Luận tạng Tây Tạng (Tengyur) — Tập 213

་མི་
འགྱུར། །གང་གིས་མཐོང་དང་བསྟི་སྟང་བྱེད་ཅི་སྨོས། །དེས་ན་རྒྱལ་བས་དགེ་སློང་གང་སྤྲུལ་པ། །ཀུན་དགའ་བཟང་པོ་ཞེས་ནི་བྱ་བ་དེས། །རྒྱལ་བས་དེ་སྐད་བསྒྲགས་པ་དེ་འདྲ་བ། །བྱང་ཆུབ་བཞུགས་པ་ཅི་མཆིས་དེ་ལ་ཞུས། །ཀུན་དགའ་བཟང་པོ་གོ་ཆ་དཔའ་བོའི་
མིང༌། །འཇིག་རྟེན་ཁམས་འདིར་ཡོངས་སུ་བསྒྲགས་པ་ན། །གང་དག་ཕྱི་དུས་དགེ་སློང་རྣམས་འབྱུང་བ། །རྩུབ་དང་གཏུམ་དང་ཤིན་ཏུ་རྩུབ་པ་ཡི། །དགེ་སློང་གཞན་གྱིས་འདི་ལ་རྩོད་པར་འགྱུར། །ཆོས་འདི་རྒྱལ་བས་གསུངས་པ་མ་ཡིན་ཞེས། །འཇིག་རྟེན་ཕྱིན་ཅི་ལོག་
ལ་ཀུན་དགར་ལྟོས། །དེ་ཕྱིར་སྙིགས་མའི་དུས་ན་དེ་དག་ནི། །ང་དང་ལྷན་ཅིག་སངས་རྒྱས་ཞིང་དུ་ལྷགས། །ང་ཡི་བྱང་ཆུབ་མཆོག་འདི་ཐོབ་གྱུར་ཀྱང༌། །དེ་ཚེ་སེམས་ཅན་ལྟ་ཅན་སྤྲོ་བ་མེད། །ཕྱི་དུས་འཇིགས་པ་ཆེན་པོ་དེ་ཡི་ཚེ། །སྲོག་ཀྱང་བཏང་ནས་དེ་བཞིན་བྱ་སྙམ་སྟེ། །
ང་ཡི་ཆོས་མཆོག་སྤེལ་ཞིང་འཛིན་པར་བྱེད། །ཀུན་དགའ་བཟང་སྐྱོང་རིན་ཆེན་འབྱུང་གནས་དང༌། །དཀོན་མཆོག་འབྱུང་གནས་དང་ནི་དེད་དཔོན་བཟང༌། །ཡོན་ཏན་སྦས་པ་མཁས་དང་དེ་བཞིན་དུ། །དཔའ་བོ་བཟང་སྟོབས་གང་ཡིན་དེ་ལ་ལྟོས། །ཀུན་དགའ་གང་སུ་དག་གིས་དེ་དག་
མཐོང༌། །གང་དག་སུ་ཡིས་མིང་ཡང་ཐོས་གྱུར་པ། །དེ་དག་ནམ་ཡང་བྱང་ཆུབ་དོགས་པ་མེད། །དེ་དག་ནམ་དུའང་ལོག་པར་ལྟུང་མི་འགྱུར། །དེ་དག་ཐམས་ཅད་བརྩོན་པས་ཚོགས་པ་ཡིན། །དེ་དག་ཐམས་ཅད་ཚོགས་པར་ཤེས་པར་འགྱུར། །ཞེས་གསུངས། ཡང་དམ་
ཆོས་པདྨ་དཀར་པོ་ལས། ངས་ནི་དགེ་སློང་དགེ་འདུན་མོས་པར་བྱས། །ཀུན་དགའ་བཟང་པོ་ང་ཡི་ཆོས་འཛིན་པ། །བདེ་གཤེགས་བྱེ་བ་དྲུག་ཅུ་མཆོད་བྱས་ནས། །མ་འོངས་དུས་ཀྱི་ཚེ་ན་རྒྱལ་བར་འགྱུར། །དེ་ཡི་མིང་ནི་རྒྱ་མཚོ་བློ་འཛིན་ཏེ། །མངོན་པར་ཤེས་ཐོབ་ཅེས་ཀྱང་དེ་ན་གྲགས། །

ལྟ་ན་སྡུག་པ་ཡོངས་སུ་དག་པའི་ཞིང༌། །མ་བསྙལ་རྒྱལ་མཚན་རྒྱལ་བའི་བ་དན་ནོ། །བྱང་ཆུབ་སེམས་དཔའ་གངྒཱའི་ཇི་སྙེད་དེར། །དེ་བས་ལྷག་པ་ཡོངས་སུ་སྨིན་པར་བྱེད། །རྒྱལ་བ་དེ་ནི་རྫུ་འཕྲུལ་ཆེ་བར་འགྱུར། །ཕྱོགས་བཅུའི་འཇིག་རྟེན་དུ་ནི་སྒྲ་ཡང་
བསྒྲགས། །དེ་ཡི་ཚེ་ཡང་དཔག་ཏུ་མེད་པར་འགྱུར། །འཇིག་རྟེན་རྣམས་ན་ཕན་ཞིང་བརྩེ་ཕྱིར་གནས། །སྐྱོབ་པ་དེ་ནི་མྱ་ངན་འདས་འོག་ཏུ། །ཉིས་འགྱུར་དེ་ཡི་དམ་ཆོས་གནས་པར་འགྱུར། །དེ་ནས་གཟུགས་བརྙན་དེ་ཡི་ཉིས་འགྱུར་དུ། །གནས་ཏེ་རྒྱལ་བ་དེ་ཡི་བསྟན་པ་ལ། །དེ་ན་
སེམས་ཅན་གངྒཱའི་བྱེ་མ་སྙེད། །སངས་རྒྱས་འབྱུང་བ་དེ་ལ་རྒྱུ་ཡང་བསྐྱེད། །ཅེས་སོ། །དེ་ལྟར་སའི་སྟེང་ཐམས་ཅད་དུ་ཡོངས་སུ་གྲགས་པའི་སྐྱེས་བུ་ཆེན་པོ་དེ་ཉིད་ཀྱི་ལུགས་སྲོལ་དྲི་མ་མེད་པར་སྨྲ་བའི་གདན་རབས་ཀྱི་ཁྲི་ལ་ཞབས་ཀྱི་འཁོར་ལོ་རྣམ་པར་བཀོད་པའི་བསྟན་པའི་མངའ་བདག་ཆེན་
པོ་ཉིད་དུ་གྱུར་ཏེ། དེར་ཆོས་ཀྱི་ཁྲི་ལ་བཞུགས་ནས་ཀྱང་བགྲང་གཞི་གསུམ་གྱི་བར་དུ་བསྟན་པའི་བྱ་བ་རྒྱ་ཆེན་པོའི་ཁུར་ཁྱེར་བའི་སྒོ་ནས་སྡོམ་པ་གསུམ་གྱི་ཕྲིན་ལས་བཟང་པོ་གངྒཱའི་རྒྱུན་ཆེན་པོ་བཞིན་དུ་རྣམ་པར་སྤྲོས་ཏེ། དེའི་རྒྱུན་ཡང་ནམ་མཁའ་ཇི་སྲིད་ཀྱི་བར་དུ་གནས་པར་བྱེད་པའི་སློབ་མའི་
ཚོགས་དཔག་ཏུ་མེད་པ་བསྐྲུན་ནོ། །སླར་ཡང་བོད་ཆེན་གྱི་ལྗོངས་འདིར་སྐྱེ་བ་ནས་སྐྱེ་བའི་ཕྲེང་བར་ལས་བཟང་དང་སྨོན་ལམ་གྱི་ས་བོན་ལེགས་པར་བཟུང་བའི་དཔལ་སའི་སྟེང་གི་ཆོས་རྒྱལ་ཆེན་པོ་སྡེ་དགེ་བསྟན་པ་ཚེ་རིང་ཡབ་སྲས་རྣམས་ཀྱིས་སྤྱན་དྲངས་པ་ལྟར་ལྗོངས་འདིར་བྱོན་ཏེ་མི་བདག་ཆེན་
པོས་རིགས་ཀྱི་ཅོད་པཎ་གཅིག་པུ་བར་མངའ་གསོལ་ལོ། །དེ་ནས་བརྩམས་ཏེ་དཔལ་སའི་དབང་ཕྱུག་སྡེ་དགེ་རྒྱལ་པོ་ཡབ་སྲས་རྣམས་དང་མངའ་འོག་ཏུ་གཏོགས་པས་མཚོན་ཏེ། ཡངས་པའི་འཇིག་རྟེན་ཁམས་ཀྱི་འགྲོ་བ་རྒྱ་མཚོ་སྨིན་གྲོལ་གྱི་ལམ་ལ་བཀོད་པ་དང༌། རྒྱལ་བའི་བསྟན་པ་ལ་བྱ་བ་
ཡང་དག་པར་བྱས་སོ། །དེ་དག་གི་ཚུལ་རྒྱས་པ་ནི་དེ་ཉིད་ཀྱི་རྣམ་པར་ཐར་བ་དཔག་བསམ་གྱི་ལྗོན་པ་ཞེས་བྱ་བ་ལས་འབྱུང་བ་ལྟར་ཤེས་པར་བྱ་བ་ལས་འདིར་མ་སྤྲོས་སོ། །དེ་ལྟར་མཆོད་ཡོན་ཉི་ཟླ་ཟུང་དུ་འགྲེལ་པ་ལྟར་བཞུགས་ཤིང་ཆོས་དང་སྲིད་ཀྱི་ཕྲིན་ལས་རབ་ཏུ་རྒྱས་པར་གྱུར་པའི་དུས་དེར་མཁན་པོ་

ཆེན་པོ་དེ་ཉིད་ནས་དགོངས་འགྲེལ་འགྱུར་རོ་འཚལ་གྱི་ཆོས་ཀྱི་སྦྱིན་པ་མི་ཟད་པའི་རྒྱུན་གྱི་ཕྱི་མོ་འདི་དག་པར་དུ་བསྒྲུབ་པར་བསྐུལ་ཏེ། དེའང་འདི་སྐད་དུ་བཀའ་སྩལ་པ་ཐོས་ཏེ། དེང་ས་སྐྱོང་བསྟན་པའི་རྩ་ལག་ཆེན་པོ་དྲི་མ་མེད་པའི་རིགས་སྲས་ཀྱི་ཕྲེང་བ་དང་བཅས་པའི་ཕྲིན་ལས་ཀྱི་གཙོ་བོ་རྒྱལ་བའི་
གསུང་རབ་འགྱུར་རོ་འཚལ་པར་དུ་བསྒྲུབ་པ་ལ་སོགས་པའི་བགྱི་བ་བླ་ན་མེད་པ་གང་དག་མཐར་ཕྱིན་པ་ནི་ཤིན་ཏུ་རྗེས་སུ་ཡི་རང་བར་གྱུར་ཅིང༌། སླར་ཡང་རྒྱལ་བའི་བཀའ་དོན་ཡང་དག་པར་གསལ་བར་བྱེད་པ་ལ་ནི་དགོངས་འགྲེལ་རིན་པོ་ཆེ་འཕགས་པའི་ཡུལ་ནས་གངས་ཅན་པའི་བརྡའི་ལམ་
དུ་འགྱུར་རོ་འཚལ་འདི་དག་ལ་རག་ལས་པ་དང༌། འདི་དག་གཉིས་ཀ་གང་དུ་བཞུགས་པ་དེ་ན་ལུང་གི་དམ་པའི་ཆོས་ཡོངས་སུ་རྫོགས་པར་གནས་པར་འདོད་པ་དང༌། འདི་དག་བཞུགས་པ་ལ་བརྟེན་ནས་འཇིག་རྟེན་གྱི་ཁམས་སུ་སངས་རྒྱས་བཅོམ་ལྡན་འདས་ཀྱི་བསྟན་པ་ཡུན་དུ་གནས་
པའི་རྒྱུར་འགྲོ་སྟེ། ཇི་སྐད་དུ། ཆོས་རྣམས་ཐམས་ཅད་བཀའ་དང་བསྟན་བཅོས་གཉིས་སུ་འདུས། །ལེགས་པར་གསུངས་དང་དེ་ཡི་དགོངས་འགྲེལ་བཅས། །དེ་ཡི་དབང་གིས་ཤཱཀྱའི་བསྟན་པ་འདི། །འཇིག་རྟེན་ཁམས་སུ་ཡུན་རིང་གནས་པར་འགྱུར། །ཞེས་བྱ་བ་ལ་
སོགས་པའི་ཕན་འདོགས་རྒྱ་ཆེན་པོ་འབྱུང་བའི་ཚུལ་གྱིས་སྤྲོ་བ་བསྐྱེད་པ་སྔོན་དུ་འགྲོ་བའི་བཀའ་སྩལ་དམ་པ་ཚངས་པའི་དབྱངས་སུ་བསྒྱུར་བ་གང་དག་ཐོས་པའི་མོད་ལ། མི་བདག་ཆེན་པོ་སྲས་དང་བཅས་པའི་ཐུགས་ལ་སྔ་ན་མ་མཆིས་པའི་སྤྲོ་བ་མཆོག་གི་རྒྱ་མཚོ་རྣམ་པར་རྒྱས་པའི་རླབས་ཕྲེང་གི་རྩེ་
མོ་ཚངས་པའི་འཇིག་རྟེན་གྱི་བར་དུ་ལུད་པ་སྙམ་བྱེད་པ་དེ་ལྟ་བུའི་ཚུལ་གྱིས་བསྐུལ་བར་མཛད་དོ། །གཉིས་པ་གང་ལ་བསྐུལ་བ་བསྟན་པའི་རྩ་ལག་ཆེན་པོའི་ཁྱད་པར་ལའང་ངོས་བཟུང་བ་དང༌། དེའི་ཆེ་བའི་ཡོན་ཏན་གྱི་ཁྱད་པར་བརྗོད་པ་གཉིས་ལས། དང་པོ་ནི། སྤྱིར་ཛམྦུའི་གླིང་གི་བསྟན་པའི་
སྲི་ཞུ་བ་ཆེན་པོར་གྱུར་ཅིང་བྱེ་བྲག་ཏུ་མ་ཧཱ་བྷོ་ཊའི་ལྗོངས་ཀྱི་ཐེག་ལེ་འདིར་ཐུབ་པའི་བཀའ་ལུང་སྤྱི་དང་བྱེ་བྲག་གི་དགོངས་དོན་མ་ལུས་པ་རྣམ་པར་འགྲེལ་པའི་བསྟན་བཅོས་གངས་ཅན་པའི་བརྡའི་ལམ་དུ་འགྱུར་རོ་འཚལ་གྱི་ཆོས་སྦྱིན་རྒྱུན་མི་ཆད་པའི་ངོ་མཚར་འཕྲུལ་གྱི་ཕྱི་མོ་འདི་ཉིད་བསྐྲུན་པར་བྱེད་པའི་བདག་

པོའི་རྐྱེན་དུ་གྱུར་པ་ནི། སྐལ་བ་བཟང་པོ་ཀུན་གྱི་ཡོངས་རྩེར་སོན་པ་དཔལ་སྡེ་དགེ་ས་སྐྱོང་བླ་མ་ཆེན་པོ་ཀུན་དགའ་ཕྲིན་ལས་རྒྱ་མཚོའི་སྡེ་ཞེས་ཡོངས་སུ་གྲགས་པ་དེ་ཉིད་དོ། །གཉིས་པ་ནི། འདི་ཉིད་ཀྱི་སྐུ་ཆེ་བའི་ཡོན་ཏན་གྱི་ཁྱད་པར་ཅུང་ཟད་ཅིག་ཡི་གེ་དང༌། མིང་དང༌།
ཚིག་གི་ཕྲེང་བའི་ལམ་ནས་འདྲེན་པ་ལ་གཉིས་ཏེ། རིགས་རུས་ཀྱི་ཁྱད་པར་བརྗོད་པ་དང༌། ཡོན་ཏན་གྱི་ཁྱད་པར་བརྗོད་པའོ། །དང་པོ་ནི་མདོ་རྒྱ་ཆེར་རོལ་པ་ལས། དགེ་སློང་དག་ཅིའི་ཕྱིར་བྱང་ཆུབ་སེམས་དཔའ་རིགས་རྣམ་པར་བལྟ་བ་ལ་རྣམ་པར་བལྟ་ཞེ་ན། བྱང་ཆུབ་སེམས་དཔའ་ནི་རིགས་
དམའ་བ་གདོལ་བའི་རིགས་སམ། སྨིག་མ་མཁན་གྱི་རིགས་སམ། ཤིང་རྟ་མཁན་གྱི་རིགས་སམ། གཡུང་རིགས་སུ་མི་སྐྱེའི། བྲམ་ཟེའི་རིགས་སམ་རྒྱལ་རིགས་ཁོ་ན་སྟེ་རིགས་གཉིས་སུ་སྐྱེའོ། །དེ་ལ་གང་གི་ཚེ་བྲམ་ཟེའི་རིགས་བཙུན་པར་བྱ་བ་དེའི་ཚེ་བྲམ་ཟེའི་རིགས་སུ་སྐྱེའོ། །
གང་གི་ཚེ་རྒྱལ་རིགས་བཙུན་པར་བྱ་བ་དེའི་ཚེ་རྒྱལ་རིགས་སུ་སྐྱེ་སྟེ། དགེ་སློང་དག་ད་ལྟར་ནི་རྒྱལ་རིགས་བཙུན་པར་བྱ་བས་དེའི་ཕྱིར་བྱང་ཆུབ་སེམས་དཔའ་རྒྱལ་རིགས་སུ་སྐྱེ་སྟེ་ཞེས་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པར། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་
མའི་མངལ་དུ་འགྲོ་བ་ཕུན་སུམ་ཚོགས་པ་གང་ཞེ་ན། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཚེ་རབས་ཐམས་ཅད་དུ་བརྫུས་ཤིང་སྐྱེ་བ་སྟེ། འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་མའི་མངལ་དུ་འགྲོ་བ་ཕུན་སུམ་ཚོགས་པའོ། །དེ་ལ་བྱང་ཆུབ་སེམས་
དཔའ་སེམས་དཔའ་ཆེན་པོའི་རིགས་ཕུན་སུམ་ཚོགས་པ་གང་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་རིགས་ཆེན་པོར་སྐྱེ་བ་སྟེ། འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་རིགས་ཕུན་སུམ་ཚོགས་པའོ། །དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་
བརྒྱུད་ཕུན་སུམ་ཚོགས་པ་གང་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྒྱལ་རིགས་ཆེ་ཞིང་མཐོང་བའམ། བྲམ་ཟེའི་རིགས་ཆེ་ཞིང་མཐོ་བར་སྐྱེ་བ་སྟེ། འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་བརྒྱུད་ཕུན་སུམ་ཚོགས་པའོ། །དེ་ལ་བྱང་ཆུབ་སེམས་དཔའ་སེམས་

