Luận tạng Tây Tạng (Tengyur) — Tập 203

ིམ་པ་བཞིན་ནོ་གངས་རིའི་བདག །བློ་གསལ་ཡིད་གཞུངས་ལས་ཤེས་བྱ། །སླར་ཡང་གཞན་ཡང་གསལ་བྱེད་རྣམས། །རིམ་པས་བགྲངས་ལ་རེ་རེ་
བྲི། །དེ་ལ་སྔར་གྱི་ཆོ་ག་ཡིས། །ཆོམ་རྐུན་ཐེ་ཚོམ་མེད་པར་ཤེས། །སྐྱེས་པ་བུད་མེད་ལྷན་ཅིག་ལས། །ལུས་དང་ཡན་ལག་སོ་སོར་ཕྱེ། །ལུས་ནི་རྒྱ་མཚོས་བསྒྱུར་བྱས་ཏེ། །ཡན་ལག་མི་ཡིས་བསྒྱུར་བར་བྱ། །གཅིག་ཏུ་བསྡོམས་ལ་གསུམ་གྱིས་བགོ །ཟུང་ནི་བུ་མོ་གཅིག་མཁའ་བུ། །
གང་ཚེ་བུད་མེད་འོངས་པ་ཡིས། །དྲིས་པའི་དང་པོའི་གསལ་བྱེད་གསུམ། །སྡེ་ཚན་བགྲང་བསྡམ་མིག་གི་ཕྱེ། །ཕོ་མོ་ཟླ་བ་སྟོང་པས་ཤེས། །གསལ་བྱེད་རིམ་པས་བླངས་པ་གསུམ། །སྡོམ་ལ་བཅུས་བསྒྱུར་དགུས་ཐོབ་པ། །འདས་པའི་ཟླ་བ་ཤེས་པར་བྱ། །སྦྲུམ་མའི་ཟླ་བའོ་དགའ་བྱེད་མ། །

དེ་ལྟར་ངེས་པ་མ་མཐོང་བས། །ཡང་ནས་ཡང་དུ་འདྲི་བ་ལ། །སྔར་གྱིས་ཐོབ་པས་དེ་དང་ནི། །ལྷག་མ་བསྲེས་ལ་དགུ་ཡིས་ཕྱེ། །ལྷག་མས་ཟླ་བ་རྟོགས་པ་སྟེ། །ཐིག་ལེ་ཤར་ན་ཟླ་བ་བཅུ། །ཡང་ནི་འདྲི་བར་བྱེད་པ་ལ། །རྙེད་དང་ལྷག་མ་བསྡོམས་ལ་བརྟག །གཞན་
ཡང་སྦྲུམ་མའི་གསལ་བྱེད་ནི། །དང་པོ་མི་མཉམ་བུ་སྐྱེ་ཞིང་། །གཉིས་དང་བཞི་སོགས་བུ་མོར་འགྱུར། །ཐ་མ་ལྔ་ལ་མ་ནིང་འགྱུར། །བུད་མེད་མིང་གི་སྐར་མའི་གྲངས། །དེ་བཞིན་ཚེས་དང་གཟའ་དང་ནི། །དྲི་ཚིག་དང་པོའི་ཡི་གེའི་གྲངས། །བསྲེས་ལ་བདུན་གྱིས་བགོས་པ་ཡི། །ལྷག་
མ་མཉམ་ན་བུ་མོ་སྟེ། །མི་མཉམ་པ་ནི་བུ་རུ་མཐོང་། །བུད་མེད་སྦྲུམ་མར་གྱུར་པ་ཡི། །མིང་གི་དབྱངས་རྣམས་ཇི་སྙེད་པ། །གསང་བའི་ཚད་པ་གང་ཡོད་བསྲེ། །ཐུབ་པས་བགོས་པས་རྙེད་པ་རྣམས། །ལྔ་ཡིས་བསྒྱུར་ལ་ལྷག་མ་བསྲེ། །དེ་ལ་གསུམ་གྱིས་བགོས་ཐོབ་པ། །རི་བོང་ཅན་ཉིད་
མིག་དང་མེ། །ལྷ་མི་ས་འོག་རིམ་བཞིན་འོངས། །ཡང་ན་དྲུག་གིས་བགོས་པའི་ལྷག །གཅིག་གཉིས་གསུམ་བཞི་ལྔ་དང་སྟོང་། །ལྷ་དང་ལྷ་མིན་མི་དུད་འགྲོ། །ཡི་དྭགས་དམྱལ་བ་རིམ་བཞིན་ཡིན། །གསལ་བྱེད་རིམ་ཅན་དང་པོ་གསུམ། །བསྲེས་ལ་གསུམ་གྱིས་བགོས་པ་ལས། །ལྷག་
མ་གཅིག་གིས་དོན་རྙེད་ཅིང་། །གཉིས་ལུས་དབུ་མར་བསྟན་པ་སྟེ། །ལྷག་མ་མེད་ན་འདྲི་བྱེད་ཀྱི། །དོན་ནི་ཐེ་ཚོམ་མེད་པར་ཉམས། །དེ་ལྟར་བཟང་ངན་བརྟགས་ནས་ནི། །ཡིད་ལ་སེམས་པ་ཤེས་པར་བྱ། །སྐྱེས་བ་བུད་མེད་གཉིས་ཀྱི་ནི། །མིང་གི་ཡི་གེ་ཇི་སྙེད་པ། །ཨ་སོགས་དབྱངས་སུ་ཤེས་
བྱ་སྟེ། །ཀ་སོགས་གསལ་བྱེད་ལྷག་དགའ་མ། །མིང་གི་དབྱངས་ཀྱིས་གྲངས་རྣམས་དང་། །མིང་གི་གསལ་བྱེད་ཇི་སྙེད་པ། །སོ་སོར་ཕྱེ་ལ་གཅིག་ཏུ་བསྲེ། །དེ་ལ་འཇིག་རྟེན་གྱིས་ཆེ་བས། །ལྷག་མ་གཟུགས་དང་སྟོང་པར་ཤར། །སྐྱེས་པ་འཆི་བདག་གིས་འཛིན་ཏེ། །ཇི་སྲིད་གཉིས་ནི་སྣང་
གྱུར་ན། །མི་མོ་དེ་བཞིན་སྲོག་དང་བྲལ། །འདི་ནི་ཁྱོ་ཤུག་ཆོ་ག་སྟེ། །གཞན་དུ་མ་བཤད་རི་སྲས་མོ། །ཀྱེན་དུ་རེ་ཁཱ་དགུ་པ་ལ། །འཕྲེད་ལ་རེ་ཁཱ་གསུམ་བྲིས་ལ། །ཨ་ཀ་ཙཊ་ཏ་པ་ཡ། །ཤ་རྣམས་སྟེང་དགོད་འོག་མ་ལ། །ཀླུ་མདའ་རོ་དང་མཚོ་དང་ནི། །ཟླ་མེ་མིག་རིང་བཞིན་དུ་

དགོང་། །མིང་གི་ཡི་གེ་ཇི་སྙེད་པ། །འོག་མས་སྟེང་ལ་བསྒྱུར་བར་བྱ། །དབྱངས་དང་གསལ་བྱེད་སོ་སོར་བསྡོམ། །མཚོ་དང་མིག་གིས་རིམ་བཞིན་བསྒྱུར། །གཅིག་ཏུ་བསྡོམས་ལ་མེ་ཡིས་ཕྱེ། །ལྷག་མར་སྟོང་པའི་རི་བོང་ཅན། །སྐྱེས་པ་གཤིན་རྗེས་སྔོན་ལ་ཁྲིད། །གང་ཚེ་
ཟུང་དུ་ལྷག་པ་ན། །དེ་ཚེ་བུད་མེད་སྔོན་ལ་འགྲོ། །མཛེས་དགའ་ཁྱོ་ཤུག་སྦྱོར་བ་སྟེ། །གཞན་དུ་ངས་ནི་མ་བཤད་དོ། །གཤིན་རྗེའི་གནས་འགྲོ་མིང་ཡིག་གི །དང་པོར་དཀར་ཕྱོགས་ཡི་གེ་སྣང་། །ནག་པོའི་ཕྱོགས་ལ་འཆི་བ་སྟེ། །དང་པོར་ནག་ཕྱོགས་ཡི་གེ་སྣང་། །དཀར་པོའི་ཕྱོགས་ལ་
དུས་ལས་འདའ། །ཁྱོ་ཤུག་ཡིན་ཏེ་གཞན་ལས་མིན། །མིང་གི་གསལ་བྱེད་དང་པོ་ལ། །མཉམ་དང་མི་མཉམ་ཡི་གེ་སྣང་། །གཡོན་དུ་གསལ་དག་རིམ་པ་བཞིན། །མིག་གི་དང་པོ་འགྲིབ་པར་གྲགས། །རང་གི་སྐྱེས་པའི་སྐར་མ་ཡིས། །འདོད་པའི་དོན་ཀུན་སྒྲུབ་བྱེད་ཅིང་། །དགེ་དང་མི་
དགེའི་འབྲས་བུ་ཀུན། །འདི་ཉིད་གཅིག་པུས་ངེས་པར་མཐོང་། །སྐྱེས་བུ་ཟླ་བའི་ཚེས་གྲངས་ལས། །སྐར་མའི་ངེས་པ་རྟོགས་པར་འགྱུར། །ཟླ་བ་ཤེས་པས་སྐྱེས་ཁྱིམ་གང་། །ཤེས་པས་དེ་ལས་འབྲས་བུ་སྟོན། །སྐྱེས་པའི་ཚེས་གྲངས་ལྷག་མ་ཡིན། །ཉི་ཤུ་རྩ་དགུ་ལ་ཕྲི་བའི། །ལྷག་མ་
སྐྱེས་སྐར་རྟོགས་པར་དྲན། །དཀར་ཕྱོགས་གཅིག་ནས་གྲངས་རྣམས་བཟུང་། །ནག་ཕྱོགས་ཚེས་ལ་གསུམ་བསྣན་དང་། །ཟླ་བའི་སྐར་མ་ཤེས་པ་དང་། །དེ་བཞིན་རང་གི་སྐྱེས་ཟླ་ལ། །བཅུ་གཅིག་འདྲེས་པས་ཤེས་པར་བྱེད། །དེ་ལྟར་སྐྱེ་བའི་ཉི་མའི་གྲངས། །གསུམ་གྱི་སྣོན་འབྲིང་ལྷན་ཅིག་
པ། །དེ་ཡི་གྲངས་ནི་གནས་པ་ལས། །སྐྱེས་པའི་སྐར་མ་རབ་ཏུ་བྱེད། །སྐྱེས་པའི་ཚེས་ལ་ཉི་ཤུ་ལྔ། །བསྲེས་ལ་ཉི་ཤུ་བདུན་གྱིས་བགོ །ལྷག་མས་ཚེས་གཅིག་ནས་བརྩམས་པའི། །སྐར་མའི་གྲངས་ནི་སྟོན་པར་བྱེད། །དེ་ལྟར་སྐར་མའི་རབ་ཕྱེ་བ། །སྐྱེས་པའི་ཟླ་བ་ཉིན་ཞག་དྲན། །འདི་ལ་
རང་གི་ཟླ་བ་ནི། །སྔོན་སོང་སྐར་མ་བཙལ་བ་ཡིན། །རང་གི་སྐར་མ་ཤེས་པ་ལས། །དོན་ཀུན་ཤེས་པར་འགྱུར་བར་དྲན། །གང་གིས་སྐར་མ་མི་ཤེས་པ། །དེ་ཡི་ངལ་བ་དོན་མེད་དྲན། །རང་གི་འདོད་པའི་སྐར་མ་ནས། །ལྷ་མོ་ནན་ཏན་ལས་ཤེས་བྱ། །འདྲི་བྱེད་སྲོག་གི་ལས་བྱེད་སར། །

བཟློག་ནས་གནས་ན་དགོས་དོན་མེད། །གལ་ཏེ་ལས་ནི་བྱེད་པར་གནས། །བསམ་པའི་ཡིད་ལ་འདོད་པ་འགྲུབ། །སྐྱེས་པ་སྒོ་ནང་གཡས་འཇོག་ཅིང་། །དེ་བཞིན་བུད་མེད་གཡོན་འཇོག་པ། །དགེ་ཞིང་ཤེས་པར་སྟོན་པ་སྟེ། །བཟློག་ན་འདྲི་བའི་དོན་ཉམས་
འགྱུར། །གཡས་ཀྱི་ཡན་ལག་གཡོ་བ་དང་། །སྙིང་ཉིད་ངན་པ་རྣམ་པར་སྤང་། །ཉེ་འཁོར་ཤིས་པའི་བྱ་བ་བྱེད། །བསམ་མི་དགོས་བས་དོན་མི་འགྲུབ། །འདྲི་བྱེད་མགྲིན་པ་འགྲམ་པ་དང་། །རྣ་བ་སྣ་མིག་བྲང་དང་ནི། །ལྕེ་དང་གསང་བ་སྙིང་དང་སོ། །སྐྲ་དང་དཔྲལ་བ་གསུས་པ་དང་། །ནུ་མ་
དང་ནི་དགུ་རྣམས་སུ། །ལག་པ་གཡས་པས་རེག་ཅིང་གཡོ། །གདོང་ནི་སྔོན་དུ་བལྟས་པའི་ཚེ། །དགེ་བའི་ལས་ཡིན་བཞིན་བཟངས་མ། །གཡོན་པས་རེག་ཅིང་གཡོ་བ་ནི། །དེ་ལས་བཟློག་པར་ཤེས་པར་བྱ། །འདྲི་བྱེད་ཕོ་ཉའི་ཉེ་འཁོར་ན། །བ་ལང་ར་ལུག་གསོད་པ་དང་། །འཐབ་རྩོད་རྡེག་
བཅིང་རྡུང་བ་དང་། །བཙོན་འཛིན་སྲོག་འཇོམས་ནོར་སྟོར་དང་། །སྣོད་སྟོང་སྐྱེ་བོ་ཡུལ་དམན་པ། །གོས་ཧྲུལ་མཛེ་ཅན་མདོག་མི་སྡུག །སྐྲག་དང་བྲེད་ཅིང་ཆད་པས་བཅད། །སེམས་སྟོར་མྱང་ན་བྱེད་པ་མཐོང་། །ཁ་དོག་ཡིད་དུ་མི་འོང་བ། །ཁ་ནི་འོ་གང་ལྟས་རླུང་ཚུབ་མཐོང་། །འགྲོ་ཕྱོགས་
ལས་བཟློག་སྐྱེ་བོ་སོགས། །མཐོང་ན་མཛེས་པའི་དོན་རྣམས་མེད། །དུད་འགྲོ་གསོད་ལས་ཐར་པ་དང་། །བརྩེ་ཞིང་དགའ་ཞིང་དགོད་པ་དང་། །ནད་པ་སོས་དང་བཙོན་རྣམས་ཐར། །དགེ་བའི་གླུ་དང་དེ་བཞིན་གར། །ཕུན་སུམ་ཚོགས་པའི་གནས་རྣམས་མཐོང་། །རོལ་མོའི་སྒྲ་སྐད་སྙན་པ་
དང་། །དགེ་སློང་བྲམ་ཟེ་བླ་མ་ལྷ། །ལྷ་མཆོད་པ་དང་དགའ་སྟོན་བྱེད། །ནོར་རྙེད་ཚོང་པ་རྙེད་པ་ཆེ། །གང་དག་སྐྱེས་བུ་ཡ་མཚན་ཅན། །གོས་བཟང་ཡན་ལག་བཟང་བ་དང་། །རྒྱལ་བོ་བུད་མེད་རྒྱན་ཅན་མཐོང་། །དཀར་ཕྱོགས་དང་ནི་མཐུན་པའི་མདོག །ཉིགས་ལ་འབྲས་བུ་མེ་ཏོག་རྒྱས། །
རྫིང་བུར་བྱ་རྣམས་རྩེ་བ་དང་། །རང་ལ་བྱིས་པའི་ཚོགས་དགའ་ཞིང་། །སེམས་དགེ་ཚིག་འབྲུ་དགེ་བ་སྒྲོགས། །མཐོང་ན་དེ་ཚེ་འདོད་དོན་འགྲུབ། །ལྷ་མོ་ཐེ་ཚོམ་ཇི་ལྟ་བུ། །འཕྲལ་དུ་མངོན་དུ་བྱེད་པ་ཉིད། །ཉི་མ་ཐབས་ལྡན་གཡས་ཕྱོགས་སུ། །ཟླ་བ་ཤེས་རབ་གཡོན་ཕྱོགས་དྲན། །

ལྐོག་ཏུ་གྱུར་པའི་ཕྱི་རོལ་དོན། །དེ་ཡི་བྱེ་བྲག་ཤེས་པ་ཡིན། །དགོས་པ་མེད་ཀྱང་བྱིས་པ་རྣམས། །དགའ་བའི་ཕྱིར་བཤད་དགའ་སྦྱིན་མ། །འཇིགས་བྱེད་ལྟང་ཚེ་དབུ་མ་ཡི། །རྣམ་འགྱུར་སྟོན་ན་འགྲུབ་འགྱུར་ཞིང་། །བཟའ་བཏུང་ལ་སོགས་ཐོབ་པར་དྲན། །ཁྱབ་འཇུག་རྣམ་འགྱུར་དེ་ལས་
བཟློག །དབུ་མ་ཉ་ལན་མི་དགུ་དང་། །ཙམུཎྜི་ཡི་སྔར་བཞིན་གྲགས། །གང་ཞིག་སུས་ཀྱང་མི་ཤེས་ཤིང་། །འཇིག་རྟེན་གསུམ་ན་རྙེད་དཀའ་བ། །གསང་བའི་རྒྱུད་ཆེན་ཁྱོད་ལ་སྨྲས། །མཛེས་མ་གསང་སྟེ་གཅེས་པར་ཟུང་། །འདི་ནི་གཡུལ་ལས་རྣམ་པར་རྒྱལ་བའི་རྒྱུད་ཀྱི་རྒྱལ་པོ་ལས། །ཕོ་
ཉས་དྲིས་པའི་ལན་བསྟན་པ་སྟེ་ལེའུ་གསུམ་པའོ།། །།ལྷ་མོས་གསོལ་བ། །བཅོམ་ལྡན་དབང་ཕྱུག་ལྷ་ཡི་གཙོ། །གཡུལ་གྱི་དུས་སུ་རྒྱལ་བ་དང་། །ཕམ་པར་བཤད་པ་ཤེས་པ་ནི། །དབང་ཕྱུག་ལྷ་ལས་ཉན་པར་འཚལ། །བཅོམ་ལྡན་འདས་ཀྱིས་བཀའ་སྩལ་པ། །ཇི་
ལྟར་ཁྱོད་ཀྱིས་བདག་དྲིས་བ། །ཉོན་ཅིག་ལྷ་མོ་བཤད་པར་བྱ། །གཞན་དུ་ངས་ནི་མ་བསྟན་ཏེ། །ངོ་མི་ཆོག་པས་ཁྱོད་ལ་བཤད། །གང་ཞིག་དབྱངས་འཆར་ཞེས་བྱ་བའི། །བསྟན་བཅོས་བཤད་པ་དོན་ཡོད་པ། །དགྲ་དང་རྩོད་པར་བྱེད་པ་ཡི། །དུས་ནི་མ་ནོར་ངེས་བཟུང་སྟེ། །འཁྲུག་པ་ལ་
སོགས་རྩོམ་པ་ལ། །མཛེས་མ་ཁྱིམ་གྱིས་སྟོན་པར་བྱེད། །རྒྱུ་སྐར་རྐང་པ་དགུ་དགུ་ལ། །ཁྱིམ་གཅིག་ཅེས་བྱར་ཡོངས་སུ་གྲགས། །ལུག་སོགས་ཉ་ཡི་མཐར་ཐུག་པར། །འཕོ་ཁྱིམ་ཅེས་བྱ་ལྷ་དགའ་མ། །ཐ་སྐར་ལ་སོགས་ནས་བཟུང་སྟེ། །ནམ་གྲུའི་མཐར་ཐུག་རིམ་བཞིན་དྲན། །བདག་
གི་མིང་གི་སྐར་མ་ཡི། །དེ་ཉིད་འཁོར་ལོ་ལས་ཤེས་བྱ། །རྐང་པ་བརྒྱ་ཡི་འཁོར་ལོ་ལས། །མིང་གི་སྐར་མ་ཤེས་པར་བྱ། །མིང་གི་ཐོག་མའི་ཡི་གེ་ནི། །བཏུས་བས་ཤེས་བྱ་དགའ་བྱེད་མ། །གང་ཚེ་ཡི་གེ་རྩེག་མ་ཡོད། །དེ་ཚེ་སྟེང་མ་གཟུང་བར་བྱ། །ཡི་གེ་དགོད་པའི་རེ་མིག་ནི། །ཕན་ཚུན་
ཀུན་ནས་བཅུ་བཅུ་སྟེ། །བརྒྱ་ཕྲག་གཅིག་གི་རེ་མིག་ལ། །མིང་གི་སྐར་མ་རིག་པར་བྱ། །དང་པོར་ཤར་ནས་བརྩམས་ནས་ནི། །རེ་མིག་རྣམས་ལ་རིམ་པ་བཞིན། །ཨ་ཝ་ཀ་ཧ་ཌ་ཞེས་པ། །སྟེང་ནས་བྲི་བ་ཉིད་དུ་བྱ། །དེ་བཞིན་དུ་ཡང་ལྷོ་ཕྱོགས་སུ། །མཊ་པ་དྲ་ཏ་རྣམས་སོ། །ཆུ་ནས་

