Luận tạng Tây Tạng (Tengyur) — Tập 213

་རྣམས་ནི་གཞན་དུ་ཤེས་པར་བྱ་བ་ལས་འདིར་མ་སྤྲོས་སོ། །ཅིའི་ཕྱིར་མ་སྤྲོས་ཤེ་ན། གོང་དུ་ཇི་སྐད་བཤད་པ་རྣམས་དང༌། འོག་ཏུ་འཆད་པར་འགྱུར་བ་ཐམས་ཅད་དང་འགྲོས་མཚུངས་སུ་
བཏང་བ་ལས། འདིར་ཧ་ཅང་བཤད་པ་ལྷག་པ་གློ་བུར་བ་ཉིད་དུ་མི་འགྱུར་བར་བྱ་བའི་ཕྱིར་རོ། །ཇི་ལྟར་གནས་པའི་ཚུལ་ནི་འཇིག་རྟེན་གྱི་ཁམས་འདི་འདེགས་པར་བྱེད་པའི་འོག་གཞི་ནི་འཇམ་པ་ཞེས་བྱ་བའི་རླུང་གི་དཀྱིལ་འཁོར་ཁ་དོག་སྔོ་སྐྱར་ཡོད་པ། ཚན་པོ་ཆེའི་རྡོ་རྗེས་ཀྱང་གཞིག་པར་མི་ནུས་
པ་ཤིན་ཏུ་འཐས་པ་ཉིད་དུ་གནས་ཏེ། འདི་ནི་འཇིག་རྟེན་གྱི་ཁམས་མི་མཇེད་ལྟ་བུ་ཞིག་རྟོན་པར་བྱེད་པའི་གཞི་ཡིན་ནོ། །དེའི་སྟེང་དུ་འོག་གི་རྒྱ་མཚོ་ཞེས་བྱ་བ་ཆུའི་ཕུང་པོ་ཆེན་པོར་གྱུར་པ་རླུང་གི་དཀྱིལ་འཁོར་དེ་ལ་བརྟེན་ཏེ་གནས་སོ། །དེའང་སློབ་དཔོན་དབྱིག་གཉེན་གྱིས། ཇི་ལྟར་ན་ཆུ་དེ་
དག་ཐད་ཀར་མི་འབོ་བ་ནི་ཁ་ཅིག་ན་རེ་སེམས་ཅན་རྣམས་ཀྱི་ལས་ཀྱི་དབང་གིས་ཏེ། དཔེར་ན་བཟའ་བ་དང་བཏུང་བ་ཟོས་པ་དང་འཐུང་བ་མ་ཞུ་བ་ལོང་ཀར་མི་ལྟུང་བ་བཞིན་ནོ་ཞེས་ཟེར་རོ། །སྡེ་པ་གཞན་དག་ན་རེ་སྦྱང་གི་ཚུལ་དུ་རླུང་གིས་འཛིན་ཏོ་ཞེས་ཟེར་རོ་ཞེས་གསུངས་སོ། །ཆུའི་དཀྱིལ་འཁོར་གྱི་
སྟེང་དུ་ཡང་གསེར་གྱི་ས་གཞི་ཞེས་བྱ་བ་ཤིན་ཏུ་མི་ཤིགས་པ་གསེར་གྱི་རང་བཞིན་ཅན་དུ་ཡོད་པའོ། །ས་གཞི་དེ་ལ་ནི་ཁོར་ཡུག་རི་བོའི་བར་གྱི་རི་དང་གླིང་དང་རྒྱ་མཚོར་བཅས་པ་རྣམས་བརྟེན་ནས་གནས་ཏེ། དེའང་ཐམས་ཅད་ཀྱི་དབུས་ན་ནི་རིའི་རྒྱལ་པོ་རི་རབ་ཅེས་བྱ་བ་ཡོད་དེ། དེ་ནི་གྲུ་བཞི་

པའི་རྣམ་པ་ལ་བང་རིམ་བཞིས་མཛེས་པར་བྱས་པ། རིན་པོ་ཆེའི་རང་བཞིན་ཅན་ཏེ། དེ་ནི་ཤེལ་དང༌། བཻ་ཌཱུརྻ་དང༌། པདྨ་རཱ་ག་དང༌། གསེར་རྣམས་ཀྱི་རྒྱུ་ལས་ངོས་བཞི་དག་ཏུ་རིམ་པ་བཞིན་དུ་གྲུབ་པ་ཡིན་ནོ། །དེ་དག་གི་རྐྱེན་གྱིས་བསྒྱུར་བས་ནམ་མཁའ་ལའང་ཁ་དོག་ཐ་དད་པ་ཉིད་དུ་སྣང་
བ་སྟེ། ཛམྦུའི་གླིང་འདི་ཡོད་པའི་ལོགས་ཀྱི་ངོས་ནི་བཻ་ཌཱུརྻའི་རང་བཞིན་ཅན་ཡིན་པའི་ཕྱིར། དེའི་འོད་ཀྱིས་ནམ་མཁའ་ཡང་བཻ་ཌཱུརྻའི་ཁ་དོག་ཏུ་ཤར་བ་བཞིན་ནོ། །དེ་ལྟ་བུའི་རི་རབ་དེའི་ཆུ་མཚམས་ནས་འོག་ཏུ་རྣམ་པར་བཅལ་བའི་རི་བོའི་ཁོང་སེང་རྣམས་སུ་ལྷ་མ་ཡིན་གྱི་ཚོགས་རྟེན་དང་
བརྟེན་པར་བཅས་པ་རྣམས་ཡོད་དོ། །དེའང་འདི་ལྟ་སྟེ་ལྷ་མ་ཡིན་གྱི་དབང་པོ་སྒྲ་གཅན་འཛིན་ཞེས་བྱ་བ་དང༌། དེ་བཞིན་དུ་མགུལ་ཕྲེང་ཅན་དང༌། རབ་གནོན་དང༌། ཐག་བཟངས་རིས་རྣམས་རང་རང་གི་འཁོར་དང་བཅས་ཏེ་འོག་ནས་འོག་ཏུ་རིམ་པ་དེ་ཇི་ལྟ་བ་བཞིན་དུ་གནས་སོ། །རི་རབ་ཀྱི་
བང་རིམ་བཞི་ལས་བང་རིམ་དང་པོ་ནི་ལག་ན་གཞོང་ཐོགས་པ་རྣམས་ཀྱི་གནས་སོ། །བང་རིམ་གཉིས་པ་ནི་ལག་ན་ཕྲེང་ཐོགས་པ་རྣམས་ཀྱི་གནས་སོ། །བང་རིམ་གསུམ་པ་ནི་རྟག་མྱོས་པའི་ལྷ་རྣམས་ཀྱི་གནས་སོ། །བང་རིམ་བཞི་པ་ནི་རྒྱལ་ཆེན་རིས་བཞིར་གཏོགས་པའི་ལྷའི་རིགས་
མང་པོ་སྟེ་དེ་དག་རྟེན་དང་བརྟེན་པར་བཅས་པ་རྣམས་གནས་སོ། །རི་རབ་ཀྱི་སྟེང་གི་མཚམས་བཞིའི་ལྕོག་ཆེན་པོ་བཞི་ལ་ནི་གནོད་སྦྱིན་གསང་བ་པ་རྣམས་གྲོང་དང་གྲོང་རྡལ་དུ་བཅས་པ་གནས་སོ། །དེའི་དབུས་སུ་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་གྲོང་ཁྱེར་ལྟ་ན་སྡུག་ཅེས་བྱ་བ་
ཡོད་ཅིང༌། གྲོང་ཁྱེར་དེའི་དབུས་སུ་ལྷ་རྣམས་ཀྱི་དབང་པོ་བརྒྱ་བྱིན་གྱི་ཕོ་བྲང་རྣམ་པར་རྒྱལ་བའི་ཁང་བཟང་ཞེས་བྱ་བ་བསོད་ནམས་ཀྱི་མཐུ་ལས་གྲུབ་པ། ཕྱི་ནང་ཀུན་དུ་ངོ་མཚར་གྱི་བཀོད་པ་དཔག་ཏུ་མེད་པས་ཤིན་ཏུ་མཛེས་པར་བྱས་པ་དག་ཡོད་དོ། །དེ་ལའང་སུམ་ཅུ་རྩ་གསུམ་པ་ཞེས་
པའི་ཐ་ཚིག་ཀྱང་ནོར་ལྷ་བརྒྱད་དང༌། དྲག་པོ་བཅུ་གཅིག་དང༌། ཐ་སྐར་གྱི་བུ་གཉིས་དང༌། ཉི་མ་བཅུ་གཉིས་ཏེ་ཉེ་དབང་སུམ་ཅུ་རྩ་གཉིས་དང༌། དེ་དག་གི་དབང་པོ་མཆོད་སྦྱིན་བརྒྱ་པ་དང་བཅས་པའི་ལྷའི་གཙོ་བོ་སུམ་ཅུ་རྩ་གསུམ་ཡོད་པས་དེ་སྐད་དུ་གྲགས་སོ། །གྲོང་ཁྱེར་ལྟ་ན་སྡུག་གི་

ཕྱོགས་བཞི་ན་བཞོན་པ་གནས་པའི་ཤིང་རྟ་སྣ་ཚོགས་ཞེས་བྱ་བའི་སྐྱེད་མོས་ཚལ་དང༌། གཡུལ་དུ་ཆས་པའི་གནས་རྩུབ་འགྱུར་ཞེས་བྱ་བའི་ཚལ་དང༌། སྤྱོད་ལམ་རྣམ་པ་སྣ་ཚོགས་ལ་འཇུག་པའི་གནས་འདྲེས་མ་ཞེས་བྱ་བའི་ཚལ་དང༌། རྩེ་ཞིང་རོལ་པའི་གནས་
དགའ་བའི་ཚལ་ཞེས་བྱ་བ་རྣམས་ཡོད་དོ། །ཚལ་དེ་དག་གི་ཕྱི་རོལ་དུ་ལྷ་རྣམས་ཀྱིས་མངོན་པར་རྩེ་བར་བྱེད་པའི་གནས་ས་གཞི་བཟང་པོ་ཡིད་དུ་འོང་བ་རྣམ་པ་བཞི་ཡང་ཡོད་ཅིང༌། ལྟ་ན་སྡུག་གི་གྲོང་ཁྱེར་གྱི་བྱང་ཤར་མཚམས་སུ་ལྷ་རྣམས་ཀྱི་འདོད་དགུ་ཕུན་སུམ་ཚོགས་པ་འབྱུང་བའི་
གནས་སུ་གྱུར་པའི་ཤིང་ཡོངས་འདུ་ས་བརྟོལ་དང༌། དར་དཀར་པོ་ལ་བ་ལྟ་བུའི་རྡོ་ཨ་མོ་ལིག་ཅེས་བྱ་བ་ལ་སོགས་པ་དག་ཡོད་དོ། །ལྷོ་ནུབ་ཀྱི་མཚམས་སུ་ལྷ་རྣམས་ཀྱིས་བགྱི་བར་རུང་བ་དང་བགྱི་བར་རུང་བ་མ་ཡིན་པ་རྣམས་གཏམ་དུ་བགྲོ་བའི་ལྷའི་མདུན་ས་ཆོས་བཟང་ཞེས་བྱ་བ་བཀོད་
པ་ཕུན་ཚོགས་མཛེས་ཤིང་ཡིད་དུ་འོང་བར་བྱས་པ་ཡོད་དོ། །གཞན་ཡང་ལྷའི་རྔ་བོ་ཆེ་ཞེས་བྱ་བ་ལྷ་རྣམས་ཀྱིས་འདོད་པའི་ཡོན་ཏན་ལ་བག་མེད་པར་སྤྱོད་པ་ན་མི་རྟག་པའི་སྒྲ་འབྱུང་བས་སྐུལ་བར་བྱེད་པ་དང༌། མི་མཐུན་པའི་ཕྱོགས་ལས་རྣམ་པར་རྒྱལ་བའི་ཤིས་པར་བརྗོད་པ་ལ་སོགས་
པའི་སྒྲ་རང་འབྱུང་བར་བྱེད་པ་དེ་དང༌། གཡུལ་ངོར་སྤྱོད་པའི་གླང་པོ་ཆེ་རབ་བརྟན་དང༌། སྐྱེད་མོས་ཚལ་དུ་སྤྱོད་པའི་གླང་པོ་ཆེ་ས་སྲུང་གི་བུ་དང༌། རྟའི་རྒྱལ་པོ་སྤྲིན་གྱི་ཤུགས་ཅན་ཏེ་དེ་དག་རང་རང་གི་འཁོར་དང་བཅས་པ་ལ་སོགས་པ་ཡོད་པའི་གནས་རྣམས་སོ། །ལྷུན་པོའི་ཕྱི་རོལ་གྱི་ཁོར་
ཡུག་ཀུན་དུ་གསེར་གྱི་རི་བདུན་ཞེས་བྱ་བ་རིན་པོ་ཆེ་གསེར་གྱི་རྡུལ་འབའ་ཞིག་བརྩེགས་པའི་རང་བཞིན་ཅན་གྱིས་རི་རབ་ལ་རིམ་པ་བདུན་དུ་གྲུ་བཞི་པའི་དབྱིབས་སུ་བསྐོར་བ་ཐམས་ཅད་ཀྱང་གསེར་གྱི་ས་གཞི་ལ་བརྟེན་ཏེ་གནས་སོ། །དེའི་དང་པོ་ནི་གཉའ་ཤིང་འཛིན་གྱི་རི་སྟེ། དེའི་བྱང་ཕྱོགས་ཀྱི་
ལོགས་ཀྱི་སྟེང་ན་ལྕང་ལོ་ཅན་ཞེས་བྱ་བའི་ཕོ་བྲང་ཡོད་དེ། དེ་ན་རྒྱལ་པོ་ཆེན་པོ་རྣམ་ཐོས་ཀྱི་བུ་གནོད་སྦྱིན་གྱི་འཁོར་གྱིས་བསྐོར་བ་དང༌། ཤར་ཕྱོགས་སུ་ཡུལ་འཁོར་སྲུང་ཞེས་བྱ་བ་ན་རྒྱལ་པོ་ཆེན་པོ་ཡུལ་འཁོར་སྲུང་དྲི་ཟའི་འཁོར་གྱིས་བསྐོར་བ་དང༌། ནུབ་ཕྱོགས་སུ་སྣ་ཚོགས་གཟུགས་

ཞེས་བྱ་བ་ན་རྒྱལ་པོ་ཆེན་པོ་མིག་མི་བཟང་ཀླུའི་འཁོར་གྱིས་བསྐོར་བ་དང༌། ལྷོ་ཕྱོགས་སུ་འཕགས་སྐྱེས་པོ་ཞེས་བྱ་བ་ན་རྒྱལ་པོ་ཆེན་པོ་འཕགས་སྐྱེས་པོ་གྲུལ་བུམ་གྱི་འཁོར་གྱིས་བསྐོར་བ་དང་བཅས་པ་རྣམས་དང༌། དེ་དག་གི་གྲོང་དང་གྲོང་རྡལ་དང༌། ཚལ་གྱི་རྣམ་པ་དག་གིས་
མཛེས་པར་བྱས་པ་དག་གནས་སོ། །དེ་བཞིན་དུ་གསེར་གྱི་རི་གཉིས་པ་ནི་གཤོལ་མདའ་འཛིན་ནོ། །གསུམ་པ་ནི་སེང་ལྡེང་ཅན་ནོ། །བཞི་པ་ནི་ལྟ་ན་སྡུག་གོ །ལྔ་པ་ནི་རྟ་རྣ་ཅན་ནོ། །དྲུག་པ་ནི་རྣམ་པར་འདུད་དོ། །བདུན་པ་ནི་མུ་ཁྱུད་འཛིན་ཞེས་བྱ་བ་རྣམས་ཏེ། ཐམས་ཅད་ཀྱང་ཆུའི་སྟེང་དུ་
འཕགས་པའི་དཔངས་ལ་ནི་མཐོ་དམན་གྱི་ཁྱད་པར་ཞུགས་པ་སྟེ། རི་རབ་ནས་བརྩམས་ཏེ་མུ་ཁྱུད་འཛིན་གྱི་བར་ལ་སྔ་མ་སྔ་མའི་ཕྱེད་ཕྱེད་ཀྱིས་ཕྱི་མ་ཕྱི་མ་དམན་པར་གནས་སོ། །གསེར་གྱི་རི་དེ་དག་གི་ཐད་ཀྱི་སྟེང་གི་ནམ་མཁའ་ལ་འཕུལ་བར་བྱེད་པའི་རླུང་གི་དཀྱིལ་འཁོར་དྭངས་ཤིང་
སྒྲིབ་པ་མེད་པ་འཁོར་ལོ་བཞིན་དུ་གཡས་སུ་འཁོར་བ་ལ་བརྟེན་པའི་ཉི་མ་དང༌། ཟླ་བ་དང༌། རྒྱུ་སྐར་གྱི་གཞལ་མེད་ཁང་རྣམས་དང༌། ཁོར་ཡུག་ལྕགས་ཀྱི་རི་བོ་དང༌། ཛམྦུའི་གླིང་གི་རི་བོ་དང༌། ལྗོན་ཤིང་ལ་སོགས་པ་རྣམས་སུའང་རྒྱལ་ཆེན་རིས་བཞི་པའི་སྡེར་གཏོགས་པའི་ལྷ་རྣམས་
ཅི་རིགས་པར་གནས་སོ། །དེ་དག་ལས་ཉི་མ་དང་ཟླ་བའི་གཞལ་མེད་ཁང་གི་འོག་གི་ཕྱི་རོལ་ནི་མེ་ཤེལ་དང་ཆུ་ཤེལ་གྱི་དཀྱིལ་འཁོར་ལས་ཚ་བར་བྱེད་པ་དང༌། བསིལ་བར་བྱེད་པ་དང༌། སྣང་བར་བྱེད་པའི་འོད་ཀྱི་ཕྲེང་བ་དག་སྤྲོས་ཏེ་འགྲོ་བ་རྣམས་རང་རང་གི་ལས་དང་རྗེས་སུ་འཚམ་པར།
མིག་དང༌། ལུས་དང༌། ཡན་ལག་དང༌། མེ་ཏོག་དང༌། འབྲས་བུ་དང༌། ལོ་ཏོག་དང༌། སྨན་དང༌། ཆུ་ཀླུང་རྣམས་འགའ་ཞིག་ཏུ་ནི་ཕན་འདོགས་པར་བྱེད་པ་དང༌། འགའ་ཞིག་ཏུ་ནི་གནོད་པར་བྱེད་པ་དག་ཅི་ཡང་འབྱུང་ངོ༌། །གཞན་ཡང་འཆར་ནུབ་ཀྱི་དུས་ཀྱང་མཛོད་ལས། ནམ་ཕྱེད་ཉི་
མ་ནུབ་པ་དང༌། །ཉི་མ་ཕྱེད་དང་འཆར་དུས་གཅིག །ཅེས་གསུངས་པ་བཞིན་དུ། དཔེར་ན་སྒྲ་མི་སྙན་དུ་ནམ་ཕྱེད་པར་གྱུར་པ་དེའི་ཚེ་ལུས་འཕགས་སུ་ཉི་མ་ནུབ་བོ། །ཛམྦུའི་གླིང་དུ་ཉི་མ་ཕྱེད་དོ། །བ་ལང་སྤྱོད་དུ་ཉི་མ་འཆར་བ་རྣམས་དུས་ཅིག་ཅར་ཉིད་དུ་འབྱུང་བ་ཡིན་ནོ། །རོལ་པའི་མཚོ་བདུན་

