Luận tạng Tây Tạng (Tengyur) — Tập 213

་པར་བཅས་པ་གསར་དུ་བསྐྲུན་པར་མཛད་པའང༌། འདི་ལྟ་སྟེ། གཙང་ཨེ་ཝཾ་ཆོས་ལྡན་དུ་གླིང་པ་སྤྱི་ཁང་དང༌། ལྷུན་གྲུབ་སྟེང་གི་ལྷ་ཁང་གསར་པ་དང༌། མགོན་ཁང་ཤར་རྟེན་དང་བརྟེན་པར་བཅས་པ་དང༌། ལྕགས་རིའི་འདུ་ཁང་རྒྱལ་
མཚན་དང་བཅས་པ་དང༌།གཞན་ཡང་འཛོམ་ཐོག་དང༌། ཡེ་ན་དང༌། རབ་བརྟན་དང༌། དུམ་མདོ་དང༌། སྦམ་མཛངས་དང༌། དཔལ་སྤུངས་དང༌། རྒ་ལེན་སྟེང་དང༌། རྣམ་རྒྱལ་གླིང་དང༌། ལྡན་གྱི་དྲན་ཐང་རྣམས་སུ་གཙུག་ལག་ཁང་བཅུ་བདུན་ལྡེབས་རིས་དང་
བཅས་པ་དང༌། དེ་དག་གི་ནང་དུའང་དུས་གསུམ་གྱི་སངས་རྒྱས་ལ་སོགས་པའི་སྐུ་བརྙན་ལྡེར་བཟོ་དང༌། ལྷུན་གྲུབ་སྟེང་འདིར་གསེར་ཟངས་ལས་གྲུབ་པའི་བླ་མ་ཡི་དམ་སངས་རྒྱས་བྱང་སེམས་དང༌། ཆོས་སྐྱོང་ནོར་ལྷ་རྣམས་ཀྱི་སྐུ་བརྙེན་བཟོ་བཀོད་ཤིན་ཏུ་ལེགས་

པ་སྔ་ཕྱིར་བཞེངས་པ་ཕྱེད་བཞི་བརྒྱ་ཙམ་དང༌། ཙནྡན་དཀར་དམར་ལས་གྲུབ་པའི་བསྐལ་པ་བཟང་པོའི་སངས་རྒྱས་སྟོང་གི་སྐུ་བརྙན་ཆ་གཉིས་ཀྱིས་མཚོན་ཏེ་གཞན་མང་པོ་དང༌། བ་སོ་ལས་གྲུབ་པའི་སྒྲོལ་མ་ཉེར་གཅིག་གི་སྐུ་བརྙན་སློབ་དཔོན་ཉི་མ་སྦས་པའི་
ལུགས་དང༌། ཙནྡན་དཀར་དམར་སྤེལ་མ་ལས་གྲུབ་པའི་དེ་བཞིན་གཤེགས་པའི་མཆོད་རྟེན་ཆེན་པོ་བརྒྱད་ཐོག་ཚད་དུ་ལངས་པ་བཟོ་དབྱིབས་ཁྱད་དུ་འཕགས་པ་ཅན་དང༌། རྒྱལ་བའི་བཀའ་འགྱུར་རོ་འཚལ་གསེར་བྲིས་སུ་བྱས་པ་གླེགས་བམ་བརྒྱ་ཕྲག་གཅིག་
ལ་བདུན་གྱིས་ལྷག་པ་དང༌། བསྟན་བཅོས་འགྱུར་རོ་འཚལ་དངུལ་བྲིས་སུ་བྱས་པ་གླེགས་བམ་བརྒྱ་ཕྲག་གཉིས་ལ་བརྒྱད་ཀྱིས་ཉེ་བར་ལྷག་པ་དང༌། དཔལ་ས་སྐྱའི་རྗེ་བཙུན་གོང་མ་ལྔའི་བཀའ་འབུམ་ཤོག་སྐྱར་བྲིས་པ་གླེགས་བམ་བཅུ་དྲུག་སྟེ་དེ་དག་ཐམས་ཅད་
ཀྱང་གླེགས་ཤིང་དང་གླེགས་ཐག་དང་ན་བཟའ་ཚུན་ཆད་ཁྱད་པར་དུ་འཕགས་པ་དང༌། དེ་དག་གིས་མཚོན་པའི་གླེགས་བམ་ཆེ་ཆུང་བགྲང་ལས་འདས་པ་བཞེངས་སོ། །ལྷ་ཁང་དང་མཆོད་རྟེན་རྣམས་ཀྱི་གན་འཇི་ར་དང་རྒྱལ་མཚན་མང་པོ་ཡང་གསེར་ཟངས་ལས་བགྱིས་པ་
དང༌། ལོ་བསྟར་དུ་གསང་སྔགས་ཟབ་མོའི་རྣལ་འབྱོར་དང་ལྡན་པའི་དགེ་སྦྱོང་རྣམས་ལ་ཆོས་དང་མཐུན་པའི་ཡོན་འབུལ་རྒྱ་ཆེན་པོ་སྟོབ་པ་དང་བཅས་ཏེ། ཡི་དམ་གྱི་ལྷ་མང་པོའི་རྩ་སྔགས་དང༌། སྙིང་པོ་དང༌། ཉེ་བའི་སྙིང་པོ་རྣམས་ཀྱི་བཟླས་པ་དུང་ཕྱུར་ཕྲག་མང་པོ་
བསགས། སྔོན་གྱི་གོང་མ་རྣམས་ཀྱིས་ཇི་ལྟར་བཞག་པ་དང༌། རང་ཉིད་ཀྱིས་གསར་བཞག་བགྱིས་པ་ལའང་དཔལ་དུས་ཀྱི་འཁོར་ལོ་ལྷ་དྲུག་བརྒྱ་དང་དྲུག་ཅུ་རྩ་བཞིའི་དཀྱིལ་འཁོར་ལ་སོགས་པ་སྒྲུབ་མཆོད་མང་པོ་ལོ་དུས་ལྟར་བཙུགས་པ་ལ་དུས་ལས་ཡོལ་བ་མི་མངའ་
ཞིང༌། བར་སྐབས་རྣམས་སུ་ཡང་དགོན་སྡེ་རིས་སུ་མེད་པ་ལ་སྐུ་རིམ་གསར་བསྐྲུན་གྱི་ཆོ་གའི་རིགས་དང༌། མདོ་སྣ་མང་པོ་ཁྲི་འདོན་དང་འབུམ་ཐེར་མང་པོ་འདོན་པ་ལ་སོགས་པ་སྟེ། བསགས་པའི་དངོས་པོ་ཐམས་ཅད་ཀྱང་དགེ་བའི་རྩ་བ་ཁོ་ནའི་རྒྱུར་འགྲོ་བར་མཛད་དོ། །

སྐུ་ཚེའི་མཐར་ཡང་བསྟན་བཅོས་འགྱུར་རོ་འཚལ་གྱི་ཆོས་སྦྱིན་པར་དུ་བསྒྲུབ་པའི་དབུ་འཛུགས་པ་ལ་སོགས་པ་མདོར་ན་དུས་ཕྱིས་སངས་རྒྱས་ཀྱི་བསྟན་པ་ལ་ལྷག་པར་བྱ་བ་བྱས་པའི་བཀའ་དྲིན་འདི་དང་མཚུངས་པ་འགའ་ཡང་མ་བྱུང་ངོ་ཞེས་གཏམ་དུ་གླིང་
བར་ཡང་བྱེད་དོ། །དེ་ལྟར་ས་ལ་སྤྱོད་པའི་དབང་པོ་བསྟན་པ་ཚེ་རིང་ཞེས་ཡོངས་སུ་གྲགས་པ་དེ་ལ་སྔོན་གྱི་བསོད་ནམས་དཔག་ཏུ་མེད་པའི་བྱེད་པོས་ཡོངས་སུ་བྱིན་པའི་སྡེ་བཞིའི་འབྱོར་པ་ཤིན་ཏུ་ཡངས་ཤིང་རྒྱ་ཆེ་ལ་གཞར་ཡང་འཛད་དུ་མེད་པའི་ལོངས་སྤྱོད་ཀྱི་གཏེར་ཆེན་པོ་དང་ལྡན་
པར་གྱུར་ཏེ། དཔེར་ན་རྣམ་མང་ཐོས་ཀྱི་བུའི་དཔལ་དང་འབྱོར་པ་ཇི་ལྟ་བ་བཞིན་ནོ། །དེ་ལྟ་ནའང་ཐོག་མར་རིགས་སྲས་ཀྱི་ཕྲེང་བ་ཅུང་ཟད་འབྱོན་དཀའ་བ་ལྟར་གྱུར་པར་བརྟེན། བདོག་པའི་དངོས་པོ་ཕལ་ཆེ་བ་དག་དཀོན་མཆོག་གི་ཕྱོགས་སུ་གཏོང་ཕོད་རྒྱ་ཆེན་པོའི་འབུལ་
བ་དང་ཆབ་ཅིག་ཏུ། མཐར་ཐུག་གི་འབྲས་བུ་བླ་ན་མེད་པའི་བྱང་ཆུབ་ཉིད་གཙོ་བོར་དམིགས་ཏེ། གནས་སྐབས་སུའང་མིའི་ལྷ་གང་གི་རིགས་སྲས་ཆུ་བོའི་རྒྱུན་ལྟར་འབྱོན་པའི་གསོལ་བ་འདེབས་པ་ལ་བརྩོན་པ་ལྟ་བུས། འཛམ་གླིང་བསྟན་པའི་མངའ་བདག་དཔལ་ས་སྐྱ་
པ་ངག་དབང་ཀུན་དགའ་བཀྲ་ཤིས་གྲགས་པའི་རྒྱལ་མཚན་དཔལ་བཟང་པོ་པ་ལ་སོགས་པ་བསྟན་འཛིན་གྱི་སྐྱེས་བུ་ཆེན་པོ། གསང་སྔགས་དང་རིག་སྔགས་ཀྱི་ནུས་མཐུ་གྲུབ་པ་གང་དག་གི་བཀའ་ལུང་ཡིད་འཕྲོག་དགའ་མའི་མིག་གི་ཟུར་མདའ་གང་དུ་ལྷུང་བ་ཙམ་གྱིས།
འཇིག་རྟེན་དང་འཇིག་རྟེན་ལས་འདས་པའི་དྲེགས་བྱེད་མཐུ་ཆེ་ཞིང་གཟི་བརྗིད་ཆེ་བ་རྣམས་ཀྱང་རང་རང་གི་ཁེངས་པ་རིང་དུ་བསྐྱུངས་ནས། ཅི་བགྱི་ཞེས་བསྒོ་བའི་ཕྲིན་ལས་ཐམས་ཅད་གུས་པས་མཉན་ཅིང་འབད་པ་མེད་པར་ཚུལ་བཞིན་དུ་བསྒྲུབ་པ་ལ་མི་གུས་པ་མེད་པའི་རྡོ་རྗེ་འཆང་
མང་པོའི་བཀའ་ལུང་བཙན་པོས་སྲུང་མའི་དབང་པོ་གུར་མགོན་ལྕམ་དྲལ་དང༌། གདོང་བཞི་མགོན་པོ་ལ་སོགས་པ་སྲུང་མ་རྒྱ་མཚོའི་ཚོགས་རྣམས་ལ། བསིལ་ལྡན་ལྗོངས་ཀྱི་རྒྱལ་བའི་བསྟན་པ་ཡོངས་སུ་རྫོགས་པའི་གདུགས་དཀར་ཐུར་མ་བརྒྱ་པ་ཁམས་གསུམ་གྱི་བླ་

མ་ནས་བླ་མར་འདེགས་པའི་སྙིང་སྟོབས་ཀྱི་ཡུ་བ་བརྟན་པའི་མིའི་ལྷ་གང་གི་རིགས་སྲས་གངྒཱའི་རྒྱུན་ལྟར་ཆད་པ་མི་མངའ་ཞིང་མྱུར་དུ་འབྱོན་པའི་ཕྲིན་ལས་སུ་བསྐུལ་བའི་རྔ་ཆེན་ཅི་ཡང་བརྡུང་བར་བརྩམས་སོ། །དུས་ཇི་ཙམ་ཞིག་ན་ཇི་ལྟར་བཅོལ་བའི་འབྲས་བུས་ནམ་ཡང་མི་བསླུ་
བ་ཉིད་དུ་འབྱུང་བ་ནི་དཀོན་མཆོག་གི་བདེན་པའི་མཐུའི་ཆོས་ཉིད་དོ། །དེའང་ས་གཞི་ཐམས་ཅད་ཆོས་བཞིན་དུ་སྐྱོང་བའི་རྒྱལ་པོ་དེ་ལ་རིགས་སྲས་ཀྱི་མཆོག་ཏུ་གྱུར་པ་ཤིང་སཱ་ལ་ཆེན་པོ་ལྟ་བུ་གསུམ་ཞིག་རིས་བྲལ་སྐྱེ་བོ་ཡོངས་ཀྱི་རྩ་ལག་ཏུ་བྱུང་བར་གྱུར་ཏོ། །དེའི་དང་པོ་ལ་ནི་
དཔལ་མིའི་དབང་ཕྱུག་བསོད་ནམས་མགོན་པོ་ཞེས་བྱ་བ་ཕྱོགས་རྣམས་ཀུན་དུ་རབ་ཏུ་གྲགས་པ་སྟེ། དེའི་རང་བཞིན་ནི་ཇི་ལྟ་བུ་ཞིག་གོ་སྙམ་ན། འདི་ནི་ཕལ་དང་ཐུན་མོང་དུ་མ་གྱུར་པ་ཞིག་སྟེ། དེའང་ཐོག་མ་ཉིད་ནས་ཆོས་སྐྱོང་བའི་སྲུང་མ་རྣམས་ཀྱི་གཟི་བརྗིད་ཀྱི་ཐིག་ལེ་
གཅིག་ཏུ་བསྡུས་ནས་ལེགས་པར་བསྐྱེད་ཅིང་ཀུན་དུ་ཡོངས་སུ་བསྐྱབ་པའི་སྐྱེས་བུ་ཉིད་དུ་གདོན་མི་ཟ་བའི་བདེན་དཔང་དུ་རྣམ་པར་དཔའ་ཞིང་རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ས་ཆེན་པོ་སྐྱོང་བ་ལ་གནོད་པ་དང་སྡོ་བ་མེད་པ། གཟི་བརྗིད་ཆེ་ཞིང་
མཐུ་ཕུན་སུམ་ཚོགས་པ་དང་ལྡན་པས་གཞན་སྡེ་མི་སྲུན་པའི་ཕྱོགས་ཐམས་ཅད་ལས་རྣམ་པར་རྒྱལ་བ། སྒྱུ་རྩལ་གྱི་རིགས་ཐམས་ཅད་ལ་མཁས་པར་གྱུར་པ་ནི་འདི་ལྟ་སྟེ། ཡི་གེ་དང༌། ལག་རྩིས་དང༌། གྲངས་དང༌། རྩིས་ཆེན་དང༌། ཐོར་ཚུགས་དང༌། གོམ་
སྟབས་དང༌། ལྕགས་ཀྱུའི་བསྒྱུར་ཐབས་དང༌། རལ་གྲིའི་ཐབས་དང༌། ཞགས་པས་གདབ་པ་དང༌། མདའ་བོ་ཆེ་འཕེན་པ་དང༌། མདུན་དུ་བསྣུར་བ་དང༌། ཕྱིར་བསྣུར་བ་དང༌། གཅད་པ་དང༌། དྲལ་བ་དང༌། དབུག་པ་དང༌། རྒྱང་ནས་འཕོག་པ་དང༌། སྒྲ་གྲག་པར་འཕོག་
པ་དང༌། གནད་དུ་འཕོག་པ་དང༌། མི་འཆོར་བར་འཕོག་པ་དང༌། ཚབས་ཆེ་བར་འཕོག་པ་དང༌། མཆོང་བ་དང༌། གྱད་ཀྱི་འཛིན་སྟངས་དང༌། བང་དང༌། རྐྱལ་གྱིས་བརྒལ་བ་དང༌། གླང་པོ་ཆེའི་གཉར་ཞོན་པ་དང༌། རྟ་ལ་ཞོན་པ་དང༌། ཤིང་རྟའི་ཐབས་དང༌། མདའ་དང༌།

གཞུ་དང༌། གྱད་སྟོབས་ཏེ་བཟོར་གཏོགས་པ་རྣམས་དང༌། གཞན་ཡང་གར་དང་བྲོ་དང༌། རྔ་བོ་ཆེ་དང༌། རྫ་རྔ་དང༌། རྔ་ཕྲན་དང༌། རྔ་ཆེན། འཁར་རྔ། པི་ཝང་རྒྱུད་གཅིག་པ་དང༌། རྫ་རྔ་ཁ་གཅིག་པ་དང༌། ལྕགས་ཀྱི་སིལ་ཁྲོལ་དང༌། འཁར་
བའི་སིལ་ཁྲོལ་དང༌། པི་ཝང་རྒྱུད་གསུམ་པ་དང༌། རྔ་མུ་ཀུནྡ་དང༌། སིལ་སྙན་གླུ་དབྱངས་དང་བསྟུན་པ་དང༌། ཕེག་རྡོ་བ་དང༌། རོལ་མོའི་སྒྲའི་རིགས་གཞན་དང༌། པི་ཝང་སྤྱིའི་རིགས་དང༌། གླིང་བུ་སྟེ་རོལ་མོའི་བྱེ་བྲག་རྣམས་དང༌། གཞན་ཡང་དབྱངས་ཀྱི་ངེས་པ་
བར་མ་དང༌། དྲང་སྲོང་དང༌། ས་འཛིན་དང༌། དྲུག་ལྡན་དང༌། ལྔ་པ་དང༌། བློ་གསལ་དང༌། འཁོར་ཉན་རྣམས་དང༌། གཞན་ཡང༌། སྒེག་པ་དཔའ་བ་མི་སྡུག་པ། །དྲག་ཤུལ་བཞད་གད་འཇིགས་སུ་རུང༌། །སྙིང་རྗེ་རྔམ་དང་ཞི་བ་སྟེ། །ཞེས་པའི་གར་གྱི་ཆ་བྱད་རྣམས་
ཏེ། སྒྱུ་རྩལ་གྱི་རིགས་རྣམ་པ་དྲུག་ཅུ་རྩ་བཞི་དང༌། གཞན་ཡང་ཕོ་རྩལ་སྣ་དགུ་ཞེས་བྱ་བ། མཐེབ་ཀྱིས་ཤ་ནོན་པ་དང༌། རྐྱལ་གྱིས་ཆུ་ཆེན་བརྒལ་བ་དང༌། ཡང་རྩལ་བྱ་ལྟ་བུ་སྟེ་ལུས་ཀྱི་རྩལ་གསུམ། ལོ་རྒྱུས་ཀྱིས་དགེ་འཐོན་པ་དང༌། གཏམ་གྱིས་བཞད་
གད་འཐོན་པ་དང༌། གཤགས་ཀྱིས་ཕ་རོལ་གནོན་པ་སྟེ་ངག་གི་རྩལ་གསུམ་དང༌། མཛངས་ལ་བློ་འགྱུ་བ་དང༌། དཔའ་ལ་བསྲན་ཚུགས་པ་དང༌། ཁ་གསལ་ཞིང་གཏིང་མི་རྟོགས་པ་སྟེ་ཡིད་ཀྱི་རྩལ་གསུམ་དང་བཅས་པ་དང༌། གཞན་ཡང་ཕོ་རྩེད་སྣ་དགུ་ཞེས་
བྱ་བ། གཏམ་ཡིག་རྩིས་གསུམ། མདའ་རྡོ་མཆོངས་གསུམ། བང་རྐྱལ་ཤེད་གསུམ་དང་བཅས་པ་སྟེ་སྐྱེས་བུ་དམ་པ་ལ་འོས་པའི་ཡོན་ཏན་གྱི་ཚོགས་མ་ལུས་པ་རབ་ཏུ་རྫོགས་པར་གྱུར་ཏོ། །རྣམ་པ་གཅིག་ཏུ་ལས་འབྲས་སྟོན་པའི་མདོ་དང་བསྟན་བཅོས་ཀྱི་རིགས་ལ་
ཤིན་ཏུ་འདྲིས་པས་དགེ་བ་དང་དགེ་བ་མ་ཡིན་པའི་བླང་དོར་གྱི་གནས་རྣམས་ལ་འཛོལ་མེད་དུ་དཔྱོད་ཅིང་གཞན་ལ་ཡང་རྒྱ་ཆེར་འདོམས་པ་ལ་མཁྱེན་རབ་ཀྱི་འཇུག་པ་ཤིན་ཏུ་གཡེར་པོར་གྱུར་ཏེ། དབོན་པོ་སྟོད་ཀྱི་གདན་སའི་ཁུར་བཞེས་སོ། །དེར་ཆབ་འབངས་སུ་གཏོགས་པ་

