Luận tạng Tây Tạng (Tengyur) — Tập 28

་བ་མེད་པར་འགྲོ། །སེམས་ཅན་རྣམས་ཀྱི་ཉིན་མཚན་དུ། །དབུགས་ནི་ཉི་ཁྲི་ཆིག་སྟོང་དང་། །དྲུག་བརྒྱ་དག་གིས་ལྷག་པར་རྒྱུ། །གྲངས་ནི་

ཡོངས་སུ་བསྒྲགས་པ་ཡིན། །གང་ཕྱིར་བདུད་རྩི་སྔགས་ཡིན་པས། །རླུང་ནི་འཇུག་པ་སྔགས་ཡིན་ཏེ། །བདུད་རྩི་གསོན་པའི་ཐབས་ཡིན་པས། །དེ་ཡིས་འཆི་བས་མི་ཚུགས་སོ། །འཇུག་པའི་རླུང་ནི་བགྲང་བྱ་ཞིང་། །རིམ་གྱིས་འབུམ་སོགས་གྲངས་ཀྱིས་ནི། །རྩེ་
གཅིག་སེམས་ཀྱིས་ཆོ་ག་བཞིན། །སྒྲ་མེད་པ་ཡི་བཟླས་པར་བཤད། །སྒྲ་མེད་བཟླས་པ་འབུམ་དུ་ནི། །ཆོ་ག་བཞིན་དུ་རྫོགས་གྱུར་ན། །མི་ནི་ཚེ་ཉམས་གྱུར་པ་ཡང་། །ལོ་ལྔའི་བར་དུ་འཚོ་བར་ངེས། །ཉིས་འབུམ་ལ་སོགས་ཟློས་པ་ཉིད། །ཚེ་འཕེལ་བར་ནི་བསྒྲེ་
བར་བྱ། །ཐབས་ལ་མཁས་པར་གྱུར་པ་དང་། །རླུང་གི་བཟླས་ལ་བརྩོན་པར་བྱ། །ནང་པར་ལངས་ནས་སྟོང་ཕྲག་གཅིག །རྟག་ཏུ་ལེགས་པར་བགྲངས་ནས་ནི། །ནད་ཀུན་ལས་ནི་རྣམ་གྲོལ་ཞིང་། །ཉི་ཟླ་གནས་ཀྱི་བར་དུ་འཚོ། །བསླབ་ལ་མི་གནས་མི་དགའ་
ཞིང་། །ཡུད་ཙམ་ཡང་ནི་གཉིད་མ་ལོག །འབད་དེ་གཉིད་ལས་རྒྱལ་བྱས་ལ། །བཟའ་དང་བཏུང་ཡང་ཁ་ཟས་སོགས། །ལུས་སུ་འབྱུང་བ་རྒྱུ་བྱས་པས། །རླུང་རྒྱུ་བ་ལ་བརྩོན་པར་བྱ། །ལུགས་མཐུན་ལ་འབད་རྣལ་འབྱོར་པ། །ངེས་པར་འཆི་བ་ལས་རྒྱལ་
འགྱུར། །རྨོངས་ལ་ལོངས་སྤྱོད་ལ་གཅིག་གཞོལ། །ལུགས་མི་མཐུན་པས་འཆི་བར་འགྱུར། །རང་གི་ངོ་བོ་ལུགས་མཐུན་འགྱུར། །དེ་ལས་བཟློག་པས་ལུགས་མི་མཐུན། །སེང་གེ་རྣམ་རོལ་ཕྱག་རྒྱ་ནི། །བཅིངས་པ་ཡིས་ནི་རླུང་དགག་ཉིད། །ཡང་ན་
དགག་པར་སྦྱོར་བས་རྒྱལ། །དགག་པའི་འཆི་བ་སླུ་བྱེད་ཡིན། །རྐང་མཐིལ་གྱི་ནི་མཐར་ཐུག་པར། །རླུང་གིས་རིམ་གྱིས་དགང་བར་བྱ། །དགག་པ་ཀུམྦ་ཀ་ཞེས་བྱ། །དེ་ཤེས་རིམ་པ་བརྗོད་བྱ་སྟེ། །སྟེང་གི་དགག་པའི་སྦྱོར་བས་ནི། །དགག་པར་བྱེད་
པ་རྒྱལ་བར་འགྱུར། །ཆུང་དང་འབྲིང་སོགས་དབྱེ་བ་ཡིས། །སྟེང་དགག་རྣམ་པ་གསུམ་དུ་འདོད། །སྟེང་དགག་ཅེས་ནི་བྱ་བ་འདི། །འོག་ནས་བཤད་པས་དོན་སྟོན་བྱེད། །ཆུང་བ་ཚད་ནི་སུམ་ཅུ་དྲུག །འབྲིང་ནི་དེ་བཞིན་ཉིས་འགྱུར་ཡིན། །ཆེན་པོ་

སུམ་འགྱུར་ཡིན་ཞེས་བྱ། །དགག་པས་དེ་ནི་རྒྱལ་བར་འགྱུར། །དགག་པ་ཡིས་ནི་ཚད་བྱས་ལ། །ཕྱི་ནང་རང་གི་པུས་ལྷ་ངར། །འདིར་ནི་ལག་པ་ཉུག་བྱས་ལ། །དེ་ནས་སེ་གོལ་དྲུག་གདབ་པོ། །མདོ་ནི་མཁས་པས་ཡོངས་འཆད་པའི། །དུས་
ཀྱི་ཚད་ནི་ཡིན་པར་བཤད། །ཇི་སྲིད་སུམ་ཅུ་དྲུག་ཚད་འགྱུར། །དེ་སྲིད་དགག་པའི་བྱ་བ་ཡིན། །སྟེང་དགག་འདི་ནི་དམན་པ་སྟེ། །དེ་ནས་བར་མ་ཉིས་འགྱུར་ཉིད། །སྟེང་དགག་ཆེན་པོ་སུམ་འགྱུར་ཏེ། །བརྒྱ་རྩ་བརྒྱད་ནི་ཚད་ཡིན་ནོ། །འཆི་བ་སླུ་བར་འདོད་པ་ཡིས། །འབད་
པས་དེ་ཉིད་ལས་རྒྱལ་བྱ། །སྟེང་དགག་ཆེན་པོའི་མཚན་ཉིད་ནི། །ཇི་སྲིད་དག་པ་རབ་འཇིགས་པའོ། །རྒྱུན་དུ་དགག་པར་འགྱུར་བ་ཡང་། །དེ་ཚེ་ལེགས་པར་གནས་པ་ཡིན། །ཉི་མ་དེ་ལས་འཆི་སོགས་ཉིད། །དགག་པ་ལ་ནི་གང་གནས་པ། །དེ་ཚེ་བསྐལ་པ་སྟོང་དུ་ཡང་། །འཆི་བདག་
ཉེ་བར་མི་འགྱུར་རོ། །ནམ་མཁའ་བ་ནི་བཞོས་པ་ལས། །བདུད་རྩི་གཤེར་བ་དག་གི་ཚོགས། །བུམ་པས་མཚན་པས་ཆུ་ཞེས་བྱའི། །དཀྱིལ་འཁོར་ལས་ནི་འོད་ཟེར་འཕྲོས། །སྣ་རྩེར་བྱུང་བའི་རླུང་གིས་ནི། །བླངས་པ་ཡང་ཡང་བརྟག་པར་བྱ། །སྙིང་གར་པདྨར་ཐིམ་པ་ཡིས། །སེམས་
ཀྱི་བུང་བའི་ཕྲུ་གུ་གསོ། །ནམ་མཁའ་བཞོ་བའི་བསམ་གཏན་དག །འདི་ནི་རྟག་ཏུ་སྤྱད་པར་བྱ། །ནམ་མཁའ་ལྟ་བུར་འཆི་བདག་གི །མཐོང་བས་མཐོང་བ་མ་ཡིན་ནོ། །ཡང་ན་རླུང་ནི་ཡོངས་སྤངས་ལ། །དེ་བཞིན་ཉིད་ལ་རྟག་ཏུ་སྤྱད། །དེ་བཞིན་ཉིད་ཀྱི་འཆི་དང་འདུད། །
དགྲ་རྣམས་གཞན་ལ་རྒྱལ་བྱེད་ཉིད། །ཉེས་པ་མ་ལུས་རབ་ཏུ་ཞི། །ཡོན་ཏན་མ་ལུས་འབྱུང་བར་འགྱུར། །སྐྱེས་བུ་དེ་ཉིད་ཀྱིས་རྒྱལ་ཞིང་། །མངོན་པར་འདོད་པ་རྣམས་ཀྱང་འགྲུབ། །དེ་བཞིན་ཉིད་ནི་སྟོང་ཉིད་བཤད། །རྣམ་པ་ཀུན་མཆོག་བདག་ཉིད་ཅན། །དེ་ཁོ་ན་ཉིད་
རྟག་བསླབས་ན། །འཆི་བ་བསླུ་བར་འགྱུར་བ་ཡིན། །ཆོས་དང་ལོངས་སྤྱོད་སྐུ་སོགས་དང་། །སྦྱིན་དང་ཚུལ་ཁྲིམས་སོགས་དབྱེར་མེད། །དམིགས་པ་ཀུན་གྱི་སྦྱོར་བ་ནི། །དམིགས་པ་ཐམས་ཅད་རྣམ་པར་སྤངས། །རྣམ་པ་ཀུན་མཆོག་ལྡན་པ་ཡི། །སྟོང་པ་རྒྱལ་བ་རྣམས་ཀྱིས་

གསུངས། །བསམ་བྱ་བསམ་པར་མི་བྱ་ཞིང་། །བསམ་པ་མིན་པའང་མི་བསམ་མོ། །བསམ་དང་བསམ་མིན་མ་བསམས་ན། །དེ་ནས་སྟོང་ཉིད་ཐོབ་པར་འགྱུར། །མཁས་པས་དངོས་པོ་མི་བསམ་ཞིང་། །དངོས་པོ་མེད་པའང་མི་བསམས་ལ། །དངོས་དང་དངོས་མེད་
རྣམ་པར་སྤངས། །སྒོམ་པ་དེ་ནི་བསྒོམ་དང་བྲལ། །རྣམ་པ་ཀུན་གྱི་མཆོག་ལྡན་པ། །སྟོང་ཉིད་འཛིན་པ་རྣམ་སྤངས་པའི། །སྟོང་པ་ཉིད་ནི་རྟག་བསྒོམས་ན། །འཆི་བདག་གིས་ནི་མཐོང་མི་འགྱུར། །ཀུན་རྟོག་ཙམ་ལས་བྱུང་བ་ཡི། །འཆི་བ་དེ་ཡང་མཐོང་མི་འགྱུར། །
གཞན་ཡང་བདུད་ནི་མང་པོ་དང་། །འཁོར་བ་ཡང་ནི་མི་མཐོང་ངོ་། །དེ་ཡང་། འཆི་བ་ཞེས་བྱའི་རྣམ་རྟོག་འདི། །དངོས་པོ་ཀུན་ལ་ཡོད་མིན་ཏེ། །སོ་སོའི་སྐྱེ་བོའི་རྣམ་འཕྲུལ་གྱི། །རྣམ་པར་རྟོག་པས་བཅོམ་པ་ཡིན། །རྣམ་རྟོག་སྡུག་བསྔལ་ཐམས་ཅད་དེ། །རྣམ་
པར་རྟོག་པ་བདུད་ཅེས་བཤད། །དེ་བས་རྣམ་པར་རྟོག་གཞོམ་ཅིང་། །རྣམ་པར་མི་རྟོག་ཉིད་དུ་བྱ། །ཞེས་གསུངས་སོ། །གུས་པ་ལ་སོགས་ཁྱད་པར་གྱིས། །རྒྱུན་དུ་བསྒོམས་པ་གང་གང་ཡིན། །དེ་དང་དེ་ནི་གསལ་འགྱུར་ཏེ། །འདོད་དང་མྱ་ངན་བློ་དང་མཚུངས། །
བསྟན་བཅོས་རྣམས་ནི་རྙེད་སླ་ཡི། །དེ་ཡི་སྦྱོར་བ་རྙེད་པར་དཀའ། །སྦྱོར་བ་ཤེས་པའི་འཇིག་རྟེན་ལས། །སྦྱོར་བ་རྙེད་པར་དཀའ་མ་ཡིན། །སྦྱོར་བ་རྣམས་ལ་མཁས་ཤིང་དང་། །བཟོད་དང་བརྩོན་འགྲུས་ལ་རབ་གནས། །བསྒྲུབ་ལ་བརྩོན་པའི་ཤེས་རབ་ཅན། །
འཆི་བ་བསླུ་བའི་སྣོད་ཡིན་ནོ། །ངལ་དང་སྨིན་དང་བཏུང་སོགས་ཀྱིས། །ཕོ་བའི་མེ་ནི་འབར་འགྱུར་ལ། །མེ་ནི་རབ་ཏུ་འབར་བའི་ཟས། །ཡོངས་ཞུ་བར་ཡང་ནུས་པ་ཡིན། །ཡོངས་སུ་ཞུ་བས་ལུས་རྒྱས་ཤིང་། །རྒྱས་པས་སྟོབས་ནི་རྣམ་པར་འཕེལ། །སྟོབས་ལས་
ཚེ་ནི་འཕེལ་འགྱུར་ཞིང་། །དེ་འཕེལ་བ་ཡིས་རིང་དུ་འཚོ། །ཀུན་གྱིས་མངོན་སུམ་ཉིད་དུ་འགྲུབ། །འདི་ལ་སོམ་ཉི་ཇི་ལྟར་ཡོད། །དེ་བཞིན་མན་ངག་གིས་བསྐལ་སོགས། །འཚོ་བར་ཡང་ནི་ཐེ་ཚོམ་མེད། །མར་དང་སྙིང་པོ་ཟད་སོགས་ཀྱིས། །མར་མེ་ལ་སོགས་

འཇིག་ཕྱོགས་ལ། །སླར་ཡང་འབྲུ་མར་ལ་སོགས་ལས། །བསྐལ་པའི་བར་དུ་གནས་པ་ཡིན། །དེ་བཞིན་དུ་ནི་ལུས་འདི་ཡང་། །རྒས་སོགས་ཀྱིས་ནི་འཆི་བཞིན་པ། །གྲུབ་པའི་མན་ངག་ལེགས་རྙེད་ན། །བསྐལ་པའི་མཐར་ཡང་ཅིས་མི་གནས། །
དཔེར་ན་ཁང་པ་རྙིང་པ་དག །བཅོས་པ་ཡིས་ནི་ཡུན་རིངས་གནས། །དེ་བཞིན་རྙིང་པའི་ལུས་དག་ཀྱང་། །བཅོས་པས་གནས་པར་ཅིས་མི་འགྱུར། །འབད་པས་དཀའ་བ་ཅི་ཡང་མེད། །དེ་བས་གཅེས་ལ་སྩོལ་བ་དོར་མི་བྱ། །རྟག་ཏུ་འབབ་ན་ཆུ་རྒྱུན་འཇམ་པོས་ཀྱང་། །
དུས་སུ་རྡོ་ལེབ་དག་ཀྱང་རྣམ་པར་འབིགས། །གཙུབས་ན་ཤིང་ལས་མེ་ནི་འབྱུང་འགྱུར་ཞིང་། །བརྐོས་པར་གྱུར་ན་ས་ལས་ཆུ་འབྱུང་འགྱུར། །མིས་ནི་རྩོལ་བ་བྱས་ན་མི་འགྲུབ་མེད། །འབད་པས་རིགས་པས་བརྩམས་ཀུན་འབྲས་བཅས་འགྱུར། །འདི་ན་འཆི་བ་བསླུ་བ་
རྣམས། །ཤིན་ཏུ་མང་པོ་ཤེས་ནས་ཀྱང་། །ཉམས་མ་བླངས་ན་མལ་དུ་ནི། །བཤང་བས་གོས་ཏེ་ཁྱོད་འཆི་འགྱུར། །གང་ཞིག་སྦྱོར་བ་ལ་མཁས་ཤིང་། །བསྟན་བཅོས་ལ་བྱང་མཁས་པ་རྣམས། །ཉམས་མ་བླངས་པའི་ཉེས་པ་ཡིས། །སོ་ནི་སྟོན་ཅིང་འཆི་བ་
ཡིན། །རྣལ་འབྱོར་གྱི་ནི་བསྟན་བཅོས་དང་། །སྦྱོར་བ་དུ་མ་ཤེས་ན་ཡང་། །དེང་ངམ་སང་ནི་བྱའོ་ཞེས། །དེ་ལྟར་སེམས་ནི་འཆི་བར་འགྱུར། །འདི་བྱ་ནང་པར་སླར་ཡང་འདི། །དེ་ནས་གཞན་ཡང་འདི་བྱ་ཞེས། །སྲིད་པ་གཡོ་བའི་རང་བཞིན་མ་ཤེས་དོན་མེད་ཡིད་
རྟོན་ཚོལ་བར་བྱེད། །སྐྱེ་དགུ་འཆི་བདག་ཁར་ནི་ཆུ་སྲིན་ཁ་རུ་གྲུ་ནི་ཞུགས་པ་ལྟར། །བྱ་བ་མཐར་མ་ཕྱིན་པར་ཡུལ་གྱི་ཆུ་ཡི་དབའ་ཀློང་དག་ཏུ་ལྷུང་། །དེ་ལྟར་འཆི་བདག་དགྲ་བོ་ནི། །སླུ་བའི་ཐབས་ནི་བཤད་པ་ཡིན། །རང་གཞན་གཞུང་ལས་འགྲུབ་པ་ཡི། །བསམ་གཏན་
ལས་ནི་རབ་བསྒྲུབ་བྱ། །བརྩེ་མེད་འཆི་བའི་འཇིགས་པ་ལས། །ཐར་པའི་ཐབས་ནི་འབད་དེ་བྱ། །གང་ཕྱིར་འདི་ནི་ཡིད་འོང་བ། །སྲོག་ལས་གཞན་པ་ཡོད་མ་ཡིན། །རྡོ་རྗེ་མཁའ་འགྲོ་གདན་བཞི་དང་། །སངས་རྒྱས་བླ་གབ་ལ་སོགས་དང་། །དུས་ཀྱི་ཕྱི་མ་དུས་ཕྲེང་བ། །དུས་

