Luận tạng Tây Tạng (Tengyur) — Tập 28

སྐུར་ནས། །སངས་རྒྱས་ཚུལ་གྱིས་དེ་མཆོད་བྱ། །ཨོཾ་བཛྲ་ས་མཱནྟ་ཛྙཱ་ན་རཏྣ་ཧཱུཾ། ཨ་བྷི་ཥིཉྩ་མཱཾ། ཨོཾ་བཛྲ་པྲ་ཏྱ་བེཀྵ་ཎ་ཛྙཱ་ན་ཨ་བྷི་ཥིཉྩ་མཱཾ།
ཨོཾ་ཀྲྀ་ཏྱཱ་ནུཥྛཱ་ན་ཛྙཱན་བཛྲ་ཨ་བྷི་ཥིཉྩ་མཱཾ། ཨོཾ་ཙཀྲ་ཨམུ་ཀ་ཛྙཱ་ན་བཛྲ་སྭ་བྷཱ་བ་ཨ་བྷི་ཥིཉྩ་མཱཾ། བླ་མས་སྤོས་དྲི་སྦྱོར་བ་ཡིས། །མཆོད་བྱ་ཡི་གེ་བཅུ་པ་བཟླས། །བཅོམ་ལྡན་འདས་ཀྱིས་བྱིན་བརླབས་པས། །འདི་ལ་འགོ་བར་མཛད་དུ་གསོལ། །སྔགས་ཀྱི་དངོས་གྲུབ་སྩལ་དུ་

གསོལ། །མེ་ཏོག་གཏད་ལ་སྔགས་བཟླར་གཞུག །དེ་ནས་དེ་ཡིས་དེ་དག་ལ། །མེ་ཏོག་ཕུལ་ལ་འདི་སྐད་ཅེས། །བཅོམ་ལྡན་བདག་གིས་བཟུང་ལགས་ཀྱིས། །བདག་ལ་འགོ་བར་མཛད་དུ་གསོལ། །དེ་ཡིས་དེ་ལ་རྡོ་རྗེ་སྦྱིན། །ཨོཾ་བཛྲ་ས་མ་ཡ་སྟྭཾ། ཨ་
བྷི་ཥིཉྩ་མཱཾ། རྒྱན་དང་ཆ་ལུགས་ཀྱིས་བསྐོན་ཏེ། །ལྷ་ཡི་ང་རྒྱལ་ལྡན་པར་བྱ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཧེ་ཧེ། སློབ་དཔོན་ཉིད་ཀྱི་ཆ་ལུགས་ཀྱང་། །དེ་ལ་བསྐོན་ལ་བསྲུང་བར་བྱ། །ཨོཾ་བཛྲ་རཀྵ་རཀྵ་ཧཱུཾ་ཨ་བྷི་ཥིཉྩ་མཱཾ། བུ་ཁྱོད་འཁོར་ལོའི་དབང་བསྐུར་གྱིས། །སངས་རྒྱས་ཀུན་གྱི་བདག་
ཉིད་ཡིན། །སྲིད་གསུམ་མ་ལུས་སྒྲོལ་མཛད་མ། །བདེ་བར་གཤེགས་པའི་ལུང་བསྟན་ཏོ། །ཁམས་གསུམ་བདག་པོར་རྒྱལ་སྲིད་ཆེ། །དཔལ་ལྡན་ཡོན་ཏན་འབྱུང་བའི་གནས། །བདུད་ཀྱི་སྡེ་རྣམས་བཅོམ་ཟིན་གྱིས། །ཁྱོད་ནི་གྲོང་ཁྱེར་མཆོག་ཏུ་ཞུགས། །ཨོཾ་ཏཱ་རེ་ཏུཏྟཱ་རེ་ཏུ་རེ་
སིདྡྷི་ས་མ་ཡ་སྟྭཾ་སྭ་བྷཱ་བ་ཨ་བྷི་ཥིཉྩ་མཱཾ། མཚན་མ་མེད་པར་འགྲོ་བའི་དོན། །གང་དག་བདག་གིས་བྱེད་ནུས་པས། །ཕྱིར་མི་ལྡོག་པའི་དབང་བསྐུར་ཆེ། །དཔའ་བོ་ཆེན་པོས་བདག་ལ་སྩོལ། །དཀྱིལ་འཁོར་མཆོད་ནས་ཁྲི་ཡི་ཁར། །སློབ་མ་བཞག་ལ་དབང་བསྐུར་བྱ། །ཨོཾ་བཛྲ་ཨ་
བྷི་ཥེ་ཀ་ཨ་བྷི་ཥིཉྩ་མཱཾ། སྒྲར་བཅས་གླེགས་བམ་ལག་གཏད་དེ། །ཆོས་ཀྱི་རྒྱལ་པོར་དབང་བསྐུར་བྱ། །དེ་ཡིས་དེ་ཡི་སྙིང་ག་རུ། །འཁོར་ལོ་བཅུག་ལ་ཡེ་ཤེས་བསྟིམ། །དབང་གི་བར་དུ་རྫོགས་པར་བྱ། །རྣལ་འབྱོར་དེ་ཉིད་ཤེས་པ་ཡིས། །མི་བྱ་བ་ནི་གང་ཡང་མེད། །དཔའ་བོ་
ཆེན་པོ་ང་ཡི་བཀས། །འདོད་ཡོན་ལྔ་ལ་སྤྱད་པར་བྱ། །ཨོཾ་སུ་པྲ་ཏིཥྛ་སྭཱ་ཧཱ། རྗེས་སུ་གནང་བའི་དབང་བསྐུར་ཕྱིར། །འདི་ནས་བཟུང་ནས་བུ་ཁྱོད་ཀྱིས། །ལུས་དང་སྲོག་ལ་མི་ཕངས་པར། །ཆོས་ཀྱི་འཁོར་ལོ་བསྐོར་བ་དང་། །འགྲོ་བའི་དོན་ནི་དཔག་མེད་བྱོས། །སེམས་ཅན་
གཟུགས་བརྙན་ལྟ་བུ་སྟེ། །རྟེན་ཅིང་འབྲེལ་བའི་ཆོས་དང་ལྡན། །ཁམས་གསུམ་དེ་ལྟར་ཤེས་ནས་ནི། སེམས་ཅན་དོན་ནི་མཚུངས་མེད་བྱོས། །དེ་དག་སློབ་མའི་དབང་བཅུ་སྟེ། །ཕལ་ཆེར་བུམ་པ་ལ་བརྟེན་པས། །བུམ་པའི་དབང་ཞེས་བརྗོད་པ་ཡིན། །ཕྱིར་མི་ལྡོག་དང་

རྗེས་སུ་གནང་། །རྡོ་རྗེ་སློབ་དཔོན་དབང་ཡིན་ནོ། །ཉོན་མོངས་དྲི་མ་འཁྲུ་བ་དང་། །ས་ནི་དང་པོ་ཐོབ་པར་བྱེད། །དེ་ནས་གསང་བའི་དབང་བསྐུར་ཕྱིར། །ཚོགས་དང་དཔའ་བོའི་སྦྱོར་བྱས་ནས། །མཚན་ཉིད་ལྡན་པའི་ཤེས་རབ་མ། །སྟ་གོན་གནས་བྱས་བླ་མའི་མདུན། །དཀྱིལ་འཁོར་
མཆོད་པས་མཉེས་བྱས་ནས། །སློབ་དཔོན་ཁྱོད་ནི་དགོངས་སུ་གསོལ། །གསང་སྤྱོད་ཐབས་དང་ལྡན་པ་ཡིས། །ཤེས་རབ་ཆེན་པོའི་སྣོད་གྱུར་ཕྱིར། །དབང་བསྐུར་ཆེན་པོ་མཛད་དུ་གསོལ། །གསང་སྤྱོད་ཐབས་དང་ལྡན་པ་ཡིས། །ཤེས་རབ་བདུད་རྩི་དྲི་མ་མེད། །བདུད་རྩི་ཆེན་
པོ་མྱང་བར་གྱིས། །དབང་བསྐུར་འདི་ལ་ཁྱོད་སྤྲོའམ། །སློབ་དཔོན་ཁྱོད་ནི་དགོངས་སུ་གསོལ། །ལྷ་མོ་འདི་ནི་ཁྱད་པར་ཅན། །ཡོན་ཏན་མཐའ་ཡས་ལྡན་པ་སྟེ། །གསང་སྤྱོད་ཐབས་ཀྱི་སྦྱོར་བ་ལས། །གསང་བའི་དབང་བསྐུར་མཛད་དུ་གསོལ། །གཞལ་ཡས་ནང་དུ་དེ་བཞག་
ནས། །འོད་ཀྱིས་འཕགས་རྣམས་སྤྱི་བོར་དྲངས། །བུ་གར་ཞུགས་ནས་པདྨར་ཞུགས། །སློབ་དཔོན་ཉིད་ལའང་དེ་བཞིན་ནོ། །མཁའ་གསང་བྱིན་གྱིས་བརླབས་ནས་སུ། །གཉིས་སུ་མེད་པའི་སྦྱོར་བ་བྱ། །ཡབ་ཡུམ་འཁྲིལ་བའི་རང་བཞིན་ལས། །ཡེ་ཤེས་གསལ་བ་བྱང་
ཆུབ་སེམས། །ཕབ་ནས་མཚན་ལྡན་བླུགས་པར་བྱ། །དཔའ་བོ་རྣལ་འབྱོར་མ་ཀུན་གྱི། །དམ་ཚིག་འདི་ནི་ངོ་མཚར་ཆེ། །ཁམས་ལྔ་ཡི་ནི་རོ་ཡིས་གང་། །བདེ་བ་ཆེན་པོ་མྱང་བར་གྱིས། །སློབ་མའི་ལྕེ་ལ་དེ་བཞག་ནས། །ཨ་ཧོ་སུ་ཁ་སྐལ་ཆེན་པོ། །དངོས་གྲུབ་དམ་པ་གསལ་བར་
མཛོད། །འདས་པའི་རྡོ་རྗེ་འཆང་སོགས་ཀྱིས། །ཇི་ལྟར་སངས་རྒྱས་སྲས་དབང་བསྐུར། །བྱང་ཆུབ་སེམས་ནི་ཡིད་འོང་བས། །དེ་བཞིན་བུ་ཁྱོད་དབང་བསྐུར་རོ། །འདི་ནི་གསང་བའི་དབང་ཡིན་ཏེ། །ས་བཅུའི་ཡེ་ཤེས་ཐོབ་པར་བྱེད། །དེ་ནས་ཤེས་རབ་ཡེ་ཤེས་དབང་། །ཤེས་
རབ་མ་ཡི་ལུས་བརྒྱན་ནས། །ལྷ་མོ་འདི་ནི་ཁྱད་པར་ཆེ། །བདེ་བ་མཐའ་ཡས་སྟེར་བྱེད་མ། །བླངས་ནས་རྣམ་པ་ཐམས་ཅད་དུ། །བུ་ཡིས་བླ་མེད་མཆོད་པར་གྱིས། །བྱང་ཆུབ་སེམས་ནི་བླ་ན་མེད། །བུ་ཡིས་དེ་རིང་ཟ་ནུས་སམ། །ཕྱག་རྒྱ་ལྔ་ལས་བྱུང་བ་ཡི། །རིག་མ་དད་པས་

མཆོད་ནུས་སམ། །བཤང་གཅི་ཁུ་བ་རཀྟ་སོགས། །འདི་ཉིད་དུ་ནི་ཟ་ནུས་སམ། །ང་ཡི་གསང་བའི་པདྨ་ཡིས། །བདེ་བའི་མྱུ་གུ་སྐྱེད་པར་བྱེད། །ཁྱོད་ཀྱིས་རྟག་ཏུ་མཆོད་ནུས་སམ། །ཇི་སྐད་བཤད་པའི་དམ་ཚིག་རྣམས། །ལྷ་མོ་ཅི་ཕྱིར་བདག་མི་ནུས། །ལྷ་མོའི་
པདྨ་མཆོད་པར་བགྱི། །ཐབས་དང་ཤེས་རབ་གཡས་དང་གཡོན། །དེ་ཡིས་དར་གྱི་མདུད་པ་བྱ། །དཀྱིལ་འཁོར་ཕྱི་རོལ་ཁྲི་ལས་བསྐྱོད། །གཡོན་པས་གཡོན་པའི་མཁལ་མ་ནས། །གཡས་པས་གསང་བའི་པདྨ་རུ། །སྙིང་པོ་བཙལ་ལ་རྡོ་རྗེ་གཞུག །ཤེས་རབ་བུམ་པའི་མགུལ་ཆིངས་
ཀྱིས། །སློབ་མ་བུམ་པའི་མགུལ་པ་བཅིང་། །བདེ་བ་ཁ་སྦྱོར་བསྒོམ་པར་བྱ། །བདེ་གསལ་མི་རྟོག་ཡེ་ཤེས་སྐྱེས། །རིམ་གྱིས་ཉམས་སུ་དེ་བླངས་ནས། །དལ་བར་ལྡང་བྱ་བྱང་ཆུབ་སེམས། །རྡོ་རྗེ་སེམས་དཔའི་རང་བཞིན་ཕྱིར། །ལྕེ་ཡིས་བཞིབས་ཤིང་སེམས་ལ་བསྟིམ། །གཉིས་མེད་ཡེ་ཤེས་
གསལ་བར་འགྱུར། །ཤེས་རབ་མ་ཡི་རྐང་པ་གཡོན། །སློབ་མའི་སྤྱི་བོར་བཞག་ནས་ནི། །ང་དང་རྡོ་རྗེ་སློབ་དཔོན་དང་། །མཆེད་དང་ལྕམ་དྲལ་ཐམས་ཅད་དང་། །ཁམས་གསུམ་སེམས་ཅན་མ་ལུས་ལ། །མ་མོས་བརྙས་པར་མ་བྱེད་ཅིག །གཞན་ཡང་དམ་ཚིག་བཤད་པ་རྣམས། །
རྟག་ཏུ་ཁྱོད་ཀྱིས་སྲུང་བར་གྱིས། །དེང་ནས་བཟུང་ནས་བུ་ཁྱོད་ཀྱིས། །ཇི་སྲིད་བྱང་ཆུབ་མ་ཐོབ་པར། །སེམས་ཅན་ཀུན་གྱི་དོན་རྣམས་ནི། །རྟག་ཏུ་རྨི་ལམ་བཞིན་དུ་བྱོས། །འདི་ནི་ཤེས་རབ་ཡེ་ཤེས་ཀྱི། །དབང་ཡིན་མི་ཤེས་ཀུན་སེལ་ཞིང་། །བདེ་གཤེགས་སྐུ་གསུམ་ཐོབ་བྱེད་པར། །
རྡོ་རྗེ་འཆང་གིས་ཡོངས་སུ་གསུངས། །བཞི་པ་དེ་ཉིད་ཚིག་གི་དབང་། །བླ་མའི་ཞལ་ལས་ཤེས་པར་བྱ། །རྗེས་ལ་བྱ་བའི་ཆོ་ག་ཡི། །མཆོད་སོགས་བྱས་ནས་དཀྱིལ་འཁོར་བསྡུ། །ཡི་གེ་བརྒྱ་པས་བསྐང་བར་བྱ། །ཚོགས་དང་དཔའ་བོའི་སྟོན་མོ་ཡིས། །མཁའ་འགྲོ་མ་སོགས་
མཉེས་པར་བྱ། །དེ་ནས་གཞན་དུ་གསུངས་པ་ཡི། །དམ་ཚིག་རྣམས་ལ་བསླབ་པར་བྱ། །འཕགས་མ་སྒྲོལ་མ་མྱ་ངན་ཐམས་ཅད་སེལ་བར་བྱེད་མ་ཞེས་བྱ་བའི་ལས་ཀྱི་ཡན་ལག་དཀྱིལ་འཁོར་དུ་འཇུག་པའི་ཆོ་གའི་ལེའུ་སྟེ་དགུ་པ་རྫོགས་སོ།། །།རྗེ་བཙུན་མ་འཕགས་མ་

