Luận tạng Tây Tạng (Tengyur) — Tập 203

ང་འབྲས་ཟན་ཁྱེར་ཤོག་ཅེས་གསུངས་སོ། །དེར་གསོལ་ནས་གསུངས་པ། གཤིན་རྗེའི་མི་ཤིན་ཏུ་འཇིགས་པ་བཞིས་ང་ཐག་རིང་པོར་ཁྱེར་ཏེ་རི་ཅིག་རྩེ་ལ་སླེབ་པ་དང་། །འོད་དཀར་པོ་ཟླ་བའི་འོད་པས་ཆེས་ལྷག་པ་ནམ་མཁའ་ལ་བྱུང་བའི་རྗེས་ལ་ཐུགས་རྗེ་ཆེན་པོ་དོན་ཞགས། རྟ་མགྲིན། སྒྲོལ་
མ། ནོར་བཟངས་དང་བཞི་ནམ་མཁའ་ལ་བྱོན་པ་མཐོང་སྟེ། དེས་གཤིན་རྗེ་དག་ཤིན་ཏུ་བྲད་ནས་འདར་རོ། །དེར་མི་དག་རྟ་མགྲིན་གྱི་དབྱུག་ཏོས་བརྡུངས་བས་བཅོམ་ལྡན་འདས་ཀྱི་ཞལ་ནས་སྙིང་རྗེ་མ་བྱེད་གསུངས་བས་རྟ་མགྲིན་བྱི་ཞལ་ནས་འོ་སྐོལ་གྱི་མི་ལ་འདིར་བར་ཆད་བྱེད་པ་མི་རིགས་གསུང་ངོ་། །དེར་བཅོམ་
ལྡན་འདས་ཀྱི་ཞལ་ནས་ད་ཆོག་གིས་འདི་ཕ་གི་མ་ཚིག་པ་ལ་ཅིག་ཅར་སྐྱོལ་ཞེས་གསུངས་སོ། །དེར་བཞི་བོས་འདིར་བསྐྱལ། སྐྱེལ་གྱི་བར་དུ་མཐོང་། ད་ནས་མ་མཐོང་སྟེ་ད་ངའི་ནད་དྲག་བར་ཐེག་ཅེས་གསུང་ངོ་། །དེ་ནས་པཎྜི་ཏ་གྲུབ་ཐོབ་ཏུ་གགས་ཏེ་བླ་མ་ཤཱཀྱ་ཤྲཱི་དང་བུངྔྷཤྲཱི་ལ་སོགས་པ་མང་པོ་

འདུས་ཤིང་གྲགས་པ་ཤིན་ཏུ་ཆེ་སྐད་དོ། །པཎྜིཏ་རྣམ་པར་གྲགས་པའི་ལྷས་ཐུགས་རྗེ་ཆེན་པོ་ལ་གྲུབ་པ་ཐོབ་པའི་གཏམ་རྒྱུད་པཎྜིཏ་བི་ན་ཡཤྲཱི་མིཏྲས་བསྒྱུར་རོ།། ༄༅༅། །ན་མོ་ལོ་ཀེ་ཤྭ་ར་ཡེ། ཤིང་བཟོ་བས་གྲུབ་པ་ཐོབ་པ་ནི། ཛ་ག་ཏ་ལར་གར་ལོག་བྱུང་བའི་ཚེ་མི་
རྣམས་ཀྱིས་ཤར་ཕྱོགས་བྷཾ་ག་ལར་བྲོས་སོ། །ལམ་ཀན་ཤིང་བཟོ་བའི་བུ་ཅིག་ཡོད་པས་མཐོང་ནས་བྲོས་པའི་དགེ་འདུན་རྣམས་ལ་བརྐྱང་ཕྱག་བཙལ་ཞབས་སྤྱི་བོར་བླངས། བསྙེན་བཀུར་བྱས་སྐད། དེར་དེ་ལྟར་བྱས་པའི་རྒྱུ་མཚན་དྲིས་པས། དེ་ན་རེ་བ་དག་གི་ཕ་དད་པ་ཆེ་པས། །རབ་བྱུང་
ཅིག་ལ་བསྙེན་བཀུར་བྱས། དེས་ཀྱང་ཐུགས་རྗེ་ཆེན་པོའི་སྒོམ་བཟླས་བོག་ནས་ཉམས་སུ་བླངས། དུས་རིང་ཞིག་ན་ནད་ཀྱིས་བཏབ་ནས་ཤི་སྟེ་དུར་ཁྲོད་དུ་ཤིང་བརྩིགས་ཏེ་དཀྱིལ་དུ་བཅུག་ནས་མཐའ་ནས་མེ་སྦར་བ་དང་ཐོན་བྱུང་། དེར་དྲིས་བས་ང་ཁྱིམ་དུ་ཐེག་བཤད་དོ་ཞེས་ཟེར་རོ། །
དེར་བཏེག་ནས་སྨྲས་པ། ང་གཤིན་རྗེའི་སྐྱེས་བུ་ཤིན་ཏུ་འཇིགས་པ་བཞིས་ཁྱེར་ནས་དམྱལ་བའི་གནས་སུ་བཀུམ་པ་ན་ར་ཀའི་ནང་མེས་གང་བར་བཅུག་པ་དང་། དེར་བཀུམ་པ་ནར་ཀ་ཁ་ཟུམ་ནས་མ་ཚུད་ཕྱིར་བསྐྱེད་པ་དང་། ཁ་བྱེ་ནས་བྱུང་། ཡང་ཡང་དེ་བཞིན་དུ་བྱུང་བས་སྐྱེས་བུ་བཞི་བོ་འཇིགས་
ནས་གཤིན་རྗེ་ཆོས་ཀྱི་རྒྱལ་པོ་ལ་དྲིས་པས། དེ་ན་རེ་འདིར་སྐྱེ་བའི་རྒྱུ་ཟད་ཐུགས་རྗེ་ཆེན་པོའི་བུ་ཡིན་ང་ཅིག་ཅར་སྐྱོལ་ཞེས་ཟེར་ནས་བསྐྱལ་བ་དང་ངའི་ནད་དྲག་འདུག་ཅེས་ཟེར་རོ། །དེ་ཕྱིར་རབ་ཏུ་བྱུང་བ་མཐོང་ཚད་ལ་བརྐྱང་ཕྱག་འཚལ་ཞིང་བསྙེན་བཀུར་བྱེད། བྱ་བ་ཐམས་ཅད་བཞག་ནས་སྒོམ་བཟླས་
བྱེད་པ་ཅིག་བྱུང་། བདག་ཀྱང་ཕའི་རྗེས་སུ་བགྱིད་པ་ལགས་ཟེར་རོ། །སྔགས་པ་ཁརྶ་པཱ་ཎིའི་སྙིང་པོ་བགྲང་བ་ཅིག་ལ་ཡང་དེ་ཁོ་ན་བཞིན་བྱུང་སྐད། ཤིང་བཟོ་བས་གྲུབ་པ་ཐོབ་པ་པཎྜི་ཏ་ནི་ན་ཡ་ཤྲཱིས་བསྒྱུར་རོ།། ༄༅༅། །ཡང་བྷཾ་ག་ལའི་བུད་མེད་ཅིག་གིས་ཁྱོ་ཤི་
ནས་ཡི་དགས་སུ་སྐྱེས་ཏེ་དེས་བདག་ཏུ་བཟུང་ནས་རྟག་ཏུ་འོད་བལ་ཡུལ་དབུས་ཀྱི་ཚོང་དཔོན་ཅིག་གིས་ཤར་ཕྱོགས་སུ་ཚོང་ལ་ཕྱིན་ཏེ་དེར་བཞག་ནས་གཡོག་གིས་རྐང་པ་བཀྲུས། ཁྲུས་དང་བསྐུམ་ཉེ་བྱས་ཏེ་སྟན་ཐོག་ཏུ་ཡི་གེ་དྲུག་པའི་སྒོམ་བཟླས་བྱེད་གྱིན་བསྡད་དོ། དེར་ཡི་དགས་དེས་ནང་ང་

འོང་མ་ནུས་པར་ཕྱི་ནས་ཀུ་ལུ་ཀུ་ལུ་ཟེར་ཞིང་ཚོང་དཔོན་ཕྱིར་ཐོན་གྱི་སྒྲ་བརྗོད་པ་བུད་མེད་དེས་མཐོང་སྟེ་བློ་སྐྱེས་ནས་ཚོང་དཔོན་ལ་ཕྱག་དང་བསྙེན་བཀུར་བྱས་ཏེ་བདག་ལའང་དེ་བསླབ་པར་ཞུ་ཞེས་གསོལ་ནས་ཉམས་སུ་བླངས་ནས་དེ་ལས་ཐར་སྐད། བུད་མེད་ཀྱིས་གྲུབ་པ་ཐོབ་པ་ནི་
བི་ན་ཡ་ཤྲཱིས་བསྒྱུར་རོ།། ༄༅༅། །ན་མོ་ལོ་ཀེ་ཤྭ་རཱ་ཡ། སྔོན་རྒྱ་གར་ལྷོ་ཕྱོགས་སུ་བསྟན་པ་དར་པའི་ཚེ། གྲོང་ཁྱེར་ཆེན་པོ་ཅིག་ན་ཚོང་དཔོན་གྱི་བུ་སུ་ཁ་དེ་བཞེས་བས་ལོངས་སྤྱོད་ཐམས་ཅད་རང་གིས་ཆུད་གསན་ནས་ཤིན་ཏུ་སྡུག་བསྔལ་ཞིང་ཡོད་པ་ན། ཡུལ་
དེར་བུད་མེད་ཅིག་ཚད་བས་ཐེབས་ཏེ་ཙནྡན་གོ་ཤིརྵ་མིན་པས་གསོ་མི་ནུས་ལ་དེ་ཡང་མ་རྙེད་དེ་སྨན་པ་ཐམས་ཅད་ཀྱིས་བོར་རོ། །དེར་ཚོང་དཔོན་གྱི་བུ་དེས་དྲིས་བས་ཙནྡན་དེ་རྙེད་ནས་སོས་ན་བུ་མོ་སྟེར་ཞེས་ཟེར་རོ། །དེར་ཕ་མེས་ཀྱི་ཡི་དམ་གོ་ཤིརྵ་ལས་བྱས་པའི་ཐུབ་པའི་སྐུ་ཅིག་ཡོད་པ་བདར་ཏེ་
ནང་དུ་བཏང་ཞིང་ཕྱིར་བྱུགས་པས་སོས་སོ། །དེ་གཉིས་ལྷན་ཅིག་གནས་པ་ན་བུད་མེད་དེས་དེ་ལ་འདི་ལྟ་བུའི་ལས་བྱེད་པ་གཉིས་ཀ་དམྱལ་བར་སྐྱེའོ་ཞེས་སྦྱོས། དེར་ཚོང་དཔོན་གྱི་བུ་དེ་དེ་དང་ཉེ་བའི་གཙུག་ལག་ཁང་ཅིག་ཏུ་པཎྜི་ཏ་ཅིག་ལ་ཡི་གེ་དྲུག་བཞུས་ནས་བུད་མེད་ཀྱིས་གཡོག་
བྱས་ནས་གཉིས་ཀའི་དོན་དུ་ལ་བཅུ་གཉིས་བསྒྲུབས་པས་རྨི་ལམ་དུ་ཞལ་གཟིགས་ཏེ་བོ་ཊ་ལར་འདེངས་ཞེས་གསུང་ངོ་། །ཁོས་བདག་འགྲོ་སྟ་སློབ་དཔོན་ལ་འདྲི་དགོས་ཞེས་བྱས་སོ། །སད་པ་དང་སློབ་དཔོན་དང་གཡོག་ལ་དྲིས་བས་དེ་དེང་ཀྱི་དྲིན་ཡིན་པས་མི་འཁྲིད་ན་མི་ཕན་ཞེས་
བྱས་པས། ཡང་སྒྲུབ་པ་ཡུན་རིང་དུ་བྱས་ཏེ་བཅོམ་ལྡན་འདས་བྱོན་ནས་གསུམ་ཆར་པོ་ཊ་ལར་ཁྲིད་དོ། །སུ་ཁ་དེ་བས་སྨྲས་པ། ལྟོས་ཤིག་སྔགས་ཀྱི་ནུས་པ་དག །ཕྲ་བའི་ལྷ་ཡང་གྲུབ་པ་ཐོབ། །བྱ་བ་ཐམས་ཅད་ཡོངས་སྤོངས་ལ། །སྔགས་ཀྱི་
བྱ་བ་སྒྲུབ་བར་གྱིས། །ཞེས་གསུངས་ནས་པོ་ཊ་ལར་གཤེགས་སྐད། སུ་ཁ་དེ་བས་གྲུབ་པ་ཐོབ་པ། པཎྜི་ཏ་བི་ན་ཡ་ཤྲཱིས་བསྒྱུར་བའོ།། །།

༄༅༅། །རྒྱ་གར་སྐད་དུ། ཤ་ལི་ཧོ་ཏྲ་ཡ་ཡཱཾ་ཨ་ཤྭ་ཨཱ་ཡུར་བཻ་དྱ་སཾ་ཧི་ཏ་ནཱམ། བོད་སྐད་དུ། རྟའི་ཚེའི་རིག་བྱེད་ཤ་ལི་ཧོ་ཏྲས་བསྡུས་བ་ཞེས་བྱ་བ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྨན་གྱི་བླ་
བཻཌཱུརྱ་འོད་ཀྱི་རྒྱལ་པོ་ལ་ཕྱག་འཚལ་ལོ། །ཁྱབ་འཇུག་གི་ནི་བཙུན་མོའི་མཆོག །ལྷ་མོ་དཔལ་མོ་རྟ་ཡི་མངལ། །ཕྱག་འཚལ་ནས་ནི་རྟ་རྣམས་ཀྱི། །ཚེ་ཡི་རིག་བྱེད་རྟོགས་བཤད་བྱ། །གང་ལས་གང་ཕྱིར་གང་དོན་ཡིན། །དེ་དག་ཀུན་ཀྱང་བརྗོད་པར་བྱ། །ཁ་བ་ཅན་གྱི་
བྱང་ཕྱོགས་ན། །ལྷ་ཡི་དབང་པོའི་གནས་འདྲ་བར། །ཤ་ལི་ཧོ་ཏྲ་དྲང་སྲོང་ཆེ། །སྦྱིན་སྲེག་བྱས་ནས་འདུག་པའི་ཚེ། །ལེགས་ཐོས་ཐོས་པ་ཕུན་ཚོགས་ལྡན། །བུ་ཡིས་ཕ་ལ་དྲིས་གྱུར་པ། །ལེགས་ལྡན་ཆོས་རྣམས་ཐམས་ཅད་མཁྱེན། །རྟ་ཚེའི་རིག་བྱེད་མཁས་
ལགས་ན། །རྟ་རྣམས་ཀྱི་ནི་གསོ་བ་འདི། །ཇི་ལྟར་བྱུང་བར་གྱུར་པ་ལགས། །དྲང་སྲོང་གཟི་བརྗིད་ཆེན་པོ་ཡིས། །དེ་ལ་མཉན་པར་གྱིས་ཞེས་སྨྲས། །སྔོན་ཚེ་རྟ་རྣམས་རང་དགར་ནི། །མཁའ་ལ་རྒྱུ་ཞིང་གནས་བྱེད་ཅིང་། །ཟས་དང་སྤྱོད་པ་ཅི་དགའ་བར། །དེ་རྣམས་རང་
དགར་སྤྱོད་པ་ཡིན། །ཐམས་ཅད་ལ་ཡང་ལུས་ཀྱི་ནི། །གོམས་པས་ནད་ནི་བྱུང་མ་གྱུར། །གང་ནས་བརྩམས་ཏེ་ང་ཡི་བུ། །བཞོན་པ་ཉིད་དུ་བྱས་གྱུར་པ། །དེ་ནས་བརྩམས་ཏེ་གནོད་བྱེད་པའི། །ནད་ཀུན་གྱིས་ནི་གཟིར་པ་ཡིན། །དེ་ནས་དེ་ལ་སེམས་གདུང་སྐྱེས། །ང་
ཡིས་དཀའ་ཐུབ་ཆེན་པོ་བྱས། །ཚངས་པ་ལྷ་ནི་མཉེས་བྱས་ནས། །དེ་ཡི་གསོ་བ་རྙེད་པ་ཡིན། །ཟུག་རྔུ་ལུས་ཀྱི་གསོ་བ་དང་། །དེ་བཞིན་ཆ་སྤྱད་ཉིད་དང་ནི། །རྟེའུ་ཡི་ནི་གསོ་བ་དང་། །དུག་གི་རང་བཞིན་སྨན་དང་ནི། །བཅུད་ལེན་གདོན་ནད་གསོ་བ་དང་། །རོ་ཙ་བྱེད་པ་
བརྒྱད་པ་ཡིན། །དེ་ལྟར་རྟ་ཡི་ཚེའི་རིག་བྱེད། །འདི་ནི་ཡན་ལག་བརྒྱད་དུ་བཤད། །ཡན་ལག་བརྒྱད་པོ་འདི་ཡི་གནས། །རྒྱས་པར་བུ་ཡིས་མཉན་པར་གྱིས། །མདོ་ཡི་གནས་ནི་དང་པོ་སྟེ། །དེ་ཡི་ཕྱི་མ་གཉིས་པ་ཡིན། །གསུམ་པ་འདིར་ནི་ལུས་ཡིན་ལ། །བཞི་པ་ཉིད་ནི་གསོ་

