Luận tạng Tây Tạng (Tengyur) — Tập 203

ུ་འདུག་ནས་དྲིས་ཀྱང་རུང་སྟེ། ཆར་པ་འབབ་པར་བལྟ་བར་བྱའོ། །བྱི་ལ་དང་། སྲེ་མོང་དང་། སྦྲུལ་རྣམས་དང་། གང་ཡང་གཞན་དག་ཏུ་གན་དུ་གནས་པ་དག་ཏེ་དྲོད་མི་མཐུན་པར་རྒྱུག་པར་བྱེད་ན་མདོ་ལ་ཆར་འབབ་པར་སྟོན་པ་
ཡིན་ནོ། །བྱིས་པ་ལུས་འཇིམ་པས་བྱུགས་པ་དང་། མགོ་མེ་ཏོག་ཕྲེང་བས་དཀྲིས་པ་གང་ན་འདུག་པ་དར་ནི། འཕྲལ་དུ་ཆར་པ་མངོན་པར་འབབ་པར་བྱེད་དོ། །ལུས་རྡུལ་བྱིས་བྱུགས་པའི་བྱིས་པ་དག་རྡུལ་གྱིས་རྩེ་བར་བྱེད་པ་དང་། ཡུར་བ་འགེངས་པར་བྱེད་ན་ཕྲལ་དུ་ཆར་པ་འབབ་པའི་རྒྱུ་ཡིན་ཏེ། ཆར་པ་

འབབ་པའི་མཚན་ཉིད་ལ་མཁས་པ་རྣམས་ཀྱིས་དེ་ནི་འཕྲལ་དུ་ཆར་འབབ་པར་བཤད་པ་ཡིན་ནོ། །གང་གི་ཚེ་སྤྲིན་ཀྱང་མེད། ཁ་བ་ཡང་མེད་པར་རླུང་ཤིན་ཏུ་བསིལ་བ་དག་འབྱུང་ཞིང་། ལུས་ཅན་གྲང་བར་བྱེད་པ་ནི་དེར་འཕྲལ་དུ་ངེས་པར་ཆར་པ་འབབ་པར་བྱེད་པའོ། །ཆུ་
ནས་སྐྱེས་པའི་བྱ་ཤིང་གི་ཡལ་ག་ལ་ཞོན་པ་དག་ཉི་མས་འདབ་མ་སྐེམས་པར་བྱེད་པ་ནི་ཤིན་ཏུ་ཆར་པ་འབབ་པར་ཡང་སྟོན་པ་ཡིན་ནོ། །གང་གི་ཚེ་ཤིང་ལ་གནས་པའི་བྱ་འདབ་མ་སྐེམས་པར་བྱེད་པ་དེ་ནི་ཆར་པ་འབབ་པར་བྱེད་པའི་རྒྱུ་ཡིན་པར་བསྟན་བཅོས་མཁས་པ་རྣམས་ཀྱི་བསྟན་བཅོས་ལས་བརྗོད་པ་
ཡིན་ནོ། །གྲོང་གི་བྱིའུ་ཁྲུས་བྱེད་ཅིང་འདབ་མ་སྦྲུག་པར་བྱེད་པ་གང་ཡིན་པ་དེ་ནི་ཆར་པ་འབབ་པའི་ཡང་དག་པའི་ཤེས་པ་རྣམས་ཀྱི་ཆར་པའི་རྒྱུ་ཡིན་པར་བརྗོད་པ་ཡིན་ནོ། །ཆར་ལྟས་ཀྱི་ལེའུ་སྟེ་དགུ་པའོ།། །།དུས་ཚིགས་ཀྱི་འོད་ཆགས་པའི་ལྟས་ལ་བྲམ་ཟེ་རིག་པ་ཅན་གྱིས་དུས་ཚིགས་ཀྱི་
འོད་ཆགས་པ་བསྒྲིམས་ཏེ་བརྟགས་ནས་དུས་བསྟན་པར་བྱ་སྟེ། གང་གི་ཚེ་ནང་ནུབ་ཏུ་དུས་ཚིགས་མདོག་སྣུམ་ཞིང་། ལྡོང་རོས་ལྟ་བུའི་འོད་དམ་པ་བླའི་འོད་ལྟ་བུར་མཐོང་ན་ཞག་གསུམ་གྱི་བར་དུ་ཆར་པ་འབབ་པར་ལྟས་ཤེས་པ་དག་གིས་བརྗོད་པ་ཡིན་ནོ། །དུས་ཚིགས་ཀྱི་ཁ་དོག་དུང་དང་། གུར་གུམ་དང་།
བ་ལང་གི་གཅིན་ལྟ་བུའི་འོད་འབྱུང་བ་དེ་དག་ནི་འཕྲལ་དུ་ཆར་པ་འབབ་པའི་རྒྱུ་ཡིན་ནོ། །དབྱར་ཀ་དུས་ཚིགས་གཉིས་ཀར་ཡང་ཁ་དོག་སྣུམ་པ་དང་། གུར་གུམ་ལྟ་བུ་དང་། གནག་པ་དང་། རང་བཞིན་གྱིས་མཚལ་གྱི་འོད་ལྟ་བུ་འབྱུང་བ་དང་། ཁ་དོག་ཁྲག་གི་རྒྱུན་དང་མཚུངས་པའི་འོད་དང་། དེ་
བཞིན་དུ་རྒྱ་སྐྱེགས་ཀྱི་ཁུ་བ་ལྟ་བུ་དང་། དེ་བཞིན་དུ་ཟངས་ལྟར་དམར་བདག་གིས་དུས་ཚིགས་འཇིགས་པར་བྱེད་པར་འགྱུར་རོ། དུས་ཚིགས་ཁ་དོག་རྩུབ་པ་དག་ཏུ་དམག་དང་མཚོན་གྱིས་འདེབས་པ་དང་། ཁྲག་གི་ཆག་ཆག་བཏབ་པའི་ས་རྣམས་འབྱུང་བ་ནི་ཤིན་ཏུ་འཇིགས་པར་འགྱུར་རོ། །དུས་
ཚིགས་ཀྱི་ཆགས་པ་ཤིན་ཏུ་དམར་བ་ནི་ཉིན་གསུམ་དུ་ཆར་པ་འབབ་པར་བསྟན་ཏོ། །ཡང་ན་མཚོན་གྱིས་འདེབས་པ་མཚོན་གྱིས་འཚོ་བའི་སྐྱེ་པོ་ཟད་པར་ཡང་འགྱུར་རོ། །གང་དུ་དུས་ཚིགས་གཉི་གར་ཕྱོགས་སུ་རྡོ་ཡི་ཆར་པ་འབབ་པ་དེར་ནི་མཁྲིས་པའི་ནད་ལ་སོགས་པས་ལུས་ཅན་འཆི་བར་འགྱུར་རོ། །

གལ་ཏེ་དུས་ཚིགས་ཀྱི་ཆགས་པ་ཡང་དང་ཡང་དུ་བྱིས་པ་དག་དམག་འགྱེད་པ་ན་རྣམ་པར་སྐྲག་པར་འགྱུར་ཞིང་རབ་ཏུ་རྒྱུག་པར་བྱེད་པ་དེར་ནི་ཡུལ་འཁོར་འཇིག་པར་འགྱུར་རོ། །དུས་ཚིགས་ཀྱི་རང་བཞིན་དང་ལྡན་པའི་ཉི་ཟླ་གཉིས་དང་ལྷན་ཅིག་ཏུ་འབྱུང་ཞིང་། ཁ་དོག་གི་འོད་དམར་བ་དང་། རྩུབ་
པ་མ་ཡིན་པ་ནི་ལོ་ལེགས་པ་དང་བདེ་བའི་རྒྱུ་ཡིན་ནོ། །དུས་ཚིགས་གཉི་གར་འོད་ཤིན་ཏུ་གནག་ཅིང་མུན་པ་དང་འདྲ་བས་གང་ན་དེའི་དམག་དཔོན་རྣམས་འཁྲུག་པ་དང་། གསོད་པར་ཡང་བསྟན་པར་བྱའོ། །གང་དུས་ཚིགས་ཀྱི་རང་བཞིན་གྲང་བ་དང་། དྲོ་བ་དང་། འཇམ་པ་དང་། རྩུབ་པ་
རྣམས་ཕྱིན་ཅི་ལོག་ཏུ་གྱུར་པ་དེར་ནི་ནད་དང་། འཆི་བ་དང་། རྒྱལ་པོ་ལ་འཇིགས་པ་འབྱུང་བའམ། ཡང་ན་ངེས་པར་བདག་པོ་འཆི་བར་བསྟན་པ་ཡིན་ནོ། །དེའི་ཉེ་འཁོར་དུ་ཆོམ་རྐུན་དང་། སྦྲུལ་དང་། སྲིན་པོ་རྣམས་ཀྱི་དབང་ཡང་འགྱུར་རོ། །དུས་ཚིགས་ཀྱི་འོད་ཆགས་པའི་ལེའུ་སྟེ་བཅུ་
པའོ།། །།དྲི་ཟའི་གྲོང་ཁྱེར་གྱི་ལྟས་ལ། གལ་ཏེ་ཤར་ཕྱོགས་སུ་དྲི་ཟའི་གྲོང་ཁྱེར་བྱུང་བར་ནུབ་ཕྱོགས་ན་འདུག་པའི་རྒྱལ་པོ་ལ་མཆོག་ཏུ་འཇིག་པ་འབྱུང་བར་བསྟན་པ་ཡིན་ནོ། །གང་གི་ཚེ་ནུབ་ཕྱོགས་སུ་ཟའི་གྲོང་ཁྱེར་སྣང་བར་གྱུར་ན། དེའི་ཚེ་ན་ཤར་ཕྱོགས་ན་གནས་པ་རྣམས་ལ་
འཇིགས་པ་ཆེན་པོ་འབྱུང་བར་བརྗོད་པར་བྱའོ། གང་གི་ཚེ་བྱང་ཕྱོགས་སུ་དྲི་ཟའི་གྲོང་ཁྱེར་སྣང་བར་གྱུར་ན་དེའི་ཚེ་ནི་ལྷོ་ཕྱོགས་ན་གནས་པའི་རྒྱལ་པོ་རྣམས་ལ་འཇིགས་པ་འབྱུང་ངོ་། །གང་གི་ཚེ་ལྷོ་ཕྱོགས་ཀུ་དྲི་ཟའི་གྲོང་ཁྱེར་སྣང་བར་གྱུར་ན་དེའི་ཚེ་ནི་བྱང་ཕྱོགས་ན་གནས་པ་རྣམས་ལ་འཇིགས་པ་འབྱུང་བར་
བརྗོད་པ་ཡིན་ནོ། །དྲི་ཟའི་གྲོང་ཁྱེར་ཆགས་པའི་ལེའུ་སྟེ་བཅུ་གཅིག་བའོ།། །།གལ་ཏེ་གང་དུ་འཇིག་རྟེན་པའི་ལྷའི་གཟུགས་གར་བྱེད་པ་དང་། རབ་ཏུ་གཡོ་བར་གྱུར་བ་དང་། སྨྲ་བར་གྱུར་པ་དང་། མིག་མཆི་མས་གང་བ་དང་། རྟུལ་བར་གྱུར་པ་དང་། གས་པར་གྱུར་པ་དང་། དུམ་བུར་
གྱུར་པ་དང་། ཐམས་ཅད་ཞིག་པ་ལ་སོགས་པས་ནི་འཇིགས་རྣམ་པ་དུ་མ་འབྱུང་བར་རིག་པར་བྱའོ། །དེ་ལ་ཡང་གར་གྱིས་ནི་དམགས་མང་པོ་འབྱུང་ངོ་། །རབ་ཏུ་གཡོ་བས་ཟླ་བ་བཞིན་དམག་བྱུང་བ་དང་། ཟླ་བ་དྲུག་གིས་རྒྱལ་པོ་ཀུན་དུ་ཟད་པར་འགྱུར་བ་དང་། རིང་པོ་མི་ཐོགས་པར་ཡུལ་འཇིག་པར་

འགྱུར་རོ། །གོམ་པ་འདོར་བས་ནི་ཡུལ་བོར་ཏེ་འདོང་བར་འགྱུར་རོ། །གླུ་ལེན་པས་ནི་ཡུལ་འཇིགས་པར་འགྱུར་རོ། །དུམ་བུ་ལས་ལྟུང་ན་ལུས་ཅན་རྣམས་འཆི་བར་འགྱུར་རོ། །རླུང་ལ་སོགས་པས་ཕུལ་བ་དང་། ལྟོས་པ་མེད་པར་ལྷའི་གཟུགས་ཀྱི་མགོ་དག་ལས་མེ་ཏོག་གི་ཕྲེང་བ་
ལག་པར་གཞག་པ་ལྷུང་བར་གྱུར་བ་ནི་རྒྱལ་པོ་དང་ཡུལ་འཁོར་དང་བཅས་ཏེ་འཆི་བར་འགྱུར་རོ། །ཡང་གང་དུ་རྒྱལ་པོ་རྟག་ཏུ་ཕན་ཚུན་འཁྱམ་པར་བྱེད་པ་དང་། འཇིགས་པ་མེད་པར་ཡང་འཇིགས་པས་སྐྲག་པ་དང་། །རྡེག་འཆོས་པ་དང་། རབ་ཏུ་གྱུར་པ་དང་། ཡིད་མི་དགའ་ཞིང་དུ་བར་གྱུར་པ་
དང་། གཟུགས་ལ་མི་སྣང་བར་སྲོག་ཆགས་རྣམ་པ་ཐ་དད་པ་དག་གིས་སྒྲ་ཤིན་ཏུ་སྡུག་བསྔལ་བར་འགྱུར་པ་དག་ཐོས་པར་གྱུར་པ་དེའི་ཚེ་ནི་རང་གི་ཡུལ་འཁོར་དང་ཡུལ་དུ་བཅས་ཏེ་རྒྱལ་པོ་འཆི་བར་འགྱུར་ལ། ཡུལ་འཁོར་དེའི་སྐྱེ་བོ་ཡང་མུ་གེ་དང་གནོན་པ་དག་གིས་གཟིར་བ་དང་། བུ་སྨད་དང་ཡང་བྲལ་
བར་གྱུར་བ་སྟོན་པ་ཡིན་ནོ། །གང་དུ་བསྟན་པ་མེད་པར་བྱིས་པ་གླུ་དང་སྤེལ་ཏེ། ཚིག་གིས་གླུ་ལེན་པར་བྱེད་ཅིང་། མི་མཐུན་པའི་དོན་བརྗོད་པ་དེར་ནི་རྒྱལ་པོའི་འཆི་བར་རྗོད་པར་བྱེད་དོ། །ལྷ་རྟེན་དང་གཟུགས་འགྱུར་བའི་ལྟས་ཀྱི་ལེའུ་སྟེ་བཅུ་གཉིས་པའོ།། །།ལམ་དུ་འཇུག་པའི་ལྟས་ལ་
གང་གི་ཚེ་རྒྱལ་པོ་དང་། བློན་པོ་དང་། བྲབ་ཟེ་དག་ལམ་དུ་འཇུག་ཅིང་འགགས་པ་ན་གནམ་གྲུམ་པ་དང་བཅས་པའི་སྐར་མདའ་འབྱུང་བ་དང་སེར་པ་འབབ་པ་ནི་དེ་དག་མི་མཐུན་པར་བརྗོད་པ་ཡིན་ཏེ། དེ་དག་དགོས་པ་ཡང་དག་པར་མི་འགྲུབ་པ་ཙམ་དུ་མ་ཟད་ཀྱི་ལུས་འཇིག་པར་འགྱུར་རོ། །གང་གི་དུས་སུ་ཉི་
མ་འཆར་བའི་ཚེས་ཕྱོགས་གང་དག་ཏུ་འགྲོ་བ་བྱ་རོག་དང་། ངང་བ་དང་། བྱ་ཀ་ར་ཎྜ་བ་དང་། ཀྲུང་ཀྲུང་དག་སྣང་བ་དེར་ནི་དགེ་བར་བལྟའོ། །སྤྲིན་དང་། འཇའ་དང་། དེ་བཞིན་དུ་གློག་འགྱུ་བ་དང་། ཆུ་སྦྱིན་པར་བྱེད་པའི་འབྲུག་མི་གསལ་བ་འབྱིན་པ་དག་ནི་འཇིགས་པ་བདེན་པར་རིག་པར་བྱེད་པ་ཡིན་
ནོ། །ལམ་དུ་འཇུག་པའི་ལྟས་ཀྱི་ལེའུ་སྟེ་བཅུ་གསུམ་པའོ།། །།གང་དུ་ལྟས་སྣ་ཚོགས་བསྟན་པ་དེ་དག་གི་འབྲས་བུ་འབྱུང་བའི་དུས་ཀྱི་ཚད་བསྟན་པ་གཟའ་སྐར་དག་ལ་མིག་དམར་གྱི་ལྟས་འབྱུང་བ་ནི་ཞག་བདུན་ནས་འབྲས་བུ་འབྱུང་ངོ་། །དེ་བཞིན་དུ་གཟའ་ལག་ནི་ཞག་བཅུ་ཚུན་ཆད་ཀྱིས་སོ། །ཕུར་

