Luận tạng Tây Tạng (Tengyur) — Tập 213

ི་མདོ་ལས། ང་མྱ་ངན་ལས་འདས་ནས་ལོ་ཉིས་སྟོང་ལྔ་བརྒྱ་ན་གདོང་དམར་ཅན་གྱི་ཡུལ་དུ་དམ་པའི་ཆོས་དར་བར་འགྱུར་རོ་ཞེས་དང༌། ཤེར་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པའི་མདོའི་ཡུལ་ཡོངས་སུ་སྦྱོང་བར། ཡུལ་
དབུས་ནས་ལྷོ་ཕྱོགས་སུ་དར་བར་འགྱུར་རོ། །ལྷོ་ཕྱོགས་ནས་བྱང་ཕྱོགས་སུ་དར་བར་འགྱུར་རོ། །བྱང་ཕྱོགས་ནས་བྱང་ཕྱོགས་སུ་དར་བར་འགྱུར་རོ་ཞེས་དམ་པའི་ཆོས་ཡོངས་སུ་དར་བར་ལུང་གི་ཕྲེང་བ་མང་པོས་མངོན་པར་བསྔགས་པའི་ལྗོངས་འདི་ཉིད་ཇི་ལྟར་ཆགས་པའི་
ཚུལ་ནི། ཐོག་མར་དག་བྱེད་ཀྱི་ཕུང་པོས་ཡོངས་སུ་གཏམས་ཤིང་བཻ་ཌཱུརྻ་སྔོན་པོའི་མཎྜལ་ཕྱིས་པ་ལྟ་བུ་མཚོར་གྱུར་པ་དེ་རིམ་གྱིས་བྲི་ནས། ཤུག་པ་ལ་སོགས་པའི་རྩི་ཤིང་ནགས་ཚལ་སྟུག་པོས་ཁྱབ་པས། སཱ་ལའི་ལྗོངས་ཞེས་གྲགས་པའི་ཡུལ་དུ་གྱུར་པ་སྟེ། དེའང་
འཇམ་དཔལ་རྩ་བའི་རྒྱུད་ལས། ང་ཡི་དུས་ནས་ལོ་བརྒྱ་ན། །ཁ་བ་ཅན་དུ་མཚོ་བྲི་ནས། །སཱ་ལའི་ནགས་ནི་འབྱུང་བར་འགྱུར། །ཞེས་སོ། །དེར་ཁྱད་པར་བོད་ཀྱི་འགྲོ་བ་ཆགས་པའི་ཚུལ་ནི། ལྷ་ལས་ཕུལ་བྱུང་གི་བསྟོད་པར། ཁྱབ་འཇུག་གིས་ནི་འཐབ་དཀའ་བསད། །
ཅེས་པའི་འགྲེལ་པར། འདི་ལྟར་ཁྱབ་འཇུག་གིས་འཐབ་དཀའ་ལ་དྲིས་པ། དཔུང་གི་ཚོགས་བཅོ་བརྒྱད་ཁྱེར་རམ། འོན་ཏེ་ནོར་ལྷ་གཅིག་པུ་ཁྱེར་ཞེས་དྲིས་པས། དེས་དཔུང་གི་ཚོགས་རྣམས་ཁྱེར་རོ་ཞེས་སྨྲས་པ་དང༌། དེས་ཞེ་འགྲས་པར་གྱུར་ནས། ཁྱབ་འཇུག་
གིས་སྐྱ་བསེང་གི་ཕྱོགས་བྱས་ཏེ་གཡུལ་ངོར་ཆས་པ་ན། སྲིད་སྒྲུབ་ཀྱིས་ཀུན་དུ་བལྟས་ཏེ་སྨྲས་པ། ཁོ་བོས་ནི་ཉེ་དུའི་ཚོགས་གསོད་པར་མི་ནུས་ཏེ། གང་གི་དོན་དུ་རྒྱལ་སྲིད་ཐོབ་པར་འདོད་པའི་ཉེ་དུའི་ཚོགས་དེ་ཇི་ལྟར་གསད་པར་བྱ་ཞེས་སྨྲ་སྟེ། སྲིད་སྒྲུབ་འཐབ་པ་ལས་
ལྡོག་པར་གྱུར་པ་དང༌། ཁྱབ་འཇུག་གིས་སྨྲས་པ། ཁྱེད་ནི་བླུན་པ་ཡིན་ཏེ། གང་གིས་མི་ནི་གསད་པ་དང༌། །གང་ཞིག་གསོད་པར་བྱེད་པ་དག །དེ་དག་གཉིས་ཀ་མི་དམིགས་ཏེ། །བསད་དང་གསོད་པ་པོ་ཡོད་མིན། །རིགས་དང་འདུལ་བ་ཕུན་སུམ་ཚོགས། །བྲམ་

ཟེ་བ་ལང་གླང་པོ་དང༌། །ཁྱི་དང་སྨེ་ཤ་ཅན་དག་དང༌། །མཁས་པ་རྣམས་ནི་མཉམ་པར་བལྟ། །ཞེས་བྱ་བ་ལ་སོགས་པ་མེད་པར་ལྟ་བའི་ཚིགས་སུ་བཅད་པ་མང་པོ་བསྟན་ཅིང༌། སྣ་ཚོགས་པའི་གཟུགས་བསྟན་པས་བསླུས་ནས། སྲིད་སྒྲུབ་ཀྱི་ཁ་ལོ་པ་རང་ཉིད་ཀྱིས་བྱས་ཏེ། གཡུལ་
བགྱེ་བས་འཐབ་དཀའི་རིགས་དཔུང་གི་ཚོགས་བཅོ་བརྒྱད་དང་བཅས་པ་བརླག་པར་གྱུར་ཏོ། །རཱུ་པ་ཏི་ཞེས་བྱ་བའི་རྒྱལ་པོ་དཔུང་གི་ཚོགས་གཅིག་དང་བཅས་པ་གཡུལ་འགྱེད་པའི་ཚེ། བུད་མེད་ཀྱི་ཆ་ལུགས་སུ་བྱས་ཏེ་བྲོས་ནས་རི་ཁ་བ་ཅན་གྱི་ཁྲོད་དུ་ཞུགས་ཏེ། གནས་པའི་རིགས་
ལས་དེང་སང་ན་ཡང་བོད་ཅེས་བྱ་བར་གྲགས་པ་ཡིན་ནོ་ཞེས་འབྱུང་བ་དང༌། བོད་ཀྱི་གཏམ་རྒྱུད་ལྟར་ན་སྤྱན་རས་གཟིགས་དབང་ཕྱུག་ལ་བཅོམ་ལྡན་འདས་སྣང་བ་མཐའ་ཡས་ཀྱིས་བྱང་ཆུབ་སེམས་དཔའ་ཐུགས་རྗེ་དང་ལྡན་པ་ཁྱོད་ཁ་བ་ཅན་གྱི་རྒྱལ་ཁམས་བྱ་བ་ཡོད་པས། བཅོམ་
ལྡན་འདས་ཤཱཀྱ་ཐུབ་པའི་གདུལ་བྱར་མ་གྱུར་པས་སྐུའི་ཞབས་ཀྱིས་མ་བཅགས། གསུང་གི་འོད་ཟེར་གྱིས་མ་ཁྱབ། ཐུགས་ཀྱི་བྱིན་གྱིས་མ་བརླབས་པས། ཁྱོད་ཀྱིས་ཁ་བ་ཅན་གྱི་སེམས་ཅན་རྣམས་དང་པོར་ཟང་ཟིང་གིས་བསྡུས། དེ་ནས་ཆོས་ཀྱི་སྦྱིན་པས་ཐུལ་ལ་དེ་རྣམས་ཀྱི་
རྒྱུད་སྨིན་པར་མཛོད་ཅིག་ཅེས་བྱ་བ་འབྱུང་ངོ༌། །དེ་ནས་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གིས་ཕོ་བྲང་རི་ཏཱ་ལའི་རྩེ་མོ་རིན་པོ་ཆེ་སྣ་ཚོགས་པའི་ཁང་བཟངས་ནས་ཁ་བ་ཅན་དུ་གདུལ་བྱའི་སེམས་ཅན་ལ་གཟིགས་པས། སངས་རྒྱས་ཀྱི་བསྟན་པ་མེད་པར་
མཚན་མོ་མུན་པ་མུན་རུམ་དང་འདྲ་བར་མུན་ནག་འཐིབས་པོར་འདུག་པ་གཟིགས་ནས། དེར་སྐྱེས་པའི་སེམས་ཅན་རྣམས་མཚོ་ལ་ཁ་བ་བབ་པ་ལྟར་ཡར་འཐོན་པ་མེད་པར་མར་ངན་སོང་དུ་འགྲོ་བར་འདུག །དེ་ནས་ཐར་པ་མེད་པར་ལྕགས་ཀྱི་ཟ་མ་ཏོག་ཁ་བཅད་པ་འདྲ་བར་གཟིགས་
ནས་དེར་འགྲོ་བའི་དོན་བྱེད་པ་ལ་ནི། དུས་དེ་ཙམ་ན་བོད་ཁམས་གླིང་དགུ་ཞེས་པ། རིན་པོ་ཆེ་འོད་ཀྱི་གླིང་ནི་སྟོད་ཁམས་གསུམ་སྟེ། གཡའ་རི་དང༌། གངས་རིའི་བར་ན་གླང་པོ་ཆེ་དང་རི་དྭགས་རྣམས་ཀྱིས་དབང་བྱས་པ། རུ་བཞི་སོགས་པའི་གླིང་ནི་བར་ཁམས་གསུམ་སྟེ། བྲག་རི་

དང་སྤང་རིའི་ཤོད་ན་བྲག་སྲིན་དང་སྤྲེའུ་རྣམས་ཀྱིས་དབང་བྱས་པ། རྨ་བྱ་འོག་གླིང་ནི་སྨད་ཁམས་གསུམ་སྟེ། ནགས་ཚལ་དང་ལྗོངས་ཀྱི་དབུས་ན་བྱ་དང་སྲིན་པོ་རྣམས་ཀྱིས་དབང་བྱས་པས་སེམས་ཅན་མི་ཞེས་བྱ་བའི་མིང་ཡང་མ་བྱུང་བ་དང༌། དུད་འགྲོ་ནི་
ཧ་ཅང་གླེན་ཞིང་གཏི་མུག་པས་བླང་དོར་ཚུལ་བཞིན་དུ་སྟོན་པའི་ཡུལ་དུ་མ་བཏུབ་བོ། །དེས་ན་ཐོག་མར་མིའི་འགྲོ་བ་བསྐྱེད་པར་དགོངས་ཏེ། འཕགས་པ་གྲུ་འཛིན་གྱི་མགོན་པོའི་ཕྱག་གཡོན་པའི་འོད་ཟེར་ལས་བྱང་ཆུབ་སེམས་དཔའ་སྤྲེའུའི་རྒྱལ་པོ་ཧ་ལུ་མཉྫུ་ཞེས་བྱ་བ་ཞིག་སྤྲུལ་ཏེ།
དེ་ལ་གཏན་ཁྲིམས་ལྔའི་སྡོམ་པ་ཕོག་སྟེ། ཟབ་པ་དང་རྒྱ་ཆེ་བའི་ཆོས་ཀྱི་བདུད་རྩི་ཡང་མང་དུ་སྩལ་ཏེ། བྱང་ཕྱོགས་ཁ་བ་ཅན་ཞེས་བྱ་བའི་རྒྱལ་ཁམས་སུ་སོང་ལ་བྲག་དུམ་བུ་གཅིག་པ་ལ་སྒོམས་ཤིག་ཅེས་སྒོམ་བྱེད་དུ་བཏང་ངོ༌། །དེས་ཀྱང་རྫུ་འཕྲུལ་གྱིས་བགྲོད་པས་སྐད་ཅིག་གཅིག་
གི་ཡུན་ལ་ཁ་བ་ཅན་དུ་ཕྱིན་ཏེ། སེམས་རྩེ་གཅིག་པའི་ཏིང་ངེ་འཛིན་ལ་མཉམ་པར་བཞག་གོ །ཇི་ཙམ་ན། རྗེ་བཙུན་སྒྲོལ་མའི་སྒྱུ་འཕྲུལ་གྱི་ཟློས་གར་ཡིན་པའི་བྲག་སྲིན་མོ་ཞིག་རྩེ་དགའི་བདེ་བ་རྗེས་སུ་དྲན་པའི་ཚུལ་གྱིས་རང་གི་རིགས་དང་མཐུན་པར་སྤྲེའུ་མོའི་ཆ་བྱད་དུ་བཟུང་སྟེ་མདུན་
དུ་འོངས་སོ། །འོངས་ནས་ཀྱང་བསམ་གཏན་པ་དེ་དང་དགའ་མགུར་སྤྱོད་པའི་བརྡ་ཐབས་ཀྱི་རྣམ་པ་ཅི་ཡང་བསྟན་པས་ཞག་བདུན་གྱི་བར་དུ་དུས་འདའ་བར་བྱས་ཀྱང་དེའི་སེམས་ནི་ཅུང་ཟད་ཀྱང་གཡོ་བར་མ་ནུས་སོ། །སྤྲེའུ་མོས་བསམས་པ། ཁ་དོག་དང་བྱད་བཞིན་མི་སྡུག་པས་ལན་
ནོ་སྙམ་སྟེ། ཉིན་གཅིག་བུད་མེད་བཟང་མོ་མཛེས་ཤིང་ལྟ་ན་སྡུག་པ་ལང་ཚོ་གཞོན་ནུར་གྱུར་པ་རྒྱན་ཐམས་ཅད་ཀྱིས་བརྒྱན་པ་ཅིག་ཏུ་སྤྲུལ་ནས། སླར་ཡང་འདོད་པའི་རྩེ་དགའ་ལ་སྤྱོད་པའི་བརྡ་བསྟན་པ་དང༌། སྤྲེའུ་དེའི་སེམས་ཅུང་ཟད་གཡོས་པ་བཞིན་དུ་དེའི་གདོང་ལ་མིག་ཟུར་གཏད་དེ་
ཅུང་ཟད་གནས་པར་གྱུར་ཏོ། །ཇི་ཙམ་ན་དེས་ཀྱང་གླགས་རྙེད་པར་ཤེས་ནས། ངོ་ཚས་སྤངས་པ་བཞིན་དུ་དེའི་གམ་དུ་ལྷགས་ཏེ། བདག་ཅག་གཉིས་ནི་མཐུན་པའི་ཁྱིམ་ཐབས་བྱའོ་ཞེས་ལན་གཅིག་མ་ཡིན་པར་སྨྲ་བར་བྱས་སོ། །སྤྲེའུས་སྨྲས་པ། ང་ནི་འཕགས་པ་སྤྱན་རས་

གཟིགས་ལས་དགེ་བསྙེན་དུ་བསླབས་ནས་དེའི་བསླབ་བྱ་ལ་སློབ་པ་ཞིག་ཡིན་པས་སྲོག་གི་དབང་པོ་འགགས་པ་ནི་བླའི། བསླབ་བྱ་འདོར་བ་ལ་ནི་དེ་ལྟ་མ་ཡིན་ནོ་ཞེས་སོ། །དེར་བྲག་སྲིན་མོས་སྨྲས་པ། ཀྱེ་མ་སྤྲེའུའི་རྒྱལ་པོ་བདག་ལ་དགོངས་ཤིང་གསོན། །བདག་ནི་ལས་ཀྱི་
དབང་གིས་སྲིན་མོའི་རིགས་སུ་སྐྱེས། །འདོད་ཆགས་དབང་གིས་ཁྱོད་ལ་ཞེན་ཅིང་ཆགས། །ཆགས་པའི་དབང་གིས་ཁྱོད་ལ་བསྐོར་ཞིང་གསོལ། །བདག་ནི་ཁྱེད་དང་ཁྱིམ་ཐབས་མི་བྱེད་ན། །ཐ་མར་སྲིན་པོ་དག་དང་འགྲོགས་ནས་ནི། །ཉི་མ་རེ་ལ་སྲོག་ཆགས་ཉི་ཁྲི་གསོད། །
ནང་མ་རེ་ལ་སྲོག་ཆགས་སྟོང་སྟོང་ཟ། །སྲིན་མོའི་ཕྲུ་གུ་མང་པོ་སྐྱེས་གྱུར་ནས། །ཁ་བ་ཅན་གྱི་ཡུལ་ཕྱོགས་འདི་ཉིད་ནི། །སྲིན་པོའི་རྒྱལ་ཁམས་དག་ཏུ་གྱུར་ནས་ཀྱང༌། །ཛམྦུའི་གླིང་ཀུན་སྲིན་པོས་ཟ་བར་འགྱུར། །དེས་ན་བདག་ནི་འདི་རུ་འཆི་བར་བགྱི། །ཤི་ནས་བདག་ཅག་ལས་ཀྱི་
དབང་གིས་ཀྱང༌། །བདག་ནི་མི་བཟད་དམྱལ་བའི་གནས་སུ་ལྟུང༌། །སྡོམ་པ་བསྲུངས་པས་མི་ཕན་ཁྱོད་ལ་སྡིག་པ་འོང༌། །ཁྱོད་ཀྱི་བྱང་སེམས་སྡོམ་པའང་ཉམས་ནས་འགྲོ། །དེ་བས་བདག་ལ་དགོངས་ལ་ཐུགས་རྗེས་གཟིགས། །ཞེས་གདུང་བའི་སྨྲེ་སྔགས་འདོན་པ་དང༌།
མཆི་མའི་རྒྱུན་ནི་ཁྲག་གི་ཆུ་གཏེར་བཞིན་དུ་དབབ་པར་བརྩམས་སོ། །བྱང་ཆུབ་སེམས་དཔས་བསམ་པ་མ་ལ་འདིའི་བསམ་པ་བཞིན་བྱས་ན་ནི་བསླབ་པ་དང་འགལ་བར་འགྱུར་ལ། ཅིག་ཤོས་དེ་ལས་བཟློག་སྟེ་བསླབ་པ་ལ་གནས་པར་བྱས་ན་ནི་སྲིན་མོ་ཤི་བར་འགྱུར་གྱི། ད་ནི་འཕགས་པ་
ཉིད་ལ་གསོལ་ཏེ། དེས་ཇི་ལྟར་བཀའ་སྩལ་པ་དེ་ལྟར་བགྱིའོ་སྙམ་དུ་རྫུ་འཕྲུལ་གྱིས་རི་པོ་ཏ་ལའི་གཞལ་མེད་ཁང་ན་འཕགས་པས་ཆོས་ཀྱི་འཁོར་ལོ་བསྐོར་བའི་དྲུང་དུ་མངོན་པར་དོང་སྟེ་ཕྱིན་ནས་གསོལ་པ། ཀྱེ་མ་འགྲོ་བའི་མགོན་པོ་ཐུགས་རྗེ་ཅན། །བདག་གི་དགེ་བསྙེན་
སྡོམ་པ་སྲོག་བཞིན་བསྲུངས་ལགས་ཀྱང༌། །བདུད་ཀྱི་རིགས་ཀྱི་སྲིན་མོ་འདོད་སེམས་ཅན། །བདག་ལ་ཐོ་འཚམ་ལགས་སམ་སྡོམ་པ་དབྲོག་ཏུ་བྱུང༌། །དེ་ལ་ཇི་ལྟར་བགྱིས་ལ་བདག་གིས་སྡོམ་པ་བསྲུང༌། །བྱམས་མགོན་ཁྱེད་ཀྱིས་བདག་ལ་གནང་བར་ཞུ། །ཞེས་གསོལ་པ་ལ།