དཔའ་ཆེན་པོའི་རུས་ཕུན་སུམ་ཚོགས་པ་གང་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་གང་གི་རིགས་སུ་སྔོན་གྱི་བྱང་ཆུབ་སེམས་དཔའ་རྣམས་བྱུང་བར་གྱུར་པ་དེའི་རིགས་སུ་སྐྱེ་བ་སྟེ། འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་རུས་ཕུན་སུམ་ཚོགས་
པའོ། །དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་འཁོར་ཕུན་སུམ་ཚོགས་པ་གང་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོས་བྱང་ཆུབ་ཏུ་སེམས་ཅན་རྣམས་བཀོད་ཅིང་བྱང་ཆུབ་སེམས་དཔའི་འཁོར་དང་ལྡན་པ་ཉིད་དུ་འགྱུར་བ་འདི་ནི་བྱང་ཆུབ་སེམས་དཔའ་སེམས་
དཔའ་ཆེན་པོའི་འཁོར་ཕུན་སུམ་ཚོགས་པའོ་ཞེས་དང༌། ཁྲི་བརྒྱད་སྟོང་པ་ལས། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་རིགས་ཕུན་སུམ་ཚོགས་པ་གང་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་རིགས་ཆེན་པོ་དག་ཏུ་སྐྱེ་བ་སྟེ། དེ་ནི་བྱང་ཆུབ་སེམས་དཔའ་སེམས་
དཔའ་ཆེན་པོའི་རིགས་ཕུན་སུམ་ཚོགས་པ་ཡིན་ནོ། །དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་ཆོ་རིགས་ཕུན་སུམ་ཚོགས་པ་གང་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྒྱལ་པོའི་རིགས་ཤིང་སཱ་ལ་ཆེན་པོ་ལྟ་བུ་དག་དང༌། བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་
དག་ཏུ་སྐྱེ་བ་སྟེ། དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་ཆོ་རིགས་ཕུན་སུམ་ཚོགས་པ་ཡིན་ནོ། །དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་རུས་ཕུན་སུམ་ཚོགས་པ་གང་ཞེ་ན། རིགས་གང་ལས་སྔོན་གྱི་བྱང་ཆུབ་སེམས་དཔའ་སེམས་དཔའ་ཆེན་པོ་དག་བྱུང་བར་
གྱུར་པ་སྟེ། དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་རུས་ཕུན་སུམ་ཚོགས་པ་ཡིན་ནོ་ཞེས་དང༌། མགོན་པོ་བྱམས་པས། སྨོན་ལམ་དག་ནི་མཐའ་ཡས་དང༌། །ལྷ་ལ་སོགས་པའི་སྐད་ཤེས་དང༌། །སྤོབས་པ་ཆུ་བོ་ལྟ་བུ་དང༌། །མངལ་དུ་འཇུག་པ་མཆོག་དང་ནི། །
རིགས་དང་རུས་དང་ཆོ་འབྲང་དང༌། །འཁོར་དང་སྐྱེ་བ་དག་དང་ནི། །ཞེས་སོ། །དེ་ལྟ་བུའི་རིགས་དང་རུས་དང་ཆོ་འབྲང་ཕུན་སུམ་ཚོགས་པའི་སྐྱེ་བ་གང་ལ་ཡོད་པ་དེ་ནི་འཕགས་པའི་ཡུལ་གྱི་མཁས་པ་ཆེན་པོ་རྣམས་ཀྱིས་ཤིང་སཱ་ལ་ཆེན་པོ་བཞིན་དུ་འཇིག་རྟེན་ན་ཆེས་མཆོག་ཏུ་མངོན་པར་བཀུར་བ་དང་

བསྔགས་པ་བརྗོད་པ་མང་དུ་འབྱུང་ཞིང་གངས་ཅན་གྱི་ལྗོངས་འདིར་ཡང་སྙན་དངགས་སྨྲ་བའི་མཁན་པོ་ཐམས་ཅད་ཀྱིས་བླ་ནས་བླ་མ་ཉིད་དུ་རྗོད་བྱེད་རྒྱན་གྱི་མེ་ཏོག་གི་སིལ་མ་དག་གིས་ལན་གཅིག་མ་ཡིན་པར་མངོན་པར་འཐོར་བ་ཀུན་གྱི་འབབ་སྟེགས་སུ་གྱུར་པ་སྟེ། རྗེ་ངོར་ཆེན་
དཀོན་མཆོག་ལྷུན་གྲུབ་ཀྱིས་ས་སྐྱ་པའི་གདུང་རབས་ཡ་རབས་ཀྱི་ཁ་རྒྱན་ལས། མི་ཤེས་གདོལ་པའི་ཕྲུ་གུ་ཕོངས་པ་ཡི། །འཁོར་གྱིས་བཏེག་ལ་འཇིག་རྟེན་འདྲེན་པ་ཞེས། །སྨིག་རྒྱུ་འབབ་ཆུར་སྒྲོགས་པའི་གྲག་སྟོང་སྒྲས། །འཇིག་རྟེན་ཡམ་མོར་བྱེད་དང་འདི་མི་མཚུངས། །ཞེས་དང༌།
རིན་སྤུངས་ས་སྤྱོད་ངག་དབང་འཇིགས་བྲལ་གྱིས་བསྐལ་པ་བཟང་པོའི་ལེགས་ལམ་ལས། པདྨ་འབྱུང་གནས་ཞི་བ་འཚོའི། །གསུང་གི་བཅུད་ཀུན་སྙིང་དབུས་སུ། །ཉལ་ཏེ་མ་རིག་གཉིད་ལས་སད། །སད་མི་ཀླུ་དབང་བསྲུང་བ་ཞེས། །བརྡ་སྤྲོད་རིག་པའི་ཟེར་འཕྲོ་བས། །རྒྱ་གར་ཆོས་
རྣམས་བོད་ཡུལ་དུ། །གསལ་བའི་བདེ་གཤེགས་བསྟན་པ་འདི། །འཛིན་པའི་སྐྱེས་བུ་སྔ་བར་བྱུང༌། །ཤེས་རབ་མ་ཉམས་ཐབས་ཀྱི་བདག །གཉིས་སུ་མེད་པ་མཆོག་ཞི་བའི། །རྒྱལ་པོར་དབང་ཕྱུག་རྡོ་རྗེ་འཛིན། །ཡིད་བཞིན་འདོད་འཇོ་རིན་པོ་ཆེ། །རིགས་དེའི་ས་བོན་གང་
ལ་ལྷའི། །རང་བཞིན་གྱིས་མཐོ་སཱ་ལའི་ཤིང༌། །མཐོ་བརྟན་རྒྱས་པའི་ཡལ་ག་ཅན། །འགྲོ་བའི་གདུང་འཕྲོག་ཕན་པར་བརྩོན། །ཞེས་འབྱུང་བ་ལྟ་བུ་སྟེ། དེའང་རིགས་ནི་མཁས་ཤིང་མཛངས་ལ་དཔའ་ཞིང་རྟུལ་ཕོད་པ། བཀའ་བཙན་ལ་དཀྱེལ་ཆེ་བ། གཞུང་བཟང་ལ་འགྲོགས་
བདེ་བ་ལ་སོགས་པ་ཡ་རབས་ཀྱི་སྤྱོད་ཚུལ་ཅི་རིགས་པ་དང་ལྡན་པའོ། །རུས་ནི་རིགས་མ་ཉམས་པའི་ཕ་དེའི་རྒྱུད་ལས་བྱུང་བའོ། །ཆོ་ནི་ཞང་པོའི་ཁུངས་དང་ལྡན་པའོ། །འབྲང་བ་ནི་བཤད་མ་ཐག་པ་གསུམ་པོ་དང་ལྡན་པའི་སྤྱོད་པའི་འབྲང་ས་འཛིན་པ་ཡིན་ནོ་ཞེས་མཁས་པ་རྣམས་ཀྱིས་བཤད་པ་
ལྟར་འདིར་ཡང་སྔོན་གྱི་ཡིག་ཚང་རྣམས་ཀྱི་གཏན་ཚིགས་ཚད་མར་བཟུང་ནས། མཁས་པ་སྔ་མ་དག་གིས་གཏམ་གྱི་གླིང་བུ་མང་ཉུང་ཅི་རིགས་པར་བསྒྱུར་བ་བཞིན་དུ། འདིར་ཡང་དགོས་པའི་དབང་ལས་དེ་དག་གི་བརྗོད་བྱའི་སྙིང་པོ་བསྡུས་པ་གང་དག་ཚོགས་པ་གསུམ་པའི་ལམ་ནས་དྲངས་ཏེ་ཅུང་

ཟད་ཅིག་གླེང་བ་ནི་འདི་ལྟ་སྟེ། སྤྱིར་བོད་ཆེན་པོར་གྲགས་པའི་མིའི་འགྲོ་བ་ཕལ་ཆེ་བ་དག་ནི་སྦྲ་འབྲུ་སྒ་སྡོང་ཞེས་བྱ་བ་སྟེ་རུས་ཆེན་བཞི་དང༌། དེ་རྣམས་ཀུན་གྱི་ཞང་པོར་འོས་པ་སྒོ་ལྷ་སྡེ་དཀར་པོའི་རིགས་ཏེ་མི་རིགས་ལྔར་བྱུང་བར་གྲགས་པ་ལས་འདི་ཕྱི་མ་ཡིན་ཞིང༌། དེ་ལས་མཆེད་པ་སྟོད་སྨད་ཀྱི་
ཕྱོགས་སུ་ཡོད་པའི་ནང་གསེས་རྔུ་ཆེན་རྒྱལ་མོ་ཚོ་བཅོ་བརྒྱད་དུ་གྲགས་པ་བྱུང་ངོ༌། །དེའང་ཇི་ལྟར་ཞེ་ན། འགར་གེ་འགོར་གསུམ་དང༌། གསུང་གསེར་འབྲོམ་གསུམ་དང༌། ཤོལ་སྟག་འཕྱང་གསུམ་དང༌། ཅི་འབུ་གཞག་གསུམ་དང༌། གཅེ་སིང་རམ་གསུམ་དང༌། ཕྱུག་པོ་བུ་
གསུམ་སྟེ་ཚོ་ཆེན་བཅོ་བརྒྱད་དེ། དེ་དག་གི་ཡ་གྱལ་དུ་གྱུར་པའི་འགར་གྱི་རིགས་སོ། །རིགས་དེ་ལས་སྐྱེས་པའི་སྐྱེས་བུ་དམ་པ་འགར་ཆེན་ཡེ་ཤེས་བཟང་པོ་དང༌། འགར་དམ་པ་ཞེས་བྱ་བ་མཆེད་གཉིས་བྱུང་ངོ་ཞེས་གྲག་གོ། །དེ་ལས་ཕྱི་མ་འདི་ནི་སིངྒ་ལའི་སློབ་དཔོན་ཨཱརྻ་དེ་ཝའི་རྣམ་
འཕྲུལ་དུ་གྲགས་པའི་མགར་ཆོས་སྡིངས་པ་སྟེ། དེའི་ཆེ་བའི་ཡོན་ཏན་ནི་འདིས་ཐུགས་དམ་གྱི་ལྷའི་གཙོ་བོ་རྡོ་རྗེ་འཇིགས་བྱེད་ལ་མཛད་པས་དངོས་གྲུབ་ཀྱི་མཚན་མ་མང་དུ་བྱུང་ངོ༌། །འབྲི་ཁུང་འཇིག་རྟེན་གསུམ་གྱི་མགོན་པོ་ལ་སོགས་པའི་བླ་མ་མང་པོ་བསྟེན་ཏེ། གསང་བ་སྔགས་ཀྱི་གདམས་
པ་མང་དུ་མནོས་པས་ཟབ་ཆོས་ཀྱི་བདག་པོར་གྱུར་ཏེ། ཙ་རི་དང་དྭགས་པོ་འགར་ཕུག་པ་ལ་སོགས་པར་བྱོན་ནས་གསང་བ་སྔགས་ཀྱི་སྤྱོད་པ་བསྐྱངས་པས། མི་མ་ཡིན་པའི་རིགས་ཀྱི་འགྲོ་བ་མང་པོ་འདུས་ནས་ཐོ་བཙམས་ཀྱང་གླགས་མ་རྙེད་པར་ཤིན་ཏུ་དད་པར་གྱུར་ཏེ་སྲོག་གི་སྙིང་པོ་ཕུལ་ནས་སྐྱབས་སུ་
བསྟེན་ནོ། །དེ་ལ་སོགས་པའི་འགྲོ་བ་རྣམས་ཀྱི་དོན་དཔག་ཏུ་མེད་པ་བྱས་ནས་ཕྱིས་སུ་སྤོ་བོ་ཕྱོགས་སུ་བྱོན་ནོ། །ཡུལ་དེ་ན་འཁོད་པའི་སྐྱེ་བོ་མང་པོ་ལ་ཡང་རྫུ་འཕྲུལ་དང་ཐབས་ཀྱི་ཁྱད་པར་མང་པོ་བསྟན་པས་ཤིན་ཏུ་དད་པར་བྱས་ནས་དགེ་བའི་ལམ་གྱི་ས་བོན་ལེགས་པར་བཏབ་བོ། །ཕུ་ལུང་
དགོན་པ་རིན་ཆེན་གླིང་གི་གཞི་བཏིང་ནས་ཞི་བར་གཤེགས་སོ། །དེ་ཉིད་ཀྱི་སྐུའི་དབོན་པོ་ཨུ་རྒྱན་པ་ལ་སོགས་པས་ཀྱང་ཁམས་ཀྱི་ཕྱོགས་ནས་བྱོན་ཏེ་དེའི་ཕྲིན་ལས་ཀྱི་རྒྱུན་བསྐྱངས། དེ་ནས་དབོན་རྒྱུད་རིམ་པར་བྱུང་བ་དག་ལ་ཕུ་ལུང་སྡེ་བ་ཐོག་ཀ་བར་གྲགས་ཏེ་དེང་སང་གི་བར་དུ་ཡོད་ཅེས་

གྲགས་སོ། །འགར་ཆེན་ཡེ་ཤེས་བཟང་པོ་ནི་སྙིང་སྟོབས་དང་མཐུ་རྩལ་རྨད་དུ་བྱུང་བ་ཞིག་སྟེ། དེས་སླང་མདོ་དྲུག་གི་ནོར་འཛིན་མའི་ཆ་ཡངས་པ་བདག་གིར་མཛད་དོ། །དེ་ནི་སྔ་ན་མེད་པའི་དབང་ཐང་གི་ལྗོན་པ་རབ་ཏུ་རྒྱས་པའི་གྲིབ་མ་ལ་འབངས་ཀྱི་ཚོགས་མཐའ་དག་
ངལ་བསོར་སྤྱོད་ཅིང་བཀའ་ལུང་ཐམས་ཅད་རྒྱན་བཟང་པོ་ལྟར་དུ་བསྲེལ་བ་བྱུང་ངོ༌། །དེ་ལ་རིགས་ཀྱི་སྲས་གཉིས་བྱུང་བའི་དང་པོ་ནི་སྒོམ་སྟོན་བསོད་ནམས་རིན་ཆེན་དང༌། གཉིས་པ་རྔུ་རྒུ་རུ་ཞེས་བྱ་བ་གཉིས་ཏེ། དེའི་དང་པོ་ནི་ཆོས་དང་སྲིད་པའི་གཙུག་ལག་ཟུང་གི་གཞུང་ལུགས་དཔྱོད་པ་ལ་བློ་རབ་ཏུ་
གསལ་བ་དང༌། བྱས་པ་གཟོ་བ་དང་ལྷག་པའི་བསམ་པས་གནས་པར་གྱུར་པ་ལ་སོགས་པ་ཡ་རབས་ཀྱི་སྤྱོད་ཚུལ་དང་མཛངས་པའི་ཡོན་ཏན་ཅི་རིགས་པ་ཚང་བས། རྣམ་འདྲེན་བུ་རམ་ཤིང་པའི་རིང་ལུགས་མ་ནོར་བ་ཡོངས་སུ་འཛིན་པའི་སྐྱེས་བུ་ཆེན་པོ་ཆོས་ཀྱི་རྒྱལ་པོ་འཕགས་པ་རིན་པོ་ཆེའི་ཞབས་
ཀྱི་པདྨར་བརྟེན་ནས་དེའི་ལས་ཚན་གྱི་རྣམ་གཞག །གསོལ་གཟིམས་མཆོད་གསུམ་འཇལ་ཡིག་མཛོད་པ་གསུམ། །ཐབ་འདྲེན་གདན་གསུམ་སྐྱ་རྟ་མཛོ་ཁྱི་བཞི། །ཆེན་པོ་ལ་འོས་ལས་ཚན་བཅུ་གསུམ་སྟེ། །འདི་རྣམས་ཆོས་ཀྱི་རྒྱལ་པོ་ས་སྐྱ་པ། །དཔལ་ལྡན་འཕགས་པའི་རིང་
ལ་དར་བ་ཡིན། །ཞེས་པའི་ལས་ཚན་བཅུ་གསུམ་གྱི་ཐོག་མ་གསོལ་དཔོན་གྱི་ལས་ཀ་ཟིན་ཏོ། །དེ་ནས་རིམ་གྱིས་གོང་ནས་གོང་དུ་ཕྱིན་པར་གྱུར་ཏེ་སྟོང་སྐོར་གྱི་དཔོན་པོའི་འཇའ་ས་དང་སྟག་མགོ་ནོར་བུ་གསུམ་པ་དང་དམག་རྣམས་བྱིན་ཏེ་ཆེན་པོའི་གོ་ས་ཉིད་དུ་དབང་བསྐུར་རོ། །ཕྱིས་སུ་
ས་དམར་ཡང་དགོན་དུ་ཚོགས་པ་སྟོང་ཕྲག་ཙམ་བསྐྱངས་པ་དང་བཅས་ཏེ་དེར་བསྟན་པའི་གཞི་ཆེན་པོ་བཙུགས་སོ། །གཅུང་པོ་རྔུ་རྒུ་རུ་ཅན་ལ་བསོད་ནམས་ཀྱི་བྱེད་པོས་ལེགས་པར་སྩལ་བའི་སྲས་དགུ་ཡོད་པའི་ནང་ནས་རྔུ་རྗེ་སྟོང་དཔོན་ཟླ་བ་བཟང་པོ་ཞེས་བྱ་བ་བློ་སྒྲིན་ཞིང་གཟུ་བོར་གནས་
པ། སྐྱེ་བོ་ཀུན་གྱིས་བཀུར་བའི་འོས་སུ་གྱུར་པ་ཞིག་སྟེ། དེའང་གོང་མ་མཆོད་ཡོན་གྱིས་བཀའ་དྲིན་བཟང་པོས་ལེགས་པར་བསྐྱངས་ཤིང་རིམ་གྱིས་རྔུ་རྒྱུད་ས་དམར་ནས་བཟུང་སྟེ་ལྗང་མཚམས་བར་གྱི་སྟོང་དཔོན་གྱི་བསྐོས་གཞག་དང་ལུང་ལས་ཀྱིས་མངོན་པར་མཐོ་བ་ཆེན་པོའི་གོ་སར་བཞག་