བུ་ནི་ལོ་གཅིག་གིས་རྣམ་པར་སྨིན་པར་འགྱུར་རོ། །པ་བ་སངས་ནི་ཟླ་བ་དྲུག་ཚུན་ཆད་ཀྱིས་སྨིན་པར་འགྱུར་བར་བསྟན་པར་བྱའོ། །གནམ་གྲུམ་པ་དང་། ས་གཡོ་བ་ནི་ཟླ་བ་བརྒྱད་དུ་བརྗོད་དོ། །གྲོང་ཁྱེར་དང་། མཆོད་རྟེན་དང་། ཤིང་དང་འབྲེལ་བ་ནི་ཟླ་བ་གཅིག་ནས་སྨིན་པར་འགྱུར་རོ། །རྡོ་གསེག་མའི་
ཆར་འབབ་པ་དང་། དེ་བཞིན་དུ་སྤྲིན་སྒྲ་འབྱུང་བ་དང་། གཟའ་རྣམས་འཁྱམས་པ་ནི་ཞག་གསུམ་ཚུན་ཆད་ཀྱིས་སྨིན་པར་འགྱུར་རོ། །ཉི་ཟླའི་ཡང་འཕྲལ་དུ་འབྲས་བུར་འགྱུར་བར་བསྟེན་པར་བྱའོ། །འཇའ་ཟུག་པ་ནི་ཟླ་བ་བཅུ་གཉིས་སུ་བརྟག་གོ། །སེར་བ་འབབ་པ་ལས་ནི་ཟླ་བ་ཕྱེད་དང་གཉིས་
གྱིས་འབྲས་བུར་འགྱུར་རོ། །མེ་མེད་པར་མེ་འབར་བ་ལྟ་བུར་སྣང་བ་ནི་འབྲས་བུ་འཕྲལ་དུ་འབྱུང་བར་མཁས་པ་དག་གིས་བཤད་དོ། །དེ་བཞིན་དུ་འབྱིག་འགྱུར་བ་དང་། མངལ་དག་ཕྱིན་ཅི་ལོག་པ་དང་། དུས་མ་ཡིན་པར་ལོ་ཏོག་འབྲས་བུ་ཆགས་པ་ཐམས་ཅད་ཀྱི་ཡང་ཟླ་བ་དྲུག་པར་བརྗོད་དོ། །སྤྲིན་མེད་
པའི་སྒྲ་དག་ཟེར་བ་ནི་ཟླ་བ་གཅིག་གིས་སོ། །འཇའི་ལྟས་ལྟ་བུ་ནི་ཞག་གསུམ་ཚུན་ཆད་ཀྱིས་འབྱུང་ངོ་། །ཟླ་བའི་དཀྱིལ་འཁོར་སྔོན་པོར་གྱུར་པ་ནི་ཞག་བདུན་ཚུན་ཆད་ཀྱིས་འབྲས་བུ་འབྱུང་ངོ་། གྲོང་དང་། གྲོང་ཁྱེར་དང་། དེ་བཞིན་དུ་གླང་པོ་ཆེ་དང་། རྟ་དང་། བ་ལང་དང་། གླང་པོ་ཆེ་ལ་སོགས་
པའི་ལྟས་འབྱུང་བ་ནི་འབྲས་བུ་འཕྲལ་དུ་འབྱུང་། དེ་བཞིན་དུ་སྔོན་མ་བྱུང་བ་ལས་གློ་བུར་དུ་འབྱུང་བ་རྣམས་དང་། འཇིགས་སུ་རུང་བའི་སྒྲ་བྱུང་བ་རྣམས་ཀྱི་ཡང་འབྲས་བུ་འཕྲལ་དུ་འབྱུང་བར་བརྗོད་དོ། །གདུགས་དང་། རྒྱལ་མཚན་འགྱེལ་བ་དང་། གཞི་དང་། རྟ་བབས་དང་། ཁང་བ་རྡིབ་པ་དང་། མཇུག་
རིངས་འཆར་བ་ནི་ཟླ་བ་གཅིག་གིས་འབྲས་བུ་འབྱུང་ངོ་། །མི་རྒོད་པ་དང་། སྐྱིན་གོར་དང་། སྦྲང་རྩིའི་སྦྲང་བུ་རྣམས་ནི་ཞག་བཅུ་ཚུན་ཆད་ཀྱིས་སོ། །སྟག་དང་། བྱིལ་དང་། ལྦ་དང་། བྱ་རྣམས་དང་། བར་སྣང་ལས་སྒྲ་བྱུང་བ་རྣམས་ཀྱིས་ནི་འབྲས་བུ་འཕྲལ་དུ་འབྱུང་ངོ་། །ཡང་བྱ་དང་། གྲོག་
སྤུར་དང་། ཕྱེ་མ་ལེབ་རྣམས་ཀྱིས་ནི་ཞག་བཅུ་ཚུན་ཆད་ཀྱིས་སོ། །ཡང་བྱི་བ་དང་། སྦྲུལ་དང་། དེ་བཞིན་དུ་སྦྲང་བུ་མང་པོའི་ལྟས་བསྟན་པ་ལས་ནི་ཟླ་བ་གཅིག་ཏུ་ཤེས་པར་བྱའོ། །རི་དགས་ཀྱི་རིགས་རྣམས་དང་། བྱ་དག་གི་སྐད་བྱུང་བ་ནི་ཟླ་བ་གསུམ་གྱིས་འབྲས་བུ་འབྱིན་ཏོ། དུས་ཚིགས་ཀྱི་མཚན་

མ་རྣམས་ནི་ཞག་བདུན་ཚུན་ཆད་ཀྱིས་སོ། །དྲི་ཟའི་གྲོང་ཁྱེར་ཆགས་པ་ནི་ཟླ་བ་གསུམ་གྱིས་འབྲས་བུ་འབྱུང་བར་བཤད་དོ། །ལས་སྣ་ཚོགས་བསྟན་པའི་འབྲས་བུ་འབྱུང་བའི་དུས་བསྟན་པའི་ལེའུ་སྟེ་བཅུ་བཞི་པའོ།། །།གནོད་པའི་ལྟས་ངན་རྣམས་ཀྱི་རྒྱུ་བསྟན་པ་
དང་། དེ་དག་ངོ་ལོན་གྱི་ཆོ་ག་བསྟན་པ། ཡོང་གི་སྲིད་པ་མ་ཡིན་པ་ཕྱིན་ཅི་ལོག་ཏུ་སྣང་བ་གང་ཡིན་པ་དེ་དག་ནི་ཕལ་ཆེར་མི་དགའ་བའི་འབྲས་བུའི་དབུས་སུ་འབྱིན་པར་རིག་པར་བྱའོ། །དེ་ཅིའི་ཕྱིར་ཞེ་ན། དེ་དག་གི་རྒྱུ་ནི་འདི་ལྟར་ཉེས་པར་སྤྱོད་པ་མང་པོ་ལ་སོགས་ཤིང་བསགས་པ་ལས་བྱུང་བའི་ཕྱིར་ཏེ།
དེ་དག་ཡང་ཁ་ཅིག་ལས་ངན་པའི་དབང་གིས་ཡུལ་ལོག་པར་སྣང་བར་གྲུབ་པ་ཡང་ཡོད། ཁ་ཅིག་མི་མ་ཡིན་པ་དག་གིས་སྦྲན་པའི་ཕྱིར་ཆེད་དུ་བསྟན་པ་དག་ཡོད་པས་ན་གང་དག་མི་སྟོན་པ་ལྟར་སྣང་བ་དེ་དག་ཀྱང་འདིར་ཐུབ་པ་ལྷའི་མིག་ཅན་དེ་དག་གིས་བསྟན་པ་བཞིན་ངེས་ཅན་དུ་གཟུང་བར་བྱའོ། །གང་དག་
ཁ་ཅིག་ཏུ་དངོས་པོ་མི་སྲིད་པ་ལྟ་བུ་ཞིག་ཏུ་བརྒྱལ་སྣང་ན། དེར་ཡོན་ཏན་ཞིག་ན་དགེ་ཞིང་བཟང་བ་དང་། ཕྱིན་ཅི་ལོག་ཅིག་ནའང་མི་དགེ་བའི་དོན་དུ་རིག་པར་བྱའོ། །དེ་ལྟར་མི་དགེ་བར་གྱུར་བའི་མཚན་མ་དེ་དག་ནི་གཉེན་པོ་སོ་སོར་བརྟེན་པ་དག་གིས་ཟློག་པར་འགྱུར་སྲིད་དེ། དེ་དག་ཀྱང་གང་ཞེ་ན། བསོད་
ནམས་ལ་རབ་ཏུ་གནས་བའི་སེམས་དང་ལྡན་པ་རྣམས་དང་། རྣམ་པར་དག་པ་ལ་རྟེན་པ་དག་དང་། སྦྱིན་སྲེག་དང་། བཟླས་བརྗོད་ལ་བརྩོན་པར་བྱ་བ་དང་། སེར་སྣ་བཅོམ་པ་དང་། ལྷ་དང་བྲམ་ཟེ་དག་ལ་མཆོད་པ་དང་། ཞི་བ་དང་རྒྱས་པའི་བཟླས་བརྗོད་དང་། སྦྱིན་སྲེག་གི་ཆོ་ག་བྱ་བ་དང་། བསམ་པ་
དྲི་མ་མེད་པས་ནོར་རབ་ཏུ་སྦྱིན་པ་དག་གི་མཚན་མ་ངན་པ་དག་གིས་མི་ཆུགས་ཤིང་རྣམ་པར་འཇིག་པར་བྱེད་དོ། །གལ་ཏེ་གཉེན་པོ་བྱེད་པའི་སྟོབས་དག་གིས་ཀུན་དུ་ཟློག་པར་གྱུར་ན་ཡང་རྒྱལ་པོ་འཆི་བ་ལས་རབ་ཏུ་བཅད་དེ་ཚེ་ནུར། གྲོང་དང་། གྲོང་ཁྱེར་དང་། ཡུལ་འཁོར་དེ་དག་རྒྱུག་ཅིང་རྣམ་པར་འཇིག་པ་
ཡང་ཡུན་རིང་དུ་གནས་པ་ཙམ་དུ་འགྱུར་བར་བསྟན་ཏོ། །ཐུབ་པའི་ཚོགས་མཆོག་གར་ག་ལ། །བྷ་ར་དྷ་ཛ་གཽ་ཏ་མས། །ལྷ་ཡུལ་བར་སྣང་ས་བླ་དང་། །གཟའ་སྐར་སྲོག་ཆགས་རྣམས་ཀྱི་ལྟས། །ས་བདག་མི་ཡི་རྒྱལ་པོ་དང་། །གྲོང་དང་ཡུལ་འཁོར་གནས་པ་ལ། །གནོད་པར་གྱུར་བའི་ལྟས་

འབྱུང་ལ། །ཆོ་ག་གང་དང་གང་དག་གིས། །ཞུ་བར་འགྱུར་བ་ཞུས་བ་ལས། །ཐུབ་པ་གར་གས་ལུང་བསྟན་པ། །ཕན་པར་འགྱུར་བའི་ཆོ་ག་གད། །གཽ་ཏ་མས་ཉན་པར་གྱིས། །དང་པོར་སྦྱིན་པ་གཏང་བྱ་སྟེ། །ལྷ་དང་བྲམ་ཟེ་མངོན་མཆོད་ན། །སྦྱིན་སྲེག་བཟླས་བརྗོད་མཆོད་སྦྱིན་གྱིས། །
གཏོང་བའི་ངོ་ལོན་བྱ་བར་བསྟན། །དེ་ལ་ཐོག་མར་བ་ལང་དང་། །དབྱིག་དང་གོས་ལ་སོགས་པ་དག །བྲམ་ཟེ་རྣམས་ལ་སྦྱིན་བྱིན་ནས། །སོ་སོར་ཁྱིམ་དུ་རྒྱལ་པོ་ལ། །གཙོ་བོ་དག་ལ་ཅི་རིགས་པར། །དབང་སྒྱུར་བ་ནི་ལེགས་པར་བྱ། །མདུན་ན་འདོན་ཞིང་མཉམ་གཞག་པ། །ཞག་བདུན་སྨྱུང་བ་
བྱས་གྱུར་པས། །ལྷ་ལ་གཏོར་མ་རབ་ཕུལ་ཏེ། །ཨུ་དུམ་བཱ་རའི་ཡམ་ཤིང་སྲེག །ཤིང་མར་བཏགས་པ་བརྒྱ་རྩ་བརྒྱད་ནང་པར་ཞིང་བསྔགས་རིག་པས་སྦྱིན་སྲེག་བྱའོ། །ཡང་ན་བྲམ་ཟེ་གཙང་མ་ཟས་སུ་མར་ཟ་ཞིང་བཟའ་བ་དང་བཅའ་བ་སྤངས་ཏེ། ཞག་གསུམ་སྨྱུར་བ་བྱས་པའི་སྔགས་མཁན་
གྱིས་རིག་སྔགས་ཏྲ་ཏ་ར་མ་ཞེས་བྱ་བ་འདིས་ཨ་པ་མ་རྒའི་ཡམ་ཤིང་བསྲེག་ཤིང་མར་ལ་བཏགས་པ་བརྒྱ་རྩ་བརྒྱད་སྦྱིན་སྲེག་བྱའོ། །ཡང་རྒྱལ་པོའི་ཕ་བྲང་ངམ། གྲོང་ཁྱེར་རམ། ཡུལ་གྱི་ཕྱིར་རྒྱལ་པོའི་མདུན་ན་འདོན་གྱི་ལྷ་ལ་ཞག་བདུན་དུ་གཏོར་མ་ཕུལ་ལ། མར་བྲེ་དོའམ། ཡང་ན་བྲེག་དམར་ལ་
བཏགས་པའི་ནས་བྲེའུ་ཆུང་གཉིས་ཁོ་ནས་སྦྱིན་སྲེག་བྱའོ། །དེ་ལྟར་སྦྱིན་སྲེག་གི་ཆོ་ག་ཟིན་ནས་བྲམ་ཟེ་རྣམས་བརྒྱའམ། དེ་ལས་ལྷག་པ་དག་ལའོ་ཐུག་བླུད་པའམ། ཡང་ན་ཞག་བདུན་དུ་ཆོས་སྟོན་བྱའོ། །དེའི་འོག་ཏུ་བྲམ་ཟེ་དག་ལ་ཡོན་སྦྱིན་པ་ནི་གསེར་དང་། དངུལ་དང་། རྟ་དང་། གླང་དང་། གོས་
རྣམ་པ་སྣ་ཚོགས་དག་སྦྱིན་པར་བྱའོ། །ཡང་ན་བྲམ་ཟེ་རྣམས་ལ་གླང་གཅིག་དང་བཅུ་སྦྱིན་པ་སྟེ། ཆོ་ག་འདི་ལྟར་བྱས་ན་ལྟས་ལས་འབྱུང་བའི་གནོད་པ་ཐམས་ཅད་ཞི་ཞིང་བཟློག་པར་འགྱུར་རོ། །ལྟས་ལས་གནོད་པར་འགྱུར་བའི་ངོ་ལོན་གྱི་ཆོ་ག་བསྟན་པའི་ལེའུ་སྟེ་བཅོ་ལྔ་པའོ།། །།ཐུབ་པ་ཆེན་པོ་དྲང་སྲོང་
སྐར་མའི་ལྟས་ཀྱི་གཙུག་ལག་རྨ་བྱའི་ལྟས་སྣ་ཚོགས་བསྟན་པ་ཞེས་བྱ་བའི་ལྟས་ཇི་སྙེད་པ་རྫོགས་སོ། །།ཨཱ་རྱ་བྱཱ་ཀ་ར་ཎའི་ནང་ནས་འབྱུང་བ་གཟའ་དང་རྒྱུ་སྐར་གྱི་རང་བཞིན་བཤད་པ་རྒྱུ་སྐར་ཉི་ཤུ་རྩ་བརྒྱད་ནི་འདི་ལྟ་སྟེ། སྨིན་དྲུག་དང་། སྣར་མ་དང་། མགོ་དང་། ལག་དང་། ནབ་སོ་དང་། རྒྱལ་

དང་། སྐག་དང་། མཆུ་དང་། གྲེ་དང་། དབོ་དང་། མེ་བཞི་དང་། ནག་པ་དང་། ས་རི་དང་། ས་ག་དང་། ལྷ་མཚམས་དང་། སྣྲོན་དང་། སྣུབས་དང་། ཆུ་སྟོད་དང་། ཆུ་སྨན་དང་། བྱི་བཞིན་དང་། གྲོ་བཞིན་དང་། མོན་གྲེ་དང་། མོན་གྲུ་དང་། ཁྲུམས་སྟོད་དང་། ཁྲུམས་
སྨད་དང་། ནམ་གྲུ་དང་། ཐ་སྐར་དང་། བྲ་ཉེ་དང་། འདི་རྣམས་ནི་རྒྱུ་སྐར་ཉི་ཤུ་བརྒྱད་དང་དོ། །དེ་ལས་རྒྱུ་སྐར་ནི་དུ། དབྱིབས་ནི་ཇི་སྙེད་ཡོད་། ཡུད་ཙམ་དང་ལྡན་པ་ཇི་སྙེད། ཟས་ནི་ཅི། རུས་ནི་ཅི། ལྷ་རྣམས་ནི་གང་། ཀྱི་བྲམ་ཟེ་པདྨའི་སྙིང་པོ་ཅན་སྨིན་དྲུག་ནི་སྐར་མ་དྲུག་སྟེ། དབྱིབས་ནི་སྤུ་གྲི་ལྟ་བུའོ།
ཡུད་ཙམ་སུམ་ཅུ་དང་ལྡན་པའི་ཆ་དྲུག་དང་བཅས་པའོ། །ཟས་ནི་ཞོའོ། །ལྷ་ནི་མེ་ལྷའོ། །རུས་ནི་རྗེའུ་རིགས་ཀྱི་རྒྱུད་དོ། །རྒྱུ་སྐར་སྣར་མ་ནི་སྐར་མ་ལྔ་སྟེ། དབྱིབས་ནི་ཤིང་རྟ་ལྟ་བུའོ། །ཡུད་ཙམ་ནི་བཞི་བཅུ་རྩ་ལྔ་དང་ལྡན་པའི་ཆ་བདུན་དང་བཅས་པའོ། །ཁ་ཟས་ནི་ཞོ་དང་སྦྲང་རྩིར་སྦྱར་བའོ། །ལྷ་ནི་སྐྱེ་དགུའི་བདག་
བའོ། །རུས་ནི་གོ་ཏ་མའོ། །རྒྱུ་སྐར་ནི་སྐར་མ་གསུམ་སྟེ། དབྱིབས་ནི་རི་དགས་ཀྱི་མགོ་ལྟ་བུའོ། །ཡུད་ཙམ་ནི་སུམ་བུ་དང་ལྡན་པའི་ཆ་དང་བཅས་པའོ། །ཟས་ནི་རི་དགས་ཀྱི་ཤའོ། །ལྷ་ནི་ཟླ་བའོ། །རུས་ནི་བྷ་ར་དྷྭ་ཛའོ། །རྒྱུ་སྐར་ལག་ནི་སྐར་མ་གཅིག་སྟེ། དབྱིབས་ནི་སོག་ལེ་ལྟ་བུའོ། །ཡུད་ཙམ་བཅོ་ལྔ་
དང་ལྡན་བའི་ཆ་བདུན་དང་བཅས་པའོ། །ཁ་ཟས་ནི་ཁྲག་གོ། །ལྷ་ནི་དྲག་ཤུལ་ཅན་ནོ། །རུས་ནི་དམར་པོའི་རྒྱུད་དོ། །རྒྱུ་སྐར་ནབ་སོ་ནི་སྐར་མ་གཉིས་ཏེ། དབྱིབས་ནི་ཁང་པའི་གདུང་ལྟ་བུའོ། །ཡུད་ཙམ་བཞི་བཅུ་རྩ་ལྔ་དང་ལྡན་པའི་ཆ་བདུན་དང་བཅས་པའོ། །ཁ་ཟས་ནི་མར་དང་ཁུར་བའོ། །ལྷ་ནི་ཉི་
མའོ། །རུས་ནི་དབང་བྱེས་དོ། །རྒྱུ་སྐར་རྒྱལ་ནི་སྐར་མ་གསུམ་སྟེ། དབྱིབས་ནི་རིལ་བ་ལྟ་བུའོ། །ཡུད་ཙམ་སུམ་ཅུ་དང་ལྡན་ནོ། །ཁ་ཟས་ནི་སྦྲང་དང་སྤོས་སོ། །ལྷ་ནི་ཕུར་བུའོ། །རུས་ནི་རྩ་ཤུན་གྱོན་པའི་རྒྱུད་དོ། །རྒྱུ་སྐར་སྐག་ནི་སྐར་མ་དྲུག་སྟེ། དབྱིབས་ནི་སྦྲུལ་མགོའི་གདེངས་ཀ་ལྟ་བུའོ། །ཡུད་ཙམ་
བཅོ་ལྔ་དང་ལྡན་པའི་ཆ་བདུན་དང་བཅས་བའོ། །ཁ་ཟས་ནི་སྦྲུལ་གྱི་ཤའོ། །ལྷ་ཡང་སྤྲུལ་ལོ། །རུས་ནི་དམའ་བའི་རྒྱུད་དོ། །པདྨའི་སྟིང་པོ་ཅན་རྒྱུ་སྐར་འདི་བདུན་ནི་ཤར་སྒོར་གཏོགས་སོ། །རྒྱུ་སྐར་མཆུ་ནི་སྐར་མ་དྲུག་སྟེ། དབྱིབས་ནི་ཆུ་པོ་ལྟ་བུའོ། །ཡུད་ཙམ་སུམ་ཅུ་དང་འབྲེལ་བའི་མཚན་ཡིན་

