Luận tạng Tây Tạng (Tengyur) — Tập 213

ོབ་པར་འདོད་པས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབ་པར་བྱའོ་ཞེས་བྱ་བ་ལ་སོགས་པ་རྒྱས་པར་གསུངས་ཤིང༌། མཐར་དེ་ཅིའི་ཕྱིར་ཞེ་ན། ཤེས་རབ་ཀྱི་ཕ་རོལ་ཏུ་ཕྱིན་པ་འདི་
ལས་ཐེག་པ་གསུམ་པོ་རྒྱ་ཆེར་བསྟན་ཏོ་ཞེས་གསུངས་པས་སོ། །དེ་དག་དང་མཐུན་པར་མངོན་པར་རྟོགས་པར་རྒྱན་གྱི་མཆོད་པར་བརྗོད་པའི་སྐབས་ནས་ཀྱང༌། ཡུམ་གྱི་གླེང་གཞི་དང་མཐུན་པར་ཐེག་པ་གསུམ་ཆར་གྱི་ལམ་བསྟན་པའི་དབང་དུ་བཞེད་ནས། མཁྱེན་གསུམ་གྱི་ཡོན་ཏན་
ལ་བསྔགས་པའི་མཆོད་པར་བརྗོད་པ་འབྱུང་བ་ཡིན་ཞིང༌། ལུས་ཀྱི་སྐབས་སུ་ནི་ཐེག་པ་ཆེན་པོའི་ལམ་ཁོ་ན་བསྟན་པ་ཡིན་ཏེ། གཞན་གྱིས་མྱོང་བ་མ་ཡིན་ཏེ་ཞེས་དང༌། མངོན་པར་རྟོགས་པ་བརྒྱད་དམ་ཡང་ན་ཡུལ་གསུམ་གཅིག་ཏུ་བྱས་པའི་དྲུག་གི་ལམ་རིམ་ནི་ཐེག་པ་གཞན་ཡོད་པ་མ་
ཡིན་པའི་ཕྱིར་རོ། །རྟོགས་རིགས་ཀྱི་དབང་དུ་བྱས་ན། ལུས་ཀྱི་སྐབས་སུ་ཡང་ཐེག་པ་གསུམ་ཆར་གྱི་ལམ་བསྟན་པས་མངོན་པ་མཐའ་དག་བསྡུས་པ་འཕགས་པ་དེ་གཉིས་ཀྱིས་གསུངས་པའི་དགོངས་པ་ཡིན་པར་གསུངས་སོ། །དེ་བཞིན་དུ་དབུ་མ་རིགས་པའི་ཚོགས་ཀྱིས་ཀྱང༌། ཐེག་
པ་གསུམ་ག་དག་གི་བྱང་ཆུབ་ཐོབ་པའི་ཐབས་སུ། གཟུགས་ནི་རང་བཞིན་གྱིས་སྐྱེ་བ་མེད་དོ་ཞེས་སོགས་རྒྱ་ཆེར་དངོས་སུ་བསྟན་པའི་སྐྱེ་མེད་ཀྱི་དོན་གཏན་ལ་འབེབས་པར་བྱེད་དེ། མདོ་ལས། གཟུགས་ནས་རྣམ་པ་ཐམས་ཅད་མཁྱེན་པའི་བར་གྱི་ཆོས་ཐམས་ཅད་སྐྱེ་བ་མེད་པར་གསུངས་

པའི་སྒྲུབ་བྱེད་དུ། རྒྱུ་ལ་དཔྱོད་པ་རྡོ་རྗེའི་གཟེགས་མ་དང༌། འབྲས་བུ་ལ་དཔྱོད་པ་ཡོད་མེད་སྐྱེ་འགོག་དང༌། གཉིས་ཀ་ལ་དཔྱོད་པ་མུ་བཞི་སྐྱེ་འགོག་དང༌། ངོ་བོ་ལ་དཔྱོད་པ་གཅིག་དང་དུ་བྲལ་དང༌། ཐམས་ཅད་ལ་དཔྱོད་པ་རྟེན་འབྲེལ་གྱི་རིགས་པ་རྣམས་
གསུངས་པའི་ཕྱིར་རོ། །དེ་དག་ལ་སྔོན་གྱི་མཁས་པ་རྣམས་ཀྱིས་སྦས་དོན་མངོན་པར་རྟོགས་པའི་རིམ་པ་གཏན་ལ་འབེབས་པའི་བསྟན་བཅོས་དང༌། དངོས་བསྟན་སྟོང་པ་ཉིད་ཀྱི་རིམ་པ་གཏན་ལ་འབེབས་པའི་བསྟན་བཅོས་ཞེས་བྱ་བའི་ཤིང་རྟའི་སྲོལ་ཆེན་པོ་གཉིས་ཀྱི་རྣམ་པར་གཞག་པའི་ཐ་སྙད་
མཛད་པ་ཡིན་ཞིང༌། དོན་ལ་ཡང་ཤིན་ཏུ་ཡང་དག་པར་གནས་པ་ཉིད་དེ། དངོས་པོ་རྣམ་པ་བརྒྱད་པོ་དོན་བདུན་ཅུའི་ནང་གསེས་ཀྱི་དབྱེ་བ་དང་བཅས་པ་འདི་དག་ནི་མདོའི་ཤུགས་ཀྱིས་བསྟན་པའམ་སྦས་པའི་དོན་ཡིན་ལ། དེ་བཞིན་དུ་གཟུགས་ལ་སོགས་པ་རང་བཞིན་གྱིས་སྐྱེ་བ་མེད་པ་ལ་སོགས་པ་
ནི་མདོ་ལས་དངོས་སུ་བསྟན་པའི་བརྗོད་བྱའི་གཙོ་བོ་ཡིན་པའི་ཕྱིར་རོ། །དེས་ན་མདོ་འདིས་དངོས་སུ་བསྟན་པའི་སྟོང་ཉིད་བཅུ་དྲུག་ལ་སོགས་པ་སྟོང་པ་ཉིད་ཀྱི་རིམ་པ་གསལ་བར་བྱེད་པ་ནི་དབུ་མ་རིགས་པའི་ཚོགས་རྗེས་སུ་འབྲང་བ་དང་བཅས་པ་སྟེ། དེ་ལ་ཡང་རང་གཞན་གྱི་སྡེ་པ་གཉིས་ཀའི་
བསྒྲུབ་བྱ་བདེན་དངོས་ཐུན་མོང་དུ་དགག་པ་དབུ་མ་རྩ་བའི་ཤེས་རབ་ཅེས་བྱ་བ་ལེའུའི་གནས་སུ་རབ་ཏུ་བྱེད་པའི་ཐ་སྙད་བཏགས་པའི་རབ་ཏུ་བྱེད་པ་ཉི་ཤུ་རྩ་བདུན་གྱི་བདག་ཉིད་དང་ལྡན་པའི་རབ་ཏུ་བྱེད་པ་དང་པོ་རྐྱེན་བརྟག་པ། གཉིས་པ་འགྲོ་འོང་བརྟག་པ། གསུམ་པ་དབང་པོ་བརྟག་པ།
བཞི་པ་ཕུང་པོ་བརྟག་པ། ལྔ་པ་ཁམས་བརྟག་པ། དྲུག་པ་མངོན་པར་འདོད་པས་ཆགས་པ་བརྟག་པ། བདུན་པ་སྐྱེ་གནས་འཇིག་པ་བརྟག་པ། བརྒྱད་པ་བྱེད་པ་པོ་བརྟག་པ། དགུ་པ་སྔ་རོལ་ན་གནས་པ་བརྟག་པ། བཅུ་པ་མེ་དང་བུད་ཤིང་བརྟག་པ། བཅུ་གཅིག་པ་སྔོན་དང་ཕྱི་མའི་
མཐའ་བརྟག་པ། བཅུ་གཉིས་པ་བདག་གིས་བྱས་པ་དང་གཞན་གྱིས་བྱས་པ་བརྟག་པ། བཅུ་གསུམ་པ་འདུ་བྱེད་བརྟག་པ། བཅུ་བཞི་པ་ཕྲད་པ་བརྟག་པ། བཅོ་ལྔ་པ་རང་བཞིན་བརྟག་པ། བཅུ་དྲུག་པ་བཅིངས་པ་ཐར་པ་བརྟག་པ། བཅུ་བདུན་པ་ལས་བརྟག་པ། བཅོ་བརྒྱད་པ་

བདག་དང་ཆོས་བརྟག་པ། བཅུ་དགུ་པ་དུས་བརྟག་པ། ཉི་ཤུ་པ་ཚོགས་པ་བརྟག་པ། ཉེར་གཅིག་པ་འབྱུང་བ་དང་འཇིག་པ་བརྟག་པ། ཉེར་གཉིས་པ་དེ་བཞིན་གཤེགས་པ་བརྟག་པ། ཉེར་གསུམ་པ་ཕྱིན་ཅི་ལོག་བརྟག་པ། ཉེར་བཞི་པ་འཕགས་པའི་བདེན་པ་བརྟག་པ། ཉེར་ལྔ་
པ་མྱ་ངན་ལས་འདས་པ་བརྟག་པ། ཉེར་དྲུག་པ་སྲིད་པའི་ཡན་ལག་བཅུ་གཉིས་བརྟག་པ། ཉེར་བདུན་པ་ལྟས་བརྟག་པ་རྣམས་ཚིགས་སུ་བཅད་པ་བམ་པོ་ཕྱེད་དང་གཉིས། ཤླཽ་ཀ་བཞི་བརྒྱ་བཞི་བཅུ་རྩ་དགུའི་གྲངས་ཚད་དུ་བཞུགས་པ་དང༌། རང་སྡེ་དངོས་པོར་སྨྲ་བའི་འདོད་པ་བྱེ་བྲག་ཏུ་
དགག་པ་རིགས་པ་དྲུག་ཅུ་པ་ཤླཽ་ཀ་དྲུག་ཅུ་རྩ་གཉིས་ཡོད་པ་སྟེ། དེ་ལྟར་ལུས་ལྟ་བུའི་བསྟན་བཅོས་གཉིས་དང༌། གོང་གི་རྐྱེན་བརྟག་པའི་རབ་ཏུ་བྱེད་པ་ལས་འཕྲོས་ནས་རང་བཞིན་མེད་པར་སྨྲ་བ་ལ་རིགས་པ་དང་འགལ་བ་སྤོང་བ་རྩོད་པ་བཟློག་པ་དང༌། འདུས་བྱས་བརྟག་པའི་རབ་ཏུ་བྱེད་
པ་ལས་འཕྲོས་ནས་སྐྱེ་འཇིག་མེད་པར་སྨྲ་བ་ལ་ལུང་དང་འགལ་བ་སྤོང་བ་སྟོང་ཉིད་བདུན་ཅུ་པ་སྟེ། ཡན་ལག་ལྟ་བུའི་བསྟན་བཅོས་གཉིས་དང༌། བདེན་དངོས་ཀྱི་སྒྲུབ་བྱེད་རྟོག་པའི་རིགས་པ་འགོག་པ་ཞིབ་མོ་རྣམ་པར་འཐགས་པ་སྟེ་ལྔ་ནི་འཕགས་པས་མཛད་པ་ཡིན་ལ། ཁ་ཅིག་དོན་
དམ་པར་རང་བཞིན་མེད་ཀྱང་ཀུན་རྫོབ་ཏུ་འཇིག་རྟེན་པའི་ཐ་སྙད་འཐད་ཅིང་གྲུབ་པར་སྟོན་པ་ཐ་སྙད་གྲུབ་པ་དང་དྲུག་ཡིན་ནོ་ཞེས་གསུངས་སོ། །གཉིས་པ་ནི་མདོའི་ཤུགས་ལས་བསྟན་པའི་དོན་དམ་སྦས་པའི་དོན་གཙོ་བོར་སྟོན་པར་བྱེད་པའི་བསྟན་བཅོས་ནི་མངོན་པར་རྟོགས་པའི་རྒྱན་ཏེ། འདིས་
བསྟན་པར་བྱ་བའི་སྙིང་པོ་ནི། གཞུང་རྩ་བར། ཤེས་རབ་ཕ་རོལ་ཕྱིན་པ་ནི། །དངོས་པོ་བརྒྱད་ཀྱིས་ཡང་དག་བཤད། །ཅེས་པས་ལུས་མདོར་བསྟན། དེ་ནས། རྣམ་ཀུན་ཤེས་ཉིད་ལམ་ཤེས་ཉིད། །དེ་ནས་ཐམས་ཅད་ཤེས་པ་ཉིད། །རྣམ་ཀུན་མངོན་རྫོགས་རྟོགས་པ་དང༌། །རྩེ་མོར་ཕྱིན་
དང་མཐར་གྱིས་པ། །སྐད་ཅིག་གཅིག་མངོན་རྫོགས་བྱང་ཆུབ། །ཆོས་ཀྱི་སྐུ་དང་དེ་རྣམ་བརྒྱད། །ཅེས་འཇུག་པའི་ཡུལ་མཁྱེན་པ་གསུམ་དང༌། འཇུག་པ་སྦྱོར་བ་བཞི་དང༌། ཞུགས་པའི་འབྲས་བུ་ཆོས་ཀྱི་སྐུ་དང་བཅས་པའི་སྐབས་རྣམ་པ་བརྒྱད་དུ་བསྡུས་ནས་བསྟན་ཏོ། །དེ་དག་ཀྱང་

ནང་གསེས་ཀྱི་དབང་གིས་དོན་བདུན་ཅུར་ཕྱེ་ནས་བསྟན་བཅོས་ཀྱི་ལུས་རྣམ་པར་གཞག་པའང༌། དེ་ཉིད་ལས། སེམས་བསྐྱེད་པ་དང་གདམས་ངག་དང༌། །ངེས་འབྱེད་ཡན་ལག་རྣམ་བཞི་དང༌། །སྒྲུབ་པ་ཡི་ནི་རྟེན་གྱུར་པ། །ཆོས་ཀྱི་དབྱིངས་ཀྱི་རང་བཞིན་
དང༌། །དམིགས་པ་དག་དང་ཆེད་དང་ནི། །གོ་ཆ་འཇུག་པའི་བྱ་བ་དང༌། །ཚོགས་ནི་ངེས་པར་འབྱུང་བཅས་རྣམས། །ཐུབ་པའི་རྣམ་ཀུན་མཁྱེན་པ་ཉིད། །ཅེས་རྣམ་མཁྱེན་གྱི་ཆོས་བཅུ་དང༌། །མོག་མོག་པོར་བྱེད་ལ་སོགས་དང༌། །སློབ་མ་བསེ་རུའི་ལམ་གང་དང༌། །འདི་དང་
གཞན་པའི་ཡོན་ཏན་གྱིས། །ཕན་ཡོན་ཆེ་བ་མཐོང་བའི་ལམ། །བྱེད་པ་དང་ནི་མོས་པ་དང༌། །བསྟོད་དང་བཀུར་དང་བསྔགས་པ་དང༌། །བསྔོ་དང་རྗེས་སུ་ཡི་རང་བ། །ཡིད་ལ་བྱེད་པ་བླ་མེད་དག །བསྒྲུབ་དང་ཤིན་ཏུ་དག་པ་ཞེས། །བྱ་བ་འདི་ནི་བསྒོམ་པའི་ལམ། །བྱང་ཆུབ་
སེམས་དཔའ་མཁས་རྣམས་ཀྱི། །ལམ་ཤེས་ཉིད་ནི་དེ་འདྲར་བཤད། །ཅེས་ལམ་ཤེས་ཀྱི་ཆོས་བཅུ་གཅིག་དང༌། །ཤེས་པས་སྲིད་ལ་མི་གནས་ཤིང༌། །སྙིང་རྗེས་ཞི་ལ་མི་གནས་དང༌། །ཐབས་མ་ཡིན་པས་རིང་བ་དང༌། །ཐབས་ཀྱིས་རིང་བ་མ་ཡིན་ཉིད། །མི་མཐུན་གཉེན་
པོའི་ཕྱོགས་དག་དང༌། །སྦྱོར་དང་དེ་ཡི་མཉམ་ཉིད་དང༌། །ཉན་ཐོས་ལ་སོགས་མཐོང་བའི་ལམ། །དེ་འདྲ་ཀུན་ཤེས་ཉིད་དུ་འདོད། །ཅེས་གཞི་ཤེས་པའི་ཆོས་དགུ་དང༌། །རྣམ་པར་སྦྱོར་བར་བཅས་རྣམས་དང༌། །ཡོན་ཏན་སྐྱོན་ནི་མཚན་ཉིད་བཅས། །ཐར་དང་ངེས་འབྱེད་ཆ་
མཐུན་དང༌། །སློབ་པ་ཕྱིར་མི་ལྡོག་པའི་ཚོགས། །སྲིད་དང་ཞི་བ་མཉམ་ཉིད་དང༌། །ཞིང་དག་བླ་ན་མེད་པ་ནི། །རྣམ་ཀུན་མངོན་རྫོགས་རྟོགས་པ་སྟེ། །འདི་ནི་ཐབས་མཁས་བཅས་པ་ཡིན། །ཞེས་རྣམ་ཀུན་མངོན་རྫོགས་ཀྱི་སྦྱོར་བའི་ཆོས་བཅུ་གཅིག་དང༌། དེ་ཡི་རྟགས་དང་
རྣམ་འཕེལ་དང༌། །བརྟེན་དང་སེམས་ཀུན་གནས་པ་དང༌། །མཐོང་ཞེས་བྱ་དང་བསྒོམ་པ་ཞེས། །བྱ་བའི་ལམ་ནི་སོ་སོ་ལ། །རྣམ་པར་རྟོག་པ་རྣམ་བཞི་ཡི། །གཉེན་པོ་རྣམ་པ་བཞི་དང་ནི། །བར་ཆད་མེད་པའི་ཏིང་ངེ་འཛིན། །ལོག་པར་བསྒྲུབ་དང་བཅས་པ་ནི། །རྩེ་མོའི་

