Luận tạng Tây Tạng (Tengyur) — Tập 213

་བཞེད་དོ། །སློབ་དཔོན་ཆེན་པོ་ཏྲི་པི་ཊ་ཀ་མ་ལ་ཤཱི་ལས། ཚུལ་གསུམ་གྱི་སྒྲོན་མ་ལས། དོན་གཅིག་ན་ཡང་མ་རྨོངས་དང༌། །ཐབས་མང་དཀའ་བ་མེད་པ་དང༌། །དབང་པོ་
རྣོན་པོའི་དབང་བྱས་པས། །སྔགས་ཀྱི་བསྟན་བཅོས་ཁྱད་པར་འཕགས། །ཞེས་གསུངས་པ་ལྟར། ཕ་རོལ་ཏུ་ཕྱིན་པའི་ཐེག་པ་དང་སྔགས་ཀྱི་ཐེག་པ་གཉིས་ལས། རྟོགས་པར་བྱ་བའི་ལྟ་བ་དང་ཐོབ་པར་བྱ་བའི་འབྲས་བུ་དང་ཀུན་སློང་བྱང་ཆུབ་ཀྱི་སེམས་རྣམས་ལ་ཁྱད་པར་ཞུགས་པ་
མ་ཡིན་ཡང༌། མ་རྨོངས་པ་ལ་སོགས་པ་རྣམ་པ་བཞིས་སྔགས་ཀྱི་ཐེག་པ་ཁྱད་པར་དུ་འཕགས་པར་བཞེད་དོ། །དེ་ཅིའི་ཕྱིར་ཞེ་ན། རྟོགས་པར་བྱ་བའི་ལྟ་བ་ནི་ཆོས་ཐམས་ཅད་ཀྱི་གནས་ལུགས་སྤྲོས་པའི་མཐའ་ཐམས་ཅད་དང་བྲལ་བ་དབུ་མའི་ལམ་ཡིན་ལ་དེ་ལ་ཁྱད་པར་ཞུགས་པ་
མ་ཡིན་ནོ། །དེ་ཉིད་ལས་ཁྱད་པར་དུ་གྱུར་པའམ་ལྷག་པའི་ལྟ་བ་ཡང་དག་པ་ཞིག་ཡོད་པར་མི་འགྱུར་ལ། གལ་ཏེ་ཡོད་པར་གྱུར་ན་ནི་ལྟ་བ་དེ་སྤྲོས་པ་ཅན་ལས་མ་འདས་ཤིང༌། སྤྲོས་པའི་མཐར་ལྷུང་བའི་ལྟ་བས་ནི་ནམ་ཡང་རྣམ་པར་གྲོལ་བ་ཡོད་པར་མདོ་སྔགས་གཉིས་ཀ་ནས་རྣམ་པ་ཀུན་དུ་

གསུངས་པ་མེད་པའི་ཕྱིར་རོ། །ཐོབ་པར་བྱ་བའི་འབྲས་བུ་རྣམ་པ་ཐམས་ཅད་མཁྱེན་པའི་སངས་རྒྱས་སུ་དམིགས་པ་ལ་ཡང་མི་མཐུན་པ་མེད་དེ། དེ་ཉིད་དམིགས་པར་བྱ་བའི་ཡུལ་དུ་མ་གྱུར་པའི་ཐེག་པ་ཆེན་པོའི་ལམ་ཞིག་ཡོད་པ་མི་སྲིད་ལ་གལ་ཏེ་སྲིད་པར་གྱུར་ན་ཡང་དེ་ཉིད་
ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ལམ་མ་ཡིན་པའི་ཕྱིར་རོ། །ཀུན་ནས་སློང་བ་བྱང་ཆུབ་ཀྱི་སེམས་ལམ་གྱི་གཞིར་བཟུང་བ་ཡང་མི་མཐུན་པ་མེད་དེ། གཞན་དོན་དུ་མི་གནས་པའི་མྱ་ངན་འདས་པའི་གོ་འཕང་དོན་དུ་གཉེར་བའི་བློ་མེད་ན་ཐེག་པ་ཆེན་པོའི་ལམ་ལ་
འཇུག་པའི་དགོས་པ་འགའ་ཡང་མེད་པའི་ཕྱིར་རོ། །དེས་ན་ལམ་སྤྱིའམ་རྩ་བ་མཚུངས་པས་གསང་བ་སྔགས་ཀྱི་ཐེག་པ་ནི་རྩོད་པ་དང་བྲལ་བ་ཡིན་ལ། དེ་ལས་སྤྱོད་པ་བདེ་བས་འགྲུབ་པ་ལ་སོགས་པའི་བྱེ་བྲག་མང་པོ་སྟོན་དུ་ཡོད་པས་ན་ཆེས་ཁྱད་པར་དུ་འཕགས་པ་ཡིན་ནོ། །དེ་ཡང་འདི་
ལྟར་རྟོགས་པའི་ལྟ་བ་ལ་མ་རྨོངས་པའི་ཁྱད་པར་ཡོད་དེ། ཕ་རོལ་ཏུ་ཕྱིན་པ་ནས་སོ་སོ་སྐྱེ་བོའི་གནས་སྐབས་སུ། དངོས་པོའི་གནས་ལུགས་དཔེ་དང་གཏན་ཚིགས་ལ་སོགས་པའི་སྒོ་ནས་སྤྲོས་བྲལ་དུ་ཇི་ལྟར་གཏན་ལ་ཕབ་ཀྱང་དོན་སྤྱིའི་ཚུལ་གྱིས་རྟོགས་པ་ཙམ་ལས་རྟོགས་མེད་དུ་འགྱུར་
མི་སྲིད་ལ། གསང་སྔགས་པས་དབང་གི་དུས་ན་རྫས་དང་སྔགས་དང་ཏིང་ངེ་འཛིན་གྱི་རྟེན་འབྲེལ་ཟབ་མོའི་གནད་ཀྱིས་ཡེ་ཤེས་ཕབ་པ་དེའི་ཚེའམ་དབང་གསུམ་པ་ལ་སོགས་པའི་གནས་སྐབས་སུ་ཡེ་ཤེས་རྒྱུད་ལ་སྐྱེས་པ་ན་རྟོགས་མེད་ཀྱི་ཡེ་ཤེས་སྤྲོས་པ་དང་བྲལ་བ་དཔེའི་ཚུལ་གྱིས་དངོས་སུ་
རྟོགས་པ་འབྱུང་ཞིང༌། དེ་ལ་བརྟེན་ནས་དོན་གྱི་ཡེ་ཤེས་ཀྱང་མྱུར་དུ་འདྲེན་པར་བཟོད་པའི་ཕྱིར་རོ། །དེ་སྐད་དུ་ཡང་སློབ་དཔོན་བཛྲ་པཱ་ཎིས། དོན་དེ་ཁོ་ན་ཉིད་ལ་དབྱེ་བ་མེད་ཀྱང་ཕ་རོལ་ཏུ་ཕྱིན་པའི་ཐེག་པ་ནི་རྨོངས་པ་སྟེ། ལུང་དང་རིགས་པས་གཏན་ལ་ཕབ་སྟེ་རྟོགས་པའོ། །རྡོ་རྗེ་ཐེག་
པ་ནི་མ་རྨོངས་པ་སྟེ་ལུང་དང་རིགས་པ་དང་བླ་མའི་མན་ངག་དག་གིས་ཉམས་སུ་མྱོང་བའོ་ཞེས་གསུངས་སོ། །རྟོགས་པར་བྱེད་པའི་ཐབས་མང་བའི་ཁྱད་པར་ཡོད་དེ། ཕ་རོལ་ཏུ་ཕྱིན་པའི་ལམ་གྱི་ཐབས་མཁས་པ་ཇི་སྙེད་པ་གཞིར་བཞག་པའི་སྟེང་དུ། དེ་དག་ཏུ་མིང་ཙམ་ཡང་མ་གྲགས་

པའི་རིམ་པ་གཉིས་ཀྱི་རྣལ་འབྱོར་དང་བཟླས་བསྒོམ་དང་ལས་ཀྱི་ཚོགས་རབ་འབྱམས་དང་རྟོགས་པ་བརྟན་པའི་ཐབས་ཀྱི་སྤྱོད་པ་ལ་སོགས་པ་མཆོག་དང་ཐུན་མོང་གི་དངོས་གྲུབ་སྒྲུབ་པའི་ཐབས་ཟབ་པ་དང་རྒྱ་ཆེ་བའི་རིམ་པ་མང་དུ་ཡོད་པའི་ཕྱིར་ཏེ། དཔེར་ན། ཀྱེ་རྡོ་རྗེ་
ལས། སྐྱེ་བོ་མི་བཟད་པ་ཡི་ལས། །གང་དང་གང་གིས་འཆིང་འགྱུར་བ། །ཐབས་དང་བཅས་ན་དེ་ཉིད་ཀྱིས། །སྲིད་པའི་འཆིང་བ་ལས་གྲོལ་འགྱུར། །ཞེས་བྱ་བ་ལྟ་བུ་རྒྱ་ཆེར་གསུངས་པའི་ཕྱིར་རོ། །འོ་ན་དེ་ལྟ་བུ་ནི་མཚན་ཉིད་ཐེག་པ་ལས་ཀྱང་བཤད་དེ། དཀོན་མཆོག་བརྩེགས་པ་
ལས། དཔེར་ན་གྲོང་ཁྱེར་གྱི་ལུད་གང་ཡིན་པ་དེས་འབྲས་སམ་བུ་རམ་གྱི་ཞིང་ལ་ཕན་འདོགས་སོ། །དེ་བཞིན་དུ་བྱང་ཆུབ་སེམས་དཔའི་ཉོན་མོངས་པའི་ལུད་གང་ཡིན་པ་དེས་བྱང་ཆུབ་ཀྱི་མྱུ་གུ་ལ་ཕན་འདོགས་སོ་ཞེས་གསུངས་པས་སོ་སྙམ་ན་དེ་ནི་ས་ཐོབ་པའི་ཚེ་ཡིན་གྱིས་མ་ཐོབ་པ་
ཕྱིན་ཆད་ཀྱི་གང་ཟག་གིས་ནི་འདོད་པའི་ཡོན་ཏན་ལྔ་ལ་སོགས་པའི་ཡུལ་སྤོང་བ་ཉིད་ལམ་དུ་བྱེད་པ་སྟེ། མདོ་ལས། འདོད་པ་རྣམས་ནི་དུག་གི་ལོ་མ་ལྟ་བུའོ། །ཞེས་སོགས་དང༌། སློབ་མ་ལ་སྤྲིང་བ་ལས། ཡུལ་དང་དུག་མཚུངས་དང་པོ་མྱོང་བ་ཙམ་ན་བདེ། །ཡུལ་དང་དུག་
མཚུངས་རྣམ་པར་སྨིན་པ་རྩུབ་ལ་མི་བཟད་པ། །ཡུལ་དང་དུག་མཚུངས་གཏི་མུག་མུན་པས་ཐིབས་པོར་བྱེད། །ཡུལ་དང་དུག་མཚུངས་ཤུགས་བཟློག་དཀའ་ཞིང་གཡོ་བ་ཡིན། །ཞེས་འབྱུང་བ་ལྟ་བུའོ། །དཀའ་བ་མེད་པས་བྱང་ཆུབ་འགྲུབ་པའི་ཁྱད་པར་ཡོད་དེ། ཕ་རོལ་ཏུ་ཕྱིན་པ་བ་ནི་
བསྐལ་པ་གྲངས་མེད་གསུམ་ལ་སོགས་པར་མགོ་དང་རྐང་ལག་གི་བར་གྱི་བདོག་པ་གཏོང་བ་ལ་སོགས་པ་དཀའ་སྤྱད་དང་དཀའ་ཐུབ་ཀྱི་ལམ་ཡིན་པས་ཚེགས་ཆེན་པོས་བསྒྲུབ་དགོས་ལ། གསང་སྔགས་པ་ནི་དེ་ལྟ་བུ་མ་ཡིན་པར་སྤྱོད་པ་བདེ་བས་བྱང་ཆུབ་འགྲུབ་པའི་ལམ་ཡིན་པའི་ཕྱིར་རོ། །
དེ་སྐད་དུ་ཡང་གསང་བ་འདུས་པ་ལས། དཀའ་ཐུབ་སྡོམ་པ་མི་བཟད་པ། །བསྟེན་ཀྱང་འགྲུབ་པར་མི་འགྱུར་གྱི། །འདོད་པའི་ལོངས་སྤྱོད་ཐམས་ཅད་ལ། །བརྟེན་ན་མྱུར་དུ་འགྲུབ་པར་འགྱུར། །ཞེས་དང༌། འདོད་པའི་ཡོན་ཏན་ཐམས་ཅད་ལ། །ཅི་བདེ་བར་ནི་བརྟེན་བཞིན་དུ། །རང་གི་

ལྷ་ཡི་སྦྱོར་བ་ཡིས། །བདག་དང་གཞན་ལ་མཆོད་པར་བྱ། །ཞེས་དང༌། སློབ་དཔོན་བཛྲ་པཱ་ཎིས། གཞན་ཡང་དཀའ་བ་མེད་པ་སྟེ་བདེ་བ་ཆེན་པོ་ལམ་དུ་བྱེད་པའོ། །ཕ་རོལ་ཏུ་ཕྱིན་པ་ནི་བཏང་སྙོམས་པ་དང་ཉམས་སུ་མྱོང་བ་མེད་དོ། །རྒྱུ་ལམ་དུ་བྱེད་པས་ན་རྒྱུའི་ཐེག་པའོ། །འབྲས་བུ་
ལམ་དུ་བྱེད་པས་ན་འབྲས་བུའི་ཐེག་པ་ཁྱད་པར་དུ་འཕགས་སོ་ཞེས་གསུངས་པའི་ཕྱིར་རོ། །འོ་ན་སྡུད་པ་ཚིགས་སུ་བཅད་པ་ལས། བྱང་ཆུབ་སེམས་དཔའ་འདོད་པའི་ཡོན་ཏན་ལྔ་སྤྱོད་ཀྱང༌། །སངས་རྒྱས་ཆོས་དང་འཕགས་པའི་དགེ་འདུན་སྐྱབས་སོང་སྟེ། །སངས་རྒྱས་བསྒྲུབ་བྱ་
སྙམ་དུ་ཀུན་མཁྱེན་ཡིད་བྱེད་པ། །མཁས་པ་ཚུལ་ཁྲིམས་ཕ་རོལ་ཕྱིན་གནས་རིག་པར་བྱ། །ཞེས་གསུངས་པ་དང་མཚུངས་སོ་སྙམ་ན། དེ་ནས་བཤད་པ་ནི་བྱང་ཆུབ་སེམས་དཔའ་མི་སྐྱེ་བའི་ཆོས་ལ་བཟོད་པ་ཐོབ་པ་ཉིད་ནས་ཡིན་ལ། གསང་སྔགས་ཀྱི་སྐབས་ནས་བཤད་པ་ནི་
དབང་བསྐུར་བ་ཐོབ་པའི་དུས་ཉིད་ནས་ཆོས་ཐམས་ཅད་ལྷག་པའི་ལྷར་ངོ་སྤྲོད་ཅིང་མཆོད་པ་དང་མི་འབྲལ་བར་བྱ་བ་ཡིན་པས་ཁྱད་པར་ཆེ་སྟེ། དུས་འདི་ཉིད་ནས་བཟུང་ནས་ནི། །འཁོར་བའི་ཉེས་པས་མ་གོས་པར། །མཆོད་པ་འདི་དང་ལྡན་པར་ནི། །དུས་ཀུན་དུ་ནི་བདེ་བར་གནས། །
ཞེས་བྱ་བ་ལ་སོགས་པ་རྒྱུད་གཞུང་མང་པོ་ནས་བཤད་པའི་ཕྱིར་རོ། །དབང་པོ་རྣོན་པོས་དབང་དུ་བྱས་པའི་ཁྱད་པར་ཡོད་དེ། ཕ་རོལ་ཏུ་ཕྱིན་པར། རྟུན་པ་རབ་ཀྱིས་ཇི་ལྟར་མྱུར་ཡང་མངོན་པར་རྫོགས་པར་འཚང་རྒྱ་བ་ལ་བསྐལ་པ་གྲངས་མེད་གསུམ་དུ་ཐོགས་ལ། རྡོ་རྗེ་ཐེག་པར་གང་
ཟག་དབང་པོ་རབ་ཀྱིས་ཚེ་འདི་ཉིད་ལ་འགྲུབ་པར་གསུངས་ཏེ། གསང་བ་འདུས་པ་ལས། འདིས་ནི་དེ་བཞིན་གཤེགས་པའི་སྐུ། །ཆོས་འཛིན་མཆོག་གི་གསུང་དང་ནི། །རྡོ་རྗེ་འཛིན་པའི་ཐུགས་དག་ཀྱང༌། །ཚེ་འདི་ཉིད་ལ་སྟེར་བར་བྱེད། །ཅེས་གསུངས་པའི་ཕྱིར་རོ། །འོ་ན་
གསང་ཆེན་ཐབས་ལ་མཁས་པའི་མདོ་ལས། མི་སྐྱེ་བའི་ཆོས་ལ་བཟོད་པ་ཐོབ་པའི་བྱང་ཆུབ་སེམས་དཔའ་འདོད་ན་ཞག་བདུན་ན་བླ་ན་མེད་པའི་བྱང་ཆུབ་ཐོབ་བོ་ཞེས་ཀྱང་བཤད་ན། གསང་སྔགས་དང་ཁྱད་པར་ཡོད་པ་མི་གྲུབ་བོ་སྙམ་ན། དེ་ནི་ཕྱིར་མི་ལྡོག་པའི་ས་ཐོབ་པ་ལ་

