Luận tạng Tây Tạng (Tengyur) — Tập 213

 །དེ་བས་ན་དེ་དག་ཕལ་ཆེ་བའི་
དགོངས་པ་མཐུན་པར་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་དུ་བཞེད་དོ། །རྒྱུད་སྡེའི་ཚད་ནི། རྟོག་པའི་རྒྱུད་དང༌། བྱ་བའི་རྒྱུད་དང༌། སྤྱོད་པའི་རྒྱུད་དང༌།གཉིས་ཀའི་རྒྱུད་དང༌། རྣལ་འབྱོར་གྱི་རྒྱུད་རྣམས་ཀྱི་མིང་ལ་རིམ་པ་བཞིན་དུ་སྟོང་ཕྲག་བཞི་དང༌། བཞི་དང༌། བརྒྱད་དང༌།
དྲུག་དང༌། སྟོང་ཕྲག་བཅུ་གཉིས་རྣམས་སུ་སྟེ་སུམ་ཁྲི་བཞི་སྟོང་དུ་ཡོད་པར་ཡེ་ཤེས་རྡོ་རྗེ་ཀུན་ལས་བཏུས་པ་ལས་བཤད་ཅིང༌། རྣལ་འབྱོར་མའི་རྒྱུད་ཀྱི་གྲངས་ནི་དེར་མ་གསུངས་སོ། །ཡང་བདེ་མཆོག་སྡོམ་པ་འབྱུང་བའི་རྒྱུད་ལས། རྣལ་འབྱོར་རྒྱུད་རྣམས་ཀྱི་ནི་ཚད། །བྱེ་བ་
ཕྲག་ནི་དྲུག་ཏུ་ངེས། །དེ་བཞིན་རྣལ་འབྱོར་མ་རྒྱུད་གྲངས། །བྱེ་བ་ཕྲག་ནི་བཅུ་དྲུག་གྲངས། །དེ་བཞིན་ཕ་རོལ་ཕྱིན་པའི་ཚུལ། །ས་ཡ་དང་ནི་དུང་ཕྱུར་ལྔ། །ཐེག་ཆེན་ལས་གཞན་མདོ་སྡེ་རྣམས། །དུང་ཕྱུར་ཕྲག་བརྒྱད་གསུངས་པ་ཡིན། །ཞེས་སོ། །འདི་དག་
ཀྱང་ཚིགས་སུ་བཅད་པའི་གྲངས་སུ་བལྟ་བར་བྱ་བ་ནི་མ་ཡིན་ཏེ། མདོ་རྒྱུད་ཐ་དད་པའི་མིང་གི་གྲངས་ཡིན་པའི་ཕྱིར་རོ། །ཅིའི་ཕྱིར་ཞེ་ན།བྱ་བའི་རྒྱུད་ལ་སྟོང་ཕྲག་བཞིར་ཡོད་པར་གསུངས་པ་ལ། དོན་ཡོད་ཞགས་པའི་མདོ་ཁོ་ན་ལའང་སྟོང་ཕྲག་བརྒྱད་ཡོད་པ་དང༌། དེ་བཞིན་

དུ་དེ་ཉིད་འདུས་པ་སྟོང་ཕྲག་བརྒྱ་པ་དང༌། དགྱེས་པ་རྡོ་རྗེ་འབུམ་ཕྲག་བདུན་པ་དང༌། འབུམ་ཕྲག་ལྔ་པ་དང༌། སངས་རྒྱས་མཉམ་པར་སྦྱོར་བ་ཁྲི་བརྒྱད་སྟོང་ཡོད་པ་ལྟ་བུ་སྟེ། ཆོས་ཀྱི་རྣམ་གྲངས་རེ་རེ་ལ་ཡང་ཚིགས་སུ་བཅད་པའི་གྲངས་མང་པོ་ཡོད་པ་
ཉིད་དུ་གྲུབ་པའི་ཕྱིར་རྒྱུད་སྡེའི་གྲངས་ནི་དཔག་ཏུ་མེད་དོ་ཞེས་སློབ་དཔོན་བསོད་ནམས་རྩེ་མོས་གསུངས་སོ། །དེ་ལྟ་བུའི་ལུང་གི་ཆོས་དེ་དག་མདོ་རྒྱུད་ཐ་དད་པ་ནས་བཤད་པའི་གཞི་མ་གང་ཡང་རུང་བ་དག་ལ་ཡི་གེར་བྲིས་ནས་གླེགས་བམ་དུ་བྱས་པའི་མིང་ལ་ལེགས་པར་སྦྱར་བའི་སྐད་
དུ་པུསྟ་ཀཿཞེས་བྱ་སྟེ། དེ་དག་ནི་གསུང་གི་རྟེན་ནོ། །གཉིས་པ་དེ་ཉིད་འགྲུབ་པར་བྱེད་པའི་རྒྱུ་ནི་ཡི་གེ་སྟེ། དེ་ལ་ཡི་གེའི་ངོ་བོ་དང༌། ངེས་པའི་ཚིག་དང༌། དབྱིབས་སམ་རྣམ་པ་སྟེ་གསུམ་ལས། དང་པོ་ནི། བརྗོད་པར་འདོད་པའི་དབང་གིས་རླུང་གཡོས་པས་དེའི་སྐྱེ་བའི་
གནས་དང་བྱེད་པ་ལྷན་ཅིག་ཕྲད་པ་དེ་ལས་ཡི་གེའི་གདངས་འབའ་ཞིག་འབྱུང་སྟེ། དེའང་དབྱངས་དང་གསལ་བྱེད་དག་གོ། །དེ་སྐད་དུའང་རྣམ་འགྲེལ་ལས། ཡི་གེ་ཀུན་སློང་ཤེས་པ་ལས། །སྐྱེ་ལ་ཤེས་པས་སྒྲ་སྐྱེའོ། །ཞེས་དང༌། སློབ་དཔོན་ཆོས་མཆོག་གིས། ངག་
གི་དོན་སྣང་བའི་སེམས་པ་ལས་སྒྲ་སྐྱེ་ལ། དེ་ལས་གནས་དང་བྱེད་པ་ཕྲད་ཅིང་དེ་ལས་སྒྲ་སྐྱེའོ་ཞེས་དང༌། སློབ་དཔོན་ཙནྡྲ་གོ་མིས་ཡི་གེའི་མདོར། གནས་དང་བྱེད་པ་དང་རྩོལ་བ་རྣམས་ལས་ཡི་གེ་རྣམས་སྐྱེའོ་ཞེས་དང༌། དཔང་ལོ་ཆེན་པོས་ཀྱང༌། བརྗོད་འདོད་དབང་
གིས་རླུང་གཡོས་ཤིང༌། །དེ་ཡི་གནས་དང་བྱེད་པ་དང༌། །ལྷན་ཅིག་ཡི་གེའི་གདངས་རྣམས་སྐྱེ། །ཞེས་བཤད་པའི་ཕྱིར་རོ། །གཉིས་པ་ནི་ལེགས་པར་སྦྱར་བའི་སྐད་དུ་ཨཀྵ་ར་ཞེས་འབྱུང་བ་ནི་མི་འགྱུར་བའི་དོན་ཏེ། ཡུལ་གྱི་བྱེ་བྲག་ཐ་དད་པར་གྱུར་ཀྱང་དབྱངས་དང་གསལ་བྱེད་
རྣམས་ནི་གཞན་དུ་འགྱུར་བ་མེད་པའི་ཕྱིར་རོ། །ཡང་བྱཉྫ་ན་ཞེས་པ་ནི་གསལ་བྱེད་དེ། དེའང་བརྗོད་བྱའི་དོན་གང་ཡིན་པ་དེ་ཡི་གེ་འདུས་པ་བརྗོད་པ་ལས་གསལ་བར་བྱེད་པའི་ཕྱིར་རོ། །ཡང་ན་ཝརྞཎ་ཞེས་ནུས་པ་དང་ལྡན་པས་ཏེ། བརྗོད་བྱའི་དོན་ཐམས་ཅད་རྗོད་པར་བྱེད་པའི་

ནུས་པ་མཐའ་དག་འདི་ལ་མངའ་བའི་ཕྱིར་རོ། །དེ་སྐད་དུ་ཡང༌། མི་འགྱུར་བ་དང་གསལ་བྱེད་དང༌། །རྗོད་པར་བྱེད་པའི་ནུས་ལྡན་ཕྱིར། །ཡི་གེ་ཞེས་ནི་བརྗོད་པ་ཡིན། །ཞེས་སོ། །གསུམ་པ་ནི་མདོ་རྒྱ་ཆེར་རོལ་པ་ལས་བཤད་པའི་ཚངས་པའི་ཡི་གེ་ལ་སོགས་པའི་ཡིག་རིགས་
དྲུག་ཅུ་རྩ་བཞི་སྟེ། དེ་ཡང་མདོ་དེ་ཉིད་ལས། ཚངས་པའི་ཡི་གེ་དང༌། ཁ་རོཥྚིའི་ཡི་གེ་དང༌། པདྨའི་སྙིང་པོའི་ཡི་གེ་དང༌། ཨངྒའི་ཡི་གེ་དང༌། མངྒའི་ཡི་གེ་དང༌། ཡུལ་མ་ག་དྷཱའི་ཡི་གེ་དང༌། བཀྲ་ཤིས་པའི་ཡི་གེ་དང༌། སོར་མོ་པའི་ཡི་གེ་དང༌། ཤ་ཀ་ནའི་ཡི་གེ་དང༌།
ཡ་བ་ནའི་ཡི་གེ་དང༌། བག་ལེ་བའི་ཡི་གེ་དང༌། པ་རུ་ཤའི་ཡི་གེ་དང༌། འགྲོ་ལྡིང་བའི་ཡི་གེ་དང༌། ཀིར་ཏའི་ཡི་གེ་དང༌། ལྷོ་ཕྱོགས་པའི་ཡི་གེ་དང༌། དྲག་ཤུལ་ཅན་གྱི་ཡི་གེ་དང༌། གྲངས་ཀྱི་ཡི་གེ་དང༌། སྤྱིའུ་ཚུགས་པའི་ཡི་གེ་དང༌། རྗེས་སུ་མཐུན་པའི་ཡི་གེ་དང༌། བྲུ་
ཤའི་ཡི་གེ་དང༌། ཀ་ཤའི་ཡི་གེ་དང༌། རྒྱའི་ཡི་གེ་དང༌། ཕུ་ནའི་ཡི་གེ་དང༌། ཧུ་ནའི་ཡི་གེ་དང༌། ཡི་གེ་འབྲིང་དང༌། རྒྱས་པར་བྲི་བའི་ཡི་གེ་དང༌། རྒྱལ་གྱི་ཡི་གེ་དང༌། ལྷའི་ཡི་གེ་དང༌། ཀླུའི་ཡི་གེ་དང༌། གནོད་སྦྱིན་གྱི་ཡི་གེ་དང༌། དྲི་ཟའི་ཡི་གེ་དང༌། མིའམ་ཅིའི་ཡི་
གེ་དང༌། ལྟོ་འཕྱེ་ཆེན་པོའི་ཡི་གེ་དང༌། ལྷ་མ་ཡིན་གྱི་ཡི་གེ་དང༌། ནམ་མཁའ་ལྡིང་གི་ཡི་གེ་དང༌། རི་དྭགས་ཀྱི་འཁོར་ལོ་པའི་ཡི་གེ་དང༌། ཁྭ་སྐད་ཤེས་པའི་ཡི་གེ་དང༌། ས་བླའི་ལྷའི་ཡི་གེ་དང༌། བར་སྣང་གི་ལྷའི་ཡི་གེ་དང༌། ནུབ་ཀྱི་བ་ལང་སྤྱོད་ཀྱི་ཡི་གེ་དང༌།
བྱང་གི་སྒྲ་མི་སྙན་གྱི་ཡི་གེ་དང༌། ཤར་གྱི་ལུས་འཕགས་པོའི་ཡི་གེ་དང༌། གདེག་པའི་ཡི་གེ་དང༌། གཞག་པའི་ཡི་གེ་དང༌། བསྣན་པའི་ཡི་གེ་དང༌། རྒྱ་མཚོའི་ཡི་གེ་དང༌། རྡོ་རྗེའི་ཡི་གེ་དང༌།སྤྲིང་ཡིག་དང༌། ལན་གྱི་ཡི་གེ་དང༌། རྣམ་འཐོར་གྱི་ཡི་གེ་དང༌། རིངས་
མེད་ཀྱི་ཡི་གེ་དང༌། བསྟན་བཅོས་བསྐོར་བའི་ཡི་གེ་དང༌། རྩིས་བསྐོར་བའི་ཡི་གེ་དང༌། གདེག་པ་བསྐོར་བའི་ཡི་གེ་དང༌། གཞག་པ་བསྐོར་བའི་ཡི་གེ་དང༌། རྐང་པས་བྲིས་པའི་ཡི་གེ་དང༌། ཚིག་ལན་གཉིས་སུ་གདབ་པའི་ཚིག་གི་མཚམས་ཀྱི་ཡི་གེ་དང༌། ཚིག་གི་མཚམས་

བཅུར་བརྒྱུད་པའི་ཡི་གེ་དང༌། བླ་ཐབས་སུ་བསྣན་པའི་ཡི་གེ་དང༌། སྒྲ་ཐམས་ཅད་ཀུན་དུ་སྡུད་པའི་ཡི་གེ་དང༌། རིག་པ་དང་མཐུན་པའི་ཡི་གེ་དང༌། རྣམ་པར་འདྲེས་པའི་ཡི་གེ་དང༌། དྲང་སྲོང་གི་དཀའ་ཐུབ་སྤྱད་པའི་ཡི་གེ་དང༌། ལྷའི་ངེས་པའི་ཡི་གེ་དང༌།
ས་བལྟ་བའི་ཡི་གེ་དང༌། ནམ་མཁའ་བལྟ་བའི་ཡི་གེ་དང༌། སྨན་ཐམས་ཅད་ཀྱི་རྒྱུ་མཐུན་པའི་ཡི་གེ་དང༌། སྙིང་པོ་ཐམས་ཅད་ཀུན་དུ་སྡུད་པའི་ཡི་གེ་དང༌། འབྱུང་པོ་ཐམས་ཅད་ཀྱི་སྒྲ་སྡུད་པའི་ཡི་གེ་སྟེ། དེ་ལྟར་ཡི་གེའི་རིགས་ཀྱི་བྱེ་བྲག་དྲུག་ཅུ་རྩ་བཞིར་གསུངས་པ་རྣམས་དང༌། བྱེ་བྲག་
ཏུ་བོད་གངས་ཅན་གྱི་ལྗོངས་འདིར་ཡོངས་སུ་དར་བའི་ཡི་གེ་ནི། འགྲེལ་ཆེན་དྲི་མ་མེད་པའི་མདོར་བསྡུས་བཞི་པ་ལས། དེ་བཞིན་གཤེགས་པ་མངོན་པར་རྫོགས་པར་སངས་རྒྱས་པ་འཕགས་པའི་ཡུལ་འདིར་བཅོམ་ལྡན་འདས་ཡོངས་སུ་མྱ་ངན་ལས་འདས་པར་གྱུར་པ་ན། སྡུད་པར་
བྱེད་པ་པོ་དག་གིས་ཐེག་པ་གསུམ་གླེགས་བམ་ལ་བྲིས་ཏེ། དེ་བཞིན་གཤེགས་པའི་ངེས་པས་སྡེ་སྣོད་གསུམ་མ་ག་དྷཱའི་སྐད་ཀྱིས་བྲིས་སོ། །མདོ་སྡེ་ནི་སིནྡྷུའི་སྐད་ཀྱིས་སོ། །ཕ་རོལ་ཏུ་ཕྱིན་པའི་ཚུལ་དང་སྔགས་ཀྱི་ཚུལ་ནི་ལེགས་པར་སྦྱར་བའི་སྐད་ཀྱིས་སོ། །རྒྱུད་དང་རྒྱུད་གཞན་དག་ནི་
ལེགས་པར་སྦྱར་བའི་སྐད་དང༌། ཐ་མལ་པའི་སྐད་དང༌། ཟུར་ཆག་གི་སྐད་དང༌། ལེགས་པར་སྦྱར་བ་མ་ཡིན་པར་རི་ཁྲོད་ལ་སོགས་པ་ཀླ་ཀློའི་སྐད་ཀྱིས་ཏེ། དེ་ལྟ་བུ་ལ་སོགས་པ་ཐམས་ཅད་མཁྱེན་པས་བསྟན་པའི་ཆོས་རྣམས་སྡུད་པར་བྱེད་པ་པོ་དག་གིས་བྲིས་སོ། །དེ་བཞིན་དུ་བོད་ཀྱི་
ཡུལ་དུ་ཐེག་པ་གསུམ་བོད་ཀྱི་སྐད་ཀྱིས་བྲིས་ཏེ། རྒྱ་ནག་ཏུ་རྒྱ་ནག་གི་སྐད་ཀྱིས་སོ། །རྒྱ་ནག་ཆེན་པོར་རྒྱ་ནག་ཆེན་པོའི་སྐད་ཀྱིས་སོ། །པར་སི་ཀའི་ཡུལ་དུ་པར་སི་ཀའི་སྐད་ཀྱིས་སོ། །ཆུ་བོ་སི་ཏའི་བྱང་དུ་ཙམྤ་ཀའི་ཡུལ་གྱི་སྐད་དང༌།སྤྲེའུའི་ཡུལ་གྱི་སྐད་དང༌། གསེར་ཞེས་བྱ་བའི་ཡུལ་གྱི་
སྐད་ཀྱིས་སོ་ཞེས་འབྱུང་བའི་ཚིག་ལ་བརྟགས་ན་བཀའ་བསྡུ་བ་བྱེད་པའི་དུས་ནས་བོད་ལ་ཡི་གེ་ཡོད་པར་གྲུབ་པ་ལྟར་སྣང་ཞེས་གསུངས་ཤིང༌། སྔོན་གྱི་མཁས་པ་མང་པོ་རྣམས་ནི། དུས་ཀྱི་འཁོར་ལོ་ལའི་འགྲེལ་ཆེན་དུ་སྡུད་པ་པོ་རྣམས་ཀྱིས་ཐེག་པ་གསུམ་བོད་ཀྱི་ཡུལ་དུ་བོད་ཀྱི་སྐད་ཀྱིས་འདྲི་བར་ལུང་བསྟན་