མངོན་རྟོགས་ཞེས་རྩེ་མོར་སྦྱོར་བའི་ཆོས་བརྒྱད་དང༌། མཐར་གྱིས་པ་དང༌། རྣམ་གསུམ་རྣམ་བཅུ་ཞེས་མཐར་གྱིས་སྦྱོར་བའི་ཆོས་བཅུ་གསུམ་དང༌། སྐད་ཅིག་མ། གཅིག་གིས་མངོན་རྫོགས་བྱང་ཆུབ་པ། །མཚན་ཉིད་ཀྱིས་ནི་རྣམ་པ་བཞི། །ཞེས་སྐད་ཅིག་མའི་སྦྱོར་བའི་ཆོས་
བཞི་དང༌། ངོ་བོ་ཉིད་ལོངས་རྫོགས་བཅས་དང༌། །དེ་བཞིན་གཞན་པ་སྤྲུལ་པ་ནི། །ཆོས་སྐུ་མཛད་པ་དང་བཅས་པ། །རྣམ་པ་བཞིར་ནི་ཡང་དག་བརྗོད། །ཅེས་བྱ་བས་ཆོས་ཀྱི་སྐུའི་ཆོས་བཞི་མདོར་བསྟན་པ་རྣམས་སོ། །ཡན་ལག་རྒྱས་པར་བཤད་པའི་སྐབས། སེམས་བསྐྱེད་
པ་ནི་གཞན་དོན་ཕྱིར། །ཞེས་བྱ་བ་ལ་སོགས་པ་དོན་བདུན་ཅུ་པོ་རེ་རེ་ནས་རྒྱས་པར་འཆད་དོ། །དེ་དག་ཀྱང་འབྲིང་དུ་བསྟན་པ་ན་ཡུལ་གསུམ་གཅིག་ཏུ་བསྡོམས་ནས་དྲུག་ཏུ་འདུ་བ་དང༌། མདོར་བསྡུས་སུ་བསྟན་པ་ན་གསུམ་དུ་འདུ་བ་ཡིན་ནོ། །དེ་ལྟར་བཤད་མ་ཐག་པའི་སྟོང་པ་ཉིད་ཀྱི་རིམ་
པ་གཏན་ལ་འབེབས་པའི་བསྟན་བཅོས་དང༌། མངོན་པར་རྟོགས་པའི་རིམ་པ་སྟོན་པར་བྱེད་པའི་བསྟན་བཅོས་དག་ལ་ནི་ཤིང་རྟའི་སྲོལ་ཆེན་པོ་གཉིས་ཞེས་མཁས་པའི་ཚོགས་ལ་ཡོངས་སུ་གྲགས་ཤིང་གྲུབ་པ་ཡིན་ནོ། །ཁ་ཅིག་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་ཐམས་ཅད་སྒོ་གསུམ་
རྣམ་གྲངས་བཅུ་གཅིག་གི་སྒོ་ནས་སྟོན་པ་འབུམ་ཊཱིཀ་དང༌། གཙོ་བོའི་དོན་སུམ་ཅུ་རྩ་གཉིས་སུ་བསྡུས་ནས་སྟོན་པ་སློབ་དཔོན་ཕྱོགས་གླང་གིས་མཛད་པའི་བརྒྱད་སྟོང་དོན་བསྡུས་གཉིས་དང་བཅས་པའི་སྲོལ་འབྱེད་བཞིར་འདོད་དེ། དེ་ལྟར་ན་སྒོ་གསུམ་རྣམ་གྲངས་བཅུ་གཅིག་ནི། གདུལ་
བྱ་དབང་པོ་རྣོན་པོ་མགོ་སྨོས་པ་ཙམ་གྱིས་རྟོགས་པ་དང༌། དབང་པོ་འབྲིང་པོ་ཅུང་ཟད་སྤྲོས་པ་ཙམ་གྱིས་རྟོགས་པ་དང༌། ཤིན་ཏུ་སྤྲོས་པའི་ཚིག་གིས་དོན་རྟོགས་དགོས་པ་དག་གི་ངོར་རིམ་པ་བཞིན་དུ་བསྡུས་ཏེ་བསྟན་པའི་སྒོ་དང༌། འབྲིང་དུ་བསྟན་པའི་སྒོ་དང༌། རྒྱས་པར་བསྟན་པའི་སྒོ་
རྣམས་སོ། །རྣམ་གྲངས་བཅུ་གཅིག་ནི། ཤཱ་རིའི་བུ་དང་རབ་འབྱོར་ལ། །བཀའ་སྩལ་རེ་རེ་བརྒྱ་བྱིན་དང༌། །རབ་འབྱོར་བྱམས་པ་གཉིས་བཞི་གཉིས། །ཀུན་དགའ་བོ་ལ་བཀའ་སྩལ་གཅིག །དེ་ལྟར་རྣམ་གྲངས་བཅུ་གཅིག་གོ །ཞེས་པ་ལྟར་རོ། །འབུམ་ཊཱིཀ་འདི་དཾ་ཥྚ྄་སེ་ནཱས་

མཛད་ཟེར་མོད།<*དང་འདི་ལ་དཀར་ཆག་འཕང་ཐང་མར་ཁྲི་སྲོང་སྡེའུ་བཙན་གྱིས་མཛད་དོ་ཞེས་ཟེར།>དབྱིག་གཉེན་གྱིས་མཛད་པའི་གཞུང་འགྲེལ་དུ་རིགས་ཤིང་འདི་དང་བརྒྱད་སྟོང་དོན་བསྡུས་གཉིས་ཀྱིས་སེམས་ཙམ་བསྟན་ནོ་ཞེས་ཀུན་མཁྱེན་བུ་སྟོན་གསུང་ངོ༌། །ཁ་ཅིག་ནི་དཔའ་བོས་མཛད་པའི་འབུམ་ཊཱིཀ་ཅེས་ཀྱང་གསུང་ངོ༌།།གཙོ
བོའི་དོན་སུམ་ཅུ་རྩ་གཉིས་ནི། བརྒྱད་སྟོང་དོན་བསྡུས་ཉིད་དུ། རྟེན་དང་དབང་དུ་བྱ་བ་དང༌། །ལས་དང་བསྒོམ་པ་དང་བཅས་དང༌། །རབ་དབྱེ་རྟགས་དང་ལྟུང་བ་དང༌། །ཕན་ཡོན་བཅས་པར་ཡང་དག་
བརྗོད། །ཅེས་འབྱུང་བའི་རྟེན་ནི་སྟོན་པ་རྫོགས་པའི་སངས་རྒྱས་དང༌། དབང་དུ་བྱ་བ་ནི་འཁོར་དང༌། ལས་ནི་ཡུམ་ལ་ཆོས་སྤྱོད་རྣམ་པ་བཅུས་ཇི་ལྟར་སྤྱད་པ་དང༌། བསྒོམ་པ་ནི་རྣམ་པར་གཡེང་བ་བཅུའི་གཉེན་པོར་གྱུར་པའི་བསྒོམ་པ་རྣམ་པ་བཅུ་དང༌། རབ་ཏུ་དབྱེ་བ་ནི་ནང་སྟོང་
པ་ཉིད་ནས་བཟུང་སྟེ་དངོས་པོ་མེད་པའི་ངོ་བོ་ཉིད་སྟོང་པ་ཉིད་ཀྱི་མཐར་ཐུག་པའི་བར་གྱི་སྟོང་པ་ཉིད་བཅུ་དྲུག་དང༌། རྟགས་ནི་བདུད་ཀྱི་ལས་ཀྱི་རྟགས་དང༌། ཕྱིར་མི་ལྡོག་པའི་རྟགས་ཏེ་གཉིས་དང༌། ལྟུང་བ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་སྤངས་ན་རྣམ་པར་སྨིན་པ་ངན་
འགྲོར་ལྟུང་བ་དང༌། ཕན་ཡོན་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ལ་སོགས་པ་རིན་པོ་ཆེས་བཀང་ནས་སྦྱིན་པ་སྦྱིན་པ་བས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་ན་བསོད་ནམས་ཆེས་ཆེ་བར་བསྔགས་པ་ལ་སོགས་པ་དང་སུམ་ཅུ་རྩ་གཉིས་ཀྱིས་བརྗོད་བྱ་
ཐམས་ཅད་བསྡུས་པར་འདོད་དོ། །དེ་ལྟ་ན་ཤིང་རྟ་ཆེན་པོ་བཞི་ཞེས་པའི་རྣམ་པར་གཞག་པ་ཡང་མཁས་པ་འགའ་ཞིག་བཞེད་དོ། །དེ་ལ་རོང་སྟོན་ཤེས་བྱ་ཀུན་མཁྱེན་ལ་སོགས་པས། ཕྱི་མ་གཉིས་པོ་ནི། སྔ་མ་གཉིས་ལས་ལོགས་སུ་གྱུར་པའི་སྲོལ་འབྱེད་གཞན་མ་
ཡིན་པས་ན་སྲོལ་འབྱེད་ལ་སྔ་མ་གཉིས་སུ་ངེས་སོ་ཞེས་བཞེད་དོ། །རྗེ་ངོར་ཆེན་ཐམས་ཅད་མཁྱེན་པ་ཆེན་པོའི་ཞལ་སྔ་ནས་ཀྱང༌། ཤིང་རྟའི་སྲོལ་ཆེན་པོ་ནི་སྔ་མ་གཉིས་པོ་དེ་ཡོངས་སུ་གྲགས་ཤིང་ཡང་དག་པར་གྲུབ་བོ་ཞེས་གསུངས་ཏེ། ཅིའི་ཕྱིར་ཞེ་ན། སྤྱིར་ཤིང་རྟའི་

སྲོལ་འབྱེད་ཅེས་བྱ་བའི་ཐ་སྙད་ཀྱི་གདགས་གཞི་ནི་ཡུམ་གྱི་དགོངས་པ་རྣམ་པར་འགྲེལ་པ་ཙམ་གྱིས་དེ་ལྟར་དུ་འཇོག་པ་མ་ཡིན་ཏེ། སློབ་དཔོན་གཞན་གྱི་མན་ངག་ལ་བརྟེན་ནས་དོན་སྤྱིའི་ཚུལ་གྱིས་འགྲེལ་པ་ལ་མ་ལྟོས་པར་ཆོས་ཉིད་དོན་དམ་པའི་བདེན་པ་མངོན་སུམ་དུ་མཐོང་བའི་
སྒོ་ནས་བཀའི་དགོངས་པ་རང་དབང་དུ་འགྲེལ་པ་ལ་ཤིང་རྟའི་སྲོལ་འབྱེད་དུ་འཇོག་པ་གང་ཞིག་དེ་ལ་སྔ་མ་གཉིས་པོ་དེར་ངེས་ཤིང༌། ཕྱི་མ་གཉིས་ནི་གཞན་གྱི་མན་ངག་ལ་བརྟེན་ནས་དོན་སྤྱིའི་ཚུལ་གྱིས་འགྲེལ་པ་ཙམ་ཡིན་པའི་ཕྱིར་རོ། །བདེན་མོད། འདིར་ནི་གཙོ་བོའི་དོན་སུམ་ཅུ་
རྩ་གཉིས་དང༌། སྒོ་གསུམ་རྣམ་གྲངས་བཅུ་གཅིག་ལ་སོགས་པའི་འགྲེལ་ཚུལ་མི་འདྲ་བའི་སྒོ་ནས་སྲོལ་འབྱེད་སོ་སོར་འཇོག་གོ་ཞེ་ན། གལ་ཏེ་དེ་ལྟ་ན་རྩ་བ་ཤེས་རབ་དང༌། འཇུག་པ་གཉིས་ཀྱང་སྲོལ་འབྱེད་སོ་སོར་འཇོག་དགོས་པར་འགྱུར་ཏེ། སྔ་མས་ནི་རྟེན་ཅིང་འབྲེལ་པར་
འབྱུང་བ་སྤྲོས་པའི་མཐའ་བརྒྱད་དང་བྲལ་བར་གཏན་ལ་དབབ་པའི་ཚུལ་གྱིས་འགྲེལ་ལ། ཕྱི་མས་ནི་མདོ་སྡེ་ས་བཅུ་པ་ལས་བཤད་པ་སོགས་དང་སྦྱར་ནས་འགྲེལ་པའི་ཕྱིར་རོ། །འོ་ན་ཕྱི་མ་གཉིས་པོ་གང་གི་མན་ངག་ལ་བརྟེན་ཞེ་ན། མགོན་པོ་བྱམས་པའི་མན་ངག་ཐོགས་
མེད་ནས་བརྒྱུད་པ་ཐོས་ནས་དེའི་རྗེས་སུ་འབྲང་བ་ཡིན་ཏེ། གོང་དུ་འདི་དང་བརྒྱད་སྟོང་དོན་བསྡུས་གཉིས་སེམས་ཙམ་དུ་བསྟན་ནོ་ཞེས་གསུངས་པས་ཀྱང་རྟོགས་པར་ནུས་པའི་ཕྱིར་རོ། །གཉིས་པ་སྤྱོད་པའི་ཆ་གསལ་བར་བྱེད་པ་ནི། མདོ་ཀུན་ལས་བཏུས་པའམ། བསླབ་པ་ཀུན་ལས་
བཏུས་པའམ། གང་ཟག་གཅིག་གི་ཆ་རྐྱེན་དུ་ལྟ་བ་དང་སྤྱོད་པ་ཟུང་འབྲེལ་དུ་ཉམས་སུ་ལེན་པའི་ཚུལ་རྒྱས་པར་བསྟན་པ་བྱང་ཆུབ་སེམས་དཔའི་སྤྱོད་པ་ལ་འཇུག་པ་ལྟ་བུའམ། ཡང་ན་རིན་ཆེན་ཕྲེང་བའི་སྒོམ་རིམ་གསུམ་ལྟ་བུའོ། །གསུམ་པ་བཀའ་ཐ་མ་ལེགས་པར་རྣམ་པར་ཕྱེ་
བའི་ཆོས་ཀྱི་འཁོར་ལོའི་དགོངས་པ་འགྲེལ་པའི་བསྟན་བཅོས་ལའང་ལྟ་བའི་ཆ་གསལ་བར་བྱེད་པའི་བསྟན་བཅོས་དང༌། སྤྱོད་པའི་ཆ་གསལ་བར་བྱེད་པའི་བསྟན་བཅོས་གཉིས་སོ། །དང་པོ་ལ། མགོན་པོ་བྱམས་པའི་ཆོས་ལྔ་ལས་གོང་དུ་སྨོས་པའི་མངོན་པར་རྟོགས་པའི་རྒྱན་མ་

གཏོགས་པའི་བྱམས་པའི་ཆོས་བཞི་དང༌། དེ་དང་རྗེས་སུ་འབྲེལ་པའི་ཆོས་སྡེ་བཅོ་ལྔ་སྟེ་བསྡམས་པའི་ཆོས་སྡེ་ཉི་ཤུ་ལ་གཅིག་གིས་དམན་པ་རྩ་འགྲེལ་དང་བཅས་པ་རྣམས་སོ། །དེ་ལ་སྤྱིར་བྱམས་པ་དང་འབྲེལ་པའི་ཆོས་ཉི་ཤུ་ཞེས་བྱ་བའི་གྲངས་
ངེས་ཀྱི་རྣམ་པར་གཞག་པ་འདོད་པ་ཡང་ཡོད་དེ། དེ་ལྟར་ན་གང་ཟག་གསུམ་གྱིས་མཛད་པའི་ཆོས་ཉི་ཤུ་སྟེ། རྒྱན་གཉིས་འབྱེད་གཉིས་རྒྱུད་བླ་མ་ཞེས་པ་ལྟར་བྱམས་པའི་ཆོས་ལྔ་དང༌། ཐོགས་མེད་ཀྱིས་མཛད་པའི་ས་སྡེ་ལྔ་དང༌། སྡོམ་རྣམ་པ་གཉིས་ཏེ་བདུན་དང༌། དབྱིག་
གཉེན་གྱིས་མཛད་པའི་པྲ་ཀཱ་ར་ཎ་སྡེ་བརྒྱད་དང་བཅས་པ་རྣམས་སོ། །དེ་ལས་དང་པོ་བྱམས་པའི་ཆོས་ལྔས་མདོ་གང་དང་གང་གི་དོན་གཏན་ལ་ཕབ་ངོས་གཟུང་བ་དང༌། ཇི་ལྟར་གཏན་ལ་འབེབས་པའི་ཚུལ་བྱེ་བྲག་ཏུ་བཤད་པ་གཉིས་ལས། དང་པོ་རྗེ་བཙུན་བྱམས་པས་བསྟན་བཅོས་
ཆེན་པོ་ལྔ་མཛད་པའི་དེ་ལས་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་རྣམས་ཀྱི་དགོངས་པ་འགྲེལ་པར་བྱེད་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་མཆོད་པར་བརྗོད་པ་དང་བཅས་པ་མཛད་དོ། །དེ་ནས་ཐེག་པ་ཆེན་པོའི་མདོ་སྡེ་སྣ་ཚོགས་པ་འཐོར་བ་བསྡུས་པ་ལྟ་བུའི་
སྒོ་ནས་མདོ་སྡེ་རྒྱན་མཛད་དོ། །དེ་ནས་འདི་གཉིས་ཀྱི་དོན་ཅུང་ཟད་བསྡུས་པ་དབུས་དང་མཐའ་རྣམ་པར་འབྱེད་པ་མཛད་དོ། །དེ་ནས་དེ་དག་གི་དོན་ཤིན་ཏུ་བསྡུས་པ་ཆོས་དང་ཆོས་ཉིད་རྣམ་པར་འབྱེད་པ་མཛད་དོ། །དེ་ནས་ཆོས་འཁོར་ཕྱི་མའི་དབང་དུ་བྱས་པའི་ངེས་དོན་གྱི་གསུང་
རབ་ཕུལ་དུ་ཕྱིན་པའི་དགོངས་པ་འགྲེལ་པར་བྱེད་པ་ཐེག་པ་ཆེན་པོ་རྒྱུད་བླ་མའི་བསྟན་བཅོས་བསྔོ་བ་དང་བཅས་པ་མཛད་དོ། །དེ་དག་གི་ནང་ནས་བར་པ་གསུམ་ལ་ནི་མཆོད་པ་བརྗོད་པ་དང་བསྔོ་བ་གང་ཡང་མེད། དང་པོ་ལ་བསྔོ་བ་དང་ཐ་མ་ལ་མཆོད་བརྗོད་མེད་པས་ཆོས་ལྔ་པོ་དཀྱུས་
ཐོག་གཅིག་ཏུ་མཛད་པ་ཡིན་ནོ་ཞེས་མདོ་སྡེ་རྒྱན་གྱི་འགྲེལ་པ་འགའ་ཞིག་ལས་འབྱུང་ངོ༌། །དེ་ལྟར་བཤད་པ་དེ་ཐོག་མཐའ་གཉིས་སུ་མཆོད་བརྗོད་དང་བསྔོ་བ་ཡོད་པའི་ཚུལ་དང༌། བར་པ་གསུམ་ལ་དེ་དག་གང་ཡང་མེད་པའི་ཚུལ་ལ་དཔགས་ན་ཤིན་ཏུ་འགྲིགས་ཆེ་བ་ལྟར་མཆིས་ནའང་