ཐམས་ཅད་ཀྱང་ཕན་པའི་སེམས་དང་རྗེས་སུ་འབྲེལ་བའི་བཀའ་ཁྲིམས་བཟང་པོས་བདེ་བ་ལ་སྦྱོར་བའི་ཐབས་ལ་ཤིན་ཏུ་མཁས་ཤིང༌། སྐྱེ་བོ་མ་ལུས་པ་ཕྱོགས་སུ་ལྷུང་བ་མེད་པའི་ཐུགས་བརྩེས་གཏིང་ནས་མི་འདོར་ཞིང༌། ཉེས་པར་སྤྱོད་པ་རྣམས་ཀྱང་འཕྲལ་ལ་བསྡིགས་པའི་
ཚུལ་གྱིས་ལེགས་པའི་ལམ་དུ་འཆོས་པ་དང༌། ལེགས་པར་སྤྱོད་པ་རྣམས་ནི་གོང་ནས་གོང་དུ་བཀུར་བའི་སྒོ་ནས་བོགས་འབྱིན་པའི་ཚུལ་གྱིས་བདེ་བར་སྐྱོང་བའི་མཛད་པ་བཟང་པོ་ནམ་ཡང་མི་བསྐྱུད་པར་ལྷག་པའི་བསམ་པ་ལ་ཡང་དག་པར་གནས་པ་ཉིད་དོ། །གཞན་ཡང་
རྟག་ཏུ་སྒོ་གསུམ་བག་དང་བཅས་པ་ལ་ལེགས་པར་གནས་ནས། བགྱི་བ་དང་བགྱི་བར་བྱ་བ་མ་ཡིན་པ་དང༌། བཀུར་བ་དང་བཀུར་བར་བྱ་བ་མ་ཡིན་པ་དང༌། གཞོམ་པ་དང་གཞོམ་པར་བྱ་བ་མ་ཡིན་པའི་གནས་ཐམས་ཅད་ཡང་དང་ཡང་དུ་ལེགས་པར་བརྟགས་ནས་ཉམ་ང་
བ་མེད་པའི་ཚུལ་གྱིས་སྤྱོད་པ་སྟེ། འཕགས་མཆོག་ནཱ་གཱརྫུ་ནས། ཕན་སེམས་ཆེ་བ་སྒྲིན་པའི་ཚུལ། །དྲང་པོའི་ཚུལ་ནི་མི་བསླུ་བ། །བག་ཡོད་ཉམ་ང་མེད་པ་ནི། །དེ་ནི་རྒྱལ་པོའི་ཚུལ་དུ་གནས། །ཞེས་དང༌། མ་སུ་རཀྵས་བྱས་པའི་ལུགས་ཀྱི་བསྟན་བཅོས་
ལས་ཀྱང༌། བརྟན་ཞིང་ཟབ་མོའི་བློ་དང་ལྡན། །མདངས་ལྡན་ཆོས་དང་བསྟན་བཅོས་རིག །དུལ་ཞིང་བདེན་པར་སྨྲ་བ་དང༌། །རྒྱལ་པོའི་འཁོར་ལ་ཕན་པར་སེམས། །རིགས་བཙུན་རྒྱུད་ནི་མཉིན་པ་དང༌། །བླ་མ་ལ་ནི་གུས་ཉན་དང༌། །སྐྱེ་དགུ་རྗེས་བརྩེར་ལྡན་པ་
ཡི། །རྒྱུད་བྱུང་དེ་ནི་རྒྱལ་སྲས་ཡིན། །ཞེས་བཤད་པ་ལྟ་བུའི་ཡོན་ཏན་རིན་པོ་ཆེའི་བང་མཛོད་ལེགས་པར་བཟུང་ནས། རང་གཞན་གྱི་འདོད་པའི་དངོས་པོ་མ་ལུས་པ་བསྒྲུབ་པའི་རང་བཞིན་ཅན་ནོ། །ཁྱད་པར་ཆོས་ཐམས་ཅད་ཀྱི་རྒྱལ་པོའི་མདོ་ལས། ལྷ་དང་བཅས་
པའི་འཇིག་རྟེན་ན། །དཀོན་མཆོག་གསུམ་པོ་མ་གཏོགས་པ། །ཡོན་གྱི་གནས་འགའ་ཡོད་མ་ཡིན། །ཞེས་དང༌། སངས་རྒྱས་ཕལ་པོ་ཆེ་ལས། རིགས་པར་བརྩོན་པ་དཀོན་མཆོག་གསུམ་རྣམས་ལ། །སྦྱོར་བ་སྐྱོ་བ་མེད་པས་མཆོད་བྱས་ན། །དེ་དག་བདུད་བཞིའི་

ལམ་ལས་རབ་འདས་ཏེ། །བྱང་ཆུབ་བླ་མེད་མྱུར་དུ་རེག་པར་འགྱུར། །ཞེས་གསུངས་པའི་ལུང་དོན་དང་མཐུན་པར་དཀོན་མཆོག་གསུམ་ལ་དད་པ་གསུམ་གྱི་རྩ་བ་རབ་ཏུ་བརྟན་པའི་སྒོ་ནས་བདོག་པའི་དངོས་པོ་ཕལ་ཆེ་བ་དག་གིས་བསྙེན་བཀུར་བ་ལ་སོགས་པ་
དགེ་བའི་རྩ་བ་ལྷུར་བྱེད་པ་གཞན་དང་ཐུན་མོང་དུ་མ་གྱུར་པ་ཞིག་སྟེ། དེ་ཡང་སྐྱེ་བོ་ཕལ་པ་ཁ་ཅིག་ནི། རང་གིས་བསགས་པའི་དངོས་པོ་བཟང་ཞིང་ཤིན་ཏུ་ཕངས་པར་གྱུར་པ་གང་ཡིན་པ་དེ་དག་བདག་གིར་བཟུང་ནས། དེའི་ལྷག་མར་གྱུར་པའི་དངོས་པོ་དམན་པའམ་ཡན་
འགར་དུ་ལུས་པ་དེ་ཉིད་མཆོད་སྦྱིན་གྱི་ཆེད་དུ་གཏོང་བ་དག་ཡོད་ཀྱང༌། ས་འཛིན་ཆེན་པོ་འདིས་ནི་རང་གི་བདོག་དགུ་ཐམས་ཅད་ཀྱི་ཕུལ་དུ་བྱུང་བའམ་མཆོག་ཏུ་གྱུར་པའམ། ཆེས་དཀོན་པའམ། གཅེས་པར་བཟུང་བ་གང་ཡིན་པ་དེ་དག་ནི་དཀོན་མཆོག་གི་ཕྱོགས་སུ་བཏང་བ་གཙོ་
བོར་བྱེད་ཅིང༌། ཁྱད་པར་འཛམ་གླིང་བསྟན་པའི་མངའ་བདག་དཔལ་ས་སྐྱ་པ་ངག་དབང་ཀུན་དགའ་བསོད་ནམས་རིན་ཆེན་པ་ཡབ་སྲས་རྣམས་དང༌། རྗེ་བཙུན་རྡོ་རྗེ་འཆང་ཀུན་དགའ་བཟང་པོའི་དམ་པ་ཆོས་ཀྱི་རྒྱལ་སྲིད་ཆེན་པོ་ལ་མངའ་བསྒྱུར་བའི་མཁན་ཆེན་ཐམས་ཅད་
མཁྱེན་པ་བཀྲ་ཤིས་ལྷུན་གྲུབ་པ་དང༌། རྒྱལ་བ་ཀུན་གྱི་རིགས་ཀྱི་བདག་པོ་དཔལ་ལྡན་རྡོ་རྗེ་སེམས་དཔའ་ཉིད་ངུར་སྨྲིག་གར་གྱིས་རྣམ་པར་རྩེན་པ་མཁན་ཆེན་དཔལ་ལྡན་ཆོས་སྐྱོང་བ་དང༌། མདོ་སྔགས་རྒྱ་མཚོ་སྨྲ་བའི་དབང་ཕྱུག་ཡར་ཀླུང་མཁན་པོ་ངག་དབང་ཀུན་
དགའ་ལེགས་པའི་འབྱུང་གནས་དང༌། ཕྱི་དང་ནང་གི་རིག་པའི་གཞུང་ལུགས་རབ་འབྱམས་སྨྲ་བ་སངས་རྒྱས་ཡེ་ཤེས་པ་དང༌། རྡོ་རྗེ་འཛིན་པ་ཀུན་གྱི་གཙུག་གི་ནོར་བུ་སངས་རྒྱས་རྒྱ་མཚོ་པ་ལ་སོགས་པ་མཁས་པ་དང་བཙུན་པ་དང་གྲུབ་པའི་ཡོན་ཏན་མི་ཟད་ནམ་མཁའི་
མཛོད་དུ་གྱུར་པ་མང་པོའི་ཞབས་ཀྱི་པདྨ་རྣམས་ནི། ལྷ་དང་མིའི་ཡུལ་ན་རྙེད་པར་དཀའ་ཞིང་རིན་ཐང་གཞལ་དུ་མེད་པའི་ཡིད་བཞིན་གྱི་ནོར་བུ་རིན་པོ་ཆེ་འོད་ཟེར་སྟོང་གི་དྲྭ་བ་རིང་པོའི་ལམ་དུ་འཕྲོ་བ་གང་གིས་ཉེ་བར་སྤུད་པ་སྟེ། དེ་ལྟ་བུའི་རལ་པའི་ཐོར་ཚུགས་རིན་པོ་ཆེ་

ཨནྡ་རྙིལ་གྱི་ཁུ་བས་ལན་བརྒྱར་བྱུགས་པ་སྙམ་བྱེད་པའི་རྩེ་མོ་ན་མངོན་པར་བཀོད་ཅིང༌། དེ་དག་མཉེས་པའི་ཞལ་གྱི་འཛུམ་སྒྲོས་བནྡྷཱ་ཛི་བ་ཀ་ལྟར་རྣམ་པར་ཕྱེ་བ་ལས་ལེགས་པར་འོངས་པའི་མདོ་སྡེ་དང་རྒྱུད་སྡེ་རྣམས་ཀྱིས་རྗེས་སུ་བསྟན་པར་བྱ་བའི་གདམས་པ་ཟབ་མོའི་བདུད་
རྩིའི་བཅུད་ལེན་མཐའ་དག་ཡང་དང་ཡང་དུ་བཏུང་བས། མངོན་པར་མཐོ་བ་དང་ངེས་པར་ལེགས་པའི་གྲོང་ཁྱེར་མཆོག་ཏུ་འཇུག་པར་བྱེད་པའི་ལམ་གྱི་ལུས་སྟོབས་ཡོངས་སུ་རྟས་པར་བྱེད་པའི་ཐབས་སུ། རྗེ་བཙུན་རྡོ་རྗེ་རྣལ་འབྱོར་མ་ལ་སོགས་པ་མཆོག་དང་ཐུན་མོང་གི་དངོས་
གྲུབ་སྒྲུབ་པར་བྱེད་པའི་གནས་སུ་མཆོག་ཏུ་བསྔགས་པའི་ལྷག་པའི་ལྷ་མང་པོའི་བསྒོམ་བཟླས་ཀྱི་རིམ་པ་རྒྱུན་བར་ཉིད་དུ་མ་ཆག་པར་ཐུགས་ཉམས་སུ་བསྟར་རོ། །གཞན་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་སྡུད་པ་དང༌། ཤེས་རབ་སྙིང་པོ་པ་དང༌། སྒྲོལ་བསྟོད་པ་དང༌། སློབ་
དཔོན་ཆེན་པོ་པདྨ་འབྱུང་གནས་ཀྱི་གསོལ་འདེབས་ལེའུ་བདུན་པ་ལ་སོགས་པ་གསང་སྔགས་གསར་རྙིང་གི་བླ་མ་བརྒྱུད་པ་མང་པོའི་གསོལ་འདེབས་དང་སྨོན་ལམ་གྱི་རིགས་མང་པོ་ཞལ་ཏོན་དུ་མཛད་དོ། །ཁྱད་པར་རང་གི་ཡབ་རྗེ་ས་སྐྱོང་བསྟན་པ་ཚེ་རིང་གི་དགོངས་རྫོགས་
བསྒྲུབ་པ་དང༌། ས་བདག་རང་གི་དལ་འབྱོར་གྱི་རྟེན་བཟང་པོ་བརྙེས་པ་ཆོས་ཚུལ་དགེ་བ་བཅུ་དང་ལྡན་པར་བྱ་བ་དང༌། སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པའི་སྙིང་པོ་ཅན་དུ་བསྒྲུབ་པར་བྱ་བའི་ཕྱིར། ཆུ་ཕོ་ཁྱིའི་ལོར་གཙང་དབུས་ཀྱི་ཕྱོགས་སུ་ཆིབས་ཀྱི་ཁ་ལོ་བསྒྱུར་
ཏེ་དབུས་གཙང་གི་སའི་ཆར་འཁོད་པའི་དགོན་སྡེ་རིས་སུ་མ་ཆད་པ་རྣམས་སུ། བསྟན་པ་རིན་པོ་ཆེའི་རྩ་ལག་ཏུ་བཞུགས་ཤིང་རྣམ་པར་དཀར་བའི་ཕྲིན་ལས་མུ་མེད་པར་སྤྲོ་བ་ལ་བཀའ་དྲིན་གཞལ་དུ་མེད་པར་གྱུར་པའི་བླ་མ་དང༌། མཁན་པོ་དང༌། ཟུར་འཆད་པ་མཐའ་དག་ལ་
དངོས་པོ་བཟང་ཞིང་རྒྱ་དཔངས་མི་དམན་པའི་མཆོད་འབུལ་དང༌། དགེ་སློང་གི་དགེ་འདུན་རྒྱ་མཚོ་ལྟ་བུ་ཇི་སྙེད་ཅིག་མཆིས་པ་རྣམས་ལ་འབུལ་བ་དང་བསྙེན་བཀུར་གྱ་ནོམ་པ་དག་གིས་མཉེས་པར་བགྱིས་སོ། །དེ་དག་ཏུ་བཞུགས་པའི་དཀོན་མཆོག་གསུམ་གྱི་རྟེན་བྱིན་རླབས་

ཀྱི་གཟི་འོད་མངོན་པར་འབར་བ་མཐའ་དག་ལ་ཡང༌། སྙན་ཤལ་དང༌། འཕན་དང༌། བ་དན་དང༌། བླ་རེ་དང༌། ལྡ་ལྡི་དང༌། རྒྱལ་མཚན་དང༌། སྤོས་དང༌། མར་མེ་དང༌། ཞལ་ཟས་ལ་སོགས་པའི་མཆོད་པའི་རྣམ་གྲངས་བསམ་གྱིས་མི་ཁྱབ་པ་དངོས་
པོ་བཟང་ཞིང་རྒྱ་ཆེ་བ་དག་གིས་བསྟི་སྟང་དུ་བྱས། བླ་མར་བྱས། རི་མོར་བྱས། རྗེད་པར་བྱས། ཕྱག་འཚལ་བར་བྱས་ཏེ། ས་བདག་ཆེན་པོ་རང་གི་ཡབ་མེས་གོང་མ་ཆོས་ཀྱི་དབྱིངས་སུ་ཐིམ་པ་རྣམས་ཀྱི་ཐུགས་ཀྱི་བཞེད་པ་མ་ལུས་པ་ཡོངས་སུ་བསྐང་བ་དང༌། རང་དང་རང་
ལ་ལྟོས་བཅས་ཀྱི་སྐྱེ་བོ་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་གྲངས་དང་བཅས་པ་རྣམས་ཀྱི་རྒྱུད་ལ་བསོད་ནམས་ཀྱི་ཚོགས་དཔག་ཏུ་མེད་པའི་རྒྱ་མཚོ་རྒྱ་ཆེ་ཞིང་གཏིང་མི་དཔོག་པར་བསྐྱིལ་ཏེ། མདོར་ན་གཙུག་ལག་ཟུང་གི་ཕྲིན་ལས་ཀྱི་སྣང་བ་དཀར་པོས་ཕྱོགས་ཀྱི་ཁོ་ར་ཁོར་
ཡུག་མ་ལུས་པ་ཡོངས་སུ་བཀང་བ་དང་འགེངས་བཞིན་པའི་ངོ་མཚར་གཏམ་གྱི་ཟླ་འོད་གཞོན་ནུ་ཕྱོགས་ཀྱི་ལུས་ཕྲའི་རྣ་རྒྱན་དུ་འགོད་པ་འདི་ལྟར་ལགས་སོ། །ལྷ་སྲས་རིགས་ཀྱི་ཤིང་སཱ་ལ་ཆེན་པོ་ལྟ་བུ་གསུམ་པ་ནི་སྡེ་དགེ་བློ་གྲོས་རྒྱ་མཚོ་ཞེས་བྱ་བ་སྟེ། འདི་ནི་སྔོན་གྱི་
བསོད་ནམས་ཀྱི་རྒྱུ་དཔག་ཏུ་མེད་པས་བསྐྱེད་པས་སྐལ་བ་ཕུན་སུམ་ཚོགས་པ་དང་ལྡན་པའི་ལྷའི་རིགས་སུ་འཁྲུངས་པ། ཐོག་མ་ཉིད་ནས་དབང་པོ་དུལ་བར་གྱུར་པས་སྤྱོད་ཚུལ་མི་མཐུན་པ་མེད་པའི་ངང་ཚུལ་ཅན། རྟག་ཏུ་ཐོས་བསམ་ལ་གོམས་པ་ལྷུར་བྱས་པས་བློ་དྲི་མ་མེད་པར་
གྱུར་པ། རིག་བྱེད་གསུམ་དང་བརྟག་པ་བརྒྱད་ལ་སོགས་པ་རིག་པའི་གཙུག་ལག་མང་པོ་ལ་མཁས་པ། གཞན་ཡང་འཕགས་མཆོག་ཀླུ་སྒྲུབ་ཞབས་ཀྱིས། གང་ལ་ཕ་དང་མ་དག་མཆོད་བྱེད་པའི། །རིགས་དེ་ཚངས་བཅས་སློབ་དཔོན་བཅས་པའང་ལགས།
དེ་དག་ལ་མཆོད་གྲགས་པར་འགྱུར་བ་དང༌། །སླད་མ་ལ་ཡང་མཐོ་རིས་འགྱུར་བ་ལགས། །ཞེས་པ་ལྟར་རང་གི་བླ་མ་དང་ཡབ་ཡུམ་དང་རྒན་རབས་ཞེ་སར་འོས་པ་རྣམས་ལ་བཀུར་སྟི་མཁས་པ། གང་གི་ཡོན་ཏན་གྱི་གྲགས་པ་དཀར་པོ་ལ་འཇིག་རྟེན་ཀུན་གྱིས་བསྔགས་