ཀྱི་ལྔ་བཅུ་པ་དང་ནི། །འཚོ་བ་ལྔ་བཅུ་པ་ལ་སོགས། །བསྟན་བཅོས་འབད་དེ་བརྟགས་ནས་ནི། །འཆི་བདག་རྣམ་པར་བསླུ་བ་འདི། །འགྲོ་ལ་རྗེས་སུ་བརྩེ་བས་བཤད། །ནམ་མཁའ་ཡོངས་དག་སྟོན་ཀའི་ཟླ་འདྲ་བར། །དག་ཅིང་ནམ་མཁའི་ལས་ཀྱང་མི་ཤོང་བའི། །དགེ་
བ་འདི་ལས་མི་འཆི་གང་ཐོབ་པ། །དེས་ནི་འགྲོ་བ་འཆི་བདག་ལས་ཐར་ཤོག །ཉོན་མོངས་ཡི་གེ་པ་རྣམས་ནི། །བརྩི་བ་ཡིས་ནི་ངལ་གྱུར་ན། །གཞུང་འདིའི་ཚད་དུ་གྱུར་པ་ནི། །སུམ་བརྒྱ་དྲུག་ཅུ་ཐམ་པའོ། །སློབ་དཔོན་ངག་གི་དབང་ཕྱུག་གྲགས་པས་མཛད་པའི་
འཆི་བ་བསླུ་བ་བསྟན་པ་ལས་ལེའུ་བཞི་པའོ།། །།ངག་གི་དབང་ཕྱུག་གྲགས་པས་མཛད་པ་འཆི་བ་བསླུ་བ་ཞེས་བྱ་བ་རྫོགས་སོ།། །།རྒྱ་གར་གྱི་མཁན་པོ་དཱི་པཾ་ཀ་ར་ཤྲཱི་ཛྙཱ་ན་དང་། ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་བའོ།།
༄༅༅། །རྒྱ་གར་སྐད་དུ། སྭབྣཱ་ཨུ་ཧཱ་ན། བོད་སྐད་དུ། རྨི་ལམ་བརྟག་པ། སངས་རྒྱས་ལ་ཕྱག་འཚལ་ལོ། །རྨི་ལམ་སྣ་ཚོགས་ལས་བྱུང་བ། །དེ་ཡི་བརྟག་པ་བཤད་པར་བྱ། །དང་པོའི་ཐུན་ལ་རྨི་ལམ་བྱུང་། །ལོ་གཅིག་ནང་དུ་འབྲས་བུ་འབྱིན། །ཐུན་
གཉིས་ཟླ་བ་བརྒྱད་བར་ལ། །ཐུན་གསུམ་ཟླ་བ་གསུམ་གྱི་བར། །ཐུན་བཞི་ཟླ་བ་ཕྱེད་བར་དུ། །མཐོང་བར་འགྱུར་བ་ཐེ་ཚོམ་མེད། །སྐྱ་རེངས་ཤར་བའི་དུས་ཉིད་ལ། །ཞག་བཅུའི་ནང་དུ་འབྲས་བུ་འབྱིན། །དེ་རྗེས་རབ་ཏུ་བཤད་བྱ་བ། །ཉོན་ཅིག་དགེ་དང་མི་དགེའི་ལས། །
བཞོན་པ་བ་ལང་དང་ནི་གླང་ཆེན་ཞོན་པ་དང་། །ཁང་བཟངས་རི་རྩེ་དང་ནི་ནགས་ཀྱི་ལྗོན་ཤིང་དང་། །གྲུ་ནང་འདུག་སྟེ་པི་ཝང་འཛིན་པར་བྱེད་པ་དང་། །ཁ་ཟས་ཟ་ཞིང་དུ་བྱེད་རྟག་པར་དངོས་པོ་འཐོབ། །མཚོན་ཆས་རྡེག་དང་སྲོག་ཆགས་ཕྲ་མོས་ལུས་ཁེབས་དང་། །དེ་བཞིན་
ལུས་ཀྱི་ལྗན་ལྗིན་རྣམ་པར་དག་པ་དང་། །བཤང་བའི་རྗེས་སུ་འཇུག་དང་ལུས་ལས་ཁྲག་འཛག་དང་། །རྨི་ལམ་རྣམས་ན་བགྲོད་མིན་ལ་ཞུགས་ཤིས་པའོ། །རྒྱལ་པོ་གླང་ཆེན་རྟ་མཆོག་དང་། །འགྲོན་བུ་གླང་དང་བ་རྣམས་དང་། །གང་གིས་གཉིད་ཀྱི་མཐའ་མར་

མཐོང་། །དེ་ཡི་ཉེ་དུ་མང་པོར་འགྱུར། །ཤིང་ལྗོན་འོ་མ་འབྲས་བུ་ཅན། །གང་གིས་གཅིག་པུ་དེ་ལ་འཛེགས། །དེ་ལ་འདུག་ནས་གཉིད་སད་ན། །མྱུར་དུ་ནོར་ནི་འཐོབ་པར་འགྱུར། །གང་གིས་ཁང་བཟངས་འདུག་ནས་ཟོས། །དེ་བཞིན་རྒྱ་མཚོ་བརྒལ་བའི་
མི། །དམན་པའི་རིགས་སུ་སྐྱེས་ཀྱང་ནི། །དེ་ནི་རྒྱལ་པོར་འགྱུར་བར་འོང་། །གང་ཞིག་རྫིང་བུའི་དཀྱིལ་དུ་ནི། །པདྨའི་འདབ་མ་ཆེན་པོའི་ནང་། །ཞོ་དང་འོ་ཐུག་ཟ་བྱེད་པ། །ས་བདག་འཐོབ་པར་ཐེ་ཚོམ་མེད། །མར་མེ་རྒྱལ་མཚན་ཤིང་རྟ་གདུགས། །བུ་མོ་ཤིང་ལོ་
འབྲས་བུ་ཟན། །གཉིད་ཀྱི་མཐའ་མར་གང་གིས་མཐོང་། །བླ་ན་མེད་པའི་དཔལ་ཐོབ་འགྱུར། །མི་དག་གི་ནི་ཤ་རྣམས་ནི། །བཙོས་སམ་མ་བཙོས་གང་ཡང་རུང་། །རྨི་ལམ་དུ་ནི་གང་གིས་ཟོས། །ཉོན་ཅིག་དེ་ཡི་ཡོན་ཏན་གང་། །རྐང་པ་ཟོས་ན་ལྔ་བརྒྱ་སྟེ། །ལག་
པ་ཟོས་ན་སྟོང་ཕྲག་གཅིག །སྟོང་ཕྲག་བརྒྱ་འམ་རྒྱལ་སྲིད་ནི། །མགོ་བོ་ཟོས་ན་ཐོབ་པར་འགྱུར། །གང་གི་རྒྱུ་མས་གྲོང་དང་ནི། །ཡང་ན་གྲོང་ཁྱེར་དཀྲིས་པ་ནི། །གྲོང་གཅིག་དཀྲིས་ན་རྒྱལ་ཕྲན་ཐོབ། །གྲོང་ཁྱེར་དཀྲིས་ན་རྒྱལ་པོ་ཐོབ། །ལྷམ་གཉིས་དང་ནི་གདུགས་
དང་ནི། །རལ་གྲི་རྣོན་པོ་དྲི་མེད་དག །ཐོབ་ནས་གང་ཞིག་གཉིད་སད་ན། །དེ་ནི་ལམ་དུ་བགྲོད་པར་བཤད། །གང་ཞིག་གྲུ་ལ་ཞོན་ནས་ནི། །ཞིག་པ་ཡིན་ཡང་ཡང་དག་སྒྲོལ། །དེ་ཡི་ལམ་བགྲོད་ཤེས་པར་བྱ། །དེ་ཡང་མྱུར་དུ་ལྡོག་པར་ངེས། །གང་གི་ས་རྣམས་རྣམ་པར་
འཆག །རབ་ཏུ་གཡོ་བའི་རྨི་ལམ་ནི། །དེ་ཡི་ནོར་ནི་བརླག་པར་འོང་། །ཡང་ན་ལུས་ལ་ན་ཚ་འབྱུང་། །གང་ལ་རྣམ་པར་གནོད་བྱེད་པའི། །རྭ་ཅན་རྣམས་དང་མཆེ་བ་ཅན། །སྤྲེའུ་འམ་ཡང་ན་ཕག་པ་བྱུང་། །དེ་ལ་རྗེ་བོའི་འཇིགས་པ་འབྱུང་། །གང་ལ་ཏིལ་མར་མངོན་པར་བྱུག །
འོ་མ་འམ་ཡང་ན་མར་གྱིས་བསྐུས། །དེ་དང་འདྲ་བ་གང་ཡང་རུང་། །དེ་ནི་ནད་དུ་རྣམ་པར་བཤད། །ཤིང་རྟ་བོང་བུ་རྔ་མོར་ལྡན། །གང་ཞིག་གཅིག་པུས་དེ་ལ་འཛེགས། །དེ་སྟེངས་འདུག་ནས་གཉིད་སད་ན། །མྱུར་དུ་འཆི་བ་ཐོབ་པར་འགྱུར། །བུད་མེད་གོས་དམར་འཛིན་པ་

དང་། །ཕྲེང་བ་བྱུག་པ་དམར་པོ་ཅན། །གང་ལ་འཁྱུད་བྱེད་རྨི་ལམ་བྱུང་། །དེ་ཡིས་མཚན་མོ་ཕྱི་མ་མེད། །བུད་མེད་གོས་དཀར་གོན་པ་དང་། །རྗེས་སུ་བྱུག་ཕྲེང་དཀར་པོར་ལྡན། །རྨི་ལམ་དུ་ནི་གང་ལ་འཁྱུད། །དེ་ཡིས་དཔལ་ནི་ཐམས་ཅད་འབྱུང་། །ནག་པོའི་གོས་ཅན་བུད་
མེད་ནི། །ཕྲེང་བ་བྱུག་པ་ནག་པོར་ལྡན། །གང་ལ་འཁྱུད་བྱེད་རྨི་ལམ་བྱུང་། །དེ་ཡིས་དཔལ་ནི་འཕེལ་བར་འགྱུར། །སེར་པོའི་གོས་ཅན་བུད་མེད་གང་། །སེར་པོའི་ཕྲེང་དང་བྱུག་པ་ཅན། །རྨི་ལམ་དུ་ནི་གང་ལ་འཁྱུད། །དེ་ཡིས་རྒྱལ་སྲིད་ཐོབ་པར་འགྱུར། །ཉི་མའི་དཀྱིལ་
འཁོར་རྨི་ལམ་དུ། །ཡང་ན་ཟླ་བ་གང་གིས་མཐོང་། །ནད་ཅན་ནད་ལས་གྲོལ་བ་དང་། །ནད་མེད་ཡིན་ན་དཔལ་ལྡན་འགྱུར། །གང་ཞིག་དཀར་པོའི་སྦྲུལ་གྱིས་ནི། །ལག་པ་གཡས་པ་བཟུང་བ་ན། །གང་ལ་ཡང་དག་བཅུ་ཡི་བར། །དེ་ཡིས་ནོར་ནི་ཐོབ་པར་ངེས། །རྒོད་མ་
ཁྱིམ་བྱ་ཀྲ་ཨུཉྩི། །ཐོབ་ནས་གང་གི་གཉིད་སད་ན། །དེ་ཡིས་དེ་དུས་སྙིང་སྡུག་འཐོབ། །ཆུང་མ་ཉེ་དུ་སྨྲ་བ་ཅན། །གང་གིས་བཟུང་ནས་བཅིངས་པ་དང་། །ཡང་ན་ལག་པ་ཞགས་པས་བཏབ། །དེ་ལས་བུ་ནི་ཐོབ་པར་འགྱུར། །ཡང་ན་གནས་པ་ཆེན་པོར་འགྱུར། །བྲམ་
ཟེར་ཕྱུགས་དང་གླང་ཆེན་ལྷ། །གཞན་དག་ནག་པོ་ཤིན་ཏུ་ངན། །ཐོད་པ་རས་བལ་ཐལ་བ་རུས། །གཞན་རྣམས་དཀར་པོ་མངོན་པར་དགའ། །རྟ་བླ་མོ་དང་ལྟོ་འཕྱེ་དང་། །ཆུ་གནས་སྲོག་ཆགས་བཟུང་བ་ནི། །རྣམ་པར་རྒྱལ་བའམ་དངོས་པོ་འཐོབ། །ཡང་ན་བུ་ཐོབ་
རྣམ་པར་བཤད། །གང་ཞིག་ཁྲག་གི་བཏུང་བ་འཐུངས། །ཡང་ན་ཆང་ནི་རབ་ཏུ་འཐུངས། །བྲམ་ཟེ་ཡིན་ན་རིག་པ་ཐོབ། །དེ་ལས་གཞན་ནི་ནོར་ཐོབ་འགྱུར། །གལ་ཏེ་རྨི་ལམ་འོ་མ་འམ། །བ་ཡི་འོ་མ་བཞོས་ནས་འཐུངས། །དེ་ཡིས་འོ་མའི་བཏུང་བ་ཐོབ། །ཡང་ན་
སྦྱིན་སྲེག་བྱེད་པར་འགྱུར། །ཞོ་མཐོང་བས་ནི་བདེ་སྐྱིད་འབྱུང་། །གྲོང་མཐོང་ནོར་དང་ལྡན་པར་འགྱུར། །ནས་ཀྱི་སྦྱིན་སྲེག་ཤེས་པར་བྱ། །ཡུངས་ཀར་གྱིས་ནི་ཐོབ་པར་འགྱུར། །མེ་ཏོག་ལྡན་ན་མེ་ཏོག་ཤེས། །འབྲས་བུ་ལྡན་ན་བློ་མེད་བློ། །མེ་འབར་དུ་བ་ཅན་

མཐོང་ན། །མེ་འབར་བ་ནི་འཇིགས་པར་བཤད། །སྟན་དང་མལ་སྟན་བཞོན་པ་དང་། །ལུས་པོ་ཤིང་རྟ་ཁྱིམ་རྣམས་ནི། །མེ་འབར་འདུག་ཚེ་གཉིད་སད་ན། །དེ་ཡིས་དེ་ཡི་དཔལ་རྣམས་འཕེལ། །རྟགས་ལ་མངོན་པར་མཆོད་མཐོང་ན། །དེ་ཡིས་
བསམ་པ་འགྲུབ་པར་འགྱུར། །བྱེ་བྲག་ཏུ་ནི་སྐུ་མཐོང་ན། །དེ་ཡིས་ལུགས་ལས་རྒྱལ་བར་འགྱུར། །ལྷ་རྣམས་བྲམ་ཟེ་ཅན་རྣམས་དང་། །ཕ་དང་རྟགས་ཅན་བུད་མེད་རྣམས། །རྨི་ལམ་དུ་ནི་མཆོག་གང་སྨྲས། །དེ་ནི་དེ་ལྟར་རྣམ་པར་བཤད། །གང་ལ་ལྷ་ཉིད་གར་བྱེད་དང་། །
གཞོགས་སྟེགས་རྒྱུག་པར་བྱེད་པ་རྣམས། །དེ་རྣམས་ཡུལ་བགྲོད་རྣམ་པར་བཤད། །ཙནྡན་དམར་པོའི་ཤིང་དག་ལ། །མར་གྱིས་བྱུགས་ལ་སྦྱིན་སྲེག་བྱ། །ག་ཡ་ཏྲི་ནི་སྟོང་ཕྲག་བཟླས། །དེ་ཡིས་ཞི་བ་ཐོབ་པར་འགྱུར། །འདི་ནི་ངག་དབང་དགོངས་པ་སྟེ། །གང་
གིས་ནང་པར་ཀློག་པ་དེའི། །རྨི་ལམ་ངན་པ་ཟློག་པར་འགྱུར། །རྨི་ལམ་བརྟག་པ་རྫོགས་སོ།། །།རྒྱ་གར་ཤར་ཕྱོགས་ཀྱི་པཎྜི་ཏ་བི་བྷཱུ་ཏི་ཙནྡྲས་རང་འགྱུར་དུ་མཛད་པའོ།། ༄༅༅། །རྒྱ་གར་སྐད་དུ། པདྨ་ཛཱ་ལོདྦྷ་བ་སཱ་དྷ་ནི། བོད་སྐད་དུ།
པདྨ་དྲ་བ་འབྱུང་བའི་སྒྲུབ་ཐབས། འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །ཆོས་དང་ལོངས་སྤྱོད་རྫོགས་སྤྲུལ་རྣམས། །སྐུ་གསུམ་རྣམས་ཀྱིས་རྣམ་པར་གནས། །སྟོང་ཉིད་སྙིང་རྗེའི་རང་བཞིན་ཅན། །པདྨ་སྤྱན་རས་གཟིགས་ཕྱག་འཚལ། །
ལྷ་ཉིད་རྣམ་པ་དུ་མ་ནི། །དེ་ཉིད་སྤངས་པ་མིན་པ་གང་། །ཐུགས་རྗེས་མཆོག་ཏུ་ཆགས་གྱུར་པ། །འཇིག་རྟེན་མགོན་ནི་རྒྱལ་བར་བྱེད། །ཆོས་བདག་མེད་པ་དམ་པའི་དངོས། །རྨད་བྱུང་མཐར་གནས་པ་གང་དེ། །དུ་མའི་དཀྱིལ་འཁོར་པ་གང་ཉིད། །ཐུགས་རྗེ་ཆེན་
པོ་རྣམ་པར་འཇོག །ཕུན་སུམ་ཚོགས་པ་ཀུན་གྱི་རྒྱུ། །པདྨ་དྲ་བ་དཔལ་ལ་བརྟེན། །ཇི་ལྟར་བླ་མས་ཉེར་བསྟན་པ། །དེ་ཡི་སྒྲུབ་ཐབས་རིམ་པར་བརྗོད། །ཡེ་ཤེས་ཤེས་རབ་ཐབས་རང་བཞིན། །སྒྲུབ་ཐབས་སེམས་ལ་ཀུན་ཕན་པ། །ཚིག་དོན་ཕལ་ཆེར་རྣམ་

གསལ་བ། །བདག་དང་བློ་མཉམ་རྣམས་ལ་ཕན། །དང་པོ་རེ་ཞིག་ཡང་དག་པའི་བྱང་ཆུབ་ཀྱི་སེམས་བསྐྱེད་ནས་སེམས་ཅན་གདོན་པ་ལ་ཀུན་དུ་དམིགས་ཏེ་ལམ་སྔོན་དུ་བྱའོ། །འཇིག་རྟེན་འདི་ཐམས་ཅད་ཉིད་བདག་གིས་འཁོར་བའི་སྡུག་བསྔལ་ལས་བཏོན་ནས་སངས་རྒྱས་ཉིད་
ལ་ངེས་པར་སྦྱར་བ་དང་། སངས་རྒྱས་ཉིད་ཐོབ་པའི་རྒྱུར་སྔགས་ཀྱི་ཐེག་པ་ཆེན་པོ་ཐེག་པ་ཐམས་ཅད་ཀྱི་མཆོག་བླ་མའི་དྲིན་གྱིས་ཉེ་བར་བསྟན་པ་ལས་ཡང་དག་པར་རྟོགས་ཏེ། ཐོས་པ་དང་། བསམ་པ་དང་བསྒོམ་པའི་རིམ་པས་ཇི་ལྟར་རིག་པ་ཀུན་དུ་སྤྱོད་པ་ལ་རབ་ཏུ་འཇུག་པ་བརྩམ་
པར་བྱའོ། །སྔགས་ཀྱི་ཚུལ་ཆེན་པོ་ཉིད་གང་ལས་བྱང་ཆུབ་སེམས་དཔའ་རྣམས་ཐམས་ཅད་ཀྱི་བྱང་ཆུབ་ཐོབ་བོ། །གང་གསུངས་པ། སྐུ་གསུང་ཐུགས་ཀྱི་རྡོ་རྗེ་ཅན། །སངས་རྒྱས་ལམ་གསུམ་ཡང་དག་བྱུང་། །ཡང་དག་གསང་སྔགས་རབ་བསྒོམས་པས། །ཡེ་ཤེས་
མཉམ་མེད་ཡང་དག་ཐོབ། །ཅེས་སོ། །དེའི་ཕྱིར་སྔགས་ཀྱི་ཚུལ་བརྗོད་པ་བསྒོམས་པའི་སྟོབས་ལས་དུས་ཡུན་མི་རིང་བ་ཁོ་ནས་བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་པར་བྱས་ན། བདེ་བར་གཤེགས་པའི་གོ་འཕང་ཐོབ་པར་བྱེད་དོ། །དེ་ལ། བྱམས་དང་
སྙིང་རྗེ་མཉམ་པར་སྦྱོར་ལས་ཡིད་ནི་རྫོགས་པའི་བྱང་ཆུབ་ལས། །སངས་རྒྱས་རྣམས་ཀྱི་ཤིན་ཏུ་ཟབ་པའི་ཚུལ་དུའང་ལྷག་པར་མོས་པར་ལྡན། །སྦྱིན་པ་ཚུལ་ཁྲིམས་ལ་སོགས་ཀུན་རྫོགས་སྲིད་པའི་ལོངས་སྤྱོད་ལས་ཕྱིར་ཕྱོགས། །སེམས་ལ་སྡུག་བསྔལ་དང་ནི་དུབ་པ་མེད་པར་ལྷ་ཉིད་
མཉེས་པར་བྱེད། །ཆུ་དང་། ཅོད་པན་དང་། རྡོ་རྗེ་དང་། བདག་པོ་དང་། མིང་དང་། གསང་བ་དང་། ཤེས་རབ་ཡེ་ཤེས་དང་། བརྟུལ་ཞུགས་དང་། དབུགས་དབྱུང་བ་ལ་སོགས་པ་དབང་བསྐུར་བའི་ཆོ་ག་དང་ལྡན་པ། ཚོགས་པར་སྦྱོར་བ་བླ་མའི་དྲིན་གྱིས་བྱིན་ཞིང་
རྗེས་སུ་གནང་བ། གཉུག་མའི་གསང་སྔགས་དངོས་སུ་བྱས་པའི་བསོད་ནམས་དང་རྗེས་སུ་མཐུན་པའི་ས་འཛིན་ལ་སོགས་པར་གང་ཡང་རུང་བར་བདེ་བའི་སྟན་ལ་སེམས་དཔའི་སྐྱིལ་མོ་ཀྲུང་གིས་འདུག་སྟེ། བདག་དང་རྣལ་འབྱོར་སྲུང་བའི་དོན་དུ། རྗེ་བཙུན་བགེགས་མཐར་

