Luận tạng Tây Tạng (Tengyur) — Tập 213

ོན་ཏེ་རྡོ་རྗེ་གདན་པ་དང༌། མཻ་ཏྲི་པ་དང༌། ཡེ་ཤེས་ཀྱི་མཁའ་འགྲོ་མ་ནི་གུ་མ་ལ་སོགས་
པའི་བླ་མ་བརྒྱ་དང་ལྔ་བཅུ་ལྷག་པ་ལས་ཆོས་གསན་ཏེ་ཐུགས་ཉམས་སུ་བསྟར། བོད་དུ་བྱོན་ཏེ་ཤངས་གཞོང་གཞོང་གི་དགོན་པ་བཏབ་པས་ཤངས་པ་བཀའ་བརྒྱུད་ཅེས་བྱ་བར་གྲགས་ཤིང༌། འདི་ལ་སློབ་མ་ལ་སྟོད་དཀོན་མཆོག་མཁར་དང༌། རྨོག་ཅོག་པ་ལ་སོགས་པ་ཁྲི་ཕྲག་བརྒྱད་

དུ་ལངས་པ་བྱུང་བར་གྲགས་སོ། །མན་ངག་སྦྱོར་དྲུག་སོགས་ནི་བོད་དུ་ཐོག་མར་དཔལ་ཆེན་རྒ་ལོ་དང༌། གྲུབ་ཐོབ་ཡུ་མོ་ཡབ་སྲས་དང༌། བུ་དོལ་ལ་སོགས་པས་དར་བར་མཛད་དོ། །རི་བོ་དགའ་ལྡན་པའི་ལུགས་སྲོལ་ནི། ཤར་བཙོང་ཁ་པ་ཆེན་པོ་བློ་བཟང་གྲགས་པའི་དཔལ་གྱི་
རྗེས་སུ་འཇུག་པ་དང་བཅས་པ་སྟེ། རྗེ་བཙུན་དམ་པ་འདི་ནི་འཇམ་དཔལ་རྩ་བའི་རྒྱུད་དང༌། མཁའ་འགྲོ་གསང་བའི་རྒྱུད་དང༌། བཀའ་གདམས་གླེགས་བམ་རིན་པོ་ཆེ་ལ་སོགས་པའི་བཀའ་དང་བསྟན་བཅོས་མང་པོ་ནས་ལུང་བསྟན་ཅིང༌། སྔོན་གྱི་དུས་སུ་དེ་བཞིན་གཤེགས་པ་
དབང་པོའི་ཏོག་གི་དྲུང་དུ་ཐུགས་བསྐྱེད་ཅིང༌། མ་འོངས་པ་ན་སངས་རྒྱས་ཀྱི་ཞིང་དཔག་ཏུ་མེད་པ་འདས་པའི་མཚམས་སུ་ངོ་མཚར་རྨད་བྱུང་བཀོད་པ་སྣ་ཚོགས་པས་མཛེས་པ་ཞེས་བྱ་བའི་ཞིང་ཁམས་སུ། དེ་བཞིན་གཤེགས་པ་སེང་གེའི་ང་རོ་ཞེས་བྱ་བར་འཚང་རྒྱ་བར་ལུང་བསྟན་པའི་སྐྱེས་བུ་
དམ་པ་སྟེ། རྗེ་བཙུན་དམ་པ་འདིས་སྐུ་ཚེའི་སྟོད་དུ་མདོ་སྔགས་དང་རིག་པའི་གཙུག་ལག་གངས་ཅན་གྱི་ལྗོངས་སུ་དར་བ་ཕལ་ཆེར་གྱི་གསན་པ་དང་སྦྱངས་པ་རྒྱ་མཚོ་ཆེན་པོ་ལྟ་བུའི་ཕ་རོལ་ཏུ་ཕྱིན་པར་མཛད་དོ། །བར་སྐབས་སུ་ཐོས་པའི་དོན་ལ་དཔྱད་པ་དང་བསྒོམ་པའི་སྒོ་ནས་ཉམས་སུ་
བཞེས་པ་ཁོ་ན་ལྷུར་མཛད་ཅིང༌།འཕྲལ་གྱི་ཀུན་དུ་སྤྱོད་པ་རྣམས་ཀྱང་འདུལ་བ་དང་མཐུན་པའི་ལག་ལེན་གྱི་གསོས་བཏབ་བོ། །ཁྱད་པར་རྒྱལ་བའི་གསུང་རབ་མདོ་རྒྱུད་མ་ལུས་པའི་སྙིང་པོ་བསྡུས་པ། ཤིང་རྟ་ཆེན་པོ་ཀླུ་སྒྲུབ་དང་ཐོགས་མེད་གཉིས་ཀྱི་ལམ་སྲོལ། སྐྱེས་བུ་གསུམ་གྱིས་
ཉམས་སུ་བླང་བར་བྱ་བའི་རིམ་པ་ཐམས་ཅད་ཚང་བར་སྟོན་པར་བྱེད་པ་བྱང་ཆུབ་ལམ་གྱི་རིམ་པ་གཙོ་བོར་གྱུར་པའི་བསྟན་པ་རྒྱས་པའི་ཕྲིན་ལས་སྐྱོང་བ་ལ་འབད་པ་རྩེ་གཅིག་ཏུ་བཏོན་པས། དཔལ་ལྡན་འཇམ་པའི་དབྱངས་ཀྱང་དགེས་པས་ཞལ་གཟིགས་པ་ལ། བླ་མ་དབུ་མ་པས་ལོ་ཙཱ་བ་
མཛད་པའི་ཚུལ་གྱིས་མདོ་དང་སྔགས་ཀྱི་ཆོས་མང་པོ་ལ་ཐེ་ཚོམ་གྱི་མདུད་པ་གྲོལ་བར་བྱས་སོ། །སྐུ་ཚེའི་སྨད་དུ་འགྲོ་དོན་དང་ཕྲིན་ལས་རྨད་དུ་བྱུང་བར་རྒྱས་པར་གྱུར་ཏེ་ལྷ་ལྡན་དུ་ཆོ་འཕྲུལ་དུས་ཆེན་གྱི་སྨོན་ལམ་ཆེན་པོ་ཚུགས་པ་དང༌། འབྲོག་རི་བོ་དགའ་ལྡན་རྣམ་རྒྱལ་གླིང་བཏབ་པས།

དེ་ནས་བརྩམས་ཏེ་དེའི་རྗེས་སུ་འཇུག་པ་དང་བཅས་པ་ལ་དགའ་ལྡན་པ་ཞེས་ཡོངས་སུ་གྲགས་པ་བྱུང་ངོ༌། །དེ་ཉིད་ཀྱི་གསུང་གི་བདུད་རྩི་འཐུང་བ་ལས་སྐྱེས་པའི་སློབ་མ་གྲངས་མེད་པ་བྱུང་བ་ལས་མཆོག་ཏུ་གྱུར་པ་ནི་རྒྱལ་ཚབས་རྗེ་དང༌། མཁས་གྲུབ་རྗེ་དང༌།
ཐམས་ཅད་མཁྱེན་པ་དགེ་འདུན་གྲུབ་པ་དང༌། འདུལ་འཛིན་གྲགས་རྒྱལ་དང༌། འདུལ་འཛིན་བློ་གྲོས་སྦས་པ་སྟེ་འདུལ་བ་འཛིན་པ་རྣམ་པ་གཉིས་ལ་སོགས་པ་མཁས་པའི་ཕྲིན་ལས་ལ་དབང་འབྱོར་བ་མང་དུ་བྱོན་པ་རྣམས་ཀྱིས་ཕྲིན་ལས་ཀྱི་རྒྱུན་གནས་པར་བྱེད་དོ། །རྗེ་བཙུན་ས་སྐྱ་
པའི་ལུགས་སྲོལ་ནི། ཐོག་མར་འཁོན་ཀླུའི་དབང་པོའི་བསྲུངས་པས་སད་མི་མི་བདུན་གྱི་ནང་གསེས་སུ་རབ་ཏུ་བྱུང་སྟེ། སློབ་དཔོན་པདྨ་སམྦྷ་ཝའི་ཞབས་ཀྱི་པདྨར་བརྟེན་ཏེ་གསང་སྔགས་ཀྱི་སྨིན་བྱེད་དང་གྲོལ་བྱེད་ཀྱི་གདམས་པ་མང་དུ་གསན་ཅིང༌། དཔལ་ཆེན་རྡོ་རྗེ་གཞོན་ནུ་ལ་སོགས་
པའི་གསང་སྔགས་ཀྱི་བཀའ་བབས་ཤིང་གྲུབ་པ་བརྙེས་སོ། །དེ་ནས་བཟུང་སྟེ་འཁོན་རོག་ཤེས་རབ་ཚུལ་ཁྲིམས་ཡན་ཆད་ལ་གསང་སྔགས་རྙིང་མའི་གྲུབ་པ་བརྙེས་པ་ཤ་སྟག་བྱུང་ངོ༌། །ཇི་ཙམ་ཞིག་ན་འཁོན་རོག་གི་གཅུང་དུ་གྱུར་པ་དཀོན་མཆོག་རྒྱལ་པོས་དབང་ཕྱུག་མ་ཉི་ཤུ་རྩ་བརྒྱད་ཀྱི་གར་འཆམ་བྱེད་པ་ལ་སོགས་
པ་གཟིགས་པའི་རྐྱེན་གྱིས།གསང་སྔགས་གསར་མ་ལ་འཇུག་པའི་སྒོ་བྱེ་སྟེ། རྙིང་མའི་ཆོས་སྐོར་ཡང་ཕུར་གཉིས་ཙམ་མིན་པའི་ཕལ་ཆེ་བ་གཏེར་དུ་སྦས་ནས། བླ་ཆེན་འབྲོག་མི་ལོ་ཙཱ་ལ་སོགས་པའི་མཁས་གྲུབ་ཀྱི་འཁོར་ལོས་སྒྱུར་བ་དུ་མའི་
ཞབས་བསྟེན་ནས་ཐོས་བསམ་བསྒོམ་པ་རྒྱ་མཚོ་ལྟ་བུའི་མཐར་སོན་པར་མཛད་དོ། །ས་དཀར་པོའི་ལོགས་ལ་སཱ་ལུའི་སྨན་ལྗོངས་ཀྱི་རྡོ་རྗེའི་གདན་ཆེན་པོ་དཔལ་ལྡན་ས་སྐྱའི་ཆོས་གྲྭ་ཆེན་པོ་འདི་ཉིད་སྐྱེ་དགུ་མ་ལུས་པའི་བསོད་ནམས་ཀྱི་དཔྱིད་དུ་བསྐྲུན་ཏེ། དེ་ཕྱིན་ཆད་ནས་ལྷ་རིགས་
འཁོན་ས་སྐྱ་པ་ཞེས་ཡོངས་སུ་གྲགས་སོ། །དེའི་སྲས་འཕགས་པ་འཇིག་རྟེན་དབང་ཕྱུག་གིས་འགྲོ་བའི་དོན་ལ་བསམ་བཞིན་དུ་སྐྱེ་བའི་སྒྱུ་འཕྲུལ་གྱི་རོལ་པ་དཔལ་བརྩེ་བ་ཆེན་པོ་ཀུན་དགའ་སྙིང་པོ་སྟེ། རྗེ་བཙུན་དམ་པ་འདིས་ལྷག་པའི་ལྷ་འཇམ་པའི་དབྱངས་བསྒྲུབས་པས་ཟླ་

བ་དྲུག་ནས་ལྷག་པ་ལྷའི་ཞལ་གྱི་དཀྱིལ་འཁོར་མཐོང་ཞིང༌། ཕ་རོལ་ཏུ་ཕྱིན་པའི་ལུགས་ཀྱི་ལམ་ཡོངས་སུ་རྫོགས་པར་སྟོན་པར་བྱེད་པའི་ཞེན་པ་བཞི་བྲལ་གྱི་གདམས་པའི་ལམ་སྲོལ་ཆེན་པོ་སྩལ་ཏོ། །དེ་ནས་བརྩམས་ཏེ་བཀའ་སྡེ་སྣོད་ཀྱི་ཆོས་ཐམས་ཅད་ལ་མི་འཇིགས་པ་མེད་
པའི་སྤོབས་པ་བརྙེས་ནས་རིམ་གྱིས་བྲང་ཏི་དར་མ་སྙིང་པོ་དང༌། ཁྱུང་རིན་ཆེན་གྲགས་དང༌། མེས་ལྷང་ཚེར་དང༌། ཁའུ་པ་དར་མ་རྒྱལ་མཚན་དང༌། སྒྱི་ཆུ་བ་དགྲ་ལྷ་འབར་དང༌། མལ་ལོ་ཙཱ་བ་དང༌། པུ་ཧྲངས་ལོ་ཆུང་ལ་སོགས་པ་ལས་མདོ་སྔགས་ཀྱི་ཆོས་ཚུལ་བསམ་
གྱིས་མི་ཁྱབ་པ་གསན་ཏེ་བསྟན་པའི་བདག་པོར་གྱུར་ཏོ། །ཁྱད་པར་བླ་ཆེན་ཞང་དགོན་པ་བ་ཡུན་རིང་དུ་བརྟེན་ཏེ། དཔལ་ལྡན་བིརྺ་པའི་བཞེད་གཞུང་གསུང་ངག་རིན་པོ་ཆེ་ལམ་འབྲས་བུ་དང་བཅས་པའི་གདམས་ངག་ཡན་ལག་དང་བཅས་པ་གསན་ཅིང་ཐུགས་ཉམས་སུ་བསྟར་
རོ། །དཔལ་རྣལ་འབྱོར་གྱི་དབང་ཕྱུག་གཙོ་འཁོར་ལྔ་དམ་པའི་ཆོས་སྒོ་སྐྱེལ་གྱི་ཚུལ་དུ་བྱོན་ནས། རྒྱུད་སྡེ་བདུན་ཅུ་རྩ་གཉིས་དང༌། ལྕགས་རིའི་ཁོང་ལས་མི་འདའ་བའི་ཟབ་ཆོས་བཞི་ལ་སོགས་པ་དང༌། གསུང་ངག་རིན་པོ་ཆེ་ཉེ་བརྒྱུད་ཀྱི་གདམས་པ་མ་ལུས་པ་སྩལ་ཏོ། །རང་ལོ་
ལྔ་བཅུ་པར་གདམས་ངག་གི་བཀའ་རྒྱ་གྲོལ་ཏེ། ཁམས་པ་ཨ་སེང་གིས་ཞུས་པའི་ངོར་གསུང་ངག་ཐོག་མར་གསུངས་པ་ནས་བཟུང་སྟེ་གདམས་པ་རྣམས་ལེགས་པར་སྩལ་བའི་སློབ་མ་མཆོག་ཐོབ་པ་གསུམ། བཟོད་པ་ཐོབ་པ་བདུན། རྟོགས་པ་ལྡན་པ་བརྒྱད་ཅུ། གཞུང་བཤད་འཛིན་
པའི་ཐུགས་སྲས་བཅུ་གཅིག ཚིག་རྐང་རྣམ་པར་འགྲེལ་པའི་ཐུགས་སྲས་བདུན། ཕྱོགས་ཀྱི་མཁས་གྲུབ་ཆེན་པོ་བཞི་ལ་སོགས་པ་རྣམས་སོ། །དེའི་སྲས་རྗེ་བཙུན་མཆེད་གཉིས་ཞེས་པ་ནི་འཕགས་པའི་ཡུལ་གྱི་པཎྜི་ཏ་ཆེན་པོ་མི་ཐུབ་ཟླ་བའི་རྣམ་པར་འཕྲུལ་བ་སློབ་དཔོན་བསོད་ནམས་
རྩེ་མོ་དང༌། སྐྱེ་བ་དུ་མར་རྗེ་བཙུན་འཇམ་པའི་དབྱངས་ལྷག་པའི་ལྷར་གྱུར་པས་སྐྱེ་བ་འདིར་འཇམ་དཔལ་གྱི་མཚན་ཡང་དག་པར་བརྗོད་པ་ཐུགས་ལ་རང་རྡོལ་དུ་བྱུང་བ་ལ་སོགས་པའི་ཡོན་ཏན་རྒྱ་མཚོའི་མངའ་བདག་རྗེ་བཙུན་གྲགས་པ་རྒྱལ་མཚན་དང༌། ཆོས་རྗེ་ཁུ་དབོན་ཞེས་པ་མཁྱེན་

རབ་འཇམ་པའི་དབྱངས་དང་གཉིས་སུ་མེད་པས། གངས་ཅན་གྱི་ལྗོངས་སུ་བཅུ་ཕྲག་རིག་པའི་གནས་ཀྱི་བསྟན་པ་ཡོངས་སུ་རྫོགས་པ་གསལ་བར་བྱེད་པའི་ཐོག་མར་གྱུར་པ་ས་སྐྱ་པཎྜི་ཏ་དང༌། ལུང་རྟོགས་ཀྱི་ཡོན་ཏན་ཕུན་སུམ་ཚོགས་པའི་རྟགས་སུ། དབུ་དང་ཕྱག་
ཞབས་རྣམས་སོ་སོར་ཕྲལ་ཏེ་དེ་བཞིན་གཤེགས་པ་ལྔའི་དཀྱིལ་འཁོར་དུ་སྤྲུལ་པ་དང་བསྡུ་བས་སའི་སྟེང་གི་འགྲོ་བ་རྒྱ་མཚོ་དད་པར་བྱས་ཏེ། མདོ་སྔགས་ཆོས་ཀྱི་སྣང་བར་བྱེད་པོ་འགྲོ་བའི་མགོན་པོ་འཕགས་པ་རིན་པོ་ཆེ་སྟེ། དཔལ་ས་སྐྱའི་རྗེ་བཙུན་གོང་མ་ལྔ་ཞེས་ཡོངས་སུ་གྲགས་སོ། །
འདི་དག་གིས་སྟོབས་བཅུ་མངའ་བའི་བསྟན་པ་ལ་ལྷག་པའི་བྱ་བ་བྱས་པ་དང་ཆེ་བའི་ཡོན་ཏན་མདོར་བསྡུས་པ་རྟོགས་པར་འདོད་པ་རྣམས་ཀྱིས་དཔལ་ས་སྐྱའི་རྗེ་བཙུན་གོང་མ་ལྔའི་གསུང་རབ་རིན་པོ་ཆེའི་པར་གྱི་སྒོ་འཕར་འབྱེད་པའི་དཀར་ཆག་འཕྲུལ་གྱི་ལྡེ་མིག་ཏུ་འཁོད་པ་ལ་སོགས་པར་
ཤེས་པར་བྱ་བ་ལས་འདིར་མ་སྤྲོས་སོ། །ཇི་སྐད་སྨོས་པའི་རྗེ་བཙུན་རྣམ་པ་ལྔ་པོ་དེ་དག་གི་བསྟན་པ་མ་ལུས་པ་ཕྱོགས་བཅུ་ཀུན་དུ་གསལ་བར་བྱེད་པའི་བསྟན་སྐྱོང་གི་སྐྱེས་བུ་ཆེན་པོ་བགྲང་གིས་མི་ལྡང་བར་བྱོན་ཞིང༌། བྱེ་བྲག་ཏུ་འཛམ་གླིང་བྱང་ཕྱོགས་ཀྱི་ནོར་འཛིན་དགའ་མའི་དཀྱིལ་
འཁོར་ཀུན་དུ་ཉི་མ་དང༌། ཟླ་བ་ལྟར་ཡོངས་སུ་གྲགས་ཤིང༌། རྒྱལ་བ་དགྱེས་པའི་ཕྲིན་ལས་འཆད་རྩོད་རྩོམ་པ་གསུམ་ལ་བསྙེངས་པ་དང་བྲལ་བའི་མཁས་པ་ཡོངས་ཀྱི་འཁོར་ལོས་སྒྱུར་བ་ཀུན་དགའ་རྣམ་པ་གཉིས་སམ། རྗེ་བཙུན་ངོར་པ་དང་རྫོང་པ་གཉིས་སུ་གྲགས་པ་ལ་སོགས་
པ་སྟེ། རྗེ་བཙུན་ངོར་པ་ལ་སློབ་མ་བསམ་གྱིས་མི་ཁྱབ་པ་བྱོན་པའི་ནང་ནས་གཙོ་བོར་གྱུར་པ་ནི། བདག་ཆེན་གཞི་ཐོག་པ་ལ་སོགས་པ་ས་སྐྱ་འཁོན་གྱི་གདུང་བརྒྱུད་དང༌། བདག་ཆེན་ཡེ་ཤེས་དབང་ཕྱུག་ལ་སོགས་པ་བླ་བྲང་ཤར་པ་རྣམས་དང༌། ཐུགས་སྲས་སེམས་དཔའ་ཆེན་པོ་
དཀོན་མཆོག་རྒྱལ་མཚན་དང༌། རྒྱལ་ཚབ་དམ་པ་ཀུན་དགའ་དབང་ཕྱུག་དང༌། ཡོངས་འཛིན་དཀོན་མཆོག་འཕེལ་བ་དང༌། འཇམ་པའི་དབྱངས་ཤེས་རབ་རྒྱ་མཚོ་དང༌། མཁས་གྲུབ་དཔལ་ལྡན་རྡོ་རྗེ་དང༌། གུ་གེ་པཎྜི་ཏ་གྲགས་པ་རྒྱལ་མཚན་དང༌། གུང་རུ་ཤེས་རབ་བཟང་པོ་དང༌། དྭགས་