པའི་གནས་སུ་གྱུར་ཅིང༌། དེ་བཞིན་གཤེགས་པའི་བསྟན་པ་དང་སེམས་ཅན་ཐམས་ཅད་ལ་ཕན་པ་རྒྱ་ཆེན་པོ་བསྒྲུབ་པའི་སྙིང་སྟོབས་དང་དམ་བཅའི་ཡ་ལད་ཤིན་ཏུ་བཙན་པར་བགོས་པ་ཞིག་གོ །དེ་ཡང་འདི་ལྟར་ཡིད་ལ་བྱེད་དེ། བདག་གིས་བསྟན་འགྲོའི་དོན་བགྱིད་
པ་ལ་ནི་རིགས་པ་དང་མི་རིགས་པའི་འགལ་འབྲེལ་ཚུལ་བཞིན་དུ་དཔྱོད་པའི་བློ་གྲོས་ཕུན་སུམ་ཚོགས་པ་ཞིག་ལ་རག་ལས་སོ། །དེ་ཡང་བློ་དང་ལྡན་པ་རྣམས་ཀྱིས་བསླབ་པར་བྱ་བའི་གནས་རིག་པའི་གཙུག་ལག་ལྔ་པོ་ལེགས་པར་རྟོགས་པ་ལས་འབྱུང་བར་དགོངས་ནས་དེ་དག་
གི་གཞུང་ཡན་ལག་དང་བཅས་པ་ཅི་རིགས་པ་ལ་མཁས་པར་སྦྱངས་སོ། །ཁྱད་པར་སྐྱེ་བོ་གཞན་དག་ཕན་པས་རྗེས་སུ་འཛིན་པའི་ཕྱིར། གསོ་བ་རིག་པའི་རྒྱུད་བཞི་འགྲེལ་པ་སྔ་ཕྱི་མང་པོ་དང་བཅས་པ་ལ་སྦྱངས་པ་རྒྱ་མཚོའི་ཕ་རོལ་དུ་སོན་པ་གཡུ་ཐོག་ཡོན་ཏན་མགོན་
པོའི་དཔལ་ལ་འགྲན་པར་གྱུར་ཏེ། ནད་རླུང་ལས་གྱུར་པ་དང༌། བད་ཀན་ལས་གྱུར་པ་དང༌།མཁྲིས་པ་ལས་གྱུར་པ་དང༌། འདུས་པ་ལས་གྱུར་པའི་ནད་ཀྱི་རིགས་རྣམ་པ་སྣ་ཚོགས་པ་དག་གིས་ཉེན་པའི་སྐྱེ་བོ་གྲངས་མེད་པ་དུཿཁ་ལས་རྣམ་པར་བཀྲོལ་ཏེ་མི་ཤིགས་པའི་
སྲོག་གི་ཀ་བ་བརྟན་པོར་བཙུགས་པའི་ཕྲིན་ལས་ནམ་མཁའ་དང་མཉམ་པར་གྱུར་ཏོ། །ནང་དོན་རིག་པའི་གནས་སྟོན་པར་བྱེད་པའི་བསྟན་བཅོས་ཆེན་པོ་སྡོམ་པ་གསུམ་གྱི་རབ་ཏུ་དབྱེ་བ་དང༌། དཔལ་ཀྱེ་རྡོ་རྗེའི་རྩ་བའི་རྒྱུད་བརྟག་པ་གཉིས་པ་དང༌། རྒྱུད་སྡེ་སྤྱིའི་རྣམ་པར་
གཞག་པ་དང༌། རྒྱུད་ཀྱི་མངོན་པར་རྟོགས་པ་དག་གི་དོན་མ་ལུས་པ་སྟོན་པའི་བསྟན་བཅོས་ཚུལ་དང་པོ་གསུམ་དང༌། མངོན་པར་རྟོགས་པ་ལྗོན་ཤིང་སྟེ་མཛེས་པར་བྱེད་པའི་རྒྱན་རྣམ་པ་གཉིས་དང༌། བྱང་ཆུབ་སེམས་དཔའི་སྤྱོད་པ་ལ་འཇུག་པ་དང༌། དབུ་མ་བཤེས་པའི་སྤྲིང་
ཡིག་དང༌། རྒྱལ་པོ་ལ་གདམས་པ་ལ་སོགས་པའི་གཞུང་མང་པོ་ཐུགས་སུ་ཆུད་པར་མཛད་པས་ལུང་དང་རིགས་པའི་བདག་པོར་གྱུར་ཏོ། །གཞན་ཡང་ཚོགས་འདོན་གྱི་རིགས་སུ་གཏོགས་པའི་ཆོས་སྤྱོད་རྣམས་དང༌། ཀྱེ་རྡོ་རྗེ་དང་རྡོ་རྗེ་ཕུར་པ་ལ་སོགས་པའི་དཀྱིལ་འཁོར་གྱི་སྒྲུབ་

མཆོད་ཆེན་པོ་མང་པོ་དང༌། དེ་དག་གི་ཕྱག་ལེན་ཕྲ་མོ་ཚུན་ཆད་ལའང་གཞན་དྲིང་མི་འཇོག་པར་མཛད་དོ། །ཁྱད་པར་དུ་ཡང་སློབ་སྤྲིང་ལས། གང་ཞིག་ཐོབ་ན་སྐྱེ་བའི་རྒྱ་མཚོ་མཐར་འབྱིན་ཅིང༌། །བྱང་ཆུབ་མཆོག་གི་ས་བོན་དགེ་བའང་འདེབས་བྱེད་ལ། །ཡིད་
བཞིན་ནོར་བུ་བས་ཀྱང་ཡོན་ཏན་ཆེས་ལྷག་པའི། །མི་ཉིད་ཐོབ་ནས་སུ་ཞིག་འབྲས་བུ་མེད་པར་བྱེད། །བདེ་གཤེགས་ལམ་བསྟན་འགྲོ་བ་འདྲེན་པར་ཆས་གྱུར་ཅིང༌། །སེམས་ཀྱི་སྟོབས་ཆེན་མི་ཡི་རྙེད་པ་གང་ཡིན་པ། །ལམ་འདི་ལྷ་དང་ཀླུ་ཡིས་མི་རྙེད་གནོད་སྦྱིན་དང༌། །མཁའ་
ལྡིང་རིག་འཛིན་མིའམ་ཅི་དང་ལྟོ་འཕྱེས་མིན། །ཞེས་དང༌། བཤེས་སྤྲིང་ལས། རྒྱ་མཚོ་གཅིག་ནས་གཉའ་ཤིང་བུ་ག་དང༌། །རུས་སྦལ་ཕྲད་པ་བས་ཀྱང་དུད་འགྲོ་ལས། །མི་ཉིད་ཆེས་ཐོབ་དཀའ་བས་མི་དབང་གིས། །དམ་ཆོས་སྤྱོད་པས་བདེ་འབྲས་མཆིས་པར་མཛོད། །
ཅེས་གསུངས་པ་ལྟར་དལ་འབྱོར་གྱི་རྟེན་བཟང་པོ་རྙེད་པ་འདི་དོན་ཡོད་པར་བྱ་བའི་ཕྱིར། དགེ་བ་དང་དགེ་བ་མ་ཡིན་པའི་ཚུལ་ལེགས་པར་དཔྱོད་ཅིང་བླང་དོར་ཐམས་ཅད་ཕྱིན་ཅི་མ་ལོག་པར་མཛད་དོ། །ཁྱད་པར་མཁས་གྲུབ་ཡོངས་ཀྱི་འཁོར་ལོས་སྒྱུར་བ་ཆེན་པོ་འཇམ་མགོན་
བཀྲ་ཤིས་ལྷུན་གྲུབ་པ་ལ་སོགས་པ་གོང་དུ་སྨོས་པའི་ཡོངས་འཛིན་དགེ་བའི་བཤེས་གཉེན་མང་པོའི་ཞབས་ཀྱི་པདྨ་གཙུག་གི་རྒྱན་དུ་བརྟེན་ཅིང༌། ལེགས་པར་གསུངས་པའི་ཆོས་ཀྱི་བདུད་རྩིའི་ཆུ་རྒྱུན་མང་པོས་རྣམ་པ་ཐམས་ཅད་མཁྱེན་པའི་གོ་འཕང་གི་བདེ་བ་བླ་ན་མེད་པ་དེ་ཉིད་
ཐོབ་པར་བྱེད་པའི་གསོས་སུ་ཡང་ཡང་བཏུང་ནས། དེ་དག་གི་སྙིང་པོ་སྡོམ་པ་གསུམ་གྱི་བསླབ་པའི་གནས་ཐམས་ཅད་མིག་གིས་འབྲས་བུ་བཞིན་དུ་གཅེས་པར་བསྲུང་ཞིང༌། ངོར་པའི་ཆག་མེད་རྣམ་པ་བཞིས་ཐོག་དྲངས་པའི་མཆོག་དང་ཐུན་མོང་གི་དངོས་གྲུབ་སྒྲུབ་པའི་ཐབས་ལ་
མཆོག་ཏུ་གྱུར་པའི་ཡི་དམ་གྱི་ལྷའི་བསྒོམ་བཟླས་དང་ཉམས་ལེན་མང་པོ་ཐུགས་ཉམས་སུ་བསྟར་རོ། །འདི་ཡུམ་སྲས་ཀྱི་སྐམ་ཐོག་གི་ཕོ་བྲང་དུ་ལྷ་ཁང་དང་མགོན་ཁང་རྟེན་དང་བརྟེན་པར་བཅས་པ་གསར་དུ་བཞེངས་ཏེ། དེར་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་སྐུ་བརྙན་

གསེར་ཟངས་ལས་བྱས་པ་དང༌། ཙནྡན་དཀར་དམར་ལས་བྱས་པ་མང་པོ་བཞེངས། རྒྱལ་བའི་བཀའ་འགྱུར་རོ་འཚལ་དང་ས་སྐྱ་བཀའ་འབུམ་པར་མ་ལ་སོགས་པའི་གླེགས་བམ་མང་པོ་ཡོན་གྱིས་བསླུས་ཏེ། དེ་དག་གི་གླེགས་ཐག་དང་གླེགས་ཤིང་ཐམས་ཅད་ཀྱང་
བཟོ་བཀོད་ཁྱད་པར་འཕགས་པ་མཛད་དོ། །དེ་དག་གི་མདུན་དུའང་རྟག་པར་མཆོད་པའི་བྱེ་བྲག་བསམ་གྱིས་མི་ཁྱབ་པའི་བཀུར་སྟི་དང་བཅས་ཏེ་བཞུགས་སུ་གསོལ་བ་ལ། དཔལ་ལྡན་རྡོ་རྗེ་འཆང་གི་རིག་སྔགས་གྲུབ་པ་ངོར་གྱི་མཁན་ཆེན་རྡོ་རྗེ་འཆང་དཔལ་ལྡན་ཆོས་སྐྱོང་
གྲགས་པའི་རྒྱལ་མཚན་དཔལ་བཟང་པོ་དང༌། ཡར་ལུང་མཁན་པོ་ངག་དབང་ཀུན་དགའ་ལེགས་པའི་འབྱུང་གནས་དང༌། མཁྱེན་རབ་ཀྱི་དབང་ཕྱུག་སློབ་དཔོན་སངས་རྒྱས་ཡེ་ཤེས་ལ་སོགས་པ་མཆོག་གི་རྡོ་རྗེ་སློབ་དཔོན་ཆེན་པོ་རྣམས། དགེ་འདུན་འདུས་པའི་ཚོགས་ཀྱི་
དབུར་བཞུགས་སུ་གསོལ་བའི་རྟེན་དེ་དག་ལ་མངོན་པར་ཞེན་པའི་བགེགས་དང་དྲི་མ་སྦྱང་བ་དང༌། རྟེན་རང་རང་གི་རིགས་ཀྱི་ལྷར་བསྐྱེད་པ་ལ་ཡེ་ཤེས་ཀྱི་འཁོར་ལོ་ཡང་ཡང་འཇུག་པ་ལ་སོགས་པའི་རབ་ཏུ་གནས་པའི་ཆོ་ག་ཡང་དག་པར་བསྒྲུབས་ཏེ་བྱིན་གྱིས་བརླབས་པ་དང་ཕན་བདེའི་
གཟི་འོད་ཉི་མ་བྱེ་བའི་དཔལ་ལས་ལྷག་པར་འབར་བ་མཛད་དོ། །མཆོག་གི་རྡོ་རྗེ་སློབ་དཔོན་ཆེན་པོ་དེ་དག་ལའང་སྔ་ཕྱིར་བདོག་པའི་དངོས་པོ་བཟང་དགུ་བརྒྱ་ཕྲག་མང་པོས་བསྙེན་བཀུར་བསྟབས་ཏེ་ལོངས་སྤྱོད་ཐམས་ཅད་སྙིང་པོ་ཅན་དུ་བྱས་སོ། །འཛོམ་ཐོག་དགོན་དུ་དགེ་
འདུན་གྱི་ཀུན་དགའ་རྭ་བ་རྟེན་དང་བརྟེན་པར་བཅས་པ་གསར་དུ་བསྐྲུན་ཏེ། དེར་དགེ་འདུན་གྱི་ཚོགས་ཆེན་པོ་བསྡུས་ནས་ངོར་པའི་དཀྱིལ་འཁོར་ཆེན་པོ་ལྔའི་སྒྲུབ་མཆོད་ཡོད་པ་ལ་བཅའ་སྒྲིགས་ཆོས་དང་མཐུན་པར་བསྡམས་ཤིང༌། གསར་དུའང་རྗེ་བཙུན་རྡོ་རྗེ་རྣལ་འབྱོར་
མའི་སིནྡྷུའི་དཀྱིལ་འཁོར་གྱི་སྒྲུབ་མཆོད་ཟླ་རེ་བཞིན་ཚེས་བཅུ་ལ་རྒྱུན་མི་ཆད་པར་འཛུགས་པ་དང༌། ས་ངོར་དང་ལྗོངས་འདིའི་དགོན་སྡེ་རིས་སུ་མེད་པར་ཡང་མཆོད་འབུལ་རྒྱ་ཆེན་པོ་བྱེད་པ་ལ་སོགས་པ་མདོར་ན་རྣམ་པར་དཀར་བའི་ཕྲིན་ལས་ཀྱི་བྱ་བ་རྒྱ་དང་དཔངས་མི་ཆུང་བར་བགྱིས་པ་དང་

བགྱིད་བཞིན་པའི་སྙིང་སྟོབས་དང་གཏོང་བ་ཆེན་པོའི་སྒོ་ནམ་ཡང་མི་བསྡམ་པ་འདི་ཉིད་དོ། །མཚུངས་པ་མེད་པའི་བསོད་ནམས་དང་སྟོབས་ཀྱིས་མངོན་པར་མཐོ་བའི་ལྷ་སྲས་ཀྱི་རིགས་ཤིང་སཱ་ལ་ཆེན་པོ་ལྟ་བུ་གཉིས་པ་ནི། ཐ་གྲུ་རྣམ་པར་ཡངས་པའི་ས་ཆེན་པོ་ལ་
འཁོད་པའི་སྐྱེ་བོ་ཕལ་མོ་ཆེ་གཞལ་དུ་མེད་པའི་བྱམས་བརྩེ་དང་ཕྲིན་ལས་ཀྱི་གདུང་སྐྱོབ་དཀར་པོའི་གྲིབ་བསིལ་སྣུམ་པོ་གཅིག་གིས་ཡོངས་སུ་ཁྱབ་པར་བདེ་བར་སྐྱོང་བ་ལ་བརྫི་བ་མི་མངའ་ཞིང༌། སླར་ཡང་གནམ་གྱི་མཐོངས་ནས་བསྐོས་པའི་མི་བདག་གོང་མ་ཆེན་པོའི་ལས་ལུང་གི་
དབང་སྐལ་བཙན་པོས་ལན་གཅིག་མིན་པར་ཤིན་ཏུ་བརླིང་བར་བྱས་པའི་མིའི་ནོར་བུ་རིན་པོ་ཆེ། གཅིག་ཏུ་གངས་ལྡན་རི་བོའི་རྭ་བས་ཡོངས་སུ་བསྐོར་བའི་སྨན་ལྗོངས་ཆེན་པོ་འདི་ཉིད་དུ་བཞུགས་པའི་བསྟན་པ་རིན་པོ་ཆེ་རིས་སུ་མ་ཆད་པའི་དབུ་འཕང་བླ་ནས་བླར་འདེགས་པ་ལ་བསྙེངས་
པ་མེད་པའི་སྙིང་སྟོབས་ཀྱི་ཕྲག་པ་བརྟན་པ་གང་དེ། བསྐལ་པ་དཔག་ཏུ་མེད་པའི་ལེགས་བྱས་ཀྱི་མཐུ་ཆེན་པོ་དག་གིས་ཀུན་ཏུ་རབ་ཏུ་བརླིང་བར་བྱས་པའི་ས་འཛིན་གྱི་དབང་པོ། བསྟན་པའི་སྙིང་པོ་སྡོམ་པ་གསུམ་གྱི་ཚུལ་ཁྲིམས་ཕུན་སུམ་ཚོགས་པས་རྒྱུད་ཡོངས་སུ་གཏམས་པའི་
མཚན་ནི་སྡེ་དགེ་ས་སྐྱོང་བླ་མ་ཆེན་པོ་ཀུན་དགའ་ཕྲིན་ལས་རྒྱ་མཚོའི་སྡེ་ཞེས་ཡོངས་སུ་གྲགས་པའི་ཟླ་རིས་གསར་པའི་འཕྲིན་ཡིག་དམ་པ་གང་དེ། ཕྱོགས་དང་ཕྱོགས་བྲལ་གྱི་ཡིད་འཕྲོག་དགའ་མའི་འགྲམ་དཀྱུས་ཡངས་པར་ལེགས་པར་འདྲི་བ། ཁྱད་པར་དུ་ཡང་རྣམ་པར་
དཀར་བའི་བྱ་བ་རྒྱ་ཆེན་པོ་འདི་ཉིད་བསྒྲུབ་པའི་ཐོག་མཐའ་བར་གསུམ་གྱི་བདག་པོའི་རྐྱེན་བྱེད་པ་པོ་གང་ཡིན་པ་དེ་ཉིད་དོ། །གཉིས་པ་དེའི་ཡོན་ཏན་གྱི་ཁྱད་པར་བརྗོད་པ་ལ། ཡང་དག་པའི་ལུང་ལ་བརྟེན་ནས་སྐྱེ་བའི་སྤྲུལ་སྐུར་གྲུབ་པའི་ཁྱད་པར། གཞོན་ནུའི་ས་ལ་གནས་ནས་ཡ་
རབས་ཀྱི་སྤྱོད་པ་བསྐྱངས་པའི་ཁྱད་པར། བསྟན་པའི་རྗེས་སུ་ཞུགས་ནས་ཐོས་པ་དང་ཚོགས་བསགས་ཀྱི་ཁྱད་པར། བསྟན་སྲིད་ཀྱི་ཁྲི་ལ་བཞུགས་ནས་ཕྲིན་ལས་ཀྱི་རྒྱུན་སྐྱོང་བའི་ཁྱད་པར་བརྗོད་པ་སྟེ་བཞི་ལས། དང་པོ་ཡང་དག་པའི་ལུང་ལ་བརྟེན་ནས་སྐྱེ་བའི་སྤྲུལ་སྐུར་