ནོ། ཟས་ནི་ཏིལ་དང་སྦྱར་བའི་ཐུག་པའོ། །ལྷ་ནི་སྤེན་པའོ། །རུས་ནི་སེར་སྐྱའི་རྒྱུད་དོ། །རྒྱུ་སྐར་གྲེ་ནི་སྐར་མ་གཉིས་ཏེ། དབྱིབས་ནི་རྩིག་པའོ། །ཡུད་ཙམ་ནི་སུམ་ཅུ་དང་ལྡན་པའི་ཆ་བདུན་དང་བཅས་པའོ། །ཁ་ཟས་ནི་ཞག་དྲུག་ཅུས་སྨིན་པའི་འབྲས་སམ་ཏིལ་གྱི་ཚིགས་མ་ཟའོ། །ལྷ་ནི་ཁྱབ་
མཇུག་གོ། །རུས་ནི་གཞོན་རྩི་མོའི་ཁྱིམ་ཐབ་ཀྱི་རྒྱུད་དོ། །རྒྱུ་སྐར་དབོ་ནི་སྐར་མ་གཉིས་ཏེ། དབྱིབས་ནི་ཁྲི་ལྟ་བུའོ། །ཡུད་ཙམ་བཞི་བཅུ་དང་ལྡན་པའི་ཆ་བདུན་དང་བཅས་པའོ། ཁ་ཟས་ནི་ཁྲེའོ། །ལྷ་ནི་ཉི་མ་དང་གཤིན་རྗེའོ། །རུས་ནི་ཨེ་ཏིའི་རྒྱུད་དོ། །རྒྱུ་སྐར་མེ་བཞི་ནི་སྐར་མ་ལྔ་སྟེ། དབྱིབས་
ནི་ལག་པ་ལྟ་བུའོ། །ལྷ་ནི་ར་སྐྱེས་ལ་ཞོན་པའོ། །ཡུད་ཙམ་སུམ་ཅུ་དང་ལྡན་པའི་ཆ་བདུན་དང་བཅས་པའོ། །ཟས་ནི་བྱ་སྣ་ཚོགས་དང་སྲེ་དའོ། །རས་ནི་འོད་སྲུངས་ཀྱི་རྒྱུད་དོ། །རྒྱུ་སྐར་ནག་པ་ནི་སྐར་མ་གཅིག་སྟེ། དབྱིབས་ནི་པདྨའི་སྙིང་པོ་འདྲའོ། །ལྷ་ནི་ཉི་མའོ། །ཡུད་ཙམ་ནི་སུམ་ཅུ་དང་ལྡན་
པའི་ཆ་དང་བཅས་པའོ། །ཁ་ཟས་ནི་ཤིང་ཏོག་སྣ་ཚོགས་ཟའོ། །རུས་ནི་སཱ་ལའི་ཤིང་དྲུང་བའི་རྒྱུད་དོ། །རྒྱུ་སྐར་ས་རི་ནི་སྐར་མ་གཅིག་སྟེ། དབྱིབས་ནི་ནོར་བུ་རིན་པོ་ཆེ་ལྟ་བུའོ། །ཡུད་ཙམ་བཅོ་ལྔ་དང་ལྡན་པའི་ཆ་བདུན་དང་བཅས་པའོ། །ཁ་ཟས་ནི་ཕྱེ་དང་ཏིལ་ཐུག་སྦྱར་བ་དང་། བ་ལ་སྲན་སྡེའུ་བཏགས་པ་
ཟའོ། །ལྷ་ནི་རླུང་ལྷའོ། །རུས་ནི་ཡིད་ཆེན་གྱི་རྒྱུད་དོ། །རྒྱུ་སྐར་ས་ག་ནི་སྐར་མ་བཞི་སྟེ། དབྱིབས་ནི་རའི་རྟེན་མགོ་ལྟ་བུའོ། །ཡུད་ཙམ་བཞི་བཅུ་ལྔ་དང་ལྡན་པའི་ཆ་བདུན་དང་བཅས་པའོ། །ཁ་ཟས་ནི་ཏིལ་དང་། རྒྱ་སྲན་སྨུག་པོ་ཟའོ། །ལྷ་ནི་དབང་པོ་དང་མེ་ལྷའོ། །རུས་ནི་མཚན་མོ་ཞེས་
བྱ་བའི་རྒྱུད་དོ། །ཀྱེ་པདྨའི་སྙིང་པོ་ཅན་རྒྱུ་སྐར་བདུན་པོ་འདི་དག་ནི་ལྷོ་ཕྱོགས་ཀྱི་སྒོར་གཏོགས་སོ། །རྒྱུ་སྐར་ལྷ་མཚམས་ནི་སྐར་མ་བཞི་སྟེ། དབྱིབས་ནི་གླང་པོ་ཆེའི་མགོ་དང་སྣ་ལྟ་བུའོ། །ཡུད་ཙམ་ནི་སུམ་ཅུ་དང་ལྡན་པའི་ཆ་དང་བཅས་པའོ། །ཟས་ནི་ཆང་དང་། སྲན་ཆུང་དང་། སྦྲང་རྩིའོ། །ལྷ་ནི་
ཉི་མའོ། །རུས་ནི་སྤེན་པ་དང་རྒྱུད་འགྲོའོ། །རྒྱུ་སྐར་སྣྲོན་ནི་སྐར་མ་གསུམ་མོ། །དབྱིབས་ནི་ཐེམ་སྐས་ལྟ་བུའོ། །ཡུས་ཙམ་བཅོ་ལྔ་དང་ལྡན་པའི་ཆ་དང་བཅས་པའོ། །ཁ་ཟས་ནི་འབྲས་སཱ་ལུ་དང་། །མར་དང་། འབྲས་ཐུག་གོ། །ལྷ་ནི་དབང་པོའོ། །རུས་ནི་ལེགས་བྱེད་ཀྱི་རྒྱུད་དོ། །རྒྱུ་སྐར་སྣུབས་ནི་སྐར་མ་

དགུ་སྟེ། དབྱིབས་ནི་སྐར་མ་གསུམ་དང་ལྡན་པའི་རི་དགས་ཀྱི་རྒྱལ་པོ་རྨད་དུ་བྱུང་བའི་རལ་པ་ལྟ་བུའོ། །ཡུད་ཙམ་ནི་སུམ་ཅུ་དང་ལྡན་པའི་ཆ་བདུན་དང་བཅས་པའོ། །ཁ་ཟས་ནི་འོ་མ་དང་། ནགས་ཀྱི་རྩ་བ་དང་། སྡོང་བུ་དང་། འབྲས་ཟའོ། །ལྷ་ནི་སྡོང་བུ་ཅན་ནོ། །རུས་ནི་ཀ་ཏ་ཡ་ནའི་
རྒྱུད་དོ། །རྒྱུ་སྐར་ཆུ་སྟོད་ནི་སྐར་མ་བཞི་སྟེ། དབྱིབས་ནི་མཆོད་རྟེན་ལྟ་བུའོ། །ཡུད་ཙམ་སུམ་ཅུ་དང་ལྡན་པའི་ཆ་བདུན་དང་བཅས་པ་ཅན་གྱི་རྒྱུད་དོ། །ཁ་ཟས་ནི་ནྱ་གྲོ་དྷ་ཟའོ། །ལྷ་ནི་ཆུ་ལྷའོ། །རུས་ནི་ཀ་ཏྱ་ཞེས་བྱ་བའི་རྒྱུད་དོ། །རྒྱུ་སྐར་ཆུ་སྨད་ནི་སྐར་མ་བཞི་སྟེ། དབྱིབས་ནི་གོམ་པ་གཡོན་པ་ལྟ་བུའོ། །ཡུད་ཙམ་
ནི་བཞི་བཅུ་རྩ་ལྔ་དང་ལྡན་པའི་ཆུ་བདུན་དང་བཅས་པའོ། །ཁ་ཟས་ནི་སྦྲང་དང་སྤོས་སོ། །ལྷ་ནི་ཐམས་ཅད་ཅེས་བྱའོ། །རུས་ནི་སྟག་དགུ་ཞེས་བྱ་བའི་རྒྱུད་དོ། །རྒྱུ་སྐར་བྱི་བཞིན་ནི་སྐར་མ་གསུམ་སྟེ། དབྱིབས་ནི་གླང་མགོ་ལྟ་བུའོ། །ཡུད་ཙམ་ནི་དྲུག་དང་ལྡན་པ་ལས་ཡུད་ཙམ་ཅིག་ལ་ཐོག་མར་ལས་བྱེད་དོ། །
ཁ་ཟས་ནི་རླུང་ཟའོ། །ལྷ་ནི་ཚངས་པའོ། །རུས་ནི་གསོ་མ་ཅན་གྱི་རྒྱུད་དོ། །རྒྱུ་སྐར་གྲོ་བཞིན་ནི་སྐར་མ་གསུམ་སྟེ། དབྱིབས་ནི་རྔ་ལྟ་བུའོ། །ཡུད་ཙམ་ནི་སུམ་ཅུ་དང་ལྡན་པའི་ཆ་བདུན་དང་བཅས་པའོ། ཁ་ཟས་ནི་མར་སར་བསྲུབས་མ་ཐག་པ་དང་བྱ་ཤ་ཟའོ། །ལྷ་ནི་ཁྱབ་འཇུག་གོ། །རུས་ནི་མོོད་གལ་གྱི་བུའི་
རྒྱུད་དོ། །ཀྱེ་པདྨའི་སྙིང་པོ་ཅན་རྒྱུ་སྐར་བདུན་པོ་འདི་དག་ནི་ནུབ་སྐོར་གཏོགས་སོ། །རྒྱུ་སྐར་མོན་གྲེ་ནི་སྐར་མ་བཞི་སྟེ། དབྱིབས་ནི་བྱ་ལྟ་བུའོ། །ཡུད་ཙམ་ནི་སུམ་ཅུ་དང་ལྡན་པའི་ཆ་བདུན་བཅས་པའོ། །ཁ་ཟས་ནི་བྱི་ལའི་ཤ་ལ་རེག་པར་བྱེད་པ་དང་། རྒྱ་སྲན་སྨུག་པོ་ཟའོ། །ལྷ་ནི་ནོར་ལྷའོ། །རུས་ནི་
གནས་བཞེས་བྱ་བའི་རྒྱུད་དོ། །རྒྱུ་སྐར་མོན་གྲུ་ནི་སྐར་མ་བརྒྱ་སྟེ། དབྱིབས་ནི་སྐར་མ་གཅིག་དང་འབྲེལ་པས་མེ་ཏོག་གི་ཕུང་པོ་འདྲའོ། །ཡུས་ཙམ་ནི་སུམ་ཅུ་དང་ལྡན་པའི་ཆ་བདུན་དང་བཅས་པའོ། །ཁ་ཟས་ནི་ར་ཤ་ཟའོ། །ལྷ་ནི་ཆུ་ལྷའོ། །རུས་ནི་སྐར་མའི་བུའི་རྒྱུད་དོ། །རྒྱུ་སྐར་ཁྲུམས་སྟོད་ནི་སྐར་མ་གཉིས་
ཏེ། དབྱིབས་ནི་ཤིང་རྟ་འདྲའོ། །ཡུད་ཙམ་ནི་སུམ་ཅུ་དང་ལྡན་པའི་ཆ་བདུན་དང་བཅས་པའོ། །ཁ་ཟས་ནི་ལུག་གི་ཤ་དང་ཁྲག་གོ། །ལྷ་ནི་འབབ་ཞིག་འཚོ་ཞེས་བྱའོ། །རུས་ནི་སྐྱེ་བོའི་ལས་ཀྱི་རྒྱུད་དོ། །རྒྱུ་སྐར་ཁྲུམས་སྨད་ནི་སྐར་མ་གཉིས་ཏེ། དབྱིབས་ནི་ཤིང་རྟ་འདྲའོ། །ཡུད་ཙམ་བཞི་བཅུ་རྩ་ལྔ་

དང་ལྡན་པའི་ཆ་བདུན་དང་བཅས་པའོ། །ཁ་ཟས་ནི་བ་ལ་སྲན་ནོ། །ལྷ་ནི་སྦྲུལ་དང་གཟའོ། །རུས་ནི་ནོར་རྒྱལ་གྱི་རྒྱུད་དོ། །རྒྱུ་སྐར་ནམ་གྲུ་ནི་སྐར་མ་སུམ་ཅུ་རྩ་གཉིས་ཏེ། དབྱིབས་ནི་སྐར་མ་གཅིག་དང་ལྡན་པས་གྲུ་ལྟ་བུའོ། །ཡུད་ཙམ་ནི་སུམ་ཅུ་དང་ལྡན་པའི་ཆ་བདུན་དང་བཅས་པའོ། །དེའི་ཟས་ནི་
ཕྱེ་དང་ཤའོ། །ལྷ་ནི་ཉི་མའོ། རུས་ནི་བསྐྱེས་པའི་བུ་ཞེས་བྱ་བའི་རྒྱུད་དོ། །རྒྱུ་སྐར་ཐ་སྐར་ནི་སྐར་མ་གསུམ་སྟེ། དབྱིབས་ནི་རྟ་མགོའི་མགུལ་པ་ལྟ་བུའོ། །ཡུད་ཙམ་ནི་སུམ་ཅུ་དང་ལྡན་པའི་ཆ་བདུན་དང་བཅས་པའོ། །ཁ་ཟས་ནི་སྦྲང་རྩི་དང་ཤ་ཟའོ། །ལྷ་ནི་དྲི་ཟའོ། །རུས་ནི་རྟ་འཇིག་གི་རྒྱུད་དོ། །རྒྱུ་སྐར་
བྲ་ཉེ་ནི་སྐར་མ་གསུམ་སྟེ། དབྱིབས་ནི་མོ་མཚན་ལྟ་བུའོ། །ཡུད་ཙམ་ནི་སུམ་ཅུ་དང་ལྡན་ནོ། །ཁ་ཟས་ནི་ཏིལ་དང་འབྲས་སོ། །ལྷ་ནི་གཤིན་རྗེའོ། །རུས་ནི་བརྒའི་རྒྱུད་དོ། །པདྨའི་སྙིང་པོ་ཅན་རྒྱུ་སྐར་བདུན་པོ་འདི་རྣམས་བྱང་གི་སྒོར་གཏོགས་སོ། །ལེའུ་བཅུ་དྲུག་གོ།། །།ནམ་མཁའ་ལས་
འབྱུང་བ་བརྟག་པའི་ལེའུ་ལས་འབྱུང་བ་གཤེན་རྗེ་དང་། ཆུ་ལྷ་དང་། དབང་པོ་དང་། ལུས་ངན་ལས་དབྱུག་པ་ལྟ་བུ་ཤར་ཤར་རོ་མཚན་མོ་འམ་ནམ་ཕྱེད་ཀྱི་དུས་ན་ཡུད་ཙམ་མམ། ཡུད་ཙམ་གསུམ་གྱི་བར་དུ་ནམ་མཁའ་ལས་ཕལ་ཆེར་རབ་ཏུ་སྣང་བ་ཡལ་ག་མང་པོ་རྒྱལ་ཆེན་དྲང་པོ་ཤིན་ཏུ་རིང་བ་རབ་ཏུ་འཕྲོས་པ་
བྱུང་ན་ཟླ་བ་གཅིག་གིས་དེའི་ཡུལ་འཁོར་དུ་འཐབ་པ་དང་། ལོ་ལ། མིའི་དབང་པོ་དང་། ཆར་པ་ལ་གནོན་པར་བྱེད་དོ། །ལེའུ་སྟེ་བཅུ་བདུན་པའོ།། །།ལྗང་སྔོན་དང་། རྩུབ་པོ་དང་། བར་ཆད་པ་དང་། ལྗང་སེར་དང་། འོད་འཚེར་པ་དང་། དུང་པ་ལྟ་བུ་དང་། སྦྲུལ་འདྲ་བ་དང་། དབྱུག་པ་འདྲ་བ་
བརྒྱད་སྣང་ན་ཆར་མི་འབབ་པ་དང་། ལོ་ཟས་དང་། བཀྲེས་པ་དང་། སྲོག་ཆགས་ལ་སོགས་པ་ལ་འཇིགས་པར་འགྱུར་རོ། །ཤིང་ཏ་ལ་ཕྱེད་ཙམ་སྣང་བའམ། །ཤིང་ཏ་ལ་གཉིས་སམ། གསུམ་མམ་བཞིའམ། །ལྔ་ཙམ་གྱི་དབྱིབས་ལྟར་སྣང་ན་འཕྲལ་དུ་སྨོན་ནོ། །ཡང་ན་ཟླ་བ་བཅུ་གཉིས་སམ།
ཟླ་བ་བརྒྱད་བརྒྱད་ནི་ལོ་ཉེས་དང་། མིའི་དབང་པོའམ། ཆུ་སྐམ་པ་དང་། འཆི་བ་དང་། འཐབ་མོའི་གཡུལ་དང་། ནོར་སྟོར་པའི་རྣམ་པར་སྨིན་པ་འབྱུང་བར་འགྱུར་རོ། །དེ་ཡང་མོད་ལ་ཆར་བབ་ན་གནོད་པར་མི་འགྱུར་རོ། །འབྲས་བུ་རྣམ་པར་སྨིན་པ་བསྟན་པ་ཇི་ལྟར་བཤད་པ་བཞིན་དུ་ཤར་ཕྱོགས་སམ། །

