Luận tạng Tây Tạng (Tengyur) — Tập 203

གས་པར་ཕྱིན་གྱུར་ན། །རྟ་ནི་གྲོ་ནག་དག་ཏུ་འགྱུར། །བརྟག་པའི་ཚུལ་ནི་འདི་ཉིད་ཀྱིས། །བད་ཀན་དང་ནི་ཁྲག་འདྲེས་དང་། །ཁྲག་མཁྲིས་

འདྲེས་པར་གྱུར་པ་ལས། །རྟ་ནི་སེར་སྐྱ་དག་ཏུ་འགྱུར། །རླུང་དང་མཁྲིས་པ་བད་ཀན་དང་། །ཁྲག་རྣམས་འདྲེས་པར་གྱུར་པ་ལས། །རྟ་རྣམས་ཀྱི་ནི་ཁ་དོག་དག །རྣམ་པ་དུ་མར་འགྱུར་པ་ཡིན། །ནད་གཞི་རླུང་གིས་བཅད་གྱུར་པ། །པགས་པར་ཕན་ཚུན་གཏོར་བ་
ལས། །ཁྲ་བོ་དང་ནི་ཐིག་ལེ་ཅན། །ཁ་དོག་དབྱེ་བ་དག་ཏུ་འགྱུར། །མདངས་ཀྱིས་གཟི་མདངས་འཕེལ་འགྱུར་ལ། །དེ་བཞིན་སྙིང་སྟོབས་དག་ཏུ་འགྱུར། །མདངས་དང་རླུང་ནི་ཤས་ཆེ་ཞིང་། །མ་འདྲེས་ཟས་ནི་ཟ་བ་ལས། །ནད་མེད་པར་ནི་འགྱུར་པ་ཡིན། །མེ་
རླུང་སྙིང་སྟོབས་དག་ལས་དཔལ། །འབྱུང་བ་ཆེན་པོ་ཆ་མཉམ་ཞིང་། །སྙིང་སྟོབས་ཆེ་ལས་འཇིགས་མེད་འགྱུར། །སྙིང་སྟོབས་རླུང་དང་སྟོབས་ཆེ་ལས། །མགྱོགས་པ་ཕུན་སུམ་ཚོགས་པར་འགྱུར། །སེམས་དང་བློ་དང་སྙིང་སྟོབས་ཡིད། །དེ་བཞིན་བད་ཀན་རང་བཞིན་
ཅན། །འདི་དག་ལྷགས་པར་གྱུར་པ་ལས། །ཡན་ལག་བཅུ་ཚད་བློ་ལྡན་འགྱུར། །དགེ་ཞིང་བྱད་ལ་རབ་དགའ་དང་། །དེ་བཞིན་དབང་པོ་དགའ་བྱེད་པ། །རིགས་དང་དུས་ཚིགས་ཕུན་ཚོགས་ལྡན། །ཡིད་དང་བློ་ན་མེ་ཡེངས་པ། །མངལ་དུ་རྟ་ནི་གང་སྐྱེས་པ། །དེ་ནི་ཡོན་ཏན་
ཀུན་ལྡན་འགྱུར། །དེ་ལས་བཟློག་པར་གང་སྐྱེས་པ། །དེ་ནི་ཡོན་ཏན་ཅན་མི་འགྱུར། །བཟང་དང་རྣོ་དང་ཞན་པ་སྟེ། །རང་བཞིན་རྣམ་གསུམ་ཅི་བཞིན་དང་། །སྐྱེ་བའི་ཆ་ཡང་དེ་བཞིན་ཏེ། །རང་བཞིན་གསུམ་དུ་ཤེས་པར་བྱ། །མངལ་དུ་གནས་ནས་ཟླ་གཉིས་ན། །
ནགས་སུ་ཉེ་བར་བསྐྱད་བྱ་ཞིང་། །ཁ་ཟས་སྣ་ཚོགས་པ་དག་དང་། །ཐུག་པ་དང་ནི་བལྡག་པ་སྦྱིན། །དེར་ནི་རྟག་ཏུ་གང་བརྟེན་པ། །ཁ་ཟས་གང་ཞིག་འདོད་གྱུར་པ། །དེ་ནི་ཡིད་ལ་རེ་བར་བཤད། །འདི་ནི་དེ་ལ་སྦྱིན་པར་བྱ། །གལ་ཏེ་འདོད་པ་མ་བྱིན་ན། །གཟུགས་
མི་སྡུག་ཅིང་མི་སྲུན་དང་། །ཡན་ལག་མི་ཚང་བློ་ཆུང་དང་། །འཇིགས་སྐྱེན་སྟོབས་ཆུང་སེམས་ཉམས་ཤིང་། །འདུས་དང་ལས་ཀྱི་དབང་དང་ནི། །ནད་གཞི་རྣམས་ཀྱི་རང་བཞིན་ལས། །མངལ་དུ་སྐྱེ་བར་འགྱུར་བ་ནི། །ཅི་ལྟ་བར་ནི་ཡོངས་སུ་བཤད། །ལེགས་

ཐོས་ཐོས་དང་ལྡན་པ་ཡིས། །ཚུལ་བཞིན་ཡོངས་སུ་དྲིས་བ་ན། །ཤ་ལི་ཧོ་ཏྲ་དཀའ་ཐུབ་ཆེས། །དྲིས་ལན་དེ་ལྟར་སྨྲས་པ་ཡིན། །ཤ་ལི་ཧོ་ཏྲའི་མདོའི་གནས་ལས་མངལ་དུ་ཆགས་པ་ཞེས་བྱ་བ་སྟེ་ལེའུ་ལྔ་པའོ།། །།རྟ་སྐད་ལས་
སྐྱེས་དྲང་སྲོང་ནི། །རྟ་ཡི་རང་བཞིན་ཤེས་གྱུར་པ། །ཤ་ལི་ཧོ་ཏྲ་ཉིད་ལས་ནི། །ལེགས་ཐོས་ཀྱིས་ནི་ཡོངས་སུ་དྲིས། །བུ་ཡིས་དྲིས་ནས་དྲང་སྲོང་དེ། །དགའ་བའི་ཚིག་ཏུ་སྨྲས་པ་ནི། །རླུང་དང་མཁྲིས་པའི་བདག་ཉིད་ཅན། །རང་བཞིན་གསུམ་དུ་ཤེས་པར་
བྱ། །རྩུབ་ཅིང་མི་བརྟན་རྔ་རྔོག་སྲབ། །འཇིགས་སྐྱེན་སྐྱིད་ཞན་ཁུར་སྟོབས་ཆུང་། །ལམ་གྱིས་དུབ་ཅིང་སྣ་ནང་མང་། །གཉིད་མེད་ཤིན་ཏུ་གཟུགས་མི་སྡུག །འཁྲིག་པ་ལ་འདུ་འདུལ་བར་དཀའ། །འདོད་པའི་ནུས་པ་ཆུང་པ་དང་། །རླུང་གིས་གང་ཚེ་
འཁུམས་པ་དང་། །སླར་ཡང་རྗེས་སུ་རྒྱུག་པ་དང་། །རྟག་ཏུ་རྟ་རྫི་རྣམས་དང་ནི། །རྟ་ལ་སོས་ནི་འདེབས་པ་དང་། །མི་དང་རྟ་ཡི་ཕྱི་ནས་ནི། །རྡུན་ནས་མདུན་དུ་བརྒྱུག་པ་དང་། །འདྲེ་བར་བྱེད་ཚེ་ལུས་ཀུན་ནི། །བཟློག་ཅིང་འདྲེ་བར་མ་ནུས་ཀྱི། །གཞོགས་གཅིག་
པ་ནི་ཡང་དང་ཡང་། །འགྲོ་བར་བྱེད་པའང་ཉིད་དང་ནི། །དེ་བཞིན་ལམ་གྱི་གཞི་མཉམ་པར། །ཁལ་མེད་པར་ཡང་བུབ་པ་དང་། །བརྡེག་ཀྱང་རང་གི་སྤྱོད་པ་ནི། །ཡུན་རིང་ཞིག་ནས་འདོར་བ་དང་། །བསླབས་པ་རྣམས་ནི་བརྗེད་གྱུར་པའི། །རྟ་ནི་རླུང་གི་རང་བཞིན་
ཅན། །རྡུལ་ཅན་ཁྲོ་བ་ཡུན་རིང་དང་། །གཉིད་མེད་འཐབ་ལ་དགའ་བ་དང་། །སོ་དང་དེ་བཞིན་ལག་གཉིས་ཀྱིས། །རྟ་ལ་རྟག་ཏུ་འཆེ་བ་དང་། །རྟ་རྫིའི་ལས་ནི་བྱེད་པ་ལ། །རང་བཞིན་ཞི་བ་སྟོན་པ་ནི། །རྟག་ཏུ་འཇིགས་ཤིང་ནུས་པ་ཆུང་། །ལས་དང་ལས་ལ་སྲན་ཆུང་
དང་། །གཞོགས་གཅིག་གིས་ནི་ཅུང་ཟད་ཙམ། །ཐོག་མར་འདྲེ་བར་བྱེད་གྱུར་ཅིག །དེ་རྗེས་ལུས་ནི་ཐམས་ཅད་ཀྱིས། །ཟློག་ཅིང་འདྲེ་བར་བྱེད་པ་དང་། །དེ་བཞིན་ཉམ་ངའི་ལམ་དུ་ནི། །ཁལ་གྱིས་དུབ་ན་བུབ་པ་དང་། །འདུལ་སྤྱོད་པ་ཡི་ཚིག་སཱན་ཅིང་། །བསླབ་པ་

འདོར་ཞིང་འབྲོས་བྱེད་དང་། །གྲང་བ་ལ་ནི་དག་འགྱུར་པའི། །རྟ་ནི་མཁྲིས་པའི་རང་བཞིན་ཅན། །སྤུ་མདོག་སྣུམ་ཞིང་སྟོབས་ཆེ་ལ། །སྒྲ་སྙན་དལ་གྱིས་འཚེར་བ་དང་། །རྟ་དང་དེ་བཞིན་མི་རྣམས་ལ། །རང་བཞིན་ཞི་བ་སྟོན་པ་དང་། །འདུལ་སྦྱོང་སླ་ཞིང་བསླབས་ལ་བརྟན། །
གཉིད་ཚེ་རྟག་ཏུ་བརྟག་པ་དང་། །ཁལ་དང་ལམ་དུ་གཡུལ་ངོ་རུ། །རྟག་ཏུ་སྡུག་བསྔལ་ཆེར་བཟོད་དང་། །ཆུ་ལ་བརྟན་ཞིང་ཤུགས་ཆེ་ལ། །གང་དུའང་བུབ་པར་འགྱུར་མ་ཡིན། །འགྲོ་ཚེ་གཞོགས་ནི་གཉིས་ཀ་ཡིས། །ཡང་དང་ཡང་དུ་ཟློག་པ་དང་། །འོབས་ལ་གོམ་པ་
མི་འདོར་གྱི། །ཤུགས་ཀྱིས་མཆོད་བར་འདོད་པ་དང་། །བདག་པོ་ལ་ནི་དགའ་བ་ཡི། །རྟ་ནི་བད་ཀན་རང་བཞིན་ཅན། །མཚན་ཉིད་གཉིས་ཀ་དང་ལྡན་པ། །རང་བཞིན་གཉིས་པ་ཞེས་བྱར་བཤད། །རླུང་དང་མཁྲིས་པའི་རང་བཞིན་ཅན། །ཐ་མ་ཡིན་པར་ཡོངས་སུ་
བཤད། །རླུང་དང་བད་ཀན་རང་བཞིན་ཅན། །བར་མ་དག་ནི་ཡིན་པར་བཤད། །མཁྲིས་པ་བད་ཀན་རང་བཞིན་ཅན། །རྟ་ནི་རབ་མཆོག་ཡིན་པར་བཤད། །ནང་མེད་ལུས་ཟུངས་མཉམ་གྱུར་ཅིང་། །བད་ཀན་ཅན་གྱི་རྟ་བསྔགས་སོ། །ཤ་ལི་ཧོ་ཏྲའི་མདོའི་གནས་ལས། །
རྟའི་རང་བཞིན་གྱི་ལེའུ་སྟེ་དྲུག་པའོ།། །།ལེགས་ཐོས་ཐོས་པ་འཛིན་པ་ཡི། །བུ་ལ་ཤ་ལི་ཧོ་ཏྲས་སྨྲས། །བཟང་པོ་སྨན་དང་རི་དགས་དང་། །འདྲེས་པའི་མཚན་ཉིད་མཉན་པར་གྱིས། །སྟོབས་ཆེན་མདོག་ནི་སྣུམ་པ་དང་། །དུལ་བའི་གཟུགས་ཅན་
གཙང་སྦྲར་ལྡན། །ཚངས་སྤྱོད་མཚན་མོ་གཉིད་ལོག་ཅིང་། །ལེ་ལོ་མེད་ཅིང་ཕྲག་དོག་མེད། །ལངས་ནས་གཉིད་ནི་ལོག་པ་དང་། །རྟག་ཏུ་ལངས་ནས་འདུག་པ་དང་། །བདག་པོ་ལ་དགའ་ལྡབ་སྐྱོན་དང་། །བསླབས་པ་ནམ་ཡང་མི་འདོར་དང་། །ཐམས་ཅད་དུ་ནི་དཔའ་བ་
དང་། །གཡུལ་དང་ལམ་དང་མེ་ལ་ནི། །སྡུག་བསྔལ་གྱིས་ཞུམ་མེད་པ་དང་། །ནད་ཀྱིས་གདུངས་བར་གྱུར་ན་ཡང་། །ཤིན་ཏུ་ཉོན་མོངས་མེད་པ་དང་། ཅི་ཡང་རུང་བ་ཟོས་ནས་ནི། །མྱུར་དུ་ལུས་ནི་རྒྱས་འགྱུར་དང་། །ཐམས་ཅད་དུ་ནི་བརྟན་པ་ཡི། །རྟ་ནི་བཟང་པོའི་སྐྱེ་

གནས་ཡིན། །བཀྲ་ཤིས་མཚན་ཉིད་ལྡན་མོད་ཀྱི། །ཅུང་ཟད་སྨད་པ་ཡོད་པ་དང་། །བསླབ་པ་མྱུར་དུ་ལོབས་ན་ཡང་། །མྱུར་དུ་བརྗེད་པར་གྱུར་ན་ཡང་། །མཚན་མོའི་དུས་སུ་ལུས་ཕུང་སྟེ། །གཉིད་ནི་ལོག་པར་བྱེད་པ་དང་། །རྟ་ལ་ཞེ་སྡང་ཆེ་བ་དང་། །འཁྲིག་
པ་ལ་འདུ་ཕྲག་དོག་ཅན། །དང་པོ་དཔལ་ཞིང་དེ་རྗེས་ལ། །འཇིགས་པ་དག་ཏུ་འགྱུར་པ་དང་། །ལྕག་གིས་ཅུང་ཟད་གཞུས་པ་ནའང་། །རིང་དུ་འགྲོ་བར་བྱེད་པ་སྟེ། །དེ་ལྟ་བུ་ཡི་རིགས་ལྡན་པའི། །རྟ་ནི་དམན་པ་ཉིད་ཡིན་ནོ། །རྩུབ་ཅིང་རྟ་ལ་འཇིགས་སྐྱེན་དང་། །གཉིད་ཆེ་རྒྱུན་
ཅན་ལེ་ལོ་ཅན། །ལྟོ་ཆེ་སྦེགས་ཅིང་འཁྱམ་པ་དགའ། །དེ་བཞིན་ཀུན་དུ་དོག་པ་ཅན། །ཉིན་མོ་དང་ནི་མཚན་མོའང་རུང་། །ཡན་ལག་མ་ལུས་བརྐྱང་ནས་ནི། །རྟག་ཏུ་གཉིད་ནི་ལོག་པ་དང་། །རྟ་ལ་འཚེ་བར་བྱེད་ལ་དགའ། །ལྕག་གིས་གཞུས་ལ་མི་ཚོར་ཞིང་། །མྱུར་
དུ་ན་བར་བྱེད་པ་དང་། །ལུས་རྒྱས་པར་ནི་དཀའ་བ་ཡི། །རྟ་ནི་རིགས་སྐྱེ་གནས་ཡིན། །ཡོན་ཏན་འདྲེས་ལས་འདྲེས་གྱུར་ཏེ། །དེ་བཞིན་དབྱེ་བ་མང་པོའང་ཡོད། །བཟང་པོ་མཆོག་ཏུ་ཤེས་པར་བྱ། །དམན་པ་བར་མ་ཞེས་བཤད་ལ། །རི་དགས་ཐ་མ་ཡིན་ཞེས་བྱ། །
རྟ་ཡི་སྐྱེ་གནས་འདི་ཉིད་ཡིན། །མདོར་ན་སྐྱོན་དང་ཡོན་ཏན་དག །འདྲེས་དང་ལྷག་པ་ཡིན་ཞེས་བྱ། །ཤ་ལི་ཧོ་ཏྲའི་མདོའི་གནས་ལས་རྟའི་སྐྱེ་གནས་ཀྱི་ལེའུ་སྟེ་བདུན་པའོ།། །།རྟ་ཡི་རང་བཞིན་དེ་ཉིད་ཤེས། །དུལ་ལ་བརྩོན་ཞིང་དབང་པོ་ཐུལ། །ཤ་ལི་ཧོ་ཏྲ་བློ་ཆེན་
ལ། །མཛའ་བོ་ལས་རྒྱལ་གྱིས་དྲིས་པ། །གཟི་བརྗིད་ཆེན་པོ་རྟ་རྣམས་ཀྱི། །རིགས་བཞི་ཇི་ལྟར་ཤེས་པར་བགྱི། །མཚན་ཉིད་སྤྱོད་ལམ་གང་དག་གིས། །དེ་ལས་བཟློག་པར་ཤེས་པར་བགྱིས། །དེ་སྐད་དྲིས་ཏེ་དྲང་སྲོང་ཆེ། །ཤ་ལི་ཧོ་ཏྲས་སླར་སྨྲས་པ། །རྟ་ཡི་
རིགས་བཞི་ཤེས་དགའ་བས། །དེ་ནི་ང་ཡིས་གོ་བར་བྱ། །རིགས་བཞི་རྣམ་པར་དབྱེ་བ་ནི། །སྐྱེ་གནས་དང་ནི་གཟུགས་བྱད་དང་། །ཚུལ་སྤྱོད་དང་ནི་དུལ་བ་དང་། །སྐད་གདངས་དབྱིབས་དང་ཁ་དོག་དང་། །དྲི་ཉིད་ལས་ནི་ཉེར་ཤེས་བྱ། །གང་ཞིག་དེ་ལས་གོ་བཟློག་སྟེ། །