བྱེད་ཡུད་ཙམ་གྱིས་དྲན་པར་བྱའོ། །ཨོཾ་ཨ་མྲྀ་ཏ་ཧ་ན་ཧ་ན་སརྦ་བིགྷྣཱཾ་ད་ཧ་ད་ཧ་སརྦ་པཱ་པཾ་ཧཱུཾ་ཕཊ། དེ་ནས་རྣམ་པར་ཐར་པའི་སྒོ་གསུམ་རྣམ་པར་སྦྱངས་ནས། བྱམས་པ་ལ་སོགས་པ་བསྒོམས་པ་སྔོན་དུ་འགྲོ་བས་རང་གི་སྙིང་གར་པདྨ་དང་ཟླ་བའི་དཀྱིལ་འཁོར་ལ་
ཧྲཱིཿའི་ཡི་གེ་བསམས་ནས་ནམ་མཁའི་མཐིལ་དུ་རྡོ་རྗེ་ཏིལ་གྱི་གང་བུ་བཞིན་དུ་བར་མཚམས་མེད་པར་རང་གི་འདོད་པའི་ལྷའི་དཀྱིལ་འཁོར་གྱི་འཁོར་ལོ་དང་དེ་དང་ཐ་མི་དད་པའི་བླ་མ་རྣམས་ཀྱི་སྐུ་དང་དེ་བཞིན་གཤེགས་པ་རྣམས་ཀྱིས་ཀྱང་ཡོངས་སུ་གང་བར་ཀུན་ཏུ་དམིགས་ནས་
ཧྲཱིཿའི་ཡི་གེ་དེ་ལས་གཟུགས་དང་སྒྲ་དང་དྲི་དང་རོ་དང་རེག་བྱ་རྡོ་རྗེའི་ལྷ་མོ་དང་ཕྱི་རོལ་གྱི་རྣམ་པ་སྣ་ཚོགས་པའི་མེ་ཏོག་ལ་སོགས་པ་ཐམས་ཅད་ཀྱིས་མཆོད་པའི་ལྷ་མོ་རྣམས་སྤྲོས་ནས་ཡང་དག་པར་མཆོད་ནས་བདག་ཉིད་དེ་རྣམས་ཀྱི་མདུན་དུ་འདུག་སྟེ་གུས་པ་དང་དུལ་བའི་སེམས་
ཀྱིས་ཐལ་མོ་སྦྱར་བ་བྱས་ཏེ། པུས་མོའི་ལྷ་ང་བཙུགས་ནས་ཕྱག་འཚལ་བར་བལྟའོ། །འདི་ལྟར་སྔར་བརྗོད་གཟུགས་སོགས་དང་། །དེ་བཞིན་རིན་ཆེན་སོགས་ཕུང་པོས། །མཆོད་པ་རྣམ་པར་བརྟག་བྱས་ནས། །སྔགས་པས་དེ་རྣམས་འབད་པས་མཆོད། །དེ་ལྟར་དེ་རྣམས་
མདུན་འདུག་ནས། །པུས་བཙུགས་ཐལ་མོ་སྦྱར་བྱས་ཏེ། །སྡིག་པ་ལ་སོགས་མི་དམིགས་པས། །བཤགས་པ་ལ་སོགས་པ་བྱའོ། །བདག་གི་སྡིག་ཀུན་བཤགས་པར་བགྱི། །དགེ་ལ་མཆོག་དགས་རྗེས་ཡི་རང་། །ཇི་སྲིད་འགྲོ་གནས་གང་དོན་དུ། །བཅོམ་ལྡན་དམ་
ཆོས་རིན་ཆེན་དང་། །དཀོན་མཆོག་གསུམ་ལ་མངོན་པར་སྐྱབས་སུ་མཆི། །བྱང་ཆུབ་ཡིད་ལ་བཟུང་ཞིང་དེ་ཡི་ལམ། །ཡང་དག་བསྟེན་ཞིང་དགེ་བའི་གཏེར་རྣམས་ནི། །རྫོགས་པའི་བྱང་ཆུབ་ཆེད་དུ་ཡང་དག་བསྟེན། །དེ་བཞིན་དཀོན་མཆོག་གསུམ་ལ་བདག་སྐྱབས་སོ། །ཞེས་
པ་ལ་སོགས་ཐམས་ཅད་བཀླགས་ནས་སོ། །དེ་ནས་སེམས་ཅན་ཐམས་ཅད་ལ་ལྷ་ཉིད་ཀྱི་བདེ་བ་ཉེ་བར་བསྒྲུབ་པའི་བྱམས་པ་བསྒོམ་པར་བྱའོ། །དེ་ནས་དེ་རྣམས་ཁོ་ན་ལ་སྡུག་བསྔལ་ཐམས་ཅད་སེལ་བའི་རྣམ་པ་སྙིང་རྗེ་དང་། དེ་ནས་དེ་རྣམས་ཁོ་ན་ལ་བདེ་བ་དང་མི་འབྲལ་

བའི་རྣམ་པ་དགའ་བ་དང་། དེ་ནས་དེ་རྣམས་ཁོ་ན་ལ་འཇིག་རྟེན་ལས་འདས་པའི་དགེ་བ་ཐམས་ཅད་ཉེ་བར་སྡུད་པའི་རྣམ་པར་བཏང་སྙོམས་སོ། །དེ་ནས་གཟུང་བ་དང་འཛིན་པའི་རང་བཞིན་དང་བྲལ་བ་སྟོང་པ། དེའི་རྣམ་པའི་ཡེ་ཤེས་ནང་གི་སྐྱེ་བ་མེད་པའོ། །དེ་བཞིན་ཁོ་ནར་ཁམས་
གསུམ་པའི་མཐར་ཐུག་པ་ལས་ཟློག་པའི་སེམས་ཅན་མེད་པའི་ཕྱིར་མཚན་མ་མེད་པའི་ཡེ་ཤེས་ཙམ་མོ། །རྣམ་པར་རྟོག་པ་མེད་ཅིང་སེམས་པ་མེད་པས་གང་ལ་ཡང་སྨོན་པ་མེད་པ་གང་ཡིན་པ་དེ་ལས་རྒྱུ་བ་དང་བཅས་པ་དང་། རྒྱུ་བ་མེད་པའི་དངོས་པོ་མ་ལུས་པ་ལ་སྨོན་པ་མེད་
པའོ། །དེ་ལྟར་རྣམ་པ་སྣ་ཚོགས་པའི་རྣམ་པར་ཐར་པའི་སྒོའི་རང་བཞིན་རང་གི་སེམས་ལ་རང་གི་སོ་སོར་རིག་པས་བལྟས་ནས་སློབ་དཔོན་གྱིས་འཆད་པར་འགྱུར་བའི་གསང་སྔགས་ཀྱི་དོན་ལ་ལྷག་པར་མོས་པས་བྱིན་གྱིས་བརླབ་པར་བྱའོ། །ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་
བྷཱ་བ་ཤུདྡྷོ྅ཧཾ། ཨོཾ་སྭ་བྷཱ་བ་ཤཱུ་ནྱ་སརྦ་དྷརྨཱཿསྭ་བྷཱ་བ་ཤཱུ་ནྱོ྅ཧཾ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། སྟོང་ཉིད་རོ་གཅིག་མ་སྦྱར་བས། །བྱང་ཆུབ་མཆོག་ཏུ་མི་འགྱུར་བ། །དེ་ཕྱིར་རང་ཡིད་རྟག་ཏུ་ནི། །ཤེས་རབ་ཐབས་ཀྱི་བདག་ཉིད་བྱ། །ནམ་ཞིག་
སངས་རྒྱས་ཀྱི་ནི་ཞིང་། །རྣམ་པར་མ་དག་སངས་རྒྱས་མེད། །དེ་ནས་དང་པོར་ཞིང་དག་ཕྱིར། །རང་སེམས་ཉི་མ་བསྒོམ་པར་བྱ། །དེ་ལ་གཟི་བརྗིད་ཕུང་པོའི་གཟུགས། །རང་གི་སེམས་ནི་བལྟ་བར་བྱ། །ཧཱུཾ་ཡིག་ཡོངས་སུ་གྱུར་པ་ལས། །སྐྱེས་པའི་རྡོ་རྗེ་ཕྲ་མོ་
རྣམས་སོ། །དེ་རྣམས་ཀྱི་འོག་དང་སྟེང་གི་ཕྱོགས་བཞིར་རྡོ་རྗེའི་ར་བ་དང་གུར་བསམ་པར་བྱའོ། །དེ་ཕྱིར་ཐོག་མ་དབུས་མཐའ་གྲོལ། །དེ་དང་ཟད་པ་སྤངས་པ་ཡི། །ཡེ་ཤེས་རྩ་ལ་གནས་པའི་ཆོས། །ཐམས་ཅད་དག་པའི་གོ་འཕང་གནས། །འདི་ལྟར་ཇི་སྐད་བཤད་ཡེ་
ཤེས། །རྫོགས་པ་ཡོངས་སུ་འཇུག་པ་ནི། །ཆོས་འབྱུང་ཕྱག་རྒྱ་གྲུ་གསུམ་པ། །དཀར་པོ་སྟེང་དུ་གནས་བསམ་བྱ། །སྣ་ཚོགས་ཆུ་སྐྱེས་རྡོ་རྗེའི་དབུས་གནས་པ། །ནམ་མཁའི་མཐར་ཐུག་པ་ཡི་གཟུགས་ཅན་ནོ། །དེ་ནས་རླུང་མེ་ཆུ་སའི་དཀྱིལ་འཁོར་དུ། །ཨ་ཡིག་ཡོངས་

གྱུར་ཟླ་བ་དེ་ལ་དེའི། །སྟེང་དུ་ཟླ་བར་པཾ་ཡིག་སེར་པོ་ནི། །ཡོངས་སུ་གྱུར་པའི་སྣ་ཚོགས་པདྨའོ། །དེ་ཡི་ཟེ་འབྲུར་ཟླ་བ་ལ་བྷྲཱུཾ་ཡིག་ལས་སྐྱེས་པའི་འཁོར་ལོ། དེ་ཡོངས་སུ་གྱུར་པ་ལས་རྣམ་པར་སྣང་མཛད་ཀྱི་རང་གི་ངོ་བོ་ཡེ་ཤེས་ཀྱི་མཆོད་རྟེན་ཁང་པ་བརྩེགས་པ་བལྟ་
བར་བྱའོ། །ཇི་ལྟར། གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་བརྒྱན་པ་དང་། །དྲ་བ་དྲ་ཕྱེད་མེ་ཏོག་ཕྲེང་། །མེ་ལོང་ལ་སོགས་པས་བརྒྱན་པ། །ཤིན་ཏུ་རྣམ་པར་དག་པ་ཡི། །ཆོས་ཀྱི་དབྱིངས་ལས་སྐྱེས་པའི་ཕྱིར། །ཉེར་སྤྱོད་ལྔ་ཡིས་བརྒྱན་པའོ། །འགྲོ་བ་མ་
ལུས་པ་ཤིན་ཏུ་རྣམ་དབྱེར་མེད་པར་བརྗོད་པའི་ཕྱིར། །དེར་གྱུར་པའི་ཉེས་པས་རྗེས་སུ་གོས་པ་མེད་པའི་ཕྱིར་སྡོང་བུ་གཅིག་ལ་རིམ་པ་གསུམ་འདབ་མ་སུམ་ཅུ་རྩ་དྲུག་པའི་སྣ་ཚོགས་པདྨའི་གདན་ཉེ་བར་མཛེས་པའི་ལྷའི་གནས་སེམས་ཅན་ཐམས་ཅད་ཀྱི་ཉོན་མོངས་པའི་ཀུན་དུ་གདུང་བ་
ཞི་བར་བྱེད་པའི་ཕྱིར་དང་དགེ་བའི་རྩ་བ་ཉེ་བར་བསགས་པའི་ཕྱིར་དང་། ཐུགས་རྗེ་ཆེན་པོའི་རང་བཞིན་ཉིད་ཀྱི་ཕྱིར། འདབ་མ་སོ་སོར་ཟླ་བའི་གདན་ལ་རྗེས་སུ་སོན་པ་མ་རིག་པའི་མུན་པ་རྣམ་པར་བཟློག་པའི་ཕྱིར་དང་། མི་དགེ་བའི་འདབ་མ་སྐེམས་པའི་ཕྱིར་དང་། བྱང་ཆུབ་ཀྱི་
སེམས་ཀྱི་མྱུ་གུ་སྨིན་པར་བྱེད་པའི་ཕྱིར་དང་། ཤེས་རབ་ཀྱི་རང་བཞིན་ཅན་ཉིད་ཀྱི་ཕྱིར་སྒོ་དང་ཟུར་དུ་ཉི་མའི་གདན་ལ་གནས་པའོ། །ཐུགས་རྗེས་བརླན་པ་ཉིད་ཀྱི་ཕྱིར་དང་བསོད་ནམས་ཀྱི་ཚོགས་ཡོངས་སུ་རྫོགས་པ་ཉིད་ཀྱི་ཕྱིར་བུམ་པ་གང་བ་རྣམས་ཀྱིས་ཡོངས་སུ་བརྒྱན་པའོ། །ཡེ་
ཤེས་ལྔའི་རང་བཞིན་གྱིས་རིན་པོ་ཆེ་ལྔའི་རང་བཞིན་ནོ། །དེ་བཞིན་དུ་རང་གི་སེམས་དེ་རྣམ་པར་དག་པར་གྱུར་པ། ཁང་པ་བརྩེགས་པའི་རང་བཞིན་ཁང་པ་རུ། །དེ་ལ་དབུས་སུ་ཟླ་བའི་གདན་ལ་ནི། །བཅུ་དྲུག་ཉིས་འགྱུར་གྱི་ནི་དབྱངས་རྣམས་ཀྱི། །སུམ་ཅུ་རྩ་གཉིས་མཚན་
གྱིས་ཚོགས་པ་ཡི། །ནུས་པས་རྫོགས་པར་བྱེད་པར་བལྟ་བར་བྱ། །ལུགས་སུ་འབྱུང་དང་ལུགས་ལས་བཟློག་པ་ཡི། །ཕྲེང་བ་གཉིས་སུ་ངེས་པར་གནས་པ་ཡིས། །དག་པ་ཟླ་བ་ཤེལ་གྱི་རྣམ་པ་ཡིས། །རྣམ་པར་འཕྲོ་བའི་འོད་ཟེར་ཕྲེང་རྣམས་ཀྱིས། །དེ་ནས་ཀ་ལ་སོགས་

ཀའི་སུམ་ཅུ་བཞི། །དེ་རྣམས་ཌ་ཌྷ་ད་དྷ་ཡ་ལ་དང་བཅས་པ་རྣམས་འབད་པ་ཆུང་བ་དང་ལྡན་པ་ཉིད་ཀྱི་ཕྱིར་རབ་ཏུ་བཅུག་ནས་བཞི་བཅུར་བྱའོ། །དེ་རྣམས་ཁོ་ན་ཉིས་འགྱུར་དུ་བྱ་སྟེ། དཔེ་བྱད་བརྒྱད་ཅུ་པོ་རྣམས་སོ། །དེ་རྣམས་ལས་སྐྱེས་པ་ཟླ་བའི་དཀྱིལ་འཁོར་གཉིས་པའོ། །
དེ་བཞིན་དུ། སྐུ་ཡི་བྱིན་རླབས་ལ་གྲུབ་པ། །དེ་ནི་གང་ལས་འབྱུང་བར་འགྱུར། །ཌ་ཌྷ་ད་དྷ་ལ་ཡ་བདག །བཅུག་ནས་ཉིས་འགྱུར་ཀ་སོགས་བྱ། །དེ་ལས་ཀྱང་ཟླ་བསམ་བྱས་ནས། །དཔེ་བྱད་སྒྲུབ་པར་བྱེད་པའོ། །བྱང་ཆུབ་སེམས་ཀྱི་རང་བཞིན་ཕྱིར། །སྙིང་རྗེའི་
རྩ་བ་ལས་བྱུང་དྲགས། །དེའི་ཕྱིར་ཀུན་གཞི་རྣམ་པར་ཤེས་པ་དང་། ཉོན་མོངས་པ་ཅན་གྱི་ཡིད་དང་འཇུག་པའི་རྣམ་པར་ཤེས་པ་གནས་གྱུར་པ། མེ་ལོང་དང་མཉམ་པ་ཉིད་དང་། སོ་སོར་རྟོག་པ་དང་། བྱ་བ་རྗེས་སུ་སྒྲུབ་པ་དང་། ཤིན་ཏུ་རྣམ་པར་དག་པའི་ཆོས་
ཀྱི་དབྱིངས་ཏེ། ཡེ་ཤེས་ལྔའི་རང་བཞིན་ཧྲཱིཿའི་ཡི་གེའི་ས་བོན་ཡོངས་སུ་གྱུར་པ་ལས་རང་ཉིད་དཔལ་པདྨ་སྤྱན་རས་གཟིགས་ཀྱི་དབང་ཕྱུག་ཐུབ་པའི་མཆོག་རྡུལ་ཕྲ་རབ་ཀྱི་ལུས་ཚད་མེད་པ་དང་། བསྡུས་པའི་དངོས་པོ་དང་སྐད་ཅིག་དང་དགའ་བ་བཞི་རྣམ་པར་དག་པ་ཡང་དག་པར་
གསལ་བར་བྱེད་པའི་ཞལ་བཞི་པར་བལྟ་བར་བྱའོ། །འགྲོ་བ་ཚིམ་པར་བྱེད་པ་པོ་ཉིད་ཀྱི་ཕྱིར་རྩ་བའི་ཞལ་དང་ལུས་གང་བའི་ཟླ་བ་ལྟར་དཀར་བ། གཡས་པ་དང་རྒྱབ་དང་གཡོན་པའི་ཞལ་སྔོན་པོ་དང་དམར་པོ་དང་ལྗང་གུའོ། །སྔགས་དང་བདག་དང་ལྷའི་དེ་ཉིད་གསུམ་གསལ་
བར་བྱེད་པ་པོ་ཉིད་ཀྱི་ཕྱིར་སྤྱན་གསུམ་རྣམ་པར་ཐར་པ་བརྒྱད་ཀྱི་ཚུལ་གྱི་ཕྱིར་ཕྱག་བརྒྱད་དོ། །སྟོང་པ་ཉིད་དང་སྙིང་རྗེ་ཆེན་པོ་དག་མཉམ་པའི་བདག་ཉིད་ཅན་གྱི་དངོས་པོའི་ཕྱིར་དང་ཤེས་རབ་དང་ཐབས་ཀྱི་བདག་ཉིད་དམ་པའི་སྐུ་གསལ་བར་བྱེད་པ་པོ་ཉིད་ཀྱི་ཕྱིར་རྣམ་པ་གཉིས་སྒྲོན་མས་
ཀུན་དུ་སྣང་མེས་བྱེད་པ་ལྟར་རང་སྣང་གི་རིག་མ་གོས་དཀར་མོ་གཡོན་གྱི་པང་དུ་ཕྱག་གིས་འཁྱུད་དེ་འཛིན་པའོ། །སྲིད་པའི་འཆིང་བ་ལས་གྲོལ་བའི་ཕྱིར་དང་། ཏིང་ངེ་འཛིན་རྣམ་པར་འཆད་པ་ཡང་དག་པར་བསྲུང་བའི་ཕྱིར་སྐྱིལ་ཀྲུང་ཕྱེད་པའོ། །གཟུགས་ལ་སོགས་པའི་ཕུང་