བཤད་པའི་ཕྱིར་ན་ཁྱད་པར་ཆེའོ། །སྔགས་ལས་ནི་སྡིག་པ་ཆེན་པོ་བྱེད་པས་ཀྱང་འགྲུབ་པར་གསུངས་ཏེ། ཇི་སྐད་དུ། སེམས་ཅན་མཚམས་མེད་ལྔ་ལ་སོགས། །སྡིག་པ་ཆེན་པོ་བྱེད་པས་ཀྱང༌། །རྡོ་རྗེ་ཐེག་པའི་རྒྱ་མཚོ་སྟེ། །ཐེག་མཆོག་འདི་ལ་
འགྲུབ་པར་འགྱུར། །ཞེས་སོ། །གཞན་ཡང་ཁ་ཅིག་འདི་སྐད་དུ། དུས་ཀྱི་མཐར་གསང་སྔགས་སྤྱོད་པའི་དུས་མ་ཡིན་ཞེས་སྨྲ་བ་ཡང་རིགས་པ་མ་ཡིན་ཏེ། རྣལ་འབྱོར་མ་ཀུན་དུ་སྤྱོད་པ་ལས། གཞན་ཡང་ཕྱི་མའི་དུས་ཀྱི་ཚེ། །དུས་མཐར་དངོས་གྲུབ་མི་ཐོབ་སྟེ། །ཆོས་
འདི་དེ་ལྟར་ཤེས་ནས་ནི། །བསམ་པ་ཐམས་ཅད་རྫོགས་བྱེད་ཡིན། །ཞེས་དང༌། ཧེ་རུ་ཀ་མངོན་པར་འབྱུང་བ་ལས། ཧེ་རུ་ཀ་དཔལ་གཟུང་བྱས་ན། །སྙིགས་མའི་དུས་སུ་འགྲུབ་པར་འགྱུར། །ཞེས་སོ། །གཉིས་པ་ཁྱད་པར་དུ་འཕགས་པའི་རྒྱུད་སྡེའི་དབྱེ་བ་ལ་གསུམ་སྟེ།
གཉིས་དང་གསུམ་དུ་བསྡུ་བ་དང༌། །བཞིར་བཞག་པ་དང༌། ལྔ་དང་དྲུག་ཏུ་དབྱེ་བའོ། །དང་པོ་ནི། རྣམ་སྣང་སྒྱུ་འཕྲུལ་དྲྭ་བར། ཕྱི་ནང་དབྱེ་བ་ཤེས་པ་ཡིས། །རྒྱུད་སྡེའི་དབྱེ་བ་ཤེས་པར་འགྱུར། །ཞེས་དང༌།་གྲུབ་ཆེན་ཨ་བྷ་ཡཱ་ཀ་རས། དཀྱིལ་འཁོར་ལ་སོགས་ཆོ་ག་ནི། །
སྟོན་པས་རྒྱུད་སྡེ་གཉིས་སུ་སྤྲོས། །ཞེས་དང༌། འཇིག་རྟེན་གསུམ་རྒྱལ་གྱི་རྟོག་པའི་འགྲེལ་པ་ལས། གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཀྱི་ལམ་ཡང་སངས་རྒྱས་བཅོམ་ལྡན་འདས་ཀྱིས་རྣམ་པ་གཉིས་སུ་གསུངས་ཏེ། སེམས་ཅན་
རྟོག་པ་མང་བ་རྣམས་ཀྱི་དོན་དུ་བྱ་བའི་རྒྱུད་རྣམས་གསུངས་སོ། །གཅིག་ཁོ་ནར་རྣལ་འབྱོར་གྱིས་བསྒྲུབ་པར་འདོད་པ་རྣམས་ལ་རྣལ་འབྱོར་གྱི་རྒྱུད་རྣམས་བཤད་དོ་ཞེས་གསུངས་པ་རྣམས་ཀྱིས་རྒྱུད་སྡེ་རིན་པོ་ཆེ་རྣམ་པ་གཉིས་སུ་བསྡུ་བའི་ཚུལ་དུ་མཛད་པ་ཡིན་ནོ། །ཐམས་ཅད་
གསང་བའི་རྒྱུད་ལས། བྱ་སྤྱོད་གཉིས་ཀ་རྣལ་འབྱོར་རྒྱུད། །ཅེས་དང༌། སྔགས་དོན་རྣམ་གཟིགས་ལས། རྣལ་འབྱོར་སྤྱོད་དང་བྱ་བའི་རྒྱུད། །ཅེས་དང༌། རྡོ་རྗེ་བདུད་རྩིའི་འགྲེལ་པར། རྒྱུད་ཐམས་ཅད་ནི་བྱ་བའི་རྒྱུད་དང་སྤྱོད་པའི་རྒྱུད་དང་གསང་བའི་རྒྱུད་ཁ་ཅིག་གོ་ཞེས་དང༌།

སློབ་དཔོན་ཀུན་དགའ་སྙིང་པོས་དེ་ཉིད་སྣང་ཆེན་དུ། ཐམས་ཅད་ཅེས་བྱ་བ་ནི་བྱ་བའི་རྒྱུད་དང༌། སྤྱོད་པའི་རྒྱུད་དང་གཉིས་ཀའི་རྒྱུད་རྣམས་སོ་ཞེས་གསུངས་པ་རྣམས་ཀྱིས་རྒྱུད་སྡེ་རིན་པོ་ཆེ་རྣམ་པ་གསུམ་དུ་བསྡུ་བའི་ཚུལ་དུ་བཞེད་པ་ཡིན་ནོ། །གཉིས་པ་ནི། དཔལ་དགེས་པའི་རྡོ་རྗེའི་
བཤད་པའི་རྒྱུད་ཐུན་མོང་མ་ཡིན་པ་རྡོ་རྗེ་གུར་ལས། དམན་པ་རྣམས་ལ་བྱ་བའི་རྒྱུད། །བྱ་མིན་རྣལ་འབྱོར་དེ་ལྟག་ལ། །སེམས་ཅན་མཆོག་ལ་རྣལ་འབྱོར་མཆོག །རྣལ་འབྱོར་བླ་མེད་དེ་ལྟག་ལ། །ཞེས་དང༌། ཡང་དག་པར་སྦྱོར་བའི་རྒྱུད་ལས། གཉིས་གཉིས་འཁྱུད་དང་ལག་
བཅང་དང༌། །དགོད་དང་བལྟས་པས་འཁྲིག་པ་ཡིན། །སྲིན་བུའི་ཚུལ་གྱིས་རྒྱུད་བཞིར་གནས། །ཞེས་གསུངས་པ་རྣམས་ཀྱིས་རྒྱུད་སྡེ་རིན་པོ་ཆེ་རྣམ་པ་བཞིར་བཞག་པའི་ལུགས་སོ། །གསུམ་པ་ནི། དཔལ་ཀྱེ་རྡོ་རྗེའི་རྩ་བའི་རྒྱུད་ལས། དགོད་དང་བལྟ་བ་དག་གིས་དང༌། །
འཁྱུད་དང་དེ་བཞིན་གཉིས་གཉིས་ཀྱིས། །རྒྱུད་ཀྱང་རྣམ་པ་བཞི་རྣམས་ཀྱིས། །དགོངས་པའི་སྐད་ནི་མ་བསྒྲགས་པ། །ཞེས་བྱ་བས་བཞི་ནི་དངོས་སུ་བསྟན་ནས། མ་བསྒྲགས་ཞེས་པའི་ཤུགས་ལས་ནི་རྒྱུད་སྡེ་ལྔ་པ་སྟོན་པར་སློབ་དཔོན་བྷ་བི་ལྷ་ལ་སོགས་པ་བཞེད་པས་རྒྱུད་
སྡེ་ལྔ་དང༌། དཔལ་མཁའ་འགྲོ་རྒྱ་མཚོ་ལས་ནི། བྷ་ག་རྣམས་སུ་རྒྱུད་རྣམ་ལྔ། །བྱ་བ་ལ་སོགས་བླ་མེད་མཐར། །ཞེས་དང༌། སློབ་དཔོན་བཛྲ་པཱ་ཎིས། ཐབས་ཀྱི་རྒྱུད་ལ་ལྔ་སྟེ། བྱ་བའི་རྒྱུད་དང༌། སྤྱོད་པའི་རྒྱུད་དང༌། རྣལ་འབྱོར་གྱི་རྒྱུད་དང༌། རྣལ་འབྱོར་བླ་ན་མེད་པའི་རྒྱུད་
དང༌། རྣལ་འབྱོར་གོང་ན་མེད་པའི་རྒྱུད་དོ་ཞེས་དང༌། སློབ་དཔོན་ཤཱནྟི་པས། ཟབ་ཅིང་རྒྱ་ཆེ་བ་དང་ལྡན་པའི་ཐེག་པ་ནི་བྱ་བ་དང༌། སྤྱོད་པ་དང༌། རྣལ་འབྱོར་དང༌། རྣལ་འབྱོར་ཆེན་པོ་དང༌། རྣལ་འབྱོར་བླ་ན་མེད་པ་ཞེས་བྱ་བ་རྣམ་པ་ལྔར་འགྱུར་རོ་ཞེས་དང༌། རབ་ཏུ་སྒྲོན་
གསལ་ལས། རྡོ་རྗེ་འཆང་ཆེན་པོས་བསམ་པ་དང་བག་ལ་ཉལ་བ་དང་ཁམས་དང་བག་ཆགས་ཀྱི་དབྱེ་བས་སྔགས་ཀྱི་བསྟན་བཅོས་རྣམ་པ་ལྔ་རུ་གསུངས་ཏེ། བྱ་བ་དང༌། སྤྱོད་པ་དང༌། རྣལ་འབྱོར་དང༌། རྣལ་འབྱོར་གྱི་བླ་མ་དང༌། རྣལ་འབྱོར་མའི་རྒྱུད་ཀྱི་དབྱེ་བས་སོ་ཞེས་

གསུངས་པ་རྣམས་ཀྱིས་རྒྱུད་སྡེ་རིན་པོ་ཆེ་རྣམ་པ་ལྔར་དབྱེ་བའི་ལུགས་སུ་འདྲེན་པ་ཡིན་ནོ། །བདེ་མཆོག་ལེའུ་ལྔ་བཅུ་རྩ་གཅིག་པ་ལས་ནི། ཇི་སྲིད་མདོ་བྱ་སྤྱོད་པ་དང༌། །རྣལ་འབྱོར་གསང་མཐའི་དབྱེ་བ་ལས། །སེམས་ཅན་མོས་པ་སྣ་ཚོགས་པ། །དེ་དང་
དེ་ལ་དགའ་བ་སྦྱིན། །ཞེས་མདོ་སྡེ་རྟོག་པའི་རྒྱུད་དང༌། བྱ་བའི་རྒྱུད་དང༌། སྤྱོད་པའི་རྒྱུད་དང༌། རྣལ་འབྱོར་གྱི་རྒྱུད་དང༌། རྣལ་འབྱོར་བླ་ན་མེད་པའི་རྒྱུད་དང༌། རྣལ་འབྱོར་གསང་མཐའི་རྒྱུད་དེ་རྒྱུད་སྡེ་རིན་པོ་ཆེ་སྒོ་དྲུག་ཏུ་དབྱེ་བ་འདི་ནི་གྲུབ་ཆེན་ན་རོ་ཏ་པ་རྗེས་སུ་འབྲང་བ་དང་བཅས་པའི་
བཞེད་པ་ཡིན་ཏེ། དེ་དག་ལ་ཡང་ནང་གསེས་ཀྱི་དབྱེ་བའི་ཚུལ་མི་འདྲ་བ་དག་ཡོད་དོ། །གསུམ་པ་དབྱེ་བ་དེ་དང་ལྡན་པའི་གྲངས་ངེས་པ་ནི། དེ་ལྟར་མཁས་ཤིང་གྲུབ་པ་བརྙེས་པའི་སློབ་དཔོན་ཆེན་པོ་རྣམས་ཀྱིས་རྒྱུད་སྡེ་སོ་སོའི་རྗེས་སུ་འབྲང་བའི་བཤད་སྲོལ་མི་འདྲ་བའི་དབང་
ལས་རྒྱུད་སྡེའི་དབྱེ་སྒོ་མང་ཉུང་ཅི་རིགས་པ་ཞིག་འབྱུང་ཡང༌། རྣམ་པར་དབྱེ་བ་དང་རིས་སུ་བསྡུ་བའི་ཁྱད་པར་ཅུང་ཟད་ཙམ་བྱས་པ་ཡིན་གྱི། དོན་ལ་རྒྱུད་སྡེ་རིན་པོ་ཆེ་རྣམ་པ་བཞིར་ངེས་པ་ནི། འདི་ལྟར། ཕྱི་རོལ་མུ་སྟེགས་བྱེད་རྣམས་ཀྱི་ལུགས་ལ་ལོག་པའི་སྤྱོད་པ་བཞི་ཡོད་པས་དེ་རྗེས་
སུ་གཟུང་བའི་ཕྱིར་དུ་རྒྱུད་སྡེ་བཞིར་ངེས་པ་དང༌། སངས་རྒྱས་པ་ལ་གྲུབ་མཐའ་མི་འདྲ་བ་བཞི་ཡོད་པས་དེ་དང་ལུང་སྒོ་བསྟུན་གྱི་དབང་དུ་བྱས་ནས་བསྐྱེད་ཆོག་མི་འདྲ་བ་བཞིས་རྒྱུད་སྡེ་བཞིར་ངེས་པ་དང༌། འདོད་པའི་ཁམས་ཀྱི་སེམས་ཅན་ལ་འདོད་ཆགས་ཀྱི་སྤྱོད་པ་མི་འདྲ་བ་བཞི་
ཡོད་པས་དེ་མ་སྤངས་ཀྱང་ལམ་དུ་བྱེད་པའི་གཉེན་པོ་བཞི་ཡིན་པས་རྒྱུད་སྡེ་བཞིར་ངེས་པའོ། །དང་པོ་ནི་འདོད་ཆགས་ཅན་ལྷ་ཆེན་པོའི་རྗེས་སུ་འབྲང་བ་ཁ་ཅིག་ནི། འདི་སྐད་དུ། གོ་ཧཾ་བུད་མེད་མེ་ཡིན་ཏེ། །དེ་ཡི་ཉེ་གནས་ཐབ་ཁུང་ཡིན། །ཞེས་བྱ་བ་ལ་སོགས་པ་མངོན་པར་ཞེན་པ་
ཆོས་སུ་སྨྲ་ཞིང་གཙང་དམེ་མེད་པར་ཁྱི་དང་ཕག་པའི་བརྟུལ་ཞུགས་སྐྱོང་བ་དག་ཡོད་དེ། དེ་རྣམས་རྗེས་སུ་གཟུང་བའི་ཕྱིར་དུ་རྣལ་འབྱོར་བླ་ན་མེད་པའི་རྒྱུད་གསུངས་ཏེ། བདེ་མཆོག་ལས། སྒྱུ་མ་དག་ནི་ཐམས་ཅད་ལས། །བུད་མེད་སྒྱུ་མ་ཁྱད་པར་འཕགས། །ཞེས་དང༌། གསང་བ་

འདུས་པ་ལས། ཆགས་ཅན་ཡེ་ཤེས་འདོད་པ་ཡིས། །རྟག་ཏུ་འདོད་ཡོན་རྣམ་ལྔ་བསྟེན། །ཞེས་སོ། །ཞེ་སྡང་ཅན་ཁྱབ་འཇུག་གི་རྗེས་སུ་འབྲང་བ་ཁ་ཅིག་ནི། མཆོད་སྦྱིན་གྱི་རིག་བྱེད་ལས། བར་གྱི་དུས་ལ་བབ་པ་ན། །བྱོལ་སོང་དྲུག་གམ་བདུན་སྦྱར་བྱ། །རྟ་ཡི་གཙང་མའི་རིགས་
ཡིན་ནོ། །ཉུང་བ་བྱོལ་སོང་གསུམ་གྱིས་སོ། །ཞེས་བྱ་བ་དང༌། རྒྱལ་རིགས་ལ་ནི་རྒྱལ་རིགས་དང༌། །བྲམ་ཟེ་འདོད་པས་བྲམ་ཟེ་གསད། །མ་རུངས་དག་ལ་རྗེ་རིགས་ཏེ། །དམངས་རིགས་ལ་ནི་དམངས་རིགས་གསད། །ཅེས་བྱ་བ་ལ་སོགས་པ་རྣམ་པར་འཚེ་བ་ཆོས་སུ་སྨྲ་བ་
དག་ཡོད་དེ། དེ་དག་རྗེས་སུ་གཟུང་བའི་ཕྱིར་དུ་སྤྱོད་པའི་རྒྱུད་གསུངས་ཏེ། ཁྲོ་བོ་ཁམས་གསུམ་རྣམ་པར་རྒྱལ་བའི་རྟོག་པ་ལས། བཅོམ་ལྡན་འཇམ་པའི་དབྱངས་ཉིད་ནི། །ཁྲོ་བོའི་མིང་ནི་གཤིན་རྗེའི་གཤེད། །དེ་མཐོང་ནས་ནི་ཁྲོ་བོ་གཞན། །ཐམས་ཅད་ཀྱིས་ནི་
ལག་ཆ་ཤོར། །ཞེས་དང༌། དེ་ནས་འདིར་ནི་གསད་བྱ་བ། །ཇི་ལྟར་ཡང་དག་སྦྱོར་ལྡན་པས། །དོགས་པ་མེད་པར་འགྲུབ་པར་འགྱུར། །གསོད་པའི་མཆོག་ནི་བཤད་པར་བྱ། །ཞེས་དང༌། དེ་ནས་གང་གིས་ལངས་པ་ལས། །མཚོན་ཆ་རྣོན་པོ་འབར་བ་ཡིས། །བསད་
པའི་ཤ་དང་ཁྲག་བཅས་པའི། །ཨརྒྷ་དེ་ལ་དབུལ་བར་བྱ། །ཞེས་གསུངས་སོ། །གཏི་མུག་ཅན་ཚངས་པའི་རྗེས་སུ་འབྲང་བ་ཁ་ཅིག་ནི།འདི་སྐད་དུ། འདག་ཆལ་དག་གིས་བགོས་པའི་གོས། །དྲི་མ་མེད་པར་འགྱུར་བ་བཞིན། །ལུས་ལ་མཆོད་སྦྱིན་གྱིས་བསྒོས་པ། །འབབ་སྟེགས་
བཀྲུས་པའང་དེ་ལྟར་འདག །ཅེས་བྱ་བ་ལ་སོགས་པ་གཙང་སྦྲའི་སྤྱོད་པ་ཆོས་སུ་སྨྲ་བ་དག་ཡོད་དེ། དེ་དག་རྗེས་སུ་གཟུང་བའི་ཕྱིར་དུ་བྱ་བའི་རྒྱུད་གསུངས་ཏེ། ལེགས་པར་གྲུབ་པ་ལས། ཁྲུས་བྱས་གཙང་ཞིང་གཟུང་བྱ་སྟེ། །བཀྲ་ཤིས་ངོ་མཚར་དག་བྱས་ནས། །བསྒྲུབ་པའི་རྫས་ནི་
ཡོངས་སུ་བཟུང༌། །ཞེས་དང༌། དུས་སུ་ཟོས་ནས་དུས་སུ་ཁྲུས་བྱས་ནས། །ཕྲེང་བ་མར་མེ་བདུག་པ་བསྟོད་དང་དྲི། །ཤ་ཆང་མེད་པའི་ལྷ་བཤོས་ཕུལ་ནས་སུ། །ཀུ་ཤའི་ཁྲེས་ལ་འདུག་ལ་བཟླས་བརྗོད་བརྩམ། །ཞེས་སོ། །རྐྱེན་མཉམ་པ་སྐབས་ཐོབ་ཀྱིས་གསུམ་ཀའི་རྗེས་སུ་འབྲང་