ན་ཡ་བྷ་ཛ་ཁ། །ག་ས་ད་ཙ་ལ་རྣམས་ནི། །བྱང་དུ་དེ་ལྟར་རིམ་བཞིན་དྲི། །ཐོག་མའི་ཡི་གེ་བདུན་གནས་པ། །རང་གི་སྡེ་ཚན་བཞི་བཞིར་བསྟན། །དེ་ལ་ཨ་ཡིག་ཨི་ཡིག་དང་། །ཨུ་དང་ཨོ་དང་ཨེ་དང་བཞི། །དེ་རྣམས་དབྱངས་ཀྱི་ཡི་གེ་དང་། །ལྷན་ཅིག་
བྱེད་དོ་དགའ་བྱེད་མ། །རང་རང་ཐད་ཀ་ཐད་ཀ་དུ། །རང་གི་རིགས་ཀྱི་ཡི་གེ་འབྱུང་། །ཀུ་སུ་བྷུ་དུ་གསུམ་པའིགྲར། །རྐང་པ་བཞི་ལ་བྲི་བ་ནི། །གྷ་ང་ཚ་དང་ཥ་ཎ་ཋ། །ངྷ་ཕ་ཌྷ་དང་ཐ་ཛྷ་ཉ། །རྐང་པ་རེ་རེ་གསུམ་གསུམ་སྟེ། །བཅུ་གཉིས་དག་གིས་བསྟན་པ་ཡིན། །དེ་ལྟར་རེ་མིག་བརྒྱ་པོ་
རྣམས། །ཡི་གེས་ཡོངས་སུ་གང་བ་བྲེ། །ཐུང་དང་རིང་བར་མཉམ་ཤེས་པས། །རྐང་པའི་སྟེང་དུ་རྣམ་པར་བཞག །ཐ་མ་གཉིས་ཀྱིས་མ་ཚང་དབྱངས། །གསལ་བྱེད་ཡོངས་སུ་རྫོགས་པར་གནས། །ཡི་གེ་བཞི་བཞི་བསྡོམས་པ་ལས། །སྐར་མ་གཅིག་ཏུ་འགྱུར་བ་ཡིན། །རྐང་པ་བརྒྱ་དང་
བཅུ་གཉིས་ལ། །འདི་ལྟར་ཨ་ཨི་ཨུ་ཨ་སྟེ། །བཞི་བོ་སྨིན་དྲུག་ཡི་གེར་བརྗོད། །ཨོ་དང་ཝ་ཝི་ཝུ་རྣམས་ནི། །སྣར་མའི་ཡི་གེར་རྣམ་པར་གནས། །དེ་བཞིན་ཝེ་ཝོ་ཀ་ཀི་མགོ །ཀུ་ག་ྷང་ཚ་ལག་ཏུ་བསྟན། །ཀི་ཀོ་ཧ་ཡི་ནམ་སོར་དྲན། །ཧུ་ཧེ་ཧོ་ཌ་རྒྱལ་ཞེས་གྲག །ཌི་ཌུ་ཌེ་ཌོ་ཞེས་བྱ་བ། །སྐག་
ཏུ་ཤེས་བྱ་ལྷ་ཆེ་ནམ། །མཆུ་ཡི་མ་མི་མུ་མེ་སྟེ། །མོ་ཌ་ཌི་ཌུ་གྲེ་ཞེས་བརྗོད། །ཌེ་ཌོ་པ་པི་དབོ་རུ་དྲན། །མེ་བཞི་བུ་ཥ་ཎ་ཋའོ། །པེ་པོ་ར་རི་ནག་པ་ཟེར། །རུ་རེ་རོ་ཏ་ས་རིང་སྨྲ། །ཏི་ཏུ་ཏེ་ཏོ་ས་ག་སྟེ། །ན་ནི་ནུ་ནེ་ལྷ་མཚམས་སོ། །ནོ་ཡ་མེ་ཡུ་སྣྲོན་དུ་གྲགས། །ཡེ་ཡོ་བྷ་བྷི་སྣྲུབས་སུ་དྲན། །བྷུ་
བྷ་ཕཊ་ཆུ་སྟོད་ཡིན། །བྷེ་བྷོ་ཛ་ཛི་ཆུ་སྨད་ཐོབ། །ཛུ་ཛེ་ཛོ་ཁ་གྲོ་བཞིན་ནོ། །ཁི་ཁུ་ཁེ་ཁོ་བྱི་བཞིན་དྲན། །ག་གི་གུ་གེ་ཞེས་བྱ་བ། །མོན་གྲུ་ཡིན་ནོ་གངས་རིའི་བདག །གོ་ས་སི་སུ་མོན་གྲེར་ཐོས། །ཤེ་ཤོ་ད་དི་ཁྲུམས་སྟོད་ཤེས། །དུ་ཐ་ཛ་ཉ་ཁྲུམས་སྨད་བཤད། །ནམ་གྲུ་དེ་དོ་ཙ་ཙིར་གྲགས། །ཙུ་
ཙི་ཙོ་ལཱ་ཐ་སྐར་ལོ། །ལི་ལུ་ལེ་ལོ་བྲ་ཉེར་གྲགས །དེ་ལྟར་རྐང་པ་བརྒྱ་འཁོར་ལོར། །མིང་གི་སྐར་མར་ཤེས་པར་བྱ། །རེ་མིག་བརྒྱ་པའི་འཁོར་ལོ་དེར། །མིང་གི་སྐར་མ་ཤེས་པར་བྱ། །རྒྱུ་སྐར་རེ་རེ་ལྡན་པ་ལ། །བཞི་བཞི་ཆ་རུ་ཤེས་པར་བྱ། །འཁོར་ལོའི་རི་མོ་དགོད་པ་ལ། །བརྒྱད་

ཀྱིས་ལྷག་པའི་ཉི་ཤུའོ། །དེ་ལྟར་ཤར་གྱི་ཕྱོགས་ལ་གནས། །ལྷོ་ལ་སོགས་པར་མཉམ་པར་གནས། །རི་མོ་བརྒྱད་པོ་མཉམ་བྲིས་པས། །རྐང་པ་རེ་ལ་ཆ་བཞི་བགོ །ཤར་ནས་བརྩམས་ཏེ་གསལ་བར་ནི། །རྐང་པ་བརྒྱ་པ་ལེགས་པར་གནས། །རྒྱུ་སྐར་བཞི་ལ་གསལ་བར་ནི། །རྐང་པ་
བཞི་རུ་གྲགས་པ་ཡིན། །སྨིན་དྲུག་ལ་སོགས་བསྡོམས་པ་ལས། །བཅུ་གཉིས་ལྷག་པའི་བརྒྱ་ཕྲག་གཅིག །དབྱངས་དང་གསལ་བྱེད་ལྔ་སོགས་ལ། །དེ་ལྟར་བྱེ་བྲག་ཤེས་པར་བྱ། །རྐང་པའི་རི་མོར་གང་གནས་ལས། །གནོད་པའི་མཚན་ཉིད་ཤེས་བྱ་བ། །འདི་ལྟར་འགྱུར་རོ་གྲོགས་མོ་
ཀྱི། །སོལ་བ་དང་ནི་འཁྱུད་པ་དང་། །དུ་བ་གདོང་ཚུགས་མཐོང་ས་རྣམས། །གཙོ་མོ་ཉོན་ལ་ཡིད་ལ་གཟུང་། །དང་པོར་སྨིན་དྲུག་གནས་པ་ལ། །སྡིག་པའི་གཟའ་ནི་མཉམ་པར་གནས། །ཨ་ཡིག་ལ་ནི་འཁྱུད་པ་ཞེས། །གསལ་པོར་ཁོང་དུ་ཆུད་པར་བྱ། །ཨ་ཡི་ཡི་གེ་དུ་བར་དྲན། །བྱང་
ཕྱོགས་ལོ་ཡི་གསོལ་བར་དྲན། །ནུབ་ཕྱོགས་ཇི་བཞིན་ཡི་གེ་ཁོ། །གདོང་ཚུགས་ཞེས་བྱར་ཡོངས་སུ་གྲགས། །མཐོང་བའི་ས་རྣམས་སླེབས་པ་སྟེ། །གནོད་པ་ལྔ་ཡིན་བཞིན་བཟང་མ། །སོལ་བས་འཆི་བར་འགྱུར་བ་སྟེ། །འཁྱུད་པས་ལུས་ལ་ནད་རྣམས་འབྱུང་། །དུ་བས་ཡིད་ལ་འདོད་པ་
མེད། །གདོང་ཚུགས་རིགས་ངན་ཐ་ཤལ་འགྱུར། །མཐོང་བའི་འབྲས་བུའི་བྱེ་བྲག་ལས། །ཤེས་བྱའི་དཔའ་བོའི་དབང་ཕྱུག་མ། །ཐོག་མར་སྨིན་དྲུག་བཞག་པ་ཡི། །རྒྱུ་སྐར་རྐང་པ་གསལ་བ་ལ། །གལ་ཏེ་ཉི་མ་མཉམ་པར་གནས། །རྒྱུ་སྐར་གསུམ་དུ་རབ་ཏུ་བརྗོད། །ཨ་ནས་བཅུ་
གཉིས་པ་ནས་ཀི །མགོ་ཡི་རྐང་པའི་ཐ་མར་དྲན། །ཟླ་བ་གནས་ན་ནུབ་ཕྱོགས་སུ། །མཐོང་ས་རྐང་པ་ཉི་ཤུ་གཉིས། །མོན་གྲུའི་རྐང་པ་ཐ་མ་ཡི། །སུ་ཡིག་གསལ་པོར་མཐོང་བ་ཡིན། །དེ་ལྟར་གཟའ་ཀུན་ངག་གིས་ནི། །མཐོང་བའི་མཚན་ཉིད་ཤེས་པར་བྱ། །ཉི་མའི་བཅུ་གཉིས་ཡིན་པར་
གྲག །མིག་དམར་གྱི་ནི་གསུམ་པར་གྲགས། །དེ་ལྟར་ལྷ་ཡི་བློན་པོ་དྲུག །ཉི་མའི་བུ་ཡི་བརྒྱད་རྣམས་ནི། །ཉི་མ་ལ་སོགས་རྒྱབ་ཏུ་གྲགས། །ཟླ་བ་ལ་སོགས་མདུན་དུ་སྟེ། །རཱ་ཧུ་གཟའ་ལྷག་པ་སངས་ཏེ། །བཞི་པོ་འགྲོགས་ལུགས་གཅིག་ཏུ་རྟེན། །ཟླ་བ་མཐོང་བ་ཉི་ཤུ་གཉིས། །དེ་བཞིན་

རཱ་ཧུའི་དགུ་རུ་དྲན། །ཟླ་བ་རི་བུ་ཡི་བདུན་ཡིན་ཏེ། །དེ་བཞིན་དཀར་པོས་ལྔ་ཞེས་བྱ། །ཉི་མའི་མཐོང་ས་ནོར་རྣམས་ཟད། །མིག་དམར་རཱ་ཧུ་སྤེན་པ་ཡིས། །ལུས་ཅན་རྣམས་ནི་འཆི་བར་བྱེད། །ཕུར་བུས་གཉེན་རྣམས་བརླག་ཅིང་འཆི། །པ་སངས་ལས་ཉམས་དོན་མི་
འགྲུབ། །གཟའ་ལྷག་དགྲ་འབྱུང་ཟོང་མི་ལོམ། །ཟླ་བས་འཇིགས་པ་ཆེན་པོ་འབྱུང་། །གཙོ་བོ་མཐོང་བའི་འབྲས་བུར་དྲན། །དེ་ནས་གཞན་ཡང་བཤད་པར་བྱ། །ཤ་ལ་ཀ་ཡི་འཁོར་ལོ་སྟེ། །བག་མ་ལ་སོགས་ཆོ་ག་མཆོག །གྲོགས་མོ་ལྷ་ཆེན་མཛེས་དགའ་ཉོན། །སྐར་མའི་དགེ་དང་
མི་དགེ་བ། །མ་ལུས་པ་ནི་སྟོན་པར་བྱེད། །ཐུག་མ་བདུན་པའི་འཁོར་ལོ་སྟེ། །ངེས་བའི་འབྲས་བུ་སྟོན་པ་ཡིན། །ཤར་ནས་ནུབ་ཏུ་རི་མོ་བདུན། །ལྷོ་ནས་བྱང་དུའང་དེ་བཞིན་ཏེ། །ཐལ་ཀར་གདོང་ཚུགས་འབྱུང་བས་ན། །ཤ་ལ་ཀ་ཞེས་གྲགས་པ་ཡིན། །སུམ་ཅུ་དྲུག་གི་རེ་མིག་བཅས། །
སྨིན་དྲུག་ནས་ནི་བྲ་ཉེའི་བར། །ཤར་ནས་བརྩམ་པའི་སྦྱོར་བ་ཡིས། །ཉི་ཤུ་རྩ་བརྒྱད་རིམ་བཞིན་བྲི། །ཆེ་ཞེ་དེ་ལ་སྡིག་པའི་གཟའ། །ལྷན་ཅིག་གནས་ཏེ་འཁྱུད་པ་ནི། །དེ་ཡི་ཐད་ཀའི་སྐར་མ་ལ། །མ་རུངས་གདོང་ནི་ཟུག་པར་ངེས། །འཁྱུད་པའི་མདུན་ན་སོལ་བ་སྟེ། །རྒྱབ་མ་དུ་བའོ་བཙུན་
མོ་ཀྱེ། །དེ་ཡི་ནུས་པ་དེ་ཙམ་དེ། །སྔོན་དུ་ཤེས་བྱ་ལྷ་སྲས་མོ། །སོལ་བ་འཁྱིལ་པ་དུ་བ་གདོང་། །སྟོབས་བཞིའི་འཁོར་ལོ་ཞེས་བྱའོ། །ཉི་མ་དང་ནི་ལྷན་ཅིག་པའི། །ཕྱོགས་ནི་མི་ཤེས་པ་ཞེས་བྱ། །ཉི་མའི་དཀྱིལ་འཁོར་གནས་པའི་ཕྱོགས། །ཨ་ཏ་མི་ཏ་ཞེས་བྱར་གྲགས། །ཕྱོགས་གང་
བསོད་ནམས་གཟའ་རྣམས་ཡོད། །འཆར་བ་ཞེས་བྱ་དགེ་བ་ཡིན། །ཉི་མ་དང་ནི་ལྷན་ཅིག་པས། །ཨ་ཏ་མི་ཏར་གྲགས་པ་ཡིན། །གཟའ་རྣམས་ཟླ་བའི་ཐད་ཀ་སོགས། །བག་མའི་འབྲས་བུ་ངེས་བར་བརླག །ཉི་མའི་ཐད་ཀར་ཁྱོ་རྣམས་ཤི། །མིག་དམར་གྱི་ནི་བུ་དང་བྲལ། །ཟླ་བའི་ཏད་ཀཱར་
གཟའ་ལྷག་ཡོད། །བཟའ་བཏུང་མེད་དོ་ལྷ་ཡི་སྲས། །ལྷ་ཡི་བླ་མས་ནོར་ཉམས་ཤིང་། །སྔོན་ཆད་མེད་པའི་སྡུག་བསྔལ་འབྱུང་། །པ་སངས་ཁྱོས་ནི་སྤངས་ནས་སུ། བཙུན་མོ་ལ་སོགས་མགོ་རེག་བྱེད། །སྤེན་པའི་ཐད་ཀར་ཟླ་བ་ཡོད། །སྨད་འཚོང་དུ་ནི་འགྲོ་ཞེས་གྲགས། །ཟླ་བ་ཡོད་པའི་