པོ་ལྔ་རྣམ་པར་དག་པའི་རང་བཞིན་གྱི་ཕྱིར་དང་། མེ་ལོང་ལ་སོགས་པའི་ཡེ་ཤེས་ལྔ་རྣམ་པར་དག་པའི་ཕྱིར་གཡས་པའི་ཕྱག་དང་པོར་གནས་པའི་རྩེ་མོ་ལྔ་པའི་རྡོ་རྗེས་གཡོན་གྱི་ཕྱག་དང་པོར་གནས་པའི་པདྨ་འབྱེད་བཞིན་པའོ། །ཇི་ལྟར་པདྨ་དམར་པོ་ནི། །
གནས་ཀྱི་ཉེས་པས་མི་གོས་པ། །དེ་བཞིན་གྲུབ་པའི་རྣལ་འབྱོར་ལྡན། །གནས་ཉེས་སྣ་ཚོགས་ཀྱིས་ཀྱང་ངོ་། །དེ་ཕྱིར་པདྨ་ཞེས་བརྗོད་དོ། །གདུལ་དཀའ་བ་འགགས་པར་བྱེད་པའི་ཕྱིར་པདྨའི་ལྕགས་ཀྱུ་གདེངས་པའོ། །གདུལ་བྱ་མ་ཡིན་པ་འཆིང་བར་བྱེད་པ་ཉིད་ཀྱི་ཕྱིར་པདྨའི་
ཞགས་པས་མཚན་པའི་ཕྱག་གོ། །དོན་དམ་པ་ལས་ཆོས་ཐམས་ཅད་བདག་མེད་པའོ་ཞེས་གསལ་བར་བྱེད་པའི་ཕྱིར་ཡེ་ཤེས་ཀྱི་བདུད་རྩིས་གང་བའི་ཐོད་པ་ཕྱག་ཏུའོ། །སྐྱེ་མཆེད་དྲུག་ལ་སོགས་པའི་ལུས་འཇོག་པ་སྤངས་པའི་ཕྱིར་རོ། །མགོ་བོ་ལ་སོགས་པ་རྐང་པའི་མཐར་
ཐུག་པའི་རྣམ་པར་དཔྱད་པ་ལས། སྟོང་པ་ཉིད་རོ་གཅིག་ཅིང་དབྱེ་བ་མེད་པའི་མགོ་བོའོ། །གཡོ་བ་མེད་པའི་དངོས་པོའི་ཕྱིར་དག་པའི་ཤེལ་དང་དུང་དང་ཀུནྡ་དང་ཟླ་བ་ལྟར་དཀར་བའི་ཁ་ཊྭཱཾ་ག་བསྣམས་པ་དམ་པའི་ཆོས་ཀྱི་ཕྱིར་ཕྱག་ཏུ་རིན་པོ་ཆེའོ། །སྤྲོས་པ་མེད་པའི་ཤེས་རབ་ཀྱི་
བདག་ཉིད་དང་བཅས་པ་ཉིད་ཀྱིས་ལྷ་མོའི་ནུ་མ་ལ་རེག་ཅིང་དགའ་བའོ། །སྡུག་བསྔལ་གསུམ་གྱིས་གཟིར་བའི་འགྲོ་བ་ལ་སོ་སོར་རྟོག་པའི་མཆོག་ཉིད་ཀྱི་ཕྱིར་འོད་དཔག་མེད་ཀྱི་ཅོད་པན་ཅན་ནོ། །བཅུད་ལེན་ཡོངས་སུ་རྫོགས་པའི་ཕྱིར་དང་ཡེ་ཤེས་ཀྱི་ཟླ་བའི་ཆའི་མྱུ་གུ་ཅན་གྱི་རལ་
པའི་ཚོགས་ཀྱིས་བརྒྱན་པ་དེ་ཁོ་ན་ཉིད་ཀྱི་ཆ་ཤས་བསྡུས་པར་བཅས་པ་རྣམ་པར་འཇོམས་པ་པོ་མ་ཡིན་པ་ཉིད་ཀྱི་ཕྱིར་པདྨ་དཀར་པོས་དབུ་ལ་མཚན་པའོ། །དེ་བཞིན་དུ། སེམས་ཅན་རྗེས་སུ་འཛིན་པ་ཡི། །ཐུགས་རྗེས་རྗེས་ཆགས་ཡང་དག་བྱུང་། །ཡང་དག་རྫོགས་
པའི་དགེ་ཆོས་ཀྱིས། །ཉོན་མོངས་ཐམས་ཅད་ངེས་འདུལ་བྱེད། །ཀུན་གྱིས་བརྒྱན་པའི་གཟུགས་རྣམས་ཀྱིས། །ཞི་དང་སྒེག་པ་འཆང་བ་པོ། །ཤེས་རབ་ཐབས་བདག་དམ་པའི་སྐུ། །མཚན་མོར་བྱེད་པ་མཆོག་འབར་བྱེད། །ཅེས་པ་དང་། གཞན་ཡང་། བཅོམ་

ལྡན་འདས་མའང་ཐམས་ཅད་དུ། །བཅོམ་ལྡན་འདས་མཚུངས་བསམ་པར་བྱའོ། །ཞེས་སོ། །ཡང་ན་ཕྱག་གཉིས་པདྨ་དམར་པོ་རྣམ་པར་རྒྱས་པར་བྱེད་བཞིན་པའོ། །དེ་བཞིན་དུ། སྣ་ཚོགས་སྤྲུལ་པའི་རྣམ་གཡེང་གིས། །མ་ལུས་འགྲོ་དོན་བྱ་དེ་མཆོག །བཅོམ་ལྡན་
འདས་གཟུགས་བདག་ཉིད་ནི། །བསམས་ནས་བསྒོམ་པར་བརྩམ་པར་བྱ། །ཞེས་དེ་ལྟ་བུ་ནི་དང་པོ་སྦྱོར་བ་ཞེས་བྱ་བའི་ཏིང་ངེ་འཛིན་རང་གི་དོན་སྒྲུབ་བྱེད་དོ། །དེ་ནས་དཀྱིལ་འཁོར་རྒྱལ་པོ་མཆོག །གཞན་གྱི་དོན་དུ་སོ་སོར་བསྒོམ་པར་བྱའོ། །དེའི་རྗེས་སུ་འགྲོ་བ་མཐའ་
དག་ལ་ཐུགས་རྗེས་བསྟན་ནས། སྙིང་གར་ཡེ་ཤེས་སེམས་དཔའ་ཧྲཱིཿཡིག་གི་ས་བོན་ལས་འོད་ཟེར་ཀུན་ཏུ་སྤྲོས་ནས་ཕྱོགས་བཅུར་གནས་པའི་དེ་བཞིན་གཤེགས་པའི་བདག་ཉིད་རྣམས་བཀུག་ནས་རབ་ཏུ་བཅུག་ནས་བསམ་པར་བྱའོ། །དེ་རྣམས་ཀྱང་མཐར་དེའི་གཟུགས་ཀྱི་
རྣམ་པ་ཡོངས་སུ་གྱུར་པས་འགྲོ་བ་རྗེས་སུ་གཟུང་བའི་ཕྱིར་རབ་ཏུ་ཕྱུང་ནས་འདི་ལྟར་གཟུགས་ཀྱི་རྣམ་པ་ཡོངས་སུ་གྱུར་ནས་སྔར་བརྗོད་པའི་ཟླ་བའི་དཀྱིལ་འཁོར་རྣམས་ལ་ཀ་ཡིག་ལ་སོགས་པའི་ས་བོན་དང་མཚན་མ་རྣམས་སུ་གནས་པ་བསམ་པར་བྱའོ། །དེ་བཞིན་དུ། སངས་རྒྱས་
ཚོགས་རྣམས་བཀུག་ནས་ནི། །རང་གི་ས་བོན་ནང་གཞུག་བྱ། །སླར་ཡང་ཡིད་ཀྱིས་ཕྱུང་ནས་ནི། །གཉུག་མའི་ས་བོན་རིམ་ཇི་བཞིན། །འདི་ཡི་དགོད་པའི་རིམ་པ་ནི། །དང་པོའི་འདབ་མ་བརྒྱད་ཀྱི་རིམ་པ་ལ། ཤར་དུ་པདྨ་སྤྱན་མ་ལྷ་མོ་བསྒོམ་པ་བློ་ལྡན་པ། །ལྷོ་རུ་རིན་
ཆེན་པདྨ་ཞེས། །ནུབ་ཏུ་པདྨ་རྡོ་རྗེ་ཅན། །དེ་བཞིན་གཡོན་དུ་པདྨ་སྒྲོལ་མ། མེ་རུ་པདྨ་གོས་མ་སྟེ། །པདྨ་འབར་བ་བདེན་བྲལ་དུ། །པདྨ་སྔོན་མོའི་ཁྲོ་གཉེར་ཅན། །རླུང་གི་ཟུར་དུ་ཡང་དག་གནས། །པདྨ་རྩེ་མོ་དབང་ལྡན་དུའོ། །དྲུག་གཉིས་འདབ་མའི་རིམ་པའི་ལྷ་
མོ་རྣམས་སོ། །དེ་རྣམས་མིང་ནི་རིམ་པར་བཤད་པ་ནི། །པདྨ་སྐར་མདའ་པདྨ་སྒྱུ་མ་དང་། །དེ་བཞིན་པདྨ་འདོད་པའི་དབང་ཕྱུག་མ། །པདྨ་ལྡན་པ་པདྨ་མཚུངས་མ་དང་། །དེ་བཞིན་པདྨ་གཏུམ་པོའི་དབང་ཕྱུག་མ། །པདྨ་གསང་མ་པདྨ་ཆེན་མོ་དང་། །པདྨ་ཟླ་བ་ཕྱི་མར་བཤད་པའོ། །

པདྨ་སྣང་མ་པདྨ་གཽ་རཱི་མ། །པདྨ་མཛོད་མ་དང་ནི་བཅུ་གཉིས་སོ། །དེ་ནས་གསུམ་པ་འདབ་མ་བཅུ་དྲུག་པ་དེ་ལ་ལྷ་མོ་རྣམས་རིམ་པ་ཇི་ལྟ་བ་བཞིན་ཏེ། པདྨ་དབང་ཕྱུག་པདྨའི་གདོང་མ་དང་། །པདྨ་གཏུམ་མར་རབ་ཏུ་གྲགས་པ་དང་། །པདྨ་རིག་པ་མཆོག་མའི་
མཆོག་དང་ནི། །སླར་ཡང་པདྨ་རྒྱ་མཚོ་མ་དང་ནི། །པདྨ་སྣང་བྱེད་མ་ཞེས་རབ་བརྗོད་མ། །དེ་བཞིན་པདྨ་ཡིད་བཞིན་ནོར་བུ་དང་། །པདྨ་འདོད་མ་པདྨ་འགྲོ་མ་དང་། །པདྨ་ནག་མོ་པདྨ་བདེ་མ་དང་། །བཅུ་བཞི་མ་ནི་པདྨ་ཅན་མ་སྟེ། །གཞན་ཡང་པདྨ་སྔོན་མའི་གཏེར་མ་དང་། །
པདྨ་རྣལ་འབྱོར་དབང་ཕྱུག་མ་ནི་མཛེས། །ཞེས་པ་རིམ་པ་གསུམ་པའི་ལྷ་མོ་རྣམས། །འདི་ནི་ཀུནྡ་ཟླ་བ་བ་མོ་དང་། །ག་པུར་གང་བ་ལྟ་བུར་ཡན་ལག་གསལ། །དགའ་བའི་ཚོགས་རྣམས་རྣམ་རྒྱལ་དགོད་པ་དང་། །མཁུར་པའི་རི་མོ་ཅུང་ཟད་དཀར་དམར་ཏེ། །རྣམ་བཀྲ་སྤྱོད་མ་
སྒེག་པ་རྒྱུན་ཆགས་པར། །གར་སྡུད་གླུ་ཡིས་རྟེན་ལ་རབ་ཏུ་འཇུག །ཨུཏྤལ་རྣམ་པར་རྒྱལ་བའི་རྫི་མས་མཚན། །སྤྱན་གསུམ་ཀུན་ནས་མཛེས་པའི་ཞལ་གཅིག་པ། །ཐོད་པའི་ཕྲེང་བ་མཐིལ་དུ་འབྱར་བྱེ་བ། །རྣམ་རྒྱས་གེ་སར་དམ་པའི་འདབ་བཀྲ་བ། །མཚོ་ལས་སྐྱེས་པ་
རྣམ་པར་ཁ་བྱེ་བ། །དག་པ་མགོ་ལ་ཅོད་པན་དུ་འཆང་བ། །བསྙེམས་བཅས་གྱེན་དུ་དྲང་པོར་བསྒྲེང་བའི་ལུས། །ཁ་ཊྭཱཾ་ག་ལ་ཅུང་ཟད་གཟིགས་པར་བཅས། །གཡས་མིན་ལ་དང་གཡས་པའི་ཕྱག་གནས་པ། །ཐོད་པའི་དོ་ཤལ་འོད་དང་རྣམ་སྒེག་པ། །ཕྱག་གི་རྩེ་མོར་རྣམ་
བཀྲའི་ཞགས་པས་རོལ། །ཕྱག་གཞན་དུ་ནི་དྲག་པོའི་ལྕགས་ཀྱུས་བྲེལ། །དགའ་བ་དགའ་བཅས་མི་དལ་གར་བྱེད་དོ། །ཁོར་ཡུག་ཀུན་དུ་ཉམས་དང་བཅས་པ་དྲག །ཅེས་པ་བསྐྱོད་པའི་ཉམས་ཀྱིས་འཁོར་ལོ་བཅིངས་པས་གར་བྱའོ། །དེ་བཞིན་དུ་གླུ་ནི་བླང་བར་བྱ་སྟེ། ཇི་
ལྟར། ཨོཾ་དེ་བཞིན་གཤེགས་ཀུན་ལ་སོགས་རྣམ་པ་སྣ་ཚོགས་མཆོག་གིས་གཟུགས་འཆང་བ། །རྣམ་པ་སྣ་ཚོགས་རྣམ་བཀྲ་སེམས་ཅན་འདུལ་བ་མཆོག་ཏུ་གྲུབ་པ་མཆོག །སེམས་ཅན་དག་པ་པདྨོ་མཆོག་གི་དགའ་བ་བལྟ་བར་གྱིས། །ཨ་ལ་ལ་ལ་ཧོ། པདྨ་སྤྱན་

རས་གཟིགས་པ་ཡི་ནི་དབང་ཕྱུག་ཐར་པའི་དགའ་བའོ། །ཨོཾ་སངས་རྒྱས་ཁྱོད། རྡོ་རྗེ་འཛིན་པ་ཁྱོད། ཚངས་པ་དང་ཁྱབ་འཇུག་དང་དབང་ཕྱུག་ཆེན་པོ་ཁྱོད། །ཟླ་བ་ཉི་མ་ཁྱོད། ཨ་ལ་ལ་ལ་ཧོ། པདྨ་ཛཱ་ལ་ཤྲཱིཿཞེས་གླུ་བླང་། སླར་ཡང་པྲ་ཀྲྀ་ཏའི་སྐད་ཀྱིས་གླུ་ལེན་པ། །རྣམ་
པ་མང་པོ་འདུལ་བའི་རྣམ་པ་ཡི་ནི་གནས། །རབ་ལས་གར་གྱིས་སྡུད་པའི་སངས་རྒྱས་གར་དབང་ཕྱུག །ཚོགས་ནི་རྣམ་སད་ཡིད་ནི་རྣམ་པར་རྨོངས་པའི་གར། །གར་གྱི་གར་གྱིས་མ་འདྲེས་གླུ་འདི་བླར་གསང་བཅས། །ཞེས་པྲ་ཀྲྀ་ཏའི་གླུ་ཡིས་གླུ་ལེན་པར་བྱེད་དོ། །
ཕྱི་རོལ་དུ་པི་ཝང་མ་ལ་སོགས་པའི་ལྷ་མོའི་ཚོགས་དང་ལྷན་ཅིག་ཏུ་པདྨ་ཕེག་རྡོབ་ཀྱི་རོལ་མོས་བཅོམ་ལྡན་འདས་ལ་ཡང་དག་པར་བསྟོད་ཅིང་ཕེག་རྡོབ་རྗོད་པར་བྱེད་དོ། ཨོཾ་པདྨ་པདྨ་ཧྲཱིཿ ཨོཾ་པདྨ་པདྨ་ཤྲཱིཿ ཨོཾ་པདྨ་པདྨ་དྷི། ཨོཾ་པདྨ་པདྨ་ཧྲཱིཾ། ཨོཾ་པདྨ་པདྨ་ཧཱིཾ། ཨོཾ་པདྨ་པདྨ་བྷྲཱུཾ།
ཨོཾ་པདྨ་པདྨ་ཧྲཱཾ། ཨོཾ་པདྨ་པདྨ་ཤྲཱི། ཞེས་པས་པདྨ་འདབ་མ་བརྒྱད་པའི་སྙིང་པོར་གར་བྱེད་དོ། །འདི་ལྟར་གསལ་བྱེད་སུམ་ཅུ་རྩ་དྲུག་གི་རང་བཞིན་གྱི་ལྷ་མོ་རྣམས་བསམ་མོ། །ཅི་ལྟར་མཐར་གནས་ལ་སོགས་པའི་རབ་ཏུ་དབྱེ་བ་ལས་ར་ཡིག་སྤངས་པ་རྗེས་སུ་སྣ་ལྡན་
ལ་སོགས་པ་དང་བཅས་པ་རྗེས་སུ་སྣ་ལྡན་ལ་སོགས་པ་དབྱངས་ཐུང་ངུ་ནི་ཐབས་སོ། །རིང་པོ་ནི་ཤེས་རབ་ཀྱི་རང་བཞིན་ནོ། །དེའི་ཕྱིར་རྣལ་འབྱོར་མཐའ་ཡས་པའི་དཀྱིལ་འཁོར་གྱི་འཁོར་ལོ་སྤྲོ་བར་བྱེད་པའི་བདག་ཉིད་དཀྱིལ་འཁོར་གྱི་འདྲེན་པ་དབུས་གྱི་ཟེ་འབྲུ་ལ་བལྟ་
བར་བྱའོ། །དེ་ལ་འཕགས་པའི་ལམ་ཡན་ལག་བརྒྱད་པ་རྣམ་པར་དག་པ་པདྨ་བརྒྱད་པའི་ནང་གི་རིམ་པའོ། །རྟེན་ཅིང་འབྲེལ་བར་འབྱུང་བ་བཅུ་གཉིས་རྣམ་པར་དག་པ་གཉིས་པའོ། །སྟོང་པ་ཉིད་བཅུ་དྲུག་རྣམ་པར་དག་པ་གསུམ་པའི་ཞེས་ཁོང་དུ་ཆུད་ནས་དེའི་རྗེས་
སུ་ཧྲཱིཿཡིག་ལས་ཁམས་གསུམ་པ་ཁྱབ་པའི་འོད་ཟེར་གྱི་ཚོགས་སྤྲོས་ནས། ཆོས་སྟོན་པ་ལ་སོགས་པ་མཐའ་ཡས་པའི་ཐབས་རྣམས་ཀྱིས་སེམས་ཅན་ཐམས་ཅད་དེ་བཞིན་གཤེགས་པ་ཉིད་ལ་སོ་སོར་བཀོད་ནས། དེ་བཞིན་གཤེགས་པ་དེ་རྣམས་བཀུག་ནས་དེའི་

