Luận tạng Tây Tạng (Tengyur) — Tập 213

ལྟར་རྒྱལ་བ་གཉིས་པ་རྡོ་རྗེ་
འཆང་གིས་བསྐལ་པ་མང་པོའི་གོང་ནས་སྨོན་ལམ་གྱི་ས་བོན་བཟང་པོ་ལེགས་པར་བཏབ་པའི་གདུལ་བྱའི་ཞིང་ས་ཐུན་མོང་མ་ཡིན་པ་ཡོད་པའི་གནས་ནི་ཁམས་ཕྱོགས་དང༌། དེའི་ནང་ནས་ཀྱང་ས་ཕྱོགས་ཆོས་ལྡན་གྱི་རྒྱལ་པོས་བསྐྱངས་ཤིང༌། ཕྱི་ནང་གི་ཉེར་འཚེ་མེད་པ་ཞེས་འབྱུང་
བ་བཞིན་དུ་རང་གི་གདུལ་ཞིང་གང་དུ་ཡོད་པ་དེ་དུས་གསུམ་གཟིགས་པ་རྣམས་ནི་མི་མཁྱེན་པའམ། མི་གཟིགས་པའམ། ཐུགས་སུ་མི་ཆུད་པའམ། རྣམ་པར་མི་རིག་པ་ཅི་ཡང་མི་མངའ་བས་རྗེ་བཙུན་དམ་པ་དེ་ཉིད་ཀྱིས་སྡེ་དགེའི་ས་ཕྱོགས་འདི་ཉིད་དུ་བསྟན་པ་དར་
རྒྱས་ཆེ་བའི་གནས་སུ་གཟིགས་སོ། །གཟིགས་ནས་ཀྱང་རིང་ཞིག་ནས་དེར་འབྱོན་པར་ཞལ་གྱིས་བཞེས་པའི་བཀའ་འཕྲིན་གྱི་གླིང་བུ་སྙན་འགྱུར་འབུམ་གྱི་རོ་དང་ལྡན་པ་སྩལ་ཏོ། །ཇི་ཙམ་ན་མིའི་བདག་པོའི་མངགས་གཞུག་པ་དེས་ཀྱང་བཀའ་མཆིད་ཇི་ལྟར་ནོད་པ་

ཁྱེར་ཏེ་འོངས་ནས་སྡེ་དགེ་བླ་མ་ཞེས་པ་བསམ་པ་དགེ་བ། དད་པ་བརྟན་པ། སེམས་ཅན་ལ་ཕན་པའི་ཕྱིར་ཞུགས་པ་དེ་ཉིད་ཀྱི་མདུན་དུ་ཇི་ལྟར་ནོད་པ་དེ་ལྟར་ཕུལ་ལོ། །དེའི་མོད་ལ་ངེས་དགོངས་པ། ད་ནི་ཡོངས་འཛིན་དམ་པ་
དེ་ཉིད་མི་རིང་བར་རང་གི་སྐལ་བས་ཐོབ་པར་འགྱུར་བར་གདོན་མི་ཟའོ་སྙམ་པའི་ཐུགས་དགེས་པ་ལས་བྱུང་བའི་ངོ་མཚར་ནི། དཔེར་ན་ཡིད་འཕྲོག་པདྨའི་རྫིང་བུ་དག་ན་འཁྲུངས་པའི་འདབ་མ་བརྒྱ་པ་ཁ་ཟུམ་པ་ཞིག ཉི་མ་འཆར་ཀའི་འོད་ཟེར་གྱིས་ཡོངས་སུ་ཕོག་
པས་ཁ་བྱེ་བར་གྱུར་པ་ལ། སླར་ཡང་སྦྲང་རྩི་འཐུང་བའི་བུང་བ་གཞོན་ནུ་དག་གིས་སྙན་པའི་གླུ་དབྱངས་ལེན་པ་ལ་མི་སྤྲོ་བ་མེད་པ་དེ་བཞིན་དུ། ཡོངས་འཛིན་ཆོས་ཀྱི་རྒྱལ་པོའི་གསུང་གི་ཟེགས་མས་སྙིང་ལ་བྲན་པའི་མོད་ལ། མི་རྗེ་དམ་པའི་བཞིན་གྱི་དཀྱིལ་
འཁོར་དགའ་བ་བརྒྱ་ཕྲག་བརྩེགས་པའི་འཛུམ་གྱི་ཕྲེང་བ་གསར་པས་ཉེ་བར་ཕྱེ་བའི་ཞལ་སྒོ་ནས། སྙན་པའི་གདངས་སུ་དྲངས་པའི་ལེགས་སོའི་དགའ་སྟོན་གསར་པ་ཅི་ཡང་བྱུང་བར་གྱུར་ཏོ། །དེ་ནས་སླར་ཡང་ཁམས་ཀྱི་ཕྱོགས་སུ་བཏེག་པའི་དགོངས་པ་ཉེ་བར་བཞག་
སྟེ་འཁོར་གྱི་ཚོགས་ཆེན་པོ་དག་དང་ལྷན་ཅིག་ཏུ། མེ་ལྷའི་ཕྱོགས་སུ་ཆིབས་ཀྱི་གདོང་བསྒྱུར་ཏེ་རིམ་གྱིས་གྲོང་དང༌། གྲོང་ཁྱེར་དང༌། ཁང་ཁྱིམ་རྣམས་ཀྱིས་ཡོངས་སུ་དབེན་པའི་རི་ཀླུང་དང༌། གནམ་གྱི་དུམ་བུ་ས་ལ་ལྷུང་བ་ལྟ་བུའི་ཐང་ཆེན་པོ་མང་པོ་བདེ་བར་བརྒལ་
ཏེ་བྱོན་པས། ཇི་ཙམ་ན་བོད་ཆེན་པོར་གྲགས་པའི་ནོར་འཛིན་མའི་དཀྱིལ་འཁོར་ཆེན་པོ་མདོ་སྟོད་འོ་མའི་ཐང་ཞེས་བྱ་བ། སྡོམ་བརྩོན་བླ་མ་ཆེན་པོ་རང་གི་ཡབ་མེས་སུ་གྱུར་པ། དམན་པ་མིན་པའི་སྟོབས་ཀྱི་འཁོར་ལོས་སྒྱུར་བ། སྡེ་དགེ་ས་སྤྱོད་ཆེན་པོ་པ།
བསོད་ནམས་ཀྱི་མཐུ་ཆེ་བ། དབང་ཆེ་བ། གཟི་བརྗིད་ཆེ་བ། སྡེ་དང་དཔུང་ཆེ་བ། དཔའ་ཞིང་རྟུལ་ཕོད་པ། མཐོན་པོར་འཕགས་ནས་དམན་པའི་མཐའ་རུ་ནམ་ཡང་མ་ལྷུང་བའི་གོང་མ་རིམ་པར་བྱོན་པ་རྣམས་ཀྱིས་དགེ་བ་བཅུ་དང་རྗེས་སུ་མཐུན་པའི་བཀའ་ཁྲིམས་

ཀྱི་འཁོར་ལོ་ནམ་མཁའི་ལམ་ན་མངོན་པར་རྒྱུ་བའི་གྲིབ་མ་སྣུམ་པོ་དང་ལྡན་པས་འབབ་སྟེགས་སུ་བྱས་ཤིང༌། ལེགས་པར་བསྲུངས་པའི་ས་གཞི་ག་ལ་བ་དེར་བདེ་བར་བྱོན་ནོ། །དེར་བྱོན་པ་དང་གང་གི་མཆེད་ཟླར་གྱུར་པའི་མིའི་བདག་པོ་བརྩེ་བའི་བདག་ཉིད་ཅན་རྣམ་པ་
གཉིས་དང༌། བཀའི་འཁོར་ལོས་སྒྱུར་བའི་འཕྲུལ་བློན་ཆེན་པོ་རྣམས་གཙོ་བོར་གྱུར་པའི་སྐྱེ་བོའི་ཚོགས་མང་པོ་དག་ཀྱང་བསུ་བ་ཉིད་དུ་མངོན་པར་ལྷགས་པར་གྱུར་ཏོ། །ཇི་ལྟར་ལྷགས་པ་དེ་རྣམས་ལ་ཡང་གཏམ་སྙན་གསར་པ་མེ་ཏོག་གི་ཕྲེང་བ་ལྟ་བུ་ཐོས་པ་འཛིན་པའི་རྒྱན་དུ་
རུང་བ་ཅི་ཡང་སྩལ་ཏོ། །སླར་ཡང་རིམ་གྱིས་བྱོན་པས་སྡེ་བཞིའི་དཔལ་འབྱོར་ཕུན་སུམ་ཚོགས་པས་ཡོངས་སུ་གཏམས་ཤིང་དགེ་ལེགས་ཀྱི་མཚན་མ་མང་པོ་ཆེད་དུ་བཀྲམ་པ་ལྟར། ལྷུན་གྱིས་གྲུབ་པས་ཀུན་ནས་ཡོངས་སུ་བསྐོར་བའི་སའི་ཐིག་ལེ་གང་ཡིན་པ་སྟེ། དེ་
ཉིད་མཛེས་པར་བྱེད་པའི་རྒྱན་དམ་པར་གྱུར་པའི་རྒྱལ་ཁབ་ཆེན་པོ་མི་མཐུན་པའི་ཕྱོགས་ཐམས་ཅད་ལས་རྣམ་པར་རྒྱལ་བ་ཞེས་བྱ་བ་དེའི་ཉེ་འདབས་སུ་ཟླ་ཚེས་དགེ་བའི་ཉིན་མོར་བྱོན་པར་གྱུར་ཏོ། །དེ་ཙམ་ན་རྒྱལ་པོའི་ཁབ་ཀྱི་ཕོ་བྲང་དམ་པ་དེའི་ཕྱི་རོལ་དང༌། སྟེང་གི་ཕྱོགས་
མཚམས་ཀྱི་ཁོ་ར་ཁོར་ཡུག་རྣམས་སུ་རྒྱལ་པོ་ཆེན་པོ་མིག་སྐྱའི་གན་མཛོད་ལས་བླངས་མ་ཐག་པ་ལྟ་བུའི་གོས་བཟང་དང༌། རིན་པོ་ཆེའི་རིགས་ལས་ལེགས་པར་གྲུབ་པའི་རྒྱན་གྱི་རྣམ་པ་མང་པོ་རྣམས་ནི་འདི་ལྟ་སྟེ། ཁ་དོག་སྣ་ཚོགས་པའི་རྒྱལ་མཚན་དང༌། མཛེས་
པའི་གདུགས་དང༌། བ་དན་དཀར་པོ་དང༌། སྔོན་པོ་དང༌། དམར་པོ་དང༌། སེར་པོ་དང༌། ལྗང་གུ་དང༌། ལེ་བརྒན་དང་ལྡན་པའི་ཕྲེང་བ་དག་བསྒྲེང་བ་དང༌། འཕན་དང༌། གོས་ཀྱི་ཆུན་འཕང་དང༌། མེ་ཏོག་གི་ཕྲེང་བ་དང༌། རིན་པོ་ཆེའི་དོ་ཤལ་དང༌། དྲིལ་ཆུང་
དང༌། གཡེར་ཁའི་ཕྲེང་བ་དུ་མ་དཔྱངས་པས་ཀུན་ནས་མཛེས་པར་བརྒྱན་ཏེ་བཞག་གོ །གཞན་ཡང་དགེ་འདུན་གྱི་ཀུན་དགའ་རྭ་བ་དང༌། ཁང་བཟང་དང༌། ཁང་ཕྲན་དང༌། སྐྱེད་མོས་ཚལ་རྣམས་ཀྱང་ལེགས་པར་བརྒྱན་ཏེ། དེ་དག་གི་སྟེང་ནས་དྲི་ཞིམ་པོའི་སྤོས་དང༌།

ལྷ་ཤིང་སྣ་ཚོགས་པ་དག་བསྲེགས་པའི་དུད་སྤྲིན་གྱི་ཕུང་པོ་བསྐལ་པ་ཆགས་པའི་དུས་ཀྱི་སྤྲིན་ལྟ་བུ་ཡང་གཏུལ་ལོ། །དེ་ན་གདན་ས་ཆེན་པོ་ལྷུན་གྲུབ་སྟེང་གི་ཆོས་གྲྭ་ཆེན་པོ་ཞེས། གང་གི་གྲགས་སྙན་ཀཱ་ཤི་ཀའི་གོས་བཟང་དྲི་མ་མེད་པ་དེ་
ནི་ཕྱོགས་དང་ཕྱོགས་བྲལ་གྱི་བུ་མོས་རང་ལུས་མཛེས་པར་བཀླུབས་པའི་རྒྱན་གྱི་གཙོ་བོ་ཉིད་དུ་ལེན་པ་ལ་ནམ་ཡང་མི་སྤྲོ་བ་མེད་ཅིང་གུས་པས་བཏུད་པ་སྙམ་བྱེད་པ། རིག་པའི་གཞུང་ལུགས་རྣམ་པ་ལྔ་ལ་མཁས་ཤིང་གྲུབ་པའི་ཡོན་ཏན་མང་པོ་ཡང་འཛིན་པའི་སྐྱེས་བུ་ཆེན་པོ། སའི་
སྟེང་ན་ཡོངས་སུ་གྲགས་པ་མང་པོའི་འཁོར་ལོས་མཚན་པའི་ཞབས་ཀྱིས་དངོས་སུ་བཅགས་ཤིང་ལེགས་པར་བཤད་པའི་བདུད་རྩིའི་རྒྱུན་གྱི་དགའ་སྟོན་ནམ་ཡང་འཛད་པ་མེད་པའི་རང་བཞིན་དུ་བཀྱེ་བའི་གདན་ས་སྟེ། དེ་ན་གཉུག་མར་གནས་པའི་སུམ་ལྡན་རྡོ་རྗེ་འཛིན་པའི་བླ་མ་དང་
སློབ་དཔོན་ཆེན་པོ་ལུང་དང་མངོན་པར་རྟོགས་པའི་ཡོན་ཏན་རྒྱ་མཚོ་ལྟ་བུའི་ཕ་རོལ་དུ་སོན་ཅིང༌། འཆད་རྩོད་རྩོམ་པའི་ཕྲིན་ལས་ཀྱི་སྣང་བ་དཀར་པོ་རིང་པོའི་ལམ་དུ་སྤྲོ་བ་རྣམས་དང༌། ངུར་སྨྲིག་འཆང་བའི་དགེ་སློང་གི་དགེ་འདུན་བརྒྱ་ཕྲག་མང་པོ་སྟེ། ཐམས་ཅད་ཀྱང་ཕྱི་ཚུལ་ཞི་
ཞིང་དུལ་བའི་སྤྱོད་ལམ་མཛེས་པ་ནི། སྔོན་དུས་སྟོན་པའི་འཁོར་གྱི་གནས་བརྟན་དགྲ་བཅོམ་པ་རྣམས་ཀྱི་རྣམ་པར་ཐར་པའི་རྗེས་སུ་བྱེད་ཅིང་རྗེས་སུ་སློབ་པ། སྐྱེ་བོ་མི་སྲུན་པ་རྣམས་ཀྱི་ཡིད་ཀྱི་དབང་པོ་ཡང་དགེ་བའི་ལམ་དུ་བསྒྱུར་བ་ལ་ཤ་ཐང་བ་མེད་པ། ནང་དུ་བསྒྲུབ་པར་
བྱ་བའི་སྙིང་པོ་ནི་གཞན་དོན་དཔག་ཏུ་མེད་པའི་འབྱུང་གནས་སུ་གྱུར་པ། མི་གནས་པའི་མྱ་ངན་ལས་འདས་པའི་གོ་འཕང་སྟེ། དེ་ཉིད་ཐོབ་པ་ལ་རྩེ་གཅིག་ཏུ་སྨིན་པ་དང༌། དེ་ལ་འཇུག་པའི་སེམས་རིན་པོ་ཆེ་དང་གཞར་ཡང་མི་འབྲལ་བ་དང༌། དེའི་སྤྱོད་པ་རྒྱ་ཆེན་པོ་རྣམས་ལ་ཡང་
ཤིན་ཏུ་གུས་པ་ལྷུར་བྱེད་པ།ཁྱད་པར་དེ་བཞིན་གཤེགས་པ་ཐམས་ཅད་ཀྱི་བགྲོད་པ་གཅིག་པའི་ཉེ་ལམ་གསང་ཆེན་རྡོ་རྗེ་ཐེག་པའི་སྔགས་ཀྱི་རྒྱས་སྒོ་གསུམ་ལེགས་པར་བཏབ་ནས། ས་ལམ་གྱི་ཡོན་ཏན་གྱ་ནོམ་པ་སྒྲུབ་པའི་ཐབས་ལ་མ་རྨོངས་པའི་ཚོགས་རྣམས་ནི་མེ་ཏོག་

ཨུཏྤལ་དམར་པོ་དང༌། བནྡུ་ཛཱི་བ་ཀ་དང༌། ཀིཾ་ཤུ་དང༌། ཀརྞི་ཀཱ་ར་དང༌། ཀུངྐུ་མའི་མེ་ཏོག་རྣམ་པར་བཞད་པའི་ནགས་ཀླུང་སྟུག་པོ་གང་ལ་ལ་ཞིག སེར་བུ་ཡིད་དུ་འོང་བ་དག་བྱུང་སྟེ་དལ་གྱིས་བསྐྱོད་པ་ན་མཚར་སྡུག་གི་ལྟད་མོ་ཅི་ཡང་འབྱུང་བ་དེ་བཞིན་དུ་ཐུབ་པའི་གོས་མཆོག་རྣམ་པ་
གསུམ་གྱིས་ཀུན་ནས་མཛེས་པར་བཀླུབས་པའི་ངུར་སྨྲིག་གི་ཚོན་མདངས་གསར་པས་ས་གཞིའི་ཁྱོན་ཆེན་པོ་ཡོངས་སུ་བཀབ་པའི་དགེ་སློང་གི་དགེ་འདུན་ཆེན་པོས་སེར་སྦྲེང་གི་བཀོད་པ་མཚར་དུ་དངར་བ་དག་རིམ་གྱིས་བྱོན་ཏེ་བསུ་བར་བྱེད་དོ། །དེ་དག་ཀྱང་ལ་ལ་ནི་སྤང་བྱ་མི་མཐུན་པའི་
ཕྱོགས་ཐམས་ཅད་ལས་རྣམ་པར་རྒྱལ་བ་ཉིད་དུ། བཀྲ་ཤིས་པར་བྱེད་པའི་མེ་ཏོག་གི་སིལ་མ་མང་པོ་འཐོར་བར་བྱེད་དོ། །འགའ་ཞིག་ནི་དྲི་འཛིན་གྱི་དབང་པོ་ཡོངས་སུ་ཚིམ་པར་བཟོད་པའི་དྲི་ངད་རབ་ཏུ་ལྡང་བའི་སྤོས་ཀྱི་མཆོག་མང་པོ་དག་གཏུལ་བར་བྱེད་དོ། །ཁ་ཅིག་ནི་བསྟན་པ་
དང་འགྲོ་བ་རྒྱ་མཚོའི་དགེ་ལེགས་དང་དཔལ་འབྱོར་ཕུན་སུམ་ཚོགས་པ་ཐམས་ཅད་གསར་དུ་འགུགས་པའི་བཀྲ་ཤིས་ཀྱི་ཚིགས་སུ་བཅད་པའི་ཆོ་ག་རྣམས་ནི་སྐྱེ་བ་ལྔ་པའི་དུང་དཀར་གྱི་སྒྲ་དང༌། སྙན་དགུ་ཡོངས་སུ་རྫོགས་པའི་གླིང་བུའི་སྒྲ་དང༌། ལོ་པཎ་སྤྱན་འདྲེན་གྱི་དུས་སུ་དར་བའི་
དུང་གི་སྒྲ་དང༌། སྨྲ་ངན་ཐམས་ཅད་ཟིལ་གྱིས་གནོན་པར་བྱེད་པའི་ཆོས་ཀྱི་རྔ་སྒྲ་དང༌། རྔ་ཟླུམ་གྱི་སྒྲ་དང༌། འཁར་རྔའི་སྒྲ་དང༌། ཏིང་ཏིང་ཤག་གི་སྒྲ་དང༌། སིལ་སྙན་གྱི་སྒྲ་དང༌། ཕེག་རྡོབ་ཀྱི་སྒྲ་རྣམས་སུ་བསྒྱུར་ཏེ། བསྟན་ལ་དགའ་བའི་ལྷ་དང་མིའི་འགྲོ་བ་རྣམས་ཀྱི་རྣ་བར་
འཇེབས་པར་བྱེད། སྙིང་ལ་འབེབས་པར་བྱེད། ཀུན་ནས་རངས་པར་བྱེད། ཡོངས་སུ་ཚིམ་པར་བྱེད་དོ། །ལ་ལ་ནི་རིན་པོ་ཆེའི་གདུགས་དང༌། ཕྱོགས་ལས་རྣམ་པར་རྒྱལ་བའི་རྒྱལ་མཚན་དང༌། དགའ་བའི་རུ་མཚོན་དང༌། བ་དན་དང༌། ཕྱེ་མ་ཕུར་མ་དང༌། མེ་ཏོག་གི་ཕྲེང་བ་དང༌།
རིན་པོ་ཆེའི་རྔ་ཡབ་དང༌། བསིལ་ཡབ་རྣམས་ཏེ་དེ་དག་རེ་རེ་ཡང་བརྒྱ་སྟོང་མང་པོ་ཐོགས་ཏེ་འགྲོ་བ་ན། ནམ་མཁར་ལྷགས་པའི་ལྷ་རྣམས་ཀྱི་ལག་པས་འཁྱུད་པ་བཞིན་དུ་བྲེ་བར་བྱེད། དཔྱངས་པར་བྱེད། གདེངས་པར་བྱེད། བསྐྱོད་ཅིང་གཡོབ་པར་བྱེད་པའི་མདུན་བསུའི་བཀོད་པ་དཔག་ཏུ་མེད་