པ་ལྟར་འདོད་དོ། །དེའང་གོང་དུ་ཇི་སྐད་སྨོས་པ་ལྟར་སྐད་གཉིས་སྨྲ་བ་ཆེན་པོ་དེ་ཉིད་ཀྱིས་སྲོལ་ཆེན་རྣམ་པར་ཕྱེ་བའི་ཡི་གེའི་རྒྱུན་ཆེན་པོ་དེ་ཉིད་རིམ་གྱིས་མཆེད་པ་ལ་བརྟེན་ནས། བོད་དང་བོད་ཆེན་པོར་གཏོགས་པའི་ཡུལ་དང་ལྗོངས་དང་གྲོང་དང་གྲོང་ཁྱེར་དང༌། གྲོང་རྡལ་དང་གཙུག་ལག་ཁང་དང་རྒྱལ་
པོའི་ཁབ་ཀྱི་གྲོང་ཁྱེར་ཆེན་པོ་ལ་སོགས་པ་རྣམས་སུ་དར་རྒྱས་སུ་གྱུར་པའི་ཡི་གེ་ལའང་རྫབ་ཆེན་དང་རྫབ་ཆུང་དང༌། འབྲུ་ཆེན་དང་འབྲུ་ཆུང་དང༌། གཤར་མ་དང་དཀྱུས་ཡིག་ལ་སོགས་པ་ཡོངས་སུ་གྲགས་པ་རྣམས་དང༌། གཞན་ཡང་ཆག་ལོ་དང་འགོས་ལོ་ལ་སོགས་པའི་ཡིག་གསར་གྱི་རྣམ་
པའང་མང་དུ་ཡོད་པ་དང༌། ཁམས་གསུམ་ཆོས་ཀྱི་རྒྱལ་པོ་འཕགས་པ་རིན་པོ་ཆེས་མཛད་པའི་ཧོར་ཡིག་རིགས་གསུམ་ལ་སོགས་པ་རྣམས་ཀྱང་དབྱངས་དང་གསལ་བྱེད་ཀྱི་རྣམ་གཞག་བོད་ཀྱི་སྐད་དང་མཐུན་པར་འབྱུང་བས་འདི་དག་ཀྱང་རྣམ་པ་ཅུང་ཟད་ཙམ་མ་གཏོགས་ཕལ་ཆེར་བོད་ཀྱི་ཡི་གེའི་ཁོངས་སུ་
གཏོགས་པར་སེམས་སོ། །དེ་ལྟར་ན་ཡི་གེའི་ཚོགས་དང་མིང་གི་ཚོགས་དང་ཚིག་གི་ཚོགས་རྣམས་ཀྱི་རྣམ་པར་གཞག་པ་སྟོན་པར་བྱེད་པའི་བསྟན་བཅོས་ནི་ཙནྡྲ་གོ་མིའི་ཡི་གེའི་མདོ་ལྟ་བུའམ། བརྡ་སྤྲོད་པའི་བསྟན་བཅོས་རྣམས་སམ། གྲུབ་མཐའ་སྨྲ་བ་རྣམས་ཀྱི་སོ་སོའི་འདོད་པ་ཐ་དད་པར་སྟོན་པར་བྱེད་པའི་བསྟན་
བཅོས་རྣམས་སམ། གསང་སྔགས་རྡོ་རྗེ་ཐེག་པ་རྣམས་སུ་ཡི་གེའི་བཤད་པ་བསམ་གྱིས་མི་ཁྱབ་པར་འབྱུང་བ་སྟེ་དེ་དག་སྟོན་པར་བྱེད་པའི་བསྟན་བཅོས་རྣམས་ལྟ་བུའོ། །གསུམ་པ་ཆོས་ཀྱི་སྐུའམ་ཐུགས་ཀྱི་རྟེན་ནི་མཆོད་རྟེན་ཏེ། དེ་ལ་སྤྱིར་ཉན་ཐོས་དང་རང་སངས་རྒྱས་དང་ཐེག་པ་ཆེན་པོའི་མཆོད་རྟེན་ཏེ་གསུམ་དུ་བཤད་
དེ། དེའང་ཉན་ཐོས་ཀྱི་མཆོད་རྟེན་ནི་ཆོས་གོས་བཞི་བལྟབ་བྱས་པའི་སྟེང་དུ་ལྷུང་བཟེད་ཁ་སྦུབ་པ་ལ་འཁར་གསིལ་བཙུགས་པ་ལྟ་བུའོ། །རང་སངས་རྒྱས་ཀྱི་མཆོད་རྟེན་ནི་རྨང་གྲུ་བཞི་པའི་སྟེང་དུ་ངོས་གྲུ་བཞི་ཟླུམ་པོ་བང་རིམ་བཅུ་གཉིས་པ་འཁོར་ལོ་རྩིབས་བརྒྱད་པའི་རྣམ་པ་ཅན་ནོ། །ཐེག་པ་ཆེན་པོའི་མཆོད་རྟེན་
ནི་ལྷུང་བཟེད་ཁ་སྦུབ་པ་ལྟ་བུ་བིམྦའི་ཟླུམ་པོ་དང༌། ཁང་བུ་ལྟ་བུ་དང༌། རྒྱལ་མཚན་ལྟ་བུའི་མཆོད་རྟེན་བརྒྱད་ལ་སོགས་པ་ཡོད་པར་ཀླུ་སྒྲུབ་ཀྱིས་གསུངས་སོ། །གཞན་ཡང་འདུལ་བ་ལུང་ལས། ཆོས་འཁོར་ལ་གདུགས་དང༌། གདུགས་ལ་ཆར་ཁེབས་སུ་བཏགས་ནས་སོ་སོ་སྐྱེ་བོའི་མཆོད་རྟེན་ལ་གདུགས་མེད་པ་དང༌།

ཉན་ཐོས་ཀྱི་མཆོད་རྟེན་ལ་འབྲས་བུའི་གྲངས་ཀྱི་གདུགས་ཡོད་པ་དང༌། རང་རྒྱལ་གྱི་མཆོད་རྟེན་ལ་གདུགས་བདུན་ཡོད་པ་དང༌། སངས་རྒྱས་ཀྱི་མཆོད་རྟེན་ལ་གདུགས་བཅུ་གསུམ་པ་ཆར་ཁེབས་ཏོག་དང་བཅས་པ་སྟེ་རྣམ་པ་ཐ་དད་ཉིད་དུ་ཡོད་པར་གསུངས་སོ། །དེ་དག་ལས་
བྱེ་བྲག་ཏུ་མཆོད་རྟེན་ཐམས་ཅད་ཀྱི་གཙོ་བོར་གྱུར་པ་ནི། ལས་ཀྱི་མཐའ་བརྗོད་པའི་མདོ་ལས། སྤྲུལ་པ་མཛད་པ་སྔོན་བསྟན་ཕྱིར། །མཆོད་རྟེན་བརྒྱད་དུ་སྐུ་གདུང་བཞག །ཅེས་བཤད་པ་ལྟར་སྟོན་པའི་མཛད་པ་མཐའ་ཡས་པའི་ནང་ནས་མཛད་པའི་གཙོ་བོ་རྣམས་ལ་བརྟེན་ནས་ཡུལ་འཁོར་ཆེན་པོ་དེ་དང་
དེའི་རྒྱལ་པོ་ལ་སོགས་པའི་སྐྱེ་འགྲོ་རྣམས་སྤྲོ་བ་མཆོག་ཏུ་སྐྱེས་ཤིང་བསོད་ནམས་ཀྱི་ཞིང་དུ་བསྐྲུན་པ་ཤཱཀྱ་ཐུབ་པའི་མཆོད་རྟེན་ཆེན་པོ་བརྒྱད་དུ་གྲགས་པ་དང༌། གཞན་ཡང་སྐུ་གདུང་ཆ་བརྒྱད་དུ་བགོས་པའི་མཆོད་རྟེན་བརྒྱད་དང༌། རས་ཚིག་པ་དང་མ་ཚིག་པ་དང་སོལ་བའི་མཆོད་རྟེན་གསུམ་སྟེ་བཅུ་གཅིག་གོ།
གཞན་ཡང་སྔ་ཕྱིར་བྱུང་བའི་མཆོད་རྟེན་གྲངས་མེད་པ་ཡོད་ཀྱང་གཙོ་བོ་སྐུ་བལྟམས་པ་ནས་མྱ་ངན་ལས་འདས་ཀྱི་བར་དུ་བྱུང་བའི་མཆོད་རྟེན་བརྒྱད་པོ་འདི་ཉིད་ཡིན་པས། དེང་གི་དུས་སུ་དེ་བཞིན་གཤེགས་པའི་རིང་བསྲེལ་གྱི་སྙིང་པོ་ཅན་གྱི་མཆོད་རྟེན་གང་བཞེང་ཡང་རྣམ་པ་ནི་བརྒྱད་པོ་དེ་དག་གང་
ཡང་རུང་བ་རེའི་དབྱིབས་ཅན་དུ་བྱ་བ་ཡིན་ནོ། །འདི་དག་གི་གོ་རིམ་ནི་སྟག་ཚང་ལོ་ཙཱ་བ་ལ་སོགས་པ་བཀྲ་ཤིས་སྒོ་མངས་ནས་ཐོག་མར་བྱས་པ་དང༌། ཁ་ཅིག་ལྷ་བབས་ཀྱིས་ཐོག་དྲངས་པ་དང༌། ཁྱད་པར་སྟག་ཚང་བས་མཆོད་རྟེན་བརྒྱད་ཀྱི་བསྟོད་པར། སྐུ་བལྟམས་པའི་དུས་ཀྱི་མཆོད་རྟེན་བཀྲ་ཤིས་
སྒོ་མངས་དང༌། ཆོས་ཀྱི་འཁོར་ལོ་བསྐོར་བའི་མཆོད་རྟེན་ད་ལྟའི་ཆོ་འཕྲུལ་མཆོད་རྟེན་ལ་ངོས་འཛིན་པ་དང༌། ཆོ་འཕྲུལ་བསྟན་པའི་ཚེའི་མཆོད་རྟེན་པདྨ་སྤུངས་པ་ལ་ངོས་འཛིན་པའི་མི་འདྲ་བའི་ཁྱད་པར་ཅུང་ཟད་བྱུང་ཡང༌། མངའ་རིས་པ་ཚུལ་ཁྲིམས་འོད་ཟེར་དང༌། པཎ་ཆེན་ནམ་མཁའ་དཔལ་
བཟང་དང༌། རྒྱལ་དབང་ལྔ་པ་ལ་སོགས་པ་ཕྱིས་ཀྱི་མཁས་པ་ཕལ་ཆེ་བས་ལེགས་པར་བཤད་པའི་གོ་རིམ་མཐུན་པར་སྐུ་བལྟམས་པའི་ཚེ་གཏེར་ཁ་ལྔ་བརྒྱ་བྱུང་བ་ལ་སོགས་པ་བཀྲ་ཤིས་པ་དང་དགེ་ལེགས་ཀྱི་མཚན་མ་བརྒྱ་ཕྲག་མང་པོ་མངོན་དུ་བྱུང་བའི་རྟེན་འབྲེལ་གྱི་དབང་དང༌། དུས་དེ་ཉིད་དུ་ཕྱོགས་

དྲུག་ན་ཞབས་ཀྱི་གོམ་པ་བདུན་བདུན་དུ་བོར་བར་པདྨ་རེ་རེ་བྱུང་བ་ལ་སོགས་པ་རྒྱུ་མཚན་དུ་བྱས་ནས་པདྨ་སྤུངས་པ་ནས་མགོ་འཛིན་པར་མཛད་དོ། །དེ་ལ་དང་པོ་གྲོང་ཁྱེར་སེར་སྐྱར་ལུམྦིའི་ཚལ་དུ་སྐུ་བལྟམས་པའི་དུས་ཀྱི་མཆོད་རྟེན་ནི་དབྱིབས་ཟླུམ་པོ་པདྨའི་རྣམ་པ་ཅན་བང་རིམ་བཞི་པ་པདྨ་དང་འཁོར་
ལོས་སྤྲས་པ་སའི་བདག་པོ་ཟས་གཙང་ལ་སོགས་པས་བཞེངས་པ་ལ་པདྨ་སྤུངས་པའི་མཆོད་རྟེན་ཞེས་བྱའོ། །གཉིས་པ་མ་ག་དྷཱ་རྒྱལ་པོའི་ཁབ་ཏུ་མངོན་པར་བྱང་ཆུབ་པའི་དུས་ཀྱི་མཆོད་རྟེན་ནི། དབྱིབས་གྲུ་བཞི་པ་བང་རིམ་བཞིས་མཛེས་པ་མ་སྐྱེས་དགྲ་དང་གཟུགས་ཅན་སྙིང་པོ་ལ་སོགས་པས་
བཞེངས་པ་ལ་བྱང་ཆུབ་ཆེན་པོའི་མཆོད་རྟེན་ཞེས་བྱའོ། །གསུམ་པ་ཝཱ་རཱ་ཎ་སཱིར་ཆོས་ཀྱི་འཁོར་ལོ་བསྐོར་བའི་དུས་ཀྱི་མཆོད་རྟེན་ནི། དབྱིབས་གྲུ་བཞི་པ་བང་རིམ་བཞི་པ་གློ་འབུར་དང་བཅས་སྒོ་རབ་བརྒྱ་རྩ་བརྒྱད་ལ་སོགས་པས་མཛེས་པ་ཡོངས་སུ་གྲགས་པ་ལྟར་རམ། ཡང་ན་བདེན་པ་རྣམ་པ་བཞིའམ་
བཅུ་དྲུག་དང་རྣམ་པར་ཐར་པ་སོགས་ཀྱི་མཚོན་བྱེད་དུ་ལོགས་རེར་སྒོ་བཞིའམ་བརྒྱད་དམ་བཅུ་དྲུག་རེར་ཡོད་པ་ལྔ་སྡེ་བཟང་པོ་འཕགས་པས་བཞེངས་པ་ལ་བཀྲ་ཤིས་སྒོ་མངས་ཀྱི་མཆོད་རྟེན་ཞེས་བྱའོ། །བཞི་པ་མཉན་དུ་ཡོད་པར་ཆོ་འཕྲུལ་བསྟན་པའི་དུས་ཀྱི་མཆོད་རྟེན་ནི། དབྱིབས་གྲུ་བཞི་པ་བང་རིམ་བཞི་
དང་ལྡན་ཞིང་ཕྱོགས་བཞིར་གློ་འབུར་དང་བཅས་པ་ལིཙྪ་བཱི་རྣམས་ཀྱིས་རྒྱལ་བྱེད་ཚལ་དུ་བཞེངས་པ་ལ་མུ་སྟེགས་ཕམ་བྱེད་ཀྱི་མཆོད་རྟེན་ནམ་ཆོ་འཕྲུལ་ཆེན་པོའི་མཆོད་རྟེན་ཞེས་བྱའོ། །ལྔ་པ་ནི་གནས་སུམ་ཅུ་རྩ་གསུམ་དུ་ལྷའི་ཡུལ་ན་དབྱར་གནས་པ་མཛད་ཅིང་ཡུམ་ལ་ཆོས་གསུངས་ནས་ཕྱི་དྲོ་ནམ་མཁའ་
ནས་བབ་པའི་དུས་ཀྱི་མཆོད་རྟེན་ནི། དབྱིབས་གྲུ་བཞི་པ་བང་རིམ་བརྒྱད་པའམ་བཞི་པ་ངོས་རེ་ལ་གློ་འབུར་དང་བཅས་པའི་གློ་འབུར་གྱི་དབུས་སུ་ཐེམ་སྐས་ཡོད་པ་གསལ་ལྡན་གྱི་དད་པ་ཅན་རྣམས་ཀྱིས་བཞེངས་པ་ལ་སུམ་ཅུ་རྩ་གསུམ་ལྷའི་མཆོད་རྟེན་ནམ་ལྷ་བབ་ཏུ་གྲགས་པའི་མཆོད་རྟེན་ཞེས་བྱའོ། །དྲུག་
པ་ནི་རྒྱལ་པོའི་ཁབ་ཏུ་ལྷས་བྱིན་གྱིས་དགེ་འདུན་གྱི་དབྱེན་བྱས་པ་མཆོག་ཟུང་གིས་བསྡུམ་པར་བྱས་པའི་དུས་ཀྱི་མཆོད་རྟེན་ནི། དབྱིབས་བང་རིམ་བཞི་པ་གྲུ་བཞིའི་གྲྭ་བཞི་པོ་མཉམ་པར་བཅད་པ་རྒྱལ་བྱེད་ལ་སོགས་པའི་མ་ག་དྷཱ་པས་བཞེངས་པ་ལ་འོད་ཟེར་ཅན་ནམ་བྱམས་དངོས་སམ་དབྱེན་བསྡུམས་

པའི་མཆོད་རྟེན་ཞེས་བྱའོ། །བདུན་པ་ཡངས་པ་ཅན་དུ་སྐུ་ཚེ་ཟླ་བ་གསུམ་དུ་བྱིན་གྱིས་བརླབས་པའི་དུས་ཀྱི་མཆོད་རྟེན་ནི། དབྱིབས་ཟླུམ་པོ་བང་རིམ་གསུམ་པ་ལྷ་རྣམས་ཀྱིས་བརྩིགས་པའམ་ཡངས་པ་ཅན་གྱི་གྲོང་ཁྱེར་བ་རྣམས་ཀྱིས་བཞེངས་པར་གྲགས་པ་ལ་སྐུ་ཚེ་བྱིན་གྱིས་
བརླབས་པའི་མཆོད་རྟེན་ནམ་རྣམ་པར་རྒྱལ་བའི་མཆོད་རྟེན་ཞེས་བྱའོ། །བརྒྱད་པ་རྩྭ་མཆོག་གི་གྲོང་དུ་མྱ་ངན་ལས་འདའ་བའི་ཚུལ་བསྟན་པའི་དུས་ཀྱི་མཆོད་རྟེན་ནི། དབྱིབས་བང་རིམ་དང་བྲལ་བ་གདན་ཁྲིའི་སྟེང་དུ་བུམ་རྟེན་ཡན་ཆད་བཞུགས་པ་རྩྭ་ཅན་གྱི་གྱད་རྣམས་ཀྱིས་བརྩིགས་པ་ལ་མྱ་ངན་
འདས་པའི་མཆོད་རྟེན་ཞེས་བྱ་བ་སྟེ་མཆོད་རྟེན་བརྒྱད་པོ་དེ་དག་གི་ཆ་ཚད་ལ་སོགས་པ་སྟོན་པར་བྱེད་པའི་བསྟན་བཅོས་རྣམས་དང༌། དེར་མ་ཟད་གསང་སྔགས་རྡོ་རྗེ་ཐེག་པའི་རྒྱུད་སྡེ་སོ་སོ་ནས་བཤད་པའི་གཞལ་ཡས་ཁང་དང་བུམ་པ་དང་རྡོ་རྗེ་དྲིལ་བུ་དང་ཞི་རྒྱས་དབང་དྲག་གི་ལས་དང་རྗེས་སུ་མཐུན་
པའི་ཐབ་ཀྱི་ཐིག་དང་དགང་གཟར་དང་བླུགས་གཟར་ལ་སོགས་པའི་ཚད་དང་མཚན་ཉིད་ལ་སོགས་པ་སྟེ། མདོར་ན་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་རྟེན་གྱི་རིགས་སུ་གཏོགས་པ་རྣམས་ཀྱི་སོ་སོའི་ཚད་དང་མཚན་ཉིད་ལ་སོགས་པ་སྟོན་པར་བྱེད་པའི་བསྟན་བཅོས་ནི་ལོགས་
སུ་གནས་པ་དང་མདོ་སྡེ་དང་རྒྱུད་སྡེ་སོ་སོའི་འགྲེལ་པ་རྣམས་ཀྱི་གསེབ་ཚག་ནས་བསྟན་པ་ཅི་རིགས་པར་འབྱུང་བ་རྣམས་ལྟ་བུའོ། །གཞན་ཡང་བཟོ་རིག་པ་ཕལ་པ་ནི། མདོ་སྡེ་ལས་གསུངས་པའི་བཟོ་སྦྱངས་བཅོ་བརྒྱད་ཅེས་པ། ཚོང་པ་དང༌། རྫ་མཁན་དང༌། ཕྲེང་བ་མཁན་དང༌། ཆང་ཚོང་དང༌།
ཕྱུགས་བཙོང་བ་དང༌། འདྲེག་མཁན་དང༌། འབྲུ་མར་འཚིར་བ་དང༌། མགར་བ་དང༌། ཤིང་མཁན་དང༌། ཕྱ་མཁན་དང༌། ཐ་ག་པ་དང༌། ཀོ་པགས་མཁན་དང༌། རྐྱལ་ཆེན་པ་དང༌། བཙོ་བླག་མཁན་དང༌། སྨྱིག་མ་མཁན་དང༌། བཤན་པ་དང༌། གདོལ་པ་མཁན་དང༌། ཤིང་རྟ་མཁན་ཏེ་བཟོ་སྦྱངས་བཅོ་
བརྒྱད་དང༌། གཞན་ཡང་རིན་པོ་ཆེ་བརྟག་པ། ས་གཞི་བརྟག་པ། གོས་བརྟག་པ། ལྗོན་ཤིང་བརྟག་པ། རྟ་བརྟག་པ། གླང་པོ་ཆེ་བརྟག་པ། སྐྱེས་པ་བརྟག་པ། བུད་མེད་བརྟག་པ་སྟེ་བརྟག་པ་བརྒྱད་དང༌། གཞན་ཡང་མདོ་སྡེ་རྣམས་སུ་སྒྱུ་རྩལ་གྱི་རིག་པ་ཇི་སྙེད་པའི་བྱ་བ་བསྟན་ཏེ། དེ་དག་དྲུག་ཅུ་རྩ་བཞིར་བསྡུ་བ་ཡང༌།