བ་ཡིན། །ལྔ་པ་རྟེའུ་སྨན་ཡིན་ཏེ། །དྲུག་པ་ཕྱི་མའི་ཕྱི་མ་ཡིན། །བྱ་བ་དེ་དང་དེ་བསྟན་པ། །གྲུབ་པའི་གནས་ནི་བདུན་པ་ཡིན། །གསང་བ་གནས་ནི་བརྒྱད་པ་སྟེ། །ཚེ་ཡི་རིག་བྱེད་བསྡུས་པ་ཡིན། །ལེའུའི་རིམ་པ་ངེས་པ་ནི། །གནས་གནས་སུ་ནི་ངས་
བཤད་བྱ། །ཚེ་ཡི་རིག་བྱེད་བྱུང་བ་དང་། །དེ་བཞིན་སློབ་མ་སྦྱང་པ་དང་། །ངེས་བའི་ཚིག་དང་བྱུང་ཚུལ་དང་། །དེ་ནས་མངལ་དུ་ཆགས་གྱུར་དང་། །རང་བཞིན་དང་ནི་སྐྱེ་གནས་དང་། །དེ་བཞིན་རིགས་ནི་བཞི་དག་དང་། །ཡན་ལག་ཐམས་ཅད་བརྟག་པ་དང་། །བཤད་པ་
དང་ནི་ཚད་གཞལ་དང་། །ཡན་ལག་བཅུ་ཡི་ཆ་དབྱེ་དང་། །སྡུག་དང་མི་སྡུག་ཤེས་བྱ་དང་། །ཚད་ཤེས་བྱ་དང་ཟས་སྦྱོར་བ། །མཛེས་དང་མཚན་གྱི་ལེའུ་དང་། །དེ་བཞིན་ཁ་དོག་ཤེས་བྱ་དང་། །ཞུར་མདངས་དང་ནི་ཐིག་ལེ་བརྟག །ཤ་རའི་མདོག་ནི་བཟང་ངན་དང་། །
འདྲེན་མ་རྒྱལ་བོའི་བཞོན་པ་དང་། །མིག་བརྟག་པ་དང་སོ་བརྟག་པ། །གཙུག་དང་ན་ཚོད་ཤེས་བྱ་དང་། །ཚེ་ཤེས་པ་དང་བཅས་པ་དང་། །དྲི་དང་སྐད་གསང་བརྟག་པ་དང་། །འགྲོས་དང་ལུས་འཕེལ་ཆོ་ག་དང་། །རྒྱུག་པ་བརྟག་དང་གྲ་མ་ཅན། །ཉེས་པ་ཆེ་དང་སྙིང་སྟོབས་
བརྟག །གཟི་མདངས་བརྟག་དང་རིགས་བརྟག་དང་། །སྟོན་ཀ་པ་དང་ཉོ་འཚོང་བཅས། །དེ་ལྟར་གནས་ནི་དང་པོ་ཡི། །ལེའུའི་རིམ་པ་གནས་བ་ཡིན།། །།དྲི་བ་ཆེན་པོ་ཉིད་དང་ནི། །དེ་བཞིན་སྒོ་ང་ལས་བྱུང་དང་། །རྨེན་བུའི་ལེའུ་གསུམ་པ་སྟེ། །ནད་ཤེས་བྱ་བ་རྣམས་གསུམ་
དང་། །ཡིད་བདེ་ཡིད་མི་བདེ་ཤེས་དང་། །རླུང་འཁྱིལ་འཁྲུལ་པ་ཤེས་བྱ་དང་། །རླུང་འཁྱིལ་གཏུགས་པ་ཤེས་བྱ་དང་། །དེ་བཞིན་ལྟོ་བ་རྒྱས་པ་དང་། །རྩུབ་བར་འཁྱིལ་བའི་ལེའུ་དང་། །དེ་བཞིན་གཅིན་འགགས་གསོ་བ་དང་། །རི་དགས་ལྟར་འཁྱིལ་མ་འདྲེས་འཁྱིལ། །རླུང་གི་
རྨུ་རྫིང་གསོ་བ་དང་། །དེ་བཞིན་ཁྲག་གི་གཅིན་ནད་དང་། །ཀོ་ར་དུ་ཤས་གནོད་གྱུར་དང་། །སྣུམ་འཁྱིལ་པ་དང་རྣམ་འཁྱིལ་བ། །ཁྲག་འཁྲུགས་ནད་ནི་གསོ་བ་དང་། །ཁྲག་འཁྲུགས་ནད་གཞི་བཞི་ལས་གྱུར། །ཁྲག་འཁྲུགས་རྗེས་ལ་གསོ་བ་དང་། །འཐེང་དང་རྐང་ནད་གསོ་བ་དང་། །

སྐྱེ་འབྲུ་དབུགས་མི་བདེ་གསོ་དང་། །དབུགས་མི་བདེ་བ་ལུད་པ་ཅན། །སྣ་རྣག་དང་ནི་མངོན་པར་ཚ། །རླུང་དང་མཁྲིས་པ་བད་ཀན་རིམས། །འདུས་པ་ལས་གྱུར་རིམས་གསོ་དང་། །དུས་ནི་གོ་བཟློག་ལས་བྱུང་དང་། །སྣད་པ་ལས་གྱུར་རིམས་དང་ནི། །ཡིད་ཀྱི་རིམས་ནི་གསོ་བ་དང་། །
དེ་བཞིན་འཁྲུ་བ་མང་པོ་དང་། །སྨན་ཁུའི་གོང་བུའི་སྦྱོར་བ་དང་། །སྦེག་པ་བརྟག་པའི་ལེའུ་དང་། །དེ་བཞིན་རྔ་མའི་ནད་གསོ་དང་། །གཞར་བྱུང་པ་ཡི་གསོ་པ་དང་། །ཁྲག་དང་མཁྲིས་པ་གསོ་པ་དང་། །སོ་ལྷག་བྱུང་བ་གསོ་བ་དང་། །འུག་པའི་རྐང་འདྲའི་ལེའུ་དང་། །གདུག་པས་
ཟིན་པའི་མཚན་ཉིད་གསོ། །སྨད་པའི་མཚན་ཉིད་ཅན་ལེའུ། །དུག་གི་ཤུགས་ནི་ཤེས་བྱ་དང་། །དེ་བཞིན་དུག་གིས་ཟིན་གསོ་བ། །དུག་མདས་ཕོག་པ་ཞེས་བྱ་བ། །གཉིས་པའི་གནས་སུ་བསྡུས་པ་ཡིན། །མངལ་ཆགས་ཞེས་པའི་ལེའུ་དང་། །དེ་བཞིན་ལུས་ཀྱི་རྣམ་དབྱེ་
དང་། །ལུས་བསྐྱེད་པ་དང་རྩ་ཡི་ཚོགས། །ཡུལ་དང་ཚ་སོགས་བསྟན་པ་དང་། །འཕེལ་དང་འབྲི་བ་ཤེས་བྱ་དང་། །རོ་དྲུག་གི་ནི་བདག་ཉིད་དང་། །ནང་གི་བདག་ཉིད་ཅན་བྱུང་དང་། །བྱ་དང་བྱ་མིན་བརྟག་པ་དང་། །འདིར་ནི་ཟས་སྐོམ་ཆོ་ག་དང་། །དེ་བཞིན་ལྗད་པའི་རོ་ཡི་
ཚོགས། །གསོ་པའི་ཡན་ལག་དབང་བྱས་དང་། །ལོང་དང་ལྐུགས་སོགས་བསྟན་པ་དང་། །དེ་བཞིན་སྐྲངས་པ་གསོ་པ་དང་། །གཞན་ཡང་རྨ་གཉིས་ལེའུ་དང་། །ཟུག་རྔུ་ཁོང་བརླག་གདོན་པ་དང་། །ཟུག་རྔུ་དབྱུང་བའི་ལེའུ་དང་། །སྦུབས་ཀྱི་རྨ་ནི་གསོ་བ་དང་། །དེ་
བཞིན་ཆག་གྲུགས་གསོ་བ་དང་། །ཆུ་བུར་གསོ་བ་ཉིད་དང་ནི། །རྒོད་མའི་མཚན་ཉིད་བརྟག་པ་དང་། །རླུང་ཉེན་མངལ་གྱི་ཉེས་པ་དང་། །མངལ་དུ་ཤི་བའི་ནད་གསོ་དང་། །བ་ལའི་ཏིལ་མར་དང་བཅས་པ། །ལེའུའི་རིམ་པ་འཆད་རྣམས་ཀྱིས། །གནས་ནི་གསུམ་པ་ཡིན་པར་
བཤད། །གསོ་བའི་གནས་ཀྱི་ལེའུ་ནི། །སེམས་ཁོང་ཆུད་པར་བྱེད་པ་དང་། །ནེ་ར་ཀ་ཡི་ནད་གསོ་དང་། །རྒན་ནད་བྱེ་བ་མེད་པ་ཉིད། །ཨ་བ་ཏང་ཀའི་གསོ་བ་དང་། །ལྕེ་རིངས་སྣ་ནད་འཛག་བྱེད་དང་། །སྣ་ནད་གལ་ལ་ཀ་གསོ་དང་། །མགོ་ནད་རླུང་ལས་གྱུར་པ་དང་། །

དེ་བཞིན་མཁྲིས་པ་ལས་གྱུར་དང་། །བད་ཀན་ལས་གྱུར་ཁྲག་ལས་གྱུར། །འདུས་པ་ལས་གྱུར་མགོ་ནད་དང་། །གློ་བུར་སྲིན་བུ་ལས་གྱུར་པ། །དེ་བཞིན་རྣ་བའི་ནད་གསོ་དང་། །མཆི་མ་འཛག་པ་གསོ་བ་དང་། །རླུང་ནད་པ་ལ་ཤ་ཉིད་དང་། །དེ་བཞིན་ཀོལ་ཉེས་
ནད་ཉིད་དང་། །གཞན་ཡང་བྲང་ཆ་བ་ཡི་ནད། །ཚེའུ་ཚེའི་ནད་ནི་གསོ་བ་དང་། །གཟུགས་འཁུམས་གཟུགས་གྱོང་ནད་གསོ་དང་། །རྨིག་པ་རྡུལ་ཅན་ནད་གསོ་དང་། །སྦལ་པ་ཆ་བར་བཤད་པ་དང་། །མཚན་ནི་འཕྱང་བར་གྱུར་གསོ་དང་། །རླིག་པ་སྐྲངས་པ་གསོ་བ་དང་། །དེ་
བཞིན་རླིག་འབྲས་གཡོས་པ་དང་། །ཁྲག་ལས་གྱུར་པའི་རླིག་ནད་དང་། །དེ་བཞིན་མཁྲིས་པ་ལས་གྱུར་དང་། །བད་ཀན་ལས་གྱུར་རྔ་མའི་ནད། །སྣ་རེངས་དེ་བཞིན་རྒྱབ་རེངས་དང་། །ལྟོ་བ་གཞོང་འདྲའོ་ནད་གསོ་དང་། །མཆུ་སྐྲངས་ནད་ནི་གསོ་བ་དང་། །རླུང་ནད་ཐི་བ་ལྟ་བུ་དང་། །
མཁྲིས་ནད་སྦྲང་བུ་ལྟ་བུ་དང་། །རི་དགས་ཅན་དང་རི་དགས་གླལ། །ཆུ་འཛིན་ཞེས་བྱའི་ནད་དང་ནི། །དེ་བཞིན་སྙིང་ནད་རླུང་གྱུར་དང་། །མཁྲིས་པ་ལས་གྱུར་སྙིང་ནད་དང་། །གཞན་ཡང་བད་ཀན་ཅན་སྙིང་ནད། །སྲིན་བུ་ལས་གྱུར་སྙིང་ནད་དང་། །རླུང་གི་གཟེར་དང་ལྐོག་མའི་ནད། །སྣུམ་
ཆོས་ཉེས་པའི་ནད་དང་ནི། །ལན་ཚྭའི་སྦྱོར་ཉེས་ཆང་བླུད་ཉེས། །དེ་བཞིན་འབྲུ་ཟོས་ཉེས་པ་དང་། །འོ་མ་འཐུང་ཉེས་ཆུ་འཐུང་ཉེས། །སྦུབས་ལས་བླུད་ནི་ཉེས་པ་དང་། །བརྡུང་ཉེས་བཞོན་པ་པོས་སྣོད་དང་། །ལུད་པ་གསོ་དང་མཛེ་ནད་གསོ། །གྱེན་འབྱུང་གློ་ནད་གསོ་བ་དང་། །
དྲེགས་དང་ཉེས་པ་གསོ་བ་དང་། །སྨྱོ་ནད་གསོ་དང་མཚན་མོ་བཅོམ། །གཞང་འབྲུམ་གསོ་དང་རྡོ་གསོ་དང་། །དེ་བཞིན་གཡན་པ་གསོ་བ་དང་། །སྐྲངས་ནད་གསོ་བ་ཉིད་དང་ནི། །གཞན་ཡང་རི་བོ་ཅན་ནད་གསོ། །ཡག་ལག་ཕྱོགས་གཅིག་ནད་ཅོང་ཅན། །མགོ་འཁོར་ཆུ་ཡི་རྨུ་
རྫིང་དང་། །ཆུ་ལྷའི་གདོན་ནི་གསོ་བ་དང་། །མིག་ཅན་འགེབས་པ་ཁན་གསོ་དང་། །མིག་ནད་མིག་ནད་སྒོ་ང་ཅན། །ཆུ་བུར་ཅན་དང་སྔོ་མཚན་ཉིད། །ལིང་ཏོག་ཅན་དང་མཆི་མ་འཛག །ལིང་ནད་མ་འདྲེས་མཐོང་བ་ཉིད། །མིག་དམར་དང་ནི་མུན་ཛ་ཅན། །མུན་ཛའི་དྲབ་ཅན་

གསོ་བ་དང་། །ཐལ་མོ་བྱེད་པ་ཅན་གྱི་ནད། །ཁྲག་འཁྲུགས་པ་ཡི་ནད་གསོ་དང་། །ཚིགས་སུ་རྨ་བྱུང་ཐོང་འབབ་དང་། །གཉེའུ་རེངས་དང་སྦོས་ནད་གསོ། །འཁྲུ་བ་གསོ་བ་ཞེས་བྱ་བ། །གནས་ཆེན་བཞི་པ་གསོ་བ་ཡིན། །རྟེའུའི་གདོན་ནི་བསྟན་དང་བཤད། །འཁྲུ་དང་དེ་བཞིན་རིམས་
དང་ནི། །གཡན་པ་ལྐོག་ནད་ཤ་ལུ་ཀ། །ཁོར་པའི་སྲིན་ནད་གཅིན་ཀྲིར་བཅས། །བོང་བུ་ཅན་དང་རླིག་རླུགས་དང་། །གཅིན་ནད་གཟེའུ་ཞེས་བྱ་བ། །སྦོ་དང་བྲང་ནད་ཅེས་བྱ་བ། །བཀྲེས་པས་ཉེན་དང་ལུང་པ་གསོ། །ཟད་བྱེད་དང་ནི་རོ་ཧི་ནི། །རི་མོ་ཅན་དང་སྦལ་བ་འདྲ། །མེས་ཚིག་ཚིགས་ནད་
གཅིན་དམར་གསོ། །ཡིད་མི་བདེ་དང་རྣ་བའི་ནད། །སོ་ནད་དང་ནི་འཇིང་པའི་ནད། །འགྲན་ནད་ལྕེ་ཡི་ནད་བཅས་དང་། །མིག་ནད་སྣ་ནད་བཅས་དང་། །རྨིག་པའི་ནད་དང་དབྱིག་པའི་ནད། །སེམས་འཁྲུལ་པ་དང་རྡུལ་ནད་བཅས། །སྦྲུལ་གྱིས་ཟིན་དང་མེས་ཚིག་གསོ། །དེ་བཞིན་
ཆག་གྲུགས་གསོ་བ་ནི། །ལྔ་པའི་གནས་སུ་ངས་བཤད་ཅིང་། །རྟེའུའི་ནང་རྣམས་གསོ་བ་ཡིན།། །།རྟ་ཁང་པ་ནི་བརྟག་པ་དང་། །ཁང་པའི་ལྷ་རྣམས་མཆོད་པ་དང་། །དེ་གཞིན་གདོན་ནི་བསལ་བ་དང་། །དཔལ་འཕེལ་བ་ཞེས་བྱ་བ་དང་། །རྟ་རྣམས་རྗེས་སུ་བསྲུང་བ་དང་། །རྣམ་རྒྱལ་
རྟ་ནི་དབང་བསྐུར་དང་། །མཆེ་བ་ཆག་པའི་ལྟས་བསྟན་དང་། །ལྟས་ཀྱི་མཚན་ཉིད་གཞན་བསྟན་དང་། །ཞི་བ་བསྐྱེད་པར་བྱ་བ་རྣམས། །དྲུག་པའི་གནས་སུ་བསྡུས་པ་ཡིན། །དང་པོར་རྗེས་བཏུང་ཆོ་ག་སྟེ། །དེ་འོག་ལན་ཚྭའི་ཆོ་ག་ཡིན། །སྣུམ་དང་ལན་ཚྭ་ཆང་དང་འབྲུ། །འོ་མ་ཆུ་
དང་སྦུབས་ལས་བྱུང་། །གནོད་པའི་ནད་ནི་བདུན་པོ་ཡི། །ནད་གཞི་གསོ་བར་བཅས་བསྟན་དང་། །མར་བླུད་དུགས་ཀྱི་ཆོ་ག་དང་། །དུར་བྱིད་ཀྱི་ནི་ཏིལ་མར་དང་། །དོན་གྲུབ་ཅེས་བྱའི་ཏིལ་མར་དང་། །མེ་བཅའི་ལས་ཀྱི་ཆོ་ག་དང་། །མས་གཏོང་ཆོ་ག་བསྟན་པ་དང་། །གཙགས་བུ་
ལས་གྱུར་ནད་བསྟན་དང་། །དེ་བཞིན་ལྟ་བའི་ལས་བསྟན་དང་། །སྣུམ་བླུད་པ་ཡི་ཡོན་ཏན་དང་། །རོ་ཙར་བྱེད་པ་བསྟན་པ་དང་། །སྣུམ་ལས་གྱུར་པའི་ནད་གསོ་བའི། །བྱ་བ་བསྟན་པའི་གནས་འདི་ནི། །བདུན་པ་གྲུབ་པའི་མཚན་ཉིད་ཡིན། །དང་པོ་རི་མོ་ལས་ཆེ་བརྟག །

དེ་རྗེས་ནད་ཀྱིས་འཆི་ལྟས་བསྟན། །ནད་མེད་འཆི་ལྟས་བསྟན་པ་དང་། །ཕོ་ཉ་ལ་སོགས་ལྟས་བསྟན་དང་། །ཕྱེ་མ་རྣམས་ཀྱི་ལེའུ་དང་། །སྨན་མར་དང་ནི་ཏིལ་མར་དང་། །དེ་བཞིན་སྨན་ཁུའི་ལེའུ་དང་། །མ་ཞུ་སྦྱང་བའི་སྦྱོར་བ་དང་། །སོ་སོར་
བཏུང་དང་རྗེས་སུ་བཏུང་། །མས་གཏོང་ལས་ཀྱི་ཆོ་ག་དང་། །སྣ་སྨན་རྣམས་ནི་བསྟན་པ་དང་། །འཇམ་རྩི་སྣ་ཚོགས་བསྟན་པ་དང་། །དེ་བཞིན་ཕྱི་ཡི་ལྡེ་གུ་དང་། །ཐལ་སྨན་ལན་ཚྭའི་ཆོ་ག་དང་། །འབྲས་བུ་གསུམ་དང་ཨ་རུ་ར། །གུ་གུལ་སྒོག་སྐྱའི་ཆོ་ག་དང་། །མི་ལ་
བརྟག་པ་དང་བཅས་པའི། །ཁུར་བསྟན་པ་ཡི་ལེའུ་དང་། །དེ་བཞིན་སྐྱེས་བུ་དང་བཅས་པའི། །ཤིང་རྟ་དང་སྦྱར་ཆོ་ག་དང་། །སྔགས་དང་བྱ་བའི་སྦྱོར་བ་དག །མཆོག་ཏུ་གསང་བ་ཉིད་ཡིན་ནོ། །དེ་ལྟར་གསང་བ་མཆོག་གྱུར་པའི། །གནས་ཀྱི་ལེའུ་ཡིན་ཤེས་བྱ། །གནས་བརྒྱད་ཡན་
ལག་བརྒྱད་དང་བཅས། །རྟ་ཡི་ཚེ་ཡི་རིག་བྱེད་མཆོག །མ་ལུས་འདི་ནི་ཚངས་པ་ཆེ། །ཞལ་བཟང་བཞི་དང་ལྡན་པས་བྱིན། །ལེགས་ལྡན་ཤ་ལི་ཧོ་ཏྲ་ཡིས། །དེ་སྐད་རྗེས་བསྟན་སྨྲས་པ་ཡིན། །ཤ་ལི་ཧོ་ཏྲའི་གནས་དང་པོ་ལས་ཚེའི་རིག་བྱེད་བྱུང་པའི་ཚུལ་བསྟན་བ་ཞེས་བྱ་བའི་ལེའུ་སྟེ་དང་པོའོ།། །།
དེ་ནས་ཤ་ལི་ཧོ་ཏྲ་ཡིས། །ལེགས་ཐོས་ལ་ནི་ཡང་སྨྲས་པ། །སློབ་མ་སྦྱང་བ་ཞེས་བྱ་བ། །ལེགས་ཐོས་དེ་བཞིན་ང་ལས་ཉོན། །སློབ་མ་རིགས་བཟང་ཡན་ལག་ཚང་། །མཚན་ལྡན་དང་བར་བཅས་པ་བྱ། །བྲམ་ཟེ་སོགས་གསུམ་གང་ཡང་རུང་། །གཙང་མ་བླ་མས་སློབ་ཏུ་གཞུག །རྟ་
ལ་ཤིན་ཏུ་བརྩེ་བས་ན། །བྲམ་ཟེ་ལས་ནི་སློབ་མ་གཟུང་། །སྐྱེ་དགུ་སྐྱོང་ལ་བརྩོན་པ་ཡི། །རྒྱལ་རིགས་སློབ་མར་གཟུང་བར་བྱ། །དམངས་རིགས་རྣམས་ནི་གསོ་བ་ཡིས། །འཚོ་བ་ཚོལ་བས་དེ་ཡང་གཟུང་། །ཉི་མ་བྱང་འགྲོ་བསོད་ནམས་དུས། །གཟའ་ལ་མིག་དམར་ཉི་མ་དང་། །
ཚེས་དྲུག་བརྒྱད་དང་ལྔ་དང་བཅུ། །ཚེས་བཞི་ཚེས་ནི་བཅུ་བཞི་དང་། །ཚེས་གཅིག་དང་ནི་ཚེས་དགུ་ནི། །རིག་པ་རྩོམ་ལ་སྤང་བར་བྱ། །ཚེས་གྲངས་ལྷག་མ་ཤིས་པ་ཡིན། །གཞན་ཡང་སྐར་མ་ང་ལས་ཉོན། །གང་ཞིག་འཇམ་དང་མྱུར་བ་དང་། །གཡོ་དང་