འབྱེད་རྣམ་པ་གཉིས་པོ་སྔ་མ་དག་གི་དོན་ཅུང་ཟད་བསྡུས་པ་དང་ཤིན་ཏུ་བསྡུས་ནས་མཛད་ཅེས་པའི་རྣམ་པར་གཞག་པ་དེ་ལྟར་བྱེད་པ་ཡང་འཐད་པ་ཡོད་མེད་དཔྱད་པར་བྱའོ། །ཡང་སྔོན་གྱི་མཁས་པ་ཁ་ཅིག་ནི། མདོ་སོ་སོ་བ་དང་ཐུན་མོང་བ་གཏན་ལ་འབེབས་པའི་དབང་དུ་བྱས་
ནས་བྱམས་པའི་ཆོས་ལྔར་ངེས་པ་ཡིན་ཏེ། མདོ་སྡེ་རྒྱན་གྱིས་ནི་སངས་རྒྱས་ཀྱི་སའི་མདོ་དང༌། མངོན་པར་རྟོགས་པ་རྒྱན་གྱིས་ནི་ཤེས་རབ་ཀྱི་ཕ་རོལ་ཏུ་ཕྱིན་པ་འབུམ་པ་དང༌། རྒྱུད་བླ་མས་ནི་འཕགས་པ་གཟུངས་ཀྱི་དབང་ཕྱུག་རྒྱལ་པོས་ཞུས་པའི་མདོའི་དོན་གཏན་ལ་འབེབས་
པས་ནི་མདོ་སོ་སོ་བ་དང༌། དབུས་དང་མཐའ་རྣམ་པར་འབྱེད་པས་ནི་གང་ཟག་གཅིག་མངོན་པར་རྫོགས་པར་འཚང་རྒྱ་བའི་ལམ་གྱི་རིམ་པ་སྟོན་ལ། ཆོས་དང་ཆོས་ཉིད་རྣམ་འབྱེད་ཀྱིས་ནི་དེའི་ནང་ནས་ཐེག་པ་ཆེན་པོ་ཐུན་མོང་མ་ཡིན་པའི་ལམ་གྱི་རིམ་པ་སྟོན་པས་ན། གཉིས་པོས་
མདོའི་དོན་ཐུན་མོང་དུ་གཏན་ལ་འབེབས་པར་བྱེད་པའི་ཕྱིར་རོ་ཞེས་བཞེད་དོ། །ཁ་ཅིག་ནི་རྩ་བ་ལུས་ལྟ་བུའི་བསྟན་བཅོས་དང༌། གྱེས་པ་ཡན་ལག་ལྟ་བུའི་བསྟན་བཅོས་ཏེ་རྣམ་པ་གཉིས་ཀྱི་དབང་དུ་བྱས་ནས་ཆོས་ལྔར་ངེས་པ་ཡིན་ཏེ། མངོན་པར་རྟོགས་པའི་རྒྱན་དང་མདོ་སྡེ་རྒྱན་
གཉིས་ཀྱིས་མདོ་སྡེའི་སྡེ་སྣོད་དང༌། དབུས་དང་མཐའ་རྣམ་པར་འབྱེད་པས་ནི་མངོན་པའི་སྡེ་སྣོད་གཏན་ལ་འབེབས་པས་གཙོ་བོ་ལུས་ལྟ་བུའི་བསྟན་བཅོས་ཡིན་ལ། རྒྱུད་བླ་མས་ནི། མདོ་སྡེ་རྒྱན་དུ་རིགས་ཆད་ཀྱི་སེམས་ཅན་ཡོད་པར་བསྟན་པ་དེ་དགོངས་པ་ཅན་དུ་བསྟན་ནས་
སེམས་ཅན་ཐམས་ཅད་དེ་བཞིན་གཤེགས་པའི་སྙིང་པོ་ཅན་དུ་བསྒྲུབ་པ་དང༌། ཆོས་དང་ཆོས་ཉིད་རྣམ་པར་འབྱེད་པས་ནི་དབུས་མཐར་ཐེག་པ་ཐུན་མོང་བའི་ལམ་གྱི་རིམ་པ་བསྟན་ཀྱང༌། ཐེག་པ་ཆེན་པོ་ཐུན་མོང་མ་ཡིན་པའི་ལམ་གྱི་རིམ་པ་མ་བསྟན་པ་དེ་འདིས་བསྟན་པས་ན་གཉིས་
པོ་གྱེས་པ་ཡན་ལག་ལྟ་བུའི་བསྟན་བཅོས་ཡིན་ནོ་ཞེས་བཞེད་དོ། །ཁ་ཅིག་ནི་སྡེ་སྣོད་གསུམ་གཏན་ལ་འབེབས་པའི་དབང་དུ་བྱས་ནས་ཆོས་ལྔར་ངེས་པ་ཡིན་ཏེ། དེ་ཡང་མདོ་སྡེའི་སྡེ་སྣོད་གཏན་ལ་འབེབས་པ་ནི་མདོ་སྡེ་རྒྱན་དང་རྒྱུད་བླ་མ་སྟེ། དེ་ཡང་སྔ་མས་ནི་མདོ་སྡེ་དྲང་

བའི་དོན་དང༌། ངེས་པའི་དོན་སོ་སོར་མ་ཕྱེ་བར་གཏན་ལ་འབེབས་པ་དང༌། ཕྱི་མས་ནི་ངེས་པའི་དོན་གྱི་མདོ་སྡེ་བྱེ་བྲག་ཏུ་གཏན་ལ་འབེབས་པའི་ཕྱིར་རོ། །འདུལ་བའི་སྡེ་སྣོད་གཏན་ལ་འབེབས་པ་ནི། མངོན་པར་རྟོགས་པའི་རྒྱན་ཏེ། དེ་ཡང་ཐེག་
ཆེན་ཐུན་མོང་མ་ཡིན་པའི་འདུལ་བ་ནི་ཉོན་མོངས་པ་འདུལ་བ་ཡིན་ལ། འདི་ཉིད་ཀྱིས་ནི་དེའི་གཉེན་པོར་བྱེད་པའི་ཕྱིར་རོ། །མངོན་པའི་སྡེ་སྣོད་གཏན་ལ་འབེབས་པ་ནི་འབྱེད་རྣམ་པ་གཉིས་ཏེ། འདི་དག་གིས་ནི་ཆོས་རྣམས་ཀྱི་རང་དང་སྤྱིའི་མཚན་ཉིད་གཏན་ལ་འབེབས་པའི་ཕྱིར་
རོ་ཞེས་གསུངས་སོ། །དེ་ལྟར་སོ་སོའི་བཞེད་པ་རྣམས་སྨོས་ནས་འདིར་ཡོངས་སུ་གྲགས་པའི་རྩོད་བྲལ་གྱི་མཁས་པ་མང་པོ་རྣམས་ཀྱིས་བཞེད་པའི་དོན་གྱི་སྙིང་པོ་དྲིལ་ཏེ་བརྗོད་ན། ཆོས་ལྔ་པོ་འདི་དག་གིས་ནི་བཤད་པར་བྱ་བའི་མདོ་སྡེ་ཐེག་པ་ཆེན་པོ་ཐུན་མོང་མ་ཡིན་པའི་སྡེ་སྣོད་
ཡིན་ལ། དེ་ལ་ཡང་ངེས་པའི་དོན་གྱི་མདོ་སྡེ་གཏན་ལ་འབེབས་པ་དང༌། དྲང་བའི་དོན་གྱི་མདོ་སྡེ་གཏན་ལ་འབེབས་པ་དང༌། དྲང་བའི་དོན་དང་ངེས་པའི་དོན་གྱི་མདོ་སྡེ་སྣ་ཚོགས་གཏན་ལ་འབེབས་པ་དང་གསུམ་ལས། དང་པོ་ངེས་པའི་དོན་གྱི་མདོ་སྡེ་གཏན་ལ་འབེབས་
པ་ནི་མངོན་པར་རྟོགས་པའི་རྒྱན་དང་རྒྱུད་བླ་མ་གཉིས་ཏེ། དེ་ལས་ཀྱང་སྔ་མས་ནི་ངེས་པའི་དོན་གྱི་མདོ་སྡེ་ཤེས་རབ་ཀྱི་ཕ་རོལ་ཏུ་ཕྱིན་པའི་རིགས་གཅིག་ཁོ་ན་གཏན་ལ་འབེབས་པར་བྱེད་པ་ཡིན་ཏེ་གོང་དུ་སྨོས་པ་ལྟར་རོ། །ཕྱི་མས་ནི་ངེས་པའི་དོན་གྱི་མདོ་སྡེ་འཕགས་པ་
གཟུངས་ཀྱི་དབང་ཕྱུག་རྒྱལ་པོས་ཞུས་པའི་མདོ་དང༌། དེ་བཞིན་གཤེགས་པའི་སྙིང་པོའི་མདོ་དང༌། དཔལ་ཕྲེང་གི་མདོ་དང༌། ལྷག་པའི་བསམ་པ་རྣམ་པར་དག་པ་བསྟན་པའི་མདོ་དང༌། འཕེལ་འགྲིབ་མེད་པའི་མདོ་དང༌། ཡེ་ཤེས་སྣང་བ་རྒྱན་གྱི་མདོ་ལ་སོགས་པ་རིགས་དུ་
མ་གཏན་ལ་འབེབས་པར་བྱེད་པ་ཡིན་ཏེ། འདི་ལྟར་རྒྱུད་བླ་མའི་འགྲེལ་པ་ཐོགས་མེད་ཀྱིས་མཛད་པ་ལས་ཀྱང་འདི་ལྟར་འབྱུང་སྟེ། རྡོ་རྗེའི་གནས་བསྟན་པ་དེ་ཡང་རྒྱས་པར་ནི་མདོ་ཇི་ལྟ་བ་བཞིན་དུ་རྟོགས་པར་བྱ་སྟེ། ཀུན་དགའ་བོ་དེ་བཞིན་གཤེགས་པ་ནི་བསྟན་དུ་མེད་པ་སྟེ།

དེ་ནི་མིག་གིས་བལྟ་བར་མི་ནུས་སོ། །ཀུན་དགའ་བོ་ཆོས་ནི་བརྗོད་དུ་མེད་པ་སྟེ། དེ་ནི་རྣ་བས་མཉན་པར་མི་ནུས་སོ། །ཀུན་དགའ་བོ་དགེ་འདུན་ནི་འདུས་མ་བྱས་པ་སྟེ། དེ་ནི་ལུས་དང་སེམས་ཀྱིས་བསྙེན་བཀུར་བྱ་བར་མི་ནུས་སོ་ཞེས་རྡོ་རྗེའི་གནས་གསུམ་པོ་འདི་ནི་ལྷག་པའི་
བསམ་པ་བསྟན་པའི་ལེའུའི་རྗེས་སུ་འབྲངས་ཏེ་རིག་པར་བྱའོ། །ཤཱ་རིའི་བུ་དོན་འདི་ནི་དེ་བཞིན་གཤེགས་པའི་ཡུལ་ཏེ་དེ་བཞིན་གཤེགས་པའི་སྤྱོད་ཡུལ་ལོ། །ཤཱ་རིའི་བུ་དོན་འདི་ནི་རེ་ཞིག་ཉན་ཐོས་དང༌། རང་སངས་རྒྱས་ཐམས་ཅད་ཀྱིས་ཀྱང་རང་གི་ཤེས་རབ་ཀྱིས་ཡང་
དག་པར་ཤེས་པའམ། ལྟ་བའམ། བརྟག་པར་མི་ནུས་ན་བྱིས་པ་སོ་སོའི་སྐྱེ་བོ་དག་གིས་ལྟ་ཅི་སྨོས་ཏེ། དེ་དེ་བཞིན་གཤེགས་པ་ལ་དད་པས་རྟོགས་པ་ནི་མ་གཏོགས་སོ། །ཤཱ་རིའི་བུ་དོན་དམ་པར་ནི་དད་པས་རྟོགས་པར་བྱ་བ་ཡིན་ནོ། །ཤཱ་རིའི་བུ་དོན་དམ་པར་ཞེས་བྱ་
བ་འདི་ནི་སེམས་ཅན་གྱི་ཁམས་ཀྱི་ཚིག་བླ་དགས་སོ། །ཤཱ་རིའི་བུ་སེམས་ཅན་གྱི་ཁམས་ཞེས་བྱ་བ་འདི་ནི་དེ་བཞིན་གཤེགས་པའི་སྙིང་པོའི་ཚིག་བླ་དགས་སོ། །ཤཱ་རིའི་བུ་དེ་བཞིན་གཤེགས་པའི་སྙིང་པོ་ཞེས་བྱ་བ་འདི་ནི་ཆོས་ཀྱི་སྐུའི་ཚིག་བླ་དགས་སོ་ཞེས་རྡོ་རྗེའི་གནས་བཞི་པ་འདི་
ནི་འགྲིབ་པ་མེད་པ་དང་འཕེལ་བ་མེད་པ་ཉིད་བསྟན་པའི་རྗེས་སུ་འབྲངས་ཏེ་རྟོགས་པར་བྱའོ། །བཅོམ་ལྡན་འདས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཅེས་བྱ་བ་འདི་ནི་མྱ་ངན་ལས་འདས་པའི་དབྱིངས་ཀྱི་ཚིག་བླ་དགས་སོ། །བཅོམ་ལྡན་འདས་མྱ་ངན་ལས་འདས་པའི་
དབྱིངས་ཞེས་བགྱི་བ་འདི་ནི་དེ་བཞིན་གཤེགས་པའི་ཆོས་ཀྱི་སྐུའི་ཚིག་བླ་དགས་སོ་ཞེས་རྡོ་རྗེའི་གནས་ལྔ་པ་འདི་ནི་འཕགས་པ་དཔལ་ཕྲེང་གི་མདོའི་རྗེས་སུ་འབྲངས་ཏེ་རྟོགས་པར་བྱའོ། །ཤཱ་རིའི་བུ་དེ་བཞིན་གཤེགས་པས་བསྟན་པའི་ཆོས་ཀྱི་སྐུ་གང་ཡིན་པ་དེ་ནི་འདི་ལྟ་སྟེ། གངྒཱའི་ཀླུང་
གི་བྱེ་མ་སྙེད་ལས་འདས་པའི་དེ་བཞིན་གཤེགས་པའི་ཆོས་དག་དང༌། རྣམ་པར་དབྱེར་མེད་པའི་ཆོས་དང་ལྡན་པ་མ་བྲལ་བའི་ཡེ་ཤེས་ཀྱི་ཡོན་ཏན་ཅན་ཡིན་ནོ་ཞེས་རྡོ་རྗེའི་གནས་དྲུག་པ་འདི་ནི་འགྲིབ་པ་མེད་ཅིང་འཕེལ་བ་མེད་པ་ཉིད་བསྟན་པའི་རྗེས་སུ་འབྲངས་ནས་རྟོགས་པར་བྱའོ། །འཇམ་

དཔལ་དེ་བཞིན་གཤེགས་པ་ནི་རྟོག་པར་མི་མཛད། རྣམ་པར་རྟོག་པར་མི་མཛད་མོད་ཀྱི། དེ་ལྟ་ན་ཡང་དེ་འདི་ལྟ་བུའི་རང་བཞིན་གྱི་མཛད་པ་འདི་ནི་མི་རྟོག་རྣམ་པར་མི་རྟོག་པ་བཞིན་དུ་ལྷུན་གྱིས་གྲུབ་པར་འཇུག་གོ་ཞེས་རྡོ་རྗེའི་གནས་བདུན་པ་འདི་ནི་དེ་བཞིན་གཤེགས་
པའི་ཡོན་ཏན་དང་ཡེ་ཤེས་བསམ་གྱིས་མི་ཁྱབ་པའི་ཡུལ་ལ་འཇུག་པ་བསྟན་པའི་རྗེས་སུ་འབྲངས་ནས་རྟོགས་པར་བྱའོ། །དེ་ལྟར་མདོར་བསྡུས་ནས་རྡོ་རྗེའི་གནས་བདུན་པོ་འདི་ནི་བསྟན་པའི་སྒོ་བསྡུས་པའི་དོན་གྱིས་ན་བསྟན་བཅོས་འདི་མཐའ་དག་གི་ལུས་སུ་རིག་པར་བྱའོ། །རྡོ་རྗེའི་
གནས་བདུན་པོ་འདི་དག་ལས་རང་གི་མཚན་ཉིད་བསྟན་པ་དང༌། རྗེས་སུ་འབྲེལ་པ་ནི་གོ་རིམ་ཇི་ལྟ་བར་འཕགས་པ་གཟུངས་ཀྱི་དབང་ཕྱུག་རྒྱལ་པོའི་མདོར་གླེང་གཞིའི་ལེའུ་ལས་གནས་གསུམ་རིག་པར་བྱ་ལ། དེའི་འོག་ཏུ་ལྷག་མ་བཞི་ནི་བྱང་ཆུབ་སེམས་དཔའ་དང་དེ་བཞིན་
གཤེགས་པའི་ཆོས་ཀྱི་དབྱེ་བ་ལས་སོ། །དེ་ལས་ཇི་སྐད་དུ། བཅོམ་ལྡན་འདས་ཆོས་ཐམས་ཅད་མཉམ་པ་ཉིད་དུ་མངོན་པར་རྫོགས་པར་སངས་རྒྱས་པ། ཆོས་ཀྱི་འཁོར་ལོ་ལེགས་པར་བསྐོར་བ། སློབ་མའི་ཚོགས་ཤིན་ཏུ་དུལ་བ་མཐའ་ཡས་པ་མངའ་བ་ཞེས་གསུངས་ཏེ། རྩ་
བའི་ཚིག་འདི་གསུམ་གྱིས་ནི་གོ་རིམ་ཇི་ལྟ་བ་བཞིན་དུ་དཀོན་མཆོག་གསུམ་རིམ་གྱིས་སྐྱེ་བ་འགྲུབ་པ་རྣམ་པར་གཞག་པར་རིག་པར་བྱ་ལ། ལྷག་མ་གནས་བཞི་ནི་དཀོན་མཆོག་གསུམ་འབྱུང་བ་དང་རྗེས་སུ་མཐུན་པའི་རྒྱུ་འགྲུབ་པ་བསྟན་པར་རིག་པར་བྱའོ་ཞེས་སོགས་རྒྱས་པར་གསུངས་
པའི་ཕྱིར་རོ། །གཉིས་པ་དྲང་བའི་དོན་གྱི་མདོ་སྡེ་གཏན་ལ་འབེབས་པ་ནི་དབུས་དང་མཐའ་རྣམ་པར་འབྱེད་པ་དང༌། ཆོས་དང་ཆོས་ཉིད་རྣམ་པར་འབྱེད་པ་གཉིས་ཏེ། དེ་དག་གིས་ནི་མདོ་དགོངས་པ་ངེས་འགྲེལ་ལ་སོགས་པ་གཏན་ལ་འབེབས་པའི་ཕྱིར་རོ། །གསུམ་པ་དྲང་བའི་
དོན་དང་ངེས་པའི་དོན་གྱི་མདོ་སྡེ་སྣ་ཚོགས་གཏན་ལ་འབེབས་པ་ནི་མདོ་སྡེ་རྒྱན་ཏེ། འདིས་ནི་གཞིའི་དུས་སུ་རིགས་ཆད་ཀྱི་སེམས་ཅན་ཡོད་པར་བཤད་པ་དང༌། ལམ་གྱི་དུས་སུ་ཆོས་ཐམས་ཅད་སྐྱེ་བ་མེད་པར་གཏན་ལ་འབེབས་པའི་མདོ་དྲང་བའི་དོན་དུ་སྟོན་པ་དང༌། འབྲས་བུའི་དུས་