རོལ་མོའི་མཚན་ཉིད་སྒྱུ་མ་དང༌། །འགྱེད་སྟོབས་དང་ནི་མེ་ཏོག་ལས། །དམག་རྣམས་ཀྱི་ནི་བདག་ཉིད་ཤེས། །གཡོས་སུ་བྱ་བ་རྣམ་པར་ངེས། །ཚོང་དང་ནོར་ནི་བསྒྱུར་བ་དང༌། །རྒྱན་དང་ལག་རྩིས་བཅུད་ཀྱིས་ལེན། །འཁྲུལ་འཁོར་སྦྱོར་དང་དྲི་བ་དང༌། །འཕོངས་དཔྱད་དང་ནི་ཚོམ་སྦྱོར་སྒྲ། །ཡི་གེ་དང་ནི་
ཁྭ་སྐད་དང༌། །རང་རང་བཟོ་དང་མཚོན་རྣམས་བརྟག །གཅོད་ཐབས་དང་ནི་སོག་ལེ་དང༌། །ཕུབ་རྣམས་བསྐོར་བར་བྱེད་པ་དང༌། །སོང་དང་འོང་བ་ཤེས་པ་དང༌། །གཞི་ཡི་མཚན་ཉིད་ཤེས་པ་དང༌། །མདུང་དང་རྡོ་རྗེ་བརྟག་པ་དང༌། །ཐབས་ཀྱི་ཚོར་བའི་མཚན་ཉིད་དང༌། །ཟུག་རྔུ་འབྱིན་དང་མིག་འགྲུལ་
དང༌། །བྷ་ར་ཏ་ཡི་བསྟན་བཅོས་ཤེས། །བཅིང་དང་ཁང་པ་བརྩེགས་མ་དང༌། །དེ་བཞིན་གོས་ཀྱི་འཕང་བ་དང༌། །ཡན་ལག་མཉེ་དང་མོ་འདེབས་དང༌། །དེ་བཞིན་ཆུ་ཡི་ཀུན་འཛིན་དང༌། །དུང་གི་སྒྲ་དང་སྡེབ་སྦྱོར་དང༌། །གྲོང་རྡལ་དང་ནི་གློག་འདྲ་དང༌། །མཚན་མོ་ཆོམ་རྐུན་ཤེས་པ་དང༌། །སྒྲ་དང་
ས་རྟོག་བྱེད་པ་དང༌། །སྐྱེས་པ་བུད་མེད་རྟ་དང་ནི། །གླང་པོའི་མཚན་ཉིད་གར་སློབ་དང༌། །འབྱུང་པོ་དག་ནི་གསོ་བ་དང༌། །ཟངས་མ་འཁར་བ་གསེར་དག་དང༌། །ཤིང་དང་དུང་དང་ཤེས་པ་དང༌། །རི་མོ་མཚོན་དང་གསོ་དག་གི། །ལས་རྣམས་དེ་དག་གོ་རིམ་བཞིན། །སྐར་མའི་གཏན་ཚིགས་ཤེས་
པ་དང༌། །མཚན་མོ་ཤེས་པ་ཉིད་དང་ཡང༌། །ངེས་པའི་ཚིག་གི་གཞུང་རྣམས་ཀྱིས། །སྒྱུ་རྩལ་དྲུག་ཅུ་རྩ་བཞིར་དྲན། །ཞེས་བྱ་བ་བསྡུས་ཏེ་སྟོན་པའི་བསྟན་བཅོས་འདུལ་བ་ཕྲན་ཚེགས་ཀྱི་འགྲེལ་པ་ལྟ་བུའམ། ཡང་ན་སྙན་དངགས་མེ་ལོང་དུ་འདི་ལྟར་སྒྱུ་རྩལ་དྲུག་ཅུ་རྩ་བཞི་ཞེས་འབྱུང་བའི་བཟོར་གཏོགས་
པ་སུམ་ཅུ་དང༌། རོལ་མོའི་བྱེ་བྲག་བཅོ་བརྒྱད། གླུ་དབྱངས་ཀྱི་ངེས་པ་བདུན། གར་གྱི་ཉམས་དགུའོ། །དེ་ལ་བཟོར་གཏོགས་པ་སུམ་ཅུ་ནི། སྒྱུ་རྩལ། ཡི་གེལག་རྩིས། གྲངས་ཅན། རྩིས། འཛིན་སྟངས། ཐོར་ཚུགས། གོམ་སྟབས། ལྕགས་ཀྱུས་བསྒྱུར་ཐབས། རལ་གྲིས་ཐབས། ཞགས་པ་གདབ་པ།
མདའ་བོ་ཆེ་འཕེན་ཐབས། འཕོང་གི་སློབ་དཔོན། མདུན་དུ་སྣུར་བ། ཕྱིར་སྣུར་བ། གཅད་པ། དྲལ་བ། དབུག་པ། རྒྱང་ནས་འཕོག་པ། སྒྲ་གྲག་པར་འཕོག་པ། གནད་དུ་འཕོག་པ། མི་འཆོར་བར་འཕོག་པ། ཚབས་ཆེ་བ། གནས་ལྔ་ལ་བྱང་བར་གྱུར་ཏོ། །མཆོངས་པ། གྱད་ཀྱི་འཛིན་སྟངས། བང༌།

རྐྱལ། རྒལ་བ། གླང་པོ་ཆེའི་གཉར་ཞོན་པ། རྟ་ལ་ཞོན་པ། ཤིང་རྟའི་ཐབས། མདའ་གཞུ་འགྱེད་སྟོབས། རོལ་མོའི་བྱེ་བྲག་བཅོ་བརྒྱད་ནི། གར་མཁན་ནམ་གྲོ་མཁན། གར་རམ་བྲོ། རྔ་བོ་ཆེ། རྫ་རྔ། རྔ། རྫ་རྔ་ཆེན་པོ། འཁར་རྔ། པི་ཝང་རྒྱུད་གཅིག་པ།རྫ་རྔ་ཁ་གཅིག ལྕགས་
ཀྱི་སིལ་ཁྲོལ། ཁར་དཀྲོལ། པི་ཝང་རྒྱུད་གསུམ་པ། རྔ་མུ་ཀུནྡ། སིལ་སྙན། གླུ་དབྱངས། ཕེག་རྡོབ་པ། རོལ་མོའི་སྒྲ། པི་ཝང༌། གླིང་བུ། གླུ་དབྱངས་ཀྱི་ངེས་པ་བདུན་ནི། བར་མ། དྲང་སྲོང༌། ས་འཛིན་པ། དྲུག་ལྡན་པ། ལྔ་པ། བློ་གསལ། འཁོར་ཉན། གར་སྟབས་ཀྱི་ཉམས་དགུ་ནི། སྟེགས་པའམ་
སྒེག་པའམ་འཛིན་པ། དཔའ་བོ། མི་སྡུག་པ། དྲག་ཤུལ་ཅན། བཞད་གད། འཇིགས་སུ་རུང་བ། སྙིང་རྗེ་བ། རྔམ་པ། ཞི་བ་སྟེ་དེ་ལ་སོགས་པའི་རྣམ་གྲངས་སྟོན་པར་བྱེད་པའི་བསྟན་བཅོས་རྣམས་དང༌། གཞན་ཡང་དུས་འཁོར་བསྡུས་རྒྱུད་ལས། གཡུལ་དུ་ཕམ་པའི་དགྲ་བོ་དག་ནི་གལ་ཏེ་འཕྲལ་
ལ་རྫོང་གི་ནང་དུ་ཞུགས་པར་གྱུར་པ་ན། །ཕྱི་རོལ་དུ་ནི་འཕྲུལ་འཁོར་བྱ་སྟེ་རྒྱུན་ཆད་མེད་པར་རྡོ་དང་མེ་མདའ་རབ་ཏུ་འབེབས་པ་དང༌། །རལ་གྲི་ལ་སོགས་གཅོད་པའི་འཕྲུལ་འཁོར་དག་དང་ས་གཞིའི་གནས་ལ་གུར་དང་གོ་ནི་དབྱེ་བ་ཡིས། །དེ་ཡིས་རྫོང་ནི་ཕྱེ་མར་བྱས་ཏེ་ཉིན་ཞག་ཅུང་ཟད་དག་གིས་གདུག་པ་དེ་ནི་
བསྒྲུབ་པར་བྱ། །ཞེས་ངོ་མཚར་བའི་སྦྱོར་བ་ཐང་རྫོང་གཞིག་པ་རྡོའི་འཕྲུལ་འཁོར། ཆུ་རྫོང་འཇོམས་པ་གྲུའི་འཕྲུལ་འཁོར། རི་རྫོང་འཇོམས་པ་མེའི་འཕྲུལ་འཁོར། རལ་གྲི་འཁོར་བ་གྲི་གུག་གི་འཕྲུལ་འཁོར། རྩེ་མོ་འབྱེད་པ་རླུང་གི་འཕྲུལ་འཁོར། རྩིག་པ་འཇིག་པ་གུར་གྱི་འཕྲུལ་འཁོར། གོ་
ཆ་འཇིག་པ་ལྕགས་མདའི་འཕྲུལ་འཁོར་རྣམས་དང༌། རང་ཕྱོགས་སྲུང་བ་རལ་གྲིའི་འཕྲུལ་འཁོར། རྒྱལ་རིགས་འཐབ་པ་ཤིང་རྟའི་ཚད། ལྟད་མོ་ལ་འགྲོ་བའི་དོན་དུ་ཁང་བཟང་གི་མཚན་ཉིད། དགའ་སྟོན་གྱི་དོན་དུ་ཁྱོགས་ཀྱི་མཚན་ཉིད། ལྡུམ་ར་བཅུ་པའི་དོན་དུ་ཆུ་འདྲེན་པའི་འཕྲུལ་འཁོར་སོགས་
དུས་ཀྱི་འཁོར་ལོ་ལས་གསུངས་པ་དང༌། གཞན་ཡང་མི་དཔྱད་རྟ་དཔྱད་ཐོར་བུར་འདུག་པ་རྣམས་སྟོན་པར་བྱེད་པའི་བསྟན་བཅོས་ལོགས་སུ་མེད་ནའང་མདོ་དང་རྒྱུད་ཀྱི་འགྲེལ་པ་རྣམས་ཀྱི་གསེབ་ཚག་ནས་ཅི་རིགས་པར་འབྱུང་བ་ལྟ་བུའོ། །གཉིས་པ་གཞན་རྗེས་སུ་འཛིན་པར་བྱེད་པ་རིག་པའི་གནས་གཉིས་

པ། ཚེ་རིང་བ་དང་ནད་མེད་པའི་བདེ་བ་སྒྲུབ་པར་བྱེད་པ་རིག་པའི་གནས་གཉིས་པ་གསོ་བ་རིག་པ་ལ། གསོ་བ་རིག་པ་ལ་འཇུག་པའི་དགོས་པ་དང༌། དེ་སྟོན་པའི་བསྟན་བཅོས་ཀྱི་རང་བཞིན་བསྟན་པའོ། །དང་པོ་ནི་རྣམ་པ་ཐམས་ཅད་མཁྱེན་པའི་གོ་འཕང་དོན་དུ་གཉེར་བའི་བྱང་ཆུབ་སེམས་དཔའ་རྣམས་ཀྱིས་གནས་
སྐབས་སུ་བྲོ་ནད་རྣམ་པ་སྣ་ཚོགས་ཀྱིས་བཏབ་པའི་ལུས་ཅན་རྣམས་ཀྱི་ནད་ཀྱི་ཟུག་རྔུ་མཐའ་དག་སེལ་བར་བྱེད་པ་ལ་མཁས་པ་དང༌། དུས་མ་ཡིན་པར་འཆི་བའི་སྡུག་བསྔལ་གྱི་འཇིགས་པ་ལས་སྐྱོབ་པའི་ནུས་པ་དང་ལྡན་པར་བྱས་ནས་ཕན་པ་རྒྱ་ཆེན་པོ་བསྒྲུབ་པའི་ཕྱིར། རླུང་ལས་གྱུར་པ་དང༌། མཁྲིས་པ་
ལས་གྱུར་པ་དང༌། བད་ཀན་ལས་གྱུར་པ་དང༌། འདུས་པ་ལས་གྱུར་པའི་ནད་དང༌། ནད་ཀྱི་གླེང་གཞི་དང༌། ནད་མེད་པར་བྱ་བ་དང༌། དེའི་ཐབས་ཀྱི་ཁྱད་པར་མང་པོ་ལ་མ་རྨོངས་པར་བྱས་ནས་གཞན་གྱི་དོན་རྗེས་སུ་བསྒྲུབ་པ་དང༌། མཐར་ཐུག་གི་སྨན་པ་བླ་ན་མེད་པ་ཐམས་ཅད་མཁྱེན་པའི་གོ་འཕང་གི་རྒྱུར་འགྱུར་བ་
དང༌། དེ་ཉིད་མངོན་དུ་གྱུར་ནས་ཀྱང་གདུལ་བྱར་གྱུར་པའི་འགྲོ་བ་ཐམས་ཅད་ཀྱི་ཉོན་མོངས་པ་བརྒྱད་ཁྲི་བཞི་སྟོང་གི་གཉེན་པོར་འགྱུར་བའི་བདུད་རྩིའི་སྒོ་མོ་དེ་སྙེད་ཀྱི་གྲངས་དང་མཉམ་པར་ཕྱེ་བས་གནས་སྐབས་དང་མཐར་ཐུག་གི་བདེ་བ་ལ་འགོད་པའི་ཐབས་ལ་དབང་བརྙེས་པར་འགྱུར་བའི་དགོས་པ་དམ་པས་
ཡིད་ཡོངས་སུ་དྲངས་ཏེ་ཚུལ་འདི་ལ་འཇུག་པར་རིགས་སོ། །དེ་ལྟར་ཡང་རྒྱན་གྱི་འགྲེལ་བཤད་ལས། གསོ་བ་རིག་པ་བྱང་ཆུབ་སེམས་དཔའ་ཚོལ་བར་བྱེད་དོ། །ཅིའི་ཕྱིར་ཞེ་ན། ནད་དང་ནད་ཀྱི་གླེང་གཞི་དང༌། ནད་མེད་པ་དང༌། ནད་མེད་པའི་ཐབས་ཤེས་པར་བྱ་བ་དང༌། སེམས་ཅན་རྣམས་ཀྱི་ནད་རྣམ་པ་
སྣ་ཚོགས་པ་ཞི་བར་བྱ་བའི་ཕྱིར་ཚོལ་བར་བྱེད་དོ་ཞེས་དང༌། སྟོན་པས་ཆོས་ཀྱི་འཁོར་ལོ་དང་པོའི་སྐབས་སུ་ཡང་དགེ་སློང་ནད་པས་ནི་སྨན་པ་ལ་དྲིས་ཏེ་བྱའོ་ཞེས་དང༌། བཅོམ་ལྡན་འདས་མགོན་མེད་ཟས་སྦྱིན་གྱི་ཀུན་དགའ་རྭ་བ་ན་བཞུགས་པའི་ཚེ་དགེ་སློང་རྣམས་སྟོན་ཀའི་བྲོ་ནད་ཀྱིས་སྐྱ་བོ་བསེང་བསེང་པོར་
གྱུར་པའི་ཚེ། སྨན་སོ་སོར་བསྟེན་པར་གསུངས་ཀྱང་དུས་སུ་མ་གཏོགས་པར་དེ་ལས་ཡོལ་བར་བསྟེན་པར་མ་གནང་བས་སྐྱ་བོར་གྱུར་པ་ལས། ཀུན་དགའ་བོ་དེ་ལྟ་བས་ན་རྗེས་སུ་གནང་སྟེ། དགེ་སློང་རྣམས་ཀྱི་སྨན་རྣམ་པ་བཞི་པོ་དུས་སུ་རུང་བ་དང༌། ཐུན་ཚོད་དུ་རུང་བ་དང༌། ཞག་བདུན་པ་དང༌། ཇི་སྲིད་