ཟུར་མ་ལ། །བསོད་ནམས་སྡིག་པ་གནས་གྱུར་པ། །མདུང་དང་མདུང་ནི་ཆེན་པོ་ཡི། །སྦྱོར་བར་ཡོངས་སུ་གྲགས་པ་ཡིན། །མདུང་དང་མདུང་ཆེན་སྦྱོར་བ་ལ། །བུ་སྐྱེས་འཆི་བར་འགྱུར་བ་སྟེ། །གལ་ཏེ་བྱེས་སུ་ཕྱིན་པ་ན། །ཟླ་བ་གཉིས་ན་ངེས་བར་འཆི། །བག་མ་བླངས་ན་ཁྱོ་ནི་འཆི། །བཤེས་
དང་འབྱེ་ཞིང་དོན་རྣམས་མེད། །བྱ་བ་གང་ཡང་འགྲུབ་མི་འགྱུར། །མཛེས་དགའ་ཁོང་དུ་ཆུད་པར་གྱིས། །སྨིན་དྲུག་ལ་སོགས་སྐར་མ་རྣམས། །ཕྱོགས་སུ་བདུན་བདུན་གནས་པ་ལས། །མིག་དམར་ལ་སོགས་གཟའ་རྣམས་ནི། །རྒྱུ་སྐར་རེ་རེའི་བདག་པོར་དྲན། །སྐར་མ་རང་གི་བདག་པོར་
གནས། །སྐྱོན་མེད་བདེ་སྟེར་རང་གི་བུ། །བྱེས་བགྲོད་སོགས་དང་བྱ་བ་ལ། །རང་གི་བདག་པོས་བདེ་བར་བྱེད། །བདག་པོར་རང་གི་བུ་ལ་གནས། །ཐམས་ཅད་ཤིས་བྱེད་ལྷ་ཆེན་མ། །བྱང་ལ་སོགས་པ་ཕྱོགས་བཞི་རུ། །ཟླ་བ་གནས་བའི་སྐར་མ་རྣམས། །དབོ་དང་ཁྲུམས་སྨད་ཆུ་སྨད་དང་། །
རྒྱལ་དང་མཆུ་དང་ས་ཡི་བུ། །མིག་དམར་ཞེས་བྱ་ཐད་ཀར་སོང་། །ཆོམ་རྐུན་གྱིས་འཚེ་བཟའ་བཏུང་མེད། །སྔར་ནས་མེད་པའི་ནད་འབྱུང་ཞིང་། །ལོངས་སྤྱོད་ཟད་འགྱུར་མེད་དོ་ཀྱེ། །ཆུ་སྨད་གྲོ་བཞིན་མེ་བཞི་དང་། །ནག་པ་མོན་གྲེར་ཟླ་བ་གནས། །དེ་ཡི་ཐད་ཀར་གཟའ་ལྷག་ཤར། །འཆི་
སོགས་མི་དགེ་སྣ་ཚོགས་པ། །ནོར་བུ་བུ་དང་བུ་མོ་དང་། །ལོངས་སྤྱོད་རྣམས་ནི་མ་ལུས་ཉམས། །ཁྲུམས་སྟོད་སྣྲུབས་དང་ཐ་སྐར་མཆུ། །ས་ག་རྣམས་ལ་ཟླ་བ་གནས། །ཐ་སྐར་ཕུར་བུའི་གདོང་བཙུགས་ན། །རྒྱལ་བོ་ཡུལ་དུ་མི་བཞག་ཅིང་། །བྱ་བ་ཀུན་ལ་མི་དགེ་སྟེ། །གཉེན་རྣམས་
གསལ་པར་འཆི་བར་འགྱུར། །སྣྲོད་དང་ཆུ་སྟོད་གྲེ་དང་སྐག །ནམ་གྲུ་རྣམས་སུ་ཟླ་བ་ཡོད། །དེ་ཡི་ཐ་ཀར་པ་སངས་བལྟས། །བག་མ་བླངས་ན་ཁྱོ་འཆི་སྟེ། །བུས་མོ་ལ་སོགས་ན་བ་དང་། །ཕྱུགས་ཀུན་བརླག་པར་འགྱུར་བ་ཡིན། །སྨིན་དྲུག་ལག་དང་ཆུ་སྟོད་དང་། །བྱི་བཞིན་བྲ་ཉེར་ཟླ་བ་
གནས། ཐ་སྐར་གལ་ཏེ་སྤེན་པ་འོངས། །ནད་འབྱུང་གྲོགས་རྣམས་འཆི་བར་དྲན། །རྒྱུ་སྐར་བདག་པོའི་ནུས་པ་སྟེ། །རང་གི་བདག་པོའི་འཁོར་ལོ་ཡིན། །སྨིན་དྲུག་ལ་སོགས་རིམ་པ་བཞིན། །བཞི་བཞིར་ཡོངས་སུ་ཕྱེ་བ་ལས། །སྡེ་ཚན་བདུན་དུ་འགྱུར་བ་སྟེ། །བཞི་ལ་རེ་ཁཱས་བསྐོར་བ་བདུན། །

ཉི་ཟླ་པ་སངས་ཕུར་བུ་དང་། །མིག་དམར་གཟའ་ལྷག་རཱ་ཧུ་སྤེན། །རིམ་པ་བཞིན་བསྟན་མཐའ་མའི་ཆར། །རཱ་ཧུ་སྤེན་པ་གཉིས་ཏེ་བཞིན། །སྡེ་ཚན་ཕན་ཚུན་བསྣོལ་གནས་ལས། །མོ་དེ་ཐད་ཀའི་ནུས་པ་འབྱུང་། །ཉི་མ་མིག་དམར་ཐད་ཀར་ཏེ། །མིག་དམར་ཉི་
མར་གདོང་བཙུགས་སོ། །དེ་བཞིན་ཟླ་བ་གཟའ་ལྷག་སྟེ། །སྤེན་པ་ཕུར་བུ་ཕན་ཚུན་བལྟས། །པ་སངས་རཱ་ཧུ་དེ་བཞིན་དུ། །ཐད་ཀར་བསྣོལ་བས་སྟོབས་སུ་འགྱུར། །གྲོང་དང་གྲོང་ཁྱེར་ཕྱོགས་རྣམས་སུ། །ཕྱུགས་དང་རིན་ཆེན་ལོ་ཏོག་སོགས། །ཐད་ཀའི་སྐྱོན་གྱིས་བརླག་པར་ནི། །འགྱུར་རོ་
ལྷ་ཡི་དབང་ཕྱུག་མ། །གཟའ་རྣམས་ཐད་ཀར་གདོང་བཙུགས་པས། །ཕན་ཚུན་ཆེན་པོའི་འཁོར་ལོར་གྲགས། །སྨིན་དྲུག་ལ་སོགས་རིམ་པ་བཞིན། །ཕྱོགས་དེར་བདུན་ནི་གནས་པ་ལས། །རང་གི་ཕྱོགས་སུ་འགྲོ་བར་ཆས། །དགེའོ་དཔའ་མོ་དབང་ཕྱུག་མ། །ཤར་ཕྱོགས་ཤར་བཞིན་བྱང་
དུ་སྟེ། །བྱང་ཡང་བྱང་བཞིན་ཤར་དུའང་བཟང་། །དེ་བཞིན་ལྷོ་དང་ནུབ་ཕྱོགས་ཀྱང་། །ཕན་ཚུན་མཉམ་པར་དགེ་བ་ཡིན། །མེ་ནས་རླུང་དུས་རི་གྷ། །མཚམས་ལ་རྒལ་ན་མི་ཤིས་པས། །དོན་ཉམས་སྡུག་བསྔལ་ངལ་དུབ་དང་། །རྨོངས་ཤིང་འཆི་བར་འགྱུར་བ་ཡིན། །མེ་དང་རླུང་དུ་
མཚམས་བཅས་པས། །ས་རི་གྷ་ཡི་འཁོར་ལོ་ཡིན། །དབང་ལྡན་དང་ནི་ཟུག་པའི་དབུས། །མེར་ནི་སྐག་དང་མཆུ་ཞེས་བརྗོད། །བདེན་བྲ་ལས་ག་ལྷ་མཚམས་དབུས། །གྲོ་བཞིན་མོན་གྲེ་རླུང་དེ་བཞིན། །རང་གི་ཕྱག་རྒྱའི་སྦྱོར་བ་སྟེ། །ལྷ་མོ་དེ་ལྟར་ཕན་ཚུན་གནས། །ཕྱོགས་བཞི་ཕན་ཚུན་
མི་མཐུན་ཕྱིར། །ཕན་ཚུན་རྣམ་པར་སྤངས་པ་ཡིན། །རྫོགས་པ་དང་ནི་ཟུག་པའི་དབུས། །རང་གི་ཕྱག་རྒྱའི་སྦྱོར་བར་དྲན་ནི། །རྫོགས་དང་ཐུག་པའི་དབུས་སུ་ནི། །བཟློག་སྟེ་འགྲོ་ལ་བཟང་བ་མེད། །རྫོགས་དང་ཟུག་པའི་ཆུ་ཚོད་ལྔ། །མི་དགེའི་ལྷག་མ་སྐྱོན་དང་བྲལ། །སྔར་བཤད་ཐད་ཀའི་
གདོང་ཚུགས་ཀྱིས། །འཁོར་ལོ་དེ་ལྟར་འདིར་ཤེས་བྱ། །དེ་ལྟར་མ་འཁྲུལ་ཤེས་བྱ་སྟེ། །སྐྱོན་གྱི་འབྲས་བུ་རྣམས་པར་སྤངས། །རང་གི་ཕྱག་རྒྱའི་འཁོར་ལོ་སྟེ། །བེ་ར་མུ་བའི་འཁོར་ལོ་ཡིན། །དེ་ལྟར་ཐུར་མའི་འཁོར་ལོ་མཆོག །དགེ་དང་མི་དགེའི་བྱེ་བྲག་རྣམས། །ཕྱེ་སྟེ་རྒྱས་པར་བསྟན་པ་

སྟེ། །ལེགས་པར་རྟོགས་སམ་སྐལ་བཟང་མ། །འདི་ནི་གཡུལ་ལས་རྣམ་པར་རྒྱལ་བའི་རྒྱུད་ཀྱི་རྒྱལ་པོ་ལས། རྐང་པ་བརྒྱ་བའི་འཁོར་ལོའི་ཆོ་ག་བསྟན་པ་དང་ཤ་ལ་ཀའི་འཁོར་ལོ་བསྟན་པ་ཆེན་པོ་སྟེ་ལེའུ་བཞི་བའོ།། །།ལྷ་མོས་གསོལ་པ། ལྷ་ཆེན་འཁོར་ལོ་མཆོག་ཏུ་དགེ །
རྐང་པ་བརྒྱད་ཅུ་རྩ་གཅིག་པའི། །ཆོ་ག་ཤིན་ཏུ་རྒྱས་པར་ཡོད། །དབང་ཕྱུག་ལྷ་ལས་ཉན་པར་འཚལ། །བཅོམ་ལྡན་འདས་ཀྱིས་བཀའ་སྩལ་བ། །རྐང་པ་བརྒྱ་ཅུ་རྩ་གཅིག་པའི། །མཉམ་པའི་འཁོར་ལོ་རྒྱས་པ་འདིར། །གཡུལ་ལས་རྣམ་པར་རྒྱལ་པ་ཡི། །བསྟན་བཅོས་དོན་ཀུན་མ་
ཚང་མེད། །ཤ་ལ་ཀ་ཡི་འཁོར་ལོ་ཡང་། །འདི་དང་ལྷན་ཅིག་མཉམ་པར་གནས། །ཐིག་ནི་དྲང་པོ་ཆ་བཅུ་རུ། །མཛེས་མ་མཉམ་པར་གནས་པར་བྱ། །དེ་ལ་རེ་མིག་བརྒྱད་ཅུ་གཅིག །འབྱུང་བར་ངེས་སོ་སྡུ་གུ་མ། །གྲྭ་ནས་གྲྭར་བཟུང་རེ་མིག་ལ། །ཨ་སོགས་དབྱངས་ཀྱི་ཡི་གེ་དགོད། །
སྨིན་དྲུག་ནས་ནི་བྲ་ཉེའི་བར། །ཕྱི་ཡི་རེ་མིག་བདུན་ལ་དགོད། །ལྔ་ལས་གསལ་བྱེད་ཉི་ཤུ་རྣམས། །ཨ་ཝ་ཀ་ཧ་ཌ་སོགས་དགོད། །དེ་བཞིན་ཐོག་མར་གླང་ལ་སོགས། །རེ་མིག་གསུམ་ལ་དགོད་པར་བྱ། །དགའ་བ་ལ་སོགས་ཚེས་རྣམས་ནི། །དབུས་ཀྱི་རེ་མིག་ལྔ་ལ་དགོད། །དེ་ལྟར་སྐར་མ་
ལ་སོགས་པ། །གཡས་བསྐོར་སྦྱོར་བས་དཀར་མོ་ཀྱེ། །དེ་ལྟར་བརྒྱད་ཅུ་རྩ་གཅིག་ལ། །དུས་ཀྱི་ལྷ་རྣམས་ཐམས་ཅད་ཚང་། །རང་གི་རྒྱུ་སྐར་གསལ་བྱེད་དབྱངས། །ཁྱིམ་དང་ཚེས་ལ་མཆེ་བ་བརྟག །སྡིག་གཟའ་ཐལ་ཀ་ལ་ནི་ངན། །གཉིས་དང་གསུམ་གྱིས་བརླག་འགྱུར་ཏེ། །གཅིག་གི་ཐད་
ཀར་སོང་པ་ཡིན། །དོན་ཉམས་ནོར་རྣམས་ཟད་བྱེད། །མིང་ལ་དྲག་པོའི་གཟའ་རྣམས་འཇོམས། །ངེས་པར་འཆི་བར་མཐོང་ཞེས་དྲན། །བསོད་ནམས་སྡིག་ཅན་མིང་ལ་ཟིན། །རིམས་འབྱུང་ནོར་རྣམས་ཟད་པར་བྱེད། །བེ་ན་སི་ཀར་དྲག་པོའི་གཟའ། །གསུམ་འཛོམ་ཚེ་ནི་འཇིག་པར་སྟོན། །
སྐྱེས་པ་ལས་དང་བི་ནཱ་ཤར། །ཨ་དྷ་ན་ལ་རིམས་ནད་འབྱུང་། །བསོད་ནམས་གཟའ་རྣམས་ཤར་ནུབ་ཏུ། །ཉི་མ་ལ་ནུབ་ངན་པར་འགྱུར། །མིང་གི་སྐར་མར་ཉི་མ་སོང་། །འཆི་བ་ལ་སོགས་འབྱུང་བའི་ཕྱིར། །ཕྱོགས་གང་ཉི་མ་གནས་པའི་ཕྱོགས། །རྒྱུ་སྐར་ཡི་གེ་དུས་སྦྱོར་ཚེས། །ཕྱུགས་ཉམས་

འཐབ་རྩོད་མྱ་ངན་འབྱུང་། །བྲན་གཡོག་ལོངས་སྤྱོད་རྣམ་པར་ཉམས། །ཉི་མ་དང་བྲལ་ཕྱོགས་གསུམ་ཀར། །དགྲ་ལས་རྒྱལ་ཞིང་གྲོགས་བཟང་ཕྲད། །འདོད་པའི་དོན་འགྲུབ་ཕུན་སུམ་ཚོགས། །རྙེད་དང་གྲགས་པ་དེ་བཞིན་འབྱུང་། །དབང་པོ་ལ་སོགས་སྡེ་ཚན་གྱི། །ལག་
སོགས་དབུས་ན་གནས་བ་ལ། །ཉི་མ་གནས་ཚེ་ནུབ་འགྱུར་ཏེ། །ཕྱོགས་དེའི་མིང་གི་རྒྱུ་སྐར་དང་། །ཚེས་ཁྱིམ་གསལ་བྱེད་དབྱངས་རྣམས་ནི། །བསྲེགས་ཉམས་ཚད་པས་གདུངས་བ་ཡིས། །རྣམ་པར་ཉམས་པར་འབྱུང་བའི་ཕྱིར། །དབུས་སུ་ཟླ་བ་གསུམ་གསུམ་ངན། །ལྷག་མའི་ཕྱོགས་གསུམ་
དགེ་བ་སྟེ། །ཟླ་བའི་སྡེ་ཚན་དེ་བཞིན་སྨྲ། །གསལ་བྱེད་རྒྱུ་སྐར་ཚེས་ཁྱིམ་དབྱངས། །ཕྱོགས་ཀྱི་བདག་པོ་མཁའ་འགྲོའི་ཕྱིར། །གང་གི་ཕྱོགས་ན་ཉི་མ་གནས། འགྲོ་འདུག་བྱེད་པ་དགེ་བར་གྲགས། །ད་གཟོད་དགེ་དང་མི་དགེ་བརྟག །སྔོན་དུ་བསམ་པ་མཁས་པ་ཡིན། །ཤར་དུ་སྨིན་དྲུག་
སྐྲག་གི་བར། །ངེས་གནས་ཡི་གེ་ལྔ་པོ་ཡང་། །ཨ་ཝ་ཀ་ཧ་ཌ་ལ་སོགས། །ཁྱིམ་ནི་གླང་འཁྲིག་ཀར་ཀ་ཊ། །དགའ་བ་ཞེས་བྱ་གྲྭ་ནས་དབྱངས། །དབྱངས་ཡིག་དང་པོ་ལྔ་པ་དང་། །དགུ་པ་དང་ནི་བཅུ་གསུམ་ཡོད། །ཉི་མ་ཤར་དུ་འོངས་ཚེ་ནུབ། །མཆུ་ནས་ས་གའི་བར་དུ་ཡང་། །མིང་
གི་གསལ་བྱེད་ལྔ་བོ་ནི། །མ་ཡིག་ལ་སོགས་ལྡན་པར་གནས། །དེ་བཞིན་སེང་གེ་བུ་མོ་སྲང་། །གྲྭ་ནི་དབྱངས་ཡིག་གཉིས་པ་དང་། །དྲུག་པ་བཅུ་བ་བཅུ་བཞིར་དྲན། །བཟང་བོ་ཚེས་ཏེ་ལྷོ་ཕྱོགས་སུ། །ཉི་མ་གནས་ཚེ་ནུབ་པར་གྲགས། །ལྷ་མཚམས་ལ་སོགས་གྲོ་བཞིན་མཐར། །ན་ནས་
ཁ་ཡི་མཐར་ཐུག་པར། །གསལ་བྱེད་ཡི་གེ་ལྔར་ཡང་གྲགས། །སྡིག་པ་གཞུ་དང་ཆུ་སྲིན་དྲན། །རྒྱལ་པོའི་ཚེས་སོ་དབྱངས་ཡིག་རྣམས། །མི་ཐུབ་དྲག་དང་དབང་ཕྱུག་གནས། །གལ་ཏེ་ཆུ་རུ་ཉི་མ་སོང་། །དེ་རྣམས་ནུབ་པར་བསྟན་པ་ཡིན། །མོན་གྲུ་ལ་སོགས་བྲ་ཉེ་གནས། །གང་ནས་ལ་ཡི་མཐར་
ཐུག་པར། །ཡི་གེ་ལྔ་ནི་གནས་པར་བསྟན། །ཁྱིམ་ནི་བུམ་པ་ཉ་དང་ལུག །ཚེས་ནི་སྟོང་པ་དབྱངས་ནི་ཆུ། །ནོར་དང་ཉི་མ་རྒྱལ་བོར་དྲན། །ཉི་མ་དྲུང་ནས་ནུབ་པ་ཡིན། །བསོད་ནམས་གཟའ་རྣམས་དགེ་ཞེས་ཟེར། །རྩ་བ་ཡན་ལག་ཚེས་ཀྱི་གཟའ། །ཉེ་བའི་གཟའ་ལ་སོགས་པ་རྣམས། །

