Luận tạng Tây Tạng (Tengyur) — Tập 28

་དུ་ཧྲཱིཿདཀར་པོ་དེ་ལས་འོད་ཟེར་འཕྲོས་གཏོར་མ་ལ་མར་འཕྲོས་སོང་བས། གཏོར་མའི་མི་གཙང་བ་དང་། སྣོད་ཀྱི་དྲི་མ་དག་པར་བསམ་མོ། །དེར་ཧྲཱིཿཡང་བདུད་རྩིར་ཞུ་བར་བསམ། དེ་ནས་གཏོར་མ་བས་ཁྲུ་གང་གིས་མཐོ་བའི་སྟེང་དུ་རཾ་ལས་ཉི་མའི་དཀྱིལ་འཁོར་
དེའི་སྟེང་དུ་ཧཱུཾ་མཐིང་ནག་དེ་ཡོངས་སུ་གྱུར་པ་ལས་རྡོ་རྗེ་ནག་པོ་རྩེ་དགུ་པ་ཁོང་སེང་ཅན་ཅིག་བསམ། དེའི་སྟེང་དུ་རཾ་ཡོངས་སུ་གྱུར་པ་ལས་ཉི་མའི་དཀྱིལ་འཁོར། དེའི་སྟེང་དུ་ཧཱུཾ་མཐིང་ནག་ཅིག་བཞེངས་ནས་བཞུགས་པར་བསམ། ཧཱུཾ་ལས་འོད་ཟེར་འཕྲོས་ནས་རྡོ་རྗེ་ཁོང་སེང་ནས་སོང་། རྡོ་རྗེའི་ར་
འོག་མ་ནས་གཉིས་སུ་གྱེས་ནས་སོང་བས། གཞུ་མཆོག་གཉིས་ཀྱིས་བ་དན་ལ་བརྒྱབ་པས། བ་དན་གྱིས་རླུང་གཡབ་པས་རླུང་གིས་མེ་སྦར་མེས་ཐོད་པ་ཁོལ། འོད་ཡར་འཕྲོས་ནས་སོང་བས། སངས་རྒྱས་དང་བྱང་ཆུབ་སེམས་དཔའ་དང་དེ་བཞིན་གཤེགས་པའི་ཐུགས་ཀ་ནས་ཡེ་ཤེས་ཀྱི་
བདུད་རྩི་རྣམ་པ་ལྔ་ཆར་འབབ་པར་བསམས་ལ། ངག་ཏུ་ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱ་ནུ་ཏྤནྣ་ཏྭཱཏ་ཨོཾ་ཨཱཿཧཱུཾ་ཕཊ་སྭཱ་ཧཱ་ཞེས་བྱ་བའི་སྔགས་ལན་ལྔའམ་བདུན་བརྗོད། ཨཱ་ཧཱུཾ་དང་དེ་བཞིན་བརྗོད་རྡོ་རྗེའི་སྟེང་གི་ཉི་མ་དང་། འོག་གི་ཉི་མ་གཉིས་ཧཱུཾ་དང་གསུམ་འཁྱག་པའི་ཟར་བུ་
ཞུ་བ་གཙུག་ཏུ་བདུད་རྩིར་ཞུ་བར་བསམས་ལ། དེ་ནས་རང་གི་ལག་པས་རྡོ་རྗེ་བླངས་ནས་ལན་གསུམ་དཀྲུགས་པས་བདུད་རྩི་དཀར་ཆིལ་གྱུར་པར་བསམ་མོ། །དེ་ནས་རང་གི་ལག་པའི་རྡོ་རྗེ་མི་དམིགས་པར་བསྒོམ་མོ། །དེ་ནི་གཏོར་མ་ཁྱད་པར་དུ་བྱ་བའོ། །མགྲོན་ཁྱད་པར་དུ་བྱ་བ་ནི་
གཏོར་མའི་མདུན་གྱི་ནམ་མཁའ་ལ་རཾ་ཡོངས་སུ་གྱུར་པ་ལས་ཉི་མའི་དཀྱིལ་འཁོར། དེའི་སྟེང་དུ་ཧཱུཾ་མཐིང་ནག་ཅིག་བསམ། དེ་ལས་འོད་འཕྲོས་སེམས་ཅན་ཐམས་ཅད་ལ་ཕོག །སྡིག་སྒྲིབ་དག །ཐམས་ཅད་དཔལ་མགོན་པོའི་སྐུར་གྱུར། དེ་སླར་འདུས་པས་དཔལ་མགོན་པོ་སྐུ་

མདོག་མཐིང་ནག་ཞལ་གཅིག་ཕྱག་གཉིས་པ་གཡས་གཡོན་ན་མི་ཤེས་པ་གཅོད་པའི་རལ་གྲི་དང་ཐོད་པ་ཁྲག་གིས་བཀང་བ་བསྣམས་པ། དབུ་སྐྲ་དམར་སེར་གྱེན་དུ་བརྫེས་པ། མཆེ་བ་གཙིགས་པ་མི་མགོ་རློན་པའི་དོ་ཤལ་དང་སྟག་གི་པགས་པའི་ཤམ་ཐབས་ཅན་ཅིག་བསམ། དེའི་ཐུགས་
ཀར་རཾ་ཡོངས་སུ་གྱུར་པ་ལས་ཉི་མའི་དཀྱིལ་འཁོར་དེའི་སྟེང་ན་ཧཱུཾ་མཐིང་ནག་ལས་གཡས་སུ་ཕཊ་དམར་ནག་ཅིག་ཆད་སོང་བ་ལས་ཉི་མའི་གདན་ལ་དཔལ་ལེགས་ལྡན་ནག་པོ་སྐུ་མདོག་དམར་ནག་ཞལ་གཅིག་ཕྱག་གཉིས་པ། གཡས་གཡོན་ན་ཙནྡན་གྱི་བེ་ཅོན་དང་ཐོད་པ་
ཁྲག་གིས་གང་བ་བསྣམས་པ། ཞབས་གཡོན་པ་ཅུང་ཟད་བརྐྱང་བ། གཡས་པ་ཅུང་ཟད་བསྐུམ་པའི་འགྱིང་བག་ཅན། རུས་པའི་ཟེ་ཕྲོག་ཅན་འཇོལ་བེར་སུམ་བརྩེགས་གཡེལ་བ་གསེར་གྱི་སྐ་རགས་བཅིངས་པ་ཅིག་ཏུ་བསྒོམ་མོ། །དེ་ནས་རང་གི་ཐུགས་ཀ་ནས་འོད་
འཕྲོས་པས། རི་རབ་ཀྱི་བྱང་ཕྱོགས་ཀྱི་བང་རིམ་ནས་མགོན་པོ་དཔོན་གཡོག་སྤྱན་དྲངས་ལ། ཛཿཧཱུཾ་བཾ་ཧོཿས་བསྟིམ་མོ། །དཔལ་ལེགས་ལྡན་ལ་ཡང་དེ་བཞིན་དུ་བསྟིམ་མོ། །སྐུ་གསུང་ཐུགས་བྱིན་གྱིས་བརླབ་པོ། །ཡང་མགོན་པོའི་གཡོན་ཕྱོགས་སུ་ཡཾ་སྔོ་སྐྱ་ཡོངས་སུ་གྱུར་པ་
ལས། །རླུང་གི་དཀྱིལ་འཁོར། དེའི་སྟེང་ན་བྷྱོཿསྨུག་ནག་དེ་ལས་འོད་འཕྲོས་སེམས་ཅན་ལ་ཕོག་སྡིག་སྒྲིབ་དག་ཐམས་ཅད་དཔལ་ལྷ་མོའི་སྐུར་སླར་འདུས་པས་དཔལ་ལྷ་མོ་སྐུ་མདོག་སྨུག་ནག་བོང་བུ་ག་དམར་ལ་བཅིབས་པ་ཞལ་གཅིག་ཕྱག་གཉིས་པ། གཡས་གཡོན་ན་རལ་གྲི་
དང་ཐོད་པ་ཁྲག་གིས་བཀང་བ་བསྣམས་པ། མཆེ་བ་གཙིགས་པ། དབུ་སྐྲ་དམར་སེར་གྱེན་དུ་བརྫེས་པ། རུས་པའི་རྒྱན་ཆ་ཅན། གོང་སྨེད་གོང་ཐག་སྦྲུལ་ལས་བྱས་པ། སྔ་ཤ་ཕྱི་ཤ་ལ་མི་རོ་བཏགས་པ། ནད་ཀྱི་རྐྱལ་པ་དང་། མཚོན་གྱི་དྲུ་གུ་ཐོགས་པ་ཅིག་བསྒོམ་མོ། །དེའི་ཐུགས་ཀ་ནས་
རཾ་ཡོངས་སུ་གྱུར་པ་ལས་ཉི་མའི་དཀྱིལ་འཁོར། དེའི་སྟེང་ན་བྷྱོཿསྨུག་ནག་དེ་ལས་གཡོན་ཕྱོགས་སུ་བྷྱོཿནག་པོ་ཅིག་ཆད་སོང་བ། དཔལ་རེ་མ་ཏི་སྐུ་མདོག་ནག་མོ་རེ་བའི་གོས་གྱོན་པ་དྲེའུ་ནག་པོ་ལ་ཆིབས་པ་ཞལ་གཅིག་ཕྱག་གཉིས་མ་གཡས་གཡོན་ན་རལ་གྲི་དང་ཐོད་པ་ཐོགས་པ།

མཆེ་བ་གཙིགས་པ། སྐྲ་གཟིངས་པ། གོང་སྨེད་གོང་ཐག་སྦྲུལ་ལས་བྱས་པ། སྔ་ཤ་ཕྱི་ཤ་ལ་མི་རོ་བཏགས་པ། ནད་ཀྱི་རྐྱལ་བུ་དང་མཚོན་གྱི་དྲུ་གུ་ཐོགས་པ་ཅིག་ཏུ་བསྒོམ་མོ། །དེ་ནས་རང་གི་ཐུགས་ཀ་ནས་འོད་འཕྲོས་སོང་བས། སུམ་ཅུ་རྩ་གསུམ་གྱི་རྣམ་པར་རྒྱལ་བའི་
ཁང་བཟངས་ཀྱི་བྱང་ཤར་མཚམས་ཀྱི་མཚོ་མུ་ལེ་ལྡིངས་ནས་ཡེ་ཤེས་ཀྱི་ལྷ་མོ་འཁོར་བཅས་སྤྱན་དྲངས་ལ། ཛཿཧཱུཾ་བཾ་ཧོཿས་བསྟིམ་མོ། །ལྷ་མོ་དྲེལ་ཞོན་མ་ལ་ཡང་དེ་བཞིན་དུ་བསྟིམ་མོ། །དེ་ནས་སྐུ་གསུང་ཐུགས་བྱིན་གྱིས་བརླབ་པོ། །དེ་ནས་བཟླས་པ་བྱེད་ན། རང་གི་སྙིང་ག་ནས་རཾ་ཡོངས་
སུ་གྱུར་པ་ལས་ཉི་མའི་དཀྱིལ་འཁོར་གྱི་སྟེང་ན་ཧཱུཾ་མཐིང་ནག་བཞེངས་ནས་བཞུགས་པ་ལ། ཨོཾ་ཙཎྜ་མ་ཧཱ་ཀཱ་ལ་བཛྲ་དཾ་ཥྚི་ན་ཧཱུཾ་ཧཱུཾ་ཧཱུཾ་ཕཊ་ཅེས་བྱ་བའི་སྔགས་ཀྱིས་གཡས་སྐོར་དུ་བསྐོར་ནས་ཡོད་པར་བསམས་ལ། དེ་རང་གི་ཁ་ནས་ཐོན་མགོན་པོའི་ཞལ་དུ་སོང་། ལྟེ་བ་ནས་ཐོན་རང་གི་ལྟེ་
བར་ཡང་རང་གི་ཁ་ནས་ཐོན་མགོན་པོའི་ཞལ་དུ་དེ་བཞིན་དུ་ཁོར་ཡུག་ཏུ་འཁོར་བར་བསམས་ཤིང་བཟླས་པར་བྱའོ། །དཔལ་ལྷ་མོའི་ཟླས་པ་བྱེད་ན་ཁོར་ཡུག་གི་བཟླས་པ་མི་བྱ་བར་དཔལ་ལྷ་མོ་ལ་དམིགས་ལ། ཨོཾ་རོ་རུ་རོ་རུ་ཏྲི་ཙ་པ་ལ་ཨ་ཤུག་མེ་མ་ཧཱུཾ་བྷྱོཿཛྫཿཛྫཿཞེས་བྱ་བའི་བཟླས་པ་
བྱའོ། །བཟླས་པ་མི་བྱེད་པར་གཏོར་མ་བཏང་ན། བསྐྱེད་པ་བཞི་པོ་ལ་མི་དམིགས་ཏེ་ལྕེའི་སྟེང་དུ་ཧཱུཾ་རེ་ཡང་བཏབ་པོ། །ཧཱུཾ་བཞི་པོ་དེ་ཡོངས་སུ་གྱུར་པ་ལས། ལྕེ་སྟོད་རྡོ་རྗེ་ལྕེ་སྨད་སྦུ་གུར་ཡོད་པར་བསམས་ལ། མགོན་པོ་ལ་སྟོབས་ན་ཧཱུཾ་ཞེས་བརྗོད་པས། གཏོར་མ་ལ་དར་བཙུགས་ནས་
གསོལ་བར་བསམས་ལ། ཧཱུཾ་ཨོཾ་ཙཎྜ་མ་ཧཱ་ཀཱ་ལ་ཁ་ཁ་བ་ལིཾ་ཏ་ཁཱ་ཧི་ཞེས་བྱ་བ་ལན་གསུམ་གྱིས་བསྟབས་སོ། །ཨོཾ་ཙཎྜ་དེ་བ་མ་ཧཱ་ཀཱ་ལ་བ་ལིཾ་ཁཱ་ཧི་ཁཱ་ཧི་ཞེས་བྱ་བ་ལན་གསུམ་གྱིས་ལྷ་མོ་དཔོན་གཡོག་ལ་བསྟབས་སོ། །དེ་ནས་འདོད་པའི་དོན་ལ་གསོལ་བ་གདབ་པོ། །ཨོཾ་ཁྱེད་
ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་སེམས་ཅན་དོན་ལ་གཤེགས། །ཨོཾ་ཨཱཿཧཱུཾ་མུཿཞེས་བྱ་བས་ཡེ་ཤེས་སེམས་དཔའ་གཤེགས། བསྐྱེད་པ་བཞི་པོ་མི་དམིགས་པར་བསྒོམ། གཏོར་མ་

ས་གཙང་སར་བསྐྱལ་ལོ། །དཱི་པཾ་ཀ་ར་ཤྲཱི་ཛྙཱ་ནས་མཛད་པ། ལོ་ཙཱ་བ་འབྲོམ་སྟོན་གྱིས་བསྒྱུར་བའོ། །ཨོཾ་ཤྲཱི་མ་ཧཱ་ཀཱ་ལ་ཏྲི་ཡཾ་ཛ། ཨོཾ་ཏྲག་རག་ཤ་མའི་ཐུན་བྷྱོ་མ་ཧཱ་ཡག་ཤ་ཏྲི་ཎ་ནག་མོ་ཐུན་བྷྱོ། སྙིང་གར་རཀྴ་ཐུན་བྷྱོ།། ༄༅༅། །རྒྱ་གར་སྐད་དུ། ཤྲཱི་དེ་ཝཱི་ཀཱ་ལི་སཱ་དྷནོ་པི་ཀ །བོད་
སྐད་དུ། དཔལ་ལྷ་མོ་ནག་མོ་སྒྲུབ་པའི་ཐབས་ཀྱི་ཆོ་ག །དཔལ་ལྷ་མོ་ནག་མོ་ལ་ཕྱག་འཚལ་ལོ། །དཔལ་ལྷ་མོ་ནག་མོ་བསྒྲུབ་པར་འདོད་པའི་རྣལ་འབྱོར་པས། ཡོ་བྱད་ཕུན་སུམ་ཚོགས་པས་ལྷ་བསམས་ལ། དེ་ནས་གནས་དུར་ཁྲོད་དམ། ཤིང་དྲུང་ངམ། གཅོང་རོང་ངམ། ཁང་སྟོང་
ངམ། དབེན་པའི་ས་ཕྱོགས་སུ་ཕྱིན་ལ། དེ་ནས་དང་པོ་ཕྱོགས་སྐྱོང་བཅུ་ལ་སོགས་པ་འཇིག་རྟེན་པ་ཐམས་ཅད་ལ་གཏོར་མ་རྒྱས་པར་བཏང་། དེ་ནས་ཨེའི་མཎྜལ་ཀུན་དུ་ཁྲུ་རེ་བ་ལ་དཔངས་སུ་ཡང་ཁྲུ་གང་གི་ཚད་དུ་བྱ། དེ་ལ་སྟེགས་བུ་རིམ་པ་གསུམ་དུ་བྱའོ། །བར་མ་ལ་ཟླ་གམ་
གསུམ་གསུམ་དུ་བྱ། ཐ་མ་ལ་གྲུ་གསུམ་དང་། དང་པོ་ལ་གྲུ་གསུམ་དུ་བྱ། རབས་ཆད་ཀྱི་ཐོད་པ་རེ་རེའམ། ཡང་ན་གང་ཡང་རུང་བའི་ཐོད་པ་རེ་རེ་བཞག་སྟེ། དེ་ཡང་ཐོད་པའི་སྟེང་དུ་མངོན་པར་བྱས་ནས། ཐོད་པའི་ནང་དུ་ཡང་ནག་པོ་རེ་རེ་རོ་སོལ་གྱིས་བྲི། ཐོད་པའི་ཕྱི་ཡང་དམར་
པོ་རེ་རེ་མི་ཁྲག་གིས་བྲིས། ཟླ་གམ་གསུམ་གསུམ་ཡང་དམར་པོར་བྱུག །གྲུ་གསུམ་ནག་པོས་ཚོན་བཏང་སྟེ། ཚོན་བཏང་མ་ལེགས་ན་སྐྱོན་འདི་ལྟ་བུ་ཡོད་དོ། །ཚོན་སྦོམས་ན་སློབ་དཔོན་དང་། སློབ་མ་ནད་མང་དུ་འོང་། ཚོན་ཕྲས་ན་ནད་མང་བར་ཡོང་། ཡོ་བར་གྱུར་ན་ཡུལ་དུ་
འཁྲུག་པ་ཡོང་། བར་ཆད་པར་གྱུར་ན་སློབ་དཔོན་སློབ་བུ་མྱུར་དུ་འཆི་བར་འགྱུར། དེ་བས་རེ་ཁཱ་སྨྱུག་མ་འབྲིང་པོ་ཙམ་དུ་བྱས་ལ། གཡས་ནས་བསྐོར་ཞིང་བྲི་སྟེ། ཚོན་དགྱེ་བ་ཡང་གྲུ་གསུམ་ཉིས་འགྱུར་དུ་དགྱེ་སྟེ། ནང་གི་གྲུ་གསུམ་ནག་པོར་བྱ། ཕྱི་གྲུ་གསུམ་དེ་དམར་པོར་
བྱུག །ནང་དང་ཕྱི་གྲུ་གསུམ་རེ་རེ་ལ་རྡོ་རྗེ་ཕྱེད་མ་རེ་རེས་མཚན་པ་བྲི། ཐལ་ཆེན་དང་ཁྲག་སྐམ་བསྲེས་པས། ཨེའི་དབུས་སུ་སྔགས་ས་བོན་གྱི་ཧཱུཾ་བྲི། ནང་གི་ཟུར་གསུམ་ལ་མ་མོ་ཐམས་ཅད་ཀྱི་སྲོག་གི་སྙིང་པོ་བྷྱོཿརེ་རེ་བྲི་བར་བྱ་བ་ཡིན་ནོ། །དེ་ཡང་ད་དུ་རའི་ཁུ་བ་དང་དུར་ཁྲོད་