འཚོའི་བར་དུ་སོ་སོར་བཅང་བ་བསྟན་པར་བྱའོ། །དེ་ལ་དུས་སུ་རུང་བ་ནི། ལྡེ་གུ་དང་ཞེས་བྱ་བ་ལ་སོགས་པས་རྒྱས་པར་བཀའ་སྩལ་པ་དང༌། ཡན་ལག་བརྒྱད་པའི་སྙིང་པོ་བསྡུས་པའི་མདོའི་གནས་ལེའུ་གཉིས་པ་ཉིན་རེའི་སྤྱོད་པའི་ལེའུ་ལས་ཀྱང༌། སེམས་ཅན་ཐམས་ཅད་བདེ་
འདོད་ཕྱིར། །རྩོམ་པ་ཀུན་ལ་འཇུག་པར་འདོད། །ཅེས་དང༌། མགོའི་བཤད་པའི་ལེའུ་ལས་ཀྱང༌། ཚེ་ནི་རིང་བར་འདོད་པ་ཡིས། །ཆོས་དང་ནོར་དང་བདེ་བ་སྒྲུབ། །ཚེ་ཡི་རིག་བྱེད་ལུང་བཤད་པ། །རབ་ཏུ་གུས་པར་བྱ་བ་གྱིས། །ཞེས་བྱ་བ་ལ་སོགས་པའི་དགོས་པ་མང་དུ་ཡོད་པར་ཤེས་པར་བྱའོ། །གཉིས་པ་
ནི་དགོས་པ་དེ་དང་ལྡན་པའི་གསོ་བ་རིག་པའི་གཞུང་གི་བསྟན་བཅོས་ནི་བཤད་མ་ཐག་པའི་གཞུང་དེ་ཉིད་ལས། ཚངས་པས་ཚེ་ཡི་རིག་བྱེད་དྲན། །སྐྱེ་དགུས་བདག་ལ་བཤད་པ་ཡིན། །དེ་ཡིས་ཐ་སྐར་དེས་བརྒྱ་བྱིན། །དེས་རྒྱུན་ཤེས་སོགས་དྲང་སྲོང་ལའོ། །དེ་ཡིས་མེ་བཞིན་འཇུག་ལ་སོགས། །དེ་
རྣམས་ཀྱིས་ཀྱང་སོ་སོར་བྱས། །ཤིན་ཏུ་འཐོར་བ་དེ་རྣམས་ལས། །རབ་གཅེས་ཕལ་ཆེར་བཏུས་པ་ནི། །ཤིན་ཏུ་བསྡུས་མིན་རྒྱས་མིན་པར། །ཡན་ལག་བརྒྱད་པའི་སྙིང་པོ་བྱ། །ཞེས་འབྱུང་བ་ལྟར་ལྷ་དང་མིའི་དྲང་སྲོང་ལ་སོགས་པ་མཁས་པ་གང་དག་བྱུང་བ་རྣམས་ཀྱིས་མཛད་པའི་གཞུང་
མང་དུ་བྱུང་བར་གྲགས་ཀྱང༌། གཞུང་དེ་ཐམས་ཅད་ཀྱི་སྙིང་པོ་བསྡུས་ཏེ་རྒྱས་བསྡུས་འཚམ་པ་ལེགས་པར་བཤད་པ་ཀུན་གྱི་མཐར་ཐུག་པ་ནི་ཡན་ལག་བརྒྱད་པའི་སྙིང་པོ་བསྡུས་པ་ཞེས་བྱ་བ་འདི་ཉིད་དེ། འདིའི་གཞུང་གི་ཚད་ནི་ཤླཽ་ཀ་དགུ་སྟོང་དང་བཞི་བརྒྱ་ལྷག་ཙམ་ལ། བརྗོད་པར་བྱ་བའི་སྙིང་པོ་ནི་
ཡན་ལག་བརྒྱད་དེ། བརྒྱད་ནི། ལུས་དང་བྱིས་པ་གདོན་ལུས་སྟོད། །མཚོན་དང་མཆེ་བ་རྒས་རོ་ཙ། །གསོ་དཔྱད་གང་ལ་གནས་གྱུར་པ། །ཡན་ལག་བརྒྱད་ཅེས་དེ་ལ་བརྗོད། །ཅེས་པ་སྟེ། དེ་ཡང་བརྗོད་ཚུལ་ནི། མདོ་གནས་ལུས་དང་ནད་གཞི་དང༌། །གསོ་གནས་ཆོ་ག་གྲུབ་ཕྱི་མ། །ཞེས་པ་ལྟར་
གནས་དྲུག་ཏུ་བྱས་ནས། མདོ་གནས་ལེའུ་སུམ་ཅུ་དང༌། ལུས་གནས་ལེའུ་དྲུག་དང༌། ནད་ཀྱི་གཞི་ལེའུ་བཅུ་དྲུག་དང༌། གསོ་བའི་གནས་ལེའུ་ཉི་ཤུ་རྩ་གཉིས་དང༌། ཆོ་ག་གྲུབ་པ་ལེའུ་དྲུག་དང༌། ཕྱི་མའི་གནས་ལེའུ་བཞི་བཅུ་སྟེ་ཡོངས་སུ་བསྡོམས་པ་ལེའུ་བརྒྱ་དང་ཉི་ཤུའོ། །དེ་ལས་མདོ་གནས་དང་

པོ་ཚེ་རིང་བའི་ལེའུས་ནི་ནད་གསུམ་གྱི་ངོ་བོ། སྨན་དང་སྨན་པ། ནད་པ་དང་ནད་གཡོག་རྣམས་ཆོས་བཞི་ལྡན་ལ་སོགས་པའི་སྤྱིའི་རྣམ་གཞག་དང༌། ལེའུ་རྣམས་ཀྱི་རྣམ་གྲངས་སྟོན་པས་རྩ་བའི་རྒྱུད་དང༌། དེ་ནས་གནས་ལྔ་པ་ཡན་ཆད་ཀྱིས་དེ་ཉིད་ཚང་བར་བཤད་པས་བཤད་པའི་རྒྱུད་དང༌། ཐ་མས་ཡན་ལག་
ཕྱི་མ་རྣམས་སྟོན་པས་ཕྱི་མ་རྒྱུད་ཀྱི་ཚུལ་དུ་གནས་པ་སྟེ། དེ་ལྟར་ན་གཞུང་འདིས་བརྗོད་པར་བྱ་བ་ཐམས་ཅད་བརྒྱད་པོ་དེ་ཉིད་དུ་བསྡུས་ནས་སྟོན་པ་ལྟ་བུའོ། །གསུམ་པ་ལོག་པར་རྟོག་པ་གཞན་དག་ཚར་གཅོད་པར་བྱེད་པའི་རིག་པའི་གནས་གཉིས་ཀྱི་དང་པོ་ཚིག་གི་འགལ་འབྲེལ་གཅོད་པའི་རིག་པ་གནས་གསུམ་
པ་བརྡ་སྤྲོད་པའི་བསྟན་བཅོས་ལ། བརྡ་སྤྲོད་པའི་རིག་པ་ལ་འཇུག་པའི་དགོས་པ་དང༌། དེ་སྟོན་པའི་བསྟན་བཅོས་ཀྱི་རང་བཞིན་བསྟན་པའོ། །དང་པོ་ནི་རྣམ་པ་ཐམས་ཅད་མཁྱེན་པའི་གོ་འཕང་དོན་དུ་གཉེར་བའི་བྱང་ཆུབ་སེམས་དཔའ་རྣམས་གནས་སྐབས་སུ་བདག་ཉིད་ལེགས་པར་སྦྱར་བའི་སྐད་ལ་འབྱོངས་
ནས་ཆོས་ཐམས་ཅད་ཀྱི་ངེས་པའི་ཚིག་ལ་མཁས་ཤིང་གཞན་གྱིས་བཀུར་བ་དང༌། མཁས་པར་རློམ་པ་གཞན་དག་ཚར་གཅད་པ་ལ་དབང་བ་དང༌། སྒྲ་གཅིག་ཅིག་ལ་ཡང་ངེས་པའི་ཚིག་མང་པོ་དགྲོལ་ཏེ་བཤད་པ་ལ་གཞན་གྱི་དྲིང་ལ་མི་འཇོག་པའི་མཁས་པར་གྱུར་ནས་སངས་རྒྱས་ཀྱི་ཆོས་ལ་བྱ་བ་བྱས་པའི་
དམ་པ་དམ་པ་ཞེས་བྱ་བའི་གྲངས་སུ་འགྲོ་བ་དང༌། མཐར་ཐུག་ཆོས་སོ་སོ་ཡང་དག་པའི་རིག་པ་དང༌། དོན་སོ་སོ་ཡང་དག་པའི་རིག་པ་དང༌། ངེས་པའི་ཚིག་སོ་སོ་ཡང་དག་པའི་རིག་པ་དང༌། སྤོབས་པ་སོ་སོ་ཡང་དག་པའི་རིག་པ་སྟེ་རིག་པ་བཞི་པོ་དེ་ལ་སོགས་པ་ཡོན་ཏན་ཐམས་ཅད་ལ་དབང་བརྙེས་པ་རྫོགས་
པའི་སངས་རྒྱས་སྒྲ་སྒྲོགས་དབང་པོའི་རྒྱུར་འགྱུར་བ་དང་དེ་ཉིད་མངོན་དུ་བྱས་ནས་ཀྱང་གདུལ་བྱར་གྱུར་པའི་འགྲོ་བ་སྣ་ཚོགས་པར་རང་རང་གི་སྐད་དང་རྗེས་སུ་མཐུན་པའི་ཆོས་སྟོན་པ་ལ་དབང་དམ་པའི་ཕ་རོལ་དུ་སོན་པའི་དགོས་པ་དམ་པས་ཡིད་ཡོངས་སུ་དྲངས་ཏེ་རིག་པའི་ཚུལ་འདི་ལ་འཇུག་པར་རིགས་སོ། །དེ་སྐད་
དུ་ཡང་མདོ་སྡེ་རྒྱན་གྱི་འགྲེལ་བཤད་ལས། སྒྲ་རིག་པ་བྱང་ཆུབ་སེམས་དཔའ་འཚོལ་བར་བྱེད་དེ། བདག་ཉིད་སཾ་སྒྲྀ་ཏའི་སྐད་ལ་མཁས་པའི་སྒོ་ནས་བདག་ལ་མཁས་པ་གཞན་དག་ཡིད་ཆེས་པར་བྱ་བ་དང༌། སྒྲའི་གཙུག་ལག་ཤེས་པར་རློམ་པའི་མུ་སྟེགས་པ་དག་ཚར་གཅད་པར་བྱ་བ་དང༌། དོན་གཅིག་

ལ་ངེས་པའི་ཚིག་མང་པོ་བསྟན་ཅིང་བཤད་པའི་ཆོས་ཀྱི་ཐ་སྙད་ལ་མཁས་པར་བྱ་བའི་ཕྱིར་ཚོལ་བར་བྱེད་དོ་ཞེས་བྱ་བའི་དོན་ཏོ་ཞེས་དང༌། གཞན་ཡང་མདོ་ལས་བྱང་ཆུབ་སེམས་དཔའ་ཅིའི་ཕྱིར་སྒྲ་ལ་སློབ་པར་བྱེད་ཅེ་ན། སྒྲའི་ཚིག་ཡོངས་སུ་དག་པར་བྱ་བ་དང༌། ཡོངས་སུ་མ་དག་པའི་
ཚིག་གི་དོན་གསལ་བར་སྟོན་ནུས་པ་དང༌། དོན་ཐམས་ཅད་ཤེས་ཤིང་ཁོང་དུ་ཆུད་པར་བྱ་བ་དང༌། ཡང་དག་པའི་ཚིག་མི་ཉམས་པས་ང་རྒྱལ་གྱིས་མི་ཤིགས་པ་དང༌། ངན་པར་ལྟ་བ་ལས་ལྡོག་ཅིང་སེམས་ཅན་འདུལ་བའི་ཐབས་དང་མཁས་པས་ཤེས་པར་བྱ་བའི་ཕྱིར། བྱང་ཆུབ་སེམས་དཔའ་སྒྲ་རིག་
པའི་བསྟན་བཅོས་ལ་སློབ་པར་བྱེད་དོ་ཞེས་དང༌། ཐོན་མི་ལོ་ཙཱས་ཀྱང༌། བསླབ་པ་ཀུན་གྱི་གཞི་འཛིན་ཅིང༌། །རིག་བྱེད་སྨྲ་བ་རྣམས་ཀྱི་རྒྱུ། །ཞེས་གསུངས་པ་ལྟར་སངས་རྒྱས་པའི་གྲུབ་མཐའ་བྱེ་བྲག་ཏུ་སྨྲ་བ་དང༌། མདོ་སྡེ་པ་དང༌། སེམས་ཙམ་པ་དང༌། དབུ་མ་པ་སྟེ་གྲུབ་པའི་མཐའ་སྨྲ་བ་བཞིའམ། ཉན་
ཐོས་དང་རང་སངས་རྒྱས་དང་བྱང་ཆུབ་སེམས་དཔའི་བསླབ་པར་བྱ་བ་ཐམས་ཅད་ཀྱི་གཞི་འཛིན་ཅིང༌། རིག་བྱེད་ནི་ཕྱི་རོལ་པའི་ལུགས་ཀྱི་ངེས་བརྗོད་ལ་སོགས་པ་བཞི་སྟེ། དེའང་ཇི་སྐད་དུ། སྙན་ཚིག་མཆོད་སྦྱིན་སྲིད་སྲུང་དང༌། །ངེས་བརྗོད་རིག་བྱེད་རིག་བྱེད་བཞི། །ཞེས་བྱ་བའི་རིག་བྱེད་སྨྲ་བ་རྣམས་ཀྱང་འདི་
ལ་མ་བརྟེན་པར་མི་འབྱུང་ཞིང༌། ཆོས་ཀྱི་དོན་རྟོགས་པར་བྱེད་པ་ལའང་ཐོག་མར་ཚིག་ལ་མཁས་པར་བྱ་དགོས་ཏེ། ས་སྐྱ་པཎྜི་ཏས་ཀྱང༌། ཚིག་ཀྱང་སྒྲིགས་ལེགས་མི་ཤེས་ན། །དོན་བཟང་སྨོས་ཀྱང་ཅི་ཞིག་དགོས། །ཞེས་དང༌། བརྡ་སྤྲོད་ཀྱི་གཞུང་འདི་ཁོ་ནར་མ་ཟད། རིག་པའི་གནས་ཐམས་ཅད་
ལ་འཇུག་པའི་སྒོ་གཅིག་པུ་ཡང་འདི་ཉིད་ཡིན་ཏེ། ཇི་སྐད་དུ། གང་ཞིག་ཤེས་ན་མཁས་པའི་གནས་ཐོབ་ཅིང༌། །མཐར་ཐུག་ཀུན་མཁྱེན་གོ་འཕང་བདེ་བླག་བགྲོད། །གཞུང་ལུགས་ཀུན་ལ་ཐོགས་མེད་འཇུག་པའི་སྒོ། །བརྡ་སྤྲོད་རིག་གནས་བསྟན་བཅོས་རྣམ་དབྱེ་བགྱི། །ཞེས་གསུངས་པ་ལ་སོགས་
པ་རྒྱ་ཆེར་འབྱུང་བ་ཡིན་ནོ། །གཉིས་པ་ནི། དགོས་པ་དེ་དང་ལྡན་པའི་བརྡ་སྤྲོད་རིག་པའི་གཞུང་འདིས་བརྗོད་པར་བྱ་བ་ཅི་ཞིག་ཡིན་སྙམ་ན། དཔལ་ལྡན་བློ་གྲོས་བརྟན་པས། རང་བཞིན་རྐྱེན་དང་རྣམ་འགྱུར་གསུམ། །བརྡ་སྤྲོད་གཞུང་གི་བརྗོད་བྱ་ཡིན། །ཞེས་པ་སྟེ། གཞུང་གི་བརྗོད་བྱ་མ་ལུས་པ་མདོར་

བསྡུ་ན། རང་བཞིན་དང་རྐྱེན་དང་རྣམ་འགྱུར་ཏེ་གསུམ་དུ་འདུ་ཞིང༌། རང་བཞིན་ལའང་དབྱེ་ན། བྱིངས་དང་མིང་གཉིས་ཏེ། དེ་སྐད་དུའང༌། རང་བཞིན་མིང་དང་བྱིངས་དེ་ལའང༌། །ཞེས་སོ། །བྱིངས་ལའང་ནང་གསེས་ཀྱི་སྒོ་ནས་དབྱེ་ན། མདོའི་བྱིངས་དང༌། རྐྱེན་གྱིས་བཅོས་པའི་བྱིངས་དང༌། གླེགས་
བམ་ལས་འབྱུང་བའི་བྱིངས་དང་གསུམ་དུ་འགྱུར་རོ། །རང་བཞིན་གཉིས་པ་ནི་མིང་ངམ་རྟགས་ཏེ། དེ་ཡང་བྱིངས་ཀྱི་ཡི་གེ་གང་ལ་ཀྲྀཏ་རྐྱེན་བྱིན་པས་བྱིངས་ཡིན་པའང་བོར། སན་ལ་སོགས་པ་མ་བྱིན་པས་རྐྱེན་གྱིས་བཅོས་པའི་བྱིངས་ཀྱང་མ་ཡིན་ལ། ཚིག་ཏུ་འགྲུབ་པར་བྱེད་པའི་རྣམ་དབྱེ་ཡང་
མ་བྱིན་པ་སྟེ། ལུང་སྟོན་པ་ཀ་ལཱ་པའི་མདོ་ལས། བྱིངས་དང་རྣམ་དབྱེ་བོར་བའི་དོན་དང་ལྡན་པ་ནི་རྟགས་སོ་ཞེས་འབྱུང་ངོ༌། །རྟགས་ལ་ཡང་དབྱངས་དང་གསལ་བྱེད་ཀྱི་མཐའ་ངེས་པ་ཅན་གྱི་སྒོ་ནས་དབྱེ་ན། སྐྱེས་པའི་རྟགས་དང་བུད་མེད་ཀྱི་རྟགས་དང་མ་ནིང་གི་རྟགས་གསུམ་སྟེ། དེ་དག་གི་རྣམ་པར་
དབྱེ་བ་རྒྱས་པར་སྟོན་པའི་བསྟན་བཅོས་ནི་མཁས་པ་འཆི་བ་མེད་པའི་སེང་གེས་མཛད་པའི་མིང་དང་རྟགས་རྗེས་སུ་བསྟན་པའི་མངོན་བརྗོད་ཀྱི་བསྟན་བཅོས་ཨ་མ་ར་ཀོ་ཥ་དང༌། དེའི་འགྲེལ་པ་འདོད་འཇོའི་བ་མོ་ལ་སོགས་པ་ལྟ་བུའོ། །གཞན་ཡང་དེའི་བྱེ་བྲག་ཏུ་གྱུར་པའི་ཉེ་བར་བསྒྱུར་བ་རྣམས་ཀྱང་རང་བཞིན་
གྱི་ཁོངས་སུ་བསྡུའོ། །རྐྱེན་ནི་རང་བཞིན་དེ་ཉིད་རྣམ་འགྱུར་གཞན་དུ་སྒྲུབ་པར་བྱེད་པ་སྒྲའི་ཡན་ལག་སྟེ། དེའི་དབྱེ་བ་བྱིངས་ལས་མིང་དུ་སྒྲུབ་པར་བྱེད་པ་བྱེད་ལྡན་གྱི་རྐྱེན་དང༌། མིང་ལས་མིང་གཞན་སྒྲུབ་པར་བྱེད་པ་དེ་ཕན་གྱི་རྐྱེན་ནོ། །དེ་ལའང་སྤྱི་དང་གྲངས་མེད་དང་དངོས་པའི་རྐྱེན་གསུམ་དུ་འགྱུར་རོ། །
བྱིངས་ལས་ཚིག་ཏུ་སྒྲུབ་ཅིང་རྣམ་པར་འབྱེད་པར་བྱེད་པ་ཏིང་ང་དང༌། མིང་ལས་ཚིག་ཏུ་སྒྲུབ་ཅིང་དོན་རྣམ་པར་འབྱེད་པ་སུཔྲ་དང༌། རང་བཞིན་དང་རྐྱེན་དག་གི་བར་དུ་གཞུག་པ་ཨ་ག་མ་དང༌། བྱིངས་གཞན་དུ་བསྒྱུར་བ་ཉེ་བར་བསྒྱུར་བ་རྣམས་སོ། །རྣམ་འགྱུར་ནི་དཔང་ལོ་ཆེན་པོས། རང་བཞིན་རྐྱེན་དང་འབྲེལ་
པ་དང༌། །ཡི་གེ་ཙམ་དང་འབྲེལ་པ་ཡི། །བསྒྱུར་དང་དབྱེ་བ་རྣམ་འགྱུར་ཏེ། །ཞེས་གསུངས་པ་ལྟར་སྒྲའི་ཡན་ལག་གི་ཡི་གེ་བསྒྱུར་དང་དབྱི་བ་དང༌།བར་རྐྱེན་སྟེར་བ་དང༌། ཚིག་གི་བསྡུ་བ་བྱ་བ་རྣམས་ཏེ། དེ་དག་ཏུ་སྒྲའི་བརྗོད་བྱ་ཐམས་ཅད་བསྡུས་པའོ། །ཡང་ན་མཚམས་སྦྱོར་དང་མིང་དང་ཀུན་བཤད་

