Luận tạng Tây Tạng (Tengyur) — Tập 213

 །ཚེ་འདི་ཉིད་ལ་སྟེར་བར་བྱེད། །རྟག་ཏུ་རང་གི་དམ་ཚིག་བསྲུང༌། །རྟག་ཏུ་དེ་
བཞིན་གཤེགས་པ་མཆོད། །རྟག་ཏུ་བླ་མ་ལ་ཡང་དབུལ། །འདི་ནི་སངས་རྒྱས་ཀུན་དང་འདྲ། །མི་ཟད་དེ་ཉིད་འདོད་པ་ཡིས། །ཅུང་ཟད་ཡིད་འོང་གང་དང་གང༌། །ཤིན་ཏུ་ཁྱད་པར་གྱུར་པ་ཉིད། །དེ་དང་དེ་ནི་བླ་མ་སྦྱིན། །དེ་བྱིན་སངས་རྒྱས་ཐམས་ཅད་ལ། །རྟག་ཏུ་བྱིན་པ་ཉིད་དུ་འགྱུར། །དེ་
བྱིན་བསོད་ནམས་ཚོགས་ཡིན་ཏེ། །ཚོགས་ལས་དངོས་གྲུབ་མཆོག་ཏུ་འགྱུར། །ཞེས་བྱ་བ་ལ་སོགས་པ་རྒྱུད་སྡེ་རིན་པོ་ཆེ་རྣམས་ནས་བརྗོད་བྱའི་གཙོ་བོ་ལྟར་བསྟན་ཅིང༌། སྐལ་བར་ལྡན་པའི་གང་ཟག་རྣམས་ལ་རྗེས་སུ་གདམས་པ་རྣམས་གང་གི་ཐུགས་ཉམས་སུ་བསྟར་ནས། འདིར་མཁན་
ཆེན་ཐམས་ཅད་མཁྱེན་པ་དཔལ་ལྡན་ཆོས་སྐྱོང་བཀྲ་ཤིས་གྲགས་པའི་རྒྱལ་མཚན་དཔལ་བཟང་པོ་ཞེས་བྱ་བ། ལྷ་དང་བཅས་པའི་སྐྱེ་དགུ་མ་ལུས་པའི་ཐོར་ཚུགས་རྣམ་པར་སྤྲ་བའི་རྒྱན་དུ་བཞུགས་པ་ལ་ཕྱོགས་རེས་ཐོབ་ཤོར་དུ་འགྱུར་བའི་སྐབས་ཅི་ཞིག །འོན་ཀྱང་སྔོན་གྱི་སྨོན་ལམ་བཟང་

པོའི་གྲོགས་པོ་མཛའ་གཅུགས་དམ་པ་དེ་ནི་སུས་ཀྱང་བསླུ་རུ་མེད་པ་ཆོས་ཉིད་དེ། དེའང་འདི་ལྟར། རྗེ་བཙུན་ཆེན་པོ་དེ་ཉིད་ནི་སྡོམ་བརྩོན་སྐྱེ་དགུའི་བདག་པོ་འདི་དང་སྐྱེ་བ་ནས་སྐྱེ་བར་མཆོད་ཡུལ་དང་སྦྱིན་བདག་གི་ཚུལ་ལམ། སློབ་དཔོན་དང་སློབ་མའི་ཚུལ་གྱིས་ཉི་ཟླ་ཟུང་འབྲེལ་བཞིན་དུ་
མི་འབྲལ་བར་བྱང་ཆུབ་སྤྱོད་པའི་སྨོན་ལམ་གྱི་ཁྱད་པར་ནི་དོན་ཡོད་ཞགས་པ་ལྟ་བུས་ལེགས་པར་སྦྲེལ་བར་བརྟེན། དེང་གི་དུས་སུའང་ལྗོངས་འདིའི་སྐྱེ་འགྲོ་སྤྱིའི་བསོད་ནམས་ཀྱི་ཞིང་དུ་སྤྱན་འདྲེན་ཇི་ལྟར་གསོལ་བ་བཞིན་དུ་ལེགས་པར་ཞུགས་པའི་དགའ་སྟོན་གྱི་འབུལ་བ་སྟོབ་པའི་ཕྱིར་
རྗེ་བཙུན་དམ་པ་ཉིད་ལ་སྐབས་དབྱེ་བའི་ཆེད་དུ། མི་བདག་ཆེན་པོའི་ཞལ་ལས་འདི་སྐད་དུ་མཆིད་པ་ཐོས་ཏེ། རྗེ་བཙུན་དམིགས་པ་མེད་པའི་ཐུགས་རྗེའི་བདག་ཉིད་ཅན་ནི། ཁམས་གསུམ་གྱི་འགྲོ་བ་མ་ལུས་པའི་དཔལ་དམ་པར་གྱུར་པའི་ཆོས་ཀྱི་རྒྱལ་པོ། ཆོས་ཀྱི་དབང་ཕྱུག །
ཆོས་ཀྱི་འབྱུང་གནས། ཆོས་ཀྱི་སྒྲོན་མེ་ཆེན་པོ་ཉིད་དུ་བཞུགས་བཞིན་པ་ནས། གུས་ལྡན་ཁོ་བོ་ཅག་གི་ལྷག་བསམ་གྱི་རྫིང་བུའི་ནང་ནས་བྱུང་བའི་སྤྱན་འདྲེན་པར་གསོལ་བ་འདེབས་པའི་ཚིག་གི་པདྨ་དཀར་པོའི་ཕྲེང་བ་ནན་ལྟར་བརྒྱུས་པའི་ཚུལ་ལ་ཐུགས་བརྩེ་བས་རྗེས་སུ་དགོངས་ཏེ།
བཤུལ་རིང་ལམ་གྱི་ངལ་བ་དུ་མ་ཁྱད་དུ་བསད། སྙིང་རྗེ་ཆེན་པོའི་ཤིང་རྟའི་འཁྲུལ་འཁོར་ནི་ལེགས་པར་བསྐོར། དེང་གི་དུས་ན་བདག་ཅག་ལྟོས་དང་བཅས་པའི་བསོད་ནམས་ཀྱི་ནམ་མཁའ་ཡངས་པའི་རྒྱན་དུ་ལེགས་པར་བྱོན་པའི་བཀའ་དྲིན་གྱི་ཕུང་པོ་འདི་ཀོ་གལ་ཏེ་གཟུགས་ཅན་ཉིད་
དུ་བྱར་བཏུབ་ན། སྟོང་གསུམ་གྱི་སྟོང་ཆེན་པོའི་མི་མཇེད་འཇིག་རྟེན་ཁམས་ཀྱི་སྣོད་ཀྱང་ཡངས་པོ་མ་ཡིན་པའི་གྲགས་པ་བྱུང་དུ་དོགས་པ་ཅི་སྟེ་མི་མཆི། དེས་ན་དེ་ལྟ་བུའི་སྐུ་དྲིན་གྱི་ཕུང་པོ་རྫོགས་པར་འཚོབ་པར་བྱེད་པའི་ནུས་པ་དེ་ནི་འཇིག་རྟེན་ཀུན་གྱི་མེས་པོ་གསེར་མངལ་ཅན་གྱིས་ཀྱང་
གསོབ་པར་བཟོད་པའི་མཐུ་ནི་ཤིན་ཏུ་ཡང་ཕྲ་ན། གཞན་གྱིས་ལྟ་ག་ལ་ཞིག །འོན་ཏེ་ལྷག་པའི་བསམ་པ་ཉིད་གཙོ་བོར་བཟུང་བའི་ལེགས་འབུལ་ཉུང་ཟད་ཅིག་སྟོབ་པར་འཚལ་ཏེ། སང་དགེ་འདུན་གྱི་ཀུན་དགའ་རྭ་བ་ཆེན་པོར་ཞབས་ཀྱིས་བཅགས་པར་གསོལ་བ་འདེབས་ཀྱིན་མཆི་

ན། ཅི་གནང་ཞེས་བྱ་བའི་ངག་གིས་སྐབས་དབྱེ་བ་ན། མཁན་པོ་ཆེན་པོ་ཐམས་ཅད་མཁྱེན་པ་ནས་ཀྱང༌། དེ་ལྟར་དུ་བགྱིར་རུང་བར་བཀའི་གནང་བ་བྱིན་ནོ། །དེ་ཙམ་ན་དཔལ་མིའི་བདག་པོ་མཆོག་གི་འཁོར་རྣམས་དང་དགེ་སློང་འགའ་ཞིག་ལ་འདི་ལྟར་
བསྒོ་སྟེ། མི་རིང་བར་དགེ་འདུན་གྱི་གཙུག་ལག་ཁང་ཆེན་པོའི་ཕྱི་དང་ནང་གི་ཁྱམས་ཀྱི་དཀྱིལ་འཁོར་ཡངས་པ་ཐམས་ཅད་དུ་རྡོ་བ་དང༌། གསེག་མ་དང༌། གྱོ་མོ་དང༌། བོང་བ་དང༌། ཕྱག་དར་གྱི་ཚོགས་ཐམས་ཅད་ལེགས་པར་བསལ་ཏེ། ཙནྡན་གྱི་ཆུ་དང༌། དྲི་བཟང་པོའི་ཆུ་
དང༌། སྤོས་ཀྱི་ཆུ་དག་གིས་ཆག་ཆག་ལེགས་པར་ཐོབ་ཅིག །དེར་མ་ཟད་རྒྱན་གྱི་བྱེ་བྲག་ཇི་སྙེད་པ་དག་ཀྱང་མཛེས་ཤིང་ཡིད་དུ་འོང་བར་བྲེ་ཞིག་ཅེས་བསྒོའོ། །དེ་རྣམས་ཀྱང་མི་བདག་ཆེན་པོའི་ལྟར་མཉན་ཏེ། གཙུག་ལག་བསམ་གྲུབ་མཐོང་གྲོལ་གྱི་ཕྱི་དང་ནང་ཐམས་ཅད་དུ་ཕྱག་
དར་ལེགས་པར་བགྱིས་པ་ལ། དྲི་ཞིམ་པོས་ཡང་དག་པར་བསྒོས་ཏེ། ངོ་མཚར་མིག་གི་བདུད་རྩིའི་རང་བཞིན་ཅན་གྱི་བླ་རེ་དང༌། གདུགས་དང༌། རྒྱལ་མཚན་དང༌། ཕྱེ་མ་ཕུར་མ་དང༌། འཕན་ཚར་གྱི་བྱེ་བྲག་བསམ་གྱིས་མི་ཁྱབ་པ་དབང་པོའི་གཞུ་རིས་ལྟར་བཀྲ་བ་རྣམས་བཏགས་
ཤིང་གཙུག་ལག་ཁང་གི་ཕྱོགས་ཀུན་དུ་མཛེས་པར་བརྒྱན་ནོ། །ཁྱད་པར་དེའི་དབུས་སུ་སྔོན་དུས་ཀྱི་མཁན་པོ་ཆེན་པོ་འཇམ་པའི་དབྱངས་སངས་རྒྱས་ཕུན་ཚོགས་བཀྲ་ཤིས་གྲགས་པའི་རྒྱལ་མཚན་དཔལ་བཟང་པོ་པ་དང༌། རྡོ་རྗེ་འཆང་བཀྲ་ཤིས་ལྷུན་གྲུབ་གྲགས་པའི་རྒྱལ་མཚན་
དཔལ་བཟང་པོ་པ་སྟེ་བསྟན་པའི་བདག་པོ་ཟུང་གི་ཞབས་ཀྱི་པདྨ་དྲི་མ་མེད་པ་དག་རྣམ་པར་བཀོད་པའི་ཆོས་ཀྱི་ཁྲི་ཆེན་པོ། རིན་པོ་ཆེ་གསེར་བཙོ་མའི་ཁ་དོག་ཏུ་སྣང་ཞིང་ཟུར་བཞི་དང་ལྡན་པ་ལ། ས་འཛིན་དང༌། རྡོ་རྗེའི་གདན་དང༌། ལྷ་སྣམ་དང༌། ནོར་བུ་བརྩེགས་པ་དག་དང༌། པདྨའི་འདབ་
མ་དང༌། བྲེ་དང༌། གླང་པོའི་རྒྱབ་དང༌། སེང་གེའི་ཁྱིམ་དང༌། ནོར་བུ་དང༌། བད་ཆུང་དང༌། བད་ཆེན་དང༌། ཙནྡྲའི་གདན་རྣམས་བང་རིམ་རིང་ཐུང་གི་རྣམ་པར་ཡོད་པ། ལོགས་ཤིག་ཏུ་ནི་ཐེམ་སྐས་ཀྱི་རིམ་པ་བཞི་དང་ལྡན་པ། རྒྱབ་ཕྱོགས་ནས་གསེར་གྱི་པདྨ་རབ་ཏུ་རྒྱས་པའི་འདབ་མ་ལྟར་

ཡངས་པའི་རྒྱབ་ཡོལ་ཆེན་པོ་གྱེན་དུ་བསླངས་པའི་ངོས་སུ། རིན་པོ་ཆེ་རྣམ་པ་སྣ་ཚོགས་ཀྱི་ཕྲ་ཚོམ་གྱི་ཁུར་བུ་ཐོགས་པའི་འོད་ཟེར་གྱི་པ་ཏྲ་རིས་མང་པོ་ཅི་དགར་འཁྱུག་པ། པ་ཏྲའི་ལག་པ་ཁ་ཅིག་ནི་ཡིད་བཞིན་གྱི་ནོར་བུ་རིན་པོ་ཆེ་ཐོགས་ནས་ཕྱི་རོལ་དུ་གདེངས་པ། འགའ་ཞིག་ནི་ནང་དུ་
ལོག་ནས་ཆུའི་དབའ་ཀློང་ལྟར་འཁྱིལ་བ། དེ་དག་ལ་བརྟེན་ནས་དཔྱངས་པའི་དར་དཀར་པོ་དྲི་མ་མེད་པའི་ཅོད་པཎ་དང༌། མུ་ཏིག་གི་དྲྭ་བ་དང༌། དྲྭ་བ་ཕྱེད་པས་མཛེས་པར་བྱས་པ། རྩེ་མོར་དགོས་འདོད་འབྱུང་བའི་ནོར་བུ་དབང་གི་རྒྱལ་པོའི་ཏོག་དང་བཅས་པའི་ཁྲི་ལྷུན་སྟུག་པ་
དེ་ཉིད་ལེགས་པར་བཤམས་སོ། །བང་རིམ་གྱི་ཁར་སྟེང་ཁེབས་ཁ་དོག་སྣ་ཚོགས་པའི་གོས་བཟང་ཤིན་ཏུ་འཇམ་པ་མང་པོ་བརྩེགས་པའི་གདིང་བས་བཀབ་པ། མདུན་ངོས་སུ་རྟེན་དང་བཅས་པའི་ལྷུང་བཟེད་དང༌། དཀར་ཞལ་དང༌། རིལ་བ་དང༌། བདུག་སྤོས་གཏུལ་བའི་སྣོད་
དང༌། སྤོས་ཀྱི་རེང་བུ་ཐོགས་པའི་སྐྱེས་བུ་གཞོན་ནུའི་གཟུགས་བརྙན་རྣམས་འདེགས་པར་བྱེད་པའི་སྟེགས་བུ་ཡངས་ཤིང་མཐོ་བ། དེའི་ངོས་ན་ཡང་ནོར་བུས་གང་བའི་ཡོལ་གོ་ཐོགས་པའི་སྒྲ་བརྒྱ་པ་སྤྲིན་གྱི་རི་མོ་འཁྲིགས་པའི་གསེབ་ནས་ཀློག་བཞིན་དུ་འགྱུ་བའི་རྣམ་པ་ཅན་ཡང་བཞག་
གོ །དེའི་ཉེན་སྐོར་རྣམས་སུ་ཉེ་བར་མཁོ་བའི་ཁྲིའུ་འགའ་ཞིག་དང་དགེ་འདུན་གྱི་གདིང་བ་དགྲམ་པ་དང་བཅས་པའི་ཉེར་བསྡོགས་ཐམས་ཅད་མ་ཚང་བ་མེད་པར་བཤམས་སོ། །སང་ཉིན་རྒྱུ་སྐར་ཐ་སྐར་གྱིས་ཉ་བའི་ཞག་གི་ཕུང་པོ་དེའི་རྒྱལ་བ་གཉིས་པའི་ཚེས་བཟང་པོ་རེས་
གཟའ་པ་སངས་དང་སྐར་མ་ཆུ་སྨད་འཛོམ་པའི་ཉིན། ཁོར་ཡུག་ཏུ་འཁོད་པའི་ས་འཛིན་གྱི་ཕྲེང་བ་རྣམས་ཀྱི་མདུན་ནམ། ངོས་ཐམས་ཅད་ལ་ཉིན་མོར་བྱེད་པའི་འོད་ཀྱིས་ཁྱབ་པར་བྱས་པའི་དུས་ཀྱི་ཚེ། དགེ་སློང་སྤོས་ཀྱི་རེང་བུ་ཐོགས་པ་དག་གིས་རྗེ་བཙུན་མཆོག་གི་སྤྱན་སྔར་
ཕྱིན་ཏེ་དུས་ལ་བབ་པ་མཁྱེན་པར་གསོལ་བར་བྱེད་དོ། །ཇི་ཙམ་ན་གནྡྷརྦའི་ཡུལ་ནས་འོངས་པ་དང་འདྲ་བའི་གླིང་བུ་བསྒྱུར་བ་ལ་སྦྱངས་པ་མཆོག་གི་མཐར་སོན་པ་དག་སྔོན་དུ་འོངས་ཏེ། དེའི་ལག་པ་ན་མིག་བུ་མང་པོ་དང་ལྡན་པའི་གླིང་བུ་དག་ཐོགས་ཏེ། ཤིན་ཏུ་མཉེན་པའི་མཛུབ་