སྒྲོལ་མ་ལ་ཕྱག་འཚལ་ལོ། །རླན་དང་མི་ལྡན་པདྨ་བཞིན། །གང་གི་དབང་གིས་རྒུད་པ་ཡི། །ཉེས་པ་བསལ་ཕྱིར་པདྨའམ། །བིལ་བའི་འབྲས་བུ་དེ་བཞིན་དུ། །ཀ་ར་བཱི་རའི་མེ་ཏོག་ལ། །མེ་ཡི་ལས་ནི་རྒྱས་པར་བྱ། །ཡང་ན་པ་ལ་ཤ་ཡིས་སོ། །གཞོང་བུ་གཉིས་སམ་བཞི་ཡིས་སོ། །བུམ་པ་བཟང་པོ་ལྟ་
བུ་ཡི། །སྣོད་ཆེན་ནང་དུ་ལྔ་ཚན་ལྔ། །རིན་ཆེན་གྱིས་བྲིས་སྙིང་པོ་གཞུག །ལོངས་སྤྱོད་ཕྱིར་ནི་གཏེར་བཟུང་སྟེ། །འབྲུ་དང་རིན་ཆེན་ཕྱུགས་ལོངས་སྤྱོད། །ཞིང་དང་མཛོད་དང་ཕྱུགས་ལྷས་སུ། །གོ་རིམས་བཞིན་དུ་ཤེས་པར་བྱ། །དེས་ནི་རྣམ་ཐོས་བུ་བཞིན་འགྱུར། །ཨོཾ་ཏཱ་རེ་ཏུཏྟཱ་རེ་ཏུ་རེ་ཛཾ་བྷེ་མོ་ཧེ་
སྭཱ་ཧཱ། འཕགས་མ་སྒྲོལ་མ་འགྲོ་བ་ཐམས་ཅད་འགུགས་ཤིང་ཕོངས་པ་ཐམས་ཅད་སེལ་མ་ཞེས་བྱ་བའི་ལས་ཀྱི་ཡན་ལག་ལོངས་སྤྱོད་སྤེལ་བའི་ཆོ་གའི་ལེའུ་སྟེ་བཅུ་པ་རྫོགས་སོ།། །།རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །དངོས་གྲུབ་ཀུན་གྱི་རྩ་བ་ནི། །
མཉེས་ལས་ཡིན་ཕྱིར་དེ་ཡི་ཐབས། །དུས་དང་ས་ཕྱོགས་ཤིས་རྣམས་སུ། །ས་ཡི་ཆོ་ག་ལེགས་བྱས་པར། །ཁྲུ་གང་ཕྱེད་དང་བཞི་དཔངས་བརྩིགས། །དྲི་ཞིམ་དཀར་པོ་བྱུགས་བྱས་ཏེ། །ཁ་ཁྱེར་ཨུཏྤལ་ཕྲེང་བས་བསྐོར། །དབུས་སུ་ས་བོན་ཡི་གེའོ། །གཡས་དང་གཡོན་དུ་
སྲེག་རྫས་དང་། །མཆོད་པའི་རྫས་རྣམས་རིམ་གྱིས་དགོད། །བ་ལང་གིའམ་འོ་མ་ཅན། །སྲོག་ཆགས་མེད་པའི་བུད་ཤིང་ནི། །མར་དང་སྤྲ་ཚིལ་ལ་སོགས་པའི། །ཡམ་ཤིང་རྣམས་ནི་སྟ་གོན་བྱ། །རིན་ཆེན་ལས་བྱས་ཁྲུ་གང་བ། །བཞི་དང་གཉིས་དང་རེ་རེ་དང་། །གཅིག་དང་
ཕྱེད་དང་རྡོ་རྗེས་མཚན། །དགང་གཟར་བླུགས་གཟར་རྡོ་རྗེ་དྲིལ། །རྣལ་འབྱོར་མདུན་དུ་གཞག་པར་བྱ། །རྫས་རྣམས་བྱིན་གྱིས་བརླབས་བྱས་ལ། །ཐབ་རྩིག་བསྲུང་ཕྱིར་ཀུ་ཤ་དགྲམ། །རྒྱུན་གཞག་པའམ་བྲམ་ཟེའི་མེ། །བསགས་ལ་རླུང་གཡབ་ཀྱིས་སྦར་བྱ། །འབར་བའི་ཆེད་དུ་
གསུམ་གསུམ་མོ། །ཐབ་ཁུང་བདག་མེད་ཆུ་སྐྱེས་ཏེ། །བྱིན་ཟ་ཞལ་གཅིག་ཕྱག་བཞི་དཀར། །དབྱུག་པ་སྐྱབས་སྦྱིན་ཕྲེང་གུནྡྷེ། །ཚངས་སྐུ་དར་སྐྱེས་གདན་ཅན་ནོ། །མེ་ཡི་མཚམས་ནས་རང་བཞིན་དགུག །བསང་གཏོར་དང་ནི་ཞབས་བསིལ་དང་། །མཆོད་པ་རྣམས་ཀྱིས་མཆོད་

ནས་བསྟིམ། །བསང་གཏོར་བྱས་ནས་པདྨ་ཡི། །འདུག་སྟངས་ནང་དུ་ལག་གཉིས་སོ། །བདུན་དང་བདུན་གསུམ་ལན་གསུམ་དུ། །མར་གྱི་དགང་བླུགས་སྦྱིན་པར་བྱ། །ཨོཾ་ཨགྣ་མེ་ཨཱ་དཱི་བྱ་ཨཱ་དཱི་བྱ། ཨ་བྷི་ས་མ་ཡ། མ་ཧཱ་ཤྲཱི་ཡེ་ཧ་བྱ་ཀ་བྱ། བཱ་ཧཱ་ནཱ་ཡ་སྭཱ་ཧཱ།
མེ་ཡི་མཚན་མ་ལེགས་བརྟགས་ཏེ། །ངན་ན་བགེགས་བསྐྲད་བཟློག་པར་བྱ། །ཨོཾ་ཨཱཿབིགྷྣཱནྟ་ཀྲྀཏ་ཧཱུཾ་ཕཊ། ཞལ་དང་ཕྱག་དང་མེ་འོད་ལ། །ཡམ་ཤིང་མར་དང་འོ་མ་ཞོ། །ཏིལ་ལ་སོགས་པ་རིམ་པ་བཞིན། །བདུན་ནམ་ཉི་ཤུ་རྩ་གཅིག་དབུལ། །ཨོཾ་ཨ་བྷ་བ་ག་ཨགྣ་ཡེ་མ་མ་
ཤཱནྟིཾ་ཀུ་རུ་སྭཱ་ཧཱ། དེ་རྗེས་དགང་བླུགས་བྱས་ནས་ནི། །ཞབས་བསིལ་སྦྱིན་ལ་བསྟོད་པ་དང་། །འདོད་པའི་དོན་ནི་བསླང་བར་བྱ། །འབར་བའི་རྣམ་པར་གྱུར་པའམ། །དེ་ཡི་སྙིང་གར་ས་བོན་ལས། །འདོད་པའི་ལྷ་ནི་སྐྱེད་པར་བྱེད། །ཡེ་ཤེས་བཀུག་ལ་བསང་གཏོར་བྱ། །ཞལ་བསིལ་བ་
དང་མཆོད་བྱས་ནས། །གཉིས་སུ་མེད་པར་བསྟིམ་པ་ཡི། །ངག་གི་ལམ་ལ་ཧཱུཾ་ཡིག་སྟེང་། །མེ་ཡི་ས་བོན་གྱིས་མཚན་མ། །དེ་ལ་དགང་བླུགས་དབུལ་བར་བྱ། །དེ་ནས་རྫས་རྣམས་རིམ་གྱིས་དབུལ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀ་རུ་ཎི་
ཀཱ་ཡ། ཏདྱ་ཐཱ། ཨོཾ་ཏཱ་རེ་ཏུཏྟཱ་རེ་ཏུ་རེ་མ་མ་ཤཱནྟིཾ་ཀུ་རུ་སྭཱ་ཧཱ། དགང་བླུགས་ཕུལ་ལ་བསྟོད་པ་དང་། །བཟོད་པར་གསོལ་ལ་འདོད་པ་བསླང་། །ཡེ་ཤེས་གཤེགས་ལ་དམ་ཚིག་བསྡུ། །ཐབ་ཁུང་བསངས་ལ་མེ་ལྷ་བསྐྱེད། །དགང་བླུགས་སྔོན་དུ་འགྲོ་བ་ཡིས། །སྲེག་རྫས་ལྷག་མ་དབུལ་བར་བྱ། །
དགང་བླུགས་བྱིན་ནས་བསྟོད་པ་དང་། །བཟོད་པར་གསོལ་ཞིང་འདོད་པ་བསླང་། །ཡེ་ཤེས་མེ་ལྷ་གཤེགས་བྱས་ལ། །དམ་ཚིག་ཐབ་ཏུ་མི་དམིགས་སོ། །ཡི་གེ་བརྒྱ་པས་བསྐང་བྱས་ནས། །ཐབ་ཁུང་བསྡུས་ཏེ་དབེན་པ་དོར། །འདི་ནི་ཞི་བའི་ཆོ་ག་སྟེ། །རྒྱས་དང་དགུག་དང་མངོན་
སྤྱོད་ཀྱང་། །ཤུགས་ཀྱིས་གནས་པར་ཤེས་པར་བྱ། །འདིས་ནི་མཉེས་པར་བྱེད་པ་སྟེ། །སྡིག་དང་ལོག་འདྲེན་ཞི་བ་དང་། །དངོས་གྲུབ་མ་ལུས་ཀུན་འབྱུང་བའི། །ཕྲིན་ལས་ཐམས་ཅད་མཛད་པར་འགྱུར། །འཕགས་མ་སྒྲོལ་མ་བཀྲ་ཤིས་ཐམས་ཅད་སྦྱིན་མ་ཞེས་བྱ་བའི་ལས་

ཀྱི་ཡན་ལག་སྦྱིན་སྲེག་གི་ཆོ་གའི་ལེའུ་སྟེ་བཅུ་གཅིག་པ་རྫོགས་སོ།། །།རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །འབར་བའི་མེ་ལ་སྦྲང་མ་ལྟར། །གང་གི་སྟོབས་ཀྱིས་གང་ལྡོག་པ། །གསེར་མདོག་ནོར་བུ་ཨིནྡྲ་དང་། །སྦུར་ལོང་འཕགས་པ་རྣམས་ཀྱི་གདུང་། །
ས་དང་མཁྲིས་པ་ཆུ་མུ་ཟི། །འབྲས་བུ་གསུམ་དང་བྷྲི་ཧ་ར། །སྦྲང་རྩི་མར་དང་བདུད་རྩི་ལྔ། །དྲི་ལྔ་གུ་གུལ་སོགས་སྦྱར་སྤོས། །ཤིན་ཏུ་ཡུན་རིང་སྐྱུར་དང་མངར། །མཁས་པས་རི་ལུ་ལེགས་བྱས་ལ། །རྣལ་འབྱོར་ལྷ་ཡི་ཏིང་འཛིན་གྱིས། །སྤོས་དེས་རབ་ཏུ་བདུག་བྱས་ན། །རང་བཞིན་
གྱིས་སམ་སྦད་པ་ཡི། །གང་དག་དབང་དུ་བྱས་རྣམས་ཀྱང་། །རྣམ་པར་འཇིག་ཅིང་ལྟུང་འགྱུར་ཏེ། །བགེགས་རིགས་སྟོང་ཕྲག་བརྒྱད་ཅུ་པོ། །ཀླད་པ་རྣམས་ནི་རབ་འགས་ཤིང་། །ལུས་ཀྱང་དུམ་བུ་དུམ་བུ་སྟེ། །མིག་ལྗོངས་ཡན་ལག་ཉམས་པ་དང་། །རླུང་གིས་ནགས་བཞིན་གཡོ་བར་
འགྱུར། །སྡིག་པ་ལ་སོགས་སྲོག་ཆགས་དང་། །རིམས་ནད་ལ་སོགས་གནོད་གཞན་ཡང་། །གང་དུ་དྲི་འདི་ཡོད་གྱུར་དེར། །ནམ་ཡང་གནས་པ་མ་ཡིན་ནོ། །འདི་ནི་ཞི་བསྲུང་སྐྲོད་པ་སྟེ། །གལ་ཏེ་གསད་པར་འདོད་གྱུར་ན། །དྲག་པོའི་རྫས་ལས་བྱས་པ་ཡི། །གཟུགས་བརྙན་
ལ་ནི་བདུག་པ་དང་། །རྩུབ་མོའི་ཤིང་ལས་བྱུང་བའི་མེས། །ཤེས་པ་རྟེན་དང་ཕྲལ་ནས་ནི། །ལིངྒ་གཏུབས་ནས་བསྲེག་བྱ་སྟེ། །གང་ཡིན་མིང་སྨོས་དེ་འོག་ཏུ། །དེ་ལ་ལས་སྦྱོར་བྱེད་པ་ཡིན། །ཡི་གེ་བྲིས་ནས་རབ་ཏུ་བརྩམ། །བསྙེན་པ་གསང་སྔགས་བརྒྱད་སྟོང་སྟེ། །ལས་ལ་
བརྒྱ་དང་བརྒྱད་དུ་གསུངས། །ཨོཾ་ཏཱ་རེ་ཏུཏྟཱ་རེ་ཏུ་རེ་བཛྲ་དྷརྨཱ་དྷཱ་ཧཱུ། སྥོ་ཊ་ཡ་བྷསྨི་ཀུ་རུ་ཧཱུཾ་ཕཊ་སྭཱ་ཧཱ། འཕགས་མ་སྒྲོལ་མ་ཡོངས་སུ་སྨིན་པར་བྱེད་པ་ཞེས་བྱ་བའི་ལས་ཀྱི་ཡན་ལག་འབྱུང་པོ་བཟློག་པའི་ལེའུ་སྟེ་བཅུ་གཉིས་པ་རྫོགས་སོ།། །།རྗེ་བཙུན་མ་འཕགས་མ་སྒྲོལ་
མ་ལ་ཕྱག་འཚལ་ལོ། །རྣལ་འབྱོར་བྱང་ཆུབ་བསྒྲུབ་པ་ལ། །འཁོར་ལོས་བསྲུང་བའི་ཐབས་གསུངས་པ། །ཤིན་ཏུ་དཀར་ཞིང་འཇམ་པ་ཡི། །དར་ལ་དྲི་ཞིམ་བྱུག་པར་བྱ། །དབུས་སུ་པདྨའི་ཟེ་འབྲུ་ལ། །ཨོཾ་དང་སྭཱ་ཧཱས་མཐའ་བརྟེན་པ། །འདབ་བརྒྱད་ལ་ནི་ལྷག་མའོ། །དེ་ཡི་མཐའ་