དང་ཀྲྀཏ་དང་བཞིས་མདོའི་རྩ་བ་སྟོན་ལ། བྱིངས་དང་ཉེར་བསྒྱུར་དང་ཨུཎ་ལ་སོགས་པ་ཡན་ལག་སྟེ། དེ་དག་གིས་འཆད་པ་ཀ་ལཱ་པ་ལྟ་བུའོ། །ཡི་གེའི་ཚོགས་དང༌། མིང་གི་ཚོགས་དང༌། ཚིག་གི་ཚོགས་ཏེ་གསུམ་དུ་སྟོན་པ་སྨྲ་བའི་སྒོ་མཚོན་ཆ་ལྟ་བུའོ། །དེ་དག་དང་
རྗེས་སུ་འབྲེལ་པ་སྡེབ་སྦྱོར་གྱི་བསྟན་བཅོས་ནི། ཡི་གེ་ལྕི་ཡང་གི་བྱེ་བྲག་སྦྱོར་བའི་སྒོ་ནས་ཚིགས་སུ་བཅད་པའི་རིགས་རྣམས་རྒྱས་པར་སྟོན་པར་བྱེད་པ་སྟེ། ཚིགས་སུ་བཅད་པ་གང་ལའང་ལུང་ལས་འབྱུང་བའི་ཚིགས་སུ་བཅད་པ་དང༌། བསྟན་བཅོས་ལས་འབྱུང་བའི་ཚིགས་སུ་བཅད་པ་གཉིས་སོ། །
དང་པོ་ནི་མངོན་པ་ཀུན་ལས་བཏུས་པར། ཚིགས་སུ་བཅད་པ་རྐང་པ་གཉིས་པ་ནས་དྲུག་པའི་བར་དུ་ཡོད་པར་གསུངས་པ་དང༌། རྗེ་ངོར་ཆེན་ཐམས་ཅད་མཁྱེན་པས། ལུང་ལས་ཚིགས་བཅད་རྐང་པ་གཉིས་པ་ནས། །བརྩམས་ཏེ་དྲུག་པའི་བར་དུ་གསུངས་པས་ན། །དེ་དང་མཐུན་པའི་ཚིགས་སུ་
བཅད་པ་བགྲང༌། །ཞེས་གསུངས་ཏེ། དེའང་རྐང་པ་གཉིས་པ་ནི། བྲམ་ཟེ་ཆུ་ལ་ཇི་ཙམ་ཞིག །ཅེས་ཚིག་རྐང་པ་གཅིག་གིས་དྲིས་པ་ལ། མི་ཡི་བདག་པོ་པུས་ནུབ་ཙམ། །ཞེས་ཚིག་རྐང་གཅིག་གིས་ལན་བཏབ་པས་ཚིགས་སུ་བཅད་པ་རྫོགས་པ་ལྟ་བུ་སྟེ། དེས་མཚོན་ཏེ་ལུང་རྣམས་
ལས་མང་དུ་འབྱུང་བ་ལྟ་བུའོ། །གཉིས་པ་ནི་སྙན་དངགས་མེ་ལོང་དུ། ཚིགས་བཅད་རྐང་བཞི་དེ་ཡང་ནི། །བྲྀཏྟ་ཛཱ་ཏི་ཞེས་རྣམ་གཉིས། །དེ་ཡི་སྤྲོས་པ་མཐའ་དག་ནི། །སྡེབ་སྦྱོར་གཞུང་དུ་ངེས་པར་བསྟན། །རིགས་དེ་སྙན་དངགས་རྒྱ་མཚོ་ནི། །ཟབ་མོ་བརྒལ་འདོད་རྣམས་ཀྱི་གྲུ། །ཞེས་
འབྱུང་བ་བཞིན་དུ་སྡེབ་སྦྱོར་གྱི་བསྟན་བཅོས་རྣམས་ལས་ཚིགས་སུ་བཅད་པ་རེ་ལ་རྐང་པ་བཞི་བཞི་བསྒྲིགས་པའི་ཚིགས་སུ་བཅད་པ་བྱ་བ་ཡིན་ཏེ། དེ་ལའང་ཡི་གེ་བགྲང་བ་དང་ཕྱི་མོ་བགྲང་བའི་བྱེ་བྲག་གིས་བྲྀཏྟའི་སྡེབ་སྦྱོར་དང༌། ཛཱ་ཏིའི་སྡེབ་སྦྱོར་གཉིས་སུ་དབྱེའོ། །བྲྀཏྟའི་སྡེབ་སྦྱོར་ལ་
མཉམ་པ་དང༌། ཕྱེད་མཉམ་པ་དང༌། མི་མཉམ་པའི་བྲྀཏྟ་ཞེས་བྱ་བ་སྟེ་གསུམ་མོ། །ཛཱ་ཏིའི་སྡེབ་སྦྱོར་ལའང་འཕགས་མའི་ཛཱ་ཏི་དང༌། རོ་ལངས་ཅན་གྱི་ཛཱ་ཏི་དང༌། ཕྱི་མོ་མཉམ་པའི་ཛཱ་ཏི་སྟེ། དེ་དག་གི་དབྱེ་བ་སྟོན་པའི་བསྟན་བཅོས་ནི། མདོར་བསྡུས་ཚིགས་བཅད་གསལ་བ་དང༌། །མདོ་ཉིད་

དཔེར་བརྗོད་གྱུར་པ་དང༌། །མ་འདྲེས་རིམ་ཅན་འདོན་སླ་དང༌། །སྡོད་དང་ཚོགས་དང་ཡོན་ཏན་བརྒྱད། །ཅེས་པའི་ཡོན་ཏན་བརྒྱད་ཀྱིས་གཞན་ལས་ཁྱད་པར་དུ་གྱུར་པའི་རིན་ཆེན་འབྱུང་གནས་ལྟ་བུའོ། །སྙན་དངགས་ཀྱི་བསྟན་བཅོས་ནི། ལུས་བཤད་པ་དང༌། རྒྱན་བཤད་པ་དང༌། སྐྱོན་སེལ་བ་བཤད་པ་སྟེ་གསུམ་
གྱི་ལུས་ལ་ཚིགས་སུ་བཅད་པ་དང༌། ལྷུག་པ་དང༌། སྤེལ་མ་སྟེ་གསུམ་མོ། །རྒྱན་ལ་ཐུན་མོང་མ་ཡིན་པའི་རྒྱན་གྱི་འདོད་པ་རྣམ་པར་དབྱེ་བ་དང༌། ཐུན་མོང་བ་དོན་རྒྱན་སུམ་ཅུ་རྩ་ལྔ་དང༌། སྒྲ་རྒྱན་བྱ་སླ་བྱ་དཀའ་ལ་སོགས་པ་དང༌། གབ་ཚིག་གི་རྒྱན་དང༌། དེ་དག་གི་རྣམ་འགྱུར་རྣམས་སོ། །སྐྱོན་
སེལ་བ་ནི། དོན་ཉམས་དོན་འགལ་དོན་གཅིག་པ། །ཐེ་ཚོམ་ཅན་དང་རིམ་པ་ཉམས། །སྒྲ་དམན་གཅོད་མཚམས་ཉམས་པ་དང༌། །སྡེབ་སྦྱོར་ཉམས་དང་མཚམས་སྦྱོར་བྲལ། །ཡུལ་དུས་སྒྱུ་རྩལ་འཇིག་རྟེན་དང༌། །ལུང་རིགས་དག་དང་འགལ་བ་སྟེ། །སྐྱོན་བཅུ་དེ་དག་སྙན་དངགས་ལ། །སྙན་
དངགས་མཁན་གྱིས་རྣམ་པར་སྤང༌། །ཞེས་པའི་སྐྱོན་རྣམ་པ་བཅུ་སེལ་བ་ལ་སོགས་པ་སྔོན་གྱི་སྙན་དངགས་ཀྱི་གཞུང་རྣམས་ལས་ཕུལ་དུ་བྱུང་བ་སློབ་དཔོན་དབྱུག་པ་ཅན་གྱིས་མཛད་པའི་སྙན་དངགས་མེ་ལོང་ཞེས་བྱ་བའི་བསྟན་བཅོས་ལ་སོགས་པ་ལྟ་བུའོ། །མངོན་བརྗོད་ཀྱི་བསྟན་བཅོས་ནི། འདོད་
འཇོའི་བ་མོར། མཐོ་རིས་མཁའ་དང་ཕྱོགས་དུས་བློ། །སྒྲ་སོགས་གར་དང་བཅས་པ་དང༌། །ས་འོག་གདེངས་ཅན་དམྱལ་བ་ཆུ། །དེ་རྣམས་ཀྱི་ནི་ཚོགས་བཅས་བཤད། །ཅེས་དང༌། ས་ཡི་སྡེ་ཚན་གྲོང་ཁྱེར་དང༌། །རི་བོ་དང་ནི་ནགས་ཚལ་དང༌། །སྨན་དང་རི་དྭགས་ལ་སོགས་དང༌། །མི་དང་
བྲམ་ཟེ་རྒྱལ་རིགས་དང༌། །རྗེའུ་རིགས་དམངས་རིགས་ཡན་ལག་བཅས། །ཉེ་བའི་ཡན་ལག་བཅས་འདིར་བརྗོད། །ཅེས་པ་སྡེ་ཚན་དུ་བཅད་དེ། དེ་དག་གི་དོན་རེ་རེ་ལའང་མིང་གི་རྣམ་གྲངས་མང་པོ་འབྱུང་བ་སྟོན་པ། དཔེར་ན་འཆི་མེད་སེང་གེས། ཉི་མ་འོད་འགྱེད་བསྟན་བྱ་དང༌། །མི་སྦྱིན་སྐྱེས་
དང་བཅུ་གཉིས་བདག །ཉིན་བྱེད་འོད་བྱེད་སྣང་བྱེད་དང༌། །རབ་ཏུ་གསལ་བྱེད་རྣམ་གསལ་བྱེད། །འོད་ཟེར་མིག་གཟུགས་རྟ་བདུན་པ། །རྟ་ལྗང་དང་ནི་ཚ་ཟེར་ཅན། །རྣམ་འགྱུར་མཆོད་འོས་མ་ཟླུམས་དང༌། །ཆར་འབེབས་འོད་འགྲོ་གསོ་བྱེད་དང༌། །ནམ་མཁའི་ནོར་བུ་སྒྲོལ་བྱེད་

བཤེས། །སྣ་ཚོགས་འོད་ཟེར་འོད་སྣང་བྱེད། །འོད་ཀྱི་ནོར་ཅན་གཟའ་ཡི་བདག །འོད་ཟེར་བདག་པོ་སྣང་བྱེད་བདག །འོད་ཅན་འཇོམས་བྱེད་འོད་སྟོང་པ། །གདུང་བ་འོད་འབྱིན་འོད་ཟེར་གཟུང༌། །ཞེས་པ་ཉི་མ་གཅིག་པུའི་མིང་ལ་རྣམ་གྲངས་སུམ་ཅུ་རྩ་བདུན་འབྱུང་བ་
དང༌། མིང་གཅིག་ཉིད་དོན་མང་པོ་ལ་འཇུག་པ། དཔེར་ན་ཀླུ་སྒྲུབ་ཞབས་ཀྱིས། ངག་ཕྱོགས་ས་དང་འོད་ཟེར་དང༌། །ཕྱུགས་དང་མིག་དང་རྡོ་རྗེ་དང༌། །མཐོ་རིས་ཆུ་སྟེ་དོན་དགུ་ལ། །མཁས་པས་གོ་སྒྲ་ངེས་པར་བཟུང༌། །ཞེས་པ་གོའི་སྒྲ་ལྟ་བུའི་མིང་གཅིག་ཉིད་ལའང་དོན་དགུ་ལ་འཇུག་པར་སྟོན་པ་སྟེ།
དེ་དག་སྟོན་པའི་བསྟན་བཅོས་ཨ་མ་ར་ཀོ་ཥ་དང༌། དེའི་འགྲེལ་པ་འདོད་འཇོའི་བ་མོ་དང༌། མུ་ཏིག་ཕྲེང་བ་ལ་སོགས་པ་ལྟ་བུའོ། །ཟློས་གར་གྱི་བསྟན་བཅོས་ནི། སྔོན་བྱུང་གི་གཏམ་ལྟ་བུའི་གཟུགས་སུ་བྱས་ཏེ་སྐད་རིགས་སོ་སོའི་རྗོད་བྱེད་རྣམས་ཉེ་བར་དྲངས་པའི་གླུ་ཟློས་ཤིང་གར་བྱེད་པ་ལ། ལུས་ཀྱི་
རྣམ་འགྱུར་རྣམ་པ་སྣ་ཚོགས་པ་དང༌། དབྱངས་ཀྱི་བྱེ་བྲག་ཐ་དད་པ་རྣམས་དང༌། ལྷའི་རྗེས་སུ་སྐྱེས་པ་དང༌། དྲང་སྲོང་གི་རྗེས་སུ་སྐྱེས་པ་དང༌། བློ་གསལ་གྱི་རྗེས་སུ་སྐྱེས་པ་ལ་སོགས་པ་དང༌། འདྲེན་པ་དང༌། དཀྱུས་གཅིག་ཏུ་སྦྱར་བ་དང༌། དཀྱུས་གཉིས་པ་དང་ཕྱེད་ཕྱི་མ་ལ་སོགས་པའི་མཚན་
ཉིད་རྣམས་དང་ལྡན་ཞིང་རྗོད་བྱེད་ཀྱི་ཚིག་ཕལ་ཆེར་སཾ་སྐྲྀ་ཏའི་སྐད་དང༌། པྲ་ཀྲྀ་ཏའི་སྐད་དང༌། ཨ་བ་བྷྣཾ་ཤའི་སྐད་དང༌། པི་ཤཱ་ཙིའི་སྐད་ཀྱིས་གླུར་ཚིགས་སུ་བཅད་པ་དང༌། ལྷུག་པ་དང༌། སྤེལ་མ་རྣམས་རོལ་མོ་དང་བསྡེབས་ནས་བསྒྱུར་བ་སྟེ། དེ་ཡང་ལྷ་དང༌། ཀླུ་དང༌། དྲི་ཟ་དང༌། ལྷ་མ་ཡིན་དང༌།
ནམ་མཁའ་ལྡིང་དང༌། གནོད་སྦྱིན་དང༌། མི་དང་མི་མ་ཡིན་པ་རྣམས་ཀྱི་གར་དང་སྐད་རིགས་སོ་སོའི་གླུའི་ཁྱད་པར་རྣམ་པ་བདུན་ཏེ། ཇི་སྐད་དུ། རྩེད་མོ་རློམ་པར་བླང་བ་ནི། །ལྔ་པ་དང་ནི་བར་མའི་དབྱངས། །དཔའ་བོ་དྲག་པོ་ངོ་མཚར་དུ། །དྲུག་སྐྱེས་ཁྱུ་མཆོག་དེ་བཞིན་ནོ། །ས་འཛིན་པ་དང་འཁོར་
ཉན་དབྱངས། །སྙིང་རྗེའི་རོ་ལ་བླང་བར་བྱ། །འཐབ་མོ་འཇིགས་དང་བཅས་པ་ལ། །བློ་གསལ་དབྱངས་ནི་བླང་བར་བྱ། །ཞེས་པ་ལྟར་སྟོན་པའི་གཞུང་ནི། བྷ་ར་ཏ་དང༌། རྒྱལ་པོ་སྤྲིན་གྱི་བཞོན་པས་ཀླུའི་སྲོག་བསྐྱབས་པའི་སྐྱེས་རབས་ཀླུ་ཀུན་དུ་དགའ་བའི་ཟློས་གར་དགའ་བའི་ལྷས་མཛད་པ་དང༌།

གཙུག་གི་ནོར་བུའི་བར་བཏང་ནས་བྲམ་ཟེའི་དབུལ་བ་བསལ་བའི་ཕྱིར་རང་ཉིད་ཚོང་དུ་བཅུག་སྟེ་དགྲ་ལ་སྟེར་དུ་བཅུག་པས་ཐམས་ཅད་བཏུལ་བའི་སྐྱེས་རབས་འཇིག་རྟེན་ཀུན་དུ་དགའ་བའི་ཟློས་གར་ཙནྡྲ་གོ་མིས་མཛད་པ་ལྟ་བུའོ། །སྐར་རྩིས་ཀྱི་རིག་པ་ནི། ཕྱི་ནང་གཞན་གསུམ་སྟོན་པ་དཔལ་ལྡན་
དུས་ཀྱི་འཁོར་ལོའི་རྒྱུད་ལས་བཤད་པའི་ཕྱི་དུས་ཀྱི་འཁོར་ལོའི་རྩིས་ཀྱི་རིག་པ་སྟེ། ཨངྒིའི་གྲངས་ཀྱི་རི་མོ་འདྲི་བ་དང༌། དབྲི་བ་དང་བསྣན་པ་དང་བསྒྱུར་བ་དང་བགོད་པ་སྟེ་ཡི་གེའི་ཡན་ལག་ལྔ་དང༌། གཟའ་དང༌། ཚེས་དང༌། སྐར་མ་དང༌། སྦྱོར་བ་དང༌། བྱེད་པ་སྟེ་རྩིས་ཀྱི་ཡན་ལག་ལྔ་དང༌། གཟའ་ལྔ་
དང༌། ཁྱིམ་དང༌། ལོངས་སྤྱོད་དང༌། སྒྲ་གཅན་དང༌། དུས་མེ་དང༌། ཉི་ཟླ་འཛིན་པའི་རྩིས་དང༌། ཉི་ལྡོག་ལ་སོགས་པ་དང༌། དུས་སྦྱོར་དང༌། ཞག་གསུམ་གྱི་རྣམ་པར་དབྱེ་བ་དང༌། དེ་དག་གི་དགེ་དང་མི་དགེའི་འབྲས་བུ་བརྟག་པ་ལ་སོགས་པ་སྟེ། དེ་དག་སྟོན་པར་བྱེད་པའི་བསྟན་བཅོས་ནི་ཕྱི་དུས་ཀྱི་
འཁོར་ལོའི་རྒྱུད་ཀྱི་འགྲེལ་པ་རྣམས་ལས་འབྱུང་བ་ལྟ་བུ་དང༌། འཕགས་པ་སྤྱན་རས་གཟིགས་དབང་ཕྱུག་བཅོམ་ལྡན་འདས་ཐལ་བའི་དབང་པོའི་སྐུར་བཞེངས་ནས། ལྷ་མོ་ཨུ་མ་དང་ཞུ་བ་དང་ལན་གྱི་ཚུལ་དུ་ཕྱི་རོལ་པའི་ལུགས་སུ་གསུངས་པའི་དཔལ་གཡུལ་ལས་རྣམ་པར་རྒྱལ་བ་ཞེས་བྱ་བའི་རྒྱུད་
ཀྱི་རྒྱལ་པོ་དབྱངས་འཆར་བ་ལྟ་བུའོ། །གཞན་ཡང་བརྩི་བར་བྱ་བ་དུས་ཀྱི་ཚད་བརྩི་བ་དང༌། གཟུགས་ཅན་གྱི་ཚད་འཇལ་བ་གཉིས་ལས། དང་པོ་ནི་སེམས་ཀྱི་རྣམ་པར་རྟོག་པའི་སྐད་ཅིག་མ་གཅིག་ལ་དུས་མཐའི་སྐད་ཅིག་མའོ། །དེ་བརྒྱ་ཉི་ཤུ་ལ་བྱ་རྫོགས་ཀྱི་སྐད་ཅིག་མའོ། །དེ་དྲུག་ཅུ་ལ་
ཐང་གཅིག་གོ། །དེ་སུམ་ཅུ་ལ་ཡུད་ཙམ་མོ། །དེ་སུམ་ཅུ་ལ་ཉིན་ཞག་གོ །དེ་སུམ་ཅུ་ལ་ཟླ་བའོ། །ཟླ་བ་གཉིས་ལ་དུས་གཅིག་གོ །དེ་གསུམ་མམ་ཟླ་བ་དྲུག་ལ་བགྲོད་པ་གཅིག་གོ །བགྲོད་པ་གཉིས་སམ་ཟླ་བ་བཅུ་གཉིས་ལ་ལོ་སྟེ། མཛོད་ལས། སྐད་ཅིག་མ་བརྒྱ་ཉི་ཤུ་ལ། །དེ་ཡི་
སྐད་ཅིག་དེ་དག་ཀྱང༌། །དྲུག་ཅུ་ལ་ནི་ཐང་གཅིག་གོ། །ཡུད་ཙམ་ཉིན་ཞག་ཟླ་བ་རྣམས། །གོང་ནས་གོང་དུ་སུམ་ཅུར་འགྱུར། །ཞག་གི་ཐུན་དང་བཅས་པ་ཡི། །ཟླ་བ་བཅུ་གཉིས་ལ་ནི་ལོ། །ཞེས་སོ། །གཉིས་པ་ནི་རྫས་ཀྱི་རྡུལ་ཕྲ་རབ་བདུན་ལ་རྡུལ་ཕྲན་གཅིག་གོ། །དེ་བདུན་ལ་ལྕགས་