ཞེས་བྱ་བ་ནི་རི་བརྒྱད་པོ་དེ་དག་གི་བར་དུ་གནས་པའི་ཆུའི་ཕུང་པོ་ཡན་ལག་བརྒྱད་དང་ལྡན་པ་གང་ཡིན་པས་མངོན་པར་གཏམས་པའི་རྒྱ་མཚོ་རིམ་པ་བདུན་དུ་ཡོད་དོ། །དེའང་ཡན་ལག་བརྒྱད་ནི་བསིལ་བ་དང༌། ཞིམ་པ་དང༌། ཡང་བ་དང༌། འཇམ་པ་དང༌། དྭངས་པ་
དང༌། དྲི་ང་བ་མེད་པ་དང༌། འཐུང་ན་མགྲིན་པ་ལ་མི་གནོད་པ་དང༌། ལྟོ་བ་ལ་མི་གནོད་པ་རྣམས་སོ། །མཚོ་དེ་དག་ཏུ་ཀླུའི་རྒྱལ་པོ་འཁོར་དང་བཅས་པ་རྣམས་ཀྱིས་མངོན་པར་རྩེ་ཞིང་རོལ་པའི་གནས་སུ་བྱེད་དོ། །གསེར་གྱི་རི་བོ་ཕྱི་མ་ནས་བརྩམས་ཏེ་ཁོར་ཡུག་གི་རི་བོའི་བར་ལ་གླིང་དང་གླིང་
ཕྲན་རྣམས་མ་གཏོགས་པ་ཕྱིའི་རྒྱ་མཚོའམ་བ་ཚ་ཅན་གྱི་རྒྱ་མཚོ་ཞེས་བྱ་བ་ཁོ་ར་ཁོར་ཡུག་ཀུན་དུ་དུམ་བུར་མ་ཆད་པ་ཡོད་ཀྱང་རི་རབ་ཀྱི་རིན་པོ་ཆེའི་མདངས་ཀྱིས་ཕོག་པས་རྒྱ་མཚོ་ཆེན་པོ་དེའི་ཁ་དོག་ཀྱང་ཐ་དད་པ་ཉིད་དུ་གྱུར་པས་རྒྱ་མཚོ་བཞིའི་གྲངས་སུ་མངོན་པར་བརྗོད་པ་ཡིན་ནོ། །གླིང་
རྣམས་ནི་ཕྱི་རོལ་གྱི་རྒྱ་མཚོ་ཆེན་པོ་ན་ཡོད་དེ། དེའང་རི་རབ་ཀྱི་ཤར་ཕྱོགས་ཀྱི་རྒྱ་མཚོ་ན་ལུས་འཕགས་པོའི་གླིང་ཞེས་བྱ་བ་ཟླ་བ་ཁམ་པའི་དབྱིབས་སུ་གནས་པ། དེ་ལ་ལུས་དང་ལུས་འཕགས་ཞེས་བྱ་བའི་གླིང་གཡོག་གཉིས་དང་བཅས་པ་ཡོད་དོ། །དེ་དག་ཏུ་སྐྱེས་པའི་མི་རྣམས་ནི་
གཟུགས་ཆེ་ཞིང་ལྟ་ན་སྡུག་པ་ཡོད་པས་ལུས་འཕགས་ཞེས་བྱ་སྟེ། དེ་ལྟ་བུའི་མི་རྣམས་ཀྱི་གནས་པ་གྲོང་དང༌། གྲོང་རྡལ་དང༌། གྲོང་ཁྱེར་དང༌། ཡུལ་འཁོར་དང༌། ཕོ་བྲང་རྣམས་གནས་སོ། །དེ་བཞིན་དུ་རི་རབ་ཀྱི་ལྷོ་ཕྱོགས་ཀྱི་རྒྱ་མཚོ་ན་ཛམྦུའི་གླིང་སྟེ་ཤིང་རྟ་ཆེན་པོའི་དབྱིབས་སུ་གནས་
པ། འདི་ལའང་རྔ་ཡབ་དང་རྔ་ཡབ་གཞན་ཞེས་བྱ་བའི་གླིང་གཡོག་གཉིས་དང་བཅས་པ་ཡོད་དོ། །འདི་དག་ཏུ་མི་རིགས་མི་འདྲ་བ་མང་པོ་རྣམས་དང༌། དེ་དག་གིས་བསྟི་བའི་གྲོང་དང་གྲོང་རྡལ་ལ་སོགས་པ་དུ་མ་ཡོད་དོ། །གླིང་འདིའི་འོག་རོལ་དཔག་ཚད་ཉི་ཁྲི་ན་དམྱལ་བ་ཆེན་པོའི་གནས་རྣམས་
ཡོད་དེ། དེའང་འདི་ལྟ་སྟེ་ཚ་བའི་དམྱལ་བ་བརྒྱད་ལས་སྡུག་བསྔལ་ཀུན་གྱི་མཐར་ཐུག་པར་གྱུར་པ་ནི་མནར་མེད་པའི་དམྱལ་བ་ཞེས་བྱ་བ་སྟེ། དེ་ནི་ཐམས་ཅད་ཀྱི་འོག་ཏུ་གནས་ཤིང༌། དེའི་གོང་ནས་གོང་དུ་རབ་ཏུ་ཚ་བ་དང༌། ཚ་བ་དང༌། ངུ་འབོད་ཆེན་པོ་དང༌། ངུ་འབོད་དང༌། བསྡུས་འཇོམས་དང༌།

ཐིག་ནག་དང༌། ཡང་སོས་ཀྱི་དམྱལ་བ་པ་ལྕགས་བསྲེགས་ཀྱི་ས་གཞིའི་གནས་དང་བཅས་པ་རྣམས་རིམ་པར་གནས་སོ། །དེ་བཞིན་དུ་བརྒྱད་པོ་དེ་དག་གི་ངོས་རེ་ལ་ཉེ་འཁོར་བ་ཞེས་བྱ་བ་མེ་མུར་དང༌། རོ་མྱགས་ཀྱི་འདམ་དང༌། མཚོན་ཆའི་སྐོར་གྱི་དམྱལ་བ་དང༌། ཆུ་བོ་རབ་མེད་དེ།
དམྱལ་བ་ལྷག་པ་བཞི་བཞི་སྟེ་བཅུ་དྲུག་པོ་རྣམས་ཀྱང་གནས་སོ། །ཚ་བའི་དམྱལ་བ་དེ་དག་གི་མཐའ་ལོགས་ཤིག་ཏུ་གྲང་བའི་དམྱལ་བ་ཞེས་བྱ་བ་བརྒྱད་ཡོད་པ་རྣམས་ནི་འདི་ལྟ་སྟེ། ཆུ་བུར་ཅན་དང༌། ཆུ་བུར་རྡོལ་བ་ཅན་དང༌། ཨ་ཆུ་འདོན་པ་དང༌། ཀྱི་ཧུད་འདོན་པ་དང༌། སོ་ཐམས་ཐམས་
པ་དང༌། ཨུཏྤལ་ལྟར་གས་པ་དང༌། པདྨ་ལྟར་གས་པ་དང༌། པདྨ་ཆེན་པོ་ལྟར་ལུས་ཐམས་ཅད་གས་པར་གྱུར་པའི་གྲང་བའི་དམྱལ་བ་པ་རྣམས་དང་དེ་དག་གི་གནས་གངས་རིའི་ཕྲེང་བ་ཆབ་རོམ་གྱི་ཐང་དང་བཅས་པ་རྣམས་ཡོད་དོ། །གཞན་ཡང་ཉི་ཚེ་བའི་དམྱལ་བ་ཞེས་པ་ཀུན་འབྱུང་བ་ཐ་དད་པ་
ལས་གྲུབ་པའི་སྡུག་བསྔལ་གྱི་བྱེ་བྲག་རྣམ་པ་མང་པོ་ཡོད་ཅིང་གནས་ནི་ངེས་པ་མེད་དེ། ཆུ་བོ་དང༌། རི་དང༌། མྱ་ངམ་གྱི་ཐང་དང༌། འོག་ཏུའང་ཡོད་པར་བཤད་དོ། །ཡི་དྭགས་ཀྱི་འཇིག་རྟེན་ཞེས་བྱ་བ་ཡང་ཛམྦུའི་གླིང་འདིའི་རྒྱལ་པོའི་ཁབ་ཀྱི་འོག་རོལ་དཔག་ཚད་ལྔ་བརྒྱ་ན་ཡི་དྭགས་ཀྱི་གྲོང་
ཁྱེར་སེར་སྐྱ་ཞེས་བྱ་བ་ཡོད་དེ། དེ་ན་ཡི་དྭགས་ཀྱི་བདག་པོ་ཆོས་ཀྱི་རྒྱལ་པོ་གཤིན་རྗེ་མཐུ་བོ་ཆེ་དཔུང་དང་བཅས་པ་གནས་ཤིང༌། དེའི་འཁོར་དུ་གཏོགས་པའི་ཡི་དྭགས་ཀྱི་རིགས་ནི་ཁ་ཁབ་མིག་ལྟར་ཕྲ་བ་ལ་སོགས་པ་སུམ་ཅུ་རྩ་དྲུག་ཏུ་གསུངས་པ་རྣམས་ཏེ་ཐམས་ཅད་རིས་སུ་བསྡུ་ན།
ཕྱིའི་སྒྲིབ་པ་ཅན་དང༌། ནང་གི་སྒྲིབ་པ་ཅན། ཟས་སྐོམ་གྱི་སྒྲིབ་པ་ཅན་དུ་འདུ་བ་སྟེ། དེ་དག་གི་འདུག་པའི་གནས་དང་བཅས་པ་རྣམས་ཡོད་དོ། །དུད་འགྲོ་ནི་ཐང་དང་ཆུ་དང་ནམ་མཁའི་སྤྱོད་ཡུལ་ཅན་ཡིན་པས་ཕལ་ཆེ་བ་དག་ཕྱིའི་རྒྱ་མཚོའི་ནང་དུ་ཆང་གི་སྦང་མ་ལྟར་བྱིངས་ན་གནས་པ་དང༌།
ཁ་འཐོར་བ་ནི་མི་དང་ལྷ་དང་ལྷ་མ་ཡིན་གྱི་ཡུལ་དང་གླིང་བར་གྱི་མུན་པ་ཆེན་པོ་རྣམས་སུ་གནས་སོ། །ཡང་རི་རབ་ཀྱི་ནུབ་ཕྱོགས་ཀྱི་ཕྱིའི་རྒྱ་མཚོ་ན་བ་ལང་སྤྱོད་ཀྱི་གླིང་ཞེས་བྱ་བ་ཀུན་ནས་ཟླུམ་པོར་གྱུར་པ་ཟླ་བ་ཉ་གང་བའི་དབྱིབས་སུ་གནས་པ། དེ་ལ་གཡོ་ལྡན་དང་ལམ་མཆོག་འགྲོ་ཞེས་

བྱ་བའི་གླིང་གཡོག་གཉིས་དང་བཅས་པ་ཡོད་དེ། དེ་དག་ཏུ་སྐྱེས་པའི་མི་རྣམས་ཀྱི་ལོངས་སྤྱོད་ནི་ཤས་ཆེར་བ་ལང་དང་རིན་པོ་ཆེ་ལས་བྱུང་བ་ལ་ཉེ་བར་སྤྱོད་པའི་ཕྱིར་མིང་ཡང་དེ་སྐད་ཅེས་བྱ་སྟེ། དེ་ལྟ་བུའི་ཡུལ་གླིང་མིའི་འགྲོ་བ་དང་བཅས་པ་རྣམས་ཡོད་དོ། །རི་རབ་ཀྱི་བྱང་ཕྱོགས་ཀྱི་
ཕྱིའི་རྒྱ་མཚོ་ན་སྒྲ་མི་སྙན་གྱི་གླིང་ཞེས་བྱ་བ་གྲུ་བཞི་པ་ཁྲིའུའི་དབྱིབས་སུ་གནས་པ། དེ་ལ་སྒྲ་མི་སྙན་དང་སྒྲ་མི་སྙན་གྱི་ཟླ་ཞེས་བྱ་བའི་གླིང་གཡོག་གཉིས་དང་བཅས་པ་ཡོད་དེ། དེ་དག་ཏུ་སྐྱེས་པའི་མི་རྣམས་ཀྱི་ལོངས་སྤྱོད་ནི་མ་རྨོས་པ་དང་མ་བཏབ་པར་འཁྲུངས་པའི་འབྲས་སཱ་ལུའི་ཟས་དང༌།
དཔག་བསམ་གྱི་ཤིང་ལས་བྱུང་བ་ལ་ཅི་བདེར་སྤྱོད་པ་ལ་སོགས་པ་མཐོ་རིས་ཀྱི་ལྷའི་འཇིག་རྟེན་ལྟ་བུ་ཡོད་དེ། དྲན་པ་ཉེར་གཞག་ལས། མཐོ་རིས་ལས་གཞན་པའི་མཐོ་རིས་ཀྱི་འཇིག་རྟེན་གཉིས་པ་ལྟ་བུ་ཞེས་གསུངས་པས། གླིང་འདིའི་བདེ་བ་དང་འབྱོར་པ་ལ་མིའི་གནས་
གཞན་གསུམ་གྱིས་འགྲན་པར་མི་ནུས་པ་ཞིག་གོ །ཡུལ་དེར་པི་ཤཱ་ཙི་ཀ་ཞེས་པ་ཤ་ཟའམ་འདྲེའི་སྐད་ཀྱིས་སྨྲ་བའི་ཕྱིར་སྒྲ་མི་སྙན་ནམ། དཔག་བསམ་གྱི་ཤིང་ལས་འཆི་འཕོ་བར་སྒྲོན་པའི་སྒྲ་མི་སྙན་པར་འབྱུང་བས་སམ། ཡང་ན་ཀླུ་རྣམས་ཀྱིས་གཙེས་པའི་སྐྱོན་གྱི་ཉི་མ་སྤྲིན་
གྱིས་གཡོགས་པ་ན། དེས་རྫ་རྔ་དང་པི་ཝང་ལ་སོགས་པའི་རོལ་མོ་རྣམས་ལས་སྐད་མི་སྙན་པར་འབྱིན་པ་ལས་དེ་སྐད་དུ་གདགས་པར་གྲག་གོ །དེ་ལྟ་བུའི་ཡུལ་གླིང་མིའི་འགྲོ་བ་དང་བཅས་པ་རྣམས་ཡོད་དེ། དེ་དག་གི་ཕྱི་རོལ་གྱི་རྒྱ་མཚོ་ཆེན་པོའི་མཐའ་སྐོར་ཀུན་དུ་ལྕགས་རི་ཆེན་པོ་
ཞིག་གིས་བསྐོར་བ་ལ་ཁོར་ཡུག་གི་ལྕགས་རི་ཞེས་བྱ་བ་ཡིན་ནོ། །རི་རབ་ཀྱི་རྩེ་མོ་སུམ་ཅུ་རྩ་གསུམ་པའི་གནས་ནས། སྟེང་གི་ནམ་མཁའ་ལ་རླུང་གི་དཀྱིལ་འཁོར་ལ་བརྟེན་ཏེ་སྤྲིན་གྱི་ཕུང་པོ་བཞིན་དུ་མངོན་པར་འཕགས་པའི་རིན་པོ་ཆེའི་གཞི་ལ། གཟུགས་ཀྱི་ཁམས་ཀྱི་ལྷ་དང༌།
འདོད་པའི་ཁམས་ཀྱི་ལྷ་རྣམས་ཀྱི་གཞལ་མེད་ཁང་དམ་པ་ལྷ་རྫས་ཀྱི་འབྱོར་པ་ཕུན་སུམ་ཚོགས་པ་ལས་ལེགས་པར་གྲུབ་པ་རྣམས་ནི། དཔེར་ན་བླ་ཁབ་མང་པོ་སྟེང་ནས་སྟེང་དུ་ཕུབ་པའམ། མཆོད་རྟེན་ཁ་སྦུབས་པའི་བང་རིམ་གྱི་རྣམ་པ་བཞིན་དུ་འོག་མ་འོག་མ་ལས་གོང་མ་གོང་མ་ཇེ་ཆེར་

གནས་ཏེ། དེའང་འདོད་པའི་ཁམས་ཀྱི་ལྷའི་གནས་བཞི་ནི་ཉིས་འགྱུར་དང༌། གཟུགས་ཀྱི་ཁམས་ཀྱི་ལྷའི་གནས་ནི་སྟོང་འགྱུར་གྱིས་རྒྱ་ཆེ་བ་ཉིད་དུ་གནས་ཏེ། ཇི་སྐད་དུ། གནས་ནས་གནས་འོག་ཇི་སྲིད་པ། །དེ་ནས་དེ་ཡི་གོང་དེ་སྲིད། །ཅེས་སོ། །གནས་དེ་དག་ཏུ་བརྟེན་པའི་ལྷ་རྣམས་ནི་
འདི་ལྟ་སྟེ། འཐབ་བྲལ་དང༌།དགའ་ལྡན་དང༌། འཕྲུལ་དགའ་དང༌། གཞན་འཕྲུལ་དབང་བྱེད་པ་སྟེ་འདོད་པའི་ཁམས་ཀྱི་ལྷ་རྣམས་སོ། །དེ་ལྟར་ན་མནར་མེད་པ་ནས་བརྩམས་ཏེ་འདིའི་བར་ལ་འདོད་པའི་ཁམས་ཞེས་བྱ་ཞིང༌། བྱེ་བྲག་ཏུ་ལག་ན་གཞོང་ཐོགས་ཀྱི་ལྷ་ཡན་ཆད་ནི་འདོད་པ་ན་སྤྱོད་པའི་ལྷ་
དྲུག་ཡིན་ཏེ། དེ་དག་འདོད་པའི་ཡོན་ཏན་འཁྲིག་པ་དང་ཁམས་ཀྱི་ཟས་ལ་འདོད་ཆགས་དང་བཅས་པའི་ཕྱིར་འདོད་པའི་ཁམས་ཀྱི་ལྷ་ཞེས་གདགས་སོ། །གཟུགས་ཀྱི་ཁམས་ཀྱི་ལྷ་རྣམས་ནི་བསམ་གཏན་བཞིས་བསྡུས་ཏེ། དེ་དག་ཀྱང་འདི་ལྟ་སྟེ། ཚངས་རིས་དང༌། ཚངས་པ་མདུན་ན་
འདོན་དང༌། ཚངས་ཆེན་ཏེ་བསམ་གཏན་དང་པོར་གཏོགས་པའི་ལྷ་རྣམས་སོ། །འོད་ཆུང་དང༌། ཚད་མེད་འོད་དང༌། འོད་གསལ་བ་སྟེ་བསམ་གཏན་གཉིས་པར་གཏོགས་པའི་ལྷ་རྣམས་སོ། །དགེ་ཆུང་དང༌། ཚད་མེད་དགེ་དང༌། དགེ་རྒྱས་ཏེ་བསམ་གཏན་གསུམ་པར་གཏོགས་པའི་ལྷ་རྣམས་
སོ། །སྤྲིན་མེད་དང༌། བསོད་ནམས་སྐྱེས་དང༌། འབྲས་བུ་ཆེ་བ་དང༌། མི་ཆེ་བ་དང༌། མི་གདུང་བ་དང༌། གྱ་ནོམ་སྣང་བ་དང༌། ཤིན་ཏུ་མཐོང་བ་དང༌། འོག་མིན་ཏེ་བསམ་གཏན་བཞི་པར་གཏོགས་པའི་ལྷ་རྣམས་ཏེ་གཟུགས་ཀྱི་ཁམས་ཀྱི་ལྷ་རྣམས་སོ། །དེ་དག་ལ་ལ་ནི་གཟུགས་ན་སྤྱོད་པའི་ལྷ་རིས་
བཅུ་བདུན་ཞེས་བྱ་སྟེ། འདོད་པའི་ཡོན་ཏན་འདོད་ཆགས་དང་བྲལ་ལ། གཟུགས་ལ་འདོད་ཆགས་དང་བཅས་པའི་ཕྱིར་གཟུགས་ཀྱི་ཁམས་ཀྱི་ལྷ་ཞེས་གདགས་སོ། །གཟུགས་མེད་པའི་ཁམས་ཀྱི་ལྷ་རྣམས་ནི་འདི་ལྟ་སྟེ། ནམ་མཁའ་མཐའ་ཡས་སྐྱེ་མཆེད་དང༌། རྣམ་ཤེས་མཐའ་ཡས་སྐྱེ་མཆེད་དང༌།
ཅི་ཡང་མེད་པའི་སྐྱེ་མཆེད་དང༌། འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་དེ་གཟུགས་མེད་པའི་ཁམས་ཀྱི་ལྷ་རྣམས་སོ། །བཞི་པོ་འདི་དག་ནི་ལུས་ཅན་མ་ཡིན་པའི་ཕྱིར་གནས་ལོགས་པ་མེད་ཀྱང་སེམས་ཀྱི་ཏིང་ངེ་འཛིན་གྱི་བྱེ་བྲག་གི་རྣམ་པ་བཞིར་འབྱེད་པའི་སྒོ་ནས་གཟུགས་མེད་པའི་