ཡིག་རྟེན་འབྲེལ་ཅན། །དེ་ནས་སྣ་ཚོགས་རྡོ་རྗེ་ནི། །རིགས་ལྔའི་སྙིང་པོས་བརྒྱན་པའོ། །ཨཱ་ལི་ཀཱ་ལི་རིམ་པ་བཞིན། །མུ་ཁྱུད་གཉིས་ལ་དགོད་པར་བྱ། །མཐར་བྱེད་སྔགས་དང་རལ་གྲི་ཡི། །ར་བ་ཕྱི་རོལ་གཉིས་ལ་དགོད། །དེ་ནས་འབར་བའི་ར་བ་སྟེ། །རབ་ཏུ་
ཤིས་པའི་སྣག་ཚས་བྱ། །དེ་ནས་ཡེ་ཤེས་འཁོར་ལོ་དགུག །མཆོད་ཅིང་ཆོ་གའི་ཡན་ལག་རྣམས། །རྫོགས་པར་བྱས་ལ་བསྙེན་པ་བསྐྱལ། །མི་དམིགས་འཁོར་ལོའི་རང་བཞིན་ཏེ། །བར་ཆད་བསྲུང་ཕྱིར་གདགས་པར་བྱ། །གང་ལ་བསྲུང་བ་འདིས་བརྒྱན་པ། །རྡོ་རྗེ་རིན་
ཆེན་ལྟ་བུ་སྟེ། །དེ་ལ་བར་ཆད་གང་གིས་ཀྱང་། །ནམ་ཡང་ཚུགས་པ་མ་ཡིན་ནོ། །འཕགས་མ་སྒྲོལ་མ་འགུགས་པའི་ཁྲོ་མོ་ཞེས་བྱ་བའི་ལས་ཀྱི་ཡན་ལག་བསྲུང་བའི་འཁོར་ལོ་ཞེས་བྱ་བའི་ལེའུ་སྟེ་བཅུ་གསུམ་པ་རྫོགས་སོ།། །།རྗེ་བཙུན་མ་འཕགས་མ་སྒྲོལ་མ་ལ་
ཕྱག་འཚལ་ལོ། །བགེགས་དང་ཡམས་ནད་ཞི་བ་དང་། །ཚེ་དང་བསོད་ནམས་འཕེལ་བའི་ཕྱིར། །ཆུ་འགྲམ་ཤིང་དྲུང་བཞི་མདོའམ། །ཁང་སྟོང་ལ་སོགས་དབེན་པར་བསྡད། །དཀྱིལ་འཁོར་གྲུ་བཞི་ལྷམ་པར་བྱ། །སྣ་ཚོགས་པདྨ་ལྔ་ཡི་དབུས། །ཉེས་པས་མ་གོས་བུམ་པ་
བཟང་། །ཆོ་ག་ལྡན་པས་བཅུད་རྒྱན་བཅས། །ཕྱི་རོལ་རྡོ་རྗེའི་ར་བས་མཛེས། །ཕྱོགས་སྐྱོང་འཇིག་རྟེན་དབང་ཕྱུག་དང་། །བཀྲ་ཤིས་རྟགས་ཀྱིས་མཛེས་པར་བྱ། །སྒོ་ནི་ལྷོའམ་ནུབ་ཏུ་གདོད། །མདའ་དང་མེ་ལོང་རལ་གྲི་དང་། །རྨ་བྱ་ཚོན་སྐུད་དག་ཀྱང་སྟེ། །གདུགས་དང་བླ་རེ་
བ་དན་དང་། །མེ་ཏོག་ཕྲེང་བ་སོགས་དགྲམ་བྱ། །མཆོད་དང་གཏོར་མ་རྒྱ་ཆེར་བཤམ། །རྗེ་བཙུན་མ་ཡི་རྣལ་འབྱོར་གྱིས། །དེ་ལས་རིན་ཆེན་ཁང་བརྩེགས་ཏེ། །ནང་དུ་བདུད་རྩིའི་རྒྱ་མཚོའི་སྟེང་། །ས་བོན་ལས་ནི་བཅོམ་ལྡན་མ། །ཆོ་ག་གསུམ་གྱིས་བསྐྱེད་པར་བྱ། །དེ་
ལས་ཡེ་ཤེས་སེམས་དཔའ་གཞུག །མཆོད་དང་བསྟོད་པ་བྱས་ནས་ནི། །འདོད་པའི་དོན་ཡང་གསོལ་བ་བཏབ། །དེ་ནས་ལན་གྲངས་བརྒྱ་སྟོང་སྙེད། །བསྙེན་པ་རྫོགས་བྱས་གཡས་སྐོར་བྱས། །དེ་ཉིད་དེ་ལ་ཐིམ་གྱུར་ཏེ། །དེ་ཡི་ཡིད་དུ་མི་འོང་བ། །བ་སྤུའི་ཁུང་སོགས་ལས་

འཐོན་པར། །དམིགས་པའི་ཚུལ་གྱིས་ཁྲུས་བྱས་ཏེ། །རྨ་བྱས་བྱབ་ཅིང་བཀྲ་ཤིས་གདོན། །ནད་པ་ལ་ནི་ལོགས་སུ་སྟེ། །གོས་བཅས་བཀྲུས་ནས་དོར་བར་བྱས། །ལྷག་མ་ལ་ནི་ལྷར་བསྐྱེད་དེ། །མཆོད་དང་བསྟོད་དང་འདོད་པའི་དོན། །གསོལ་བ་བཏབ་ལ་བཟོད་པར་གསོལ། །
དེ་ནས་གཤེགས་སུ་གསོལ་བར་བྱ། །འཇིག་རྟེན་སྐྱོང་སོགས་དེ་བཞིན་ནོ། །དེ་ནས་དཀྱིལ་འཁོར་ལེགས་པར་བསྡུ། །དབེན་པར་དོར་ལ་བསྐང་བ་བྱ། །འདིས་ནི་བཀྲ་ཤིས་ཐམས་ཅད་སྦྱིན། །ཡིད་དུ་མི་འོང་སེལ་བར་བྱེད། །གང་ཡང་མི་འབྱུང་མེད་པའི་ཕྱིར། །རྣལ་འབྱོར་པ་
ཡིས་རྟག་ཏུ་བྱ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཨོཾ་ཏཱ་རེ་ཏུཏྟཱ་རེ་ཏུ་རེ། སརྦ་གྲ་ཧེ། སརྦ་བྱཱ་དྷི། སརྦ་ཛྭ་རེ། སརྦ་བཱིརྱ། སརྦ་དུར་སྭབ་ནི་བྷྱཿསརྦ་པཱ་པཾ་པྲ་ཤ་མ་ན་ཡེ་སྭཱ་ཧཱ། འཕགས་མ་སྒྲོལ་མ་
ཞི་བ་ཆེན་མོ་ཞེས་བྱ་བའི་ལས་ཀྱི་ཡན་ལག་ཁྲུས་ཀྱི་ཆོ་གའི་ལེའུ་སྟེ་བཅུ་བཞི་པ་རྫོགས་སོ།། །།རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །འཁོར་བའི་རྩ་བ་རྨོངས་པ་སྟེ། །དེ་བསལ་བྱ་ཕྱིར་ཤེས་རབ་བསྐྱེད། །ཐུགས་རྗེ་ཆེན་པོའི་རང་བཞིན་སྐུ། །གཅིག་ཏུ་ཕན་
མཛད་དངོས་གྲུབ་སྟེ། །ངག་གི་དབང་ཕྱུག་ཞི་ཕྲ་མ། །བདག་བསམ་གཡས་གཡོན་མདུན་རྒྱབ་ཏུ། །ཡིད་གཞུངས་དྲན་པ་ཤེས་རབ་དང་། །བློ་ཡི་རང་བཞིན་ལྷ་མོ་བཞི། །སྔ་མ་ལྟ་བུར་བསྒོམ་པར་བྱ། །སྲིད་པའི་འཁོར་ལོ་ཟླ་བའི་དབུས། །རྣམ་སྣང་ལས་བྱུང་དག་རང་
བཞིན། །རྒྱུན་མི་འཆད་འབྱུང་དེ་དབུས་གནས། །མི་སྨྲའི་སྦྱོར་བས་གསང་སྔགས་བཟླས། །འོ་མ་གསེར་མདོག་ཚ་བ་གསུམ། །པདྨ་ཤུ་དག་རྒྱམ་ཚ་ལ། །ལན་བདུན་བཟླས་པས་བཅོམ་ལྡན་འགྲུབ། །འོ་མ་བྲེ་བཞི་སྲང་གཅིག་སྨན། །མར་བྲེ་གང་སྦྱར་མེ་ལ་གདུ། །ཟླ་བ་གཅིག་
གིས་ལན་མེད་ཅིང་། །དྲུག་གིས་མངོན་སུམ་མཐོང་བར་འགྱུར། །ཤུ་དག་ཤིང་མངར་སེནྡྷ་བ། །གསེར་མདོག་དོང་གྲ་ལ་ལ་ཕུད། །ཟི་ར་རུ་རྟ་པི་པི་ལིང་། །ལན་བདུན་བཟླས་ནས་ཟོས་གྱུར་ན། །ཟླ་བ་དྲུག་དང་གསུམ་དང་གཅིག །གོ་རིམས་བཞིན་དུ་ཐོས་འཛིན་ཅིང་། །ས་

བདག་ཉིད་དང་བློ་ལྡན་ཞིང་། །ཚངས་པའི་ང་རོ་ཐོབ་པར་འགྱུར། །གངས་ལས་སྐྱེས་པའི་གསེར་མདོག་དང་། །ཤུ་དག་ཐོ་རངས་ལན་བདུན་བཟླས། །ཟླ་བ་གཅིག་བསྟེན་དེ་ཉིད་དུ། །བདག་ཉིད་ཡིད་གཞུངས་དབྱངས་སྙན་ཅིང་། །ཤེས་རབ་ལྡན་དེ་ཟླ་དྲུག་གིས། །
ངག་གི་དབང་ཕྱུག་རང་བཞིན་ཐོབ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཧྲཱི་མ་ཧཱ་མ་ཡཾ་གེ་མ་ཧཱ་སྭ་རས་ཏྱཻ་ནཱཾ་མ་མ་པྲ་ཀྲྀ་ཏྱ་བ་རི་ཤུདྡྷ་སརྦ་དྷརྨ་པྲ་ཀྲྀ་ཏ་པ་རི་ཤུདྡྷོ྅ཧཾ་ས་པ་སྤྱ་ཨ་པ་ཡནྟ་ར་སྭཱ་ཧཱ། འཕགས་མ་སྒྲོལ་མ་ཆགས་པ་ཐམས་ཅད་འཇོམས་མ་ཞེས་བྱ་བའི་ལས་ཀྱི་ཡན་ལག་བློ་འཕེལ་བར་བྱེད་པའི་ཆོ་གའི་
ལེའུ་སྟེ་བཅོ་ལྔ་པ་རྫོགས་སོ།། །།རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །རྣལ་འབྱོར་བར་ཆད་བསྲུང་བའི་ཕྱིར། །དབེན་པའི་ཕྱོགས་སུ་ཆག་ཆག་དང་། །མཎྜལ་གཉིས་དང་མཆོད་སོགས་གཉིས། །བཤམ་བྱ་རྗེ་བཙུན་རྟེན་ཡང་གཞག །སྟན་བདེ་ལ་
གནས་སེམས་ཅན་ལ། །སྙིང་རྗེ་ཆེ་བསྐྱེད་འདི་རྣམས་ནི། །རྗེ་བཙུན་གནས་དགོད་དམ་བཅས་ནས། །དེ་ཡི་གཏོར་མ་གཏང་བར་བྱ། །དེ་ནས་སྙིང་གའི་འོད་ཟེར་གྱིས། །ཐུན་མོང་ཁྱད་པར་སྤྱན་དྲངས་ཏེ། །མཆོད་པ་ཆ་རེས་མཆོད་པར་བྱ། །དེ་ནས་བདག་གི་སྤྱི་བོར་ཨ། །དེ་ལས་
ཟླ་བ་དེ་སྟེང་ཏཱཾ། །གསུམ་པོ་ཡོངས་སུ་གྱུར་པ་ལས། །རྗེ་བཙུན་ཞལ་གཅིག་ཕྱག་གཉིས་མ། །མི་འཇིགས་ཨུཏྤལ་གཡས་དང་གཡོན། །སྣ་ཚོགས་རིན་ཆེན་རྒྱན་གྱིས་བརྒྱན། །མགུལ་ཆིངས་གདུ་བུ་དོ་ཤལ་ཅན། །སྐུ་གསུང་ཐུགས་མཚན་ཡེ་ཤེས་སེམས། །སྐྱེ་མཆེད་རྣམ་
དག་དབུ་རྒྱན་མཛེས། །ཕྱག་གི་བདུད་རྩིས་བདག་རྒྱས་པར། །བསམ་ཞིང་གསང་སྔགས་གདོན་པར་བྱ། །ཕྱི་ཡི་ཕྱག་རྒྱ་རྫས་ཀྱིས་བསྡུ། །ནང་གི་ནང་དུ་བསྡུ་བྱའི་ཚེ། །བསྒྲུབ་བྱ་བསྡུས་ཤིང་ཚིམ་པར་བསམ། །དེ་ནས་གཏོར་མ་ཅིག་ཤོས་བཏང་། །འགྲོ་བའི་ཕྱོགས་སུ་བཅོམ་
ལྡན་མ། །ཞལ་བཟངས་བདག་ལ་གཟིགས་པར་བསམ། །དེ་ནས་བསྟོད་དང་བཟླས་པ་བྱ། །དེས་ནི་འཇིགས་པ་ཀུན་སྐྱོབ་འགྱུར། །ཨོཾ་ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་དུཥྚཱན། པྲ་དུཥྚཱན་མ་