པ་དག་གིས་བསུ་ཞིང་དལ་གྱིས་འོངས་པ་དང༌། དེའི་རྗེས་ཐོགས་ཉིད་ནས་དཔལ་སྡོམ་བརྩོན་མིའི་ནོར་བུ་རིན་པོ་ཆེ་སྡེ་དགེ་བླ་མ་ཆེན་པོ་སྟེ། ཆོས་ལས་བྱུང་བའི་མཚན་གྱི་རོལ་མོ་ནི་ཀུན་དགའ་འཕྲིན་ལས་རྒྱ་མཚོའི་སྡེ་ཞེས་བྱ་བ། བསོད་ནམས་ཀྱི་མཐུས་མངོན་པར་
བཏེག་པས་ཇེ་མཐོར་གྱུར་པ་མིའི་རྒྱལ་པོ། འཇིག་རྟེན་དུ་སྔ་ན་མེད་པའི་བདེ་སྐྱིད་ཀྱི་དཔལ་འགུགས་པར་བྱེད་པའི་དབང་གི་ལྕགས་ཀྱུ། ཕྱོགས་ཀྱི་རྒྱལ་ཕྲན་མང་པོའི་གཙུག་ན་ངལ་བསོར་སྤྱོད་པ་ལ་མི་གུས་པ་མེད་པ་གཙུག་གི་ནོར་བུ། ཀུན་མཁྱེན་ཉི་མའི་གཉེན་གྱི་བསྟན་པ་རིང་དུ་གནས་
པར་བྱེད་པའི་སྨན་པ་ཆེན་པོ། བྱམས་པ་དང་བརྩེ་བས་རྒྱུད་བརླན་པར་བྱས་པ་རྒྱལ་བའི་མྱུ་གུ་དམ་པ། བགྱི་བ་ཐམས་ཅད་ཀྱི་བློ་སྣ་དཀོན་མཆོག་ལ་གཏོད་པས་གཞན་གྱིས་ཐུབ་པ་མེད་པའི་དཔའ་བོ་ཆེན་པོ་དེ་ཉིད་ལྗོངས་འདིའི་འགྲོ་བ་སྤྱིའི་བསོད་ནམས་ཀྱི་བཞོན་པ་ལ་ལེགས་པར་བཅིབས་ཏེ།
རང་གི་རྒྱལ་ཁབ་དམ་པ་མི་མཐུན་པའི་ཕྱོགས་ཐམས་ཅད་ལས་རྣམ་པར་རྒྱལ་བ་དེ་ཉིད་རྣམ་པ་ཐམས་ཅད་དུ་མཛེས་པར་བྱེད་པའི་བཅུད་ཀྱི་སྙིང་པོ་ཉིད་དུ་ལེགས་པར་བྱོན་ཏེ། གཟི་བརྗིད་ཀྱི་ཕུང་པོ་མངོན་པར་བརྟས་པའི་རང་བཞིན་དུ་བརྟན་པར་བཞུགས་སོ། །བཞི་པ་བསྟན་སྲིད་ཀྱི་ཁྲི་ལ་བཞུགས་
ནས་ཕྲིན་ལས་ཀྱི་རྒྱུན་སྐྱོང་བའི་ཁྱད་པར་ལ་གཉིས་ཏེ། ཁྲི་ལ་བཞུགས་པའི་དུས་སུ་བསོད་ནམས་ཀྱི་སྐལ་བར་ལྡན་པའི་ཁྱད་པར། སྐལ་བར་ལྡན་པས་བསྟན་པ་དང་འགྲོ་ལ་ཕན་པ་སྒྲུབ་པའི་ཁྱད་པར་རོ། །དང་པོ་བསོད་ནམས་ཀྱི་སྐལ་བར་ལྡན་པའི་ཁྱད་པར་ནི། དེ་ལྟར་ཁམས་གསུམ་
ཆོས་ཀྱི་རྒྱལ་པོ་ཆེན་པོར་གྱུར་པའི་སྐྱེས་བུ་དམ་པ་ཇི་སྐད་སྨོས་པ་དེ་དག་གི་དྲིན་གྱིས་ལྷ་དང་བཅས་པའི་སྐྱེ་དགུ་མ་ལུས་པའི་ཕྱག་བགྱིར་འོས་པའི་བླ་མ། སྡོམ་པ་གསུམ་གྱི་འབྱོར་པ་བླ་ན་མེད་པ་དང་ལྡན་པ། ཆོས་ཀྱི་རྒྱལ་པོའི་རྒྱལ་ཚབ་དམ་པ་ཉིད་དུ་ཆོ་ག་ཡང་དག་པའི་སྒོ་ནས་མངའ་གསོལ་
དུ་ཟིན་ཡང་སླར་ཡང་སྙིགས་མའི་དུས་ཀྱི་སྐྱེ་བོ་མི་སྲུན་པ་ཤིན་ཏུ་གདུལ་དཀའ་བ་དག །དངོས་སུ་ཆོས་དང་མཐུན་པའི་བཀའ་ཁྲིམས་རྡོ་རྗེ་བརྩེགས་པའི་རྭ་བ་ན་ལེགས་པར་བཅུག་སྟེ། བརྒྱུད་ནས་ཚུལ་བཞིན་མ་ཡིན་པའི་སྤྱོད་པ་ལས་བཟློག་པར་བྱ་བའི་ཕྱིར་དང༌། སངས་རྒྱས་བཅོམ་

ལྡན་འདས་ཀྱི་བསྟན་པ་རིན་པོ་ཆེའི་དབུ་འཕང་མངོན་པར་འདེགས་པའི་ཕྱིར། བསྐལ་པ་དཔག་ཏུ་མེད་པའི་བསོད་ནམས་ཀྱི་འབྲས་བུ་སྨིན་པ་སྙམ་བྱེད་པའི་ཛམྦུ་གསེར་གྱི་ཕུང་པོ་མཐའ་དག་གཅིག་ཏུ་བརྩེགས་པ་དཔལ་སྡེ་དགེ་རྒྱལ་པོ་ཞེས་བྱ་བའི་བསྟན་སྲིད་ཉི་ཟླ་ཟུང་དུ་འབྲེལ་བ་ལྟ་བུའི་གདན་སའི་
ཁྲི་འཕང་མཐོན་པོ། ཕྱོགས་ཀྱི་དཀྱིལ་འཁོར་ཀུན་དུ་འཁོད་པའི་རྒྱལ་རིགས་དང༌། བློན་པོ་དང༌། མི་དཔོན་དང༌། ཆེ་བཙན་གྱི་སྐྱེ་འགྲོ་ཕལ་ཆེ་བ་དག་གི་རལ་པའི་དོ་ཀེར་སྣུམ་པོ་མཛེས་པར་བྱེད་པ་ནོར་བུའི་རྒྱན་དང་བཅས་པས་ལན་གཅིག་མིན་པར་བཏུད་པར་བྱས་པའི་གནས་ག་ལ་བ་དེར། སྡོམ་བརྩོན་བླ་མ་
ཆེན་པོ་གང་གི་ཞབས་ཀྱི་ཆུ་སྐྱེས་དམར་པོ། སེན་མོ་མུ་ཏིག་གི་དོག་པ་འཛིན་པ་དག་ཉེ་བར་བཀོད་དེ་སྐྱེ་དགུའི་བདག་པོ་དམ་པ་ཉིད་དུ་དབང་བསྐུར་རོ། །དེའང་ཇི་ལྟར་ཁྲི་ལ་མངའ་གསོལ་བའི་ཚུལ་ནི། སྡོམ་བརྩོན་བླ་མ་སྐྱེ་དགུའི་བདག་པོར་གྱུར་པ་རང་གི་སྐུའི་མཆེད་ཟླར་གྱུར་པ་ཆེ་ཞིང་མཐོ་བའི་
རིགས་ཤིང་སཱ་ལ་ཆེན་པོ་ལྟ་བུ་སྡེ་དགེ་བླ་མ་བློ་གྲོས་རྒྱ་མཚོ་དང༌། དཔོན་ཆེན་བསོད་ནམས་མགོན་པོ་ཞེས་པ་གོང་དུ་སྨོས་པའི་ཡ་རབས་དམ་པའི་སྤྱོད་ཚུལ་དང༌། ཕྱི་དང་ནང་གི་རིག་པའི་གཙུག་ལག་རྒྱ་མཚོའི་མངའ་བདག་ཅན་ཏེ་རྣམ་པ་གཉིས་དང༌། མཁྱེན་དཔྱོད་ཀྱི་དཀྱིལ་འཁོར་རྣམ་པར་
ཡངས་པའི་དགེ་ཚུལ་མ་ཚེ་དབང་ལྷ་མོ་ཞེས་པ་སྲིད་ཞིའི་ཡོན་ཏན་མང་པོ་དང་ལྡན་པར་གྱུར་ཀྱང་རྒྱགས་པ་དང་གཡེང་བ་མ་མཆིས་པར་སྒོ་གསུམ་ཚུལ་དམ་པ་ལ་རྟག་ཏུ་གནས་པ། བདོག་པའི་རྫས་ཕལ་ཆེ་བ་དག་ཀྱང་དཀོན་མཆོག་ལ་མཆོད་པ་འབུལ་བ་དང༌། སེམས་ཅན་ལ་སྦྱིན་པར་གཏོང་
བའི་ཕྱག་ཐུང་ངུར་མ་གྱུར་པ་དེ་ཉིད་དང༌། སྡོམ་བརྩོན་བླ་མ་སྐྱེ་དགུའི་བདག་པོའི་བཀའ་ལུང་གི་ནོར་བུས། འགྲོ་བའི་སེམས་ཀྱི་རྙོག་པ་མ་ལུས་པ་བགྲུང་པར་བྱེད་ཅིང༌། གཅིག་ཏུ་ཕྲིན་ལས་ཀྱི་འཁོར་ལོ་རིན་པོ་ཆེ་ལག་ཏུ་ཐོགས་ནས་འཛིན་མའི་ཁྱོན་གྱི་དཀྱིལ་འཁོར་ཡངས་པ་མཐའ་དག་རང་
དབང་དུ་བགྱིད་པ་ལ་བསྙེངས་པ་མི་མངའ་བའི་བློ་གྲོས་ཀྱི་རྩལ་རབ་ཏུ་རྫོགས་པའི་འཕྲུལ་གྱི་མདུན་ན་འདོན་དང༌། ནང་བློན་དང༌། སྐུ་སྲུང་བ་དང༌། ཡི་གེ་པ་དང༌། ཚོང་དཔོན་དང༌། དམག་དཔོན་དང༌། སྡེ་དཔོན་ལ་སོགས་པ་རྒྱལ་པོའི་འཁོར་གྱི་སྐྱེ་བོའི་ཚོགས་དབང་ཆེ་ཞིང་མཐོ་བར་གྱུར་

པ་རྣམས་ཀྱང་གུས་པའི་ཞེ་ས་དང་བཅས་ཏེ། རྐང་རྟེན་དང་ལྡན་པའི་ཁྲི་མཐོན་པོ་གང་ཡིན་པ་དེ་ལ་གཙུག་གིས་ཉེ་བར་བཏུད་ནས་མདུན་དུ་འཁོད་པ་དག་ནི་འདི་ལྟ་སྟེ། མདུན་ན་འདོན་ཐམས་ཅད་ཀྱི་མེས་པོར་གྱུར་པའི་བློན་ཆེན་ཆོས་སྐྱོང་བློ་གྲོས་དང༌། རྒྱལ་བའི་མྱུ་གུའི་
སྤྱོད་ཚུལ་ལ་གོམས་པ་སྡོམ་བརྩོན་བསོད་ནམས་བཀྲ་ཤིས་དང༌། ངོ་མཚར་ཚིག་གི་བང་མཛོད་འཛིན་པ་དགེ་སློང་བསྟན་པ་བཟང་པོ་དང༌། རིག་པའི་གནས་ཀྱི་བང་མཛོད་འཛིན་པ་དྲུང་ཡིག་རྣམ་པ་གཉིས་དང༌། མང་དུ་ཐོས་པའི་དབང་ཕྱུག་དགེ་སློང་བཟང་པོ་དང༌། ངང་ཚུལ་ཆོས་དང་
མཐུན་པ་དགེ་སློང་མགོན་སྲུང་དང༌། དྲན་འཛིན་གྱི་མེ་ལོང་རབ་ཏུ་གསལ་བ་དབོན་པོ་ལྷ་དགྱེས་དང༌། བསྟན་སྲིད་ཟུང་གི་ཕྲིན་ལས་ཀྱི་འཁོར་ལོས་སྒྱུར་བ་ལྷ་བུ་ཚེ་རིང་དང༌། བགྱི་བ་ཀུན་ལ་རྨོངས་པ་མེད་པའི་བློ་ལྡན་དར་རྒྱས་དང༌། བློ་དང་ཐབས་ཀྱི་རྩལ་རབ་ཏུ་རྫོགས་པ་ཕྱག་མཛོད་གུ་རུ་
བཀྲ་ཤིས་དང༌། གཙུག་ལག་ཟུང་གི་མཁྱེན་པ་རབ་ཏུ་རྒྱས་པ་བོ་དགྱེས་དང༌། སྡེབ་ལེགས་གཏམ་གྱི་འབྱུང་གནས་ཚོང་དཔོན་འབུམ་སྐྱབས་དང༌། ཤེས་རབ་དང་གཟུངས་ཀྱི་མེ་ལྕེ་རབ་ཏུ་འབར་བ་བཀྲ་ཤིས་རྒྱ་མཚོ་དང༌། བརྟན་ཅིང་ཟབ་མོའི་བློ་དང་ལྡན་པ་གྲོག་མ་དང༌། རྣམ་པར་
དཔྱོད་པའི་མིག་དཀྱུས་རིང་པོར་གྱུར་པ་ཨ་ཟློས་ལ་སོགས་པ་སྟེ། ཐམས་ཅད་ཀྱང་ཇི་སྐད་དུ། མ་སུ་རཀྵའི་ལུགས་ཀྱི་བསྟན་བཅོས་ལས། ཚིག་གསལ་བློ་ནི་ཕུན་སུམ་ཚོགས། །ལུགས་ཀྱི་བསྟན་བཅོས་དག་ལ་མཁས། །ངང་འཇམ་དཔྱོད་པར་བྱེད་པ་སྟེ། །རྒྱལ་པོའི་བློན་པོ་དེ་
འདྲས་བྱ། །ཞེས་དང༌། རིགས་དང་ངང་ཚུལ་ཡོན་ཏན་ལྡན། །བདེན་དང་ཆོས་ལ་མཆོག་ཏུ་གཞོལ། །གཟུགས་བྱད་ཤིན་ཏུ་བཟང་བ་ནི། །རྒྱལ་པོའི་སྤྱན་མི་ཡིན་པར་བཤད། །ཅེས་གསུངས་པ་ལྟར་ཕྱི་དང་ནང་གི་རིག་པའི་གཙུག་ལག་མང་པོའི་བརྗོད་པར་བྱ་བ་ཐམས་ཅད་འདྲེན་པ་ལ་ཐོགས་
པ་མེད་པའི་རྗོད་བྱེད་ཀྱི་ཚིག་གསལ་བ། བརྗོད་ཚུལ་གྱི་སྡེབ་ལེགས་པ། དགོས་པའི་གཙོ་བོ་གང་དང་གང་ཡིན་པ་དེ་དཔེ་དང་གཏན་ཚིགས་ཀྱི་སྒོ་ནས་བདེ་བླག་ཏུ་སྟོན་ནུས་པ། འཇིག་རྟེན་ལུགས་ཀྱི་བསྟན་བཅོས་ཤེས་རབ་སྡོང་བུ་དང༌། སྐྱེ་བོ་གསོ་བའི་ཐིགས་པ་དང༌། ཙ་ན་ཀའི་རྒྱལ་པོའི་

