Luận tạng Tây Tạng (Tengyur) — Tập 213

ོང་དུ་བོགས་དབྱུང་སྟེ། སྦྱིན་པ་རྣམ་པ་བཞི་པོ་གང་ཡང་རུང་བ་ལ་འཇུག་པར་བསྐུལ་མ་འདེབས་པའི་མཆོག་ཏུ་ཡང་འགྱུར་བ་ཉིད་དོ། །དེས་ན་གོང་དུ་ལུང་དྲངས་པ་ལྟར་བྱང་ཆུབ་སེམས་
དཔའི་སྤྱོད་པ་བསྡུ་བ་རྣམ་པ་བཞིའི་ཐབས་ཀྱིས་སེམས་ཅན་གཞན་སྨིན་པར་བྱེད་པའི་ཚུལ་རྣམས་ཀྱང་ཅི་རིགས་པའི་སྒོ་ནས་ཚང་བ་ཡིན་ནོ། །དེ་ལས་གཞན་པ་མཁས་པ་ལ་འོས་པའི་བགྱི་བ་བླ་ན་མེད་པ་ནི། ཕྱི་རིག་པའི་གནས་ཀྱི་གཙུག་ལག་ཐམས་ཅད་དང༌། ནང་སྡོམ་
པ་རིན་པོ་ཆེ་རྣམ་པ་གསུམ་དང་རྗེས་སུ་འབྲེལ་བའི་ཟབ་པ་དང་རྒྱ་ཆེ་བའི་ཆོས་ཀྱི་བང་མཛོད་མ་ལུས་པ་བཟུང་ནས། འཆད་པ་ཆོས་ཀྱི་འཁོར་ལོས་སྐལ་ལྡན་གྱི་གདུལ་བྱ་རྗེས་སུ་འཛིན་པ་དང༌། རྩོད་པ་ལུང་རིགས་ཀྱི་འཁོར་ལོས་ལོག་པར་རྟོགས་པ་ཚར་གཅོད་པ་དང༌། རྩོམ་
པ་ལེགས་བཤད་ཀྱི་འཁོར་ལོས་རྒྱལ་བའི་བསྟན་པ་གསལ་བར་བྱེད་པ་རྣམས་ཀྱི་སྒོ་ནས་ཆོས་ཀྱི་སྦྱིན་པ་གཏོང་བས། འཇིག་རྟེན་གྱི་ཁམས་ཐམས་ཅད་ཆོས་ཀྱི་སྙིང་པོ་ཅན་དུ་བགྱིད་པ་ཉིད་ནི། སྡོམ་བརྩོན་བླ་མ་ཆེན་པོ་རང་ཉིད་སྡེ་དགེ་གོང་མ་རྣམས་ཀྱི་བསྟན་སྲིད་ཀྱི་བྱ་བ་

ཆེན་པོའི་ཁུར་ཁྱེར་བའི་ལས་ཅན་དུ་སོང་བས། ཐོག་མ་ཉིད་ནས་འབད་པ་གཙོ་བོར་མ་བརྩམས་པ་དང༌། གལ་སྲིད་བརྩམས་ཀྱང་མིའི་རྒྱལ་པོའི་ཀུན་སྤྱོད་དང་ལྡན་པའི་བླ་མར་སོང་བས། ཕན་འདགས་ཆུང་བ་ལ་དགོངས་ནས། རེ་ཞིག་དེའི་སྤྲོས་པ་མ་
མཛད་ཅིང༌།འོན་ཀྱང་རྒྱལ་སྲས་བྱང་ཆུབ་སེམས་དཔའ་སྙིང་བརྩེའི་བདག་ཉིད་ཅན་རྣམས་ནི་གང་དང་གང་གི་རྣམ་པས་གནས་ཀྱང༌། གཞན་ལ་ཕན་པ་རྒྱ་ཆེན་པོ་འབྱུང་བའི་བསམ་པ་དང༌། སྦྱོར་བ་ཕུན་སུམ་ཚོགས་པ་དག་ནི་ནམ་ཡང་མི་འདོར་བ་ཆོས་ཉིད་དེ། དེའང་འདི་ལྟར་བོད་ཆེན་
ལྗོངས་ཀྱི་ཡུལ་གྲུ་འདི་ཉིད་ཀྱིས་མཚོན་པའི་འཛིན་མའི་དཀྱིལ་འཁོར་ཐམས་ཅད་དུ། མི་ནུབ་ཆོས་ཀྱི་རྒྱལ་མཚན་ཆེན་པོ་བརྟན་པར་འཛུགས་པ་དང༌། འགྲོ་ཚོགས་རྒྱ་མཚོ་ལྟ་བུའི་དོན་ལ་ཕན་པའི་སེམས་དམ་པ་ཉེ་བར་བཞག་ནས། དུས་འདིར་ཁམས་གསུམ་ཆོས་ཀྱི་
རྒྱལ་པོ་ཆེན་པོ་མཁན་པོ་རིན་པོ་ཆེ་ཐམས་ཅད་མཁྱེན་པ་དཔལ་ལྡན་ཆོས་སྐྱོང་བཀྲ་ཤིས་གྲགས་པའི་རྒྱལ་མཚན་དཔལ་བཟང་པོ་ལ་སོགས་པ། གོང་དུ་སྨོས་པའི་བསྟན་འཛིན་གྱི་སྐྱེས་བུ་ཆེན་པོ། མཁས་པ་དང་གྲུབ་པའི་ཡོན་ཏན་གྱི་ཚོགས་མང་པོས་ཡོངས་སུ་བཟུང་བ་དེ་དག་
སྡོམ་བརྩོན་སྐྱེ་དགུའི་བདག་པོ་རང་གི་རིགས་ཀྱི་ཅོད་པཎ་དུ་མངོན་པར་མངའ་གསོལ་ཏེ། སྒོ་གསུམ་ལོངས་སྤྱོད་དང་བཅས་པས་མཉེས་པར་བྱེད་ཅིང༌། ཟབ་པ་དང་རྒྱ་ཆེ་བའི་ཆོས་ཀྱི་བདུད་རྩི་བསམ་གྱིས་མི་ཁྱབ་པ་རྣམས་མངོན་པར་མཐོ་བ་དང་ངེས་པར་ལེགས་པའི་གོ་འཕང་
གི་གསོས་སུ་རྟག་པར་ལེན་པ་དང༌། སྲོག་ཆགས་དཔག་ཏུ་མེད་པའི་དོན་དུ་ཡང་ལེགས་པར་གསུངས་པའི་ཆོས་ཀྱི་འཁོར་ལོ་རྒྱ་ཆེ་ཞིང་རྒྱུན་མི་ཆད་པར་བསྐོར་བའི་གསོལ་བ་འདེབས་པ་པོ་བྱེད་པ་དང༌། གཞན་ཡང་དཔལ་ལྡན་ས་སྐྱ་པ་དང་ངོར་ཆེན་རྡོ་རྗེ་འཆང་དག་གི་ཕྲིན་
ལས་ལྷུན་གྱིས་གྲུབ་པ་དང་རྒྱུན་མི་ཆད་པའི་རྣམ་པར་འཕྲུལ་པ་ལས་བྱུང་བའི་ཆོས་ཀྱི་རྗེ་རིན་པོ་ཆེ། ཕྱོགས་བཅུ་ཀུན་དུ་ཆོས་ཀྱི་དགའ་སྟོན་འགྱེད་པ་པོ་ཇི་སྙེད་འབྱོན་པ་རྣམས་དང༌། ཆོས་གྲྭ་ཆེན་པོ་འདི་ཉིད་ན་གཉུག་མར་གནས་ཤིང་བཤད་པ་དང་སྒྲུབ་པའི་ཕྲིན་ལས་ཟུང་

གིས་བསྟན་པ་སྐྱོང་བར་བྱེད་པའི་ཟུར་ཆོས་པ་ཡང༌། མཁྱེན་རབ་ཀྱི་དབང་ཕྱུག་བསོད་ནམས་རྒྱལ་མཚན་ཞེས་པ། ཀུན་མཁྱེན་ཉི་མའི་གཉེན་གྱི་གསུང་རབ་མདོ་སྡེ་དང་རྒྱུད་སྡེ་མ་ལུས་པའི་བརྗོད་བྱར་གྱུར་པའི་བསླབ་པའི་གནས་རྣམས་འགྲོ་བ་རྒྱ་མཚོའི་རྡུལ་དང་མཉམ་པ་ལ་བློ་དང་
འཚམ་པར་ཚུལ་བཞིན་དུ་འདོམས་པ་ལ་འཇིགས་མེད་མགྲིན་པའི་འཁོར་ལོ་རྣམ་པར་ཡངས་པ་དེ་དང༌། རྡོ་རྗེ་འཛིན་པའི་དབང་ཕྱུག་བཀྲ་ཤིས་བཟང་པོ་ཞེས་པ། ཕྱི་རུ་མཁས་པ་དང་བཙུན་པའི་ཡོན་ཏན་སྟོན་པའི་འཁོར་གྱི་དགྲ་བཅོམ་པ་རྣམས་ཀྱི་རྣམ་པར་ཐར་པ་ལ་གནས་པ།
ནང་དུ་གྲུབ་པའི་ཡོན་ཏན་བཅུ་གསུམ་རྡོ་རྗེ་འཛིན་པའི་ས་ཡང་འདི་ཉིད་ཀྱི་ངོ་ན་རིང་པོ་མ་ཡིན་པ། གཅིག་ཏུ་སེམས་ཅན་ཐམས་ཅད་ལ་བུ་གཅིག་པ་ལྟར་བརྩེ་བ་དེ་དང༌། གསང་སྔགས་གྲུབ་པའི་རྩེ་མོར་སོན་པ་རྗེ་བཙུན་ནམ་མཁའ་དཔལ་བཟང་ཞེས་པ། མདོ་རྒྱུད་ཀྱི་མཁྱེན་པ་རབ་ཏུ་
རྒྱས་ཤིང༌། གང་གི་སྐུ་གསུང་ཐུགས་ཀྱི་བྱིན་རླབས་རྡོ་རྗེའི་ཟེག་མ་རེས་ཀྱང་ཡིད་ཀྱི་སྲུབ་ཤིང་དཔུང་དང་བཅས་པ་དཔག་ཚད་བརྒྱའི་ཕ་རོལ་དུ་ཡང་གནས་པའི་སྐབས་མེད་པར་བྱེད་པའི་ནུས་པ་མཆོག་གི་བདག་ཉིད་ཅན་དེ་དང༌། གཞན་ཡང་བསྟན་པའི་རྩ་ལག་དམ་པར་གྱུར་པ་ཡང་
དག་པའི་དགེ་བའི་བཤེས་གཉེན་གཞུང་ལུགས་མང་པོའི་དོན་ལ་སྦྱངས་པ་མཐའ་རུ་ཕྱིན་པར་གྱུར་པས་མགྲིན་པ་ཆོས་ཀྱི་བང་མཛོད་དུ་གྱུར་པ་གང་དག་བཞུགས་པ་རྣམས་ཏེ། དེ་དག་ཐམས་ཅད་ལ་ཡང་འགྲོ་བ་རིས་སུ་མེད་པའི་ངོར་རང་རང་གི་བློ་དང་མོས་པར་རྗེས་སུ་མཐུན་པའི་
དབང་བསྐུར་བ་དང༌། ལུང་འབོགས་པ་དང༌། མན་ངག་གི་ཚོགས་སྦྱིན་པའི་ཆོས་ཀྱི་གྲུ་ཆར་རྒྱུན་མི་ཆད་པར་བསྙིལ་དུ་འཇུག་པ་ལ་སོགས་པས་ཆོས་ཀྱི་སྦྱིན་པའི་སྒོ་མོ་བྱེ་བ་བརྒྱ་སྟོང་ཕྲག་མང་པོ་ཕྱོགས་མཐའ་དག་ནས་ཕྱེ་ཞིང༌། དེ་ལ་བརྟེན་ནས་སྲོག་ཆགས་བྱེ་བ་བརྒྱ་སྟོང་ཕྲག་
དཔག་ཏུ་མེད་པ་དག ཕལ་ཆེ་བ་ནི་ལས་དང་འབྲས་བུ་དང༌།དཀོན་མཆོག་ལ་ཡིད་ཆེས་པའི་དད་པའི་གཞི་འཛིན་པ་ལ་བཀོད། འགའ་ཞིག་ནི་དཀོན་མཆོག་གསུམ་ལ་སྐྱབས་སུ་འགྲོ་ཞིང་བསླབ་པའི་གཞི་འཛིན་པའི་སྐལ་བ་ཅན་ལ་བཀོད། ཕལ་ཆེར་ནི་བླ་ན་མེད་པ་

ཡང་དག་པར་རྫོགས་པའི་སངས་རྒྱས་ཀྱི་གདུང་འཛིན་པའི་སྐལ་བ་ཅན་ལ་བཀོད། ཁ་ཅིག་ནི་དཔལ་ལྡན་རྡོ་རྗེ་འཆང་གི་གསང་བའི་སྔགས་དང་རིག་པའི་སྔགས་འཆང་བའི་སྐལ་བ་བཟང་པོ་ཅན་ལ་བཀོད་དེ། མདོར་ན་འགྲོ་བ་ཕལ་མོ་ཆེ་སངས་རྒྱས་ལ་
གཞོལ་བ་དང༌། ཆོས་ལ་འབབ་པ་དང༌། དགེ་འདུན་ལ་བབ་པར་བགྱིས་ཏེ། དེ་དག་ཐམས་ཅད་ཀྱང་སྡོམ་བརྩོན་ཆོས་ལྡན་གྱི་རྒྱལ་པོ་འདི་ཉིད་ཀྱི་སྐུ་དྲིན་ལས་བྱུང་བ་ཉིད་དུ་ངེས་པར་ཤེས་དགོས་ཏེ། ཅིའི་ཕྱིར་ན། གནས་སྐབས་སུ་སངས་རྒྱས་ཀྱི་བསྟན་པའི་འཕེལ་འགྲིབ་
དང༌། སེམས་ཅན་གྱི་བདེ་སྡུག་རྣམས་ནི་ཡུལ་ཕྱོགས་གང་ཡིན་པའི་ས་བདག་རྒྱལ་པོ་དེའི་སྤྱོད་པ་ཉིད་ལ་རག་ལས་ཏེ། དཔེར་ན་སྔོན་གྱི་ཆོས་རྒྱལ་བྱང་ཆུབ་སེམས་དཔའ་རྣམས་ཀྱི་དྲིན་ལས། བོད་ཡུལ་མུན་པའི་གླིང་འདིར་བསྟན་པ་རིན་པོ་ཆེ་ཉི་མ་ཤར་བ་ལྟར་མཛད་དེ། འཁོར་
དང་ཆབ་འོག་ཏུ་གཏོགས་པའི་འགྲོ་བ་ཐམས་ཅད་ཀྱང༌། སངས་རྒྱས་ཀྱི་ཆོས་ཉན་པ་དང༌། བཤད་པ་དང༌། སྒྲུབ་པའི་ཕྲིན་ལས་དྲི་མ་མེད་པ་ལ་ལོངས་སྤྱོད་དུ་གཞུག་པ་དང༌། དེ་ལ་བརྟེན་ནས་གནས་སྐབས་དང་མཐར་ཐུག་གི་བདེ་དགའི་ལོ་ཐོག་ཕུན་སུམ་ཚོགས་པ་ལ་ཡང་དག་པར་
སྦྱར་བ་ལྟ་བུའོ། །དེ་ལས་ལྡོག་པའི་ལས་ལའང་རྒྱལ་པོ་ཉིད་མཐུ་ཆེ་བ་ནི། དཔེར་ན་སྡིག་ཅན་ནག་པོའི་རྩ་ལག་གླང་དར་མས།ལོག་པའི་ཆོས་ཀྱི་ཁྲིམས་ལུགས་བཅས་ཏེ། འཁོར་དང་ཆབ་འོག་ཏུ་གཏོགས་པའི་འགྲོ་བ་མང་པོ་སངས་རྒྱས་དང་ཆོས་ཀྱི་སྒྲ་ཙམ་ཡང་མཉན་པའི་
སྐབས་མེད་པར། བླང་དོར་ཐམས་ཅད་ཕྱིན་ཅི་ལོག་པར་སྤྱད་དུ་གཞུག་པ་དང༌། དེ་ལ་བརྟེན་ནས་བསྟན་པ་དམ་པའི་ཆོས་ལ་གནོད་ཚབ་ཆེན་པོས་ཡུན་རིང་དུ་ཉམས་པར་བྱས་པ་དང༌། སེམས་ཅན་རྣམས་ཀྱི་གནས་སྐབས་དང་མཐར་ཐུག་གི་བདེ་དགའ་རིང་དུ་བཅོམ་པ་ལྟ་བུའོ། །
དེ་བས་ན་ས་ཕྱོགས་གང་དང་གང་གི་སེམས་ཅན་ཐམས་ཅད། བསོད་ནམས་དང་བསོད་ནམས་མ་ཡིན་པ་ལ་སྦྱར་བའམ། བདེ་བ་དང་བདེ་བ་མ་ཡིན་པ་གང་ལ་སྦྱར་ནའང༌། མི་བདག་རྒྱལ་པོ་དེ་དང༌། དེའི་རྗེས་སུ་འབྲང་མི་དགོས་པ་ནི་འགའ་ཡང་མེད་པ་ལས། དེང་གི་དུས་ན་