ས་བོན་ནང་དུ་བཅུག་ནས་དཀྱིལ་འཁོར་གྱི་འཁོར་ལོ་བསྲུང་བའི་ཆེད་དུ་ཁྲོ་བོའི་གཟུགས་ཀྱིས་དབྱུང་བར་བྱའོ། །དེ་ལ། མ་དད་ཕུང་པོ་འཇིག་ལྟ་དང་། །ཤེས་བྱའི་སྒྲིབ་པ་ཟད་པ་དང་། །དད་པའི་རང་བཞིན་བཟང་པོ་ནི། །ཤར་སྒོར་པདྨ་ལྕགས་ཀྱུའོ། །
ཁ་དོག་དཀར་པོ་ཆེན་པོའི་སྐུ། །རབ་སྤྲོས་ཁྲོ་བོས་ཀུན་ཏུ་འཁྲུགས། །སྔོན་པོ་དམར་པོར་སྣང་བའི་ཞལ། །སྤྱན་གསུམ་འཇིགས་པའི་གཟུགས་ཅན་ཏེ། །ལྕགས་ཀྱུ་ཐོ་བ་འཁོར་ལོ་དང་། །ཐོད་པ་ཁ་ཊྭཱཾ་སྡིགས་མཛུབ་རྣམས། །འཆང་ཞིང་ཉི་མའི་དཀྱིལ་འཁོར་དབུས། །
སོན་ཅིང་རྟག་ཏུ་བཞུགས་པའོ། །ལེ་ལོ་ཉོན་མོངས་པ་ཡི་བདུད། །མཐར་འཛིན་ལྟ་བ་མི་མཐུན་ཕྱོགས། །རྣམ་དག་བརྩོན་འགྲུས་ཡང་དག་བྱུང་། །འབར་བའི་གསེར་གྱིས་མཚུངས་པ་སྟེ། །གེ་སར་སྔོན་པོའི་ཞལ་ལ་ནི། །སྤྱན་ནི་གསུམ་པོ་འཆང་བར་བྱེད། །དབྱུག་པ་
ཞགས་པ་ཐོད་པ་དང་། །ཁ་ཊྭཱཾ་སྡིགས་མཛུབ་ནོར་བུའོ། །མ་ལུས་སངས་རྒྱས་རྣམས་ཀྱི་ཚོགས། །འདུལ་བའི་དོན་དུ་ཡང་དག་གདེངས། །ཉི་མའི་གདན་ནི་ཀུན་ཏུ་གནོན། །པདྨ་ཞགས་པའང་ལྷོ་ཕྱོགས་སུའོ། །འཆི་དང་བརྗེད་ངས་ལོག་ལྟ་དང་། །ཆོས་ཀྱི་སྒྲིབ་པ་
མི་མཐུན་ཕྱོགས། །རྣམ་དག་དྲན་པ་ཡང་དག་བྱུང་། །པདྨ་ལྕགས་སྒྲོག་ཉི་མའི་འོད། །དམར་གནག་དཀར་བའི་སྤྱན་གསུམ་གྱི། །དམར་སེར་མེ་ཡི་འོད་རྣམས་ཀྱིས། །གསལ་བའི་ཞལ་གྱིས་ཁྲོས་པ་ཡི། །འོད་ཀྱིས་ནམ་མཁའ་ཀུན་རྟོགས་པ། །ཐོད་པ་ཁ་ཊྭཱཾ་ག་
བསྣམས་ཤིང་། །སྡིགས་མཛུབ་འཁོར་ལོ་འཆང་བ་པོ། །གཡས་བརྐྱང་གནས་སུ་གནས་པའོ། །ལྕགས་སྒྲོག་པདྨ་ཕྱག་གིས་བསྣམས། །ནུབ་ཀྱི་ཕྱོགས་སུ་ཀུན་སོང་སྟེ། །ཉི་མར་ཐུགས་རྗེའི་གཏེར་བསམ་བྱ། །རྣམ་གཡེང་ལྟ་བ་མཆོག་འཛིན་དང་། །ལྷ་ཡི་བུ་བདུད་བྱ་
བའི་སྒྲིབ། །རྣམ་པར་གཡེང་བས་རབ་གཏུམ་འོད། །དམ་པའི་ཏིང་ངེ་འཛིན་རང་བཞིན། །ལྗང་གནག་དཀར་བའི་རྣམ་པ་ཡི། །ཞལ་གྱིས་ཀྱང་ནི་རྣམ་པར་བརྒྱན། །བཻ་ཌཱུརྱ་འོད་སྤྱན་གསུམ་པ། །པདྨ་འབེབས་པ་པད་ཆེན་པོ། །རྡོ་རྗེ་རལ་གྲི་ཁ་ཊྭཱཾ་ག །སྡིགས་མཛུབ་སྣོད་

ཀྱིས་བརྒྱན་པར་བྱ། །དེ་ནས་འགྲོ་བའི་བྱ་བྱས་ནས། །དེ་ཡི་མི་མཐུན་ཕྱོགས་ཟད་སྐྱེས། །དེ་བསྡུས་བརྟན་པར་བལྟས་ནས་ནི། །བྱང་གི་སྒོ་རུ་ཉི་མ་ལའོ། །ཁྲོས་པས་སྟག་གི་པགས་པའི་གོས། །སྦྲུལ་གྱི་རྒྱན་གྱིས་བརྒྱན་པ་དང་། །ཐོད་པའི་ཕྲེང་བའི་ཅོད་པན་ཅན། །ཐོར་
ཅོག་ལྔ་ནི་འཆང་བ་དང་། །དགུག་དང་གཞུག་དང་འཆིང་བ་དང་། །དེ་བཞིན་དུ་ནི་མཉེས་པར་བྱེད། །རྣམ་པར་གཞོམ་དུ་མེད་པའི་ལས། །གཞན་ནི་ཁྱད་པར་ལས་ཤེས་བྱ། །ཟུར་མ་རྣམས་སུ་མཁའ་འགྲོ་མ། །ཞལ་གཅིག་པ་ལ་ཕྱག་བཞི་པ། །སྤྱན་གསུམ་ཁ་དོག་
སྣ་ཚོགས་པ། །གཙིགས་པའི་ཞལ་གྱིས་འཇིགས་པར་བྱེད། །སྣོད་དང་ཅང་ཏེའུ་ཁ་ཊྭཱཾ་ག །དྲིལ་བུ་ཞེས་པ་འཆང་ཞིང་བསྟོད། །སྣ་ཚོགས་ཆུ་སྐྱེས་ཟླ་དབུས་གནས། །དེ་བཞིན་ཕྱོགས་རིམ་གཡས་བརྐྱང་བཅས། །རོ་ལངས་དྲག་པོའི་སྒྲ་ལྡན་མ། །རྡོ་རྗེ་མཆེ་མ་སྟོབས་
ཆེན་མ། །ཡན་ལག་ཐམས་ཅད་བསྡུས་པའི་རྒྱུས། །ཀུན་དུ་འཁོད་ཅིང་རྣམ་གནས་པ། །དཀྱིལ་འཁོར་པ་ཉིད་བསམ་པར་བྱས། །དཀྱིལ་འཁོར་བདག་པོ་ལ་མངོན་ཕྱོགས། །དེའི་རྗེས་སུ་འདི་རྣམས་ཀྱི་ས་བོན་གྱི་ཡི་གེ་རྣམས་ནི། ཨོཾ་ཏྲཱཾ་ཧཱུཾ་ཁཾ་ཧཱུཾ་ལཱཾ་མཱཾ་པཱཾ་ཏཱཾ་བྷྲཱུཾ་ཁཾ་ཧྲིཾ་ཧྲོཾ་ཧཱུཾ་
བཾ་ཨོཾ་ཧཱུཾ་ཨོཾ་ཨཱཿཧཱུཾ་ཞེས་པ་ཕུང་པོ་དང་སྐྱེ་མཆེད་དང་ཁམས་དང་ལུས་དང་ངག་དང་ཡིད་རྣམས་ཐམས་ཅད་དུ་ཇི་ལྟར་རིགས་པར་ཐམས་ཅད་དགོད་པར་བྱའོ། །གཞན་ཡང་གསུངས་པ། བུཾ་ཧཱུཾ་ཨཱཾ་ཧྲི་ཁཾ་ལཱཾ་མཱཾ་པཱཾ་ཏཱཾ་ཛཿཧཱུཾ་བཾ་ཧོཿ། ཁ་རཾ་ཀྵིཾ་ཛཱཾ་ཀྵཾ་ཥྐཾ་སཾ་ཁཾ་ཞེས་པ་དེ་ལྟ་བུའི་རང་གི་ས་བོན་
གཱཾ་རཾ་ཁཾ་ཧཱུཾ་དང་མཚན་མ་རང་གི་རྟེན་ལ་བརྟེན་པའི་སྐུའོ། །གཟུགས་ལ་སོགས་པ་ནི་གཟུགས་རྡོ་རྗེ་མ་ལ་སོགས་པའོ། །ས་ལ་སོགས་པ་ནི་སྤྱན་མ་ལ་སོགས་པའོ། །གཟུགས་ལ་སོགས་པའི་ཕུང་པོ་ལྔ་པོ་ནི་རྣམ་པར་སྣང་མཛད་ལ་སོགས་པའི་སངས་རྒྱས་རྣམས་སོ། །དེ་
བཞིན་དུ་མིག་ལ་སོགས་པ་རྣམས་སུ་བཅུག་པའི་སའི་སྙིང་པོ་ལ་སོགས་པ་རྣམས་ཀྱང་ངོ་། །ལེགས་བརྟན་ཉིད་ཀྱི་སེམས་དཔའ་ཡིས། །དང་པོར་ཐར་པས་ཤེས་བྱར་གྲགས། །ཞེས་པ་དེ་ལྟར་ཀུན་ནས་གྲུབ། །དམ་ཚིག་དཀྱིལ་འཁོར་བལྟས་ནས་ནི། །སྙིང་གའི་ཡེ་

ཤེས་སེམས་འོད་ཀྱིས། །ཡེ་ཤེས་དཀྱིལ་འཁོར་དགུག་པར་བྱ། །འདི་ནི་དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་དུ་ཡོངས་སུ་གྲགས་པའོ། །དེ་ནས་སྙིང་གའི་སྔགས་ཀྱི་འོད་ཟེར་གྱིས་ཡེ་ཤེས་ཀྱི་དཀྱིལ་འཁོར་བཀུག་ནས་དམ་ཚིག་གི་དཀྱིལ་འཁོར་གྱི་འཁོར་
ལོ་ལ་འོ་མ་ལ་འོ་མ་བཞིན་གཅིག་ཏུ་འདྲེས་པའི་དངོས་པོས་རབ་ཏུ་ཞུགས་པར་བསམ་པར་བྱའོ། །ཤེས་རབ་དང་ཐབས་ལས་བྱུང་བ་བདེ་བ་ཆེན་པོའི་ཏིང་ངེ་འཛིན་གྱིས་མཆོག་ཏུ་རོ་མྱང་བ་དང་དཀྱིལ་འཁོར་གྱི་འཁོར་ལོ་མཐའ་དག་བལྟ་བར་བྱའོ། །དེའི་རྗེས་སུ་མཆོད་ཡོན་གྱི་
སྣོད་དུ་མེ་ཏོག་དང་ཙནྡན་ལ་སོགས་པ་སྦྱོར་བར་བསམས་ནས། པདྨ་ལྕགས་ཀྱུ་ལ་སོགས་པའི་ཁྲོ་བོ་རྣམས་ཀྱིས་དཀྱིལ་འཁོར་འཁོར་ལོ་ལ་སྲུང་བ་བྱས་ཏེ་མཆོད་ཡོན་དང་མེ་ཏོག་དང་ཙནྡན་ལ་སོགས་པ་དབུལ་བར་བྱའོ། །དེ་ནས་རང་གི་སྙིང་གའི་ས་བོན་གྱི་འོད་ཟེར་གྱིས་བཀུག་པའི་
དེ་བཞིན་གཤེགས་པ་རྣམས་ལ་མཆོད་པའི་ལྷ་མོ་སྤྲོས་པ་རྣམས་ཀྱིས་ཡང་དག་པར་མཆོད་ནས་དབང་བསྐུར་བར་གསོལ་བ་གདབ་པར་བྱའོ། །དེ་ནས་དེ་རྣམས་ཡེ་ཤེས་ལྔའི་རང་བཞིན་གྱིས་གང་བའི་ནོར་བུའི་བུམ་པས། དཀྱིལ་འཁོར་གྱི་བདག་པོ་དང་དཀྱིལ་འཁོར་ལ་མངོན་པར་
དབང་བསྐུར་བར་བསམ་པར་བྱའོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཀ་ས་མ་ཡ་ཤྲི་ཡེ་ཧཱུཾ། དེ་བཞིན་དུ་རྣམ་པར་བསམས་ནས་མཆོད་པར་བྱ་བ་དང་། མཆོད་པ་པོ་དང་མཆོད་པའི་བདག་ཉིད་སེམས་ཙམ་མོ་ཞེས་རྣམ་པར་བསམས་ནས་སྔགས་འདི་བརྗོད་པར་བྱའོ། །ཨོཾ་སརྦ་ཏ་ཐཱ་ག་
ཏ་པཱུ་ཛ་བཛྲ་སྭ་བྷཱ་བ་ཨཱཏྨ་ཀོ྅ཧཾ། སླར་ཡང་དཀྱིལ་འཁོར་གྱི་འཁོར་ལོ་ལ་སྔར་བརྗོད་པའི་རིམ་པས་མཆོད་པར་བྱའོ། །དེའི་རྗེས་སུ་སྒྲ་བརྙན་བཞིན་དུ་སྒྲའི་ཚོགས་མཐའ་དག་ངེས་པར་བརྟགས་ནས་དཀྱིལ་འཁོར་གྱི་ལྷ་མོ་རྣམས་འཆད་བཞིན་པའི་བསྟོད་པ་ཞལ་ནས་བརྗོད་པར་བསམས་
ནས། རྡོ་རྗེ་ཆེན་པོ་ཕྱག་འཚལ་འདུད། །བདེ་བ་ཆེན་པོ་ཕྱག་འཚལ་བསྟོད། །དགའ་བ་ཆེན་པོ་ཕྱག་འཚལ་འདུད། །ཕྲིན་ལས་ཆེན་པོ་ཕྱག་འཚལ་འདུད། །ཁྱོད་ལས་རྡོ་རྗེ་དང་སེམས་དཔའ། །ཁྱོད་ལས་པདྨ་ལེགས་སྤྲུལ་པ། །ཁྱོད་ལས་རིན་ཆེན་ལྷ་མོ་ཆེ། །