ཉི་མ་གནས་པའི་རྗེས་འབྲང་ཞིང་། །དེ་བཞིན་སྤྲོ་ཞིང་སྡུད་པར་བྱེད། །ཇི་ལྟར་གློག་ནི་ལྔ་བ་ལ། །ལོངས་སྤྱོད་ཡོངས་སུ་རྫོགས་པར་ཤེས། །འདི་ལྟར་བརྒྱད་ལ་ཤུ་ལ་གནས། །བཅུ་བཞི་བ་ལ་འབྲུག་ཏུ་དྲན། །བཅོ་བརྒྱད་དེ་བཞིན་མཇུག་ཏུ་བརྗོད། །མཁའ་མིག་གཙོ་ཞེས་ངེས་པར་མཐོང་། །
ཐོག་ཅེས་མིང་དང་ལག་པར་གྲགས། །ས་གཡོས་གསུམ་ལྷག་ཉི་ཤུའོ། །དེ་བཞིན་རྒྱལ་བ་ཞེས་བྱ་བ། །གཏུན་ཤིང་དག་ཏུ་གྲགས་པ་ཡིན། །སྒྲ་གཅན་མིག་དམར་སྤེན་པ་རྣམས། །མཐོངས་སྔོན་དུ་དགུ་གསུམ་བརྒྱད། །ཉེ་བའི་གཟའ་ཡི་སྦྱོར་བ་རྣམས། །རྒྱུ་སྐར་ལ་སོགས་ཤེས་བར་བྱ། །
རྒྱུ་སྐར་ཉི་ཤུ་རྩ་བདུན་ནི། །ཐམས་ཅད་ཚང་བར་བསྐོར་བ་ཡིན། །དུས་སྦྱོར་བྱེད་གཟའ་འཆར་བ་ནི། །སུམ་ཅུའི་ཚེས་ལའང་འཆར་ཞིང་བསྐོར། །དང་པོའི་ཐུན་ལ་ཚེས་ཀྱི་བདག །ལན་བཞི་བྱི་བཞིན་དུས་སྦྱོར་བྱེད། །ཉིན་མོ་གཟའ་རྣམས་དྲུག་ལ་བསྐོར། །མཚན་མོ་ལྔ་ལ་བསྐོར་བ་ཡིན། །
འདི་ལྟར་ལོ་དང་ལུག་སོགས་ཁྱིམ། །ཚེས་དང་ཐུན་མཚམས་རིམ་པ་བཞིན། །བདག་པོའི་གཟའ་རྣམས་འཆར་བས་ན། །སྐར་མ་ལས་ནི་རྟོགས་པར་བྱ། །ཛ་ན་མ་ཧཱུ་ནི་ཨ་ན་དྷ་ཀ །ཛ་ན་མ་ཧཱུ་ནི་རིམ་པ་བཞིན། །ཚེས་ལ་ལན་གསུམ་འཆར་བར་གྲགས། །དཀར་པོ་ལ་སོགས་ཚེས་གཅིག་ལ། །
དུས་སྦྱོར་ཕྱེད་ལ་དེ་ལྟར་འཆར། །ཕྱེད་གོང་ཕྱེད་འོག་དཀར་ནག་དྲན། །མཚམས་ཡང་དེ་ལྟར་དཀར་ན་བརྗོད། །དྲག་པོའི་ཚེས་དང་དྲེག་པོའི་གཟའ། །སྐར་མ་དྲག་པོ་གསུམ་འཛོམ་པ། །ཤིན་ཏུ་མི་ཤིས་ངན་པ་སྟེ། །བ་ནི་ཤ་ཀ་ཞེས་བྱར་གྲགས། །རྐང་པ་བརྒྱལ་ཅུ་རྩ་གཅིག་པའི། །འཁོར་
ལོར་གསུམ་འཛོམ་གདོང་ཚུགས་གྲགས། །གླང་ཆེན་མྱོས་བའི་མཆེ་བ་ཡིས། །བླངས་ཏེ་ཟ་བར་བྱེད་དང་མཚུངས། །གཡས་གཡོས་མཆེ་བས་འཛིན་པ་སྟེ། །སྣ་ཡི་མདུན་ན་སྡོད་པ་གསོད། །ཇི་ལྟར་གྲྭ་བཞིར་གནས་པ་ཡི། །ཨ་སོགས་བཞི་པོས་སྤང་བ་ལས། །གལ་ཏེ་དབྱངས་ཡིག་བཅུ་གཉིས་
ཀྱང་། །མཆེ་བ་ངེས་པ་ཅེས་མི་སྤང་། །བསམ་གྱིས་མི་ཁྱབ་རྒྱུ་ཡི་ཕྱིར། །བརྗོད་དུ་མི་བཏུབ་གསང་སྟེ་བཞག །རེ་མིག་དང་པོ་དགུ་པ་དང་། །བཅུ་བདུན་ཉི་ཤུ་ལྔ་བ་སྟེ། །རྐང་པ་བརྒྱད་བཅུ་རྩ་གཅིག་ལས། །འདིས་ནི་མཆེ་བ་རྣམ་པར་སྤངས། །གཞན་ཡང་རྐང་བ་བཅུ་གཉིས་ཀྱི། །ཨུ་ཕྱོགས་

དབྱངས་ཡིག་བཅུ་གཉིས་པོ། །གལ་ཏེ་འདི་ལ་གདོང་ཚུགས་ཤར། །གྲྭ་བཞིར་གདོང་ཚུགས་ཅི་སྟེ་མེད། རྐང་པ་དྲུག་ལ་གང་གནས་པ། །ཉི་ཤུ་རྩ་གཅིག་ཉི་ཤུ་ལྔ། །བརྒྱ་ཕྱེད་གཅིག་གིས་མ་ལྡང་བའི། །བརྒྱ་ཡི་ཕྱེད་དང་གཅིག་ལྷག་པ། །རེ་མིག་བདུན་ཅུ་རྩ་
གཅིག་བས། །ཁེངས་པ་རྣམས་ཀྱིས་དེ་མ་སྤངས། །གྲྭར་གནས་ཡི་གེ་ཇི་བཞིན་ཏེ། །ཟླ་བ་འཕེལ་བར་མི་བྱེད་དོ། །ཉི་ཟླའི་བར་མཉམ་བཅོ་ལྔ་སྟེ། །ཅུང་ཟད་བསྣོལ་བས་འགྲིབ་པར་དྲན། །དེས་ན་གང་བའི་ཚེས་ལ་ནི། །གླང་ཆེན་མཆེ་བས་རྒྱབ་ཀྱིས་ཕྱོགས། །ལོ་དང་ཟླ་བ་ཉིན་ཞག་ལ། །
རྣམ་པར་འཆར་བར་ཤེས་པར་བྱ། །དཀར་ནག་ཕྱོགས་ཀྱི་ཉིན་ཞག་ལ། །དབྱངས་དང་གསལ་བྱེད་སྟོབས་བྱེད་ངན། །དཀར་ཕྱོགས་ལས་སྐྱེས་དཀར་པོ་སྟེ། །ནག་ཕྱོགས་ལས་སྐྱེས་ནག་པོ་ལ། །སྟོབས་ནི་ཆེ་བར་འགྱུར་བ་སྟེ། །ཟླ་བ་ཕྱེད་པར་ཡོངས་སུ་གྲགས། །གྷང་ཚ་དང་ཥ་ཎ་ཋ། དྷ་
པཌྷ་དང་ཐ་ཛ་ཉ། །ཀ་བ་བཞི་བོར་གནས་བ་ལས། །གསལ་བྱེད་ཡི་གེ་གསུམ་གསུམ་བསྟན། །སྨིན་དྲུག་སྡིག་ཅན་གནས་པ་ལས། །བྲེ་ཉེ་གཡས་སོང་ཨ་དང་གླང་། །དགའ་བ་བཟང་བོ་སྲང་དང་ཏེ། །ས་ག་གཡོས་ཏེ་བྱི་བ་བཞིན་བདུན། །དེ་བཞིན་རྒྱུ་སྐར་ཀུན་ལ་སྦྱར། །སྣར་མ་ཨུ་དང་ཐ་
སྐར་གཡས། །ཝ་འཁྲིག་ཨོ་དང་བུ་མོ་དང་། །ས་རིག་ཡོན་ཏེ་གྲོ་བཞིན་མདུན། །མགོ་ཡི་གཡོན་ནས་ཀ་ཡིག་དང་། །ཀར་ཀ་སེང་གེ་པ་ནག་པ། །མདུན་དུ་ཆུ་སྨད་ཅེས་བྱ་སྟེ། །ཨ་དང་ལ་དང་ནམ་གྲུ་གཡས། །བསོད་ནམས་ཤར་ན་ཟས་མེད་ཅིང་། །སྡིག་ཅན་འདག་ཉིད་རྣམ་པར་
ཉམས། །ལག་གི་གཡོན་ནས་ཧ་དང་ལཱི། །ཊ་ཡིག་མི་བཞི་གཡས་སུ་ཝ། །ལི་ཙ་ཁྲུམས་སྨད་མདུན་ཕྱོགས་སུ། །ཆུ་སྟོད་སྡིག་ཅན་ཟས་མེད་ཅིང་། །སྔོན་བཞིན་སྲོག་མཐར་བྱེད་པ་ཡིན། །ནབ་སོའི་གཡོན་དུ་ཊ་བད་བོ། །གཡས་སུ་ཀ་ཡིག་གླང་ལུག་དང་། །ཁྲུམས་སྟོད་མདུན་དུ་
སྣྲུབས་ཞེས་བྱ། །སྡིག་པས་འཇོམས་པར་སྟོན་པ་ཡིན། །རྒྱལ་གྱི་དོན་དུ་ཨུ་དང་གྲེ། །གཡས་སུ་ཧ་ཡིག་འཁྲིག་པ་ཨོ། །ཉ་དང་ས་ཡིག་མོན་གྲེ་དང་། །མདུན་དུ་སྣྲོན་ཏེ་མཆེ་བས་བཏབ། །སྐག་ནས་གཡོས་དུ་མཆུ་ཞེས་དྲན། །ཌ་དང་ཀར་ཀ་དགའ་བ་སྡོང་། །བུམ་པ་ག་ཡིག་མོན་གྲུ་

གཡས། །ལྷ་མཚམས་མདུན་གནས་སྡིག་པས་གདུངས། །མཆུ་ཡི་གཡས་སུ་སྐག་བཟུང་སྟེ། །གཡོན་ནས་མ་ཡིག་སེང་གེ་དང་། །བཟང་པོ་རྒྱལ་བ་ཆུ་སྲིན་ཁ། །བྱི་བཞིན་མདུན་དུ་བྲེ་ཉེའོ། །སྡག་གནས་བཅོམ་པའི་བདག་ཉེད་དྲན། །གྲེ་ཡི་གཡོན་ནས་ཌ་ཡིག་དང་། །བུ་མོ་ཨི་ཡིག་
གཞུ་དང་ཛ། །གྲོ་བཞིན་གཡས་སུ་ཨུ་དང་རྒྱལ། །མདུན་དུ་ཐ་སྐར་སྡིག་ཅན་འཇོམས། །དབོ་ཡིག་གཡོན་དུ་བ་དང་སྲང་། །སྡིག་པ་འབའ་ཞིག་ཆུ་སྨད་རྣམས། །གཡས་ཕྱོགས་མ་ཌ་ནབ་སོ་བཟུང་། །མདུན་དུ་ནམ་གྲུ་སྡིག་གཟའི་བདག །ར་ཨོ་ཡ་དང་ཆུ་སྟོད་རྣམས། །མེ་བཞིའི་གཡོན་
དུ་མཆེ་བས་བཏབ། །ཌ་ལི་ཧ་དང་ལག་རྣམས་གཡས། །ཁྲུམས་སྨད་མདུན་དུ་སྡིག་པས་གནོད། །ནག་པར་སྡིག་པས་གནོད་པ་ལ། །ཏན་སྣྲུབས་ནི་གཡོན་དུ་སྟེ། །པ་དང་སེང་གེ་ཀ་ར་ཀཊ། །ཀ་དང་མགོ་གཡས་ཁྲུམས་སྟོད་མདུན། །གཡས་གཡོས་མདུན་དུ་གནས་པ་རྣམས། །སྡིག་
ཅན་བདག་ཉིད་གནོད་པར་དྲན། །ས་རེར་སྡིག་གནས་གཡོན་དུ་རི། །སྣྲོན་ནོག་གཡས་སུ་དེ་བཞིན་ར། །བུ་མོ་ཨོ་དང་འཁྲིག་པ་མ། །སྣར་མ་མདུན་དུ་མོན་གྲེར་གྲགས། །ས་གར་སྡིག་ཅན་ལྷ་མཚམས་གཡོན། །གཡས་སུ་ཏ་ཡིག་སྲང་བཟང་པོ། །དགའ་བ་གླང་དང་ཨ་ཡིག་དང་། །སྨིན་
དྲུག་མདུན་དུ་མོན་གྲུ་བཟུང་། །ལྷ་མཚམས་ལ་གནས་གཡས་སུ་ནི། །ས་ག་གཡོན་ནས་ན་སྡིག་པ། །རྒྱལ་བ་སྟོང་པ་ལུག་དང་ལ། །བྲ་ཉེའོ་དེ་བཞིན་མདུན་དུ་སྐག། །སྣྲོན་ལ་ཡ་ཡིག་གཞུ་ཨ༔ཉ། །ཙ་ཡིག་ཐ་སྐར་མཆེ་བ་གཡོན། །གཡས་སུ་རི་ཡིག་ས་རི་བཟུང་། །རྒྱལ་ནི་མདུན་ཏེ་སྡིག་
པའི་བདག །སྣྲུབས་ནས་བྷ་ཡིག་ཆུ་སྲིན་དང་། །བུམ་པ་ད་ཡིག་ནམ་གྲུབ་གཡོན། །ན་ཏ་ནག་པ་གཡས་སུ་སྟེ། །མདུན་དུ་ནབ་སོ་སྡིག་ཅན་གནོད། །གང་ཞིག་ཆུ་སྟོད་སྡིག་ཅན་གནས། །ཇ་ཨཻ་ཤ་དང་ཁྲུམས་སྨད་གཡོན། །ཡ་ཨེ་ར་དང་མེ་བཞིན་གནས། །མདུན་ན་ལག་གི་གནོད་ཅན་དག །
གལ་ཏེ་ཆུ་སྨད་སྡིག་ཅན་གནས། །ཁག་ཁྲུམས་སྟོད་གཡོན་པས་འཛིན། །བྷ་ཡིག་སྡིག་པ་སྲང་ལ་དབོ། །གཡས་ཏེ་མདུན་དུ་མགོ་ལ་གནོད། །གྲོ་བཞིན་ལ་གནས་གཡས་སུ་ཛ། །གཞུ་དང་ཨ་ཡིག་བུ་མོ་ཊ། །བྲེ་འོ་གཡོན་པས་རྀ་ཡིག་དང་། །མོན་གྲུ་དེ་བཞིན་མདུན་སྣར་མ། །བྱི་བཞིན་

བྱི་ནི་གཡས་ཕྱོགས་སུ། །ཁ་ཡིག་ཆུ་སྲིན་རྒྱལ་བ་བཟད། །སེང་གེ་མ་ཡིག་མཆུ་རྣམས་ཟིན། །གཡོན་དུ་མོན་གྲེ་སྨིན་དྲུག་མདུན། །མོན་གྲེར་གལ་ཏེ་སྡིག་ཅན་གནས། །གཡས་སུ་བྱི་བཞིན་གཡོན་དུ་ག། །བུམ་པ་སྟོང་དགའ་ཀ་ར་ཀཊ། །ཌ་ཀ་གཡས་སོ་
ས་ག་མདུན། །མོན་གྲུར་བདག་ཉིད་ཆེན་པོ་གནས། །ས་ད་ཉ་ཁྱིམ་ཨོ་འཁྲིག་པ། །ཧ་རྒྱལ་གཡོན་བཟུང་གཡས་སུ་རི། །གྲོ་བཞིན་དུ་ནི་ས་རིར་དྲན། །གནོད་པ་ཁྲུམས་སྟོད་ལ་གནས་ཏེ། །ཁག་ཆུ་སྨད་གཡས་སུ་འཛོམ། །གཡོན་དུ་ད་ཡིག་ལུག་གླང་ཀ །ནབ་སོའི་མདུན་དུ་
ནག་པ་བཅོམ། །ཁྲུམས་སྨད་དགའ་ཏེ་སྡིག་ཅན་འོངས། །ཙ་ལི་ཝ་ལག་གཡོན་པས་འཛིན། །ཤ་ཨོ་ཛ་དང་ཁྲུམས་སྟོད་གཡས། །མདུན་དུ་མེ་བཞི་རྣམ་པར་འཇོམས། །ནམ་གྲུའི་གཡས་སུ་ད་ཡིག་དང་། །བུམ་པ་ཆུ་སྲིན་བྷ་ཡིག་སྣྲུབས། །གཡོན་དུ་ཌྷ་ཨ་རྒྱུ་སྐར་མགོ །མདུན་
དུ་དབོ་ཞེས་བཅོམ་པར་དྲན། །ཐ་སྐར་གཡོན་དུ་ཨུ་ཡིག་དང་། །སྣར་མ་གཡས་སུ་ཙ་ཡིག་ཉ། །ཨ་ཐ་གཞུ་དང་ཡ་དང་སྣྲོན། །མདུན་དུ་གྲེ་ནི་རྣམ་པར་ཉམས། །བྲེ་ཉེ་གཡོན་དུ་སྨིན་དྲུག་སྟེ། །གཡས་སུ་ལ་ཡིག་ལུག་སྟོང་པ། །རྒྱལ་བ་སྡིག་པ་ན་ཡིག་དང་། །ལྷ་མཚམས་མདུན་དུ་
མཆུ་ཞེས་གྲགས། །རང་གནས་དང་པོར་སྐྱེས་པ་སྟེ། །དེ་བཞིན་བཅུ་པར་ལས་ཞེས་བརྗོད། །དེ་ནས་རྐང་པ་བཅུ་དྲུག་པ། །རྣམ་པར་འགེས་པ་ཞེས་བྱར་དྲན། །རྐང་པའི་གྲངས་ནི་བཅོ་བརྒྱད་པར། །རྒྱ་ཅན་ཞེས་བྱར་ཡོངས་སུ་གྲགས། །ལྷ་མོ་ཉི་ཤུ་རྩ་གསུམ་པར། །ལྷ་མོ་ཉི་ཤུ་རྩ་གསུམ་པར། །བེ་ནཱ་ཤཱ་རྐ་ཞེས་
བྱའོ། །ཉི་ཤུ་རྩ་ལྔར་བཤད་པ་ལ། །ཡིན་ཅན་ཞེས་བྱར་ཀུན་དུ་གྲགས། །དེ་ལྟར་མཆེ་བ་དྲུག་གནོན་པས། །དྲུག་འཛིན་ཞེས་བྱ་ལྷ་སྲས་མོ། །རྐང་པ་བཅུ་དགུ་པ་ཡི་གྲངས། །ཨ་དྷ་ན་ཞེས་དེ་བཞིན་བརྗོད། །རིགས་དང་ཡུལ་དང་དབང་བསྐུར་གསུམ། །གང་ལ་མཆེ་བས་བཟུང་
བའམ། །གདོང་མཇུག་མེད་ན་དགེ་བ་སྟེ། །གདོང་མཇུག་མཆེ་བས་མི་དགེ་བྱེད། །སྐྱེས་པར་གདོན་ཤར་ནད་འབྱུང་ཞིང་། །ནོར་ཟད་ཀུ་ཅོ་དགྲ་དང་རྩོད། །ལས་ལ་མཆེ་གནས་གྲོགས་དང་འཐབ། །བཟོ་བྱས་བླ་མེད་ལས་མི་འགྲུབ། །རྣམ་འགྲེས་གཉེན་བཤེས་ཕོ་མོ་བྱེ། །གལ་