རྡུལ་ལོ། །དེ་བཞིན་དུ་བདུན་འགྱུར་གྱིས་བསྒྲེ་བའི་ཆུ་རྡུལ་དང༌། རི་བོང་གི་རྡུལ་དང༌། ལུག་རྡུལ་དང༌། གླང་རྡུལ་དང༌། ཉི་ཟེར་རྡུལ་དང༌། སྲོ་མ་དང༌། ཤིག་དང༌། ནས་དང༌། སོར་མོ་དང༌། སོར་མོ་བརྒྱ་ཉི་ཤུ་རྩ་བཞི་ལ་ནི་ཁྲུ་གང་ངོ༌། །ཁྲུ་བཞི་ལ་ནི་གཞུ་འདོམ་གང་ངོ༌། །
དེ་ལྔ་བརྒྱ་ལ་ནི་རྒྱང་གྲགས་གཅིག་གམ་དགོན་པའོ། །དེ་བརྒྱད་ལ་དཔག་ཚད་གཅིག་གོ། །དེས་འཇིག་རྟེན་གྱི་ཁམས་ཀྱི་ཚད་ཐམས་ཅད་འཇལ་བར་བྱེད་དེ། མཛོད་ལས། ཕྲ་རབ་རྡུལ་དང་ནི། རྡུལ་ཕྲན་དང་ནི་དེ་བཞིན་དུ། །ལྕགས་ཆུ་རི་བོང་ལུག་དང་གླང༌། །ཉི་ཟེར་རྡུལ་དང་སྲོ་མ་དང༌། །དེ་ལས་
བྱུང་དང་དེ་བཞིན་དུ། །སོར་ཚིགས་ཞེས་བྱ་གོང་བདུན་བསྒྱུར། །སོར་མོ་ཉི་ཤུ་བཞི་ལ་ཁྲུ། །ཁྲུ་བཞི་ལ་ནི་གཞུ་གང་ངོ༌། །དེ་དག་ལྔ་བརྒྱ་རྣམས་ལ་ནི། །རྒྱང་གྲགས་དེ་ལ་དགོན་པར་འདོད། །དེ་བརྒྱད་དཔག་ཚད་ཅེས་བྱའོ། །ཞེས་སོ། །ཡང་ན་རྒྱ་དཔངས་ཀྱི་ཚད་འཇལ་བར་བྱེད་པ་ལ་སོར་མོ་དང་
ལྕི་ཚད་འཇལ་བར་བྱེད་པ་ལ་སྲང་དང༌། བོངས་ཚད་འཇལ་བ་ལ་བྲེ་ཉིད་ཡིན་ཏེ། འཆི་མེད་མཛོད་ལས། འཇལ་བྱེད་སྲང་དང་སོར་དང་བྲེ། །མ་རུ་ལྔ་སོགས་མ་ཤ་ཀ །དེ་དག་དྲུག་ཅུ་ཞོ་ཡིན་ཏེ། །ཞོ་བཞི་ལ་ནི་སྲང་གང་ངོ༌། །ཞེས་གསུངས་པ་ལྟ་བུའོ། །རྩི་བྱེད་གྲངས་ཀྱི་གནས་གཞན་
ནི་མཛོད་ཀྱི་རང་འགྲེལ་ལ་སོགས་པ་ནས་འབྱུང་བ་ཚིགས་སུ་བཅད་པར་བསྡེབས་པ་རྐྱང་པ་དང་ཁུག་པ་གཉིས་ཀྱི་དང་པོ་ནི། གཅིག་བཅུ་བརྒྱ་སྟོང་ཁྲི་འབུམ་དང༌། །ས་ཡ་བྱེ་བ་དུང་ཕྱུར་རྣམས། །རྐྱང་བའི་གྲངས་སུ་ཤེས་པར་བྱ། །ཞེས་པ་ལྟར་རོ། །གཉིས་པ་ཁུག་པ་ནི་གནས་འདི་ལ་
ཡང་ནང་གསེས་སུ་དབྱེ་ན་གསུམ་དུ་འགྱུར་ཏེ། ཐེར་འབུམ་ཁྲག་ཁྲིག་རབ་བཀྲམ་དང༌། །གཏམ་དཀྲིགས་མི་འཁྲུགས་ཁྱད་འབྱིན་དང༌། །སྤང་རྟེན་དེད་འདྲེན་ཞེས་བྱ་བ་འདི་ཡན་ཆད་ཀྱི་གནས་དགུ་ལ། ཐེར་འབུམ་བཅུ་ལ་ཐེར་འབུམ་ཆེན་པོ་ལ་སོགས་པ་སྦྱར་བའི་བཅོ་བརྒྱད་ལ་ནི་ཁུག་པ་
དང་པོ་ཞེས་བྱའོ། །དེའི་རྗེས་སུ་མཐའ་སྣང་དང༌། རྒྱུ་རིགས་འོད་མཛེས་དབང་པོ་དང༌། །ལེགས་འབྱིན་རྟོགས་འགྲོ་འབྱིན་རྡུལ་དང༌། །བརྒྱ་རྟགས་སྟོབས་འཁོར་ཞེས་བྱ་བ། །འདི་ཡན་ཆད་ཀྱི་གནས་དགུ་ལ་སྔ་མ་བཞིན་དུ་ཆེན་པོ་དང་བཅས་པའི་བཅོ་བརྒྱད་ལ་ཁུག་པ་གཉིས་པ་ཞེས་བྱའོ། །

དེའི་རྗེས་སུ་བརྡ་ཤེས་དང༌། རྣམ་བྱུང་སྟོབས་མིག་ཅེས་བྱ་བ་འདི་ཡན་ཆད་ཀྱི་གནས་གསུམ་པོ་ལ་ཆེན་པོ་དང་བཅས་པའི་དྲུག་འབྱུང་བ་ལ་ཁུག་པ་གསུམ་པ་ཞེས་བྱའོ། །དེ་ལྟར་ན་ཁུག་པ་གཉིས་པ་ཡན་ཆད་ལ་ཆེན་པོ་དང་བཅས་པའི་གནས་སོ་དྲུག་དང༌། ཐ་མའི་དྲུག་དང་བཅས་པའི་ཞེ་གཉིས་དང༌། རྐྱང་པའི་
གནས་དགུ་དང་བཅས་པའི་ལྔ་བཅུ་རྩ་གཅིག་གོ། །དེ་ལ་གནས་དྲུག་ཅུའི་དབང་དུ་བགྱིས་ན་གནས་བརྒྱད་ཐ་མ་དང་བཅས་པ་མ་ཚང་བར། བྱམས་པ་སྙིང་རྗེ་དགའ་བ་དང༌། བཏང་སྙོམས་རྣམས་ཞེས་པ་ཆེན་པོ་དང་བཅས་པའི་བརྒྱད་ཁུག་པ་གསུམ་པར་བསྟན་པས་གྲངས་ཀྱི་གནས་བཅུ་བཞི་སྟེ་ཐམས་
ཅད་བསྡོམས་པའི་ལྔ་བཅུ་རྩ་དགུ་ནི་གྲངས་ཀྱི་མིང་དུ་བཏགས་ལ། དྲུག་ཅུ་པ་ནི་དེ་ལྟ་བུའི་མིང་ལས་འདས་པས་གྲངས་མེད་པ་ཞེས་བྱའོ། །ཡང་ན་གོང་གི་སྟོབས་མིག་ཅེས་པའི་རྗེས་སུ་ཉལ་ཉུལ་དང༌། ཝལ་ཝོལ་ཁྱད་ཁྱུད་ཕྱད་ཕྱིན་རྣམས། །ཆེན་པོར་བཅས་ཏེ་བགྲང་བར་བྱ། །གྲངས་མེད་པ་ནི་ཐ་
མ་ཡིན། །ཞེས་བྱ་བའང་བཤད་དོ། །བཞི་པ་ལོག་པར་རྟོག་པ་ཚར་གཅོད་པར་བྱེད་པའི་རིག་པའི་གནས་གཉིས་པ་དོན་གྱི་འགལ་འབྲེལ་གཅོད་པར་བྱེད་པའི་རིག་གནས་བཞི་པ་རྒྱུ་རིག་པའམ་རྟོག་གེ་རིག་པའམ་གཏན་ཚིགས་རིག་པ་ལ་འདུག་པའི་དགོས་པ་དང༌། དེ་སྟོན་པའི་བསྟན་
བཅོས་ཀྱི་རང་བཞིན་བསྟན་པའོ། །དང་པོ་ནི་རྣམ་པ་ཐམས་ཅད་མཁྱེན་པའི་གོ་འཕང་དོན་དུ་གཉེར་བའི་བྱང་ཆུབ་སེམས་དཔའ་རྣམས་ཀྱིས་གནས་སྐབས་སུ་རིགས་པ་དང་མི་རིགས་པར་སྨྲ་བ་ཐམས་ཅད་ཀྱི་དབྱེ་བ་རྣམ་པར་ཕྱེད་ཅིང༌། མུ་སྟེགས་པའི་འདོད་པ་སྙིང་པོས་དབེན་པ་ལ་ཡང་དག་པ་
ཉིད་དུ་མངོན་པར་ཞེན་ཅིང་འཇུག་པ་རྣམས་ཚར་གཅོད་པའི་ཕྱིར་དང༌། མུ་སྟེགས་ཅན་ལ་སོགས་པ་རྒྱུ་རིག་པ་ཤེས་པར་རློམ་པ་རྣམས་ཚར་གཅད་པ་དང༌། བསྟན་པ་ལ་མི་དད་པ་རྣམས་དད་པར་བྱ་བ་དང༌། དད་པ་རྣམས་ཀྱི་དད་པའི་དབང་པོ་ཕྱིར་ཞིང་འཕེལ་བར་བྱ་བ་དང༌། དེ་བཞིན་གཤེགས་པའི་
ཆོས་རྣམས་ཀྱི་མཚན་ཉིད་གཞན་དུ་མཆི་ན་དེ་དག་གི་འགལ་འབྲེལ་རྣམ་པར་དཔྱོད་པ་དང༌། མཐར་ཐུག་སྟོན་པ་ཚད་མར་གྱུར་པའི་གོ་འཕང་གི་རྒྱུར་འགྱུར་བ་དང༌། དེ་ཉིད་མངོན་དུ་བྱས་ནས་ཀྱང་ཚད་མར་གྱུར་པའི་ཆོས་ཀྱི་སྣང་བ་ཆེན་པོས་གདུལ་བྱར་གྱུར་པ་རྣམས་ཀྱི་མ་རྟོགས་པ་དང་ལོག་པར་

རྟོགས་པ་དང༌། ཐེ་ཚོམ་གྱི་དྲྭ་བ་མ་ལུས་པ་གཅོད་པར་བྱེད་པ་ལ་གཞན་དྲིང་མི་འཇོག་པར་འགྱུར་བའི་དགོས་པ་དམ་པས་ཡིད་ཉེ་བར་དྲངས་ཏེ་ཚུལ་འདི་ལ་འཇུག་པར་རིགས་སོ། །དེ་ལྟར་ཡང་རྒྱན་གྱི་འགྲེལ་བཤད་ལས། རྒྱུ་རིག་པ་བྱང་ཆུབ་སེམས་དཔའ་ཚོལ་
བར་བྱེད་དེ། འདི་ལྟར་ལེགས་པར་སྨྲས་པ་དང་ཉེས་པར་སྨྲས་པ་རྣམས་ཀྱི་དོན་ཕྱིན་ཅི་མ་ལོག་པར་ཤེས་པར་བྱ་བ་དང༌། རྒྱུ་རིག་པའི་གཙུག་ལག་ཤེས་པར་རློམ་པའི་མུ་སྟེགས་པ་དག་ཚར་གཅད་པ་དང༌། བསྟན་པ་འདི་ལ་མ་དད་པ་རྣམས་དད་པར་སྐྱེད་པ་དང༌། དད་པ་སྐྱེད་པ་རྣམས་ཀྱི་དད་པ་
ཕྱིར་ཞིང་འཕེལ་བར་བྱ་བའི་ཕྱིར་བརྩོན་པར་བྱེད་དོ་ཞེས་དང༌། ཐབས་ལ་མཁས་པ་སངས་རྒྱས་ཀྱི་དྲིན་ལན་བསབས་པ་ཞེས་བྱ་བ་ཐེག་པ་ཆེན་པོའི་མདོ་ལས་ཀྱང༌། སེམས་ཅན་དད་པའི་སེམས་བསྐྱེད་པར་བྱ་བའི་ཕྱིར་རྒྱུ་རིག་པའི་བསྟན་བཅོས་སློབ་པར་བྱེད་དོ་ཞེས་དང༌། ཚད་མ་ཀུན་
ལས་བཏུས་པ་ལས། ཚད་མ་དང་གཞལ་བྱ་ཉེ་བར་བརྗོད་པ་ཉིད་ཀྱིས་མུ་སྟེགས་པའི་འདོད་པ་སྙིང་པོས་དབེན་པའི་ཕྱིར། དེར་ཞེན་པ་རྣམས་ལྡོག་པའི་དོན་དུ་འདི་བརྩམས་པ་ཡིན་གྱིས། འདི་ཙམ་གྱིས་དེ་བཞིན་གཤེགས་པའི་བསྟན་པ་ལ་གཞུག་པའི་དོན་དུ་ནི་མ་ཡིན་ཏེ། དེའི་ཆོས་ནི་རྟོག་
གེའི་ཡུལ་མ་ཡིན་པའི་ཕྱིར་རོ། །ལྡོག་པ་ལ་ནི་སྟོན་པའི་ཆོས་ཉིད་ཐོས་ནས་འབད་པ་མེད་པར་རྟོགས་པར་འགྱུར་ཏེ་བར་དུ་མ་བསྐལ་པའི་ཕྱིར་རོ་ཞེས་བྱ་བ་དང༌། ཡང་དེ་ཉིད་ལས། གང་ཞིག་རྟོག་གེའི་ལམ་ནས་ཆོས་ཉིད་ལ་ཁྲིད་ན། །ཐུབ་པའི་ཆོས་ལས་ཆེས་བསྲིངས་ཉམས་པར་བྱས་པ་ཡིན། །དེ་
ལྟ་ན་ཡང་དེ་བཞིན་གཤེགས་པའི་ཆོས་ཀྱི་མཚན་ཉིན་གཞན་དུ་འགྲོ་ན་དཔྱད་པར་རིགས་ཞེས་དང༌། ཆོས་མངོན་པའི་མདོ་ལས། དགེ་སློང་དག་གམ་མཁས་རྣམས་ཀྱིས། །བསྲེགས་བཅད་བརྡར་བའི་གསེར་བཞིན་དུ། །ལེགས་པར་བརྟགས་ལ་ང་ཡི་བཀའ། །བླང་བར་བྱ་ཡིས་གུས་
ཕྱིར་མིན། །ཞེས་བྱ་བ་ལ་སོགས་པ་རྒྱ་ཆེར་གསུངས་པའི་ཕྱིར་རོ། །གཉིས་པ་ནི་སྟོན་པ་རྫོགས་པའི་སངས་རྒྱས་ཀྱིས་ལེགས་པར་གསུངས་པའི་བཀའ་གང་ལས་བརྩམས་ཏེ་རིགས་པར་སྨྲ་བའི་དབང་ཕྱུག་ཆེན་པོ་རྣམས་ཀྱིས་ལེགས་པར་བཀྲལ་བའི་བསྟན་བཅོས་ལ་མངོན་སུམ་དང༌། རང་དོན་རྗེས་

དཔག །གཞན་དོན་རྗེས་དཔག །གཞན་སེལ་དཔེ་དང༌། ལྟག་ཆོད་བརྟག་པ་སྟེ་དྲུག་ཏུ་བསྡུས་ནས་སྟོན་པ་ཚད་མའི་མདོ་ལྟ་བུའམ། དེའི་དགོངས་འགྲེལ་རབ་ཏུ་བྱེད་པ་སྡེ་བདུན་ལྟ་བུའམ། བརྟག་པ་སྡེ་བདུན་ནམ། གྲུབ་པ་སྡེ་བརྒྱད་དམ། རྗེས་འབྲེལ་བདུན་ལ་སོགས་པའོ། །དེ་ལ་རབ་ཏུ་
བྱེད་པ་སྡེ་བདུན་ནི། གཙོ་བོ་ལུས་ལྟ་བུའི་བསྟན་བཅོས་གསུམ་དང༌། གྱེས་པ་ཡན་ལག་དང་འདྲ་བའི་བསྟན་བཅོས་བཞིའོ། །དང་པོ་ལ་གང་ཟག་དབང་པོ་རྣོ་འབྲིང་རྟུལ་གསུམ་གྱིས་ཡང་དག་པའི་ཤེས་པ་བདེ་བླག་ཏུ་རྟོགས་པར་བྱེད་པའི་ཐབས་སྟོན་པའི་བསྟན་བཅོས་ནི་རིམ་པ་བཞིན་དུ་རིགས་
པའི་ཐིགས་པའི་རབ་ཏུ་བྱེད་པ་དང༌། ཚད་མ་རྣམ་པར་ངེས་པ་དང༌། རྒྱས་པའི་བསྟན་བཅོས་ཚད་མ་རྣམ་འགྲེལ་ཏེ་གསུམ་མོ། །དེའི་དང་པོ་ནི་དབང་པོ་རབ་མགོ་སྨོས་པ་ཙམ་གྱིས་དོན་རྟོགས་པའི་དབང་དུ་བྱས་ནས་རང་ལུགས་སྙིང་པོ་ཙམ་མ་གཏོགས་གཞན་སུན་འབྱིན་ལ་སོགས་པ་མེད་པའི་
རིགས་པའི་ཐིགས་པའི་རབ་ཏུ་བྱེད་པ་ལེའུ་གསུམ་པའི་བདག་ཉིད་ཅན་ཏེ། དེའང་ལེའུ་དང་པོ་མངོན་གྱུར་རྟོགས་པར་བྱེད་པའི་ཐབས་ཏེ། དེ་ལའང་དབང་པོའི་ཤེས་པའམ་མངོན་སུམ་དང༌། དེ་བཞིན་དུ་ཡིད་ཀྱི་ཤེས་པ་དང༌། རང་རིག་པ་དང༌། རྣལ་འབྱོར་པའི་ཤེས་པའམ་མངོན་སུམ་སྟེ་
བཞིའི་སྒོ་ནས་གཏན་ལ་འབེབས་ཤིང༌། དེའི་ཡུལ་ནི་རང་གི་མཚན་ཉིད་དེ། ཇི་སྐད་དུ། ཡང་དག་པའི་ཤེས་པ་ནི་སྐྱེས་བུའི་དོན་ཐམས་ཅད་འགྲུབ་པའི་སྔོན་དུ་འགྲོ་བ་ཅན་ཡིན་པས་དེ་བསྟན་ཏོ། །ཡང་དག་པའི་ཤེས་པ་ནི་རྣམ་པ་གཉིས་ཏེ་ཞེས་སོགས་མངོན་སུམ་གྱི་ལེའུ་དང༌། ལེའུ་
གཉིས་པ་ལྐོག་གྱུར་གྱི་འཇལ་བྱེད་སྒྲུབ་བྱེད་དང་དངོས་སྟོབས་རྗེས་དཔག་གི་རྟེན། འབྲས་བུའི་དང་རང་བཞིན་དང་མ་དམིགས་པའི་གཏན་ཚིགས་གསུམ་སྟེ། ཇི་སྐད་དུ། དེ་ལ་རང་གི་དོན་གྱི་རྗེས་སུ་དཔག་པར་བྱ་བ་ལ་ཚུལ་གསུམ་པའི་རྟགས་ལས་ཤེས་པ་གང་ཡིན་པའོ་ཞེས་སོགས་རང་གི་དོན་གྱི་
རྗེས་སུ་དཔག་པའི་ལེའུ་དང༌། ལེའུ་གསུམ་པ་གཞན་རྗེས་སུ་འཛིན་པའི་ཡན་ལག་ལ་གཞན་གྱི་དོན་གྱི་རྗེས་སུ་དཔག་པའི་རྟགས་བརྗོད་པ་སྟེ། རྒྱུ་ལ་འབྲས་བུ་བཏགས་པའི་ཕྱིར་རོ་ཞེས་སོགས་གཞན་དོན་རྗེས་སུ་དཔག་པའི་ལེའུ་རྣམས་སོ། །འབྲིང་རྣམ་པར་ངེས་པ་ལ་ཡང་ལེའུ་གསུམ་གྱི་

