Luận tạng Tây Tạng (Tengyur) — Tập 28

པ་པོའི་རྐང་པའི་འོག་ཏུ་ཇི་ལྟར་བསམས་པ་བཞིན་ཐམས་ཅད་འོང་བར་འགྱུར་རོ། །འབུམ་ཕྲག་གཅིག་བཟླས་པ་བྱས་པས། སྦྱོར་བ་ཅན་མ་དབང་དུ་འགྱུར་རོ། །དེ་ནས་དབང་དུ་བྱ་བའི་ཆོ་ག་བརྗོད་པ། ན་མཿཀེ་ལི་ཀི་ལཿསཾ་བྷུ་ཐ་པ་ནཻ་ཏྲེ་བྷི་ཀ་ར་ཎེ། བི་ཀུ་རྭ་བི་ཀུ་རྭ་ཛམྦྷ་ཤ་མི་སྭཱ་ཧཱ། དེ་
ནས་སྦྱོར་བ་ཅན་མ་མཐོང་བས། མིག་བགྲད་དེ་བཟླས་པ་བྱས་པས། དེ་མ་ཐག་ཏུ་འོང་བར་འགྱུར་རོ། །འགྲོ་བར་འདོད་ན་འགྲོ་བར་འགྱུར་རོ། །དེ་ནས། ཨ་དི་སཾ་བུདྡྷཱ་ཡ་ཀུ་རུ་ཀུ་རུ་ལཾ་བྷེ་ལཾ་བྷེ་ལུ་ནེ་ལུ་ནེ་སྭཱ་ཧཱ། སྔགས་འདི་རང་ཉིད་ཉལ་བའི་ཚེ་བུད་མེད་ཀྱི་མིང་ནས་བཟུང་ལ་བཟླས་
པ་བྱས་ན། དཔག་ཚད་བརྒྱ་ན་ཡོད་ཀྱང་འོང་བར་འགྱུར་རོ། །མ་འོངས་ན་འཆི་བར་འགྱུར་རོ། །དེ་ནས། ན་མཿསརྦ་བུདྡྷེ་བྷྱོ་ཛ་ཧི་བུདྡྷ་ཨ་ནོ་ཛ་ར་པྲེ་སི་དོ་མེ་བཱ་ཙ་ནཾ་ཀུ་རུ་སྭཱ་ཧཱ། དེ་ནས་གང་དུ་འདུག་པར་བཟླས་པ་བྱས་པས། ཇི་ལྟར་སྐྱེས་པའམ། དཔའ་མོའི་མིང་ནས་བཟུང་སྟེ་
བཟླས་པས། ཐམས་ཅད་རང་བཞིན་གྱིས་དབང་དུ་འགྱུར་རོ། །ན་མཿཀྵི་པྲ་གྷ་མི་ཀུ་རུ་ཀུ་རུ་བི་མ་ལ་ཡེ་སྭཱ་ཧཱ། ཆུ་ལ་ལན་བདུན་བཟླས་ཏེ། སྐྱེས་པའམ་བུད་མེད་གང་གི་མིང་ནས་བཟུང་སྟེ་འཐུངས་ན་དབང་དུ་འགྱུར་རོ། །ན་མཿཀ་ཏྲཾ་ཀ་ཏྲི་གྲོ་ར་རཱུ་པི་ཎི་ཆེ་གེ་མོ་མེ་བ་ཤ་མ་ནཱ་ཡ་སྭཱ་ཧཱ།
ཟླ་བའི་དུས་སུ། དང་པོ་ཟས་ཁམ་གཅིག་ལ་གང་གི་མིང་ནས་བཟུང་སྟེ། ལན་བདུན་བཟླས་ནས་ཟོས་པས། ཞག་པའི་དབང་དུ་འགྱུར་རོ། །ན་མཿཨཱརྱ་སཾ་བུདྡྷཱ་ཡ། ཨེ་ཧྱེ་ཧི་བྷཱུ་ཏ་པྲ་ཏྲ་དྷུ་ཏ་ཀཱརྱཾ་ཀུ་རུ་སྭཱ་ཧཱ། དེ་ནས་མིག་སྨན་ལ་བརྒྱ་ཕྲག་བརྒྱ་བཟླས། རང་གི་མིག་ལ་བསྐུས་ན། ཐོག་
མར་མཐོང་བ་དེ་དབང་དུ་འགྱུར་རོ། །དེ་ནས། ན་མཿཔྲེ་ཁ་ཀ་ཡ་མཉྫུ་གྷོ་ཥ་ཀཱ་ཡ་པྲེ་ཁི་ཏོ་སི་ཛྷ་ཧི་ལཾ་ཀུ་རུ་སྭཱ་ཧཱ། དེ་ནས་ཡུངས་ཀར་ལ་བཟླས་ལ། གང་གི་ཁང་པར་གཏོར་བ་དེ་དབང་དུ་འགྱུར་རོ། །ན་མོ་རཏྣ་ཏྲ་ཡཱ་ཡ། ཀུ་བྷི་ནི་ཛྷཾ་བྷི། མ་ཧཱ་བེ་ཏཱ་ལཱི་སྭཱ་ཧཱ། དེ་ནས་རང་གི་ཁུ་བ་
དང་། །ག་བུར་ལ་བརྒྱ་རྩ་གཅིག་བཟླས་ཏེ། གང་གི་མིང་ནས་བཟུང་སྟེ་སྦས་པ་དེ་དབང་དུ་འགྱུར་རོ། །ན་མོ་བུདྡྷཱ་ཡ་དྷརྨ་སཾ་གྷ་བཛྲ་པཱ་ཎཱི་བྷྱཿཤཱི་ཏ་པིཾ་ག་ལེ་ལ་ཧཱུཾ་ཀུ་རུ་ཀུ་རུ་ཛྭ་ལ་ཛྭ་ལ་སྭཱ་ཧཱ། གི་ཝང་ལ་བརྒྱ་རྩ་བརྒྱད་བཟླས་ཏེ་ཐིག་ལེ་བྱས་པས་ཇི་ལྟར་མཐོང་བ་ཐམས་ཅད་དབང་དུ་

འགྱུར་རོ། །ཧཾ་བྷོ་བྲ་ཥ་ཀ་ཡ་ཏི་ཨ་མུ་ཀ་ཤ་མ་ནུ་གྷྲི་དྱས་མ་ནེ་སྭཱ་ཧཱ། དེ་མ་ཐག་ཏུ་མི་འོང་ན། དཔའ་མོའམ། སྐྱེས་པ་ཇི་ལྟར་ཡིད་ལ་བསམས་ལ་བསྒྱུར་བར་བྱའོ། །དེ་རྣམས་དབང་དུ་བྱ་བའི་ལས་སོ། །བདག་གི་བླ་མས་ནི་མདོར་བསྡུས་ཏེ་གསུངས་པ། ཁོ་བོས་
ནི་རབ་ཏུ་ཕྱེ་སྟེ་རྒྱས་པར་བཤད་དོ། །མ་ངེས་པར་འབུམ་ཕྲག་གཅིག་བཟླས་པས། ལས་ཐམས་ཅད་ཀྱི་འབྲས་བུ་སྟེར་བ་ནི། སྒྲུབ་ཐབས་ལས་ཤེས་པར་བྱའོ། །དེ་ནས་བརྗོད་པར་བྱ་བ། དཔག་ཏུ་མེད་པའི་ལས་རྫོགས་པར་བྱེད་པ། དང་པོར་བསྐྲད་པར་བྱ་བའི་ལས་བཤད་པ།
ཨོཾ་ཀྵཾ་ཧ་ཧུ་ཧ་ཨ་མུ་ཀ་ཥཱ་ཨུཙྪ་ཊ་ཡ་ཧཱུཾ་ཕཊ། བསྐྲད་པ་ལ་ནི་དུ་བའི་ཁ་དོག་ཅན། གྲི་གུག་དང་ཐོད་པ་ཐོགས་པ། གཞན་རྣམས་ནི་སྔར་བརྗོད་པ་བཞིན་ལ། དོན་ཡོད་གྲུབ་པས་དབུ་རྒྱན་བྱས་པ། ལྷོ་ཕྱོགས་སུ་ཁ་བལྟས་ཏེ། སེམས་དཔངས་མཐོ་བས་བཟླས་པར་བྱའོ། །བྱེ་ཕྲག་གཅིག་
གམ། སྟོང་ཕྲག་ཉི་ཤུས་ཀྱང་འགྲུབ་སྟེ། དུར་ཁྲོད་ཀྱི་ཐལ་བ་བླངས་ལ། སྐྲ་གྲོལ་བ། གཅེར་བུ། གཞན་རྣམས་ནི་གོ་སླའོ། །དེ་ནས་དུག་ལང་ག་ལི་དང་། ཕག་པའི་རྟུག་པ་དང་། རོའི་སྐྲ་དང་། རྔ་མོའི་རུས་པ་རྣམས་ལ་བརྒྱ་རྩ་བརྒྱད་བཟླས་ལ། བཏབ་པས་དགྲ་བོ་རེངས་པར་
འགྱུར་རོ། །ཐེ་ཚོམ་མེད་པར་སྐྲོད་པར་འགྱུར་ཏེ། འདི་ནི་གཅེས་པའི་ལས་སོ། །ཞག་བདུན་བྱས་ནས་སྒོར་སྦས་ན། སྔར་བརྗོད་པའི་དུག་ལང་ག་ལི་དང་། མགྲིན་རིངས་ནི་རྔ་མོ་སྟེ། དེའི་རུས་པ་རྣམས་སོ། །དེ་ནས་ཡི་གེ་ཛཿའི་ས་བོན་ལས་བྱུང་བའི་སྐྱེས་བུ་ལག་ན་དབྱུག་པ་
ཐོགས་པ་བསྒོམས་ནས། བདེ་བྱེད་ཀྱི་བླ་མ་དང་། ཞག་བདུན་གྱིས་ངེས་པར་སྐྲོད་པར་འགྱུར་རོ། །རང་གི་གནས་སོ། །དེ་ནས་སྐྱེས་པའི་རུས་པ་ལ་ཁབ་ཀྱི་གཟུགས་བྱས་ལ་སྒོར་སྦས་ན། ཁྱིམ་དེར་རབ་ཏུ་འཇིགས་པ་སྐྱེ་ཞིང་། འབྱུང་པོ་ཆེན་པོའི་གནས་བཞིན་དུ་འགྱུར་རོ། །
ནག་པོའི་ཚེས་བརྒྱད་དམ། བཅུ་བཞིའམ། མཚན་མོ་ཐུན་གཅིག་ལའང་རུང་སྟེ། བརྒྱ་ཕྲག་བརྒྱད་བཟླས་སོ། །འདི་ནི་བསྐྲད་པའི་བྱ་བའོ། །དེ་ནས་རེངས་པ་ལ། སེར་པོ་མིའུ་ཐུང་ལྟོ་བ་རབ་ཏུ་འཕྱང་བ། ཐོད་པ་དང་གྲི་གུག་ཐོགས་པ། རླུང་ནང་དུ་གཟུང་བ། རླུང་འགགས་པའི་

དུས་བཟླས་ན། རིན་པོ་ཆེའི་ཅོད་པན་ཅན། བརྒྱ་ཕྲག་བརྒྱད་བཟླས་པར་བྱའོ། །ཨོཾ་མཾ་ཛྷ་ཀྵ། ཨ་མུ་ཀཾ་སྟཾ་བྷ་ཡ་ཧཱུཾ་ཕཊ། འདི་ལ་སོགས་པ་གཞན་ནི་གོ་སླའོ། །དེ་ནས་གསད་པ་ནི། ནག་པོའི་ཕྱོགས་ལ་ལྷོར་ཁ་བལྟས་ཏེ། སི་ལས་ཐིག་ལེ་བྱས་ལ་གོས་ནག་པོ་བགོས་ལ། ཐོད་པ་
དང་གྲི་གུག་ལག་ན་ཐོགས་པ། མི་བསྐྱོད་པ་ནག་པོའི་ཅོད་པན་ཅན། ལྗགས་བསྒྱུར་བ། འཇིགས་པར་བྱེད་པ། ཐུགས་ཀའི་ས་བོན་ལས་འོད་ཟེར་འཕྲོས་པས་ནག་པོ་དང་། འཇིགས་པའི་གདོང་མ་དང་། བཱ་རཱ་ལཱི་དང་། བེ་ཏཱ་ལཱི་དང་། ནག་མོ་ཆེན་མོ་དང་། རྣལ་འབྱོར་མ་དེ་
རྣམས་ཀྱང་། ཐོད་པ་དང་གྲི་གུག་ཐོགས་པ། རླུང་གི་ཤུགས་ལྟར་མགྱོགས་པ། དགྲ་བོའི་ཁ་ནས་ཞུགས་ཏེ། ཤ་རྣམས་ཀྱང་བཅད་ཅིང་། ཁྲག་རྣམས་ཀྱང་འཐུངས་ནས། ནང་ཆ་རྣམས་ཀྱང་བཅད་ཅིང་། ཐུན་གསུམ་དུ་བསྒོམ་པར་བྱའོ། །དེ་ལྟར་ཚེས་བརྒྱད་ལ། མིའི་ཐོད་པ་ཟན་
གྱིས་བཀང་བ་ལ་ཁྲག་བཏབ་སྟེ། ཕག་པ་ལ་སོགས་པའི་ཤ་རྣམས་དང་བཏབ་ལ། དེ་རྣམས་ཀྱི་ཁྲག་དང་། གཞན་ཡང་བྱ་དང་། ཉའི་ཤ་དང་། ཁྲག་དང་། ཟན་དང་། སྲན་མ་དང་བསྲེས་པའི་ཟན་དང་། ཆང་དང་། མེ་ཏོག་དང་། བདུག་པ་དང་། བྱུག་པ་རྣམས་བསོགས་ལ། མཚན་
ཕྱེད་ན་གཏོར་མ་སྦྱིན་པར་བྱའོ། །དེ་ནས་ཤ་ཟའི་སྒྲུབ་ཐབས་ལ། སྔོན་དུ་བརྗོད་པའི་ནག་པོ་ཆེན་པོའི་གཟུགས་སུ་བསྒོམས་ལ། སྟོང་ཕྲག་བཅུ་བཟླས་པས་སྔོན་དུ་བསྙེན་པར་འགྱུར་རོ། །དུར་ཁྲོད་ཀྱི་རས་ལ། ཨ་ན་ལ་དང་། ཀུནྡྷ་ལའི་མིང་ཅན་གྱི་གནོད་སྦྱིན་མོ་གཉིས་བྲི་བར་བྱའོ། །
རོ་སོལ་གྱིས་བསྲེས་ལ། དྲི་ཞིམ་པོས་ཀྱང་སྦགས་ཏེ། ཞུན་ཆེན་གྱི་མར་མེའི་སྣག་ཚས་ཤ་ཟ་གནས་པའི་སྡོང་པོའི་རྩེར་བྲི་བར་བྱའོ། །ནག་པོ་དང་པོའི་ལང་ཚོ་ཅན། སྐྲ་རྣམ་པར་གྲོལ་བ། རྒྱལ་པོ་ཆེན་པོ་ལྟར་རོལ་པའི་འདུག་སྟངས་ཀྱིས་བྲི་བར་བྱའོ། །མེ་ཏོག་དང་། བདུག་
པ་དང་། ལྷ་བཤོས་དང་། བྱུག་པ་རྣམས་ཀྱིས་མཆོད་པར་བྱའོ། །དེ་ནས་སྒྲུབ་པ་པོ་གང་ཟ་བ་ཐམས་ཅད་ཀྱི་ལྷག་མ་ནས་སྦྱིན་པར་བྱའོ། །མཚན་མོའི་ནང་དུ་རྟག་ཏུ་ལྷག་མ་རེ་སྦྱིན་པར་བྱའོ། །དེའི་སྔགས་ལ། ཨོཾ་ཨ་ན་ལེ་ཀུནྡྷ་ལི། གྲྀཧྞ་པིཎྚ་པི་ཤཱ་ཙཱི་ནི་སྭཱ་ཧཱ། ལན་བདུན་གྱིས་

གྲུབ་པར་འགྱུར་རོ། །དེ་ནས་ཆོ་ག་གཞན་བརྗོད་པ། བོང་བུའི་གདོང་ཅན་བསྒོམ་པར་བྱས་ལ། བོང་བུའི་གདོང་ཅན་ལག་པ་གཉིས་ཀྱིས་བུམ་པ་བཟུང་ལ། འགྲོན་བུའི་བུམ་པའི་གདན་ལ་འདུག་པ། ཤིང་ཀེ་ཏ་ཀའི་མེ་ཏོག་ཀུ་སུ་མས་བརྒྱན་པ། ཟླ་བ་གཅིག་གི་བར་དུ་
ལྷག་མ་བྱིན་པས་འགྲུབ་པར་འགྱུར་རོ། །སྔོན་དུ་བརྗོད་པའི་ཆོ་གས་གྷུ་པ་ཏའི་ཤ་ཟ་བྲི་བར་བྱའོ། །ཡུང་བ་དང་རྡོ་ཞོ་བསྲེས་པས་བྲི་བར་བྱ། སྐྱིལ་ཀྲུང་ཕྱེད་པའི་འདུག་སྟངས་ཀྱིས་གནས་པ། ཕྱག་གཉིས་པ། ཀུན་ནས་དགའ་བའི་རྒྱན་གྱིས་བརྒྱན་པ། གསེར་གྱི་ཁྲི་སྟེགས་ལ་འདུག་
པ། །གཡོན་པ་ན་རིན་པོ་ཆེའི་སྣོད་ཐོགས་པ། གཡས་པ་ན་རིན་པོ་ཆེའི་སྙེ་མ་ཐོགས་པ་བྲིས་ལ་སྔོན་གྱི་ཆོ་ག་བཞིན་དུ་གཏོར་མ་སྦྱིན་པར་བྱའོ། །སེམས་ཅན་ཐམས་ཅད་ཀྱི་དོན་བྱེད་པའི་བསམ་པས་འགྲུབ་པར་འགྱུར་གྱི། རང་གི་དོན་བྱེད་པས་ནི་མ་ཡིན་ནོ། །དེ་ནས་མི་འཕོ་
བའི་རྣལ་འབྱོར་བརྗོད་པར་བྱ་སྟེ། སྟོང་ཕྲག་སུམ་ཅུ་རྩ་གཉིས་པའི་ནག་པོ་ཆེན་པོའི་རྒྱུད་ལས། བཅོམ་ལྡན་འདས་མས་ཞུས་པ། འཇིག་རྟེན་གྱི་ནི་སྟོན་པ་པོ། །སེམས་ཅན་ཀུན་གྱི་དོན་འགའི་ཕྱིར། །ཇི་ལྟར་སེམས་ཅན་ཐམས་ཅད་ལ། །རྒས་དང་འཆི་དང་ནད་སྤངས་པ། །
བཅོམ་ལྡན་འདས་ཀྱིས་བཀའ་སྩལ་གསོལ། །བཟང་མོ་ཁྱོད་ཀྱིས་ཞུས་པའི་དོན། །སེམས་ཅན་ཀུན་གྱི་དོན་གྱི་ཕྱིར། །མི་གཡོ་བ་ཡི་བདེ་བ་བཤད། །གུས་པའི་སེམས་ཀྱིས་མཉན་པར་བྱོས། །གསང་བ་ལས་ཀྱང་གསང་བ་ནི། །བདེ་བ་ཆེན་པོ་བཅིངས་པས་ཐེབས། །གྱེན་དུ་
འགྲོ་དང་གཟུང་བའི་ཐབས། །རླུང་ནི་རབ་ཏུ་བཅིངས་པ་བརྗོད། །བུམ་པའི་ཆུ་ལྟར་རབ་གཡོ་བ། །སེམས་ནི་བརྟན་པར་བྱས་པ་ལས། །དེ་ཚེ་ཁུ་བའང་འཛིན་པར་འགྱུར། །འདི་ནི་ཆོས་ལུགས་ལྔ་ཀ་འདོད། །གསང་བའི་མཛོད་ཀྱི་འོག་གི་སྒོ། །བསྡམས་པས་བདེ་བ་
འཛིན་པར་བྱེད། །དེ་ཚེ་གྱེན་དུ་དངས་པ་ལས། །རླུང་གི་སྟོབས་ཀྱིས་བྱེད་པར་འགྱུར། །ཇི་ལྟར་བུམ་པ་སྟོང་པ་ལྟར། །དེ་བཞིན་སྟོང་པའི་རྣམ་འབྱོར་བྱ། །ཁུ་བ་བརྟན་པར་གྱུར་པ་ལ། །གྲུབ་མཐའ་ལྔ་ཀ་མཆོག་ཏུ་འདོད། །རྐྱང་མ་རོ་མ་དབུ་མ་ལས། །རླུང་ནི་