ཏེ་རྒྱན་ནམ་མཆེ་བས་བཏབ། །བསམ་པའི་དོན་རྣམས་འགྲུབ་མི་འགྱུར། །བི་ན་ཤ་ཀ་རིམས་ནད་འཆི། །ཡིད་ཅན་གདོང་ཚུགས་སྡུག་བསྔལ་འཐོབ། །དེ་ལྟར་དྲུག་ལ་མི་དགེ་བྱེད། །སྨིན་དྲུག་བྲམ་ཟེའི་རིགས་ཡིན་ཏེ། །རྒྱལ་རིགས་འཛིན་པ་རྒྱལ་ཞེས་བྱ། །ནམ་གྲུ་རྗེའུའི་རིགས་ལ་
གནས། །མེ་བཞི་དམངས་རིགས་ལ་སོགས་དྲན། །དབུད་ནས་བརྩམས་ཏེ་ཡུལ་རྣམས་སུ། །སྨིན་དྲུག་ལ་སོགས་གསུམ་གསུམ་པོ། །ཧུ་རའི་ཡུལ་གྱི་མཐར་ཐུག་པར། །རིམ་པ་བཞིན་དུ་ཤེས་བར་བྱེད། །གཟུགས་འདི་སྡིག་ཅན་གང་གནས་པའི། །གསུམ་ལ་དབུགས་སོགས་
རིམ་པ་བཞིན། །ལགས་སོགས་གསུམ་ལ་སྡིག་ཅན་གནས། །ཤར་གྱི་རྒྱལ་བོ་ཚོགས་རྣམས་འཇིག །སྨིན་དྲུག་སོགས་གསུམ་ཡུལ་དབུས་ཀྱི། །མ་ག་དྷ་སོགས་རྣམས་ལ་ངན། །སྐག་སོགས་ཤར་ལྷོའི་སེམས་ཅན་སྐྲག །དབོ་སོགས་ལྷོ་རུ་མི་དགེ་སྟེ། །ས་རི་ལ་སོགས་ལྷོ་ནུབ་
པ། །སྣྲོན་སོགས་སིན་དྷུ་སོགས་ནུབ་ཤེས། །ནུབ་བྱང་ཧོང་སོགས་ཆུ་སྨད་སོགས། །མོན་གྲེ་ལ་སོགས་བྱང་གི་ཡུལ། །ནམ་གྲུ་ལ་སོགས་བྱང་ཤར་ཡུལ། །སྡིག་གནས་མི་དགེ་དབང་ཕྱུག་མ། །སྙིང་ག་བཤང་ལམ་དེ་བཞིན་ཁ། །ཡན་ལག་བཞི་དང་ལྷན་ཅིག་ཏུ། །དབོ་གཉིས་
མཉམ་པར་གསུམ་གནས་ལ། །རུས་སྦལ་འཁོར་ལོར་ཡོངས་སུ་གྲགས། །ལྷ་མོ་སྐར་མའི་སྦྱོར་བ་ཡིས། །དགེ་དང་མི་དགེའི་འབྲས་བུ་ཐོབ། སྙིང་གི་དབུས་ཀྱི་ཡུལ་རིག་ཅིང་། །ཡན་ལག་བཞིས་ནི་མཚམས་ཀྱི་ཡུལ། །ཁ་ཡི་ཤར་ན་གནས་པའི་ཡུལ། །བཤང་ལམ་ནུབ་ཕྱོགས་
བཙུན་མོ་ཀྭ །དབོ་གཉིས་ལྷོ་བྱང་ཡུལ་དུ་ནི། དབྱངས་འཆར་རྒྱུད་ལས་ཡོངས་སུ་གྲགས། །བསོད་ནམས་སྡིག་ཅན་གང་སྦྱོར་བ། །དགེ་དང་མི་དགེ་ངེས་བར་མཐོང་། །དེ་ནས་སེ་བཱི་ཙ་ཀྲ་བཤད། །ལེགས་བར་ཉོན་ཅིག་ལྷ་ཆེན་མ། །འདི་ནི་རྣམ་པར་ཤེས་ཙམ་གྱིས། །དགོས་པ་
ཐམས་ཅད་འགྲུབ་འགྱུར་བའི། །རང་གི་སྐྱེ་བར་འཛིན་པ་ཡི། །སྐར་མ་དང་པོར་གཞག་པ་ལས། མགོ་བོར་འདུན་བཞག་མཛེས་དགའ་མ། །དེ་བཞིན་རྒྱབ་ཏུ་བདུན་ནས་བརྗོད། །སྙིང་གར་བདུན་ནི་གནས་པར་བསྟན། །རྐང་པར་བདུན་བཞག་དབང་ཕྱུགས་བདག །རང་གི་སྐར་མར་

གང་བརྗོད་པ། །མགོ་བོའི་དབུས་སོང་མཆོག་ཏུ་དགེ །མགོ་བོར་གནས་པས་དགའ་བསྐྱེད་ཅིང་། མཆོག་འགྱུར་ལེགས་སྟེར་རྗེས་འཛིན་འགྱུར། །རྒྱབ་ཀྱི་སྐར་མ་ལ་སོགས་ངན། །ཇི་བཞིན་པ་ཡི་བཅུ་ཆ་སྙེད། །གལ་ཏེ་སྙིང་གའི་སྐར་མར་སོང་། །བདག་པོའི་
དབང་སོང་ཅི་བགྱིད་བྱེད། །ཇི་སྙེད་རྐང་པའི་སྐར་མ་ལ། །ཞུ་བ་དོན་མེད་ཉོན་མོངས་འགྱུར། །མིག་གིས་མི་མཐོང་རེ་དྲག་འཆར། །བདེན་པར་ངེས་དྲན་རི་སྲས་མོ། །དེ་ལྟར་བརྒྱད་ཅུ་རྩ་གཅིག་པའི། །འཁོར་ལོ་ཞེས་གྲགས་བཞིན་བཟང་མ། །འདི་ནི་གཡུལ་ལས་རྣམ་པར་རྒྱལ་བ་གསང་
བའི་རྒྱུད་ཀྱི་རྒྱལ་པོ་ལས་རྐང་པ་བརྒྱ་ཅུ་རྩ་གཅིག་པའི་འཁོར་ལོ་སྦྱོར་བ་བསྟན་པ་ཆེན་པོ་སྟེ་ལེའུ་ལྔ་པའོ།། །།ལྷ་མོས་གསོལ་བ། ལྷ་ཡི་ལྷ་མཆོག་བཅོམ་ལྡན་འདས། །ཐམས་ཅད་མཁྱེན་པ་ལ་ཞུས་པ། །ལུས་ཅན་སྐྱེས་པའི་གནས་སྐབས་ལ། །དགེ་བ་མི་དགེ་ཇི་
ལྟར་གནས། །དུས་ཀྱི་འཁོར་ལོ་ཇི་ལྟ་བུ། །གནས་དང་འཆི་བའི་ཁྱད་པར་ལས། དགེ་དང་མི་དགེའི་རིམ་པ་བཞིན། །ལྷ་ཆེན་བདག་ལ་ཅིས་མ་གསུང་། །བཅོམ་ལྡན་འདས་ཀྱིས་བཀའ་སྩལ་བ། །མཆོག་ཏུ་གསང་བའི་མན་ངག་ལྷ། །དཀར་མོ་མྱུར་དུ་ཉན་པར་གྱིས། །ལུས་
ཅན་ཀུན་གྱི་སྲོག་ཤེས་པ། །དུས་ཀྱིས་འཁོར་ལོ་ཞེས་བྱ་བ། །མུ་ཁྱུད་བཞི་བ་ལྟེ་བ་ཅན། །རྩིབས་ནི་བཅུ་གཉིས་རེ་མིག་ནི། །སུམ་ཅུ་བདུན་ལྡན་འཁོར་ལོ་སྟེ། །རིམ་པ་གསུམ་དུ་བྲིས་ནས་ནི། །ཚེ་དང་སྲོག་རླུང་ཞག་གྲངས་དང་། །ལོ་ཟླ་ཉིན་ཞག་རིམ་བས་བྲི། །ཉི་ཁྱིམ་འཕོ་བ་
ཞེས་བྱ་བ། །གཡས་དང་གཡོན་པའི་ལམ་ལས་ནི། །རྒྱུ་བའི་མཚན་ཉིད་རིག་པར་བྱ། །འདི་ལ་དགེ་དང་མི་དགེ་བརྟག །ནག་པོའི་ཆེས་གཅིག་ནས་གཟུང་སྟེ། །ཉིན་ཞག་གསུམ་དུ་འཕག་གཅིག་ལ། །ཟླ་བའི་འགྲོད་པ་རྒྱུ་བ་སྟེ། །དེ་ནས་ཉིན་གསུམ་ཉི་བགྲོད་འགྱུར། །དེ་བཞིན་བཅོ་
ལྔའི་བར་དུ་ཡང་། །ཞག་ནི་གསུམ་གསུམ་ཤེས་པར་བྱ། །དཀར་བོའི་ཆོས་གཅིག་ནས་བརྩམས་ཏེ། །ཉིན་ཞག་གསུམ་དུ་སྔ་དྲོ་ནི། །ཉི་མའི་བགྲོད་བ་རྒྱུ་བ་སྟེ། །དེ་བཞིན་ཚེས་ནི་བཅོ་ལྔའི་བར། །དུས་སྦྱོར་གཅིག་ལ་རྒྱུ་བར་འགྱུར། །དུས་སྦྱོར་རེ་རར་རྒྱུ་བ་ལས། །ཕྱིན་ཅི་ལོག་ཏུ་ངེས་

པར་རྒྱུ། །རྩོད་བ་ལ་སོགས་ངེས་འགྱུར་པ། །ཉིན་ཞག་ལྔར་ནི་ལོག་པར་རྒྱུ། །རྩོད་པ་ལ་སོགས་འབྱུང་བར་འགྱུར། །ཟླ་བ་ཕྱེད་ཀྱིས་ནད་འབྱུང་ཞིང་། །ཟླ་བ་གཅིག་གིས་གཉེན་རྣམས་བརླག །ཟླ་ཕྱེད་གསུམ་གྱིས་འཆི་བར་འགྱུར། །དེ་ལྟར་ཤེས་བྱ་མཛེས་མ་ཀྱེ། །ཞག་གཅིག་
ནས་ནི་བཞི་བའི་བར། །བཅུ་ནས་བཞི་ཡི་བར་གྱི་ལོ། །ཞག་ལྔ་ནས་ནི་བརྩམས་ནས་ནི། །ཉི་ཤུ་རྩ་ལྔའི་མཐར་ཐུག་པ། །ལྔ་ལྔའི་ཞག་ནི་འཕེལ་བ་ཡིན། །ཉི་ཤུ་ལྔ་ནས་སུམ་ཅུ་གསུམ། །རེ་རེ་ཞག་ནི་འཕེལ་བ་ཡིན། །དེ་ལ་གསུམ་གཉིས་གཅིག་གི་ལོ། །དྲུག་གསུམ་གཉིས་
གཅིག་ཕྱེད་ཀྱི་ཟླ། །བཅོ་ལྔ་གསུམ་གཉིས་གཅིག་གི་ཞག །དེ་ལྟར་ལོ་ཟླ་ཞག་རྣམས་ཀྱིས། །ལུས་ཅན་རྣམས་ཀྱི་སྲོག་འདོར་བྱེད། །དེ་ལྟར་ཐེ་ཚོམ་མེད་མཚན་ཉིད། །མ་ལུས་པར་ནི་བཤད་པར་བྱ། །སྐར་མའི་མིང་ལ་ཟླ་བ་གནས། །བཅུ་བཞི་པ་ལ་ཉི་མ་སོང་། །འཇོམ་
པས་ལུས་ཅན་སྲོག་འདོར་འགྱུར། །ཐམས་ཅད་མཁྱེན་པས་གསང་སྟེ་བཤད། །དུས་འདི་ཤེས་པར་བྱ་བ་སྟེ། །སྔ་མའི་སྦྱོར་བ་འདི་རྫོགས་འགྱུར། །རང་གི་རླུང་དང་སྐར་ཁྱིམ་བརྟག །ལྟས་ཀྱི་འཁོར་ལོ་བརྟག་པར་བྱ། །ཇི་ལྟར་སངས་རྒྱས་བཅོམ་ལྡན་འདས། །གཡས་གཡོན་
རླུང་གི་བྱེ་བྲག་བལྟ། །འཕོ་བའི་དུས་ཚོད་བརྟག་བྱ་སྟེ། །བྱེ་བྲག་ཕྱེད་པས་སྨྲ་བར་བྱ། །ལམ་གསུམ་ལས་རྒྱུ་བྱེ་བྲག་ནི། །དབུས་རྒྱུ་ཉིན་ཕྱེད་འཆི་བ་སྟེ། །གཡོན་ནས་རྒྱུ་ན་ནུབ་མོ་འཆི། །གཡས་རྒྱུ་ཉིན་མོ་འཆི་བར་སྟོན། །འདི་ནི་རྩེ་གཅིག་ཡིད་གནས་བ། །མཉམ་པར་གཞག་པས་
ཤེས་བར་འགྱུར། །ཚེ་ཡི་མཚན་ཉིད་ཇི་ཙམ་ཞེས། །རླུང་གི་དབུགས་ལ་མ་གཡེངས་བལྟ། །ཇི་ལྟར་རླུང་ནི་ལམ་གཅིག་ལས། །ཞག་ལྔར་རྒྱུས་ན་རི་སྲས་མོ། །ལོ་གསུམ་གྱི་ནི་རིམ་པ་ཡིས། །མི་རྣམས་སྲོག་ནི་ཟད་པར་འགྱུར། །གལ་ཏེ་ཉིན་ཞག་བཅུ་རྒྱུས་ན། །ལོ་གཉིས་ལུས་
ཅན་སྲོག་འདོར་འགྱུར། །བཅོ་ལྔའི་ཉིན་ཞག་རྒྱུས་པ་ན། །ལོ་གཅིག་ལ་ནི་ངེས་པར་འཆི། །གལ་ཏེ་ཉིན་ཞག་ཉི་ཤུ་རྒྱུ། །མི་རྣམས་ཟླ་བ་དྲུག་གནས་འཆི། །ཉི་ཤུ་རྩ་ལྔར་རྒྱུ་བྱེད་ན། །ཟླ་བ་གསུམ་གྱིས་འཆི་བར་འགྱུར། །ཉིན་ཞག་ཉི་ཤུ་རྩ་དྲུག་གིས། །སྲོག་ནི་ཟླ་བ་གཉིས་ན་

འདོར། །ཉིན་ཞག་ཉི་ཤུ་རྩ་བདུན་གྱིས། །ཟླ་བ་གཅིག་ན་གཤིན་རྗེའི་གནས། །གལ་ཏེ་ཉིན་ཞག་ཉི་ཤུ་བརྒྱད། །ཟླ་བ་ཕྱེད་ན་ལྷོ་ཕྱོགས་སོང་། །ཉིན་ཞག་ཉི་ཤུ་རྩ་དགུ་རྒྱུས། །ཉིན་ཞག་བཅུ་ན་ངེས་པར་འཆི། །སུམ་ཅུ་རྒྱུས་ན་ཞག་ལྔ་ན། །སུམ་ཅུ་གཅིག་
གིས་ཞག་གསུམ་ན། །སུམ་ཅུ་གཉིས་ཀྱིས་ཞག་གཉིས་ན། །ཉིན་ཞག་སུམ་ཅུ་སོ་གསུམ་གྱིས། །ལུས་ཅན་རྣམས་ཀྱི་ལམ་པོ་ཆེར། །ཞག་གཅིག་གིས་ནི་སྲོག་འདོར་དྲན། །ཉི་ཕྱེད་ནས་ནི་ཉེར་ལྔའི་བར། །ལྷ་ཡིས་ཤེས་ཀྱིས་གཞན་གྱིས་མིན། །ཇི་སྲིད་མ་ཤིའི་བར་དུ་ནི། །བློ་ལྡན་
མཁས་པས་ཤེས་པར་བྱ། །དང་པོར་དེ་ལྟར་ཤེས་བྱས་ལ། །འདྲི་བ་རྣམས་ལ་ལན་གདབ་བྱ། །ལུས་ཅན་རྣམས་ཀྱི་འཆི་བའི་དུས། །ལེགས་པར་བརྟགས་ན་དེ་ལྟར་མཐོང་། །བརྟག་ཏུ་དེ་ལྟར་བརྟག་བྱ་སྟེ། །ཇི་བཞིན་མཁས་ལ་དྲི་བར་བྱ། །མཆུ་ཡི་ཟླ་བ་ཤར་དུས་སུ། །ཆུ་སྲིན་འཕྲོ་
བར་ཡོངས་སུ་གྲགས། །དེ་ཚེ་ཐོ་རངས་མལ་ནས་ལངས། །ཉི་མ་ཤར་བ་ལྟ་བར་བྱ། །དགུན་ཟླ་ཐ་ཆུངས་ཞེས་བྱ་བ། །ཆུ་སྲིན་འཕོ་བའི་སྦྱོར་བར་གྲགས། །དེ་ནས་གཞན་ཡང་བཤད་པར་བྱ། །ཚེ་ཡི་གནས་སྐབས་འབྲས་བུ་ལ། །དགེ་དང་མི་དགེའི་སྦྱོར་བ་རྣམས། །གཙོ་
མོ་གཞན་ལ་ངས་མ་བཤད། །ཉི་ཟླ་མིག་དམར་སྒྲ་གཅན་དང་། །ཕུར་བུ་སྤེན་པ་གཟའ་ལྷག་དང་། །དུ་མཇུག་པ་སངས་ཞེས་བྱ་བ། །གཟའ་རྣམས་དགུ་རུ་ཡོངས་སུ་གྲགས། །ལུས་ཅན་ཚེ་ཡི་གནས་སྐབས་ལ། །ཀུན་དུ་དབང་བྱེད་འདི་རྣམས་ཡིན། །ཡོངས་སུ་རྫོགས་དང་དབུ་
མ་དང་། །འབྲིང་དང་ཐ་མར་ཤེས་པར་བྱ། །ཉི་མའི་ལོ་དྲུག་ཤེས་བྱ་སྟེ། །ཟླ་བ་ལོ་བཅུ་མཛེས་དགའ་མ། །མིག་དམར་ཞེས་བྱ་ལོ་བདུན་ཡིན། །སྒྲ་གཅན་ལ་ནི་བཅོ་བརྒྱད་དྲན། །བླ་མའི་བཅུ་དྲུག་སྤེན་པ་ནི། །ཉི་ཤུར་གཅིག་གིས་མ་ཚད་པའི། །གཟའ་ལྷག་ལོ་ནི་བཅུ་བདུན་
གྲགས། །དུ་བ་མཇུག་རིངས་ལོ་བདུན་དྲན། །པ་སངས་མཉམ་པར་ཉི་ཤུ་སྟེ། །དགེ་དང་མི་དགེའི་རིམ་བས་སྤྱོད། །བསྡུས་བས་བརྒྱུད་དེ་ཉི་ཤུ་སྟེ། །ལུས་ཅན་མཆོག་གི་ཚེ་རབས་གྲགས། །རྒྱུ་སྐར་སྨིན་དྲུག་ལ་སོགས་པ། །ལན་གསུམ་བསྐོར་བས་ཉི་ཤུ་བདུན། །རེ་མིག་ཐད་དང་