འཕགས་པས་བཀའ་སྩལ་པ། རིགས་ཀྱི་བུ་ཁྱོད་ཀྱིས་བྲག་སྲིན་མོ་དང་བཟའ་ཚོ་གྱིས་ཤིག །བར་ཆད་དུ་མི་འགྲོ་ཞིང་ཕན་པ་རྒྱ་ཆེན་པོ་འབྱུང་བའི་གྲོགས་སུ་འགྲོ་སྟེ། མ་འོངས་པ་ན་ཁ་བ་ཅན་གྱི་རྒྱལ་ཁམས་སུ་ཁྱོད་ཀྱི་བུ་ཚ་རིགས་རྒྱུད་འཕེལ་ཞིང་མིའི་འགྲོ་བར་གྱུར་ཏོ། །
དེ་དག་གིས་དམ་པའི་ཆོས་འཛིན་པར་འགྱུར་བས་ན་མཆོག་ཏུ་འགྱུར་རོ་ཞེས་དང༌། རྗེ་བཙུན་མ་སྒྲོལ་མས་ཀྱང༌། དེ་ནི་ལེགས་ཀྱི་དེས་ནི་མིའི་འགྲོ་བ་འཕེལ་ནས་དམ་པའི་ཆོས་འཛིན་པའི་རྟེན་དུ་འགྱུར་རོ་ཞེས་གསུངས་སོ། །དེ་སྐད་ཐོས་ནས་སླར་ཡང་ཁ་བ་ཅན་དུ་ལོག་སྟེ་བྲག་སྲིན་མོ་དང་བཟའ་ཚོ་བྱས་
ཏེ། དགའ་བ་དང་རྩེ་བ་དང་དགའ་མགུར་སྤྱོད་པ་ལས། ཟླ་བ་དགུ་དང་ངོ་བཅུ་ནས་འགྲོ་བ་རིགས་དྲུག་ནས་ཚེ་འཕོས་པའི་ཕྲུ་གུ་གཤིས་མི་འདྲ་བ་དྲུག་བྱུང་སྟེ། ལུས་ཐམས་ཅད་སྤུས་ཁེངས་པ་དང༌། མ་སྲིན་མོ་ཡིན་པས་མཇུག་མ་མེད་ཅིང་གདོང་དམར་བ། དེའང་ལྷ་ལས་འཕོས་པ་
ནི། དལ་བ་དང༌། ཡིད་གཞུངས་པ་དང༌། རྒྱུད་འཇམ་པ། ལྷ་མ་ཡིན་ལས་འཕོས་པ་ནི་ཞེ་སྡང་ཆེ་བ་དང་འཐབ་པ་ལ་དགའ་བ། མི་ལས་འཕོས་པ་ནི་འདོད་པའི་ལོངས་སྤྱོད་ལ་སྲེད་པ་ཆེ་བ། དུད་འགྲོ་ལས་འཕོས་པ་ནི་གོ་བ་ཞན་པ་དང་ཤེས་རབ་ཆུང་བ། ཡི་དྭགས་ལས་འཕོས་པ་ནི་ལྟོ་
ལ་ཞེན་པ་དང་སེར་སྣ་ཆེ་བ། དམྱལ་བ་ལས་འཕོས་པ་ནི་ཁྲོ་གཏུམ་ཆེ་བ་དང་སྡུག་བསྔལ་ལ་བཟོད་སྲན་ཆེ་བ་རྣམས་བྱུང་སྟེ། དེ་ཐམས་ཅད་ཀྱང་ཕ་ལ་ལྟོས་ནས་ལུས་ལ་སྤུས་གང་བ་དང༌། མ་ལ་ལྟོས་ནས་མཇུག་མ་མེད་པ་དང༌། ཤ་ཁྲག་ལ་དགའ་བ་དང༌། མགོ་ལ་སྐྲ་ཡོད་པ་
དང༌། སྨྲ་ཤེས་པ་རྣམས་སུ་གྱུར་ཏོ། །ཇི་ཙམ་ན་ཕ་སྤྲེའུ་བྱང་ཆུབ་སེམས་དཔའ་དེས་ལྷོ་ཕྱོགས་ཀྱི་ནགས་ཚལ་རྨ་བྱ་ཅན་ཞེས་བྱ་བ་ན་སྤྲེའུ་མང་དུ་ཡོད་པའི་ཟླར་བསྐྱལ་ཏེ་བཞག་གོ། །རིང་ཞིག་ལོན་ན་དེ་ཐམས་ཅད་སྤྲེའུ་ཡང་མ་ཡིན་ལ། མི་ཡང་མ་ཡིན་པ་ཁོ་ན་ལྔ་བརྒྱ་ཙམ་འཕེལ་
ནས། རང་རང་གི་ཕ་མ་དང་མེས་པོ་དག་མཐོང་བ་ན། ཁ་དུ་མ་ནས་ལག་པ་གདེངས་པ་རོང་རོང་བྱེད་ཅིང་ང་ལ་ཟས་བྱིན་ཞེས་སློང་བར་བྱེད་དོ། །དེ་དག་སྤྲེའུ་བྱང་ཆུབ་སེམས་དཔའ་དེས་མཐོང་ནས་ཤིང་ཐོག་ལ་སོགས་པ་བཏུས་ནས་བྱིན་པས་ཚིམ་པར་ཡང་མ་ནུས་ཤིང་ལུས་སེམས་

ཤིན་ཏུ་གདུང་བར་གྱུར་པས་ཡིད་ལ་འདི་ལྟར་བྱེད་དེ། ང་ལ་ལུས་སེམས་གདུང་བ་འདི་ལྟ་བུ་འབྱུང་བ་ནི་འཕགས་པའི་བཀའ་བཞིན་དུ་བསྒྲུབས་པ་ལས་བྱུང་གི་ཁོང་ལ་ནི་འཁྲུལ་པ་ཅི་ཞིག་སྲིད། དེས་ན་ད་ནི་ཇི་ལྟར་བགྱི་ཞེས་འཕགས་པ་ཉིད་ལ་ཞུ་བར་རིགས་སོ་སྙམ་ནས་རི་བོ་གྲུ་འཛིན་གྱི་གཞལ་
མེད་ཁང་དུ་ཕྱིན་ཏེ་འཕགས་པ་ལ་གསོལ་པ། ཀྱེ་མ་ཁྱིམ་ཐབས་བདུད་ཀྱི་བཙོན་རར་མ་ཤེས་ཤིང༌། །བུད་མེད་བདུད་ཀྱི་འཆིང་བར་མ་ཤེས་ལ། །བུ་ཚ་འཁོར་བའི་བདུད་དུ་མ་ཤེས་པས། །འདོད་པ་དུག་གི་ལོ་མར་མ་རྟོགས་ཏེ། །སྙིང་རྗེས་ཆགས་པར་གྱུར་ནས་བདག་བསླུས་ན། །
འདོད་པའི་འདམ་བྱིང་སྡུག་བསྔལ་རི་ཡིས་མནན། །ཉོན་མོངས་དུག་འཐུང་ལས་ངན་རིམས་ཀྱིས་བཏབ། །སྡུག་བསྔལ་ནད་ཀྱིས་བདག་ཉིད་མནར་གྱུར་ན། །འཁོར་བའི་གནས་སུ་བདག་ཉིད་རང་གིས་བཅིངས། །མ་རིག་མུན་འཐིབས་རྟོག་པའི་དྲྭ་བར་ཆུད། །ད་ནི་ཇི་ལྟར་བྱས་ལ་བུ་ཚ་
བསྐྱོང་བར་བགྱི། །འཕགས་པས་བཀའ་ཡིས་གནང་ནས་བདག་ལ་འདི་ལྟར་བྱུང༌། །ཕྱི་མ་དམྱལ་བར་ལྟུང་བར་ཐེ་ཚོམ་མེད། །དེ་ཕྱིར་བདག་ལ་ཐུགས་རྗེས་བསྐྱབ་ཏུ་གསོལ། །ཞེས་ཞུས་པས། འཕགས་པ་སྤྱན་རས་གཟིགས་དབང་ཕྱུག་གི་ཞལ་ནས། བོད་ཁ་བ་ཅན་གྱི་
ཡུལ་ནི་མུན་པའི་སྨག་རུམ་དང་འདྲ། མི་མ་ཡིན་གྱི་སེམས་ཅན་གྱི་དབང་བྱས་ནས་ངའི་གདུལ་བྱའི་རྟེན་དུ་མ་གྱུར། འདི་རྣམས་འགྲོ་བ་མིར་སྤེལ་ལ། མཐོ་རིས་དང་ཐར་པ་ཐོབ་པའི་ཆེད་དུ་ཁྱོད་བཏང་བ་ཡིན། ཁྱོད་ང་ལ་ཐེ་ཚོམ་དང་ཡིད་གཉིས་མ་བྱེད་ཅིག །ཁྱོད་ཀྱང་སྡུག་བསྔལ་
བར་མ་བྱེད་ཅིག །ཁྱོད་ཀྱི་བུ་ཚ་བོ་འདི་རྣམས་མཐར་མིར་འགྱུར་གྱིས་དེ་དུས་ནམ་ཞིག་ན་ངའི་གདུལ་བྱར་འགྱུར་བ་ཡིན་པས། ཁྱོད་ལ་ཉེས་པ་མེད་ཀྱིས་ཐར་པའི་ཆ་དང་མཐུན་ནོ། །ཤིན་ཏུ་ལེགས་སོ། །སྡུག་བསྔལ་བར་མ་སེམས་ཤིག །ཁྱོད་ཀྱི་རིགས་བརྒྱུད་དེ་རྣམས་ཀྱི་ཟས་
སྐལ་འདི་ཡིན་ནོ་གསུངས་ནས། ནས་དང༌། གྲོ་དང༌། སྲན་མ་ལ་སོགས་པའི་འབྲུ་སྣ་བདུན་གནང་ནས་འདི་ཁ་བ་ཅན་གྱི་ཡུལ་དབུས་སུ་ཐོབ་ཅིག་དང་འབྲུའི་ཚོགས་དཔག་ཏུ་མེད་པ་འཕེལ་བར་འགྱུར་རོ་ཞེས་གསུང་ཞིང་གསེར་དང༌། དངུལ་དང༌། ཟངས་དང༌། ལྕགས་ལ་

སོགས་པ་རིན་པོ་ཆེའི་ཕྱེ་མ་སྙིམ་པ་གང་ཁ་བ་ཅན་གྱི་ཕྱོགས་སུ་གཏོར་ནས་ས་གཞི་རིན་པོ་ཆེའི་འབྱུང་གནས་སུ་བྱིན་གྱིས་བརླབས་ཏེ། ཁྱོད་ཀྱི་རིགས་རྒྱུད་འདི་དག་མིར་གྱུར་པའི་ཚེ་གསེར་དངུལ་ལ་སོགས་པས་ཀྱང་འཚོ་ཞིང༌། རིན་པོ་ཆེའི་འབྱུང་ཁུངས་རྣམས་ཀྱང་དུས་
དུས་སུ་ཁ་བྱེ་བར་འགྱུར་རོ་ཞེས་དང༌། ལྗགས་ཀྱི་མཆིལ་མ་ཞིག་ཀྱང་ཁ་བ་ཅན་གྱི་ཕྱོགས་སུ་འཕངས་ཏེ། མ་འོངས་པ་ན་བྱང་ཆུབ་སེམས་དཔའི་སྤྲུལ་པ་ཆོས་སྐྱོང་བ་ཐོད་བརྒལ་བ་རེ་འབྱུང་བར་འགྱུར་རོ་ཞེས་དབུགས་ཕྱུང་ནས་བཏང་ངོ༌། །སྤྲེའུ་བྱང་ཆུབ་སེམས་དཔས་ཀྱང་ཁ་བ་
ཅན་གྱི་ཡུལ་དུ་འོངས་ཏེ་ཡུལ་དབུས་སུ་འབྲུ་དེ་དག་བཏབ་བོ། །དེ་ལེགས་པར་སྨིན་པ་དང་སྤྲེལ་ཕྲུག་རྣམས་ལ་བསྟན་ཏེ། འདི་དག་འཕགས་པས་ཁྱེད་རྣམས་ཀྱི་ཟས་སྐལ་དུ་གནང་བ་ཡིན་པས་འདི་ཟོ་དང་ཞེས་སྨྲས་པས། ཡུལ་དེ་ལ་ཟོ་དང་དུ་གྲགས་སོ། །དེ་ནས་སླར་
ཡང་ཐུགས་རྗེ་ཆེན་པོའི་ཕྱག་མཐིལ་གྱི་འོད་ཟེར་ལས་ཁྱེའུ་ཆུང་མཚན་དང་དཔེ་བྱད་དུ་ལྡན་པ་ཅིག་སྤྲུལ་ཏེ། སྔར་གྱི་མི་ཡང་མིན་ལ་སྤྲེའུ་ཡང་མིན་པ་དེ་རྣམས་ཀྱི་ཁྲོད་ཏུ་བཏང་བ་ན། དེ་རྣམས་ཀྱིས་སྨྲས་པ། ཁྱོད་ཀྱི་ལུས་བྱད་མཛེས་ཤིང་ལྟ་ན་སྡུག་པ་འདི་ཅི་ལས་བྱུང༌།
ཁྱེའུ་ཆུང་གིས་སྨྲས་པ། ངས་མི་དགེ་བ་བཅུ་སྤོང་བ་དང༌། དགེ་བ་བཅུ་སྤྱད་པ་ལས་བྱུང་ངོ༌། །འོ་ན་བདག་ཅག་རྣམས་ལ་ཡང་སློབས་ཤིག་དང་དེ་ལྟར་དུ་སྤྱད་པར་བགྱིའོ་ཞེས་གསོལ་ལོ། །དེ་ནས་སྤྲུལ་པའི་ཁྱེའུ་དེས་སྤྲེལ་ཕྲུག་རྣམས་ལ་མི་དགེ་བ་བཅུ་སྤོང་བ་དང༌། དགེ་
བ་བཅུ་དང་ཕ་རོལ་ཏུ་ཕྱིན་པ་དྲུག་ལ་སྤྱད་པའི་ཚུལ་རྣམས་ལེགས་པར་བཤད་དོ། །དེ་དག་གིས་ཀྱང་བླང་དོར་ཚུལ་བཞིན་དུ་བྱེད་པའི་སྒོ་ནས་བསྒྲུབས་པས། གཟུགས་བྱད་ཇེ་བཟང་དུ་སོང་སྟེ་མཐར་ཐམས་ཅད་ཀྱང་མིར་གྱུར་ཏོ། །རེ་ཞིག་ན་དེ་དག་གཅིག་ལ་གཅིག་འཇིགས་
པའི་སྣང་བ་དང་བཅས་མཆིས་པ་ལ། མེས་པོས་ཆེ་བཞི་བྱས་ཏེ་ཞིང་རྣམས་ཁག་བཞིར་བགོས་ནས་གཏད་པ་ལྟར་སོ་སོར་གྱེས་པས། སེ་དང༌། རྨུ་དང༌། ལྡོང་དང༌། སྟོང་སྟེ་ནང་གི་མིའུ་རིགས་བཞིའམ་གདུང་དྲུག་ཏུ་གྲགས་སོ། །དེ་ལྟར་ཇི་སྐད་བཤད་པ་ལྟ་བུའི་

འཕགས་པ་སྤྱན་རས་གཟིགས་དབང་ཕྱུག་གི་གདུལ་ཞིང་དུ་གྱུར་པའི་ཡུལ་དེའི་གནས་ཚུལ་དང་ངོ་མཚར་གྱི་ཁྱད་པར་ཇི་ལྟ་བུ་ཞེ་ན། པུ་རྒྱལ་བོད་ཀྱི་ཡུལ་ལ་བསྔགས་པ་མཁའ་འགྲོ་མ་རྣམས་ཀྱིས་རྡོ་རྗེའི་མགུར་དུ་བླངས་པ་ལས། ཤར་རྡོ་རྗེ་གདན་གྱི་བྱང་ཕྱོགས་ན། །གནས་པུ་རྒྱལ་
བོད་ཅེས་བྱ་བ་ཡོད། །རི་མཐོན་པོ་གནམ་གྱི་ཀ་བ་ཡོད། །མཚོ་དམའ་མོ་གཡུ་མི་མཎྜལ་ཡོད། །གངས་དཀར་པོ་ཤེལ་གྱི་མཆོད་རྟེན་ཡོད། །སྤང་སེར་པོ་གསེར་གྱི་ལྷུན་པོ་ཡོད། །དྲི་ཞིམ་པོ་སྨན་གྱི་བདུག་སྤོས་ཡོད། །ཚོན་བཀྲ་བ་གསེར་གྱི་མེ་ཏོག་ཡོད། །དབྱར་བཀྲ་
བ་གཡུ་ཡི་མེ་ཏོག་ཡོད། །ཀྱེ་གངས་རིའི་མགོན་པོ་སྤྱན་རས་གཟིགས། །གནས་དེ་ན་ཁྱོད་ཀྱི་ཞིང་ཁམས་ཡོད། །ཞིང་དེ་ན་ཁྱོད་ཀྱི་གདུལ་བྱ་ཡོད། །ཀྱེ་གངས་རིའི་མགོན་པོ་སྤྱན་རས་གཟིགས། །རི་པདྨ་སྟོང་ལྡན་དབྱིབས་ལེགས་པ། །དུས་དགུན་གསུམ་དཀར་པོ་ཤེལ་གྱི་
མདོག །དུས་དབྱར་གསུམ་སྔོན་པོ་གཡུ་ཡི་མདོག །དུས་སྟོན་གསུམ་སེར་པོ་གསེར་གྱི་མདོག །དུས་དཔྱིད་གསུམ་ཁྲ་བོ་གཟི་ཡི་མདོག །མདོག་ཕུན་སུམ་ཚོགས་པའི་རི་བོ་ལ། །ལྟས་ཁྱད་པར་འཕགས་པའི་མཚན་མ་ཡོད། །དུང་དཀར་པོ་གཡས་སུ་འཁྱིལ་པ་ལ། །
དར་དམར་པོ་རཱ་གའི་ཅོད་པཎ་ཡོད། །མི་ཁྱོད་ཀྱི་སྙན་པ་ཕྱོགས་བཅུར་འཕེལ། །དཔལ་བེའུས་རི་སྐོར་བརྒྱན་པ་ལ། །ནགས་བཀྲ་ཤིས་ཡལ་འདབ་རྒྱས་པ་ཡོད། །མི་ཁྱོད་ཀྱི་བུ་སློབ་ཕྱོགས་བཅུར་འཕེལ། །རི་བོགས་ཆད་གཡུ་ཡི་བུམ་པ་ལ། །ཆུ་ཡན་ལག་བརྒྱད་
ལྡན་ཆུ་མིག་འབབ། །མི་ཁྱོད་ཀྱི་ཐུགས་རྗེས་བསིལ་བར་བྱེད། །གནམ་སྔོན་པོ་གཡུ་བྱའི་གདུགས་སུ་ཕུབ། །ལས་ཉོན་མོངས་ཚད་པ་ཞི་བར་བྱེད། །མི་ཁྱོད་ཀྱི་དགེ་བཤེས་འཕེལ་བའི་རྟགས། །རི་ཟུར་གསུམ་བྲ་གཞུང་གནམ་དུ་མཐོ། །དེང་མཁའ་འགྲོའི་རྒྱལ་མཚན་བསྒྲེང་བ་
འདྲ། །མི་ཁྱོད་ཀྱི་གནས་དེར་བསྟན་པ་སྤེལ། །ས་རྩེ་བརྒྱད་ལུང་པ་ཕྱོགས་སུ་གྱེས། །ཀྱེ་འཁོར་ལོ་རྩིབས་བརྒྱད་ཕབ་པ་འདྲ། །མི་ཁྱོད་ཀྱི་མི་མཐུན་གཅོད་པའི་རྟགས། །ཐང་ཆེན་པོའི་གསེབ་ན་རི་ཆུང་ཉལ། །མཚོ་ཆེན་པོའི་ནང་གི་ཉ་མོ་འདྲ། །མི་ཁྱོད་ཀྱི་སྤྱན་ལྔ་འཕེལ་བའི་