གཡོས་པར་འགྱུར་བའི་ཚེ། །དེ་ཚེ་ལྕེ་ནི་གྱེན་ལ་བཟློག །འདོད་པས་ཁུ་བ་གཡོས་པ་འཛིན། །རང་གི་རླུང་རྣམས་གྱེན་དུ་འཕངས། །རྩོལ་བའི་སྟོབས་ཀྱིས་ཐུར་དུ་བཟུང་། །མགྲིན་པར་རླུང་རྣམས་གནས་པའི་ཚེ། །སྙིང་གར་རླུང་ནི་མཉམ་པར་སྦྱོར། །དེ་ཚེ་སེམས་ནི་བརྟན་པར་
འགྱུར། །རླུང་ནི་ནང་དུ་ཟིན་པའི་ཚེ། །དེ་ཚེ་སྟོང་པའི་རྣལ་འབྱོར་སྐྱེ། །ལུས་པོ་རླུང་གིས་མཉམ་པར་གང་། །དེ་ཚེ་རླུང་ནི་དལ་བས་བདེན། །ཇི་ལྟར་དམ་པར་སྟོན་པའི་ཚེ། །སེམས་ནི་སྟོང་པའི་རྣལ་འབྱོར་གཟུང་། །འདི་འདྲའི་རྩོལ་བ་བྱས་པ་ལས། །འཆི་བ་ལས་ནི་རྣམ་པར་
རྒྱལ། །སྦྱར་བས་གཉེར་མ་མེད་པར་བྱེད། །སྐྲ་དཀར་དང་ནི་བྲལ་བར་འགྱུར། །དབང་པོ་ལྔ་རྣམས་རབ་གསལ་ཞིང་། །ཏིང་འཛིན་འདི་ཡི་སྦྱོར་བ་ཡིས། །རྡོ་རྗེ་པདྨ་རབ་གནས་པ། །སྦྱོར་བ་མང་པོས་བསྐྱོད་པར་བྱ། །བྱང་ཆུབ་སེམས་ནི་གཡོས་པ་ལས། །གཡོས་པ་དེ་
ཡང་གཟུང་བར་བྱ། །སེམས་ཀྱིས་ཉི་མ་བླངས་པ་ལས། །ཇི་སྲིད་ཉི་མ་བསྐྱོད་པའི་ཚེ། །ཟླ་བ་གནས་གཞན་འགྲོ་བར་བྱེད། །སྟོང་པའི་རྣལ་འབྱོར་བརྟན་པར་བྱ། །སེམས་ནི་གཡོ་མེད་གཅིག་ཏུ་བྱ། །ཇི་སྲིད་ཉི་ཟླ་འབྱོར་པའི་ཚེ། །ལུས་ནི་འཆི་བ་མེད་པ་ཐོབ། །ཇི་སྲིད་ཉི་ཟླ་གཅིག་
སྦྱོར་བ། །དེ་ཚེ་བདག་མེད་རྣལ་འབྱོར་བྱ། །རི་བོང་ཉི་མ་སྦྱོར་བ་ཡིས། །ལུས་ནི་འཆི་མེད་སྐྱེ་བར་འགྱུར། །འཆི་བ་མེད་པ་སྐྱེ་བར་འགྱུར། །ལུས་ནི་དུས་ཀྱིས་མི་ཟ་སྟེ། །བུད་མེད་དགའ་བས་རྗེས་ཆགས་པ། །རྣལ་འབྱོར་པ་ཡི་ཆགས་པ་ཡང་། །ཇི་སྲིད་མཉམ་
པར་སྐྱེ་འགྱུར་བ། །དེས་ནི་གྲུབ་པ་རབ་ཏུ་སྟེར། །ཨོཾ་ཙ་ལེ་ཙ་ལེ་ཙི་ཏེ་ཙི་ཏོ་མུཉྩ་པ་ཡ་སྭཱ་ཧཱ། སྔགས་འདི་བརྗོད་པ་ཙམ་གྱིས་བུད་མེད་རྗེས་སུ་ཆགས་པ་སྐྱེ་བར་འགྱུར་རོ། །དེ་ལྟར་བུད་མེད་རྗེས་སུ་ཆགས་པའི་ཚེ། སྒོམ་པ་ལ་སྦྱོར་བར་བྱའོ། །ན་མོ་བུདྡྷེ་སཏྭེ་བྷྱ་ཧཱུཾ་ཤི་གི་ནི་
སྭཱ་ཧཱ། སྦྲུལ་མགོ་གཉིས་པ་མགོ་བོ་ནས་སོར་བཅུ་གཉིས་བཟུང་ནས། དུར་ཁྲོད་ཀྱི་མེ་ལ་བསྲེགས་ཏེ། དེའི་ཐལ་བ་བླངས་ལ། བྱ་ཀུ་ར་ཀུའི་ཁྲག་གིས་ལན་བདུན་གྱི་བར་དུ་སྦྲུས་པས། དེས་ཐིག་ལེ་བྱས་པའི་ཚེ་མི་སྣང་བར་འགྱུར་རོ། །དེ་ནས་ཤིང་སྐྲ་དཀར་གྱི་བྱང་ཕྱོགས་ཀྱི་རྩ་བ་

ལ། །གཅེར་བུ་བྱས་བརྐོས། ཉི་མ་དང་ཟླ་བ་དང་མེའི་ནང་དུ་བྱས་ལ། ཁར་བཅུག་ན་མི་སྣང་བར་འགྱུར་རོ། །ཉི་མ་ནི་ཟངས་སོ། །ཟླ་བ་ནི་དངུལ་ལོ། །མེ་ནི་གསེར་རོ། །དེ་རྣམས་ལ་ནི་ལྕགས་སོ། །དེ་ནས་ཐོག་མའི་དངུལ་ལ། དེའི་ཚེ་སྐྱེས་པ་དང་སྦྱར་བའི་ཁུ་བ་གཉིས་མཉམ་
པར་སྦྱར་བ་ལ། མེ་ནི་སི་ལ་བཏབ་ལ། འཇིག་རྟེན་གསུམ་པོས་མི་མཐོང་ངོ་། །དེའང་ལ་ལཱ་ཊ་ལ་ཏིལ་ཀ་བྱས་སོ། །དེ་ན་ཏི་ཚ་དཀར་པོ་དང་། ཀན་ཏྲ་སི་བ་ལི་དང་། སྦྲང་རྩི་དང་། དང་པོའི་མེ་ཏོག་དང་ཁུ་བ་བསྲེས་ཏེ། པདྨ་གསར་པའི་ཟེའུ་འབྲུ་དང་། ལྕགས་གསུམ་གྱི་ནང་དུ་བཅུག་སྟེ་སྦྱར་
ན། །འཇིག་རྟེན་གསུམ་གྱི་མིས་མི་མཐོང་ངོ་། །ཐོག་མར་རྩྭ་སྐྱེས་པའི་དུས་ཀྱི་རྩེ་མོ་ལ་སོགས་པའི་ས་བཞག་ལ། དེའི་འོག་གི་ས་བླངས་ལ། བ་བླ་བསྲེས་ཏེ། རྒྱལ་གྱི་ཉིན་པར་ཐིག་ལེ་བྱས་ན་གྲུབ་པའི་སྐྱེས་བུས་ཀྱང་མི་མཐོང་ངོ་། །དང་པོ་རྩྭ་ནི། གླ་སྒང་གི་རྩྭའོ། །དེའི་འོག་གི་ས་
བླངས་པས་སོ། །དེའང་རྒྱལ་གྱི་ཉིན་པར་རོ། །སྦྲང་རྩི་དང་བ་བླ་བསྲེས་ལ། དཔྲལ་བར་ཐིག་ལེ་བྱས་ན། སྐྱེས་བུ་དེ་ནི་གྲུབ་པའི་རྣལ་འབྱོར་པས་ཀྱང་མི་མཐོང་ངོ་། །གཞན་ལྟ་སྨོས་ཀྱང་ཅི་དགོས། འདི་ནི་མི་སྣང་བའི་རབ་ཏུ་དབྱེ་བའོ། །དེ་ནས་རེངས་པ་ལ། ན་མོ་བུདྡྷ་བྷྱཿསྟཾ་བྷ་ཡ་ཛཾ་བྷ་ཡ་མོ་
ཧ་ཡ་སྭཱ་ཧཱ། དེ་ནས་ཁྱོ་བོ་ཡོད་པའི་བྲམ་ཟེ་མོ་ཤི་བའི་ཐལ་བ་བླངས་ཏེ། ལག་པ་ལ་བྱུགས་ནས་གང་ལ་བསྟན་པའི་སེམས་ཅན་ཐམས་ཅད་རེངས་པར་བྱེད་དོ། །དེ་ནས་ན་མོ་རཏྣ་ཏྲ་ཡཱ་ཡ། ཀྵིཔ་བེ་ཀྵི་པ་བེ་ཏ་ལི་སྭཱ་ཧཱ། སྔར་བརྗོད་པའི་ཐལ་བས་གྲོ་གའི་འདབ་མ་ལ་སྔགས་བྲིས་པས་མདའ་
རེངས་པར་བྱེད་དོ། །དེ་ནས་ན་མོ་རཏྣ་ཏྲ་ཡཱ་ཡ། དྷ་ཀྵ་ཛ་པིཾ་ག་ལོ་གྲི་ཧ་བྷཱུ་ཏ་པ་ཙ་ན་ནི་པྲ་ཧ་ར་སཾ་ཀྲ་མ་ཡ་སྭཱ་ཧཱ། སྔགས་འདིས་རྨ་བྱའི་མཇུག་སྒྲོ་ལ་སྟོང་ཕྲག་གཅིག་བཟླས་ཏེ། ནག་པོ་ཆེན་པོའི་ཐང་སྐུའི་སྟེང་དུ་བཞག་ལ། རང་གི་དཔུང་གི་སྟེང་དུ་གཡབ་སྟེ་བཞག་པས། ཕ་རོལ་གྱི་
དཔུང་རེངས་པར་བྱེད་དོ། །ནག་པོ་ཆེན་པོའི་ཐང་སྐུ་ལ་གདིང་དང་། ཡུང་བ་བསྲེས་པ་སེར་པོས་བྲི་བར་བྱ། རབ་ཏུ་འཇིགས་པ་ལ་འཇིགས་པར་བྱེད་པ། ལྟོ་བ་རབ་ཏུ་རྒྱས་པ། སྤྱན་གསུམ་པ། རོའི་སྟེང་ན་གནས་པ། རོལ་པའི་འདུག་སྟངས་ཀྱིས་གནས་པ། ཕྱག་གཉིས་པ་གཡས་

པའི་ཕྱག་ན་རི་སྣ་ཚོགས་པ་ཐོགས་པ། གཡོན་པའི་ཕྱག་ན་ཐོད་པའི་སྟེང་དུ་མེའི་དཀྱིལ་འཁོར་གྲུ་གསུམ་འཛིན་པ། དེ་ལྟ་བུ་ཐང་སྐུའི་སྟེང་དུ་རྒྱལ་མཚན་གྱི་རྩེ་མོ་འཕྱར་བར་བྱའོ། །རང་གི་དཔུང་རྣམས་ཀྱིས་མི་མཐོང་བར་བྱས་ལ། ཕ་རོལ་གྱི་དཔུང་རྣམས་རེངས་པའི་དོན་དུ་བསྟན་པར་
བྱའོ། །དེ་ནས་གཟའ་ཉི་མའི་སྟེང་དུ་སྐར་མ་རྒྱལ་ལ་བབ་པ་ན་ཤིང་ས་ར་ལིའི་རྩ་བ་ལ། ཀྵི་པ་བི་ཀྵི་པ་བེ་ཏ་ལི་སྭཱ་ཧཱ། དེའི་རྗེས་སུ་སྔགས་འདི་རྫས་དང་སྦྱར་ཏེ། ཆོ་ག་བཞིན་ཁ་ནས་བརྗོད་པས། གཡུལ་དུ་ཞུགས་པའི་དགྲ་བོའི་རལ་གྲི་ཐམས་ཅད་འཆིང་བར་བྱེད་དོ། །དེ་ནས་མེ་
བསིལ་བའི་ལས་ནི་གོ་སླའོ། །སྔགས་དེའི་ལས་ལ། གཞན་བརྗོད་པ། སྨན་སེ་བ་ལི་དང་། སྨན་ཛ་མུ་ཀ་དང་། མེ་ཏོག་པ་རལ་ལིའི་རྩ་བ་དང་ཞིབ་ཏུ་བཏགས་ལ། སྦལ་པའི་ཚིལ་བུ་དང་བསྲེས་ཏེ། རྐང་པའི་ཞབས་སུ་བསྐུས་ན། སོལ་བའི་མེ་རབ་ཏུ་འབར་བའི་སྟེང་དུ་ཕྱིན་ཡང་མི་
ཚིག་གོ། །གཞན་སྔགས་དེའི་ལས་ལ། སྨན་མུན་ཏྲི་རིའི་སྡོང་པོ་དང་། པདྨ་དང་། སྨན་སེ་བ་ལི་དང་། སྦལ་པའི་ཞག་དང་བསྲེས་ཏེ། རྐང་པ་ལ་བསྐུས་ན། མངོན་དུ་མི་ཚིག་པར་འགྱུར་རོ། །གཞན་ཡང་སྦལ་པ་དཀར་པོའི་རོ་སྐམས་ལ། གཞན་སྦལ་པའི་ཁྲག་གིས་བསྐུས་ལ་
བསྲེས་ནས་བཏགས་ཏེ་བསྐུས་པས་མེ་རེངས་པར་བྱེད་དོ། །སྦལ་པའི་ཚིལ་བུ་གང་དུ་བསྐུས་པ། མེ་ལ་རེག་ན་མེ་འཆི་བར་འགྱུར་རོ། །དེ་ནས་རྒྱལ་པོ་རེངས་པར་བྱེད་པའི་ལས་ལ། དེ་ནས་སྨན་ཏྲི་ཤི་བྷན་དྷིའི་སྨན་དེ་ཐལ་བར་བྱས་པ་ལ། ལན་བདུན་བཟླས་ཏེ་བཏབ་པས། རྒྱལ་པོ་
རེངས་པར་བྱེད་དོ། །དེ་ཡང་ཏྲི་ཤི་ནི་འདབ་མ་གསུམ་པའི་རྩ་བའོ། །དེ་ནས་ཆུ་བཅིང་བའི་ཆོ་ག་ལ། ཆུའི་ནང་ན་འདུག་སྟེ་བཟླས་པ་བྱས་པས། ཉ་འདྲུ་འདྲུ་བའི་ཁར་རིན་པོ་ཆེ་བཅུག་ལ། མར་གསར་པ་དང་། ཉའི་ཁྲག་བསྲེས་ཏེ། སྣ་དང་། མིག་དང་། གཟུགས་པོ་ཐམས་ཅད་ལ་
བྱུགས་ལ། ཆུའི་སྟེང་དུ་ཕྱིན་པས་ཆུ་སྲིན་བཞིན་དུ་སྟེང་དུ་ལྡིང་བར་འགྱུར་རོ། །དེ་རྣམས་ནི་ཆུ་བཅིངས་པའི་ལས་སོ། །དེ་ནས་བསྐྲད་པ་ནི་གོ་སླའོ། །དེ་ནས་ཞེ་སྡང་བ་ལ། ན་མོ་རཏྣ་ཏྲ་ཡཱ་ཡ། དྭེ་ཥ་ཡ་དྭེ་ཥ་ཡ། མ་ཧཱ་དྭེ་ཥ་ཀ །མཱ་བི་ལཾ་པ་རུ་རུ་སྭཱ་ཧཱ། བྲམ་ཟེ་དང་དགེ་

ཚུལ་དང་། བྱི་ལ་དང་། བྱི་བའི་སྐྲ་དང་། སྤུ་བླངས་ལ། གཅིག་ཏུ་བཏགས་ཏེ། གང་གི་མིང་ནས་གཟུང་སྟེ། ས་ལ་སྦས་པ་དེ་ཐམས་ཅད་འཁོན་པར་འགྱུར་རོ། །དགེ་ཚུལ་ནི་བཙུན་པ་ཆུང་ངུའོ། །མར་ཆར་ནི་བྱི་ལའོ། །ཨཱ་ཁུའི་ནི་བྱི་བའོ། །དེ་ནས་རྨ་བྱའི་མགོ་དང་། བྱ་ཕོའི་
མགོ་དང་། སྔགས་འདི་བརྗོད་ཅིང་གཅིག་ཏུ་བཏགས་ལ་སྤོས་ཀྱིས་བདུགས་ན། གང་གི་མིང་ནས་བཟུང་བ་དེ་འཁོན་དུ་འགྱུར་རོ། །དེ་ནས་གང་ཞིག་བུད་མེད་ཁྲག་འབབ་པའི་མཚན་མར་ཡུངས་ཀར་གྱི་ཐུམ་པོ་ཞག་བདུན་གྱི་བར་དུ་བཅུག་ལ། དེའང་བུད་མེད་སྡུག་བསྔལ་དང་ལྡན་པའིའོ། །
གང་ལ་ཡུངས་ཀར་གྱིས་གཏོར་བ་དེ་ཐམས་ཅད་འཁོན་པར་འགྱུར་རོ། །དེ་ནས་བྱ་རོག་དང་འུག་པའི་སྒྲོ་དང་རུས་པ་དང་ཤ་བླངས་ལ། རང་ཉིད་བསྲུང་བར་བྱས་ལ། སྤོས་ཀྱིས་གང་ལ་བདུགས་པ་དེ་མཛའ་བོ་ཡིན་ཡང་འཁོན་པར་འགྱུར་རོ། །དེ་ནས་སྦྲུལ་མགོ་གཉིས་པའི་ཤུན་ལྤགས་དང་། རྨ་བྱའི་སྒྲོ་དང་མཉམ་པར་
སྦྱར་ཏེ། གང་ལ་བདུགས་པ་དེ་འཇིག་རྟེན་གསུམ་དང་འཁོན་པར་འགྱུར་ཏེ། དེ་མ་ཐག་ཏུའོ། །རང་ཉིད་བསྲུང་བ་ནི་མཆོག་ཏུ་གཅེས་པའོ། །འདི་རྣམས་རབ་ཏུ་ཞེ་སྡང་བའི་ལས་སོ། །དེ་ནས་སྦྱིན་སྲེག་གི་ལས་བརྗོད་པར་བྱ་སྟེ། ཐབ་ནི་རྒྱུད་ཐམས་ཅད་ལས་བཤད་པས་གོ་སླའོ། །རྒྱུད་འདི་
ལས་གྲུབ་པ་བརྒྱད་བསྒྲུབ་པ་ནི། བཅོམ་ལྡན་འདས་ཀྱིས་སྟོང་ཕྲག་དྲུག་པའི་རྒྱུད་ལས་བཀའ་སྩལ་པ། རལ་གྲི་བསྒྲུབ་པ་ལ། ཁྲུ་བརྒྱད་པའི་ཐབ་བྱའོ། །དེའང་ཟུར་བརྒྱད་པའོ། །ཁྲུ་བཞི་འོག་ཏུ་བྲིའོ། །དེའི་བྱེད་པས་ཐམས་ཅད་ཤེས་པར་བྱའོ། །དེ་ཡང་ཡི་གེ་མངས་པས་འཇིགས་
ནས་བསྡུས་ཏེ་བཤད་དོ། །ཞི་བའི་ཐབ་ནི་གསང་འདུས་དང་གཅིག་གོ། །སྦྱིན་སྲེག་གི་རབ་ཏུ་དབྱེ་བ་ནི་གོ་སླའོ། །དེ་ནས་མིག་སྨན་གྱི་རང་བཞིན་ལ། ནམ་མཁའ་ལ་སྤྱོད་པའི་མིག་བླངས་ལ། བྱ་རོག་རྒད་པོའི་མིག་དང་། བྱ་རྒོད་དམར་པོའི་མིག་དང་། དར་གྱིས་གཡོགས་པའི་ཟླ་
མཚན་ཕྱིས་པའི་དར་རོ། །དེ་ནས་བྱི་ལ་ནག་པོའི་མིག་དང་། བྷྲི་ཧཱ་ཧ་བྷཱུ་མི་ལ་ཏིའི་མགོ་དང་། བྷུ་ཟུག་པོས་འདབ་ཀྱིན་འགྲོ་བ། སྲིན་བུ་མེ་ཁྱེར་དང་། རྣ་བའི་ནང་དུ་འཇུག་པའི་སྲིན་བུ་དང་། དེ་རྣམས་གཅིག་ཏུ་བསྲེས་ཏེ་བཏགས་ཏེ་རི་ལུ་བྱས་ལ། མིའི་ཚིལ་གྱི་མར་མེའི་སྣག་ཚ་བླངས་ལ་