ཀྱི་སོལ་བ་དང་ར་ཁྱིའི་ཁྲག་དང་། བྱ་ནག་མོའི་ཁྲག་དང་། དེ་རྣམས་ཆ་བསྙམས་ལ་བསྲེས་ཏེ་ཞིབ་ཏུ་བཏགས་ལ་ཚོན་རྩི་དང་སྦྱར་བས་དུར་ཁྲོད་ཀྱི་རས་ལ་ལྷ་མོའི་སྐུ་བྲིས་ལ། ཨེའི་མཎྜལ་གྱི་དབུས་སུ་བཞུགས་སུ་གསོལ་ཏེ། དེ་ནས་སྤོས་ལ་སོགས་པ་མཆོད་པའི་ཡོ་བྱད་ལྔ་
ཚང་བར་བཤམས་ཏེ་མཆོད་པ་དབུལ། དེ་ཡང་བདག་དམ་ཚིག་གི་ལྷ་མོ་བསྒོམ་པ་ནི། དང་པོ་རང་གི་སྙིང་གར་པདྨ་འདབ་མ་བཞིའམ། ཡང་ན་འདབ་མ་བརྒྱད་པ་གེ་སར་དང་བཅས་པ་ཅིག་བསམ། པདྨ་དེའི་གེ་སར་གྱི་དབུས་སུ་ཡི་གེ་ཨཾ་ཀླད་ཀོར་དང་བཅས་པ་འོད་འབར་བ་ཅིག་བསམས་ལ།
དེའི་སྟེང་དུ་ཡི་གེ་ཧཱུཾ་རང་གི་གཟི་བརྗིད་ཀྱིས་རང་ཉིད་མེ་ལྟར་འབར་བ་ཅིག་བསྒོམ། མེ་དེས་བདག་ཉིད་རྣམ་པར་རྟོག་པ་ཅན་གྱི་ལུས་བསྲེགས་ནས་ཐལ་བར་གྱུར་པར་བསམ་མོ། །ཡང་ཐལ་བ་དེའི་དབུས་སུ་ཞི་བའི་འོད་ཀྱིས་བསམ་པར་བྱ་བ། སྔོན་གྱི་པདྨའི་སྙིང་པོ་ལ་གནས་པ། སྲོག་གི་རང་
བཞིན་གྱི་ཡི་གེ་ཨོཾ། དེའི་སྟེང་དུ་བཾ་བསམ་མོ། །དེ་ནས་ཡི་གེ་བཾ་ཡོངས་སུ་གྱུར་པ་ལས། བུམ་པ་གང་བ་དཀར་པོའི་ཁ་ནས་བདུད་རྩིའི་ཆུ་རྒྱུན་འབབ་པ་ཅིག་བསམ། དེ་ནས་སྲོག་ཏུ་བཤད་པའི་ཡི་གེ་ཨོཾ་དེ་ཡིས་བདུད་རྩིའི་ཆུ་རྒྱུན་འབབ་ཅིང་སྦྲེང་བས། ཡི་གེ་ཀུན་གྱི་མཆོག་སྲོག་ཏུ་བཤད་
པའི་ཡི་གེ་ཨ་ཞེས་པའི་ཆུ་དེས་ལྷག་པར་བརྟན་ཞིང་བརྟས་པར་བྱས་ནས། གཟི་བརྗིད་དང་ལྡན་པར་གྱུར་ནས། ཟླ་བ་དང་། ཁ་བ་དང་། ཀུནྡ་དང་། སྤྲིན་དཀར་པོ་དང་། དུང་ལྟ་བུར་བསམ་པར་བྱའོ། །དེ་ནས་དཔལ་ལྷ་མོའི་མཚན་སྔགས་ཨོཾ་མ་ཧཱ་ཀཱ་ལི་དེ་ཝཱི་ཀཱ་ལི། ཏྲནྟ་ཀཱ་ལ་ཏི་ཙཎྜ་རཱུ་པི་ཎི་
ཧཱུཾ་ཕཊ། ཅེས་བརྗོད་པའི་སྒོ་ནས། སྔགས་ཀྱི་ས་བོན་ཡི་གེ་ཨ་དེ་ལས་ལྷར་བསྒྲུབས་ཏེ། དཔལ་ལྷ་མོ་ནག་མོའི་སྐུར་བསྒྱུར་ཞིང་བསྒོམ་པར་བྱ་བ་ནི། སྐུ་མདོག་ནག་མོ་ཆར་སྤྲིན་ནམ། བུང་བ་ལྟར་གནག་པ། ཤིན་ཏུ་རིད་པ། ཀེང་རུས་ཀྱི་རུས་ཅན། ཞལ་གཅིག་ཕྱག་བཞི་པ། ཞབས་
གཉིས་པ། གཡས་ཀྱི་དང་པོ་ན་རལ་གྲི། འོག་མ་ན་བྷནྡྷ་དམར་གྱིས་བསྐྱིལ་བ། ཁ་ཊྭཱཾ་ག་དཀྲོལ་བ་སྟེ། གཡོན་ན་ཤཀྟི། འོག་མས་ཏྲི་ཤཱུ་ལའི་དར་དཔྱངས་འཕྱར་བ་ཐོགས་པ། མི་རོ་རེངས་པ་ཁར་བཅུག་ནས་མཆེ་བ་གཙིགས་པ། སྤྱན་དམར་པོ་གསུམ་བཟློག་ནས་ལྟ་བ། དབུའི་

རལ་པ་གྱེན་དུ་བརྫེས་ཤིང་ལེན་བུ་གཡོན་དུ་འཁྱིལ་པ། དབུ་སྐྲའི་རལ་པ་ལ་ཐོད་པའི་ཕྲེང་བས་བརྒྱན་པ། སྙན་ཆ་གཡས་པ་སྦྲུལ་གྱི་མགུལ་ནས་དྲིལ་བུ་གསིལ་བ། སྙན་ཆ་གཡོན་པ་སེང་གེའི་རལ་པ་དམར་བ། རྣ་ལྟག་གཉིས་ན་མེ་ཏོག་དང་དར་དམར་ནག་གི་ཅོད་པན་འཕུར་བ། ལྷ་
མ་ཡིན་ལ་སོགས་པའི་ཐོད་པའི་དོ་ཤལ་བྱས་པ། གླང་པོ་ཆེའི་ཀོ་རློན་སྟོད་གཡོགས་སུ་བྱས་པ། བ་ལང་གི་ཀོ་རློན་ཆེན་པོ་དྲལ་བ་ལ་རེ་ལྡེ་སེར་པོས་ཤམ་བུ་བྱས་པ་སྐུ་སྨད་དཀྲིས་པ། ཁྲག་དང་ཞག་གི་ཐིག་ལེས་ཚོམ་བུར་བྲིས་པ། ཀླུའི་རྒྱལ་པོ་གཉིས་གཤིབས་པས་སྐ་རགས་སུ་བྱས་པ། ཞབས་གཉིས་ལྕགས་སྒྲོག་
གིས་བརྒྱན་ནས། བོང་བུ་གྭ་པའི་སྟེང་ན་རྩེན་སྐྱིལ་དུ་བཞུགས་པ། དུར་ཁྲོད་བརྒྱད་ཀྱི་དབུས་ན་སྐད་དུང་དང་འབྲུག་གི་སྒྲ་ལྟར་སྒྲོགས་ཤིང་། མ་མོ་མཁའ་འགྲོ་ཤ་ཟ་ཐམས་ཅད་དབང་དུ་སྡུད་པ་ཅིག་ཏུ་བསྒོམ་མོ། །དེ་ལྟར་གསལ་བ་དང་དེའི་སྙིང་གའི་དབུས་སུ། ཐུགས་མར་མེ་འདྲ་བ་
ལ་རང་གི་སོར་བཞིའི་ཚད་ལ་དབྱིབས་སྒོ་ངའི་གཟུགས་འདྲ་བ་ཅིག་གསལ་བར་བསྒོམ་མོ། །སྒོ་ང་དེའི་ནང་གི་དབུས་སུ་ཧཱུཾ་ཉི་མ་ཟླ་བའི་དཀྱིལ་འཁོར་དང་ལྡན་པ་ཅིག་བསྒོམ་མོ། །དེའི་ཡང་ཧཱུཾ་གི་ཐིག་ལེ་ནི་ཉི་མའི་དཀྱིལ་འཁོར་དུ་བསམ། ཧཱུཾ་གི་ཟླ་ཚེས་ཟླ་བའི་དཀྱིལ་འཁོར་དུ་བསམ།
དེའི་འོག་ཏུ་ཧཱུཾ་དེ་ལས་འོད་ཟེར་བྱུང་བས་བཟླས་པའི་ཡིག་འབྲུ་རྣམས་ཕྲེང་བར་གྱུར་ནས། ཧཱུཾ་དེ་ཉིད་ལ་བལྟ་ཞིང་གསལ་བ་དང་། འདྲིས་ཤིང་གོམས་པའི་སྦྱོར་བས་རྩེ་གཅིག་ཁོ་ནར་བསྒོམ་མོ། །དེ་ལྟར་བདག་དམ་ཚིག་གི་ལྷ་མོར་གསལ་བ་དང་། གྲུབ་པའི་གནས་ནས་རང་
བཞིན་གྱི་ལྷ་མོ་སྔར་གྱི་དེ་དང་འདྲ་བ་ཞིག་ལ། འཁོར་མ་མོ་གཅེར་བུ་རལ་པ་ཅན་ཐོད་པས་སེ་རལ་ཁར་བརྒྱན་པ། ལག་པ་གཡས་པས་མིའི་སྙིང་ཐོགས་པ། ལག་པ་གཡོན་པས་བྷནྡྷ་རཀྟས་བཀང་བ་འཛིན་པ། སྙིང་གི་དཀྱིལ་ན་སྲོག་གི་སྙིང་པོ་བྷྱོཿརེ་རེ་ཡོད་པ། བསམ་གྱིས་མི་
ཁྱབ་པ་དང་བཅས་པ་བྱོན་པར་བསམ་མོ། །དེ་ནས་ནམ་མཁའ་ལ་སྤྱན་དྲངས་ནས། མདུན་དུ་ཨེའི་དབུས་སུ་སྔགས་ཀྱི་ས་བོན་ཧཱུཾ་དང་བྷྱོཿལ་སོ་སོར་ཐིམ་པས་སྐུ་ཕྱག་རྒྱར་བཞེངས་པར་བྱའོ། །དེ་ལ་དགུག་པ་དང་གཞུག་པ་དང་བཅིང་བ་དང་དབང་དུ་བྱ་བ་སྔགས་འདིས་

བྱའོ། །དྲྀ་ཤྱ་ཛཿཧཱུཾ་བཾ་ཧོཿས་མ་ཡ་སྟྭཾ་ས་མ་ཡ་སྟྭཾ་ཞེས་བརྗོད་ནས་དེ་ནས་གཟུགས་ལ་མངོན་དུ་སྐུ་སྟོན་པ་ཅིག་བསྒོམ་མོ། །དེ་ལྟར་མི་སྟོན་ན། ཨོཾ་ཧཱུཾ་བྷྱོཿཨེ་ཨཱར་ལི་ཧྲཱིཿཛཿཞེས་བརྗོད་ཅིང་གཟིར་རོ། །མངོན་དུ་མ་བྱུང་ན་བདག་གི་སེམས་ལ་ཅི་འདོད་པ་ནི་ཁྱོད་ཀྱིས་སྒྲུབ་
པར་གྱིས་ཤིག་ཅེས་བསྒོ་བའོ། །དེ་ཡང་ལས་བྱེད་པའི་ཚེ་རིག་སྔགས་ཀྱི་དམ་ཚིག་སྦྱིན་ཏེ། དམ་ཚིག་ཀྱང་གུར་གུམ་ཆུ་ལ་སྔགས་ཀྱིས་བཏབ་ལ་སྦྱིན་ནོ། །དམ་ཚིག་གི་སྔགས་འདིའོ། །ཨོཾ་ཧ་ན་ཧ་ན་བཛྲ་ས་མ་ཡ་ཨ་དྷི་ཀྲ་མ་ནན་ཧཱུཾ་ཕཊ། དམ་ཚིག་གི་ཆུ་སྦྱིན་ནས་བསྒོ་བ། ལྷ་མོ་ཁྱོད་
དམ་ཚིག་འདི་ལས་འདས་ནས་བསྒོ་བ་བཞིན་དུ་མ་བྱས་ན་རབ་ཏུ་གཟིར་བ་ཆེན་པོ་བྱེད་པ་དང་། དམ་ཚིག་གི་ཆུ་འདི་ཡང་ཧ་ལ་ཧ་ལ་ཆེན་པོར་འགྱུར་ཏེ། མཐོང་བས་ཁྲག་སྐྱུགས་པ་དང་། རྡོ་རྗེ་ཟ་བྱེད་ཆེན་པོས་སྙིང་དྲལ་ཏེ་དུས་མ་ཡིན་པར་འཆི་བར་འགྱུར་བ་དང་། རྡོ་རྗེ་གནོད་སྦྱིན་གྱིས་གསོད་
པ་ལ་སོགས་པར་འགྱུར་རོ། །ཁྲོ་བོ་ཟ་བྱེད་ཆེན་པོར་འགྱུར་ཏེ། རྡོ་རྗེ་མེ་དཔལ་འབར་བས་ཚིག་ནས་ལུས་ཐལ་བར་བྱས་ཏེ། སོ་སོ་རང་གི་རྣམ་པ་གསལ་བཞིན་དུ་དམྱལ་བ་འབོད་སྒྲོགས་སུ་སྐྱེ་བར་འགྱུར་རོ་ཞེས་དམ་ཚིག་བོར། དེ་ནས་ལྷ་མོ་ལ་མཆོད་པ་ལྔ་དང་གཏོར་མ་དབུལ་
ལོ། །ཨོཾ་ཧཱུཾ་ཤྲཱི་ཡ་དེ་བཱི་ཀཱ་ལི་མ་ཧཱ་ཀཱ་ལི་ཧཱུཾ་བྷྱོཿ། །ཨོཾ་བཛྲ་པུཥྤེ་པཱུ་ཛ་སྥ་ར་ཎ་ས་མ་ཡེ་ཧཱུཾ་ཕཊ་ཅེས་བརྗོད་དེ་མེ་ཏོག་དབུལ་ལོ། །ཨོཾ་བཛྲ་དྷཱུ་པེ་པཱུ་ཛ་སྥ་ར་ཎ་ས་མ་ཡེ་ཧཱུཾ་ཞེས་བརྗོད་དེ་བདུག་སྤོས་ཤངས་ལ་དབུལ་ལོ། །ཨོཾ་བཛྲ་དཱི་པེ་པཱུ་ཛ་སྥ་ར་ཎ་ས་མ་ཡེ་ཧཱུཾ་ཞེས་བརྗོད་དེ་མར་མེ་སྤྱན་ལ་
དབུལ་ལོ། །ཨོཾ་བཛྲ་གནྡྷེ་པཱུ་ཛ་སྥ་ར་ཎ་ས་མ་ཡེ་ཧཱུཾ་ཞེས་བརྗོད་དེ་དྲི་ཐུགས་ཀར་དབུལ་ལོ། །ཨོཾ་བཛྲ་ནཻ་ཝི་དྱེ་པཱུ་ཛ་སྥ་ར་ཎ་ས་མ་ཡ་ཧཱུཾ་ཞེས་བརྗོད་དེ་ལྷ་བཤོས་ཕྱག་ཏུ་དབུལ་ལོ། །དེ་ནས་ར་རོག་པོའི་ཤ་ཁྲག་དང་། བྱ་ནག་མོའི་ཤ་ཁྲག་དང་། གཞན་གྱི་ཡང་ཤ་ཁྲག་སྣ་ཚོགས་
གང་འབྱོར་པ་དང་། ཆང་ལ་སོགས་པ་བཟའ་བ་སྣ་ཚོགས་དང་ལྡན་པའི་གཏོར་མ་དབུལ་བར་བྱ་སྟེ། མ་ཧཱ་མཾ་ས་ཁཱ་ཧི། མ་ཧཱ་གོ་རོ་ཙ་ན་ཁཱ་ཧི། མ་ཧཱ་ཙིཏྟ་ཁཱ་ཧི། མ་ཧཱ་བ་སུ་ཏ་ཁཱ་ཧི། ཨི་དཾ་བ་ལིཾ་གྲྀ་ཧྞཱ་ས་མ་ཡ་ཧཱུཾ་ཕཊ་སྭཱ་ཧཱ་ཞེས་བརྗོད་དེ་གཏོར་མ་དབུལ་བར་བྱའོ། །དེ་ལྟར་མཆོད་པ་

རྫོགས་པར་ཕུལ་ནས་བསྟོད་པ་བྱའོ། །གླིང་བུ་འབུད་པའམ། མི་རྐང་འབུད་པའམ། ཅང་ཏེའུའམ། མི་ཐོད་ཀྱི་རྔ་བརྡུང་ཞིང་དབྱངས་སྙན་པོས་བསྟོད་པ་བྱ་སྟེ། ཨོཾ་དཔལ་ལྡན་ནག་མོ་མི་ཕམ་སྲིད་གསུམ་བདག །རང་དོན་གྲུབ་ཅིང་རྣམ་ཐར་སྒོར་གཞོལ་ཀྱང་། །སྙིང་རྗེའི་དབང་
གིས་གཞན་དོན་རྗེས་ཐོབ་ཅིང་། །ཤེས་རབ་སྣ་ཚོགས་དག་གིས་འགྲོ་དོན་བྱེད། །ལྷ་མོ་སྐུ་མདོག་ནག་མོ་ཆར་སྤྲིན་མདོག །མཚན་མོ་ནག་མོ་ཤིན་ཏུ་གཏུམ་པའི་གཟུགས། །ཤིན་ཏུ་རིད་ཅིང་ཀེང་རུས་ལུས་ཅན་མ། །ཞལ་གཅིག་ཕྱག་བཞི་ཞབས་གཉིས་བརྗིད་པའི་སྐུ། །རལ་
པ་གྱེན་འགྲེང་ལན་བུ་གཡོན་དུ་འཁྱིལ། །སྐྲ་རྐེད་སྦྲུལ་དང་ཐོད་པའི་ཕྲེང་ཐོད་ཅན། །རྣ་ལྟག་མེ་ཏོག་དར་ནག་ཅོད་པན་ཅན། །ཁྲག་གི་ཆང་གིས་ར་རོ་སྤྱན་རྩ་དམར། །མི་རོ་རེངས་པ་ཁར་བཅུག་མཆེ་བ་གཙིགས། །རྣམ་པར་གཙིགས་ནས་ཁྲག་ལ་ཤིན་ཏུ་དགྱེས། །སྙན་ཆ་
གཡས་པ་སྦྲུལ་གྱི་མགུལ་ནས་དྲིལ་བུ་གསིལ། །གདུག་པ་བཏུལ་ནས་ཚངས་པའི་སྒྲ་སྒྲོགས་མ། །སྙན་ཆ་གཡོན་པར་སེང་གེ་རལ་པ་དམར། །དཔའ་བོ་ཁམས་གསུམ་སེང་གེའི་སྒྲ་སྒྲོགས་ཤིང་། །ཕྱག་བཞི་གཡས་ཀྱི་དང་པོ་རལ་གྲི་འཛིན། །འོག་མ་བྷནྡྷ་རཀྟ་
དམར་བསྐྱིལ་འཛིན། །གཡོན་གྱི་དང་པོ་ཤཀྟི་མཚོན་ཆ་འཛིན། །འོག་མ་ཏྲི་ཤཱུལ་མགུལ་ན་དར་དཔྱངས་འཛིན། །ཤཀྟི་རལ་གྲི་མཚོན་གྱིས་བསད་པ་ཡི། །ལྷ་མ་ཡིན་གྱི་མགོ་བོས་དོ་ཤལ་བྱས། །གླང་པོ་ཆེ་ཡི་ཀོ་རློན་སྟོད་གཡོགས་བྱས། །སྨད་ནི་བ་ལང་ཀོ་རློན་དྲས་
པ་ལ། །ཕྱེད་ནི་རེ་ལྡེ་སེར་པོའི་ཤམ་བུས་དཀྲིས། །ཀླུ་ཡི་དབང་པོ་གཞིབས་པའི་རྐེད་ཆིངས་ཅན། །ཞབས་གཉིས་ལྕགས་སྒྲོག་དག་གིས་མཛེས་པར་བརྒྱན། །ཁྲག་ཞག་མང་པོ་དག་གི་ཚོམ་བུས་ཐིག་ལེར་བྲིས། །བོང་བུ་གྭ་ཞོན་མཚན་མོ་དུར་ཁྲོད་རྒྱུ། །བོང་བུའི་རྨིག་
པ་གློག་གི་ཤུགས་ཅན་མ། །ཁམས་གསུམ་སྐད་ཅིག་ཙམ་གྱིས་སྐོར་བར་བྱེད། །སྐད་ནི་དུང་དང་འབྲུག་གི་སྒྲ་ལྟར་སྒྲོགས། །མ་མོ་མཁའ་འགྲོ་ཤ་ཟ་དབང་དུ་སྡུད། །ལྷོ་ཕྱོགས་གཤིན་རྗེའི་ཕོ་བྲང་དག་ན་གནས། །དམ་པའི་ས་ནས་གཟུགས་སྐུ་གཉིས་གཟིགས་མ། །