མ་ཀྲྀ་ཏེ། ཛཾ་བྷ་ཡ། སྟཾ་བྷ་ཡ། མོ་ཧ་ཡ། བནྡྷ་ཡ། ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ། སརྦ་དུཥྚཱན་སྟཾ་བྷ་ནི་ཏཱ་རེ་སྭཱ་ཧཱ། འཕགས་མ་སྒྲོལ་མ་བདེ་བ་ཐམས་ཅད་བསྒྲུབ་པའི་ལམ་གྱི་ཡན་ལག་ཆོམ་རྐུན་བཅིང་བའི་ཆོ་གའི་ལེའུ་སྟེ་བཅུ་དྲུག་པ་རྫོགས་སོ།། །།རྗེ་བཙུན་མ་འཕགས་མ་
སྒྲོལ་མ་ལ་ཕྱག་འཚལ་ལོ། །བག་མེད་ལ་སོགས་མི་རྣམས་ལ། །གདུག་པའི་ཡིད་ལྡན་དུད་འགྲོའི་རིགས། །ཡིད་དང་བལྟས་དང་འཚེ་བ་དང་། །རིག་པའི་སྒོ་ནས་འཚེ་བར་བྱེད། །གྲོག་པོ་ཕུག་དོག་མོ་ཡི་སྒོར། །ལྷ་ཁང་འདམ་རྫབ་མི་སྡུག་གཟུགས། །རི་གཟར་འཛེག་དང་དུད་འགྲོས་
འཚེ། །མཚོ་འགྲམ་འདུག་སོགས་གནོད་པའི་རྟགས། །གླུ་ལ་དགའ་དང་ནུབ་མོ་ན། །ཡན་ལག་མི་བདེ་ལུས་ལྕི་ཞིང་། །ཤུ་བ་གཡན་པ་བས་ལྡག་དང་། །འབྲུམ་བུ་ལ་སོགས་ཐེབས་པར་འགྱུར། །མི་དགའ་བ་དང་ཟ་འཕྲུག་དང་། །ཤ་མདོག་ཉམས་དང་མེ་རིས་དང་། །རེས་འགའ་
ཆུ་གྲང་བླུགས་བཞིན་དང་། །བས་ལྡག་ཤ་བཀྲ་འབྱུང་བ་ཡིན། །ཤ་འཕྲིག་སྦྲིད་དང་བེམས་པོར་འདུག །མིག་ནི་ཚ་ཞིང་ཟླུམ་པ་དང་། །སྨིན་མ་ལ་སོགས་བྱི་འགྱུར་ཏེ། །ལག་སོར་སྐམ་པོར་གྱུར་པའོ། །ལུས་ལ་དྲི་ང་འབྱུང་འགྱུར་ཞིང་། །ཆུ་བུར་དང་ནི་ཉ་ལྒང་ཅན། །རྣག་
དང་ཆུ་སེར་རུལ་དྲི་མནམ། །རོ་སྟོད་དག་ཀྱང་ཟུག་པར་འགྱུར། །ཕྱི་ཡི་ཤ་སྐམ་མདོག་འཆོར་ཞིང་། །ཤ་ཡི་མདངས་མེད་ཟུག་དང་བཅས། །གོས་ཀྱང་མདངས་དང་བྲལ་འགྱུར་ཏེ། །གློག་པ་ཆར་ཡག་མ་བཞིན་ནོ། །དེ་དག་བསྲུང་བར་བྱ་བའི་ཕྱིར། །ལྷ་ཡི་སྦྱོར་བས་གནས་པ་
ཡིས། །གུ་གུལ་གླ་རྩི་ཤུ་དག་དང་། །རུ་རྟ་བཙན་དུག་ཤིང་ཀུན་དང་། །ད་ལིས་རྣམས་ལ་གསང་སྔགས་ཆེ། །འབུམ་ཕྲག་གསུམ་བསྙེན་བྱས་པ་ཡིས། །དེ་བསྲུང་གླ་རྩི་མི་བསྐྱོད་སྦྱོར། །གནས་ལྔར་བྱུག་ཅིང་བཀྲུ་བར་བྱ། །འདི་ནི་སྦྱོར་བ་ཟབ་མོ་སྟེ། །མི་ལ་རི་དགས་ཇི་བཞིན་
དུ། །གང་ལ་བསྲུང་བ་འདིས་བརྒྱན་པ། །དེ་ལ་སྡང་ལྡན་འབྲོས་པར་འགྱུར། །གཉིས་པ་ལ་ནི་ཤུ་དག་དང་། །གླ་རྩི་རུ་རྟ་གུ་གུལ་དང་། །མུ་ཟི་རོ་རས་རྒྱ་ཚིལ་དང་། །ཤི་བའི་དྲི་ཆེན་ཕག་པའི་བཅུད། །སྒོག་སྐྱ་དང་ནི་མ་དུ་དང་། །མི་ཡི་བཅུད་དང་རུས་པའི་ཕྱེ། །མི་བཅུད་

ཀྱིས་བསྡུས་རི་ལུ་སྟེ། །སྔ་མ་ཉིས་འགྱུར་བསྙེན་པ་ཡིས། །དབང་པོའི་སྒོ་རྣམས་བདུག་བྱ་སྟེ། །ཉི་མའི་འོད་ལ་མུན་པ་བཞིན། །དུག་ཅན་རྣམས་ནི་ནམ་དུ་ཡང་། །འོང་བར་ནུས་པ་མ་ཡིན་ནོ། །གསུམ་པ་ལ་ནི་སུམ་འགྱུར་ཏེ། །གོང་མའི་རྫས་ཀྱི་སྦྱོར་བ་དང་། །
ཀླུ་ཡི་དུག་དང་བདུད་རྩི་བསྟེན། །འབར་བའི་མེ་ཡིས་ནགས་ཚལ་བཞིན། །དེས་གཞན་ནད་རྣམས་འཚིག་པར་འགྱུར། །བཞི་པ་ལ་ནི་བྱ་བ་སྟེ། །གོང་མའི་རྫས་ཀྱི་སྦྱོར་བ་དང་། །ཀླུ་ཡི་དུག་དང་རྣམ་རྒྱལ་བསྟེན། །རྩ་མིག་དག་ཀྱང་བསལ་བར་བྱ། །ཉི་མས་གངས་བཞིན་དེ་
འཇོམས་སོ། །ལྔ་པ་ལ་ཡང་དེ་བཞིན་ཏེ། །ཁྱད་པར་དུ་ནི་ཨ་རུ་ར། །དྲི་ཆུ་གླ་རྩི་བསྟེན་པར་བྱ། །རྡོ་རྗེ་ཡིས་ནི་རིན་ཆེན་བཞིན། །ཐོགས་པ་མེད་པར་འཇིག་པར་འགྱུར། །ཨོཾ་ཏཱ་རེ་ཏུཏྟཱ་རེ་ཏུ་རེ་ཀུ་རུ་ཀུལླེ། སརྦ་ཤ་ཏྲཱུཾ་བཀྵ་ཡ་བཀྵ་ཡ། ཧཱུཾ་ཧཱུཾ་ནཱ་ག་སྟཾ་བྷ་ཡ། མོ་ཧ་ཡ།
བནྡྷ་ཡ། ཡཾ་རཾ་ཁཾ་སུཾ་ནེ་ར་ལ་ནེ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། རྗེ་བཙུན་འཕགས་མ་སྒྲོལ་མ་རྣམ་པར་རྒྱལ་མ་ཞེས་བྱ་བའི་ལས་ཀྱི་ཡན་ལག་ཀླུ་ནད་གསོ་བའི་ཆོ་གའི་ལེའུ་སྟེ་བཅུ་བདུན་པ་རྫོགས་སོ།། །།རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །མི་ཡི་དབང་
པོ་ལ་སོགས་པས། །ཤིན་ཏུ་དམ་པར་བསྡམས་པ་རྣམས། །རབ་ཏུ་ཐར་བར་བྱ་བའི་ཕྱིར། །བ་ལང་ལྕི་བས་དཀྱིལ་འཁོར་བྱ། །དབུས་སུ་ཕྱག་མཚན་ས་བོན་བཅས། །དེ་ལ་དེ་ཉིད་སྤྱན་དྲངས་ལ། །མཆོད་པ་སྔོན་དུ་འགྲོ་བ་ཡིས། །དང་པོ་བསྙེན་པ་རྫོགས་པར་བྱ། །དེ་ནས་
སྦྱོར་གཞན་རབ་སྤངས་ཏེ། །བཅོམ་ལྡན་མཆོད་ནས་བརྒྱ་ཕྲག་བརྒྱད། །གསོལ་བའི་མཆོད་པ་དང་བཅས་པས། །ལེགས་པར་བཟླས་ན་གྲོལ་བར་འགྱུར། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། རི་ཛུ་
ཀདྷརྨི། ནིར་ཡ་ཏེ། ཏཱ་རེ་ཏཱ་རཱ་ཡ། བྷ་ག་བ་ཏི་ཏུཏྟཱ་རེ། བྷྲ་མ་བྷྲ་མ། མོ་ཙ་ནེ་ཏུ་རེ་སྭཱ་ཧཱ། འཕགས་མ་སྒྲོལ་མ་སྡུག་བསྔལ་ཐམས་ཅད་སེལ་བའི་ལས་ཀྱི་ཡན་ལག་ཁྲི་མོན་ལས་ཐར་བར་བྱེད་པའི་ཆོ་གའི་ལེའུ་སྟེ་བཅོ་བརྒྱད་པ་རྫོགས་སོ།། །།རྗེ་བཙུན་མ་འཕགས་

མ་སྒྲོལ་མ་ལ་ཕྱག་འཚལ་ལོ། །གང་གིས་གང་ལ་རབ་བསྔགས་པ། །དངོས་གྲུབ་དེ་ཉིད་བསྒྲུབ་པའི་ཕྱིར། །མིག་དང་ལྕེ་དང་མཁྲིས་པ་རྣམས། །རིན་ཆེན་གའུའི་ནང་དུ་གཞུག །བདུད་རྩི་འཁྱིལ་པས་བསྲུང་བྱས་ནས། །འགྲུབ་པར་བྱེད་པའི་བསྙེན་པ་བརྩམ། །ཆོག་པར་
ཤེས་ནས་པད་རྩར་སྦ། །དག་པའི་མིག་ལས་དབེན་པར་འགྱུར། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཏཱ་རེ་ཏཱ་རེ་ཏཱ་ར་ཛ་ཡཱ། ཛ་ཡེ་ཛ་ཡེ། ཏུཏྟཱ་རེ་ཛ་ཡ། བྷ་ཡེ་ཏུ་རེ་སྭཱ་ཧཱ། འཕགས་
མ་སྒྲོལ་མ་དངོས་གྲུབ་ཐམས་ཅད་སྟེར་བར་བྱེད་མ་ཞེས་བྱ་བའི་ལས་ཀྱི་ཡན་ལག་མི་སྣང་བའི་ཆོ་གའི་ལེའུ་སྟེ་བཅུ་དགུ་པ་རྫོགས་སོ།། །།རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །མཐོང་བའི་ཆོས་ལ་འོག་མིན་དུ། །འཕགས་རྣམས་སྤྱོད་ཡུལ་དང་གཅིག་ཅིང་། །
ཡིད་ཀྱི་ཤུགས་ཀྱིས་སྐྱོང་བྱེད་པ། །ཟངས་དང་ལྕགས་དང་གསེར་དག་ལས། །འབར་བའི་རལ་གྲི་བྱས་ནས་སུ། །ཡུ་བ་གཞུང་དང་གོ་རིམས་བཞིན། །གཉིས་དང་བཅུ་གཅིག་སོར་དུ་ལྡན། །ཨཱ་ལི་ཀཱ་ལི་གཡས་གཡོན་ཏེ། །ཡི་གེ་བཅུ་པ་དབུས་སུའོ། །གནས་སྐབས་གསུམ་དུ་སྐུ་སོགས་
གསུམ། །སྒྲ་དང་མེ་སྟག་འོད་འཕྲོ་བ། །རབ་འབྲིང་རྟགས་དང་ལྡན་པ་ལས། །ཆགས་མེད་ཡིད་ཀྱིས་བསྐྱོད་བྱས་ཏེ། །འདབ་གཤོག་རྒྱས་པའི་བྱ་བཞིན་དུ། །གང་དང་གང་དུ་བསམ་པ་ཡི། །ཞིང་ཁམས་དག་ཏུ་འདོད་པའི་དོན། །ཐམས་ཅད་དེ་ཡི་དབང་དུ་གྱུར། །ཨོཾ་ཏཱ་རེ་
ཏུཏྟཱ་རེ་ཏུ་རེ་ཨ་མོ་གྷ་སིདྡྷི། ཁངྒེ་པྲ་སྲིད་དྷི། ལོ་ཀ་ཨཱ་ལོ་ཀཱ། ཏིཥྛ་རཏྣ་ཙ་ལ་ཙ་ལ། ཧཱུཾ་ཧཱུཾ་བཾ་བཾ་ཨ་ཏི་སྭཱ་ཧཱ། འཕགས་མ་སྒྲོལ་མ་ཡོངས་སུ་རྫོགས་པར་བྱེད་པ་ཞེས་བྱ་བའི་ལས་ཀྱི་ཡན་ལག་མཆོག་བསྒྲུབ་པའི་ལེའུ་སྟེ་ཉི་ཤུ་པ་རྫོགས་སོ།། །།རྗེ་བཙུན་མ་འཕགས་མ་
སྒྲོལ་མ་ལ་ཕྱག་འཚལ་ལོ། །གསེར་བརྩེགས་རབ་མཛེས་སྣོད་དག་ཏུ། །འོ་མ་མར་དང་སྲན་ཆན་དང་། །ལ་ཕུག་མངར་དང་མེ་ཏོག་སྤོས། །དགེ་བའི་ཆུ་དང་ཆང་ལ་སོགས། །སྐུ་གསུང་ཐུགས་ཀྱི་ཡི་གེ་ཡིས། །སྦྱངས་ནས་འབྱུང་པོ་རྣམས་ལ་སྦྱིན། །ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ།