བསྲེགས་ཏེ། མིག་ལ་བསྐུས་པས་ས་འོག་གི་གཏེར་མཐོང་ངོ་། །དེ་ནས་རལ་གྲི་བསྒྲུབ་པ་ལ། སྔར་བརྗོད་པའི་བྱའི་མིག་སྨན་བླངས་ལ་བྱ་བ་ནི་གོ་སླའོ། །དེ་ནས་རྐང་མགྱོགས་ལ། ཤྭེ་ཏ་བྷྲ་མ་ཤི་ཁའི་ཤིང་དང་། པ་ལ་དཀར་པོའི་ཤིང་དང་། ཤིང་དེ་གཉིས་ཀྱི་ཤར་ཕྱོགས་ཀྱི་འདབ་མ་བླངས་
ལ། །ཏ་ཤ་པ་པུ་མར། དེ་རྣམས་ཀྱིས་བཅིངས་པ་ནི། སྟཾ་མྲ་ནི་ཟངས་སོ། །ཤཾ་ཁ་ནི་དུང་ངོ་། །པྲ་བ་ལ་ནི་བྱི་རུའོ། །སུ་བརྞ་ནི་གསེར་རོ། །མུཀྟ་ནི་མུ་ཏིག་གོ། །རཱ་ཛ་རཱུ་པ་ནི་དངུལ་ལོ། །དེ་རྣམས་ཀྱིས་བཅིངས་པའོ། །སྟོང་ཕྲག་ཉི་ཤུ་བཟླས་པས་གྲུབ་པར་འགྱུར་རོ། །དེ་ནས་
མཁའ་སྤྱོད་ཀྱི་དངོས་གྲུབ་བརྗོད་པ་ནི། ཛཱ་ཏི་ཕ་ལ་མ་ས་བརྒྱད། ཀ་ཀོ་ལ་མ་ས་བརྒྱད། པི་པི་ལིང་གི་སྙིང་པོ་མ་ས་བརྒྱད། མོན་ལུག་གླ་སྒང་མ་ས་བརྒྱད། སྒ་ཐོལ་གྱི་ཆུ་མ་ས་བརྒྱད། ག་པུར་ཞོ་གཉིས། ག་པུར་གྱི་ཆུ་ཞོ་གཉིས། དེ་ཐམས་ཅད་གཅིག་ཏུ་བསྲེས་ལ། ཤིང་སཱ་ཧཱ་ཀ་རའི་འདབ་
མས་གཏུམས་ལ་བསྲེག་གོ། །དེའི་སྟེང་དུ་ནིམ་པའི་ཤིང་བཙིགས་ལ་སྨན་རྣམས་ས་འོག་ཏུ་སྦས་ཏེ། ཤིང་པ་ལ་ཤའི་མེ་ཏོག་བཏགས་པའི་ཁུ་བ་སྲང་བཞི། མར་དང་སྦྲང་རྩི་སྦགས་ཏེ། སྣོད་སྣུམ་ཅན་གྱི་ནང་དུ་འབྲས་ཀྱི་ཕུང་པོ་ཆེན་པོའི་སྟེང་དུ་ཞག་ཉི་ཤུ་རྩ་གཅིག་གཞུག་གོ། །
ལྷགས་པ་མི་འོང་པའི་ཁུང་དུ་འདུག་ལ། སོར་མོ་གསུམ་གྱིས་བླངས་པའི་ཆོས་ཙམ་ཉིན་རེ་བཞིན་དུ་ཟའོ། །དེའི་ཚེ་བཟའ་བའང་མེད་པར་ལོངས་སྤྱད་པར་བྱའོ། །ནམ་མཁའ་ལོངས་སྤྱོད་པར་འགྱུར་རོ། །དེ་ནས་གྲུབ་པའི་སྨན་བརྗོད་པར་བྱ་བ། ཛྱོ་ཏི་སྨ་ཏིའི་མར་ཁུ་སྲང་
བརྒྱད། མར་སྲང་བརྒྱད། སྦྲང་རྩི་སྲང་བརྒྱད། ཨ་རུ་ར་ཤ་ཆེན་བརྒྱ་རྩ་བརྒྱད། དེ་ཐམས་ཅད་གཅིག་ཏུ་བཏགས་ལ། སྣོད་སྣུམ་ཅན་གྱི་ནང་དུ་བཅུག་ལ། བ་གླང་གིས་གཅིན་བཏང་བའི་ནང་དུ་ཟླ་བ་དྲུག་སྦང་བར་བྱའོ། །འོ་མ་དང་གཅིག་ཏུ་བསྲེས་ཏེ་བཏུང་བར་བྱའོ། །ཟླ་བ་
དྲུག་ནས་རྒད་པོས་འཐུངས་ཀྱང་བྱིས་པར་འགྱུར་རོ། །དེ་ནས་ཅི་བགྱི་ཞེས་བཀའ་ཉན་པའི་སྒྲུབ་ཐབས་ཀྱི་རང་བཞིན་ལ་ཏ་པ་སི་ཤི་བའི་ཁར་ཐོད་ལོ་སྐོར་བཅུག་ལ་བསྲེགས་ནས་ཚིག་པའི་འོག་ཏུ་ཐོད་ལོ་སྐོར་བླངས་ཏེ། བཟླས་པའི་སྔགས་ནི་འདི་ཡིན་ཏེ། ཨོཾ་ན་མཿསིདྡྷེ་

སྭཱ་ཧཱ། དེ་ནས་མཚན་ཕྱེད་ན་ཅི་བགྱི་ཞེས་བཀའ་ཉན་པའི་ཕོ་ཉར་འོངས་ནས། བདག་གིས་ཅི་བགྱི་ཞེས་སྨྲ་བ་ལ། ཅང་མི་བརྗོད་པར་ངག་ཐུབ་པར་བྱའོ། །ཐོ་རངས་ཀྱི་ཚེ་ནམ་ལངས་ནས་ཅི་བགྱི་ཞེས་སྨྲ་བ་ལ། ཐོ་རངས་སྒྲུབ་པ་པོས་སྨྲ་བར་བྱ་བ། རྒྱལ་པོའམ་བཙུན་
མོའམ། འཁོར་པ་གང་འདོད་པ་ཁྱེར་ལ་ཤོག་ཅེས་སྨྲས་པས། ཇི་ལྟར་ཡིད་ལ་བསམས་པའི་ལས་ཐམས་ཅད་རྫོགས་པར་བྱེད་དོ། །མཐོ་རིས་སུའང་འཁྱེར་ཞིང་། ཇི་ལྟར་བདེ་བར་ལོངས་སྤྱོད་པ་དང་། བཅུད་དང་བཅུད་ཀྱིས་ལེན་ཐམས་ཅད་སྟེར་རོ། །ལྷ་ཆེན་པོ་བརྒྱད་ཀྱི་བུ་མོ་
ཡང་འགུགས་པར་བྱེད་དོ། །དེ་ལ་སོགས་པའི་ལས་ཐམས་ཅད་བྱེད་དོ། །དེ་ནས་ཤ་ཟའི་སྒྲུབ་ཐབས་ཀྱི་རང་བཞིན་ལ། བྲམ་ཟེ་ཤི་བའི་ཁར་ལྕགས་བརྒྱད་གཅིག་ཏུ་བཞུ་བའི་རི་ལུ་བཅུག་ལ། མེར་བསྲེགས་པའི་ཐལ་བ་བླངས་ལ། ལྕགས་བརྒྱད་ཀྱི་རི་ལུ་ཞིབ་པར་བཏགས་ཏེ། སྤྲ་ཚིལ་
གྱིས་རི་ལུ་བྱས་ལ། ག་པུར་གྱི་མར་མེ་བཏང་སྟེ། དུར་ཁྲོད་དུ་བརྒྱ་ཕྲག་བརྒྱད་བཟླས་ལ། དེའི་ཚེ་ཤ་ཟ་འོངས་ནས་ཅི་བགྱི་ཞེས་སྨྲ་བ་ལ། ཅང་མི་སྨྲ་བར་འདུག་པར་བྱའོ། །ངག་བཅད་དེ་ཐུབ་པར་འདུག་པར་བྱའོ། །དེ་ནས་རི་ལུ་ཁྱེར་ཏེ་ལྷའི་ཁང་པར་མཚན་མོ་ཐོག་ཐག་བཟླས་པར་བྱའོ། །
ཐོ་རངས་གྲོགས་པོ་ལོངས་ཞེས་སྨྲ་སྟེ། དེའི་ཚེ་འགྲུབ་པར་འགྱུར་རོ། །རི་ལུས་ཅི་འདོད་པའི་མིང་ཡི་གེ་བྲིས་པས། ཇི་ལྟར་སྒྲུབ་པ་པོས་བཀའ་སྩལ་པ་བཞིན་གྲུབ་པར་བྱེད་དོ། །རི་ལུ་བསྒྲུབ་པའི་སྔགས་ནི། ཨོཾ་རུ་རི་རུ་རི་རུ་རུ་སྭཱ་ཧཱ། ད་ནི་གཏོར་མའི་ཆོ་ག་བརྗོད་པར་བྱ་སྟེ། ལྷའི་རྣལ་
འབྱོར་གྱིས་བསམ་གཏན་ལ་གནས་པས། རྩ་བ་ནས་བཤད་པའི་བདུད་རྩི་རྣམས་བསོགས་ལ། དབང་པོ་ལ་སོགས་པ་རྣམས་ལ་གཏོར་མ་སྦྱིན་པར་བྱའོ། །ཉུང་བ་དང་ནི་མང་བ་ཡི། །བཟླས་པ་བྱས་པའི་ནང་དུ་ནི། །ཐུགས་ཀའི་ས་བོན་འོད་ཀྱིས་འགུགས། །ཤར་གྱི་ཕྱོགས་
སུ་གཞག་པར་བྱ། །དབང་པོ་སྤྱན་སྟོང་ལྡན་པ་དཀར། །ཆིབས་ནི་གླང་པོ་དཀར་པོའི་སྟེང་། །གཡས་པའི་ཕྱག་ན་རྡོ་རྗེ་སྟེ། །གཡོན་པ་རོལ་པས་གནས་པ་ཡིན། །གཤིན་རྗེ་རབ་ཏུ་སྔོ་བ་ཕྱག་གཉིས་པ། གཡས་པ་ན་དབྱུག་པ་འཛིན་པ། གཡོན་པ་སྡིགས་མཛུབ་ཅན། སྤྱན་དམར་

པོ་གསུམ་པ། དབུ་སྐྲ་དམར་སེར་གྱེན་དུ་ལངས་པ། རལ་པ་དང་སྨིན་མ་རབ་ཏུ་སེར་ཞིང་རིང་བ། རུས་པའི་རྒྱན་གྱིས་བརྒྱན་པ། མ་ཧེའི་སྟེང་ན་རོལ་པས་འདུག་པ། ཆུ་ལྷ་དཀར་པོ་ཕྱག་གཉིས་པ། ཆུ་སྲིན་གྱི་གདན་ཅན། གཡས་པ་ན་ཀླུའི་ཞགས་པ། གཡོན་རོལ་པས་གནས་པ། སྦྲུལ་གྱི་
གདེངས་ཀ་ཅན། ནོར་བདག་ལུས་ངན་སེར་པོ། ཕྱག་གཉིས་པ། གཡས་པ་ན་ཤིང་ཐོག་བི་ཛ་པཱུ་ར་འཛིན་པ། གཡོན་པ་ན་ནེའུ་ལེའི་རྐྱལ་པ་འཛིན་པ། མེ་ཏོག་གི་ཤིང་ཏ་ལའི་སྟེང་ན་འདུག་པའོ། །བདེ་བྱེད་དཀར་པོ་ཕྱག་གཉིས་པ། གླང་གི་སྟེང་ན་སྟག་གི་པགས་པའི་ཤམ་ཐབས་ཅན།
དབུ་ལ་ཐོད་པས་བརྒྱན་པ། རལ་པའི་ཅོད་པན་ཟླ་བས་བརྒྱན་པ། གཡས་པ་ན་རྩེ་གསུམ་པ། གཡོན་པའི་ཕྱག་གིས་དཀར་མོའི་ནུ་མ་ལ་རེག་པ། མགྲིན་པ་སྔོན་པོ་ཅན། སྤྱན་གསུམ་པ། དཀར་མོ་སྐུ་མདོག་སེར་མོ། ཕྱག་གཉིས་པ། གཡས་པས་བདེ་བྱེད་ལ་འཁྱུད་པ། གཡོན་པ་མེ་
ལོང་ལ་ལྟ་བའོ། །མེ་ལྷ་རལ་པ་གསུམ་པ། ཕྱག་བཞི་པ། འབར་བའི་ཕྲེང་བ་ཅན། ལྟོ་བ་རྒྱས་པ། རྒྱན་དང་བྲལ་བ། ར་ལ་ཞོན་པ། གཡས་པ་མི་འཇིགས་པ་དང་བགྲང་ཕྲེང་། གཡོན་པས་དབྱུག་པ་དང་སྤྱི་བླུགས་སོ། །བདེན་བྲལ་དྲག་པོ་ཕྱག་གཉིས་པ། གཅེར་བུ་རོའི་སྟན་ལ་འདུག་
པ། །རོལ་པའི་འདུག་སྟངས་ཀྱིས་གནས་པ། སྐྲ་གྲོལ་བ། ཐོད་པས་དབུ་ལ་བརྒྱན་པ། གཡས་པ་ན་གྲི་གུག །གཡོན་པ་ན་ཐོད་ཁྲག་གོ། །རླུང་ལྷ་སེར་པོ་རི་དགས་ལ་ཞོན་པ། ཕྱག་གཉིས་པ། བ་དན་སྔོན་པོ་གཉིས་འཛིན་པའོ། །ཟླ་བ་དཀར་པོ་འཁོར་ལོའི་སྟེང་ན། ཕྱག་
གཉིས་པ། གཡས་པས་ཀུ་མུ་ཏ་འཛིན་པ། གཡོན་པ་རོལ་པས་གནས་པ། མཛེས་པའི་གཟུགས་ཅན་ནོ། །རྟ་བདུན་གྱི་སྟེང་ན་ཉི་མ་དམར་པོ་ཕྱག་གཉིས་པ། གཡས་པ་པདྨའི་སྟེང་ན་རྡོ་རྗེ་འཛིན་པ། གཡོན་པ་པདྨའི་སྟེང་ན་ཉི་མའི་དཀྱིལ་འཁོར་འཛིན་པའོ། །ཚངས་པ་གདོང་
བཞི་པ་དཀར་པོ་ངང་པ་ལ་ཞོན་པ། རལ་པ་འཛིན་པ། ཕྱག་བཞི་པ། གཅིག་ན་པདྨ། གཡས་པ་སྐུད་པའི་ཕྲེང་བ། གཡོན་པ་ན་པདྨ་དང་སྤྱི་བླུགས་སོ། །སའི་ལྷ་མོ་སྐུ་མདོག་སེར་མོ་པདྨའི་སྟེང་ན་གཡས་པ་ན་པདྨ། གཡོན་པ་ན་རོལ་པས་གནས་པའོ། །ལྷ་མ་ཡིན་གྱི་དབང་པོ་ཐགས་

བཟངས་རིས། ཤིང་རྟའི་སྟེང་དུ་གནས་པ། ཕྱག་གཉིས་པ། གཡས་པ་ན་རལ་གྲི། གཡོན་པ་རོལ་པས་གནས་པའོ། །ཞབས་ཀྱང་རོལ་པའོ། །གནོད་སྦྱིན་དང་དྲི་ཟ་དང་ཡི་དགས་དང་། སྲིན་པོ་ལ་སོགས་པ། ཀླུ་དང་། ཀླུའི་རྒྱལ་པོ་དང་བཅས་པ་ཐམས་ཅད་རྩོལ་བས་བསྒོམ་
པར་བྱའོ། །ཕྱི་ནས་དབང་པོ་ལ་སོགས་རང་གི་ལྷའི་རྣལ་འབྱོར་གྱིས་ཡུལ་དུ་མཐོང་བར་བསམ་སྟེ། ཐོག་མར་དེ་དག་གི་ལུས་རྡུལ་ལྟ་བུར་བྱས་ལ། རང་གི་ས་བོན་ལས་འོད་ཟེར་འཕྲོས་པས། བདུད་རྩིའི་རྒྱུན་ལྟ་བུས་ལུས་བཀྲུས་ཏེ་ཡོངས་སུ་རྫོགས་པར་བསམ་མོ། །རང་རང་གི་
ལྗགས་རྡོ་རྗེའི་ཨས་མཚན་པས་དྲངས་པར་བསམ་མོ། །དེ་ལྟར་བདུད་རྩི་ལ་གསོལ་བས། སྒྲུབ་པ་པོས་ཇི་ལྟར་ཡིད་ལ་བསམས་པའི་དོན་ཐམས་ཅད་གྲུབ་པར་བསམ་མོ། །གཡོན་པ་དྲིལ་བུ་དཀྲོལ་ཞིང་། གཡས་པས་བདུག་སྤོས་བཟུང་ལ། གནས་བརྒྱད་དུ་གཡོན་པས་དྲིལ་བུ་
དཀྲོལ་བར་བྱ་སྟེ། སྔགས་འདི་བརྗོད་པར་བྱའོ། །ཨོཾ་ཨིནྡྲཱ་ཡ། སུ་པ་ཏ་ཡ་སྭཱ་ཧཱ། ཨོཾ་ཨགྣ་ཡེ་ཧ་བྱ་ཀ་བྱ་བཱ་ཧཱ་ན་ཡ་སྭཱ་ཧཱ། ཨོཾ་ཛ་མ་ཡ་པྲ་ཏ་ཨ་དྷི་པ་ཏ་ཡེ་སྭཱ་ཧཱ། ཨོཾ་་ནཻ་ཪྼྀ་ཏྱཱ་ཡ་རཀྵ་པཱ་ཏི་པ་ཏ་ཡེ་སྭཱ་ཧཱ། ཨོཾ་བ་རུ་ཎ་ཡ་ནཱ་ག་ཨ་དྷི་པ་ཏ་ཡེ་སྭཱ་ཧཱ། ཨོཾ་བཱ་ཡ་བཻ་ཨནྟ་རིཀྵ་ཙ་ར་སྭཱ་ཧཱ།
ཨོཾ་ཀུ་བེ་རཱ་ཡ་ཛཀྵ་ཨ་དྷི་པ་ཏ་ཡེ་སྭཱ་ཧཱ། ཨོཾ་ཨི་ཤཱ་ནཱ་ཡ་བྷཱུ་ཏ་ཨ་དྷི་པ་ཏ་ཡེ་སྭཱ་ཧཱ། སྟེང་དུ། ཨོཾ་སོ་མ་ཡ་ན་ཀྵ་ཏྲ་ཨ་དྷི་པ་ཏ་ཡེ་སྭཱ་ཧཱ། ཨོཾ་སཱུཪྻ་གྲ་ཧ་ཨ་དྷི་པ་ཏ་ཡེ་སྭཱ་ཧཱ། ཨོཾ་བྲཧྨ་ན་ཡེ་བེ་ཏ་ཨ་དྷི་པ་ཏ་ཡེ་སྭཱ་ཧཱ། ཨོཾ་བི་མ་ཙི་ཏྲ་ནེ་སྭཱ་ཧཱ། ཨོཾ་ཨ་ངྷྭ་ཡ་སཱུ་རེ་བྷྱ་སྭཱ་ཧཱ། སྔགས་འདི་དག་བརྗོད་
པའི་རྗེས་ལ་གཏོར་མའི་སྔགས་བརྗོད་པར་བྱའོ། །དེ་ལ་གཏོར་མའི་སྔགས་ནི་འདི་ཡིན་ཏེ། ཨོཾ་ཤྲིང་ཀཱི་མ་ཧཱུཾ་ཕཊ། ཏ་མ་ཏ་མ་ས། པུཥྤ། དྷཱུ་པ། རཀྟ། ཏ་ལ་པཱ་ཏ་ལི། ཨཥྚ་ནཱ་ག །དེ་བ། ཡཀྵ། རཀྵ་སཱ། གྲྀཧྞ་གྲྀཧྞ། ཨི་དཾ་བ་ལིཾ་ཧ་ཧ་ཧ་ཧཱུཾ་ཁཱ་ཧི་ཁཱ་ཧི། ཁ་ཁ་ཧཱུཾ་ཛ། ཕུ་ཕེཾ་མ་ཧཱ་ཨཊྚ་
ཧཱ་ས། གརྫ་གརྫ། ཀྲྀཥྞ་ཝརྞཱ་ཡ། ཕེཾ་ཕེཾ་ཧཱུཾ་སྭཱ་ཧཱ། དང་པོ་ལྟེ་བ། སྙིང་ག །ནུ་མ། མགྲིན་པ། གདོང་པ། རྣ་བ་གཡས་པ། མིག །སྤྱི་བོ། དེ་དག་ནི་གནས་བརྒྱད་དུ་ཤེས་པར་བྱའོ། །དེ་རྣམས་ནི་གཏོར་མའི་ཆོ་གའོ། །ཨོཾ་མ་ཧཱ་ཀཱ་ལ་ཧྲིཾ་ཧྲི་ཧཱུཾ་ཕཊ་སྭཱ་ཧཱ། ཉེ་བའི་སྙིང་པོའོ། །ཧྲིཿབཅོམ་