ལུགས་ཀྱི་བསྟན་བཅོས་དང༌། ཚིགས་སུ་བཅད་པ་བརྒྱ་པ་དང༌། ལེགས་པར་བཤད་པ་རིན་པོ་ཆེའི་གཏེར་ལ་སོགས་པ་ལུགས་ཀྱི་བསྟན་བཅོས་ཐམས་ཅད་རིག་ཅིང་དེ་དག་གི་རྗེས་སུ་བྱེད་པ། གཏུམ་པ་དང་རྩུབ་པའི་ཚེར་མའི་མེ་དབལ་བཏུལ་ནས། སྙིང་རྗེ་ཆེན་པོའི་སེམས་བཞིན་དུ་
འཇམ་ཞིང་མཉེན་པའི་ངང་ཚུལ་དང་ལྡན་པ། བརྩམ་པར་བྱ་བ་དང་བརྩམ་པར་བྱ་བ་མ་ཡིན་པ་དང༌། བསྐྱབ་པར་བྱ་བ་དང་བསྐྱབ་པར་བྱ་བ་མ་ཡིན་པ་དང༌། བསྐྱུང་བར་བྱ་བ་དང་བསྐྱུང་བར་བྱ་བ་མ་ཡིན་པ་དང༌། གཞོམ་པར་བྱ་བ་དང་གཞོམ་པར་བྱ་བ་མ་ཡིན་པ་དང༌། བཀུར་བར་བྱ་བ་དང་བཀུར་
བར་བྱ་བ་མ་ཡིན་པ་ལེགས་པར་དཔྱོད་ཅིང་བླང་དོར་ཚུལ་བཞིན་དུ་བྱེད་པ། བདེན་པའི་ལམ་དུ་རྒྱུ་ཞིང་བདེན་པའི་ཚིག་གསོང་པོར་སྨྲ་བ། བགྱི་བ་ཐམས་ཅད་ཀྱང་མཐར་དམ་པའི་ཆོས་སུ་འགྱུར་བ་དང་བསྟན་པའི་ཞབས་ཏོག་ཏུ་འགྱུར་བའི་ལས་ལ་གཞོལ་བ། བཟོད་པ་བསྒོམ་པ་བཞིན་དུ་བཞིན་
འཛུམ་ཞིང་གཟུགས་བྱད་ཕུན་སུམ་ཚོགས་པ་དང་ལྡན་པས་ཀུན་གྱི་མཉེས་གཤིན་དམ་པར་གྱུར་པ་དང༌། གཞན་ཡང་རྒྱལ་པོའི་འཁོར་དུ་འོས་པ་དཔའ་ཞིང་བརྟན་པ་དང༌། བཟོའི་ལས་དང༌། མཚོན་གྱི་ལས་དང༌། བཞོན་པ་དག་ལ་ཡང་འདབ་ཆགས་བཞིན་དུ་ཤིན་ཏུ་གོམས་པར་བྱས་པ་
སྟེ། དེ་ལྟ་བུའི་ཡོན་ཏན་དང་ལྡན་པའི་འཁོར་གྱི་ཚོགས་ཆེན་པོ་རྣམས་ཀྱིས་མདུན་གྱིས་བལྟས་ཏེ་ཀུན་ནས་བསྐོར་བའི་དབུས་ག་ལ་བ་དེ་ཉིད་དུ། གསེར་གྱི་རི་དབང་ཉི་མའི་འོད་ཀྱིས་འཁྱུད་པའམ་ཀ་ན་ཀའི་མཆོད་སྡོང་ལ་མར་མེའི་འོད་ཀྱིས་ཕོག་པ་ལྟར་བཞུགས་སུ་གསོལ་ལོ། །དུས་དེ་ཉིད་
དུ་ཡར་ལུང་བཀྲ་ཤིས་ཆོས་ལྡན་གྱི་མཁན་པོ་ངག་དབང་ཀུན་དགའ་ལེགས་པའི་འབྱུང་གནས་རྒྱལ་མཚན་དཔལ་བཟང་པོ་ཞེས་པ་དཔལ་ལྡན་སྟོབས་བཅུ་མངའ་བའི་བསྟན་པ་རིན་པོ་ཆེ་འཆད་པ་དང༌། རྩོད་པ་དང༌། རྩོམ་པའི་ཕྲིན་ལས་ཀྱི་སྒོ་ནས་རིང་དུ་གནས་པར་བྱེད་པའི་མཁྱེན་བརྩེ་
ནུས་པའི་བདག་ཉིད་ཅན་དེ་ཉིད་གཙོ་བོར་བྱས་པའི་གསང་སྔགས་གྲུབ་པའི་རྡོ་རྗེ་སློབ་དཔོན་ཆེན་པོ་རྣམས་དང་ལྷན་ཅིག་པས། སྡོམ་བརྩོན་ས་གཞི་སྐྱོང་བའི་བརྟུལ་ཞུགས་བཟུང་བའི་བླ་མ་ཆེན་པོ་གང་དེ། བསྐལ་པ་བཟང་པོ་འདི་ཉིད་ཇི་སྲིད་གནས་པ་དེ་སྲིད་དུ། སྐུ་གསུང་ཐུགས་མི་

ཤིགས་རྡོ་རྗེ་གསུམ་གྱི་རང་བཞིན་དུ་སྒྲུབ་པར་བྱེད་པའི་ཆོ་ག་ཟབ་མོའི་རྟེན་འབྲེལ་ལ་བརྟེན་ནས། རྣམ་པར་དཀར་བའི་ཕྲིན་ལས་གྱི་འཁོར་ལོ་གང་དེ་རིང་པོའི་ལམ་དུ་རྒྱུ་བས་སྙིགས་མའི་དུས་ཀྱི་སེམས་ཅན་ཐམས་ཅད་དགེ་བ་བཅུའི་ཁྲིམས་ཀྱི་ར་བ་ལ་ཡང་དག་པར་
གཟུད་པར་བྱ་བའི་ཕྱིར་དང༌། བསྒྲུན་དུ་མེད་པའི་སྙིང་སྟོབས་ཀྱི་ཕྲག་པ་བརྟན་པོས་ཐམས་ཅད་མཁྱེན་པ་ཆེན་པོ་ཉི་མའི་གཉེན་གྱི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཀུན་དུ་མི་ཉམས་པར་བགྱི་བའི་ཁུར་ཆེན་པོ་གོང་ནས་གོང་དུ་གདེགས་པར་བྱ་བའི་ཕྱིར་དང༌། ཕྱོགས་སུ་ལྷུང་བ་མེད་པའི་
སྙིང་རྗེ་ཡོངས་སུ་རྒྱས་པའི་གདུགས་དཀར་གཅིག་གི་གྲིབ་ཏུ་ཡངས་པའི་རྒྱལ་ཁམས་ཀྱི་འགྲོ་བ་ཐམས་ཅད་རྫོགས་ལྡན་བསྐལ་པའི་དུས་ཀྱི་བདེ་སྐྱིད་གསར་པའི་རོ་ལ་ལོངས་སུ་སྤྱད་པར་བྱ་བའི་ཕྱིར་དང༌། མཐའ་གཉིས་ལ་མི་གནས་པ་སངས་རྒྱས་བཅོམ་ལྡན་འདས་ཀྱི་གོ་འཕང་མངོན་དུ་བྱ་
བའི་ཐབས་ཀྱི་གཙོ་བོ་གཞན་ལ་ཕན་པ་ཉེ་བར་ཞུགས་པའི་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་མཐར་ཕྱིན་པར་བྱ་བའི་ཕྱིར་དུ་ཞབས་བརྟན་གྱི་ཆོ་ག་ཡང་དག་པར་བསྒྲུབ་པར་བརྩམས་སོ། །དེ་ལྟ་བུའི་ཞབས་ཀྱི་པདྨ་བརྟན་པའི་ཆོ་ག་དེ་ལྟར་བསྒྲུབ་པའི་དགོས་པའང། ཤེས་རབ་བརྒྱ་པར།
ནད་དང་འདྲ་བའི་དགྲ་མེད་དེ། །འཆི་བ་དང་མཉམ་འཇིགས་པ་མེད། །ཅེས་འབྱུང་བ་ལྟར་འཁོར་བ་ན་ཤིན་ཏུ་འཇིགས་ཤིང་བག་ཚ་བར་བྱེད་པའི་གནས་ནི་དེ་དག་ཏུ་བཤད་ལ། དེས་ན་དེ་དག་བཟློག་པའི་ཐབས་ལ་བརྩོན་དགོས་པ་ཡང༌། སློབ་དཔོན་ངག་གི་དབང་ཕྱུག་གྲགས་པས་མཛད་
པའི་འཆི་བ་བསླུ་བའི་མན་ངག་ལས། ཆོས་སྤྱོད་དབང་པོ་ཐུལ་བ་ནི། །འཁོར་བ་རུ་ནི་ཇི་སྲིད་འཚོ། །དེ་སྲིད་བསོད་ནམས་ལ་སོགས་ཚོགས། །བྱང་ཆུབ་སྒྲུབ་བྱེད་རབ་ཏུ་སྐྱེ། །འཁོར་བར་སྲོག་ལས་གཅེས་པ་ནི། །ཅི་ཡང་ཡོད་པ་མ་མཐོང་སྟེ། །དེ་བས་མྱུར་དུ་ཐབས་མང་པོས། །
འཆི་བ་བསླུ་བར་ཀུན་དུ་སྤྱོད། །ཅེས་གསུངས་ཤིང་དེ་ལྟ་བུའི་འཆི་བའི་འཇིགས་པ་བཟློག་པའི་ཐབས་ཀྱང༌། དེ་ཉིད་ལས། གང་ཞིག་རིགས་པའི་ཐབས་སྦྱོར་བ། །དཀའ་བ་ཅུང་ཟད་ཡོད་མ་ཡིན། །ནོར་བུ་སྔགས་དང་སྨན་རྣམས་ཀྱི། །མཐུ་ནི་ཐམས་ཅད་འདོད་པ་ཡིན། །ཞེས་དང༌།

ལུས་དང་ངག་གི་ལས་ཀྱིས་ཕྱི། །བསམ་གཏན་ལས་ཀྱིས་ནང་གི་ཡིན། །ནོར་བུ་སྔགས་སྨན་ཕྱི་ཡི་སྟེ། །རྣལ་འབྱོར་ནུས་པས་ནང་ཡིན་ནོ། །ཞེས་དང༌། སྔགས་ཀྱིས་གང་ཞིག་ལས་བྱེད་པ། །དེ་ཡི་ཚེ་ནི་འཕེལ་བར་འགྱུར། །ཚེ་ནི་འཕེལ་བར་གྱུར་པ་ན། །དེས་ནི་འཆི་བ་བསླུ་
བར་འགྱུར། །སྔགས་རྣམས་ཀྱི་ནི་མཐུ་ལ་ཡང༌། །ཐེ་ཚོམ་བྱ་བ་རིགས་མ་ཡིན། །གང་ཕྱིར་སྔགས་ཀྱི་མཐུ་དག་ནི། །བསམ་མི་ཁྱབ་པར་ཀུན་ལ་འདོད། །འཇིག་རྟེན་ན་ནི་དངོས་གཞན་དག །སྔགས་ཀྱིས་མི་འགྲུབ་དེ་ཡོད་མིན། །ཡང་དག་དད་དང་མངོན་བརྩོན་ལས། །སྔགས་
རྣམས་ཡིད་བཞིན་ནོར་བུར་མཚུངས། །ཞེས་གསུངས་པ་བཞིན་དུ་ནོར་བུ་དང་སྨན་དང་སྔགས་དང་ཏིང་ངེ་འཛིན་གྱི་ནུས་པས་ཚེ་བསྲིང་བའི་ཐབས་བསམ་གྱིས་མི་ཁྱབ་པ་ཅིག་བསྟན་པ་ལས། འདིར་གཙོ་བོར་གསང་བསྔགས་ཀྱི་གདམས་པ་སྟེ། དེ་ལ་ཡང་སྔོན་གྱི་མཁས་པ་ཆེན་པོ་
རྣམས་ཀྱི་བཞེད་སྲོལ་གྱི་ཆོ་ག་མི་འདྲ་བ་ཚུལ་འགའ་ཞིག་མཆིས་པ་ལས། འདིར་སློབ་དཔོན་ངག་གི་དབང་ཕྱུག་གྲགས་པས། ཚངས་དབང་ཁྱབ་འཇུག་ཉི་ཟླ་དང༌། །དྲག་པོ་ཕྱོགས་སྐྱོང་འདོད་ལྷས་ཀྱང༌། །སྤུ་རྩེ་ཙམ་ཡང་མ་ཉམས་པར། །འཆི་བདག་ལྟ་བུར་འཆི་ལས་རྒྱལ། །
སྐྲ་དཀར་གཉེར་མ་སྐལ་ངན་དང༌། །ནད་དང་དབུལ་བ་ཀུན་ཟད་བྱེད། །སེང་གེ་ལ་སོགས་འཇིགས་ཆེན་བརྒྱད། །སྡུག་བསྔལ་ཚོགས་ནི་འཇིག་པར་བྱེད། །མ་བསླངས་པར་ནི་ཟས་སྐོམ་སོགས། །ཁང་བཟང་གོས་ལ་སོགས་པ་རྙེད། །རལ་གྲི་མིག་སྨན་རྐང་བྱུག་དང༌། །བུམ་པ་
བཟང་སོགས་དངོས་གྲུབ་རྣམས། །སྙན་དངགས་སྨྲ་མཁན་ཉིད་ཀྱི་བློ། །ཤེས་རབ་གཅིག་ཏུ་དྲི་མ་མེད། །འདོད་པའི་དངོས་གྲུབ་གཞན་དག་ཀྱང༌། །འཁོར་ལོ་འདི་ལས་འབྱུང་བར་འགྱུར། །ཞེས་གསུངས་པ་ལྟར། ཕྱོགས་བཅུའི་རྒྱལ་བ་ཀུན་གྱི་ཕྲིན་ལས་མ་ལུས་པ་གཅིག་ཏུ་བསྡུས་པའི་
རང་གཟུགས་རྗེ་བཙུན་སྒྲོལ་མ་དཀར་མོ་ཡིད་བཞིན་འཁོར་ལོའི་ཆོ་ག་རྣམ་པར་དག་པའི་སྒོ་ནས། འཆི་བདག་བདུད་ཀྱི་དཔུང་གིས་མི་ཕྱེད་པའི་འཆི་བ་མེད་པ་རྡོ་རྗེའི་སྲོག་གི་ཀ་རིང་ཤིན་ཏུ་བརྟན་པར་བཙུགས་སོ། །སླར་ཡང་དེ་ཉིད་རྒྱུན་དུ་བརྟན་པར་བྱེད་པའི་ཆོ་ག་ལ་བཀྲ་ཤིས་པའི་རྫས་རྟགས་

རྣམ་པ་བརྒྱད་ཀྱི་མངའ་འབུལ་དང་བཅས་པའི་བཀྲ་ཤིས་ཀྱི་ཚིགས་སུ་བཅད་པ་བརྗོད་པའི་ཆེད་དུ། ཕྱོགས་བཅུ་རབ་འབྱམས་ཀྱི་ཞིང་མུར་ཐུག་པ་མེད་པ་རྣམས་སུ་བཞུགས་པའི་རྒྱལ་བ་སྲས་དང་སློབ་མར་བཅས་པའི་ཚོགས་དང༌། གཞན་ཡང་འཆི་མེད་ཚེའི་དངོས་
གྲུབ་བརྙེས་པའི་ལྷ་དང༌། ཀླུ་དང༌། དྲང་སྲོང་དང༌། གྲུབ་པ་དང༌། རིག་པ་འཛིན་པའི་ཚོགས་བསམ་གྱིས་མི་ཁྱབ་པས་ནམ་མཁའི་གཏོས་ཐམས་ཅད་དུ་ཁྱབ་པར་མངོན་པར་བལྟས་ཏེ། དེ་དག་དང་མཆོག་གི་རྡོ་རྗེ་སློབ་དཔོན་ཆེན་པོ་རྣམས་མགྲིན་བསྒྲིགས་ཏེ་བཀྲ་ཤིས་ཀྱི་གླུ་དང་རོལ་མོའི་བྱེ་
བྲག་བསམ་གྱིས་མི་ཁྱབ་པའི་སྒྲ་ཤིན་ཏུ་སྙན་པར་འབྱིན་ཅིང༌། ལྷའི་མེ་ཏོག་མནྡྷ་རྭ་བ་དང༌། པུཎྜཱ་རཱི་ཀ་དང༌། ཨུཏྤལ་ལ་སོགས་པའི་མེ་ཏོག་གི་རྣམ་པ་སྣ་ཚོགས་པ་དག་གིས་སིལ་མ་གཏོར་བ་ནི། བསྐལ་པ་ཆགས་པའི་དུས་ཀྱི་ཆར་གྱི་རྒྱུན་ཆེན་པོ་བཞིན་དུ་བསྙིལ་བས། མི་དང་མི་མ་ཡིན་
པའི་འགྲོ་བ་རྒྱ་མཚོའི་དབང་པོ་ལྔའི་སྤྱོད་ཡུལ་དུ་སྔོན་ཆད་མཐོང་བ་དང༌། ཐོས་པ་དང་མྱང་བར་མ་ནུས་པའི་ངོ་མཚར་གྱི་ལྟད་མོ་ཚར་དུ་དངར་བ་དག་བསྐྲུན་ཏོ། །དེ་ནས་བརྩམས་ཏེ། ཇི་སྐད་དུ། ནོར་དང་འདོད་པ་ཐར་བ་ཆོས། །ཞེས་པ་ལྟར་སྡེ་བཞི་སྟེ། དེ་ཡང་ཆོས་ནི་གནས་སྐབས་སུ་མངོན་
པར་མཐོ་བ་དང༌། མཐར་ཐུག་ངེས་པར་ལེགས་པའི་གོ་འཕང་ཐོབ་པར་བྱེད་པའི་རྒྱུའོ། །ནོར་ནི་རིག་བྱེད་མང་དུ་ཐོས་པ་དང༌། ས་གཞི་དང་རིན་པོ་ཆེ་ལ་སོགས་པ་སོག་པ་དང་བསྲུང་བར་བྱ་བའི་རིགས་སོ། །འདོད་པ་ནི་ལྷ་དང་མིའི་དབང་པོའི་ཡུལ་དུ་གྱུར་པའི་འདོད་པའི་ལོངས་སྤྱོད་རྣམས་སོ། །
ཐར་པ་ནི་གཏན་གྱི་བདེ་བ་བྱང་ཆུབ་ཀྱི་སྙིང་པོ་སྟེ་བསྒྲུབས་པའི་འབྲས་བུ་ཉིད་དུ་བཤད་དོ། །དགེ་བ་ནི་མ་ཆགས་པ་དང༌། ཞེ་སྡང་མེད་པ་དང༌། གཏི་མུག་མེད་པས་ཀུན་ནས་བསླངས་པའི་ལས་ཏེ། དེ་ལ་དབྱེ་ན་ལུས་ངག་ཡིད་ཀྱི་སྤང་བ་བཅུ་སྟེ་འབྲས་བུ་རྡུལ་མེད་པ་ཉིད་དུ་སྐྱེད་པར་བྱེད་པའི་རྒྱུ་གང་
ཡིན་པའོ། །མདོར་ན་འཁོར་བ་དང་མྱ་ངན་ལས་འདས་པའི་དཔལ་འབྱོར་གྱི་རྒྱུ་དང་འབྲས་བུ་ཐམས་ཅད་སྡེ་བཞི་པོ་འདིར་མ་འདུལ་བ་མེད་ཅིང༌། ཕྱི་མ་ནི་སྐྱེ་བ་ནས་སྐྱེ་བར་བདེ་བ་ཕུན་སུམ་ཚོགས་པ་འཐོབ་པར་བྱེད་པའི་རྒྱུའམ་ལམ་ཁོ་ན་ཉིད་དོ། །དེས་ན་མིང་དོན་དེ་དང་ལྡན་པའི་བསྟན་སྲིད་ཟུང་