པོ་བཀྲ་ཤིས་རྣམ་རྒྱལ་དང༌། བཟང་ཆེན་ཕྱོགས་ལས་རྣམ་རྒྱལ་དང༌། སྨར་ཁམས་པ་གྲགས་པ་བཟང་པོ་དང༌། དམར་སྟོན་རྒྱལ་མཚན་འོད་ཟེར་དང༌། པཎྜི་ཏ་ཆེན་པོ་ཤཱཀྱ་མཆོག་ལྡན་དང༌། ཞྭ་ལུ་སྐུ་ཞང་མཁྱེན་རབ་ཆོས་རྗེ་དང༌། བྱམས་ཆེན་རབ་འབྱམས་པ་
སངས་རྒྱས་འཕེལ་དང༌། འཇམ་དབྱངས་ཀུན་དགའ་ཆོས་བཟང་དང༌། དཔལ་འབུམ་ཕྲག་གསུམ་པ་བྱམས་པ་ཆོས་དོན་གྲུབ་དང༌། བྱང་ཆུབ་སེམས་དཔའ་གཞོན་ནུ་རྒྱལ་མཆོག་དང༌། གྲུབ་ཆེན་དཀོན་མཆོག་བློ་གྲོས་དང༌། གོ་བོ་རབ་འབྱམས་པ་ཀུན་
མཁྱེན་བསོད་ནམས་སེང་གེ་དང༌། ཉག་རེ་དཔལ་གྱི་རྒྱལ་མཚན་དང༌། ཡོན་ཏན་འོད་ཟེར་དང༌། གྲགས་པ་རིན་ཆེན་དོན་གྲུབ་དང༌། ལྡན་མ་དྲུང་ཀུན་དགའ་རིན་ཆེན་ལ་སོགས་པ་དང༌། སྲད་པ་ཀུན་དགའ་བློ་གྲོས་དང༌། མཁས་གྲུབ་ཟླ་བ་བཟང་པོ་དང༌། བྲག་དཀར་
སེམས་དཔའ་ཆེན་པོ་དང༌། གྲུབ་ཐོབ་ཐང་སྟོང་རྒྱལ་པོ་དང༌། མངོན་པར་དགའ་བའི་མཁན་པོ་དཔལ་ལྡན་སངས་རྒྱས་དང༌། བླ་མ་དཔལ་ལྡན་རྒྱལ་པོ་ལ་སོགས་པ་སའི་སྟེང་ན་ཡོངས་སུ་གྲགས་པའི་སློབ་མ་མང་དུ་བྱོན་པ་རྣམས་དང༌། རིམ་གྱིས་སྙན་བརྒྱུད་བསྟན་པའི་བདག་པོ་
ཚར་ཆེན་བློ་གསལ་རྒྱ་མཚོ་ལ་སོགས་པ་སྟེ། དེ་དག་གི་རྗེས་སུ་འཇུག་པ་བརྒྱུད་པ་དང་བཅས་པ་རྣམས་ཀྱིས་རྣམ་པ་ཐམས་ཅད་དུ་ལེགས་པར་བསྐྱངས་སོ། །མདོར་ན་འཇིག་རྟེན་དང་འཇིག་རྟེན་ལས་འདས་པའི་དགེ་ལེགས་དང་ཕན་བདེའི་འདོད་དགུ་མི་ཟད་པའི་འབྱུང་གནས་གཅིག་
པུར་གྱུར་པ་སངས་རྒྱས་བཅོམ་ལྡན་འདས་ཉི་མའི་གཉེན་གྱི་ཞལ་ལུང་དང་མངོན་པར་རྟོགས་པའི་ཆོས་ཚུལ་ཡིད་བཞིན་གྱི་ནོར་བུའི་རྒྱལ་པོ་འདི་ཉིད། ཛམྦུ་བྲྀཀྵའི་ཟུར་ཕུད་ཀྱིས་ཉེ་བར་མཚན་པའི་གླིང་གི་དམ་པ་འདི་ན་མཁས་པའི་སྐྱེས་བུ་གང་དག་བྱོན་པ་རྣམས་ཀྱིས་ལེགས་པར་བཤད་
པ་དང་ཚུལ་བཞིན་སྒྲུབ་པའི་རྒྱལ་མཚན་གྱི་རྩེ་མོ་ལ་མངའ་གསོལ་ཏེ། དེ་བཞིན་གཤེགས་པའི་ཕྲིན་ལས་ཀྱི་སྣང་བ་དཀར་པོས་ཕྱོགས་དང་ཕྱོགས་བྲལ་ཀྱི་དཀྱིལ་འཁོར་ཐམས་ཅད་དུ་ཡང་དག་པར་རབ་ཏུ་གསལ་བར་བགྱིས་པ་འདི་ལྟར་ལགས་སོ། །འདིར་སྨྲས་པ། ས་གསུམ་

<*མཐའ་དག་གཟུགས་ཅན།>བཀྲ་ཤིས་བྱེད་པའི་ཆོ་ག་བཟོ་གནས་རིག་པའི་རིན་ཆེན་རྒྱན་གྱིས་རྣམ་པར་མཛེས། །རིག་བྱེད་ཚེ་ཡི་བདུད་རྩིའི་དགའ་སྟོན་འགྱེད་ལ་རབ་མཁས་སྒྲ་དང་ཚད་མའི་རྡོ་རྗེ་ཡིས། །ཚིག་དོན་འཁྲུལ་པའི་རི་བོའི་འགྲོས་བཅིངས་ནང་གི་ལུང་དོན་རྣམ་པར་འབྱེད་
པའི་མིག་སྟོང་བཀྲ། །ཡང་དག་རྟོགས་པའི་ལང་ཚོ་རྟག་ཏུ་དར་ལ་བབ་རྣམས་བློ་ལྡན་སྔོན་གྱི་ལྷ་དབང་ཡིན། །<*བྱ་བའི་རང་བཞིན་བརྗོད་པ།>དེ་བཞིན་གཤེགས་པ་རང་གི་ཐུགས་རྗེ་དང༌། །སྨོན་ལམ་གཞལ་དུ་མེད་ལས་ཟློས་པའི་གར། །ཕྱོགས་བཅུར་ཆོས་ཀྱི་སྣང་བས་
འགེངས་བཟོད་པ། །སྨྲ་བའི་དབང་ཕྱུག་བྱོན་པ་བསམ་མི་ཁྱབ། །<*ཆོས་འགོག་པ།>གང་དག་བྱོན་པ་དེ་དག་སྟོབས་བཅུ་པའི། །ལེགས་གསུངས་དྲི་མ་མེད་པས་འགྲོ་བ་ལ། །ཕན་པ་བསྒྲུབས་པའི་རྟོགས་བརྗོད་ཕྱོགས་རེ་ཙམ། །མཐོང་བའི་ང་རོ་འབྱིན་དེ་
ཅི་ལ་སྙམ། །དེ་ཀོ་རྗེས་སུ་འཇུག་པའི་སྐྱེ་བོ་རྣམས། །ཆོས་ལ་བློ་གྲོས་ཞུམ་པ་གཟེངས་བསྟོད་དང༌། །རྒོད་པ་འདུལ་སོགས་ཆ་ཙམ་བསྙད་པ་ལས། །འཕགས་རྣམས་མཛད་པ་བྱིས་པའི་བློ་ལས་འགོངས། །<*བསམ་པ་རྒྱ་ཆེ་བ།>གང་ཕྱིར་སྟོན་པ་ཐམས་ཅད་མཁྱེན་པ་
ཡི། །གཉིས་སུ་མེད་པའི་ཡེ་ཤེས་རང་སྣང་ལས། །གཞན་དུ་བགྲང་ལས་འདས་པའི་བསྐལ་པ་རུ། །བཙལ་ཡང་དམིགས་སུ་མེད་པ་ངེས་པའི་དོན། །འོན་ཏེ་བློ་གྲོས་དམན་པའི་ཆོས་ཀྱི་བློ། །འཕྱང་མོ་ཉུག་ལ་བརྟེན་པ་སྤོང་བའི་སླད། །འདྲི་དང་
ལེན་ལྡོན་སྡུད་དང་འགྲེལ་པ་ཡི། །རྣམ་པར་སྣང་བས་བསྟན་པ་རབ་གསལ་བྱས། །<*རིགས་རང་བཞིན་བརྗོད་པ།>དུས་གསུམ་རྒྱལ་བ་ཀུན་གྱི་མཁྱེན་དང་བརྩེ། །བྱིན་རླབས་ཟད་མི་ཤེས་པའི་འབབ་སྟེགས་སུ། །བྱས་པ་མཐོང་ན་མི་མཐུན་མེད་པའི་སྐུ། །ཚངས་བཅས་སྐྱེ་དགུ་ཀུན་
གྱིས་བཏུད་པའི་གནས། །<*དགག་པའི་དཔེ།>དངོས་པོ་ཐམས་ཅད་སྐྱོན་བཅུ་སྤངས་པའི་གླུ། །རྟག་པར་འཇོ་བའི་ཡོན་ཏན་གྱིས་དབེན་པས། །དྲི་ཟའི་གླིང་བུ་སྙན་དགུ་བསྒྱུར་བའི་དཔལ། །སྨྲ་མཆོག་རྣམས་ཀྱི་གསུང་ལས་ཤིན་ཏུ་

དམན། །<*མཛེས་པ་བསྔགས་པ་ལ་སྦྱར་བ།>མཐའ་ཀླས་སྐྱེ་བའི་ཡུན་དུ་ཆོས་ཐམས་ཅད། །སྦྱངས་སྟོབས་ཕུན་སུམ་ཚོགས་པའི་མཁྱེན་པ་དེས། །དཔྱད་པ་གང་ཚེ་ངལ་བའི་གཏམ་འབྱུང་བ། །ཆེས་བརླིང་རིག་པའི་གནས་དེ་གང་དུ་མཆིས། །<*མཆོག་གི་ངེས་བསྟན།>ཨེ་མ་ཆུ་ཡི་གཏེར་ལས་དག་བྱེད་མ། །རྟག་
ཏུ་འབྱིན་ཡང་གང་བའི་རང་བཞིན་གྱིས། །མཁས་བཙུན་བཟང་པོ་གྲུབ་པའི་ཡོན་ཏན་དག །སྨྲ་མཁས་ཡོངས་ཀྱིས་བརྗོད་པས་མི་ཟད་སྟོན། །<*ཡན་ལག་གཉིས་པའི་གཟུགས་ཅན།>གསུང་རབ་ཀུན་གྱི་སྙིང་པོ་འདོམས་པ་ལ། །མཁས་པའི་འབྲས་
བུ་སྐལ་བར་ལྡན་པའི་བུ། །སྡུག་བསྔལ་ཞི་བ་ཐར་པའི་ལྡིང་ཁང་དང༌། །ཐམས་ཅད་མཁྱེན་པའི་གྲོང་ཁྱེར་སོང་བ་མང༌། །<*ནང་ཤེས་བྱེད་ཀྱི་རྒྱུ།>འགལ་འབྲེལ་རིགས་པར་སྨྲ་ལ་སྤྲོ་བའི་འཛུམ། །དཀའ་བའི་གནད་ལ་བརྩད་པས་མ་འགྱུར་ཞིང༌། །ཕྱི་རོལ་
རྒོལ་བ་སྟོང་གིས་མ་ཕྲོགས་པར། །ལེགས་པར་བརྟགས་པའི་གཏམ་གྱིས་མགྲིན་པ་ཕྱུག །<*དཔའ་བ་ཕུན་སུམ་ཚོགས་པའི་ཟོལ་བསྟོད།>ལེགས་བཤད་བརྩམས་པའི་ཚིག་དོན་ཟེགས་མས་ཀྱང༌། །སྐྱེ་འཕགས་ཡིད་ཀྱི་བརྟན་པ་མ་བྱིན་པར། །བརྩེ་མེད་རང་དབང་འཕྲོག་པའི་
ལས་འདི་འདྲ། །དགེ་སྦྱོང་ཆོས་ལ་མི་འོས་པ་མིན་ནམ། །<*ངེས་པའི་དཔེ།>མདོར་ན་རྣམ་པར་དཀར་བའི་ཕྲིན་ལས་མཐའ། །མཐོང་འདོད་ལྷ་ཡི་ལམ་འདིས་རང་གི་ལུས། །སྔོན་པོར་སོང་བ་དེ་སྲིད་བཙལ་བྱས་ཀྱང༌། །མ་རྙེད་ད་དུང་
རྗེས་སུ་སོང་བར་ངེས། །ཐམས་ཅད་མཁྱེན་པ་ཆེན་པོ་ཉི་མའི་གཉེན་གྱི་བཀའ་ལུང་སྤྱི་དང་བྱེ་བྲག་གི་དགོངས་དོན་རྣམ་པར་འགྲེལ་པའི་བསྟན་བཅོས་གངས་ཅན་པའི་སྐད་དུ་འགྱུར་རོ་འཚལ་གྱི་ཆོས་སྦྱིན་རྒྱུན་མི་ཆད་པའི་ངོ་མཚར་འཕྲུལ་གྱི་ཕྱི་མོ་རྫོགས་
ལྡན་བསྐལ་པའི་བསོད་ནམས་ཀྱི་སྤྲིན་ཕུང་རྒྱས་པར་དཀྲིགས་པའི་ཚུལ་ལས་བརྩམས་པའི་གཏམ་ངོ་མཚར་ཆུ་གཏེར་འཕེལ་བའི་ཟླ་བ་གསར་པ་ལས། སྤྲོ་བ་བསྐྱེད་པའི་ཆེད་དུ་བསྟན་སྐྱོང་རྣམས་ཀྱིས་བྱ་བ་བྱས་པའི་སརྒ་སྟེ་གཉིས་པའོ།། །།

༄༅། །སརྦྦཛྙེནསུདྷོཀྟཾཤྲོཏམིཔཏིཏཻཿཀྲིཏོཧིཏཾསདྲྀ། ཀྩིནྟཱམཎིཿསུཀུམྦྷེཧཀལྤདཱརུབྷིརཔིབིཤཱཀྱཾ། །
༄༅། །<*རབ་ཏུ་སྤེལ་བ།>ཀུན་མཁྱེན་གྱིས་གསུངས་བདུད་རྩི་སྒྲ་འཛིན་ཏུ། །ལྷུང་བས་བསྒྲུབས་པའི་ཕན་པ་དེ་འདྲ་ནི། །འདི་ན་ཡིད་བཞིན་ནོར་བུ་བུམ་པ་བཟང༌། །དཔག་བསམ་ཡོངས་འདུ་དག་ཀྱང་བཟོད་པ་མིན། །

<*རིགས་བརྗོད་པ་ཐ་མའི་གསལ་བྱེད།>གང་གིས་བགྲོད་པའི་ལམ་དང་མྱ་ངན་ལས། །འདས་པ་བསོད་ནམས་གསུམ་གྱི་སྙིང་པོ་ཅན། །དེས་ནི་འཁོར་བ་ངན་པར་སོང་དག་ཏུ། །འབབ་ལས་ཡོང་ཡེ་འཛིན་པ་ཆོས་ཀྱི་མཆོག །<*རིགས་རང་བཞིན་བརྗོད་པ།>ལམ་དང་འབྲས་བུ་དབེན་པའི་བས་མཐའ་རུ། །ངལ་བསོའི་བདེ་བ་ལ་དམིགས་ལྟུང་བ་ལས། །འཛིན་ཅིང་
སྲིད་དང་ཞི་བའི་མཐའ་འགོང་བ། །ཐེག་ཆེན་ཆོས་ཀྱི་ཁྱད་པར་དེ་བས་མང༌། །<*རིགས་རང་བཞིན་བརྗོད་པ།>གསང་ཆེན་སྐལ་བར་ལྡན་པའི་ལུས་ངག་ཡིད། །མི་ཕྱེད་རྡོ་རྗེ་གསུམ་གྱི་རྒྱས་བཏབ་ནས། །མཆོག་གི་གོ་འཕང་རིངས་པར་འདོང་བའི་ཆོས། །སྒྲ་དོན་རྒྱུད་ཀྱི་ཟབ་ཁྱད་བསམ་ལས་
འདས། །<*ཁྱད་གཞི་ཐ་དད་ཅིང་ཁྱད་ཆོས་མཚུངས་པའི་བསྡུས་བརྗོད།>སྲིད་པའི་ལམ་ན་དུབ་པ་དབུགས་རབ་འབྱིན། །གདུང་བས་ཉན་ལ་བསིལ་བའི་ངལ་བསོ་སྟེར། །མངོན་འདོད་སྙེ་མ་གཡུར་བའི་དགའ་ཚལ་འདི། །ཐོབ་པའི་ལུས་ཅན་དེ་དག་སྐལ་བ་སྦོམ། །<*རྨད་དུ་བྱུང་བའི་དཔེ།>ཚངས་པའི་བཀའ་ལས་མ་འདས་ལམ་གསུམ་དུ། །འགྲོ་བ་དག་
བྱེད་འབབ་པའི་ལྷ་མོ་ཁྱོད། །ལས་ཉོན་སྒྲིབ་པ་སྦྱོང་བའི་མཐུ་རྫོགས་ན། །ཐུབ་པའི་བཀའ་ལུང་དམ་པའི་རྗེས་སུ་སྙེགས། །<*རིགས་རང་བཞིན་བརྗོད་པ།>བརྗོད་པ་བླ་ན་མེད་པ་འགོག་ལམ་གྱི། །བདེན་པ་ཟུང་གི་སྙིང་པོ་འདྲེན་པའི་གསུང༌། །རབ་མཆོག་དྲི་
མས་དབེན་པ་ལུང་རྟོགས་ཀྱི། །དཀོན་མཆོག་དམ་པའི་ཆོས་ཀྱི་དབྱེ་བ་བྲི། །སྤྱི་དོན་གསུམ་པ་བཀྲལ་བྱ་ངེས་པའི་ཆེད་དུ་དམ་པའི་ཆོས་ཀྱི་རྣམ་པར་གཞག་པ་ལ། ཆོས་ཀྱི་སྒྲ་འཇུག་པའི་ཡུལ་སྤྱིར་བཤད་པ་དང༌།དེ་ལས་དམ་པའི་ཆོས་བྱེ་བྲག་ཏུ་བཤད་པའོ། །དང་པོ་ལ་སྒྲའི་དོན་བཤད་
པ་དང༌། དབྱེ་བ་བསྟན་པ་གཉིས་ལས། དང་པོ་སྒྲའི་དོན་ནི་སྤྱིར་ཆོས་ཞེས་བྱ་བ་དེ་ལ་ལེགས་པར་སྦྱར་བའི་སྐད་དུ་ནི་དྷརྨ་ཞེས་འབྱུང་སྟེ། དེ་ནི་ཌུ་དྷྲྀ་ཉ྄་འཛིན་པ་ལའོ་ཞེས་བྱ་བའི་བྱིངས་ལས་བྱུང་བའི་ཕྱིར་འཛིན་པར་བྱེད་པའི་དོན་ལ་འཇུག་གོ །དེའང་གང་འཛིན་པར་བྱེད་པ་ཡིན་ཞེ་ན། ཤེས་བྱ་
རྣམས་ཀྱི་རང་དང་སྤྱིའི་མཚན་ཉིད་ཐམས་ཅད་འཛིན་པར་བྱེད་དེ། དེའང་འདི་ལྟར་གཟུགས་ཀྱི་མཚན་ཉིད་གཟུགས་སུ་རུང་བ་འཛིན་པར་བྱེད་པ་ནས། རྣམ་པ་ཐམས་ཅད་མཁྱེན་པའི་མཚན་ཉིད་ཆོས་ཐམས་ཅད་མངོན་སུམ་དུ་བྱེད་དོ་ཞེས་བྱ་བ་ལྟ་བུའི་བར་གྱིས་རང་གི་མཚན་ཉིད་ཐམས་ཅད་འཛིན་པར་