རྩེ་རྣམས་ནི་གློག་གི་ཐག་པ་འཁྱུག་པའི་རྣམ་འགྱུར་དུ་མ་བསྒྱུར་ཅིང་འབུད་པ་ན། ཀུན་གྱི་སྙིང་ལ་བདུད་རྩིའི་ཐིགས་པ་ལྟར་སིམ་པར་བྱེད་པའི་དབྱངས་ཀྱི་མཆོད་པ་འབུལ་བ་དང༌། གཞན་ཡང་དགེ་སློང་སྤོས་ཀྱི་དུད་སྤྲིན་སྔོན་པོ་རབ་ཏུ་འཐུལ་བའི་སྤོས་སྣོད་
ཐོགས་པ་དང༌། དྲང་སྲོང་ཆེན་པོའི་ཞལ་ཟས་ཀྱི་སྣོད་དུ་རུང་བའི་ལྷུང་བཟེད་བཻ་ཌཱུརྻ་སྔོན་པོའི་ཁ་དོག་ཅན་ཐོགས་པ་དང༌། ཆུ་གཙང་མའི་ཞབས་བསིལ་གྱི་རྒྱུན་གཏིགས་པའི་དངུལ་གྱི་རིལ་བ་ལྟ་ན་སྡུག་པ་ཐོགས་པ་དང༌། སྐྱེས་བུ་ཆེན་པོའི་སྐུ་ལ་བགོ་བར་བྱ་བའི་གོས་བེར་གྱི་ན་བཟའ་དང༌།
གདན་དུ་གདིང་བར་བྱ་བའི་བརྟུལ་ཞུགས་ཀྱི་ཡོ་བྱད་ཧ་ཅང་གསར་པ་ཡང་མིན་ལ་ཤིན་ཏུ་རྙིང་པ་ཡང་མིན་པ། ཚུལ་ཁྲིམས་ཀྱི་དྲི་ཞིམ་པོས་ལེགས་པར་བགོས་པ་དག་ཕྲག་ན་ཐོགས་པ་ལ་སོགས་པའི་ཉེ་བ་འཁོར་གྱི་ཚོགས་ཀྱིས་ཀུན་ནས་བསྐོར་ཏེ། བཅོམ་ལྡན་འདས་ཤཱཀྱ་སེང་
གེ་དགྲ་བཅོམ་པའི་འཁོར་གྱིས་བསྐོར་ཏེ་ལྗོངས་རྒྱུ་བ་ལྟར་ཉི་མ་བྱེ་བའི་དཔལ་ལ་འཁུ་བར་བྱེད་པའི་འོད་དང་འོད་ཟེར་གྱི་ཚོགས་ལྷམ་མེར་དཀྲིགས་ཤིང་དལ་གྱིས་བྱོན་ཏེ་ཆོས་ཀྱི་ཁྲི་མཐོན་པོ་གང་ན་བར་ཞབས་ཀྱི་པདྨ་རྣམ་པར་བཀོད་དེ་བཞུགས་སོ། །དེར་བཞུགས་མ་ཐག་ཏུ་ཕྱོགས་
མཚམས་ཐམས་ཅད་ནས་ལི་ཁྲིའི་རྒྱ་མཚོ་ཆེན་པོ་རབ་ཏུ་བསྐྱོད་པ་ལྟ་བུའི་ངུར་སྨྲིག་འཆང་གི་བརྟུལ་ཞུགས་ལ་གནས་པའི་རྡོ་རྗེ་སློབ་དཔོན་གྱི་རིགས་སུ་གཏོགས་པ་དང༌། འཕགས་པའི་དགེ་འདུན་གྱི་ཚོགས་གྲངས་མེད་པས་ཀྱང་ཉེ་བར་ལྷགས་ཏེ། ཧ་ཅང་ཡང་ཉེ་བ་མ་ཡིན་པའི་མཐའ་
སྐོར་ཀུན་དུ་རང་རང་གི་འོས་པའི་ཁྲིའུ་དང་སྟན་བསྟབས་པ་རྣམས་སུ་བག་དང་བཅས་པའི་སྤྱོད་ལམ་གྱིས་ལེགས་པར་འཁོད་ཅིང༌། ཐམས་ཅད་ཀྱང་རྒྱལ་བ་གཉིས་པ་ཡབ་སྲས་ཀྱི་སྐུའི་ཡོན་ཏན་ལ་བསྔགས་པའི་བསྟོད་པ་ཚིགས་སུ་བཅད་པ་རྣམས་ནི་སྙན་ཅིང་ལྡིར་བའི་གདངས་སུ་བསྒྱུར་ཏེ་
གདོན་པར་བྱེད་དོ། །དེར་ཡུན་ཇི་སྲིད་ཅིག་ནས་དཔལ་སྡོམ་བརྩོན་བླ་མ་སྐྱེ་དགུའི་བདག་པོ་ཉིད་ཀྱི་ཕྱག་གི་པདྨ་རྣམ་པར་གདེངས་པའི་མཐིལ་ན། སྟོང་འཁུན་གྱི་རྒྱལ་པོའི་གན་མཛོད་ལས་འཐོན་པའི་དར་དཀར་པོ་དྲི་མ་མེད་པ་ལ་དཔལ་གྱི་བེའུ་ལ་སོགས་པ་བཀྲ་ཤིས་པའི་རི་མོ་རྣམས་ནི་

ལྷན་སྐྱེས་སུ་བཀྲ་བ་དང་ཆབ་ཅིག་པར། སྐྱེ་འགྲོ་ཀུན་གྱི་སྤྱི་བོ་ནས་དབང་བསྐུར་བའི་རྟེན་འབྲེལ་དུ་ལེགས་པར་དགོངས་ནས་ཁ་དོག་སྣ་ཚོགས་པའི་དར་གྱི་ཅོད་པཎ་དང༌། སུ་ཝརྞཎ་འབྱམས་བརྡུངས་སུ་བྱས་པ་ལས་གྲུབ་པའི་ཟ་མ་ཏོག་བཟོ་དབྱིབས་དང་བཀོད་པ་ཁྱད་པར་ཅན་དང་
བཅས་པའི་བཀྲ་ཤིས་པར་བྱེད་པའི་རྫས་རྣམ་པར་བརྒྱད་ཀྱི་གཟུགས་རྣམས་གུས་པའི་ཞེ་ས་དང་བཅས་པས་ཐོགས་ཏེ། སྔོན་དུས་བཅོམ་ལྡན་འདས་ཐུབ་པའི་དབང་པོ་ལ་མི་མཇེད་ཀྱི་བདག་པོ་ཚངས་པ་གཙུག་ཕུད་ཅན་དང༌། སུམ་ཅུ་རྩ་གསུམ་གྱི་བདག་པོ་ལྷའི་དབང་པོ་བརྒྱ་བྱིན་གྱིས་བཀྲ་
ཤིས་པའི་རྫས་ཀྱིས་མངོན་པར་མཆོད་པ་དེ་ཇི་ལྟ་བ་བཞིན་དུ་དགེ་ལེགས་ཀྱི་རྟེན་འབྲེལ་ཕུན་སུམ་ཚོགས་པའི་མཆོད་རྫས་དག་གིས་ཐོག་མ་ཉིད་དུ་ཡང་དག་པར་མཆོད་པར་བྱེད་དོ། །དེ་ནས་རྒྱལ་བ་ཀུན་གྱི་ཡུམ་ཆེན་ཤེས་རབ་ཀྱི་ཕ་རོལ་དུ་ཕྱིན་མ་དབྱངས་ཀྱི་རྒྱལ་མོའི་ཡེ་ཤེས་ཀྱི་ཉི་ཟེར་རྣོན་པོས་ལན་བརྒྱར་
བྲན་པས། བློ་གྲོས་ཀྱི་འདབ་སྟོང་རྣམ་པར་གྲོལ་བའི་སྦུབས་ནས། ཤེས་པར་བྱ་བའི་གཙུག་ལག་མ་ལུས་པ་རྙོག་པ་དང་བྲལ་བའི་སྙན་དངགས་སྦྲང་རྩི་འཛིན་པའི་གླུར་ལེན་པ་ལ་བསྙེངས་པ་མེད་པའི་ངག་གི་དབང་ཕྱུག་ཆེན་པོ་དཔལ་ལྡན་དཎྜཱི་ཞེས་བྱ་བ། གང་གིས་ལེགས་པར་གསུངས་
པའི་ཟེགས་མ་རེ་ཡང་འཕགས་པའི་ཡུལ་གྱི་སྨྲ་བའི་ཁྱུ་མཆོག་དམ་པ་ཐམས་ཅད་ཀྱི་གཙུག་ན་ཡིད་བཞིན་གྱི་ནོར་བུ་ལྟར་ལེན་པ་ལ་མི་གུས་པ་མེད་པ་སྟེ། དེ་ཉིད་ཀྱིས་ལེགས་པར་སྩལ་བའི་གཞུང་གིས་དངོས་སུ་བསྟན་པའི་ཐུན་མོང་དང་ཐུན་མོང་མ་ཡིན་པའི་རྒྱན་གྱི་སྙན་དངགས་དམ་པའི་
རྒྱུད་ལས་འཕོས་པའི་ཤིས་པར་བརྗོད་པ་དང༌། ཡུལ་ཁྱད་པར་ཅན་རྣམས་ལ་ཕྱག་བྱ་བ་དང༌། དངོས་པོ་ངེས་པར་བསྟན་པའི་སྒོ་རྣམས་སྔོན་དུ་འགྲོ་བས། སྐབས་སུ་བབ་པའི་འབུལ་ཚན་གྱི་རྣམ་གྲངས་ལ། ཐོག་མར་བཀྲ་ཤིས་པའི་རྟགས་ཀྱིས་སྤྲས་པའི་མང་བཀུར་མཆོད་ཡིག་ཅན། དེ་
བཞིན་གཤེགས་པའི་སྐུའི་རྟེན་ལ་བཅོམ་ལྡན་འདས་མགོན་པོ་ཚེ་དང་ཡེ་ཤེས་དཔག་ཏུ་མེད་པའི་སྐུ་བརྙན་གསེར་ཟངས་ལས་གྲུབ་པ། བསྟན་པའི་བདག་པོ་སངས་རྒྱས་བཅོམ་ལྡན་འདས་ཀྱི་སྐུ་བརྙན་རྒྱ་གར་གྱི་ལི་མ་ཁྱད་པར་འཕགས་པ། རྡོ་རྗེ་སེམས་དཔའི་སྐུ་བརྙན་ཆོས་རྒྱལ་ལི་མ། གསུང་

གི་རྟེན་ལ་ཀུན་མཁྱེན་ཉི་མའི་གཉེན་གྱི་བཀའ་ལུང་སྤྱི་དང་བྱེ་བྲག་གི་དགོངས་དོན་རྣམ་པར་འགྲེལ་བའི་བསྟན་བཅོས་གངས་ཅན་གྱི་ལྗོངས་སུ་འགྱུར་རོ་འཚལ་པུསྟ་ཀ་ཉིས་བརྒྱ་དང་བརྒྱད། ཐུགས་ཀྱི་རྟེན་ལ་སྐུ་ཚེ་བྱིན་གྱིས་བརླབས་པའི་མཆོད་རྟེན་གསེར་ཟངས་ལས་གྲུབ་པ་
བཀའ་གདམས་མཆོད་རྟེན་ལྕགས་རྩེ་ཅན་ཁྱད་འཕགས་གཉིས། ཆོས་གོས་ངུར་སེར་གྲས་དྲུབས་ཅན་གཅིག །ལྷུང་བཟེད་རྟེན་པ་དང་བཅས་པ་གཅིག །དངུལ་ལྗང་བརྡུང་གི་ཕུད་ཀོང་གཅིག །དངུལ་གྱི་སྤྱི་བླུགས་ལེགས་པ་གཅིག །གན་དཀར་གསེར་རིས་མ་སྟེགས་དང་བཅས་པ་གཅིག །
དངུལ་གྱི་བཟེད་ཞལ་བཟོ་དབྱིབས་ལེགས་པ་གཅིག །ཐེག་ཆེན་གན་གྱི་རྡོ་རྗེ་དྲིལ་བུ་ལེགས་པ་གཅིག །རྡོ་རྗེ་དང་དབུ་རྩེ་གསེར་ལས་བྱས་པའི་དྲིལ་བུ་གཅིག །རག་ལས་བྱས་པ་གཅིགཏིང་ཤག་དངུལ་ཐག་ཅན་ཆ་གཅིག །རག་ཐག་ཅན་ཆ་གཉིས། གཏོར་ཆ་ལེགས་པ་ལྔ་ཚར་གཅིག །ཏིང་
བདུན་ཆེ་བ་ཆ་གཅིག །སེང་ལྡེང་གི་ཌཱ་མ་རུ་འཕན་ཚར་བཅས་པ་གཅིག །རིགས་ལྔའི་ཅོད་པཎ་དར་དཔྱངས་དང་བཅས་པ། རྟེན་ཁེབས་ཇུས་མ་འབྲུག་མཐོངས་ཅན་གཅིག །བཀྲ་ཤིས་རྫས་བརྒྱད་ཀྱི་གཟུགས་དངུལ་གྱི་མཎྜལ་ཆེ་ཞིང་ལེགས་པ་གཅིག །རི་དྭགས་རུ་རུའི་རྭ་གཅིག །གླང་པོ་
ཆེའི་མཆེ་བ་ཡ་གཅིག །མ་ཧཱ་ཙི་ནའི་སྤོག་ཕོར་ཟོང་རྙིང་ལས་གྲུབ་པ་ཆེ་ལེགས་གཅིག །དེ་ལ་སོགས་པའི་ཡོ་བྱད་ཀྱི་རྣམ་པ་རྒྱ་གར་དང་རྒྱ་ནག་དང་བལ་པོ་དང་བོད་ཀྱི་ཡུལ་གྲུ་ཆེན་པོ་རྣམས་ལ་རིན་ཐང་ཤིན་ཏུ་ཆེ་བའི་ཉེ་བར་སྤྱད་པའི་རིགས་དང༌། གཞན་ཡང་གསེར་དང་དངུལ་དང༌། དར་གོས་
དང༌། ཨརྡོ་ཀའི་སྤོབས་རྩེ་དང༌། རྟ་ཕྱུགས་ལ་སོགས་པ་སྟེ་དེ་དག་རེ་རེ་ལའང་ནང་གསེས་ཀྱི་རྣམ་གྲངས་ཤིན་ཏུ་མང་ཞིང་དངོས་པོ་བཟང་བའི་འབུལ་ཚན་གྱི་རྣམ་གྲངས་རགས་པ་རྣམས་ཕྱོགས་སུ་བསྡོམས་པ་ཚན་གྲངས་སྟོང་ཕྲག་གཅིག་དང་བརྒྱ་ཕྲག་ལྔ་ལ་སུམ་ཅུས་ལྷག་པའི་འབུལ་བ་བསྟབ་
བོ། །དེའི་རྗེས་སུ་སྡོམ་བརྩོན་ཆེན་པོའི་སྐུའི་བར་ཆད་སྲུང་བར་བྱེད་པའི་བླ་མ་དང༌། ཆོས་ཁྲིམས་དང༌། གྲྭ་ཚང་དང༌། གསོལ་དཔོན་དང༌། མཆོད་དཔོན་དང༌། བཀའི་འཁོར་ལོས་སྒྱུར་བའི་མདུན་ན་འདོན་ཆེན་པོ་རྣམས་དང༌། གཉེར་པ་དང༌། ཚོང་དཔོན་དང༌། ཧོར་འདྲ་དང༌།

ལས་བྱེད་དུ་གཏགས་པ་ཐམས་ཅད་ཀྱང་རང་རང་གི་འབྱོར་པའི་བང་མཛོད་དག་དབྱེ་ཞིང༌། གཏོང་ཕོད་ཀྱི་ཕྱག་རིང་ལེགས་པར་བརྐྱངས་པའི་འབུལ་བ་རྒྱ་ཆེན་པོ་དག་གིས་བསྙེན་བཀུར་སྟོབ་པར་བྱེད་དོ། །དེའི་རྗེས་ཐོགས་སུ་ལྷུན་གྲུབ་སྟེང་གི་ཆོས་གྲྭ་འདིར་གཉུག་མར་བཞུགས་པའི་བླ་མ་དང༌། སློབ་
དཔོན་དང༌། ཆོས་ཁྲིམས་དང༌། སྤྱི་པའི་དུས་ཇ་བ་ཁག་རྣམས་དང༌། དགེ་སློང་དང༌། དགེ་ཚུལ་ཇི་སྙེད་བཞུགས་པ་རྣམས་ཀྱིས་ཀྱང་རང་རང་གི་བདོག་པའི་དངོས་པོ་གྱ་ནོམ་པ་དག་གིས་ཡང་དག་པར་མཆོད་པར་བྱེད་དོ། །དེ་དག་གི་རྗེས་སུ་རྫོང་ཁག་ཆེན་པོ་བཅོ་བརྒྱད་ཀྱི་མངའ་འོག་ཏུ་གཏོགས་
སོ་འཚལ་གྱི་བླ་མ་དང༌། མི་དཔོན་དང༌། དགོན་པ་དང༌། ཁྱིམ་བདག་འབྱོར་པ་དང་ལྡན་པ་རྣམས་ཏེ། མདོར་ན་སྡོམ་བརྩོན་སྐྱེ་དགུའི་བདག་པོ་འདིའི་ཐུགས་རྗེས་ལེགས་པར་བསྲུངས་པའི་འཛིན་མའི་དཀྱིལ་འཁོར་ཀུན་དུ་འཁོད་པའི་འགྲོ་བ་གཞན་མང་པོ་དག་ཀྱང་འོངས་ཏེ། རང་རང་གི་དད་
མོས་ཀྱི་ཤུགས་ལས་བྱུང་བའི་འབུལ་བ་དང་བསྙེན་བཀུར་ཡང་དག་པར་སྟོབ་པར་བྱེད་དོ། །ཕྱོགས་དང་ཕྱོགས་བྲལ་གྱི་སྐྱེ་བོའི་ཚོགས་དེ་དག་ཐམས་ཅད་ཀྱང་རྗེ་བཙུན་དམིགས་པ་མེད་པའི་ཐུགས་རྗེ་དང༌། ཡོན་ཏན་བསམ་གྱིས་མི་ཁྱབ་པའི་བདག་ཉིད་ཆེན་པོ་གང་གི། ཞལ་བཟང་ཟླ་བ་རྒྱས་པའི་
དཀྱིལ་འཁོར་ལེགས་པར་མཐོང་བའི་བསོད་ནམས་ཀྱི་སྐལ་བ་རྨད་དུ་བྱུང་བའི་རྒྱ་མཚོ་ཆེན་པོ་ནི་གསར་དུ་འཕེལ་བའི་བཀའ་དྲིན་གཞལ་དུ་མེད་པ་བྱུང་ངོ༌། །དེ་བཞིན་དུ་ཡར་ལུང་བཀྲ་ཤིས་ཆོས་སྡེའི་མཁན་པོ་ཕྱི་དང་ནང་གི་ཡོན་ཏན་གྱི་ནོར་བུའི་འབྱོར་པས་རབ་ཏུ་གཏམས་ཤིང༌། སེམས་ཅན་གྱི་རེ་བ་ཐམས་ཅད་
བདེ་བླག་ཏུ་འགེངས་པར་བྱེད་པའི་ངག་གི་དབང་ཕྱུག་ཀུན་དགའ་ལེགས་པའི་འབྱུང་གནས་བསྟན་པའི་རྒྱལ་མཚན་དཔལ་བཟང་པོ་པ་དེ་ཉིད་ཀྱང་ལྗོངས་འདིར། བསྟན་པའི་དོན་དང་འགྲོ་བའི་དཔལ་དུ་དང་པོར་སྤྱན་འདྲེན་པ་དང༌། བར་དུ་དོན་ཡོད་པ་རྣམ་པ་བཞིའི་སྒོ་ནས་དགྱེས་པའི་བྱ་བ་ཡང་
དག་པར་བསྒྲུབས་ནས། དེ་ཉིད་ཀྱི་ཞལ་སྒོ་ནས་བྱུང་བའི་ཟབ་པ་དང་རྒྱ་ཆེ་བའི་ཆོས་ཀྱི་བདུད་རྩི་བསམ་ལས་འདས་པ། རང་དང་གཞན་གྱི་ཐར་པ་མཆོག་གི་སྲོག་ཟུང་བརྟན་པར་བྱེད་པའི་བཅུད་ལེན་དུ་བསྟེན་ཏེ། དེའི་རྣམ་གྲངས་ནི་མདོ་ཙམ་གོང་དུ་སྨྲས་ཟིན་ཏོ། །འདྲེན་མཆོག་དམ་པ་དེའི་

