Luận tạng Tây Tạng (Tengyur) — Tập 213

་ཏུ་གྲགས་པ་སྟེ། དེའི་རྗེས་སུ་གནང་བའི་སྐོར་ལ། བསྟེན་དུས་ཀྱི་མགོན་པོ་ཞལ་བཞི་པ་དང༌། སྒྲུབ་དུས་ཀྱི་མགོན་པོ་ཞལ་ཁྲ་ཅན་གྱི་རྗེས་སུ་གནང་བ་ཐུན་མོང་བ་དང་ཐུན་མོང་མ་ཡིན་པ་གཉིས། ལས་སྦྱོར་གྱི་
མགོན་པོ་གདོང་བརྙན་ཅན་དང༌། ནང་ཞིང་སྐྱོང་ལྟར་སྒྲུབ་པའམ་གསང་སྒྲུབ་ཅེས་གྲགས་པ་དང༌། ལས་བཞིའི་རྗེས་སུ་གནང་བ་ལ། དཀར་པོ་ཚེ་འཕེལ་བར་བྱེད་པ་ཐུན་མོང་བ་དང་ཐུན་མོང་མ་ཡིན་པ་གཉིས་དང༌། སེར་པོ་བསོད་ནམས་རྒྱས་པར་བྱེད་པ་ལྷ་དགུ་པ་དང་ལྷ་ལྔ་པ་གཉིས་
དང༌། དམར་པོ་སྐྱེ་འགྲོ་དབང་དུ་སྡུད་པར་བྱེད་པ་དང༌། སྔོན་པོ་དགྲ་བགེགས་སྒྲོལ་བར་བྱེད་པ་དང་ཤི་ས་བསྟེན་པ་དང༌། གཤིན་རྗེ་ལྟར་སྒྲུབ་པ་དང༌། དམག་དཔོན་གྱི་མགོན་པོ་ཁྱུང་ཞལ་ཅན་རྣམས་ཀྱི་རྗེས་སུ་གནང་བ་རྣམས་དང༌། གཞན་ཡང་ཞིང་སྐྱོང་སྟོབས་འཕྲོགས་དབང་པོའི་བཀའ་སྡོད་ཀྱི་
གཙོ་བོ་བླ་མ་གཉན་ལོ་ཙཱ་བའི་སྲུང་མ་མཐུ་རྩལ་ཤིན་ཏུ་ཆེ་བར་གྲགས་པ་བེག་རྩེ་ལྕམ་དྲལ་གཉིས་དང་ལྷ་མང་གཉིས་ཀའི་རྗེས་སུ་གནང་བ་རྣམས་གསན་པར་མཛད་དོ། །གཞན་ཡང་གུར་གྱི་མགོན་པོ་སྤྲིན་གསེབ་མ་དང༌། དཔལ་ལྡན་ལྷ་མོ་རྡོ་རྗེ་རབ་བརྟན་མ་ལ་སོགས་པའི་རྗེས་སུ་གནང་
བ་མང་པོ་དང༌། དེ་དག་གི་སྒྲུབ་སྐོར་དང༌། ལས་ཚོགས་ཟབ་ཅིང་ཆེས་ཟབ་པ་གསང་སྔགས་འཛིན་པ་ཕལ་གྱི་རྣ་བའི་སྣོད་དུ་ལྷུང་བར་མ་གྱུར་པའི་ཟབ་ཆོས་ཀྱི་གསན་པ་རྒྱ་མཚོ་ལྟ་བུའི་ཕ་རོལ་ཏུ་སོན་པར་མཛད་དོ། །གཞན་ཡང་གསང་སྔགས་གསར་རྙིང་གི་བསྟན་པའི་སྲོལ་འཛིན་ཆེན་པོར་
གྱུར་པའི་བླ་མ་མཁས་གྲུབ་ཀྱི་ཡོན་ཏན་མངའ་བ། གཞན་མང་པོ་པས་ཀྱང་སྔ་ཕྱིར་ཟབ་པ་དང་རྒྱ་ཆེ་བའི་ཆོས་ཀྱི་བདུད་རྩི་གསན་པའི་རྣམ་གྲངས་མང་དུ་ཡོད་ཀྱང་འདིར་མ་སྤྲོས་སོ། །དེས་ན་རྒྱལ་རིགས་དང་མི་དཔོན་གཞན་པ་འགའ་ཞིག་ནི་རིགས་དང་སྟོབས་དང་འབྱོར་པ་ལ་སོགས་པ་ཅུང་ཟད་རེས་

ཁེངས་ཏེ་འཇིག་རྟེན་ཕ་རོལ་གྱི་ལྟད་མོ་འབྱུང་སྙམ་ཡིད་ལ་མི་བྱེད། དེ་ལ་བརྟེན་ནས་བླ་མ་དང་དཀོན་མཆོག་ལ་མོས་གུས་ཙམ་ཡང་མི་སྐྱེ་ཞིང༌། གལ་ཏེ་གུས་པ་བྱས་ན་རང་གི་ཆེ་བ་ཉམས་ཀྱིས་དོགས་པས་བདེ་འགྲོའི་ལུས་རྟེན་ཐོབ་པར་གྱུར་ཀྱང་དམ་པའི་ཆོས་ཉན་པ་ལ་སོགས་པའི་སྐལ་བ་
བཟང་པོ་མྱོང་བའི་སྐབས་ཡོད་པ་མ་ཡིན་ནོ། །དེར་མ་ཟད་དགྲ་བསད་པ་དང༌། དབལ་འཕྲོག་པ་དང༌། གཡོ་སྒྱུ་བརྩམས་པའི་ལོ་རྒྱུས་རྣམས་ཀྱང་ཆོས་དང་ཡོན་ཏན་བཞིན་དུ་བསམས་ནས་དབྱངས་སུ་ལེན་པར་བྱེད་པ་དང༌། རྒྱུ་དེས་མངའ་རིས་རྣམས་ཀྱང་སྡིག་པ་དང་སྡུག་བསྔལ་ལ་སྦྱོར་བར་བྱེད་
དོ། །འདིར་ནི་དེ་དག་དང་ཐུན་མོང་དུ་མ་གྱུར་པ་སྟེ་རྒྱལ་རིགས་མཐོ་བའི་གནས་སུ་སྐྱེས་ཀྱང་ཁེངས་པ་ལ་སོགས་པ་རིང་དུ་བསྐྱུངས་ནས་ཡང་དག་པའི་དགེ་བའི་བཤེས་གཉེན་ཆེན་པོའི་སྤྱོད་པ་སྐྱོང་བ་འདི་ནི་བློ་ལྡན་ཀུན་གྱི་སྙན་དངགས་དམ་པའི་མེ་ཏོག་གིས་མངོན་པར་འཐོར་བའི་ཡུལ་དུ་གྱུར་
པ་ཉིད་དོ། །ཇི་ལྟར་ཐོས་པའི་ཆོས་རྣམས་ཀྱི་དོན་ལ་བསམ་པས་སྒྲོ་འདོགས་གཅོད་པའི་ཕྱིར་ཡང་དག་པའི་བློ་གྲོས་ཀྱི་སྣང་བ་བསྐྱེད་པ་ལ་མཐུན་པ་མིན་པའི་ཕྱོགས་སུ་གྱུར་པ་ནི་མི་ཤེས་པའི་མུན་པ་སྟེ། དེའི་གཉེན་པོར་རྗེ་བཙུན་འཇམ་དཔལ་དབྱངས་དང༌། དུས་མ་ཡིན་པའི་འཆི་བ་
བཟློག་པ་ལ་རབ་ཏུ་བསྔགས་པའི་ཚེ་སྒྲུབ་ཀྱི་རིགས་འགའ་ཞིག་གི་བཟླས་བསྒོམ་གྱི་རྒྱུན་མ་ཆག་པར་མཛད་དོ། །དེ་ནས་བརྩམས་ཏེ་དཔལ་ཨེ་ཝཾ་ཆོས་ལྡན་གྱི་གཙུག་ལག་ཁང་ཆེན་པོའི་ཚོགས་འདོན་གྱི་རིམ་པ་ཇི་ལྟར་སྲིད་པ་རྣམས་དང༌། དཔལ་ཀྱེ་རྡོ་རྗེ་དང་རྡོ་རྗེ་ཕུར་པའི་དཀྱིལ་འཁོར་ཆེན་
པོ་རྣམས་ཀྱི་སྒྲུབ་ཐབས་དང༌། དཀྱིལ་འཁོར་གྱི་ཆོ་ག་ཡན་ལག་དང་བཅས་པའི་ཐུགས་འཛིན་བྱང་ཆུབ་པར་མཛད་ནས། དེ་དག་ལག་ཏུ་བླང་བའི་རིམ་པ་ཆོ་གའི་ཆིངས་དང༌། འདོན་འགྲིགས་དང༌། གདངས་དབྱངས་དང༌། གར་འཆམ་དང༌། རོལ་མོའི་རིགས་ཀྱི་འབུད་དཀྲོལ་ལ་སོགས་པ་
ལ་ཤིན་ཏུ་འདྲིས་པར་མཛད་དེ། ལོ་གྲངས་ཁ་ཡར་དུ་དགེ་འདུན་གྱི་ཚོགས་ཆེན་པོའི་དབུར་བཞུགས་ནས་དཀྱིལ་འཁོར་ཆེན་པོ་སྒྲུབ་ཅིང་མཆོད་པ་དང༌། འཇུག་ཅིང་དབང་བླང་བ་རྣམས་ལ་བྱང་ཆུབ་པར་མཛད་དོ། །དེར་མ་ཟད་གཉིས་སུ་མེད་པའི་རྒྱུད་ཀྱི་རྒྱལ་པོ་དཔལ་ཀྱེ་རྡོ་རྗེའི་རྩ་རྒྱུད་

བརྟག་པ་གཉིས་པ་དང༌། དེ་ཉིད་གཙོ་བོར་གྱུར་པའི་རྒྱུད་སྡེ་མང་པོའི་རྣམ་གཞག་དང༌། མཚན་གྱི་དོན་དང༌། བཤད་པའི་ཐབས་ཀྱི་མན་ངག་དང༌། མངོན་པར་རྟོགས་པ་རྣམས་སྟོན་པར་བྱེད་པའི་བསྟན་བཅོས་ཆེན་པོ་ཚུལ་གསུམ་མཛེས་པར་བྱེད་པའི་རྒྱན་དང༌།
མངོན་པར་རྟོགས་པ་མཛེས་པར་བྱེད་པའི་རྒྱན་དང༌། ཡོངས་སུ་རྫོགས་པའི་བསྟན་པ་རིན་པོ་ཆེའི་དགོངས་དོན་མཐའ་དག་དཔྱད་པ་གསུམ་གྱི་སྒོ་ནས་ལེགས་པར་འདོམས་ཤིང༌། ཆོས་དང་ཆོས་མ་ཡིན་པ་རྣམ་པར་འབྱེད་པའི་བསྟན་བཅོས་ཆེན་པོ་སྡོམ་པ་གསུམ་གྱི་རབ་ཏུ་དབྱེ་བ་
ལ་སོགས་པ་ནང་དོན་རིག་པའི་གཞུང་ལུགས་རྣམས་ཀྱང་སྦྱངས་པ་ལ་རྩོལ་བས་ཁོང་དུ་ཆུད་པར་བྱས་ནས་དེ་དག་གི་ཚོགས་འདོན་རྣམས་ལ་ཡང་བྱོན་ནོ། །གཞན་ཡང་འཇིག་རྟེན་ལུགས་ཀྱི་བསྟན་བཅོས་སྐྱེ་བོ་གསོ་བའི་ཐིག་པ་དང༌། ཤེས་རབ་བརྒྱ་པ་དང༌། ཙ་ན་ཀའི་རྒྱལ་པོའི་ལུགས་
ཀྱི་བསྟན་བཅོས་དང༌། ལེགས་པར་བཤད་པ་རིན་པོ་ཆེའི་གཏེར་ལ་སོགས་པ་དང༌། ཕྱི་རོལ་རིག་པའི་གཙུག་ལག་གི་གཞུང་དུ་གཏོགས་པ་མང་པོ་དང༌། འཕྲིན་ཡིག་དང་ཆབ་ཤོག་གི་སྙན་དངགས་ཡན་ཆད་ཀྱི་ཐ་སྙད་རིག་པའི་བསྟན་བཅོས་ཕལ་ཆེ་བ་རྣམས་དང༌། འཁོར་བ་ལས་
ཡིད་འབྱུང་སྐྱེད་པར་བྱེད་པའི་རྟོགས་པ་བརྗོད་པ་དང༌། རྣམ་པར་ཐར་པ་མང་པོའི་ཚིག་དོན་ལ་ལེགས་པར་དཔྱད་པའི་གཟིགས་རྟོགས་ཀྱི་སྒོ་ནས་ཚར་ཕྱིན་པར་བགྱིས་སོ། །མདོར་ན་ཇི་སྐད་དུ། ལེགས་པར་བཤད་པ་རིན་པོ་ཆེའི་གཏེར་ལས། མི་གང་སྐྱེ་བོ་དམ་པ་དང༌། །དམན་པའི་ཁྱད་
པར་ལེགས་ཤེས་ནས། །དེ་ཡི་བྱ་བ་བསྒྲུབ་ཤེས་པ། །ཕུན་སུམ་ཚོགས་པའི་གཞི་ཚན་ཡིན། །ཞེས་པ་ལྟར་རང་གཞན་གྱི་སྤྱོད་པའི་ཆ་ལ་ལེགས་པར་བརྟགས་ནས་དམ་པ་དང་དམ་པ་མ་ཡིན་པའི་ཁྱད་པར་དཔྱོད་པ་ལ་མ་རྨོངས་པ་ཉིད་དུ་གྱུར་ཏོ། །དེ་ནས་བསྟན་པའི་གཞི་
མ་ཡོངས་སུ་རྫོགས་པ་དགེ་སློང་གི་དངོས་པོར་བསྒྲུབ་པའི་ཕྱིར་དང༌། དབུས་གཙང་ཕྱོགས་ཀྱི་དགོན་སྡེ་རིས་སུ་མ་ཆད་པ་རྣམས་སུ་ཀུན་མཁྱེན་ཉི་མའི་གཉེན་གྱི་བསྟན་པའི་རྩ་ལག་ཏུ་བཞུགས་པའི་བླ་མ་དམ་པ་རྣམས་དང་དགེ་སློང་གི་དགེ་འདུན་གྱི་ཚོགས་ཇི་སྙེད་ཅིག་མཆིས་པ་དག་ལ་འབུལ་འགྱེད་

དང་བསྙེན་བཀུར་སྟོབ་པའི་ཕྱིར་དང༌། དེ་དག་གི་གཙུག་ལག་ཁང་ཆེན་པོ་རྣམས་སུ་འགྲོ་བ་མ་ལུས་པའི་མགོན་སྐྱབས་དང་དཔུང་གཉེན་དུ་བཞུགས་པའི་རྟེན་གསུམ་ངོ་མཚར་ཅན་བགྲང་གིས་མི་ལང་བ་ཇི་སྙེད་བཞུགས་པ་རྣམས་ཀྱི་ཞལ་མཇལ་ཞིང་མཆོད་པ་དབུལ་བའི་སྒོ་ནས་བསོད་
ནམས་ཀྱི་ཚོགས་གསོག་པའི་ཕྱིར་དབུས་གཙང་གི་ཕྱོགས་སུ་ཆིབས་ཀྱི་གདོང་བསྒྱུར་བ་ལ་མཆོག་ཏུ་དགའ་བའི་འཛུམ་གྱི་ཕྲེང་བ་མང་པོས་བསུ་བའི་གདོང་གི་པདྨ་རྣམ་པར་རྒྱས་པ་དང་སྤྲོ་བ་མཆོག་གི་ཤིང་རྟ་དམ་པའི་ཁར་མངོན་པར་འཛེགས་པར་གྱུར་ཏོ། །ཇི་ལྟར་བཞེད་པའི་དོན་དེ་དག་གི་རྐྱེན་སེལ་ལ་
ཡང་དངུལ་མདའ་ལྷུན་གྲུབ་སྟེང་གཙོ་བོར་སྨོས་པའི་མངའ་འོག་ཏུ་གཏོགས་པའི་དགོན་སྡེ་མཐའ་དག་ལ་སྐུ་ཚེ་རིང་དུ་འཚོ་བའི་ཆོ་ག་མང་པོ་དང༌། བསྲུང་བཟློག་གི་རིམ་གྲོ་རྒྱ་ཆེན་པོ་དང༌། མགོན་ཁང་རྣམས་སུ་བསྐང་གསོ་རྒྱུན་འདོན་བྱེད་པའི་གྲྭ་པ་གསར་འཕར་མང་པོ་ཡང་བཞག་གོ། །ཁྱད་པར་མཁན་ཆེན་
ཐམས་ཅད་མཁྱེན་པ་བཀྲ་ཤིས་ལྷུན་གྲུབ་པ་དང༌། ཡར་ལུང་མཁན་པོ་ངག་དབང་ཀུན་དགའ་ལེགས་པའི་འབྱུང་གནས་པ་དང༌། མཐུ་སྟོབས་གྲུབ་པའི་དབང་ཕྱུག་སངས་རྒྱས་རྒྱ་མཚོ་སྟེ། རྡོ་རྗེ་འཛིན་པའི་དེད་དཔོན་ཆེན་པོ་དེ་དག་ནི་མགོན་ཁང་གསར་རྙིང་རྣམས་སུ་རིམ་པ་བཞིན་དུ་གདན་དྲངས་ཞུས་
ཏེ། བསྟན་སྲུང་ཡོངས་ཀྱི་སྡེ་དཔོན་ཆེན་པོ་རྡོ་རྗེ་གུར་གྱི་མགོན་པོ་ལྕམ་དྲལ་དང༌། གདོང་བཞི་གཉན་གྱི་མགོན་པོ་ལ་སོགས་པའི་སྲུང་མ་རྒྱ་མཚོའི་ཚོགས་རྣམས་སྔགས་དང་ཏིང་ངེ་འཛིན་གྱི་ནུས་པས་བྲན་བཞིན་དུ་བཀོལ་ཏེ། མདུན་དུ་ཅི་བགྱི་ཞེས་བཀའ་ནོད་པའི་ཚུལ་གྱིས་འཁོད་པ་ལ་ཁྱེད་
རྣམས་ཀྱིས་རིགས་ཀྱི་བུ་འདིའི་ལུས་དང་གྲིབ་མ་བཞིན་དུ་རྟག་པར་འགྲོགས་ལ། དམ་པའི་ཆོས་ཚུལ་བཞིན་དུ་སྒྲུབ་པར་བྱེད་པ་ལ་འགལ་རྐྱེན་བར་དུ་གཅོད་པ་ཐམས་ཅད་མི་འབྱུང་བ་དང༌། མཐུན་རྐྱེན་བཞེད་པའི་དོན་ཐམས་ཅད་ཆོས་དང་མཐུན་པར་ཚུལ་བཞིན་དུ་སྒྲུབ་པའི་ཕྲིན་ལས་དང་སྟོང་
གྲོགས་གྱིས་ཤིག་ཅེས་བྱ་བ་ལ་སོགས་པའི་ཕྲིན་ལས་རྣམ་པ་བཞིའི་བཀའ་བསྒོ་ཡང་དག་པ་མཛད་དོ། །དེ་ནས་རིམ་གྱིས་བཏེག་སྟེ་ལམ་བར་དུ་འཁོད་པའི་དགོན་སྡེ་རྣམས་ལ་ཡང་དགེ་གཏོང་གི་མཆོད་སྦྱིན་རྒྱ་ཆེན་པོ་བསྟར་བ་དང་བཅས་ཏེ། ཡུལ་དབུས་འགྱུར་འཆང་གི་ལྟེ་བ་ལྷ་ལྡན་སྤྲུལ་པའི་