གྲུབ་པའི་ཁྱད་པར་ནི། སྤྱིར་དེ་བཞིན་གཤེགས་པ་རྣམས་ཀྱིས་དམ་པའི་ཆོས་ཀྱི་ཕྲིན་ལས་འཇིག་རྟེན་གྱི་ཁམས་སུ་ཡུན་རིང་པོར་གནས་པ་དང༌། སེམས་ཅན་ཡོངས་སུ་སྨིན་པར་བྱེད་པའི་ཐབས་མཁས་པའི་ཁྱད་པར་ལ་རྗེས་སུ་ཞུགས་པའི་ཚེ་ན། སངས་རྒྱས་དང་བྱང་ཆུབ་སེམས་
དཔའ་དང༌། འཕགས་པ་ཉན་ཐོས་དང༌། རང་སངས་རྒྱས་དང༌། འཇིག་རྟེན་ན་ཆེ་བའི་ཚངས་པ་དང༌། དབང་པོ་དང༌། འཇིག་རྟེན་སྐྱོང་བ་དང༌། སྟོང་འཁོར་ལོས་སྒྱུར་བའི་རྒྱལ་པོ་དང༌། ཁམས་ཀྱི་རྒྱལ་ཕྲན་དང༌། དམ་པའི་ཆོས་སྨྲ་བ་ལ་སོགས་པའི་རྣམ་པར་འཕྲུལ་པ་བསམ་གྱིས་མི་ཁྱབ་
པས་དོན་མཛད་པ་ཡིན་ཏེ། དེའང་བློ་གྲོས་རྒྱ་མཚོས་ཞུས་པའི་མདོར། དེ་བཞིན་གཤེགས་པའི་དམ་པའི་ཆོས་འཛིན་པ། །བརྒྱ་བྱིན་ཚངས་པ་དེ་བཞིན་འཇིག་རྟེན་སྐྱོང༌། །འཁོར་ལོས་སྒྱུར་དང་མི་ཡི་བདག་པོར་འགྱུར། །བདེ་དང་ཡིད་བདེའི་བྱང་ཆུབ་དེ་འཚང་རྒྱ། །དེ་བཞིན་གཤེགས་
པའི་དམ་པའི་ཆོས་འཛིན་པ། །དེ་ལུས་སུམ་ཅུ་རྩ་གཉིས་མཚན་ལྡན་ཞིང༌། །མཁས་པ་ཡན་ལག་སྨད་པ་མེད་པར་འགྱུར། །དེ་ལ་བལྟ་བས་ངོམས་པར་ཡོངས་མི་འགྱུར། །ཞེས་དང༌། སངས་རྒྱས་ཀྱི་སྟོབས་བསྐྱེད་པ་ཆོ་འཕྲུལ་རྣམ་པར་བསྟན་པ་ཞེས་བྱ་བའི་མདོ་ལས། བཅོམ་
ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །ཀྱེ་རྒྱལ་བའི་བུ་དག་དེ་བཞིན་གཤེགས་པའི་ཐབས་མཁས་པ་དང༌། སེམས་ཅན་ཡོངས་སུ་སྨིན་པར་བྱ་བ་ནི་མང་ངོ༌། །སེམས་ཅན་རྣམས་ཀྱི་བསམ་པ་ཇི་ལྟ་བུ་དང༌། ཇི་ལྟར་འདུལ་བ་དང༌། དགེ་བའི་རྩ་བ་ཇི་ལྟ་བུ་དང༌།
སེམས་ཅན་རྣམས་ཀྱི་མོས་པ་སྣ་ཚོགས་ཀྱི་སྤྱོད་པ་མཁྱེན་ནས་ཆོས་སྟོན་ཏེ། སེམས་ཅན་ཁ་ཅིག་ནི་བྱང་ཆུབ་སེམས་དཔས་འདུལ། ཁ་ཅིག་ནི་ཉན་ཐོས་ཀྱིས་འདུལ། ཁ་ཅིག་ནི་རང་སངས་རྒྱས་ཀྱིས་འདུལ། ཁ་ཅིག་ནི་ལྷས་འདུལ། ཁ་ཅིག་ནི་བརྒྱ་བྱིན་གྱིས་འདུལ། ཁ་ཅིག་ནི་ཚངས་
པས་འདུལ། ཁ་ཅིག་ནི་ཀླུས་འདུལ། ཁ་ཅིག་ནི་རྫུ་འཕྲུལ་ཆེན་པོས་འདུལ། ཁ་ཅིག་ནི་རྒྱལ་པོས་འདུལ། ཁ་ཅིག་ནི་ཏིང་ངེ་འཛིན་གྱིས་འདུལ། ཁ་ཅིག་ནི་ཆོས་ཉན་པས་འདུལ། ཁ་ཅིག་ནི་ཆོ་འཕྲུལ་གྱིས་འདུལ། ཁ་ཅིག་ནི་དེ་བཞིན་གཤེགས་པ་མྱ་ངན་ལས་འདས་པས་འདུལ། ཁ་ཅིག་

ནི་རིང་བསྲེལ་གྱིས་འདུལ། ཁ་ཅིག་ནི་མཆོད་རྟེན་བྱེད་དུ་འཇུག །གཙུག་ལག་ཁང་དང་སྐྱེད་མོས་ཚལ་བྱེད་དུ་གཞུག་པའི་དགེ་བའི་རྩ་བར་སྤྲོ་བ་བསྐྱེད་པས་འདུལ། ཁ་ཅིག་ནི་སྐུ་གཟུགས་བྱེད་དུ་གཞུག་པ་དང༌། རི་མོ་དང༌། གསེར་དང༌། དངུལ་དང༌། ར་གན་གྱིས་སྐུ་གཟུགས་བྱེད་དུ་
གཞུག་པའི་དགེ་བའི་རྩ་བ་ལ་སྤྲོ་བ་བསྐྱེད་པས་འདུལ། ཁ་ཅིག་ནི་དགེ་སློང་གི་དགེ་འདུན་ལ་མཆོད་པ་དང་བཀུར་སྟི་བྱ་བའི་དགེ་བའི་རྩ་བར་སྤྲོ་བ་བསྐྱེད་པས་འདུལ། ཁ་ཅིག་ནི་མདོ་སྡེ་འདྲི་བ་དང༌། འདྲིར་གཞུག་པ་དང༌། བཀླག་པ་ལ་སྤྲོ་བ་བསྐྱེད་པས་འདུལ། ཁ་ཅིག་ནི་མར་མེ་དང༌། སྤོས་དང༌།
མེ་ཏོག་དང༌། དྲི་དང༌། ཕྲེང་བ་དང༌། དོ་ཤལ་ལ་སོགས་པས་བརྒྱན་པ་ལ་སྤྲོ་བ་བསྐྱེད་པས་འདུལ་བ་ཡིན་ཏེ། དོན་དམ་པ་མཁས་པའི་ཆོས་དང་ལྡན་པ་དང༌། མྱ་ངན་ལས་འདས་པའི་ཆོས་དང་ལྡན་པ་ནི་མ་ཡིན་ནོ། །ཀྱེ་རྒྱལ་བའི་སྲས་དག་ཡང་དེ་བཞིན་གཤེགས་པས་ནི་མི་མཁྱེན་པ་དང༌། མི་
གཟིགས་པ་དང༌། མི་གསན་པ་དང༌། རྣམ་པར་མི་མཁྱེན་པ་ཅུང་ཟད་ཀྱང་མི་མངའ་སྟེ། འོང་བ་ཡང་མཁྱེན། མ་འོངས་པ་ཡང་མཁྱེན། འདས་པ་ཡང་མཁྱེན། ད་ལྟར་བྱུང་བ་ཡང་མཁྱེན། སེམས་ཅན་ཐམས་ཅད་ཀྱི་སྤྱོད་ལམ་ཡང་མཁྱེན། སྤྱོད་པ་ཡང་མཁྱེན། ཁམས་ཀྱང་མཁྱེན།
སྐྱེ་བ་ཡང་མཁྱེན། འབྱུང་བ་ཡང་མཁྱེན་ཏོ། །ཀྱེ་རྒྱལ་བའི་སྲས་དག་འདི་ལྟ་སྟེ། དཔེར་ན་སྨན་པ་ལེགས་པར་བསླབས་པ་ཚེའི་རིག་པ་ཡན་ལག་བརྒྱད་པ་ཐམས་ཅད་ལ་ཆེས་མཁས་ཤིང་ཁམས་ཐམས་ཅད་ལ་མཁས་པ། སྨན་དང་ཡོ་བྱད་སྦྱོར་བ་ལ་བརྩོན་པ་ནི། སེམས་ཅན་ནད་པ་
ནད་སྣ་ཚོགས་ཀྱིས་ལུས་ཡོངས་སུ་གཟིར་བ་རྣམས་ཀྱི་ཁམས་ཀྱང་ཤེས། དུས་ཀྱང་ཤེས། ཚོད་ཀྱང་ཤེས། སྨན་ཡང་ཤེས། རླུང་ལས་གྱུར་པ་དང༌། མཁྲིས་པ་ལས་གྱུར་པ་དང༌། བད་ཀན་ལས་གྱུར་པ་དང༌། འདུས་པ་ལས་གྱུར་པ་དང༌། ཁྲག་ལས་གྱུར་པ་དང༌། མ་ཞུ་བ་ལས་གྱུར་པ་དང༌།
སྐྲན་དང༌། དམུ་རྫིང་དང༌། སྙིང་ནད་དང༌། མཛེ་དང༌། གཡན་པ་དང༌། ཤུ་བ་དང༌། འབྲས་ལ་སོགས་པ་དང༌། དུག་དང༌། མེ་དབལ་ལ་སོགས་པའང་ཤེས་སོ། །དེས་ཐམས་ཅད་ཤེས་ནས་སྨན་གྱི་རྫས་སྣ་ཚོགས་ཀྱི་ཕྱེ་མ་དང༌། སྣ་ནས་བླུགས་པའི་ལས་དང༌། གཏར་ག་གདབ་པ་དང༌། མར་

དང༌། འབྲུ་མར་བསྐོལ་བ་དང༌། སྨིན་པར་བྱ་བ་རྣམས་སྦྱོར་བའི་ཐབས་ཀྱིས་སེམས་ཅན་ཐམས་ཅད་ཀྱི་ནད་དེ་དག་ཐམས་ཅད་ཉེ་བར་ཞི་བར་བྱེད་ཅིང་ནད་སྣ་ཚོགས་ཀྱི་འཇིགས་པ་ལས་ཡོངས་སུ་ཐར་བར་བྱེད་དོ། །ཀྱེ་རྒྱལ་བའི་སྲས་དག་དེ་བཞིན་དུ་དེ་བཞིན་གཤེགས་པས་ཏིང་ངེ་འཛིན་
སྣ་ཚོགས་དང༌། རྫུ་འཕྲུལ་གྱི་རྐང་པ་དང༌། སྟོབས་དང༌། མི་འཇིགས་པ་དང༌། ལྷའི་མིག་དང་རྣ་བ་རྣམས་ཀྱི་ཚེའི་རིག་པ་ཡན་ལག་བརྒྱད་དང་ལྡན་པས་སེམས་ཅན་གྱི་ཁམས་དང་བཅས་སྦྱོར་བ་སྣ་ཚོགས་ལ་མཁས་པས། འདོད་ཆགས་དང༌། ཞེ་སྡང་དང༌། གཏི་མུག་གི་ནད་
དང༌། ཉོན་མོངས་པ་དང་ཉེ་བའི་ཉོན་མོངས་པའི་ནད་ཀྱིས་གཟིར་བའི་སེམས་ཅན་དང༌། ང་རྒྱལ་དང་རྒྱགས་པ་དང་དྲེགས་པས་བསྒྲིབས་པ་དང༌། ཆགས་པ་དང༌། མྱ་ངན་དང༌། འཇིགས་པ་དང༌། ཁྲོ་བས་བསྒྲིབས་པ་རྣམས་སེམས་ཅན་དམྱལ་བ་དང༌། དུད་འགྲོའི་སྐྱེ་གནས་དང༌། ཡི་
དྭགས་ཀྱི་སྐྱེ་གནས་དང༌། གཤིན་རྗེའི་འཇིག་རྟེན་གྱི་གནས་ནས་ཡོངས་སུ་ཐར་བར་བྱ་བའི་ཕྱིར་ཐབས་མཁས་པ་སྣ་ཚོགས་དང༌། སྦྱོར་བ་སྣ་ཚོགས་དང༌། ཏིང་ངེ་འཛིན་སྣ་ཚོགས་དང༌། རྫུ་འཕྲུལ་གྱི་རྣམ་པར་རོལ་པས་སེམས་ཅན་རྣམས་ཡོངས་སུ་སྒྲོལ་བར་བྱས་ནས་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ཀྱི་སར་བཀོད་པས་ལྷག་མ་མ་ལུས་པའི་མྱ་ངན་ལས་འདས་པའི་དབྱིངས་སུ་མྱ་ངན་ལས་འདས་པར་མཛད་དོ། །མི་དགེ་བའི་ཆོས་བརྒྱད་ལས་ཡོངས་སུ་ཐར་བར་མཛད་ཅིང༌། འཕགས་པའི་ལམ་ཡན་ལག་བརྒྱད་པ་ལ་འགོད་པ་ནི། རིགས་ཀྱི་བུ་འདི་ལྟ་སྟེ་དཔེར་ན་ཟླ་
བའི་དཀྱིལ་འཁོར་ནི་ཐབས་ལ་མཁས་པ་དང་ལྡན་པས་ཇི་ལྟར་ཁམས་ཀྱི་དགེ་བའི་རྩ་བ་འདུལ་བའི་སེམས་ཅན་རྣམས་ཀྱི་དོན་དུ་བདག་ཉིད་མི་སྣང་བར་ཡང་སྟོན། ཟླ་བ་ཁམ་པ་ལྟ་བུའི་དཀྱིལ་འཁོར་ཀྱང་སྟོན། ཟླ་བ་མར་གྱི་ངོ་དང་ཡར་གྱི་ངོ་ཡང་སྟོན། ཟླ་བའི་དཀྱིལ་འཁོར་ཡོངས་སུ་རྒྱས་
པ་ཡང་སྟོན། མུན་ནག་ཐིབས་པོ་ཐམས་ཅད་ཀྱང་རྣམ་པར་བསལ། རྩྭ་དང་ཤིང་གེལ་པ་དང་སྨན་དང་འབྲུ་ལ་སོགས་པ་ཡང་བསིལ་བར་བྱེད་དོ། །ཀྱེ་རྒྱལ་བའི་སྲས་དག་དེ་བཞིན་དུ་དེ་བཞིན་གཤེགས་པས་ཀྱང་སྡུག་བསྔལ་རྣམ་པ་སྣ་ཚོགས་ཀྱིས་བསྒྲིབས་པའི་སེམས་ཅན་རྣམས་དང་

ཁམས་སྣ་ཚོགས་ཀྱིས་འདུལ་བའི་སེམས་ཅན་རྣམས་ཀྱི་སྤྱོད་པ་མཁྱེན་ནས་ཡོངས་སུ་མྱ་ངན་ལས་འདའ་ཡང་སྐྱེ་བར་ཡང་སྟོན། འཁོར་ལོས་སྒྱུར་བའི་རྒྱལ་པོར་ཡང་སྟོན། རྩེ་བ་དང༌། དགའ་བ་དང༌། བུད་མེད་ཀྱི་བཞད་གད་དང༌། ཀུ་རེ་དང༌། དྲི་དང༌། ཕྲེང་བ་དང༌།
དགའ་ཞིང་རྩེ་བ་ཡང་སྟོན། ཁྱིམ་ནས་འབྱུང་བ་དང༌། རབ་ཏུ་བྱུང་བ་དང༌། དཀའ་བ་སྤྱོད་པ་རྣམས་ཀྱང་སྟོན། བདུད་བཏུལ་བ་དང༌། ཆོས་ཀྱི་འཁོར་ལོ་བསྐོར་བ་ནས། ཆོས་ཀྱི་སྤྲིན་ཆེན་པོའི་ཆར་འབབ་པས་སེམས་ཅན་རྣམས་ཚིམ་པར་བྱེད་པའི་བར་ཡང་སྟོན། དེ་བཞིན་གཤེགས་
པ་རྣམས་ཡོངས་སུ་མྱ་ངན་ལས་འདས་ཀྱང་སྤྱོད་པ་སྣ་ཚོགས་ཀྱིས་རིང་བསྲེལ་མཆོད་པ་དང༌། མཆོད་རྟེན་དང༌། གཙུག་ལག་ཁང་དང་སྐུ་གཟུགས་བྱེད་དུ་གཞུག་པ་དང༌། རབ་ཏུ་བྱུང་བའི་ཕྱིར་ཁྱིམ་ནས་བྱུང་བ་དང༌། དགེ་སློང་གི་དགེ་འདུན་རྣམས་མཆོད་པ་དང༌། དམ་པའི་ཆོས་འདྲི་
བ་དང༌། བཀླག་པ་དང༌། ཁ་ཏོན་དུ་བྱ་བ་ལ་སྤྲོ་བ་བསྐྱེད་པ་དག་གིས་ཀྱང་སེམས་ཅན་ཐམས་ཅད་ཐར་བར་མཛད་པ་དང༌། འཛིན་པ་དང༌། བརྟུལ་ཞུགས་དང༌། སྡོམ་པ་དང༌། ཉེ་བར་གནས་པ་དང༌། དགེ་བསྙེན་གྱི་སྡོམ་པ་རྣམས་འཛིན་དུ་གཞུག་པའི་ཐབས་མཁས་པས་ཀྱང་སེམས་ཅན་རྣམས་ཐར་བར་
མཛད་དེ། སེམས་ཅན་དམྱལ་བ་དང༌། དུད་འགྲོའི་སྐྱེ་གནས་དང༌། གཤིན་རྗེའི་འཇིག་རྟེན་དང༌། མི་ཁོམ་པ་དང༌། ངན་སོང་དང༌། ངན་འགྲོ་ཐམས་ཅད་ལས་ཡོངས་སུ་ཐར་པར་མཛད་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བཀོད་དོ་ཞེས་དང༌། མདོ་སྡེ་ས་བཅུ་པ་ལས། ས་
དང་པོ་ལ་གནས་པའི་བྱང་ཆུབ་སེམས་དཔའ་རྣམས་ནི་ཕལ་ཆེར་ཛམྦུའི་གླིང་གི་དབང་པོར་འགྱུར་ཞིང༌། དབང་ཕྱུག་ཆེན་པོ་ལ་དབང་རབ་ཏུ་ཐོབ་པ་དང༌། ཆོས་རྗེས་སུ་བསྲུང་བ་དང༌། གཏོང་བ་ཆེན་པོས་སེམས་ཅན་རྣམས་སྡུད་པའི་གཙོ་བོར་གྱུར་ཅིང༌། སེམས་ཅན་རྣམས་ཀྱི་སེར་སྣའི་དྲི་མ་
བཟློག་པ་ལ་མཁས་པ་ཡིན། གཏོང་བ་ཆེན་པོ་རྩོམ་པ་ལ་ཡོངས་སུ་དུབ་པར་མི་འགྱུར་བ་ཡིན་ནོ། །སྦྱིན་པ་དང༌། སྙན་པར་སྨྲ་བ་དང༌། དོན་སྤྱོད་པ་དང༌། དོན་མཐུན་པས་ལས་གང་ཅི་རྩོམ་ཡང་རུང་སྟེ། དེ་ཐམས་ཅད་སངས་རྒྱས་ཡིད་ལ་བྱ་བ་དང༌། ཆོས་ཡིད་ལ་བྱ་བ་དང༌། དགེ་