ཁམས་ཀྱི་ལྷ་ཞེས་བྱ་སྟེ། གཟུགས་ལ་འདོད་ཆགས་དང་བྲལ་བར་གྱུར་ལ། གཟུགས་མེད་པ་ལ་འདོད་ཆགས་དང་བཅས་པའི་ཕྱིར་དེ་སྐད་ཅེས་གདགས་སོ། །མངོན་པ་བ་ཁ་ཅིག་ནི་གཟུགས་མེད་པའི་ཁམས་ནི་འོག་མིན་གྱི་སྟེང་ནས་སྟེང་དུ་བརྩེགས་མར་ཡོད་པ་དང་གཟུགས་
ཀྱང་ཡོད་ལ། གཟུགས་མེད་པ་ཞེས་བརྗོད་པ་ནི་དམན་པ་ལ་དགག་སྒྲ་སྦྱར་བ་ཡིན་ཞེས་སྨྲ་བ་ཡང་ཡོད་དོ། །དེ་དག་གི་སྐྱེ་བའི་གནས་ཀྱི་ཁྱད་པར་ཡང༌། ལྷ་དང༌། དམྱལ་བ་དང༌། སྲིད་པ་བར་མ་རྣམས་ནི་བརྫུས་ཏེ་སྐྱེས་པ་ཡིན་ལ། མི་དང་དུད་འགྲོ་བ་རྣམས་ནི་སྒོ་ང་ལས་སྐྱེས་པ་དང༌། མངལ་ལས་སྐྱེས་པ་དང༌།
བརྫུས་ཏེ་སྐྱེས་པ་དང༌། དྲོད་གཤེར་ལས་སྐྱེས་པ་སྟེ་བཞི་ག་ཚང་བ་དང༌། ཡི་དྭགས་ལ་མངལ་ལས་སྐྱེས་པ་དང་བརྫུས་ཏེ་སྐྱེས་པ་གཉིས་ཀ་ཡོད་པར་བཤད་དོ། །དེ་ལྟར་ཇི་སྐད་བསྟན་པའི་གླིང་བཞི་དང༌། རིའི་རྒྱལ་པོ་དང༌། གསེར་གྱི་རི་བདུན་དང༌། ཁོར་ཡུག་དང༌། འདོད་པའི་ལྷ་དྲུག་དང༌། ཚངས་པའི་
འཇིག་རྟེན་གྱི་བར་ལ་གླིང་བཞི་པའི་འཇིག་རྟེན་གྱི་ཁམས་ཞེས་བྱའོ། །དེ་བྱེ་བ་ཕྲག་བརྒྱ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་ཇི་ལྟར་བགྲང་བའི་ཚུལ་ནི་སྔོན་དུ་སྨྲས་ཟིན་པ་ལྟར་རོ། །གཉིས་པ་ཛམྦུའི་གླིང་བཀར་ཏེ་བཤད་པ་ནི། དེ་ལ་ཇི་སྐད་སྨོས་པའི་གླིང་གཞན་གསུམ་ནི།
ལོངས་སྤྱོད་ཀྱི་ས་དང༌། ཛམྦུའི་གླིང་ནི་ལས་ཀྱི་ས་སྟེ་དེ་ཡང་དུས་ཀྱི་འཁོར་ལོའི་རྒྱུད་འགྲེལ་རྣམས་ནས། རི་རབ་ཀྱི་རྭའི་འོག་གི་གླིང་དྲུག་ནི་ལོངས་སྤྱོད་ཀྱི་ས་པ་དང༌། བསིལ་རིའི་ཕྱི་མཚམས་ནས་ལན་ཚྭའི་རྒྱ་མཚོའི་མཐར་ཐུག་པའི་བདུན་པ་ཛམྦུའི་གླིང་ནི་ལས་ཀྱི་ས་པ་སྟེ། དེ་ལ་དུམ་བུ་བཅུ་
གཉིས་སུ་གནས་པའི་ལྷོ་གླིང་དབུས་མ་ཛམྦུའི་གླིང་ཆུང་ངུར་བཞེད་པ་ཡིན་ནོ། །དེ་ལ་ཅིའི་ཕྱིར་ཛམྦུའི་གླིང་ཞེས་བྱ་ཞེ་ན། གླིང་གང་གི་ཡུལ་དབུས་སུ་གྱུར་པ་ནི་འཕགས་པའི་ཡུལ་གྱི་མ་ག་དྷཱ་སྟེ། དེའི་བྱང་ནས་བྱང་དུ་རི་ནག་པོ་རྒྱུད་དགུ་འདས་པའི་ཕ་རོལ་ན་རིའི་རྒྱལ་པོ་གངས་ཅན་ཞེས་བྱ་བ་གངས་
རི་དཔལ་དང་ལྡན་པ་ཡོད་དོ། །དེའི་ཕ་རོལ་དུ་རིའི་རྒྱལ་པོ་སྤོས་ཀྱི་ངད་ལྡང་ཞེས་བྱ་བ་ཡོད་དེ། དེ་དག་གི་ཚུ་རོལ་ན་ཀླུའི་རྒྱལ་པོ་མ་དྲོས་པས་བདག་གིར་བྱས་པའི་མཚོ་མ་དྲོས་པ་ཞེས་བྱ་བ་ཆུ་བསིལ་ཞིང་སྦྲང་རྩི་ལྟ་བུས་གང་བ་ལ། མེ་ཏོག་ཨུཏྤལ་དང་པདྨ་དང་ཀུ་མུ་དཱ་དང་པུཎྜ་རཱི་ཀ་རྣམས་ཀྱིས་

ཁེབས་པ་དབྱིབས་ལེགས་ཤིང་ལྟ་ན་སྡུག་པ་གནས་སོ། །དེའི་ཤར་དང་ལྷོ་དང་ནུབ་དང་བྱང་གི་ཕྱོགས་བཞི་ནས་ཆུ་བོ་ཆེན་པོ་བཞི་འབབ་པ་ནི་འདི་ལྟ་སྟེ། ཆུ་བོ་གངྒཱ་དང༌། སིནྡྷུ་དང༌། པཀྵུ་དང༌། སི་ཏཱ་རྣམས་རིམ་པ་དེ་ཉིད་ཀྱིས་སོ། །ཆུ་བོ་དེ་དག་རེ་རེས་ཀྱང་མ་དྲོས་པའི་མཚོ་ལ་གཡས་སུ་
ལན་གྲངས་བདུན་བདུན་དུ་བསྐོར་ནས་ཆུ་བྲན་ལྔ་བརྒྱ་ལྔ་བརྒྱ་དང་ལྷན་ཅིག་ཏུ་རང་རང་གི་ཕྱོགས་ཀྱི་རྒྱ་མཚོ་ག་ལ་བར་འགྲོ་བར་བྱེད་དོ། །མཚོ་མ་དྲོས་པའི་འགྲམ་ངོགས་སུ་ཤིང་ཛམྦུ་ཏྲི་ཤ་ཞེས་བྱ་བ་འབྲས་བུ་རོ་མཆོག་མངར་པོ་དང་ལྡན་པར་སྐྱེས་པ། ཤིང་དེའི་འབྲས་བུ་ཤིན་ཏུ་སྨིན་པར་གྱུར་པ་ཆུའི་
ནང་དུ་ལྷུང་བ་ལས་ཛམྦུ་ཞེས་བྱ་བའི་སྒྲ་ཡང་འབྱུང་ངོ༌། །དེར་ལྡང་བའི་འབྲས་བུ་དེ་ལས་ཀླུའི་རྒྱལ་པོ་རྣམས་ཉར་སྤྲུལ་ནས་ཟ་བར་བྱེད་ཅིང༌། མ་ཟོས་པ་རྣམས་ནི་ཆུ་དང་ཕྲད་པའི་སྟོབས་ཀྱིས་ཛམྦུ་ཆུ་བོའི་གསེར་དུ་འགྱུར་བ་ཞིག་ཡོད་དོ། །དེས་ན་ཤིང་དེས་ཉེ་བར་མཚོན་པའི་གླིང་ཡིན་པས་ཛམྦུའི་
གླིང་ཞེས་ཐ་སྙད་དུ་བྱས་སོ། །གཞན་ཡང་རིའི་རྒྱལ་པོ་སྤོས་ཀྱི་ངད་ལྡང་དེའི་བྱང་ཕྱོགས་ན་བྲག་གསེར་གྱི་བྱ་སྐྱིབས་ལྷ་མ་ཡིན་གྱི་ངོས་ཞེས་བྱ་བ་དབྱིབས་ལེགས་པ་ནང་གི་ས་གཞི་ཡང་གསེར་གྱི་བྱེ་མ་བརྡལ་ཞིང་ཙནྡན་གྱི་ཆུས་ཆག་ཆག་བཏབ་པ་སྟེ། དེར་ཡིད་དུ་མི་འོང་བའི་ཤིང་ངམ།
ཐགསེག་མ་གང་ཅི་ཡང་རུང་བ་ལྷུང་བ་མི་མ་ཡིན་རྣམས་ཀྱིས་ཕྱིར་འདོར་བར་བྱེད་པ། དེའི་ཁོར་ཡུག་ཏུའང་བྲག་གསེར་གྱི་བྱ་སྐྱིབས་བརྒྱད་སྟོང་དང་བཅས་པ་ཡོད་དོ། །བྲག་དེའི་བྱང་ཕྱོགས་སུ་ཤིང་སཱ་ལའི་རྒྱལ་པོ་རབ་ཏུ་བརྟན་པ་ཞེས་བྱ་བ་འདོམ་བཞི་བཅུ་ཐུར་དུ་ཟུག་ཅིང་བརྒྱད་ཅུ་གྱེན་དུ་འཕགས་
པ་སཱ་ལའི་ཕྲེང་བ་རིམ་པ་བདུན་གྱིས་བསྐོར་བ་དང༌། ཤིང་དེའི་ཤར་ཕྱོགས་སུ་རྫིང་བུ་དལ་གྱིས་འབབ་པ་ཞེས་བྱ་བ་དབྱིབས་ཟླུམ་པོ། །རྫིང་གཡོག་བརྒྱད་སྟོང་དང་བཅས་པ། ཐམས་ཅད་ཀྱང་ཡན་ལག་བརྒྱད་དང་ལྡན་པའི་ཆུས་གང་བའི་ནང་ན་མེ་ཏོག་ཨུཏྤལ་དང་པདྨ་དང་ཀུ་མུ་དཱ་དང་པདྨ་
དཀར་པོ་ཆེ་ཞིང་མཆོག་ཏུ་ཆེ་བ་དག་གིས་ཁེབས་པ་ཡོད་དོ། །བརྒྱ་བྱིན་གྱི་གཡུལ་ངོར་སྤྱོད་པའི་གླང་པོ་ཆེ་རབ་བརྟན་ཞེས་བྱ་བ་གླང་པོ་ཆེ་བརྒྱད་སྟོང་གི་འཁོར་དང་བཅས་ཏེ། དགུན་དང༌། དཔྱིད་དང༌། སྟོན་གསུམ་དུ་ཟླ་བ་བཞི་བཞིར་བྲག་གསེར་གྱི་བྱ་སྐྱིབས་དང༌། ཤིང་སཱ་ལའི་རྒྱལ་པོ་དང༌། རྫིང་བུ་

དལ་གྱིས་འབབ་པ་དག་ཏུ་རེ་མོས་སུ་འཇུག་ཅིང་འཁོད་པ་དེ་ལྟ་བུའི་ངོ་མཚར་གྱི་ཕྲེང་བ་མང་པོ་དག་ཡོད་དོ། །དེ་དག་ཏུ་མ་ཟད་གླིང་འདི་ནི་གླིང་གཞན་ལས་མངོན་པར་འཕགས་པའི་ཁྱད་པར་གྱི་ཆོས་ཤིན་ཏུ་མང་ཏེ། མདོ་དྲན་པ་ཉེར་གཞག་ལས། གླིང་གསུམ་གྱི་
ནང་ནས་འདི་ནི་ལས་ཀྱི་ས་ཡིན། འདིར་ནི་དགེ་བ་བཅུའི་ལས་ཀྱི་ལམ་དག་སེམས་པ་ཡིན། འདིར་ནི་སངས་རྒྱས་འབྱུང་བ་ཡིན། འདི་ནི་མིའི་གནས་བཞི་དག་གི་རག་ལས་པ་ཡིན། འདིར་ནི་དགེ་བ་བཅུའི་ལས་ཀྱི་ལམ་དག་ངེས་པར་སེམས་ཤིང་རྣམ་པར་དཔྱོད་པ་ཡིན། འདིར་ནི་
ཚངས་པར་སྤྱོད་པའི་གནས་ཡིན། འདིར་ནི་འཆི་བ་དང་སྐྱེ་བའི་སེམས་པ་ཡིན། འདིར་རྡོ་རྗེ་ལས་བྱས་པའི་གདན་ཡོད་ཅེས་གསུངས་པ་ལྟར་གླིང་འདིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཞིང་སྦྱོང་བའི་སྨོན་ལམ་གྱི་ཁྱད་པར་མང་པོས་མཛའ་བར་བཅིངས་པ་དང༌།
གདུལ་བར་བགྱི་བའི་འགྲོ་བ་མཐའ་དག་གིས་ཀུན་ནས་བསྟེན་པའི་གནས་ཡིན་པའི་ཕྱིར་ཁྱད་པར་དུ་འཕགས་པ་སྟེ། དེ་ཡང་སྔོན་བདག་ཅག་གི་སྟོན་པ་འདིས་བྱང་ཆུབ་ཀྱི་སྤྱད་པ་སྤྱོད་པ་ན། ཝཱ་རཱ་ཎ་སཱི་ཁོ་ན་ལ་ཡང་འདས་པའི་དུས་ཀྱི་སངས་རྒྱས་མང་པོ་བྱོན་པ་ལ་མཆོད་པ་དང༌། དེ་དག་
གི་རྗེས་སུ་བསྟན་པ་ཐོས་པའང་དཔག་ཏུ་མ་མཆིས་པ་བྱུང་བར་ངེས་ཏེ། རྒྱ་ཆེར་རོལ་པའི་མདོ་ལས། དེར་ནི་ང་ཡིས་མཆོད་སྦྱིན་སྟོང་ཕྲག་བྱེ་བ་ཁྲག་ཁྲིག་དྲུག་ཅུ་བྱས། །དེར་ནི་སངས་རྒྱས་སྟོང་ཕྲག་བྱེ་བ་ཁྲག་ཁྲིག་དྲུག་ཅུ་དེ་དག་མཆོད། །ཝཱ་རཱ་ཎ་སཱི་དམ་པ་དེ་ནི་སྔོན་གྱི་དྲང་སྲོང་རྣམས་
ཀྱི་གནས། །ས་དེ་ལྷ་དང་ཀླུ་ཡིས་མངོན་བསྟོད་རྟག་ཏུ་ཆོས་ནི་མངོན་པར་གཞོལ། །ངས་ནི་སྔོན་ཆད་སངས་རྒྱས་བྱེ་བ་སྟོང་ཕྲག་དགུ་བཅུ་རྩ་གཅིག་དྲན། །དེ་དག་དྲང་སྲོང་ཞེས་བྱ་ནགས་མཆོག་དེར་ནི་འཁོར་ལོ་དམ་པ་བསྐོར། །ཞི་ཞིང་ཉེར་ཞི་བསམ་གཏན་མངོན་གྱུར་རྟག་ཏུ་
རི་དྭགས་རྣམས་ཀྱིས་བསྟེན། །དེ་ཕྱིར་དྲང་སྲོང་ཞེས་བྱ་ནགས་མཆོག་དེར་ནི་འཁོར་ལོ་དམ་པ་བསྐོར། །ཞེས་གསུངས་པ་དང༌། གནས་བྱ་རྒོད་ཕུང་པོ་ཉིད་དུ་བཞུགས་པའི་སངས་རྒྱས་ལ་བཀུར་སྟིར་མཛད་པ་ཡང་ཆེས་ཤིན་ཏུ་མང་སྟེ། ཏིང་ངེ་འཛིན་རྒྱལ་པོའི་མདོ་ལས། སངས་རྒྱས་