གཙུག་ལག་ཁང་ཆེན་པོ་དང་ཉེ་བའི་ཆར་ཕེབས་སོ། །དེའི་ཚེ་གཞུང་ས་ཆེན་པོ་མཆོད་ཡོན་ཉི་ཟླ་ཟུང་དུ་འབྲེལ་བ་ལྟ་བུ་དག་ནས་ཐུགས་ཤིན་ཏུ་དགེས་པའི་རོལ་མོར་མདུན་བསུའི་བཀོད་པ་སྔ་ཕྱིའི་རིམ་པ་མང་པོ་སྩལ་བ་ལ་སོགས་པ་གཞན་ལས་ཁྱད་པར་དུ་འཕགས་པའི་
བསྔགས་བཀུར་རྒྱ་ཆེན་པོ་དང་བཅས་ཏེ་ལྷ་ལྡན་དུ་བདེ་བར་ཕེབས་སོ། །དེར་ཕེབས་པ་དང་ཐོག་མར་བསིལ་ལྡན་ལྗོངས་ཀྱི་བོད་འབངས་སྤྱིའི་བསོད་ནམས་ཀྱི་རྭ་བ་གཞལ་དུ་མེད་ཅིང་རྣམ་པར་ཡངས་པ་དག་ཏུ་འགྱུར་ཁུག་སྙན་པའི་མགྲིན་པ་མཐའ་དག་ལྷན་ཅིག་ཏུ་བསྒྲིགས་པའི་སྨོན་ལམ་གྱི་རྒྱང་
གླུ་ཤིན་ཏུ་སྙན་པའི་གདངས་སུ་བསྒྱུར་ཏེ། དུས་རིང་མོ་ཞིག་ནས་ལན་བརྒྱ་འམ་སྟོང་གི་བར་དུ་བོས་པ་དང་འདྲ་བར་ཉེ་བར་ལྷགས་པའི་མགྲོན་གྱི་དམ་པ། སྡེ་སྲིད་མིའི་དབང་པོ་ཕོ་ལྷ་ཐཱ་ཇི་ཞེས་བྱ་བ་ལེགས་བྱས་ཀྱི་མཁུར་ཚོས་ཡངས་པའི་ངོས་སུ་རྒྱ་ཆེན་དབང་གི་ཕྲིན་ལས་ཀྱི་དམར་མདངས་
ཕུན་སུམ་ཚོགས་པས་མངོན་པར་འཕོས་པ་དེ་ཉིད་ཀྱི་ཞལ་བཟང་ཟླ་བ་གཞོན་ནུ་ཡོངས་སུ་མཇལ་བར་ཞུ་བའི་རྟེན་དང༌། དེང་གི་དུས་ན་སངས་རྒྱས་ཀྱི་བསྟན་པ་རིས་སུ་མ་ཆད་པ་ལ་ཕན་པའི་རི་མོ་ལྷག་པར་བགྱི་བའི་སྒོ་ནས། འཇིག་རྟེན་གྱི་ཁམས་ཐམས་ཅད་བདེ་སྐྱིད་ཀྱི་དཔལ་ལ་
བཀོད་པའི་དྲིན་གཟོར་དམིགས་ནས་འབུལ་ཚན་བརྒྱ་ཕྲག་གཅིག་དང་གསུམ་གྱིས་ལྷག་པ་ཕུལ་ལོ། །དེར་འཇིག་རྟེན་ལུགས་ཀྱི་བསྟན་བཅོས་དང་མཐུན་པའི་གསུང་མཆིད་ཀྱི་བདུད་རྩིའི་ཟེར་ཕྲེང་ཅི་ཡང་སྩལ་བའི་དགའ་སྟོན་བཟང་པོ་མྱང་ངོ༌། །དེ་ཉིད་ནས་མཚམས་སྦྱར་ཏེ་མི་རིང་
བར་དཔལ་ལྡན་གྲུ་འཛིན་ཞིང་གི་མགོན་པོའི་ཕོ་བྲང་གཉིས་པ་པོ་ཏ་ལ་ཞེས་བྱ་བ་སྤྲུལ་པའི་ལྷ་བཟོ་བི་ཤྭ་ཀརྨའི་ལག་གི་འདུ་བྱེད་ལས་བྱུང་བ་ལྟ་བུའི་བསྟི་གནས་དེ་ཉིད་དུ་འཕགས་པ་ཕྱག་ན་པདྨའི་རྣམ་པར་འཕྲུལ་པ་གདོན་མི་ཟ་བའི་ཐུགས་རྗེ་དང་ལྡན་པ། རྒྱལ་བའི་དབང་པོ་ཐམས་ཅད་
མཁྱེན་པ་བསྐལ་བཟང་རྒྱ་མཚོ་ཞེས་ཡོངས་སུ་གྲགས་པའི་བསྟན་འཛིན་གྱི་སྐྱེས་བུ་ཆེན་པོ་དེ་ཉིད་ཞལ་མཇལ་གྱི་ཆེད་དུ་བྱོན་པ་ན། ནམ་ཞིག་གི་ཚེ་ན་སྐྱབས་མགོན་ཆེན་པོ་དེ་ནི་འཇིགས་མེད་གདོང་ལྔའི་དབང་པོ་དྲེགས་པས་བསྒྱིངས་པའི་ཁྲི་མཐོན་པོ་ག་ལ་བར་ཞབས་ཀྱི་པདྨ་རྣམ་པར་བཀོད་དེ།

ལྷམ་མེ། ལྷང་ངེ༌། ལྷན་ནེར་བཞུགས་པ་མཐོང་ངོ༌། །མཐོང་ནས་ཀྱང་གནས་སྐབས་སུ་སྐལ་བ་བཟང་པོ་འདི་ལྟ་བུ་དང་ཕྲད་པར་གྱུར་ཏོ་སྙམ་པའི་དགའ་བ་དང་སྤྲོ་བ་དཔག་ཏུ་མེད་པ་དང་ཆབ་ཅིག་པར། དེ་ཉིད་ཀྱི་སྤྱན་ལམ་དུ་བཀྲ་ཤིས་པའི་ཁ་དར་དང༌། དེ་བཞིན་གཤེགས་པའི་
རྟེན་གསུམ་ངོ་མཚར་ཅན་གྱིས་ཐོག་དྲངས་པའི་འབུལ་བ་དངོས་པོ་བཟང་ཞིང་གཏོས་ཆེ་བ་ཚན་གྲངས་སྟོང་ཕྲག་ལས་ཀྱང་ལྷག་པའི་ཚོགས་རྫོགས་རྒྱ་དཔངས་མི་ཆུང་ཙམ་ཕུལ་ཏེ། ཞལ་གྱི་དཀྱིལ་འཁོར་དངོས་སུ་མཇལ་བའི་དགའ་བ་གྱ་ནོམ་པ་བརྙེས་སོ། །དེ་ནས་རིམ་གྱིས་དཔལ་
འབྲས་སྤུངས་དང་སེ་ར་ལ་སོགས་པ་དེ་ཕྱོགས་ཀྱི་དགོན་སྡེ་ཆེ་ཕྲ་རྣམས་སུ་དགེ་སློང་གི་དགེ་འདུན་ཇི་སྙེད་བཞུགས་པ་དག་ལའང་གྲལ་འགྱེད་དང་བསྙེན་བཀུར་གཟབས་པར་བསྟབས་སོ། །ཁྱད་པར་མེ་ཏོག་བརྩེགས་པའི་གཟུངས་ལས། སེང་གེ་རྣམ་པར་རྩེ་བ་གང་གིས་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ལོ་གཅིག་གམ། ལོ་བརྒྱའམ། ལོ་སྟོང་དུ་ཡང་རུང་སྟེ་བདེ་བའི་ཡོ་བྱད་རྣམས་ཀྱིས་བསྙེན་བཀུར་བྱས་པ་དང༌། དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་མཆོད་རྟེན་རྣམས་ལ་མེ་
ཏོག་འབུལ་ལམ། ཆུ་སྙིམ་པ་གང་འཐོར་རམ། བྱུག་པའི་ཐིག་ལེ་འདྲིའམ། མེ་ཏོག་གི་ཉལ་ཉིལ་འཕྱག་གམ། བྱུག་པ་འབུལ་ལམ། སྤོས་འབུལ་ལམ། གདུག་པ་འབུལ་ལམ། མར་མེ་འབུལ་ཞིང་ཕུལ་ན་དགའ་བའི་སེམས་ཀྱིས་གོམ་པའི་སྟབས་འགའ་བོར་ཏེ་སངས་
རྒྱས་བཅོམ་ལྡན་འདས་ལ་ཕྱག་འཚལ་ལོ་ཞེས་སྨྲ་བ་དེ་དག་ནི་སེང་གེ་རྣམ་པར་རྩེ་བ་བསྐལ་པའམ། བསྐལ་པ་བརྒྱའམ། བསྐལ་པ་སྟོང་དུའམ། བསྐལ་པ་བརྒྱ་སྟོང་དུ་ངན་འགྲོ་ལོག་པར་ལྟུང་བའི་གནས་སུ་འགྲོ་བར་འགྱུར་བ་དེའི་གནས་མེད་དོ་ཞེས་བྱ་བ་ལ་སོགས་པ་རྒྱ་ཆེར་གསུངས་
པའི་ཕན་ཡོན་གྱི་འཕྲིན་ཡིག་བསླུ་བ་མིན་པའི་ལུང་གི་ཕྲེང་བ་མང་པོ་ཡིད་ཀྱི་ཁང་བཟངས་ཡངས་པ་དག་ཏུ་རྗེས་སུ་སེམས་ཤིང་རྗེས་སུ་དྲན་པའི་བྱེད་པོས་ལེགས་པར་འདྲི་བཞིན་པས་འཇིག་རྟེན་ཀུན་གྱི་མཆོད་སྡོང་བླ་ན་མེད་པར་བཞུགས་པ་ནི་འདི་ལྟ་སྟེ། འདོད་པའི་ཁམས་དང་གཟུགས་

ཀྱི་ཁམས་ན་གནས་པའི་ལྷ་དང༌། མི་དང༌། ལྷ་མ་ཡིན་དང༌། དྲི་ཟ་དང༌། གདེངས་ཅན་དབང་པོ་ལ་སོགས་པ་དང༌། འཕགས་པ་ཉན་ཐོས་དང༌། རང་སངས་རྒྱས་དང༌། བྱང་ཆུབ་སེམས་དཔའི་ཚོགས་བྱེ་བ་ཁྲག་ཁྲིག་མང་པོས་མདུན་གྱིས་བལྟས་ཏེ། ཉི་
མ་རེ་རེ་བཞིན་དུ་མཆོད་པའི་སྤྲིན་གྱི་བྱེ་བྲག་བསམ་གྱིས་མི་ཁྱབ་པས་མཆོད་ཅིང་རྗེད་པར་བྱེད་པའི་བསོད་ནམས་ཀྱི་རྟེན་བླ་ན་མེད་པ། བཅོམ་ལྡན་འདས་ཤཱཀྱའི་རྒྱལ་པོའི་སྐུ་བརྙན་རྣམ་པ་གཉིས་ལ་སོགས་པའི་རྟེན་གསུམ་གྱི་རྣམ་པ་ཇི་སྙེད་བཞུགས་པ་རྣམས་ཏེ། དེ་དག་ལ་ཞལ་གསེར་གསོལ་
བ་དང༌། བདུག་པ་དང༌། མར་མེ་དང༌། ཞལ་ཟས་སོགས་ཉེ་བར་སྤྱོད་པ་རྣམས་དང༌། སྟོང་འཁུན་གྱི་ཡུལ་ལས་འཐོན་པའི་དར་གོས་ཀྱི་ཁྱད་པར་སྣ་ཚོགས་པ་ལས་གྲུབ་པའི་སྙན་ཤལ་དང༌། འཕན་དང༌། གསེར་ལས་བརྡུངས་པའི་མཆོད་ཀོང་ལ་སོགས་པ་མཆོད་པའི་ཡོ་བྱད་གྱ་ནོམ་པ་རྣམས་ཀྱིས་
མཆོད་པ་འབུལ་བ་དང་བཅས་ཏེ། མདོར་ན་བསགས་པའི་དངོས་པོ་སྙིང་པོས་དབེན་པ་རྣམས་ཀྱང་འདིའི་དོན་མཐར་ཐུག་བླ་ན་མེད་པའི་བྱང་ཆུབ་ཀྱི་རྒྱུར་འགྲོ་བའི་སྙིང་པོ་ཤིན་ཏུ་ལྕི་བའི་རང་བཞིན་ཅན་དུ་མཛད་དོ། །དེ་ནས་མཐར་གྱིས་གཙང་ཕྱོགས་སུ་བཏེག་སྟེ་ལམ་བར་གྱི་དགོན་སྡེ་རིས་སུ་མ་ཆད་
པ་རྣམས་སུ་བཞུགས་པའི་དགེ་འདུན་རྣམས་ལ་བསྙེན་བཀུར་རྒྱ་ཆེན་པོ་བསྲིང་བ་དང་བཅས་ཏེ། རིམ་གྱིས་ལྷ་དང་བཅས་པའི་འཇིག་རྟེན་གྱི་ཁམས་སུ་ཕན་བདེ་མ་ལུས་པའི་འབྱུང་གནས་གཅིག་པུར་གྱུར་པའི་དཔལ་སྟོབས་བཅུ་མངའ་བའི་ལུང་རྟོགས་ཀྱི་བསྟན་པ་དྲི་མ་མེད་པའི་ཆུ་ཀླུང་བྱེ་བ་
ཕྲག་བརྒྱ་ཡོངས་སུ་བཟུང་བ། བཤད་པ་དང་སྒྲུབ་པའི་ཕྲིན་ལས་ཀྱི་རྒྱུན་ཆེན་པོས་ཕྱོགས་དང་ཕྱོགས་བྲལ་གྱི་ཁོ་ར་ཁོར་ཡུག་མ་ལུས་པ་ཁྱབ་པར་རྟག་ཏུ་འབེབས་པའི་གནས། ཉེ་བར་བསྟེན་ན་གནས་སྐབས་དང་མཐར་ཐུག་གི་ཡོན་ཏན་རིན་པོ་ཆེ་ཟད་མི་ཤེས་པའི་འབྱུང་གནས་དམ་པར་
གྱུར་པ། དཔལ་ཨེ་ཝཾ་ཆོས་ལྡན་གྱི་ཆོས་གྲྭ་ཆེན་པོ་ཞེས་པ་འོག་མིན་སྟུག་པོ་བཀོད་པའི་ཞིང་ཁམས་ཆེན་པོ་ཉིད་སའི་སྟེང་ན་འཕོས་པ་སྙམ་བྱེད་པ་སྟེ། དེའང་ཨེ་ཝཾ་ཞེས་པ་ནི་མདོ་སྡེ་དང་རྒྱུད་སྡེ་ཕལ་ཆེ་བ་དག་གི་ཐོག་མར་གླེང་སློང་བའི་གཞི་ཐམས་ཅད་ནི་ཡི་གེ་དམ་པ་དེ་གཉིས་ལས་རྣམ་པར་འཕྲོས་

ཏེ། ཆོས་ཀྱི་ཕུང་པོ་བསམ་གྱིས་མི་ཁྱབ་པའི་བར་དུ་འབྱུང་བའི་སྒོར་གྱུར་པ་ལྟར། འདིར་ཡང་དེ་ལྟ་བུའི་སྒྲ་དོན་དང་ལྡན་པའི་ཕྱིར་ཏེ། གདན་ས་དེ་ཉིད་ཀྱི་ཡོན་ཏན་གྱི་ཁྱད་པར་མང་པོ་ཡིད་ལ་རྗེས་སུ་བྱེད་ཅིང༌། རྗེས་སུ་མཐོང་བ་ལྷུར་བྱེད་པ་དང་བཅས་ཏེ། དཔེར་ན་སྐོམ་པས་གདུང་
བའི་སྐྱེས་བུ་གང་ལ་ལ་ཞིག་ཤིན་ཏུ་བསིལ་བའི་ཆུ་རྒྱུན་གཙང་མ་ཡིད་དུ་འོང་བའི་ཆབ་སྒྲ་སྙན་པར་སྒྲོགས་བཞིན་དུ་འབབ་པ་གང་ཞིག་ཡིད་ལ་བྱེད་ཀྱིན་རིངས་པ་རིངས་པར་འགྲོ་བ་དེ་བཞིན་དུ་མཆོག་ཏུ་སྤྲོ་བའི་ཤིང་རྟ་དམ་པ་ལ་མངོན་པར་འཛེགས་ཏེ་བྱོན་ནོ། །ཇི་སྐད་ཡིད་ལ་བྱ་བའི་གནས་དེའི་
ཡོན་ཏན་གྱི་ཁྱད་པར་ཡང་ཇི་ལྟ་བུ་ཞེ་ན། རྒྱས་པར་ན་བརྗོད་ཀྱིས་མི་ལྡང་བ་ཉིད་ཀྱང་འདིར་མདོ་ཙམ་ཞིག་ནི། རྗེ་བཙུན་མཁས་པའི་དབང་པོ་དཀོན་མཆོག་ལྷུན་གྲུབ་པའི་དངོས་སློབ་ཤར་དྭགས་པོའི་པཎྜི་ཏ་རྗེ་བཙུན་ཕྲིན་ལས་པ་འཇིགས་བྲལ་གསུང་རབ་གཏེར་མཛོད་སྦས་པའི་སྡེ།
ཕྱོགས་ལས་རྣམ་པར་རྒྱལ་བ་ཞེས་བྱ་བའི་མཁས་པ་ཆེན་པོ་དེས་མཛད་པའི་བསྟོད་པ་ཌཱ་ཀི་རྣམ་པར་བཞད་པའི་གླུ་དབྱངས་ཞེས་བྱ་བ་ལས། ཀུན་དཀྲིས་ཉེས་བརྒྱས་གཟིངས་པའི་གྲོང་ཁྱིམ་ལས། །ལམ་རིང་བགྲོད་དཀས་ཕྱིན་པ་ཉེར་ཞིའི་གནས། །ངན་འགྲོའི་འཇིགས་
ལས་རྒྱལ་བྱེད་ཚལ་དང་ནི། །མྱང་འདས་ཐར་པ་མཆོག་གི་གཞལ་མེད་ཁང༌། །འདུ་འཛིའི་ཀླུང་བརྒྱ་བརྒལ་བ་རི་བོའི་ཕབ། །བྱ་དང་རི་དྭགས་རྩེ་བའི་དོ་ར་མཆོག །གྲུབ་པ་རིག་འཛིན་དྲང་སྲོང་དགའ་བའི་ཚལ། །འབྲོག་དགོན་ཤིན་ཏུ་དབེན་པའི་བསྟི་གནས་གང༌། །
ཏིང་འཛིན་ངང་གིས་འཕེལ་བ་སྲིད་ཉོན་གྱི། །གདུང་སྐྱོབ་དཔལ་གྱི་དུམ་བུའི་ལྡིང་ཁང་ཉིད། །ལྷོ་ཕྱོགས་མ་ལ་ཡ་ཡི་ནགས་ཀླུངས་ལས། །བྱང་ཕྱོགས་དཔལ་མོའི་རྒྱན་དུ་འཕོས་པ་སྙམ། །སྲིད་པའི་འདམ་རྫབ་ནཱ་རིའི་བགྲོད་པ་དང༌། །མཚན་རྒྱུ་སྲེད་བྱེད་ཁ་ཟས་མཾ་སའི་དུམ། །
མྱོས་འགྱུར་དུག་གི་ཁུ་བའི་ཐིགས་པ་སྟེ། །ཉེས་བརྒྱའི་བསྐྱེད་རྩ་བདུད་ཀྱི་ལོངས་སྤྱོད་དག །རྟག་པར་རིང་དུ་སྤང་བ་བཅའ་ཁྲིམས་ཀྱི། །ར་བ་བརྩེགས་པའི་གོ་སྐབས་མི་ཕྱེད་པ། །ཞོ་འཐུང་རུས་པའི་དུམ་བུ་གོ་བིནྡའི། །མཚོན་གྱི་འཁོར་ལོ་ཡིས་ཀྱང་གཞིག་ནུས་མིན། །