ལྡན་འདས་མེའི་སྙིང་པོའོ། །ཧྲིཾཿཉེ་བའི་སྙིང་པོའོ། །ཨོཾ་མ་ཧཱ་ཀཱ་ལཱི་ཧཱུཾ་ཧཱུཾ་ཕཊ་སྭཱ་ཧཱ། སྙིང་པོ་དང་ཉེ་བའི་སྙིང་པོའོ། །ཨོཾ་ཀཱ་ལི་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་ཀཱ་ར་ལི་ཡེ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་བཱ་རཱ་ལཱི་ཡེ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་བེ་ཏཱ་ལཱི་ཧཱུཾ་ཧཱུཾ་ཕཊ་ཕཊ་སྭཱ་ཧཱ། དེ་ནས་རས་རིས་ཀྱི་ཆོ་ག་ནི་གོ་སླའོ། །རང་
གི་ཁྱིམ་དུ་ལྷ་ལ་མཆོད་པ་བྱ་སྟེ། སྔོན་དུ་བསྙེན་པ་བྱས་པས་ནི་ལས་ཐམས་ཅད་གྲུབ་པར་འགྱུར་ལ། རྫོགས་ལྡན་དུས་ན་གཅིག་ཡིན་ཏེ། །གསུམ་ལྡན་ལ་ནི་གཉིས་འགྱུར་རོ། །གཉིས་ལྡན་ལ་ནི་གསུམ་འགྱུར་རོ། །རྩོད་ལྡན་དུས་ན་བཞི་འགྱུར་རོ། །དགོད་ཅིང་བཟླས་པ་རྩེ་ཞིང་
ཡེངས། །ཟ་ཞིང་འཁྲིག་པ་སྤྱོད་པའི་ཚེ། །དུས་རྣམས་ཀུན་ལ་བཟླས་པར་བྱ། །དེ་ཚེ་བདུད་ཀྱི་ལས་དང་བྲལ། །རྣམ་པར་རྟོག་པ་ཐམས་ཅད་ཀུན། །སྒྲ་རྣམས་ནག་པོ་ཆེན་པོར་སྒྲོགས། །ཐམས་ཅད་སྔགས་སུ་ཤེས་པར་བྱ། །ཡིད་ལ་བསམས་པའི་འབྲས་བུ་ཐོབ། །ཀུན་ལ་
འདི་ནི་མི་སྦྱིན་ཏེ། །སློབ་མའི་སྣོད་རྣམས་བརྟགས་ལ་སྦྱིན། །སྔགས་འདི་འཇིག་རྟེན་ཀུན་ན་དཀོན། །འཇིག་རྟེན་གསུམ་ན་གཅེས་པའི་མཆོག །འཁོར་བའི་རྒྱ་མཚོ་སྒྲོལ་བ་ཡི། །སྐྱེ་བ་དང་ནི་འཆི་བ་ལ། །འཁོར་བའི་འཁོར་ལོ་འཇིགས་ཤིང་ཟབ། །ཆགས་པ་ཞེ་སྡང་ཆུ་སྲིན་
འཕྱོ། །སེམས་ཀྱིས་འགྲམ་གཉིས་བདེ་བ་ལ། །ཕྲ་མ་སེར་སྣ་ཕྲག་དོག་གིས། །བྱེད་པ་ནག་པོ་ཆེན་པོ་ཡིས། །བདེ་ཆེན་སྒྱུ་མའི་གྲོང་ཁྱེར་ན། །བྱས་པ་སེམས་ཅན་ཀུན་གྱི་དོན། །བདག་གིས་བསགས་པའི་བསོད་ནམས་ཀྱིས། །ཉོན་མོངས་ཐམས་ཅད་གཅོད་པར་ཤོག །འཇིག་
རྟེན་འདས་པའི་གྲུབ་པ་འཐོབ། །དཔལ་ནག་པོ་ཆེན་པོའི་མངོན་པར་རྟོགས་པའི་རྣམ་པར་བཤད་པ། ལྷན་ཅིག་སྐྱེས་པའི་ཞབས་ཀྱི་སློབ་མ། སློབ་དཔོན་ལི་ཀ་རིའི་ཞབས་ཀྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་ཤྲཱི་ན་རེནྡྲ་བྷ་དྲ་དང་། བོད་ཀྱི་ལོ་ཙཱ་བ་ཨུ་རྒྱན་པ་རིན་ཆེན་
དཔལ་གྱིས་རི་བོ་ཆེན་པོ་སྤུ་ཏྲའི་མགུལ་དུ། བདེ་ཆེན་གླིང་གི་ཕོ་བྲང་ཆེན་པོར་བསྒྱུར་བའོ།། ༄༅༅། །རྒྱ་གར་སྐད་དུ། སྟྲཱི་པྲཛྙཱ་ཤྲཱི་མ་ཧཱ་ཀཱ་ལ་སཱ་དྷ་ནཾ་ནཱ་མ། བོད་སྐད་དུ། དཔལ་ནག་པོ་ཆེན་པོ་ཡུམ་ཅན་གྱི་སྒྲུབ་ཐབས་ཞེས་བྱ་བ། བླ་མ་དང་དཔལ་རྡོ་རྗེ་མཁའ་

འགྲོ་ལ་ཕྱག་འཚལ་ལོ། །འགྱེལ་བའི་རོ་ལ་ཞབས་མཆོག་མཉམ་པའི་སྟབས་ཀྱིས་བཞུགས་ཤིང་སྦོམ་ཐུང་དྲག་ལ་གསུས་ཁྱིམ་ཡངས། །ཀླུ་ཆེན་བརྒྱད་ཀྱིས་རྣམ་པར་བརྒྱན་ཞིང་དབུ་སྐྲ་དམར་སེར་གྱེན་བརྫེས་གྲི་གུག་ཐོད་པ་འཛིན། །ཕྲག་པར་ཤེས་རབ་མ་ཡིས་འཁྱུད་
ཅིང་ཞལ་གཅིག་དང་ལྡན་དཔལ་ལྡན་ཆོས་སྐྱོང་རྟག་པར་དགའ། །རང་བཞིན་ཤིན་ཏུ་གནག་པའི་ཁྱད་པར་འཕགས་སྐུ་སྤྱན་གསུམ་ལྡན་པས་ཁྱེད་ལ་རྟག་ཏུ་བསྲུངས། །བགེགས་རྣམས་ཐམས་ཅད་འཇོམས་དོན་དང་། །དམ་ཚིག་བསྐྱང་བར་བྱ་བའི་ཕྱིར། །ནག་པོ་ཆེན་པོའི་སྒྲུབ་པའི་
ཐབས། །མན་ངག་བརྒྱུད་པ་བཤད་པར་བྱ། །དེ་ལ་དུར་ཁྲོད་དང་ལིངྒ་གཅིག་པ་ལ་སོགས་པར་འཇམ་པའི་སྟན་ལ་འདུག་ལ། སྐད་ཅིག་གིས་སྟོང་པ་ཉིད་བསྒོམས་པའི་ངང་ལས་སྣ་ཚོགས་པདྨ་དང་ཉི་མ་ལ་ཧཱུཾ་ཡིག་ཁ་དོག་ནག་པོའོ། །དེ་ལས་གྲུབ་པའི་རྗེ་བཙུན་དཔལ་ལྡན་ནག་
པོ་ཆེན་པོ། ཞལ་གཅིག་པ། ཕྱག་གཉིས་པ། སྐུ་མདོག་ནག་པོ། སྤྱན་གསུམ་པ། མགོ་བོའི་ཕྲེང་བ་སྐེ་ལ་འཕྱང་བ། དབུ་སྐྲ་དམར་སེར་གྱེན་དུ་བརྫེས་པ། རོའི་གདན་ལ་བཞུགས་པ། མཆེ་བ་གཙིགས་པ། འཇིགས་སུ་རུང་བ། ཀླུ་བརྒྱད་ཀྱིས་རྣམ་པར་བརྒྱན་པ། སྐུ་ཐུང་བ། གསུས་ཁྱིམ་ཆེ་བ། གཟི་
བརྗིད་དང་ལྡན་པ། ཐོད་པ་ལྔ་ཡིས་ཅོད་པན་བྱས་པ། མི་བསྐྱོད་པས་དབུ་བརྒྱན་ཞིང་ཕྱག་རྒྱ་ལྔས་རྣམ་པར་བརྒྱན་པའོ། །ཕྱག་གཡས་པས་གྲི་གུག་འཛིན་པ། གཡོན་པ་ཁ་ཊྭཱཾ་ག་དང་ཐོད་པ་འཛིན་པ། ཞལ་ནས་ཁྲག་འཛག་པ། ལྗགས་འདྲིལ་བ། ནག་པོ་ཆེན་མོ་དང་སྙོམས་པར་
སྦྱོར་བར་བདག་ཉིད་བསྒོམ་པར་བྱའོ། །བཅོམ་ལྡན་འདས་མ་ནི། ས་བོན་ཧྲིཾ་ཡིག་ལས་སྐྱེས་པའི་སྐུ་མདོག་ནག་མོ། སྐུ་གཅེར་མོ་རྒྱན་དང་བྲལ་བ། དབུ་སྐྲ་དམར་སེར་གྱེན་དུ་མཛེས་པ། ཕྱག་གཡས་པས་གྲི་གུག་དང་། གཡོན་པས་ཐོད་པ་འཛིན་པས་ཡབ་ཀྱི་སྐུ་ལ་འཁྱུད་པས་བཞུགས་པའོ། །
ཤར་དུ་ས་བོན་ཀཾ་ལས་སྐྱེས་པའི་ནག་མོ་སྐུ་མདོག་ནག་མོའོ། །ལྷོར་ས་བོན་ཀཾ་ལས་བྱུང་བའི་གཙིགས་མའོ། །ནུབ་ཏུ་བཾ་ལས་བྱུང་བའི་ཕག་མོའོ། །བྱང་དུ་བེཾ་ལས་བྱུང་བའི་རོ་ལངས་མའོ། །འདི་རྣམས་ཐམས་ཅད་ཕྱག་རྣམས་གྲི་གུག་དང་ཐོད་པ་འཛིན་པ། སྐུ་གཅེར་མོ། །དབུ་སྐྲ་

དམར་སེར་གྱེན་དུ་བརྫེས་པ། པདྨ་དང་ཉི་མའི་གདན་ལ་བཞུགས་པ། སྤྱན་གསུམ་མ། རྔམ་པའི་ཞལ། སྐུ་མདོག་ནག་མོའོ། །སྙིང་གའི་པདྨ་དང་ཉི་མའི་ཧཱུཾ་གི་འོད་ཟེར་གྱི་ལྕགས་ཀྱུས་ཡེ་ཤེས་སེམས་དཔའ་སྤྱན་དྲངས་ཏེ། མངོན་པར་མཆོད་ལ། དམ་ཚིག་པ་ལ་བསྟིམ་པ་བྱས་ནས། དེ་འདིར་ནག་པོ་ཆེན་
པོ་བདག །དངོས་གྲུབ་ཐམས་ཅད་བསྒྲུབ་པར་བྱ། །འོད་གསལ་བར་ནི་རབ་ཞུགས་སོ། །བདག་ནི་རྣམ་ཀུན་ཡོངས་སུ་བཀང་། །ཞེས་སོ། །དེ་ནས་ནག་པོ་ཆེན་པོ་ལ་མཆོད་པ་ཕུལ་ནས། དེ་ལ་ལག་པ་ཐལ་མོ་སྦྱར་བ་བསྟན་ནས། ཨོཾ་ཤྲཱི་མ་ཧཱ་ཀཱ་ལ། ས་མ་ཡ། མཱ་ཏི་ཀྲཱ་མ་ཡ། ས་མ་
ཡ་རཀྵཾ་ཏུ། ཞེས་བརྗོད་པར་བྱའོ། །ལྷ་མོ་རྣམས་ལ་ཡང་རྡོ་རྗེའི་ཐལ་མོ་སྦྱར་བ་བསྟན་ནས། དེ་རྣམས་ཀྱི་མིང་བཅུག་པ་རྣམ་པ་ལྔ་པོ་ལའང་བཀླག་པར་བྱའོ། །རང་གི་འདོད་པའི་དོན་ལ་གསོལ་བ་གདབ་པར་བྱའོ་ཞེས་པ་དམ་ཚིག་གཟུང་བའོ། །དེ་ནས་དུག་དང་ཁྲག་ཆེན་དང་
ཡུངས་ཀར་རྣམས་ཀྱི་བདུག་སྤོས་ཕུལ་ནས། སྲན་མ། ཛམྦུ་ཏི་ཀ །ཆང་མེ་ཏོག །བདུག་སྤོས། ཤ་ལྔ་བདུད་རྩི་ལྔའི་གཏོར་མ་ནི། བདུད་རྩིར་བྱ་ལ། ཨོཾ་ཤྲཱིཾ་ཀྵཱིཾ་ཨི་དཾ་བ་ལཾ་གྲྀཧྞ་གྲྀཧྞ་ཧཱུཾ་ཕཊ། མ་ཧཱ་མ་ས། པུཥྤཾ། དྷཱུ་པཾ་དཱི་པ། རཀྵ། ཏ་ལ་པཱ་ཏཱ་ལེ། ཨཥྚ་ནཱ་ག །དེ་བ། ཡཀྵ། རཱཀྵ་ས། གྲྀཧྞཱ་པ་ཡ་
གྲྀཧྞཱ་པ་ཡ། ཨི་དཾ། བ་ལིཾ། ཧཱ་ཧཱ། ཧཱུཾ་ཧཱུཾ། ཁ་ཁ། ཁཱ་ཧི་ཁཱ་ཧི། ཧཱུཾ་ཛཿཕེཾ་མ་ཧཱཊྚ་ཧཱ་ས། གརྫྫ་ཡ་གརྫྫ་ཡ། ཏརྫ་ཡ་ཏརྫྫ་ཡ། ཨོཾ་ཀྲྀཥྞཱ་བརྞྞ་ཡ། ཕེཾ་ཕེཾ་ཕཊ། ཅེས་པའི་སྔགས་ཀྱིས་དབུལ་ལོ། །མངོན་པར་མཆོད་ཅིང་བསྟོད་པར་བྱའོ། །སྙིང་གར་སྔགས་བརྟན་པོར་དམིགས་པ་བྱས་ནས་
བཟླས་པར་བྱའོ། །ཨོཾ་ཤྲཱི་མ་ཧཱ་ཀཱ་ལ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། སྙིང་པོའོ། །ཨོཾ་ཤྲཱི་མ་ཧཱ་ཀཱ་ལཱ་ཡ། ཤཱ་ས་ནོ་པ་ཧཱ་རི་ཎེ། ཨེ་ཥཱ་པཥྩི་མ་ཀཱ་ལོ་ཨ་ཡཾ་ཨི་དཾ་པྲ་ཏི་ཛྙཱ། སྨ་ར་སི་ཏ་དཱ་མཱཾ། རཏྣ་ཏྲ་ཡཱ་ཡཱ་པ་ཀཱ་རི་ཎཾ། དུཥྚཱཾ་ཁ་ཁ། ཁཱ་ཧི་ཁཱ་ཧི། མ་ར་མ་ར། གྲྀཧྞ་གྲྀཧྞ། བནྡྷ་བནྡྷ། ཧ་ན་ཧ་ན། ད་ཧ་ད་ཧ།
པ་ཙ་པ་ཙ། དི་ན་མེ་ཀེ་ན་མཱ་ར་ཡ་ཧཱུཾ་ཕཊ། ཅེས་པ་གཟུངས་སྔགས་སོ། །ཨོཾ་མ་ཧཱ་ཀཱ་ལ་ཡེ་ཧཱུཾ་ཧཱུཾ་ཕཊ། ནག་པོ་ཆེན་མོའོ། །ཨོཾ་ཀཱ་ལཱི་ཡེ་ཧཱུཾ་ཧཱུཾ་ཕཊ་སྭཱ་ཧཱ། ནག་མོའིའོ། །ཨོཾ་ཀཱ་རཱ་ལི་ཡེ་ཧཱུཾ་ཧཱུཾ་ཕཊ་སྭཱ་ཧཱ། གཙིགས་མའོ། །ཨོཾ་ཝཱ་རཱ་ཧཱི་ཡེ་ཧཱུཾ་ཧཱུཾ་ཕཊ་སྭཱ་ཧཱ། ཝཱ་རཱ་ཧཱིའིའོ། །ཨོཾ་བེ་ཏཱ་ལཱི་