སྣ་ཚོགས་རྡོ་རྗེ་དེ་བཞིན་ཉིད། །ཁྱོད་ལས་སངས་རྒྱས་དཔའ་བོ་ཆེ། །ཡང་དང་ཡང་དུ་ཡང་དག་འབྱུང་། །ཁྱོད་ལས་ཆོས་དང་དགེ་འདུན་ཡང་། །ཁྱོད་ལས་ཕ་རོལ་ཕྱིན་པའི་ཚོགས། །བྱང་ཆུབ་སེམས་དཔའ་སེམས་དཔའ་ཆེ། །ཁྱོད་ལས་གཟུགས་ཀྱི་དཀྱིལ་འཁོར་དང་། །ཁྱོད་
ལས་ཕྱག་རྒྱ་དང་སྔགས་ཀྱང་། །སླར་ཡང་ཁྲོ་བོའི་རྒྱལ་པོའི་ཚོགས། །སླར་ཡང་པྲ་ཀྲྀ་ཏའི་སྐད་ཀྱིས་བསྟོད་པ། །ཡོན་ཏན་མཆོག་ཐོབ་ཤིན་ཏུ་དགའ། །བདེ་བ་ཆེན་པོ་མཆོག་ཏུ་གྱུར། །ཨ་ལ་ལ་ཧོཿ། མཐའ་དག་བདེ་ཆེན་དེ་བཞིན་གཤེགས། །མཐོང་ཞིང་ཉམས་ཀྱིས་གནས་
པའོ། །བདེ་བ་ཆེན་པོ་བསམས་པ་ལས། །དེ་རིང་བདེ་བ་ཆེན་པོ་ཡི། །རོ་ཡིས་གང་བར་བྱེད་པའོ། །ཨ་ལ་ལ་ཧོཿ། མཆོག་ཏུ་བདེ་བ་ཆེན་པོ་ནི། །ཁྱོད་ལ་ཕན་པ་རབ་ཏུ་བྱེད། །པདྨའི་གནས་ཀྱི་ནང་དུ་ནི། །རྡོ་རྗེ་རྡོ་རྗེ་འདི་འགྲུབ་བྱེད། །ཅེས་བསྟོད་པ་དང་མཆོད་པ་བྱས་ལ་མཆོད་
པའི་ལྷ་མོ་རྣམས་ལྷའི་ལུས་ལ་རབ་ཏུ་ཞུགས་པར་བསམས་ནས་དེའི་རྗེས་སུ་ཐོག་མར་ཡ་ཡིག་གིས་རླུང་གི་དཀྱིལ་འཁོར་ནག་པོ་གཞུའི་དབྱིབས་ཅན་བསམས་ནས་དེའི་སྟེང་དུ་ར་ཡིག་གིས་མེའི་དཀྱིལ་འཁོར་གྲུ་གསུམ་འབར་བས་མཚན་པ། དེའི་སྟེང་དུ་བདུད་རྩིས་ཡོངས་སུ་གང་
བའི་ཐོད་པ་བསམས་ནས་བདུད་རྩི་དེ་ཧཱུཾ་ཡིག་གིས་སྤར་བ་དང་། ཨཱཿཡིག་གིས་བསིལ་བར་འགྱུར་བ་དང་། ཨོཾ་ཡིག་གིས་བདུད་རྩིའི་རང་བཞིན་དུ་རྣམ་པར་བསྒོམས་ནས་ལྕེ་ལ་ཧཱུཾ་ཡིག་གིས་རྫོགས་པའི་རྡོ་རྗེས་བྱིན་གྱིས་བརླབས་པར་བསམས་ལ་སྙིང་གར་གནས་པའི་དཀྱིལ་
འཁོར་གྱི་འཁོར་ལོ་མཐའ་དག་བདུད་རྩིས་ཚིམ་པར་བྱའོ། །དེ་ནས་ཧྲཱིཿཡིག་དེ་ལས་འོད་ཟེར་འཕྲོས་ནས་དེ་བཞིན་གཤེགས་པ་རྣམས་བཀུག་སྟེ་གཉུག་མའི་སྙིང་གའི་ནང་དུ་བསྒོམ་པར་བྱའོ། །ཡོངས་སུ་རྫོག་པ་བསྒོམ་པའི་དོན་དུ་རྣམ་པར་དཔྱད་པ་བརྩམ་པར་བྱ་སྟེ། གཅིག་དང་
གཅིག་མིན་སོགས་བརྟགས་པས། །ཕྱི་རོལ་དངོས་པོ་མི་འགྲུབ་སྟེ། །དེ་ཉིད་ཕྱིར་ན་དེ་གཟུང་དང་། །རྣམ་པར་ཤེས་པའང་ཡོད་མ་ཡིན། །དེས་ན་འདི་དག་རང་ཉིད་ཚུལ། །རང་ལ་རག་ལས་གདན་ལ་ཁྱབ། །ཇི་བཞིན་ཡིན་དང་ཇི་བཞིན་མིན། །འགྲོ་བ་འདི་དག་རྟོགས་པར་

བྱ། །འདི་དེ་དམ་པའི་དོན་ཅན་གྱི། །བྱང་ཆུབ་སེམས་སོ་འདི་དེ་ནི། །ཤེས་རབ་ཕ་རོལ་ཕྱིན་པའི་དངོས། །འདི་ཉིད་མཆོག་གི་སྟོང་ཉིད་ཀྱི། །ཡེ་ཤེས་དེ་ལས་དེ་བཞིན་དུ། །རྣམ་དག་གཟུགས་ཉིད་དེ་ཡི་གཟུགས། །མེད་པ་ཉིད་ཕྱིར་དེ་དབྱེར་མེད། །དགེ་བའི་
སེམས་བྱུང་སེམས་རང་བཞིན། །དཀྱིལ་འཁོར་པ་ཀུན་ཤེས་པར་བྱ། །ཞེས་པ་ལས་རྒྱལ་པོ་མཆོག་གི་ཏིང་ངེ་འཛིན་ཏོ། །དེའི་རྗེས་སུ་སྙིང་གའི་ཟླ་བར་པདྨ་ཕྲ་མོ་ལ་གནས་པའི་ཧྲཱིཿཡིག་ཐིག་ལེ་དང་བཅས་པ་ཡུངས་ཀར་གྱི་འབྲུའི་ཚད་ཙམ་གཟི་བརྗིད་ཀྱི་གཟུགས་ཐམས་ཅད་ཡང་དག་
པར་བསྡུས་ནས་རང་གི་ང་རྒྱལ་གྱིས་བསམ་པར་བྱའོ། །དེ་ལ་སེམས་བརྟན་པར་བྱས་ནས་དུབ་པ་སྐྱེས་པ་ལ་སེམས་དེ་ལ་ང་རྒྱལ་དང་བཅས་པར་བྱས་ནས་ཡུད་ཙམ་གྱིས་དཀྱིལ་འཁོར་གྱི་འཁོར་ལོ་བསམ་པར་བྱའོ། །གཟི་བརྗིད་དང་ཐིག་ལེ་ལས་སྐྱེས་པའི་འོད་ཟེར་གྱི་ཕུང་པོས་
ལྕེ་དང་མགོ་ལ་ངག་དང་ལུས་ལ་སོགས་པ་སྤྲོས་ནས་ཐིག་ལེ་ལ་གཟི་བརྗིད་འཕྲོག་པར་བྱེད་པར་བསམས་ནས་ཐིག་ལེ་ཙམ་གྱི་ང་རྒྱལ་གྱིས་གནས་པར་བྱའོ། །སླར་ཡང་གཟི་བརྗིད་འཕྲོག་པར་བྱས་ནས་རང་གི་ལུས་ལས་ངེས་པར་སྣང་བར་བྱའོ། །དེ་བཞིན་དུ་ཡང་ནས་ཡང་དུ་འཕྲོ་
བ་དང་སྡུད་པར་བྱེད་པ་ཉིད་ཀྱིས་ཐིག་ལེའི་རྣལ་འབྱོར་བསྒོམ་པར་བྱའོ། །རྣལ་འབྱོར་པ་ནི་རྒྱལ་བ་དང་། མངོན་པར་ཤེས་པ་དང་གྲུབ་པ་རྙེད་དོ་ཞེས་པ་མན་ངག་གོ། །ཡང་ན་སྣའི་རྩེ་མོར་རང་གི་ལྷའི་མཚན་མ་ཕྲ་མོ་དེའི་ནང་དུ་དཀྱིལ་འཁོར་གྱི་འཁོར་ལོ་མཐའ་དག་བསྒོམ་
པར་བྱའོ། །སྙིང་རྗེ་དང་ཤེས་རབ་མ་བྲལ་བར་སྒོམ་པར་བྱེད་པ་འདི་ནི་ཕྲ་མོའི་རྣལ་འབྱོར་བསྒོམ་པར་བྱའོ། །ཇི་སྲིད་བརྟན་པར་གྱུར་པར་བལྟ་བར་བྱ་སྟེ། བརྟན་པར་གྱུར་པ་ཕྲ་མོའི་རྣལ་འབྱོར་སྤྲོ་བ་དང་སྡུད་པར་བྱེད་པ་ནི་མྱུར་དུ་དཀྱིལ་འཁོར་གྱི་འཁོར་ལོའི་དངོས་གྲུབ་ཐོབ་པར་བྱེད་དོ་ཞེས་པ་
དགོད་པའི་ནུས་པ་ཇི་ལྟ་བ་བཞིན་དུ་གསུངས་པ། ཟླ་བའི་དཀྱིལ་འཁོར་རྫོགས་པ་ལ། །དེའི་ནང་དུ་གནས་བསམ་པ། །དང་པོར་སྨིག་རྒྱུའི་རྣམ་པ་སྟེ། །དུ་བའི་རྣམ་པ་གཉིས་པ་ཅན། །གསུམ་པ་མཁའ་སྣང་དང་མཚུངས་པ། །བཞི་པ་སྒྲོན་མ་ལྟ་བུ་སྟེ། །ལྔ་པ་རྟག་ཏུ་སྣང་

བ་ན། །སྤྲིན་མེད་ནམ་མཁའ་ལྟ་བུའོ། །དེ་ལྟར་རིམ་པར་བྱས་པའམ། །སོ་སོ་རེ་རེར་ངེས་མེད་པ། །སྲོག་ནི་སྤྲོ་ཞིང་དབྱུང་བར་བྱ། །དེ་ལྟར་མཚན་མ་ལྔ་ཡིས་ནི། །སེམས་ནི་བརྟན་པར་གྱུར་པ་ཡི། །འགྲོ་བའི་དོན་ནི་རབ་སྒྲུབ་བྱེད། །རྣལ་འབྱོར་པ་ནི་ཕུལ་དུ་བྱུང་། །ཞེས་པ་ཐིག་ལེའི་
རྣལ་འབྱོར་ལ་སོགས་པ་བསྒོམ་པའོ། །དེ་ནས་སངས་རྒྱས་ཀྱི་ཏིང་ངེ་འཛིན་ལ་གནས་པ་རང་དང་སྔགས་དབྱེར་མི་ཕྱེད་པར་བྱས་པ་ལས་ཕན་ཚུན་མ་འཁྲུག་པ་གསལ་བ་མྱུར་བ་མ་ཡིན་པ་ཐོགས་པ་མ་ཡིན་པར་གསང་སྔགས་གདོན་པར་བྱ་སྟེ། ད་ལྟར་ཨོཾ་ཡིག་ལ་སོགས་པས་ཁྱབ་པར་བྱའོ། །
དེ་ལ་འདི་ནི་སྔགས་ཏེ་ཧྲཱཾ་ཧཱུཾ་ཨཱ་རྨེས་ཁ་སུ་ཧཱ་མ་རེ་ཤྭ་རེ་ཀི་ལོ་བརྨཱ་ས་པ་ཧྲིཾ་ཨོཾ། ཧྲིཾ་ནི་སི་ཝཿརཎྜ་པཱ་པཾ་ཨོཾ་ཞེས་སོ། །ལྷ་མོ་ཐམས་ཅད་ཁོ་ན་ཡི། །མིང་དང་སྔགས་ནི་ངེས་སྦྱར་བྱ། །ཨོཾ་ཡིག་དང་པོར་སྤེལ་བ་ཡིས། །ཕྱི་ནས་དེ་ལ་ཧྲཱིཾ་དགོད་བྱ། །དེ་བཞིན་མཁའ་འགྲོ་མ་དག་ཀྱང་། །
ཧཱུཾ་ཕཊ་ཡི་གེ་ཡང་དག་ལྡན། །ཁྲོ་བོ་རྣམས་ཀྱི་མིང་ཨོཾ་དང་། །ཧཱུཾ་ཕཊ་ཡི་གེས་བརྒྱན་པའོ། །དེ་བཞིན་ཛཿཧཱུཾ་བཾ་ཧོཿརྣམས། །ས་བོན་རིམ་པའི་མཐར་ཐུག་དགོད། །ལྷ་མོའི་ཧྲི་བཾ་ཡང་དག་འབྱུང་། །མཁའ་འགྲོ་མ་རྣམས་ཧཱུཾ་ཕཊ་འབྱུང་། །ཕྱི་ཡི་པདྨའི་པི་ཝང་སོགས། །སྔར་
བརྗོད་ཆོ་གས་དྲན་པར་བྱ། །དེ་བཞིན་དེ་རྣམས་ཁོ་ནའི་ཚོགས། །སྔར་བརྗོད་གསང་སྔགས་བརྗོད་པར་བྱ། །དེ་བཞིན་རིམ་པར་བྱ་བ་ནི། །རེ་རེ་འམ་འཁྲུལ་མེད་མ་ཡིན་པར། །འབྱུང་ཞིང་སྤྲོ་བའི་བསམ་གཏན་དང་། །སྔགས་ཀྱི་མཐར་ཡང་ཡང་དག་བསྡུ། །རྩོལ་བའི་རླུང་
གིས་བཀུག་ནས་ནི། །རང་གི་ས་དེར་ངེས་པར་གཞག །བྱང་ཆུབ་རང་ས་བོན་དེར་བློ། །བསམ་གཏན་བཟླས་པའི་གོ་ཆར་གནས། །ཞེས་པ་བཟླས་པའི་ཆོ་གའོ། །བསམ་གཏན་ནམ་བཟླས་པ་བྱེད་པ་གང་གི་ཚེ་བྱིང་བ་དང་རྒོད་པའི་སེམས་ལ་བལྟ་བ་དེའི་ཚེ་བྱིང་བའི་སེམས་
ལ་ལྷ་མོའི་གླུས་བསྐུལ་བ་བཞིན་དུ་འཁོར་ལོ་མཆོད་པར་བྱ་བ་དང་བསྒོམ་པ་བརྩམ་པར་བྱའོ། །རྒོད་ན་ཐིག་ལེའི་རྣལ་འབྱོར་ལ་སོགས་པ་སྒོམ་པར་བྱེད་པས་དངོས་པོ་རྣམས་ཀྱི་གཅིག་དང་གཅིག་མིན་ལ་སོགས་པ་རྣམས་དཔྱད་པར་བསམ། དེ་བཞིན་དུ་བྱིང་བའི་སེམས་ལ་ནི་ལེ་

ལོ་དང་རྒོད་པ་ཞིག་ནས་ཟད་དོ་ཞེས་པ་ཞུམ་པར་ངེས་པར་བཟུང་བ་ལས་ལྷ་མོ་རྣམས་ཀྱི་གླུས་ཡང་དག་པར་བསྐུལ་བས་དང་རྒོད་པ་ལ་ཐིག་ལེའི་རྣལ་འབྱོར་ལ་སོགས་པས་དེ་ཁོ་ན་ཉིད་བསྒོམས་པས་སོམ་དངོས་པོ་རྣམས་ཀྱིས་རྣམ་པར་དཔྱད་པས་སྟོང་པ་ཉིད་ཀུན་དུ་
དམིགས་པའི་ཕྱིར་རོ། །དེ་བཞིན་དུ་རྣལ་འབྱོར་པའི་སེམས་ཡོད་པས་ཆུང་ངུ་ནས་འཁོར་བ་ཉིད་བལྟ་བར་བྱའོ། །དེའི་ཚེ་མགོ་བོ་ལས་མཐོ་གང་ཙམ་དུ་ཨ་ཡིག་གིས་ཟླ་བའི་དཀྱིལ་འཁོར་བསྒོམ་པར་བྱའོ། །དེའི་སྟེང་དུ་བདུད་རྩིའི་གཟུགས་ཅན་གྱི་ཨོཾ་ཡིག་བསམས་ནས་སྙིང་
ག་དང་མགོ་བོ་ལས་སྔགས་ཀྱི་འོད་ཟེར་སྤྲོས་ནས་ཨོཾ་ཡིག་ཟླ་བ་དང་བཅས་པ་དེ་ཞུ་བར་བལྟས་ནས་དེའི་བདུད་རྩིས་ལུས་ཀྱི་ནང་བུམ་པ་བཞིན་དུ་ཡོངས་སུ་གང་བར་བསམས་ནས། བདུད་རྩིས་ནང་དང་ཕྱི་རོལ་བ་སྤུའི་ཁུང་རྣམས་སུ་གང་བས་ཟིལ་པ་བཞིན་དུ་གང་བར་བསམས་པས་
དུབ་པ་ཉེ་བར་ཞི་བར་བྱའོ། །དེ་ལྟར་ངལ་སོས་པ་དང་སྐད་ཅིག་གཅིག་ལ་བདེ་བའི་ཚོགས་མ་འཁྲུགས་པའི་ཐིག་ལེ་ལ་སོགས་པ་བསྒོམས་པས་སྔར་བཞིན་དུ་གསང་སྔགས་མ་འཁྲུགས་པས་བཟླས་པར་བྱའོ། །དེ་ནས་བསྒོམས་པ་དང་བཟླས་པ་དག་གིས་དུབ་པར་གྱུར་ན་ཕྱི་རོལ་གྱི་
མཆོད་པའམ་ཆོ་གས་ཡུད་ཙམ་དུ་སྟོང་པ་ཉིད་དུ་བསྒོམ་པར་བྱས་ནས་རྣམ་པར་སྨིན་པ་ལས་བྱུང་བའི་ལུས་ཀྱིས་ལངས་ཏེ་ཕྱི་རོལ་མཆོད་པའི་དུས་སུ་རང་གི་ལྷའི་རྣལ་འབྱོར་དམིགས་ཏེ་བྲིས་སྐུ་ལ་སོགས་པའི་མདུན་ན་བཅོམ་ལྡན་འདས་ཀྱི་མདུན་དུ་དཀྱིལ་འཁོར་བྱས་ནས་བདག་ཉིད་ལ་
མཆོད་དེ། དཀྱིལ་འཁོར་བ་རང་གི་སྙིང་ག་ནས་གཟུགས་བརྙན་ལྟ་བུའི་དཀྱིལ་འཁོར་གྱི་འཁོར་ལོ་སྤྲོས་ནས་གསང་བ་དང་ཕྱིའི་ལྷ་སྤྲུལ་པའི་མཆོད་པ་རྣམས་ཀྱིས་མཆོད་ནས་རང་གི་སྙིང་གའི་སྔགས་ཀྱིས་དཀྱིལ་འཁོར་གྱི་འཁོར་ལོ་ལ་མཆོད་པར་བྱའོ། །དེ་ནས་ཟས་ཀྱི་དུས་སུ་ཡུད་
ཙམ་གྱིས་རང་གི་ལྷའི་རྣལ་འབྱོར་བྱས་ནས་ཟས་ལ་ཨོཾ་ཡིག་ལ་སོགས་པའི་ཡི་གེ་གསུམ་གྱིས་རིམ་གྱིས་བདུད་རྩིར་བྱས་ནས་མཆོག་ཏུ་རྣམ་པར་དག་པའི་སེམས་ཀྱིས་ཚིམ་པར་བྱའོ། །ཐུན་མཚམས་ཀྱི་དུས་སུ་ཡུད་ཙམ་གྱིས་རང་གི་ལྷའི་འཁོར་ལོ་བསྒོམ་པར་བྱས་ནས་སྔར་བརྗོད་པའི་