དཀར་གསུམ་མངར་གསུམ་འཕགས་པ་དགེས་པའི་ཟས། །ཟླ་བའི་དུམ་བུ་བདུད་རྩིའི་ཟིལ་མངར་དང༌། །བཟའ་ཤིང་འཕུར་མ་མང་པོ་བགྲུངས་པའི་ཆབ། །ལྷ་ཡི་ཞལ་སྐྱེམས་བཏུང་བས་ཉེར་འཚོ་བའི། །གཙང་སྤྱོད་ས་ཧ་ཀ་རའི་སྙེ་མ་དག །ཡོངས་
སུ་སྨིན་པའི་ཚུལ་ཁྲིམས་དྲི་བཟང་པོ། །ཕྱོགས་བརྒྱར་འཐུལ་བས་ལྷ་རྫས་སྤོས་ངད་ཀྱིས། །སྲིད་ལམ་དུབ་པའི་མགྲོན་པོ་དབུགས་འབྱིན་བཞིན། །གུས་པའི་ཕོ་ཉས་མགྲོན་གཉེར་ལམ་རིང་གིས། །ངལ་བརྒྱའི་ཁུར་བཅས་ལམ་དུ་བགྲོད་མ་ཐག །ཐོས་བསམ་སྒོམ་པའི་བྱ་
བ་ལྷུར་བྱེད་ལས། །ཚེ་འདིའི་ཟང་ཟིང་གཡེངས་པ་ངང་གིས་སྤོང༌། །བུད་ཤིང་ལ་སོགས་ཉེར་སྤྱད་བཙལ་དཀའ་བས། །བཟའ་བཏུང་རྙེད་བཀུར་ལྷུར་བྱེད་མི་འདུ་ཞིང༌། །དབང་ལུང་མན་ངག་ཆོས་ཀྱི་ཆར་འབབ་པས། །ཐར་འདོད་སྐལ་ལྡན་སྐྱེ་བོ་ངང་གིས་འདུ། །ཞེས་བྱ་བ་
ལ་སོགས་པའི་ཡོན་ཏན་གྱི་རྣམ་པ་མང་པོ་དང་ལྡན་པའི་གནས་དེ་ཉིད་དང་ཉེ་བའི་ས་ཕྱོགས་སུ་བདེ་བར་སོན་ནོ། །དེའི་ཚེ་ངོར་གྱི་བླ་བྲང་ཁག་རྣམས་དང་ཁང་ཚན་རྣམས་ཀྱིས་བསུ་བ་སྔ་ཕྱི་མང་པོས་རིམ་པར་སོན་ཅིང༌། ཁྱད་པར་སིནྡྷཱུ་ཝཱ་རའི་རྒྱ་མཚོ་ཆེན་པོ་ཤིན་ཏུ་རངས་པའི་རྦ་རླབས་
ཀྱི་ལྕེ་ཞགས་ནམ་མཁའི་མཐོངས་སུ་འཕྱོ་བ་ལ། ཁ་དོག་ལྔ་པའི་གཞའ་རིས་གསར་པས་སླར་ཡང་ཀུན་ནས་མཛེས་པར་བྱས་པ་ལྟ་བུའི་དགེ་སློང་གི་དགེ་འདུན་གྱི་ཚོགས་ཆེན་པོ་ཕྲེང་དུ་བསྟར་བའི་སེར་སྦྲེང་གི་བཀོད་པ་སྐྱེ་བོ་ཀུན་གྱི་མིག་གི་ལོངས་སྤྱོད་དུ་བསྐྲུན་པའི་ངོ་མཚར་གྱི་ལྟད་མོ་མཐོང་
བ་ནི་འདི་ལྟ་སྟེ། ཐོག་མར་དགེ་ཞིང་བཀྲ་ཤིས་པར་བྱ་བ་དང་སྙན་པའི་གྲགས་པས་ཕྱོགས་ཀྱི་དཀྱིལ་འཁོར་ཀུན་ཏུ་དགང་བར་བྱ་བའི་རྟེན་འབྲེལ་གྱི་དང་པོར་སྐྱེ་བ་སྔ་པའི་ཆོས་དུང་དཀར་པོ་གཡས་སུ་འཁྱིལ་བ་འབུད་པའི་སྒྲ་དང༌། དེ་ནས་རིམ་བཞིན་དུ་གླིང་བུའི་སྒྲ་དང༌། སིལ་སྙན་གྱི་སྒྲ་
དང༌། རྔ་བོ་ཆེའི་སྒྲ་དང༌། རྔ་ཟླུམ་གྱི་སྒྲ་དང༌། རྫ་རྔའི་སྒྲ་དང༌། པི་ཝང་གི་སྒྲ་སྟེ་རོལ་མོའི་བྱེ་བྲག་བསམ་གྱིས་མི་ཁྱབ་པ་དང༌། གཞན་ཡང་ཕྱོགས་ལས་རྣམ་པར་རྒྱལ་བའི་རྒྱལ་མཚན་དང༌། གདུགས་དང༌། བ་དན་དང༌། ཕྱེ་མ་ཕུར་མ་དང༌། འཕན་རྩེ་གསུམ་པ་དང༌།

རིན་པོ་ཆེའི་རྔ་ཡབ་དང༌། བསིལ་ཡབ་ལ་སོགས་པ་མཆོད་པའི་བྱེ་བྲག་བསམ་གྱིས་མི་ཁྱབ་པ་དང་བཅས་ཏེ་བསུ་བའི་དགའ་སྟོན་རྒྱ་ཆེན་པོ་དང་བཅས་ཏེ་རིང་ནས་བསམ་པའི་ཡུལ་དུ་ལན་བརྒྱར་བྱས་པའི་ཆོས་གྲྭ་ཆེན་པོ་དེ་ཉིད་དུ་སྐུ་དང་གསུང་དང་ཐུགས་ལ་མི་མཐུན་པའི་ཕྱོགས་ཐམས་ཅད་
ལས་རྣམ་པར་རྒྱལ་བའི་ངོ་མཚར་གཏམ་གྱི་གླིང་བུ་བྱེ་བ་ཕྲག་བརྒྱས་མདུན་བདར་བ་དང་བཅས་ཏེ་ཉེ་བར་བྱོན་ནོ། །དེ་ལའང་འདི་ལྟར་དོགས་པ་སེམས་ཏེ། མཚུངས་པ་མེད་པའི་བསྟན་པའི་རྩ་ལག་དམ་པར་གྱུར་པའི་བླ་མ་དང་མཁན་པོ་གང་དུ་བཞུགས་བཞིན་དུ། རང་གི་སློབ་མ་ལ་
བསུ་བ་འདི་ལྟ་བུའི་བཀོད་པ་བཤམས་པ་མི་རིགས་སོ་སྙམ་ན། ཤིན་ཏུའང་རིགས་ཏེ། གང་དག་གནས་སྐབས་དང་མཐར་ཐུག་གི་རྣམ་པ་ཐམས་ཅད་དུ་དགེ་ལེགས་སུ་བྱེད་པའི་རྟེན་འབྲེལ་ཐམས་ཅད་ཀྱི་ཐོག་མ་ནི་རང་གི་མཁན་པོར་གྱུར་པའམ། བླ་མར་གྱུར་པའམ། སློབ་དཔོན་
དུ་གྱུར་པ་གང་ཡིན་པ་དེ་ཉིད་ཀྱིས་བསྒྲིགས་དགོས་པ་ནི། ཆོས་ཐམས་ཅད་རྟེན་ཅིང་འབྲེལ་བར་འབྱུང་བའི་གནད་ལ་མཁས་པ་ཀུན་གྱི་ཆོས་ལུགས་ཡིན་ནོ། །དེའང་དཔེར་ན་བདག་ཅག་གི་སྟོན་པ་འདི་ཉིད་སྔོན་གྱི་དུས་ན་བྲམ་ཟེ་རྒྱ་མཚོའི་རྡུལ་དུ་གྱུར་པ་ན། དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་སྙིང་པོའི་སྤྱན་སྔར་བླ་ན་མེད་པའི་བྱང་ཆུབ་ཀྱི་མཆོག་ཏུ་སེམས་བསྐྱེད་ཅིང་སྨོན་ལམ་ཆེན་པོ་ལྔ་བརྒྱ་བཏབ་ནས་བདེན་པའི་སྟོབས་བརྗོད་པ་ན། དེ་བཞིན་གཤེགས་པ་རིན་ཆེན་སྙིང་པོའི་ཞལ་ནས། ཁྱོད་ནི་པདྨ་དཀར་པོ་ལྟ་བུའི་
བྱང་ཆུབ་སེམས་དཔའོ་ཞེས་བྱ་བ་ལ་སོགས་པས་རྒྱ་ཆེར་བསྔགས་པ་དང༌། དེའི་ཚེ་ཕྱོགས་བཅུའི་སངས་རྒྱས་ཐམས་ཅད་ཀྱིས་ཀྱང༌། བྱང་ཆུབ་ཏུ་སེམས་དང་པོ་བསྐྱེད་པའི་བྱང་ཆུབ་སེམས་དཔའ་དེ་ལ་མེ་ཏོག་ཟླ་བ་མདོག་མཛེས་དྲི་མ་མེད་པ་དག་སྐྱེས་སུ་སྩལ་བ་དང་བཅས་ཏེ།
སངས་རྒྱས་རྣམས་ཀྱི་གསུང་དབྱངས་དབྱངས་ཀྱི་དཀྱིལ་འཁོར་ཡོངས་སུ་རྫོགས་པ་ལས་འཕོས་པའི་བསྟོད་པའི་ཚོགས་རྣམས་ཀྱིས་མངོན་པར་བསྟོད་པ་དང༌། བྲམ་ཟེའི་ཁྱེའུར་གྱུར་པའི་ཚེ་དེ་བཞིན་གཤེགས་པ་མར་མེ་མཛད་ཀྱིས་ལུང་བསྟན་ཅིང་འཁོར་གྱི་དབུས་སུ་མངོན་པར་བསྟོད་པ་

དང༌། སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དམ་པ་ཏོག་ཏུ་གྱུར་པའི་ཚེ་དགའ་ལྡན་གྱི་གནས་ནས་ཛམྦུའི་གླིང་དུ་འཕོ་བར་བརྩམས་པ་ན། ཕྱོགས་བཅུའི་སངས་རྒྱས་རྣམས་ཀྱིས་བསྟོད་ཅིང་སེམས་ཅན་གྱི་དོན་ལ་
བསྐུལ་བ་དང༌། རང་གི་ཅོད་པཎ་དམ་པ་རྗེ་བཙུན་མ་ཕམ་པའི་དབུར་བཅིངས་ཏེ། མ་འོངས་པ་ན་འཚང་རྒྱ་བར་ལུང་བསྟན་ཅིང་འཁོར་གྱི་ཚོགས་སུ་མངོན་པར་བསྟོད་དེ། ཐེག་པ་ཆེན་པོའི་དམ་པའི་ཆོས་ཀྱི་རྒྱལ་ཚབ་ཏུ་དབང་བསྐུར་བ་དང༌། ཤར་ཕྱོགས་ཟ་ཧོར་གྱི་རྒྱལ་པོ་དགེ་བ་
དཔལ་གྱི་སྲས་ཇོ་བོ་ཆེན་པོ་དཔལ་ལྡན་ཨ་ཏི་ཤ་འཁོར་དགེ་སློང་འདུལ་བ་འཛིན་པ་བརྒྱ་དང་བརྒྱད། དགེ་ཚུལ་བཅུ་གསུམ། དགེ་སློང་ཆེན་པོ་བཞི་སྟེ་བརྒྱ་དང་ཉི་ཤུ་རྩ་ལྔས་ཡོངས་སུ་བསྐོར་ཏེ། བླ་མ་གསེར་གླིང་པའི་དྲུང་དུ་བྱང་ཆུབ་ཀྱི་མཆོག་ཏུ་སེམས་བསྐྱེད་པ་དང༌། ཐེག་
པ་ཆེན་པོའི་བློ་སྦྱོང་ལ་སོགས་པ། ཐུགས་ལ་ཇི་ལྟར་མངའ་བའི་ཆོས་རྣམས་ཞུ་བའི་ཆེད་དུ་བྱོན་པ་ན། བླ་མ་གསེར་གླིང་པའི་འཁོར་དགེ་སློང་ཆོས་གོས་རྣམ་པ་གསུམ་སྐུ་ལ་གསོལ་བ་ཐམས་ཅད་ཀྱང་རིལ་བ་སྤྱི་བླུགས་དང༌། འཁར་གསིལ་ཕྱག་ན་ཐོགས་པས་མཛེས་
པ། སྔོན་དུས་སྟོན་པའི་འཁོར་གྱི་དགྲ་བཅོམ་པ་རྣམས་ལྟར་དྭང་བ་འདྲེན་པའི་དགེ་སློང་ལྔ་བརྒྱ་དང་སུམ་ཅུ་རྩ་ལྔ། རབ་ཏུ་བྱུང་བ་དྲུག་ཅུ་རྩ་གཅིག་སྟེ། མདོར་ན་རབ་ཏུ་བྱུང་བ་ལྔ་བརྒྱ་དང་དགུ་བཅུ་རྩ་བདུན་གྱི་སེར་སྦྲེང་གི་སྣ་བླ་མ་གསེར་གླིང་བ་ཉིད་ཀྱིས་དྲངས་ནས། རྒྱང་རིང་
པོ་ནས་བསུ་བ་མཛད་པ་ལ་སོགས་པ་སྔོན་གྱི་མཁས་གྲུབ་མང་པོའི་རྣམ་པར་ཐར་པ་རྣམས་ལ་ལེགས་པར་བལྟས་པས་རྟོག་པའི་ཚེར་མ་དེ་དག་ཡོངས་སུ་ཞི་བར་འགྱུར་རོ། །དེ་ནས་མི་རིང་བར་ཨེ་ཝཾ་བླ་བྲང་ཞེས་པ་དུས་རྟག་པར་དཔའ་བོ་དང་མཁའ་འགྲོའི་ཚོགས་ཐམས་ཅད་སྤྲིན་བཞིན་
དུ་འདུ་ཞིང༌། གསང་ཆེན་ཆོས་ཀྱི་ཕོ་བྲང་ཆེན་པོ་ཉིད་དུ་རྡོ་རྗེ་ཐེག་པས་མཚོན་པའི་ཆོས་ཀྱི་ཚུལ་དྲི་མ་མེད་པ་ཐམས་ཅད་བཤད་པ་དང་སྒྲུབ་པའི་སྒྲ་དབྱངས་ཆེན་པོ་རྒྱུན་མི་ཆད་པར་འབྱུང་བའི་ཕྲིན་ལས་རྒྱ་ཆེན་པོ་བསྒྲུབ་པ་དང༌། གནས་གཙང་མ་རིས་ཀྱི་ལྷའི་བུ་གཞོན་ནུ་གྲངས་

མེད་པའི་ཚོགས་ནི། དཔེར་ན་ཆུ་ལས་སྐྱེས་པའི་པདྨ་རྣམ་པ་སྣ་ཚོགས་པས་ཀུན་ནས་བརྒྱན་ཏེ་ཉམས་དགའ་དགའ་ལྟར་བྱས་པའི་རྫིང་བུ་གང་ལ་ངང་པ་དང་ངུར་པའི་ཚོགས་མང་པོ་མ་བསྡུས་པར་ཡང་ངང་གིས་འདུ་བར་འགྱུར་བ་དེ་བཞིན་དུ་ཉི་མ་རེ་རེ་བཞིན་དུ་ནམ་མཁའི་ངོས་
ཐམས་ཅད་དུ་སྤྲིན་གྱི་ཤིང་རྟ་དང༌། གླང་པོ་ཆེ་དང༌། མཁའ་ལྡིང་དང༌། རྟ་མཆོག་གི་རྣམ་པ་བསམ་གྱིས་མི་ཁྱབ་པ་དག་སྤྲུལ་ཏེ། དེ་དག་གི་རྒྱབ་ཏུ་ཞོན་ཏེ་མངོན་པར་ལྷགས་ནས་འོངས་པའི་ལྷའི་བུ་དེ་དག་གིས་ལྷའི་མེ་ཏོག་གི་སིལ་མས་གཏོར་བ་དང༌། བདུག་པའི་སྤྲིན་གྱིས་
དཀྲིགས་པ་དང༌། རིན་པོ་ཆེའི་སྒྲོན་མ་བཏེག་པ་དང༌། དྲི་ཞིམ་པོའི་ཆུས་ཟིལ་མ་འཐོར་བ་དང༌། བཟའ་བ་དང་བཅའ་བ་སྦྱར་བའི་ཞལ་ཟས་རྣམ་པ་སྣ་ཚོགས་པས་མཆོད་པ་དང༌། སིལ་སྙན་ལ་སོགས་པ་རོལ་མོའི་བྱེ་བྲག་དཔག་ཏུ་མེད་པ་དག་གིས་མངོན་པར་མཆོད་པ་དང༌། གཞན་
ཡང་འཕན་དང༌། གདུགས་དང༌། རྒྱལ་མཚན་དང༌། རྔ་ཡབ་དང༌། ཁང་བཟང་ཉམས་དགའ་བ་ལ་སོགས་པ་དཔལ་འབྱོར་ཕུན་སུམ་ཚོགས་པ་དག་གིས་བཀུར་སྟིར་བྱེད། མཆོད་པར་བྱེད། རྗེད་པར་བྱེད། སྙན་པའི་ཚིག་ཐམས་ཅད་ཀྱིས་བསྟོད་ཅིང་བཀུར་བར་བྱེད་པའི་གནས་
ཀྱི་དམ་པ་ག་ལ་བ་དེར། བསོད་ནམས་ཀྱི་མཐུ་ཆེན་པོས་མངོན་པར་མཐོ་བར་བྱས་པའི་ལྷ་སྲས་མིའི་དབང་ཕྱུག་ཆེན་པོ་རང་བཞིན་གྱིས་ཞི་ཞིང་དུལ་བའི་ཡོན་ཏན་གྱི་ཚོགས་མང་པོས་ཡོངས་སུ་བཟུང་བའི་རྒྱལ་བའི་མྱུ་གུའི་རིགས་མཆོག་རྨ་མེད་པ་དེ་ཉིད་དང༌། དེའི་བཀའི་ལས་བྱེད་
ཀྱི་གཙོ་བོ་འཕྲུལ་བློན་ཆེན་པོ་བསོད་ནམས་བཀྲ་ཤིས་ཞེས་བྱ་བ། ས་གཞི་སྐྱོང་བ་ཆེན་པོ་གང་དེའི་བཀའ་ལུང་གསེར་གྱི་འཁོར་ལོ་རྩིབས་སྟོང་གིས་མངོན་པར་མཛའ་བ་གང་དེ་གཟུ་བོར་གནས་པའི་བློ་གྲོས་ཀྱི་ལག་པས་ལེགས་པར་བཟུང་ནས། ཕྱོགས་དང་ཕྱོགས་བྲལ་གྱི་རྒྱལ་
ཕྲན་དང༌། བློན་པོ་དང༌། སྡེ་དཔོན་དང༌། མཁས་པ་དང༌། མཛངས་པ་དང༌། དཔའ་ཞིང་རྟུལ་ཕོད་པ་ཀུན་གྱི་སྤྱི་བོའི་སྟེགས་ལ་ངལ་བསོར་སྤྱོད་ཅིང༌། ལུགས་དང་མཐུན་པའི་བཀའ་མཆིད་ལྷའི་བདུད་རྩི་ལྟ་བུས་སྐྱེ་འགྲོ་ཐམས་ཅད་དགེ་བ་བཅུ་དང་རྗེས་སུ་མཐུན་པའི་སྤྱོད་ལམ་བཟང་པོ་ལ་