དེ་ཡི་ཁྱད་པར་སྨྲ་བ་ནི། །ཉོན་ལ་རྣམ་པར་དཔྱད་པར་གྱིས། །གཟུགས་བཟང་དཔལ་དང་ལྡན་པ་དང་། །སྤྱོད་པ་དུལ་ཞིང་བསྔགས་པར་འོས། །བློ་ལྡན་ངང་ཚུལ་བཟང་བ་དང་། །འདུལ་སྦྱོང་མཁན་གྱིས་བྱས་པ་ཉན། །རྗེས་སུ་མཐུན་ཞིང་ནུས་པ་ལྡན། །གཙང་ཞིང་
གཙང་སྦྲ་དག་ལ་བརྟེན། །བཀྲེས་དང་སྐོམ་ལ་སྲན་ཆེ་ཞིང་། །ཁྲོ་བ་ཆུང་ཞིང་བླན་པར་སླ། །གཟི་བརྗིད་དང་ལྡན་གྲགས་དང་ལྡན། །ལས་རྣམས་ཀུན་གྱི་རྗེས་སུ་འཇུག །བཏུང་དང་ཁ་ཟས་བཟའ་བྱ་ཡི། །ལྷག་མ་དང་ནི་མི་གཙང་དང་། །རྟ་སྤངས་དང་ནི་དེ་བཞིན་
གཅིན། །འདི་ནི་རིང་དུ་སྤོང་བྱེད་ཅིང་། །གཙང་ཞིང་གཙང་མར་སྤྱོད་པ་དང་། །ཉལ་ཡང་གཉིད་ནི་མེད་པ་དང་། །སྦྲང་རྩི་འབྲས་ཡོས་ཁུར་བ་མར། །འོ་ཐུག་སྲེག་རྫས་ལ་དགའ་ཞིང་། །དྲི་དང་སྣ་མའི་ཕྲེང་པ་དང་། །ཁྲུས་དང་བཀྲ་ཤིས་ལ་དགའ་ཞིང་། །འཚེར་
ཞིང་དེ་དག་སྣོམ་པ་དང་། །མི་དག་ལྟ་ན་སྡུག་པ་དང་། །འཇིགས་མེད་མཁས་ལ་སྲན་ཆེ་དང་། །སྙན་པར་འཚེར་ཞིང་སྒྲ་སྐད་ཆེ། །སེར་དང་དཀར་དང་དམར་པ་དང་། །ཕལ་ཆེར་སྦྲང་རྩི་ལྟར་སེར་དང་། །འགྲོས་ཆེ་སྲན་ནི་ཆེ་བ་དང་། །བརྟན་ཞིང་སྟན་པ་རྗེས་སུ་འཚེར། །
མདོག་སྣུམ་པགས་པ་སྲབ་པ་དང་། །བྲམ་ཟེ་ཀུན་ལ་དགའ་བ་དང་། །གཉིད་ལོག་ཚེ་ནི་འབྲས་ཡོས་དང་། །མར་དང་ཨུ་ཤིར་དྲི་འབྱུང་ལ། །ལྷ་དང་དྲི་ཟའི་སྙིང་སྟོབས་ཅན། །དགེ་ཞིང་རྟག་ཏུ་ངེས་པ་སྟེ། །དེ་ལྟའི་ཚུལ་སྤྱོད་ལྡན་པའི་རྟ། །བྲམ་ཟེའི་རིགས་སུ་ཤེས་པར་བྱ། །རྒྱལ་
རིགས་ཁྲོ་བའི་ཚུལ་ཅན་ཏེ། །ཚངས་པའི་མདོག་ལྡན་ཤེས་པར་བྱ། །རང་བཞིན་རྣོ་ཞིང་དཔའ་བ་དང་། །སྒྲ་སྐད་བཏང་ནས་འཚེར་བ་དང་། །དཔུང་པ་གློ་ཞིང་སྙིང་སྟོབས་ཆེ། །རང་བཞིན་གཙང་ཞིང་སྤྱོད་པ་ཡང་། །གཅེས་པར་བསྡུས་དང་ལྡན་པ་དང་། །ཡན་ལག་
འབྱེས་ཤིང་པགས་པ་སྲབ། །སྤྱོད་པ་གཙང་ཞིང་དུལ་པ་དང་། །འཇིགས་པ་རྣམས་ལ་མི་སྐྲག་པ། །ཆུ་དང་མེ་དང་འབྲུག་སྒྲ་དང་། །སྒྲ་ཆེར་གྲགས་དང་ལྷུང་དང་ཁུར། །ཚ་དང་རྩུབ་པའི་རེག་པ་དང་། །ས་རྩུབ་ཤིང་གི་ཚང་ཚིང་དང་། །རིང་དུ་འགྲོ་དང་ལམ་དོག་པར། །གང་

ཞིག་འཇིགས་པ་མེད་པ་དང་། །གླང་པོའི་ཚོགས་ནི་ཆེན་པོ་དང་། །དྲིལ་བུ་རོལ་མོའི་སྒྲ་རྣམས་དང་། །ཅ་ཅོ་འདོན་པའི་སྒྲ་རྣམས་དང་། །རྟ་གཞན་འཚེར་བར་གྱུར་པ་དང་། །དུང་དང་རྔ་ཆེན་སྒྲ་དང་ནི། །རོལ་མོའི་སྒྲ་དང་རྫ་རྔའི་སྒྲ། །གདུགས་དང་
རྒྱལ་མཚན་བ་དན་གྱིས། །སྐྲག་པར་མི་འགྱུར་རྟ་མཆོག་ཡིན། །རྔ་རྔོག་ལེགས་པར་བརྐྱང་ནས་ནི། །དགའ་བའི་ཡིད་ཀྱིས་འཚེར་བ་དང་། །རྐང་གཉིས་ལེགས་པར་འཇུག་བཞིན་དུ། །ས་སྟེང་ན་ནི་འཚེར་བ་དང་། །རྔུལ་དང་གཅིན་དང་རྟ་སྦངས་ནི། །ཡན་ལག་
བརྐྱང་སྟེ་འདོར་བ་དང་། །མཐར་ནི་ཤུགས་ཀྱིས་འདོར་བ་དང་། །རྟ་གཞན་ལ་ནི་བསྡིགས་པ་དང་། །གཡུལ་ངོར་རྟ་དང་གླང་པོ་དང་། །ཤིང་རྟ་དཔུང་བུ་ཆུང་འཇོམས་དང་། །རྗེས་སུ་སྐད་འདོན་སྒྲ་འཇམ་པས། །ཕྱོགས་ཀུན་ཁྱབ་པར་འཚེར་བ་དང་། །རྟ་གཞན་དག་ནི་
ཕྱིན་ནས་ནི། །དེ་ནི་འགྲོ་བར་བཟོད་མི་བྱེད། །མཚོན་གྱིས་བསྣུན་ཀྱང་ནད་ཆུང་ཞིང་། །མཚོན་ཆ་མཐོང་ན་འཇིགས་མི་འགྱུར། །སྤྱོད་པ་མྱུར་ཞིང་དཔའ་བ་དང་། །འཐབ་ཚེ་མྱུར་ཏུ་ཕ་རོལ་གནོན། །ནོར་བུ་ལྟ་བུར་མིག་སེར་ཞིང་། །མདོག་བཟང་ཁ་དོག་ངན་པ་མེད། །བློ་
ལྡན་དེ་བཞིན་མགྱོགས་པ་དང་། །སྨིན་ཞིང་མ་ཞུམ་སྟོབས་ཆེ་ལ། །རྟག་ཏུ་ལས་ཀུན་ནུས་པ་དང་། །བག་ཡོད་རྟག་ཏུ་ཉོན་མོངས་མེད། །བསོད་ནམས་བྱེད་པའི་མེ་ཏོག་མར། །འབྲས་བུ་ལྡན་པའི་དྲི་ཡོད་ལ། །ལྷ་དང་དྲི་ཟའི་སྙིང་སྟོབས་ཅན། །དེ་མཚུངས་སྦྱོང་ཡུལ་
སྤྱོད་པར་ལྡན། །དགེ་ཞིང་སྤྱོད་པ་ངེས་པའི་རྟ། །རྒྱལ་རིགས་སུ་ནི་ཤེས་པར་བྱ། །རྗེའུ་རིགས་བཏུང་པ་ལ་དགའ་བརྟན། །ཞི་ཞིང་བློ་ཆེ་ལེ་ལོ་ཅན། །མི་འཁྲུགས་དགའ་པར་འགྱུར་བ་མེད། །དུལ་པའི་སྤྱོད་པ་ཡང་དག་ལྡན། །ཁྲོ་བ་མེད་ཅིང་ང་རྒྱལ་མེད། །དུལ་ཞིང་ངང་
ཚུལ་སྙོམས་པ་དང་། །ནད་དང་ཚ་དང་བཀྲེས་པ་བཟོད། །ཁལ་བཀལ་ལམ་དུ་འགྲོ་ཚེ་བརྟན། །དེ་ནི་མགྱོགས་བུལ་རན་མ་ཡིན། །ཉམས་དང་ལུས་སྟོབས་པར་མ་སྟེ། །མིག་ནི་དེ་བཞིན་སྔོ་དང་སེར། །གནག་དང་དཱུར་བའི་མདོག་འདྲ་དང་། །སྔོ་བསངས་སྤུ་མདོག་

དཀར་བ་དང་། །སྨྱིག་མ་ཏ་ལའི་མདོག་འདྲ་དང་། །ཕལ་ཆེར་ངང་པའི་མདོག་འདྲ་ཞིང་། །སྟེང་འོག་ཐད་དཀར་ཆེ་མིན་གྱི། །རོ་སྟོད་ཆེ་བ་ཉིད་ཡིན་ནོ། །ཧ་རེ་ཎུ་ཀ་དེ་བཞིན་དུ། །ཇ་མོའི་འོ་མའི་དྲི་དང་ལྡན། །བག་ཆུང་གཉིད་ནི་ཆེ་བ་དང་། །མི་ཡི་སྙིང་སྟོབས་ལ་བརྟེན་པ། །
བཟོད་ལྡན་དེ་ལྟའི་སྤྱོད་པ་ཅན། །རྟ་ནི་རྗེ་རིགས་ཡིན་ཞེས་བྱ། །དམངས་རིགས་ངང་ཚུལ་ངན་པ་དང་། །སྤྱོད་ལམ་སྤྱོད་ཡུལ་མི་གཙང་ཞིང་། །གཞན་གྱིས་ཡོངས་སུ་ལོངས་སྤྱོད་པའི། །ལྷག་མའི་ཟས་སྐོམ་དག་ལ་དགའ། །སྐམ་དང་སྨད་དང་ངན་པ་དང་། །བཤད་
གཅི་དག་ནི་བརྟེན་པར་དགའ། །མིག་རྐོང་མིག་ནི་ཟླུམ་པ་དང་། །རྐང་པས་ས་ནི་བརྐོ་བ་དང་། །བཤང་གཅི་སྣོམ་པར་བྱེད་པ་དང་། །ཟ་ཞིང་ཉུང་དུ་སྤྱོད་པ་དང་། །མི་གཙང་སར་ནི་འགྲོ་བ་དང་། །རྟ་རྫི་ལ་ནི་འཕྲ་བ་དང་། །རང་དང་རྩིག་པ་ཤིང་ལ་སོགས། །སོ་
ཡིས་འདྲད་པར་བྱེད་པ་དང་། །འབྲེང་བ་དབྱིག་པ་ལྕུག་མ་ཡི། །ལྕག་མི་ཚོར་ཞིང་མི་འཁྲུགས་ལ། །ལུད་པ་ལུ་ཚེ་གསུས་པ་ཆེ། །འཇིགས་པ་ཀུན་ལས་སྡར་བ་དང་། །མི་གཙང་བ་ལ་མི་སྨོད་ཅིང་། །གཅད་སྦྲའི་སྤྱོད་པ་དེ་ལ་མེད། །དུ་བ་རྡུལ་འདྲའི་མདོག་ལྡན་ཞིང་། །
སེར་སྐྱ་མོ་གྲོ་དམར་སྐྱའི་མདོག །བསྲུང་བར་རབ་ཏུ་དཀའ་བ་དང་། །སྤྱོད་པ་ངན་ཞིང་ཞི་ཚུལ་ཆུང་། །མ་ཁྲོས་ལས་སྦྱར་མི་ནུས་ཀྱི། །ཁྲོས་ན་ལས་ནི་ནུས་པ་དང་། །བྱ་རོག་ཚང་གི་དྲི་བྲོ་ཞིང་། །ཁྲ་དང་མི་རོའི་དྲི་དང་ནི། །ཀུན་ཁྱབ་གཉིད་ཆེ་བག་ཆུང་ལ། །སྲིན་པོ་
ཤ་ཟའི་སྙིང་སྟོབས་ཅན། །ད་འདྲའི་སྤྱོད་པ་མདོག་ལྡན་པའི། །རྟ་ནི་དམངས་རིགས་ཡིན་ཤེས་བྱ། །དེ་དག་འདྲེས་པར་འགྱུར་བ་ཡི། །སྐྱེ་བ་དག་ཀྱང་བསྟན་པར་བྱ། །རྒྱལ་རིགས་བྲམ་ཟེའི་རིགས་མོ་ལ། །ཞུགས་པའི་བུ་ནི་དངུལ་ཆུར་བཤད། །དངུལ་ཆུ་
དེ་ནི་སྤྱོད་པ་གཙང་། །ངེས་ཤིང་ཉུག་མ་ཟ་མི་བྱེད། །མདོག་ནི་བ་སོ་ལྟར་དཀར་སེར། །ནག་པོའི་མདོག་ཏུའང་འགྱུར་བ་ཡིན། །ཕལ་ཆེར་མིག་ནི་དར་བ་དང་། །སྒྲ་སྙན་རྗེས་སུ་སྒྲོགས་པར་བྱེད། །ཆང་དང་ཕྲེང་བའི་དྲི་ལྡན་གྱི། །དྲི་མེ་ཞིམ་པའང་ཡོད་མ་ཡིན། །

གཉིད་ལོག་ན་ནི་བག་མེད་པའི། །རྟ་ནི་རིགས་འཛིན་རྒྱུད་ཡིན་ནོ། །བྲམ་ཟེའི་རིགས་མོར་རྗེའུ་རིགས་ཞུགས། །དེ་ནི་མ་ག་ད་ཞེས་བྱ། །སྙིང་སྟོབས་ཞན་ཞིང་ཁུར་སྟོབས་ཆེ། །ལམ་དུ་ཆས་ཚེ་འཚེར་ཞིང་འགྲོ། །རྔོག་མ་འཆོལ་བར་སྐྱེ་བ་དང་། །གང་
ལའང་སྨོད་པར་མི་བྱེད་དོ། །བུད་མེད་མིག་ནི་ན་བ་དང་། །འགྲོས་ཆེ་ཡིད་ཕེབས་མེད་པ་དང་། །ཁ་དོག་མི་སྡུག་པ་ཉིད་དེ། །ཤ་ཟའི་སྙིང་སྟོབས་དག་ལ་གནས། །སྡིག་ལ་དགའ་ཞིང་བསྟར་བ་དང་། །གདུལ་དཀའ་དྲི་ནི་མི་ཞིམ་པ། །སྤྱོད་པ་ངན་བར་སྤྱོད་པ་དང་། །དམན་
པར་ལྟ་མ་ག་ད། །བྲམ་ཟེའི་རིགས་མོར་རྗེའུ་རིགས་དག །ཞུགས་པ་ལས་ནི་སྐྱེས་པའི་རྟ། །དེ་ནི་གདོལ་བ་ཞེས་བཤད་དེ། །སྡིག་པ་སྐྱེད་པའི་སྤྱོད་ཡུལ་ཅན། །ལས་རྣམས་ལ་ནི་མི་འཇུག་ཅིང་། །གཏུམ་པ་བོང་བུའི་སྒྲ་ཅན་ཡིན། །སྒྲ་འཆག་རྩུབ་ཅིང་གདུག་པ་
དང་། །ཡན་ལག་མི་སྙོམས་བག་མེད་ལྡན། །མི་ཤེས་པ་ཡི་མཚན་ཉིད་དང་། །མཚན་མ་སྤྱོད་པས་ཉེ་བར་བསྒོས། །ཐིག་ལེ་ཞུ་བ་མི་སྡུག་པ། །སྨད་པ་ཡིས་ནི་ཡོངས་སུ་ཁྱབ་། །བདག་ལ་གསོད་པར་བྱེད་པ་དང་། །བག་མེད་གནས་སུ་ཁྱེར་བར་བྱེད། །རྟ་སྦངས་
ལྕི་བ་གཏོང་བ་ན། །ཟ་ཞིང་སྨོད་པར་མི་བྱེད་ལ། །མཐར་ནི་གནོད་པ་ཉིད་བྱེད་ཅིང་། །ཁང་སྟོང་དག་ཏུ་དགའ་བར་བྱེད། །ཅེ་སྤྱང་དག་གམ་སྤྱང་ཀིའམ། །དུ་བའི་མདོག་གམ་མདོག་ངན་ལྡན། །སྒྲ་རྩུབ་ཡི་དགས་དྲེ་ཅན་ཏེ། །ཆང་ལ་དགའ་ཞིང་ཤ་ལ་དགའ། །ཤ་ཟ་
སྲིན་པོའི་སྤྱོད་པ་ཅན། །སྤྱོད་པ་ངན་པ་གདོལ་བའི་རྟ། །རྟགས་དང་མཚན་མ་འདི་དག་གིས། །རིགས་བཞིར་རྣམ་པར་དབྱེ་བར་བྱ། །གང་ཞིག་ཕ་དང་རྟག་སྤྱོད་འདྲ། །སྐྱེས་པའི་བུ་ནི་གང་ཡིན་པ། །རིགས་བཞི་རུ་ནི་རྣམ་ཕྱེ་ལ། །རྟ་ནི་རང་གི་རིགས་སུ་གཞག །རིགས་ཀྱི་
དབྱེ་བ་ཅི་བཞིན་ཤེས། །སྡིག་བས་གོས་པར་མི་འགྱུར་རོ། །སྙིང་སྟོབས་སྤྱོད་པ་ལྷག་མ་ནི། །གང་གང་ཡིན་པ་མཉན་པར་གྱིས། །དྲི་ཟ་བྲམ་ཟེ་དང་མཉམ་ལ། །གནོད་སྦྱིན་རྒྱལ་རིགས་ཉིད་དང་འདྲ། །སྲིན་པོ་རྗེའུ་རིགས་དང་མཚུངས་ཏེ། །དམར་རིགས་ཤ་ཟ་ཉིད་དང་འདྲ། །