དག་ནི་བྱེ་བ་ཕྲག་སྟོང་དང༌། །དེ་བས་ལྷག་པ་གངྒཱའི་བྱེ་མ་སྙེད། །ཀུན་ཀྱང་བྱ་རྒོད་ཕུང་པོ་འདིར་བཞུགས་ཏེ། །མི་དབང་དེ་ཀུན་ང་ཡིས་བཀུར་སྟིར་བྱས། །ཞེས་གསུངས་པའི་ཕྱིར་རོ། །དེ་བཞིན་དུ་མ་འོངས་པར་ཡང་སྒྲོན་མེའི་བསྐལ་པ་འདི་ལ་འབྱོན་པར་འགྱུར་བའི་སངས་རྒྱས་
བཅོམ་ལྡན་འདས་སྟོང་ཕྲག་གཅིག་ལ་བཞིས་དམན་པའམ་གཅིག་གིས་དམན་པ་རྣམས་ཀྱང་བྱང་ཆུབ་ཀྱི་སྙིང་པོ་མངོན་དུ་མཛད་ཅིང་ཆོས་ཀྱི་འཁོར་ལོ་བསྐོར་བའི་གནས་སུ་འགྱུར་བའི་ཕྱིར་དང༌། བྱེ་བྲག་ཏུ་བདག་ཅག་གི་སྟོན་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ།
བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་ཐུབ་པའི་དབང་པོ་ཉིད་ཀྱིས་བྱང་ཆུབ་ཀྱི་ཤིང་ལྗོན་པའི་དྲུང་ག་ལ་བར་སྐྱིལ་མོ་ཀྲུང་གཅིག་ལ་ཡིད་ཀྱི་སྲུབ་ཤིང་སྡེ་དང་བཅས་པ་ལས་རྣམ་པར་རྒྱལ་བའི་གོ་འཕང་
དམ་པ་མངོན་དུ་མཛད་པའི་ཚུལ་བསྟན་པ་དང༌། འཇིག་རྟེན་གྱི་ཁམས་ཐམས་ཅད་དུ་སྣང་བར་བྱེད་པའི་ཆོས་ཀྱི་འཁོར་ལོ་བསྐོར་བའི་བྱིན་གྱིས་རློབ་པས་བྱིན་གྱིས་བརླབས་ཏེ། སླར་ཡང་མི་ཤིགས་རྡོ་རྗེ་རིན་པོ་ཆེའི་ཁམས་སུ་བརླིང་བར་བྱས་པའི་གནས་སུ་གྱུར་པའི་གླིང་ཐམས་ཅད་ཀྱི་གཙུག་
གི་ནོར་བུ་གཅིག་པུར་གྱུར་པ་ནི་ཛམྦུའི་གླིང་འདི་ཉིད་དོ། །གཞན་ཡང་གླིང་འདིའི་ནུབ་ཕྱོགས་སུ་གསང་ཆེན་རྡོ་རྗེ་ཐེག་པའི་ཉེ་ལམ་གྱི་བདུད་རྩི་བསམ་གྱིས་མི་ཁྱབ་པའི་འབྱུང་གནས་སུ་གྱུར་པའི་ཆོས་མཛོད་ཆེན་པོ། རིག་པ་འཛིན་པ་རྣམས་ཀྱི་དགའ་བའི་ཚལ་ལྟ་བུའི་གནས་མཆོག་ཁྱད་པར་ཅན་ཨཽ་ཌྱཱན་
རྡོ་རྗེ་ཆེན་པོའི་ཕོ་བྲང་ཞེས་བྱ་བ་ཡོད་དོ། །ཤར་ཕྱོགས་སུ་རྒྱལ་བ་མ་ལུས་བསྐྱེད་པའི་ཡབ་གཅིག་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་བརྟན་པའི་འཁོར་ལོ་བུས་པ་ཆུང་ངུའི་གཟུགས་སུ་བཟུང་ནས། ཡིད་ཅན་རྒྱ་མཚོ་ཆེན་པོའི་རྡུལ་གྱི་གྲངས་དང་མཉམ་པ་རྣམ་པ་ཐམས་ཅད་
མཁྱེན་པའི་གྲོང་ཁྱེར་དུ་འཁྲིད་པའི་ཆོས་ཀྱི་ཚུལ་ལེགས་པར་འདོམས་པའི་གནས་རྒྱའི་རི་བོ་རྩེ་ལྔ་ཞེས་བྱ་བ་ཡོད་དོ། །ལྷོ་ཕྱོགས་སུ་སྙིང་རྗེ་ཆེན་པོའི་གཏེར་ཆེན་འཕགས་པ་སྤྱན་རས་གཟིགས་དབང་ཕྱུག་དང་ཐུགས་རྗེ་ཤིན་ཏུ་མྱུར་བའི་དཔའ་མོ་རྗེ་བཙུན་སྒྲོལ་མ་སྟེ་དེ་གཉིས་ཀྱིས་སེམས་ཅན་གྱི་ཁམས་སུ་ཉིན་མཚན་

གྱི་དུས་རྣམ་པ་དྲུག་ཏུ་དགོངས་ཤིང་དངོས་དང་རྣམ་པར་འཕྲུལ་བའི་སྒྱུ་འཕྲུལ་གྱི་དྲྭ་བས་བྱང་ཆུབ་ཀྱི་སྤྱོད་པ་སྐྱོང་ཞིང་བཞུགས་པའི་གཞལ་མེད་ཁང་དག་གིས་མངོན་པར་བརྒྱན་པའི་རི་བོ་གྲུ་འཛིན་ཞེས་བྱ་བ་དང༌། སྟོན་པ་ཤཱཀྱའི་རྒྱལ་པོས་ཟུང་འཇུག་གི་སྐུར་བཞེངས་ནས་སྐལ་བ་དང་ལྡན་པའི་གདུལ་བྱ་མཆོག་
གི་འཁོར་རྣམས་ལ་དཔལ་དུས་ཀྱི་འཁོར་ལོའི་རྩ་བའི་རྒྱུད་ཀྱི་བདུད་རྩིའི་དགའ་སྟོན་སྩལ་བའི་གནས་སུ་བྱིན་གྱིས་བརླབས་པ་དཔལ་ལྡན་འབྲས་སྤུངས་ཀྱི་མཆོད་རྟེན་ཆེན་པོ་ཞེས་བྱ་བ་བཞུགས་སོ། །བྱང་ཕྱོགས་སུ་རྒྱལ་བའི་སྲས་ཀྱི་རང་གཟུགས་ཆོས་བཞིན་མཛད་པའི་ཆོས་རྒྱལ་བདུན་དང་རིགས་ལྡན་ཉི་ཤུ་རྩ་
ལྔས་ལེགས་པར་བསྲུངས་པ། ཀ་ལཱ་པ་ཞེས་བྱ་བས་མཚོན་པའི་གྲོང་ཁྱེར་བྱེ་བ་ཕྲག་དགུ་བཅུ་རྩ་དྲུག་དང་ལྡན་པའི་འཛིན་མའི་དཀྱིལ་འཁོར་དམ་པ་ཤམྦྷ་ལ་ཞེས་བྱ་བ་དང༌། ས་ཆེན་པོ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་རྣམ་པར་འཕྲུལ་པའི་རོལ་རྩེད་བགྲང་དུ་མེད་པ་དག་
གིས། བཅོམ་ལྡན་འདས་བུ་རམ་ཤིང་པའི་ལུང་དང་རྟོགས་པའི་བསྟན་པ་ཡིད་བཞིན་གྱི་ནོར་བུ་རིན་པོ་ཆེ་མཁས་པའི་ཕྲིན་ལས་གསུམ་གྱི་རྒྱལ་མཚན་དམ་པའི་རྩེ་མོ་ལ་མངའ་གསོལ་ཏེ། ཇི་སྲིད་མ་ཕམ་རྒྱལ་བའི་དབང་པོའི་བསྟན་པ་ཤར་བར་མ་གྱུར་པ་དེ་སྲིད་དུ་བརྟན་པར་བགྱིད་པའི་གནས་དམ་པ་བོད་ཡུལ་
ཁ་བའི་ལྗོངས་ཞེས་བྱ་བ་རྣམས་ཡོད་དོ། །གཞན་ཡང་འཇིག་རྟེན་ལས་འདས་པ་ཆེན་པོ་དཔལ་ཧེ་རུ་ཀའི་ཡེ་ཤེས་སྐྱེ་བ་མེད་པའི་ཀློང་ནས་སྐྱེ་བའི་ཆོ་འཕྲུལ་གྱི་རྣམ་པར་རོལ་པའི་དཔའ་བོ་དང་རྣལ་འབྱོར་མ་ས་ཆེན་པོའི་རྡུལ་ཕྲ་བ་སྙེད་ཀྱིས་རྣམ་པར་རྩེ་བའི་གནས་ཆེན་པོ་ཡུལ་སུམ་ཅུ་རྩ་གཉིས། གནས་ཉི་ཤུ་
རྩ་བཞི། དུར་ཁྲོད་ཆེན་པོ་བརྒྱད་རྣམས་དང༌། གཞན་ཡང་ཡུལ་འཁོར་ལྔ་བརྒྱ་དང༌། ལྗོངས་ཆེན་པོ་བཅུ་དྲུག་དང༌། ཡུལ་ཕྲན་སྟོང་ཕྲག་གཅིག་སྟེ། དེ་དག་ཏུ་བསྟེན་པའི་མིའི་རིགས་མི་འདྲ་བ་སུམ་བརྒྱ་དྲུག་ཅུ་དང༌། སྐད་ཀྱི་རིགས་མི་འདྲ་བ་བདུན་བརྒྱ་ཉི་ཤུ་འབྱིན་པ་ཡོད་པར་བཤད་པ་རྣམས་
ཀྱང་གླིང་འདི་ཉིད་དུ་ཡོད་པས་སོ། །མདོར་ན་བསྐལ་པ་བཟང་པོའི་བྱང་ཆུབ་སེམས་དཔའ་སྟོང་དང་བཞི་ལས་ཐུགས་བསྐྱེད་ཀྱི་སྟོབས་རྨད་དུ་བྱུང་བར་བཤད་པ་ནི་སྟོན་པ་འདི་ཉིད་དེ། གང་དེས་མཛད་པའི་ཕྲེང་བ་རྨད་དུ་བྱུང་བ་དང་བཅས་ཏེ་སེམས་ཅན་གྱི་དོན་ལ་བྱོན་པའི་གནས་ནི་ཛམྦུའི་གླིང་ཞེས་བྱ་བ་འདི་ཉིད་

དོ། །གཉིས་པ་དེར་ཇི་ལྟར་བྱོན་པ་དངོས་ནི། སློབ་དཔོན་ཆེན་པོ་ཀླུ་སྒྲུབ་ཀྱིས། དང་པོར་བྱང་ཆུབ་མཆོག་ཏུ་ཐུགས་བསྐྱེད་དེ། །བསྐལ་པ་གྲངས་མེད་གསུམ་དུ་ཚོགས་བསགས་ཤིང༌། །བར་དུ་གཅོད་པའི་བདུད་རྣམས་འཇོམས་མཛད་པ། །བཅོམ་ལྡན་སེང་གེ་དེ་ལ་ཕྱག་འཚལ་ལོ། །ཞེས་
གསུངས་པ་ལྟ་བུའི་གོ་རིམ་དང་རྗེས་སུ་མཐུན་པར་བརྗོད་པར་བྱའོ། །དེ་ལ་དང་པོ་བྱང་ཆུབ་ཏུ་ཐུགས་བསྐྱེད་པ་དང༌། བར་དུ་ཚོགས་གཉིས་བསགས་པ་དང༌། མཐར་སངས་རྒྱས་པ་དངོས་སོ། །དང་པོ་ཐུགས་བསྐྱེད་པ་ལའང་ཐེག་པ་དམན་པ་ལ་གྲགས་པ་དང༌། ཐེག་པ་ཆེན་པོ་ལ་གྲགས་
པ་གཉིས་སོ། །དང་པོ་ཐེག་པ་དམན་པ་ལྟར་ན། འདུལ་བ་ལུང་ལས། སངས་རྒྱས་འདོད་ཆགས་བྲལ་ཐོས་ཤིང༌། །གླང་པོ་དྲེགས་པའི་ཤས་ཆེན་དང༌། །འཇིག་རྟེན་སྡུག་བསྔལ་གྱུར་མཐོང་ནས། །ངས་ནི་བྱང་ཆུབ་སེམས་བསྐྱེད་དོ། །ཞེས་འབྱུང་བའི་དོན་བསྡུས་ཏེ་བརྗོད་ན་འདི་ལྟར་
སྔོན་བྱུང་བ་འདས་པའི་དུས་ཀྱི་བསྐལ་པ་ལ་ཁོ་བོ་ཅག་གི་སྟོན་པ་འདི་ནི་རྒྱུད་རང་བཞིན་གྱིས་མཉེན་ཞིང་ཆོས་ལ་གུས་པ་ལྷུར་བགྱིད་པ། འོད་ལྡན་ཞེས་བྱ་བའི་གྲོང་ཁྱེར་གྱི་རྒྱལ་པོ་རབ་གསལ་ལམ་འོད་ལྡན་ཞེས་བྱ་བ་སྟོབས་དང་འབྱོར་པ་ནི་ལྷ་རྣམས་ཀྱི་དབང་པོའི་ཕུན་སུམ་ཚོགས་པ་ལྟ་བུ་ལ་སྤྱོད་པ་
ཞིག་ཏུ་གྱུར་ཏོ། །དེ་ལ་དུས་གཞན་ཞིག་ན། གླང་པོ་ཆེ་མེ་ཏོག་ཀུ་མུ་དའི་མདོག་བཞིན་དུ་ཐལ་ཀར་ཡོད་པ། གཟུགས་བཟང་ཞིང་ཡན་ལག་བདུན་ལེགས་པར་རྫོགས་པ་ཞིག་ཡོད་དེ། དེ་འདུལ་བའི་ཆེད་དུ་ཀུན་དུ་བགྲོད་ཅེས་བྱ་བའི་གླང་པོ་འདུལ་མཁན་ཞིག་ཡོད་པ་དེ་བཀུག་སྟེ་འདུལ་དུ་འཇུག་
གོ །དེས་ཀྱང་དེ་ལྟར་མཉན་ཏེ་དུལ་བར་བྱས་ནས་སླར་རྒྱལ་པོ་ལ་ཕུལ་ལོ། །དེ་ནས་ཉམས་སད་པའི་ཕྱིར་རྒྱལ་པོ་དང་འདུལ་མཁན་གཉི་གས་གླང་པོ་ཆེའི་རྒྱབ་ཏུ་ཞོན་ཏེ་རི་དྭགས་བཤོར་དུ་སོང་ངོ༌། །ཇི་ཙམ་ན་གླང་པོ་ཆེ་དེས་ནགས་ཀྱི་བན་གླང་མོའི་དྲི་ཚོར་བའི་རྐྱེན་བྱས་པས་རྩེ་དགའི་བདེ་བ་རྗེས་སུ་དྲན་
ཏེ་དེའི་རྗེས་སུ་རླུང་དང་འདྲ་བར་མགྱོགས་པའི་ཤུགས་ཀྱིས་རྒྱུག་པ་ན། རྒྱལ་པོ་སྐྲག་སྟེ་འདུལ་མཁན་ལ་སྨྲས་པ། ཀྱེ་གླང་པོ་འདུལ་བ་གླང་པོའི་དབང་པོ་གདུལ་བ་ལ་འབད་པར་གྱིས་ཤིག དེས་སྨྲས་པ། ལྷ་འདི་ནི་འཁྲུལ་གྱིས། ཤིང་གི་ཡལ་ག་ལ་འཇུས་ཤིག དེ་ནས་གཉིས་ཀས་ཤིང་གི་ཡལ་

ག་ལ་འཇུས་ཏེ་གླང་པོ་ཆེ་ཅི་དགར་བཏང་ནས་བདེ་བར་བབ་བོ། །དེར་རྒྱལ་པོས་འདུལ་མཁན་ལ་སྨྲས་པ། ཁྱོད་ཀྱིས་གླང་པོ་མ་ཐུལ་བ་ང་ལ་བྱིན་ནོ། །དེས་སྨྲས་པ། ལྷ་ཁོ་བོ་ཅག་གིས་འདིའི་ལུས་ནི་ཤིན་ཏུ་དུལ་བར་བྱས་པ་ཡིན་ནོ། །འོན་ཀྱང་སེམས་ནི་དེ་ལྟར་མ་ལགས་པས།
དེང་བན་གླང་མོའི་དྲི་ཚོར་ཏེ་ཉན་དུ་མ་བཏུབ་བོ། །དེ་ལྟ་ནའང་དཔྱད་རྗེས་སུ་དྲན་ནས་རིང་པོར་མི་ཐོགས་པར་འོང་བར་འགྱུར་རོ། །དེས་ཇི་སྐད་སྨྲས་པ་བཞིན་དུ་ཞག་བདུན་ནས་ཁྱིམ་དུ་བྱུང་ངོ༌། །དེ་མཐོང་ནས་འདུལ་མཁན་གྱིས་རྒྱལ་པོ་ལ་སྦྲོན་ནོ། །དེ་ནས་རྒྱལ་པོའི་མདུན་དུ་ཡིད་ཆེས་པར་བྱ་བའི་
ཕྱིར་ཀུན་དུ་བགྲོད་ཀྱིས་ལྕགས་ཀྱི་ཐོ་ལུམ་སོལ་མལ་དུ་བསྲེགས་པ་རབ་ཏུ་འབར་བ་ཞིག་ཐོགས་ཏེ་ཁ་ཁ་ཞེས་བརྗོད་དོ། །དེ་ལ་གླང་པོས་ཀྱང་བག་ཚ་བ་མེད་པར་ལེན་དུ་བརྩམས་པ་ན། འདུལ་མཁན་གྱིས་སྨྲས་པ། ལྷ་འདི་ལེན་དུ་ནི་བཏུབ་ན་འོན་ཀྱང་འགུམ་པར་འགྱུར་རོ། །དེ་དག་གིས་རྒྱལ་པོ་
ཡིད་ཆེས་པར་གྱུར་ཏེ་ཡང་སྨྲས་པ། དེ་ལྟར་དུལ་བར་བགྱིས་པ་ལ་བདག་ཅག་ཟུང་ནི་དེ་ལྟ་བུའི་གཡེང་བར་བྱེད་པའི་རྒྱུ་ཅི་ཞིག་ཅེས་དྲིས་པ་ལ། ལྷ་ཁོ་བོ་ཅག་གིས་ལུས་ནི་ཐུལ་གྱིས་སེམས་ནི་མ་ལགས་སོ་ཞེས་བྱ་བ་སྔར་ཡང་མ་གསོལ་ལམ། དེར་རྒྱལ་པོས་སྨྲས་པ། སེམས་འདུལ་བ་གང་
དག་ཡོད་པ་ཁྱོད་ཀྱིས་མཐོང་བ་དང་ཐོས་པ་བྱུང་ངམ་ཞེས་དྲིས་སོ། །དེ་ཡང་ལྷས་བསྐུལ་ནས། ལྷ་གཅིག་ལུས་དང་སེམས་འདུལ་བ་པོ་ནི་སངས་རྒྱས་བཅོམ་ལྡན་འདས་རྣམས་སོ་ཞེས་བྱ་བ་ལ་སོགས་པ་གཏམ་གྱི་ཞར་ལས་སངས་རྒྱས་ཀྱི་མཚན་ཐོས་པའི་མོད་ལ་རྒྱལ་པོ་སངས་རྒྱས་བཅོམ་ལྡན་
འདས་ལ་ཤིན་ཏུ་དད་པར་གྱུར་ཏེ་སྦྱིན་པ་ནི་བྱིན། བསོད་ནམས་ནི་ཅི་ཡང་བསགས་ཏེ་བླ་ན་མེད་པའི་བྱང་ཆུབ་ལ་མོས་པས། སྦྱིན་པ་རྒྱ་ཆེན་གྱུར་པ་འདི་ཡིས་སུ། །འགྲོ་བ་རང་བྱུང་སངས་རྒྱས་གྱུར་ནས་ནི། །སྔོན་གྱི་རྒྱལ་བ་རྣམས་ཀྱིས་མ་བསྒྲལ་བའི། །སྐྱེ་བོའི་ཚོགས་རྣམས་བདག་གིས་
བསྒྲལ་བར་བྱ། །ཞེས་པ་སྨོན་ལམ་དུ་བཏབ་པས་སྨོན་ལམ་གྱི་ཐོག་མ་བསྐྲུན་པར་བཤད་དོ། །གཉིས་པ་ཐེག་པ་ཆེན་པོ་ལས་འབྱུང་བ་ལ། སེམས་བསྐྱེད་ཀྱི་ངོ་བོ་དང༌། ཇི་ལྟར་སེམས་བསྐྱེད་པ་དངོས་སོ། །དང་པོ་སེམས་བསྐྱེད་ཀྱི་ངོ་བོ་ནི། གཞན་གྱི་དོན་བསྒྲུབ་པའི་ཕྱིར་ཡང་དག་པར་