ཆོས་བཞིན་སྤྱོད་པའི་སྡོམ་བརྩོན་སྐྱེ་དགུའི་བདག་པོ་འདིས། བསིལ་ལྡན་ཁ་བ་ཅན་གྱི་ལྗོངས་འདིར། རྒྱལ་བ་བུ་རམ་ཤིང་པའི་ལུགས་བཟང་དྲི་མ་མེད་པ་ཡུན་རིང་དུ་གནས་པའི་ཕན་འདོགས་རྨད་དུ་བྱུང་བ་ནི། ལུང་གི་ཆོས་ཀྱི་སྦྱིན་པ་སྟེ། དེའི་སྦྱིན་པའི་སྒོ་མོ་བྱེ་བ་བརྒྱ་སྟོང་
ཕྲག་དུ་མ་ཕྱོགས་ཐམས་ཅད་ནས་ཕྱེ་སྟེ། ལྷག་པའི་བྱ་བ་ཡང་དག་པ་ནི་བགྱིས། འཇིག་རྟེན་དུ་བདེ་ལེགས་རྒྱ་ཆེན་པོ་འབྱུང་བའི་བསོད་ནམས་ཀྱི་ཕུང་པོ་གང་ཡིན་པ་དག་ནི་མངོན་པར་འདུ་བགྱིས་པའི་སྐུ་དྲིན་གང་དག་གསོབ་པ་ལ་ནི་བསྟན་པ་དམ་པའི་ཆོས་རྒྱས་པ་ཉིད་ཀྱིས་འཚོབ་པར་ནུས་ཀྱི་
དེ་ལས་གཞན་པའི་ལས་དང་དངོས་པོ་གང་གིས་ཀྱང་གཞར་ཡང་འཚོབ་པའི་མཐའ་ཡོད་པ་མ་ཡིན་པར་སེམས་སོ། །གསུམ་པ་མི་འཇིགས་པ་དང་བྱམས་པའི་སྦྱིན་པས་འགྲོ་ལ་ཕན་པ་སྒྲུབ་པའི་ཁྱད་པར་ལ། དང་པོ་ནི། སྤྱིར་མི་འཇིགས་པའི་སྦྱིན་པ་ཞེས་བྱ་བ། དགྲ་གཉེན་
བར་མའི་སེམས་ཅན་ཐམས་ཅད་ལ་སྙོམས་པའི་སེམས་ཀྱིས་ཕ་རོལ་གྱི་དམག་ཚོགས་དང༌། རྐུན་པོ་ལ་སོགས་པ་མིའི་འཇིགས་པ་དང༌། གདོན་བགེགས་དང༌། སེང་གེ་དང་སྟག་ལ་སོགས་པ་མི་མ་ཡིན་པའི་འཇིགས་པ་དང༌། མེ་དང་ཆུ་ལ་སོགས་པ་འབྱུང་བའི་འཇིགས་
པ་སྟེ། འཇིགས་པ་དེ་དག་གིས་ཉེན་པ་ལས་ཡོངས་སུ་སྐྱོབ་པའོ། །དེ་སྐད་དུ་ཡང༌། རྡོ་རྗེ་རྩེ་མོ་ལས། དགྲ་དང་གྲོགས་དང་བར་མ་ལ། །སེམས་སྙོམས་མི་འཇིགས་རབ་ཏུ་སྦྱིན། །ཞེས་དང༌། ཕལ་ཆེན་ཏ་ལ་ལར། མི་འཇིགས་སྦྱིན་པས་གང་ཞིག་བསྐྱབ་བྱ་བ། །
སྲོག་ཆགས་གསོད་ལས་བཟློག་པར་བྱས་པ་དང༌། །འཇིགས་པས་སྐྱབས་འཚོལ་རྣམས་ལ་སྐྱབས་བྱས་པ། །མི་འཇིགས་སྦྱིན་པའི་འོད་ཟེར་དེས་གྲུབ་བོ། །ཞེས་སོ། །དེ་ལྟ་བུའི་མི་འཇིགས་པའི་སྦྱིན་པ་དེ་ལ་བདག་ཅག་གི་སྟོན་པ་འདི་བྱང་ཆུབ་སེམས་དཔའ་སློབ་པའི་
ལམ་པར་གྱུར་པའི་ཚེ། སྒྲོན་མ་སྣང་བྱེད་ཅེས་བྱ་བའི་སྐྱེ་བར། འདོད་པས་ཡོངས་སུ་དྲངས་པའི་ཚངས་པ་འགའ་ཞིག་རྒྱ་མཚོ་ཆེན་པོར་ཞུགས་པ་ན། མི་མ་ཡིན་གྱི་ཆོ་འཕྲུལ་གྱིས་ཕྱོགས་ཀྱི་དཀྱིལ་འཁོར་ཐམས་ཅད་དུ་མུན་བསྲོས་པར་བྱས་པས། ཕྱོགས་ཀྱི་མཚན་མ་

འཁྲུགས་ཏེ་གང་དུ་མཆི་བར་མ་ཤེས་པར་ཅི་བྱ་གཏོལ་མེད་དུ་གྱུར་པ་ན། བྱང་ཆུབ་སེམས་དཔའི་ཕྱག་གཡས་པ་ཞུན་མར་དུ་སྦགས་པའི་རས་ཀྱིས་དཀྲིས་པ་ལ་མེ་སྦར་ནས་ཞག་བདུན་གྱི་བར་དུ་སྣང་བའི་སྒྲོན་མ་བཏེག་ཅིང༌། ཚོང་པ་རྣམས་འཇིགས་པ་ཆེན་པོ་ལས་
ཡོངས་སུ་བསྐྱབ་པ་དང༌། སེང་གེའི་རྒྱལ་པོར་གྱུར་པའི་ཚེ། ཚོང་པ་ལྔ་བརྒྱ་དུག་སྦྲུལ་ནག་པོས་ཡོངས་སུ་འཁྱུད་ཅིང་བཟའ་བར་བརྩམས་པ་ན། རང་ཉིད་ཡལ་བར་བོར་ནས་སྡེར་མོ་རྣོན་པོས་དུག་སྦྲུལ་གྱི་གདེངས་ཀ་ལ་བསྣུན་ཅིང་བསད་དེ་འཇིགས་པ་དེ་ལས་བསྐྱབ་པ་དང༌།
རི་དྭགས་རུ་རུར་གྱུར་པའི་ཚེ། འབབ་ཆུ་དྲག་པོའི་ཤུགས་ཀྱིས་བདས་པའི་སྐྱེ་བོ་ངན་པའི་རང་བཞིན་ཅན་སྐམ་པར་ཕྱུང་བ་དང༌། རི་དྭགས་ཤ་ར་བྷ་དང་སྤྲེའུའི་རྒྱལ་པོར་གྱུར་པའི་ཚེ། གྲོག་རོང་དུ་ལྷུང་བའི་སྐྱེ་བོ་ཉམ་ཉེས་པ་ཡོངས་སུ་བསྐྱབ་པ་ལ་སོགས་པ་སྔོན་གྱི་བྱང་ཆུབ་
སེམས་དཔའ་སྙིང་རྗེའི་བདག་ཉིད་ཅན་དག་གིས་ཇི་ལྟར་བསླབས་པའི་རྗེས་སུ་སློབ་པའི་འདུན་པ་ལྷོད་པར་མ་གྱུར་པའི་སྡོམ་བརྩོན་མིའི་བདག་པོས། སྤྱིར་འཛིན་མའི་དཀྱིལ་འཁོར་རྣམ་པར་ཡངས་པའི་ཁྱོན་ཐམས་ཅད་དགེ་བའི་ལམ་དང་རྗེས་སུ་མི་མཐུན་པ་མེད་པའི་རྒྱལ་ཁྲིམས་རྡོ་རྗེ་
བརྩེགས་པའི་རྭ་བ་ལྟར་གཞིག་ཏུ་མེད་པར་བཅའ་བ་དང༌། སྔོན་དང་ད་ལྟའི་ལེགས་བྱས་དམན་པ་མིན་པའི་མཐུ་ཆེན་པོའི་སྲུང་བས་ལེགས་པར་བསྲུངས་པས་ན། འཇིགས་པ་ཐམས་ཅད་ཀྱིས་མི་ཚུགས་པར་ཡོངས་སུ་སྐྱོབ་པར་བྱེད་དེ། དེའང་མངའ་འོག་ཏུ་གཏོགས་པའི་སྐྱེ་
འགྲོ་ཐམས་ཅད་ནི། མཐོང་བའི་ཆོས་འདིར་ཕན་ཚུན་འཐབ་པ་དང༌། རྩོད་པ་དང༌། གཡུལ་འགྱེད་པ་དང༌། འཕྲོག་འཇོམས་ལ་སོགས་པ་མི་སྲུན་པའི་ལས་བརྩམས་པའི་འཇིགས་པ་རྣམས་ནི། མིའི་རྒྱལ་པོའི་ལུགས་ཀྱི་བཀའ་ཁྲིམས་དམ་པའི་ཆོས་དང་མཐུན་པ་ཉིད་
དུ་བཅའ་ཞིང༌། དེ་ལ་བརྟེན་ནས་ལས་ངན་པར་སྤྱོད་པ་གང་ཡིན་པ་དེ་ལས་བཟློག་ཅིང་ཡོངས་སུ་སྐྱོབ་པར་བྱེད་དོ། །ཕྲག་དོག་དྲག་པོའི་ཆང་གིས་རབ་ཏུ་མྱོས་པའི་ཕ་རོལ་གྱི་དམག་ཚོགས་ཀྱི་འཇིགས་པ་དང༌། དེ་བཞིན་དུ་དགྲ་དང༌། རྐུན་པོ་དང༌། རྒྱལ་པོའི་ཆད་པའི་ལས་ཀྱི་

འཇིགས་པ་ལ་སོགས་པ་མིར་གཏོགས་པའི་འཇིགས་པ་རྣམས་ནི། མི་བདག་ཆེན་པོ་འགྲན་པའི་ཟླ་ཐམས་ཅད་དང་བྲལ་བའི་སྟོབས་ཕུན་སུམ་ཚོགས་པ་དང༌། དཔུང་གི་ཚོགས་ཆེན་པོ་དང༌། གྲགས་པ་དཀར་པོ་ཕྱོགས་ཀྱི་མཐར་རྒྱས་པ་དང༌། བསོད་ནམས་དཔག་ཏུ་མེད་པའི་མཐུ་
རྣམས་ཀྱིས་ཡོངས་སུ་སྐྱོབ་པར་བྱེད་དོ། །གདོན་དང་བགེགས་དང་ལོག་པར་འདྲེན་པ་དང༌། གཅན་གཟན་གདུག་པ་ཅན་གྱི་འཇིགས་པ་ལ་སོགས་པ་མི་མ་ཡིན་པའི་འཇིགས་པ་རྣམས་ནི། ཆོས་དང་ལྡན་པའི་རྒྱལ་པོས་སྔོན་གྱི་སྐྱེ་བར་དགེ་བ་བསགས་པའི་མཐུ་དང༌། ད་ལྟར་དགེ་བ་ལེགས་
པར་སྤྱོད་པ་ལ་ཞུགས་པ་དང༌། སེམས་ཅན་ཐམས་ཅད་ལ་ཕན་འདོད་ཀྱི་ལྷག་པའི་བསམ་པ་སྟོབས་དང་ལྡན་པ་རྒྱུད་ལ་སྐྱེས་པའི་མཐུ་ཕུན་སུམ་ཚོགས་པ་རྣམས་ཀྱིས་ཡོངས་སུ་སྐྱོབ་པར་བྱེད་དོ། །མེའི་འཇིགས་པ་དང་ཆུའི་འཇིགས་པ་ལ་སོགས་པ་འབྱུང་བའི་འཇིགས་པ་དང༌། ནད་དང་མུ་གེ་
དང་བཀྲ་མི་ཤིས་པ་ལ་སོགས་པ་བྱུར་དང་སྐལ་བ་ངན་པའི་འཇིགས་པ་རྣམས་ནི། མི་བདག་ཆེན་པོས་རྒྱལ་སྲིད་ཐམས་ཅད་དམ་པའི་ཆོས་བཞིན་དུ་སྐྱོང་བ་དང༌། དེའི་རྗེས་སུ་འབྲངས་པའི་ཆབ་འབངས་རྣམས་ཀྱང་དགེ་བའི་ལས་དང་སྡིག་པའི་ལས་རྣམས་ཀྱི་བླང་དོར་ཚུལ་བཞིན་པར་སྤྱོད་
དུ་འཇུག་པ་དང༌། འགྲོ་བ་མ་ལུས་པའི་བདེ་སྐྱིད་ཀྱི་མཛའ་བོ་གསར་དུ་འགུགས་པའི་རིམ་གྲོར་བགྱིད་པ་དང༌། དཀོན་མཆོག་ལ་མཆོད་པ་འབུལ་བ་དང༌། རྟེན་ཅིང་འབྲེལ་པར་འབྱུང་བའི་རྫས་དང་སྔགས་དང༌། ཏིང་ངེ་འཛིན་གྱི་སྲུང་བ་དང་བཟློག་པའི་ཆོ་ག་རྣམ་པ་མང་པོ་རྩོམ་པས་ཡོངས་སུ་
སྐྱོབ་པར་བྱེད་དོ། །དེ་བཞིན་དུ་ཕྱི་མའི་དུས་སུ་ངེས་པར་འབྱུང་བར་འགྱུར་བ་ངན་སོང་གསུམ་གྱི་སྡུག་བསྔལ་བཟོད་པར་དཀའ་བའི་འཇིགས་པ་དང༌། མཐོ་རིས་སུ་སྐྱེས་པར་གྱུར་ཀྱང༌། རྟེན་དེ་ལ་ཚེ་ཐུང་བ་ལ་སོགས་པ་འཁོར་བའི་སྡུག་བསྔལ་དཔག་ཏུ་མེད་པའི་འཇིགས་པ་རྣམས་ནི།
ཆོས་དང་མཐུན་པའི་རྒྱལ་པོ་གང་གིས་ཆབ་འབངས་སུ་གཏོགས་པའི་སྐྱེ་འགྲོ་ཐམས་ཅད་ཀྱང་ད་ལྟ་ནས་སྲོག་གཅོད་པ་སྤོང་བ་ལ་སོགས་པ་དགེ་བ་བཅུའི་ཁྲིམས་ལ་སྦྱོར་བར་བྱེད་པས་ན་འཇིགས་པ་དེ་དག་མི་འབྱུང་བར་ཡོངས་སུ་སྐྱོབ་པར་བྱེད་དོ། །དེ་ལྟར་ཡང་རྒྱལ་པོ་བྱམས་པའི་སྟོབས་

ཀྱི་སྐྱེས་རབས་ལས། རྒྱལ་པོ་དེའི་མཐུ་ཁྱད་པར་ཆེ་བས་ན། །བདག་གི་ཡིན་པའི་བློ་ནི་གར་བཞག་པ། །དེ་ཉིད་དེ་ཡི་སྲུང་བ་མཆོག་ཡིན་པས། །དེ་དག་གིས་ཀྱང་མདངས་འཕྲོག་ནུས་མ་གྱུར། །ཞེས་དང༌། བདེ་ལེགས་ཆེན་པོའི་འགྲོ་བ་འདི། །ཡོངས་
སུ་བསྐྱང་བར་གྱུར་པ་ན། །ལྷ་ཡི་དབང་པོ་དག་གིས་ཀྱང༌། །འདི་དག་གཙེ་བར་མི་ནུས་ན། །ཤ་ཟ་རྣམས་ཀྱིས་ག་ལ་ནུས། །དེ་བས་ནགས་ན་ཁྱིམ་བཞིན་དུ། །མཚན་མོ་དག་ཀྱང་ཉིན་པར་བཞིན། །གཅིག་པུའང་གྲོགས་ཀྱི་ནང་འདུག་འདྲ། །བདག་ནི་འཇིགས་པ་མེད་པར་
འདུག །ཅེས་འབྱུང་བ་བཞིན་ནོ། །གཞན་ཡང་བཟོད་པ་དམ་པའི་ཆོས་དང་ལྡན་པ་མ་ཡིན་པའི་འགྲོ་བ་རྣམས་ཀྱི་སྡིག་པའི་ལས་ནི་ཁོང་ཁྲོ་བ་སྟེ། དེ་ཉིད་ཀྱིས་ཀུན་ནས་བསླངས་ཏེ་སྨྲ་ལྕེར་ཐུག་པ་རྣམས་ཀྱང༌། རྒྱལ་པོ་ཕལ་པའི་ཁྲིམས་ལུགས་འཁྱོག་པོ་ལྟ་བུ་མ་ཡིན་པར་རིགས་པའི་
ལམ་དང་རྗེས་སུ་མཐུན་པས་ལེགས་པར་བརྟགས་ཤིང་དཔྱད་པའི་མཐའ་མར། བཀའ་ལུང་གསེར་གྱི་གཉའ་ཤིང་ལྟ་བུའི་ལྗིད་ཀྱིས་མནན་ཏེ། ཕན་ཚུན་གཉིས་ཀའི་རྒྱུད་ཀྱི་ངན་སེམས་ཀྱི་ཚེར་མ་རྣོན་པོ་མཐའ་དག་དྲུང་ནས་འབྱིན་ཅིང་རྣལ་དུ་གནས་པའི་ཐབས་སུ་ཅི་འགྱུར་
མཛད་ཀྱི། དེ་ལས་གཞན་པའི་གཡོ་སྒྱུ་དང་ཕྱོགས་ལྷུང་གི་སྤྱོད་པར་མ་སོང་བ་ཉིད་གཙོ་བོར་མཛད་དོ། །དེའི་དབང་གིས་མི་བདག་ཆེན་པོ་རང་གི་མངའ་ཞབས་སུ་འཁོད་པ་རྣམས་དང༌། དེ་ལས་གཞན་དུ་གྱུར་པའི་མི་དཔོན་དང༌། བློན་པོ་དང༌། སྡེ་དཔོན་དང༌། དབང་བཙན་
པ་དང༌། མཛངས་པར་རློམ་པ་མང་པོས་ཐབས་ཀྱིས་བཟླུམ་པར་མ་ནུས་པའི་སྨྲ་མཆུ་ཐམས་ཅད་ཀྱང༌། འདི་ཉིད་དུ་ཕྱིན་ན་ལེགས་པར་འདུམ་པར་འགྱུར་རོ་ཞེས། ཕྱོགས་དང་ཕྱོགས་བྲལ་གྱི་འཛིན་མའི་དཀྱིལ་འཁོར་ཐམས་ཅད་ནས་བཀྲེས་པས་ཉེན་པ་བཟའ་བ་དོན་དུ་གཉེར་
བའི་ཕྱིར་རམ། སྐོམ་པས་ཉེན་པ་བཏུང་བ་དོན་དུ་གཉེར་བའི་ཕྱིར་ཇི་ལྟར་འོངས་པ་བཞིན་དུ་རིངས་པར་ལྷགས་ནས། སྐྱེ་དགུའི་བདག་པོ་གང་གི་སྒྲ་འཛིན་གྱི་དབང་པོ་ག་ལ་བར་ཇི་ལྟར་ནུས་པའི་ཚིག་གིས་གསོལ་བར་བྱེད་དོ། །ཇི་ལྟར་གསོལ་བ་དེ་དག་ཀྱང་གཟོད་མ་ནས་ཡོངས་སུ་དར་