གོ། །དེ་ལ་སྲས་དཔལ་ལྡན་སེང་གེ་དང་རྒྱལ་བ་བཟང་པོ་ཞེས་བྱ་བ་གཉིས་འཁྲུངས་ཤིང༌། ཕྱི་མའི་སྲས་ནི་སངས་རྒྱས་བཟང་པོ་དང་པདྨ་བསྟན་སྲུང་ཞེས་བྱ་བ་གཉིས་སོ། །དེའི་ཕྱི་མ་ལ་ཡང་བསོད་ནམས་འབུམ་དང་དཀར་ཆེན་བྱང་ཆུབ་འབུམ་ཞེས་བྱ་བའི་སྲས་གཉིས་སོ། །དེའི་ཕྱི་མའི་
སྲས་སུ་དབོན་ཆེན་དགེ་འདུན་རྒྱལ་མཚན་དང༌། བདེ་ཆེན་བསོད་ནམས་བཟང་པོ་དང༌། རྔུ་ཆོས་ཀྱི་རྡོ་རྗེ་སྟེ་གསུམ་མོ། །དང་པོ་དེའི་སྲས་སུ་མགོན་པོ་གཟུངས་ཞེས་བྱ་བ་བྱུང་ཞིང༌། དེ་ནས་རིམ་གྱིས་མཆེད་པའི་མི་བརྒྱུད་ནི་ས་དམར་གྱི་ཕྱོགས་སུ་དེང་སང་གི་བར་དུ་ཡང་རྒྱུན་མ་ཆད་པར་ཡོད་
དོ། །བདེ་ཆེན་བསོད་ནམས་འབུམ་ནི་ཡུམ་སྔ་པའི་ལམ་དུ་སོང་བའི་དགོངས་རྫོགས་ཀྱི་དགེ་བའི་རྩ་བ་བསྐྲུན་པའི་ཆེད་དུ་ཀ་ཐོག་རྡོ་རྗེའི་གདན་གྱི་དགོན་པར་བྱོན་ནས་རིང་ཞིག་བཞུགས་པ་ན་ནམ་ཞིག་མཆེད་ཟླ་གཞན་རྣམས་ཀྱིས་རང་གི་བསྟི་གནས་སུ་འབོད་པར་བཏང་བར་བརྩམས་པ་ན་ཀརྨ་
ཆོས་གྲགས་རྒྱ་མཚོ་དང༌། རྔུ་ཆོས་ཀྱི་རྡོ་རྗེ་དཔོན་སློབ་ཟུང་གིས་ཡེ་ཤེས་ཀྱི་གཟིགས་པ་རབ་ཏུ་དྭངས་པའི་མེ་ལོང་དག་ཏུ་ཇི་ལྟར་ཤར་བའི་ལུང་བསྟན་སྩལ་བ་ནི། ཁྱོད་ལ་རིང་པོར་མི་ཐོགས་པར་ལས་ཀྱི་མ་མས་བྱིན་པའི་བགོ་སྐལ་དུ་བཀྲ་ཤིས་པའི་རྟགས་ཀྱི་དགེ་མཚན་མང་པོ་ཆེད་དུ་
བཀྲམ་པ་ལྟ་བུ་ཡོད་པའི་གནས་ཞིག་རང་དབང་དུ་འབྱུང་བར་འགྱུར་ལ། གནས་དེ་ལེགས་པར་བཟུང་ནས་ཡིད་ཅི་བདེ་བར་བག་ཕོབས་ཤིག་དང་ཕ་ལས་ཆེས་ལྷག་པའི་བུ་རྒྱུད་ཇེ་བཟང་དུ་འགྲོ་བར་འགྱུར་རོ་ཞེས་སྩལ་ཏོ། །ཇི་ལྟར་ལུང་བསྟན་སྩལ་བ་ཐོག་ཏུ་བབ་སྟེ་རིམ་པར་བརྒྱུད་
ཀྱིན་བྱོན་པས་ནམ་ཞིག་ན་ལྕགས་རར་ཕྱིན་ཏོ། །དེར་གླིང་ཡུལ་གྱི་མངའ་རིས་དང་སའི་དུམ་བུའི་བདག་པོར་གྱུར་ཏེ། དེའི་མོད་ལ་སྔོན་གྱི་སྨོན་ལམ་གྱི་འཕེན་པས་ལྗོངས་དེ་ནའང་བདེ་བ་དང༌། ལོ་ལེགས་པ་དང༌། སྡེ་བཞིའི་འབྱོར་པ་ཕུན་སུམ་ཚོགས་པ་དང་ལྡན་པར་གྱུར་པ་དང༌། དགེ་ལེགས་
ཀྱི་མཚན་མ་གཞན་དག་ཀྱང་མངོན་དུ་བྱུང་བའི་རྟེན་འབྲེལ་བཟང་བ་དེ་རྒྱུ་མཚན་དུ་སོང་སྟེ་སྡེ་དགེ་ཞེས་བྱ་བ་མིང་དུ་ཐོགས་སོ། །དེས་ན་སྡེ་དགེའི་ཐ་སྙད་ཀྱི་ཐོག་མའང་འདིའི་དུས་ནས་བྱུང་བ་ཉིད་དོ། །དེ་ལས་སྲས་བཞི་བྱུང་བའི་གཉིས་པ་སྡེ་དགེ་བོ་ཐར་ཞེས་བྱ་བ་སྲེད་མེད་ཀྱི་བུའི་སྟོབས་དང་

རྣམ་པར་དཔྱོད་པའི་རྩལ་ཡོངས་སུ་རྫོགས་པ་ཞིག་སྟེ། དེའི་བློ་གྲོས་ཀྱི་གོམ་སྟབས་ཆེན་པོ་གཅིག་གིས་ཟུལ་བརྒྱུད་ཀྱི་མི་སྡེ་མཐའ་དག་རང་དབང་དུ་ཐོབ་བོ། །ཐོབ་པའི་འབངས་འཁོར་ཐམས་ཅད་ཆོས་དང་མཐུན་པའི་ཕྲིན་ལས་ཀྱིས་བསྐྱངས་པས་ཐམས་
ཅད་ཀྱང་བཀའ་ལུང་གང་དག་སྩལ་བ་གཙུག་གི་ནོར་བུ་བཞིན་དུ་སྤྱི་བོས་ལེན་པ་བྱུང་ངོ༌། །དེ་ཉིད་ཀྱི་བླའི་མཆོད་གནས་སུ་གྲུབ་ཐོབ་ཐང་སྟོང་རྒྱལ་པོ་ཞེས་སམ་བརྩོན་འགྲུས་བཟང་པོ་ཞེས་ཡོངས་སུ་གྲགས་པ་མཐུ་ཆེ་ཞིང་རྫུ་འཕྲུལ་ཆེ་བའི་གོམ་པའི་འདེགས་འཇོག་བསྒྱུར་བ་ཙམ་གྱིས་གང་དུ་བཞུད་
ཀྱང་དཀའ་བ་ཅི་ཞིག །ཁྱད་པར་དཔལ་རི་པདྨ་འོད་ཀྱི་གཞལ་ཡས་སུ་སྐད་ཅིག་རེས་བྱོན་ཏེ་སློབ་དཔོན་ཆེན་པོ་པདྨཱ་ཀ་ར་དང་དངོས་སུ་མཇལ་ནས། ལེགས་པར་གདམས་པའི་བདུད་རྩི་ཅི་ཡང་གསན་པ་དང༌། སློབ་དཔོན་ཆེན་པོས་བོད་ཡུལ་དུ་འགྲོ་བའི་དོན་ལ་འབྱོན་དགོས་པར་ཇི་ལྟར་བསྐུལ་བ་དེ་
བཞིན་དུ་བོད་དང་བོད་ཆེན་པོ་དང་རྒྱ་ནག་ལ་སོགས་པ་ཡུལ་དང་ལྗོངས་དང་གྲོང་དང་གྲོང་ཁྱེར་མང་པོར་ཡང་ཞབས་ཀྱིས་བཅགས་ཤིང་སྐུ་དངོས་དང་རྣམ་པར་འཕྲུལ་པའི་བཀོད་པ་བགྲང་ལས་འདས་པ་དག་གིས་སེམས་ཅན་གྱི་དོན་ལ་རྩེ་གཅིག་ཏུ་གཞོལ་ཞིང་བབ་པ། ད་ལྟར་ཡང་སྐུ་དངོས་སུ་བཞུགས་པའམ་ལུས་
མ་སྤངས་པར་མཁའ་སྤྱོད་དུ་གཤེགས་པའི་ཚུལ་གཉིས་ཀར་གྲགས་པ་དེ་ཉིད་སྤྱན་དྲངས་ཏེ་གཙུག་གིས་བསྟེན་ནོ། །གང་གི་ཚེ་ན་གྲུབ་པའི་དབང་ཕྱུག་ཆེན་པོ་དེའི་ཡེ་ཤེས་ཀྱིས་གཟིགས་པའི་ངོ་ན་ཡུལ་དེར་ས་དཔྱད་ཕུན་སུམ་ཚོགས་ཤིང་དེར་དགོན་པ་བཏབ་ན་བཤད་སྒྲུབ་ཀྱི་རྒྱུན་རྒྱ་ཆེན་པོ་དར་རྒྱས་སུ་
འགྱུར་བའི་རྟེན་འབྲེལ་ཕུན་སུམ་ཚོགས་པ་ཤར་བ་གཟིགས་ནས། རྔུ་མདའི་སྲིབ་རིའི་འཁྲིས་དེ་ན་མཚོ་ཞིག་ཡོད་པར་ཀླུའི་དབང་པོ་ཞིག་གིས་རྟེན་བཅས་པ་ལ་ཀླུ་དེ་བཏུལ་ནས་བསྟན་པ་ཇི་སྲིད་གནས་ཀྱི་བར་དུ་རྣམ་པར་མི་འཚེ་ཞིང་མཐུན་རྐྱེན་ཐམས་ཅད་སྒྲུབ་པའི་གྲོགས་སུ་བཀའ་བསྒོས་པས་
དེས་ཀྱང་དེ་ལྟར་དུ་བགྱི་བར་དམ་བཅས་སོ། །མཚོ་དེ་ཡང་རྫུ་འཕྲུལ་གྱི་མཐུ་ཆེན་པོས་ལེགས་པར་བསུབས་ཏེ། དེའི་ཁར་གཙུག་ལག་ཁང་གི་རྨང་བཏིང་བ་ནས་བརྩམས་ཏེ་སྲིབ་ཀྱི་དགོན་དུད་བརྒྱ་དང་རྩ་བརྒྱད་བཞེངས་པའི་བདག་པོའི་རྐྱེན་སྦྱར་བ་ལ་སོགས་པ་ལེགས་བྱས་རྒྱ་ཆེན་པོ་

བསྐྲུན་ནོ། །གཙུག་ལག་ཁང་ལེགས་པར་གྲུབ་པ་དང་གྲུབ་ཆེན་དེ་ཉིད་ཀྱིས་དེར་དཔལ་མགོན་པོ་ཆེན་པོ་ཞལ་བཞི་པའི་ལྗགས་བསྙེན་ཞིག་ཀྱང་མཛད་དོ། །དེའི་ཚེ་ཆོས་དང་སྲིད་པའི་དཔལ་འབྱོར་གྱི་སྒོ་འཕར་བྱེ་བ་བརྒྱ་སྟོང་དུས་ཅིག་ཅར་དུ་ཕྱེ་བའི་རྟེན་འབྲེལ་ཐམས་ཅད་འབད་མེད་ལྷུན་གྱིས་
གྲུབ་པ་ཉིད་དུ་བྱུང་བས་དགོན་པའི་མཚན་དུ་ཡང་ལྷུན་གྲུབ་སྟེང་ཞེས་བྱ་བར་གསོལ་ལོ། །སྡེ་དགེ་བོ་ཐར་གྱི་རིགས་སྲས་ཆེ་བ་དཔལ་ལྡན་སེང་གེ་ཞེས་བྱ་བ་མདོ་སྔགས་ཀྱི་གཞུང་ལུགས་མང་པོ་དང་ཐོས་བསམ་གྱི་བགྱི་བ་མཐར་སོན་ཏེ་བསྒྲུབ་པའི་སྙིང་པོ་ལྷུར་མཛད་པ་དང༌། གནས་དེའི་གདགས་
རིའི་སྡེབས་སུ་ངུར་སྨྲིག་འཆང་བ་འདུས་པའི་སྡེ་བཙུགས་ཤིང་གཙུག་ལག་ཁང་བཞེངས་པ་ལ་དེང་སང་ཉིན་དགོན་དུ་གྲགས་ཤིང༌། རྔུ་ཕུའི་བྲག་གི་ཕུག་པ་སེང་གེ་རྫོང་དུ་གྲགས་པ་འདི་ཡང་དེ་ཉིད་ཀྱི་སྒྲུབ་གནས་མཛད་པས་ཕྱི་ནས་རྟེན་ལ་བརྟེན་པའི་མིང་དུ་ཐོགས་པ་ཡིན་ནོ་ཞེས་གླེང་ངོ༌། །དེའི་མཆེད་
ཡ་རྒྱལ་མཚན་འབུམ་ལ་སྲས་བཞི་བྱུང་བའི་དབོན་ཆེན་ཨ་སྔའི་སྲས་སུ་ཇོ་གདན་ནམ་མཁའ་ལྷུན་བཟང་ཞེས་བྱ་བ་འཁྲུངས་ཏེ། འདིས་བླ་མ་མང་པོའི་གདམས་པའི་མཛོད་བཟུང་ནས་རྡོ་རྗེ་འཇིགས་བྱེད་ལྷག་པའི་ལྷར་བཟུང་ཞིང༌། དེའི་རྩ་སྔགས་ཡ་མ་རཱ་ཛ་དུང་ཕྱུར་གཅིག་སོང་བའི་མཚམས་
ནས་ལྗགས་ཀྱི་སྟེང་ནས་ལྕགས་ཀྱི་རིལ་བུ་རང་རྡོལ་དུ་བྱུང་བ་དང༌། བསྐྱེད་པའི་རིམ་པ་ལ་བརྟེན་པ་ཐོབ་པས་ཉེ་གནས་འགའ་ཞིག་གིས་མཐོང་སྣང་དུ་རྡོ་རྗེ་འཇིགས་བྱེད་མངོན་སུམ་དུ་བཞུགས་པར་མཐོང་བ་ལ་སོགས་པ་གྲུབ་པའི་མཚན་མ་མང་དུ་བརྙེས་སོ། །དེའི་མཆེད་ཡ་རྒྱལ་འཕེལ་གྱི་
སྲས་ཆེ་བ་སྡེ་དགེ་ཀུན་དགའ་རིན་ཆེན་ཞེས་བྱ་བ་སྟེ། འདིས་ནི་ཤར་ཆེན་བྱམས་པ་ཀུན་དགའ་བཀྲ་ཤིས་དང༌། པ་པང་མཁན་ཆེན་བསོད་ནམས་རིན་ཆེན་ལ་སོགས་པའི་ཡོངས་འཛིན་མང་པོ་བསྟེན་ནས་ཟབ་དོན་གྱི་བདུད་རྩི་ངོམས་པར་བཞེས་ནས། ཡི་དམ་གྱི་ལྷ་མང་པོའི་བསྙེན་སྒྲུབ་
དང་ཁྱད་པར་ཆོས་སྐྱོང་གི་བསྙེན་པ་ལ་བཞུགས་པའི་ཚེ་སྒྲུབ་ཁང་ཐམས་ཅད་མེའི་ཕུང་པོ་གཅིག་ཏུ་འབར་བར་ཀུན་གྱིས་མཐོང་བ་ལ་སོགས་པ་ལུང་རྟོགས་ཀྱི་ཡོན་ཏན་བསམ་གྱིས་མི་ཁྱབ་པ་བརྙེས་སོ། །སྡེ་དགེ་བླ་བྲང་ལྷ་ཁང་ཞེས་པ་ལྷ་ཁང་དང་བླ་བྲང་བཟུང་དུ་འབྲེལ་བ་འདི་ཉིད་གསར་དུ་

བཞེངས་པ་དང༌། ངུར་སྨྲིག་འཆང་བའི་དགེ་འདུན་གྱི་སྡེ་མང་དུ་བསགས་པ་ལ་སོགས་པའི་སྒོ་ནས་བསྟན་པ་དར་རྒྱས་སུ་མཛད་དོ། །དེའི་མཆེད་ཟླར་གྱུར་པ་ནམ་མཁའ་དང་རྡོ་རྗེ་ལྷུན་གྲུབ་ཅེས་བྱ་བ་གཉིས་སུ་བྱོན་པའི་ཕྱི་མ་དེའི་རིགས་སྲས་ལ་གྲགས་པ་ལྷུན་གྲུབ་
དང༌། ཀརྨ་སྲུང་ཞེས་བྱ་བ་གཉིས་བྱོན་ནོ། །དེའི་དང་པོས་ནི་ཐུགས་དམ་གྱི་གཙོ་བོར་དགྱེས་པའི་རྡོ་རྗེ་དང་ཆོས་སྐྱོང་བའི་སྲུང་མ་ནག་པོ་ཆེན་པོ་གུར་གྱི་མགོན་པོ་ལ་མཛད་པས། སྲུང་མའི་དབང་པོ་དེ་ཉིད་དུས་རྟག་ཏུ་ལུས་དང་གྲིབ་མ་བཞིན་དུ་འགྲོགས་ཤིང་ཇི་ལྟར་བསྒོས་པའི་ཕྲིན་ལས་
ཐམས་ཅད་ཐོགས་པ་མེད་པར་བསྒྲུབ་པ་གདོན་མི་ཟ་བ་དང༌། རེས་འགའ་གར་གྱི་ཉམས་དགུ་ཡོངས་སུ་རྫོགས་པའི་སྐུའི་དཀྱིལ་འཁོར་ཡང་མངོན་སུམ་དུ་བསྟན་པ་དང༌། མགོན་པོའི་སྐུ་རྟེན་ཞིག་ཐུན་མོང་མ་ཡིན་པའི་ཆོ་གས་བཞེངས་ནས་རབ་ཏུ་གནས་པའི་ཆོ་ག་བགྱིས་པའི་ཚེ་མགོན་
པོར་ཡེ་ཤེས་པ་དངོས་སུ་ཐིམ་པའི་སྣང་བ་བྱུང་ངོ༌། །སྐུ་དེ་ནི་ད་ལྟ་མགོན་ཁང་ཆེན་པོ་ན་བཞུགས་སུ་གསོལ་བ་བྱིན་གྱིས་རླབས་ཀྱི་གཟི་འོད་འབར་བ་འདི་ཉིད་ལགས་ཤིང༌། ཕྱིས་སུ་ཡུལ་ལྗོངས་འདི་ཉིད་ཀྱི་བསྟན་སྲིད་ལ་རྣམ་པར་སྡང་ཞིང་ཕྲག་དོག་གི་དུག་ཆུས་ཀུན་ནས་མྱོས་པའི་ཁ་རླངས་ཀྱི་
འཚུབས་མར་ཕ་རོལ་གྱི་དཔུང་ཚོགས་མི་སྲུན་པ་དག་གིས་ཉེ་བར་ལྷགས་པའི་དུས་ན་མགོན་ཁང་དུ་གཉུག་མར་བཞུགས་པའི་བླ་མས་མཆོད་གཏོར་རྒྱ་ཆེན་པོ་ཕུལ་ནས་དྲག་པོའི་ཕྲིན་ལས་སུ་བསྐུལ་བ་དང་བཅས་ཏེ་མགོན་ཁང་གི་ཐོག་ཁར་སྤྱན་དྲངས་ནས་དགྲ་ཕྱོགས་སུ་ཞལ་བསྟན་ཏེ་བཞག་གོ། །
དེའི་དུས་ན་འགྲོ་བ་མང་པོའི་མཐུན་སྣང་དུ་མགོན་པོའི་སྐུ་ཤིན་ཏུ་མི་སྡུག་པའི་ཉམས་ཅན་གྱིས་བདུད་རྟ་ནག་པོ་རླུང་གི་ཤུགས་ལྡན་ཞིག་ལ་བཅིབས་ཏེ། དུས་ཀྱི་མཐའི་འཐོར་རླུང་དྲག་པོ་ལྟ་བུའི་རླུང་ནག་འཚུབ་མ་ཆེན་པོ་དང་ཆབ་ཅིག་དུ་དགྲ་སྡེ་ཡོད་པའི་ཕྱོགས་ག་ལ་བ་དེར་མངོན་སུམ་དུ་རྒྱུག་
པར་མཐོང་ངོ༌། །ཇི་ལྟར་མཐོང་བ་དེ་བཞིན་དུ་རིང་པོར་མ་ཐོགས་པར་དགྲ་སྡེ་དེ་དག་ནང་འཁྲུགས་པ་དང་ཆོ་འཕྲུལ་དུ་མ་བྱུང་སྟེ་རང་ཞིར་སོང་བ་ལ་སོགས་པ་བསྟན་སྲུང་དངོས་སུ་འཁོར་བའི་འཕྲིན་ཡིག་བསྙོན་དུ་མེད་པ་གང་དེ་བདེན་པའི་མཐས་བསྒྲགས་པ་ལྟར་གྱུར་ཏོ། །སྡེ་དགེ་ཀུན་དགའ་