ཨཱད་ནུཏྤན་ན་ཏྭཱཏ་ཨོཾ་ཨཱཿཧཱུཾ་ཕཊ་སྭཱ་ཧཱ། གཏོར་མའི་ཆོ་གའི་ལེའུ་སྟེ་ཉི་ཤུ་རྩ་གཅིག་པ་རྫོགས་སོ།། །།རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །མཚོའམ་ཁྲོན་པ་འབབ་ཆུ་གཙང་། །བཅོམ་ལྡན་མཆོག་སྦྱིན་བདུད་རྩི་ཡིས། །གདུང་བྲལ་
འཕགས་པའི་རང་བཞིན་དུ། །བསྒྱུར་ནས་གསང་སྔགས་རྒྱལ་པོ་ནི། །བདུན་ཕྲག་གསུམ་གྱིས་ཡི་དགས་རྣམས། །རབ་ཏུ་ཚིམ་པའི་ཆོ་ག་བྱ། །ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་པྲེ་ཏེ་བྷྱཿསྭཱ་ཧཱ། ཆུ་སྦྱིན་པའི་ཆོ་གའི་ལེའུ་སྟེ་ཉི་ཤུ་རྩ་གཉིས་པ་རྫོགས་སོ།། །།རྗེ་བཙུན་མ་
འཕགས་མ་སྒྲོལ་མ་ལ་ཕྱག་འཚལ་ལོ། །དྲི་ཞིམ་དཀར་བའི་ས་རྣམས་ལ། །རིགས་ལྔར་སྦྱངས་ནས་དེའི་རང་བཞིན། །དེ་ལས་མཆོད་རྟེན་གདབ་བྱས་ལ། །དེ་དག་གནས་སུ་དམ་ཚིག་སྟེ། །དེ་ལ་ཡེ་ཤེས་དེ་དབང་བསྐུར། །དེ་ལ་བྱིན་བརླབ་དེ་ནས་མཆོད། །རབ་ཏུ་གནས་བྱས་དེ་ནས་
ནི། །དགེ་བའི་གནས་སུ་བཞུགས་པར་བྱ། །ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་ཏ་ཐཱ་ག་ཏ་ཧྲྀ་ད་ཡ་ཨ་དྷིཥྛ་ན་ཨ་དྷིཥྛི་ཏེ་སྭཱ་ཧཱ། ཚ་ཚ་གདབ་པའི་ཆོ་གའི་ལེའུ་སྟེ་ཉི་ཤུ་རྩ་གསུམ་པ་རྫོགས་སོ།། །།རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །གསོ་སྦྱོང་དག་ལ་གནས་པ་ཡིས། །
ཀ་ཏི་ཀ་ཡི་ཐལ་བ་ལ། །སྟོང་ཕྲག་བཅུ་ཡི་བསྙེན་པ་བྱ། །ཆུ་ཤེལ་སྤྱོད་ཡུལ་ཡར་ངོ་ལ། །དྲི་དབང་ཕྱེད་གཡས་སེང་གེའི་ཚུལ། །རྩེ་གཅིག་འདོད་པའི་དོན་རྣམས་ཏེ། །འདོད་པའི་ལྷ་དང་དུས་གསུམ་གྱིས། །སྐྱེ་བའི་གནས་རྣམས་སྟོན་པར་མཛད། །ཨོཾ་ཏཱ་རེ་ཏུཏྟཱ་རེ་ཏུ་རེ་ཏདྱ་
ཐཱ། ཨོཾ་མུག་ཤི་རི་པྲ་མ་དནྟེ་ཁརྒོ་ཡ་ཤ།།ཤོ་མ་དྷ་ར་ཙ་ར་ཕྱེ་མ་ཧཱ་ནི་སྭཱ་ཧཱ། དུས་གསུམ་བརྟག་པའི་ཆོ་གའི་ལེའུ་སྟེ་ཉི་ཤུ་རྩ་བཞི་པ་རྫོགས་སོ།། །།རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །སྦྲུམ་མ་དང་ནི་མགོ་མཇུག་ལོག །མོ་གཤམ་བུ་ནི་སྐྱེད་བྱེད་དང་། །
སྲིའུ་བསྲུང་དང་འབྱུང་པོ་བཟློག །ལས་གང་བྱེད་པའི་ལྷར་གྱུར་བྱ། །དང་པོ་གོ་རོ་ཙ་ན་དང་། །ཡུང་བ་བ་བླའི་རི་ལུ་ལས། །སྣག་ཚ་བྱས་ལ་སྔགས་བྲིས་ལ། །བདུད་རྩི་ལྔ་དང་འབྲུ་སྣ་ལྔ། །རིན་ཆེན་ལྔ་དང་སྨན་སྣ་ལྔ། །བུམ་པར་བཅུག་ལ་གསང་སྔགས་འདི། །ཉི་ཤུ་རྩ་

གཅིག་བཟླས་བྱིན་བརླབ། །སྔགས་ཆུས་ནམ་ཕྱེད་ཡོལ་བའི་དུས། །མཆོད་པ་བྱས་ལ་སྦྲུམ་མ་དེས། །ཁྲུས་བྱས་བདེ་བར་བཙའ་ཞིང་འབྱུང་། །གཉིས་པ་མར་དག་ལག་མཐིལ་དུ། །བཞག་ལ་གསང་སྔགས་ཉི་ཤུ་གཅིག །བཟླས་ལ་མགོ་ལུས་བྷ་གར་བྱུག །དེ་ལྟར་བྱས་ན་
བདེ་བར་སྐྱེ། །གསུམ་པ་བོ་དྷི་ཙེ་ཡི་འབྲུམ། །ཕྱེ་མ་དག་དང་བ་དམར་སེར། །འོ་མ་བསྲེས་ལ་བུམ་པར་བླུགས། །གསང་སྔགས་ཉི་ཤུ་རྩ་གཅིག་བཟླས། །ཟླ་མཚན་བྱུང་དུས་ཐ་མའི་ཚེ། །བླུད་ན་བུ་དག་མྱུར་དུ་སྐྱེ། །བཞི་པ་འཕྲལ་སྐྱེས་བྱིས་པ་དེ། །ཁྲུས་བྱས་བདེ་བར་འཚོ་
བར་འགྱུར། །ལྔ་པ་གསང་སྔགས་དེ་ཉིད་ཀྱིས། །ཡུངས་ཀར་ཉི་ཤུ་གཅིག་བསྔགས་ནས། །གདོང་དུ་བྲབས་ན་འབྱུང་པོ་ལྡོག །ཨོཾ་ཏཱ་རེ་ནི་ཏ་རཱ་ཡ། ཨོཾ་མོ་ཙ་ནི་མོ་ཙ་ཡ། ཨོཾ་མོ་ཀྵ་ནི་མོཀྵ་ཡ་ཛི་བ་བར་བྷི་སྭཱ་ཧཱ། བསྐྱེད་ཅིང་བསྲུང་བ་ལ་སོགས་པའི་ཆོ་གའི་ལེའུ་སྟེ་ཉི་ཤུ་རྩ་ལྔ་པ་རྫོགས་
སོ།། །།བདེ་གཤེགས་བསྐྱེད་མཛད་རྗེ་བཙུན་གྱི། །རྣལ་འབྱོར་བྱང་ཆུབ་ཡན་ལག་བཟང་། །ཐབས་ཀྱི་ཁྱད་པར་མདོར་བསྡུས་པ། །ཞི་བ་ལ་སོགས་ལས་བཞིའི་ཚུལ། །བདག་གཞན་དོན་དུ་སྒྲུབ་བྱེད་པ། །ཐུགས་རྗེ་ཆུ་སྐྱེས་ལས་བྱུང་བའི། སྦྲང་རྩི་འདི་ནི་བདག་གིས་
གཞིབས། །འགྲོ་ལ་ཕན་ཕྱིར་འདིར་བཀོད་དོ། །དེ་ལས་བྱུང་བའི་དགེ་བ་ཡིས། །འགྲོ་བ་མ་ལུས་བྱང་ཆུབ་ཆེ། །སྐུ་གསུམ་རང་བཞིན་མཐར་ཕྱིན་པ། །མྱུར་བ་ཉིད་དུ་ཐོབ་པར་ཤོག །རྗེ་བཙུན་མ་འཕགས་མ་སྒྲོལ་མའི་སྒྲུབ་ཐབས་ཉི་ཤུ་རྩ་གཅིག་པའི་ལས་ཀྱི་ཡན་ལག་དང་བཅས་
པ་མདོར་བསྡུས་པ་ཞེས་བྱ་བ། ཁ་ཆེའི་སློབ་དཔོན་ཉི་མ་སྦས་པ་ཞེས་བྱ་བས་མཛད་པ་རྫོགས་སོ།། །།རྒྱ་གར་གྱི་མཁན་པོ་མཉྫུ་ཤྲཱི་དང་། བོད་ཀྱི་ལོ་ཙཱ་བ་མལ་གྱོ་བློ་གྲོས་གྲགས་པས་བི་ཀྲ་མ་ཤཱི་ལའི་གཙུག་ལག་ཁང་ཆེན་པོ་དེ་ཉིད་དུ་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།
༄༅༅། །རྒྱ་གར་སྐད་དུ། ཏཱ་ར་སཱ་དྷ་ནཱཾ་ཨུ་པ་དེ་ཤ་ཀྲ་མ། བོད་སྐད་དུ། སྒྲོལ་མའི་སྒྲུབ་ཐབས་མན་ངག་གི་རིམ་པ། རྗེ་བཙུན་འཕགས་མ་སྒྲོལ་མ་ལ་ཕྱག་འཚལ་ལོ། །ཕུན་སུམ་ཚོགས་ལྡན་དཔལ་འབྱོར་དྲི་མེད་ཡོན་ཏན་གྱི། །གཞིར་གྱུར་འགྲོ་ལ་དམ་པའི་ལམ་སྟེར་རྒྱལ་བའི་

ཡུམ། །སྒྲོལ་མའི་ཞབས་རྡུལ་སྤྱི་བོས་བླངས་ཏེ་འགྲོ་བ་ལ། །ཕན་ཕྱིར་བརྩེ་བས་སྒྲུབ་པའི་ཆོ་ག་བཤད་པར་བྱ། །རྡོ་རྗེ་སློབ་དཔོན་ཡོན་ཏན་མཚོ། །ཇི་བཞིན་སྦྱོར་བས་བསྟེན་བྱས་ནས། །ཆོ་གའི་རིམ་པས་དབང་བསྐུར་བའི། །རྣལ་འབྱོར་པས་ནི་རྣམ་པར་བསྒོམ། །
ཇི་ལྟར་བཤད་བཞིན་རྣམ་བསམས་ལ། །ས་བོན་གྱིས་ནི་བསྐུལ་བ་ཡི། །བླ་མ་རྡོ་རྗེ་རྣམས་མཆོད་ལ། །གུས་པའི་བསམ་པས་རྩེ་གཅིག་ཏུ། །བཏུད་ལ་ཕྱི་ནས་རང་ལུས་གཞུག །སླར་ཡང་དཀྱིལ་འཁོར་རྫོགས་པར་བྱ། །བུ་ཛ་ཨོ་ཨ་གོ་ར་དེ་མཱ། ཀཱ་ཨོ་ཏྲི་ཀོ་ཀ་ལ་ཀཱ་ཧི་བྲེ་གྲི་སཽ་
སུ་ན་སི་མ་ཀུ། སྤྱི་བོའི་གནས་སུ་པུལླི་རར། །མྱུར་ཞིང་དཔའ་མ་དྲན་པར་བྱ། །སྤྱི་གཙུག་འབར་བ་འཛིན་པ་རུ། །སྟོན་ཟླ་ལྟ་བུར་དྲི་མ་མེད། །གསེར་གྱི་མདོག་ཅན་རྣ་བ་ནི། །གཡས་པ་ཨོ་དྱན་ཉིད་དུ་བསམ། །ཨརྦུ་ད་ནི་ལྟག་པ་སྟེ། །གཙུག་ཏོར་རྣམ་པར་རྒྱལ་བར་གྲགས། །
གོ་ད་བ་རི་རྣ་བ་གཡོན། །ཧཱུཾ་སྒྲ་སྒྲོགས་པའི་ལྷ་མོའོ། །སྨིན་དབུས་ར་མེ་ཤྭ་རི་སྟེ། །རྡོ་རྗེ་སྐུ་ཡི་སྒྲོལ་མའོ། །འཁོར་ལོ་དང་ནི་ཆེར་སྒྲོགས་པའི། །དྲིལ་བུ་གཡས་དང་གཞན་དུ་བསམ། །དབང་མཆོག་དེ་བཱི་ཀོ་ཊི་སྟེ། །ཁམས་གསུམ་རྣམ་པར་རྒྱལ་བྱེད་དོ། །གཞན་འཇོམས་
ལྷ་མོ་དཔུང་པར་ངེས། །མཱ་ལར་སྒྲུབ་པོ་དམ་པས་བསམ། །མཆན་ཁུང་ཀཱ་མ་རཱུ་པ་སྟེ། །བདུད་འཇོམས་དམ་པ་སྦྱིན་པ་མོ། །ཨོ་ཊེ་ཞེས་བྱ་ནུ་མ་སྟེ། །འཁོར་ལོས་སྒྱུར་བྱེད་འདོད་སྟེར་མ། །ཏྲི་ཤ་ཀུ་ནེ་ལྟེ་བ་རུ། །མྱ་ངན་ཀུན་འཇོམས་བསམ་པར་བྱ། །དྲི་འཛིན་གནས་སུ་ཀོ་ས་
ལར། །འགྲོ་བ་ཀུན་འགུགས་ཕོངས་པ་སེལ། །ཀ་ལིངྐ་ནི་ཁ་ཡིན་ཏེ། །ལྷ་མོ་བཀྲ་ཤིས་ཐམས་ཅད་སྟེར། །མགྲིན་པའི་གནས་ནི་ལམ་པ་ཀར། །ལྷ་མོ་གསུང་གི་སྒྲོལ་མ་སྟེ། །པདྨ་དྲིལ་བུ་འཛིན་པ་རུ། །མཉམ་པར་བཞག་ལ་རྟག་ཏུ་བསམ། །ཀཱཉྩི་སྙིང་གི་གྲོང་ཁྱེར་ཏེ། །
རྡོ་རྗེ་ཐུགས་ཀྱི་སྒྲོལ་མའོ། །མིག་སྨན་གྱི་ནི་ཁ་དོག་ཅན། །རྡོ་རྗེ་དལ་བུས་འགྱིང་བ་ཡིན། །ཁ་བའི་རིར་ནི་སྨིན་བྱེད་མ། །སུམ་མདོའི་གནས་སུ་བསམ་པར་བྱ། །ཡི་དགས་གྲོང་དུ་འགུགས་བྱེད་མ། །ཁྲ་མོ་རྟགས་ཀྱི་རྩེ་མོ་ལ། །ཞི་བ་ཆེན་མོ་ཁྱིམ་གྱི་ལྷར། །འོག་གི་