གདུག་དང་སྨིན་དྲུག་དང་། །ཐ་སྐར་མ་གཏོགས་མི་རྣམས་ཀྱིས། །རིག་སློབ་རྩོམ་ལ་རྟག་ཏུ་ཤིས། །སྐར་མ་ཡང་ནི་འདི་རྣམས་དང་། །ཐང་ཅིག་ཀྱང་ནི་ཤིས་པ་དང་། །གཟའ་ནི་མ་སྨད་པ་རྣམས་དང་། །ཆུ་ཆོད་བཟང་ལ་བརྩམ་པར་བྱ། །དེ་ལྟའི་དུས་ནི་ཤིས་པ་ལ། །སློབ་
མ་གོས་གཙང་བགོས་པ་དང་། །བྲམ་ཟེ་མཆོད་ཕྱིར་ཐོགས་དཀར་བཏགས། །དྲི་ནི་དཀར་པོས་བྱུགས་པ་དང་། །ཕྲེང་བ་དཀར་བཏགས་མཁས་པ་དང་། །གོས་དཀར་བགོས་པ་འདོན་དུ་གཞུག །དེ་བཞིན་རྒྱལ་རིགས་རྣམས་ཀྱང་ནི། །ཆ་ལུགས་ཐམས་ཅད་དམར་བ་དང་། །
དེ་བཞིན་དམངས་རིགས་ཐམས་ཅད་སེར། །ལྷ་རྣམས་ཐམས་ཅད་བྱེད་དུ་གཞུག །བྲམ་ཟེ་ཡིས་ནི་ཚངས་པ་མཆོད། །རྒྱལ་རིགས་ཀྱིས་ནི་བརྒྱ་བྱིན་ཏེ། །དམངས་རིགས་ཀྱིས་ནི་རླུང་ལྷ་མཆོད། །བྱེ་བྲག་མེད་པར་ཀུན་གྱིས་ནི། །དབྱངས་ཅན་དེ་བཞིན་དཔལ་མོ་དང་། །ཤ་ལི་
ཧོ་ཏྲ་མཆོད་པར་བྱ། །དེ་རྣམས་ལ་ནི་མེ་ཏོག་སྤོས། །ཁ་ཟས་ཕུན་ཚོགས་ཀྱིས་མཆོད་ནས། །དེ་ཡི་འོག་ཏུ་ས་བེ་ཏྲ། །མེ་ལ་མར་གྱིས་ཚིམ་པར་བྱས། །བྲམ་ཟེ་རྣམས་ལ་ཁ་ཟས་སྦྱིན། །དེ་ནས་བུ་གཅིག་ཡོན་བྱས་པས། །སློབ་དཔོན་ལ་ནི་ཡོན་བྱིན་ཏེ། །ས་ཕྱོགས་དག་ཅིང་བརྒྱན་པ་
རུ། །སློབ་མ་ནུབ་ཏུ་བལྟས་ནས་ནི། །སློབ་དཔོན་ཤར་དུ་བལྟས་ཏེ་བརྗོད། །རྟག་ཏུ་ལས་ལ་བརྩོན་པ་ཡི། །བུ་ཁྱོད་ཀྱིས་ནི་བསླབ་པར་བྱ། །སྲོག་གིས་ཀྱང་ནི་བླ་མ་ངག །མཉེས་པར་བྱན་ནོར་ཅི་སྨོས། །བླ་མ་བྲམ་ཟེ་ས་བདག་ལ། །བུ་ཡིས་འཁུ་བར་མི་བྱ་སྟེ། །ཁྱོད་ཀྱིས་རྟ་རྣམས་
ལ་ཡང་ནི། །འཁུ་བར་ནམ་ཡང་མི་བྱའོ། །ང་ཡི་ཁ་ལས་གང་ཟོས་པ། །དེ་ནི་བུ་ཡིས་འབད་དེ་སློབས། །དེ་བཞིན་ཕོངས་པར་གྱུར་ཀྱང་ནི། །གླེགས་བམ་ལས་རེ་སློབ་མི་བྱ། །གླེགས་བམ་ལས་ནི་གང་བསླབས་དེ། །འཇིག་རྟེན་གཉིས་ཀ་དག་དང་འགལ། །དང་པོ་འདི་དག་ཐམས་
ཅད་ནི། །གསོ་བ་བུ་ཡིས་བསླབ་པར་བྱ། །མ་བསླབས་པ་ནི་སྤངས་ནས་ཀྱང་། །གང་སྨྲས་འདི་ནི་མཉན་པར་གྱིས། །བཅོ་ལྔ་གཉིས་དང་བཅུ་བཞི་གཉིས། །ཚེས་བརྒྱད་དང་བཅས་ས་འགུལ་དང་། །བུ་བཙས་ཤིང་དྲུང་ཉིད་དང་ནི། །མི་གཙང་བས་ནི་ཁྱབ་གནས་དང་། །བདག་

ཉིད་མི་གཙང་བ་ཉིད་དང་། །ནད་ཀྱིས་སེམས་ནི་རྨོངས་པ་དང་། །རླུང་ནི་ཆེན་པོ་རྒྱུ་བ་དང་། །དེ་བཞིན་འབྲུག་སྒྲ་སྒྲོགས་པའི་ཚེ། །འདི་བསླབ་པ་ནི་སྤང་བྱས་ལ། །བུ་ཡིས་བསྟན་བཅོས་གཟུང་བར་བྱ། །བསྟན་བཅོས་གཟུང་བ་བྱས་ནས་ནི། །བསྟན་བཅོས་དོན་ནི་གཟུང་བར་
གྱིས། །བསྟན་བཅོས་དོན་ནི་གཟུང་བྱས་ནས། །དེ་འོག་ལས་ལ་གོམས་པར་གྱིས། །བསྟན་བཅོས་ཤེས་པ་འབའ་ཞིག་ལ། །ལས་ཀྱི་བྱ་བ་ཙམ་མཐོང་བ། །གསོ་བའི་ལས་ལ་འཇུག་པར་ནི། །དེ་དག་གཉི་ཀ་དོན་མེད་འགྱུར། །གསོ་བའི་ལས་ལ་འཇུག་པ་ན། །ཁྱོད་ཀྱིས་
རྟ་ནི་རྟག་ཏུ་སྐྱོངས། །མི་བཟད་ནད་ཀྱིས་ཉེན་ན་ཡང་། །ཁྱོད་ཀྱིས་སྤང་བར་མི་བྱའོ། །རྟ་གང་གསོར་ནི་མི་རུང་བ། །དེ་ཡང་རིགས་པས་གསོ་བར་བྱ། །མ་གསོས་ན་ནི་ངེས་པར་འཆི། །གསོས་ཀྱང་ངེས་པ་མེད་གྱུར་པའི། །ནད་ཀྱིས་གདུངས་པར་གྱུར་པ་གང་། །ནད་ནི་གཞན་ལ་འགོ་བར་
འགྱུར། །བསྟན་བཅོས་ལས་དེ་སྤང་བར་བཤད། །སྤང་ཚུལ་དེ་ཡང་ང་ལས་ཉོན། །དེ་ནི་རྟ་བྲེས་ལས་རིང་བར། །སྲུང་མ་དང་བཅས་གཞག་པར་བྱ། །ན་བའི་རྟ་ནི་གང་ཡང་རུང་། །གཏན་སྤང་བ་ནི་རིགས་མ་ཡིན། །ནད་དང་སྦེགས་དང་རྒས་པའི་རྟ། །གཏན་སྤང་བྲམ་ཟེ་གསོ་
དང་མཚུངས། །རྟ་ནི་མཚན་ཉིད་ངན་གྱུར་པ། །ཉོ་བའི་དུས་སུ་བླང་མི་བྱ། །གང་ཞིག་རང་གི་ཁྱིམ་དུ་སྐྱེས། །བྲམ་ཟེ་གཞན་ཡུལ་པ་ལ་སྦྱིན། །ལྟས་ངན་བྱུང་བར་གྱུར་ན་ནི། །འདི་ཉིད་སྦྱིན་པ་གཏང་བར་བྱ། །མི་འཚེ་བ་ནི་ཚེ་སྐྱི་མཆོག །སེམས་ཅན་ལ་བརྟག་བརྩེ་བྱ་ཞིང་། །
དེ་བས་ཅི་ཙམ་གསོ་ནུས་པ། །དེ་ཙམ་ཞིག་ནི་གཞག་པར་བྱ། །བདེ་བར་འཇོག་པར་ནུས་གྱུར་ལས། །ལྷག་པར་འཇོག་པ་འབད་མི་བྱ། །རྟ་ནི་སྡུག་བསྔལ་བར་བཞག་ན། །ཆོས་དོན་འདོད་པ་འཇོམས་པར་འགྱུར། །གཞན་ཡང་རྒྱལ་པོའི་ས་སྐྱོང་བའི། །བྱ་བ་རྟ་ལ་རག་ལས་
པས། །དེ་ལ་ཁྱེད་ཀྱིས་གུས་བྱ་ཞིང་། །དེ་བཞིན་སློབ་དཔོན་བླ་མ་དང་། །བྲམ་ཟེ་ལ་ཡང་གུས་པར་བྱ། །དེས་ནི་ཁྱེད་ཀྱིས་དཔལ་ཐོབ་འགྱུར། །དེ་ལས་གཞན་དུ་བྱེད་ན་ནི། །ལྟུང་ལས་ཉེ་བར་ལྟུང་བར་འགྱུར། །དམྱལ་བར་རང་ནི་ལྟུང་བ་དང་། །ངེས་པར་ལྡན་པ་ཉིད་དུ་

འགྱུར། །དམ་པའི་ལམ་ལ་གནས་ན་ནི། །གྲགས་དང་བསོད་ནམས་ཚེ་རིང་དང་། །ཆོས་དོན་འདོད་པ་མ་ལུས་པའི། །དཔལ་མཆོག་འབད་པ་མེད་པར་འཐོབ། །དེ་སྐད་བརྗོད་ནས་སློབ་མ་ཡིས། །ཁས་བླང་དེ་རྗེས་སློབ་དཔོན་གྱིས། །དུས་ཤིས་པ་ལ་མ་ཡེངས་པར། །སློབ་
མ་དེ་ནི་སློབ་ཏུ་གཞུག །དེ་ཡི་འོག་ཏུ་རྒྱུན་དུ་ནི། །མཁས་པ་རྟག་ཏུ་བརྩོན་པ་ཡིན། །བྱ་བ་ཅི་བཞིན་རྫོགས་བར་དུ། །སློབ་མ་དེ་ནི་སློབ་ཏུ་གཞུག །དེ་ལྟར་རིག་པ་བྱིན་པ་ཡིས། །བླ་མས་སློབ་མར་བསླབ་པ་ཡིན། །སློབ་དཔོན་དང་ནི་སློབ་མ་དག །འདོད་འཇོ་བ་
ལྟར་ཟད་མེད་འགྱུར། །ཤ་ལི་ཧོ་ཏྲའི་མདོའི་གནས་ལས་སློབ་མ་སྦྱང་བའི་ལེའུ་སྟེ་གཉིས་པའོ།། །།དེ་ནས་ཤ་ལི་ཧོ་ཏྲས་བུ། །ལེགས་ཐོས་ལ་ནི་ཡང་སྨྲས་པ། །གང་ཕྱིར་འདི་ནི་དཔལ་མོའི་བུ། །དེ་ཕྱིར་མཆོག་ཏུ་བཀྲ་ཤིས་ཡིན། །གཞན་ཡང་རྟ་ཡི་མཆོད་སྦྱིན་
ལ། །རྟ་ནི་དགོས་པ་ཉིད་ཡིན་པས། །དེ་བས་ཤིན་ཏུ་དག་བྱེད་དེའང་། །འདི་ནི་བཀྲ་ཤིས་དམ་པ་ཡིན། །རི་དགས་དང་ནི་ཐག་རིང་འགྲོ། །དེ་བཞིན་གཡུལ་གྱི་ལས་རྣམས་ལའང་། །རྒྱལ་པོ་རྒྱལ་བྱེད་པ་ཡི་རྒྱུ། །རྟ་ལས་མཆོག་གྱུར་ཡོད་མ་ཡིན། །རྟ་ཡི་མཆོད་སྦྱིན་དག་ལ་
ནི། །སྐྱེ་དགུའི་བདག་གིས་ལོངས་སྤྱོད་ཅིག །དེ་བས་མཆོད་སྦྱིན་ཐམས་ཅད་ལ། །དེ་ནི་སྤྱད་བྱ་ཉིད་ཡིན་ནོ། །དེ་ཕྱིར་ཤིན་ཏུ་གཙང་བས་ན། །ཀུན་ལ་རྗེས་སུ་གནང་བ་ཡིན། །དེ་ཕྱིར་ཚངས་པ་མ་གཏོགས་པ། །ཐམས་ཅད་ཀྱི་ནི་ཟས་མ་ཡིན། །རྟ་ཡི་མཆོད་སྦྱིན་ལས་
ལྷག་པའི། །དག་བྱེད་མི་ལ་ཡོད་མིན་པས། །རྟ་མ་གཏོགས་པར་ས་གསུམ་ན། །བཀྲ་ཤིས་མཆོག་གཞན་ཡོད་མ་ཡིན། །རྣག་ཅན་མྱུར་འགྲོ་ལམ་ལས་རྒྱལ། །འགྲོས་ལེགས་འཕྲོག་བྱེད་ལས་རྫོགས་དང་། །མགྱོགས་དང་མགྱོགས་འགྲོ་མྱུར་འགྲོས་ཅན། །དཔལ་
མོའི་བུར་ཡང་བཤད་པ་ཡིན། །འཇིག་རྟེན་ན་ནི་སྣ་ཆེ་བས། །དེ་ནི་སྣ་ཅན་ཞེས་བྱར་བཤད། །རྟག་ཏུ་འགྲོ་བས་མགྱོགས་འགྲོ་ཡིན། །ལམ་དུ་རྒྱལ་བས་ལམ་ལས་རྒྱལ། །འགྲོས་ལེགས་ལྡན་པས་འགྲོས་ཅན་ཡིན། །དབང་མེད་ཁྱེར་བས་འཕྲོག་བྱེད་དེ། །ལས་

རྣམས་རྫོགས་པར་བྱེད་ནུས་པས། །ལས་རྫོགས་ཞེས་ནི་ཚངས་པས་བཤད། །མགྱོགས་པ་དང་ནི་མགྱོགས་འགྲོ་དང་། །དེ་བཞིན་མྱུར་འགྲོ་ཅན་ཞེས་པ། །དེ་ནི་མགྱོགས་པ་ཁོ་ནར་བཤད། །འདི་དག་ངེས་ཚིག་ཚལ་ཡིན་ནོ། །རྟ་ནི་དཔལ་མོའི་
བུ་ཡིན་པས། །དཔལ་མོའི་བུ་ཞེས་བཤད་པ་ཡིན། །མཚན་དང་རིགས་ནི་བཟང་བ་དང་། །དཔའ་པོས་བཞོན་ཞིང་བྱང་བ་ཡི། །རྟ་ནི་སྟོང་གིས་ས་བཞི་དག །མ་ལུས་པ་ལས་རྒྱལ་བར་ནུས། །མཚོན་ཐོགས་པ་ཡིས་མི་ཐུབ་པའི། །གནས་དེར་སྟོབས་ཆེ་བ་ཡི་རྟས། །འཕྲལ་
དུ་རྒྱལ་བར་ནུས་པ་ཡིན། །དེ་ཕྱིར་ཁྱེད་ཀྱིས་དེ་ལ་ནི། །ཤིན་ཏུ་གུས་ཤིང་བརྩེ་བར་བྱ། །རྒྱལ་པོ་སྨན་པའི་ཆོས་དོན་དང་། །ཕུན་ཚོགས་པ་ཡང་གཞན་ལས་མིན། །ཤ་ལི་ཧོ་ཏྲའི་མདོའི་གནས་ལས་ངེས་པའི་ཚིག་གི་ལེའུ་སྟེ་གསུམ་པའོ།། །།ཤ་ལི་ཧོ་ཏྲ་
བློ་གྲོས་ཆེ། །རྟ་ཡི་གནས་ན་འདུག་པ་ལ། །ལེགས་ཐོས་ཐོས་པ་ཕུན་ཚོགས་པས། །སླར་ཡང་ཕ་ལ་དྲིས་གྱུར་པ། །རྟ་ནི་ཅི་ལྟར་བྱུང་བར་གྱུར། །མཆོད་སྦྱིན་འཚམ་པ་ཅི་ལྟར་འགྱུར། །དེ་ནི་དང་པོར་རྒྱལ་པོ་དག །གང་གི་བཞོན་པ་ཉིད་དུ་འགྱུར། །དེ་ཡི་རིགས་བཞི་ཅི་ལྟ་བུ། །
དེ་ལྟ་བུར་ནི་ཅི་ལྟར་འགྱུར། །ཅི་ཡི་ཕྱིར་ནི་དེ་འདྲར་འགྱུར། །དེ་དག་ཤེས་པར་འཚལ་ལགས་སོ། །དེ་ཡི་ཚིག་ནི་ཐོས་པ་དང་། །ཤ་ལི་ཧོ་ཏྲས་སྨྲས་གྱུར་པ། །འདི་ན་རྒྱལ་པོའི་ཆོས་ཀྱི་མཆོག །ས་རྣམས་ཡོངས་སུ་སྐྱོང་བ་ཡིན། །དེ་ཡང་དཔུང་གིས་བྱེད་པར་ནུས། །དཔུང་
གི་མཆོག་ནི་རྟ་རྣམས་ཡིན། །དེ་ཕྱིར་རང་དོན་ལ་མཁས་པའི། །རྒྱལ་པོའི་ཆོས་དོན་འདོད་དོན་དུ། །ཡང་ཡེ་རྣམ་པ་ཐམས་ཅད་དུ། །འབད་དེ་རྟ་རྣམས་བསྲུང་བར་བྱ། །ཆོས་དང་གྲགས་འདོད་སྨན་པ་ནི། །བསྟན་བཅོས་མཁས་གྱུར་པས་ཀྱང་བསྟེན། །དེ་བས་དེ་
རྣམས་ལྷ་དང་ནི། །མི་ནི་ཇི་ལྟར་བྱུང་བ་བཤད། །རིགས་དང་ཉེ་བའི་རིགས་དང་ཚེ། །ན་ཚོད་ཤིས་དང་མི་ཤིས་དང་། །གཙུག་དང་གདོང་དང་ཐིག་ལེ་དང་། །འཚེར་དང་འགྲོས་ཀྱི་རིམ་པ་དང་། །མཚན་ངན་གཉེན་པོ་མཆན་ཁུང་དང་། །འབྱུང་དང་བཞོན་