དེ་ལྟར་སྐྱེ་གནས་འདྲ་ཡི། །རང་རང་བཞིན་ཅི་བཞིན་རྣམ་པར་དབྱེ། །དེ་བཞིན་སྤྱོད་ཚུལ་མི་མཐུན་པ། །ཕྱན་སྡིག་པས་གོས་པར་འགྱུར། །དེ་ལྟར་ལེགས་རྗེས་སྟོན་པ། །ཤ་ལི་ཧོ་ཏྲས་བཤད་པ་ཡིན། །ཤ་ལི་ཧོ་ཏྲའི་མདོའི་གནས་ལས་རྟའི་རིགས་བཞིའི་
ལེའུ་སྟེ་བརྒྱད་པའོ།། །།དེ་ལ་རྟ་ཡི་མཚན་ཉིད་ནི། །ཡན་ལག་མ་གཏོགས་ཐ་དད་དེ། །གདོང་ནི་སྲབ་ལ་རྒྱ་ཆེ་ཞིང་། །ཟུར་བཞི་པ་ལ་གཡུལ་སྙོམས་པ། །དྲང་ཞིང་འཁྱོག་པ་མ་ཡིན་ལ། །ཡོངས་སུ་ཚད་བ་བསྔགས་པ་ཡིན། །ཁ་ནི་བཙུམས་
དང་རྒྱ་ཆེ་ལ། །དྲི་ཟད་ཁ་ཆུ་ཉུང་བ་དང་། །ཁ་ཆུ་མི་འཇིག་སྐམ་པོ་མིན། །རྟ་ལ་རབ་ཏུ་བསྔགས་པ་ཡིན། །སོ་ནི་ཁ་དོག་ཡིད་འོང་བཟང་། །སྲོག་ཤིང་སྲ་ལ་བརྟན་པ་དང་། །མ་གྱེས་དྲང་པོར་སྐྱེ་བ་དང་། །སྣུམ་ཞིང་ནང་མ་མཐོ་བ་དང་། །མཐོ་ཞིང་རྩ་བ་བརྟན་པ་
དང་། མཚན་མ་གསལ་ཞིང་སྲ་བ་དང་། །སྦྲང་རྩི་འདྲ་བའམ་རབ་ཏུ་དཀར། །རྟ་ལ་བསྔགས་པར་གྱུར་བ་ཡིན། །འགྲམ་སོ་མཉམ་ཞིང་ཟླུམ་པ་དང་། །སྲ་ཞིང་སྙོམས་པར་གྱུར་པ་བཟང་། །མཆེ་བ་མདུན་སོའི་མདོག་འདྲ་ཞིང་། །རྩེ་མོ་རྣོ་བར་གྱུར་པ་དང་། ཟླུམ་
ཞིང་རྩ་བ་བརྟན་པ་དང་། །སྣུམ་ཞིང་འཇམ་ལ་སྐྱེ་བ་བསྔགས། །ལྕེ་ནི་སྲབ་ཅིད་རྗེས་འབྲེལ་དང་། །འཇམ་ཞིང་རིང་ལ་སྙོམས་པ་དང་། །མཉམ་ཞིང་འཇམ་ལ་དམར་བ་དང་། །ཁྱི་ཡི་ལྕེ་དང་འདྲ་ན་བཟང་། །ལྕེ་རྩ་ཅུང་ཟད་མཐུག་པ་དང་། །འཇམ་ཞིང་མཉེན་ལ་
སྣོམས་ལ་སྲབ། །བརྟན་ཞིང་ལྗན་ལྗིན་མེད་པ་དང་། རིང་ཞིང་དམར་ན་རབ་ཏུ་བཟང་། །ལྕེའུ་ཆུད་གཏིང་རིང་རྩེ་མོ་དམར། །སྲུབ་ལ་རི་མོས་རྣམ་པར་ཁྱབ། །འཇམ་ཞིང་གོས་པ་མེད་པ་དག །རྟ་ལ་རབ་ཏུ་བསྔགས་པ་ཡིན། །མཆུ་ནི་འཇམ་ཞིང་མཉེན་པ་དང་། །
དབྱེ་སླ་ཤ་རྒྱས་དབྱིབས་ལེགས་དང་། །ཤིང་ཏུ་གཡོ་དང་འཕྱང་བའམ་མིན། །སོ་ནི་ཁེབས་པར་གྱུར་བ་དང་། །མཉམ་ཞིང་སྙོམས་ལ་ཟླུམ་པ་དང་། །ཚད་ལྡན་དྲང་ན་བསྔགས་པ་ཡིན། །སྣ་གུང་མཉམ་པར་དབུགས་རྒྱུ་ཞིང་། །ཟླུམ་ལ་ནང་ན་ཡངས་པར་

སྣང་། །མཉེན་ཞིང་འཇམ་ལ་གནོད་པ་མེད། །རྟ་ལ་བསྔགས་པར་གྱུར་པ་ཡིན། །མཚུལ་པ་དྲང་ཞིང་དབྱིབས་མཛེས་ལ། །སྐྱོན་མེད་པར་ཡང་གང་གནས་དང་། །དྲང་ཞིང་ཟླུམ་ལ་འཇམ་ཞིང་མཉེན། །ཡོན་ཏན་དག་གིས་བརྒྱན་ན་བཟང་། །
རྟ་ཡི་འཛུམ་ནི་དབུས་སྲབ་ཅིང་། །འགྲམ་གཉིས་མ་ཐོབ་བར་གྱུར་ན་བཟང་། །ཁ་འགྲམ་མཉེན་ཞིང་སྲང་ལ་སྙོམས། །བུ་ག་ཁེབས་ཤིང་ཟླུམ་ལ་འབྱར། །ཁ་འགྲམ་ཡངས་པར་སྣང་གྱུར་བའི། །རྟ་ནི་ཡིད་དུ་འོང་བ་ཡིན། །མཁུར་ཚོས་བྱི་དོར་བྱས་འདྲ་ཞིང་། །
དབུས་སྡུག་སྲབ་ལ་ལྟ་ན་སྡུག །རིམ་གྱིས་མཁུར་བའི་ཞེང་ཆེ་ཞིང་། །ཤ་ཡིས་རྒྱས་པར་གྱུར་པ་བསྔགས། །སྣ་འགྲམ་པགས་སྲབ་ན་ཆུང་བ། །རིམ་གྱིས་ཞིང་ཆེ་སྲ་བ་དང་། །མཁུར་པ་ལེགས་པའི་འཕྲལ་དང་ནི། །རྣ་བར་ལེགས་པས་གནས་ན་བཟང་། །མཆི་
མ་འཛགས་གནས་རྒྱུས་པ་སྲ། །མི་མངོན་ཤ་ནི་སྲབ་ན་བཟང་། །མིག་ནི་དཀྱུས་རིང་མིག་འབྲས་དག །ཤིན་ཏུ་དང་བར་སྣང་བ་དག །ནོར་བུའི་འོད་ཀྱི་མདངས་འདྲ་ཞིང་། །སྣུམ་པའི་སྦྲང་རྩི་ལྟར་སེར་སྐྱ། །སྣ་མ་འདྲ་འམ་རྨ་བྱ་འདྲ། །རྔ་མོ་ཀ་ལ་པིངྐ་ཡི། །འུར་
པའམ་གང་མ་སྲེག་ནག་པོ། །གླང་ཆེན་གྱི་ནི་མི་འདྲའམ། །སེང་གེ་རི་དགས་མིག་འདྲའམ། །དེ་བཞིན་མཆིལ་པའི་མིག་འདྲ་ཞིང་། །རྫི་མ་མཐུག་ཅིང་རིང་བ་ཡི། །མིག་ནི་རྟ་ལ་བསྔགས་པ་ཡིན། །མིག་སྤུབས་སྡོམ་པོ་མ་ཡིན་ཞིང་། །གཙང་དང་མི་མཉམ་མེད་
པ་དང་། །དྲང་ཞིང་རིམ་གྱིས་སྲབ་པ་དང་། །བལྟ་བ་ཚེ་ན་ལྷོད་པ་དང་། །སྨིན་མའང་སྙོམས་ཞིང་རིམ་གྱིས་སྲབ། །ཤ་ནི་སྲ་ཞིང་ཟླུམ་པ་དང་། །ཤ་དང་པགས་པ་ལེགས་པར་འབྲེལ། །རྩ་རྒྱུས་མི་མངོན་མཉམ་ན་བཟང་། །འཕྲལ་པ་ཡངས་པར་སྣང་བ་དག །ཤ་
སྲབ་མཉམ་ཞིང་དབྱེས་ཆེ་དང་། །རིམ་གྱིས་ཡངས་བར་གྱུར་པ་དང་། །གཉེར་མ་མེད་ན་བསྔགས་པ་ཡིན། །འགྲམ་གླིང་རིམ་གྱིས་ཡངས་པ་དང་། །བརྟན་ཞིང་སྲ་བར་གྱུར་པ་བཟང་། །རྣ་བ་སྤུ་དང་གཉེར་མ་མེད། །རྩེ་མོ་ཕྲ་བ་བསྔགས་པ་ཡིན། །རྟ་ཡི་མགོ་བོ་

སྙོམས་པ་དང་། །རིང་ཞིང་རྒྱ་ཆེ་ནད་མེད་དང་། །གཙུག་དང་ཕུམ་ཕུམ་ལེགས་པ་དང་། །དབྱིབས་ལེགས་པ་ནི་བསྔགས་པ་ཡིན། །རྔོག་མ་ཤིན་ཏུ་མང་ཉུང་མིན། །འཇམ་ཞིང་དེ་བཞིན་ནག་ནོག་མེད། །སྣུམ་ཞིང་རིང་ལ་ཅུང་ཟད་འཁྱིལ། །དེ་བཞིན་རིམ་པར་ལེགས་
གནས་ཤིང་། །ཤིན་ཏུ་མི་རིང་རབ་ཐུང་མིན། །རྟ་ལ་བསྔགས་པར་འགྱུར་བ་ཡིན། །རྟ་ཡི་སྤུ་ནི་མཐུག་མཉེན་འཇམ། །རྩ་བ་བརྟན་ཞིང་ཤ་ལ་འཛུགས། །ཤིན་ཏུ་སྣུམ་ཞིང་ལེགས་པར་སྐྱེ། །ཉག་རེ་ལས་ནི་སྐྱེ་བ་བསྔགས། །ལྐོག་མ་མགོ་དང་མགྲིན་པར་འབྲེལ། །
རང་བཞིན་ཟླུམ་ལ་སྙོམས་པ་དང་། །ལྗན་ལྗིན་གྱིས་ནི་གོས་པ་མེད། །དྲི་མ་མེད་ན་བསྔགས་པ་ཡིན། །སྲོལ་མདུན་ཟླུམ་ཞིང་མཉམ་ལ་འབྲེལ། །དབྱིབས་ནི་དྲང་པོར་འདུག་པ་བསྔགས། །སྐེ་མགྲིན་རིམ་གྱིས་ཟླུམ་པ་དང་། །རིང་ཞིང་དབྱིབས་ནི་ལེགས་པ་དང་། །
མིད་པ་རྩེའུ་ཆུང་དང་འབྲེལ་ཞིང་། །དེ་བཞིན་མགོ་བོ་དང་འབྲེལ་པ། །ལྐོག་མའི་ཕྱོགས་ནི་ཤ་སྲབ་ཅིང་། །ལྷོད་མིན་ཅུང་ཟད་གུག་པ་དང་། །ཤ་རྒྱས་ལེགས་པར་འབྲེལ་བ་ནི། །རྟ་ལ་རབ་ཏུ་བསྔགས་པ་ཡིན། །སྐྲ་རྩ་ལེགས་པར་རྒྱས་པ་དང་། །ཤ་ཆེ་སུམ་མདོ་
ཡངས་པ་དང་། །ཤ་མཁྲིགས་ཡན་ལག་ལེགས་འབྲེལ་ཞིང་། །ཤ་མོ་ལྷོད་ན་བསྔགས་པ་ཡིན། །ཟེའུ་ནི་ལེགས་འབྲེལ་ཆེར་མི་མཐོང་། །ཟེའུ་ལྟག་དང་ནི་རྗེས་སུ་འབྲེལ། །ཕྲག་གང་ཟེ་འདབ་འབྲེལ་ཞིང་ཡངས། །ཤ་རྒྱས་ཚིགས་འབྲེལ་མཉམ་ཞིང་སྲ། །སོག་
པ་ཤ་རྒྱས་རབ་ཏུ་འབྲེལ། རྟ་ལ་བསྔགས་པར་འགྱུར་བ་ཡིན། །བ་ཧ་ཟླུམ་ཞིང་ཤ་རྒྱས་ལ། །གཙུག་མེད་ཤིན་ཏུ་བརྟན་པ་དང་། །ཡངས་ཤིང་དབུགས་ནི་རྒྱུ་བ་དང་། །མཐོང་བར་གྱུར་ན་བསྔགས་པ་ཡིན། །དཔུང་རྒྱབ་ཟླུམ་ཞིང་རྒྱུས་པ་རྩ། །མི་མངོན་ཚིགས་
དང་ཤ་སྙོམས་ལ། །ཤ་ནི་ཅུང་ཟད་མཐོ་བར་སྣང་། །དེ་ནི་ཤིན་ཏུ་བསྔགས་པ་ཡིན། །དཔུང་པ་ཤ་རྒྱས་རིང་བ་དང་། །སྲ་ཞིང་ཟླུམ་ལ་དྲང་ཞིང་མཉམ། །རིམ་གྱིས་ཕྲ་བར་གྱུར་པ་དང་། །ཚིགས་ནི་ལེགས་པར་འབྲེལ་བ་བཟང་། །པུས་མོ་དག་ནི་རབ་མཉམ་

ཟླུམ། །ཚིགས་སམ་ཚིགས་ནི་མི་མངོན་དང་། །མཛེས་ཞིང་རྩ་ནི་མངོན་པ་དང་། །འགྲོ་ཚེ་གུག་པར་བདེ་ན་བཟང་། །ཆེ་དྲང་རིང་ཞིང་ཤིན་ཏུ་ཟླུམ། །ཤིན་ཏུ་ཤ་སྲབ་མ་ཡིན་མ་འཁྲེགས། །རྩ་རྒྱུས་དག་ནི་མི་མངོན་ལ། །ནད་མེད་པ་ནི་རྟ་ལ་
བསྔགས། །ཚེའུ་རྩུབ་ཅིང་འགྲེང་བ་དང་། །ཟླུམ་ཞིང་ལེགས་སྐྱེས་ཐུང་བ་དང་། ཚིགས་མི་མངོན་ཞིང་ལོང་མོ་དང་། །སྒྲོག་མཁར་རིང་པོར་སྣང་དང་བཅས། །རྐང་དང་འབྲེལ་མཉམ་ཞིང་རིང་། །རྟ་ལ་བསྔགས་པར་གྱུར་པ་ཡིན། །ཚེའུ་ཆེ་ཤིན་ཏུ་མཉམ་
ཞིང་ཟླུམ། །རིང་ཞིང་ཟླུམ་ལ་མཛེས་པ་དང་། །དབུས་ནི་ཅུང་ཟད་རྐྱོང་བ་དང་། །ཚེའུ་སྤུས་གཡོགས་བསྔགས་པ་ཡིན། །རྨིག་པ་མཐོ་ཞིང་ཟླུམ་པ་དང་། །ཤིན་ཏུ་སྲ་ཞིང་མཐུག་པ་དང་། །ཟ་མ་ཏོག་ལྟར་ཟླུམ་ཞིང་མཛེས། །བོང་རྨིག་འདྲ་ནའང་བསྔགས་
པ་ཡིན། །དེ་བཞིན་སྒྲོས་ནི་མ་གས་ཤིང་། །རྣོ་ཞིང་མི་གུག་ཟེགས་པ་མེད། །ཁ་དོག་དུ་མའམ་ཁ་དོག་གཅིག །ཁྲ་བོར་གྱུར་པ་མེད་ན་བཟང་། །དབུས་ནི་ཤིན་ཏུ་ཟབ་པ་དང་། །རྨིག་མཐིལ་རྡོ་ལེབ་ལྟར་སྲ་ཞིང་། །སྦལ་མཚམས་ལེགས་པར་སྐྱེས་པ་
ནི། །མཛེས་པ་དག་དང་ལྡན་པ་དང་། །སྦལ་པ་བུབ་ཅིང་གསལ་བར་མངོན། །མཚམས་ནི་ལེགས་པར་དོད་པ་དང་། །ཉེ་འཁོར་མཉམ་ཞིང་འཇམ་པ་དང་། །རྐང་པའི་ནད་དང་བྲལ་བ་དང་། བརྟན་ཞིང་ལྗན་ལྗིན་མེད་པ་དང་། །ཁ་ཏོག་སྣུམ་པ་བསྔགས་པ་
ཡིན། །ཟེའུའི་ཤ་ནི་རྒྱས་པ་དང་། གཙུག་མེད་པ་ནི་ནི་བསྔགས་པ་ཡིན། །སྒ་འོག་མཉམ་ཞིང་ཡངས་པ་དང་། །རྒྱབ་ནི་མཐེབ་སོར་ཙམ་གྱིས་དམའ། །སྒལ་ཚིགས་ཅུང་ཟད་མཐོ་བ་དང་། །ཤ་ཡིས་རྒྱས་ན་བསྔགས་པ་དང་། །རྩིབ་མ་གུག་ཅིང་ལྕང་ལྕོང་
མེད། །མི་མངོན་རབ་ཏུ་མཉམ་ཞིང་སླ། །ཕྲག་གོང་རྒྱས་པར་ཁྱབ་གྱུར་ཅིང་། །མཉམ་ཞིང་འཇམ་ན་བསྔགས་པ་ཡིན། །གསུས་ཁྱིམ་ཟླུམ་ཞིང་ཡངས་པ་དང་། །རི་དགས་ཀྱི་ནི་དབྱིབས་འདྲ་ཞིང་། །བུ་ག་མེད་ལ་ཐུང་ཟླུམ་ཆུ། །དགུ་སྙོམས་པ་ནི་བསྔགས་པ་

ཡིན། །ཨོང་དོ་མཉམ་ཞིང་ཟླུམ་པ་དང་། །དབྱིབས་ནི་ལེགས་བར་གྱུར་པ་དང་། །མཇུག་དོ་ཤིན་ཏུ་རྒྱས་མིན་ཞིང་། །ཧ་ཅང་ཞུམ་པ་ཡང་མ་ཡིན། །རྒྱབ་གཞུང་བས་ནི་མཐོན་བཟང་། །སྲ་ཞིང་ཟླུམ་ལ་རྒྱུས་མི་མངོན། །གསལ་ཞིང་རིམ་གྱིས་མཛེས་པར་གནས། །
ཤིན་ཏུ་ཐུང་དང་རིང་བ་མིན། །གདོང་གི་ཚད་དང་མཉམ་པ་དང་། །མཇུག་མ་དང་ལེགས་འབྲེལ་བ་བཟང་། །རྟ་ཡི་རྔ་མ་སྤུ་རིང་ཞིང་། །མཉམ་ས་ཁ་དོག་གཅིག་པ་དང་། །མཉེན་ཞིང་སྣུམ་པར་གྱུར་བ་ནི། །རྟ་ལ་ཤིས་བར་བཤད་པ་ཡིན། །མཇུག་ཙོས་ཤིན་
ཏུ་མཐོ་མ་ཡིན། །ཤིན་ཏུ་གྱེས་དང་འབུས་པའང་མིན། །ལུས་དང་རྗེས་མཐུན་ཚད་དང་ལྡན། །དེ་ལྟ་བུ་དག་བསྔགས་པ་ཡིན། །རྐུབ་ནི་ཟབ་ཅིང་ཟླུམ་པ་དང་། །དབྱིབས་ལེགས་ཕྱི་རོལ་གཉེར་མ་མེད། །གང་གིས་རྟ་སྦངས་ལེགས་གཏོད་པ། །དེ་ནི་རབ་
ཏུ་བསྔགས་པ་ཡིན། །བརླ་ནད་ཤིན་ཏུ་ཡངས་མིན་ཞིང་། །དོག་པར་གྱུར་པ་མིན་ན་བསྔགས། །རླིག་པ་དོ་མཉམ་ལེགས་འབྲེལ་སྐྱེས། །སྤུ་ནི་མེད་པར་གྱུར་པ་དང་། །དབུས་ནི་བིལ་བ་ཙམ་ཞིག་ནི། །ཤིན་ཏུ་ནི་འཕྱང་གྱུར་པ་བསྔགས། །མཚན་ནི་རྩ་
སྡོམ་རིམ་གྱིས་ཕྲ། །འཇམ་ཞིང་མྱུར་དུ་ལྡང་བ་དང་། །སྤུབས་ཡངས་པས་ནི་གཡོགས་པ་དང་། །ཁ་ཞིང་ཤིན་ཏུ་ཕྱེ་ཞིང་ཟླུམ། །གཏིང་རིང་ཁ་དོག་གཅིག་ལྡན་པའི། །རྟ་ནི་བསྔགས་པར་འགྱུར་བ་ཡིན། །དཔྱི་མགུ་ལ་མཉམ་ཞིང་དབྱིབས་ལེགས་ལ། །
པགས་སྲབ་སྤུ་ནི་ལེགས་པ་བཟང་། །རྐུབ་ཚོས་སྲ་ཞིང་ལེགས་པར་འབྲེལ། །རྩ་རྒྱུས་དག་ནི་མི་མངོན་བཟང་། །དབྱི་ནི་ལེགས་པར་འབྱོར་པ་དང་། །ལེགས་པར་རྫོགས་གྱུར་པ་དང་། །ཡངས་ཤིང་དཀྱུས་ནི་རིང་བ་དང་། །པགས་པ་སྲབ་ལ་ཤ་རྒྱས་
བཟང་། །རྗེ་དར་སྙོམས་ཤིང་དབྱིབས་ལེགས་དང་། །རིམ་གྱིས་ཕྲ་བར་གྱུར་པ་དང་། །ཤིན་ཏུ་ཕྲ་བའི་རུས་པས་ཁྱབ། །རྟ་ནི་བསྔགས་པར་འགྱུར་པ་ཡིན། །ཆེ་དྲང་པ་སོགས་ལུས་སྟོད་ནི། །ཅི་འདྲར་རོ་སྨད་དེ་བཞིན་དུ། །མཚན་ཉིད་ཐམས་ཅད་བཤད་