རྟགས། །ཀྱེ་གངས་རིའི་མགོན་པོ་སྤྱན་རས་གཟིགས། །མི་ཁྱོད་ཀྱི་ཞིང་ཁམས་དེ་ན་ཡོད། །ཞིང་དེ་ན་ཁྱོད་ཀྱི་གདུལ་བྱ་ཡོད། །འབྲུ་སྣ་ཚོགས་སྨིན་པའི་ཞིང་ས་ཅན། །འབྲུ་བང་མཛོད་རྒྱས་པའི་རྟགས་སུ་བཟང༌། །ཤིང་སྣ་ཚོགས་སྐྱེས་པ་ནགས་ཀྱི་ཁྲོད། །གནས་
ཁང་བཟངས་འཕེལ་བའི་རྟགས་སུ་བཟང༌། །ཆུ་མི་ཆེ་རྒྱ་མཚོ་ཆེན་པོ་མེད། །ཆུ་མི་ཆུང་ཆུ་བོ་དཔག་མེད་འབབ། །ཆུ་སྙོམས་པས་ཡུལ་མི་རྟག་ཏུ་བདེ། །ཀྱེ་གངས་རིའི་མགོན་པོ་སྤྱན་རས་གཟིགས། །གནས་དེ་ནི་ཁྱོད་ཀྱི་ཞིང་ཁམས་ཡིན། །ཞིང་དེ་ན་ཁྱོད་ཀྱི་གདུལ་བྱ་ཡོད། །
ཤར་ལྷུན་པོའི་རྩེ་ནས་ཉི་མ་འཆར། །ཕྱོགས་གཞན་གསུམ་མི་ནོར་ཤུགས་ལ་ཤེས། །འཆར་མི་སྔ་སྔ་དུས་བསམ་གཏན་འཕེལ། །འཆར་མི་འཕྱི་ཉི་འོད་སྨིན་པ་ལ། །ལུས་བག་ཕེབ་བདེ་བར་སྤྱོད་པར་བྱེད། །རྒས་མི་སྔ་ཕོ་རབ་མདུན་སྟངས་འཕེལ། །རྒས་མི་འཕྱི་མཛངས་
མའི་ལས་རྣམས་འགྲུབ། །ཀྱེ་གངས་རིའི་མགོན་པོ་སྤྱན་རས་གཟིགས། །ཡུལ་བཀྲ་ཤིས་འབྱུང་དེ་ཁྱོད་ཀྱི་ཞིང༌། །ཞིང་དེ་ན་ཁྱོད་ཀྱི་གདུལ་བྱ་ཡོད། །ཅེས་གསུངས་པ་དང༌། འབྲོམ་སྟོན་པ་རྒྱལ་བའི་འབྱུང་གནས་ཀྱིས་སྟོད་མངའ་རིས་ནས་བོད་སྟོན་རྣམས་ཇོ་བོ་རྗེ་ལྷ་གཅིག་
སྤྱན་འདྲེན་པའི་གྲོགས་སུ་སྦྲེན་པའི་ཕྲིན་ཤོག་ལས། ཤིང་རྟའི་དབྱིབས་འདྲ་འཛམ་གླིང་གི །བྱེ་བྲག་བརྗིད་ལྡན་གངས་རིའི་བྱང༌། །ལོ་ཧི་ཏ་འགྲམ་རིན་ཆེན་ཁུངས། །ཁ་བ་ཅན་ཞེས་མང་གྲགས་ན། །བླ་ཆེན་སྟོབས་ལྡན་མི་བསྲུན་པ། །བོད་ཅེས་བྱ་བར་གནས་པའི་ཕྱིར། །ཞེས་
དང༌། ནཻ་པ་ལའི་རྒྱལ་པོ་དེ་ཝ་ལྷས་རང་གི་སྲས་མོ་ལྷ་གཅིག་ཁྲི་བཙུན་ལ་གསུངས་པ། ང་ཡི་སྙིང་དང་འདྲ་བའི་བུ་མོ་ཁྱོད། །བོད་ཅེས་བྱ་བ་ཁྱད་པར་འཕགས་པའི་ཡུལ། །རི་མཐོ་ས་གཙང་གངས་རི་གཉན་གྱི་མགུལ། །བསིལ་ལ་མཛེས་པ་ལྷ་གནས་གཞལ་མེད་ཁང༌། །ངོ་
མཚར་རྨད་བྱུང་ཕན་བདེ་འབྱུང་བའི་གཞི། །ཆུ་བོ་བཞི་འབབ་རྩི་ཤིང་ནགས་ཀྱིས་མཛེས། །འབྲུ་སྣ་ལྔ་འཁྲུངས་རིན་ཆེན་སྣ་ཚོགས་འབྱུང༌། །ཞེས་དང༌། རྒྱ་ནག་ཏོང་འཁུན་རྒྱལ་པོས་ལྷ་གཅིག་ཀོང་ཇོ་ལ་བསླབ་བྱར་གདམས་པ་ལས། བོད་ཅེས་བྱ་བ་ཁ་བ་ཅན་གྱི་ཡུལ། །

ཡུལ་ལ་ཁྱད་པར་འཕགས་པ་དེ་ཡིན་ཏེ། །གངས་རི་རང་བྱུང་མཆོད་རྟེན་ཡ་མཚན་ཅན། །ལྷུན་གྱིས་གྲུབ་པའི་གནས་མཆོག་དམ་པ་ནི། །མཚོ་བཞི་གཡུ་ཡི་མཎྜལ་བཀྲམ་པ་འདྲ། །ཐང་བཞི་ཡིད་འོང་མཆོད་པ་བཤམས་པ་འདྲ། །ཆུ་བོ་བཞི་ཡི་འགྲོས་བཞིའི་རང་བཞིན་ཅན། །རི་མཐོ་
ས་གཙང་གངས་རི་གཉན་གྱི་ལྗོངས། །བཀྲ་ཤིས་ཉམས་དགའ་གཡུང་དྲུང་བྲིས་པ་འདྲ། །ཞེས་དང༌། འཕྲུལ་གྱི་བློན་པོ་མགར་གྱིས་ལྷ་གཅིག་ཀོང་ཇོ་ལ་འདི་ལྟར།ཨེ་མ་ངོ་མཚར་ཆེ། །ལྷ་གཅིག་ཀོང་ཇོ་ཁྱེད། །བདག་གི་ཚིག་ལ་གསོན། །བཀྲ་ཤིས་ཉམས་སུ་དགའ། །
བོད་ཀྱི་རྒྱལ་ཁམས་ན། །རིན་ཆེན་ལྔ་ལས་གྲུབ། །རྒྱལ་པོའི་ཕོ་བྲང་ན། །མི་རྗེ་ལྷ་ཡིས་མཛད། །སྲོང་བཙན་སྒམ་པོ་དེ། །རིགས་གཟུགས་དཔལ་གྱིས་བརྗིད། །མཐོང་ན་སེམས་ཡིད་འཕྲོག །ཐུགས་རྗེ་ཆེན་པོ་ལགས། །རྒྱལ་སྲིད་ཆོས་བཞིན་བསྐྱངས། །
འབངས་རྣམས་བཀའ་ལ་ཉན། །རྒྱལ་བློན་འཁོར་འབངས་རྣམས། །དགའ་སྐྱིད་གླུ་རུ་ལེན། །ཆོས་ཀྱི་ཉི་མ་ཤར། །དཔལ་གྱི་སྒྲོན་མེ་བཏེག །རི་ལ་ཤིང་སྣ་ཚང༌། །ས་གཞི་ཡངས་པ་ལ། །འབྲུ་སྣ་ལྔ་ཡི་ཚོགས། །གོ་མཚམས་མེད་པར་སྐྱེས། །གསེར་དངུལ་
ཟངས་ལྕགས་སོགས། །རིན་ཆེན་དུ་མ་ཡོད། །གནག་རྟ་ལུག་གསུམ་རྒྱས། །དགའ་སྐྱིད་དེ་ལྟར་ཡོད། །ཅེས་དང༌། ཁྲོ་ཕུ་ལོ་ཙཱ་བ་བྱམས་པའི་དཔལ་གྱིས་བཻ་ཌཱུརྻའི་ཚོང་དུས་ནས་པཎ་ཆེན་ཤཱཀྱ་ཤྲཱི་སྤྱན་འདྲེན་པོའི་ཕོ་ཉ་པཎ་ཆུང་ཛ་ཡ་ཤྲཱི་དང༌། ཝཱ་རཱ་ཎ་སཱི་བ་སོགས་
མངགས་པའི་དུས་ཀྱི་ཞུ་ཡིག་ཏུ། མ་ག་དྷཱ་སོགས་རིག་འབྱུང་གནས་ན་སྡིག་ཏོ་ཡི། །དམག་ཚོགས་ཀྱིས་བཅོམ་ཨཽ་རྒྱན་ཁ་ཆེ་བལ་ཡུལ་ཡང༌། །ལོག་སྤྱོད་ཀྱིས་ཁེངས་དེང་སང་བསྟན་སྲོག་ལེགས་གནས་ནི། །བོད་ཡུལ་འདིར་ཟད་སྐྱེས་ཆེན་བྱང་ཕྱོགས་ཞབས་བསྐྱོད་
ཞུ། །ཞེས་གསུངས་པ་ལྟར་ཁ་བ་ཅན་གྱི་རྒྱལ་ཁམས་ནི་ས་གཞི་མཐོ་ཞིང་གཙང་བ། འཆི་བ་མེད་པའི་གཞལ་མེད་ཁང་དུ་སོན་པ་ལྟར་ཧ་ཅང་གྲང་བ་ཡང་མིན་པའི་རེག་པ་བསིལ་པོ་འཇོ་བས་སྙིང་ལ་དགའ་བ་སྟེར་བ། ཤེལ་དཀར་པོ་དང་བསིལ་ཟེར་བྱེད་པའི་དཀྱིལ་འཁོར་བཏགས་

པའི་ཕྱེ་མ་དག་ལེགས་པར་སྤུངས་པ་དང་འདྲ་བའི་གངས་རིའི་ཕྲེང་བ་མཚར་དུ་དངར་བས་བསྐོར་བའི་ལྗོངས། རྩྭ་དང༌། ཤིང་ལྗོན་པ་དང༌། གེལ་པ་དང༌། ལོ་མ་དང༌། མེ་ཏོག་དང༌། འབྲས་བུ་དང༌། འབྲུ་དང༌། སྨན་གྱི་རྣམ་པ་མང་པོ་རྩི་བཅུད་ཆེ་ཞིང་དྲི་ཞིམ་པོའི་
ཚོགས་ཀྱིས་ཀུན་ནས་གཏམས་པ། རིན་པོ་ཆེའི་རིགས་སུ་གཏོགས་པ། གསེར་དང༌། དངུལ་དང༌། ཟངས་དང༌། ལྕགས་ལ་སོགས་པ་ས་གཞི་ལས་རང་འབྱུང་བ། ཕྱོགས་ཀྱི་དཀྱིལ་འཁོར་ཐམས་ཅད་དུ་བཀྲ་ཤིས་པའི་རྟགས་ཀྱིས་ཉམས་དགའ་བར་བྱས་པ། འཕགས་པ་རིགས་
གསུམ་མགོན་གྱིས་རྣམ་པར་འཕྲུལ་པའི་ལྷ་བཙན་པོ་རིམ་པར་བྱོན་པ་རྣམས་ཀྱི་དགེ་བ་བཅུའི་ཁྲིམས་ཀྱིས་ལེགས་པར་བསྐྱངས་པ། མི་དཔའ་ཞིང་རྟ་མགྱོགས་པ་ལ་སོགས་པ་རྟེན་དང་བརྟེན་པའི་ཡོན་ཏན་འབའ་ཞིག་གིས་རྣམ་པར་བཀླུབས་པ། དེའི་ཤར་དུ་རྒྱ་ནག་དང་ཁྲི་བརྟན།
ལྷོར་རྒྱ་གར་དང་ཁ་ཆེ། ནུབ་ཏུ་སྟག་སྡེ་གཟིག་ཕན། བྱང་དུ་ཁྲོམ་དང་གེ་སར་ཏེ་བརྒྱད་ཀྱིས་ཀུན་ནས་བསྟེན་པའི་ཡུལ་ལྗོངས་གང་ལ་སྤྱིའི་མིང་དུ་བོད་ཡུལ་ཞེས་གྲགས་སོ། །གཉིས་པ་བྱེ་བྲག་ཏུ་ཆོས་ཀྱི་སྦྱིན་པའི་མ་མོ་འདི་གང་དུ་བསྒྲུབ་པའི་གནས་ནི། སྤྱིར་སྐོར་གསུམ་དང༌། རུ་བཞི་
དང༌། ཁམས་གསུམ་མམ།སྒང་དྲུག་ཏུ་དབྱེ་བའི་རྣམ་བཞག་བྱུང་བ་ལྟར་ན། སྤུ་རངས་དང༌། མང་ཡུལ་དང༌། ཟངས་དཀར་གསུམ་སྐོར་གཅིག་གོ །ལི་དང༌། བྲུ་ཤ་དང༌། སྦལ་ཏེ་གསུམ་སྐོར་གཅིག་གོ །ཞང་ཞུང་དང༌། ཁྲི་ཏེ་དང༌། སྟོད་སྨད་གསུམ་སྐོར་གཅིག་སྟེ་
སྟོད་ཀྱི་མངའ་རིས་སྐོར་གསུམ་མོ། །དབུས་ན་དབུ་རུ་དང་གཡོ་རུ་གཉིས། གཙང་ན་གཡས་རུ་དང་རུ་ལག་གཉིས་ཏེ་བར་གྱི་དབུས་གཙང་རུ་བཞིའོ། །མདོ་ཁམས་ལ་སྨད་ཁམས་བཏགས་པ་ཁམས་གཅིག་དང༌། མདོ་སྨད་ལ་དབྱར་མོ་ཐང་བཏགས་པ་ཁམས་གཅིག་དང༌། གཙོང་
ཁ་ལ་གྱི་ཐང་བཏགས་པ་ཁམས་གཅིག་སྟེ་སྨད་ཁམས་གསུམ་དུ་བཏགས་པའི་དབང་དུ་བྱས་ན་མདོ་སྨད་ཀྱི་ཁམས་དང༌། ཡང་ན་རྔུལ་རྫ་ཟལ་མོ་སྒང་དང༌། ཚ་བ་སྒང་དང༌། སྨར་ཁམས་སྒང་དང༌། སྤོ་འབོར་སྒང་དང༌། དམར་རྫ་སྒང་དང༌། མི་ཉག་རྭ་བ་སྒང་སྟེ་སྨད་ཀྱི་མདོ་ཁམས་

སྒང་དྲུག་ནི་བོད་ཆེན་པོའི་རྒྱལ་ཁམས་སུ་གྲགས་པ་ལས། ཟལ་མོ་སྒང་དང༌། ཡང་ཚེ་རིང་གནམ་གྱི་མཐོངས་ནས་བསྐོས་པའི་སྟོབས་ཀྱི་འཁོར་ལོས་སྒྱུར་བ་ཇིང་གིར་གན་གྱིས། ཆོས་ཀྱི་རྒྱལ་པོ་དཔལ་ས་སྐྱ་པ་འཕགས་པ་བློ་གྲོས་རྒྱལ་མཚན་དཔལ་བཟང་པོ་པ་ལ་དབང་ཡོན་
རིམ་པ་གསུམ་ཕུལ་བའི་དང་པོ་ལ་ཁྲི་སྐོར་བཅུ་གསུམ་ཕུལ་བ་དང༌། བར་པ་ལ་ཆོས་དུང་དཀར་པོ་རྒྱང་གྲགས་ཀྱིས་གཙོས་པའི་བོད་ཆོལ་ཁ་གསུམ་ཕུལ་བ་དང༌། རྗེས་མ་ལ་བླ་མའི་བཀའ་བཞིན་དུ་རྒྱའི་མི་ཡུར་ཆེན་པོ་ཕུལ་བ་ལས། བར་པ་ཆོལ་ཁ་གསུམ་ཞེས་བྱ་བའི་ཐ་སྙད་
གདགས་གཞི་ཡང༌། མངའ་རིས་གུང་ཐང་ནས་སོག་ལ་སྐྱ་བོའི་བར་ལ་དབུས་གཙང་དམ་པ་ཆོས་ཀྱི་ཆོལ་ཁ་དང༌། སོག་ལ་སྐྱ་བོ་ནས་རྨ་ཆུ་ཁུག་པའི་བར་ལ་མདོ་སྟོད་མགོ་ནག་མིའི་ཆོལ་ཁ་དང༌། རྨ་ཆུ་ཁུག་པ་ནས་རྒྱ་མཆོད་རྟེན་དཀར་པོའི་བར་ལ་མདོ་སྨད་གེར་ལིང་རྟའི་ཆོལ་ཁ་སྟེ་
གསུམ་པོ་འདི་ལ་ཞིང་གཅིག་ཏུ་བརྩིས་པ་ཡིན་ཏེ། དེའང་ཧོར་སེ་ཆེན་རྒྱལ་པོའི་མངའ་འོག་ཏུ་ཞིང་བཅུ་གཅིག་ཡོད་པ་ལས། འདིར་ཆོལ་ཁ་གསུམ་དུ་ཞིང་གཅིག་ཅུང་ཟད་མ་ལང་ནའང༌། བླ་མ་བཞུགས་པའི་གནས་ཡིན་པ་དང་བསྟན་པ་དར་བའི་གནས་ཡིན་པས་གཞན་ལས་ཁྱད་པར་
འཕགས་པར་དགོངས་ནས་ཞིང་གཅིག་ཏུ་བརྩིས་ནས་ཕུལ་བར་གྲགས་སོ། །དེ་ལྟར་ཇི་སྐད་བཤད་པའི་ཆོལ་ཁ་གསུམ་ལས་ཆོལ་ཁ་ཕྱི་མ་བོད་དང་བོད་ཆེན་པོ་གཉིས་ལས། བོད་ཆེན་པོར་གྲགས་པའི་སའི་ཐིག་ལེ་གང་ཡིན་པ་སྟེ། དེའང་འདི་ལྟར་གང་དག་འདས་པ་དང༌། མ་བྱོན་
པ་དང༌། ད་ལྟར་བྱོན་པའི་སངས་རྒྱས་བཅོམ་ལྡན་འདས་གང་ཇི་སྙེད་ཅིག་བྱོན་པ་དང༌། འབྱོན་པར་འགྱུར་བ་ཐམས་ཅད་ཀྱང་ཡིད་ཀྱི་སྲུབ་ཤིང་དཔུང་དང་བཅས་པའི་གཡུལ་ལས་རྣམ་པར་རྒྱལ་བའི་གོ་འཕང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སྙིང་པོ་མངོན་དུ་བགྱིད་
པ་དང་བགྱི་བར་འགྱུར་བ། དུས་དང་གནས་སྐབས་ཐམས་ཅད་དུ་ཡང་མི་ཤིགས་རྡོ་རྗེ་ཆེན་པོའི་ཁམས་སུ་བྱིན་གྱིས་བརླབས་པའི་གནས། གླིང་རྣམས་ཀྱི་ནང་ནས་ཆེས་ཁྱད་པར་དུ་འཕགས་པ། ཛམྦུ་རྐང་འཐུང་གི་རྒྱལ་མཚན་གྱིས་ཉེ་བར་སྤུད་ཅིང༌། ཤིང་དེའི་འབྲས་བུ་ལེགས་པར་