བའི་ཁྲིམས་ལུགས་བཟང་པོ་གང་དག་གི་འཇལ་བར་བྱེད་པའི་སྲང་ལ་བཅལ་ཏེ། མཐའ་དོན་བསླབ་པར་བྱ་བ་གང་དང་གང་བསྒོ་བ་ཐམས་ཅད་ཀྱང༌། སྔོན་ཆད་མེད་པའི་གཙུག་གི་ནོར་བུའི་མཆོག་ཅིག་འདོད་ལྡན་གྱི་སྐྱེ་བོས་ཇི་ལྟར་ཐོབ་པ་དེ་ལྟར་དུ་ཡན་ལག་མཆོག་གིས་འདུད་པ་དང་
བཅས་ཏེ་གུས་པས་ལེན་ཅིང༌། འགྲོ་བ་ཐམས་ཅད་ཀྱི་ཡིད་བདེ་བར་བྱེད་པའི་སྨན་བཞིན་དུ་ངོམས་པ་མེད་པར་རྟག་ཏུ་འཐུང་བར་བྱེད་དོ། །ཁྱད་པར་ལེགས་པར་བཤད་པ་རིན་པོ་ཆེའི་གཏེར་ལས། རྒྱལ་ངན་གཞན་གྱིས་གཙེས་པ་ན། །ལྷག་པར་ཆོས་རྒྱལ་དྲན་པར་འགྱུར། །
རིམས་ཀྱིས་བཏབ་པའི་སེམས་ཅན་འགའ། །གངས་ཆུ་འབའ་ཞིག་ཡིད་ལ་བྱེད། །ཅེས་པ་ལྟར་རྒྱལ་ཕྲན་དྲེགས་པ་རང་གི་འཁོར་ལ་ཡང་སྙིང་བརྩེ་བ་མེད་པ་རྣམས་ཀྱིས་གཙེས་པ་དང༌། ཆད་པའི་ལས་ཀྱིས་ཕོག་པ་དང༌། ཁྲི་མུན་དུ་བསྐྱུར་བ་དང༌། བཅིངས་པ་ལས་ཐར་ཏེ་
བྱུང་བ་དང༌། རང་གི་དགྲར་གྱུར་པས་འདས་པ་དང༌། ལུས་དང་སྲོག་གི་ཕུང་པོ་ལ་གཏུགས་སུ་ཉེ་བའི་སྐྱེ་བོ་མགོན་མེད་པ་དང་སྐྱབས་མེད་པ། རི་དྭགས་སྨས་མ་བཞིན་དུ་འབྲོས་ཤིང༌། སྐྲག་པའི་དབང་གིས་མིག་རྩ་རིག་རིག་ཏུ་གྱུར་པ་རྣམས་ཀྱང༌། སྡོམ་བརྩོན་སྐྱེ་དགུའི་བདག་
པོ་གང་གི་སྙིང་རྗེ་རྣམ་པར་ཡངས་པའི་བྲག་རྫོང་བཙན་པོ་ག་ལ་བར་སྐྱབས་སུ་འཚོལ་ཞིང༌། ཐར་པ་དམ་པའི་གྲོང་ཁྱེར་བཞིན་དུ་འཇུག་པར་བྱེད་དོ། །དེར་ཤུགས་རིང་དབུགས་ཀྱི་རྒྱུ་བ་རབ་ཏུ་བརྫངས་པས་རྗོད་བྱེད་ཀྱི་སྡེབ་སྦྱོར་ཤིན་ཏུ་འཁྲུགས་པར་གྱུར་པའི་ངོ་ཚ་དག་ནི་ཅི་ཡང་སྟོན་པར་
བྱེད། བ་སྤུ་རྣམ་པར་གཟིངས་པའི་ལག་པ་དག་ནི་ཐལ་མོ་སྦྱར་བ་འཆིང་བར་བྱེད་ཀྱིན་རིངས་པ་རིངས་པར་ལྷགས་ནས་འོངས་པ་དག་ལའང་ཐོག་མ་ཉིད་ནས་མ་འཇིགས་ཤིག་མ་འཇིགས་ཤིག་ཅེས་འཇམ་པའི་ངག་གི་དབུགས་དབྱུང་སྔོན་དུ་འགྲོ་བས། ནམ་ཞིག་ན་ལུས་དང་སྲོག་ནོངས་
པར་འགྱུར་བ་གང་ཡིན་པ་དེ་ལས་ཡོངས་སུ་སྐྱོབ་པར་བྱེད་དོ། །གཟུ་བོར་གནས་པ་མ་ཡིན་པའི་ཁྲིམས་སྲོལ་འཁྱོག་པོར་གྱུར་པ་རྣམས་ཀྱང་བདེན་རྫུན་རིག་པའི་ཐིག་གིས་བཏབ་སྟེ། ཆོས་ཀྱི་ཚུལ་དྲི་མ་མེད་པ་བཞིན་དུ་ཡང་དག་པར་འཆོས་པར་བྱེད་དོ། །སྡོམ་བརྩོན་ཆེན་པོ་རང་ཉིད་

ནི་སྔོན་གྱི་སྡེ་དགེ་གོང་མར་གྱུར་པ་རྣམས་ཀྱི་མཐུ་དང་སྟོབས་དང་དཔུང་གི་ཚོགས་དང༌། བྱམས་པའི་སེམས་ཀྱིས་ཡོངས་སུ་བསྲུངས་ཤིང་བརྟན་པར་བཞག་པའི་ཆབ་སྲིད་རྣམ་པར་ཡངས་པའི་དཀྱིལ་འཁོར་གང་ཡིན་པ་དང༌། སྔོན་གྱི་བསོད་ནམས་ཀྱི་ནུས་པ་དམན་
པ་མིན་པའི་བགོ་སྐལ་དུ་ཇི་ལྟར་བྱུང་བ་ཙམ་གྱིས་ཆོག་ཤེས་བསྟན་ཏེ་གནས་སོ། །དེ་ལྟ་ནའང་གནམ་གྱིས་བསྐོས་པའི་རྒྱལ་པོ་ཤར་ཕྱོགས་གོང་མ་ཆེན་པོའི་བཀའ་ལུང་གི་བཀོད་པ་བཙན་པོ་སྔ་ཕྱི་མང་པོར་སྩལ་ཏེ། བོད་ཆེན་པོའི་ལྗོངས་ཀྱི་བདེ་སྐྱིད་ཐམས་ཅད་གང་ལ་ཤེས་སུ་བཅུག་
སྟེ། འགྲོ་ཁམས་སྤྱིའི་མེས་པོ་ཉིད་དུ་བསྐོས་སོ། །དེའི་དབང་གིས་སྔོན་གྱི་བསྐལ་པར་བྱུང་བའི་འཁོར་ལོས་སྒྱུར་བའི་རྒྱལ་པོ་རྣམས་ལྟར། ཡུལ་རིས་དང་སྐྱེ་བོ་མང་པོ་རང་དབང་དུ་འདུ་བར་གྱུར་པ་ཁོ་ན་ལས། གཞན་གྱི་མངའ་རིས་ལས་འཕྲོག་བཅད་ལ་སོགས་པ་ཆོས་མིན་གྱི་
བགྱི་བ་ནམ་ཡང་མི་མཛད་ཅིང༌། དེར་མ་ཟད་ཧ་ཅང་སྟོབས་དང་མཐུ་ཆེ་བ་མ་ཡིན་པའི་མི་དཔོན་གཞན་གྱི་མགོ་འདོན་མཛད་པའང་རབ་ཏུ་མང་བར་ཡོད་པ་དང༌། དགྲ་ཇག་གི་རྒྱུན་ལུགས་ཆེ་བའི་གནས་ནས། གཞན་གྱི་འདྲོན་པ་ལ་སོགས་པ་སྲོག་དང་ལོངས་སྤྱོད་ཀྱི་བར་དུ་གཅོད་པར་
འགྱུར་བའི་འཇིགས་པ་ལས་བསྐྱབས་པའི་སྐྱབས་དང་དཔུང་གཉེན་མཛད་པའང་བགྲང་གིས་མི་ལྡང་བ་ཉིད་དོ། །གཞན་ཡང་སྙིང་རྗེའི་བདག་ཉིད་ཅན་འདི་ནི་སློང་བའི་སྐྱེ་བོ་རྣམས་ཀྱི་དཔག་བསམ་གྱི་ལྗོན་པའི་མཆོག་ཏུ་གྱུར་ཏེ། དེའི་གྲགས་པའི་དྲི་བསུང་མངར་པོ་རིང་པོའི་ལམ་དུ་
སོང་བས། རྒྱ་གར་གྱི་ཡུལ་དང༌། ནཻ་པ་ལའི་ཡུལ་དང༌། ཀསྨི་རའི་ཡུལ་དང༌། བོད་ཀྱི་ཡུལ་ལ་སོགས་པ་ཕྱོགས་གཞན་དང་གཞན་ནས་འོངས་པའི་མིའི་འགྲོ་བ་བཀྲེས་པ་དང༌། ཕོངས་པ་དང༌། ཉམ་ཐག་པ་དང༌། འཁྱམས་པས་དུབ་པ་དང༌། མགོན་མེད་པ་དང༌། སྐྱབས་
མེད་པར་གྱུར་པ་རྣམས་ཀྱང་མེ་ཏོག་དང་པདྨའི་ཕྲེང་བས་རྣམ་པར་བརྒྱན་པའི་མཚོ་ལ་མ་བསྡུས་པར་ཡང་ངང་པའི་ཁྱུ་དག་རང་འདུ་བ་ལྟ་བུའམ། རི་དྭགས་སྐོམ་པ་ཆུ་ཀླུང་གི་ཆེད་དུ་བསྙགས་པ་ལྟར་ལྷགས་ནས་བག་ཚ་བ་མེད་པར་ཤིང་སྡོང་གོག་པོ་ལྟ་བུའི་ལུས་ཐམས་ཅད་ས་ལ་ཕབ་པའི་

ཕྱག་འཚལ་བ་དང་ཆབ་ཅིག་པར། ལྷའི་རྒྱལ་པོ་རྒྱལ་བར་གྱུར་ཅིག །བླ་མ་ཆེན་པོ་རྒྱལ་བར་གྱུར་ཅིག སློང་བའི་དཔག་བསམ་རྒྱལ་བར་གྱུར་ཅིག འདོད་པའི་རེ་སྐོང་རྒྱལ་བར་གྱུར་ཅིག་ཅེས་པའི་ཤིས་པར་བརྗོད་པའི་ཚིག་གི་ཕྲེང་བ་འགའ་ཞིག་གིས་མདུན་བསུ་སྟེ། ངོ་ཚས་
ཉམས་པར་བྱས་པའི་གདོང་གིས་ས་ལ་བལྟ་བ་དང་བཅས་ཏེ་རང་ཉིད་གང་དང་གང་གིས་ཉེན་པར་གྱུར་པ་དེ་དང་དེའི་གཉེན་པོ་དག་རྟབས་ཤིང་རྟབས་པའི་ངག་གིས་སློང་བར་བྱེད་དེ། །དེ་སྐད་སྨྲ་བ་སྐྱེ་དགུའི་བདག་པོ་གང་གི་སྙན་གྱི་དབང་པོར་སིམ་པར་གྱུར་པའི་མོད་ལ་སྔར་འདྲིས་ཀྱི་གྲོགས་དང་
ཕྲད་པ་བཞིན་དུ་འཛུམ་པའི་མདངས་ཕྱུང་ཞིང་སྙིང་རྗེས་ཤིན་ཏུ་འཇམ་པར་བྱས་པའི་གསུང་གིས་དབུགས་དབྱུང་མང་པོ་སྔོན་དུ་འགྲོ་བས། ཇི་ཙམ་ན་སློང་བའི་སྐྱེ་བོ་གང་ལ་བཟའ་བའི་རྣམ་པའམ། བགོ་བའི་རྣམ་པའམ། དབྱིག་གི་རྣམ་པའམ། བཞོན་པའི་རྣམ་པ་གང་དགོས་པ་
དེ་དག་གིས་ཡོངས་སུ་ཚིམ་པར་བྱེད་པའི་སྒོ་ནས། བཀྲེས་པ་དང་ཕོངས་པ་ལ་སོགས་པས་ཉམ་ཉེས་པར་གྱུར་པའི་འཇིགས་པ་ཆེན་པོ་གང་དག་ལས་ཅི་བདེ་བར་ཡོངས་སུ་སྐྱོབ་པར་བྱེད་དོ། །གཞན་ཡང་བཤས་རར་ཆུད་པའི་སྲོག་ཆགས་ཀྱི་རིགས་སྤྱན་ལམ་དུ་བབ་པ་ཐམས་ཅད་ལ་
ཡང་མི་བཟོད་པའི་སྙིང་རྗེས་ཀུན་ནས་བསླངས་པའི་མཆི་མ་འཁྲུགས་བཞིན་པས་རིངས་པ་རིངས་པར་འདོད་ལྡན་གྱི་སྐྱེ་བོ་སྡིག་པའི་ལས་ལ་ཇི་མི་སྙམ་པའི་བདག་པོ་གང་ཡིན་པ་དེ་ལ་རིན་ཐང་ཚད་དུ་ལངས་པར་བཅལ་ཏེ། སྲོག་ཆགས་དེ་དག་གི་སྲོག་བསླུ་བར་མཛད་པ་ཁོ་ན་ཡང་
བགྲང་དུ་མེད་དོ། །འོན་ཏེ་རྒྱལ་པོའི་ཁབ་འདི་དང་གཞན་དུ་ཡང་རུང་སྟེ། རང་དང་གཞན་གྱི་ཕྱོགས་རིས་མཐའ་དག་ནས་ལྷགས་པའི་མགྲོན་འགྲིམ་གྱི་རིགས་མང་བ་དང༌། རྟག་ཏུ་གཏོང་སྲོལ་ཆེ་བ་དང༌། རྒྱལ་པོའི་ཀུན་སྤྱོད་ཀྱི་དབང་དུ་གྱུར་པས་བཟའ་ཤའི་ཆེད་དུ་དམིགས་པའི་
གནག་ལུག་གི་སྲོག་གཅོད་མང་དུ་འགྲོ་བ་ཡོད་པ་འདི་ནི་ཤིན་ཏུ་སྤང་དཀའ་བར་མཆིས་མོད། དེ་དག་གི་སྡིག་སྦྱོང་དུ་དགེ་སློང་བཅུ་གཅིག་གིས་བཅོམ་ལྡན་འདས་ཀུན་རིག་གི་ཆོ་ག་ཚར་རེ་ཉིན་རེ་ཞིང་འདོན་པ་འདི་ཉིད་ཡིན་ཞིང༌། ལན་རེ་ཙ་ན་སྡེ་དགེ་བླ་མ་རང་གིས་བཞེས་ཤ་མཆོད་

པའི་རུས་པ་དུམ་བུ་བསགས་པ་ལ་དགེ་འདུན་རྣམས་ཀྱིས་བྱང་ཆོག་བཏང་ནས་རུས་བུ་དེ་ལས་སཱཙྪ་བཏབ་པའི་ལོ་རྒྱུས་ཀྱང་ཐོས་སོ། །གཞན་ཡང་སློབ་དཔོན་མ་ཏི་ཙི་ཏྲས་རྒྱལ་པོ་ཀ་ནིཥྐ་ལ་གདམས་པ་ལས། འགྲོ་བ་དམན་པ་ལོག་ལྟུང་བ། །མགོན་མེད་
ཉེས་མེད་ཕལ་ཆེར་ནི། །རྩྭ་དང་ཆུ་དང་འབྲས་བུ་ནི། །ཕལ་པས་འཚོ་བ་སྒྲུབ་བགྱིད་པ། །བྱ་དང་རི་དྭགས་ཕྱུགས་དག་ལ། །རྒྱལ་པོས་གསོད་དམ་གསོད་འཇུག་པ། །ཅི་ག་རིགས་སམ་མི་རིགས་པ། །བདེ་ལ་གནས་པ་ཁྱོད་ཉིད་གསུངས། །ཁྱོད་ནི་ཆེན་པོར་མི་ཁྲོ་
ཞིང༌། །གནོད་པ་བགྱིད་ལའང་བཟོད་ཅེས་གདའ། །ཁྱོད་ཀྱི་ཐུགས་རྗེ་དུད་འགྲོ་ལ། །ཀྱེ་མ་སུ་ཡིས་དགག་པར་བགྱིས། །གནོད་པ་བགྱིད་ལ་བཟོད་མཛད་ཅིང༌། །གནོད་མི་བགྱིས་པ་འགུམས་མཛད་པ། །ཁྱོད་ལ་བརྩེ་དང་མི་བརྩེ་བའི། །རྒྱུ་མཐུན་པ་ནི་གཉིས་ཀ་གདའ། །
སྔོན་ཆད་བགྱིས་པའི་སུག་ལས་ཀྱི། །འདི་ལྟར་འབེན་དུ་གྱུར་པ་ལ། །ཁྱོད་ཉིད་གནོད་པ་མཛད་ན་ཀོ །སུ་ལ་སྐྱབས་སུ་མཆི་བ་གསུངས། །གཞན་གྱིས་གནོད་པ་བགྱིས་ན་ཡང༌། །ཉིད་ཀྱི་ཕྱག་གིས་བཤུག་འཚལ་ན། །ཁྱོད་བཞེངས་མངོན་དུ་གནོད་མཛད་ན། །ཕྱོགས་
ཀུན་མུན་པར་མ་གྱུར་ཏམ། །ཀུན་ལ་སྲོག་ནི་ཕོངས་པ་སྟེ། །ཀུན་ལ་གསོན་པ་སྡུག་པ་ལགས། །ཐམས་ཅད་འཆི་བའི་ཆོས་ཅན་ཏེ། །ཐམས་ཅད་སྡུག་བསྔལ་རྣམས་ཀྱིས་གདུངས། །འདི་ལྟར་གང་ཞིག་མི་འཚལ་བ། །དེ་ཉིད་ཀྱིས་ནི་སྡུག་བསྔལ་ཏེ། །མཁས་པ་སུ་ཞིག་
མགར་བ་ལྟར། །ཚིག་པ་ལ་ནི་ཡང་སྲེག་བཞིན། །ཁྱོད་ནི་སྲོག་གཅོད་མི་དགྱེས་ཤིང༌། །སྲོག་གཅོད་དགྱེས་ལས་ཕྱིར་ལོག་ན། །རྒྱལ་སྲིད་ཉམས་པར་འགྱུར་རམ་ཅི། །ལུགས་འདི་ཅི་ཞིག་ལགས་པ་གསུངས། །མཚོན་ཆའི་ཐབས་ལ་མཁས་ཁྱོད་ཀྱིས། །གཡུལ་
ངོར་སྲོལ་བསྟོད་མཐོང་ལགས་ན། །གཞན་དུ་ཁྱོད་བརྟེན་རི་དྭགས་ལ། །ཅི་སླད་གནོད་པའི་ལས་རྣམས་མཛད། །རི་དྭགས་གཞོན་ནུའི་སྤྱན་མངའ་ཁྱོད། །སྤྱན་དང་འདྲ་བའི་རི་དྭགས་རྣམས། །རྟབས་ནས་རིག་རིག་ལྟ་བ་ལས། །ཅི་ཡི་སླད་དུ་ཐུགས་མི་རྗེ། །ཁྱོད་ཀྱི་སྤྱན་

དང་མིག་འདྲའི་ཕྱིར། །ཁྱོད་ལ་དགའ་བ་གང་ལགས་དེ། །རི་དྭགས་ལ་ཡང་དགའ་བགྱིད་ན། །ཁྱོད་ནི་ཇི་ལྟར་དགྱེས་མི་མཛད། །ལོག་པར་ལྟུང་དང་སྤྱན་འདྲ་དང༌། །མགོན་མེད་ཡུལ་ན་གནས་པ་ཉིད། །རེ་རེ་ཡང་ནི་རི་དྭགས་དག །མི་འགུམས་པ་ཡི་རྒྱུར་རུང་ངོ༌། །མི་
རྣམས་ལ་ནི་མཛད་པ་བས། །སྡུག་བསྔལ་ལྷག་པར་བརྟགས་པ་ཡི། །དུད་འགྲོ་རྣམས་ལ་ཆེས་ལྷག་པར། །ཁྱོད་ཀྱི་ཐུགས་རྗེས་མཛད་དུ་གསོལ། །ཞེས་དང༌། སྐྱེས་རབས་ལས་ཀྱང༌། གལ་ཏེ་བདག་ནི་དགའ་བར་ཁྱོད་བཞེད་ན། །དཔའ་བོ་ཁྱོད་ཀྱིས་རྔོན་པའི་ཕྲིན་
ལས་སྤངས། །དུད་འགྲོའི་རང་བཞིན་སེམས་ནི་གླན་པ་ཅན། །རི་དྭགས་ཉོན་མོངས་རྣམས་ལ་སྙིང་རྗེ་མཛོད། །བདེ་ལ་གནས་དང་སྡུག་བསྔལ་བྲལ་འདོད་པ། །སེམས་ཅན་ཐམས་ཅད་མཚུངས་པར་ཐུགས་ལ་དགོངས། །དེ་བས་བདག་ཉིད་མི་འདོད་གང་ཡིན་པ། །དེ་དག་
གཞན་ལ་བགྱི་བར་མི་རིགས་སོ། །གྲགས་པ་མེད་ཅིང་དམ་པས་སྨད་པར་འགྱུར། །སྡུག་བསྔལ་སྡིག་ལས་བྱུང་བར་རིག་ནས་ནི། །དགྲ་བོའི་ཕྱོགས་བཞིན་སྡིག་པ་སྤོང་བར་མཛོད། །དེ་ནི་རང་བཞིན་ཡལ་བར་དོར་མི་རིགས། །ཞེས་གསུངས་པ་བཞིན་འདོད་ལྡན་གྱི་སྐྱེ་
བོ་སྡིག་པའི་བྲེ་ག་མ་གང་བ། དུག་དང་ཁྲག་གི་ཁུ་བས་ལག་པ་དང་མཚོན་ཆ་ལ་སྦགས་པ་སྡང་བའི་རྒྱུ་མེད་པར་རི་དྭགས་ཀྱི་རིགས་ལ་བསྣུན་པ། དོན་དུ་རང་གི་བསོད་ནམས་ཀྱི་སྙིང་ལ་འབིགས་པ། ངན་སོང་འབབ་པའི་རྐང་སྟེགས་འཆའ་བ། མཐོ་རིས་ཀྱི་ལྟད་མོ་མཐོང་
བའི་ཐ་མར་གྱུར་པ། གཤིན་རྗེའི་སྐྱེས་བུ་བཞིན་དུ་སྲོག་ལེན་གྱི་ཆོ་ག་ལ་གོམས་པའི་རྔོན་པ་རྣམས་ལའང་རི་དྭགས་ཀྱི་རིགས་གསོད་དུ་མི་སྟེར་བའི་མངོན་རྒྱ་ལོ་གྲངས་ཀྱིས་ངེས་པར་བཅད་པའི་བཀའ་ཁྲིམས་ཀྱང་མང་དུ་འཆའ་བར་མཛད་དོ། །གཞན་ཡང་རང་དང་གཞན་གྱི་
བདེ་དགའ་དང་ལེགས་བྱས་ཀྱི་རྩ་བ་ཅིག་ཅར་དུ་འཇོམས་པའི་གཡུལ་གཤོམ་དང་དམག་འཁྲུག་གི་རིགས་རྣམས་ཀྱང་ཐབས་ཀྱིས་མགོ་གནོན་གང་ཐུབ་དང་ལེགས་འདུམ་དུ་ཅི་འགྲོ་གཙོ་བོར་མཛད་པ་ལས། དེ་ལས་ལྡོག་སྟེ་གཡུལ་གྱི་ལས་ལ་དགའ་བའི་དགའ་སྟོན་བཞིན་དུ་