རིན་ཆེན་པའི་གཅུང་དཔོན་ཆེན་ནམ་མཁའི་སྲས་དབོན་ཆེན་ལྷུན་གྲུབ་ཐུབ་ཅེས་བྱ་བ་བསོད་ནམས་ཀྱི་ལྗོན་པ་མངོན་པར་རྒྱས་པ་ཞིག་བྱུང་སྟེ། དེ་ལ་སྲས་དྲུག་བྱོན་པའི་དང་པོ་ནི་བླ་མ་མཚོ་ལས་སྐྱེས་པའི་རྡོ་རྗེའི་ལུང་གིས་ཟིན་པའི་གཏེར་སྟོན་ཆེན་པོ་རིག་འཛིན་རྒོད་ཀྱི་ལྡེམ་འཕྲུ་ཅན་གྱི་སྐྱེ་བའི་ཟློས་གར་དུ་
གྲགས་པ་སྡེ་དགེ་གྲུབ་ཆེན་ཀུན་དགའ་རྒྱ་མཚོ་ཞེས་པ་སྐྱེས་ཐོབ་དང་སྦྱངས་སྟོབས་ཀྱི་མཁྱེན་རབ་ཕུལ་དུ་བྱུང་ཞིང༌། ཐུགས་རྒྱུད་ཐོག་མ་ཉིད་ནས་བྱང་ཆུབ་སེམས་ཀྱི་བརླན་གྱིས་ལེགས་པར་བསྒོས་པའི་སྐྱེས་བུ་དམ་པ་ཞིག་སྟེ། འདིས་ནི་ཤར་ཆེན་བྱམས་པ་ཀུན་དགའ་བཀྲ་ཤིས་
གྲགས་པའི་རྒྱལ་མཚན་དཔལ་བཟང་པོ་པ་གཙོ་བོར་སྨོས་པའི་གསང་སྔགས་གསར་རྙིང་གི་གྲུབ་པའི་ལུགས་སྲོལ་འཛིན་པའི་མཁས་གྲུབ་ཀྱི་བླ་མ་མང་པོ་བསྟེན་ཅིང་དེ་དག་ལ་ཇི་ལྟར་མངའ་བའི་ཟབ་ཆོས་ཀྱི་བདུད་རྩི་ཐམས་ཅད་བུམ་པ་གང་འབྱོའི་ཚུལ་དུ་གསན་པས། གསང་
བ་སྔགས་ཀྱི་བསྟན་པའི་རྩ་ལག་དམ་པར་གྱུར་ཏོ། །དེའི་འབྲས་བུ་རྟོགས་པའི་ཡོན་ཏན་ནི་གཟུང་འཛིན་གྱི་འཆིང་བ་མཐའ་དག་རང་སར་གྲོལ་བའི་བདེན་གཏམ་གྱི་རི་མོ་སྲ་ཞིང་མཁྲེགས་པ་རྡོ་བའི་གཞི་མ་ཡང་འཇིམ་པའི་ཕུང་པོ་ལ་བརྫིས་པ་ལྟ་བུའི་ཞབས་རྗེས་འཇོག་པ་དང༌།
ལྐོག་ཏུ་གྱུར་པའི་ཤེས་པར་བྱ་བའི་དངོས་པོ་ཐམས་ཅད་ཀྱང་སྒྲིབ་བྱེད་ཀྱི་རྣམ་པ་འགའ་ཡང་མེད་པར་རྗེན་པ་ཉིད་དུ་ཡང་དག་པར་གཟིགས་ནས་ལུང་དུ་བསྟན་པ་ལ་བསྙེངས་པ་མི་མངའ་བའི་མངོན་པར་ཤེས་པ་ཐོབ་ཅིང༌། འབྱུང་པོ་གདུག་པ་ཅན་གྱི་རིགས་རྣམས་དམ་ལ་འདོགས་པ་ལ་
ཡང་དཀའ་བ་མེད་པའི་སྔགས་ཀྱི་མཐུ་ཆེན་པོ་གྲུབ་པ་ལ་སོགས་པ་ཡོན་ཏན་བསམ་གྱིས་མི་ཁྱབ་པ་ལ་དབང་འབྱོར་རོ། །གཙུག་ལག་ཁང་བསམ་གྲུབ་མཐོང་གྲོལ་བརྩིགས་པའི་ཐོག་མར་ས་འདུལ་དང༌། མཐར་རྟེན་དང་བརྟེན་པར་བཅས་པ་ལ་ཡེ་ཤེས་ཀྱི་འཁོར་ལོ་འཇུག་པའི་རབ་ཏུ་གནས་
པའི་ཆོ་གའང་མཛད་དོ། །ཆོས་གྲྭ་འདིས་མཚོན་པའི་ཕྱོགས་དང་ཕྱོགས་བྲལ་རྣམས་ནས་ལྷགས་པའི་དོན་གཉེར་གྱི་སློབ་མ་མང་པོ་ལ་རང་རང་གི་བློ་དང་འཚམ་པའི་དབང་ལུང་དང་ཉམས་ཁྲིད་དང་གྱེར་དབྱངས་དང་གར་འཆམ་དང་རོལ་མོ་ལ་སོགས་པའི་ཕྱག་ལེན་གྱི་རིགས་ཤིན་ཏུ་ཕྲ་མོ་

ཚུན་ཆད་ལ་གཅེས་སྤྲས་ཀྱི་སྒོ་ནས་གཏན་ལ་འབེབས་པ་ལ་སོགས་པ་རྣམ་པར་དཀར་བའི་ཕྲིན་ལས་ཀྱི་རྒྱུན་ཆེན་པོས་བསྟན་པ་རིན་པོ་ཆེ་ལ་གཅིག་ཏུ་བཀའ་དྲིན་ཆེ་བར་མཛད་དོ། །གཉིས་པ་དབོན་ཆེན་ཀླུ་འཕེལ་ཞེས་བྱ་བ་དང༌། གསུམ་པ་ས་གཞི་སྐྱོང་
བའི་དབང་པོ་བླ་མ་བྱམས་པ་ཕུན་ཚོགས་ཞེས་བྱ་བ་སྟེ་འདི་ནི་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེའི་རྣམ་འཕྲུལ་དུ་ལུང་གིས་ཟིན་པའི་སྐྱེས་བུ་ཆེན་པོ་ཞིག་སྟེ། གཙུག་ལག་ཟུང་གི་མཁྱེན་དཔྱོད་རབ་ཏུ་གསལ་བས། ཤར་ཆེན་ཆོས་ཀྱི་རྒྱལ་པོ་ཤེས་རབ་འབྱུང་གནས་ལ་
སོགས་པ་མདོ་རྒྱུད་རྒྱ་མཚོའི་ཕ་རོལ་ཏུ་སོན་པའི་མཁས་གྲུབ་དུ་མའི་ཞབས་ཀྱི་པདྨ་ཉེ་བར་བསྙེན་ཅིང༌། སྡོམ་པ་གསུམ་དང་རྗེས་སུ་འབྲེལ་བའི་ཟབ་པ་དང་རྒྱ་ཆེ་བའི་ཆོས་ཀྱི་བདུད་རྩི་ཟད་མི་ཤེས་པའི་རྒྱུན་ཆེན་པོ་ངོམ་པར་གསོལ་ལོ། །གཅིག་ཏུ་མཚུངས་པ་མེད་པའི་བསོད་
ནམས་ཀྱི་མཐུས་སྐྱེ་འགྲོ་ཐམས་ཅད་དབང་དུ་འདུས་པ་ཞིག་སྟེ། འདི་ཉིད་ཀྱི་སྐུ་རིངས་ལ། གཞན་སྡེ་མི་སྲུན་པ་དབང་ཤེད་དང་ངན་དཔུང་གིས་མངོན་པར་ཁེངས་ཤིང༌། སྟོབས་བཅུ་མངའ་བའི་རིང་ལུགས་རྨ་མེད་པ་གང་དང་གང་དུ་དར་བ་དེ་དང་དེར་སྡང་ཞིང་ཐོ་བཙམས་པ། བེ་
རི་རྒྱལ་པོ་ལ་སོགས་པའི་དཔོན་ཆེན་དང་དཔོན་ཕྲན་མང་པོའི་ང་རྒྱལ་གྱི་གནམ་རུ་ཤིན་ཏུ་གྱོང་པོར་གནས་པ་དག །ཆེ་བར་རློམ་པ་གཞན་མང་པོས་དགུག་ཏུ་མ་བཏུབ་པ་རྣམས་ཀྱང་སྔོན་ལས་དང་སྨོན་ལམ་གྱི་ནུས་མཐུ་དགག་ཏུ་མེད་པའི་རྒྱུད་གྲིམས་པོས་དཀའ་བ་མེད་པར་རང་དབང་དུ་
བཀུག་སྟེ། ཆབ་འབངས་རྫོང་ཆེན་བཅོ་བརྒྱད་དང༌། རིས་སུ་མ་ཆད་པའི་ཆོས་སྡེ་བརྒྱ་རྩ་ལ་སོགས་པ་ཐ་གྲུ་རྣམ་པར་ཡངས་པའི་དབྱིག་འཛིན་གྱི་གཞི་མར། ལས་ཤུགས་གསེར་སྦྱངས་ཀྱི་ཙཀྲ་རྩིབས་མ་སྟོང་གིས་མངོན་པར་སྤ་བས་མངའ་བསྒྱུར་བ་མཛད་དོ། །ཁྱད་པར་རྒྱལ་
བའི་བསྟན་པའི་རྩ་ལག་ཏུ་ཨེ་ཝཾ་ཆོས་ལྡན་གྱི་སྒྲུབ་ཁང་བླ་བྲང་ནས་རིན་པོ་ཆེ་དཔལ་མཆོག་རྒྱལ་མཚན་པ་དེ་ཉིད་མདོ་སྨད་ཕྱོགས་ཀྱི་ཆོས་གྲྭ་དང༌། ཡུལ་དང༌། གྲོང་ཁྱེར་དང༌། གྲོང་རྡལ་དང༌། རྒྱལ་པོའི་ཕོ་བྲང་ལ་སོགས་པ་རྣམས་སུ་བསྟན་པའི་སྣང་བ་ཆེན་པོ་བཀྱེ་བའི་ཆེད་དུ་

སྤྱན་དྲངས་ཏེ་རིགས་ཀྱི་ཅོད་པཎ་གཅིག་པུ་ཉིད་དུ་མངའ་གསོལ་ལོ། །ཆོས་གྲྭ་ཆེན་པོ་ལྷུན་གྲུབ་སྟེང་འདི་ཉིད་གཙོར་སྨོས་པའི་ཆོས་སྡེ་མང་པོར་བཤད་སྒྲུབ་ཀྱི་རྒྱུན་ཉམས་པ་སླར་གསོ་ཞིང༌། མེད་པ་གསར་དུ་སྤེལ་བ་དང༌། སྤྲུལ་པའི་ལྷ་ཁང་ཆེན་པོ་བསམ་གྲུབ་མཐོང་གྲོལ་གཙོ་བོར་
སྨོས་པའི་གཙུག་ལག་ཁང་མང་པོ་བཞེངས་པ་དང༌། རིག་པ་འཛིན་པའི་དགེ་འདུན་གྲངས་མེད་པ་ལ་བསྙེན་བཀུར་གྱ་ནོམ་པ་སྟོབ་པ་དང་བཅས་ཏེ། ཀྱེ་རྡོ་རྗེ་དང་འཁོར་ལོ་བདེ་མཆོག་དང་གསང་བ་འདུས་པ་ལ་སོགས་པའི་གསང་ཆེན་རྒྱུད་སྡེ་ཆེན་པོའི་དཀྱིལ་འཁོར་མང་པོའི་ཞལ་ཕྱེ་
བའི་སྒྲུབ་མཆོད་ཀྱི་རྣམ་པ་མང་པོ་ཡང་གསར་དུ་འཛུགས་པར་མཛད་དེ། མདོར་ན་སྔར་སྲོལ་བཟང་པོ་མི་ཉམས་པར་སྐྱོང་བ་དང༌། གསར་བྱུང་གི་སྒྲིག་སྲོལ་བཟང་པོ་བཅའ་བ་ལ་སོགས་པས་ལུགས་གཉིས་ཀྱི་བསྟན་པའི་རྒྱུན་གཙང་དྲི་མ་མེད་པ་བསྐལ་བ་ནམ་གནས་ཀྱི་བར་དུ་མི་ནུབ་
པར་སྤེལ་བའི་བགྱི་བ་ཐམས་ཅད་ཆོས་རྒྱལ་ཨ་ཤོ་ཀའི་རྣམ་པར་ཐར་པའི་ངོ་མཚར་ཡང་འགོག་པར་ནུས་པའི་རང་བཞིན་ཁོ་ན་ཉིད་དོ། །བཞི་པ་དབོན་ཆེན་ཀརྨ་ཞེས་བྱ་བ་དང༌། ལྔ་པ་བླ་མ་ལྷ་སྲུངས་ཞེས་བྱ་བ་སྟེ། ཕྱི་མ་འདི་ནི་ཡི་དམ་གྱི་ལྷའི་བསྒོམ་བཟླས་ཁོ་ནས་ཉིན་མཚན་འདའ་
བར་མཛད་དོ། །དྲུག་པ་བླ་མ་ཀརྨ་བསམ་གྲུབ་ཅེས་བྱ་བ་སྟེ་དེ་ནི་སྒྲུབ་རྒྱུད་ཀརྨ་ཀཾ་ཚང་གི་གྲུབ་མཐའ་ལ་ཞུགས་པའི་བློ་གྲོས་དང་ལྡན་པ་ཞིག་སྟེ་དབོན་པོ་སྟོད་ཀྱི་གདན་སར་བཞུགས་སོ། །ཀརྨ་སྲུང་ཁྱིམ་ཐབས་ལ་བཞུགས་པའི་སྲས་གཉིས་ཏེ་མགོན་པོ་དང༌། ལྷུན་གྲུབ་ཅེས་སོ། །
མགོན་པོའི་སྲས་བླ་མ་བསོད་ནམས་རྒྱལ་མཚན་དང་སྐལ་བཟང་འབུམ་ད་ང༌། པདྨ་བསམ་འགྲུབ་དང་ཀུན་དགའ་ཚེ་བརྟན་ཏེ་བཞི་ལས། ཕྱི་མ་འདིས་ནི་ཡོངས་འཛིན་མང་པོའི་ཞབས་ཀྱི་པདྨར་གུས་པས་བསྟེན་ཅིང་མདོ་རྒྱུད་ཀྱི་ལུང་དང་མན་ངག་གི་གསན་པ་རྒྱ་མཚོ་ལྟ་བུའི་ཕ་རོལ་དུ་
སོན་ནས་རིམ་པ་གཉིས་ཀྱི་ཏིང་ངེ་འཛིན་ཟབ་མོ་ལ་རྩེ་གཅིག་ཏུ་བརྩོན་པས་ཡོན་ཏན་དཔག་ཏུ་མེད་པ་མངའ་ཞིང༌། ལྷག་པའི་ལྷ་རྗེ་བཙུན་རྡོ་རྗེ་རྣལ་འབྱོར་མའི་ཞལ་གྱི་དཀྱིལ་འཁོར་མངོན་སུམ་དུ་མཐོང་བར་གྲགས་སོ། །སྐལ་བཟང་འབུམ་གྱི་སྲས་བླ་མ་བཀྲ་ཤིས་རྒྱ་མཚོ་ལ་སོགས་

པ་རྣམས་ཏེ་བླ་མ་འདི་ནི་གསང་ཆེན་རྒྱུད་སྡེ་མང་པོའི་ལག་ལེན་ཆེ་ཕྲ་ཀུན་ལ་ཤིན་ཏུ་མཁས་པར་གྱུར་ཏེ། ངུར་སྨྲིག་འཛིན་པའི་དགེ་འདུན་སྟོང་ཕྲག་ཕྱེད་དང་གཉིས་ཙམ་གྱི་འགོ་འཛིན་དང་སྒྲིག་སྲོལ་མ་འཕྱུགས་པར་བསྐྱངས་བ་ལ་སོགས་པ་བསྟན་པའི་བགྱི་
བ་ལྷག་པར་བགྱིས་སོ། །སྐུ་ཚེའི་སྨད་དུ་ལོ་གྲངས་བཅུ་གསུམ་ཙམ་ལ་ཡི་དམ་གྱི་ལྷ་མང་པོའི་བསྙེན་སྒྲུབ་ལ་རྩེ་གཅིག་ཏུ་གཞོལ་བའི་རིང་ནས་མཁའ་སྤྱོད་དུ་གཤེགས་ཤིང་དེའི་དབོན་རྒྱུད་ད་ལྟར་བཞུགས་པའི་བར་རོ། །དབོན་ཆེན་ཀླུ་འཕེལ་གྱི་སྲས་གསུམ་ལས་ཨཽ་ཌྱཱན་བཀྲ་ཤིས་ཁྱིམ་ཐབས་ལ་
བཞུགས་ནས་སྲིད་པའི་ཕྲིན་ལས་ཀྱི་རྒྱུན་སྐྱོང་བར་མཛད་དོ། །དབོན་ཆེན་ཀུན་དགའ་ཕུན་ཚོགས་ནི་ཐུགས་སྒམ་ཞིང་ངང་རིང་བ་དང༌། མངའ་འབངས་ཐམས་ཅད་ཆོས་དང་མཐུན་པའི་བྱ་བས་བསྐྱང་བ་ལ་སོགས་པ་ཡ་རབས་ཀྱི་སྤྱོད་ཚུལ་ཕུན་སུམ་ཚོགས་པ་ནམ་ཡང་མི་གཏོང་བ་དང༌། ཕྱི་
གསོ་བ་རིག་པ་དང༌། བཟོ་རིག་པ་ལ་སོགས་པ་ལ་མཁས་པར་གྱུར་པ་དང༌། ནང་གསང་སྔགས་གསར་རྙིང་གི་ལམ་གྱི་ཉམས་ལེན་ཟབ་མོ་ལ་བརྩོན་པ་དང་དཀྱིལ་འཁོར་གྱི་རིགས་མང་པོའི་ཆོ་གའི་ཕྱག་ལེན་དང༌། གར་འཆམ་དང་དབྱངས་དང་རོལ་མོ་ལ་སོགས་པའི་གཙུག་
ལག་རྒྱ་མཚོའི་དོན་ལ་བློ་ལྡན་ཀུན་གྱིས་བསྔགས་པའི་མཁྱེན་རབ་ཕུལ་དུ་བྱུང་བ་མངའ་ཞིང༌། ས་སྐྱོང་བླ་མ་ཆེན་པོ་བྱམས་པ་ཕུན་ཚོགས་པ་སྐུ་གཤེགས་ནས། དེའི་གདན་སའི་ཁྲི་ལ་བཞུགས་ནས་རྣམ་དཀར་གྱི་ཕྲིན་ལས་རྒྱ་ཆེར་སྤེལ་བར་མཛད་དོ། །དབོན་པོ་རྒྱ་བོ་ནི་
དབོན་པོ་སྟོད་དུ་བཞུགས་སོ། །དབོན་ཆེན་ལྷུན་གྲུབ་ཀྱི་སྲས་བཞི་པ་ཀརྨ་ཞེས་བྱ་བ་དེའི་སྲས་དབོན་པོ་ཆེ་མཆོག་དང༌། རྡོར་ལེགས་དང༌། གཡུལ་རྒྱལ་ཏེ་གསུམ་ལས། ཆེ་མཆོག་ནི་ཆོས་དང་སྲིད་ཀྱི་གཙུག་ལག་ཀུན་ལ་མི་འཇིགས་པའི་བློ་གྲོས་ཀྱི་ལང་ཚོ་མངོན་པར་བདོ་
བས་གདན་ས་གཉིས་པ་མཛད་དེ་ཆབ་འབངས་ཐམས་ཅད་ཆོས་དང་བྱམས་པས་བདེ་བར་སྦྱར་བ་ལ་སོགས་པ་བཀའ་དྲིན་ཤིན་ཏུ་ཆེ་བ་བྱུང་ངོ༌། །གཡུལ་རྒྱལ་གྱི་སྲས་ངག་དབང་བཀྲ་ཤིས་ནི་མཁྱེན་རབ་ཕུན་སུམ་ཚོགས་པ་མངའ་ཞིང་གཅིག་ཏུ་གཞན་ལ་ཕན་པ་ལྷུར་བྱེད་པ་ཞིག་