རིམ་པ་ལྔ། །སྡེ་ཚན་དགུ་དགུར་གནས་པ་ལ། །ཉི་མ་ནས་བརྩམས་པ་སངས་མཐར། །དགུ་པོ་རེ་མིག་རྣམས་ལ་གྲགས། །གནས་སྐབས་འབྲས་བུ་རིམ་པ་བཞིན། །འདི་འདྲའི་བསྟན་བཅོས་ལྷ་ཡིས་བཤད། །ཚེས་དང་མཁའ་མེ་བཞི་བཅུ་ལྔ། །དྲུག་ཅུའི་དུས་ཀྱི་ཆུ་ཚོད་རྣམས། །
དང་པོ་གཉིས་གསུམ་བཞི་བ་སྟེ། །ཆའམ་སྐལ་བར་གྲགས་པ་ཡིན། །ཆ་ཤས་དང་པོར་སྐྱེས་པ་རྣམས། །མཆོག་གི་ཚེ་ཞེས་ཡོངས་སུ་གྲགས། །ཆ་ཤས་གཉིས་བར་སྐྱེས་པ་རྣམས། །ཚེ་ལོ་བརྒྱ་རུ་གྲགས་པ་ཡིན། །གསུམ་པས་བརྒྱད་བཅུར་ཤེས་བྱ་སྟེ། །བཞི་བ་དྲུག་ཅུར་ཤེས་བར་བྱ། །
བསྡོམས་པས་བརྒྱ་དང་ཉི་ཤུ་སྟེ། །གནས་སྐབས་ཚེ་ཚད་དེ་ལ་ལྟོས། །རང་གི་སྐྱེས་བའི་ཆུ་ཚོད་ལ། །ཉི་ཤུ་ལྷག་པའི་བརྒྱ་ཡིས་བསྒྱུར། །དེ་ལ་དགུ་བཅུས་བགོས་ཐོབ་པ། །ཚེ་ཚད་རྣམས་ལ་རིམ་བཞིན་དབྲི། །ལྷག་མ་ལུས་ཅན་ཚེ་ཚད་དེ། །འཆི་སླུས་པ་ན་སྣོན་པར་བཤད། །ཆ་ཤས་
དང་པོས་མཆོག་ལ་དབྲི། །གཉིས་པས་བརྒྱ་ལ་དབྲི་བར་བྱ། །གསུམ་པས་བརྒྱད་ཅུ་ལ་དབྲིའོ། །ཆ་ཤས་བཞི་པ་དྲུག་ཅུར་དབྲི། །སླུས་ན་དང་པོར་སྣོན་པ་མེད། །ཆ་ཤས་གཉིས་པར་ལྔ་སྟེར་ཏེ། །ཆ་ཤས་གསུམ་པར་བཅུ་སྦྱིན་བྱ། །ཆ་ཤས་བཞི་བས་བཅོ་ལྔར་བསྣན། །ཉི་ཟླ་
མིག་དམར་ལ་སོགས་པའི། །སོ་སོར་ལོ་རྣམས་ཞག་ཏུ་བསྒྱུར། །དེ་ལ་རང་རང་ལོ་ཡིས་བསྒྱུར། །དེ་ལ་མཁའ་དང་ཉི་མས་བགོ །རྙེད་པ་སུམ་ཅུས་བགོས་ཐོབ་པ། །ཟླ་བར་འགྱུར་རོ་ལྷག་མ་ཞག །ཡང་ན་སོ་སོའི་ལོ་རྣམས་ཀུན། །མཁའ་དུས་མེ་ཡིས་བསྒྱུར་བར་བྱ། །དེ་
ལ་མཁའ་དང་ཉི་མས་བགོ །རྙེད་པ་རྣམས་ན་བརྟན་པ་ཡིན། །ལྷག་མ་དྲུག་ཅུས་བསྒྱུར་ཐོབ་པ། །ཆུ་ཚོད་རྣམས་སུ་ཤེས་པར་བྱ། །གཟའ་དགུར་རང་རང་བསྟན་པ་ལ། །རང་རང་ལོ་ཡིས་བསྒྱུར་བར་བྱ། །མཁའ་དུས་མེས་བགོས་ཐོབ་པ་ལོ། །གལ་ཏེ་རྙེད་པར་མ་གྱུར་ན། །སུམ་
ཅུས་བགོས་ལ་ཟླ་བ་བྱ། །དེ་ཡི་ལྷག་མ་ཞག་ཏུ་འགྱུར། །དེ་ལྟར་མཆོག་གི་ཚེ་ལ་ནི། །ལུས་ཅན་རྣམས་ལ་ཡོངས་སུ་གྲགས། །འདྲི་བྱེད་སྐྱེས་པའི་སྐར་མ་ཡི། །བདག་པོ་གང་ཡིན་དེ་ཡི་ལོ། །མཆོག་ནས་ཆ་ཤས་བཞི་བའི་བར། །ལྷག་མ་ལུས་ཅན་ཚེ་ཚད་ཡིན། །འདྲི་བར་

བྱེད་པའི་ཚེ་ཚད་གང་། །ཐོག་མར་རང་གི་ལོ་ཡིས་བསྒྱུར། །མཁའ་དང་ཉི་མས་ཐོབ་པ་ལ། །ལྷག་མ་ཡོད་ན་གསུམ་གྱིས་བསྒྱུར། །སུམ་ཅུས་བགོས་ལ་ཟླ་བ་བྱ། །ལྷག་མ་དག་ནི་ཞག་ཏུ་འགྱུར། །དེ་འོག་རིམ་པ་ཇི་བཞིན་དུ། །དགུ་ཡི་མཐར་ཐུག་
བལྟ་བར་བྱ། །ཆ་ཤས་བཞི་ཡི་གནས་སྐབས་ཀུན། །བློ་ལྡན་བྱེ་བྲག་ཤེས་བྱ་སྟེ། །ལོ་ཟླ་ཞག་དང་དབྱུ་གུ་དང་། །ཆུ་སྲང་དབུགས་ཀུན་ཕྲ་བར་བྱེད། །ལུས་ཅན་ཚེ་ཡི་གནས་སྐབས་ལ། །དགེ་བ་དང་ནི་མི་དགེ་བའི། །ལོ་ཟླ་ཞག་གི་གནས་སྐབས་རྣམས། །ལེགས་པར་བརྟགས་
ཏེ་སྨྲ་བར་གྱིས། །ཉི་ཤུ་རྩ་བདུན་རེ་མིག་ལས། །ལོ་བདག་གང་ཡིན་ཤེས་བྱ་སྟེ། །རང་གི་སྐྱེས་བའི་སྐར་མ་ནི། །བགྲངས་ལ་གང་ཡིན་ཤེས་པར་བྱ། །གྲོ་བཞིན་དབུས་སུ་སོང་བ་ནི། །མིང་གི་སྐར་མ་ཞེས་བྱ་བ། །དེ་ཡི་མཚམས་སུ་འཆི་བ་སྟེ། །སྡིག་པའི་གནས་སྐབས་ཐོབ་པར་
བྱེད། །སྟོབས་ལྡན་འཆི་བར་འགྱུར་བ་སྟེ། །སྟོབས་ཆུང་ལོངས་སྤྱོད་རླག་བར་བྱེད། །སྟོབས་མཉམ་ནད་ནི་འབྱུང་བར་ཡང་། །བྱེད་དོ་མཆོག་གི་གཟུགས་ཅན་མ། །ལྷ་མཆོད་སྦྱིན་དང་ཆོ་གའི་ལས། །དགེ་བའི་བཤེས་དང་འགྲོགས་ཤིང་ཞུ། །དགེ་སྦྱོང་བྲམ་ཟེ་བསྙེན་བཀུར་སོགས། །
དུས་མིན་འཆི་བ་འཇོམས་པར་བྱེད། །རྒྱུ་སྐར་འོག་ན་གནས་པའི་གཟའ། །ཚེ་ཡི་གནས་སྐབས་འབྲས་བུ་སྟོན། །དེ་ཉིད་རིམ་པས་ལུས་ཅན་ཚེ། །གནས་སྐབས་འབྲས་བུ་ཐམས་ཅད་ཤེས། །ཉི་མ་རྒྱལ་པོས་རྙེད་པར་འབྱུང་། །མཁྲིས་པའི་ནད་རྣམས་འབྱུང་བ་དང་། །གཉེན་གྲོགས་
རྣམས་དང་འབྲལ་བ་དང་། །ནོར་ཟད་པ་དང་ཉེ་བ་འབྱུང་། །ཟླ་བའི་ལོ་བཅུར་གཉེར་ཆེ་ཞིང་། །བུད་མེད་རྣམས་ནི་མཉམ་པར་རྙེད། །གོས་དང་རྒྱན་ལ་སོགས་པ་རྙེད། །རང་ཕྱོགས་དགྲར་འགྱུར་བུ་མོ་སྐྱེ། །མིག་དམར་ལོ་བདུན་དགྲ་རྣམས་འབྱུང་། །གཉེན་བཤེས་རྣམས་
དང་འཐབ་རྩོད་འབྱུང་། །ཁྲག་དང་མཁྲིས་པའི་ནད་འབྱུང་ཞིང་། །གཞན་གྱི་བུད་མེད་རྣམས་དང་འགྲོགས། །ལྷ་མིན་དབང་པོའི་བཅོ་བརྒྱད་ལ། །ནོར་ཟད་ལྩེ་ཟུག་ཆུང་མ་འཆི། །གཉེན་བརླག་དོན་ཉམས་སེམས་ནད་འབྱུང་། །གཞན་དུ་འགྲོ་དགོས་བརྙས་པར་འགྱུར། །

ཕུར་བུའི་བཅུ་དྲུག་གྲགས་པ་ལ། །གཞན་གྱིས་ཁུར་ཞིང་བུ་ཐོབ་འགྱུར། །ནོར་དང་ཆོས་དང་གོས་འཕེལ་ཞིང་། །སྦྱིན་སྲེག་སེམས་དང་རིག་པ་འཕེལ། །སྤེན་པའི་བཅུ་དགུར་ལུས་ནད་འབྱུང་། །ཆུང་མ་བུ་དང་འཐབ་རྩོད་ཅིང་། །བློ་དམན་རྨུགས་ཤིང་ལེ་ལོ་ཆེ། །བྱེས་སུ་
འཁྱམས་ཤིང་ཡུལ་ན་བསྐོར། །གཟའ་ལྷག་ལོ་ནི་བཅུ་བདུན་ལ། །གཉེན་གྲོགས་དང་མཐུན་ཆོས་དང་སྦྱར། །ཤེས་རབ་འཕེལ་ཞིང་ལུས་ནད་སྦྱོར། །རླུང་ནད་ཆམ་པ་ཁྲག་ནད་འབྱུང་། །ཀེ་ཏུའི་བདུན་ལ་བུ་བརླག་ཅིང་། །ནོར་ཟད་སྤུན་ཟླ་སྲིང་མོ་འཆི། །དགྲ་དང་ཕྲད་ཅིང་
རྒྱལ་བོས་འཇོམས། །བུད་མེད་མ་རུངས་རྣམས་དང་རྩོད། །པ་སངས་ཉི་ཤུ་ལོ་རྣམས་ལ། །བུད་མེད་རྙེད་ཅིང་ཆོས་ཀྱང་རྙེད། །དོན་དང་ལས་འགྲུབ་དགེ་བ་འཕེལ། །ནོར་ཐོབ་གྲགས་པ་འཕེལ་བར་འགྱུར། །དེ་ལྟར་ཚེ་ཡི་གནས་སྐབས་སུ། །དགེ་དང་མི་དགེ་རྣམ་པར་སྤྱོད། །
སྐྱེས་བའི་བྱེ་བྲག་མ་ལུས་པ། །ལྷ་མོ་བདག་གིས་ངེས་པར་བསྟན། །དེ་ནས་གཞན་ཡང་སྐྱེས་པ་ཡི། །འཁོར་ལོ་ཟབ་མོ་ལྷ་མོ་ཉོན། །བསྟན་བཅོས་འདིར་ནི་མ་གསུངས་ཀྱང་། །ཐུབ་པ་ཆེན་པོས་རྣམ་པར་བཤད། །ཉི་མས་འཁྱུད་པའི་སྐར་མ་དེ། །སྤྱི་བོའི་སྟེང་དུ་བྲི་བར་བྱ། །དེ་
བཞིན་ཁ་ལ་གསུམ་ཡིན་ཏེ། །དཔུང་མགོར་གཉིས་ཏེ་མཁྲིག་མར་གཉིས། །ལག་པ་ལ་གཉིས་སྙིང་གར་ལྔ། །སྐར་མ་གཅིག་ནི་ལྟེ་བ་ལ། །གསང་བར་སྐར་མ་གཅིག་ཡིན་ཏེ། །པུས་མོ་ལ་ནི་སྐར་མ་གཉིས། །རྐང་པར་བརྒྱད་དགོད་སྐྱེ་བ་བརྟག །རྐང་པ་ལས་སྐྱེས་ཚེ་ཐུང་འགྱུར། །
བུས་མོ་ལས་སྐྱེས་བྱེས་འཁྱམས་ཤིང་། །གསང་བ་ལས་སྐྱེས་འཁྲིག་པས་བརླག ལྟེ་བ་ལས་སྐྱེས་དབུལ་པོར་འགྱུར། །སྙིང་ག་ལས་སྐྱེས་ལོགས་སྤྱོད་ལྡན། །ལག་པ་ལས་སྐྱེས་རྐུན་མོར་འགྱུར། །མཁྲིག་མར་སྐྱེས་བ་སྡུག་བསྔལ་ཅན། །དཔུང་པ་ལས་སྐྱེས་ཁུར་པོ་པ། །
ཁ་ལས་སྐྱེས་པ་ཆོས་དང་ལྡན། །སྤྱི་བོའི་སྐར་མ་ལས་སྐྱེས་པ། །རྒྱལ་པོར་འགྱུར་བར་ཐེ་ཚོམ་མེད། །དེ་ལྟར་དགེ་དང་མི་དགེ་བ། །སྐྱེས་མ་ཐག་ཏུ་མཁས་པས་བརྟག །དུས་ཀྱི་འཁོར་ལོའི་སྦྱོར་བ་ལས། །ཤེས་པར་འགྱུར་རོ་དབང་མོ་ཆེ། །འདི་ནི་གཡུལ་ལས་རྣམ་པར་

རྒྱལ་བ་དབྱངས་འཆར་བའི་རྒྱུད་ཀྱི་རྒྱལ་བོ་ལས་སྐྱེས་པའི་སྐབས་བསྟན་པ་ཆེན་པོ་སྟེ་ལེའུ་དྲུག་པའོ།། །།བཅོམ་ལྡན་འདུས་ཀྱིས་བཀའ་སྩལ་པ། །དེ་ནས་གཞན་ཡང་བཤད་པར་བྱ། །ཇི་ལྟར་ལམ་གྱི་འཁོར་ལོ་མཆོག །ལམ་བུ་ཞུགས་
བའི་མི་རྣམས་ལ། །ཕན་གནོད་འབྲས་བུ་མཐོང་བར་འགྱུར། །རྩ་གསུམ་འཁོར་ལོ་རྣལ་འབྱོར་པ། །ཐ་སྐར་ལ་སོགས་རིམ་བཞིན་བྲི། །རྒྱུ་སྐར་རིམ་བཞིན་རྩ་གསུམ་ཁྲིད། །ནམ་གྲུའི་མཐའ་ཐུག་མཛེས་མ་ཉོན། །ཐ་སྐར་དང་ནི་ལག་དང་ཡང་། །ནབ་སོ་དང་ནི་དེ་བཞིན་དབོ། །
མེ་བཞི་སྣྲོན་དང་བཅས་པ་དང་། །སྣྲུབས་དང་མོན་གྲུ་ཁྲུམས་སྟོད་རྣམས། །དང་པོའི་རྩ་ལ་རིམ་བཞིན་བྲི། །པྲ་ཉེ་དང་ནི་དེ་བཞིན་མགོ །རྒྱལ་དང་གྲེ་ཞེས་བྱ་བ་དང་། །ནག་པ་དེ་བཞིན་ལྟ་མཚམས་དང་། །ཆུ་སྟོད་མོན་གྲུ་ཁྲུམས་སྨད་རྣམས། །བློ་ལྡན་མཆོག་གི་གཟུགས་ཅན་མ། །
གཉིས་པའི་རྩ་ཞེས་ཡོངས་སུ་གྲགས། །སྨིན་དྲུག་ནས་ནི་སྣར་མ་དང་། །སྐག་དང་མཆུ་དང་ས་རི་དང་། །ས་ག་ཆུ་སྨད་གྲོ་བཞིན་དང་། །ནམ་གྲུ་ལྷ་མོ་རྩ་གསུམ་དྲན། །དེ་རྣམས་གཟའ་དང་ཡང་དག་སྦྱོར། །བསོད་ནམས་སྡིག་ཅན་གཟའ་རྣམས་བརྟག །ལམ་འཇུག་ཏཏྒཱལ་
རྒྱུ་སྐར་གྱི། །རྩ་རྒྱུད་ལ་གནས་གཟའ་ཡི་ལས། །མདའ་འཕེན་དྲུག་ཅུས་རྐང་པ་གཅིག །རྐང་པ་བཞི་ལ་དཔག་ཚད་ཡིན། །འགྲོ་སར་དཔག་ཚད་ཇི་སྙེད་པ། །རྩ་རྒྱུད་ལ་གནས་གཟའ་ཡིས་བསྒྱུར། དེ་ལ་ཉི་ཤུ་བདུན་བགོས་ཐོབ། །དྲོ་ལམ་དུ་འགྱུར་ལྷག་མ་ལ། བཞིས་
བསྒྱུར་ཐོབ་པ་རྐང་པ་སྟེ། །ལྷག་མ་མཁའ་དུས་བསྒྱུར་ལས་ཐོབ། མདའ་འཕེན་ཞེས་བྱ་དེ་རྣམས་སུ། །དགེ་དང་མི་དགེའི་འབྲས་བུ་འབྱུང་། །སྡིག་ཅན་རྣམས་ཀྱིས་མི་དགེ་བྱེད། །བསོད་ནམས་གཟའ་རྣམས་བདེ་བ་བྱེད། །ཉི་མས་འཇིགས་ཀྱང་སྐྱོན་མེད་འགྱུར། །རཱ་ཧུ་ལམ་
མེད་མི་དགེ་བྱེད། །སྤེན་པས་རྩོད་དང་འཆིང་བར་བྱེད། །མིག་དམར་འཆི་བསམ་གཞན་གྱིས་གསོད། །ཟླ་བས་བུད་མེད་མཉམ་པར་མཐུན། །གཟའ་ལྷག་རེག་བྱེད་རྣམས་དང་ཕྲད། །ཕུར་པས་ཆོས་དང་སྦྱོར་བར་བྱེད། །པ་སངས་བདག་པོས་མཆོད་པར་འགྱུར། །ཀ་ཏུས་