བ་ཁ་ཅིག་ནི། དེ་དག་ལས་གང་དང་གང་སྨྲ་བའི་སློབ་དཔོན་དང་ཕྲད་པ་དེ་དང་དེའི་སྤྱོད་པའི་རྗེས་སུ་སྐྱོང་བ་དག་ཡོད་དེ། དེ་རྣམས་རྗེས་སུ་གཟུང་བའི་ཕྱིར་དུ་རྣལ་འབྱོར་གྱི་རྒྱུད་གསུངས་ཏེ།དེ་ཉིད་འདུས་པའི་དུམ་བུ་དང་པོ་རྡོ་རྗེ་དབྱིངས་ཀྱི་དུམ་བུ་ལས་ནི་འདོད་ཆགས་ཅན་
རྗེས་སུ་གཟུང་བའི་ཕྱིར་དུ་ལྷ་ཐམས་ཅད་ཆགས་པའི་ཉམས་ཅན་དང༌། ཁམས་གསུམ་རྣམ་པར་རྒྱལ་བའི་དུམ་བུ་ལས་ནི་ཞེ་སྡང་ཅན་རྗེས་སུ་བཟུང་བའི་ཕྱིར་དུ་ཁྲོ་བོའི་ཉམས་ཅན་དང༌། འགྲོ་བ་འདུལ་བའི་དུམ་བུ་ལས་ནི་གཏི་མུག་ཅན་རྗེས་སུ་གཟུང་བའི་ཕྱིར་དུ་ཞི་བའི་ཉམས་ཅན་དང༌། དོན་
ཐམས་ཅད་གྲུབ་པའི་དུམ་བུ་ལས་ནི་ལྷ་རྣམས་ཀྱི་སྐུ་མདོག་དང་ཉམས་སྣ་ཚོགས་པར་གསུངས་སོ། །འདི་ནི་དེ་ཉིད་འདུས་པའི་རྒྱུད་ཀྱི་རྗེས་སུ་འབྲངས་ནས། སློབ་དཔོན་རབ་འབྱོར་བསྐྱངས་དང་ཀུན་དགའ་སྙིང་པོ་ལ་སོགས་པ་རྣམས་ཀྱི་བཞེད་པ་ཡིན་ནོ། །གཉིས་པ་ནི། སངས་རྒྱས་པའི་
མཚན་ཉིད་ཐེག་པ་ལ་གྲུབ་མཐའ་མི་འདྲ་བ་བཞི་ཡོད་པའི་ཉན་ཐོས་གནས་མ་བུ་པ་དང༌། ཉི་འོག་བྱེ་བྲག་ཏུ་སྨྲ་བ་དག་ནི་བརྗོད་དུ་མེད་པའི་གང་ཟག་གི་བདག་ཁས་ལེན་པ་ལྟར། དེ་དང་ལུང་སྒོ་བསྟུན་གྱི་དབང་དུ་བྱས་ན། བྱ་བའི་རྒྱུད་ལ་བདག་དང་རས་བྲིས་གཉིས་ཀ་མ་ཡིན་པའི་ཡེ་ཤེས་སེམས་
དཔའ་ཞེས་བྱ་བ་ནི་འདོད་པ་ཡིན་ནོ། །ཡང་ཉན་ཐོས་ཁ་ཆེ་བྱེ་བྲག་ཏུ་སྨྲ་བ་དང་མདོ་སྡེ་པ་གཉིས་ནི། གང་ཟག་གི་བདག་ཁས་ལེན་པར་མི་འདོད་ཀྱང་ཡུལ་རྡུལ་ཕྲན་དང་འཛིན་པའི་ཤེས་པ་སྐད་ཅིག་ཆ་མེད་ཀྱི་བདེན་པར་ཁས་ལེན་པ་ལྟར། སྤྱོད་པའི་རྒྱུད་དུ་བདག་ཉིད་དམ་ཚིག་སེམས་དཔའ་དང་
མདུན་དུ་ཡང་ཡེ་ཤེས་སེམས་དཔའ་གཉིས་ཀ་འདོད་པ་ཡིན་ནོ། །འཕགས་པ་རང་སངས་རྒྱས་ནི། ཇི་སྐད་དུ། གཟུང་བའི་རྟོག་པ་སྤང་ཕྱིར་དང༌། །འཛིན་པ་མི་སྤང་ཕྱིར་ན་ཡང༌། །རྟེན་གྱི་བསེ་རུ་ལྟ་བུའི་ལམ། །ཞེས་མངོན་པར་རྟོགས་པའི་རྒྱན་ལས་འབྱུང་བ་ལྟར། ཀུན་རྫོབ་དུ་གཟུང་
འཛིན་གཉིས་ཀ་འདོད་ཀྱང་དོན་དམ་པར་གཟུང་བར་བྱ་བའི་ཡུལ་བདེན་པར་མི་འདོད་ལ། འཛིན་པའི་ཤེས་པ་སྐད་ཅིག་མ་བདེན་པར་ཁས་ལེན་པ་ལྟར། རྣལ་འབྱོར་གྱི་རྒྱུད་ལ་བདག་ཉིད་དམ་ཚིག་སེམས་དཔར་བསྐྱེད་པ་ལ་ཡེ་ཤེས་སེམས་དཔའ་བཅུག་ནས་སླར་ཡང་དེ་ཉིད་གཤེགས་སུ་

གསོལ་བར་འདོད་པ་ཡིན་ནོ། །ཐེག་པ་ཆེན་པོ་སེམས་ཙམ་པ་དང་དབུ་མ་པ་ནི་ཀུན་རྫོབ་ཏུ་གཟུང་འཛིན་གཉིས་ཀ་འདོད་ལ། དོན་དམ་པར་གཟུང་འཛིན་གཉིས་ཀ་བདེན་པ་མེད་པར་ཁས་ལེན་པ་ལྟར། རྣལ་འབྱོར་བླ་ན་མེད་པའི་རྒྱུད་ལ་དམ་ཚིག་སེམས་དཔའ་དང་ཡེ་ཤེས་སེམས་དཔའ་དབྱེར་མེད་དུ་བསྲེས་ནས།
ཐུན་མཚམས་ཀྱི་གནས་སྐབས་སུ་ཡང་ཡེ་ཤེས་སེམས་དཔའ་གཤེགས་སུ་གསོལ་བར་མི་འདོད་པ་སྟེ། དེ་དག་དང་ལུང་སྒོ་བསྟུན་གྱི་དབང་དུ་བྱས་ན་བསྐྱེད་ཆོག་རྣམ་པ་བཞིས་རྒྱུད་སྡེ་བཞིར་བཞག་པ་ནི་ཡེ་ཤེས་རྡོ་རྗེ་ཀུན་ལས་བཏུས་པའི་རྒྱུད་ཀྱི་རྗེས་སུ་འབྲངས་ནས་འཕགས་པ་ཡབ་
སྲས་ལ་སོགས་པའི་བཞེད་པའོ། །གསུམ་པ་ནི། དཔལ་རྡོ་རྗེ་སྙིང་པོ་རྒྱན་ལས། འདི་ནི་གཉིས་པོ་འཁྱུད་པ་ཡིས། །རྒྱུད་ཀྱི་དབྱེ་བ་བསྟན་པའོ། །དེ་བཞིན་དུ་ནི་ལག་བཅང་དང༌། །དགོད་དང་བལྟས་པས་ཤེས་པར་བྱ། །ཞེས་གསུངས་པའི་དོན་ནི་འདོད་པའི་ཁམས་ཀྱི་གཞན་
འཕྲུལ་དབང་བྱེད་པ་བལྟས་པ་ཙམ་གྱི་བདེ་བས་ཆགས་པ་ཚིམ་ལ། དེ་ཙམ་གྱི་བདེ་བ་གནང་བ་ནི་བྱ་བའི་རྒྱུད་དེ། བྱ་བའི་རྒྱུད་རྡོ་རྗེ་གཙུག་ཏོར་ལས། དཀྱིལ་འཁོར་ལྷ་རྣམས་ཐམས་ཅད་ནི། །དཀར་པོའི་རིགས་ལ་རྟག་གནས་ཤིང༌། །ཕོ་ནི་མོ་ལ་བལྟ་བ་དང༌། །མོ་ཡང་ཕོ་ལ་བལྟ་བ་བྲི། །
ཞེས་སོ། །འཕྲུལ་དགའ་བ་ནི་དགོད་པ་ཙམ་གྱི་བདེ་བས་ཚིམ་ལ། དེ་ཙམ་གྱི་བདེ་བ་གནང་བ་ནི་སྤྱོད་པའི་རྒྱུད་དེ། རྣམ་པར་སྣང་མཛད་མངོན་པར་བྱང་ཆུབ་པ་ལས། མགོན་པོ་རལ་པའི་ཐོར་ཚུགས་ཅན། །ཕོ་ཉ་རྣམས་ཀྱིས་ཡོངས་སུ་བསྐོར། །བཞིན་ནི་བག་ཙམ་འཛུམ་པ་བྲི། །ཞེས་
སོ། །དགའ་ལྡན་པ་དང་འཕྲུལ་དགའ་བ་ནི་ལག་བཅང་དང་འཁྱུད་པ་ཙམ་གྱི་བདེ་བས་ཚིམ་ལ། དེ་ཙམ་གྱི་བདེ་བ་གནང་བ་ནི་རྣལ་འབྱོར་གྱི་རྒྱུད་དེ། དཔལ་མཆོག་དང་པོ་ལས། དཀྱིལ་འཁོར་གྱི་ནི་ལྷ་རྣམས་ཀུན། །དཔུང་པ་ཡིད་ཙམ་བསྡམ་པར་བཞག །ཅེས་དང༌། རྡོ་རྗེ་རྩེ་མོ་ལས།
དེ་ཡི་གཡོན་ལོགས་ལྷ་མོ་ནི། །འཛུམ་བཅས་ཟླ་བའི་འོད་མངའ་བ། །ཀུན་དུ་རྣམ་པར་ལྟ་བས་ཏེ། །བཅོམ་ལྡན་འདས་ཀྱི་ཕྱག་ལ་འཇུས། །ཞེས་སོ། །སུམ་ཅུ་རྩ་གསུམ་པ་དང༌། རྒྱལ་ཆེན་རིས་བཞི་པ་དང༌། མིའི་འགྲོ་བ་ལ་སོགས་པ་རྣམས་ནི་དབང་པོ་ཟུང་སྦྱོར་གྱི་བདེ་བས་ཚིམ་ལ།

དེ་ཙམ་གྱི་བདེ་བ་གནང་བ་ནི་རྣལ་འབྱོར་བླ་ན་མེད་པའི་རྒྱུད་དེ། དགྱེས་པ་རྡོ་རྗེ་ལས། བོལླ་ཀ་ཀོ་ལ་སྦྱར་བས། །དེ་ཡི་བདེ་བ་ཤེས་པར་འགྱུར། །ཞེས་དང༌། འཁོར་ལོ་སྡོམ་པ་ལས་ཀྱང༌། དབང་གཉིས་སྙོམས་པར་འཇུག་པ་ལས། །སྙོམས་པར་འཇུག་པའང་དེ་ཉིད་
འཛིན། །ཞེས་སོ། །འདི་དག་ནི་གྲུབ་པ་བརྙེས་པའི་སློབ་དཔོན་བྷ་ཝི་ལྷ་ལ་སོགས་པས་དགེས་པ་རྡོ་རྗེའི་རྒྱུད་ཀྱི་རྗེས་སུ་འབྲང་བའི་བཞེད་པ་སྟེ་འཐད་པ་དང་ལྡན་པའི་ལུགས་ལེགས་པ་ཅིག་ཏུ་བཞེད་དོ། །བཞི་པ་གྲངས་དང་གོ་རིམས་གཉིས་ཀ་ངེས་པ་ལ། གང་ཟག་དང༌། དབང་དང༌། ལམ་
མོ། །དང་པོ་གང་ཟག་གིས་ངེས་པ་ནི། བཅོམ་ལྡན་འདས་ཀྱིས་ཐུན་མོང་མ་ཡིན་པའི་ཆོས་ཀྱི་གདུལ་བྱར་གྱུར་པའི་གང་ཟག་བསམ་གྱིས་མི་ཁྱབ་པ་ཞིག་ཡོད་ཀྱང་ཕྱོགས་རིས་སུ་བསྡུ་ན། དབང་པོ་དམན་པ་དང༌། འབྲིང་དང༌། མཆོག་དང༌། ཆེས་མཆོག་ཏུ་གྱུར་པ་སྟེ་བཞི་པོ་འདིར་འདུ་
ཞིང༌། དེ་དག་རྗེས་སུ་གཟུང་བ་ལ་དགོངས་ནས་རྒྱུད་སྡེ་རྣམ་པ་བཞི་རིམ་པ་བཞིན་དུ་བཞག་སྟེ། དེ་ཡང་གང་ཟག་དམན་པ་ཕྱི་ལུས་ངག་གི་བྱ་བ་ཁྲུས་དང་གཙང་སྦྲ་ལ་དགའ་བ་རྣམས་ལ་བྱ་བའི་རྒྱུད་རྣམས་གསུངས་ཏེ། དེ་ནི་ལེགས་པར་གྲུབ་པ་དང་དཔུང་བཟང་ལ་སོགས་པ་རྣམས་སོ། །
གང་ཟག་འབྲིང་ཕྱི་ལུས་ངག་གི་བྱ་བ་དང་ནང་ཏིང་ངེ་འཛིན་ཆ་མཉམ་དུ་སྤྱོད་པ་རྣམས་ལ་སྤྱོད་པའི་རྒྱུད་རྣམས་གསུངས་ཏེ། དེ་ནི་རྣམ་པར་སྣང་མཛད་མངོན་པར་བྱང་ཆུབ་པ་ལ་སོགས་པའོ། །གང་ཟག་མཆོག་ཏིང་ངེ་འཛིན་ཁོ་ན་གཙོ་བོར་སྤྱོད་པ་རྣམས་ལ་རྣལ་འབྱོར་གྱི་རྒྱུད་རྣམས་གསུངས་ཏེ། དེ་ནི་དེ་ཁོ་
ན་ཉིད་བསྡུས་པ་ལ་སོགས་པའོ། །གང་ཟག་ཆེས་མཆོག་ཏུ་གྱུར་པ་ཏིང་ངེ་འཛིན་གྱི་ཁྱད་པར་གོང་ན་མེད་པ་སྤྱོད་པ་རྣམས་ལ་རྣལ་འབྱོར་ཆེན་པོ་བླ་ན་མེད་པའི་རྒྱུད་རྣམས་གསུངས་པ་ཡིན་ཏེ། དེ་ལ་ཐབས་ཀྱི་རྒྱུད། ཤེས་རབ་ཀྱི་རྒྱུད། ཐབས་དང་ཤེས་རབ་གཉིས་སུ་མེད་པའི་རྒྱུད་གསུམ་ལས། དང་པོ་ནི་གསང་བ་
འདུས་པ་ལ་སོགས་པའོ། །གཉིས་པ་ནི་བདེ་མཆོག་ཉུང་ངུའི་རྒྱུད་ལ་སོགས་པ་དང༌། གསུམ་པ་ནི་ཀྱེ་རྡོ་རྗེ་དང་དུས་ཀྱི་འཁོར་ལོ་ལ་སོགས་པ་རྣམས་སོ། །དེ་ལྟར་ཡང་རྡོ་རྗེ་གུར་ལས། དམན་པ་རྣམས་ལ་བྱ་བའི་རྒྱུད། །བྱ་མིན་རྣལ་འབྱོར་དེ་ལྟག་ལ། །སེམས་ཅན་མཆོག་ལ་རྣལ་འབྱོར་མཆོག ། རྣལ་

འབྱོར་བླ་མེད་དེ་ལྟག་ལ། །ཞེས་སོ། །འདི་ནི་རྒྱུད་དེ་ཉིད་ཀྱི་རྗེས་སུ་འབྲངས་ནས་དངོས་གྲུབ་བརྙེས་པའི་སློབ་དཔོན་དཔལ་ལྡན་བིརྺ་པ་དང༌། ཌོམྦི་ཧེ་རུ་ཀ་རྗེས་སུ་འབྲང་བ་དང་བཅས་པའི་བཞེད་པའི་ལུགས་སྲོལ་ཤིན་ཏུ་ལེགས་པ་ཡིན་ནོ། །གཉིས་པ་དབང་གིས་ངེས་པ་ནི། ལམ་འདིར་
འཇུག་པར་བྱེད་པའི་ཐབས་ཀྱི་གཙོ་བོ་དབང་བསྐུར་བ་ཡང་རྣམ་པ་བཞི་ཡོད་པས། དེ་སྟོན་པར་བྱེད་པའི་ཕྱིར་ཡང་རྒྱུད་སྡེ་བཞིར་ངེས་པ་ཡིན་ཏེ། ཡེ་ཤེས་ཐིག་ལེ་ལས། ཆུ་དང་དེ་བཞིན་ཅོད་པཎ་དབང༌། །བྱ་བའི་རྒྱུད་ལ་རབ་ཏུ་གྲགས། །རྡོ་རྗེ་དྲིལ་བུ་དེ་བཞིན་མིང༌། །སྤྱོད་པའི་རྒྱུད་ལ་
རབ་ཏུ་གྲགས། །ཕྱིར་མི་ལྡོག་པའི་སློབ་དཔོན་དབང༌། །རྣལ་འབྱོར་རྒྱུད་ལས་བཤད་པ་ཡིན། །རྣལ་འབྱོར་མ་ཡི་རྒྱུད་དུ་ནི། །གསང་བ་ཤེས་རབ་ཡེ་ཤེས་དང༌། །ཤེས་རབ་ཡེ་ཤེས་ཆེན་པོའོ། །ཞེས་སོ། །གསུམ་པ་ལམ་གྱིས་ངེས་པ་ནི། འདིར་ཞུགས་པའི་གང་ཟག་རིགས་
བཞི་པོས་དབང་བསྐུར་བའི་ཚུལ་རྣམ་པ་བཞི་ལས། གང་དང་གང་ཐོབ་པ་དེ་དང་དེས་ལམ་གྱི་ཚུལ་རྣམ་པ་བཞི་གང་ཡིན་པ་རེ་ཉམས་སུ་བླང་དགོས་པས། དེ་སྟོན་པར་བྱེད་པའི་ཕྱིར་ཡང་རྒྱུད་སྡེ་བཞིར་ངེས་པ་ཡིན་ཏེ། དེ་ཡང་བྱ་བའི་རྒྱུད་དུ། རྗེ་དཔོན་གྱི་ཚུལ་དུ་དངོས་གྲུབ་ལེན་པ་སྟེ། རྗེ་
བོ་ཉིད་དུ་ཉེ་བར་གནས། །ཞེས་སོ། །སྤྱོད་པའི་རྒྱུད་དུ་གྲོགས་པོའི་ཚུལ་གྱིས་ཏེ། གྲོགས་པོ་ཉིད་དུ་ཉེ་བར་གནས། །ཞེས་སོ། །རྣལ་འབྱོར་རྒྱུད་དུ་ཡེ་ཤེས་འབྱིན་འཇུག་གིས་ཚུལ་གྱིས་ཏེ། དེ་བཞིན་གཤེགས་པ་ཚད་མེད་པ་དང་སེམས་ཅན་ཚད་མེད་དུ་བསྒྲུབས་ནས་སླར་གཤེགས་
སུ་གསོལ་བར་བཤད་དོ། །རྣལ་འབྱོར་ཆེན་པོའི་རྒྱུད་དུ་གཉིས་སུ་མེད་པ་སྟེ། མདོར་ན་ཕུང་པོ་ལྔ་རྣམས་ནི། །རྒྱལ་བ་ལྔར་ནི་རབ་ཏུ་གྲགས། །ཞེས་བྱ་བ་ལ་སོགས་པ་སྤྲོ་བར་བྱ་བ་མང་དུ་ཡོད་དོ། །ལྔ་པ་གྲངས་ངེས་པ་ཅན་གྱི་རྒྱུད་ཀྱི་སྒྲ་དོན་ནི། ཅིའི་ཕྱིར་བྱ་བའི་རྒྱུད་ཅེས་བྱ་ཞེ་ན།
ལུས་ངག་གི་བྱ་བ་གཙོ་བོར་སྟོན་པའི་ཕྱིར་ན་བྱ་བའི་རྒྱུད་ཅེས་བྱ་སྟེ། བསམ་གཏན་ཕྱི་མའི་འགྲེལ་པ་ལས། རྒྱུད་འདི་ནི་ཕྱི་ལུས་ངག་གི་བྱ་བ་གཙོ་བོར་སྟོན་པས་བྱ་བའི་རྒྱུད་ཅེས་གསུངས་པའི་ཕྱིར་རོ། །ཅིའི་ཕྱིར་སྤྱོད་པའི་རྒྱུད་ཅེས་བྱ་ཞེ་ན། ལུས་ངག་གི་བྱ་བ་དང་ཏིང་ངེ་འཛིན་