སྨིན་པ་ཆུར་ལྷུང་བའི་སྒྲ་ལས་ཉེ་བར་དྲངས་ཏེ། ཛམྦུ་གླིང་ཞེས་བྱ་བའི་ཡུལ་དབུས་གྱུར་འཆང་གི་ལྟེ་བ་འཕགས་ཡུལ་རྡོ་རྗེའི་གདན་ནོ། །དེ་ནས་གནོད་སྦྱིན་གྱི་རྒྱལ་པོའི་ཕྱོགས་སུ་དཔག་ཚད་བརྒྱ་ཕྲག་གཅིག་གཞལ་བའི་ནོར་འཛིན་དགའ་མའི་བཞིན་གྱི་དཀྱིལ་འཁོར་
རྣམ་པར་ཡངས་པ་ག་ལ་བར། ངེས་པའི་དོན་དུ་བསྐལ་པ་དཔག་ཏུ་མེད་པ་ནས་སྟོབས་དང་མི་འཇིགས་པ་ལ་སོགས་པ་ཐུན་མོང་མ་ཡིན་པའི་ཡོན་ཏན་གྱི་རྩལ་མ་ལུས་པ་རྫོགས་པར་གྱུར་ཀྱང༌། དུས་འདིར་འགྲོ་བ་ཐུན་མོང་བ་དག་གི་སྣང་ངོ་རུ། དཔེར་ན་ནམ་མཁའ་དྭངས་པའི་
དུས་ཀྱི་ཟླ་བའི་དཀྱིལ་འཁོར་གཅིག་ཉིད་མ་གཡོས་བཞིན་དུ། ཆུའི་སྣོད་ཆེ་ཆུང་ཇི་སྙེད་པ་དེ་སྙེད་ཀྱི་གྲངས་དང་མཉམ་པའི་གཟུགས་བརྙན་འགོག་པ་མེད་པར་སྟོན་པ་དེ་བཞིན་དུ་འཕགས་པ་རིགས་གསུམ་མགོན་པོའི་རྣམ་པར་འཕྲུལ་པའི་སྒྱུ་འཕྲུལ་གྱི་རོལ་རྩེད། འོད་གསལ་ལྷའི་
རིགས་ཀྱི་ཤིང་སཱ་ལ་ཆེན་པོའི་པང་པར་རྒྱུན་མི་ཆད་པ་ཉིད་དུ་སྐྱེ་བ་ལེན་ཅིང༌། སངས་རྒྱས་བཅོམ་ལྡན་འདས་ཀྱི་ལུགས་མཆོག་དྲི་མ་དང་བྲལ་བ་གང་དག་བཞུགས་པ་མ་ལུས་པ་ལེགས་པར་བཟུང་ནས། མཁས་པའི་ཕྲིན་ལས་རྣམ་པ་གསུམ་གྱི་སྒོ་ནས། ཕྱོགས་ཀྱི་དཀྱིལ་འཁོར་མ་
ལུས་པ་ཡང་དག་པའི་འབྱོར་པ་བླ་ན་མེད་པས་སྣང་བར་བྱེད་དོ། །རབ་ཏུ་སྣང་བར་བྱེད་དོ། །ཀུན་དུ་རབ་ཏུ་སྣང་བར་བྱེད་ཅིང་བྱིན་གྱིས་བརླབས་པའི་གདན་ས་ཆེན་པོ་དཔལ་ས་སྐྱའི་དགོན་པ་ཞེས་ཡོངས་སུ་གྲགས་པ། མཁས་ཤིང་གྲུབ་པའི་ས་ལ་གནས་པ་གྲངས་མེད་པའི་བསྟི་གནས་
སུ་གྱུར་པའི་བོད་ཡུལ་དབུས་ཀྱི་རྡོ་རྗེའི་གདན་ཆེན་པོ། འཕགས་ཡུལ་གྱི་གྲུབ་པའི་དབང་ཕྱུག་ཐམས་ཅད་ཀྱི་འཁོར་ལོས་སྒྱུར་བ་འཇིགས་བྲལ་དཔལ་ལྡན་ཆོས་སྐྱོང་ཆེན་པོའི་ཞབས་ཀྱིས། སེམས་ཅན་རྒྱ་མཚོའི་ཁམས་སུ་ཉིན་ལན་གསུམ་དང་མཚན་ལན་གསུམ་དུ་གཟིགས་ནས་
བདག་གི་སྐལ་བ་དང་ལྡན་པའི་གདུལ་བྱ་སུ་ཞིག་ནི་ཡོངས་སུ་སྨིན་པར་བགྱི། སུ་ཞིག་ནི་རྣམ་པར་གྲོལ་བའི་ལམ་དུ་བཀྲི་བར་བགྱི། སུ་ཞིག་ནི་བྱང་ཆུབ་ཀྱི་སྙིང་པོ་ལ་དགོད་པར་བགྱི། སུ་ཞིག་ནི་སེམས་ཅན་གྱི་དོན་དུ་བསྐུལ་བར་བགྱི་སྙམ་པ་རྩེ་གཅིག་ཏུ་དགོངས་ཏེ། སྐུ་དངོས་

སུ་བྱོན་ནས་གདན་ས་ཆེན་པོ་དེ་ཉིད་དུ་ཕེབས་པ་ན། དེར་ལེགས་པའི་རྟེན་འབྲེལ་ཕུན་སུམ་ཚོགས་པ་འཛོམ་པར་བརྟེན། ས་འདི་ཐམས་ཅད་ང་ལ་དབང་བ་ཡིན་ནོ་ཞེས་གསུངས་ཤིང་བདག་གིར་མཛད་ཅིང་བྱིན་གྱིས་བརླབས་པའི་གནས་དེ་ཉིད། ལྷ་དང་བཅས་པའི་སྐྱེ་དགུ་མ་ལུས་པའི་
མཆོད་སྡོང་ཕུལ་དུ་བྱུང་བའི་རང་བཞིན་དུ་བཞུགས་སོ། །སླར་ཡང་གདན་ས་ཆེན་པོ་དེ་ཉིད་ནས་ཀྱང༌། མེ་ལྷའི་མཚམས་སུ་ཞག་གི་ཕུང་པོ་གསུམ་ཙམ་ཞིག་བསྐལ་བ་ན། འཆི་བ་མེད་པའི་ཡུལ་གྱི་དུམ་བུ་མིའི་ཡུལ་ན་འཕོས་པ་ལྟ་བུའི་ངོ་མཚར་དང་ལྡན་པའི་ནོར་འཛིན་མའི་ཆ་
གླིང་ཞེས་བྱ་བ་གང་ཡིན་པ་དེ་ཉིད་ཡོད་དོ། །དེ་ཡང་ཆུ་བོ་ཆེན་པོ་བཞི་ལས་འབྲི་ཞེས་བྱ་བའི་ཆུ་ཀླུང་གསེར་དང་ལྡན་པའི་རྒྱུན་ཆེན་པོ་དང༌། ཤར་ཟླའི་ཆུ་ཀླུང་ཆེན་པོ་གཉིས་ནོར་རྒྱས་ཀྱི་བུ་སའི་སྟེང་ན་གྱ་གྱུར་འཕྱན་ཞིང་དལ་གྱིས་འོངས་པ་ན། སླར་ཡང་རྒྱ་མཚོ་ཆེན་པོའི་རང་གནས་
རྗེས་སུ་དྲན་ཏེ་དེ་ཉིད་དུ་འཇུག་པ་བཞིན་དུ་དལ་གྱིས་འབབ་པའི་བར་ན་ཆུད་ཅིང༌། ཡུལ་གྱི་དགེ་བཅུ་དང་བཀྲ་ཤིས་པའི་ལྟས་བཟང་ཐམས་ཅད་མ་ཚང་བ་མེད་པ་ཞིག་སྟེ། ཇི་སྐད་དུ། ཞིང་ས་ཁང་ས་ས་ཡི་དགེ །ཁང་རྡོ་འཐག་རྡོ་རྡོ་ཡི་དགེ །འཐུང་ཆུ་ཡུར་ཆུ་ཆུ་ཡི་དགེ །ཁང་
ཤིང་བུད་ཤིང་ཤིང་གི་དགེ །གམ་འབྲོག་རྐྱང་འབྲོག་རྩྭ་ཡི་དགེ །ཞེས་བཤད་པ་ལྟ་བུའི་ཡུལ་གྱི་དགེ་བཅུ་དང༌། ཁྱད་པར་ས་ཕྱོགས་འདིར་མཁས་པ་དང་བཙུན་པ་དང་གྲུབ་པའི་དབང་ཕྱུག་གི་ས་ལ་གནས་པའི་བསྟན་འཛིན་གྱི་སྐྱེས་བུ་ཉི་ཟླ་ལྟར་ཡོངས་སུ་གྲགས་པ་མང་པོའི་ཞབས་
ཀྱི་འཁོར་ལོས་བཅགས་ཤིང་བྱིན་གྱིས་བརླབས་པ་དང༌། ས་སྐྱོང་ཆེན་པོ་ཡབ་མེས་སྲས་དང་བཅས་པ་རྣམས་ཀྱིས་སྔོན་གྱི་བསྐལ་པར་ལེགས་བྱས་རྒྱ་མཚོ་ལྟ་བུ་བསགས་པའི་མཐུ་དང༌། དགེ་བ་བཅུ་དང་མཐུན་པའི་བཀའ་ཁྲིམས་ཀྱིས་ཆབ་འབངས་ཐམས་ཅད་ཆོས་བཞིན་དུ་བསྐྱངས་པ་
དང༌། འགྲོ་བ་རྒྱ་མཚོའི་ཚོགས་རྣམས་ཀྱང་མི་དགེ་བའི་ལས་རྔམ་ཆེན་བསགས་པ་ཉུང་ཞིང༌། སྤྱི་མཐུན་དུ་དགེ་བའི་རྩ་བ་བསགས་པའི་སྟོབས་བདོ་བར་གྱུར་པའི་བདག་པོའི་འབྲས་བུ་ལེགས་པར་སྨིན་པའི་ས་ཕྱོགས་ཕུན་སུམ་ཚོགས་པ་ཞིག་ཏུ་གདོན་མི་ཟ་སྟེ། གཞན་དུ་ན་མི་དགེ་བ་སྤྱད་

པའི་བདག་པོའི་འབྲས་བུར། རིན་ཆེན་ཕྲེང་བར། ས་གཞི་གཟི་ཆུང་ས་ཆར་མང༌། །རྡུལ་འཁྲིགས་དྲི་ང་མཐོ་དམའ་ཅན། །ཚ་སྒོ་ཅན་དང་དུས་ལོག་དང༌། །འབྲས་བུ་ཕྲ་ཁ་ཆུང་ངུའང་མེད། །ཅེས་གསུངས་ཤིང་དགེ་བ་སྤྱད་པའི་འབྲས་བུ་ནི་དེ་ལས་ལྡོག་སྟེ་འབྱུང་བར་
གསུངས་པ་བཞིན་དུ། ལྗོངས་འདིའི་འཛིན་མའི་དཀྱིལ་འཁོར་གྱི་ཐ་གྲུ་རྣམ་པར་ཡངས་པ་དང༌། གཟི་ཆེ་ཞིང་སྣུམ་བག་དང་ལྡན་པ། དམ་པའི་ཆོས་དང་སྲིད་ཀྱི་གཙུག་ལག་རབ་འབྱམས་ཀྱི་ལོངས་སྤྱོད་དང་དགེ་ལེགས་ཐམས་ཅད་ལྷུན་གྱིས་གྲུབ་པའི་ཚུལ་དུ་འབྱུང་བའི་སྒོ་ཆེན་པོ་
ཅིག་ཏུ་ངེས་པའི་ཕྱིར་རོ། །ཁྱད་པར་ཡུལ་ཕྱོགས་འདི་ན་དགེ་ཞིང་བཀྲ་ཤིས་པའི་རྟགས་དང་དབྱིབས་ལེགས་ཤིང་ལྟ་ན་སྡུག་པ་དགེ་ལེགས་ཀྱི་ལྟས་བཟང་ཐམས་ཅད་རང་བྱུང་དུ་གྲུབ་པ་ཡོད་དོ། །དེའང་འདི་ལྟར་སྔོན་གྱི་བསྐལ་པར་བྱུང་བའི་འཁོར་ལོས་སྒྱུར་བའི་རྒྱལ་པོ་རྣམས་ཀྱི་ལེགས་
བྱས་ཀྱི་བགོ་སྐལ་དུ་ཐོབ་པའི་རྒྱལ་སྲིད་རིན་པོ་ཆེ་རྣམ་པ་བདུན་དང༌། བསོད་ནམས་བརྒྱ་པའི་གཟུགས་སྐུ་མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་བརྒྱན་པ་ལ་ཡོངས་སུ་ཚང་བའི་བཀྲ་ཤིས་ཀྱི་རྟགས་རྣམ་པ་བརྒྱད་དེ། དེ་དག་གི་གཟུགས་བརྙན་ཅི་རིགས་
པ་རྣམས་ཀྱང༌། ལྗོངས་འདིའི་ཕྱོགས་ཀྱི་འཁོར་ལོ་ཀུན་ཏུ་ལྷུན་གྱིས་གྲུབ་པའི་ཚུལ་གྱིས་ཚང་སྟེ། དེ་ཡང་ཇི་ལྟར་ཞེ་ན་ཆོས་དང་སྲིད་པའི་དགེ་ལེགས་དང་དཔལ་འབྱོར་གྱིས་བསྡུས་པའི་སྡེ་བཞིའི་འབྲས་བུ་ཕུན་སུམ་ཚོགས་པ་དག་གི་འབྱོར་པ་མ་ཚང་བ་མེད་པས་མངོན་པར་གཏམས་པའི་
ངོ་མཚར་འཛད་པ་མེད་པའི་ཕུང་པོ་མ་ལུས་པ་ཡོངས་སུ་ཆུད་པར་དཀའ་བའི་དོགས་པ་མང་པོས་ཡིད་ཀྱི་དབང་པོ་ཀུན་ནས་བསླངས་ཏེ། གསེར་ལྡན་དགའ་མ་རང་གི་ལུས་འདི་པདྨ་འདབ་མ་བརྒྱད་པ་ཤིན་ཏུ་རྒྱས་ཤིང་རྣམ་པར་ཡངས་པའི་དཀྱིལ་འཁོར་ཆེན་པོ་ཉིད་དུ་སྤྲུལ་པ་སྙམ་བྱེད་པའི་
ས་གཞིའི་ཁྱོན་ཐམས་ཅད་ཐ་གྲུ་རྣམ་པར་ཡངས་ཤིང༌། ཕྱོགས་ཐམས་ཅད་ནས་ཁོད་མི་སྙོམས་པ་མེད་པ། སེམས་ཅན་ཀུན་གྱི་ཉེར་འཚོའི་གཞིར་གྱུར་པ་ནི། འདི་ལྟ་སྟེ། ས་གཞི་གང་ལས་རིན་པོ་ཆེ་གསེར་དང༌། དངུལ་དང༌། བཻ་ཌཱུརྻ་དང༌། དུང་དང༌། མན་ཤེལ་ལ་སོགས་པའི་རིན་པོ་ཆེ་དུ་

མའི་འབྱུང་གནས་སུ་གྱུར་པ། འབྲུའི་རིགས་སུ་གྱུར་པ་སོ་བ་དང༌། ནས་དང༌། གྲོ་དང༌། སྲན་མ་དང༌། ཏིལ་དང༌། ཡུངས་ཀར་ལ་སོགས་པ་ཆེད་དུ་བཏབ་པ་དང༌། ཆེད་དུ་བཏབ་པ་མ་ཡིན་པར་འཁྲུངས་པའི་ལོ་ཐོག་དང་སྙེ་མ་དང༌། འབྲས་བུ་ལ་སོགས་པ་བཟའ་བ་དང་བཅའ་བའི་རིགས་
རྣམ་པ་སྣ་ཚོགས་པ་དག་སྐྱེ་ཞིང༌། སྐྱེས་པ་དེ་རྣམས་ཀྱང་རང་རང་གི་དྲི་དང་རོ་དང་ནུས་པ་དང༌། བཅུད་ཕུན་སུམ་ཚོགས་པ་དང་ལྡན་པ་མང་པོ་རང་དབང་དུ་འབྱུང་བའི་ས་གཞི་རིན་པོ་ཆེ་དགོས་འདོད་ཐམས་ཅད་ཡིད་བཞིན་དུ་འབྱུང་བ་དེ་ལྟ་བུ་དག་ཡོད་དོ། །ཇི་སྐད་བཤད་པའི་ས་གཞི་རིན་པོ་ཆེ་གང་ལ་
བརྟེན་ནས་ཕྱོགས་དང་ཕྱོགས་བྲལ་གྱི་ཁོ་ར་ཁོར་ཡུག་རྣམས་སུ་རི་བོའི་ཕྲེང་བ་མཛེས་ཤིང་ལྟ་ན་སྡུག་པ། དབྱིབས་ལེགས་པ་མཚར་དུ་དངར་བ་དག་ཡོད་དེ། དེའང་འདི་ལྟར་ལྷའི་ནོར་བུ་རིན་པོ་ཆེ་རྒྱུ་བཻ་ཌཱུརྻའི་རང་བཞིན་ལས་གྲུབ་པ། དཔག་ཚད་གཅིག་གི་ཁོར་ཡུག་ཏུ་སྣང་བའི་འོད་ཟེར་གྱི་དྲྭ་བ་དཀྲིགས་
པ། རྣམ་པ་ཟུར་བརྒྱད་དང་ལྡན་པ་གང་ལས་ཇི་ལྟར་འདོད་པའི་དགོས་འདོད་ཐམས་ཅད་འབད་པ་མེད་པར་འབྱུང་བ་དེ་གཅིག་པུའི་རྣམ་པའམ། དེ་ལྟ་བུ་མང་དུ་བརྩེགས་ཤིང་ཕྱུར་བུར་སྤུངས་པ་དང་འདྲ་བའི་སྤང་རི་དང༌། ནགས་རི་དང༌། བྲག་རི་བརྩེགས་མར་ཡོད་པ་རྣམས་ནི། རིན་པོ་ཆེ་མར་
ཀ་ཏི་དང༌། ཨནྡ་རྙིལ་དང༌། མཐོན་ཀ་དང༌། མཐོན་ཀ་ཆེན་པོའི་ཁ་དོག་གི་དཔལ་ལ་ཅུང་ཟད་སྡང་བ་སྙམ་བྱེད་པའི་རྩྭ་སྔོན་པོ་གསར་པར་སྐྱེས་པ་དང༌། ལྡུམ་བུ་དང༌། ལོ་འདབ་དང༌། མྱུ་གུ་གཞོན་ནུའི་ཚོགས་སྟུག་པོར་སྐྱེས་པ། དེ་དག་གི་རོ་དང་ནུས་པས་རྟ་དང་ཕྱུགས་ཀྱི་རིགས་དང༌། རི་དྭགས་
ཀྱི་རིགས་རྣམ་པ་སྣ་ཚོགས་པ་དག་གིས་སྲོག་གི་དབང་པོ་ཡོངས་སུ་བསྲུང་བ་དང༌། ཡིད་ལ་རེ་བའི་ཤིང་རྟ་ཐམས་ཅད་འགེངས་པར་བྱེད་པའི་ཡོན་ཏན་དང་ལྡན་པའོ། །གཞན་ཁ་ཅིག་ན་ནི་བུད་མེད་རིན་པོ་ཆེ་མཛེས་ཤིང་ལྟ་ན་སྡུག་པ། དེའི་ལུས་ལ་ལྷའི་གོས་དང༌། ལྷའི་ནོར་བུ་རིན་པོ་ཆེ་བཻ་ཌཱུརྻ་
དང༌། ཨིནྡྲ་ནཱི་ལ་དང༌། མུ་ཏིག་དང༌། དུང་དང༌། མན་ཤེལ་དང༌། བྱི་རུ་ལ་སོགས་པའི་རིན་པོ་ཆེ་སྣ་ཚོགས་པའི་རྒྱན་གྱིས་བརྒྱན་པ་ལས་སིལ་ཁྲོལ་གྱི་སྒྲ་སྙན་པར་འབྱིན་ཅིང༌། སྔོ་བསངས་སྒྲའི་ལན་བུ་མཛེས་པ་གཡོ་བ་དང་འདྲ་བའི་སྐྱེད་མོས་ཚལ་དང༌། སྨན་ལྗོངས་དང༌། ནགས་ཚལ་