ཆེས་ཆེར་སྤྲོ་བའི་རྒྱལ་རིགས་ངན་པའི་ངང་ཚུལ་དག་ནི་ནམ་ཡང་མི་འཛིན་པ་ཆོས་ལྡན་བླ་མ་སྐྱེ་དགུའི་བདག་པོ་འདི་ཉིད་ཀྱི་རྣམ་པར་ཐར་པ་རྨད་དུ་བྱུང་བ་ཉིད་དོ། །དེས་ན་ཚུལ་འདི་དག་ལ་ལེགས་པར་བསམས་ན་སེམས་ཅན་རིས་སུ་མེད་པ་ལ་རང་རང་གི་བརྟེན་གནས་
སུ་གྱུར་པའམ། ཕ་མར་གྱུར་པའམ། སྤུན་ཟླར་གྱུར་པའམ། མཛའ་བཤེས་སུ་གྱུར་པ་གང་དང་གང་ཡིན་པ་རྣམས་ལས་སྡོམ་བརྩོན་ཆེན་པོ་འདི་ཉིད་དྲིན་དུ་ཆེ་བར་ཁུམས་སོ། །གཉིས་པ་ནི། སྤྱིར་ཐེག་པ་ཆེན་པོའི་རིགས་སུ་སྐྱེས་པའི་བློ་ལྡན་རྒྱལ་བའི་མྱུ་གུ་དམ་པར་
གྱུར་པ། རྟག་ཏུ་སེམས་ཅན་ཐམས་ཅད་ལ་ཕན་པའི་ཕྱིར་ལམ་ཡང་དག་པ་ལ་ཞུགས་པ་རྣམས་ཀྱིས་དོན་དུ་གཉེར་བྱའི་འབྲས་བུ་ཅི་ཞིག་ཡིན་སྙམ་ན། མགོན་པོ་བྱམས་པས། བདག་སྲེད་མ་ལུས་ཤེས་རབ་ཀྱིས་བསལ་ཏེ། །སེམས་ཅན་སྲེད་ཕྱིར་བརྩེར་ལྡན་ཞི་ཐོབ་མིན། །དེ་
ལྟར་བློ་བརྩེ་བྱང་ཆུབ་ཐབས་བརྟན་པས། །འཕགས་པ་འཁོར་བའམ་མྱ་ངན་འདའ་མི་འགྱུར། །ཞེས་གསུངས་པས། ཤེས་རབ་ཆེན་པོས་འཁོར་བའི་མཐའ་ལ་མི་གནས་པར། ཁམས་གསུམ་གྱི་སྡུག་བསྔལ་ལས་འདས་ཤིང་སྙིང་རྗེ་ཆེན་པོས་མྱ་ངན་ལས་འདས་པའི་མཐའ་ལ་མི་
གནས་པར། འཁོར་བ་སྲིད་དུ་སེམས་ཅན་གྱི་དོན་འབད་མེད་ལྷུན་གྲུབ་ཏུ་འབྱུང་བའི་མི་གནས་མྱ་ངན་ལས་འདས་པའི་གོ་འཕང་དེ་ཉིད་ནི་བློ་དང་ལྡན་པ་རྣམས་ཀྱིས་དོན་དུ་གཉེར་བར་བྱ་བའི་སྙིང་པོ་ཡིན་ནོ། །དེ་ཡང་རང་དགའ་ཙམ་གྱིས་ཐོབ་པར་འགྱུར་བ་མ་ཡིན་གྱི། ཐེག་པ་ཆེན་
པོའི་ལམ་ཚང་ལ་མ་ནོར་བ་ཞིག་ལ་ཚུལ་བཞིན་དུ་བསླབས་ནས། དེ་ཉིད་མཐར་ཕྱིན་པར་གྱུར་པ་ལས་འབྱུང་དགོས་པའི་ཕྱིར་རོ། །དེ་ལྟ་བུའི་ཐེག་པ་ཆེན་པོའི་ལམ་ཐམས་ཅད་ཀྱི་རྩ་བ་ནི་སྙིང་རྗེ་ཡིན་ཏེ། ཆོས་ཡང་དག་པར་སྡུད་པའི་མདོ་ལས། སྤྱན་རས་གཟིགས་ཀྱིས་གསོལ་པ།
བཅོམ་ལྡན་འདས་སངས་རྒྱས་ཐོབ་པར་འདོད་པས་ཆོས་མང་པོ་ལ་བསླབ་པར་མི་བགྱིའི་ཆོས་གཅིག་ལ་བསླབ་པར་བགྱིའོ། །དེ་གང་ཞེ་ན། སྙིང་རྗེ་ཆེན་པོའོ། །བཅོམ་ལྡན་འདས་འདི་ལྟ་སྟེ།འཁོར་ལོས་སྒྱུར་བའི་རྒྱལ་པོའི་འཁོར་ལོ་རིན་པོ་ཆེ་གང་དུ་མཆིས་པ་དེར་དཔུང་གི་ཚོགས་

ཐམས་ཅད་མཆིའོ། །བཅོམ་ལྡན་འདས་དེ་བཞིན་དུ་བྱང་ཆུབ་སེམས་དཔའ་སྙིང་རྗེ་ཆེན་པོ་གང་དུ་མཆིས་པ་དེར་སངས་རྒྱས་ཀྱི་ཆོས་ཐམས་ཅད་མཆི་བ་ལགས་སོ་ཞེས་དང༌། ཡང་བྱང་ཆུབ་སེམས་དཔའ་ཆོས་ཤིན་ཏུ་མང་པོ་ལ་བསླབ་པར་མི་བགྱིའོ། །བཅོམ་ལྡན་འདས་བྱང་
ཆུབ་སེམས་དཔའ་ཆོས་གཅིག་བཟུང་ཞིང་རབ་ཏུ་རྟོགས་པར་བགྱིས་ན་སངས་རྒྱས་ཀྱི་ཆོས་ཐམས་ཅད་ལག་མཐིལ་དུ་མཆིས་པ་ལགས་སོ། །ཆོས་གཅིག་པོ་གང་ཞེ་ན་འདི་ལྟ་སྟེ། སྙིང་རྗེ་ཆེན་པོའོ་ཞེས་དང༌། མགོན་པོ་བྱམས་པས་མདོ་སྡེ་རྒྱན་ལས། དང་པོ་རྩ་བ་ཐ་མ་འབྲས་
མཆོག་ལྡན། །འདི་ནི་སྙིང་རྗེའི་ལྗོན་ཤིང་ཆེན་པོ་ཡིན། །རྩ་བ་སྙིང་རྗེ་མེད་གྱུར་ན། །དཀའ་སྤྱད་བཟོད་པ་ཉིད་མི་འགྱུར། །ཞེས་དང༌། སྙིང་རྗེ་ཆེན་པོ་ཡོན་ཏན་འབྱུང་གནས་ཀྱིས། །སེམས་ཅན་རྣམས་ལ་སྙིང་རྗེ་སུ་མི་བྱེད། །འདི་ལྟར་འདི་དག་ལ་ནི་སྡུག་བསྔལ་
ཡང༌། །བརྩེས་བསྐྱེད་བདེ་བ་གཞལ་དུ་མེད་པ་འབྱུང༌། །ཞེས་གསུངས་སོ། །དེ་ལྟ་བུའི་སྙིང་རྗེ་ཆེན་པོ་ཡོན་ཏན་ཐམས་ཅད་ཀྱི་འབྱུང་གནས་སུ་གྱུར་པ་དེ་ཉིད་རྒྱུད་ལ་བསྐྱེད་པ་ལ་ཡང༌། ཐོག་མར་བྱམས་པའི་ཏིང་ངེ་འཛིན་ལ་ནན་ཏན་བྱ་དགོས་ཏེ། སྙིང་རྗེ་ནི་བྱམས་པའི་
རྩ་བ་ཅན་ཡིན་པའི་ཕྱིར་རོ། །དེ་སྐད་དུ་ཡང༌། མདོ་སྡེ་རྒྱན་ལས། སྙིང་རྗེའི་ཆུ་བ་བྱམས་པས་ཏེ། །ཞེས་སོ། །དེ་བསྒོམས་པའི་ཕན་ཡོན་ནི། ཟླ་བ་སྒྲོན་མའི་མདོ་ལས། བྱེ་བ་ཕྲག་ཁྲིག་གཏམས་པའི་ཞིང་དག་ན། །མཆོད་པའི་རྣམ་པ་དཔག་མེད་ཇི་སྙེད་པས། །སྐྱེས་
མཆོག་རྣམས་ལ་ཉིན་རེ་རྟག་མཆོད་པས། །བྱམས་པའི་སེམས་ལ་གྲངས་དང་ཆར་མི་ཕོད། །ཅེས་དང༌། བུ་མོ་བློ་གྲོས་བཟང་མོས་ཞུས་པ་ལས། ཆོས་བཞི་དང་ལྡན་ན་མཛེས་པར་འགྱུར་རོ། །དགྲ་བོ་ལ་ཡང་མི་ཁྲོ་བ་དང༌། བྱམས་པ་ལ་གནས་པ་དང༌། ཆོས་འདོད་པ་དང༌།
དེ་བཞིན་གཤེགས་པའི་སྐུ་གཟུགས་བྱེད་དུ་འཇུག་པའོ་ཞེས་གསུངས་པས་བྱམས་པའི་སྦྱིན་པ་བྱིན་པ་ལས་བསོད་ནམས་དཔག་ཏུ་མེད་པ་འཐོབ་སྟེ། དེའི་རྒྱུ་མཚན་ཡང་སྤྱོད་འཇུག་ལས། དེ་དག་དགའ་ནས་ཐུབ་པ་ཀུན་དགེས་ཤིང༌། །དེ་ལ་གནོད་བྱས་ཐུབ་ལ་གནོད་པ་བྱས། །

ཞེས་དང༌། འགྲོ་བ་འདི་ཀུན་ཐུགས་རྗེའི་བདག་ཅན་དེས། །བདག་ཏུ་མཛད་པ་འདི་ལ་ཐེ་ཚོམ་མེད། །སེམས་ཅན་ངོ་བོར་མཐོང་བ་འདི་དག་ཉིད། །མགོན་དེའི་བདག་ཉིད་ཅི་ཕྱིར་གུས་མི་བྱེད། །ཅེས་གསུངས་པས་སེམས་ཅན་ལ་གནོད་པ་བྱས་པ་ན། སངས་
རྒྱས་ལ་གནོད་པ་བྱས་པར་འགྱུར་བ་དང༌། སེམས་ཅན་རྣམས་ནི་སངས་རྒྱས་ཀྱིས་བདག་གིར་མཛད་པ་དང༌། སེམས་ཅན་རྣམས་ནི་རང་བཞིན་གྱིས་སངས་རྒྱས་ཀྱི་སྙིང་པོ་ཅན་ཡིན་པའི་ཕྱིར་རོ། །དེའི་ངོ་བོ་ཇི་ལྟ་བུ་ཞེ་ན། མཐའ་མེད་པའི་སེམས་ཅན་ཐམས་ཅད་བདེ་བ་དང་བདེ་
བའི་རྒྱུ་དང་ལྡན་པར་འདོད་པའི་དམིགས་རྣམ་ཅན་གང་ཡིན་པའོ། །དེ་ལྟར་ཡང་སློབ་དཔོན་ཟླ་བས། འགྲོ་ལ་ཕན་པ་ཉེར་བསྒྲུབ་པ། །བྱམས་པ་ཆེན་པོ་ཞེས་བྱར་བརྗོད། །ཅེས་དང༌། རྩེ་མོ་ལས། སྙན་ཅིང་བདེན་པར་སྨྲ་བ་ཡིས། །ཞེ་སྡང་འཇོམས་བྱེད་བྱམས་པ་
བསྒོམ། །ཞེས་པ་སྟེ། དེ་ལ་དབྱེ་ན་གང་ཟག་གི་རིམ་པ་གསུམ་དུ་འགྱུར་ཏེ། སེམས་ཅན་ལ་དམིགས་པ་དང༌། ཆོས་ལ་དམིགས་པ་དང༌། དམིགས་པ་མེད་པ་ལ་དམིགས་པའོ། །དེ་སྐད་དུ་ཡང་བྱང་ཆུབ་སེམས་དཔའི་སྡེ་སྣོད་ལས། བྱང་ཆུབ་སེམས་དཔའ་སེམས་དང་པོ་
བསྐྱེད་པ་རྣམས་ཀྱི་བྱམས་པ་ནི་སེམས་ཅན་ལ་དམིགས་པའོ། །སྤྱོད་པ་ལ་ཞུགས་པ་རྣམས་ཀྱི་ནི་ཆོས་ལ་དམིགས་པའོ། །བཟོད་པ་ཐོབ་པ་རྣམས་ཀྱི་ནི་དམིགས་པ་མེད་པའོ་ཞེས་སོ། །དེ་ལྟ་བུའི་དབྱེ་བ་དེ་དང་ལྡན་པའི་བྱམས་པ་དེ་ནི་ཐེག་པ་ཆེན་པོའི་ལམ་ཐམས་ཅད་ཀྱི་རྩ་བར་གྱུར་པ་
སྟེ། དེ་ཉིད་ཀྱི་སྦྱིན་པ་བྱིན་པ་ལ་བརྟེན་ནས་སེམས་ཅན་ལ་ཕན་འདོགས་བསྒྲུབས་པའི་ཚུལ་ནི། བླ་མ་ཆེན་པོ་འདི་ཉིད་རང་གི་མངའ་འོག་ཏུ་གཏོགས་པས་མཚོན་ཏེ། ས་ཆེན་པོ་ལ་འཁོད་པའི་སྐྱེ་བོ་མ་ལུས་པ་མཐོང་བའི་ཆོས་འདིར་མཐོ་རིས་ཀྱི་ཡོན་ཏན་བདུན་དང་ལྡན་པའི་
བདེ་བ་ཕུན་སུམ་ཚོགས་པ་དང་ལྡན་ཞིང༌། སླད་མ་རྣམས་སུ་ཡང་བདེ་ལེགས་ཐམས་ཅད་ཀྱི་རྒྱུར་གྱུར་པའི་དགེ་བ་དང་ལྡན་པར་འདོད་པའི་མཉེས་གཤིན་བྱམས་པའི་སེམས་ཀྱིས་ཡོངས་སུ་བསྲུང་བ་ལ་སུས་ཀྱང་བརྫི་བ་མི་མངའ་བ་ནི། རྒྱལ་པོ་བྱམས་པའི་སྟོབས་ཀྱི་སྐྱེས་རབས་སུ། །

དེའི་དཔུང་བྱམས་པ་རུ་མཚོན་ཁྲོ་བོའི་དཔུང་ནི་ཆོ་ག་ཙམ། །དེ་ནི་མི་ཁྲོ་ཚིག་རྩུབ་མི་སྨྲ་ས་ཡང་ལེགས་པར་བསྲུངས། །དེ་ཡི་བཀའ་ཁྲིམས་ཆོས་ཡིན་རྒྱུ་མེད་ནོར་ཡང་དམ་པ་མཆོད། །དེ་ལྟར་རྨད་དུ་བྱུང་ཡང་ངན་པའི་ཆོས་ཉིད་དྲེགས་པ་མེད། །ཅེས་དང༌། སྐྱེ་དགུ་རྣམས་ནི་བདེ་དང་
སྡུག་བསྔལ་གང༌། །རྒྱལ་པོ་དེ་ཡང་དེ་དག་དེ་བཞིན་འགྱུར། །དེ་བས་དེ་ནི་སྐྱེ་དགུ་བསྲུང་ལ་མཁས། །མཚོན་ཆ་རྣམས་དང་གཙུག་ལག་རྣམས་ལ་གོམས། །མི་ཡི་བདག་པོའི་བཀའ་ཁྲིམས་སྤྱི་བོས་མནོས། །དེ་ཡི་མཚོན་ཆ་རྒྱན་དང་འདྲ་བར་གྱུར། །འཇིག་རྟེན་ཕན་འབྱུང་
བསྟན་བཅོས་ཚུལ་རྣམས་ཀྱིས། །གཙུག་ལག་དག་ཀྱང་རྣམ་པར་གསལ་བར་སྣང༌། །ཚར་གཅད་པ་དང་ཕན་གདགས་བྱས་པ་ལ། །ཆོས་དང་འགལ་བ་དེ་ནི་ཡོངས་མི་བྱེད། །ཚུལ་ལ་མཁས་ཤིང་གཞན་ལ་ཕན་པར་སེམས། །སྐྱེ་དགུ་རྣམས་ལ་རྟོག་མཁས་པ་དང་འདྲ། །ཞེས་འབྱུང་
བ་བཞིན་དུ། འདིར་བྱམས་ལྡན་དམ་པ་གང་གི་མཉེས་གཤིན་བྱམས་པའི་ཐུགས་ཀྱི་སྲུང་བས་ལེགས་པར་བསྲུངས་པའི་འཛིན་མའི་དཀྱིལ་འཁོར་རྣམ་པར་ཡངས་པའི་ཁོངས་སུ། ཆབ་འབངས་ཀྱི་འགྲོ་བ་ཀུན་ཀྱང་འཇིགས་པ་དང་བག་ཚ་བ་མེད་པར་ཅི་བདེར་གནས་པར་བྱེད། རང་
རང་གི་སྐྱེ་བ་སྔོན་མའི་ལས་ཀྱི་བདག་པོས་ལེགས་པར་སྩལ་བའི་བགོ་སྐལ་གང་དང་གང་ཡིན་པ་དེ་ལ་ལོངས་སུ་སྤྱོད་པར་བྱེད་དོ། །མིའི་བདག་པོ་གང་གི་ཐུགས་བརྩེ་དང་བྱམས་པའི་སྒོ་མོ་བྱེ་བ་བརྒྱ་སྟོང་ཕྲག་མང་པོ་དག་ནི་ཕྱེ་སྟེ། དེ་ལས་བྱུང་བའི་ཕན་འདོགས་ཀྱི་རིགས་རྣམ་པ་སྣ་ཚོགས་པ་
དག་འགྲོ་བ་རང་རང་གི་སྐལ་བ་དང་མཉམ་པར་ལེགས་པར་འགྱེད་པར་མཛད་དོ། །དེ་དག་ཀྱང་བག་ཚ་བ་མེད་པར་དཔེར་ན་བདག་པོ་རང་གིས་སྔོན་ཆད་བཅོལ་བའི་ནོར་ལ་ཇི་ལྟར་བྱ་བ་དེ་བཞིན་དུ་ལེན་པར་བྱེད་དོ། །སྐྱེ་དགུའི་བདག་པོ་དེ་ཡིས་ཇི་ལྟར་བསྒོས་པའི་བཀའ་ལུང་གི་བྱ་བའི་ཁུར་
ལྕི་བ་དང་ཡང་བ་གང་ཡིན་པ་དེ་ནི་སྐྱེ་བོའི་ཚོགས་དེ་དག་གིས་རྒྱན་གྱི་དམ་པ་བཞིན་དུ་སྤྱི་བོས་བཏུད་ཅིང་གུས་པར་ལེན་པར་བྱེད་དོ། །བྱམས་པའི་སེམས་ཀྱིས་ཀུན་ནས་སྦགས་པའི་ཞལ་བཟང་འཛུམ་པའི་བདུད་རྩི་མང་པོ་ཡང་རྟག་ཏུ་འཐུང་བར་བྱེད་དོ། །ཚིག་རྩུབ་ཀྱི་ཚེར་མ་མེད་