ཆ་མཉམ་པར་སྤྱོད་པའི་ཕྱིར་ན་སྤྱོད་པའི་རྒྱུད་ཅེས་བྱ་སྟེ། རྣམ་པར་སྣང་མཛད་མངོན་པར་བྱང་ཆུབ་པའི་དོན་བསྡུས་པ་ལས། རྒྱུད་འདི་ནི་གཙང་སྦྲ་ལ་སོགས་པ་ལ་སྨད་པ་འཇིག་རྟེན་དང་འགལ་བར་སྤྱོད་པ་གཉིས་ཀ་ལ་སྤྱོད་པས་སྤྱོད་པའི་རྒྱུད་དོ་ཞེས་གསུངས་པའི་ཕྱིར་
རོ། །ཅིའི་ཕྱིར་རྣལ་འབྱོར་གྱི་རྒྱུད་ཅེས་བྱ་ཞེ་ན། ཏིང་ངེ་འཛིན་གཙོ་བོར་བྱེད་པའི་ཕྱིར་ན་རྣལ་འབྱོར་གྱི་རྒྱུད་ཅེས་བྱ་སྟེ། དེ་ཁོ་ན་ཉིད་སྣང་བའི་དོན་བསྡུས་པ་ལས། རྒྱུད་འདི་ནི་ཏིང་ངེ་འཛིན་གཙོ་བོར་སྟོན་པས་རྣལ་འབྱོར་གྱི་རྒྱུད་དོ་ཞེས་གསུངས་པའི་ཕྱིར་རོ། །ཅིའི་ཕྱིར་རྣལ་འབྱོར་བླ་ན་མེད་པའི་རྒྱུད་ཅེས་
བྱ་ཞེ་ན། ཏིང་ངེ་འཛིན་གྱི་ཁྱད་པར་གོང་ན་མེད་པ་སྟོན་པའི་ཕྱིར་ན་རྣལ་འབྱོར་བླ་ན་མེད་པའི་རྒྱུད་ཅེས་བྱ་སྟེ། ཡང་དག་པར་སྦྱོར་བའི་རྒྱུད་ལས། གསང་བའི་ཡེ་ཤེས་བླ་ན་མེད། །སྙིང་པོ་བཅོམ་ལྡན་བཤད་དུ་གསོལ། །ཞེས་དང༌། གསང་བ་འདུས་པ་ལས། སྐུ་དང་གསུང་དང་ཐུགས་
ཀྱི་མཆོག །དེ་བཞིན་གཤེགས་པ་ཀུན་གྱིས་ཀྱང༌། །བྱང་ཆུབ་སེམས་ནི་བླ་ན་མེད། །སྙིང་པོ་བཅོམ་ལྡན་བཤད་དུ་གསོལ། །ཞེས་གསུངས་པའི་ཕྱིར་རོ། །ལྔ་པ་བདག་རྐྱེན་གྱི་སྒོ་ནས་དབྱེ་བ་ལ། ཞལ་ནས་གསུངས་པ་དང༌། བྱིན་གྱིས་བརླབ་པ་དང༌། རྗེས་སུ་གནང་བའི་བཀའ་
སྟེ་གསུམ་མོ། །དང་པོ་ཞལ་ནས་གསུངས་པ་ནི་འཕགས་པ་སྡུད་པ་ལྟ་བུའོ། །གཉིས་པ་བྱིན་གྱིས་བརླབ་པ་ནི། སྐུ་གསུང་ཐུགས་ཀྱིས་བྱིན་གྱིས་བརླབས་ནས་གསུངས་པ་གསུམ་སྟེ། དང་པོ་ནི་དེ་བཞིན་གཤེགས་པའི་སྐུའི་མཛད་པ་ཕྱག་ལ་སོགས་པས་བྱིན་གྱིས་རློབ་པ་སྟེ་
ས་བཅུ་པའི་མདོ་ལྟ་བུའོ། །གཉིས་པ་ནི་གསུང་གིས་བྱིན་གྱིས་རློབ་པ་སྟེ། མ་སྐྱེས་དགྲས་འགྱོད་པ་བསལ་བའི་མདོ་ལྟ་བུའོ། །གསུམ་པ་ནི་ཐུགས་ཀྱིས་བྱིན་གྱིས་རློབ་པ་སྟེ་ཀུན་དུ་བཟང་པོའི་སྤྱོད་པ་སྟོན་པའི་མདོ་ལྟ་བུའོ། །ཐུགས་ཀྱིས་བྱིན་གྱིས་བརླབས་པ་ལའང་ཐུགས་ཏིང་ངེ་འཛིན་གྱིས་བྱིན་གྱིས་
བརླབས་པ་དང༌། ཐུགས་ཐུགས་རྗེས་བྱིན་གྱིས་བརླབས་པ་དང༌། ཐུགས་བདེན་པའི་སྟོབས་ཀྱིས་བྱིན་གྱིས་བརླབས་པ་སྟེ་གསུམ་དུ་འགྱེད་པ་ལྟར་ན། རིམ་པ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོ་ལྟ་བུ་དང༌། གནོད་སྦྱིན་ལ་སོགས་པས་སྨྲས་པའི་སྔགས་བཅོམ་

ལྡན་འདས་ཀྱིས་བྱིན་གྱིས་བརླབས་པ་ལྟ་བུ་དང༌། སངས་རྒྱས་ཀྱི་བྱིན་གྱིས་རླབས་ཀྱིས་འོད་ཟེར་གྱི་རྩེ་མོའམ་ནམ་མཁའ་ལས་ཆོས་ཀྱི་སྒྲ་འབྱུང་བ་ལྟ་བུ་རྣམས་སུ་བཤད་དོ། །གསུམ་པ་རྗེས་སུ་གནང་བའི་བཀའ་ནི། ཐོག་མར་གླེང་གཞིའི་ཚིག་དང༌། བར་དུ་མཚམས་སྦྱོར་གྱི་ཚིག་དང༌། མཐར་
མཐུན་འགྱུར་གྱི་ཚིག་དང༌། རྗེས་སུ་ཡི་རང་གི་ཚིག་རྣམས་འཇུག་པ་རྗེས་སུ་གནང་བ་སྟེ། སྙིང་རྗེ་ཆེན་པོ་པད་དཀར་ལས། ཀུན་དགའ་བོ་དེ་ན་དགེ་སློང་དེ་དག་གིས་ཁྱོད་ལ་དེ་སྐད་དྲིས་པ་དང་འདི་སྐད་ལུང་སྟོན་ཅིག །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དང་པོ་
མངོན་པར་རྫོགས་པར་སངས་རྒྱས་ནས་ཡུལ་མ་ག་དྷཱ་ན་བྱང་ཆུབ་ཀྱི་སྙིང་པོ་ལ་བཞུགས་ཞེས་སོགས་ནས། དོན་དང་ཚིག་དང་ཡི་གེ་གང་དང་གང་དག་གིས་རྣམ་གྲངས་གང་དང་གང་གསུངས་པ་དེ་ལ་ཁྱོད་ཀྱིས་གླེང་གཞི་དང་བཅས་པ་དང༌། རྒྱུ་དང་བཅས་པ་དང༌། རྐྱེན་དང་བཅས་པ་དང༌། དོན་
བཟང་པོ་དང༌། ཚིག་འབྲུ་བཟང་པོ་རྒྱས་པར་སྟོན་ཅིག མདོ་སྡེའི་མཇུག་ཏུའང་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཐམས་ཅད་དང་ལྡན་པའི་འཁོར་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ་ཞེས་བྲིས་ཤིག ཀུན་དགའ་བོ་ཆོས་ཀྱི་ཚུལ་འདི་དེ་ལྟར་ཡང་
དག་པར་བསྡུ་བར་བྱའོ་ཞེས་དང༌། ཆོས་ཡང་དག་པར་སྡུད་པ་ལས། དགེ་སློང་དག་འདི་སྐད་བདག་གིས་ཐོས་པ་ཞེས་གྱིས་ལ་ཆོས་བསྡུ་བར་བྱའོ་ཞེས་བྱ་བ་དང་འབྲེལ་བ་དང་གོ་རིམ་ཀྱང་བསྟན་པར་བྱའོ་ཞེས་བཀའ་སྩལ་བ་ལྟ་བུའོ། །དེ་རྣམས་ཀྱིས་གང་བཀྲལ་བར་བྱ་བ་བཀའི་རྣམ་པར་གཞག་པའི་གླེང་བ་
རེ་ཞིག་བསྟན་ཟིན་ཏོ། །འདིར་སྨྲས་པ། <*ཡོངས་སུ་བརྗེས་པའི་རྒྱན།>ལྷ་དང་མི་ཡི་སྟོན་པ་བླ་ན་མེད་པས་སྔོན། །བསྐལ་པ་བྱེ་བ་ཁྲག་ཁྲིག་བགྲང་ལས་འདས་པ་ནས། །ཚིགས་སུ་བཅད་པ་གཅིག་ཅིག་ཕྱིར་ཡང་ལོངས་སྤྱོད་དང༌། །ལུས་སྲོག་དཔག་ཏུ་མེད་པ་བཏང་ནས་བསྒྲུབས་པའི་ཆོས། །<*མི་འོས་པའི་དོན་གཞན་བཀོད་པ།>གང་དག་ཕན་པའི་དགོངས་པས་ལེགས་པར་
བསླབས་པ་རྣམས། །ཐོས་པ་ཙམ་ཡང་རྣ་བར་ཚེར་མའི་ལས་འགྱུར་བ། །ངན་པར་འགྲོ་བའི་འབབ་སྟེགས་འཆའ་ལ་རིང་མོ་ནས། །གོམས་པའི་བག་ཆགས་མི་དམན་ལྡན་པ་ཀུན་གྱི་གཤིས། །<འགལ་བའི་གཟུགས་ཅན།>བཅུ་གཉིས་ཁྱིམ་ལ་ལོངས་སུ་སྤྱོད་པས་

མི་རྒྱུ་ཞིང༌། །རྣམ་པ་ཀུན་དུ་ཁ་ལོ་འདྲེན་པ་འཐེང་ལྡན་གྱི། །རྗེས་སུ་རྒྱུག་པར་མི་བྱེད་ཆོས་ཀྱི་ཉི་མ་འདིས། །སྲིད་པའི་གདོན་ཆེན་གསུམ་གྱི་གདུང་བ་རབ་བསིལ་བྱེད། །*<སྒྲས་ཟིན་པ་མཚུངས་པའི་ལྡོག་པ་ཅན་ལས་གཏན་ཚིགས་ཀྱི་ལྡོག་པ།>འབད་རྩོལ་མཚན་མའི་ཀུན་དུ་རྟོག་པས་རབ་ཏུ་དབེན། །མངོན་འདོད་ལྡན་པ་ཀུན་གྱི་རེ་བ་
རྫོགས་བྱེད་ཀྱང༌། །མཆོག་གི་འདོད་པ་སྟེར་བ་མེད་ཕྱིར་ནོར་བུའི་རྒྱལ། །ཏོག་གི་བློ་གྲོས་ཐུབ་པའི་གསུང་ལས་ཤིན་ཏུ་དམན། །<*སྤྱིའི་བསྡུས་པ་བརྗོད་པ།>ནད་ཆེན་གསོད་པའི་ནུས་པ་རྨད་བྱུང་ཨ་མྲྀ་ཏ། །སུ་ཞིག་བསྟེན་ན་འཆི་མེད་བྱེད་པ་ཡོད་བཞིན་
དུ། །ཕན་དང་གནོད་པའི་མཐའ་གཉིས་དག་ཏུ་མ་ལྷུང་བའི། །འབྱོར་དགུ་གཅིག་ཏུ་སྦྱར་བའི་སྨན་དེས་ཅི་ཞིག་བྱ། །<*མི་འོས་ཤིང་འོས་པའི་དོན་གཞན་བཀོད་པ།>བློ་ལྡན་དམ་པའི་ཆོས་ལ་གུས་པ་ལྷོད་གྱུར་ན། །རྨོངས་ཆེན་སྐྱེ་བོས་རིང་དུ་བསྐྱུར་བ་སྨོས་ཅི་དགོས། །འཚོ་བར་བཅས་ལ་མི་འཆི་སྒྲུབ་པའི་
ཐབས་དགོས་ཀྱི། །ལུས་སྲོག་སོ་སོར་དེངས་པར་གྱུར་ལ་དེ་ལྟ་མིན། །<*ངོ་མཚར་ཕུལ་བྱུང༌།>སྲིད་པ་གསུམ་གྱི་སྙིང་པོ་ཕུལ་དུ་བྱུང་བའི་ཆོས། །ནུས་མཐུ་ཟད་མི་ཤེས་པས་མངོན་པར་ལྕི་བའི་ཁུར། །ཕྲག་པར་འཛིན་ལ་ནུབ་པ་མེད་པའི་འོད་སྲུངས་བྱིན། །ཡངས་
པའི་དཀྱིལ་འཁོར་འདི་ནི་ཨེ་མ་ཤིན་ཏུ་སྲ།<*འབྲུ་མང་པོའི་ཚིག་སྡུས་ཀྱི་དཔེ།>སྦྲང་རྩིས་མྱོས་པའི་པའི་གདངས་སྙན་ཚིག་འབྲུ་བཟང་པོ་ལ། །རོ་མཆོག་མངར་བའི་བརྗོད་བྱ་རྨད་བྱུང་འཁྱིལ་པ་ཅན། །དྲི་མེད་ཆུ་སྐྱེས་འདབ་མ་ཡངས་པའི་ཆོས་ཀྱི་ཚུལ། །འཇིག་རྟེན་འདི་ན་མི་ནུབ་རྟག་པར་
རྒྱལ་གྱུར་ཅིག །ཐམས་ཅད་མཁྱེན་པ་ཆེན་པོ་ཉི་མའི་གཉེན་གྱི་བཀའ་ལུང་སྤྱི་དང་བྱེ་བྲག་གི་དགོངས་དོན་རྣམ་པར་འགྲེལ་བའི་བསྟན་བཅོས་གངས་ཅན་པའི་སྐད་དུ་འགྱུར་རོ་འཚལ་གྱི་ཆོས་སྦྱིན་རྒྱུན་མི་ཆད་པའི་ངོ་མཚར་འཕྲུལ་གྱི་ཕྱི་མོ་རྫོགས་ལྡན་བསྐལ་
པའི་བསོད་ནམས་ཀྱི་སྤྲིན་ཕུང་རྒྱས་པར་དཀྲིགས་པའི་ཚུལ་ལས་བརྩམས་པའི་གཏམ་ངོ་མཚར་ཆུ་གཏེར་འཕེལ་བའི་ཟླ་བ་གསར་པ་ལས། བཀྲལ་བྱ་ངེས་པའི་ཆེད་དུ་དམ་པའི་ཆོས་ཀྱི་རྣམ་པར་གཞག་པའི་སརྒ་སྟེ་གསུམ་པའོ།། །།

ཡེཔཱདནྱཱསཻཿཏབིཏསཀལཾབིཤྲམཱརཱུཌྷབྷདྲཱིདཱཀྵིཎྱོབཱཡུརྨནཧརཤནཻཿཀུམྦྷབྷདྲོབིཔདྡོཿ།
༄༅། །གང་དག་རྐང་པ་བཀོད་པས་དུབ་ལ་བཞོན་པ་བཟང་ལྡན་གདུངས་རྣམས་ལ། །ཡིད་འཕྲོག་ལྷོ་ཡི་དྲི་ཁྱེར་དལ་བུ་ཕོངས་པའི་ལག་པར་བུམ་པ་བཟང༌། །

༄༅། །སཾསཱརཱནནྟཾནཀཙཔཏཏེཿསཱཀརཱལམྦཤངྐཻཿ ཏྲཱསཽསཾཡུཀྟཾསམུདཡཧིཏཾདཱནདྷརྨཏྟམེཝཾ།
༄༅། །ལྷུང་བའི་དོགས་བཅས་ལག་པའི་མཆེལ་པ་མཐའ་བྲལ་འཁོར་བའི་སྡུག་བསྔལ་དང༌། །ཀུན་ནས་འབྱུང་བའི་འཇིགས་དང་ལྡན་ལ་ཆོས་ནི་མཆོག་ཏུ་ཕན་སྟེར་ཉིད། །

<*མཐའ་དག་གཟུགས་ཅན།>ཆོས་ཀྱི་ཆོས་མཆོག་ཐུབ་གསུང་མྱ་ངན་མེད། །དོན་བཟང་འདབ་མ་སྟོང་ཕྲག་རྫོགས་པའི་ཁ། །ཟབ་ཡངས་དཀྲུགས་པ་པདྨའི་རྒྱ་ནང་དུ། །ཆུད་པའི་ངོ་མཚར་ལྟད་མོ་ལྐོག་ན་མོ། །<*ཡན་ལག་གཉིས་པའི་གཟུགས་ཅན།>དུས་དེར་རྒྱལ་བ་འགྲོ་ལ་ཕན་པའི་ལས། །ལྷུན་གྱིས་གྲུབ་པ་ལས་བྱུང་སྨྲ་བའི་དབང༌། །རྣམ་པར་
འབྱེད་པའི་བུ་མོ་ཆོས་ཀུན་ལ། །སྦྱངས་པའི་མིག་ཡངས་མང་པོ་འཇིག་རྟེན་བྱུང༌། །<*ཆ་ཤས་ཀྱི་གཟུགས་ཅན།>དེ་དེས་བཀའ་ལུང་ཡངས་པ་སྡུད་པ་དང༌། །ཟབ་མོ་འགྲེལ་དང་རིམ་པར་བསྟར་བ་ཡི། །འཆད་རྩོམ་མཁས་པའི་རྐང་རྩིས་བསྣུན་པའི་ཚེ། །ཚིག་དོན་དྲི་མེད་འདབ་མ་
ཕྱོགས་སུ་གྲོལ། །<*རིགས་རང་བཞིན་བརྗོད་པ།>ཡེ་ཤེས་དག་པའི་གཏེར་གྱུར་ཐུབ་པ་དང༌། །དགོངས་པ་གཉིས་སུ་མེད་པར་བཀོད་པའི་ཆོས། །སྲིད་པའི་ཟུག་རྔུ་ཀུན་གྱི་ཕ་རོལ་དུ། །འདོང་བར་ཞི་བའི་ལམ་དང་རྗེས་སུ་མཐུན། །<*སྐྱེད་བྱེད་འགྲུབ་པའི་རྒྱུ།>གང་ལ་དམིགས་པས་འཁོར་བའི་ནད་ཆེན་གསུམ། །ཟད་པར་ཟ་བའི་ལས་སུ་
མངོན་ཕྱོགས་པའི། །བསླབ་གསུམ་དམ་པའི་འབྱོར་པར་ལྡན་པའི་ལམ། །ཡང་དག་འཆོས་བར་བྱེད་པ་བསྟན་པའི་ཆོས། །<*དངོས་པོའི་དཔེ།>གཅིག་ཏུ་ངན་པར་འགྲོ་དང་སྲིད་པ་ཡི། །ཚོར་བ་སྲིན་པོ་ཁྲོས་པའི་སོ་འདྲ་བས། །བཏབ་པ་ཀུན་ལས་ཡོང་ཡེ་སྐྱོབ་པའི་མཐུ། །
གང་ལ་རྫོགས་པ་དེ་ཡང་ལུང་གི་ཆོས། །<*མཐའ་དག་གཟུགས་ཅན།>སྡུག་བསྔལ་ཐན་པ་སྐྱེད་པའི་ཀུན་འབྱུང་དུས། །གསོད་བྱེད་ལམ་བདེན་སྤྲིན་གྱི་རླུང་ཡབ་ཀྱིས། །སྡུག་བསྔལ་འགོག་པ་བསིལ་བའི་རླུང་འཇོ་བ། །འཁོར་ལོ་དང་པོའི་བཀའ་དོན་གསལ་བར་བྱེད། །<*རབ་སྤེལ།>ཆོས་རྣམས་སྒྱུ་མའི་དཔེ་འདྲར་
རང་བཞིན་དང༌། །མཚན་ཉིད་མེད་པའི་མཐའ་བྲལ་ལུང་གི་སྒྲས། །མཐའ་བརྒྱད་མལ་དུ་ཡུར་བ་སློང་བའི་ཆོས། །འཁོར་ལོ་བར་བའི་བཀའ་ཡང་གསལ་བར་བྱེད། །<*རིགས་བརྗོད་པ་ཐ་མའི་གསལ་བྱེད།>ཡོད་དང་མེད་མཐའ་བརྟོལ་པ་ངེས་པའི་ལུང༌། །ཀུན་བརྟག་མཚན་མས་སྟོང་པའི་
གཞན་གྱི་དབང༌། །ཡོངས་གྲུབ་རྣམ་རིག་ཙམ་དུ་ལེགས་ཕྱེ་བ། །འཁོར་ལོ་ཐ་མའི་བཀའ་དོན་རྣམས་ཀྱང་ངོ༌། །<*དེ་ཉིད་བརྗོད་པའི་དཔེ།>མུན་པ་ཆེན་པོའི་གཤེད་དུ་རྒྱུ་བ་འདི། །པདྨའི་གཉེན་གྱི་དཔལ་དང་རྗེས་མཐུན་ཡང༌། །སྒྲིབ་པའི་དགྲ་ཚོགས་བཅོམ་ལས་ཕྱི་རོལ་དུ། །ཕྱོགས་