ཡེ་ཧཱུཾ་ཧཱུཾ་ཕཊ་སྭཱ་ཧཱ། རོ་ལངས་མའིའོ། །ཇི་སྲིད་མཚན་མ་མ་ཐོབ་ཀྱི་བར་དུ་བཟླས་པར་བྱའོ། །དེའང་དངོས་སམ་རྨི་ལམ་དུ། བུད་མེད་ནག་མོ་ཆེན་པོ་དང་། བྱ་དང་ཁྱི་ནག་པོ་དག་དང་། ཅེ་སྤྱང་རྣམས་དགའ་བ་བྱེད་པར་འགྱུར་རོ་ཞེས་པ་ནི་བསྙེན་པའི་ཆོ་གའོ། །ད་ནི་སྒྲུབ་
ཐབས་ཀྱི་ཆོ་ག་བྲི་བར་བྱ་སྟེ། འཇིགས་སུ་རུང་བའི་དུར་ཁྲོད་དུ། སྔགས་པས་ཆས་གོས་ནག་པོ་འཆང་བས། ནག་ཕྱོགས་ཚེས་བཅུ་བཞིའི་མཚན་མོ། སྟན་ནག་པོ་ལ་འདུག་ལ། བ་བྱུང་ལྔ། བདུད་རྩི། དྲི་བཟང་། མིའི་ཁྲག་དང་ཞག་གིས་བྱུགས་པའི་སྟེགས་བུ་ལ། གཞོན་ནུ་མའི་རྡུལ་གྱིས་
ཆག་ཆག་དང་ཐིག་ལེ་བྱས་ལ། དུར་ཁྲོད་ཀྱི་སོལ་བས་བྱུགས་ནས། ཆོས་འབྱུང་ནག་པོ་ལ་མེ་ཏོག་གི་ཚོམ་བུ་ལྔ་བཀོད་པར་བྱའོ། །དེའི་མདུན་དུ་སྔོན་དུ་བཤད་པའི་བདུག་སྤོས་དང་། གཏོར་མ་དང་། གཞན་ཡང་མཆོད་པའི་རྫས་རྣམས་བཤད་ནས་བསྒྲུབ་པ་བརྩམ་པར་བྱའོ། །དེ་ལ་
འཁྱིལ་པའི་སྔགས་བཟླས་པའི་ཆང་གིས་དཀྱིལ་འཁོར་ལ་གཏོར་བས་བསངས་ཤིང་རང་བཞིན་གྱིས་རྣམ་པར་དག་པར་མོས་ལ། སྔགས་བཟླས་ཤིང་། དེའི་ངང་ལས་རང་རང་གི་ས་བོན་ལས་སྐྱེས་པའི་དཔལ་ནག་པོ་ཆེན་པོ་འཁོར་དང་བཅས་པ། སྔོན་དུ་སྨྲས་པ་བཞིན་དུ་བདག་
ཉིད་རྫོགས་པར་བྱའོ། །ཛཿཧཱུཾ་བཾ་ཧོཿཞེས་པས་ཡེ་ཤེས་སེམས་དཔའ་སྤྱན་དྲངས་ལ། རབ་ཏུ་གཞུག་པ་ལ་སོགས་པ་ཕྱག་རྒྱ་དང་བཅས་པ་བྱས་ནས། མཆོད་པ་དང་གཏོར་མ་ཕུལ་ལོ། །སྔགས་ཀྱི་བཟླས་པའི་མཐར་ཐུག་པར་བྱའོ། །ཚོགས་ཀྱི་འཁོར་ལོས་ཚིམ་པར་བྱས་ཤིང་ལྷག་མ་
རྣམས་ལྷག་གཏོར་དུ་སྦྱིན་པར་བྱའོ། །དེ་ལྟར་སྔོན་དུ་འགྲོ་བ་བྱས་ནས། དེ་ནས་བཟུང་སྟེ། ཉི་མ་སོ་སོར་ཐུན་བཞིར་སྔོན་དུ་སྨྲས་པའི་ཆོ་ག་རྫོགས་པར་བྱའོ། །ཁྱད་པར་དུ་འདིར་བསྟོད་པ་དང་། བྱ་བ་ལ་བསྐུལ་བའི་ཚིག་དང་བཅས་པ་སླར་ནས་སླར་དུ་བྱའོ། །དུབ་པར་གྱུར་ན། གོས་ནག་
པོ་དཀྱིལ་འཁོར་ལ་གཡོགས་ལ། ཨོཾ་ཨཱཿཧཱུཾ་ཞེས་པས་བྱིན་གྱིས་བརླབས་ལ། ཇི་ལྟར་བདེ་བར་གནས་པར་བྱའོ། །རིམ་པ་འདི་ཡིས་ཇི་སྲིད་མཚན་མ་མ་ཐོབ་ཀྱི་བར་དུ་བསྒྲུབ་པར་བྱ་སྟེ། འདིར་མཚན་མ་ནི་རབ་ནག་པོ་ཆེན་པོའི་སྐུ་མངོན་སུམ་མམ་རྨི་ལམ་དུའམ་ཉམས་སྣང་

དུའོ། །འབྲིང་དཀྱིལ་འཁོར་ལ་འོད་ཟེར་དུ་སྣང་བའོ། །ཐ་མ་རྨི་ལམ་དུ་རང་ཉིད་གོ་བགོས་པ། མཚོན་ཆ་ཐོགས་པ། དཔུང་གི་གཙོ་བོ་བྱེད་པ། གདུག་པ་གསད་པ། མི་ཤ་ཟོས་པ་རྣམས་སོ་ཞེས་བྱ་བ་ནི་སྒྲུབ་ཐབས་ཀྱི་ཆོ་གའོ། །ལས་ལ་སྦྱོར་བ་བྲི་བར་བྱ་སྟེ། སློབ་དཔོན་ལ་གང་རྟག་ཏུ་སྡང་
བར་སེམས་པ་དང་། དཀོན་མཆོག་གསུམ་ལ་གནོད་པ་དང་། སེམས་ཅན་མང་པོ་ལ་གནོད་པར་གྱུར་པ་རྣམས་ནག་པོ་ཆེན་པོས་དེའི་ཤ་ཟ་བར་མཛོད་ཅིག །བཅད་པར་མཛོད་ཅིག །ཁྲག་བཏུང་བར་མཛོད་ཅིག །ཡང་ན་སྤྱི་བོ་ནས་ཕུག་ནས། ཏིལ་ཙམ་དུ་ཕྱེ་མར་མཛོད་ཅིག་ཅེས་པ་སྟེ།
བདག་གིས་གལ་ཏེ་བླ་མ་ལ་སོགས་པ་ལ་གནོད་པར་བྱེད་པའི་གདུག་པ་ལ། མངོན་སྤྱོད་ཀྱི་ལས་བྱ་བར་འདོད་པ་དེའི་ཚེ། དེའི་རྐང་རྗེས་ཀྱི་རྡུལ་ལུས་ཀྱི་དྲི་མར་བཅས་པ་དང་། རྡོ་དང་ལྕགས་དང་ཟངས་དང་། ཚ་བ་གསུམ་དང་། གྲོ་ཕྱེ་རྣམས་ཕྱེ་མར་བྱས་ལ་གདུག་པའི་གཟུགས་བྱས་པའི་སྙིང་
གར། །དུག་དང་། སྐེ་ཚེ་དང་། ཚོས་དང་། མཚོན་གྱིས་བསད་པའི་ཁྲག་རྣམས་ཀྱིས་མིའི་པགས་པ་ལ་འཁོར་ལོ་ནི། ལྟེ་བར་བསྒྲུབ་བྱའི་མིང་བཀོད་པའི་གཟུངས་རིང་བྲིའོ། །ཨི་དཾ་དུཥྚཱཾ་དི་ན་མེ་ཀེ་ན་མཱ་ར་ཡ་ཧཱུཾ་ཕཊ། ཅེས་པ་རྩིབས་དྲུག་ལ་བྲིའོ། །ཨོཾ་མ་ཧཱ་ཀཱ་ལི་ཡེ། ཆེ་གེ་མོ་དུཥྚཱཾ་དི་ན་མེ་
ཀེ་ན་ནཱ་ར་ཡ་ཕཊ་སྭཱ་ཧཱ། ཞེས་སོགས་ལྷ་མོ་ལྔའི་སྔགས་མུ་ཁྱུད་ལ་བྲིའོ། །དེ་སྐད་ཅིག་གིས་རང་བཞིན་གྱིས་རྣམ་པར་དག་པར་མོས་ལ། དེའི་ངང་ལས་འཁོར་ལོ་པདྨ་དང་ཉི་མ་ལ་གནས་པ་ལ། ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་དེ་བཞིན་གཤེགས་པ་ཐམས་ཅད་ཀྱི་ཐུགས་
ཀ་ནས་ཡེ་ཤེས་ཀྱི་འཁོར་ལོ་སྤྱན་དྲངས་ལ་གཞུག་པར་བྱ་ཞིང་། རབ་ཏུ་གནས་པ་དང་། མཆོད་པ་བྱས་ལ། དེ་ནས་གཟུངས་རིངས་ཀྱི་སྔགས་ལས། མཚོན་ཆ་སྣ་ཚོགས་ཐོགས་པའི་ཁྲོ་བོའི་ཚོགས་འཕྲོས་པས་བསྒྲུབ་བྱ་བཀུག་ནས། དེའི་མིང་ལ་ཛཿཧཱུཾ་བཾ་ཧོཿཞེས་པས་རབ་ཏུ་གཞུག་པ་ལ་
སོགས་པ་བྱས་ལ། གདོལ་པས་ཕྱིར་འཁལ་དུ་བཀལ་བའི་སྐུད་པས་ཕྱོགས་ནས་དཀྲིས་ཏེ་སྙིང་གར་བཅུག་པར་བྱའོ། །དེའི་སྟེང་སྤྲ་ཚིལ་གྱིས་བཀག་གོ། །དེའི་རྩ་བའི་སྒོ་ནས་ལྕགས་ཀྱི་རྩང་གིས་འཁོར་ལོ་ལ་མ་རེག་པར་བཙུགས་ནས་ལྷོ་ཕྱོགས་སུ་ཐད་ཀ་དང་མཐོན་དམན་ལ་

སོར་བཅུ་གཉིས་པའི་ཁུང་བུ་ཟུར་གསུམ་པ་ལ། དུར་ཁྲོད་ཀྱི་སོལ་བས་བྱུགས་པ་བཅུག་ལ་སྣ་ཚོགས་རྡོ་རྗེས་མནན་པར་བྱའོ། །དེ་ནས་སྔགས་པས་སྒྲུབ་ཐབས་སུ་བཤད་པའི་ཆོ་ག་དང་རྗེས་སུ་མཐུན་པར་དཔལ་ནག་པོ་ཆེན་པོའི་ང་རྒྱལ་དང་ལྡན་པས། རང་ཉིད་དྲག་པོ་ཆེན་
པོའི་ཐུགས་ལས་འཕྲོས་པའི་མེ་འདྲེས་པ་ལས། མཚོན་ཆ་ཐོགས་པའི་ཁྲོ་གཟུགས་མཐའ་ཡས་པ་འཕྲོས་པའི་ཟེར་དང་ལྡན་པས། སྙིང་པོའི་སྔགས་དང་གཟུངས་རིངས་དང་། ལྷ་མོའི་སྔགས་བཟླ་ཞིང་། ཁྲག་སྣ་ཚོགས། ཐལ་ཆེན། ཡུངས་ཀར་རྣམས་བཟུང་ལ། སྣ་ཚོགས་རྡོ་རྗེ་བསལ་ནས།
རབས་ཆད་ཀྱི་ཐོད་པར་བཅུག་པའི་དགྲ་གཟུགས་ལ། བསྒྲུབ་བྱ་རབ་ཏུ་བཀུག་པས་བཅུག་གོ། །ཁྱབ་བདག་གིས་རབ་ཏུ་བསྐུལ་བ་ལས། རྣལ་འབྱོར་མ་ལྔ་པོ་རྣམས་རོལ་པ་ཆེན་པོའི་གཟུགས་ཅན། གྲི་གུག་དང་ཐོད་པ་འཛིན་པ་རྣམས་རླུང་གི་ཤུགས་ཀྱིས་སོན་ཏེ། དེའི་ཤ་གཏུབ་པར་བྱེད།
ཁྲག་འཐུང་བར་བྱེད། རྒྱུ་མ་གཅོད་པར་བྱེད། ལྟེ་བའི་རྩ་བ་ནས་དབྱུང་བར་བྱེད། ནག་པོ་ཆེན་པོའི་ཐུགས་ཀ་ནས་འཕྲོས་པའི་ཁྲོ་བོའི་ཚོགས་རྣམས་ཀྱིས་མཚོན་ཆ་སྣ་ཚོགས་པའི་ཆར་ཕབ་པ་ལྷུང་བས་དེའི་ལུས་ཐལ་བ་བཞིན་དུ་བྱས་ཏེ། རྣམ་པར་ཤེས་པ་ནི་མི་བསྐྱོད་པའི་ཞིང་དུ་སོང་བའི་མོས་པ་
བྱ་ཞིང་། གཟུངས་སྔགས་བཟླས་སོ། །ཨོཾ་ཤྲཱི་མ་ཧཱ་ཀཱ་ལ་ཆེ་གེ་མོ་མཱ་ར་ཡ་ཧཱུཾ་ཧཱུཾ་ཕཊ། ཅེས་པ་བཟླས་སོ། །དེ་ནས་ལྷ་མོའི་སྔགས་སྤེལ་ཚིག་དང་བཅས་པས་གསད་པར་བྱའོ། །དེའི་རྗེས་སུ་སྤྲུལ་པ་རྣམས་དེ་ལ་བཅུག་ནས། གཏོར་མ་དང་མཆོད་པ་ལ་སོགས་པས་ཚིམ་པར་བྱ་ཞིང་བཟོད་པར་
གསོལ་ནས། ལིངྒ་སྣ་ཚོགས་རྡོ་རྗེ་དང་གཏོར་མས་མནན་པར་བྱའོ། །དེ་ལྟར་ཐུན་བཞིར་བསྒྲུབས་པ་ལས། འགུལ་པ་ལ་སོགས་པའི་མཚན་མ་འབྱུང་སྟེ། ནག་པོ་ཆེན་པོ་ལ་གཏོར་མ་ལ་སོགས་པས་མངོན་པར་མཆོད་ནས། དེའི་རྗེས་སུ་ལིངྒ་ལག་པ་གཡོན་པས་ལྕགས་ཀྱི་རྩང་གིས་བཟུང་ལ།
ཨོཾ་ཤྲཱི་མ་ཧཱ་ཀཱ་ལཱ་ཡ་ཆེ་གེ་མོ་མཱ་ར་ཡ་ཧཱུཾ་ཕཊ། ཅེས་གཡབ་པས་བཟླས་པ་བྱའོ། །ནག་པོ་ཆེན་པོ་ལ་སོགས་པའི་ཐུགས་ཀའི་ཡེ་ཤེས་ཀྱི་མེ། འབྲས་ཀྱི་ཕུབ་མ་ལ་དུར་ཁྲོད་ཀྱི་མེ་སྤར་བའི་རོ་མཉམ་པ་ལ་བདུག་པར་བྱའོ། །མཚན་ཕྱེད་དུ་བྱ་བ་ཞག་བདུན་གྱི་བར་དུའོ། །འོན་ཀྱང་འབྲས་ཕུབ་ཀྱི་

མེ་མ་ཤི་བར་བྱའོ་ཞེས་པའོ། །ཡང་ན་སྔོན་དུ་སྨྲས་པའི་ལིངྒ་གཏོར་མའི་དབུས་སུ་བཅུག་ནས། བསྒྲུབ་བྱའི་མིང་སྤེལ་ཚིག་ཅན་གྱིས་གཟུངས་རིངས་བཀླག་ཅིང་། དཔལ་ནག་པོ་ཆེན་པོ་ལ་གཏོར་མ་དབུལ་ལོ་ཞེས་པའོ། །ནག་ཕྱོགས་བཅུ་བཞིའི་མཚན་མོ། དྲག་པོའི་སྦྱིན་སྲེག་གིས་
བསྒྲུབ་བྱ་ལ་གཟིར་བར་བྱ་བ་སྟེ། དེ་དག་གི་ཆོ་ག་ནི་གཞན་དུ་ཤེས་སོ། །གང་ཞིག་བྱང་ཆུབ་ཐོབ་པའི་རྒྱུ་ཕྱིར་རང་སྐྱབས་སོང་བའི་བགེགས་རྣམས་མ་ལུས་འཇོམས། །གང་ཞིག་འཁོར་བར་ལས་ཀྱི་ཞགས་ལས་སེམས་ཅན་རྣམས་ནི་སྙིང་རྗེ་དམ་པ་བསྲུངས། །དེང་འདིར་རྣལ་འབྱོར་
མ་རྣམས་ཀྱིས་ནི་མཐའ་དག་འགྲོ་བའི་སྡིག་མུན་ཕུང་པོ་ཆོམ། །དཔལ་ལྡན་རྡོ་རྗེ་ནག་པོ་ཆེན་པོ་རབ་དགའི་སྙིང་པོས་དགེ་བ་ཁྱེད་ལ་སྩལ་དུ་གསོལ། །དཔལ་ནག་པོ་ཆེན་པོ་ཡུམ་ཅན་གྱི་སྒྲུབ་ཐབས་སློབ་དཔོན་འཕགས་པ་ཀླུ་སྒྲུབ་ཞབས་ལས་བྱུང་བ་རྫོགས་སོ།། །།རྒྱ་གར་ཤར་
ཕྱོགས་ཀྱི་པཎྜི་ཏ་ཤྲཱི་བ་ན་རཏྣའི་ཞལ་སྔ་ནས་དང་ཆོས་འཁོར་ལོ་ཙཱ་བ་འཇམ་དཔལ་ཡེ་ཤེས་ཀྱིས་བསྒྱུར་བའོ།། ༄༅༅། །རྒྱ་གར་སྐད་དུ། ཤྲཱི་མ་ཧཱ་ཀཱ་ལ་སཱ་དྷ་ནཾ་ནཱ་མ། བོད་སྐད་དུ། དཔལ་ནག་པོ་ཆེན་པོའི་སྒྲུབ་ཐབས་ཞེས་བྱ་བ། དཔལ་ལྡན་ཁྲག་འཐུང་འགྲོ་བའི་མགོན། །ལྷ་མོ་དང་
བཅས་འཁོར་ལོ་ལ། །བཏུད་དེ་ནག་པོ་ཆེན་པོ་ཡི། །སྒྲུབ་པའི་རིམ་པ་བྲི་བར་བྱ། །དབང་གིས་སྨིན་བྱས་དམ་ཚིག་ལྡན། །བླ་མ་ལ་གུས་སྙིང་བརྩེ་གཏོང་། །ཤེས་རབ་བཟོད་ལྡན་བརྩོན་འགྲུས་ཆེ། །སྒྲུབ་ལ་དཔའ་བའི་སྔགས་པ་ཡིས། །ཡིད་འོང་དབེན་པའི་གནས་དག་གམ། །
རི་བོ་དུར་ཁྲོད་མ་མོ་དང་། །གཤིན་རྗེ་འཇིགས་སུ་རུང་བ་ཡི། །གནས་སུ་ནག་པོ་བསྒྲུབ་པར་བྱའོ། །མཎྜལ་མཆོད་དང་གཏོར་མ་བཤམ། །རྟེན་བཤམས་བདེ་བའི་སྟན་འདུག་སྟེ། །རང་གི་ལྷ་ཡི་རྣལ་འབྱོར་དུ། །ཞུགས་ཏེ་ཆོ་ག་རྫོགས་པ་དང་། །བླ་མ་ལ་སྨོད་བསྟན་ལ་
སྡང་། །དེ་དག་རབ་ཏུ་ཞི་བྱའི་ཕྱིར། །བདག་གིས་ནག་པོ་བསྒྲུབ་པར་བྱའོ། །སྙམ་དུ་བློ་ནི་བསྐྱེད་བྱ་སྟེ། །ཕྱི་དང་ནང་གི་དངོས་པོ་རྣམས། །སྐད་ཅིག་སྟོང་པར་བསྒོམ་པར་བྱ། །མདུན་དུ་པདྨ་ཉི་མ་ལ། །གནས་པའི་ཡི་གེ་ཧཱུཾ་ནག་པོ། །བལྟས་ཏེ་དེ་ཡི་འོད་ཟེར་གྱིས། །