པའི་འཛུམ་སྒྲོས་པདྨ་དམར་པོའི་འདབ་མ་ཁ་བྱེ་བ་ལས་བྱུང་བའི་གསུང་འཇམ་གྱི་སྦྲང་རྩི་མངར་པོ་ནི་ཅི་ཡང་འཇིབ་པར་བྱེད་དོ། །ཆབ་འབངས་ཀྱི་འགྲོ་བ་དེ་ཐམས་ཅད་ཀྱང་བདེ་བ་དང་སྡུག་བསྔལ་བའི་གནས་སྐབས་ཀྱི་རྣམ་པ་ཅི་འདྲར་གྱུར་ཀྱང་མིའི་བདག་པོའི་
མཁྱེན་པའི་མིག་དཀྱུས་ཡངས་པ་དང་དྲི་མ་མེད་པ་ཉིད་དུ་སྤྲོས་ཏེ་ཡང་དང་ཡང་དུ་གཟིགས་པར་བྱེད་དོ། །དེ་ལྟ་བུའི་བྱམས་པའི་གོ་ཆ་བཟང་པོས་ལེགས་པར་བསྲུངས་པའི་ས་ཕྱོགས་གང་དུ་དགྲའི་འཇིགས་པ་དང་ཕ་རོལ་གྱི་དམག་ཚོགས་ཀྱི་འཇིགས་པ་དག་གིས་གླགས་རྙེད་པའི་
སྐབས་ཅི་ཞིག །འོན་ཀྱང་ལེགས་པར་བཤད་པ་རིན་པོ་ཆེའི་གཏེར་ལས། རྒྱུ་འབྲས་བསླུ་བ་མེད་པ་འདི། །ཐམས་ཅད་མཁྱེན་པའི་ཁྱད་ཆོས་ཡིན། །ཞེས་དང༌། རྒྱལ་པོ་ལ་གདམས་པ་ལས། སྐྱེས་བུ་དེ་ནི་གང་དང་གང་འགྲོ་ཡང༌། །ལས་ནི་གྲིབ་མ་བཞིན་དུ་རྗེས་སུ་འབྲང༌། །
ཞེས་གསུངས་པ་ལྟར་སེམས་ཅན་གྱི་ཁམས་རྣམས་སུ་རང་རང་གི་སྔོན་བསགས་ལས་ཀྱི་འབྲས་བུ་རྣམ་པར་སྨིན་པས་འབྱོར་པ་དང་རྒུད་པ་དང་བཀྲེས་སྐོམ་གྱི་རྣམ་པ་སྣ་ཚོགས་པ་ཞིག་འབྱུང་བ་འདི་ནི་བཟློག་ཏུ་མ་མཆིས་པ་ཉིད་དེ། དེའང་འདི་ལྟར། སྔོན་གྱི་སྦྱིན་པའི་སྟོབས་ལས་སྐྱེས་པའི་སྐྱེ་
བོ་འགའ་ཞིག་ནི། བདོག་པའི་རྫས་ཀྱི་འབྱོར་པ་རྒྱ་ཆེ་ཞིང་ཟད་མི་ཤེས་པ་མཆོད་པ་དང་སྦྱིན་པ་ལ་སོགས་པའི་ཆེད་དུ་ཇི་ཙམ་ཟད་པར་བྱས་པ་དེ་ཙམ་དུ་གང་བར་འགྱུར་བ། རིན་ཆེན་འབྱུང་གནས་ཆེན་པོའི་ཆུ་ལྟ་བུ་ལ་ལོངས་སུ་སྤྱོད་པ་དག་ཡོད་དོ། །ཕལ་ཆེར་ནི་འབྱོར་པའི་ཚོགས་སྦོམ་ཞིང་
རྒྱུན་རིང་བ། དུས་དུས་སུ་འཕེལ་འགྲིབ་ཀྱི་རྣམ་པ་ཅུང་ཟད་སྟོན་ཀྱང་ཡོངས་སུ་ཟད་པར་བྱར་མེད་ཅིང་རྟག་ཏུ་འབྱུང་བ་ཆུ་ཀླུང་ཆེན་པོའི་རྒྱུན་ལྟ་བུ་ལ་སྤྱོད་པའང་ཡོད་དོ། །ཁ་ཅིག་ནི་ཇི་ལྟར་འབྱོར་པར་གྱུར་པ་ཡོངས་སུ་བཟུང་བ་ལ་མཁས་ཀྱང་གཏོང་བ་ལ་མི་མཁས་པ། ཡུན་ཇི་སྲིད་ཅིག་ནས་
དགོས་པའི་ཆེད་དུ་ཡང་སྤྱོད་པར་བྱར་མེད་པས་ཡོངས་སུ་གཏུགས་པར་འགྱུར་བ་རྫིང་བུའི་ཆུ་ལྟ་བུ་ལ་སྤྱོད་པའང་ཡོད་དོ། །གཞན་པ་ཕལ་ཆེར་ནི་བསགས་པའི་རྫས་ཀྱི་རྒྱུན་མང་པོ་དང་ལྡན་པ་ཡང་མ་ཡིན་ལ། ཤིན་ཏུ་འགྲིབ་པར་འགྱུར་བ་ཡང་མིན་པ། ཇི་ལྟར་དགོས་པའི་དུས་ཉིད་

ནའང་རྩོལ་བ་ཆུང་ངུས་འབྱུང་བ། ཆུ་མིག་རྟག་ཏུ་འབབ་པའི་ཆུ་ལྟ་བུ་ལ་སྤྱོད་པ་དག་ཀྱང་ཡོད་དོ། །འགའ་ཞིག་ནི་བདོག་པའི་རྫས་གཙང་བ་དང་མི་གཙང་བ་ཇི་སྙེད་ཅིག་ཉུང་ངུ་ཉུང་ངུ་ནས་ཤིན་ཏུ་འབད་པས་བསགས་ཀྱང་མང་པོ་ཉིད་དུ་འཕེལ་བ་མི་སྲིད་ལ། ཉུང་ཟད་གང་བ་ལྟར་སྣང་
ཡང་ཡོངས་སུ་རྫོགས་པ་ཉིད་རང་དབང་དུ་སྤྱོད་པའི་སྐབས་མེད་པར། གཞན་རྐྱེན་ཕྲ་མོ་རེས་འཁྱག་པའམ་སྐོམ་པར་འགྱུར་བ་རྨིག་རྗེས་ཀྱི་ཆུ་ལྟ་བུ་ལ་སྤྱོད་པའང་ཡོད་དོ། །འགའ་ཞིག་ནི་ཕན་པའི་ཐབས་ཀྱི་ཁྱད་པར་མང་པོས་ལན་འགར་བསྐྱངས་ནའང༌། བདག་ཏུ་བཟུང་བའི་ཡོ་
བྱད་རྣམས་ནི་དེའི་ཉེས་པ་དྲན་པ་བཞིན་དུ་སྤངས་ཏེ་སྡིག་མེད་ཀྱི་ལོངས་སྤྱོད་དག་ནི་ཡང་དང་ཡང་དུ་ཡིད་སྨོན་བྱེད་ཅིང་བསྒུགས་ནས་དེ་ཉིད་ནམ་བྱུང་བ་ན་ལེན་པ་ཙམ་གྱིས་མི་ཚེ་ཕྱིད་པར་བྱེད་པ་ཆར་སྡོད་ཀྱི་བྱིའུའི་ཆུ་ལྟ་བུ་སྤྱོད་པ་དག་ཀྱང་ཡོད་དོ། །དེ་ལྟ་བུའི་མངའ་རིས་རྣམས་ལ་ནི།
སྤྱིར་མིའི་བདག་པོ་འདིས་ཕན་པའི་སེམས་དང་རྗེས་སུ་འབྲེལ་པའི་བགྱི་བ་རྨད་དུ་བྱུང་བས། གནའི་ལུགས་སྲོལ་དུ་དར་བའི་བགྱི་བ་ཐམས་ཅད་གཙོ་བོར་བཟུང་ནས། དགོས་པའི་དཔྱ་འབུལ་རྣམས་ཀྱང་དུས་དང་གནས་སྐབས་ཀྱི་ཁྱད་པར་ལ་མངོན་པར་དཔགས་པའི་སྒོ་ནས་བསྡུ་ཞིང་
མངའ་རིས་ཐམས་ཅད་ཡུན་རིང་དུ་གནས་པའི་བྱ་བ་ཁོ་ན་ལྷུར་ལེན་པར་མཛད་དེ། དཔེར་ན་སྦྲང་རྩི་ལེན་པ་ལ་མཁས་པ་བཞིན་ནོ། །དེའང་ཇི་ལྟར་ཞེ་ན། སྦྲང་རྩི་ལེན་པ་ལ་མཁས་པ་དག་ནི། ནམ་ཞིག་དུས་ལ་བབ་པ་ན་སྦྲང་བུ་འཚོ་བའི་གསོས་སུའང་འཇོག་ཅིང་རང་གི་དགོས་པ་ཉིད་ཀྱང་
ལེན་པར་བྱེད་ཀྱི། སྦྲང་རྩི་འཛིན་པ་ཉིད་ཀྱང་ཡུན་རིང་དུ་གནས་པར་མི་འགྱུར་བའི་ལས་གང་ཡིན་པ་དེ་ནི་ནམ་ཡང་རྩོམ་པར་མི་བྱེད་པ་དེ་བཞིན་དུ། སྡོམ་བརྩོན་མིའི་བདག་པོ་འདིས་ཀྱང་མངའ་རིས་ལ་ལོངས་སུ་སྤྱོད་པའི་ཚེ། ལན་ཅིག་མ་ཡིན་པར་རྟག་ཏུ་སྤྱད་པར་བགྱིར་རུང་བའི་
ལས་ཁོ་ན་རྩོམ་པ་གཙོ་བོར་མཛད་ཅིང༌། དུས་གཅིག་ཉིད་དུ་རྩ་བ་ནས་འབྱིན་པར་འགྱུར་བའི་ལས་རྣམས་ནི་རྣམ་པ་ཐམས་ཅད་དུ་བགྱིད་པ་མ་ལགས་ཤིང༌། ཁྱད་པར་ཉེ་བར་སྤྱད་པའི་ལོངས་སྤྱོད་ཀྱི་སྐལ་བ་རྨིག་རྗེས་ཀྱི་ཆུ་དང་བྱེའུའི་བཏུང་བ་ལྟ་བུ་ལ་སྤྱོད་པའི་རིགས་ཅན། གནའ་

ནས་དར་བའི་ཤོག་མ་ཙམ་ཡང་སྟོབ་པར་མི་ནུས་པ་དང༌། ཅུང་ཟད་སྟོབ་པར་ནུས་ཀྱང་ཕྱི་ནས་ལག་པ་དག་ནི་དཎྜ་དང་ཡོལ་གོས་བྲེལ་བའི་སྐལ་བ་ཅན་དུ་འགྱུར་བ་རྣམས་ལ་ནི། བདོག་པ་ངན་ངོན་གང་རུང་རེས་ཀྱང་འཚོ་བར་བྱེད་པ་དང༌། དེའང་མེད་ན་དཀོན་མཆོག་གསུམ་གྱི་
རྟེན་ལ་ཕྱག་འཚལ་བའམ། བསྐོར་བ་བྱེད་པའམ། ཐུགས་རྗེ་ཆེན་པོའི་ཡི་གེ་དྲུག་པའི་བཟླས་བརྗོད་ཙམ་གྱིས་འཚོབ་པར་བྱེད་ཅིང༌། སླར་ཡང་རང་རང་གི་གནས་སུ་བཀོད་པའམ་ཁོལ་པོར་བཀོལ་བའི་བྱ་བ་གང་རུང་དག་ལ་འགོད་པར་མཛད་དོ། །དེ་ལས་གཞན་པ་ཚུལ་བཞིན་མ་ཡིན་པའི་ལས་ལ་
རྟག་ཏུ་གོམས་པ། བྱེད་པ་རྒྱུ་མཐུན་གྱི་བག་ཆགས་སད་པ་དང༌། སྙིགས་མ་ལྔའི་མྱོས་བྱེད་ཀྱི་བཏུང་བས་མངོན་པར་ཁེངས་པའི་སྐྱེ་བོ་མི་སྲུན་པའི་རིགས་ཅན། གཞན་གྱི་འཚོ་བ་འཕྲོག་པ་དང༌། མ་བྱིན་པར་ལེན་པ་དང༌། འདོད་པས་ལོག་པར་གཡེམས་པ་ལ་སོགས་པ་མི་དགེ་བའི་ལས་
ལ་དགའ་བའི་ཚལ་བཞིན་དུ་ཞུགས་པ་རྣམས་ཀྱང༌། གནས་སྐབས་སུ་ཉེས་པ་གང་དང་གང་ཡིན་པ་དེ་གསལ་བར་བསྒྲགས་ཏེ། སྤྱོ་བ་དང༌། བསྡིགས་པ་དང༌། ལོངས་སྤྱོད་ཀྱི་ཆ་ལས་ཕྲི་བ་ལ་སོགས་པའི་ཐབས་ཀྱི་རྣམ་པ་མང་པོ་དག་གིས་སྐྱོ་བ་སྐྱེད་པ་དང༌། ཇི་སྲིད་ཅིག་ནས་སྐྱོ་བ་སྐྱེས་པར་
གྱུར་པ་ན། གོས་རྙིང་པའི་དྲི་མ་བཀྲུས་ནས་དག་པར་གྱུར་པ་ན་རང་གིས་ཡོངས་སུ་སྤྱད་པ་དེ་ཇི་ལྟ་བ་བཞིན་དུ། སྤྱོད་པ་ངན་པ་དེ་ལས་བཟློག་ནས་རྣལ་དུ་གནས་པར་གྱུར་པ་དང་ཕན་འདོགས་ཀྱི་རྣམ་པ་གང་ཡང་རུང་བ་དག་གིས་སེམས་མགུ་བར་བྱེད་དོ། །ཡང་ཇི་སྐད་དུ། ཆུ་ནི་ཇི་ལྟར་བཟློག་
གྱུར་ཀྱང༌། །ཐུར་དུ་འབབ་པ་ཁོ་ནར་འདོད། །ཅེས་པ་ལྟར་རང་བཞིན་ངན་པའི་མཐའ་རུ་ལྷུང་བའི་སྐྱེ་བོ་མི་དགེ་བའི་ལས་ལས་ཇི་ལྟར་བཟློག་ཀྱང་འཆོས་སུ་མ་བཏུབ་པ་རྣམས་ཀྱང༌། རེ་ཞིག་ཡུལ་གཞན་དུ་སྤྱུགས་ནས་འབྲེལ་ཐག་གཅོད་པ་ཙམ་མཛད་ཀྱི་དྲི་མ་དང་ལྡན་པའི་གོས་རྙིང་པ་མེ་ལ་
སྦྱངས་པ་བཞིན་དུ། རྒྱལ་རིགས་བློ་ངན་རྣམས་ལ་ཡོངས་སུ་དར་བའི་ཁྲིམས་ལུགས་ངན་པ་དུག་གི་སྡོང་པོ་ལྟ་བུ་དེ་བཟུང་ནས་སྲོག་གི་དབང་པོ་བཀུམས་པ་ལ་སོགས་པའི་བྱ་བ་ནམ་ཡང་མི་བྱེད་པ་ནི། ཆོས་དང་ལྡན་པའི་ས་སྐྱོང་ཆེན་པོ་རྣམས་ཀྱི་ལུགས་ལ་བྱམས་པའི་སྦྱིན་པས་འགྲོ་བ་ལ་ཕན་པ་སྒྲུབ་