ནུབ་ཕྱོགས་སུ་དབྱུག་པ་ལྟ་བུར་སྣང་ན་རྒྱལ་པོ་གཞན་དང་། བྲམ་ཟེ་འཆི་བར་བྱེད་དོ། །བྱང་ཕྱོགས་དང་། ལྷོ་ཕྱོགས་ནས་དབྱུག་པ་ལྟ་བུར་སྣང་ན་དེའི་འཁོར་གྱི་མི་ལ་གནོད་པ་དང་། མེའི་འཇིགས་པར་འགྱུར་རོ། །ཤིང་རིངས་ལྟར་ཐད་ཀར་བྱུང་བའམ། ཆུ་རླུང་ས་མང་པོ་ལྟར་སྣང་བའམ། །
མིག་མང་ས་རིས་ལྟ་བུའི་དབྱུག་པར་འདུག་ནས་རྐུན་པོའི་དཔུང་སྐྱེ་བ་དང་། ཡུལ་འཁོར་ངན་ཞིང་མི་རིགས་པ་འབྱུང་ངོ་། །རྩུབ་པོ་དང་། དུམ་བུ་དང་། འཇམ་པོ་མ་ཡིན་པ་དང་། །གློག་དང་སྐར་མདའ་དང་། གནམ་ལྕགས་དང་སྐར་མ་མཇུག་རིངས་དང་། མེས་འགག་པ་ལྟར་སྣང་བ་ལ་ཐོག་གམ། །སྐར་
མདའ་འབྲེས་ན་མིའི་དབང་པོ་དང་། ཡུལ་ཁོར་དུ་འཇིག་པར་བྱེད་དེ། ལེགས་པར་གྱུར་པའི་ཚེས་གྲངས་དང་། བྱེད་པའི་ཡུད་ཙམ་ལ་འབྱུང་བའི་དབྱུག་པ་ལྟར་སྣང་བ་ནི་གནོད་པར་མི་བྱེད་དེ། རྒྱལ་པོའི་སྲིད་ཆེ་བ་དང་ཆར་འབབ་པ་དང་། ཡུལ་ལ་ཕན་པར་འགྱུར་རོ། །ཤར་ཕྱོགས་དང་། བྱང་ཕྱོགས་ན་
དབྱུག་པ་ལྟར་སྣང་བ་དེའི་ཕྱོགས་ནས་དབྱུག་པ་ལ་གནོད་དོ། །ཕྱོགས་མཚམས་ནས་དབྱུག་པ་ལྟར་སྣང་ན་བུད་མེད་དང་། བ་ལང་སྦྲུམ་མ་རྣམས་འཇིག་གོ། །ཀྱོག་ཀྱོག་དང་། མི་མཉམ་པ་ལ་སོགས་པ་རྒྱལ་མཚན་དཀར་པོ་ལྟར་གྱེན་དུ་བྱུང་ན་རྒྱལ་པོ་དང་། ཡུལ་འཁོར་འཇིག་པ་ང་། སྐྲན་ནད་དང་། འཆི་
བར་བྱེད་དོ། །ཉིན་མཚན་ཀུན་དུ་དབྱུག་པ་རྩེ་མོ་གྱེད་པ་ལྟར་སྣང་ན་ཡུལ་གྱི་རྒྱལ་པོ་འཆི་བར་འགྱུར་རོ། །དབྱུག་པ་ལྟ་བུའི་རྩེ་མོ་ཅན་དུ་སྣང་ན་ཡུལ་ཐམས་ཅད་ཀྱི་རྒྱལ་པོ་འཆི་བ་དང་། དེའི་ཡུལ་འཇིག་པར་འགྱུར་རོ། །གལ་ཏེ་ཉིན་མཚན་རྒྱུན་མི་འཆད་པར་རྟག་ཏུ་དབྱུག་པ་ལྟ་བུ་སྣང་ན་ཡུལ་འཁོར་དེ་
འཇིག་པ་དང་། དེའི་ཡུལ་ཕྱོགས་སུ་ནད་དང་། མེ་དང་། ཆར་པ་འབབ་པོ། །ལེའུ་བཅོ་བརྒྱད་པའོ།། །།སྐར་མདའི་མཚན་མ་བཤད་པའི་ལེའུ་ལ་སྐར་མདའ་འཇའ་འདྲ་བ་དང་། གདུགས་དང་། ཤིང་གི་ཡལ་ག་འདྲ་བ་དང་། རྩ་གྲུང་པོ་དང་། དབྱིག་པ་འདྲ་བ་དང་། དཀྱིལ་འཁོར་འདྲ་
བ་དང་། འཁོར་ལོ་ལྟ་བུའི་སྐར་མདའ་སྣང་ན། བྲམ་ཟེ་དང་། རྒྱལ་རིགས་གཙོ་བོ་དམ་པ་དང་། རྒྱལ་པོའི་བཙུན་པོ་དང་། ནང་མི་དང་། ཡུལ་འཁོར་གྱི་མི་དང་། མིའི་དབང་པོ་དང་། བླ་མར་བྱ་བ་དང་། བློན་པོ་འཆི་བར་འགྱུར་རོ། །ནམ་མཁའ་ལ་སྐར་མ་སྣང་བ་ལས་གྱུར་ན་ཆར་མི་འབབ་པོ། །སྐར་

མདའ་དུས་གཉིས་སུ་བྱུང་ངམ། སྐར་མདའ་ཕར་ཕྱིར་ལོག་ན་གནམ་གར་སོང་གནས་དེར་གནོད་པར་གྱུར་རོ། །སྐར་མདའ་དཀར་ལ་དབྱིབས་ལེགས་པར་སྣང་བ་ནི་བསྔགས་པར་བྱ་བ་ཡིན་ནོ། །ཆུའི་ནང་གི་སྲོག་ཆགས་གྱ་གྱུར་འགྲོ་བ་དང་། མཚོན་ཤ་ཀཏི་དང་། སྐར་མ་དེའུ་དང་། རྟ་ལྟ་བུ་དང་། བྱི་ལ་ལྟ་བུ་དང་།
སྒྲ་དང་བཅས་པ་ཕལ་ཆེར་སྣང་ན་ཉེས་པ་མང་པོ་འབྱུང་ངོ་། སྐར་མདའ་འབར་བ་བཞིན་དུ་སོང་བ་ལས་ཕྱིར་ལོག་པ་དང་། སྐར་མདའ་གཞན་གྱིས་ཕོག་སྟེ་ཞིག་ན་ཡུལ་དེའི་རྒྱལ་པོ་ལ་གནོད་པའི་དགྲ་བསྐྱེད་དེ། ནང་པར་རམ། ནུབ་མོ་འམ། དེའི་ཚེམ་ཚེམས་སུ་སྐར་མདའ་རྩུབ་མོ་ཡོན་པོ་སྣང་ན་རབ་ཏུ་བསྔགས་པ་
མ་ཡིན་ནོ། །སྐར་མདའ་གནམ་གྱི་དབུས་སུ་སོང་ལ་སྤྲིན་གྱི་ཆུ་འཐུང་བ་ལྟར་ཞུགས་ཤིང་། སྐར་མདའི་སྒྲ་མེད་ན། སྐར་མདའི་དབུས་ཀྱི་ཚམས་ཡོད་པར་སྣང་བ། འཇམ་ཞིང་དྲང་ལ་ཤིན་ཏུ་ཡངས་ཤིང་དཀར་བ། ལོགས་གཡས་གཡོན་དུ་ཡང་ནམ་མཁའ་ལ་རྣམ་པར་རྒྱུ་བ་སྣང་ན་སྐར་མདའ་དེ་དག་དགེ་བ་སྟེ། །
འབྲས་བུ་དམ་པ་རབ་ཏུ་སྦྱིན་པར་བྱེད་དོ། །སྐར་མདའ་ཁ་ཡོད་པ་ཞིག་སྣང་ན་རྒྱལ་པོ་ལ་གནོད་པ་དང་། བཙུན་མོ་ལ་གནོད་པར་འགྱུར་རོ། །སྐར་མདའ་རྒྱབ་ཀྱིས་སོང་ལ་དུད་པས་ཆོག་པ་ལྟ་བུ་སྒྲ་ཅན་དུ་བྱུང་ན་ཡུལ་དེའི་འཁྲོར་མ་རུང་བར་འགྱུར་རོ། །སྲོད་ལ་སྐར་མདའ་བྱུང་བ་ནི་བཀྲ་ཤིས་སོ། །སྐར་མདའ་རི་
བོང་གི་ཁྲག་ལྟར་སྣང་བ་འབར་བ་ལྷུང་ན་རྒྱལ་པོ་དང་དམག་དཔོན་ལ་གནོད་དོ། །སྐར་མདའ་མཚན་མོ་ཟླ་བ་ལ་ཕོག་གམ་ཉིན་པར་ཉི་མ་ལ་ཕོག་ན་ནིའི་བདག་པོ་ཟླ་བའམ་སྐར་མདའ་ལ་མོས་པར་བྱེད་པ་དེའི་ཆིའོ། །སྐར་མདའ་རབ་ཏུ་འབར་བས་གཟའ་འམ་རྒྱུ་སྐར་ལ་མངོན་པར་ཕོག་ན་དེ་ལ་མོས་པ་རྣམས་ལ་མི་རུང་
བར་འགྱུར་རོ། །ཉེ་བར་སྐར་མདའ་མེའི་འོད་ལྟ་བུར་ལྷུང་ན་ཡུལ་འཁོར་གྱི་དབང་པོ་དང་ཡུལ་དུ་བཅས་པ་རྣམས་པར་འཇིག་གོ། །ཡུལ་གྱི་ས་གང་དུ་སྐར་མདའ་སྒྲ་གྲགས་པེ་ལྷུང་ན་ཡུལ་དེར་རྒྱལ་པོ་དང་། བླུན་པོ་དང་། རྐུན་པོའི་དྲག་ཤུལ་སྣང་བར་འགྱུར་རོ། སྐར་མདའི་ལེའུ་སྟེ་བཅུ་དགུ་
པའོ།། །།ནམ་མཁའ་ལས་སྒྲ་བྱུང་བའི་ལྟས་ཀྱི་མཚན་མ་བསྟན་པ། རླུང་གཉིས་ཕན་ཚུན་ནས་ཕྲད་པ་ལས་གནམ་གྲུམ་པ་ལྟ་བུའི་སྒྲ་བྱུང་སྟེ། དེ་ཡང་ས་ལ་བབས་པ་དང་། གྱེན་དུ་འབྱུང་བ་དང་། ཐད་དུ་དང་། རྒྱང་རིང་པོ་ཁོང་དུ་ཆུད་པར་བྱའོ། །ཉི་མ་རྩེ་ལ་སྒྲ་བྱུང་ན་རྒྱལ་རིགས་ལ་གནོད་དོ། །སྔ་

དྲོ་སྒྲ་བྱུང་ན་དམངས་རིགས་ལ་གནོད་དོ། །ཉི་མ་ཕྱེད་པའི་ཆེ་སྒྲ་བྱུང་ན་བྲམ་ཟེའི་སྡེ་ལ་གནོད་དོ། །ཉི་མ་ནུབ་པའི་ཚ་སྒྲ་བྱུང་ན་རྡེའུ་རིགས་ཀྱི་ཚོགས་ལ་གནོད་དོ། །ཉི་མ་ནུབ་ཀའི་དུས་སུ་སྒྲ་བྱུང་ན་རིགས་ངན་རྣམས་ལ་གནོད་དོ། །ནམ་གྱི་བཞི་ཐུན་གྱི་ཐོ་རངས་སྒྲ་བྱུང་ན་ལོ་ཐོག་ལ་གནོད་
དོ། །མཚན་གྱི་གུང་ལ་སྒྲ་བྱུང་ན་སྲིན་པོ་མང་པོ་ཕུང་བར་བྱེད་པར་འགྱུར་རོ། །ནམ་མཁའ་ཕན་ཚུན་ན་སྒྲ་བྱུང་ན་གླང་པོ་ཆེ་དང་། རྟ་མ་རུང་བར་བྱེད་དོ། །ནམ་ལངས་ནས་སྒྲ་བྱུང་ན་འགྲོན་པོ་མང་པོ་ལ་གནོད་དོ། །སྒྲ་བྱུང་བ་དལ་ལ་ཐུང་ན་གནོད་པ་ཆུང་ངུར་འགྱུར་རོ། །སྒྲ་རིང་དུ་བྱུང་ན་འཇིགས་པ་འབྱུང་ངོ་། །
དུས་གསུམ་གང་ཡང་རུང་བའི་མཚམས་སུ་སྒྲ་ཆེན་པོ་བྱང་ཕྱོགས་སུ་ལྷུང་ན་བྲམ་ཟེ་དམ་པ་འཆི་བར་འགྱུར་རོ། །དེ་བཞིན་དུ་རྒྱུ་སྐར་གྱི་ཚོགས་གང་གི་ཉི་མ་ལ་སྒྲ་བྱུང་ན་དེ་ལ་བརྟེན་པའི་བྲམ་ཟེ་གང་ཡིན་པ་ལ་གནོད་དོ། །བདེན་བྲལ་གྱི་ཕྱོགས་ནས་སྒྲ་བྱུང་ན་དྲག་ཤུལ་གྱི་ལས་བྱེད་པ་ལ་གནོད་དོ། །རླུང་གི་
ཕྱོགས་ནས་སྒྲ་བྱུང་ན་མཐའ་འཁོབ་ཀྱི་ལྷོ་བྲལ་ལ་གནོད་དོ། །མེའི་ཕྱོགས་ནས་སྒྲ་བྱུང་ན་མེས་འཚོ་བ་ལ་གནོད་དོ། །ཕྱོགས་རིང་དུ་སྒྲ་འབྱིན་པ་དེར་དཔའ་བོ་རྣམས་དང་། སྦྲུལ་པོ་ཆེ་ལ་གནོད་དོ། །སྒྲ་ལྟས་ཀྱི་ལེའུ་སྟེ་ཉི་ཤུ་བའོ།། །།ཉི་མ་དང་ཟླ་བ་འཁྱིམ་པའི་ལྟས་ཀྱི་བྱེ་བྲག་བསྟན་པ། །
ཉི་མའམ། །ཟླ་བའི་འོད་དང་། རླུང་གཅིག་ཏུ་འདྲེས་པ་ལས་བྱུང་བ་ནི་འོད་འཁྱིམས་པ་ཞེས་བྱ་བའོ། །དེ་ལ་མར་དང་། ཏིལ་མར་དང་། ཆུ་དང་། དངུལ་དང་། འོ་མ་དང་། ཐི་བ་ལྟ་བུའི་ཁ་དོག་ཏུ་འཁྱིམས་ན་ཆར་འབབ་པོ། །བོང་བུ་དང་། རྔ་མོ་དང་། ཤིང་རྟ་བུའི་འོད་འཁྱིམས་པ་ལ་རབ་ཏུ་ཞིག་
སྟེ། །རྣམ་པར་གྱེས་ཤིང་ཁ་དོག་ངན་པ་སྣང་ན་མི་དགེ་བར་འགྱུར་རོ། །ཉི་མ་དང་ཟླ་བ་གཉིས་ཀའི་ཉིན་མཚན་དུ་འོད་འཁྱིམས་པར་རྟག་ཏུ་འགྲོན་བཅིང་བ་དང་། མཚོན་དང་ནད་འབྱུང་ངོ་། །མེ་འབར་བ་ཞིན་དུ་འཁྱིམས་ན་མཆུ་མངོན་པར་སྐྱེའོ། །འཇའ་འདྲ་བའི་དབྱིབས་སུ་འཁྱིམས་ན་མཚོན་མང་པོ་
འབྱུང་ངོ་། །རྡུལ་འདྲ་བར་འཁྱིམས་ན་མུ་གེ་འབྱུང་ངོ་། །སུམ་རིམ་དུ་འཁྱིམས་ན་གྲོང་དང་། རྒྱལ་པོ་ལ་མི་དགེའོ། །རྒྱ་སྐྱེགས་ཀྱི་ཁུ་བ་དང་། ཞོའི་མདོག་འདྲ་བར་འཁྱིམས་ན་འཐབ་མོ་དང་གཡུལ་འབྱུང་ངོ་། །སེར་པོར་འཁྱིམས་ན་ཡུལ་འཁོར་གསུམ་དུ་འཇིགས་པར་སྟོན། །སྐྱ་བོ་དང་། ལྗང་སྔོན་དུ་

འཁྱིམས་ན་སྦྲུམ་མ་འཆིའོ། །ནོར་བུ་འདྲ་བའི་ཕྱེད་དང་སུམ་ཆའི་དུམ་བུ་གཅིག་འཁྱིམས་ན་ཆར་པ་འཕྲལ་དུ་འབབ་བོ། །མཚན་དུས་གསུམ་དུ་འཁྱིམས་ན་གྲོང་མི་དང་། རྒྱལ་པོ་འཆི་བར་འགྱུར་རོ། །ཉི་མ་གསུམ་གྱི་བར་དུ་འཇམ་ཞིང་སྣུམ་པར་འཁྱིམས་ན་ཆར་པ་འབབ་པོ། །རྩུབ་པོར་འཁྱིམས་ན་
ཆར་པ་འབབ་ན་ཟླ་བ་གཅིག་ན་འཇིགས་པ་འབྱུང་བར་སྟོན་ཏོ། །སྐར་མ་དང་གཟའི་ཐོག་ཏུ་འཁྱིམས་པས་ནོན་ན་རང་གི་མཐུ་ལས་བྱུང་བའི་འབྲས་བུར་བསྟན་པར་བྱའོ། །ཉི་ཟླ་འཁྱིམས་པའི་ལེའུ་སྟེ་ཉི་ཤུ་གཅིག་གོ། །།འཇའ་ཟུག་པའི་ལྟས་ཀྱི་མཚན་མ་བསྟན་པ། རླུང་དང་། སྤྲིན་དང་།
ཉི་མའི་འོད་ལས་བྱུང་བ་ནི་འཇའ་ཞེས་བྱའོ། །འཇའི་ཚོན་སྣ་ཚོགས་སུ་སྣང་ན་ཆར་པ་འབབ་པོ། །ཆུའི་ནང་དུ་ཟུག་ན་ཆར་རབ་ཏུ་ཆེའོ། །ཚོན་དཀར་པོ་ལ་སོགས་པ་ནི་བྲམ་ཟེ་ལ་སོགས་པ་ལ་གནོད་དོ། །སེར་སྐྱ་དང་། མེའི་མདོག་དང་། མར་ཏོག་དམར་ཟང་ཟང་རྩ་བ་སེར་བ་ལྟ་བུའི་འཇའ་ཟུག་ན་ཡུལ་དུ་
འཇིགས་པ་འབྱུང་ངོ་། །འཇའ་སྔོན་པོར་ཟུག་ན་ལོ་མ་རུང་བར་འགྱུར་རོ། །འཇའི་དབུས་ཉི་ཚེ་ཞིག་ན་ཆར་མི་ཟད་པར་འགྱུར་རོ། །མཚན་མོ་ཤར་ཕྱོགས་སུ་འཇའ་ཟུག་ན་རྒྱལ་པོ་ལ་གནོད་དོ། །ནུབ་ཕྱོགས་སུ་མཚན་མོ་འཇའ་ཟུག་ན་མིའི་གཙོ་བོ་ལ་གནོད་དོ། །ཆར་འབབ་པའི་ཚེ་འཇའ་ཟུག་ན་ཆར་འཆད་དོ། །ཆར་
མི་འབབ་པའི་ཚེ་འཇའ་ཟུག་ན་ཆར་འབབ་བོ། །ཤར་ཕྱོགས་སུ་འཇའ་ཟུག་ན་ཆར་འབབ་པོ། །ལྷོ་ཕྱོགས་ལ་སོགས་པ་ཕྱོགས་གསུམ་དུ་འཇའ་ཟུག་ན་བྲམ་ཟེ་ལ་སོགས་པ་ལ་མཆོད་པ་མང་པོ་འོང་ངོ་། །དེ་བཞིན་དུ་ལྷོ་ཕྱོགས་ནས་ནུབ་ཕྱོགས་སུ་འཇའ་ཟུག་ན་རྒྱལ་རིགས་དང་། རྗེའུ་རིགས་དང་། དམངས་རིགས་
ལ་གནོད་དོ། །དུས་གསུམ་གྱི་མཚམས་སུ་འཇའ་ཟུག་ན་ཡུལ་འཇིག་པར་བྱེད་དོ། །ཉི་མའི་རྩེ་ལ་ལྷོ་ཕྱོགས་སུ་འཇའ་ཟུག་མི་ལ་འཇིགས་པ་འོང་ངོ་། །མཚམས་སུ་འཇའ་ཟུག་ན་བུད་མེད་མ་རུང་བར་འགྱུར་རོ། །ལན་གཉིས་སུ་འཇའ་ཟུག་ན་བདེ་བ་འཕེལ་བ་བ་དང་། ལོ་ལེགས་པར་འགྱུར་རོ། །ཚེས་
གྲངས་བཟང་པོ་དང་། རྒྱུ་སྐར་བཟང་པོ་དང་། ཡུད་ཙམ་དང་། བྱེད་པ་དང་། གཟའ་བཟང་པོ་དང་། ཁྱིམ་པ་དང་། སྐབས་བཟང་པོའི་ཚེ་འཇའ་ཟུག་མ་དགེ་བ་སྟེ། རྒྱལ་པོའི་སྲིད་སྐྱེ་སྟེ། རྐུན་པོ་སྤ་གོང་བར་འོང་ངོ་། །དེ་བཞིན་དུ་ཉ་འདྲ་བ་དང་། དབུག་པ་འདྲ་བ་དང་། དྲི་ཟའི་གྲོང་ཁྱེར་ལྟ་བུ་དང་།