སྟུག་པོ་རྣམས་ཏེ། དེ་དག་ནི་སྤང་ལྗང་མརྒད་ཀྱི་ཁ་དོག་འཛིན་པའི་རྩི་ཤིང་དང༌། ལོ་འདབ་དང༌། ལྡུམ་བུའི་ཚོགས་མང་པོ་སྐྱེས་པ། ཨུཏྤལ་ལ་སོགས་པའི་མེ་ཏོག་རྣམ་པ་སྣ་ཚོགས་པ་བཀྲ་བས་མཛེས་པར་བྱས་པ། རྩི་སྨན་གྱི་བྱེ་བྲག་མང་པོ་རོ་དང་བཅུད་དང་དྲི་ཞིམ་པོ་མཆོག་
ཏུ་རྒྱས་པའི་ཚོགས་ཀྱིས་ཡོངས་སུ་ཁེབས་པར་སྐྱེས་པ་དག་ལ་སེར་བུ་བསིལ་ཞིང་ཡིད་དུ་འོང་བ་ལངས་པ་དག་གིས་བསྣུན་པ་ན་རྔ་ཡབ་ལྟར་གཡོབ་ཅིང༌། དེ་དག་གི་དྲི་ཞིམ་པོ་རྣམས་རིང་དུ་ཁྱེར་བ། དེའི་ཡོན་ཏན་དང་རོ་བཅུད་བཟང་པོ་དག་རྗེས་སུ་དྲན་པའི་བུང་པ་མང་པོ་དག་ཉེ་བར་ལྷགས་ནས་
མགྲིན་པའི་གླིང་བུ་རབ་ཏུ་སྙན་པའི་གླུར་བསྒྱུར་བ། གོས་བཟང་ལྟར་འཇམ་པའི་ལོ་མ་དང་ཀུ་སུ་མ་དང་འབྲས་བུ་གཡུར་དུ་ཟ་བས་དུད་པར་གྱུར་པའི་ལྗོན་ཤིང་གི་ནགས་ཚལ་རབ་ཏུ་འཁྲིགས་པ་རྣམས་ཀྱི་ཁྲོད་ན། སྤྲེའུ་རྣམས་ཀྱི་གར་བསྒྱུར་བ་དང༌། འདབ་ཆགས་ཀོ་ཀི་ལ་ལ་སོགས་པ་སྐད་
སྙན་པ་རྣམས་ཀྱི་རོལ་མོ་འཁྲོལ་བ་སྙམ་བྱེད་པ། ས་ཕྱོགས་ལ་ལར་ནི་དཔའ་ཞིང་མཛངས་པའི་བློན་པོ་རིན་པོ་ཆེ་ཡན་ལག་མཆོག་གི་གཟུགས་དང་ལྡན་པ་ལ་དར་ལྗང་གུའི་སྨད་གཡོགས་དང༌། ཀཱ་ཤི་ཀའི་རས་ཀྱིས་སྟོད་གཡོགས་བྱས་པ། དབུ་ལ་དར་དཀར་པོ་དྲི་མ་མེད་པའི་ལ་ཐོད་བཅིངས་
པས་མཛེས་པར་བྱས་པ་དང་འདྲ་བའི་ཀེ་ལ་ཤའི་རི་བོའི་ཕྲེང་བ་རྣམས་ནི། བགྲོད་པས་དུབ་པའི་འགྲོན་པ་རྣམས་ཀྱི་ཚ་བའི་གདུང་བ་འཇིལ་བར་བྱེད་པའི་རླུང་གི་བསིལ་ཡབ་ཡིད་དུ་འོང་བ་དག་གཡོབ་པ་དང༌། དངུལ་ཆུའི་རེག་པ་ལྟར་བསིལ་བའི་ཆུ་གཙང་མའི་རྒྱུན་འབེབས་པ་ལ་བརྩོན་པ།
རེས་འགའ་ནི་ན་བུན་གསར་པ་ཡིད་དུ་འོང་བ་ལང་ལིང་འཁྲིགས་པའི་སྟོད་གཡོགས་ཀྱིས་བསྒྲིབ་པའི་ཐབས་ལ་བརྩོན་པར་བྱེད་དོ། །ཁ་ཅིག་ནི་སྐྱེ་བ་ལྔ་པའི་ཆོས་དུང་ཁ་དོག་དཀར་ཞིང་གཡས་སུ་འཁྱིལ་བ་ལ་སྟོང་འཁུན་གྱི་གན་མཛོད་ནས་འཕོས་པའི་དར་ལྗང་སེར་གྱི་ཤམ་བུར་འཕྱང་
བའི་བརྟུལ་ཞུགས་ལ་གནས་པ་ནི། གངས་ལྡན་གྱི་རི་བོ་རྣམས་རང་གི་ལང་ཚོ་དང་ཁ་དོག་རྒྱས་པས་ནོར་བུ་ཆུ་ཤེལ་དང༌། ཟླ་བ་དག་པ་དང༌། སྟོན་ཀའི་སྤྲིན་དཀར་བརྩེགས་པ་རྣམས་ཀྱི་མཛེས་སྡུག་དང་ངོ་མཚར་དག་ལ་ཅོ་འདྲིར་རྩོམ་པར་བྱེད་དོ། །སྐབས་ཁ་ཅིག་ཏུ་ནི་རིན་པོ་ཆེའི་

གདུགས་མཆོག་དྲི་མ་མེད་པ་དབྱིབས་ལེགས་པ་ལྟ་ན་སྡུག་པ། རིན་པོ་ཆེའི་ཏོག་གི་འོད་ཟེར་འཕྲོ་བ། ཁོར་ཡུག་ཀུན་དུ་རིན་པོ་ཆེའི་རྒྱན་གྱི་དྲྭ་བ་དང་དྲྭ་བ་ཕྱེད་པ་རྣམ་པར་དཔྱངས་པ་གང་ཞིག །གསེར་ལྡན་དགའ་མ་རང་གི་ལུས་ལ་དྲོད་ཀྱི་གདུང་བ་རྒྱས་པ་གང་དག་འཕྲོག་པར་བྱེད་པའི་ཆེད་དུ། བླ་
མ་ཉིད་ན་ལེགས་པར་ཕུབ་པ་ལྟ་བུའི་རིན་པོ་ཆེའི་ལྷུན་པོ། མེ་ཏོག་གི་རིགས་རྣམ་པ་མང་པོ་གཅལ་དུ་བཀྲམ་པ་ལྟར་སྐྱེས་པ་ལྷུན་ཆགས་ཤིང་ཀུན་ནས་ཟླུམ་པོར་གྱུར་པ་ཤིན་ཏུ་མཐོ་བས། ཕྲག་པ་ན་ནོར་བུ་ཆུ་ཤེལ་གྱི་དབང་པོ་འཆར་ཞིང༌། ནོར་བུ་ཆུ་ཤེལ་གྱི་འོད་ཟེར་རིང་པོའི་ལམ་དུ་སྣང་བས།
ཚ་བའི་གདུང་བ་མཐའ་དག་བསིལ་བར་བྱེད་པ་དག་ཡོད་དོ། །དེ་ལས་གཞན་པའི་ཕྱོགས་འགའ་ཞིག་ན་ནི། དཔེར་ན་གཉིས་འཐུང་གི་དབང་པོ་འདུལ་མཁན་མཁས་པའི་ཐབས་ཀྱིས་དུལ་བར་བྱས་པ། གསེར་གྱི་དྲྭ་བ་དང༌། གསེར་གྱི་པདྨ་དང༌། ནོར་བུ་དང༌། མུ་ཏིག་གི་ཚོམ་བུ་ཅན་གྱི་
ཆུན་འཕྱང་གིས་མཛེས་པར་བྱས་པ་ལ་འདོད་པའི་ཡོན་ཏན་མི་དམན་པའི་ཁུར་དང་ལྡན་པ་གང་དག །བདག་པོ་ལ་འདུད་ཅིང་བག་ཕེབས་པར་གནས་པའི་རྣམ་པ་དང་རྗེས་སུ་མཐུན་པའི་རི་བོ་འགའ་ཞིག་བརྗིད་ཅིང་ལྷུན་ཆགས་པ། རྒྱབ་དང་སྤྱི་བོ་མཐོ་ཞིང་སྣ་ལག་ལེགས་པར་བརྐྱངས་པ་
ལ་སོགས་པའི་རྣམ་པ་དང་ལྡན་པ། དེའི་ངོས་ལོགས་ཀྱི་སྐབས་རྣམས་སུ། གྲོང་དང༌། གྲོང་ཁྱེར་དང༌། སྤྱིལ་བུ་དང༌། བྱ་སྐྱིབས་དང༌། ནགས་ཚང་ཚིང་དང༌། མེ་ཏོག་རྣམ་པ་སྣ་ཚོགས་པས་ཀུན་ནས་བཀྲ་བར་གྱུར་པའི་སྐྱེད་ཚལ་ཡི་གར་འོང་བ་ཅན་དང་ལྡན་པ་མང་པོ་ཁོར་ཡུག་
ཏུ་འཁོད་པ། ལོགས་འགའ་ཞིག་ན་ནི་དཔའ་ཞིང་རྟུལ་ཕོད་པའི་དམག་མི་རིན་པོ་ཆེ་སྟོབས་དང་ཁོ་ལག་ཡོངས་སུ་རྫོགས་པ་ཡ་ལད་བགོས་ནས་རལ་གྲི་དང༌། ཤགྟི་དང༌། རུ་མཚོན་རྣོན་པོ་ལ་སོགས་པ་ལག་ཆར་བསྲེལ་ཞིང༌། མཐུན་པའི་ཕྱོགས་དང་ལེགས་པའི་ཕྱོགས་རྣམས་ལ་
རྟག་ཏུ་ཐོ་བཙམ་ཞིང་བསྡོ་བའི་དགྲ་བོ་རྣམས་ནི་སྐད་ཅིག་ཙམ་གྱི་ཡུན་དུ་གསོན་པར་གནས་སུ་ཅི་ཞིག་རུང་ཞེས་འཇིགས་པའི་ང་རོ་དང་བཅས་ཏེ། ཁོང་ནས་འཁྲུགས་པའི་བ་སྤུ་རྣམ་པར་གཟིངས་པ་དང་འདྲ་བའི་བྲག་རི་རྡོ་རྗེའི་རང་བཞིན་དུ་བརྩེགས་པ། འཇིགས་ཤིང་སྐྱི་གཡའ་བ། འབྱུང་

པོའི་འདབ་ཆགས་མང་པོས་མི་སྙན་པའི་གདངས་ཀྱི་ང་རོ་མཐོན་པོར་སྒྲོགས་པ་ལ་སོགས་པ་མི་སྡུག་པའི་ཉམས་ཀྱི་ཁྱད་པར་ཅི་ཡང་སྟོན་པའི་རྭ་བས་བསྐོར་བ། དེ་དག་ཏུ་སྐྱེས་པའི་ཚེར་མ་ཅན་གྱི་ལྗོན་པའི་ནགས་རུམ་སྟུག་པོ་རྣམས་ནི། ཡལ་གའི་ལག་པ་འཁྱོག་
པོ་དག་བརྐྱངས་ནས་གཡུལ་གྱི་དགའ་སྟོན་ལ་ཆགས་པ་ལྟར་འཁོད་པ། དེ་དག་དང་ངང་ཚུལ་མཐུན་པའི་སྟག་དང༌། གཟིག་དང༌། དོམ་དང༌། དྲེད་དང༌། གསའ་དང༌། ཛམྦུ་ཀ་ལ་སོགས་པའི་སྲོག་ཆགས་མཆེ་བའི་མཚོན་ཆ་དང་ལྡན་པ་མང་པོས་རྒྱུ་འགྲུལ་བྱེད་པ། ངང་ཚུལ་དེ་
ལས་ལྡོག་པའི་བྲག་རི་འགའ་ཞིག་དག་ནི། དཔེར་ན་རིན་པོ་ཆེའི་རྒྱལ་མཚན་མཐོ་ཞིང་ལྟ་ན་སྡུག་པ། ཀཽ་ཤམྦཱིའི་རས་སམ། ཝཱ་རཱ་ཎ་སཱིའི་རས་ཕུན་སུམ་ཚོགས་པ། ཁ་དོག་མི་འདྲ་བ་མང་པོ་བརྩེགས་པའི་ལྷབ་ལྷུབ་ཁོར་ཡུག་ཏུ་དཔྱངས་པ། དེ་ལ་ཡིད་བཞིན་གྱི་ནོར་བུ་རིན་པོ་ཆེ་འོད་ཟེར་
སྟོང་གི་དྲྭ་བ་དཀྲིགས་པའི་དཔལ་དང་ལྡན་པ་གང་ཞིག །མཐུན་པ་མ་ཡིན་པའི་ཕྱོགས་ལས་རྣམ་པར་རྒྱལ་བའི་དགའ་སྟོན་གྱི་རྒྱན་དུ་བསླངས་པ་ཇི་ལྟ་བ་དེ་ལྟར་གནས་པའི་བྲག་རི་དང༌། ནགས་རི་དང༌། སྤང་རི་དང༌། ཀཻ་ལ་ཤའི་རི་རྣམས་གད་པ་བང་རིམ་གྱི་རྣམ་པར་བརྩེགས་པ་དེ་ཉིད་
ཀྱིས་ནམ་མཁའ་འབིགས་བྱེད་ཀྱི་རི་བོའི་ཁེངས་པ་ཡང་ཐུང་ངུར་བྱེད་པའི་རང་བཞིན་ཅན་ཏེ། དེའི་ཕྲག་ན་ནི་ཉིན་མོར་བྱེད་པའི་དཀྱིལ་འཁོར་ཡང་ངལ་བསོར་སྤྱོད་པས་ཕྱོགས་ཀྱི་མཚན་མ་དག་ཀྱང་མ་འཁྲུལ་བར་སྟོན་པར་བྱེད་དོ། །ཕྱོགས་མཚམས་ཐ་དད་པ་མང་པོ་ན་ནི། རྟ་མཆོག་རིན་
པོ་ཆེའི་ཁ་དོག་རྨ་བྱའི་མགྲིན་པ་ལྟར་རབ་ཏུ་སྔོ་བ། གང་དག་མུཀྟི་ཀའི་སྒ་སྲབ་དང་རྒྱན་གྱི་རྣམ་པ་མང་པོས་སྤྲས་པའི་དྲིལ་ཆུང་གི་ཕྲེང་བ་རྣམས་ནི་ཕན་ཚུན་འཐབ་པའི་ཁ་ནས་སྒྲ་སྙན་པར་འཁྲོལ་བ་དང་ཆབ་ཅིག་ཏུ་དྲི་གཞོན་གྱི་འཚུབས་མའམ། གློག་གི་གྱ་གྱུ་ལའང་སྨ་འབེབས་སྟེར་བའི་གོམ་
སྟབས་སྟོང་དུ་བསྒྱུར་བ་ལ་མི་མཁས་པ་མེད་པ་དེ་བཞིན་དུ། ཆུ་ཀླུང་དང༌། ཆུ་ཕྲན་དང༌། འབབ་ཆུ་དང༌། གཙང་ཆབ་བསིལ་མའི་རྒྱུན་གཙང་མ་དྭངས་ཤིང་དྲི་མ་མེད་པ་མང་པོ་རྟག་པར་གཞོལ་ཞིང་འབབ། ཁ་ཅིག་ནི་དུས་སུ་བབ་སྟེ། དེ་དག་ལས་མང་པོ་ཞིག་ནི་སྐྱེས་བུ་ཆེན་པོ་མཚན་

གྱིས་ཀུན་ནས་བརྒྱན་པའི་ཐུགས་ཀ་ན་དཔལ་གྱི་བེའུ་འོད་འབར་བའི་རྣམ་པར་སྣང་བ་དེ་ལྟ་བུའི་རི་མོ་དག་ལ་ལེགས་པར་འདྲི་བའི་ཚུལ་གྱིས་འབབ། ཁ་ཅིག་ནི་དགའ་བ་འཁྱིལ་བའམ་གཡུང་དྲུང་རིས་ཀྱི་རི་མོ་འདྲི་བའི་ཚུལ་གྱིས་འབབ་སྟེ། ཐམས་ཅད་ཀྱང་ལྦུ་བ་དཀར་པོ་པུཎྜ་རཱི་ཀའི་
ཕྲེང་བ་འགྲེམས་པ་བཞིན་དུ། ཡིད་འོང་ལྷུང་ལྷུང་སྙན་པའི་ཆབ་སྒྲ་རྟག་ཏུ་སྒྲོག་པས། དྲང་སྲོང་བསམ་གཏན་ལ་གནས་པའམ། ཆགས་བྲལ་དཀའ་ཐུབ་བརྟན་པ་རྣམས་ཀྱི་སྙིང་ལ་ཡང་རབ་ཏུ་སིམ་པའི་བདེ་བ་སྟེར་ནུས་པ་མང་པོ་ཞིག་སྟེ། དེ་དག་ཀྱང་དབྱར་སྐྱེས་སྨན་གྱི་ནགས་
ཚལ་སྟུག་པོས་ཡོངས་སུ་ཁེབས་པའི་རི་ཀླུང་དང༌། རི་སུལ་དང༌། རི་ཤོད་ཡངས་པ་རྣམས་ན་ཅི་བདེར་རྒྱུ་བ་དག་ཡོད་དོ། །ཁ་ཅིག་དག་ན་སྐྱེས་བུ་ཆེན་པོའི་སྤྱན་དང་མཚུངས་པའི་ཉའི་རྒྱལ་པོ་ལུས་ཐམས་ཅད་གསེར་གྱི་ཁ་དོག་ཅན་ལ། མིག་དག་ཀྱང་གསེར་གྱི་མདོག་ཏུ་སྣང་བ།
ལུས་ལ་མཛེས་པའི་རི་མོ་མང་པོས་ཁྱབ་པ་དེ་ནི་འཕགས་པ་རྫུ་འཕྲུལ་རྣམ་པ་གསུམ་གྱི་བདག་ཉིད་ཅན་བཞིན་དུ། རེས་འགའ་ནི་ཆུའི་ཁ་རུ་ཅི་བདེར་འཕྱོ་ཞིང༌། རེས་འགའ་ནི་ཆུའི་གཏིང་དུ་འགྲོ་བ་ལ་ཆགས་ཐོགས་མེད་པས་རྒྱ་མཚོར་བྱིངས་པའི་སེམས་ཅན་མང་པོ་འཛིན་པར་བྱེད་པ་
དང༌། ཕ་རོལ་ཏུ་སྒྲོལ་བར་བྱེད་པའི་མཉེས་གཤིན་པ་སྟེ། དེའི་དཔལ་དང་རྗེས་སུ་མཐུན་པར་ཐང་མཉམ་པ་གཡུའི་རྒྱ་མཚོ་འཁྱིལ་པ་ལྟ་བུར་ཡོད་པའི་དཀྱིལ་ནས། ཧ་ཅང་ཡང་མཐོ་བ་མ་ཡིན་པའི་སྤང་རི་གསེར་གྱི་ཉ་མོ་ཉལ་བ་ལྟར་ཡོད་པ་ལ་དྲི་ཞིམ་པོའི་སྨན་དང་ལྡུམ་བུའི་རིགས་
མང་དུ་སྐྱེས་པ། མེ་ཏོག་ཁ་ཡོངས་སུ་བྱེ་བ་འདབ་མ་དང་གེ་སར་ཐམས་ཅད་གསེར་གྱི་ཁ་དོག་འཛིན་པ་སྟུག་པོས་ཁྱབ་པས་མཛེས་པར་བྱས་པ་སྟེ། དེར་བཤུལ་རིང་གི་ལམ་གྱིས་དུབ་པའི་འགྲོན་པ་གང་དག་ངལ་བསོར་སྤྱོད་ཅིང་དགའ་བའི་རོ་ལ་སྤྱོད་པའི་ཡུལ་དུ་གྱུར་པས་སམ། ཡང་
ན་འབབ་ཆུའི་རྒྱུན་ཆེན་པོ་དལ་གྱིས་འབབ་ན། སྐབས་ལ་ལར་རྒྱུན་སྲོལ་གྱི་དབར་ལས་ཁ་གཉིས་སུ་གྱེས་ནས་འབབ་པ་སྟེ། དེའི་བར་དུ་ཆུད་པར་གྱུར་པའི་བཟའ་ཤིང་གི་རྭ་བ་དང༌། སྐྱེད་མོས་ཚལ་ཡིད་དུ་འོང་བ། རྩྭ་དང་ཤིང་ལྗོན་པ་མང་དུ་སྐྱེས་པ་དག་སྟེ། གང་གིས་ཆུར་ལྷུང་