བདག་ཉིད་ཅན་ཏེ། དེ་ཡང་ལེའུ་དང་པོས་དབང་མངོན་ཡིད་མངོན་རང་རིག་མངོན་སུམ་རྣལ་འབྱོར་མངོན་སུམ་རྣམས་སྟོན་པ་མངོན་སུམ་ལེའུ། གཉིས་པ་རང་དོན་ལེའུ། གསུམ་པ་གཞན་དོན་ལེའུ་རྣམས་སོ། །རྒྱས་པ་ཚད་མ་རྣམ་འགྲེལ་ལེའུ་བཞིའི་བདག་ཉིད།
ལེའུ་དང་པོ་རང་གི་གཞལ་བྱ་རྟོགས་པར་བྱེད་པའི་ཐབས་ཀྱི་ནང་ནས་ལྐོག་གྱུར་རྟོགས་བྱེད་ཀྱི་རྟགས་ཡང་དག་གསུམ་གྱི་སྒོ་ནས་རྟགས་ཀྱི་མཚན་ཉིད་དང༌། དེའི་ལྡོག་པ་གཏན་ཚིགས་ལྟར་སྣང་དང་བཅས་པའི་དོན་གཏན་ལ་འབེབས་པར་བྱེད་པ་ལ། ཕྱོགས་ཆོས་དེ་ཆེས་ཁྱབ་པ་ཡི། །གཏན་ཚིགས་
དེ་ནི་རྣམ་གསུམ་ཉིད། །ཅེས་སོགས་རང་དོན་གྱི་ལེའུ། ལེའུ་གཉིས་པ་སྟོན་པ་ཚད་མར་གྱུར་པ་གང་ལས་གཤེགས་པའི་ལམ་རྒྱས་པར་སྟོན་པར་བྱེད་པ་ལ། ཚད་མ་བསླུ་མེད་ཅན་ཤེས་པ། །དོན་བྱེད་ནུས་པར་གནས་པ་ནི། །ཞེས་སོགས་ཚད་མ་གྲུབ་པའི་ལེའུ་དང༌། ལེའུ་གསུམ་པ་མངོན་
གྱུར་རྟོགས་པར་བྱེད་པའི་ཐབས་མངོན་སུམ་བཞི་གཏན་ལ་འབེབས་པར་བྱེད་པ་ལ། གཞལ་བྱ་གཉིས་ཕྱིར་ཚད་མ་གཉིས། །དོན་བྱེད་ནུས་དང་མི་ནུས་ཕྱིར། །ཞེས་བྱ་བ་ལ་སོགས་པས་མངོན་སུམ་གྱི་ལེའུ་དང༌། ལེའུ་བཞི་པ་གཞན་རྗེས་སུ་འཛིན་པའི་ཡན་ལག་ལ། གཞན་དོན་རྗེས་སུ་
དཔག་པའི་མཚན་ཉིད་དང༌། དེའི་དབྱེ་བ་དང༌། དེ་ལ་ལོག་པར་རྟོགས་པ་སྤང་བའི་ཚུལ། །བྱེ་བྲག་ཏུ་སོ་སོའི་སྒོ་ནས་རྒྱས་པར་སྟོན་པ། །གཞན་ལ་བསྟན་པར་བྱ་ཉིད་ཕྱིར། །བདག་མཐོང་མིན་ཡང་གཞན་དག་གི། །ཞེས་སོགས་གཞན་དོན་ལེའུ་རྣམས་ཏེ་གསུམ་མོ། །གཉིས་པ་གྱེས་པ་ཡན་
ལག་ལྟ་བུའི་བསྟན་བཅོས་བཞི་ནི། མངོན་སུམ་ལེའུ་ལས་འཕྲོས་པ་ནི་མེད་ལ། རང་དོན་རྗེས་དཔག་ལས་འཕྲོས་ནས་ཕྱོགས་ཆོས་ཁྱབ་པ་སྤྱིར་གཏན་ལ་འབེབས་པ་གཏན་ཚིགས་ཐིགས་པ་དང༌། རྟོགས་དཀའ་བ་ཁྱབ་པའམ་ལྟག་ཆོད་ཀྱི་འབྲེལ་པ་གཏན་ལ་འབེབས་པས་འབྲེལ་པ་བརྟག་པ་སྟེ་
གཉིས་སོ། །གཞན་དོན་ལེའུ་ལས་འཕྲོས་ནས་དག་ལས་གཞན་བློ་རྟོགས་པ་ཐ་སྙད་དུ་སེམས་ཙམ་ལའང་མི་འགལ་བར་སྟོན་པ་རྒྱུད་གཞན་གྲུབ་པ་དང༌། རྒོལ་ཕྱིར་རྒོལ་རྩོད་པ་དང༌། རྒྱལ་འཕམ་ཚར་བཅད་ཀྱི་གནས་སྟོན་པ་རྩོད་པའི་རིག་པའི་བསྟན་བཅོས་དང་གཉིས་ཏེ་བསྡོམས་པས་སྡེ་བདུན་

རྩ་འགྲེལ་དང་བཅས་པ་ལྟ་བུའོ། །དེ་དག་ལ་སོགས་པའི་རྟོག་གེའི་བསྟན་བཅོས་རྣམས་བོད་དག་མངོན་པའི་སྡེ་སྣོད་དུ་སྨྲ་བ་ནི་མི་འཐད་དེ། རྟོག་གེ་ནི་གཏན་ཚིགས་རིག་པའི་བསྟན་བཅོས་ཡིན་ལ། མངོན་པ་ནི་ནང་རིག་པའི་བསྟན་བཅོས་ཡིན་པའི་ཕྱིར་རོ། །ཅིའི་ཕྱིར་ན། དེ་དག་ལུང་
ལ་མི་བརྟེན་པར་བཤད་པའི་ཕྱིར་ཏེ། མགོན་པོ་བྱམས་པས། རྟོག་གེ་བརྟན་ཅིང་མ་ངེས་ལ། །མ་ཁྱབ་ཀུན་རྫོབ་སྐྱོ་བ་ཅན། །བྱིས་པ་ལ་ནི་བརྟེན་པར་འདོད། །ཅེས་གསུངས་ཤིང༌། མངོན་པ་ནི་ཆོས་ཐམས་ཅད་ཀྱི་མ་མོ་ཡིན་པའི་ཕྱིར་དེ་ལས་ལྡོག་པའི་ཁྱད་པར་མང་དུ་ཡོད་པའི་ཕྱིར་རོ། །
ལྔ་པ་རིག་པའི་གནས་ཐམས་ཅད་ཀྱི་གཙོ་བོའམ་ཕུལ་དུ་བྱུང་བ་ནི་འཕགས་པའི་ལམ་ཕྱིན་ཅི་མ་ལོག་པར་སྟོན་པར་བྱེད་པ་རིག་པའི་གནས་ལྔ་པ་ཀུན་ཤེས་པར་བྱེད་པ་རྒྱལ་བའི་བསྟན་པ་རིན་པོ་ཆེ་ནང་སྟོང་པའི་བསྟན་བཅོས་ལ། ནང་དོན་རིག་པ་ལ་འཇུག་པའི་དགོས་པ་དང༌། དེ་སྟོན་པའི་བསྟན་
བཅོས་ཀྱི་རང་བཞིན་བསྟན་པའོ། །དང་པོ་ནི་རྣམ་པ་ཐམས་ཅད་མཁྱེན་པའི་གོ་འཕང་དོན་དུ་གཉེར་བའི་བྱང་ཆུབ་སེམས་དཔའ་རྣམས་ཀྱིས་གནས་སྐབས་སུ་བདག་ཉིད་ཐེག་པ་གསུམ་དུ་གཏོགས་པའི་འཕགས་པའི་ལམ་ཐམས་ཅད་དང༌། དེ་དག་གི་དེ་ཁོ་ན་ཉིད་ཕྱིན་ཅི་མ་ལོག་པར་ཁོང་དུ་ཆུད་པར་བྱས་ནས་
ཐར་པ་དང་ཐམས་ཅད་མཁྱེན་པའི་གེགས་སུ་གྱུར་པའི་སྤང་བྱ་མ་ལུས་པ་སྤོང་བའི་གཉེན་པོ་ལ་ཤིན་ཏུ་མཁས་པར་བྱ་བ་དང༌། གཞན་དག་ལའང་རྒྱ་ཆེར་ཡང་དག་པར་རབ་ཏུ་སྟོན་པ་ལ་ཤིན་ཏུ་མཁས་པར་བྱ་བ་དང༌། མཐར་ཐུག་སྒྲིབ་གཉིས་བག་ཆགས་དང་བཅས་པ་ལས་ཤིན་ཏུ་འདས་པའི་ཆོས་ཀྱི་
རྒྱལ་པོ་ཆེན་པོའི་གོ་འཕང་རིན་པོ་ཆེ་མངོན་དུ་བྱ་བ་དང༌། གང་མངོན་དུ་གྱུར་ནས་ཀྱང་ཐེག་པ་གསུམ་གྱི་རིགས་སུ་གཏོགས་པའི་གདུལ་བྱ་རྣམས་སོ་སོའི་ཁམས་དང་བསམ་པ་དང་བག་ལ་ཉལ་དང་རྗེས་སུ་འཚམ་པའི་ཆོས་ཀྱི་འཁོར་ལོ་བསྐོར་བ་ལ་དབང་བརྙེས་པ་དམ་པའི་ཕ་རོལ་དུ་སོན་པར་བྱ་བའི་དགོས་
པ་བླ་ན་མེད་པས་ཡིད་ཡོངས་སུ་དྲངས་ནས་ཚུལ་འདི་དག་ལ་འཇུག་པར་རིགས་སོ། །དེ་ལྟར་ཡང་རྒྱན་གྱི་འགྲེལ་བཤད་ལས། ནང་རིག་པ་བྱང་ཆུབ་སེམས་དཔའ་འཚོལ་བར་བྱེད་དོ། །ཅིའི་ཕྱིར་ཞེ་ན། བདག་ཉིད་ཀྱིས་འབགས་པའི་ལམ་དང༌། དེ་ཁོ་ན་ཉིད་ཕྱིན་ཅི་མ་ལོག་པར་ཤེས་པས་ཉོན་

མོངས་པ་སྤང་བར་བྱ་བ་དང༌། བྱས་པ་ཆུད་ཟོས་པ་དང༌། མ་བྱས་པ་འོང་བ་མེད་པ་ཕྱིན་ཅི་མ་ལོག་པ་ཤེས་པར་བྱ་བ་དང༌། གཞན་ལའང་མངོན་པར་རྒྱ་ཆེར་བསྟན་པའི་ཕྱིར་ཚོལ་བར་བྱེད་དོ་ཞེས་དང༌། མདོ་ལས། སྡུག་བསྔལ་དག་ནི་ཐམས་ཅད་དང༌། །སྒྲིབ་པ་ཀུན་སེལ་དམ་པའི་
ཆོས། །ཞེས་བྱ་བ་ལ་སོགས་པ་རྒྱ་ཆེར་འབྱུང་ངོ༌། །གཉིས་པ་དེ་སྟོན་པའི་བསྟན་བཅོས་ཀྱི་རང་བཞིན་བསྟན་པ་ལ་མཚན་ཉིད་ཐེག་པའི་དགོངས་པ་འགྲེལ་པའི་བསྟན་བཅོས་དང༌། སྔགས་ཀྱི་ཐེག་པའི་དགོངས་པ་འགྲེལ་པའི་བསྟན་བཅོས་སོ། །དང་པོ་ལའང་བཀའ་དང་པོ་བདེན་པ་བཞིའི་ཆོས་ཀྱི་འཁོར་ལོའི་དགོངས་
པ་འགྲེལ་པའི་བསྟན་བཅོས་དང༌། བར་པ་མཚན་ཉིད་མེད་པའི་ཆོས་ཀྱི་འཁོར་ལོའི་དགོངས་པ་འགྲེལ་པའི་བསྟན་བཅོས་དང༌། ཐ་མ་ལེགས་པར་རྣམ་པར་ཕྱེ་བའི་ཆོས་ཀྱི་འཁོར་ལོའི་དགོངས་པ་འགྲེལ་པའི་བསྟན་བཅོས་ཏེ་གསུམ་མོ། །དང་པོ་ལ་ལྟ་བའི་ཆ་གསལ་བར་བྱེད་པའི་བསྟན་བཅོས་དང༌།
སྤྱོད་པའི་ཆ་གསལ་བར་བྱེད་པའི་བསྟན་བཅོས་གཉིས་ལས། དང་པོ་ལྟ་བའི་ཆ་གསལ་བར་བྱེད་པ་ནི་ཉན་ཐོས་པའི་ཐུན་མོང་མ་ཡིན་པའི་འདུལ་བ་མངོན་པ་སྡེ་བདུན་ཏེ། དེ་ཡང་ཇི་སྐད་དུ། ཆོས་ཀྱི་ཕུང་པོ་ཤཱ་རིའི་བུས། །གདགས་པའི་བསྟན་བཅོས་མཽང་གལ་བུས། །ཁམས་ཀྱི་ཚོགས་ནི་གང་པོས་
བྱས། །རྣམ་ཤེས་ཚོགས་ནི་ལྷ་སྐྱིད་ཀྱིས། །ཡེ་ཤེས་ལ་འཇུག་ཀ་ཏྱའི་ངུས། །རབ་ཏུ་བྱེད་པ་དབྱིག་བཤེས་ཀྱིས། །ཡང་དག་འགྲོ་བའི་རྣམ་གྲངས་ནི། །གསུས་པོ་ཆེ་ཡིས་བྱས་ཞེས་གྲགས། །ཞེས་པ་ལྟར་བདུན་ཏེ། འདི་དག་ནི་བྱེ་བྲག་ཏུ་སྨྲ་བ་རྣམས་ནི་བཀའ་ཡིན་པར་འདོད་དེ། རྒྱུ་མཚན་གང་གི་ཕྱིར་ན། བཅོམ་
ལྡན་འདས་ཀྱིས་ཡུལ་ཐ་དད་པ་དང༌། དུས་ཐ་དད་པ་དང༌། གང་ཟག་ཐ་དད་པ་དག་ཏུ་རང་དང་སྤྱིའི་མཚན་ཉིད་ཀྱི་ཆོས་འཐོར་བུའི་ཚུལ་དུ་གསུངས་པ་རྣམས་དགྲ་བཅོམ་པ་བདུན་གྱིས་བསྡུས་པ་ཡིན་ནོ། །གལ་ཏེ་དེ་ལྟར་མ་ཡིན་ན་བཀའ་ལ་སྡེ་སྣོད་གསུམ་མ་ཚང་བར་འགྱུར་བའི་སྐྱོན་ཡོད་དོ་ཞེས་ཟེར་རོ། །མདོ་སྡེ་པ་ཡན་
ཆད་ནི། བཅོམ་ལྡན་འདས་ཀྱི་བཀའ་གང་ལ་ནི་མངོན་པའི་སྡེ་སྣོད་མ་ཚང་བའི་སྐྱོན་ཡོད་པ་མ་ཡིན་ཏེ། ཅིའི་ཕྱིར་ཞེ་ན། མདོ་སྡེ་དང་འདུལ་བ་གཉིས་ཀའི་སྤྱི་ཁྱབ་ཏུ་བསྟན་པའམ་གསེབ་ཚགས་རྣམས་ནས་བསྟན་པའི་ཕྱིར་རོ། །དེས་ན་འདི་དག་ནི་བསྟན་བཅོས་ཡིན་ནོ་ཞེས་གསུང་ངོ༌། །བདུན་པོ་དེ་