རྣམ་པར་དཀར་བའི་ཕྲིན་ལས་ཀྱི་རྒྱུན་ཆེན་པོ་ནི། དཔལ་དུས་ཀྱི་འཁོར་ལོའི་དཀྱིལ་འཁོར་ཆེན་པོ་རྡུལ་ཚོན་ལ་བརྟེན་པའི་སྒྲུབ་མཆོད་གསར་དུ་བཙུགས་པ་དང༌། མགོན་པོའི་དམར་ཆེན་གཏོར་མའི་བཟློག་པ་ལོ་དུས་བཞིན་དུ་བཙུགས་པ་དང༌། བསྐང་གསོ་ཆོས་
ཉིད་མའི་རྒྱུན་འཛུགས་རྣམས་ཀྱི་སྲོལ་མ་ནུབ་པར་བསྟན་པའི་སྦྱིན་བདག་ཆེན་པོར་མཛད། མཐར་རྗེ་བཙུན་བླ་མ་དེ་ཉིད་དབུས་ཕྱོགས་ཀྱི་བསྟན་དོན་ལ་ཆིབས་ཀྱི་གདོང་བསྒྱུར་ནས་འབྱོན་དགོས་བྱུང་བ་ན་ཡང༌། འབུལ་རྫོངས་ཀྱི་དངོས་པོ་བཟང་ཞིང་གཏོས་ཆེ་བ་ཚན་གྲངས་བརྒྱ་ཕྲག་ལྔ་ལས་
ལྷག་པའི་ཡོན་འབུལ་བ་སྟབས་ཏེ། མདོར་ན་མཐར་ཐུག་ཐམས་ཅད་མཁྱེན་པའི་གོ་འཕང་མངོན་དུ་མ་གྱུར་པ་དེ་སྲིད་དུ་མཐས་གཏུགས་པ་མེད་པའི་བསོད་ནམས་ཀྱི་ཚོགས་རྫོགས་རྒྱ་མཚོ་ཆེན་པོ་ལྟ་བུར་བསྐྱིལ་བར་མཛད་དོ། །དེ་བཞིན་དུ་མཁན་ཆེན་རྡོ་རྗེ་འཆང་ཆེན་པོའི་སྐུའི་དཔོན་
དུ་གྱུར་པའི་གནས་ལྔ་རིག་པ་སྨྲ་བའི་དབང་ཕྱུག་ཆེན་པོ་འཇམ་དབྱངས་བླ་མ་སངས་རྒྱས་ཡེ་ཤེས་པའང༌། ལྗོངས་འདིར་དང་པོར་སྤྱན་འདྲེན་པ་དང༌། བར་དུ་བསྙེན་བཀུར་དང་ཡོན་འབུལ་སྟོབ་པ་ལ་སོགས་པ་ཐམས་ཅད་སྔ་མ་ཉིད་དང་རིགས་མཚུངས་སུ་མཛད་ཅིང༌། ཁྱད་པར་མཁན་ཆེན་རྡོ་རྗེ་འཆང་
བཀྲ་ཤིས་ལྷུན་གྲུབ་པའི་གདུང་འབུམ་ཁང་དུ་འདས་དུས་ཀྱི་ཟླ་མཆོད་རྒྱུན་མི་ཆད་པའི་རྟེན་བཞག་གི་མཐུན་རྐྱེན་རྒྱ་དཔངས་མི་དམན་པའི་ལེགས་བྱས་ཀྱི་ཚོགས་ཆེན་པོ་བསྐྲུན་ནོ། །གཞན་ཡང་ས་སྐྱ་གོང་དང་ངོར་པ་བླ་བྲང་རྣམས་ནས་བརྫོངས་པའི་འབུལ་སྡུད་ཀྱི་ཆོས་རྗེ་འབྱོན་བཞུད་
མཛད་པ་ཐམས་ཅད་ལའང་ཕན་འདོགས་གང་ཆེ་དང༌། གནང་སྦྱིན་གྱ་ནོམ་པ་མཛད་པ་ལ་སོགས་པ་བསྟན་པར་དམིགས་པའི་མགོ་འདོན་ཡང་དག་པར་མཛད་དོ། །གཞན་ཡང་བར་སྐབས་དག་ཏུ་དགེ་སློང་བསྙེན་པ་དང་སྒྲུབ་པ་ལྷུར་བགྱིད་པ་རྣམས་དང༌། སྔོན་ཆད་བསྙེན་པ་མ་གྲུབ་པ་
རྣམས་ལ་མཚམས་རྒྱགས་ལེགས་པར་སྦྱར་ཏེ་ཡི་དམ་གྱི་ལྷ་གང་ཡང་རུང་བའི་གསང་སྔགས་བགྲང་དུ་བཅུག་པའང་དཔག་ཏུ་མ་མཆིས་པ་མངོན་པར་འདུ་བྱས་སོ། །མདོར་ན་སྡོམ་བརྩོན་སྐྱེ་དགུའི་བདག་པོ་འདིའི་གཏོང་སྒོ་དང༌། མཛད་པ་ཐམས་ཅད་ཀྱང་མཐར་ནི་བསྟན་པ་རིན་པོ་ཆེའི་ཞབས་

འདེགས་སུ་གཞོལ་ཞིང་འབབ་པ་ཁོ་ནར་འགྱུར་བའི་ཕྱིར་ཆོས་ལྡན་གྱི་རྒྱལ་པོ་ཞེས་གྲགས་པའི་ཡི་གེ་རྣམ་པར་གསལ་བ་གང་ཡིན་པ་དེ་ནི་གཅམ་བུ་མ་ཡིན་པའི་ངེས་པའི་དོན་ཉིད་དོ་ཞེས་བདེན་པའི་མཐའ་ཉིད་ཀྱིས་གསལ་བར་འབོད་པ་བཞིན་དུ་མཆིས་སོ། །ཁྱད་པར་རྔུ་མདའ་ལྷུན་གྲུབ་སྟེང་གི་ཆོས་གྲྭ་
འདིར་སྡེ་དགེ་ས་སྐྱོང་གོང་མར་གྱུར་པ་རྣམས་ཀྱི་ཐུགས་བསྐྱེད་རྨད་དུ་བྱུང་བ་ཉིད་ཀྱི་མཐུ་དང༌། བསྟན་འཛིན་གྱི་སྐྱེས་བུ་སྤྲུལ་པའི་སྐུ་རིམ་པར་བྱོན་པ་རྣམས་ཀྱིས་ལེགས་པར་བཤད་པའི་བདུད་རྩིའི་རྒྱུན་གྱིས་རྟག་ཏུ་བརླན་པའི་དབང་གིས། རྣམ་གསུམ་བསླབ་པའི་ནོར་བུའི་འབྱོར་པས་ཀུན་ནས་
བདོ་བའི་དགེ་སློང་གི་དགེ་འདུན་ཆེན་པོ་རྣམས་ཀྱི་སྒྲིགས་སྲོལ་ལ་རྙོག་པའི་དྲི་མ་ཕྲ་ཞིང༌། ཚོགས་འདོན་དང་ཆོ་གའི་རིམ་པ་གང་དང་གང་ཡིན་པ་དེ་དང་དེའི་ལག་ལེན་ཕྲ་མོ་ཚུན་ལའང་དེ་ཁོ་ན་ལ་སྦྱངས་པ་ལྟ་བུའི་བྱང་ཆུབ་པ་ཤ་སྟག་ཏུ་མཆིས་མོད། འོན་ཀྱང་བར་སྐབས་འགའ་རེ་ནས་སྒྲིགས་
ལམ་བག་ཡོངས་སུ་སོང་བའི་རྐྱེན་གྱིས་ཅུང་ཟད་འཕྱུགས་པ་མཐོང་བ་རྣམས་ཀྱང༌། སྔོན་དུས་མཁན་ཆེན་འཇམ་པའི་དབྱངས་སངས་རྒྱས་ཕུན་ཚོགས་པས་མཛད་པའི་དགོན་གནས་ཀྱི་བཅའ་ཡིག་ལྷག་བསམ་རབ་དཀར་ཞེས་བྱ་བ་དང༌། རྡོ་རྗེ་འཆང་བཀྲ་ཤིས་ལྷུན་གྲུབ་པས་མཛད་
པའི་བཅའ་ཡིག་ལྷག་བསམ་མཛེས་པར་བྱེད་པའི་རྒྱན་ཞེས་བྱ་བ་ལ་སོགས་པ་དང༌། གྲྭ་ས་ཆེན་པོ་རྣམས་ཀྱི་གནང་བཀག་ཇི་ལྟར་བྱ་བའི་མིག་མཐོང་བྱུང་བ་དང་བསྟུན་པའི་ཁྲིམས་སུ་བཅའ་བ་གསར་དུ་སྡོམ་པ་དང་བཅས་པའི་སྒོ་ནས། ཡོན་གནས་དང་བ་འདྲེན་པའི་མཆོག་ཏུ་
བསྐྲུན་ནོ། །དེ་ལྟ་བུའི་དགེ་འདུན་གྱི་ཚོགས་འདུ་བའི་སྒྲུབ་མཆོད་ཀྱི་རྒྱུན་སྔར་ཡོད་པ་རྣམས་མ་ཉམས་པར་མཛད་ནས། ལོ་དུས་བཞིན་དུ་རིམ་པར་འཛུགས་པ་ནི། འདི་ལྟར་རྒྱུ་སྐར་རྒྱལ་གྱིས་ཉ་བའི་ཟླ་བར། བཅོམ་ལྡན་འདས་ཤཱཀྱའི་རྒྱལ་པོའི་རྒྱལ་ཚབ་ཆེན་པོ་རྗེ་བཙུན་ཀུན་
དགའ་བཟང་པོ་པའི་གཟུགས་སྐུ་སྒྱུ་འཕྲུལ་གྱི་སྤྲོས་པ་མཁའ་ཁྱབ་ཆོས་ཀྱི་སྐུའི་དབྱིངས་སུ་བརྟུལ་བའི་ཟླ་དུས་ཀྱི་མཆོད་པ་འབུལ་བའི་དུས་བཟང་པོ་དང་བསྟུན་པའི་ཉི་ཤུ་ལྔའི་ཉིན་ནས་བརྩམས་ཏེ། ཆོ་འཕྲུལ་གྱི་ཟླ་བའི་ཚེས་བཅུ་དྲུག་གི་བར་དུ། ལྷུན་གྲུབ་སྟེང་གི་ཆོས་གྲྭ་ཆེན་པོ་འདི་ཉིད་དུ་

གཉུག་མར་གནས་པའི་དགེ་སློང་གི་དགེ་འདུན་ཇི་སྙེད་བཞུགས་པ་རྣམས་དང༌། གཞན་ཡང་ལྕགས་རའི་དགོན་པ་དང༌། རྒ་ལྡན་སྟེང་གི་དགོན་པ་དང༌། འཁོར་ལོ་མདོའི་དགོན་པ་དང༌། རྫོང་ཆེན་མགོའི་དགོན་པ་དང༌། ཡེ་ནའི་དགོན་པ་དང༌། རབ་བརྟན་གླིང་
གི་དགོན་པ་སྟེ། དགོན་སྡེ་བདུན་གྱི་བླ་མ་དང་དགེ་སློང་ཞིབ་རྒྱས་སུ་འདུ་བའི་དགེ་འདུན་གྱི་འདུ་བ་ཆེན་མོར་གྲགས་པ་སྟེ། དེ་ལ་མཆོད་གནས་སྟོང་ཕྲག་གཅིག་ལ་བརྒྱ་ཕྲག་ལྔས་ལྷག་པ་རྣམས་ཀྱིས། གཙུག་ལག་ཁང་ཆེན་པོ་བསམ་འགྲུབ་མཐོང་གྲོལ་གྱི་ནང་ན་སྟབས་སུ་འཚོགས་
ཤིང༌། དེའི་དབུར་རབ་ཏུ་ངོར་ཆེན་རྡོ་རྗེ་འཆང་གི་རྒྱལ་ཚབ་ཏུ་མངའ་གསོལ་བའི་མཁན་པོ་རིན་པོ་ཆེ་རེ་བཞུགས་པའི་སྐབས་ཡིན་ན་དེ་ཉིད་དང༌། དེ་ལྟར་མ་བྱུང་བ་ན་ངོར་པའི་ཆོས་རྗེ་ཆེན་པོ་རེས་རྡོ་རྗེ་སློབ་དཔོན་མཛད་པ་ལ། དེང་གི་སྐབས་ནི་མཁན་རིན་པོ་ཆེ་ཐམས་ཅད་མཁྱེན་པ་དཔལ་
ལྡན་ཆོས་སྐྱོང་བཀྲ་ཤིས་གྲགས་པའི་རྒྱལ་མཚན་དཔལ་བཟང་པོ་པ་ཚོགས་ཀྱི་དབུར་སྤྱན་འདྲེན་པར་མཛད་དེ། ཐོག་མར་དུས་དགྲའི་དབང་པོ་བཅོམ་ལྡན་འདས་རྡོ་རྗེ་འཇིགས་བྱེད་འཁོར་དང་བཅས་པའི་གཏོར་མའི་ཆོ་ག་དྲུག་ཅུ་པ་དང་བཅས་པའི་གཏོར་རྒྱབ་ཉིན་ལྔ། ཚེས་གཅིག་ལ་གཙུག་
ཏོར་རྣམ་པར་རྒྱལ་མའི་སྟོང་མཆོད་དང༌། རྡོ་རྗེ་རྣམ་པར་འཇོམས་པའི་ཆོ་ག་གཉིས་སོ། །ཚེས་གཉིས་ནས་བརྩམས་ཏེ་ངོར་པའི་དཀྱིལ་འཁོར་བདུན་དུ་གྲགས་པ་འཛུགས་ཏེ། ཐམས་ཅད་ཀྱང་སྟ་གོན་ཚོམ་བུའི་དཀྱིལ་འཁོར་ལ་བརྟེན་པའི་ཆོ་ག་དང༌། དངོས་གཞི་རྡུལ་ཚོན་
ལ་བརྟེན་ཏེ་སྒྲུབ་ཅིང་མཆོད་པ་དང༌། བདག་ཉིད་འཇུག་ཅིང་དབང་བླང་བའི་ཆོ་ག་དང༌། རྗེས་གཤེགས་སུ་གསོལ་བ་ལ་སོགས་པའི་ཆོ་ག་དང་བཅས་པ་ཉིན་བཅོ་ལྔ་སྟེ། དེའང་གཙོ་བོར་ཐབས་དང་ཤེས་རབ་གཉིས་སུ་མེད་པའི་རྒྱུད་ཀྱི་རྒྱལ་པོ་དཔལ་ཀྱེ་རྡོ་རྗེའི་རྩ་བའི་རྒྱུད་དང་བཤད་པའི་རྒྱུད་རྣམས་
ཀྱི་རྗེས་སུ་འབྲངས་ནས་རྣལ་འབྱོར་གྱི་དབང་ཕྱུག་དཔལ་བིརྺ་པའི་ཞལ་སྔ་ནས་མན་ངག་ལུགས་སུ་བཀྲལ་བའི་བཅོམ་ལྡན་འདས་དགྱེས་པ་རྡོ་རྗེ་ལྷ་དགུའི་དཀྱིལ་འཁོར་དང༌། རྒྱུད་དེ་ཉིད་ཀྱི་བཤད་པའི་རྒྱུད་ཐུན་མོང་མ་ཡིན་པ་མཁའ་འགྲོ་རྡོ་རྗེ་གུར་གྱི་རྒྱུད་ལས་འབྱུང་བའི་རིགས་བསྡུས་པ་

མཁའ་འགྲོ་ལྔའི་ཕོ་བྲང་ལྷ་བཞི་བཅུ་རྩ་དགུའི་དཀྱིལ་འཁོར་དང༌། རྒྱུད་གཞན་དང་ཐུན་མོང་བའི་བཤད་པའི་རྒྱུད་དཔལ་ཁ་སྦྱོར་རམ་ཡང་དག་པར་སྦྱོར་བའི་རྒྱུད་ལས་འབྱུང་བའི་རྡོ་རྗེ་དབྱིངས་ལྷ་སུམ་ཅུ་རྩ་བདུན་གྱི་དཀྱིལ་འཁོར་དང༌། ཤེས་རབ་རྒྱུད་གཙོ་བོར་གྱུར་པ་འཁོར་ལོ་སྡོམ་པའི་རྩ་བའི་
རྒྱུད་ལེའུ་ལྔ་བཅུ་རྩ་གཅིག་པ་དང༌། རྣལ་འབྱོར་མ་ཀུན་དུ་སྤྱོད་པའི་རྒྱུད་ཀྱི་རྗེས་སུ་འབྲངས་ནས་གྲུབ་ཆེན་ལོ་ཧི་པའི་ལུགས་ཀྱི་འཁོར་ལོ་བདེ་མཆོག་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར། རྩ་བའི་རྒྱུད་དེ་ཉིད་དང་རྡོ་རྗེ་མཁའ་འགྲོའི་རྒྱུད་ཀྱི་རྗེས་སུ་འབྲངས་ནས་གྲུབ་ཆེན་ནག་པོ་སྤྱོད་
པའི་ལུགས་ཀྱི་འཁོར་ལོ་བདེ་མཆོག་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་དང༌། ཐབས་རྒྱུད་གཙོ་བོར་གྱུར་པ་དཔལ་གསང་བ་འདུས་པའི་རྩ་བའི་རྒྱུད་དང༌། རྒྱུད་ཕྱི་མ་དང༌། བཤད་པའི་རྒྱུད་དང་ཆ་མཐུན་གྱི་རྒྱུད་རྣམས་ལ་བརྟེན་ནས་འཕགས་མཆོག་ཀླུ་སྒྲུབ་ཡབ་སྲས་ཀྱིས་ལེགས་པར་
བཀྲལ་བའི་གསང་བ་འདུས་པ་མི་བསྐྱོད་རྡོ་རྗེ་ལྷ་སུམ་ཅུ་རྩ་གཉིས་ཀྱི་དཀྱིལ་འཁོར་དང༌། གསང་བ་འདུས་པའི་རྩ་བའི་རྒྱུད་དང༌། དེའི་རྒྱུད་ཕྱི་མ་དང༌། རྡོ་རྗེ་སྙིང་པོ་རྒྱན་གྱི་རྒྱུད་རྣམས་ལ་བརྟེན་ནས། རྗེ་བཙུན་འཇམ་པའི་དབྱངས་ཀྱིས་དངོས་སུ་བྱིན་གྱིས་བརླབས་པའི་སློབ་དཔོན་
སངས་རྒྱས་ཡེ་ཤེས་ཞབས་ཀྱིས་དམ་པར་བཀྲལ་བའི་འཇམ་པའི་རྡོ་རྗེ་ལྷ་བཅུ་དགུའི་དཀྱིལ་འཁོར་ཏེ། རྣལ་འབྱོར་བླ་ན་མེད་པའི་རྒྱུད་སྡེ་རིན་པོ་ཆེ་རྣམ་པ་གསུམ་གྱིས་བསྟན་པར་བྱ་བ་ཐམས་ཅད་ཀྱི་སྙིང་པོ་ལས་ཀྱང་ཆེས་སྙིང་པོར་གྱུར་པའི་དཀྱིལ་འཁོར་ཆེན་པོ་གསེར་གྱི་རི་བོའི་གྲངས་དང་
ལྡན་པ་རྣམས་ཀྱི་ཞལ་ཕྱེ་བའི་སྒྲུབ་མཆོད་ཆེན་མོ་འཛུགས་ཤིང༌། དེ་ལ་བརྟེན་ནས་རང་དང་གཞན་གྱི་རྒྱུད་ལ་བསྐལ་པ་བྱེ་བ་དུ་མ་ནས་བསགས་པའི་སྡིག་པའི་ཕུང་པོ་བརྩེགས་པ་རི་རབ་ལྟར་ཡོད་པ་རྣམས་ཀྱང་སྐད་ཅིག་རེའི་ཡུན་ལ་བསྙིལ་བར་བྱེད་དོ། །ཡང་དུས་ཚེས་དེ་དང་མཉམ་དུ་ཆོས་སྒྲོག་
མཁན་བརྒྱ་དང་ཉི་ཤུ་ཙམ་གྱིས་རྒྱལ་བའི་བཀའ་འགྱུར་རོ་འཚལ་ཚར་གྲངས་གང་འགྲོར་ཀློག་པ་དང༌། སླར་ཡང་ཆོས་སྒྲོག་མཁན་ཉུང་བཏུས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ་བརྒྱ་ཚར་མན་ཆད་གང་འགྲུབ་དང་རྒྱལ་བའི་བཀའ་འགྱུར་རོ་འཚལ་རྫོགས་པ་ཚར་གཅིག་ཀློག་པ་དང༌།