རྣལ་དུ་འགོད་པར་བྱེད་པ་དེ་ཉིད་དང༌། མདུན་ན་འདོན་གྱི་གཙོ་བོ་འཕྲུལ་བློན་ཆེན་པོ་ལྷ་བུ་ཚེ་རིང་ཞེས་བྱ་བ། བྱམས་ལྡན་ས་གཞི་སྐྱོང་བའི་དབང་ཕྱུག་དམ་པ་དེ་ཉིད་ཀྱི་ཆོས་དང་སྲིད་ཀྱི་གཙུག་ལག་ཉི་ཟླ་ཟུང་འབྲེལ་ལྟ་བུའི་བགྱི་བ་མཐའ་དག་གི་ཕྲིན་ལས་ཐུར་
མ་བརྒྱ་པའི་གདུགས་དཀར་པོ་གང་ཡིན་པ་དེ། བསྒྲུན་དུ་མེད་པའི་སྙིང་སྟོབས་ཀྱི་ཕྲག་པ་བརྟན་པོས་གོང་ནས་གོང་དུ་འདེགས་པའི་འགྲིབ་མ་བསིལ་པོས་ཡངས་པའི་ས་ཆེན་པོའི་དཀྱིལ་འཁོར་གྱི་འཁོར་ལོ་མ་ལུས་པ་ཡོངས་སུ་སྐྱོབ་པ་ལ་བསྙེངས་པ་མི་མངའ་བའི་མཁྱེན་དཔྱོད་ཀྱི་རྩལ་
ཆེན་པོ་ཀུན་ནས་རྫོགས་པར་གྱུར་ཅིང༌། གཅིག་ཏུ་རྒྱལ་བའི་བསྟན་པ་རིན་པོ་ཆེ་ལ་ཁ་ཙམ་ཚིག་ཙམ་མ་ཡིན་པའི་སྙིང་ནས་ཕན་པའི་ཐུགས་བསྐྱེད་ཀྱི་ཁོ་ལག་ཀུན་ནས་བདོ་བ་དེ་ཉིད་དང༌། གཞན་ཡང་ས་བདག་ཆེན་པོའི་བཞེད་པ་ཐམས་ཅད་ཡིད་བཞིན་དུ་བསྒྲུབ་པ་ལ་ལུས་དང་ངག་དང་
ཡིད་ཀྱི་རྩལ་དགུ་ཡོངས་སུ་རྫོགས་པའི་ཕྱི་བློན་དང༌། ནང་བློན་དང༌། དཀོར་གཉེར་དང༌། མགོ་དཔོན་ལ་སོགས་པའི་འཁོར་གྱི་སྐྱེ་བོའི་ཚོགས་དང་ལྷན་ཅིག་ཏུ་འདྲེན་མཆོག་མཚུངས་པ་མེད་པའི་ཞལ་གྱི་དཀྱིལ་འཁོར་ལེགས་པར་མཇལ་བའི་ཕྱིར། ཐམས་ཅད་ཀྱང་སྔ་ན་མེད་པའི་
དགའ་བ་དང༌། སྤྲོ་བ་དང༌། གུས་པ་མཆོག་གི་བདུད་རྩིའི་འཛུམ་རླབས་སྟོང་གིས་བཞིན་གྱི་དཀྱིལ་འཁོར་མ་ལུས་པ་ལེགས་པར་བཀྲུས་པ་བཞིན་དུ་མངོན་པར་ཆས་ཏེ་གསང་ཆེན་ཆོས་ཀྱི་གནས་མཆོག་དམ་པ་དེ་ཉིད་དུ་ཉེ་བར་ཕྱིན་ཏོ། །ཇི་ཙམ་ཞིག་ན་གནས་དེར་སྡེ་སྣོད་རིན་པོ་ཆེ་རྣམ་པ་
གསུམ་དང༌། རྒྱུད་སྡེ་རིན་པོ་ཆེ་རྣམ་པ་བཞིས་བསྡུས་པའི་ཆོས་ཀྱི་སྒྲ་དབྱངས་རྒྱུན་མི་ཆད་པར་རྟག་ཏུ་སྒྲོགས་པ་ལ་འཇིགས་པ་དང་བག་ཚ་བ་མི་མངའ་བའི་བརྡར། གདོང་ལྔའི་དབང་པོ་བརྒྱད་ཀྱིས་མངོན་པར་བཏེག་པའི་ཆོས་ཀྱི་ཁྲི་ཆེན་པོ་ཞིག་ཏུ་རྒྱལ་བས་ལུང་བསྟན་པའི་སྐྱེས་བུ་ཆེན་
པོ་རྗེ་བཙུན་ཀུན་དགའ་བཟང་པོ་པའི་དམ་པའི་ཆོས་ཀྱི་རྒྱལ་སྲིད་ཆེན་པོ་ལ་མངའ་བསྒྱུར་བའི་གདན་རབས་སོ་གསུམ་པ། མཁན་ཆེན་ཐམས་ཅད་མཁྱེན་པ་ཆེན་པོ་དཔལ་ལྡན་ཆོས་སྐྱོང་བཀྲ་ཤིས་གྲགས་པའི་རྒྱལ་མཚན་དཔལ་བཟང་པོ་བ་ཞེས་བྱ་བ། ཕྱོགས་བཅུའི་འཇིག་རྟེན་གྱི་

ཁམས་རབ་འབྱམས་མཐའ་དང་མུར་ཐུག་པ་མེད་པའི་ཞིང་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་ཇི་སྙེད་ཅིག་བྱོན་པ་དང༌། འབྱོན་པར་འགྱུར་བ་དང༌། ད་ལྟར་བཞུགས་ཤིང་འཚོ་ལ་གཞེས་པ་ཐམས་ཅད་ཀྱི་སྐུ་དང་གསུང་
དང་ཐུགས་ཀྱི་གསང་བ་བསམ་གྱིས་མི་ཁྱབ་པ་མ་ལུས་པ་གཅིག་ཏུ་བསྡུས་པའི་སྒྱུ་འཕྲུལ་གྱི་རྣམ་པར་རོལ་པ་ཆེན་པོ་དེང་གི་དུས་ཀྱི་ལྷ་དང༌། མི་དང༌། ཀླུའི་འཇིག་རྟེན་གྱི་ཁམས་སུ་འཁོད་པའི་སྐྱེ་དགུ་མ་ལུས་པའི་ཡན་ལག་མཆོག་གིས་ལན་བརྒྱར་བཏུད་པར་བྱས་པའི་སྐྱབས་ཀྱི་དམ་པ་
མ་རྟོགས་པ་དང་ལོག་པར་རྟོགས་པ་དང༌། ཐེ་ཚོམ་གྱི་མུན་པ་མ་ལུས་པ་སེལ་བར་བྱེད་པ། ལྟ་བ་ངན་པའི་རབ་རིབ་ཀྱིས་ཁེབས་པ་ཐམས་ཅད་ཡེ་ཤེས་ཀྱི་ཐུར་མ་རྣོན་པོས་རྣམ་པར་སྣང་བར་བྱེད་པ། མངོན་པར་ཞེན་པའི་མེ་དཔུང་གི་ལྕེ་ཞགས་འཇིལ་བར་བྱེད་པ། ཁོང་ནས་
འཁྲུགས་པའི་མཚོན་ཆ་རྣོན་པོ་རྟུལ་བར་བྱེད་པ། རྗེས་སུ་གདམས་པའི་བདུད་རྩིའི་སྒོ་འཕར་བྱེ་བ་ཕྲག་བརྒྱར་ཕྱེ་བས་སེམས་ཅན་གྱི་རེ་བ་ཐམས་ཅད་རྫོགས་པར་བྱེད་པ། འཁོར་བ་དང་ངན་སོང་གི་འཇིགས་པ་ལས་སྐྱོབ་པར་ངེས་པའི་ཐུགས་རྗེའི་ཕྱག་རིང་རྐྱོང་བ། མ་དད་པ་
རྣམས་ཀྱི་རྒྱུད་ལ་དད་པའི་ཞིང་ས་གཤིན་པར་བྱེད་པ། དད་པ་རྣམས་ཀྱི་རྒྱུད་ལ་དགེ་བའི་ལམ་གྱི་ས་བོན་མ་རྨས་པ་འདེབས་པར་བྱེད་པ། དེང་ནས་བཟུང་སྟེ་བྱང་ཆུབ་མཆོག་གི་གོ་འཕང་ལ་རེག་པར་མ་གྱུར་པ་དེ་སྲིད་དུ་བསྟེན་པར་འོས་པའི་མཚན་ཉིད་ཅན་གྱི་བསྟན་འཛིན་གྱི་སྐྱེས་བུ་ཆེན་པོ་
དེ་ཉིད་བསྐལ་པ་དཔག་ཏུ་མེད་པའི་བསོད་ནམས་ཀྱི་རྒྱུས་སམ། བླ་མ་བསུ་བ་ལ་སོགས་པ་ལེགས་བྱས་ཀྱི་མཐུ་ཆེན་པོས་མངོན་པར་བསྒྲུབས་པའི་འབྲས་བུ་བསླུ་བ་མིན་པའི་བདེན་དཔང་ཉིད་དུ། ཞབས་མཐིལ་པདྨ་རཱ་ག་བཞུ་བའི་ཚོན་གྱིས་ལན་བརྒྱར་བྱུགས་པ་སྙམ་བྱེད་པ་ལ། སླར་ཡང་
བཀྲ་ཤིས་པའི་རྟགས་ཀྱི་འཁོར་ལོ་རྩིབས་སྟོང་གི་གཟུགས་ཀྱིས་ཉེ་བར་སྤུད་པ་གང་དེ་ཆོས་ཀྱི་ཁྲི་མཐོན་པོ་ག་ལ་བ་དེར་མངོན་པར་བཀོད་དེ། མཐོང་ན་མི་མཐུན་པ་མེད་པའི་སྐུའི་དཀྱིལ་འཁོར་གང་ལས་མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུའི་གཟི་བྱིན་རིང་པོའི་ལམ་

དུ་སྣང་བ་འབྱིན་པར་འབྱེད་དེ། དཔེར་ན། ཛམྦུ་གསེར་གྱི་རྡུལ་ཚོགས་མངོན་པར་བརྩེགས་པའི་ལྷུན་པོ་ཞིག་ལ་གུར་གུམ་གྱི་ཆར་བས་ལན་བརྒྱ་སྟོང་དུ་བཀྲུས་པ་ལ། འཆར་ཀའི་ཉི་འོད་ཀྱི་ཐིགས་པ་དག་གིས་ཀྱང་ཡོངས་སུ་བྲན་པ་བཞིན་དུ་ལྷམ་མེར་བཞུགས་པ་མཐོང་
ངོ༌། །མཐོང་ནས་ཀྱང་ལྷ་སྲས་ཆོས་ཀྱི་བག་ཆགས་རབ་ཏུ་བརྟས་པ་གང་གི་ཡིད་ལ་སྤྲོ་བ་གསར་དུ་སྐྱེས་པའི་ཆེད་དུ་བརྗོད་པ་འདི་ལྟ་སྟེ། ཨེ་མ་དེ་རིང་ཐོབ་པའི་འབྲས་བུ་འདི། །དངོས་སུ་ཡིན་གྱི་རྨི་ལམ་སྣང་བ་མིན། །རིང་ནས་གསོལ་བ་བཏབ་པའི་སྙིང་པོ་དེ། །དེ་རིང་སྨིན་པར་
གྱུར་གྱི་དོན་མེད་མིན། །ཨེ་མ་དགེ་བའི་ཟོང་གིས་བསྒྲུབས་པའི་རྟེན། །སྐལ་བ་བཟང་པོར་གྱུར་གྱི་དམན་པ་ཡིན། །ཇི་ལྟར་ཡིད་ལ་བྱ་བའི་དགོས་པ་དེ། །བླ་ན་མེད་པར་བྱུང་གི་གྱི་ན་མིན། །ཨེ་མ་དེ་རིང་ཀུན་དགའ་གསར་པ་འདི། །འདྲེན་པ་ཁྱེད་ལས་བྱུང་གི་གཞན་ལས་
མིན། །དེ་ཕྱིར་མི་ཡི་སྐྱེ་བ་བླངས་པ་ནི། །ངེས་པར་དོན་ཆེན་གྱུར་ལ་བདག་དགའོ། །ཞེས་ཆེད་དུ་བརྗོད་ཅིང་བ་སྤུ་རྣམ་པར་གཟིངས་པའི་སྙིམ་པའི་ཆུ་སྐྱེས་དམར་པོ་གཙུག་གི་རྒྱན་དུ་བཀོད་དེ། ཕྱག་གི་ཕྲེང་བ་བརྩེགས་པ་དང་ཆབ་ཅིག་ཏུ་བཀྲ་ཤིས་པའི་རེ་ཁཱ་མངོན་པར་གསལ་
བའི་དར་དཀར་གྱི་ཕྱག་རྟེན་འབུལ་བ་དང་བཅས་ཏེ་མདུན་དུ་འཁོད་དོ། །དེར་རྗེ་བཙུན་དེ་ཉིད་ནས་ལམ་གྱི་བར་ཆད་འདྲི་བའི་ཚིགས་སུ་བཅད་པ་སྩལ་བ། ལེགས་པར་བྱོན་ཏམ་མངོན་མཐོའི་རིགས་ཀྱི་བུ། །ལེགས་པར་བྱོན་ཏམ་བསོད་ནམས་སྨིན་པའི་ལྷ། །ལེགས་པར་བྱོན་ཏམ་
ཀུན་གྱི་མཉེས་གཤིན་པ། །ལེགས་པར་བྱོན་ཏམ་བྱམས་དང་བརྩེ་བའི་བདག །བཤུལ་རིང་ལམ་དུ་བགྲོད་པ་མང་པོ་ཡིས། །སྐུ་ཐང་རྣམ་པར་དུབ་པར་མ་བྱས་སམ། །ཉི་ལྷགས་གདུང་བའི་བཟའ་བ་དམན་པ་ཡིས། །པདྨའི་སྐུ་མདངས་ཕྲོགས་པར་མ་བྱས་སམ། །འབྱུང་
བ་ལྔ་ཚོགས་དལ་འབྱོར་ཆོས་ཀྱི་སྣོད། །གཅོང་ནད་ཕྲ་མོས་རྒུད་པར་མ་བྱས་སམ། །དགེ་བའི་ལས་ལ་སྡང་བའི་ཉེ་ཞོ་ཡིས། །ཐུགས་ལ་ཚེར་མའི་བྱ་བ་མ་བྱས་སམ། །ཞེས་བྱ་བ་ལ་སོགས་པའི་བཀའ་མཆིར་དབྱངས་ཀྱི་རྒྱལ་མོའི་རྒྱུད་མངས་ལྟ་བུ་རྣ་བའི་བཅུད་དུ་སྩལ་ཏེ། དེའི་ཚེ་ལན་

དུ་གསོལ་བ། ལེགས་པར་འོངས་སོ་མདོ་སྨད་སའི་ཐིག་ལེ། །སྡེ་བཞིའི་རྣམ་པར་རྒྱས་པའི་རྒྱལ་པོའི་ཁབ། །དགེ་བཅུར་རྟག་ཏུ་སྤྱོད་པའི་རྒྱལ་རིགས་ཀྱི། །ལྗོན་པའི་ཡལ་ག་རྣམ་པར་འཕྱང་བ་ང༌། །ཆོས་ཀྱི་རྒྱལ་པོའི་ཞལ་བཟང་བལྟ་ཕྱིར་འོང༌། །ཞབས་ཀྱི་པདྨ་གཙུག་ཏུ་ལེན་
ཕྱིར་འོང༌། །ལེགས་པར་གསུངས་པའི་བདུད་རྩི་འཐུང་ཕྱིར་འོང༌། །ཡེ་ཤེས་གཟིགས་པའི་བྱིན་རླབས་འབེབས་ཕྱིར་འོང༌། །ངན་འགྲོའི་སྐྱེ་སྒོ་འགོག་པའི་ཆེད་དུ་འོང༌། །འཁོར་བའི་འཇིགས་ལས་སྐྱོབ་པའི་ཆེད་དུ་འོང༌། །བསོད་ནམས་ས་བོན་འཇོག་པའི་ཆེད་དུ་འོང༌། །བསླབ་
གསུམ་ནོར་བུ་བསྒྲུབ་པའི་ཆེད་དུ་འོང༌། །ཐར་པའི་ཁང་བཟང་བསྟེན་པའི་ཆེད་དུ་འོང༌། །བྱང་ཆུབ་སྙིང་པོའི་ལམ་གྱི་ཆེད་དུ་འོང༌། །མཁྱེན་དང་བརྩེ་དང་ནུས་པའི་དབང་ཕྱུག་གི །སྔགས་སྲུང་རྡོ་རྗེའི་རྭ་བར་ཆུད་པའི་བརྡར། །ནད་དང་བར་དུ་གཅོད་པའི་ཁབ་ཀྱི་སོས། །མ་
རྨས་མ་བཏབ་པ་རུ་ལྷགས་འདིའོ། །ཞེས་བྱ་བ་ལ་སོགས་པའི་ཚིག་གི་ཕྲེང་བ་སྙན་སྒྲོན་དུ་འབུལ་བ་དང་བཅས་ཏེ། རྗེ་བཙུན་དམ་པ་བཀའ་དྲིན་མཚུངས་པ་མེད་པའི་བདག་ཉིད་ཅན་གྱི་ཞལ་གྱི་དཀྱིལ་འཁོར་སེམས་ཅན་ཐམས་ཅད་ལ་ཁྱབ་པའི་སྙིང་རྗེ་ཆེན་པོས་ལན་བརྒྱར་བཀྲུས་པ་
སྙམ་བྱེད་པ། སུ་ཞིག་མཐོང་ན་དོན་གྱི་སྙིང་པོས་མངོན་པར་ལྕི་བ་གང་ཡིན་པ་དེ་ཉིད། ལྷ་སྲས་མིའི་དབང་ཕྱུག་དམ་པ་དེ་ཉིད་སྐུ་འཁོར་གྱི་ཚོགས་དང་བཅས་པའི་འདྲེན་བྱེད་ཀྱི་དབང་པོའི་དགའ་སྟོན་བླ་ན་མེད་པ་ཉིད་དུ་མཐོང་བར་གྱུར་ཏོ། །ཇི་ལྟར་མཐོང་བ་ལའང་དུས་དེ་ཉིད་ནས་བརྩམས་
ཏེ་བླ་མའི་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པ་ལ་རྗེ་བཙུན་འཇམ་པའི་དབྱངས་དང་གཉིས་སུ་མེད་པའི་སྣང་བ་ཁོ་ན་ལ། འགྲོ་བ་ཕལ་དང་ཐུན་མོང་དུ་གྱུར་པའི་མ་དད་པ་ལ་སོགས་པ་སྐད་ཅིག་ཀྱང་མི་འབྱུང་བ་ནི་ཀུན་གྱིས་མངོན་དུ་གྱུར་པའོ། །ཚུལ་འདི་ལ་བསམས་ན་རྗེ་
བཙུན་དམ་པ་འདི་ཉིད་དང་སྐྱེ་བ་དཔག་ཏུ་མེད་པའི་རིང་ནས་བསོད་ནམས་ཀྱི་ཕུང་པོ་མངོན་པར་འདུ་བྱས་ཤིང་སྨོན་ལམ་གསེར་གྱི་སྐུད་པ་བཟང་པོས་ལུ་གུ་རྒྱུད་དུ་སྦྲེལ་བའི་སྐྱེས་བུ་དམ་པ་ཉིད་དུ་གདོན་མི་ཟ་བའོ། །ཅིའི་ཕྱིར་ན་གཞན་དུ་བསྐལ་པའམ་བསྐལ་པ་ལས་ལྷག་པར་ཡང་རྒྱལ་བ་ཀུན་