འབྲེལ་གྱི་བགྱི་བ་ཤིན་ཏུ་ལྕི་བའི་ཁུར་ཆེན་པོ་ཡོངས་སུ་བཞེས་པར་མཛད་དོ། །དེ་ལའང་ལེགས་པར་བཤད་པ་རིན་པོ་ཆེའི་གཏེར་ལས། དམ་པ་དཔོན་དུ་བསྐོས་གྱུར་ན། །དོན་གྲུབ་པ་དང་བདེ་སྐྱིད་འཐོབ། །ནོར་བུ་རྒྱལ་མཚན་རྩེར་མཆོད་ན། །ཡུལ་ཕྱོགས་དགེ་ཞེས་འཇིག་རྟེན་
སྒྲོགས། །ཞེས་གསུངས་པ་ལྟར། དགེ་བའི་རྩ་བ་ལ་ཡོངས་སུ་སྦྱངས་པའི་བསོད་ནམས་ཀྱི་མཐུ་ཆེན་པོ་དང་ལྡན་པ་དེ་ཉིད་མངའ་འབངས་ཀྱིས་མཚོན་པའི་བསྟན་འགྲོ་སྤྱིའི་བསོད་ནམས་ཀྱི་ནོར་བུ་བརྩེགས་པའི་ཁྲི་ག་ལ་བར་བཞུགས་པ་ནས་བརྩམས་ཏེ། འདི་ལྟར་མདོ་ལས། ལུས་
ཅན་རྣམས་ཀྱི་ལས་རྣམས་ནི། །བསྐལ་པ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབ་པ་ན། །འབྲས་བུ་སྨིན་པ་ཉིད་དུ་འགྱུར། །ཞེས་དང༌། རྒྱལ་པོ་ལ་གདམས་པ་ལས། སྐྱེས་བུ་དེ་ནི་གང་དང་གང་འགྲོ་ཡང༌། །ལས་ནི་གྲིབ་མ་བཞིན་དུ་རྗེས་སུ་འབྲངས། །ཞེས་དང༌།
ལས་ཀྱི་རྣམ་པར་འགྱུར་བའི་མདོ་ལས། ཇི་ལྟར་གང་ཟག་ལས་འདི་ལྟ་བུར་གྱུར་པས་སྔར་ཡང་བདེ་ལ། ཕྱིས་ཀྱང་བདེ་བར་འགྱུར་བའི་ལས་གང་ཡིན་ཞེ་ན། གང་ཟག་སུ་ཡང་རུང་སྟེ་སྦྱིན་པ་བྱིན་པ་ཡང་མང་པོ་དང་རངས་པར་བྱིན། བདག་ཀྱང་ཡིད་དགའ་སྟེ་བྱིན་པས་ཕྱིས་ཀྱང་མི་འགྱོད་པའི་
གང་ཟག་དེའི་འབྲས་བུ་ནི། མིར་སྐྱེས་ན་ཡང་ཕྱུག་པོའི་རིགས་སུ་སྐྱེ་སྟེ་ནོར་མང་པོ་སྤྱོད་པ་དང༌། མང་པོའི་ཇོ་བོར་གྱུར་ནས། བློན་པོ་དང༌། གྲོགས་པོ་དང༌། གཉེན་དང་རིགས་གཅིག་པ། མང་དུ་བདོག་པ་དང༌། བང་མཛོད་ཐམས་ཅད་གང་ཞིང་བདེ་བའི་རིགས་སུ་སྐྱེ་སྟེ། གང་ཟག་
ལས་འདི་ལྟ་བུ་འདུས་པས་སྔར་ཡང་བདེ། ཕྱིས་ཀྱང་བདེ་བར་འགྱུར་རོ་ཞེས་དང༌། ཟུང་གི་མདོ་ལས། གང་དག་ང་ཡི་བསྟན་པ་ལ། །སྦྱིན་པ་སྐྲ་ཙམ་བྱིན་པ་ནི། །བསྐལ་པ་སྟོང་ཕྲག་བརྒྱད་ཅུ་རུ། །ལོངས་སྤྱོད་ཆེ་ཞིང་ནོར་ཡང་མང༌། །ཞེས་དང༌། མདོ་རྒྱ་ཆེར་རོལ་པ་ལས། ཁྱོད་
ཀྱིས་སྔོན་ཆད་དགེ་ལས་བསགས་པ་དང༌། །ཡུན་རིང་དུས་ཀྱི་དགེ་བས་བྱུང་བ་དང༌། །ཁྱོད་ཀྱིས་ཆོས་རྣམས་ཀུན་གྱི་ཚུལ་སྦྱངས་པས། །དེ་རིང་མཆོད་པ་རྒྱ་ཆེན་བྱུང་བར་གྱུར། །ཞེས་འབྱུང་བ་ལྟར། སྡོམ་བརྩོན་བླ་མ་ཆེན་པོ་སྐྱེ་དགུའི་བདག་པོར་གྱུར་པ་གང་གི་ལེགས་བྱས་ཀྱི་མཐུས།

དུས་དེ་ཉིད་ནས་བརྩམས་ཏེ་མངའ་འོག་ཏུ་འཁོད་པས་མཚོན་ཏེ། ཕྱོགས་བཅུའི་འཛིན་མའི་དཀྱིལ་འཁོར་ཀུན་དུ་ཆེ་བའི་ཡོན་ཏན་དང༌། རིགས་དང༌། སྟོབས་དང༌། དཔུང་གི་སྡེ་ཆེན་པོས་མངོན་པར་ཁེངས་པ་དང་ལྡན་པའི་རྒྱལ་ཕྲན་དང༌། བློན་པོ་དང༌། མི་དཔོན་དང༌།
རྫོང་དཔོན་དང༌། སྡེ་དཔོན་དང༌། ཆེ་བཙན་དང༌། འབྱོར་ལྡན་གྱི་སྐྱེ་བོ་རྣམས་ཏེ། ཐམས་ཅད་ཀྱང་ལེགས་བྲིས་ཀྱི་ཡུལ་ནས་འོངས་པ་ལྟ་བུའི་གོས་བཟང་དང་རྒྱན་གྱི་རྣམ་པ་མང་པོས་ལུས་ལ་སྒེག་པར་བྱས་པ་བགྲང་གི་མི་ལྡང་བ་རྣམས་ཀྱིས་ལྷགས་ཏེ། རང་རང་གི་མངོན་པར་རྒྱགས་
པ་ཐམས་ཅད་ཆོག་ཤེས་ལྡན་པའི་ནོར་བཞིན་དུ་བཏང་ནས། གང་གི་ཞབས་སྟེགས་ཀྱི་ཁྲི་མཐོན་པོ་རིན་ཐང་ཆེ་བའི་ནོར་བུ་རིན་པོ་ཆེའི་ཕྲ་ཚོམ་མཚར་དུ་དངར་བར་བཀོད་པ་དག་ནི། བཙོ་མ་གསེར་གྱི་པ་ཏྲ་རིས་འཁྱུག་པས་ལེགས་པར་བཟུང་བའི་ངོ་མཚར་མིག་གི་དགའ་སྟོན་དུ་གྱུར་པ་ག་ལ་བ་དེ་ན།
ལུས་ཐམས་ཅད་ནས་གུས་པའི་ཞེ་ས་དང་བཀུར་སྟི་སྔོན་དུ་འགྲོ་བས། སྡོམ་བརྩོན་བླ་མ་ཆེན་པོའི་ཐུགས་ལ་ཇི་ལྟར་བཞེད་པའི་དགེ་བའི་རྩ་བ་ཐམས་ཅད་ལེགས་པར་གྲུབ་ནས། དེང་གི་དུས་སུ་བོད་ཆེན་པོའི་ལྗོངས་ཀྱི་འགྲོ་བ་སྤྱིའི་བསོད་ནམས་ཀྱི་ཁང་པ་བརྩེགས་པའི་ནང་དུ་བདེ་བར་བྱོན་
པའི་དགའ་སྟོན་དང༌། གཅིག་ཏུ་བསྟན་སྲིད་ཟུང་འབྲེལ་གྱི་ཁྲི་ལ་མངའ་གསོལ་བའི་ལེགས་སོའི་གཏང་རག་ཏུ། རང་རང་གི་བདོག་པའི་དངོས་པོ་གྱ་ནོམ་པ་དག་སྟོབས་པར་བྱེད་དོ། །དེ་དག་ལ་ཡང་སྔ་ན་མེད་པའི་གཏམ་སྙན་གྱི་བཀའ་སྩལ་དང༌། གནང་སྐྱེས་ཀྱི་རྣམ་པ་མང་པོ་དག་
གིས་ཡིད་ཀྱི་རེ་བ་དག་ཀྱང་ཚིམ་པར་བྱེད་དོ། །གཞན་ཡང་བསོད་ནམས་ཀྱི་མཐུ་ཆེན་པོ་དེས། དེ་ཙམ་ན་རྒྱལ་པོའི་ཕོ་བྲང་གི་ཕྱི་ནང་ཐམས་ཅད་དང༌། མངའ་འོག་ཏུ་གཏོགས་པའི་ཡུལ་ལྗོངས་དང༌། གྲོང་དང༌། གྲོང་ཁྱེར་དང༌། གྲོང་རྡལ་དང༌། ཚོང་དུས་དང༌། ཕོ་བྲང་དང༌། ཁང་
ཁྱིམ་ཐམས་ཅད་ཀྱང་འབྱོར་པ་དང་རྒྱས་པ་དང༌། བདེ་ཞིང་ལོ་ལེགས་པ་དང༌། མི་དང་སྐྱེ་བོའི་ཚོགས་ཆེན་པོ་རྣམས་ཀྱང་དགའ་གཞས་ཀྱི་གླུ་ལེན་པ་དང༌། གར་གྱིས་རྩེན་པའི་ངོ་མཚར་ཅི་ཡར་རྒྱས་པ་དང༌། ཉེན་ཀོར་གྱི་ཀུན་དགའ་རྭ་བ་དང༌། སྐྱེད་མོས་ཚལ་དང༌། མེ་ཏོག་གི་ལྡུམ་

ར་དང༌། ཤིང་ལྗོན་པ་དང༌། ཚང་ཚིང་འཁྲིགས་པའི་ནགས་ཚལ་རྣམས་ཀྱང༌། རིན་པོ་ཆེ་མར་ཀ་ཏི་དང༌། ཨིནྡྲ་ནཱི་ལ་དང༌། གཡུ་ལྗང་གི་ཁ་དོག་ལ་འགྲན་པའི་ལོ་འདབ་དང་ལྡན་པའི་དབྱར་སྐྱེས་ཀྱི་ཕྲེང་བ་དག་ཀྱང༌། རྩ་བ་དང༌། སྡོང་བུ་དང༌། ལྕུག་མ་དང༌། ལོ་མ་དང༌། མེ་ཏོག་དང༌།
འབྲས་བུ་རྣམ་པ་སྣ་ཚོགས་པ་དག་ཀྱང་རང་རང་གི་དུས་ཀྱི་ངོ་མཚར་དང་ལང་ཚོ་ངོམ་པ་བཞིན་དུ་ཉམས་དགའ་བར་བྱེད་དོ། །ཡུལ་ཕྱོགས་དེ་དང་དེ་དག་ཏུ་ནི་གཏེར་དང༌། འབྲུའི་ཚོགས་དང༌། བཟའ་བ་དང༌། བཅའ་བ་དང༌། བཏུང་བ་དང༌། བགོ་བ་དང༌། རྒྱན་དང༌། རྟ་དང་བཞོན་
པ་དང༌། གནག་ལུག་ལ་སོགས་པ་ཉེ་བར་མཁོ་བ་རྣམས་ཀྱང་ཡིད་བཞིན་དུ་འབྱོར་ཞིང་རྒྱས་པར་གྱུར་ཏོ། །གཞན་ཡང་རིན་པོ་ཆེ་གསེར་དང༌། དངུལ་དང༌། ནོར་བུ་དང༌། མུ་ཏིག་དང༌། བཻ་ཌཱུརྻ་དང༌། དུང་དང༌། མན་ཤེལ་དང༌། བྱི་རུ་ལ་སོགས་པ་ལྷ་དང་མིའི་དབྱིག་གི་རྣམ་
པ་མང་པོ་ཡང་ཡུལ་ཕྱོགས་དེ་དང་དེ་དག་ཏུ་འཕེལ་བར་གྱུར་ཏོ། །དེ་ལྟར་མཚུངས་པ་མེད་པའི་སྟོབས་དང༌། བསོད་ནམས་ཀྱི་མཐུ་ཆེན་པོས་ཇེ་མཐོར་གྱུར་པའི་སྡོམ་བརྩོན་མིའི་དབང་ཕྱུག་དམ་པ་དེས་ནི། བོད་ཆེན་ལྗོངས་ཀྱི་འཛིན་མའི་དཀྱིལ་འཁོར་རྣམ་པར་ཡངས་པའི་དཀྱིལ་འཁོར་
ཀུན་དུ་འཁོད་པའི་སྐྱེ་དགུ་ཐམས་ཅད་གཞལ་དུ་མེད་པའི་ཐུགས་རྗེ་དང་ཕྲིན་ལས་འདོད་དགུའི་དཔག་བསམ་གྱི་ལྗོན་པ་ལྟར་རྒྱས་པར་གྱུར་པའི་གྲིབ་མ་སྣུམ་པོ་གཅིག་གིས་ཡོངས་སུ་ཁེབས་པར་བྱེད་ཅིང་ཅི་བདེ་བར་སྐྱོང་བ་ལ། རྣམ་པ་ཀུན་དུ་བརྫི་བ་མི་མངའ་ཞིང༌། གལ་ཏེ་སྲིད་པ་དང་ཞི་
བའི་དཔལ་འབྱོར་ཕུན་སུམ་ཚོགས་པ་དང་ལྡན་པར་མཐོང་སྟེ། དེ་ལ་མ་བཟོད་པར་སྡང་བའི་སེམས་དང༌། གདུག་པའི་སེམས་དང༌། དྲག་ཤུལ་གྱི་སེམས་དང༌། བསམ་པ་ངན་པ་དང༌། སྦྱོར་བ་རྩུབ་མོར་གཤོམ་པའི་སྐྱེ་འགྲོ་མི་སྲུན་པ་འགའ་ཞིག་ཡོད་པ་རྣམས་ཀྱང༌། གང་གི་
བསོད་ནམས་ཀྱི་སྟོབས་དང༌། ལྷག་པའི་བསམ་པ་མི་དམན་པའི་ཁང་བཟང་ཡངས་པ་དེ་ན་རྟག་ཏུ་བསྟན་ཅིང་བསྒྲུབས་པའི་དབང་གིས་འབྲལ་བ་མེད་པར་བཞུགས་པའི་ལྷ་དང་སྲུང་མའི་ཚོགས་གཟི་བརྗིད་ཆེ་བ། མཐུ་ཆེ་བ། རྫུ་འཕྲུལ་ཆེ་བ། སྟོབས་ཆེ་བ། ཡེ་ཤེས་ཀྱི་མིག་རྡུལ་

མེད་ཅིང་དྲི་མ་དང་བྲལ་བ་མང་པོ་དག་མཆིས་ཏེ། དེ་དག་ལ་ཇི་ལྟར་མངོན་པར་འདོད་པའི་དོན་གང་དང་གང་ཡིན་པ་དེ་དང་དེ་གསོལ་ཞིང་ལས་སུ་བསྒོ་བ་ན། འབད་རྩོལ་དྲག་པོ་ལ་མ་ལྟོས་པར་ལས་ངན་ལ་འདྲིས་ཤིང་བརྩམས་པར་བྱེད་པ་གང་ཡིན་པ་དེ་དག་གཏན་བརླག་ཏུ་
སོང་བ་ཀུན་གྱིས་མངོན་དུ་གྱུར་པ་མང་པོ་དག་ཀྱང་ཡོད་དོ། །དེ་ལྟ་བུའི་ལྷག་པའི་བསམ་པ་དང་བསོད་ནམས་ཀྱི་མཐུ་ཆེན་པོས་ཆབ་སྲིད་ཀྱི་ཐ་གྲུ་རྣམ་པར་ཡངས་པའི་ས་ཆེན་པོ་ཆོས་བཞིན་དུ་སྐྱོང་བ་ལ་ནི་གནོད་པ་དང་སྡོ་བ་མི་མངའ་བའི་ཁར། སླར་ཡང་ཛམྦུའི་གླིང་གི་རྒྱལ་ཁབ་ཆེན་པོ་བཞིའི་
ཡ་གྱལ་དུ་གྱུར་པ་གནམ་གྱི་མཐོངས་ནས་བསྐོས་པའི་ཤར་ཕྱོགས་གོང་མ་རྒྱལ་པོ་ཞེས་བྱ་བ། སའི་སྟེང་ན་མཚུངས་པའི་ཟླ་ཐམས་ཅད་དང་བྲལ་བའི་སྟོབས་དང་ལས་དབང་གི་འཁོར་ལོས་སྒྱུར་བ་ཆེན་པོ་དེས། བཀའ་ལུང་ཛམྦུ་ཆུ་བོའི་གསེར་ལས་བསྒྲུབས་པའི་ཅོད་པཎ་དམ་པ་བས་ཀྱང་
རབ་ཏུ་ལྕི་ཞིང་རིན་ཐང་ཆེ་བ་གང་ཞིག །དེང་གི་སྡོམ་བརྩོན་བླ་མ་ཆེན་པོའི་སྤྱི་བོར་བཅིངས་ཏེ། དེང་ནས་བརྩམས་ཏེ་བོད་ཆེན་པོར་གཏོགས་པའི་ས་གཞིའི་དཀྱིལ་འཁོར་ཆེན་པོ་ཀུན་དུ་འཁོད་པའི་སྐྱེ་འགྲོ་མཐའ་དག་དང༌། མི་བདག་སྤྱིའི་མེས་པོར་དགོས་པའི་འཇའ་ས་དང་གསེར་དམ་
ཆེན་པོ་ཡང་དང་ཡང་དུ་སྩལ་ཏེ། ཤིན་ཏུ་བརླིང་བར་བྱས་པའི་སྒོ་ནས་ཀྱང་མཚུངས་པ་མེད་པའི་སྟོབས་ལྡན་གྱི་རྒྱལ་པོའི་གོ་ས་རུ་དབང་བསྐུར་བ་ལེགས་པར་ཐོབ་བོ། །དུས་ནམ་ཞིག་ན་སྡོམ་བརྩོན་ཆེན་པོ་འདིས་བཞེད་པའི་གཙོ་བོ། མཁན་ཆེན་ཐམས་ཅད་མཁྱེན་པ་ཆེན་པོ་དཔལ་ལྡན་
ཆོས་སྐྱོང་བཀྲ་ཤིས་གྲགས་པའི་རྒྱལ་མཚན་དཔལ་བཟང་པོ་དེ་ཉིད་དང༌། མཁྱེན་རབ་ཀྱི་དབང་ཕྱུག་སངས་རྒྱས་ཡེ་ཤེས་པ་སྟེ། བསྟན་པའི་བདག་པོ་ཆེ་ཆུང་གཉིས་ཀ་ངོར་ནས་དབང་པོའི་ཕྱོགས་སུ་ཆིབས་ཀྱི་ཁ་ལོ་བསྒྱུར་ཏེ། རིམ་གྱིས་འབྲི་ཀླུང་གསེར་དང་ལྡན་པ་འབབ་པའི་རྒྱུན་ཕྱོགས་
ནས་བརྒྱུད་དེ་བྱོན་ནོ། །དེ་དག་གི་ལམ་བར་རྣམས་སུ་འཁོད་པའི་དད་ལྡན་གྱི་འགྲོ་བ་རྒྱ་མཚོ་ལྟ་བུ་ལ་རང་རང་གི་བློ་དང་འཚམས་པའི་ཆོས་ཀྱི་བདུད་རྩི་སྩལ་བཞིན་པ་ནས་ལྕགས་ཕོ་སྤྲེལ་ལོའི་རྒྱུ་སྐར་ཐ་སྐར་གྱིས་ཉ་བའི་དཀར་པོའི་ཕྱོགས་ཀྱི་དུས་ཚེས་དགེ་བར། ཆོས་སྡེ་ཆེན་པོ་ལྷུན་གྲུབ་སྟེང་གི་རྒྱལ་ཁབ་དང་