བྱེད་དོ། །གཞན་ཡང་འདུས་བྱས་ཀྱི་དངོས་པོ་ཐམས་ཅད་ནི་མི་རྟག་པའོ། །ཟག་པ་དང་བཅས་པ་ཐམས་ཅད་ནི་སྡུག་བསྔལ་བའོ། །ཆོས་ཐམས་ཅད་ནི་བདག་མེད་པའོ། །མྱ་ངན་ལས་འདས་པ་ནི་ཞི་བའོ་ཞེས་བྱ་བ་ལྟ་བུའི་སྤྱིའི་མཚན་ཉིད་ཐམས་ཅད་ཀྱང་འཛིན་པར་བྱེད་པའི་ཕྱིར་
གང་ཆོས་ཞེས་བྱ་བའི་ངེས་པའི་ཚིག་ནི་འཛིན་པར་བྱེད་པའི་དོན་དུ་གཟུང་བར་བྱའོ། །གཉིས་པ་དབྱེ་བ་བསྟན་པ་ནི། དེ་ལྟ་བུའི་སྒྲ་དེ་འཇུག་པའི་ཡུལ་གང་ལ་དབྱེ་ན་རྣམ་པ་བཅུ་ཉིད་དུ་འཇུག་པར་རིག་པར་བྱ་སྟེ། རྣམ་བཤད་རིགས་པ་ལས། ཆོས་ནི་ཤེས་བྱ་ལམ་དང་ནི། །མྱ་ངན་འདས་དང་ཡིད་ཀྱི་
ཡུལ། །བསོད་ནམས་ཚེ་དང་གསུང་རབ་དང༌། །འབྱུང་འགྱུར་ངེས་དང་ཆོས་ལུགས་ལའོ། །ཞེས་པ་ལྟར་ཏེ། དེའང་ཤེས་བྱ་ལ་འཇུག་པ་ནི་དཔེར་ན་ཆོས་གང་ལ་འདུས་བྱས་སམ་འདུས་མ་བྱས་ཞེས་བྱ་བ་ལྟ་བུ་སྟེ་ཤེས་བྱའི་ཆོས་སུ་གཏོགས་པ་གང་ཡིན་པ་དེ་ལ་ནི་མཁས་པར་བྱ་བའི་གནས་
ཉིད་དོ། །དེ་བཞིན་དུ་ལམ་ལ་འཇུག་པ་ནི། ཡང་དག་པར་ལྟ་བ་ནི་ཆོས་ཡིན་ནོ། །ཡང་དག་པར་ལྟ་བ་ནི་ལམ་ཡིན་ནོ་ཞེས་བྱ་བ་ལྟ་བུ་སྟེ་ལམ་གྱི་ཆོས་གང་ཡིན་པ་དེ་ནི་བསྒྲུབ་པར་བྱ་བ་ཉིད་དོ། །མྱ་ངན་ལས་འདས་པ་ལ་འཇུག་པ་ནི་འདོད་ཆགས་དང་བྲལ་བ་རྣམས་ཀྱི་མཆོག་ཆོས་ཞེས་བྱ་བ་
ལྟ་བུ་སྟེ། མྱ་ངན་ལས་འདས་པའི་ཆོས་གང་ཡིན་པ་དེ་ལ་ནི་རེག་པར་བྱ་བ་ཉིད་དོ། །ཡིད་ཀྱི་ཡུལ་ལ་འཇུག་པ་ནི་ཆོས་ཀྱི་ཁམས་དང་ཆོས་ཀྱི་སྐྱེ་མཆེད་ཅེས་བྱ་བ་ལྟ་བུའམ། འདི་ནི་རིགས་པའི་ཆོས་སོ་འདི་ནི་རིགས་པ་མ་ཡིན་པའི་ཆོས་སོ་ཞེས་བྱ་བ་ལྟ་བུ་སྟེ། ཡིད་ཀྱི་ཡུལ་དུ་གྱུར་པའི་ཆོས་
རྣམས་ནི་ཡོངས་སུ་ཤེས་ནས་འཇུག་ལྡོག་ཚུལ་བཞིན་དུ་བྱ་བ་ཉིད་དོ། །བསོད་ནམས་ལ་འཇུག་པ་ནི་བཙུན་མོའི་འཁོར་དང་གཞོན་ནུ་རྣམས་ལྷན་ཅིག་སྤྱོད་ཅེས་བྱ་བ་ལྟ་བུ་སྟེ། བསོད་ནམས་ཀྱི་ཆོས་སུ་གྱུར་པ་གང་ཡིན་པ་དེ་ནི་ཡོངས་སུ་སྤྱད་པར་བྱ་བ་ཉིད་དོ། །ཚེ་ལ་འཇུག་པ་ནི་མཐོང་བའི་
ཆོས་ལ་བདེ་བར་གནས་ཞེས་བྱ་བ་ལྟ་བུ་སྟེ། མཐོང་བའི་ཚེའི་ཆོས་གང་ཡིན་པ་དེ་ལ་ནི་བརྩོན་པར་བྱ་བ་ཉིད་དོ། །གསུང་རབ་ལ་འཇུག་པ་ནི་དམ་པའི་ཆོས་ཞེས་བྱ་བ་འདི་ལྟ་སྟེ། མདོའི་སྡེ་དང་དབྱངས་ཀྱིས་བསྙད་པའི་སྡེ་དང་ལུང་དུ་བསྟན་པའི་སྡེ་ཞེས་བྱ་བ་ལྟ་བུ་སྟེ། གསུང་རབ་ཀྱི་ཆོས་

རྣམས་ནི་ཐོས་པ་དང་བསམ་པའི་བགྱི་བས་འཇུག་པར་བྱ་བ་ཉིད་དོ། །འབྱུང་འགྱུར་ལ་འཇུག་པ་ནི་ལུས་འདི་ནི་རྒ་བར་འགྱུར་བའི་ཆོས་ཡིན་ནོ་ཞེས་བྱ་བ་ལྟ་བུ་སྟེ་འབྱུང་བར་འགྱུར་བའི་ཆོས་རྣམས་ཀྱང་ཤེས་པར་བྱ་བ་ཉིད་དོ། །ངེས་པ་ལ་འཇུག་པ་ནི་དགེ་སྦྱོང་གི་ཆོས་བཞི་ཞེས་པ་ལྟ་བུ་སྟེ། ངེས་
པའི་ཆོས་ལ་ནི་ནམ་ཡང་དབྲི་བ་དང་བསྣན་པར་བྱར་མེད་པའམ་དེ་ལས་མི་འདའ་བར་བྱ་བ་ཉིད་དོ། །ཆོས་ལུགས་ལ་འཇུག་པ་ནི་ཡུལ་ཆོས་དང་རིགས་ཆོས་ཞེས་བྱ་བ་ལྟ་བུ་སྟེ། ལུགས་ཀྱི་ཆོས་གང་ཡིན་པ་དེ་དང་དེའི་རྗེས་སུ་མཐུན་པར་བྱ་བ་ཉིད་དོ། །གཉིས་པ་དམ་པའི་ཆོས་བྱེ་བྲག་ཏུ་བཤད་པ་
ལ། དམ་པའི་ཆོས་ཀྱི་མཚན་ཉིད་དང༌། སྒྲ་དོན་དང༌། རབ་ཏུ་དབྱེ་བ་སྟེ་གསུམ་ལས། དང་པོ་དམ་པའི་ཆོས་ཀྱི་མཚན་ཉིད་ནི། བཤད་མ་ཐག་པའི་བཅུ་པོ་དེ་ལས། བསོད་ནམས་དང་ལམ་དང་མྱ་ངན་ལས་འདས་པ་གསུམ་ནི་བརྗོད་བྱའི་གཙོ་བོ་ཉིད་དུ་བཟུང་ནས། གསུང་རབ་ནི་རྗོད་བྱེད་
དུ་བྱས་པའི་དམ་པའི་ཆོས་གང་ལ་དམིགས་ནས། སྲིད་པའི་སྡུག་བསྔལ་རྒྱུ་དང་བཅས་པ་མཐར་འབྱིན་པར་བྱེད་པའི་ཐབས་སུ་གྱུར་པ་གང་ཡིན་པ་སྟེ། ཇི་སྐད་དུ། སྡུག་བསྔལ་དག་ནི་ཐམས་ཅད་དང༌། །སྒྲིབ་པ་ཀུན་སེལ་དམ་པའི་ཆོས། །ཞེས་སོ། །དམ་པའི་ཆོས་དེ་ལ་ཡང་གང་ཞིག་བརྗོད་
པར་བྱ་བ་དང་གང་གིས་རྗོད་པར་བྱེད་པའི་མཚན་ཉིད་ལ་ལྟོས་ནས་དབྱེ་ན་རྟོགས་པའི་དམ་པའི་ཆོས་དང༌། ལུང་གི་དམ་པའི་ཆོས་གཉིས་སུ་འགྱུར་ཏེ། མཛོད་ལས། སྟོན་པའི་དམ་ཆོས་རྣམ་གཉིས་ཏེ། །ལུང་དང་རྟོགས་པའི་བདག་ཉིད་དོ། །ཞེས་སོ། །རྟོགས་པའི་དམ་པའི་ཆོས་དེ་ལའང་
གང་འདོད་ཆགས་དང་བྲལ་བར་གྱུར་པ་དང༌། གང་གིས་འདོད་ཆགས་དང་བྲལ་བར་བྱེད་པའི་མཚན་ཉིད་ཀྱིས་རྣམ་པར་དབྱེ་ན་འགོག་པའི་བདེན་པའི་དམ་པའི་ཆོས་དང་ལམ་གྱི་བདེན་པའི་དམ་པའི་ཆོས་རྣམ་པ་གཉིས་སུ་འགྱུར་ཏེ། མགོན་པོ་བྱམས་པས། གང་ཞིག་གང་གིས་ཆགས་བྲལ་བ། །
བདེན་གཉིས་མཚན་ཉིད་ཅན་དེ་ཆོས། །ཆགས་བྲལ་ཉིད་ནི་འགོག་པ་དང༌། །ལམ་གྱི་བདེན་པ་དག་གིས་བསྡུས། །ཞེས་སོ། །ལུང་གི་དམ་པའི་ཆོས་ནི་རྟོགས་པའི་དམ་པའི་ཆོས་སུ་འཇུག་པར་བྱེད་པའི་རྗོད་པ་ཕུན་སུམ་ཚོགས་པ་སྟེ་དེ་ལ་ཡང་སྤྲོས་པ་ལས་བྱུང་བའི་བག་ཆགས་སམ་

འཇིག་རྟེན་པའི་མངོན་བརྗོད་ཅེས་བྱ་བ་དང༌། ཆོས་ཀྱི་དབྱིངས་ཀྱི་རྒྱུ་མཐུན་ལས་བྱུང་བའི་མངོན་བརྗོད་དམ་འཇིག་རྟེན་ལས་འདས་པའི་མངོན་བརྗོད་ཅེས་བྱ་བ་གཉིས་སུ་དབྱེ་བར་བྱ་བའང་འབྱུང་སྟེ། དང་པོ་ནི་རྟ་དང་གླང་པོ་ལ་སོགས་པའི་གཏམ་སྣ་ཚོགས་པ་སྟེ་འཁོར་བ་དང་ཆོས་མཐུན་
པས་དེ་སྐད་ཅེས་བྱའོ། །གལ་ཏེ་དེ་ལྟར་ཡིན་ན་རྟོགས་པའི་དམ་པའི་ཆོས་སུ་འཇུག་པའི་རྗོད་པ་ཉིད་དུ་ཇི་ལྟར་འགྱུར་ཞེ་ན། དངོས་སུ་མངོན་པར་མཐོ་བའི་རྒྱུ་གཙོ་བོར་སྨོས་ནས། བརྒྱུད་ནས་རྟོགས་པའི་ཆོས་ལ་འཇུག་པའི་དབང་གིས་བཞག་པ་སྟེ། ཤེས་རབ་བརྒྱ་པ་ལས། མི་ཡི་ཆོས་ལུགས་
ལེགས་སྤྱད་ན། །ལྷ་ཡུལ་བགྲོད་པ་ཐག་མི་རིང༌། །ལྷ་དང་མི་ཡི་ཐེམ་སྐས་ལ། །འཛེགས་ན་ཐར་པ་གམ་ན་ཡོད། །ཅེས་གསུངས་པ་དང༌། མགོན་པོ་བྱམས་པས་ཀྱང༌། །རིག་པའི་གནས་ལྔ་དག་ལ་བརྩོན་པར་མ་བྱས་ན། །འཕགས་མཆོག་ཅི་གཏམ་ཐམས་ཅད་མཁྱེན་ཉིད་མི་འགྱུར་ཏེ། །
ཞེས་བྱ་བ་ལ་སོགས་པའི་དོན་དུ་དགོངས་ནས་དེ་ལྟར་དུ་བཞག་པར་མངོན་ནོ། །གཉིས་པ་ནི་གསུང་རབ་ཡན་ལག་བཅུ་གཉིས་ཏེ། དེ་ནི་ཆོས་ཉིད་རྟོགས་པར་བྱེད་པའི་རྒྱུ་མཐུན་ནམ། ཆོས་དབྱིངས་རྟོགས་པར་བྱེད་པའི་རྒྱུ་མཐུན་ལས་བྱུང་བས་དེ་སྐད་ཅེས་བྱ་སྟེ། དབུས་དང་མཐའ་རྣམ་པར་འབྱེད་པ་ལས།
རྒྱུ་མཐུན་དོན་གྱི་མཆོག་ཉིད་དང༌། །ཞེས་དང༌། མྱ་ངན་ལས་འདས་པའི་མདོ་ལས། ཆུ་བོ་ཆེན་པོ་རྒྱ་མཚོར་བབ། འབབ། གཞོལ་བ་དེ་བཞིན་དུ། ཆོས་ཐམས་ཅད་ཀྱང་མྱ་ངན་ལས་འདས་པར་བབ། འབབ། གཞོལ་ཞེས་གསུངས་སོ། །གཉིས་པ་སྒྲ་དོན་བཤད་པ་ལ། སྤྱི་དང་བྱེ་བྲག་པ་གཉིས་
ལས། དང་པོ་ནི་ལེགས་པར་སྦྱར་བའི་སྐད་དུ་སདྡྷརྨ་ཞེས་འབྱུང་བ་བོད་སྐད་ལ་དམ་པའི་ཆོས་ཞེས་བྱ་བར་འགྱུར་ཏེ། དེ་ལ་དམ་པ་ནི་སྟོན་པ་རྫོགས་པའི་སངས་རྒྱས་ཡིན་ལ། ཆོས་ནི་དེས་གསུངས་པ་ཡིན་པའི་ཕྱིར་དམ་པའི་ཆོས་ཞེས་བྱའོ། །ཡང་ན་བསྟན་བཅོས་ཀྱི་དབང་དུ་བྱས་ན་དམ་པ་ནི་སངས་
རྒྱས་ཀྱི་རྣམ་པར་འཕྲུལ་པ་དང༌། དེའི་སྲས་བཀའི་དོན་རང་རྒྱུད་དུ་རྩོམ་པར་བྱེད་པའི་སློབ་དཔོན་དང༌། གཞུང་འགྲེལ་བྱེད་པ་ལ་དབང་བརྙེས་པའི་སློབ་དཔོན་ཡིན་ལ། ཆོས་ནི་དེ་དག་གིས་ལེགས་པར་བཤད་པ་ཡིན་པའི་ཕྱིར་དམ་པའི་ཆོས་སོ། །ཡང་ན་དམ་པ་ནི་མཆོག་ཏུ་གྱུར་པ་ཡིན་ལ་ཆོས་