བའི་བྱ་བ་དང་། །ནད་མེད་ནད་ནི་རྒྱས་པ་དང་། །རྣ་བ་རྣམས་ཀྱི་སྨན་དང་ནི། །དེ་བཞིན་སྨན་ནི་བྱུང་བ་ཡི། །གོ་རིམས་ཅི་བཞིན་ཉིད་དང་ནི། །སྤུ་མདོག་མདོག་འདྲེས་ཁྱད་པར་དང་། །སྤུ་མདོག་དག་དང་མིག་དག་དང་། །རང་བཞིན་སྙིང་སྟོབས་དག་དང་ནི། །སྟོན་ཀ་
སྐྱེས་པའི་མཚན་ཉིད་དེ། །འདི་དག་ཐམས་ཅད་མདོར་བསྡུས་ནས། །ཁྱེད་ལ་ལེགས་པར་བཤད་པར་བྱ། །ལྷ་རྣམས་ཀྱིས་ནི་མངལ་སྐྱེས་དང་། །མངལ་མེད་བྱུང་བ་གཉིས་སུ་བཤད། །སྔོན་ཚེ་འཇིག་རྟེན་ཞིག་གྱུར་ཅིང་། །འཇིག་རྟེན་འདི་ནི་མེད་པའི་ཚེ། །འབྱིན་བྱེད་
མེ་ལ་སྦྱིན་སྲེག་ནི། །བྱས་པས་དང་པོར་ཚངས་པ་དང་། །རྟ་ཕོ་དེ་རྗེས་རྒོད་མ་མཆོག །རང་གི་སྐྱེ་གནས་དག་ཏུ་བསྐྱེད། །གཞན་ཡང་སྐྱེ་དགུའི་བདག་མོ་ཡི། །མཆོད་སྦྱིན་ལ་ནི་ཚངས་པ་ཡི། །མཆི་མ་བྱུང་བ་དཔལ་མོ་ནི། །དགའ་བས་སྙིམ་པ་སྦྱར་བས་བླངས། །དེ་
ཡི་ཡན་ལག་ལས་བྱུང་སྟེ། །རྟ་རྣམས་བྲམ་ཟེའི་རིགས་སོགས་གྱུར། །ཁ་དང་དཔུང་པ་བརླ་གཉིས་དང་། །རྐང་པ་གཉིས་ལས་གོ་རིམས་བཞིན། །གཡས་གཡོན་ལས་ནི་ཕོ་མོ་སྟེ། །ཚངས་པ་ལས་རྟ་དེ་ལྟར་སྐྱེས། །འོ་མའི་རྒྱ་མཚོ་བསྲུབས་པའི་ཚེ། །རྟ་དང་བདུད་རྩི་ལྷན་
ཅིག་བྱུང་། །དེ་མིང་ཨུ་ཙ་སྲ་བ་སྟེ། །སྒྲ་ནི་སྤྲིན་ཆེན་ལྟ་བུ་ཡིན། །རྒྱ་མཚོ་དེ་ལས་ནམ་མཁའ་ལ། །ཤུགས་ཀྱིས་རྣམ་པར་འགྲོ་བ་ན། །ལྷ་མིན་སྟོབས་དང་ལྷ་འཁྲུག་པས། །ཕྱི་རྐང་གཉིས་ནི་བཟུང་བར་གྱུར། །སྟོབས་ཆེན་སྟོབས་ལྡན་གྱིས་དྲངས་པས། །དཔྱི་ནི་ཅུང་ཟད་
ཉམས་པར་གྱུར། །དེ་བས་རྟ་རྣམས་ད་རུང་མི། །དཔྱི་ནི་མྱུར་བར་མི་འདེབས་ཤིང་། །ངལ་སོ་བ་ན་རྐང་པ་ནི། །ཕྱི་མ་རེས་ཀྱིས་དལ་བར་འདེགས། །ཚངས་པའི་བུར་གྱུར་གཏུམ་པོ་ནི། །དམོད་པ་ཡིས་ནི་འུག་པར་གྱུར། །ཡིད་འོང་ཡིད་ཀྱི་མཆོད་སྦྱིན་ནི། །རི་དགས་མོར་གྱུར་དེ་
གཉིས་འདུས། །དེ་ལ་སྒོ་ང་སྣ་ཚོགས་པ། །དུ་མ་བྱུང་བར་གྱུར་བ་ཡིན། །ལྟེ་བ་མན་ཆད་མེས་གདུངས་པའི། །རྡུལ་ནི་ཐལ་བར་འཛག་གྱུར་པ། །དེ་ལས་ཀྱང་ནི་ཁ་དོག་རྣམས། །ཐ་དད་བོང་ཕོ་བོང་མོར་གྱུར། །སྒྲ་སྐད་རྩུབ་ཅིང་རྣོ་བ་དང་། །རང་བཞིན་རྩུབ་ཅིང་རྐང་པ་རྩུབ། །དེ་ཡང་

རྟ་དང་ལྷན་ཅིག་བྱུང་། །སྐྱེ་དགུའི་བདག་གི་གནས་ན་འདུག །དེ་ནས་དེ་དག་རྨོངས་པ་ཡིས། །དེ་ཡི་སྦྱིན་སྲེག་ཁང་པ་བརླག །དེས་ནི་དེ་ལ་བསད་དང་བཅིངས། །སྒྲོ་བཅད་རྩྭ་ནི་ཟ་བ་དང་། །ལྷ་དང་མི་ཡི་བཞོན་པ་ནི། །ཉིད་གྱུར་ཅིག་ཅེས་དམོད་པ་
བཏབ། །རྟ་དེ་ཡིད་ནི་ཁུམས་གྱུར་ནས། །སྐྱེ་དགུའི་བདག་ལ་གསོལ་བ་བཏབ། །དེ་ནས་དེ་ལ་མགུ་གྱུར་ནས། །མཆོག་འདི་ཐོབ་པར་གྱུར་བ་ཡིན། །རྟ་ཡི་མཆོད་སྦྱིན་ལ་བསད་དང་། །གཡུལ་དུ་གཡོ་བར་གྱུར་པ་དང་། །ལེགས་པར་སྦྱིན་པ་བཏང་པ་ན། །བསོད་ནམས་ཁྱེད་ཀྱིས་
ཐོབ་གྱུར་ཅིག །དེ་བཞིན་དུ་ནི་ཡོན་གནས་ཀྱི། །མཆོག་ཉིད་དུ་ནི་རྟ་གྱུར་ཅིག །དད་པས་དགེ་སྦྱོང་བྲམ་ཟེ་ལ། །རྟ་རྣམས་བྱིན་པར་གྱུར་ན་ནི། །རྟ་ཡི་བ་སྤུ་ཇི་སྙེད་པར། །ལྷ་ཡུལ་དུ་ནི་སྐྱེ་བར་འགྱུར། །སྦྱིན་པ་བཏང་པའི་རྟ་ཡང་ནི། །འགྲོ་བའི་མཆོག་ཏུ་འགྱུར་བ་ཡིན། །དེ་ནས་
སྐྱེ་དགུའི་བདག་པོ་ཡིས། །ཚིག་གིས་འདུས་ནས་ཁ་བ་ཅན། །ཤ་ལི་ཧོ་ཏྲ་ལ་འཁུར་ཞིང་། །དྲང་སྲོང་རྣམས་དང་ལྷན་ཅིག་རྩེ། །སྟོབས་ལྡན་ཨུ་ཙ་སྲ་བ་ནི། །ཞོན་ནས་ལྷ་རྣམས་གཟིར་བར་བྱེད། །ལྷ་ཀུན་མངོན་མཐོ་འདོད་པ་ཡིས། །ཤ་ལི་ཧོ་ཏྲ་ལ་གསོལ་བཏབ། །དེ་ནས་
ལྷ་ལ་བཞོན་པའི་ཕྱིར། །ཇི་ལྟར་འདོད་པ་བཞིན་དུ་བྱིན། །ཟླ་བ་ལ་དཀར་ལྷ་ཆེན་ལ། །ལྗང་གུ་ཁྱབ་འཇུག་ལ་རྟ་སེར། །མརྐ་ཏ་མདོག་འདྲ་ཉི་མ་ལ། །མེ་ལྷ་ལ་དམར་གཤིན་རྗེ་ནག །པདྨ་དཀར་འདྲ་ཆུ་ལྷ་ལ། །སྔོ་དང་ཁྲ་བོ་ཐ་སྐར་གྱི། །བུ་གཉིས་དམར་པོ་རླུང་ལྷ་ལ། །ལྷ་
རྣམས་གཞན་ལ་སྣ་ཚོགས་པ། །རང་རང་ཇི་ལྟར་དགའ་བ་ནི། །འདི་འདྲ་ཡིད་འཕྲོག་བྱེད་པ་བྱིན། །ལག་མའི་རྟ་ནི་སྐྱེ་དགུའི་བདག །ཡིད་ཆེས་བྱས་པས་བླངས་ནས་ནི། །དེ་ཡིས་མི་ཡི་རྒྱལ་པོ་ལ། །ཅི་རིགས་བར་ནི་བགོས་ཏེ་བྱིན། །གཤོག་པ་བཅད་པས་དེ་རྣམས་ནི། །
ན་གྱུར་སླར་ཡང་མེ་ཡིས་བསྲེགས། །ནད་གདུངས་ཤ་ལི་ཧོ་ཏྲ་ལ། །འཁུས་པར་གྱུར་ཏེ་ཁྲོ་བ་ཡི། །མཆེ་བ་བཅད་ནས་སྟོབས་ཀྱིས་ནི། །དེ་གཉིད་ལོག་པ་བཟའ་སྙམ་ན། །དེ་ཚེ་དྲང་སྲོང་མི་སྣང་གྱུར། །དེ་ནས་རྟ་རྣམས་ཟོས་སྙམ་ནས། །དགའ་བས་རྟ་སྤངས་འབྱིན་ཅིང་སྣོམ། །

དེ་ཕྱིར་རྟ་རྣམས་ད་རུང་ཡང་། །རྟ་སྤངས་བཏང་ནས་སྣོམ་པར་བྱེད། །སྐྱེ་དགུའི་བདག་གི་ཁྱིམ་བདག་ཚེ། །ཧ་ཧ་ཟེར་བས་ཧ་ཡར་བཤད། །བྱ་ལྟར་གཤོག་པ་མགྱོགས་འགྲོ་བས། །མགྱོགས་འགྲོ་ཞེས་ནི་བཤད་པ་ཡིན། །ལམ་རྫོགས་མགྱོགས་པས་བྱེད་པ་ནི། །འཕྲོག་
པ་འཚེར་བ་ཉིད་ལའང་བྱ། །ལྷ་རྣམས་ཀྱིས་ནི་རྟ་བྱུང་བ། །རྣམ་པ་བཞི་སྟེ་དུ་མའང་ཡིན། །བོང་བུ་རྒོད་མ་ལ་དྲེའུ། །བོང་བུ་བས་ནི་བཟང་བར་འདོད། །དྲེའུ་ལས་སྐྱེས་ཀི་ན་ཡིན། །དེ་ལས་སྐྱེས་པ་ཀི་ས་ཏ་ཏ། །ཀི་ས་ཏ་ཏའི་བུ་ཆུ་བུར་ཅན། །ཆུ་བུར་ཅན་བུ་བོང་བུར་གྱུར། །
རང་དང་རྟ་ཡི་སྐྱེ་གནས་ཏེ། །བོང་བུའི་སྐྱེ་གནས་གཉིས་སུ་འདོད། །བོང་བུ་དང་ནི་རྟ་སོགས་ལ། །ལུགས་སུ་འབྱུང་དང་ལུགས་ལས་བཟློག །དེ་ལྟར་རིགས་ཀྱི་དབྱེ་བ་འདི། །གོ་རིམས་བཞིན་དུ་བརྗོད་པ་ཡིན། །རྟ་རྣམས་ཀྱི་ནི་འབྱུང་བ་དག །སླར་ཡང་འོད་ཆེན་བཀའ་སྩོལ་ཅིག །
འོ་མའི་རྒྱ་མཚོ་ལས་བྱུང་ཉིད། །ཐམས་ཅད་ཤེས་པར་འཚལ་ལགས་སོ། །བུ་ཡིས་དེ་ལྟར་དྲིས་པ་དང་། །ཤ་ལི་ཧོ་ཏྲས་སྨྲས་པ་ནི། །སྐྱེ་དགུ་དང་པོ་བྱུང་བའི་ཚེ། །འཚོ་བའི་འཇིག་རྟེན་བདེ་གནས་གྱུར། །དེ་རྗེས་ལྷ་དང་ལྷ་མིན་གྱི། །འཇིག་རྟེན་ཀུན་ལ་ཚངས་པ་ཡིས། །འཇིག་རྟེན་
ཐམས་ཅད་ཁྱབ་བྱེད་པའི། །སྐོམ་གྱིས་གདུངས་པ་ཉིད་དུ་བྱས། །འཇིག་རྟེན་པ་ཡི་སྲོག་ཆགས་རྣམས། །སླར་ཡང་རྒྱུག་ཅིང་འགྲོ་བར་བྱེད། །ལྷ་དང་ལྷ་མིན་ཤ་ཟ་དང་། །ལྟོ་འཕྱེ་སྲིན་པོ་དེ་རྣམས་ཀྱང་། །སྟོབས་དང་ལྡན་པའི་སྐོམ་གྱིས་ནི། །གདུངས་བས་ཉེ་བར་ཟིན་པར་གྱུར། །ལྷ་
དང་ལྷ་མིན་ཁ་ཟས་དང་། །མལ་སྟན་ལ་ནི་དགའ་མེད་གྱུར། །དེ་རྣམས་དེ་ལྟར་སེམས་པ་ན། །དེ་ཡི་ཚེ་ན་བློ་སྐྱེས་པ། །གང་འདི་ཆུ་ཡི་སྙིང་པོར་ནི། །གནས་དེར་བདག་ཅག་སྐོམ་སེལ་གྱུར། །དེ་ནས་རི་བོ་མནྡཱར། །གྲགས་ལྡན་སྲུབ་ཤིང་ཉིད་དུ་བྱས། །ཀླུ་ཡི་རྒྱལ་ཆེན་མཐའ་
ཡས་ནི། །སྲུབ་ཟག་ཏུ་ནི་ཡང་དག་སྦྱར། །དེར་ནི་ཕྱོགས་གཅིག་ལྷ་རྣམས་ཏེ། །ཕྱོགས་གཅིག་ཏུ་ནི་ལྷ་མིན་གནས། །སྲུབ་ཐག་འདྲེན་ཞིང་མཚོ་ཆེན་ནི། །འཇིགས་པའི་སྒྲ་རྣམས་བསྲུབས་པ་ན། །མཚོ་ཆེན་དེར་ནི་ལྷ་དང་མིའི། །སྨན་ནི་རྩ་བ་ལོ་མ་དང་། །འོ་མར་བཅས་པ་བསྡུས་ནས་ནི། །

ཐམས་ཅད་བཅུག་པ་ཉིད་དུ་འགྱུར། །གཟི་བརྗིད་ཆེ་ཞིང་གཟི་བརྗིད་ཅན། །རོ་ལ་སོགས་པ་འབྱུང་ཞིང་དགེ །མེ་ཏོག་སེར་དང་གོ་སྲིང་གི །དེ་བཞིན་སོར་མོ་ལ་སྤྱོད་དང་། །མདངས་ལྡན་ཛཱ་ཏི་ས་ར་དང་། །འཚོ་བྱེད་འཆི་བ་གསོ་བྱེད་དང་། །དེ་བཞིན་རྨ་འཚོ་བྱེད་ལ་
སོགས། །གཞན་ཡང་ཚངས་བས་གང་སྤྲུལ་བའི། །བཅུ་དང་མཐུ་སྟོབས་བསམ་མི་ཁྱབ། །སྨན་རྣམས་མཚོ་ཆེན་དེར་བཅུག་སྟེ། །རྒྱ་མཚོ་བསྲུབས་པར་གྱུར་པ་ན། །དེ་ཚེ་དང་པོ་ཁོ་ནར་ནི། །དཔལ་མོ་ལ་སོགས་བྱུང་པར་འགྱུར། །གང་གིས་ནང་པར་བརྗོད་ན་ནི། །རྨི་ངན་
ལ་སོགས་འཇིག་བྱེད་པའི། །དགེ་བ་ཞེས་བྱའི་རིན་པོ་ཆེ། །བརྒྱད་ནི་ཆུ་ལས་བྱུང་བར་གྱུར། །ཉི་མ་བཞོན་པའི་ཤིང་རྟ་ནི། །འདྲེན་པའི་རྟ་དང་ལྷ་ཡི་ཆང་། །དེ་བཞིན་ནོར་བཟང་ཀོ་ཐུབ། །ནོར་བུའི་རྣ་ཆ་བཟང་པོ་དང་། །བདུད་རྩི་ཞེས་བྱའི་སྨན་དང་ནི། །བདུད་རྩི་ཉིད་ཀྱང་བྱུང་བར་
འགྱུར། །བསྟན་བཅོས་ཐམས་ཅད་འཛིན་པའི་མཆོག །སྨན་པ་ཐང་ལ་འབར་དང་ནི། །སྒྲ་མཐོ་ཞེས་ནི་བྱ་བ་རྟ། །སྙིང་སྟོབས་ཆེ་ཞིང་སྟོབས་ཆེ་ལ། །འབྲུག་དང་རྔ་ཡི་སྒྲ་དང་ནི། །དུང་དང་རྔ་ཆེན་སྒྲ་འདྲ་བ། །གང་ཞིག་སྐད་གསང་མཐོན་པོ་ཡིས། །སྒྲ་དེས་མིང་དུ་བཏགས་པ་ནི། །
དེ་ཚེ་ལྷ་དང་ལྷ་མིན་གྱིས། །སྒྲ་མཐོ་ཞེས་ནི་བྱ་བར་བཏགས། །སྤྲིན་དཀར་གྱི་ནི་མདོག་འདྲ་ཞིང་། །མགྱོགས་ཤིང་བདུད་རྩི་ལས་བྱུང་བ། །མདངས་ལྡན་རྒྱ་མཚོ་ཆེན་པོ་ལས། །བྱུང་སྟེ་མཁའ་ལ་འགྲོ་བར་བྱེད། །སྟོབས་ལྡན་ཞེས་བྱའི་སྣང་བྱེད་བུས། །དེ་ཡི་རྐང་པ་གཉིས་
ལས་བཟུང་། །དེ་ཚེ་ལྷ་མིན་ཐམས་ཅད་ཀྱིས། །མནྡཱར་དང་དེ་བཞིན་དུ། །ཀླུ་ཡི་རྒྱལ་པོ་བོར་ནས་ནི། །རྟ་ཡི་རིན་ཆེན་ལ་འཇུས་ཏེ། །འོ་མའི་རྒྱ་མཚོ་སྤངས་ནས་ནི། །ས་གཞི་འདིར་ནི་ཕྱིན་པར་གྱུར། །ལྷ་མིན་བུམ་པ་མཉམ་པ་དང་། །དེ་བཞིན་སེམས་རབ་འཕགས་པ་དང་། །
མེ་འདྲ་བ་དང་འདོད་ལྷ་དང་། །གནོད་སྐྱོབས་གསེར་མདོག་ཅེས་བྱ་བ། །ཆུ་བུར་ཟླུམ་པོ་ཞེས་བྱ་བས། །སྟོབས་ལྡན་ལ་ནི་ཚིག་འདི་སྨྲས། །གང་གིས་དཔལ་ཐོབ་འགྱུར་པ་ཡི། །དོན་གཉེར་རིན་ཆེན་ཐོབ་པས་ན། །བདག་ཅག་ལྷ་དང་མི་རྣམས་ལ། །འཇིགས་བ་འབྱུང་བར་མི་འགྱུར་རོ། །