ཏིང་འཛིན་དབང་ཐོབ་གཟུགས་ཁམས་གནས་སུ་བྱོན། །ཚངས་པའི་རྒྱལ་པོ་ལ་སོགས་ཕྱག་བྱས་མ། །གཞན་ལ་དབང་བསྒྱུར་འདོད་ཁམས་ཡ་མཐར་བྱོན། །དབང་ཕྱུག་ཆེན་པོའི་སྐུ་ལ་དགྱེས་འཁྲིལ་མ། །སུམ་ཅུ་རྩ་གསུམ་ཚལ་དུ་བྱོན་པའི་ཚེ། །ལྷ་རྣམས་དབུགས་
ཕྱུང་བརྒྱ་བྱིན་ཕྱག་བྱས་མ། །ལྷ་མ་ཡིན་རྣམས་ཕུང་བར་བྱས་པའི་ཚེ། །ལྷ་མིན་དབང་པོ་ཀུན་གྱིས་ཕྱག་བྱས་མ། །སྐུ་མདོག་རི་རབ་ཆེ་དང་འགྲན་པའི་ཚེ། །ལྟེ་བའི་ཐད་ཀའི་ཕྱོགས་ནས་ཉི་ཟླ་འཆར། །རྒྱལ་ཆེན་བཞི་ལ་སོགས་པས་ཕྱག་བྱས་མ། །རྒྱ་མཚོའི་གཏིང་ནས་མེ་སྦར་མཚོ་
སྐེམས་ནུས། །ས་འོག་དབང་པོ་ཀུན་གྱིས་ཕྱག་བྱས་མ། །ལྷ་མོ་ཁྱོད་ཀྱིས་ཆོ་འཕྲུལ་འདི་བསྟན་པས། །བདུད་དང་གཤིན་རྗེའི་རྒྱལ་པོ་འདར་ཞིང་འདུད། །མ་མོ་སྲིན་མོའི་ཚོགས་རྣམས་རྔམ་ཞིང་རྒོད། །དམ་སྲིའི་ཚོགས་རྣམས་འདར་ཞིང་དམ་ལ་འདུད། །ཙིཏྟའི་རིན་ཆེན་གུར་ཕུབ་
གཞལ་ཡས་ནས། །ཉི་ཟླའི་དཀྱིལ་འཁོར་བརྩེགས་པའི་འོད་ཟེར་འབར། །ཕྱོགས་བཅུ་འཇིག་རྟེན་དག་གི་བཅུད་བསྡུས་ནས། །ཉི་མའི་དཀྱིལ་འཁོར་དག་ལ་ཐིམ་མཛད་མ། །དུག་གི་རླངས་པས་ནག་པོའི་ཕྱོགས་རྣམས་ཀྱི། །བཞི་བརྒྱ་རྩ་བཞིའི་ནད་རྣམས་སློང་མཛད་མ། །དེ་ཕྱིར་
ནད་ཀྱི་བདག་མོ་དམ་ལ་འདུ། །ཕྱོགས་བཅུའི་འཇིག་རྟེན་བདུད་རྩིའི་བཅུད་བསྡུས་ནས། །ཟླ་བའི་དཀྱིལ་འཁོར་དག་ལ་ཐིམ་མཛད་མ། །བདུད་རྩིའི་རླངས་པས་དཀར་པོའི་ཕྱོགས་རྣམས་ཀྱི། །བཞི་བརྒྱ་རྩ་བཞིའི་ནད་ཀྱི་རྩད་གཅོད་མ། །བདུད་རྩི་སྨན་གྱི་རྒྱལ་མོ་དམ་ལ་འདུ། །གང་
ཞིག་ཁྱོད་ལ་དད་ན་མ་བས་བྱམས། །དེ་ཕྱིར་ནད་བདག་མ་གཅིག་སྨན་གྱི་གཙོ། །བདུད་རྩི་ལྷ་མོ་ཁྱོད་ལ་རྟག་ཏུ་བསྟོད། །སངས་རྒྱས་ཤཱཀྱ་ཐུབ་པའི་སྤྱན་སྔ་རུ། །བདག་གི་དེང་ནས་འཁོར་བ་ཇི་སྲིད་བར། །དཀར་པོའི་ཕྱོགས་ཀྱི་ནད་དང་སྡུག་བསྔལ་སོགས། །ཞི་བར་བྱ་
ཕྱིར་ཚེ་དང་བསོད་ནམས་སྤེལ། །ནག་པོའི་ཕྱོགས་ནི་བཀུག་ཅིང་དབང་དུ་སྡུད། །སྨྱོ་འབོག་བསད་ལ་སོགས་པའི་ལས་འདི་རྣམས། །བསྟན་པ་སྲུང་ཕྱིར་ལས་འདི་བསྒྲུབ་པར་བགྱི། །འདི་ལས་འགལ་ན་རྒྱལ་བའི་སྐུ་བསླུས་པས། །དུས་གསུམ་རྒྱལ་བའི་རྡོ་རྗེས་མགོ་

འགེམས་ཤོག །དེ་སྐད་རྒྱལ་བའི་སྤྱན་སྔར་དམ་བཅས་པས། །ཁས་བླངས་བཞིན་དུ་དམ་ཚིག་དགྱེས་དགོངས་ལ། །དམ་བཅས་བཞིན་དུ་ཕྲིན་ལས་མྱུར་དུ་མཛོད། །རྣལ་འབྱོར་བདག་དང་བདག་གི་འཁོར་བཅས་ལ། །ཞལ་ནས་བདུད་རྩིའི་རྒྱུན་གྱི་ཆར་ཕོབ་ལ། །ནད་སོགས་སྡུག་
བསྔལ་ཚོགས་རྣམས་ཞི་བར་མཛོད། །ཚེ་དང་དབང་ཐང་ལོངས་སྤྱོད་རྒྱས་པར་མཛོད། །ཟང་ཟིང་ལོ་ཏོག་འབྲུ་ཡི་ཕུང་པོ་དང་། །རིན་ཆེན་རྐང་འགྲོ་ཕྱུགས་རྣམས་འཕེལ་བར་མཛོད། །བླ་མ་སྨོད་ཅིང་དཀོན་མཆོག་དབུ་འཕང་སྨོད། །བདག་གི་དགེ་བའི་བར་ཆད་བྱེད་པ་རྣམས། །ཆེ་གེ་
མོ་ཞེས་བྱ་བའི་ལས་ངན་འདི། །ཁྱོད་ཀྱི་ཁོང་ནས་དུག་གི་རླུང་བུས་ལ། །འདུ་བ་རྣམ་བཞིའི་ནད་རྣམས་ཁོང་ནས་སློང་། །པགས་གཞི་ས་ལ་ལྷུང་ལ་རྡེབས་སུ་ཆུག །དོན་སྣོད་ལྔ་པོ་ཁོང་ཁྲག་སྐྱུག་ཏུ་ཆུག །ལས་ངན་འཁོར་བཅས་བྲང་ཆེན་བརྡུང་དུ་ཆུག །སྨྲེ་སྔགས་ཆོ་ངེ་གནམ་
དུ་འབོད་དུ་ཆུག །འཆི་བདག་གསད་སྨྱོ་འབོགས་པས་གསད་པར་མཛོད། །གཅན་གཟན་མཁའ་ལྡིང་ལ་སོགས་ལྟས་ངན་ཕོབ། །བསྟན་པ་སྲུང་བའི་ལས་འདི་མྱུར་དུ་མཛོད། །ཨོཾ་རོ་རུ་རོ་རུ་བི་ཏིཥྛ་བ་དྷོ་ཏྶཱི་ཀ་མཱ་ལ་རཀྵ་སཱི་ཧཱུཾ་བྷྱོཿ། །ཆེ་གེ་མོ་མཱ་ར་ཡ་ཧཱུཾ་ཕཊ་ཅེས་བཟླས་ཤིང་
དམ་བདར། གཏོར་མ་སྥྲེང་ཞིང་བརྒྱ་རྩ་བརྒྱད་དམ། ཡང་ན་ཉི་ཤུ་རྩ་གཅིག་བཟླས། གཞན་ཡང་ལྷ་མོའི་གཟུངས་ལ་སོགས་བསྟོད་པ་མཐའ་དག་བྱའོ། །དེ་ནས་ལྷ་མོའི་རྣལ་འབྱོར་ལ་གནས་ནས། དོན་ཐམས་ཅད་གྲུབ་པར་བྱེད་པའི་སྙིང་པོའི་སྔགས་འདིས་བཟླས་པར་བྱ་སྟེ། མྱུར་
བར་མ་ཡིན་བུལ་མ་ཡིན། །མི་གསལ་མ་ཡིན་གསལ་བར་མིན། །གུག་སྐྱེད་ཉམས་པ་མ་ཡིན་པ། །གཡེང་བའི་རྟོག་པ་སྤངས་པས་བཟླས། །ཨོཾ་ཧཱུཾ་ཤྲི་ཡ་དེ་ཝཱི་ཀཱ་ལི་མ་ཧཱ་ཀཱ་ལི་ཧཱུཾ་བྷྱོཿ། །ཨཱ་ར་ལི་ཧྲིཾ་ཛཿཞེས་ཡིག་འབྲུ་གསལ་བར་བྱས་ཏེ། སྔགས་ཀྱི་བཟླས་པ་ཐམས་ཅད་ཀྱང་ལྷ་
མོའི་ཚིག་ཡིན་པར་ཆེ་བའི་ང་རྒྱལ་བྱ་ཞིང་། རང་གི་སྤྲུལ་པའི་ལྷ་མོ་ཐམས་ཅད་ཀྱི་ཞལ་ནས་ཀྱང་སྔགས་ཀྱི་སྒྲ་འབྱུང་བར་བསམ་ཞིང་བཟླས་པ་ལ་སོགས་པ་བྱ་སྟེ། དེ་ལྟ་བུ་ཐམས་ཅད་ཀྱིས་བཟླས་པར་འགྱུར། དེ་ནི་སྔོན་དུ་བྱ་བ་སྔགས་ཏེ། འབུམ་ཕྲག་བདུན་བཟླས་པའམ།

ཡང་ན་གསུམ་བཟླས་པས་ལས་ཐམས་ཅད་འགྲུབ་པར་འགྱུར་རོ། །དེ་ཡང་སྔགས་ཁྲི་ཕྲག་བཟླས་ནས་གཏོར་མ་རེ་རེ་བཏང་སྟེ། ཁུ་ཚུར་བཅིངས་ཏེ་མཛུབ་མོ་གཉིས་བསྒྲེངས་ལ། ཁ་འགྲམ་གཡས་གཡོན་དུ་མཆེ་བ་ལྟར་བྱས་ལ། ཨོཾ་བྱ་བཱ་བཏྟཱ་ལི་ཆེ་ཞེས་ལན་
བདུན་ནམ་གསུམ་བཟླས་ནས་འདི་སྐད་དུ། དུར་ཁྲོད་མ་མོ་དངོས་གྲུབ་ཞལ། །གཏུམ་མོ་གཙིགས་བྱེད་ཡི་དགས་ཁ། །དམ་ཚིག་སྲུང་མ་ཁྲག་དགའ་མོ། །ལྷ་ཆེན་དགྱེས་མཛད་ཁྱེད་ལ་བསྟོད། །ཀི་ལི་སྒྲ་སྒྲོགས་སྦྱོར་འཛིན་མ། །དུར་ཁྲོད་རོ་ཡི་མཚོ་དབུས་ན། །ཚོགས་དང་ཕོ་ཉ་བཅས་
པ་རུ། །གཙིགས་བྱེད་གཏུམ་བདུད་མཛད་ལ་བསྟོད། །ལས་བཞིའི་དབང་ཕྱུག་སྣ་ཚོགས་གཟུགས། །ཤིན་ཏུ་རིད་པའི་འཇིགས་གཟུགས་ཅན། །ལུས་ལ་ལྤགས་གྱོན་བོང་བུ་ཞོན། །གནས་གསུམ་བདག་མོ་ཁྱེད་བསྟོད་དོ། །སྐེ་ཆ་ལུས་རྒྱན་ཐལ་བས་མཚན། །ཕྱོགས་བཞི་ཉུལ་
ཞིང་སྲོག་གི་བདག །ཡ་མཚན་གྱུར་ནས་དེ་མཚན་གྱིས། །སྔོན་ཆད་ལ་སོགས་འདུད་ལ་བསྟོད། །གསོལ་ཅིག་བཞེས་ཤིག་དམ་ཚིག་ལྷ། །གནས་ནས་གནས་སུ་མཛད་དུ་གསོལ། །བདག་གི་བསམ་པ་ཅི་འདོད་པ། །དེ་ནི་ཁྱོད་ཀྱིས་འགྲུབ་པར་གྱིས། །བདག་གི་ལས་འདི་ཅི་
བྱེད་ཀྱང་། །དེ་ལ་ཀུན་གྱིས་གྲོགས་གྱིས་ཤིག །གྲྀཧྞ་གྲྀཧྞ། སརྦ་དུཥྚཱཾ། པྲ་དུཥྚཱཾ། བྷཀྵ་བྷཀྵ། ཕྲུཾ་ཕྲུཾ་ཕྲུཾ་ཕཊ་སྭཱ་ཧཱ་ཞེས་བརྗོད་དེ། སེ་གོལ་ལན་གསུམ་བརྡབས་ལ་གཏང་བར་བྱའོ། །སྔགས་མ་རྫོགས་ཀྱི་བར་དུ་དེ་ལྟར་ཤེས་པར་བྱའོ། །ཇི་སྲིད་སྐྱོ་བར་མ་གྱུར་གྱི་བར་དེ་སྲིད་དུ་བཟླས་
ལ། །སྐྱོ་བར་གྱུར་ན་ཡང་བསྟོད་པ་བྱས་ལ་མཆོད་ཡོན་ཕུལ་ཏེ་མཆོད་ལ་ཕྱག་བྱས་ལ། ལྷ་མོ་སླར་གཤེགས་སུ་གསོལ། དཔལ་ལྷ་མོ་ལ་སྔོན་དུ་མཆོད་པ་ཕུལ་ཞིང་བསྙེན་པ་རྫོགས་པར་བྱས་ལ། ལྷ་མོས་ལུང་བསྟན་ཅིང་མཚན་མ་ཐོབ་པའི་རྣལ་འབྱོར་པས་ཀྱང་དང་པོ་ཉིད་དུ་སྙིང་པོའི་
སྔགས་འབུམ་བཟླས་ཏེ། དེ་ནས་བཟོད་ལས་ལ་སྦྱར་རོ། །དེ་ལ་སྨྱོ་ཞིང་བསད་པའི་ལས་བྱ་སྟེ། གྲོག་མཁར་གྱི་ས་དང་། ཆུ་འགྲམ་གཉིས་ཀྱི་ས་དང་། དུར་ཁྲོད་ཀྱི་ས་དང་། དུར་ཁྲོད་ཀྱི་ཐལ་བ་དྲོན་པོ་དང་། དུར་ཁྲོད་ཀྱི་སོལ་བ་དང་། རྫས་དེ་དག་གཅིག་ཏུ་བསྲེས་ཏེ། ཞིབ་ཏུ་

བཏགས་ལ། ལུང་བོང་གི་གཅིན་གྱིས་སྦྲུས་ཏེ། བསྒྲུབ་བྱའི་གཟུགས་བརྙན་བྱས་ལ་ལྡུམ་བུ་མེད་ན་ཡང་། ལུང་ཏང་ཙེའི་འབྲས་བུ་དང་། དུག་དང་། སྐེ་ཚེ་དང་། ལན་ཚྭ་དང་། ར་ཁྲག་སྦྱར་ལ་མི་དེའི་རུས་རིགས་བླ་གང་ཡིན་པའི་གཟུགས་གྲོ་ག་ལ་བྲིས་ལ། བླ་དེའི་ལུས་ལ་དེའི་མིང་རུས་
དང་། སོད་ཅིག་པའི་བསྐུལ་ཚིག་དང་ལྡན་པ་བྲིས་ཏེ། འདི་སྐད་དུ། ཧཱུཾ་ཆེ་གེ་མོ་མཱ་ར་ཡ་མཱ་ར་ཡ་ཨུན་མནྟ་ཀུ་རུ་ཧཱུཾ་ཕཊ་ཅེས་བྲི། བླ་རྡོ་དང་སྦྲགས་ལ་གཟུགས་བརྙན་གྱི་སྙིང་གར་གཞུག །གཞན་ཡང་གོང་གི་རྫས་དང་། ཚ་བ་གསུམ་དང་། མུ་ཟི་ནག་པོ་བསྲེས་ཏེ་ཞིབ་ཏུ་བཏགས་ལ།
ལུང་བོང་གི་གཅིན་དང་སྦྱར་ཏེ། གཟུགས་བརྙན་ལ་ཁྱབ་པར་བསྐུའོ། །དེ་ནས་གཅན་གཟན་གྱི་ཐོད་པར་བཅུག་ལ་མཎྜལ་གྱི་དབུས་སུ་གཞག །དེ་ནས་གང་ལ་བྱ་བ་དེ་བཀུག་ཅིང་གཟུགས་བརྙན་ལ་བསྟིམས་ཏེ། མི་དེ་ཡིན་པ་ཁོ་ནར་བསམས་ལ་དེ་ལ་ལས་བྱའོ། །གསལ་ཤིང་ལ་བསྐྱོན་ལ་
གསད་པའི་ཚུལ་དུ། འདིར་ལྕགས་ལས་གསལ་ཤིང་རྩེ་གཅིག་པ་བརྡུངས་ལ་བྱའོ། །དེ་ལྟར་བྱས་པ་ནི་ལྷ་མོ་ཡིན་ཏེ། གཟུགས་བརྙན་གྱི་རྐུབ་ནས་གྱེན་དུ་བཙུགས་པར་ཕྱུང་ལ་གཟུགས་སོ། །དེ་ནས་སྔགས་འབུམ་ཕྲག་གསུམ་བཟླས་ན་དགྲ་བོ་བརླག་པར་འགྱུར་རོ། །དེ་དབུས་
བསམ་པར་བྱ་བ་ནི། བསྒྲུབ་བྱ་དེའི་སྙིང་གའི་དབུས་སུ་ཡི་གེ་ཀཾ་ལས་གྱུར་པའི་སྡིག་པ་ཁ་དོག་ནག་པོ་མི་སྡུག་པ་ཅིག །སྙིང་གི་མར་མེའི་དབུས་སུ་ཞུགས་ནས། སྙིང་ཁྲག་འཐུང་ཞིང་ཤ་ཟ་བར་བསམ་མོ། །གཞན་ཡང་དཔལ་ལྷ་མོ་ནག་མོ་བསྒོམས་པའི་ཐུགས་ཀའི་མར་མེ་ལ།
ནང་གི་ཧཱུཾ་གི་འོད་ཟེར་ལས་ཛཿདམར་པོ་སྒྲིལ་མར་ཕྱོགས་བཅུར་འཕྲོས་འདུས་དེ་ཡོངས་སུ་གྱུར་པ་ལས། ལྕགས་ཀྱི་སྤྱང་མོ་རལ་པ་ཅན་ཅིག་ཏུ་བསྒོམ་མོ། །དེས་བསྒྲུབ་བྱའི་སྙིང་རྩའི་དབུས་ནས་ཁྲག་རྔུབ་པར་བསམ་ཞིང་སྔགས་བཟླས་ཏེ། ཨོཾ་ཧཱུཾ་ཤྲཱི་དེ་ཝཱི་ཀཱ་ལི་མ་ཧཱ་ཀཱ་ལི་ཧཱུཾ་
བྷྱོཿ། །མ་མ་ཤ་ཏྲཱུཾ་ཨཱ་མུ་ཀཾ་མཱ་ར་ཡ་ཧཱུཾ་ཧཱུཾ་ཕཊ་ཕཊ་ཅེས་བརྒྱ་རྩ་རེ་བཟླས་ནས། རྫས་ནི་ཀ་ན་ཀའི་རྩ་བ་དང་། ཟི་ར་ནག་པོ་དང་། དབང་པོའི་ལག་པ་དང་། གནོད་སྦྱིན་གྱི་ལག་པ་དང་། བེའུ་རྒྱུག་པ་དང་། སྐྱེ་བ་དམར་པོ་དང་། དུར་ཁྲོད་ཀྱི་སོལ་བ་དང་། ལན་ཚྭའི་ཕྱེ་མ་རྣམས་ཞིབ་ཏུ་