སུ་མཐར་ཐུག་ཐེག་པ་གཅིག་ཏུ་ངེས་པ་དྲང་བའི་དོན་དུ་བསྟན་ནས་མཐར་ཐུག་ཐེག་པ་གསུམ་དུ་བསྟན་པ་རྣམས་ཀྱིས་དྲང་བའི་དོན་གྱི་མདོ་སྡེ་གཏན་ལ་འབེབས་པའི་ཕྱིར་དང༌། གཞིའི་དུས་སུ་སེམས་ཅན་ཐམས་ཅད་དེ་བཞིན་གཤེགས་པའི་སྙིང་པོ་ཅན་དུ་བསྟན་པ་དང༌། ལམ་གྱི་དུས་
སུ་ཕ་རོལ་ཏུ་ཕྱིན་པ་དྲུག་དང༌། བསྡུ་བའི་དངོས་པོ་བཞིའི་སྤྱོད་པ་དང༌། འབྲས་བུའི་དུས་སུ་སྐུ་གསུམ་དང་ཡེ་ཤེས་བཞིའི་རྣམ་པར་གཞག་པ་སྟོན་པ་རྣམས་ཀྱིས་ངེས་དོན་གྱི་མདོ་སྡེ་གཏན་ལ་འབེབས་པའི་ཕྱིར་རོ། །གཉིས་པ་ཇི་ལྟར་གཏན་ལ་འབེབས་པའི་ཚུལ་བྱེ་བྲག་ཏུ་བཤད་པ་
ནི། མདོ་སྡེ་རྒྱན་གྱིས་ཐེག་པ་ཆེན་པོའི་དྲང་བའི་དོན་དང་ངེས་པའི་དོན་གྱི་མདོ་སྡེ་དུ་མའི་དོན་ཐམས་ཅད་དཔེ་ལྔས་མཚོན་པའི་དོན་རྣམ་པ་ལྔའི་དབང་དུ་བྱས་ནས་བསྟན་པ་ཡིན་ཏེ། དེའང་རྒྱན་གྱི་རྒྱ་ཆེར་བཤད་པ་ལས་བསྒྲུབ་པར་བྱ་བ་དང༌། བྱེ་བྲག་ཏུ་ཤེས་པར་བྱ་བ་དང༌། བསམ་
པར་བྱ་བ་དང༌། བསམ་གྱིས་མི་ཁྱབ་པ་དང༌། ཡོངས་སུ་གྲུབ་པ་རྟོགས་པའི་དོན་སོ་སོ་རང་གིས་རིག་པར་བྱ་བ་དང༌། བྱང་ཆུབ་ཀྱི་ཕྱོགས་དང་མཐུན་པའི་ངོ་བོ་ཉིད་དོ་ཞེས་དང༌། དེའི་འགྲེལ་བཤད་ལས་འདིར་ནི་ཐེག་པ་ཆེན་པོར་དངོས་པོ་ལྔ་པོ་དང༌། ངོ་བོ་ཉིད་གསུམ་དང༌། གང་
ཟག་རྣམ་པར་གཞག་པ་སྟེ་རྣམ་པ་གསུམ་གྱིས་འགྲེལ་ཏོ། །དེ་ལ་དངོས་པོ་ལྔ་གང་ཞེ་ན། མིང་དང༌། རྒྱུ་མཚན་དང༌། རྣམ་པར་རྟོག་པ་དང༌། དེ་བཞིན་ཉིད་དང༌། རྣམ་པར་མི་རྟོག་པའི་ཡེ་ཤེས་སོ་ཞེས་སོགས་རྒྱ་ཆེར་གསུངས་ཤིང་ངོ་བོ་ཉིད་གསུམ་ནི་ཀུན་བརྟག་དང་གཞན་དབང་
དང་ཡོངས་གྲུབ་གསུམ་མོ། །དཔེ་ལྔའི་རྩ་བར། ཇི་སྐད་དུ། གསེར་ལས་བརྡུང་བྱས་འདྲ་ཞིང་པདྨ་རྒྱས་པ་བཞིན། །བཀྲེས་པས་ཉེན་པ་གཡོས་ལེགས་ཁ་ཟས་ཟ་བ་འདྲ། །ཕྲིན་ཡིག་ལེགས་པ་ཐོས་འདྲ་རིན་ཆེན་སྒྲོམ་ཕྱེ་ལྟར། །ཆོས་དེ་འདིར་བཤད་པ་ཡང་དགའ་བའི་
མཆོག་བསྐྱེད་དོ། །ཞེས་འབྱུང་བ་བཞིན་དུ་ཚིགས་སུ་བཅད་པ་རིང་ཐུང་སྣ་ཚོགས་པར་སྤེལ་བའི་གཞུང་གི་ཚད་བམ་པོ་གཉིས། ལེའུ་ཉི་ཤུ་རྩ་གཅིག་གི་བདག་ཉིད་དུ་བཞུགས་པའི་ལེའུ་དང་པོས་སྤྱིར་བསྟན། ལེའུ་གཉིས་པས་ཐེག་པ་ཆེན་པོ་བཀར་སྒྲུབ་པ་དང༌། གསུམ་པས་

སྐྱབས་སུ་འགྲོ་བ་དང༌། བཞི་པས་རིགས་བསྟན་པ་དང༌། ལྔ་པས་སེམས་བསྐྱེད་པ་དང༌། དྲུག་པས་བསྒྲུབ་པ་དང༌། བདུན་པས་དེ་ཁོ་ན་ཉིད་དང༌། བརྒྱད་པས་མཐུ་དང༌། དགུ་པས་ཡོངས་སུ་སྨིན་པ་དང༌། བཅུ་པས་བྱང་ཆུབ་དང༌། བཅུ་གཅིག་པས་མོས་པ་
དང༌། བཅུ་གཉིས་པས་ཡོངས་སུ་ཚོལ་བ་དང༌། བཅུ་གསུམ་པས་བཤད་པ་དང༌། བཅུ་བཞི་པས་བསྒྲུབ་པ་དང༌། བཅོ་ལྔ་པས་གདམས་ངག་རྗེས་སུ་བསྟན་པ་དང༌། བཅུ་དྲུག་པས་ཐབས་དང་ལྡན་པའི་ལས་དང༌། བཅུ་བདུན་པས་ཕ་རོལ་ཏུ་ཕྱིན་པ་དང་བསྡུ་བ་དང༌། བཅོ་བརྒྱད་པས་
མཆོད་པ་དང་བསྙེན་པ་ཚད་མེད་དང༌། བཅུ་དགུ་པས་བྱང་ཆུབ་ཀྱི་ཕྱོགས་དང་མཐུན་པ་དང༌། ཉི་ཤུ་པས་ཡོན་ཏན་དང༌། ཉེར་གཅིག་པས་སྤྱོད་པ་དང་མཐར་ཐུག་བསྟན་པ་རྣམས་སོ། །དབུས་དང་མཐའ་རྣམ་པར་འབྱེད་པ་ནི། མཐའ་ཞེས་བྱ་བ་ནི་ཡོད་མེད་དང༌། རྟག་ཆད་ཀྱི་ལྟ་བའོ། །
དབུས་ཞེས་བྱ་བ་ནི་དེ་ཉིད་སྤངས་པ་དབུ་མའི་ལམ་སྟེ། དེ་དག་རྣམ་པར་འབྱེད་པས་ན་དེ་སྐད་ཅེས་བྱ་ཞིང༌། འདིས་ནི་ཐེག་པ་ཐུན་མོང་བའི་ལམ་གྱི་རིམ་པ་དང༌། ཐེག་པ་ཆེན་པོ་ཐུན་མོང་མ་ཡིན་པའི་ལམ་གྱི་རིམ་པ་དོན་བདུན་གྱི་སྒོ་ནས་བསྟན་པ་སྟེ། དེ་ཡང༌། མཚན་ཉིད་སྒྲིབ་པ་དེ་ཁོ་ན། །
གཉེན་པོ་དག་ནི་བསྒོམ་པ་དང༌། །དེ་ཡི་གནས་དང་འབྲས་བུ་ཐོབ། །ཐེག་པ་བླ་ན་མེད་པའོ། །ཞེས་འབྱུང་བ་ལྟར་ཚིགས་སུ་བཅད་པ་གཞུང་གི་ཚད་ལེའུ་ལྔ་ལ་ཤླཽ་ཀ་བདུན་ཅུ་ཡོད་པའི་ལེའུ་དང་པོས་མཚན་ཉིད་དང༌། གཉིས་པས་སྒྲིབ་པ་དང༌། གསུམ་པས་དེ་ཁོ་ན་ཉིད་དང༌། བཞི་པས་གཉེན་
པོ་སྒོམ་པ་དང༌། ལྔ་པས་བླ་ན་མེད་པ་དང་བཅས་པའོ། །ཆོས་དང་ཆོས་ཉིད་རྣམ་པར་འབྱེད་པ་ནི། ཆོས་ནི་ཀུན་ནས་ཉོན་མོངས་པ་འཁོར་བའི་ཆོས་སོ། །ཆོས་ཉིད་ནི་མྱ་ངན་ལས་འདས་པའི་ཆོས་ཏེ་དེ་གཉིས་ཀྱི་རྣམ་པར་དབྱེ་བ་རབ་ཏུ་སྟོན་པས་ན་དེ་སྐད་ཅེས་བྱ་སྟེ། ཇི་སྐད་དུ། འདི་དག་ཐམས་
ཅད་ནི་གཉིས་ཀྱིས་བསྡུས་ཏེ།ཆོས་དང་ཆོས་ཉིད་ཀྱིས་སོ། །ཆོས་ཀྱིས་ཉེ་བར་མཚོན་པ་ནི་འཁོར་བའོ། །འདི་ཉིད་ཀྱིས་ཉེ་བར་མཚོན་པ་ནི་ཐེག་པ་གསུམ་གྱིས་མྱ་ངན་ལས་འདས་པའོ་ཞེས་འབྱུང་བ་ལྟར་ཚིག་ལྷུག་པར་འདོད་པའོ། །རྒྱུད་བླ་མ་ནི། གཞུང་འདི་ཉིད་ཀྱི་སྐད་དོད་དུ་ཨུཏྟ་ར་ཞེས་

འབྱུང་བ་མཆོག་དང༌། བླ་མ་དང༌། བྱང་དང༌། ཕྱི་མ་རྣམས་སུ་འཇུག་སྟེ། དེའང་ཐེག་པ་ཆེན་པོའི་རྒྱུད་དམ། རྒྱུན་ཆགས་པའི་ཆོས་རྣམས་ཀྱི་གོང་མར་གྱུར་པས་སམ། ཡང་ན་ཐེག་པ་ཆེན་པོའི་རྒྱུད་ཕྱི་མའི་དགོངས་པ་འགྲེལ་པས་དེ་སྐད་ཅེས་བྱ་ཞིང༌། འདིས་ནི་སྔར་སྨོས་པའི་
མདོ་སྡེ་དེ་རྣམས་ཀྱིས་དོན་རྡོ་རྗེའི་གནས་བདུན་དུ་བསྡུས་ནས་སྟོན་པ་སྟེ། ཇི་སྐད་དུ། སངས་རྒྱས་ཆོས་ཚོགས་ཁམས་དང་བྱང་ཆུབ་དང༌། །ཡོན་ཏན་སངས་རྒྱས་ཕྲིན་ལས་ཐ་མ་སྟེ། །བསྟན་བཅོས་ཀུན་གྱི་ལུས་ནི་མདོར་བསྡུ་ན། །རྡོ་རྗེ་ཡི་ནི་གནས་བདུན་འདི་དག་གོ །ཞེས་
འབྱུང་བ་ལྟར་ཚིགས་སུ་བཅད་པ་རིང་ཐུང་སྣ་ཚོགས་ཡོད་པ་སྐབས་བཞིའི་སྐབས་དང་པོས་དཀོན་མཆོག་གསུམ་དང༌། ཁམས་བདེ་བར་གཤེགས་པའི་སྙིང་པོ་དང༌། སྐབས་གཉིས་པས་འབྲས་བུ་བྱང་ཆུབ་དང༌། སྐབས་གསུམ་པས་ཡོན་ཏན་དྲུག་ཅུ་རྩ་བཞི་དང༌། སྐབས་
བཞི་པས་ཕྲིན་ལས་དང༌། སྐབས་ལྔ་པས་ཇི་སྐད་བསྒྲགས་པའི་གནས་བཞི་པོ་དག་ལ་ལྷག་པར་མོས་པ་རྣམས་ཀྱིས་ལྷག་པར་མོས་པའི་ཕན་ཡོན་བསྟན་པ་དང་བཤད་པ། མཇུག་གི་དོན་བསྟན་བཅོས་བརྩམས་པའི་ཚུལ། བདག་ཉིད་དག་པའི་ཐབས་བསྟན་པ། ཉམས་པའི་རྒྱུ་དང་
འབྲས་བུ་བསྟན་པ། བརྩམས་པའི་དགེ་བ་བསྔོ་བ་བསྡུས་པའི་དོན་དང་བཅས་པ་རྣམས་བསྟན་ཏོ། །དེ་ལྟར་བཤད་པ་དེ་དག་གི་སྟེང་དུ་མངོན་པར་རྟོགས་པའི་རྒྱན་བསྣན་པ་ལ་བྱམས་པའི་ཆོས་ལྔ་ཞེས་བྱའོ། །དེ་དག་དང་རྗེས་སུ་འབྲངས་པའི་འཕགས་པ་ཐོགས་མེད་ཀྱིས་མཛད་པའི་ཆོས་བདུན་
ལས་ས་སྡེ་ལྔ་ནི་རྩ་བ་ལྟ་བུ་ཡིན་ལ། དེ་དག་ལས་སའི་དངོས་གཞིས་ནི་གང་ཟག་གཅིག་འཚང་རྒྱ་བའི་ཆ་རྐྱེན་ཐམས་ཅད་ས་བཅུ་བདུན་དུ་བསྡུས་ནས་སྟོན་པ་སྟེ། དེ་ཉིད་ལས་འབྱུང་བའི་སྤྱི་སྡོམ་དུ། རྣམ་ཤེས་ལྔ་དང་ལྡན་པའི་ས། །ཡིད་ཀྱི་ས་དང་གཞན་གསུམ་སྟེ། །རྟོག་དཔྱོད་
བཅས་ལ་སོགས་པ་དང༌། །ཏིང་འཛིན་བཅས་དང་མ་ཡིན་དང༌། །སེམས་ཡོད་པ་དང་སེམས་མེད་དང༌། །ཐོས་དང་བསམ་དང་བསྒོམ་ལྡན་དང༌། །དེ་བཞིན་ཐེག་པ་གསུམ་ལྡན་དང༌། །ཕུང་པོར་བཅས་དང་ཕུང་མེད་གཞན། །ཞེས་གསུངས་པ་ལྟར་བཅུ་བདུན་པོ་དེ་ཡང་རྟེན་དང༌།

སྤྱོད་པ་དང༌། འབྲས་བུ་གསུམ་གྱི་དབང་དུ་མཛད་པ་ཡིན་ཏེ། དེ་ཡང་རྟེན་གྱི་རང་བཞིན་གྱི་དབང་དུ་བྱས་ནས་ས་དང་པོ་གཉིས་ཏེ། ཉམས་སུ་ལེན་པའི་རྟེན་དེ་ཡང་རྣམ་པར་ཤེས་པ་ཚོགས་བརྒྱད་ཀྱི་རྒྱུན་ལ་འཇོག་དགོས་པའི་ཕྱིར་རོ། །ཇི་ལྟར་འཇུག་པའི་དབང་དུ་
བྱས་ནས་རྟོག་དཔྱོད་དང་བཅས་པ་ལ་སོགས་པའི་ས་གསུམ་སྟེ། རྟེན་དེ་ཡང་བསམ་གཏན་དང་པོའི་དངོས་གཞི་ཙམ་པོ་མན་ཆད་དུ་རྟོག་པ་དང་བཅས་པ་དང༌། དཔྱོད་པ་དང་བཅས་པའི་སྒོ་ནས་འཇུག་པ་དང༌། ཁྱད་པར་ཅན་གྱི་དུས་སུ་རྟོག་པ་མེད་ཅིང་དཔྱོད་པ་ཙམ་དང་བཅས་པའི་སྒོ་ནས་
འཇུག་པ་དང༌། བསམ་གཏན་གཉིས་པ་མན་ཆད་དུ་རྟོག་པ་མེད་པ་དང༌། དཔྱོད་པ་མེད་པའི་སྒོ་ནས་འཇུག་པའི་ཕྱིར་རོ། །དེའི་གནས་སྐབས་ཀྱི་དབང་དུ་བྱས་ནས་ཏིང་ངེ་འཛིན་དང་བཅས་པ་ལ་སོགས་པའི་ས་བཞི་སྟེ། རྟེན་དེ་ཉིད་གཟུགས་དང་གཟུགས་མེད་པ་ན་ཏིང་ངེ་འཛིན་དང་བཅས་པ་
དང༌། འདོད་པ་ན་ཏིང་ངེ་འཛིན་དང་བཅས་པ་མ་ཡིན་པ་དང༌། སྙོམས་པར་འཇུག་པ་གཉིས་ལ་སོགས་པའི་གནས་སྐབས་ན་སེམས་མེད་པ་དང༌། དེ་ལས་གཞན་དུ་ནི་སེམས་ཡོད་པའི་ཕྱིར་རོ། །གོ་རིམ་གྱི་དབང་དུ་བྱས་ནས་ཐོས་པ་དང༌། བསམ་པ་དང༌། བསྒོམ་པའི་ས་གསུམ་སྟེ།
དེ་གསུམ་ལ་འཇུག་པ་ན་རིམ་མིན་དུ་ནི་ནམ་ཡང་མ་ཡིན་པའི་ཕྱིར་རོ། །གང་ཐོབ་པའི་དབང་དུ་བྱས་ནས་གནས་སྐབས་ཀྱི་འབྲས་བུ་ཉན་ཐོས་ལ་སོགས་པའི་ས་གསུམ་སྟེ། ཐོབ་པར་བྱ་བའི་ཐེག་པ་ནི་གསུམ་པོ་དེར་མ་འདུས་པ་མེད་པའི་ཕྱིར་རོ། །དེ་ལ་འགྲོ་བའམ་འདོང་བའི་དབང་དུ་
བྱས་ནས་ས་ལྷག་མ་གཉིས་པོ་སྟེ། དེ་ལྟ་བུའི་རྟེན་དེ་ཡང་མཐར་ཐུག་ཐེག་པ་གསུམ་གྱི་འབྲས་བུ་ཕུང་པོ་ལྷག་བཅས་དང༌། ལྷག་མ་མེད་པའི་མྱ་ངན་ལས་འདས་པ་གཉིས་སུ་འགྲོ་བའི་ཕྱིར་རོ། །དེ་སྐད་དུ་ཡང༌། སའི་སྟོད་འགྲེལ་དུ། རང་བཞིན་དུ་ནི་ཇི་ལྟར་འཇུག །དེ་ལ་དེ་
ཡི་གནས་སྐབས་དང༌། །གོ་རིམ་དང་ནི་གང་ཐོབ་དང༌། །དེ་ལ་དེ་ནི་འགྲོ་བ་ཡིན། །ཞེས་སོ། །རྣམ་པར་གཏན་ལ་དབབ་པ་བསྡུ་བས་ནི་སའི་དངོས་གཞིའི་འགྲེལ་པ་ལྟ་བུར་བྱེད་པར་ཡང་གསུངས་ཏེ། དེའི་གནས་སྐབས་ཀྱི་ཚིག་དོན་གཉིས་ཀ་མུ་བཞི་ལ་སོགས་པར་གཏན་ལ་