གཞན་ཡང་དུས་ཚེས་དེ་དག་དང་མཉམ་པར་མཁར་གསུམ་མདོའི་དགོན་པ་དང༌། དབོན་པོ་སྟོད་ལ་སོགས་པ་ངོར་གྱི་དགོན་ལག་ཡོད་པ་ཕལ་ཆེ་བ་རྣམས་སུ་ཡང་དགེ་འདུན་མང་པོ་འདུ་བའི་དཀྱིལ་འཁོར་ལྔ་བདུན་གང་རུང་གི་སྒྲུབ་མཆོད་དང༌། དེ་དག་ཏུ་མ་ཟད་སྡོམ་བརྩོན་སྐྱེ་དགུའི་
བདག་པོ་རང་གི་མངའ་འོག་ཏུ་གཏོགས་པའི་གསར་རྙིང་གི་དགོན་སྡེ་རྣམས་སུ་ཡང་རང་རང་གི་ཕྱོགས་སུ་བསྡུ་ཁྲལ་ཡོད་པ་ལས་བྱུང་བ་རྣམས་ཀྱང་ཕལ་ཆེར་སྐུའི་མཆེད་ཟླར་གྱུར་པ་དང༌། སྐུ་ཚབ་དང་བསྐོས་མི་ལ་སོགས་པ་ལ་འགན་བསྐུལ་བ་དང་བཅས་པའི་སྒོ་ནས། དགོན་སྡེ་རང་རང་གི་ཕྱོགས་
སུ་སྐུ་རིམ་དང༌། གཏན་པ་མེད་པའི་དགེ་བསྐུལ་དུ་འགྲོ་བ་ལ་སོགས་པའི་རྣམ་དཀར་གྱི་བྱ་བ་རྒྱ་ཆེན་པོ་སྐྱོང་བ་དང༌། གཞན་ཡང་ལྷུན་གྲུབ་སྟེང་གི་ཆོས་གྲྭ་འདིར་ཟླ་དུས་དང༌། ཚེས་གྲངས་གང་དང་གང་ཡིན་པ་དེ་དང་དེ་ལས་ནམ་ཡང་བསྐལ་དུ་མེད་པའི་མཆོད་པ་དང༌། ཆོ་གའི་རིམ་པ་ནི། ཧོར་ལུགས་
ཀྱི་ཟླ་བ་དང་པོའི་ཚེས་བཅུ་བདུན་ནས་སྟོང་གི་བར་དུ་བཅོམ་ལྡན་འདས་རྡོ་རྗེ་ཕུར་པ་ས་ལུགས་ཀྱི་སྒྲུབ་མཆོད་ཆེན་མོ་འཛུགས་པ་སྟེ། དེའང་འདི་ལྟར་དཔལ་ས་སྐྱའི་རྗེ་བཙུན་མཆོག་གི་ཕྲིན་ལས་ལྷུན་གྱིས་གྲུབ་པའི་སྒྱུ་འཕྲུལ་གྱི་རོལ་པ་ལས་བྱོན་པའི་མཆོག་གི་རྡོ་རྗེ་སློབ་དཔོན་ཆེན་པོ་མཚན་ཉིད་དང་ལྡན་
པ། སྤྱིར་མདོ་དང་སྔགས་ཀྱི་གཞུང་ལུགས་རབ་འབྱམས་ལ་སྦྱངས་པ་དང༌། ཁྱད་པར་རྗེ་བཙུན་ས་སྐྱ་པའི་ཡབ་ཆོས་རྡོ་རྗེ་ཕུར་པའི་སྟོད་སྨད་ཀྱི་ཕྲིན་ལས་མཐའ་དག་ལ་གཞན་དྲིང་མི་འཇོག་པར་བྲི་ཐིག་དང༌། འདོན་གདངས་དང༌། འཆམས་དང༌། རོལ་མོ་རྣམས་ལ་སྦྱངས་པ་རབ་ཀྱི་མཐར་
སོན་པ་རེ་གདན་ས་ཆེན་པོ་ནས་གདན་འདྲེན་པར་མཛད་དེ། དེ་ཉིད་ཚོགས་ཀྱི་རྡོ་རྗེ་སློབ་དཔོན་དུ་བཞུགས་སུ་གསོལ་ནས་རིག་པ་འཛིན་པའི་དགེ་སློང་གི་དགེ་འདུན་གྱི་ཚོགས་དང་ལྷན་ཅིག་ཏུ་དཔལ་རྡོ་རྗེ་གཞོན་ནུའི་དཀྱིལ་འཁོར་ཆེན་པོ་རྡུལ་ཚོན་ལ་བརྟེན་པའི་སྒྲུབ་མཆོད། ཟླ་བ་དེའི་ཉི་ཤུ་ལྔའི་
ནང་བར་དགེ་འདུན་ཇི་སྙེད་བཞུགས་པས་རྡོ་རྗེ་མི་འཁྲུགས་པ་ལྷ་དགུའི་དཀྱིལ་འཁོར་གྱི་ཆོ་ག་དང༌། དེའི་ཕྱི་མ་རེད་ནས་ཉེར་དགུའི་བར་ལ་བསྐང་གསོ་དང༌། ཐུགས་གསོ་དང༌། གཟུངས་གསོ་གང་རུང་རེ་མཛད། དབོ་ཟླ་བའི་ཚེས་གསུམ་ནས་བརྩམས་ཏེ་དགེ་འདུན་གྱི་གཙུག་ལག་ཁང་ཆེན་པོ་

བསམ་འགྲུབ་མཐོང་གྲོལ་ལ་སོགས་པའི་ལྷ་ཁང་རྣམས་སུ་རྡོ་རྗེ་སློབ་དཔོན་ལྔ་བཅུས་དཔལ་ཀྱེ་རྡོ་རྗེའི་དཀྱིལ་འཁོར་ལ་བརྟེན་པའི་རབ་ཏུ་གནས་པའི་ཆོ་ག་རྒྱས་པ་ཉིན་གསུམ་པ་ཚར་བརྒྱད། ཉེར་གསུམ་ནས་ཉེར་དགུའི་བར་མགོན་ཁང་ཤར་དུ་མགོན་པོའི་དམར་ཆེན་གཏོར་མའི་བཟློག་པ། ནག་པས་ཉ་བའི་
ཞག་གི་ཕུང་པོའི་ཚེས་བརྒྱད་ནས་ཉི་ཤུ་བཞིའི་བར་ལ་ཐབས་དང་ཤེས་རབ་གཉིས་སུ་མེད་པའི་རྒྱུད་ཀྱི་རྒྱལ་པོ་དང་པོའི་སངས་རྒྱས་ཞེས་བྱ་བའི་རྒྱུད་ཀྱི་རྗེས་སུ་འབྲངས་ནས་ལེགས་པར་བཀྲལ་བའི་དཔལ་དུས་ཀྱི་འཁོར་ལོ་ཐུགས་གསུང་སྐུའི་དཀྱིལ་འཁོར་གྱི་ལྷ་མཁའ་རོ་དུས་ཀྱི་གྲངས་དང་མཉམ་པའི་
དཀྱིལ་འཁོར་ཆེན་པོ་རྡུལ་ཚོན་ལ་བརྟེན་པའི་སྒྲུབ་མཆོད་འཛུགས། དེ་ནས་ལྕགས་རའི་དགོན་པར་སྐུ་ཞབས་གྲྭ་ཚང་དང་བཅས་པའི་དགེ་འདུན་གྱི་ཚོགས་ཇི་སྙེད་བཞུགས་པས་ཉི་ཤུ་ལྔ་ནས་ཉེར་དགུའི་བར་རྡོ་རྗེ་འཇིགས་བྱེད་ཀྱི་གཏོར་མ་དྲུག་ཅུ་རྩ་བཞི་པའི་གཏོར་རྒྱབ། ས་ག་ཟླ་བ་ནས་རིམ་
པར་དཔལ་ཀྱེ་རྡོ་རྗེའི་དཀྱིལ་འཁོར་ལ་བརྟེན་པའི་རབ་ཏུ་གནས་པ་རྒྱས་པ་ལན་གཉིས། དཔལ་རྣལ་འབྱོར་གྱི་དབང་ཕྱུག་བིརྺ་པའི་ཞབས་ཀྱིས་བཀྲལ་བའི་རྗེ་བཙུན་རྡོ་རྗེ་བདག་མེད་མ་ལྷ་མོ་བཅོ་ལྔའི་དཀྱིལ་འཁོར་རྡུལ་ཚོན་ལ་བརྟེན་པའི་སྒྲུབ་མཆོད་ཉིན་བརྒྱད། རྡོ་རྗེ་འཇིགས་བྱེད་རྭ་ལུགས་རོ་ལངས་
བརྒྱད་སྐོར་གྱི་དཀྱིལ་འཁོར་རྡུལ་ཚོན་ལ་བརྟེན་པའི་སྒྲུབ་མཆོད་ཉིན་བརྒྱད། ཉི་ཤུ་གསུམ་ནས་ཉེར་དགུའི་བར་རྡོ་རྗེ་ཕུར་པ་ས་ལུགས་ཀྱི་གཏོར་བཟློག །སྣྲོན་གྱི་ཟླ་བར་བཅོམ་ལྡན་འདས་ཚེ་དཔག་ཏུ་མེད་པ་འཆི་མེད་རྔ་སྒྲའི་དཀྱིལ་འཁོར་གྱི་སྒྲུབ་མཆོད་ཉིན་བརྒྱད། ཆུ་སྟོད་ཟླ་བར་བཅོམ་ལྡན་འདས་རྡོ་རྗེ་
འཇིགས་བྱེད་རྭ་ལུགས་ལྷ་བཅུ་གསུམ་གྱི་དཀྱིལ་འཁོར་རྡུལ་ཚོན་ལ་བརྟེན་པའི་སྒྲུབ་མཆོད་ཉིན་བརྒྱད་པ་རྣམས་འཛུགས་སོ། །ཟླ་བ་དེའི་ཚེས་འགོར་ལྷུན་གྲུབ་སྟེང་གི་ཆོས་གྲྭ་འདིར་ངན་སོང་ཐམས་ཅད་ཡོངས་སུ་སྦྱོང་བའི་ཀུན་རིག་རྩ་བའི་དཀྱིལ་འཁོར་ལྷ་སུམ་ཅུ་རྩ་བདུན་མགྲོན་ཐབས་ཀྱི་ལྷ་དང་
བཅས་པའི་ཆོ་ག་སྟོང་ཕྲག་གསུམ་ལ་ཉིན་གསུམ། གྲོ་བཞིན་ཟླ་བར་སྒྲོལ་མ་མཎྜལ་བཞི་པའི་མཆོད་པའི་ཆོ་ག་ཉིན་གསུམ། ཉེར་གསུམ་ནས་ཉེར་དགུའི་བར་ལ་མགོན་པོའི་གཏོར་མ་དྲུག་ཅུ་རྩ་བཞི་པའི་གཏོར་བཟློག །ཁྲུམས་ཀྱི་ཟླ་བར་མགོན་པོའི་གཏོར་བཟློག །ཐ་སྐར་ཟླ་བའི་ཚེས་བཅུ་

བཞིའི་ཉིན་ས་སྐོར་ཆེན་པོ་ཞེས་བྱ་བ་སྟེ། དེ་ཡང༌། མདོ་སྡེ་ལས་བརྒྱ་པ་ལས། དགེ་སློང་དག་སྔོན་བྱུང་བ་འདས་པའི་དུས་བསྐལ་པ་བཟང་པོ་འདི་ཉིད་ལ། སྐྱེ་དགུ་རྣམས་ཚེ་ལོ་བཞི་ཁྲི་ཐུབ་པ་ན། ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ།
བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་འཁོར་བ་འཇིག་ཅེས་བྱ་བ་འཇིག་རྟེན་དུ་བྱོན་ཏེ། གང་གི་ཚེ་སངས་རྒྱས་ཀྱི་ཕྲིན་ལས་ཐམས་ཅད་མཛད་ནས། ཕུང་པོ་ལྷག་མ་མེད་པའི་མྱ་ངན་ལས་འདའ་བའི་དབྱིངས་
སུ་ཡོངས་སུ་མྱ་ངན་ལས་འདས་ནས། རྒྱལ་པོ་མཛེས་པས་དེའི་སྐུ་གདུང་ལ་མཆོད་པ་བྱས་ཏེ། སྐུ་གདུང་གི་མཆོད་རྟེན་བརྩིགས་ནས། མཆོད་རྟེན་དེ་ལ་བཀུར་སྟི་ཆེན་པོ་བྱས་ཏེ་མཆོད་རྟེན་གྱི་དུས་སྟོན་གྱི་ལུགས་བཏོད་དོ་ཞེས་དང༌། བདག་ཅག་གི་སྟོན་པ་ཡང་དག་པར་རྫོགས་པའི་སངས་
རྒྱས་བཅོམ་ལྡན་འདས་ཤཱཀྱའི་རྒྱལ་པོ་དེ་ཉིད་གྲོང་ཁྱེར་རྩྭ་ཅན་གྱི་གནས་སུ་མྱ་ངན་ལས་འདའ་བའི་ཚུལ་བསྟན་པའི་སྐུ་གདུང་གི་མཆོད་རྟེན་ལ། རྩྭ་ཅན་དང་སྡིག་པ་ཅན་གྱི་གྱད་དང༌། ཡུལ་རྟོག་པ་གཡོ་བའི་རྒྱལ་པོ་དང༌། སེར་སྐྱའི་གྲོང་ཁྱེར་གྱི་ཤཱཀྱའི་རིགས་དང༌། མ་ག་དྷཱའི་རྒྱལ་པོ་མ་
སྐྱེས་དགྲ་རྣམས་ཀྱིས་རང་རང་གི་ཡུལ་དུ་དུས་སྟོན་གྱི་མཆོད་པ་དཔག་ཏུ་མེད་པ་བཙུགས་པར་འདུལ་བ་ལུང་ཕྲན་ཚེགས་དང༌། མྱ་ངན་ལས་འདས་པའི་མདོ་ལ་སོགས་པ་ནས་གསུངས་ཤིང༌། ལྷག་པར་བསོད་ནམས་ཀྱི་ཚོགས་བྱེ་བ་གྲངས་མེད་དུ་འཕེལ་བར་འདོད་པ་རྣམས་ཀྱིས། ཁྱད་པར་
ཅན་གྱི་དུས་ཆེན་བཞི་ལ་དགེ་བའི་རྩ་བ་བསྒྲུབ་པར་གསུངས་པ་ལས། དེའི་ངོས་འཛིན་ཚུལ་ཡང་ཡོངས་སུ་གྲགས་པ་ནི། མཆུ་ཟླ་བར་ཆོ་འཕྲུལ་ཆེན་པོ་བསྟན་པའི་དུས་མཆོད་དང༌། ས་ག་ཟླ་བར་མངོན་པར་བྱང་ཆུབ་པའི་དུས་མཆོད་དང༌། ཆུ་སྟོད་ཟླ་བར་ཆོས་ཀྱི་འཁོར་ལོ་བསྐོར་བའི་
དུས་མཆོད་དང༌། དབྱུག་པ་ཟླ་བར་ལྷ་ལས་བབ་པའི་དུས་མཆོད་རྣམས་སྔོན་དུས་འཕགས་པའི་ཡུལ་དུ་དར་བར་གྲགས་ཤིང༌། གཞན་ཡང་ཁྱིམ་ནས་ཁྱིམ་མེད་པར་མངོན་པར་བྱུང་སྟེ། མཆོད་རྟེན་རྣམ་དག་གི་དྲུང་དུ་དབུའི་གཙུག་ཕུད་བྲེགས་པའི་ཚེ་གཙུག་གི་ཕུད་བུ་ལྷ་རྣམས་ཀྱི་དབང་པོ་བརྒྱ་

བྱིན་གྱིས་བླངས་ཏེ། སུམ་ཅུ་རྩ་གསུམ་གྱི་གནས་སུ་ཁྱེར་བ་ལ་གཙུག་ཕུད་ཀྱི་དུས་སྟོན་བྱས་པ་དང༌། དེ་ཉིད་ཤ་ཝ་རི་པའི་ཆ་བྱད་ཅན་དུ་སྤྲུལ་ནས་ཉེ་བར་འོངས་ཏེ། ཤ་ནའི་གོས་ངུར་སྨྲིག་གི་ཚོན་གྱིས་བྲན་པ། སྲིད་པ་ཐ་མའི་བྱང་ཆུབ་སེམས་དཔའ་ལ་ཕུལ་ནས། དེའི་ན་བཟའ་ཀཱ་
ཤི་ཀའི་གོས་རིན་ཐང་གཞལ་དུ་མེད་པ་གུས་པས་བླངས་ཏེ། སུམ་ཅུ་རྩ་གསུམ་གྱི་གནས་སུ་ཁྱེར་ཏེ་དེར་ངུར་སྨྲིག་བླངས་པའི་དུས་སྟོན་བྱས་པ་དང༌། དཀའ་ཐུབ་ཀྱི་མཛད་པ་མཐར་ཕྱིན་ནས་ཁ་ཟས་རགས་པ་གསོལ་བར་བཞེད་པའི་ཚེ། ལེགས་སྐྱེས་མ་དང་དགའ་སྟོབས་མས། ཉིས་
སྟོང་གི་འོ་མ་བསྐོལ་བའི་འོ་ཐུག་སྦྲང་རྩི་ཅན་གྱིས་གསེར་གྱི་ཡོལ་གོ་ཡོངས་སུ་བཀང་སྟེ་ཕུལ་བ་བཅོམ་ལྡན་འདས་ཀྱིས་ལེགས་པར་བཞེས་ཏེ། ཡོལ་གོ་དེ་ཉིད་ཀྱང་ནཻ་རཱཉྫ་ནའི་ཆུ་བོ་ཆེན་པོར་བསྒྱུར་བ། ཀླུའི་རྒྱལ་པོ་རྒྱ་མཚོ་ཞེས་བྱ་བས་མཆོད་པའི་ཆེད་དུ་བླངས་པ་ན། ལྷའི་དབང་པོ་
བརྒྱ་བྱིན་ནམ་མཁའ་ལྡིང་གི་རྣམ་པར་སྤྲུལ་ནས་ཕྲོགས་ཏེ། དེ་ཉིད་རང་གི་གཟུགས་ཀྱིས་ལྷའི་གནས་སུ་ཁྱེར་བ་དང་ཡོལ་གོའི་དུས་སྟོན་བྱས་པ་ལ་སོགས་པ་བཤད་པ་དང༌། འདུལ་བ་མདོ་རྩ་བར། དེ་ལ་དུས་སྟོན་བྱའོ། །བལྟམས་པ་དང༌། གཙུག་ཕུད་དང༌། དབུ་སྐྲ་དང༌།
བྱང་ཆུབ་པའི་དུས་སྟོན་དག་ཀྱང་ངོ་ཞེས་གསུངས་ཤིང༌། ཁྱད་པར་བླ་མའི་དུས་ཆེན་གྱི་ཚེ་མཆོད་པ་བྱས་པའི་ཕན་ཡོན་དང་དགོས་པ་ནི། དུས་ཀྱི་འཁོར་ལོའི་རྩ་བའི་རྒྱུད་ཀྱི་དུམ་བུ་བླ་མའི་ཡོན་ཏན་བཟུང་བའི་རྒྱུད་ལས། ཉེ་དུ་འབྲེལ་པ་ཤུལ་ན་གནས་པ་ཡིས། །གཤིན་གྱི་དོན་དུ་དགེ་བ་གང་བྱས་
པའི། །རྣམ་པར་སྨིན་པ་མ་ཕྱིར་བེའུ་བཞིན། །གང་དུ་སྐྱེས་པ་དེ་ཡི་རྗེས་སུ་འབྲང༌། །དེ་བཞིན་མོས་གུས་ལྡན་པའི་སློབ་མ་ཡིས། །བླ་མ་འདས་ནས་གདུང་བས་མཆོད་བྱས་ན། །ཐུགས་ཀྱི་དགོངས་པ་གོང་དུ་ཡོངས་རྫོགས་ཤིང༌། །སློབ་མས་བླ་མའི་རྣམ་ཐར་སྙོགས་པར་འགྱུར། །
བླ་མ་འདས་པའི་ལོ་ཟླ་ཚེས་གྲངས་དག །ངེས་པར་བཟུང་སྟེ་མཆོད་པ་བྱས་གྱུར་ན། །བསྐལ་པར་བསགས་པའི་སྡིག་ཆེན་རབ་བཅོམ་ནས། །ཤིན་ཏུ་མི་བཟད་གཤིན་རྗེའི་གྲོང་ལས་ཐར། །སྟོང་གསུམ་སྐྱེ་བོ་མིག་བྲལ་སྲོག་ཉམས་ལ། །མིག་སྲོག་བྱིན་ཀྱང་དེ་ཡི་དཔེར་མི་ཕོད། །