གདུག་པ་མ་ལུས་ཞི་བྱས་ཏེ། །འགྲོ་ཀུན་བདེ་བ་ལ་བཞག་ནས། །སླར་འདུས་ཧཱུཾ་ལ་ཐིམ་གྱུར་ཏེ། །ཡི་གེ་གྱུར་པས་སྐད་ཅིག་གིས། །བྱ་རོག་མིང་ཅན་ནག་པོ་ཆེ། །ཞལ་གཅིག་ཕྱག་བཞི་གཡས་པ་ན། །དང་པོ་བེ་ཙའི་འབྲས་བུ་དམར། །གཉིས་པ་རལ་གྲི་འཛིན་
པའོ། །གཡོན་གྱི་དང་པོ་ཁྲག་ཆེན་གྱིས། །རབ་ཏུ་གང་བའི་ཐོད་པ་འཛིན། །གཉིས་པ་ཁ་ཊྭཱཾ་འཛིན་པའོ། །སྟག་གི་པགས་པས་སྨད་དཀྲིས་ཤིང་། །དབུ་སྐྲ་ཨག་ཚོམ་སྨིན་མ་སེར། །སྤྱན་གསུམ་མཆེ་གཙིགས་འཇིགས་པར་བྱེད། །ཐོད་པ་རིན་ཆེན་སྦྲུལ་གྱིས་བརྒྱན། །སྣ་ཚོགས་
པདྨ་ཉི་སྟེང་དུ། །དཔའ་བོའི་འདུག་སྟངས་ཀྱིས་གནས་པའོ། །དེ་ནས་རང་གི་ཐུགས་ཀ་ཡི། །ས་བོན་ལས་འཕྲོས་འོད་ཟེར་གྱིས། །ཡེ་ཤེས་སེམས་དཔའ་སྤྱན་དྲངས་ལ། །མཆོད་ལ་ཛཿཧཱུཾ་བཾ་ཧོཿཡིས། །དགུག་གཞུག་བསྟིམ་དང་མཉེས་པར་བྱ། །སྤྱི་བོ་མགྲིན་པ་སྙིང་ག་རུ། །
པདྨ་ཉི་མའི་གདན་སྟེངས་སུ། །ཧཱུཾ་དང་ཨཱཿདང་ཨོཾ་གསུམ་གྱིས། །སྐུ་གསུང་ཐུགས་གསུམ་བྱིན་གྱིས་བརླབས། །ལེགས་མཆོད་བསྟོད་དེ་དེ་ནས་ནི། །ཨོཾ་མ་ཧཱ་ཀཱ་ལ་ཧཱུཾ་ཕཊ། ཅེས་བྱ་བའི་སྔགས་ཅི་ནུས་པར། མན་ངག་བཞིན་དུ་བཟླས་པར་བྱ། །སྐྱོ་ན་གཏོར་མ་བྱིན་བརླབས་ཏེ། །
རང་སྔགས་ཀྱིས་ནི་བསྔོ་བར་བྱའོ། །ལེགས་པར་མཆོད་ལ་དེ་ཉིད་ཀྱི། །རྐང་པ་བརྒྱད་པས་བསྟོད་པར་བྱ། །ཞི་རྒྱས་དབང་དང་མངོན་སྤྱོད་ཀྱི། །ལས་རྣམས་གང་ཡིན་དེ་རྩོལ་བྱ། །ཡེ་ཤེས་གཤེགས་ལ་དམ་ཚིག་བསྡུ། །བློ་ལྡན་མཚན་མ་མ་བྱུང་གི །བར་དུ་འབད་དེ་བསྒྲུབ་
པར་བྱ། །མཚན་མ་བྱུང་ནས་བླ་མ་ཡི། །མན་ངག་བཞིན་དུ་ལས་ལ་སྦྱོར། །བླ་མའི་གསུང་གི་རྗེས་འབྲངས་ཏེ། །བདག་གིས་ནག་པོ་སྒྲུབ་པའི་ཐབས། །བྲིས་པའི་བསོད་ནམས་ཐོབ་པ་དེས། །བགེགས་ཞི་ཐུབ་དབང་ཐོབ་པར་ཤོག །དཔལ་ནག་པོ་ཆེན་པོ་སྒྲུབ་པའི་ཐབས་
འཕགས་པ་ཀླུ་སྒྲུབ་ཀྱིས་མཛད་པ་རྫོགས་སོ།། །།པཎྜི་ཏ་ཨ་བྷ་ཡཱ་ཀ་ར་དང་། ལོ་ཙཱ་བ་ཙ་མི་ཆེན་པོས་བསྒྱུར་བའོ།། ༄༅༅། །རྒྱ་གར་སྐད་དུ། ཤྲཱི་མ་ཧཱ་ཀཱ་ལ་བི་ཏ་ར་སཱ་དྷ་ནཾ་ནཱ་མ། བོད་སྐད་དུ། དཔལ་མགོན་པོའི་ནང་སྒྲུབ་ཅེས་བྱ་བ། དཔལ་ནག་པོ་ཆེན་པོ་ལ་ཕྱག་

འཚལ་ལོ། །ནག་པོ་བསྒྲུབ་འདོད་རྣལ་འབྱོར་གྱིས། །ཡིད་དང་མཐུན་པའི་དབེན་གནས་སུ། །རྟེན་དང་མཆོད་པའི་རྫས་བཤམས་ཏེ། །དང་པོ་བྱང་ཆུབ་སེམས་བསྐྱེད་ལ། །མདུན་དུ་སྐད་ཅིག་འདབ་བརྒྱད་སྟེང་། །དཔལ་ལྡན་ནག་པོ་ཆེན་པོ་ལ། །ལྷ་མོ་བརྒྱད་ཀྱིས་བསྐོར་བ་ཡང་། །
བྱ་རྒོད་མགོ་དང་ཁྱུང་གི་མགོ། །ཁྭ་ཡི་གདོང་དང་འུག་པའི་གདོང་། །དེ་བཞིན་ཕྱོགས་ཀྱི་ལྷ་མོའོ། །ཕག་གི་གདོང་དང་ཁྱི་གདོང་མ། །སྤྱང་ཀི་སྟག་གི་གདོང་ཅན་བཞི། །མཚམས་ཀྱི་ལྷ་ནི་ཤེས་པར་བྱ། །ཀུན་ཀྱང་ནག་མོ་གྲི་ཐོད་ཐོགས། །པདྨ་རོ་དང་ཉི་སྟེང་ན། །ཞབས་
གཉིས་བརྐྱང་བསྐུམ་ཚུལ་དུ་བཞུགས། །དེ་ལ་བདུན་པོ་རྣམ་དག་གིས། །མཆོད་ལ་གསོལ་བ་བཏབ་བྱས་ལ། །རང་བཞིན་གནས་སུ་གཤེགས་སུ་གསོལ། །རང་ཉིད་ཡི་དམ་གསལ་བའི་མདུན། །སྟོང་པའི་ངང་ལས་པཾ་དང་རཾ། །པདྨ་ཉི་མའི་སྟེང་དུ་ཧཱུཾ། །འཕྲོས་འདུས་
གྲི་གུག་ཧཱུཾ་གིས་མཚན། །འོད་འཕྲོས་དོན་བྱས་སླར་འདུས་ནས། །ས་བོན་ཕྱག་མཚན་གྱུར་པ་ལས། །དཔལ་ལྡན་མགོན་པོའི་སྐུར་གྱུར་ཏེ། །ཞལ་གཅིག་སྤྱན་གསུམ་སྨིན་མ་འཁྱོག །ཁྲོ་གཉེར་ཞལ་གདངས་མཆེ་བ་གཙིགས། །དབུ་སྐྲ་དམར་སེར་གྱེན་དུ་འབར། །ཕྱག་བཞི་
གཡས་གཉིས་གྲི་གུག་དང་། །རལ་གྲི་འབར་བ་འཛིན་པའོ། །གཡོན་གྱི་ཕྱག་གཉིས་ཐོད་ཁྲག་དང་། །མདུང་རྩེ་གསུམ་པ་བསྣམས་པའོ། །ཞབས་གཉིས་ཕྱེད་སྐྱིལ་འགྱིང་བག་ཅན། །སྟག་ཤམ་མགོ་ཕྲེང་དོ་ཤལ་བྱས། །ཕྱག་རྒྱ་ལྔ་དང་ལྡན་པ་ལ། །ཀླུ་ཆེན་བརྒྱད་
ཀྱིས་སྐུ་ལ་བརྒྱན། །དེ་ལྟར་དམ་ཚིག་གསལ་བསྐྱེད་ལ། །ཡེ་ཤེས་སྤྱན་དྲངས་མཆོད་ཅིང་བསྟོད། །ཛཿཧཱུཾ་བཾ་ཧོཿས་དགུག་གཞུག་བྱ། །སྐུ་གསུང་ཐུགས་གསུམ་བྱིན་གྱིས་བརླབ། །ཨོཾ་བཛྲ་ཀ་ཝཱུ་བ་མ་ཧཱ་ཀཱ་ལ་ཧཱུཾ་ཧཱུཾ་ཕཊ། མན་ངག་བཞིན་དུ་བཟླས་པར་བྱ། །སྐྱོ་ན་གཏོར་མ་
ཕུལ་བྱས་ལ། །མཆོད་བསྟོད་གསོལ་བཏབ་ཡེ་ཤེས་གཤེགས། །དམ་ཚིག་བསྡུས་ལ་དགེ་བ་བསྔོ། །དགེ་རྩས་བར་ཆད་ཀུན་བསལ་ནས། །བསྟན་པ་དར་ཞིང་རྒྱས་པར་ཤོག །མགོན་པོ་བྱ་རོག་གདོང་ཅན་གྱི་ནང་སྒྲུབ་རྫོགས་སོ།། །།པཎྜི་ཏ་ཨ་བྷ་ཡཱ་ཀ་ར་དང་། ལོ་ཙཱ་

བ་ཙ་མི་ཆེན་པོས་བསྒྱུར་བའོ།། ༄༅༅། །རྒྱ་གར་སྐད་དུ། ཤྲཱི་མ་ཧཱ་ཀཱ་ལ་སཱ་དྷ་ནཾ་ནཱ་མ། བོད་སྐད་དུ། དཔལ་ནག་པོ་ཆེན་པོའི་སྒྲུབ་ཐབས་ཞེས་བྱ་བ། དཔལ་ཧེ་རུ་ཀ་ལ་ཕྱག་འཚལ་ལོ། །བླ་མ་ལ་གུས་སྙིང་རྗེར་ལྡན། །ཚུལ་ཁྲིམས་སོགས་ལྡན་
བསྡུ་དངོས་བཞིས། །སེམས་ཅན་དོན་བྱེད་བརྩོན་འགྲུས་ལྡན། །རྟག་ཏུ་བསྒྲུབ་ལ་དགའ་བ་ཡིས། །སློབ་དཔོན་ལ་སྨོད་བསྟན་ལ་སྡང་། །དམ་ཚིག་ལ་འཕྱ་མཚམས་མེད་བྱེད། །དེ་རྣམས་བསྒྲལ་བར་བྱ་བ་ཡིན། །གཞན་དུ་དམ་ཚིག་ཉམས་པར་འགྱུར། །དང་པོར་བདག་ཉིད་ཡི་དམ་ལྷ། །
རིམ་པ་ཐམས་ཅད་རྫོགས་བསྒོམས་ལ། །བསྟན་པ་བསྲུང་ཕྱིར་ནག་པོ་མཆོད། །བྲག་སྟེང་དཀྱིལ་འཁོར་གྲུ་གསུམ་གནས། །ཧཱུཾ་སྐྱེས་འབར་བ་ནག་པོ་ཆེ། །གྲི་དང་ཀ་པཱ་ལ་ལག་ན་འཛིན། །མགོ་པོའི་ཕྲེང་བས་དོ་ཤལ་བྱས། །མཆེ་གཙིགས་གཟུགས་ཐུང་གཟི་བརྗིད་ཆེ། །ཁ་ནས་ཁྲག་
འཛག་ཁྲོས་ཙམ་ན། །རང་གི་ཡན་ལག་ཤ་གཅོད་བྱེད། །ཁྲག་གི་རྒྱུན་ཡང་འཛག་པར་བྱེད། །དཀོན་མཆོག་གསུམ་ཁྲོ་བླ་མ་བརྙས། །མཚམས་མེད་ལ་སོགས་བྱེད་རྣམས་ཀྱི། །དེ་རྣམས་མགོ་ནས་ཏིལ་ཙམ་ཟ། །དེ་ལྟར་གསལ་བར་བྱས་ནས་ནི། །རང་གི་གནས་ནས་སྤྱན་འདྲེན་
བྱ། །རྡོ་རྗེ་འཆང་གི་སྤྱན་སྔ་རུ། །ཇི་ལྟར་ཁས་བླངས་དམ་བཅས་ལྟར། །བྱིན་གྱིས་བརླབས་པའི་གནས་འདི་རུ། །དྲག་པོའི་ལས་ལ་སྤྱན་འདྲེན་ན། །མྱུར་དུ་འོངས་ནས་དེ་ལ་ཐིམ། །མོན་སྲན་གྲེའུ་དང་འཛམ་བུའི་ཏི། །མེ་ཏོག་བདུག་སྤོས་ཤ་ལྔ་དང་། །བདུད་རྩི་ལྔ་སྦྱར་
གཏོར་མ་སྦྱིན། །ཨོཾ་མ་ཧཱ་ཀཱ་ལཱ་ཡ་ཤཱ་ས་ནོ་བ་ཧཱ་རི་ཎེ། ཨེ་ཥཱ་པཤྩི་མ་ཀཱ་ལོ་ཨ་ཡཾ་ཨི་དཾ། རཏྣ་ཏྲ་ཡཱ་ཡཱ་པ་ཀ་རི་ཎཱཾ། ཡ་དི་པྲ་ཏཱི་ཛྙཱ་སྨ་ར་སི་ཏ་དཱ་ཨི་དཾ་དུཥྚཱཾ་ཁ་ཁ་ཁཱ་ཧི་ཁཱ་ཧི། མ་ར་མ་ར། གྲྀཧྞ་གྲྀཧྞ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། དི་ན་མེ་ཀེ་ན་མཱ་ར་ཡ་ཧཱུཾ་ཕཊ། ནག་པོ་ཁྱོད་
ཀྱིས་སྔོན་བཅོམ་ལྡན་འདས་ཀྱི་སྤྱན་སྔར་ཁས་བླངས་པ་བཞིན་དུ་ངས་ཅི་བཅོལ་བའི་ལས་གྱིས་ཤིག །དེ་ལྟར་མ་བྱས་ན་མགོ་ཨརྫ་ཀའི་དོག་པ་ལྟར་འགས་སོ། །དམ་ཆུ་བླུད། ལག་ཏུ་རྡོ་རྗེ་སྦྱིན། དེ་ནས་བསྟོད་པ། ཧཱུཾ་སྲིན་པོའི་གཟུགས་ཀྱིས་གདུག་པ་ཅན། །ཚར་གཅོད་བྱང་ཆུབ་

སེམས་དཔའ་སྟེ། །གྲོང་ཁྱེར་སུམ་བརྩེགས་འཇིག་བྱེད་པ། །གཏུམ་པོ་ཁྱོད་ལ་བདག་བསྟོད་དོ། །མདོག་ནག་གཟུགས་ཐུང་གཟི་བརྗིད་ཅན། །གདུག་པ་ཚར་གཅོད་གྲི་གུག་གཡས། །གཡོན་པ་གདུག་པའི་ཁྲག་བཀང་སྣོད། །ཐོད་ཕྲེང་ཅན་ལ་བདག་བསྟོད་དོ། །ཁྲོས་པས་ཞབས་
བརྡབས་ས་གཞི་གཡོས། །འཇིགས་པའི་གད་མོས་རི་རབ་བསྒྱེལ། །དམ་ཚིག་ཉམས་པའི་སྙིང་འབྱིན་པ། །དམ་ཚིག་ཅན་ལ་བདག་བསྟོད་དོ། །དེ་ནས་བསྐུལ་བ། འདས་དང་མ་བྱོན་ད་ལྟར་གྱི། །བསྟན་པ་བསྲུང་བར་སེམས་བསྐྱེད་པ། །ནག་པོ་ཁྱོད་ནི་ཡིན་པ་སྟེ། །གདུག་པ་ཚར་
གཅོད་འཇིགས་པའི་གཟུགས། །རལ་པ་ནག་པོ་གྱེན་དུ་གཡེངས། །སྟེང་གི་ལྷ་ཚོགས་འཇིགས་པར་བྱེད། །སྤྱན་བགྲད་ལྗགས་འདྲིལ་བར་གྱི་ལྷ་གདོན་སྡིགས། །གཡས་པ་གྲི་གུག་གནོད་སེམས་ཅན་ལ་སྡང་། །གཡོན་པས་ཐོད་པ་གནོད་སེམས་ཁྲག་བཀང་གསོལ། །ཞབས་
བརྡབས་གནོད་སེམས་ཅན་གྱི་ལུས་ལ་ཉེད། །གང་ཞིག་དཀོན་མཆོག་གསུམ་ཁྲོ་དང་། །བླ་མ་བརྙས་བྱེད་སེམས་ཅན་འཚེ། །བདག་གིས་བསྒོ་བ་ཀུན་ཁུག་ལ། །ལིངྒ་འདི་ལ་མྱུར་དུ་ཆུག །འདི་ཡི་ཤ་ཟོ་ཁྲག་ལ་འཐུང་། །རུས་པ་ཀླད་པ་ནང་གྲོལ་ཟོ། །རིགས་རྒྱུད་རྩད་ནས་
ཆོད་ལ་ཤོག །མཛའ་བ་ཀུན་དང་ཕྲོལ་ལ་ཤོག །བདག་གིས་བསྒོ་བ་མ་ཉན་ན། །ནག་པོ་ཁྱོད་ནི་ཉམས་པར་འགྱུར། །ཞེས་བསྐུལ། གོང་གི་སྔགས་སམ་ཡང་ན། ཨོཾ་མ་ཧཱ་ཀཱ་ལ་ཆེ་གེ་མོ་ཧཱུཾ་ཕཊ། སྟོང་རྩ་བརྒྱད་བཟླས། དེ་ནས་སྦྱོར་བ་བཤད་བྱ་བ། །ཚ་བ་གསུམ་ལ་གཟུགས་བརྙན་
བྱ། །དུག་དང་སྐེ་ཚེ་ལན་ཚྭ་དང་། །ཚྭ་གསུམ་སྨྱོ་བྱེད་སྲིན་ལག་ཁྲག །གྲོ་གར་སྔགས་སྤེལ་སྙིང་གར་གཞུག །གདུག་པའི་ཚེར་མས་ལུས་ལ་དགང་། །དུར་ཁྲོད་མེ་ལ་གདུངས་བཟླས་ན། །དེ་མ་ཐག་ཏུ་མེད་པར་འགྱུར། །ཡང་ན་རབས་ཆད་ཐོད་པ་རུ། །བཅུག་ལ་དགྲ་ཡི་
དུར་བཅུག་ན། །ཐེ་ཚོམ་མེད་པར་གང་བསྒོ་འགྲུབ། །ཀླུ་ཡོད་གནས་སུའང་གང་བསྒོ་འགྲུབ། །ནག་པོའི་འཕན་ནམ་རྒྱལ་མཚན་ལ། །སྔགས་དང་མིང་སྤེལ་བྱས་ནས་ནི། །མཆོད་རྟེན་ལ་བཏགས་གང་བསྒོ་འགྲུབ། །གང་འདོད་ཡུལ་གྱི་ལྷ་རྟེན་ནས། །ནག་པོ་བསྐྱེད་ལ་