གོ། །དབོན་པོ་ཀླུ་འཕེལ་གྱི་སྲས་འགྲན་ཟླ་མེད་པའི་བསོད་ནམས་ཀྱི་འབྲས་བུ་མཐའ་དག་གཅིག་ཏུ་འཁྱིལ་བའི་ཁྲི་ཆེན་བླ་མ་སངས་རྒྱས་བསྟན་པ་ཞེས་མཚན་གྱི་སྙན་པའི་ཡི་གེ་ཕྱོགས་བྲལ་གྱི་ཆེ་དགུ་མང་པོས་རལ་པའི་རྩེ་ལ་ཅི་བདེ་བར་ངལ་བསོར་སྤྱོད་པ་སྙམ་བགྱིད་པ་དེ་ནི། གཏེར་གཞུང་
འགའ་ཞིག་ཏུ་ཅོག་རོ་ཀླུའི་རྒྱལ་མཚན་པའི་སྤྲུལ་པའི་རོལ་རྩེད་ཉིད་དུ་གདོན་མི་ཟ་བར་ལུང་གིས་བསྟན་པའི་སྐྱེས་བུ་ཆེན་པོ་ཞིག་སྟེ། དང་པོ་ནས་རང་བཞིན་བཟང་ཞིང་བསམ་པ་དགེ་བ། ཡིད་གཞུངས་ཤིང་ཕྱི་ནང་གི་རིག་པའི་གཞུང་ལུགས་རབ་འབྱམས་ལ་བློ་གྲོས་ཀྱི་འཇུག་པ་ཤིན་ཏུ་
གསལ་པོར་གྱུར་པས་སྡེ་དགེའི་གདན་རབས་ཀྱི་ཁྲི་ལ་མངའ་གསོལ་ལོ། །དེ་ནས་བཟུང་སྟེ་རྒྱལ་ཁམས་ཀྱི་འགྲོ་བ་རིས་སུ་མེད་པ་ལས་དབང་གི་གྲིབ་མ་བསིལ་པོའི་ཁོངས་སུ་བདེ་བར་སྐྱོང་ཞིང༌། དེ་བཞིན་གཤེགས་པའི་བསྟན་པ་ལ་ཕན་པའི་ལེགས་བྱས་ཀྱི་སྒོ་འཕར་བྱེ་བ་ཁྲག་ཁྲིག་
དུས་ཅིག་ཅར་དུ་ཕྱེ་བ་ལ་སྔོན་རབས་བོད་ཀྱི་ཆོས་རྒྱལ་ཆེན་པོ་རྣམས་ཀྱི་མཛད་པ་བཟང་པོ་རྗེས་སུ་དྲན་པའི་རང་བཞིན་དུ་གྱུར་ཅིང༌། མངའ་འོག་ཏུ་མཆིས་སོ་འཚལ་གྱི་དགེ་འདུན་གྱི་སྡེ་རིས་སུ་མ་ཆད་པ་རྣམས་ལ་བཤད་སྒྲུབ་ཀྱི་རྒྱུན་ཉམས་པ་སླར་གསོ་བ་དང༌། སྔ་ན་མེད་པའི་དཀྱིལ་
འཁོར་གྱི་སྒྲུབ་མཆོད་མང་པོ་ལོ་རེ་བཞིན་འཛུགས་པའི་སྲོལ་བཏོད་པ་དང༌། ཆོ་ག་དེ་དང་དེ་དག་གི་ཆིངས་དང༌། མཐོང་བ་བརྒྱུད་པའི་ལག་ལེན་དུ་དར་བའི་གྱེར་གདངས་དང༌། ཕྱག་རྒྱ་དང༌། བྲི་ཐིག་རྡུལ་ཚོན་ལ་སོགས་པ་རྣམས་ཀྱང་གྲྭ་ས་ཆེན་པོ་རྣམས་དང༌། ལྗོངས་འདིར་
སྔ་རབས་བྱོན་པའི་མཁས་གྲུབ་གོང་མ་རྣམས་ཀྱིས་ཇི་ལྟར་བཞག་པའི་ལག་ལེན་ཐམས་ཅད་མ་འཕྱུགས་པའི་བཅའ་ཁྲིམས་རྡོ་རྗེའི་རྭ་བ་ལྟར་བརྟན་པར་བཅས་ཏེ། བསྟན་དོན་རྒྱ་ཆེ་ཞིང་བསྐལ་པའི་བར་དུ་ཡང་ཆེས་ཆེར་བརླིང་བར་མཛད་དོ། །རང་ལུགས་ཀྱི་གྲྭ་ས་གཙོར་བཏོན་
པའི་དབུས་གཙང་ཁམས་གསུམ་དུ་གཏོགས་པའི་དགེ་འདུན་གྱི་ཚོགས་ཚད་མེད་ཅིང་གྲངས་མེད་པ་ལ་བསྙེན་བཀུར་གྱ་ནོམ་པ་སྦྱར་རོ། །ཁྱད་པར་ལྷུན་གྲུབ་སྟེང་གི་ཆོས་གྲྭ་ཆེན་པོས་མཚོན་པའི་མདོ་སྨད་ཀྱི་སའི་ཆ་ལ་འཁོད་པའི་འགྲོ་བའི་བདེ་སྐྱིད་དང་བསྟན་པའི་བཤད་སྒྲུབ་ལ་

ཕན་པའི་ཐུགས་བསྐྱེད་རྨ་མེད་པ་ཉེ་བར་བཞག་སྟེ། འཇམ་མགོན་བཀྲ་ཤིས་དཔལ་ལྡན་ཞེས་པ་མདོ་སྡེ་དང་རྒྱུད་སྡེ་མ་ལུས་པའི་གསན་སྦྱངས་རྒྱ་མཚོ་ལྟ་བུའི་ཕ་རོལ་དུ་སོན་པ་དེ་ཉིད་སྤྱན་དྲངས་ཏེ། དཔལ་དགེས་པ་རྡོ་རྗེ་ལ་སོགས་པའི་རྒྱུད་སྡེ་ཆེན་པོ་རྣམས་དང་
རྗེས་སུ་འབྲེལ་བའི་དབང་བསྐུར་བ་དང་བྱིན་གྱིས་བརླབས་པ་ལ་སོགས་པའི་ཆོས་ཀྱི་འཁོར་ལོ་རྒྱ་ཆེན་པོ་བསྐོར་བར་བསྐུལ་ཏེ་བསྟན་པའི་རྒྱལ་མཚན་ཆེན་པོ་མི་ནུབ་པར་བྱས་སོ། །ཐུབ་བསྟན་རྣམ་པར་རྒྱལ་བའི་ཆོས་གྲྭ་ནས་ཀུན་མཁྱེན་གོ་བོ་རབ་འབྱམས་བསོད་ནམས་སེང་གེ་ཞེས་ས་སྟེང་གི་
དཀྱིལ་འཁོར་ལུས་པ་མེད་པར་ཉིན་མོར་བྱེད་པ་ལྟར་གྲགས་པ་གང་དེའི་ཞབས་སྟེགས་སེང་གེའི་ཁྲི་མཐོན་པོ་གང་ལ་མངའ་གསོལ་བའི་མཁན་ཆེན་བཟང་པོ་རྒྱལ་མཚན་ཞེས་པ་གཞུང་ལུགས་རབ་འབྱམས་སྨྲ་བའི་དབང་ཕྱུག་དེ་ཉིད་སྤྱན་དྲངས་ནས་བླའི་མཆོད་གནས་སུ་བཀུར་རོ། །མགོན་
དེས་གསུང་ངག་རིན་པོ་ཆེ་ལམ་འབྲས་བུ་དང་བཅས་པའི་གདམས་ངག་གི་ཉམས་ཁྲིད་རྒྱས་པ། དེའི་ཡན་ལག་དང་བཅས་པ་ཡོངས་སུ་རྫོགས་པ་དང༌། འཕགས་ཡུལ་གྱི་གྲུབ་པའི་དབང་ཕྱུག་འཇིགས་མེད་འབྱུང་གནས་སྦས་པའི་ཞབས་ཀྱིས་ལེགས་པར་བཀྲལ་བའི་རྡོ་རྗེ་
ཕྲེང་བ་དཀྱིལ་འཁོར་ཆེན་པོ་བཞི་བཅུ་རྩ་ལྔ་ལ་སོགས་པའི་དབང་བསྐུར་གྱི་རིགས་དང༌། རྗེས་སུ་གནང་བ་དང༌། ཉམས་ཁྲིད་ལ་སོགས་པ་ཟབ་པ་དང་རྒྱ་ཆེ་བའི་ཆོས་ཀྱི་འཁོར་ལོ་རྒྱ་ཆེན་པོ་བསྐོར་ཏེ། དེ་དག་གི་རྒྱུན་དེང་སང་གི་བར་དུ་ཡང་དར་རྒྱས་སུ་བཞུགས་སོ། །སླར་
ཡང་དཔལ་ཨེ་ཝཾ་ཆོས་ལྡན་གྱི་དགོན་པ་ནས། བཅོམ་ལྡན་འདས་ཤཱཀྱའི་རྒྱལ་པོའི་རྒྱལ་ཚབ་ཀྱི་སྐྱེས་བུ་ཆེན་པོ་རྡོ་རྗེ་འཆང་ཀུན་དགའ་བཟང་པོ་པའི་ཞབས་སྟེགས་མི་འཇིགས་གདོང་ལྔའི་ཁྲི་ལ་མངའ་གསོལ་བའི་མཁན་རབས་ཉེར་གསུམ་པ་དཔལ་ལྡན་རྡོ་རྗེ་འཆང་དབང་ངུར་སྨྲིག་
གར་གྱིས་རྣམ་པར་རྩེན་པའི་མཁས་གྲུབ་སངས་རྒྱས་ཕུན་ཚོགས་པ་ཞེས་བྱ་བ། འཛམ་གླིང་བསྟན་པའི་རྒྱན་གཅིག་པུ་དཔལ་ས་སྐྱ་པ་ཀུན་དགའ་བཀྲ་ཤིས་པ་གཙོ་བོར་སྨོས་པའི་གཙང་དབུས་ཁམས་གསུམ་གྱི་མཁས་པ་དང་གྲུབ་པའི་དབང་པོ་མ་ལུས་པའི་གཙུག་གི་ནོར་བུར་གྱུར་པ་དེ་ཉིད་

མདོ་ཁམས་ཕྱོགས་ཀྱི་སྐྱེ་འགྲོ་དཔག་ཏུ་མེད་པའི་ཐར་པ་བགྲོད་པའི་ལམ་མཁན་ཉིད་དུ་སྤྱན་དྲངས་ཏེ། ཆོས་གྲྭ་འདིར་རྟག་པར་བཞུགས་ནས། ལྕགས་ར་དང༌། ཡ་ན་དང༌། དབོན་པོ་སྟོད་དང༌། ཟུལ་སྟོད་དང༌། སྤེ་བར་དང༌། སྨད་ཤོད་རྣམས་སུ་ཞབས་ཀྱིས་བཅགས་པར་གསོལ་བ་བཏབ་
སྟེ། དེ་དག་ཏུ་སྤྱན་དྲངས་ནས། སྡོམ་པ་གསུམ་གྱི་བདུད་རྩིའི་སྒོ་འཕར་བསམ་གྱིས་མི་ཁྱབ་པ་ཕྱེ་བས་སྐལ་བར་ལྡན་པ་ཀུན་གྱི་རེ་བ་ཡོངས་སུ་རྫོགས་པར་མཛད་པ་དང༌། སྒྲུབ་མཆོད་ཀྱི་རིགས་མང་པོ་གསར་དུ་བཙུགས་པ་དང༌། སྔར་ཡོད་པ་རྣམས་ཀྱང་དག་ཐེར་མཛད་པའི་སྒོ་ནས། བསྟན་
པ་རིན་པོ་ཆེའི་དྲི་མ་ཕྲ་མོ་རྣམས་ཀྱང་ལུང་དང་རིགས་པ་དང་མན་ངག་གི་དག་བྱེད་བཟང་པོས་ལེགས་པར་བཀྲུས་ཏེ། སྔོན་དུས་འཕགས་པའི་ཡུལ་གྱི་བསྟན་པ་དར་རྒྱས་ལ་འགྲན་པར་ནུས་པའི་ཕྲིན་ལས་ཀྱི་རྒྱུན་ཆེན་པོ་བཙུགས་པ་སོགས་ལ་ས་སྐྱོང་བླ་མ་ཆེན་པོ་འདི་ཉིད་ཀྱི་བཀའ་དྲིན་
མཐའ་དག་གཟུགས་སུ་རུང་ན་གནམ་སའི་དཀྱིལ་འཁོར་ཀུན་ཀྱང་དོག་པར་འགྱུར་བའི་རང་བཞིན་ཁོ་ནའོ། །དབོན་ཆེན་ཀླུ་འཕེལ་གྱི་རིགས་སྲས་ཨོ་ཌྱཱན་བཀྲ་ཤིས་དེ་ཉིད་ལ་སྲས་བཞི་འཁྲུངས་པའི་དང་པོ་སྡེ་དགེ་ཁྲི་ཆེན་བླ་མ་བསོད་ནམས་ཕུན་ཚོགས་ཞེས་ཡོངས་སུ་གྲགས་པ་
ལས་དབང་གི་འཁོར་ལོས་སྒྱུར་བ་ཆེན་པོ་སྟེ། དེ་ནི་ཐོག་མ་ཉིད་ནས་སངས་རྒྱས་བཅོམ་ལྡན་འདས་ཀྱི་བསྟན་པ་ལ་རྩོམ་པ་བླ་ན་མེད་པའི་སྒོ་ནས་ཕན་འདོགས་པར་འདོད་པའི་དམ་བཅའི་ཁུར་ཆེན་པོ་བླངས་པ་ཞིག་སྟེ། ཤིན་ཏུ་མཐོ་བའི་རིགས་སུ་གྱུར་ཀྱང་དྲེགས་པ་དང་
ཁེངས་པ་མི་མངའ་བར་རང་བཞིན་གྱིས་བཟང་ཞིང༌། བདག་དང་གཞན་ལ་ཕན་པའི་བསམ་པ་དང་སྦྱོར་བ་ཕུན་སུམ་ཚོགས་པ་ལ་ཞུགས་པ། བཟོ་དང་གསོ་བ་ལ་སོགས་པ་ཕྱི་རིག་པའི་གནས་ཕལ་ཆེ་བ་དག་ལ་མ་རྨོངས་པའི་མཁྱེན་རབ་དང་ལྡན་པ། ནང་གསང་སྔགས་གསར་རྙིང་
གི་བསྟན་པ་ལ་ལྷག་པར་མོས་པས་མཁས་གྲུབ་ཡོངས་ཀྱི་གཙུག་གི་ནོར་བུ་ལྟར་གྱུར་པ་མཁན་ཆེན་སངས་རྒྱས་ཕུན་ཚོགས་པ་ལ་སོགས་པ་གསར་རྙིང་གི་བླ་མ་མང་པོ་ལས་ཟབ་ཆོས་ཀྱི་གདམས་པ་རྒྱ་མཚོ་ལྟ་བུའི་གསན་སྦྱངས་དཔྱིས་ཕྱིན་པར་མཛད་དེ། བསླབ་པ་རིན་པོ་ཆེ་རྣམ་པ་