དེ་སྙེད་སྐྱེ་བོ་དགྲ་བཅོམ་ལ་བཀོད་ནས། །བསྐལ་པར་མཆོད་པའི་དགེ་བས་དཔེར་མི་བཟོད། །བསྐལ་པ་གྲངས་མེད་བསགས་པའི་སྡིག་པ་ཡང༌། །མུན་ལ་ཉི་མ་ཇི་བཞིན་མ་ལུས་སེལ། །ཞེས་འབྱུང་བ་ལྟར། འདིར་འཛམ་གླིང་བསྟན་པའི་བདག་པོ་དཔལ་ས་སྐྱ་
པ་ཀུན་དགའ་སྙིང་པོ་ཞེས་ཕྱོགས་བཅུའི་དཀྱིལ་འཁོར་ཀུན་དུ་གྲགས་པའི་ཡི་གེ་རྣམ་པར་གསལ་བ། དུས་གསུམ་མཉམ་པ་ཉིད་དུ་མཁྱེན་པ། ཐུགས་རྗེའི་དཀྱིལ་འཁོར་ཡངས་པ། སྲིད་པའི་འཆིང་དགུ་གཅོད་པ། ལུས་མེད་གཡུལ་ལས་རྒྱལ་བ། བདེན་པར་ཡང་དག་པར་འདོམས་པར་
མཛད་པ། ཆོས་ཀྱི་རྒྱལ་པོ་ཆེན་པོ། ཆོས་བཞིན་དུ་སྨྲ་བ། རིགས་པར་འདོམས་པའི་རྒྱལ་པོ། གཞི་ཐུགས་སུ་ཆུད་པ། ལམ་མ་ནོར་བར་སྟོན་པ། འབྲས་བུ་བདེ་བླག་ཏུ་སྟེར་བ། ཕྱོགས་བཅུའི་རྣམ་པར་འདྲེན་པ་ཐམས་ཅད་ཀྱིས་ལེགས་སོའི་མེ་ཏོག་
སྩལ་བ། གང་གི་ཞབས་ཀྱི་ཆུ་ལས་སྐྱེས་པ་དག་ནི་འཇིག་རྟེན་གྱི་མེས་པོ་གསེར་མངལ་ཅན་དང༌། གཙུག་ན་ཟླ་བ་དང༌། ཤིས་བརྗོད་ཉན་དང༌། རྣམ་གསུམ་གནོན་པ་ལ་སོགས་པས་ཡན་ལག་མཆོག་གི་གུས་པས་བཏུད་ཅིང་ཕྱག་བྱས་པ། སའི་སྟེང་གི་མཁས་པ་སྐྱེ་བ་ནས་སྐྱེ་
བའི་ཕྲེང་བར་ཤེས་པར་བགྱི་བའི་གཞུང་ལུགས་རབ་འབྱམས་ལ་སྦྱངས་པའི་རྒྱ་མཚོ་རབ་ཏུ་བསྐྱིལ་བས་སྒྲིབ་པའི་དྲི་མ་མ་ལུས་པ་བཀྲུས་ནས་སྐྱེ་བ་འདིར་ལྷག་པའི་ལྷའི་སྐུ་དང་གསུང་དང་ཐུགས་ཀྱི་བྱིན་གྱིས་བརླབས་པ། ཟབ་མོའི་སྔགས་ཀྱིས་ལེགས་པར་བཏབ་པ། ཕྱི་དང་ནང་གི་རིག་པའི་
གཙུག་ལག་རབ་འབྱམས་ལ་ལྟ་བར་བྱེད་པའི་རྣམ་པར་འབྱེད་པའི་མིག་དབང་ཤིན་ཏུ་དག་པར་གྱུར་པ་མང་པོས། དྲི་ཟའི་བུ་མོའི་རྒྱུད་མངས་ཀྱི་གླུ་དང་ལྷན་ཅིག་ཏུ་བསྲེས་པ་སྙམ་བྱེད་པའི་སྙན་དངགས་ཀྱི་མེ་ཏོག་ཨུ་དུམྦཱ་ར་མཐའ་དག་གཅིག་ཏུ་སྤུངས་ནས། གང་གི་ཡོན་ཏན་གྱི་ཁྱད་
པར་ལ་ལན་བརྒྱ་སྟོང་དུ་མར་མངོན་པར་བསྔགས་པའི་ཚིག་གི་མེ་ཏོག་སིལ་མས་ཡང་དག་པར་འཐོར་བ་ན། ནམ་ཞིག་སྙན་དངགས་ཀྱི་མེ་ཏོག་གི་ཕུང་པོ་ནི་ཡོངས་སུ་ཟད་པར་གྱུར་ཀྱང༌། དེའི་ཡོན་ཏན་གྱི་ཆ་ཤས་ནི་གཞར་ཡང་གཏུགས་པར་བྱར་མེད་པ་དེ་ཉིད་ཀྱིས། མིའི་སྲིད་པའི་

ཟ་མ་ཏོག་ནི་ཆོས་དབྱིངས་སུ་མཉམ་པ་ཉིད་དུ་རྣམ་པར་བསྲེས་ཏེ། ཡེ་ཤེས་སྒྱུ་མའི་རྒྱལ་པོའི་མིག་འཕྲུལ་གསུམ་དུ་སྤྲུལ་པ་ཡང་བདེ་བ་ཅན་དང༌། མངོན་པར་དགའ་བའི་ཞིང་དང༌།གསེར་མདོག་ཅན་རྣམས་སུ་བདེ་བར་གཤེགས་པའི་ལོ་དུས་ཀྱི་མཆོད་པའི་དུས་ཇ་ཆེན་པོས་བསྐོར་ཞེས་
བྱ་བ་ས་ངོར་གྱི་དགོན་སྡེ་མཐའ་དག་ཏུ་ཡོད་ཅིང༌། ཁྱད་པར་ལྷུན་གྲུབ་སྟེང་འདིར་གཙུག་ལག་ཁང་དུ། དུས་ཐང་གི་སྐུ་བརྙན་མཐོང་བ་དོན་ལྡན་ཞེས་བྱ་བ་བཀྲམ་པའི་མདུན་གང་ན་བར། མེ་ཏོག་དང༌། སྤོས་དང༌། མར་མེའི་ཕྲེང་བ་དང༌། བྱུག་པ་དང༌། ལྷ་བཤོས་ལ་སོགས་
པའི་ཉེ་བར་སྤྱོད་པ་རྣམས་ནི། རེ་རེའང་བརྒྱ་སྟོང་གྲངས་མེད་པར་བསྐྲུན་དུ་བཅུག་སྟེ་བཤམ་མོ། །ཇི་ཙམ་ན་དགེ་འདུན་གྱི་ཚོགས་ཇི་སྙེད་བཞུགས་པ་མ་ལུས་པ་རྒྱལ་པོའི་ཁབ་ཀྱི་གཙུག་ལག་ཁང་དུ་བསྡུ་ཞིང༌།དེ་དག་གི་གཙོ་བོར་བཞུགས་པ་ནི། འདི་སྐབས་སུ་ལྷ་དང་བཅས་པའི་འཇིག་རྟེན་
གསུམ་གྱི་མཆོད་ཡུལ་མཆོག་ཏུ་གྱུར་པ་མཁན་པོ་རིན་པོ་ཆེ་ཐམས་ཅད་མཁྱེན་པ་དཔལ་ལྡན་ཆོས་སྐྱོང་པ་ཉིད་སྤྱན་འདྲེན་མཛད་ཅིང་ཆོས་ཀྱི་ཁྲི་ལ་ཞབས་ཀྱི་ཆུ་སྐྱེས་རྣམ་པར་བཀོད་པ་དང་བཅས་ཏེ། མཆོད་པ་དང་བསྟོད་པའི་གདངས་དབྱངས་ཡིད་དུ་འོང་བར་བསྒྱུར་བའི་སྒོ་ནས་མཆོད་ཅིང་རྗེད་
པར་བྱེད་དོ། །དེ་ནས་ཕྱི་རོལ་དུ་སེར་སྦྲེང་གི་བཀོད་པ་བསྟར་བའི་ངོ་མཚར་ནི། དཔེར་ན་སིནྡྷུ་ཝཱ་རའི་རྒྱ་མཚོ་ཆེན་པོ་ཞིག་མཆོག་གི་སྐྱེས་བུ་སུ་ཞིག་གི་ཡོན་ཏན་དང་ངོ་མཚར་གྱི་ཕུང་པོ་གང་དག་རྗེས་སུ་དྲན་པས་གཡོས་ཤིང་རབ་ཏུ་གཡོས་ཏེ། སའི་སྟེང་ན་ཡོངས་སུ་ལུད་པར་གྱུར་པ་ན། དགའ་
བའི་དབའ་རླབས་ཀྱི་ཕྲེང་བ་རྣམས་ནི་ནམ་མཁའ་ལ་འགོང་བ་བཞིན་དུ་རྣམ་པར་འཕྱོ་བ་དེ་ནི་ཀཱཉྩ་ནའི་ལྷུན་པོ་འགྲོ་ཤེས་པ་དང་ལྷན་ཅིག་ཏུ་འགྲོགས་ཏེ། འཛིན་མའི་གཞི་ལ་བརྟེན་ཏེ་དལ་བུས་རྒྱུ་བ་དང་འདྲ་བར། བླ་མར་གྱུར་པ་དང༌། དགེ་སློང་གི་དགེ་འདུན་ཆེན་པོ་མཚར་དུ་དངར་བ་རྣམས་
ཀྱིས་འབུད་པ་དང་དཀྲོལ་བར་བྱ་བའི་རོལ་མོའི་བྱེ་བྲག་དཔག་ཏུ་མེད་པ་དང༌། གདུགས་དང༌། རྒྱལ་མཚན་དང༌། འཕན་དང༌། བ་དན་ལ་སོགས་པ་མཆོད་པའི་ཁྱད་པར་སྔོན་དུས་སྡེ་དགེ་གོང་མ་རྣམས་ཀྱིས་བཞག་པ་དང༌། སྡོམ་བརྩོན་བླ་མ་སྐྱེ་དགུའི་བདག་པོ་འདིའི་སྐུ་རིང་

ལ་གསར་བསྐྲུན་དང་བཅས་པའི་ཡོ་བྱད་ཀྱི་ཕྲེང་བ། མཛེས་ཤིང་ལྟ་ན་སྡུག་པ་རྣམ་པ་སྣ་ཚོགས་པ་དག་བཟུང་ནས། ནམ་མཁའ་ལ་འཕྱར་བ་དང༌། དཔྱངས་པ་དང༌། རླུང་གིས་བསྐྱོད་པ་རྣམས་ཀྱི་ངོ་མཚར་གང་ཞིག་མཐོང་བར་གྱུར་པའི་སྐྱེ་བོ་འགའ་ཞིག་ནི་བཅོམ་
ལྡན་འདས་འོད་མཐའ་ཡས་པའི་ཡོན་ཏན་གྱི་བཀོད་པ་ཡང་འདི་ལས་ལྷག་པ་ཅི་ཞིག་ཅེས་གཏམ་དུ་སྒྲོག་པ་ལའང་མི་སྤྲོ་བ་མེད་པ་ཉིད་དོ། །ཉེར་ལྔ་ནས་ཉེར་དགུའི་བར་ལ་མགོན་པོའི་གཏོར་བཟློག་ཆེན་པོ་འཆམས་དང་བཅས་པ་དང༌། སྟོང་ལ་ཕྱོགས་བཞི་གཏོར་མ། སྨིན་དྲུག་ཟླ་བའི་ཚེས་ལ་
རྣམ་པར་རྒྱལ་མའི་སྟོང་མཆོད་དང་རྡོ་རྗེ་རྣམ་པར་འཇོམས་པའི་བུམ་སྒྲུབ་ཀྱི་ཆོ་ག་རྣམས་སོ། །དེ་ནས་མཁར་མདོ་ལ་སོགས་པའི་དགོན་སྡེ་མང་པོ་རྣམས་སུ་དྲུག་ཅུ་པའི་གཏོར་རྒྱབ་ལ་ཉིན་ལྔ་པ་རེའོ། །མགོས་ཉ་བའི་ཟླ་བར་ཉི་ལྡོག་གི་དུས་ཚོད་རི་མོའི་ངེས་པ་དང་བསྟུན་ཏེ་ངོར་ལུགས་ཀྱི་དགོན་སྡེ་
མཐའ་དག་ཏུ་འཇིགས་བྱེད་ཀྱི་གཏོར་མའི་ཆོ་ག་དྲུག་ཅུ་རྩ་བཞི་པ་དང་བཅས་པའི་གཏོར་རྒྱབ་ཉིན་ལྔ་པ་རེ་རྣམས་ལོ་དུས་ཀྱི་མཆོད་པ་ཉིད་དུ་བཙུགས་སོ། །གཞན་ཡང་ཟླ་དུས་ཀྱི་མཆོད་པ་ལ། མཁས་པ་འཆི་བ་མེད་པའི་སེང་གེས། ཕྱོགས་ནི་སྔོན་མ་ཕྱི་མ་སྟེ། །དེ་གཉིས་ཟླ་བ་དཀར་ནག་
གོ །ཞེས་ཉིན་ཞག་བཅོ་ལྔ་ལ་ནི་ཕྱོགས་དང༌། ཕྱོགས་སྔ་མ་དང་ཕྱི་མ་གཉིས་ལ་ནི་དཀར་ཕྱོགས་དང་ནག་ཕྱོགས་ཏེ། དེ་གཉིས་བསྡོམས་པའི་ཉིན་ཞག་སུམ་ཅུ་ལ་ཟླ་བ་སྟེ། དེ་ལྟ་བུའི་ཟླ་བ་ཤར་དགུ་ཐམས་ཅད་ཀྱི་ཚེས་གསུམ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ་ཚར་རེ། ཚེས་
བརྒྱད་ཀྱི་ནང་བར་སྒྲོལ་མ་ལྷ་ཁང་དུ་རྣམ་པར་རྒྱལ་མའི་སྟོང་མཆོད་ཀྱི་ཆོ་ག་དང༌། ཨ་ཐིག་བང་རྒོད་དུ་དགེ་སློང་བཅུས་ལམ་ཟབ་བླ་མ་མཆོད་པ། མགོན་ཁང་ནུབ་ཏུ་དགེ་སློང་མང་འཚོགས་ཀྱིས་མགོན་པོའི་བསྐང་གསོ་དང༌། ཡང་མགོན་ཁང་ནུབ་ཏུ་དགེ་སློང་བཅོ་ལྔས་བསྐང་གསོ། ཚེས་བཅུར་
ལྷ་ཁང་གསར་པར་དགེ་སློང་བཅོ་ལྔས་གཏེར་སྟོན་འཇའ་ཚོན་ལུགས་ཀྱི་དཀོན་མཆོག་སྤྱི་འདུས་གཏོར་འབུལ་འཆམས་དང་བཅས། བཅུ་གཉིས་ལ་ཀུན་དགའ་ཆོས་འཕེལ་གྱི་གདུང་འབུམ་ཁང་དུ་དགེ་སློང་བཅུས་ཀུན་རིག་གི་བསྙེན་པ་རྒྱས་པ་མདུན་བསྐྱེད་ཀྱི་ཆོ་ག་དང་བཅས། བཅུ་བཞིར་

ལམ་འབྲས་ལྷ་ཁང་དུ་དགེ་སློང་ཉི་ཤུས་བླ་མ་རིན་ཆེན་འབྱུང་ལྡན་མཆོད་པའི་ཆོ་ག་དང༌། ངོར་པའི་ཆོས་སྤྱོད་ཀྱི་རིམ་པ་མཚན་ཡང་དག་པར་བརྗོད་པ་སྨོན་ལམ་རྣམ་པ་བཞི་དང་བཅས་པ་ཡོངས་སུ་རྫོགས་པ་དང༌། མགོན་ཁང་གཉིས་སུ་བསྐང་བ་སྔ་མ་བཞིན་དུ་བཏང་བ་དང༌། སྡེ་དགེ་གྲུབ་
ཐོབ་པའི་དུས་མཆོད་དུ་དགེ་སློང་བཞིས་ལམ་ཟབ་བླ་མར་མཆོད་པའི་ཆོ་ག་རྣམས་སོ། །ཉི་ཤུར་མཁན་པོ་ཆེན་པོ་བཀྲ་ཤིས་ལྷུན་གྲུབ་པའི་གདུང་འབུམ་ཁང་དུ་དགེ་སློང་བཅུ་ཕྲག་གཅིག་གིས་ལམ་འབྲས་བླ་མར་མཆོད་པའི་ཆོ་ག །ཉི་ཤུ་གསུམ་ལ་ལམ་འབྲས་ལྷ་ཁང་དུ་དགེ་སློང་བཅོ་
ལྔས་ཞང་བློན་ཆེན་པོ་རྡོ་རྗེ་བདུད་འདུལ་གྱི་བསྐང་གསོ་ཚོགས་ཀྱི་འཁོར་ལོ་དང་བཅས་པ་དང༌། མགོན་ཁང་གཉིས་སུ་ཆོས་སྐྱོང་རྣམས་ཀྱི་བསྐང་བ་སྔ་མ་ལྟར་རོ། །ཉི་ཤུ་དགུ་ལ་མགོན་ཁང་གཉིས་སུ་བསྐང་བ་སྔ་མ་བཞིན་ནོ། །སྟོང་གི་ཉིན་ལ་དགེ་སློང་བཅོ་ལྔས་སློབ་དཔོན་ཆེན་
པོ་པདྨ་འབྱུང་གནས་ལ་གསོལ་བ་འདེབས་པ་ལེའུ་བདུན་མ་སྟེ་རིམ་པ་དེ་ཉིད་ཀྱིས་ཟླ་དུས་ཀྱི་མཆོད་པ་རྣམས་སོ། །གཞན་ཡང་ནང་རེ་བཞིན་སྒྲོལ་མ་ལྷ་ཁང་དུ་དགེ་སློང་བཞིས་སྒྲོལ་མ་མཎྜལ་བཞི་པའི་མཆོད་པའི་ཆོ་ག་དང༌། མགོན་ཁང་ཤར་ནུབ་གཉིས་སུ་རེས་འགའ་
ནི་ལྔ་རེ། རེས་འགའ་ནི་བཅུ་རེ་སྟེ། དེ་ཡང་བསྐང་བ་རྟག་འདོན་བྱེད་པའི་མཆོད་པ་རྣམས་དེ་དག་གི་རིམ་པས་དུས་མཆོད་ཀྱི་རིམ་པ་རྣམས་མ་ཆག་པར་འཛུགས་པར་མཛད་དོ། །དེ་བཞིན་དུ་སྡོམ་བརྩོན་བླ་མ་སྐྱེ་དགུའི་བདག་པོ་གང་གི་སྐུའི་སྲུང་བ་པ་སྐུ་ཞབས་གྲྭ་ཚང་ཞེས་པ། མངའ་འོག་ཏུ་གཏོགས་པའི་དགོན་
སྡེ་མཐའ་དག་གི་དཀྱིལ་ནས་བཀྲབས་ཤིང་བཏུས་པའི་བླ་མར་གྱུར་པ་དང་དགེ་སློང་གི་ཚོགས་རྣམས་ནི་གསང་བ་ཆེན་པོ་སྔགས་ཀྱི་ཐེག་པ་གསར་རྙིང་དང་བཀའ་གཏེར་གྱིས་བསྡུས་པའི་ཆོས་ཀྱི་ཚུལ་མཐའ་དག་གི་གསན་པ་དང་སྦྱངས་པ་རབ་ཀྱི་རྩེ་མོར་གཤེགས་པས་ལྷ་དང་སྲུང་མའི་ཚོགས་
གང་ཡིན་པ་དེ་དང་དེ་དག་གི་བསྙེན་པ་དང་སྒྲུབ་པ་དང༌། ལས་ལ་སྦྱར་བའི་ཚུལ་ཐམས་ཅད་ལ་འཇུག་པར་བྱེད་པའི་རྣམ་པར་དཔྱོད་པའི་མིག་དཀྱུས་རྣམ་པར་ཡངས་ཤིང༌། འདྲི་བ་དང༌། བཅའ་བ་དང༌། འདོན་པ་དང༌། གདངས་དང༌། དབྱངས་ཀྱི་འགྱུར་ཁུག་དང༌། གར་འཆམས་དང༌།