གྱི་ཕྲིན་ལས་ལས་སྤྲུལ་པའི་མཆོག་གི་རྡོ་རྗེ་སློབ་དཔོན་ཆེན་པོའི་མཚན་ཉིད་ཐམས་ཅད་ཡོངས་སུ་རྫོགས་ནས་སྐྱེ་བོ་མ་ལུས་པ་སྨིན་པར་བྱེད་པའི་བདག་ཉིད་ཅན་དང་ནམ་དུ་ཡང་མཇལ་བར་དཀའ་ཞིང༌། གལ་ཏེ་མཇལ་བར་གྱུར་ཀྱང་སེམས་ཅན་རང་རང་ལས་
ཀྱི་ཉེས་པས་བསྒྲིབས་ཏེ། ཚུལ་བཞིན་མ་ཡིན་པར་སྤྱོད་པ་དང༌། བློ་དྲི་མ་དང་བྲལ་བའི་རང་བཞིན་ཅན་མ་ཡིན་པ་དང༌། ཡང་དག་པར་མ་ཡིན་པར་སྨྲ་བ་དང༌། རང་དང་སྐལ་བ་མཉམ་པ་ཙམ་དུ་མཐོང་ངོ༌། །དེ་ལྟར་མཐོང་བ་ལ་བརྟེན་ནས་སེམས་ཀྱི་རྒྱུད་ལ་དད་པ་ཙམ་ཡང་སྐྱེ་བར་
མི་འགྱུར་བ་ཡིན་ནོ། །དེ་ལྟར་ཡིན་པའང་ཅིས་ཤེས་ན། བ་ཚ་ཆུ་ཀླུང་གི་མདོ་ལས། ལྔ་བརྒྱ་ཐ་མར་གྱུར་པ་ན། །ང་ཉིད་སློབ་དཔོན་གཟུགས་འཛིན་ཏེ། །ང་ཡིན་སྙམ་དུ་ཡིད་བྱོས་ལ། །དེ་ཚེ་དེ་ལ་གུས་པ་སྐྱེད། །ཅེས་སོ། །རྡོ་རྗེ་གུར་ལས། རྡོ་རྗེ་སེམས་དཔའ་ལྟ་བུ་ཡི། །
དེ་ལྟར་སློབ་དཔོན་གཟུགས་འཛིན་ཏེ། །སེམས་ཅན་རྗེས་སུ་གཟུང་དམིགས་ནས། །ཕལ་པའི་གཟུགས་སུ་གནས་པའོ། །ཞེས་དང༌། སློབ་དཔོན་སྟོན་པར་གྱུར་པ་ནི། །སངས་རྒྱས་ཀུན་གྱིས་ཕྱག་མཛད་པ། །བདག་ཅག་རྣམས་ཀྱི་ཕ་དང་མ། །འདི་ཉིད་ཡིད་ལ་བསམ་
པར་བྱ། །ཞེས་དང༌། གང་ཕྱིར་ཡེ་ཤེས་རྡོ་རྗེ་ནི། །བརྙེས་པས་མྱུར་དུ་ཐོབ་པར་འགྱུར། །དེ་ཕྱིར་སློབ་དཔོན་དྲུང་གཤེགས་ནས། །དེ་བཞིན་གཤེགས་རྣམས་ཕྱག་མཛད་དོ། །ཞེས་གསུངས་པ་བཞིན། ངེས་པའི་དོན་དུ་བསྐལ་པ་དཔག་ཏུ་མེད་པའི་གོང་རོལ་ནས་ཟུང་འཇུག་རྡོ་རྗེ་
འཛིན་པ་ཆེན་པོའི་གོ་འཕང་མངོན་དུ་མཛད་ཟིན་ཀྱང༌། སྲོག་ཆགས་ཀྱི་རྣམ་པ་སྣ་ཚོགས་པ་དག་གདུལ་བའི་ཐབས་ལ་བཞུགས་པ་ན། ལ་ལར་ནི་དཀྱིལ་འཁོར་གྱི་འཁོར་ལོའི་རྣམ་པར་བསྟན་ནས་དོན་མཛད། ལ་ལར་ནི་སངས་རྒྱས་ཀྱི་སྐུར་བསྟན་ནས་དོན་མཛད། དེ་བཞིན་དུ་བྱང་ཆུབ་
སེམས་དཔའ་དང༌། འཕགས་པ་ཉན་ཐོས་དང༌། རང་སངས་རྒྱས་དང༌། པཎྜི་ཏ་དང༌། གྲུབ་པ་ཐོབ་པ་དང༌། རིག་པ་འཛིན་པའི་ས་ལ་གནས་པ་ལ་སོགས་པ་རྣམས་ཀྱི་ཚུལ་བཟུང་ནས་དོན་མཛད་དོ། །དེ་སྐད་དུའང༌། ས་སྐྱ་པཎྜི་ཏས། ཁྱོད་ནི་རྒྱལ་དང་རྒྱལ་བའི་སྲས། །

རབ་བྱུང་དགེ་བསྙེན་ཁྱིམ་པ་སོགས། །འགྲོ་བ་ཀུན་གྱི་གཟུགས་མཛད་ནས། །གདུལ་བྱ་ཐམས་ཅད་སྨིན་པར་མཛད། །ཉི་མའི་འོད་ཟེར་རབ་ཚ་ཡང༌། །མེ་ཤེལ་མེད་པར་མེ་མི་འབྱུང༌། །དེ་བཞིན་སངས་རྒྱས་བྱིན་རླབས་ཀྱང༌། །བླ་མ་མེད་པར་འབྱུང་མི་འགྱུར། །ཞེས་དང༌།
རྡོ་རྗེ་གུར་གྱི་རྒྱུད་ལས། གང་དུ་སྣང་ནས་ཀྱང་སེམས་ཅན་གྱི་དོན་མཛད་དོ། །སོ་སོར་སྣང་ནས་ཀྱང་སེམས་ཅན་གྱི་དོན་མཛད་དོ་ཞེས་བྱ་བ་ལ་སོགས་པ་རྒྱ་ཆེར་གསུངས་སོ། །དེ་བས་ན་སངས་རྒྱས་དང་བྱང་ཆུབ་སེམས་དཔའ་གངྒཱའི་ཀླུང་གི་བྱེ་མ་སྙེད་ཀྱི་གྲངས་དང་མཉམ་པ་ལ་བསྐལ་
པའི་ཕྲེང་བའང་དེ་སྙེད་ཀྱི་གྲངས་དང་མཉམ་པར་བསྙེན་བཀུར་བ་ལས། རྡོ་རྗེ་སློབ་དཔོན་གྱི་བ་སྤུའི་ཁུང་བུ་གཅིག་ལ་མཆོད་པའི་བསོད་ནམས་ཀྱི་ཕུང་པོ་ཆེས་ཁྱད་པར་དུ་འཕགས་པ་འཐོབ་པའི་ཚུལ་མང་དུ་གསུངས་ཤིང༌། བདེ་མཆོག་སྡོམ་པ་འབྱུང་བ་ལས། མཆོད་པ་ཐམས་
ཅད་ཡོངས་སྤངས་ཏེ། །བླ་མ་མཆོད་པ་ཡང་དག་བརྩམ། །དེ་མཉེས་པས་ནི་ཀུན་མཁྱེན་གྱི། །ཡེ་ཤེས་མཆོག་ནི་ཐོབ་པར་འགྱུར། །བླ་མེད་མཛད་པའི་སློབ་དཔོན་ནི། །རྡོ་རྗེ་སེམས་དཔའ་རབ་མཆོད་ན། །དེ་ཡིས་བསོད་ནམས་མ་བྱས་ཅི། །དཀའ་ཐུབ་མ་བསྟེན་
ཅི་ཞིག་ཡོད། །ཅེས་དང༌། སློབ་དཔོན་ཡོན་ཏན་གླེང་བྱ་ཡིས། །སྐྱོན་ནི་ནམ་ཡང་མ་ཡིན་ནོ། །ཞེས་སོ། །གལ་ཏེ་དེ་ལྟར་ཡིན་ན་ཐུགས་རྗེ་ཆེན་པོའི་རང་བཞིན་ཅན་དུ་བཞུགས་ནས་རྣམ་པ་ཐམས་ཅད་དུ་ཡིད་བཞིན་གྱི་ནོར་བུ་དང་འདྲ་བར་སྲོག་ཆགས་མཐའ་དག་གི་དོན་ཇི་ལྟར་
མི་མཛད་ཅེ་ན། བཤད་པར་བྱ་སྟེ། དཔེར་ན་ལྷའི་རྒྱལ་པོ་རྣམས་ཀྱིས་ཆར་གྱི་རྒྱུན་ཆེན་པོ་རབ་ཏུ་ཕབ་ཀྱང༌། ཏིལ་དང་ནས་ལ་སོགས་པའི་ས་བོན་རུལ་བ་དང༌། མེས་ཚིག་པ་དང༌། ས་བོན་དུ་མི་རུང་བ་བཏབ་པ་དག་ལས་ནི་ནམ་ཡང་མྱུ་གུ་སྐྱེ་བར་མི་འགྱུར་བ་དེ་བཞིན་དུ། སངས་རྒྱས་
དང་བྱང་ཆུབ་སེམས་དཔའ་རྣམས་ནི་འགྲོ་བ་མཐའ་དག་གི་ཡིད་ལ་རེ་བ་ཐམས་ཅད་ཡོངས་སུ་རྫོགས་པར་མཛད་པ་ལ་མི་མཁས་པ་མེད་ཀྱང་སྐལ་བ་མེད་པ་རྣམས་ཀྱིས་དད་པའི་རྩ་བ་བརྟན་པ་དང༌། དམ་པའི་ཆོས་མཉན་པ་དང༌། ཡུལ་དེ་ལ་བརྟེན་ནས་ཚོགས་བསགས་པ་ལ་སོགས་པའི་

ལས་བཟང་པོ་མྱང་བར་མི་འགྱུར་ཏེ། ཇི་སྐད་དུ་ཡང༌། རྒྱུ་ནི་ཡོངས་སུ་སྨིན་གྱུར་ནས། །གང་དང་གང་ལ་གང་དང་ནི། །གང་ཚེ་བྱ་བ་ཕན་གྱུར་པ། །དེ་དང་དེ་ལ་དེར་སྣང་ངོ༌། །ལྷ་ཡི་རྒྱལ་པོས་ཆར་ཕབ་ཀྱང༌། །ས་བོན་མི་རུང་མི་འཁྲུངས་ལྟར། །
སངས་རྒྱས་རྣམས་ནི་བྱུང་གྱུར་ཀྱང༌། །སྐལ་བ་མེད་པས་བཟང་མི་མྱང༌། །ཞེས་སོ། །དེ་ལ་སོགས་པ་རྒྱུ་མཚན་དུ་མས་ཡིད་ཡོངས་སུ་དྲངས་ནས་མི་རིང་བར་གཟའ་སྐར་དང་སྦྱོར་བྱེད་བཟང་པོ་འཛོམ་པའི་ཟླ་ཚེས་དགེ་བའི་ཉིན་འབུལ་ཆེན་གྱི་བཀོད་པ་ལེགས་པར་བཤམས་ཏེ། དེའང་འཕགས་
པའི་ཡུལ་གྱི་སྙན་དངགས་མཁན་ཐམས་ཅད་ཀྱི་གཙུག་གི་ནོར་བུ་ལྟར་གྱུར་པ་དཔལ་ལྡན་དཎྜིའི་ཞབས་ཀྱི་སྙན་དངགས་ཀྱི་གཞུང་ལས་ལེགས་པར་འཕོས་པའི་མཆོད་པར་བརྗོད་པ་ཡན་ལག་བདུན་པ་དང་བཅས་པའི་ཚིགས་སུ་བཅད་པ་ཉམས་འགྱུར་སྟོང་གི་རོ་དང་ལྡན་པའི་དབྱངས་ཀྱིས་མདུན་
བསུ་ནས། ཐོག་མར་བཀྲ་ཤིས་པའི་ལྷ་དར་དང༌། རྒྱལ་བ་བདུད་ལས་རྣམ་པར་རྒྱལ་བའི་སྐུ་གསུང་ཐུགས་ཀྱི་རྟེན་ངོ་མཚར་ཆེ་བ་རྣམས་ཀྱིས་ཐོག་དྲངས་པའི་འབུལ་བ་དངོས་པོ་བཟང་ཞིང་རྒྱ་དཔངས་མི་དམན་པ་ཚན་གྲངས་བརྒྱ་ཕྲག་བདུན་བརྩེགས་པ་མཎྜལ་དུ་ཕུལ་ལོ། །གཞན་ཡང་ཨེ་
ཝཾ་ཐར་པ་རྩེའི་མཁན་ཆེན་རྡོ་རྗེ་འཆང་ནམ་མཁའ་བསམ་འགྲུབ་བཀྲ་ཤིས་གྲགས་པའི་རྒྱལ་མཚན་དཔལ་བཟང་པོ་ཞེས་པ། ཤེས་རབ་ཀྱི་སྣང་བ་དམ་པས་སྒྲིབ་པའི་མུན་པ་མཐའ་དག་བསལ་བར་བྱས་པ། དཀའ་བ་བརྒྱ་སྟོང་གིས་བསྒྲུབས་པའི་ཡོན་ཏན་གྱི་ཚོགས་མང་པོ་ལ་
དབང་འབྱོར་པ། མངོན་པར་ཤེས་པའི་མིག་གྲུངས་པོར་གྱུར་པས་དུས་གསུམ་གྱི་ཤེས་པར་བྱ་བ་ཐམས་ཅད་མཁྱེན་ཅིང་གཟིགས་པ། འགྲོ་བ་ཐམས་ཅད་ལེགས་པའི་ལམ་དུ་འཁྲིད་པ་ལ་ཤ་ཐང་བ་མེད་པའི་མཐུ་ཆེན་པོ་དང་ལྡན་པ། ཆོས་ཐམས་ཅད་མ་ནོར་བ་ཡང་དག་པར་སྟོན་
པ་ལ་བསྙེངས་པ་མེད་པའི་མཁྱེན་རབ་ཀྱི་དབང་ཕྱུག་གྲུབ་པ་དེ་ཉིད་ཀྱི་ཞལ་གྱི་དཀྱིལ་འཁོར་མཐོང་བའི་སྐལ་བ་བཟང་པོའི་རོ་ལ་ལོངས་སུ་སྤྱོད་པའི་མཚོན་བྱེད་དུ་རྣམ་གྲངས་བརྒྱ་དང་ལྔ་བཅུ་ཕུལ་ལོ། །ཨེ་ཝཾ་ཀླུ་སྡིངས་བླ་བྲང་གི་ཤར་པ་རིན་ཆེན་རྒྱལ་མཚན་ཞེས་པ་བླ་ན་མེད་པའི་བྱང་ཆུབ་ཀྱི་སྤྱོད་

པ་ལ་མ་འདྲིས་པ་མེད་པས་དམ་པའི་སྤྱོད་པ་ལ་དགའ་བ། སྐྱེ་བ་ནས་སྐྱེ་བར་སྦྱངས་པའི་བག་ཆགས་ཀྱི་མཐུ་བརྟས་པར་གྱུར་པས་ཚེ་འདིའི་གཙུག་ལག་མང་པོའི་གནད་ལ་མཁས་པ། ཟབ་ཅིང་ཡངས་པའི་ཆོས་ཐམས་ཅད་སྡེབ་ལེགས་ངག་གི་ཤིང་རྟ་ལ་བརྟེན་ནས། འགྲོ་བ་ཀུན་གྱི་ཐར་
པའི་གསོས་སུ་འདྲེན་པ། རྟག་ཏུ་མཁས་པའི་བྱ་བ་ཐམས་ཅད་ལྷུར་ལེན་པའི་བསྟན་འཛིན་གྱི་སྐྱེས་བུར་གྱུར་པ་དེ་ཉིད་ལ་འབུལ་བ་རྣམ་གྲངས་བརྒྱ་དང་ལྔ་བཅུ། ཨེ་ཝཾ་ཕུན་ཚོགས་གླིང་བླ་བྲང་གི་མཁན་ཆེན་འཇམ་པའི་དབྱངས་བསོད་ནམས་བཟང་པོ་བཀྲ་ཤིས་གྲགས་པའི་རྒྱལ་མཚན་དཔལ་
བཟང་པོ་ཞེས་པ། ཕྱི་དང་ནང་གི་གྲུབ་པའི་མཐའི་གཞུང་ལུགས་མ་ལུས་པ་མཁྱེན་ཅིང་ལེགས་པར་སྨྲ་བའི་དབང་ཕྱུག་ཆེན་པོ། སྙིགས་མའི་དུས་འདིར་རྒྱལ་བ་གཉིས་པ་བཞིན་དུ་བསྟན་པ་ལ་ལྷག་པར་སྨན་པའི་བྱ་བ་བྱས་པ། རྒྱལ་བ་ཀུན་གྱི་སྐུ་གསུང་ཐུགས་མི་ཟད་པ་རྒྱན་གྱི་འཁོར་
ལོའི་ཡོན་ཏན་གྱ་ནོམ་པའི་འབྱོར་པས་རྒྱས་པ། སྐྱེ་དགུ་མ་ལུས་པའི་ཡིད་ལ་རེ་བ་ཐམས་ཅད་རྫོགས་པར་བྱེད་པའི་དཔག་བསམ་དམ་པ་དེ་ཉིད་ལ་འབུལ་བ་རྣམ་གྲངས་བརྒྱ་དང་ལྔ་བཅུ། དེ་སྐབས་སུ་ཟུར་འཆད་པ་ཡིན་པ་ལ་ཕྱིས་སུ་གདན་རབས་ཀྱི་ཁྲིར་ཕེབས་པའི་མཁན་ཆེན་འཇམ་
པའི་དབྱངས་སངས་རྒྱས་དཔལ་བཟང་བཀྲ་ཤིས་གྲགས་པའི་རྒྱལ་མཚན་དཔལ་བཟང་པོ་ཞེས་པ། སྐྱེ་བ་དུ་མ་ནས་ལྷག་པའི་ལྷ་འཇམ་དཔལ་གཞོན་ནུས་རྗེས་སུ་བཟུང་བ། ཚེ་འདིར་ཤེས་བྱའི་དཀྱིལ་འཁོར་མ་ལུས་པ་ཐུགས་སུ་ཆུད་པ་ཕྱི་གནས་ལྔ་རིག་པའི་པཎྜི་ཏ་ཆེན་པོར་གྱུར་པ། ནང་
དུ་བཅུ་གསུམ་རྡོ་རྗེ་འཛིན་པའི་ས་ལ་ཇི་ལྟར་མངའ་བའི་ཡོན་ཏན་མ་ལུས་པ་རྫོགས་པ། སངས་རྒྱས་བཅོམ་ལྡན་འདས་ཀྱི་བསྟན་པ་མཁས་པའི་བྱ་བ་རྣམ་པ་གསུམ་གྱིས་ལྷག་པར་ཕན་པའི་བགྱི་བ་བགྱིས་པའི་བསྟན་འཛིན་གྱི་སྐྱེས་བུ་དམ་པ་དེར་ཡང་འབུལ་བ་དཔངས་མཐོར་བརྩེགས།
དཔོན་སློབ་དབུ་མཛད་སངས་རྒྱས་ཚུལ་ཁྲིམས་ཞེས་གཞུང་ལུགས་རབ་འབྱམས་ལ་མཁྱེན་པའི་དཀྱིལ་འཁོར་རྒྱས་ཤིང༌། འཕགས་པའི་དགེ་འདུན་རྒྱ་མཚོ་ལྟ་བུའི་དབུས་ན་ཡོན་ཏན་གྱི་ཁྱད་པར་དུ་མས་མངོན་པར་འཕགས་པ་དེ་ཉིད་ལ་ཡང་འབུལ་བ་གཟབ་པར་བརྩེགས། གཞན་ཡང་