བར་བྱ། དེ་ཡི་འོག་ཏུ་རྒོད་མ་ཡི། །ལུས་ཀྱི་ཕྱོགས་ཀྱི་མཚན་ཉིད་དག །གང་དག་ཡིན་པ་བཤད་པར་བྱ། །དེ་ཡི་མཚན་ནི་མཉམ་ཆེ་གསལ། །ལེགས་པར་བལྟམས་ཤིང་ལེགས་པར་འཛག །བུ་ག་ཆེ་ཞིང་གྲྭ་མཚམས་ཆེ། །རིང་ཞིང་མཚན་ནི་
རྒྱ་ཕྱེད་ལ། །མངལ་གྱི་ཉེས་པ་དང་བྲལ་བ། །དེ་ཡི་མོ་མཚན་དེ་འདྲ་བསྔགས། །ནུ་མ་ཟླུམ་ཞིང་རྒྱས་པ་དང་། །ཤིན་ཏུ་འཕྱང་བ་མ་ཡིན་དང་། །འོ་མ་སྐྱོན་མེད་ལེགས་པར་རྒྱས། །རྒོད་མ་རབ་ཏུ་བསྔགས་པ་ཡིན། །ནུ་སོར་མཉམ་ཞིང་ཟླུམ་པ་དང་། །བུ་ག་ལེགས་
ཤིང་འོ་མ་རྒྱས། །ཤིན་ཏུ་འདུས་མིན་གྱེས་པའང་ཡིན། །མཐུག་ཅིང་བརྟན་ལ་ལེགས་པར་སྐྱེས། །ཤིན་ཏུ་འབྱར་མིན་རབ་འཕྱང་མིན། །རྟེའུས་འོ་མ་བཏུང་བདེ་བསྔགས། །ལྷག་མ་རྒོད་མའི་ཡན་ལག་ཀུན། །རྟ་ཕོ་དང་ནི་འདྲ་པར་བསྔགས། །དེ་ལྟ་མོད་ཀྱི་
གཟུགས་མཛེས་པས། །རྒོད་མའི་གཟུགས་ནི་བཟང་བར་བཤད། །ལུས་ནི་སྦོམ་པོར་གྱུར་པ་ཡོད། །ཕྲ་བ་ལྟ་བུར་མངོན་པ་ཡིན། །ལུས་སྲབ་པར་ནི་གྱུར་ན་ཡང་། །རྒོད་མ་སྤུ་མདངས་ཡོད་པ་མངོན། །དེ་འདྲའི་ཚུལ་གྱིས་ལུས་ཀྱི་ནི། །དབྱིབས་ཀྱི་བྱེ་བྲག་ཤེས་པར་
བྱ། །རྒོད་མ་རྟ་ཕོ་འདྲ་བ་དང་། །རྟ་ཕོ་རྒོད་མ་འདྲ་བ་རུ། །གལ་ཏེ་ཕྱིན་ཅི་ལོག་ཅི་སྣང་། །དགོས་པའི་འབྲས་བུ་འབྱིན་མི་འགྱུར། །ལུས་ཆེ་མདངས་ནི་བཟང་བ་དང་། །ལེགས་པར་སྐྱེས་ཞིང་ཚད་དང་ལྡན། །གཟི་བརྗིད་ཡན་ལག་དབྱེས་པ་དང་། །ཡན་ལག་
ཆ་ནི་སྙོམས་པ་དང་། །གཙུག་འཁྱིལ་དགེ་ཞིང་གཟི་མདངས་དགེ །དྲི་བཟང་ཡན་ལག་མི་སྡུག་མེད། །ལུས་རྒྱས་འགྲོས་ནི་བཟང་བ་དང་། །འཇིགས་མེད་གནས་གསུམ་ཡངས་པ་དང་། །ཚད་མཉམ་དབྱིབས་ནི་ལེགས་པ་སྟེ། །གང་ཞིག་དེ་འདྲའི་ལུས་ལྡན་
པ། །བདག་པོའི་གྲགས་དང་རིགས་དང་ནོར། །རྣམ་པར་འཕེལ་བར་འགྱུར་བ་ཡིན། །ཡོན་ཏན་ཕྱིན་ཅི་ལོག་ལྡན་པ། །བདག་པོའི་དོན་རྣམས་ཉམས་བྱེད་ཡིན། །ཤ་ལི་ཧོ་ཏྲའི་མདོའི་གནས་ལས་ཡན་ལག་ཐམས་ཅད་ཀྱི་མཚན་ཉིད་ཀྱི་ལེའུ་སྟེ་དགུ་པའོ།། །།

དཀའ་ཐུབ་བསམ་གཏན་ཆེན་པོ་ཡིས། །གཟི་བྱིན་གསལ་གྱུར་དྲང་སྲོང་ལ། །བློ་དང་ལྡན་པ་ལགས་ཐོས་ཀྱིས། །སྔར་བཤད་པ་ནི་དྲིས་གྱུར་པ། །ཁྱོད་ཀྱིས་ཕྱོགས་བསྟན་གསུངས་མོད་ཀྱི། །བཤད་པ་དག་ནི་མ་གསུངས་པས། །བསྟན་པ་རྣམས་ཀྱི་བཤད་
པ་ནི། །ལེགས་ལྡན་གསུང་བར་མཛད་བའི་རིགས། །བསྟན་པ་བཤད་པ་དང་བཅས་པ། །བུ་ཡིས་བསྐུལ་བས་སྨྲས་པ་ནི། །མིད་པ་སྲོལ་གོང་དང་འབྲེལ་བས། །རོ་འཛིན་ལྕེར་ནི་ཤེས་པར་བྱ། །དེ་ཡི་སྟེང་ནི་རྐན་ཡིན་ཏེ། །མ་རྐན་ལྕེ་འོག་ཡིན་པར་བཤད། །འགྲམ་
སོ་འགྲམ་པ་ལས་སྐྱེས་པ། །ལྡང་བའི་སོ་ནི་ཡིན་པར་བཤད། །དེ་ལས་གཞན་པ་མདུན་གྱི་སོ། །བཅུ་གཉིས་མཚན་མར་ལྡན་པ་ཡིན། །དེ་རྣམས་ཀྱི་ནི་དབུགས་གནས་པ། །སྟེང་འོག་བཞི་ནི་མཆེ་བ་ཡིན། །སྟེང་འོག་གི་ནི་སོ་འགེབས་པ། །གཉིས་པོ་མཆུ་ནི་
ཡིན་པར་བཤད། །མཆུ་མཐའ་ཡི་ནི་ངོས་གཉིས་ན། །འགྲམ་པའི་དབུས་ཆུང་ཁ་འགྲམ་ཡིན། །ཡ་མཆུའི་སྟེང་ན་སྒྲོས་ཡོད་དེ། །དེ་ཡི་སྟེང་གི་མཆུ་ལྷག་ཡིན། །མ་མཆུའི་འོག་མ་ཀོ་སྐོ་སྟེ། །དེ་ལྟག་འགྲམ་པ་ཡིན་པར་བཤད། །སྣ་གོང་མིག་གཉིས་བར་མཚམས་
གདོང་། །གདོང་གི་ཡན་ལག་སྣ་ཁུང་གཉིས། །གདོང་གི་ངོས་གཉིས་མཁུར་ཚོས་ཡིན། །དེ་བར་དམའ་བ་མཆི་མའི་སྟན། །དེ་དག་རྣམས་ཀྱི་གོང་ན་མིག །མིག་འབྲས་འགེགས་པ་མིག་མཆུ་ཡིན། །མིག་མཐའི་དཀར་པོ་མིག་སྤྲིན་ཡིན། །དེ་དབུས་ལ་ཟླུམ་ནག་
མཐོང་མིག་ཡིན། །མཐོང་མིག་ནག་པོ་ཟླུམ་པོའི་དབུས། །ཕྲ་ཞིང་དང་བ་མིག་རྒྱལ་བོང་། །མིག་ལྟག་གཉིས་ནི་མིག་གི་སྐྱུ། །དེ་སྟེང་སྨིན་མ་གཉིས་ཡིན་ནོ། མིག་གི་རྒྱ་བ་ནི་མིག་ཟུར་ཏེ། །ནང་གི་མཚམས་ནི་མིག་ཕུགས་ཡིན། །སྨིན་མ་གཉིས་རེ་དཔྲལ་བ་
སྟེ། །དཔྲལ་བའི་སྟེང་གི་དཔྲལ་མཚམས་ཡིན། །དེ་སྟེང་སྤྱི་བོ་ཡིན་པར་བཤད། །རྣ་བའང་གཉིས་པར་གླད་པ་སྟེ། མིག་ཟུར་མིག་འགྲམ་བར་མུར་གོང་། །མུར་གོང་རྣ་བའི་བར་མུར་འགྲམ། །མཁུར་ཚོས་གཉིས་ཀྱི་རྒྱབ་ཟ་ཡུང་། །དེ་གཉིས་ཕྱི་རོལ་

འགྲམ་གླད་ཡིན། །འགྲམ་པ་སྲོལ་གོང་གཉིས་ཀྱི་བར། །ལྐོག་མ་ཞེས་ནི་བྱ་བར་བཤད། །རྣ་བ་གཉིས་ཀྱི་སྟེང་དང་རྒྱབ། །རྣ་ལྟག་དང་ནི་རྣ་མཆན་ཡིན། །མགོ་དང་ཕྲག་སོའི་བར་སྐེ་མགྲིན། །སྐེ་མགྲིན་ཕྲག་སོའི་ལྟག་སྐེ་རྩ། །དེ་སྟེང་རྔོག་
གཡབ་ཡིན་པར་བཤད། །རྔོག་མཐའ་རྣ་བའི་བར་ཕུམ་ཕུམ། །རྔོག་གཡབ་མཐའ་ནི་ཟེའུ་ལྟག་སྟེ། །དེ་ཡི་རྒྱབ་ནི་དང་རུ་ཡིན། །དང་རུའི་འོག་ནི་ནམ་ཙོང་ཞེས། །རྟ་རྣམས་ལ་ནི་བཤད་པ་ཡིན། །ཟེའུ་ལྟག་ནི་འོག་མ་ཉིད། །ཟེའུ་ཡིན་པར་ཤེས་པར་བྱ། །ཟེའུའི་རྗེས་
ཐོགས་ཁོ་ན་ལ། །སྒ་འོག་ཡིན་པར་ཤེས་པར་བྱ། །དེ་ཕན་ཅད་ན་སྒལ་ཚིགས་དང་། །རྒྱབ་ཉིད་ཡིན་པར་ཤེས་པར་བྱ། །ཟེའུའི་སོ་གཉིས་ཕྲག་སོ་སྟེ། །ཕྲག་སོའི་རྩ་བ་དཔུང་མགོ་ཡིན། །ལྐོག་མ་དང་ནི་སྲོལ་གོང་བར། །མིད་པའོ་དེ་འོག་སྲོལ་མདུད་ཡིན། །མིད་
འོག་ལག་པར་བྲང་ཡིན་ཏེ། །དེ་རྗེས་ལག་འོག་བར་སྙིང་ག །དེ་འོག་དཔུང་སྣ་དཔུང་པ་ཡིན། །དཔུང་པའི་ནང་ནི་མཆན་ཁུང་ཕན། །རྒྱབ་ཀྱི་ཆ་ནི་དཔུང་རྒྱབ་ཡིན། །དེ་འོག་པུས་མོ་གཉིས་ཀྱི་ལྟག །པུས་གོང་དང་ནི་ལག་ངར་གཉིས། །པུས་མོའི་འོག་ཏུ་ཆིག་གྲང་
སྟེ། །དེ་འོག་ཆིག་གྲང་ཕྲ་མོ་ཡིན། ཆིག་གྲང་སྡོམ་ཕའི་བར་ན་ནི། །ཆིག་གྲང་ནང་སྟེ་དེ་ངོག་གི །མདུན་གྱི་ཆ་ནི་ཚེའུ་གདོང་ཡིན། །རྒྱབ་ནི་ཚེའུ་སྤུར་ཤེས་པར་བྱ། །དེའི་ལྟག་དེ་ནི་སྒྲོག་མཁར་ཡིན། །དེའི་ཡང་འོག་ན་ཡོད་པ་ཡི། །ཚེའུ་ཆེ་ཞེས་ནི་བྱ་བར་བཤད། །
དེའི་འོག་རྨིག་པའི་མཚམས་ཡིན་ལ། །དེ་ཡི་འོག་ཏུ་རྨིག་པ་ཡིན། །རྨིག་པའི་མཐའ་མ་རྨིག་སྒྲོས་ཡིན། །རྨིག་བའི་འོག་ནི་རྨིག་མཐིལ་ཏེ། །རྨིག་མཐིལ་ནང་མཐའ་སྦལ་པའི་མཚམས། །རྨིག་མཐིལ་དབུས་ནི་སྦལ་པ་ཡིན། །དཔུང་མཐའི་མགོ་ན་སྙིང་ཡོད་དེ། །
དེ་ཡི་ངོས་ནི་རྩིབ་ལོགས་ཡིན། །རྩིབ་ལོགས་འོག་ཏུ་དཀུ་ཡིན་ལ། །དེ་ཡི་སྟེང་ནི་སྒ་འདབ་ཡིན། །སྒལ་ཚིགས་ཀྱི་ནི་ཆ་དག་གི །མཚམས་ནི་རོ་སྨད་ཡིན་པར་བཤད། །རུས་པ་གསུམ་ནི་འདུས་པ་ཡི། །སུམ་མདོ་འཇུག་དོ་ཡིན་པར་བཤད། །མཇུག་དོའི་འོག་ཏུ་ཨོང་

དོ་སྟེ། །དེ་རྗེས་རྔ་རྩ་ཡིན་པར་བཤད། །དེ་ཡི་ངོས་གཉིས་དབྱི་སྟེང་ཡིན། །དཔྱི་སྟེང་འོག་ནི་རི་ཧི་ནི། །བར་ན་རྔ་མ་རྔ་སྙིང་བཅས། །དེ་གཉིས་འོག་ནི་བརླ་དཔྱིའི་མཚམས། །རྔ་རྩའི་འོག་ནི་རྐུབ་ཡིན་ལ། །དེ་ཡི་ངོས་གཉིས་རྐུབ་ཚོས་ཡིན། །དེ་ཡི་འོག་ནི་འབྲེག་
ཡིན་ལ། །དེ་དག་བར་ནི་མཇུག་སྲུབ་ཡིན། །བརླ་ཡི་ཡང་ན་རླིག་པ་སྟེ། །རླུག་པ་དང་འབྲེལ་མཚན་ཡིན་ནོ། །དེ་གཉིས་མདུན་ན་རྨོང་ཁ་སྟེ། །རྨོང་ཁ་སྙིང་དེའི་དབུས་ལྟེ་བ། །དཀུ་ཡང་བར་ན་གནས་པ་ཡིན། །དཀུ་ན་ལྟེ་བའི་བར་ན་རྒྱུ། །རྒྱབ་དར་དཀུ་ཡི་བར་རན་
འདྲ། །རན་འདྲའི་འོག་ནི་སྡུ་གུ་མིག །དེ་ཡི་ཕ་རོལ་དཔྱི་ཡིན་ཏེ། །དེ་ཡི་འོག་ན་བརླ་ཡིན་ནོ། །དེ་ཡི་ཡང་འོག་བརླ་ཕྲ་མོ། །དེ་ཡི་འོག་ནི་རྗེ་རང་ཡིན། །དེ་འོག་སྲེ་ལོང་ཆིག་གྲང་ཡིན། །ལྷག་མ་རོ་སྟོད་རྗེས་འབྲངས་ཏེ། །ཐམས་ཅད་ཉེ་བར་དབྱེ་བར་བྱ། །ཤ་
ལི་ཧོ་ཏྲའི་མདོའི་གནས་ལས་བསྟན་པ་རྣམས་བཤད་པ་སྟེ་ལེའུ་བཅུ་པའོ།། །།རྟ་ཡི་ཚེ་ཡི་རིག་བྱེད་མཁན། །དྲང་སྲོང་མགྱོགས་འགྲོའི་གཉེན་གྱུར་པ། །ཤ་ལི་ཧོ་ཏྲ་དབང་ཐུལ་ལ། །མཛའ་ལས་རྒྱལ་གྱིས་ཡོངས་དྲིས་པ། །རྟ་ཡི་ཚུལ་གྱི་དེ་ཉིད་
མཁྱེན། །ཚད་ནི་རྣམ་པ་དུ་རུ་བཤད། །མི་སྡུག་གཞལ་མིན་གང་ཞིག་ལགས། །སྡུག་ཅིང་གཞལ་བཟོད་གང་ཞིག་ལགས། །ཡན་ལག་ཉིང་ལག་ཤེས་པ་དང་། །གྲངས་ཉིད་ཀྱི་ནི་བྱེ་བྲག་རྣམས། །བདག་ཅག་བློ་གྲོས་ཞན་པས་ན། །ལེགས་ལྡན་ཁྱོད་ལས་
མཉན་པར་འཚལ། །དེ་སྐད་སྨྲས་ཚེ་སློབ་དཔོན་གྱུར། །དྲང་སྲོང་དམ་པས་སླར་སྨྲས་པ། །ཇི་སྐད་བསྟན་པ་འདི་མཉན་ནས། །མཛའ་ལས་རྒྱལ་གྱིས་བཟུང་བར་གྱིས། །སྒུར་ཞིང་གདོང་དང་སྐེ་པ་ཞུམ། །འཁུམས་དང་ཤིན་ཏུ་རྒྱས་དྲགས་དང་། །འདུག་དང་དབང་པོ་
ཡུལ་གྱི་གནས། །དེ་བཞིན་བྲང་ནི་འཕྱུགས་པ་དང་། །རྐེད་པ་སྐྲོངས་བར་གྱུར་པ་དང་། །ཞིན་ཏུ་དམའ་དང་ཤིན་ཏུ་མཐོ། །གང་ཞིག་ལུས་སྟོད་ཤིན་ཏུ་ཆེ། །དེ་བཞིན་རྒྱབ་ནི་ལྷག་པར་དམའ། །ལུས་ནི་ཤིན་ཏུ་མི་སྙུག་དང་། །དེ་བཞིན་རྐེད་པ་ཞུམ་པ་སྟེ། །མི་སྡུག་