འབུད་པ་དང༌། དཀྲོལ་བར་བྱ་བའི་རིགས་ཐམས་ཅད་ལ་ཐོགས་པ་མི་མངའ་བ་ཤ་སྟག་ཏུ་བཞུགས་པ་རྣམས་ཏེ། དེ་དག་གིས་འདོན་པར་བྱ་བ་དུས་མཆོད་ཀྱི་རིམ་པ་ལ། ལོ་དུས་ཀྱི་མཆོད་པར། ངོར་ལུགས་ཀྱི་མགོན་པོ་ཆེ་ཆུང་གི་བསྐང་བ་བརྒྱ་ཚར། དཔལ་ལྡན་ལྷ་
མོ་རེ་ཝ་ཏཱི་དམག་ཟོར་རྒྱལ་མོའི་ཐུགས་དམ་བསྐང་བ་སྟོང་ཚར། རྒྱ་ཞང་ཁྲམ་པའི་གཏེར་ཆོས་ལས་འབྱུང་བའི་གཤིན་རྗེ་ཚེ་བདག་གི་གཏོར་བཟློག །འཇའ་ཚོན་སྙིང་པོའི་ལུགས་ཀྱི་དཀོན་མཆོག་སྤྱི་འདུས་ཚོགས་འཁོར་བརྒྱ་ཚར། གུ་རུ་དྲག་པོ་མེ་རླུང་འཁྱིལ་བའི་བསྐང་བ་བརྒྱ་ཚར།
ཀློང་གསལ་ལུགས་ཀྱི་ཡེ་ཤེས་རབ་འབར་གྱི་བསྟན་སྲུང་ཡོངས་སུ་རྫོགས་པའི་བསྐང་བ་བརྒྱ་ཚར། འཁོར་ལོ་བདེ་མཆོག་ལས་བཀའ་སྲུང་སྐྱེས་བུ་ཆེན་པོའི་བསྐང་བ་བརྒྱ་ཚར། མགོན་པོ་ཚོགས་ཀྱི་བདག་པོའི་བསྐང་བ་རྣམས་སོ། །ཟླ་དུས་ཀྱི་མཆོད་པར་ཟླ་བ་ཐམས་ཅད་ཀྱི་ཚེས་
གཅིག་ལ་གཙུག་ཏོར་རྣམ་པར་རྒྱལ་མའི་སྟོང་མཆོད་ཀྱི་ཆོ་ག །གཉིས་ལ་རྡོ་རྗེ་རྣམ་པར་འཇོམས་པའི་བུམ་སྒྲུབ་ཀྱི་ཆོ་ག་དང༌། འཇམ་དཔལ་གྱི་མཚན་ཡང་དག་པར་བརྗོད་པ། གསུམ་ལ་ས་བདག་ཆེན་པོ་བསྟན་པ་ཚེ་རིང་པའི་དུས་མཆོད་དུ་ན་རོ་མཁའ་སྤྱོད་མའི་ཆོ་ག་སིནྡྷུ་རའི་
དཀྱིལ་འཁོར་ལ་བརྟེན་པ། བཞི་ལ་ཛེ་ཏཱ་རིའི་ལུགས་ཀྱི་ཚེ་དཔག་ཏུ་མེད་པ་ལྷ་དགུའི་དཀྱིལ་འཁོར་གྱི་ཆོ་ག ཚེས་ལྔ་ལ་རྫོགས་ཆེན་པདྨ་རིག་འཛིན་གྱི་དུས་མཆོད་དུ་དཀོན་མཆོག་སྤྱི་འདུས། དྲུག་ལ་ངོར་ལུགས་ཀྱི་ཆོས་སྤྱོད་རྒྱས་པ། བདུན་ལ་སློབ་དཔོན་རིན་པོ་ཆེའི་གསོལ་
འདེབས་ལེའུ་བདུན་པ་དང་ཀློང་གསལ་ལུགས་ཀྱི་ཚེ་སྒྲུབ་ཡང་གསང་བླ་མེད། ཚེས་བརྒྱད་ལ་སློབ་དཔོན་ངག་གི་དབང་ཕྱུག་གྲགས་པའི་ལུགས་ཀྱི་སྒྲོལ་མ་དཀར་མོ་ཡིད་བཞིན་འཁོར་ལོའི་ཆོ་ག་དང༌། བླ་མ་དགོངས་པ་འདུས་པའི་ཚོགས་བསྐང་དང༌། ངོར་ལུགས་ཀྱི་མགོན་པོ་ཆེ་ཆུང་གི་
བསྐང་བ། དགུ་ལ་གཏེར་སྟོན་ཉི་མ་གྲགས་པའི་ལུགས་ཀྱི་བདུད་འདུལ་མ། བཅུ་ལ་གསོལ་འདེབས་བསམ་པ་ལྷུན་གྲུབ་དང་དཀོན་མཆོག་སྤྱི་འདུས། བཅུ་གཅིག་ལ་རྗེ་མོའི་དགོངས་རྫོགས་སུ་གྲུབ་ཆེན་ཀུན་དགའ་སྙིང་པོའི་ལུགས་ཀྱི་ཀུན་རིག་རྩ་བའི་དཀྱིལ་འཁོར་གྱི་ཆོ་ག །

བཅུ་གཉིས་ལ་བླ་མ་ཀུན་དགའ་ཆོས་འཕེལ་བའི་དུས་མཆོད་དུ་ཀུན་རིག་གི་བསྙེན་པ་རྒྱས་པའི་ཆོ་ག །བཅུ་གསུམ་ལ་རྗེ་བཙུན་བཞད་པའི་རྡོ་རྗེའི་ལུགས་ཀྱི་བཀྲ་ཤིས་ཚེ་རིང་མའི་གསོལ་བསྐང༌། བཅུ་བཞི་ལ་ཉི་མ་གྲགས་པའི་ལུགས་ཀྱི་ཚེ་སྒྲུབ་བདུད་བཞིའི་གཡུལ་ལས་རྒྱལ་བ་དང༌།
ངོར་ལུགས་ཀྱི་མགོན་པོའི་བསྐང་བ། བཅོ་ལྔ་ལ་ལྷ་བསང་དང་བརྒྱགས་བརྔན་ཆེན་པོ་དང་དཀོན་མཆོག་སྤྱི་འདུས་དང་ཡང་འདུས། བཅུ་དྲུག་ལ་སྒྲོལ་མ་དཀར་མོའི་ཆོ་ག །བཅུ་བདུན་ལ་ཐུབ་པ་གནས་བརྟན་དང་བཅས་པའི་ཕྱག་མཆོད། བཅོ་བརྒྱད་ལ་མཁན་པོ་ཆེན་པོ་སངས་རྒྱས་ཕུན་
ཚོགས་པའི་དུས་མཆོད་དུ་ལམ་འབྲས་ཕྱག་མཆོད། བཅུ་དགུ་ལ་ཉི་མ་གྲགས་པའི་ལུགས་ཀྱི་རྟ་མགྲིན་དྲེགས་པ་ཟིལ་གནོན་དང་ལྷ་ཆེན་ཚོགས་བསྐང༌། ཉི་ཤུ་ལ་བསྟན་བཅོས་ཆེན་པོ་སྡོམ་པ་གསུམ་གྱི་རབ་ཏུ་དབྱེ་བ། ཉེར་གཅིག་ལ་འཇམ་པའི་དབྱངས་བཀྲ་ཤིས་དཔལ་ལྡན་པའི་
དུས་མཆོད་དུ་ལམ་འབྲས་བླ་མ་མཆོད་པའི་ཆོ་ག ཉེར་གཉིས་ལ་ཀློང་གསལ་བའི་ལུགས་ཀྱི་ཡེ་ཤེས་རབ་འབར་ཚོགས་བསྐང༌། ཉེར་གསུམ་ལ་རཏྣ་གླིང་པའི་ལུགས་ཀྱི་གུ་རུ་དྲག་པོ་མེ་རླུང་འཁྱིལ་པ་དང་ངོར་ལུགས་ཀྱི་མགོན་པོའི་བསྐང་བ་དང༌། དམག་ཟོར་མའི་བསྐང་བ་དང༌།
ཉེར་ཞི་ལ་དཔལ་ས་སྐྱ་པ་བསོད་ནམས་དབང་ཕྱུག་པའི་དུས་མཆོད་དུ་བླ་མ་མཆོད་པའི་ཆོ་ག །ཉེར་ལྔ་ལ་སངས་རྒྱས་བསྟན་པ་དང་བསོད་ནམས་ཕུན་ཚོགས་གཉིས་ཀྱི་དུས་མཆོད་དུ་རྡོ་རྗེ་མི་འཁྲུགས་པའི་ཆོ་ག་དང་ན་རོ་མཁའ་སྤྱོད་ཀྱི་ཆོ་ག །ཉེར་དྲུག་ལ་ཆོས་སྤྱོད་རྒྱས་པ། ཉེར་བདུན་
ལ་རྒྱལ་སྲས་ཞི་བ་ལྷས་མཛད་པའི་བྱང་ཆུབ་སེམས་དཔའི་སྤྱོད་པ་ལ་འཇུག་པ་དང༌། ཇོ་བོའི་བྱང་ཆུབ་སེམས་དཔའ་ནོར་བུའི་ཕྲེང་བ་དང༌། ཀླུ་སྒྲུབ་ཀྱི་དབུ་མ་བཤེས་པའི་སྤྲིང་ཡིག་དང༌། ཉི་མ་གྲགས་པའི་ལུགས་ཀྱི་བདེ་མཆོག་ཚོགས་བསྐང༌། ཉེར་བརྒྱད་ལ་ཐམས་ཅད་
མཁྱེན་པ་དཔལ་མཆོག་རྒྱལ་མཚན་པའི་དུས་མཆོད་དུ་ལམ་འབྲས་ཕྱག་མཆོད། ཉེར་དགུ་ལ་ཡེ་ཤེས་རབ་འབར་ཚོགས་བསྐང་དང༌། ངོར་ལུགས་མགོན་པོ་དང་དམག་ཟོར་གྱི་བསྐང་བ། སྟོང་ལ་སྒྲོལ་མ་མཎྜལ་བཞིའི་མཆོད་པའི་ཆོ་ག་དང༌། གནམ་ཆོས་ཚོགས་བསྐང་རྣམས་སོ། །

གཞན་ཡང་ཉིན་རེ་བཞིན་རྒྱུན་ཁྱེར་དུ་ཡེ་ཤེས་རབ་འབར་ལས། སེང་གེའི་གདོང་ཅན་མ་དང༌། མ་མོ་དང༌། མགོན་པོ་ཚོགས་བདག་དང༌། རྣམ་ཐོས་སྲས་འཁོར་རྟ་བདག་བཅས་དང༌། གནོད་སྦྱིན་སྟག་མདའ་གདོང་དང༌། དྲང་སྲོང་དང༌། དམ་ཅན་དང༌། རྒྱལ་
པོ་སྐུ་ལྔ་དང༌། གཡུ་ཕྲེང་ཅན་དང༌། རྨུ་མོ་དཀར་མོ་རྣམས་དང༌། བདེ་མཆོག་དང༌། དེའི་བཀའ་སྲུང་ལྔས་རྩེན་དང༌། དམ་ཅན་དང་བཅས་པ། ཉི་མ་གྲགས་པའི་ལུགས་ཀྱི་དྲག་ཁྲོས་གཏེར་སྲུང་ཀླུ་མོ་དང་བཅས་པ། དྷི་རི་ཆོས་གྲགས་ལུགས་ཀྱི་ཚོགས་བདག །རཏྣ་གླིང་པའི་ལུགས་ཀྱི་དམ་
ཅན་དང༌། དཀོན་མཆོག་སྤྱི་འདུས་ལ་སོགས་པ་རྣམས་དང༌། གཞིའི་ལྷ་གཉེར་རྣམས་ཀྱིས་ཀུན་རིག་གི་ཆོ་ག་ཚར་རེ། ངོར་ལུགས་ཀྱི་མགོན་པོའི་བསྐང་བ་ཚར་རེ་རྣམས་ནི་ཉིན་བཞིན་དུ་མ་ཆགས་པར་འཛུགས་པའི་བདག་པོའི་རྐྱེན་བྱེད་པའི་མཆོག་ཏུ་གྱུར་པའོ། །གཞན་ཡང་ལོ་དུས་སུ་ཀ་
ཐོག་རྡོ་རྗེའི་གདན་གྱི་བླ་མ་དཔོན་སློབ་རྣམས་དང༌། དཔལ་བྱང་ཆུབ་གླིང་གི་བླ་མ་དཔོན་སློབ་རྣམས་དང༌། ཐང་ཤིང་བྲོ་བརྡུང་དགོན་གྱི་བླ་མ་དཔོན་སློབ་རྣམས་དང༌། དགེ་དགོན་པའི་བླ་མ་དཔོན་སློབ་རྣམས་དང༌། སྡོམ་བརྩོན་བླ་མ་ཆེན་པོའི་སྐུ་སྲུང་བའི་གཏོ་མཁན་གྱི་རྒྱལ་པོ་དང༌། རྩིས་
མཁན་གྱི་རྒྱལ་པོ་དཔོན་གཡོག་རྣམས་ཀྱང༌། རྒྱལ་པོའི་ཁབ་ཀྱི་ཕོ་བྲང་ཆེན་པོ་འདིར་དྲུག་ཅུ་ཆེན་པོའི་ཚོགས་པ་དང་ལྷན་ཅིག་ཏུ་ལྷགས་ནས། བཀའ་བརྒྱད་འདུས་ཆེན་དང་ཡེ་ཤེས་རབ་འབར་དང༌། ཞིང་སྐྱོང་ལ་སོགས་པ་རང་རང་གི་ལུགས་ཀྱི་ལག་ལེན་ལ་དབང་འབྱོར་བའི་
གཏོར་བཟློག་གི་རིགས་མང་དུ་བཅའ་བ་ལ་སོགས་པའི་སྒོ་ནས། བཅོམ་ལྡན་འདས་བུ་རམ་ཤིང་པའི་ལུང་དང་རྟོགས་པའི་བདག་ཉིད་ཅན་གྱི་བསྟན་པ་རིན་པོ་ཆེ་ཡུན་དུ་བརྟན་པའི་རིམ་གྲོ་དང༌། ས་ཕྱོགས་འདི་ཉིད་ཀྱིས་མཚོན་ཏེ་ཡངས་པའི་འཇིག་རྟེན་གྱི་ཁམས་ཐམས་ཅད་
དུ་བདེ་ཞིང་འབྱོར་པ་དང༌། ལོ་ལེགས་པ་དང༌། སྐྱེ་འགྲོ་ཐམས་ཅད་ཀྱི་རྒྱུད་ལ་དགེ་ཚོགས་ཀྱི་ཆུ་གཏེར་ཀུན་ནས་རབ་ཏུ་འཕེལ་བར་བྱ་བའི་དགོངས་པ་མངོན་དུ་བཞག་སྟེ། སྒྲུབ་ཅིང་མཆོད་པ་ལ་སོགས་པའི་རིམ་པ་ཐམས་ཅད་ཀྱང་དུས་དང་དུས་ལས་ནམ་ཡང་འཛོལ་དུ་མེད་པའི་