འདུན་ཡིད་ལ་བྱ་བ་དང༌། བྱང་ཆུབ་སེམས་དཔའ་ཡིད་ལ་བྱ་བ་ནས། རྣམ་པ་ཐམས་ཅད་ཀྱི་མཆོག་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་ཡིད་ལ་བྱ་བ་དང་མི་འབྲལ་བ་ཡིན་ཏེ། ཇི་ལྟར་ན་སེམས་ཅན་ཐམས་ཅད་ཀྱི་མཆོག་ཏུ་འགྱུར། གཙོ་བོར་འགྱུར། ཕུལ་དུ་འགྱུར་རོ་ཞེས་
དང༌། འཕགས་པ་ཆོས་ཐམས་ཅད་ཡང་དག་པར་སྡུད་པ་ཞེས་བྱ་བའི་མདོ་ལས། བྱང་ཆུབ་སེམས་དཔའ་རྣམས་ཀྱི་འཕྲུལ་པ་ཆེན་པོ་རྣམ་པ་བཅུར་ཁོང་དུ་ཆུད་པར་བྱ་སྟེ། གང་ཞེ་ན་འཁོར་ལོས་སྒྱུར་བར་འཕྲུལ་བ་དང༌། བརྒྱ་བྱིན་དུ་འཕྲུལ་བ་དང༌། ཚངས་པར་འཕྲུལ་བ་དང༌། ཉན་ཐོས་སུ་
འཕྲུལ་བ་དང༌། རང་སངས་རྒྱས་སུ་འཕྲུལ་བ་དང༌། བྱང་ཆུབ་སེམས་དཔར་འཕྲུལ་བ་དང༌། སངས་རྒྱས་སུ་འཕྲུལ་བ་དང༌། སངས་རྒྱས་ཀྱི་ཞིང་དུ་འཕྲུལ་བ་དང༌། བྱང་ཆུབ་ཀྱི་སྙིང་པོར་འཕྲུལ་བ་དང་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་འཕྲུལ་བ་ཆེན་པོར་ཁོང་དུ་ཆུད་པར་བྱའོ། །དེ་
ལ་ནམ་འཇིག་རྟེན་ན་འཁོར་ལོས་སྒྱུར་བའི་རྒྱལ་པོ་གཙོ་བོར་བྱེད་ཅིང་ཚུལ་ཁྲིམས་ཡང་དག་པར་འཛིན་པ་དང༌། སྤྱོད་པ་གཙོ་བོ་བྱེད་པ་དེར་ནི་བྱང་ཆུབ་སེམས་དཔའ་སེམས་དཔའ་ཆེན་པོས་འཁོར་ལོས་སྒྱུར་བའི་བཀོད་པ་རྣམ་པར་སྤྲུལ་ནས་སེམས་ཅན་གྱི་དོན་བྱེད་དོ་ཞེས་སོགས་དང༌། དེ་ལ་སོགས་
པ་འཁོར་ལོས་སྒྱུར་བའི་རིན་པོ་ཆེ་བཀོད་པ་ཐམས་ཅད་སྤྲུལ་ནས། བྱང་ཆུབ་སེམས་དཔའ་སེམས་ལ་དབང་བ། སེམས་ཅན་ཐམས་ཅད་ལ་ཕན་པ་དང་བདེ་བའི་ལྷག་པའི་བསམ་པ་ཅན། མི་རིན་པོ་ཆེ་ཁ་ན་མ་ཐོ་བ་མེད་པའི་ལས་ཟབ་པ། སྣུམ་པ། ཕན་པའི་ལྷག་པའི་བསམ་པ་དམ་པ་ཆོས་ཆེན་པོ་
ལ་གཞོལ་བ། འཁོར་ལོས་སྒྱུར་བ་ཆེན་པོ་དགེ་བ་བཅུའི་ལས་ཀྱི་ལམ་ལ་བརྟེན་པ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པས་སེམས་ཅན་རྣམས་ཡོངས་སུ་སྨིན་པར་བྱེད་དེ། འདི་ནི་བྱང་ཆུབ་སེམས་དཔའི་འཁོར་ལོས་སྒྱུར་བར་འཕྲུལ་བ་ཆེན་པོ་ཞེས་བྱའོ་ཞེས་དང༌། ཐེག་པ་ཆེན་
པོའི་བསྟན་བཅོས་མདོ་སྡེ་རྒྱན་ལས། བྱང་ཆུབ་སེམས་དཔའ་རྟག་ཏུ་ནི། །ཁྱིམ་པ་འཁོར་ལོས་སྒྱུར་རྣམས་སུ། །གྱུར་ནས་སྐྱེ་བ་ཐམས་ཅད་དུ། །སེམས་ཅན་རྣམས་ཀྱི་དོན་བྱེད་དོ། །ཞེས་དང༌། དཔལ་མགོན་འཕགས་པ་ཀླུ་སྒྲུབ་ཀྱིས་རིན་ཆེན་ཕྲེང་བར། དེ་དག་དང་པོར་རབ་དགའ་བ། །བྱང་ཆུབ་

སེམས་དཔའ་དགའ་བྱེད་ཕྱིར། །ཀུན་ཏུ་སྦྱོར་བ་གསུམ་སྤངས་ཤིང༌། །དེ་བཞིན་གཤེགས་པའི་རིགས་སྐྱེས་ཕྱིར། །དེ་ཡི་རྣམ་པར་སྨིན་པས་ན། །སྦྱིན་པའི་ཕ་རོལ་ཕྱིན་མཆོག་གྱུར། །འཇིག་རྟེན་ཁམས་ནི་བརྒྱ་གཡོ་ཞིང༌། །འཛམ་གླིང་དབང་ཕྱུག་ཆེན་པོར་གྱུར། །ཞེས་སོ། །དེས་ན་སངས་
རྒྱས་དང་བྱང་ཆུབ་སེམས་དཔའ་རྣམས་ནི་གདུལ་བྱ་འདུལ་བའི་ཐབས་ཀྱི་རྣམ་པ་ཅིར་ཡང་སྟོན་པ་ལ་ཞུགས་པ་ན། བརྒྱ་བྱིན་དང༌། ཚངས་པ་དང༌། འཇིག་རྟེན་སྐྱོང་བ་དང༌། འཁོར་ལོས་སྒྱུར་བ་དང༌། མིའི་རྒྱལ་པོ་དང༌། ཉན་ཐོས་དང༌། རང་སངས་རྒྱས་དང༌། དགྲ་བཅོམ་པ་དང༌། བྱང་ཆུབ་སེམས་དཔའ་ལ་སོགས་
པའི་ཚུལ་བཟུང་ནས། དེ་བཞིན་གཤེགས་པའི་ཕྲིན་ལས་ཀྱི་རྒྱུན་མི་ནུབ་པར་སྐྱོང་བར་བྱེད་དོ། །བྱེ་བྲག་ཏུ་དམ་པའི་ཆོས་ཡུན་དུ་གནས་པར་བྱེད་པ་དང༌། སེམས་ཅན་རྣམས་ཉེས་པར་བྱེད་པ་ལས་བཟློག་ནས་ལེགས་པར་བྱེད་པ་ལ་འགོད་པ་ལ་སོགས་པར་ཆོས་དང་ལྡན་པའི་མིའི་རྒྱལ་པོའི་སྐྱེ་བར་སྤྲུལ་པ་ནི་
ལྷ་དང་མིའི་ཡུལ་ན་གྲགས་པ་དགེ་བའི་གཞིར་གྱུར་པ་སྟེ། གསེར་འོད་དམ་པ་ལས། རྒྱལ་པོ་ཆོས་དང་ལྡན་པ་ཡི། །གྲགས་པ་འཇིག་རྟེན་གསུམ་གང་སྟེ། །སུམ་ཅུ་གསུམ་གྱི་གནས་རྣམས་ན། །ལྷ་ཡི་དབང་པོ་དགར་འགྱུར་ཏེ། །འཛམ་བུའི་གླིང་ན་ངེད་ཀྱི་བུ། །འདི་ལྟར་ཆོས་ལྡན་རྒྱལ་པོ་ཡིན། །
ཆོས་ཀྱི་ཡུལ་འཁོར་དེར་བརྟེན་ནས། །ལེགས་པར་བྱེད་ལ་སྐྱེ་བོ་བཀོད། །རྒྱལ་པོ་དེ་ནི་ལེགས་བྱེད་པས། །སྐྱེ་བོ་དག་ནི་འདིར་འགྱེད་དེ། །ལྷ་དང་ལྷ་ཡི་བུ་རྣམས་ཀྱིས། །ལྷ་གནས་གང་བར་བྱེད་སྙམ་མོ། །ཆོས་ཀྱི་ཡུལ་འཁོར་དེར་བསྟན་པས། །རྒྱལ་པོ་རྣམས་ནི་རབ་ཏུ་དགའ། །ལྷ་དབང་རབ་ཏུ་དང་གྱུར་
པས། །མི་ཡི་རྒྱལ་པོ་དེ་ལ་བསྲུང༌། །ཉི་ཟླ་དང་ནི་དེ་བཞིན་དུ། །རྒྱུ་སྐར་ལེགས་པར་རྒྱུ་བར་འགྱུར། །རླུང་ཡང་དུས་སུ་ལྡང་འགྱུར་ཞིང༌། །ཆར་པའང་དུས་སུ་འབབ་པར་འགྱུར། །ལྷ་གནས་རྣམས་དང་དེ་བཞིན་དུ། །ཡུལ་འཁོར་རྣམས་སུ་ལོ་ལེགས་བྱེད། །ལྷ་དང་ལྷ་ཡི་བུ་རྣམས་ཀྱིས། །ལྷ་ཡི་གནས་རྣམས་གང་
བར་བྱེད། །དེ་ལྟ་བས་ན་རྒྱལ་པོ་ཡི། །བདག་གིས་ཕངས་པའི་སྲོག་བཏང་གིས། །བདག་གིས་འཇིག་རྟེན་བདེར་འགྱུར་བའི། །དཀོན་མཆོག་ཆོས་ནི་མི་བཏང་སྟེ། །ཡོན་ཏན་རྣམས་ཀྱིས་གང་བརྒྱན་པ། །ཆོས་དང་ལྡན་པས་བསྟེན་པར་བྱ། །རང་གིས་སྐྱེ་བོ་རྟག་དགའ་བ། །རྟག་ཏུ་སྡིག་པ་རྣམ་པར་སྤང༌། །ཆོས་ཀྱིས་ཡུལ་འཁོར་

བསྐྱང་བར་བྱ། །ཆོས་ཀྱང་ཡང་དག་བསྟན་པར་བྱ། །ལེགས་པར་བྱེད་ལ་སེམས་ཅན་དགོད། །ཉེས་བྱེད་ལས་ནི་བཟློག་པར་བྱ། །གང་ཚེ་སྡིག་པ་བྱེད་པ་རྣམས། །ཚུལ་བཞིན་འདུལ་བར་བྱེད་པའི་ཚེ། །ཡུལ་འཁོར་དུ་ནི་ལོ་ལེགས་ཤིང༌། །རྒྱལ་པོ་གཟི་བརྗིད་ལྡན་པར་འགྱུར། །རྒྱལ་པོ་གྲགས་དང་ལྡན་འགྱུར་ཞིང༌། །སྐྱེ་དགུ་
རྣམས་ཀྱང་བདེ་བར་སྐྱོང༌། །ཞེས་སོ། །དེ་བས་ན་བྱང་ཆུབ་སེམས་དཔའ་སྡོམ་བརྩོན་མིའི་དབང་ཕྱུག་ཆེན་པོ་འདི་ནི། སྐྱེ་བ་ནས་སྐྱེ་བར་སྙིང་སྟོབས་དམན་པ་མིན་པའི་ཐུགས་བསྐྱེད་ཀྱི་ཁུར་ཆེན་པོ་ཡོངས་སུ་ཁྱེར་བས། དུས་སྙིགས་མ་ལྔའི་མུན་ཀློང་སྟུག་པོའི་ཁྲོད་དུ་རང་དབང་མེད་པར་ཆུད་པའི་འགྲོ་བ་རྣམས་གནས་
སྐབས་དང་མཐར་ཐུག་གི་བདེ་བ་ལ་ཅི་ནུས་སུ་དགོད་པའི་ཕྱིར་དང༌། དགེ་ལེགས་ཐམས་ཅད་ཀྱི་འབྱུང་གནས་སུ་གྱུར་པ་དམ་པའི་ཆོས་རིན་པོ་ཆེ་འཇིག་རྟེན་གྱི་ཁམས་སུ་ཡུན་རིང་པོར་གནས་པའི་ཆོ་ག་མཐའ་དག་བསྒྲུབ་པའི་གཡར་དམ་དང་སྨོན་ལམ་གྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱ་བའི་ཕྱིར། ས་
གཞི་ཡངས་པ་ཆོས་བཞིན་དུ་སྐྱོང་བ་ལ་བསྙེངས་པ་དང་བྲལ་བའི་སྟོབས་དང་འབྱོར་པ་དང་གྲགས་པ་དཀར་པོས་མངོན་པར་མཐོ་བའི་མིའི་རྒྱལ་པོ་ཆེན་པོར་སྐྱེ་བའི་སྤྲུལ་སྐུའི་དཔག་བསམ་གྱི་ལྗོན་པ་ཡོངས་སུ་བཟུང་ནས། འགྲོ་བ་ཀུན་གྱི་ཉེར་འཚོའི་གཞིར་བྱེད་པ་གདོན་མི་ཟ་བ་ཞིག་གོ །གཉིས་པ་གཞོན་ནུའི་ས་
ལ་གནས་ནས་ཡ་རབས་ཀྱི་སྤྱོད་པ་བསྐྱངས་པའི་ཁྱད་པར་ནི། དེ་ལྟར་རིང་ནས་དགེ་ཚོགས་དཔག་ཏུ་མེད་པ་མངོན་པར་འདུ་བྱས་པའི་མཐུ་ལས་ལེགས་པར་འཁྲུངས་པའི་བསོད་ནམས་ཀྱི་སྐལ་བ་ཆེན་པོ་དང་ལྡན་པ། བསམ་པ་དགེ་བ། རང་དང་གཞན་ལ་ཕན་པར་ཞུགས་པ། སྙིང་རྗེ་དང་ལྡན་པ། བདག་ཉིད་
ཆེན་པོ་དམ་པའི་ཆོས་འདོད་པ། འགྲོ་བ་ཐམས་ཅད་ལ་མཉེས་གཤིན་པ་ལ་སོགས་པ་ཡ་རབས་དམ་པའི་ཁྱད་པར་དང་ལྡན་པ་ཞིག་སྟེ། དེའང་འཕགས་མཆོག་ཀླུ་སྒྲུབ་ཀྱིས། གཞོན་ཡང་རྒན་པའི་ཉེ་བར་ཞི་ལ་དགའ། །མཁས་པར་གྱུར་ཀྱང་ཤེས་པའི་ང་རྒྱལ་མེད། །གཟི་བརྗིད་ཆེ་ཡང་བཟོད་ཅིང་དེས་པའི་
ངང༌། །ཇེ་མཐོར་ཕྱིན་ཡང་ང་རྒྱལ་དྲེགས་པ་མེད། །ཅེས་དང༌། སེར་སྣ་གཡོ་སྒྱུ་ཆགས་དང་སྙོམ་ལས་དང༌། །མངོན་པའི་ང་རྒྱལ་འདོད་ཆགས་ཞེ་སྡང་དང༌། །རིགས་དང་གཟུགས་དང་ཐོས་པ་ལང་ཚོ་དང༌། །དབང་ཐང་ཆེ་བས་རྒྱགས་པ་དགྲ་བཞིན་གཟིགས། །ཞེས་གསུངས་པ་བཞིན་དུ་ལང་ཚོ་གཞོན་ནུའི་ས་

ལ་གནས་པའི་དུས་ནས། རང་གི་བླ་མར་གྱུར་པ་དང༌། སློབ་དཔོན་དང༌། མཁས་པ་ཡོན་ཏན་ཅན་དང༌། ཕ་མ་ལ་སོགས་པ་ཞེ་ས་བགྱི་བའི་འོས་སུ་གྱུར་པ་གང་ཡིན་པ་དག་ལ་ཞེ་སར་མཁས་པའི་སྲི་ཞུའི་སྒོ་ནས་མངོན་པར་མཆོད་ཅིང༌། རང་ཉིད་ནི་དཔའ་བ་དང༌། རྟུལ་ཕོད་པ་དང༌།
ཡན་ལག་མཆོག་གི་གཟུགས་དང་ལང་ཚོར་ལྡན་པ། འགྲོ་བ་ཐམས་ཅད་ཀྱི་མིག་ཏུ་སྡུག་ཅིང་ཡིད་འཕྲོག་པར་བཟོད་པ། པདྨའི་རྫིང་བུར་འཁྲུངས་པའི་ཆུ་སྐྱེས་གཞོན་ནུ་ཁ་ཕྱེ་མ་ཐག་པ་ཇི་ལྟ་བ་བཞིན་དུ་ཁ་དོག་རྒྱས་ཤིང༌། གཏམ་གྱི་སྒོ་ནས་ལི་ཤི་གསར་པའི་དྲི་འབྱུང་བ་ལ་སོགས་པ་གཞོན་
ནུ་དམ་པའི་ཡོན་ཏན་གྱི་ཚོགས་མང་པོས་ལེགས་པར་བཟུང་བའོ། །དེར་མ་ཟད་བསླད་པ་མེད་པའི་རིགས་དང༌། བརྫི་བ་མེད་པའི་སྟོབས་དང༌། གཞོམ་དུ་མེད་པའི་དཔུང་པ་དང༌། བྲི་བ་མེད་པའི་མངའ་ཐང་དང་དཔལ་འབྱོར་ཕུན་སུམ་ཚོགས་པ་དག་གིས་ཕྱུར་བུར་གཏམས་པར་གྱུར་མོད་
ཀྱི། བདག་ནི་འདི་ལྟར་བསོད་ནམས་ཀྱི་མཐུ་ཆེན་པོ་དང་ལྡན་ནོ་སྙམ་དུ་གཞན་ལ་ཇི་མི་སྙམ་བྱེད་པའི་མངོན་པར་ཁེངས་པ་ཡོངས་སུ་སྤངས་པ་དང༌། རང་གི་བདོག་པའི་དངོས་པོ་དབྱིག་གི་རྣམ་པའམ། འབྲུའི་བང་བའམ། བཟའ་བ་དང་བཅའ་བའི་རྣམ་པའམ། བགོ་བ་དང་རྒྱན་གྱི་བྱེ་
བྲག་གམ། རྟ་དང་བཞོན་པ་ལ་སོགས་པ་གང་ཅིའང་རུང་ལ་མངོན་པར་ཞེན་ཅིང༌། འདི་ནི་དཀོན་མཆོག་གི་ཕྱོགས་སུ་མཆོད་པར་ཕུལ་བའམ། བཀྲེན་པ་དང་ཕོངས་པ་དང༌། ཉམ་ཐག་པ་དང༌། མགོན་མེད་པ་དང༌། ནད་པ་དང༌། ཡུལ་གཞན་ནས་བསྐྲད་པ་ལ་སོགས་པ་སྙིང་རྗེའི་ཡུལ་
དུ་གྱུར་པའི་སྐྱེ་བོ་རྣམས་ལ་སྦྱིན་པར་བྱིན་ན། སླར་ཡང་འདི་དང་འདི་ལྟ་བུའི་འབྱོར་བ་དག་གིས་ཡོངས་སུ་དབེན་པར་འགྱུར་རོ་སྙམ་པ་ལ་སོགས་པ་སོག་སྲུང་གི་སྡུག་བསྔལ་དུ་འགྱུར་བའི་སེར་སྣའི་འཆིང་བ་ཐམས་ཅད་ལས་རང་བཞིན་གྱིས་གྲོལ་བ། སློང་བ་ཐམས་ཅད་ཀྱི་དཔག་
བསམ་ལྗོན་པ་ལྟ་བུའི་གཏོང་ཕོད་ཆེན་པོའི་ཕྱག་རིང་རབ་ཏུ་རྐྱོང་བ། དགེ་བའི་རྩ་བ་ལ་གཅིག་ཏུ་འདུན་ཅིང་སྤྲོ་བ་མཆོག་གི་རྩེར་འཛེགས་པ་ཞིག་གོ། །དེར་མ་ཟད། མགོན་པོ་བྱམས་པས། རིག་པའི་གནས་ལྔ་དག་ལ་སྦྱོང་བར་མ་བྱས་ན། །འཕགས་མཆོག་ཅི་གསུང་ཐམས་ཅད་མཁྱེན་