ཀྱང་ཡིན་པས་དམ་པའི་ཆོས་ཏེ་གཞི་མཐུན་པས་སམ། སྐྱེས་བུ་དམ་པ་རྣམས་ཀྱིས་སྤྱད་པར་བྱ་བ་ཡིན་པས་ན་དམ་པའི་ཆོས་ཏེ། དཔེར་ན་དགེ་སྦྱོང་གི་ཆོས་བཞི་ཞེས་བྱ་བ་ལྟ་བུའོ། །གཉིས་པ་ནི་དེ་བཞིན་གཤེགས་པའི་བཀའ་འབའ་ཞིག་པ་སྟེ། དེ་ནི་སུ་བྷཱ་ཥི་ཏ་ཞེས་པ་ལེགས་པར་གསུངས་པ་སྟེ།
ཚིག་དང་དོན་ཕྱིན་ཅི་མ་ལོག་པར་ཡང་དག་པར་གསུངས་པའི་ཕྱིར་ལེགས་པར་གསུངས་པ་སྟེ། ཇི་ལྟར་ལེགས་པར་གསུངས་ཤེ་ན། མདོ་ལས་བཅོམ་ལྡན་འདས་ཀྱིས་ཆོས་ལེགས་པར་གསུངས་པ། ཡང་དག་པར་མཐོང་བ། ནད་མེད་པ། དུས་ཆད་པ་མེད་པ། ཉེ་བར་གཏོད་པ། འདི་མཐོང་བ་ལ་དོན་ཡོད་པ། མཁས་པ་རྣམས་
ཀྱི་རང་གིས་རིག་པར་བྱ་བའོ་ཞེས་གསུངས་པ་དེའང་ཕྱིན་ཅི་མ་ལོག་པར་ཡང་དག་པར་གསུངས་པའི་ཕྱིར་ལེགས་པར་གསུངས་པ་དང༌། དོན་མཐོང་བའི་ཕྱིར་ཡང་དག་པར་མཐོང་བ་དང༌། ཉོན་མོངས་པའི་བག་ལ་ཉལ་གྱི་གཉེན་པོར་གྱུར་པའི་ཕྱིར་ནད་མེད་པ་དང༌། ཡོངས་སུ་ཉམས་པ་མེད་པའི་ཕྱིར་
དུས་ཆད་པ་མེད་པ་དང༌། སྡུག་བསྔལ་མ་ལུས་པ་ལས་ངེས་པར་འབྱུང་བ་ལ་ཉེ་བར་གཏོད་པའི་ཕྱིར་ཉེ་བར་གཏོད་པ་དང༌། ཐུན་མོང་མ་ཡིན་པའི་ཕྱིར་འདི་མཐོང་བ་ལ་དོན་ཡོད་པ་དང༌། རྟོག་གེས་བརྟག་པར་མི་ནུས་པའི་ཕྱིར་མཁས་པ་རྣམས་ཀྱི་རང་གིས་རིག་པར་བྱ་བའོ། །གཞན་ཡང་དུས་
ཐམས་ཅད་དུ་བྱ་སླ་བའི་ཕྱིར་དུས་ཆད་པ་མེད་པ་དང༌། སློབ་དཔོན་གྱི་དཔེ་མཁྱུད་དང་བྲལ་བའི་ཕྱིར་ཚུར་ཤོག་ལྟོས་ཤིག་ཅེས་བྱ་བའི་སྐབས་དབྱེ་བ་དང་ལྡན་པའི་ཕྱིར་ཏེ། དབྱིག་གཉེན་གྱིས། འཕགས་པའི་ལམ་གྱི་ཡན་ལག་བརྒྱད་པོ་ནི། །ཡང་དག་དོན་དང་དོན་ནི་མཐོང་བ་དང༌། །གཉེན་པོ་
དང་ནི་གཏན་དང་མ་ལུས་དང༌། །ཐུན་མོང་མིན་དང་རྟོག་གེའི་ཡུལ་མིན་དང༌། །གཞན་ཡང་དེ་ནི་དུས་ཆད་མེད་པའི་ཕྱིར། །བྱ་སླ་བ་དང་ཚུར་ཤོག་ལྟོས་ཤིག་ཅེས། །སློབ་དཔོན་དཔེ་མཁྱུད་བྲལ་བར་ཤེས་བྱ་ཞིང༌། །ཞེས་སོ། །གཞན་ཡང་ལུང་ལས་བཅོམ་ལྡན་འདས་ཀྱིས་ལེགས་པར་
གསུངས་པའི་ཆོས་འདུལ་བ་ནི་ལེགས་པར་བསྟན་པ། ངེས་པར་འབྱུང་བ་རྫོགས་པའི་བྱང་ཆུབ་ཏུ་འགྲོ་བར་བྱེད་པ། མི་མཐུན་པ་མེད་ཅིང་འདུས་པ་དང་ལྡན་པ། རྟེན་པ་ཡོད་པ་ཞེས་བྱ། འདི་སྟོན་པ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སོ་ཞེས་པ་

སྟེ། དེ་དག་གི་དོན་ནི་ཕྱི་རོལ་པ་ལས་ཆོས་འདུལ་བ་འདིའི་ཡོན་ཏན་ཡང་དག་པར་བསྟན་པ་ཡིན་ཏེ། ཕྱི་རོལ་པ་དག་གི་འདུལ་བ་ནི་ཉེས་པར་བསྟན་པ་ཉིད་ཀྱིས་ལེགས་པར་གསུངས་པ་མ་ཡིན་པ་དང༌། རྫོགས་པའི་བྱང་ཆུབ་ཏུ་འགྲོ་བར་མི་འགྱུར་བ་ཉིད་ཀྱིས་ངེས་པར་འབྱུང་
བ་མ་ཡིན་པ་དང༌། འདུས་པ་དང་མི་ལྡན་པ་ཉིད་ཀྱིས་མཐུན་པ་མ་ཡིན་པ་དང༌། སྟོན་པ་དེ་བཞིན་གཤེགས་པ་ལ་སོགས་པ་མ་ཡིན་པ་ཉིད་ཀྱིས་རྟེན་པ་མེད་པའོ། །མདོར་ན་སྐྱོན་རྣམ་པ་འདི་བཞི་བསྟན་པ་ཡིན་ཏེ། བསྟན་པའི་ཆོས་ལ་དོན་ཕྱིན་ཅི་ལོག་པ་ཉིད་ཀྱི་སྐྱོན་དང༌། སྒྲུབ་པའི་ཆོས་ལས་
མྱ་ངན་ལས་འདས་པར་མི་འགྲོ་བ་ཉིད་ཀྱི་སྐྱོན་དང༌། ཉན་པ་པོ་རྣམས་ལ་བློ་དུ་མ་དང་ལྡན་པ་ཉིད་ཀྱི་སྐྱོན་དང༌། སྟོན་པ་ལ་ཐེ་ཚོམ་ཐམས་ཅད་གཅོད་མི་ནུས་པའི་སྐྱོན་དང་ལྡན་པ་སྟེ། དེ་ཉིད་ལས། ཚིག་འབྲུ་བཟང་མིན་དོན་བཟང་མིན། །གྲོལ་དང་རིགས་པའི་ཐབས་མ་ཡིན། །སྔ་མ་ཕྱི་མ་
འགལ་བ་ཡིན། །དེ་བཞིན་བསྡུ་བ་བཞི་དང་ནི། །བསྟན་པ་བཞི་དག་སྤངས་པ་དང༌། །སྟོན་པའང་སྟོན་པའི་མཚན་ཉིད་མེད། །དེ་ལྟར་གཞན་གྱི་བསྟན་བཅོས་དང༌། །སློབ་མ་བསྟན་པ་སྐྱོན་ཅན་ཡིན། །ཆོས་འདུལ་བ་འདི་ལ་ནི་དེ་ལས་བཟློག་པས་ན་སྐྱོན་མེད་པ་ཡིན་ནོ། །དོན་ཕྱིན་
ཅི་མ་ལོག་པ་ཉིད་ཀྱིས་རིགས་པ་ཡིན་པའི་ཕྱིར་ཆོས་སོ། །ཉོན་མོངས་པ་འདུལ་བའི་ཕྱིར་འདུས་པའོ། །དེ་ལྟར་ན་སངས་རྒྱས་ཀྱི་བསྟན་པ་ནི་ཡང་དག་པའི་ཡེ་ཤེས་དང་སྤངས་པ་འདྲེན་པ་ཉིད་བསྟན་པ་ཡིན་ནོ་ཞེས་གསུངས་སོ། །གཞན་ཡང་མདོ་ལས་དགེ་སློང་དག་ངའི་ཆོས་ནི་ལེགས་པར་
གསུངས་པ། གསལ་བ། ཕྱེ་བ། རྒྱུ་བ་བཅད་པ། ལྷ་དང་མིའི་བར་དག་ལ་ཡང་དག་པར་ཤིན་ཏུ་བསྟན་པའོ་ཞེས་བྱ་བས་ནི་དེ་བཞིན་གཤེགས་པའི་ཆོས་ཀྱི་ཡོན་ཏན་བསྟན་ཏོ། །དེའང་ཇི་ལྟར་ཞེ་ན། དོན་ཕྱིན་ཅི་མ་ལོག་པར་བསྟན་པའི་ཕྱིར་ལེགས་པར་གསུངས་པ་དང༌། ཚིག་དང་ཡིག་
འབྲུ་གསལ་བ་དང་དོན་ཤིན་ཏུ་རྣམ་པར་ཕྱེ་ནས་བསྟན་པའི་ཕྱིར་བདེ་བར་འཇུག་པ་ཉིད་དང༌། གོང་དུ་འགྲོ་བའམ་རྒྱུ་བ་བཅད་པ་ཉིད་ཀྱིས་གོང་ན་མེད་པ་ཉིད་དང༌། ལྷ་དང་མིས་ཡང་དག་པར་བཟུང་བ་ཉིད་དང༌། ཇི་ལྟར་འོས་པའི་གདུལ་བྱ་ལ་བསྟན་པ་ཉིད་དང༌། སློབ་དཔོན་གྱི་དཔེ་མཁྱུད་མེད་པར་རྒྱུན་

དུ་བསྟན་པ་ཉིད་དེ། དེ་ལྟ་བུའི་ཡོན་ཏན་དྲུག་དང་ལྡན་པ་སྟེ། དེ་ཉིད་ལས།དེ་ཉིད་དོན་ནི་ལེགས་གསུངས་ཕྱིར། །བདེ་བར་འཇུག་ཕྱིར་བླ་མེད་ཕྱིར། །རབ་ཏུ་གཟུང་ཕྱིར་ཇི་ལྟར་འོས། །མ་ལུས་པ་ནི་བསྟན་ཕྱིར་རོ། །ཞེས་སོ། །གཞན་ཡང་རྣམ་པར་བཤད་པའི་རིགས་པ་ལས་ཡོན་
ཏན་ཡོངས་སུ་འཛིན་པའི་རྣམ་པ་བཅུ་དག་གིས་ལེགས་པར་གསུངས་པ་ཉིད་དུ་བཤད་དོ། །བཅུ་ནི་ཡང་དག་པར་བླང་བ་དང༌། དབང་དུ་མཛད་པ་དང༌། འཇུག་པ་དང༌། རབ་ཏུ་བསྟན་པ་དང༌། རབ་ཏུ་དབྱེ་བ་དང༌། རྟེན་དང༌། གོ་བར་མཛད་པ་དང༌། གདགས་པ་དང༌། དུས་དང༌། ཡོན་ཏན་
ཡོངས་སུ་འཛིན་པ་རྣམས་སུ་གསུངས་ཏེ། དེ་དག་གི་དོན་ནི། ཡང་དག་པར་མངོན་པར་རྫོགས་པར་སངས་རྒྱས་ནས་གསུངས་པའི་ཕྱིར་ཡང་དག་པར་བླང་བ་དང༌། སེམས་ཅན་ཐམས་ཅད་ཀྱི་དབང་དུ་མཛད་ནས་གསུངས་པའི་ཕྱིར་དབང་དུ་མཛད་པ་ཉིད་དང༌། རེས་འགའ་བ་མ་ཡིན་
པར་ཡང་དང་ཡང་དུ་རྒྱུན་དུ་གསུངས་པའི་ཕྱིར་འཇུག་པ་ཉིད་དང༌། དཔེ་མཁྱུད་ཀྱིས་འགའ་ལ་ཡང་བར་ཆད་པར་མ་བྱས་པར་ཡང་དག་པར་གསུངས་པའི་ཕྱིར་རབ་ཏུ་བསྟན་པ་ཉིད་དང༌། སེམས་ཅན་གྱི་བསམ་པ་ཇི་ལྟ་བ་བཞིན་དུ་ཡང་དག་པར་གསུངས་པའི་ཕྱིར་རབ་ཏུ་དབྱེ་བ་དང༌། དབྱངས་ཀྱི་
ཡན་ལག་ལྔ་དང་ལྡན་པར་ཡང་དག་པར་གསུངས་པའི་ཕྱིར་རྟེན་ཉིད་དང༌། དབྱངས་གཅིག་གིས་འཇིག་རྟེན་གྱི་ཁམས་མཐའ་ཡས་པར་གོ་བར་མཛད་པའམ། འཁོར་གྱི་དཀྱིལ་འཁོར་ཇི་སྙེད་པ་ཁྱབ་པར་ཡང་དག་པར་གསུངས་པའི་ཕྱིར་གོ་བར་མཛད་པ་ཉིད་དང༌། མཐའ་གཉིས་སྤངས་
པའི་ལམ་གསུངས་པའི་ཕྱིར་གདགས་པ་ཉིད་དང༌། འདུལ་བ་ཡོངས་སུ་སྨིན་པ་རྣམས་ལ་གསུངས་པའི་ཕྱིར་དུས་ཉིད་དང༌། གསུང་ཡོན་ཏན་དྲུག་ཅུ་དང་ལྡན་པར་ཡང་དག་པར་གསུངས་པའི་ཕྱིར་ཡོན་ཏན་ཡོངས་སུ་འཛིན་པ་ཉིད་དེ། ཁྱད་པར་དེ་དང་དེ་དག་གིས་ལེགས་པར་
གསུངས་སོ་ཞེས་བྱ་བའི་དོན་དུ་བསྟན་པ་ཡིན་ནོ། །གསུམ་པ་རབ་ཏུ་དབྱེ་བ་ལ་ལྔ་སྟེ། བརྗོད་བྱའི་སྒོ་ནས་དབྱེ་བ་དང༌། རྗོད་བྱེད་ཀྱི་སྒོ་ནས་དབྱེ་བ་དང༌། གཉེན་པོའི་སྒོ་ནས་དབྱེ་བ་དང༌། གདུལ་བྱའི་སྒོ་ནས་དབྱེ་བ་དང༌། བདག་རྐྱེན་གྱི་སྒོ་ནས་དབྱེ་བའོ། །དང་པོ་བརྗོད་

པར་བྱ་བའི་སྒོ་ནས་དབྱེ་ན། བདེན་པ་གཉིས་སམ་དྲང་ངེས་གཉིས་ཏེ། དབུ་མ་རྩ་བའི་ཤེས་རབ་ལས། སངས་རྒྱས་རྣམས་ཀྱིས་ཆོས་བསྟན་པ། །བདེན་པ་གཉིས་ལ་ཡང་དག་བརྟེན། །ཞེས་སོ། །དེའང་ཇི་ལྟར་ན་གསུང་རབ་གང་གིས་ཀུན་རྫོབ་ཀྱི་བདེན་
པ་བརྗོད་པར་བྱ་བའི་གཙོ་བོར་སྟོན་པར་བྱེད་པ་དེ་ནི་དྲང་བའི་དོན་དང༌། དོན་དམ་པའི་བདེན་པ་བརྗོད་པར་བྱ་བའི་གཙོ་བོར་སྟོན་པར་བྱེད་པ་དེ་ནི་ངེས་པའི་དོན་ཏེ། འཕགས་པ་བློ་གྲོས་མི་ཟད་པས་བསྟན་པ་ལས། ཀུན་རྫོབ་སྒྲུབ་པ་སྟོན་པ་ནི་དྲང་བའི་དོན་ཏོ། །དོན་དམ་སྒྲུབ་པ་སྟོན་པ་ནི་ངེས་
པའི་དོན་ཏོ་ཞེས་སོ། །གཉིས་པ་རྗོད་བྱེད་ཀྱི་སྒོ་ནས་དབྱེ་ན་གསུང་རབ་ཡན་ལག་བཅུ་གཉིས་ཏེ། བརྒྱད་སྟོང་འགྲེལ་པ་སྙིང་པོ་མཆོག་ལས། མདོ་སྡེ་དབྱངས་བསྙད་ལུང་བསྟན་དང༌། །ཚིགས་བཅད་ཆེད་བརྗོད་གླེང་གཞི་དང༌། །རྟོགས་བརྗོད་དེ་ལྟ་བུ་བྱུང་དང༌། །སྐྱེས་རབས་
ཤིན་ཏུ་རྒྱས་པ་དང༌། །རྨད་བྱུང་གཏན་ལ་དབབ་པའི་སྡེ། །གསུང་རབ་ཡན་ལག་བཅུ་གཉིས་སོ། །ཞེས་གསུངས་པ་ལྟར་མདོའི་སྡེ་ནི་གང་བཞེད་པའི་དོན་མདོར་སྨོས་པའི་ཚུལ་གྱིས་ལྷུག་པར་གསུངས་པ་སྟེ། འདུས་བྱས་འདུས་མ་བྱས་རྣམ་པར་ངེས་པ་ལས། དེ་ལ་
ཚིག་རྐྱང་ལྷུག་གིས་མདོ་མདོར་བརྗོད་པ་དེ་ནི་མདོའི་སྡེའོ་ཞེས་སོ། །ཅིའི་ཕྱིར་ཕྱེ་སྟེ་མི་གསུངས་སྙམ་ན། ཀུན་ལས་བཏུས་པ་ལས། ཕན་ཡོན་བཅུ་གཟིགས་ནས་དེ་བཞིན་གཤེགས་པས་སྨོས་པའི་ཚུལ་གྱིས་ཆོས་སྟོན་ཏེ་རྣམ་པར་གཞག་སླ་བ་དང༌། བཤད་སླ་བ་དང༌། གཟུང་
སླ་བ་དང༌། ཆོས་ལ་གུས་པས་མྱུར་དུ་ཚོགས་ཡོངས་སུ་རྫོགས་པར་བྱེད་པ་དང༌། མྱུར་དུ་ཆོས་ཉིད་རྟོགས་པར་འགྱུར་བ་དང༌། སངས་རྒྱས་ལ་ཤེས་ནས་དད་པ་ཐོབ་པ་དང༌། ཆོས་དང་དགེ་འདུན་ལ་ཤེས་ནས་དད་པ་ཐོབ་པ་དང༌། མཐོང་བའི་ཆོས་ལ་བདེ་བར་གནས་
པའི་མཆོག་ལ་རེག་པ་དང༌། འབེལ་བའི་གཏམ་གྱིས་གཏན་ལ་འབེབས་པས་དམ་པ་རྣམས་ཀྱི་སེམས་མགུ་བར་བྱེད་དོ། །མཁས་པ་མཁས་པ་ཞེས་བྱ་བའི་གྲངས་སུ་འགྲོའོ་ཞེས་སོ། །དབྱངས་ཀྱིས་བསྙད་པའི་སྡེ་ནི། མདོའི་སྡེ་དེ་ཉིད་ལ་བར་དང་མཐའ་མ་དག་ཏུ་