ཁང་ཚན་བཅོ་བརྒྱད་ཀྱི་དགེ་འདུན་རྣམས་ལ་མང་ཇ་རྟེན་བཞག་པ་ལ་སོགས་པ་མཛད་དོ། །ཁྱད་པར་དཔལ་ཨེ་ཝཾ་ཆོས་ལྡན་ལ་བསྔགས་པ་ཌཱ་ཀི་རྣམ་པར་བཞད་པའི་གླིང་བུ་ལས། ཆོས་ཀྱི་དུང་དང་རྔ་ཆེན་གཎྜཱིའི་སྒྲ། །སྤྲིན་ཆེན་འབྲུག་གི་གད་རྒྱངས་ལས་ལྷག་
པས། །ཚུལ་བཞིན་མགྲོན་གཉེར་ངུར་སྨྲིག་འཛིན་པའི་དཔུང༌། །ལི་ཁྲིའི་ཆུ་གཏེར་གཡོ་བའི་རྦ་ཀློང་བཞིན། །འདུས་པ་རྒྱ་མཚོའི་སྣམ་སྦྱར་འཕགས་པའི་གོས། །གུར་གུམ་གཞོན་ནུའི་ཚོན་གྱིས་ནམ་མཁའི་ཁམས། །སིནྡྷུ་ཝཱ་ར་ལི་ཁྲིའི་རྡུལ་ཚོགས་ལྟར། །དམར་
སེར་འོད་ཀྱི་དཀྱིལ་འཁོར་རྒྱ་ཆེའི་དབུས། །ཞེས་བསྔགས་པའི་དོན་དང་མཐུན་པར་ཨེ་ཝཾ་གཙུག་ལག་ཁང་ཆེན་པོ་ཉིད་དུ་སེམས་ཅན་རྒྱ་མཚོའི་ཚོགས་ཀྱི་མགོན་དང་སྐྱབས་དང་དཔུང་གཉེན་དུ་བཞུགས་ནས། སངས་རྒྱས་བཅོམ་ལྡན་འདས་ཀྱི་བསྟན་པའི་རྩ་ལག་ཏུ་གྱུར་པ། སུམ་
ལྡན་རྡོ་རྗེ་འཛིན་པའི་དགེ་སློང་གི་དགེ་འདུན་ངུར་སྨྲིག་གོས་ཀྱིས་མཛེས་པར་བྱས་པའི་ཚོགས་སྟོང་ཕྲག་ཕྱེད་གཉིས་སུ་ལྡང་བ་ཐམས་ཅད་ཟླ་བ་གཅིག་དང་ཞག་བཞིའི་བར་དུ་བསྙེན་བཀུར་ཡང་དག་པར་བགྱིས་ཏེ། རྣལ་འབྱོར་རྒྱུད་ཀྱི་ནང་གསེས་ཆ་མཐུན་གྱི་རྒྱུད་ཀྱི་ཁོངས་སུ་
གཏོགས་པ། དཔལ་ངན་སོང་ཐམས་ཅད་ཡོངས་སུ་སྦྱོང་བའི་རྒྱུད་ཀྱིས་དངོས་སུ་བསྟན་པར་བྱ་བའི་གཙོ་བོ་ཀུན་རིག་རྩ་བའི་ལྷ་སུམ་ཅུ་རྩ་བདུན་མགྲོན་ཐབས་ཀྱི་ལྷ་དང་བཅས་པའི་དཀྱིལ་འཁོར་གྱི་ཆོ་ག་རྒྱས་པ། རྗེ་བཙུན་རྡོ་རྗེ་འཆང་གིས་མཛད་པའི་ཡིག་ཆ་སྒྲིབ་པ་རྣམ་སེལ་དང་
གཞན་ཕན་མཐའ་ཡས་ཇི་ལྟ་བ་བཞིན་གྱི་སྒྲུབ་མཆོད་དུ་བཙུགས་ཏེ། གླ་པ་རེ་ལ་གསེར་ཞོ་རེ་འགྱེད་པ་ཉིན་གཅིག་གོ །གྲྭ་པ་བཞི་རེ་ལ་དངུལ་ཞོ་ཕྱེད་དང་གཉིས་རེ་འགྱེད་པ་ཉིན་ཉི་ཤུ་རྩ་བཞིའོ། །གྲྭ་པ་བཞི་རེ་ལ་གཞུང་ཇ་བར་ཁག་རེ་འགྱེད་པ་ཉིན་གསུམ་མོ། །གྲྭ་པ་བཅུ་རེ་ལ་
ཇ་ནག་པོ་བར་ཁག་རེ་འགྱེད་པ་ཉིན་གཅིག་གོ །གྲྭ་པ་བཞི་རེ་ལ་མ་ཧཉྩི་ཡུག་རེ་འགྱེད་པ་ཉིན་བཞིའོ། །གྲྭ་པ་རེ་རེ་ལ་མཛོད་དར་ལེགས་པ་རེ་འགྱེད་པ་ཉིན་གཅིག་སྟེ། དེ་ལྟར་ཉིན་སུམ་ཅུ་རྩ་བཞི་རྫོགས་པ་དང༌། དེའི་མཚམས་ནས་འདིའི་མདུན་ན་འདོན་ལ་སོགས་པའི་སྐུ་འཁོར་དུ་

གཏོགས་པ་རྣམས་ཀྱིས་རིམ་པར་བཙུགས་པ་ལ་ཟླ་བ་གཅིག་སྟེ། མདོར་ན་ཟླ་བ་གཉིས་ཀྱི་བར་དུ་དགེ་འདུན་ཇི་སྙེད་མཆིས་པ་རྣམས་ལ་བསྙེན་བཀུར་དང་ཡོན་འབུལ་གཟབས་པར་བསྟབས་སོ། །གཞན་ཡང་དགེ་འདུན་ཉུང་བཏུས་ཀྱིས་བཅོམ་ལྡན་འདས་མགོན་པོ་ཚེ་དཔག་ཏུ་མེད་
པའི་ཆོ་ག་དང༌། གཙུག་ཏོར་རྣམ་པར་རྒྱལ་མའི་སྟོང་མཆོད་དང༌། མགོན་ཁང་ཤར་ནུབ་རྣམས་སུ་བསྐང་གསོ་དང༌། ཀ་དྲུག་ཁང་དུ་འཇིགས་བྱེད་དྲུག་ཅུ་པའི་གཏོར་རྒྱབ་གསར་འཕར་བཙུགས་པ་དང༌། རྡོ་རྗེ་རྣམ་པར་འཇོམས་པའི་གཏོར་ཆེན་གཏོང་བ་རྣམས་ལའང་ཡོན་འབུལ་དང་བསྙེན་
བཀུར་དཔངས་མཐོར་བྱས་སོ། །གཙུག་ལག་ཁང་དང༌། གཙང་ཁང་དང༌། ལམ་འབྲས་ལྷ་ཁང་དང༌། ལམ་ཟབ་ལྷ་ཁང་ལ་སོགས་པའི་ལྷ་ཁང་རྣམས་སུ་སྐྱེ་དགུ་མ་ལུས་པའི་ཕན་བདེའི་རྩ་ལག་ཏུ་བཞུགས་པའི་བླ་མ་རྒྱལ་བ་སྲས་དང་བཅས་པའི་སྐུ་གསུང་ཐུགས་ཀྱི་རྟེན་ཤིན་ཏུ་དཀོན་
ཞིང་ངོ་མཚར་བ། བྱིན་རླབས་ཀྱི་གཟི་འོད་རབ་ཏུ་འཕྲོ་བ་རྣམས་ལ་སྤོས་དང༌། མར་མེ་དང༌། ཞལ་ཟས་དང༌། ཁ་དོག་སྣ་ཚོགས་པའི་དར་གྱི་སྙན་ཤལ་དང༌། གོས་བཟང་ཁྱད་པར་དུ་འཕགས་པ་མང་པོའི་རྒྱུ་ལས་བསྐྲུན་པའི་བླ་རེ་དང༌། རྒྱལ་མཚན་དང༌། འཕན་དང༌། ལྡ་ལྡི་
ལ་སོགས་པ་མཆོད་པའི་ཡོ་བྱད་ཕུལ་བའི་གཏོང་ཕོད་མི་དམན་པ་ངོ་མཚར་རྣ་བའི་དགའ་སྟོན་བླ་ན་མེད་པ་ཉིད་དུ་མཛད་དོ། །དེ་ནས་དཔལ་ས་སྐྱ་ཉིད་དུ་འབྱོན་པའི་ཕྱིར་མཐུན་པའི་ཡོ་བྱད་སྣ་ཚོགས་པའི་འབྱོར་པ་བསྣམས་པའི་འཁོར་གྱི་ཚོགས་མང་པོ་དང་བཅས་པ་གདན་བཏེག་སྟེ་བྱོན་པ་
ན། ནམ་ཞིག་ན་ཆོས་གྲྭ་ཆེན་པོ་དེ་ཉིད་ལ་བསྔགས་པ་དབང་པོའི་ཉེར་འཚོ་ཞེས་བྱ་བ་ལས། འཛམ་གླིང་འཛིན་མའི་ཁྱོན་གྱི་དབུས། །དབུས་ཀྱི་རྡོ་རྗེའི་རང་བཞིན་ཞིང༌། །ཞིང་ཁམས་རྒྱ་མཚོ་ཀུན་གྱི་མཆོག །མཆོག་འདི་ས་ཡི་སྙིང་པོ་སྟེ། །སྐྱེ་དགུ་ཀུན་ལ་རབ་དགའི་དཔལ་སྟེར་
བ། །གང་གིས་བྱང་ཆུབ་སྙིང་པོ་བརྙེས་པའི་གཞི། །རྡོ་རྗེའི་རང་བཞིན་རྡོ་རྗེ་གདན་འདི་ནི། །རྒྱལ་བ་རྒྱ་མཚོས་བྱང་ཆུབ་བརྙེས་པའི་གནས། །མ་ག་དྷཱ་ཡང་འདི་ལས་གཞན་དུ་ཅི། །ཞེས་དང༌། ལོངས་སྤྱོད་རྣམ་མང་ལྡན་པའི་གནས་མང་ཡང༌། །རིག་པའི་འབྱུང་གནས་འདི་

ལྟ་འགའ་ཡོད་མིན། །ཡིད་འཕྲོག་མཛེས་པའི་རིན་ཆེན་མང་ཡོད་ཀྱང༌། །འདོད་དགུ་འགྲུབ་པ་བསམ་འཕེལ་གཅིག་པོ་ཙམ། །ཞེས་དང༌། དེ་ཕྱིར་རྒྱལ་དང་རྒྱལ་བའི་སྲས་རྣམས་ཀྱིས་བསྟེན་ཅིང༌། །རིག་པའི་གནས་ལྔ་ཕུལ་བྱུང་རྣམས་ཀྱིས་བསྟི་བའི་
གནས། །ངུར་སྨྲིག་གོས་མཆོག་འཛིན་པ་རྣམས་ཀྱི་དགའ་ཚལ་ཏེ། །གདན་ས་ཆོག་འདི་བྱང་ཆུབ་སྙིང་པོ་ཡིན་ལགས་གྲང༌། །ཞེས་འབྱུང་བ་ལྟར། བསྐལ་པ་བཟང་པོའི་རྣམ་པར་འདྲེན་པ་ཐམས་ཅད་མངོན་པར་བྱང་ཆུབ་པའི་ཚུལ་བསྟན་པའི་གནས། འཕགས་པའི་ཡུལ་གྱི་རྡོ་རྗེ་
གདན་ཆེན་པོའི་གནྡྷོ་ལ་དང༌། རིག་པའི་གནས་ལྔ་ལ་མཁས་པ་དང་གྲུབ་པའི་དབང་ཕྱུག་གི་འབྱུང་གནས་སུ་གྱུར་པ་ལ་ནི་ཁྱད་པར་ཅུང་ཟད་ཀྱང་དམིགས་སུ་མེད་པ། འཕགས་པ་རིགས་གསུམ་མགོན་པོས་དགོངས་བཞིན་དུ་སྐྱེ་བའི་ཟློས་གར་གྲངས་མེད་པ་དེང་ནས་བཟུང་སྟེ་མ་འོངས་བསྐལ་པའི་
བར་དུ་ཡང་འབྱོན་པར་འགྱུར་བར་མངོན་པར་ཤེས་པ་དྲུག་གི་མིག་གྲུངས་པོར་གྱུར་པ་རྣམས་ཀྱིས་ལེགས་པར་གཟིགས་ཤིང་ལུང་བསྟན་གྱི་བདུད་རྩིའི་ཆུ་གཙང་མས་ལེགས་པར་ཆག་ཆག་བཏབ་པ། ཇི་ལྟར་ལུང་དུ་བསྟན་པ་དེ་ལྟར་བདེན་པའི་མཐས་ཀྱང་ཤིན་ཏུ་གསལ་བར་བྱས་པའི་གདན་ས་ཆེན་པོ་དཔལ་ས་སྐྱའི་ཆོས་གྲྭ་ཆེན་པོ་ཞེས་བྱ
བ་དེའི་ཉེ་འདབས་སུ་བྱོན་ནོ། །དེར་བྱོན་པ་དང་གདན་ས་དེ་ཉིད་ནས་ཀྱང་བསུ་བ་སྔ་ཕྱི་མང་པོས་སོན་པ་རྣམས་ཀྱིས་མདུན་བསུ་བ་དང༌། ལྷ་བསངས་ཀྱི་དུད་པ་གནམ་སའི་དཀྱིལ་འཁོར་མ་ལུས་པར་ཁྱབ་པར་གཏུལ་བ་དང༌། ཕྱོགས་ལས་རྣམ་པར་རྒྱལ་བའི་རྒྱལ་མཚན་དང༌། བ་
དན་དང༌། འཕན་དང༌། གདུགས་ལ་སོགས་པའི་ཡོ་བྱད་བསམ་གྱིས་མི་ཁྱབ་པ་བསྒྲེང་བ་དང་བཅས་ཏེ། རིང་ནས་མངོན་པར་འདུན་པའི་རི་མོ་ལན་ཅིག་མ་ཡིན་པར་ཡང་དང་ཡང་དུ་འདྲི་བའི་གནས་ག་ལ་བ་དེར་བདེ་བར་ཕེབས་སོ། །དེར་ཅུང་ཟད་ཅིག་ནས་སྐྱབས་གཅིག་རིན་
པོ་ཆེའི་བསྟན་སྲིད་ཟུང་གི་ཕྲིན་ལས་ཀྱི་འཁོར་ལོས་སྒྱུར་བའི་མཁྱེན་རབ་ཀྱི་དབང་ཕྱུག་ཕྱག་མཛོད་རིན་པོ་ཆེའི་སྐུ་ཞབས་སུ་འཛམ་གླིང་བསྟན་པའི་བདག་པོའི་ཞལ་གྱི་དཀྱིལ་འཁོར་མཇལ་བའི་སྐབས་དབྱེ་བར་གསོལ་ལོ། །དེས་ཀྱང་ལེགས་པར་སྐབས་ཕྱེད་པ་དང༌། ཇི་ཙམ་ཞིག་

ན་ཛམྦུ་རྐང་འཐུང་གི་རྒྱལ་མཚན་གྱིས་ཉེ་བར་སྤུད་པའི་གླིང་དམ་པ་འདི་ཉིད་རྣམ་པ་ཐམས་ཅད་དུ་མཛེས་པར་བྱེད་པའི་རྒྱན་གྱི་མཆོག་ཏུ་གྱུར་པ། སྐྱབས་གཅིག་མཚུངས་ཟླ་མེད་པ། དཔལ་ས་སྐྱ་པ་སྔགས་འཆང་བླ་མ་ངག་དབང་ཀུན་དགའ་བསོད་ནམས་རིན་ཆེན་བཀྲ་ཤིས་གྲགས་
པའི་རྒྱལ་མཚན་དཔལ་བཟང་པོ་ཞེས་མཚན་གྱི་རྔ་བོ་ཆེ་སྲིད་པ་གསུམ་གྱི་ཁོངས་སུ་ལྡིར་བ། དེ་ཉིད་སུ་ཞིག་གི་ཐོས་པ་འཛིན་པའི་བཅུད་དུ་ལེན་པར་བྱེད་པ་ཁོ་ནས་ཀྱང་སྲིད་ཞིའི་རྒུད་པ་ཐམས་ཅད་ལས་སྐྱོབ་པའི་ཐུགས་རྗེ་ཆེན་པོ་དང་ཡོན་ཏན་དཔག་ཏུ་མེད་པས་བཟུང་བའི་བདག་
ཉིད་ཅན། གང་གི་ཞབས་མཐིལ་བནྡྷུ་ཛཱི་ཝ་ཀའི་འདབ་མ་ལྟ་བུའི་ངོས་སུ་བསོད་ནམས་ཀྱི་བྱེད་པོས་ལེགས་པར་བྲིས་པའི་འཁོར་ལོ་རྩིབས་བརྒྱད་པའི་རྟགས་ཀྱིས་ཉེ་བར་སྤུད་པ་དེ་ནི། འཇིག་རྟེན་གྱི་ཁམས་ན་མཐུ་ཆེ་ཞིང་གཟི་བརྗིད་ཆེ་བར་རློམ་པ་རྣམས་ནི་འདི་ལྟ་སྟེ། ཚངས་
པ་དང༌། དབང་པོ་དང༌། དྲག་པོ་དང༌། སྲེད་མེད་ཀྱི་བུ་ལ་སོགས་པའི་ལྷའི་དབང་པོ་རྣམས་དང༌། དེ་བཞིན་དུ་མི་དང༌། ལྷ་མ་ཡིན་དང༌། ལྟོ་འཕྱེ་དང༌། གནོད་སྦྱིན་དང༌། མིའམ་ཅི་དང༌། གྲུལ་བུམ་སྟེ། དེ་དག་གི་བདག་པོར་གྱུར་པ་རྣམས་ཀྱང་མངོན་པར་ཁེངས་པ་བསྐྱུངས་
ཏེ། མུན་པའི་གཉེན་པོར་བྱེད་པའི་ནོར་བུ་རིན་པོ་ཆེའི་རྒྱན་གྱིས་ལེགས་པར་བརྒྱན་པའི་རལ་པའི་ཐོར་ཚུགས་རྣམས་ཀྱི་རྩེ་ན་ལེགས་པར་བཀོད་ཅིང༌། རི་མོར་བྱས་པ། བླ་མར་བྱས་པ། མཆོད་ཅིང་རྗེད་པར་བྱས་པ། འཇིག་རྟེན་ན་གྲགས་པའི་ཟླ་འོད་བཀར་པོས་ཡོངས་སུ་
བྲན་པའི་མཁས་པ་དང༌། གྲུབ་པ་དང༌། རིག་སྔགས་འཆང་བ་ཐམས་ཅད་ཀྱིས་རྗེད་པར་བྱེད། ཚིག་གི་བདོག་པ་ཕུན་སུམ་ཚོགས་པ་དག་གི་བསྟོད་པའི་མེ་ཏོག་ཇི་སྙེད་པས་མངོན་པར་གཏོར་ཡང་ཡོངས་སུ་གཏུགས་པ་མེད་པའི་ཡོན་ཏན་གྱི་ཕུང་པོར་གྱུར་པ། མཆོག་གི་སྤྲུལ་པའི་སྐུ་
དཔལ་ལྡན་སྟོབས་བཅུ་མངའ་བ་ཉིད་དང༌། དེའི་རྣམ་པར་འཕྲུལ་པ་བགྲང་ལས་འདས་པ་རྣམས་ཀྱིས་ལེགས་པར་བཤད་པའི་ཚོགས་ཇི་སྙེད་མཆིས་པ་དང༌། དེ་དག་གི་བརྗོད་བྱར་གྱུར་པ་གང་ཡིན་པའི་དམ་པའི་ཆོས་ཐམས་ཅད་ཀྱི་བདག་པོ། མཐའ་དྲུག་ཚུལ་བཞིའི་ལམ་