ཕྱོགས་ཚེག་པ་དང་བཅས་པར་སྣང་བ་ཡང་ཚུལ་གོང་མང་དང་འདྲ་ཚས་གྲངས་དང་། རྒྱུ་སྐར་དང་། གཟའ་ལ་སོགས་པ་བཟང་ངན་གྱི་ཚུལ་གོང་མ་དང་འདྲ་བར་གདོན་མི་ཟ་བར་རྟོགས་པའི་མིས་ཤེས་པར་བྱའོ། །དེ་ལྟ་བུར་སྣང་བ་གྱུར་བའི་རྗེས་ལ་ཞག་བདུན་ཚུན་ཆད་དུ་ཆར་བབས་ན་
ཞི་བ་ཡིན། ལེགས་པར་འགྱུར་རོ། །འཇའ་ལྟས་ཀྱི་ལེའུ་ཉི་ཤུ་གཉིས་པའོ།། །།ས་གཡོ་བའི་ལྟས་ཀྱི་མཚན་ཉིད་བསྟན་པ། དེ་ལ་ཆོས་མ་ཡིན་པའི་མཐུ་ལས་བྱུང་བའི་དུས་སུ་སྐར་མ་དྲུག་ཤུལ་ཅན་དང་། ཡུས་ཙམ་དང་། ཐང་ཅིག་དང་། ཚེས་གྲངས་མི་བཟད་པའི་ཆེས་གཡོས་ན་སྐྱེ་བོ་
ཐམས་ཅད་ཀྱི་ཕུན་སུམ་ཚོགས་པ་མ་ཡིན་པའི་འཇིགས་པ་འོང་བར་འགྱུར་རོ།། །།ཚས་གྲངས་བཟང་པོའི་ཚེས་གཡོས་ན་རབ་ཏུ་དགེ་བ་ཞེས་བྱའོ། །སྐར་ཚེས་གྲངས་ལ་སོགས་པ་བཟང་ངན་འདྲེས་པའི་ཚེས་གཡོས་ན་ཕན་གནོད་ཀྱི་འབྲས་བུ་ཡང་འདྲེན་པར་འགྱུར་རོ། ཚས་གྲངས་བཟང་པོའི་ཚེས་གཡོས་ན་རྒྱལ་
པོ་དང་། སྐྱེ་བོས་ཚོས་ལེགས་པའི་འབྲས་བུ་ཐོབ་པར་འགྱུར་རོ། །ས་གཡོས་བཞིན་དུ་ཡུལ་གཞན་དུ་སོང་ན་ཡུལ་དེར་གནས་པར་འགྱུར་ཞེས་བྱ་སྟེ། དེ་ཡང་ཆོས་ཉམས་པའི་ཉེས་པ་མ་བྱས་ན་ས་གཡོས་ཀྱང་ལེགས་པར་གྱུར་ཏེ། །དེ་དག་ཏུ་ཆར་འབབ་ཅིང་རབ་ཏུ་ཞི་བར་འགྱུར་རོ། །གནམ་ལྕགས་རྣོན་པོ་ལྷུང་
བའི་སྒྲ་དྲག་པོས་ས་རབ་ཏུ་གཡོས་ན་སྐྱེ་བོ་འཐབ་ཅིང་འཁོན་པ་དང་། མུ་གེ་དང་། མི་ངས་ཀྱིས་ཟད་པར་འགྱུར་རོ། །ས་གཡོ་བ་གཡས་ཕྱོགས་སུ་འགྲོ་ཞིང་འབྲུག་སྒྲ་ལྟར་མཉེན་ཞིང་ཟབ་པའི་སྒྲ་གྲགས་ལ། །དུས་ཚིགས་དང་ཚེས་གྲངས་བཟང་བ་ལམ་འཁྲུལ་པའི་སྐབས་སུ་ས་གཡོས་ན་དགེ་བར་འགྱུར་
རོ། །ནམ་གཟའ་སྐར་དྲག་པོའི་དུས་སུ་ས་གཡོས་པའི་དུས་ན་རི་དགས་དང་བྱ་རྣམས་མར་འབར་བ་བཞིན་དུ་འགྱུར་ལ། གཞན་ཡང་མི་དགེ་བའི་མཚན་མའི་ལྟས་དག་སྣང་ན་འཇིག་རྟེན་དུ་རབ་ཏུ་གནོད་པ་དྲག་པོ་འབྱུང་བར་འགྱུར་རོ། །རྒྱུ་སྐར་དང་། གཟའ་དགེ་བའི་དུས་སུ་ཡང་དེ་ལྟར་གྱུར་ན་དེའི་ཚར་འབྲས་བུ་
དགེ་བར་མི་འགྱུར་རོ། །དགེ་བའི་ལྟས་ཀྱི་མཚན་མ་བྱུང་ལ། བྱ་རྣམས་ཀྱང་ཁྲག་ཁྲིག་ལང་ལོང་མེད་ཅིང་རབ་ཏུ་ཞི་བ་དང་། རླུང་ཡང་ཞི་བར་གྱུར་པ་ནི་དགེ་བས་རབ་ཏུ་དགེ་བ་ཞེས་བྱ་སྟེ། མི་དགེ་བའི་ལྟས་ངན་དྲག་པོ་ཞི་བར་འགྱུར་རོ། །ས་གཡོས་པའི་འོག་ཏུ་གལ་ཏེ་ཆར་པ་འབབ་པ་ན་དེའི་ཚེ་བདེ་བ་

དང་། ལོ་ལེགས་པ་དང་བ། ནད་མེད་པར་འགྱུར་རོ། །ས་གཡོས་པའི་རྗེས་ལ་སྐར་མདའ་ཆེན་པོ་ལྷུང་བར་གྱུར་ན་དེའི་ཚེ་སྐྱེ་བོ་ལྟོགས་པ་དང་། མཚོན་དང་། ནད་ཀྱིས་ཟད་པར་འགྱུར་རོ། །ནམ་ས་གཡོས་པའི་རྗེས་ལ་རླུང་དྲག་པོ་ལངས་པས་གསེག་མ་ཁྱེར་ཞིང་འགྲོ་བར་འགྱུར་བའི་ཚེ་ན་མུ་གེ་འབྱུང་བར་འགྱུར་
རོ། །ད་གཡོས་ཤིང་འགྲོ་བ་དང་། རླུང་ལྡང་བ་དང་། ཉི་མ་དང་། ཟླ་བའི་འོད་རྣམས་དང་། འདི་རྣམས་མཐུན་པར་འགྲོ་ན་བཀྲ་ཤིས་ཏེ་དགེའོ། །དེ་ལྟ་བུ་དང་མི་མཐུན་པར་འགྲོ་ཞིང་ས་གཡོས་ན་མི་དགེ་སྟེ་སྨད་པ་ཡིན་ནོ། །ཟླ་བ་ཕྱེད་ཕྱེད་ཅིང་ལན་གསུམ་གསུམ་གཡོས་བ་ཟླ་བ་གཅིག་ལ་སྤྱིར་ས་ལན་
དྲུག་གཡོས་པར་གྱུར་ན་དགྲའི་ཚོགས་འོང་བར་སྟོན་ཏོ། །ཡུལ་གང་དུ་ས་གཡོ་བ་བསྟུད་པ་དེར་ཡང་དང་ཡང་ཞག་གཅིག་གམ། ཞག་བདུན་ནམ། ཞག་བཅུ་གཅིག་གམ། ཟླ་བ་ཕྱེད་དམ། ཟླ་བ་རེ་རེ་ཞིང་ས་གཡོ་འམ། །ཟླ་བ་དྲུག་ཏུའམ། ཟླ་བ་བཅུའམ། ལོ་གཅིག་ཏུའམ། ལོ་བཅུའི་བར་དུའམ། །
དེ་བས་ཀྱང་ལྷག་པར་ལན་མང་དུ་གཡོས་སམ། དེ་ལ་ས་ཉིས་འགྱུར་དུ་གཡོས་ན་ཡུལ་ཕུན་སུམ་ཚོགས་པ་དང་ལྡན་པའི་རྒྱལ་པོ་དང་དམག་དང་འཁོར་དུ་བཅས་པ་མ་རུང་བར་འགྱུར། ཡུལ་དེ་རྒྱལ་པོ་གཞན་བྱེད་དེ། དེ་ཡང་ཡུལ་དེར་རབ་ཏུ་འཚེ་ཞིང་གནོད་པ་བྱེད་པས་ཡུལ་དེ་ཉིད་དགོན་པར་གྱུར་ནས་རི་དགས་
གནས་པར་འགྱུར་རོ། །ཚུལ་གོང་མ་བཞིན་དུ་དཔྱིད་ཟླ་ཐ་ཆུངས་ལས་གཡོས་ན་གནོད་པའི་འབྲས་བུ་ཞག་བཅུ་ནས་འབྱུང་ངོ་། །དབྱར་ཟླ་ར་བ་ལས་གཡོས་ན་རྣམ་པར་སྨིན་པའི་འབྲས་བུ་ཞག་བཅུ་གཉིས་ན་འབྱུང་ངོ་། །དབྱར་ཟླ་འབྲིང་པོ་ལས་གཡོས་ན་རྣམ་པར་སྨིན་པའི་འབྲས་བུ་ཞག་ཉི་ཤུ་རྩ་ལྡན་འབྱུང་
ངོ་། །དབྱར་ཟླ་ཐ་ཆུངས་ལས་གཡོས་ན་འབྲས་བུ་ཞག་བདུན་ཅུ་རྩ་ལྔ་ན་འབྱུང་ངོ་། །སྟོན་ཟླར་བ་ལས་གཡོས་ན་རྣམ་པར་སྨིན་པའི་འབྲས་བུ་ཞག་བརྒྱད་ན་འབྱུང་ངོ་། སྟོན་ཟླ་འབྲིང་ངོ་ལས་གཡོས་ན་ཟླ་བ་གཉིས་ན་འབྱུང་ངོ་། །སྟོན་ཟླ་ཐ་ཆུངས་ལས་གཡོས་ན་འབྲས་བུ་ཟླ་བ་གསུམ་མ་འབྱུང་ངོ་། དགུན་
ཟླར་བ་ལས་གཡོས་ན་འབྲས་བུ་ཟླ་བ་གཉིས་ན་འབྱུང་ངོ་། །དགུན་ཟླ་འབྲིང་པོ་ལས་གཡོས་ན་འབྲས་བུ་ཞག་ལྔ་བཅུ་རྩ་ལྔ་ན་འབྱུང་ངོ་། དགུན་ཟླ་ཐ་ཆུངས་ལས་གཡོས་ན་འབྲས་བུ་ཞག་བརྒྱད་ན་འབྱུང་ངོ་། །དཔྱིད་ཟླ་བ་ལས་གཡོས་ན་འབྲས་བུ་ནི་ཞག་ལྔ་བུ་ན་འབྱུང་ངོ་། །དཔྱིད་ཟླ་འབྲིང་པོ་ལས་གཡོས་ན་

ཞག་ལྔ་བཅུ་རྩ་གསུམ་ན་འབྲས་བུ་འབྱུང་བར་སྐར་མཁན་གྱིས་ཤེས་པར་བྱའོ། །དེ་ལྟར་ས་གཡོས་པའི་འབྲས་བུ་ལྟར་བསྟན་པ་ཡིན་ནོ། །དེ་ལྟར་ཟླ་བའི་ངོར་རེ་ཞིང་ས་གཡོ་བའི་དམིགས་ཀྱང་ཡར་གྱི་ཚེས་གཅིག་དང་། མར་གྱི་ཚེས་བཅུ་དྲུག་དང་། མར་གྱི་ཚེས་ཉི་
ཤུ་གསུམ་དག་དང་། ཡར་གྱི་ཚེས་བཅུ་བཞི་དང་། བཅོ་ལྔ་དང་། ཉི་ཤུ་དགུ་དང་། སུམ་ཅུ་སྟེ། དུས་ཚིགས་འདི་རྣམས་ལྟ་བུའི་དུས་སུ་མ་གཡོས་པའི་འབྲས་བུ་ནི་ཚུལ་དེ་ལྟར་བལྟའོ། །ས་གཡོས་པའི་ལྷས་ཀྱི་ལེའུ་སྟེ་ཉི་ཤུ་གསུམ་པའོ།། །།ནམ་ཟླ་བ་བཅུ་གཉིས་ཀྱི་ངོ་ཀུན་
ལས་རྟག་པར་གཡོས་ཏེ། ཤིང་ཡང་འགུལ། ཆུ་ཡང་གཡོས་ཏེ། མེར་མེར་བྱེད་ཅིང་། དེ་ལྟར་དུས་ཚིགས་དང་། དུས་ཚིགས་མ་ཡིན་པར་གཡོས་ཏེ། རླུང་ལངས་པས་ཤིང་ཡང་བཅག །གྲོང་དང་། གྲོང་ཁྱེར་དང་། གྲོང་འདབ་དང་། གྲོང་དེ་ན་བརྟེན་པའི་སྐྱེ་བོ་རྣམས་མེད་པར་གྱུར་
ཏེ། གཅན་གཟན་གྱི་གནོན་ནས་ཡུལ་འབྲོག་ཏུ་གྱུར་ཏེ། །དེ་ལྟར་གཡོས་པ་ནི་གནོད་པའི་འབྲས་བུ་ལོ་བཅོ་ལྔ་ནས་ཡུལ་ཕྱོགས་དེར་ཡང་སུ་ཡང་མི་གནས་པར་འགྱུར་རོ། །རྒྱུ་སྐར་སྨིན་དྲུག་གི་ཉི་མ་ལས་གཡོས་ན་གྲོང་དང་གྲོང་ཁྱེར་ལ་མེ་བསྟུད་པར་ཤོར་ཏེ། །ཤིང་རྩེ་ཡང་ཚིག །
གོས་ནག་པོ་གྱོན་པའི་སྡེ་དང་། ནོར་བུ་མཁན་རྣམས་དང་། མགར་དང་། བྲམ་ཟེ་མེ་འབྱིན་པའི་བྱེད་སྤྱོད་པ་བྱེད་པ་འདི་རྣམས་ལ་མི་དགེ །འབྱུང་ཁུངས་ནས་ནོར་བུ་བྱུང་བ་རྣམས་དང་། འཕེལ་བ་རྣམས་ཀྱང་སུབས་པར་འགྱུར། ཡུལ་དེ་ལ་བརྟེན་པའི་བ་ལང་དང་། ཤིང་རྟ་འདྲེན་པའི་མི་དང་། བྲམ་
ཟེ་དང་། འདྲེག་མཁན་སྤུ་གྲིའི་ལས་བྱེད་པ་དང་། ཡུལ་སིན་དུ་ཞེས་བྱ་བའི་ཡུལ་ཕྱེད་ཀྱི་མི་དང་ཡུལ་ཨ་མ་བསྟ་དང་། ཡུལ་ཆུ་གྲུང་ལྔ་ཞེས་བྱ་བ་ན་གནས་པའི་མི་དང་། ཡུལ་ཤི་བ་ཞེས་བྱ་བ་དང་། ཡུལ་བ་སི་ཏི་ཞེས་བྱ་བ་དང་། ཡུལ་ཏ་ཤེར་གཞེས་བྱ་བ་དང་། ཡུལ་བརྟ་བ་དང་། ཡུལ་རྟལ་དྷ་ན་ཞེས་བྱ་
བ་དང་། །ཡུལ་གངས་ཁྲོད་ན་གནས་པ་རྣམས་དང་། ལྷོ་ཕྱོགས་ཀྱི་ལུང་པ་ན་གནས་པའི་སྐྱེ་བོ་རྣམས་ལ་གནོད་པ་འབྱུར་བར་འགྱུར། དེ་ལྟར་ས་གཡོས་པས་གཟི་བརྗིད་ཉམས་ཏེ་ནད་དྲག་པོས་འདེབས། ལྟོགས་པར་འགྱུར། ཐན་ཆེན་དང་། ཆོམ་རྐུན་

དང་། ཕ་རོལ་གྱི་དགྲ་རྣམས་ཀྱིས་གནོད་པ་དྲག་པོ་བྱེད་པར་འགྱུར་རོ། །རྒྱུ་སྐར་སྣར་མའི་ཉི་མ་ལ་ས་གཡོས་ན་ས་བོན་ཐམས་ཅད་ཆུད་ཟོས་པར་འགྱུར་རོ། །ས་ལ་འབྲུ་བཏབ་པ་ཡང་མི་སྐྱེ། དེད་པ་འདྲ་བར་རྩྭ་ཡང་དཀོན། །ནགས་ཁྲོད་ནས་ཅུང་ཟད་ཅི་འཁྲུངས་པ་ཡང་དཀོན་ནོ། །བུད་མེད་སྦྲུམ་མ་
རྣམས་ཀྱི་རུ་མ་རབ་ཏུ་མི་བདེ། མུ་གེ་དང་། མཚོན་དང་། ནད་ཀྱི་ཟད་དེ། སྐྱེ་བོ་སུམ་ཆ་གཅིག་གནས་པར་འགྱུར་རོ། །མིའི་དབང་པོ་ཆེ་བའི་བདག་ཉིད་ཅན་དང་། དཔལ་དང་ལྡན་པའི་མི་མཆོག་རྣམས་དང་། བྲམ་ཟེ་གཟི་བརྗིད་ཅན་མང་པོ་དང་། བ་ལང་ཕྱུག་པོ་དང་། དབང་དང་ལྡན་པ་དང་།
ཡུལ་ཕི་པ་ཤ་དང་། ཡུལ་ཤ་ཏ་རུ་དང་། ཡུལ་སིན་དྷུ་དང་། ཡུལ་ཨན་ད་དང་། ཆུ་བོ་བ་ནི་སྟིའི་འགྲམ་ན་གནས་པ་དང་། ཆུ་བོ་ཨེ་ར་བ་ཏིའི་དྲུང་དུ་གནས་པ་དང་། ཡུལ་ཀུ་དྷན་གནས་པའི་མི་དང་། ཆུ་བོ་ཙན་ཏྲ་བྷ་ག་ཞེས་བྱ་བའི་འཁོར་ན་གནས་པའི་མི་དང་། ཆུ་བོ་སུ་ཏ་ན་ཞེས་བྱ་བ་དང་། ཆུ་བོ་འདི་
དག་གི་འགྲམ་ན་གནས་པའི་མི་དང་། ཡུལ་ནགས་འབྲོག་ཆུ་དང་ལྡན་པ་དང་། ཆུ་བོ་ཨ་གྲོ་ཏ་དང་། སེར་ས་ཏི་ཞེས་བྱ་བའི་འཁོར་དང་། ཡུལ་ས་བརྟ་པྲ་རྟ་ཞེས་བྱ་བ་རྣམས་དང་། ར་བདོག་པའི་གཙོ་བོ་དང་། འདི་རྣམ་བཞིར་ས་གཡོས་ན་གནོད་པ་འབྱུང་བར་འགྱུར་རོ། །རྒྱུ་སྐར་མགོའི་ཉི་མ་ལས་
གཡོས་ན་སྨན་རྣམས་དང་། ནད་དཔྱད་བྱེད་པའི་སྨན་པ་རྣམས་དང་། རྩྭ་སོ་མ་ཞེས་བྱ་བ་ལ་སྐོམ་དུ་སྦྱར་ཏེ། འཐུང་བའི་ཆོས་བཞིན་བྱད་པ་རྣམས་དང་། རྩྭ་སོ་མ་ལ་སྐོམ་དུ་འཐུང་བ་རྣམས་དང་། བྲམ་ཟེ་ནགས་ཁྲོད་ན་གནས་ཤིང་དཀའ་ཐུབ་བྱེད་པ་རྣམས་ལ་མི་རུང་བར་འགྱུར། ཡུལ་དབུས་མ་ག་དྷར་ཆར་
ཆེར་འབེབས་ཏེ་ལོ་ལེགས། བདེ་བར་འགྱུར། རྒྱལ་པོ་ནང་ཕན་ཚུན་མི་མཐུན་ཏེ་རྩོད་པར་འགྱུར། ཡུལ་ཨ་དྷི་ཤ་ཧའི་མི་དང་། ཡུལ་ཤུལ་ར་སེ་ན་དང་། ཆུ་བོ་ཆར་མ་ནཱ་ཏི་ན་གནས་པ་དང་། ཡུལ་ཀ་ཏ་ལའི་མི་དང་། ཡུལ་བ་ད་སའི་མི་དང་། ཡུལ་ཕན་ཙ་ལའི་ལྷོ་ཕྱོགས་དང་། ཡུལ་པ་ནི་ཙ་ལའི་
བྱང་ཕྱོགས་དང་། ཡུལ་མ་ག་དཱྷ་ན་གནས་པའི་མི་དང་། མི་ལ་གནོད་པར་འགྱུར་རོ། །ཡུལ་སུ་ལའི་མི་དང་། ཡུལ་བེ་ཤ་ལའི་མི་དང་། ཡུལ་མ་ལ་ཞེས་བྱ་བའི་འཁོར་མི་དང་། འདི་རྣམས་ལ་གནོད་པ་རྣམ་པ་དྲུག་འབྱུང་སྟེ། ཆོམ་རྐུན་དང་། མེས་འཇིག་པ་དང་། མི་ངས་དང་། ཐན་ཆེན་ལ་