ཁད་ཉེ་བའི་ནོར་འཛིན་མའི་ཆ་ཤས་ལྷ་ལུང་ཁུག་ཅེས་བྱ་བར་ཕེབས་སོ། །དེར་ཕེབས་པ་ན་བྱམས་བརྩེའི་དབང་ཕྱུག་སྡེ་དགེ་བླ་མ་ཆེན་པོ་འདི་ཉིད་སྐུ་འཁོར་རྣམས་ཀྱིས་མཚོན་པའི་ཆིབས་བསུའི་རིམ་པ་མང་པོ་དག་གིས་བྱོན་ནས་བསུ་ཞིང༌། ཁྱད་པར་ལྷུན་གྲུབ་སྟེང་གི་གདན་ས་འདིར་འབྱོན་པའི་
སྟ་གོན་ཡང་འདི་ལྟར་བརྩམས་ཏེ། དེའང་ཆོས་ཀྱི་རྗེ་ས་སྐྱ་པཎྜི་ཏས། ཁྱོད་ལ་བསུ་བས་དཔལ་དུ་བྱེད། །བརྟེན་པས་བློ་གྲོས་མཆོག་ཏུ་འགྱུར། །བསྟེན་ན་འཇིགས་པ་མེད་པར་མཛད། །བསྙེན་བཀུར་བགྱིས་པའང་བདེ་བ་འབྱུང༌། །ཞེས་གསུངས་པ་ལྟར་རང་གི་དངོས་ཀྱི་བླ་མ་བསུ་བ་
དང་སྐྱེལ་མར་བྱས་པའི་འབྲས་བུ་ནི་མཐར་ཐུག་ཕྱག་ཞབས་འཁོར་ལོས་མཚན་པ་འཐོབ་པ་ལ་སོགས་པའི་ཕན་ཡོན་རྗེས་སུ་དྲན་པ་སྡོམ་བརྩོན་བླ་མ་ཆེན་པོ་དེའི་བཀའི་བཀོད་པས་ཇི་ལྟར་སྩལ་བ་དེ་བཞིན་དུ། ས་ཕྱོགས་འདིའི་ཁོ་ར་ཁོར་ཡུག་དང༌། ཡངས་པའི་ཁྱམས་དང༌། སྲང་བར་དང༌།
བཞི་མདོ་དང་སུམ་མདོ་རྣམས་སུ་ཕྱག་དར་གྱི་ཚོགས། རྡོ་བ་དང༌། བོང་བ་དང༌། གསེག་མ་དང༌། གྱོ་མོ་དང༌། སྡོང་དུམ་དང༌། སོ་ཕག་དང༌། མི་གཙང་བའི་འདམ་དང་ལྗན་ལྗིན་གྱི་ཚོགས་ལེགས་པར་བསལ་ཏེ། དྲི་ཞིམ་པོ་དང་ཙནྡན་གྱི་ཆུས་རྡུལ་གྱི་འཚུབ་མ་མེད་པར་ཆག་ཆག་ལེགས་
པར་བཏབ་ལ། དེ་ནས་རིན་པོ་ཆེ་རྣམ་པ་བཞིའི་ཁ་དོག་ལ་མངོན་པར་འཁུ་བའི་སྟེགས་བུ་དང༌། བ་གམ་དང༌། རྟ་བབས་དང༌། སྒོ་དང༌། སྒོ་ཁང་དང༌། སྐར་ཁུང་དང༌།ཁྱམས་ཀྱི་དཀྱིལ་འཁོར་ཡོངས་སུ་རྫོགས་པའི་གཙུག་ལག་ཁང་དང༌། ལྷའི་ཁང་བཟང་དང༌། རྒྱལ་པོའི་ཕོ་
བྲང་དང༌། དགེ་འདུན་གྱི་གནས་མལ་དང༌། སྒྲུབ་པའི་ཁང་པ་དང༌། ཁང་པ་བརྩེགས་པ་དང༌། སྐྱེད་ཚལ་གྱི་དོ་ར་རྣམས་སུ་ཡིད་ལ་མི་འབབ་པ་མེད་པའི་རྒྱན་གྱི་བྱེ་བྲག་མང་པོས་ལེགས་པར་བརྒྱན་པ་ནི་འདི་ལྟ་སྟེ། རྒྱ་གར་དང༌། བལ་པོ་དང༌། ཁ་ཆེ་དང༌། སྟོང་འཁུན་གྱི་
ཡུལ་ལས་འོངས་པའི་གོས་བཟང་དང༌། རས་དར་གྱི་བྱེ་བྲག་ཁ་དོག་དཀར་པོ་དང༌། སྔོན་པོ་དང༌། སེར་པོ་དང༌། དམར་པོ་དང༌། ལེ་བརྒན་དང༌། སྣ་ཚོགས་སྤེལ་བ་དག་གིས་རྒྱལ་མཚན་དང༌། བ་དན་དང༌། བླ་རེ་དང༌། ཡོལ་བ་དང༌། འཕན་གྱི་རྣམ་པ་དང༌། རིན་པོ་ཆེའི་རྔ་

ཡབ་ཀྱི་རྣམ་པ་མང་པོ་དག་བསྒྲེང་བ་དང་དཔྱངས་པས་ཀུན་ནས་མཛེས་པར་བྱས་སོ། །གཞན་ཡང་མེ་ཏོག་གི་ཕྲེང་བ་དང༌། གསེར་གྱི་དྲྭ་བ་དང༌། མུ་ཏིག་གི་ཆུན་འཕྱང་དང༌། དྲིལ་བུ་གཡེར་ཁའི་ཕྲེང་བ་དང༌། མེ་ཤེལ་དང༌། ཆུ་ཤེལ་དང༌། ཟླ་བ་རླུང་གིས་བསྐྱོད་
པ་རྣམས་ཀྱིས་འགྲོ་བ་མང་པོའི་སྙིང་ལ་སྔ་ན་མེད་པའི་དགའ་བ་རབ་ཏུ་སྟེར་བར་བྱས་སོ། །གཞུང་ལུགས་རབ་འབྱམས་འཛིན་ཅིང་སྨྲ་བའི་མགྲིན་པ་རྣམ་པར་ཡངས་པའི་བླ་མ་དང༌། དགེ་སློང་གི་དགེ་འདུན་རྒྱ་མཚོ་ཆེན་པོའི་རྡུལ་གྱི་གྲངས་དང་མཉམ་པས་མདུན་ནས་བསུ་བའི་སེར་སྦྲེང་གི་
མཚར་དུ་དངར་བ་དག་ནི་ངུར་སྨྲིག་བླ་གོས་གསར་པའི་ཚོན་གྱིས་ས་དང་ནམ་མཁའི་ཁ་དོག་ཀྱང་བསྒྱུར་བ་སྙམ་བྱེད་པ་རྣམས། ཁ་ཅིག་ནི་ཨ་ག་རུ་དང༌། ཏུ་རུཥྐ་དང༌། ཧ་རི་ཙནྡན་ལ་སོགས་པ་ལྷན་ཅིག་སྐྱེས་པ་དང་སྦྱར་བའི་བདུག་སྤོས་ཀྱི་དུད་པ་ནི། ཆར་ལྡན་མའི་དུས་ཀྱི་སྤྲིན་སྔོན་
ཡིད་དུ་འོང་བ་རབ་ཏུ་བརྩེགས་པ་ལ་ཅོ་འདྲི་བ་ལྟ་བུའི་ཕྱོགས་ཀྱི་ཁོར་ཡུག་ཐམས་ཅད་ཀྱང་ཚུལ་ཁྲིམས་དང་ལྡན་པའི་ལུས་བཞིན་དུ་བྱེད་དོ། །ལ་ལ་ནི་སྲུང་མ་རྒྱ་མཚོའི་སྡེ་དཔོན་ཆེན་པོ་རྡོ་རྗེ་གུར་གྱི་མགོན་པོ་ལྕམ་དྲལ་ལྷ་བརྒྱད་དང༌། ཞིང་སྐྱོང་ཆེན་པོ་བྲམ་ཟེའི་གཟུགས་ཅན་དང་བཅས་
པའི་འཆམ་སྐུ་ཆེན་པོ་ཕལ་ཐོག་ཕྱེད་གཉིས་ཙམ་བརྒལ་བ་བསྣམས་ཏེ། སྒེག་པའི་སྟང་སྟབས་མང་པོ་བྱེད་ཀྱིན་བསུའོ། །འགའ་ཞིག་ནི་བཀྲ་ཤིས་དང་དགེ་ལེགས་ཐམས་ཅད་ཀྱི་འབྱུང་གནས་སུ་གྱུར་པའི་རྗེ་བཙུན་ཆེན་པོ་ཉིད་མི་མཐུན་པའི་ཕྱོགས་ཐམས་ཅད་ལས་རྣམ་པར་རྒྱལ་ནས་
བསྐལ་པ་མང་པོར་སྐུ་གསུང་ཐུགས་མི་འགྱུར་རྡོ་རྗེ་གསུམ་གྱི་རང་བཞིན་དུ་བརྟན་པར་བཞུགས་ནས། སེམས་ཅན་གྱི་དོན་ལ་བསྐུལ་བའི་ཚིགས་སུ་བཅད་པ་ཐམས་ཅད། ཆོས་ཀྱི་དུང་དང༌། གླིང་བུ་དང༌། རྔ་བོ་ཆེ་དང༌། སིལ་སྙན་ལ་སོགས་པའི་རོལ་མོའི་བྱེ་བྲག་ཐ་དད་པ་དེ་དང་དེ་དག་
གི་གདངས་སུ་བསྒྱུར་ཏེ་འབུད་པ་དང་འཁྲོལ་བར་བྱེད་དོ། །ཕལ་ཆེ་བ་དག་ནི་བརྒྱ་བྱིན་གྱི་ཚོན་གྱི་ཁ་དོག་དང༌། སྟོན་ཀའི་ཟླ་བའི་འོད་དང༌། བཙོ་མའི་གསེར་དང༌། གུར་གུམ་དང༌། ལེ་བརྒན་རྩི་དང༌། ཨུཏྤ་ལ་དང༌། ཀརྞི་ཀ་དང༌། ལྡོང་རོས་དང༌། མཚལ་དང༌། མཐོན་

ཀ་ཆེན་པོ་དང༌། མར་ཀ་ཏི་དང༌། རྨ་བྱའི་ལྐོག་མའི་མདོངས་ལྟ་བུའི་རས་དང་དར་གྱི་ཁྱད་པར་རབ་ཏུ་མང་པོ་ལས་བྱས་པའི་གདུགས་དང༌། རྒྱལ་མཚན་དང༌། བ་དན་དང༌། ལྡ་ལྡི་དང༌། ཕྱེ་མ་ཕུར་མ་དང༌། འཕན་གྱི་རྣམ་པ་བགྲང་ལས་འདས་པ་བསྒྲེང་བ་རྣམས་ནི་ཡིད་འཕྲོག་
རླུང་གི་བགྲོད་པ་དལ་བུས་ཀྱང་ཅུང་ཟད་བསྐྱོད་པ་དང་བཅས་ཏེ་མདུན་ནས་བསུ་བར་བྱེད། དེ་དག་ལས་གཞན་པའི་རྒྱལ་པོ་དང༌། རྒྱལ་ཕྲན་དང༌། བློན་པོ་དང༌། རིག་བྱེད་པ་དང༌། ཁྱིམ་བདག་དང༌། གྲོང་ཁྱེར་གྱི་སྐྱེ་བོ་དང་ཞོ་ཤས་འཚོ་བ་རྣམས་ནི་ཕྱོགས་ཀྱི་དཀྱིལ་འཁོར་ཀུན་དུ་ཡོངས་
སུ་ཁྱབ་པར་ས་ཆེན་པོའི་རྡུལ་བཞིན་དུ་ལྷགས་པ་རྣམས་ཀྱིས་ཀྱང་མཁན་ཆེན་ཐམས་ཅད་མཁྱེན་པ་ཆེན་པོའི་ཞལ་གྱི་དཀྱིལ་འཁོར་མཐོང་ན་དོན་གྱི་སྙིང་པོ་དམ་པས་ཡོངས་སུ་ལྕི་བ་གང་དེར། མིག་གི་དབང་པོས་ཡང་དང་ཡང་དུ་མཇལ་ཞིང༌། ལག་པའི་ཐལ་སྦྱར་བཅིངས་པ་སྤྱི་བོའི་རྒྱན་དུ་བཀོད་
དེ། ཕྱག་གི་ཕྲེང་བ་གྲངས་མེད་པ་བརྩེགས་པས་མངོན་པར་མཆོད་པ་དང༌། འདི་ཕྱི་བར་དོའི་གནས་སྐབས་ཀུན་དུ་ཡེ་ཤེས་ཀྱི་གཟིགས་པ་དམ་པས་འཇུག་པའི་གསོལ་བ་འདེབས་པ་ལ་བྲེལ་བར་གྱུར་ཏོ། །དེར་མ་ཟད་དུས་དེ་ཉིད་དུ་རྗེ་བཙུན་དམ་པ་ཉིད་འབྱོན་པའི་མདུན་ཕྱོགས་ཀྱི་ནམ་མཁའི་
ཁམས་ཕལ་ཆེར་ཡང་སྤྲིན་གྱི་དུམ་བུ་མཆོད་རྫས་ཀྱི་རྣམ་པ་ཅན་མང་པོ་ཆེད་དུ་བྱས་པ་ལྟ་བུས་གཏམས་པའི་ཁྲོད་ན། ཁ་དོག་ལྔ་ལྡན་གྱི་འཇའ་ཚོན་གསར་པའི་རང་བཞིན་ཡིན་པ་ལ། རྣམ་པ་ནི་ལྷའི་རྒྱལ་མཚན་དང༌། ལྷའི་བ་དན་དང༌། ལྷའི་འཕན་དང༌། ལྷའི་གོས་བཟང་སྲབ་ལ་
འཇམ་པ་དང་འདྲ་བ་དག་ཀྱང་ཆེད་དུ་དཔྱངས་པ་ལྟ་བུར་མཆིས་པ་འགྲོ་བ་མང་པོའི་མཐུན་སྣང་དུ་བྱུང་ངོ༌། །ཚུལ་དེ་ལ་དཔག་ན་སྡེ་དགེ་ས་སྐྱོང་བླ་མ་ཆེན་པོ་འདིའི་སྔོན་གྱི་དུས་ནས་བསགས་པའི་བསོད་ནམས་ཀྱི་སྟོབས་དང༌། ཐུགས་བསྐྱེད་རྨད་དུ་བྱུང་བའི་ལེགས་བྱས་ཀྱི་མཐུ་ཆེན་པོས།
དཀར་པོའི་ཕྱོགས་སུ་མངོན་པར་དགྱེས་པའི་ལྷ་དང་སྲུང་མའི་ཚོགས་བསམ་གྱིས་མི་ཁྱབ་པ་དག་ཀྱང་ས་སྐྱོང་ཆེན་པོ་རང་གི་མཐུན་པའི་གྲོགས་སུ་ཉེ་བར་བཀུག་ནས་མཁན་ཆེན་ཐམས་ཅད་མཁྱེན་པ་ཆེན་པོ་ཉིད་འདིར་སྤྱན་འདྲེན་པ་དང་བསུ་བ་བྱ་བའི་གྲོགས་སུ་ནམ་མཁའི་མཐོངས་ལ་

ལྷགས་པར་གདོན་མི་ཟའོ། །ཅིས་མངོན་ན། སྔོན་དུས་དེད་དཔོན་དོན་ཀུན་གྲུབ་པས་རྒྱ་མཚོ་ལས་ཡིད་བཞིན་གྱི་ནོར་བུ་རྙེད་པ། ནག་ཕྱོགས་ཀླུ་གདུག་པ་ཅན་གྱིས་ཕྲག་དོག་གིས་རྒྱ་མཚོར་དོར་བ་ན། དེད་དཔོན་སྙིང་སྟོབས་ཀྱི་མཐུ་བྲི་བ་མེད་པ་དེས། ལྷ་
བདག་གི་རིན་པོ་ཆེ་སྩོལ་ཅིག་ཅེས་ཡང་ཡང་སྨྲས་ཀྱང་དེས་ནོར་བུ་མ་བྱིན་པ་དང༌། ད་ནི་བདག་གིས་རྒྱ་མཚོ་ཆེན་པོ་ཡོངས་སུ་བསྐམ་པར་མ་གྱུར་གྱི་བར་དུ་ཕྱིར་དོར་ལ་ཡིད་བཞིན་གྱི་ནོར་བུ་དེ་བླང་བར་བྱའོ། །བླངས་ནས་ཀྱང་སེམས་ཅན་ཐམས་ཅད་ཀྱི་དབུལ་འཕོངས་ཀྱི་རྒྱུན་གཅད་པར་བྱའོ་
ཞེས་དམ་བཅས་ཏེ་རྒྱ་མཚོའི་ཆུ་འཕྱགས་པར་བརྩམས་པ་ན། ལྷའི་དབང་པོས་དེའི་ལྷག་པའི་བསམ་པ་རྟོགས་ནས་ལས་སྣ་ཚོགས་པ་ལ་ཆུ་སྣོད་བྱིན་ཅིག་ཅེས་བསྒོ་བ་ན། དེས་ཀྱང་དེ་མ་ཐག་ཏུ་ཆུ་འཕྱགས་པའི་གཞོང་པ་དག་སྤྲུལ་ཏེ་བྱིན་པས། དེར་བསྟན་ལ་དགའ་བའི་ལྷ་རྣམས་ཀྱང་
དེའི་གྲོགས་སུ་ལྷགས་ནས་རྒྱ་མཚོ་བསྐམ་པར་བརྩམས་པ་ན། ཀླུ་དེས་ཀྱང་དེད་དཔོན་མཐུ་ཆེན་པོ་དང་ལྡན་པ་ཡིན་པར་ཤེས་ནས་སྐྲག་སྟེ་ནོར་བུ་དེ་བྱིན་པ་ལྟ་བུའོ། །མདོར་ན་སྡོམ་བརྩོན་སྡེ་དགེ་བླ་མ་ཆེན་པོ་ཞེས་བྱ་བ། གང་གི་ཐུགས་རྒྱུད་ཀྱི་དད་པའི་ཞིང་ས་གཤིན་པ། ཐུགས་བསྐྱེད་
ཀྱི་ས་བོན་དགེ་བ། ཕན་སེམས་ཀྱི་སོ་ནམ་ལེགས་པ། ཐབས་མཁས་ཀྱི་སྲུང་བས་བསྲུངས་པ། སྙིང་སྟོབས་ཀྱི་དྲོད་གཤེར་འཛོམ་པ། སྨོན་ལམ་གྱི་ཆར་ཆུ་ཞོད་པ་སྟེ། མཐུན་པའི་རྐྱེན་ཐམས་ཅད་ཚོགས་པའི་དུས་འདིར། ས་བདག་མཆོག་གིས་མཚོན་པའི་ས་སྟེངས་ཀྱི་སྐྱེ་
འགྲོ་སྤྱིའི་བསོད་ནམས་རྣམ་པར་ཡངས་པའི་དགའ་ཚལ་དམ་པ་དེ་ན། སྐྱབས་གཅིག་མཚུངས་པ་མེད་པའི་མཁན་ཆེན་སྐྱེ་དགུའི་དཔག་བསམ་ཆེན་པོ་ཞེས་བྱ་བ། བྱམས་པའི་རྩ་བ་བརླིང་བ། སྙིང་རྗེའི་སྡོང་པ་རྒྱས་པ། ཕན་སེམས་ཀྱི་ཡལ་ག་བརྐྱངས་པ། ཡོན་ཏན་གྱི་མེ་ཏོག་
ཁ་བྱེ་བ། ཕྲིན་ལས་ཀྱི་ལོ་འདབ་རྒྱས་པ། ཕན་བདེའི་གྲིབ་མ་འགུགས་པ། ཉོན་མོངས་པའི་ཚ་གདུང་འཇིལ་བ། ཆོས་ཀྱི་སྦྱིན་ཆེན་འགྱེད་པ། མོས་པའི་ཤིང་རྟ་འགེངས་པ། ཐར་པའི་འབྲས་བུ་སྟེར་བར་བྱེད་པའི་བདག་ཉིད་ཆེན་པོ་གང་འདི་དེང་གི་དུས་མདོ་སྟོད་སྨད་བར་གསུམ་གྱི་