གཏོར་མ་སྦྱིན། །གོང་གསུངས་བཟླས་པ་ཚང་བར་བྱ། །ཡུལ་དུ་སེར་བ་མྱུར་དུ་ཕོབ། །བསྒོ་ན་མྱུར་དུ་འབེབས་པར་བྱེད། །དེ་རུ་གཏོར་མ་གཏེར་དུ་སྦ། ཡུལ་ལྷའི་སྟེང་དུ་ནག་པོ་བཞག །ནག་པོའི་སྔགས་བཟླས་ཕུར་བུ་ནི། །ཡུལ་ལྷའི་སྙིང་གར་གདབ་པར་བྱ། །དེས་ནི་
ཐེ་ཚོམ་མེད་པར་འགྲུབ། །ཁྱི་ཡི་ཐོད་པ་ཤ་མེད་ལ། །སྔགས་དང་མིང་སྤེལ་དགྲ་ཁྱིམ་སྦ། །དེ་ཡིས་ཀྱང་ནི་གང་བསྒོ་འགྲུབ། །ཐལ་བའམ་ཡུངས་ཀར་གང་ལ་ཡང་། །བཟླས་གཏོར་སེར་སོགས་འཆད་པར་བྱེད། །ནག་པོ་སྔགས་ཀྱི་སྦྱོར་བ་ཡི། །ཡོན་ཏན་བརྗོད་པར་མི་ནུས་སོ། །ཞེས་
གསུངས་སོ། །དཔལ་ནག་པོ་ཆེན་པོའི་སྒྲུབ་ཐབས་སློབ་དཔོན་བྲམ་ཟེ་མཆོག་སྲེད་ཀྱིས་མཛད་པ་རྫོགས་སོ།། ༄༅༅། །རྒྱ་གར་སྐད་དུ། ཨ་དྷིཥྛཱ་ན་མ་ཧཱ་ཀཱ་ལ་སཱ་དྷ་ནཾ་ནཱ་མ། བོད་སྐད་དུ། བྱིན་གྱིས་བརླབས་པའི་ནག་པོ་ཆེན་པོའི་སྒྲུབ་ཐབས་ཞེས་བྱ་བ། མྱུར་མཛད་སྤྱན་རས་
གཟིགས་ལ་ཕྱག་འཚལ་ལོ། །ཞབས་གདུབ་དང་བཅས་བི་ནཱ་ཡ་ག་མནན། །ནག་པོ་ཆེན་པོ་སྟག་གི་ཤམ་ཐབས་ཅན། །ཕྱག་དྲུག་སྦྲུལ་གྱི་རྒྱན་གྱིས་རྣམ་པར་བརྒྱན། །གཡས་པ་ཕྲེང་བ་བར་མ་གྲི་གུག་འཛིན། །ཐ་མ་ཌཱ་མ་རུ་ནི་དྲག་ཏུ་འཁྲོལ། །གཡོན་པ་ཐོད་པ་དང་ནི་མདུང་
རྩེ་གསུམ། །དེ་བཞིན་ཞགས་པ་བཟུང་ནས་འཛིན་པར་བྱེད། །དྲག་པོའི་ཞལ་ལ་མཆེ་བ་རྣམ་པར་གཙིགས། །སྤྱན་གསུམ་དྲག་པོ་དབུ་སྐྲ་གྱེན་དུ་འབར། །དཔྲལ་བར་སིནྡྷུ་ར་ཡིས་ལེགས་པར་བྱུགས། །རིན་ཆེན་ཐོད་སྐམ་ལྔ་ཡིས་དབུ་ལ་བརྒྱན། །སྤྱི་བོར་མི་བསྐྱོད་པ་ཡིས་རྒྱས་
བཏབ་བརྟན། །ཁྲག་འཛག་མི་མགོ་ལྔ་བཅུའི་དོ་ཤལ་ཅན། །སྣ་ཚོགས་པདྨ་ཉི་ཟླའི་དཀྱིལ་འཁོར་སྟེང་། །ཡེ་ཤེས་མེ་དཔུང་འབར་བའི་དབུས་ན་བཞེངས། །ཤིང་ལས་བྱོན་ནས་གཏོར་མ་ལེན་པར་དམིགས། །ཨོཾ་བཛྲ་མ་ཧཱ་ཀཱ་ལ་ཀྵིཾ་ཀྵེ་ཏྲ་བིགྷྣཱན་བི་ན་ཡ་ཀ་ཧཱུཾ་ཧཱུཾ་ཕཊ་ཕཊ་སྭཱ་ཧཱ།
ལན་བདུན་བརྗོད་ལ་གཏོར་མ་གཏང་། བྱིན་གྱིས་བརླབས་པའི་ནག་པོ་ཆེན་པོའི་སྒྲུབ་ཐབས་སློབ་དཔོན་ཆེན་པོ་ཤ་བ་རི་པས་མཛད་པ་རྫོགས་སོ།། ༄༅༅། །རྒྱ་གར་སྐད་དུ། ཤྲཱི་མ་ཧཱ་ཀཱ་ལ་ཨ་བྷི་ཥིཉྩ་བི་དྷིཿ། བོད་སྐད་དུ། དཔལ་ནག་པོ་ཆེན་པོའི་དབང་བསྐུར་བའི་ཆོ་ག།

དཔལ་ཧེ་རུ་ཀ་ལ་ཕྱག་འཚལ་ལོ། །སྲུང་མའི་མགོན་པོ་འཁོར་དང་བཅས། །བླ་མའི་མཆོག་ལ་ཕྱག་འཚལ་ནས། །དཔལ་ལྡན་ནག་པོ་ཆེན་པོ་ཡི། །དབང་བསྐུར་ཆོ་ག་བྲི་བར་བྱ། །སློབ་དཔོན་དབང་དང་ལྡན་པ་ཡིས། །སློབ་མའི་ནུས་པ་བསྐྱེད་ཕྱིར་རོ། །དེ་ལ་དོན་ནི་གསུམ་ཡིན་
ཏེ། །བསྙེན་དང་དངོས་གཞི་རྗེས་ཉིད་དོ། །དེ་ལ་བསྙེན་པ་ནི་སློབ་དཔོན་མཚན་ཉིད་དང་ལྡན་པ་ལ། སློབ་མ་སྣོད་དང་ལྡན་པས་མཆོད་པ་དང་གཏོར་མ་དང་ཡོན་དབུལ་བ་རྣམས་རྫོགས་པར་བྱས། སློབ་དཔོན་གྱིས་བདག་ལ་དཔལ་མགོན་པོ་ནག་པོའི་དཀྱིལ་འཁོར་དུ་འཇུག་པའི་མཐུ་
དང་། དངོས་གྲུབ་ཀྱི་དབང་བསྐུར་བ་དང་། རྗེས་སུ་གནང་བ་སྩལ་དུ་གསོལ་ཞེས་ལན་གསུམ་བརྗོད་དོ། །དེ་ནས་སློབ་དཔོན་གྱིས་གནང་བ་བྱིན་ནས། གནས་དབེན་པར་དཀྱིལ་འཁོར་ལ་སོགས་པ་དང་། ཚོགས་ཀྱི་འཁོར་ལོ་ལ་སོགས་པའི་དམ་རྫས་ཚང་བར་བཀོད་ལ། ནག་པོ་ཆེན་
པོ་བསྐྱེད་པར་བྱ་བ་ལ་སོགས་པ་བྱས་ཏེ། སྔགས་ཉིས་སྟོང་ངམ་འབུམ་ཕྲག་བརྗོད་པར་བྱའོ། །དེ་ནས་དངོས་གཞིའི་ཆོ་ག་ལ་འཇུག་པར་བྱ་སྟེ། ས་གཟུང་བ་དང་། སྟ་གོན་དང་། དཀྱིལ་འཁོར་དུ་འཇུག་ཅིང་དབང་བསྐུར་བར་བྱའོ། །དཀྱིལ་འཁོར་གྱི་ཁང་པར་ས་བསླང་བ་ལ་སོགས་པ་
བྱས་ནས་ཆག་ཆག་བཏབ་སྟེ། བགེགས་ལ་བཀའ་བསྒོ་བ་བྱས་ནས། བགེགས་ཀྱི་རྒྱལ་པོ་རྣམས་ལ། དཔལ་རྡོ་རྗེ་ནག་པོ་ཆེན་པོས་ཕུར་པ་བཏབ་ལ། སྲུང་བའི་འཁོར་ལོ་བསྒོམ་པར་བྱའོ། །དེ་ནས་དཀྱིལ་འཁོར་དང་། ལྷ་དང་། བུམ་པ་དང་། སློབ་མ་རྣམས་སྟ་གོན་དུ་གནས་པར་བྱ་སྟེ།
དཔལ་ནག་པོ་ཆེན་པོའི་དཀྱིལ་འཁོར་གྱི་ལྷ་ནམ་མཁའ་ལ་བཀུག་སྟེ། མཆོད་པ་ལ་སོགས་པ་བྱས་ནས། དཔལ་ལྡན་མགོན་པོ་ནག་པོ་ཆེ། །སྔོན་གྱི་དམ་ཚིག་དྲན་བྱོས་ལ། །བདག་དང་སློབ་མའི་དོན་དུ་ནི། །ས་འདིར་བྱོན་པར་མཛད་དུ་གསོལ། །ཅེས་བརྗོད་ལ་བཞུགས་སུ་གསོལ་
ལོ། །དེ་ནས་བུམ་པ་མཚན་ཉིད་དང་ལྡན་པར་སྨན་ལ་སོགས་པ་བླུགས་ནས། ནག་པོ་ཆེན་པོ་ནང་དུ་བསྐྱེད་པ་ལ་སོགས་པ་བྱས་ཏེ། ཨོཾ་ཤྲཱི་མ་ཧཱ་ཀཱ་ལ་ཆེ་གེ་མོ་རཀྵ་རཀྵ་ཧཱུཾ་ཕཊ། བརྒྱ་རྩ་བརྒྱད་དམ། སྟོང་ངམ། ཁྲིའི་བར་དུ་བརྗོད་པའི་བུམ་པ་ལྔ་དག་དཀྱིལ་འཁོར་གྱི་ནང་དུ་

དགྲམ་མོ། །ལས་ཐམས་ཅད་པའི་བུམ་པ་ནི་ཤར་ཕྱོགས་སུ་གཞག་གོ། །དེ་ནས་སློབ་མ་རྣམས་ཁྲུས་བྱས་ཏེ། བླ་མ་དང་དཀྱིལ་འཁོར་གྱི་ལྷ་ལ་ཕྱག་དང་མཆོད་པ་བྱས་ནས། ཁ་བཤལ་ཞིང་སོ་ཤིང་དོར་ལ། ཨོཾ་ཨཱཿཧཱུཾ་གནས་གསུམ་དུ་བསམས་ཏེ་མཆོད་ཅིང་སྲུང་
སྐུད་ཀྱིས་བསྲུངས་ལ། ཀུ་ཤའི་ཆུན་པོ་སྔས་སྟན་དུ་སྦྱིན་པར་བྱའོ། །དེ་རྣམས་ཀྱི་སྔགས་ནི། ཨོཾ་མ་ཧཱ་ཀཱ་ལ་ཨོཾ་ཨཱཿཧཱུཾ་ཨ་དྷིཥྛཱ་ན་ཞེས་པའོ། །དེ་ནས་དཀྱིལ་འཁོར་བདུད་རྩི་ལྔས་བྱུགས་ལ་འཁོར་ལོ་རྩིབས་བརྒྱད་པའི་ཐིག་བཏབ་ལ། ཚོན་རྩི་ལྔ་ལ་རིགས་ལྔའི་ས་བོན་བསམས་
ཏེ། །དབུས་ཀྱི་གྲུ་གསུམ་ནག་པོ། ཟླ་གམ་དམར་པོ། འཁོར་ལོའི་རྩིབས་མཚན་ཁ་དོག་སྣ་ཚོགས་པར་བྱ། མུ་ཁྱུད་དམར་པོ། ཐོད་པའི་ར་བ་དཀར་པོ་བྱ། དུར་ཁྲོད་ལྗང་གུ་སེར་པོ་བྱ། རྡོ་རྗེའི་ར་བ་སྔོ་བ། མེ་རི་དམར་པོ་བྱའོ། །དེ་ནས་ནག་པོ་ཆེན་པོའི་སྐུ་དང་། གྲི་གུག་དང་། ཐོད་པ་དང་།
ཕུར་བུ་དང་། བུམ་པ་དང་། ལྷའི་གྲངས་ཀྱི་མཆོད་པ་དང་གཏོར་མ་ལ་སོགས་པ་དཀྱིལ་འཁོར་གྱི་གནས་སུ་བཀྲམ་ནས། ཡོལ་བ་དང་བླ་རེས་བྲེས་ཏེ། མདའ་དང་རལ་གྲི་ལ་སོགས་པས་བརྒྱན་པར་བྱའོ། །དེ་ནས་སློབ་དཔོན་གྱིས་ལྷ་རྫོགས་པར་བསྒོམས་ནས། དཀྱིལ་འཁོར་
བསྒྲུབ་པར་བྱ་སྟེ། ནག་པོ་ཆེན་པོའི་སྔགས་ཀྱིས་བགེགས་བསྐྲད་ནས། དཀྱིལ་འཁོར་གྱི་དབུས་སུ་བྲག་གི་སྟེང་དུ་ཧཱུཾ་དང་གྲི་གུག་ལས་བྱུང་བའི་རྡོ་རྗེའི་གུར་བགེགས་ལ་མེ་འཕྲོ་བ་དང་བཅས་པ་བསྒོམས་ནས། དེའི་ནང་དུ་གཞལ་ཡས་ཁང་དང་ལྷ་བསྐྱེད་པ་ལ་སོགས་པ་དང་།
བསྐུར་བའི་བར་རྫོགས་པར་བྱས་ལ། དཀྱིལ་འཁོར་གྱི་ལྷས་བདག་ལ་དབང་བསྐུར་བར་དམིགས་ནས། སློབ་མ་དཀྱིལ་འཁོར་དུ་གཞུག་པར་བྱ་སྟེ། དེའི་དཀྱིལ་འཁོར་གྱི་ཕྱི་རོལ་དུ་བླ་མ་ལ་ཡོན་ལེགས་པར་ཕུལ་ནས། དཀོན་མཆོག་གསུམ་ལ་བདག་སྐྱབས་མཆི་ལ་སོགས་
པས་སེམས་བསྐྱེད་དེ། སྔགས་ཀྱི་ཆེ་བ་བརྗོད་ལ་གདོང་གཡོགས་ནས། རྡོ་རྗེ་སློབ་དཔོན་དགོངས་སུ་གསོལ། །དུས་འདི་ཉིད་ནས་བཟུང་ནས་སུ། །ཇི་སྲིད་བྱང་ཆུབ་སྙིང་པོའི་བར། །སེམས་ཅན་ཀུན་གྱི་དོན་གྱི་ཕྱིར། །ནག་པོ་ཆེན་པོའི་དཀྱིལ་འཁོར་དུ། །བདག་ཉིད་

གཞུག་པར་མཛད་དུ་གསོལ། །ཞེས་ལན་གསུམ་གྱི་བར་དུ་བརྗོད་པ་དང་། སློབ་དཔོན་གྱིས་དཀྱིལ་འཁོར་གྱི་ཁང་པར་ཁྲིད་དོ། །དཀྱིལ་འཁོར་ལ་བསྐོར་བ་དང་། ཕྱག་བྱས་ནས་དཀྱིལ་འཁོར་གྱི་སྒོའི་ནང་དུ་ཕྱིན་པར་བསམས་ཏེ། དཀྱིལ་འཁོར་གྱི་ཤར་གྱི་སྟེགས་བུ་ལ་གཞག་གོ། །དེ་
ནས་སློབ་མས་འདི་སྐད་ཅེས་བརྗོད་པར་བྱ་སྟེ། བདག་ལ་དཔལ་ནག་པོ་ཆེན་པོའི་སྐུ་གསུང་ཐུགས་ཡོན་ཏན་དང་ཕྲིན་ལས་ཀྱི་ཡེ་ཤེས་དབབ་ཏུ་གསོལ་ཞེས་ལན་གསུམ་དུའོ། །སློབ་དཔོན་གྱིས་སློབ་མའི་སྙིང་གར་བྲུཾ་ལས་འཁོར་ལོ་དང་ཉི་མའི་སྟེང་དུ་ནག་པོ་ཆེན་པོ་བསྐྱེད་པ་ལ་སོགས་
པ་བྱས་ནས་ཡེ་ཤེས་དབབ་སྟེ། སྤོས་བསྲེགས་ནས་ནག་པོ་ཆེན་པོའི་སྔགས་བརྗོད་པས་བརྟན་པར་བྱས་ལ། དཀྱིལ་འཁོར་གྱི་ལྷ་ལ་མེ་ཏོག་དོར་ནས། ཨོཾ་མ་ཧཱ་ཀཱ་ལ་ཙཀྵུ་པ་ཊ་ལཾ་ཧྲཱིཿགསེར་གྱི་ཐུར་མས་མིག་ཕྱེ་ལ། ལྷ་བསྟན་པ་ནི་དཀྱིལ་འཁོར་དུ་ཞུགས་པའོ། །དེ་ནས་དབང་གི་ཕྱིར་
ཡོན་ཕུལ་ནས། རྡོ་རྗེ་སློབ་དཔོན་དགོངས་སུ་གསོལ། །དཔལ་ལྡན་ནག་པོ་ཆེན་པོ་ཡི། །སྐུ་གསུང་ཐུགས་དང་ཕྲིན་ལས་ཀྱི། །དབང་རྣམས་བདག་ལ་སྩལ་དུ་གསོལ། །ཞེས་ལན་གསུམ་དུ་གསོལ་བ་གདབ་པོ། །དེ་ནས་རྡོ་རྗེ་སློབ་དཔོན་གྱིས། །ལྷ་ཡི་ཏིང་འཛིན་རབ་གསལ་བས། །
བུམ་པ་ཅོད་པན་རྡོ་རྗེ་དང་། །དྲིལ་བུ་མིང་དང་སློབ་དཔོན་དབང་། །རྒྱལ་བ་རིགས་ལྔའི་ངོ་བོ་ཡིན། །ནག་པོ་ཆེན་པོ་ལྔར་བསྐྱེད་ལ། །སློབ་མ་ལ་ནི་སྦྱིན་པར་བྱ། །ཇི་ལྟར་བལྟམས་པ་ཙམ་གྱིས་ནི། །ལྷ་ཡི་ཆུ་ནི་དག་པ་ཡིས། །དེ་བཞིན་གཤེགས་ཀུན་ཁྲུས་གསོལ་ལྟར། །མི་
བསྐྱོད་པ་ཡི་ཆུ་ཡི་དབང་། །དི་རིང་ཁྱོད་ལ་བསྐུར་བར་བྱ། །ཨོཾ་ཤྲཱི་མ་ཧཱ་ཀཱ་ལཱ་ཡ་ཀཱ་ཡ་ཝཱཀ་ཙིཏྟ་ཀརྨ་ཨ་བྷི་ཥིཉྩ་ཨཱཿཧཱུཾ། དེ་མ་ཐག་ཏུ་ཕྱོགས་བཅུའི་སངས་རྒྱས་རྣམས་མི་བསྐྱོད་པའི་ངོ་བོ་ནག་པོ་ཆེན་པོར་བསམས་ལ་སློབ་མའི་སྤྱི་བོར་བསྟིམ་མོ། །དེ་ནས་དབུ་རྒྱན་དང་། རྡོ་རྗེ་དང་།
དྲིལ་བུ་དང་། མིང་ལ་ཡང་དཀྱིལ་འཁོར་གྱི་ཆོ་ག་གཞན་ནས་བཤད་པ་བཞིན་ཤེས་པར་བྱའོ། །སྔགས་ཀྱི་མཐར་ཏྲཱཾ་དང་། ཧྲཱི་དང་། ཨོཾ་སྦྱོར་བར་བྱའོ། །དེ་ནས་ནག་པོ་ཆེན་པོའི་སྐུ་དང་། གྲི་གུག་དང་། ཐོད་པ་དང་། ཕུར་བུའི་དབང་རྣམས་བསྐུར་བར་བྱའོ། །སྐུ་བྱིན་ལ།