སོགས་པའི་ཁྱད་ཞུགས་པའི་གནོད་པ་རྣམས་ཀྱིས་སྐྱེ་བོ་ལ་ཟིལ་གྱིས་གནོད་པར་འགྱུར་རོ། །རྒྱུ་སྐར་ལག་ལ་ས་གཡོས་ན་ཤིང་འོ་མ་ཅན་རྣམས་དང་། འོ་མ་མ་རུང་བར་འགྱུར་རོ། །ཟས་སྐོམ་ཕྱོགས་སུ་མ་རུང་བར་འགྱུར། འགྲོན་པ་རྣམས་དང་། གཅན་གཟན་དང་། རྒྱ་མོ་
ཐོགས་པའི་ཉ་འཆོར་པ་ལ་སོགས་པ་རྣམས་དང་། འོབ་བརྐོ་ཞིང་ཁྲོན་པ་བརྐོ་བ་དང་། སྡིག་པའི་ལས་ཅན་རྐུན་པོ་རྣམས་དང་། གདོལ་བ་དང་། རིགས་ངན་དང་། ཡུལ་ཤར་ཕྱོགས་དང་། ཡུལ་པུན་ད་བརྟ་དང་། མུ་སྟེགས་གཅེར་བུ་དང་། ཡུལ་ཨོཾ་ཏྲ་དང་། ཡུལ་ཁུ་ལི་དའི་མི་དང་། ཡུལ་ཤ་བ་རིའི་
མི་རྣམས་དང་། ནགས་འབྲོག་ཆུ་དང་ལྡན་པ་ཨ་ཏ་བྱ་སོ་ཏ་ཀ་ཞེས་བྱ་བ་དང་། ཡུལ་གཞན་ཡང་དེ་དང་འདྲ་བ་ཆུ་དང་ལྡན་པའི་ནགས་འབྲོག་ཀྱང་གནོད་པ་དྲག་པོ་མི་བདེ་བ་སྣ་ཚོགས་པ་རྣམས་པ་དྲུག་གིས་གནོད་པ་འབྱུང་བར་འགྱུར་རོ། །རྒྱུ་སྐར་ནབ་སོའི་ཉི་མ་ལས་གཡོས་ན་ཆང་འཚོང་དང་། གསལ་ཤིང་དང་། །
མཚོན་ཐོགས་པའི་མི་དང་། ཁུར་བ་འཚོང་བའི་མི་དང་། གདུགས་ཕྱེད་པའི་མི་དང་། ཤིང་མཁན་རྣམས་དང་། མི་གསོད་པའི་གཤེད་མ་རྣམས་དང་། བཙས་དང་། འགྲོ་བའི་ཆོང་པ་རྣམས་དང་། འཁོར་ལོ་བྱེད་པ་རྣམས་དང་། འཁོར་ལོ་སློབ་པ་རྣམས་དང་། ལྷ་ཚོར་འཐག་ཅིང་སྦྱོར་བ་དང་། ཤ་འཆོར་
བ་དང་། དུང་འཚོར་དང་། གྲོང་ན་གནས་པའི་ཚོང་བ་དང་། གང་དག་སྐྱེ་བོ་ཕལ་པོ་ཆེ་ལྷན་ཅིག་གནས་པས་འཚོང་བ་དང་། ཚུལ་ཅན་རྣམས་དང་། ཆར་ཆེར་འབབ་པས་ལོ་ལ་ཡང་གནོད་པར་འགྱུར་རོ། །རྒྱལ་པོ་དང་། ལྷོ་ཀའི་གནས་ན་གནས་པའི་རྒྱལ་ཕྲན་རྣམས་དང་། རྒྱལ་ཕྲན་དེ་དག་ལ་ཕྱོགས་པའི་
ཡུལ་མི་རྣམས་དང་། ཡུལ་གྱི་མཆོག་དང་། ཏོ་ཀ་ཞེས་བྱ་བ་དང་། མོན་ཡུལ་ཀན་ཏུ་ན་གནས་པའི་མི་རྣམས་དང་། སྤྱང་ཀི་ཁྱི་མང་པོ་རྣམས་ལ་ས་གཡོས་ན་གནོད་པར་འགྱུར་རོ། །རྒྱུ་སྐར་རྒྱལ་གྱི་ཉི་མ་ལ་ས་གཡོས་ན་མི་དགེ་བ་བྱས་པ་དང་། བྲམ་ཟེ་དམ་པ་དང་། རྒྱལ་པོ་སྤྱི་བོ་ནས་དབང་བསྐུར་བ་རྣམས་
དང་། རྒྱལ་པོའི་བུ་གཞོན་ནུ་དང་། དཔོན་སྣ་ཕྲ་མོ་དང་། མི་མང་པོའི་ཚོགས་པ་དང་། བློན་པོ་རྣམས་དང་། དགེ་སློང་རྣམས་དང་། སྤྲང་པོ་དང་། བྲམ་ཟེ་དང་། མཁས་པ་རྣམས་དང་། ཆོས་ལ་རབ་ཏུ་བརྩོན་པ་རྣམས་དང་། བསོད་ནམས་ཆེན་པོ་བྱེད་པའི་མི་རྣམས་ལ་གནོད་པར་འགྱུར་རོ། །དེ་ལྟར་ཤར་

ཕྱོགས་དང་། ཡུལ་ཏ་མ་ལི་བ་ཏའི་གྲོང་རྡལ་དང་། ཤར་ཕྱོགས་ཀྱི་གླིང་དུ་མ་ཏ་ར་ཏི་བ་དང་། མོན་ཡུལ་ཀ་མ་རུ་བ་དང་། ཤར་ཕྱོགས་ཀྱི་རྒྱ་མཚོའི་གླིང་ན་གནས་པ་དང་། གསེར་གྱི་གླིང་ན་གནས་པ་དང་། ཆུ་བོ་གང་གཱའི་རྒྱ་མཚོའི་གཏིང་དུ་འབབ་པ་དང་། འགྲམ་ན་གནས་པའི་སྐྱེ་བོ་རྣམས་ལ་གནོད་པར་
འགྱུར་རོ། །རྒྱུ་སྐར་སྐག་གི་ཉི་མ་ལ་གཡོས་ན་ཀླུ་རྣམས་དང་། སྦྲུལ་རྣམས་དང་། སྡིག་སྦྲུལ་རྣམས་དང་། གྲོག་མ་རྣམས་དང་། གྲོག་མ་མང་པོ་རྣམས་དང་། སྲིན་བུ་སྣ་ཚོགས་དང་། ཁྱི་དང་། རྨིག་པ་གཅིག་པ་རྣམས་དང་། དུག་རྣམས་དང་། དུག་སྦྱོར་ཞིང་བྱེད་པའི་མི་རྣམས་དང་། སེམས་ཅན་
གང་དག་རི་ཁྲོད་ན་གནས་པ་རྣམས་དང་། ཡུལ་མཐའ་འཁོབ་ན་རྐུ་འཕྲོག་བྱེད་ཅིང་འཇོམས་པའི་མི་རྣམས་དང་། ཟོལ་པ་དང་། རྐུ་ཐབས་ཀྱིས་འཐབ་མོ་འགྱེད་པའི་མི་རྣམས་དང་། སྡིག་པའི་ལས་ལ་དགའ་བའི་མི་རྣམས་དང་། མི་བླུན་པོ་རྣམས་དང་། མི་ངན་པ་དང་། ཚིག་ངན་པ་སྨྲ་བ་རྣམས་དང་།
ཡུལ་ཏོས་ལ་དང་། ཡུལ་ཀོས་ལ་དང་། གྲོང་ཁྱེར་ཀཉྩི་དང་། ཡུལ་ལིང་ག་དང་། ཡུལ་ཨན་དྲ་དང་། ཡུལ་ཨ་ན་དྲའི་བྱང་ཕྱོགས་དང་། ཡུལ་ཡ་མའི་གྲོང་རྡལ་ཉམས་དགའ་དང་། རི་བྷྱིན་དྷ་དང་། རི་བྷྱིན་དྷ་བྱང་ཕྱོགས་ཀྱི་ངོས་དང་། རི་དེའི་དྲུང་དང་། རྩེ་མོ་དང་། སྲངས་ས་ན་གསུམ་པའི་སྐྱེ་བོ་རྣམས་
ལ་གནོད་པ་དྲག་པོ་ནད་དང་། མེ་དང་། མི་ངས་དང་། ཐན་ཆེན་དང་། སེར་བ་དང་། ཡང་དང་ཡང་མཚོན་ཀར་འགྱེད་པས་ཡུལ་དེ་ཕྱོགས་ན་མྱ་ངན་བྱེད་ཅིང་འགྲོ་སྟེ། ས་གཡོ་བས་གཟི་བརྗེད་ཉམས་ནས་གནོད་པ་དེ་ལྟ་བུ་འབྱུང་བར་འགྱུར་རོ། །རྒྱུ་སྐར་མཆུའི་ཉི་མ་ལ་ས་གཡོས་ན་རྒྱལ་པོ་ཆེན་པོ་མྱ་ངན་བྱེད་པར་
འགྱུར་རོ། །མཆོད་སྦྱིན་བྱེད་པ་དང་། དད་པ་རྣམས་ལྡོག་པར་འགྱུར། མི་མང་པོ་འདུ་བ་དང་། དགའ་སྟོན་བྱེད་པ་དང་། ལྷའི་གཙོ་བོ་ལ་མཆོད་སྦྱིན་བྱེད་པ་རྣམས་དང་། སྔགས་ཐམས་ཅད་ནི་ལྡོག་པར་འགྱུར་རོ། །གང་དག་བཙས་པ་དང་། ཆེར་སྐྱེས་པ་དང་། གཞན་ཡང་མཁས་པའི་མཆོག་
དང་། རོལ་མོ་མཁས་པ་དང་གླུ་སྙན་པོ་དང་། རིགས་ཆེན་པོ་བློ་དང་ལྡན་པའི་མི་རྣམས་དང་། འབྲུ་ནག་པོ་ཏིལ་དང་། ཟར་མ་སྲན་མ་ལ་སོགས་པ་ལ་གནོད་པ་ཡུལ་ཀ་ལིང་ཀའི་ཕྱེད་དང་། ཀ་ལིང་ཀའི་ནུབ་ཕྱོགས་དང་། ཡུལ་ཨ་ན་ཏེའི་རིལ་བརྟེན་པའི་མི་རྣམས་དང་། རེ་བྱིན་དྷའི་ངོས་

ཕྱེད་ལ་བརྟེན་པའི་མི་རྣམས་ལ་ས་གཡོ་བ་དང་། ས་རྣམ་པར་གཡོས་ན་དེ་དག་ལ་ཡང་གནོད་པར་འབྱུང་བར་འགྱུར་རོ། །རྒྱུ་སྐར་གྲེའི་ཉི་མ་ལ་ས་གཡོས་ན་དུས་ཚིགས་ལོག་པར་འགྱུར་ཏེ། དེའི་རླུང་དྲག་པོ་ལྡང་བར་འགྱུར། བརྟེན་པ་བྱས་པ་མ་རུང་པར་འགྱུར། ཡོད་པའི་
མ་རུང་བར་འགྱུར། །སྨད་འཚོང་མ་དང་། ཆོས་ལ་དགའ་བ་དང་། གཡོས་མཁན་དང་། ཤོག་མ་གྱིས་འཚོ་བ་དང་། བཙོན་འཚོ་བ་དང་། སྣམ་བུ་འཐག་པ་དང་། ཁྱད་པར་ཆུ་བོ་སིན་དྷུའི་ལྷོ་ཕྱོགས་ཀྱི་ཕྱེད་དང་། ཤར་ཕྱོགས་ཀྱི་ཕྱེད་དང་། ཡུལ་མ་ཧཱ་ཀ་རི་རི་ཁྲོད་ཀྱི་སྡོང་བུ་དང་། ཡུལ་དང་། ལུང་
པའི་ནང་ན་གནས་པའི་སྐྱེ་བོ་དང་། རི་ཀེས་ཀིན་དའི་གྲོང་ཁྱེར་དང་། གྲོང་རྡལ་དང་། དེ་བཞིན་དུ་ཡུལ་ཤུར་པར་ཀ་དང་། ཡུལ་ཚ་སེར་ཆེ་བ་ནགས་རི་ཆུ་མང་བ་ན་གནས་པའི་བ་ལང་ལ་སོགས་པ་དང་། སྐྱེ་བོ་མི་སྲུན་པ་མང་པོས་བསྐོར་ཞིང་། མེ་ཏོག་རྒྱས་པ་ལྟར་ལྡང་ཞིང་གནས་པ་ལས་གཡོས་ཏེ་མདངས་
ཉམས་ན་གནོད་པ་འབྱུང་བར་འགྱུར་རོ། །རྒྱུ་སྐར་དབོའི་ཉི་མ་ལས་གཡོས་ན་ཚོང་པ་རྣམས་དང་། གླིང་ཕྲན་ན་གནས་པའི་མི་དང་། འགྲོན་པོ་ལམ་དུ་ཞུགས་པ་དང་། མཆོད་སྦྱིན་གྱི་སྣོད་དང་། ཡོ་བྱད་རྣམས་དང་། སྦྲུལ་གྱི་གདོང་གིས་འཚོ་བའི་མི་རྣམས་དང་། བག་མ་ལམ་བཅའ་བ་ལ་སོགས་པ་དང་། །
བཀྲ་ཤིས་བྱེད་པ་དང་། ཡུལ་མ་ཧེ་སེ་ནའི་གྲོང་རྡལ་དང་། གྲོང་ཁྱེར་ཉམས་དགའ་བ་བ་ལང་གི་ཁྱུ་མང་པོ་དང་ལྡན་པ་དང་། ཆུ་བོ་ག་ད་བ་རའི་འགྲམ་གྱི་ཡུལ་དང་། ཡུལ་མ་ཧཱ་བེ་ནན་དང་། ཆུ་བོ་མ་ས་རི་ཏའི་འགྲམ་ན་གནས་པའི་གྲོང་རྡལ་དང་། གྲོང་འདབ་ཀྱི་མི་དང་། ཡུལ་དབུས་ཨ་ག་དང་། མོན་ཡུལ་
བད་ག་དང་། ཡུལ་ཀ་ལིང་ཀའི་ཕྱེད་དང་། ཡུལ་ནི་ཀྲི་ཏི་དང་། ཡུལ་ཁ་ཤའི་མི་རྣམས་དང་། སླས་བུད་མེད་མང་པོ་བསྲེལ་བ་དང་། སྙིང་ལས་སེམས་པའི་མི་རྣམས་དང་། གྲོང་དང་གྲོང་དམ་པ་རྣམས་དང་། རྒྱལ་པོ་ལ་བརྟེན་པས་ཚོང་པའི་མི་དེ་ལྟ་ལ་ས་གཡོས་ན་གནོད་པར་འགྱུར་རོ། །རྒྱུ་སྐར་མེ་བཞི་
ལ་ས་གཡོས་ན་རྫ་མཁན་དང་། སྨན་པ་རྣམས་དང་། ཚོགས་ཀྱི་གཙོ་བོ་དང་། བློན་པོ་དང་། བློན་པོ་ཆེན་པོ་དང་། དམག་དཔོན་རྣམས་དང་། གླང་པོ་འདུལ་སྦྱོར་བྱེད་པའི་མི་དང་། ཆོམ་རྐུན་བྱེད་པ་མང་པོ་དང་། ཆོམ་རྐུན་བྱེད་པའི་གཙོ་བོ་རི་གདོང་ས་བཙན་ལ་བརྟེན་པའི་མི་རྣམས་དང་། བྲམ་ཟེ་སྲད་བུ་སེ་

རལ་དུ་ཐོགས་པས་འཚོ་བ་རྣམས་དང་། ལྷ་དོན་དུ་གཉེར་བ་རྣམས་ལ་མི་སྨོད་བའི་མི་རྣམས་དང་། བྲམ་ཟེའི་ལག་བརྡ་ཁ་དོན་འདོན་པ་དང་། མཆོད་སྦྱིན་གྱི་ཡོ་བྱེད་ཀྱི་ཚོགས་སྦྱར་བ་དང་། ཡུལ་ཧ་སེ་ནའི་གྲོང་རྡལ་ཉམས་དགའ་པ་དང་། རི་རྨ་བྱ་ཞེས་བྱ་བའི་དྲུང་ན་གནས་པ་དང་། རི་བ་རི་ཡ་ཏྲའི་དྲུང་ན་
གནས་པ་དང་། སྡིངས་དང་། ལུང་པ་དང་། ལུང་པ་ཕྲན་མང་པོ་སྣ་ཚོགས་ན་གནས་པའི་མི་རྣམས་དང་། ཡུལ་སྤང་ཀུ་ར་དང་། ཡུལ་ས་སྲ་དང་། ཡུལ་ཨ་མུ་ཏྲ་དང་། འདི་རྣམས་ལ་ས་གཡོས་ན་གནོད་པར་འགྱུར་རོ། །རྒྱུ་སྐར་ནག་པ་ལ་ས་གཡོས་ན་རོ་མོ་འབྲི་བའི་ལས་རྣམས་མ་རུང་བར་འགྱུར།
རི་མོ་འབྲི་བ་རྣམས་དང་། ཤིང་མཁན་རོ་བོ་དང་། བཟོ་བོ་དང་། གསེར་མགར་དང་། རྡོ་རྗེ་གསོར་བའི་ལས་བྱེད་པ་དང་། བཟང་ཀན་དང་། ནོར་བུ་འབྲུག་ཅིང་ནོར་བུ་མདོག་དང་། རྒྱན་ལ་དགའ་བ་དང་། ཚོང་པ་དང་། མིག་སྨན་སྦྱོར་ཤེས་པའི་མི་དང་། རྒྱན་བྱེད་པའི་མི་དང་། ཡུལ་པྲ་བ་ཀ་
ཤ་དང་། ཡུལ་ཨ་ནི་ལའི་གྲོང་རྡལ་དང་། ཡུལ་མ་གྱི་སྨ་དང་། ཡུལ་ཨ་པ་ན་ཏི་དང་། རིས་ངྷྱའི་རླུང་དང་། རི་བྱིན་མདའི་མཁོར་ན་གནས་པའི་སྐྱེ་བོ་རྣམས་དང་། མི་དྲ་མ་རྣམས་ལ་དེ་ལྟར་ས་གཡོས་ན་གནོད་པར་འགྱུར་རོ། རྒྱུ་སྐར་ས་རི་ལས་གཡོས་ན་ཆོམ་རྐུན་བྱེད་པའི་མི་རྣམས་དང་། མགར་མཁན་
རྣམས་དང་། འཚེ་ཞིང་གནོད་པའི་མི་རྣམས་དང་། ལ་འཕྲད་འཇོམས་པའི་མི་རྣམས་དང་། ཡུལ་གངས་རིའི་བྱང་ཕྱོགས་ཀྱི་ཤོད་ན་གནས་པའི་མི་རྣམས་དང་། རོལ་མོ་མཁན་དང་། བཞད་གད་མཁན་དང་། དཀའ་ཐུབ་ཟས་སུ་རླུང་ཟ་བ་དང་། ཚུལ་མ་ཡིན་པའི་དཀའ་གྲུབ་བའི་མི་རྣམས་
དང་། མི་དགེ་བ་དམ་པའི་མི་རྣམས་དང་། ང་རྒྱལ་ཅན་རྣམས་དང་། ཡུལ་ས་ཧ་ཏའི་མི་དང་། ཡུལ་ཨན་དར་སྟིའི་མི་དང་། ཡུལ་བི་བུལ་དང་། ཡུལ་ཀ་ཙའི་སྐྱེ་བོ་མང་པོ་ཕལ་པོ་ཆེ་དང་། ཡུལ་བ་ཡ་བ་དང་། ཡུལ་བ་ཤུད་ཀྲང་ཀ་དང་། ཡུལ་ད་ར་ག་ཞེས་བྱ་བའི་གྲོང་དང་། ཕལ་པོ་ཆེའི་མི་དང་།
གླིང་སྣ་ཚོགས་ན་བུད་མེད་དམ་པ་གནས་པ་དང་། རྐང་འགྲོས་ཀྱིས་གང་བར་རྒྱས་ཤིང་གྲོང་ཁྱེར་ཀུ་བེར་ཞེས་བྱ་བ་ལ་འབྱོར་ཞིང་རྒྱས་པར་གནས་པ་དང་། རིད་མ་པ་བྲད་ཛ་ཡ་ཧོ་ཞེས་བྱ་བའི་དྲུང་ན་གནས་པའི་མི་དང་། རྒྱ་མཚོའི་འགྲམ་ན་གནས་པའི་མི་དང་། ཡུལ་བྲི་སྣི་དང་། ཡུལ་ཨ་ན་དྲག་དང་། མ་