པ་མིན་ཕྱིར་ལེགས་བཤད་སྣང་བའོ། །<*མཚུངས་པ་གསལ་བྱེད་ཀྱི་ཟླ་བ་དངོས་སུ་ཟིན་པའི་བྱ་བ།>སྟོང་གསུམ་མི་མཇེད་ཡངས་པའི་ཟོང་གིས་ཀྱང༌། །ལེགས་པར་གདམས་པའི་ཚིག་དོན་ཆ་རེ་ཡང༌། །གཞལ་དུ་མེད་པའི་རིན་ཆེན་འདི་ཐོབ་པས། །ཕལ་པའི་ནོར་མཆོག་དེ་ལ་རྣམ་པར་འཕྱ། །<*རིགས་བརྗོད་པ་ཐ་མའི་གསལ་བྱེད།>མཆོག་དང་ཕལ་དུ་
གཏོགས་པའི་ཤེས་བྱ་བ། །ཇི་ལྟ་ཇི་སྙེད་ཡང་དག་འདོམས་པའི་གཞུང༌། །ལུང་དང་རིགས་པ་མན་ངག་ཀུན་གྱི་མ། །དགོངས་འགྲེལ་བསྟན་པའི་ཆོས་ཀྱི་ཁྱད་པར་གླེང༌། །སྤྱི་དོན་བཞི་པ་འགྲེལ་ཚུལ་ངེས་པའི་ཆེད་དུ་བསྟན་བཅོས་ཀྱི་
རྣམ་པར་གཞག་པ་ལ། བསྟན་བཅོས་སུ་གཏོགས་པ་སྤྱིར་བཤད་པ། དེ་ལས་མཆོག་གི་བསྟན་བཅོས་བྱེ་བྲག་ཏུ་བཤད་པའོ། །དང་པོ་བསྟན་བཅོས་སུ་གཏོགས་པ་ཙམ་ལ་རྣམ་པར་དབྱེ་ན་དོན་མེད་པའི་བསྟན་བཅོས་དང༌། དོན་ལོག་པའི་བསྟན་བཅོས་དང༌། དོན་དང་ལྡན་པའི་བསྟན་
བཅོས་དང༌། ངན་གཡོའི་བསྟན་བཅོས་དང༌། བརྩེ་བ་བྲལ་བའི་བསྟན་བཅོས་དང༌། སྡུག་བསྔལ་སྤོང་བའི་བསྟན་བཅོས་དང༌། ཐོས་པ་ལྷུར་ལེན་པའི་བསྟན་བཅོས་དང༌། རྩོད་པ་ལྷུར་ལེན་པའི་བསྟན་བཅོས་དང༌། སྒྲུབ་པ་ལྷུར་ལེན་པའི་བསྟན་བཅོས་ཏེ་རྣམ་པ་དགུར་འགྱུར་ཏེ། ས་སྡེ་
ལས། དོན་མེད་དོན་ལོག་དོན་དང་ལྡན། །ངན་གཡོ་བརྩེ་བྲལ་སྡུག་བསྔལ་སྤོང༌། །ཐོས་རྩོད་སྒྲུབ་པ་ལྷུར་ལེན་པ། །ཞེས་གསུངས་པ་ལྟར་རོ། །གཉིས་པ་དེ་ལས་མཆོག་གི་བསྟན་བཅོས་བྱེ་བྲག་ཏུ་བཤད་པ་ལ། བསྟན་བཅོས་རྣམ་པ་དགུ་པོ་དེ་དག་ལས། སྔ་མ་གཉིས་གཉིས་ནི་
ཕལ་པ་ཡིན་ལ། ཕྱི་མ་རེ་རེ་ནི་མཆོག་སྟེ། ཇི་སྐད་དུ། བསྟན་བཅོས་དྲུག་བྲལ་གསུམ་དུ་འདོད། །ཅེས་སོ། །དེ་ལྟར་ཕྱི་མ་གསུམ་པོ་དེ་དག་གི་རང་བཞིན་ངེས་པར་བྱེད་པ་ལ། བསྟན་བཅོས་ཀྱི་མཚན་ཉིད་དང༌། ངེས་པའི་ཚིག་དང༌། རབ་ཏུ་དབྱེ་བ་སྟེ་གསུམ་མོ། །དང་པོ་མཚན་ཉིད་ནི་སྟོན་པ་དེ་བཞིན་གཤེགས་
པའི་བཀའ་ལུང་འབའ་ཞིག་གི་དབང་དུ་བྱས་ཏེ། རྩོམ་པ་པོ་རྣམ་པར་གཡེང་བ་མེད་ཅིང་བློ་དང་ལྡན་པའི་སྐྱེས་བུ་དམ་པ་དག་གིས་རྗོད་པར་བྱེད་པ་ངག་དོན་ཕུན་སུམ་ཚོགས་པའི་སྒོ་ནས་ཐར་པ་ཐོབ་པར་བྱེད་པའི་ལམ་གྱི་ཆོས་དང་རྗེས་སུ་མཐུན་པར་ལེགས་པར་བཤད་པ་སྟེ། འཕགས་པ་བྱམས་པས།གང་

ཞིག་རྒྱལ་བའི་བསྟན་པ་འབའ་ཞིག་གི། །དབང་བྱས་རྣམ་གཡེང་མེད་ཡིད་ཅན་གྱིས་བཤད། །ཐར་པ་ཐོབ་པའི་ལམ་དང་རྗེས་མཐུན་པ། །དེ་ཡང་དྲང་སྲོང་བཀའ་བཞིན་སྤྱི་བོས་བླངས། །ཞེས་སོ། །གཉིས་པ་ངེས་པའི་ཚིག་ནི། འཆི་བ་མེད་པའི་སེང་གེས། ནིརྡི་ཤ་གྲནྠ་ཡོཿཤཱསྟྲ་ཞེས་
བཤད་ཅིང༌། དེ་ལ་ཤཱ་ས་ན་འཆོས་པ། ཏྲ་ཡའམ་ཏཱ་ར་ཎ་སྐྱོབ་པ། དེ་གཉིས་བསྡུས་པ་ལ་ཤཱསྟྲ་ཞེས་འབྱུང་སྟེ། གདུལ་བྱ་རྣམས་ཀྱི་རྒྱུད་ཉོན་མོངས་པ་དུག་གསུམ་ལས་བསླབ་པ་སུམ་ལྡན་དུ་འཆོས་པ་དང༌། ངན་འགྲོ་དང་སྲིད་པའི་སྡུག་བསྔལ་ལས་སྐྱོབ་པའི་ཕྱིར་བསྟན་བཅོས་སོ། །
དེ་ལྟར་ཡང་རྣམ་བཤད་རིགས་པ། ཉོན་མོངས་དགྲ་རྣམས་མ་ལུས་འཆོས་པ་དང༌། །ངན་འགྲོའི་སྲིད་ལས་སྐྱོབ་པ་གང་ཡིན་པ། །འཆོས་སྐྱོབ་ཡོན་ཏན་ཕྱིར་ན་བསྟན་བཅོས་ཏེ། །གཉིས་པོ་འདི་དག་གཞན་གྱི་ལུགས་ལ་མེད། །ཅེས་སོ། །དེས་ན་འཆོས་པ་དང་སྐྱོབ་པར་བྱེད་པའི་
ཡོན་ཏན་དང་ལྡན་པའི་ཕྱིར་ངེས་པའི་ཚིག་དེ་ནི་སངས་རྒྱས་ཀྱི་བཀའ་ལའང་བཤད་དུ་ཡོད་དེ། དེ་ཉིད་ལས། དེ་ལྟ་བས་ན་སངས་རྒྱས་ཀྱི་གསུང་ཁོ་ན་དོན་དམ་པར་བསྟན་བཅོས་ཡིན་པས་འཆོས་པ་དང་སྐྱོབ་པའི་ཡོན་ཏན་གྱི་ཕྱིར་ཡང་དོན་དུ་བཟུང་བ་ལ་འབད་པ་དང་ལྡན་པར་བྱའོ་
ཞེས་གསུངས་སོ། །གསུམ་པ་རབ་ཏུ་དབྱེ་བ་ནི། བྱེད་པ་ལས་ཀྱི་སྒོ་ནས་དབྱེ་བ། བརྗོད་བྱ་དོན་གྱི་སྒོ་ནས་དབྱེ་བ། བཤད་བྱ་བཀའི་སྒོ་ནས་དབྱེ་བ་སྟེ་གསུམ་མོ། །དང་པོ་བྱེད་པ་ལས་ཀྱི་སྒོ་ནས་དབྱེ་བ་ལའང༌། བཀའ་རྒྱ་ཆེན་པོ་སྡུད་པའི་བསྟན་བཅོས་དང༌། ཟབ་མོ་རྣམ་པར་
འབྱེད་པའི་བསྟན་བཅོས་དང༌། འཁྲུགས་པ་གོ་རིམས་སུ་བསྡེབས་པའི་བསྟན་བཅོས་དང་གསུམ་སྟེ། དེ་དག་དཔེར་མཚོན་ན་དང་པོ་ནི་འདུལ་བ་མདོ་རྩའམ་ཐེག་པ་ཆེན་པོ་མདོ་སྡེ་རྒྱན་ལྟ་བུའོ། །གཉིས་པ་ནི་མངོན་པར་རྟོགས་པའི་རྒྱན་ནམ་དབུ་མ་རྩ་བའི་ཤེས་རབ་ལྟ་བུའོ། །གསུམ་པ་
ནི་བསླབ་པ་ཀུན་ལས་བཏུས་པའམ་མདོ་སྡེ་རྒྱན་ནམ་སྐྱེས་པའི་རབས་ལྟ་བུའོ། །གཉིས་པ་བརྗོད་བྱ་བཀའི་སྒོ་ནས་དབྱེ་བ་ལ་གསུམ་ལས། ཤེས་བྱ་ཇི་ལྟ་བ་སྟོན་པའི་བསྟན་བཅོས་དང༌། ཇི་སྙེད་པ་སྟོན་པའི་བསྟན་བཅོས་དང༌། ཐར་པ་དང་ཐམས་ཅད་མཁྱེན་པའི་ལམ་སྟོན་པའི་

བསྟན་བཅོས་ཏེ་གསུམ་མོ། །དང་པོ་ལའང་ཕལ་པ་དང་ཁྱད་པར་བ་གཉིས་ལས། དང་པོ་ནི་འཇིག་རྟེན་ལུགས་ཀྱི་བསྟན་བཅོས་ཤེས་རབ་བརྒྱ་པ་དང༌། སྐྱེ་བོ་གསོ་བའི་ཐིགས་པ་དང༌།ཚིགས་སུ་བཅད་པའི་མཛོད་དང༌། ཙ་ན་ཀའི་རྒྱལ་པོའི་ལུགས་ཀྱི་
བསྟན་བཅོས་ལ་སོགས་པ་རྣམས་ཏེ། དེ་དག་བསྟན་བཅོས་ཕལ་པ་མཛད་པའི་རྒྱུ་མཚན་ཡང༌། གཙོ་བོར་མངོན་མཐོ་འཐོབ་བྱེད་ཀྱི་རྒྱུ་ཡིན་ཞིང༌། ཐར་པའི་རྟེན་དུ་འགྲོ་བ་ཡང་སྲིད་དེ། ཤེས་རབ་བརྒྱ་པ་ལས། མི་ཡི་ཆོས་ལུགས་ལེགས་སྤྱད་ན། །ལྷ་ཡུལ་བགྲོད་པར་ཐག་
མི་རིང༌། །ལྷ་དང་མི་ཡི་ཐེམ་སྐས་ལ། །འཛེགས་ན་ཐར་པ་གམ་ན་འདུག །ཅེས་དང༌། འཇིག་རྟེན་པ་ཡི་ཡང་དག་ལྟ། །ཆེན་པོ་གང་ན་ཡོད་གྱུར་ཀྱང༌། །དེ་ནི་བསྐལ་པ་སྟོང་དུ་ཡང༌། །ངན་འགྲོར་འགྲོ་བ་མི་སྲིད་དོ། །ཞེས་པས་སོ། །གཉིས་པ་ནི། གཙོ་བོར་བརྗོད་པར་བྱ་བ་
རིག་པའི་གནས་ལྔ་སྟོན་པའི་བསྟན་བཅོས་ཀྱི་རིགས་སུ་གཏོགས་པ་རྣམས་ཏེ། འདི་དག་ནི་འོག་ཏུ་འཆད་པར་འགྱུར་རོ། །གཉིས་པ་ཇི་ལྟ་བ་སྟོན་པའི་བསྟན་བཅོས་ནི།བདེན་པ་རྣམ་པ་བཞིའམ་རྣམ་པ་བཅུ་དྲུག་ཏུ་སྟོན་པའམ། གཟུང་འཛིན་གཉིས་སུ་མེད་པའི་དོན་སྟོན་པ་དང༌།
རང་བཞིན་གཉིས་སུ་མེད་པའི་དོན་སྟོན་པ་སྟེ། དཔེར་ན་བདེན་པ་རྣམ་པར་ངེས་པའམ་དབུ་མ་རྒྱན་ལ་སོགས་པ་ལྟ་བུའོ། །གསུམ་པ་ཐར་པ་དང་ཐམས་ཅད་མཁྱེན་པའི་ལམ་སྟོན་པའི་བསྟན་བཅོས་ནི། བྱང་ཆུབ་སེམས་དཔའི་ས་དང་ཉན་ཐོས་ཀྱི་སའམ། བྱང་ཆུབ་སེམས་དཔའི་སྤྱོད་པ་
ལ་འཇུག་པ་ལ་སོགས་པ་ལྟ་བུའོ། །དེ་ལ་ཁ་ཅིག་དེ་དག་ཕྱོགས་རེ་ཙམ་སྟོན་པའི་བསྟན་བཅོས་ཉིད་ཡིན་པས་ན། རབ་ཏུ་བྱེད་པ་ཡིན་ལ། འདིར་ནི་མ་ལུས་པ་སྟོན་པའི་བསྟན་བཅོས་ཆེན་པོ་ཀུན་ལས་བཏུས་པའམ་མངོན་པ་མཛོད་ལྟ་བུའོ་ཞེས་ཀྱང་འདོད་དོ། །གཉིས་པ་བཤད་བྱ་བཀའི་སྒོ་ནས་
དབྱེ་བ་ལ། སྤྱིར་བཤད་པ་དང་བྱེ་བྲག་ཏུ་བཤད་པ་གཉིས་ལས། དང་པོ་ནི་བསྒྲུབ་པར་བྱ་བའི་འབྲས་བུ་རྣམ་པ་ཐམས་ཅད་མཁྱེན་པའི་གོ་འཕང་དོན་དུ་གཉེར་བ་ལ་ཆེས་སྤྲོ་བར་གྱུར་པའི་བློ་དང་ལྡན་པའི་བྱང་ཆུབ་སེམས་དཔའ་རྣམས་ཀྱིས་བསླབ་པར་བྱ་བའི་གནས་ཀྱི་གཙོ་བོ་ནི་རིག་པའི་

གནས་རྣམ་པ་ལྔའམ། རིག་པའི་གནས་བཅུར་གྲགས་པའི་བསྟན་བཅོས་རྣམས་ཏེ། ཇི་སྐད་དུ་མདོ་སྡེ་རྒྱན་ལས། རིག་པའི་གནས་ལྔ་དག་ལ་བརྩོན་པར་མ་བྱས་ན། །འཕགས་པའི་དམ་པ་ཐམས་ཅད་མཁྱེན་པ་ག་ལ་ཐོབ། །ཅེས་གསུངས་ཤིང༌། དེའི་འགྲེལ་བཤད་ལས། རིག་
པའི་གནས་ནི་ལྔ་སྟེ་ནང་རིག་པ་དང༌། རྒྱུ་རིག་པ་དང༌། སྒྲ་རིག་པ་དང༌། གསོ་བ་རིག་པ་དང༌། བཟོའི་ལས་ཀྱི་གནས་རིག་པའོ། །དེ་ལ་དེ་བཞིན་གཤེགས་པའི་གསུང་རབ་ཡན་ལག་བཅུ་གཉིས་ལ་མཁས་པ་ནི་ནང་རིག་པ་ཞེས་བྱའོ། །མངོན་སུམ་དང་རྗེས་སུ་དཔག་པའི་ཚད་མས་ཟིན་པའི་
ཏརྐའི་གཞུང་ལ་མཁས་པ་ནི་རྒྱུ་རིག་པ་ཞེས་བྱའོ། །སྒྲའི་གཙུག་ལག་བྱཱ་ཀ་ར་ཎ་ལ་མཁས་པ་ནི་སྒྲ་རིག་པ་ཞེས་བྱའོ། །རླུང་དང་བད་ཀན་ལ་སོགས་པ་ནད་གསོ་བའི་གཙུག་ལག་ལ་མཁས་པ་ནི་གསོ་བ་རིག་པ་ཞེས་བྱའོ། །གླུ་དང་གར་དང་སྤོས་ལ་སོགས་པའི་གཙུག་ལག་ལ་མཁས་པ་ནི་
བཟོའི་ལས་ཀྱི་གནས་རིག་པ་ཞེས་བྱའོ། །རིག་པའི་གནས་ལྔ་པོ་དེ་དག་ལ་ཉན་པ་དང་བསམ་པ་ལ་སོགས་པའི་སྒོ་ནས་ཤེས་པ་དང་རྟོགས་པར་མ་བྱས་པར་བྱང་ཆུབ་སེམས་དཔའ་རྣམས་ཀྱིས་ཐམས་ཅད་མཁྱེན་པའི་ཡེ་ཤེས་ག་ལ་ཐོབ་སྟེ། དེ་བས་ན་བྱེ་བྲག་མེད་པར་མཁྱེན་པའི་ཡེ་ཤེས་
ཐོབ་པར་བྱ་བའི་ཕྱིར་རིག་པའི་གནས་ལྔ་ལ་བརྩོན་པར་བྱེད་དོ་ཞེས་བྱ་བའི་དོན་ཏོ། །དེ་ལ་འཕགས་པ་ནི་ཉན་ཐོས་དང་རང་སངས་རྒྱས་དེ་དག་ལས་མཆོག་ཏུ་གྱུར་པས་འཕགས་པ་དམ་པའི་བྱང་ཆུབ་སེམས་དཔའོ། །ཇི་ལྟར་ཡོད་པ་མ་ལུས་པ་དང་ཕྱིན་ཅི་མ་ལོག་པར་ཤེས་པ་ནི་ཐམས་ཅད་མཁྱེན་པ་
ཞེས་བྱའོ་ཞེས་བཤད་པ་དང༌། ས་སྐྱ་པཎྜི་ཏས་ཀྱང༌། མཁས་གང་ཤེས་བྱའི་དེ་ཁོ་ན། །ཇི་བཞིན་རྟོགས་པ་ཡིན་པར་འདོད། །བྱེ་བྲག་སྦྱངས་པའི་དོན་ཤེས་པ། །དེ་ཡང་དེ་ལ་མཁས་པ་ཡིན། །དེ་ཡུལ་བརྡ་སྤྲོད་རྟོག་གེ་དང༌། །གསོ་བ་ཕྱི་ནང་རིག་ཅེས་གསུངས། །གཞན་ལས་
གཞན་དག་རྣམ་བཤད་པ། །འདི་ཡི་ནང་དུ་འདུས་ཤེས་བྱ། །ཞེས་ཏེ། དེ་ཡང་མཁས་པ་ཞེས་བྱ་བ་ནི་གང་ཡིན་ཞེ་ན། ཤེས་བྱ་ཐམས་ཅད་ཕྱིན་ཅི་མ་ལོག་པར་ཤེས་པ་ཡིན་ལ། གཞན་ཡང་བྱེ་བྲག་ཏུ་གང་བསླབ་པ་ཤེས་པ་དེ་ལའང་དེ་ཉིད་ལ་མཁས་པ་ཞེས་བྱ་ཞིང༌། དེས་བསླབ་པར་བྱ་བའི་