དབབ་པར་བསྟན་ལ། དེའི་ནང་ནས་ཀྱང་ཀུན་ནས་ཉོན་མོངས་པ་དང༌། རྣམ་པར་བྱང་བའི་ཆོས་ཀྱི་རྣམ་གྲངས་བསྟན་པ་ཡིན་ནོ། །དེ་ལྟར་བཤད་མ་ཐག་པ་གཉིས་པོ་དེས་ནི་གསུང་རབ་རྣམས་ཀྱི་བརྗོད་པར་བྱ་བའི་དོན་གྱི་ཆ་གཏན་ལ་འབེབས་པར་བྱེད་པ་ཡིན་ནོ། །གཞི་བསྡུ་བས་ནི་
རྗོད་པར་བྱེད་པའི་གཞུང་དེ་དག་སྡེ་སྣོད་གསུམ་དུ་བསྡུ་བའི་ཚུལ་བསྟན་པ་སྟེ། འདི་ཉིད་ཀྱི་མདོར་བསྟན་པའི་སྐབས་སུ་སྡེ་སྣོད་གསུམ་ག་བསྡུ་བ་འབྱུང་བ་སྨོས་ནས། རྒྱས་པར་བཤད་པ་ན་མདོ་སྡེ་དང༌། འདུལ་བ་གཉིས་ལས་མི་འབྱུང་བ་ནི་ས་སྡེ་ལྔ་ཀ་མ་མོའི་བསྡུ་བ་ཡིན་པས་ལོགས་
སུ་མ་བསྟན་པ་ཡིན་ཏེ། ཇི་སྐད་དུ། དེ་ལ་མ་མོ་བསྡུ་བ་ནི། ས་བཅུ་བདུན་དང་བསྡུ་བ་བཞིའོ་ཞེས་འབྱུང་བས་སོ། །རྣམ་གྲངས་བསྡུ་བ་ནི། ཀུན་ནས་ཉོན་མོངས་པ་དང་རྣམ་པར་བྱང་བའི་ཆོས་ཀྱི་རྣམ་གྲངས་བྱེ་བྲག་ཏུ་གཏན་ལ་འབེབས་པ་སྟེ། འདི་གཉིས་ཀྱི་གསུང་རབ་
རྣམས་ཀྱི་རྗོད་པར་བྱེད་པའི་ཚིག་གི་ཆ་གཏན་ལ་འབེབས་པར་བྱེད་པ་ཡིན་ནོ། །རྣམ་པར་བཤད་པའི་སྒོ་བསྡུ་བས་ནི་དེ་དག་ཇི་ལྟར་འཆད་པའི་ཚུལ་སྟོན་པ་སྟེ། དེ་ལྟར་ན་གསུང་རབ་རྣམས་ཀྱི་བརྗོད་བྱ་དང་རྗོད་བྱེད་དང༌། ཇི་ལྟར་བཤད་པའི་ཚུལ་སྟོན་པའི་དབང་གིས་ས་སྡེ་ལྔའོ། །
སྡོམ་རྣམ་པ་གཉིས་ལས་མངོན་པ་ཀུན་ལས་བཏུས་ནི་ཐེག་པ་ཐུན་མོང་བའི་སྡོམ་ཡིན་ཏེ། ཉན་ཐོས་པ་དང་ཐུན་མོང་དུ་ཕྱི་རོལ་གྱི་རྣམ་པར་གཞག་པ་དང༌། རྣལ་འབྱོར་སྤྱོད་པ་དང༌། ཐུན་མོང་དུ་མཚན་ཉིད་རྣམ་པ་གསུམ་དང༌། རྣམ་པར་ཤེས་པ་ཚོགས་བརྒྱད་ལ་སོགས་པའི་རྣམ་
པར་གཞག་པ་གསུངས་པའི་ཕྱིར་ཏེ། འདིས་བརྗོད་བྱ་ནི་མཚན་ཉིད་ཀུན་ལས་བཏུས་པ་དང༌། བདེན་པ་རྣམ་པར་ངེས་པ་དང༌། ཆོས་རྣམ་པར་ངེས་པ་དང༌། ཐོབ་པ་རྣམ་པར་ངེས་པ་དང༌། འབེལ་གཏམ་རྣམ་པར་ངེས་པ་སྟེ་ལྔར་བསྡུས་ནས་སྟོན་པ་ཡིན་ནོ། །ཐེག་པ་ཆེན་པོ་
བསྡུས་པ་ནི། ཐེག་པ་ཆེན་པོ་ཐུན་མོང་མ་ཡིན་པའི་སྡོམ་ཡིན་ཏེ། དེ་ནས་བསྟན་པའི་ཤེས་བྱའི་གནས་ལ་སོགས་པ་དེ་རྣམས་རྣལ་འབྱོར་སྤྱོད་པའི་ལུགས་ཀྱི་གཞི་ལམ་འབྲས་བུའི་རྣམ་པར་གཞག་པ་ཁོ་ན་ཡིན་ཏེ། དེ་ཡང༌། ཤེས་བྱའི་གནས་དང་མཚན་ཉིད་དེར་འཇུག་དང༌། །དེ་

ཡི་རྒྱུ་འབྲས་དེ་རབ་དབྱེ་བ་དང༌། །བསླབ་པ་གསུམ་དང་དེ་འབྲས་སྤང་བ་དང༌། །ཡེ་ཤེས་ཐེག་པ་མཆོག་གྱུར་ཁྱད་པར་འཕགས། །ཞེས་པའི་དོན་རྣམ་པ་བཅུར་བསྡུས་ནས་སྟོན་པའི་ཕྱིར་རོ། །དེའི་འོག་ཏུ་དབྱིག་གཉེན་གྱིས་རང་རྒྱུད་དུ་བརྩམས་པའི་བསྟན་
བཅོས་ལྔ་དང་གཞན་འགྲེལ་ཊཱི་ཀར་བརྩམས་པ་གསུམ་སྟེ། རབ་ཏུ་བྱེད་པ་སྡེ་བརྒྱད་བརྩམས་པ་ནི། ཆོས་ཐམས་ཅད་སེམས་ཙམ་དུ་སྟོན་པ་སུམ་ཅུ་པའི་རབ་ཏུ་བྱེད་པ་སྟེ། འདིས་ནི་ཆོས་དང་གང་ཟག་གི་འགྲོ་བ་ཐམས་ཅད་གྱུར་པ་གསུམ་དུ་བསྡུས་ནས་བདག་མེད་པ་གཉིས་བསྟན་པའི་
ཕྱིར་རོ། །དེ་རིགས་པས་སྒྲུབ་པ་ཉི་ཤུ་པའི་རབ་ཏུ་བྱེད་པ་སྟེ། སྣང་བ་ཐམས་ཅད་སེམས་ཡིན་པའི་སྒྲུབ་བྱེད་བསྟན་པའི་ཕྱིར་རོ། །དེ་ལྟར་ཆོས་ཐམས་ཅད་སེམས་ཡིན་ན་ཕུང་པོ་ལྔའི་རྣམ་པར་གཞག་པ་མི་འཐད་པར་འགྱུར་རོ་ཞེ་ན། དེ་འཐད་པར་སྟོན་པ་ཕུང་པོ་ལྔའི་རབ་ཏུ་བྱེད་པའོ། །
དེ་ལྟར་ཡིན་ཡང་བཤད་པ་དང་ཉན་པའི་བྱ་བ་འཐད་པར་སྟོན་པ་རྣམ་པར་བཤད་པའི་རིགས་པའོ། །སྒོ་གསུམ་གྱི་ལས་འཐད་པར་སྟོན་པ་ལས་སྒྲུབ་པའི་རབ་ཏུ་བྱེད་པ་སྟེ་དེ་ལྟར་ལྔའོ། །རང་དོན་དུ་ཕ་རོལ་ཏུ་ཕྱིན་པ་དྲུག་དང༌། གཞན་དོན་དུ་བསྡུ་བའི་དངོས་པོ་བཞིའི་སྤྱོད་པ་འཐད་པར་སྟོན་པ།
མདོ་སྡེ་རྒྱན་གྱི་འགྲེལ་པ། རྟེན་ཅིང་འབྲེལ་པར་འབྱུང་བ་བཅུ་གཉིས་འཐད་པར་སྟོན་པ་རྟེན་འབྲེལ་གྱི་མདོའི་འགྲེལ་པ། མཚན་ཉིད་གསུམ་འཐད་པར་སྟོན་པ་དབུས་དང་མཐའ་རྣམ་པར་འབྱེད་པའི་འགྲེལ་པ་དང་གསུམ་སྟེ་བརྒྱད་དོ། །ཁ་ཅིག་སློབ་དཔོན་འདིས་མཛད་པའི་ཆོས་
དང་ཆོས་ཉིད་རྣམ་པར་འབྱེད་པའི་འགྲེལ་པ་དང༌། ས་བཅུ་པའི་འགྲེལ་པ་ལ་སོགས་པ་མང་དུ་མཛད་པས་སྡེ་བརྒྱད་ཀྱི་གྲངས་ངེས་མེད་ཅེས་དང༌། གཞན་ཡང་འཕགས་པ་ཐོགས་མེད་ཀྱིས་མཛད་པའི་རྒྱུད་བླ་མའི་འགྲེལ་པ་སོགས་ཀྱང་བགྲང་དུ་རུང་སྟེ། བྱམས་པ་དང་འབྲེལ་པའི་
ཆོས་ཉི་ཤུའི་གྲངས་ངེས་མི་རིགས་པར་ཡང་སྨྲ་བ་ཡོད་དོ། །གཉིས་པ་སྤྱོད་པའི་ཆ་གསལ་བར་བྱེད་པའི་བསྟན་བཅོས་ནི་བྱང་ཆུབ་སེམས་དཔའི་སྡོམ་པ་ཉི་ཤུ་པ་ལ་སོགས་པ་ལྟ་བུའོ། །གཉིས་པ་སྔགས་ཀྱི་ཐེག་པའི་དགོངས་པ་འགྲེལ་བའི་བསྟན་བཅོས་ལ། རྒྱུད་འགྲེལ་བའི་ཐབས་

ཀྱི་གདམས་ངག་གི་རྣམ་གྲངས་སྤྱིར་བསྟན་པ་དང༌། སྐབས་སུ་བབས་པའི་རྒྱུད་ཀྱི་རྣམ་འགྲེལ་དཔེར་མཚོན་པའོ། །དང་པོ་ལ་སྤྱིར་རྒྱུད་སྡེ་རིན་པོ་ཆེ་འགྲེལ་བའམ་བཤད་པའི་ཐབས་ཀྱི་གདམས་ངག་བསམ་གྱིས་མི་ཁྱབ་ནའང་ཕལ་ཆེར་རྣམ་པ་དྲུག་ཏུ་འདུ་བར་བཞེད་དོ། །དེའང་
འདི་ལྟ་སྟེ། གདམས་ངག་དྲུག་གིས་བཤད་པ་དང༌། རྒྱུད་གསུམ་གྱིས་བཤད་པ་དང༌། བདག་ཉིད་ཅན་གསུམ་གྱིས་བཤད་པ་དང༌། གནས་པ་བཞིས་བཤད་པ་དང༌། དག་པ་གསུམ་གྱིས་བཤད་པ་དང༌། གསང་བ་བདུན་གྱིས་བཤད་པའོ། །དང་པོ་ནི། འགྲེལ་པ་པོས་འགྲེལ་སླ་ཞིང་
ཉན་པ་པོ་རྣམས་ཀྱིས་ཀྱང་རྟོགས་པར་སླ་བའི་ཕྱིར་གདམས་ངག་དྲུག་གིས་བཤད་པ་སྟེ། དེའང་གང་བརྗོད་པར་བྱ་བའི་དོན་བཤད་པར་བྱ་བའི་མན་ངག་ནི་སྤྱིའི་དོན་དུ་བཤད་པ་དང༌། སྦས་པའི་དོན་དུ་བཤད་པ་དང༌། མཐར་ཐུག་པའི་དོན་དུ་བཤད་པ་སྟེ་གསུམ་དང༌། དེ་རྗོད་པར་བྱེད་
པའི་སྒྲ་ནི་ཡན་ལག་གི་དོན་གྱིས་བཤད་པ་དང༌། ཡི་གེའི་དོན་གྱིས་བཤད་པ་དང༌། མན་ངག་གི་དོན་གྱིས་བཤད་པ་སྟེ་གསུམ་མོ། །དེ་ལྟར་ཡང་དཔལ་ནམ་མཁའ་དང་མཉམ་པའི་རྒྱུད་ལས། ཡི་གེ་དང་ནི་ཡན་ལག་དང༌། །བསྡུས་པའི་དོན་དང་སྤྱི་ཡི་དོན། །སྦས་དང་དེ་བཞིན་མཐར་ཐུག་པར། །
རྒྱུད་རྣམས་ངེས་པ་ཁོ་ན་ཡིན། །ཞེས་སོ། །དེ་ལ་སྤྱིའི་དོན་ཞེས་བྱ་བ་ནི་གཉིས་ཀའི་ཐུན་མོང་དུ་གྱུར་པ་སྟེ། དེ་ལའང་ཕ་རོལ་ཏུ་ཕྱིན་པའི་ཐེག་པའི་སྤྱི་ནི། དེ་ནས་བཤད་པའི་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་དང༌། ལམ་ལྔ་དང༌། ས་བཅུ་ལ་སོགས་པ་སྟེ། དེ་དག་ནི་ཕ་རོལ་ཏུ་ཕྱིན་
པའི་ལམ་ལ་ཞུགས་པ་རྣམས་ཀྱིས་དེ་དག་དང་མི་མཐུན་པའི་འགྱོད་པ་བསལ་བའི་ཕྱིར་དང༌། གསང་བ་སྔགས་ཀྱི་གཞུང་གིས་བརྗོད་བྱ་ཉིད་དུའང་བསྟན་པའི་ཕྱིར་དེ་སྐད་ཅེས་བྱའོ། །བསྐྱེད་པའི་རིམ་པ་སྤྱི་ནི་བུམ་པའི་དབང་དང་རྗེས་སུ་འབྲེལ་བ་ཡན་ལག་དང་བཅས་པ་སྟེ། འདི་ནི་མཆོག་གི་
དངོས་གྲུབ་སྒྲུབ་པ་དང་ཐུན་མོང་གི་དངོས་གྲུབ་སྒྲུབ་པ་གཉིས་ཀས་སློབ་པའི་ཕྱིར་དེ་སྐད་ཅེས་བྱའོ། །དེ་ལྟར་ཡང་ཡེ་ཤེས་རྡོ་རྗེ་ཀུན་ལས་བཏུས་པའི་རྒྱུད་ལས། ངོ་མཚར་གྱི་རྡོ་རྗེའི་ཚིག་ཐོས་ནས་སྨོད་པར་བྱེད་པ་དེ་རྣམས་ལ་མི་འགལ་བའི་སྒོ་ནས་བཤད་པ་ནི་སྤྱིའི་དོན་ཏོ་ཞེས་དང༌། སློབ་དཔོན་

ཟླ་བ་གྲགས་པས་ཀྱང༌། མདོ་སོགས་ལ་ནི་རབ་ཞུགས་པའི། །འགྱོད་པ་ཟློག་པར་བྱེད་པ་དང༌། །བསྐྱེད་པའི་རིམ་དང་ལྡན་པ་དག །སྤྱི་ཡི་དོན་ནི་ཡིན་པར་བཤད། །ཅེས་སོ། །སྦས་པའི་དོན་ཞེས་བྱ་བ་ནི། བུམ་པའི་དབང་ཐོབ་པ་ཙམ་ལ་མ་གྲགས་ཤིང་
མཆོག་དབང་གོང་མ་གསུམ་ཐོབ་པ་ཁོ་ནའི་ཡུལ་དུ་གྱུར་པའི་ཕྱིར་དེ་སྐད་ཅེས་བྱ་སྟེ། དེ་ལའང་ཐབས་ཀྱི་ཁྱད་པར་ལ་ལྟོས་ནས་རང་བྱིན་གྱིས་བརླབས་པའི་སྦས་པ་ཞེས་བྱ་བ་དང༌། དཀྱིལ་འཁོར་འཁོར་ལོའི་སྦས་པ་ཞེས་བྱ་བ་གཉིས་ཏེ། ཀྱེ་རྡོ་རྗེ་ལས། དཀྱིལ་འཁོར་འཁོར་ལོའི་ཐབས་
དང་ནི། །རང་བྱིན་བརླབས་པའི་རིམ་པས་ཀྱང༌། །ཀུན་རྫོབ་དོན་དམ་ཚུལ་ཅན་གྱིས། །བྱང་ཆུབ་སེམས་ནི་རབ་ཏུ་བསྐྱེད། །ཅེས་སོ། །མཐར་ཐུག་པའི་དོན་ཞེས་བྱ་བ་ནི་ལམ་གང་ཡིན་པ་དེས་མངོན་པར་བསྒྲུབས་པའི་འབྲས་བུར་གྱུར་པ་སྟེ། དེ་ལའང་སྤྱིའི་མཐར་ཐུག་པ་ནི་ཐུན་མོང་
བའི་འབྲས་བུ་ཀུན་དུ་འོད་ཀྱི་ས་དང༌། སྦས་པའི་མཐར་ཐུག་པ་ནི་གསང་སྔགས་བླ་ན་མེད་པའི་འབྲས་བུ་རྡོ་རྗེ་འཛིན་པའི་ས་ཉིད་དེ། འདི་ནས་བཤད་པའི་སྐུ་དང་ཡེ་ཤེས་དང་ཤེས་བྱ་ཐམས་ཅད་རང་སྣང་དུ་མཁྱེན་པའི་ཚུལ་ལ་སོགས་པ་ཕ་རོལ་ཏུ་ཕྱིན་པའི་གཞུང་ནས་མ་བཤད་པའི་ཁྱད་
པར་མང་དུ་འབྱུང་བའི་ཕྱིར་མཐར་ཐུག་པ་མཚན་ཉིད་པ་ནི་འདི་ཡིན་གྱི། སྔ་མ་ནི་མཐར་ཐུག་པ་དངོས་ཉིད་མ་ཡིན་ནའང་དེ་དང་ཉེ་བའི་ཕྱིར་དེ་སྐད་དུ་བཏགས་པ་སྟེ། དཔེར་ན་མངོན་པར་རྟོགས་པའི་རྒྱན་ལས། ས་དགུ་འདས་ནས་ཡེ་ཤེས་ནི། །གང་གིས་སངས་རྒྱས་སར་གནས་པ། །དེ་ནི་
བྱང་ཆུབ་སེམས་དཔའི་ས། །བཅུ་པ་ཡིན་པར་ཤེས་པར་བྱ། །ཞེས་ས་བཅུ་པ་ཉིད་ལ་སངས་རྒྱས་ཀྱི་སར་བཏགས་པ་ལྟ་བུའོ། །དེ་དག་རྗོད་པར་བྱེད་པའི་སྒྲ་ཡན་ལག་གི་དོན་གྱིས་བཤད་པ་ནི། གཞུང་གིས་དངོས་སུ་བསྟན་པའི་མིང་དང་ཚིག་གི་རྗེས་སུ་འབྲང་ནས། འཇིག་རྟེན་ན་གྲགས་
པའི་མིང་དང༌། བསྟན་བཅོས་ལས་གྲགས་པའི་མིང་དང༌། དེ་དག་འཇུག་པའི་རྒྱུ་མཚན་ངེས་པའི་ཚིག་ཡོད་པ་དང་མེད་པ་སྐབས་དང་བསྟུན་པའི་བཤད་པ་རྣམས་དང༌། དེ་ཉིད་འདུས་པར་གྱུར་པའི་ཚིག་གིས་གཞུང་གི་དོན་རྟོགས་པར་དཀའ་བའི་གནས་རྣམས་སུ་ཚིག་གི་འབྱེད་སྡུད་དང་བྱ་བ་དང་བྱེད་