ཅུང་ཟད་མི་དགེ་བྱེད། །མདའ་འཕེན་རྐང་པ་དྲོ་ལམ་རྣམས། །གཟའ་ཡིས་བསྒྱུར་ལ་འཁོར་ལོ་ཡིས། །ཐོབ་བའི་གྲངས་ཀྱིས་ལམ་རྣམས་སུ། །དགེ་དང་མི་དགེ་བྱེད་པར་འགྱུར། །ལམ་གྱི་འཁོར་ལོར་འདྲི་བྱེད་གང་། །ལམ་ཞུགས་རྣམས་ལ་ཕན་བྱེད་ཡིན། །དཀར་
པོའི་འཁོར་ལོ་བཤད་པར་བྱ། །མཛེས་གཟུགས་ཐལ་སྦྱོར་འདྲི་བར་བྱ། །སྦྱི་བོའི་མིག་དང་ཁ་མགྲིན་པ། །ལག་གཉིས་ཐལ་མོ་དེ་བཞིན་རྐང་། །གསང་བ་དེ་བཞིན་སྙིང་གར་ནི། །དཀར་པོས་འཁྱུད་བརྩམས་གསུམ་གསུམ་དགོད། །སྤྱི་བོའི་དུས་ལ་གང་དབང་འདོད། །བྲམ་
ཟེ་བུད་མེད་བློན་པོ་རྣམས། །བྲམ་ཟེ་རིག་བྱེད་ཆོས་ཀྱིས་བཀུར། །བུད་མེད་བསྟན་ནས་ཆུང་མར་བྱེད། །བློན་བོས་ནོར་སྟེར་ཕུན་སུམ་ཚོགས། །མིག་གིས་བྲན་དང་བུད་མེད་འདུལ། །རང་ལ་དགུག་ཅིང་ཉེ་བ་དང་། །ཆུང་མ་ནོར་དང་བཀྲ་ཤིས་བྱེད། །ཁ་ལ་རྒྱལ་རིགས་མ་ནིང་
གིས། །མགོ་སྐོར་བྱེད་དང་སྨྲ་དགོས་དང་། །ལུས་ལ་ཚད་པ་འབབ་པ་ཡིན། །མགྲིན་པར་རྗེའུ་རྒྱལ་རྣམས་དང་། །བུད་མེད་ལ་སྨྲས་ནོར་རྣམས་དང་། །བུད་མེད་ཐམས་ཅད་འདུལ་བ་ཡིན། །ལག་གཉིས་སྐར་མར་ངག་སྨྲས་པ། །རྒྱལ་དང་དམག་དཔོན་སྐྱེས་པ་ལ། །རང་ལ་
ལྟས་ངན་འབབ་པ་དང་། །ཡུལ་དང་ནོར་དང་སྐྱེ་བོ་སྡད། །ཐལ་མོ་ལ་ནི་གང་དབང་བ། །ཕལ་བ་དང་ནི་མ་ནིང་ལ། །ལྷ་དང་བླ་མ་མཆོད་བྱེད་ཅིང་། །ཆོས་དང་སྦྱིན་དང་རྒྱལ་རྣམས་འགྲུབ། །རྐང་བའི་བདག་པོ་བྲམ་ཟེ་བློན། །སྐྱེས་བ་རྣམས་ལ་རིམ་པ་བཞིན། །ནོར་ཟད་ཆུང་མ་
སྤངས་པ་དང་། །དགྲ་ཡི་དབང་དུ་སོང་བས་འཇིག །གསང་བའི་དུས་ལ་རྣལ་འབྱོར་པས། །དབང་བྱ་བྲན་དང་བུད་མེད་དང་། །ཡོན་ཏན་ཅན་འཁོར་ཆུང་མས་འབོར། །སྙིང་གའི་དུས་ལ་དབང་བྱ་ནི། །བྲམ་ཟེ་དག་དང་མ་ནིང་ལ། །དབང་དུ་བྱེད་ན་གཉེན་གྲོགས་སྤོང་། །ནོར་དང་
བྲམ་ཟེ་བུད་མེད་རྙེད། །དགུ་ཆའི་དུམ་བུའི་མཚན་ཉིད་དེ། །ཇི་སྲིད་ན་འཐོབ་ཡུན་ཚོད་ནི། །ཁ་ན་ཆུ་ཚོད་ཡུན་ཡིན་ཏེ། །ལག་པ་ཞག་ཏུ་འཇོག་པར་བྱ། །གཞན་རྣམས་ཟླ་བ་མིག་ལ་ལོ། །དེ་ཡི་ངེས་པ་སྔར་འདས་ཀྱི། །དྲུག་པར་ལྷག་མ་གང་ཡིན་པ། །སྤྱི་བོའི་ཕྱེད་བརྩི་མིག་

ལ་གཅིག །མགྲིན་ལག་དྲང་པོ་སྙིང་ག་ཕྱེད། །ཐལ་མོ་གཉིས་ཡིན་ཁ་ལ་དྲུག །རྐང་པ་དགུ་ཡིན་གསང་གནས་དྲུག །ཉིན་ཞག་དཀྱིལ་འཁོར་མཉམ་དུས་ན། །ཇི་སྲིད་བཞིན་ལ་མ་འཕོས་པར། །དེ་ཡི་འབྲས་བུ་མཉམ་པར་མཐོང་། །དཀར་བོའི་
འཁོར་ལོ་བསྟན་ནས་ཀྱང་། །དེ་ནས་གཞན་ཡང་བཤད་པར་བྱ། །རི་དྭགས་པ་ཡི་འཁོར་ལོ་མཆོག །ཟླ་བ་དང་ནི་རི་དྭགས་པའི། །དབུས་སུ་སྡིག་པའི་གཟའ་རྣམས་ཀྱིས། །འཁྱུད་བའི་གྲངས་དང་མཉམ་པ་ནི། །སྲོག་ཆགས་རྣམས་ནི་གསོད་པར་བཤད། །སྡིག་པས་འཁྱུད་
པའི་ཁ་དོག་བཞིན། །རྔོན་པས་ལས་ནི་བཤད་པར་བྱ། །གསུམ་ནི་ཆ་ཤས་ཁྱིམ་ལ་གནས། །དགུ་ཆ་ལ་གནས་ཉེས་འགྱུར་གནས། །འཁྱོག་པོ་མཐོན་པོ་ལ་གནས་གཟའ། །གསུམ་གྱིས་བསྒྱུར་བའི་གྲངས་བཞིན་བསྟན། །འདི་ཡི་འགྱུར་གྱིས་ཐམས་ཅད་ལ། །བྱེད་དོ་དཔའ་བོས་ཕྱག་
བྱས་མ། །གཟའ་སྐར་སྦྱོར་བ་དེ་དག་གི །རྨ་རྣམས་འབྱུང་བར་བརྗོད་པར་བྱ། །སྟོད་དང་སྨད་དང་ལོགས་དང་རྒྱབ། །ལོངས་སྦྱོད་ཆ་ཡིས་དེ་བཞིན་ནོ། །ལྷ་མོ་འདི་འདྲའི་འཁོར་ལོ་ནི། །བདེན་ཕྱིར་ངོན་སུམ་བྱེད་པ་ཡིན། །ཡང་ན་རབ་ཏུ་བྱེད་པ་གཞན། །བཤད་དོ་ཚོགས་ཀྱི་
བདག་མོ་ཀྱེ། །གཟའ་ཡི་གྲངས་ནི་ཚེས་ཀྱིས་བསྒྱུར། །གཟུགས་ཀྱིས་དམན་བྱས་རང་གིས་བསྒྱུར། །ཕྱེད་དམན་བདུན་དང་མིག་གིས་བགོ །ལྷག་མ་ཆ་ཤས་གང་ཡོད་པའོ། །དེ་ལྟར་སྲོག་ཆགས་ཇི་ཙམ་པ། །རྒྱལ་བོ་སོགས་ཀྱིས་འཆིང་པར་བྱེད། །ཕྱེ་བའི་ལྷག་མ་གཅིག་གིས་
ནི། །བྲོས་པ་ཉིད་དུ་བསྟན་པ་ཡིན། །ཁྱིམ་དང་སྐར་མ་ཇི་བཞིན་དུ། །བློ་ལྡན་མཚན་ཉིད་ཤེས་བར་བྱ། །དེ་ནས་རབ་ཏུ་བཤད་པ་གཞན། །ཇི་ལྟར་བཤད་དོ་བཞིན་བཟང་མ། །ཚེས་ནི་གཟའ་དང་ལྷན་ཅིག་པ། །གཟུགས་ཀྱིས་དམན་བྱས་རང་གིས་བསྒྱུར། །ཕྱེད་དང་འདོད་པའི་ཆུ་ཚོད་
ཀྱིས། །བགོས་བའི་ལྷག་མ་གང་ཡོད་པ། །སྲོག་ཆགས་དེ་ཡིན་མཁས་པ་ཡིས། །རྒྱལ་པོ་བདག་ལ་བརྗོད་བར་བྱ། །སྔོན་ལས་མ་དག་ཉིན་ཞག་ལ། །དགེ་དང་མི་དགེ་མང་པོར་འགྱུར། །མི་མཐུན་ཕྱོགས་ལ་སྡུག་བསྔལ་འབྱུང་། །ངེས་འབྱིན་ཡན་ལག་རྨ་རྣམས་འབྱུང་། །སོ་སོར་

ཕྱིན་ན་གཡང་ལ་ལྷུང་། །སྐྱེས་བའི་མཚམས་ཀྱིས་རང་ནོར་ཉམས། །ལྷག་མ་རྣམས་ཀྱི་འབྲས་བུ་ནི། །ཚོགས་ཀྱི་བདག་པོས་དགེ་བར་བརྗོད། །ཉི་ཟླ་མིག་དམར་གཟའ་ལྷག་ཕུར། །པ་སངས་སྤེན་པ་རཱ་ཧུ་དང་། །ཀེ་ཏུའི་གྲངས་ཀྱིས་རིམ་པ་བཞིན། །དྲོ་ལམ་ལ་སོགས་བསྒྱུར་
བར་བྱ། །རྔོན་པའི་འཁོར་ལོ་བསྟན་ནས་ཀྱང་། །རྒྱན་གྱི་འཁོར་ལོ་བཙུན་མོ་ཉོན། །རྒྱན་གྱི་འཁོར་ལོ་འདི་ཡི་ལས། །གཡུལ་ཤོམ་ཤགས་འགྱེད་འཐབ་རྩོད་ལའོ། །ཞེང་དུ་རཱེ་ཁ་བཅུ་གཉིས་ཏེ། །དེ་བཞིན་ཆུ་རུ་དྲུག་པ་བྲི། །ཡིད་དང་རྒྱུ་སྐར་མིག་ཉི་མ། །ཚེས་དང་དྲུག་དང་རྒྱ་
མཚོ་མེ། །དེ་བཞིན་བཅུ་བདུན་བརྒྱད་དང་དྲུག །རེ་མིག་རྣམས་ལ་རིམ་བཞིན་བྲི། །དེ་འོག་ཨཱ་ལི་ཀཱ་ལི་ཡང་། །རིམ་པས་མཉམ་པར་བྲི་བར་བྱ། །རྀ་རཱྀ་ལྀ་ལཱྀ་ཨ་རྣམས་སྤང་། །ཀྵ་ནི་རྣམ་པར་སྤངས་པ་ཡིན། །འདི་ཡི་རེ་མིག་ཡང་དག་པ། །ལྔ་བཅུ་རྩ་ལྔར་ཡོངས་སུ་གྲགས། །དེ་
ནས་མིང་གི་ཡི་གེ་གྲངས། །དབྱངས་དང་གསལ་བྱེད་ཇི་སྙེད་པ། །ལེགས་པར་བལྟས་ལ་རང་རང་གི །སྟེང་གི་གྲངས་ཀྱིས་བསྒྱུར་བར་བྱ། །ནོར་གྱིས་བགོས་ཏེ་ཁྱེར་བ་ཡི། །ལྷག་མས་རྒྱལ་མཚན་ལ་སོགས་འཆར། །དེ་བཞིན་དབྱངས་དང་གསལ་བྱེད་ནི། །འདི་ལྟར་
རྗེས་སུ་གྲགས་པ་རྣམས། །རྒྱལ་མཚན་དུ་བ་སེང་གི་ཁྱི། །ཁྱུ་མཆོག་བོང་བུ་གླང་པོ་ཆེ། །བྱ་རོག་དང་ནི་བརྒྱད་དུ་གྲགས། །འདི་རྣམས་སྟོབས་ཀྱི་བྱེ་བྲག་ནི། །བྱ་རོག་གཉིས་འགྱུར་ཁྱི་ལ་བརྗོད། །ཁྱི་གཉིས་བོང་བུར་ཤེས་བྱ་སྟེ། །བོང་བུའི་ཉིས་འགྱུར་ཁྱུ་མཆོག་དྲན། །ཁྱུ་
མཆོག་གཉིས་འགྱུར་གླང་པོ་ཆེ། །གླང་པོའི་ཉིས་འགྱུར་སེང་གེ་ལ། །སེང་གེའི་ཉིས་འགྱུར་རྒྱལ་མཚན་ཏེ། །རྒྱལ་མཚན་སྟོབས་གཉིས་དུ་བ་ལའོ། །དེ་ལྟར་སྟོབས་ཀྱིས་བྱེ་བྲག་ཤེས། །བརྒྱད་ཀྱི་ཆ་ཡིས་ཐོབ་པ་ཡི། །ལྷག་མ་ཡོངས་སུ་བསམ་པ་སྟེ། །གཅིག་སོགས་ལྷག་མར་གྱུར་
པའི་གྲངས། །རྒྱལ་མཚན་ལ་སོགས་བདུན་རིམ་བཞིན། །རྒྱན་ནི་འཁོར་ལོའི་སྟོབས་བསྟན་པ། །དེ་ལྟར་བརྗོད་བྱ་དབང་མོ་ཆེ། །དེ་ནས་མིང་གི་ཡི་གེ་སོགས། །བརྟག་པ་གཞན་ཡང་བཤད་པར་བྱ། །རྒྱལ་དང་ཕམ་པ་ཡོངས་ཤེས་ལ། །དབྱངས་འཆར་རྒྱུད་ལ་བཤད་པ་ཉོན། །

རང་དང་རང་གི་དགྲ་བོ་ཡི། །མིང་གི་གསལ་བྱེད་རྟོགས་པ་དང་། །མིང་གི་དབྱངས་ནི་ངས་བྱས་ལ། །གསལ་བྱེད་བཞི་ཡིས་བསྒྱུར་བྱས་ཏེ། །དབྱངས་ནི་གཉིས་ཀྱིས་བསྒྱུར་བྱས་ལ། །གཅིག་ཏུ་བསྡོམས་པར་བྱས་ནས་ཀྱང་། །བདུན་གྱི་ཆ་ཡིས་བགོ་བར་
བྱ། །དེ་ཡི་ལྷག་མར་གང་གྱུར་པ། །གཉིས་ཀ་མཉམ་ན་འདུམ་པ་སྟེ། །མི་མཉམ་སྟོབས་ལ་བལྟས་པས་ཤེས། །མིང་གི་ཡི་གེ་ཇི་སྙེད་པ། །གཅིག་གིས་གཅིག་ལ་དབྲི་བར་བྱ། །ལྷག་མ་གང་ཡོད་རྒྱལ་བ་སྟེ། །མ་ལྡང་བ་ནི་འཕམ་པར་འགྱུར། །ལྷག་མེད་མཉམ་པས་འདུམ་
བར་བྱེད། །དེ་ལྟར་ཤེས་བྱ་དཀའ་བཟློག་མ། །མིང་གི་དབྱངས་དང་གསལ་བྱེད་རྣམས། །སོ་སོར་ཕྱེ་བ་ལེགས་པར་བརྟག །ཟུང་གིས་ཕམ་པར་ཤེས་བྱ་སྟེ། །ཁ་ཡར་བས་ནི་རྒྱལ་བར་སྟོན། །དབྱངས་དང་གསལ་བྱེད་ཇི་རྙེད་པ། །སོ་སོར་མཉམ་ན་འདུམ་པར་སྟོན། །ལྷ་མོ་
དེ་ལྟར་འཁོར་ལོ་མཆོག །སོ་སོར་ཤེས་པར་བྱ་ཞེས་གྲགས། །དེ་ནས་ཤིན་ཏུ་གསང་བ་ཡི། །རྨ་བརྟག་འཁོར་ལོ་བཤད་པར་བྱ། །སྐྱེས་བུའི་གཟུགས་ཀྱི་འཁོར་ལོ་ལ། །རྒྱུ་སྐར་གནས་པའི་མཚན་ཉིད་ཅན། །ལུས་ཀྱི་ཆ་ཤས་གང་དུ་རྨ། །བྱུང་ཞིང་ཇི་ཙམ་འབྱུང་བ་ཞེས། །ཉི་
མ་གནས་པའི་རྒྱུ་སྐར་ནས། །བྱེ་བྲག་ཕྱེ་ལ་རིམ་བཞིན་བྲི། །མགོ་བོར་གསུམ་ལ་ཁ་ལ་གསུམ། །སྙིང་ག་ལྔ་སྟེ་ལག་པར་བརྒྱད། །རྐང་པ་དག་ལ་བརྒྱད་ཡིན་ཏེ། །དེ་ལྟར་གཟུགས་ལ་དགོད་པར་བྱ། །རང་གི་སྐར་མའི་དུས་སྦྱོར་ལས། །མཐོང་བར་སྡིག་ཅན་གང་ཡོད་པ། །
རྨ་བྱུང་ཆེ་ཆུང་མཐོང་དང་སྟོབས། །བདུན་པར་ཐེ་ཚོམ་མེད་པར་འགྱུར། །ཟླ་བ་གནས་པའི་ཆ་ཤས་ལ། །རྨ་རྣམས་འབྱུང་བར་ཤེས་པར་བྱ། །རྨ་རྣམས་ཆེ་ཆུང་ལྟ་བ་ནི། །དགུ་ཆའི་དུམ་བུ་བལྟ་བར་བྱ། །དེ་ཡི་གྲངས་ཀྱི་སོར་གྱིས་བཅལ། །སྡིག་ཅན་གནས་བར་རྨ་འབྱུང་བཤད། །
ཉི་མ་མཐོང་ན་རྨ་ལོག་འགྱུར། །རཱ་ཧུ་མཐོང་ན་རྨ་ཟེར་ཐེབས། །སྤེན་པ་མཐོང་ན་སྐྱེས་བུ་ཡི། །རྨ་ལ་ཁྲག་ནི་མེད་པར་འགྱུར། །མིག་དམར་མཐོང་ན་ཁྲག་དམར་འབྱུང་། །གལ་ཏེ་འཆི་བར་འགྱུར་བའང་སྲིད། །གཟའ་ཡི་འཁོར་ལོ་གནས་པ་ལས། །སྡིག་ཅན་གནས་

པས་ཤེས་པར་བྱེད། །དེ་ལྟར་བདེན་པའི་མཚན་ཉིད་ཅན། །སོ་སོར་བྱེ་བྲག་ཕྱེད་པར་བྱེ། །འདི་ཡི་ཉི་མ་མགོར་བསྟན་པས། །རྨ་འབྱུང་དྲང་སྲོང་གིས་ཤེས་འགྱུར། །དེ་ནས་མདོར་བསྡུས་མཉམ་པ་ནི། །ཏྲི་ཤཱུ་ལ་ཡི་འཁོར་ལོ་བཤད། །གང་ཞིག་ཤེས་པས་གཡུལ་འགྱེད་
ཚ། །རྩོད་པའི་མཚན་ཉིད་ཤེས་པར་བྱ། །ཏྲི་ཤཱུ་ལ་ནི་གསུམ་བྲིས་ཏེ། །རིམ་པ་བཞིན་དུ་སྐར་མ་དགོད། །ཉི་མས་འཁྱུད་པའི་སྐར་མ་དང་། །རྩེ་མོ་ནས་བཟུང་བྲི་བར་བྱ། །ཉི་མས་འཁྱུད་པའི་སྐར་མ་ནས། །མགོ་བཟུང་རྩེ་མོར་སྐར་མ་གསུམ། །ཏྲི་ཤཱུ་ལ་ཡི་ཡུ་བ་ལ། །རྒྱུ་
སྐར་དྲུག་ནི་རིམ་བཞིན་བྲི། །དེ་ཉིད་ཕྱི་རོལ་འཐོན་པ་ཡི། །མདུང་རྩེ་གསུམ་ལ་རྒྱུ་སྐར་གསུམ། །ཏྲི་ཤཱུ་ལ་ཡི་ཡུ་བ་ལ། །རིམ་པ་གསུམ་གསུམ་བརྩེགས་མར་བྲི། །དེ་ནས་སྟེང་དུ་བརྩེགས་པ་ཡི། །དབུ་མའི་རྩེ་མོའི་ཡུ་བར་ཡང་། །གཡས་པའི་རྩེ་མོར་གསུམ་ཡིན་ཏེ། །ཡུ་བ་
གསུམ་གསུམ་བརྩེགས་མར་བྲི། །མདོར་ན་རྩེ་མོ་རྣམས་ལ་གསུམ། །ཡུ་བར་གསུམ་གསུམ་བརྩེགས་མར་བྲི། །དབུ་མ་འཁྲུག་པའི་ཏྲི་ཤཱུ་ལ། །གཡས་པ་ནང་དུ་འཇུག་པར་བརྗོད། །གཡོན་པ་ཕྱི་རོལ་མཐོན་པ་སྟེ། །དབྱངས་འཆར་རྒྱུད་ལས་དེ་ལྟར་མཐོང་། །ཟླ་བ་གང་ན་གནས་
པ་བརྟག །རང་གི་སྐར་མ་གང་ནས་གནས། །རང་གིས་བརྟགས་ལ་ཤེས་པར་བྱ། །གདུག་པའི་གཟའ་རྣམས་གར་ཡོད་ངན། །ཕྱིར་འཐོན་པ་ལ་ཕྱིར་ལོག་འགྱུར། །ནང་འཇུག་སྐར་མས་ནང་དུ་ཆུད། །དབུ་མ་འཁྲུག་པར་འགྱུར་པ་སྟེ། །འོག་མ་གཉིས་ལ་རྩོད་པ་ཆུང་། །བར་
མ་གཉིས་ལ་འབྲིང་པོར་འགྱུར། །སྟེང་མ་མཉམ་ལ་འཐབ་རྩོད་ཆེ། །རྩེ་མོ་གསུམ་ལ་ཤིན་ཏུ་ཆེ། །མདུང་ནི་དབུ་མར་གང་ཡོད་ཕམ། །རང་དང་དགྲ་ཡི་སྐར་མ་དག །འདི་ལ་སྲུང་བ་ཤིན་ཏུ་གཅེས། །གཡས་དང་གཡོན་གྱི་ཏྲི་ཤཱུ་ལ། །ནང་འཇུག་ཕྱི་རོལ་འཐོན་པ་ལས། །
རྩོད་པ་ཆེ་འབྲིང་གོང་མ་བཞིན། །དབྱངས་འཆར་རྒྱུད་ལས་བཤད་པ་ཡིན། །འདི་ལྟར་རང་གི་རྒྱུ་སྐར་ལ། །སྡིག་ཅན་མི་དགེ་ཞི་བ་དགེ །ཏྲི་ཤཱུ་ལ་གསུམ་ཞབས་བསྡུས་དགོད། །ཉི་མ་གནས་པའི་སྐར་མ་ནི། །ཏྲི་ཤཱུ་ལ་བར་མའི་རྩེ་མོ་ནས། །རིམ་བཞིན་དུ་དགོད་བར་