གསུམ་གྱི་འབྱོར་པས་ཐུགས་ཀྱི་བང་མཛོད་རྨ་མེད་པའི་རང་བཞིན་དུ་ཡོངས་སུ་བཀང་སྟེ་ཆོས་སྨྲ་བའི་རྒྱལ་པོར་གྱུར་ཏོ། །གཙུག་ལག་གཉིས་ཀ་ཟུང་དུ་འབྲེལ་བའི་ཕྲིན་ལས་ཀྱི་དབང་ཕྱུག་དམ་པའི་གོ་འཕང་ཉིད་དུ་མངའ་སྒྱུར་བའི་ཕྱིར་སྡེ་དགེའི་གདན་རབས་རིན་པོ་
ཆེའི་ཁྲི་འཕང་མཐོན་པོ་ལ་ཞབས་ཀྱི་པདྨ་དམར་པོ་རྣམ་པར་བཀོད་དེ་ཆོས་དང་སྲིད་པའི་གཞུང་ལུགས་ཐམས་ཅད་སྨྲ་བའི་རྒྱལ་པོར་གྱུར་ཏོ། །དེ་ནས་བརྩམས་ཏེ་ཆོས་དང་མཐུན་པའི་ཕྲིན་ལས་མདོག་བཟང་གི་འཁོར་ལོ་སྔོན་དུ་རྒྱུ་བས། ཡངས་པའི་རྒྱལ་ཁམས་ཀྱི་འགྲོ་བ་ཕལ་ཆེ་བ་གཞོལ་
དུ་མེད་པའི་མཁྱེན་རབ་དང་བརྩེ་བའི་གདུགས་དཀར་གྱི་གྲིབ་མ་བསིལ་པོའི་རྭ་བ་གང་ན་ལེགས་པར་བཅུག་ནས་རྣམ་པར་འཚེ་བ་མེད་པའི་བདེ་བ་ལ་ངལ་བསོ་བའི་སྐལ་བ་བཟང་པོ་ཅི་ཡང་བྱིན་ནོ། །གཞན་ཡང་བསགས་པའི་དངོས་པོ་གྱ་ནོམ་པ་དག་ཀྱང་བོད་ཁམས་ཀྱི་ཆོས་སྡེ་རིས་སུ་མེད་པའི་དགེ་
འདུན་རྣམས་ལ་མཆོད་ཅིང་རྗེད་པར་བྱེད་པ་དང༌། བྱེ་བྲག་ཏུ་མངའ་འོག་ཏུ་གཏོགས་པའི་དགོན་སྡེ་རྣམས་སུ་གཙུག་ལག་ཁང་སྔར་ཡོད་ཉམས་པ་རྣམས་ཀྱི་ཉམས་གསོ་དང༌། མེད་པ་རྣམས་གསར་དུ་བཞེངས་པ་དང༌། བསྟན་པའི་རྩ་ལག་དགེ་སློང་གི་དགེ་འདུན་གྲངས་མེད་པ་ལ་བསྙེན་
བཀུར་སྟོབ་པའི་ཕྱིར་གཏོང་ཞིང༌། དེ་དག་གི་བཅའ་ཁྲིམས་དང་ཀུན་སྤྱོད་ཀྱི་སྒྲིག་ལམ་གོང་མ་རྣམས་ཀྱིས་བཞག་པའི་རྒྱུན་བཟང་པོ་སྐྱོང་བ་དང༌། གྲྭ་ས་ཆེན་པོ་རྣམས་ལ་ཇི་ལྟར་ཡོངས་སུ་དར་བའི་ལུགས་སྲོལ་བཟང་པོ་སྔོན་ཆད་འདིར་མ་བྱུང་བ་རྣམས་ཀྱང་གསར་བསྒྲུབ་ཀྱི་སྲོལ་བཏོད་པ་ལ་
སོགས་པ་སྟོབས་བཅུ་མངའ་བའི་བསྟན་པ་རིན་པོ་ཆེ་རིང་འཚོར་འགྱུར་བའི་བཀའ་དྲིན་ཟླ་མེད་པ་མཛད་དོ། །གཉིས་པ་དབོན་དབང་ཆེན་མགོན་པོ་ཞེས་བྱ་བ་དང༌། གསུམ་པ་བླ་མ་སངས་རྒྱས་དཔལ་བཟང་པ་སྟེ། འདིས་རྣམ་པ་ཐམས་ཅད་དུ་བསྒྲུབ་པར་བྱ་བའི་གཙོ་བོ་ནི། སྤྱིར་བདེ་བར་
གཤེགས་པའི་བསྟན་པ་ཐམས་ཅད་དང༌། སྒོས་སུ་རྗེ་བཙུན་ས་སྐྱ་པ་ཞེས་ཁམས་གསུམ་ཆོས་ཀྱི་སྒྲོན་མེ་ཆེན་པོར་གྱུར་པ་དེ་དང༌། རྒྱལ་བ་གཉིས་པ་རྗེ་བཙུན་ཀུན་དགའ་བཟང་པོ་ཡབ་སྲས་བརྒྱུད་པ་དང་བཅས་པའི་ལུགས་བཟང་རྩོད་པ་ཀུན་ལས་གྲོལ་བ་གང་དེ། གངས་ཀྱི་རྭ་བས་

མཛེས་པར་བསྐོར་བའི་ལྗོངས་འདིར་ཇི་ལྟར་སྤྲིན་སྔོན་དུས་ཀྱི་ཆུ་གཏེར་ཆེན་པོ་བཞིན་དུ་མི་ཉམས་ཤིང་གོང་ནས་གོང་དུ་སྤེལ་བའི་ཐུགས་བསྐྱེད་རིན་པོ་ཆེ་འབྱུང་བའི་གནས་ཀྱི་དབའ་རླབས་གནམ་དུ་འཕྱོ་བའི་རང་བཞིན་ལས་ནམ་ཡང་བྲི་བ་མེད་པ་ནས། གྲུབ་པའི་དབང་པོའི་གདན་ས་རི་ཁྲོད་སྨིན་གྲོལ་
གླིང་དང༌། དབོན་པོ་སྟོད་ཀྱི་གདན་ས་གཉིས་ཆར་སྐྱོང་བར་མཛད་དོ། །གདན་ས་དེ་གཉིས་དང་དགོན་སྡེ་གཞན་དང་གཞན་དག་ལ་ཡང་ངོར་ལུགས་དཀྱིལ་འཁོར་བདུན་དུ་གྲགས་པ་ལ་སོགས་པའི་དཀྱིལ་འཁོར་གྱི་རྣམ་པ་མང་པོའི་སྒྲུབ་མཆོད་དང་གཞུང་འདོན་པའི་དུས་མཆོད་ཀྱི་རྒྱུན་མང་པོ་
གསར་དུ་བཞག་སྟེ། ངུར་སྨྲིག་འཆང་བའི་དགེ་འདུན་བགྲང་ལས་འདས་པ་ལ་བསྙེན་བཀུར་རྒྱ་ཆེན་པོ་སྦྱོར་བའི་སྲོལ་བཏོད་དོ། །གཞན་ཡང་རྗེ་བཙུན་ཨེ་ཝཾ་པ་ཆེན་པོ་བརྒྱུད་པ་དང་བཅས་པ་འགའ་ཞིག་གི་བཀའ་འབུམ་དང་རྣམ་པར་ཐར་པ་ལ་སོགས་པའི་གླེགས་བམ་དག་ཅིང་དངོས་
བཟང་བ་མང་པོ་བཞེངས་ཏེ། དེ་དག་གི་མདུན་དུ་ཡང་སྤོས་དང་མར་མེ་ལ་སོགས་པའི་ཉེ་བར་སྤྱོད་པ་རྒྱ་དཔངས་མི་ཆུང་བའི་རྒྱུན་མཆོད་ཀྱི་རྒྱུན་བཙུགས་སོ། །ཁྱད་པར་ཕྱོགས་བཅུའི་རྒྱལ་བ་ཐམས་ཅད་ཀྱི་ཡོན་ཏན་དང་ཕྲིན་ལས་མངའ་བ་འཇམ་དབྱངས་སངས་རྒྱས་ཕུན་ཚོགས་པ་དེ་ཉིད་
བོད་ཆེན་གྱི་ལྗོངས་འདིར་སྤྱན་འདྲེན་པའི་སླད་དུ། འཕགས་པའི་ཡུལ་གྱི་པཎ་ཆེན་ནཱ་རོ་ཏ་པའི་རྣམ་པར་ཐར་པའི་རྗེས་སུ་འགྲོ་བའི་དཀའ་བ་དཔག་ཏུ་མེད་པ་དང་དུ་བླངས་ཏེ། ལྗོངས་འདིའི་འགྲོ་བའི་ལེགས་བྱས་ཀྱི་མགྲོན་དུ་སྤྱན་དྲངས་ནས། འཆད་རྩོད་རྩོམ་པའི་ཕྲིན་ལས་གཞལ་དུ་
མེད་པས། བསྟན་པ་མཐའ་དག་ནམ་ལངས་པ་ལ་ཉི་མ་ཤར་བ་ལྟར་མཛད་པའང་འདི་པ་སྐུ་མཆེད་ཀྱི་དྲིན་ཁོ་ན་ལས་བྱུང་བ་ཡིན་ནོ། །བསྟན་འཛིན་གྱི་སྐྱེས་བུ་ཆེན་པོ་དེ་ལ་སོགས་པའི་ཡོངས་རྫོགས་བསྟན་པའི་མངའ་བདག་མང་པོ་གཙུག་ན་མཆོད་ཅིང༌། དེ་དག་ལས་འོངས་པའི་གདམས་
པ་ཟབ་པ་དང་རྒྱ་ཆེ་བ་བསམ་གྱིས་མི་ཁྱབ་པ་རྣམས་ཐུགས་ཉམས་སུ་བཞེས་ཏེ། མདོར་ན་མཁས་པ་དང་བཙུན་པ་དང་གྲུབ་པའི་ཡོན་ཏན་ཟད་མི་ཤེས་པའི་ངང་ཚུལ་བཟང་པོ་ཡོངས་སུ་འཛིན་པ་ཉིད་དོ། །བཞི་པ་བྱམས་པ་ཀུན་དགའ་རབ་བརྟན་པ་སྟེ། འདི་ནི་སྐྱེས་སྟོབས་དང་སྦྱང་སྟོབས་ཀྱི་

རྣམ་པར་འབྱེད་པའི་མིག་དཀྱུས་རིང་པོར་སྤྲོས་པའི་ཁོངས་ག་ལ་བ་དེ་ན། ཕྱི་དང་ནང་གི་གྲུབ་པའི་གཞུང་ལུགས་རབ་འབྱམས་ཐམས་ཅད་དོག་པ་མེད་པའི་ཚུལ་གྱིས་ཆུད་པས། དེའི་འབྲས་བུ་གྲུབ་མཐའ་སོ་སོའི་ལྟ་གྲུབ་ཀྱི་ཁྱད་པར་རྣམ་པར་དབྱེ་བའི་གཏམ་སྙན་གྱི་མེ་
ཏོག་བསྟར་ལ་བརྒྱུས་པའི་ཕྲེང་བ་གང་དག །བློ་ལྡན་ཡོངས་ཀྱི་རྣ་བའི་རྒྱན་དུ་བཀོད་པ་ལ་བསྙེངས་པ་མི་མངའ་བའི་གདེངས་ཐོབ་སྟེ། དབོན་སྟོད་ཀྱི་གདན་སར་བཞུགས་སོ། །དེར་བསྟན་སྲིད་ཟུང་དུ་འབྲེལ་བའི་ཕྲིན་ལས་དཔག་ཏུ་མེད་པས་བསྟན་པ་དང་སེམས་ཅན་གྱི་དོན་རྒྱ་ཆེན་པོ་བསྒྲུབས་
ཤིང༌། རྒྱུ་དང་དཀའ་ཚེགས་ཀྱི་གཏིང་མཐའ་གཞལ་དུ་མེད་པས་དཔལ་ས་སྐྱའི་རྗེ་བཙུན་གོང་མ་ལྔའི་བཀའ་འབུམ་སྐྱ་ཆོས་པུསྟི་བཅུ་དྲུག་ན་བཟའ་དང་གླེགས་ཤིང་གླེགས་ཐག་དང་བཅས་པ་སྤུས་བཟང་བར་བསྒྲུབས་པ་དང༌། དཀོན་མཆོག་གསུམ་ལ་མཆོད་པ་ཕུལ་བ་དང༌། དགེ་འདུན་ལ་
བསྙེན་བཀུར་བགྱིས་པ་ལ་སོགས་པའི་རྣམ་པར་དཀར་བའི་ལེགས་མཛད་ཀྱི་ཕུང་པོ་གང་ལ་བློ་ལྡན་ཐམས་ཅད་ཀྱི་བསྔགས་པར་བརྗོད་པའི་ཚིག་གི་གླིང་བུ་ཅི་ཡང་བསྒྱུར་བའི་གནས་སོ། །དཔོན་དབང་ཆེན་མགོན་པོ་ལ་སྲས་གཉིས་འཁྲུངས་པའི་དང་པོ་མགོན་པོ་ཚེ་རིང་ཞེས་བྱ་བ་ཡ་རབས་ཀྱི་རང་
བཞིན་བཟང་པོ་ཡོངས་སུ་མི་འདོར་བའི་ལས་ཅན་ཞིག་སྟེ། འོན་ཀྱང་གཞོན་ནུའི་དུས་ཉིད་ནས་སྔ་པའི་ལམ་དུ་གཤེགས་སོ། །དེའི་མཆེད་ཟླར་གྱུར་པ་དཔོན་དབང་ཆེན་མགོན་པོའི་སྲས། སྟོབས་ཀྱི་འཁོར་ལོས་སྒྱུར་བའི་ཆོས་ལྡན་གྱི་རྒྱལ་པོ་བསྟན་པ་ཚེ་རིང་ཞེས་ཡོངས་སུ་གྲགས་པ་སྟེ།
དེ་ནི་སྔ་ན་མེད་པའི་ལེས་བྱས་ཀྱི་གཞི་ཆེན་པོར་གྱུར་པའི་ཆོས་ཀྱི་སྦྱིན་པའི་མ་མོ་འདི་ཉིད་ཀྱི་དབུ་འཛུགས་པའི་བདག་པོའི་རྐྱེན་བྱེད་པ་པོ་སྟེ། ངེས་པར་ས་ལ་གནས་པའི་བྱང་ཆུབ་སེམས་དཔའ་ཉིད་མིའི་བདག་པོའི་མིག་འཕྲུལ་གྱི་རྫུ་ལ་ཞུགས་པ་ཞིག་སྟེ། ཐོག་མ་ཉིད་ནས་འཇིག་རྟེན་
ཐམས་ཅད་ལ་ཡིད་བརྩེ་བའི་རླན་གྱིས་བརླན་པ། ན་བ་དང༌། རྒ་བ་དང༌། འཆི་བ་དང༌། སྡུག་པ་དང་བྲལ་བ་ལ་སོགས་པའི་སྡུག་བསྔལ་གྱི་ཁུར་ཆེན་པོ་དག་གིས་ཡོངས་སུ་གཟིར་བའི་སྐྱེ་བོ་མགོན་དང་བྲལ་བ་དང༌། སྐྱབས་དང་བྲལ་བ་དང༌། དཔུང་གཉེན་དང་བྲལ་བ་དག་

མཐོང་ན། སྙིང་རྗེའི་ཕྱག་རིང་ཡངས་པར་བརྐྱང་སྟེ། འཇིགས་པ་དང༌། ཉམ་ང་བ་གང་དང་གང་ཡིན་པ་དེ་ལས་བསྐྱབ་པ་ལ་སྤྲོ་བ་མཆོག་ཏུ་བརྟས་པ། སྔོན་གྱི་བསོད་ནམས་ཀྱི་མཐུ་ཆེན་པོ་ཐོབ་པ་ལ། སླར་ཡང་དཀོན་མཆོག་གསུམ་ལ་མཆོག་ཏུ་དད་པས། ཡོན་ཏན་གྱི་ཆོས་གང་
དག་ཕྱིར་ཕྱིར་རབ་ཏུ་བརྟན་པར་བྱས་པ། ཕྱོགས་བཅུའི་རྒྱལ་ཕྲན་ཐམས་ཅད་ཀྱང་ཕྱག་འཚལ་ཞིང་རང་གི་ངང་གིས་བཏུད་པར་བྱས་པ། དེ་ལྟ་ནའང་དགེ་བའི་སེམས་དང་ཆོས་ལས་འབྱུང་བའི་སྤྱོད་པའི་ཆུ་ཀླུང་བསིལ་པོར་འབེབས་པ་ལ་རབ་ཏུ་མཁས་པས་ང་རྒྱལ་གྱི་མེ་དཔུང་ཡོངས་སུ་
བཅིལ་བ་དང་ཐུགས་དུལ་བར་གྱུར་པ། གཏོང་བ་ལ་མཆོག་ཏུ་དཔའ་བ། ཡིད་གཞུངས་ཤིང་མང་དུ་ཐོས་པ་དང༌། ཤེས་རབ་ཀྱི་ནོར་དང་ལྡན་པ། ཡི་གེ་དང༌། གྲངས་དང༌། རྩིས་དང༌། མིག་འཕྲུལ་དང༌། སྔོན་གྱི་རབས་དང༌། སྙན་དངགས་དང༌། ཟློས་གར་དང༌། རོལ་མོའི་བྱེ་བྲག་
དང༌། འཕོ་བ་དང༌། སྒྱུ་རྩལ་གྱི་རིག་པ་ཐམས་ཅད་ལེགས་པར་སྦྱངས་པ། ཁྱད་པར་གསོ་བ་རིག་པའི་གཞུང་ལུགས་སྨན་འཚོ་བའི་མདོ་དང༌། ཡན་ལག་བརྒྱད་པ་དང༌། དེའི་མན་ངག་རྒྱུད་བཞི་འགྲེལ་པ་དང་བཅས་པ་ལ་སྦྱངས་པའི་ཕ་རོལ་དུ་སོན་ནས། མཆོག་དམན་གྱི་འགྲོ་བ་
ཐམས་ཅད་དུས་མ་ཡིན་པར་འཆི་བ་དང་ནད་ཀྱི་ཟུག་རྔུས་གསུངས་པར་གྱུར་པའི་འཇིགས་པ་ལས་སྐྱོབ་ཅིང༌། གནས་སྐབས་ཀྱི་བདེ་བ་དང་འཆི་བ་མེད་པའི་གོ་འཕང་སྦྱིན་པ་ལ་མ་རྨོངས་པ་ནི་སྔོན་གྱི་འཚོ་བྱེད་གཞོན་ནུས་གསོས་སམ་སྨན་པའི་རྒྱལ་པོ་གཉིས་པ་ལྟ་བུར་གྱུར་ཏེ་སེམས་ཅན་ཐམས་ཅད་
ཀྱི་ཉེར་འཚོའི་གཞི་ཆེན་པོ་ཉིད་དོ། །དེ་ལྟར་ཡང་སྐྱེས་པ་རབས་ཀྱི་རྒྱུད་ལས། རིག་བྱེད་ཤེས་ལ་དེ་ནི་ཚངས་པ་བཞིན། །རྒྱལ་པོ་རྣམས་ཀྱིས་བཀུར་བ་རྒྱལ་པོ་བཞིན། །སྐྱེ་དགུ་རྣམས་ལ་བརྒྱ་བྱིན་མངོན་སུམ་བཞིན། །ཤེས་འདོད་རྣམས་ལ་དྲན་སྤྱོད་ཕ་དང་འདྲ། །ཞེས་པ་ལྟར་སྐྱེ་
བོ་ཐམས་ཅད་ལ་ཕ་དང་འདྲ་བར་ཐབས་ཀྱི་བྱེ་བྲག་ཅི་རིགས་པའི་སྒོ་ནས་ཕན་འདོགས་པ་ཞིག་གོ །དེར་མ་ཟད་ཚེ་རབས་དུ་མ་ནས་བསོད་ནམས་ཀྱི་ཚོགས་དཔག་ཏུ་མེད་པ་མངོན་པར་འདུ་བྱ་བ་ལ་ཀུན་ནས་ཡོངས་སུ་གོམས་པའི་བག་ཆགས་བཟང་པོ་སད་པས། རྒྱལ་སྲིད་ཀྱི་ཁྲི་ལ་