ཡུལ་ནི་རིག་པའི་གནས་ལྔ་སྟེ། བརྡ་སྤྲོད་པ་སྒྲ་དང༌། རྟོག་གེ་སྟེ་ཚད་མ་དང༌། ཕྱི་རོལ་རིག་པ་བཟོ་དང༌།ནང་རིག་པ་ལུང་གི་ཆོས་དང༌། གསོ་བ་རིག་པ་སྨན་དཔྱད་རྣམས་ལ་བཤད་དོ། །གཞན་ཡང་རིག་པའི་གནས་ཆུང་བ་ལྔ་དང༌། མདོ་ལས་རིག་པའི་
གནས་བཅོ་བརྒྱད་དུ་གསུངས་པ་རྣམས་ཀྱང་རིག་པའི་གནས་ཆེན་པོ་ལྔ་པོ་དག་ཏུ་འདུ་ཞེས་པའི་དོན་ཏོ། །དེ་བས་ན་རྣམ་པ་ཐམས་ཅད་མཁྱེན་པའི་གནས་ཐོབ་པ་ལ་མངོན་པར་འདོད་པའི་བྱང་ཆུབ་སེམས་དཔའ་ཤེས་བྱ་ཐམས་ཅད་ལ་ཤིན་ཏུ་མཁས་པར་བྱ་དགོས་སོ་ཞེས་པའི་དོན་ཏོ། །དེའང་
གང་གི་ཕྱིར་ཞེ་ན། རྒྱན་ལས། སྔ་མ་དེའི་རྗེས་ཐོགས་སུ། །དེ་ལྟར་གཞན་དག་ཚར་བཅད་པ་དང་རྗེས་གཟུང་ཕྱིར། །བདག་ཉིད་ཤེས་བྱའི་ཕྱིར་ན་དེ་ལ་དེར་བརྩོན་བྱེད། །ཅེས་དང༌། དེའི་འགྲེལ་བཤད་ལས་ཀྱང༌། བྱེ་བྲག་ཏུ་རྒྱུ་རིག་པ་དང་སྒྲ་རིག་པ་ལ་བྱང་ཆུབ་སེམས་དཔའ་བརྩོན་པར་བྱེད་དོ། །
ཅིའི་ཕྱིར་ཞེ་ན། མུ་སྟེགས་རྒྱུ་རིག་པའི་གཙུག་ལག་ཤེས་པར་རློམ་པ་དང༌། སྒྲ་རིག་པའི་གཙུག་ལག་ཤེས་པར་རློམ་པ་དེ་དག་ཚར་གཅད་པར་བྱ་བའི་ཕྱིར་བརྩོན་པར་བྱེད་དོ། །གསོ་བ་རིག་པ་དང་བཟོའི་ལས་ཀྱི་གནས་རིག་པ་ལ་བྱང་ཆུབ་སེམས་དཔའ་བརྩོན་པར་བྱེད་དོ། །ཅིའི་ཕྱིར་ཞེ་ན། ནད་
ཀྱི་བཏབ་པའི་ནད་ཞི་བར་འདོད་པ་རྣམས་དང་བཟོ་སློབ་པར་འདོད་ཅིང་ལོངས་སྤྱོད་འདོད་པ་རྣམས་རྗེས་སུ་གཟུང་ཞིང་ཕན་གདགས་པའི་ཕྱིར་བརྩོན་པར་བྱེད་དོ། །ནང་རིག་པ་ལ་བྱང་ཆུབ་སེམས་དཔའ་བརྩོན་པར་བྱེད་དོ། །ཅིའི་ཕྱིར་ཞེ་ན། བདག་ཉིད་འཕགས་པའི་ལམ་དེ་ཁོ་ན་ཉིད་ཀྱི་
མཚན་ཉིད་གང་ཡིན་པ་ཕྱིན་ཅི་མ་ལོག་པར་ཤེས་པར་བྱ་བའི་ཕྱིར་བརྩོན་པར་བྱེད་དོ་ཞེས་སོ། །གཉིས་པ་སོ་སོར་བཤད་པ་ལ། གཞན་རྗེས་སུ་འཛིན་པའི་རིག་པའི་གཙུག་ལག་གཉིས་ལས། དང་པོ་བཟོ་རིག་པ་ལ། དེར་འཇུག་པའི་དགོས་པ་དང༌། དེ་སྟོན་པའི་བསྟན་བཅོས་ཀྱི་རང་
བཞིན་བསྟན་པའོ། །དང་པོ་ནི། རྣམ་པ་ཐམས་ཅད་མཁྱེན་པའི་གོ་འཕང་དོན་དུ་གཉེར་བའི་བྱང་ཆུབ་སེམས་དཔའ་རྣམས་ཀྱིས་གནས་སྐབས་སུ་ཕན་བདེ་འབྱུང་བའི་རྩ་ལག་ཏུ་གྱུར་པའི་བཟོའི་གནས་ཀྱི་རིག་པ་ལ་མཁས་པའི་གོ་སར་དབང་བ་དང༌། ཤ་ཐང་བ་མེད་པར་ལོངས་སྤྱོད་ཀྱི་འབྱོར་པ་དང་ལྡན་པར་བྱ་བ་

དང༌། འཇིག་རྟེན་པ་རྣམས་ཀྱིས་བཀུར་བར་བྱ་བ་དང༌། ལོངས་སྤྱོད་ཀྱི་སྒོ་ནས་གཞན་ལ་ཕན་གདགས་པར་བྱ་བ་དང༌། མཐར་ཐུག་ཐམས་ཅད་མཁྱེན་པའི་གཟུགས་ཀྱི་སྐུ་མཚན་བཟང་པོ་དང་དཔེ་བྱད་བཟང་པོས་བརྒྱན་པ་འགྲུབ་པའི་རྒྱུར་འགྱུར་བ་དང༌། དེ་ཉིད་མངོན་དུ་གྱུར་ནས་ཀྱང་དེ་བཞིན་
གཤེགས་པའི་གཟུགས་དང་གཟུགས་བརྙན་ནས་སྤྲུལ་པ་ཐ་མའི་བར་གྱི་རྣམ་པས་སེམས་ཅན་ཀུན་གྱི་ཉེར་འཚོའི་གཞིར་འགྱུར་བའི་དགོས་པ་དམ་པས་ཡིད་ཡོངས་སུ་དྲངས་ནས་རིག་པའི་ཚུལ་འདི་ལ་འཇུག་པར་རིགས་ཏེ། མདོ་སྡེ་རྒྱན་གྱི་འགྲེལ་བཤད་ལས། བཟོའི་གནས་ཀྱི་རིག་པ་བྱང་ཆུབ་
སེམས་དཔའ་འཚོལ་བར་བྱེད་དོ། །ཅིའི་ཕྱིར་ཞེ་ན། ཚེགས་ཆུང་ངུས་ཤ་ཐང་བ་མེད་པར་ལོངས་སྤྱོད་བསྒྲུབ་པར་བྱ་བ་དང༌། ལོངས་སྤྱོད་དང་ལྡན་ཞིང་བཟོའི་གནས་ལ་མཁས་པས་འཇིག་རྟེན་པ་རྣམས་ཀྱིས་བཀུར་བར་བྱ་བ་དང༌། ལོངས་སྤྱོད་ཀྱི་སྒོ་ནས་འཇིག་རྟེན་པ་རྣམས་ལ་ཕན་པར་བྱ་
བའི་ཕྱིར་ཚོལ་བར་བྱེད་དོ་ཞེས་དང༌།བསོད་ནམས་ཀྱི་སྟོབས་ཀྱི་རྟོགས་པ་བརྗོད་པ་ལས། དེ་བས་ན་བཟོ་འབའ་ཞིག་མི་རྣམས་ཀྱི་ཉམས་སུ་སྨན་པ་ཡིན་ཏེ། བཟོ་བོ་ནི་རིགས་དམན་པར་སྐྱེས་སུ་ཟིན་ཡང་རྒྱལ་པོ་རྣམས་དང༌། བློན་པོ་རྣམས་དང༌། བྲམ་ཟེ་དང༌། ཁྱིམ་བདག་
རྣམས་ཀྱིས་གདོན་མི་ཟ་བར་བཀུར་རོ། །སྣ་ཚོགས་ལས་ཅན་ལྷ་རྣམས་དང༌། །མི་རྣམས་ཀྱིས་ཀྱང་ལེགས་པར་བཀུར། །དེ་བཞིན་མ་རབས་བཟོ་ཡི་ཕྱིར། །མི་དང་ལྷ་རྣམས་ཀྱིས་ཀྱང་བཀུར། །ཞེས་དང༌། མངོན་བརྗོད་ཀྱི་བསྟན་བཅོས་སྣ་ཚོགས་གསལ་བར། བི་ཤྭ་ཀརྨ་སྣ་
ཚོགས་བྱེད། །ལས་བཟང་ཅན་དང་ལྷའི་བཟོ་བོ། །ཞེས་པས་བསྟན་པའི་ལྷའི་བཟོ་བོ་བི་ཤྭ་ཀརྨ་ལྟ་བུ་ནི་ལྷའི་དབང་པོ་ལ་སོགས་པ་འཇིག་རྟེན་ན་ཆེ་བར་རློམ་པས་ཀྱང་བཀུར་ཞིང་བསྔགས་པའི་གནས་སུ་གྱུར་པའང་བཟོའི་གནས་ལ་མཁས་པ་ཁོ་ནའི་ཕྱིར་ཏེ། གདགས་པའི་བསྟན་བཅོས་ལས།
འཁོར་ལོ་རིན་པོ་ཆེ་ག་ལས་འོངས་ཤེ་ན། གང་གི་ཚེ་འཁོར་ལོས་སྒྱུར་བའི་རྒྱལ་པོ་འཇིག་རྟེན་དུ་བྱུང་བ་དེའི་ཚེ། ལྷ་རྣམས་ཀྱི་དབང་པོ་བརྒྱ་བྱིན་གྱིས་ལྷའི་བུ་ལས་ཐམས་ཅད་པ་ལ་བསྒོ་བ། ལས་ཐམས་ཅད་པ་འཁོར་ལོས་སྒྱུར་བའི་རྒྱལ་པོ་འཇིག་རྟེན་དུ་བྱུང་བ་ཤེས་པར་གྱིས་ལ། དེའི་ཕྱིར་

ལྷའི་འཁོར་ལོ་རིན་པོ་ཆེ་མངོན་པར་སྤྲུལ་པར་གྱིས་ཤིག དེ་ནས་ལྷའི་བུ་ལས་ཐམས་ཅད་པས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བསྒོ་བ་བཞིན་དུ་མཉན་ཏེ། ལྷའི་འཁོར་ལོ་རིན་པོ་ཆེ་རྩིབས་སྟོང་པ་ལྟེ་བ་དང་བཅས་པ། མུ་ཁྱུད་དང་བཅས་པ། རྣམ་པ་ཐམས་ཅད་
ཡོངས་སུ་རྫོགས་པ། དག་པ། བཟང་བ། ལྷ་རྫས་རིལ་གྱིས་གསེར་ལས་མངོན་པར་གྲུབ་པ་ཞེས་འཁོར་ལོ་རིན་པོ་ཆེ་ལྷའི་བཟོ་བོས་སྤྲུལ་དགོས་པར་བཤད་ཅིང༌། རིག་བྱེད་པའི་གཏམ་རྒྱུད་ལས་ཀྱང༌། སྔོན་གྱི་དུས་སུ་ལྷའི་བུ་ཉི་མས། ལས་ཐམས་ཅད་པའི་བུ་མོ་ནེ་རུ་ཀ་
ཆུང་མར་བླངས་པས་ཉི་མའི་འོད་ཟེར་ཆེ་བ་ལ་མ་བཟོད་ནས་ཕའི་ཁྱིམ་དུ་བྲོས་སོ། །དེའི་ཚེ་ཕ་མ་དག་གིས་འཐབས་པ་སྐྱོ་བར་གྱུར་ཏེ། རི་བོ་ཏི་སེ་ན་རྟ་རྒོད་མའི་གཟུགས་ཀྱིས་དཀའ་ཐུབ་བྱེད་ཅིང་ཡིབས་སོ། །དེའི་ཚེ་ལས་ཐམས་ཅད་པས་ཉི་མ་དུམ་བུ་བཅུ་གཉིས་སུ་བྱས་ཤིང་ལོང་མོ་
ཡན་ཆད་བརྡར་ཏེ་གཟུགས་ཡིད་དུ་འོང་བར་བྱས་པས་དེ་ཕྱིན་ཆད་ལྟ་ན་སྡུག་ཅེས་བྱའོ་ཞེས་འབྱུང་བ་ལྟར་བཟོ་རིག་པ་ནི་འཇིག་རྟེན་ཐམས་ཅད་དུ་ཕན་འདོགས་རྒྱ་ཆེན་པོ་འབྱུང་བའི་གཞི་མ་ཉིད་དུ་བཤད་པའི་ཕྱིར་རོ། །གཞན་ཡང་སྔོན་གྱི་ཆོས་རྒྱལ་མྱ་ངན་མེད་པ་ལ་སོགས་པའང་བཅོམ་ལྡན་
འདས་ཀྱིས་ལུང་བསྟན་པའི་རྒྱུའི་གཙོ་བོ་དེ་བཞིན་གཤེགས་པའི་མཆོད་རྟེན་བརྩིགས་པ་དང༌། དགེ་འདུན་གྱི་ཀུན་དགའ་རྭ་བ་བརྩིགས་པ་ལ་སོགས་པའི་སྒོ་ནས་སྟོན་པའི་སྐུ་གསུང་ཐུགས་ཀྱི་ཕྲིན་ལས་དཀར་པོའི་རྒྱུན་མི་ནུབ་པ་སྐྱོང་བའི་རྩ་ལག་ཏུ་འགྱུར་བ་ལ་དགོངས་ནས་ལུང་བསྟན་པར་བཤད་པའི་ཕྱིར་དང༌།
ཁྱད་པར་མྱ་ངན་ལས་འདས་པའི་མདོ་ལས། ཆུ་བོ་ཆེན་པོ་བཞི་རྒྱ་མཚོར་བབ། འབབ། གཞོལ་བ་དེ་བཞིན་དུ་ཆོས་ཐམས་ཅད་མྱ་ངན་ལས་འདས་པ་ལ་བབ། འབབ། གཞོལ་ཞེས་བྱ་བ་ལ་སོགས་པའི་དོན་དུ་འགྱུར་བའི་དགོས་པ་ཡོད་དོ། །གཉིས་པ་དེ་ལ་དབྱེ་ན་གཙོ་བོ་དང༌། ཕལ་པ་གཉིས་སོ། །དེའི་དང་པོ་
ལའང་སྐུ་གསུང་ཐུགས་ཀྱི་རྟེན་གསུམ་ལས། དང་པོ་ནི་དེ་བཞིན་གཤེགས་པའི་སྐུ་གཟུགས་ཀྱི་ཚད་བཤད་པ་ནས། ཉན་ཐོས་དང་རང་སངས་རྒྱས་ལ་སོགས་པའི་སྐུ་གཟུགས་ཀྱི་ཚད་བཤད་པའི་བར་ཏེ། མདོར་བསྡུ་ན་ངག་དབང་ལྷ་མོས་རྗེས་སུ་བཟུང་བའི་དཔལ་ལྡན་བློ་གྲོས་བཟང་པོས་སྐུ་

གཟུགས་ཀྱི་ཆ་ཚད་བཤད་པ་ལས། རྒྱལ་བའི་སྐུ་གཟུགས་ཐལ་མོ་བཅུ་པ་དང༌། །རྒྱལ་སྲས་རྣམས་ཀྱི་མཐོ་བཅུ་ཞན་པ་དང༌། །རྒྱལ་ཡུམ་སོགས་ཀྱི་ཞལ་ཚད་དགུ་པ་དང༌། །རྒྱལ་དབང་ཁྲོས་པ་རྣམས་ཀྱི་གདོང་བརྒྱད་དང༌། །མིའུ་ཐུང་གི་ལུས་ཚད་མཐོ་དྲུག་པ། །ཞེས་གསུངས་ཏེ།
དེ་ཡང་གང་ལ་བརྟེན་སྙམ་ན། དཔལ་དུས་ཀྱི་འཁོར་ལོའི་རྒྱུད་ལས། རྒྱལ་བའི་བདག་པོ་གཙུག་ཏོར་ནས་ནི་མཛོད་སྤུའི་དབུས་སུ་ཕྱེད་དང་བཅས་པའི་ཉི་མའི་སོར་དུ་འགྱུར། །དེ་ནས་མགྲིན་པའི་ཆུ་སྐྱེས་དེ་བཞིན་སྙིང་ག་དང་ནི་དེ་ནས་ལྟེ་གསང་ཆུ་སྐྱེས་དེ་བཞིན་ནོ། །ཞབས་ཀྱི་མཐིལ་
དང་རྗེ་ངར་བརླ་དང་དཔྱི་ཡང་མ་ནུ་དེ་ཉིད་དེ་ཉིད་རིག་བྱེད་རྣམས་ཀྱི་སྟེ། །བྲང་ཕྱེད་ཕྱེད་བཅས་ཉི་མའི་རང་དཔུང་དཔུང་ལག་རྣམས་ནི་མཁའ་མིག་རྒྱལ་པོ་ཉི་མའི་ཚད་ཀྱིས་སོ། །ཉི་ཤུ་རྩ་ལྔ་ལྷག་པའི་བརྒྱ་ཕྲག་གང་ཞིག་དུས་དང་དགུ་ཡིས་མི་རྣམས་ཀྱི་ནི་འཇིག་རྟེན་ཚད། །རིག་བྱེད་ཕྱེ་དང་བཅས་
པའི་བཞི་དང་ཆུ་གཏེར་ཆུ་གཏེར་ཕྱེད་དང་བཅས་པའི་རིག་བྱེད་རིག་བྱེད་ཀྱི། །གཙུག་ཏོར་མཐོ་བའི་འོག་ཏུ་འགྱུར་ཏེ་རྒྱལ་བའི་བདག་པོའི་དཔལ་ལྡན་དཔྲལ་བ་དག་དང་ཤངས་དང་ནི། །ཤངས་ཀྱི་འོག་ཏུ་ཀོས་ཀོའི་མཐའ་དང་དེ་ནས་མགྲིན་པ་དག་སྟེ་མགྲིན་པ་རྩ་བའི་ཆུ་སྐྱེས་དབུས། །
དེ་ནས་སྙིང་ག་ལྟེ་བ་གསང་བར་མི་ཡི་བདག་པོ་ཕྱེད་བཅས་ཉི་མ་རྣམས་ཀྱི་རིམ་པས་སོ། །གསང་བའི་ཆུ་སྐྱེས་ལྟེ་བའི་རྩ་བར་རྡོ་རྗེ་དག་ཀྱང་ཐུབ་པ་ཡི་ནི་སྟེང་གི་གཙུག་ཏོར་ཉིད། །ཅེས་པས་སྐུ་གཟུགས་མཐོ་བཅུ་པར་བྱས་པའི་སོར་མོ་བརྒྱ་ཉེར་ལྔ་པའི་ཚད་དང༌། བདེ་མཆོག་སྡོམ་པ་འབྱུང་བའི་
རྒྱུད་ལས། མཐིལ་ལམ་ཐལ་མོ་བཅུ་གཅིག་གིས། །ལྷ་ཡི་གཟུགས་ནི་བྲི་བར་བྱ། །ཞེས་དང༌། ཟབ་མོ་རྡོ་རྗེ་ཅན་གྱི་ལྷ། །ཆ་ནི་བཅུ་གཉིས་མཚན་ཉིད་དོ། །ཞེས་པས་སོར་མོ་བརྒྱ་ཉི་ཤུ་པའི་ཚད་བསྟན་ཅིང༌། བསླབ་བཏུས་སུ། བྱང་ཆུབ་སེམས་དཔའ་རྣམས་ཀྱི་ཡང་
སོར་བཅུ་གཉིས་པའི་མཐོ་བཅུ་པ་ཉིད་དོ་ཞེས་དང༌། སྡོམ་འབྱུང་གི་རྒྱུད་འགྲེལ་རྣམས་ལས་བྱང་ཆུབ་སེམས་དཔའ་རྣམས་ཀྱི་ཚད་བསྟན་པ་དང༌། གཞན་ཡང་སྡོམ་འབྱུང་ལས། ཡིད་དུ་འོང་བའི་རང་གཟུགས་ནི། །ཆ་དགུ་པར་ནི་མངོན་པར་བྲི། །ཞེས་པས་རྒྱལ་ཡུམ་རྣམས་