ཕྱོགས་སུ་བསྒོམ་པར་བྱ། །བརླ་གཉིས་སཽ་རཱཥྚ་ཡིན་ཏེ། །འདོད་ཆགས་ཐམས་ཅད་འཇོམས་པ་མོ། །གསེར་གླིང་བྱིན་པ་ཟུང་གི་ཚལ། །ལྷ་མོ་བདེ་བ་སྒྲུབ་བྱེད་དོ། །སོར་མོ་ཕལ་བ་ན་ག་རར། །རྣམ་པར་རྒྱལ་མ་བསམ་པར་བྱ། །སྡུག་བསྔལ་སྲེག་བྱེད་སིནྡྷུ་སྟེ། །རྐང་པའི་བོལ་
དུ་རྣམ་པར་དགོད། །རྒན་པོ་མ་རུ་དངོས་གྲུབ་ཀུན། །ལེགས་འབྱུང་ལྷ་མོ་བསྒོམ་པར་བྱ། །ཀུ་ལུ་ཏར་ནི་ཡོངས་རྫོགས་མ། །པུས་མོའི་དཀྱིལ་འཁོར་གཉིས་ལ་གནས། །དེ་ལྟར་ཆོ་ག་རྫོགས་པ་དང་། །ཕྱིས་ནི་རྡོ་རྗེ་སྒྲོལ་མ་ཡི། །དཀྱིལ་འཁོར་བཅས་པའི་ལྷ་རྣམས་ཀུན། །རང་གི་
ལུས་ལ་གཞུག་པར་བྱ། །དྲི་མ་ཐམས་ཅད་སྦྱང་བའི་ཕྱིར། །སྤྱན་དྲང་མཆོད་ནས་གསོལ་བ་གདབ། །དེ་བཞིན་ཐུབ་པས་དབང་བསྐུར་ལ། །དབུ་རྒྱན་རང་གི་ལྷག་པའི་ལྷ། །གསང་སྔགས་བཟླས་བརྗོད་ཆོ་ག་དང་། །མཚན་མ་ཁ་དོག་ལ་སོགས་པ། །གཞན་དུ་བཤད་བཞིན་
མཁས་པ་ཡིས། །མཉམ་པར་གཞག་པས་རྟག་ཏུ་བྱ། །ཟབ་མོའི་དོན་ལ་སྐྱེ་བོ་ཡི། །བློ་གྲོས་རྣམ་པར་འཁྲུལ་གྱུར་ཀྱང་། །དམ་པའི་བླ་མ་ལས་བྱུང་བའི། །མན་ངག་རིམ་པས་བྲིས་པ་ཡིན། །བསོད་ནམས་འདི་ཡིས་ཉེས་པའི་དབའ་ཀློང་གཡོ་བའི་ཆུས། །རྣམ་པར་དཀྲུགས་
ཏེ་འཁྲིགས་པའི་ནོར་འཛིན་བརྟན་པ་དང་། །དེས་སྐྱེད་དགེ་ལེགས་སྙེ་མའི་མེ་ཏོག་འབྲས་ལྡན་པའི། །སྐྱེ་བོའི་དོན་དུ་དཔག་བསམ་ལྗོན་ཤིང་བྱེད་པར་ཤོག །དཔལ་ཨུ་རྒྱན་ནས་བྱུང་བའི་མན་ངག་གི་རིམ་པའི་སྒྲུབ་ཐབས་སློབ་དཔོན་ཆེན་པོ་ཉི་མ་སྦས་པའི་ཞབས་ཀྱིས་མཛད་པ་
རྫོགས་སོ།། །།མན་ངག་གི་རིམ་པའི་སྒྲུབ་ཐབས་འདི་དང་པོ་མ་འགྱུར་བ་ལས་ཕྱིས་ཁ་ཆེའི་པཎྜི་ཏས་ཁ་བ་ཅན་གྱི་ལྗོངས་སུ་སྤྱན་དྲངས་པའི་དཔེ་ལས་བོད་སྐད་དུ་དཔལ་ས་སྐྱའི་དབེན་གནས་དམ་པར་བསྒྱུར་བའོ།། ༄༅༅། །རྒྱ་གར་སྐད་དུ། བྷ་ག་བ་ཏི་ཏཱ་ར་དེ་བཱི་
ཨེ་ཀ་བིཾ་ཤ་ཏི་སྟོ་ཏྲ་ནོ་པི་ཡ་ཀཾ །བོད་སྐད་དུ། བཅོམ་ལྡན་འདས་མ་སྒྲོལ་མ་ལ་བསྟོད་པ་ཉི་ཤུ་རྩ་གཅིག་པའི་སྒྲུབ་ཐབས། འཕགས་མ་སྒྲོལ་མའི་ཞབས་ལ་ཕྱག་འཚལ་ལོ། །དུས་གསུམ་རྒྱལ་བ་བསྐྱེད་མཛད་ཡུམ། །ཤེས་རབ་ཕ་རོལ་ཕྱིན་བདག་ཉིད། །སྣ་ཚོགས་སྤྲུལ་

པས་ཀུན་སྐྱོབ་མ། །ལྷ་མོ་མཆོག་དེའི་ཞབས་བཏུད་བཤད། །དེ་ཉིད་སྐྱབས་སོང་སེམས་བཟང་པོས། །སྲས་བཅས་རྒྱལ་བས་ཡོངས་བསྐོར་བའི། །འཕགས་མ་ཉིད་མདུན་མཁར་བཞུགས་མཆོད། །སྡིག་བསལ་བསོད་ནམས་ལོངས་རྫོགས་བྱ། །རྣམ་དག་
སྔགས་ཀྱིས་དྲི་བསལ་ལ། །སྐུ་གསུང་ཐུགས་དངོས་བསྐྱེད་དང་རྫོགས། །ཆོ་ག་ཇི་བཞིན་ཇི་སྙེད་པར། །མ་འཁྲུགས་འཁྲུལ་བ་མེད་པར་བསྒོམ། །འཕགས་མ་སྒྲོལ་མ་ཆེ་ཉིད་སྐུ། །ཡོངས་གྱུར་འདོད་སྦྱིན་སྣ་ཚོགས་གཟུགས། །སྣ་ཚོགས་ནོར་བུའི་ཚུལ་བཞིན་དུ། །གདུལ་བྱའི་
དབང་ཅན་ཡོངས་གྱུར་བལྟ། །ཡེ་ཤེས་གཞུག་ཅིང་བྱིན་བརླབས་ལ། །དབང་བསྐུར་མཆོད་ཅིང་རྒྱས་གདབ་བྱ། །འོད་ཟེར་འབྱོར་པས་འགྲོ་སྐྱོབ་དང་། །དངོས་གྲུབ་བླངས་ཏེ་བཟླས་པ་བྱ། །ཕྱག་འཚལ་སྒྲོལ་མ་མྱུར་མ་དཔའ་མོ། །སྤྱན་ནི་སྐད་ཅིག་གློག་དང་འདྲ་མ། །འཇིག་རྟེན་
གསུམ་མགོན་ཆུ་སྐྱེས་ཞལ་གྱི། །གེ་སར་བྱེ་བ་ལས་ནི་བྱུང་མ། །སྤྱན་རས་གཟིགས་མགོན་ཐུགས་རྗེ་མ། །ཆུ་སྐྱེས་ཞལ་གྱི་གེ་སར་ལས། །ཆུ་འཛིན་ལས་སྐྱེས་གློག་འགྱུ་བཞིན། །བྱུང་བས་རབ་དགའི་སྒྲོལ་མ་བསྒོམ། །མཁའ་དཀྱིལ་གསེར་མདོག་ཆུ་སྐྱེས་གདན། །ཞལ་གཅིག་
ཕྱག་བརྒྱད་ཆོས་སྒྲོགས་དང་། །མདའ་གཞུ་འཁོར་ལོ་རལ་གྲི་དུང་། །རྡོ་རྗེ་ཞགས་བཅས་མེ་ཏོག་བརྒྱན། །དེ་ཡི་ཕྲིན་ལས་གཞན་གྱི་མཐུ། །ཕྱིར་བཟློག་བསྟེན་ཕྱིར་ལྷ་མོ་བསྙེན། །བསྒྲུབ་བྱའི་རྗེས་ལ་དཀྱིལ་འཁོར་བྱ། །དེ་དབུས་ཧོཾ་ཁུང་དྲག་གཟུགས་དགོད། །སྙིང་གར་རྩིབས་
བརྒྱད་སྤེལ་ཚིག་སྔགས། །མན་ངག་བཞིན་བཀོད་ཐི་གུས་དྲང་། །སྦུ་གུ་སྙིང་གཏང་ལྷ་སྦྱོར་གྱིས། །སྦོད་བྱེད་རྟེན་བྲལ་ཡང་ཡང་གཞུག །ལྷ་མོ་ཁྲོས་པས་མཆོད་རྟེན་ནི། །ནག་པོ་ཁྲི་འཕང་བཞི་ལྡན་བརྩིག །རྒོད་གསུང་རྣ་བ་མགུལ་དང་ཐོས། །སྣོམ་པའི་སྡུད་བྱེད་ཤེས་པར་
བྱེད། །རྒྱུན་མི་འཆད་པའི་ལྷ་སྦྱོར་གྱིས། །དགུག་གཞུག་བསྟིམས་ནས་མནན་བྱ་སྟེ། །མཚན་མ་རྙེད་ནས་སྔར་གཟུགས་སྲེག །རང་གནས་སླར་ཡང་ཙི་ཏས་མནན། །ནུས་ལྡན་སྟོང་གིས་གཅིག་བརྣག་ཀྱང་། །མཚོན་ཆའི་སྦྱོར་བ་སླར་ཉེས་བཞིན། །བདག་ཉིད་བདག་གིས་ཕུང་

བར་བྱེད། །མཆོད་བསྟོད་སྙིང་རྗེས་མི་གཏོང་ཞེས། །ཨོཾ་ཏཱ་རེ་ཏུཏྟཱ་རེ་ཏུ་རེ་མ་མ་རཀྵ་རཀྵ་སྭཱ་ཧཱ། ཨོཾ་ཏཱ་རེ་ཏུཏྟཱ་རེ་ཏུ་རེ་ཆེ་གེ་མོ་གྲྀ་ཧྞ་གྲྀ་ཧྞ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། བི་དྷྭནྶ་ཡ། བི་དྷྭནྶ་ཡ། ཨཱ་མུ་ཀཾ་མཱ་ར་ཡ་ཕཊ། མཱ་ར་ཡ་ཏུ་རེ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཨོཾ་ཏཱ་རེ་ཏུཏྟཱ་རེ་ཏུ་རེ་མ་
ཧཱ་པཉྩ་ཡཀྵ་སྟཾ་བྷ་ཡ་ཧྲི་བཾ་ཧྲིལ་མ་ར་ཡ་ཕཊ་ཀུ་རུ་ཀུ་ལ་བྷྱོ། རྗེ་བཙུན་མ་འཕགས་མ་སྒྲོལ་མ་མྱུར་མ་དཔའ་མོ་ཞེས་བྱ་བའི་སྒྲུབ་ཐབས་རྫོགས་སོ།། །།ཕྱག་འཚལ་སྟོན་ཀའི་ཟླ་བ་ཀུན་དུ། །གང་བ་བརྒྱ་ནི་བརྩེགས་པའི་ཞལ་མ། །སྐར་མ་སྟོང་ཕྲག་ཚོགས་པ་རྣམས་ཀྱིས། །རབ་
ཏུ་ཕྱེ་བའི་འོད་རབ་འབར་མ། །སྟོན་ཟླ་བརྒྱ་ཡི་ཞལ་མདངས་མངའ། །སྟོང་ཕྲག་སྐར་མས་རབ་ཕྱེ་བའི། །བཀྲག་འབྱིན་གཟི་མདངས་ཡིད་འོང་མ། །མི་ཤེས་མུན་སེལ་བསྒོམ་པར་བྱ། །ཇི་བཞིན་ཆོ་གས་རབ་སྤྲུལ་ཡུམ། །ཞལ་གསུམ་དཀར་སྔོ་གསེར་མདོག་ཅན། །བཅུ་གཉིས་
ཕྱག་མངའ་མཉམ་གཞག་དང་། །ཁ་ཊྭཱཾ་འཁོར་ལོ་རིན་ཆེན་ཉིད། །རྡོ་རྗེ་མེ་ཏོག་ཕྲེང་འཛིན་གཡས། །རིལ་བ་ཨུཏྤལ་དྲིལ་བུ་དང་། །བུམ་པ་དང་ནི་པོ་ཏི་གཡོན། །སྣ་ཚོགས་ལྷ་མོའི་རྒྱན་གྱིས་སྤྲས། །སྐུ་སྤྲོས་གསུང་བཟླས་ཕྱག་མཚན་ཐུགས། །རང་རང་རྗེས་མཐུན་ཕྲིན་ལས་སྒྲུབ། །
ཐུན་མོང་ཐུན་མོང་མ་ཡིན་པས། །མཉམ་གཞག་རྗེས་འགྲོ་རྩེ་གཅིག་བྱ། །ཕྲིན་ལས་ཡམས་ནད་ཞི་བའི་ཕྱིར། །དཀར་ཕྱོགས་མཎྜལ་མཎྜལ་དགོད། །དབུས་སུ་ཡུམ་བཅས་འོད་དཔག་མེད། །ཕྱོགས་མཚམས་རིགས་བཞི་ཡུམ་བཞི་དགོད། །ཁོར་ཡུག་ཕྱོགས་སྐྱོང་བཅས་དཀྱིལ་
འཁོར། །མ་ལུས་རྒྱན་གྱིས་མཛེས་པར་བྱ། །མཆོད་དང་གཏོར་མ་སྔོན་སོང་བས། །གསོ་སྦྱོང་ལྡན་པས་གསང་སྔགས་བཟླས། །ཁྲི་ཕྲག་མཆོད་གཏོར་ལྡན་པས་འབུམ། །བཟླས་ཏེ་ལྷ་ཡི་སྦྱོར་ལྡན་པས། །ནད་སོགས་ཞི་བྱ་གཙང་སྦྲས་སོ། །ཡམས་བདག་མང་པོ་ཚིམ་
པར་བྱ། །ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་བྱཱ་དྷི་པྲ་ཤ་མ་ན་ཤཱནྟིཾ་ཀུ་རུ་སྭཱ་ཧཱ། རྗེ་བཙུན་མ་སྒྲོལ་མ་སྟོན་ཟླ་ལྟ་བུ་ཞེས་བྱ་བའི་སྒྲུབ་ཐབས་རྫོགས་སོ།། །།ཕྱག་འཚལ་གསེར་སྔོ་ཆུ་ནས་སྐྱེས་ཀྱིས། །པདྨས་ཕྱག་ནི་རྣམ་པར་བརྒྱན་མ། །སྦྱིན་པ་བརྩོན་འགྲུས་དཀའ་ཐུབ་ཞི་བ། །