དུ་ཞེས་བྱ་བའི་མི་དང་། ས་ཏྭ་ཏ་ཞེས་བྱ་བའི་མི་དང་། འདི་དག་གི་གནས་རྣམས་དང་། མིའི་སྡེ་དྷ་ཤ་ན་ཞེས་བྱ་བ་རྒྱ་མཚོ་ཆུའི་འགྲམ་གྲོང་ཁྱེར་རྣམ་པ་བརྒྱ་དང་། གྲོང་ཁྱེར་རྣམས་པ་སྟོང་སྙེད་དུ་གནས་པ་དེ་དག་ལས་གཡོས་ན་རབ་ཏུ་གནོད་པར་འགྱུར་རོ། །རྒྱུ་སྐར་ས་ག་ལས་
གཡོས་ན་མི་ལས་སུ་བྱ་བ་རྣམས་ས་རུང་བར་འགྱུར་རོ། །བྲམ་ཟེ་དམ་པ་མེ་ལ་རྗེད་པ་རྣམས་དང་། གསལ་བ་མ་འཁྲུལ་པ་སྨྲ་བ་རྣམས་དང་། ཏིལ་དང་། བལ་གྱི་ས་བོན་དང་། མོན་སྲན་སྡེའུ་དང་། བུ་རམ་ཤིང་གི་ཁུ་བ་དང་། འབྲུ་རྣམས་དང་། མི་རྒན་པ་རྣམས་དང་། མི་ཕལ་པ་ཆེར་གནས་པ་
རྣམས་དང་། འབྲས་སོ་དང་། ས་བོན་བཏབ་པ་སྨན་ལས་སྲན་ཆུང་དང་། སྲན་མ་དང་། སྲན་ཙན་ཤ་ཀ་དང་། རྒྱ་སྲན་ནག་པོ་དང་། ཡུངས་ཀར་དང་། ཡུལ་དུ་རའི་མི་དང་། ཡུལ་མ་ཀུ་རའི་མི་དང་། ཡུལ་བ་ཡན་དང་། དེ་བཞིན་དུ་ཡུལ་རི་མ་ཀའི་མི་དང་། ཡུལ་བ་པར་ན་མི་མང་པོས་གང་བ་
དང་། ཡུལ་ཀ་མར་ཨ་དི་སྟ་ཏ་ཞེས་བྱ་བ་ན་གནས་པའི་མི་དེ་དག་ལ་ས་གཡོས་ན་གནོད་པ་འབྱུང་བར་འགྱུར་རོ། །རྒྱུ་སྐར་ལྷ་མཚམས་ལ་ས་གཡོས་ན་མཛའ་བོ་བྱམས་ཤིང་སྡུག་པ་འབྱེ་བར་འགྱུར་རོ། །ཆུང་མ་དང་ནོར་གྱི་བྱ་བ་ལ་སོགས་པ་རྣམ་པ་བཅུ་གཅིག་ཏུ་བཤད་པ། གཉེན་བྱས་ཞིང་། བག་
མ་བླང་བ་ལ་སོགས་པ་དང་། ཡོ་བྱད་བསགས་ཤིང་སྤེལ་བ་དང་། བག་མ་བླང་པ་རྣམས་དང་། མཆོད་སྦྱིན་བྱ་བ་རྣམས་དེ་དག་གི་ལས་བྱ་བ་དང་། བཀྲ་ཤིས་པར་བྱ་བ་རྣམས་དང་། ལྟས་སུ་བལྟ་བ་རྣམས་དང་། བྲམ་ཟེ་ཞི་བ་དང་ལྡན་པ་རྣམས་དང་། དཀའ་ཐུབ་ཅན་རྣམས་དང་། ཐུབ་པ་དང་ལྡན་
པ་རྣམས་དང་། དཀའ་ཐུབ་དང་ལྡན་པ་རྣམས་དང་། བརྟུལ་ཞུགས་དང་ལྡན་པ་རྣམས་དང་། ཡུལ་ཀ་ཤ་ཞེས་བྱ་བ་ན་རྒྱལ་སྲིད་ཆེན་པོ་རྣམ་པ་བརྒྱད་དང་ལྡན་པའི་ཡུལ་དང་། རྒྱལ་པོའི་མཐའ་འཁོར་ཡུག་ན་གནས་པ་འབྲ་གོ་ཆ་ལ་ཉམས་དགའ་བའི་གནས་ན་འབྲ་གོས་སྲོག་འཚོ་བ་རྣམས་དང་། སྐད་
རྣམས་སྣ་ཚོགས་ཤེས་པའི་འཇིག་རྟེན་པ་རྣམས་དང་། གཟི་བརྗིད་མི་མངོན་པར་བྱེད། གཟུགས་དང་། གོས་དང་། རྒྱན་དང་། སྤྱོད་པ་དང་། བྱེད་པ་དང་། འགྲོ་བ་དང་། ཆ་བྱད་རྣམ་པ་སྣ་ཚོགས་དང་ལྡན་པ་ཟས་སུ་ཤ་ཟ་ཞིང་ལུས་ཉམས་བདེ་བ་སྐྱིད་པ་དེ་ལྟ་བུའི་རྣམས་ལ་ས་གཡོས་ན་རབ་ཏུ་གནོད་པར་

འགྱུར་རོ། །རྒྱུ་སྐར་སྣོན་ལ་ས་གཡོས་ན་རི་ཆེན་པོ་བསྙིལ་བར་འགྱུར། འཇིག་པའི་རླུང་རབ་ཏུ་ལྡང་། ཡུལ་ཨ་མྲ་ཀ་ཞེས་བྱ་བའི་ཡུལ་དུ་ཡུལ་ཀ་ཤའི་མི་དང་། རྐུན་པོ་དང་། མི་ངས་དང་། ཐན་ཆེན་དང་། སེར་བ་དང་། ཡང་དང་ཡང་མཚོན་ཀར་འགྱིད་པ་ཡུལ་དེ་ཕྱོགས་ན་མྱ་ངན་བྱེད་ཅིང་འགྲོ་སྟེ།
ས་གཡོས་པས་གཟི་བརྗིད་ཉམས་ནས་གནོད་པ་དེ་ལྟ་བུ་འབྱུང་བར་འགྱུར་རོ། །ཚུལ་མ་ཡིན་པ་དག་གིས་ཕན་ཚུན་དུ་གནོད་པ་བྱེད་པར་འགྱུར་རོ། །མི་གཡོན་ཅན་དང་། རྒྱལ་པོ་དང་། རྒྱའི་མི་དང་། དེ་བཞིན་དུ་སྒོ་ལྕགས་འབྱེད་ཅིང་རྐུ་བའི་མི་རྣམས་དང་། ཡུལ་ཨ་ན་དྲའི་མི་རྣམས་དང་། ཡུལ་པུ་ལིནྡ་ན་
གནས་པའི་མི་རྣམས་འཇིག་པར་གནས་པར་འགྱུར། །མཛའ་བའི་དཔུང་དང་ལྡན་པ་རྣམས་དང་ཡང་ཕྱེད་པར་འགྱུར། རྒྱལ་པོ་ཆེན་པོ་དང་། སྙོམ་ལས་དང་ལྡན་པ་རྣམས་ཀྱང་གཅོད་པ་དང་། བྱ་རོག་དང་། རི་དགས་པྲི་ཤ་དང་། གཅན་གཟན་དང་། གཅན་གཟན་དྲག་ཤུལ་ཅན་ཆེན་པོ་རྣམས་དང་། །
ཡུལ་ཀ་ར་དང་། ཡུལ་པ་ར་དང་། ཡུལ་ཤུད་དྷ་སེ་ན་ན་གནས་པའི་མི་དང་། ཡུལ་མ་ལ་ཡའི་མི་རྣམས་དང་། ཐོ་གར་གྱི་ཡུལ་བག་ལེ་དང་། པར་སེག་གི་ཡུལ་དང་། ཟ་ཧོར་གྱི་ཡུལ་དང་། ཀ་པུ་ཤའི་ཡུལ་གྱི་རི་བ་རི་ཤེ་ནའི་འཁོར་ན་གནས་པའི་མི་དང་། འདི་རྣམས་ལ་ས་གཡོས་ན་དགྲ་དྲག་པོ་མྱུར་
དུ་འབྱུང་ཞིང་གནོད་པར་འགྱུར་རོ། །རྒྱུ་སྐར་སྣུབས་ལ་ས་གཡོས་ན་རྐང་བཞི་པ་དང་། རྐང་གཉིས་པ་དང་། དེ་བཞིན་དུ་ཕུག་ན་གནས་པ་རྣམས་དང་། ཡི་དགས་ཤ་ཟ་རྣམས་དང་། སེམས་ཅན་གང་དག་རི་ལ་གནས་པ་རྣམས་དང་། མུ་གེ་མྱུར་དུ་འབྱུང་། ས་ལ་ཆུ་ཡང་མྱུར་དུ་སྐམས་པར་འགྱུར་རོ། །དགྲ་
རྣམས་རི་དྲུང་དུ་སོང་ནས་དེ་ནས་དགའ་བར་གནས་པ་དང་། ཆོས་ཀྱི་ཡོ་བྱད་རྣམས་དང་། གང་ན་ནགས་ཚལ་ཕུན་སུམ་ཚོགས་པ་དང་། རྒུན་ར་དང་། བུ་རམ་ཤིང་གི་ཁུ་བ་དང་། འབྲས་བུ་མང་པོ་ཅུང་ཟད་ཡོད་པ་རྣམས་དང་། ཤིང་དུ་ཀའི་ཚལ་དང་། མེ་ཏོག་སྣ་ཚོགས་རྣམས་དང་། འབྲུ་དང་ས་བོན་རྣམས་དང་།
འབྲས་ལ་སོགས་པ་རྣམ་པ་ཐ་དད་པ་སྣ་ཚོགས་དང་། ཁྱིམ་གྱི་ལས་ཀུན་བརྩམ་པ་དང་། བརྟན་པར་བྱ་བའི་རྣམ་པ་དང་། རྩ་བ་བསྐྱེད་ཅིང་བསྐྲུན་པའི་ལས་སྣ་ཚོགས་དང་། རོ་ལངས་བྱེད་པའི་ལས་རྣམས་དང་། ཡུལ་སུ་ན་དང་། གོག་ཡུལ་དང་། ཡུལ་ཀ་ཏ་ཡའི་མི་དང་། བ་ལང་རྫི་ལ་སོགས་པའི་རིའི་རྩེ་མོ་

དང་། ཕུག་དང་། རྫིང་བུ་ན་གནས་པའི་མི་རྣམས་དང་། རྐང་བཞི་པ་སྣ་ཚོགས་དང་། དཀའ་ཐུབ་ཅན་ཤིང་ཐོག་དང་རྩ་བ་ཟ་བ་རྣམས་དང་། ཡུལ་ཀ་ཤའི་བྱང་ཕྱོགས་ཀྱི་གནས་ཡུལ་ས་བཙན་པོ་ལ་བརྟེན་པའི་མི་དེ་རྣམས་ལ་ས་གཡོས་ན་གནོད་པ་འབྱུང་བར་འགྱུར་རོ། །རྒྱུ་སྐར་ཆུ་སྟོན་ལ་
ས་གཡོས་ན་མི་ལས་སྐྱེས་པ་དང་། འགྲོན་པོ་ལམ་ན་གནས་པ་དང་། ཚོང་པ་དང་། རྒྱ་མཚོ་ལ་རྒྱུ་ཞིང་འགྲོ་བ་དང་། ཁ་ཟས་ལས་འཚོ་བ་དང་། ཆུ་སྲིན་བྱིས་པ་གསོད་པ་དང་། འུག་པ་དང་། ཆུ་སྲིན་ན་ཀྲ་དང་། ཆུ་སྲིན་ན་མ་ཀ་ར་དང་། རུས་སྦལ་དང་། རུས་དང་། རིགས་དང་། བཙུན་པ་དང་། ཕྱུག་པོ་དང་།
མཁས་པ་རྣམས་དང་། བཞོན་པའི་མཆོག་བདོག་པ་དང་དེ་དག་ལ་འཇིགས་པ་ཆེན་པོ་རབ་ཏུ་འབྱུང་བར་འགྱུར་བ་དང་། ཆུའི་ལས་སུ་བྱ་བ་རྫིང་སྐྱིལ་བ་དང་། རྫིང་བུ་བརྐོ་བ་དང་། ཚལ་བུ་དང་། སྐྱེད་མོས་ཚལ་སྣ་ཚོགས་དང་། ནོར་དང་། འབྲུ་དང་། ཆང་གི་ཡོ་བྱད་སྦྱོར་བས་འཚོ་བའི་མི་རྣམས་དང་། ཡུལ་ཏ་རུ་ན་
དང་། ཡུལ་རུ་ག་ཀ་ཏིལ་རའི་མི་རྣམས་དང་། ཡུལ་ཀ་མ་བོ་ཛ་ནས་སྐྱེས་པའི་མི་རྣམས་དང་། ཐོ་གར་གྱི་ཡུལ་དང་། ཡུལ་ཧུན་ནས་སྐྱེས་པའི་མི་རྣམས་དང་། ཡུལ་ཤ་ཟའི་མི་དང་ཕྱུགས་རྫི་རྣམས་དང་། ཡུལ་ཀ་ན་ནས་སྐྱེས་པའི་མི་རྣམས་དང་། རི་དགས་ཉམས་པའི་མི་དང་། སྐྱེ་གནས་ངན་པ་
ནས་སྐྱེས་པའི་མི་དང་། བྱ་གག་དང་། བུད་མེད་དང་། ཆུ་ཆེན་པོ་ད་ཀྵའི་འགྲམ་ན་གནས་པའི་མི་རྣམས་དང་། གངས་རིའི་རི་ལོགས་ཀྱི་ངོས་གཉིག་ན་གནས་པའི་མི་རྣམས་དང་། རི་རྐེ་དང་། རི་དྲུང་ན་གནས་པའི་མི་རྣམས་དང་། རི་རྒྱུད་ཆད་པ་ན་གནས་པ་དང་། ལུང་པ་ན་གནས་པ་རྣམས་ལ་ས་
གཡོས་ན་གནོད་པར་འགྱུར་རོ། །རྒྱུ་སྐར་ཆུ་སྨད་ལ་ས་གཡོས་ན་བཟོ་བོ་རྣམས་ལ་གནོད་པར་འགྱུར་ཏེ། ལྕགས་མགར་དང་། ཕྱ་མཁན་དང་། ཚོན་མོ་སྟེང་མཁན་དང་། ཤིང་མཁན་རྣམས་དང་། འདྲེག་མཁན་དང་། ཕྱུག་པོ་རྣམས་དང་། རྐུན་པོ་རྣམས་དང་། བཟོ་བོ་རྣམས་དང་། སྣ་ཚོགས་
རྣམས་དང་། ཐོས་ཟློས་འདོན་པའི་གཅམ་བུ་རྣམས་ལ་གནོད་པར་འགྱུར། ཡུལ་ག་ན་རའི་མི་རྣམས་དང་། ཡུལ་ཀེ་ཀ་ཡ་དང་། ཡུལ་ཁ་ཤ་བ་རྣམས་དང་། གུ་ཟན་ཡུལ་དང་། ཡུལ་བ་གུར་ན་གནས་པའི་བྲགས་པ་གཏུམ་པོ་རྣམ་པ་སྟོང་སྙེད་དང་། བྲུ་ཤ་ཡུལ་ལ་སོགས་པ་དང་། ཡུལ་ས་ག་ར་དེའི་