བཏགས་པའི་ཕྱེ་མ་སྦྱར་བ་བྱས་ལ། སྔགས་བཟླས་ནས་གཟུགས་བརྙན་ལ་གདབ། ཕུར་པ་དམར་ལྷང་ངེ་བ་བསྲེགས་ལ་སྙིང་གར་གདབ། དེ་ལྟར་མཚོན་རྣོན་པོས་གཟུགས་དུམ་བུར་གཏུབས་ལ། ཕྱེ་མར་བྱས་ལ། ད་དུ་རའི་འབྲས་བུ་ཡོད་ན་རབ། མེད་ན་ཡང་ལུང་
ཏང་ཙེའི་འབྲས་བུ་བརྒྱ་རྩ་བརྒྱད་བླངས་ལ། རྩབ་མོའི་ནང་དུ་བཙགས་ནས་གཟུགས་བརྙན་གྱི་ཕྱེ་མ་དང་བསྲེས་ནས། དཔལ་ལྷ་མོའི་སྦྱོར་བས་སྐྲ་བཤིག་གཅེར་བུར་ཕྱུང་ནས། ཁ་ལྷོ་ཕྱོགས་སུ་བལྟས་ཏེ་ཚེར་མ་ལ་སྦྱིན་སྲེག་བྱའོ། །དེ་ནས་སྔགས་ལ། ཨོཾ་ཧཱུཾ་ཤྲཱི་དེ་ཝཱི་ཀཱ་ལི་མ་ཧཱ་ཀཱ་ལི་
ཧཱུཾ་བྷྱོཿ། །མ་མ་ཤ་ཏྲཱུཾ་ཨཱ་མུ་ཀཾ་མཱ་ར་ཡ་ཨུན་མནྟ་ཀུ་རུ་ཧཱུཾ་ཕཊ་ཅེས་བརྒྱ་རྩ་བརྒྱད་བཟླས་ཤིང་། རྫས་དང་བསྟུན་ཞིང་བསྲེག་པར་བྱའོ། །དེ་ལྟར་བྱས་ན་སྨྱོ་ནས་འཆི་བར་འགྱུར་རོ། །ཧཾ་གིས་ཐལ་བ་དེ་ཉིད་བླངས་ཏེ། དེ་ཉིད་སྤྱི་བོར་བཏབ་ན་ལོ་ཉི་ཤུ་རྩ་གཅིག་ཏུ་སྨྱོ་བར་འགྱུར་རོ་ཞེས་
ཀྱང་བཤད་དོ། །གཞན་ཡང་བདག་གི་རྨི་ལྟས་སུ། །བུད་མེད་ནག་མོ་ཁྲོས་པ་ཡིས། །གང་ཞིག་འཆིང་བས་བཅིངས་གྱུར་ན། །མཚན་མོ་ནག་མོར་དེ་ཤེས་བྱ། །བསྒྲུབ་བྱ་ཉི་མ་བདུན་ན་ནི། །འཆི་སྟེ་གཤིན་རྗེའི་ཡུལ་དུ་འགྲོ། །གལ་ཏེ་རེ་ཞིག་ཅུང་ཟད་འགོར་ན་ཡང་། ཉིན་ཞག་
བདུན་དུ་བསམ་གཏན་འདི་བྱའོ། །བསྒྲུབ་བྱ་ལུས་པོ་སྐམས་ལ་རིད་པ། སྐྲ་འཛིངས་པ། སྦུབ་པ། ཁུ་བ་དང་། རྡུལ་དང་ཁྲག་འཛག་པ། འདར་བའི་ཆ་བྱད་ཅན་ཞིག་མདུན་དུ་མངོན་སུམ་དུ་བསམ་མོ། །བདག་ལྷ་མོར་གནས་པའི་ཧཱུཾ་ལས་འོད་ཟེར་ཉི་མ་དང་མེ་སྟག་ལྟ་བུ་འབྱུང་
བ་ལས། བསྐལ་པའི་མེ་བཞིན་འབར་ཞིང་། འུར་འུར་དང་། ཏོག་ཏོག་དང་། ཆེམ་ཆེམ་ཅན་དུ་དྲག་པོའི་ཡི་གེ་ཧཱུཾ་དུ་གྱུར་ནས། ཧཱུཾ་དེ་ལས་རྡོ་རྗེའི་ཁབ་ཏུ་གྱུར་པར་བསམ་མོ། །རྡོ་རྗེ་འབར་བའི་ཁབ་དེ་དགྲ་བོའི་བཤང་ཁུང་གི་སྒོར་ཞུགས་ཏེ། སྙིང་ཕུག་ནས་ཁའི་ནང་ནས་སམ། སྤྱི་གཙུག་
གི་ཚངས་པའི་བུ་ག་ནས་ཕྱུང་ནས་ཆེར་འབར་བར་བསམས་ཏེ། སྙིང་པོའི་སྔགས་ཀྱི་མཇུག་ལ། ཆེ་གེ་མོ་ཧ་ན་ཧ་ན། ད་ཧ་ད་ཧ། ཧཱུཾ་ཧཱུཾ་ཕཊ་ཕཊ་ཅེས་པའི་སྔགས་ཀྱིས་ཁས་བུབ་ཏུ་ལྷུང་བར་བྱའོ། །དེ་ལྟ་བུས་བསམ་གཏན་གྱི་ལྷ་ཡང་འཆི་ན་འཁོར་བ་ན་གནས་པའི་མི་རྣམས་ལ་ལྟ་

ཅི་སྨོས། ལྷ་མོ་མུ་སྟེགས་ཀྱི་སྒྲུབ་ལུགས། སློབ་དཔོན་ལོ་ཀ་ཤྲཱི་ཡིས་བསྒྱུར་བ་རྫོགས་སོ།། ༄༅༅། །ཨོཾ་སྭསྟི། རེ་མ་ཏིའི་དམག་ཟོར་གྱི་མན་ངག་འདི་ལ། མན་ངག་གཅིག་ལ་ཁུངས་གཉིས་ཏེ། དང་པོ་ཨཱ་ཙརྱ་དམར་པོ་ལ་ལྕེ་འབྱུང་གནས་བཟང་པོས་གསེར་སྲང་ལྔ་ཕུལ་
ནས་ཞུས། དགེ་བཤེས་ལྕེ་ལ་ཞང་ཤེས་རབ་དང་། སྣུབས་རྒྱ་ལེ་གཉིས་ཀྱིས་སྟག་གཅིག་སྤྱི་མར་ཕུལ་ནས་ཞུས། སྣུབས་ལ་སྣུབས་ཀྱི་མ་མོ་ཁྲག་མིག་ཅེས་པར་གྲགས་སོ། །གཉིས་པ་ནི་ལོ་ཙཱ་བ་ཤེས་རབ་བླ་མས་གུ་རུ་ཨཱ་ཙརྱ་དམར་པོ་ཉིད་རྒྱ་གར་དུ་གཤེགས་པ་ལ་བལ་
པོ་ཚུན་ཆད་སྐྱེལ་ཐུང་མཛད་ནས་ཞུས་ནས་ཁྱད་བྱུང་སྟེ། ཞལ་གྱི་མན་ངག་མ་ལུས་པ་ཡིད་ཆེས་པར་གནང་སྟེ་ཁུངས་གཉིས་སོ། །དམག་ཟོར་ཞེས་པའི་དེས་ཚིག་གཏམ་དེར་རྩད་ཆོད་དོ། །གཞུང་ནི་སྡོམ་བརྒྱད་པོ་འདི་ཉིད་ཡིན་ཏེ་ཁུངས་མཐུན་ནོ། །མན་ངག་འདི་བྱ་
ཐབས་ལ། །མཆོད་པ་བཤམས་ཏེ་བཅའ་བ་དང་། །མ་མོ་བསྐྱེད་ཅིང་ཡེ་ཤེས་དགུག །མཆོད་ཅིང་བཟླས་པ་བྱ་བ་དང་། །བསྟོད་ཅིང་ལས་སྦྱོར་བསྡུ་བའོ། །དེ་ལ་མཆོད་པ་བཤམ་པ་ནི། །དུར་ཁྲོད་ལ་སོགས་དབེན་པའི་སར། །མཎྜལ་ཁྲུ་གསུམ་ཆག་ཆག་བྱ། །མདུན་དུ་
གྲུ་གསུམ་མི་རིས་བཅས། །སླར་བརྟག །མཎྜལ་སྟེང་དུ་སོགས་པའི་རྫས། །ཕུད་དང་གཏོར་མ་རཀྟ་བཤམས། །ཁྲམ་ཤིང་བྱང་དམར་ནད་རྐྱལ་དང་། །ཤོ་རྡེའུ་ཚོན་གྱི་དྲུ་བུ་སོགས། །ཤ་སྣ་རྙེད་ཚད་མི་དབང་ཤ །བསུར་ཆེན་མ་མོ་མཉེས་པར་བྱ། །དེ་ནས་རྟེན་གྱི་བྱ་ཐབས་ནི། །
དཀྱིལ་འཁོར་དབང་ལྡན་མཚམས་སུ་ནི། །འབྲུ་ནག་འཇིམ་ནག་བསྲེས་པ་ལས། །དྲེའུ་རྟ་ལ་ཞོན་ནག་མོ་ནི། །མཐིང་ནག་རྒྱན་གྱིས་བརྒྱན་པ་མོ། །རྨ་བྱའི་གདུགས་ཀྱིས་ཕུབ་པ་སྟེ། །བདུད་ཕྲུག་མཚོན་ཐོགས་མང་པོས་བསྐོར། །འཇིགས་སུ་རུང་བས་བསྐོར་བར་བྱ། །
ད་ནི་མ་མོ་བསྐྱེད་པར་བྱ། །རང་གི་ཆོ་ག་རྫོགས་བྱས་ལ། །བྱང་ཤར་མུ་ལེ་དངོས་སུ་བསམ། །རླུང་ནག་འཚུབ་མའི་ནང་ཤེད་དུ། །ཀྵ་ཞེས་བརྗོད་པས་སྐད་ཅིག་གིས། །དམག་ཟོར་ནག་མོ་རེ་མ་ཏི། །དྲེའུ་རྟ་ལ་ཞོན་ཐོད་པ་ཅན། །ཕྱག་གཡས་བེ་ཅོན་འཛིན་པ་ལ། །ཕྱག་གཡོན་

ཐོད་པ་ཁྲག་བཀང་བསྣམས། །དམོད་མོའི་མཚོན་ཆ་ལྔ་དང་བཅས། །སྒ་ཡི་སྔ་ཤ་ནད་རྐྱལ་ལ། །སྒ་ཡི་ཕྱི་རུ་དྲུ་བུ་སྟེ། །ཁྲམ་ཤིང་རྐེད་ལ་གཟིར་བ་དང་། །བྱད་དམར་ཤོ་རྡེའུ་སྔ་ཤ་ལ། །དར་ནག་གོས་ཀྱིས་སྐུ་སྟོད་བརྒྱན། །བྱ་ཡི་གདུགས་འོག་ཆུད་པར་
བསམ། །བདུད་ཕྲུག་ཚོགས་ནི་དུས་མཉམ་དུ། །གཡོན་པ་ཐོད་ཁྲག་ཡུངས་ཀར་ཅན། །གཡས་པ་མཚོན་ཆ་སྣ་ཚོགས་ཅན། །དེ་ལྟར་དམ་ཚིག་བསྐྱེད་བྱས་ལ། །རང་བཞིན་གནས་ནས་གཞུག་པར་བྱ། །ཛཿཧཱུཾ་ཞེས་ནི་སྔགས་ལ་གདགས། །བྱང་ཤར་ནས་བྱོན་རང་རང་ཐིམ། །བཞུགས་
སུ་གསོལ་བའི་ཚིག་འདི་བརྗོད། །ཧཱུཾ་ནག་མོ་གདུག་ཅན་དྲེགས་པ་ཅན། །ཀུན་དུ་ཁྱབ་པའི་གཟུགས་སྟོན་མ། །ནག་མོ་གཙོ་མོ་དྲེའུ་རྟ་ཆིབས། །འདིར་སྤྱོན་དྲེའུ་རྟའི་གདན་ལ་བཞུགས། །རགྨོ་ཛཿཧཱུཾ་བཾ་ཧོཿས་མ་ཡ་སྟྭཾ་ཞེས་བརྗོད་དོ། །དེ་ནས་དེ་ལ་མཆོད་པར་བྱ། །ཟ་བྱེད་ནག་མོ་
མཆེ་བ་ཅན། །དགོད་བྱེད་ཧ་ཧ་ནག་མོ་ཁྱོད། །གསོད་ལ་དགའ་བར་བྱེད་པ་མོ། །བདག་ནི་བརྡ་ཡི་ཕྱག་བྱེད་དོ། །རགྨོ་ཨ་ཏི་པཱུ་ཛ་ཧོ། ཕྲ་མོ་སྦོམ་པོ་ལས་བྱུང་བའི། །བདུད་རྩི་བྲན་པའི་ཛ་གད་འདི། །དམག་ཟོར་ནག་མོ་ལ་འབུལ་ལགས། །བསྟན་པ་བསྲུང་ཕྱིར་བཞེས་སུ་གསོལ། །
ཡི་གེ་སུམ་ཅུ་གཅིག་པ་ལ། །པཉྩ་ཨ་མྲྀ་ཏ་ཁཱ་ཧི་གདགས་སོ། །ཤ་ཁྲག་ལ་སོགས་བདུད་རྩི་ལྔ་དང་སྦྱོར། །འབྲུ་སྣ་ལྔ་ལ་སྦྱར་བའི་གཏོར་མ་འདི། །དམག་ཟོར་ནག་མོ་ཁྱོད་ལ་དབུལ། །བསྟན་པ་བསྲུང་ཕྱིར་བཞེས་སུ་གསོལ། །སྔགས་ཀྱི་མཇུག་ལ་བ་ལིཾ་ཏ་ལ་ཁ་རཾ་ཁཱ་ཧི་ཞེས་
གདགས་སོ། །ཆུ་དང་མ་འདྲེས་དངས་མའི་ཁྲག །དངས་མ་ཡི་ནི་ཁྲག་ཆེན་པོ། །དམག་ཟོར་ནག་མོ་ལ་དབུལ་ལགས། །བསྟན་པ་བསྲུང་ཕྱིར་བཞེས་སུ་གསོལ། །སྔགས་ཀྱི་མཇུག་ལ་མ་ཧཱ་རཀྟ་ཁ་རཾ་ཁཱ་ཧི་ཞེས་སོ། །ལྷ་མོའི་སྔོག་མི་ཡོང་བར་བྱ་བའི་ཕྱིར། བྱང་ཆུབ་ཀྱི་སེམས་
དཀར་དམར་ལྕེ་ལ་བཞག་ཅིང་མཆོད་དོ། །དེ་ནི་དམ་བསྲེས་སོ། །དེ་ནས་སྨོན་ལམ་གདབ་པ་ནི། །བདག་ཅག་དུས་འདིར་ཚེ་རིང་ཞིང་། །བུ་དང་ཚ་བོ་རྒྱས་པ་དང་། །ལོངས་སྤྱོད་ཐམས་ཅད་རྒྱས་པ་དང་། །ལོག་པར་ལྟ་བའི་དགྲ་དང་བགེགས། །ཐམས་ཅད་རྟག་ཏུ་རློག་པར་

བྱེད། །ད་ནི་བཟླས་པ་བརྩམ་པར་བྱ། །རྟེན་གྱི་ལྷ་མོའི་ཐུགས་ཀ་རུ། །རྒྱུས་པའི་སྲེད་བུ་དེ་ལ་གདགས། །རྣལ་འབྱོར་སྙིང་གའི་ས་བོན་ལས། །འོད་ཟེར་དཀར་པོ་འཕྲོས་པ་ཡིས། །ལྷ་མོའི་ཐུགས་ཀར་མ་ལ་ཐིམ། །འོད་ཟེར་སྔགས་ཀྱིས་མཆོད་པར་བསམ། །འོད་ཟེར་དཀར་པོ་
སྔགས་ཀྱི་གཟུགས། །བདག་ལ་སླར་ཐིམ་དངོས་གྲུབ་བྱིན། །དེ་ལྟར་ཡང་དང་ཡང་དུ་བསམ། །དེ་ཡི་ཐུན་སྨད་དག་ལ་ནི། །བདག་དང་མ་མོ་བདུད་ཕྲུག་བཅས། །ཐམས་ཅད་དུས་མཉམ་སྔགས་ཟློས་པའི། །འོད་ཟེར་དུག་མདའ་འདྲ་བ་ཡིས། །འབྲུབ་ཁུང་ཡུངས་ཐུན་ཁྲག་ཐུན་
བྱ། །གཟས་པའི་ལུས་ཀྱང་བརླག་པར་བསམ། །མགོན་པོ་དེ་ལ་གཟུངས་ཐག་གཏད། །བསྟོད་པ་ཅུང་ཟད་ཅུང་ཟད་བྱ། །རེ་མ་ཏི་ཡི་སྤྱི་དང་མཐུན། །དེ་ནས་ལས་ལ་བསྡུ་བ་ནི། །བདུད་ཕྲུག་ཚོགས་དང་ཁྲག་རྣམས་ནི། །སླེའུ་ཁུང་དུ་ཁྱེར་ནས་ནི། །བསྒྲུབ་བྱའི་ཕྱོགས་
སུ་ཁ་བལྟས་ལ། །སྐྲ་བཅིངས་འགྲམ་པ་སོལ་བས་བྱུག །དཔུང་པ་གཡས་པ་ཕྱུང་ནས་སུ། །ཡུགས་སྐྲས་བྱས་པའི་འུར་རྡོའམ། །ཡང་ན་ལག་པ་རང་གིས་ཏེ། །ཟོར་ལམ་སྤྱི་དང་མཐུན་པར་དབྱེ། །དམག་གི་ཚོགས་ནི་མི་ཐུབ་སྦྱིན། །དུག་ལྔས་བཀང་བ་མང་པོ་དང་། །ཡུངས་ཐུན་
ཐོགས་པ་མང་པོ་དང་། །མཚོན་ཆ་ཐོགས་པ་མང་པོ་ཡིས། །དགྲ་ལུས་ཡུལ་འཁོར་བཅོམ་པ་དང་། །ཐམས་ཅད་གསོད་ཅིང་ཟ་བར་བསམ། །གཡང་གཞི་དྲག་ཏུ་བརྡབ་པར་བྱ། །ལོག་ལ་ལྷ་མོ་ལ་ཡང་མཆོད། །བདུད་ཕུང་མང་པོ་ཕངས་པའི་ཚེ། །བདུད་ཕྲུག་གཟུགས་
རྣམས་མི་སྣང་ན། །ལས་རྣམས་འགྲུབ་པར་གདོན་མི་ཟ། །བདུད་རྣམས་འདུག་ན་ཅུང་ཟད་དཀའ། །ཅུང་ཟད་བསྟོད་པ་བྱེད་པ་ནི། །ཧཱུཾ་བྷྱོ་དཔལ་གྱི་གཟུགས་ཅན་འདོད་ཁམས་གཙོ་མོ་ཁྱོད། །རྟ་མཆོག་ཞོན་ནས་དཔག་ཚད་ལྔ་བརྒྱར་རྒྱུག །བེ་ཅོན་ཐོད་པ་དམ་པ་རང་རྟགས་འཛིན། །
རེ་ལྡེས་སྟོད་དཀྲིས་སྦྲུལ་གྱི་ཤམ་བུ་ཅན། །ལྟེ་བར་ཉི་ཤར་གཙུག་ན་ཟླ་རྒྱས་མ། །ཁྲག་ནད་བདག་མོ་དབྱིངས་ཕྱུག་དཔལ་འབར་མ། །ལྷ་མོ་རེ་མ་ཏི་ལ་བསྟོད་པ་འབུལ། །རགྨོ་བྷྱོཿ། །རགྨོ་བྷྱོཿབྷྱོཿ། །རགྨོ་ཐུན་བྷྱོཿ། །ཁ་ལ་རག་ཆེ་ན་མ། རགྨོ་ཨ་བྱ་ཏ་བྱ་ཐུན་བྷྱོཿ། །རུ་ལུ་རུ་ལུ་