བ་རྣམས་ནི་འཛིན་པར་བྱེད་ལ། ཕ་རོལ་དང་ཚུ་རོལ་ནས་ལྷགས་པ་རྣམས་ལ་བདེ་བའི་ངལ་བསོ་སྟེར་བར་བགྱིད་པས། དེར་ཡང་ལེགས་པའི་ལྟས་དང་བཅས་པའི་ས་ཕྱོགས་སུ་བརྟག་པར་བྱར་མི་བཏུབ་པའི་སྐྱོན་འགའ་ཡང་ཡོད་པ་མ་ཡིན་ནོ། །ཁ་ཅིག་ཏུ་ནི་
ལྷའི་འཁོར་ལོ་རིན་པོ་ཆེ་རྩིབས་དང་མྱུ་ཁྱུད་དང་བཅས་པ། ལྷ་དང་ལག་འགྲོའི་ཡུལ་ནས་འོངས་པའི་རིན་པོ་ཆེ་དཀར་པོ་དང༌། སྔོན་པོ་དང༌། སེར་པོ་དང༌། ལྗང་གུ་ལ་སོགས་པ་ཁ་དོག་སྣ་ཚོགས་པའི་ཕྲས་ཀུན་ནས་སྤྲས་པ། སྐྱེ་བོ་མ་ལུས་པའི་ཡིད་རང་དབང་དུ་སྡུད་པར་
བྱེད་པ་ལ་དབང་བ་གང་ཡིན་པ་དེ་ནི་ནོར་འཛིན་གྱི་བུ་མོའི་ལག་པ་ན་ཐོགས་པ་དང་འདྲ་བའི་ས་གཞི་ལག་མཐིལ་ལྟར་ཁོད་མི་སྙོམས་པ་མེད་པ་སྣུམ་ཞིང་གཟི་མདངས་ཆེ་བ། ཕལ་ཆེར་ན་ནི་དབྱར་སྐྱེས་མྱུ་གུའི་ཚོགས་ཀྱིས་ཁྱབ་པས་མནན་ན་ནེམ་པ་བཏེག་ན་ཕར་བའི་རེག་བྱ་ཕུན་
སུམ་ཚོགས་པ་དང་ལྡན་པ། ཁོར་ཡུག་ནས་བསྐོར་བའི་རི་བོའི་ཚོགས་ཕྲེང་དུ་བསྟར་བ་རྣམས་ཀྱི་མཐའ་བསྣོལ་བའི་མཚམས་ནས། ལུང་པ་པདྨའི་འདབ་མ་ལྟར་ཡངས་པ། ཕྱོགས་ཕྱོགས་སུ་སོང་བ། དེ་དག་གི་བར་སྐབས་རྣམས་སུ་ཡང་ཡུལ་དང༌། ཡུལ་གྲུ་དང༌། ལྗོངས་
དང༌། གྲོང་དང༌། གྲོང་ཁྱེར་དང༌། ཚོང་འདུས་དང༌། རྒྱལ་པོའི་ཕོ་བྲང་དང༌། གཙུག་ལག་ཁང་དང༌། མཆོད་རྟེན་དང༌། ཀུན་དགའ་རྭ་བ་རྣམས་ཀྱི་གང་བ་སྟེ། དཔེར་ན་གཡུའི་མཎྜལ་ངོས་མཉམ་པ་ཡིད་དུ་འོང་བ་ཞིག་ལ་སྐྱེས་བུ་མཁས་པས་མེ་ཏོག་གི་ཚོམ་བུ་བཀྲམ་པ་ལྟ་བུ་
དག་ཡོད་དོ། །དེ་དག་ཐམས་ཅད་ཀྱང་བདེ་བ་དང་འབྱོར་པ་ལོ་ལེགས་པ། སྐྱེ་བོ་མང་པོ་དང་མིས་ཀུན་དུ་གང་བ། དེ་དག་གི་ཉེན་སྐོར་རྣམས་སུ་ཀུན་གྱི་ཉེར་འཚོའི་གཞིར་གྱུར་པའི་ཞིང་ས་ཤིན་ཏུ་གཤིན་པ་མང་པོ་སྟེ། དེ་དག་ལས་དུས་དུས་སུ་མྱུ་གུ་དང༌། སྡོང་བུ་དང༌། ལོ་མ་དང༌།
འབྲས་བུ་ཕུན་སུམ་ཚོགས་པ་དང་ལྡན་པའི་འབྲུའི་རིགས་རྣམ་པ་སྣ་ཚོགས་པ་དང་ལྡན་པ་དག་འབྱུང་སྟེ། དེ་དག་གི་རོ་དང་བཅུད་དང་ནུས་པ་ཕུན་སུམ་ཚོགས་པ་དག་གིས་སྐྱེ་བོའི་ཚོགས་ཆེན་པོ་དེ་དག་སྡུད་པར་བྱེད། དགའ་བར་བྱེད། མགུ་བར་བྱེད། འཚོ་བར་བྱེད། སྲུང་

བར་བྱེད་དོ། །འབྲུའི་བང་མཛོད་རྣམས་ཀྱང་དངོས་པོ་དེ་དང་དེ་དག་གིས་རབ་ཏུ་རྒྱས་པར་བྱེད་དོ། །རྒྱུ་དེ་དག་གིས་ནི་སེམས་ཅན་དཔག་ཏུ་མེད་པ་བཀྲེས་པའི་སྡུག་བསྔལ་གྱི་འཇིགས་པ་དང༌། ཕོངས་པའི་སྡུག་བསྔལ་གྱི་འཇིགས་པ་དང༌། རྒུད་པའི་སྡུག་བསྔལ་གྱི་འཇིགས་པ་དང༌།
མུ་གེའི་སྡུག་བསྔལ་གྱི་འཇིགས་པ་སྟེ། འཇིགས་པ་དེ་དག་གི་རྒྱུན་ཡང་གཅོད་པར་བྱེད་པ་དག་ཡོད་དོ། །དེས་ན་ས་ཕྱོགས་དགེ་བའི་མཚན་མར་རྫོགས་པ་གང་གིས་མཐུན་པའི་ཕྱོགས་ཐམས་ཅད་རང་དབང་དུ་སྡུད་པར་བྱེད་ཅིང༌། ཅིག་ཤོས་མཐུན་པ་མ་ཡིན་པའི་ཕྱོགས་ཐམས་
ཅད་གཅོད་པར་བྱེད་པའི་ཕྱིར་འཁོར་ལོ་རིན་པོ་ཆེ་ཉིད་དང་ཆོས་མཚུངས་པ་ཡིན་ནོ། །གཞན་ཡང་རིན་པོ་ཆེའི་གཏེར་གྱི་བུམ་པ་བཟང་པོ་ཞེས་པ་ནང་བཅུད་དུ་རིན་པོ་ཆེའི་གཏེར་མང་པོས་ཡོངས་སུ་ཁེངས་པ། གང་ཞིག་ཐོབ་པར་གྱུར་ན་ནི་སྐྱེས་བུ་དེའི་ཡིད་ལ་ཇི་ལྟར་རེ་བའི་ཤིང་རྟ་མ་ལུས་
པ་མངོན་པར་འདོད་པའི་འབྲས་བུ་དེ་དང་དེ་དག་གིས་བདེ་བར་འགེངས་པ་ལ་རྩོལ་བ་དང་ཚེགས་ཆེ་བ་ལ་མ་ལྟོས་པར་འབད་མེད་ལྷུན་གྱིས་གྲུབ་པའི་ཚུལ་གྱིས་འབྱུང་བའི་ཡོན་ཏན་དང་ལྡན་པ་ཞིག་སྟེ། དེ་དང་རྗེས་སུ་མཐུན་པར་སྡོམ་བརྩོན་ས་གཞི་སྐྱོང་བའི་ཚུལ་བཟུང་བའི་བླ་མ་ཆེན་པོ་
འདི་ཉིད་སྐུ་མཆེད་ཡབ་མེས་དང་བཅས་པས་ཡོངས་སུ་བསྲུངས་པའི་རྒྱལ་སྲིད་རྣམ་པར་ཡངས་པའི་དཀྱིལ་འཁོར་ཆེན་པོ་སྟེ། དེར་འཁོད་པའི་ཡུལ་དང་ཡུལ་གྲུ་ཆེན་པོ་རྣམས་ཀྱི་རྒྱལ་ཕྲན་དང༌། མདུན་ན་འདོན་དང༌། སྡེ་དཔོན་དང༌། ཁྱིམ་བདག་དང༌། གྲོང་ཁྱེར་གྱི་སྐྱེ་བོ་ལ་སོགས་པ་
རྣམས་ཀྱིས་བདག་གིར་བྱས་པའི་ཕོ་བྲང་དང༌། དཀོར་ཁང་དང༌། མཛོད་དང༌། འབྲུའི་བང་བ་དང༌། ཕྱུགས་ཀྱི་རྭ་བ་རྣམས་ན། རང་རང་གི་ཡུལ་ནས་བྱུང་བ་དང༌། ཡུལ་ཁམས་གཞན་ནས་བྱུང་བའི་རིན་པོ་ཆེའི་རིགས་དང༌། འབྲུའི་རིགས་དང༌། བཟའ་བ་དང་བཅའ་བའི་རིགས་དང༌། བགོ་བ་
དང་རྒྱན་གྱི་རིགས་དང༌། བཞོན་པ་དང་བཀོལ་སྤྱད་བྱ་བའི་རིགས་རྣམ་པ་སྣ་ཚོགས་པ་སྟེ། མདོར་ན་ནོར་དང་འདོད་པའི་འབྲས་བུས་བསྡུས་པའི་དཔལ་དང་འབྱོར་པ་དང་ལོངས་སྤྱོད་དང༌། དབང་ཕྱུག་ཕུན་སུམ་ཚོགས་པས་མངོན་པར་གཏམས་ཤིང༌། འདོད་དགུ་ཕུན་སུམ་ཚོགས་པ་ཐམས་ཅད་

ཀྱི་འབྱུང་གནས་སུ་གྱུར་པའོ། །དེ་ལ་བརྟེན་ནས་སྐྱེ་འགྲོ་ཐམས་ཅད་ཀྱི་བསམ་པ་ཐམས་ཅད་ཡོངས་སུ་རྫོགས་པར་བྱེད་པའི་རྒྱུར་འགྱུར་བས། རིན་པོ་ཆེའི་གཏེར་གྱི་བུམ་པ་དང་མཚུངས་པའི་བྱ་བ་མ་ལུས་པ་བྱེད་པའི་ཕྱིར་རོ། །ཁྱད་པར་མཆོག་གི་སྤྲུལ་པའི་སྐུ་པདྨ་ཀ་རའི་ལུང་
བསྟན་གྱི་རྔ་བོ་ཆེས་ལན་དུ་མར་བསྔགས་པའི་རྩོད་བྲལ་གྲུབ་པའི་འཁོར་ལོས་སྒྱུར་བ་ཆེན་པོ་ལྕགས་ཟམ་པའམ། ཐང་སྟོང་རྒྱལ་པོའམ། བརྩོན་འགྲུས་བཟང་པོ་ཞེས་མཚན་གྱི་རྣམ་གྲངས་གསུམ་དང་ལྡན་པ། ལུང་དང་རྟོགས་པའི་ཡོན་ཏན་མི་ཟད་པའི་མཛོད་དུ་གྱུར་པས་འབྱུང་བ་བཞིའི་ཡུལ་ལ་
ཐོགས་རྡུགས་མེད་པར་འགྲོ་ཞིང༌། རྫུ་འཕྲུལ་གྱི་ཆོ་འཕྲུལ་མང་པོ་བསྟན་པས་འགྲོ་བ་རྒྱ་མཚོ་དད་པའི་ཞིང་ས་གཤིན་པར་བྱས་ནས། དེར་དགེ་བའི་ས་བོན་རྨ་མེད་པ་འདེབས་པའི་སྒོ་ནས་སེམས་ཅན་གྱི་དོན་ལ་ཞུགས་པ་ན། དུས་གསུམ་རྣམ་པར་སྣང་བའི་ཏིང་ངེ་འཛིན་ལ་སྙོམས་པར་
ཞུགས་ནས། འཇིག་རྟེན་གྱི་ཁམས་སུ་བལྟས་པས། ཕན་པ་དང་བདེ་བའི་བདུད་རྩི་ཟད་མི་ཤེས་པའི་འབྱུང་ཁུངས་སུ་གྱུར་པ། དམ་པའི་ཆོས་ཀྱི་ཟླ་བ་འདི་ནི་གང་དུ་འགྲིབ་པར་འགྱུར། གང་དུ་འཕེལ་བར་འགྱུར། གང་དུ་གནས་པར་འགྱུར། གང་དུ་ཡང་དག་པར་བརྟན་པར་འགྱུར་སྙམ་དུ་
དགོངས་པ་ན། ལྗོངས་འདིར་དགེ་ལེགས་ཀྱི་མཚན་མ་ཕུན་སུམ་ཚོགས་པ་ཐམས་ཅད་ངོམ་པ་བཞིན་དུ་མཆིས་པ་དེ་ལེགས་པར་གཟིགས་སོ། །གཟིགས་ནས་ཀྱང་ཇི་སྐད་དུ། རྒྱ་མཚོ་ཆུ་སྲིན་རྣམས་ཀྱི་གནས། །དུས་རླབས་ཡོལ་བར་འགྱུར་ཡང་སྲིད། །གདུལ་བར་བྱ་བའི་སྲས་རྣམས་ལ། །སངས་
རྒྱས་དུས་ལས་ཡོལ་བ་མེད། །ཅེས་འབྱུང་བ་ལྟར་སེམས་ཅན་ལ་སྙིང་བརྩེ་བའི་གྲོགས་ཀྱིས་ལེགས་པར་བསྐུལ་ནས་ལྗོངས་འདིར་སྐུ་དངོས་སུ་བྱོན་ནས་ཞབས་ཀྱི་འཁོར་ལོས་བཅགས། གཙུག་ལག་ཁང་དང་དགོན་པ་འདེབས་པ་ལ་སོགས་པས་སངས་རྒྱས་ཀྱི་བསྟན་པའི་རྒྱལ་མཚན་དམ་པ་བཙུགས་སོ། །
དེ་ནས་བརྩམས་ཏེ་གོང་དུ་སྨོས་པའི་བསྟན་འཛིན་གྱི་སྐྱེས་བུ་དམ་པ་རིམ་པར་བྱོན་པ་རྣམས་ཀྱིས་ཞབས་ཀྱིས་བཅགས་ཤིང་ཕྲིན་ལས་ཀྱི་རྒྱུན་མི་ནུབ་པ་སྐལ་ལྡན་ཤིང་རྟའི་རྒྱུན་ཆེན་པོ་བཞིན་དུ་གནས་པར་མཛད་པའི་གདན་ས་ཆེན་པོ་དཔལ་ལྷུན་གྲུབ་སྟེང་གི་ཆོས་གྲྭ་ཆེན་པོ་ཞེས་གྲགས་སྙན་སྤྲིན་གྱི་རྔ་གསང་