རྟ་ནི་བཅུ་པོ་འདི། །གཞལ་མིན་ཡིན་པར་ཤེས་པར་བྱ། །སྟོབས་མ་ཉམས་ཤིང་མཛེས་པ་ཡི། །ལུས་ལྡན་རྟ་ནི་བཅོ་ལྔ་པ། །ལུས་ཀྱི་ཆུ་ཞིང་ལེགས་གནས་ཤིང་། །གནས་ཀྱི་ཆ་ནི་མ་འཕྱུགས་པ། །ཚོད་ཤེས་པ་ཡི་གཞལ་བྱ་ཡིན། །
གཟུགས་ངན་ནམ་ཡང་མིག་ཞལ་ལོ། །སྐེ་མགྲིན་ལུས་ནི་ཆ་མཉམ་ཞིང་། །རྔ་སྙིང་མགོ་དང་མཉམ་པ་དང་། །ཨོང་དོ་དང་ནི་བྲང་ཞེང་མཉམ། །པུས་མོའི་ཚེའུ་མཉམ་པ་དང་། །དཔངས་དང་ཞིང་གི་ཚད་དང་ནི། །ལེགས་པ་སྙོམས་པར་གྱུར་བའི་རྟ། །དེ་འདྲའི་ཚད་དང་ལྡན་
པ་དག །ཆ་མཉམ་ཡིན་པར་ཤེས་པར་བྱ། །རྟ་ནི་ལུས་ཀྱི་ཆ་མཉམ་པའི། །ཚད་ནི་རྣམ་གསུམ་མཉན་པར་གྱིས། །རྟ་མཆོག་གི་ནི་དཔྲལ་བ་ལ། །སོར་ནི་བཅུ་གཉིས་ཡོད་པར་བཤད། །རྣ་བ་སོར་དྲུག་ཡིན་ཞེས་བྱ། །སོ་དག་སོར་ནི་ཕྱེད་དང་གཉིས། །མིག་ནི་སོར་
གསུམ་ཤེས་པར་བྱ། །མཆེ་བའི་དབངས་ནི་སོར་གཉིས་ཡིན། །མགོ་བོ་སོར་ནི་ཉི་ཤུ་བརྒྱད། །ཕུམ་ཕུམ་གནས་ནི་དཔངས་སོར་གསུམ། །རྟ་མཆོག་གི་ནི་ཆུ་རུ་ནི། །སོར་བརྒྱ་རྩ་བཞི་ཉིད་ཡིན་ནོ། །སྐེ་མགྲིན་སོར་ནི་སུམ་ཅུ་སྟེ། །ཟེའུ་ལྟག་སོར་ནི་དྲུག་ཡིན་ལ། །
རྒྱབ་ནི་སུམ་ཅུར་ཤེས་པར་བྱ། །ཨོར་དོ་གདོང་པ་དག་དང་མཉམ། འབྲེག་ནི་སོར་ནི་བཅུ་ཡིན་ཏེ། །འདི་ནི་ཆུ་ཡི་ཚད་དུ་བཤད། །རླིག་པ་བིལ་བ་བཟང་པོ་ཡི། །ཚད་ཙམ་ཡོད་པར་ཤེས་པར་བྱ། །རྟ་མཆོག་གི་ནི་མཚན་དག་ལ། །སོར་ནི་བཅུ་དྲུག་ཡིན་ཞེས་བྱ། །
ཕྲག་སོ་སོར་ནི་ཉི་ཤུ་དྲུག །དཔུང་མགོ་ཉིད་ནི་སོར་བཅུ་ཡིན། །དཔུང་པ་ཉི་ཤུ་རྩ་བཞི་སྟེ། །པུས་མོའི་ཚིགས་ནི་སོར་དྲུག་པ། །ཚེའུ་སྤུ་སོར་དྲུག་ཡིན་ཞེས་བྱ། །ཆིག་གྲང་དཀྱུས་སུ་སོར་བཅུ་དྲུག །ཚེའུ་ཚེ་སོར་ནི་དྲུག་པ་ཡིན། །རྨིག་པའང་དེ་དང་མཉམ་པ་ཡིན། །
རྐེད་པའི་དབུས་ཀྱི་ཞེང་གང་ཡིན། །དཔངས་ནི་དེ་དང་མཉམ་པ་ཡིན། །ཚད་ནི་རྟ་མཆོག་དག་གི་ཡིན། །དེ་ནས་བར་མའི་བཤད་བྱ་སྟེ། །དཔྲལ་བའི་ཚད་ནི་སོར་བཅུ་ཡི། །གདོང་པ་སོར་ནི་ཉི་ཤུ་དྲུག །མིག་ལ་སོར་ནི་ཕྱེད་དང་གསུམ། །ཕུམ་ཕུམ་གནས་ཀྱང་དེ་དང་

འདྲ། །སོ་ལ་སོར་གཅིག་བཞི་ཆ་གཅིག །མཆེ་བ་སོར་གཅིག་བཞི་ཆ་གསུམ། །རྣ་བའི་དཔངས་སུ་སོར་ལྔ་རུ། །རྟ་ནི་བར་མའི་ཡིན་པར་བཤད། །སྐེ་མགྲིན་ཉི་ཤུ་རྩ་བདུན་དུ། །བསྟན་བཅོས་རྟོགས་པར་ཤེས་པར་བྱ། རྔོག་མཐའ་སོར་ནི་ལྔ་རུ་བཤད། །རྒྱབ་ནི་སྐེ་མགྲིན་
དག་དང་མཉམ། །འབྲེག་ལ་སོར་ནི་བདུན་ཡིན་ཏེ། །ཨོང་དོ་ཉི་ཤུ་རྩ་དྲུག་ཡིན། །བར་མ་འདི་ཡི་ཆུ་རུ་ནི། །སོར་ནི་དགུ་བཅུ་རྩ་གཉིས་ཡིན། །མགོ་བོ་སོར་ནི་ཉི་ཤུ་དྲུག །འདི་ཡི་རྔ་སྙིང་དེ་དང་མཉམ། །བར་མ་རླིག་བའི་ཚད་དག་ནི། །བིལ་པ་འབྲིང་པོ་ཙམ་ཡིན་ནོ། །
བར་གྱི་མཚན་གྱི་ཚད་དག་ནི། །སོར་ནི་བཅུ་བཞི་ཡིན་པར་བཤད། །དཔངས་སུ་སོར་ནི་བཅུ་དགུ་དག །འདི་ལ་བསྔགས་བར་གྱུར་པ་ཡིན། །ཕྲག་སོར་སོར་ནི་ཉི་ཤུ་ལྔ། །དཔུང་མགོ་སོར་ནི་བརྒྱད་ཡིན་ནོ། །དཔུང་པ་སོར་ནི་ཉི་ཤུ་གསུམ། །པུས་མོ་ཚེའུ་དང་མཉམ་པ་
ཡིན། །ཆིག་གྲང་སོར་ནི་བཅུ་བཞི་སྟེ། །ཚེའུ་སྤུ་སོར་ནི་ལྔ་པ་སྟེ། །ཚེའུ་ཚེའང་སོར་ནི་ལྔ་པ་སྟེ། །རྨིག་པའང་དེ་དང་འདྲ་བར་བཤད། །རྟ་ཡི་ཐ་མ་དག་གི་ཚད། །དཔྲལ་བ་སོར་ནི་བརྒྱད་ཡིན་ཏེ། །མགོ་བོ་སོར་ནི་ཉི་ཤུ་བཞི། །མིག་ནི་སོར་གཉིས་ཡིན་ཤེས་བྱ། །
ཕུམ་ཕུམ་གནས་ཀྱང་དེ་དང་འདྲ། །མཆེ་བ་སོར་ནི་ཕྱེད་དང་གཉིས། །སོ་ཡི་དཔངས་སུ་སོར་གཅིག་ཡིན། །རྣ་བའི་དཔངས་ནི་སོར་བཞི་སྟེ། །སྐྲ་འགྲམ་ཉི་ཤུ་རྩ་བཞི་སྟེ། །རྔོག་མཐའ་སོར་ནི་བཞི་ཡིན་ནོ། །རྒྱབ་ནི་སྐེ་བ་ཉིད་དང་མཉམ། །འབྲེག་གི་ཚད་ནི་སོར་བཞི་
སྟེ། །ཨོང་དོ་སོར་ནི་ཉི་ཤུ་བཞི། །ཆུ་རུ་སོར་ནི་བརྒྱད་ཅུ་ཡིན། །མགོ་བོ་ཉི་ཤུ་རྩ་བཞི་སྟེ། །རྔ་སྙིང་དག་ཀྱང་དེ་དང་མཉམ། །རླིག་པ་བིལ་བ་ཆུང་ངུ་ཙམ། །ཕོ་མཚན་སོར་ནི་བཅུ་གཉིས་ཡིན། །རྟ་ནི་ཐ་མའི་དཔངས་སུ་ནི། །སོར་ནི་བརྒྱད་ཅུ་ཡིན་པར་བཤད། །ཕྲག་
སོ་སོར་ནི་ཉི་ཤུ་བཞི། །དཔུང་མགོ་འདི་ཡི་སོར་དྲུག་ཡིན། །དཔུང་པ་སོར་ནི་ཉི་ཤུ་གཉིས། །པུས་མོ་སོར་ནི་བཞི་ཡིན་ལ། །རྟ་ནི་ཐ་མའི་ཆིག་གྲང་གི །དཔངས་ནི་སོར་བཅུ་གཉིས་ཡིན་ནོ། །ཚེའུ་སྤུའི་གནས་ནི་སོར་བཞི་སྟེ། །ཚེའུ་ཚེའི་རྨིག་པ་དེ་དང་འདྲ། །དེ་ལྟར་

ཆུ་ཡི་ཚད་བཤད་པ། །ཆུ་ནི་ཅི་བཞིན་གཞག་པ་ཡིན། །རོ་སྟོད་ཀྱི་ནི་དཔངས་གང་ཡིན། །འོག་ནས་རྔོག་མཐའི་བར་དུ་གཞལ། །རོ་སྨད་མཇུག་དོའི་མཚམས་ནས་ནི། །འོག་ནས་སྟེང་དུ་དེ་བཞིན་གཞལ། །དེ་ལྟར་དཔངས་སུ་གཞལ་ནས་
ནི། །བསྟན་བཅོས་མཁས་པས་བྱ་བ་ཡིན། །རྔ་སྙིང་རྩ་ནས་མིག་ཟུར་གྱི། །བར་དུ་ཆུར་ནི་གཞལ་བར་བྱ། །དཔྱི་སྟེང་མཇུག་ཏོ་དཔྱི་མགུལ་དང་། །བརླ་དཔྱིའི་མཚམས་ནི་གང་ཡིན་པ། །མཆོག་དང་བར་མ་ཐམ་ལའང་། །ཕྲག་སོ་དང་ནི་མཉམ་པ་ཡིན། །རྗེ་ངར་དཕྱི་ཡི་
བ་ཧ་ལས། །སོར་གཅིག་གིས་ནི་ཆུང་བར་བཤད། །སྤུ་ར་པུས་མོའི་ཚད་ལས་ནི། །སོར་གཅིག་ལྷག་པར་ཤེས་པར་བྱ། །ཆིག་གྲང་ལ་སོགས་སྔར་བཤད་པ། །ཕྱི་རྐང་གི་ཡང་དེ་འདྲར་ལྡན། །ནས་རྒྱས་ཀྱི་ནི་ལྟོག་ཤིབས་པའི། །ཞེང་ནི་སོར་དུ་ཤེས་པར་བྱ། །
ལ་ལ་མཐེ་བོའི་ཚིགས་ཀྱི་ཞེང་། །སོར་ཡིན་པར་ནི་འཆད་པར་བྱེད། །གཞན་དག་སྐྱེས་བུ་རན་པ་ཡི། །ལག་སོར་གྱི་ནི་གུང་མོ་ཡི། །ཚིགས་ནི་དབུས་མའི་ནང་དག་ལ། །སོར་མིན་པར་ནི་འདོད་པ་ཡིན། །རྟ་གཞན་གང་དག་ཡོད་པ་དག །ཚད་འདི་ཡིས་སྣ་གཞལ་
བར་བྱ། །དེ་ལྟར་མཆོག་དང་བར་མ་དང་། །ཐ་མར་གྱུར་པའི་རྟག་སུམ་ལ། །ཚད་ནི་རྣམ་པ་གསུམ་དག་གིས། །གཞལ་བར་འདི་ནི་བཤད་པ་ཡིན། །དེ་ལྟར་ཆུ་ཞེང་ཚད་ལྡན་པའི། །ལུས་དང་ལྡན་པ་གང་ཞིག་ཡིན། །ལུས་དང་འཚམས་པར་ཤ་རྒྱས་ཤིང་། །རྐང་པ་
སྲ་ལ་མཚན་དང་ལྡན། །ཡན་ལག་གསལ་ཞིང་མཉན་པ་དང་། །ལུས་སྙོམས་ཤ་ནི་མཁྲེགས་པ་དག །བཀྲ་ཤིས་དབལ་སྐྱེད་དགེ་བ་དང་། །འདོད་པ་ཐམས་ཅད་སྦྱིན་བྱེད་ཡིན། །ཤ་ཡི་ཧོ་ཏྲའི་མདོའི་གནས་ལས་ཚད་གཞལ་བའི་ལེའུ་སྟེ་བཅུ་གཅིག་པའོ།། །།
དེ་ནས་གཞན་ཡང་ཡན་ལག་བཅུའི། །ཆ་ཡི་ལེའུ་བཤད་པར་བྱ། །དང་པོའི་གནས་ནི་དཔྲལ་བ་ཡིན། །མཐར་ཐུག་ཚད་དུ་བཤད་པ་ཡིན། །གཉིས་པ་དཔྲལ་བའི་སྟེང་གི་ནི། །གླང་བ་ལ་ནི་བརྟེན་པ་ཡིན། །གསུམ་པ་སྐེ་འགྲིན་ཕྲག་སོ་ཡི། །ལུས་ཀྱི་ཕྱོགས་ནི་ཡིན་

པར་བཤད། །ནམ་ཚོར་ཟེའུའི་ལྟག་ཟེའུ། །དཔུང་མགོ་བཞིན་ཕྲག་སོ་དང་། །སོག་པའི་གནས་ནི་གང་ཡིན་པ། །བཞི་པ་དག་ནི་ཡིན་པར་འདོད། །ལུས་ཀྱི་རོ་སྟོད་ཆ་མཉམ་དང་། །དཔུང་སྣ་ལ་སོགས་ལྔ་བོ་ཡིན། །སྙིང་ག་ལག་འོག་རྩིབ་ལོགས་དང་། །སྒ་འོག་དང་
ནི་རྒྱབ་ཉིད་ནི། །རྟ་ཡི་གནས་ནི་དྲུག་པ་ཡིན། །སྒལ་ཚིགས་དང་ནི་ལྟོ་བ་དང་། །མཚན་གྱི་ཉེ་འཁོར་གང་ཡིན་དང་། །རྒྱུ་དང་མི་རྒྱུ་གང་ཡིན་རྣམས། །གནས་ནི་བདུན་པ་དག་ཏུ་བཤད། །ཨོང་དོའི་ཕྱོགས་ན་གང་ཡོད་དང་། །བརླག་ཉིས་དང་ནི་བཅས་པ་དག །དེ་
དག་གནས་ནི་བརྒྱད་པ་ཡིན། །དཔུང་པ་དཔུང་རྒྱབ་པུས་མོ་དང་། །རྐུབ་ཚོས་དཔྱི་མགུལ་དཔྱི་མཚམས་དང་། །རྗེ་ངར་དང་ནི་བཅས་པ་དང་། །གནས་ནི་དགུ་པ་ཡིན་པར་འདོད། །པུས་མོ་རྗེ་ངར་མན་ཆད་ནི། །གནས་ནི་བཅུ་བ་ཞེས་བྱའོ། །དགེ་བའམ་ཡང་ན་མི་དགེ་
བ། །ཐམས་ཅད་ཀྱང་ནི་མཚོན་པར་བྱ། །གནས་སྐབས་ཆ་ཡི་འབྲས་བུ་དག །དེ་ཡི་རྟག་ཏུ་བརྗོད་བྱ་མིན། །དེ་བཞིན་གནས་ཀྱི་དབྱེ་བ་ཡི། །རྟ་ཡི་ཚད་ལ་སོགས་པའང་བཤད། །གནས་ཤེས་བ་ཡི་གནས་རྣམས་ནི། །རྟོགས་པར་བྱས་ལའང་འབྲས་བུ་བརྗོད། །
ཚེ་དང་ན་ཚོད་ཆ་རྣམས་ནི། །གནས་ལས་ཤེས་པར་བྱས་ཏེ་བསྟན། །མཚན་ཉིད་ལྡན་ན་འབྲས་བུར་བཅས། །གོ་བཟློག་པ་ནི་འབྲས་བུ་མེད། །མཚན་ཉིད་གནས་ནི་འཁྲུགས་པ་ལས། །འབྲས་བུ་ཁྱད་པར་འཕགས་པར་འགྱུར། །མདོག་དང་གཟི་མདངས་སྙིང་སྟོབས་དྲི། །
ཅི་བཞིན་དུས་སུ་འབྲས་བུ་སྟེར། །ལུས་ཀྱི་འགྲོས་དང་སྐད་དང་ནི། །རྟག་ཏུ་འབྲས་བུ་འབྱིན་པ་ཡིན། །ཐིག་ལེ་དང་ནི་གཙུག་གི་ནི། །གནས་སྐབས་ཆ་ནི་འདི་ལས་བྱུང་། །ཤ་ལི་ཧོ་ཏྲའི་མདོའི་གནས་ལས་ཡན་ལག་བཅུའི་ཆ་དབྱེ་བའི་ལེའུ་སྟེ་བཅུ་གཉིས་པའོ།། །།
ལེགས་ཐོས་ཐོས་པ་ཕུན་ཚོགས་པས། །ཤ་ལི་ཧོ་ཏྲ་ལ་དྲིས་པ། །མི་སྡུག་ཅི་ལྟར་ཤེས་པར་གྱིས། །ཇི་བཞིན་སྡུག་པ་ཇི་ལྟ་བུ། །དམན་དང་དེ་བཞིན་མི་དམན་དང་། །ཡན་ལག་ཚང་དང་མི་ཚང་དང་། །གཞལ་བྱ་ཉིད་དང་གཞལ་མིན་དང་། །གསོ་སླ་གསོ་དཀའ་ཇི་ལྟ་བུ། །