ཧཱུཾ་བྷྱོ་ཧཱུཾ། ཆེ་གེ་མོ་མཱ་ར་ཡ། འབོད་རྦད་བསད་གསུམ་དེ་ལ་ཚང་། །བཟླས་པ་ལ་ནི་བརྩོན་འགྲུས་བྱ། །མ་མོའི་བསྟོད་བསྐུལ་སྤྱི་དང་མཐུན། །གསེར་མཁར་ར་བ་དུས་བཞིའི་རྒྱལ་མོའི་བསྐུལ་ལ་སོགས་པ་བྱ། དཔལ་ལྷ་མོ་དམག་ཟོར་གྱི་མན་ངག་རྫོགས་སོ།། །།
ཨཱ་ཙརྱ་དམར་པོ་ལ་ཤེས་རབ་བླ་མས་ཞུས་པའི་ལུགས་ཡིན།། ༄༅༅། །རྒྱ་གར་སྐད་དུ། ཨ་ནུ་ཛྙཱ་བི་དྷིཿ། བོད་སྐད་དུ། རྗེས་སུ་གནང་བའི་ཆོ་ག །དཔལ་རྣལ་འབྱོར་ནམ་མཁའ་ལ་ཕྱག་འཚལ་ལོ། །གདོད་མའི་མགོན་ལ་རབ་བཏུད་ནས། །ནཱ་རོའི་ཞབས་ལས་རིམ་འོངས་
པའི། །དུད་སོལ་མ་ཡི་རྗེས་སུ་གནང་། །ད་ནི་བདག་གིས་བཤད་པར་བྱ། །དེ་ཡང་རེ་ཞིག་དང་པོར་བཟའ་བ་དང་བཅའ་བ་དང་འཇིབ་པ་དང་བལྡག་པ་དང་བཏུང་བ་ལ་སོགས་པར་ལྡན་པའི་གཏོར་མ་འདུས་བྱས་ལ། འཆད་པར་གྱུར་པའི་ཆོ་གས་བཅོམ་ལྡན་འདས་མ་དུད་པའི་སོལ་བ་ལ་
མཆོད་ཅིང་བསྟོད་པས་ཡང་དག་པར་མཉེས་པར་བྱས་ནས་མངོན་པར་འདོད་པའི་བྱ་བ་སྩོལ་བྱའོ། །དེ་ནས་རྗེས་སུ་གནང་བ་ནོད་པར་འདོད་པའི་སློབ་མ་སྐལ་བ་དང་ལྡན་པ་རྣམས་ཀྱིས་བླ་མ་ལ་མཎྜལ་ཕུལ་ཏེ། མགོ་བོར་མེ་ཏོག་གི་ཕྲེང་བ་དང་བཅས་པས་པུས་མོ་ས་ལ་བཙུགས་ཤིང་ཐལ་
མོ་སྦྱར་ཏེ། དཀྱིལ་འཁོར་དབང་ཕྱུག་ཕྱི་དང་གསང་བ་གཞན་པ་ལས་བྱུང་བ། །བདག་དང་སྦྱོར་བ་ནམ་མཁའི་དེ་ཉིད་གདན་བཞུགས་རིག་མར་བཅས། །རྣལ་འབྱོར་ནམ་མཁའི་ཞབས་ཀྱི་ཆུ་སྐྱེས་ལ་ནི་གྲུབ་པ་ཡི། །རྗེས་སུ་འགྲོ་བའི་བློ་ནི་རྒྱལ་བའི་ཆེད་དུ་བདག་ཕྱག་འཚལ། །ཞེས་བྱ་
བ་འདི་བརྗོད་པའི་མཐར། ཀྱེ་འཁོར་ལོའི་དབང་ཕྱུག་གི་བདག་པོ་རྣལ་འབྱོར་ནམ་མཁའ། སྡུག་བསྔལ་གྱི་རྒྱ་མཚོར་གྱུར་པའི་སྲིད་པ་རབ་ཏུ་གཞོམ་པ་དང་། མཆོག་གི་བདེ་བ་ཆེན་པོའི་མྱ་ངན་ལས་འདས་པ་མངོན་དུ་མ་བྱས་པ་དེ་སྲིད་དུ། བར་དུ་གཅོད་པ་ཉེ་བར་ཞི་བའི་ཆེད་དུ། བདག་ལ་བཅོམ་
ལྡན་འདས་མ་དུད་པའི་སོལ་བ་མའི་རྗེས་སུ་གནང་བ་དང་བྱིན་གྱིས་བརླབ་པ་སྩལ་དུ་གསོལ་ཞེས་ལན་གསུམ་དུ་གསོལ་བ་གདབ་ཏུ་གཞུག་གོ། །དེ་མ་ཐག་པར་དེ་དག་རྣམས། །བླ་མ་སངས་རྒྱས་ལ་ཕྱག་འཚལ། །ཞེས་བྱ་བ་ལ་སོགས་པས་སྐྱབས་སུ་འགྲོ་བ་དང་། སེམས་བསྐྱེད་པ་

ལ་བཀོད་ནས། དེ་རྣམས་ཀྱི་མགོ་བོར་ལྷའི་རང་བཞིན་གྱི་གཏོར་མ་ཡང་དག་པར་བཀོད་པ། སྣ་ཚོགས་པདྨ་འདབ་མ་བརྒྱད་པ་དང་ཉི་མ་ལ་ཧཱུཾ་ཡིག་ལས་སྐྱེས་པའི་དུད་པའི་སོལ་བ་མ། དུ་བའི་མདོག་ཅན་ཞབས་གཡོན་བརྐྱང་བས་གནས་པ། ཞལ་གཅིག་ཕྱག་གཉིས་པ། ཞལ་སྤྱན་གསུམ་
དམར་ཞིང་ཟླུམ་པ། མཆེ་བ་གཙིགས་པ། གཡས་ཁ་ཊྭཱཾ་གའི་རལ་གྲི་འཕྱར་བ། གཡོན་ཁྲག་གིས་གང་བའི་ཐོད་པ་འཛིན་པ། སྐྲ་དམར་སེར་གྱེན་དུ་འབར་བ། དར་དམར་པོའི་སྨད་དཀྲིས་ཅན། ཕྱག་རྒྱ་དྲུག་གིས་ཉེ་བར་བརྒྱན་པ། སྒལ་ཚིགས་ཀྱི་ཕྲེང་བ་འཕྱར་བ། འཇིགས་པའི་གཟུགས་
ཅན་མ། མེ་དཔུང་རབ་ཏུ་འབར་བ་ཅན་དུ་བལྟ་བར་བྱའོ། །དེ་ནས་ཨོཾ་དྷུ་མཱངྒཱ་རཱི་ཡེ་སཱུཾ་སྭཱ་ཧཱ། ཞེས་བྱ་བས་ལན་ཉི་ཤུ་གཅིག་ཏུ་བསྔགས་ཏེ། །སེམས་ཅན་སྒྲོལ་མཛད་སྦྱོར་བའི་བདག་མོ་ཁྱོད་ལ་འདུད། །སྐལ་མང་སེམས་ཅན་རྒལ་བར་མཛད་མ་ཁྱོད་ལ་འདུད། །ཀུན་བདག་གཅིག་པའི་
རང་བཞིན་མ་ལ་བདག་འདུད་དོ། །གཅིག་པུའི་དེ་ཉིད་ངེས་གྱུར་བདག་ཉིད་མ་ལ་འདུད། །ཅེས་བྱ་བའི་ཚིགས་སུ་བཅད་པ་བླ་མས་ལན་གསུམ་དུ་བརྗོད་ཅིང་། གུ་གུལ་ལ་སོགས་པའི་སྤོས་ཀྱིས་བདུག་པ་དང་། རྔ་ལ་སོགས་པའི་རོལ་མོའི་སྒྲས་བྱིན་དབབ་པར་བྱའོ། །དེའི་རྗེས་སུ་རྡོ་རྗེ་
འཆང་ལ་སོགས་པ་བརྒྱུད་པའི་བླ་མ་རྣམས་ཀྱི་མཚན་ཡང་དག་པར་བསྒྲགས་ནས། ཀྱཻ་བཅོམ་ལྡན་འདས་མ་རྣལ་འབྱོར་ནམ་མཁའ་དུད་པའི་སོལ་བ་མ། འདི་དག་རྣམས་ཀྱིས་བཀའ་ལས་མ་འདའ་བར་དམ་བཅའ་བ་རྗེས་སུ་དྲན་པས་དམ་ཚིག་སྲུངས་ཤིག །བསྟན་པ་སྐྱོངས་ཤིག །སློབ་མ་ཆེ་
གེའི་དགྲ་དང་བགེགས་ཐམས་ཅད་གཞོམ་པར་མཛོད་ཅིག །ཆེ་གེའི་རྗེས་སུ་འཇུག་པར་གྱིས་ལ་ཇི་ལྟར་མངོན་པར་འདོད་པའི་དོན་ཐམས་ཅད་ཕུན་སུམ་ཚོགས་པར་བྱོས་ཤིག་ཅེས་བསྒོ་བར་བྱའོ། །དེ་ནས་དེས་ཇི་ལྟར་བཀའ་སྩལ་པ་དེ་བཞིན་དུ་བགྱི་སྟེ། ཁྱེད་རྣམས་ཀྱིས་མངོན་
པར་འདོད་པའི་དོན་ཕུན་སུམ་ཚོགས་པར་བགྱིད་དོ་ཞེས་ཁས་ལེན་པ་ནི། དེ་རྣམས་ཀྱང་མཉན་དུ་གཞུག་གོ། །དེ་ནས་གཏོར་མ་སྔར་གྱི་གནས་དེ་ཉིད་དུ་བཞག་ལ། བཅོམ་ལྡན་འདས་མ་ལ་ཡང་དག་པར་མཆོད་ཅིང་མངོན་པར་བསྟོད་དེ། ངེས་པར་དགྱེས་པར་གྱུར་པར་བལྟ་བར་བྱའོ། །

དེའི་རྗེས་སུ་འཆད་པར་འགྱུར་བའི་སྒྲུབ་པའི་ཐབས་བརྗོད་པར་བྱའོ། །དེ་ནས་ཚོགས་ཀྱི་འཁོར་ལོ་བྱ། །དོ་རྗེས་དུད་སོལ་དགྱེས་བྱ་ཞིང་། །དགེ་འདུན་མཆོད་སྟོན་གྱིས་མགུ་དང་། །ཕོངས་དང་མགོན་མེད་རྣམས་ཚིམ་བྱ། །འདི་ནི་རྗེས་སུ་གནང་བའི་ཆོ་གའོ། །དངོས་གྲུབ་
བརྙེས་པའི་པཎྜི་ཏ་ཆེན་པོ་ཤྲཱི་བ་ན་རཏྣའི་ཞལ་སྔ་ནས་མཛད་པའོ།། ༄༅༅། །རྒྱ་གར་སྐད་དུ། དྷཱུ་མངྒཱ་རི་སཱ་དྷ་ནཾ། བོད་སྐད་དུ། དུད་སོལ་མའི་སྒྲུབ་ཐབས། དུད་སོལ་མ་ལ་ཕྱག་འཚལ་ལོ། །དང་པོར་གདུག་པའི་བགེགས་ཚོགས་རྣམས། །འཇོམས་མཛད་དུད་སོལ་
མར་བཏུད་ནས། །གཞན་ལ་ཕན་ཕྱིར་བདག་གིས་ནི། །འདི་ཡི་སྒྲུབ་ཐབས་བཤད་པར་བྱ། །དེ་ལ་དང་པོར་རེ་ཞིག་སྔགས་པས་རང་གི་ཡིད་དང་རྗེས་སུ་མཐུན་པའི་ཡུལ་དང་གནས་སུ་བདེ་བའི་སྟན་ལ་ཉེ་བར་འདུག་ནས། སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་པ་སྔོན་དུ་སོང་
བས་གང་ཅི་ཡང་རུང་བའི་ལྷའི་ཁྱད་པར་གྱི་རང་གི་ཆོ་ག་ཤེས་པས། འདོད་པའི་ལྷའི་རྣལ་འབྱོར་དང་སྔགས་བཟླས་པ་ལ་སོགས་པ་རྫོགས་པར་བདག་ཉིད་ཀྱིས་བྱའོ། །མདུན་གྱི་ཕྱོགས་སུ་སྐད་ཅིག་གིས་སྐུ་མདོག་དང་ཕྱག་དང་། །དབྱིབས་ལ་སོགས་པ་སྔོན་དུ་བཤད་པའི་བཅོམ་ལྡན་འདས་
མ་དུད་སོལ་མ་བལྟ་བར་བྱ་སྟེ། དེ་ཡང་། རྣོ་བའི་ངར་ལྡན་རལ་གྲི་གཡས་པའི་ཕྱག་གིས་སྟེང་དུ་འཕྱར། །གཡོན་གྱི་ལག་པར་འགྲོ་ལ་གནོད་བྱེད་རྣམས་ཀྱི་ཁྲག་གི་སྣོད་བཟུང་ཞིང་། །ཚངས་དབང་ཁྱབ་འཇུག་སོགས་ཀྱི་བསྙེམས་པ་དྲག་པོ་རབ་ཏུ་གཞིལ་བ་མ། །དུད་པའི་སོལ་བ་
མ་འདི་ཤིན་ཏུ་བརྟན་པའི་ཡིད་ཀྱིས་རབ་བསྒོམ་བྱ། །བདག་ཉིད་ཀྱི་ལྷག་པའི་ལྷའི་རྣལ་འབྱོར་གྱིས་རང་གི་སྙིང་གར་བཟླས་བྱའི་སྔགས་ཀྱི་ཡི་གེ་ཤིན་ཏུ་གསལ་བ་རྣམས་ལས་རང་རང་གི་ཁ་དོག་དང་རྗེས་སུ་མཐུན་པའི་སྔགས་ཀྱི་འོད་ཟེར་རྣོ་ཞིང་རྩུབ་པ་དྲག་ཅིང་གདུག་པ་བཟོད་པར་
དཀའ་བའི་འོད་ཟེར་གྱི་ཚོགས་འཕྲོས་པ་རྣམས་ཀྱིས་དུད་སོལ་མའི་སྙིང་གི་ཆུ་སྐྱེས་ལ་གནས་པའི་ཉི་མའི་དཀྱིལ་འཁོར་གྱི་དབུས་ཀྱི་ཧཱུཾ་གི་ས་བོན་དུ་བ་ལྟ་བུ་ཤིན་ཏུ་གདུང་བས་གདུངས་ཏེ། ཡང་ནས་ཡང་དུ་བསྐྱོད་ཅིང་བསྐྱོད་པས་རབ་ཏུ་བསྐུལ་བར་བྱའོ། །དེ་ལས་ཀྱང་འདི་ལྟར་བཟོད་པར་

དཀའ་བའི་འོད་ཟེར་དྲག་པོས་དེའི་སྙིང་གདུངས་ཤིང་གདུངས་པ་མ་བཟོད་པས། སྒྲུབ་པ་པོའི་མངོན་པར་འདོད་པའི་དོན་རིག་ནས། རང་གི་སྙིང་གི་ས་བོན་ལས། དེ་ལྟ་བུའི་འོད་ཟེར་ཆེས་དྲག་པོ་སྤྲོས་པ་རྣམས་ཀྱིས་སྒྲུབ་པ་པོ་ལ་གནོད་པར་བྱེད་པ་བགེགས་གདུག་པ་ཅན་མ་ལུས་པ་ཐམས་ཅད་ལ་བསྣུན་
ཅིང་བསྐྲད་དེ་བཅོམ་ནས། སྒྲུབ་པ་པོ་བགེགས་དང་བྲལ་བ་ཉིད་དུ་ཤེས་པ་ལས་གང་དང་གང་འདོད་པའི་བྱ་བ་དེ་དང་དེ་རྫོགས་པར་བྱ་ཞིང་། ཇི་ལྟར་བཀའ་སྩོལ་བ་དེ་དང་དེ་ཐམས་ཅད་ཀྱིས་རྗེས་སུ་འཇུག་པ་དང་ཁས་ལེན་ན། ཅི་ཞིག་བགྱི་ཞེས་བཀའ་ནོད་ཅིང་འདུག་པར་མངོན་པར་མོས་ནས་
འདི་སྐད་དུ་སྔགས་བཟླ་བར་བྱ་བ་ནི། ཨོཾ་དྷཱུ་མངྒཱ་རཱི་ཡེ་ཧཱུཾ་སྭཱ་ཧཱ་ཞེས་བྱ་བ་ཇི་ཙམ་ནུས་པར་བཟླས་སོ། །དུབ་པར་གྱུར་པས་ལངས་པར་འདོད་པ་ན། རང་གི་འདོད་པའི་ལྷ་ལ་ཕྱག་བྱས་ནས། མངོན་པར་མཆོད་ཅིང་ཡང་དག་པར་བསྟོད་དེ། དགེ་བ་གང་ཞིག་ཐོབ་པ་དག་སེམས་ཅན་ཐམས་
ཅད་ཀྱི་ཆེད་དུ་བླ་ན་མེད་པའི་བྱང་ཆུབ་ཏུ་ཡོངས་སུ་བསྔོ་བ་དང་། བཟོད་པར་གསོལ་ལ་ཡེ་ཤེས་སེམས་དཔའ་གཤེགས་པར་བྱའོ། །དུད་པའི་སོལ་བ་ནི། ཆོ་ག་ཇི་ལྟ་བར་གཏོར་མ་དང་མཆོད་པ་དང་བདུད་རྩིས་ཚིམ་པར་བྱས་པས། ཡང་དག་པར་མཉེས་པ་ལས། རང་གི་འདོད་པའི་དོན་
གསོལ་བར་བྱའོ། །དེ་ནས་ཆོས་ཐམས་ཅད་རྟེན་ཅིང་འབྲེལ་པར་འབྱུང་བ་ཙམ་པ་སྟོང་པ་ཉིད་ཀྱི་རང་བཞིན་དུ་མོས་པར་བྱས་ནས། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱ་ནུཏྤནྣ་ཏྭཱཏ་ཅེས་བྱ་བས་སྤྲོས་པ་མེད་པའི་ངང་དུ་གནས་པར་བྱ་བ་འདི་ནི་དུད་པའི་སོལ་བ་མ་སྒྲུབ་པའི་ཐབས་ཡིན་ནོ། །
དངོས་གྲུབ་བརྙེས་པའི་སློབ་དཔོན་ཆེན་པོ་དཔལ་ནགས་ཀྱི་རིན་ཆེན་ཞབས་ཀྱིས་མཛད་པའོ།། ༄༅༅། །རྒྱ་གར་སྐད་དུ། བ་ལིཾ་བི་དྷིཿ། བོད་སྐད་དུ། གཏོར་མའི་ཆོ་ག །དཔལ་རྣལ་འབྱོར་ནམ་མཁའ་ལ་ཕྱག་འཚལ་ལོ། །དེའི་རྗེས་སུ་འཁོར་ལོའི་དབང་ཕྱུག་གི་བདག་
ཉིད་ཀྱི་སྔགས་པས། བཅོམ་ལྡན་འདས་མ་དུད་པའི་སོལ་བ་མ་ལ་གཏོར་མ་སྦྱིན་པར་བྱ་སྟེ། དེ་ལ་སྔོན་དུ་སྨྲས་པའི་ཚུལ་གྱིས་བཤམས་པའི་གཏོར་མ་ཉིད་དམ། ཡང་ན་ལྷག་མའི་སྐབས་སུ། འཁོར་ལོ་པ་རྣམས་ཀྱི་ལྷག་མའི་དུམ་བུ་བསྡུས་པ། སྣོད་ཆེན་པོར་བླུགས་ཏེ། འཁོར་ལོའི་གཙོ་བོའི་