ནས་རྒྱལ་བའི་དགོངས་པ་མ་ལུས་པ་གཏན་ལ་འབེབས་པའི་མཁས་པ་རྣམས་ལ་འོས་པའི་ཕྲིན་ལས་གསུམ་གྱི་སྒོ་ནས། བསྟན་པའི་རྒྱལ་མཚན་དམ་པ་གོང་ནས་གོང་དུ་བསླང་བ་ལ་འཇིགས་པ་དང་བག་ཚ་བ་མེད་པའི་མཁྱེན་རབ་ཀྱི་དབང་ཕྱུག་ཆེན་པོ་སྟེ། གང་དེ་
མི་འཇིགས་བཞི་དང་ལྡན་པའི་གོ་འཕང་ཉེ་བར་བརྙེས་པའི་བརྡར། སེང་གེ་ཆེན་པོ་བརྒྱད་ཀྱིས་མངོན་པར་བཏེག་པའི་ཆོས་ཀྱི་ཁྲི་མཐོན་པོ་ཞིག་ཏུ་སྲིད་པ་གསུམ་གྱི་གཟི་བརྗིད་ཀྱི་ཕུང་པོ་མ་ལུས་པ་གཅིག་ཏུ་སྤུངས་པ་ལས་ལྷག་པའི་རང་བཞིན་ཉིད་དུ་འོད་དང་འོད་ཟེར་གྱི་ཚོགས་རབ་ཏུ་དཀྲིགས་
པའི་སྐུའི་དཀྱིལ་འཁོར་ནི། དཔེར་ན་འཆར་ཀའི་ཉིན་མོར་བྱེད་པའི་དཀྱིལ་འཁོར་སྒྲིབ་བྱེད་མེད་པ་ཞིག །ཐུན་མཚམས་སྤྲིན་གྱི་ལང་ཚོ་མངོན་པར་བདོ་བའི་རྩེ་ན་འདུག་པ་དང་འདྲ་བར་མཐོང་ན་མི་མཐུན་པ་མེད་པའི་སྐུ་ལས་མཚན་གྱི་སྣང་བ་རིང་པོའི་ལམ་དུ་འཕྲོ་བ་སྟེ། དེ་ནི་དགེ་སློང་གི་
དགེ་འདུན་སྤྱོད་ལམ་དུལ་ཞིང་མཛེས་པ་ཁོ་ནས་ཀྱང་སྐྱེ་འཕགས་ཐམས་ཅད་ཀྱི་ཡིད་འཕྲོག་པར་བཟོད་པའི་འཁོར་གྱིས་ཀུན་ནས་བསྐོར་ཞིང་མདུན་གྱིས་བལྟས་ཏེ་གནས་སོ། །དེ་དག་ཀྱང་ལ་ལ་ནི་ཨ་ག་རུ་དང༌། ཏུ་རུཥྐ་དང༌། ཙནྡན་ལ་སོགས་པ་ལྷན་ཅིག་སྐྱེས་པའི་སྤོས་
མཆོག་གི་སྡོང་བུ་དག་གཏུལ་བའི་དུད་སྤྲིན་བཻ་ཌཱུརྻ་སྔོན་པོའི་སྤྲིན་ཕུང་ལྟ་བུ་དག་གཏིབས་པར་བྱེད་དོ། །ལ་ལ་ནི་ཡི་གར་ཤིན་ཏུ་འོང་བའི་དྲི་ཞིམ་པོ་སྣ་ཚོགས་པ་དག་གཅིག་ཏུ་སྦྱར་བ་ལས་བྱུང་བའི་སྤོས་ཀྱི་རེངས་བུ་སྦར་བ་དག་ཐོགས་ཏེ། སྔོ་བསངས་དུད་པའི་སྤྲིན་གྱི་རི་མོ་ངོ་
མཚར་བ་དག་ནམ་མཁའི་ངོས་ལ་ཅི་ཡང་འདྲི་བར་བྱེད་དོ། །ཁ་ཅིག་ནི་མཐུན་པའི་རྐྱེན་དུ་གྱུར་པའི་ཡོ་བྱད་གཙང་ཞིང་བསོད་པ་ཕུན་སུམ་ཚོགས་པ་དག་གིས་སྐུའི་རིམ་གྲོ་དག་ལྷུར་བྱེད་དོ། །ཁ་ཅིག་ནི་གསང་ཆེན་རྡོ་རྗེ་ཐེག་པའི་ཆོས་ཀྱི་འཁོར་ལོ་བསྐོར་བ་ལ་ཉེ་བར་མཁོ་བའི་
ཉེར་བསྡོགས་ཀྱི་ཕྲེང་བ་མཚར་དུ་དངར་བ་ཅི་དང་ཅི་དགོས་པ་དག་མངོན་པར་བསྐྲུན་པར་བྱེད་དོ། །ཕལ་ཆེར་ནི་འདྲི་ཞིང་ལན་ལྡོན་པའི་ཚུལ་གྱིས་ཆོས་ཐམས་ཅད་ཀྱི་དྲང་བའི་དོན་དང་ངེས་པའི་དོན་གྱི་བྱེ་བྲག་ཕྲ་ཞིང་ཕྲ་བ་ཉིད་དུ་རྣམ་པར་འབྱེད་པའི་ལེགས་བཤད་ཀྱི་བདུད་རྩི་མང་པོ་

དག་ལེན་པར་བྱེད་དོ། །ཁ་ཅིག་ནི་ཇི་སྐད་ཐོས་པའི་གསུང་གི་བདུད་རྩི་མང་པོ་དག་བརྡ་དང་ཚིག་ལ་རྨོངས་པར་མ་གྱུར་པའི་སྐྱེས་བུའི་འདུ་བྱེད་ཀྱིས་ཡི་གེའི་ལམ་དུ་འགོད་པར་བྱེད་དོ། །ཁ་ཅིག་ནི་འགྲོ་བ་རྒྱ་མཚོའི་དད་པའི་དབའ་རླབས་ཀྱི་ཕྲེང་བ་རྣམ་པར་གཡོས་པའི་རྩེ་
མོ་ནས་འཁྲུངས་པར་དངོས་སུ་འབྱོར་པའི་ཡོ་བྱད་ཀྱི་མཎྜལ་གྱ་ནོམ་པ་དག་ཀྱང་སྟོབ་པར་བྱེད་པའི་དབུས་སུ། རྗེ་བཙུན་དམ་པ་དེ་ཉིད་འོད་དང་འོད་ཟེར་གྱི་སྣང་བ་ལྷམ་མེར་འབར་བ་དང་བཅས་ཏེ་བཞུགས་པ་དངོས་སུ་མཐོང་བར་གྱུར་ཏོ། །དེ་ལྟར་མཐོང་བར་གྱུར་པ་དང༌། སྡོམ་བརྩོན་
མིའི་དབང་ཕྱུག་དམ་པ་འཁོར་དང་བཅས་པ་ནི་འདི་སྙམ་དུ། ཨེ་མ་ཁམས་གསུམ་ཆོས་ཀྱི་རྒྱལ་པོ་ཆེན་པོ། དུས་གསུམ་མཉམ་པར་གཟིགས་པའི་དབང་ཕྱུག །འཇིག་རྟེན་གསུམ་གྱི་སྙིང་པོ་མཐའ་དག་གཅིག་ཏུ་སྤུངས་པ་ལྟ་བུའི་སྐྱབས་ཀྱི་མཆོག་འདི་ལྟ་བུ་དང་དངོས་སུ་མཇལ་
བའི་སྐལ་བ་བཟང་པོའི་རོ་ལ་ལོངས་སུ་སྤྱད་པར་གྱུར་པ་འདི་ནི་ངེས་པར་ངོ་མཚར་ཆེ་བ་ཞིག་གོ་སྙམ་དུ་ཐུགས་ལ་བྱེད་པ་དང་བཅས་ཏེ། རྗེ་བཙུན་དམ་པ་དེས་སྐྱེ་བ་དཔག་ཏུ་མེད་པ་ནས་བཟོད་པའི་རྒྱུ་ཕུན་སུམ་ཚོགས་པས་ཉེ་བར་བསྒྲུབས་པའི་ཞལ་བཟང་ཟླ་བ་རྒྱས་པའི་དཀྱིལ་འཁོར་
རྟག་ཏུ་གང་བའི་རང་བཞིན་ཅན་དེ་ཉིད། སྐལ་བར་ལྡན་པའི་མིག་གི་མེ་ལོང་དག་ཏུ་འགོག་པ་མེད་པའི་ཚུལ་གྱིས་འཆར་བ་དང༌། ལེགས་པར་གདམས་པའི་བདུད་རྩིའི་སྒོ་འཕར་ཕྱེ་བས་ཐར་པ་བླ་ན་མེད་པའི་ལང་ཚོའི་བཅུད་ལེན་དུ་འཐུང་བའི་སྐལ་བ་བཟང་པོ་ལ་སྦྱོར་བར་གསོལ་བའི་
མཚོན་བྱེད་དུ། ཐོག་མར་སྲིད་ཞིའི་སྐྱབས་མགོན་མཚུངས་པའི་ཟླ་ཐམས་ཅད་དང་བྲལ་བ། གང་གི་ཡོན་ཏན་འཛད་དུ་མེད་པའི་རང་བཞིན་རྒྱ་མཚོ་ལྟ་བུའི་ནང་ནས་ཕྱོགས་རེ་ཙམ་ཞིག་ཉམས་དང་འགྱུར་བའི་རོ་དང་ལྡན་པའི་སྙན་དངགས་དམ་པའི་གླུར་བླངས་པའི་མཆོད་པར་བརྗོད་པ་
དང༌། ཡན་ལག་བདུན་པ་ཚིགས་སུ་བཅད་པར་བསྡེབས་པའི་མེ་ཏོག་གི་སིལ་མས་མངོན་པར་གཏོར་ཞིང་རབ་ཏུ་གཏོར་རོ། །དེ་ནས་བཀྲ་ཤིས་པའི་རྟགས་ཀྱི་དགེ་མཚན་རྣམ་པར་བཀྲ་བའི་ལྷ་དར་དཀར་པོ་དང༌། བདེ་ལྡན་ཞིང་གི་མགོན་པོ་ཚེ་དཔག་ཏུ་མེད་པའི་སྐུ་བརྙན་

གྱིས་ཐོག་དྲངས་པའི་འབུལ་བ་དངོས་པོ་བཟང་ཞིང་གཏོས་ཆེ་བ་རྣམ་གྲངས་སྟོང་ཕྲག་གཅིག་དང་བརྒྱ་ཕྲག་གསུམ་གྱིས་ཉེ་བར་ལྷག་པའི་འབུལ་བ་ཕུལ་ལོ། །དེར་བཤུལ་ཐག་རིང་པོའི་ལམ་གྱི་བདེ་ལེགས་དང་ཁམས་འདྲི་བ་དང་ལན་ལྡོན་པ་ལས་
བརྩམས་པའི་བཀའ་མཆིད་ཨུཏྤལ་དཀར་པོའི་ཕྲེང་བ་ལྟ་བུ་ཀུན་གྱི་རྣ་བར་མཛེས་པའི་རྒྱན་དུ་ལེགས་པར་སྩལ་ཏོ། །དེ་ནས་རིམ་པར་ཟབ་པ་དང་རྒྱ་ཆེ་བའི་ཆོས་ཀྱི་དགའ་སྟོན་ཐོབ་པ་ལ། ཐོག་མར་འཕགས་ཡུལ་གྱི་གྲུབ་པའི་དབང་ཕྱུག་ཆེན་པོ་ཛེ་ཏཱ་རི་ལས་རིམ་པར་བརྒྱུད་
དེ། བསྟན་པའི་བདག་པོ་དཔལ་ས་སྐྱ་པ་ལ་བཀའ་བབ་པའི་འཇམ་དཔལ་ཨ་ར་པ་ཙ་ནའི་རྗེས་སུ་གནང་བ་དང༌། གྲུབ་པའི་དབང་ཕྱུག་ཐང་སྟོང་རྒྱལ་པོ་ཞེས་པ་དགུང་ལོ་བརྒྱ་དང་ཉི་ཤུ་ལྔར་བཞུགས་ནས་སེམས་ཅན་གྱི་དོན་མཛད་པར་གྲགས་པ་དེ་ཉིད་ལས་བརྒྱུད་པ་བར་མ་ཆད་
པ་ལས་བྱུང་བའི་ཚེ་སྒྲུབ་ཟབ་གཏེར་དག་སྣང་ཆུ་བོ་ཉིས་འདྲེས་སུ་གྱུར་པའི་བླ་མ་ཞི་ཁྲོའི་ཚེ་དབང་ཟབ་མོ་དང༌། དཔལ་ཀྱེ་རྡོ་རྗེ་མན་ངག་ལུགས་ཀྱི་དཀྱིལ་འཁོར་རས་བྲིས་ལ་བརྟེན་པའི་རྒྱུ་དུས་ཀྱི་དབང་བཞི་ཡོངས་སུ་རྫོགས་པ། རྡུལ་ཚོན་གྱི་དཀྱིལ་འཁོར་ཆེན་པོ་ཞལ་ཕྱེ་བའི་རྡོ་རྗེ་
ཕུར་པ་ས་ལུགས་སྟོད་ལས་བྱང་ཆུབ་སྒྲུབ་པའི་དབང་བཞི་ཡོངས་སུ་རྫོགས་པ་དང༌། རྡོ་རྗེ་གུར་གྱི་རྒྱུད་ལེའུ་བཅོ་ལྔ་པ་ལས་བསྟན་པའི་རྡོ་རྗེ་ནག་པོ་ཆེན་པོ་གུར་གྱི་མགོན་པོ་ལྕམ་དྲལ་ལྷ་བརྒྱད་ཀྱི་རྗེས་སུ་གནང་བ་དང༌། གཞན་ཡང་རྗེས་སུ་གནང་བ་དང་རྗེས་སུ་གདམས་
པ་དཔག་ཏུ་མེད་པ་སྩལ་ཏོ། །གཞན་ཡང་སྔོན་གྱི་དུས་ནས་བླ་མ་བརྒྱུད་པ་དང་བཅས་པ་རྣམས་ཀྱི་བཀའ་དང་དམ་ཚིག་གཉེན་པོའི་རྡོ་རྗེ་བདུད་རྩི་སྙིང་ལ་སིམ་པ་དྲལ་དུ་མ་བཏུབ་པར་དུས་རྟག་ཏུ་མཁའ་འགྲོ་ཆོས་སྐྱོང་གི་ཚོགས་ཐམས་ཅད་སྤྲིན་བཞིན་དུ་འདུ་ཞིང་བསྒོ་བ་ཐམས་
ཅད་བྲན་བཞིན་དུ་ཉན་པའི་བསྟི་གནས་སུ་གྱུར་པའི་མགོན་ཁང་ཆེན་པོ་རྣམས་སུ། ཧེ་རུ་ཀ་དཔལ་མིའི་སྲིད་པར་བཟུང་བའི་རྗེ་བཙུན་དམ་པ་དེ་ཉིད་དང༌། སྡོམ་བརྩོན་བླ་མ་ཆེན་པོ་འདི་ཉིད་ལྷན་ཅིག་ཏུ་བྱོན་ནས། ཆོས་སྐྱོང་བའི་སྲུང་མ་རྣམས་ལ་མཆོད་གཏོར་རྒྱ་ཆེན་

པོས་མཉེས་པར་བྱས་ཏེ། སྔོན་དུས་བླ་མ་མལ་ལོ་ཙཱ་བས་ས་ཆེན་ཀུན་དགའ་སྙིང་པོ་ལ་ཇི་ལྟར་གཏད་པ་དེ་ལྟར་དུ། རྗེ་བཙུན་ཧེ་རུ་ཀ་དཔལ་ཆེན་པོ་ཉིད་ཀྱི་ཕྱག་ན་དམ་ཚིག་གི་རྡོ་རྗེ་འབར་བ་ཐོགས་ཏེ་ཆེད་དུ་བསྒོ་བ། ཆོས་སྐྱོང་བའི་སྲུང་མ་མཐུ་ཆེ་ཞིང་རྫུ་འཕྲུལ་ཆེན་པོ་དང་ལྡན་པ།
བཅོལ་བའི་ལས་ཐམས་ཅད་ལ་སྐད་ཅིག་ཀྱང་གཡེལ་བ་མེད་པར་སྒྲུབ་པ། མངོན་པར་ཤེས་པའི་མིག་དང་ལྡན་པ་ཁྱེད་རྣམས་དམ་ཚིག་དང་ལྡན་པའི་རིགས་ཀྱི་བུ་འདིའི་ལུས་དང་གྲིབ་མ་བཞིན་དུ་འབྲལ་བ་མེད་པར་འགྲོགས་ལ། ཕྱི་དང་ནང་གི་བར་དུ་གཅོད་པ་མི་མཐུན་པའི་ཕྱོགས་
ཐམས་ཅད་ཞི་བའི་ཕྲིན་ལས་སྒྲུབས་ཤིག །མཐུན་པའི་ཕྱོགས་ཐམས་ཅད་གོང་ནས་གོང་དུ་སྤེལ་བའི་ཕྲིན་ལས་སྒྲུབས་ཤིག གཞན་ཡང་རིགས་ཀྱི་བུ་འདིས་ཇི་ལྟར་འདོད་པའི་ཕྲིན་ལས་རྣམ་པ་བཞི་གང་དང་གང་བཅོལ་བ་ཐམས་ཅད་མྱུར་བ་ཉིད་དུ་སྒྲུབས་ཤིག་ཅེས་བྱ་བ་ལ་
སོགས་པའི་བཀའ་དང་དམ་ཚིག་གི་རྡོ་རྗེ་ཕྱེད་པར་དཀའ་བའི་ར་བ་དེ་ན་ལེགས་པར་བཅུག་སྟེ། མཐར་ཐུག་བྱང་ཆུབ་མ་ཐོབ་ཀྱི་བར་དུ་སྐད་ཅིག་ཀྱང་འབྲལ་བ་མེད་པར་ལུ་གུ་རྒྱུད་དུ་སྦྲེལ་ལོ། །གཞན་ཡང་ཆོས་དང་སྲིད་པའི་གཙུག་ལག་ཟུང་ལས་བརྩམས་པའི་བཀའ་མཆིད་ཉིན་
མོར་བྱེད་པའི་ནོར་བུའི་འོད་ཟེར་གྱི་དྲྭ་བ་མང་དུ་སྤྲོས་པས། བློ་གྲོས་ཀྱི་འདབ་བརྒྱ་རྣམ་པར་གྲོལ་བར་མཛད་པའི་བཀའ་དྲིན་བསམ་པའི་ཡུལ་ལས་འདས་པའི་ཚུལ་གྱིས་རྗེས་སུ་བཟུང་ཞིང་རྗེས་སུ་བསྐྱངས་ཏེ་ཉིན་ཞག་གི་འཁོར་ལོ་མང་པོ་ཡང་བརྒལ་བར་མཛད་དོ། །དེ་དག་གི་བར་
སྐབས་རྣམས་སུ། སྐྱེ་དགུ་མ་ལུས་པའི་ཕན་པ་དང་བདེ་སྐྱིད་འབྱུང་བའི་རྩ་ལག་ཏུ་བཞུགས་པའི་རྟེན་མཇལ་དང་མཆོད་འབུལ་མཛད་པ་ནི། གདན་ས་ཆེན་པོ་དེ་ཉིད་ཀྱི་གདགས་སྲིབ་ཏུ་བཞུགས་སོ་འཚལ་གྱི་ལྷ་ཁང་དང༌། གཙུག་ལག་ཁང་དང༌། མགོན་ཁང་དང༌།
སྒྲུབ་ཁང་ཁྱད་པར་དུ་འཕགས་པ་རྣམས་དང༌། སྤྲུལ་པའི་ལྷ་ཁང་ཆེན་པོ་ཞེས་བྱ་བ། གང་གི་ངོ་མཚར་སྒྱུ་མའི་བཀོད་པ་ལྟ་བུའི་ཁྱད་པར་གྱི་ལྟད་མོའི་ཆ་ཤས་རེ་ཡང་སྐལ་བར་ལྡན་པ་སུ་ཞིག་གི་མིག་གི་དབང་པོའི་ལོངས་སྤྱོད་ཉིད་དུ་ཐོབ་པར་གྱུར་པའི་མོད་ལ།