ཀྱི་ཚད་དང༌། ཁྲོ་བོ་ཁྲོ་མོ་དབང་ཕྱུག་མ། །བྲན་ཕོ་བྲན་མོ་ཅི་བགྱི་མ། །དྲག་ཅིང་འཇིགས་པའི་གཟུགས་རྣམས་ནི། །ཐལ་མོ་བརྒྱད་པ་རྣམ་པར་བྲི། །ཞེས་དང༌། གཤིན་རྗེའི་གཤེད་ནག་པོའི་རིམ་པར་ཕྱེ་བ་བཅུ་བཞི་བར། །ཁྲོ་བོ་སྦོམ་ལ་ཐུང་བར་བཤད། །ཅེས་སོགས་ཀྱི་
ཁྲོ་བོ་མཐོ་བརྒྱད་པའི་ཚད་དང༌། བྱ་བ་བཏུས་པར་སྒྲ་གཅན་དང་མིའུ་ཐུང་དང་ཚོགས་ཀྱི་བདག་པོ་རྣམས་ནི་མཐོ་ལྔ་བྱའོ། །མིའུ་ཐུང་གི་ལུས་བྱིངས་པོ་སྐུའི་ཚད་བཤད་པ་རྣམས་སོ། །དེ་དག་གི་ནང་ནས་དེ་བཞིན་གཤེགས་པའི་སྐུ། ལོངས་སྤྱོད་རྫོགས་པ་དང༌། སྤྲུལ་པའི་སྐུའི་
བདག་ཉིད་ཅན་རྣམས་ནི་མཚན་བཟང་པོ་སུམ་ཅུ་རྩ་གཉིས་དང༌། དཔེ་བྱད་བཟང་པོ་བརྒྱད་ཅུས་སྤྲས་པའི་སྐུ་སྟེ། རྒྱུད་བླ་མར། མཐོང་ན་ཚིམ་བྱེད་ཡོན་ཏན་གང༌། །སུམ་ཅུ་རྩ་གཉིས་ཞེས་བྱ་བ། །སྤྲུལ་པ་ཆོས་ལ་རྫོགས་པར་ནི། །ལོངས་སྤྱོད་རྫོགས་སྐུ་གཉིས་ལ་བརྟེན། །
ཞེས་དང༌། མངོན་རྟོགས་རྒྱན་ལས། མཚན་ནི་སུམ་ཅུ་རྩ་གཉིས་དང༌། །དཔེ་བྱད་བརྒྱད་ཅུའི་བདག་ཉིད་འདི། །ཐེག་ཆེན་ཉེ་བར་ལོངས་སྤྱོད་ཕྱིར། །ཐུབ་པའི་ལོངས་སྤྱོད་རྫོགས་སྐུར་བཞེད། །ཅེས་སོ། །དེ་ལྟ་བུའི་གཟུགས་ཀྱི་སྐུ་རྣམ་པ་གཉིས་ཀྱི་གཟུགས་བརྙན་
མཚན་ཉིད་དང་ལྡན་པ་བསྒྲུབ་པ་ལ། ཉེ་བར་མཁོ་བའི་མཚན་དང་དཔེ་བྱད་བཤད་པ་རྒྱལ་ཚབ་བྱམས་པའི་བསྟན་བཅོས་ལས་འབྱུང་བ་ནི། ཕྱག་ཞབས་འཁོར་ལོས་མཚན་དང་རུས་སྦལ་ཞབས། །ཞེས་བྱ་བ་ནས། སྤྱན་ནི་མཐོན་མཐིང་སྤྱན་རྫི་བ་མཆོག་གི །འདྲ་བ་འདི་དང་སུམ་
ཅུ་རྩ་གཉིས་མཚན། །ཞེས་བྱ་བའི་བར་དུ་འབྱུང་བའི་དོན་ནི། སྣང་བའི་རྒྱན་དུ། བླ་མ་རྣམས་ལ་སྐྱེལ་བ་དང་བསུ་བ་ལ་སོགས་པས་ཕྱག་དང་ཞབས་འཁོར་ལོས་མཚན་དང་ལྡན་པ་ཉིད་དང༌། སྡོམ་པ་ཡང་དག་པར་བླངས་པ་བརྟེན་པ་ཉིད་ཀྱིས་རུས་སྦལ་བཞིན་དུ་ཞབས་ཤིན་ཏུ་གནས་པ་
ཉིད་དང༌། བསྡུ་བའི་དངོས་པོ་བཞི་བསྟེན་པས་ཕྱག་དང་ཞབས་ཀྱི་སོར་མོ་ངང་པའི་རྒྱལ་པོ་ལྟ་བུར་དྲྭ་བས་འབྲེལ་བ་ཉིད་དང༌། བཟའ་བ་དང་བཅའ་བ་ལ་སོགས་པ་གྱ་ནོམ་པ་བྱིན་པས་ཕྱག་དང་ཞབས་འཇམ་ཞིང་གཞོན་ཤ་ཆགས་པ་ཉིད་དང༌། བལྡག་པ་ལ་སོགས་པ་ཤིན་ཏུ་གྱ་ནོམ་པ་བྱིན་པས་

ཕྱག་དང་ཞབས་དང་ཕྲག་པ་དང་ལྟག་པའི་ཕྱོགས་མཐོ་བའི་ཕྱིར་བདུན་མཐོ་བ་ཉིད་དང༌། གསད་པར་བྱ་བ་ལས་ཐར་བར་བྱས་པས་སོར་མོ་རིང་བ་ཉིད་དང༌། འཚོ་བ་ལ་ཕན་གདགས་པ་ཉིད་ཀྱིས་རྟིང་པ་ཡངས་པ་ཉིད་དང༌། སྲོག་གཅོད་པ་སྤངས་པས་སྐུ་ཆེ་ཞིང་དྲང་བ་ཉིད་དང༌།
དགེ་བའི་ཆོས་ཡང་དག་པར་སྤངས་པས་ཞབས་འབུར་མི་མངོན་པ་ཉིད་དང༌། དགེ་བ་ཡང་དག་པར་བླངས་པ་སྤེལ་བས་སྐུའི་སྤུ་གྱེན་དུ་ཕྱོགས་པ་ཉིད་དང༌། རིག་པ་དང་བཟོ་ལ་སོགས་པ་གུས་པར་བྱས་ཏེ་བྱིན་པས་བྱིན་པ་རི་དྭགས་ཨེ་ན་ཡའི་ལྟ་བུ་དང༌། ནོར་བདོག་པ་སློང་བ་
པོའི་སྐྱེ་བོ་ཕྱིར་མ་སྤངས་པས་ཕྱག་རིང་ཞིང་མཛེས་པ་ཉིད་དང༌། སྐྱེ་བོ་ཐམས་ཅད་ཚངས་པར་སྤྱོད་པ་ཡང་དག་པར་ལེན་དུ་འཇུག་ཅིང་གསང་བའི་ཚིག་བསྲུངས་པས་འདོམས་ཀྱི་སྦ་བ་སྦུབས་སུ་ནུབ་པ་ཉིད་དང༌། གདིང་བ་གྱ་ནོམ་པ་བྱིན་པས་མདོག་གསེར་འདྲ་བ་ཉིད་དང༌། ཁང་
བཟངས་ལ་སོགས་པ་དམ་པ་བྱིན་པས་པགས་པ་འཇམ་པ་ཉིད་དང༌། འདུ་འཛི་ལ་སོགས་པ་ཡོངས་སུ་སྤངས་པས་སྤུ་རེ་རེ་ནས་གཡས་ཕྱོགས་སུ་འཁྱིལ་བ་ཉིད་དང༌། སྐྱེ་བོ་བླ་མ་ཐམས་ཅད་གནས་ཇི་ལྟ་བ་བཞིན་དུ་བཀོད་པས་ཞལ་མཛོད་སྤུས་བརྒྱན་པ་ཉིད་དང༌། རྣམ་
པ་ཐམས་ཅད་དུ་ཁ་དྲག་གི་ཚིག་གིས་ཁྱད་དུ་མ་བསད་པས་རོ་སྟོད་སེང་གེ་འདྲ་བ་ཉིད་དང༌། སྙན་པར་སྨྲ་བ་དང་ལེགས་པར་སྨྲ་བའི་རྗེས་སུ་མཐུན་པར་བྱས་པས་དཔུང་མགོ་ཤིན་ཏུ་ཟླུམ་པ་ཉིད་དང༌། སྨན་ལ་སོགས་པ་བྱིན་པས་ཕྲག་པ་རྒྱས་པ་ཉིད་དང༌། སྐྱེ་བོ་ནད་པའི་
གཡོག་བྱས་པས་རོ་བྲོ་བའི་མཆོག་མཁྱེན་པ་ཉིད་དང༌། ནགས་ཚལ་དང་ཀུན་དགའི་རྭ་བ་ལ་སོགས་པ་བྱེད་པ་ཡང་དག་པར་ལེན་དུ་བཅུག་པས་ཤིང་ནྱ་གྲོ་དྷ་ལྟར་ཆུ་ཞེང་གབ་པ་ཉིད་དང༌། གཙུག་ལག་ཁང་ལ་སོགས་པ་ལྷག་པར་བྱིན་པས་དབུ་གཙུག་ཏོར་དང་ལྡན་པ་ཉིད་དང༌།
འཇམ་པོ་ལ་སོགས་པ་གསུངས་པས་ལྗགས་རིང་བ་ཉིད་དང༌། འཇིག་རྟེན་གྱི་ཁམས་ཐམས་ཅད་ཀྱི་སེམས་ཅན་ལ་དམ་པའི་ཆོས་གོ་བར་བྱས་པས་ཚངས་པའི་དབྱངས་ཉིད་དང༌། ཚིག་འཁྱལ་པ་སྤངས་པས་འགྲམ་པ་སེང་གེའི་འདྲ་བ་ཉིད་དང༌། སྐྱེ་བོ་ཐམས་ཅད་བཀུར་བ་ལ་

སོགས་པས་ཚེམས་དཀར་བ་ཉིད་དང༌། འཚོ་བ་རྣམ་པར་དག་པ་ཉིད་ཀྱིས་ཚེམས་མཉམ་པ་ཉིད་དང༌། བདེན་པའི་ཚིག་ཀུན་དུ་སྤྱད་པས་ཚེམས་ཐགས་བཟང་བ་ཉིད་དང༌། ཕྲ་མའི་ཚིག་སྤངས་པས་ཚེམས་བཞི་བཅུ་མངའ་བ་ཉིད་དང༌། སེམས་
ཅན་ཐམས་ཅད་ལ་བུ་གཅིག་པ་དང་འདྲ་བར་བལྟས་པས་སྤྱན་མཐོན་མཐིང་ཉིད་དང༌། ཁོང་ཁྲོ་བ་ལ་སོགས་པ་མེད་པར་བལྟས་པས་རྫི་མ་བའི་ལྟ་བུ་ཉིད་དོ་ཞེས་འབྱུང་ངོ༌། །དཔེ་བྱད་བཟང་པོ་བརྒྱད་ཅུ་ཡང༌། །ཐུབ་པའི་སེན་མོ་ཟངས་མདོག་དང༌། །ཞེས་བྱ་བ་ནས། གཡུང་
དྲུང་འཁྱིལ་པས་བརྒྱན་པ་སྟེ། །སངས་རྒྱས་དཔེ་བྱད་བཟང་པོར་བཞེད། །ཅེས་བྱ་བའི་བར་དུ་འབྱུང་སྟེ། དེའི་དོན་ནི། གོང་མའི་རྗེས་ཐོགས་སུ་འདི་ལྟ་སྟེ། འདུ་བྱེད་ཐམས་ཅད་ལ་འདོད་ཆགས་དང་བྲལ་བ་ཉིད་ཀྱིས་སེན་མོ་ཟངས་ཀྱི་མདོག་ལྟ་བུ་ཉིད་དང༌། སེམས་ཅན་
ཐམས་ཅད་ལ་ཕན་པའི་ལྷག་པའི་བསམ་པ་ཉིད་ཀྱིས་སེན་མོའི་མདོག་སྣུམ་པ་ཉིད་དང༌། རིགས་ཀྱི་མཆོག་སྤེལ་བས་སེན་མོ་མཐོ་བ་ཉིད་དང༌། ཚུལ་ཁ་ན་མ་ཐོ་བ་མེད་པ་ཉིད་ཀྱིས་སོར་མོ་རྣམས་ཟླུམ་པ་ཉིད་དང༌། དགེ་བའི་རྩ་བ་བསགས་པ་ཉིད་ཀྱིས་སོར་མོ་རྣམས་རྒྱས་པ་
ཉིད་དང༌། ཡང་དག་པར་མཐར་གྱིས་ཞུགས་པ་ཉིད་ཀྱིས་སོར་མོ་རྣམས་བྱིན་གྱིས་ཕྲ་བ་ཉིད་དང༌། ལུས་ལ་སོགས་པའི་ལས་དང་འཚོ་བ་རབ་ཏུ་བསྲུངས་པ་ཉིད་ཀྱིས་རྩ་མི་མངོན་པ་ཉིད་དང༌། ཉོན་མོངས་པའི་མདུད་པ་བཀྲོལ་བ་ཉིད་ཀྱིས་རྩ་མདུད་པ་མེད་པ་ཉིད་དང༌། ཤིན་ཏུ་
སྦས་པའི་ཆོས་ཀྱི་བློ་གྲོས་ཅན་ཉིད་ཀྱིས་ལོང་བུ་མི་མངོན་པ་ཉིད་དང༌། བགྲོད་པར་དཀའ་བའི་གནས་ཐམས་ཅད་ལ་སྐྱེ་བོ་སྒྲོལ་བར་མཛད་པ་ཉིད་ཀྱིས་ཞབས་མི་མཉམ་པ་མེད་པ་ཉིད་དང༌། མི་ཟིལ་གྱིས་གནོན་པ་ལ་མཁས་པ་ཉིད་ཀྱིས་སེང་གེའི་སྟབས་སུ་གཤེགས་པ་ཉིད་དང༌། ཀླུ་
ཟིལ་གྱིས་མནན་པ་ལ་མཁས་པ་ཉིད་ཀྱིས་གླང་པོ་ཆེའི་སྟབས་སུ་གཤེགས་པ་ཉིད་དང༌། ནམ་མཁའ་ལ་གཤེགས་པར་མཁས་པ་ཉིད་ཀྱིས་ངང་པའི་སྟབས་སུ་གཤེགས་པ་ཉིད་དང༌། སྐྱེས་བུ་ཁྱུ་མཆོག་ཏུ་མཁས་པ་ཉིད་ཀྱིས་ཁྱུ་མཆོག་གི་སྟབས་སུ་གཤེགས་པ་ཉིད་དང༌། སྐོར་

ཕྱོགས་ཀྱི་ལམ་དང་མཐུན་པར་གཤེགས་པ་ཉིད་ཀྱིས་གཡས་ཕྱོགས་སུ་ལྡོག་ཅིང་གཤེགས་པ་ཉིད་དང༌། མཛེས་པར་མཁས་པ་ཉིད་ཀྱིས་མཛེས་པར་གཤེགས་པ་ཉིད་དང༌། རྟག་ཏུ་སེམས་གྱ་གྱུ་མི་མངའ་བ་ཉིད་ཀྱིས་མ་ཡོ་བར་གཤེགས་པ་ཉིད་དང༌། ཡོན་ཏན་ཡང་དག་པར་བརྗོད་པ་མཛད་
པ་ཉིད་ཀྱིས་སྐུ་འཁྲིལ་བག་ཆགས་པ་ཉིད་དང༌། སྡིག་པའི་ཆོས་དང་མ་འབགས་པ་ཉིད་ཀྱིས་སྐུ་བྱི་དོར་བྱས་པ་ལྟ་བུ་ཉིད་དང༌། གདུལ་བྱ་དང་འཚམ་པའི་ཆོས་སྟོན་པར་མཛད་པ་ཉིད་ཀྱིས་སྐུ་རིམ་པར་འཚམ་པ་ཉིད་དང༌། སྐུ་ལ་སོགས་པའི་ཀུན་དུ་སྤྱོད་པ་གཙང་བའི་ཕྱིར་རྣམ་པར་
དག་པ་ཉིད་དང༌། ཐུགས་ཐུགས་རྗེ་ཅན་གྱི་ཕྱིར་སྐུ་འཇམ་པ་ཉིད་དང༌། ཐུགས་རྣམ་པར་དག་པའི་ཕྱིར་སྐུ་རྣམ་པར་དག་པ་ཉིད་དང༌། ཆོས་འདུལ་བ་ཡོངས་སུ་རྫོགས་པའི་ཕྱིར་མཚན་རྫོགས་པ་ཉིད་དང༌། ཡངས་ཤིང་མཛེས་པའི་ཡོན་ཏན་བརྗོད་པའི་ཕྱིར་སྐུའི་ཁོ་ལག་ཡངས་ཤིང་བཟང་བ་ཉིད་དང༌།
ཐམས་ཅད་ལ་ཐུགས་སྙོམས་པའི་ཕྱིར་གོམས་པ་སྙོམས་པ་ཉིད་དང༌། རྣམ་པར་དག་པའི་ཆོས་སྟོན་པའི་ཕྱིར་སྤྱན་རྣམ་པར་དག་པ་ཉིད་དང༌། ཆོས་གོ་སླ་བ་སྟོན་པའི་ཕྱིར་སྐུ་གཞོན་ཤ་ཅན་ཉིད་དང༌། ཐུགས་རྟག་ཏུ་མ་ཞུམ་པའི་ཕྱིར་སྐུ་ཞུམ་པ་མེད་པ་ཉིད་དང༌། དགེ་བའི་
རྩ་བ་ཡང་དག་པར་འཕགས་པའི་ཕྱིར་སྐུ་རྒྱས་པ་ཉིད་དང༌། ཡང་སྲིད་པ་ཟད་པ་ཉིད་ཀྱིས་སྐུ་ཤིན་ཏུ་གྲིམས་པ་ཉིད་དང༌། རྟེན་ཅིང་འབྲེལ་པར་འབྱུང་བ་རྣམས་ཤིན་ཏུ་རྣམ་པར་ཕྱེ་བ་སྟོན་པར་མཛད་པ་ཉིད་ཀྱིས་ཡན་ལག་དང་ཉིང་ལག་ཤིན་ཏུ་རྣམ་པར་འབྱེས་པ་ཉིད་དང༌། ཚིག་གི་
དོན་ཤིན་ཏུ་རྣམ་པར་དག་པ་སྟོན་པས་རབ་ཏུ་གཟིགས་པ་རབ་རིབ་མེད་ཅིང་རྣམ་པར་དག་པ་ཉིད་དང༌། སློབ་མ་ཚུལ་ཁྲིམས་ཕུན་སུམ་ཚོགས་པ་ཉིད་དུ་གྱུར་པ་ཉིད་ཀྱིས་དཀུ་ཟླུམ་པ་ཉིད་དང༌། འཁོར་བའི་སྐྱོན་གྱིས་མ་སྦགས་པ་ཉིད་ཀྱིས་དཀུ་སྐབས་ཕྱེད་པ་ཉིད་དང༌། ང་རྒྱལ་
གྱི་འགྱིང་པ་མ་བཅོམ་པ་ཉིད་ཀྱིས་དཀུ་མ་རྙོངས་པ་ཉིད་དང༌། ཆོས་ཟད་པ་རྣམ་པར་ཟློག་པ་ཉིད་ཀྱིས་ཕྱལ་ཕྱང་ངེ་བ་ཉིད་དང༌། ཆོས་ཟབ་མོ་རྟོགས་པ་ཉིད་ཀྱིས་ལྟེ་བ་ཟབ་པ་ཉིད་དང༌། སློབ་མ་མཐུན་པ་ཟབ་པ་ཉིད་ཀྱིས་ལྟེ་བ་གཡས་ཕྱོགས་སུ་འཁྱིལ་བ་ཉིད་དང༌། འཁོར་ཀུན་