སྐྱེ་འགྲོ་སྤྱིའི་ཕན་པ་དང་བདེ་བ་འཛད་པ་མེད་པར་འབྱུང་བའི་གནས་སུ་གྱུར་པའི་མགྲོན་གྱི་དམ་པ་ཉིད་དུ་ལེགས་པར་སྤྱན་དྲངས་སོ། །དེ་ནས་བརྩམས་ཏེ་སངས་རྒྱས་བཅོམ་ལྡན་འདས་ཀྱི་བསྟན་པ་རིན་པོ་ཆེ་ལ་ཕྲིན་ལས་གཞལ་དུ་མེད་པས་ཕན་འདོགས་པ་དང༌། སེམས་ཅན་དཔག་ཏུ་མེད་པ་
གང་དེའི་མཁྱེན་པ་དང༌། བརྩེ་བ་དང༌། ནུས་པ་མཆོག་གི་ར་བ་ཡངས་པ་ན་ཆུད་པར་མཛད་དོ། །དེ་ལྟ་བུའི་སྐྱབས་གཅིག་མཚུངས་པ་མེད་པ་གང་དེ་མཆོག་དམན་གྱི་འགྲོ་བ་སྤྱིའི་དཔལ་དུ་དཀའ་བ་མེད་པར་ཐོབ་པ་དེའང་རྒྱལ་པོའམ། རྒྱལ་ཕྲན་ནམ། བློན་པོའམ། ཕ་མ་
འམ། མཛའ་བཤེས་ལ་སོགས་པ་གཞན་གང་གི་ཡང་དྲིན་ལས་བྱུང་བ་མ་ཡིན་གྱི། ཆོས་སྐྱོང་བའི་བླ་མ་ཆེན་པོ་བསོད་ནམས་ཀྱི་སྐལ་བར་ལྡན་པ་འདི་ཉིད་ཁོ་ནའི་སྐུ་དྲིན་ལས་བྱུང་བར་ཤེས་པར་བྱའོ། །དེས་ན་ཚུལ་འདི་ཁོ་ན་ལ་བསམས་ཀྱང་སྐྱེས་བུ་སྟོབས་དང་ལྡན་པ་སུ་ཞིག་གིས་
སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་མ་ལུས་པ་རིན་ཆེན་གསེར་གྱི་བྱེ་མས་བཀང་སྟེ། ཉི་མ་རེ་རེ་ཞིང་བཅལ་ཡང་གང་གི་སྐུ་དྲིན་གྱི་ཚད་དང་ནམ་ཡང་མཉམ་པར་མི་འགྱུར་བ་སྟེ། དེ་ཅིའི་ཕྱིར་ཞེ་ན། ཚེ་འདིའི་འདུན་མ་ཙམ་མ་ཟད། ཚེ་རབས་གཏན་གྱི་འདུན་མ་མྱ་ངན་ལས་
འདས་པ་ཆེན་པོའི་ཕྱོགས་སུ་གཞོལ་ཞིང་འབབ་པར་འགྱུར་བའི་ལྷག་པའི་བསམ་པ་རྣམ་པར་དག་པ་ལས་བྱུང་བའི་མཐུ་ཉིད་ཀྱིས་སོ། །གཉིས་པ་སྐལ་བར་ལྡན་པས་བསྟན་པ་དང་འགྲོ་ལ་ཕན་པ་བསྒྲུབ་པའི་ཁྱད་པར་ལ་གསུམ་སྟེ། ཟང་ཟིང་གི་སྦྱིན་པས་བསྟན་པ་དང་འགྲོ་བ་ལ་ཕན་པ་
བསྒྲུབ་པའི་ཁྱད་པར། ཆོས་ཀྱི་སྦྱིན་པས་བསྟན་པ་དང་འགྲོ་བ་ལ་ཕན་པ་བསྒྲུབ་པའི་ཁྱད་པར། བྱམས་པ་དང་མི་འཇིགས་པའི་སྦྱིན་པས་བསྟན་པ་དང་འགྲོ་བ་ལ་ཕན་པ་བསྒྲུབ་པའི་ཁྱད་པར་རོ། །དང་པོ་ནི་དེ་ལྟར་བསོད་ནམས་ཀྱི་སྐལ་བར་ལྡན་པའི་སྐྱེས་བུ་དམ་པ་དེ་ལ་སྔོན་གྱི་དགེ་བའི་མཐུ་དམན་
པ་མིན་པའི་བག་ཆགས་བཟང་པོ་ཡོངས་སུ་སད་པའི་གྲོགས་ཀྱིས་བསྐུལ་བའི་རྣམ་པར་རྟོག་པ་གཉིས་ཤིག་སྐྱེས་པར་གྱུར་ཏོ། །དེའང་འདི་ལྟར། འཁོར་བའི་ཕུན་སུམ་ཚོགས་པ་དག་ནི་རྟག་ཅིང་བརྟན་ལ་མི་འགྱུར་བའི་གོ་འཕང་ལྟ་བུར་ཡིད་ལ་བྱེད། བློ་དེ་ལ་བརྟེན་ནས་འབྱོར་པ་དང་ནུས་པ་

ཡོད་བཞིན་དུ་མཆོད་པ་འབུལ་བ་དང་སྦྱིན་པ་གཏོང་བ་ལ་སོགས་པ་དགེ་བའི་ཆེད་དུ་ཆུང་ངུ་ཡང་གཏང་བར་མི་ནུས་པ་དག་ཡོད་དེ། དེ་དག་ནི་སྐྱེས་བུ་ཤིན་ཏུ་མ་རབས་ཀྱི་སྤྱོད་པར་གྱུར་པ། ཚེ་འདིར་ཡང་སོག་སྲུང་གི་སྡུག་བསྔལ་ཆེ་བ་དང༌། སྐྱེ་བ་གཞན་དུ་ཡང༌།
མདོ་སྡུད་པར། སེར་སྣ་ཅན་ནི་ཡི་དྭགས་གནས་སུ་སྐྱེ་བར་འགྱུར། །གལ་ཏེ་མིར་སྐྱེ་ན་ཡང་དབུལ་པོ་ཉིད་དུ་འགྱུར། །ཞེས་གསུངས་པ་ལྟ་བུའི་འབྲས་བུ་མི་འདོད་པ་མྱོང་བར་འགྱུར་བའི་ལས་ཅན་ཞིག་གོ །ཡང་ཇི་སྐད་དུ། བསགས་པ་ཀུན་མཐའ་འཛད་པ་སྟེ། །མཐོན་
པོའི་མཐའ་ནི་དམའ་བ་ཡིན། །འདུས་པའི་མཐའ་ནི་འབྲལ་བ་སྟེ། །འཚོ་བའི་མཐའ་ནི་འཆི་བ་ཡིན། །ཞེས་གསུངས་པ་ལྟར་འཁོར་བའི་ཕུན་སུམ་ཚོགས་པ་ནི་ཇི་ལྟར་བདོག་ཀྱང་མི་རྟག་ཅིང་མི་བརྟན་ལ་འགྱུར་བ་སྙིང་པོ་མེད་པ་དང༌། ཁྱད་པར་ནོར་གྱི་འབྱོར་པ་ནི། རྔ་བོ་ཆེའི་མདོ་
ལས། ནོར་ནི་དགྲ་དང་ཆོམ་རྐུན་སོགས་མང་དང༌། །རྒྱལ་པོ་མེ་དང་ཆུ་དང་མཛའ་བཤེས་དང༌། །ཉེ་དུ་མི་མཛའ་བགོ་སྐལ་སྤྱོད་མང་གིས། །སྡིག་པར་སྤྱོད་པ་ཡིས་ནི་འཛད་པར་འགྱུར། །ཞེས་དང༌། བཤེས་སྤྲིང་ལས། ངེས་པ་བདོག་མང་ཇི་ལྟར་སྡུག་བསྔལ་བ། །འདོད་པ་
ཆུང་རྣམས་དེ་ལྟ་མ་ལགས་ཏེ། །ཀླུ་མཆོག་རྣམས་ལ་མགོ་བོ་ཇི་སྙེད་པ། །དེ་ལས་བྱུང་བའི་སྡུག་བསྔལ་དེ་སྙེད་དོ། །ཞེས་གསུངས་པ་ལྟར་འཇིགས་པ་དང་གསོད་པ་དང༌། སྡུག་བསྔལ་བ་དུ་མའི་འབྱུང་གནས་ཆེན་པོ་སྟེ། ཚུལ་དེ་ལ་སེམས་ཤིང་ཇི་ལྟར་ནུས་པའི་སྒོ་ནས་དཀོན་
མཆོག་ལ་མཆོད་པ་འབུལ་བ་དང༌། སློང་བ་ལ་སྦྱིན་པ་གཏོང་བ་ལ་སྤྲོ་བ་དག་ཡོད་དེ། དེ་དག་ནི་སྐྱེས་བུ་དམ་པའི་ཁོངས་སུ་འགྲོ་བ། ཚེ་འདིར་ཡང་སེར་སྣ་དང་སོག་སྲུང་གི་སྡུག་བསྔལ་མེད་པ་དང༌། སྐྱེ་བ་གཞན་དུ་ཡང༌། སྦྱིན་པས་ལོངས་སྤྱོད་ཁྲིམས་ཀྱིས་བདེ། །ཞེས་པ་ལྟ་
བུའི་འབྲས་བུ་ཡིད་དུ་འོང་བ་འཐོབ་པར་འགྱུར་བའི་ལས་ཅན་ཞིག་གོ །དེ་ལྟར་ཡིན་པ་ཡང་གང་གིས་ཤེས་ན། མང་དུ་སྨོས་པས་ཅི་ཞིག །སྙིང་པོ་དམ་པ་བླང་དུ་ཡོད་པའི་སྐབས་འདིར་འབད་པ་བརྒྱ་སྟོང་མང་པོས་བསྒྲུབ་པར་བྱ་བའི་སྙིང་པོ་ནི་མཐར་ཐུག་གི་འབྲས་བུ་རྣམ་པ་ཐམས་ཅད་

མཁྱེན་པ་རྫོགས་པའི་སངས་རྒྱས་བཅོམ་ལྡན་འདས་ཀྱི་གོ་འཕང་སྟེ། དེ་ཉིད་གང་ལ་བརྟེན་ནས་མཐར་ཕྱིན་པར་གྱུར་པའི་སྔོན་གྱི་སྐྱེས་བུ་ཆེན་པོ་ཇི་སྙེད་ཅིག་བྱོན་པ་ཐམས་ཅད་ཀྱི་བགྲོད་པ་གཅིག་པའི་ལམ་ཐམས་ཅད་ཀྱི་དང་པོར་གྱུར་པ་ནི་སྦྱིན་པའི་ཕ་རོལ་དུ་ཕྱིན་པ་ཉིད་དེ། སྐྱེས་པ་རབས་
ཀྱི་གླེང་གཞིའི་མདོ་ལས། བདག་གིས་སངས་རྒྱས་བྱེད་པའི་ཆོས། །གང་དང་དེ་རུ་བཙལ་བྱས་པ། །སྟེང་དང་འོག་དང་ཕྱོགས་བཅུ་དང༌། །ཆོས་ཀྱི་དབྱིངས་ཀྱི་བར་དུའོ། །དེ་ཚེ་བཙལ་བ་ན་ནི་མཐོང༌། །དང་པོར་སྦྱིན་པའི་ཕ་རོལ་ཕྱིན། །སྔོན་གྱི་སྐྱེས་བུ་ཆེན་པོ་ཡི། །ལམ་ནི་ཕ་རོལ་
ཕྱིན་རྗེས་འགྲོ། །འདི་ནི་རེ་ཞིག་ཁྱོད་ཀྱིས་ཀྱང༌། །བརྟན་པོར་བྱས་ནས་བཟུང་བར་གྱིས། །གལ་ཏེ་བྱང་ཆུབ་ཐོབ་འདོད་ན། །སྦྱིན་པའི་ཕ་རོལ་ཕྱིན་པར་གྱིས། །ཞེས་གསུངས་ཤིང་གནས་སྐབས་ཐམས་ཅད་དུ་ཡང་སྙིང་པོས་རྣམ་པར་དབེན་པའི་ནོར་ལས་སྙིང་པོ་དམ་པ་བླངས་པར་
འགྱུར་བ་དང༌། མཛའ་བཤེས་དང༌། ཉེ་དུ་དང༌། དགྲ་དང་ཆོམ་རྐུན་ལ་སོགས་པས་གཙེ་བར་མི་འགྱུར་བ་དང༌། མངོན་པར་འདོད་པ་དང་སེར་སྣའི་ཉོན་མོངས་པ་རྣམས་ཀྱིས་བདག་ཟིལ་གྱིས་གནོན་པར་མི་འགྱུར་བ་དང༌། སོག་སྲུང་ལ་སོགས་པ་འཁོར་བའི་སྡུག་བསྔལ་གྱི་ལམ་
ལས་འདའ་བར་བྱེད་པའི་བཞོན་པ་བདེ་བ་ཉིད་དུ་འགྱུར་བ་དང༌། ཡོན་ཏན་གྱི་ཚོགས་དང་གྲགས་པ་དཀར་པོ་ཡང་རྣམ་པར་འཕེལ་བར་འགྱུར་བ་དང༌། སྐྱེ་བ་ནས་སྐྱེ་བར་ལོངས་སྤྱོད་འཛད་པ་མེད་པའི་གཏེར་ལ་སྤྱོད་པའི་རྒྱུར་འགྱུར་བ་དང༌། མཐོ་རིས་ཀྱི་ཡོན་ཏན་བདུན་དང་ལྡན་པར་
འགྱུར་བ་དང༌། དབང་ཕྱུག་ཕུན་སུམ་ཚོགས་པ་ཐོབ་པར་འགྱུར་བ་སྟེ། ཀོ་ས་ལའི་སྐྱེས་པའི་རབས་ལས། སྦྱིན་པ་ཞེས་བྱ་གཏེར་ཆེན་རྗེས་འགྲོ་རྐུན་པོ་ལ་སོགས་ཐུན་མོང་མིན། །སྦྱིན་པ་འདོད་དང་སེར་སྣའི་སྐྱོན་གྱིས་རྡུལ་ཅན་སེམས་ནི་སྦྱོང་བར་བྱེད། །སྦྱིན་པས་འཁོར་བའི་
ལམ་བགྲོད་ངལ་བ་མེད་པ་བཞོན་པ་བདེ་བ་ཡིན། །སྦྱིན་པས་བདེ་བ་མང་པོ་འགྲུབ་ཅིང་གྲོགས་པོ་བཟང་པོའི་མཆོག་ཡིན་ནོ། །འབྱོར་པ་ཕུན་སུམ་ཚོགས་པའམ་བཀའ་ལུང་ཡོན་ཏན་ནམ། །སུམ་ཅུ་རྩ་གསུམ་ཕོ་བྲང་གནས་སམ་གཟུགས་བཟང་ཡོན་ཏན་ནམ། །གང་ཞིག་འདོད་པ་དེ་དག་

ཐམས་ཅད་སྦྱིན་པས་ཐོབ་པར་འགྱུར། །དེ་ལྟར་ངེས་དོན་གཏན་ལ་ཕབ་ན་སྦྱིན་པ་སུས་མི་བྱེད། །སྦྱིན་པས་ནོར་གྱི་སྙིང་པོ་ལེན་པར་གསུངས། །སྦྱིན་པ་དབང་ཕྱུག་རྣམས་ཀྱི་རྒྱུ་ཞེས་གསུངས། །སྦྱིན་པ་དཔལ་ལྡན་སྐྱེ་བོ་མཆོག་གི་ཚུལ། །ཤེས་རབ་ཆུང་ངུས་རྡུལ་ཙམ་
སྦྱིན་མི་ནུས། །ཞེས་དང༌། ཁང་བུ་བརྩེགས་པའི་མདོ་ལས། ཀུན་དགའ་བོ་འདི་ལྟར། དེ་བཞིན་གཤེགས་པའི་ཆོས་ཀྱི་དབྱིངས་ནི་ཤིན་ཏུ་རབ་ཏུ་གནས་པ་ཡིན་ནོ། །དེ་ཤིན་ཏུ་རབ་ཏུ་གནས་པའི་ཕྱིར་ཐལ་མོ་སྦྱར་བ་ཡང་ཆུད་ཟ་བར་མི་འགྱུར་ན། སྦྱིན་པ་ལ་སོགས་པ་བྱེད་པ་ལྟ་སྨོས་
ཀྱང་ཅི་དགོས་ཞེས་དང༌། ཆགས་པ་མེད་པའི་སེམས་ཀྱིས་སེར་སྣའི་དགྲ་བོ་ཟིལ་གྱིས་མནན་ནས་སྦྱིན་པ་ལེགས་པར་བྱིན་པའི་མི་དེ་ནི་འཇིག་རྟེན་ན་དཔའ་བོ་ཐམས་ཅད་ཀྱི་ནང་ནས་ཀྱང་ཆེས་དཔའ་བོ་ཉིད་ཡིན་ཏེ། ཆེད་དུ་བརྗོད་པའི་ཚོམས་ལས། འདི་ན་ལན་བརྒྱར་གཡུལ་བཟློག་དཔའ་བོ་
བས། །སེར་སྣ་དགྲར་གྱུར་ཟིལ་གྱིས་མནན་ནས་སུ། །གང་ཞིག་ཆགས་མེད་སེམས་ཀྱིས་སྦྱིན་བྱེད་པ། །དེ་དག་ཆེས་དཔའ་ཡིན་པར་ངེས་གསུངས་སོ། །ཞེས་སོ། །སྦྱིན་པ་གཏོང་བས་ལོངས་སྤྱོད་རེ་ཞིག་ཟད་པ་ལྟར་སྣང་ཡང་ཟད་པའི་མཆོག་ཡིན་པའི་ཕྱིར་འཇིག་རྟེན་འདི་དང་ཕྱི་མར་
བཅས་པར་ཤིན་ཏུ་ཡང་འཕེལ་བའི་ཐབས་བླ་ན་མེད་པ་ཡིན་ཏེ། རྔ་བོ་ཆེའི་མདོར་ཡང༌། རང་དང་རང་གི་ལོངས་སྤྱོད་དག་ལ་ཡང༌། །སྤྱོད་པར་བྱེད་པ་སྐྱེས་བུ་རྣམས་ཀྱི་ནོར། །སྤྱད་པ་ཉིད་ན་གནོད་པ་གཞན་གྱིས་ཀྱང༌། །ཟད་པར་མི་འགྱུར་ཤེས་བྱ་དམ་ཆོས་ཕྱིར། །འདིར་ཟད་བྱས་
མཆོག་ཕ་རོལ་ཟད་མི་འགྱུར། །འཇིག་རྟེན་འདིར་འཕེལ་འཇིག་རྟེན་ཕ་རོལ་དུ། །ཟད་པར་མི་འགྱུར་ཁ་དོག་མཐུར་བཅས་བྱེད། །ཅེས་སོ། །དེ་ལྟ་བུའི་ཕན་ཡོན་གྱི་ཟང་ཟིང་གི་སྦྱིན་པ་དེ་ལ་དབྱེ་ན་གཏོང་བ་དང༌། གཏོང་བ་ཆེན་པོ་དང༌། ཤིན་ཏུ་གཏོང་བ་ཆེན་པོ་དང་གསུམ་དུ་འགྱུར་
ཏེ། ཆོས་ཡང་དག་པར་སྡུད་པའི་མདོ་ལས། བྱང་ཆུབ་སེམས་དཔའ་རྣམས་ཀྱི་གཏོང་བ་རྣམ་པ་གསུམ་སྟེ། གཏོང་བ་དང༌། གཏོང་བ་ཆེན་པོ་དང༌། ཤིན་ཏུ་གཏོང་བའོ། །དེ་ལ་གཏོང་བ་གང་ཞེ་ན། བཟའ་བ་དང༌། བཏུང་བ་དང༌། བཞོན་པ་དང༌། གོས་དང༌། མར་མེ་