རྟག་པར་རབ་ཏུ་དགའ་བྱེད་ཅིང་། །ཐམས་ཅད་སྟོབས་ཀྱིས་དྲེགས་པ་དང་། །ལྷ་མིན་སྐྱེས་བུ་ཐམས་ཅད་ནི། །དགའ་ཞིང་མགུ་བ་ཉིད་དུ་བྱ། །དེ་ནས་སྟོབས་ལྡན་ཡིད་དགའ་བས། །དེས་ནི་ལྷ་རྣམས་ལ་སྨྲས་པ། །རྒྱ་མཚོ་ཆེན་པོ་བསྲུབས་པ་ལས། །རིན་ཆེན་གང་ཞིག་ཐོབ་གྱུར་པ། །དེ་
ནི་བ་ལ་བྱིན་པས་ན། །གཞན་གྱིས་དེ་རྙེད་འོན་མ་ཡིན། །ལྷ་རྣམས་ཀྱིས་ཀྱང་ཚིག་སྨྲས་པ། །བདག་ཅག་གི་ཡང་རྩལ་ཡིན་པས། །རིན་ཆེན་ཁྱོད་ནི་གཅིག་བུའི་མིན། །ཁྱེད་དང་བདག་ཅག་ཐུན་མོང་ཡིན། །དེ་ནས་ལོ་ནི་ཁྲི་ཡི་བར། །སྐར་མའི་ཚད་ཀྱིས་གཡུལ་འབྱེད་དེ། །ལྷ་དང་ལྷ་མིན་
གཡུལ་ངོར་ནི། །དཔུང་ཚོགས་ལྡང་ཞིང་ལྡང་ཞིང་འཐབ། །དེ་ཚེ་སྟོབས་ལྡན་སྒྲ་མཐོ་བའི། །སྟོབས་མགྱོགས་ལྡན་པའི་རྟ་ཞོན་ནས། །ལྷ་རྣམས་ཀྱི་ནི་དཔུང་གི་ཚོགས། །ཆེན་པོ་དག་ཀྱང་བརླགས་པར་གྱུར། །གང་ཡང་དེར་ནི་ལྷ་རྣམས་ཀྱིས། །གཡུལ་དུ་བསད་པའི་ལྷ་མིན་རྣམས། །
རྟ་དབང་དེ་ཡིས་བསྣམས་པ་དང་། །ཡང་དང་ཡང་དུ་སླར་འཚོ་གྱུར། །དེ་ནས་ལྷ་མིན་ཆེན་པོ་ཡིས། །བསད་པར་གྱུར་པས་རྨོངས་ནས་ནི། །སྐྱབས་འདོད་པ་ཡིས་ཚངས་པ་ལ། །སྐྱབས་སུ་ཉེ་བར་སོང་བར་གྱུར། །ལེགས་ལྡན་སྟོབས་ཆེན་ལྡན་པ་ཡི། །ལྷ་མིན་གཡུལ་གྱིས་ཕམ་པར་
བགྱིས། །ལེགས་ལྡན་གྱིས་ནི་བདག་ཅག་ལ། །བཞོན་པ་བཟང་པོ་སྩལ་བའི་རིགས། །བདག་ཅག་གིས་ཀྱང་ལྷ་མིན་གྱི། །གཡུལ་ངོའི་གནས་ལས་རྒྱལ་བར་བགྱི། །དེ་ནས་ཚངས་པ་སྐྱེ་དགུ་ཡི། །བདག་པོས་དེ་ལ་སྨྲས་པ་ནི། །ཕྱིས་འབྱུང་བ་ནི་གང་ཡང་རུང་། །ང་ཉིད་ཀྱིས་ནི་སྔར་ཤེས་
ཏེ། །གང་ཚེ་གང་གིས་ཅི་ཙམ་འགྱུར། །འདི་ནི་ཁོ་བོས་སྔར་ཤེས་པས། །ང་ཡིས་སྔོན་ཚེ་རྟ་སྤྲུལ་བས། །དེབ་ནི་ནས་སྟེང་འགྲོ་བ་དང་། །བར་སྣང་དང་ནི་ས་འོག་གི །རྒྱུ་དང་མི་རྒྱུ་གང་ཡིན་དང་། །སྲོག་ཆགས་རྣམས་ནི་གང་ཅིའང་རུང་། །དེ་དག་ཐམས་ཅད་མངོན་སྤྲུལ་ཏོ། །མཆོད་
སྦྱིན་བཞོན་པའི་དོན་དུ་ནི། །རྟ་ཡང་ང་ཡིས་སྔོན་ཕྱུང་སྟེ། །སྦྱིན་སྲེག་བྱེད་ཚེ་ང་ཡི་ནི། །མཆི་མ་འཛག་པར་གྱུར་པ་དེ། །དཔལ་མོ་ཡིད་ནི་དགའ་བ་ཡིས། །ལག་པ་གཉིས་ཀྱིས་བླངས་པར་གྱུར། །དེ་ལས་དེར་ནི་རྟ་བྱུང་བས། །དེ་ཕྱིར་དཔལ་མོའི་བུ་ཞེས་བྱ། །དེར་ནི་ལག་པ་

གཡས་པ་ཡི། །མཆི་མ་ལས་ནི་རྟ་ཕོར་གྱུར། །གཡོན་པའི་མཆི་མ་ལས་རྒོད་མ། །སྙིང་སྟོབས་ལྡན་དང་མགྱོགས་མདངས་ལྡན། །དཔལ་མོའི་ལག་པའི་ངའི་མཆི་མ། །དེར་ནི་རྟ་དེ་བྲམ་ཟེའི་རིགས། །ང་ཡི་མཆི་མ་དཔལ་མོ་ཡི། །ལག་པ་གཉིས་ལས་
འཛག་གྱུར་པ། །བྲང་ན་གནས་པ་རྒྱལ་རིགས་ཏེ། །གཡུལ་ངོར་སྲ་བར་ཤེས་པར་བྱ། །ལྟེ་བ་བརླ་ཡི་རྗེའུ་རིགས་ཏེ། །རྐང་པ་འཛག་པ་དམངས་རིགས་ཡིན། །དེར་ནི་གཡོན་ངོས་རྒོད་མ་སྟེ། །གཡས་ངོས་ཀྱིས་ནི་རྟ་པོར་བཤད། །འདི་རྣམས་ཕན་ཚུན་འདུས་པ་ནི། །རིགས་བཞི་དག་ཏུ་བཤད་
པ་ཡིན། །དེ་ལྟར་རྟ་རྣམས་ཡང་དག་བྱུང་། །ཡིད་ལྟར་མགྱོགས་ཞིང་མདོག་ལྡན་ཏེ། །མདོག་གཅིག་མདོག་ནི་འདྲེས་པ་དང་། །སྣ་ཚོགས་མདངས་ཀྱིས་ཕྱེ་བ་དང་། །ཐིག་ལེ་ཅན་དང་ཁ་དོག་མངའ། །མཚན་མ་ཅན་དང་ཞུར་པ་དང་། །རྐང་དཀར་རྡོག་མ་མུན་ཇ་འདྲ། །རྒྱལ་མཚན་
དཀྱིལ་འཁོར་འདྲ་བ་དང་། །རྔ་རྔོག་མདོག་ནི་མང་བ་དང་། །ཁྲ་བོ་ཐིག་ལེ་ཕྲ་བ་དང་། །འདམས་མདོག་སེ་བ་ཉིད་དང་ནི། །དཀར་ལ་རྔོག་མ་གནག་པ་སྟེ། །ཕལ་ཆེར་ཁ་དོག་སྣ་ཚོགས་ཤིང་། །བ་སྤུ་སྣུམ་ཞིང་བཟང་བ་དང་། །ཚད་དང་ལྡན་ཞིང་མིག་བཟང་ལ། །རོ་སྟོད་མཐོ་བར་གྱུར་
བ་དང་། །དབུས་ཕྲ་གསུས་ཁྱིམ་ཆུང་བ་དང་། །མཆུ་ལེགས་བྲང་ཞེང་ཡངས་པ་དང་། །རྔོག་མ་རྐེད་པ་རྨིག་པ་བཟང་། །པགས་སྲབ་སྤུ་མཚམས་ཕྲ་བ་དང་། །ཡིད་དུ་འོང་ཞིང་ཕུམ་ཕུམ་བཟང་། །སྙིང་སྟོབས་ལྡན་ཞིང་རྐང་མདོག་མཐུན། །ལུས་ལས་སྐྱེས་པའི་གཤོག་པ་བཞི། །ནམ་
མཁའ་འགེབས་པ་ལྟ་བུ་དང་། །ཡན་ལག་དང་ནི་ཉིང་ལག་རྣམས། །ལྷ་ཡི་ཆར་ལྡན་གཟི་བརྗིད་ཆེ། །དཔལ་ལྡན་བྱུང་བ་དཔལ་མའི་བུ། །ཚངས་པའི་མཆི་མ་ལས་བྱུང་མགྱོགས། །མེ་ཡིས་གདུངས་པ་ལས་གྱུར་པའི། །ལྟེ་བ་ལས་མི་བྱུང་བའི་རྡུལ། །ཐལ་བར་འཛག་གྱུར་དེ་ལས་
ནི། །བོང་བུ་དང་ནི་བོང་མོར་གྱུར། །རྣ་བ་རིང་ཞིང་མཇུག་མར་ལྡན། །གཞུང་ཐིག་ཕྲ་ཞིང་རྨེག་པ་སྲ། །སྐད་གདངས་རྩུབ་ཅིང་ཁུར་སྲན་ཆེ། །གང་ཞིག་རྩུབ་པ་བོང་བུ་ཡིན། །ཐལ་བ་ལས་ནི་སྐྱེས་པའི་ཕྱིར། །དེ་བས་བོང་བུ་ཐལ་མདོག་ལྡན། །དེ་དག་དེ་ལྟར་གྱུར་ནས་ནི། །སྐྱེ་

དགུའི་བདག་མོའི་གནས་ན་འདུག །དེ་ནས་དྲེགས་པས་རྩེ་བ་དང་། །སྲེག་རྫས་དགང་གཟར་བླུགས་གཟར་དང་། །གཞོང་པ་སྣོད་དང་བུམ་པ་བསྣམས། །རྨོངས་བའི་རྟ་ཡིས་རབ་ཏུ་བརླག །འཇག་མག་ཐལ་བས་ཁྱབ་པ་ཡི། །མི་གང་དེ་ནི་མཐོང་བ་དང་། །དང་ཁྲ་ཁྲོས་པར་
གྱུར་ནས་ན། །རྟ་རྣམས་དམོད་པ་བཏབ་པར་གྱུར། །གཤོག་བཅད་མཚན་ནི་ནུབ་པ་དང་། །ས་ལ་རྒྱུ་ཞིང་ཚིག་མི་འདོན། །ལྷ་རྣམས་དང་ནི་མི་རྣམས་ཀྱི། །བཞོན་པ་ཉིད་དུ་སོང་གྱུར་ཅིག །དེ་ཐོས་སྡུག་བསྔལ་གྱིས་གདུངས་ཏེ། །དེ་ཚེ་རྟ་རྣམས་དང་ཁྲ་ནི། །དེ་ཉིད་ལ་ནི་
སྐྱབས་སོང་ནས། །སླར་ཡང་རྗེས་སུ་ཕན་བཏགས་བྱས། །རྟ་ཡི་མཆོད་སྦྱིན་འབྲས་བུ་ནི། །བསོད་ནམས་དོན་དུ་འགྲོ་གྱུར་ཅིང་། །མཆོད་པ་བཟང་པོ་ཐོབ་གྱུར་ཅིང་། །བསོད་ནམས་འཇིག་རྟེན་གྱིས་ཐོབ་ཤོག །ཕན་བཏགས་ཐོབ་པས་དེ་དགའ་སྟེ། །དང་ཁྲ་ལ་ནི་བསྐོར་བར་
བྱས། །མགོ་བོས་ཕྱག་བྱས་བདག་ཅག་གིས། །ཅི་ཞིག་བགྱིས་ཞེས་ཚིག་ཏུ་སྨྲས། །དང་ཁྲས་དེར་ནི་ལུང་བསྒོ་བ། །ཁ་བ་ཅན་དུ་ཁྱེད་སོང་ལ། །རི་འདབ་ཡིད་དུ་འོང་བ་དང་། །ཆུ་དང་ལྡན་པར་གནས་པར་གྱིས། །དེ་སྐད་སྨྲས་ནས་རྟ་རྣམས་ནི། །དགའ་བ་རི་རྒྱལ་དག་ཏུ་སོང་། །
སྦྱིན་སྲེག་བཤིགས་པས་ཁྲོས་པ་ན། །དང་ཁྲས་ཧ་ཧ་ཞེས་བཟློག་པས། །དེ་ཕྱིར་འདི་ལ་ཧ་ཡི་སྒྲ། །རྟ་རྣམས་ལ་ནི་བཏགས་པ་ཡིན། །རི་བོ་དམ་པ་དེ་རུ་ནི། །རྟ་རྣམས་གནས་པར་གྱུར་བས་ནི། །གང་ཞིག་འདོད་པ་སྤྱོད་གྱུར་པ། །རིགས་ནི་འདྲེས་པར་གྱུར་པའི་རྒྱུས། །རྟ་དང་བོང་
བུ་དེ་དག་གི །སྐྱེ་གནས་འདྲེ་བར་བཤད་པར་བྱ། །བོང་བུ་རྟ་ལ་འཇུག་གྱུར་པ། །གང་ཡིན་དེ་ལས་དྲེའུ་འབྱུང་། །དྲེའུ་དང་རྒོད་མ་དག་ལས་ནི། །གོ་རི་ཞེས་ནི་བྱ་བ་སྐྱེ། །གོ་རི་རྒོད་མར་འཇུག་པ་ལས། །ཀི་ནི་ཞེས་ནི་བྱ་བ་སྐྱེ། །ཀི་ནི་རྒོད་མ་ལས་སྐྱེས་པ། །ཀིས་ཏ་ཏ་ཞེས་བྱ་
བ་ཡིན། །ཀི་ས་ཏ་ཏ་དང་རྒོད་མ་ལས། །ཆུ་བུར་ཅན་ཞེས་བྱ་བ་ཡིན། །ཆུ་བུར་ཅན་དང་རྒོད་མ་ལས། །སླར་ཡང་བོང་བུ་ཞེས་བྱར་བཤད། །བོང་བུ་འོང་བར་མཐོང་ན་ནི། །རྟ་ནི་ཐམས་ཅད་རྨོངས་པར་འགྱུར། །བྱ་བ་མང་ཞིང་བསླབ་པར་དཀའ། །དེ་ཕྱིར་བོང་བུ་བཞོན་

དགྲ་ཡིན། །དེ་ལྟར་འདི་ནི་དྲེའུ་སྟེ། །མ་འདྲེས་འཇུག་ལས་རྟ་ཉིད་ཡིན། །རང་དང་རྟ་ཡི་སྐྱེ་གནས་ཏེ། །བོང་བུའི་སྐྱེ་གནས་གཉིས་སུ་འདོད། །རྟ་རྣམས་གཞན་གྱི་མངལ་དུ་ནི། །འཁྲིག་པ་སྤྱོད་པར་མི་བྱེད་ལ། །གལ་ཏེ་བྱེད་པར་གྱུར་ན་ནི། །ཡུལ་དེ་འཇིག་པར་
ཤེས་པར་བྱ། །དེ་ལྟར་ང་ནི་རྟ་འབྱིན་ལ། །མཆོད་སྦྱིན་དོན་ནི་ཕྱུགས་ཀྱི་མཆོག །དགྲ་འཇོམས་རྒྱས་བྱེད་ལ་སོགས་པ། །རྒྱལ་པོ་རྣམས་ཀྱི་དཔུང་གི་མཆོག །དེ་ནས་ཁ་དོན་ལ་དགའ་ཞིང་། །སྦྱིན་སྲེག་བྱེད་ལ་རབ་གཞོལ་བ། །གཞོན་ནུ་ཚངས་པར་སྤྱོད་ལ་གནས། །ཤ་ལི་ཧོ་ཏྲ་
དཀའ་ཐུབ་ཆེ། །ཁ་བ་ཅན་གྱི་ངོས་ཀྱི་ནགས། །ལྷ་ཡི་ཚལ་འདྲར་འོངས་པར་གྱུར། །དེ་ནི་དེ་རུ་གནས་བཅས་ནས། །རི་ཡི་ཚོགས་ནི་ཉམས་དགའ་ཞིང་། །རི་དགས་ཚོགས་ནི་དུ་མས་ཁྱབ། །མིའམ་ཅི་ནི་སྣ་ཚོགས་གནས། །བྱ་ཚོགས་དུ་མ་སྒྲ་སྒྲོགས་ཤིང་། །དྲི་ཟའི་བུ་མོ་རྣམས་ཀྱིས་བསྐོར། །
གྲུབ་དང་དྲང་སྲོང་རོལ་བ་ཡི། །ཚོགས་དང་ལྷ་རྣམས་དག་གིས་མཛེས། །མེ་ཏོག་འབྲས་བུ་མང་པོ་ཡིས། །ཉམས་དགའ་ནེའུ་གསེང་བཟང་པོས་ཁྱབ། །ཤིན་ཏུ་ཡིད་དུ་འོང་བའི་གནས། །ཉམས་དགའ་དེར་ནི་གནས་པར་གྱུར། །དེར་ནི་ཕྱེ་ལེབ་ཡན་ཆད་ཀྱི། །ཡི་དགས་
ལ་སོགས་སྣ་ཚོགས་གནས། །རྟ་དང་དྲི་ཟ་མིའམ་ཅི། །ནེའུ་ལེ་སྦྲུལ་དང་བྱ་རྣམས་ནི། །སེང་གེ་སྟག་དང་པག་དང་ནི། །གླང་པོའི་དབང་པོ་སྤྲེའུ་དང་དོམ། །དེ་ལ་སོགས་པ་མང་པོ་ནི། །ཤ་ལི་ཧོ་ཏྲ་དྲང་སྲོང་ཆེ། །བདག་ཉིད་ཐུལ་ཅིང་གཙང་བ་ཡིས། །གནས་དང་ཉེ་བར་
འཁོད་པ་ན། །ཤ་ལི་ཧོ་ཏྲས་རྟ་དེ་རྣམས། །བུ་དང་འདྲ་བར་ཡོངས་སུ་བསྐྱང་། །ཁ་བ་ཅན་གྱི་ངོས་ན་རྩེ། །ཤ་ལི་ཧོ་ཏྲའི་དབང་དུ་གྱུར། །དེ་བས་ལྷ་རྣམས་མྱུར་དུ་ནི། །ཤ་ལི་ཧོ་ཏྲའི་གནས་སུ་སོང་། །དེར་ནི་ཁྱེད་ལ་བཞོན་པ་མགྱོགས། །ཤ་ལི་ཧོ་ཏྲ་སྟེར་བར་འགྱུར། །ལྷ་
མཆོག་ཚངས་པས་དེ་སྐད་དུ། །ལྷ་རྣམས་ལ་ནི་སྨྲས་པ་དང་། །དགའ་བས་དེ་ལྟར་བགྱི་ཞེས་ཏེ། །དེ་རྣམས་རི་མཆོག་དེ་རུ་ཆས། །དེ་ནས་སྐད་ཅིག་ཙམ་གྱིས་ནི། །བརྒྱ་བྱིན་གཤིན་རྗེ་ཆུ་ལྷ་དང་། །དཔལ་ལྡན་ནོར་གྱི་བདག་པོ་དང་། །བཅས་པ་དྲང་སྲོང་གནས་སུ་སོང་། །ཕྱིན་ནས་