ཚིགས་སུ་བཅད་པའི་དབྱངས་སུ་བསྙད་པའམ། ད་དུང་བརྟག་པར་བྱ་བ་གཞན་ཡོད་པས་དྲང་བའི་དོན་དུ་གསུང་བའི་མདོ་སྡེ་གང་ཡིན་པ་རྣམས་སོ། །ལུང་དུ་བསྟན་པའི་སྡེ་ནི། ཉན་ཐོས་དང་བྱང་ཆུབ་སེམས་དཔའ་ལ་སོགས་པ་སྔོན་བྱུང་བ་ཤི་བའི་དུས་བྱས་པ་དང་འབྱུང་
བར་འགྱུར་བ་ལ་སོགས་པ་རྣམས་ལུང་སྟོན་པ་མཛད་པའམ། དགོངས་པ་རྣམ་པར་ཕྱེ་ནས་ལུང་སྟོན་པར་བྱེད་པ་ངེས་པའི་དོན་གྱི་མདོ་སྡེ་གང་ཡིན་པ་རྣམས་སོ། །ཚིགས་སུ་བཅད་པའི་སྡེ་ནི། ལུང་གང་དག་ཚིག་རྐང་པ་གཉིས་པ་ནས་བརྩམས་ཏེ་རྐང་པ་དྲུག་པའི་བར་དུ་ཚིགས་
སུ་བཅད་པར་བསྡེབས་ནས་གསུངས་པ་གང་ཡིན་པ་རྣམས་སོ། །ཆེད་དུ་བརྗོད་པའི་སྡེ་ནི། གང་ཟག་གཞན་གྱིས་ཞུ་བ་ལ་མ་ལྟོས་པར་བཅོམ་ལྡན་འདས་ཀྱིས་བསྟན་པ་ཡུན་དུ་གནས་པར་བྱ་བ་ཁོ་ནའི་ཕྱིར་ཡི་རང་བའི་ཚུལ་གྱིས་གསུངས་པ་སྟེ། དཔེར་ན་མདོ་ལས་བཅོམ་
ལྡན་འདས་ནང་དུ་ཡང་དག་འཇོག་ལས་བཞེངས་ཏེ་གདན་ལ་བཞུགས་ནས་དགེ་སློང་གི་དགེ་འདུན་རྣམས་ལ་ཆེད་དུ་རྗོད་པ་འདི་ཆེད་དུ་བརྗོད་དོ་ཞེས་པ་ལྟ་བུ་སྟེ།རྣམ་བཤད་རིགས་པ་ལས། གང་ཟག་གི་ཆེད་དུ་གསུངས་པ་མ་ཡིན་གྱི། བསྟན་པ་གནས་པར་བྱ་བ་
འབའ་ཞིག་གི་ཕྱིར་གསུངས་པ་གང་ཡིན་པ་སྟེ་ཞེས་གསུངས་སོ། །གླེང་གཞིའི་སྡེ་ནི། གང་ཟག་འགའ་ཞིག་གི་ཆེད་དུ་གསུངས་པ་དང་བྱུང་བ་དང་བཅས་པའི་བསླབ་པ་བརྗོད་པ་རྣམས་ཏེ། སྒྲ་སྦྱོར་བམ་པོ་གཉིས་པ་ལས། མདོ་སྡེ་དང་འདུལ་བ་ལ་སོགས་པ་ཐོག་མ་ཅི་ལས་
གླེངས་ཏེ་བཤད་པ་དང༌། གཞི་འདི་དང་སྐབས་འདི་དང་བྱུང་བ་འདིའི་ཚེ་བསླབ་པ་བཅས་པ་ལྟ་བུ་ལ་བྱ་སྟེ་གླེང་གཞིའི་སྡེ་ཞེས་བྱ་ཞེས་སོ། །རྟོགས་པ་བརྗོད་པའི་སྡེ་ནི། ཆོས་ཉན་པ་རྣམས་ཀྱིས་དོན་གོ་ཞིང་ལེགས་པར་རྟོགས་པར་བྱ་བའི་ཕྱིར་སྔོན་བྱུང་བ་གཞན་ལས་
བརྩམས་པའི་དཔེ་དང་བཅས་ནས་སྟོན་པ་གང་ཡིན་པ་རྣམས་སོ། །དེ་ལྟ་བུ་བྱུང་བའི་སྡེ་ནི་སྔོན་རབས་ཀྱི་གཏམ་རྒྱུད་གསུངས་པ་རྣམས་སོ། །སྐྱེས་པ་རབས་ཀྱི་སྡེ་ནི། བཅོམ་ལྡན་འདས་ཀྱིས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་གང་དང་གང་དུ་སྐྱེས་པ་དང༌།

དཀའ་ཐུབ་ཅི་དང་ཅི་མཛད་པ་རྣམས་ལེགས་པར་སྟོན་པ་རྣམས་སོ། །ཤིན་ཏུ་རྒྱས་པའི་སྡེ་ནི། ཐེག་པ་ཆེན་པོ་བྱང་ཆུབ་སེམས་དཔའི་སྡེ་སྣོད་ཀྱིས་དང་ཕ་རོལ་ཏུ་ཕྱིན་པ་ལ་སོགས་པ་ཤིན་ཏུ་རྒྱ་ཆེ་བ་དང་རྒྱས་པ་དང་ཟབ་པའི་རྣམ་པར་སྟོན་པ་རྣམས་སོ། །རྨད་དུ་བྱུང་
བའི་སྡེ་ནི། གང་ལས་ཉན་ཐོས་དང་བྱང་ཆུབ་སེམས་དཔའ་དང་རྫོགས་པའི་སངས་རྒྱས་རྣམས་ཀྱི་མཁྱེན་པ་དང་རྫུ་འཕྲུལ་དང་བྱིན་གྱིས་བརླབས་པ་ལ་སོགས་པ་ངོ་མཚར་རྨད་དུ་བྱུང་བའི་ཆོས་བསྟན་པ་རྣམས་སོ། །གཏན་ལ་དབབ་པའི་སྡེ་ནི། ཆོས་ཐམས་ཅད་རང་དང་སྤྱིའི་མཚན་
ཉིད་ཀྱིས་གཏན་ལ་འབེབས་པའི་སྒོ་ནས་མདོ་སྡེ་ལ་སོགས་པའི་དོན་ཡང་དག་པར་བསྟན་པ་རྣམས་སོ། །གསུམ་པ་གཉེན་པོའི་སྒོ་ནས་དབྱེ་ན་སྡེ་སྣོད་གསུམ་སྟེ། སྤྱིའི་ངེས་ཚིག་དང༌། སོ་སོའི་རང་བཞིན་དང༌། སྡེ་སྣོད་གསུམ་དུ་འཇོག་པའི་རྒྱུ་མཚན་ནོ། །དང་པོ་སྤྱིའི་ངེས་ཚིག་
ནི། ཐུན་མོང་དུ་ལེགས་པར་སྦྱར་བའི་སྐད་དུ་པི་ཊ་ཀ་ཞེས་འབྱུང་སྟེ། དེ་ཉིད་བསྒྱུར་ན་གང་བུའམ་བསྡུས་པའི་དོན་ལ་འཇུག་སྟེ། དེ་ན་ཤེས་པར་བྱ་བའི་ཆོས་ཐམས་ཅད་ནི་འདིའི་བརྗོད་བྱ་ཉིད་དུ་བསྡུས་པའི་ཕྱིར་སྡེ་སྣོད་དམ། ཡང་ན་ཡུལ་དབུས་ཀྱི་བྲེ་བོ་ཆེའི་མིང་སྟེ། དེའི་ནང་
དུ་བྲེའུ་ཆུང་གིས་གཞལ་བར་བྱ་བའི་འབྲུ་ལ་སོགས་པ་མང་པོ་ཆུད་པ་ལྟར། འདིར་ཡང་ཤེས་པར་བྱ་བའི་ཆོས་སམ་བསླབ་པར་བྱ་བའི་ཆོས་མང་པོ་འདུས་པའི་ཕྱིར་སྡེ་སྣོད་ཅེས་བྱ་སྟེ། དཔེར་ན་སྣོད་གང་དུ་འབྲུ་བྲེ་བཅུ་ཤོང་ཞིང་འདུས་པའི་སྣོད་དེ་ལ་སྣོད་ཅེས་བྱ་བ་དང་འདྲ་བར་སྡེ་
སྣོད་གསུམ་པོ་དང་གཉིས་པོ་འདིར་ཡང་གསུང་རབ་ཡན་ལག་བཅུ་གཉིས་ཀྱི་དོན་དང་ཚིག་ཐམས་ཅད་མ་འདུས་པ་མེད་པའི་ཕྱིར་སྡེ་སྣོད་ཅེས་བྱའོ། །དེ་ལྟར་ཡང་སློབ་དཔོན་ཐོགས་མེད་ཀྱིས་གསུམ་པོའམ་གཉིས་པོ་དེ་ཡང་ཅིའི་ཕྱིར་སྡེ་སྣོད་ཅེས་བྱ་ཞེ་ན། སྨྲས་པ། བསྡུས་པའི་
ཕྱིར་ཏེ་ཤེས་བྱའི་དོན་ཐམས་ཅད་བསྡུས་པའི་ཕྱིར་རོ་ཞེས་སོ། །ཡང་ན་ཕུང་པོ་དང་ཁམས་དང་སྐྱེ་མཆེད་ཀྱི་ཆོས་ནས་སྐུ་དང་ཡེ་ཤེས་ལ་སོགས་པའི་བར་གྱིས་ཤེས་པར་བྱ་བའི་དོན་ཐམས་ཅད་འདུས་པས་དེའི་ཕྱིར་སྡེ་སྣོད་ཅེས་བྱའོ་ཞེས་གསུངས་སོ། །སྡེ་སྣོད་གསུམ་དུ་གསུང་རབ་

ཡན་ལག་བཅུ་གཉིས་པོ་ཇི་ལྟར་འདུ་བར་འགྱུར་བ་ཡིན་སྙམ་ན། མདོའི་སྡེ་དང་དབྱངས་ཀྱིས་བསྙད་པའི་སྡེ་དང་ལུང་དུ་བསྟན་པའི་སྡེ་དང་ཚིགས་སུ་བཅད་པའི་སྡེ་དང་ཆེད་དུ་བརྗོད་པའི་སྡེ་སྟེ་ལྔ་པོ་དག་ནི་ཉན་ཐོས་ཀྱི་མདོ་སྡེའི་སྡེ་སྣོད་དུ་འདོད་དོ། །གླེང་གཞིའི་སྡེ་དང་རྟོགས་པ་
བརྗོད་པའི་སྡེ་དང་དེ་ལྟ་བུ་བྱུང་བའི་སྡེ་སྟེ་གསུམ་པོ་དག་ནི་ཉན་ཐོས་ཀྱི་འདུལ་བ་སྟེ།དེའི་ཡང་དང་པོས་ནི་ལྟུང་བ་བསླབ་བྱ་དང་བཅས་པ་སྟོན་པའི་ཕྱིར་ན་གཙོ་བོའི་ཚུལ་དང༌། ཕྱི་མ་གཉིས་ནི་དེའི་འཁོར་གྱི་ཚུལ་དུ་འདོད་པ་ཡིན་ནོ། །སྐྱེས་པ་རབས་ཀྱི་སྡེ་ནི་བྱང་ཆུབ་སེམས་
དཔའི་འདུལ་བའི་སྡེ་སྣོད་ཀྱི་འཁོར་དང༌། ཤིན་ཏུ་རྒྱས་པའི་སྡེ་དང་རྨད་དུ་བྱུང་བའི་སྡེ་གཉིས་ནི་བྱང་ཆུབ་སེམས་དཔའི་མདོ་སྡེའི་སྡེ་སྣོད་ཉིད་དུ་འདོད་དོ། །གཏན་ལ་དབབ་པའི་སྡེ་ནི་ཉན་ཐོས་དང་བྱང་ཆུབ་སེམས་དཔའ་གཉིས་ཀའི་ཐུན་མོང་དུ་གྱུར་པའི་ཆོས་མངོན་པའི་སྡེ་སྣོད་དུ་
ངེས་པ་ཡིན་ལ། རང་སངས་རྒྱས་ལ་ནི་སྡེ་སྣོད་ལོགས་སུ་གྱུར་པ་མེད་པས་ཉན་ཐོས་ཀྱི་སྡེ་སྣོད་ལ་དམིགས་པ་ཡིན་ནོ། །གཉིས་པ་སོ་སོའི་རང་བཞིན་ལ། མཚན་ཉིད་དང༌། མཚན་གཞི་དང༌། ངེས་པའི་ཚིགས་སྟེ་གསུམ་གསུམ་ལས། དང་པོ་མདོ་སྡེའི་སྡེ་སྣོད་ཀྱི་མཚན་ཉིད་
ནི། ལྷག་པའི་སེམས་ཀྱི་བསླབ་པ་བརྗོད་བྱའི་གཙོ་བོར་གྱུར་པའི་གསུང་རབ་ཀྱི་རིགས་སུ་གཏོགས་པའོ། །གཉིས་པ་མཚན་གཞི་ནི། ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ་ལ་སོགས་པ་རྣམས་སོ། །གསུམ་པ་ངེས་ཚིག་ནི། མདོའི་སྐད་དོད་ལ་ལེགས་པར་
སྦྱར་བའི་སྐད་དུ་སཱུ་ཏྲ་ཞེས་པ་མགོ་སྨོས་པ་སྟེ། མདོ་སྡེ་རྒྱན་ལས། མདོ་དང་ཆོས་མངོན་འདུལ་བ་དག །མདོར་ན་དོན་ནི་རྣམ་བཞིར་འདོད། །བློ་ལྡན་པས་ནི་དེ་ཤེས་ན། །རྣམ་པ་ཐམས་ཅད་མཁྱེན་པ་ཐོབ། །ཅེས་པའི་དོན་ནི་སྡེ་སྣོད་གསུམ་པོ་སོ་སོར་རེ་རེ་ཞིང་གནས་ལ་སོགས་
པ་བཞི་དང༌། མངོན་དུ་བ་ལ་སོགས་པ་བཞི་དང༌། ལྟུང་བ་ལ་སོགས་པ་བཞི་སྟེ། མདོར་ན་སྡེ་སྣོད་གསུམ་པོ་མ་ལུས་པར་ཤེས་པའི་བློ་དང་ལྡན་པའི་བྱང་ཆུབ་སེམས་དཔའ་རྣམས་ཀྱིས་རྣམ་པ་ཐམས་ཅད་མཁྱེན་པ་ཉིད་འཐོབ་པར་བཤད་ལ། ཉན་ཐོས་དག་གིས་ནི་ཚིགས་

སུ་བཅད་པ་གཅིག་གི་དོན་རྟོགས་པས་ཀྱང་ཟག་པ་ཟད་པའི་འབྲས་བུ་འཐོབ་པར་བཤད་དོ། །དེ་དག་ལས་གནས་ལ་སོགས་པ་རྣམ་པ་བཞི་ནི། དེ་ཉིད་ལས། གནས་རྣམས་དང་ནི་མཚན་ཉིད་དང༌། །ཆོས་དོན་སྨོས་ཕྱིར་མདོ་ཡིན་ནོ། །ཞེས་གསུངས་པ་
བཞིན་དུ།ས་ཡུལ་གང་དུ་བཤད་པ་དང༌། །གང་གིས་བཤད་པ་དང༌། གང་གི་ཕྱིར་གསུངས་པ་རྣམས་སྨོས་པའི་ཕྱིར་གནས་དང༌། ཀུན་རྫོབ་ཀྱི་བདེན་པའི་མཚན་ཉིད་དང་དོན་དམ་པའི་བདེན་པའི་མཚན་ཉིད་སྨོས་པའི་ཕྱིར་མཚན་ཉིད་དང༌། ཕུང་པོ་དང་ཁམས་དང་སྐྱེ་མཆེད་དང་རྟེན་
ཅིང་འབྲེལ་བར་འབྱུང་བ་ལ་སོགས་པ་སྨོས་པའི་ཕྱིར་ཆོས་དང༌། དེ་རྣམས་ཀྱི་དགོངས་པའི་དོན་སྨོས་པའི་ཕྱིར་དོན་ཏེ་དེ་དག་སྨོས་པའི་ཚུལ་གྱིས་གསུངས་པའི་ཕྱིར་མདོ་ཡིན་ནོ། །དེ་དག་སྟོན་པར་བྱེད་པའི་གསུང་རབ་ཀྱི་ཚོགས་སུ་གྱུར་པའི་ཕྱིར་སྡེ་ཞེས་བྱ་བ་ཡིན་ནོ། །གཉིས་པ་མངོན་པའི་སྡེ་སྣོད་ལ་ཡང་དང་པོ་
མཚན་ཉིད་ནི། ལྷག་པའི་ཤེས་རབ་ཀྱི་བསླབ་པ་བརྗོད་བྱའི་གཙོ་བོར་གྱུར་པའི་གསུང་རབ་ཀྱི་རིགས་སུ་གཏོགས་པའོ། །གཉིས་པ་མཚན་གཞི་ནི་མངོན་པ་སྡེ་བདུན་ལ་སོགས་པ་རྣམས་སོ། །གསུམ་པ་ངེས་པའི་ཚིག་ནི་མངོན་པ་ལ་ལེགས་པར་སྦྱར་བའི་སྐད་དུ་ཨ་བྷི་ཞེས་
འབྱུང་སྟེ། ཨ་བྷི་མུ་ཁྱ་ཞེས་པ་མངོན་དུ་ཕྱོགས་པ་དང༌། ཨ་བྷཱི་ཀྵ་ཎ་ཞེས་པ་ཡང་ཡང་དང༌། ཨ་བྷི་བྷུ་ཞེས་པ་ཟིལ་གནོན་དང༌། ཨ་བྷི་ས་མ་ཡ་ཞེས་པ་རྟོགས་པ་སྟེ། དེ་ཉིད་ལས། མངོན་དུ་ཕྱིར་དང་ཡང་ཡང་དང༌། །ཟིལ་གནོན་རྟོགས་ཕྱིར་མངོན་པའི་ཆོས། །
ཞེས་པ་ལྟར་ཞི་བ་མྱ་ངན་ལས་འདས་པ་ལ་མངོན་དུ་ཕྱོགས་པའི་ཆོས་བྱང་ཆུབ་ཀྱི་ཕྱོགས་དང་མཐུན་པ་དང་རྣམ་པར་ཐར་པའི་སྒོ་ལ་སོགས་པ་སྟོན་པའི་ཕྱིར་མངོན་དུ་བ་དང༌། ཕུང་པོ་དང་ཁམས་དང་སྐྱེ་མཆེད་ལ་སོགས་པ་ཆོས་རེ་རེ་ལའང་བསྟན་དུ་ཡོད་པ་དང་བསྟན་དུ་མེད་པ་ལ་
སོགས་པའི་བྱེ་བྲག་མང་པོ་ཡང་དང་ཡང་དུ་སྟོན་པའི་ཕྱིར་ཡང་ཡང་དང༌། བརྩད་པ་དང་བརྩད་པའི་གཞི་ལ་སོགས་པ་སྨྲ་བ་ལ་རྣམ་པར་ངེས་པས་ཕས་ཀྱི་རྒོལ་བ་ཟིལ་གྱིས་གནོན་པའི་ཕྱིར་ཟིལ་གནོན་དང༌། ཤེས་བྱ་ཇི་སྙེད་པའི་མདོ་སྡེའི་དོན་མ་ནོར་བར་རྟོགས་པའི་རྒྱུར་འགྱུར་