དེ་ལྟར་བུ་ཡིས་དྲིས་པ་དང་། །ཤ་ལི་ཧོ་ཏྲས་སླར་སྨྲས་པ། །སོ་སོའི་མཚན་ཉིད་ཅི་འདྲ་བ། །དེ་དག་ཁྱེད་ལ་བཤད་པར་བྱ། །གང་ཡང་ལུས་ཀྱི་དབྱིབས་ལེགས་ཤིང་། །རྩ་རྒྱུས་སྣང་བར་མི་འགྱུར་དང་། །ཆུ་ཞེང་ཚད་དང་ལྡན་པ་དང་། །ཤ་ནི་གནས་
དང་འཚམས་པར་སྐྱེ། །ལུས་སྙོམས་གསུམ་པ་ཆུང་བ་དང་། །ཡིད་དང་མིག་ནི་དགའ་བྱེད་པ། །རོ་སྨད་མཉམ་ཞིང་ཟླུམ་པ་དང་། མཛེས་ཤིང་དབྱིབས་ནི་ལེགས་གནས་དང་། ཡན་ལག་ཉིང་ལག་རྫོགས་པ་དང་། །ཡན་ལག་ཀུན་གྱི་དབྱིབས་ལེགས་དང་། །ཉིང་ལག་
རྣམས་ནི་མི་སྡུག་དང་། །མགྱོགས་ཤིང་མཉམ་དང་ལྡན་པ་དང་། །དེས་ཤིང་སྟོབས་དང་ལྡན་པ་དང་། །ན་ཚོད་གཞོན་ཞིང་འགྲོས་ཆེ་དང་། །སྐེ་མགྲིན་ཕྲག་སོ་བྲང་གི་ཕྱོགས། །ཤ་རྒྱས་ཚད་དང་ལྡན་ལ་སོགས། །འདི་དག་གཞལ་བྱ་ཆ་མཉམ་དང་། །གསོ་སླ་མི་སྡུག་
མེད་པ་ཡིན། །དེ་ལས་བཟློག་པར་གྱུར་པའི་རྟ། །གཞལ་བྱའི་ལས་དག་མ་ཡིན་ནོ། །དེ་ལྟའི་མི་སྡུག་ལ་སོགས་དང་། །ལྡན་པའི་རྟ་ནི་གང་ཡིན་པ། །ཤིང་རྟ་ལམ་དང་ཁལ་དང་ནི། །རྩེད་མོའི་གནས་དང་གཡུལ་དག་ཏུ། །ལས་དང་འཚམ་པ་མ་ཡིན་པས། །དེ་ཕྱིར་
དེ་ནི་སྤང་བར་བྱ། །དེ་ཕྱིར་བཟང་པོ་ཤེས་བྱས་ལ། །དེ་ལྟའི་རྟ་ནི་བླང་བར་བྱ། །དེ་ལྟར་བླང་འོས་བླངས་ནས་ནི། །ལྷག་མ་སྤང་བྱ་རྣམ་པར་སྤང་། །ཚོང་པ་རྣམས་ལ་རྟ་དག་ནི། །བཟང་པོ་བླང་བར་གྱུར་པ་དང་། །སྤྲིས་མ་བཤུགས་པའི་ཞོ་ལྟ་བུར། །ལྷག་མ་
སྙིང་པོ་མེད་པ་ཡིན། །དེ་ལྟ་མོད་ཀྱི་བརྩེ་བ་ཡིས། །སྤང་བྱ་དེ་ཡང་ཚོང་བ་དང་། །རྟ་ལ་བརྩེ་བར་བྱ་བའི་ཕྱིར། །བླངས་ཏེ་སྦྱིན་པ་གཏང་བར་བྱ། །མཚན་ནི་ངན་པར་གྱུར་ན་ཡང་། །མགྱོགས་ཤིང་རིགས་དང་ན་ཚོད་ལྡན། །རྒྱལ་པོས་ལྷག་གང་རྣམས་
དང་ནི། །བྲམ་ཟེ་ལ་ནི་སྦྱིན་པར་བྱ། །མ་ནིང་རྒན་དང་ནད་ཀྱིས་ཉེན། །ཉེ་འཁོར་གནས་པའི་མི་ལ་སྦྱིན། །རླིག་པ་མེད་དང་རླིག་གཅིག་པ། །རླིག་སེར་དང་ནི་ལུས་སྐེམས་དང་། །ཡན་ལག་མ་ཚང་གྱུར་པ་དག །ཉུང་རུམ་ལ་སོགས་རྣམས་ལ་

སྦྱིན། །གཡུལ་དུ་འཇུག་པར་མི་ནུས་པ། །གར་མཁན་དང་ནི་གླུ་མཁན་དང་། །འཁྲུས་མཁན་དང་ནི་འདྲེག་མཁན་དང་། །དེ་འདྲའི་ཚུལ་ལྡན་དག་ལ་སྦྱིན། །དེ་ལ་ཤིན་ཏུ་མི་སྡུག་པ། །ཤིན་ཏུ་བཟང་བ་མི་སྦྱིན་ནོ། །ཤུ་ལ་ཀ་དང་གཟུགས་མི་སྡུག །སོ་མི་སྡུག་དང་མི་
སྲུན་པ། །ཉེ་འཁོར་ཀྱི་ནི་ཕོ་ཉ་སོགས། །དྲག་ཤུལ་བྱེད་པ་རྣམས་ལ་སྦྱིན། །འགྲོས་ཆུང་བ་དང་སྲེགས་པ་དང་། །རྐང་ངན་གླས་ཀྱི་ནང་མིར་སྦྱིན། །རྟ་ལ་གདུག་བར་གྱུར་པ་ནི། །མཚམས་སྲུང་མཐའ་འཁོར་པ་དག་དང་། །ཉེས་པ་ཆེར་བསྟེན་དག་ལ་སྦྱིན། །རང་གི་
ཡུལ་དུ་དེ་མིག་ཞག །དེ་རྣམས་རྟོག་ལ་མཁས་པ་ནི། །རྒྱལ་པོའི་དྲུང་དུ་རྟག་པར་གཞག །དེ་ལྟར་རྟ་ནི་རྣམ་ཕྱེ་ན། །རྒྱལ་པོའི་འབྱོར་པ་འཕེལ་འགྱུར་ཞིང་། །ཡིད་ནི་དགའ་ཞིང་མགུ་བ་དང་། །གཡུལ་དང་དགྲ་ལས་རྒྱལ་བར་འགྱུར། །ཤ་ལི་ཧོ་ཏྲའི་མདོའི་གནས་ལས་སྡུག་
པ་དང་མི་སྡུག་པ་རྣམ་པར་ཕྱེ་བའི་ལེའུ་སྟེ་བཅུ་གསུམ་པའོ།། །།ཉི་མ་འཆར་ཀ་འདྲ་བ་ཡི། །དྲང་སྲོང་ཐ་ལ་ཕྱག་བྱས་ཏེ། །ལེགས་ཐོས་ཀྱིས་ནི་ཟས་ཀྱི་ཚད། །རྣམ་པར་བརྟག་པ་དྲིས་གྱུར་པ། །ལེགས་ལྡན་མི་ལ་ཟས་ཀྱི་ཚད། །བཤད་ཀྱིས་རྟ་ལ་ཅི་ཞིག་འཚལ། །
ཕྱུགས་རྣམས་དང་ནི་ཁྱད་པར་དུ། །རྟ་ལ་དེ་གསོ་མ་མཆིས་ཏེ། །དེ་རྣམས་དབུགས་འབྱིན་ཙམ་གྱིས་ནི། །ཟོས་ཤིང་བཅས་པ་འཇུ་གྱུར་ལ། །ཕྱུགས་ནི་ལྟོ་བར་གྲགས་པས་ན། །དེ་ལ་ཚད་ནི་ཅི་ཞིག་བགྱི། །དེ་སྐད་ལེགས་ཐོས་ཀྱིས་སྨྲས་ཚེ། །ཤ་ལི་ཧོ་ཏྲས་སླར་སྨྲས་པ། །
བློ་གྲོས་བཟང་པོ་ནན་ཏན་དུ། །ཤིན་ཏུ་འདྲ་པས་ཀྱང་ཚད་ཙམ་དུ། །བྱིན་ན་དགའ་བ་སྐྱེད་བྱེད་ཅིང་། །ཚོད་ཟིན་དུག་ཀྱང་བདུད་རྩིར་འགྱུར། །ཚོད་མ་ཟིན་ན་བདུད་རྩིས་ཀྱང་། །གསོད་པར་འགྱུར་བ་ཉིད་ཡིན་ནོ། །བདེ་ཞིང་གསོལ་འཚོ་བྱེད་པས། །ཚོད་ཟིན་འཇིག་རྟེན་མ་དང་
འདྲ། །དེ་མེད་སྲོག་མཐའི་འཇིགས་བསྐྱེད་ལ། །དེ་དང་ལྡན་ན་གནས་མཆོག་འགྱུར། །རྟ་ནི་མང་དུ་ཟ་བས་ན། །ཚད་ཀྱི་དགོས་པ་བདེན་མོད་ཀྱི། །སྨན་དང་ཟས་སྐོམ་ཆོ་ག་ནི། །འགྲོ་ངན་བོང་བུ་ལ་ཡང་དགོས། །ཚོད་མ་ཟིན་ན་སྨན་གྱིས་ཀྱང་། །ནད་གཞན་སྐྱེད་པར་འགྱུར་

ཡིན་ལ། །ཚོད་དང་ལྡན་པ་བྱས་པ་ཡིས། །དུག་གིས་ཀྱང་ནི་ནད་འཇོམས་སོ། །རྫས་དང་འཇུ་སྟོབས་རྫས་ཅི་ཡང་། །ཚད་ནི་རྣམ་པ་གསུམ་ལ་འཇུག །སྙིང་དགའ་ཤུགས་ནི་མ་བཀག་དང་། །ལྟོའང་ཤིན་ཏུ་མི་གནོད་དང་། །རྩིབ་ལོགས་རྣམས་
ནི་བདེ་བ་དང་། །གསུས་པ་ཚིམ་བར་མ་གྱུར་ལ། །བཀྲེས་དང་སྐོམ་ནི་ཞི་བ་དང་། །དབང་པོ་རྣམས་ནི་ཚིམ་པ་དང་། །དབུགས་རྔུབ་དབུགས་དབྱུང་བདེ་བ་དང་། །གཉིད་ནི་བདེ་བར་ལོག་བྱེད་དང་། །སྟོབས་དང་ཁ་དོག་འཕེལ་བྱེད་དང་། །བདེ་བར་འཇུ་བར་འགྱུར་བ་དང་། །
ལུས་གཟུངས་འཁྲུག་པར་མི་བྱེད་པ། །ཚོད་ཟིན་ཟོས་པ་ཡིན་བར་བཤད། །ཁ་ཟས་ལྕི་བས་ལྟོ་བ་ཡི། །ཕྱེད་དམ་སུམ་ཆ་བཀང་བ་བསྔགས། །ཁ་ཟས་ཤིན་ཏུ་ཡང་བ་ཡང་། །ཤིན་ཏུ་འདྲངས་པར་སྦྱིན་ནོ། །དེ་ལྟར་ཚད་ལས་ཚད་མིན་པར། །ལྷག་པའམ་ཆུང་པར་གྱུར་
པ་ནི། །སྟོབས་དང་སྙིང་སྟོབས་བློ་དང་ནི། །མདོག་དང་དབང་པོ་ལ་གནོད་བྱེད། །རླུང་ནི་འགགས་པའམ་སྦྱོར་བར་བྱེད། །ནད་སྐྱེད་བྱེད་པའི་མཆོག་ཡིན་ལ། །རོ་མི་ཙ་ཞིང་ཚེ་ཐུང་དང་། །མདངས་མེད་བཀྲ་མི་ཤིས་པར་འགྱུར། །དེ་བས་རྟ་རྣམས་ལོག་པ་ཡི། །
ཟས་ལ་སྤྱོད་ལམ་བཟློག་པར་བྱ། །འདྲངས་དྲགས་པར་ནི་གྱུར་པ་ལས། །ནད་གཞི་ཐམས་ཅད་འཁྲུག་བྱེད་ཅིང་། །གསུང་དང་ཕོ་བའི་ནད་སྐྱེས་པས། །རྟ་ནི་དེ་ལས་བཟློག་པར་བྱ། །ཇི་ཙམ་གྱིས་ནི་ལྟོ་བའི་མེ། །འབར་གྱུར་དེ་ཙམ་སྦྱིན་པར་བྱ། །ཚད་མི་ལྡན་པར་བྱིན་
པ་ཡིས། །ཡང་ན་དྲགས་པའམ་ཆུང་བར་འགྱུར། །རྫས་ནི་ཆུ་སྐྱེས་རླན་ཅན་དང་། །སྐམ་པར་སྐྱེ་སྟེ་གསུམ་དུ་འདོད། །དེ་དག་ཚད་མི་ལྡན་པར་ནི། །བཟའ་བའི་བྱ་བའང་ཐ་དད་དོ། །མར་དང་སྦྲང་རྩི་མཉམ་ཟས་སོགས། །ཚད་མི་ལྡན་དང་འདྲ་བ་ཡི། །ཟས་ཀྱི་
སྨོས་ཀྱི་སྐོམ་མམ་ནི། །སྣུམ་མམ་རྩྭ་ཡི་ཚོད་དང་ནི། །གྲང་ལྷགས་འདྲེན་པ་དྲགས་པས་ཀྱང་། །ཚད་མི་ལྡན་པར་གནོད་པ་སྐྱེད། །དེ་བས་སྤྱི་དང་ཁྱད་པར་གྱི། །ཚད་ནི་ང་ཡིས་བཤད་པར་བྱ། །འོལ་མ་སེ་བཞི་མ་ཤ་བཞི། །དེ་བཞི་ལ་ནི་ཤན་སྟེ། །དེ་

བཞི་ལ་ནི་སུ་བ་སྣ། །དེ་ཉིད་ཞོ་གཉིས་ཞེས་བྱའོ། །དེ་བཞི་ལ་ནི་སྲང་གཅིག་སྟེ། །དེ་བཞི་ལ་ནི་ཕུལ་དུ་བཤད། །ཕུལ་བཞི་ལ་ནི་བྲེ་གང་ཡིན། །དེ་བཞི་ལ་ནི་བྲེ་བཞི་སྟེ། །དེ་བཞི་ལ་ནི་དྲོ་ན་ཡིན། །འདི་ནི་སྤྱི་ཡི་ཚད་ཡིན་ལ། །གཤེར་རྫས་ལ་ནི་ཉིས་
འགྱུར་བྱ། །སྣུམ་ནི་ཚད་ཀྱི་ཕྱེད་དུ་བྱ། །ཨཀྵ་ལག་པའི་མཐིལ་ལ་སོགས། །ཞོ་གཉིས་ཀྱི་ནི་མིང་ཡིན་ནོ། །སྲང་ཕྱེད་མིང་ནི་ཨ་སྨུར་བཅས། །སྲང་གཅིག་ཨུདུམྺྰ་རར་བཤད། །སྲང་གཉིས་ཁྱོར་གང་ཞེས་བྱར་བཤད། །དེ་གཉིས་ལ་ནི་གཉིས་པར་བཤད། །
དེ་ལ་རྩྭ་སྐམ་དག་ལས་སྲང་། །བརྒྱད་བརྒྱ་ཏ་ལ་རན་པ་ཡིན། །རློན་པ་དེའི་འདབ་སྙེ་མར་བཅས། །བཞི་བརྒྱ་ཉིན་མཚན་གཅིག་ལ་རན། །ཐུག་སོགས་ལ་ནི་བྲེ་བཞི་ཙམ། །བཟའ་སྐམ་བྲེ་ནི་ཕྱེ་དང་གཉིས། །སྣུམ་ལས་ཕུལ་གང་བཏུང་བ་ནི། །བྲེ་གང་སྦྱིན་པར་ཤེས་
པར་བྱ། །སྦྲང་རྩི་ལས་ནི་ཕུལ་གང་སྦྱིན། །བུར་མ་ལས་ནི་སྲང་བརྒྱད་སྦྱིན། །ཧྭགས་དང་ཁ་ར་གང་ཡིན་པ། །སྲང་ནི་བཅུ་ཡི་ཚད་དུ་སྦྱིན། །སྣ་སྨན་ཁུ་བ་ཕུལ་གང་སྟེ། །སྣུམ་གྱི་སྣ་སྨན་དེ་ཡི་ཕྱེད། །དུ་བས་བདུག་ལ་ཞོ་དྲུག་སྟེ། །དུ་བ་དྲག་པོ་ཞོ་གཉིས་ཚད། །
སྨན་ཁའི་གོང་བུ་སྲད་བཞི་དག །བད་ཀན་ནད་ལ་སྦྱིན་པར་བྱ། །རྟ་ལ་དགོངས་ཀ་བཏུང་བར་ནི། །ཆང་ནི་བྲེ་གང་བླུད་པར་བྱ། །རྟ་རྣམས་ལ་ནི་ཕྱེ་མའི་སྨན། །བཏགས་པ་སྲང་གཉིས་སྦྱིན་པར་བྱ། །ཟས་དང་སྣུམ་ནི་མཉམ་བྱིན་ཚེ། །སྐོམ་དུ་ཆང་ནི་བླུད་པར་བྱ། །
རྟ་ལ་ལན་ཚྭ་སྲང་ལྔ་ཡི། །ཚད་དུ་བར་ཏུ་སྦྱིན་པར་བྱ། །ལུས་ཀུན་བསྐུ་བྱུག་བྱ་བ་ཡང་། །སྣུམ་ནི་བྲེ་དང་སྦྱར་བར་བྱ། །རྣ་བཀང་ལ་ཡང་སྣུམ་དག་ནི། །སྲང་གཉིས་ཉེ་བར་གཞུག་པར་བྱ། །བསྐུ་བའི་སྣུམ་ལ་སྨན་ལས་ནི། །སྲང་བརྒྱ་ཕྱེ་མར་བཏགས་པ་གཞུག །
ཕྱེ་ལས་བྲེ་ནི་དོ་དག་དང་། །དེ་རུ་བུ་རམ་སྲང་བརྒྱད་གཞུག །མར་ལས་ཕུལ་དོ་བསྲེས་པ་ཡི། །སྐྱོ་མ་དག་ནི་སྦྱིན་པར་བྱ། །ཆུ་སྐྱེས་ཤ་ནི་སྲང་ལྔ་བཅུ། །རླན་ཅན་ཤ་ནི་སྲང་བདུན་ཅུ། །སྐམ་པའི་ཤ་ནི་སྲང་དགུ་བཅུ། །ཤ་ཡི་ཁ་ཟས་ཚད་ཡིན་ནོ། །ཁྲག་བྲེ་དོ་ལ་རྒྱམ་