སུམ་ཅུ་རྩ་གསུམ་པའི་ལྷ་རྣམས་ཀྱི་བསོད་ནམས་ཀྱི་མཐུ་ལས་གྲུབ་པ་རྣམ་པར་རྒྱལ་བའི་ཁང་བཟངས་ཞེས་བྱ་བ། སྤྲུལ་པའི་བཟོ་བོ་བི་ཤྭ་ཀརྨྨའི་འཕྲུལ་གྱིས་བཟོས་པ། ལྷའི་རིན་པོ་ཆེ་སྣ་བཞི་ལས་བསྒྲུབས་པ་ཞིག་སྟེ། དེའི་བཟོ་དབྱིབས་
ལྟ་ན་སྡུག་པའི་ངོ་མཚར་དང་གྲགས་པ་ཡང་འགོག་པར་ནུས་པའི་རང་བཞིན་ཅན་ཉིད་དོ། །དེ་ཡང་ཇི་ལྟར་ཞེ་ན། བསྐལ་པ་བཟང་པོའི་ལེགས་ལམ་ལས། གང་དུ་འཇུག་པའི་ཐེམ་སྐས་སུ་ཞིག་གིས། །འགོངས་པ་ཙམ་ན་ཐར་པའི་གྲོང་ཁྱེར་དུ། །བདེ་བར་སོན་པ་
སྲིད་ལས་འདས་པ་ཡི། །སྒོ་དེའི་ཁྱད་པར་ཅི་ཡིན་ཡོངས་མི་ཤེས། །རྟ་བབས་ནོར་བུ་རྒྱས་པའི་ལྗོན་པ་ཡི། །ཀ་བ་སྟོང་གིས་བཏེག་པའི་འོད་ཀུན་དུ། །འབར་བས་རང་གནས་ཕྲོགས་ཏེ་གནམ་སྔོན་པོ། །ས་ལ་ལྷུང་བ་མིན་ནམ་ཁྱམས་དེ་སྔོ། །དེ་ལ་ནོར་འཛིན་ཟླ་
བའི་མིག་མངས་རིས། །བཀྲ་བ་དེ་ནི་མཐིང་གི་རོལ་བའི་མཚོར། །སིནྡྷུ་ཝཱ་རའི་གེ་སར་ཕྱེ་མའི་ཕྲེང༌། །རླབས་ཀྱི་སོར་མོས་བྲིས་པ་བཞིན་དུ་མཛེས། །ཨིནྡྲ་ནཱི་ལའི་བ་གམ་འོད་ཚོགས་ཀྱིས། །རྩིག་ངོས་དག་པའི་ལོགས་ལ་ཡོངས་ཁྱབ་པ། །ཨུཏྤལ་སྔོན་པོ་རབ་
རྒྱས་ནགས་སུ་སེམས། །མེ་ཏོག་ཟས་ཅན་རྣམས་ལ་འཁྲུལ་པ་འཇུག ། མདའ་ཡབ་ཕྲེང་བ་ལས་འཕྱང་དྲྭ་ཕྱེད་ཚོགས། །ཕ་གུ་ཆུ་སྐྱེས་དཀར་པོའི་ངོས་རྩེ་ལ། །རེག་པ་རྣམ་པར་གསལ་ཏེ་བཅུ་དྲུག་ཆ། །སྙིང་ལས་བདུད་རྩིའི་ཐིག་ཕྲེང་བསྒྲེང་བ་བཞིན། །བྱ་འདབ་
མཁའ་དང་འདྲེས་པའི་འགྲམ་པ་ལ། །རྒྱ་ཕིབས་འཇིག་རྟེན་གསུམ་གྱི་མུན་འཕྲོག་པའི། །སྣང་བའི་རི་མོ་གློག་གི་གར་མཁན་མས། །གཞན་ཡིད་རྐུ་བའི་ཆོ་འཕྲུལ་མཛེས་ལས་ལྷག །ཟླ་བ་རླུང་གིས་བསྐྱོད་པའི་རྔ་ཡབ་རྩེར། །ཛམྦུ་ནཱ་དའི་གསེར་གྱི་དྲིལ་ཆུང་
གི །མགྲིན་ལ་ཟད་མི་ཤེས་པའི་སྒྲ་སྙན་མང༌། །རྣ་བའི་བཅུད་དུ་འགྲོ་བའི་དབྱངས་སུ་འབབ། །ཏོག་གི་ཁྱད་པར་ཉི་མའི་སྤྱི་བོ་ལ། །འོད་ཟེར་འབབ་སྟེགས་བྱེད་པའི་གཟི་བརྗིད་གཏེར། །མཛེས་པའི་གོས་ཅན་ལྷབ་ལྷུབ་རྟ་གདོང་མེར། །རིག་པས་མི་བརྫིའི་རྒྱལ་

མཚན་འབུམ་གྱིས་སྤུད། །ཅེས་པ་ལྟ་བུའི་ངོ་མཚར་རྨད་དུ་བྱུང་བའི་གཞལ་མེད་ཁང་ཆེན་པོ་དེ་དང་བཅས་པ་སྟེ། རྟེན་དེ་དག་ཏུ་བཞུགས་པའི་བརྟེན་པ་རྒྱལ་བ་སྲས་དང་བཅས་པའི་སྐུ་གསུང་ཐུགས་ཀྱི་རྟེན་གསུམ། རྒྱ་གར་གྱི་པཎྜི་ཏ་མང་པོ་དང༌། བོད་ཀྱི་ལོ་ཙཱ་བ་ཆེན་པོ་
རྣམས་དང༌། དཔལ་ས་སྐྱའི་གདུང་རབས་རིམ་པར་བྱོན་པ་རྣམས་ཀྱི་ཐུགས་དམ་རྟེན་དུ་མཛད་པས་ཡེ་ཤེས་ཀྱི་འཁོར་ལོ་དངོས་སུ་བཞུགས་པ། ཕན་བདེ་ཐམས་ཅད་ཀྱི་འབྱུང་གནས་སུ་གྱུར་པ་སྤྱི་ལ་སྤོས་དང༌། མར་མེ་དང༌། ཞལ་ཟས་ཕུལ་ལོ། །བྱེ་བྲག་པ་རྣམས་ལ་
ལྷག་པར་འཕན་དང༌། བླ་རེ་དང༌། རྒྱལ་མཚན་འབུལ་བ་ལ་སོགས་པའི་དགེ་བའི་རྩ་བ་རྒྱ་ཆེན་པོ་བསྐྲུན་པའི་ངོ་མཚར་བརྗོད་ཀྱིས་མི་ལྡང་བ་ཉིད་དོ། །དེ་ལྟར་གདན་ས་ཆེན་པོ་དེར་ཇི་ལྟར་བཞེད་པའི་དོན་ཐམས་ཅད་ལེགས་པར་གྲུབ་ནས། དཔལ་ཞྭ་ལུའི་ཆོས་སྡེར་བྱོན་ནས།
དེར་བཞུགས་པའི་དགེ་འདུན་རྣམས་ལ་མང་ཇ་དང་གྲལ་འགྱེད། གྲྭ་པ་རེར་དངུལ་དཀར་བལ་པོའི་དོང་ཙེ་རེའི་འགྱེད་པ་དང༌། གདན་ས་དེའི་བླ་མ་དང་ལས་ཚན་རྣམས་ལ་འབུལ་བ་ཚན་གྲངས་དང༌། རྟེན་གསུམ་རྣམས་ཀྱི་ཞལ་མཇལ་དང་མཆོད་འབུལ་མཛད་དོ། །སྐབས་དེར་
ཆོས་གྲྭ་ཆེན་པོ་བཀྲ་ཤིས་ལྷུན་པོའི་དགོན་པར་གདན་འདྲེན་ཞུ་བའི་བསུ་བར། བླ་བྲང་རྒྱལ་མཚན་མཐོན་པོའི་མགྲོན་གཉེར་བ་དང༌། གཞིས་རྩེ་རྫོང་གི་དཔོན་པོ་དང༌། ཧགས་གདོང་གྲྭ་ཚང་དང༌། རྒྱ་ཁང་ཚན་གྱི་དགེ་བསྐོས་རྣམས་ཀྱིས་སྔོན་ནས་བསུ་སྟེ། དེ་ཕྱོགས་སུ་
ཆིབས་ཀྱི་གདོང་བསྒྱུར་བར་མཛད་པས་མི་རིང་བར་བླ་བྲང་ཆེན་པོ་རྒྱལ་མཚན་མཐོན་པོ་ཞེས་བྱ་བ། དེའི་ངོ་མཚར་གྱི་ཁྱད་པར་ནི། དཔེར་ན་བསྐལ་པ་བཟང་པོའི་རྒྱལ་བ་བཞི་པའི་རྒྱལ་ཚབས་ཆེན་པོ་མགོན་པོ་བྱམས་པས། སྐལ་བ་ལྡན་པའི་ལྷ་བུ་གྲངས་མེད་པའི་
དབུས་སུ། ཐེག་པ་ཆེན་པོའི་ཆོས་ཀྱི་འཁོར་ལོ་རྒྱ་ཆེན་པོ་བསྐོར་བའི་གནས་དགའ་ལྡན་ཆོས་ཀྱི་གཞལ་མེད་ཁང་ཆེན་པོ་ཞེས་པ། དེ་ནི་ཕལ་ཆེར་སྦྱོང་བར་དཀའ་བའི་ས་ལ་གནས་པའི་བྱང་ཆུབ་སེམས་དཔའི་རྒྱུ་ཚོགས་ཕུན་སུམ་ཚོགས་པ་མ་ཡིན་པས་འཐོབ་པར་དཀའ་བ་

ངོ་མཚར་གྱི་ཁྱད་པར་བརྗོད་མི་ནུས་པ་ཞིག་སྟེ། དེའི་བཀོད་པ་ལེགས་པ་དང་དཔལ་མ་ལུས་པ་སའི་སྟེང་ན་ཡོངས་སུ་འཕོས་པ་སྙམ་བྱེད་པའི་ངོ་མཚར་སྐྱེ་བོ་ཡོངས་ཀྱི་མིག་གི་བདུད་རྩིར་གྱུར་པ་ཞིག་གོ །དེའང་འདི་ལྟར་ལྷའི་རིན་པོ་ཆེ་སྣ་
བདུན་གྱི་ཕ་གུ་བརྩེགས་པ་ལྟ་བུའི་སྟེགས་བུ་དང༌། བ་གམ་དང༌། མདའ་ཡབ་དང༌། ལན་ཀན་རྣམས་ཀྱིས་མཛེས་པ། ཟུར་བཞི་དང་ལྡན་པ་ཆེས་མཐོ་ཞིང་བརླིང་བ། སྒོ་དང་རྟ་བབས་དང་སྐར་ཁུང་དང༌། རྒྱན་གྱི་རྣམ་པ་མང་པོ་དང་ལྡན་པ། བཙོ་མ་གསེར་གྱི་རྒྱ་
ཕིབས་མང་པོ་དག་ལ་ཉི་མ་བྱེ་བའི་དཔལ་བཞིན་དུ་འོད་ཟེར་གྱི་དྲྭ་བ་དཀྲིགས་པ། དེའི་ཕྱི་རོལ་ཀུན་དུ་གཙུག་ལག་ཁང་དང༌། ཁང་པ་དང༌། ཁང་ཕྲན་གྱི་ཚོགས་མང་པོ་དང༌། མེ་ཏོག་གི་ལྡུམ་ར་དང༌། སྐྱེད་མོས་ཚལ་ལ་སོགས་པས་བསྐོར་བས་ཡིད་དུ་འོང་བར་བྱས་པ། དེ་
ལྟ་བུའི་ངོ་མཚར་གྱི་ཕུང་པོར་གྱུར་པ་གང་ཡིན་པ་དེའི་ཉེ་འདབས་སུ་བྱོན་ནོ། །དེར་བྱོན་པ་དང་ཆོས་གྲྭ་ཆེན་པོ་དེ་ཉིད་ནས་ཀྱང༌། དྲི་ཞིམ་པོའི་སྨན་དང༌། སྤོས་དང༌། སིཧླ་དང༌། བདུད་རྩི་ཅན་གྱི་ཤིང་གི་ལྕུག་ཕྲན་གཞོན་ནུ་དག་བསྲེགས་པའི་ལྷ་བསང་གི་དུད་སྤྲིན་སྔོན་པོས་ནམ་མཁའི་
དབྱིངས་ཁྱབ་པར་གཏུལ་ལོ། །དེ་དང་ཆབ་ཅིག་པར་ལྷའི་རྒྱལ་མཚན་དང༌། ལྷའི་བ་དན་ལ་སོགས་པའི་དར་འཕྱར་གྱི་དགའ་སྤྲོ་དཔག་ཏུ་མེད་པ་བསྟར་བའི་བཀུར་སྟི་དང་བཅས་ཏེ་བླ་བྲང་ཆེན་པོར་སྤྱན་དྲངས་ཞུས་སོ། །དེ་ན་ལྷ་དང་བཅས་པའི་འཇིག་རྟེན་པ་ཐམས་ཅད་ཀྱི་ཡོན་གྱི་
གནས་དམ་པར་གྱུར་པ་ནི་པཎ་ཆེན་ཐམས་ཅད་གཟིགས་པ་བློ་བཟང་ཡེ་ཤེས་དབང་པོ་ཞེས་ཡོངས་སུ་གྲགས་པ་སྟེ། དེ་ནི་སྔོན་དུས་འཕགས་པའི་ཡུལ་དང་བསིལ་ལྡན་ཁ་བ་ཅན་གྱི་ལྗོངས་འདིར་ཉི་མ་དང་ཟླ་བ་ལྟར་རབ་ཏུ་གྲགས་པའི་མཁས་པ་ཆེན་པོ་དུ་མའི་སྐུའི་སྐྱེ་བ་ལུ་གུ་རྒྱུད་
དུ་བཞེས་པ། དེའི་དབང་གིས་དཔལ་སྟོབས་བཅུ་མངའ་བའི་བསྟན་པ་རིན་པོ་ཆེ་ཕྱོགས་རིས་མེད་པ་ལ་སྐྱེ་བ་ནས་སྐྱེ་བར་ཕན་པའི་བྱ་བ་ཡང་དག་པར་བགྱིས་པ། སྐྱེ་བ་འདིར་ཡང་གསེར་མདངས་ཅོད་པཎ་འཆང་བ་ཐམས་ཅད་ཀྱི་བསྟན་པ་རྒྱལ་མཚན་མཛེས་པར་བྱེད་པའི་ཏོག་ཏུ་

གྱུར་པ། འགྲོ་བ་ཐམས་ཅད་ལ་བུ་གཅིག་པ་ལྟར་བརྩེ་བའི་ཐུགས་རྗེ་ཆེ་ཞིང༌། རྣམ་པར་དཀར་བའི་ཕྲིན་ལས་ནམ་མཁའི་མཐའ་དང་མཉམ་པར་གྱུར་པའི་བསྟན་འཛིན་གྱི་སྐྱེས་བུ་ཞིག་གོ །དེ་ལྟ་ནའང་སྐབས་དེར་སྐྱེ་འགྲོ་སྤྱིའི་ལེགས་བྱས་ཀྱི་ཐག་པ་ཕྲ་མོས་མ་ཟིན་པ་བཞིན་
དུ་རེ་ཞིག་དེ་ནས་མི་སྣང་བར་ཞིང་ཁམས་གཞན་དུ་གཤེགས་པའི་ཚུལ་བསྟན་ནོ། །དེའི་སྐྱེ་བའི་ཟློས་གར་གྱི་སྤྲུལ་པའི་སྐུ་ཡང་བྱོན་མ་ཟིན་པའི་སྐབས་སུ་མཆིས་མོད། རྗེ་བཙུན་དམ་པ་དེས་ཐེག་པ་གསུམ་གྱི་ཆོས་ཀྱི་འཁོར་ལོ་རྒྱ་ཆེན་པོ་བསྐོར་བའི་སེང་གེའི་ཁྲི་མཐོན་པོ་དང༌།
དམ་པ་དེ་ཉིད་ཀྱི་སྐུ་བརྙན་ཕྱག་ནས་ཅན་གྱི་མདུན་ག་ལ་བར་རྣམ་གྲངས་བརྒྱ་ཕྲག་གཅིག་ལ་བརྒྱད་ཀྱིས་ཉེ་བར་ལྷག་པའི་མཆོད་འབུལ་མཛད་དོ། །ཆོས་གྲྭ་དེའི་གཙུག་ལག་ཁང་ཆེན་པོར་བསྟན་སྐྱོང་འཕགས་པའི་དགེ་འདུན་ཞི་ཞིང་དུལ་བ། སྐུ་ལས་ཧ་རི་ཙནྡ་ནའི་དྲི་བསུང་
མངར་པོ་ཁོ་ར་ཁོར་ཡུག་ཏུ་འཐུལ་བ། མཐའ་མེད་འཁོར་བའི་རིམས་ནད་ཀྱི་གཉེན་པོར་བྱེད་པའི་ཡོན་གནས་དམ་པ་སྟོང་ཕྲག་བཞིར་ལྡང་བར་བཞུགས་པ་རྣམས་ལ་མང་ཇ་གཉིས་དང༌། གྲྭ་པ་རེ་ལ་དངུལ་དཀར་བལ་པོའི་དོང་ཙེ་རེ་རེ་གྲལ་འགྱེད་དུ་ཕུལ་ལོ། །དེ་ན་བྱིན་
རླབས་དང་ཕན་བདེའི་དཔལ་གྱིས་མངོན་པར་གཏམས་པའི་སྐུ་གསུང་ཐུགས་ཀྱི་རྟེན་མཆོག་ཛམྦུའི་གླིང་ན་དཀོན་པ་ལྟར་གྱུར་པའི་གྲགས་ཆེ་ཞིང་གྲངས་མང་བར་བཞུགས་པ་རྣམས་ལའང་ཞལ་