བའི་ཕྱིར་རྟོགས་པ་སྟེ་རྣམ་པ་བཞི་པོ་དེ་དག་གིས་མངོན་པ་ཡིན་ནོ། །གསུམ་པ་འདུལ་བའི་སྡེ་སྣོད་ལའང་དང་པོ་མཚན་ཉིད་ནི། ལྷག་པའི་ཚུལ་ཁྲིམས་ཀྱི་བསླབ་པ་བརྗོད་བྱའི་གཙོ་བོར་གྱུར་པའི་གསུང་རབ་ཀྱི་རིགས་སུ་གཏོགས་པའོ། །གཉིས་པ་མཚན་གཞི་ནི་ལུང་སྡེ་བཞི་
ལ་སོགས་པ་རྣམས་སོ། །གསུམ་པ་ངེས་ཚིག་ནི་འདུལ་བ་ལ་ལེགས་པར་སྦྱར་བའི་སྐད་དུ་བི་ན་ཡ་ཞེས་པ་འབྱུང་སྟེ་བི་བཏྟི་རྣམ་པར་ལྟུང་བ་དང༌། བི་ནིཤྩ་ཡ་རྣམ་པར་ངེས་པ་སྟེ། དེ་ཉིད་ལས། ལྟུང་དང་འབྱུང་དང་ལྡང་བ་དང༌། །ངེས་པར་འབྱུང་དང་གང་ཟག་དང༌། །
བཅས་པ་དང་ནི་རབ་དབྱེ་དང༌། །རྣམ་པར་ངེས་ཕྱིར་འདུལ་བ་ཉིད། །ཅེས་འབྱུང་བ་ལྟར་ཏེ། དེ་ལ་ལྟུང་བ་ནི་ཕས་ཕམ་པ་དང༌། དགེ་འདུན་ལྷག་མ་དང༌། ཉེས་པ་སྦོམ་པོ་དང༌། ལྟུང་བྱེད་དང༌། སོ་སོར་བཤགས་པ་སྟེ་ལྟུང་བ་རིས་ལྔའོ། །ལྟུང་བ་དེ་དག་གང་
ལས་འབྱུང་བའི་རྒྱུ་ནི། མི་ཤེས་པ་ལ་སོགས་པ་བཞི་ལས་འབྱུང་བའོ། །ལྟུང་བ་ལས་ལྡང་བའི་ཐབས་ནི། ཕྱིན་ཆད་མི་བྱ་བར་བསྡམས་པའི་སེམས་སྟོན་པས་ལྡང་བའོ། །ལྟུང་བ་ལས་ངེས་པར་འབྱུང་བའི་ཐབས་ནི། སོ་སོར་བཤགས་པ་ལ་སོགས་པ་བདུན་སྟོན་
པས་ངེས་པར་འབྱུང་བ་སྟེ་ཆོས་རྣམ་པ་བཞི་འབྱུང་བའི་ཕྱིར་འདུལ་བ་ཡིན་ནོ། །རྣམ་པ་གཞན་ཡང་གང་ལ་བརྟེན་ནས་བསླབ་པའི་ཚིག་བཅའ་བའི་གང་ཟག་དང༌། གང་ཟག་གི་ཉེས་པ་གསོལ་ནས་སྟོན་པས་དགེ་འདུན་ལ་བསླབ་པ་བཅས་པ་དང༌། དེ་མདོར་བསྟན་
པ་ལས་རབ་ཏུ་དབྱེ་བ་དང༌། ལྟུང་བ་དང་ལྟུང་བ་མ་ཡིན་པ་རྣམ་པར་ངེས་པ་སྟེ་བཞི་འབྱུང་བའི་ཕྱིར་ཡང་འདུལ་བ་ཡིན་ནོ། །གསུམ་པ་སྡེ་སྣོད་གསུམ་དུ་བཞག་པའི་རྒྱུ་མཚན་ནི། སྤང་བྱ་གསུམ་ཡིན་པ་དང་བསླབ་བྱ་གསུམ་ཡིན་པ་དང་ཤེས་བྱ་གསུམ་ཡིན་པ་སྟེ་རྒྱུ་རྣམ་པ་དགུ་ལས།
དང་པོ་ནི་སྤང་བྱ་ཉོན་མོངས་པ་གསུམ་གྱི་དབང་གིས་སྡེ་སྣོད་གསུམ་དུ་གཞག་སྟེ། འདི་ལྟར་ཉེ་བའི་ཉོན་མོངས་པ་ཐེ་ཚོམ་གྱི་གཉེན་པོར་མདོ་སྡེའི་སྡེ་སྣོད་རྣམ་པར་གཞག་པ་སྟེ། མདོ་སྡེ་གང་ལས་ཕུང་པོ་དང་ཁམས་དང་སྐྱེ་མཆེད་དང་རྟེན་ཅིང་འབྲེལ་པར་འབྱུང་བ་དང༌། བདེན་

པ་དང་ས་དང་ཕ་རོལ་ཏུ་ཕྱིན་པ་ལ་སོགས་པའི་དོན་གང་ལ་ཡིད་གཉིས་སུ་གྱུར་པ་དེ་ལ་དེ་གདོན་མི་ཟ་བར་བྱ་བའི་ཆེད་དུ་བཤད་པའི་ཕྱིར་རོ། །མཐའ་གཉིས་ལ་སྦྱོར་བའི་གཉེན་པོར་འདུལ་བའི་སྡེ་སྣོད་རྣམ་པར་གཞག་པ་སྟེ། གང་ལས་ཚེགས་དང་རྩོལ་བས་བསྒྲུབ་པའི་ཁ་
ན་མ་ཐོ་བའི་ཡོངས་སུ་སྤྱད་པས་སྲེད་པས་ཀུན་ནས་བསླང་བའི་སོག་འཇོག་ལ་སྤྱོད་པ་བཀག་པ་འདོད་པའི་བསོད་ཉམས་ཀྱི་མཐའ་སྤོང་བ་དང༌། ངེས་པར་འབྱུང་བའི་ཚུལ་ཁྲིམས་དག་པ་དང་ལྡན་པའི་དགེ་སློང་གིས་ཁ་ན་མ་ཐོ་བ་མེད་པའི་ཡོངས་སུ་སྤྱད་པ་ལྷག་པར་རྙེད་ན་ཁ་ཟས་རོ་བརྒྱ་དང་ལྡན་
པ་དང༌། ཁང་པ་བརྩེགས་པ་ཁང་མིག་ལྔ་བརྒྱ་པ་ཡང་ཞེན་མེད་དུ་སྤྱོད་པར་གནང་བ་བདག་ཉིད་ངལ་ཞིང་དུབ་པའི་མཐའ་སྤོང་བར་སྟོན་པའི་ཕྱིར་ཏེ། དཔེར་ན་བཅོམ་ལྡན་འདས་ཀྱིས་དགེ་སློང་ཚུལ་ཁྲིམས་དང་ལྡན་པ་དང༌། ཡོན་ཏན་དང་ལྡན་པ་ལ་ནི་ངས་ཁ་ཟས་རོ་བརྒྱ་དང་ལྡན་པ་དང་གོས་འབུམ་
རི་བ་ཡང་གནང་ངོ་ཞེས་གསུངས་པ་ལྟ་བུའོ། །རང་གི་ལྟ་བ་ལ་མཆོག་ཏུ་འཛིན་པའི་གཉེན་པོར་ཆོས་མངོན་པའི་སྡེ་སྣོད་རྣམ་པར་གཞག་པ་སྟེ། ཆོས་རྣམས་ཀྱི་མ་མོ་གང་གིས་ཤེས་བྱ་ཐམས་ཅད་ཀྱི་རང་སྤྱིའི་མཚན་ཉིད་ཕྱིན་ཅི་མ་ལོག་པར་གཏན་ལ་ཕབ་ནས་རྒྱ་ཆེར་སྟོན་པའི་ཕྱིར་རོ། །
གཉིས་པ་ནི་བསླབ་པར་བྱ་བ་རྣམ་པར་བྱང་བའི་ལམ་གསུམ་གྱི་དབང་གིས་སྡེ་སྣོད་གསུམ་དུ་རྣམ་པར་གཞག་སྟེ། འདི་ལྟར་རྗོད་བྱེད་གསུམ་པོ་དེ་དག་གིས་བརྗོད་བྱ་བསླབ་པ་གསུམ་ཅི་རིགས་པར་བསྟན་ཏེ། མདོ་སྡེའི་སྡེ་སྣོད་ཀྱིས་ནི་ཉན་ཐོས་དང་ཐེག་པ་ཆེན་པོའི་བསླབ་པ་གསུམ་རྒྱས་པར་
བརྗོད་པའི་སྒོ་ནས་གདུལ་བྱ་རྣམས་བསླབ་པ་གསུམ་ལ་ཡང་དག་པར་སྦྱོར་བར་བྱེད་དོ། །འདུལ་བའི་སྡེ་སྣོད་ཀྱིས་ནི་སོ་སོར་ཐར་པའི་སྡོམ་པའི་བསླབ་བྱ་ལ་སློབ་པའི་ཚུལ་རྒྱ་ཆེར་བསྟན་པའི་སྒོ་ནས་གདུལ་བྱ་རྣམས་ཀྱི་རྒྱུད་ལ་དངོས་སུ་ཚུལ་ཁྲིམས་ཡོངས་སུ་དག་པར་བྱེད་པ་དང༌། དེ་ལ་གནས་པས་འགྱོད་
པ་མེད་པ་ལ་སོགས་པ་རིམ་གྱིས་སེམས་རྩེ་གཅིག་པ་འཐོབ་པའི་ཕྱིར་ལྷག་པའི་ཚུལ་ཁྲིམས་ཀྱི་བསླབ་པ་དང་ལྷག་པའི་སེམས་ཀྱི་བསླབ་པ་ལ་ཡང་དག་པར་སྦྱོར་བར་བྱེད་དོ། །ཆོས་མངོན་པའི་སྡེ་སྣོད་ཀྱིས་ནི་ཆོས་རྣམས་ཀྱི་མཚན་ཉིད་མ་ནོར་བར་རྒྱ་ཆེར་བསྟན་པའི་སྒོ་ནས་ཆོས་རབ་ཏུ་རྣམ་པར་འབྱེད་པའི་

བློ་དྲི་མ་མེད་པར་བསྒྲུབ་པའི་ཕྱིར་ལྷག་པའི་ཤེས་རབ་ཀྱི་བསླབ་པ་ལ་ཡང་དག་པར་སྦྱོར་བར་བྱེད་དོ། །དེ་སྐད་དུ་ཡང༌། སློབ་དཔོན་དབྱིག་གཉེན་གྱིས། མདོ་སྡེས་ནི་བསླབ་པ་གསུམ་བཤད་དོ། །འདུལ་བས་ནི་ལྷག་པའི་ཚུལ་ཁྲིམས་དང་ལྷག་པའི་སེམས་བསྒྲུབ་པ་ཡིན་ཏེ། ཚུལ་ཁྲིམས་དང་ལྡན་པ་ནི་འགྱོད་
པ་མེད་པ་ལ་སོགས་པའི་རིམ་གྱིས་ཏིང་ངེ་འཛིན་འཐོབ་པའི་ཕྱིར་རོ། །ཆོས་མངོན་པས་ལྷག་པའི་ཤེས་རབ་བསྒྲུབ་པ་ཡིན་ཏེ་དོན་ཕྱིན་ཅི་མ་ལོག་པར་སྟོན་པའི་ཕྱིར་རོ་ཞེས་གསུངས་སོ། །གསུམ་པ་ནི་ཤེས་པར་བྱ་བ་ཆོས་དོན་བཤད་པ་དང་ཆོས་དོན་སྒྲུབ་པ་དང་ཆོས་དོན་འབེལ་གཏམ་གྱིས་
གཏན་ལ་འབེབས་པའི་དབང་གིས་སྡེ་སྣོད་གསུམ་དུ་རྣམ་པར་གཞག་པ་སྟེ། འདི་ལྟར་མདོ་སྡེའི་སྡེ་སྣོད་ཀྱིས་ནི་རྗོད་པར་བྱེད་པའི་མིང་དང་ཚིག་དང་ཡི་གེའི་མཚན་ཉིད་ཀྱི་ཆོས་དང་དེས་བརྗོད་པར་བྱ་བ་ཕུང་པོ་དང་ཁམས་ལ་སོགས་པའི་མཚན་ཉིད་ཀྱི་དོན་ནམ། མཐོ་རིས་འགྲུབ་པར་བྱེད་པའི་
རྒྱུ་དགེ་བ་བཅུའི་ལས་ལ་སོགས་པའི་ཆོས་དང་མྱ་ངན་ལས་འདས་པ་འགྲུབ་པར་བྱེད་པའི་རྒྱུ་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ལ་སོགས་པའི་དོན་བརྗོད་པའི་སྒོ་ནས་ཚིག་དོན་ལ་བློ་འབྱང་བར་བྱེད་དོ། །འདུལ་བའི་སྡེ་སྣོད་ཀྱིས་ནི་འདོད་ཆགས་ལ་སོགས་པའི་ཉོན་མོངས་པ་རྣམས་ལ་མི་སྡུག་
པ་ལ་སོགས་པར་བསྒོམ་པའི་སྒོ་ནས་ཉོན་མོངས་པ་འདུལ་བ་ལ་མཆོག་ཏུ་སྤྲོ་བས་ན། མིང་གི་ཚོགས་ལ་སོགས་པའི་ཆོས་དང་དེ་དག་གིས་བརྗོད་པར་བྱ་བའི་དོན་མངོན་སུམ་དུ་བྱེད་དོ། །མངོན་པའི་སྡེ་སྣོད་ཀྱིས་ནི་ཆོས་ཀྱི་མཚན་ཉིད་ཤིན་ཏུ་མཁས་པར་བསྒྲུབས་ནས་ཆོས་དང་དོན་རྣམས་གཞན་ལ་མ་
ནོར་བ་ཉིད་དུ་ལེགས་པར་འདོམས་པ་ལ་མཁས་པར་འགྱུར་རོ། །དེ་སྐད་དུ་ཡང་སློབ་དཔོན་དེ་ཉིད་ཀྱིས། མདོ་སྡེས་ནི་ཆོས་དང་དོན་བཤད་དོ། །འདུལ་བས་ནི་ཆོས་དང་དོན་བསྒྲུབ་པ་སྟེ། ཉོན་མོངས་པ་འདུལ་བ་ལ་རབ་ཏུ་བརྩོན་པས་དེ་གཉིས་རྟོགས་པའི་ཕྱིར་རོ། །ཆོས་མངོན་པས་ནི་འབེལ་བའི་
གཏམ་རྣམ་པར་གཏན་ལ་དབབ་པ་ལ་མཁས་པ་ཞེས་གསུངས་སོ། །དེ་ལྟར་བཤད་པའི་སྡེ་སྣོད་གསུམ་གྱི་ཆོས་དེ་དག་ལས་བྱུང་བའི་ཤེས་རབ་ཀྱིས་རྣམ་པར་གྲོལ་བར་བྱེད་དོ། །དེའང་ཐོས་པའི་ཤེས་རབ་ཀྱིས་ཆོས་ཀྱི་དབྱིངས་རྣམ་པར་དག་པའི་རྒྱུ་མཐུན་པ་ལས་བྱུང་བའི་ཐོས་

པའི་བག་ཆགས་འཇོག་པ་དང༌། བསམས་པའི་ཤེས་རབ་ཀྱིས་ཇི་ལྟར་བསམས་པ་དེ་དང་དེའི་དོན་སྤྱིའི་ཚུལ་གྱིས་རྟོགས་པར་བྱེད་པ་དང༌། དེ་ལྟ་བུའི་ཐོས་པ་དང་བསམ་པའི་ཤེས་རབ་དང་ལྡན་པས་ནི་བསམ་པའི་དོན་རྩེ་གཅིག་ཏུ་ཡིད་ལ་བྱེད་པའི་བསྒོམ་པ་ལ་སྦྱོར་བའི་ཚུལ་གྱིས་ལྷག་
མཐོང་གི་རྒྱུ་ཞི་གནས་ཀྱི་ཏིང་ངེ་འཛིན་རྒྱུད་ལ་སྐྱེད་པར་བྱེད་དོ། །དེས་སེམས་ཀྱི་ཉོན་མོངས་པ་ཞི་བར་བྱེད་པ་དང་ལྷག་མཐོང་གིས་ཆོས་ཉིད་དོན་དམ་པའི་བདེན་པ་ཡང་དག་པ་ཇི་ལྟ་བ་བཞིན་དུ་རྟོགས་པའི་སྒོ་ནས་རྣམ་པར་གྲོལ་བར་བྱེད་དེ། མགོན་པོ་བྱམས་པས། སྡེ་སྣོད་དག་ནི་གསུམ་མམ་གཉིས་
ཀྱང་རུང༌། །བསྡུས་པའི་ཕྱིར་ན་རྒྱུ་ནི་དགུས་འདོད་དོ། །དེ་ཡིས་བག་ཆགས་རྟོགས་དང་ཞི་བ་དང༌། །རབ་ཏུ་རྟོགས་པས་རྣམ་པར་གྲོལ་བར་བྱེད། །ཅེས་སོ། །བཞི་པ་གདུལ་བྱའི་སྒོ་ནས་དབྱེ་བ་ནི། གལ་ཏེ་དེ་ལྟར་སྡེ་སྣོད་གསུམ་དུ་བཞག་པ་དེ་ཁོ་ན་ཉིད་དུ་ངེས་སམ་ཞེ་ན། མཐའ་གཅིག་ཏུ་མ་ངེས་ཏེ། བཞི་
རུ་དབྱེ་བ་དང༌། གཉིས་སུ་བསྡུ་བའོ། །དང་པོ་ནི། རིག་པ་འཛིན་པ་སྔགས་ཀྱི་སྡེ་སྣོད་ནི་སྔར་གྱི་སྡེ་སྣོད་གསུམ་པོ་གང་ཡང་རུང་བའི་ཁོངས་སུ་འདུ་བར་འགྱུར་རམ། ཡང་ན་ལོགས་སུ་འགྱུར་བ་ཡིན་སྙམ་ན། སློབ་དཔོན་ཨ་བྷ་ཡཱ་ཀ་རས་ནི་བསླབ་པ་གསུམ་ཀ་སྟོན་པས་སྡེ་སྣོད་གསུམ་ཀའོ་ཞེས་གསུམ་ཆར་
གྱི་ཟབ་པའི་མཐར་ཐུག་ཡིན་པས་དེ་དག་ཏུ་བསྡུ་བའི་ལུགས་སུ་མཛད་དོ། །སློབ་དཔོན་ཤཱནྟི་པས་ནི་ཟབ་མོའི་དོན་བསྡུས་ནས་སྟོན་པས་མདོ་སྡེའི་སྡེ་སྣོད་ཡིན་ནོ་ཞེས་མདོ་སྡེའི་ཁོངས་སུ་བསྡུ་བའི་ལུགས་སུ་བཞེད་དོ། །སློབ་དཔོན་ཨཱརྻ་དེ་ཝས་ནི་རིག་པ་འཛིན་པའི་སྡེ་སྣོད་དོ་ཞེས་ལོགས་
སུ་ཕྱེ་བའི་སྡེ་སྣོད་བཞི་པ་ཉིད་དུ་བཞེད་དོ། །དེ་ལྟར་ན་སྡེ་སྣོད་བཞིར་ཡང་འགྱུར་ཏེ་འདི་ནི་གདུལ་བྱ་ཐུན་མོང་དུ་མ་གྱུར་པ་དག་གི་དོན་གསུངས་པ་ལ་སོགས་པས་ཕྱི་མ་ལྟར་འཐད་པའི་ལུགས་སུ་བཞེད་དོ། །གཉིས་པ་ནི། རྒྱན་ལས། གཉིས་ཀྱང་རུང་ཞེས་པས་གདུལ་བྱའི་གང་ཟག་ལ་ལྟོས་ནས་སྡེ་སྣོད་གཉིས་
སུ་བཞག་པའང་རིགས་ཏེ། ཉན་ཐོས་ཀྱི་སྡེ་སྣོད་དང༌། བྱང་ཆུབ་སེམས་དཔའི་སྡེ་སྣོད་དག་གོ །དེའང་གདུལ་བྱའི་གང་ཟག་བློ་དམན་པ་ལམ་རྒྱ་ཆུང་ངུ་ལ་མོས་པའི་ངོ་ན་ཉན་ཐོས་ཀྱི་སྡེ་སྣོད་དང༌། བློ་མཆོག་ཏུ་གྱུར་པ་ལམ་རྒྱ་ཆེན་པོ་ལ་མོས་པའི་ངོ་ན་བྱང་ཆུབ་སེམས་དཔའི་སྡེ་སྣོད་གཉིས་སུ་འགྱུར་