པའི་རྣམ་པར་ཐར་པ་རྨད་དུ་བྱུང་བ་ཉིད་དུ་ཤེས་པར་བྱའོ། །གསུམ་པ་དེ་ལྟར་པར་དུ་བསྒྲུབ་པར་བསྐུལ་བའི་དགོས་པ་ནི། སྤྱིར་རང་རེ་རྣམས་ཀྱི་སྟོན་པ་ཡང་དག་པར་རྫོགས་པའི་སངས་རྒྱས་ཤཱཀྱའི་རྒྱལ་པོའི་བསྟན་པ་རིན་པོ་ཆེ་གང་དང་མཇལ་བའི་སྐལ་བ་སྦོམ་པ་ལས་ཆེས་སྦོམ་པར་གྱུར་པའི་སྐབས་
འདིར། སྐྱེས་བུ་དམ་པ་བློ་དང་ལྡན་པ་རྣམས་ཀྱིས་ཚེ་འདིའི་བགྱི་བ་ཆུ་ཤིང་བཞིན་དུ་སྙིང་པོ་རྣམ་པར་དབེན་པ་ཐམས་ཅད་ལས་རྒྱང་བསྲིངས་ཏེ། རྗེ་ངོར་ཆེན་རྡོ་རྗེ་འཆང་གིས། འགྲོ་ལ་བདེ་སྐྱིད་འབྱུང་བའི་སྒོ་གཅིག་པུ། །ཀུན་མཁྱེན་རྒྱལ་བའི་བསྟན་པ་རིན་པོ་ཆེ། །ཞེས་མཐའ་དང་མུར་
ཐུག་པ་མེད་པའི་ལུས་ཅན་ཐམས་ཅད་ལ། འཇིག་རྟེན་དང་འཇིག་རྟེན་ལས་འདས་པ་བླ་ན་མེད་པ་བྱང་ཆུབ་མཆོག་གི་བར་གྱི་དགེ་ལེགས་དང་བདེ་སྐྱིད་ཀྱི་འབྲས་བུ་གང་དང་གང་འདོད་པ་ཐམས་ཅད་འཛད་པ་མེད་པའི་གཏེར་བཞིན་དུ་འབྱུང་བའི་སྒོ་གཅིག་པུ་ཉིད་ནི། ཀུན་མཁྱེན་སངས་རྒྱས་
བཅོམ་ལྡན་འདས་ཀྱི་བསྟན་པ་རིན་པོ་ཆེ་ཞེས་བྱ་བ། རིན་ཐང་གཞལ་དུ་མེད་པའི་བདག་ཉིད་ཅན་འདི་ཁོ་ན་སྟེ། དེ་ཉིད་འཇིག་རྟེན་གྱི་ཁམས་སུ་ཡུན་རིང་པོར་གནས་པར་བྱེད་པའི་ཐབས་ཀྱི་ཁྱད་པར་གང་ཡིན་པ་དག་ལ་ཤིན་ཏུ་འབད་པར་བྱ་དགོས་སོ། །དེ་ཅིའི་ཕྱིར་ཞེ་ན། དེ་ལས་
ལག་པར་གྱུར་པའམ། ཕུལ་དུ་བྱུང་བའམ། ཆེས་མཆོག་ཏུ་གྱུར་པའི་བསྒྲུབ་པར་བྱ་བའི་དགོས་པ་ནི། འཇིག་རྟེན་གསུམ་པོ་མ་ལུས་ཤིང་ལུས་པ་མེད་པའི་ཁོངས་ན་འགའ་ཡང་ཡོད་པ་མ་ཡིན་པའི་ཕྱིར་རོ། །དེ་ལ་ཇི་ལྟར་འབད་པར་བྱ་བའི་ཚུལ་ཡང༌། སློབ་དཔོན་དབྱིག་
གཉེན་གྱིས། དེ་འཛིན་པ་དང་སྨྲ་བྱེད་པ། །སྒྲུབ་པར་བྱེད་པ་ཁོ་ན་ཡིན། །ཞེས་པ་སྟེ། དེའང་དེའི་རང་འགྲེལ་དུ། དེ་ལ་ལུང་ནི་མདོ་སྡེ་དང༌། འདུལ་བ་དང༌། མངོན་པ་རྣམས་སོ། །རྟོགས་པ་ནི་བྱང་ཆུབ་ཀྱི་ཕྱོགས་དང་མཐུན་པ་རྣམས་ཏེ། དེ་ལྟར་ན་དམ་པའི་ཆོས་ནི་རྣམ་པ་གཉིས་ཏེ་ཞེས་
དང༌། ལུང་འཛིན་པར་བྱེད་པ་དང་སྨྲ་བར་བྱེད་པ་ཡིན་ནོ། །རྟོགས་པ་འཛིན་པར་བྱེད་པ་ནི་སྒྲུབ་པར་བྱེད་པ་ཡིན་ཏེ། དེའི་ཕྱིར་དེ་གཉིས་ཇི་སྲིད་དུ་གནས་པ་དེ་སྲིད་དུ་དམ་པའི་ཆོས་གནས་པར་རིག་པར་བྱའོ་ཞེས་པ་ལྟར་ལུང་གི་ཆོས་རྣམས་ནི་ཉན་པ་དང་བཤད་པ་ཡང་དག་པའི་སྒོ་ནས་གནས་པར་

བྱེད་པ་དང༌། རྟོགས་པའི་ཆོས་ནི་སྒྲུབ་པ་ལྷུར་ལེན་གྱི་སྒོ་ནས་གནས་པར་བྱེད་པའམ། ཡང་ན་ཆོས་རྗེ་པཎྜི་ཏས། དེས་ན་སངས་རྒྱས་གསུང་རབ་དང༌། །མཁས་པ་རྣམས་ཀྱི་བསྟན་བཅོས་ཀྱི། །ཚིག་དོན་ལ་ནི་བྱིན་རླབས་ཡོད། །འདི་འདྲ་ཉན་བཤད་བྱེད་
པ་ལ། །ཐོས་པ་ཞེས་ནི་བརྗོད་པ་ཡིན། །དེ་དོན་དཔྱོད་པ་བསམ་པ་ཡིན། །ནན་ཏན་གྱིས་ནི་དེ་སྒྲུབ་པ། །སྒོམ་པ་ཡིན་པར་ཤེས་པར་བྱ། །ཐོས་བསམ་སྒོམ་གསུམ་དེ་ལྟར་གྱིས། །ཞེས་གསུངས་པ་ལྟར་ཐོས་པ་དང༌། བསམ་པ་དང༌། སྒོམ་པ་སྟེ་གསུམ་གྱི་སྒོ་ནས་འཛིན་
པའམ། ཡང་ན་ཀློག་པ་ཐོས་བསམ་གྱི་འཁོར་ལོ་དང༌། སྤོང་བ་བསམ་གཏན་གྱི་འཁོར་ལོ་དང༌། བྱ་བ་ལས་ཀྱི་འཁོར་ལོ་སྟེ་གསུམ་གྱི་སྒོ་ནས་འཛིན་དགོས་ཤིང༌། གང་ཞིག་ཉན་བཤད་བྱ་བའི་ཆོས་དེ་ཡང༌། བསྲེགས་བཅད་བརྡར་བའི་གསེར་བཞིན་དུ་ལེགས་པར་
བརྟགས་པ་ཞིག་དགོས་ཏེ། འདི་ལྟར་བཟོ་མགར་མཁས་པས་མེར་བསྲེགས་པ་ལ་སོགས་པའི་ཐབས་ཀྱིས་སླད་འབྱིན་ཅིང་དོན་དུ་རུང་བར་བྱས་པའི་གསེར་གང་ཞིག །ཚོང་དུས་ཆེན་པོ་ལ་སོགས་པ་གང་དུ་ཡང་མི་བྲིན་པ་མེད་པ་དེ་བཞིན་དུ། ཉན་བཤད་བྱ་བའི་ཆོས་གང་
གིས། མངོན་གྱུར་བརྗོད་བྱར་བྱེད་པ་ལ་མངོན་སུམ་གྱིས་མི་གནོད་པ་དང༌། ལྐོག་གྱུར་བརྗོད་བྱར་བྱེད་པ་ལ་རྗེས་སུ་དཔག་པས་མི་གནོད་པ་དང༌། ཤིན་ཏུ་ལྐོག་གྱུར་བརྗོད་བྱར་བྱེད་པ་ལ་ལུང་རང་གིས་མི་གནོད་པ་ཅིག་དགོས་ཏེ། ཆོས་མངོན་པའི་མདོ་ལས། དགེ་སློང་དག་
གམ་མཁས་རྣམས་ཀྱིས། །བསྲེགས་བཅད་བརྡར་བའི་གསེར་བཞིན་དུ། །ལེགས་པར་བརྟགས་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །ཞེས་དང༌། འཇམ་མགོན་ས་སྐྱ་པཎྜི་ཏས། ལུང་རིགས་རྗེས་སུ་གདམས་པའོ། །ཞེས་དང༌། དེའི་བཤད་པར། མདོ་
རྒྱུད་བསྟན་བཅོས་དང་མཐུན་པའི་ལུང༌། སྒྲ་ཚད་དངོས་སྟོབས་དང་མཐུན་པའི་རིགས་པ། ཆོས་ཉིད་ཟབ་མོ་དང་མི་འགལ་བའི་གདམས་པའོ་ཞེས་འབྱུང་བ་ལྟར་མཚན་ཉིད་གསུམ་མམ་གཉིས་སམ་གང་རུང་ཅིག་དང་ལྡན་ཡང་རུང༌། དེ་རྣམས་ཀྱི་ནང་ནས་ཀྱང་ཡིད་ཆེས་པའི་ལུང་དང་

བརྒྱུད་པ་དྲི་མ་མེད་པ་ལས་འོངས་པའི་གདམས་པ་གཙོ་ཆེ་སྟེ། ཤིན་ཏུ་ལྐོག་གྱུར་ལ་སྤྱོད་པའི་ཚེ་ལུང་ཉིད་ཚད་མར་ཡིན་པའི་ཕྱིར་དང༌། ལུང་དོན་བརྒྱུད་པ་ཡང་དག་པའི་མན་ངག་གི་འགྲོས་ཀྱིས་བརྒྱན་པ་མེད་ན་ཉམས་སུ་མི་ལོན་པ་མང་དུ་ཡོད་པའི་ཕྱིར་དང༌། གང་ཟག་ཁ་ཅིག་ལུང་གི་
ཚིག་སྒྲ་ཇི་བཞིན་པར་ཞེན་ནས་དོན་དུ་མི་འགྱུར་བ་ཡང་དུ་མ་ཡོད་པར་བཤད་པའི་ཕྱིར་རོ། །དེ་ལྟ་བས་ན་ཉན་པ་དང་བཤད་པར་བྱ་བའི་ཆོས་ནི་སངས་རྒྱས་ཀྱིས་གསུངས། སྡུད་པོས་བསྡུས། མཁས་གྲུབ་རྣམས་ཀྱིས་བཀྲལ། པཎྜི་ཏས་བཤད། ལོ་ཙཱ་བས་བསྒྱུར། བླ་མ་བརྒྱུད་པའི་མན་
ངག་དང་ལུང་གི་རྒྱུན་དང་ལྡན་པ། མཁས་པ་རྣམས་ལ་གྲགས་པ་ཞིག་དགོས་ཀྱི། དེ་ལས་གཞན་པའི་ཆོས་ལ་བཤད་སྒྲུབ་བྱས་ཀྱང་ཆོས་བཞིན་དུ་མི་འགྱུར་བ་ཡང་ཡོད་པར་གསུངས་པའི་ཕྱིར་རོ། །དེ་ལྟ་བས་ན་དེང་འདིར་བློ་དང་ལྡན་པའི་སྐྱེས་བུ་དམ་པ་སུ་དག་གིས་ཉན་པ་དང་བཤད་
པ་ལ་སོགས་པའི་བྱ་བ་ཡང་དག་པའི་སྒོ་ནས་གཅེས་སྤྲས་སུ་བྱ་བའི་སྙིང་པོ་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔག་ཏུ་མེད་པའི་ཡེ་ཤེས་དང་ཐུགས་རྗེ་ཆེན་པོའི་དཀྱིལ་འཁོར་ཡོངས་སུ་རྫོགས་པ་གང་དེས། སེམས་ཅན་ཐམས་ཅད་ལ་
ཕན་པའི་ཕྱིར་ལེགས་པར་བསྟན་པའི་བདུད་རྩིའི་བཏུང་བ་ཇི་སྙེད་ཅིག་སྩལ་བ་ཐམས་ཅད་ཀྱང༌། བསྒྲུན་དུ་མེད་པའི་མཁྱེན་རབ་དང༌། སྤོབས་པ་དང༌། ཏིང་ངེ་འཛིན་དང༌། དྲན་པའི་སྙིམ་པ་དག་རབ་ཏུ་བརྐྱངས་ནས་ཡང་དག་པ་ཉིད་དུ་འཐུངས་པས། ཆོས་ཀྱི་ཚུལ་ཐམས་ཅད་ལ་ཞུམ་
པ་མེད་པའི་ཡོན་ཏན་གྱི་ཁོ་ལག་ཕྱོགས་ཐམས་ཅད་བརྟས་པར་གྱུར་པའི་སྲས་ཀྱི་ཐུ་བོར་གྱུར་པ་གང་དག་བྱོན་པ་སྟེ། དེའང་སྟོན་པ་ཉིད་ཀྱིས་རྒྱལ་ཚབ་ཆེན་པོར་དབང་བསྐུར་བའི་རྗེ་བཙུན་མ་ཕམ་པ་དང༌། དེ་བཞིན་གཤེགས་པ་ཐམས་ཅད་ཀྱི་གསུང་གི་གསང་བ་འཛིན་པ་དཔལ་ལྡན་ལག་ན་
རྡོ་རྗེ་ལ་སོགས་པ་ས་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང༌། གཉིས་ཀའི་ཆ་ལས་རྣམ་པར་གྲོལ་ཏེ་འཁོར་བ་ལས་རིང་དུ་མངོན་པར་འཕགས་པའི་དགྲ་བཅོམ་པ་རྣམས་དང༌། སྟོན་པ་ཉིད་ཀྱིས་ངེས་པ་དོན་གྱི་ལུང་གི་ཚོགས་ཀྱིས་མངོན་པར་བསྔགས་པའི་

བསྟན་སྐྱོང་ཆེན་པོ། ཕྱི་དང་ནང་གི་གཞུང་ལུགས་རྒྱ་མཚོའི་ཕ་རོལ་དུ་སོན་པའི་མཁས་པ་དང་གྲུབ་པའི་ས་ལ་གནས་ནས། སངས་རྒྱས་བཅོམ་ལྡན་འདས་ཀྱིས་ལེགས་པར་གསུངས་པའི་ཆོས་ཀྱི་ཕུང་པོ་ཇི་སྙེད་པའི་ཚིག་དང་དོན་གྱི་ཆ་རྣམ་
པར་འགྲེལ་པའི་བསྟན་བཅོས་དང༌། དེ་དག་གི་དགོངས་དོན་གསལ་བར་བྱེད་པ་བསྟན་བཅོས་ཆེན་པོ་རང་རྒྱུད་དུ་བརྩམས་པ་ལ་བསྙེངས་པ་མི་མངའ་བའི་དབང་དམ་པའི་ཕ་རོལ་ཏུ་སོན་པ། སྟོན་པ་ཉིད་ཀྱིས་ཕྱོགས་བཅུའི་སེམས་ཅན་གྱི་ཁམས་སུ་ཆོས་ཀྱི་སྣང་བ་མི་ནུབ་པར་བྱ་བའི་ཁུར་
ཡོངས་སུ་གཏད་པ། ཉོན་མོངས་པའི་བྲོ་ནད་ཀྱིས་ཀུན་ནས་གཙེས་པ་རྣམས་སྐྱོབ་པར་ངེས་པའི་ཆོས་ཀྱི་སྨན་པ་བླ་ན་མེད་པ། ཆོས་ཐམས་ཅད་ལ་འཇིགས་པ་མེད་པའི་སྨྲ་སྤོབས་ཕུན་སུམ་ཚོགས་པའི་ང་རོ་མཐོན་པོས་ལྟ་བ་ངན་པའི་རི་དྭགས་ཐམས་ཅད་རིང་དུ་འབྱེར་བར་བྱེད་
པ། མི་ཤེས་པའི་རབ་རིབ་སྟུག་པོས་རྣམ་པར་དཔྱོད་པའི་ལྟ་བྱེད་ལོང་བ་རྣམས་ཀྱི་དམིགས་བུར་གྱུར་པ། གདུལ་བར་བྱ་བའི་བློ་གྲོས་ཀྱི་ཀུ་མུ་དཱའི་དགའ་ཚལ་མཐའ་དག་ཅིག་ཅར་དུ་ཁ་འབྱེད་པར་བྱེད་པ་ཚིག་གི་འོད་དཀར་ཅི་ཡང་འཇོ་བ། གཙུག་ལག་རབ་འབྱམས་
ཀྱི་དོན་ལ་དཔྱོད་པའི་སྤྱན་ཡངས་པ། སྨྲ་བའི་དབང་ཕྱུག །སྨྲ་བའི་རྒྱལ་པོ། ཆོས་ཀྱི་གྲུ་དམ་པ། ཆོས་ཀྱི་སྦྱིན་བདག་ཆེན་པོ། རྨོངས་པ་ངེས་པར་འཇིགས་པ། སོམ་ཉིའི་དྲྭ་བ་གཅོད་པ། བདེན་པ་ཡང་དག་པར་སྟོན་པ། ཆོས་བཞིན་དུ་སྨྲ་
བའི་རྩོམ་པ་པོ་ཚད་མར་གྱུར་པ་རྣམས་ཀྱིས། བློ་དང་ལྡན་པའི་སྐྱེས་བུ་དམ་པ་རྣམས་ཀྱིས་བསླབ་པར་བགྱི་བའི་གནས། རིག་པའི་གཞུང་ལུགས་རྣམ་པ་ལྔ་ལས་བརྩམས་པའི་བསྟན་བཅོས་ཀྱི་རིགས་བསམ་གྱིས་མི་ཁྱབ་པ་ཞིག་བཞུགས་པ་ལས། འདིར་
བོད་གངས་ཅན་པའི་བརྡའི་ལམ་དུ་ཇི་སྙེད་ཅིག་བསྒྱུར་བ་རྣམས་སྔོན་གྱི་མཁས་པ་རྒྱ་ཆེན་ཆོས་ཀྱི་སྤྱན་དང་ལྡན་པ་རྣམས་ཀྱིས་ཕྱོགས་གཅིག་ཏུ་བསྡེབས་པར་བསྟན་བཅོས་འགྱུར་རོ་འཚལ་ཞེས་ཡོངས་སུ་གྲགས་པ་འདི་དག་སུ་ཞིག་གིས་གླེགས་བམ་དུ་འདྲི་བ་དང༌། ཉན་

བཤད་ལ་སོགས་པའི་རྒྱུན་ལ་བརྟེན་ནས། བཅོམ་ལྡན་འདས་ཤཱཀྱའི་རྒྱལ་པོའི་བསྟན་པ་རིན་པོ་ཆེ་འཇིག་རྟེན་གྱི་ཁམས་སུ་ཡུན་རིང་པོར་འཚོ་ཞིང་གཞེས་པའི་གསོས་སྨན་བླ་ན་མེད་པ་ཉིད་དུ་འགྱུར་བ་ལ་སོགས་པའི་དགོས་པ་དང་ཕན་ཡོན་དཔག་ཏུ་མེད་པའི་ལུང་དང་
རིགས་པའི་དག་བྱེད་ལྷའི་བུ་མོས་ཤིན་ཏུ་འཇེབས་པའི་ལྷུང་ལྷུང་གི་སྒྲ་སྙན་འབུམ་དུ་འབྱིན་བཞིན་པར་བླ་ན་མེད་པའི་བྱང་ཆུབ་ཏུ་རྩེ་གཅིག་པས་འདུན་པའི་སེམས་ཀྱི་རྒྱ་མཚོ་གང་ལ་མངའ་བ་དེ་ཉིད་དུ་གཞོལ་ཞིང་བབ་པ་ལ་བརྟེན་ནས་རྒྱ་ཆེན་སྤྱོད་པའི་ལེགས་བྱས་ཀྱི་རླབས་
ཕྲེང་གི་ལྕེ་ཞགས་སྲིད་པའི་རྩེ་མོའི་བར་དུ་ལུད་པར་འཕྱུར་བའི་ངོ་མཚར་གྱི་ལྟད་མོ་ཅི་ཡང་བྱུང་བ་ཉིད་དོ། །འདིར་སྨྲས་པ། <*མངོན་གནས་གསུམ་གྱི་གསལ་བྱེད་ལས་བྱ་བ་བརྗོད་བགོད་པའི་གསལ་བྱེད།>པར་སྦྲུལ་ལོ་ས་གཞི་ཆུ་གཏེར་ལས། །གདོན་པ་གང་ཚེ་ཁྱབ་འཇུག་ཕག་པའི་གཟུགས། །རྩོད་པའི་དུས་འདིར་རྒྱལ་བསྟན་བསྐྱོང་བའི་ཚེ། །
ཐུབ་པའི་ཕྲིན་ལས་དེ་ཡང་མི་བདག་ཚུལ། ༡ །<*བཻ་དརྦ་བའི་མཛེས་པ་བསྔགས་པ་ལ་སྦྱར་བ།>རིགས་རུས་གང་དུ་དྲན་དབང་གྲུབ་པའི་བདག །དཔའ་མཛངས་ལྡན་པ་སྔོན་གྱི་སྐྱེས་བུ་ཡིས། །འབབ་སྟེགས་བྱིན་གྱིས་བརླབས་པ་དེ་ནས་བཟུང༌། །ལྷ་བཞིན་འཇིག་རྟེན་
འདི་ན་བསྔགས་པ་ཐོབ། ༢ །<*སྲིད་མིན་གྱི་དཔེ།>ག་པུར་བཏུང་བ་ལ་བརྟེན་ཚ་བའི་ཡམས། །དཔལ་གྱི་དུམ་བུ་ལས་ནི་དྲི་ངན་བཞིན། །རིགས་ཀྱིས་མངོན་པར་མཐོ་བའི་སྐྱེ་བ་ལས། །མ་རབས་ཀུན་སྤྱོད་མི་འབྱུང་ཁྱད་པར་ཆོས། ༣ །<*ཀུན་དུ་ཕན་པར་བྱེད་པ།>སྙིང་བརྩེས་མངའ་འབངས་
ཐམས་ཅད་བདེ་བ་ལ། །འགོད་པའི་མི་བདག་མཆོག་ཅིག་འགྲོ་བ་འདིས། །སྨོན་ལམ་དབྱངས་སུ་ལེན་ཚེ་འཇིག་རྟེན་ཁམས། །ཀུན་དུ་ཕན་བྱེད་མཆོག་འདི་སྐལ་བས་ཐོབ། ༤ །བསོད་<*མཐའ་དག་གི་གཟུགས་ཅན།>ནམས་ཟླ་བ་ཚེས་པའི་འོད་འཐུང་བས། །སྔ་ན་མེད་པའི་
དགེ་མཚན་ཀུ་མུ་དཱའི། །འདབ་སྟོང་རབ་ཏུ་རྒྱས་པའི་ངོ་མཚར་གྱིས། །ཆབ་སྲིད་ཡངས་པའི་དགའ་ཚལ་མཛེས་པར་བྱས། ༥ །<*རབ་རྟོག་འདྲ་བའི་སྒྲ་ཅན།>ཨེ་མ་སྐབས་གསུམ་བདག་པོར་འོས་པའི་བུ། །ས་སྟེངས་རྒྱན་དུ་ཐོབ་པས་འཚེང་ངོ་ཞེས། །ནོར་འཛིན་