བྱ། །ཏྲི་ཤཱུ་ལ་ཡི་རྩེ་མོ་ན། །རྒྱུ་སྐར་གསུམ་གསུམ་བྲི་བར་བྱ། །ཡུ་བའི་ཐད་ཀའི་བར་རྣམས་སུ། །རྒྱུ་སྐར་དྲུག་དྲུག་བྲི་བར་བྱ། །མདོར་ན་བར་དང་རྩེ་མོ་ལ། །རྒྱུ་སྐར་དགུ་དང་བཅོ་བརྒྱད་དང་། །ཏྲི་ཤཱུ་ལ་ནི་གསུམ་པོ་ལ། །རྒྱུ་སྐར་རྣམས་ཀྱིས་
ཡོངས་སུ་བསྐོར། །མིང་གི་སྐར་མར་ཉི་མ་སོང་། །དེ་ལ་ནད་རྣམས་འབྱུང་བར་གྲགས། །དབུ་མ་གསུམ་ལ་ནོར་ཉམས་བྱེད། །ཉི་མ་མེད་པའི་རྩེ་མོ་ལ། །འཐབ་རྩོད་འབྱུང་བར་བསྟན་པ་ཡིན། །མདོར་ན་རྩེ་མོའི་རྒྱུ་སྐར་གྱིས། །དོན་ཉམས་ཕྱུགས་རྣམས་བརླག་པ་
དང་། །གཉེན་བཤེས་རྣམས་ནི་མྱུར་ཏུ་ཉམས། །ཡུལ་གཞན་འཕོ་ཞིང་རྒྱལ་པོའི་འཇིགས། །དབུས་ཀྱི་དྲུག་གིས་བདེ་བར་བྱེད། །བཅུ་གཉིས་ཀྱིས་ནི་ཕུན་སུམ་ཚོགས། །བུ་རྣམས་སྐྱེད་ཅིང་དགའ་སྐྱེད་དང་། །སྐལ་བཟང་བདེ་བ་སྐྱེད་པར་མཐོང་། །གཡུལ་གྱི་དུས་
སུ་ལེགས་པར་གནས། །རྩེ་མོར་གལ་ཏེ་ཟླ་བ་སོང་། །ནད་དང་སྡུག་བསྔལ་ལ་སོགས་འབྱུང་། །ཏྲི་ཤཱུ་ལ་ཡི་འཁོར་ལོ་ནི། །དེ་ལྟར་ལྷ་མོ་ཁྱོད་ལ་བཤད། །ཉི་མས་འཁྱུད་བའི་སྐར་མ་དེ། །མགོ་བོ་ནས་བརྩམས་རིམ་བཞིན་བྲེ། །གཡས་སུ་བསྐོར་བ་སྦྱོར་བ་ཡིས། །
མགོ་བོའི་མཐར་ཐུག་བྲི་བར་བྱ། །མགོ་བོར་དགུ་ལ་རྣ་བར་གཉིས། །ལག་པ་དག་ལ་དྲུག་དྲུག་སྟེ། །རྒྱལ་ཏུ་བརྒྱད་དུ་བསྟན་པ་ཡིན། །རྐང་པ་དག་ལ་གཉིས་ཡིན་ཏེ། །དེ་ལ་རང་གི་སྐར་མ་ནི། །མགོ་དང་རྐང་བར་འཆི་བ་སྟེ། །ལག་པ་དག་ལ་རྣམ་པར་རྒྱལ། །རྒྱབ་ནི་
རྒྱལ་ཕམ་མེད་པར་འཐབ། །རྣ་བ་དག་ལ་རྣམ་པར་ཉམས། །ཟླ་བའི་སྐར་མ་དེ་བཞིན་ནོ། །གཡུལ་དུ་རྒྱལ་དང་ཕམ་པ་ཡི། །ཉི་མའི་འཁོར་ལོ་གངས་རིའི་བདག །མིང་གི་རྒྱུ་སྐར་འཁོར་ལོ་ནི། །གང་གིས་ཤེས་བ་ཙམ་གྱིས་ཀྱང་། །འཁྲུག་པ་གཉེན་དང་ལས་རྣམས་
ཀུན། །བྱེད་ན་འདིར་རྟོགས་དཀའ་བཟློག་མ། །རིམ་པ་གཉིས་དང་ལྡན་པ་ལ། །རེ་མིག་བཅུ་བཞི་མཉམ་པར་དགོད། །སྦྱང་ཁུ་ནི་ལེ་བྱི་ཡ་སྟག །ཁྲི་སྙན་མ་ཧེ་སེང་གེ་རྣམས། །རེ་མིག་སྟེང་གི་རིམ་བར་བྲི། །ལུག་སྤྲུལ་བྱི་བ་ཁྱུ་མཆོག་དང་། །སྤྲེའུ་རྟ་དང་གླང་པོ་ཆེ་

འོག་ཏུ་ཐད་དྲང་རྣམས་ལ་དགོད། །ལུག་གི་སྨིན་དྲུག་རྒྱལ་ཡིན་ཏེ། །དེ་བཞིན་སྦྲུལ་ནི་སྣར་མ་མགོ །བྱི་བ་དབོ་དང་མོན་གྲེར་བརྗོད། །ཁྱུ་མཆོག་མཆུ་དང་ཆུ་སྟོད་ཡིན། །སྤྲེའུ་གྲོ་བཞིན་ཆུ་སྨད་དྲན། །རྟ་ནི་ཐ་སྐར་མོན་གྲུའོ། །གླང་པོ་བྲ་ཉིན་མ་གྲུར་བརྗོད། །དེ་ནས་སྤྱང་
ཁུ་ཡག་དང་སྣྲུབས། །བྱི་བཞིན་ཁྲུམས་སྟོད་ནེའུ་ལེ། །བྱི་ལ་དེ་བཞིན་ནབ་སོ་སྐག །སྟག་ནི་ནག་པས་གར་བརྗོད། །ཁྲི་སྙན་སྣོན་དང་ལྷ་མཚམས་བཤད། །མ་ཧེ་མེ་བཞི་ས་རིར་བཤད། །སེང་གེ་ཁྲུམས་དང་གྲེ་ཡིན་ཏེ། །འོག་དང་གོང་གི་རེ་མིག་ལ། །ལུག་སོགས་
སྦྱང་སོགས་རིམ་བཞིན་དགོད། །དེ་ལྟར་རྟ་དང་མ་ཧེ་དགྲ། །གླང་དང་སྟག་དག་མི་མཐུན་ཏེ། །སྦྲུལ་དང་ནེ་ལེ་མཛའ་བ་མེད། །ལྷ་མོ་གླང་ཆེན་སེང་གེ་དགྲ། །ལུག་དང་སྤྱང་ཁུ་མཐུན་པ་མེད། །མཛེས་མ་བྱི་བ་བྱི་ལ་ཡང་། །དེ་བཞིན་སྤྲེའུ་ཁྲི་སྙན་དྲན། །གཡུལ་དུ་ཤེས་བྱ་
ལྷས་མཆོད་མ། །ཇི་ལྟར་མིང་གི་སྐར་མ་ནི། །མཆུ་དང་ཆུ་སྟོད་ཁྱུ་མཆོག་མིང་། །སེང་གེའི་མིང་ལ་ཁྲུམས་སྨད་གྲེ། །དེ་ལྟར་ཐམས་ཅད་ཤེས་པར་བྱ། །གང་གི་རིགས་ནི་ཤེས་པ་ལས། །སྟོབས་ཀྱི་ཆེ་ཆུང་ཤེས་པར་འགྱུར། །མིང་གི་སྐར་མའི་མིང་ཤེས་པར། །མཛེས་
དགའ་གཡུལ་སོགས་ཇི་ལྟར་བྱེད། །རྒྱལ་དང་ཐ་སྐར་ནག་སོ་མགོ །ནམ་གྲུ་ལྷ་མཚམས་ས་རི་དང་། །གྲོ་བཞིན་མེ་བཞིར་བཅས་བ་རྣམས། །ལྷ་ཡི་རིགས་སུ་ཤེས་པར་བྱ། །ཆུ་སྟོད་ཁྲུམས་སྟོད་ཁྲུམས་སྨད་གྲོ། །དབོ་དང་ཆུ་སྟོད་བྲ་ཉེ་ལག །སྣར་མའི་མིང་གི་བྱེ་བྲག་
རྣམས། །མོ་ཡི་རིགས་ཡིན་བཞིན་བཟངས་མ། །མཆུ་དང་ནག་པ་སྨིན་དྲུག་དང་། །མོན་གྲེ་མོན་གྲུས་ག་དང་། །སྣུབས་སྐག་སྣོན་དང་བཅས་པ་རྣམས། །སྲིན་པོའི་རིགས་ལས་གྲུབ་པ་ཡིན། །རང་གི་རིགས་རྣམས་མཉམ་པར་མཐུན། །ལྷ་དང་མིན་འབྲིང་པོ་སྟེ། །ལྷ་དང་
སྲིན་པོ་དེ་བཞིན་ནོ། །མི་དང་སྲིན་པོ་ལྷན་ཅིག་འཆི། །གལ་ཏེ་ཆུང་མ་སྲིན་པོར་འགྱུར། །ཁྱོ་ནི་མི་ཡི་རིགས་ལས་སྐྱེས། །དེ་ཚེ་ཁྱོ་ནི་འཆི་བར་འགྱུར། །ཤིན་ཏུ་རྒྱལ་རིང་འདུག་པར་བྱ། །མི་མཛའ་ལྷན་ཅིག་འཆི་བ་སྟེ། །རང་གི་རིགས་མཐུན་པ་དེ་བར་བྱེད། །གལ་ཏེ་ལྷ་ཡི་

རིགས་ཡིན་ན། །མི་དང་སྲིན་པོ་ཀུན་ལས་རྒྱལ། །མི་དང་སྲིན་པོ་ལྷན་ཅིག་པ། །མེ་དང་ཆུ་བཞིན་འགལ་བར་འགྱུར། །དེ་ལྟར་ཁྱོ་ཤུག་ལ་སོགས་པ། །རིགས་ཀྱི་འཁོར་ལོ་བསྟན་པ་ཡིན། །དེ་ནས་གཞན་ཡང་བཤད་པར་བྱ། །གང་གིས་ཤེས་པ་
ཙམ་གྱིས་ནི། །མིག་གི་མཚན་ཉིད་ཤེས་འགྱུར་པ། །ཐེ་ཐོམ་མེད་པར་བཤད་ཀྱིས་ཉོན། །ཐ་སྐར་མགོ་དང་རྒྱལ་དང་ནི། །མེ་བཞི་ལྷ་མཚམས་གྲོ་གཞིན་དང་། །ནབ་སོ་གང་དང་ལྷན་ཅིག་པ། །རེ་ཡི་མིག་ནི་དགེ་བ་སྟེ། །བསམ་པའི་དོན་ཀུན་འགྲུབ་པ་ཡིན། །དྲོ་ལམ་
བརྒྱ་ཡི་ཡུལ་ཡང་མཐོང་། །ལག་དང་སྣྲུབས་དང་མོན་གྲེ་དང་། །ས་རི་གྲེ་དང་ཆུ་སྟོད་དང་། །ཁྲུམས་སྟོད་མིག་ནི་ལོང་བ་དང་། །དོན་དང་ལས་ཀུན་འགྲུབ་པ་མེད། །མཆུ་དང་ནག་པ་སྣྲོན་ཞེས་བྱ། །སྣར་མ་དབོ་དང་ཆུ་སྨད་དང་། །ཁྲུམས་སྨད་རྣམས་ལ་འདྲི་བྱེད་ཀྱི། །མིག་ནི་
ཤེལ་ལམ་གཡོ་བར་འགྱུར། །བྲ་ཉེ་དེ་བཞིན་སྨིན་དྲུག་སྐག །མོན་གྲུས་ག་བྱི་བཞིན་དང་། །ནམ་གྲུ་གང་ཡོད་མིག་དམར་ཞིང་། །ནག་པོར་འགྱུར་ཞིང་དགེ་བ་མེད། །ནོར་དང་རྙེད་པ་རབ་སྦྱོར་མེད། །ཡིད་ལ་འདོད་པ་རྣམ་པར་སྤངས། །དེ་ནས་སྡེ་བརྒྱད་འཁོར་ལོ་མཆོག །གང་
གིས་ཤེས་པའི་མི་རྣམས་ཀྱིས། །སྟོབས་དང་གཉིན་བོའི་བྱེ་བྲག་རྣམས། །བཤད་ཀྱིས་ལྷ་ཡི་བདག་མོ་ཉོན། །ཨ་ཡི་སྡེ་ཚན་ལྷ་ཡིན་ཏེ། །ཀ་སྟེ་ལྷ་མ་ཡིན་དུ་བརྗོད། །ཙ་སྡེ་གང་གནས་ཀླུ་ཞེས་བྱ། །བཞི་ཡི་སྡེ་ཚན་དྲི་ཟར་གྲགས། །ཏ་སྡེར་གནས་བ་གནོད་སྦྱིན་དྲན། །དེ་
བཞིན་བ་སྡེ་སྲིན་པོར་སྨྲ། །ཡ་ཡི་སྡེ་ཚན་ཤ་ཟ་སྟེ། །ཤ་ཡི་སྡེ་ཚན་ནི་ཞེས་གྲགས། །འདི་ལྟར་ལྷ་མིན་སྟོབས་གཅིག་སྟེ། །ཀླུ་ལ་དེ་ཡི་ཉིས་འགྱུར་བཤད། །དེ་གཉིས་ཉིས་འགྱུར་དྲི་ཟ་སྟེ། །དེ་གཉིས་ཉིས་འགྱུར་གནོན་སྦྱིན་ནོ། །དེ་གཉིས་འགྱུར་གྱིས་སྲིན་པོ་སྟེ། །སྲིན་མོའི་
ཉིས་འགྱུར་ཤ་བ་དང་། །ཤ་ཟའི་འགྱུར་གྱིས་ལྷ་ལ་བརྟག །ལྷ་ཡི་ཉིས་འགྱུར་ནི་ཞེས་གྲགས། །དེ་ལྟར་ཕན་ཚུན་ཉེ་རིང་དུ། །གྲངས་ནི་གང་མང་སྟོབས་ཆེར་འགྱུར། །ཕྱོགས་མཚམས་ཐད་ཀར་མི་མཛའ་སྟེ། །སྟོབས་ཆེན་རྣམས་ཀྱིས་ཆུང་བ་གསོད། །གཡུལ་གྱི་དུས་སུ་

བསྟན་པ་སྟེ། །འཁོར་ལོའི་སྟོབས་ནི་ངེས་བར་མཐོང་། །མིང་གི་དང་པོ་གསལ་བྱེད་ལ། །རྣམ་པར་དཔྱོད་པར་ཡོངས་སུ་གྲགས། །དེ་ལྟར་ཕན་ཚན་ཉེ་རིང་དུ། །གྲངས་ནི་གང་མང་སྟོབས་ཆེར་འབྱུང་། །དེ་ལྟར་སྟོབས་ཀྱི་བྱེ་བྲག་འདི། །ཚངས་པས་རྒྱུད་དུ་བཤད་པ་
ཡིན། །གཡུལ་གྱི་དུས་སུ་འཁོར་ལོ་འདི། །སྟོབས་ཀྱི་ཆ་ཡིས་རྒྱལ་ཕམ་སྟོན། །སྡེ་ཚན་ཇི་ལྟར་གནས་པ་དང་། །སྟོབས་བསྐྱེད་པ་ཡི་རིམ་པ་ནི། །དབང་མེ་གཤིན་རྗེ་བདེན་བྲལ་དང་། །ཆུ་རླུང་གནོད་སྦྱིན་དབང་ལྡན་དང་། །གོ་རིམས་བཞིན་དུ་གནས་པ་སྟེ། །འདི་རྣམས་
སྟོབས་ལ་ཁྱད་པར་གནས། །སྟོབས་ཆེན་རྣམ་པར་རྒྱལ་འགྱུར་ཏེ། །ཆུང་བ་ཕམ་པར་འགྱུར་བ་ཡིན། །རང་ལ་ཕ་རོལ་ཕྱོགས་ཀྱི་སྟོབས། །སྲོག་ཆགས་རྣམས་ཀྱི་ལུས་ཀྱིས་གསལ། །ཨ་སྡེ་འདི་ལྟར་བྱ་ཁྱུང་སྟེ། །ཀ་ཡི་སྡེ་ཚན་བྱི་ལར་དྲན། །ཙ་ཡི་སྡེ་ཚན་སེང་གེར་
དྲན། །ཊ་སྡེ་སྦྱར་ཁུར་ཤེས་པར་བྱ། །ཏ་ཡི་སྡེ་ཚན་སྤྲུལ་དུ་གསལ། །ས་སྡེ་བྱི་ལར་ཡོངས་སུ་གྲགས། །ཡ་ཡི་སྡེ་ཚན་གླང་པོ་ཆེ། །ཤ་སྡེ་ལུག་ཏུ་ཡོངས་སུ་བརྗོད། །དེ་ནས་འདབ་ཆགས་འཁོར་ལོ་མཆོག །གང་གིས་ཤེས་པ་ཙམ་གྱིས་ཀྱང་། །དུས་ཀྱི་སྟོབས་
ཀྱིས་འདོད་དོན་ཀུན། །ཐེ་ཚོམ་མ