བ་ཡིན་ཏེ། རྒྱན་གྱི་འགྲེལ་པར་གསུམ་པོ་དེ་དག་ཉིད་ཐེག་པ་དམན་པ་དང༌། ཐེག་པ་མཆོག་གི་བྱེ་བྲག་གིས་རྣམ་པ་གཉིས་སུ་འགྱུར་ཏེ། ཉན་ཐོས་ཀྱི་སྡེ་སྣོད་དང༌། བྱང་ཆུབ་སེམས་དཔའི་སྡེ་སྣོད་དོ་ཞེས་སོ། །དེ་དག་ལ་ཐེག་པ་ཆུང་ངུ་དང་ཐེག་པ་ཆེན་པོ་ཞེས་ཀྱང་བྱ་སྟེ།
སྤྱིར་ཐེག་པ་ཞེས་བྱ་བ་ལེགས་པར་སྦྱར་བ་ལ། ཡཱ་ན་ཞེས་ཡོད་པ་དེ་ནི་ཁྱོགས་དང་ཐེག་པ་དང་བཞོན་པ་དང་ལམ་རྣམས་སུ་འཇུག་པ་ལས། འདིར་འགྲོ་བའི་དོན་གྱིས་ཐེག་པ་ཞེས་བྱ་ཞིང༌། ལམ་གྱི་བདེན་པ་འཁོར་དང་བཅས་པ་ལའང་སྒྲ་དེ་ནི་དོན་གྱིས་འཇུག་སྟེ། སློབ་པའི་གང་ཟག་གི་ལམ་གྱི་བདེན་
པ་ནི་འདིས་འདོང་བར་བྱེད་པས་ཐེག་པ་ཞེས་བྱའོ། །མི་སློབ་པའི་ལམ་གྱི་བདེན་པ་ནི་འདིར་དོང་བས་ན་ཐེག་པ་ཞེས་བྱའོ། །ཐེག་པ་དམན་པ་དང་ཐེག་པ་ཆེན་པོ་གཉིས་ཀྱི་ཁྱད་པར་ཡང༌། སྡེ་སྣོད་ཀྱི་དབང་དུ་བྱས་ན་ཐེག་པ་དམན་པའི་ལུགས་ཀྱི་གསུང་རབ་ཡན་ལག་བཅུ་གཉིས་དང་
བསྟན་བཅོས་མངོན་པ་སྡེ་བདུན་ལ་སོགས་པ་ནི་ཉན་ཐོས་ཀྱི་སྡེ་སྣོད་ཡིན་ལ། དེ་དག་ལ་མ་གྲགས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཕལ་པོ་ཆེ་ལ་སོགས་པ་ཤིན་ཏུ་རྒྱས་པའི་སྡེ་སྣོད་རྣམས་ནི་བྱང་ཆུབ་སེམས་དཔའི་སྡེ་སྣོད་དུ་འདོད་པ་ལ་སོགས་པའི་ཁྱད་པར་ཞིབ་ཏུ་
ཕྱེ་ན་མཐའ་ཡས་པར་གསུངས་ཀྱང༌། གཙོ་བོར་འཕགས་པ་ལངྐར་གཤེགས་པ་ལས། ཆོས་ལྔ་དག་དང་རང་བཞིན་གསུམ། །རྣམ་པར་ཤེས་པ་བརྒྱད་ཉིད་དང༌། །བདག་མེད་གཉིས་ཀྱི་དངོས་པོར་ནི། །ཐེག་པ་ཆེན་པོ་མཐའ་དག་འདུས། །ཞེས་གསུངས་སོ། །དེ་ལ་ཆོས་ནི་
མིང་དང་རྒྱུ་མཚན་དང་རྣམ་པར་རྟོག་པ་དང་དེ་བཞིན་ཉིད་དང་ཡང་དག་པའི་ཡེ་ཤེས་སོ། །རང་བཞིན་ནི་ཀུན་བརྟགས་དང༌། གཞན་དབང་དང༌། ཡོངས་སུ་གྲུབ་པ་སྟེ་གསུམ་མོ། །རྣམ་པར་ཤེས་པ་ནི། ཚོགས་དྲུག་དང༌། ཉོན་མོངས་པའི་ཡིད་དང༌། ཀུན་གཞིའི་རྣམ་པར་ཤེས་པ་སྟེ་བརྒྱད་དོ། །བདག་
མེད་ནི་གང་ཟག་གི་བདག་མེད་དང༌། ཆོས་ཀྱི་བདག་མེད་གཉིས་ཏེ། དེ་དག་སྟོན་པར་བྱེད་པ་ནི་ཐེག་པ་ཆེན་པོའི་གཞུང་ཡིན་ནོ། །ཡང་ལམ་དང་འབྲས་བུའི་དབང་དུ་བྱས་ན། ཆེན་པོ་བདུན་དང་ལྡན་པའི་ཕྱིར་ཐེག་པ་ཆེན་པོ་ཞེས་བྱ་སྟེ། དེའང་མདོ་སྡེ་ལ་སོགས་པའི་ཆོས་རྒྱ་ཆེན་པོ་དཔག་ཏུ་མེད་པ་དང་ལྡན་པར་

དམིགས་པའི་ཕྱིར་དམིགས་པ་ཆེན་པོའོ། །རང་གི་དོན་དང་གཞན་གྱི་དོན་གཉིས་སྒྲུབ་པའི་ཕྱིར་སྒྲུབ་པ་ཆེན་པོའོ། །རྟོགས་པའི་དུས་ན་གང་ཟག་དང་ཆོས་ཀྱི་བདག་མེད་པ་གཉིས་རྟོགས་པས་རྟོགས་པ་ཆེན་པོའོ། །བསྐལ་པ་གྲངས་མེད་པ་གསུམ་དུ་རྟག་ཏུ་གུས་པར་བྱས་ཏེ་སྦྱོར་
བའི་བརྩོན་འགྲུས་རྩོམ་པས་བརྩོན་འགྲུས་རྩོམ་པ་ཆེན་པོའོ། །འཁོར་བ་ཡོངས་སུ་མི་གཏོང་ཞིང་ཀུན་ནས་ཉོན་མོངས་པས་གོས་པ་མེད་པས་ཐབས་ལ་མཁས་པ་ཆེན་པོ་སྟེ། རྒྱུའི་ཁྱད་པར་ལྔའོ། །སྟོབས་དང་མི་འཇིགས་པ་དང་སངས་རྒྱས་ཀྱི་ཆོས་མ་འདྲེས་པ་ཡང་དག་པར་འགྲུབ་པས་ཡང་དག་
པར་གྲུབ་པ་ཆེན་པོའོ། །ཡང་དང་ཡང་དུ་མངོན་པར་རྫོགས་པར་བྱང་ཆུབ་པ་དང་མྱ་ངན་ལས་འདས་པ་ཆེན་པོ་ཀུན་དུ་སྟོན་པས་སངས་རྒྱས་ཀྱི་ཕྲིན་ལས་ཆེན་པོ་སྟེ། མགོན་པོ་བྱམས་པས། དམིགས་པ་ཆེ་བ་ཉིད་དང་ནི། །དེ་བཞིན་སྒྲུབ་པ་གཉིས་དག་དང༌། །ཡེ་ཤེས་བརྩོན་འགྲུས་རྩོམ་
པ་དང༌། །ཐབས་ལ་མཁས་པར་གྱུར་པ་དང༌། །ཡང་དག་གྲུབ་པ་ཆེན་པོ་དང༌། །སངས་རྒྱས་ཕྲིན་ལས་ཆེན་པོ་སྟེ། །ཆེན་པོ་བདུན་དང་ལྡན་པའི་ཕྱིར། །ཐེག་ཆེན་ཞེས་ནི་ངེས་པར་བརྗོད། །ཅེས་པ་ལྟར་རོ། །ཡང་ན་ཐེག་པ་ཆེན་པོ་བསྡུས་པ་ལས། ཤེས་བྱའི་གནས་དང་མཚན་ཉིད་དེར་འཇུག་དང༌། །
དེ་ཡི་རྒྱུ་འབྲས་དེ་རབ་དབྱེ་བ་དང༌། །བསླབ་པ་གསུམ་དང་དེ་འབྲས་སྤངས་པ་དང༌། །ཡེ་ཤེས་ཐེག་པ་མཆོག་གྱུར་ཁྱད་པར་འཕགས། །ཞེས་པའི་དོན་རྒྱ་ཆེར་འབྱུང་བ་རྣམས་ཀྱི་སྒོ་ནས་ཐེག་པ་ཆེན་པོ་ཁྱད་པར་དུ་འཕགས་པ་བསྟན་པ་ཡིན་ནོ། །ཁྱད་པར་འཕགས་པའི་ཐེག་པ་ཆེན་པོ་དེ་ལ་དབྱེ་ན། གདུལ་
བྱ་དབང་པོ་རྟུལ་པོ་རྒྱུ་ལ་མོས་པས་རྒྱུ་ལམ་དུ་བྱེད་པ་ལ་རྒྱུ་ཕ་རོལ་ཏུ་ཕྱིན་པའི་ཐེག་པ་དང༌། དབང་པོ་རྣོན་པོ་རྒྱུ་འབྲས་ལྷུན་གྲུབ་ལ་མོས་པས་འབྲས་བུ་ལམ་དུ་བྱེད་པ་ལ་འབྲས་བུ་གསང་སྔགས་རྡོ་རྗེ་ཐེག་པ་གཉིས་སུ་འགྱུར་ཏེ། མདོ་སྡེ་གདམས་ངག་འབོགས་པའི་རྒྱལ་པོ་ལས། འདྲེན་
པའི་ཐེག་པ་གསུམ་པོ་དག །བཅོམ་ལྡན་ངེས་པར་གསུངས་ལགས་ན། །རྒྱུ་འབྲས་ལྷུན་གྲུབ་ཏུ་སྤྱོད་ཅིང༌། །སངས་རྒྱས་གཞན་ནས་མི་འཚོལ་བའི། །ངེས་པའི་ཐེག་པ་ཅིས་མ་གསུངས། །ཞེས་པ་དང༌། རྒྱུ་ལ་མོས་པ་རྒྱུ་ཆོས་ཀྱི། །འཁོར་ལོ་རབ་ཏུ་བསྐོར་བྱས་

ནས། །རྡོ་རྗེ་ཐེག་པའི་ཉེ་ལམ་ཞིག །མ་འོངས་དུས་ན་འབྱུང་བར་འགྱུར། །ཞེས་སོ། །དེ་ལས་ཕྱི་མ་གསང་སྔགས་རྡོ་རྗེ་ཐེག་པ་བྱེ་བྲག་ཏུ་བཤད་པ་ལ། མདོར་བསྟན་པ་དང༌། རྒྱས་པར་བཤད་པ་གཉིས་ལས། དང་པོ་ལ་སྤྱིའི་ངོ་བོ་ངོས་བཟུང་བ་དང༌། རྒྱུད་ཀྱི་ངེས་ཚིག་བསྟན་པའོ། །
དང་པོ་ལ་ཐེག་པ་དམན་པ་ལས་མཆོག་ཏུ་གྱུར་པའི་ཐེག་པ་ཆེན་པོའི་ནང་ནས་གཞི་མི་སྤོང་བར་ལམ་དུ་བྱེད་པའི་ཐབས་ཁྱད་པར་དུ་འཕགས་པ། དཀའ་བ་མེད་པར་གཞན་དོན་དུ་བླ་ན་མེད་པའི་བྱང་ཆུབ་མྱུར་དུ་འགྲུབ་པའི་ཐབས་སུ་གྱུར་པ་གང་ཡིན་པའོ། །གཉིས་པ་ངེས་
ཚིག་ནི་སྐད་བྱེ་བྲག་ཏུ་རྟོགས་པར་བྱེད་པ་འབྲིང་པོ་ལས། ཏནྟྲ་པྲ་བནྡྷ་ཁྱཱ་ཞེས་པ་རྒྱུན་ཆགས་པར་བཤད་པའི་མིང་དུ་བཤད་དེ། དེ་ལས་བྱེ་བྲག་ཏུ་བརྗོད་བྱ་དོན་གྱི་རྒྱུད་ཀྱི་དབང་དུ་བྱས་ན། སེམས་ཉིད་གཉིས་སུ་མེད་པའི་ཡེ་ཤེས་རང་གི་མཚན་ཉིད་གསལ་ལ་མ་འགགས་པ། རྒྱུ་དང་
ཐབས་དང་འབྲས་བུའི་གནས་སྐབས་ཐམས་ཅད་དུ་འབྲེལ་ཞིང་རྒྱུན་ཆགས་པ། ངོ་བོ་ནི་ཐབས་དང་ཤེས་རབ་ཟུང་དུ་འབྲེལ་བའི་བདག་ཉིད་ཅན་དུ་གནས་པ་དེ་ལ་རྒྱུད་ཅེས་བྱ་སྟེ། སྒྱུ་འཕྲུལ་དྲྭ་བ་ལས། རྒྱུད་ནི་རྒྱུན་ཞེས་བྱ་བ་སྟེ། །ཞེས་དང༌། རྡོ་རྗེ་རྩེ་མོ་ལས། རྒྱུད་ནི་རྒྱུན་ཆགས་ཞེས་བྱ་སྟེ། །འཁོར་
བ་རྒྱུད་དུ་འདོད་པ་དེ། །མྱ་ངན་འདས་པ་རྒྱུད་ཕྱི་མ། །ཞེས་དང༌། གསང་བ་འདུས་པའི་རྒྱུད་ཕྱི་མ་ལས། རྒྱུད་ནི་རྒྱུན་ཆགས་ཞེས་བྱ་སྟེ། །རྒྱུན་དེ་རྣམ་པ་གསུམ་དུ་འགྱུར། །གཞི་དང་དེ་ཡི་རང་བཞིན་དང༌། །མི་འཕྲོགས་པ་ཡིས་རབ་ཕྱེ་བའོ། །རང་བཞིན་རྣམ་པ་རྒྱུ་ཡིན་ཏེ། །གཞི་ནི་ཐབས་
ཞེས་བྱ་བ་ཡིན། །དེ་བཞིན་མི་འཕྲོགས་འབྲས་བུ་སྟེ། །གསུམ་གྱིས་རྒྱུད་ཀྱི་དོན་བསྡུས་པའོ། །ཞེས་གསུངས་པ་ལྟ་བུའོ། །དེ་ལྟ་བུའི་རྒྱུད་སྡེ་དེ་ལ་སྤྱིར་གསང་སྔགས་སམ་སྔགས་ཀྱི་ཐེག་པ་དང༌། རྡོ་རྗེ་ཐེག་པ་དང་རིག་པ་འཛིན་པའི་སྡེ་སྣོད་དང༌། འབྲས་བུའི་ཐེག་པ་ཞེས་བྱ་བའི་མཚན་གྱི་རྣམ་
གྲངས་དང་ལྡན་པའོ། །དེ་ལས་དང་པོ་གསང་སྔགས་ཞེས་པ་འདིའི་སྒྲ་དོན་ནི། ལེགས་པར་སྦྱར་བའི་སྐད་དུ་མནྟྲ་ཞེས་འབྱུང་བ་བོད་སྐད་དུ་གསང་སྔགས་སམ་སྔགས་ཏེ། དེའང་ཡི་གེ་བསྣན་བགོད་ཀྱི་སྒྲ་ལས་དྲངས་ན་མ་ན་ཡིད་དང༌། ཏྲཱ་ཡ་སྐྱོབ་པ་སྟེ། ཡིད་མཚན་མ་དང་རྣམ་པར་རྟོག་པ་ལས་སྐྱོབ་

པའི་ཕྱིར་སྔགས་ཏེ། དེ་ཉིད་ལས། དབང་པོ་དང་ནི་ཡུལ་རྣམས་ཀྱི། །རྐྱེན་གྱིས་གང་དང་གང་བྱུང་བའི། །ཡིད་དེ་མན་ཞེས་བྱ་བར་བཤད། །ཏྲ་ནི་སྐྱོབ་པར་བྱེད་པའི་དོན། །འཇིག་རྟེན་སྤྱོད་ལས་རྣམ་གྲོལ་བ། །གང་བཤད་དམ་ཚིག་སྡོམ་པ་སྟེ། །རྡོ་རྗེ་ཀུན་གྱི་སྲུང་བ་
ནི། །སྔགས་ཀྱི་སྤྱོད་པ་ཞེས་བཤད་དོ། །ཞེས་དང༌། ཡང་ན་སྟོང་པ་དང་སྙིང་རྗེ་གཉིས་སུ་མེད་པ་ལའང་བཤད་དེ། དབང་ཡོན་ཏན་རིམ་པ་ལས། མ་ནི་སྟོང་པ་མཚན་མ་བྲལ། །རྡོ་རྗེ་སེམས་དཔའི་དབུགས་དབྱུང་བ། །ཤེས་རབ་ཆེན་པོ་བདག་གིས་བཤད། །ཏྲ་ནི་སྐྱོབ་པར་བྱེད་པའི་དོན། །དེ་
བཞིན་གཤེགས་པའི་དབུགས་དབྱུང་བ། །སྟོང་པ་དང་ནི་སྙིང་རྗེ་ཉིད། །གཉིས་སུ་མེད་དང་གཉིས་ཀྱི་ཚུལ། །ཞེས་སོ། །དེ་ལ་ནང་གསེས་ཀྱི་དབྱེ་བ་གསང་སྔགས་དང་རིག་སྔགས་དང་གཟུངས་སྔགས་གསུམ་དུ་འགྱུར་ཏེ། དང་པོ་ནི་སྣོད་མིན་དུ་གཏོགས་པའི་སྐྱེ་བོ་རྣམས་ཀྱི་སྤྱོད་ཡུལ་དུ་མ་གྱུར་པའི་
ཕྱིར་གསང་བར་བྱ་བའི་འོས་ཡིན་པས་ན་དེ་སྐད་ཅེས་བྱ་སྟེ། དཔལ་ཁ་སྦྱོར་གྱི་རབ་ཏུ་བྱེད་པ་དང་པོར། ཁྱབ་འཇུག་དང་དབང་ཕྱུག་ཆེན་པོ་དང་ཚངས་པ་དང་ཉན་ཐོས་དང་རང་སངས་རྒྱས་རྣམས་ཀྱི་སྤྱོད་ཡུལ་མ་ཡིན་པའི་ཕྱིར་གསང་བའོ་ཞེས་སོ། །གཉིས་པ་ནི། བིདྱཱ་ཞེས་པའི་སྒྲས་གཙོ་ཆེར་རིག་པའི་མི་
མཐུན་པའི་ཕྱོགས་སུ་གྱུར་པའི་འདོད་ཆགས་ལ་སོགས་པ་ཉོན་མོངས་པའི་མུན་པ་འཇོམས་པ་ལ་ལྟོས་ནས་འཇོག་པ་སྟེ། རྡོ་རྗེ་རྩེ་མོར། འདོད་ཆགས་མུན་པ་རྣམ་རྟུལ་ཞིང༌། །ཉོན་མོངས་རྣམས་ཀྱང་རྣམ་པར་འདུལ། །མ་རིག་པ་ནི་ཟློག་བྱེད་པ། །དེ་ནི་རིག་སྔགས་རྣམ་པར་བརྗོད། །ཅེས་དང༌། བསམ་གཏན་
ཕྱི་མའི་འགྲེལ་པ་ལས། དེ་ལ་རིག་སྔགས་ནི་བུད་མེད་ཀྱི་གཟུགས་དང་དབྱིབས་ཀྱི་ལྷ་དང༌། དེ་སྟོན་པའི་སྒྲ་དང་ཕྱག་རྒྱ་ལ་སོགས་པའོ་ཞེས་སོ། །གསུམ་པ་ནི། དྷཱ་ར་ཎི་ཞེས་པའི་སྒྲས་ཡོན་ཏན་འཛིན་པར་བྱེད་པ་ལ་ལྟོས་ནས་འཇོག་པ་སྟེ། དེ་ཉིད་ལས། སངས་རྒྱས་ཆོས་རྣམས་འཛིན་བྱེད་ཅིང༌། །ཆོས་རྣམས་
འཛིན་པར་བྱེད་པ་དང༌། །དགེ་བ་ཞེས་བྱ་འཛིན་བྱེད་པ། །གཟུངས་སྔགས་ཀྱི་ནི་མཚན་ཉིད་བརྗོད། །ཅེས་སོ། །དེ་ལྟར་གསང་སྔགས་ཞེས་བྱ་བའི་སྒྲ་དོན་དང་ལྡན་པ་དེ་ལ་རྡོ་རྗེ་ཐེག་པ་ཞེས་བྱ་བའི་དོན་ནི། འདི་ལྟར་རྡོ་རྗེ་ནི་སངས་རྒྱས་ཀྱི་སྐུ་གསུང་ཐུགས་རྡོ་རྗེའོ། །ཐེག་པ་ནི་འདིས་འདོང་བར་བྱེད་པས་ན་ལམ་དང༌།