དགའ་བས་རང་ལུས་འདོད་པ་དགུའི། །འབྱུང་གནས་སྤྲུལ་པའི་དགའ་སྟོན་འགྱེད་པ་འདྲ། ༦ །<*ལྡན་པའི་གཟུགས་ཅན།>ལང་ཚོའི་མེ་ཏོག་དུས་སུ་དགོད་པ་དང༌། །འགྲོགས་པའི་ཡི་གེ་རྩིས་དང་འགྱེད་སྟོབས་དང༌། །འཕོང་སྐྱེན་ལྔ་དང་གེར་ལིང་རྩེན་པ་སོགས། །
སྒྱུ་རྩལ་བུང་བའི་རྩེ་འཇོ་ཅི་ཡང་བསྒྱུར། ༧ །<*རྐང་པ་བཞི་ཀའི་ཐོག་མར་ཡོད་པ་བར་ཆོད་པའི་ཟུང་ལྡན།>དགེ་བར་གོམས་པ་རྣམས་ཀྱི་བག་ཆགས་མཐུ། །དགེ་བའི་བཤེས་ཀྱིས་འཕེལ་བའི་ཚུལ་རྟོགས་ནས། །དགེ་བའི་བློ་གྲོས་ཤིང་རྟ་བཟུང་བ་དེས། །དགེ་བའི་འབྱུང་གནས་མང་པོ་སྐྱབས་སུ་ཐོབ། ༨ །<*ནང་ཤེས་བྱེད་ཀྱི་རྒྱུ།>ཁྱིམ་གྱི་ཉེས་
པ་དྲན་པས་བཞིན་གནག་པ། །ལང་ཚོ་ལས་བྱུང་གཏམ་ལ་མ་འཛུམ་ཞིང༌། །འདོད་ལྷའི་སྒྱུ་འཕྲུལ་ཀུན་དུ་མ་ཁུགས་པར། །ཚིགས་གསུམ་རིམ་པར་བཟླས་པའི་བརྟུལ་ཞུགས་བཟུང༌། ༩ །<*རྨད་བྱུང་གི་དཔེ།>སྦྲང་རྩིའི་བཅུད་བཟང་འཁྱིལ་
པའི་པདྨ་དཀར། །བསླབ་པའི་གནས་ཀྱིས་མཉེན་བྱས་ཉིད་ཡིན་ན། །སྲིད་ཞིའི་འབྱོར་པ་རྫོགས་པའི་སྡོམ་བརྩོན་གྱི། །ཞི་དུལ་ཡོན་ཏན་འཇལ་བའི་དཔེ་རུ་བྱེད། ༡༠ །<*སྦྱར་བའི་དཔེ་རྒྱན།>རིས་བྲལ་སེམས་ཅན་ཀུན་གྱི་རེ་བ་དག །བདེ་བར་འགེངས་པ་གང་གི་རིན་ཐང་ནི། །གཞལ་བར་ཆེས་
དཀའ་བྱང་ཆུབ་སེམས་དཔའ་ཡི། །ཚུལ་ཁྲིམས་དབང་གི་རྒྱལ་པོ་བཞིན་དུ་བཟུང༌། ༡༡ །<*བར་ཆོད་པའི་ཟུང་ལྡན།>རྡོ་རྗེ་འཆང་བ་ལས་བྱུང་ཆོ་ག་ཡིས། །རྡོ་རྗེའི་ཕོ་བྲང་མཆོག་ཏུ་ལེགས་བཅུག་ནས། །རྡོ་རྗེ་གསུམ་གྱི་བདག་ཉིད་སྨིན་བྱས་པའི། །རྡོ་རྗེའི་དམ་ཚིག་འཛིན་པའི་སྐལ་བས་བརྒྱན། ༡༢ །<*རྒྱུ་ལས་འབྲས་བུ་སྔ་བ་ཅན།>རྣམ་
འདྲེན་སྐྱེ་དགུའི་བླ་མ་ཉིད་དང་དེ་སྲས་ས་ལ་གནས་པའི་བདག་ཉིད་ཆེན་པོ་རྣམས། །ཞིང་རབ་སྦྱོང་དང་སེམས་ཅན་ཡོངས་སུ་སྨིན་པའི་སྤྱོད་པ་དཔག་མེད་བསྐལ་པའི་སྔོན་དུ་སྤྱད། །སླད་ནས་རང་གི་རྣམ་པར་འཕྲུལ་པས་གཞུང་ལུགས་ཀུན་གྱི་ཐོས་པ་མི་དམན་རྒྱུད་
ལ་བསགས། །རྩོད་པའི་དུས་སུ་དམ་པའི་ཆོས་ཚུལ་སྟོབས་ཀྱིས་སྐྱོང་བའི་དུས་ལ་བབ་ན་རྒྱལ་སྲིད་བྱེད། ༡༣ །<*དངོས་པོའི་དཔེ།>སྐབས་གསུམ་བདག་པོའི་སྟོབས་དང་འབྱོར་པ་དག །ས་ལ་འཕོས་ལྟའི་རྫོང་ཆེན་དྲུག་གསུམ་གྱིས། །མཚོན་པའི་བོད་ཆེན་སྤྱི་ཡི་རྗེ་བོ་རུ། །རྒྱུ་སྐར་

དབུས་སུ་རྒྱུ་སྐར་བདག་པོ་བཞིན། ༡༤ །<*འབྱོར་བ་རྒྱ་ཆེ་བ།>འདི་ཡི་རྐང་བཀོད་སྟེགས་བུ་ཀཉྩ་ནའི། །པ་དྲྭའི་གློག་གི་རྩེ་འཇོས་དམ་འཁྱུད་པའི། །ནོར་བུ་བརྒྱ་ཕྲག་འབར་བའི་མེ་ལོང་དུ། །ཕྱོགས་ཀྱི་ས་འཛིན་འདུད་པའི་བཞིན་རས་འཆར། ༡༥ །<*ཡན་ལག་གཅིག་པའི་གཟུགས་ཅན།>དེ་ན་ཀུན་དགའི་དཔལ་སྟེར་རྒྱལ་བའི་བསྟན། །སྲིད་པར་
བཅས་པའི་ཕྲིན་ལས་འཁོར་ལོ་ཡིས། །རྒྱ་མཚོའི་གོས་ཅན་ཡངས་པར་དབང་སྒྱུར་བའི། །སྡེ་བཞིའི་བདག་པོ་ཉིད་དུ་གནམ་གྱིས་བསྐོས། ༡༦ །<*བྱ་བ་ལྷན་ཅིག་བརྗོད་པ།>གང་ཚེ་མཆོག་གི་རྡོ་རྗེའི་སློབ་དཔོན་དང༌། །ལྷན་ཅིག་རྒྱལ་བ་སྲས་དང་སློབ་མར་བཅས། །འདུས་
པ་ཀུན་གྱི་སྲིད་ཞིའི་ཡ་མཚན་ནི། །རྟག་ཏུ་ཤིས་པའི་དབྱངས་སྙན་མགྲིན་པ་བསྒྲིགས། ༡༧ །<*བྱ་བ་བརྗོད་པ་བར་གྱི་གསལ་བྱེད།>དེར་དེའི་གནས་གསུམ་ལྷ་ཡི་སྐུ་གསུང་ཐུགས། །རྡོ་རྗེའི་རང་བཞིན་བསྒྲུབས་པའི་སྤྱི་བོ་ནས། །དབང་བསྐུར་རིགས་ཀྱི་ཅོད་པཎ་བཅིང་བ་ཡིས། །བདུད་ལས་
རྣམ་པར་རྒྱལ་བའི་གོ་འཕང་བྱིན། ༡༨ །<*རྣམ་པར་རྨོངས་པའི་དཔེ།>དེ་ཚེ་དཔལ་ལྡན་ས་ཡི་བདག་པོའི་དཔལ། །རྫོགས་ལྡན་འཁོར་ལོས་སྒྱུར་དུ་རྣམ་འཁྲུལ་ཏེ། །བི་ཤྭ་ཀརྨས་དགྲ་ལས་རྒྱལ་བྱེད་པའི། །འཁོར་ལོ་རིན་ཆེན་བྱིན་པའི་ཤེས་པ་བསྒྲུབས། ༡༩ །<*རབ་རྟོག་གི་དཔེ།>གང་བསམས་ཡིད་བཞིན་
འཇོ་བ་ཁྱོད་ཀྱི་དཔེ། །ང་ཉིད་འོས་སྙམ་དེ་ཚེ་ལག་པ་ན། །བཞག་པའི་ནོར་བུ་རིན་ཆེན་ཅི་ལ་རྒྱགས། །དཔལ་དེ་དཔག་བསམ་ཡོངས་འདུ་ལ་ཡང་ཡོད། ༢༠ །<*ཀུན་ཕན།>སྡོམ་བརྩོན་མི་ཡི་བདག་པོར་མི་འདུད་པའི། །ཕྱོགས་བྲལ་ཁེངས་པ་ལྡན་པའི་སྐྱེ་བོའི་
ཚོགས། །དབང་བྱེད་མིག་ཟུར་འཁྱོག་པོས་འདེབས་པ་ཡི། །གྲོགས་སུ་བཙུན་མོ་རིན་ཆེན་འཛུམ་ཞིང་བྱུང༌། ༢༡ །<*བྱ་བའི་རང་བཞིན་བརྗོད་པ།>བགྱི་བ་ཀུན་ལ་སྒྲིན་ཅིང་ཡིད་རབ་གཞུང༌། །གྲུངས་པའི་མིག་ལམ་དེ་རུ་ལྐོག་ན་མོའི། །དབྱིག་གི་རྣམ་པ་མི་མཐོང་འགའ་ཡང་མེད། །འདོད་དོན་སྒྲུབ་པའི་
བློན་པོ་རིན་ཆེན་མང༌། ༢༢ །<*ངག་དོན་གྱི་དཔེ་ལས་བཞིན་སྒྲ་གཅིག་པ།>གཟུགས་མཛེས་ཡན་ལག་རྫོགས་པའི་གོམ་ལྷོད་ཀྱིས། །བསམས་པའི་གནས་སུ་མྱུར་སྐྱེལ་གཉིས་ལས་འཐུང༌། །སྟོན་ཀའི་སྤྲིན་དཀར་གཡོ་བའི་ཕུང་པོ་ལ། །ཉི་གཞོན་འོད་ཀྱིས་འཁྱུད་བཞིན་མངོན་པར་རྒྱུ། ༢༣ །

<*སྲིད་པ་ཅན།>འགྲས་པ་མེད་པར་དབང་སྔོན་རི་དང་འཐབ། །སྙིང་གྲོགས་མིན་ཡང་རླུང་དང་ལྷན་ཅིག་རྩེ། །བསླུ་འདོད་མེད་པར་ཀུན་གྱི་ཡིད་འཕྲོག་པའི། །རྔ་རྔོག་ཟར་བུ་གཡོ་བའི་ཅང་ཤེས་རྟ། ༢༤ །<*གཟི་བརྗིད་ལྡན་པ།>དཔའ་རྟུལ་ཡན་ལག་མཆོག་གི་ལང་ཚོ་ཡིས། །ཁེངས་ལྡན་རལ་གྲི་བསྐྱོད་པའི་
དམག་དཔོན་འདིས། །ཉེས་བྲལ་སྐྱེ་བོ་གཞོམ་པའི་དོགས་པ་མེད། །སྡང་སེམས་འཆང་བ་མིན་རྣམས་རྗེས་སུ་སྲུང༌། ༢༥ །<*ཉམས་ལྡན་ལས་དཔའ་བའི་ཉམས་དང་ལྡན་པ།>འཆི་མེད་དཔལ་འབྱོར་ལ་སྡང་ལྷ་མ་ཡིན། །བསད་པ་ཁྲག་གིས་ས་གཞི་མ་བརླན་པར། །ཀུན་ལས་རྒྱལ་བའི་དཔའ་མཚན་བཀྲ་
ཤིས་རྟགས། །རྣམ་བརྒྱད་མཆོད་པའི་ཡུལ་དུ་གྱུར་འདི་ཅི། ༢༦ །<*རབ་སྤེལ་གྱི་རྒྱན།>ཤཱཀྱའི་སྐྱེས་མཆོག་དེ་ཡི་བྱིན་རླབས་ཀྱིས། །འབབ་སྟེགས་ལེགས་པར་བྱས་པའི་རྫས་མཆོག་བརྒྱད། །ཤིས་པ་བརྗོད་པའི་གླུ་དང་མཉམ་འགྲོགས་པས། །ལུགས་བརྒྱའི་མདུན་ས་ཆེ་
ལ་མངའ་གསོལ་ཏོ། ༢༧ །<*གཽ་ཌ་བའི་མཛེས་པ་བསྔགས་པ་ལ་སྦྱར་བ།>དཀར་མིན་ངག་གི་ཉེས་པ་ཟད་པའི་བཀའ། །ཤིས་པ་ཡང་དག་བསྒྲུབས་པའི་ཉིན་མོ་ནས། །མི་བདག་གང་གི་དགེ་བའི་ཕྲིན་ལས་ནི། །ནམ་མཁའི་ཕ་རོལ་བགྲོད་པའི་བཀྲ་ཤིས་ཕྱུག ༢༨ །<*བྱ་བ་ལྷན་ཅིག་བརྗོད་པ།>འགྲོ་བ་ཐམས་ཅད་བདེ་དང་བདེ་བའི་རྒྱུར། །དགོད་པའི་སྙིང་
སྟོབས་བརླིང་བར་བཟུང་བ་དང༌། །ལྷན་ཅིག་ཤར་ཕྱོགས་གོང་མའི་ལས་ལུང་གིས། །ལན་མང་དག་ཏུ་རྡོ་རྗེའི་ཁམས་སུ་བསྒྲུབས། ༢༩ །<*ལྡན་པའི་གཟུགས་ཅན།>དཀའ་ལུང་ཟླ་འོད་གསར་པའི་ཟེར་གྱི་ཕྲེང༌། །ཕྱོགས་བྲལ་ས་གཞི་སྐྱོང་བ་གཞན་དང་དེའི། །ཆབ་འབངས་བཅས་པའི་
བདེ་སྐྱིད་ས་མོས་ཚལ། །འདབ་སྟོང་རྣམ་པར་བཞད་པའི་བཅུད་དུ་འཐུང༌། ༣༠ །<*ཆོས་དཔེ།>རྟག་ཏུ་གུས་པས་བསྟེན་དང་དམ་ཚིག་ཆུ། །འཐུངས་པ་རྗེས་སུ་དྲན་པས་མཉམ་འགྲོགས་ཤིང༌། །མཐུན་པ་བསྒྲུབ་དང་བར་ཆད་བསྒྲལ་བ་ཡི། །ལས་ལ་ཡིད་ལྟར་མགྱོགས་པ་སྲུང་མའི་ཚོགས། ༣༡ །<*དྲག་ཤུལ་གྱི་ཉམས།>རབ་ཁྲོས་སྡང་
མིག་བལྟ་བའི་འགྱུར་བ་རེས། །བསྟན་དགྲའི་དོན་སྙིང་དམར་པོ་རང་གནས་སུ། །སྐད་ཅིག་གཉིས་པར་མི་ཚུགས་ཁ་ཡི་སྒོར། །ཁྲག་གི་དབའ་རླབས་རྩེ་ན་འཕེན་པར་བྱེད། ༣༢ །<*རིག་བྱེད་ཀྱི་གཏམ་རྒྱུད་ལས་དྲངས་པའི་ཁྱད་པར་ལ་གནས་པའི་དོན་གཞན་བཀོད་པ།>སྙིང་རྗེའི་བདག་ཉིད་རང་དོན་སྒྲུབ་པ་ཡི། །ཟོལ་གྱིས་