བསྟི་གནས་གནས་དེ་ལ། །སྙན་པའི་ཚིག་ནི་འདི་སྐད་སྨྲས། །དྲང་སྲོང་ཁྱེད་ནི་གང་གི་ཕྱིར། །དཀའ་ཐུབ་གནས་བཅས་དཀའ་ཐུབ་གྲུབ། །ཆུར་སྤྱོན་གྲུབ་དང་དྲང་སྲོང་ཚོགས། །མི་བཟད་པ་ཡི་གནས་སུ་དེངས། །དེ་ནས་ངས་ནི་དགྲ་འཇོམས་པའི། །བརྒྱ་བྱིན་ལ་ནི་དེར་སྨྲས་པ། །ང་ལ་དཀའ་
ཐུབ་ཡང་སྤྱད་པ། །མི་དགོས་དེ་ལྟར་བྱ་ཞེས་སྨྲས། །དེ་ནས་ང་ལ་གཤིན་རྗེ་ཡིས། །སྙན་པའི་ཚིག་ནི་འདི་སྐད་སྨྲས། །རྒ་མེད་འཆི་མེད་ཟད་མེད་པ། །ལྷ་ཡི་དབང་པོའི་གནས་འདྲ་བ། །འཇིག་རྟེན་ཀུན་ན་གང་བཟང་པའི། །གནས་དེ་ང་ཡིས་སྦྱིན་པར་བྱ། །ཟས་དང་སྟན་དང་མལ་ཁྲི་
དང་། །སྤྱོད་ལམ་ཅི་བདེ་གནས་མེད་པའི། །ནགས་ཚལ་འདིར་ནི་དཀའ་ཐུབ་ཅན། །ཁྱེད་ནི་ཇི་ལྟར་དགའ་བར་གྱུར། །བརྒྱ་བྱིན་བཅས་པའི་ལྷ་མཆོག་ནི། །ཀུན་ལ་ང་ཡིས་ལྷར་སྨྲས་པ། །རྩ་བ་འབྲས་བུ་ང་ཡི་ཟས། །གོས་ནི་ཤིང་ཤུན་རི་དགས་པགས། །འདོན་དང་སྦྱིན་སྲེག་བྱེད་པ་
ན། །མཐར་ཐུག་མེད་པར་ངའི་བློ་འཇུག །རི་དགས་ཚོགས་ཀྱང་རྟག་ཏུ་ནི། །ཁོ་བོའི་བསྟི་གནས་དག་ཏུ་འོངས། །གློ་བུར་ལྷགས་པ་གཞན་དག་དང་། །གཤོག་ཐོགས་དག་ནི་བལྟ་བྱ་ཡིན། །དེ་དང་ལྷན་ཅིག་གནས་བྱ་ཡིན། །ལྷ་ཡུལ་འདོད་པ་ང་ལ་མེད། །དེ་ནས་དགྲ་ཐུབ་གཤིན་
རྗེ་ཡིས། །ང་ལ་ཡང་ནི་སླར་སྨྲས་པ། །གང་དང་འགྲོགས་ན་ཁྱེད་དགའ་བའི། །གཟུགས་སྡུག་རི་དགས་བྱ་ཚོགས་དང་། །གཤོག་པ་ཡོད་པའི་རྐང་བཞི་པ། །ཐམས་ཅད་བདག་ཅག་ལ་བསྟན་གསོལ། །ང་ཡིས་དེ་ལྟར་ཁས་བླངས་ཏེ། །རི་དགས་བྱ་ཚོགས་དེ་དག་ཀུན། །ཇི་སྲིད་
མཐོང་བར་གྱུར་གྱི་བར། །ལྷ་རྣམས་ཡུད་ཙམ་འདུག་པར་གྱིས། །དེ་ནས་ལྷ་རྣམས་མཁའ་ལས་ནི། །ཕྱོགས་རྣམས་ཀུན་ནས་འོངས་གྱུར་ཅིང་། །རི་རྩེ་ཆུ་བོ་རྣམས་ལས་ཀྱང་། །བྲང་གི་ཕྱོགས་ནི་སྟོན་ཅིང་འོངས། །དེ་ཚེ་རྟ་ཕྲན་བར་སྣང་ལ། །ཡིད་དུ་འོང་བའི་སྐད་དུ་འཆེར། །རྣར་སྙན་
པ་ཡི་སྒྲ་དང་ནི། །གཤོག་པའི་རླུང་ནི་ཡིད་འོང་བའི། །སྒྲ་དེས་མདངས་དང་ལྡན་པ་ཡི། །སྒྲ་དེས་ངོ་མཚར་སྐྱེས་པར་གྱུར། །ལྷ་རྣམས་དགའ་བས་ང་ལ་ནི། །སྣུམ་ཞིང་ཡིད་འོང་ཟབ་པ་དང་། །རྗེས་མཐུན་སྒྲ་ལྡན་པ་སྙམ་དགའ། །ཨེ་མའོ་མཐོ་རིས་མཚུངས་ཞེས་སྨྲས། །ཀྱེ་མའོ་ཁྱོད་ནི་

ཉམས་དགའ་བར། །གནས་པར་གྱུར་པ་ལེགས་སོ་ལེགས། །ཀྱེ་མའོ་རི་དགས་གཟུགས་བཟང་ཞིང་། །ཉམས་སྟོབས་སྙིང་པོར་མགྱོགས་པར་ལྡན། །ལྷ་དང་མི་ནི་སུ་ལ་ཡང་། །འདི་འདྲའོ་བཞོན་པ་ཡོད་མ་ཡིན། །བདག་ཅག་འདི་ལ་ཞོན་ནས་ནི། །
འགྲོ་ན་ངེས་པར་རྒྱལ་བར་འགྱུར། །ཁྱོད་ཀྱིས་བདག་ཅག་ལ་གསོལ་ཅིག །ཅི་ལྟར་བཞོན་པར་གྱུར་པ་ཡི། །ཐབས་དེ་དྲང་སྲོང་མཆོག་གིས་ནི། །ཡིད་ལ་བདག་ཅག་བསམ་པར་འདོད། །དེ་ནས་དེ་སྐད་སྨྲས་པ་ཡི། །ལྷ་མཆོག་རྣམས་ལ་ངས་ལན་སྨྲས། །ལྷ་མིན་བརླག་པའི་
དོན་དང་ནི། །དེ་ཕྱིར་ཁྱེད་རྣམས་རྒྱལ་ཕྱིར་དང་། །བྲམ་ཟེ་རྣམས་ཀྱི་མཆོད་སྦྱིན་ཕྱིར། །ཚངས་བས་རྟ་ནི་སྤྲུལ་བ་ཡིན། །དེ་བས་ཚངས་བས་ང་བསྒོ་བས། །ཁྱེད་རྣམས་ཤས་ཆེར་དགའ་འགྱུར་པའི། །བཞོན་པ་རྣམས་ཀྱི་དམ་པ་ནི། །མ་ལུས་པར་ནི་སྦྱིན་པར་བྱ། །ལྷ་ཡི་དམ་པ་
ཁྱེད་རྣམས་ནི། །བྲམ་ཟེའི་ཡུལ་དུ་འགྲོ་བར་གྱིས། །དེར་ནི་འདུལ་ཐབས་བྱ་བ་དག །འོངས་ནས་བྱ་ཡི་གཞན་དུ་མིན། །དེར་སོང་དེ་རྗེས་ང་ཡིས་ནི། །རྟ་ནི་ཇི་སྙེད་བོད་པར་བྱ། །དེ་ནས་ང་ཡིས་རྟ་རྣམས་ཀུན། །བསྡུས་ནས་ཚིག་ནི་འདི་སྐད་སྨྲས། །བླ་མ་མཁན་པོ་མཇའ་བ་དང་། །
གཉེན་དང་རང་མི་རྣམས་ཀྱང་ནི། །རིང་པར་བལྟ་བར་ང་འདོད་ལ། །ཁྱེད་རྣམས་ལ་ཡང་མགྲོན་དུ་འབོད། །དེར་ནི་འབྲས་བུ་མུངྒ་དང་། །མ་ཤ་ནས་དང་ཏིལ་དག་དང་། །སཱ་ལུ་དྲུག་ཅུ་པ་དང་འབྲུ། །རྩྭ་ནི་མཐོ་ཞིང་འཇམ་པ་དང་། །ཆུ་བོ་ནེའུ་གསིང་རྣམས་ཀྱང་ཡོད། །དེའི་ནགས་
གཟར་པོ་མ་ཡིན་ན། །ང་དང་ལྷན་ཅིག་འགྲོ་བྱའམ། །ཡང་ན་འདི་རུ་གནས་པར་གྱིས། །དེ་ནས་ང་ལ་རྟ་ཀུན་གྱིས། །སྙན་པའི་ཚིག་ཏུ་འདི་སྐད་སྨྲ། །ནགས་ཚལ་སྟོང་པ་འདི་མཐོང་ན། །བདག་ཅག་ཤས་ཆེར་ཡིད་སྐྱོ་བས། །ཁྱེད་ནི་གང་དུ་འགྲོ་འགྱུར་བ། །བདག་ཅག་དེར་
འབྲེང་གཞན་དུ་མིན། །ཁྱེད་ཀྱི་རྗེས་སུ་འབྲངས་ཏེ་ནི། །འགྲོ་བ་བདག་ཅག་རབ་ཏུ་བསྔགས། །དེ་ནས་ང་ན་རྟས་བསྐོར་ཞིང་། །བདེ་གནས་དགྲ་དང་ལྷན་ཅིག་ཏུ། །གང་དུ་ལྷ་དང་དུས་བཏབ་པའི། །བྲམ་ཟེའི་ཡུལ་དུ་ཕྱིན་བར་གྱུར། །དེས་ནི་ཨ་ཤྭདྠ་ཡི་རྩྭར། །གཙུབ་ཤིང་

ལས་ནི་མེ་ཕྱུང་སྟེ། །སྦྱིན་སྲེག་ང་ཡིས་བྱས་ནས་ནི། །ལྷ་དང་སྲིན་པོ་ཚིམ་པར་བྱས། །དེ་ནས་ཡུལ་དེའི་ས་མཚམས་ཀྱི། །ཉེ་འཁོར་ཀུན་ཏུ་ཁྱབ་ནས་ནི། །རྟ་དེ་དག་གིས་འབྲུ་དག་ནི། །ཐམས་ཅད་ཟ་བ་ཉིད་དུ་འགྱུར། །དེ་ནས་འབྲུ་དེ་བརླག་གྱུར་པ། །བྲམ་ཟེས་མཐོང་
ནས་ཁྲོས་པ་ཡི། །ཡིད་ཀྱིས་མིག་ནི་དམར་པོ་དང་། །དེ་ལ་ཚིག་རྩུབ་འདི་སྐད་སྨྲ། །སྔོན་ནི་དཀའ་ཐུབ་ལ་གནས་པའི། །བྲལ་ཟེ་གཞན་དག་འདིར་འོངས་ཚེ། །དཀའ་ཐུབ་ཚངས་པར་སྤྱོད་པ་དང་། །འདོན་དང་སྦྱིན་སྲེག་བྱེད་པ་ཡིས། །ལོ་གྲངས་མང་པོར་འདིར་གནས་ཤིང་། །
དེ་བཞིན་ཡམས་ཀྱང་ཞི་བྱེད་ན། །ཁྱེད་ནི་རི་དགས་འདི་འདྲ་བ། །ཁྱེར་ཏེ་ཡུལ་དུ་ཇི་ལྟར་འོང་། །ལམ་གང་ནས་ནི་ཁྱེད་འོངས་པ། །དེ་ལས་སླར་ནི་འགྲོ་བར་གྱིས། །ཁྱེད་ཀྱི་ཡམས་འདི་བདག་ཅག་གིས། །བཟློག་པར་ནུས་པ་མ་ཡིན་ནོ། །བྲམ་ཟེ་ཁྲོས་པ་དེ་ལ་ངས། །བཟོད་གསོལ་
སྔོན་འགྲོའི་ཚིག་འདི་སྨྲས། །རྟ་རྣམས་འབྲུ་ནི་ཟ་བ་དང་། །ཁྱེད་ལ་འཚེ་བར་ང་མི་དགའ། །སྦྱིན་སྲེག་བྱེད་པས་ང་བྲེལ་བས། །ཁྱེད་ལ་གནོད་པ་ངས་མ་བཀག །དེ་ནས་ང་ཡིས་རྟ་རྣམས་ནི། །ཐམས་ཅད་བསྡུས་ནས་འདི་སྐད་སྨྲས། །ང་ལ་ཡུལ་གྱི་མི་རྣམས་ནི། །ཅི་སྐད་སྨྲས་གྱུར་
པ་ལ་ལྟོས། །འདི་དག་མགུ་བར་བྱ་བའི་ཕྱིར། །རེ་ཞིག་ཁྱེད་ནི་ལེགས་པར་བཅིང་། །དེ་ནས་མཚན་མོར་གྱུར་པ་དང་། །སླར་ཡང་ཅི་དགར་སྤྱད་པར་གྱིས། །དེ་ནས་བཅིངས་པའི་ཚོར་པ་ནི། །མ་མྱོང་པས་ན་བཅིང་པར་ལྷགས། །ལྷ་རྣམས་ལྟད་མོ་སྐྱེས་པ་ཡི། །ཡིད་ཀྱིས་ང་ལ་ཡིད་
ཆེས་འགྱུར། །དེ་ནས་ཆུ་ལྷ་རང་ཉིད་ནི། །བོས་ནས་ཞགས་པས་རྟ་རྣམས་ནི། །ཡན་ལག་ལྔར་བཅས་ཤིང་ལ་ནི། །གོ་རིམས་བཞིན་དུ་བཅིངས་པར་གྱུར། །བཅིངས་པའི་རྗེས་ལ་སྟོབས་ཡོད་ཀྱང་། །འགུལ་བར་གྱུར་པ་མ་གྱུར་ཏོ། །ཉེ་བར་བཅིང་པ་བྱས་ནས་ནི། །མཚོན་ནི་
རྣོན་པོ་ཐོགས་ནས་སུ། །ལྷ་ཡིས་མདུན་དང་རྒྱབ་ཀྱི་ནི། །རྟ་རྣམས་ཀྱི་ནི་གཤོག་པ་བྲེགས། །དེ་ནས་གཤོག་པ་བཅད་ཀྱང་ནི། །ཕྱི་ཕྱིར་ཞིང་ནི་སྐྱེ་བར་གྱུར། །དེ་རྗེས་མེ་ཡིས་བསྲེགས་པས་ན། །ཚིག་པས་མེ་ལྕེ་བྱུང་བར་གྱུར། །བཅིངས་ཤིང་གཤོག་པ་མེད་བྱས་ནས། །གང་ཚེ་

རྟ་རྣམས་ཉམ་ཐག་པ། །དེ་ཚེ་ལྷ་རྣམས་ཡིད་ལ་ནི། །ཇི་ལྟར་འདོད་པ་བཞིན་དུ་ཁྱེར། །ཟླ་བས་རི་བོང་དཀར་འདྲ་བ། །ཉི་མ་ནེ་ཚོའི་མདོག་འདྲ་བ། །བརྒྱ་བྱིན་གྱིས་ནི་སྔོ་བསངས་ཏེ། །གཤིན་རྗེ་ཡིས་ནི་ནག་པོ་ཡིན། །མེ་ལྷས་རྒྱ་སྐྱེགས་མདོག་འདྲ་བ། །རླུང་ལྷས་
དམར་སེར་མདོག་འདྲ་བ། །ཆུ་ལྷས་སྔོན་པོ་ཁྱེར་བར་གྱུར། །ཉི་མ་གཞན་གྱིས་ཁ་དོག་སྐྱ། །ལྷ་ཆེན་གྱིས་ནི་སེར་པོ་སྟེ། །སྣ་ཚོགས་ལས་ཀྱིས་རྒྱང་མདོག་ཅན། །ཉི་མ་སུ་ཤས་སྣ་གནག་པ། །ཏྲ་ཥྚས་མཚན་དང་ལྡན་པ་སྟེ། །ལྷ་གཞན་གྱིས་ནི་རང་རང་གི །ཡིད་ལ་འདོད་པ་
བཞིན་དུ་ཁྱེར། །དེ་ལྟར་རྟ་རྣམས་བགོས་ནས་ནི། །ལྷག་མ་ང་ཡི་གནས་བཞག་སྟེ། །གཡུལ་དུ་དགོས་པའི་ལས་རྣམས་དང་། །མཚན་ཉིད་མཚན་མ་རྣམས་དང་ནི། །གསོ་དང་སླར་འབྲོས་ལས་རྣམས་ལ། །བུ་དང་ལྷན་ཅིག་ཉེ་བར་བསྐྱང་། །ངའི་བུ་མཛའ་བོ་ལས་རྒྱལ་དང་། །
འཁྲུལ་མེད་ཐ་ཆུངས་བྱེད་པ་ཞེས། །ཡོན་ཏན་དེས་ལས་མིང་བཏགས་པ། །བུ་གསུམ་མཁས་པར་གྱུར་པ་ཡིན། །ཞི་ཞིང་མཛའ་བོ་རྣམས་ལས་རྒྱལ། །དེས་དེ་མཛའ་ལས་རྒྱལ་ཞེས་བྱ། །རིགས་བྱེད་བསྟན་བཅོས་མ་འཁྲུལ་བས། །དེ་ཕྱིར་འཁྲུལ་མེད་ཅེས་འདི་བཤད། །
ང་ཡི་ཚིག་ལམ་དོན་དགའ་བས། །རྟག་ཏུ་འདི་ལྟར་བྱེད་པས་ན། །དེའི་ཕྱིར་དེ་ལ་བྱེད་པ་ཞེས། །ཐ་ཆུངས་ལ་ནི་བཏགས་པ་ཡིན། །དེ་ནས་རྟ་གཞན་བདག་ཉིད་ཆེ། །མ་ན་ཞེས་བྱ་ཚངས་སྲས་བྱིན། །དེ་ལས་གཞན་པ་རྟ་བྲེས་སུ། །ལས་རྣམས་ལ་ནི་བྱང་པར་བྱས། །བཞོན་པ་
ལ་ནི་གདུལ་པ་དང་། །བྱ་བའི་ལས་རྣམས་ལ་ཡང་གཞག །ད་ནི་རྒས་ཕྱིར་གྲོལ་བ་ཆོལ། །རྟ་རྣམས་ཀྱི་ནི་ནང་དུ་ཉལ། །དེ་ནས་རྟ་ཁྲོས་པ་ཡིས་ང་། །གཉིད་ལོག་སྙམ་སྟེ་བསད་པར་བརྩམས། །དེ་དག་འདུས་ནས་འཁོན་གྱིས་ནི། །སྐྱོ་བའི་ཡིད་དང་ཕན་ཚུན་སྨྲ། །
བདག་ཅག་བཅིང་དང་གསོད་འདི་ནི། །གང་ལས་སྡུག་བསྔལ་སྐྱེ་འགྱུར་བ། །འདི་དག་ཀུན་གྱི་རྩ་བ་ནི། །དྲང་སྲོང་གཉིད་ལོག་འདི་ཡིན་གྱི། །དེ་བས་གནོད་བྱས་ལན་བྱ་ཞིང་། །ཟོས་པར་གྱུར་ན་ལེགས་པ་ཡིན། །དེ་ནས་བཅིངས་པ་བཅད་ནས་ནི། །ང་གསོད་ཕྱིར་ནི་ལྷགས་