པ་དང་ལས་ཀྱི་ཚིག་ལ་སོགས་པས་རྣམ་པར་ཕྱེ་ནས་སེང་གེའི་ལྟ་སྟངས་དང༌། སྦལ་པའི་འཕར་བ་དང༌། རུས་སྦལ་གྱི་བཞི་འགྲོས་དང༌། སྟག་མོའི་མཆོང་སྟབས་ཞེས་བྱ་བ་སྟེ་རྣམ་པ་བཞིའི་སྒོ་ནས་གཞུང་གི་ཚིག་དོན་གཏན་ལ་ཕེབས་པར་འཆད་པའམ། ཡང་ན། དགོས་པ་བསྡུས་པའི་དོན་བཅས་
དང༌། །ཚིག་དོན་བཅས་དང་མཚམས་སྦྱོར་བཅས། །བརྒལ་ལན་བཅས་ཏེ་བསྙད་པར་བྱ། །ཞེས་བྱ་བ་ལྟ་བུའི་ཚུལ་གྱིས་རྣམ་པར་འགྲེལ་བའོ། །ཡི་གེའི་དོན་གྱིས་བཤད་པ་ནི། གཞུང་ཚིག་གིས་རྒྱུ་མཚན་དངོས་སུ་མི་རྙེད་ཀྱང་ཡི་གེ་སོ་སོར་བྱས་པས་དོན་རྟོགས་པར་འགྱུར་བ་དག་ལ་ནི་ཡི་གེའི་སྒྲ་ལས་
དྲངས་ཏེ་བཤད་པ་དང༌། ཡི་གེ་ཁ་ཕྲལ་ཏེ་བཤད་པ་དང༌། ཡི་གེ་དབྱིབས་མཐུན་པར་བཤད་པའི་སྒོ་ནས་རྣམ་པར་འགྲེལ་བའོ། །བསྡུས་པའི་དོན་གྱིས་མན་ངག་གིས་བཤད་པ་ནི། ཡན་ལག་དང་ཡི་གེ་གཉིས་ཀས་བཤད་དུ་མི་བཏུབ་པ་དེ་བཞིན་གཤེགས་པ་རྣམས་ཀྱིས་མཛད་པའི་བརྡར་གྱུར་པ་མཐའ་དག་
བསྡུས་པའི་དོན་གྱིས་རྣམ་པར་བཤད་པས་རྟོགས་པར་འགྱུར་བ་གང་ཡིན་པ་སྟེ། སློབ་དཔོན་ཟླ་བ་གྲགས་པས། ཀོ་ཊ་ཀྵ་ལ་སོགས་པའི་སྒྲ། །འཇིག་རྟེན་བསྟན་བཅོས་ལ་མེད་ཅིང༌། །དེ་བཞིན་གཤེགས་པའི་བརྡར་གྱུར་པ། །འདི་ནི་ཇི་བཞིན་མིན་པར་བརྗོད། །ཅེས་པ་ལྟ་བུའོ། །དེ་ལྟ་བུའི་བཤད་པར་བྱ་བ་
མཐར་ཐུག་པ་དག་གཅིག་ཏུ་བྱས་པའི་ཚེ་ལྔའམ་སོ་སོར་བྱས་པའི་ཚེ་དྲུག་ཏུ་འགྱུར་བ་ལ། འཆད་པར་བྱེད་པ་གསུམ་གྱིས་འཆད་པའི་ཚེ་ན་མན་ངག་བཅོ་ལྔའམ་བཅོ་བརྒྱད་གང་ཡང་རུང་བ་རེ་འབྱུང་བ་ཡིན་ནོ། །གཞན་ཡང་ཡེ་ཤེས་རྡོ་རྗེ་ཀུན་ལས་བཏུས་པའི་རྒྱུད་ལས། མཐའ་དྲུག་གི་བཤད་པ་ཞེས་
གསུངས་པའི་ལུགས་ཀྱི་གདམས་ངག་ནི་འདི་ཉིད་དེ། བརྗོད་བྱ་སྤྱིའི་དོན་གཉིས་སུ་ཡན་ལག་གི་དོན་གྱིས་བཤད་པ་ན་སྒྲ་ཇི་བཞིན་པའི་བཤད་པར་འགྱུར་རོ། །སྦས་པའི་དོན་དུ་ཡན་ལག་གི་དོན་གྱིས་བཤད་པ་ན། ངེས་པའི་དོན་གྱི་བཤད་པར་འགྱུར་རོ། །མཐར་ཐུག་པའི་དོན་དུ་ཡན་ལག་གི་དོན་གྱིས་བཤད་པ་ན་
དགོངས་པ་ཅན་མ་ཡིན་པའི་བཤད་པར་འགྱུར་རོ། །སྤྱིའི་དོན་གཉིས་སུ་ཡི་གེ་དང་མན་ངག་གིས་བཤད་པ་ན་སྒྲ་ཇི་བཞིན་མ་ཡིན་པའི་བཤད་པར་འགྱུར་རོ། །སྦས་པའི་དོན་དུ་དེ་གཉིས་ཀྱིས་བཤད་ན་དྲང་བའི་དོན་གྱི་བཤད་པར་འགྱུར་རོ། །མཐར་ཐུག་པའི་དོན་དུ་དེ་གཉིས་ཀྱིས་བཤད་ན་དགོངས་པ་ཅན་གྱི་བཤད་པར་

འགྱུར་ཏེ་དེ་ལྟར་མཐའ་དྲུག་གོ །ཡང་ཡི་གེའི་དོན་དང༌། སྤྱིའི་དོན་དང༌། སྦས་པའི་དོན་དང༌། མཐར་ཐུག་པའི་དོན་ཏེ་བཞི་པོ་ལ་ཚུལ་བཞི་ཞེས་པའི་ཐ་སྙད་འབྱུང་སྟེ་བཤད་པའི་ཚུལ་འདི་དག་ཀྱང་གདམས་ངག་དྲུག་གི་ནང་དུ་འདུ་བར་འགྱུར་རོ། །དེ་ལྟ་བུའི་བཤད་ཐབས་དེ་དག་
གིས་རྒྱུད་འགྲེལ་བའི་ཚུལ་ཡང༌། གཞུང་གི་ཚིག་དོན་ལ་སྐབས་ཁ་ཅིག་ཏུ་ནི་སྤྱིའི་དོན་དང༌། ཁ་ཅིག་ཏུ་ནི་སྦས་པའི་དོན་དང༌། ཁ་ཅིག་ཏུ་ནི་མཐར་ཐུག་པའི་དོན་དུ་སྟེ་གང་རྗོད་པར་བྱེད་པའི་སྒྲ་ནི་ཡན་ལག་གི་དོན་གཙོ་ཆེ་ཞིང་གཞན་གཉིས་ཀྱང་སྐབས་ཀྱི་སྟོབས་ཀྱིས་ཅུང་ཟད་རེ་འཇུག་པ་དང་བཅས་ཏེ་
བཤད་པ་ནི་ཡན་ལག་གི་དོན་གྱི་བཤད་པའམ། ཡི་གེའི་དོན་གྱི་བཤད་པའམ། གཞུང་ཐད་སོའི་བཤད་པའམ། ཡོངས་སུ་གྲགས་པའི་བཤད་པ་ཞེས་བྱའོ། །ཁྱད་པར་གཞུང་གི་ཚིག་འགའ་ཞིག་ཏུ། གང་ཟག་ཕ་རོལ་ཏུ་ཕྱིན་པ་དང་མཐུན་པ་ལ་དགའ་བ་དང༌། བསྐྱེད་པའི་རིམ་པ་ལ་དགའ་བ་
རྣམས་ལ་སྤྱི་ལྟར་ཡང་བཤད་དོ། །ཟབ་མོ་ལ་མོས་པ་རང་གི་ལུས་ལ་དགའ་བ་དང་ཆགས་ཅན་ཕྱག་རྒྱའི་རྣལ་འབྱོར་ལ་དགའ་བ་རྣམས་ལ་ཙཎྜ་ལཱི་དང་དཀྱིལ་འཁོར་འཁོར་ལོ་ལྟར་ཡང་བཤད་དོ། །རྟོགས་པ་དང་ལྡན་པ་སྤྱི་བློས་མོས་པ་ཡུལ་དུ་བྱ་བའི་ཕྱིར་དང་རྟོགས་པ་དང་ལྡན་པ་ཡེ་ཤེས་དཔེའི་ཚུལ་
གྱིས་རྟོགས་པར་བྱ་བའི་ཕྱིར་མཐར་ཐུག་པའི་དོན་དུ་བཤད་པ་སྟེ་དེ་དག་ནི་རྒྱུད་དོན་ཡིད་བཞིན་གྱི་ནོར་བུ་ལྟ་བུའི་བཤད་པ་ཞེས་བྱ་བ་སྟེ། འདི་ནི་འཇིགས་བྲལ་རྣལ་འབྱོར་གྱི་དབང་ཕྱུག་ཆེན་པོ་བརྒྱུད་པ་དང་བཅས་པ་རྣམས་ཀྱི་བཤད་སྲོལ་ཐུན་མོང་མ་ཡིན་པར་འདོད་དོ། །གཉིས་པ་ནི། སེམས་ཀྱི་རྒྱུད་རྒྱུན་ཆགས་པ་ཞིག་
གཏན་ལ་དབབ་པ་ལ་དགོངས་ནས་རྒྱུད་གསུམ་གྱིས་བཤད་པ་སྟེ། གསང་བ་འདུས་པ་ལས། རྒྱུད་ནི་རྒྱུན་ཆགས་ཞེས་བྱ་སྟེ། །རྒྱུན་དེ་རྣམ་པ་གསུམ་དུ་འགྱུར། །གཞི་དང་དེ་ཡི་རང་བཞིན་དང༌། །མི་འཕྲོགས་པ་ཡིས་རབ་ཕྱེ་བའོ། །རང་བཞིན་རྣམ་པ་རྒྱུ་ཡིན་ཏེ། །གཞི་ནི་ཐབས་ཞེས་བྱ་བ་ཡིན། །དེ་བཞིན་མི་འཕྲོགས་
འབྲས་བུ་སྟེ། །གསུམ་གྱིས་རྒྱུད་ཀྱི་དོན་བསྡུས་པའོ། །ཞེས་གསུངས་པ་ལྟར་ཏེ། དེའང་རྒྱུའི་རྒྱུད་ནི་སེམས་ཅན་ཐམས་ཅད་ཀྱི་ཆོས་ཉིད་རང་བཞིན་གྱིས་རྣམ་པར་དག་པ་དང་ཆོས་ཅན་ཕུང་པོ་དང་ཁམས་དང་སྐྱེ་མཆེད་ཀྱི་ཆོས་སམ་ལུས་དང་ངག་དང་ཡིད་ཀྱི་ཆོས་ཇི་ལྟར་གནས་པ་རྣམས་སོ། །ཐབས་ཀྱི་རྒྱུད་ནི་

སྨིན་པར་བྱེད་པའི་དབང་དང་གྲོལ་བར་བྱེད་པའི་ལམ་འཁོར་དང་བཅས་པ་རྣམས་སོ། །འབྲས་བུའི་རྒྱུད་ནི་ཐབས་དེ་ལ་གོམས་པར་བྱས་པས་མཆོག་དང་ཐུན་མོང་གི་དངོས་གྲུབ་གྲུབ་པར་གྱུར་པ་གང་ཡིན་པ་སྟེ། གཞི་དང་ལམ་དང་འབྲས་བུའི་རྒྱུད་ཀྱི་མངོན་པར་རྟོགས་པ་གསུམ་དུ་རྒྱུད་ཀྱི་ཚིག་དོན་མ་ལུས་
པ་བསྡུས་ནས་གང་ཟག་གཅིག་འཚང་རྒྱ་བའི་ཉམས་ལེན་དུ་སྦྱར་བའི་བཤད་པ་སྟེ། ཚུལ་འདིས་ཀྱང་རྒྱུད་གསུམ་པོ་གནས་སྐབས་གང་དང་གང་དུ་བབ་པར་དེ་དང་དེར་འགྲེལ་བ་དང༌། ཚིག་འགའ་ཞིག་ཏུ་རྒྱུད་གསུམ་དང་ལྡན་པར་འགྲེལ་པ་གཉིས་ཀ་འབྱུང་བ་ཡིན་ནོ། །གསུམ་པ་ནི། དབང་ལམ་དུ་བྱ་བའི་ཕྱིར་
བདག་ཉིད་ཅན་གསུམ་གྱིས་བཤད་པ་སྟེ། ནམ་མཁའ་དང་མཉམ་པའི་རྒྱུད་ལས། སྔགས་དང་དབྱིབས་དང་ཆོས་བདག་ཉིད། །སྦྱོར་བ་རྣམ་པ་གསུམ་གྱིས་ནི། །སྲིད་པའི་ཉེས་པས་མི་གོས་ཤིང༌། །རྒྱུད་ཀྱི་དོན་ལ་འཇུག་པར་བྱ། །ཞེས་གསུངས་པའི་དོན་ནི་ལུས་དང་ངག་དང་སེམས་དང་རླུང་སྟེ་རྒྱུ་རྣམ་པ་བཞི་ཡོད་པ་དང༌།
དེ་བཞིན་དུ་དབང་བཞི་དང་ལམ་བཞི་དང་འབྲས་བུ་བཞི་ཡོད་པས་རིམ་པ་ལྟར་དབྱིབས་ཀྱི་བདག་ཉིད་དང༌། སྔགས་ཀྱི་བདག་ཉིད་དང༌། དབང་ཆོས་ཀྱི་བདག་ཉིད་དང༌། མཐར་ཐུག་ཆོས་ཀྱི་བདག་ཉིད་དེ་རྣམ་པ་བཞིར་འགྱུར་ནའང་དབང་ཆོས་དང་མཐར་ཐུག་ཆོས་གཉིས་གཅིག་ཏུ་བྱས་པའི་བདག་ཉིད་ཅན་གསུམ་སྟེ། དེ་དག་གིས་
རྒྱུད་འགྲེལ་པ་ལའང་བདག་ཉིད་ཅན་གསུམ་གང་དུ་བབ་པའི་སྐབས་སོ་སོར་བཤད་པ་དང༌། སྔགས་དང་དབྱིབས་དང་ཆོས་གསུམ་ཚང་བའི་ཚིག་རེ་རེ་ལའང་རྒྱུ་དང་དབང་དང་ལམ་དང་འབྲས་བུར་སྦྱར་ཏེ་བཤད་པས་བཤད་པའི་ཐབས་བཅུ་གཉིས་སམ་ཆོས་གཉིས་སོ་སོར་བྱས་པ་ན། བཅུ་དྲུག་ཏུ་བཤད་
པར་ཡང་འགྱུར་རོ། །བཞི་པ་ནི། འབྲས་བུ་སྐུ་བཞི་ལམ་དུ་བྱ་བའི་ཕྱིར་གནས་པ་བཞིས་བཤད་པ་སྟེ། དཔལ་ནམ་མཁའ་དང་མཉམ་པ་ལས། གོང་བུ་ཆུ་དང་གཟུགས་སུ་བཅས། །དེ་བཞིན་གཟུགས་ལས་འདས་པ་དང༌། །གནས་པ་རྣམ་པ་བཞི་རུ་ནི། །རྒྱུད་རྣམས་ངེས་པ་ཁོ་ན་ཡིན། །ཞེས་གསུངས་པ་ལྟར་ལོངས་
སྤྱོད་རྫོགས་པའི་སྐུ་ནི་གོང་བུར་གནས་པ་དང༌། ཆོས་ཀྱི་སྐུ་ནི་ཆུར་གནས་པ་དང༌། སྤྲུལ་པའི་སྐུ་ནི་གཟུགས་སུ་གནས་པ་དང༌། ངོ་བོ་ཉིད་ཀྱི་སྐུ་ནི་གཟུགས་ལས་འདས་པར་གནས་པ་སྟེ། འབྲས་བུ་གནས་པ་བཞི་ཡིན་པ་ལྟར་སྦྱང་གཞི་ལའང་མངལ་སྐྱེས་ཀྱི་འགྲོ་བའི་དབང་དུ་བྱས་ན་ཉིང་མཚམས་སྦྱོར་བ་དང༌།

མངལ་གྱི་གནས་སྐབས་ལྔ་དང༌། འཚོ་བའི་གནས་སྐབས་དང༌། འཆི་བའི་གནས་སྐབས་ཏེ་གནས་པ་བཞི་དང༌། དེ་བཞིན་དུ་གསང་དབང་དང་རང་བྱིན་གྱིས་བརླབས་པ་ལ་སོགས་པའི་སྨིན་པར་བྱེད་པ་དང་གྲོལ་བར་བྱེད་པ་དག་ལའང་གནས་པ་བཞི་སྟེ། ལམ་བཞི་པོའི་ནང་གསེས་
ཀུན་དུ་ཡང་གནས་པ་བཞི་བཞི་ཡིན་ནོ། །འདི་དག་གིས་རྒྱུད་འགྲེལ་བ་ལའང་གནས་པ་བཞིའི་སྒོ་ནས་གཞུང་ཚིག་སོ་སོའི་སྐབས་སུ་བཤད་པ་ལས། ཚིག་རེ་ལ་གནས་པ་བཞི་བཞི་སྦྱར་བ་མེད་ཀྱང་རྒྱུ་དང་ལམ་དང་འབྲས་བུའི་གནས་པ་གསུམ་གཞུང་ཚིག་གཅིག་ལ་སྦྱར་དུ་མི་རུང་བ་མེད་པའི་ཕྱིར་རོ། །
ལྔ་པ་ནི། སྤང་བྱ་མི་མཐུན་པའི་ཕྱོགས་སྤང་བའི་ཕྱིར་དག་པ་གསུམ་གྱིས་བཤད་པ་སྟེ། ཀྱེ་རྡོ་རྗེ་ལས། ངེས་པར་དངོས་པོ་ཐམས་ཅད་ཀྱི། །དག་པ་དེ་བཞིན་ཉིད་དུ་བརྗོད། །ཕྱི་ནས་རེ་རེའི་དབྱེ་བ་ཡིས། །ལྷ་རྣམས་ཀྱིས་ནི་བརྗོད་པར་བྱ། །རང་རིག་བདག་ཉིད་དག་པ་ཉིད། །དག་
པ་གཞན་གྱི་རྣམ་གྲོལ་ཡིན། །ཞེས་པ་སྟེ། རྒྱུའི་རྒྱུད་ངོ་བོ་ཉིད་ཀྱི་དག་པ་གསུམ་དང༌། ཐབས་ཀྱི་རྒྱུད་དྲི་མ་སྦྱོང་བྱེད་ཀྱི་དག་པ་གསུམ་དང༌། འབྲས་བུའི་རྒྱུད་དྲི་མ་དང་བྲལ་བའི་དག་པ་གསུམ་སྟེ། འདི་དག་གིས་རྒྱུད་འགྲེལ་བའི་ཚུལ་ཡང་རྒྱུད་གསུམ་སོ་སོའི་ཐད་སོར་བཤད་པ་ལས་ཚིག་རེ་
ལ་དག་པ་གསུམ་ག་སྦྱར་དུ་མི་བཏུབ་ནའང་ཚིག་རེ་ལ་རྒྱུད་གསུམ་ཚང་བ་ཉིད་དུ་བཤད་པར་བྱ་བ་ཡིན་ནོ། །དྲུག་པ་ནི། སྣོད་དང་མི་ལྡན་པ་ལ་གབ་ཅིང་གསང་བའི་དོན་དུ་གསང་བ་བདུན་གྱིས་བཤད་པ་ནི། དཔལ་ཡང་དག་པར་སྦྱོར་བའི་རྒྱུད་ལས། གསང་བ་ནི་མི་གསལ་བའོ། །གསང་བ་ནི་དེ་ཁོ་ན་ཉིད་མདོར་
བསྟན་པའོ། །གསང་བ་ནི་ས་བོན་ལྔའོ། །གསང་བ་ནི་དམ་པའི་དངོས་པོ་སྦས་པའོ། །གསང་བ་ནི་གསང་བའི་པདྨའོ། །གསང་བ་ནི་ལྟེ་བའི་དགའ་བའོ། །གསང་བ་ནི་ཐམས་ཅད་དུ་འགྲོ་བ་བསྡུས་པའོ། །གསང་བ་ནི་བདེ་བ་མཐའ་ཡས་པ་སྟེ་རྒྱུད་ཀྱི་གཞུང་གི་བཤད་པའོ་ཞེས་
གསུངས་སོ། །དེའང་འདིར་གསང་བ་བརྒྱད་དུ་གསུངས་ཀྱང༌། རྒྱུད་དེ་ཉིད་ལས། གསང་བའི་སྒྲ་ནི་བདུན་པ་སྟེ། བརྒྱད་པ་ནི་བརྗོད་དུ་མེད་པའི་མཚན་ཉིད་དོ་ཞེས་གསུངས་པས། ཐོག་མ་དང་ཐ་མའི་གསང་བ་གཉིས་རྟོགས་བྱ་དང་རྟོགས་པ་གཉིས་གནས་ལུགས་ལ་ངོ་བོ་དབྱེར་མེད་པའི་