འགྲོ་བ་ཀུན་ལ་ཕན་པ་བརྩོན། །རྒྱལ་པོ་སྐལ་ལྡན་ཤིང་རྟའི་དཀའ་སྤྱད་ཀྱིས། །གངྒཱ་མི་ཡུལ་ཕབ་པ་བདག་དོན་ནམ། ༣༣ །<*མཚུངས་པ་གསལ་བྱེད་ཀྱི་སྒྲ་གཞུང་གིས་ཟིན་པའི་དཔེ།>གང་ཕྱིར་ལྗོངས་འདིས་མཚོན་པའི་སྐྱེ་བོའི་ཚོགས། །རྒྱ་མཚོའི་རྡུལ་གྱི་གྲངས་ལ་འཕྱ་བ་ཡི། །མགོན་དུ་དཔལ་དང་ལྡན་པ་སྟོབས་བཅུ་པའི། །ཆོས་ཀྱི་རྒྱལ་
སྲིད་སྐྱོང་གིས་མཛེས་པར་བྱས། ༣༤ །<*རིམ་པ་ཅན་གྱི་རྒྱན།>མངོན་པར་འདོད་པའི་འབྲས་བུ་ཆོས་དང་དབྱིག །འདོད་པ་ཐར་པ་སྡེ་བཞིའི་དགེ་མཚན་རྣམས། །བསྐལ་པའི་ཆར་དང་ཆུ་གཏེར་དཔག་བསམ་ཤིང༌། །འབྲས་བུ་ཕུན་ཚོགས་དཔྱིད་ཀྱི་དཔལ་ལ་སྙེགས། ༣༥ །<*རྒྱུ་འགོག་པ།>ཁྱོད་ཉིད་
སྦྱིན་པའི་གནས་གྱུར་ཐམས་ཅད་ཀྱི། །དཔལ་ཀུན་འབྱུང་བའི་གནས་སུ་ངེས་ན་ཡང༌། །རིང་ནས་སེམས་ཅན་ཀུན་གྱི་ཉེར་འཚོ་རུ། །འགྱུར་བའི་སྨོན་ལམ་བཏབ་ཕྱིར་སུ་ཞིག་བསྟོད། ༣༦ །<*སེམས་མེད་རབ་རྟོག>སྦྱིན་པ་རྣམས་བཞིའི་དངོས་པོའི་རང་དབང་དུ། །འཛིན་པའི་ཐག་པ་ཆད་པས་ཆེས་
འཐོར་བ། །རྗེས་སུ་འཚོལ་ལ་ཁྱོད་ཀྱི་གྲགས་པ་དེས། །ཕྱོགས་བཅུ་ཀུན་དུ་རྒྱུག་པས་བྲེལ་ལམ་སྙམ། ༣༧ །<*ངོ་མཚར་ཕུལ་བྱུང༌།>ཐུབ་བསྟན་རིང་དུ་གནས་བྱེད་མི་བདག་གི །ཆོས་དྲིན་རྣམ་པར་བརྡལ་བའི་དཀྱིལ་འཁོར་འདི། །རྫོགས་པར་ཆུད་པའི་སྟོང་གསུམ་མི་མཇེད་ཞིང༌། །བྱེད་པ་པོ་དེའི་སྙིང་སྟོབས་ཨེ་མ་ཆེ། ༣༨ །མི་རྣམས་
ནོར་ནི་ཕལ་ཆེར་བུང་བའི་དཔལ་བཞིན་བསགས་ལ་རང་ཡང་སྤྱད་པའི་སྐལ་བ་ཕྲ། །ཕལ་ཆེར་སྙིམ་པར་གནས་པའི་ཆུ་བཞིན་ཇི་ཙམ་བཙིར་བ་དེ་ཙམ་འཛད་ལ་ཤིན་ཏུ་ཉེ། །འདི་ཡི་དཔལ་ནི་རིན་ཆེན་གསེར་བཞིན་བསོད་ནམས་འབབ་སྟེགས་དམ་པའི་རྟེན་གསུམ་འགྲུབ་བྱེད་དང༌། །དག་དང་མ་སྦྱར་བའི་དགེ་
དག་སྦྱིན་པའི་ཞིང་གྱུར་ཀུན་གྱི་ནོར་མཆོག་མི་ཟད་གྲགས་པ་འཕེལ་ཕྱིར་གནས། ༣༩ །ཐམས་ཅད་མཁྱེན་པ་ཆེན་པོ་ཉི་མའི་གཉེན་གྱི་བཀའ་ལུང་སྤྱི་དང་བྱེ་བྲག་གི་དགོངས་དོན་རྣམ་པར་འགྲེལ་པའི་བསྟན་བཅོས་གངས་ཅན་པའི་སྐད་དུ་འགྱུར་རོ་འཚལ་གྱི་ཆོས་སྦྱིན་རྒྱུན་མི་ཆད་པའི་ངོ་མཚར་འཕྲུལ་གྱི་ཕྱི་མོ་
རྫོགས་ལྡན་བསྐལ་པའི་བསོད་ནམས་ཀྱི་སྤྲིན་ཕུང་རྒྱས་པར་དཀྲིགས་པའི་ཚུལ་ལས་བརྩམས་པའི་གཏམ་ངོ་མཚར་ཆུ་གཏེར་འཕེལ་བའི་ཟླ་བ་གསར་པ་ལས། བསྟན་པ་གནས་པའི་ཆེད་དུ་དགོངས་འགྲེལ་པར་དུ་བསྒྲུབ་པར་བསྐུལ་བའི་སརྒ་སྟེ་ལྔ་པའོ།། །།

༄༅། །ཀལྤསྱཙིརཱམྦུཔེཡམརྷཥྱཱཤྭཱསཱགཏཡཱབཏཿཀཐཱརྵེཿཀཱཔྱཔཏིབྷཱནཤཱསནེམཾཀཱརྻཾཀྲྀནྣརཔཏྱནེནསཾཛྙཿ།
༄༅། །<*མཆོག་གི་ངེས་པར་བསྟན་པ།>སྐལ་པའི་སྲིད་དུ་བཏུང་བར་འོས་པའི་ཆབ། །ཇི་སྙེད་རྀ་ཥིའི་ཧུབ་ཏུ་སོང་བའི་གཏམ། །བསྟན་པ་འདི་ལ་སུས་ཀྱང་མ་སྤོབས་པའི། །བྱ་བ་མི་བདག་འདི་ཡིས་སྒྲུབ་པ་སྟོན། །

<*བྱ་བའི་རང་བཞིན་བརྗོད་པ།>ཀུན་དུ་དགའ་བའི་དཔལ་སྟེར་དཀོན་མཆོག་གསུམ། །སྐྱབས་ཀྱི་དམ་པར་བརྙེས་པའི་བརྟུལ་ཞུགས་ཀྱི། །མཆོག་གསུམ་དགྱེས་པའི་ཕྲིན་ལས་རྒྱ་མཚོ་ཡི། །སྐ་རགས་ལྡན་པ་མཛེས་བྱེད་སྡེ་བཞིའི་བདག །དེས་ནི་སེམས་ཅན་བྱང་ཆུབ་གནས་འདོང་བའི། །ཐེག་པ་མི་
བསླུ་ངེས་པ་དམ་པའི་ཆོས། །མཆོག་ཏུ་ལེགས་པར་རྟོགས་པའི་བློ་གྲོས་ཀྱིས། །ལེགས་བྱས་འདི་ཡི་སྒོ་འཕར་འབྱེད་ལ་ཞུགས། །<*ངག་དོན་གྱི་དཔེ།>ཟླ་གཞོན་ཟེར་གྱིས་ཆུ་ཡི་གཏེར་བཞིན་དང༌། །མི་སྦྱིན་སྐྱེས་ཀྱིས་པདྨའི་ཚལ་ལ་བཞིན། །གཏོང་བ་འདི་ཡི་ཕན་ཡོན་བསམ་ཡས་
ཀྱིས། །མི་བདག་དེ་ཡི་བློ་གྲོས་མཛེས་པར་བྱས། །<*ཡན་ལག་གཅིག་པའི་གཟུགས་ཅན།>ཐུབ་པའི་བསྟན་པ་ཇི་སྲིད་གནས་བར་ལ། །ཆོས་ཀྱི་སྦྱིན་པ་མི་ཟད་འབྱུང་བའི་མ། །གང་ལ་པར་ཞེས་བྱ་བ་ཐ་སྙད་དུ། །འཕྲིན་ཡིག་གསལ་བ་ཕྱོགས་ཀྱི་མཁས་པས་བྲིས། །<*བཞི་གའི་ཐོག་མར་ཡོད་པ་ཆོད་པའི་ཟུང་ལྡན།>མི་མཆོག་ཆོས་ཀྱི་མཆོད་སྡོང་བླ་ན་མེད།
མི་དགེའི་མཚན་རིས་དབེན་པའི་ཡུལ་དུས་སུ། །མི་མཁས་བྲལ་བའི་གྲོགས་དང་གཏོང་པ་ཡིས། །མི་མཐུན་ཕྱོགས་ལས་རྒྱལ་བ་ཉིད་དུ་བསྒྲུབས། །<*རྣམ་པར་རྨོངས་པའི་དཔེ།>ཡ་མཚན་གཏམ་དུ་གླེང་ལ་དབྱངས་ཅན་མ། །འདི་ན་མཆིས་ཞེས་བྱིས་
པའི་བློ་འཁྲུལ་ཏེ། །རྒྱུད་མང་སྒྲ་དང་བསྲེས་པའི་ཆོས་འཆད་པ། །བལྟ་འདོད་འདི་ན་ཡང་དང་ཡང་རྒྱུའོ། །སྤྱི་དོན་དྲུག་པ་བསྐུལ་བ་མི་ལྡོག་ཆེད་དུ་ཇི་ལྟར་པར་དུ་བསྒྲུབ་པ་ལ། གང་དུ་བསྒྲུབ་པའི་ཡུལ་གྱི་ཁྱད་པར། ནམ་ཞིག་བསྒྲུབ་པའི་དུས་
ཀྱི་ཁྱད་པར། ཇི་ལྟར་བསྒྲུབ་པའི་ལས་ཀྱི་འཁོར་ལོ་དང་གསུམ་ལས། དང་པོ་ནི་སྤྱིར་འཕགས་མཆོག་འཇིག་རྟེན་དབང་ཕྱུག་གི་གདུལ་ཞིང༌། བསིལ་ལྡན་སྟོན་དུས་ཟླ་བ་ཞུན་མའི་ཚོན་གྱིས་ལན་བརྒྱར་བྱུགས་པ་ལ་ཅོ་འདྲིར་བྱེད་པའི་ཁ་བའི་རྡུལ་དཀར་གྱི་ཕྲེང་བ་བརྩེགས་པའི་ས་
འཛིན་གྱི་རྭ་བས་ཡོངས་སུ་བསྐོར་བའི་བོད་ཁ་བ་ཅན་གྱི་རྒྱལ་ཁམས་ཏེ། དེའང་མདོ་སྡེ་པདྨ་དཀར་པོ་ལས། སྟོན་པ་འོད་མའི་ཚལ་ན་བཞུགས་པའི་དུས་ན། སྨིན་མཚམས་ཀྱི་མཛོད་སྤུ་ལས་འོད་ཟེར་ཁ་དོག་ལྔ་འཕྲོས་ཏེ། བྱང་ཕྱོགས་ཁ་བ་ཅན་གྱི་རྒྱལ་ཁམས་ལ་སོང༌། དེར་གཟིགས་

ཏེ་ཞལ་འཛུམ་མཛད་པས་བྱང་ཆུབ་སེམས་དཔའ་སྒྲིབ་པ་རྣམ་པར་སེལ་བས་དེའི་རྒྱུ་རྐྱེན་བཤད་དུ་གསོལ་ཞེས་ཞུས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དུས་གསུམ་གྱི་སངས་རྒྱས་གང་གིས་ཀྱང་གདུལ་བྱར་མ་གྱུར་པའི་གནས།
འདྲེ་སྲིན་དུ་མས་གང་བའི་མཐའ་འཁོབ་ཁ་བ་ཅན་གྱི་རྒྱལ་ཁམས་དེར། མ་འོངས་པའི་དུས་སུ་དམ་པའི་ཆོས་ཉི་མ་ཤར་བ་ལྟ་བུ་ཞིག་དར་ཞིང་རྒྱས་པར་འདུག་སྟེ། སེམས་ཅན་དེ་རྣམས་ཀྱང་ཐར་པ་བྱང་ཆུབ་ཀྱི་ལམ་ལ་འགོད་པར་འགྱུར་རོ། །མཐའ་འཁོབ་དེ་འདུལ་བའི་གཉེན་
པོ་ནི་འཕགས་པ་སྤྱན་རས་གཟིགས་ཡིན་ནོ། །དེ་གང་ཞེ་ན། འཕགས་པ་སྤྱན་རས་གཟིགས་དབང་ཕྱུག་དེས། སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། སངས་རྒྱས་སྟོང་གི་སྤྱན་སྔར་སྨོན་ལམ་བཏབ་སྟེ། བདག་གིས་དུས་གསུམ་སངས་རྒྱས་གང་གིས་ཀྱང་ཞབས་ཀྱིས་མ་
བཅགས་པའི་གནས། མཐའ་འཁོབ་ཁ་བ་ཅན་གྱི་རྒྱལ་ཁམས་ལ་ཡོད་པའི་སེམས་ཅན་གདུལ་དཀའ་བ་དེ་རྣམས་ཐར་པ་བྱང་ཆུབ་ཀྱི་ལམ་ལ་འགོད་པར་གྱུར་ཅིག མཐའ་འཁོབ་དེ་ཡང་བདག་གིས་འདུལ་བའི་ཞིང་དུ་གྱུར་ཅིག །བདག་འདྲེ་སྲིན་ལ་སོགས་པའི་སེམས་
ཅན་དེ་དག་གི་ཕ་མ་ལྟ་བུར་གྱུར་ཅིག །འགྲོ་བ་སྒྲོལ་བའི་དེད་དཔོན་ལྟ་བུར་གྱུར་ཅིག །མུན་པ་སེལ་བའི་སྒྲོན་མེ་ལྟ་བུར་གྱུར་ཅིག །དུས་གསུམ་སངས་རྒྱས་ལ་སོགས་པ་དེ་བཞིན་གཤེགས་པ་ཐམས་ཅད་ཀྱིས་གསུངས་པའི་ཆོས་ཐམས་ཅད་མཐའ་འཁོབ་ཀྱི་ཡུལ་དེར་དར་
ཞིང་རྒྱས་ལ་ཡུན་རིང་དུ་གནས་པར་གྱུར་ཅིག །སེམས་ཅན་དེ་རྣམས་ཀྱིས་དཀོན་མཆོག་གསུམ་གྱི་མཚན་ཐོས་ཏེ་སྐྱབས་སུ་སོང་ནས། བདེ་འགྲོ་མཐོ་རིས་ཀྱི་ལུས་ཐོབ་སྟེ། དམ་པའི་ཆོས་ལ་ལོངས་སྤྱོད་པར་གྱུར་ཅིག་ཅེས་སྨོན་ལམ་བཏབ་པར་བཤད་པ་དང༌། ཟ་མ་
ཏོག་བཀོད་པའི་མདོའི་འཁོར་ལོ་ཐ་མ་ལས། སྟོན་པ་མྱ་ངན་ལས་འདའ་བར་ཉེ་བའི་ཚེ། བྱང་ཕྱོགས་ཁ་བ་ཅན་གྱི་རྒྱལ་ཁམས་ཞབས་ཀྱིས་མ་བཅགས། གསུང་གིས་མ་བསྐྱངས་པ་འདི་རྣམས་ཀྱི་དོན་དུ་བཞུགས་པར་ཞུ་ཞེས་གསོལ་བས། བཅོམ་ལྡན་འདས་ཀྱི་ཞལ་ནས།

ངའི་གདུལ་བྱ་ནི་རྫོགས་པ་ཡིན། ད་གདུལ་བྱར་གྱུར་པ་མེད་པས་ལེ་ལོ་ཅན་རྣམས་ཆོས་ལ་བསྐུལ་བ་དང༌། རྟག་པར་སུན་འདོན་པའི་ཕྱིར་མྱ་ངན་ལས་འདའ་བའི་ཚུལ་སྟོན་ནོ། །བྱང་ཕྱོགས་ཁ་བ་ཅན་གྱི་རྒྱལ་ཁམས་ཀྱི་སེམས་ཅན་ནི་ད་ལྟ་དུད་འགྲོར་སོང་བས་སེམས་ཅན་
མིའི་མིང་མེད་དོ། །མུན་པ་མུན་ནག་ཏུ་གྱུར་པ། ཤི་བ་ཐམས་ཅད་ཀྱང་མི་ལྡོག་པ། མཚོ་ལ་ཁ་བ་བབས་པ་བཞིན་དུ་ངན་འགྲོའི་འཇིག་རྟེན་དུ་འགྲོ་བ་ཡིན་པས། མ་འོངས་པའི་དུས་ན་ངའི་བསྟན་པ་མར་འགྲིབ་ཀྱི་དུས་སུ། བྱང་ཆུབ་སེམས་དཔའ་ཁྱོད་ཉིད་ཀྱི་གདུལ་བྱར་འགྱུར་
གྱིས། ཐོག་མར་བྱང་ཆུབ་སེམས་དཔའི་སྤྲུལ་པས་མིའི་འགྲོ་བ་བསྐྱེད། དེ་ནས་ཟང་ཟིང་གིས་བསྡུས། དེ་ནས་ཆོས་ཀྱིས་བསྡུས། འགྲོ་བའི་དོན་དུ་འགྱུར་རོ་ཞེས་དང༌། ཇོ་བོ་རྗེ་ལྷ་གཅིག་རྡོ་རྗེ་གདན་གྱི་ནུབ་ཕྱོགས་ན་འོད་དཔག་མེད་པའི་ལྷ་ཁང་ཞིག་ཡོད་པའི་ནང་དུ་
བྱམས་སྙིང་རྗེ་བྱང་ཆུབ་ཀྱི་སེམས་བསྒོམ་ཞིང་བཞུགས་པ་ན། འཕགས་པ་སྤྱན་རས་གཟིགས་ཀྱིས་ཞལ་མངོན་སུམ་དུ་བསྟན་ནས། སྐྱེས་བུ་དམ་པ་ལེགས་སོ་ལེགས་སོ། །དུས་གསུམ་གྱི་སངས་རྒྱས་ཐམས་ཅད་ཀྱི་གསང་བའི་མཛོད་གང་ཡིན་པ་དེ་ཁྱོད་ཀྱིས་ཤེས་སམ། འདི་
ནས་བྱང་ཕྱོགས་ན་ངའི་ཞིང་ཁམས་ཡོད། ཁྱོད་ཀྱི་ཡི་དམ་སྒྲོལ་མ་ཡང་དེ་ན་སེམས་ཅན་གྱི་དོན་མཛད་ཅིང་བཞུགས། གདུལ་བྱ་མང་པོ་ཡང་དེ་ན་ཡོད་པས་བྱང་ཕྱོགས་སུ་སོང་ཤིག་ཅེས་བྱ་བ་ལ་སོགས་པའི་བོད་ཀྱི་ཡུལ་འདིར་འཕགས་པ་སྤྱན་རས་གཟིགས་ཀྱི་འདུལ་ཞིང་ཡིན་པར་
ལུང་གིས་བསྟན་ཅིང་དངོས་སུ་གྲུབ་པ་འདི་ནི། བདེ་མཆོག་ཉུང་ངུ་ལེའུ་ལྔ་བཅུ་རྩ་གཅིག་པ་ལས། བོད་ཀྱི་ཡུལ་དང་དེ་བཞིན་དུ། །མ་ལ་ཝ་དང་པུལླི་སོགས། །ཉི་ཤུ་རྩ་བཞིའི་ཡུལ་ཡིན་ནོ། །ཞེས་པ་ཉི་ཤུ་རྩ་བཞིའི་ཡུལ་གྱི་གསུང་གི་འཁོར་ལོའི་ནང་ཚན་དུ་བཤད་པ་དང༌།
ཀྱེ་རྡོ་རྗེ་ལས་གནས་དང་ས་སྦྱར་བའི་བཅུ་གཉིས་པར་བཤད་ཅིང༌། རྡོ་རྗེ་མཁའ་འགྲོའི་རྒྱུད་ལས། བོད་ཡུལ་དུ་ནི་ལྷན་སྐྱེས་ཏེ། །ཞི་ཞིང་གསལ་བའི་གཟུགས་ཅན་མ། །ཆུ་སྲིན་རྒྱལ་མཚན་ལག་ན་ཐོགས། །བྲག་གི་ཁྱིམ་ལ་བརྟེན་ཏེ་གནས། །རང་བྱུང་གི་ནི་སྐྱེ་གནས་ཅན། །

ཞེས་དང༌། ལྷ་མོ་དྲི་མ་མེད་པས་ཞུས་པའ