ལྷང་ངེར་ལྡིར་བ་གང་ལ། དཀར་པོའི་ཕྱོགས་སུ་མངོན་པར་འདུན་པའི་ལྷ་དང་མིར་བཅས་པའི་མདོངས་མཐའ་རྣམས་ནི་ཀུན་ནས་དགའ་བའི་སྒྲོ་གཤོག་ཟླུམ་པོར་ཕུབ་པའི་གར་སྟབས་སྟོང་དུ་བསྒྱུར་བས་བྲེལ་བར་བགྱིད་པ་དེ་ཉིད་ཡོད་དོ། །དེ་ལྟ་བུའི་གནས་དེ་ན་ཡོད་པའི་གཙུག་ལག་ཁང་བསམ་གྲུབ་མཐོང་
གྲོལ་ཞེས་བྱ་བ་གང་ཞིག་ལེགས་པར་བལྟས་ན་འཕགས་ཡུལ་རྡོ་རྗེའི་གདན་གྱི་དྲིའི་གཙང་ཁང་ཆེན་པོ་ཡང་འདི་ལས་ལྷག་པ་ཅི་ཞིག་སྙམ་པ་དེ་ཉིད་ཡོད་དེ། དེའང་རྣམ་པ་ནི་ཇི་ལྟ་བུ་ཞེ་ན། ལྷའི་བཟོ་བོ་ལས་སྣ་ཚོགས་པའི་ལག་པའི་ཟློས་གར་གྱིས་རིན་པོ་ཆེ་པདྨ་རཱ་གའི་ཕ་གུ་བརྩེགས་པ་ལས་བྱས་པ་ལྟ་
བུའི་སྟེགས་བུ་དང༌། བ་གམ་དང༌། མདའ་ཡབ་དང༌། ལན་ཀན་དང༌། སྒོ་དང༌། སྒོ་ཁང་དང༌། རྟ་བབས་རྣམས་ཀྱིས་མཛེས་པར་བྱས་པ། བཻ་ཌཱུརྻ་མཐིང་གའི་ཆུ་གཏེར་ཆེན་པོ་བསྐྱིལ་པ་ལྟ་བུའི་ཁྱམས་ཀྱི་དཀྱིལ་འཁོར་སྔོ་ཞིང་དྭངས་པ་ལ་བརྟན་པའི་ཀ་བ་བརྒྱ་ཕྲག་གཅིག་གིས་བཏེག་པའི་གདུང་དང༌། གདུང་
ཕྲན་དང་སྤང་ལེབ་རྣམས་ལེགས་པར་བཀོད་པ། ལོགས་ཐམས་ཅད་ནས་མི་མཉམ་པ་མེད་པར་ཤིན་ཏུ་མཐོ་ཞིང་ཟུར་བཞི་དང་ལྡན་པ། བཙོ་མ་གསེར་གྱི་རང་བཞིན་ལས་གྲུབ་པའི་རྒྱ་ཕུབ་དང་ཏོག་དང༌། རྒྱལ་མཚན་དང་ནམ་མཁའ་ལྡིང་དང་མེ་ལོང་དང་ཡིད་བཞིན་གྱི་ནོར་བུ་རྣམས་ལས་ཤིན་ཏུ་འབར་བའི་འོད་
ཟེར་གྱི་དྲྭ་བ་རིང་དུ་འཕྲོ་བ། ཆུ་སྲིན་ཀུམྦྷི་རའི་མཆེ་བའི་ཕྲག་ནས་ཉེ་བར་འཐོན་པའི་རིན་པོ་ཆེའི་དཔྱངས་ཐག་ལ་འཁྱུད་ནས་ཤིན་ཏུ་སྙན་པའི་སྒྲ་འབྱིན་པར་བྱེད་པའི་གཡེར་ཀའི་ཕྲེང་བ་དང་དྲིལ་བུ་དང་ཟླ་བ་རླུང་གིས་བསྐྱོད་པ་རྣམས་ཀྱིས་ཕྱོགས་ཐམས་ཅད་ནས་མཛེས་པར་དཔྱངས་པ། ཕྱི་རོལ་དུ་ནཱི་ལོཏྤལ་དང་
པུཎྜ་རཱི་ཀ་དང་བནྡྷུ་ཛཱི་བ་ཀ་ཡི་ཁ་དོག་ཅན་གྱི་ཁང་པ་དང༌། ཁང་ཕྲན་དང༌། དྲིའི་གཙང་ཁང་དང༌། རིག་སྔགས་འཆང་བ་རྣམས་ཀྱི་སྒྲུབ་ཁང་དམ་པ་དག་གིས་ཀུན་ནས་བསྐོར་བའི་དབུས་སུ་དཔེར་ན་རིན་པོ་ཆེ་པདྨ་རཱ་གའི་མཆོད་སྡོང་དང༌། ཐུན་མཚམས་ཀྱི་སྤྲིན་དང༌། པདྨ་དམར་པོའི་ནགས་ཚལ་དང༌། བྱི་རུའི་
ལྷུན་པོ་རྣམས་ལ་སླར་ཡང་ཉི་མ་འཆར་ཀའི་འོད་ཟེར་གྱི་ཕུང་པོས་ལན་སྟོང་དུ་དཀྲིས་པ་བཞིན་དུ་ལྷམ་མེར་འབར་བ། ནང་ན་དེ་བཞིན་གཤེགས་པ་སྲས་དང་བཅས་པའི་སྐུ་བརྙན་ལུགས་སུ་བླུགས་པ་དང༌། འབུར་དུ་བཞེངས་པ་དང༌། རི་མོར་བྲིས་པ་དང༌། གླེགས་བམ་གྱི་ཚོགས་གྲངས་མེད་པ་རྣམས་

མཆོད་པའི་ཡོ་བྱད་བསམ་གྱིས་མི་ཁྱབ་པའི་བཀུར་སྟི་དང་བཅས་ཏེ་བཞུགས་པ། དེའི་ཕྱི་དང་ནང་གི་ཁྱམས་གཙང་མ་དང༌། ཁོ་ར་ཁོར་ཡུག་ཀུན་དུ་སྒོ་གསུམ་བག་དང་བཅས་ཤིང་སྤོས་མཆོག་ཧ་རི་ཙནྡན་གྱི་དྲི་བསུང་མངར་པོ་རིང་དུ་འཐུལ་བའི་དགེ་སློང་གི་དགེ་འདུན་གྱི་ཚོགས་མང་པོས་སྡེ་
སྣོད་གསུམ་དང་རྒྱུད་སྡེ་བཞིའི་གཞུང་ལུགས་ཀྱི་ཚིག་དང་དོན་གྱི་ཆ་རྣམ་པར་བཀྲོལ་ཞིང་བགྲོ་བར་བྱེད། མཉན་པར་བྱེད། ཀློག་པར་བྱེད། འཛིན་པར་བྱེད། འཆད་ཅིང་སྟོན་པར་བྱེད། ཁ་ཏོན་དུ་བྱེད། ཚུལ་བཞིན་དུ་ཉམས་སུ་ལེན་པར་བྱེད་པའི་སྒོ་ནས་ལུང་གི་ཆོས་ཀྱི་ཚུལ་མང་པོ་ནི་ཡུན་དུ་གནས་པར་
བྱེད་དོ། །རྟོགས་པའི་ཆོས་ཀྱི་ཚུལ་མང་པོ་ནི་རྒྱུད་ལ་མངོན་དུ་བྱེད་དོ། །དེ་ལྟ་བུའི་ཚུལ་གྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ལུགས་བཟང་དྲི་མ་མེད་པ་ཉིད་ཕྱོགས་དུ་མ་ནས་དར་ཞིང་རྒྱས་པར་བྱེད་པ་དག་ཡོད་དོ། །དེ་དང་ཟུང་དུ་འབྲེལ་བའི་རྒྱལ་ཁབ་དམ་པ་
མི་མཐུན་པའི་ཕྱོགས་ལས་རྣམ་པར་རྒྱལ་བ་ཞེས་བྱ་བ་ཤིན་ཏུ་བརླིང་ཞིང་མཐོ་བ་ཟུར་བཞི་དང་ལྡན་པ་ལ་སྟེགས་བུ་དང་བ་གམ་དང་སྒོ་དང་རྟ་བབས་རྣམས་ཀྱིས་མཛེས་པར་བྱས་པ་ལ་ནོར་བུ་ཆུ་ཤེལ་དང༌། ཨིནྡྲ་ནཱི་ལ་དང༌། པདྨ་རཱ་ག་རྣམས་སོ་སོར་བཞུ་བའི་ཁ་དོག་ཅན་གྱི་ཚོན་རིས་རིམ་པར་བྱུགས་
པས་དབང་པོའི་གཞུའི་མཛེས་པ་ལ་ཅོ་འདྲིར་བྱེད་པ། ངོས་རྣམས་ན་མུན་པ་སེལ་བར་བྱེད་པའི་སྐར་ཁུང་དམ་པ་རིན་པོ་ཆེའི་སྒྲོན་མ་བཏེག་པ་ལྟ་བུ་མང་པོ་ལ་ཁ་དོག་སྣ་ཚོགས་པའི་ཚོན་གྱིས་མཛེས་པ། ནང་གི་ཁྱམས་ཐམས་ཅད་དུ་འཕྲུལ་གྱི་བྱེད་པོས་མངོན་པར་བསྐྲུན་པ་དང་འདྲ་བའི་ཀ་བ་
མང་པོས་བཏེག་པའི་གདུང་དང༌། གདུང་ཕྲན་རྣམས་ཀྱིས་ལེགས་པར་བྲེས་པ་ལ་བརྟེན་པའི་སྟེང་ཐོག་རིམ་པར་ཕུབ་པ་ལ་མཐོན་ཀ་ཆེན་པོའི་མདའ་ཡབ་དང་པུ་ཤུས་བརྒྱན་པ། ཉི་མ་འཆར་ཀའི་འོད་མདངས་ཕུན་སུམ་ཚོགས་པ་ལ་འགྲན་ཟླར་བྱེད་པའི་གསེར་བཙོ་མའི་རང་བཞིན་ཅན་གྱི་འགན་ཇི་ར་ཆེན་
པོ་དང་རྒྱལ་མཚན་དང་མེ་ལོང་དང་དྲིལ་བུ་གཡེར་ཁའི་ཕྲེང་བ་རྣམས་ཀྱིས་སྤྲས་པ་དག་ཡོད་དོ། །ཕྱི་རོལ་ན་མེ་ཏོག་གི་ལྡུམ་ར་དང༌། བཟའ་ཤིང་གི་རྭ་བ་དང༌། སྐྱེད་མོས་ཚལ་དང༌། ཤིང་ལྗོན་པའི་གྲིབ་བསིལ་སྣུམ་པོ་འབབ་པའི་སྤང་ལྗོང་རྩྭ་སྔོན་དང༌། ལྡུམ་བུ་དང༌། མེ་ཏོག་དང༌། སྨན་གྱི་ལོ་འདབ་སྟུག་

པོས་ཁེབས་པའི་སྐབས་འགའ་ཞིག་ནས། རེག་པ་ཤིན་ཏུ་བསིལ་བའི་ཆུ་རྒྱུན་གཙང་མ་ཡིད་འོང་སྙན་པའི་ཆབ་སྒྲ་འབྱིན་བཞིན་པ་འབབ་པ་དང་བཅས་པའི་སྐྱེད་ཚལ་གྱི་ཕྲེང་བས་ཀུན་ནས་བསྐོར་བ་ཡོད་དོ། །ཕོ་བྲང་གི་ནང་དང་ཁོར་ཡུག་གི་རིམ་པ་རྣམས་སུ་དགེ་སློང་གི་དགེ་འདུན་མང་པོ་འདུ་བའི་གཙུག་ལག་
ཁང་དང་ལྷ་ཁང་དང་མགོན་ཁང་མང་པོ་རྣམས་སུ། དཀོན་མཆོག་གསུམ་གྱི་རྟེན་གསུམ་ངོ་མཚར་དང་བྱིན་རླབས་ཀྱི་གཟི་འོད་རབ་ཏུ་འབར་བ་བགྲང་གིས་མི་ལང་བ་རྣམས་ཀྱི་མདུན་ན་མཆོད་པར་ཕུལ་བའི་ཡོ་བྱད་ཀྱི་རྣམ་པ་ནི། མེ་ཏོག་དང༌། བདུག་པ་དང༌། མར་མེ་དང༌། དྲི་མཆོག་དང༌། ཞལ་ཟས་དང༌། རོལ་མོའི་བྱེ་
བྲག་མང་པོ་དང༌། གཞན་ཡང་སྟོང་འཁུན་གྱི་རྒྱལ་པོའི་གན་མཛོད་ལས་ཐོན་པའི་བཟང་གོས་དང༌། དར་གྱི་བྱེ་བྲག་ཤིན་ཏུ་རྙེད་དཀའ་ཞིང་རིན་ཐང་ཆེ་བ་གྱ་ནོམ་པ་དག་ལས་གྲུབ་པའི་བླ་རེ་དང༌། རྒྱལ་མཚན་དང༌། འཕུར་མ་དང༌། འཕན་དང༌། སྙན་ཤལ་ལ་སོགས་པ་མཆོད་པའི་ཡོ་བྱད་བསམ་
གྱིས་མི་ཁྱབ་པའི་བཀུར་སྟི་དང་བཅས་པ་སྟེ་བཞུགས་པའི་གཞལ་མེད་ཁང་མང་པོ་དང༌། མིའི་བདག་པོ་དང༌། མདུན་ན་འདོན་དང༌། མི་དཔོན་དང༌། ལས་གཉེར་བ་རྣམས་ཀྱི་བསྟི་གནས་དང༌། མདུན་གྲོས་ཀྱི་གནས་དང༌། རྒྱལ་པོའི་དཀོར་ཁང་དང༌། གན་མཛོད་དང༌། མཛོད་ཕལ་པ་དང༌། འབྲུའི་བང་
བ་རྣམས་ཀྱི་ཁང་བཟང་དང༌། ཁང་པ་བརྩེགས་པ་དང༌། ཁང་ལྕོག་རྣམས་ཀྱིས་ཀུན་ནས་མཛེས་པར་བྱས་པ་དག་ཡོད་དོ། །དེ་དག་ཀྱང་འབྱོར་ཞིང་རྒྱས་པ་སྡེ་བཞིའི་འབྲས་བུ་ཕུན་སུམ་ཚོགས་པའི་འབྱུང་གནས་ཆེན་པོ་ཉིད་དུ་ངེས་པ་ནི། འདི་ལྟར་ནོར་དང་འདོད་པའི་སྡེ་རྣམ་པ་གཉིས་ཀྱིས་བསྡུས་པའི་
འབྱོར་པ་ལ་དབང་ཐོབ་ཅིང༌། ཟང་ཟིང་གི་སྦྱིན་པ་རྒྱུན་མི་ཆད་པར་འབྱུང་བའི་སྒོ་ཆེན་པོ་བརྒྱ་ཕྲག་སྟོང་དུ་མ་དུས་ཅིག་ཅར་དུ་ཡོངས་སུ་བྱེ་བ་ལྟ་བུ་ཡོད་དེ། ཇི་ལྟར་ཞེ་ན། རྒྱལ་ཁབ་ཆེན་པོ་འདི་ཉིད་ཀྱིས་མཚོན་པའི་མངའ་འོག་ཏུ་གཏོགས་པའི་གྲོང་དང་གྲོང་ཁྱེར་དང་གྲོང་རྡལ་དང་ཚོང་འདུས་རྣམས་
ནས་འབྱུང་བ་དང༌། དེ་དག་ལས་གཞན་པའི་ཕྱོགས་དང་ཕྱོགས་བྲལ་གྱི་ཚོང་འདུས་ཆེན་པོ་རྣམས་ནས་འབྱུང་བ་དང་བཅས་པའི་འདོད་པ་དགུའི་ལོངས་སྤྱོད་དང་དཔལ་འབྱོར་ཕུན་སུམ་ཚོགས་པ་དག་འབྱུང་བ་ནི་འདི་ལྟ་སྟེ། ནོར་བུ་རིན་པོ་ཆེ་བཻ་ཌཱུརྻ་དང༌། ཏོག་གི་བློ་གྲོས་དང༌། ཨིནྡ་ནཱི་ལ་དང༌། མུ་ཏིག་དང༌། པདྨ་

རཱ་ག་དང༌། ཀེ་ཏ་ཀ་དང༌། སྤུག་དང༌། ཀརྟེ་ཀ་དང༌། ཤེལ་དང༌། ཉ་ཕྱིས་དང༌། དུང་དང༌། མེ་ཤེལ་དང༌། ཆུ་ཤེལ་དང༌། རྒྱལ་པོ་འཁྱིལ་བ་དང༌། པེ་རོ་ཙ་དང༌། བྱི་རུ་དང༌། མཆོང་ལ་སོགས་པ་རིན་པོ་ཆེའི་རིགས་སུ་གཏོགས་པ་རྣམས་སོ། །གཞན་ཡང་རྔ་དང༌། རྫ་རྔ་
དང༌། རྔ་ཟླུམ་དང༌། ཅང་ཏེའུ་དང༌། རོལ་མོ་དང༌། དུང་དང༌། སིལ་སྙན་དང༌། གླིང་བུ་དང༌། པི་ཝང་དང༌། སྒྲ་བརྙན་ལ་སོགས་པ་རོལ་མོའི་རིགས་སུ་གཏོགས་པ་དང༌། འབྲས་དང་སོ་བ་དང༌། ནས་དང་གྲོ་དང༌། སྲན་མ་དང་ཏིལ་དང༌། ཁྲེ་དང་ཡུངས་ཀར་ལ་སོགས་པ་འབྲུའི་རིགས་སུ་གཏོགས་
པ་དང༌། དཀར་གསུམ་དང་མངར་གསུམ་དང༌། ཤིང་ཐོག་དང༌། འབྲུའི་རིགས་ལ་སོགས་པ་བཟའ་བ་དང་བཅའ་བའི་རིགས་སུ་གཏོགས་པ་རྣམས་དང༌། ཁ་དོག་སྣ་ཚོགས་པའི་གོས་བཟང་པོ་དང༌། དར་དང་རས་ཟུང་དང༌། རས་ཡབ་དང༌། ཐེར་ཕྲུགས་ལ་སོགས་པ་བགོ་བ་དང་རྒྱན་གྱི་
རིགས་སུ་གཏོགས་པ་ཉེ་བར་སྤྱད་པའི་ཡོ་བྱད་ཀྱི་རྣམ་པ་མང་པོ་དང༌། ཨརྡྷོ་ཀའི་ཕུར་མ་དང༌། རྟ་དང༌། དྲེའུ་དང༌། གནག་ཕྱུགས་ལ་སོགས་པ་ཉེ་བར་མཁོ་བའི་རིགས་སུ་གཏོགས་པ་མ་ཚང་བ་མེད་པ་དག་ཡོད་དོ། །མདོར་ན་ཆེན་པོ་དང་བར་མ་དང་དམན་པའི་སྐྱེ་འགྲོ་ཐམས་ཅད་རང་རང་གི་མངོན་
པར་འདོད་པ་བཞིན་དུ་བཅང་བར་རུང་བའི་ཟང་ཟིང་གི་ལོངས་སྤྱོད་ཟད་མི་ཤེས་པ་ལ་དབང་འབྱོར་པའི་ཚུལ་ནི། སྔོན་གྱི་སྦྱིན་པ་དཔག་ཏུ་མེད་པའི་དཔལ་ལས་ལེགས་པར་འཁྲུངས་པའི་རྒྱལ་པོ་ཆེན་པོ་རྣམ་མང་ཐོས་ཀྱི་བུའི་འབྱོར་པ་དང་མངའ་ཐང་ལ་འགྲན་པར་བཟོད་པའི་ངོ་མཚར་གྱི་ཕུང་པོ་ཅི་
རིགས་པ་ཡོངས་སུ་རྫོགས་པ་ཡོད་དོ། །དེ་ལྟ་བུའི་འབྱོར་བའི་ཚོགས་ཆེན་པོ་དེ་དག་ཀྱང་སྐྱེ་བོ་ཕལ་གྱི་ཆོས་ལུགས་བཞིན་དུ་མཆོག་གི་གོ་འཕང་དུ་འཛེགས་པར་བྱེད་པའི་ལམ་ཡང་དག་པ་བཞིན་དུ། རྟག་ཏུ་གཅེས་པར་བསྲུང་བར་མི་བྱེད་པར་ཡོངས་སུ་བཏང་བ་ལ་མཁས་པའི་སྒོ་ནས།
བསོད་ནམས་ཀྱི་ཞིང་བླ་ན་མེད་པར་གྱུར་པ་རྣམས་ལ་མཆོད་པའི་ཆེད་དུ་བཏང་བ་དང༌། རྒྱལ་བ་སྲས་དང་བཅས་པ་རྣམས་ཀྱི་སྐུ་དང་གསུང་དང་ཐུགས་ཀྱི་རྟེན་ཕན་བདེ་ཀུན་གྱི་རྩ་ལག་ཏུ་གྱུར་པ་མང་པོ་བཞེངས་པའི་རྒྱུར་བཏང་བ་དང༌། དགེ་འདུན་གྱི་གཙུག་ལག་ཁང་བརྩིགས་པའི་རྒྱུར་བཏང་བ་དང༌།