སྤྱན་སྔར་བཞག་ལ། དེའི་སྟེང་དུ་འབྲས་ཆན་དང་། ཚོད་མ་དང་། མྱོས་བྱེད་ལ་སོགས་པ་ཅུང་ཟད་ཅུང་ཟད་ཀྱང་བྱིན་ནས། རང་ཉིད་ཀྱི་མདུན་གྱི་ནམ་མཁའི་ཁམས་སུ་རྣལ་འབྱོར་ནམ་མཁའ་དུད་པའི་སོལ་བ་མ་བལྟ་བར་བྱའོ། །མཆོད་ཡོན་ལ་སོགས་པ་སྦྱིན་པ་སྔོན་དུ་
འགྲོ་བའི་མེ་ཏོག་ལ་སོགས་པས་ཡང་དག་པར་མཆོད་ལ། ཛཿཧཱུཾ་བཾ་ཧོཿཞེས་བྱ་བ་འདིས་ལྷག་མའི་སྟེང་དུ་དགུག་པ་ལ་སོགས་པ་བྱའོ། །དེ་ནས་ཞུ་བའི་བདུད་རྩི་ཁར་བླུགས་ནས། ཧོ་པཎྜིའི་སྔགས། ཨོཾ་སུ་མི་ཤུདྡྷ་དྷརྨྨ་ཧཱུཾ་ཨ་ཨཱ་ཨཾ་ཨཱཿསྭཱ་ཧཱ་ཞེས་བྱ་བ་འདི་བརྗོད་ཅིང་། རྡོ་རྗེ་ཁུ་ཚུར་གྱི་
ཕྱག་རྒྱ་གཉིས་བཅིངས་པའི་གྲུ་མོ་གཉིས་བཀུག་སྟེ་མཐེའུ་ཆུང་བསྒྲེང་བ་མདོག་དཀར་པོའི་མཆེ་བའི་རྣམ་པར་སྦྱོར་བའི་ཕྱག་རྒྱ་བཅིངས་ལ། སྔགས་འདིས་གཏོར་མ་དབུལ་བར་བྱ་སྟེ། ཨོཾ་ཀུ་རུ་ཀུ་རུ་བ་ཏ་ལི་བ་ཏ་ལི། སིཾ་ཧ་མུ་ཁིཤྨ་ཤཱ་ན་ཝ་སི་ནི་པྲ་ཏེ་མུ་ཁི་ཙཎྜ་ཀ་རཱ་ལི། རུ་དྷི་ར་པྲི་ཡ་ས་མ་
ཡ་རཀྵི་ཏ་ཡོ་གཱམྦ་རི་ཀི་ལི་ཀི་ལི་རཱ་བེ་པི་ཏྲི་བ་ན་མ་དྷྱ། བྷུཉྫ་ཧ་བྷཀྵ་ཧ་ཛི་གྷ་ས་ཧ་ག་ཎ། དཱུ་ཏེ་དྷཱ་མངྒཱ་རཱི་ཙཎྜ་ཀཱ་རཱ་ལི་ཏིཥྛ་སྭཱི་ཀུ་རུ་ཧཱུཾ་གྲྀཧྞ་སརྦ་དུཥྚཱཾ་བྷཀྵཱ་ཕུཾ་ཕུཾ་ཕིཾ་ཕཊ་སྭཱ་ཧཱ་ཞེས་བྱའོ། །སླར་ཡང་མངོན་པར་མཆོད་ཅིང་ཡང་དག་པར་བསྟོད་པར་བྱའོ། །དེ་ནས་འདིས་བཟོད་ཅིང་གསོལ་བ་བྱ་སྟེ།
གཙོ་མོ་བདག་གིས་མ་ཤེས་དང་། །ཡོངས་སུ་མ་རྙེད་ནུས་མ་མཆིས། །ལྷག་དང་མ་ཚང་གྱུར་པ་གང་། །དེ་ཀུན་མགོན་པོས་བཟོད་མཛོད་རིགས། །རྫོགས་སངས་རྒྱས་དང་དེ་ཡི་སྲས། །ཚངས་སོགས་ལྷ་དང་འཇིག་རྟེན་སྐྱོང་། །ཐེག་མཆོག་ཆོ་གར་ནོངས་བགྱིས་པ། །བཟོད་པར་
སྩལ་ནས་བདག་དང་ནི། །སྦྱིན་བདག་རྣམས་ལ་ཞི་བ་དང་། །རྒྱས་དང་བདེ་ལེགས་མཛད་དུ་གསོལ། །ཞེས་བསྔོའོ། །དེ་ནས་སྔགས་པས་དམིགས་པ་མེད་པ་ཉིད་དུ་ཅི་བདེ་བས་གནས་པར་བྱའོ། །འདི་ནི་གཏོར་མའི་ཆོ་གའོ། །བླ་མའི་མན་ངག་བསྐྱུད་པར་གྱུར་པའི་ཉེས་པ་དང་། །
རྨོངས་པ་ལས་ནི་འཁྲུལ་པའི་ནོངས་གང་འདིར་ཆགས་པ། །རྣམ་དག་ཐུགས་རྗེ་ཤིན་ཏུ་ཞི་ཞིང་གཤིན་གྱུར་པའི། །དཔལ་ལྡན་རྡོ་རྗེ་མཁའ་འགྲོའི་ཚོགས་ལ་ཡང་དག་འཆགས། །རྣལ་འབྱོར་ནམ་མཁའི་སྒྲུབ་ཐབས་རྣམ་དག་བགྱིས་འདི་ལས། །བསོད་ནམས་གང་ཞིག་བདག་གིས་རབ་

ཏུ་ཐོབ་གྱུར་པ། །དེ་ཡིས་འཇིག་རྟེན་དཀའ་བ་མེད་པའི་བདེ་བ་དང་། །ཡང་དག་ལྡན་པ་ཀུན་དུ་བཟང་པོ་ཉིད་གྱུར་ཅིག །འདི་ནི་དུད་པའི་སོལ་བ་མའི་ཆོ་ག་སྟེ་དཔལ་ནགས་ཀྱི་རིན་ཆེན་ཞབས་ཀྱིས་མཛད་པའོ། །གྲུབ་པའི་ཞལ་གྱི་སྦྲང་རྩིས་རབ་ཏུ་མྱོས་པ་ཡིས། །གར་བྱེད་དེ་ནི་དཔལ་
ལྡན་རྒྱ་མཚོའི་སྡེ་ཞེས་པ། །བསྙེངས་བྲལ་སྒྲེག་པའི་བཀྲ་ཤིས་ཡི་གེའི་ཀཱ་མ་ལར། །ཆགས་པས་ཀུན་དགར་གྱུར་པའི་གླུ་དབྱངས་འདི་བླངས་སོ། །པཎྜི་ཏ་ཆེན་པོ་དེ་ཉིད་ཀྱི་བཀའ་དྲིན་གྱིས་འཚོ་བའི་བཙུན་པ་བསོད་ནམས་རྒྱ་མཚོའི་སྡེས་བསྒྱུར་བའོ།། ༄༅༅། །རྒྱ་གར་སྐད་དུ།
ཤྲཱི་མ་ཧཱ་ཀཱ་ལ་སཱ་དྷ་ནཾ། བོད་སྐད་དུ། དཔལ་ནག་པོ་ཆེན་པོའི་སྒྲུབ་ཐབས། རྡོ་རྗེ་ནག་པོ་ཆེན་པོ་ལ་ཕྱག་འཚལ་ལོ། །སྔར་གསུངས་པའི་ཆོ་གས་སྟོང་པ་ཉིད་བསྒོམས་པའི་ངང་ལས། སྣ་ཚོགས་པདྨ་དང་ཉི་མ་ལ་ཧཱུཾ་ཡིག་ནག་པོ་དེ་ཉིད་ལས་ཡོངས་སུ་རྫོགས་པའི་རྗེ་བཙུན་དཔལ་ནག་པོ་ཆེན་
པོ་ཞལ་གཅིག་ཕྱག་གཉིས་པ་སྐུ་མདོག་ནག་པོ་སྤྱན་གསུམ་པ་འབར་བ་ཆེན་པོ་ཕྱག་གཡས་པ་གྲི་གུག་གཡོན་གྱིས་ཐོད་པ་འཛིན་པ། མི་མགོའི་རྒྱན་ཅན། སྐྲ་ཁམ་པ་གྱེན་དུ་བརྫེས་པ། སྨྲ་ར་ཁམ་པ་ཅན། མཆེ་བ་གཙིགས་པས་འཇིགས་པར་བྱེད་པ། ཡན་ལག་ཐམས་ཅད་ལ་སྦྲུལ་གྱིས་
བརྒྱན་པ་བོང་ཐུང་བ། ཞལ་ནས་ཁྲག་འཛགས་པར་བདག་ཉིད་སྐད་ཅིག་ཏུ་རྫོགས་པར་བྱས་ནས་སྔགས་བཟླས་པར་བྱའོ། །དེ་ལ་སྔགས་ནི་འདི་ལྟ་སྟེ། ཨོཾ་མ་ཧཱ་ཀཱ་ལ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། དུག་དང་ཁྲག་དང་སྒོག་པ་ཡུངས་ཀར་རྣམས་ཀྱི་སྤོས་ཕུལ་ནས། ཤ་དང་སྲན་ཆེན་
མྱོས་བྱེད་དང་། །མེ་ཏོག་བདུག་སྤོས་བྱུག་པ་དང་། །ཤ་ལྔ་དང་ནི་བདུད་རྩི་ལྔ། །ནག་པོ་ཆེན་པོའི་གཏོར་མ་བྱ། །དེ་ཡི་སྔགས་ནི་འདི་ལྟ་སྟེ། ཨོཾ་མ་ཧཱ་ཀཱ་ལ་ཡ་ཤཱ་ས་ནོ་པ་ཀ་ར་ཡཱ་སརྱ་མུཥྚ་ཤྨ་ཤཱ་ཎ་བཱ་སི་ནཱ་སྐྲི་ཏཱ་ཡ་ཨེ་ཥོ་ཨ་པཥྩི་མ་ཀཱ་ལོ྅ཡཾ་ཡ་ཏི་ཏཱཾ་པྲ་ཏི་ཛྙཱ་སྨ་ར་སི་ཏི་དཱ་
ཨི་མཾ་རཏྣ་ཏྲ་ཡཱ་ཀ་རི་ཎ་མཱ་མུ་ཀ་ན་དུཥྚཱཾ་ཁ་ཁཱ་ཧི་ཁ་ཁཱ་ཧི། མ་ར་མ་ར། གྲྀཧྞ་གྲྀཧྞ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། དི་ན་མེ་ཀེ་ན། མཱ་ར་ཡ་ཧཱུཾ་ཧཱུཾ་ཕཊ་ཕཊ། སརྦ་ཡཀྵ་རཱཀྵ་ས་བྷཱུ་ཏ་པྲེ་ཏ་པྲི་ཤཱ་ཙ་ན། བ་ལ་གྲྀཧྞ་མཱ་མ་སིདྡྷི་ཀུ་རུ་ཤཱནྟིཾ་ཀུ་རུ་རཀྵ་ཀུ་རུ་ཞེས་བྱ་བ་གཏོར་མའི་སྔགས་སོ། །

དེ་ལ་ཉེ་བར་སྤྱོད་པ་འདི་ཡིན་ཏེ། ཀུ་ཤ་ལས་བསྒྲལ་བྱའི་གཟུགས་བརྙན་ལ། ཚ་བ་གསུམ་དང་དུག་དང་སྐེ་ཚེ་མ་རྣམས་ར་ཙི་ཀ་ཆོ་ག་བཞིན་དུ་བསྐུས་ནས་རྩང་གིས་ཁྲག་ཐམ་པར་བཙུགས་ཏེ་གང་གི་མིང་གིས་མེ་ལ་བདུགས་ན་དེ་ནི་སྐད་ཅིག་དེ་ཉིད་ལ་མི་སྣང་བ་དང་
ཉམས་པར་འགྱུར་རོ། །དེ་བཞིན། གང་ཞིག་སློབ་དཔོན་ལ་སྡང་དང་། །རྟག་ཏུ་དཀོན་མཆོག་གསུམ་ལ་སྨོད། །སེམས་ཅན་དུ་མ་འཇོམས་བྱེད་པ། །ནག་པོ་ཆེན་པོས་གསོལ་བར་མཛད། །དེ་བཞིན་མགོ་ལ་འདུག་ནས་སུ། །ཏིལ་འབྲུ་ཙམ་དུ་གཏུབ་པར་བྱེད། །ཅེས་བྱ་བ་ལ་སོགས་
པ་དཔག་ཏུ་མེད་པ་རྟོགས་པར་བྱའོ། །དཔལ་ནག་པོ་ཆེན་པོའི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། མ་ཧཱ་ཀཱ་ལ་སཱ་དྷ་ནཾ། བོད་སྐད་དུ། ནག་པོ་ཆེན་པོའི་སྒྲུབ་ཐབས། ནག་པོ་ཆེན་པོ་ལ་ཕྱག་འཚལ་ལོ། །ནི་མྠི་ཤི་ལ་ནག་པོ་བྱ་སྟེ་གྲི་གུག་དང་ཐོད་པ་བསྣམས་
པ་སྐྲ་གྱེན་དུ་ལངས་པ། ཐོད་པའི་ཅོད་པན་ཅན། སྦྲུལ་གྱིས་བརྒྱན་པ། སྤྱན་དམར་བ། མཆེ་བ་གཙིགས་པའི་ཞལ། སྟག་གི་པགས་པའི་ཤམ་ཐབས་ཅན་མི་མགོའི་ཕྲེང་བའི་དོ་ཤལ་དང་ལྡན་པ། ཡི་དགས་ཀྱི་གདན་ལ་བཞེངས་པར་གནས། མུན་པ་མི་བཟད་པའི་རང་བཞིན་དུ་བསྒོམས་ལ་ནག་
པོའི་ཚེས་ནས་སྒྲུབ་པ་བཅས་ཏེ། དེའི་ཞལ་ལྷོར་བསྟན་ལ་གཞག །ཁ་ཤར་དུ་བསྟན་ལ་གཞག །ཁ་ཤར་སྔགས་སྟོང་ཕྲག་བཅུ་བཟླས་པར་བྱའོ། །དམ་ཚིག་གི་རྫས་ཀྱི་གཏོར་མ་ཕུལ་ལ། གུ་གུལ་གྱི་བདུག་སྤོས་དབུལ་བར་བྱའོ། །མེ་ཏོག་སྣ་ཚོགས་པ་གཏོར་ནས། ཨོཾ་ཨཱ་སི་མུ་ས་
ལ་ཏྲི་ཤཱུ་ལ། ཨེ་ཧྱེ་ཧི་མ་ཧཱ་ཀཱ་ལ་སརྦྦ་ཤ་ཏྲཱུཾ། ནིརྒ་ཏ་ཡ་ནིརྒ་ཏ་ཡ། ཛྭ་ར་ཎ། གྲྀཧྞཱ་པ་ཡ་གྲྀཧྞཱ་པ་ཡ་ཧཱུཾ་ཕཊ། བཟའ་བ་སྤངས་ལ་བཟླས་པ་བྱའོ། །ཚངས་པར་བྱས་ལ་མངོན་དུ་ཕྱོགས་པས་སྔགས་བཟླས་པར་བྱའོ། །སྔར་བཞིན་གཏོར་མ་དབུལ་ལོ། །ཨོཾ་མ་ཧཱ་ཀཱ་ལ་ཧ་ན་ཧ་ན་བཛྲ་ཎ་
སྭཱ་ཧཱ་ཞེས་བྱ་བ་འབུམ་ཕྲག་གཅིག་བཟླས་པར་བྱའོ། །ཨོཾ་མ་ཧཱ་ཀཱ་ལ་ཧ་ན་ཧ་ན་བཛྲ་ཎ་ཨེ་ཏེ་ཏ་པྲེ་ཥ་ཡཱ་མི་ཀ་ར་ཥེ་ཐཱ་སྭཱ་ཧཱ་ཞེས་འབུམ་ཕྲག་གསུམ་བཟླས་པར་བྱའོ། །ཨོཾ་མ་ཧཱ་ཀཱ་ལ་ཧི་ཧ་ན་ཧ་ན་རཀྵ་རཀྵ་བྷ་གྲྀཧྞ་ཀརྱཾ་ཀུ་རུ་ཛ་ཛ་ཞེས་བྱ་བ་གཏོར་མའི་སྔགས་སོ། །རྣལ་འབྱོར་མ་དང་སྒྲུབ་

པ་བྱས་ལ་ནག་པོ་ཆེན་པོ་བསྒྲུབ་པར་བྱའོ། །ནག་པོ་ཆེན་པོའི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། ཤྲཱི་མ་ཧཱ་ཀཱ་ལ་སྱཱ་ཥྚ་པ་ད་སྟོ་ཏྲ་ནཱ་མ། བོད་སྐད་དུ། དཔལ་ནག་པོ་ཆེན་པོའི་བསྟོད་པ་རྐང་པ་བརྒྱད་པ་ཞེས་བྱ་བ། དཔལ་ནག་པོ་ཆེན་པོ་ལ་ཕྱག་འཚལ་ལོ། །ཨོཾ་གྲུབ་པར་
གྱུར་ཅིག །ཧཱུཾ་ཧཱུཾ་ཕཊ་ཅེས་དྲག་པོའི་སྒྲ་ཡིས་སྲིད་པ་གསུམ་གྱི་ཁོངས་ནི་མ་ལུས་འགེངས་ནུས་པའི། །ཧ་ཧ་ཊ་ཊ་ཞེས་བརྗོད་གང་ཞིག་དུས་ཀུན་དུ་ནི་བདུད་སྡེ་ཤིན་ཏུ་འཇིགས་མཛད་ཅིང་། །ཀཾ་ཀཾ་ཀཾ་ཞེས་ཐོད་པའི་ཕྲེང་བས་དབུ་ལ་སྤྲས་ཤིང་ནག་པོའི་མཆུ་དང་མཚུངས་པའི་སྐུ། །བྲུཾ་བྲུཾ་བྲུཾ་ཞེས་
ཁྲོས་པའི་མཆོག་གི་ཁྲོ་གཉེར་འཇིགས་མཛད་འཇིགས་པ་ཁ་གདངས་ཤ་ཟ་ཞིང་། །དབུ་སྐྲ་དང་ནི་སྨ་ར་ཆེས་སེར་ཉེ་བར་སྤྱོད་པའི་ཞིང་སྐྱོང་ཁྱོད་ཀྱིས་སྲུང་བར་མཛོད། །རཾ་རཾ་རཾ་ཞེས་སྤྱན་དམར་འཁྱུག་ཅིང་བསྒྱུར་མཛད་ཀྲུཾ་ཀྲུཾ་ཀྲུཾ་ཞེས་རབ་སྒྲོགས་སྤྱན་གྱིས་གཟིགས། །སྨིན་མ་སེར་ཞིང་མཆེ་
གཙིགས་རོ་ཡི་གདན་ལ་དགྱེས་པའི་ཞིང་སྐྱོང་ཁྱོད་ཀྱིས་ཞིང་སྐྱོང་མཛོད། །ཧ་ཧ་ཧཱུཾ་དང་ཀཱི་ལི་ཀཱི་ལི་ཞེས་སྒྲོགས་ཕྱག་གཡོན་ཁ་ཊྭཱཾ་གར་བཅས་ཐོད་པ་བསྣམས། །རུ་རུ་རུ་ཞེས་ཁྲག་གི་རྒྱུན་འབབ་ཕྱག་གིས་བསྣམས་ཤིང་གསོལ་བ་འཐུང་བ་ལ་དགྱེས་ཤིང་། །ཁཾ་ཁཾ་ཁཾ་ཞེས་གཏུམ་མོའི་
ཕྱག་གཡས་གྲི་གུག་རལ་གྲི་བགེགས་རྣམས་ལ་ནི་རོལ་མཛད་པས། །ཌཾ་ཌཾ་ཌཾ་ཞེས་ཌ་མ་རུ་ཅན་འདི་ཡིས་འདུལ་མཛད་འཁོར་བཅས་ཞིང་སྐྱོང་ཁྱོད་ཀྱིས་སྲུངས། །རབ་ཏུ་རྔམ་ཞིང་མགོ་བོ་རྣམས་ཀྱི་ཕྲེང་བས་གཤིན་རྗེ་དང་མཚུངས་འཇིགས་པའི་སྐུ་བརྒྱན་ཅིང་། །ཀྵཾ་ཀྵཾ་ཀྵཾ་ཞེས་བཟོད་
པའི་ཤུགས་ཅན་ཅ་ཅོ་སྒྲོགས་པར་བྱེད་པའི་གདུག་པ་རྣམས་བཟུང་སྟེ། །གཅིག་པུས་སྣ་ཚོགས་མནན་ནས་ཀ་ཀ་ཧ་ཧ་བརྗོད་མཛད་ཆར་སྤྲིན་སྔོན་པོ་ལྟ་བུའི་མདོག །སྐུ་ལ་མི་ཡི་ཤ་དང་རྒྱུ་མས་བྲེལ་བའི་རྒྱན་གྱིས་ཀུན་ནས་བརྒྱན་ཅིང་ཞལ་དུ་གསོལ། །དྲག་ཤུལ་ཕྱག་གིས་འདོད་པའི་
གཟུགས་དང་མི་སྡུག་གཟུགས་ཅན་གྱི་ནི་འབྱུང་པོ་རོ་ལངས་ཚོགས། །མ་ལུས་བཟུང་ནས་མྱུར་དུ་བསད་པ་རྣམས་ཀྱི་མགོ་བོའི་ཁྲག་རྒྱུན་འབབ་པ་རབ་ཏུ་གསོལ། །ཧྲཱིཾ་ཀྵུཾ་ཤྲཱི་ཞེས་སྔགས་ཀྱི་གསུངས་ཅན་པ་ཙ་པ་ཙའི་སྔགས་ཀྱིས་བགེགས་རྣམས་རབ་ཏུ་བསྲེགས། །རོལ་པས་