ཕྱིར་གསང་བ་བདུན་དུ་ངེས་པ་སྟེ། དེ་དག་ཀྱང་རིམ་པ་ལྟར་སྨིན་པར་བྱེད་པ་དང༌། བསྐྱེད་པའི་རིམ་པ་དང༌། རྟོགས་པའི་ལྟ་བ་དང༌། ཕོ་ཉ་དང༌། རང་བྱིན་གྱིས་བརླབས་པ་དང༌། ལམ་གྱི་ཡན་ལག་རྣམས་བསྟན་ཏེ། འདི་དག་གིས་རྒྱུད་འགྲེལ་བའི་ཚུལ་ཡང་གཞུང་ཐམས་ཅད་གནས་
སྐབས་གང་དང་གང་དུ་འབྲེལ་བར་ཐད་སོར་བཤད་པ་ཁོ་ན་ལས་མི་འབྱུང་བ་ཡིན་ནོ། །དེ་ལྟ་བུའི་བཤད་པའི་ཐབས་འདི་དག་དང༌། སློབ་དཔོན་མི་ཐུབ་ཟླ་བའི་རྒྱུད་དོན་ཡན་ལག་ལྔའི་བཤད་པ་ཞེས་བྱ་བ་དང༌། གསང་བ་འདུས་པའི་བསྙེན་སྒྲུབ་ཡན་ལག་ཏུ་བཅས་པ་དང༌། བདེ་
མཆོག་ཉུང་ངུའི་གསང་བ་རྣམ་པ་གསུམ་རྣམས་ཕལ་ཆེར་མཚུངས་པར་བཤད་དོ། །གཞན་ཡང་ཡེ་ཤེས་རྡོ་རྗེ་ཀུན་ལས་བཏུས་པའི་རྒྱུད་ལས་རྒྱན་བདུན་ཞེས་བཤད་པའི་ནང་གསེས་ཀྱི་མཐའ་དྲུག་དང་ཚུལ་བཞི་ཞེས་པའི་བཤད་པའི་སྲོལ་རྣམས་ཀྱང་གདམས་ངག་འདི་དག་ཏུ་དོན་
གྱིས་མ་འདུས་པ་མེད་པར་གསུངས་སོ། །དེ་དག་གིས་ནི་རྒྱུད་སྡེ་རིན་པོ་ཆེ་སྤྱིར་འགྲེལ་བའི་ཚུལ་གྱི་རྣམ་པར་གཞག་པ་ཅུང་ཟད་ཅིག་བསྟན་པ་ཡིན་ལ། བྱེ་བྲག་ཏུ་ནང་གསེས་ཀྱི་རྒྱུད་སྡེ་རིན་པོ་ཆེ་རེ་རེ་ལའང་ཐབས་ཀྱི་རྒྱུད་དང༌། ཤེས་རབ་ཀྱི་རྒྱུད་དང༌། གཉིས་སུ་མེད་པའི་རྒྱུད་དང༌།
དེ་བཞིན་དུ་བྱ་བའི་རྒྱུད་དང༌། སྤྱོད་པའི་རྒྱུད་དང༌། རྣལ་འབྱོར་གྱི་རྒྱུད་ལ་སོགས་པ་རྒྱུད་སྡེ་ཐ་དད་པའི་རྗེས་སུ་འབྲངས་ནས་རྣམ་པར་འགྲེལ་པའི་ཚུལ་ཐ་དད་པ་ཤིན་ཏུ་མང་བར་འབྱུང་སྟེ། དེ་དག་ནི་འདིར་བཤད་ཀྱིས་ལྡང་བ་མེད་པའི་ཕྱིར། རྒྱུད་ཀྱི་རྣམ་འགྲེལ་སོ་སོའི་སྟེང་དུ་
ལེགས་པར་བརྟགས་པས་ཤེས་པར་འགྱུར་རོ། །གཉིས་པ་སྐབས་སུ་བབ་པའི་རྒྱུད་ཀྱི་རྣམ་འགྲེལ་དཔེར་མཚོན་པ་ནི། དེ་ལྟར་ཇི་སྐད་བཤད་པའི་རྒྱུད་དོན་འགྲེལ་པར་བྱེད་པའི་མན་ངག་དེ་དག་ཅི་རིགས་པ་ལ་བརྟེན་ནས་ཟབ་པ་དང་རྒྱ་ཆེ་བའི་རྒྱུད་དོན་རྣམ་པར་བཀྲལ་བའི་
བསྟན་བཅོས་རྣལ་འབྱོར་བླ་ན་མེད་པའི་སྐོར་ལ། གཉིས་སུ་མེད་པའི་རྒྱུད་ཀྱི་རྒྱལ་པོ་ཀྱེ་རྡོ་རྗེ་རྩ་བའི་རྒྱུད་དང༌། བཤད་པའི་རྒྱུད་ཀྱི་འགྲེལ་པ་བྱང་ཆུབ་སེམས་དཔའ་ཕྱག་ན་རྡོ་རྗེས་མཛད་པ་དང༌། དཀའ་འགྲེལ་པདྨ་ཅན་དང༌། ཀཽ་མུ་ཏི་ལ་སོགས་པ་དང༌། རྡོ་རྗེ་གུར་

ཀྱི་དཀའ་འགྲེལ་དང༌། སཾ་པུ་ཊའི་འགྲེལ་པ་མན་ངག་གི་སྙེ་མ་ལ་སོགས་པ་དང༌། དུས་ཀྱི་འཁོར་ལོའི་འགྲེལ་པ་དྲི་མ་མེད་པའི་འོད་ལ་སོགས་པ་ལྟ་བུའོ། །ཤེས་རབ་ཀྱི་རྒྱུད་ལ་བདེ་མཆོག་རྩ་བའི་རྒྱུད་ཀྱི་སྟོད་འགྲེལ་བྱང་ཆུབ་སེམས་དཔའ་
ཕྱག་ན་རྡོ་རྗེས་མཛད་པ་དང༌། དཀའ་འགྲེལ་རིན་པོ་ཆེའི་ཚོགས་དང༌། དཔའ་བོ་ཡིད་འོང་དང༌། མཁའ་འགྲོ་རྒྱ་མཚོའི་རྒྱུད་འགྲེལ་ལ་སོགས་པ་ལྟ་བུའོ། །ཐབས་ཀྱི་རྒྱུད་ལ་གསང་བ་འདུས་པ་འཕགས་པའི་སྐོར་ལ་རྒྱུད་འགྲེལ་སྒྲོན་མ་གསལ་བ་དང༌། སྦྱོར་བ་ཡན་
ལག་དྲུག་པའི་འགྲེལ་པ་ལ་སོགས་པ་དང༌། ཡེ་ཤེས་ཞབས་ཀྱི་སྐོར་ལ་རྒྱུད་འགྲེལ་སློབ་མ་ལ་ཕན་པ་ལ་སོགས་པ་ལྟ་བུ་སྟེ། དེ་དག་སྤྱིའི་དགོངས་འགྲེལ་དུ་གྱུར་པ་སྒྲུབ་པའི་ཐབས་དང་དཀྱིལ་འཁོར་གྱི་ཆོ་ག་ཡན་ལག་དང་བཅས་པ་རྣམས་ལྟ་བུའོ། །རྒྱུད་སྡེ་འོག་མའི་སྐོར་
ལ་རྣལ་འབྱོར་གྱི་རྒྱུད་ལ་དེ་ཁོ་ན་ཉིད་བསྡུས་པའི་རྒྱ་ཆེར་བཤད་པ་ལ་སོགས་པ་དང༌། སྤྱོད་པའི་རྒྱུད་ལ་རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་ཀྱི་འགྲེལ་པ་ལ་སོགས་པ་དང༌། བྱ་བའི་རྒྱུད་ལ་བསམ་གཏན་ཕྱི་མའི་རྒྱུད་ཀྱི་འགྲེལ་པ་ལ་སོགས་པ་རྒྱུད་སོ་སོ་དང་སྤྱིའི་འགྲེལ་
པ་སྒྲུབ་པའི་ཐབས་དང་དཀྱིལ་འཁོར་གྱི་ཆོ་ག་ཡན་ལག་དང་བཅས་པ་རྣམས་ལྟ་བུའོ། །དེ་དག་གིས་ནི་བཀའ་ལུང་གི་དགོངས་པ་རྣམ་པར་འགྲེལ་བའི་རྣམ་པར་གཞག་པ་ལ་སོགས་པ་མདོ་ཙམ་རེ་ཞིག་བརྗོད་ཟིན་ཏོ། །འདིར་སྨྲས་པ། སྲིད་<*ཤླཽ་ཀ་དགུ་པོ་ཟུང་ལྡན་གྱི་རྒྱན་གྱི་བྱེ་བྲག་ལས་འབྱུང་བ།>ཞིར་བཀྲ་ཤིས་སྒྲུབ་པ་ཆོས་ཀྱི་དབྱངས། །
དབྱངས་མཆོག་དཀྱིལ་འཁོར་རྫོགས་པའི་གདངས་ཉིད་དུ། །དུ་མའི་མོས་པར་ཐ་དད་སྟོན་པའི་མཆོག །མཆཾོག་གི་ཡོན་ཏན་མཐར་ཕྱིན་ཤཱཀྱའི་གཙོ། །གཙོ་བོ་འཇིག་རྟེན་གཙོ་བོས་ཕྱག་བྱས་པའི། །གསུང་རབ་གཉིས་མེད་གསུང་དང་དགོངས་
གཅིག་ཏུ། །ཇི་བཞིན་སྒྲ་དང་ཇིཾ་བཞིན་མིན་པ་སོགས། །ལེགས་པར་མཁྱེན་དོན་ལེགས་འདོམས་རྒྱལ་བའི་སྲས། །བདེན་མཐོང་རང་སྟོབས་ཤིང་རྟའི་སྲོལ་ཕྱེའམ། །གཞན་གྱི་གཞུང་དོན་ལ་བརྟེན་འགྲེལ་ཡང་རུང༌། །ཐམས་ཅད་ཤེས་བྱའི་གནས་ཀུན་འཆད་པ་ལ། །ཐམས་

ཅད་མཁྱེན་པ་ཉིད་དང་མཚུངས་པར་སྨྲ། །སྨྲ་མཆོག་སྨྲ་བའི་ཉི་མ་གང་དག་གིས། །ལེགས་བཤད་ལེགས་པར་གདམས་པའི་སྣང་བ་ཆེ། །འཇཾག་རྟེན་འཇཾག་རྟེན་འདས་པའི་ངོ་མཚར་འཕྲུལ། །ཇི་སྙེད་ཇཾ་བཞིན་སྟོན་པ་འདི་རྨད་བྱུང༌། །ཕྱོགས་བྲལ་བདེ་གཤེགས་
གཤེགས་པའི་ལམ་པོ་ཆེ། །རྣམ་གཉིས་དངོས་གྲུབ་གྲུབ་པའི་ཐུགས་ཀྱི་བཅུད། །ལྔ་རིག་མཁས་དབང་དབང་པོས་བཤད་བྱ་བ། །ལེགས་པའི་ལམ་འགྲོ་འགྲོ་བའི་མིག་འདི་ཡིན། །བརྒྱ་ལམ་སྐྱེ་བའི་ཕྲེང་བར་མཇལ་དཀའ་དཀའ། །མཇལ་བ་སྙིང་པོ་ཀུན་གྱིས་རབ་ལྕི་ལྕི། །མཆོག་
ཏུ་རྣམ་གྲོལ་སྙིང་པོས་ཆེས་བརླིང་བརླིང་། །སྦྱིན་འདི་ཐོབ་པའི་སྐལ་བ་རྨད་བྱུང་བྱུང༌། །ཡང་ཡང་སྐྱེ་བར་སྦྱངས་པའི་བློ་གྲོས་ཀྱིས། །གསལ་གསལ་ཡང་དག་རྟོགས་ནས་གསུངས་པའི་ཆོས། །ཡང་ཡང་དཔྱད་པ་གསུམ་གྱིས་དག་གྱུར་པ། །རང་རང་མོས་པ་བླངས་དོན་མི་ཆུང་
གྲང༌། །ཀུན་ཕན་གཞོན་ནུ་རྩེ་དགའ་དྲན་པ་ཡིས། །ཀུན་ནས་འོད་ཀྱི་སོར་མོ་རབ་བརྐྱངས་ནས། །ཀུནྡའི་འདབ་མ་ནས་བཟུང་འབྱེད་པའི་ཚེ། །ཀུན་དགའི་འཛུམ་བརྒྱ་གྲོལ་ལ་སུ་ཡིས་འགོག །སྨྲ་མཆོག་རྣམས་ཀྱི་བཀའ་དོན་བཀྲལ་བའི་ཚུལ། །ཚུལ་ལུགས་མང་
པོའི་ཁྱད་པར་མདོ་ཙམ་དུ། །དུ་མའི་ལུང་ལས་ཉེ་བར་འཕོས་པའི་དབྱངས། །དབྱངས་ཀྱི་རྒྱལ་མོའི་གླུ་ཡི་སྤུན་ཟླར་བླངས། །རྗོད་བྱེད་<*རབ་རྟོག་ལས་སེམས་ལྡན་རབ་རྟོག >སྙན་པའི་། གདངས་ལས་ཆོས་ཀྱི་དོན། །ཅི་ཡང་འདྲེན་པའི་མཚར་ལ་མ་བཟོད་པར། །ཡིད་འཕྲོག་སྒྲ་ངན་སྤངས་པ་མཐོ་རིས་སུ། །བྲོས་ཏེ་རང་གི་གླིང་བུར་
བཤུང་པ་འདྲ། །ཐམས་ཅད་མཁྱེན་པ་ཆེན་པོ་ཉི་མའི་གཉེན་གྱི་བཀའ་ལུང་སྤྱི་དང་བྱེ་བྲག་གི་དགོངས་དོན་རྣམ་པར་འགྲེལ་པའི་བསྟན་བཅོས་གངས་ཅན་པའི་སྐད་དུ་འགྱུར་རོ་འཚལ་གྱི་ཆོས་སྦྱིན་རྒྱུན་མི་ཆད་པའི་ངོ་མཚར་འཕྲུལ་གྱི་ཕྱི་མོ་རྫོགས་ལྡན་བསྐལ་
པའི་བསོད་ནམས་ཀྱི་སྤྲིན་ཕུང་རྒྱས་པར་དཀྲིགས་པའི་ཚུལ་ལས་བརྩམས་པའི་གཏམ་ངོ་མཚར་ཆུ་གཏེར་འཕེལ་བའི་ཟླ་བ་གསར་པ་ལས། འགྲེལ་ཚུལ་ངེས་པའི་ཆེད་དུ་བསྟན་བཅོས་ཀུན་གྱི་རྣམ་པར་གཞག་པའི་སརྒ་སྟེ་བཞི་པའོ།། །།

དྷརྨོཏྟརཱནནྡདདཱཏིལོཀེཏྱཱགོམཧཱརམྦྷམཧཱཙདྷཱིརཀྲྀཏྟེམཧཱསཏྭབཏཱིཛིནཱནཱཾཀརྨཱརྞབཱབཤྱབིཀུརྦཎཻཝཾ།
༄༅། །<ཡན་ལག་གཅིག་པའི་གཟུགས་ཅན།> ཆོས་མཆོག་ཀུན་དུ་དགའ་སྟེར་འཇིག་རྟེན་ན། །བརྟན་བྱེད་རྩོམ་པ་ཆེ་དང་གཏོང་བ་ཆེ། །སྙིང་སྟོབས་ཆེ་ལྡན་དེ་དག་རྒྱལ་རྣམས་ཀྱི། །ཕྲིན་ལས་རྒྱ་མཚོའི་རྣམ་འཕྲུལ་ངེས་པ་ཉིད། །

<*གཟུགས་ཅན་ལས་མ་བསྡུས་པ།>སྡེ་བཞིའི་སྙེ་མ་དུད་པའི་ཚལ་དུ་སྟོབས་ཀྱི་ཤིང་རྟར་ཡང་དག་འཛེགས། །བསྡུ་དངོས་བཞི་ཡི་འཁོར་ལོའི་འགྲོས་མཛེས་སྙིང་རྗེའི་གདུང་སྐྱོབ་དཀར་པོ་ཡིས། །འཇིག་རྟེན་ཁམས་སུ་རྫོགས་ལྡན་ཆོས་ཀྱི་གྲིབ་མ་ཡིད་དུ་འོང་འཇོ་བ། །ཆོས་དང་སྲིད་པར་དགེ་བའི་རྒྱལ་སྲིད་ཅིག་ཅར་སྐྱོང་བའི་
མི་བདག་ཡོད། །<མ་བསྡུས་པའི་གཟུགས་ཅན།>ཇེ་མཐོའི་རིགས་ཀྱི་ས་བོན་མ་རྨས་པ། །བདེ་བར་འགྲོ་བའི་ཞིང་སར་བཏབ་པ་ལས། །ལུས་ཅན་ཡོངས་ཀྱི་མཉེས་གཤིན་ཟླ་མེད་པའི། །སྐྱེས་བུ་དམ་པའི་ལོ་ཏོག་ཅི་ཡང་ལེགས། །<*ཡོན་ཏན་ལྷན་ཅིག་བརྗོད་པ་ལ་ཆོས་ཀྱི་དཔེས་བརླིང་བ།>དེ་དེའི་རྒྱུད་དུ་འབབ་སྟེགས་ལེགས་བྱས་པའི། །བཞིན
བཟང་ལང་ཚོ་གསར་བུའི་དཔལ་ཉིད་དང༌། །མཉམ་དུ་སྒྱུ་རྩལ་ཀུན་ལ་རབ་སྒྲིན་པའི། །གཏམ་སྙན་དང་པོའི་ཕོ་ཉ་བཞིན་དུ་རྒྱུ། །<*རྒྱུའི་རྒྱན་ལས་ཐོབ་པར་བྱེད་པ།>འགའ་ཞིག་རྣམ་པ་ཐམས་ཅད་མཁྱེན་པའི་རྒྱུ། །བློ་ལྡན་རྣམས་ཀྱི་འཇུག་ངོགས་ཤེས་
བྱའི་གནས། །གྲངས་མེད་སྤྲོ་བ་མཆོག་གིས་རབ་སྦྱངས་པས། །མཁས་དང་གྲུབ་པའི་རྩེ་མོར་མ་ཕྱིན་སུ། །<*རིག་བྱེད་ཀྱི་ལོ་རྒྱུས་ལས་དྲངས་པའི་མཐའ་དག་གཟུགས་ཅན།>ཟབ་བརླིང་གཞོན་ནུའི་བརྟུལ་ཞུགས་འཆང་བ་འགའ། །བསྟན་ཇུས་རྨ་བྱའི་ཐེག་པ་ལ་ཆིབས་ནས། །ལས་དབང་ཤ་ཟའི་མདུང་རྣོན་ཐོགས་པའི་
མདུན། །འཚེ་བྱེད་པ་སངས་སློབ་མས་ཅི་སྟེ་ཚུགས། །<*ཟོལ་བསྟོད་ལས་དཔའ་བ་ཕུན་སུམ་ཚོགས་པ།>རྣམ་འདྲེན་བསྟན་པ་སྐྱོང་བར་ཚེ་རིང་ལྷས། །བསྐོས་པའི་མི་བདག་ཁྱོད་ཀྱི་མཐུ་ཆེན་པོས། །མི་བདག་གཞན་གྱི་གྲགས་པ་ཟིལ་གནོན་པའི། །ཐུབ་ཆོད་ལས་འདི་ཆོས་ལ་རིགས་
སམ་ཅི། །<*གཟུགས་ཅན་ལས་མཐའ་དག་གཟུགས།>བསོད་ནམས་གསེར་གྱི་སྒོ་ངའི་སྦུབས་ཡངས་ནས། །ལེགས་འཁྲུངས་མི་ཡི་རྗེ་བོ་འཇིག་རྟེན་མགོཾན། །གཙུག་ལག་རིག་བྱེད་འཆད་པའི་དང་པོ་དེ། །ཆབ་སྲིད་འཇིག་རྟེན་མཛེས་པའི་དཔལ་དུ་བྱོན། །<*དོན་གཞན་བཀོད་པ་ལས་ཁྱད་པར་ལ་གནས་པ།>ལྷག་པའི་ལྷས་བསྐྱེད་བློ
གྲོས་དཀྱིལ་འཁོར་དུ། །རིག་པའི་གཞུང་བརྒྱ་སོང་ཡང་ཁེངས་པ་ཅི། །ཆེ་བའི་རྒྱ་མཚོ་ཉིད་དུ་དག་བྱེད་མ། །མཐའ་དག་ཕྱིན་པས་ངོམས་པ་ནམ་ཞིག་མཐོང༌། །<རྐང་པ་དང་པོ་དང་གསུམ་པར་ཡོད་པ་ཆོད་པའི་ཟུང་ལྡན།>རྒྱལ་བའི་ཕྲིན་