ལས་བྱེད་རྣམས་ཀྱི་དྲིན་གཟོའི་ཡོན་འབུལ་དུ་སྟོབ་པ་དང༌། མཆོད་པའི་ཡོ་བྱད་བསྒྲུབས་པའི་ཟོང་དུ་བཏང་བ་ལ་སོགས་པ་དགེ་བའི་རྩ་བ་ཁོ་ནའི་ཆེད་དུ་གཏོང་བ་ལ་སྙིང་སྟོབས་ཀྱི་རྒྱ་མཚོ་ནམ་ཡང་བྲི་བ་མེད་པར་སྦྱིན་པའི་སྒོ་ཆེན་པོ་འབྱེད་པར་བྱེད་དོ། །དེའང་འདི་ལྟར། བཟའ་བ་འདོད་པ་རྣམས་
ལ་ནི་བཟའ་བ་དང༌། བགོ་བ་འདོད་པ་རྣམས་ལ་ནི་བགོ་བ་དང༌། རྒྱན་གྱི་བྱེ་བྲག་འདོད་པ་རྣམས་ལ་ནི་རྒྱན་གྱི་བྱེ་བྲག་དང༌། མཁོ་བའི་ཡོ་བྱད་འདོད་པ་རྣམས་ལ་ནི་མཁོ་བའི་ཡོ་བྱད་དང༌། ཇ་དང་གསེར་དང་དངུལ་འདོད་པ་རྣམས་ལ་ནི་ཇ་དང་གསེར་དང་དངུལ། བཞོན་པ་དང་གནག་ཕྱུགས་འདོད་པ་
རྣམས་ལ་ནི་དེ་དང་དེས་ཚིམ་པར་བྱེད་པ་སྟེ། མདོར་ན་སེམས་ཅན་རང་རང་གི་ཡིད་ལ་ཅི་དང་ཅི་འདོད་པའི་རེ་བ་ཐམས་ཅད་ཡོངས་སུ་རྫོགས་པར་བྱེད་པའི་ལོངས་སྤྱོད་ཟད་མི་ཤེས་པའི་འབྱུང་གནས་སུ་གྱུར་པའི་ཕྱིར་རོ། །དེར་མ་ཟད་འཇིག་རྟེན་གྱི་འབྱོར་པ་མ་ལུས་པ་གཅིག་ཏུ་སྤུངས་ཀྱང༌།
གང་གི་སྣང་བའི་ཟེགས་མ་ཕྲ་མོ་རེ་རེས་ཀྱང་ཟིལ་གྱིས་གནོན་ཅིང་མོག་མོག་པོར་བྱེད་པ་ནི་དམ་པའི་ཆོས་ཀྱི་འབྱོར་པ་བླ་ན་མེད་པ་སྟེ། དེ་ཡང་ཆོས་དང་ཐར་པའི་སྡེ་རྣམ་པ་གཉིས་ཀྱིས་བསྡུས་པའི་འབྱོར་པ་ལ་དབང་ཞིང་ཆོས་ཀྱི་སྦྱིན་པ་རྒྱུན་མི་ཆད་པར་འབྱུང་བའི་སྒོ་ཆེན་པོ་བྱེ་བ་ཕྲག་བརྒྱ་
དུས་ཅིག་ཅར་དུ་དབྱེ་བ་ལྟ་བུར་ཡོད་དེ། དེའང་ཇི་ལྟར་ཞེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ལེགས་པར་གསུངས་པའི་ལུང་གི་ཆོས་སྡེ་སྣོད་གསུམ་དང་རྒྱུད་སྡེ་བཞིའི་བདག་ཉིད་ཅན་དེའི་དགོངས་དོན་རྣམ་པར་འགྲེལ་བའི་
བསྟན་བཅོས་དང་བཅས་པ་གངས་ཅན་གྱི་སྐད་དུ་འགྱུར་རོ་འཚལ་གྱིས་མཚོན་པའི་ཆོས་ཀྱི་སྦྱིན་པའི་མ་མོ་རྒྱ་ཆེན་པོ་འདི་དག་བསྒྲུབས་སོ། །ཇི་ལྟར་བསྒྲུབ་པ་དེ་དག་ཐམས་ཅད་ཀྱང་གེགས་མེད་པ་ཉིད་དུ་མཐར་ཕྱིན་ནས། ཕྱོགས་བཅུར་དམ་པའི་ཆོས་ཀྱི་སྣང་བ་ཆེན་པོ་བཀྱེ་བའི་སྒོ་ནས་འགྲོ་བ་རྒྱ་
མཚོའི་རྒྱུད་ལ་དགེ་བའི་རྩ་བ་བླ་ན་མེད་པའི་འབྱོར་པ་དམ་པ་དེང་ནས་བརྩམས་ཏེ་རྫོགས་པའི་བྱང་ཆུབ་ཀྱི་བར་དུ་ཟད་མི་ཤེས་པའི་རང་བཞིན་ཅན་ལ་སྦྱོར་བ་འདི་དག་ལགས་སོ། །དེའང་གླེགས་བམ་ཙམ་དུ་མ་ཟད་བཤད་སྒྲུབ་ཀྱི་རྒྱུན་ཆེན་པོའང་ཡོད་དེ། ཇི་སྐད་སྨོས་པ་རྣམས་ཀྱིས་

མཚོན་པའི་བསྟན་འཛིན་གྱི་སྐྱེས་བུ་ཤེས་བྱའི་གནས་ཀྱི་གཙུག་ལག་ཐམས་ཅད་ལ་མི་འཇིགས་པའི་མཁྱེན་རབ་དང༌། སྤོབས་པ་དང༌། གཟུངས་དང༌། ཏིང་ངེ་འཛིན་གྱི་སྒོ་མང་པོ་ལ་དབང་འབྱོར་བ། དམ་པའི་ཆོས་ཐམས་ཅད་ཀྱི་འབྱུང་གནས་སུ་གྱུར་པའི་
མང་དུ་ཐོས་པ་རྣམས་ཀྱིས་རྣམ་པར་དཀར་བའི་ཕྲིན་ལས་རྣམ་པ་གསུམ་གྱི་སྒོ་ནས་ཆོས་ཀྱི་སྣང་བ་ཆེན་པོ་ཕྱོགས་ཐམས་ཅད་དུ་བཀྱེ་སྟེ། སྐྱེ་དགུ་ཐམས་ཅད་ཀྱི་རེ་བའི་ཡོལ་གོ་མ་ལུས་པ་ཐོས་པ་མཆོག་གི་འབྱོར་པ་བླ་ན་མེད་པས་ཕྱུར་བུར་འགེངས་པར་བྱེད་དོ། །དེ་ལ་བརྟེན་ནས་རང་གིས་ནུས་ན་
ཐར་པ་དང་ཐམས་ཅད་མཁྱེན་པའི་འབྲས་བུ་ཡང་རིང་པོར་མ་ཡིན་པར་ལག་རྩེར་གནས་པ་ལྟ་བུར་གྱུར་པ་ཡོད་དོ། །དེས་ན་ཆོས་དང་སྲིད་པའི་དཔལ་འབྱོར་མ་ལུས་པའི་འབྱུང་ཁུངས་སུ་གྱུར་པས་ན་འབྱོར་པ་རྒྱས་པ་དང༌། ཕྱི་ནང་ཀུན་དུ་མཆོག་དང་ཕལ་པའི་མི་དང་སྐྱེ་བོའི་ཚོགས་ཀྱིས་
ཡོངས་སུ་གང་བ་སྟེ། དེ་ལས་བླའི་མཆོད་གནས་སུ་གྱུར་པ་ནི་ཕྱི་དང་ནང་གི་ཡོན་ཏན་གྱི་ནོར་བུས་ཕྱུག་པའི་བླ་མ་དང༌། སློབ་དཔོན་དང་དགེ་སློང་གི་དགེ་འདུན་ཞི་ཞིང་དུལ་བའི་ཡོན་ཏན་གྱི་ཚོགས་བཟུང་བ་མང་པོ་དག་ཡོད་དེ། དེ་དག་འགའ་ཞིག་ནི་ཀློག་པ་ཐོས་བསམ་གྱི་འཁོར་ལོ་ལ་
གནས། འགའ་ཞིག་ནི་སྤོང་བ་བསམ་གཏན་གྱི་འཁོར་ལོ་ལ་གནས་པའི་ཚོགས་དང༌། རྒྱལ་པོའི་འཁོར་དུ་བསྙེན་པར་འོས་པ་ནི་དཔའ་ཞིང་མཛངས་ལ་རྟུལ་ཕོད་པ། ཆོས་དང་སྲིད་པའི་གཙུག་ལག་གི་གཞུང་རབ་འབྱམས་ལ་རྣམ་པར་དཔྱོད་པའི་བློ་གྲོས་ཀྱི་རྩལ་རབ་ཏུ་རྫོགས་ནས། མགྲིན་
པ་ལོངས་སྤྱོད་ཀྱི་འཁོར་ལོའི་རྩ་འཁོར་རྣམ་པར་གྲོལ་བའི་ལམ་ནས་ལེགས་བཤད་གཏམ་གྱི་ངོ་མཚར་དང་མཚར་སྡུག་ཟད་མི་ཤེས་པར་འཇོ་བས། སྐྱེ་བོ་མང་པོ་ཡིད་ཀྱི་བརྟན་པ་རང་དབང་དུ་འཕྲོག་པར་བཟོད་པའི་མདུན་ན་འདོན་དང༌། མི་དཔོན་དང༌། ལས་བྱེད་དང༌། གཙོ་བོ་དང༌།
ཚོང་དཔོན་དང༌། བྱ་མ་རྟ་དང༌། ཁྱིམ་བདག་དང༌། ལྗོངས་ཀྱི་སྐྱེ་བོ་དང༌། གཞན་ཡང་མཆོག་དང་ཕལ་པའི་བཟོའི་གནས་དང༌། རིག་པའི་གནས་ཀྱི་གཙུག་ལག་རབ་འབྱམས་རྣམས་ལ་གཞན་དྲིང་མི་འཇོག་པའི་བློ་གྲོས་དང་ལྡན་པའི་ཚོགས་མང་པོས་ཡོངས་སུ་གང་བའོ། །གཞན་

ཡང་དགའ་སྟོན་དང་ངོ་མཚར་བའི་ལྟད་མོའི་གནས་སུ་གྱུར་པའི་གཏམ་བརྗོད་པ་དང༌། བཞད་གད་བྱེད་པ་དང༌། གླུ་ལེན་པ་དང༌། ཟློས་གར་བསྒྱུར་བ་དང༌། མིག་འཕྲུལ་སྟོན་པ་དང༌། པི་ཝང་བརྡུང་བ་དང༌། གླིང་བུ་བསྒྱུར་བ་དང༌། ཁར་རྔ་དང་སིལ་ཁྲོལ་འཁྲོལ་བ་ལ་མཁས་པ་
དང༌། བུས་པ་སྲང་བར་ན་རྩེ་བའི་བར་རྣམས་ཏེ། དེ་དག་ཐམས་ཅད་ཀྱང་སྲང་དང༌། སྲང་བར་དང༌། བཞི་མདོ་དང༌། སུམ་མདོ་རྣམས་སུ་རང་རང་གི་བྱ་བ་དེ་དག་གིས་འཚོ་བར་བྱེད་པ་དག་ཀྱང་ཡོད་དོ། །དེ་ལྟར་སྡེ་བཞི་རྣམ་པར་རྒྱས་པའི་དགེ་མཚན་གྱི་ཕུང་པོས་གོང་ནས་གོང་དུ་
མངོན་པར་མཐོ་བར་གྱུར་པའི་གདན་ས་དཔལ་ལྷུན་གྲུབ་སྟེང་གི་ཆོས་གྲྭ་ཆེན་པོ་ཞེས་བྱ་བ། སྔོན་གྱི་སྐྱེས་བུ་མཁས་པ་སྐྱེ་བ་ནས་སྐྱེ་བའི་ཕྲེང་བར་ཤེས་པར་བགྱི་བ་རིག་པའི་གནས་ཀྱི་གཞུང་ལུགས་མཐའ་དག་ལ་སྦྱངས་པ་རྒྱ་མཚོའི་ཕ་རོལ་དུ་སོན་པ་གཙུག་ལག་རབ་འབྱམས་ཀྱི་ཡུལ་
ལ་བལྟ་བར་བྱེད་པའི་རྣམ་པར་འབྱེད་པའི་མིག་དབང་ཤིན་ཏུ་དག་པར་གྱུར་པ། ཆོས་ཀྱི་ཚུལ་ཐམས་ཅད་མགྲིན་པ་རྣམ་པར་ཡངས་པའི་འཁོར་ལོའི་སྦུབས་ནས་འདྲེན་པ་ལ་བསྙེངས་པ་དང་བག་ཚ་བ་མི་མངའ་བའི་ངག་གི་དབང་ཕྱུག་གྲུབ་པ་མང་པོས་སྡེབ་ལེགས་ཚིག་གི་མེ་ཏོག་མ་ལུས་པ་
གཅིག་ཏུ་སྤུངས་ནས་མངོན་པར་བསྔགས་པའི་མེ་ཏོག་གི་སིལ་མ་མང་པོས་ཡང་དག་པར་འཐོར་བར་བྱེད་པའི་གདན་ས། བསྐལ་པ་བགྲང་དུ་མེད་པའི་རིང་ནས་སེམས་ཅན་ཐམས་ཅད་ལ་ཕན་པར་སྒྲུབ་པའི་དམ་བཅའ་དབྲོག་ཏུ་མེད་པའི་ཁུར་ཆེན་པོ་ཁྱེར་བའི་བྱང་ཆུབ་སེམས་དཔའ་
སེམས་དཔའ་ཆེན་པོ་རྣམས་ཀྱིས་བསམས་བཞིན་དུ་སྐྱེ་བ་ཉེ་བར་ལེན་པའི་ཞིང་དམ་པ། དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་ལས་རྣམ་པར་འཕྲུལ་པའི་སྨྲ་བའི་ཁྱུ་མཆོག་ཆེན་པོ་རྣམས་ཀྱིས་མི་ནུབ་ཆོས་ཀྱི་རྒྱལ་མཚན་དམ་པ་བརྟན་པར་འཛུགས་པའི་ཁང་
བཟངས་ཆེན་པོ། སྲིད་པའི་སྡུག་བསྔལ་ཆུ་སྲིན་མ་ཀ་རའི་མཆེ་བ་ལྟར་གཟིངས་པ་ལས་རིང་དུ་བརྒལ་བའི་ངུར་སྨྲིག་འཆང་བ་རྣམས་ཀྱིས་ངལ་འཚོར་སྤྱོད་པའི་དགའ་ཚལ། ལྷ་དང༌། མི་དང༌། ལྷ་མ་ཡིན་དང༌། དྲི་ཟ་དང༌། ལྟོ་འཕྱེ་དང༌། སྲུལ་པོ་དང༌། ལུས་སྲུལ་པོ་ལ་སོགས་

པའི་འཇིག་རྟེན་པ་ཐམས་ཅད་ཀྱིས་གཙུག་གི་ནོར་བུས་གུས་པར་བསྟེན་ཅིང་མཆོད་པའི་ཡུལ་དུ་གྱུར་པའི་གཙུག་ལག་ཁང་ཆེན་པོ་བསམ་འགྲུབ་མཐོང་གྲོལ་ཞེས་བྱ་བ་དང༌། དེ་དང་ཟུང་འབྲེལ་དུ་ཡོད་པའི་ལྷའི་ཕོ་བྲང་དམ་པ། སྔོན་གྱི་བསོད་ནམས་དཔག་ཏུ་
མེད་པས་ཉེ་བར་བསྐྱེད་པའི་མིའི་ལྷ། ཆེ་ཞིང་མཐོ་བ་ཤིང་སཱ་ལ་ཆེན་པོ་ལྟ་བུའི་རིགས་མཆོག་མ་ཉམས་པ་རྣམས་ཀྱིས་སྲིད་པ་ཉེ་བར་ལེན་པའི་གནས། གཞལ་དུ་མེད་པའི་སྟོབས་དང་ཐུགས་བརྩེ་ཆེན་པོ་ལྷན་ཅིག་ཏུ་འགྲོགས་པའི་ཕྲིན་ལས་ཀྱི་ཟླ་འོད་དཀར་པོ་གང་གིས་ཆབ་འོག་ཏུ་
འཁོད་པའི་འགྲོ་བ་དང༌། བྱང་ཕྱོགས་ཀྱི་འཛིན་མའི་དུམ་བུ་རྣམ་པར་ཡངས་པའི་ཁྱོན་ཐམས་ཅད་དུ་འཁོད་པའི་སྐྱེ་འགྲོ་མ་ལུས་པ་དང་བཅས་པ་རྣམས་ལ། སྔ་ན་མེད་པའི་བདེ་སྐྱིད་ཀྱི་ཀུནྡའི་དགའ་ཚལ་ཤིན་ཏུ་རྒྱས་པར་བྱེད་པའི་མི་བདག་ཆེན་པོ་རྣམས་འཚོ་གཞེས་སུ་བཞུགས་
པའི་རྒྱལ་པོའི་ཁབ་དམ་པ་མི་མཐུན་པའི་ཕྱོགས་ལས་རྣམ་པར་རྒྱལ་བ་ཞེས། གང་གི་ཡི་གེ་དམ་པ་ཕྱོགས་བཅུའི་འགྲོ་བ་ཡོངས་ཀྱི་ཐོས་པ་འཛིན་པའི་བཅུད་ལེན་དུ་རྟག་པར་རྒྱུ་བའི་འབྱུང་གནས་སུ་གྱུར་པའི་བསྟི་གནས་ཆེན་པོ་གང་ཡིན་པ་དེ་ནི། སྔ་ན་མེད་པའི་ལེགས་བྱས་ཀྱི་
མཆོད་སྡོང་ཆེན་པོ་འདི་ཉིད་གང་དུ་སྒྲུབ་པའི་གནས་སོ། །གཉིས་པ་ནམ་བསྒྲུབ་པའི་དུས་བཤད་པ་ལ། སྟོན་པའི་བསྟན་པ་གནས་པའི་ཚད་བཤད་པ། དེ་ལས་ཆོས་སྦྱིན་འདིའི་ཕྱི་མོ་བསྒྲུབ་པའི་དུས་བཀར་བའོ། །དང་པོ་ལའང་བཤད་པའི་ཚུལ་སོ་སོར་འགོད་པ་དང༌། སྒྲ་ཇི་བཞིན་
པའི་ལུང་ངོས་བཟུང་བའོ། །དང་པོ་ལ་སྤྱིར་བདག་ཅག་གི་སྟོན་པ་བཅོམ་ལྡན་འདས་ཤཱཀྱའི་གཙོ་བོའི་ལུང་དང་རྟོགས་པའི་བསྟན་པ་རིན་པོ་ཆེ་ནི། ངེས་པའི་དོན་དུ་གསང་སྔགས་རྡོ་རྗེ་ཐེག་པའི་དཔའ་བོ་དང་རྣལ་འབྱོར་མ་བསམ་གྱིས་མི་ཁྱབ་པ་རྣམས་ཀྱིས་རྟག་ཏུ་སྲུང་བར་བྱེད་པས་
རྒྱུན་ཆད་མེད་པར་འབྱུང་བར་གསུངས་པ་ལ་སོགས་པས་ནམ་ཡང་ནུབ་པ་མེད་པའི་རང་བཞིན་དུ་བཞུགས་པ་དེ་ལྟ་ནའང༌། གདུལ་བྱ་ཐུན་མོང་བ་རྣམས་ཀྱི་སྣང་ངོ་རུ་བསྟན་པ་རིན་པོ་ཆེ་ཇི་ཙམ་གནས་པའི་ཚད་ལ་རིང་ཐུང་སྣ་ཚོགས་སུ་གསུངས་པ་ལས། བསྟན་པ་ལོ་སྟོང་ཕྲག་གཅིག་ཏུ་

གནས་པར་བཤད་པ་ནི། འདུལ་བ་ལུང་ཕྲ་མོ་ལས། ཀུན་དགའ་བོ་བུད་མེད་རྣམས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་མ་བྱུང་ན་ནི་ད་དུང་ངའི་བསྟན་པ་ལོ་སྟོང་ཚང་བར་ཉེས་པ་མེད་ཅིང་ཅང་ཉམས་པ་མེད་པར་གནས་པར་འགྱུར་རོ་ཞེས་དང༌། ཇི་ལྟར་ཁྱོད་ཀྱིས་སངས་རྒྱས་ཀྱི་
ཞིང་ཕུན་སུམ་ཚོགས་པ་ལ་སེར་བ་བབ་པས་ལོ་སྟོང་ཚང་བར་གནས་པའི་ཡུན་ཐུང