བཟོད་པ་བསམ་གཏན་སྤྱོད་ཡུལ་ཉིད་མ། །ཤེས་རབ་བདག་ཉིད་ཕར་ཕྱིན་ལྔ། །ཡོངས་རྫོགས་འཕགས་མ་ཆོ་ག་བཞིན། །རིམ་གཉིས་བསྒོམ་ཞིང་བཟླས་བྱ་སྟེ། །རྒྱ་ཆེར་མཆོད་བསྟོད་བསྔགས་པར་བྱ། །པད་ཉིར་སྐྱིལ་ཀྲུང་གསེར་མདོག་ཞལ། །
གཅིག་མདའ་ཕྲེང་བ་རལ་གྲི་མདའ། །རྡོ་རྗེ་དབྱི་གུ་དར་དབྱངས་ཞགས། །པདྨ་དྲིལ་བུ་གཞུ་འཛིན་བཅུའོ། །རྗེས་མཐུན་ཆོ་ག་སྔོན་སོང་བས། །ཚེ་བསྲིང་ཕྲིན་ལས་དོགས་མེད་བསྒྲུབ། །གཞན་སྲོག་ཚེ་ཡང་བསྲུངས་ནས་ནི། །ཚེ་དཔག་མེད་བཀུག་མཆོད་བསྟོད་གསོལ། །
ཨོཾ་ཏཱ་རེ་ཏུཏྟཱ་རེ་ཏུ་རེ་ཨཱ་ཡུ་རྫྙཱ་ན་དྷ་ར་དྷ་ར་བི་དྷ་ར་བི་དྷ་ར་ཡ་མ་བྲ་ཧི་དཱ་ཡ་དེ་ཧི་སྭཱ་ཧཱ། རང་ལོའི་གྲངས་ཀྱི་བརྒྱ་རྩ་བརྒྱད། །སངས་རྒྱས་ཀུན་དངོས་ཚེ་ཡི་དཔལ། །གྲངས་ཏེ་ཉི་ཤུ་གཅིག་བསྟོད་བྱ། །ཞག་རེ་ཟླ་རེ་ལས་ཚེ་འཕེལ། །རྗེ་བཙུན་མ་སྒྲོལ་མ་ཕ་རོལ་ཕྱིན་མ་ཞེས་བྱ་བའི་སྒྲུབ་
ཐབས་རྫོགས་སོ།། །།ཕྱག་འཚལ་དེ་བཞིན་གཤེགས་པའི་གཙུག་ཏོར། །མཐའ་ཡས་རྣམ་པར་རྒྱལ་མ་སྤྱོད་མ། །མ་ལུས་ཕ་རོལ་ཕྱིན་པ་ཐོབ་པའི། །རྒྱལ་བའི་སྲས་ཀྱིས་ཤིན་ཏུ་བསྟེན་མ། །གཙུག་ཏོར་ཡིད་བཞིན་ནོར་བུས་མཚན། །བདུད་དགྲ་འཚེ་བ་ཀུན་ལས་
རྒྱལ། །ཕ་རོལ་ཕྱིན་ཀུན་ཡོངས་རྫོགས་པས། །བདག་ཉིད་ཆེ་རྣམས་ཀྱིས་མཆོད་བསྒོམ། །གསེར་མདོག་ཆུ་སྐྱེས་རི་མོ་ཅན། །ཟག་མེད་ཆགས་མེད་རྣམ་གནོན་ཞིང་། །གསེར་རི་ལྟར་བརྗིད་ཕྱག་བཞི་མཛེས། །མཆོག་སྦྱིན་ཕྲེང་བ་རིལ་བ་དབྱུག །དེ་ལས་སྲོག་གཡོ་རྣམས་
འཇིལ་བ། །ཁརྒ་ནེ་ཏྲ་ཨཀྵོ་བྷྱ། །གརྦ་སུ་ཁ་གཅིག་པུ་སྐྱེས། །མ་གྷི་བཻ་རོ་ཙ་ན་སྦྱར། །ལྷ་མོར་ཡིད་བརྟན་མང་བཟླས་ནས། །གནས་ལྔར་གདབ་ཅིང་ཁོང་དུ་སྦྱིན། །རྩེ་གཅིག་ཧ་ལས་འཚོ་སྒྲོས་བྱབ། །རང་བཞིན་བཅོས་སོགས་སེལ་དོན་མེད། །ཨོཾ་ཏཱ་རེ་ཏུཏྟཱ་རེ་ཏུ་རེ་ན་མ།
ཤ་རེ་ཤ་རེ་བི་ཤ་རེ་སརྦ་བྲཧྨ་གྷ་ཊ་སྭཱ་ཧཱ། རྗེ་བཙུན་མ་སྒྲོལ་མ་གཙུག་ཏོར་རྒྱལ་མ་ཞེས་བྱ་བའི་སྒྲུབ་ཐབས་རྫོགས་སོ།། །།ཕྱག་འཚལ་ཏུཏྟཱ་ར་ཧཱུཾ་ཡི་གེས། །འདོད་དང་ཕྱོགས་དང་ནམ་མཁའ་གང་མ། །འཇིག་རྟེན་གསུམ་པོ་ཞབས་ཀྱིས་མནན་ཏེ། །ལུས་པ་མེད་པར་

འགུགས་པར་ནུས་མ། །མཐུ་ཆེན་སྔགས་ཀྱི་ཧཱུཾ་སྒྲ་ཡིས། །ཁམས་གསུམ་རྒྱས་འགེངས་སྲིད་གསུམ་གནོན། །ཀུན་བདག་བཀུག་ནས་དབང་སྡུད་མ། །དབང་བསྒྱུར་ཆེ་ཉིད་རྣམ་པར་བསྒོམ། །ཟླ་སྟེང་རྡོ་རྗེའི་ཞབས་གནོན་ཅིང་། །སྐྱབས་སྦྱིན་གསེར་གྱི་པད་ལྕུག་འཛིན། །ཏིང་འཛིན་
མཆོག་གཞུག་འགྲོ་སྐྱོབ་མ། །མ་ཆགས་གདུལ་བྱ་ཀུན་སྐྱོང་མཛད། །ཕྲིན་ལས་བསྒྲུབ་ཕྱིར་ལྷར་བསྙེན་མ། །རས་ལ་རྩིབས་བཞི་འཁོར་ལོ་བྲི། །བསྒྲུབ་བྱའི་གཟུགས་སོགས་མིག་དང་ལྡན། །ཝ་ཤཾ་ཀུ་རུ་ཁྲག་གིས་བྲི། །ཨོཾ་གསུམ་རིམ་པའི་རྒྱལ་མོའི་དབུས། །སྐྱེ་མཆེད་
གསལ་རྫོགས་སྤྲ་ཚིལ་གཟུགས། །ལྷ་མོས་བསྡུས་ཏེ་སྙིང་གར་གཞུག །དུས་གསུམ་དུས་དྲུག་སེང་ལྡེང་བསྲེག །སྒོ་གཉིས་ཟངས་མའི་ཐུར་མས་བྲུ། །ས་བོན་འོད་དམར་ཤུགས་དྲག་གི། །ལྕགས་ཀྱུས་བཀུག་སྟེ་ཞགས་པས་བཅིངས། །སྐྲ་ཡེངས་གཅེར་བུ་རྐང་འདུད་
བསམ། །དུར་ཁྲོད་རྗེས་གསུམ་རྡོ་རྗེའི་ཆུས། །སྦྱར་ཏེ་སྔགས་བཅས་སྦྱིན་པར་བྱ། །དེ་རྗེས་སྐེ་ཚེ་མིང་དང་བཅས། །དབང་སྡུད་ཡིད་ཀྱིས་སྦྱིན་སྲེག་བྱ། །བདུན་ཕྲག་ཞག་ནི་གཅིག་དང་གཉིས། །དེ་བཞིན་བདུན་གྱི་མི་མོ་དང་། །མི་ཕོ་ལྷ་མོ་སོགས་དབང་བསྐུར། །ཨོཾ་ཏཱ་རེ་
ཏུཏྟཱ་རེ་ཏུ་རེ་ལམྦྷ་ལམྦྷ་སོ་སཱ་ཏིཀྵ་སི་ཨུ་ཀྲོ་སི་བ་ཤཾ་ཀ་ར་ཡ་ཨ་མུ་ཀཾ་སྱ་དྷྱརྨ་གྷ་ཌ་ནི་ར་ཧ་ཏྲ་ཙ་མ་ན་བ་བྷྱཿསིད་ཧ་ད་ཧསྠི་དྷྱ་མ་མསྫ་ཀ་དྷ་ཧ་ལཾ་པ་ན་བི་རུ་ཏི་པ་ལ་ཎཱ་པ་ཙ་ཏི་རཏྣེ་ཏཾ་བ་ལན་དརྱ་མ་ནེ་ཧི་ཀུ་ཏོ་ནི་ཀུ་ཀུ་ཏྲོ་རོ་ཏྲོ་ཏྲི་ཡ་ཏི་བ་ས་ནེ་ཧི་བ་ལན་བ་དྷ་ཕུ་ར་ས་ཀྲི་ཏཾ། ཨོཾ་ཙི་ཏྲི་ཙི་ཏྲི་བི་ལོ་ལི་ལ་བི་ལོ་ལ་
སྭཱ་ཧཱ། ཨཱ་མུ་ཀཾ་སཱ་དྷ་ནཾ་པ་ར་པ་ཏཱམྨེ་ད་ས་མ་ན་ཡེ་སྭཱ་ཧཱ། ཨོཾ་ཀུ་རུ་ཀུལླེ་ཧྲཱིཿསྭཱ་ཧཱ། འབུམ་ཕྲག་རྣལ་འབྱོར་རྩེ་གཅིག་གིས། །མེ་ཏོག་བདུག་པ་བཟའ་བཏུང་དག །བྱིན་ན་བརྒྱ་བྱིན་ཡང་དབང་བྱེད། །མེ་ཏོག་དམར་པོའི་སྦྱིན་སྲེག་གཅེས། །ཡུངས་ཀར་སྐྱེས་བུ་མཆོག་
ལ་བསྔགས། །འཁར་བའི་སྣོད་དུ་སྦྲང་རྩི་མར། །སྔགས་དང་བཅས་གུས་དུས་གསུམ་དུ། །མཆོད་པ་བཅས་པས་དོན་རྣམས་འགྲུབ། །ཁམ་ཕོར་རམ་ནི་དུང་ཕོར་དུ། །སྦྲང་རྩི་སོགས་ལ་བརྒྱ་རྩ་བརྒྱད། །བཟླས་སོ་མིག་བྱུགས་དགྲ་བོ་ཡང་། །བུ་སྡུག་བཞིན་དུ་

སེམས་པར་འགྱུར། །དུར་ཁྲོད་གནས་སུ་སྣོད་ཆེན་ནི། །པདྨ་དཀར་དང་ཆེན་པོའི་སྣུམ། །བརྒྱ་དང་བཅུ་བཞི་བསྒྲུབ་བྱས་པའི། །མིག་སྨན་གྱིས་ནི་གཞན་དགའ་བྱེད། །རྗེ་བཙུན་མ་སྒྲོལ་མ་སྲིད་གསུམ་འགུགས་པའི་སྒྲུབ་ཐབས་རྫོགས་སོ།། །།
ཕྱག་འཚལ་བརྒྱ་བྱིན་མེ་ལྷ་ཚངས་པ། །རླུང་ལྷ་སྣ་ཚོགས་དབང་ཕྱུག་མཆོད་མ། །འབྱུང་པོ་རོ་ལངས་དྲི་ཟ་རྣམས་དང་། །གནོད་སྦྱིན་ཚོགས་ཀྱིས་མདུན་ནས་བསྟོད་མ། །འཇིག་རྟེན་ལས་འདས་འཇིག་རྟེན་གྱི། །ཆེ་རྣམས་དབང་ཕྱུག་དཔལ་ལྡན་མ། །འཇིགས་ཆེན་སྡིག་སྦྱོང་སྲིད་ཞི་ཡི། །
དངོས་གྲུབ་སྟེར་མཛད་མཁས་པས་བསྒོམ། །པདྨ་ཉི་མ་ལ་གནས་དམར། །ཞལ་གཅིག་ཕྱག་བཞི་རྡོ་རྗེ་གྲི། །སྡིགས་མཛུབ་ཞགས་བསྣམས་རྗེས་མཐུན་བསྒྲུབ། །ལྷ་ཚོགས་ཀུན་ལ་སྐྱོན་སེལ་མའོ། །ལས་སྒྲུབ་འགྲོ་ལ་ཕན་ཡིད་ཀྱིས། །དབེན་པར་དཀྱིལ་འཁོར་བཟང་བྱས་
ཏེ། །བགེགས་བསལ་ཕྲིན་ལས་གཏོར་མ་བྱིན། །ལྷ་མོ་སྤྱན་དྲངས་མཆོད་བསྟོད་གསོལ། །བརྒྱ་རྩ་བརྒྱད་བཟླས་བསྒོམ་པར་བཅས། །གནས་གསུམ་ལུས་ངག་ཡིད་སྡིག་སྐྱོན། །སྡིག་གཟུགས་བསམས་ལ་བྱབ་པར་བྱ། །དེ་རྗེས་བཀྲུ་དང་བསྲེག་པར་བྱ། །ལུས་བཀྲུས་
འདམ་སྐྱེས་སྡུད་དང་སྐྱེས། །མཁའ་ལ་རྒྱུ་དང་རྩོད་ལས་རྒྱལ། །ངན་སྐྱུགས་རྒལ་སོགས་ལྟས་འཐོན་ནས། །སྡིག་ལྡན་གཞན་ཡང་སྦྱང་བར་བྱ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཨོཾ་ཏཱ་རེ་ཏུཏྟཱ་རེ་ཏུ་རེ་
མ་མ་སརྦ་པཱ་པཾ། ཤོ་དྷ་ཡ། ཤོ་དྷ་ཡ། བི་ཤོ་དྷ་ཡ། བི་ཤོ་དྷ་ཡ། སརྦ་བྷ་བ་ས་མུ་དྷིཙྪོ་ཤ་ར་ཡཾ་སྭཱ་ཧཱ། དངོས་སམ་གཟུགས་སམ་གཟུགས་བརྙན་ལ། །མི་དགེ་ཀུན་བསྡུས་སྟོབས་བཞིར་བཅས། །འཕགས་པའི་སྐུ་གསུང་ཐུགས་བདེན་པས། །བདག་དང་འགྲོ་ཀུན་
སྡིག་བསལ་བྱ། །རྗེ་བཙུན་མ་སྒྲོལ་མ་སྡིག་པ་ལས་རྣམ་པར་རྒྱལ་མའི་སྒྲུབ་ཐབས་རྫོགས་སོ།། །།ཕྱག་འཚལ་ཏྲཊ་ཅེས་བྱ་དང་ཕཊ་ཀྱིས། །ཕ་རོལ་འཁྲུལ་འཁོར་རབ་ཏུ་འཇོམས་མ། །གཡས་བསྐུམ་གཡོན་བརྐྱང་ཞབས་ཀྱིས་མནན་ཏེ། །མེ་འབར་འཁྲུག་མ་ཤིན་ཏུ་