དག་གི་དགོངས་པ་འགྲེལ་པར་བྱེད་པ་ནི་བྱང་ཕྱོགས་རི་བོ་འབིགས་བྱེད་གར་མཁན་གྱི་གཙུག་ལག་ཁང་ག་ལ་བ་དེར་འཕགས་པ་ཉེར་སྦས་ཀྱི་སློབ་མ་ཟླ་བ་ནོར་བུ་ཞེས་བྱ་བ་ལ་སོགས་པའི་དགྲ་བཅོམ་པའི་དགེ་འདུན་ལྔ་བརྒྱས་བསྟན་བཅོས་བྱེ་བྲག་ཏུ་བཤད་པའི་མཚོ་ཆེན་པོ་ཞེས་བྱ་བ་གཞུང་གི་ཚད་
ཤླཽ་ཀ་འབུམ་ཕྲག་གཅིག་ཡོད་པ་ཞིག་མཛད་དོ། །ཕྱིས་སློབ་དཔོན་དེ་རྣམས་ལས་རིམ་པར་བརྒྱུད་དེ། སློབ་དཔོན་དབྱིག་གཉེན་གྱིས་གསན་ནས། བསྟན་བཅོས་དེ་ཐམས་ཅད་ཀྱི་བརྗོད་པར་བྱ་བའི་སྙིང་པོ་མ་ལུས་པ་བསྡུས་ནས། ཐེག་པ་དམན་པའི་ལུགས་སུ། ཆོས་མངོན་པ་མཛོད་ཀྱི་ཚིག་
ལེའུར་བྱས་པ་ཞེས་བྱ་བ་གནས་བརྒྱད་དང་ལྡན་པའི་བདག་ཉིད་ཅན་གྱི་བསྟན་བཅོས་ཆེན་པོ་འདི་མཛད་དོ། །དེའང་འདིའི་བརྗོད་བྱའི་གནས་དང་པོས་ནི་ཤེས་པར་བྱ་བའི་གནས་ཐམས་ཅད་ཟག་པ་དང་བཅས་པ་དང༌། ཟག་པ་མེད་པའི་ཆོས་ཀྱི་ཚོགས་གཉིས་སུ་བསྡུས་ཏེ་མདོར་བསྟན་ནས། ཡན་
ལག་རྒྱས་པར་བཤད་པ་འདུས་བྱས་ཀྱི་རྣམ་པར་གཞག་པ་དང༌། ཕུང་པོ་དང་ཁམས་དང་སྐྱེ་མཆེད་རྣམས་ཀྱི་རྣམ་པར་གཞག་པ་སྤྱིར་བསྟན་ནས། ཆོས་ཐམས་ཅད་དེ་གསུམ་གྱིས་ཇི་ལྟར་བསྡུས་པའི་ཚུལ་དང༌། ཁམས་ཀྱི་རྣམ་པའི་རབ་ཏུ་དབྱེ་བ་རྒྱས་པར་སྟོན་པ་ཁམས་བསྟན་པའི་མཛོད་དོ། །གནས་
གཉིས་པས་ནི་དབང་པོ་རྣམས་ཀྱི་རང་བཞིན་དང༌། འདུས་བྱས་ཀྱི་ཆོས་རྣམས་ཀྱི་སྐྱེ་བའི་ཚུལ་དང༌། རྒྱུ་རྐྱེན་འབྲས་བུ་དང་བཅས་པ་སྟོན་པ་དབང་པོ་བསྟན་པའི་མཛོད་དོ། །གནས་གསུམ་པ་འབྲས་བུ་སྡུག་བསྔལ་གྱི་བདེན་པའི་སྣོད་ཀྱི་འཇིག་རྟེན་དང༌། བཅུད་ཀྱི་སེམས་ཅན་དང༌། འགྲོ་
བའི་དབྱེ་བ་དང༌། སྐྱེ་བའི་ཚུལ་གྱི་རྟེན་འབྲེལ་དང༌། སྐྱེས་པ་གནས་པའི་རྐྱེན་དང༌། གནས་པ་འཆི་འཕོ་བའི་སེམས་དང༌། སེམས་ཅན་གྱི་ཚོགས་གསུམ་དུ་བསྡུ་བ་རྣམས་ཀྱི་སྒོ་ནས་བརྟེན་པ་སེམས་ཅན་གྱི་འཇིག་རྟེན་དང༌། རྟེན་སྣོད་ཀྱི་འཇིག་རྟེན་དང༌། དེ་དག་གི་ཚད་དང་འཇལ་བྱེད་ལ་སོགས་
པ་སྟོན་པ་འཇིག་རྟེན་བསྟན་པའི་མཛོད་དོ། །གནས་བཞི་པས་ནི་འཇིག་རྟེན་སྣ་ཚོགས་སུ་སྐྱེ་བའི་རྒྱུ་ཀུན་ནས་འབྱུང་བའི་བདེན་པ་གཏན་ལ་དབབ་པ་ལ་སོགས་པ་སྟོན་པ་ལས་བསྟན་པའི་མཛོད་དོ། །གནས་ལྔ་པ་ཀུན་ནས་འབྱུང་བའི་ལས་ཀྱི་འབྲས་བུ་འབྱིན་པར་བྱེད་པ་ནི་ཕྲ་རྒྱས་ལ་རག་ལས་སོ་

ཞེས་ཤེས་པའི་ཆེད་དུ་དེ་དག་སྟོན་པ་ཕྲ་རྒྱས་བསྟན་པའི་མཛོད་དོ། །གནས་དྲུག་པས་ནི་ཀུན་ནས་འབྱུང་བའི་ལས་དང་ཉོན་མོངས་པ་དེ་དག་གི་རྒྱུན་འགོག་པར་བྱེད་པའི་གཉེན་པོ་ཉིད་ནི་ལམ་དང་གང་ཟག་ལ་རག་ལས་སོ་ཞེས་ཤེས་པའི་ཆེད་དུ་རྣམ་པར་
གྲོལ་བའི་ལམ་དང་གང་ཟག་བསྟན་པའི་མཛོད་དོ། །གནས་བདུན་པས་ནི་མཐོང་བ་དང་སྒོམ་པས་སྤང་བར་བྱ་བ་སྤངས་པའི་འབྲས་བུ་ཤེས་པ་རྣམ་པ་བཅུ་ཤེས་པ་དང་ལྡན་པ་དང༌། འཐོབ་པ་དང༌། སངས་རྒྱས་ཀྱི་ཐུན་མོང་མ་ཡིན་པའི་ཡོན་ཏན་བརྗོད་པ་ཡེ་ཤེས་བསྟན་པའི་མཛོད་དོ། །
གནས་བརྒྱད་པས་ནི། འཇིག་རྟེན་པ་དང་ཐུན་མོང་བའི་ཡོན་ཏན་བསམ་གཏན་དང༌། གཟུགས་མེད་ཀྱི་ཏིང་ངེ་འཛིན་གྱི་དབྱེ་བ་བསྟན་པ་སྙོམས་པར་འཇུག་པ་བསྟན་པའི་མཛོད་དེ། འདི་ལ་སློབ་དཔོན་རང་ཉིད་ཀྱིས་མཛད་པའི་རང་འབྲེལ་དང་བཅས་པ་ལྟ་བུའོ། །གཉིས་པ་སྤྱོད་པའི་ཆ་
གསལ་བར་བྱེད་པ་ནི། འདི་ལྟར། རབ་བྱུང་གསོ་སྦྱོང་གཞི་དང་ནི། །དགག་དབྱེ་དབྱར་དང་ཀོ་པགས་དང༌། །སྨན་དང་གོས་དང་སྲ་བརྐྱང་དང༌། །ཀོ་ཤམྦྷི་དང་ལས་ཀྱི་གཞི། །དམར་སེར་ཅན་དང་གང་ཟག་དང༌། །སྤོ་དང་གསོ་སྦྱོང་བཞག་པ་དང༌། །གནས་མལ་དང་ནི་རྩོད་པ་དང༌། །
དགེ་འདུན་དབྱེན་རྣམས་བསྡུས་པ་ཡིན། །ཞེས་ལུང་བར་སྡོམ་ལས་འབྱུང་བའི་གཞི་བཅུ་བདུན་གྱི་གོ་རིམ་སྨོས་པ་དག་དང་ཅུང་ཟད་མི་འདྲ་བའི་ཁྱད་པར་མིན་པ་གཞན་ལུང་གཞི་ནས་བྱུང་བའི་དོན་རྣམས་ནི་གཞུང་གི་ཚུལ་དུ་བཤད། ལུང་རྣམ་པར་འབྱེད་པ་ལས་བྱུང་བ་རྣམས་ནི་
འགྲེལ་པའི་ཚུལ་དུ་མཛད། ལུང་ཕྲན་ཚེགས་ནས་བྱུང་བ་རྣམས་ནི་ཁ་སྐོང་བའི་ཚུལ་དུ་བཤད། ཞུ་བའི་སྐབས་སུ་ལུང་བླ་མ་ནས་བྱུང་བ་རྣམས་དོགས་གཅོད་ཀྱི་ཚུལ་དུ་བཤད་དེ། མདོར་ན་ལུང་སྡེ་བཞིའི་བརྗོད་བྱའི་སྙིང་པོ་མཐའ་དག་ཚང་ལ་མ་ནོར་བར་སྟོན་པ་སྟེ། གཞུང་འདི་ཉིད་ཀྱི་གཤམ་
དུ་ཡང་འདུལ་བའི་མདོ་ཞེས་བྱ་བ་ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་པ། འདུལ་བ་རྒྱ་མཚོའི་སྙིང་པོ་མདོར་བསྡུས་པ་ལྷག་པའི་ཚུལ་ཁྲིམས་ཀྱི་བསླབ་པ་མཐའ་དག་གི་མཛོད་དུ་གྱུར་པ། འདུལ་བའི་སྡེ་སྣོད་ཐམས་ཅད་ཀྱི་མ་ལྟ་བུ་ཞེས་མངོན་པར་བསྔགས་པའི་གཞུང་འདི་ལ་

ལེའུའི་ཐ་སྙད་མ་མཛད་ཅིང༌། བཀའ་ལུང་གི་འཁྲུགས་པ་གོ་རིམས་སུ་བསྡེབས་ནས་འཆད་པར་བྱེད་པ་འདུལ་བ་མདོ་རྩ་ཞེས་བྱ་བ་གཞུང་ཚིག་ལྷུག་བམ་པོ་དགུ་ཤླཽ་ཀ་ཉིས་སྟོང་དང་བདུན་བརྒྱ་པ་སྟེ། གཞུང་འདིས་བསྟན་པར་བྱ་བ་ཉིད་ནི་གཞི་བཅུ་བདུན་ཉིད་དོ། །དེའང་དང་པོ་རབ་བྱུང་
གི་གཞིས་ནི། སྔར་སྡོམ་པ་མ་ཐོབ་པ་ཐོབ་པར་བྱེད་པ་འབོག་པའི་ཆོ་ག་ལ་སྔོན་གྱི་ཆོ་ག་ཞེས་པ་རབ་ཏུ་བྱུང་བ་དང་བསྙེན་པར་རྫོགས་པ་ཅིག་ཅར་དུ་སྒྲུབ་པའི་ཐབས་དང༌། ད་ལྟར་གྱི་ཆོ་ག་ཞེས་པ་གསོལ་བ་དང་གཞིའི་ལས་ཀྱིས་རིམ་ཅན་དུ་སྒྲུབ་པའི་ཐབས་དང༌། འབུལ་བའི་ཆོ་ག་དང༌།
ཐོབ་པ་མི་ཉམས་པར་སྲུང་བའི་ཐབས་སུ་དགེ་སློང་ཕ་མའི་བསླབ་པར་བྱ་བ་ལ་སློབ་པ་ལ་སོགས་པ་རབ་བྱུང་གི་གཞི་ཀུན་ལ་ཉེ་བར་མཁོ་བ་རྣམས་སྟོན་ཏོ། །གཉིས་པ་གསོ་སྦྱོང་གི་གཞིས་ནི། གསོ་སྦྱོང་བཅུ་བཞི་པ་དང༌། བཅོ་ལྔ་པ་དང༌། གནོད་པ་ཞི་བའི་གསོ་སྦྱོང་དང༌། མཐུན་པའི་གསོ་
སྦྱོང་དང༌། བཀྲ་ཤིས་པའི་གསོ་སྦྱོང་དང༌། ཞི་གནས་ཀྱི་གསོ་སྦྱོང་དང་བཅས་པའི་དབྱེ་བསྡུ་ལ་སོགས་པ་བསྟན་ཏོ། །གསུམ་པ་དབྱར་གནས་པའི་གཞིས་ནི། དབྱར་གནས་པའི་གཞི་དང༌། དགོས་པ་དང༌། གང་ཟག་དང༌། དུས་དང༌། གནས་དང༌། ཡུན་དང༌། བསམ་པ་དང༌། ཆོ་ག་དང༌།
ཁས་ལེན་ཇི་ལྟར་བྱ་བ་རྣམས་སྟོན་ཏོ། །བཞི་པ་དགག་དབྱེའི་གཞིས་ནི། ཡུལ་དང༌། གང་ཟག་དང༌། བྱེད་པ་པོ་དང༌། དངོས་པོ་དང༌། དུས་དང༌། བསམ་པ་དང༌། ཆོ་ག་དང༌། དགོས་ཆེད་ལ་སོགས་པ་སྟོན་ཏོ། །ལྔ་པ་སྲ་བརྐྱང་གི་གཞིས་ནི། སྲ་བརྐྱང་འདིང་བ་དང༌། བརྐྱང་བའི་ཚུལ་དང༌།
དབྱུང་བའི་ཆོ་ག་ལ་སོགས་པ་སྟོན་ཏོ། །དྲུག་པ་གོས་ཀྱི་གཞིས་ནི། གོས་ཇི་ལྟར་སྒྲུབ་པ་དང༌། གོས་ཀྱི་རྒྱུ་དང༌། རྒྱུ་དེ་ལས་གྲུབ་པའི་གོས་ཀྱི་རྣམ་པར་གཞག་པ་ལ་སོགས་པས་སྟོན་ཏོ། །བདུན་པ་ཀོ་པགས་ཀྱི་གཞིས་ནི། ཡུལ་དབུས་དང༌། མཐའ་འཁོབ་ཀྱི་མཚམས་སུ་བཅང་བའི་
ཚུལ་ལ་སོགས་པ་སྟོན་ཏོ། །བརྒྱད་པ་སྨན་གྱི་གཞིས་ནི། སྨན་རྣམ་པ་བཞིར་དབྱེ་བ་དང༌། མཚན་གཞི་དང༌། མཚན་ཉིད་དང༌། དགོས་པ་དང༌། སྒྲ་དོན་དང༌། བརྟེན་པའི་ཚུལ་ལ་སོགས་པས་སྨན་ཇི་ལྟར་སྒྲུབ་པ་དང༌། སྨན་གྱི་སྣོད་དང༌། བསྟེན་པའི་གང་ཟག་དང༌། གཞག་པའི་

གནས་དང༌། རུང་བའི་ཁང་པ་དང༌། སྨན་ལ་འཇུག་པའི་ཚུལ་ལ་སོགས་པ་སྟོན་ཏོ། །དགུ་པ་ལས་ཀྱི་གཞིས་ནི། ལས་དངོས་དང༌། གང་ཟག་དང་འབྲེལ་པའི་ལས་ཞར་བྱུང་དང་བཅས་པ་རྒྱས་པར་སྟོན་ཏོ། །བཅུ་པ་ཕྱིར་བཅོས་ཀྱི་གཞིས་ནི། མི་མོས་པ་
ནན་ཏུར་གྱིས་ཕྱིར་བཅོས་སུ་འཇུག་པ་ནན་ཏུར་དང༌། ཕྱིར་བཅོས་ཀྱི་རྣམ་པར་གཞག་པ་དང་བཅས་པ་སྟོན་ཏོ། །བཅུ་གཅིག་པ་དུས་དང་དུས་མ་ཡིན་པ་བསྡུས་པ་འབྱུང་བའི་གཞིས་ནི། འཆབ་པའི་གཞི་དང༌། བསམ་པ་དང༌། སྦྱོར་བ་དང༌། མཐར་ཐུག་གི་ཡན་ལག་རྣམས་སྟོན་ཏོ། །བཅུ་གཉིས་
པས་གཞན་ན་གནས་པ་སྤྱོད་པའི་གཞིས་ནི། དེའི་དབྱེ་བསྡུ་དང༌། གྲལ་དང༌། བསླབ་བྱ་དང༌། སྒྲ་དོན་ལ་སོགས་པ་བསྟན་ཏོ། །བཅུ་གསུམ་པ་ཡོངས་སུ་སྦྱོང་བའི་གཞིས་ནི། ཡུལ་དང༌། གླེང་བ་དང༌། གང་ཟག་དང༌། བསམ་པ་དང༌། དངོས་པོ་དང༌། དུས་དང༌། ཆོ་ག་དང༌། དགོས་ཆེད་དང༌།
ཇི་ལྟར་སྒྲུབ་པ་རྣམས་ཀྱིས་བཤད་དོ། །བཅུ་བཞི་པ་ལས་བྱེ་བའི་གཞིས་ནི། གཞི་དང༌། བསམ་པ་དང༌། སྦྱོར་བ་དང༌། མཐར་ཐུག་པ་རྣམས་ཀྱིས་ཞི་བར་བྱ་བ་དང༌། དགེ་འདུན་བྱེ་བའི་རྒྱུ་སྤོང་བ་དང་གཉེན་པོ་བསྟེན་པ་དག་གིས་བྱེ་བ་ཞི་བར་བྱེད་པའི་ཆོ་ག་རྣམས་སྟོན་ཏོ། །བཅོ་ལྔ་པ་འཁོར་ལོ་བྱེ་བའི་
གཞིས་ནི། གཞི་དང༌། བསམ་པ་དང༌། སྦྱོར་བ་དང༌། མཐར་ཐུག་པ་དང༌། ཉེས་དམིགས་ལ་སོགས་པས་བྱེ་བ་ཞི་བར་བྱ་བ་དང་ཞི་བར་བྱེད་པའི་ཐབས་རྣམས་སྟོན་ཏོ། །བཅུ་དྲུག་པ་རྩོད་པའི་གཞིས་ནི། འཁྲུག་ལོང་གི་རྒྱུའི་དབྱེ་བ་ཞི་བར་བྱ་བ་དང་ཞི་བར་བྱེད་པ་དག་སྟོན་ཏོ། །བཅུ་བདུན་པ་
གནས་མལ་གྱི་གཞིས་ནི། སོ་སོར་ཐར་པའི་སྡོམ་པས་མཆོག་ཏུ་གྱུར་པ་ལ་ཕྱག་བྱ་བ་དང་མི་བྱ་བའི་ཚུལ་དང་གཙུག་ལག་ཁང་བརྩིགས་པའི་ཐབས་ལ་སོགས་པ་དང༌། གཙུག་ལག་ཁང་བསྐྱང་བའི་ཆོ་ག་དང༌། ལོངས་སྤྱོད་ཀྱི་རྣམ་པ་ཇི་ལྟར་བྱ་བ་རྣམས་དང་བཅས་པ་སྟོན་པའི་གཞུང་དེ་ལྟ་
བུའམ། འདུལ་བ་ལུང་རྣམ་པར་འབྱེད་པ་གཞིར་བྱས་ནས་གཞན་ཇི་ལྟར་རིགས་པར་སྦྱར་ནས་འཆད་པ་མེ་ཏོག་ཕྲེང་རྒྱུད་དམ་སུམ་བརྒྱ་པ་ལ་སོགས་ལྟ་བུའོ། །གཉིས་པ་བཀའ་བར་པ་མཚན་ཉིད་མེད་པའི་ཆོས་ཀྱི་འཁོར་ལོའི་དགོངས་པ་འགྲེལ་བའི་བསྟན་བཅོས་ལ། ལྟ་བའི་ཆ་

གསལ་བར་བྱེད་པའི་བསྟན་བཅོས་དང༌། སྤྱོད་པའི་ཆ་གསལ་བར་བྱེད་པའི་བསྟན་བཅོས་ཏེ་གཉིས་སོ། །དང་པོ་ལྟ་བའི་ཆ་གསལ་བར་བྱེད་པ་ནི། ཤིང་རྟའི་སྲོལ་འབྱེད་ཆེན་པོ་བཞིའམ་གཉིས་རྗེས་འབྲང་དང་བཅས་པ་སྟེ། དེའང་རྒྱུ་ཕ་རོལ་ཏུ་ཕྱིན་པའི་མདོའི་ཕྱོགས་ཀྱི་ལམ་གྱི་གཙོ་བོ་
ཉིད་ནི་ཕ་རོལ་ཏུ་ཕྱིན་པ་དྲུག་སྟེ། དེའི་ནང་ནས་མཐར་ཐུག་པར་གྱུར་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། མགོན་པོ་མི་ཕམ་པས། བློ་ལྡན་རྒྱལ་བའི་ཡུམ་འདི་ལ་མོས་པ། །སངས་རྒྱས་ཡོན་ཏན་ཚོགས་ཀྱི་སྣོད་གྱུར་ཏེ། །ཞེས་དང༌། སྡུད་པའི་འགྲེལ་པ་ལས། སྤྱིར་ཤེས་རབ་ཀྱི་ཕ་རོལ་དུ་ཕྱིན་
པའི་མདོ་དངོས་ཀྱིས་ནི་ཐེག་པ་གསུམ་ཆར་གྱི་ལམ་བསྟན་པ་ཡིན་ཏེ། འདི་ལྟར་ཉན་ཐོས་ཀྱི་ས་ལ་སླ