ལས་བར་ཆད་མེད་ས་བོན། །འཛམ་གླིང་ཡངས་མའི་མངལ་དུ་ལེགས་བཟུང་བ། །རྒྱལ་བའི་སྲས་སུ་ངེས་པར་ཟློས་པ་ལ། །བླ་མ་ཆེ་ཞེས་ཕྱོགས་ཀྱི་བློ་ལྡན་སྨྲ། །<*དགའ་བ་ལས་དངོས་ཐོབ།>འཇིག་རྟེན་ཀུན་དགའ་འབྱུང་བའི་ཕྲིན་ལས་ཀྱིས། །རྒྱ་མཚོའི་སྐ་རགས་ལྡན་པར་མཛེས་ཁྱོད་ནི། །
སྲིད་པས་ཐོབ་པའི་དགའ་བ་མཐའ་ཡས་འདི། །ཉིད་ལས་གཞན་པའི་དྲིན་གྱིས་ཅི་སྟེ་ཐོབ། །<*གཟུགས་ཅན་ལས་ལྡན་པ།>སྔ་ན་མེད་པའི་བདེ་སྐྱིད་མེ་ཏོག་འདབ། །འཛུམ་ལྡན་གྲགས་པ་དགེ་བའི་རྐང་དྲུག་གི །གླུ་སྙན་འབུམ་དུ་འབྱིན་པས་བོད་ཆེན་པོ། །ལེགས་ལྡན་དཔྱིད་ཀྱི་དཔལ་དེས་མཛེས་
པར་བྱས། །<*ལྡོག་པ་ཅན་ལས་གཉིས་ཀྱི་ལྡོག་པ།>ཆེ་བའི་ཁེངས་ལྡན་མང་པོའི་ཐོར་ཚུགས་རྩེ། །མཛེས་བྱེད་གང་གི་ཞབས་དང་རྩ་ལག་འཚོ། །དྲི་བཟང་ཁང་པ་དྲོད་ཀྱི་རེག་པས་རྙིངས། །ཁྱོད་ཞབས་མཛེས་པའི་ལང་ཚོ་ཡོལ་བ་མེད། །<*བསྙོན་དོར་ལས་ཆོས་ལ་བསྙོན་པ།>བཀའ་ལུང་ཡི་གེའི་གཟུགས་སུ་འཁྲུངས་པ་རེས། །འགྲོ་བའི་
མི་བདེ་བཅིལ་བ་སྔོན་ལས་མཐུ། །མ་ཡིན་ཟུག་རྔུ་ཐམས་ཅད་འབྱིན་བྱེད་པའི། །སྨན་མཆོག་སྟོང་གི་ཐིགས་པས་བྲན་པར་ངེས། །<*ཏིང་ངེ་འཛིན་གྱི་རབ་རྟོག་ལ་དཔེའི་རྒྱན་གྱིས་མཛེས་པ།>རྣམ་འབྱེད་བློ་གྲོས་འབར་བའི་ལྕེ་བཞིན་དུ། །གཡོ་བ་དེ་མཐོང་ཤེས་བྱའི་དངོས་པོ་དག །རང་གི་བརྟན་
པ་ཟ་ཕྱིར་གླལ་སྙམ་དུ། །སྐྲག་སྟེ་རང་བཞིན་མངོན་སུམ་བསྟན་པ་འདྲ། །<*རྒྱུའི་རྒྱན་ལས་རིགས་འབྲས།>ཕྱོགས་དང་ཕྱོགས་བྲལ་དག་གི་རྒྱལ་རིགས་ལ། །བསྔགས་པའི་སྙན་དངགས་གླུ་རུ་བླངས་རྣམས་ཀྱང༌། །འདི་ན་སྙིང་རྗེའི་བདག་ཉིད་བཞུགས་གང་གི །ཆེ་བའི་ཡོན་
ཏན་བརྗོད་པའི་འཕྲིན་དུ་བྱུང༌། །<*གཟུགས་ཅན་ལས་ལྡན་པ།>མི་དམན་བསོད་ནམས་ཡངས་པའི་དགའ་ཚལ་དུ། །སྲིད་གསུམ་འབྱོར་པ་ཡོངས་སུ་སྤུངས་པས་ཀྱང༌། །བྱེ་བ་བརྒྱ་སྟོང་ཆ་ཤས་ཕོད་མིན་པའི། །ལེགས་བྱས་ཆོས་ཀྱི་སྡོང་པོ་འདི་འཁྲུངས་སོ། །<*གཟུགས་ཅན་ལས་མི་མཉམ་པ།>མཐོང་བའི་ཆོས་ཀྱི་ཕན་པ་ཉི་ཚེ་ཡང༌། །ཆེ་བར་
སྒྲོ་བཏགས་ཚིག་གི་སྦུན་མ་དེ། །འུད་ཆེན་རླུང་གི་རྟ་ལ་བསྐྱོན་ནས་ནི། །བསྔགས་པ་དབྱངས་སུ་བརྗོད་དང་ཅི་ཞིག་མཚུངས། །<བཻ་དརྦྷའི་མཛེས་པའི་ཡོན་ཏན་བསྔགས་པ་ལ་སྦྱར་བ།>སེམས་རྒྱུད་ལ་ཞེན་རྣམ་པར་གནག་པའི་དྲི། །གཉེན་པོ་ཆུང་ངུ་ཡིས་ཀྱང་འཇིག་པའི་ཆོས། །

ལེགས་པར་བྱིན་པའི་བཀའ་དྲིན་གཟུགས་ཅན་དུ། །གྲུབ་ན་སྲིད་པ་གསུམ་དུ་ཅང་ཆུད་དམ། །<*སྙམ་སྒྲ་ཅན་གྱི་རབ་རྟོག>ལེགས་བྱས་ཕ་རོལ་མཐོང་དཀའ་མི་བདག་གི། །རྟོགས་བརྗོད་མཐའ་ཡས་ཚིག་ཏུ་འཁྲུངས་པའི་ཚད། །འཇལ་བྱེད་ཁུར་ཆེན་ཁྱེར་བའི་གཉིས་ལས་འཐུང༌། །རབ་ཏུ་བརྟན་དེ་སྲིད་པས་སྤྲུལ་ལམ་སྙམ། །
<*མཚུངས་པ་གསལ་བྱེད་ཀྱི་དཔེ།>འོན་ཏེ་ཆེ་བའི་ཆར་ལས་གཞན་གྱིས་གསོས། །ངོམས་པར་བཏུང་བས་རྒྱས་པའི་དབྱངས་བཞིན་དུ། །ལེགས་པར་བརྟགས་པའི་མཐོང་དོན་ཅུང་ཟད་ཅིག །ཚིག་ཏུ་བསྡེབས་པ་འདི་ལ་དགའ་བས་ཉོན། །སྤྱི་དོན་ལྔ་པ་བསྟན་པ་གནས་པའི་ཆེད་དུ་དགོངས་འགྲེལ་པར་དུ་སྒྲུབ་པར་
བསྐུལ་བ་ལ། གང་གིས་བསྐུལ་བ་བསྟན་པའི་སྒྲོན་མ་ཆེན་པོའི་ཁྱད་པར་དང༌། གང་ལ་བསྐུལ་བ་བསྟན་པའི་རྩ་ལག་ཆེན་པོའི་ཁྱད་པར་རོ། །དང་པོ་ལ་ངོས་གཟུང་བ་དང༌། དེའི་ཆེ་བའི་ཡོན་ཏན་གྱི་ཁྱད་པར་བརྗོད་པ་གཉིས་ལས། དང་པོ་བསྟན་པའི་སྒྲོན་མར་གྱུར་པའི་སྐྱེས་བུ་དམ་པ་
ནི་སྤྱིར་སྟོབས་བཅུ་མངའ་བའི་བསྟན་པ་རིན་པོ་ཆེ་གང་དང་གང་དུ་དར་བ་དེ་དང་དེ་དག་གི་ཕྱོགས་དང་ཕྱོགས་བྲལ་ཀུན་དུ་མཛེས་པར་བྱེད་པའི་བསྟན་འཛིན་གྱི་སྐྱེས་བུ་ཆོས་བཞིན་དུ་སྨྲ་ཞིང་ཆོས་བཞིན་དུ་མཛད་པ་གང་དག་འབྱོན་པར་འགྱུར་བ་སྟོན་པ་ཐུབ་པའི་དབང་པོ་ཉིད་ཀྱིས་ལུང་བསྟན་པའི་སྐྱེས་བུ་དམ་པ་སྟེ། དེ་
ལའང་དབྱེ་ན། འབྱོན་འགྱུར་གྱི་སྐྱེས་བུ་དམ་པ་གང་དག་ཡིན་པ་དེ་དག་གི་མཚན་ནས་དངོས་སུ་སྨོས་ཏེ་ལུང་བསྟན་པ་དང༌། བརྒྱུད་ནས་ནི། དཔེར་ན། བ་ཚ་ཆུ་ཀླུང་གི་མདོ་ལས། སྔ་བརྒྱ་ཐ་མར་གྱུར་པའི་ཚེ། །ང་ཉིད་སློབ་དཔོན་གཟུགས་ཀྱིས་གནས། །ང་ཡིན་སྙམ་དུ་ཡིད་བྱོས་ལ། །དེ་ཚེ་དེ་ལ་གུས་པ་སྐྱེད། །
ཅེས་གསུངས་པ་ལྟར་སྟོན་པ་རང་གི་མཁྱེན་བརྩེ་ནུས་པ་རྒྱ་མཚོ་ཆེན་པོའི་རྣམ་པར་འཕྲུལ་པའི་སྒྱུ་འཕྲུལ་གྱི་དྲྭ་བ་ཉིད་དུ་ལུང་བསྟན་པའི་སྐྱེས་བུ་དམ་པ་རྒྱལ་བའི་བསྟན་པ་རིན་པོ་ཆེ་སྐྱོང་བ་ལ་ཐུགས་རྩེ་གཅིག་ཏུ་ཕྱོགས་པ་གྲངས་མེད་པ་དག་འབྱོན་པར་གསུངས་པ་ལས། འདིར་སྐབས་སུ་བབ་པ་ནི་ཕྱི་མ་སྟེ། དེ་ལ་ཡང་
འདིར་རྡོ་རྗེ་འཆང་ཀུན་དགའ་བཟང་པོའི་ཆོས་ཀྱི་ཁྲི་ཆེན་པོ་ལ་མངའ་གསོལ་བའི་གདན་རབས་སུམ་ཅུ་པར་གྱུར་པ་འཇམ་པའི་དབྱངས་བཀྲ་ཤིས་ལྷུན་གྲུབ་གྲགས་པའི་རྒྱལ་མཚན་དཔལ་བཟང་པོ་པ་ཞེས་ཡོངས་སུ་གྲགས་པ་དེ་ཉིད་དོ། །གཉིས་པ་ནི། འདིས་སྔོན་གྱི་སྐྱེ་བ་ཇི་ལྟར་བཞེས་པའི་དབང་དུ་བགྱིས་ན། འཕགས་

པའི་ཡུལ་གྱི་པཎྜི་ཏ་མང་པོའི་གཙུག་གི་ནོར་བུ་ལྟ་བུར་གྱུར་པ་དཔལ་དཱི་པཾ་ཀ་ར་ཤྲཱི་ཛྙཱ་ནའི་རྣམ་པར་འཕྲུལ་པ་ཉིད་དུ་དངོས་དང་མངོན་པར་ཤེས་པའི་མེ་ལོང་སྒྲིབ་པ་མེད་པ་ཐོགས་པ་འགའ་ཞིག་གིས་ཀྱང་ལུང་བསྟན་པ་དང༌། བར་སྐབས་སུའང་རྗེ་བཙུན་དམ་པ་ཉིད་ཀྱི་ཉམས་ཀྱི་སྣང་
བ་ལ་རྒྱ་གར་རྡོ་རྗེ་གདན་གྱི་མཁན་པོ་མཛད་པའི་སྔོན་གྱི་སྐྱེ་བ་དྲན་པ་བྱུང་བ་དང༌། གངས་རིའི་ལྗོངས་འདིར་ཡང་བཀའ་གདམས་པའི་དགེ་བའི་བཤེས་གཉེན་ཆེན་པོ་ཞིག་གི་སྐྱེ་བ་བླངས་པར་གསུངས་པ་དང༌། ཨེ་ཝཾ་ཆོས་ལྡན་གྱི་གདན་རབས་བཅུ་བཞི་པ་མཁན་པོ་རིན་པོ་ཆེ་དཔལ་ལྡན་དོན་གྲུབ་སྟེ།
དེ་ལ་སོགས་པ་མཁས་པ་དང་གྲུབ་པའི་ཡོན་ཏན་བརྙེས་པ་མང་པོའི་སྐུའི་སྐྱེ་བ་ལུ་གུ་རྒྱུད་དུ་བཞེས་ནས། དུས་དེ་དང་དེ་དག་ཏུ་འགྲོ་བ་རྒྱ་མཚོའི་དོན་མཐའ་ཡས་པར་མཛད་པ་ཞིག་གོ། །སྐྱེ་བ་འདིར་ཡང་གཞུང་ལུགས་མང་པོའི་དོན་ལ་ལེགས་པར་སྦྱངས་པས། ཆོས་དང་ཆོས་མ་ཡིན་པ་རྣམ་པར་
དཔྱོད་པས་ལོག་པར་སྨྲ་བ་གཞན་ཚར་གཅོད་པ་ལ་ཤིན་ཏུ་མཁས་ཤིང༌། ནང་དུ་གསང་སྔགས་རྡོ་རྗེ་ཐེག་པའི་སྔགས་ཀྱི་རིག་པ་གྲུབ་པས་རྟོགས་པའི་ཡོན་ཏན་བསམ་གྱིས་མི་ཁྱབ་པ་ལ་དབང་འབྱོར་བའི་རྡོ་རྗེ་སློབ་དཔོན་ཆེན་པོར་གྱུར་པའོ། །བྱེ་བྲག་ཏུ་འཛམ་བུའི་གླིང་འདིར་ཐུབ་པའི་རྒྱལ་
ཚབ་ཀྱི་མཆོག་ཏུ་གྱུར་པའི་སྐྱེས་བུ་ཆེན་པོ་རྡོ་རྗེ་འཆང་ཀུན་དགའ་བཟང་པོ་ཞེས་རྒྱལ་བ་ཉིད་ཀྱི་ཞལ་སྒོ་ནས་ཚངས་པའི་གསུང་དབྱངས་ཡན་ལག་དྲུག་ཅུའི་སྒྲ་ལས་ལུང་བསྟན་པའི་སྐྱེས་བུ་དམ་པ་སྟེ། དེའང་གང་ལས་ལུང་བསྟན་པ་ཡིན་སྙམ་ན། འཕགས་པ་དགེ་བའི་རྩ་བ་ཡོངས་སུ་འཛིན་
པ་བྱང་ཆུབ་སེམས་དཔའི་སྡེ་སྣོད་ཀྱི་མདོ་ལས། དེ་ཚེ་འཇིག་རྟེན་མགོན་པོའི་སྤྲུལ་པ་སྤྲུལ། །དེ་ཚེ་དགེ་སློང་ཀུན་དགའ་བཟང་པོ་འབྱུང༌། །ཚུལ་ཁྲིམས་ཀྱིས་ཀྱང་ཁྱད་པར་འཕགས་གྱུར་ལ། །ཐོས་པ་མང་ཞིང་ཕ་རོལ་ཕྱིན་པས་འཕགས། །ཐབས་དང་ཤེས་རབ་ལ་ནི་ཤིན་ཏུ་བསླབས། །
དེ་དག་ཆོས་ཀྱི་སེམས་རྒྱུད་བརྗེད་མི་འགྱུར། །རྟག་ཏུ་འཕགས་པ་རྣམས་དང་འགྲོགས་པར་འགྱུར། །དཔའ་བོ་དེ་ཡི་ཡོན་ཏན་གང་ཡོད་པ། །མང་དུ་ཐོས་ཀྱང་མཐར་ཐུག་འགྱུར་བ་མེད། །དཔའ་བོ་ཤིན་ཏུ་གནས་པ་དེ་ཡི་མིང༌། །དེ་ཚེ་བུད་མེད་གང་གིས་ཐོས་གྱུར་པ། །དེ་

ནི་ཕྱིན་ཆད་བུད་མེད་དངོས་མི་འགྱུར། །དེ་ལྟར་རྩི་སྨན་འདྲ་བའི་མི་དེས་ནི། །མིང་གི་འང་སངས་རྒྱས་མཛད་པ་བྱེད་པར་འགྱུར། །དེ་ཚེ་ཕྱོགས་བཅུ་དག་ཏུ་བསྒྲགས་པ་ན། །དཔའ་བོ་དེ་ཡི་མིང་ནི་སུས་ཐོས་པ། །དེ་ཡི་མིང་གིས་ལས་ནི་དེ་བྱེད་དེ། །བུད་མེད་གང་ཟག་ལ་ནི་རེག