ལེགས་བྱས་དཔྱིད་ཀྱི་དཔལ་མོའི་གཡབ་མོ་ལྟ་བུ་ནི་ཅི་ཡང་གཡོབ་པར་བྱེད་དོ། །དེ་ལྟར་གོང་དུ་སྨོས་པའི་དྲུག་ཅུ་རྩ་བཞི་ཆེན་པོ་ནས་བརྩམས་ཏེ་ཇི་སྐད་བཤད་པའི་དུས་མཆོད་ཀྱི་རིམ་པ་དེ་དག་འདོན་པར་བྱེད་པའི་ཡོན་གྱི་ཞིང་དུ་གྱུར་པ། ཐམས་ཅད་ལ་ཡང་བསྙེན་བཀུར་དང་གྲལ་འགྱེད་
དུ་དབུལ་བར་བྱ་བ་ཡང༌། རེས་འགའ་ནི་དར་གྱི་བྱེ་བྲག་དང༌། རེས་འགའ་ནི་གོས་བཟང་གི་རྣམ་པ་དང༌། རེས་འགའ་ནི་ཟམ་སོའི་རྣམ་པ་དང༌། རེས་འགའ་ནི་གསེར་དང༌། དེ་བཞིན་དུ་དངུལ་དང༌། ཇ་དང༌། མར་དང༌། ནས་དང༌། ཐ་མི་ཀ་དང༌། སྣམ་བུ་དང༌། སྣོད་
སྤྱད་ཀྱི་རིམ་པ་དང༌། ལྤགས་པའི་རིམ་པ་དང༌། རྟ་ཕྱུགས་ལ་སོགས་པ་རེ་མོས་ཀྱིས་སྟོབ་པར་བྱེད་པའི་སྒོ་ནས། དགེ་བ་གང་བྱས་པ་ཐམས་ཅད་ཀྱང་བྱང་ཆུབ་ཀྱི་ལམ་དུ་འགྱུར་བ་ཁོ་ན་ལྷུར་བྱེད་ཀྱི། བྱས་གྲགས་ཀྱི་དགེ་ཆོས་གློ་སྟོང་སྤོས་པའི་ཐུག་རྡོར་བཞིན་དུ་ཁ་ལ་ཡོད་ཅིང་གཏིང་
ལ་མེད་པའི་རྣམ་པ་ཅན་མ་ཡིན་པར། གཏོང་ཕོད་ཆེན་པོའི་སྒོ་མོ་བྱེ་བ་བརྒྱ་སྟོང་དུ་མ་ནི་ནམ་ཡང་མ་བསྡམས་པར་ཡོད་པ་ཡང་སྐྱེ་དགུའི་བདག་པོ་འདི་ཉིད་ཀྱི་ཁྱད་པར་གྱི་ཆོས་སོ། །གཉིས་པ་ཆོས་ཀྱི་སྦྱིན་པས་བསྟན་པ་དང་འགྲོ་ལ་ཕན་པ་སྒྲུབ་པའི་ཁྱད་པར་ནི། སྤྱིར་ཆོས་ཀྱི་
སྦྱིན་པ་ནི་བྱང་ཆུབ་སེམས་དཔའ་རྣམས་ཀྱིས་སེམས་ཅན་གཞན་སྨིན་པར་བྱེད་པའི་ཐབས་སུ་གྱུར་པ་གང་ཡིན་པ་སྟེ། འཕགས་པ་ཆོས་བགྲོ་བའི་མདོ་ལས། དེ་ལ་བྱང་ཆུབ་སེམས་དཔའ་རྣམས་ཀྱིས་དགའ་བར་བགྱི་བའི་ཆོས་བཞི་སྟེ། ལན་དུ་ཕན་འདོགས་པ་ལ་མི་རེ་བའི་
སྦྱིན་པ་དང༌། སེམས་ཅན་ཐམས་ཅད་ལ་སྙོམས་པའི་སེམས་ཀྱིས་སྙན་པར་སྨྲ་བ་དང༌། སེམས་ཅན་ཐམས་ཅད་ཀྱི་དོན་མ་ལེགས་པ་སེལ་ཞིང་དོན་སྒྲུབ་པས་དོན་སྤྱོད་པ་དང༌། སེམས་ཅན་ཐམས་ཅད་ལ་དགའ་བའི་བདག་ཉིད་ཀྱི་དོན་མཐུན་པ་སྟེ། ཆོས་བཞི་པོ་དེ་དག་ནི་བྱང་
ཆུབ་སེམས་དཔའ་རྣམས་ཀྱིས་དགའ་བར་བགྱི་བའོ་ཞེས་དང༌། དཀོན་མཆོག་སྒྲོན་མེར། གང་དག་འགྲོ་བའི་སྤྱོད་པ་མང་རྟོགས་པ། །དེ་དག་འགྲོ་བ་ཡོངས་སུ་སྨིན་བྱེད་མཁས། །འགྲོ་བ་ཡོངས་སུ་སྨིན་བྱེད་གང་མཁས་པ། །དེ་དག་འགྲོ་བ་སྡུད་ཤེས་ཆོ་ག་མཁས། །

འགྲོ་བ་སྡུད་ཤེས་ཆོ་ག་གང་མཁས་པ། །དེ་དག་བསྡུ་བའི་དངོས་པོ་བཞི་ལ་བརྩོན། །གང་དག་བསྡུ་བའི་དངོས་པོ་བཞིར་བརྩོན་པ། །དེ་དག་འགྲོ་བའི་དོན་ནི་མཐའ་ཡས་བྱེད། །ཅེས་དང༌། མདོ་སྡེ་རྒྱན་ལས། སྦྱིན་མཚུངས་དེ་སྟོབ་ལེན་འཇུག་དང༌། །
བདག་ཉིད་རྗེས་སུ་འཇུག་རྣམས་ཀྱིས། །སྙན་པར་སྨྲ་དང་དོན་སྤྱོད་དང༌། །དོན་མཐུན་ཉིད་དུ་འདོད་པ་ཡིན། །ཞེས་དང༌། ཕན་པར་བྱེད་པའི་ཐབས་དང་ནི། །འཛིན་དང་འཇུག་པར་བྱེད་པ་དང༌། །དེ་བཞིན་རྗེས་སུ་འཇུག་བྱེད་པས། །བསྡུ་བའི་དངོས་པོ་བཞིར་བཤད་དོ། །ཞེས་
གསུངས་པས་གདུལ་བྱ་རྣམས་ལ་གནས་སྐབས་སུ་ཕན་གདགས་པར་བྱ་བའི་དོན་དུ་ཟང་ཟིང་དང༌། མཐར་ཐུག་ཉིད་དུ་ཕན་པའི་རྒྱུ་ཕ་རོལ་ཏུ་ཕྱིན་པ་དྲུག་གི་ཚིག་འཛིན་པ་དང༌། དེའི་དོན་ལ་འཇུག་པ་དང༌། དོན་དེ་ལ་ཡང་དང་ཡང་དུ་བརྟུན་ཏེ་རྗེས་སུ་འཇུག་པར་བྱ་བའི་ཕྱིར་རོ། །ཡང་ན་སྣོད་དུ་
རུང་བར་བྱ་བ་དང༌། མོས་པར་བྱ་བ་དང༌། བསྒྲུབ་པར་བྱ་བ་དང༌། བསྒྲུབ་པ་མཐར་ཕྱིན་པར་བྱ་བའི་ཕྱིར་ཏེ། རྒྱན་ལས། དང་པོ་སྣོད་འགྱུར་དངོས་པོ་སྟེ། །གཉིས་པ་ཡིས་ནི་མོས་པ་ཡིན། །གསུམ་པ་ཡིས་ནི་བསྒྲུབ་པ་སྟེ། །བཞི་པས་རྣམ་པར་སྦྱོང་བའོ། །ཞེས་སོ། །དེ་
ལྟར་བསྡུ་བ་རྣམ་པ་བཞིའི་སྒོ་ནས་ཆོས་ལ་སྦྱོར་བར་གསུངས་ལ། ཕ་རོལ་ཏུ་ཕྱིན་པ་བསྡུས་པ་ལས། སྦྱིན་པའི་འབྲས་བུས་ཡངས་པ་ཐོབ་གྱུར་ནས། །སྲིད་པའི་མུན་པར་འཐོམས་པའི་སྐྱེ་བོ་ལ། །དམ་པའི་ཆོས་ཀྱི་སྦྱིན་པ་རྒྱ་ཆེན་གྱིས། །ཉི་མ་ཤར་བའི་འོད་ལས་གསལ་བར་སྟོན། །
འཇིག་རྟེན་དམ་པའི་དོན་གྲུབ་སྙོམས་པ་དེ། །ཐམས་ཅད་མཁྱེན་པ་ཉིད་འགྲུབ་གཞིར་གྱུར་པས། །ཉི་ཤར་ཟེར་བཀྱེ་འོད་ཆེན་མི་ཟད་བཞིན། ། དེ་ཡི་བསོད་ནམས་ཀུན་དུ་ཟད་མི་ཤེས། ། ཞེས་པར། ཆོས་ཀྱི་སྦྱིན་པ་ཟང་ཟིང་མེད། །ཅེས་གསུངས་པ་ལྟར་སྦྱིན་པ་ཐམས་ཅད་ཀྱི་ནང་ནས་
སྙིང་པོའམ་གཙོ་བོར་གྱུར་པ་ནི་ཆོས་ཀྱི་སྦྱིན་པ་ཡིན་ཞིང༌། བྱེ་བྲག་ཏུ་སྙིགས་མའི་དུས་ཀྱི་སེམས་ཅན་འདོད་ཆགས་བདོ་བ་དང༌། ཞེ་སྡང་བདོ་བ་དང༌། གཏི་མུག་བདོ་བས་ཡོངས་སུ་དཀྲུགས་ཏེ། སངས་རྒྱས་བཅོམ་ལྡན་འདས་ཀྱིས་ལེགས་པར་གསུངས་པའི་དམ་པའི་ཆོས་ལ་མོས་པ་

ལྷུར་མི་བྱེད་ཅིང༌། ནུབ་རིའི་རྩེ་མོར་འཛེགས་པའི་ཉི་མ་བཞིན་དུ་རིང་དུ་མི་གནས་པའི་སྐབས་འདིར། དམ་པའི་ཆོས་རྣམས་ཡི་གེར་འདྲི་བ་དང༌། གླེགས་བམ་སྦྱིན་པ་དང༌། ལུང་ནོད་པ་དང༌། འཆང་བ་དང༌། ཀློག་པ་དང༌། ཁ་ཏོན་དུ་བྱེད་པ་དང༌། གཞན་དག་ལའང་རྒྱ་ཆེར་
ཡང་དག་པར་རབ་ཏུ་སྟོན་པ་དག་གི་ཕན་ཡོན་བསམ་གྱིས་མི་ཁྱབ་པར་གསུངས་པ་རྣམས་ཀྱིས་ཐུགས་ཡོངས་སུ་ཕྲོགས་པའི་མིའི་ལྷར་གྱུར་པ་བྱང་ཆུབ་སེམས་དཔའ་ཆེན་པོ་བསྟན་པ་ཚེ་རིང་ཞེས་བྱ་བ་དང༌། དེའི་སྲས་སུ་གྱུར་པ་སྡེ་དགེ་བླ་མ་ཆེན་པོ་སྐུ་མཆེད་གསུམ་སྟེ། ཡབ་སྲས་ཐམས་
ཅད་ཞལ་འཛོམ་དུ་བཞུགས་པའི་སྐབས་སུ་བཞེངས་པ་ནི་བདེ་བར་གཤེགས་པའི་བཀའ་གངས་ཅན་གྱི་བརྡའི་ལམ་དུ་འགྱུར་རོ་འཚལ་གྱི་ཕྱི་མོ་པར་དུ་བསྒྲུབ་པ་ལ། འཁོར་ལོ་དང་པོར་གཏོགས་པ་འདུལ་བ་ལུང་གི་སྐོར་དང༌། འཁོར་ལོ་བར་པ་ཤེས་རབ་ཀྱི་ཕ་རོལ་ཏུ་ཕྱིན་པའི་སྐོར་དང༌།
འཁོར་ལོ་ཐ་མའི་མདོ་གཞུང་བཞུགས་ཚན་ཆེ་བའི་སྐོར་དང༌། ཐེག་པ་ཆེ་ཆུང་གི་མདོ་ཅི་རིགས་པ་ཕྱོགས་སུ་བསྒྲིགས་པ་མདོ་མང་དུ་གྲགས་པའི་སྐོར་དང༌། རྒྱུད་སྡེ་རྣམ་པ་བཞི་བསྡོམས་པ་གསང་སྔགས་རྒྱུད་འབུམ་དུ་གྲགས་པའི་སྐོར་དང༌། མཐར་བསྔོ་བ་དང་སྨོན་ལམ་དང་ཤིས་
བརྗོད་ཀྱི་སྐོར་རྣམས་བསྡོམས་པར་གླེགས་བམ་བརྒྱ་དང་བརྒྱད་དེ། རྒྱས་པར་ནི། དེའི་དཀར་ཆག་ཆོས་སྦྱིན་པར་དུ་བསྒྲུབས་པའི་ཚུལ་ལས་ཉེ་བར་བརྩམས་པའི་གཏམ་བཟང་པོ་བློ་ལྡན་མོས་པའི་ཀུནྡ་ཁ་ཡོངས་སུ་བྱེ་བའི་ཟླ་འོད་གཞོན་ནུའི་འཁྲི་ཤིང་ཞེས་བྱ་བ་ཉིད་དུ་བཀོད་པ་ལྟར་
ཕྱི་མོ་ཆེན་པོ་རྫོགས་པ་ནི་ཆུ་གླང་གི་ལོར་ཡོངས་སུ་གྲུབ་པ་ནས་བརྩམས་ཏེ་ཤིང་ཕོ་བྱི་བའི་ལོ་འདི་ཡན་ཆད་དུ། འདུལ་བའམ། ཤེས་ཕྱིན་ནམ། མདོ་སྣ་ལ་སོགས་པ་ཆོས་ཚན་ཕྱོགས་རེ་ཙམ་གྱི་ཚར་གྲངས་ནི་བགྲང་དུ་ཅི་ཞིག །བཀའ་འགྱུར་རོ་འཚལ་ཡོངས་སུ་ཚང་བ་
ཚར་གྲངས་བརྒྱ་ཕྲག་བཅོ་ལྔ་ཙམ་ཆོས་ཀྱི་སྦྱིན་པར་བཏང་བ་དང༌། འཛམ་གླིང་བསྟན་པའི་སྒྲོན་མེ་དཔལ་ས་སྐྱ་པ་ཀུན་དགའ་སྙིང་པོ་དང༌། གནས་ལྔ་རིག་པའི་པཎྜི་ཏ་སློབ་དཔོན་རིན་པོ་ཆེ་བསོད་ནམས་རྩེ་མོ་དང༌། དེ་བཞིན་གཤེགས་པ་ཐམས་ཅད་ཀྱི་གསུང་གི་གསང་བ་འཛིན་

པ་རྗེ་བཙུན་རིན་པོ་ཆེ་གྲགས་པ་རྒྱལ་མཚན་དང༌། ཕྱོགས་ཐམས་ཅད་ལས་རྣམ་པར་རྒྱལ་བ་ཆེན་པོ་ས་སྐྱ་པཎྜི་ཏ་དང༌། ཁམས་གསུམ་ཆོས་ཀྱི་རྒྱལ་པོ་ཆེན་པོ་འཕགས་པ་བློ་གྲོས་རྒྱལ་མཚན་དཔལ་བཟང་པོ་པ་སྟེ། དཔལ་ས་སྐྱ་པའི་རྗེ་བཙུན་གོང་མ་ལྔར་གྲགས་
པའི་གསུང་རབ་ཀྱི་སྐོར་ལ། གསུང་རབ་རིན་པོ་ཆེ་ལམ་འབྲས་བུ་དང་བཅས་པའི་གདམས་ངག་གི་སྐོར་གྱི་གླེགས་བམ་དང༌། ཆོས་སྲུང་རྡོ་རྗེ་ནག་པོ་ཆེན་པོ་གུར་གྱི་མགོན་པོ་དང་དཔལ་མགོན་གདོང་བཞི་པའི་སྒྲུབ་སྐོར་དང༌། ལྕགས་རིའི་ཁོངས་ལས་མི་འདའ་བའི་གསེར་ཆོས་དང་
ཟབ་ཆོས་ལ་སོགས་པ། གསང་སྔགས་འཛིན་པ་ཐུན་མོང་བའི་སྤྱོད་ཡུལ་དུ་མ་བཏུབ་པ་རྣམས་ལོགས་སུ་བཞག །གསང་སྔགས་འཛིན་པ་ཐུན་མོང་བར་ཡོངས་སུ་གྲགས་པའི་བསྟན་བཅོས་རྣམས་བསྡོམས་པར་གླེགས་བམ་བཅོ་ལྔ་སྟེ། དེ་དག་གི་ཆོས་ཀྱི་རྣམ་གྲངས་རྒྱས་པར་ནི་
དཔལ་ས་སྐྱའི་རྗེ་བཙུན་གོང་མ་ལྔའི་གསུང་རབ་རིན་པོ་ཆེའི་པར་གྱི་སྒོ་འཕར་འབྱེད་པའི་དཀར་ཆག་འཕྲུལ་གྱི་ལྡེ་མིག་ཏུ་བཀོད་པ་ལྟར། ཕྱི་མོ་རྫོགས་པ་མེ་མོ་སྦྲུལ་གྱི་ལོར་ཡོངས་སུ་གྲུབ་པ་ནས་བརྩམས་ཏེ། ཤིང་བྱི་འདི་ཡན་ཆད་དུ་ཡོངས་སུ་ཚང་བ་ཚར་གྲངས་བརྒྱ་ཕྲག་
གསུམ་ཙམ་ཆོས་ཀྱི་སྦྱིན་པར་བཏང་བ་དང༌། གཞན་ཡང་ངོར་ལུགས་གཙོ་བོར་བཏོན་པའི་ཆོས་སྤྱོད་ཀྱི་རིགས་དང༌། སྒྲུབ་ཐབས་དང༌། དཀྱིལ་འཁོར་གྱི་ཆོ་ག་དང༌། མཆོད་པ་དང༌། གཏོར་མ་ལ་སོགས་པ་ཉེ་བར་མཁོ་བའི་རིགས་སུ་གཏོགས་པ་དང༌། གསོ་བ་རིག་པའི་
རྒྱུད་བཞི་དང༌། མན་ངག་རྒྱུད་ཀྱི་ལྷན་ཐབས་སོགས། བསྡོམས་པ་གླེགས་བམ་བཅུ་གཅིག་ཙམ་པར་དུ་བསྒྲུབས་ཏེ་ཆོས་ཀྱི་སྦྱིན་པ་བཏང་ངོ༌། །ཁྱད་པར་སྡོམ་བརྩོན་བླ་མ་ཆེན་པོ་འདི་ཉིད་ཆོས་དང་སྲིད་པའི་གཙུག་ལག་ཉི་ཟླའི་སྒྲོན་མ་ཟུང་འབྲེལ་བ་ལྟ་བུའི་ཕྲིན་ལས་ཀྱི་སྣང་བ་དཀར་པོ་ཕྱོགས་
ཀྱི་དཀྱིལ་འཁོར་ཀུན་དུ་འཕྲོ་བ། དཔལ་སྡེ་དགེ་རྒྱལ་པོ་ཞེས་ཡོངས་སུ་གྲགས་པ་གང་གི་གདན་རབས་ཀྱི་ཁྲི་འཕང་མཐོན་པོ་གང་ན་བར། བསོད་ནམས་དཔག་ཏུ་མེད་པ་མངོན་པར་འདུ་བགྱིས་པའི་ལས་ཤུགས་དང༌། དམན་པ་མིན་པའི་སྟོབས་ཀྱི་འཁོར་ལོས་མངའ་བསྒྱུར་བ་ནས་བརྩམས་