པར་གྱུར། །ད་ནི་དེ་ལ་ཐབས་གང་གིས། །བདེ་བར་འགྱུར་ཞེས་སེམས་ཤིང་ཉལ། །དེ་ནས་ལྷ་ཡིས་སད་བྱས་པ། །ང་ཡིས་རྟ་ལ་དམོད་པ་བཏབ། །དེང་ནས་བརྩམས་ཏེ་ང་ཡི་ནི། །དམོད་པས་བཞོན་ཁྱེད་དོང་ལ་ནི། །འཇུག་ཅིང་རླིག་པ་འཕྱང་བ་དང་། །བརྗེད་ངས་པ་ནི་ཉིད་གྱུར་ཅིག །
དེ་ནས་དེ་ནི་འཆིག་པ་དག །སྐྱེས་ཤིང་དམོད་པས་བརྗེད་ངས་གྱུར། །དེ་སྐད་དེ་ལ་ངས་སྨྲས་ནས། །གནས་དེ་ནས་ནི་མི་སྣང་བྱས། །རྟ་ཡི་སྒྲ་དེ་ཐོས་པ་དང་། །དེ་ནས་རྟ་ཡིས་འཚོ་བ་དང་། །རྟ་ལ་ཞོན་དང་འཆིང་བྱེད་དང་། །རྟ་བྲེས་སུ་ནི་འོངས་བར་གྱུར། །རྟ་རྣམས་གྲོལ་ནས་གནས་
གནས་སུ། །ཕན་ཚུན་རྒྱུ་བར་བྱེད་པ་དང་། །མལ་ཁྲི་རྒྱ་ཆེན་དག་དང་ནི། །མལ་སྟན་དག་ཀྱང་སྟོང་པ་མཐོང་། །དེ་ཡིས་ང་ནི་མ་མཐོང་བས། །རྟ་རྣམས་ཀྱིས་ནི་ཟོས་སྙམ་ན། །དེ་ཡི་མལ་ཁྲི་ལས་མཚོན་པས། །བྲམ་ཟེ་མི་སྣང་ཉིད་གྱུར་སྙམ། །འདི་ལྟར་རྟ་ནི་དེ་དག་རྣམས། །བྲམ་
ཟེ་ཟོས་པར་བྱས་སྙམ་སེམས། །དེ་ཡི་ཕྱིར་ན་རྟ་རྣམས་ནི། །རྟ་སྤངས་བཏང་ནས་མང་དུ་སྣོམ། །ཤ་ལི་ཧོ་ཏྲ་ཅི་ནས་ཀྱང་། །ཕྱེས་ཅི་འབྱུང་བར་གྱུར་ཏོ་སྙམ། །རྟ་ཡི་སྐྱེ་བ་བྱུང་བ་འདི། །གང་ཞིག་རྟག་ཏུ་ཉན་བྱེད་པའམ། །ཡང་ན་ལ་ལ་འཛིན་བྱེད་དམ། །གཏམ་ལ་དད་པར་གྱུར་ན་ནི། །
ལྷ་རྣམས་ཀྱིས་ན་བཀུར་བ་དང་། །བུ་དང་ཚ་བོ་འཕེལ་བར་འགྱུར། །ཚེ་རིང་བ་ནི་ཐོབ་འགྱུར་ཞིང་། །གྲགས་པ་ཆེ་བ་ཉིད་དུ་འགྱུར། །འདི་ལྟར་ལྷ་ཡི་མཐུ་ལྡན་ཞིང་། །འདས་དང་མ་འོངས་དོན་ཤེས་པའི། །དྲང་སྲོང་ཤ་ལི་ཧོ་ཏྲ་ཡིས། །བུ་ཡིས་དྲིས་ཏེ་སྨྲས་པ་ཡིན། །ཤ་ལི་
ཧོ་ཏྲའི་མདོའི་གནས་ལས་རྟ་རྣམས་བྱུང་བའི་ཚུལ་ཞེས་བྱ་བའི་ལེའུ་སྟེ་བཞི་པའོ།། །།ཐ་སྐར་ཚ་བོ་དྲང་སྲོང་ཆེ། །རྟ་སྐད་ལས་ནི་ལུས་སྐྱེས་པ། །ལྷ་ཡི་མཐུ་ལྡན་དཀའ་ཐུབ་ཅན། །ཚངས་པ་ཉི་མ་མེའི་གཟི་མདངས། །ཤ་ལི་ཧོ་ཏྲ་དྲང་སྲོང་མཆོག །དེ་ལ་
ལེགས་ཐོས་ཀྱིས་དྲིས་པ། །འདི་ལྟར་མངལ་དུ་ཚོགས་པར་འགྱུར། །སྲོག་ནི་ཇི་ལྟར་འཛིན་པ་ལགས། །ལུས་གཟུངས་རྨིག་པ་སྤུ་དག་དང་། །ནད་གཞི་ལྟོ་བ་འབྱུང་བ་དང་། །ཡན་ལག་ལུས་ཀྱི་ཤ་རྣམས་དང་། །རྩ་དང་རུས་པ་དེ་བཞིན་ཚིགས། །ཟླ་བ་གང་ལ་འབྱུང་བར་

འགྱུར། །མངལ་དུ་ཇི་ལྟར་འཚོ་བ་ལགས། །རྟེའུ་ཕོ་མོ་ཇི་ལྟར་འགྱུར། །མཚན་མི་ལྡན་དང་མ་ནིང་དང་། །རྟེའུ་ཕོ་གཉིས་སམ་རྟེའུ་མོ་གཉིས། །སྐྱེ་བའམ་གཡང་གཤམ་ཉིད་འགྱུར་བའམ། །རྟེའུ་ཕོ་མོ་སྐྱེ་བའམ། །ཕྲ་དང་རགས་པ་ཇི་ལྟར་འགྱུར། །
འདུག་པ་དང་ནི་ཉལ་བ་དང་། །མངལ་དུ་ཞུ་དང་སྐམས་པ་དང་། །ཤིན་ཏུ་དགྱེ་དང་མཐུག་པ་དང་། །བསླབ་སྦྱང་སོ་སོར་ཤེས་པ་དང་། །དེ་བཞིན་ཟས་དང་རྣོ་དང་བུལ། །ལྷོ་དང་ཞི་བ་ཇི་ལྟར་འགྱུར། །དཔལ་དང་མི་འཇིགས་བློ་ལྡན་དང་། །སྟོབས་ཆེ་མགྱོགས་པ་ཕུན་ཚོགས་དང་། །
བུལ་དང་བློ་ནི་ཞེན་པ་དང་། །སྦེགས་དང་ཉམས་དང་ལྡན་པ་དང་། །ངང་ཚུལ་མདངས་ལྡན་ནད་མེད་དང་། །ཕོར་སྐྱེས་དོན་མེད་ཅི་ལྟ་བུ། །ཚེ་རིང་བ་དང་ཚེ་ཐུང་ཉིད། །བཀྲ་ཤིས་བཀྲ་མི་ཤིས་གཟུགས་བཟང་། །མདོག་མ་འདྲེས་དང་མདོག་འདྲེས་དང་། །སྣ་ཚོགས་དབྱེ་བ་
ཇི་ལྟར་འགྱུར། །མཚན་དང་རླིག་པ་ལྕེ་དང་ནི། །སྤུ་དང་རྔོག་མ་དག་དང་རྐན། །སོ་དང་རྨིག་པ་མིག་མི་སྡུག །ཁ་དོག་མི་སྡུག་ཇི་ལྟར་འགྱུར། །སྒུར་དང་མ་ནིང་ཡན་ལག་ཉམས། །གཟུགས་དང་མཇུག་མ་ཡོ་བ་དང་། །བེམས་པོ་འདྲ་དང་ལྐུགས་དང་འོན། །རྣ་ཡོན་ཁ་ནི་ཆེ་བ་
དང་། །མི་སྡུག་པ་ཡི་ནད་བུ་ཅན། །གཞན་གྱི་དབྱིབས་འདྲ་འཁུ་བ་མེད། །སི་སི་ཅན་ནམ་ཁྱི་རྡོ་ཅན། །མངལ་དུ་གནས་ཚེ་ཇི་ལྟར་འགྱུར། །དེ་ལྟར་བློ་ལྡན་གྱིས་དྲིས་ཚེ། །ཤ་ལི་ཧོ་ཏྲས་སྨྲས་གྱུར་པ། །ཇི་ལྟར་ལས་དང་ཉོན་མོངས་ལས། །སེམས་ཅན་རྣམས་ནི་འབྱུང་
འགྱུར་པ། །ཡིད་བློ་དབང་པོ་ཞེས་བྱ་བ། །རྣམ་ཤེས་དང་ནི་འདུས་གྱུར་ནས། །མངལ་དུ་ཆགས་པར་གྱུར་པ་ན། །ལས་ཀྱི་ཚུལ་ལ་གནས་པ་ཡིན། །སེམས་ཅན་འབྱུང་བར་གྱུར་པའི་ཚེ། །ཁོང་ཁྲག་རླུང་ལ་བརྟེན་པ་ཡིན། །གང་ཚེ་རྟ་ཕོ་རྒོད་མ་ནི། །ཟླ་མཚན་ལྡན་ལ་འཇུག་
གྱུར་པ། །དེ་ཚེ་འབར་བར་གྱུར་པ་ཡིས། །རྣམ་ཤེས་མངལ་དུ་གནས་པ་ཡིན། །དེས་ནི་ཁུ་བ་ཁྲག་བླངས་ནས། །མངལ་གྱི་གནས་སུ་འདྲེན་པར་འགྱུར། །ཇི་ལྟར་པདྨའི་སྡོང་བུའི་རྩར། །སྐྱེས་བུས་ཆུ་ནི་བླུགས་པ་ལྟར། །དེ་བཞིན་མངལ་གྱི་གནས་སུ་ནི། །ཁུ་བ་རླུང་

གིས་འདྲེན་པར་བྱེད། །དེ་ནི་རྩོལ་བ་ཐམས་ཅད་ཀྱིས། །ཁྲག་གིས་ལུས་ནི་འཕེལ་བར་བྱེད། །ཇི་ལྟར་མེ་གྲོགས་དུ་བ་ནི། །ཤིང་ལས་བྱུང་བས་གྱེན་དུ་འདྲེན། །དེ་ནི་བར་སྣང་ལ་གནས་ནས། །གཟུགས་ཅན་དུ་ནི་གནས་པར་བྱེད། །དེ་བཞིན་མངལ་ན་གནས་པའི་རླུང་། །
ཁུ་བ་ཁྲག་ཏུ་བྱུང་བ་རྣམས། །དེ་ནི་མངལ་ཆགས་གྱུར་པ་ན། །རྣམ་ཤེས་དང་ནི་བཅས་པ་ལས། །སེམས་མེད་གྱུར་པའི་དངོས་པོ་ཡང་། །སེམས་དང་ལྡན་པ་ཉིད་དུ་འགྱུར། །དེ་ནས་ལུས་སུ་ཚོར་འགྱུར་ཞིང་། །རང་གི་གནས་སུ་འབྱུང་ལས་སྐྱེ། །མངལ་གྱི་ཁུ་བ་ཁྲག་
དང་རླུང་། །འདུས་པ་ལས་ནི་མངལ་ཆགས་འགྱུར། །རྣམ་ཤེས་དང་ནི་འདྲེས་གྱུར་ལ། །ཁྲག་གིས་གསོས་པར་གྱུར་པ་ལས། །སྙིང་སྟོབས་དང་ནི་འདྲེས་འགྱུར་པ། །དེ་ནི་མངལ་ཆགས་ཤེས་པར་བྱ། །ལེགས་ཐོས་གྱིས་ནི་སླར་སྨྲས་པ། །བདག་ལ་ཐེ་ཚོམ་འདི་
སྐྱེས་ཏེ། །ཁུ་བ་ཟླ་བའི་བདག་ཉིད་ཅན། །ཁྲག་ནི་མེ་ཡི་རང་བཞིན་ཡིན། །དེ་གཉིས་འདུས་པར་གྱུར་པ་ན། །ཇི་ལྟར་མངལ་ནས་ཟགས་མ་གྱུར། །བུ་ཡིས་དེ་སྐད་དྲིས་པ་དང་། །ཤ་ལི་ཧོ་ཏྲས་སྨྲས་གྱུར་པ། །དེ་ནི་རྣམ་ཤེས་ཀྱིས་ཟིན་པས། །དྲོད་ཀྱིས་ཁུ་བར་འགྱུར་
མ་ཡིན། །མ་ཡི་ཉིས་པའི་དབང་དང་ནི། །ཚེ་ཡང་ཡོངས་སུ་ཟད་ན་འཇིག །ས་སོགས་འབྱུང་བ་ཆེན་པོ་དང་། །ཁུ་ཁྲག་སྐྱོན་མེད་གྱུར་པ་ལས། །དེ་ཚེ་ཡོན་ཏན་དང་ལྡན་པར། །མངལ་ནི་འཛིན་པར་འགྱུར་པ་ཡིན། །དེ་ནི་ང་ཡིས་བཤད་བྱ་ཡི། །རིམ་གྱིས་ཁྱོད་ཀྱིས་ཤེས་
པར་གྱིས། །ནམ་མཁའ་རླུང་དང་མེ་དང་ནི། །ཆུ་དང་དེ་བཞིན་ས་རྣམས་ཏེ། །འབྱུང་བ་ཆེན་པོ་དེ་དག་ལས། །མངལ་ནི་སྐྱོན་མེད་འབྱུང་བར་འགྱུར། །ལུས་ཅན་དག་ནི་ཐམས་ཅད་ཀྱི། །སྐྱེ་བ་དེ་ལྟར་འབྱུང་པ་ཡིན། །གཞན་བཤད་གཞུང་ཡང་མང་མོད་ཀྱི། །ཁོ་བོ་དེ་ལྟར་
མི་འདོད་དོ། །ཕ་དང་མ་ལས་བྱུང་བ་དང་། །ལས་དང་དེ་བཞིན་སྙིང་སྟོབས་སྐྱེས། །དེ་ལྟར་སེམས་ཅན་ཐམས་ཅད་ནི། །མངལ་དུ་ཆགས་པར་ཤེས་པར་བྱ། །ཇི་ལྟར་འབྱུང་བ་བཤད་བྱ་སྟེ། །ལ་ལ་མགོ་བོ་སྔར་སྐྱེ་ཟེར། །ཁ་ཅིག་གིས་ནི་དང་པོར་སྙིང་། །

གཞན་དག་རྒྱུ་མ་སྐྱེ་ཞེས་ཟེར། །དེ་ལྟ་མོད་ཀྱི་མངལ་དུ་ནི། །མིང་ཅན་ཅིག་ཅར་སྐྱེ་བར་འདོད། །ཁུ་བ་ཁྲག་དང་རྣམ་ཤེས་དག །འདྲེས་ཀྱང་བརྒྱལ་བར་གྱུར་པ་ལས། །ཞག་བདུན་ནས་ནི་རླུང་དག་གིས། །བསྐམས་ལས་ནུར་ནུར་པོར་འགྱུར་རོ། །ཞག་
བཅུ་ན་ནི་མེར་མེར་པོ། །ཟླ་བ་གཅིག་ན་གོར་གོར་པོ། །རྫ་བུམ་གསེར་ལས་ཆུ་བླུགས་པ། །ཀུན་དུ་གཤེར་བར་བྱེད་པ་ལྟར། །མ་ཡི་ཁ་ཟས་ཡོན་ཏན་གྱིས། །མངལ་དུ་ཆགས་པ་གསོ་བར་བྱེད། །ནུར་ནུར་པོ་ལ་སོགས་པའི་ཆེ། །ཡན་ལག་མི་གསལ་ཉིད་དུ་
བཤད། །ཟླ་བ་གཉིས་ན་རྐང་ལག་ནི། །སོ་སོའི་ཆར་ནི་འགྲོ་བར་འགྱུར། །དུས་ནི་དུས་ཀྱི་ཁྱད་པར་གྱིས། །ཡན་ལག་གསལ་ཞེས་བཞད་པ་ཡིན། །སྔར་ནི་མི་གསལ་དེ་རྗེས་ལ། །གསལ་བ་ཉིད་དུ་སྣང་བ་ཡིན། །ཇི་ལྟར་སྨན་གྱི་ས་བོན་ལ། །ཐམས་ཅད་མི་གསལ་ཉིད་དུ་
འདོད། །དེར་ནི་བྱེད་པ་པོ་མི་སྣང་། །ས་བོན་ལ་རྟ་དེ་བཞིན་ནོ། །དཔེར་ན་འོ་མ་མར་ཡོད་པ། །དེ་ལ་སྣང་བར་འགྱུར་མ་ཡིན། །དེ་ནི་བསྲུབས་པར་གྱུར་པ་ན། །ཐམས་ཅད་གསལ་བར་འགྱུར་བ་ཡིན། །དེ་བཞིན་མ་ཆགས་རང་བཞིན་ནི། །ཕྲ་བས་མངོན་པར་མི་འགྱུར་ལ། །
དེ་ཉིད་འཕེལ་བར་གྱུར་པ་ཡི། །དུས་གཞན་དུ་ནི་གསལ་བར་འགྱུར། །ཇི་ལྟར་ཨ་མྲའི་ས་བོན་ལ། །ཤུན་པ་ལ་སོགས་མི་སྣང་གི །དུས་གཞན་ཞིག་ན་གསལ་བར་སྣང་། །མངལ་དུ་ཆགས་པ་དེ་དང་འདྲ། །གང་ཚེ་གསལ་བར་གྱུར་ནས་ནི། །མངལ་དུ་སླར་ཡང་འཕེལ་
འགྱུར་ཏེ། །ཡན་ལག་ཉིང་ལག་ཆགས་གྱུར་པ། །ཟླ་བ་གསུམ་ལོན་ལ་སོགས་ཉོན། །ལུས་དང་རྒྱབ་དང་བྲང་དང་སྤུ། །པགས་པ་བུ་ག་རྐེད་པ་ལྟོ། །མིད་པ་དཔུང་པ་རྨིག་པ་དང་། །རྐན་མཆུ་ནུ་མ་ཁ་འགྲམ་སོགས། །ནམ་ཚོང་བྲང་དང་རྩིབ་མ་རྣམས། །ཟླ་བ་གསུམ་ན་སྐྱེ་
བར་འགྱུར། །ཟླ་བ་བཞི་པར་ཕོ་མཚན་ནི། །རྩ་རྒྱུས་བཅས་པ་སྐྱེ་བར་འགྱུར། །དེ་བཞི་དང་གས་སྲ་ཤ་འཕེལ་དང་། །མཇུག་མ་རྔོག་མ་རུས་པ་སྐྱེ། །ཟླ་བ་ལྔ་པར་རྐུབ་དང་ནི། །ལོང་ཀ་དག་ཀྱང་སྐྱེ་འགྱུར་ཞིང་། །སྙིང་དང་གློ་བ་མཚེར་པ་དང་། །མཆིན་པ་མཁལ་མ་གཞང་