ཉིད་མི་འགྱུར་ཏེ། །ཞེས་དང༌། ས་སྐྱ་པཎྜི་ཏས། མ་བསླབས་པ་ལ་ཀུན་མཁྱེན་དུ། །འགྱུར་ན་རྒྱུ་འབྲས་ག་ལ་བདེན། །རྒྱུ་འབྲས་བསླུ་བ་མེད་པ་འདི། །ཐམས་ཅད་མཁྱེན་པའི་ཁྱད་ཆོས་ཡིན། །ཞེས་གསུངས་པ་དང༌། སྐྱེས་རབས་ལས་ཀྱང༌། །ཡོན་ཏན་ཡོད་ན་རྒྱལ་པོའི་གོ་འཕང་
དང༌། །སྐྱེ་དགུ་མངོན་པར་མཐོ་བ་ཐོབ་པར་འགྱུར། །ལྷ་དབང་དཔལ་ཡང་ཡོན་ཏན་ལ་ལྟོས་ཏེ། །ཡོན་ཏན་ཡོད་ན་ཕ་རོལ་མགུ་བར་འགྱུར། །གྲགས་པ་རྣམས་ཀྱང་ཡོན་ཏན་ཉིད་ལས་འཕྲོ། །བདག་ཉིད་ཆེ་བའང་ཡོན་ཏན་ལྡན་ལས་འབྱུང༌། །ཟླ་འོད་ལས་ཀྱང་གསལ་བའི་ཡོན་ཏན་
གྱིས། །དགྲ་བོ་མི་ཟད་དྲེགས་ཤིང་སྡང་བ་དང༌། །འཁོན་རྙིང་ཡོད་ཅིང་ཕྲག་དོག་ཆེ་བ་ཡང༌། །ཡིད་ནི་རབ་ཏུ་དང་ཞིང་མགུ་བྱེད་དོ། །ཞེས་གསུངས་པ་ལྟར་གནས་སྐབས་སུ་སྐྱོན་ཡོན་གྱི་ཁྱད་པར་མ་འཁྲུལ་བར་རྣམ་པར་འབྱེད་ཅིང་བླང་དོར་གྱི་གནད་ལ་མཁས་པར་འགྱུར་བ་དང༌། དེ་
ལ་བརྟེན་ནས་མཛའ་བ་དང་མཛའ་བ་མ་ཡིན་པའི་སྐྱེ་བོ་ཐམས་ཅད་མ་བསྡུས་པར་ཡང་རང་དབང་དུ་འདུ་བར་འགྱུར་བ་དང༌། སྲིད་པ་ནས་སྲིད་པ་ཐམས་ཅད་དུ་ཡོན་ཏན་གྱི་གྲགས་པའི་ཟླ་འོད་དཀར་པོ་ཕྱོགས་བཅུའི་ཁོ་ར་ཁོར་ཡུག་ཐམས་ཅད་དུ་ཉུལ་བ་ཡང་ཡོན་ཏན་གྱི་དབང་
ལས་བྱུང་བར་རྗེས་སུ་རྟོགས་སོ། །དེ་ལྟར་རྟོགས་ནས་ཀྱང་ཐོག་མར་འཇིག་རྟེན་པའི་བཟོའི་གནས་དང༌། ལས་ཀྱི་གནས་དང༌། ཡི་གེ་དང༌། གྲངས་དང༌། རྩིས་དང༌། ལག་རྩིས་དང༌། རལ་གྲིའི་ཐབས་དང༌། འཕོང་དང༌། སྟོབས་དང༌། གྱད་ཀྱི་འཛིན་སྟངས་
རྣམས་ལ་སེམས་ཅན་གཞན་ལས་ཁྱད་པར་དུ་གྱུར་པའི་རིག་པ་མང་པོ་ལ་འདྲིས་པར་མཛད་དོ། །གཞན་ཡང་གཞི་བརྟག་པ་དང༌། གོས་བརྟག་པ་དང༌། རིན་པོ་ཆེ་བརྟག་པ་དང༌། ཤིང་རྟ་བརྟག་པ་དང༌། རྟ་དང་གླང་པོ་ཆེ་བརྟག་པ་ལ་སོགས་པ་དང༌། འབྱེད་པ་
དང༌། ཀློག་པ་རྣམས་ལ་གཡེར་པོར་གྱུར་ཏོ། །གསུམ་པ་བསྟན་པའི་རྗེས་སུ་ཞུགས་ནས་ཐོས་པ་དང་ཚོགས་བསགས་ཀྱི་ཁྱད་པར་ནི། དེ་ལྟ་བུའི་གཞོན་ནུ་དེ་ཉིད་སྲིད་པའི་དཔལ་འབྱོར་ཀུན་གྱི་དབུས་ན་མངོན་པར་མཐོ་ཡང༌། ཇི་ཙམ་ཞིག་ན་སྔོན་གྱི་བསྐལ་པ་

དཔག་ཏུ་མེད་པར་གོམས་པའི་ཆོས་ཀྱི་བག་ཆགས་བཟང་པོ་དམན་པ་མིན་པའི་གྲོགས་ཀྱིས་ཉེ་བར་བསྐུལ་ནས་འདི་ལྟར་ཡིད་ལ་བྱེད་པར་གྱུར་ཏོ། །ཀྱེ་མ་དེང་བདག་གི་བསོད་ནམས་ཀྱི་མཐུ་ཆེན་པོས་རྙེད་པར་དཀའ་བའི་ལུས་རྟེན་དལ་བ་བརྒྱད་དང་
འབྱོར་པ་བཅུའི་བདག་ཉིད་ཅན་གྱི་རྙེད་པ་འདི་ནི་ལེགས་པར་རྙེད་དོ། །ཚེ་འདིའི་མཐོ་འབྱོར་དང་གྲགས་པའི་ཟླ་རིས་དཀར་པོ་རིང་དུ་འཕྲོ་བའི་གོ་འཕང་དམ་པ་དེ་ཡང་ཐོབ་པར་གྱུར་ཏོ། །འོན་ཀྱང་འཁོར་བའི་ལྟར་སྣང་གི་བདེ་འབྱོར་གྱི་དཔལ་ནི་ཇི་ལྟར་བདོ་ཡང་རྣམ་པར་
དཔྱད་ན་མཐའ་བཞི་ལས་མི་འདའ་སྟེ། ཇི་སྐད་དུ། བསགས་པ་ཀུན་མཐར་འཛད་པ་སྟེ། །མཐོན་པོའི་མཐའ་ནི་དམའ་བ་ཡིན། །འདུས་པའི་མཐའ་ནི་འབྲལ་བ་སྟེ། །འཚོ་བའི་མཐའ་ནི་འཆི་བ་ཡིན། །ཞེས་གསུངས་པ་ལྟར་འཁོར་བ་མཐའ་བཞིའི་རང་བཞིན་ཅན་
ཏེ་མི་རྟག་ཅིང་མི་བརྟན་ལ་ཐེར་ཟུག་མེད་པའི་ཆོས་ཅན་ཁོ་ན་སྟེ། སྐྱེ་འཆིའི་ཕྲེང་བ་ནི་གར་མཁན་གྱི་ལག་པའི་ཟློས་གར་བསྒྱུར་བ་ལྟ་བུའོ། །འབྱོར་རྒུད་ཀྱི་རི་མོས་ནི་སྟོན་ཀའི་སྤྲིན་གྱི་འདུ་འགོད་བརྩམས་པ་ལྟ་བུའོ། །སྐྱེས་བུའི་འཚོ་བ་ནི་སྤྲིན་རུམ་སྟུག་པོའི་ཁྲོད་ན་གློག་གི་
ཐག་པ་འགྱུ་བ་ལྟ་བུའོ། །ཁྱད་པར་ཁྱིམ་ན་གནས་པའི་ལྟར་སྣང་གི་བདེ་བ་ནི་ཐར་པ་མེད་པའི་མེ་འོབས་སྟུག་པོའི་ནང་དུ་ལྷུང་བ་ལྟ་བུའོ་ཞེས་དང༌། གཞན་ཡང་བཅོམ་ལྡན་འདས་ཀྱིས་ཁྱིམ་ན་ཆགས་པའི་ཉེས་དམིགས་མང་པོ་བསྟན་པ་རྗེས་སུ་དྲན་པའི་ཡིད་འབྱུང་གི་
མཚོན་རྣོན་པོ་དག་གིས། འཁོར་བ་ལ་མངོན་པར་ཞེན་པའི་འཆིང་བ་དམ་པོ་ཡོངས་སུ་དྲལ་བ་ལ་སྤྲོ་བས་ཞུགས་པར་གྱུར་ཏོ། །དེའང་དགེ་སློང་ལ་རབ་ཏུ་གཅེས་པའི་མདོ་ལས། ཤིན་ཏུ་ལེགས་པའི་ཚུལ་ཁྲིམས་གང༌། །བསྡོམས་པའི་མི་དེ་མཛེས་པའི་
གཟུགས། །འདུལ་བ་ལ་ནི་ཉེ་བར་གནས། །ཚུལ་ཁྲིམས་བསླབ་པ་རང་ཡིད་ཆེས། །མི་དེ་ཉིད་མ་གཅིག་ལ་ཡང༌། །བསོད་ནམས་ཕུང་པོ་དཔག་ཏུ་མེད། །གསོག་ཅིང་སངས་རྒྱས་འབྲས་བུ་འགྲུབ། །ཅེས་དང༌། ཚུལ་ཁྲིམས་འདི་ནི་བདེ་བའི་མཆོག །ཚུལ་

ཁྲིམས་འདི་ནི་ཐར་པའི་ལམ། །ཚུལ་ཁྲིམས་འདི་ནི་ཡོན་ཏན་གཞི། །ཚུལ་ཁྲིམས་འདི་ནི་སངས་རྒྱས་རྒྱུ། །ཞེས་དང༌། འཕགས་པ་ཀླུ་སྒྲུབ་ཀྱིས། ཁྱོད་ཀྱི་ཚུལ་ཁྲིམས་མ་ཉམས་མོད་མི་དམའ། །མ་འདྲེས་མ་སྦགས་པ་དག་བསྟེན་པར་མཛོད། །ཁྲིམས་
ནི་རྒྱུ་དང་མི་རྒྱུའི་ས་བཞིན་དུ། །ཡོན་ཏན་ཀུན་གྱི་གཞི་རྟེན་ལགས་པར་གསུངས། །ཞེས་བྱ་བ་ལ་སོགས་པ་རབ་ཏུ་བྱུང་ཞིང་ཚུལ་ཁྲིམས་ཀྱི་བསླབ་པ་ཚུལ་བཞིན་དུ་བསྲུངས་པའི་ཕན་ཡོན་དཔག་ཏུ་མེད་ཅིང་བསམ་གྱིས་མི་ཁྱབ་པ་རྗོད་བྱེད་ཀྱི་གླིང་བུ་དྲི་ཟའི་རོལ་མོ་བྱེ་བ་
ཕྲག་བརྒྱས་ཀྱང་གང་གི་དཔེ་ཟླར་མི་བཟོད་ཅིང་ཆར་ཡང་མི་ཕོད་པའི་སྙན་འགྱུར་ངག་གི་ལང་ཚོ་ཡོངས་སུ་རྫོགས་པའི་འཕྲིན་ཡིག་དམ་པས་ཡིད་ཀྱི་དབང་པོ་ཡོངས་སུ་ཕྲོགས་པར་གྱུར་ཏོ། །དེ་ལའང་ཐོག་མར་ཤེས་རབ་ཀྱི་ཕ་རོལ་ཏུ་ཕྱིན་པ་སྡུད་པ་ལས། བླ་མ་མཁས་པ་
རྣམས་ལ་རྟག་ཏུ་བརྟེན་པར་བྱ། །ཅི་ཕྱིར་ཞེ་ན་མཁས་པའི་ཡོན་ཏན་དེ་ལས་འབྱུང༌། །ཞེས་དང༌། སློབ་དཔོན་ཀླུ་སྒྲུབ་ཀྱིས་ཀྱང༌། དགེ་བའི་བཤེས་གཉེན་བསྟེན་པ་ཚངས་པར་སྤྱོད། །ཡོངས་སུ་རྫོགས་པར་ཐུབ་པས་གསུངས་དེའི་ཕྱིར། །སྐྱེས་བུ་དམ་པ་བསྟེན་
བགྱི་རྒྱལ་བ་ལ། །བརྟེན་པ་རབ་ཏུ་མང་པོས་ཞི་བ་ཐོབ། །ཅེས་དང༌། དགེ་བ་དགེ་བའི་བཤེས་ལ་བརྟེན་ན་འཕེལ། །ཞེས་བྱ་བ་ལ་སོགས་པ་རྒྱ་ཆེར་འབྱུང་སྟེ། དེ་དག་ཀྱང་དགེ་བའི་བཤེས་གཉེན་ལ་རག་ལས་པར་རྗེས་སུ་རྟོགས་སོ། །དེ་ལྟར་རྗེས་སུ་རྟོགས་
ནས་ཀྱང་རྒྱལ་བ་གཉིས་པ་རྗེ་བཙུན་ཀུན་དགའ་བཟང་པོའི་ཆོས་ཀྱི་རྒྱལ་སྲིད་ཆེན་པོ་ལ་མཁས་པའི་ཕྲིན་ལས་རྣམ་པ་གསུམ་གྱི་འཁོར་ལོས་སྒྱུར་བའི་གདན་རབས་སུམ་ཅུ་པ། ལེགས་པར་གསུངས་པ་དམ་པའི་ཆོས་འདུལ་རྒྱ་མཚོའི་ཕ་རོལ་ཏུ་སོན་པ་སྨྲ་བའི་དབང་
ཕྱུག་ཆེན་པོ། །དོན་གྱི་སླད་དུ་མཚན་ནས་སྨོས་ན་མཁན་ཆེན་ཐམས་ཅད་མཁྱེན་པ་བཀྲ་ཤིས་ལྷུན་གྲུབ་གྲགས་པའི་རྒྱལ་མཚན་དཔལ་བཟང་པོའི་ཞལ་སྔ་ནས་ཀྱི་མཁན་པོ་དང༌། འདུལ་བ་སྨྲ་བའི་མཆོག་འཕགས་པ་ཨུ་པཱ་ལི་ལྟ་བུའི་ཐོས་པ་དང་ཡོན་ཏན་གྱི་ཕུང་པོ་འཛིན་ཅིང་

ལེགས་པར་སྨྲ་བའི་དབང་ཕྱུག་སངས་རྒྱས་བསྟན་པ་སློབ་དཔོན་དང༌། གནས་བརྟན་འདུལ་བ་འཛིན་པ་ཆེན་པོ་བཀྲ་ཤིས་བཟང་པོ་པ་དུས་བསྒོ་བ་ལ་སོགས་པ་མཁས་ཤིང་བཙུན་པའི་དགེ་སློང་གི་དགེ་འདུན་གྲངས་ཚང་བའི་དབུས་སུ་ཚིགས་དང་པོ་གཉིས་རིམ་ནོས་ཀྱི་རབ་ཏུ་བྱུང་
བ་དགེ་ཚུལ་གྱི་དངོས་པོར་བསྒྲུབས་ཏེ། དེའི་མཚན་ལ་ཕུན་ཚོགས་བསྟན་པ་ཞེས་བྱ་བར་གསོལ་ཏོ། །དེ་ནས་བརྩམས་ཏེ་བསླབ་པར་བྱ་བའི་གནས་ཐམས་ཅད་མིག་གི་འབྲས་བུ་ལྟར་གཅེས་པར་བསྲུང་བའི་སྒོ་ནས་སྔོན་གྱི་འཕགས་པ་རྟ་ཐུལ་ལ་སོགས་པའི་རྣམ་པར་ཐར་པའི་རྗེས་སུ་སློབ་ཅིང་
རྗེས་སུ་འགྲོ་བའི་འདུན་པ་ས་ལྟ་བུར་བརྟན་པར་མཛད་དོ། །དེ་ལྟར་ངེས་པར་འབྱུང་བའི་ཚུལ་ཁྲིམས་རྣམ་པར་དག་པའི་གཞི་གཙང་མ་ལ་གནས་པ་དེས། མངོན་པ་མཛོད་ལས། ཚུལ་གནས་ཐོས་དང་བསམ་ལྡན་པས། །བསྒོམ་པ་ལ་ནི་རབ་ཏུ་སྦྱར། །ཞེས་གསུངས་པའི་དོན་དང་རྗེས་སུ་
མཐུན་པར་བསྟན་པའི་བྱ་བ་ཐོས་པ་དང་བསམ་པ་དང་བསྒོམ་པ་གསུམ་ལ་འཇུག་པའི་འདུན་པ་དྲག་པོས་ཀུན་ནས་བསླངས་ཏེ། དེའང་ཐོག་མར་བྱང་ཆུབ་སེམས་དཔའི་སྡེ་སྣོད་ལས། ཐོས་པས་ཆོས་རྣམས་ཤེས་པར་འགྱུར། །ཐོས་པས་སྡིག་ལས་ལྡོག་པར་འགྱུར། །ཐོས་པས་དོན་མ་ཡིན་
པ་སྤོང༌། །ཐོས་པས་མྱ་ངན་འདས་པ་ཐོབ། །ཅེས་བྱ་བ་ལ་སོགས་པ་གསུངས་པ་ལྟར་ཕྱི་དང་ནང་གི་གྲུབ་པའི་མཐའ་ཤེས་པས་བླང་དོར་གྱི་གནས་རྣམས་ལེགས་པར་ཤེས་པར་བྱས་ཏེ། ཉེས་པའི་སྤྱོད་པ་ལས་ལྡོག་པ་དང༌། དོན་མེད་པའི་འདོད་པ་ཡོངས་སུ་སྤོང་བ་དང༌། ཟག་པ་ཟད་
པ་ཡོངས་སུ་ཤེས་པ་ལ་སོགས་པ་མང་དུ་ཐོས་པའི་ཕན་ཡོན་རྣམས་ཐེག་པ་ཆེ་ཆུང་གི་གཞུང་མང་པོ་ནས་རྒྱ་ཆེར་བསྟན་པའི་དོན་ལ་རྗེས་སུ་སློབ་པའི་ཕྱིར་དང༌། བྱེ་བྲག་ཏུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་བགྲོད་པ་གཅིག་པའི་ཉེ་ལམ། གཞི་དང་ལམ་དང་འབྲས་
བུའི་གནས་སྐབས་ཐམས་ཅད་ནས་ཟབ་པའི་ཁྱད་པར་མང་པོས་བརྟུན་པ་རབ་འབྲིང་གི་དབང་ལས་ཚེ་འདིའམ། བར་དོའམ། སྐྱེ་བ་བདུན་ནམ་བཅུ་དྲུག་ཏུ་ཟུང་འཇུག་རྡོ་རྗེ་འཆང་གི་གོ་འཕང་གདོན་མི་ཟ་བར་འགྲུབ་པའི་ལམ་ཟབ་མོ་གསང་སྔགས་རྡོ་རྗེ་ཐེག་པ་སྟེ། དེ་ལྟ་ནའང་ལམ་དེར་