ཚ་ནི། །སྲང་གཉིས་ཉེ་བར་གཞུག་བྱ་ཞིང་། །སྣུམ་ཡང་སྲང་གཉིས་བཅུག་པ་ནི། །ཁྲག་ཟད་པ་ལ་སྦྱིན་པར་བྱ། །མས་གཏོང་བ་ལ་བྲེ་གང་ཙམ། །དུམ་བུ་གསུམ་དུ་བྱས་ཏེ་གཏོང་། །བཏགས་བ་ལས་ནི་སྲང་གསུམ་ཙམ། །སྲང་རེ་རུ་ནི་
བཅད་དེ་གཏོང་། །འཇམ་རྩི་ཕུལ་བཞི་གཏང་བར་བྱ། །འཇམ་རྩིའི་གོང་མ་ཕུལ་གང་གཏོང་། །མར་ལ་འཇམ་རྩི་གཏོང་བ་ནི། །ཕུལ་དོ་དག་ནི་བྱ་བར་བཤད། །སྨན་ནི་སྲང་བཞིའི་ཚད་དག་ནི། །ཆུ་སྲང་སུམ་ཅུ་རྩ་གཉིས་བསྐོལ། །བཞི་ཆ་ལུས་པར་བྱས་པ་
དག །འདི་ཡི་སྨན་ཁུ་ཡིན་པར་བཤད། །ཆུ་སྨན་བཅུ་དྲུག་འགྱུར་ནང་དུ། །བསྐོལ་བའི་སྨན་ནི་སྲང་བརྒྱ་གཞུག །སྣུམ་ཡང་སྲང་བརྒྱ་བཅུ་གནས་ནི། །བཞི་ཆ་ཆ་གསུམ་བསྲུབ་པར་བྱ། །དེར་ནི་སྣུམ་གྱི་བཞི་ཆ་ཡི། །སྨན་ཕྱེ་བཅུ་ག་ལ་ལྡེ་གུར་བྱ། །དེ་ལ་
ཤ་ཁུ་འོ་མ་ནི། །ཆུ་ཡི་བཞི་ཆ་གཞུག་པར་བྱ། །བསྐོལ་ཆུ་སྨན་དང་སྦྱར་བ་ཡང་། །ཞག་ལོན་པ་ནི་སྦང་བར་བྱ། །བུ་རམ་བསིལ་དུ་འདོད་པ་དང་། །བསྲེགས་ན་སྒྲ་མི་འབྱུང་བ་ཡི། །མཚན་མ་དེ་དང་དང་བར་ནི། །སྣང་ན་ཐོབ་ལ་དབོག་པར་བྱ། །དེ་ནི་ཚོས་
པ་ཡིན་བའི་ཕྱིར། །སྣུམ་དེ་སླར་ནི་བབ་པར་བྱ། །དེ་ནི་བཙགས་པར་གྱུར་ན་ནི། །ཡོན་ཏན་ལྷག་པར་འགྱུར་པ་ཡིན། །སྣུམ་ཞིང་དང་བར་འགྱུར་པ་དང་། །གསལ་བར་གྱུར་ན་མཁས་པ་ཡིས། །སྣུམ་དེ་མདོག་ནི་ཕྱིན་པའི་ཕྱིར། །ཚོས་པ་ཡིན་པར་ཤེས་
བར་བྱ། །དེ་འདྲ་ནང་ཀུན་འཇོམས་བྱེད་ཡིན། །མ་ཚོས་ཆུ་དང་འདྲེས་པ་དང་། །ཚོས་དྲགས་ནག་པོར་གྱུར་པ་ནི། །ནད་ཀུན་འཁྲུགས་བར་བྱེད་པ་ཡིན། །རྨ་དང་སྣ་སྨན་འཇམ་རྩི་ལ། །འཇམ་པར་ཚོས་པ་གཏང་བར་བྱ། །བསྐུ་ལ་ཚོས་དྲགས་བཏུང་བ་ལ། །བར་
མ་ཙམ་ནི་བསྔགས་པ་ཡིན། །མཚོས་སྣུམ་ནི་ནད་སྐྱེད་ལ། །ཚོས་དྲགས་ཕན་པ་མེད་པ་ཡིན། །ལེགས་པར་ཚོས་པའི་སྣུམ་དག་ནི། །རྟ་ཡི་ནད་ནི་འཇིག་བྱེད་ཡིན། །རླུང་མཁྲིས་བད་ཀན་སེལ་བའི་སྣུམ། །བཏུང་དང་བསྐུ་དང་སྣ་སྨན་དང་། །རྨ་དང་འཇམ་རྩི་

ལས་རྣམས་ཏེ། །རྣམ་པ་ལྔ་ལ་གཏང་བར་བྱ། །ཚད་འདི་དག་ནི་རྟ་རྣམས་ལས། །མཆོག་གི་ཡིན་པར་ཤེས་པར་བྱ། །བར་མལ་ནི་བཞི་ཆ་དབྲི། །ཐ་མ་ལ་ནི་ཕྱེད་དབྲིའོ། །སོ་སོའི་ཟས་སྐོམ་ཆོ་ག་དང་། །སུམ་གྱི་ཆོ་ག་ཐ་དད་པས། །ནད་རྣམས་ཞི་བ་ཉིད་
འགྱུར་གྱི། །ཀུན་ལ་གཅིག་ནི་བསྔགས་མ་ཡིན། །ཨུཏྤ་ལ་ནི་ཁ་འབྱེད་པ། །ཟླ་བའི་འོད་ཟེར་ཉིད་ཡིན་ལ། །ཉི་མའི་ཟེར་གྱིས་པདྨ་ནི། །ཁ་འབྱེད་པར་ནི་སྣང་བ་ཡིན། །ཚད་ནི་མེ་སྟོབས་ལས་ཤེས་བྱ། །ཇི་དགའ་སྦྱིན་པར་མི་བྱའོ། །མེ་དྲོད་དེ་ཡང་
རྣམ་བཞི་སྟེ། །རྣོ་རྟུལ་མཉམ་དང་མི་མཉམ་པའོ། །རྣོ་བས་ཤིན་ཏུ་མྱུར་དུ་འཇུ། །རྟུལ་བས་དཀའ་བས་འཇུ་བ་ཡིན། །མ་སྙོམས་པས་ནི་འཇུ་མི་སྙོམས། །སྙོམས་པས་འཇུ་བ་སྙོམས་པ་ཡིན། མེ་དྲོད་རྟུལ་བས་གཟི་མདངས་མདོག །དང་པོ་དང་ནི་
འགྲོས་ཞན་འགྱུར། །མེ་དྲོད་རྣོ་བས་དེ་རྣམས་དང་། །ལྡན་ཞིང་ནད་ནི་ཉུང་བར་འགྱུར། །མེ་དྲོད་སྙོམས་པས་སྟོབས་མདོག །ནད་མེད་འགྲོས་དང་སྐད་དང་ནི། །དབང་པོ་བདེ་ལྡན་ནད་མེད་འགྱུར། །མེ་དྲོད་མི་སྙོམས་སྐད་དང་མདོག །སྟོབས་ཆུང་
ནད་ནི་མང་བ་དང་། །བདེ་བ་མེད་པར་འགྱུར་རོ་ཞེས། །ཤ་ལི་ཧོ་ཏྲས་རྗེས་སུ་བསྟན། །ཤ་ལི་ཧོ་ཏྲའི་མདོའི་གནས་ལ་ཚད་ཀྱི་ལེའུ་སྟེ་བཅུ་བཞི་པའོ།། །།རྟ་བྲེས་ལ་ནི་ལེགས་གནས་པའི། །དྲང་སྲོང་ཆེན་པོ་དབང་པོ་ཐུལ། །མེ་ལ་སྦྱིན་
སྲེག་བྱེད་བརྩོན་ལ། །ལེགས་ཐོས་ལ་སོགས་ཀྱིས་དྲིས་པ། །ཆོད་ཤིས་གང་གི་དོན་འགྱུར་ཞིང་། །གང་གི་ཡོན་ཏན་སྐྱོན་བཤད་པ། །དེ་ཡི་ཟས་ཀྱི་བྱ་བ་ནི། །ལུས་དང་དེས་འབྲེལ་བཀའ་སྩོལ་ཅིག །དེ་སྐད་ཤ་ལི་ཧོ་ཏྲ་ལ། །དྲང་སྲོང་དམ་པ་བུས་
དྲིས་ཚེ། །ཟས་ཀྱི་སྦྱོར་བ་དྲང་སྲོང་ཆེ། །མདངས་དང་ལྡན་པས་སླར་སྨྲས་པ། །ཟས་ཀྱི་སྦྱོར་བས་ཁ་དོག་མདངས། །མགྱོགས་མཛེས་སྙིང་སྟོབས་དྲན་པ་དང་། །འདྲངས་དང་སེམས་ནི་དགའ་བ་དང་། །ན་ཚོད་ལ་ནི་འཇོག་པ་ཡིན། །ལ་ལ་འཚམ་དང་མི་

འཚམ་དང་། །ཟས་ཀྱི་སྦྱོར་བས་བདེ་འགྱུར་བའི། །སྦྱོར་བའི་ཆོ་ག་བཤད་པར་བྱ། །བཤད་པ་དེ་ནི་མཉན་པར་གྱིས། །མེ་དྲོད་ཆུང་དང་ཡིད་མི་བདེ། །ལྟོ་བ་ན་དང་དབུགས་མི་བདེ། །དུབ་ཅིང་ཁལ་གྱིས་ཉེན་པ་དང་། །དུག་འཐུངས་བ་དང་སྐམས་པ་
དང་། །ལམ་འགྲོ་མཚན་ནི་མི་ལྡང་དང་། །དུབ་ལའང་ཁ་ཟས་མི་སྦྱིན་ནོ། །སྟོབས་ལྡན་ལྕི་བའི་ཁ་ཟས་ནི། །དེ་ལ་སྦྱིན་པར་མི་བྱའོ། །ལམ་གྱིས་ཉམ་ཆུང་གྱུར་སྟོབས་བྲི། །རྒན་དང་རབ་གཞོན་དབང་ཉམ་ཆུང་། །རྩ་དང་འབྲས་དང་གློ་གཅོང་ཅན། །ཟས་སྦྱོར་རྟག་ཏུ་
བྱ་བར་རིགས། །གང་ཚེ་ཕྱི་དྲོའི་དུས་སུ་ནི། །སྐྱེས་བུ་གསུམ་པོའི་གྲིབ་མ་ལྷགས། །ཅུང་ཟད་ལྷག་པའམ་མཆང་བའམ། །ཟས་སྦྱོར་བྱ་བའི་དུས་ཡིན་ནོ། །འབྲས་བྲེ་གང་ནི་ལེགས་བཙོས་ལ། །དེ་རྗེས་ཆ་དང་བསྲེ་བར་དང་། །སྣུམ་དང་ལྡན་པར་བྱས་པ་ནི། །བྱིན་ན་
ལེགས་པར་འཇུ་བར་འགྱུར། །དང་པོར་སྣུམ་དང་ལྡན་པ་ཡི། །རྗེས་ལ་ལན་ཚྭར་ལྡན་པ་དང་། །ཟས་སྦྱོར་འདི་ནི་སྐོམ་དང་དག །མི་སྐྱེད་ལེགས་པར་འཇུ་པར་འགྱུར། །ཞོ་དང་ཀུལངྠའི་ཁུ་བ། །ཆང་དང་སྦྲང་རྩི་ཀཉྫི་དང་། །ཏིལ་མར་བསྲེས་པས་མཉེན་བྱ་མིན། །
ཁུ་བ་གཞན་དང་བསྲེ་མི་བྱ། །ཀཉྫི་དང་ནི་ཤ་ཁུའམ། །འོ་མ་འམ་ཡང་ན་ཧྭགས་དང་ནི། །འདི་དག་མཉེ་བ་སྦྱིན་བྱ་ཞིང་། །ཡང་ན་ཏིལ་མར་སྦྱར་བའང་རུང་། །ཞག་དང་ཏིལ་མར་མར་སྦྱར་བ། །གསུམ་པོ་སྦྱར་བ་ཞེས་བྱའང་བསྐུ། །དེ་ལ་ཤ་ཁུ་མཆོག་ཡིན་ཏེ། །དེ་དང་ཉེ་
བར་བྱ་བ་ཡི། །ནས་དང་མ་ཤ་གྲོ་དང་ནི། །དྲུག་ཅུ་པ་ཡི་སྦྱོར་བ་གང་། །དེ་ནི་འོ་མའམ་སྦྲང་རྩིའམ། །མར་དང་སྦྱར་བས་མཉེ་བར་བྱ། །འདི་དག་དང་ནི་མཉེ་བའི་ཚེ། །དེ་རུ་ལན་ཚྭ་གཞུག་མི་བྱ། །རླུང་དང་བད་ཀན་གྱིས་ཉེན་དང་། །རྟ་ཡི་སྣུམ་མང་འཐུངས་པ་དང་། །
མེ་དྲོད་ཆང་དང་མི་སྙམས་དང་། །སྦེགས་ལ་ལན་ཚྭར་བཅས་པ་གཏང་། །མཉེ་བའི་སྦྱོར་བ་བྱ་བ་དང་། །ཆང་དང་ཆང་སྙིང་ཞོ་ག་ཆུས། །ལྟོ་བའི་མ་ཞུ་རྣམ་སྦྱར་ཞིང་། །ཁ་ཆུའི་རྒྱུན་ནི་འཛག་པར་བྱ། །ཁོང་པའི་སྲིན་བུ་ཡོད་པ་ལ། །བ་གཅིན་དང་སྦྱར་སྦྱིན་པར་བྱ། །གང་

ཞིག་རྒན་དང་ལུད་པ་ཅན། །དེ་ལ་ཁ་ཟས་སྐམ་མི་སྦྱིན། །དེ་ལྟ་བུས་སྣུམ་དང་ནི། །བཅས་པའི་ཟས་ཀྱི་སྦྱོར་བ་བྱ། །རྟ་ལ་ཟས་ནི་སྦྱིན་པ་ནི། །མགོ་བོ་གྱེན་དུ་ལེགས་བསྟན་ནས། །ཟས་ཞི་ཁམ་རེ་བཅད་ནས་ནི། །མྱུར་མིན་འགོར་བ་མེད་པར་སྦྱིན། །ནས་ཐུག་མར་དང་
ལྡན་པའམ། །ཡང་ན་ཚག་ཚེ་མར་གྱིས་སྦངས། །རྟ་རྣམས་རྟས་བྱེད་དམ་པ་ཡིན། །མཁྲིས་པ་ཅན་ལ་མཆོག་ཏུ་ཕན། །ཚག་ཚེ་ནས་ཐུག་སྣུམ་མེད་པ། །ལན་ཚྭ་དང་ནི་ལྡན་པ་རུ། །བཅའ་ལྒ་བཏབ་པར་གྱུར་པ་ནི། །བད་ཀན་ཅན་ལ་སྦྱིན་པར་བྱ། །རྒྱམ་ཚ་དང་
ནི་བཅས་པ་དང་། །མ་ཤ་རི་ལ་མ་ར་བཅུག་པ། །རླུང་ནད་ཅན་ལ་ཕན་མོད་ཀྱི། །དེ་ལས་མཁྲིས་པ་སྐྱེ་བ་བསྲུང་། །ཤ་རྣམས་སྣ་ཚོགས་དག་དང་ནི། །བད་ཀན་ཅན་ལ་ཆང་བླུད་ཅིང་། །མཁྲིས་པ་ཅན་ལ་འོ་མ་བླུད། །རླུང་ནད་ཅན་ལ་ཤ་ཁུ་སྦྱིན། །མཁྲིས་པ་
ཅན་ལ་རབ་བསིལ་བ། །རླུང་ནད་ཅན་ལ་དྲོ་འཇམ་ཙམ། །ཅུང་ཟད་དྲོ་འཇམ་བད་ཀན་ཅན། །ཟས་དང་སྐོམ་ནི་སྦྱིན་པར་བྱ། །རྒུད་ཅིང་སྣུམ་ནི་མེད་པ་དང་། །ཡང་ཤིང་ཚད་ལས་ཆུང་བ་ནི། །བད་ཀན་ཅན་ལ་སྦྱིན་བྱ་ཡི། །ཁ་ཟས་སྣུམ་པའང་མི་སྦྱིན་ནོ། །ཆུ་དྲོན་
གྱིས་ནི་ཁ་བཀྲུས་ལ། །ཁ་འགྲམ་ལེགས་པར་བལྟས་ནས་ནི། །མཉེས་ལ་སྣ་སྨན་བཏང་ནས་ནི། །དེ་ཡི་འོག་ཏུ་འདྲེ་རུ་གཞུག །དེ་ཡི་མོད་ལ་རྩྭ་མོ་སྦྱིན། །ཁྱད་པར་དུ་ནི་སྔོ་མི་སྦྱིན། །དེ་ཚེ་ལམ་འགྲོ་དུབ་པའམ། །ཆུ་རྒལ་བ་ནི་བསྔགས་མ་ཡིན། །ཟས་སྦྱིན་
འོག་ཏུ་བཏུང་བ་ནི། །ཆུ་བྲེ་ཕྱེད་ནི་བླུད་པར་བྱ། །དེས་ནི་དྲོད་སྐྱེད་ནད་གཞི་སེལ། །ལེགས་པར་འཇུ་བར་བྱེད་པ་ཡིན། །མགྱོགས་ཤིང་སྟོབས་དང་ལྡན་པ་དང་། །ཤ་མཁྲེགས་དབང་པོ་བརྟན་པ་དང་། །ཁལ་དང་ཁུར་ལ་སྲན་ཆེ་བར། །ཟས་དེ་ཡིས་ནི་འགྱུར་བ་
ཡིན། །རྙིང་དང་འབུ་ཡིས་ཟོས་པ་དང་། །ཚིག་དང་དུ་བས་ཁྱེར་བ་དང་། །གཡུ་ལས་ཆར་གྱིས་ཉེན་པ་ཡི། །རྩྭ་ནི་རྟ་ལ་མི་བསྔགས་སོ། །སྐྱོན་མེད་པ་ནི་ནས་བས་ཀྱང་། །ཡི་གར་འོང་ཞིང་ཟོས་པས་སྲེད། །དེ་ནས་རྟ་ཡི་འཚོ་བ་ནི། །རྩྭ་ཡིས་ངེས་པར་

བསྡུས་པ་ཡིན། །ལྗང་པ་དགའ་ཞིང་ཡི་གར་འོང་། །མེ་དྲོད་གཟི་མདངས་སྲེད་འཕེལ་བྱེད། །དེ་ཕྱིར་རྟ་ཡི་ལྗང་པ་ཡིན། །ཟོས་ན་དེ་འདྲར་འགྱུར་བ་ཡིན། །ལྗང་པ་ཚད་ལྡན་བྱིན་ན་ནི། །ནད་རྣམས་སྐྱེ་བར་མི་འགྱུར་ཞིང་། །རིགས་པར་ལྗང་པ་
བྱིན་པ་ཡིས། །སྐྱེས་ཟིན་ནད་ཀྱང་འཇུ་བར་འགྱུར། །བོང་པ་སྤུ་ཤེལ་ཚ་བ་གསུམ། །བྱི་དང་ག་དང་དུག་མོ་ཉུང་། །འབྲས་བཏགས་ཆང་དང་སྦྱར་བ་ནི། །མདོག་དང་ཆེ་ནི་འཕེལ་བྱེད་མཆོག །འོ་མ་མར་དང་མ་ཤར་བཅས། །ཏིལ་བཏགས་སྦྱར་བ་ཞོ་ཅན་ཡིན། །
མ་ཤའི་ཕྱེ་ལ་ལན་ཚྭར་བཅས། །སྟོབས་སྐྱེད་བྱེད་པ་གཞན་དག་གམ། །སཱ་ལུའི་ཕྱེ་མའང་སྦྲང་རྩིར་བཅས། །བི་ད་རི་དང་ལྡན་པ་ནི། །འོ་མ་སྦྱར་བ་ཞག་གསུམ་བྱིན། །སྟོབས་དང་ཁ་དོག་འཕེལ་བྱེད་ཡིན། །ཞོ་དང་སྐྱུར་རྫས་ལན་ཚྭ་དང་། །མར་དང་བཅས་
པར་དཀྲུགས་པ་ནི། །ནས་དང་སྦྱར་བྱིན་ལུས་ཟུངས་བཟང་། །སྟོབས་དང་ཁ་དོག་སྐྱེད་བྱེད་ཡིན། །སྐམས་དང་ཆུ་ལ་རྐྱལ་བ་དང་། །རྩྭ་ནི་སྔོན་པོ་དག་དང་ནི། །གང་ཞིག་ཁ་ཟས་མངར་བ་དང་། །མར་ལ་སོགས་དང་སྦྱར་བ་དང་། །ཤ་ལ་སོགས་
བཅས་བསིལ་བ་སྟེ། །དྲུག་པོ་འཕྲལ་དུ་སྲོག་སྟེར་ཡིན། །འབྲོག་ཏུ་རྩྭ་ནི་སྣ་ཚོགས་ལས། །རྩྭ་གཅིག་ལ་ནི་སྲེད་པ་གང་། །གོམས་པས་བསྟེན་པ་ཡིན་ཞེས་བྱ། །རོ་ཡི་གོམས་པ་ཟས་སྦྱོར་ལས། །དེ་ཡི་རོ་ལས་ཤེས་པར་བྱ། །བྱ་བའི་སྦྱོར་བས་ལུས་
འཕེལ་འགྱུར། །གཞན་གྱིས་ཟོས་དེ་གང་བོར་དང་། །གང་ཞིག་རྩ་ནས་བྱུང་བ་དང་། །ནང་དུ་རུལ་བར་གྱུར་པ་ཡི། །རྩྭ་ནི་ཤིན་ཏུ་སྟོབས་འཕྲོག་བྱེད། །ཤ་ལི་ཧོ་ཏྲའི་མདོའི་གནས་ལས་ཟས་ཀྱི་སྦྱོར་བའི་ལེའུ་སྟེ་བཅོ་ལྔ་པའོ།། །།གང་ཞིག་
ཟས་སྦྱོར་སྣ་ཚོགས་ཀྱིས། །འབད་པ་མང་པོས་བསྒྲུབས་བྱས་པ། །མཛེས་པ་ཞེས་འདི་གྲགས་པ་འདི། །ཅི་འདྲ་རྣམ་པ་དུ་ཞིག་མཆིས། །ལེགས་ལྡན་དེ་ནི་གསུངས་ཤིག་ཅེས། །དེ་ལྟར་ལེགས་ཐོས་ཀྱིས་བསྐུལ་ཏོ། །ཤ་ལི་ཧོ་ཏྲ་དྲང་སྲོང་ཆེས། །གོ་