དང༌། སྤོས་དང༌། རྒྱན་ལ་སོགས་པ་གང་སེམས་ཅན་རྣམས་ལ་ཕན་པར་འགྱུར་བ་མ་གཏོགས་པ་མི་སྦྱིན་པ་གང་ཡིན་པ་དེ་ནི་གཏོང་བའོ། །གཏོང་བ་ཆེན་པོ་འདི་ལྟ་སྟེ། ཆུང་མ་དང༌། བུ་དང༌།བུ་མོ་དང༌། ཡིད་དུ་འོང་བའི་བྲན་དང༌། ཁྱིམ་དང༌། རྒྱལ་སྲིད་རྣམས་ཡོངས་སུ་གཏོང་
བ་ནི་གཏོང་བ་ཆེན་པོའོ། །ཤིན་ཏུ་གཏོང་བ་གང་ཞེ་ན། ལག་པ་དང༌། རྐང་པ་དང༌། རྣ་བ་དང༌། སྣ་དང༌། ཤ་དང༌།རུས་པ་དང༌། པགས་པ་དང༌། མིག་དང༌། ལྕེ་དང༌། མགོ་རུས་དང༌། རྐང་ལ་སོགས་པ་གཏོང་བ་སྟེ། འདི་ནི་བྱང་ཆུབ་སེམས་དཔའི་ཤིན་ཏུ་གཏོང་བ་
ཞེས་བྱའོ་ཞེས་གཏོང་བ་རྣམ་པ་གསུམ་དུ་གསུངས་པ་ལས། འདིར་དང་པོ་དང་འབྲེལ་བར་བསགས་པའི་དངོས་པོ་ཐམས་ཅད་མཆོད་སྦྱིན་གྱི་ཆེད་དུ་བཏང་བའི་སྐབས་ཏེ། དེ་ལ་ནང་གསེས་ཀྱིས་སྦྱིན་པར་བྱ་བའི་རྫས་ཀྱང་མ་དག་པའི་སྦྱིན་པ་སྤངས་ནས་སྦྱིན་དུ་རུང་བའི་དངོས་པོ་
རྣམས་སྦྱིན་པར་བྱིན་པའི་རྣམ་པར་སྨིན་པ་སོ་སོར་བཤད་པ་ཡང༌། ཕ་རོལ་ཏུ་ཕྱིན་པ་ལྔ་བསྟན་པའི་མདོ་ལས།ཁ་ཟས་སྦྱིན་པར་བྱིན་ན་ནི། །དེ་ནི་ཚེ་དང་ཁ་དོག་དང༌། །སྟོབས་དང་བདེ་བ་ལྔ་པ་སྤོབས། །ཤེས་རབ་ཅན་གྱི་སྦྱིན་པ་ཡིན། །ཁ་ཟས་སྦྱིན་པས་དགའ་བ་དང༌། །ཚེ་རིང་
སྟོབས་ལྡན་བདེ་སྐྱིད་འགྱུར། །སྐོམ་བྱིན་པས་ནི་མཁས་པ་དེ། །ཀུན་དུ་འབར་ཞིང་རབ་འབར་བ། །ཡི་དྭགས་ཉམ་ངར་མི་སྐྱེ་ལ། །སྐོམ་པའི་གནོད་པ་འབྱུང་མི་འགྱུར། །གོས་སྦྱིན་ཤིན་ཏུ་དཔལ་དང་ལྡན། །རྟག་ཏུ་རིགས་ལྡན་གཟུགས་བཟང་ཞིང༌། །མི་དེ་ངོ་ཚ་ཤེས་པར་འགྱུར། །
ཞེས་དང༌། སྦྱིན་པའི་ལེགས་པའི་མདོ་ལས། བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་མཁས་པ་རྣམས་ཀྱིས་རྣམ་པ་སུམ་ཅུ་རྩ་བདུན་སྦྱིན་པར་བྱིན་ནོ། །སུམ་ཅུ་རྩ་བདུན་གང་ཞེ་ན། སེར་སྣ་རྣམ་པར་སྤང་བའི་ཕྱིར་དད་པས་སྦྱིན་པ་བྱིན་ནོ། །དུས་
སུ་སྦྱིན་པ་བྱིན་ནོ། །དེ་བཞིན་གཤེགས་པས་གནང་བའི་རུང་བ་དངོས་པོ་གསུམ་ཡོངས་སུ་དག་པས་སྦྱིན་པ་བྱིན་ནོ། །སེམས་ཀྱི་འཁྲུག་པའི་སྐྱོན་ཐམས་ཅད་སྤང་བའི་ཕྱིར་བསྟི་སྟང་དུ་བྱས་ཏེ་སྦྱིན་པ་བྱིན་ནོ། །སྙིང་པོ་མེད་པའི་ལུས་ལས་སྙིང་པོ་བླང་བའི་ཕྱིར་རང་གི་ལག་ནས་སྦྱིན་པ་བྱིན་ནོ། །

གཞན་ལ་མི་གནོད་པར་སྦྱིན་པ་བྱིན་ན་རྣམ་པར་སྨིན་པ་གཏོང་བ་ཆེན་པོ་རབ་ཏུ་ཐོབ་པར་འགྱུར་རོ། །ཁ་དོག་ཕུན་སུམ་ཚོགས་པ་སྦྱིན་པར་བྱིན་ན་རྣམ་པར་སྨིན་པ་ཁ་དོག་མཛེས་པ་རབ་ཏུ་ཐོབ་པར་འགྱུར་རོ། །སྤོས་ཕུན་སུམ་ཚོགས་པ་སྦྱིན་པར་བྱིན་ན་རྣམ་པར་
སྨིན་པ་གྲགས་པའི་སྤོས་རབ་ཏུ་ཐོབ་པར་འགྱུར་རོ། །རོ་བྲོ་བ་ཕུན་སུམ་ཚོགས་པ་སྦྱིན་པར་བྱིན་ན་རོ་བྲོ་བའི་མཆོག་གི་དཔེ་བྱད་བཟང་པོ་རབ་ཏུ་ཐོབ་པར་འགྱུར་རོ། །གྱ་ནོམ་པ་སྦྱིན་པར་བྱིན་ན་རྣམ་པར་སྨིན་པ་ལོངས་སྤྱོད་ཀྱི་ནོམ་པ་རབ་ཏུ་ཐོབ་པར་འགྱུར་རོ། །རྒྱ་ཆེན་པོ་སྦྱིན་པར་བྱིན་ན་
རྣམ་པར་སྨིན་པ་ལོངས་སྤྱོད་རྒྱ་ཆེན་པོ་རབ་ཏུ་ཐོབ་པར་འགྱུར་རོ། །བཟའ་བ་སྦྱིན་པར་བྱིན་ན་རྣམ་པར་སྨིན་པ་སྐྱེ་བ་ཐམས་ཅད་དུ་བཀྲེས་པ་རྣམ་པར་གཅོད་པ་རབ་ཏུ་ཐོབ་པར་འགྱུར་རོ། །བཏུང་བ་སྦྱིན་པར་བྱིན་ན་རྣམ་པར་སྨིན་པ་སྐྱེ་བ་ཐམས་ཅད་དུ་སྐོམ་པ་རྣམ་པར་གཅོད་པ་རབ་ཏུ་
ཐོབ་པར་འགྱུར་རོ། །གོས་སྦྱིན་པར་བྱིན་ན་རྣམ་པར་སྨིན་པ་གོས་ཀྱི་ལོངས་སྤྱོད་སྣ་ཚོགས་པ་རབ་ཏུ་ཐོབ་པར་འགྱུར་རོ། །གནས་སྦྱིན་པར་བྱིན་ན་རྣམ་པར་སྨིན་པ་པུ་ཤུ་དང༌། ཁང་པ་བརྩེགས་པ་དང༌། ཁྱིམ་དང༌། ཁང་པ་དང༌། གཞལ་མེད་ཁང་དང༌། སྐྱེད་ཤིང་གི་རྭ་བ་དང༌།
ཀུན་དགའ་རྭ་བ་དང༌། ཡུལ་རབ་ཏུ་ཐོབ་པར་འགྱུར་རོ། །མལ་ཆ་སྦྱིན་པར་བྱིན་ན་རྣམ་པར་སྨིན་པ་རིགས་མཐོན་པོ་རབ་ཏུ་ཐོབ་པར་འགྱུར་རོ། །བཞོན་པ་སྦྱིན་པར་བྱིན་ན་རྣམ་པར་སྨིན་པ་རྫུ་འཕྲུལ་གྱི་རྐང་པ་བཞི་རབ་ཏུ་ཐོབ་པར་འགྱུར་རོ། །སྨན་སྦྱིན་པར་བྱིན་ན་རྣམ་པར་སྨིན་པ་རྒ་ཤི་མེད་ཅིང་
མྱ་ངན་དང་ཀུན་ནས་ཉོན་མོངས་པ་འགོག་པའི་མྱ་ངན་ལས་འདས་པ་རབ་ཏུ་ཐོབ་པར་འགྱུར་རོ། །ཆོས་སྦྱིན་པར་བྱིན་ན་རྣམ་པར་སྨིན་པ་སྐྱེ་བ་དྲན་པ་རབ་ཏུ་ཐོབ་པར་འགྱུར་རོ། །མེ་ཏོག་སྦྱིན་པར་བྱིན་ན་རྣམ་པར་སྨིན་པ་བྱང་ཆུབ་ཀྱི་ཡན་ལག་གི་མེ་ཏོག་རབ་ཏུ་ཐོབ་པར་འགྱུར་རོ། །ཕྲེང་བ་སྦྱིན་པར་
བྱིན་ན་རྣམ་པར་སྨིན་པ་འདོད་ཆགས་དང༌། ཞེ་སྡང་དང༌། གཏི་མུག་གི་དྲི་མ་རྣམ་པར་དག་པ་རབ་ཏུ་ཐོབ་པར་འགྱུར་རོ། །བདུག་པ་སྦྱིན་པར་བྱིན་ན་རྣམ་པར་སྨིན་པ་ཉོན་མོངས་པའི་དྲི་ང་བ་ཐམས་ཅད་མེད་པ་རབ་ཏུ་ཐོབ་པར་འགྱུར་རོ། །གདུགས་སྦྱིན་པར་བྱིན་ན་རྣམ་པར་སྨིན་པ་ཆོས་ལ་དབང་ཐོབ་

པ་རབ་ཏུ་འགྱུར་རོ། །དྲིལ་བུ་སྦྱིན་པར་བྱིན་ན་རྣམ་པར་སྨིན་པ་སྒྲ་དབྱངས་ཡིད་དུ་འོང་བ་རབ་ཏུ་ཐོབ་པར་འགྱུར་རོ། །སིལ་སྙན་སྦྱིན་པར་བྱིན་ན་རྣམ་པར་སྨིན་པ་ཚངས་པའི་སྒྲ་དབྱངས་རབ་ཏུ་ཐོབ་པར་འགྱུར་རོ། །མར་མེ་སྦྱིན་པར་བྱིན་ན་རྣམ་པར་སྨིན་པ་ལྷའི་མིག་སྒྲིབ་པ་མེད་ཅིང་རྣམ་པར་དག་པ་
རབ་ཏུ་ཐོབ་པར་འགྱུར་རོ། །དར་སྦྱིན་པར་བྱིན་ན་རྣམ་པར་སྨིན་པ་ལྷ་དང་མིའི་ནང་ན་རྣམ་པར་གྲོལ་བའི་དར་གྱིས་བཅིངས་པ་རབ་ཏུ་ཐོབ་པར་འགྱུར་རོ། །དེ་བཞིན་གཤེགས་པའི་མཆོད་རྟེན་ནམ། དེ་བཞིན་གཤེགས་པའི་སྐུ་གཟུགས་ལ་འབྲུ་མར་དྲི་ཞིམ་པོ་ཕུལ་ལམ་སྤོས་ཀྱི་ཁྲུས་ཆུ་དབུལ་
བ་ཕུལ་ན་རྣམ་པར་སྨིན་པ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུ་རབ་ཏུ་ཐོབ་པར་འགྱུར་རོ། །ཁྲུས་ཀྱི་ཡོ་བྱད་སྦྱིན་པར་བྱིན་ན་རྣམ་པར་སྨིན་པ་སྐྱེ་བ་ཐམས་ཅད་དུ་ནད་ཉུང་བ་དང་རིགས་མཆོག་ཏུ་སྐྱེ་ཞིང་ཀུན་དུ་མཛེས་པ་རབ་ཏུ་ཐོབ་པར་འགྱུར་རོ། །སྙིང་
པོ་ལྔ་སྦྱིན་པར་བྱིན་ན་རྣམ་པར་སྨིན་པ་སྐྱེ་བ་ཐམས་ཅད་དུ་མཐུ་ཆེ་ཞིང་སྤྲོ་བ་ཆེན་པོ་མི་ཐུལ་བ་རབ་ཏུ་ཐོབ་པར་འགྱུར་རོ། །བྱམས་པ་ལ་གནས་ཏེ་སྦྱིན་པར་བྱིན་ན་རྣམ་པར་སྨིན་པ་གནོད་སེམས་མེད་པ་རབ་ཏུ་ཐོབ་པར་འགྱུར་རོ། །སྙིང་རྗེ་ལ་གནས་ཏེ་སྦྱིན་པར་བྱིན་ན་རྣམ་པར་སྨིན་པ་འཚེ་བ་མེད་
པ་རབ་ཏུ་ཐོབ་པར་འགྱུར་རོ། །དགའ་བ་ལ་གནས་ཏེ་སྦྱིན་པར་བྱིན་ན་རྣམ་པར་སྨིན་པ་མི་འཇིགས་པ་སྦྱིན་པ་རབ་ཏུ་ཐོབ་པར་འགྱུར་རོ། །བཏང་སྙོམས་ལ་གནས་ཏེ་སྦྱིན་པར་བྱིན་ན་རྣམ་པར་སྨིན་པ་མི་དགའ་བ་སྤོང་བ་རབ་ཏུ་ཐོབ་པར་འགྱུར་རོ། །རྣམ་པ་སྣ་ཚོགས་ཀྱི་སྦྱིན་པར་བྱིན་ན་རྣམ་པར་
སྨིན་པ་ལོངས་སྤྱོད་སྣ་ཚོགས་རབ་ཏུ་ཐོབ་པར་འགྱུར་རོ། །ལན་ལ་མི་རེ་བ་ལ་གནས་ཏེ་སྦྱིན་པར་བྱིན་ན་རྣམ་པར་སྨིན་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འགྱུར་རོ་ཞེས་བྱ་བ་ལ་སོགས་པ་ཟང་ཟིང་གི་སྦྱིན་པ་ཚུལ་བཞིན་དུ་བྱིན་པའི་ཕན་ཡོན་མང་པོ་དྲི་མ་མེད་པའི་ལུང་གི་
ཚོགས་ཀྱིས་ལེགས་པར་གདམས་པའི་ཡི་གེ་དམ་པའི་རྔ་ཆེན་བརྡུང་བ་ནི་ཅི་ཡང་ཐོས་སོ། །ཐོས་ནས་ཀྱང་སླར་ཡང་འདི་ལྟར་ཐུགས་ལ་སེམས་པར་བྱེད་དེ། རྗེ་ངོར་ཆེན་རྡོ་རྗེ་འཆང་གིས། ད་ལྟའི་བདེ་སྡུག་འབྱོར་རྒུད་འདུ་འབྲལ་རྣམས། །སྔོན་བསགས་ལས་ཀྱི་རྗེས་སུ་འབྲང་བའི་

ཕྱིར། །ལས་འབྲས་བསླུ་མེད་དོན་ལ་མ་རྨོངས་པས། །བླང་དོར་ཚུལ་བཞིན་སྤྱོད་དང་ཤེས་ལྡན་དག །ཅེས་གསུངས་པ་ལྟར། བདག་གི་སྔོན་གྱི་སྐྱེ་བར་སྦྱིན་པ་མ་ཉུང་ཙམ་ཞིག་བཏང་བའི་མཐུས། ད་ལྟ་ནི་ཀུན་གྱི་འགྲན་པའི་ཟླ་ཐམས་ཅད་དང་བྲལ་བའི་སྟོབས་
དང༌། དཔལ་དང་འབྱོར་པ་ཕུན་སུམ་ཚོགས་པ་འདི་ལྟ་བུ་ཞིག་ཐོབ་པར་གྱུར་པ་འདི་དག་གོ །འོན་ཏེ་འདི་དག་གི་རང་བཞིན་ལ་ཇི་ལྟར་དཔྱད་ཀྱང་འཁོར་བའི་ཕུན་སུམ་ཚོགས་པ་ཞེས་པ་མི་རྟག་པའི་མཐའ་ཅན་གང་རུང་ཞིག་ལས་མ་འདས་པའི་ཕྱིར། ནམ་ཞིག་ན། སྟོན་ཀའི་སྤྲིན་གྱི་
འདུ་འགོད་ལྟར་མི་བརྟན་ཅིང་གཡོ་བའི་རང་བཞིན་ཅན་ཡིན་པ་དང༌། ཚྭ་ཆུ་ལྟར་ཇི་ཙམ་སྤྱད་ཀྱང་ངོམས་པའི་མཐའ་མཐོང་བ་མེད་པའི་རང་བཞིན་ཅན་ཡིན་པ་དང༌། ཆུའི་ཆུ་བུར་ལྟར་སྙིང་པོས་རྣམ་པར་དབེན་པའི་རང་བཞིན་ཅན་ཡིན་པའི་ཕྱིར། ཡིད་བརྟན་དུ་རུང་བ་ནི་ཅུང་ཟད་ཀྱང་མ་
མཆིས་སོ། །འོན་ཀྱང་སྙིང་པོ་མེད་པ་ལས་ཀྱང་སྦྱིན་པ་གཏོང་བ་ལ་སོགས་པའི་སྒོ་ནས། བླ་ན་མེད་པའི་བྱང་ཆུབ་ཀྱི་སྙིང་པོ་ལེན་པ་ལ་ཤིན་ཏུ་མཁས་པ་ནི་སྔོན་གྱི་སྐྱེས་བུ་ཆེན་པོ་ཐབས་ལ་མཁས་པ་རྣམས་སོ། །དེ་བས་ན་ཁོ་བོ་ཅག་ཀྱང་སྔོན་གྱི་སྐྱེས་བུ་དམ་པ་བྱང་ཆུབ་སེམས་དཔའ་
སེམས་དཔའ་ཆེན་པོ་རྣམས་ཀྱིས་ཇི་ལྟར་བླ་ན་མེད་པའི་བྱང་ཆུབ་ཀྱི་སྤྱོད་པ་རྒྱ་ཆེན་པོ་སྤྱད་པའི་ལམ་གང་ཡིན་པ་དེའི་རྗེས་སུ་ཞུགས་ལ། སེར་སྣ་མེད་པའི་གཏོང་བ་ལ་རབ་ཏུ་དཔའ་བར་གྲགས་པའི་རྔ་བོ་ཆེ་ནི་བརྡུང་བར་བགྱིའོ། །ལན་དང་རྣམ་པར་སྨིན་པ་རེ་བ་མེད་པའི་སྦྱིན་པ་དམ་པའི་སྒོ་བརྒྱ་
ཕྲག་གཅིག་ནི་དབྱེ་བར་བགྱིའོ། །གཏོང་ཕོད་དམན་པ་མིན་པའི་ལག་པ་ནི་བརྐྱང་བར་བགྱིའོ། །འགྲོ་བ་ཐམས་ཅད་ནི་མཆོད་པ་དང་སྦྱིན་པའི་ཞིང་དུ་དགོད་པར་བགྱིའོ་ཞེས་སྙམ་དུ་རྩེ་གཅིག་པས་དགོངས་ཏེ། ཟང་ཟིང་གི་འབྱོར་པ་ཕལ་ཆེ་བ་དག་དགེ་བའི་རྩ་བ་བསྒྲུབ་པའི་ཆེད་དུ་ཚུལ་
བཞིན་དུ་གཏོང་བ་ལ་མི་སྤྲོ་བ་མེད་པའི་སྙིང་སྟོབས་ཀྱི་ཆུ་གཏེར་རབ་ཏུ་འཕེལ་བར་གྱུར་ཏོ། །དེའང་གང་དུ་གཏོང་བར་བྱ་བའི་ཞིང་དུ་གྱུར་པ་ནི། དབུ་མ་བཤེས་པའི་སྤྲིང་ཡིག་ལས། ལོངས་སྤྱོད་གཡོ་བ་སྙིང་པོ་མེད་མཐོང་ནས། །དགེ་སློང་བྲམ་ཟེ་བཀྲེན་དང་བཤེས་རྣམས་ལ། །སྦྱིན་