ཆོ་གས་བསྒོམ་པ་བྱས་ནས་བཟླས་པ་བྱའོ། །དེ་ནས་ཟླ་བའི་སྙིང་གར་བསམས་ནས་རྣལ་འབྱོར་པ་བདེ་བར་གཉིད་ལོག་པར་བྱའོ། །སླར་ཡང་ཐོ་རངས་རབ་ཏུ་སད་པར་གྱུར་པ་ན་ལྷ་མོའི་གླུ་རྣམས་ཀྱིས་བསྐུལ་བཞིན་པར་བདག་ཉིད་བསམ་པར་བྱའོ། །ལངས་ནས་སྔར་བརྗོད་པའི་ཆོ་གས་
བསྒོམ་པ་བྱས་ནས་བཟླས་པ་བྱས་སོ། །དེ་བཞིན་དུ་ཇི་སྲིད་པའི་སྲིད་དུ་རྒྱུད་ལས་གསུངས་པའི་མཚན་མ་ཐོབ་པ་དེ་སྲིད་དུ་ཉི་མ་སོ་སོར་རོ། །དེ་ནས་དེ་བཞིན་དུ་ཇི་ལྟར་ནུས་པ་དང་ཇི་ལྟར་ཚོགས་པ་བཞིན་དུ་མཆོད་པའི་ཚོགས་བྱས་ནས་མཐར་གཤེགས་སུ་གསོལ་བར་བྱའོ། །བདེ་བའི་
སྒྲུབ་ཐབས་དམ་པའི་གཞུང་རིགས་བྱས་གང་འདིར། །བསོད་ནམས་ལས་བྱུང་གྲུབ་པ་ཐོབ་པ་ལས་པདྨ། །དྲ་དཔལ་སྒྲུབ་པ་ཁོ་ན་ཉེ་བར་སྤངས་པ་དེས། །སྐྱེ་བོའི་ཚོགས་རྣམས་བྱང་ཆུབ་མཆོག་བདེ་ཐོབ་གྱུར་ཅིག །ཅེས་པ་པདྨ་དྲ་བ་དཔལ་འབྱུང་བའི་སྒྲུབ་ཐབས་རྒྱལ་བ་དཔལ་ཡེ་
ཤེས་ཀྱིས་མཛད་པ་རྫོགས་སོ།། །།ཁ་ཆེའི་པཎྜི་ཏ་སུ་མ་ན་ཤྲཱི་དང་། བོད་ཀྱི་ལོ་ཙཱ་བ་དགེ་སློང་རིན་ཆེན་གྲུབ་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།། ༄༅༅། །རྒྱ་གར་སྐད་དུ། པདྨ་ཨཱ་བ་ལོ་ཀི་ཏེ་ཤྭ་ར་སྱ་པདྨ་ཛཱ་ལ་ཀྲ་མེ་ཎ་བྷ་ག་བ་ཏེ་མཎྜལ་
པཱུ་ཛཱ་བི་དྷིཿ། བོད་སྐད་དུ། པདྨ་སྤྱན་རས་གཟིགས་དབང་ཕྱུག་གི་པདྨ་དྲ་བའི་རིམ་པས་བཅོམ་ལྡན་འདས་ཀྱི་དཀྱིལ་འཁོར་དུ་མཆོད་པའི་ཆོ་ག །འཕགས་པ་སྤྱན་རས་གཟིགས་དབང་ཕྱུག་པདྨ་དྲ་བ་ལ་ཕྱག་འཚལ་ལོ། །མཐའ་མེད་འཁོར་བའི་རྒྱ་མཚོ་ཡི། །ནང་དུ་རྒྱུ་བའི་
འཇིག་རྟེན་རྣམས། །མངའ་བདག་ཐུགས་རྗེས་ནོན་པས་འདོན། །འཇིག་རྟེན་དབང་ཕྱུག་རྒྱལ་གྱུར་ཅིག །ཀུན་མཁྱེན་གྱིས་ཀྱང་ལེགས་ཤེས་མིན། །ཟབ་ཅིང་རྒྱ་ཆེའི་ཆུ་གཏེར་ནི། །པདྨའི་ཕྱག་གིས་ཐུགས་རྗེས་མཁྱེན། །བརླིང་པར་མཛད་པ་ལ་ཕྱག་འཚལ། །བནྡུ་ཀ་
དང་སེ་འབྲུ་མཚལ་བཟངས་པདྨ་རཱ་ག་དང་། །རྒྱ་སྐྱེགས་ཁུ་བ་ཞུ་བ་དམར་པོའི་གདན་དང་པདྨ་གསེར། །སྣང་ལས་རྣམ་པར་རྒྱལ་ནས་ཐུགས་རྗེས་དམར་པོའི་མཆོག་གི་སྐུ། །འཇིག་རྟེན་དབང་ཕྱུག་བླ་མ་འདི་ནི་མཆོག་གསལ་རྣམ་སྣང་བྱེད། །དེ་ནི་སེམས་ཅན་ཐམས་ཅད་ཡོན་

ཏན་ཕུན་ཚོགས་ཀུན་འཛིན་པ། །འཇིག་རྟེན་དབང་གི་དབུ་ལ་རྟག་ཏུ་ཡང་དག་གནས་བཅས་པ། །འདོད་ཆགས་ལ་སོགས་ཉེས་པ་བཞི་ལྡན་བདེ་བར་གཤེགས་པའི་གཙོ། །ཡོན་ཏན་མང་པོ་ཡང་དག་གནས་པའི་འོད་དཔག་མེད་ལ་འདུད། །པདྨ་རཱ་ག་རྣམ་པར་
བདར་དང་གསེར་དང་སྣང་བྱེད་འོད། །ཚོགས་རྣམས་རབ་འཛག་བྱུ་རུའི་སྡོང་པོ་ཟངས་དང་མཚལ་བཟངས་མཛེས། །མཁའ་མཉམ་སྣང་བ་མཐའ་ཡས་ཡོན་ཏན་རྒྱ་ཆེ་འོད་དཔག་མེད། །བཅོམ་ལྡན་འཇིག་རྟེན་མགོན་པོའི་ཅོད་པན་རྒྱན་གྱུར་ལ་ཕྱག་འཚལ། །གང་གིས་སངས་
རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་ཐམས་ཅད་ཀྱིས་ཀྱང་མི་ཤེས་པའི་སྤྱོད་པ་ནི་བདག་གི་པགས་པའི་མིག་གི་སྐུ་བཞིའི་ངོ་བོའི་རང་གི་ངོ་བོ་དཀྱིལ་འཁོར་མཆོད་པའི་ཆོ་ག་བརྗོད་པར་བྱའོ། །དེ་ཡང་བདག་ཉིད་བཞད་གད་དུ་བྱེད་པ་གལ་ཏེ་ཡང་། དེ་ལྟ་ན་ཡང་དེའི་དྲིན་
འདིས། །ཚོགས་རྣམས་བདག་ལ་ཆེན་པོར་འཆར། །གང་གི་རྒྱུ་མཚན་དེ་རྣམས་ནི། །ནོར་ལྷའི་ཕྲིན་ལས་བཟང་པོ་རྣམས། །དེ་ཕྱིར་གཞན་ལ་ཕན་དོན་དུ། །ཇི་བཞིན་པ་ནི་མ་ཡིན་ཡང་། །ཡོངས་སུ་ངལ་གང་ལེགས་པ་ཡི། །ཤིན་ཏུ་ཆུང་གྱུར་ཀྱང་མཛེས་
བྱེད། །མཆོད་པའི་ཆོ་ག་དམ་པའི་ལམ། །ལེགས་པ་དེ་འདི་མཉེས་གྱུར་ཅིག །ཅུང་ཟད་ཅི་ཡང་ཤེས་བྱེད་པ། །ལས་ཐམས་ཅད་པ་བདག་གིས་བརྗོད། །དང་པོ་རེ་ཞིག་ཚངས་པའི་ཡུད་ཙམ་ལ་རྡོ་རྗེ་སློབ་དཔོན་སྟན་ལས་ལངས་ནས་གོས་ཡོངས་སུ་བགོས་ཏེ་ལྷའི་ངག་གི་
ཐ་སྙད་བྱ་ཞིང་འཇིག་རྟེན་པའི་ཕལ་པའི་སྐད་ཀྱིས་འདྲིས་པ་ཡོངས་སུ་སྤངས་པའམ། མི་སྨྲ་བར་བྱས་པ་ཕྱི་རོལ་གྱི་སར་གཙང་སྦྲའི་ཕྱེད་དུ་ཡང་དག་པར་བརྟེན་པར་བྱའོ། །དེ་ལ་ཉི་མ་སྔ་དྲོ་ཁ་ཤར་ལ་ཕྱོགས་པ་དང་། ཉི་མ་གུང་ལ་ལྷོར་ཕྱོགས་པ་དང་། དགོངས་མོ་ནུབ་ཏུ་ཕྱོགས་
པས་ཉེ་བར་འདུག་སྟེ་ལངས་ནས་རྟགས་ལ་གཅིག་དང་བཤང་ལམ་ལ་གསུམ་དང་དེ་བཞིན་དུ་ལག་པ་གཡོན་པ་ལ་བཅུ་དང་གཉི་ག་ལ་བདུན་སྦྱིན་པར་བྱ་བས་དག་པར་མངོན་པར་འདོད་དོ་ཞེས་པའི་རིམ་པས་གཙང་སྦྲ་བྱའོ། །དེ་ནས་སླར་ཡང་ཁ་བཤལ་ནས་དལ་གྱིས་དཀྱིལ་འཁོར་གྱི་

ཁང་པར་འཇུག་པར་བྱའོ། །ཞུགས་ནས་ཨོཾ་སརྦ་ཏ་ཐཱ་ག་ཏཱ་ནཱཾ་པཱ་ད་བནྡ་ནཾ་ཀཱ་རོ་མི། ཨོཾ་ན་མཿསརྦ་བུདྡྷ་བོ་དྷི་ས་ཏྭེ་བྷྱཿད་ཤ་དིཀ་ལོ་ཀ་དྷཱ་ཏུ་བྱ་བསྠི་ཏེ་བྷྱཿས་སྲ་བ་ཀ་པྲ་ཏེ་ཀ་བུདྡྷེ་བྷྱ། ཞེས་པས་ཤར་དང་ལྷོ་དང་ནུབ་དང་བྱང་དུ་བསྐོར་བས་ཕྱག་བྱའོ། །དེ་ནས་འཇམ་པའི་སྟན་ལ་ཡང་དག་པར་ཉེ་བར་
འདུག་ནས། བླ་མ་བདག་ཉིད་གང་དུ་བྲིས་པའི་དཀྱིལ་འཁོར་གྱི་ཤར་གྱི་ཆར་ཁ་ནུབ་ཕྱོགས་པའམ་གལ་ཏེ་མ་ཡིན་ཏེ་བྲིས་པའི་དཀྱིལ་འཁོར་མེད་ན་དེའི་ཚེ་སྟོན་པ་པོ་བློ་བཟང་པོས་གལ་ཏེ་ས་ལ་ཁ་ཤར་དུ་ཕྱོགས་པར་གྱུར་ནས་ཡེ་ཤེས་ཀྱི་ལྷ་ལ་མཆོད་པ་བྱའོ་ཞེས་གསུངས་པའི་ཕྱིར། དེ་ལ་
ཨོཾ་བཛྲ་ཨུ་ད་ཀ་ཧཱུཾ་ཞེས་ཁྱོར་བའི་ཆུ་ལ་མངོན་པར་བསྔགས་ཏེ་ཆུའི་ཉེས་པ་བསལ་ནས་ལན་གསུམ་དུ་མགོ་ལ་མངོན་པར་བསྐུར་བར་བྱའོ། །དེ་ནས་ཨོཾ་བཛྲ་ཨུ་ད་ཀ་མ་མཱ་ཤྲཱི་པདྨ་ཨ་ཝ་ལོ་ཀི་ཏེ་ཤྭ་ར་མུ་ནེ་བ་ར་མ་པ་ར་མ་ཨ་ནུ་ཏ་ནོ་ཨཱ་ན་ན་ཨཱ་དི་ཤུདྡྷཾ་གུ་རུ་སྭཱ་ཧཱ། ཞེས་པས་ལག་པ་དང་གདོང་
ཁྲུས་བྱའོ། །དེ་ནས་བསམ་གཏན་གྱི་ཕྱག་རྒྱ་བཅིངས་ལ། བཅོམ་ལྡན་འདས་པདྨ་སྤྱན་རས་གཟིགས་དབང་ཕྱུག་ལ་བསྟོད་པས་བསྟོད་པར་བྱའོ། །སྐྱོན་མེད་ཡོན་ཏན་གྱིས་མཛེས་པ། །རྒྱལ་བ་འོད་དཔག་མེད་ཀྱིས་བརྒྱན། །ཅོད་པན་བཀྲ་ཤིས་སྦྱིན་པ་པོ། །ཐུགས་རྗེའི་བདག་ཉིད་
ཁྱོད་ལ་འདུད། །པདྨ་མཆོག་གི་འོད་ཀྱི་ལུས། །པདྨ་མཆོག་གིས་འཛིན་པ་དང་། །པདྨའི་དཔལ་གྱི་གཏེར་གྱི་ཕྱག །པདྨ་ཆེན་པོའི་གདན་ལ་བཞུགས། །རལ་པའི་དཀྱིལ་འཁོར་དམ་པ་འཆང་། །ཐམས་ཅད་མཁྱེན་པའི་འབྱུང་གནས་འཛིན། །སེམས་ཅན་འདོན་པར་
བྱེད་ལ་མཁས། །སེམས་ཅན་དབུགས་འབྱིན་མཛད་པའི་ཕྱག །དམན་དང་གཞན་ལ་རྗེས་བརྩེ་བ། །སེམས་ཅན་སྨིན་པར་མཛད་པ་ལ། །རྟག་ཏུ་སེམས་ཅན་དེས་གནས་པ། །སེམས་དཔའ་ཆེན་པོ་བསྟོད་པའི་བདག །སེམས་དཔའི་སྙིང་པོ་མཆོད་པ་ལ། །རྒྱུ་
མེད་སེམས་ཅན་མཉེས་གཤིན་པ། །སྨན་གྱི་རྒྱལ་པོ་དང་མཚུངས་པ། །ཉི་མ་ཟླ་བ་མེ་ཡི་སྤྱན། །ཤིན་ཏུ་རྣམ་པར་དག་ཡོན་བདག །ཤིན་ཏུ་རྣམ་དག་གོ་འཕང་གནས། །ཤིན་ཏུ་རྣམ་དག་རབ་སྦྱིན་པ། །དམ་ཆོས་མཛོད་ཀྱི་བདག་པོ་སྟེ། །ཡིད་བཞིན་ནོར་བུ་མཉམ་

པའི་འོད། །ཐར་པའི་ལམ་ལ་རབ་གནས་པ། །སྣ་ཚོགས་འཇིགས་པ་འཕྲོག་པར་བྱེད། །ཡོན་ཏན་མགོན་པོ་ཁྱོད་ལ་བསྟོད། །ཐུགས་རྗེ་ཆེན་པོ་ཁྱོད་ལ་འདུད། །བྱམས་དང་དགའ་བ་ལ་ཕྱག་འཚལ། །ཕ་རོལ་ཕྱིན་པ་དྲུག་ཕྱག་འཚལ། །ཁྱབ་བདག་ཆེན་
པོ་ཁྱོད་ཞབས་ལ། །ས་ལ་ལྷུང་ནས་བདག་ཕྱག་འཚལ། །ས་སྟེངས་འཇིག་རྟེན་དག་བྱས་པ། །ཉེས་པ་ཟད་པར་མཛད་པ་ལ། །ཇི་ལྟར་མཁའ་ནི་ཕ་རོལ་མཐའ་མེད་ཅིང་། །ཉི་མའི་རབ་གདུང་མཚུངས་མེད་ཇི་བཞིན་ཉིད། །ཇི་ལྟར་སངས་རྒྱས་ཡོན་ཏན་མཐའ་མེད་ཉིད། །
ཁྱེད་ཀྱི་བརྩེ་ཆེན་མཐའ་མེད་དེ་བཞིན་ཉིད། །ནམ་མཁའ་མ་ལུས་ཀུན་དུ་གནས། །རྟག་ཏུ་འགྲོ་དྲུག་རྒྱུ་བྱེད་པ། །ཀུན་ནས་འདོན་པ་བྱེད་འདོད་ཁྱོད། །སྲིད་པའི་བར་དུ་བདག་ཕྱག་འཚལ། །འཇིག་རྟེན་བླ་མ་འཕགས་པ་ཁྱོད་ཞབས་པདྨ་ལ། །བདག་གིས་བསྟོད་པའི་བྱ་བ་
[14 5a.4]འདི་དག་ཀུན་ཕུལ་ལས། །ཡང་དག་བྱུང་བའི་བསོད་ནམས་མངོན་བྱུང་ཉེར་ཐོབ་པ། །སྐྱེ་བོ་རྣམས་ཀྱིས་རྟག་པ་ཁོ་ནར་འབྱུང་བར་གྱིས། །ལོང་བ་མགོན་མེད་ལམ་མེད་རབ་ཞུགས་པ། །སྲིད་པའི་སྡིག་པའི་ཚོགས་སུ་ངེས་བྱིན་ལུས། །བསོད་ནམས་འདི་ཡིས་ཉེས་པ་མ་ལུས་
པར། །སླར་ནི་མི་སྐྱེ་མྱུར་དུ་གྲོལ་གྱུར་ཅིག །སྡུག་བསྔལ་རྣམ་པར་སྤངས་ཤིང་མུན་པའི་ཚོགས་བསལ་བ། །ཆགས་པ་ཉེ་བའི་ཆགས་བྲལ་འཁོད་པའི་རྒྱུ་ཚོགས་ཀྱིས། །འཁོར་བ་རྒྱུ་བ་པོར་རྒྱུར་ཡུལ་སྤྲུལ་མཆེ་བ་ཡི། །ཕྲག་ཏུ་ཉེར་སོན་ཉེན་པ་བདག་ལའང་རབ་སྲུངས་
ཤིག །དམ་པའི་ལམ་སྟོན་མཆོག་ཏུ་ཆེ་བའི་དོན་བཅས་འཛིན། །མཆོག་གི་དབང་ཕྱུག་དང་ནི་མྱུར་དུ་ལམ་སྟོན་ཅིག །ལས་ཀྱི་ཆུ་རླབས་གཡོ་བའི་དྲག་པོའི་ཡུལ་འཛིན་པ། །འཇིགས་པའི་དབང་པོ་རབ་དྲག་ཆུ་སྲིན་འཇིགས་རུང་མཚན། །འཁོར་བའི་རྒྱ་མཚོ་སྒྲོལ་
བྱེད་སྐྱ་འཛིན་བཅོམ་ལྡན་འདས། །སྙིང་རྗེའི་གཏེར་གྱིས་མྱུར་དུ་ཕ་རོལ་བདག་དྲོངས་ཤིག །འཇིག་རྟེན་ཁམས་ཀྱི་ལྷ་དབང་པདྨ་སྤྱན་རས་གཟིགས། །སེམས་ཅན་མ་ལུས་སྲིད་པའི་སྡུག་བསྔལ་ཚོགས་རྣམས་འཕྲོག །བདག་དང་འགྲོ་ཀུན་འཇིགས་འཕྲོག་བདག་ཉིད་ཆེན་པོ་