འཇུག་པ་ལ་ནི་དབང་བསྐུར་བ་ལེགས་པར་ཐོབ་དགོས་ཀྱི། དབང་བསྐུར་བ་མ་ཐོབ་པར་སྔགས་ཀྱི་ལམ་ལ་འབད་པ་བྱས་ཀྱང་དངོས་གྲུབ་ཐོབ་པར་མི་འགྱུར་ཞིང༌། བརྒྱ་ལམ་ན་འཇིག་རྟེན་པའི་དངོས་གྲུབ་ཕྲ་མོ་ཙམ་ཐོབ་སྲིད་ཀྱང་ཕྱི་མར་ངན་སོང་དུ་འགྲོ་བར་གསུངས་ཏེ། དམ་པ་དང་པོའི་རྒྱུད་
ལས། དབང་བསྐུར་མེད་པར་རྒྱུད་འཆད་དང༌། །ཟབ་མོའི་དེ་ཉིད་སྒོམ་བྱེད་པ། །དེ་དོན་ལེགས་པར་ཤེས་ན་ཡང༌། །དམྱལ་བར་འགྱུར་གྱི་གྲོལ་བ་མིན། །ཞེས་དང༌། ཕྱག་རྒྱ་ཆེན་པོ་ཐིག་ལེའི་རྒྱུད་ལས། དབང་མེད་ན་ནི་དངོས་གྲུབ་མེད། །ཕྱེ་མ་བཙིར་ཡང་མར་མེད་བཞིན། །
གང་ཞིག་རྒྱུད་ལུང་ང་རྒྱལ་གྱིས། །དབང་བསྐུར་མེད་པར་འཆད་བྱེད་པ། །སློབ་དཔོན་སློབ་མ་ཤི་མ་ཐག །དངོས་གྲུབ་ཐོབ་ཀྱང་དམྱལ་བར་སྐྱེ། །དེ་བས་འབད་པ་ཐམས་ཅད་ཀྱིས། །བླ་མ་ལ་ནི་དབང་ནོད་ཞུ། །ཞེས་དང༌། དབང་བསྐུར་མ་ཐོབ་པར་སྔགས་པ་ཉིད་དུ་ཁས་ལེན་པ་
སྙིང་པོ་མེད་ཅིང་སྨིག་རྒྱུའི་ཆུ་ལ་བཏུང་བར་འདོད་པ་དང་མཚུངས་ཏེ། བདེ་མཆོག་རྩ་རྒྱུད་ལས། སྔགས་པས་དཀྱིལ་འཁོར་མ་མཐོང་བར། །གང་ཞིག་རྣལ་འབྱོར་པར་འདོད་པ། །མཁའ་ལ་ཁུ་ཚུར་གྱིས་རྡེག་དང༌། །སྨིག་རྒྱུའི་ཆུ་ནི་འཐུང་དང༌། །ཞེས་དང༌། རྡོ་རྗེ་ཐོད་པའི་
རྒྱུད་ལས་ཀྱང༌། །དཔེར་ན་བུ་ཚ་མེད་པའི་ཁྱིམ། །ཤི་བ་ཙམ་གྱིས་སྟོང་བར་འགྱུར། །དེ་བཞིན་དབང་དང་བྲལ་བ་ཡི། །ཡེ་ཤེས་ཀུན་གྱི་སྟོང་པ་ཉིད། །དཔེར་ན་པི་ཝང་སྦྱོར་ཀུན་ཚོགས། །རྒྱུད་དང་བྲལ་ན་བཟུང་མི་རུང༌། །དེ་བཞིན་དབང་དང་བྲལ་ན་ནི། །སྔགས་དང་བསམ་གཏན་
འགྲུབ་མི་འགྱུར། །རྨོངས་པ་གང་ཞིག་དབང་མེད་པར། །བདག་ནི་དབང་བསྐུར་ཞེས་སྨྲ་བ། །ཇི་སྲིད་སངས་རྒྱས་བཞུགས་ཀྱི་བར། །སློབ་མར་བཅས་ཏེ་དམྱལ་བར་འགྲོ། །ཞེས་བྱ་བ་ལ་སོགས་པ་དབང་བསྐུར་བ་མ་ཐོབ་པར་སྔགས་ཀྱི་ལམ་ལ་འཇུག་པའི་ཉེས་པ་དཔག་ཏུ་མེད་པ་
གསུངས་ཤིང་དབང་བསྐུར་བ་ཚུལ་བཞིན་དུ་ཐོབ་པའི་ཕན་ཡོན་བསམ་གྱིས་མི་ཁྱབ་ཀྱང༌། མདོར་བསྡུ་ན། གང་ཟག་དབང་པོ་ཡང་རབ་དབང་གི་རྗེས་དེ་མ་ཐག་པར་གྲོལ་བར་གསུངས་ཏེ། འགྲེལ་ཆེན་སྒྲོན་མ་གསལ་བ་ལས། དངོས་གྲུབ་ཐམས་ཅད་ནི་དཀྱིལ་འཁོར་དུ་དབང་བསྐུར་བ་ལས་

འབྱུང་བར་འགྱུར་རོ་ཞེས་དང༌། ས་སྐྱ་པཎྜི་ཏས་ཀྱང༌། དེས་ན་གང་ཟག་དབང་པོ་རབ། །དབང་བསྐུར་ཉིད་ཀྱིས་གྲོལ་བར་གསུངས། །ཞེས་སོ། །གང་ཟག་རབ་ཏུ་གྱུར་པ་མ་ཡིན་ནའང་དབང་ལེན་པ་ལ་རྟག་ཏུ་གོམས་པར་བྱས་པས་སྐྱེ་བ་བདུན་ནས་འགྲུབ་སྟེ།
གསང་བའི་མཛོད་ལས། དབང་བསྐུར་ཡང་དག་སྦྱིན་ལྡན་ན། །སྐྱེ་ཞིང་སྐྱེ་བར་དབང་བསྐུར་འགྱུར། །དེ་ཡིས་སྐྱེ་བ་བདུན་ནས་ནི། །མ་བསྒོམས་པར་ཡང་དངོས་གྲུབ་ཐོབ། །ཅེས་སོ། །དབང་ཐོབ་ནས་རྩ་བའི་ལྟུང་བས་མ་གོས་ན་སྐྱེ་བ་བཅུ་དྲུག་ནས་འགྲུབ་པ་ཡང༌། དམ་ཚིག་ལྔ་པ་
ལས། གལ་ཏེ་ལྟུང་བ་མེད་གྱུར་ན། །སྐྱེ་བ་བཅུ་དྲུག་དག་ནས་འགྲུབ། །ཅེས་གསུངས་ཤིང༌། གྲོལ་བྱེད་ཀྱི་ལམ་སྟོན་པའི་སྣོད་རུང་དུ་བྱེད་པའི་ཐབས་ཀྱང་དབང་བསྐུར་བ་ཉིད་ཡིན་ཏེ། ཕྱག་རྒྱ་ཆེན་པོ་ཐིག་ལེ་ལས། དང་པོར་རེ་ཞིག་སློབ་མ་ལ། །དབང་རྣམས་ལན་ཅིག་བསྐུར་བ་
ཡིས། །དེ་ཚེ་གསང་ཆེན་བཤད་པ་ཡི། །ངེས་པར་སྣོད་དུ་འགྱུར་བའོ། །ཞེས་བྱ་བ་ལ་སོགས་པའི་ཕན་ཡོན་བརྗོད་ཀྱིས་མི་ལྡང་བར་ཡིད་ཆེས་པའི་ལུང་དང་མན་ངག་གི་ཚོགས་ཀྱིས་ཉེ་བར་བསྟན་པའི་ཡི་གེ་དམ་པ་གསུབ་ཏུ་མེད་པ་གང་དག་ཡིད་ཀྱི་ངོས་སུ་ལེགས་པར་འདྲི་བཞིན་པའི་སྡོམ་
བརྩོན་མིའི་དབང་ཕྱུག་འདིས་གོང་དུ་སྨོས་པའི་བླ་མ་དེ་ཉིད་ཀྱི་དྲུང་ནས་དཔལ་ཀྱེ་རྡོ་རྗེའི་རྡུལ་ཚོན་གྱི་དཀྱིལ་འཁོར་དུ་དབང་བཞི་པོ་ཡོངས་སུ་རྫོགས་པར་མནོས་ཏེ། ཕུང་པོ་དང༌། ཁམས་དང༌། སྐྱེ་མཆེད་ཀྱི་ཞིང་ས་གཤིན་པར་སངས་རྒྱས་ཀྱི་སྐུ་བཞིའི་བདག་ཉིད་ཅན་གྱི་ས་བོན་ལེགས་
པར་བཏབ་སྟེ། རིག་པ་འཛིན་པ་སྔགས་ཀྱི་སྡོམ་པའི་མྱུ་གུ་རྨ་མེད་པ་ཉིད་དུ་ཡོངས་སུ་འཛིན་པའི་སྐལ་བ་ཅན་དུ་བགྱིས་སོ། །དེ་ནས་བརྩམས་ཏེ་ངོར་ལུགས་ཀྱི་དཀྱིལ་འཁོར་ཆེན་པོ་བདུན་དུ་གྲགས་པའི་དབང་བསྐུར་བ་དང༌། རྡོ་རྗེ་འཇིགས་བྱེད་རོ་ལངས་བརྒྱད་སྐོར་གྱི་དབང་བསྐུར་བ་
དང༌། ངན་སོང་ཐམས་ཅད་ཡོངས་སུ་སྦྱོང་བའི་རྒྱུད་ནས་བསྟན་པའི་དཀྱིལ་འཁོར་བཅུ་གཉིས་ཀྱི་དབང་བསྐུར་བ་རྣམས་དང༌། གཞན་ཡང་ཀུན་རིག་རྩ་བའི་དཀྱིལ་འཁོར་དང༌། འཆི་བདག་འཇོམས་པ་ལྷ་བཅུ་གསུམ་དང༌། ཚེ་དཔག་ཏུ་མེད་པ་ལྷ་དགུ་དང༌། མི་འཁྲུགས་པ་ལྷ་དགུ་དང༌།

མགོན་པོའི་བཀའ་བབ་བཞིར་གྲགས་པ་བྲམ་ཟེ་ཆེན་པོའི་བཞེད་པའི་མགོན་པོ་གྲི་གུག་ལྷ་ལྔ་རས་བྲིས་ཀྱི་དཀྱིལ་འཁོར་དུ་དབང་བསྐུར་བ་དང༌། བླ་མ་ལོ་ཙཱ་བའི་བཞེད་པའི་མགོན་པོ་ལྷ་བརྒྱད་རས་བྲིས་ཀྱི་དཀྱིལ་འཁོར་དུ་དབང་བསྐུར་བ་དང༌། བླ་མ་བྲག་སྟེང་པའི་བཞེད་པའི་གུར་གྱི་མགོན་པོ་ལྷ་བཅུ་
གཉིས་རས་བྲིས་ཀྱི་དཀྱིལ་འཁོར་དུ་དབང་བསྐུར་བ་དང༌། གྱི་ལྗང་ལུགས་ཀྱི་མགོན་པོ་ལྷ་བཅུ་བདུན་པ་རས་བྲིས་ཀྱི་དཀྱིལ་འཁོར་དུ་དབང་བསྐུར་བ་དང༌། མགོན་པོ་གྲི་གུག་ལྷ་ལྔ་སྙན་བརྒྱུད་ལུགས་སིནྡྷུ་རའི་དཀྱིལ་འཁོར་ལ་བརྟེན་པ་རྣམས་ཀྱི་དབང་བསྐུར་བ་ལ་སོགས་པའི་དབང་བསྐུར་གྱི་རིགས་
མང་པོ་མནོས་སོ། །གཞན་ཡང་མཆོག་དང་ཐུན་མོང་གི་དངོས་གྲུབ་སྒྲུབ་པའི་ཡི་དམ་གྱི་ལྷ་བསམ་གྱིས་མི་ཁྱབ་པའི་དབང་བསྐུར་བ་དང༌། བྱིན་གྱིས་བརླབས་པ་དང༌། རྗེས་སུ་གནང་བ་དང༌། རྗེས་སུ་གདམས་པ་མང་པོ་བུམ་པ་གང་འབྱོའི་ཚུལ་དུ་གསན་ནོ། །ཡར་ལུང་མཁན་པོ་ངག་གི་
དབང་ཕྱུག་ཀུན་དགའ་ལེགས་པའི་འབྱུང་གནས་བསྟན་པའི་རྒྱལ་མཚན་དཔལ་བཟང་པོ་པའི་དྲུང་ནས། རྡོ་རྗེ་ཕྲེང་བ་དང་ཀྲཱྀ་ཡ་ས་མུཙྪ་གཉིས་ཀའི་དབང་གི་ཆུ་བོ་ཆིག་འདྲེས་སུ་གྱུར་པའི་དཀྱིལ་འཁོར་ཆེན་པོ་བཞི་བཅུ་རྩ་ལྔ་རས་བྲིས་ལ་བརྟེན་པ། ཀྲཱྀ་ཡ་ས་མུཙྪའི་སྒོས་ཆོས་བསབས་པ་དང་བཅས་པའི་
ཕྱག་ལེན་རྒྱས་པའི་ལུགས་ཀྱི་དབང་བསྐུར་བ་ཐོབ་པ་ལ། དཔལ་གསང་བ་འདུས་པའི་རྒྱུད་ལས་གསུངས་པའི་མི་བསྐྱོད་པའི་རིགས་གསང་བ་འདུས་པ་འཇམ་དཔལ་རྡོ་རྗེ་ལྷ་བཅུ་དགུ། དཔལ་གསང་བ་འདུས་པ་མི་བསྐྱོད་རྡོ་རྗེ་ལྷ་སོ་གཉིས། རྣམ་སྣང་སྒྱུ་དྲའི་རྒྱུད་ལ་བརྟེན་པའི་འཇམ་དཔལ་རྡོ་རྗེ་
ལྷ་ཞེ་གསུམ། རྩ་བའི་རྒྱུད་གཤིན་རྗེ་དགྲ་ནག་གི་རྒྱུད་ལ་བརྟེན་པའི་རྣམ་སྣང་གི་རིགས་དཔལ་གཤིན་རྗེ་གཤེད་ལྷ་བཅུ་གསུམ་སྟེ་ཕ་རྒྱུད་བཞི། བརྟག་པ་གཉིས་པ་ནས་གསུངས་པའི་ཧེ་རུ་ཀའི་རིགས་ཀྱི་དཔལ་དགྱེས་པ་རྡོ་རྗེ་ཐོད་པ་ཅན་ཞལ་བརྒྱད་ཕྱག་བཅུ་དྲུག་པ་ལྷ་དགུ། ཐུགས་རྡོ་རྗེ་ཞལ་གསུམ་
ཕྱག་དྲུག་པ་ལྷ་དགུ། གསུང་རྡོ་རྗེ་ཞལ་གཅིག་ཕྱག་བཞི་པ་ལྷ་དགུ། སྐུ་རྡོ་རྗེ་ཞལ་གཅིག་ཕྱག་གཉིས་པ་ལྷ་དགུ། མཁའ་འགྲོ་མ་རྡོ་རྗེ་གུར་གྱི་རྒྱུད་ལས་གསུངས་པའི་མཁའ་འགྲོ་ལྔ་རིགས་བསྡུས་པ་ལྷ་ལྔ་བཅུ་རྩ་གསུམ། སམྤུ་ཊའི་རྒྱུད་ལས་གསུངས་པའི་བདག་མེད་ལྷ་མོ་ཉེར་གསུམ།

བརྟག་གཉིས་ནས་གསུངས་པའི་བདག་མེད་ལྷ་མོ་བཅོ་ལྔ། ཡང་རྒྱུད་སྡེ་དེ་ཉིད་ནས་གསུངས་པའི་ཀུ་རུ་ཀུལླེ་ལྷ་བཅོ་ལྔ། མཁའ་འགྲོ་མ་རྡོ་རྗེ་གུར་ནས་བཤད་པའི་རྡོ་རྗེ་སྒྲོལ་མ་ལྷ་བཅུ་གསུམ། སམྤུ་ཊ་ནས་གསུངས་པའི་སྙིང་པོ་ཀྱེ་རྡོ་རྗེ་མཚོན་ཆ་ཅན་ཞལ་བརྒྱད་ཕྱག་
བཅུ་དྲུག་པ་ལྷ་བཅུ་བདུན། ཐུགས་རྡོ་རྗེ་ཞལ་གསུམ་ཕྱག་དྲུག་པ་ལྷ་བཅུ་བདུན། གསུང་རྡོ་རྗེ་ཞལ་གཅིག་ཕྱག་བཞི་པ་ལྷ་དགུ། སྐུ་རྡོ་རྗེ་ཞལ་གཅིག་ཕྱག་གཉིས་པ་ལྷ་བཅུ་བདུན་རྣམས་གཉིས་མེད་ཀྱི་རྒྱུད། སམྤུ་ཊ་ནས་གསུངས་པའི་བདེ་མཆོག་རྡོ་རྗེ་སེམས་དཔའ་ལྷ་སོ་བདུན། བདེ་
མཆོག་རྩ་བའི་རྒྱུད་ནས་གསུངས་པའི་འཁོར་ལོ་སྡོམ་པ་ཞལ་བཞི་ཕྱག་བཅུ་གཉིས་པ་ལྷ་དྲུག་ཅུ་རྩ་གཉིས། བདེ་མཆོག་སྔོན་པོ་ཞལ་གཅིག་ཕྱག་གཉིས་པ་ལྷ་དྲུག་ཅུ་རྩ་གཉིས། བདེ་མཆོག་སེར་པོ་ཞལ་གཅིག་ཕྱག་གཉིས་པ་ལྷ་དྲུག་ཅུ་རྩ་གཉིས། ཕག་མོ་དམར་མོ་ལྷ་སུམ་ཅུ་སོ་
བདུན། ཕག་མོ་སྔོན་མོ་ལྷ་སོ་བདུན། ཕག་མོ་སེར་མོ་ལྷ་སོ་བདུན། ཨ་བྷི་དྷ་ན་ལས་གསུངས་པའི་ཧཱུྃ་མཛད་ཁྲོ་བོ་ལྷ་བཅུ་གཅིག་པ། ཡང་རྒྱུད་དེ་ཉིད་ལས་གསུངས་པའི་བདེ་མཆོག་འཁོར་ལོས་སྒྱུར་དྲུག་ལྷ་བདུན་ཅུ་རྩ་གཉིས། རྡོ་རྗེ་བདུད་རྩིའི་རྒྱུད་ལ་བརྟེན་ནས་རྡོ་རྗེ་ཉི་མའི་རིགས་
ཀྱི་རྡོ་རྗེ་བདུད་རྩི་ལྷ་ཉེར་གཅིག །བདུད་རྩི་ཧཱུྃ་མཛད་ལྷ་ཉེར་དགུ། བདུད་རྩི་ཁྲོ་བོ་ལྷ་ཉེར་གཅིག །བདུད་རྩི་འཁྱིལ་པ་ལྷ་བཅུ་གསུམ། ཧེ་རུ་ཀའི་རིགས་སངས་རྒྱས་ཐོད་པ་ལྷ་ཉི་ཤུ་རྩ་ལྔ། སངས་རྒྱས་ཐོད་པ་ལྷ་དགུ། མ་ཧཱ་མཱ་ཡའི་རྒྱུད་ཆུང་ལ་བརྟེན་པའི་མ་ཧཱ་མཱ་ཡ་ལྷ་ལྔ། གདན་
བཞིའམ་རྒྱུད་གསེར་གྱི་ཆར་པ་ནས་བཤད་པའི་རྣམ་སྣང་གི་རིགས་རྣལ་འབྱོར་ནམ་མཁའ་ལྷ་ལྔ་བཅུ་རྩ་བརྒྱད། དེའི་ཡུམ་བཀའ་ཡེ་ཤེས་མཁའ་འགྲོ་ལྷ་བཅུ་གསུམ་རྣམས་བདེ་མཆོག་གི་ཕྱོགས་སུ་གཏོགས་པའམ་རྣལ་འབྱོར་མ་རྒྱུད། སྔོན་བྱུང་དྲང་སྲོང་ཉི་མའི་ཤིང་རྟ་སོགས་དྲང་སྲོང་བྱེ་བ་
ཕྲག་ཕྱེད་དང་བཞི་འདུལ་བའི་དོན་དུ་གསུངས་པ་དཔལ་དུས་ཀྱི་འཁོར་ལོའི་རྒྱུད་ལ་བརྟེན་ནས་སྐུ་གསུང་ཐུགས་ཡོངས་སུ་རྫོགས་པ་ལྷ་དྲུག་བརྒྱ་སུམ་ཅུ་རྩ་བཞི། ཕ་རྒྱུད་མ་རྒྱུད་གཉིས་སུ་ཕྱེ་ན་དགྱེས་རྡོར་ནས་འདིའི་བར་མ་རྒྱུད་དུ་བསྡུས་ཀྱང་འཐད་དོ། །དེ་ཉིད་འདུས་པའི་རྒྱུད་ལས་གསུངས་པའི་