པ་ཚུལ་བཞིན་སྩལ་བགྱི་ཕ་རོལ་དུ། །སྦྱིན་ལས་གཞན་པའི་གཉེན་མཆོག་མ་མཆིས་སོ། །ཞེས་བཤད་པ་ལྟར། སྦྱིན་པའི་ཞིང་ངམ་མཆོད་པའི་ཞིང་ངམ་ཡོན་གྱི་ཞིང་དམ་པར་གྱུར་པ་ནི། དམ་པའི་ཆོས་སྨྲ་བ་དང༌། དགེ་སློང་དང་བྲམ་ཟེ་ལ་སོགས་པ་དང༌། ཕན་འདོགས་པའི་ཞིང་
དུ་གྱུར་པ་ནི་བཀྲེན་པ་དང་ནད་པ་ལ་སོགས་པ་དང༌། རེ་བའི་ཞིང་དུ་གྱུར་པ་ནི་མཛའ་བཤེས་ལ་སོགས་པ་རྣམས་སུ་གསུངས་པ་ལས། འདིར་སྡོམ་བརྩོན་སྐྱེ་དགུའི་བདག་པོ་འདི་ཉིད་ནི། སྤྱིར་ཛམྦུའི་གླིང་གི་བྱང་ཕྱོགས་ཁ་བ་ཅན་གྱི་ལྗོངས་སུ་བཞུགས་སོ་འཚལ་གྱི་སངས་རྒྱས་བཅོམ་
ལྡན་འདས་ཀྱི་བསྟན་པ་རིན་པོ་ཆེ་མཐའ་དག་དང༌། དེ་ཉིད་ཡུན་དུ་གནས་པར་བྱེད་པའི་རྩ་ལག་བསྟན་པ་འཛིན་པའི་གང་ཟག་རྒྱ་མཚོ་ཆེན་པོའི་རྡུལ་གྱི་གྲངས་དང་མཉམ་པ་ཇི་སྙེད་ཅིག་བཞུགས་པ་ཐམས་ཅད་ཀྱི་ཉེར་འཚོའི་གཞིར་གྱུར་པའི་བསྟན་པའི་སྦྱིན་བདག་ཆེན་པོ་ཉིད་དུ་ལེགས་
པར་གྲགས་ཤིང་གྲུབ་པའི་ཚུལ་ཕལ་ཆེ་བ་ནི་གོང་དུ་སྨོས་པ་ལས་ཤེས་པར་འགྱུར་ཞིང༌། དེ་དག་ཙམ་དུ་མ་ཟད་སྐབས་འདི་དང་འོག་ཏུ་འཆད་པར་འགྱུར་བ་རྣམས་སུ་ཡང་རྒྱས་པར་འབྱུང་སྟེ། ཅིའི་ཕྱིར་ན། གནའི་དུས་ནས་དར་བའི་དཔྱ་དང་གཞན་གྱིས་ཕུལ་བ་དང༌། ཚོང་ཟོང་
གིས་བསྒྲུབས་པ་ལ་སོགས་པ་བདོག་པའི་དངོས་པོ་ཐམས་ཅད་ཀྱང་མཐར་དཀོན་མཆོག་ལ་མཆོད་པ་འབུལ་བ་དང༌། གཙུག་ལག་ཁང་བརྩིགས་པ་དང༌། དེ་བཞིན་གཤེགས་པ་སྲས་དང་སློབ་མར་བཅས་པའི་སྐུ་དང་གསུང་དང་ཐུགས་ཀྱི་རྟེན་བཞེངས་པ་ལ་སོགས་པའི་རྒྱུར་གཏོང་བ་དང༌།
ཁྱད་པར་ཆོས་ཀྱི་སྦྱིན་པ་རྒྱུན་མི་ཆད་པའི་འཕྲུལ་གྱི་སྒོ་ཆེན་པོ་འདི་ཕྱེ་བའི་རྒྱུར་གཏོང་བའི་ཚུལ་རྒྱས་པ་ནི་འོག་ཏུ་འཆད་པར་འགྱུར་བ་ལྟར་དང༌། བྱེ་བྲག་ཏུ་བོད་ཆེན་པོའི་ལྗོངས་ན་སྡོམ་བརྩོན་བླ་མ་འདི་ཉིད་ཀྱི་ཡབ་མེས་གོང་མར་གྱུར་པ་བསྟན་པ་ལ་ལྷག་པའི་བསམ་པ་མཆོག་ཏུ་དཀར་བ་
རྣམས་ཀྱི་སྐུ་རིང་ནས་གསང་སྔགས་གསར་རྙིང་བོན་གསུམ་གྱི་གྲུབ་པའི་མཐའ་ཕྱོགས་རིས་མེད་པའི་དབུ་འཕང་བླ་མ་ནས་བླ་མར་འདེགས་པའི་འཛིན་སྐྱོང་དང་ཞབས་ཏོག་ཡང་དག་པ་མཛད་ཅིང༌། དེ་དག་གི་ནང་ནས་ཀྱང་མཆོག་གམ། གཙོ་བོའམ། ཕུལ་ལམ། གཙུག་གི་ནོར་

བུ་བཞིན་དུ་གཅེས་པར་བཟུང་བ་ནི་འཛམ་གླིང་བསྟན་པའི་བདག་པོ་དཔལ་ས་སྐྱ་པའི་ལུགས་བཟང་དྲི་མ་མེད་པ་འདི་ཉིད་དང༌། རྒྱལ་བ་ཉི་མའི་གཉེན་གྱི་རྒྱལ་ཚབ་ཆེན་པོ་རྡོ་རྗེ་འཆང་ཀུན་དགའ་བཟང་པོ་པའི་བསྟན་པ་རྩོད་པ་ཀུན་གྱི་ཕྱོགས་ལས་རྣམ་པར་རྒྱལ་བའི་
རྒྱལ་མཚན་དམ་པ་འདི་གཉིས་གང་གི་སྙིང་སྟོབས་ཀྱི་ཕྲག་པ་རབ་ཏུ་བརྟན་པའི་རྩེ་ན་བཟུང་ངོ༌། །ཇི་ལྟར་བཟུང་བ་དེ་དག་ཀྱང་བསྐལ་པ་ནས་བསྐལ་པའི་ཕྲེང་བར་བརྟན་པར་བྱེད་པའི་ཆོ་ག་རྨད་དུ་བྱུང་བ་ནི་མཁས་པའི་ཕྲིན་ལས་རྣམ་པ་གསུམ་སྟེ། དེ་དག་ལ་ཤིན་ཏུ་དབང་འབྱོར་པའི་བསྟན་
འཛིན་གྱི་སྐྱེས་བུ་ཆེན་པོ། ས་གསུམ་གྱི་ཁོངས་ནས་གྲགས་པའི་ཟླ་འོད་རྣམ་པར་གསལ་བ་མང་པོ་སྤྱན་དྲངས་ཏེ། བསྟན་པའི་རྒྱུན་ཆེན་པོ་མི་ནུབ་པར་བཙུགས་སོ། །དེས་ན་གོང་མ་དེ་དག་གི་བསྟན་པ་ལ་དམ་པའི་བྱ་བ་ཇི་ལྟར་བྱས་པ་དེ་བཞིན་དུ། དེང་གི་དུས་ཀྱི་སྡོམ་བརྩོན་སྐྱེ་དགུའི་
བདག་པོ་འདིས་ཀྱང་གོང་མ་དེ་དག་གི་ཕྲིན་ལས་དང༌། རྣམ་པར་དཀར་བའི་ལེགས་བྱས་ཀྱི་སྡོང་པོ་ཆེན་པོ་རྨ་མེད་པ་ཉིད་དུ་བཟུང་ནས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ཀྱི་བདག་རྐྱེན་ལས་བྱུང་བའི་བསྟན་པ་རིན་པོ་ཆེ་འདི་
ཉིད་འཇིག་རྟེན་གྱི་ཁམས་ན་ཡུན་དུ་འཚོ་ཞིང་གཞེས་པའི་ཐབས་ཀྱི་རྣམ་པ་མང་པོ་མངོན་པར་འདུ་བགྱི་བ་དང༌། དེ་ཉིད་ལེགས་པར་གནས་པ་ལ་བརྟེན་ནས་ཡངས་པའི་རྒྱལ་ཁམས་ཀུན་དུ་བདེ་ལེགས་རྒྱ་ཆེན་པོ་འབྱུང་བར་འགྱུར་བའི་ལྷག་པའི་བསམ་པས་ཀུན་ནས་བསླངས་ཏེ། གཏོང་ཕོད་
ཆེན་པོའི་ཕྱག་གི་དཔག་བསམ་གྱི་ཡལ་ག་རྣམ་པར་བརྐྱངས་ཏེ། བླ་མ་དང་དཀོན་མཆོག་ལ་མཆོད་པ་འབུལ་བ་དང༌། འཕགས་པའི་དགེ་འདུན་ལ་བསྙེན་བཀུར་བགྱིས་པ་ལ་སོགས་པའི་གཏམ་རགས་པ་ཙམ་བརྗོད་པ་ནི་འདི་ལྟ་སྟེ། བགྲང་བ་ལས་འདས་པའི་བསྐལ་པ་རྣམས་སུ་བསགས་
པའི་ལེགས་བྱས་རྒྱ་མཚོ་ལྟ་བུས་ཀྱང་ཤིན་ཏུ་འགྲུབ་པར་དཀའ་བ་ཉིད་ནི་རྣམ་པ་ཐམས་ཅད་མཁྱེན་པའི་ཡེ་ཤེས་མཆོག་སྟེ། དེའི་གོ་འཕང་ཉིད་ཀྱང་དཀའ་ཚེགས་ཆེན་པོ་ལ་མ་ལྟོས་པར་བདེ་བླག་ཏུ་བརྙེས་པར་འདོད་པའི་སློབ་མ་བློ་དང་ལྡན་པ་དག་གིས། མཆོད་པ་གཞན་ཐམས་ཅད་

སྤངས་ཏེ། རང་ཉིད་ལ་དུས་གསུམ་གྱི་སངས་རྒྱས་ཐམས་ཅད་ཀྱི་མཛད་པ་བླ་ན་མེད་པ་ཐམས་ཅད་མཛད་པའི་དཔལ་ལྡན་བླ་མ་མཆོག་གི་རྡོ་རྗེ་སློབ་དཔོན་ཆེན་པོ་གང་ཡིན་པ་དེ་ཉིད་དོ། །དེ་ནི་རྣམ་པ་ཐམས་ཅད་དུ་བཅོམ་ལྡན་འདས་རྡོ་རྗེ་སེམས་དཔའ་ལྟ་བུར་བལྟས་ལ། ཤིན་ཏུ་
གཏོང་བར་དཀའ་བ་དང་དཀོན་པ་དང༌། ཁྱད་པར་ཅན་དུ་གྱུར་པའི་ཡོ་བྱད་གང་དང་གང་ཡིན་པ་དེ་དང་དེས་མངོན་པར་མཆོད་ཅིང༌། མཉེས་པར་འགྱུར་བའི་ཐབས་སུ་ཅི་འགྱུར་བྱེད་པ་དེ་ནི་འཁོར་བའི་སྡུག་བསྔལ་མཐའ་ཅན་དུ་བྱེད་པའི་སྐྱེས་བུ་དམ་པ་སྟེ། ཇི་སྐད་དུ། མཆོད་པ་
ཐམས་ཅད་ཡོངས་སྤངས་ནས། །བླ་མར་མཆོད་པ་ཡང་དག་བརྩམ། །དེ་མཉེས་པས་ནི་ཀུན་མཁྱེན་པའི། །ཡེ་ཤེས་མཆོག་ནི་ཐོབ་པར་འགྱུར། །བླ་མེད་མཛད་པའི་སློབ་དཔོན་ནི། །རྡོ་རྗེ་སེམས་དཔའ་རབ་མཆོད་ན། །དེ་ཡིས་བསོད་ནམས་མ་བྱས་ཤིང༌། །དཀའ་ཐུབ་མ་
བསྟེན་ཅི་ཞིག་ཡོད། །ཅེས་བྱ་བ་དང༌། རིམ་པ་ལྔ་པ་ལས་ཀྱང༌། དེ་ཉིད་མི་ཟད་འདོད་པ་ཡིས། །ཤིན་ཏུ་དགའ་བ་གང་དང་གང༌། །ཤིན་ཏུ་ཁྱད་པར་ཅན་དེ་དེ། །དེ་དང་དེ་ནི་བླ་མར་བྱིན། །སློབ་དཔོན་གྱིས་ནི་སྡིག་པ་འཕྲོག །སློབ་དཔོན་གྱིས་ནི་འཇིགས་པ་སེལ། །སློབ་དཔོན་
གྱིས་ནི་སྡུག་བསྔལ་གྱི། །རྒྱ་མཚོའི་མཆིང་ལས་ཕ་རོལ་སྒྲོལ། །ཞེས་བྱ་བ་དང༌། རྡོ་རྗེ་སྙིང་པོ་རྒྱན་གྱི་རྒྱུད་ལས། བློ་ལྡན་རྡོ་རྗེ་སློབ་མ་ཡིས། །ཅི་སྟེ་བདེ་བ་ཀུན་འདོད་ན། །དད་མོས་སེམས་ཀྱིས་དབུལ་བར་བྱ། །ཡིད་ལ་གང་བསམས་མ་ཕུལ་ལམ། །ཁས་བླངས་དེ་ནི་མ་ཕུལ་ན། །
ཡི་དྭགས་དམྱལ་བ་རྣམ་གཉིས་སུ། །ངེས་པར་སྐྱེ་སྟེ་བརླག་པར་འགྱུར། །ཞེས་དང༌། དཔལ་ཡང་དག་པར་སྦྱོར་བའི་རྒྱུད་ལས་ཀྱང༌། གང་དང་གང་གིས་སྡུག་པའི་རྫས། །རེ་བ་མེད་པའི་སེམས་ཀྱིས་ནི། །དེ་དང་དེ་ནི་བླ་མར་དབུལ། །ཞེས་བྱ་བ་དང༌། རྡོ་རྗེ་ཕྲེང་བ་ལས། གསེར་དང་
དོ་ཤལ་གོས་དང་ནི། །རིན་ཆེན་སྣ་ཚོགས་ཡོན་ཏན་མཆོག །བྲན་དང་ལས་བྱེད་གྲངས་མེད་དང༌། །དད་ཅིང་གུས་པ་ལ་སོགས་ཀྱི། །ཆགས་པ་བྲལ་བའི་སེམས་ཀྱིས་ནི། །རབ་ཏུ་འབད་པས་མཉེས་པར་བྱ། །ཇི་ལྟར་བཞེད་པ་སྟོན་པ་ལ། །རྙེད་པར་དཀའ་བའི་དངོས་རྣམས་ཀྱིས། །སྔགས་

ཀྱི་དོན་སྟོན་བླ་མ་ནི། །དགོངས་པ་ཡོངས་སུ་བསྐང་བར་བྱ། །ཞེས་བྱ་བ་དང༌། གཤིན་རྗེའི་གཤེད་དམར་པོའི་རྒྱུད་ལས། དེ་ནས་བླ་མར་ཡོན་དབུལ་བ། །འདི་ན་རབ་ཏུ་བཤད་པར་བྱ། །བདག་ཉིད་ཞི་བ་ཉིད་དང་ནི། །ལས་ཀུན་འགྲུབ་པའི་ཕྱིར་དུ་ཡང༌། །ཕོངས་པ་མེད་
པར་དབུལ་བྱ་སྟེ། །བདག་ཉིད་དངུལ་གྱི་རྣ་རྒྱན་དང༌། །གསེར་དང་ནོར་བུ་མཱ་ལ་དང༌། །དེ་བཞིན་བུ་དང་ཆུང་མ་དང༌། །སྐྱེད་བྱེད་མ་དང་སྲིང་མོ་དང༌། །རྣམ་པ་སྣ་ཚོགས་ན་བཟའ་ཉིད། །གདུགས་དང་རྔ་ཡབ་མཛེས་པ་དང༌། །ཁང་པ་ཁྲི་དང་དྲི་བཟང་དང༌། །དེ་བཞིན་གླུ་དང་རོལ་མོ་ཉིད། །རལ་
གྲི་དང་ནི་རྒྱན་ཉིད་ཀྱང༌། །བླ་མར་རབ་དབུལ་བརྟུལ་ཞུགས་ཅན། །ཞེས་བྱ་བ་དང༌། བླ་མ་ལྔ་བཅུ་པ་ལས་ཀྱང༌། བླ་མ་ལ་ནི་གུས་བཅས་ཡོན། །རྗེས་སུ་མཐུན་པར་སྦྱིན་པར་བྱ། །དེས་ནི་རིམས་སོགས་གནོད་པ་རྣམས། །ཕྱིར་ཞིང་འབྱུང་བར་མི་འགྱུར་རོ། །རང་གི་དམ་ཚིག་སློབ་དཔོན་ནི། །
སྦྱིན་དཀའ་བུ་དང་ཆུང་མ་དང༌། །རང་སྲོག་གིས་ཀྱང་བསྟེན་བྱ་ན། །ལོངས་སྤྱོད་གཡོ་བ་སྨོས་ཅི་དགོས། །གང་ཕྱིར་བསྐལ་པ་བྱེ་བ་ནི། །གྲངས་མེད་པར་ཡང་རྙེད་དཀའ་བའི། །སངས་རྒྱས་ཉིད་ཀྱང་བརྩོན་ལྡན་ལ།