ཁྱོད། །རྟག་ཏུ་མི་འབྲལ་མཐོང་བར་འདིར་ནི་ཡོད་གྱུར་ཅིག །སྐྱོ་དང་ཉེར་ཆགས་སྤངས་པ་མཚུངས་མེད་དྲི་བྲལ་བརྩོན་འགྲུས་ལྡན། །གཞན་ཕན་ངེས་དགའ་བདག་ནི་ངེས་པ་བདག་ལ་དོགས་པ་མེད། །རྒྱ་ཆེ་ཡོན་ཏན་རྟག་ཏུ་ཕྱུག་པ་ཉེས་པ་རབ་རྒྱས་གྲོལ། །རབ་མཆོག་པདྨའི་ཕྱག་
ཁྱོད་ཇི་བཞིན་ཁོ་ནར་བདག་གྱུར་ཅིག །ཅེས་བསྟོད་པ་བྱའོ། །དེ་ནས་བྱམས་པ་དང་སྙིང་རྗེ་དང་དགའ་བ་དང་བཏང་སྙོམས་ཏེ་ཚངས་པའི་གནས་བཞི་བསྒོམ་པར་བྱའོ། །དེ་ལྟར་བསྒོམ་པར་བྱས་ལ་བདག་ཉིད་སྔགས་ཀྱི་དཀྱིལ་འཁོར་བསྲུང་བའི་དོན་དུ་སྡིགས་མཛུབ་དང་མཐེ་བོའི་སེ་
གོལ་རྣམས་ཀྱིས་ཤར་ལ་སོགས་པའི་ཕྱོགས་དང་ཕྱོགས་བྲལ་རྣམས་སུ་བགེགས་བསྐྲད་པར་བྱ་སྟེ། ཨོཾ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ་ཅེས་པའི་སྔགས་ཀྱིས་སོ། །དེ་ནས་རང་གི་སྙིང་གར་པཾ་ལས་སྐྱེས་པའི་པདྨ་དམར་པོ་དེའི་སྟེང་དུ་ཟླ་བའི་དཀྱིལ་འཁོར་དེའི་སྟེང་དུ་ཧྲཱིཿཡིག་ཁ་དོག་
དཀར་པོ་བསམས་ནས་ནམ་མཁར་སངས་རྒྱས་དང་བྱང་ཆུབ་སེམས་དཔའ་ཉན་ཐོས་ཀྱི་དགེ་འདུན་དང་བཅས་པ་ཐམས་ཅད་སྣང་བར་གྱུར་པར་རྣམ་པར་བསམ་པར་བྱའོ། །རང་གི་འདོད་པའི་ལྷའི་གཟུགས་རྣམས་དཀྱིལ་འཁོར་གྱི་འཁོར་ལོ་བླ་མ་རྣམས་དང་བཅས་པ་སྣང་བར་གྱུར་པར་བྱའོ། །
ཨོཾ་སརྦ་ཏ་ཐཱ་ག་ཏ་ཨཱ་ད་ཡ་སཾ་སྲ་བ་ཀ་པྲ་ཏྱེ་ཀ་བུདྡྷ་བོ་དྷི་སཏྭ་ཨཱཏྨ་ཀཾ་ཨ་ནུ་གྲ་ཧཱ་ཡ་ག་ག་ན་ཏ་ལེ་ཨཱ་བི་ར་བྷཱ་བནྟུ་ཧཱུཾ་ཧཱུཾ་ཧཱུཾ་ཡུཥྨ་བྷྱཾ་ན་མཿསྭཱ་ཧཱ། ཞེས་པ་སྣང་བར་གྱུར་པའི་སྔགས་སོ། །སླར་ཡང་ཧྲཱིཿཡིག་དེ་ལས་གཟུགས་དང་སྒྲ་དང་དྲི་དང་རོ་དང་རེག་བྱ་རྡོ་རྗེ་མའི་ལྷ་མོ་རྣམས་དང་ཕྱི་རོལ་གྱི་རྣམ་
པ་སྣ་ཚོགས་པའི་མེ་ཏོག་ལ་སོགས་པའི་ལྷ་མོ་རྣམས་ཀུན་དུ་སྤྲོས་ནས་དེ་ཉིད་ཡང་དག་པར་མཆོད་དེ་བདག་དེ་རྣམས་ལ་དབུལ་བར་བྱས་ནས་ཐལ་མོ་སྦྱར་ཏེ་ཕྱག་དང་བཅས་པར་བྱའོ། །དེ་བཞིན་དུ་སྔགས་ཀྱང་བཀླག་པར་བྱའོ། །ཨོཾ་སརྦ་ཏ་ཐཱ་ག་ཏ་པུཥྤ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་
ཤྲི་ཡཾ་ཧཱུཾ། དེ་བཞིན་དུ་དྷཱུ་བ་ལ་སོགས་པ་རྣམས་སོ། །འདི་ལྟར་ནམ་མཁར་སྣང་བར་གྱུར་པའི་དཀྱིལ་འཁོར་མཆོད་པར་བྱའོ། །དེ་ནས་སྡིག་པ་བཤགས་པ་སྔོན་དུ་འགྲོ་བས་དཀོན་མཆོག་གསུམ་ལ་སྐྱབས་སུ་འགྲོ་བའི་ཚིགས་སུ་བཅད་པ་བཀླག་པར་བྱའོ། །སངས་རྒྱས་

བླ་མ་ཕྱག་འཚལ་ལོ། །སྐྱོབ་པའི་ཆོས་ལ་ཕྱག་འཚལ་ལོ། །དགེ་འདུན་ཆེ་ལ་ཕྱག་འཚལ་ལོ། །གསུམ་ལའང་རྟག་ཏུ་ཕྱག་འཚལ་ལོ། །དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་
རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་བདག་སྐྱབས་མཆི། །རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱིས་ཤོག །
སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འབྱུང་གྱུར་ཅིག །སྡིག་པ་ཐམས་ཅད་བཤགས་པ་དང་། །བསོད་ནམས་རྗེས་སུ་ཡི་རང་དང་། །གང་འཕགས་ཡན་ལག་བརྒྱད་གསོ་སྦྱོང་། །
བྱས་སམ་ཀུན་དུ་སྤྱད་པར་བགྱིའོ། །ཞེས་སོ། །དེ་ནས་སླར་ཡང་ཚངས་པའི་གནས་བཞི་བསྒོམ་པར་བྱས་ནས་དོན་དམ་པ་ལས་ཆོས་ཐམས་ཅད་བདག་མེད་པ་འདུས་བྱས་ཐམས་ཅད་སྐད་ཅིག་པ་མྱ་ངན་ལས་འདས་པ་ཞི་བའོ་ཞེས་ཁམས་གསུམ་པ་སེམས་ཙམ་ཁོ་ནའོ་ཞེས་སྔགས་ཀྱི་དོན་
བསྒོམ་པར་བྱའོ། །ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ། ཨོཾ་སྭ་བྷཱ་བ་ཤཱུ་ནྱེཿསརྦ་དྷརྨཱཿསྭ་བྷཱ་བ་ཤཱུ་ནྱོ྅ཧཾ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་སོ། །དེ་ནས་ནང་གི་མི་ཤེས་པའི་མུན་པ་ཡོངས་སུ་བསྐོར་བའི་སྙིང་གའི་ཁུང་བུའི་ནང་དུ་སོན་པ་སེམས་ལ་
གནས་པ་རྣམ་པར་བསམས་ནས། དེའི་མུན་པའི་རྣམ་པའི་རང་གི་ངོ་བོ་མི་ཤེས་པ་བཟློག་པའི་ཕྱིར་སྙིང་གི་པདྨ་རབ་ཏུ་རྒྱས་པ་ལ་བརྒྱ་ཕྲག་བཅུར་འོད་གསལ་བའི་ཉི་མ་ལ་སོགས་པ་རྣམ་པར་བསྒོམ་པར་བྱའོ། །དེས་སེམས་དྲི་མ་མེད་པ་ཅན་དུ་བྱས་པ་ཀུན་དུ་བལྟ་བར་བྱའོ། །
དེ་ལ་སེམས་ཀྱི་ནང་དུ་ཧཱུཾ་ཡོངས་སུ་གྱུར་པ་འཆད་བཞིན་པའི་རིམ་པས་རྡོ་རྗེའི་གུར་ལ་སོགས་པའི་རིམ་པའོ། །དཔེར་ན་དང་པོར་རེ་ཞིག་ཆོས་འབྱུང་གི་ཕྱག་རྒྱ་གདེངས་ཀ་གྱེན་དུ་ཕྱོགས་པ་དཀར་པོ་ཟུར་གསུམ་འོག་ཏུ་རྩེ་མོ་ཕྱོགས་པ་བསྒོམ་པར་བྱའོ། །དེའི་དབུས་སུ་སྣ་ཚོགས་པདྨ་

དང་སྣ་ཚོགས་རྡོ་རྗེའོ། །དེའི་འོག་ཏུ་ཡཾ་ལས་སྐྱེས་པའི་རླུང་གི་དཀྱིལ་འཁོར་ནག་པོར་སྣང་བའོ། །དེའི་སྟེང་དུ་རཾ་ལས་སྐྱེས་པའི་དཀྱིལ་འཁོར་དམར་པོ་ཟུར་གསུམ་པ། །དེའི་སྟེང་དུ་བཾ་ལས་སྐྱེས་པའི་ཆུའི་དཀྱིལ་འཁོར་དཀར་པོ་ཟླུམ་པོ། དེའི་སྟེང་དུ་ལཾ་ལས་སྐྱེས་པའི་དབང་ཆེན་གྱི་དཀྱིལ་
འཁོར་སེར་པོ་གྲུ་བཞི། དེའི་སྟེང་དུ་སུཾ་ལས་སྐྱེས་པའི་ལྷུན་པོ་ཆོས་མངོན་པ་མཛོད་ཀྱིས་འཇིག་རྟེན་གྱི་ཁམས་མཉམ་པར་གཞག་པར་གསུངས་པ་བཞིན་རི་བདུན་དང་གླིང་དང་བཅས་པ་དེའི་སྟེང་དུ་ཨ་ཡོངས་སུ་གྱུར་པའི་ཟླ་བ། དེའི་སྟེང་དུ་པཾ་ཡིག་སེར་པོ་ཡོངས་སུ་གྱུར་པ་ལས་སྣ་
ཚོགས་པདྨ། དེའི་སྟེང་དུ་བཾ་ཡོངས་སུ་གྱུར་པའི་སྣ་ཚོགས་རྡོ་རྗེའོ། །དེའི་ལྟེ་བ་ལ་བྷཱུཾ་ལས་སྐྱེས་པའི་འཁོར་ལོ། དེའི་ལྟེ་བར་རྣམ་པར་སྣང་མཛད་ཀྱི་རང་གི་ངོ་བོ་ཡེ་ཤེས་ཀྱི་མཆོད་རྟེན་ཁང་པ་བརྩེགས་པ་བལྟ་བར་བྱའོ་ཞེས་པ་རྒྱུད་ཐམས་ཅད་ལ་ངེས་པའོ། །ཁང་པ་བརྩེགས་པ་
དེ་ཉིད་ལ་གྲུ་བཞི་པ་སྒོ་བཞི་པ་ཞེས་དཀྱིལ་འཁོར་གྱི་ཆོ་གར་བྲིས་པ་འཆད་བཞིན་པའི་རིམ་པས་ཐམས་ཅད་རྣམ་པར་བསམས་པར་བྱས་ནས་དེའི་བདག་ཉིད་མཆོད་པའི་ཡོ་བྱད་དུ་གྱུར་པར་དབུལ་བར་བྱའོ། །ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་སོ། །དེ་ནས་མགོ་བོར་
འཁོར་ལོ་རྩིབས་བཅུ་གཉིས་པ་དཀར་པོའི་སྟེང་དུ་ཨོཾ་ཡིག་དཀར་པོ། ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་བ་ཨཱཏྨ་ཀོ྅ཧཾ། དེའི་རྗེས་སུ་མགྲིན་པར་པདྨ་དཀར་པོ་འདབ་མ་བརྒྱད་པ། དེའི་སྟེང་དུ་ཨཱཿདམར་པོ། ཨོཾ་སརྦ་ཏ་ཐཱ་ག་ཏ་ཝཱཀ་བཛྲ་སྭ་བྷཱ་བ་ཨཱཏྨ་ཀོ྅ཧཾ། དེའི་རྗེས་སུ་སྙིང་
གར་རྡོ་རྗེ་ནག་པོའི་སྟེང་དུ་ཧཱུཾ་ཡིག་ནག་པོ། ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཨོཾ་ཨཱཿཧཱུཾ། སརྦ་ཏ་ཐཱ་ག་ཏ་ཀཱ་ཡ་ཝཱཀ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བསམས་ནས། དེ་ནས་གཡས་སུ་ཞབས་བསིལ་དང་མཆོད་ཡོན་གྱི་སྣོད་མདུན་དུ་བཞག་ནས། ཨོཾ་བཛྲ་
ཨརྒྷཾ་ཨཱཿཧཱུཾ་ཞེས་ཉེ་བར་རེ་གནས་སྐུའི་དབང་པོ་ལ་སོགས་པའི་ས་བོན་གསུམ་གྱིས་བྱིན་གྱིས་བརླབ་པོ། །དེ་ནས་ཞབས་བསིལ་དེས་མཆོད་རྫས་གཞན་ལ་མངོན་པར་གཏོར་བར་བྱའོ། །ཨོཾ་ཨརྒྷཾ་པྲ་ཏཱིཙྪ་བཛྲ་པ་དྱཾ་པྲ་ཏཱིཙྪ་བཛྲ་པུཥྤེ་ཨཱཿཧཱུཾ། བཛྲ་དྷཱུ་པེ་ཨཱཿཧཱུཾ་ཞེས་པ་ལ་སོགས་པ་རང་རང་

གི་ཕྱག་རྒྱས་དབུལ་བར་བྱའོ། །དེ་ནས་རང་གི་དོན་གྱི་ཆོ་གས་བྲིས་པ་མ་ཡིན་པའི་དཀྱིལ་འཁོར་སྔར་གྱི་རིམ་པས་ཡེ་ཤེས་སེམས་དཔའ་བཀུག་ནས་རྡོ་རྗེ་ལྕགས་ཀྱུ་ལ་སོགས་པའི་རིམ་པས་ནང་དུ་གཞུག་པར་བྱའོ། །སླར་ཡང་ཀུན་ཏུ་སྤྲོས་ནས་སེམས་ཅན་ལ་ཕན་པའི་དོན་
བྱེད་དུ་བཅུག་ནས་དམ་ཚིག་གི་དཀྱིལ་འཁོར་དང་ཡེ་ཤེས་ཀྱི་དཀྱིལ་འཁོར་དག་གཅིག་ཉིད་དུ་བྱས་ནས་དཀྱིལ་འཁོར་དང་དཀྱིལ་འཁོར་པ་རྣམས་རང་རང་གི་སྙིང་པོའི་སྔགས་ཀྱིས་མཆོད་པར་བྱ་ཞིང་བཟླས་པ་དང་བསྟོད་པར་བྱས་ལ་མཐར་གཤེགས་སུ་གསོལ་བར་བྱའོ་ཞེས་པ་དཀྱིལ་
འཁོར་དང་བྲལ་བ་རང་གི་དོན་གྱི་ཆོ་གར་མདོར་བསྡུས་པ་ལས་རྒྱས་པས་གཞན་གྱི་དོན་དུ་དཀྱིལ་འཁོར་ལ་བརྗོད་པར་བྱའོ་ཞེས་པ་དང་པོར་སྦྱོར་བ་སྒྲུབ་པ་པོ་རང་གི་དོན་ཆོས་ཀྱི་སྐུའོ། །དེ་ནས་དཀྱིལ་འཁོར་རྒྱལ་པོ་མཆོག་གི་ཆོ་ག་རྒྱས་པས་དཀྱིལ་འཁོར་གྱི་ཆོ་ག་བརྗོད་པར་བྱའོ། །དེ་ལ་དང་པོར་རེ་ཞིག་
དཀྱིལ་འཁོར་གྱི་གནས་ཞིང་གི་བདག་པོ་ལ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱ་ནུཏྤནྣ་ཏྭཱཏ་ཅེས་པས་གཏོར་མ་སྦྱིན་པར་བྱའོ། །དེ་ལ་དཀྱིལ་འཁོར་དུ་ཉེ་བར་རུང་བའི་ས་ལ་བ་ལས་བྱུང་བ་བཅུ་ཕྱེད་ཀྱིས་ཉེ་བར་བྱུག་པར་བྱའོ། །དེ་ལ་སྔགས་ནི་ཨོཾ་ས་མནྟ་དྷ་ར་ཤུདྡྷེ་དྷ་ར་དྷ་ར་ཧཱུཾ། ཨོཾ་ནི་རྨི་ལ་ཤུདྡྷ་ཧཱུཾ་
ཞེས་སོ། །དེ་ནས་ས་གཞི་དེ་ཁོ་ནའི་བགེགས་བཟློག་པའི་དོན་དུ་ཞི་བ་ཅན་གྱི་སྦྱིན་སྲེག་བྱའོ། །དེ་ལ་དཀྱིལ་འཁོར་དུ་ཉེ་བར་བྱས་ནས་གཡས་སུ་སྤོས་ཕོར་གཡོན་དུ་དྲིལ་བུ་བཟུང་ནས་ལྷ་སྤྱན་དྲང་བ་འདི་བཀླག་པར་བྱའོ། །ད་ནི་རྡོར་སེམས་རང་ངོ་བོ། །དཀྱིལ་འཁོར་མཆོག་ནི་འདྲི་བར་
བྱེད། །ལྷ་རྣམས་བདག་ལ་གྲུབ་པའི་ཕྱིར། །མྱུར་དུ་བསྙེན་པར་མཛད་དུ་གསོལ། །ཞེས་གསོལ་བ་གདབ་པར་བྱའོ། །དེ་ནས་སློབ་དཔོན་རྡོ་རྗེ་སེམས་དཔའི་རང་གི་གཟུགས་སུ་བསམས་ནས་གཡོན་པ་དྲིལ་བུ་ཐོགས་པ་གཡས་པ་ཁ་ཊྭཱཾ་ག་སྟེང་དུ་རྩེ་མོ་ལྔ་པའི་རྡོ་རྗེ་འཆང་བར་
བསམས་ནས་བདག་དེ་དང་འདྲ་བའི་ཕྱག་རྒྱ་བཅིངས་ནས་གཞན་སློབ་མ་རྣམས་ཤར་ལ་སོགས་པའི་ཕྱོགས་སུ་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་བཞིའི་ལུས་སུ་ཡོངས་སུ་བཞག་ནས་དེ་རྣམས་ཀྱིས་དཀྱིལ་འཁོར་གྱི་སའི་སྟེང་གི་བླ་མ་སྔགས་ཀྱིས་མཆོད་

པར་བྱའོ། །དེ་ནས་དེ་རྣམས་རྡོ་རྗེ་དྲིལ་བུ་གསིལ་ཞིང་ཤར་དུ་མཉམ་པའི་རྐང་སྟབས་དང་རྗེས་སུ་རྐང་པ་ལ་སོགས་པ་རྐང་སྟབས་བཞིས་གར་བྱས་ནས་རང་རང་གི་གནས་སུ་ཉེ་བར་འདུག་སྟེ་དེ་རྣམས་རྣམ་པར་སྣང་མཛད་ལ་སོགས་པ་རང་རང་གི་ཁ་དོག་དང་ཕྱག་རྒྱས་མཛད་པར་བཞག་ནས་
བླ་མ་རང་ཉིད་ཤར་དུ་མངོན་པར་ཕྱོགས་པ་ཇི་ལྟར་གནས་པ་དེ་བཞིན་ཁོ་ནར་འདུག་པར་བྱའོ། །དེ་ནས་སློབ་མ་དེ་རྣམས་རྡོ་རྗེ་སེམས་དཔའི་རང་གི་ངོ་བོ་བླ་མ་ལ་རྡོ་རྗེ་མེ་ཏོག་ལ་སོགས་པའི་མཆོད་པ་བཅུ་གསུམ་བྱའོ། །དེ་ལ་སྔགས་ནི། ཨོཾ་བཛྲ་པུཥྤེ་ཨཱཿཧཱུཾ། ཨོཾ་བཛྲ་དྷཱུ་པེ་ཨཱཿཧཱུཾ། ཨོཾ་
བཛྲ་གནྡྷེ་ཨཱཿཧཱུཾ། ཨོཾ་བཛྲ་ནཻ་བེ་དྱ་ཨཱཿཧཱུཾ། ཨོཾ་བཛྲ་ཤབྡ་ཨཱཿཧཱུཾ། ཨོཾ་བཛྲ་ལཱ་སྱེ་ཨཱཿཧཱུཾ། ཨོཾ་བཛྲ་མཱ་ལེ་ཨཱཿཧཱུཾ། ཨོཾ་བཛྲ་གཱིརྟི་ཨཱཿཧཱུཾ། ཨོཾ་བཛྲ་ནྲྀ་ཏ