རྫོགས་པའི་བྱང་ཆུབ་ལ་དམིགས་པའི་མཚན་ཉིད་ཅན་གང་ཡིན་པ་སྟེ། དེ་སྐད་དུའང༌། མངོན་པར་རྟོགས་པའི་རྒྱན་ལས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་སོ། །དེ་ལའང་ནང་གསེས་ཀྱི་སྒོ་ནས་དབྱེ་ན། བྱང་ཆུབ་ཏུ་སྨོན་པའི་སེམས་
བསྐྱེད་པ་ཞེས་བྱ་བ་དང༌། དེ་བསྒྲུབ་པར་རྩོམ་པ་འཇུག་པའི་སེམས་བསྐྱེད་པ་ཞེས་བྱ་བ་གཉིས་སུ་འགྱུར་ཏེ། ཞི་བའི་ལྷས། འགྲོ་བར་འདོད་དང་འགྲོ་བ་ཡིས། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། །ཞེས་སོ། །དེ་ལའང་ཡུལ་གྱི་སྒོ་ནས་དབྱེ་ན།
ཀུན་རྫོབ་བྱང་ཆུབ་ཀྱི་སེམས་ཞེས་བྱ་བ་དང༌། དོན་དམ་བྱང་ཆུབ་ཀྱི་སེམས་ཞེས་བྱ་བ་གཉིས་སུ་འགྱུར་ཏེ། དང་པོ་ཐོབ་པར་བྱེད་པའི་རྒྱུ་ནི། རྒྱན་ལས། གྲོགས་སྟོབས་རྒྱུ་སྟོབས་རྩ་བའི་སྟོབས། །ཐོས་སྟོབས་དགེ་བ་གོམས་པ་ལས། །མི་བརྟན་པ་དང་བརྟན་འབྱུང་བ། །གཞན་གྱིས་
བསྟན་པའི་སེམས་བསྐྱེད་འདོད། །ཅེས་འབྱུང་བ་ལྟ་བུའོ། །ཕྱི་མ་ཐོབ་པར་བྱེད་པའི་རྒྱུ་ནི། ཇི་སྐད་དུ། རྫོགས་པའི་སངས་རྒྱས་རབ་བསྙེན་བྱས། །བསོད་ནམས་ཡེ་ཤེས་ཚོགས་རབ་བསགས། །ཆོས་ལ་མི་རྟོག་ཡེ་ཤེས་ནི། །བསྐྱེད་ཕྱིར་དེ་ནི་དམ་པར་འདོད། །ཅེས་འབྱུང་བ་ལྟ་
བུའོ། །དེ་བཞིན་དུ་ས་མཚམས་ཀྱི་སྒོ་ནས་དབྱེ་ན། མོས་པ་དང༌། ལྷག་པའི་བསམ་པ་རྣམ་པར་དག་པ་དང༌། རྣམ་པར་སྨིན་པ་དང༌། སྒྲིབ་པ་སྤོང་བ་སྟེ་བཞིའོ། །དེ་སྐད་དུའང༌། སེམས་བསྐྱེད་དེ་ནི་ས་རྣམས་ལ། །མོས་དང་ལྷག་བསམ་དག་པ་དང༌། །རྣམ་པར་སྨིན་པ་གཞན་དུ་
འདོད། །དེ་བཞིན་སྒྲིབ་པ་སྤོང་བའོ། །ཞེས་སོ། །གྲོགས་དང་དཔེའི་སྒོ་ནས་ནི། འདུན་པ་དང་ལྡན་པས་ལྟ་བུ་ནས། ཆོས་ཀྱི་སྐུ་སྤྲིན་ལྟ་བུའི་བར་གྱི་ཉི་ཤུ་རྩ་གཉིས་སུ་རྒྱན་ལས་ཇི་སྐད་བཤད་པ་ལྟར་ཤེས་པར་བྱའོ། །གཉིས་པ་ཇི་ལྟར་སེམས་བསྐྱེད་པ་དངོས་ནི། དྲིན་ལན་བསབས་
པའི་མདོ་ལས་འབྱུང་བའི་སྙིང་པོ་དྲིལ་ན་འདི་ལྟར། བཅོམ་ལྡན་འདས་འདི་སྔོན་གྱི་བསྐལ་པ་དཔག་ཏུ་མེད་པའི་གོང་རོལ་དུ་སོ་སོ་སྐྱེ་བོ་འཆིང་བ་ཐམས་ཅད་དང་ལྡན་པའི་དུས་སུ། ལས་ཀྱི་དབང་གིས་མིའི་ཤིང་རྟ་ཞེས་བྱ་བའི་དམྱལ་བར་ལྷུངས་ཏེ། གྲོགས་གཞན་ཞིག་དང་ལྷན་ཅིག་ཏུ་དམྱལ་

བའི་སྲུང་མ་ཨ་བང་སྡོད་པའི་ཤིང་རྟ་འདྲེན་པའི་གྱད་དུ་གྱུར་ཏོ། །སྲུང་མ་དེ་ནི་ལུས་བོང་ཤིན་ཏུ་ཆེ་ཞིང་ཁ་དང་མིག་དང་རྣ་བ་དང་སྣ་རྣམས་ནས་མེ་འབུད་ཅིང་དུ་བ་གཏུལ་བ། རྒྱུད་གཏུམ་པོ་མི་བཟད་པ་དང་ལྡན་པ་ཡིན་པས་ཤིང་རྟ་ལ་སྐྱིལ་མོ་ཀྲུང་བཅས་ཏེ་གནས་བཞིན་དུ་ལག་པ་
ན་ལྕགས་ཀྱི་དབྱུག་པ་ཐོགས་ནས་ཤིང་རྟ་འདྲེན་པ་གཉིས་ལ་བརྡེག་གོ །དེས་ཤིན་ཏུ་ན་བའི་སྡུག་བསྔལ་ལ་མ་བཟོད་ནས་ཇི་ལྟར་ནུས་པའི་སྟོབས་ཀྱིས་དྲངས་པས། ཅིག་ཤོས་ནི་ཉམ་ཆུང་བར་གྱུར་པས་དེ་ལྟར་དུ་འདྲེན་པར་མ་ནུས་པ་ལ། དམྱལ་བའི་སྲུང་མས་ལྕགས་ཀྱི་མདུང་རྩེ་གསུམ་པ་
བྲང་ལ་བཙུགས་ནས་ལྕགས་ཀྱི་དབྱུག་པས་བསྣུན་པས་ཁྲག་ཆལ་བར་ཕབ་བོ། །དེའི་ཚེ་གྱད་དེ་ནི་ཐེག་པ་ཆེན་པོའི་རིགས་དང་ལྡན་པར་གྱུར་པ་ཡིན་པས་གྲོགས་ཀྱི་སྡུག་བསྔལ་མཐོང་བས་སྙིང་རྗེ་རབ་ཏུ་རྒྱས་པའི་སེམས་སྐྱེས་ཏེ། སྲུང་མ་ཨ་བང་ལ། འདི་ལ་སྙིང་རྗེ་ཅུང་ཟད་སྐྱེད་ཅིག་ཅེས་
སྨྲས་སོ། །དེས་དེ་ལ་ཁྲོས་ནས་ལྕགས་ཀྱི་མདུང་ཐུང་འབར་བ་རྩེ་གསུམ་པ་གྱད་ཀྱི་གཉའ་བར་བཙུགས་པས་དེ་ཉིད་དུ་དུས་བྱས་སོ། །དེར་སྙིང་རྗེའི་སེམས་ཀྱི་མཐུ་ཆེན་པོས་བསྐལ་པ་བརྒྱ་སྙེད་ཀྱི་སྡིག་པ་ཡང་ཆུས་བཀྲུས་པའི་དྲི་མ་བཞིན་དུ་བྱང་ནས་དམྱལ་བའི་གནས་དེ་ལས་ཐར་བར་གྱུར་ཏོ། །
དེ་ནས་རིང་ཞིག་ལོན་པ་ན་ཛམྦུའི་གླིང་གི་ལྷོ་ཕྱོགས་ཀྱི་རྒྱུད་དུ་རྫ་མཁན་གྱི་ཁྱེའུ་སྣང་བྱེད་ཅེས་བྱ་བ་ཞིག་ཏུ་གྱུར་ཏོ། །དེ་ལྟ་བུའི་རིགས་ལ་གནས་པའི་གང་ཟག་དེ་ལ་ཡང༌། ཇི་སྐད་དུ། རིགས་དང་དགེ་བཤེས་སྙིང་རྗེ་དང༌། །སྡུག་བསྔལ་རྣམས་ཀྱིས་མི་ལྡོག་པ། །རྒྱུ་བཞི་རྐྱེན་ནི་འདི་དག་
གིས། །བྱང་ཆུབ་སེམས་ནི་རབ་ཏུ་འཇུག །ཅེས་པ་ལྟར་བྱང་ཆུབ་ཀྱི་སེམས་འཕེལ་བར་བྱེད་པའང་བདག་རྐྱེན་དགེ་བའི་བཤེས་ལ་རག་ལས་པ་ཡིན་པའི་ཕྱིར། ཇི་ལྟར་ན་ཁྱེའུ་སྣང་བྱེད་སངས་རྒྱས་ཤཱཀྱ་ཐུབ་པ་ཆེན་པོ་ལ་ཤིན་ཏུ་དད་པར་གྱུར་ཏེ། ཐུག་འཇམ་ཡོལ་གོ་གང་ཞིག་ཕུལ་ཏེ། མེ་ཏོག་
ཏུ་འགྲོན་བུ་ལྔས་ཀྱང་མངོན་པར་གཏོར་ནས། བདེ་བར་གཤེགས་པ་ཁྱེད་སྐུ་ཅི་འདྲ་དང༌། །སྐུ་ཚེའི་ཚད་ཀྱང་ཁྱེད་དང་ཅི་འདྲ་བ། །མཚན་མཆོག་བཟང་པོ་ཁྱེད་དང་ཅི་འདྲ་བ། །དེ་བཞིན་བདག་ཀྱང་དེ་དང་འདྲ་བར་ཤོག །ཅེས་སྨོན་ལམ་བཏབ་ཅིང་བླ་ན་མེད་པའི་བྱང་ཆུབ་ཏུ་སེམས་བསྐྱེད་དོ། །

དེ་ལྟར་ཡང༌། འཕགས་པ་བསྐལ་པ་བཟང་པོ་ལས། ང་ནི་སྔོན་ཚེ་དམན་པར་གྱུར་པའི་ཚེ། །དེ་བཞིན་གཤེགས་པ་ཤཱཀྱ་ཐུབ་དེ་ལ། །འཇམ་གང་ཞིག་ནི་དབུལ་བར་བྱས་ནས་ཀྱང༌། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །ཞེས་འབྱུང་ངོ༌། །གཉིས་པ་བར་དུ་ཚོགས་གཉིས་
བསགས་པ་ལ། ཐེག་པ་ཆུང་ངུར་གྲགས་པ་དང༌། ཐེག་པ་ཆེན་པོར་གྲགས་པ་གཉིས་སོ། །དང་པོ་ཐེག་པ་ཆུང་ངུར་གྲགས་པ་ལྟར་ན། མཛོད་ལས། དེ་གྲངས་མེད་གསུམ་ལ་འཚང་རྒྱ། ཞེས་གསུངས་པ་ལྟར། གྲངས་མེད་གསུམ་གྱིས་ཚར་ཕྱིན་པར་འདོད་དེ། དེ་ཡང་
བྱང་ཆུབ་ཀྱི་ཕྱོགས་ཀྱི་ཆོས་རྣམས་གཞན་དོན་དུ་བྱང་ཆུབ་ཐོབ་པའི་སེམས་ཀྱིས་སངས་རྒྱས་རྣམས་མཆོད་པས་མཉེས་པར་བྱེད་པ་དང༌། གཞན་དོན་དུ་ཕ་རོལ་ཏུ་ཕྱིན་པ་དྲུག་གི་སྤྱོད་པ་རྣམས་བསྐལ་པ་ཆེན་པོ་གྲངས་མེད་པ་གསུམ་དུ་སྤྱད་པས་བྱང་ཆུབ་ཏུ་སངས་རྒྱས་པར་འདོད་པའི་དབང་དུ་བྱས་
པ་ནི། འདི་ལྟར་བསྐལ་པ་གྲངས་མེད་པ་དང་པོ་ལ་བདག་ཅག་གི་སྟོན་པ་འདི་ནི་སྔོན་དུ་རྫ་མཁན་གྱི་ཁྱེའུར་གྱུར་པའི་ཚེ། ཐོག་མར་དེ་བཞིན་གཤེགས་པ་ཤཱཀྱ་ཐུབ་པ་ཆེན་པོ་འཇིག་རྟེན་དུ་བྱོན་པ་ལ་མར་དང་ཏིལ་མར་གྱིས་བསྙེན་བཀུར་བ་ནས་བཟུང་སྟེ། རྒྱལ་པོར་གྱུར་པའི་ཚེ་ཡན་ལག་བཞི་པའི་
དཔུང་གི་ཚོགས་ཡོངས་སུ་སྤངས་ནས། བྱང་ཆུབ་མངོན་པར་འདོད་པའི་སེམས་ཀྱིས། དེ་བཞིན་གཤེགས་པ་ཡུལ་འཁོར་སྐྱོང་གི་ཞམ་རིང་བྱས་པའི་བར་ལ། དེ་བཞིན་གཤེགས་པ་བདུན་ཁྲི་ལྔ་སྟོང་ལ་བསྙེན་བཀུར་བས་མཉེས་པར་བྱས་པ་ཡིན་ནོ། །དེ་ལྟར་ཡང་འདུལ་བ་ལུང་ལས།
སངས་རྒྱས་ཤཱཀྱ་ཐུབ་པ་ནས། །འདྲེན་པ་ཡུལ་འཁོར་སྐྱོང་གི་བར། །བདུན་ཁྲི་དང་ནི་ལྔ་སྟོང་གི །སངས་རྒྱས་རྣམས་ནི་ང་ཡིས་མཆོད། །ཅེས་སོ། །བསྐལ་པ་གྲངས་མེད་པ་གཉིས་པ་ལ་བྲམ་ཟེའི་ཁྱེའུར་གྱུར་པའི་ཚེ། དེ་བཞིན་གཤེགས་པ་མར་མེ་མཛད་ལ་ཨུཏྤལ་སྔོན་པོ་བདུན་གྱིས་
མངོན་པར་གཏོར་བ་ནས་བཟུང་སྟེ། བྲམ་ཟེར་གྱུར་པའི་ཚེ་དེ་བཞིན་གཤེགས་པ་དབང་པོའི་རྒྱལ་མཚན་མཐོང་བ་ལ་ཡིད་རབ་ཏུ་དགའ་བས་ཐལ་མོ་སྦྱར་ཏེ་བསྟོད་པ་ཕུལ་བའི་བར་ལ། དེ་བཞིན་གཤེགས་པ་བདུན་ཁྲི་དྲུག་སྟོང་ལ་བསྙེན་བཀུར་བས་མཉེས་པར་བྱས་པ་ཡིན་ཏེ། ཇི་སྐད་དུ།

སངས་རྒྱས་མར་མེ་མཛད་པ་ནས། །ཐུབ་པ་དབང་པོའི་རྒྱལ་མཚན་བར། །བདུན་ཁྲི་དང་ནི་དྲུག་སྟོང་གི །སངས་རྒྱས་རྣམས་ནི་ང་ཡིས་མཆོད། །ཅེས་སོ། །བསྐལ་པ་གྲངས་མེད་པ་གསུམ་པ་ལ། རྒྱལ་པོར་གྱུར་པའི་ཚེ། དེ་བཞིན་གཤེགས་པ་བདེ་མཛད་
དམ་པ་ལ་མཆོད་པ་ཕུལ་བ་དང༌། སངས་རྒྱས་དེ་མྱ་ངན་ལས་འདས་པ་ནའང་སྐུ་གདུང་གི་མཆོད་རྟེན་བརྩིགས་པ་ནས་བཟུང་སྟེ། བྲམ་ཟེའི་ཁྱེའུ་བླ་མ་ཞེས་བྱ་བར་གྱུར་པའི་ཚེ། དགའ་སྐྱོང་གི་ཚིག་ཐོས་ནས། དེ་བཞིན་གཤེགས་པ་འོད་སྲུངས་ལས་རབ་ཏུ་འབྱུང་བའི་ཐུགས་བསྐྱེད་པའི་བར་
ལ། དེ་བཞིན་གཤེགས་པ་བདུན་ཁྲི་བདུན་སྟོང་ལ་བསྙེན་བཀུར་བས་མཉེས་པར་བྱས་པ་ཡིན་ཏེ། ཇི་སྐད་དུ། གང་ཡང་སངས་རྒྱས་བདེ་མཛད་ནས། །སངས་རྒྱས་འོད་སྲུངས་བར་དུ་ནི། །ངས་ནི་བདུན་ཁྲི་བདུན་སྟོང་གི །རྒྱལ་བ་རྣམས་ནི་མཆོད་པ་བྱས། །ཞེས་འབྱུང་ངོ༌། །དེ་ལའང་མངོན་
པ་མཛོད་ལས་ནི། ཤཱཀྱ་ཐུབ་པ་ནས་རིན་ཆེན་གཙུག་ཏོར་ཅན་ཐ་མར་གྱུར་པའི་བར་ནི་གྲངས་མེད་པ་དང་པོའོ། །དེ་ནས་མར་མེ་མཛད་ཐ་མར་གྱུར་པའི་བར་ནི་གྲངས་མེད་པ་གཉིས་པའོ། །དེ་ནས་རྣམ་པར་གཟིགས་ཐ་མར་གྱུར་པའི་བར་ནི་གྲངས་མེད་པ་གསུམ་པ་སྟེ། དེ་ལྟར་ཡང༌། དེ་ཉིད་ལས།
རྣམ་གཟིགས་མར་མེ་རིན་ཆེན་གཙུག །གྲངས་མེད་གསུམ་གྱི་ཐ་མར་བྱུང༌། །དང་པོ་ཤཱཀྱ་ཐུབ་པ་ཡིན། །ཞེས་འབྱུང་བ་ལྟར་རོ། །དེ་ནས་མཚན་བཟང་གི་རྒྱུ་བསྒྲུབ་པ་ལ་བསྐལ་པ་བརྒྱར་ཐོགས་པ་ལ། བྲམ་ཟེའི་ཁྱེའུར་གྱུར་པ་ན་སངས་རྒྱས་སྐར་རྒྱལ་མེའི་ཁམས་ལ་སྙོམས་པར་ཞུགས་
པ་ལ་རྐང་གཅིག་གིས་འགྲེང་སྟེ་ཞག་བདུན་གྱི་བར་དུ་བསྐོར་བ་བར་མ་ཆད་པར་བྱས་ཏེ་བསྟོད་པ། སྐྱེས་བུ་ཁྱུ་མཆོག་ཁྱོད་འདྲའི་དགེ་སྦྱོང་ཆེན་པོ་གཞན་དག་ལྷ་ཡུལ་ས་ལ་མེད། །འཇིག་རྟེན་འདི་ནའང་ཡོད་པ་མ་ཡིན་རྣམ་ཐོས་བུ་ཡི་གནས་ནའང་མེད། །ལྷ་ཡི་ཕོ་བྲང་གནས་མཆོག་དག་ནའང་
ཡོད་མིན་ཕྱོགས་དང་ཕྱོགས་མཚམས་དག་ནའང་མེད། །རི་དང་ནགས་སུ་བཅས་པའི་ས་སྟེངས་རྒྱས་པ་ཀུན་ཏུ་བསྐོར་ཀྱང་ཡུལ་གཅིག་ག་ལ་ཡོད། །ཅེས་པའི་ཚིགས་སུ་བཅད་པའི་དབྱངས་ཀྱིས་བསྟོད་པ་བྱས་པ་དང༌། བསྐལ་པ་ཆེན་པོ་དགུའི་ཚོགས་བཟླུམས་ཏེ། དེ་ནས་བསྐལ་པ་