རོལ་པ་སེལ་ཞིང་མི་ཡིས་གང་བའི་མཚོ་ལ་ཞིང་སྐྱོང་ཁྱོད་ཀྱིས་བསྲུང་བ་མཛད། །ཕེཾ་ཕེཾ་ཕཊ་ཅེས་སྒྲོགས་པ་སོ་སོར་བསྐྱོད་པའི་མེ་དཔུང་ཆེན་པོའི་དབུས་སུ་བཞུགས་ནས་སུ། །རིགས་ཀྱི་ལུས་ཅན་སྲུང་བར་མཛད་ཅིང་སྒྲུབ་པ་རྣམས་ཀྱི་ཞིང་རྣམས་ངེས་པར་ཞིང་སྐྱོང་མཛོད། །
ཕྱུགས་རྣམས་ཀྱི་ནི་ཉིན་རེ་བཞིན་དུ་བགེགས་དང་སྡིག་འཇོམས་དྲི་མེད་བརྙེས་པ་ཆུ་ཉི་བཞིན། །ཙཾ་ཙཾ་ཙཾ་ཞེས་གཏུམ་པའི་ཤུགས་ཀྱིས་རབ་དབྱེ་རྨད་བྱུང་འོད་ཀྱི་འཇིག་རྟེན་སྣང་མཛད་པ། །ཀྲཾ་ཀྲཾ་ཀྲཾ་ཞེས་གཤེགས་པས་དགྲ་བོ་ཉོན་མོངས་པ་རྣམས་ངེས་པར་ཉོན་མོངས་འཇོམས་མཛད་ཅིང་།
སཾ་སཾ་སཾ་ཞེས་ཚོགས་པའི་བདག་ཉིད་དམ་ཚིག་ཐོས་འཛིན་ཞིང་སྐྱོང་གང་ཡིན་ཁྱོད་ཀྱིས་སྐྱོངས། །བཾ་བཾ་བཾ་ཞེས་གཤིན་རྗེ་ལྟར་འགྲོ་དྲི་མ་མེད་པའི་སྣ་ཚོགས་ཆུ་བཞིན་གཟིགས་མཛད་ཅིང་། །ཡཾ་ཡཾ་ཡཾ་ཞེས་རླུང་གི་ཤུགས་ཀྱིས་མྱུར་དུ་རྒྱུ་ཞིང་ཉོན་མོངས་འཇིག་རྟེན་གནོད་བྱེད་མཁྱེན། །ཀླིཾ་
ཀླིཾ་ཀླིཾ་ཞེས་གདུག་པའི་གཟུགས་ཀྱིས་སྲིད་གསུམ་ཉིན་མཚན་དུས་ཀུན་ཉོན་མོངས་གྱུར་པ་གང་། །པཾ་པཾ་པཾ་ཞེས་ཐུགས་རྗེའི་ཞགས་པས་བྱོལ་སོང་རྣམས་འཛིན་ཕྱག་གིས་གདུལ་བྱ་རྣམས་སྐྱོང་ལ། །སྔགས་བདག་སྔགས་ཀྱི་ལུས་ཅན་ཐུགས་ཀྱི་སྔགས་པ་རྣམས་ལ་འབྲས་བུ་བློ་གྲོས་མཚུངས་
མེད་སྟེར། །ཞིང་རྣམས་སྐྱོང་བར་མཛད་པ་ཁྱོད་ཀྱིས་འགྲོ་བའི་ལུས་རྣམས་མ་ལུས་ཡུན་རིང་སྐྱོང་དུ་གསོལ། །སྒྲུབ་པ་པོའམ་སློབ་དཔོན་འགའ་ཞིག་ཐོས་འཛིན་གང་ཞིག་བློ་ལྡན་ནུས་པ་དང་། །ཐུན་གསུམ་དུ་ནི་སྔགས་རྣམས་བརྒྱད་པོ་ཀློག་བྱེད་དེ་ནི་བསོད་ནམས་ལྡན་པར་འགྱུར་བ་
དང་། །ཚེ་དང་དཔལ་དང་གྲགས་དང་འབྱོར་པ་འཛིན་དང་གཟི་རྒྱས་པ་དང་མཚུངས་མེད་དང་། །ས་སྟེངས་དང་ནི་མཐོ་རིས་སུའང་དེ་ཡི་བགེགས་ཀྱི་ཚོགས་རྣམས་རྟག་ཏུ་ཉམས་པར་འགྱུར། །དཔལ་ནག་པོ་ཆེན་པོ་ལ་བསྟོད་པ་རྐང་པ་བརྒྱད་པ་ཞེས་བྱ་བ། སློབ་དཔོན་
འཕགས་པ་ཀླུ་སྒྲུབ་ཀྱིས་མཛད་པ་རྫོགས་སོ།། ༄༅༅། །རྒྱ་གར་སྐད་དུ། ཤྲཱི་མ་ཧཱ་ཀཱ་ལ་སྟོ་ཏྲ། བོད་སྐད་དུ། དཔལ་ནག་པོ་ཆེན་པོ་ལ་བསྟོད་པ། དཔལ་ནག་པོ་ཆེན་པོ་ལ་ཕྱག་འཚལ་ལོ། །ཧཱུཾ་སྲིན་པོའི་གཟུགས་ཀྱིས་གདུག་པ་ཅན། །ཚར་གཅོད་བྱང་ཆུབ་

སེམས་དཔའ་སྟེ། །གྲོང་ཁྱེར་སུམ་བརྩེགས་འཇིག་བྱེད་པའི། །གཏུམ་པོ་ཁྱོད་ལ་བདག་བསྟོད་དོ། །མདོག་ནག་གཟུགས་ཐུང་གཟི་བརྗིད་ཅན། །གདུག་པ་ཚར་གཅོད་གྲི་གུག་གཡས། །གཡོན་པ་གདུག་པའི་ཁྲག་བཀང་སྣོད། །ཐོད་ཕྲེང་ཅན་ལ་བདག་བསྟོད་དོ། །ཁྲོས་
པས་ཞབས་བརྡབས་ས་གཞི་གཡོ། །འཇིགས་པའི་གད་མོས་རི་རབ་བསྒྱེལ། །དམ་ཚིག་ཉམས་པའི་སྙིང་འབྱིན་པ། །དམ་ཚིག་ཅན་ལ་བདག་བསྟོད་དོ། །ཧཱུཾ་ཞལ་གཅིག་པ་ལ་ཕྱག་གཉིས་པ། །གྲི་གུག་ཐོད་པ་ལག་ན་འཛིན། །རལ་པ་ཁམ་ནག་གྱེན་དུ་འཁྱིལ། །སྤྱན་གསུམ་མེ་ཡི་
མདོག་འདྲ་བ། །མཆེ་བ་ཟླ་བ་ཚེས་པ་འདྲ། །ཐོད་པའི་ཕྲེང་བས་དོ་ཤལ་བྱས། །གསུས་ཁྱིམ་ཆེ་ལ་འཕྱང་བ་པོ། །མི་ཐུང་ཁྲོས་པའི་གཟུགས་འདྲ་བ། །འདས་དང་མ་བྱོན་ད་ལྟར་གྱི། །བསྟན་པ་སྲུང་བར་ཞལ་བཞེས་པ། །ནག་པོ་ཁྱོད་ནི་ཡིན་པ་སྟེ། །གདུག་པ་ཚར་གཅོད་འཇིགས་
པའི་གཟུགས། །དབུ་སྐྲ་ཁམ་ནག་གྱེན་བརྫེས་པ། །སྟེང་གི་ལྷ་ཚོགས་འཇིགས་པར་བྱེད། །སྤྱན་བགྲད་མཆེ་གཙིགས་ལྗགས་འདྲིལ་བས། །བར་གྱི་གདོན་ཚོགས་བསྡིགས་པར་བྱེད། །གཡས་ན་གྲི་གུག་བསྣམས་པ་ནི། །དགྲ་བགེགས་འདུལ་ཞིང་བདུད་མགོ་གཅོད། །
གཡོན་པས་ཐོད་པ་བསྣམས་པ་ནི། །གནོད་སེམས་ཅན་གྱི་ཁྲག་བཀང་གསོལ། །ཁྲོས་པའི་ཞབས་གཉིས་བརྡབ་པ་ཡིས། །གནོད་སེམས་ཅན་གྱི་ལུས་ལ་ཉེད། །ཁྱོད་ཀྱིས་ཐུབ་པའི་བསྟན་པ་སྲུངས། །རྣལ་འབྱོར་པ་ཡི་བར་ཆད་སྲུངས། །ཆོས་དང་དཔལ་འབྱོར་རྒྱས་
པར་མཛོད། །ལུས་དང་གྲིབ་མ་བཞིན་དུ་འགྲོགས། །དཔལ་ནག་པོ་ཆེན་པོ་ལ་བསྟོད་པ་སློབ་དཔོན་བྲམ་ཟེ་མཆོག་སྲེད་ཀྱིས་མཛད་པ་རྫོགས་སོ།། ༄༅༅། །རྒྱ་གར་སྐད་དུ། ཤྲཱི་མ་ཧཱ་ཀཱ་ལ་སྟོ་ཏྲ། བོད་སྐད་དུ། དཔལ་ནག་པོ་ཆེན་པོ་ལ་བསྟོད་པ། དཔལ་ནག་པོ་ཆེན་
པོ་ལ་ཕྱག་འཚལ་ལོ། །བཅོམ་ལྡན་དཔལ་ཆེན་གྲགས་པ་ཡི། །སྐུ་གསུང་ཐུགས་ལས་སྤྲུལ་པ་ཡིས། །ཉིད་ཀྱི་ཐུགས་ཀ་ནས་བྱུང་སྟེ། །སྤྲུལ་པས་འདུལ་ལ་ཕྱག་འཚལ་བསྟོད། །ཧཱུཾ་གི་དེ་ཉིད་ལས་བཞེངས་པའི། །ཞལ་གཅིག་ཕྱག་ནི་གཉིས་པ་སྟེ། །སྐུ་མདོག་

ནག་པོ་འབར་བ་ཆེ། །བསྟན་པ་སྲུང་ལ་ཕྱག་འཚལ་བསྟོད། །ཐོད་པ་རྣམ་གསུམ་འབར་བ་ཡི། །གཞལ་ཡས་གུར་གྱི་ནང་ན་བཞུགས། །གཡས་བསྐུམ་གཡོན་བརྐྱང་བདུད་རྣམས་མནན། །འགྱིང་བག་བརྗིད་ལ་ཕྱག་འཚལ་བསྟོད། །མ་ཆགས་ཐབས་ཀྱི་པདྨ་
མཛེས། །ཤེས་རབ་ཡེ་ཤེས་ཉི་མའི་དཀྱིལ། །ཧཱུཾ་ལས་སྐྱེས་པའི་དཔའ་བོ་ནི། །བསྟན་པ་བསྲུངས་ལ་ཕྱག་འཚལ་བསྟོད། །གཡས་ཀྱི་གྲི་གུག་གདེངས་པ་ཡིས། །དགྲ་བགེགས་འདུལ་ཞིང་བདུད་མགོ་གཅོད། །ཉོན་མོངས་དུག་གསུམ་རྩད་ནས་འཇོམས། །དཔའ་བོ་ཁྱོད་ལ་
ཕྱག་འཚལ་བསྟོད། །བདུད་ཀྱི་ཐོད་པ་བདུད་རྩིས་བཀང་། །ཉིད་ཀྱི་ཞལ་དུ་གསོལ་བར་མཛད། །སྒྲུབ་པ་པོ་ལ་དངོས་གྲུབ་སྩོལ། །བྱིན་རླབས་འབེབས་ལ་ཕྱག་འཚལ་བསྟོད། །ཞལ་ནས་ཁྲག་གི་རྒྱུན་འཛག་པ། །བསྟན་པ་ལ་གནོད་དལ་ཡམས་འབེབས། །དམ་ཚིག་
བསྲུངས་ལ་དངོས་གྲུབ་སྩོལ། །ཐུགས་རྗེ་ཆེ་ལ་ཕྱག་འཚལ་བསྟོད། །སྲིད་གསུམ་སེམས་ཅན་ཐམས་ཅད་ཀྱི། །མགོ་བོའི་ཕྲེང་བས་དོ་ཤལ་བྱས། །དུག་ལྔ་རྩད་ནས་གཅོད་པ་སྟེ། །དུག་གསུམ་འཇོམས་ལ་ཕྱག་འཚལ་བསྟོད། །མཆེ་བ་གཙིགས་པས་བསྟན་པ་ལ། །གནོད་པའི་
ཀླད་པ་འཇོམས་པར་མཛད། །ཏིལ་ཙམ་དག་ཏུ་བརླག་པར་མཛད། །མི་མཐུན་འདུལ་ལ་ཕྱག་འཚལ་བསྟོད། །གདུག་པ་མ་ལུས་འདུལ་མཛད་པའི། །རྐང་མེད་འགྲོ་བས་སྐུ་ལ་བརྒྱན། །ཞེ་སྡང་རྩད་ནས་གཅོད་པ་སྟེ། །ཀླུ་ཆེན་འདུལ་ལ་ཕྱག་འཚལ་བསྟོད། །སྟག་ནི་དཔའ་བརྗིད་རྔམ་
པའི་ཆས། །ཤམ་ཐབས་རྐད་ལ་བཅིངས་པ་ཡིས། །དྲེགས་པ་ལྷ་ཆེན་ཟིལ་གྱིས་གནོན། །དཔའ་ཆེན་བདུད་འདུལ་ཕྱག་འཚལ་བསྟོད། །བསྐལ་པ་མེ་དཔུང་འབར་བ་ཡི། །སྲིད་པའི་རྩེ་མོར་རབ་ཏུ་འབར། །བསྟན་པ་ལ་གནོད་སྒྲོལ་མཛད་པ། །འབར་བའི་རྒྱལ་པོ་ཁྱོད་ལ་བསྟོད། །
དེ་བཞིན་གཤེགས་པ་ཐམས་ཅད་ཀྱི། །ཐ་མའི་བསྟན་པ་སྲུང་མཛད་པ། །ཐད་པ་ལྔ་ཡིས་དབུ་ལ་བརྒྱན། །འཇིགས་འགོད་གཤེགས་ལ་ཕྱག་འཚལ་བསྟོད། །རལ་པ་ཁམ་ནག་གྱེན་དུ་འཁྱིལ། །བསྟན་པ་ཕུན་སུམ་ཚོགས་པ་ཡིས། །ནམ་མཁའི་མཐའ་དང་མཉམ་པའི་རྟགས། །

རྟགས་ལྔ་ལྡན་ལ་ཕྱག་འཚལ་བསྟོད། །སྤྱན་གསུམ་དུག་གསུམ་རྩད་ནས་འཇོམས། །འདུལ་བ་རྣམ་པ་བཞི་གཟིགས་ནས། །གང་ལ་ཅི་འདུལ་ཇི་བཞིན་དུ། །དེ་འདུལ་ཁྱོད་ལ་ཕྱག་འཚལ་བསྟོད། །དཔལ་ནག་པོ་ཆེན་པོ་ལ་བསྟོད་པ་སློབ་དཔོན་ཆེན་པོ་ཨ་ཝ་དྷཱུ་ཏཱི་པས་མཛད་པ་
རྫོགས་སོ།། ༄༅༅། །རྒྱ་གར་སྐད་དུ། ཤྲཱི་བྷཊྚ་རཱ་ཀ་མ་ཧཱ་ཀཱ་ལ་སྟོ་ཏྲ། བོད་སྐད་དུ། རྗེ་བཙུན་དཔལ་ནག་པོ་ཆེན་པོ་ལ་བསྟོད་པ། དཔལ་ནག་པོ་ཆེན་པོ་ལ་ཕྱག་འཚལ་ལོ། །བདུད་དང་བདུད་ཀྱི་ཕྱོགས་ཀྱི་སེམས་ཅན་མ་ལུས་མྱུར་དུ་ཚར་བཅད་བསད་ནས་ཁྲག་རྒྱུན་གསོལ་
མཛད་ནག་པོ་ཆེན་པོ་ནི། །རབ་འཇིགས་མདོག་གནག་གཟུགས་ཐུང་གསུས་པ་འཕྱང་ཞིང་དབུ་སྐྲ་དམར་སེར་འཇིགས་པའི་མེ་དཔུང་ནང་བཞུགས་ཁྲོས་པའི་གད་མོས་ནི། །ཧ་ཧཱུཾ་ཕེཾ་གྱི་སྒྲ་ཡིས་ལྷ་དང་ལྷ་མིན་ཚོགས་ནི་འདར་ཞིང་འདུད་པའི་འཁོར་གྱིས་བསྐོར་ནས་མནན་པ་དྲག་པོའི་
ཚུལ། །བདུད་དང་བདུད་ཀྱི་ཕྱོགས་ཀྱི་སེམས་ཅན་མ་ལུས་མྱུར་དུ་ཚར་བཅད་བསད་ནས་ཁྲག་རྒྱུན་གསོལ་མཛད་ནག་པོ་ཆེན་པོ་ནི། །སྐེ་རགས་དྲིལ་བུ་གཡེར་ཀ་སིལ་སིལ་ཌ་མ་རུ་མི་ཊི་ཊི་ཧཱུཾ་ཧ་རྔ་སྒྲ་ཐོག་གི་ནང་གི་ཐོག་ལྟར་ནི། །སྒྲ་རྣམས་སྒྲོགས་ཤིང་མཉམ་དང་མི་མཉམ་གར་བྱེད་
པ་ཡི་ལྷ་དང་ལྷ་མོའི་ཚོགས་ཀྱིས་བསྐོར་ནས་དུར་ཁྲོད་གནས་སུ་རོལ། །བདུད་དང་བདུད་ཀྱི་ཕྱོགས་ཀྱི་སེམས་ཅན་མ་ལུས་མྱུར་དུ་ཚར་བཅད་བསད་ནས་ཁྲག་རྒྱུན་གསོལ་མཛད་ནག་པོ་ཆེན་པོ་ནི། །ཐུང་ཞིང་སྦོམ་ལ་སྤྱན་གསུམ་མེ་ཏོག་བནྡུ་ཀ་ལྟར་དམར་བས་བགེགས་རྣམས་སྐྲག་ཅིང་
སྔང་མཛད་ལྗགས་ནི་གློག་ལྟར་འཁྱུག །མཆེ་བ་རྣམ་པར་གཙིགས་པས་མ་རུངས་གདུག་པ་ཅན་གྱི་ཤ་དང་རུས་པ་ཀྲུཾ་ཀྲུཾ་འཆའ་ཞིང་ལྷ་བ་ཞག་འཇིབ་པ། །བདུད་དང་བདུད་ཀྱི་ཕྱོགས་ཀྱི་སེམས་ཅན་མ་ལུས་མྱུར་དུ་ཚར་བཅད་བསད་ནས་ཁྲག་རྒྱུན་གསོལ་མཛད་ནག་པོ་ཆེན་པོ་ནི། །ཕྱག་
རྒྱ་ལྔ་དང་ཀླུ་བརྒྱད་ཀྱིས་བརྒྱན་སྟག་ལྤགས་སྐེ་རགས་དང་ནི་སྐུ་སྨད་དཀྲིས་ཤིང་མི་བསྐྱོད་པ་ནི་སྤྱི་བོར་བཞུགས། །དེ་བཞིན་གཤེགས་པའི་ཚོགས་རྣམས་སྐུ་ལས་སྤྲོ་ཞིང་མི་ཡི་རྒྱུ་མས་སྦྲེལ་བའི་མགོ་ཡི་ཕྲེང་བ་རབ་འཕྱང་དོ་ཤལ་བྱས། །བདུད་དང་བདུད་ཀྱི་ཕྱོགས་ཀྱི་སེམས་ཅན་མ་