ཐབས་གཙོ་བོར་སྟོན་པ་རྡོ་རྗེ་དབྱིངས་ལྷ་ལྔ་བཅུ་རྩ་གསུམ། ངན་སོང་སྦྱོང་རྒྱུད་དང་བརྟག་པ་ཕྱོགས་གཅིག་པ་གཙུག་དགུ་ལྷ་སུམ་ཅུ་རྩ་བདུན། སྒྱུ་དྲྭའི་རྒྱུད་དང་འཇམ་དཔལ་གྲགས་པའི་མཚན་བརྗོད་ཀྱི་འགྲེལ་པ་ལ་བརྟེན་ནས་ཤེས་རབ་གཙོ་བོར་སྟོན་པ་ཆོས་དབྱིངས་གསུང་དབང་ལྷ་ཉིས་
བརྒྱ་ཉེར་གཅིག་སྟེ་རྣལ་འབྱོར་རྒྱུད། འབྱུང་པོ་འདུལ་བྱེད་ཀྱི་རྒྱུད་ལ་བརྟེན་པའི་རྡོ་རྗེའི་རིགས་འབྱུང་པོ་འདུལ་བྱེད་ལྷ་སོ་གསུམ་པ་སྤྱོད་རྒྱུད། དེ་བཞིན་གཤེགས་པའི་རིགས་ཀྱི་ཡུམ་འོད་ཟེར་ཅན་མ་ལྷ་ཉི་ཤུ་རྩ་ལྔ། གཟུངས་གྲྭ་ལྔ་ལྷ་བཅུ་གསུམ་འདི་ཡན་གྱིས་འཕྲེང་རྐྱང་གི་དཀྱིལ་འཁོར་ཞེ་
གཉིས་ཚང་ངོ༌། །ཀྲཱྀ་ཡ་ནས་གསུངས་པའི་བདེ་ལེགས་སུ་བྱེད་པའི་དཀྱིལ་འཁོར་གསུམ་ཞེས་པ་ནོར་རྒྱུན་མའི་རྟོག་ཆུང་ལ་བརྟེན་པའི་དེ་བཞིན་གཤེགས་པའི་རིགས་ཀྱི་གནས་གཙང་མའི་ལྷ་ནོར་རྒྱུན་མ་ལྷ་བཅུ་དགུ། གཟའ་ཡུམ་གྱི་རྟོག་པ་ལས་གསུངས་པའི་རིགས་བྱེད་མ་ནུབ་བྱང་གི་གྲྭར་བཞུགས་པ་
དཀྱིལ་འཁོར་གྱི་གཙོ་བོར་བྱས་པའི་གཟའ་ཡུམ་ལྷ་ཞེ་དྲུག་གམ་ལྔ་བཅུ། དེ་བཞིན་གཤེགས་པའི་རིགས་ཀྱི་གཙུག་ཏོར་རྣམ་རྒྱལ་མ་ལྷ་སུམ་ཅུ་རྩ་གསུམ་སྟེ་བྱ་རྒྱུད་ཀྱི་དཀྱིལ་འཁོར་ལྔ་དང་བཅས་པ་རྣམས་སོ། །གཞན་ཡང་གཉིས་སུ་མེད་པའི་རྒྱུད་ཀྱི་རྒྱལ་པོ་དཔལ་དུས་ཀྱི་འཁོར་ལོའི་སྐུ་གསུང་
ཐུགས་ཡོངས་སུ་རྫོགས་པའི་དཀྱིལ་འཁོར་དུ་བྱིས་པ་འཇུག་པའི་དབང་བདུན། མཆོག་དབང་གོང་མ་རྡོ་རྗེ་སློབ་དཔོན་ཆེན་པོ་བདག་པོའི་དབང་དང་བཅས་པ་དང༌། དཔལ་ཀྱེ་རྡོ་རྗེའི་ཆོས་སྐོར་ལ་བརྒྱུད་པའི་བཀའ་བབས་བཞིར་བཞུགས་པའི་དབང་རས་བྲིས་ཀྱི་དཀྱིལ་འཁོར་ལ་བརྟེན་པ་དང༌། རྭ་
ཆེན་རྡོ་རྗེ་གྲགས་པའི་ལུགས་ཀྱི་རྡོ་རྗེ་འཇིགས་བྱེད་ལྷ་བཅུ་གསུམ་གྱི་དབང་བསྐུར་བ་དང༌། གཞན་ཡང་བྱིན་རླབས་དང་རྗེས་སུ་གནང་བ་དང༌། ཁྲིད་ཀྱི་སྐོར་ལ་སོགས་པའི་གདམས་པ་དཔག་ཏུ་མེད་པ་གསན་ནོ། །རྡོ་རྗེ་འཛིན་པའི་དབང་ཕྱུག་སངས་རྒྱས་རྒྱ་མཚོའི་དྲུང་དུ་སྔ་ཕྱིར་གདམས་པའི་བདུད་རྩི་
དཔག་ཏུ་མེད་པ་གསན་པ་རྣམས་འདིར་ཕྱོགས་སུ་བསྡོམས་ཏེ་རགས་པ་ཙམ་སྨོས་ན། ཐོག་མར་རྗེ་བཙུན་ས་སྐྱ་པའི་གསེར་ཆོས་ཀྱི་ནང་ཚན་དུ་གྱུར་པའི་ཚེ་དཔག་ཏུ་མེད་པ་སྤྲུལ་སྐུའི་བྱིན་གྱིས་བརླབས་པ་དང༌།འཇམ་དཔལ་ནག་པོ་སྐྱིལ་ཀྲུང་ཅན་གྱི་བྱིན་གྱིས་བརླབས་པ་དང༌། རྡོ་རྗེ་ཁྱུང་ཁྲའི་རྗེས་གནང་

དང༌། པཎྜི་ཏ་ཟླ་འབྱུང་ནས་བརྒྱུད་པའི་འཇམ་དཔལ་ཤེས་རབ་འཁོར་ལོའི་བྱིན་གྱིས་བརླབས་པ་དང༌། ཆག་ལོ་ཙཱ་བ་དགྲ་བཅོམ་པ་ནས་བརྒྱུད་པའི་ཁྲོ་བོ་གཙུག་ཏོར་འབར་བའི་རྗེས་སུ་གནང་བ། དེའི་མན་ངག་ཟབ་མོ་དང་བཅས་པ་དང༌། པཎྜི་ཏ་དཱ་ན་ཤཱི་ལ་ནས་
བརྒྱུད་པའི་དབྱངས་ཅན་མ་དམར་མོ་དང༌། གྲྭ་པ་མངོན་ཤེས་ལས་བརྒྱུད་པའི་སྨན་སྐྱོང་ཆེན་པོ་ཞང་བློན་རྡོ་རྗེ་བདུད་འདུལ་དང༌། མཉམ་མེད་ཇོ་བོ་ཆེན་པོ་ནས་བརྒྱུད་པའི་རྟ་མགྲིན་ཤྭ་ན་བཞིས་བསྐོར་དང༌། ཐུབ་པ་དང་སྤྱན་རས་གཟིགས་དང་མི་གཡོ་བ་དང་སྒྲོལ་མ་སྟེ་བཀའ་གདམས་ལྷ་བཞིར་
གྲགས་པ་དང༌། མ་གཅིག་གྲུབ་པའི་རྒྱལ་མོ་ལུགས་ཀྱི་རྟ་མགྲིན་དབྱུག་ཐོ་ཅན་དང༌། ཀྲཱྀ་ཡ་ས་མུཙྪའི་བཞེད་པ་དང་རྗེས་སུ་མཐུན་པའི་གཟའ་ཐམས་ཅད་ཀྱི་ཡུམ་རྗེ་བཙུན་མ་རིག་པ་ཆེན་མོ་ལྷ་བཅུ་བཞི་དང༌། དཔལ་མོ་ལུགས་ཀྱི་འཕགས་པ་བཅུ་གཅིག་ཞལ་ལྷ་ལྔ་དང༌། གཞན་ཡང་ལྷ་
མོ་ནམ་མཁའི་གོས་ཅན་མ་དང༌། ཕྱག་ན་རྡོ་རྗེ་ཁང་བུ་བརྩེགས་པ་དང༌། འཕགས་པ་དོན་ཡོད་ཞགས་པ་ལྷ་ལྔ་དང༌། རྡོ་རྗེ་འཇིགས་བྱེད་ཕྱག་གཉིས་པ་དང༌། ལྷ་མོ་འོད་ཟེར་ཅན་གཙོ་རྐྱང་རྣམས་ཀྱི་རྗེས་སུ་གནང་བ་དང༌། སྒྲོལ་མ་དཀར་མོ་ཡིད་བཞིན་འཁོར་ལོའི་རྗེས་སུ་གནང་བ་ཚེ་ཁྲིད་
དང་བཅས། གསེར་ཆོས་ཀྱི་མཁའ་འགྲོ་སེང་གེའི་གདོང་ཅན་མའི་རྗེས་སུ་གནང་བ་མན་ངག་གི་སྐོར་དང་བཅས་པ། རས་ཆུང་རྡོ་རྗེ་གྲགས་པ་ནས་བརྒྱུད་པའི་ཚེ་དཔག་ཏུ་མེད་པའི་ཚེའི་དབང་བསྐུར་བ་དང་དེའི་གདམས་པ་ཟབ་མོའི་ཁྲིད་ཀྱི་རིམ་པ་དང་བཅས་པ། གྲུབ་ཐོབ་ཐང་སྟོང་རྒྱལ་པོའི་
ལུགས་ཀྱི་བླ་མ་ཞི་ཁྲོའི་ཚེའི་དབང་བསྐུར་བ། རྫོང་བྱུང་བའི་ལུགས་ཀྱི་ཚེའི་དབང་བསྐུར་བ་ཟབ་མོ་རྣམས་ལེགས་པར་མནོས་ཤིང༌། གྲུབ་ཆེན་ལ་བ་པའི་ལུགས་ཀྱི་འཁོར་ལོ་བདེ་མཆོག་རས་བྲིས་ཀྱི་དཀྱིལ་འཁོར་ལ་བརྟེན་པའི་དབང་བསྐུར་བ་དང༌། བདེ་མཆོག་སྒྱུ་མ་ཆེན་པོ་ལྷ་ལྔའི་དཀྱིལ་འཁོར་
དུ་དབང་བསྐུར་བ་དང༌། འཁོར་ལོ་བདེ་མཆོག་གྲུབ་ཆེན་དྲིལ་བུ་པའི་ལུགས་ཀྱི་བྱིན་རླབས་ཟབ་མོ་དང༌། གཞན་ཡང་དམར་པོ་སྐོར་གསུམ་དང༌། དམར་མོ་སྐོར་གསུམ་ལ་སོགས་པ་གསེར་ཆོས་དང་ཟབ་ཆོས་ཀྱི་སྐོར་མང་པོའི་བྱིན་གྱིས་བརླབས་པ་དང་རྗེས་སུ་གདམས་པའི་

བདུད་རྩི་བསམ་གྱིས་མི་ཁྱབ་པ་གསན་ཅིང༌། ཁྱད་པར་དུ་ཡང་བསྟན་པའི་མངའ་བདག་རྗེ་བཙུན་ས་སྐྱ་པ་ཡབ་སྲས་ལ་བསྟན་པ་སྲུང་བའི་མཚོན་ཆར་ཆོས་སྐྱོང་བའི་སྲུང་མའི་རིགས་རྣོ་ཞིང་མྱུར་མགྱོགས་ཆེ་བ་མང་པོའི་གདམས་ངག་གི་བཀའ་བབ་པའི་ནང་ནས་གཙོ་བོར་གྱུར་པ་ནི་ཆོས་སྐྱོང་
བའི་སྲུང་མ་ཆེ་ཆུང་གཉིས་སུ་གྲགས་པ་ལས། ཆོས་སྲུང་ཆེ་བ་ནི་འཕགས་ཡུལ་རྡོ་རྗེའི་གདན་གྱི་སྒོ་སྐྱོང་དུ་བཞུགས་པའི་སྲུང་མའི་དབང་པོ་རྡོ་རྗེ་ནག་པོ་ཆེན་པོ་འདི་ཉིད་ནི། མཁའ་འགྲོའི་དབང་ཕྱུག་རྡོ་རྗེ་གུར་གྱི་རྒྱུད་ལེའུ་བཅོ་ལྔ་པ་ལས་བསྟན་པས་གུར་གྱི་མགོན་པོ་ཞེས་བྱ་སྟེ། འདི་
ལ་བཀའ་བབས་རྣམ་བཞིའི་གདམས་ངག་ཆུ་བོའི་རྒྱུན་བཞིན་དུ་མ་ནུབ་པར་བཞུགས་པ་ལས། བརྒྱུད་པའི་བཀའ་བབས་དང་པོ་དཔལ་རྣལ་འབྱོར་གྱི་དབང་ཕྱུག་བིརྺ་པ་ལས་བརྒྱུད་པའི་མགོན་པོ་དཔའ་བོ་གཅིག་པ་ལམ་འབྲས་པའི་མགོན་རྐྱང་དུ་གྲགས་པའི་རྗེས་སུ་གནང་བ་ལས་ཚོགས་ཀྱི་
ལུང་དང་བཅས་པ་དང༌། བཀའ་བབས་གཉིས་པ་བ་རི་ལོ་ཙཱ་བ་ནས་བརྒྱུད་པའི་མགོན་པོ་དཔའ་བོ་གཅིག་པའི་རྗེས་སུ་གནང་བ་དང༌། བཀའ་བབས་བཞི་པ་ཁ་ཆེ་པཎ་ཆེན་ཤཱཀྱ་ཤྲཱི་ནས་བརྒྱུད་པ་སྤུ་གྲི་སྐོར་གསུམ་གྱི་ལུང་དང་བཅས་པ་རྣམས་མནོས་སོ། །བརྒྱུད་པའི་བཀའ་བབས་གསུམ་
པ་བླ་མ་མལ་ལོ་ཙཱ་བ་ནས་བརྒྱུད་པའི་བྱིན་གྱིས་བརླབས་པའི་བཀའ་མ་ནུབ་པ་ལ་ལོ་ཆེན་གྱི་བཞེད་པ་གཙོ་བོར་གྱུར་པ་ནག་པོ་ཆེན་པོ་ལྕམ་དྲལ་ལྷ་གསུམ་སྦགས་ཏེ་སྒྲུབ་པ་དང༌། ལྷ་བརྒྱད་མཁའ་འགྲོ་སྦགས་ཏེ་སྒྲུབ་པ་ཐུན་མོང་བ་དང་ཐུན་མོང་མ་ཡིན་པ་གཉིས་དང༌། ལྷ་བཅུ་གཉིས་པ་ཐུན་མོང་བ་དང་
ཐུན་མོང་མ་ཡིན་པ་གཉིས་དང༌། མགོན་པོ་ཁྲོ་བོ་བཅུ་དང་བཅས་པ་གཙོ་འཁོར་སྦགས་ཏེ་སྒྲུབ་པའི་རྗེས་སུ་གནང་བ་བཀའ་རྒྱ་ཤིན་ཏུ་དམ་པ་ཅན་དང༌། ཤིན་ཏུ་ཟབ་པ་གསང་ཁྲིད་ཀྱི་སྔོན་དུ་འགྲོ་བའི་ནག་པོ་ཆེན་པོ་ལྷ་བརྒྱད་ལ་བེར་ནག་ཟངས་གྲི་ཅན་བསྣན་པའི་ལྷ་དགུ་པ་རྣམས་ཀྱི་རྗེས་གནང་དང༌། དཔལ་ལྡན་
ལྷ་མོ་དུད་པའི་སོལ་བ་ཅན་ཕྱི་སྒྲུབ་ཐུན་མོང་བ་དང༌། གསང་སྒྲུབ་ཐུན་མོང་མ་ཡིན་པ་གཉིས་དང༌། ལས་ཀྱི་མགོན་པོ་པུ་ཏྲ་མི་སྲིང་དང༌། ནང་གི་ལས་མཁན་བེར་ནག་ཟངས་གྲི་ཅན་དང༌། ཕྱིའི་ལས་མཁན་གཅེར་བུ་ཟངས་གྲི་ཅན་དང༌། རུ་མཚོན་གྱི་ལས་མཁན་བྲན་བདུད་གཤིན་

རྗེ་ནག་པོ་ཐུན་མོང་བ་དང་ཐུན་མོང་མ་ཡིན་པའི་ལུགས་ཏེ་དེ་དག་གི་རྗེས་སུ་གནང་བ་རྣམས་ལེགས་པར་མནོས་སོ། །ཆོས་སྐྱོང་ཆུང་བར་གྲགས་པ་ནི། དཔལ་གསང་བ་འདུས་པའི་རྩ་བའི་རྒྱུད་ལེའུ་བཅུ་བདུན་པ་དང༌། འཁོར་ལོ་བདེ་མཆོག་གི་བཤད་པའི་རྒྱུད་ལ་བརྟེན་པའི་
ཞིང་སྐྱོང་སྟོབས་འཕྲོགས་ནག་པོ་གདོང་བཞི་པའམ་དྲག་པོ་གཟི་ལྡན་དབང་ཕྱུག