ཆེན་པོ་དགུ་བཅུ་རྩ་གཅིག་འདས་པ་ན་གྲོང་ཁྱེར་ཉེར་ལྡན་དུ་སངས་རྒྱས་འོད་སྲུངས་བྱོན་པའི་ཚེ། བྲམ་ཟེའི་ཁྱེའུ་བླ་མར་གྱུར་པ་ཡན་ཆད་ཀྱིས་མཚན་བཟང་གི་རྒྱུ་གྲུབ་པ་ནི་བྱང་ཆུབ་སེམས་དཔའ་ངེས་པ་ལ་གནས་པ་ཞེས་བྱ་བ་ཡིན་ནོ། །དེའང་མཚན་བཟང་གྲུབ་པའི་རྒྱུ་ནི། འཇིག་རྟེན་གྱི་
ཁམས་ཐམས་ཅད་ཀྱི་བསོད་ནམས་དང༌། ཉན་ཐོས་དང་རང་སངས་རྒྱས་ཐམས་ཅད་འགྲུབ་པའི་བསོད་ནམས་ཀྱི་ཕུང་པོ་ཇི་སྙེད་པ་དེ་སྙེད་བཅུར་བསྒྱུར་བས་ནི་སངས་རྒྱས་ཀྱི་བ་སྤུའི་ཁུང་བུ་གཅིག་གོ །བ་སྤུ་ཇི་སྙེད་སྐྱེད་པར་བྱེད་པའི་བསོད་ནམས་དེ་སྙེད་བརྒྱར་བསྒྱུར་བས་ནི་དཔེ་བྱད་བཟང་པོ་
གཅིག་གོ །དཔེ་བྱད་བརྒྱད་ཅུ་པོ་ཚང་བར་འགྲུབ་པར་བྱེད་པའི་བསོད་ནམས་དེ་སྙེད་བརྒྱར་བསྒྱུར་བས་ནི་མཚན་བཟང་པོ་གཅིག་གོ །མཚན་བཟང་པོ་སུམ་ཅུ་རྩ་གཉིས་པོ་ཚང་བར་འགྲུབ་པར་བྱེད་པའི་བསོད་ནམས་སྟོང་དུ་བསྒྱུར་བས་ནི་ཟླ་བ་ཉ་གང་བ་ལྟ་བུའི་མཛོད་སྤུ་འགྲུབ་བོ། །མཛོད་སྤུ་
འགྲུབ་པར་བྱེད་པའི་བསོད་ནམས་ཀྱི་ཕུང་པོ་དེ་འབུམ་དུ་བསྒྱུར་བས་ནི་གཙུག་ཏོར་བལྟར་མི་སྣང་བ་འགྲུབ་པར་འགྱུར་ཏེ། དེ་ལྟར་ཡང་རིན་ཆེན་ཕྲེང་བ་ལས། རང་སངས་རྒྱས་ཀུན་ལས་བྱུང་དང༌། །སློབ་དང་མི་སློབ་ལས་བྱུང་དང༌། །འཇིག་རྟེན་མ་ལུས་ཀུན་བསོད་ནམས། །འཇིག་རྟེན་བཞིན་
དུ་དཔག་མེད་གང༌། །དེ་ཙམ་བཅུར་ནི་བསྒྲེས་པ་ཡིས། །བ་སྤུའི་བུ་ག་གཅིག་འགྲུབ་སྟེ། །སངས་རྒྱས་བ་སྤུའི་བུ་ག་ནི། །ཐམས་ཅད་དེ་དང་འདྲ་བར་འགྱུར། །བ་སྤུའི་བུ་ག་ཐམས་ཅད་ནི། །སྐྱེད་པར་བྱེད་པའི་བསོད་ནམས་གང༌། །དེ་དག་བརྒྱར་ནི་བསྒྱུར་བ་ཡིས། །དཔེ་བྱད་
བཟང་པོ་གཅིག་ཏུ་བཞེད། །བསོད་ནམས་དེ་དག་དེ་སྙེད་ཀྱིས། །རྒྱལ་པོ་དཔེ་བྱད་བཟང་པོ་ནི། །གཅིག་མཐར་ཕྱིན་ཏེ་དེ་ལྟ་བུར། །བརྒྱད་ཅུའི་བར་དུ་འབྱུང་བར་འགྱུར། །དཔེ་བྱད་བཟང་པོ་བརྒྱད་ཅུ་དག །འགྲུབ་པའི་བསོད་ནམས་ཚོགས་གང་ཡིན། །དེ་དག་བརྒྱར་ནི་བསྒྱུར་བ་
ཡིས། །སྐྱེས་བུ་ཆེན་པོའི་མཚན་གཅིག་གོ །མཚན་ནི་སུམ་ཅུ་འགྲུབ་པའི་རྒྱུ། །བསོད་ནམས་རྒྱ་ཆེ་གང་ཡིན་པ། །དེ་དག་སྟོང་དུ་བསྒྱུར་བ་ཡིས། །ཟླ་བ་ཉ་འདྲའི་མཛོད་སྤུའོ། །མཛོད་སྤུ་ཡི་ནི་བསོད་ནམས་དག །སྟོང་ཕྲག་བརྒྱ་ནི་བསྡོམས་པ་ཡིས། །སྤྱི་གཙུག་

བལྟར་ནི་མི་སྣང་བ། །སྐྱོབ་པའི་གཙུག་ཏོར་སྐྱེད་པར་བྱེད། །ཅེས་སོ། །དེ་ལྟར་མཚན་བཟང་འགྲུབ་པའི་རྒྱུ་མཐར་ཕྱིན་ནས། དགའ་ལྡན་གྱི་གནས་སུ་དམ་པ་ཏོག་དཀར་དུ་འཁྲུངས་པ་ནི་སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་ཞེས་བྱའོ། །དེ་ཉིད་
ནས་ཛམྦུའི་གླིང་དུ་བྱུང་སྟེ་དོན་ཐམས་ཅད་གྲུབ་པ་ཞེས་བྱ་བར་གྱུར་པ་ནི་སྲིད་པ་ཐ་མ་པའི་བྱང་ཆུབ་སེམས་དཔའ་ཞེས་བྱ་བ་ཡིན་ནོ། །དུས་དེ་དང་དེ་དག་ཏུ་ཕ་རོལ་ཏུ་ཕྱིན་པ་དྲུག་ཀྱང་རྒྱལ་བུ་ཐམས་ཅད་སྒྲོལ་དུ་གྱུར་པའི་ཚེ། སྙིང་རྗེ་ཆེན་པོས་འགྲོ་བ་ཐམས་ཅད་ལ་བདོག་པ་མ་ལུས་པ་བཏང་བས་སྦྱིན་
པའི་ཕ་རོལ་ཏུ་ཕྱིན་པ་རྫོགས་ཤིང༌། དྲང་སྲོང་བཟོད་པར་སྨྲ་བར་གྱུར་པའི་ཚེ་ཆགས་པ་དང་བཅས་བཞིན་དུ་ཡན་ལག་དང་ཉིང་ལག་རྣམས་བཅད་ཀྱང་འཁྲུགས་པ་མི་མངའ་བས་བཟོད་པའི་ཕ་རོལ་ཏུ་ཕྱིན་པ་དང་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་རྫོགས་པ་ཡིན་ལ། བྲམ་ཟེའི་ཁྱེའུར་གྱུར་པའི་ཚེ་
སངས་རྒྱས་སྐར་རྒྱལ་ལ་མངོན་པར་བསྟོད་པས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་རྫོགས་པ་ཡིན་ནོ། །རྒྱལ་བུ་དོན་གྲུབ་ཏུ་གྱུར་པའི་ཚེ་རྡོ་རྗེའི་གདན་ལ་སྲོད་ཀྱི་དུས་སུ་བདུད་བཏུལ་ནས་ཐོ་རངས་རྡོ་རྗེ་ལྟ་བུའི་ཏིང་ངེ་འཛིན་རྒྱུད་ལ་བསྐྱེད་པས་བསམ་གཏན་གྱི་ཕ་རོལ་ཏུ་ཕྱིན་པ་དང་ཤེས་རབ་ཀྱི་ཕ་རོལ་ཏུ་
ཕྱིན་པ་རྫོགས་པར་འདོད་པ་ཡིན་ནོ། །མཛད་པ་བཅུ་གཉིས་ཇི་ལྟར་བསྟན་པ་ནི་མངོན་པར་འབྱུང་བའི་མདོ་ལ་སོགས་པ་ནས་འབྱུང་བ་ལྟར་ཤེས་པར་བྱ་བ་ཉིད་དོ། །གཉིས་པ་ཐེག་པ་ཆེན་པོའི་ལུགས་ལ། ཇི་སྲིད་བསགས་པ་ཚོགས་ཀྱི་ཡུན་ཚད་དང༌། བསགས་པར་བྱ་བ་ཚོགས་ཀྱི་ངོ་བོ་དང༌།
ཇི་ལྟར་བསགས་པའི་ཚུལ་ཏེ་རྣམ་པ་གསུམ་ལས། དང་པོ་ཇི་སྲིད་དུ་བསགས་པའི་ཡུན་གྱི་ཚད་ནི། བསྐལ་པ་ཆེན་པོ་གྲངས་མེད་པ་གསུམ་དུ་བཤད་པ་ནི་བཀའ་དང་དགོངས་འགྲེལ་གྱི་བསྟན་བཅོས་ཕལ་ཆེ་བ་ལས་འབྱུང་སྟེ། མདོ་སྡེ་རྒྱན་ལས། ས་ནི་དང་པོ་ཡིན་པར་འདོད། །འདི་སྟེ་
བསྐལ་པ་དཔག་མེད་ཀྱི། །ཞེས་དང༌། གྲངས་མེད་གཉིས་ནི་རྫོགས་པ་ཡིས། །སྒོམ་པའི་ལམ་ནི་ཚར་ཕྱིན་ཏོ། །ཞེས་གྲངས་མེད་དང་པོས་ནི་མོས་པས་སྤྱོད་པའི་ས་དང་པོ་དང༌། གྲངས་མེད་གཉིས་པས་ནི་ས་གཉིས་པ་ནས་བདུན་པ་མན་ཆད་དང༌། གྲངས་མེད་གསུམ་པས་ནི་ས་

བཅུ་པ་མན་ཆད་ཐོབ་པར་བཞེད་དོ། །བརྒྱད་སྟོང་པའི་འགྲེལ་ཆེན་ལས་ནི་བསྐལ་པ་གྲངས་མེད་པ་སུམ་ཅུ་རྩ་གསུམ་དུ་བཤད་དེ། དེའང་ཚོགས་ལམ་དང་སྦྱོར་ལམ་ལ་གྲངས་མེད་གསུམ་དང༌། ས་བཅུ་པོ་རེ་རེ་ལ་གསུམ་གསུམ་གྱིས་བྱང་ཆུབ་སེམས་དཔའི་
ས་རྫོགས་པར་བཤད་པ་ནི་ངེས་པའི་དོན་དང༌། གྲངས་མེད་གསུམ་དུ་བཤད་པ་ནི་དྲང་དོན་དགོངས་པ་ཅན་ཡིན་ཏེ། གྲངས་མེད་སུམ་ཚན་བཅུ་གཅིག་ཏུ་རིགས་གཅིག་པའི་ཕྱིར་རྗེས་སུ་འཇུག་པ་རྣམས་ཧ་ཅང་རྒྱུན་རིང་བ་ལ་ཞུམ་པ་སྤང་བའི་ཕྱིར་ཡིན་པར་བཞེད་དོ། །དེ་ལྟ་བུའི་གྲངས་མེད་བརྩམ་པའི་ཐོག་མ་ཉིད་ཀྱང་བྱང་ཆུབ་ཀྱི་ཆེད་དུ་
དགེ་བའི་རྩ་བ་གང་དག་བསགས་པ་རྣམས་མཐུན་པ་མ་ཡིན་པའི་ཕྱོགས་གང་གིས་ཀྱང་ཟིལ་གྱིས་མི་གནོན་པར་འགྱུར་བའི་བཟང་པོ་དང༌། ཚེ་རབས་ཐམས་ཅད་དུ་བྱང་ཆུབ་ཀྱི་སེམས་སྟོན་པའི་དགེ་བའི་བཤེས་གཉེན་དང་ཕྲད་པའི་སྨོན་ལམ་སྟོབས་དང་ལྡན་པ་དང༌། མི་དགེ་བའི་གྲོགས་ཀྱིས་
མོས་པ་བཟློག་ཀྱང་དེའི་དབང་དུ་འགྲོ་བར་མི་འགྱུར་བར་བྱང་ཆུབ་ཀྱི་སེམས་མི་གཏོང་བའི་སེམས་བརྟན་པ་དང༌། ཡོན་ཏན་ལ་ཆོག་པར་མི་འཛིན་ཞིང་མཐོང་བའི་ཆོས་དང་ཚེ་རབས་ཕྱི་མར་བཅས་པ་ལ་དགེ་བའི་ཆོས་མི་ཉམས་ཤིང་འཕེལ་བར་བྱེད་པ་སྟེ། ཆོས་འདི་རྣམས་དང་ལྡན་པ་ནི་ཁྱད་
པར་དུ་འགྲོ་བ་སྟེ། དེ་ལྟ་བུའི་ཆོས་བཞི་པོ་འདི་དག་ཚོགས་ཀྱི་ལམ་དུ་ནམ་ཐོབ་ན། དེ་ནས་བཟུང་སྟེ་བསྐལ་པ་གྲངས་མེད་ཀྱི་འགོ་བརྩམ་པར་འདོད་དེ། ཐེག་པ་བསྡུས་པ་ལས། བཟང་དང་སྨོན་པའི་སྟོབས་ཅན་དང༌། །སེམས་བརྟན་ཁྱད་པར་འགྲོ་བ་ཡིས། །བྱང་ཆུབ་སེམས་
དཔའ་གྲངས་མེད་གསུམ། །ཀུན་ཏུ་བརྩམ་པར་མཛད་པ་ཡིན། །ཞེས་གསུངས་ཤིང༌། རྗེ་བཙུན་བསོད་ནམས་རྩེ་མོས་ནི་རང་གི་སྟོབས་ཀྱིས་དེ་བཞིན་གཤེགས་པ་མཐོང་བ་ནས་གྲངས་མེད་དང་པོ་འགོ་བརྩམ་པར་གསུངས་སོ། །གཉིས་པ་བསགས་པར་བྱ་བ་ཚོགས་ཀྱི་ངོ་བོ་ནི། སྟོང་
ཉིད་སྙིང་རྗེའི་སྙིང་པོ་ཅན་དང༌། འཁོར་གསུམ་དུ་རྣམ་པར་མི་རྟོག་པའི་སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་དྲུག་སྟེ། བསོད་ནམས་དང་ཡེ་ཤེས་ཀྱི་ཚོགས་རྣམ་པ་གཉིས་ཀྱིས་བསྡུས་པའི་ལམ་གང་ཡིན་པ་སྟེ། མདོ་སྡེ་རྒྱན་ལས།བསོད་ནམས་ཡེ་ཤེས་མཚུངས་པ་མེད། །

གཅིག་གིས་འཁོར་བར་མངོན་མཐོ་བྱེད། །གཞན་གྱིས་ཉོན་མོངས་མེད་པར་འཁོར། །ཞེས་དང༌། སྦྱིན་དང་ཚུལ་ཁྲིམས་བསོད་ནམས་ཀྱི། །ཚོགས་ཡིན་ཤེས་རབ་ཡེ་ཤེས་ཀྱི། །གསུམ་ནི་གཉིས་ཆར་ལ་ཡང་གཏོགས། །ལྔ་ཆར་ཡང་ནི་ཡེ་ཤེས་ཚོགས། །
ཞེས་དང༌། གཏམ་དུ་བྱ་བ་རིན་པོ་ཆེའི་ཕྲེང་བ་ལས། སངས་རྒྱས་རྣམས་ཀྱི་གཟུགས་སྐུ་འདིར། །བསོད་ནམས་ཚོགས་ལས་བྱུང་བ་སྟེ། །ཆོས་ཀྱི་སྐུ་ནི་མདོར་བསྡུས་ན། །རྒྱལ་པོ་ཡེ་ཤེས་ཚོགས་ལས་བྱུང༌། །དེ་ལྟ་བས་ན་ཚོགས་འདི་གཉིས། །སངས་རྒྱས་ཉིད་ནི་འཐོབ་པའི་
རྒྱུ། །ཞེས་གསུངས་པ་ལྟ་བུའོ། །གསུམ་པ་ཇི་ལྟར་ཚོགས་བསགས་པའི་ཚུལ་ནི། བསྐལ་པ་ཆེན་པོ་གྲངས་མེད་དང་པོ་ལ་འཇུག་པའི་དུས་སུ་རྒྱལ་པོའི་ཕོ་བྲང་རྣམ་པར་རྒྱལ་བའི་རྒྱལ་མཚན་དུ་སྟོན་པ་འདི་ཉིད་རྒྱལ་པོ་རྣམ་པར་རྒྱལ་བའི་སྲས་གཞོན་ནུ་བརྩོན་འགྲུས་སྤྱོད་ཅེས་བྱ་བར་གྱུར་
ཏོ། །དེའི་ཚེ་དེ་བཞིན་གཤེགས་པ་འོད་འཕྲོའི་ཕུང་པོ་ཆེན་པོ་ལས་བྱང་ཆུབ་སེམས་དཔའི་སྡེ་སྣོད་ཀྱི་ཆོས་རྗེས་སུ་བསྟན་པ་མནོས་ཤིང༌། དེ་བཞིན་གཤེགས་པ་འཁོར་དང་བཅས་པ་ལོ་བྱེ་བ་ཕྲག་དྲུག་ཅུ་རྩ་དྲུག་ཏུ་བསྙེན་བཀུར་བགྱིས་པ་ནས་བརྩམས་ཏེ། བསྐལ་པ་གྲངས་མེད་པ་
གཅིག་ཏུ་ཚོགས་བསགས་པས་ས་དང་པོ་མངོན་དུ་མཛད་པ་ཡིན་ནོ། །གྲངས་མེད་གཉིས་པ་ལ་འཇུག་པའི་དུས་སུ་གྲོང་ཁྱེར་ཛམྦུ་ཆུ་བོའི་གསེར་དུ་རྒྱལ་པོ་མཛེས་པར་སྣང་བ་ཞེས་བྱ་བ་ཞིག་ཡོད་དེ། དེའི་ཚེ་སྟོན་པ་འདི་ཉིད་དེའི་གནང་ཆེན་ཚོང་དཔོན་ཤེས་རབ་བཟང་པོ་ཞེས་བྱ་བར་གྱུར་
པའི་ཚེ། དེ་བཞིན་གཤེགས་པ་དཀོན་མཆོག་ཡན་ལག་ལས་རྗེས་སུ་བསྟན་པ་མནོས་ཤིང༌། དེ་བཞིན་གཤེགས་པ་འཁོར་དང་བཅས་པ་ལོ་སྟོང་དུ་བསྙེན་བཀུར་བ་ནས་བརྩམས་ཏེ། བསྐལ་པ་གྲངས་མེད་པ་གཅིག་ཏུ་ཚོགས་བསགས་པས་ས་བདུན་པ་མངོན་དུ་མཛད་པ་ཡིན་ནོ། །
གྲངས་མེད་པ་གསུམ་པ་ལ་འཇུག་པའི་དུས་སུ་རྒྱལ་པོ་དགྲ་ཐུལ་གྱི་ཕོ་བྲང་པདྨོ་ཅན་དང་ཉེ་བ་ཞིག་ཏུ་བྲམ་ཟེའི་སློབ་མ་གཞོན་ནུ་སྤྲིན་ཞེས་བྱ་བར་གྱུར་པའི་ཚེ། དེ་བཞིན་གཤེགས་པ་མར་མེ་མཛད་ལ་ཨུཏྤ་ལ་ལྔས་མངོན་པར་གཏོར་ཏེ། རལ་པ་གསེར་གྱི་མདོག་ཅན་སྟན་དུ་བཏིང་ནས། འདི་