ལུས་མྱུར་དུ་ཚར་བཅད་བསད་ནས་ཁྲག་རྒྱུན་གསོལ་མཛད་ནག་པོ་ཆེན་པོ་ནི། །དྲག་པོ་དང་ནི་ཆུ་བདག་བཟློག་པར་དཀའ་བའི་ཚོགས་རྣམས་ཞལ་དུ་གསོལ་མཛད་ཕྱག་གཡོན་རྩེ་གསུམ་འཛིན་ཅིང་ཐོད་ཁྲག་འཐུང་། །གཤིན་རྗེའི་ལྕེ་འདྲའི་གྲི་གུག་དང་ནི་རལ་གྲི་ཕྱག་གཡས་
བསྣམས། །གདུག་པ་ཅན་རྣམས་རློག་མཛད་སྡིག་པ་རིང་དུ་སྤོང་། །བདུད་དང་བདུད་ཀྱི་ཕྱོགས་ཀྱི་སེམས་ཅན་མ་ལུས་མྱུར་དུ་ཚར་བཅད་བསད་ནས་ཁྲག་རྒྱུན་གསོལ་མཛད་ནག་པོ་ཆེན་པོ་ནི། །རིག་བྱེད་ཅེས་པའི་ལྷ་མོ་བརྒྱད་དང་རོལ་བའི་རྗེ་བཙུན་རྡོ་རྗེ་ནག་པོ་ཆེན་པོ་སངས་རྒྱས་
གྲགས་པས་བསྐུལ་བ་ནི། །གང་གིས་ཉིན་མཚན་རྟག་ཏུ་འདི་བཏོན་བསྒྲུབ་པའི་དོན་རྣམས་གྲུབ་དང་སེམས་ཅན་མ་ལུས་ཁྱད་པར་ས་ལ་གནས་པར་མཛོད།། །།དཔལ་རྡོ་རྗེ་ནག་པོ་ཆེན་པོ་ལ་ཕྱག་འཚལ་ལོ། །བོང་ཐུང་གསུས་འཕྱང་མདོག་གནག་རལ་པ་ཁམ་ནག་གྱེན་དུ་བརྫེས། །འབར་
བའི་ཚོགས་ཀྱིས་ལྷ་མིན་དགྲ་བགེགས་མ་ལུས་སྲེག་པར་བྱེད། །དྲག་པོའི་ཞལ་གྱིས་བདུད་རྩི་གསོལ་མཛད་མགོ་བོ་གཅོད་མཛད་པ། །བཞད་པའི་ཚུལ་གྱིས་ཁྲོ་ཞིང་གདུག་པའི་དགྲ་རྣམས་སྐྲག་མཛད་པ། །རྐེད་པ་བྱིན་པ་དྲིལ་བུ་གཡེར་གའི་ཚོགས་ཀྱིས་སྒྲ་སྒྲོགས་ཤིང་། །ཊི་ཊི་དང་ནི་
ཧཱུཾ་ཧཊ་རུ་ཡི་སྒྲ་སྒྲོགས་པ། །ཞལ་ནས་ཏོར་ཀེ་ན་ནི་ཏོར་ར་ཀི་ཎི་ཀི་སྒྲ་ནི། །སྒྲོགས་ཤིང་ཞབས་ཀྱིས་མཉམ་དང་མི་མཉམ་ཚུལ་དུ་གར་མཛད་ཅིང་། །མ་མོའི་ཚོགས་ཀྱིས་ཡོངས་སུ་བསྐོར་ཅིང་དུར་ཁྲོད་གནས་ན་རོལ། །ཧ་ཀ་ཧཱུཾ་ཀ་ཕེཾ་ཀའི་སྒྲས་ནི་ལྷ་དང་ལྷ་མིན་སྲེགས། །མ་ལུས་དགྲ་བགེགས་
ཚོགས་ཀྱི་སྲོག་ལ་མྱུར་དུ་སོགས་བྱེད་ཅིང་། །ནག་པོའི་ཕྱོགས་ཀྱི་དགྲ་བགེགས་ཁྲག་གི་རྒྱུན་ནི་ཞལ་དུ་གསོལ། །ནག་པོ་ཆེན་པོས་སྒྲུབ་པ་པོ་ཡི་བསམ་པ་མྱུར་དུ་སྒྲུབས། །སྤྱན་གསུམ་མེ་ཏོག་བྱི་རུའི་མདོག་ལྟར་དམར་ཞིང་སྨིན་མ་འཁྱོག །ལྗགས་ནི་གློག་ལྟར་འཁྱུག་པས་
བགེགས་ཀྱི་ཚོགས་ནི་འཇིགས་ཤིང་སྐྲག །ཞལ་ནས་མཆེ་བ་རྣམ་པར་གཙིགས་པས་དགྲ་བགེགས་མ་ལུས་པའི། །ཤ་རུས་རྐང་དམར་ཀྲུཾ་ཀྲུཾ་གསོལ་ཞིང་ལྷ་བཞག་ནི་འཇིབ། །སྟག་གི་པགས་པའི་ཤམ་ཐབས་ཀྱིས་ནི་སྐུ་སྨད་ཡོངས་སུ་དཀྲིས། །ཕྱག་རྒྱ་ལྔ་དང་ཀླུ་བརྒྱད་ཀྱིས་བརྒྱན་

སྤྱི་བོ་ནས། །མི་བསྐྱོད་ལ་སོགས་དེ་བཞིན་གཤེགས་པ་རྣམ་པར་འཕྲོ་བར་བྱེད། །རྒྱུ་མ་མི་མགོ་རློན་པའི་ཕྲེང་བས་སྐུ་ལ་དོ་ཤལ་བྱས། །ནག་པོ་དྲག་པོས་ཆུ་བདག་ལ་སོགས་ཞལ་དུ་གསོལ་བར་མཛད། །རྩེ་གསུམ་དང་ནི་གདུག་པའི་ཁྲག་བཀང་ཐོད་པ་གཡོན་ན་བསྣམས། །གནོད་སྦྱིན་ལྕེ་
འདྲའི་གྲི་གུག་རལ་གྲི་གཡས་ཀྱི་ཕྱག་ན་འཛིན། །གདུག་པའི་དགྲ་རྣམས་རིང་དུ་སྤོང་ཞིང་རློག་པར་མཛད་པ་ཁྱོད། །ལྷ་མོ་བརྒྱད་ཀྱིས་བསྐོར་ཞིང་འདིར་ནི་གར་གྱི་ཚུལ་གྱིས་བཞུགས། །ཉིན་དང་མཚན་དུ་སྒྲུབ་པའི་དོན་རྣམས་མ་ལུས་མཛད་པ་ལ། །སངས་རྒྱས་གྲགས་པ་ཡིས་ནི་འཇིག་
རྟེན་མགོན་པོ་ལ་ཞུས་པ། །མ་ལུས་སེམས་ཅན་འདི་དག་རྡོ་རྗེ་ས་ལ་རབ་འགོད་མཛད། །རྗེ་བཙུན་དཔལ་ནག་པོ་ཆེན་པོ་བྱ་རོག་མིང་ཅན་དང་གདོང་ཅན་ལ་བསྟོད་པ་མཁས་པ་ཆེན་པོ་རྩ་མི་སངས་རྒྱས་གྲགས་ཀྱིས་བསྟོད་པ་རྫོགས་སོ།། །།འདི་དག་པྲ་ཀྲི་ཏའི་སྐད་དུ་ཡོད་པ་ལས་
སེ་ལོ་ཙཱ་བས་བོད་སྐད་དུ་བསྒྱུར་བའོ།། ༄༅༅། །རྒྱ་གར་སྐད་དུ། ཤྲཱི་མ་ཧཱ་ཀཱ་ལ་དེ་ཝཱི་སྟོ་ཏྲ་ཨཥྚ་ནཱ་མ། བོད་སྐད་དུ། དཔལ་ལྷ་མོ་ནག་མོ་ཆེན་མོ་ལ་བསྟོད་པ་བརྒྱད་པ་ཞེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །ཏིལ་མར་གྱིས་བསྐུས་ལན་བུ་གཅིག་པ་རོ་ཉེའི་རྣ་
ཆས་སྒེག་ཅིང་ཆ་ལུགས་མ་ལུས་འཆང་། །རྒྱན་དུ་རྐང་སྒྲོགས་ལྕགས་ལས་བྱས་པ་ཅིག་གིས་རང་གི་རྐང་པ་མཛེས་པར་བྱས་པ་དེ། །གཅེར་བུ་བོང་བུ་ཞོན་ཞིང་འགྲོ་བ་འདི་ན་རྒྱུ་བ་དེ་ནི་ལྷ་མོ་ཁྱོད་ཉིད་ཀྱིས། །བདག་ཉིད་མཛེས་པར་ཤེས་ཀྱིས་གཞན་ལྟས་ཁྱོད་ཀྱི་སྤྱོད་པའི་མཚོ་ཆེན་
དོན་དག་སུ་ཡིས་ཤེས། །འཁོར་བ་འཇིག་པའི་ཚེ་ན་མི་ལུས་དག་ལས་ཁྲག་དང་ཞག་འཛག་དུད་པ་འཐུལ་བ་ན། །ལྷ་མོ་མཆེ་བ་མི་བཟད་ཁྱོད་ཀྱིས་ཞལ་དུ་འགྲོ་ཀུན་སྐད་ཅིག་ཙམ་གྱིས་ཞུགས་པར་འགྱུར། །ནག་མོ་མི་ཐོད་ཐོགས་པ་ཁྱོད་ནི་རྣལ་འབྱོར་གྲུབ་པའི་རྣལ་འབྱོར་ཅན་ཏེ་དུར་ཁྲོད་
དགྱེས། །ཁྱོད་ནི་གཡོ་བྱེད་མནན་ཅིང་ནད་ཆེན་འཆི་བའི་འཇིགས་པ་བསལ་ཞིང་མི་བཟད་དྲིལ་ཡང་སྒྲོགས། །ཁྱོད་ནི་དཔའ་བོ་དག་གི་མགོ་བོས་ཅོད་པན་གྱིས་ནི་ལེགས་སྤྲས་གཡུལ་དུ་མཚོན་གྱིས་བཅད་པ་ཡི། །ཕྲེང་བ་ཐོགས་ཤིང་གར་བྱེད་ལག་པ་མཉེན་བརྐྱང་རྐུབ་ཚོས་ཆེ་ལ་ཀླུ་

དབང་གཤིབས་པ་ཡི། །སྐ་རགས་འཆིང་ཞིང་ལག་ན་མདུང་དང་རལ་གྲི་ཐོགས་ལ་ཁྲག་གི་ཆང་གིས་མྱོས་པར་འགྱུར། །མིག་རྩ་དམར་པོར་གྱུར་ཅིང་མཚན་མོ་དུར་ཁྲོད་འགྲོ་བ་འབྱུང་པོ་ཕལ་ཆེན་རྣམས་ཀྱིས་མཐོང་། །ཀོ་རློན་ཆེན་པོ་དྲལ་ཏེ་བརྒྱངས་པའི་གོས་ཀྱིས་
མནབས་ཤིང་ཕྱེད་གཡོགས་ཕྱེད་ནི་རེ་ལྡེས་དཀྲིས། །མི་ཡི་རྒྱུ་མ་གསར་པའི་སྦུབས་ཀྱིས་ཞལ་གྱི་ཟླ་བ་བརྒྱན་ཅིང་དྲིལ་བུ་འགྲམ་པར་འཁྲོལ། །ལུས་ནི་སྣུམ་གྱིས་གསར་དུ་བྱུགས་ཤིང་ཁྲག་དང་ཞག་ལ་སོགས་པའི་ཐིག་ལེས་ཚོམ་བུར་བྲིས། །མི་ཡི་ཤ་ལ་སོ་ཡིས་ཆེམ་ཆེམ་གཅོད་
བྱེད་ཐོད་པ་ཅན་ནི་བདག་ལ་སྐྱོང་གྱུར་ཅིག །དྲག་པོ་དྲག་མོ་མི་བཟད་མི་ཤ་ཁ་ན་ཐོགས་པ་སྔོན་ཆད་མ་བྱུང་ཁྱོད་མཐོང་ནས། །མ་མོ་རྣམས་ཀྱང་སྐྲག་ཅིང་བརྟབས་ལ་རྔམ་པ་འཐོན་ཅིང་མིག་རྩ་རིག་རིག་ཁྱོད་ལ་འདུད། །ནག་མོ་བཟང་མོ་ལུས་མདོག་གནག་ཅིང་བཟོད་པར་དཀའ་བ་
ཁྱོད་ལ་བརྒྱ་བྱིན་ལ་སོགས་ཀྱང་། །ཉིན་གཅིག་བཞིན་དུ་བསྟོད་པ་བྱེད་དེ་གཤིན་རྗེ་ཉིད་ཀྱང་རྟག་ཏུ་འདར་ཞིང་འདུད་པར་བྱེད། །མི་རྣམས་དང་ནི་འགྲོ་བ་མ་ལུས་པ་དག་མཇུག་བརྟུལ་བ་ནི་རྣ་བ་ཡ་གཅིག་ལ། །བྲང་གིས་འགྲོ་བ་འགོ་བོའི་གདེངས་ཀ་སྟོང་དང་ལྡན་པ་རྒྱབ་ནས་རྒྱན་དུ་བྱས་
ནས་གནས། །ཡ་གཅིག་ལ་ནི་སེང་གེ་མཚུངས་མེད་ཐོགས་ཤིང་རྒྱ་མཚོས་བསྐོར་བའི་ས་གཞི་མ་ལུས་གནོན། །སྟེང་ན་རྒྱུ་བའི་ཉི་མ་འོད་ཟེར་སྟོང་ལྡན་ཁྱོད་ཀྱི་ལྟེ་བའི་ཐད་ཀའི་ཕྱོགས་སུ་གཞག །རྒྱ་མཚོའི་ཀློང་ནས་མེ་འབར་ཁྱོད། །ཆུ་རྣམས་སྐེམས་པར་ནུས་པ་སྟེ། །བུད་མེད་
ཐམས་ཅད་ཞི་བྱའི་ཕྱིར། །ལྷ་ཆེན་སྐུ་ཡི་ཕྱེད་དུ་བཞག །རྫོང་དང་དཀའ་ཟློག་ནག་མོ་ཆེ། །ལྷ་དང་ལྷ་མིན་ཕྱག་བྱས་པ། །མི་ནད་གང་ཡིན་ཁྱོད་ཀྱིས་ཤེས། །དེ་ནི་འཇིགས་པ་མེད་པར་མཛོད། །གཤིན་རྗེའི་ལྕམ་མོ་བདུད་ཀྱི་ཡུམ། །འདོད་ཁམས་དབང་ཕྱུག་མ་ལ་བསྟོད། །
ནད་དོ་ཅོག་གི་བདག་མོ་དཔལ་ལྷ་མོ་ནག་མོ་ཆེན་མོ་ལ་བསྟོད་པ་བརྒྱད་པ་ཞེས་བྱ་བ་བྲམ་ཟེ་མཆོག་སྲེད་ཀྱིས་མཛད་པ་རྫོགས་སོ།། ༄༅༅། །རྒྱ་གར་སྐད་དུ། ཤྲཱི་མ་ཧཱ་ཀཱ་ལཱཥྚ་མནྟྲ་སྟོ་ཏྲ་ནཱ་མ། བོད་སྐད་དུ། དཔལ་ནག་པོ་ཆེན་པོའི་བསྟོད་པ་རྐང་པ་བརྒྱད་པ་ཞེས་བྱ་བ།

དཔལ་ནག་པོ་ཆེན་པོ་ལ་ཕྱག་འཚལ་ལོ། །ཨོཾ་གྲུབ་པར་གྱུར་ཅིག །འབྱུང་པོ་རོ་ལངས་ཚོགས་རྣམས་ཧ་ཧ་ཧཱུཾ་དང་ཀི་ལི་ཀི་ལི་ཞེས་སྒྲོགས་མྱུར་བར་ནི། །སྐུ་ལ་རྒྱུ་མའི་ཕྲེང་བས་ཀུན་ནས་བཀླུབས་ཤིང་ཞལ་དུ་མི་ཡི་ཤ་ནི་གསོལ་མཛད་ཅིང་། །འདོད་པའི་གཟུགས་དང་མི་སྡུག་གཟུགས་ཅན་ཁ་ཊྭཱཾ་
གར་བཅས་ཕྱག་གཡོན་མི་ཡི་ཐོད་པ་བསྣམས། །སྤྱན་དམར་སྨིན་མ་སེར་ཞིང་མཆེ་གཙིགས་རོ་ཡི་གནས་ལ་དགྱེས་པའི་ཞིང་སྐྱོང་ཁྱོད་ཀྱིས་སྲུངས། །ཕེཾ་ཕེཾ་ཕེཾ་ཞེས་སྒྲོགས་པར་བྱེད་ཅིང་སོ་སོར་བསྐྱོད་པའི་མེ་དཔུང་ཆེན་པོའི་དབུས་ན་ནི། །མགོ་བོ་རྣམས་ཀྱིས་མགོ་ཡི་ཕྲེང་བྱས་རབ་
གསལ་འཇིགས་པའི་སྐུར་བརྒྱན་གཤིན་རྗེ་དང་མཚུངས་ཤིང་། །དྲག་ཤུལ་ཕྱག་གི་དང་པོ་རྣམས་ཀྱིས་མི་མགོ་མ་ལུས་འཛིན་ཅིང་ཁྲག་སྐྱུགས་བབ་པ་གསོལ། །རོལ་པས་རོལ་པ་སེལ་ཞིང་མེ་ཡིས་གང་བའི་གནས་ལ་ཞིང་སྐྱོང་ཁྱོད་ཀྱིས་སྲུང་བར་མཛོད། །ཀྵཾ་ཀྵཾ་ཀྵཾ་ཞེས་བཟོད་
པའི་སྐུ་ཅན་ཅ་ཅོ་སྒྲོགས་པར་བྱེད་པའི་གདུག་པ་རྣམས་བཟུང་སྟེ། །གཅིག་པུ