ཏེ། ཐམས་ཅད་མཁྱེན་པ་ཆེན་པོ་ཉི་མའི་གཉེན་གྱི་བཀའ་ལུང་སྤྱི་དང་བྱེ་བྲག་གི་དགོངས་དོན་མ་ལུས་པ་རྣམ་པར་འགྲེལ་བའི་བསྟན་བཅོས་གངས་ཅན་པའི་བརྡའི་ལམ་དུ་འགྱུར་རོ་འཚལ་གྱི་ཆོས་སྦྱིན་རྒྱུན་མི་ཆད་པའི་ངོ་མཚར་འཕྲུལ་གྱི་ཕྱི་མོ་རྫོགས་ལྡན་བསྐལ་པའི་བསོད་ནམས་
ཀྱི་སྤྲིན་ཕུང་རྒྱས་པར་དཀྲིགས་པ་ཞེས་བྱ་བ། སྲིད་པ་གསུམ་གྱི་མཆོད་སྡོང་སྔ་ན་མེད་པའི་ཆོས་སྦྱིན་གྱི་ཕྱི་མོ་འདི་ཉིད་གསར་དུ་བསྐྲུན་པར་བརྩམས་ཤིང༌། ཤིང་ཕོ་བྱི་བའི་ལོར་ཡོངས་སུ་གྲུབ་པར་བགྱིས་ཏེ། དེའི་འཕྲལ་ལའང་དགོངས་འགྲེལ་ཡོངས་སུ་ཚང་བ་ཚར་ཉི་ཤུ་རྩ་
གཅིག་ཙམ་ཆོས་ཀྱི་སྦྱིན་པར་སྩལ་བ་དང༌། ད་ལྟར་སྩོལ་བཞིན་པ་ནས། མ་འོངས་དུས་ཀྱི་བསྐལ་པ་ནས་བསྐལ་པའི་ཕྲེང་བ་ཀུན་དུ་ཡང་དམ་པའི་ཆོས་ཀྱི་སྦྱིན་པ་རྒྱ་ཆེ་ཞིང་རྒྱུན་མི་ཆད་པར་སྩལ་བའི་དམ་བཅའ་བརྟན་པའི་རྭ་བ་ནི་ནམ་ཡང་གཞིག་ཏུ་མེད་པའི་རང་བཞིན་ཅན་ནོ། །
དེ་ལྟར་ཇི་སྐད་བཤད་པའི་རྣམ་དཀར་གྱི་ལེགས་བྱས་ཆེན་པོ་དེ་དག་འགྲུབ་ཏུ་ཉེ་བ་དང༌། ཇི་ཙམ་ན་རྡོ་རྗེ་སྙེམས་མའི་བདག་པོ་དང་གཉིས་སུ་མེད་པའི་ཐམས་ཅད་མཁྱེན་པ་ཆེན་པོ་དཔལ་ལྡན་ཆོས་སྐྱོང་བཀྲ་ཤིས་གྲགས་པའི་རྒྱལ་མཚན་དཔལ་བཟང་པོ་པའི་ཞལ་གྱི་སྒོ་ནས་སྡོམ་
བརྩོན་སྐྱེ་དགུའི་བདག་པོ་དེ་ལ་འདི་སྐད་དུ་མཆིད་པ་ཐོས་ཏེ། འདིར་གསུང་ངག་རིན་པོ་ཆེའི་ཁོག་ཕུབ་པ་ལ་སོགས་པ་མཚན་གྱི་ཕྲེང་བས་གསལ་བར་བྱས་པ་འདི་དག་ཀྱང་པར་གྱི་རྒྱུན་དུ་བསྒྲུབ་པའི་བདག་རྐྱེན་མཛོད་ཅིག །དེ་ལྟར་བྱུང་ན་འགྲོ་བ་མང་པོ་ཞིག་ལ་ཕན་པར་འགྱུར་རོ་ཞེས་
བཀའ་ལུང་སྙན་དགུ་རྫོགས་པའི་ཕྲིན་ཡིག་དམ་པ་དེ་ཉིད་ཀྱིས་ཉེ་བར་ཕྱིན་པར་གྱུར་ཏོ། །དེ་ལྟར་སོན་པ་དང༌། ཇི་སྐད་དུ། བློ་གྲོས་ཆེན་པོས་དགའ་སེམས་དང༌། །བླ་མའི་བཀའ་ནི་འབད་དེ་མཉན། །རིག་པ་ཡིས་ནི་མི་ནུས་ན། །མི་ནུས་དེ་ནི་ཚིག་གིས་སྦྱང༌། །བླ་མ་
ལས་ནི་དངོས་གྲུབ་དང༌། །མཐོ་རིས་དང་ནི་བདེ་བ་འཐོབ། །དེ་བས་འབད་པ་ཐམས་ཅད་ཀྱི། །བླ་མའི་བཀའ་ལས་འདའ་མི་བྱ། །ཞེས་དང༌། བླ་མ་ལས་ནི་བཀའ་སྩོལ་ཞུ། །བཀའ་བཞིན་བགྱི་ཞེས་བརྗོད་བྱས་ལ། །ཐལ་མོ་སྦྱར་ཞིང་མ་ཡེངས་པར། །བླ་མའི་བསྒོ་

བ་མཉན་པར་བྱ། །ཞེས་འབྱུང་བ་ལྟར་བླ་མའི་བཀའ་བཞིན་སྒྲུབ་པའི་གང་ཟག་གང་ཡིན་པ་དེ་ནི་དངོས་གྲུབ་མང་པོའི་སྣོད་དུ་འགྱུར་བར་དགོངས་བཞིན་པས་ཇི་ལྟར་སྩལ་བ་དེ་ལྟར་དུ་བགྱི་ཞེས་འཛུམ་པའི་མདངས་དང་བཅས་པས་ཞལ་གྱིས་འཆེས་པ་
ལྟར། སླར་ཡང་ཡོངས་རྫོགས་བསྟན་པ་རིན་པོ་ཆེའི་ཉམས་ལེན་གྱི་མན་ངག་གསུང་ངག་རིན་པོ་ཆེའི་བྱོན་ཚུལ་ཁོག་ཕུབ་དང་བཅས་པ་རྒྱས་པར་བཤད་པ་ལེགས་བཤད་འདུས་པའི་རྒྱ་མཚོ་ཞེས་བྱ་བ་དང༌། ཀུན་མཁྱེན་ཆེན་པོ་རོང་སྟོན་པའི་རྣམ་ཐར་ངོ་མཚར་དད་པའི་རོལ་མཚོ།
རྒྱལ་སྲས་རིན་པོ་ཆེ་ཐོགས་མེད་བཟང་པོ་དཔལ་གྱི་རྣམ་ཐར་གཞན་ལ་ཕན་པའི་འོད་ཟེར་དང་གསུམ་ལ་གླེགས་བམ་གཅིག །དེ་བཞིན་གཤེགས་པ་ཐམས་ཅད་ཀྱི་བགྲོད་པ་གཅིག་པའི་ལམ་ཆེན་གསུང་ངག་རིན་པོ་ཆེའི་བླ་མ་བརྒྱུད་པའི་རྣམ་ཐར་ཕྱོགས་གཅིག་ཏུ་བསྒྲིགས་པ་
གླེགས་བམ་གསུམ། སངས་རྒྱས་བཅོམ་ལྡན་འདས་ཀྱི་རྣམ་ཐར་རྨད་དུ་བྱུང་བ་མཛད་པ་འཁྲུལ་པ་མེད་པར་བརྗོད་པ་བདེ་བར་གཤེགས་པའི་སྤྱོད་པ་མཆོག་གི་གཏེར་ཞེས་བྱ་བ་གླེགས་བམ་གཅིག །བདེ་བར་གཤེགས་པའི་བསྟན་པའི་གསལ་བྱེད་ཆོས་ཀྱི་འབྱུང་གནས་གསུང་རབ་རིན་
པོ་ཆེའི་མཛོད་དང༌། རྒྱལ་རབས་གསལ་བའི་མེ་ལོང་གཉིས་ལ་གླེགས་བམ་གཅིག །མ་ཎི་བཀའ་འབུམ་གླེགས་བམ་གཉིས། པདྨ་བཀའི་ཐང་ཡིག་གླེགས་བམ་གཅིག །ཐང་ཡིག་སྡེ་ལྔ་གླེགས་བམ་གཅིག །སྒྲ་བསྒྱུར་མར་པའི་རྣམ་ཐར་དང༌། རྗེ་བཙུན་མི་ལའི་
རྣམ་ཐར། རྣམ་ཐར་རྒྱས་པར་ཕྱེ་བ་མགུར་འབུམ་བཅས་གླེགས་བམ་གཅིག །ཕུག་ལུགས་རྩིས་ཀྱི་ལེགས་བཤད་མཁས་པའི་མགུལ་རྒྱན་བཻ་ཌཱུར་དཀར་པོའི་དོ་ཤལ་དཔྱོད་ལྡན་སྙིང་ནོར་གླེགས་བམ་གཉིས། བསྟན་བཅོས་བཻ་ཌཱུར་དཀར་པོ་ལས་དྲིས་ལན་འཁྲུལ་སྣང་གཡའ་
སེལ་དོན་གྱི་བཞིན་རས་སྟོན་བྱེད་སྙན་སྒྲོན་དང་བཅས་པ་གླེགས་བམ་གཉིས། གསོ་བ་རིག་པའི་བསྟན་བཅོས་སྨན་བླའི་དགོངས་རྒྱན་སྨན་རྒྱུད་བཞིའི་གསལ་བྱེད་བཻ་ཌཱུར་སྔོན་པོའི་མལླི་ཀ་ཞེས་བྱ་བ་གླེགས་བམ་གཉིས། ཀླུ་འབུམ་དཀར་ནག་ཁྲ་གསུམ་གླེགས་བམ་

གཅིག སྙན་དངགས་ཀྱི་བསྟན་བཅོས་ཆེན་པོ་མེ་ལོང་ལ་འཇུག་པའི་བཤད་སྦྱར་དཎྜིའི་དགོངས་རྒྱན་གླེགས་བམ་གཅིག་སྟེ། མདོར་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱའི་རྒྱལ་པོ་ཉིད་དང༌། ཤཱཀྱའི་
རྒྱལ་པོའི་སྲས་སུ་གྱུར་པའི་བསྟན་པ་འཛིན་པའི་སྐྱེས་བུ་ཆེན་པོ། ཤེས་པར་བགྱི་བའི་གནས་མ་ལུས་པ་ལ་སྦྱངས་པ་རྒྱ་མཚོའི་མཐར་སོན་པ། ཆོས་ཐམས་ཅད་ཐུགས་སུ་ཆུད་པ། ཆོས་ཀྱི་སྤྱན་ཡངས་ཤིང་དྲི་མ་མེད་པ་མངའ་བ། ཆོས་བཞིན་སྤྱོད་ཀྱིན་ཆོས་བཞིན་དུ་
འདོམས་པ། ཆོས་ཀྱི་ཚུལ་མཐའ་དག་སོ་སོར་སྨྲ་བ་ལ་ཚིག་གི་དབང་ཕྱུག་གྲུབ་པ་རྣམས་ཀྱིས་ལེགས་པར་གསུངས་པའི་གསུང་གི་ཕྲིན་ལས་ཀྱི་རྒྱུན་ཆེན་པོའི་དམ་པའི་ཆོས་ཕལ་ཆེ་བ་དག་ནུབ་པར་མི་འགྱུར་བའི་ཆོས་ཀྱི་སྦྱིན་པ་རྒྱ་ཆེན་པོ་རྟག་ཏུ་འབྱུང་བའི་པར་གྱི་མ་མོ་འདི་
དག །རྨད་དུ་བྱུང་བའི་བཟོད་པ་དམ་པའི་གོ་ཆས་ཀུན་ནས་བརླིང་བར་བྱས་པའི་ཐུགས་བསྐྱེད་དམན་པ་མིན་པའི་སྟོབས་ནི། སྲེད་མེད་བུའི་དཔལ་ལ་ཡང་ཅོ་འདྲི་བར་བཟོད་པའི་སྡོམ་བརྩོན་བསྟན་པའི་སྦྱིན་བདག་ཆེན་པོ་གང་གིས་འབད་པ་དུ་མའི་སྒོ་ནས་བདག་པོའི་རྐྱེན་
ལེགས་པར་སྦྱར་ཏེ། འཇིག་རྟེན་གྱི་ཁམས་མ་ལུས་པའི་མུན་པ་མཐའ་དག་དཔྱིས་འབྱིན་བྱེད་པའི་ཆོས་ཀྱི་ཉི་མ་ཆེན་པོ་འདི་དག་གསར་དུ་བསྒྲུབས་སོ། །བསྒྲུབས་ནས་ཀྱང་ཕྱོགས་བཅུའི་སེམས་ཅན་གྱི་ཁམས་དཔག་ཏུ་མེད་པ་རྣམས་ཀྱང་སྡོམ་བརྩོན་སྐྱེ་དགུའི་བདག་
པོ་འདིའི་ཆོས་ཀྱི་སྦྱིན་པ་གཏོང་བའི་ཞིང་དུ་ལྷགས་པ་ནི། འདི་ལྟ་སྟེ། གང་དག་འགྲོ་བ་མང་པོའི་དོན་ལ་རྩེ་གཅིག་ཏུ་གཞོལ་བའི་བླ་མ་དང༌། དགེ་སློང་དང༌། དགེ་ཚུལ་དང༌། དགེ་བསྙེན་དང༌། གཞན་ཡང་མི་དཔོན་དང༌། བློན་པོ་དང༌། འཁོར་དང༌། ཡང་འཁོར་
དང༌། ཁྱིམ་བདག་དང༌། ཞོ་ཤས་འཚོ་བ་ལ་སོགས་པ་སངས་རྒྱས་བཅོམ་ལྡན་འདས་ཀྱི་ལུང་གི་ཆོས་ཚུལ་རྙོག་པ་མེད་པ་གང་དག་བཞུགས་པ་ལ། གུས་པའི་རི་མོ་ཡོངས་སུ་ལྷོད་པར་མ་གྱུར་པའི་སའི་སྟེང་གི་སྐྱེ་འགྲོ་རིས་སུ་མ་ཆད་པ་རྣམས་ཏེ། དེ་དག་ཐམས་ཅད་ལ་བདེ་

བར་གཤེགས་པའི་བསྟན་པ་དམ་པའི་ཆོས་ཀྱི་སྦྱིན་པ་ཟད་མི་ཤེས་པའི་སྣང་བ་ཆེན་པོ་བཀྱེ་སྟེ། དེའང་དོན་དུ་གཉེར་བའི་འགྲོ་བ་རང་རང་གི་བློ་དང་མོས་པར་འཚམ་པའི་ཆོས་ཀྱི་རྣམ་གྲངས་གང་དང་གང་ཡིན་པ་དེ་དག །ཆེ་བའི་ཡོན་ཏན་དང་ཕན་ཡོན་བསམ་
གྱིས་མི་ཁྱབ་པ་རྣམས་རྗེས་སུ་གདམས་པ་དང་བཅས་པའམ། ཡང་ན་དགེ་བའི་རྩ་བ་གང་དག་གི་རྗེས་སུ་ཡི་རང་བར་བྱེད་པའི་ཚིག་གིས་སྙན་པར་སྨྲ་བ་དང་བཅས་པས་ལེན་དུ་འཇུག་གོ །དེ་ལ་བརྟེན་ནས་ཡངས་པའི་རྒྱལ་ཁམས་ཀྱི་སྣོད་ཐམས་ཅད་རྒྱལ་བའི་བསྟན་པ་རིན་
ཐང་གཞལ་དུ་མེད་པའི་འབྱོར་པ་བླ་ན་མེད་པ་དང་ལྡན་པའི་སྙིང་པོ་ཅན་དུ་བགྱིད་དོ། །དེ་ལྟ་བུའི་མཛད་པ་གང་ལ་ཕྱོགས་བཅུའི་རྣམ་པར་འདྲེན་པ་ཐམས་ཅད་ཀྱང་དབྱིངས་ནས་དགྱེས་པའི་བརྡ་མཚོན་དུ། ལེགས་སོའི་ལུང་གི་གླིང་བུ་མཐའ་དག་མགྲིན་གཅིག་ཏུ་བསྒྱུར་བ་ལ་མི་སྤྲོ་
བ་ཅུང་ཟད་ཀྱང་མེད་ན། འགྲོ་བ་ཕལ་པ་དག་མགུ་བ་ཙམ་ལ་ངོ་མཚར་ཆེ་བ་ཅི་ཞིག །གཞན་ཡང་ཆོས་ཀྱི་ཆེད་དུ་དམིགས་ནས་ཕུལ་བའི་ནོར་རྫས་ཀྱི་བྱེ་བྲག་ཇི་སྙེད་བྱུང་བ་རྣམས་ཀྱང་ཕལ་ཆེར་ནི་གོང་དུ་སྨོས་པའི་མཆོད་སྦྱིན་གྱི་ཞིང་དུ་གྱུར་པ་རྣམས་ལ་གཏོང་བ་དང༌། དགེ་
འདུན་འདུ་བའི་དྲིའི་གཙང་ཁང་བརྩིགས་པ་དང༌། དེ་བཞིན་གཤེགས་པ་རྣམས་དང༌། དེ་དག་གི་སྲས་དང་སློབ་མའི་ཚོགས་དང་བཅས་པའི་སྐུ་དང་གསུང་དང་ཐུགས་ཀྱི་རྟེན་རྣམས་བཞེང་བའི་རྒྱུར་སྦྱོར་བ་དང༌། དེང་གི་དུས་སུའང་འཇིག་རྟེན་གསུམ་གྱི་མཆོད་སྡོང་བླ་ན་མེད་པ་ཆོས་
སྦྱིན་པར་གྱི་ཕྱི་མོ་རྒྱ་ཆེན་པོ་འདི་དག་བསྐྲུན་པ་ལ་དགོས་པའི་ཡོ་བྱད་མཁོ་དགུ་ཕུན་སུམ་ཚོགས་པ་མ་ཚང་བ་མེད་པ་བསྒྲུབས་པའི་རྒྱུར་བྱེད་པ་དང༌། དེ་དག་གི་ལས་བྱེད་པ་རྣམས་ཀྱི་བཟའ་ཡོན་དུ་སྟོབ་པ་ལ་སོགས་པས། འགྲོ་བ་གང་དག་གིས་ཆོས་ཀྱི་སྦྱིན་པ་མངོན་
པར་འདུ་བྱས་པའི་ནོར་རྫས་ཀྱི་འབྲེལ་པ་ཅུང་ཟད་རེ་བཞག་པ་རྣམས་ཀྱང༌། ནམ་ཞིག་ན་དགེ་བ་ཉིད་ནས་དགེ་བ་ཉིད་ཀྱི་རྒྱུ་རྐྱེན་དུ་མཆི་བ་སྟེ། དཔེར་ན་རྒྱ་མཚོ་ཆེན་པོའི་ནང་དུ་ཆུའི་ཐིགས་པ་ཉུང་ཟད་ཅིག་ལྟུང་བ་ན་ཡང༌། ཇི་སྲིད་རྒྱ་མཚོ་ཆེན་པོ་དེ་ཉིད་ཡོངས་སུ་སྟོང་པར་མ་གྱུར་

པ་དེ་སྲིད་དུ་རོ་གཅིག་པར་འདྲེས་ནས་སོ་སོར་དབྱེར་མི་བཏུབ་པ་ལྟ་བུའི་ལེགས་བྱས་ཀྱི་རྒྱུན་ཆེན་པོ་ཉིད་དུ་འགྲོ་བ་ཁོ་ན་ཉིད་དོ། །དེ་ལྟར་རླབས་ཆེན་དགེ་བའི་ལས་ལ་སྤྲོ་བ་མཆོག་ཏུ་བརྟས་པའི་མི་བདག་ཆེན་པོ་འདིའི་མཛད་པའི་ཕྲེང་བ་ལེགས་བྱས་ཀྱི་ཟེར་ཕྲེང་སྟོང་དང་ལྡན་པའི་
ངོ་མཚར་གྲགས་པའི་ཕུང་པོ་འདི་ནི། འབྲས་ལྡན་དུས་ཀྱི་ཟླ་འོད་ལས་ཀྱང་ཆེས་མཆོག་ཏུ་དཀར་ཞིང་བསིལ་བར་གྱུར་པ་གང་དག །ཕྱོགས་བཅུའི་འཛིན་མའི་དཀྱིལ་འཁོར་ཀུན་དུ་འཁོད་པའི་རྒྱལ་ཕྲན་དང༌། སྡེ་དཔོན་དང༌། སྟོབས་ལྡན་དང༌། འབྱོར་ལྡན་གྱི་སྐྱེ་འགྲོ་མཐའ་དག་
གི་རྣ་བའི་བཅུད་ལེན་མཆོག་ཏུ་འཛིན་པར་མི་བྱེད་པ་ནི་འགའ་ཡང་མེད་ཅིང༌། དེར་མ་ཟད་རྣམ་པར་དཀར་བའི་ལེགས་མཛད་དང༌། རྣམ་པར་ཐར་པ་གང་དག་གཏམ་དུ་གླེང་བར་ཐོས་པ་ལ་བརྟེན་ནས། ཕྱོགས་བཅུའི་འགྲོ་བ་སྔོན་ཆད་དགེ་བའི་རྩ་བ་རྒྱ་ཆེན་པོ་སྒྲུབ་པ་ལ་སྤོབས་པ་མ་
སྐྱེས་པ་རྣམས་ཀྱི་སྤོབས་པ་གསར་དུ་སྐྱེད་པ་དང༌། སྤོབས་པ་སྐྱེས་པ་རྣམས་གོང་ནས་ག