སངས་རྒྱས་རྣམས་ཀྱི་སྐུ་ཡི་རྟགས། །གང་ཞིག་བསྒོམས་པ་ཙམ་གྱིས་ཀྱང་། །དངོས་གྲུབ་མྱུར་དུ་ཐོབ་འགྱུར་བ། །དི་རིང་ཁྱེད་ལ་སྦྱིན་པར་བྱ། །ཨོཾ་ཤྲཱི་མ་ཧཱ་ཀཱ་ལཱ་ཡ་ཨ་དྷིཥྠཱ་ན་ཨ་བྷི་ཥིཉྩ་ཨཱཿཧཱུཾ། དེ་ནས་གྲི་གུག་ལག་པ་གཡས་པར་བྱིན་ལ། སངས་རྒྱས་རྣམས་
ཀྱི་ཐུགས་ཀྱི་རྟགས། །གང་ཞིག་བཅངས་པ་ཙམ་གྱིས་ནི། །གདུག་པའི་ཉོན་མོངས་གཅོད་བྱེད་པ། །དི་རིང་ཁྱོད་ལ་སྦྱིན་པར་བྱ། །ཨོཾ་ཤྲཱི་མ་ཧཱ་ཀཱ་ལཱ་ཡ་ཙིཏྟཱ་དྷིཥྛཱ་ན་ཨ་བྷི་ཥིཉྩ་ཨཱཿཧཱུཾ། དེ་ནས་ཐོད་པ་ལག་པ་གཡོན་དུ་བྱིན་ལ། སངས་རྒྱས་རྣམས་ཀྱི་གསུང་གི་རྟགས། །གང་ཞིག་
བཟུང་བ་ཙམ་གྱིས་ནི། །སྙིང་རྗེ་ལྡན་ཞིང་བདུད་སྐྲག་པ། །དི་རིང་ཁྱོད་ལ་སྦྱིན་པར་བྱ། །ཨོཾ་ཤྲཱི་མ་ཧཱ་ཀཱ་ལཱ་ཡ་ཝཱཀ་ཨ་དྷིཥྛཱ་ན་ཨ་བྷི་ཥིཉྩ་ཨཱཿཧཱུཾ། དེ་ནས་ཕུར་བུ་བྱིན་ལ། སངས་རྒྱས་རྣམས་ཀྱི་ཕྲིན་ལས་རྟགས། །གང་ཞིག་བཟུང་བ་ཙམ་གྱིས་ནི། །དགྲ་བགེགས་ཐམས་ཅད་རླག་བྱེད་པ། །
དེ་རིང་ཁྱོད་ལ་སྦྱིན་པར་བྱ། །ཨོཾ་ཤྲཱི་མ་ཧཱ་ཀཱ་ལཱ་ཡ་ཀརྨཱ་དྷིཥྛཱ་ན་ཨ་བྷི་ཥིཉྩ་ཨཱཿཧཱུཾ། དེ་ནས་སློབ་མ་ལ་བརྗོད་པར་འགྱུར་བའི་སྔགས་ཀྱི་རྗེས་སུ་གནང་བ་སྦྱིན་ནོ། །དེ་ནས་ཚོགས་ཀྱི་འཁོར་ལོའི་ཕྱིར་རྣལ་འབྱོར་པས་ང་རྒྱལ་བརྟན་པས། ཚོགས་ཀྱི་རྫས་རྣམས་མེ་ཆུ་རླུང་གསུམ་གྱི་ས་བོན་
གྱིས་སྦྱངས་ལ་འབྲུ་གསུམ་གྱིས་བྱིན་གྱིས་བརླབས་ཏེ། དཀྱིལ་འཁོར་དང་རྣལ་འབྱོར་པ་རྣམས་མཆོད་པར་བྱའོ། །གསུམ་པ་རྗེས་ཀྱི་བྱ་བ་ནི་དཀྱིལ་འཁོར་ལྷ་ལ་མཆོད་པ་དང་བསྐོར་བ་བྱས་ཏེ། ཡི་གེ་བརྒྱ་པ་ལན་བདུན་གྱི་བར་དུ་བརྗོད་དེ། ཡེ་ཤེས་པ་གཤེགས། དམ་ཚིག་པ་བདག་ལ་བསྡུས་
ནས། །ལྷ་གཞན་མི་དམིགས་པར་མོས་ལ། རྡུལ་ཚོན་རྣམས་ཆུ་བོར་དོར་བར་བྱའོ། །བདག་གིས་ནག་པོ་ཆེན་པོ་ཡི། །དབང་བསྐུར་ཆོ་ག་བཀོད་པ་ཡི། །དགེ་བས་མགོན་པོ་བསྒྲུབ་པ་ཀུན། །དཔལ་ལྡན་མགོན་པོ་འདྲ་བར་ཤོག །དཔལ་ནག་པོ་ཆེན་པོའི་དབང་བསྐུར་བའི་
ཆོ་ག །བྲམ་ཟེ་མཆོག་སྲེད་ཞབས་ཀྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་པཎྜི་ཏ་ནག་པོ་ཆེན་པོ་རོ་འཛིན་དང་། ལོ་ཙཱ་བ་གྱི་ལྗང་དབུ་དཀར་གྱིས་བསྒྱུར་བའོ།། ༄༅༅། །རྒྱ་གར་སྐད་དུ། ཤྲཱི་ནཱ་ཐ་ཀཱ་ལ་སཱ་དྷ་ནཱཾ། བོད་སྐད་དུ། དཔལ་མགོན་པོ་ནག་པོའི་སྒྲུབ་

ཐབས། དཔལ་ནག་པོ་ཆེན་པོ་ལ་ཕྱག་འཚལ་ལོ། །ཐོ་རངས་མལ་ནས་ལངས་ནས་གདོང་བཀྲུ་བ་ལ་སོགས་པ་སྔོན་དུ་སོང་བས། ཡིད་དང་མཐུན་པའི་གནས་སུ་སྔགས་པ་སྟན་བདེ་བ་ལ་འདུག་སྟེ། རང་གི་སྙིང་གར་ཨ་ལས་བྱུང་བའི་ཉི་མའི་དཀྱིལ་འཁོར་ལ་ཧཱུཾ་ཡིག་དེ་ཉིད་སྔོན་པོ་
རྣམ་པར་བཀོད་ནས། དེའི་འོད་ཟེར་གྱིས་བདག་ཉིད་ཀུན་དུ་སྣང་བར་བྱས་ཏེ། མདུན་གྱི་བར་སྣང་ལ་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་ཡིད་ཀྱིས་བལྟས་ནས། ཡིད་ཀྱི་རང་བཞིན་གྱིས་མཆོད་པ་རྣམས་ཀྱིས་མཆོད་ལ། བདུད་རྩི་ལྔ་ཡང་དབུལ་བར་བྱའོ། །
དེ་ནས་ཕྱག་འཚལ་ནས་དོན་མངོན་དུ་བྱེད་པ་སྔོན་དུ་འགྲོ་བས་འདི་བརྗོད་པར་བྱའོ། །སྡིག་པ་ཐམས་ཅད་འཇིགས་པས་འཆགས་པར་བགྱིད། །འགྲོ་བའི་དགེ་ལ་དགའ་བས་ཡི་རང་ངོ་། །དཀོན་མཆོག་གསུམ་པོ་ལ་ཡང་སྐྱབས་སུ་མཆི། །རྫོགས་པའི་བྱང་ཆུབ་ཏུ་ནི་སེམས་
བསྐྱེད་དོ། །དེ་ནས་སེམས་ཅན་བདེ་བ་ལ་ཉེ་བར་སྡུད་པའི་རྣམ་པ་ཅན་གྱི་བྱམས་པ་དང་། སྡུག་བསྔལ་དང་སྡུག་བསྔལ་གྱི་རྒྱུ་མཐའ་དག་ལས་བྲལ་བར་འདོད་པའི་རྣམ་པ་ཅན་གྱི་སྙིང་རྗེ་དང་། ཟག་པ་མེད་པའི་བདེ་བ་རྒྱུན་མི་འཆད་པར་མོས་པའི་རྣམ་པ་ཅན་གྱི་དགའ་བ་དང་། འཇིག་
རྟེན་པའི་ཆོས་བརྒྱད་སྤོང་བའི་རྣམ་པ་ཅན་གྱི་བཏང་སྙོམས་བསྒོམ་པར་བྱའོ། །དེའི་རྗེས་ལ་མཆོད་བྱ་དང་། མཆོད་པ་རྣམས་དབྱེར་མེད་པར་དམིགས་ནས། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ་ཞེས་བྱ་བའི་སྔགས་བརྗོད་པ་སྔོན་དུ་སོང་བས་དཔེར་ན་རྨི་ལམ་གྱི་ཤེས་པ་
ལྟར་རང་གི་སེམས་ཉིད་དེ་དང་དེའི་རྣམ་པས་གཟུང་བ་མེད་པའི་ཕྱིར་དེ་ལ་འཛིན་པའི་ཡིད་ཀྱང་མེད་ཅེས་ཐོག་མཐའ་མེད་པ་ནས་རང་བཞིན་གྱིས་ཡོངས་སུ་དག་པར་ཡིད་ཀྱིས་དམིགས་པས་སྟོང་པ་ཉིད་མངོན་དུ་བྱའོ། །དེའི་རྗེས་ལ་སྔོན་སྨོན་ལམ་རྗེས་སུ་དྲན་པས་སྐད་
ཅིག་གིས་བར་སྣང་དུ་ཡི་གེ་པཾ་ལས་བྱུང་བའི་པདྨའི་སྟེང་དུ། ཨ་ལས་གྲུབ་པའི་ཉི་མའི་དཀྱིལ་འཁོར་ལ་ཧཱུཾ་གི་དེ་ཉིད་ཁ་དོག་ནག་པོ་ལས་བྱུང་བ། རྗེ་བཙུན་དཔལ་ནག་པོ་ཆེན་པོ་ཞལ་གཅིག་ཕྱག་གཉིས་པ། སྐུ་མདོག་ནག་པོ་སྤྱན་འབར་བ་ཆེན་པོ་གཡས་གཡོན་གྱི་ཕྱག་

ན་གྲི་གུག་དང་ཀ་པཱ་ལ་འཛིན་པ། མགོ་བོའི་ཕྲེང་བས་དབུ་ལ་བརྒྱན་པ། དབུ་སྐྲ་སེར་པོ་གྱེན་དུ་འབར་བ། འཇིགས་པའི་མཆེ་བས་འཇིགས་པར་བྱེད་པ། སྐུ་ལ་ཐམས་ཅད་སྦྲུལ་གྱིས་བརྒྱན་པ། ཡན་ལག་ཐུང་བ་ཞལ་ནས་ཁྲག་གི་རྒྱུན་འཛག་པར་སྐད་ཅིག་གིས་
བསྐྱེད་པར་བྱའོ། །རང་གི་སྙིང་གའི་ཧཱུཾ་དེ་ཉིད་ཀྱི་འོད་ཟེར་རྣམས་ཀྱིས་དེ་བཞིན་གཤེགས་པ་ཐམས་ཅད་གཅིག་ཏུ་བྱས་ལ་སྔགས་བཟླ་བར་བྱའོ། །དེ་ལ་འདི་ནི་སྔགས་ཡིན་ཏེ། ཨོཾ་མ་ཧཱ་ཀཱ་ལ་ཧཱུཾ་ཧཱུཾ་ཕཊ་སྭཱ་ཧཱ། དུག་དང་ཁྲག་དང་སྒོག་སྐྱ་དང་ཉུངས་ཀར་རྣམས་ཀྱིས་བདུག་སྤོས་ནག་པོ་ལ་
ཕུལ་ནས། སྲན་མ་ལ་སོགས་པའི་ཆན་དང་། ཆང་དང་། མེ་ཏོག་དང་། བྱུག་པ་དང་། ཤ་ལྔ་བདུད་རྩི་ལྔ་རྣམས་ཀྱིས་གཏོར་མ་སྔགས་འདིས་ནག་པོ་ཆེན་པོ་ལ་དབུལ་བར་བྱའོ། །ཏདྱ་ཐཱ། ཨོཾ་མ་ཧཱ་ཀཱ་ལཱ་ཡ། ཤཱ་ས་ནཱ། ཨ་པཤྩི་མ་ཀཱ་ལོ་ཡ་མི་ཏཏ་རཏྣ་ཏྲ་ཡ། ཨ་པ་ཀ་རི་ཎཾ། ཡ་དི་པྲ་
ཏི་ཛྙཱ་སྨ་ར་སི་ཏ་དཱ། ཨི་དཾ་དུཥྚཱཾ་ཁ་ཁ་ཁཱ་ཧི་ཁཱ་ཧི། མ་ར་མ་ར། གྲྀཧྞ་གྲྀཧྞ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། དི་ན་མེ་ཀེ་ན་མཱ་ར་ཡ་ཧཱུཾ་ཧཱུཾ་ཕཊ་ཕཊ། དེ་ལ་ཉེ་བར་སྤྱོད་པ་ནི། ཚ་བ་གསུམ་གྱིས་བསྒྲུབ་བྱའི་གཟུགས་བརྙན་བྱས་ཏེ། ཡན་ལག་ཐམས་ཅད་ཚེར་མས་བཀང་
སྟེ། དུག་དང་ཁྲག་གིས་ཆོ་ག་བཞིན་དུ་མངོན་པར་བྱུགས་ཤིང་། གང་གི་མིང་ནས་སྨོས་ཏེ། མེ་ལ་གདུང་བ་སྟེ་དེའི་མོད་ལ་མི་སྣང་ཞིང་འཆི་བར་འགྱུར་རོ། །དེ་བཞིན་དུ་གང་ཞིག་རྟག་ཏུ་བླ་མ་ལ་འཁུ་བ་དང་། དཀོན་མཆོག་གསུམ་འཇིག་པ་དང་། གང་ཞིག་སེམས་ཅན་དུ་མ་ཉམས་
པར་བྱེད་པ་དེ། ནག་པོ་ཆེན་པོས་དེའི་ལུས་ལ་ཤ་བཅད་ནས་ཟ་བར་འགྱུར་ཞིང་། ཁྲག་ཀྱང་འཐུང་བར་འགྱུར་རོ། །དེ་བཞིན་དུ་མགོ་བོ་ལ་ཞུགས་ནས་ཏིལ་འབྲུ་ཙམ་དུ་བྱེད་དོ་ཞེས་བྱ་བ་ལ་སོགས་པ་ཆོ་ག་རྒྱས་པར་ཤེས་པར་བྱའོ། །ཡང་ན་དུར་ཁྲོད་ཀྱི་རས་ལ་དུག་དང་ཁྲག་དང་།
དུར་ཁྲོད་ཀྱི་སོལ་བས་མི་རུས་ཀྱི་སྨྱུ་གུས་གྲི་གུག་གི་ཆང་གཟུངས་ལ་རྩིབས་བརྒྱད་ཀྱི་འཁོར་ལོ་བྲིས་ལ་ཤར་ནས་བརྩམས་ཏེ་རིམ་པ་བཞིན་དུ་སྔགས་འདི་བཟླ་བར་བྱའོ། །ཨ་མུ་ཀཾ་མཱ་ར་ཡ་སྭཱ་ཧཱ་ཞེས་པ་ནས་རྩིབས་གཞན་ལ་ཡང་ལྟེ་བ་ལ་ནི་ཧཱུཾ་གཉིས་སྤེལ་ལོ། །མུ་ཁྱུད་

ཀྱི་རེ་ཁཱ་གཉིས་ཀྱི་བར་དུ་ནི་སྔར་གྱི་ཕྲེང་བའི་སྔགས་སོ། །འཁོར་ལོ་འདི་རབ་ཏུ་གནས་པ་སྔོན་དུ་སོང་བས་སྐུད་པ་སྔོན་པོས་དཀྲིས་ཏེ། ཐོད་པ་ཁ་སྦྱར་དུ་བཅུག་སྟེ་ཐལ་བས་བཀང་སྟེ། ཡང་ཐ་གུ་སྔོན་པོས་བཅིངས། དུར་ཁྲོད་དུ་ས་མཐོ་གང་ཙམ་དུ་བརྐོས་པས་སྦ་བར་བྱའོ། །དེའི་སྟེང་
དུ་རང་ཉིད་ནག་པོ་ཆེན་པོའི་རྣལ་འབྱོར་དང་ལྡན་པས། ཁ་ལྷོར་བལྟས་ཏེ་ཁྲོ་བ་དང་བཅས་པས་སྔགས་འདི་བཟླས་པར་བྱའོ། །ཨོཾ་མ་ཧཱ་ཀཱ་ལ་ཧཱུཾ་ཧཱུཾ་ཕཊ་ཕཊ་ཨ་མུ་ཀཾ་མཱ་ར་ཡ་ཧཱུཾ་སྭཱ་ཧཱ། དེ་ལྟར་ཉིན་རེ་བཞིན་བྱས་ན་ཞག་བདུན་ནས་འཆི་བར་འགྱུར་རོ། །གལ་ཏེ་ཤི་བར་མ་གྱུར་ན། འཁོར་ལོ་
དེ་ཉིད་དུམ་བུ་དུམ་བུར་བྱས་ཏེ་ཐལ་བ་དེ་དང་། མིའི་ཤ་དང་ལྷན་ཅིག་ཏུ་ཆང་གིས་བྱུགས། དེ་མངོན་སྤྱོད་ཀྱི་ཐབ་ཁུང་དུ་སྦྱིན་སྲེག་བྱས་ན། གདོན་མི་ཟ་བར་འཆི་བར་འགྱུར་རོ། །དཔལ་ནག་པོ་ཆེན་པོའི་སྒྲུབ་ཐབས་བྱིན་རླབས་དང་བཅས་པ། སློབ་དཔོན་ཆེན་པོ་བསོད་སྙོམས་པས་
མཛད་པ་རྫོགས་སོ།། །།རྒྱ་གར་གྱི་མཁན་པོ་དཔལ་སུ་མཱ་ཏི་ཀཱིརྟི་དང་། ལོ་ཙཱ་བ་དགེ་སློང་པྲཛྙཱ་ཀཱིརྟིས་བསྒྱུར་བའོ།། ༄༅༅། །རྒྱ་གར་སྐད་དུ། མ་ཧཱ་ཀཱ་ལ་བ་ལིཾ་ཏེ་སྱ་ནཱ་མ། བོད་སྐད་དུ། དཔལ་མགོན་པོའི་གཏོར་མ་ཞེས་བྱ་བ། དཔལ་ལྕམ་དྲལ་ལ་ཕྱག་
འཚལ་ལོ། །དུར་ཁྲོད་ལ་སོགས་པའི་ཡིད་དུ་འོང་བའི་གནས་སུ། བྱང་ཆུབ་ཀྱི་སེམས་སྔོན་དུ་བཏང་ལ། བམ་བསྒྲུབ་བམ་གཏོར་མ་དབུལ་ཏེ། གཏོར་མ་ལ་གསུམ། བདག་ཁྱད་པར་དུ་བྱ་བ་དང་། གཏོར་མ་ཁྱད་པར་དུ་བྱ་བ་དང་། མགྲོན་ཁྱད་པར་དུ་བྱ་བའོ། །དང་པོ་ནི་རང་ཉིད་
སྐད་ཅིག་ལ་བཅོམ་ལྡན་འདས་མི་གཡོ་བར་བསྒོམས་ལ། སྐུ་གསུང་ཐུགས་ཀྱི་ཡེ་ཤེས་བྱིན་གྱིས་བརླབ་པར་བྱའོ། །གཉིས་པ་ནི་བནྡྷ་འམ་ཐོད་པའི་ནང་དུ་མིའི་ཤ་ཆེན་ནམ་ཤ་ཁྲག་གིས་བརྒྱན་པའི་མགོན་པོའི་གཏོར་མ་བཟང་པོ་བཤམས། དེ་མེད་ན་སྣོད་གཞན་དུ་མར་གྱིས་
བརྒྱན་པ་བཤམ་མོ། །གཏོར་མ་བཤམས་ཟིན་པ་དང་། ཨོཾ་སྭ་བྷཱ་ཝ་བི་ཤུདྡྷཿསརྦ་དྷརྨཱཿསྭ་བྷཱ་ཝ་བི་ཤུདྡྷོ྅ཧཾ་ཞེས་བྱ་བ་ལན་གསུམ་བརྗོད་པས་གཏོར་མ་མི་དམིགས་པར་སྟོང་པར་བསྒོམ། སྟོང་པའི་ངང་ལས་ཡཾ་སྔོན་པོ་ཅིག་ཡོངས་སུ་གྱུར་པ་ལས། རླུང་གི་དཀྱིལ་འཁོར་ཁ་དོག་སྔོ་

སྐྱར་འདུག་པའི་དབྱིབས་གཞུ་བཞིན་ནར་མོར་འདུག་པ། གཞུ་མཆོག་གཉིས་ནི་མདའ་དར་གྱི་བ་དན་གྱིས་མཚན་པ་ཅིག་བསྒོམ། དེའི་སྟེང་དུ་རཾ་ལས་མེའི་དཀྱིལ་འཁོར་གྲུ་གསུམ་འབར་བ་ཚ་བ་ཅིག་བསྒོམ། དེའི་སྟེང་ན་ཨ་ཡོངས་སུ་གྱུར་པ་ལས་ཐོད་པ་ཤིན་ཏུ་ཡངས་ཤིང་
ཆེ་བ་ཅིག་བསམ་མོ། །དེའི་སྟེང