མ་བཞུགས་པའི་དུས་ནས། ཇི་ལྟར་མངའ་བའི་བདོག་པ་རྣམས་ལ་ཕོངས་སེམས་མེད་པར་བླ་མ་དང་དཀོན་མཆོག་མཆོད་པའི་ཆེད་དུ་གཏོང་བ་དང༌། དེ་བཞིན་གཤེགས་པ་སྲས་དང་བཅས་པའི་སྐུ་གསུང་ཐུགས་ཀྱི་རྟེན་གསུམ་བཞེངས་པ་ལ་སོགས་པའི་
རྣམ་པར་དཀར་བའི་ལེགས་བྱས་ཀྱི་རྒྱུན་ཁོ་ནའི་ཆེད་དུ་གཏོང་ཞིང༌། ཇི་ལྟར་བཞེང་བར་བྱ་བའི་རྟེན་གསུམ་རྣམས་ཀྱང་བློ་དམན་ཀུན་གྱིས་ཡིད་ལ་མི་ཤོང་ཞིང༌། སྔོན་གྱི་སྐྱེས་བུ་བློ་སྟོབས་དང་ལྡན་པ་མང་པོས་ཀྱང་བརྩམ་པར་མ་ནུས་པའི་ལས་གང་ཡིན་པ་དེར་འཇུག་པ་ལ་མི་སྤོབས་པ་
མེད་པ་ཞིག་སྟེ། དཔེར་ན་རྒྱལ་བའི་བཀའ་འགྱུར་རོ་འཚལ་གྱི་ཆོས་སྦྱིན་པར་གྱི་བྱ་བ་མཐར་ཕྱིན་པ་དང༌། བསྟན་བཅོས་འགྱུར་རོ་འཚལ་གྱི་ཆོས་སྦྱིན་གྱི་ཕྱི་མོ་བསྒྲུབས་པའི་འགོ་བརྩམས་པ་འདི་ལྟ་བུའི་རང་བཞིན་ཁོ་ན་ལས། སྐྱེ་བོ་ཕལ་གྱི་བསམ་སྦྱོར་དང་རྗེས་སུ་མཐུན་པར་འདི་
དང་འདི་ལྟ་བུའི་འབྱོར་པ་དག་ནི་རེ་ཞིག་བསགས་ན་བདག་གི་དཀོར་ཁང་མངོན་པར་གཏམས་པའི་རྒྱུར་འགྱུར་རོ་སྙམ་པ་དང༌། བདག་གིས་དཔལ་འབྱོར་འདི་དང་འདི་ཞེས་བྱ་བ་རྣམ་པར་འཕེལ་བར་བྱས་ཏེ། དགྲ་ཟླར་གྱུར་པ་ཐམས་ཅད་ཀྱང་ཟིལ་གྱིས་གནོན་པའི་མཐུ་དང་ལྡན་པར་བྱའོ་སྙམ་
པ་ལ་སོགས་པའི་བློ་ངན་ཐམས་ཅད་རིང་དུ་སྤངས་པ་དང༌། སྒོ་གསུམ་དགེ་བའི་རྩ་བ་ཐམས་ཅད་ལ་གཅིག་ཏུ་འདུན་པའི་ཡ་རབས་དང་དམ་པའི་ངང་ཚུལ་བཟང་པོ་ལས་གཞར་ཡང་མི་འགྱུར་བས། འགྲོ་བ་ཐམས་ཅད་ཀྱི་ཡིད་ཀྱི་དབང་པོ་ཀུན་ནས་འཛིན་ནུས་པར་གྱུར་ཏོ། །ནམ་ཞིག་ན་ཆོས་
དང་སྲིད་པའི་གཙུག་ལག་ཟུང་གི་ཕྲིན་ལས་ཀྱི་འཁོར་ལོ་མུ་མེད་ཕྱོགས་ཀྱི་ཕ་རོལ་དག་ཏུ་བགྲོད་པའི་གདན་རབས་ཀྱི་ནོར་བུ་རིན་པོ་ཆེ་བཏེགས་པའི་ཁྲི་འཕང་མཐོན་པོ་ག་ལ་བ་དེ་ན་བཙོ་སྦྱངས་དག་པའི་གསེར་གྱི་པ་ཏྲ་རིས་གློག་འགྱུ་སྟོང་གིས་མཛེས་པ་དག་ཀྱང་ཉུང་ངུར་བྱེད་པས་ཡོངས་སུ་
འཁྱུད་པའི་མངལ་གྱི་ཁུར་དུ་ལྷ་དང་མི་དང་གདེངས་ཅན་གྱི་དབང་པོའི་ཡུལ་ན་རིན་ཐང་ཤིན་ཏུ་ཆེ་བའི་ནོར་བུ་རིན་པོ་ཆེ་སྣ་ཚོགས་པའི་ཕྲ་ཚོམ་དང་ལྡན་པ།དེ་ལྟ་བུའི་རྐང་གདུབ་མཛེས་པ་དག་གིས་མངོན་པར་སྤུད་པའི་ཞབས་ཀྱི་ཆུ་སྐྱེས་ཟུང་དག་ཉེ་བར་བཀོད་དོ། །དེ་ལྟར་གཙུག་ལག་གཉིས་

ཀྱིས་མཐོ་བའི་ཁྲི་ལ་བཞུགས་མ་ཐག་ནས། རྟོགས་བརྗོད་རིན་པོ་ཆེ་དཔག་བསམ་འཁྲི་ཤིང་གི་གཙུག་ན་ནོར་བུའི་སྐྱེས་རབས་ལས། རྟག་ཏུ་དམ་པས་བསྟེན་འོས་ཤིང༌། །རྩོད་དུས་རབ་ཏུ་འཕྲོག་བྱེད་པ། །རྫོགས་ལྡན་ལྟ་བུས་གང་གིས་ནི། །སྐྱེ་བོ་ཆོས་རྣམས་
འཛིན་པར་བྱས། །ས་བདག་བཟོད་ལ་ཀུན་ཆགས་ཤིང༌། །དཔལ་གྱིས་དཀྲིས་གྱུར་སྙིང་རྗེར་དགའ། །རབ་གྲགས་ལ་ཡང་དབང་ཐུལ་གང༌། །སྐྱེ་དགུ་རྣམས་ཀྱི་དགའ་བྱེད་གྱུར། །ཞེས་པ་ལྟར་སྙིང་རྗེའི་བདག་ཉིད་དང་ལྡན་པ་གང་གི་མཐུས་ཆབ་འབངས་
ཀྱིས་མཚོན་པའི་རྒྱལ་ཁམས་ཐམས་ཅད་རྟག་ཏུ་བདེ་ཞིང་འབྱོར་པ་དང༌། ལོ་ལེགས་པར་གྱུར་པས་ནང་དུ་དགའ་བ་རབ་ཏུ་རྒྱས་པའི་བཏུང་བ་གང་ལ་སྐྱེ་བོ་མ་ལུས་པ་རྩེ་བར་བྱེད་ཅིང༌། ཆ་ལུགས་བཟང་ལ་མི་འཕྱར་བ་དང༌། མིའི་བདག་པོའི་བཟོད་པ་དང༌། དེས་པ་དང༌།
སྙིང་བརྩེ་བ་དང༌། གྲགས་པའི་ཡོན་ཏན་མི་ཟད་པ་དག་སྙིང་གི་དཀྱིལ་ནས་ཡང་ཡང་དྲན་པར་བྱེད་ཅིང༌། དགེ་བ་ཡོན་ཏན་དེ་དག་ཀྱང་ཕྱོགས་ཕྱོགས་ཀུན་དུ་སྒྲོག་པར་བྱེད་པའི་བསྟོད་པ་དང་བཀྲ་ཤིས་ཀྱི་རོལ་མོ་མང་པོ་འཁྲོལ་བ་ལ་ལྷུར་བྱེད་པར་གྱུར་ཏོ། །དེ་ནས་
བཟུང་སྟེ་ཡངས་པའི་ས་ཆེན་པོའི་དཀྱིལ་འཁོར་ཐམས་ཅད་བྱམས་པ་ཆེན་པོས་དཔུང་གིས་ལེགས་པར་བསྲུངས་པའི་སྐབས་དེར། སྔོན་གྱི་དྲང་སྲོང་རྣམས་ཀྱིས་ལེགས་པར་བཞག་པའི་འཇིག་རྟེན་ལུགས་ཀྱི་བསྟན་བཅོས་དང་རྗེས་སུ་གདམས་པ་ཟབ་མོ་རྣམས་དང་
མི་འགལ་བར་བྱ་བ་ཐམས་ཅད་བརྟགས་ནས་བྱེད་པ་དང༌། མི་འོས་པའི་ལས་ལ་གཡེར་པོར་གྱུར་ཀྱང་མི་འཇུག །འོས་པའི་ལས་ཐམས་ཅད་ལ་དཀའ་ཡང་ལེ་ལོ་དང་ཕྱི་བཤོལ་གྱི་དབང་གིས་མི་འདོར་བ་དང༌། གནའ་དུས་ཡན་ནས་ཡོངས་སུ་དར་བའི་དཔྱ་ཁྲལ་
རྣམས་ཀྱང་དུས་དང་གནས་སྐབས་དག་ལ་ལེགས་པར་བརྟགས་ནས་ཚོད་ཟིན་པར་ལོངས་སྤྱད་པ་ལས་རིགས་པ་མ་ཡིན་པའི་འདོད་ཆེན་གྱི་ལས་མི་བརྩམ་པ་ནི། དཔེར་ན་ཕྲེང་བརྒྱུད་མཁན་མཁས་པ་དག་གིས་ཀུན་དགའ་རྭ་བའི་མེ་ཏོག་གི་ཚལ་ནས་དུས་ལ་བབ་པ་ན་མེ་

ཏོག་གི་རིགས་ཙམ་བཏུ་བར་བྱའི། སོལ་བ་མཁན་གྱིས་བཞིན་དུ་དུས་གཅིག་ལ་རྩ་བ་ཡོངས་སུ་འབྱིན་པར་མི་བྱེད་པ་དེ་བཞིན་ནོ། །གཞན་ཡང་དབང་དང་སྟོབས་ཀྱི་སྒོ་ནས་བརྩམས་ན་ཁྱབ་འཇུག་བཞིན་དུ་གཞན་སྡེ་རྣམ་པར་ནོན་པ་ལ་མི་མཐུན་པ་ནི་
འགའ་ཡང་མེད་མོད། ཆོས་དང་འགལ་བར་གྱུར་པའི་ཆགས་སྡང་གི་ལས་མི་བརྩམ་པར་ཀུན་གྱི་སེམས་བསྲུང་བ་དང༌། རྟག་ཏུ་དགེ་སྡིག་གི་ལས་འབྲས་ཞིབ་ཏུ་བསམས་ཤིང་སྒོ་གསུམ་དགེ་བའི་ལམ་དུ་རང་གཞན་ཐམས་ཅད་འཇུག་པ་དང༌། འཁོར་བ་དང་མྱ་ངན་ལས་
འདས་པའི་འབྱོར་པ་ཕུན་སུམ་ཚོགས་པ་དག་ལ་དབང་འབྱོར་ཡང༌། རྒྱགས་པ་དང་ཁེངས་པའི་སེམས་མི་འཛིན། བློ་གཏད་ཀྱི་དཔང་དཀོན་མཆོག་གསུམ་ལ་བཅོལ་བས། གཡོ་སྒྱུ་རྣམ་པར་སྤངས་ནས་ལྷག་པའི་སེམས་ཀྱིས་རྟག་ཏུ་གནས་ཤིང་ཞི་དུལ་གསོང་པོར་སྨྲ་བ་དང༌།
བག་དང་བཅས་པའི་ངང་ནས་སྐྱེ་བོ་ཐམས་ཅད་བུ་བཞིན་དུ་སྐྱོང་བའི་སྤྱོད་ཚུལ་ཕུན་སུམ་ཚོགས་པ་མངའ་བ་ཡིན་ཏེ། ཇི་སྐད་དུ། གྱ་ཚོམ་མི་སྨྲ་ཤེས་ཀྱང་མ་བཅོལ་རང་ཞུགས་ཡོང་མི་བྱེད། །ཟིན་ཁར་མི་འདོར་འོག་ནས་སྔར་བརྩམས་འགྱོད་མི་སྨྲ། །ལྷག་པར་ཁེ་
མཐོང་བཙལ་གླགས་ཡོད་ཀྱང་མི་རིགས་འདོད་ཆེན་ཡོང་མི་བྱེད། །དབང་དང་ཚན་གྱིས་ཐུབ་ཀྱང་འཕྱས་གནོན་གཟན་མི་འཚོལ། །ཉེ་ཞེས་ཉེ་མགོན་མི་བྱེད་རིང་ཞེས་སྙོམ་ལས་ཡོང་མི་སྤྱོད། །དབང་སར་ཕྱིན་ཅིང་ཀུན་གྱིས་བཀུར་ཡང་མཐའ་དག་སེམས་བསྲུང་བྱ། །
ལེགས་ཉེས་བསམ་ཞིང་སྲོད་དང་ཐོ་རངས་དགེ་བ་སྤྱད། །ང་རྒྱལ་ཁེངས་སེམས་མུ་ཅོར་སྨྲ་དང་རྒྱགས་ཆོས་མེད། །ཚན་ཀར་མི་འདོར་གཞན་གྱིས་བརྩི་སར་ཡུན་རིང་སྡོད། །ཕྱི་ཚུལ་མི་འཆོས་ནང་གི་གཡོ་སྒྱུ་མེད། །གསོང་དེས་མཉེན་དང་གསལ་སྟུག་འཇམ་ལ་
རིང༌། །ངན་ལ་ཁྱད་དུ་མི་གསོད་ཞེ་ས་ཕངས་མེད་མཉམ། །ཕྲག་དོག་འགྲན་སེམས་ནོར་ངན་གཞན་ལ་འཕྱ་མི་བྱེད། །བདག་ལ་རང་བསྟོད་མི་བྱེད་གཞན་ལ་མཚང་མི་འབྲུ། །དཔའ་ལ་སྲན་ཆེ་བྱེད་དགུ་མཐར་ཕྱིན་མཛངས་ལས་སློབ། །ཆང་དང་བུད་མེད་དད་དང་

ཁེ་བརྐམ་གཅམ་བུའི་ལས། །ནམ་དུའང་མི་བྱེད་ཆུང་མ་ངན་པའི་ཁར་མི་བཏང༌། །ཞེས་གསུངས་པ་ལྟར་རོ། །ཁྱད་པར་འཇིག་རྟེན་གྱི་མེས་པོ་ཚངས་པ་དང༌། དྲག་པོ་དང༌། སྲེད་མེད་ཀྱི་བུ་དང༌། མིག་སྟོང་པ་དང༌། སྐེམས་བྱེད་ལ་སོགས་པ་འཇིག་རྟེན་སྐྱོང་བའི་ལྷ་
དང༌། ལྷ་མ་ཡིན་དང༌། གདེངས་ཅན་གྱི་དབང་པོ་དང༌། གནོད་སྦྱིན་དང༌། དྲི་ཟ་དང༌། གྲུལ་བུམ་དང༌། ནམ་མཁའ་ལྡིང་དང༌། ལངྐའི་དབང་ཕྱུག་དང༌། མིའི་དབང་ཕྱུག་ཏུ་གྱུར་པ་རྣམས་ནི་འདི་ལྟ་སྟེ། གསེར་གྱི་འཁོར་ལོ་དང༌། དངུལ་གྱི་འཁོར་ལོ་དང༌། ཟངས་ཀྱི་
འཁོར་ལོ་དང༌། ལྕགས་ཀྱི་འཁོར་ལོ་དང༌། སྟོབས་ཀྱི་འཁོར་ལོ་རྣམས་ཀྱིས་མཚན་པ་ལ་སོགས་པ་འཇིག་རྟེན་ན་དབང་ཆེ་ཞིང་གཟི་བརྗིད་ཆེ་བ་དག་ཀྱང་རང་རང་གི་རལ་པའི་ཐོར་ཚུགས་ནོར་བུ་རིན་པོ་ཆེ་འོད་ཟེར་སྟོང་གི་དྲྭ་བས་དཀྲིགས་པ་དག་གིས་ལན་བརྒྱར་བཏུད་ཅིང་
མཆོད་པའི་གནས་སུ་གྱུར་པ། བསྟན་པའི་བདག་པོ་ཆེན་པོ་དཔལ་ས་སྐྱ་པ་ཞེས་སྙན་གྲགས་ལྷའི་རྔ་བོ་ཆེ་ལྟར་ཡོངས་སུ་ལྡིར་བ་དེ་ཉིད་བརྒྱུད་པ་དང་བཅས་པའི་ལུགས་བཟང་དྲི་མ་མེད་ཅིང་རྩོད་པ་ཀུན་ལས་གྲོལ་བ་དེ་ཉིད་ཀྱིས་མཚོན་ཏེ། སངས་རྒྱས་པའི་གྲུབ་པའི་མཐའི་
གཞུང་ལུགས་དྲི་མ་མེད་པ་གང་དུ་དར་ཞིང་རྒྱས་པར་གྱུར་པ་རྣམས་དང༌། དེ་ཉིད་མཁས་པའི་བགྱི་བ་གསུམ་གྱི་སྒོ་ནས་འཛིན་པར་བྱེད་པའི་བསྟན་འཛིན་གྱི་སྐྱེས་བུ་ཕྱོགས་བཅུའི་འཇིག་རྟེན་གྱི་ཁམས་མུར་ཐུག་པ་མེད་པ་རྣམས་སུ་བྱོན་པ་དང༌། འབྱོན་པར་འགྱུར་བ་དང༌།
ད་ལྟར་འཚོ་ཞིང་གཞེས་པ་ཇི་སྙེད་ཅིག་མཆིས་པ་རྣམས་ལ་དད་པ་གསུམ་གྱི་རྩ་བ་རབ་ཏུ་བརྟན་པས། དོན་ཡོད་རྣམ་པ་བཞིས་བཀུར་སྟིར་བྱེད། བླ་མར་བྱེད། རི་མོར་བྱེད། མཆོད་ཅིང་རྗེད་པར་བྱེད། དེ་དག་གི་རྣམ་པར་དཀར་བའི་ཕྲིན་ལས་ཀྱི་རྒྱུན་ཆེན་པོ་དག་རིང་དུ་གནས་
པའི་ཐབས་ཀྱང་བྱེད་དོ། །མི་བདག་ཆེན་པོ་རང་གི་རིགས་ཀྱི་ཅོད་པཎ་ཉིད་དུ། བཅོམ་ལྡན་འདས་ཤཱཀྱའི་རྒྱལ་པོའི་ལུང་དང་རྟོགས་པའི་ཆོས་ཀྱི་རྒྱལ་སྲིད་ཆེན་པོ་ལེགས་པར་བཟུང་ནས་མདོ་སྡེ་དང་རྒྱུད་སྡེར་གཏོགས་པའི་ཆོས་ཀྱི་ཕུང་པོ་ཇི་སྙེད་པ་དག་འཆད་པ་དང༌།