རིམས་དེ་ནི་སླར་སྨྲས་པ། །ལྗང་པ་ཟས་དང་སྐོམ་རྣམས་དང་། །དེ་བཞིན་མར་དང་སྣུམ་ཚོགས་ཀྱིས། །སོས་པར་གྱུར་ཚེ་མཛེས་གྱུར་ཏེ། །དེ་ནི་རྣམ་པ་ལྔར་བཤད་དོ། །བྲག་བཅས་ཞེས་བྱ་དང་པོ་སྟེ། །གཉིས་པ་རྩིབ་ལོགས་འགེངས་བྱེད་ཡིན། །གསུམ་པ་
སྟོབས་ནི་སྐྱེད་པ་སྟེ། །བཞི་པ་ཤ་ནི་རྒྱས་པ་ཡིན། །ལྔ་པ་ལུད་པ་ཅན་ཞེས་བྱ། །དེ་ལྟར་རྣམ་པ་ལྔར་བཤད་དོ། །འདི་དག་རྣམས་ཀྱི་མཚན་ཉིད་ནི། །སོ་སོར་བཤད་ཀྱི་ཉན་པར་གྱིས། །མཚན་དང་རླིག་པ་རྨོང་ཀ་དང་། །རྐུབ་དང་བྲང་དང་རྩ་སྦུབས་རྣམས། །
ཁྲག་དང་ཤ་ནི་སྲབ་པ་ཡིས། །མཉེན་ཞིང་ཁྲག་གིས་རྒྱས་འདྲ་བ། །དེ་ནི་ཁྲག་བཅས་མཛེས་ལ་གནས། །རྟ་ནི་གདུལ་སྦྱོར་དག་ལ་སྦྱར། །ཡན་ལག་ཤ་ནི་འཇམ་པོ་ཡིས། །ཅུང་ཟད་གཡོགས་པར་གྱུར་པ་དང་། །ཕྲག་སོ་བྲང་སོགས་ཤ་སྐྱེས་པ། །
སྟོབས་ལྡན་རྩིབ་ལོགས་འགེངས་བྱེད་ཡིན། །རྐེད་པ་བརླ་ནི་ཤ་རྒྱས་ཤིང་། །རྩིབ་མ་ཤས་ནི་ལེགས་པར་ཁེབས། །སྟོབས་ཆེ་ན་ཅུང་ཟད་མ་རྫོགས་པ། །མཛེས་པ་དང་ནི་སྟོབས་སྐྱེས་ཡིན། །འདིར་ནི་ཇི་ལྟར་དགའ་བ་རུང་། །བཞོན་བའི་དོན་དུ་བཤད་པར་བྱ། །
ཅུ་ནུས་པར་ནི་བཀོལ་བ་ཡང་། །དེ་ནི་ཉམ་ཆུང་གིས་འགྱུར་རོ། །ཤ་ནི་རྒྱས་པར་གྱུར་པའི་རྟ། །བྱ་བ་ཀུན་ལ་ནུས་པར་ལྡན། འདྲེགས་པར་བཅས་ཤིང་མཛེས་དང་བཅས། །དཔའ་ཞིང་སྟོབས་ལྡན་དཔའ་བ་དང་། །ཚིགས་སུས་རྩིབ་ལོགས་རྐེད་པའང་། མཇུག་
དོ་དང་ནི་ཤར་ནུས་ཟླུམ། །ཟེའུ་ནས་རྔ་སྙིང་བར་དུ་ནི། །དམའ་ཞིང་གང་གི་རི་མོ་ཆགས། །ཤ་ནི་ཤིན་ཏུ་རྒྱས་གྱུར་བ། །ཤ་ནི་ཤིན་ཏུ་རྒྱས་གྱུར་པ། །དེ་ནི་ལུད་པ་ཅན་ཞེས་བྱ། །མཛེས་པ་འདི་དང་ལྡན་པའི་རྟ། །བྱ་བ་ཐམས་ཅད་བདེ་བླག་ནུས། །ཤ་རྣམས་འཕྱང་ཞིང་དབུགས་མི་བདེ། །
རྔུལ་དང་དུབ་པའི་ཤས་ཆེ་བ། །ཁྲུ་སྨན་ལེགས་པར་བཏང་བ་ཡིས། །འདི་ནི་ཉམ་སྨད་ཉིད་དུ་བྱ། །དེ་ཡན་ཆད་ནི་ཤ་རྒྱས་པར། །རྟ་ནི་ནམ་ཡང་མི་བྱའོ། །ཚིལ་ནི་ཤིན་ཏུ་ཆེས་གྱུར་པ། །དེ་ཡིས་ལས་སྦྱོར་མི་ནུས་འགྱུར། །གསོ་དཀའ་པ་ཡི་ནད་ལྡན་ན། །རིགས་

པས་ལེགས་པར་གསོ་བར་བྱ། །ཟས་ཀྱི་སྦྱོར་སོགས་སྤང་བ་དང་། །རིམ་གྱིས་དབྲི་ཞིང་སྦྱར་བར་བྱ། །ཉམས་སྨད་དྲགས་པའམ་མྱུར་དུ་ནི། །བྱས་ན་མ་གོམས་དབང་གིས་འཆི། །མེ་དྲོད་ཁོང་ནས་འབར་གྱུར་ལ། །རྒྱུ་བའི་ལམ་ནི་ཚིལ་གྱིས་བཀག །
སྣུམ་རྣམས་བྱིན་པར་གྱུར་པ་ནི། །དེ་ནི་ཉེ་བར་རྒྱས་པར་འགྱུར། །དེ་བས་བདེ་བ་དྲགས་པ་དང་། །ཉམས་སྨད་དྲགས་པར་མི་བྱའོ། །དེ་དག་གཉི་ག་དྲགས་པ་ཡིས། །གསོར་མི་རུང་བ་ཉིད་དུ་འགྱུར། །གྲིབ་མ་འདོད་དང་སྐོམ་དད་ཆེ། །ལུད་པ་དབུགས་མི་བདེ་བས་ཉེན། །
ཁུ་བཞིའི་ནད་ནི་མང་བ་དང་། །གཅིན་མང་བདེ་བ་མེད་པ་དང་། །གང་ཞིག་བདག་ཉིད་སྡུག་བསྔལ་ཞིང་། །ཉམ་ཐག་པར་ནི་འགྲོ་གྱུར་ལ། །ལམ་འཇུག་པར་ནི་མི་ནུས་པ། །དེ་ནི་གྲང་དྲགས་ཚ་དྲགས་པའི། །བཀྲེས་དང་སྐོམ་པ་མི་བཟོད་
པས། །མཛེས་འདོད་རྟ་ནི་སྐྱིད་ཆོས་དག །ཤིན་ཏུ་དྲགས་པར་མི་བྱའོ། །བཀོལ་དུ་མེད་ཅིང་ལུས་ཉམ་ཆུང་། །གཟི་མདངས་ཆུང་ཞིང་སྟོབས་མེད་ལ། །ལས་ལ་སྦྱོར་བར་མི་ནུས་པ། །དེ་ནི་མཛེས་བར་མི་འདོད་དོ། །ཤ་ལི་ཧོ་ཏྲའི་མདོའི་གནས་ལས་མཛེས་པའི་ལེའུ་
སྟེ་བཅུ་དྲུག་པའོ།། །།ཤ་ལི་ཧོ་ཏྲ་དྲང་སྲོང་མཆོག །ལེགས་ཐོས་ཀྱིས་ནི་ཡང་དྲིས་པ། །གཟུགས་ནི་གང་དག་ཉིད་ཀྱིས་ན། །རྟ་ནི་གཟུགས་སྡུག་འགྱུར་བ་ལགས། །སྤྱོད་པ་དང་ནི་མཚན་དག་སྟེ། །དེ་ནི་བདག་ལ་ལུང་བསྟན་སྩོལ། །དེ་ནས་རྟ་ཡི་མཚན་
མཁས་པ། །ཤ་ལི་ཧོ་ཏྲས་སླར་སྨྲས་པ། །རྟ་ཡི་ཡན་ལག་ཉིང་ལག་གི །སྐྱོན་མེད་མཚན་ཉིད་མཉན་པར་གྱིས། །མཚན་ཉིད་སུམ་ཅུ་དྲུག་ལྡན་པ། །གང་གིས་དེ་ནི་བསྔགས་པ་ཡིན། །རིགས་དང་མཚན་ཉིད་ནད་མེད་དང་། །ལུས་ཀྱང་སྨད་པ་མེད་གྱུར་པ། །གང་
ལ་འདི་བཞི་ཡོད་པ་ཡི། །རྟ་དེ་བསྔགས་པར་འོས་པ་ཡིན། །གང་ཞིག་དབུགས་ནི་ཆེར་འབྱིན་ཅིང་། །མིད་པ་སྲབ་པར་མངོན་པ་དང་། །སྣ་ཡི་སྦུབས་ནི་མི་མཐུག་པ། །རྟ་ནི་རབ་ཏུ་བསྔགས་པ་ཡིན། །མཆུ་ལྟག་མཉམ་ཞིང་ཟླུམ་པ་དང་། །ཆེ་བར་གྱུར་ན་བཟང་

བ་ཡིན། །མ་མཆུ་སྲབ་ཅིང་མཉེན་པ་དང་། །མི་འཕྱང་ན་ནི་བསྔགས་པ་ཡིན། །སོ་ནི་ཐམས་ཅད་སྙོམས་པ་དང་། །ཐགས་བཟང་དཀར་ཞིང་ནག་མཐོ་ལ། །སྣུམ་ཞིང་སྲབ་པར་གྱུར་པ་དང་། །མཚན་ཉིད་ལེགས་པར་ལྡན་ན་བསྔགས། །རྐན་ནི་སྲབ་ཅིང་གཉེར་མ་ཆགས། །
ཟབ་ཅིང་དམར་བ་བསྔགས་པ་ཡིན། །ལྕེ་ནི་སྲབ་བཅིང་མཉེན་པ་དང་། །རྩ་མཐུག་རྒྱ་སྐྱེགས་འདྲ་བ་ལ། །ཁྱི་ཡི་ལྕེ་དང་དབྱིབས་འདྲ་བའི། །རྟ་ནི་བསྔགས་པར་གྱུར་པ་ཡིན། །མགོ་བོ་ཕྲ་མིན་སྦོམ་པ་མིན། །ལུས་དང་འཚམ་པར་གྱུར་པ་དང་། །འགྲམ་གླང་ཆེ་བར་
གྱུར་པ་ནི། །བསྔགས་པར་གྱུར་པ་ཉིད་ཡིན་ནོ། །དཔྲལ་བ་མཉམ་ཞིང་ཡངས་ལ་ཆེ། །པགས་པ་སྲབ་ཅིང་མི་གྱོང་ལ། །དབུས་ན་གཙུགས་འཁྱིལ་གནས་པ་དག །གད་ཡིན་དེ་ནི་བསྔགས་པ་ཡིན། །རྟ་ཡི་མིག་ནི་མིག་མཆུ་དག །སྲབ་ཅིང་ལེགས་གནས་རྫི་མ་
སྲབ། །མིག་འབྲས་ཀྱི་ནི་མཐའ་མ་དག །ལེགས་པར་དཀར་ཞིང་དབུས་ནག་ལ། །གང་ཞིག་གཟུགས་ཀྱི་མདོག་སྡུག་ཅིང་། །ཕྲ་ཞིང་ཐག་རིང་མཐོ་བ་དང་། །གླང་པོའི་མིག་འདྲ་མེ་ཏོག་ནི། །མ་ལི་ཀ་ཡི་སྙིང་པོ་འདྲ། །ཤེལ་ལྟར་ཡོངས་སུ་དང་བ་དང་། །མཐོང་
བ་བརྟན་པ་བསྔགས་པ་ཡིན། །རྣ་བ་སྲབ་ཅིང་མཉེན་པ་དང་། །སྤུ་སྲབ་ཐུང་བར་གྱུར་པ་དང་། །གང་གི་སྐྲ་གྲགས་ཕྲ་བ་དང་། །ཐག་རིང་བ་ཡང་ཐོས་པ་བཟང་། །གདོང་པ་གསལ་ཞིང་རྩ་མི་མངོན། །ཤ་སྲབ་ཤམ་ཐུག་མ་ཡིན་ཞིང་། །དཔྲལ་མཚམས་ཆུང་ཞིང་
རྔོག་རིང་བསྔགས། །སྐེ་མགྲིན་ཤ་རྒྱས་རིང་བ་དང་། །རྣ་ལྟག་རྣ་མཆན་ལེགས་པར་གནས། །པགས་སྲབ་རིམ་གྱིས་སྦོམ་པར་ནི། །གྱུར་པ་དེ་ནི་དགེ་བ་ཡིན། །ཕྲག་སོ་ལེགས་འབྲེལ་ན་མཚོར་ནུབ། །རྔོག་མཐའ་ལེགས་པར་འདུས་པ་དང་། །རིང་ཞིང་
ཁ་ཞེང་ཆེ་ན་བཟང་། །བྲང་ནི་མཐུག་ཅིང་ཡངས་ལ་མཁྲེགས། །སྲ་ཞིང་གཉེར་མ་མེད་པ་དང་། །བར་ཡངས་དཔུང་སྣ་ཆེ་བ་དང་། །འདི་འདྲ་བ་དག་བསྔགས་པ་ཡིན། །དཔུང་པ་མཁྲེགས་ཤིང་ཡངས་པ་དང་། །ཟླུམ་ཞིང་སྦོམ་ལ་རྩ་མི་མངོན། །རིམ་གྱིས་ཕྲ་བར་

གྱུར་བ་ནི། །རྟ་ལ་བསྔགས་པར་གྱུར་པ་ཡིན། །ལག་རང་ཕྲ་མོ་རིམ་གྱིས་ཕྲ། །པུས་མོ་ཟླུམ་པར་གྱུར་པ་དང་། །མཉེན་ཞིང་བསྐྱེད་པར་བདེ་བ་དང་། །རྟ་ལ་བསྔགས་པར་གྱུར་པ་ཡིན། །ཕྱི་གྲང་རིང་ཞིང་དབྱིབས་ལེགས་པ། །ཤ་སྲབ་རྩ་
རྒྱུས་མི་མངོན་སྲབ། །པགས་སྲབ་ཤིན་ཏུ་ཟླུམ་པ་ཡི། །རྟ་ནི་བསྔགས་པར་གྱུར་པ་ཡིན། །ཚེའུ་ཚེ་ལེགས་སྐྱེས་མཉམ་ཞིང་ཟླུམ། །དོད་ཅིང་སྙོམས་པར་གྱུར་པ་དང་། །སྤུ་ཕྲ་པགས་པ་སྲབ་པ་ཡི། །རྟ་ནི་བཟང་པོར་བཤད་པ་ཡིན། །རྨིག་པ་སྲ་ཞིང་དཀྱིལ་
ལགས་ལ། །བོང་བུའི་རྨིག་པ་འདྲ་བ་དང་། །སྦལ་པ་ནུབ་ཅིང་ལེགས་པར་འབྱར། །ཆ་མཉམ་པར་ནི་འགྲོ་བ་དང་། །རྒྱ་ནི་ཟབ་མོ་དང་འདྲ་ཞིང་། །རྨིག་སྒྲོས་སྙོམས་ཤིང་སྲ་བ་དང་། །མཁྲེགས་ཤིང་གཉེར་མ་མེད་པ་ཡི། །རྟ་ནི་བར་ཏུ་བསྔགས་པ་ཡིན། །རྒྱབ་
སོ་ཐུང་བབ་རབ་ཏུ་བསྔགས། །རྩིབ་མ་ལེགས་པར་སྐུ་བ་དང་། །ངོས་གཉིས་ལེགས་པར་སྐྱེ་བ་བསྔགས། །སྒ་འོག་གནས་ནི་ཁང་པ་བཟང་། །ལྟོ་བ་ཟླུམ་ཞིང་རྩིབ་མའི་ནང་། །འདུས་པ་ལྟར་འདུག་བསྔགས་པ་ཡིན། །ཨོང་དོ་ཡངས་ཤིང་ཆེ་ལ་འཇམ། །སྤུ་ཡི་
ཚོགས་ཀྱིས་ཁེབས་པ་བཟང་། །མཇུག་མ་རྔ་མ་ཕྲ་ཞིང་འཇམ། །མཇུག་རྩ་ཨོང་དོ་ལེགས་པར་འབྲེལ། །མཇུག་མའི་ཕྱོགས་སུ་དང་པོར་སྐྱེས། །རྟ་ནི་བསྔགས་པར་གྱུར་པ་ཡིན། །རྐུབ་ནི་ཟླུམ་ཞིང་ལེགས་པར་འཛུམས། །ཐུང་ཞིང་གཉེར་མ་ལེགས་པར་གནས། །
གང་གིས་རྟ་སྦངས་ལེགས་པར་འབྱིན། །དེ་ནི་བསྔགས་བར་གྱུར་པ་ཡིན། །རླིག་པ་མཉམ་ཞིང་ལེགས་པར་སྐྱེས། །སྦུ་མེད་པར་ནི་གྱུར་པ་དང་། །བིལ་བ་ཆུང་ངུའི་ཚོད་ཙམ་ཞིག །མ་འཕྱངས་གྱུར་པ་བསྔགས་པ་ཡིན། །རྟ་ཡི་ཕོ་མཚན་རིམ་གྱིས་ཕྲ། །ཐུང་ཞིང་དྲང་
ལ་མྱུར་དུ་འབྱིན། །གཏིང་རིང་ཁ་དོག་གཅིག་པར་ནི། །རྟ་ལ་བསྔགས་པར་གྱུར་པ་ཡིན། །རྗེ་ངར་རྒྱབ་མཐོང་ཡ་ཡོ་མེད། །ཤ་སྲབ་གུག་པ་མ་ཡིན་ཞིང་། །མཉམ་ཞིང་མ་འཁུམས་དབྱིབས་ལེགས་པའི། །རྟ་ན