དང་ན། །རྒྱུ་མ་གཉེ་མ་སོགས་པ་འབྱུང་། །ཟླ་བ་དྲུག་པར་ཡན་ལག་ཀུན། །རྒྱས་ཤིང་རྩ་ཕྲན་རྩ་ཆེན་དང་། །རུས་པ་ཀུན་དང་ཚིགས་རྣམས་འབྱུང་། །ཟླ་བ་བདུན་པའི་ཚེ་ན་ནི། །མ་ཡི་ནུ་མ་གཡོས་འགྱུར་ཞིང་། །དབང་པོ་དྲུག་ནི་ཚང་བ་དང་། །དབུགས་ནི་དམན་པ་ཉིད་ཀྱིས་
རྟ། །དབང་པོའི་ཡོན་དང་བྱ་བ་ལ། །ནུས་པ་ཆུང་བ་ཉིད་དུ་འགྱུར། །དེ་ཕྱིར་ཟླ་བ་བདུན་པ་ན། །རྒོད་མ་དབུགས་རྔུབ་བདེར་མི་ནུས། །དེ་ཚེ་ཡན་ལག་རྒྱས་ཤིང་བརྟན། །རྩ་སོགས་བདུན་བརྒྱ་གསལ་བར་འགྱུར། །དེ་བཞིན་ཟླ་བ་བརྒྱད་པ་ལ། །མངལ་དུ་ལུས་དེ་ཆེར་འཕེལ་ཞིང་། །
ལུས་རྒྱས་རོ་དྲུག་ཚོར་བ་དང་། །སྟོབས་དང་ལྡན་ཞིང་དབང་པོ་གསལ། །དབང་པོས་དོན་ནི་གསལ་བྱེད་ཅིང་། །མ་ཡང་བདེ་བར་དབུགས་མི་རྔུབ། །ཚགས་ཚིགས་མཉེན་ཞིང་བརྟན་འགྱུར་ཞིང་། །རྒོད་མའི་ལྟོ་བ་ཅི་ཞིག་ན། །ཟླ་བ་དགུ་པར་རྒོད་མ་ནི། །མཚན་དང་དེ་
བཞིན་ནུ་མ་སྐྲངས། །འབྱུང་བ་གསལ་བ་ཉིད་འགྱུར་ཞིང་། །ཡན་ལག་ཉིང་ལག་རྫོགས་པར་འགྱུར། །ཟླ་བ་དགུའམ་ནི་བཅུ་བའམ། །ཟླ་བ་བཅུ་གཅིག་པ་དག་ལ། །ཉེ་བར་བཙས་པ་ཉིད་དུ་འགྱུར། །རྒོད་མ་ནད་དང་བཅས་པར་ནི། །བུ་བཙས་པ་ནི་འགྱུར་བ་ཡིན། །བུ་
ཡི་ལྟེ་བ་དང་འབྲེལ་བའི། །མངལ་ན་རྩ་སྦུབས་ཡོད་པས་ན། །དེ་ལས་དངས་མ་རྒྱུ་མ་ཡི། །མངལ་ནི་འཕེལ་བར་གྱུར་པ་ཡིན། །མངལ་ན་གནས་པ་རྟག་པར་ནི། །མགོ་བོ་གྱེན་དུ་བལྟས་ནས་གནས། །མངལ་ན་གནས་པའི་གཅིན་རྟུག་ནི། །སྐྱེ་བའི་དུས་ན་འབྱུང་
འགྱུར་ལ། །ཟླ་བ་བཅུ་བར་དེ་འཕེལ་ཏེ། །དེ་ནི་ཤ་མ་ལ་གནོད་བྱེད། །དེ་ནི་གཅིན་རྟུག་ལ་གནས་པས། །ཡིད་མི་བདེ་ཕྱིར་སྒྱུར་བར་བྱེད། །མགོ་ནི་ཐུར་དུ་སྒྱུར་བྱེད་ཅིང་། །གོ་བཟློག་པར་ནི་གནས་བས་ན། །རྒྱུ་མ་དཀྲུགས་བར་གྱུར་པའི་ཕྱིར། །མ་ཡིན་ད་ནི་མི་བཟད་
སྐྱེད། །དེ་ལྟར་ཐུར་དུ་བསྒྱུར་བས་ན། །དེ་བས་རྒོད་མའི་ཁ་ཟས་ནི། །རྗེས་སུ་མཐུན་པ་ཉིད་དུ་བྱ། །རྒྱུ་དེས་ཟླ་བ་བཅུ་ན་ནི། །ལེགས་པར་བཅས་པ་ཉིད་དུ་འགྱུར། །དེ་ནི་བཟུང་བར་བྱེད་པས་ན། །དང་པོ་མགོ་བོ་འབྱུང་འགྱུར་ཏེ། །དེ་ནས་ལུས་ནི་རིམ་གྱིས་འབྱུང་། །

དེ་ལྟར་ན་ནི་བཙས་པར་བཤད། །དེ་ཡི་རྗེས་ལ་ཤ་མ་ནི། །མངལ་ནས་འབྱུང་བར་འགྱུར་བ་ཡིན། །ཕོ་ལ་སོགས་པ་མངལ་དུ་ནི། །ཆགས་པར་བྱེད་པའི་རྒྱུ་ཉོན་ཅིག །ཁུ་བ་མང་ཞིང་ཁྲག་ཉུང་པ། །རླུང་གིས་འདྲེས་པར་བྱས་ནས་ནི། །དེར་ནི་
རྣམ་ཤེས་ཞུགས་གྱུར་ན། །རྟེའུ་ཕོ་རུ་སྐྱེ་བར་འགྱུར། །དེ་ལྟ་བུ་ཡི་ཚུལ་གྱིས་ནི། །ཁུ་བ་ཉུང་ཞིང་ཁྲག་མང་ན། །དེ་ལས་རྟེའུ་མོར་སྐྱེ་བར་འགྱུར། །གང་གིས་མ་ནིང་སྐྱེ་འགྱུར་ཉོན། །རྩ་དང་ཆུ་ནི་ཟད་འགྱུར་ཞིང་། །ཁ་རླུང་གིས་ཉེན་གྱུར་པ་ཡི། །ཕྱིན་ཅི་ལོག་གི་
དུས་སུ་ནི། །ཕ་མ་དག་ཀྱང་ཉམ་ཆུང་ཞིང་། །དབང་པོའི་སྟོབས་ཀྱང་ཟད་གྱུར་པ། །དེ་གཉིས་ཕྲད་པར་གྱུར་པ་ནི། །ཁུ་བ་ཁྲག་ཀྱང་ཆ་མཉམ་ན། །མ་ནིང་དུ་ནི་སྐྱེ་བར་འགྱུར། །ཉེས་པ་དེ་དག་གཉིས་དང་ནི། །ཕ་མ་ནད་གཞིར་བཅས་གྱུར་ན། །ཟླ་མཚན་ཉེས་པ་ཆེར་
ལྡན་ལས། །རྟ་ནི་གཡང་གཤམ་དག་ཏུ་འགྱུར། །སྡར་བཤད་པ་ཡི་རྒྱུ་ཡོད་ཅིང་། །མངལ་དུ་ཆགས་པར་གྱུར་པ་ན། །མངལ་གྱི་གནས་ནི་ནད་གཞིར་བཅས། །རླུང་ནི་ཤས་ཆེར་གྱུར་པ་ན། །དེ་ལ་རྟེའུ་ཕོ་མོ་འབྱུང་། །ཁུ་བ་ཉེས་པར་ལྡན་འགྱུར་ན། །གསེབ་ཀྱིས་བུ་ནི་
སྐྱེད་མི་བྱེད། །ཁུ་བ་སྟོང་པར་གྱུར་པ་ན། །རླུང་གིས་གཉིས་སུ་ཕྱེ་བ་ལས། །ཁྲག་དང་འདྲེས་པར་གྱུར་པ་རུ། །རྣམ་ཤེས་གཉིས་ནི་ཞུགས་པ་ན། །རྟེའུ་མཚེ་མར་སྐྱེ་འགྱུར་ལ། །ཁུ་བ་མང་ན་ཕོ་གཉིས་ཏེ། །ཁྲག་ནི་མང་བར་གྱུར་པ་ལས། །རྟེའུ་མོའི་མཚེ་མར་སྐྱེ་བར་
འགྱུར། །དེ་ལས་གཞན་ཡང་མངལ་གྱི་ནི། །ཉེས་པ་བཞི་བོ་མཉན་པར་གྱིས། །རླུང་ནད་གནོད་ཀྱི་ཉེས་པ་ཡིས། །མངལ་དུ་ཞུ་བར་གྱུར་པ་ཡིན། །དེ་ལ་བད་ཀན་ལྷགས་གྱུར་ན། །མངལ་ན་ཉལ་བ་ཞེས་བྱར་འགྱུར། །རླུང་དང་བད་ཀན་གྱིས་ཉེན་པས། །མངལ་
དུ་ལུགས་པ་ཞེས་བྱར་འགྱུར། །རྒོད་མ་རྩེག་ཅིང་མེ་དྲོད་ཉམས། །མངལ་སྐམ་པ་ཞེས་བྱ་བར་འགྱུར། །མངལ་དུ་རླུང་གིས་གཟིར་གྱུར་ཅིང་། །འཇུག་ཚེ་ཤིན་ཏུ་གནོད་བྱས་ལ། །བད་ཀན་ཁྲག་དང་འདྲེས་པ་ལས། །དེ་ཚེ་མཚན་མི་ལྡང་བར་འགྱུར། །སྦྲུམ་

མ་ཡི་ནི་ཉེས་པ་དང་། །ཁ་ཟས་རྩུབ་པས་རླུང་བསྐྱེད་ཅིང་། །གྲང་བས་བཀག་ཅིང་གནོད་གྱུར་བས། །དེ་ནི་མངལ་དུ་གཟུགས་ཐུང་འགྱུར། །གང་ཚེ་དུས་ཚིགས་ཉེས་པ་ལ། །རྒོད་མའི་ནད་གཞི་དང་ཕྲད་པར། །མངལ་དུ་ཆགས་པར་གྱུར་པ་ན། །དེ་ཚེ་ནད་བུ་ཅན་དུ་
འགྱུར། །རོ་ནི་མི་མཉམ་ཉེས་པ་དང་། །དེ་བཞིན་དུས་ནི་གོ་ལོག་པས། །མངལ་གྱི་རླུང་འཁྲིས་བད་ཀན་གྱི། །ཉེས་པ་ཉེ་བར་འཁྲུག་པར་འགྱུར། །རླུང་གིས་ལྕེ་ཡི་རྩ་དག་ཏུ། །རྗེས་སུ་རྒྱུ་བར་བྱེད་པ་ན། །ནད་གཞི་དེ་ནི་འཁྲུགས་གྱུར་ན། །དེ་ལས་རྟ་ནི་ལྐུགས་
པར་འགྱུར། །རྣ་བའི་བུ་ག་འགགས་པ་ལས། །འོན་པ་ཉིད་དུ་སྐྱེ་བར་འགྱུར། །མིད་པའི་རྩ་ནི་འགགས་པ་ལས། །བེམས་པོ་འདྲ་བར་སྐྱེ་བར་འགྱུར། །མངལ་དུ་མིག་གི་རྩ་དག་ལ། །གནོད་གྱུར་པ་ཡིས་ཁེབས་པ་ལས། །རྟེའུ་དམུས་ལོང་དག་ཏུ་ནི། །
རྒོད་མ་ལས་ནི་སྐྱེ་བར་འགྱུར། །སྣ་ཡོན་རྔོག་མ་གཡོ་བ་དང་། །གཞོགས་ཉམས་གཞོགས་ཕྱེད་ཆེ་བ་དང་། །ལུས་དང་མཇུག་རྔོག་མི་སྡུག་དང་། །རྒྱབ་སྒུར་རླིག་པ་ཆེ་བ་དང་། །རླིག་པ་རབ་ཆུང་ལྷག་པ་དང་། །མཚན་ནི་རིང་དང་ཐུང་དང་གུག །ཡན་ལག་
རེངས་དང་ཡོ་བ་དང་། །མ་ནིང་ཡན་ལག་མ་ཚང་དང་། །གཟུགས་ནི་སྡུག་དང་ཡན་ལག་ཉམས། །ཡན་ལག་ཕྲ་དང་ལྷག་མ་རྣམས། །དེ་ནི་རླུང་གི་གནོད་ལས་གྱུར། །དེ་ལྟར་ཇི་སྐད་བཤད་པ་དང་། །དེ་ལས་ལྷག་པའི་སྨད་བྱ་བ། །སྣང་ན་རྟ་དེ་རླུང་གི་ནི། །ནད་ཀྱིས་
ཉེན་པར་ཤེས་པར་བྱ། །རྟ་ནི་གསེབ་དང་ཕྲད་གྱུར་ཚེ། །ཡིད་ལ་གང་ཞིག་འདོད་གྱུར་པ། །དེ་ཡི་བུ་ནི་དེ་འདྲ་པར། །སྐྱེ་བར་འགྱུར་བ་ཁོ་ན་ཡིན། །དེ་བཞིན་སྤྱོད་ལམ་དག་དང་ཚང་། །མདོག་དང་གཟི་མདངས་འགྲོས་དང་ནི། །ཕ་དང་མ་ནི་ཅི་འདྲ་བ། །དེ་འདྲ་ཕལ་
ཆེར་འགྱུར་བ་ཡིན། །ཁ་ཟས་ངན་དུ་འཁྲུ་བ་དང་། །སྣད་དང་འཇིགས་དང་ངལ་བ་ལས། །སྦྲུམ་མའི་ནད་ནི་འཁྲུགས་གྱུར་པས། །མངལ་འཇིག་པར་ནི་འགྱུར་པ་ཡིན། །གང་ཚེ་རླུང་ནི་མངལ་གནས་པའི། །རྔོག་མའི་གནས་སུ་ཕྱིན་གྱུར་ན། །རྔོག་མ་རྩུབ་དང་མི་སྙོམས་

པའམ། །རྔོག་མ་སྲབ་པར་འགྱུར་བ་ཡིན། །པགས་པ་སྤུ་དང་རྔ་མ་ཡི། །སྐྱོན་གང་ཡོད་དེ་རླུང་ལས་གྱུར། །བད་ཀན་མཁྲིས་པ་ལས་གནས་པའི། །སོ་ཡི་རྩ་བར་གནས་གྱུར་ལ། །བད་ཀན་མཁྲིས་པ་ཤས་ཆེ་ལས། །སོ་མི་སྡུག་པར་འགྱུར་པ་
ཡིན། །འཁྲིག་ཚེ་ཁུ་བ་སྐྱོན་མེད་ཅིང་། །ཟླ་མཚན་ཡོན་ཏན་ལྡན་པ་དང་། །གོམས་ཤིང་འདོད་པ་དང་ཕྲད་ཅིང་། །ཡིད་ལ་འདོད་པ་མ་བཀག་དང་། །བཀྲ་ཤིས་ཤིས་པ་བརྗོད་བྱས་དང་། །དགེ་སྦྱོང་བྲམ་ཟེ་མཆོད་པ་ལས། །ཚེ་རིང་བར་ནི་འགྱུར་པ་ཡིན། །གཞན་དུ་དེ་ནི་
ཚེ་ཐུང་འགྱུར། །གསེབ་སྦྱར་ཚེ་ན་སྐར་མ་ཆེས། །བྱེད་པ་ལ་སོགས་བཟང་པོ་དང་། །ཡིད་འོང་གཞན་ཡང་མང་པོ་ཡིས། །བཀྲ་ཤིས་དང་ནི་མཆོད་བྱས་ཏེ། །རྟ་ནི་མཆན་ལྡན་རྒོད་མ་ནི། །ཤིས་པ་དང་ནི་སྦྱར་བར་བྱ། །ལྷ་དང་བྲམ་ཟེ་མཆོད་བྱས་ལ། །རོལ་མོ་སེམས་
ཅན་གཞན་གྱིས་བསྐོར། །རོ་ཙ་གཙང་བའི་ཁ་ཟས་དང་། །ཁུ་བཅུད་བཟང་པོ་དག་ཀྱང་སྦྱིན། །དེ་ལྟར་བྱས་ན་བཟང་འགྱུར་ཏེ། །གཞན་དུ་བྱས་ན་བཟང་མི་འགྱུར། །གཟི་མདངས་ཉམས་དང་སྙིང་སྟོབས་རྩལ། །གཟུགས་དང་ནད་མེད་དཔའ་བ་དང་། །འཇིགས་མེད་པ་
དང་བློ་ལྡན་པ། །འོག་ནས་རྒྱ་ཆེར་བཤད་པར་བྱ། །རྫས་བཅུད་ནུས་པ་སྨིན་པ་ལས། །རྟ་རྣམས་མངལ་དུ་ཆགས་པའི་ཚེ། །བད་ཀན་པགས་པར་ཁྱབ་གྱུར་ན། །རྟེའུ་དཀར་པོར་སྐྱེ་བར་འགྱུར། །རླུང་གི་ཁ་དོག་སྔོ་བསངས་འགྱུར། །མཁྲིས་པ་ཡིས་ནི་ནག་པོར་སྐྱེ། །
བད་ཀན་མཁྲིས་པ་འདྲེས་པ་ལས། །རྟ་མདོག་སེར་སྐྱར་སྐྱེ་བ་ཡིན། །གལ་ཏེ་ཁྲག་མཁྲིས་ཉུང་གྱུར་ལ། །བད་ཀན་ཡང་ནི་ཤས་ཆུང་བས། །རྟེའུའི་པགས་པར་ཕྱིན་གྱུར་ན། །མདོག་རྗེས་སེ་བོ་དག་ཏུ་འགྱུར། །ཁྲག་ནི་གལ་ཏེ་མང་གྱུར་ཅིང་། །བད་ཀན་མཁྲིས་པ་ཤས་ཆུང་བ། །
རྟ་ཡི་པགས་པར་ཕྱིན་ན་ནི། །རྟ་ནི་དམར་གྲོ་དག་ཏུ་འགྱུར། །གང་ཚེ་མཁྲིས་པ་མང་གྱུར་ཅིང་། །ཁྲག་དང་བད་ཀན་ཉུང་གྱུར་པ། །རྟེའུའི་པ