རྩོད་པ་དང༌། རྩོམ་པའི་ཕྲིན་ལས་ཀྱི་འཁོར་ལོས་སྒྱུར་བའི་བསྟན་འཛིན་གྱི་སྐྱེས་བུ་རིམ་པར་བྱོན་པ་རྣམས་ནི་འདི་ལྟ་སྟེ། ཡོངས་རྫོགས་བསྟན་པའི་མངའ་བདག་འཇམ་པའི་དབྱངས་སངས་རྒྱས་ཕུན་ཚོགས་པ་དང༌། གཞུང་ལུགས་རབ་
འབྱམས་སྨྲ་བའི་དབང་པོ་འཇམ་མགོན་བཀྲ་ཤིས་དཔལ་ལྡན་པ་དང༌། རྒྱ་ཆེན་ཆོས་ཀྱི་སྤྱན་ལྡན་ཐུབ་བསྟན་མཁན་རིན་པོ་ཆེ་བཟང་པོ་རྒྱལ་མཚན་དང༌། རྣམ་འདྲེན་བསྟན་པའི་རྩ་ལག་ཆེན་པོ་སི་ཏུ་ཆོས་ཀྱི་འབྱུང་གནས་དང༌། གསང་ཆེན་རྒྱ་མཚོའི་མངའ་བདག་
མཚུངས་མེད་ཀུན་དགའ་ཆོས་འཕེལ་དང༌། ཤེས་པར་བྱ་བའི་གཞུང་ལུགས་རྒྱ་མཚོའི་མངའ་བདག་བཀྲ་ཤིས་དབང་ཕྱུག་དང༌། མཐུ་སྟོབས་གྲུབ་པའི་དབང་ཕྱུག་རྡོ་རྗེ་འཛིན་པ་སངས་རྒྱས་རྒྱ་མཚོ་པ་ལ་སོགས་པའི་བསྟན་འཛིན་གྱི་དགེ་བའི་བཤེས་གཉེན་མང་པོ་དང༌།
ཁྱད་པར་ངོར་ཆེན་རྡོ་རྗེ་འཆང་ཀུན་དགའ་བཟང་པོ་པའི་ལུགས་བཟང་བདུད་རྩིའི་རྒྱུན་མ་ལུས་པ་བཟུང་ནས། སེམས་ཅན་གྱི་ཁམས་ཀྱི་ཉོན་མོངས་པའི་རིམས་ནད་མཐའ་དག་ཞི་བར་བྱེད་པའི་ཆོས་ཀྱི་སྨན་པ་ཆེན་པོ་ཐམས་ཅད་མཁྱེན་པ་བཀྲ་ཤིས་ལྷུན་གྲུབ་གྲགས་
པའི་རྒྱལ་མཚན་དཔལ་བཟང་པོ་ཞེས་ཡོངས་སུ་གྲགས་པ་དེ་ཉིད་དང༌། ཡར་ལུང་བཀྲ་ཤིས་ཆོས་སྡེ་ནས། རྒྱལ་བ་ཀུན་གྱི་ཕྲིན་ལས་སྐྱོང་བ་ངག་དབང་ཀུན་དགའ་ལེགས་པའི་འབྱུང་གནས་བསྟན་པའི་རྒྱལ་མཚན་དཔལ་བཟང་པོ་པ་སྟེ། རྗེ་བཙུན་དམ་པ་དེ་
དག་རང་གི་བླའི་མཆོད་གནས་ཀྱི་ཆེད་དང༌། མདོ་སྨད་ཕྱོགས་ཀྱི་སྐྱེ་དགུ་མ་ལུས་པ་མངོན་པར་མཐོ་བ་དང་ངེས་པར་ལེགས་པའི་གྲོང་དུ་འཁྲིད་པར་བྱེད་པའི་ལམ་མཁན་དམ་པ་ཉིད་དུ་སྤྱན་དྲངས་ཏེ། ཆབ་འོག་ཏུ་གཏོགས་པས་མཚོན་པའི་སེམས་ཅན་རྒྱ་མཚོ་ཆེན་
པོའི་རྡུལ་གྱི་གྲངས་དང་མཉམ་པ་རྣམས་ཀྱི་རྒྱུད་ལ་ཆོས་ཀྱི་ས་བོན་མ་རྨས་པར་བཏབ་སྟེ། ལ་ལ་ནི་དཀོན་མཆོག་གསུམ་ལ་སྐྱབས་སུ་སོང་ཞིང་བསླབ་པའི་གཞི་རབ་ཏུ་བཟུང་བ་ལ་བཀོད། ལ་ལ་ནི་ཁྱིམ་ནས་ཁྱིམ་མེད་པར་རབ་ཏུ་བྱུང་བ་དགེ་སློང་གི་དངོས་པོར་

བསྒྲུབས་ཏེ་འཁོར་བ་ལས་མངོན་པར་འཕགས་པའི་གནས་ལ་བཀོད། ལ་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་སྩལ་ཏེ་ཐེག་པ་ཆེན་པོའི་རིགས་སུ་བཀོད། ལ་ལ་ནི་གསང་སྔགས་རྡོ་རྗེ་ཐེག་པའི་ཆོས་ཀྱི་སྒོར་སྨིན་པར་བྱས་ཏེ་
རིང་པོར་མི་ཐོགས་པར་རྣམ་པར་གྲོལ་བའི་སྐལ་བ་དང་ལྡན་པར་བྱས་ཏེ། མདོར་ན་འཁོར་བ་ཕལ་མོ་ཆེ་སངས་རྒྱས་ལ་གཞོལ་བ་དང༌། དམ་པའི་ཆོས་ལ་བབ་པ་དང༌། དགེ་འདུན་ལ་གཞག་པར་མཛད་དེ། དེ་དག་ཐམས་ཅད་ཀྱང་མི་བདག་ཆེན་པོ་འདིའི་སྐུ་དྲིན་ཁོ་ན་
ལས་བྱུང་བ་ཡིན་པས། ལེགས་པར་བསམས་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཛམྦྷུ་གསེར་གྱི་ཕུང་པོས་ཡོངས་སུ་བཀང་སྟེ་བཅལ་བར་བྱས་ཀྱང་མི་བདག་ཆེན་པོ་འདི་ཉིད་ཀྱི་སྐུ་དྲིན་དང་གཞར་ཡང་མཉམ་པར་དཀའ་བའི་རང་བཞིན་
ཁོ་ནའོ། །དེ་ལྟར་ཇི་སྐད་སྨོས་པའི་འདྲེན་མཆོག་དམ་པ་དེ་དག་སྤྱི་བོའི་རྒྱན་དུ་བསྟེན་ཅིང་སྒོ་གསུམ་ལོངས་སྤྱོད་དང་བཅས་པས་མཉེས་པར་འགྱུར་བའི་ལས་གང་ཡིན་པ་དེ་རྟུན་པ་ལྷུར་བྱེད་ཅིང༌། དེ་དག་གི་ཞལ་སྒོ་ནས་བྱུང་བའི་གསུང་གི་བདུད་རྩི་ནི། རྒྱུ་སྡེ་ཆེན་པོ་རྣམས་
ལས་འབྱུང་བའི་དཀྱིལ་འཁོར་རྣམས་ཀྱི་དབང་བསྐུར་བ་དང༌། རྗེས་སུ་གནང་བ་དང༌། ལུང་འབོགས་པ་དང༌། མན་ངག་གི་ཉམས་ཁྲིད་ཟབ་མོ་དཔག་ཏུ་མེད་པ་རང་དང་གཞན་གྱི་ཐར་པའི་གསོས་སུ་རྟག་ཏུ་ལེན་པར་མཛད་ཅིང༌། ཇི་ལྟར་ཐོས་པའི་ཆོས་དེ་དག་ལས་ཀྱང་
ཕལ་ཆེར་གྱི་བསྒོམ་བཟླས་མ་ཆག་པའི་ཉམས་བཞེས་ཆུ་བོའི་རྒྱུན་བབས་པ་ལྟ་བུས་ཉིན་མཚན་གྱི་དུས་འདའ་བར་མཛད་དོ། །དེའང་ཐོག་མར་དཀར་ཆ་བཞི་དང་གཏོར་མ་བརྒྱ་རྩ་སྔོན་དུ་འགྲོ་བས། དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་བགྲོད་པ་གཅིག་
པའི་ལམ་ཟབ་མོ་བླ་མའི་རྣལ་འབྱོར་གྱི་ཉམས་ལེན། དཔལ་ཀྱེ་རྡོ་རྗེ་ལྷ་དགུ་མན་ངག་ལུགས་ཀྱི་མངོན་པར་རྟོགས་པ་འབྲིང་དུ་བྱ་བ་ཡན་ལག་དྲུག་པ་ལམ་དུས་ཀྱི་དབང་བཞི་ལེན་པ་དང་བཅས་པ། དཔལ་ནཱ་རོ་ཏ་པའི་ཐུགས་བཅུད་ཀྱི་གདམས་པ་ཟབ་མོ་རྗེ་བཙུན་རྡོ་རྗེ་རྣལ་འབྱོར་

མའི་བསྒོམ་བཟླས། རྡོ་རྗེ་འཇིགས་བྱེད་རྭ་ལུགས་ཀྱི་མངོན་པར་རྟོགས་པ། ཐུགས་རྗེ་ཆེན་པོ་དང་ཕྱག་རྒྱ་ཆེན་པོ་ཟུང་འཇུག་ཏུ་ཉམས་སུ་ལེན་པའི་སྒྲུབ་ཐབས་མདོ་ཁམས་ཤར་ཕྱོགས་མར་གྲགས་པ། སྒྲོལ་མ་དཀར་མོ་ཡིད་བཞིན་གྱི་འཁོར་ལོའི་སྒྲུབ་
ཐབས། རྡོ་རྗེ་ནག་པོ་ཆེན་པོ་གུར་གྱི་མགོན་པོ་ཁྲོ་བོ་བཅུ་དང་བཅས་པའི་སྲུང་བའི་འཁོར་ལོ་རྡོ་རྗེའི་བྲག་རྫོང་མ་དང༌། གཞན་ཡང་རྗེ་བཙུན་ས་སྐྱ་པའི་མན་ངག་གསེར་ཆོས་ཀྱི་སྐོར་ལ་སོགས་པ་གསང་སྔགས་གསར་རྙིང་གི་ཡི་དམ་གྱི་ལྷ་དུ་མའི་བསྒོམ་བཟླས་མང་པོ་དང༌། དེ་དག་གི་
མཇུག་ཏུའང་གཏོར་མའི་རྣལ་འབྱོར་དང་བཅས་པ་རྣམས་རྒྱུན་པར་ཆག་ཉམས་མེད་པའི་དམ་བཅའ་ངེས་པ་ཅན་དུ་མཛད། ཐུན་མཚམས་རྣམས་སུ་ཡང་དཀོན་མཆོག་གསུམ་རྗེས་སུ་དྲན་པའི་མདོ་དང༌། ཡན་ལག་བདུན་པ་དང༌། རྒྱ་བོད་ཀྱི་བླ་མ་བརྒྱུད་པ་དང་བཅས་པའི་སྐུ་
བསྟོད་དང་གསོལ་འདེབས་ཀྱི་རིགས་མང་པོ་དང༌། འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པ་ཉི་མ་རེ་ལ་ཚར་བདུན་རེ། དཔལ་ཡེ་ཤེས་ཡོན་ཏན་བཟང་པོའི་བསྟོད་པ་ཚར་ཉི་ཤུ་རྩ་གཅིག་རེ། སྒྲོལ་མའི་བསྟོད་པ་ཕྱག་འཚལ་ཉེར་གཅིག་པ་ཚར་ཉི་ཤུ་རྩ་གཅིག །
ཉི་མ་སྦས་པས་མཛད་པའི་སྒྲོལ་མའི་བསྟོད་པ་རྣམ་དག་གཙུག་ན་ཅན་ཚར་རེ། སྒྲོལ་མའི་མཚན་བརྒྱ་རྩ་བརྒྱད་པ་ཚར་རེ། ཤེས་རབ་སྙིང་པོ་ཚར་དགུ་རེ། གཙུག་ཏོར་རྣམ་པར་རྒྱལ་མའི་གཟུངས། རྡོ་རྗེ་རྣམ་པར་འཇོམས་པའི་གཟུངས། ཚེ་དང་ཡེ་ཤེས་དཔག་ཏུ་མེད་
པའི་གཟུངས། ལས་ཀྱི་སྒྲིབ་པ་རྣམ་པར་སྦྱོང་བའི་གཟུངས་རྣམས་དང༌། ཕུང་པོ་གསུམ་པའི་མདོ་དང༌། བཟང་པོ་སྤྱོད་པའི་སྨོན་ལམ་ལ་སོགས་པའི་སྨོན་ལམ་གྱི་སྐོར་མང་པོ་རྣམས་ཞལ་འདོན་དུ་མཛད། གཞན་ཡང་དཀོན་མཆོག་གསུམ་གྱི་རྟེན་ལ་ཕྱག་འཚལ་
བ་དང་བསྐོར་བ་བྱེད་པ་དང༌། སཱཙྪ་འདེབས་པ་ལ་སོགས་པ་མདོར་ན་ས་བདག་ཆེན་པོ་འདི་ཉིད་ཀྱིས་ཉི་མ་རེ་ལ་དམ་བཅར་བགྱིས་པའི་དགེ་སྦྱོར་ཁོ་ན་ལ་ཡང༌། དགེ་སྦྱོར་བྱེད་པར་རློམ་པ་ཕལ་གྱིས་ཉི་མ་མང་པོ་འཕུལ་བའི་རྒྱུར་འགྲོ་བ་ལ་སོགས་པའི་ཡོན་ཏན་བརྗོད་ཀྱིས་

མི་ལྡང་བ་ནི་རྣམ་པར་འཕྲུལ་པ་མཆོག་གི་ལེགས་བྱས་གཅིག་པུའི་རྗེས་སུ་འགྲོ་བའི་རང་བཞིན་ནོ། །གསང་སྔགས་ཟབ་མོའི་བཟླས་བརྗོད་གྲངས་སུ་བགྱིས་པ་ཡང༌། རྡོ་རྗེ་འཇིགས་བྱེད་ཀྱི་སྙིང་པོ་ཡི་གེ་བཅུ་པ་དུང་ཕྱུར་གཅིག །ཐུགས་རྗེ་ཆེན་པོའི་སྙིང་པོ་ཡི་གེ་
དྲུག་པ་དུང་ཕྱུར་གཅིག །གུར་གྱི་མགོན་པོའི་སྙིང་པོ་ཡི་གེ་བདུན་པ་དུང་ཕྱུར་གཅིག །སེང་གེའི་གདོང་ཅན་མའི་བསྙེན་པ་དུང་ཕྱུར་གཅིག་རྣམས་རང་གི་ལྗགས་ཐོག་ནས་བསགས་པ་ལ་སོགས་པ་སྒོ་གསུམ་བག་མེད་ཀྱི་དབང་དུ་བཞུགས་པ་ནི་རྟག་ཏུ་ཞབས་འབྲིང་ན་འཁོད་
པ་རྣམས་ཀྱིས་ཀྱང་ཡེ་མ་མཐོང་ངོ་ཞེས་ཀུན་གྱིས་ཁ་མཐུན་པར་ལན་གཅིག་མ་ཡིན་པར་སྙན་དངགས་དམ་པའི་གླུ་བཞིན་དུ་ལེན་པར་བྱེད་དོ། །མདོར་ན་རིན་ཆེན་ཕྲེང་བ་ལས། དམ་པའི་ཆོས་དང་ཆོས་སྨྲ་ལ། །ཉིད་ཀྱིས་བཀུར་སྟི་མཆོག་དང་ནི། །གུས་པར་མཛད་དེ་
གནས་ལས་བཞེངས། །མེ་ཏོག་གཏོར་ནས་ཆོས་ཉན་ཅིང༌། །ཆོས་ཀྱི་སྦྱིན་པ་དག་ཀྱང་མཛོད། །འཇིག་རྟེན་གཏམ་ལ་དགའ་མ་མཛད། །འཇིག་རྟེན་འདས་ལ་དགྱེས་པར་མཛོད། །འཁོར་རྣམས་ཟིལ་གྱིས་མནན་པའི་ཕྱིར། །ལྷུན་སྟུག་བརྟན་ལ་ངེས་པར་མཛོད། །
ཅེས་གསུངས་པ་ལྟར་དང༌། དེ་དག་གི་བར་སྐབས་རྣམས་སུ་ཡང་གཟུ་བོར་གནས་པའི་བློ་གྲོས་ཀྱིས་ལེགས་པར་བརྟགས་པའི་བཀའ་ཁྲིམས་བཙན་པོས་རྒྱལ་ཁམས་ཐམས་ཅད་ཀྱང་བྱམས་པའི་ཆོས་དང་མཐུན་པའི་ཕྲིན་ལས་ཀྱིས་བདེ་བར་སྐྱོང་བ་ལ་བློ་སྒམ་ཞིང་གཏིང་
མི་རྟོགས་པ། བྱ་བ་གང་བརྩམས་ཀྱང་རང་གི་ངང་གིས་འགྲུབ་པ་ལ་སོགས་པ་ཡོན་ཏན་བསམ་ལས་འདས་པ་ཞིག་སྟེ། དེ་ཉིད་ལས། ཇི་ལྟར་རྒྱལ་སྲིད་བསྐྱང་བ་དང༌། །འབངས་ཀུན་བདེ་ལ་འཁོད་པ་དང༌། །བསྡོ་བའི་དགྲ་རྣམས་འདུལ་བ་དང༌། །རྒྱལ་
ཁམས་ཆོས་ཀྱིས་བསྐྱང་བགྱི་བ། །ཞིབ་ཏུ་དགོངས་ནས་གྲུབ་པར་མཛོད། །འགྲུབ་བམ་མི་འགྲུབ་མ་ངེས་པར། །དགོངས་མ་ཐག་ཏུ་མ་གསུངས་ཤིག །ཡུན་ཇི་སྲིད་ཅིག་ཆོས་སྒྲུབ་ཅིང༌། །སེར་སྣ་འཇུར་གེགས་མ་མཛད་པར། །བདོག་པ་ཐམས་

ཅད་གཏུགས་ཏེ་མཛོད། །ཁྱོད་ནི་བདོག་པ་ཀུན་བོར་ནས། །གཅིག་བུ་ག་ཤེད་གཤེགས་འཚལ་བས། །ཆོས་ཀྱི་སླད་དུ་སྤྱད་པ་ཀུན། །ཁྱོད་ཀྱི་མདུན་དུ་འོང་བ་ཉིད། །འབངས་ལ་རེ་བ་མ་འཇོག་པར། །ཞལ་བཞུགས་ཚེ་ན་མྱུར་བར་
མཛོད། །ཅེས་བྱ་བ་ལ་སོགས་པ་སྔོན་གྱི་དྲང་སྲོང་མཁས་པ་རྣམས་ཀྱིས་ཇི་ལྟར་གདམས་པའི་བདུད་རྩི་ལྟ་བུའི་ཆོས་རྣམས་ལ་ནམ་ཡང་མི་འདའ་བ་ལྷུར་བྱེད་པ་ཉིད་དོ། །དེར་མ་ཟད་རིན་ཆེན་ཕྲེང་བ་ལས། གཙུག་ལག་ཁང་དག་བརྩིག་པ་དང༌། །མཆོད་རྟེན་བརྩིག་
དང་ན་བཟའ་གསོལ། །ཞིག་རལ་བཅོས་དང་མཆོད་པ་གཟུགས། །ལྷ་ཁང་ལ་སོགས་གཞན་བགྱི་བ། །སྔ་ལུགས་བཞིན་དུ་རྒྱས་པར་མཛོད། །དམ་ཆོས་ཚུལ་བཞིན་སྤྱོད་པ་ཡི། །དགེ་སློང་དགེ་བསྙེན་ལ་སོགས་པ། །གཞན་གྱིས་གཙེ་བ་མེད་པ་
ཡི། །དཔུང་གཉེན་སྐྱབས་དང་ཁ་འཛིན་མཛོད། །འདི་ཀུན་ཡུན་དུ་བདེ་བ་ཡི། །མྱ་ངན་འདའ་བའི་དགེ་ཚོགས་ལགས། །ཞེས་གསུངས་པ་བཞིན་དུ་མི་བདག་འདི་ཉིད་ཀྱི་སྐུ་རིང་ལ་ལྷུན་གྲུབ་སྟེང་ལ་སོགས་པའི་སྟོད་སྨད་ཀྱི་དགོན་སྡེ་བཅུ་གསུམ་ཙམ་དུ་གཙུག་
ལག་ཁང་རྟེན་དང་བརྟེན