འདིར་དོང་བས་ན་འབྲས་བུ་ལ་བྱའོ། །ཡང་ན་མི་ཕྱེད་པ་དང་མི་ཤིགས་པ་དང་ཐོགས་པ་མེད་པའི་དོན་གྱིས་ན་རྡོ་རྗེའོ། །དེ་ན་རྒྱུ་དང་འབྲས་བུ་ལྷུན་གྱིས་གྲུབ་པའི་ཚུལ་དུ་སྤྱོད་པའི་ལམ་གྱིས་འདོང་བས་ན་ཐེག་པ་སྟེ། རྒྱུད་ཀྱི་དོན་ལ་འཇུག་པ་ལས། དེ་ཉིད་ནི་འཚེ་བ་མེད་ཅིང་ཡང་དག་པའི་དོན་ཐོགས་པ་མེད་པར་
ཐོབ་པར་བྱེད་པས་ན་རྡོ་རྗེའོ། །དེ་ནི་ཐེག་པ་ཡང་ཡིན་ཏེ་ལམ་དེས་དཀའ་བ་མེད་པར་མྱུར་དུ་ཡིད་ལ་བྱེད་པའི་ཕྱིར་རོ་ཞེས་དང༌། དུས་འཁོར་འགྲེལ་ཆེན་ལས། རྡོ་རྗེ་ནི་མི་ཕྱེད་པ་དང་མི་ཆོད་པ་ཆེན་པོ་ཡིན་ལ། དེ་ཉིད་ཐེག་པ་ཡིན་པ་ནི་རྡོ་རྗེ་ཐེག་པ་སྟེ་སྔགས་ཀྱི་ཚུལ་དང་ཕ་རོལ་ཏུ་ཕྱིན་པའི་ཚུལ། འབྲས་
བུ་དང་རྒྱུའི་བདག་ཉིད་གཅིག་ཏུ་འདྲེས་པར་གྱུར་པའོ་ཞེས་དང༌། དཔལ་གསང་བ་འདུས་པ་ལས། འདོད་ཆགས་ཞེ་སྡང་གཏི་མུག་རྣམས། །རྡོ་རྗེ་ལ་དགའ་རྟག་པར་གནས། །དེས་ན་སངས་རྒྱས་རྣམས་ཀྱི་ཐབས། །རྡོ་རྗེ་ཐེག་པ་ཞེས་བཤད་དོ། །ཞེས་འབྱུང་བ་ལྟ་བུའོ། །རིག་པ་འཛིན་པའི་སྡེ་སྣོད་
ཅེས་བྱ་བ་ནི། དེ་བཞིན་གཤེགས་པའི་རིག་སྔགས་འཆང་བ་རྣམས་ཀྱི་བསླབ་པའི་གཞི་དང་ལྟ་བའི་གྲུབ་པའི་མཐའ་འདི་ཉིད་ཀྱིས་སྟོན་པར་བྱེད་པའི་དོན་དུ་དཔུང་བཟང་གི་རྒྱུད་ཀྱི་འགྲེལ་པ་ལས་བཤད་པ་ལྟ་བུའོ། །དེ་ལ་འབྲས་བུའི་ཐེག་པ་ཞེས་བྱ་བའི་དོན་ནི། དཔེར་ན་སྐྱེས་བུ་ཤིན་ཏུ་
མཛེས་པ་ལ་ལྷ་ཞེས་བརྗོད་པ་བཞིན་དུ་ཐེག་པ་འདི་པའི་ལུགས་ཀྱིས་ད་ལྟ་ནས་འབྲས་བུའི་རྣམ་པར་བསྒོམས་པས་ན་འབྲས་བུའི་ཐེག་པ་ཞེས་བྱ་སྟེ། རྡོ་རྗེ་གུར་ལས། སངས་རྒྱས་ང་རྒྱལ་རྣལ་འབྱོར་གྱིས། །སངས་རྒྱས་ཉིད་དུ་ངེས་པར་འགྲུབ། །ཅེས་སོགས་རྒྱ་ཆེར་གསུངས་སོ། །ཁྱད་པར་དུ་
ཐེག་པ་འདི་ཉིད་ཀྱིས་མངོན་པར་བསྒྲུབས་པའི་འབྲས་བུ་ནི། གང་ཟག་དབང་པོ་རབ་ཀྱིས་ཚེ་འདི་ཉིད་དུ་འགྲུབ་པ་དང༌། འབྲིང་གིས་བར་དོར་འགྲུབ་པ་དང༌། ཐ་མས་སྐྱེ་བ་བདུན་ན་འགྲུབ་པ་དང༌། ཤིན་ཏུ་ཐ་མས་ཀྱང་སྐྱེ་བ་བཅུ་དྲུག་ན་འགྲུབ་པར་གསུངས་ཏེ། དེའི་དང་པོ་ནི། གསང་བ་འདུས་པ་
ལས། འདི་ཡིས་ཆོས་ཀྱི་བདག་ཉིད་ཆེ། །སྐུ་གསུམ་མི་ཕྱེད་ལས་བྱུང་བ། །ཡེ་ཤེས་རྒྱ་མཚོས་རྣམ་པར་བརྒྱན། །ཚེ་འདི་ཉིད་ལ་འགྲུབ་པར་འགྱུར། །ཞེས་གསུངས་པ་དང༌། གཉིས་པ་ཡང་ཡེ་ཤེས་ཐིག་ལེ་ལས། ཡང་ན་ལུས་ནི་སྤངས་མ་ཐག །བརྩོན་པ་མི་ལྡན་པས་ཀྱང་འགྲུབ། །

ཅེས་གསུངས་པ་དང༌། གསུམ་པ་ཡང༌། གསང་བའི་མཛོད་ལས། དབང་བསྐུར་ཡང་དག་སྦྱིན་ལྡན་ན། །སྐྱེ་ཞིང་སྐྱེ་བར་དབང་བསྐུར་འགྱུར། །དེ་ཡིས་སྐྱེ་བ་བདུན་ན་ནི། །མ་བསྒོམས་པར་ཡང་དངོས་གྲུབ་ཐོབ། །ཅེས་གསུངས་པ་དང༌། བཞི་པ་ཡང་དམ་ཚིག་ལྔ་པ་ལས། གལ་
ཏེ་ལྟུང་བ་མེད་གྱུར་ན། །སྐྱེ་བ་བཅུ་དྲུག་དག་ན་འགྲུབ། །ཅེས་གསུངས་སོ། །དེ་བས་ན་མི་གནས་པའི་མྱ་ངན་ལས་འདས་པའི་འབྲས་བུ་ཚེགས་མེད་པ་ཉིད་ཀྱིས་འགྲུབ་པའི་ཕྱིར་ན་འབྲས་བུའི་ཐེག་པ་ཞེས་བྱའོ། །དེ་ཉིད་རྗོད་པར་བྱེད་པའི་སྒྲ་རྒྱུད་ཀྱི་དབང་དུ་བྱས་ན། བརྗོད་བྱ་རྒྱུད་གསུམ་པོ་སྟོན་པར་བྱེད་པའི་མིང་དང་
ཚིག་དང་ཡི་གེའི་རྣམ་པ་རང་རང་གི་རྣམ་པར་རིག་པ་ལ་སྒྲ་སྤྱི་དང་དོན་སྤྱི་འདྲེས་མའི་རྣམ་པར་སྣང་བ་གང་ཡིན་པ་དེ་ནི་སྒྲའི་རྒྱུད་མཚན་ཉིད་པ་དང༌། སྒྲ་རྒྱུད་བློ་ལ་སྒྲ་གནས་པའི་འབྲས་བུ་དང༌། དེ་ཉིད་རྒྱུད་ལ་སྐྱེད་པར་བྱེད་པའི་གྲོགས་སུ་གྱུར་པ་གང་རྗོད་པར་བྱེད་པ་ལུང་གི་རྒྱུད་སྡེའི་རིམ་པ་ནི་སངས་རྒྱས་བཅོམ་
ལྡན་འདས་ཀྱིས་ལེགས་པར་གསུངས་པ་ནས་བརྩམས་ཏེ་གླེགས་བམ་དུ་བྲིས་པའི་བར་ནི་སྒྲ་རྒྱུད་བཏགས་པ་བ་ཉིད་དུ་བཞེད་དོ། །གལ་ཏེ་དེ་ལྟ་ན་མངོན་པ་མཛོད་ལས། ཆོས་ཀྱི་ཕུང་པོ་བརྒྱད་ཁྲི་དག །གང་རྣམས་ཐུབ་པས་གསུངས་དེ་དག །ཚིག་གམ་མིང་ཡིན་དེ་དག་ནི། །གཟུགས་
སམ་འདུ་བྱེད་དག་ཏུ་འདུས། །ཞེས་བཤད་པ་དང་འགལ་ལོ་སྙམ་ན། བྱེ་བྲག་ཏུ་སྨྲ་བ་དང་མདོ་སྡེ་པ་དག་དེ་ལྟར་འདོད་ཀྱང༌། ཐེག་པ་ཆེན་པོའི་ལུགས་ལ་ཀུན་རྫོབ་ཏུ་སྣང་བ་ཐམས་ཅད་རྣམ་པར་རིག་པ་སྒྱུ་མ་ལྟ་བུར་འདོད་པ་དེ་ཉིད་ཀྱི་ཕྱིར་ན་འོག་མའི་གཞུང་དང་འགལ་བའི་སྐྱོན་དུ་འགྱུར་བ་མེད་དོ། །དེ་དག་
ནི་ཐུན་མོང་བ་ལ་གྲགས་པའི་ལུགས་ཡིན་ལ། ཐུན་མོང་མ་ཡིན་པའི་ལུགས་ཀྱི་སྒྲ་རྒྱུད་མཚན་ཉིད་པ་ནི། རྡོ་རྗེ་རྩེ་མོར། སེམས་ཅན་ཀུན་ལ་ཕན་པའི་ཕྱིར། །སངས་རྒྱས་རྣམས་ཀྱི་ཆོས་ལོངས་རྫོགས། །སངས་རྒྱས་ཐུགས་རྗེས་བསྐུལ་ནས་ནི། །རྒྱུད་དོན་ཡང་དག་བྱུང་བ་ཡིན། །ཞེས་འབྱུང་བ་ལྟར་
འོག་མིན་གྱི་བྱང་ཆུབ་སེམས་དཔའ་རྣམས་ཀྱི་ཆོས་ཀྱི་ལོངས་སྤྱོད་རྗོད་བྱེད་སྒྲའི་རྒྱུད་ཐམས་ཅད་མཚན་ཉིད་པ་དང༌། སྔར་བཤད་པའི་མཚན་བཏགས་ཀྱི་དབྱེ་བ་དག་ནི་སྒྲ་རྒྱུད་བཏགས་པ་བ་ཉིད་དུ་འཁྲུལ་པ་ཟད་པའི་རྗེ་བཙུན་གོང་མ་རྣམས་ཀྱི་བཞེད་པ་བླ་ན་མེད་པ་ཉིད་ཡིན་ནོ། །གཉིས་པ་རྒྱས་པར་བཤད་པ་

ལ། དེ་ཕ་རོལ་ཏུ་ཕྱིན་པའི་ཐེག་པ་ལས་ཁྱད་པར་དུ་འཕགས་པར་བསྟན་པ་དང༌། ཁྱད་པར་དུ་འཕགས་པའི་རྒྱུད་སྡེའི་དབྱེ་བ་དང༌། དབྱེ་བ་དེ་དང་ལྡན་པའི་གྲངས་ངེས་པ་དང༌། གྲངས་དང་གོ་རིམ་གཉིས་ཀ་ངེས་པ་དང༌། གྲངས་ངེས་པ་ཅན་གྱི་རྒྱུད་ཀྱི་སྒྲ་དོན་བཤད་པའོ། །དང་པོ་དེ་ཕ་རོལ་ཏུ་ཕྱིན་
པའི་ཐེག་པ་ལས་ཁྱད་པར་དུ་འཕགས་པར་བསྟན་པ་ནི་སློབ་དཔོན་ཛྙཱ་ན་ཤྲཱིས། གསང་བ་སྔགས་ཀྱི་ཐེག་པ་འདི་ཕ་རོལ་ཏུ་ཕྱིན་པའི་ཐེག་པ་ཆེན་པོ་དབུ་མ་ལས་ཀྱང་ཁྱད་པར་ཅི་ཞིག་ཡོད་པར་བསྟན་ཅེ་ན། དམིགས་པ་བླ་ན་མེད་པ་ལ་དམིགས་པའི་ཐབས་དང༌། སྒྲུབ་པ་བླ་ན་མེད་པ་དང༌། ཡེ་ཤེས་བླ་ན་
མེད་པ་དང༌། བརྩོན་འགྲུས་བླ་ན་མེད་པ་དང༌། གདུལ་བྱ་མ་ལུས་པ་རྗེས་སུ་འཛིན་པར་ནུས་པ་དང༌། ཉོན་མོངས་པ་བྱིན་གྱིས་རློབ་པ་དང༌། བྱིན་གྱིས་རློབ་པ་མྱུར་བ་དང༌། མྱུར་དུ་འབྱུང་བ་དང༌། ཉོན་མོངས་སྤོང་བ་དང༌། བསམ་པ་བླ་ན་མེད་པ་དང༌། སྤྱོད་པ་བླ་ན་མེད་པའི་ཐབས་མཁས་པ་སྟེ།
དེ་ལྟར་ཐབས་མཁས་པ་ཉིད་རྣམ་པ་བཅུ་གཅིག་གི་ཁྱད་པར་དུ་འཕགས་སོ་ཞེས་གསུངས་ཏེ། དེ་དག་གི་དོན་ཡང་རིམ་པ་བཞིན་དུ་དགེས་པ་རྡོ་རྗེ་ལ་སོགས་པའི་རྒྱུད་སྡེ་རྒྱ་ཆེན་པོ་ལ་དམིགས་པའི་ཕྱིར་དང༌། བསྐྱེད་པའི་རིམ་པ་ལ་བརྟེན་ནས་ལུས་ཀྱི་བཀོད་པ་སྣ་ཚོགས་པ་དང་ཏིང་ངེ་འཛིན་གྱི་སྟོབས་
ཀྱིས་ཀྱང་མངོན་སུམ་མ་ཡིན་པར་དོན་དཔག་ཏུ་མེད་པ་བསྒྲུབ་པར་ནུས་པའི་ཕྱིར་དང༌། རྒྱུ་དང་ངོ་བོ་ཉིད་དང་ལས་དག་ལས་ཡེ་ཤེས་མྱུར་བ་ཉིད་དུ་འགྲུབ་པའི་ཕྱིར་དང༌། དམ་ཚིག་རྣམ་པར་དག་པའི་དབང་གིས་བརྩོན་འགྲུས་ཆེན་པོ་ཤུགས་འབྱུང་དུ་རྩོམ་པ་འབྱུང་བའི་ཕྱིར་དང༌། མཚམས་མེད་
པ་ལྔའི་ལས་བྱེད་པ་ལ་སོགས་པ་ཐེག་པ་གཞན་ནས་ཡོངས་སུ་སྤངས་པ་རྣམས་ཀྱང་འདིར་འགྲུབ་པར་གསུངས་པའི་ཕྱིར་དང༌། ལྷ་མཆོད་པའི་བསམ་པ་དང་བདེ་བ་ལ་བརྟེན་པའི་རྫོགས་པའི་རིམ་པའི་རྣལ་འབྱོར་གྱིས་ཉོན་མོངས་པ་བྱིན་གྱིས་རློབ་པའི་ཕྱིར་དང༌། ད་ལྟ་ཉིད་ནས་དེ་བཞིན་གཤེགས་པ་
རྣམས་ཀྱིས་མངོན་པར་དབང་བསྐུར་ཞིང་བྱིན་གྱིས་རློབ་པའི་ཕྱིར་དང༌། ཚེ་འདི་དང་སྐྱེ་བ་བདུན་དང་བཅུ་དྲུག་ན་ངེས་པར་འཚང་རྒྱ་བའི་ཐབས་ཀྱི་ཁྱད་པར་མང་པོ་འདི་ལ་ཡོད་པའི་ཕྱིར་དང༌། དབྱིབས་དང་ཁ་དོག་ལ་སོགས་པའི་སྒོ་ནས་ཉོན་མོངས་པ་རང་བཞིན་གྱིས་རྣམ་པར་གྲོལ་བར་སྤོང་བའི་ཕྱིར་དང༌།

སངས་རྒྱས་རྣམས་ཀྱི་སྐུ་དང་གསུང་དང་ཐུགས་རྡོ་རྗེའི་རྣལ་འབྱོར་ལ་རྩེ་གཅིག་ཏུ་དམིགས་པས་ཆོས་ཐམས་ཅད་སྒྱུ་མ་ལྟ་བུར་ཤེས་ཤིང་ཉོན་མོངས་པ་ཚེགས་མེད་པར་སྤོང་བར་ནུས་པའི་ཕྱིར་དང༌། ཐེག་པ་གཞན་ནས་མ་གནང་བའི་འདོད་པའི་ལོངས་སྤྱོད་ཐམས་ཅད་ལ་འདི་
ནས་ཇི་སྐད་བཤད་པའི་ཐབས་ཀྱི་རྩིས་ཟིན་པའི་སྒོ་ནས་སྤྱད་པས་འབྲས་བུ་མྱུར་དུ་འགྲུབ་པར་གསུངས་པས་ན། སྤྱོད་པ་བླ་ན་མེད་པ་སྟེ་འདི་དག་གིས་ཁྱད་པར་དུ་འཕགས་པར་བཞེད་དོ། །སློབ་དཔོན་ཤཱནྟི་པ་ནི། ཕ་རོལ་ཏུ་ཕྱིན་པ་དང་སྔགས་ཀྱི་ཐེག་པ་དོན་དམ་པའི་བདེན་པ་ལ་ཁྱད་པར་མེད་ཀྱང༌།
ཀུན་རྫོབ་ཀྱི་བདེན་པའི་ཁྱད་པར་ལ་སྣང་བའི་དམིགས་པ་རྣམས་ལྷར་བསྒོམ་པས་དམིགས་པ་རྒྱ་ཆེ་བ་དང༌། དུས་གསུམ་གྱི་སངས་རྒྱས་ཀྱི་བདེན་པའི་ཚིག་རྣམས་ཡིད་བཞིན་དུ་བཟུང་བས་བྱིན་གྱིས་བརླབས་པ་ཁྱད་པར་ཅན་སྐྱེ་བས་གྲོགས་རྒྱ་ཆེ་བ་དང༌། འགྲོ་བའི་དོན་དང་ཞིང་ཡོངས་
སུ་དག་པ་ད་ལྟ་ཉིད་ནས་སྤྱོད་པས་སྤྱོད་པ་རྒྱ་ཆེ་བ་སྟེ་གསུམ་པོ་འདིས་རྡོ་རྗེ་ཐེག་པ་ཁྱད་པར་དུ་འཕགས་པར