ནས་མཛེས་པར་འགྱུར་བ་ཉིད་ཀྱིས་ཀུན་ནས་མཛེས་པ་ཉིད་དང༌། ཐུགས་གཙང་བ་ཉིད་ཀྱིས་ཀུན་དུ་སྤྱོད་པ་གཙང་བ་ཉིད་དང༌། དུས་མ་ཡིན་པའི་ཆོས་འདུལ་བ་དང་བྲལ་བ་ཉིད་ཀྱིས་སྐུ་ལ་སྨེ་བ་དང་གནག་བག་མེད་པ་ཉིད་དང༌། ལུས་ལ་སོགས་བཟོ་མདོག་
བདེ་བ་འཐོབ་པའི་ཆོས་སྟོན་པར་བྱེད་པ་ཉིད་ཀྱིས་ཕྱག་ཤིང་བལ་ལྟར་འཇམ་པ་ཉིད་དང༌། མདངས་ཡོད་པའི་དགེ་སྦྱོང་ཆེན་པོ་རྙེད་པ་ཉིད་ཀྱིས་ཕྱག་གི་རི་མོ་མདངས་ཡོད་པ་ཉིད་དང༌། ཆོས་ཟབ་མོ་ལ་གནས་པ་ཉིད་ཀྱིས་ཕྱག་གི་རི་མོ་ཟབ་པ་ཉིད་དང༌། ཕྱིས་རྗེས་སུ་ཡང་དག་པར་
ཡོངས་སུ་དག་པའི་ཆོས་སྟོན་པར་མཛད་པ་ཉིད་ཀྱིས་ཕྱག་གི་རི་མོ་རིང་བ་ཉིད་དང༌། བསླབ་པ་རབ་ཏུ་མང་པོ་ཀུན་སྟོན་པར་མཛད་པ་ཉིད་ཀྱིས་ཞལ་ཧ་ཅང་མི་རིང་པ་ཉིད་དང༌། འཇིག་རྟེན་ཐམས་ཅད་གཟུགས་བརྙན་དང་འདྲ་བར་རྟོགས་པ་ཉིད་ཀྱིས་མཆུ་བིམ་པ་ལྟར་དམར་བ་ཉིད་དང༌།
ཚིག་འཇམ་པོས་འདུལ་བ་ཉིད་ཀྱིས་ལྗགས་མཉེན་པ་ཉིད་དང༌། ཡོན་ཏན་འཐད་པ་མངའ་བ་ཉིད་ཀྱིས་ལྗགས་སྲབ་པ་ཉིད་དང༌། ཆོས་འདུལ་བ་བྱིས་པའི་སྐྱེ་བོ་ཆགས་པ་ཅན་གྱིས་གཏིང་དཔག་དཀའ་བ་ཉིད་ཀྱིས་ལྗགས་དམར་བ་ཉིད་དང༌། བསྙེངས་པ་ཐམས་ཅད་མི་མངའ་བ་ཉིད་ཀྱིས་
འབྲུག་གི་སྒྲ་དང་ལྡན་པ་ཉིད་དང༌། སྙན་པ་ལ་སོགས་པར་གསུངས་པ་ཉིད་ཀྱིས་གསུང་སྙན་ཞིང་མཉེན་ལ་འཇམ་པ་ཉིད་དང༌། སྲིད་པར་ཀུན་དུ་སྦྱོར་བ་བསྡོམས་པ་ཉིད་ཀྱིས་མཆེ་བ་ཟླུམ་པ་ཉིད་དང༌། སྐྱེ་བོ་གདུལ་བར་དཀའ་བ་འདུལ་བ་ཉིད་ཀྱིས་མཆེ་བ་རྣོ་བ་ཉིད་དང༌། ཆོས་
འདུལ་བ་ཤིན་ཏུ་དཀར་བ་ཉིད་ཀྱིས་མཆེ་བ་དཀར་བ་ཉིད་དང༌། མཉམ་པའི་ས་ལ་གནས་པ་ཉིད་ཀྱིས་མཆེ་བ་མཉམ་པ་ཉིད་དང༌། མཐར་གྱིས་མངོན་པར་རྟོགས་པ་ཡང་དག་པར་རབ་ཏུ་སྟོན་པར་མཛད་པ་ཉིད་ཀྱིས་མཆེ་བ་བྱིན་གྱིས་ཕྲ་བ་ཉིད་དང༌། ཤེས་རབ་མཆོག་ལ་གནས་པ་
ཉིད་ཀྱིས་ཤངས་མཐོ་བ་ཉིད་དང༌། སྐྱེ་བོ་གཙང་མ་ཕུན་སམ་ཚོགས་པ་ཉིད་ཀྱིས་ཤངས་གཙང་བ་ཉིད་དང༌། ཆོས་ཤིན་ཏུ་རྒྱས་པ་ཉིད་ཀྱིས་སྤྱན་ཡངས་པ་ཉིད་དང༌། སེམས་ཅན་གྱི་ཚོགས་དྲངས་པ་ཉིད་ཀྱིས་རྫི་མ་སྟུག་པ་ཉིད་དང༌། འགྲོ་བ་གཞོན་ནུ་མ་ཐམས་ཅད་མངོན་པར་

མགུ་བ་ཉིད་ཀྱིས་སྤྱན་དཀར་ནག་འབྱེས་ཤིང་པདྨའི་འདབ་མ་རངས་པ་ལྟ་བུ་ཉིད་དང༌། རྟག་ཏུ་ཕྱིས་རྗེས་སུ་གཟིགས་པ་ཉིད་ཀྱིས་སྨིན་ཚུགས་རིང་བ་ཉིད་དང༌། ཆོས་འདུལ་བ་འཇམ་པོ་ལ་མཁས་པ་ཉིད་ཀྱིས་སྨིན་མ་འཇམ་པ་ཉིད་དང༌། ཐུགས་ཀྱི་རྒྱུད་དག་པས་བརླན་པ་ཉིད་
ཀྱིས་སྨིན་མ་སྣུམ་པ་ཉིད་དང༌། ཀུན་དུ་སྐྱོན་གཟིགས་པ་ཉིད་ཀྱིས་སྨིན་མའི་སྤུ་མཉམ་པ་ཉིད་དང༌། མཆོག་ཏུ་གནོད་པ་བཟློག་པར་མཛད་པ་ཉིད་ཀྱིས་ཕྱག་རིང་ཞིང་རྒྱས་པ་ཉིད་དང༌། འདོད་ཆགས་ལ་སོགས་པའི་གཡུལ་ལས་རྣམ་པར་རྒྱལ་བ་ཉིད་ཀྱིས་སྙན་མཉམ་པ་ཉིད་དང༌།
སེམས་ཅན་གྱི་རྒྱུད་མ་ཉམས་པར་མཛད་པ་ཉིད་ཀྱིས་སྙན་གྱི་དབང་པོ་མ་ཉམས་པ་ཉིད་དང༌། ལྟ་བས་བྱས་པ་ཐམས་ཅད་ཀྱིས་གཞན་དུ་མི་འགྱུར་བ་ཉིད་ཀྱིས་འཕྲལ་བ་ལེགས་པར་འབྱེས་པ་ཉིད་དང༌། སྨྲ་བ་ཐམས་ཅད་ཀྱི་ཐོག་མར་གྱུར་པ་ཉིད་ཀྱིས་འཕྲལ་བ་དབྱེས་ཆེ་བ་ཉིད་དང༌། སྨོན་
ལམ་གྱི་མཆོག་ཡོངས་སུ་རྫོགས་པ་ཉིད་ཀྱིས་དབུ་ཤིན་ཏུ་རྒྱས་པ་ཉིད་དང༌། ཡུལ་གྱི་དགའ་བ་རྗེས་སུ་བཟློག་པར་མཛད་པ་ཉིད་ཀྱིས་དབུ་སྐྲ་བུང་བ་ལྟར་གནག་པ་ཉིད་དང༌། མཐོང་བ་དང་བསྒོམ་པས་སྤང་བར་བྱ་བའི་བག་ལ་ཉལ་སྤངས་པ་ཉིད་ཀྱིས་དབུ་སྐྲ་སྟུག་པ་ཉིད་དང༌། བསྟན་
པ་བློ་འཇམ་པོས་ཡོངས་སུ་ཤེས་པ་ཉིད་ཀྱིས་དབུ་སྐྲ་འཇམ་པ་ཉིད་དང༌། ཐུགས་འདོད་ཆགས་ལ་སོགས་པས་མ་འཁྲུགས་པ་ཉིད་ཀྱིས་དབུ་སྐྲ་མ་འཛིངས་པ་ཉིད་དང༌། རྟག་ཏུ་ཚིག་མི་རྩུབ་པ་ཉིད་ཀྱིས་དབུ་སྐྲ་མེ་བཤོར་བ་ཉིད་དང༌། བྱང་ཆུབ་ཀྱི་ཡན་ལག་གི་མེ་ཏོག་བཀྲམ་པ་ཉིད་ཀྱིས་
དབུ་སྐྲ་དྲི་ཞིམ་པ་ཉིད་དང༌། རྣམ་པ་ཐམས་ཅད་དུ་མཛེས་པར་གྱུར་པ་ཉིད་ཀྱིས་ཕྱག་དང་ཞབས་དཔལ་གྱི་བེའུ་དང་བཀྲ་ཤིས་པ་དང་གཡུང་དྲུང་འཁྱིལ་པས་བརྒྱན་པ་ཉིད་ཡིན་ནོ་ཞེས་འབྱུང་བ་ནི་སངས་རྒྱས་ཀྱི་གཟུགས་སྐུའི་ཡོན་ཏན་ཡིན་པས་དེ་དག་དང་ལྡན་པའི་སྐུའི་ཆ་ཚད་དེ་དག་གི་
མཚན་ཉིད་སྟོན་པའི་བསྟན་བཅོས་ནི་གོང་དུ་སྨོས་པའི་རྒྱུད་འགྲེལ་དེ་དག་རྣམས་དང༌། དྲང་སྲོང་ཨེ་དྲ་ཡའི་བུས་བྱས་པའི་བསྟན་བཅོས་ལ་སོགས་པ་རྣམས་སོ། །གཉིས་པ་དེ་བཞིན་གཤེགས་པའི་གསུང་གི་རྟེན་ལུང་གི་ཆོས་ཀྱི་ཕུང་པོ་སྟེ། དེ་ལ་ཆོས་ཀྱི་ཕུང་པོའི་ཚད་བསྟན་པ་

དང༌། དེ་ཉིད་འགྲུབ་པའི་རྒྱུ་བསྟན་པའོ། །དང་པོ་ཆོས་ཀྱི་ཕུང་པོ་ཉིད་དུ་རྣམ་པར་གཞག་པའི་ཚད་ནི། བདག་ཅག་གི་སྟོན་པ་ཤཱཀྱའི་རྒྱལ་པོས་གདུལ་བྱ་མཐའ་ཡས་པའི་དོན་དུ་ལེགས་པར་གདམས་པའི་གཞུང་གི་ཚད་ལ་ཡང་དག་པར་ན་ཚད་དང་མུར་
ཐུག་པ་མེད་ནའང༌། གདུལ་བྱ་སོ་སོས་དབང་པོའི་རིམ་པ་དང་འཚམ་པར་བཟུང་བའི་གསུང་རབ་རིན་པོ་ཆེའི་ཚད་ལ་འདོད་པ་ཐ་དད་པ་དག་ཡོད་དེ། འདི་ལྟར་བསྟན་པའི་གཞིར་གྱུར་པ་ཐེག་པ་དམན་པའི་ལུགས་ཀྱི་འདོད་པ་ལྟར་ན། འདོད་ཆགས་ལ་སོགས་པའི་ཉོན་མོངས་པར་
སྤྱོད་པ་ནང་གསེས་ཀྱི་སྒོ་ནས་རྣམ་པར་དབྱེ་བ་བརྒྱད་ཁྲི་སྟེ། དེ་དག་ལས་གང་ཡང་རུང་བ་རེའི་གཉེན་པོ་མ་ཚང་བ་མེད་པར་སྟོན་པའི་གཏམ་རྫོགས་པ་རེ་ལ་ལུང་གི་ཆོས་ཀྱི་ཕུང་པོའི་ཚད་དུ་འདོད་དེ། མངོན་པ་མཛོད་ལས། ཆོས་ཀྱི་ཕུང་པོ་བརྒྱད་ཁྲི་དག །གང་རྣམས་ཐུབ་པས་
གསུངས་དེ་དག །ཅེས་དང༌། ཁ་ཅིག་བསྟན་བཅོས་ཚད་ཅེས་ཟེར། །ཕུང་པོ་ལ་སོགས་གཏམ་རེ་ཡིན། །སྤྱོད་པ་རྣམས་ཀྱི་གཉེན་པོར་ནི། །ཆོས་ཀྱི་ཕུང་པོ་མཐུན་པར་གསུངས། །ཞེས་སོ། །དེ་ལྟ་བུའི་ཆོས་ཀྱི་ཕུང་པོ་རེ་རེའི་འཇལ་བྱེད་ཀྱི་ཚད་ནི་ཅི་ཙམ་ལ་འཇོག་པ་
ཡིན་སྙམ་ན། མངོན་པ་སྡེ་བདུན་གྱི་ཡ་གྱལ་ཆོས་ཀྱི་ཕུང་པོ་ཞེས་བྱ་བ་ཤཱ་རིའི་བུས་བསྡུས་པར་འདོད་པའི་གཞུང་གང་ལ་ཤླཽ་ཀ་སྟོང་ཕྲག་དྲུག་ཏུ་ལོངས་པ་དེ་ཉིད་ཆོས་ཀྱི་ཕུང་པོ་གཅིག་གི་ཚད་དུ་བྱས་ནས། དེ་ཉིད་ཀྱི་ཟླས་རྣམ་པར་དབྱེ་བའི་ཆོས་ཀྱི་ཕུང་པོ་བརྒྱད་ཁྲི་ཉིད་དུ་ཡོད་པར་འདོད་དོ། །
ཐེག་པ་ཐུན་མོང་བ་ལྟར་ན། དབུ་མ་པ་ཆོས་ཀྱི་བཤེས་གཉེན་གྱིས། མ་ལུས་པ་ནི་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་སྟེ། དེ་ལ་ཆོས་ཕུང་གཅིག་གི་ཚད་ནི་ཇི་ཙམ་ཞེ་ན། དེ་གཅིག་ལ་ནི་ཚིག་ལེའུར་བྱས་པ་སྟོང་ཉིད་དོ། །ཚིགས་སུ་བཅད་པ་རེ་ལའང་ཡིག་འབྲུ་
སུམ་ཅུ་རྩ་གཉིས་ཉིད་དོ། །དེ་ལྟར་ན་ཕུང་པོ་ཐམས་ཅད་ཚིགས་སུ་བཅད་པ་བྱེ་བ་ཕྲག་བརྒྱད་དང༌། ཡང་འབུམ་ཕྲག་བཞི་བཅུར་འགྱུར་བར་བཤད་དོ། །ཐེག་པ་ཆེན་པོ་ལྟར་ན་གླང་པོ་ཆེ་རབ་བརྟན་ཞེས་བྱ་བ་ལུས་ཀྱི་ཚད་ནི་མཐའ་སྐོར་ལ་དཔག་ཚད་བདུན་ཡོད་པ་ཞིག་སྟེ།

དེའི་ཁུར་དུ་བཀུར་བར་འོས་པའི་སྣག་ཚ་ལས་བྲིས་པ་ཇི་ཙམ་ཡོད་པ་དེ་ཙམ་ལ་ཆོས་ཀྱི་ཕུང་པོ་གཅིག་གི་ཚད་དུ་མངོན་པར་འདོད་དེ། དེ་ཉིད་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པའི་འགྲེལ་པ་ཚིག་གསལ་ལས། ཐེག་པ་བླ་ན་མེད་པའི་དབང་དུ་བྱས་ཏེ། དབང་པོའི་གླང་པོ་ཆེ་རབ་བརྟན་གྱིས་
འཁུར་བར་འོས་པའི་སྣག་ཚས་ནི་ཆོས་ཀྱི་ཕུང་པོ་གཅིག་འདྲི་བར་ནུས་སོ་ཞེས་གསུངས་ཏེ། དེ་ལྟར་བྱས་ན་མདོ་གང་དག་ལས། འཕགས་པ་ལྷས་བྱིན་གྱིས་གླང་པོ་ཆེ་ལྔ་སྟོང་གིས་འཁུར་བར་བྱ་བའི་གླེགས་བམ་རྣམས་ཁ་དོན་དུ་རྗོད་པར་བྱེད་དོ་ཞེས་གསུངས་པ་འདིའང་རིགས་པར་འགྱུར་
རོ། །ཆོས་ཀྱི་ཕུང་པོ་དེ་སྙེད་ཡོད་པ་ཉིད་ན། ཅིའི་ཕྱིར་འཛམ་བུའི་གླིང་ན་རབ་ཏུ་མི་སྣང་ཞེ་ན། ཁ་ཅིག་ནི་འཇིག་རྟེན་གྱི་ཁམས་གཞན་རྣམ་པར་སྤྱོད་ཅིང་གཞན་ཡང་ཕལ་ཆེར་ཀླུ་རྣམས་ཀྱི་གནས་ན་སྤྱོད་པ་སྟེ་ཞེས་གསུངས་པའི་ཕྱིར་རོ།