སྐྱེ་བོ་རྣམས་ལ་གནོད་པར་འགྱུར་རོ། །རྒྱུ་སྐར་གྲོ་བཞིན་ལ་ས་གཡོས་ན་རྒྱལ་པོས་བཀུར་བའི་མི་རྣམས་དང་། བྲམ་ཟེ་རིག་བྱེད་སློབ་པའི་མི་རྣམས་དང་། བསྟན་བཅོས་ལ་མཁས་པའི་མི་རྣམས་དང་། སྙན་དངགས་ཤེས་བྱ་བའི་མི་རྣམས་དང་། ཡུལ་ག་ན་ད་ར་ནས་ཡུལ་ཀཽ་ཤཱ་མྦཱའི་བར་དང་། ཡུལ་མེ་ཏ་ར་སྟེ་
ན་གནས་པ་རྣམས་དང་། སི་ནི་ས་ཀྱི་ཡུལ་གཉིས་དང་ཡུལ་དུ་སྦྲ་ས་ཧ་དང་། ཡུལ་དུ་མེ་ལ་རྗེད་པའི་མི་དང་། ཡུལ་ས་གེ་ཀའི་མི་དང་། ཡུལ་ལ་མ་བ་ཀའི་མི་དང་། ཡུལ་ན་ག་ཧ་ར་དང་། ཡུལ་ཙ་ཏ་བི་ཤ་ཡ་དང་། ཡུལ་ག་ཙི་ཀ་ན་གནས་པ་མ་རུང་བ་དུ་མ་དང་། ཡུལ་ལ་བ་ཞེས་བྱ་བའི་རི་ལ་གནས་པ་
དང་། མཐའི་རྒྱལ་པོ་ཆེན་པོ་རྣམས་དང་། ཡུལ་ཀི་སད་ཏ་དང་། ཡུལ་ས་བ་ཏིར་དང་། ཡུལ་བ་རི་ར་བ་དང་། ཡུལ་བ་རྣ་པུ་རིའི་གྲོང་རྡལ་དང་། ཀླུའི་གནས་རྣམས་དང་། འདི་དག་ལ་ས་གཡོས་ན་གནོད་པ་འབྱུང་བར་འགྱུར་རོ། །རྒྱུ་སྐར་མོན་གྲེ་ལ་ས་གཡོས་ན་མི་ཕྱུག་པོ་དང་། ར་ལུག་དང་། བོང་བུ་དང་། རྔ་
མོ་དང་། དྲེའུ་དང་། ལྦ་དང་། རི་དགས་ཀྱི་རྣམ་གྲངས་ཐ་དད་པ་དང་། མ་ཧེ་དང་། འཕོང་དང་། རྩལ་ཆེ་བ་དང་། འདུན་ཁང་སྣ་ཚོགས་དང་། གྲོང་ཁྱེར་གྱི་ཚོང་དཔོན་རྣམས་དང་། ཡུལ་ཁ་ག་དང་། ཡུལ་སྭ་ཏི་མན་ཏ་དང་། ཡུལ་ཁི་ལ་དང་། ཡུལ་མུན་དང་། ཡུལ་བ་ཏྲ་ཀར་དང་། ཡུལ་གོན་ཐ་མའི་རྣམས་
དང་། ཡུལ་བོ་ཟ་དང་། ཡུལ་སཱ་ལའི་གྲོང་ཁྱེར་བྲུ་ཤ་ཡུལ་དང་། གུ་ཟན་དང་། ཡུལ་ཙིད་དྲ་དང་། ཆང་ཞིམ་པོ་སྣ་ཚོགས་དག་ལ་དགའ་བ་རྣམས་དང་། རི་ཤ་ཤའི་རི་ལོགས་ན་གནས་པའི་མི་སྣ་ཚོགས་ལ་ས་གཡོས་ན་གནོད་པ་འགྱུར་རོ། །རྒྱུ་སྐར་མོན་གྲུ་ལས་གཡོས་ན་སའི་འོག་ཏུ་གནས་པ་
རྣམས་དང་། རྒྱ་མཚོའི་འོག་ན་གནས་པ་དང་། རྒྱ་མཚོའི་ནང་ན་གནས་པའི་སེམས་ཅན་རྣམས་དང་། སེམས་ཅན་གཞན་ཡང་ཆུ་ལ་བརྟེན་པ་དང་། དེ་བཞིན་དུ་རྟ་དང་། གླང་པོ་ཆེ་དང་། ཁྱི་རྣམས་དང་། བོང་བུ་དང་། རྔ་མོ་དང་། བྱ་རྣམས་དང་། དེ་བཞིན་དུ་དམག་མི་དཔའ་བོ་དམ་པ་དང་། མཚོན་
ཤག་ཏི་དང་། རལ་གྲི་ཀྱོག་པོ་དང་། རལ་གྲི་ཐོགས་པའི་མི་རྣམས་དང་། ཡུལ་པྲལ་ལྷའི་མི་དང་། ཡུལ་ལྷོ་ཕྱོགས་ཀྱི་རྒྱུད་ཀྱི་རོང་ལ་བརྟེན་པ་དང་། ལྷོ་ཕྱོགས་ཀྱི་རི་རྒྱུད་ལ་དྲང་སྲོང་ཐུབ་པ་གནས་པ་རྣམས་དང་། ཡུལ་འཁོར་ལོ་གཅིག་པ་ཞེས་བྱ་བའི་མི་དང་། བུད་མེད་ནུ་མ་ཡ་གཅིག་པ་རྣམས་དང་། །

དམག་དཔོན་དུ་བསྐོས་པ་འདི་དག་ལ་ས་གཡོས་ན་གནོད་པར་འགྱུར་རོ། །རྒྱུ་སྐར་ཁྲུམས་སྟོད་ལ་ས་གཡོས་ན་ཆུ་དང་མེས་འཚོས་པའི་མི་རྣམས་དང་། དེ་བཞིན་དུ་བ་ལང་གསོད་ཅིང་མ་ཧེ་ལ་དགའ་བ་དང་། ནོར་བུ་དེ་སོགས་ལ་ཚོར་བྱེད་པ་དང་། ཡུལ་སུ་བི་ར་འབྱོར་བ་དང་ལྡན་པ་དང་།
ལུག་གསོད་ཅིང་འཚོ་བའི་མི་དང་། ནགས་ཀྱིས་འཚོ་བའི་རྗེའུ་རིགས་དང་། དམངས་རིགས་དང་། རོལ་མོ་མཁན་དང་། མི་དམ་པ་དང་། རྟ་རྣམས་དང་། ཡུལ་མལ་ལ་དང་། ཡུལ་མ་ལ་ལ་བ་དང་། སྒོ་འབྱེད་ཅིང་རྐུ་བའི་མི་ངན་པ་རྣམས་དང་། འདི་དག་ལས་གཡོས་ན་གནོད་པར་འགྱུར་རོ། །རྒྱུ་
སྐར་ཁྲུམས་སྨད་ལ་ས་གཡོས་ན་ཚོང་བ་དང་། ཆུ་ལ་བརྟེན་པ་རྣམས་དང་། འགྲོན་ལམ་དུ་ཞུགས་པ་རྣམས་དང་། ཚོར་བ་རྒྱམ་ཚོ་ལ་གྲུ་བོ་ཆེས་འགྲོ་བར་ཆས་པ་དང་། སངས་རྒྱས་ཀྱི་ཆོས་ལ་དགའ་བ་རྣམས་དང་། རང་གི་རིགས་རྣམས་དང་། ཆང་འཚོང་གི་ལས་བྱེད་པ་དང་། ཡུལ་ཤི་བའི་མི་དང་།
ཡུལ་པའི་ཡོ་ཏའི་མི་རྣམས་དང་། རྒྱལ་རིགས་ཨ་ཛུ་ཡ་ནའི་རྒྱུད་དང་། ཡུལ་སིན་དྷུ་དང་། ཡུལ་ཧ་ནུ་སྨ་དང་། ཁ་ཆེ་ཡུལ་གྱི་མི་དང་། རི་ཁྲོད་ཟབ་མོ་ན་གནས་པའི་མི་དང་། རྩེ་རྒོད་ན་གནས་པའི་ཡུལ་དང་། ཡུལ་རྣམ་པ་དུ་མ་དང་། ཡུལ་ཏ་ག་ལ་དང་། བར་ནང་ག་ལའི་མི་དང་། ལྷའི་བུ་གང་
གི་གནས་མེ་ཏོག་སྣ་ཚོགས་བྱེ་བས་རྒྱན་པ་ཡུལ་རི་ཅན་བརྒྱད་ཅེས་པ་ན་སྐྱེ་བོ་དུ་མས་གང་བར། གོས་དང་རྒྱན་རྣམས་པ་སྣ་ཚོགས་དང་། མཚོན་ཆ་སྣ་ཚོགས་དང་ལྡན་པར་གནས་པ་ལས་གཡོས་ན་གནོད་པ་འབྱུང་བར་འགྱུར་རོ། །རྒྱུ་སྐར་ནམ་གྲུ་ལས་གཡོས་ན་འཐབ་མོའི་གཡུལ་དྲག་ཤུལ་ཆེར་
འབྱུང་། གྲོང་ཕུན་སུམ་ཚོགས་པ་དང་ལྡན་པ་དང་། གྲོང་མི་རྣམས་དང་། རི་ཁྲོད་ན་གནས་པ་རྣམས་དང་། འདུན་ཁང་རྣམས་དང་། ཡུལ་དེ་ཏ་ལའི་མི་དང་། ཡུལ་ཨ་ན་ཤ་དང་། ཙ་ག་དང་། ཡུལ་ཛི་བ་ར་དང་། ཡུལ་མ་ཐ་དང་། ཡུལ་ཀ་ཤ་དང་། ཡུལ་བན་ཀན་ཞེས་བྱ་བ་ན་དཔུང་གིས་
སྙེམས་པའི་ང་རྒྱལ་མཆོག་དང་ལྡན་པ་ན་རློམ་པར་གནས་པ་གར་བྱེད་ཅིང་གླུ་ལེན་པ་དང་། སྨད་འཚོང་མས་འཚོ་བ་དང་། ཡུལ་ཤ་ན་ཀ་དང་། ཡུལ་ཨ་པིར་ར་དང་། ཡུལ་ནན་ཏི་དང་། ཡུལ་ཙ་ར་མ་ནན་ཏི་ན་གནས་པའི་མི་དང་། དམག་མི་དང་། དམག་དཔོན་དང་། ཡུལ་མི་ཏི་ལའི་གྲོང་རྡལ་གྱི་མི་

དང་། བལ་ཡུལ་ནས་ཤར་ཕྱོགས་དང་། བྱང་ཕྱོགས་ཀྱི་གཟེར་མཚམས་ཀྱི་ཡུལ་འདི་དག་ལ་ས་གཡོས་ན་གནོད་པ་འབྱུང་བར་འགྱུར་རོ། །རྒྱུ་སྐར་ཐ་སྐར་ལས་གསོས་ན་རྟ་རྣམས་ལ་ནད་འབྱུང་བར་འགྱུར། གྲོང་དུ་མི་གསོད་པ་འབྱུང་བ་དང་། མི་སྤུན་ནད་གསོད་པ་འབྱུང་། ཐ་སྐར་གྱི་ངོ་ལ་རུམ་དུ་
བུ་ཆ་གས་བ་ལ་མི་དགེའོ། །ཐ་སྐར་གྱི་དུས་སུ་བཙས་པ་ལ་མི་དགེ་སྟེ། དེ་ཕན་ཆད་ལོ་གསུམ་ན་མི་བདེ་བ་འབྱུང་ངམ། དེ་ནས་ལོ་བཅུ་ན་འཆི་བར་འགྱུར། ཡུལ་ལ་རིད་དང་། ཡུལ་ཏི་གར་ཏ་དང་། ཡུལ་བ་ན་ཙ་ལའི་སྐྱེ་བོ་རྣམས་དང་། ཡུལ་ཨརྫུ་ནའི་མི་རྣམས་དང་། ཡུལ་ད་རུ་དང་། ཡུལ་
ད་ན་བྱ་དང་། ཡུལ་ས་ཏི་ནའི་མི་རྣམས་ལ་གནོད་པར་འགྱུར་རོ། །རྒྱུ་སྐར་པྲ་ཉེ་ལ་ས་གཡོས་ན་རྐུན་པོ་རྣམས་ལ་གནོད་པ་ཆེར་འགྱུར། རྒྱན་པོ་བྱེད་པ་དང་། མདུད་བ་དང་། སྒོ་ལྕགས་འབྱེད་ཅིང་རྐུ་བ་དང་། མེ་ལོང་འཚོང་བ་དང་། དབྱིག་དུག་སྦྱོར་ཞིང་སྡུད་པའི་མི་དང་། འཁོར་ལོ་བྱེད་པ་
དང་། བཙོན་སྲུང་དང་། གཏུམ་པོ་སྡིག་ཅན་རྣམས་དང་། རྐུན་པོ་རྣམས་དང་། གཡོ་བྱེད་པ་རྣམས་དང་། མི་སྲུན་པ་དང་། ཕྲ་མ་བྱེད་པ་དང་། གདོལ་བ་དང་། རིགས་ངན་ལ་སོགས་པའི་ཡུལ་གྱི་མཐའ་གཡས་པ་རྣམས་དང་། རྒྱ་ཡུལ་ན་རྒྱ་རྣམས་དང་། རྒྱ་དམ་པ་རྣམས་དང་། ཡུལ་དགའ་
བ་བཟང་པོ་ཞེས་བྱ་བ་རྣམས་དང་། ཡུལ་སྱ་བ་ན་གནས་པའི་མི་རྣམས་དང་། ཆུ་བོ་ཆེན་པོ་སི་ཏ་ཞེས་བྱ་བའི་འགྲམ་ན་གནས་པའི་སྐྱེ་བོ་རྣམས་དང་། མཚོ་མ་དྲོས་ཕ་ཡིད་བཞིན་ཞེས་བྱ་བའི་འཇིག་རྟེན་རྣམས་ལ་གྲགས་པ་དེ་ལ་འདོད་ཆགས་དང་བྲལ་བ་རྣམས་དང་། རིག་སྔགས་གྲུབ་པ་དང་། རིག་
འཛིན་གྱི་ཚོགས་རྣམས་དང་། དྲང་སྲོང་ཐུབ་པ་རྣམས་ཀྱི་ཀྱང་བསྙེན་པར་བྱ་བ་ཤིང་འཛམྦུའི་སྐྱེ་བོ་མང་པོ་གནས་པ་དང་། ཀེ་ལ་སེ་ཏི་སའི་གངས་དང་། གངས་མངས་ཏེ་ནོར་བུ་ཅན་གྱི་རི་དང་། སྤོས་ངད་ལྡང་པ་གངས་ལྟར་གོ་དང་། དེ་བཞིན་དུ་སུ་རི་པ་ཤ་ཞེས་བྱ་བའི་ངོས་བཟང་པ་དང་། རི་དང་རི་ས་བར་ནི་
ཞེས་བྱ་བ་དང་། བྱང་ཕྱོགས་ངོས་དང་། གླིང་རྣམ་པ་སྣ་ཚོགས་མང་པོ་དང་། རི་རད་རོད་དག་ན་གནས་པའི་གནོད་སྦྱིན་དང་། འབྱུང་བོ་དང་། ཤ་ཟ་དང་། དྲི་ཟ་དང་། སྲིན་པོའི་ཚོགས་མང་པོ་དག་དང་། གྲུབ་པ་དང་། རིག་འཛིན་དང་། ཀླུ་རྣམས་དང་། དེ་བཞིན་དུ་སྨན་རྣམ་པ་སྟོང་སྙེད་ལ་

གནོད་པ་འབྱུང་བར་འགྱུར་རོ། །དེ་ལྟར་གཡོས་པའི་རྗེས་ལ་ཞག་བདུན་ཚུན་ཆད་དུ་ས་ལ་པ་ན་བའི་སྤྲིན་སྔོ་གནག་འཇམ་པོ་མིག་བསྐུ་བའི་སྨན་གྱི་མདོག་རི་ཆེན་པོ་འདྲ་བ་ལས་འབྲུག་སྒྲ་ཟབ་མོར་སྒྲོག་ཅིང་ཉེ་བར་འབྲུག་སྒྲ་ལ་གློག་རྣམ་པ་སྣ་ཚོགས་འགྱུ་ཞིང་། ནམ་མཁའ་ལ་སྔོན་
ཕོ་ཤུར་ཤུར་པོ་ལྟ་བུ་སྣང་བའམ། །སྒྲ་འབྱུང་བའམ། སྐར་མདའ་ལྟ་བུ་མང་ལ་རླུང་མེ་དྲག་པ་ལྡན་ཞིང་ཚུབ་མ་ལྟ་བུ་མི་སྡུག་པ་ནི་མེད། །སྤྲིན་གྱི་གཟུགས་བཀྲ་ཤིས་ཀྱི་རི་མོ་སྣ་ཚོགས་དང་། དབང་པོ་རྡོ་རྗེ་ལྟ་བུ་སྣང་བ་དང་། ནད་པར་ཉི་མ་འཆར་བ་དང་། ཉི་མ་ནུབ་ནས་ཟླ་བ་འཆར་པའི་ཚེ་སྤྲིན་གྱིས་
མཆོག་པར་ཆར་པ་དང་། མན་མཁའ་སྤྲིན་དལ་ལ་སྙོམས་པ་འཇམ་པོའི་གཟུགས་རྒྱང་རིང་པོར་སོང་བ་གློག་ཕན་ཚུན་དུ་འཕྲོ་བའི་སྤྲིན་དེ་ལྟ་བུ་ནི་དགེ་བའི་མཚན་ཡིན་ནོ། །སྤྲིན་འཇམ་ལ་དལ་སྙོམས་ཏེ། བར་ཆད་མེད་ཅིང་སྤྲིན་གྱི་གཟུགས་ལག་པ་མི་སྣང་བ་དེ་ལྟ་བུར་སྣང་ན་སྤྲིན་མཚན་མ་དེ་ལྟ་བུ་ད་
ལྡན་པ་ནི་ལྷའི་དབང་པོའི་ས་གཡོས་བར་བསྟན་པ་ཡིན་ནོ། །དེ་ལྟར་གང་དང་གང་དུ་ས་གཡོས་པའི་ཕན་གནོད་ཀྱི་འབྲས་བུའི་དམིགས་ནི་འཇིགས་ཤིང་དང་ངས་པ་མེད་པར་ཡིད་རྟེན་ལ་ས་བོན་ཐམས་ཅད་ཐོབ་ཤིག །ལས་དང་མཚོན་མ་རྣམས་ཀྱང་གྱིས་ཤིག །རྣམ་པར་རྒྱལ་བར་འགྱུར་བར་ཡང་བསྟན་
ཏོ། །ཚོང་པ་ཡང་དེའི་ཚེ་ཀུན་དུ་སོང་ཡང་འཇིགས་པ་མེད་དོ། །ཡང་ས་གཡོས་པའི་རྗེས་ལ་ཞག་བདུན་ཚུན་ཆད་དུ་ནམ་མཁའ་ལ་སྤྲིན་གྱི་ས་ཁེབས་ཏེ། ཐར་ཆགས་སུ་སྤྲིན་པ་ལ་ལྟར་དལ་སྙོམས་པར་སོང་ལ། ནུབ་ཕྱོགས་སུ་ནམ་མཁའ་ལ་ཆུ་སྲིན་བྱིས་པ་གསོད་པ་དང་། སྦལ་པ་རྣམས་དང་། ཉ་དང་།
ཆུ་སྲིན་འདྲ་བའི་སྤྲིན་གྱི་གཟུགས་སྣང་ལ་ནང་ནུབ་ཏུ་ཉི་མ་དང་ཟླ་བ་འཆར་བའི་ཚེ་སྤྲིན་གྱི་བསྒྲིབས་པ་མེད་པ་དེ་ལྟར་སྣང་བའི་མཚན་མ་ནི་ཆུའི་དཀྱིལ་འཁོར་གྱིས་གཡོས་བཞེས་བྱ་སྟེ། དེ་ལྟར་ས་གཡོས་པའི་ཕན་གནོད་ཀྱི་འབྲས་བུ་ཡང་དྲང་སྲོང་ཆེན་པོས་ཇི་ལྟར་མཐོང་བ་བཞིན་དུ་བསྟན་པར་བྱ་སྟེ། ཐད་བུ་དང་།
རི་ངོས་དང་། ཞིང་དང་། མཚོ་འགྲམ་དང་། དེ་དག་ཏུ་ས་བོན་ཐོབ་ཤིག་དང་། ས་དམའ་བ་དང་། ཧ་ཅང་ཆུ་ཆེ་བའི་ས་དང་། འདམ་རྫབ་ཅན་དུ་བཏབ་ན་ནི་མ་རུང་བར་འགྱུར་རོ། །ཚུལ་དེ་ལྟ་བུར་ས་གཡོས་པ་ནི་བཀྲ་ཤིས་ཏེ་ཆུའི་ས་གཡོས་པ་ཞེས་བྱའོ། །ཡང་ས་གཡོས་པའི་རྗེས་ལ་ཞག་བདུན་

ཚུན་ཆད་དུ་རླུང་དྲག་པོ་ལངས་ལ། ནང་བར་དང་ནུབ་ཀར་ཉི་མ་དང་ཟླ་བ