ལ་དེ་བཞིན་གཤེགས་པ་མར་མེ་མཛད་ཀྱི་ཞབས་འཇོག་པ་དང་བདག་ལུང་སྟོན་པར་མི་མཛད་ན་འདི་ཉིད་དུ་ལུས་བསྐམ་པར་བྱའོ་ཞེས་ཡི་དམ་བརྟན་པར་བཅས་ཏེ་ལོགས་ཤིག་ཏུ་འཁོད་པ་ན། དེ་བཞིན་གཤེགས་པས་མཁྱེན་ཏེ་རལ་པ་ལ་ཞབས་བཞག་ནས། མ་འོངས་པའི་དུས་ན་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་བསྟན་ཏོ། །དེའི་མོད་ལ་ཤིན་ཏུ་དགའ་ཞིང་མགུ་ལ་རངས་པར་གྱུར་ཏེ། སྟེང་གི་བར་སྣང་ལ་ཤིང་ཏཱ་ལ་བདུན་སྲིད་ཀྱི་ཚད་དུ་མངོན་པར་འཕགས་ཏེ། ཏིང་ངེ་འཛིན་བྱེ་བ་ཁྲག་ཁྲིག་མང་
པོ་མངོན་དུ་བྱས་ཏེ་ས་བརྒྱད་པ་མངོན་དུ་མཛད་པ་ཡིན་ནོ། །དེ་ལྟར་ཡང༌། སངས་རྒྱས་མར་མེ་མཛད་ལ་ཨུཏྤལ་ལྔས། །གཏོར་ཏེ་རལ་པ་སྟན་དུ་བཏིང་བྱས་པས། །མི་སྐྱེའི་ཆོས་ལ་བཟོད་པ་ཐོབ་གྱུར་ནས། །ཤཱཀྱའི་རྒྱལ་པོར་འགྱུར་ཞེས་ང་ལུང་བསྟན། །ཞེས་དང༌། ལུང་ལས་
ཀྱང༌། གང་ཚེ་མར་མེ་མཛད་ཀྱིས་ང༌། །ལུང་བསྟན་གྱུར་པ་དེ་ཡི་ཚེ། །ས་བརྒྱད་པ་ནི་ཐོབ་གྱུར་ཏེ། །དབང་བཅུ་དག་ཀྱང་ཐོབ་པར་འགྱུར། །ཞེས་སོ། །དེ་ནས་བརྩམས་ཏེ་བརྒྱ་བྱིན་མིག་བཟང་པོ་ལ་སོགས་པའི་སྐྱེ་བ་མང་དུ་བཞེས་ནས་སེམས་ཅན་གྱི་དོན་མཛད་པའི་མཐར། བསྐལ་
པ་འདིའི་ཚེ་ལོ་ཉི་ཁྲི་པའི་དུས་སུ་གྲོང་ཁྱེར་ཉེར་ལྡན་དུ་སངས་རྒྱས་འོད་སྲུང་བྱོན་པའི་ཚེ། བྲམ་ཟེའི་ཁྱེའུ་བླ་མར་གྱུར་པའི་བར་ལ་བསྐལ་པ་གྲངས་མེད་གཅིག་ཏུ་སངས་རྒྱས་མང་པོ་ལ་བསྙེན་བཀུར་ཞིང་ཚོགས་བསགས་པས་ས་བཅུ་པ་མངོན་དུ་བྱས་པར་འདོད་དེ། ཏིང་ངེ་འཛིན་རྒྱལ་པོ་ལས།
སངས་རྒྱས་དག་ནི་བྱེ་བ་ཁྲག་ཁྲིག་དང༌། །དེ་ལས་ལྷག་པ་གངྒཱའི་བྱེ་མ་སྙེད། །ཀུན་ཀྱང་བྱ་རྒོད་ཕུང་པོ་འདིར་བཞུགས་ཏེ། །མི་དབང་དེ་ཀུན་ང་ཡིས་བསྙེན་བཀུར་བྱས། །ཞེས་བྱ་བ་ལ་སོགས་པ་གསུངས་སོ། །གསུམ་པ་མཐར་མངོན་པར་རྫོགས་པར་སངས་རྒྱས་པའི་ཚུལ་ལ། ཐེག་པ་
དམན་པ་ལས་འབྱུང་བ་དང༌། ཐེག་པ་ཆེན་པོ་ལས་འབྱུང་བའོ། །དང་པོ་ཐེག་པ་དམན་པའི་ལུགས་སུ་འདུལ་བ་ལུང་དང་མཛོད་ལས་འབྱུང་བ་ལྟར། བསྐལ་པ་ཆེན་པོ་གྲངས་མེད་པ་གསུམ་དུ་ཚོགས་བསགས་ཤིང་སངས་རྒྱས་རྣམས་བསྙེན་བཀུར་ཏེ་ཕ་རོལ་ཏུ་ཕྱིན་པ་དྲུག་རྫོགས་ཀྱང་

སོ་སོ་སྐྱེ་བོ་རང་རྒྱུད་པ་ཡིན་ལ། བྱང་ཆུབ་སེམས་དཔའ་སོ་སོ་སྐྱེ་བོ་སྲིད་པ་ཐ་མ་པའི་སྐྱེ་བ་ལ། རྡོ་རྗེའི་གདན་དུ་སྟན་གཅིག་གི་སྟེང་དུ་བསམ་གཏན་བཞི་པའི་རབ་མཐའ་ལ་བརྟེན་ནས། སྦྱོར་ལམ་དྲོད་ནས་བརྩམས་ཏེ་ཟད་པ་དང་མི་སྐྱེ་ཤེས་པ་འཁོར་དང་བཅས་པའི་བྱང་
ཆུབ་གདན་ཐོག་གཅིག་ལ་མངོན་དུ་བྱས་ཏེ། གསར་དུ་མངོན་པར་རྫོགས་པར་སངས་རྒྱས་པར་བཞེད་དོ། །དེ་ལྟར་ཡང་མཛོད་ལས། སྟོན་དང་བསེ་རུ་བྱང་ཆུབ་བར། །བསམ་གཏན་མཐའ་རྟེན་གཅིག་ལ་ཀུན། །དེ་ཡི་སྔོན་དུ་ཐར་ཆ་མཐུན། །ཞེས་སོ། །དེ་ལྟར་རྣམ་པར་གྲོལ་བའི་
ཆོས་ཀྱི་སྐུ་མྱ་ངན་ལས་འདས་པའི་དབྱིངས་སུ་ཞི་ནས་འཁོར་བར་སྐྱེ་བའི་རྒྱུ་འབྲས་མ་ལུས་པ་དང་བྲལ་བ་དང༌། རྣམ་པར་སྨིན་པའི་གཟུགས་ཀྱི་སྐུ་མཚན་དང་དཔེ་བྱད་ཀྱིས་བརྒྱན་ཞིང༌། ཡོན་ཏན་དང་ཕྲིན་ལས་ཀྱིས་རྣམ་པར་ཕྱེ་བ་གཉིས་ཀྱི་བདག་ཉིད་དུ་སངས་རྒྱས་ནས། ཀུན་ཤེས་ནས་
བཟུང་སྟེ་རབ་བཟང་གི་བར་ལ་ཆོས་ཀྱི་འཁོར་ལོ་བསྐོར་ནས་ལྷག་མ་མེད་པའི་དབྱིངས་སུ་མྱ་ངན་ལས་འདས་པར་བཞེད་དོ། །གཉིས་པ་ཐེག་པ་ཆེན་པོ་ལས་འབྱུང་བ་ལ། ཇི་ལྟར་སངས་རྒྱས་པ་དང༌། དེའི་རང་བཞིན་ངོས་བཟུང་བ་དང༌། ཐུབ་པའི་མཛད་པ་བྱེ་བྲག་ཏུ་བཤད་པ་སྟེ་གསུམ་ལས།
དང་པོ་ཇི་ལྟར་སངས་རྒྱས་པ་ནི། ས་བཅུ་རྒྱུན་གྱི་མཐའ་མར་རྡོ་རྗེ་ལྟ་བུའི་ཏིང་ངེ་འཛིན་གྱིས་སྒྲིབ་པ་བག་ཆགས་དང་བཅས་པ་མ་ལུས་པ་ཕྱིར་མི་ལྡོག་པའི་ཚུལ་གྱིས་ཡོངས་སུ་སྤངས་པ་མཐར་ཕྱིན་པ་དང༌། ཤེས་བྱ་ཇི་ལྟ་བ་དང་ཇི་སྙེད་པའི་དོན་མ་ལུས་པ་མངོན་སུམ་དུ་མཁྱེན་པའི་ཡེ་ཤེས་བརྙེས་པའི་
རྟོགས་པ་མཐར་ཕྱིན་པའི་བྱང་ཆུབ་ཆེན་པོ་ཐོབ་པ་ནི། དཔེར་ན་རིན་པོ་ཆེ་སྣོད་དུ་བཅུག་པ་སྒྲིབ་བྱེད་ཀྱི་སྣོད་ལེགས་པར་བསལ་བ་ན་མངོན་སུམ་དུ་གྱུར་པ་ལྟ་བུ་སྟེ། རྒྱན་ལས། སྒྲིབ་པ་ཀུན་གྱི་དྲི་མེད་པ། །རྣམ་པ་ཐམས་ཅད་མཁྱེན་ཉིད་ཐོབ། །རིན་ཆེན་སྣོད་ནི་ཕྱེ་བ་ལྟར། །སངས་
རྒྱས་ཉིད་ནི་ཡང་དག་བསྟན། །ཞེས་སོ། །གཉིས་པ་དེའི་རང་བཞིན་ངོས་བཟུང་བ་ནི། དང་པོ་རང་དོན་ཕུན་སུམ་ཚོགས་པ་ལོངས་སྤྱོད་རྫོགས་པའི་སྐུ་དང༌། གཞན་དོན་ཕུན་སུམ་ཚོགས་པ་སྤྲུལ་པའི་སྐུ་སྟེ། དེ་གཉིས་ཀའི་རྟེན་ཆོས་ཀྱི་སྐུ་དང༌། སྐུ་གསུམ་གྱིས་བསྡུས་པའི་

རང་བཞིན་ཅན་དུ་སངས་རྒྱས་པ་སྟེ། རྒྱན་ལས། སྐུ་གསུམ་དག་གིས་སངས་རྒྱས་ཀྱི། །སྐུ་བསྡུས་པར་ནི་ཤེས་བྱ་སྟེ། །སྐུ་གསུམ་དག་གིས་རང་བཞིན་གྱི། །དོན་འདི་རྟེན་དང་བརྟེན་པར་བསྟན། །ཞེས་པ་སྟེ། དེའང་དབྱིངས་རང་བཞིན་གྱིས་རྣམ་པར་དག་པ་དང༌། སྤང་
བྱ་གློ་བུར་གྱི་དྲི་མས་དག་པའི་རང་བཞིན་གང་ལ་རྣམ་པར་རྟོག་པ་མི་མངའ་ཡང༌། ལྷུན་གྱིས་གྲུབ་ཅིང་ཆགས་ཐོགས་མི་མངའ་བའི་མཁྱེན་བརྩེ་ནུས་པའི་སྒོ་ནས་སེམས་ཅན་གྱི་དོན་འབད་པ་མེད་པ་ཉིད་དུ་འབྱུང་བའི་ཡེ་ཤེས་ཀྱི་སྐུ་སྟེ། སྐུ་གསུམ་གྲུབ་པ་ལས། དྲི་མེད་དེ་བཞིན་ཉིད་དང་
ནི། །མི་རྟོག་ཡེ་ཤེས་མ་གཏོགས་པ། །སངས་རྒྱས་རྣམས་ཀྱི་ཆོས་གཞན་ནི། །འགའ་ཡང་ཡོད་པ་མ་ཡིན་ནོ། །ཞེས་གསུངས་སོ། །དེ་ཉིད་ཟག་པ་མེད་པའི་ཡོན་ཏན་དང་དབྱེར་མི་ཕྱེད་པའི་ཆོས་ཀྱི་དབྱིངས་དག་པ་གཉིས་ལྡན་མངོན་དུ་གྱུར་པའི་ཆ་ནས་ངོ་བོ་ཉིད་ཀྱི་སྐུར་འཇོག་
སྟེ། མངོན་པར་རྟོགས་པའི་རྒྱན་ལས། ཐུབ་པའི་ངོ་བོ་ཉིད་སྐུ་ནི། །ཟག་པ་མེད་པའི་ཆོས་གང་དག །ཐོབ་གྱུར་རྣམ་ཀུན་རྣམ་དག་པ། །དེ་དག་རང་བཞིན་མཚན་ཉིད་ཅན། །ཞེས་སོ། །དེ་ཉིད་འོག་མིན་ཆེན་པོར་རྒྱལ་སྲས་འཕགས་པ་རྣམས་ལ་མཚན་བཟང་པོ་སུམ་ཅུ་རྩ་གཉིས་དང་
དཔེ་བྱད་བཟང་པོ་བརྒྱད་ཅུས་བརྒྱན་པའི་སྐུར་སྣང་བ་སྟེ། མཚན་ནི་སུམ་ཅུ་རྩ་གཉིས་དང༌། །དཔེ་བྱད་བརྒྱད་ཅུའི་བདག་ཉིད་འདི། །ཐེག་ཆེན་ཉེ་བར་ལོངས་སྤྱོད་ཕྱིར། །ཐུབ་པའི་ལོངས་སྤྱོད་རྫོགས་སྐུར་བཞེད། །ཅེས་སོ། །དེ་ཉིད་གདུལ་བྱ་མཐའ་ཡས་པའི་བསམ་པ་དང་
མཐུན་པར་རྣམ་པར་འཕྲུལ་པ་སྣ་ཚོགས་པས་སེམས་ཅན་གྱི་དོན་རྒྱུན་མི་ཆད་པར་མཛད་པ་ནི། གང་གིས་སྲིད་པ་ཇི་སྲིད་པར། །འགྲོ་ལ་ཕན་པ་སྣ་ཚོགས་དག །མཉམ་དུ་མཛད་པའི་སྐུ་དེ་ནི། །ཐུབ་པའི་སྤྲུལ་སྐུ་རྒྱུན་མི་ཆད། །ཅེས་གསུངས་སོ། །དེས་ན་གོང་དུ་ཇི་སྐད་བཤད་
པ་རྣམས་ཀྱང་གདུལ་བྱ་དྲང་བའི་དོན་དུ་འཇིག་རྟེན་དང་ཚུལ་མཐུན་པར་བསྟན་པ་ཡིན་གྱི། ངེས་པའི་དོན་གྱི་དབང་ལས་ནི་བསྐལ་པ་ཆེན་པོ་དཔག་ཏུ་མེད་པའི་གོང་རོལ་དུ་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ཀྱི་ཞིང་གཅིག་ཏུ་གྱུར་པ་དེར། དེ་བཞིན་གཤེགས་པ་དབང་

པོའི་ཏོག་ཅེས་བྱ་བར་སངས་རྒྱས་ཤིང༌། ད་དུང་ཡང་འཚང་རྒྱ་བ་དང༌། བྱང་ཆུབ་སེམས་དཔའི་ཚུལ་གྱིས་གཞན་དོན་མཛད་པར་ཡབ་སྲས་མཇལ་བའི་མདོ་ལས་བཤད་དེ། ཇི་སྐད་དུ། སེམས་ཅན་རྣམས་ལ་ཐུགས་བརྩེ་ཞིང༌། །སེམས་ཅན་ཡོངས་སུ་
སྨིན་མཛད་ཕྱིར། །དཔའ་བོ་ཆེན་པོ་རྣམ་པར་འཕྲུལ། །བྱེ་བ་བརྒྱད་ཅུར་རྒྱལ་བ་ཉིད། །སངས་རྒྱས་ཉིད་དུ་བསྟན་གྱུར་ཀྱང༌། །ད་དུང་ཆོག་པའི་འདུ་ཤེས་བསལ། །ཞེས་དང༌། ད་དུང་དང་པོ་ཐུགས་བསྐྱེད་པར། །དེ་དང་དེར་ནི་ཡོངས་བསྟན་ཏེ། །ད་དུང་དུ་ཡང་འདྲེན་པ་ཁྱོད། །
སངས་རྒྱས་མང་པོ་སྟོན་པར་མཛད། །ཅེས་དང༌། དེ་ཉིད་བསྡུས་པའི་རྒྱུད་ལས། བཅོམ་ལྡན་འདས་བསྐལ་པ་བསམ་གྱིས་མི་ཁྱབ་པར་མངོན་པར་རྫོགས་པར་སངས་རྒྱས་ནས་ཤཱཀྱའི་རིགས་སུ་སྐྱེ་བར་སྟོན་པར་མཛད་དོ་ཞེས་བྱ་བ་ལ་སོགས་པ་མང་དུ་འབྱུང་བའི་ཕྱིར་རོ། །གསུམ་
པ་ཐུབ་པའི་མཛད་པ་བྱེ་བྲག་ཏུ་བཤད་པ་ནི། སྤྱིར་དེ་བཞིན་གཤེགས་པ་ཆོས་ཀྱི་སྒྲོན་མ་ཆེན་པོས་ལེགས་པར་བརྒྱན་པའི་བསྐལ་པ་འདི་ལ། འཕགས་པ་བསྐལ་པ་བཟང་པོ་ལས་ནི་དེ་བཞིན་གཤེགས་པ་སྟོང་ཕྲག་གཅིག་འབྱོན་པར་བསྟན་ཏེ། གང་དག་བསྟན་པ་དེ་རྣམས་ཀྱང་སོ་
སོའི་ཡུལ་དང༌། རིགས་དང༌། འོད་དང༌། ཡབ་དང༌། ཡུམ་དང༌། སྲས་དང༌། རིམ་གྲོ་པ་དང༌། ཤེས་རབ་ཅན་གྱི་མཆོག་དང༌། རྫུ་འཕྲུལ་ཅན་གྱི་མཆོག་དང༌། འདུས་པའི་གྲངས་དང༌། སྐུ་ཚེའི་ཚད་དང༌། དམ་པའི་ཆོས་གནས་པའི་ཚད་དང༌། སྐུ་གདུང་སྟེ་རྣམ་པ་
བཅུ་གསུམ་མམ་མཆོད་རྟེན་ཡོད་པ་འབྱུང་བ་ལྟར་ན་བཅུ་བཞི་རེའི་སྒོ་ནས་བསྟན་ཏོ། །འཕགས་པ་དཀོན་མཆོག་བརྩེགས་པའི་མདོ་སྡེལས་ཀྱང༌། བསྐལ་པ་འདི་ཉིད་དུ་སངས་རྒྱས་འཁོར་བ་འཇིག་དང༌། གསེར་ཐུབ་དང༌། འོད་སྲུངས་དང༌། ཤཱཀྱ་ཐུབ་པ་ནས་མོས་པ་ལ་ཐུག་པའི་
བར་གྱི་དེ་བཞིན་གཤེགས་པ་སྟོང་འབྱུང་བ་སྔོན་གྱི་ལོ་རྒྱུས་དང་བཅས་པའི་ཚུལ་གྱིས་རྒྱས་པར་བསྟན་ཏོ། །དེ་བཞིན་དུ་སྙིང་རྗེ་ཆེན་པོ་པདྨ་དཀར་པོ་ལས་ཀྱང་བསྐལ་པ་བཟང་པོ་འདི་ལ་ཐུབ་པའི་ཉི་མ་སྟོང་དང་ལྔ་འབྱུང་བ། སྔོན་གྱི་དེ་བཞིན་གཤེགས་པ་རིན་ཆེན་སྙིང་པོས་ལུང་བསྟན་པའི་

ལོ་རྒྱུས་དང་བཅས་པའི་ཚུལ་གྱིས་གསལ་བར་བསྟན་ཏོ། །ཇི་ལྟར་བསྟན་པའི་རྣམ་པར་འདྲེན་པ་དེ་དག་ལས་བཞི་པར་གྱུར་པ་ཐུབ་པའི་དབང་པོ་འདི་ཉིད་ཀྱི་མཛད་པ་བསམ་གྱིས་མི་ཁྱབ་པ་བཅོམ་ལྡན་འདས་ཁོ་ན་ལས་གཞན་གྱིས་རྟོགས་པའི་ཡུལ་ལས་རིང་དུ་གྱུར་པ་ཉིད་དོ། །དེ་ལྟ་ནའང་སྟོན་པ་འདི་
ཉིད་ཀྱི་རྗེས་སུ་འཇུག་པའི་གདུལ་བྱ་གྲངས་ཀྱི་ངེས་པ་ལ་མངོན་པར་དགའ་བ་རྣམས་རྗེས་སུ་གཟུང་བའི་ཕྱིར། མཛད་པའི་གཙོ་བོ་རྣམས་ནི་སྡེ་ཚན་བཅུ་གཉིས་ཀྱི་གྲངས་སུ་དོན་གྱིས་འདུ་བར་མདོ་སྡེ་རྣམས་སུ་གསུངས་པ་དང༌། དེ་དག་དང་རྗེས་སུ་མཐུན་པར་མགོན་པོ་བྱམས་པས་ཐེག་པ་ཆེན་
པོ་རྒྱུད་བླ་མ་ལས། སྐྱེ་བ་མངོན་པར་སྐྱེ་བ་དང༌། །དགའ་ལྡན་གནས་ནས་འཕོ་བ་དང༌། །ལྷུམས་སུ་འཇུག་དང་བལྟམས་པ་དང༌། །བཟོ་ཡི་གནས་ལ་མཁས་པ་དང༌། །བཙུན་མོའི་འཁོར་དགྱེས་རོལ་པ་དང༌། །ངེས་འབྱུང་དཀའ་བ་སྤྱོད་པ་དང༌། །བྱང་ཆུབ་སྙིང་པོར་གཤེགས་པ་
དང༌། །བདུད་སྡེ་འཇོམས་དང་རྫོགས་པར་ནི། །བྱང་ཆུབ་ཆོས་ཀྱི་འཁོར་ལོ་དང༌། །མྱ་ངན་འདས་པར་གཤེགས་མཛད་རྣམས། །ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། །ཞེས་གསུངས་པའི་གོ་རིམ་དང་རྗེས་སུ་མཐུན་པར་མདོ་ཙམ་ཞིག་གླེང་བར་བྱའོ། །
དེ་ལས་དང་པོ་དགའ་ལྡན་གྱི་གནས་ན་གནས་པའི་མཛད་པ་ལ། སངས་རྒྱས་རྣམས་ཀྱིས་ཇི་ལྟར་བསྐུལ་བ་དང༌། བསྐུལ་ནས་འཕོ་བར་བརྩམས་པའོ། །དང་པོ་ནི། བདག་ཅག་གི་སྟོན་པ་ཐུགས་རྗེ་དཔག་ཏུ་མེད་པའི་བདག་ཉིད་ཅན་འདི་བྲམ་ཟེའི་ཁྱེའུ་བླ་མ་ཞེས་བྱ་བ་ཚེ་འཕོས་ཏེ་དགའ་ལྡན་གྱི་
གནས་སུ་ལྷའི་བུ་དམ་པ་ཏོག་དཀར་པོའི་སྐྱེ་བ་བཞེས་ཏེ། དེར་སྐྱེ་བ་བླངས་ནས་དགའ་ལྡན་ཆོས་ཀྱིས་མཐོ་བ་ཞེས་བྱ་བའི་ཁང་བཟང་དུ་སེང་གེའི་ཁྲི་ལ་བཞུགས་ནས་ལྷའི་འཁོར་དཔག་ཏུ་མེད་པ་ལ་ཆོས་སྟོན་ཅིང་བཞུགས་པ་ལ། ལྷའི་བུ་བྱེ་བ་ཁྲག་ཁྲིག་དཔག་ཏུ་མེད་པས་མདུན་བདར་ཏེ། ཆོས་
ཀྱི་སྒྲ་འབྱུང་བའི་སིལ་སྙན་དང་གླུ་དབྱངས་རྣམས་ཀྱི་མཆོད་པ་མང་པོས་མངོན་པར་མཆོད་པ་བྱེད་དོ། །དུས་ཇི་ཙམ་ཞིག་ན། ཛམྦུའི་གླིང་པ་རྣམས་གདུལ་བའི་དུས་ལ་བབ་པ་དང༌། སྔོན་གྱི་སྨོན་ལམ་གྱི་མཐུ་དང༌། ཕྱོགས་བཅུའི་ཞིང་གི་སྟོབས་བཅུ་མངའ་བ་རྣམས་ཀྱི་བྱིན་གྱིས་རླབས་ཀྱིས།

རོལ་མོའི་སྒྲ་དེ་དག་ལས་བྱང་ཆུབ་སེམས་དཔའ་གཞན་དོན་དུ་བསྐུལ་བའི་ཚིགས་སུ་བཅད་པ་བྱུང་བ་ནི་འདི་ལྟ་སྟེ། བསོད་ནམས་རྒྱ་མཚོའི་ཚོགས་མངའ་དྲན་རྟོགས་དང༌། །བློ་གྲོས་མཐའ་ཡས་ཤེས་རབ་འོད་མཛད་པ། །མཚུངས་མེད་སྟོབས་མང་སྒྱུ་རྩལ་རྒྱ་ཆེ་བ། །མར་མེ་མཛད་
ཀྱིས་ལུང་བསྟན་དགོངས་པར་མཛོད། །ཅེས་བྱ་བ་ལ་སོགས་པས་སྐུལ་བར་བྱེད་དོ། །ཇི་ལྟར་བསྐུལ་བའི་ཚིག་གི་ཕྲེང་བ་དེ་དག་སྤྲུལ་པའི་བྱང་ཆུབ་སེམས་དཔའ་དེས་རྗེས་སུ་སེམས་ཤིང་རྗེས་སུ་དགོངས་པ་ན། ད་སྟེ་ཁོ་བོ་ཅག་གིས་ཛམྦུའི་གླིང་དུ་འགྲོ་བའི་དུས་ལ་ངེས་པར་བབ་བོ་ཞེས་རྩེ་གཅིག་ཏུ་དགོངས་
ཤིང་རེ་ཞིག་ཅང་མི་སྨྲ་བར་གྱུར་ཏོ། །གཉིས་པ་ནི། དེ་ནས་བྱང་ཆུབ་སེམས་དཔའ་དགའ་ལྡན་གྱི་གནས་རྒྱལ་མཚན་མཐོན་པོར་གཤེགས་ནས་སེང་གེའི་ཁྲི་ག་ལ་བ་དེར་བཞུགས་སོ། །དེ་ན་དགའ་ལྡན་གྱི་ལྷའི་རིས་མཐའ་དག་བསྡུས་ནས་འཁོར་དེ་དག་ལ། གྲོགས་པོ་དག་བྱང་ཆུབ་སེམས་དཔའི་ལུས་
བསོད་ནམས་བརྒྱའི་མཚན་གྱིས་ལེགས་པར་བརྒྱན་པ་ལྟོས་ཤིག་ཅེས་བསྐུལ་བ་དང༌། ཕྱོགས་བཅུ་ཀུན་ཏུ་བྱང་ཆུབ་སེམས་དཔའ་དགའ་ལྡན་གྱི་གནས་ན་བཞུགས་པ་ཐམས་ཅད་ཀྱང་སྲིད་པ་ཐ་མ་པ་ལ་མངོན་དུ་ཕྱོགས་པ། ལྷའི་འཁོར་གྱིས་བསྐོར་བ་འཆི་འཕོ་བའི་རྣམ་པས་ཆོས་སྣང་བའི་སྒོ་ཡང་
དག་པར་སྟོན་པ་གྲངས་མེད་པ་བསྟན་ཏོ། །དེ་ནས་བྱང་ཆུབ་སེམས་དཔས་ལྷའི་འཁོར་དེ་དག་ལ་ཆོས་སྣང་བའི་སྒོ་བརྒྱ་རྩ་བརྒྱད་བསྟན་པས། ལྷའི་བུ་བརྒྱད་ཁྲི་བཞི་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །ལྷའི་བུ་སྔོན་ཡོངས་སུ་སྦྱངས་པ་བྱས་པ་སུམ་ཁྲི་ཉིས་
སྟོང་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །ལྷའི་བུ་བྱེ་བ་སུམ་ཅུ་རྩ་དྲུག་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ །དགའ་ལྡན་གྱི་གནས་ཐམས་ཅད་ཀྱང་ལྷའི་མེ་ཏོག་གིས་པུས་མོ་ནུབ་ཙམ་དུ་ཁྱབ་པར་གྱུར་ཏོ། །དེ་ནས་ཛམྦུའི་གླིང་དུ་གཤེགས་པར་དགོངས་
ནས་གཟིགས་པ་བཞིའམ་ལྔས་གཟིགས་ཏེ། དེའང་འགྲོ་བ་གདུལ་སླ་བ་ཚེ་ལོ་བརྒྱ་པའི་དུས་དང༌། གླིང་ནི་ཛམྦུའི་གླིང་དང༌། ཡུལ་ནི་དབུས་འགྱུར་འཆང་དང༌། རིགས་ནི་རྒྱལ་རིགས་ཏེ་བཞིའམ། རིགས་དང༌། དུས་དང༌། ཡུལ་དང༌། རུས་དང༌། བུད་མེད་དེ་ལྔ་ལ་གཟིགས་སོ། །དེ་ནས་བྱང་

ཆུབ་སེམས་དཔས་འཁོར་རྣམས་ལ་ཁོ་བོ་ཛམྦུའི་གླིང་དུ་འཚང་རྒྱ་བའི་ཕྱིར་འགྲོའོ་ཞེས་གསུངས་པས། དེ་ཐོས་པའི་མོད་ལ་ལྷ་རྣམས་ཤིན་ཏུ་ཡིད་མི་དགའ་བར་གྱུར་ཏེ་སྨྲས་པ། དགའ་ལྡན་གྱི་གནས་འདིར་ཁྱེད་ཀྱིས་བཞུགས་པར་མི་མཛད་ན་སླན་ཆད་སྟོན་པར་འོས་པ་སུ་ཞིག །གཞན་ཡང་ཛམྦུའི་གླིང་ནི་
འོད་སྲུངས་རྫོགས་བྱེད་ལ་སོགས་པའི་རྟོག་གེ་པ་དྲུག་དང༌། བྲམ་ཟེ་རྒྱུས་རྒལ་ལ་སོགས་པའི་རྗེས་སུ་སྒྲོགས་པ་དྲུག་དང༌། རེངས་བྱེད་ཀྱི་བུ་ལྷག་སྤྱོད་ལ་སོགས་པ་སྙོམས་པར་འཇུག་པ་དྲུག་སྟེ། མུ་སྟེགས་ཀྱི་སྟོན་པ་བཅོ་བརྒྱད་ཀྱིས་མ་རུངས་པར་བགྱིས་པས་འདི་ཉིད་དུ་བཞུགས་པར་རིགས་སོ་ཞེས་གསོལ་བ་
དང༌། དེ་དག་ལ་བྱང་ཆུབ་སེམས་དཔས་དུང་གཅིག་གི་སྒྲས་རོལ་མོའི་ཆ་བྱད་ཐམས་ཅད་ཟིལ་གྱིས་གནོན་པའི་དཔེ་རྗེས་སུ་བསྟན་ནས། དེ་བཞིན་དུ་ངས་ཀྱང་ཛམྦུའི་གླིང་དུ་སོང་ལ་དེ་དག་ཐམས་ཅད་ཟིལ་གྱིས་མནན་ནས་བདུད་རྩིས་འགྲོ་བ་ཐམས་ཅད་ཚིམ་པར་བྱའོ། །དེས་ན་ཁོ་བོ་ནི་མའི་མངལ་དུ་ཇི་ལྟ་བུའི་གཟུགས་
ཀྱིས་འགྲོ་བར་བགྱི་ཞེས་གསུངས་པ་དང༌། ཚངས་རིས་ཀྱི་ལྷའི་བུ་གཟི་བརྗིད་དམ་པས་བྲམ་ཟེའི་རིག་བྱེད་ལས་འབྱུང་བ་ལྟར་གླང་པོ་ཆེ་དམ་པའི་གཟུགས་ཀྱིས་འཇུག་པར་རིགས་སོ་ཞེས་གསོལ་བ་ལྟར། དེ་ལྟ་བུའི་གཟུགས་ཀྱིས་འཇུག་པར་དགོངས་སོ། །དེ་ནས་བྱང་ཆུབ་སེམས་དཔའ་འཕོ་བའི་དུས་ལ་བབ་པ་
ན། འདོད་པའི་ཁམས་ཀྱི་ལྷའི་གནས་ནས་འོག་མིན་གྱི་མཐར་ཐུག་པར་གནས་པའི་ལྷ་རྣམས་ཀྱིས་རྗེས་སུ་ཐོས་ནས་བྱང་ཆུབ་སེམས་དཔའ་ཛམྦུའི་གླིང་དུ་གཅིག་པུ་གཉིས་སུ་མེད་པར་གཤེགས་སུ་གསོལ་ན། བདག་ཅག་གི་བྱས་པ་མ་ཤེས་པར་འགྱུར་བར་བསམས་ནས། རྒྱལ་ཆེན་རིས་བཞི་པའི་
ལྷ་འབུམ་ཕྲག་བརྒྱད་ཅུ་རྩ་བཞི་དང༌། སུམ་ཅུ་རྩ་གསུམ་གྱི་ལྷ་འབུམ་དང༌། འཐབ་བྲལ་གྱི་ལྷ་འབུམ་དང༌། དགའ་ལྡན་གྱི་ལྷ་འབུམ་དང༌། གཞན་འཕྲུལ་དབང་བྱེད་ཀྱི་ལྷ་འབུམ་དང༌། བདུད་ཀྱི་རིས་ཀྱི་ལྷ་དྲུག་ཁྲི་དང༌། ཚངས་རིས་ཀྱི་ལྷ་དྲུག་ཁྲི་བརྒྱད་སྟོང་དང༌། འོག་མིན་གྱི་ལྷ་བརྒྱ་སྟོང་མང་པོ་ཡང་བྱང་ཆུབ་
སེམས་དཔའ་ལྷུམས་སུ་འཇུག་པ་ནས། མྱ་ངན་ལས་འདས་པ་ཆེན་པོ་བསྟན་པའི་བར་དུ་ཕན་པའི་སེམས་དང་དགའ་བའི་སེམས་ཀྱིས་ཞམ་རིང་དུ་འབྲང་ཞིང་རྟག་ཏུ་བསྲུང་བའི་ཕྱིར་ཆས་ཏེ། བྱང་ཆུབ་སེམས་དཔའ་ག་ལ་བ་དེར་ལྷགས་སོ། །དེ་བཞིན་དུ་ཕྱོགས་བཅུའི་ཕྱོགས་རེ་རེ་ནས་ཀྱང་བྱང་ཆུབ་སེམས་དཔའ་

སྐྱེ་བ་གཅིག་གིས་ཐོགས་པ། དགའ་ལྡན་གྱི་གནས་དམ་པ་ན་གནས་པ་བརྒྱ་སྟོང་ཕྲག་མང་པོ་ཡང་མཆོད་པའི་ཕྱིར་ལྷགས་སོ། །འདོད་པའི་ཁམས་ཀྱི་ལྷའི་བུ་མོ་འབུམ་ཕྲག་བརྒྱ་ཅུ་རྩ་བཞིས་སིལ་སྙན་དང་གླུ་དབྱངས་རྣམ་པ་སྣ་ཚོགས་པས་ཀྱང་མཆོད་པའི་ཕྱིར་བྱང་ཆུབ་སེམས་དཔའ་འཆི་འཕོ་
བསྟོན་པའི་དྲུང་དུ་ཉེ་བར་ལྷགས་སོ། །ཇི་ལྟར་འདུས་པའི་འཁོར་གྱི་ཚོགས་ཆེན་པོ་དེ་དག་གིས་ཀུན་ནས་བསྐོར་ཅིང་མདུན་གྱིས་བལྟས་ཏེ། རང་རང་གི་མཆོད་པའི་བྱེ་བྲག་དཔག་ཏུ་མེད་པས་ཕྱོགས་ཀྱི་དཀྱིལ་འཁོར་མ་ལུས་པ་ཡོངས་སུ་བཀང་སྟེ་མངོན་པར་མཆོད་བཞིན་པས་དུས་འདའ་
བར་བགྱིས་སོ། །གཉིས་པ་ལྷུམས་སུ་ཞུགས་པའི་མཛད་པ་ནི། དེ་ནས་ས་ག་ཟླ་བའི་ཚེས་བཅོ་ལྔའི་རྒྱུ་སྐར་རྒྱལ་ལ་བབ་པ་ན། བྱང་ཆུབ་སེམས་དཔའི་ཚོགས་དེ་དག་དང༌། ལྷའི་ཚོགས་དེ་དག་གིས་ཀུན་ནས་ཡོངས་སུ་བསྐོར་ཞིང་མདུན་བདར་ནས། དགའ་ལྡན་གྱི་
གནས་ནས་བསྐྱོད་པའི་ཚེ་འོད་ཟེར་གྱི་སྣང་བ་ཆེན་པོས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་དུ་ཁྱབ་པར་བྲན་ཏེ། ས་གཞི་རྣམ་པ་བཅོ་བརྒྱད་དུ་གཡོས་ཤིང༌། ལྷ