འབར་མ། །མ་ལུས་རྒོལ་འཇོམས་ལྷ་མོ་ཆེ། །ཏྲཊ་ཕཊ་སྒྲ་ཡིས་ཕ་རོལ་གནོན། །པདྨ་སེར་དང་ཉི་མ་ལ། །གཡས་བསྐུམ་གཡོན་བརྐྱང་སྟང་སྟབས་མཛེས། །ཚམ་རྔམ་གནག་ཅིང་ཁྲོས་པའི་བཞིན། །ན་བཟའ་སེར་བསྣམས་ལྟོ་འགྲོས་བརྒྱན། །ཕྱག་བཞི་འཁོར་ལོ་རལ་གྲི་དང་། །
སྐྱེ་གནས་སྟེང་ཞགས་སྡིག་མཛུབ་མཛད། །རྗེས་མཐུན་ལས་ཀྱི་འཆི་བསླུས་ལ། །དེ་ལས་གོང་མར་འཕོ་བར་བྱ། །ཕྱི་ནང་གསང་བས་འགྲོ་བ་ལ། །སྲོག་སྦྱིན་ཚོགས་བསགས་མཆོད་རྟེན་བསྒྲུབ། །ལྷ་མོ་འདོད་སྦྱིན་ཡིད་ཀྱི་བལྟས། །སྒོ་གཉིས་འཇུག་ལྡོག་རླུང་སྦྱངས་ལ། །གཉུག་
མར་གནས་པའི་ཡི་གེ་གསུམ། །གཅིག་ཏུ་བསྡུས་ཏེ་སྟེང་དུ་འཕང་། །ཧི་ཀས་ལམ་ཕྱེ་ཏཱཾ་གིས་དྲངས། །འོག་མིན་ལོངས་སྤྱོད་རྫོགས་སྐུར་འགྱུར། །དྲི་མེད་ཆོས་སྐུ་ལས་མ་གཡོས། །སྣ་ཚོགས་གནས་སུ་སྤྲུལ་སྐུ་འཕྲོ། །རྗེ་བཙུན་མ་སྒྲོལ་མ་གཞན་འཇོམས་འཕོ་བ་
ཞེས་བྱ་བའི་སྒྲུབ་ཐབས་རྫོགས་སོ།། །།ཕྱག་འཚལ་དཀོན་མཆོག་གསུམ་མཚོན་ཕྱག་རྒྱ། །སོར་མོས་ཐུགས་ཀར་རྣམ་པར་བརྒྱན་མ། །མ་ལུས་ཕྱོགས་ཀྱི་འཁོར་ལོས་བརྒྱན་པའི། །རང་གི་འོད་ཀྱི་ཚོགས་རྣམས་འཁྲུག་མ། །སངས་རྒྱས་ཆོས་ལས་ལེགས་
སྐྱེས་ཤིང་། །དགེ་འདུན་ཀུན་སྐྱོང་བརྩེ་ཆེན་མ། །ཕྱོགས་དང་ཕྱོགས་བྲལ་འཁོར་ལོའི་བདག །རང་སྐྱེས་འོད་ཀྱིས་ཀུན་སྐྱེས་བསྒོམ། །པདྨ་དམར་དང་ཟླ་སྟེང་དུ། །བནྡུ་ལྟར་དམར་ཕྱག་བཞི་མ། །གཉིས་དང་གཉིས་ལས་རབ་དགའ་ཡི། །རང་བཞིན་མྱ་ངན་མེད་ཤིང་
འཛིན། །རྗེས་མཐུན་ལས་ཀྱི་དོན་བསྒྲུབ་ཅིང་། །དེ་ལ་མཆོད་ཚོགས་སྔོན་འགྲོ་བས། །བསྙེན་ཅིང་བསྒྲུབས་ནས་ཚོགས་བསགས་ཏེ། །དེ་ཉིད་གསུམ་གྱིས་བྱིན་གྱིས་བརླབས། །བྱིན་བརླབས་མ་བརླབས་ཡོན་ཏན་སྐྱོན། །ཤེས་གསལ་མི་གསལ་བསྲུང་བྱས་ཏེ། །ཡོངས་
རྫོགས་མཎྜལ་གསུམ་པའི་ཚད། །མཎྜལ་སྟེགས་བཞུགས་དུས་བཟང་བརྟག །མཆོད་བསྟོད་གསོལ་བཏབ་གཏོར་མ་སྦྱིན། །ལྷ་ཡི་རྣལ་འབྱོར་རྫོགས་ལྡན་པས། །དཀྱིལ་འཁོར་བྲིས་ཏེ་བུམ་པར་ནི། །དབང་བསྐུར་ཕྱིར་ནི་ལྷ་རྣམས་བསྒྲུབ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥ་ཀ་ཏ་

ས་མ་ཡ་ཤྲི་ཡེ་ཧཱུཾ། བུམ་པ་ལ་བཟླས་པ་བྱའོ། །བྷྲཱུཾ་ཨཱཾ་ཛྲཱྀ་ཁཾ་ཧཱུཾ་བསྐྱེད་ལ། །སླར་ཡང་ཕྱག་མཚན་ལྷ་སྦྱོར་ལས། །རིགས་ལྔ་བསྒོམས་ཏེ་དབང་མཆོག་བསྐུར། །ཁྲུས་བྱས་དྲིས་བྱུག་ཀུན་རྫོགས་སྦྱར། །ཨོཾ་སརྦ་ཏ་ཐཱ་ག་ཏ་ཀཱ་ཡ་བི་ཤོ་དྷ་ནེ་ཧཱུཾ་སྭཱ་ཧཱ། སྐུ་ཕྱི་བའི་
སྔགས་སོ། །ཨོཾ་ཨཱཿཧཱུཾ་ཛཿཧཱུཾ་བཾ་ཧོཿ། སྐུ་གསུང་ཐུགས་བྱིན་གྱིས་བརླབ་པ་དང་། ཡེ་ཤེས་པ་སྤྱན་དྲང་བའི་སྔགས་སོ། །དེ་ནས་མན་ངག་ལྡན་པ་ཡིས། །མཆོད་ནས་སྔགས་བཟླས་སྤྱན་ཕྱེ་ལ། །སླར་ཡང་རབ་ཏུ་རྒྱས་པའི་ལས། །མཆོད་ཅིང་སྦྱིན་སྲེག་བཅས་མངའ་
གསོལ། །ཨོཾ་ཨཱཿཏཱ་རེ་པུཥྤ་དྷཱུ་པཾ་དཱི་པ་གནྡྷེ་ནཻ་བི་ཏྱ་བཛྲ་ཧཱུཾ་མཆོད་པའི་སྔགས་སོ། །ཨོཾ་ཙཀྵུ་ཙཀྵུ་ས་མནྟ་ཙཀྵུ་བི་ཤོ་དྷ་ཡ་སྭཱ་ཧཱ། ཐུར་མས་སྤྱན་དབྱེ་བའི་སྔགས་སོ། །ཨོཾ་སུ་པྲ་ཏིཥྛ་བཛྲེ་སྭཱ་ཧཱ། མེ་ཏོག་ལ་བཟླས་པ་དང་གཏོར་མའི་སྔགས་སོ། །ཨོཾ་ཧཱུཾ་བྷྲཱུཾ་ཁཾ་བཛྲཱི་བྷ་བ་དྲྀ་ཌྷོ་ཏིཥྛ་བྷྲཱུཾ་
ཁཾ། བཞུགས་ནས་མཎྜལ་དབུལ་བའི་སྔགས་སོ། །ཞི་བའི་སྦྱིན་སྲེག་ལས་ཀུན་བྱེད། །བསྟན་སྐྱོང་མཆོད་པས་སྲུང་བར་བྱེད། །སྲུང་འཁོར་ལྡན་བྱས་གནོད་མེད་བྱེད། །གཏོར་མ་རྒྱས་བྱིན་རྒྱས་པར་བྱེད། །མཆོག་གི་མངའ་གསོལ་རབ་གནས་ཀྱིས། །བྱིན་བརླབས་
འབར་དང་རྒྱུན་རིང་གནས། །གང་འདོད་དཔལ་སྟེར་མཐུ་སྟོབས་འཕེལ། །གང་བསྒྲུབས་དེ་འདྲར་སངས་རྒྱས་འགྱུར། །རྗེ་བཙུན་མ་སྒྲོལ་མ་མཆོག་སྩོལ་བ་ཞེས་བྱ་བའི་སྒྲུབ་ཐབས་རྫོགས་སོ།། །།ཕྱག་འཚལ་ཏུ་རེ་འཇིགས་པ་ཆེན་མོ། །བདུད་ཀྱི་དཔའ་བོ་
རྣམ་པར་འཇོམས་མ། །ཆུ་སྐྱེས་ཞལ་ནི་ཁྲོ་གཉེར་ལྡན་མཛད། །དགྲ་བོ་ཐམས་ཅད་རབ་ཏུ་གསོད་མ། །འཇིགས་ཆེན་ལས་སྐྱོབ་འཇིགས་ཆེན་མོ། །དཔའ་བོ་ལས་ཀྱང་དཔའ་མོ་ཆེ། །ཁྲོས་པས་དགྲ་གསོད་དགྲ་ཆེན་དགྲ། །དབང་བསྐུར་ཀུན་སྦྱིན་དབང་བདག་བསྒོམ། །
པདྨར་ཟླ་གདན་ཆུ་སྲིན་གདན། །གསེར་མདོག་སྐྱིལ་ཀྲུང་ཕྱེད་ཞལ་གཅིག །ཨ་ཤྭ་ཀ་དང་རིན་ཆེན་མཆོག །པདྨ་བུམ་ལས་དབང་མཆོག་སྟེར། །རྗེས་མཐུན་ལས་བྱེད་ཉོན་མོངས་ཀྱིས། །ཉོན་མོངས་ཀུན་སེལ་དབང་བསྒྲུབ་བྱ། །རིགས་གསུམ་ལས་སྐྱེས་སྨིན་བྱས་ཏེ། །

ཆོ་གས་སྦུ་གུར་སྙིང་པོ་དྲང་། །ཉི་ཟླ་ནམ་མཁའ་སྦྲང་རྩིའི་བཅུད། །ལྷན་ཅིག་སྐྱེས་ཞེས་མི་འབྲལ་བསྒོམ། །ཟག་དང་བཅས་ལས་ཟག་པ་མེད། །ཞི་ལ་འོད་གསལ་དམིགས་བྲལ་དག །མཁས་པས་ལུས་དང་ལུས་མེད་ལས། །མེ་ཏོག་རྩིའམ་ཏིལ་མར་ལྟར། །ཐབས་ལྡན་
ཐབས་བྲལ་ལེགས་བླངས་བསྟན། །མཐར་ནི་ཡང་དག་མཁའ་མཉམ་ཉིད། །རྗེ་བཙུན་མ་སྒྲོལ་མ་བདུད་འཇོམས་དབང་སྟེར་མ་ཞེས་བྱ་བའི་སྒྲུབ་ཐབས་རྫོགས་སོ།། །།ཕྱག་འཚལ་རབ་ཏུ་དགའ་བ་བརྗིད་པའི། །དབུ་རྒྱན་འོད་ཀྱི་ཕྲེང་བས་སྤེལ་མ། །བཞད་
པ་རབ་བཞད་ཏུ་ཏྟཱ་ར་ཡིས། །བདུད་དང་འཇིག་རྟེན་དབང་དུ་མཛད་མ། །ཏིང་འཛིན་དམ་པས་ཐུགས་བལྟམས་ཏེ། །དགྱེས་ཤིང་དགྱེས་པས་རོལ་པའི་སྟངས། །དབུ་རྒྱན་ལྔ་ཡི་ལྷ་འོད་ཀྱིས། །བཞད་ཅིང་རབ་བཞད་བསྒོམ་པར་བྱ། །པདྨར་ཟླ་སྟེང་བྱི་རུའི་མདོག །ཞལ་
གཅིག་ཕྱག་བཞི་དང་པོ་གཉིས། །སྤྱི་བོར་བཅིངས་དང་རལ་གྲི་འཕྱར། །ཨ་ཤྭ་ཀ་ཡི་ཡལ་ག་འཛིན། །རྗེས་མཐུན་ལས་རྣམས་བསྒྲུབ་མཛད་མ། །མཉེས་བྱས་དུ་མས་གསོལ་བཏབ་པས། །བགེགས་བསལ་གཏོར་མ་སྔོན་བྱིན་ལ། །ས་བླང་སྟེགས་བུ་བཟང་པོ་བྱ། །
རི་རབ་སྟེང་གནས་གཞལ་ཡས་ཁང་། །བུམ་པ་ལྔ་ལྡན་མཆོད་བསྟོད་གསོལ། །དམ་ཚིག་བསྐྱེད་ལ་རྫོགས་པར་བསྒྲུབ། །འབུམ་ཕྲག་གསུམ་དུ་བཟླས་པ་བྱ། །མིག་གཉིས་ཉི་མ་ཟླ་བ་ཡིས། །ཕྱོགས་ཀུན་བསྲེགས་ནས་ལྷ་མོ་ཡི། །དཀྱིལ་འཁོར་དམ་པ་མཁའ་
ལ་བལྟ། །བཛྲ་ཨུཙྪ་ཊ་ཧཱུཾ་བརྗོད། །འཁྱིལ་པའི་སྔགས་བརྗོད་གོམ་པ་བརྒྱར། །རྔམ་པར་བྱ་སྟེ་དྲ་གུར་བྱ། །འབྱུང་ཆེན་ལྷ་མོ་དཔང་བཞག་ནས། །དཀྱིལ་འཁོར་མཆོག་ནི་རྒྱས་པར་བྲི། །ཕྱོགས་བཞི་ནས་གུས་ཚིག་བཞི་ཡིས། །གསོལ་བཏབ་དམ་ཚིག་ཡེ་ཤེས་ཀྱི། །
དཀྱིལ་འཁོར་བསྐྱེད་དང་གཞུག་སོགས་བྱ། །བུ་དང་བླ་མའི་དྲིས་ལན་བརྗོད། །མཎྜལ་སྔོན་སོང་སོ་ཤིང་སྦྱིན། །སྔགས་བཅས་ཉལ་བས་རྨི་བརྟགས་ལ། །ལྷ་ཡིད་ཀུན་ལྡན་རྡུལ་ཚོན་དགོད། །མཆོད་བསྟོད་བསྒོམ་ཞིང་བཟླས་སོགས་བྱ། །ཨོཾ་དྷ་རོད་བཛྲ་ས་མ་ཡ་སྭཱ་ཧཱ།

གསང་བར་བསྡམས་ཏེ་མནའ་དོར་ལ། །བྱིན་བརླབས་ཆུ་སྦྱིན་གདོང་གཡོགས་ནས། །མེ་ཏོག་དོར་ཏེ་དཀྱིལ་འཁོར་གཞུག །རྟགས་ལྡན་བརྟན་པ་ཕྱག་རྒྱས་གདབ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཙིཏྟ་མཎྜ་ལ་བཛྲ་ས་མ་ཡ་སྟྭཾ། དཀྱིལ་འཁོར་བསྟན་ཅིང་གསོལ་
བཏབ་ལ། །སངས་རྒྱས་ཀུན་བཞུ་ལྷ་མོ་ཡི། །རྣལ་འབྱོར་ཀུན་ལྡན་ཡེ་ཤེས་ལྔའི། །དབང་བསྐུར་སློབ་མ་མཆོག་ལ་སྦྱིན། །ཨོཾ་ཨཱ་བཛྲཱ་དཪྴ་ཛྙཱ་ན་ཨ་བྷི་ཥིཉྩ་མཱཾ། ཨོཾ་བཛྲ་ས་མ་ཏ་ཛྙཱ་ན་རཏྣ་ཨ་བྷི་ཥིཉྩ་མཱཾ། ཨོཾ་བཛྲ་པྲ་ཏྱ་བེཀྵ་ཎ་ཛྙཱ་ན་ཨ་བྷི་ཥིཉྩ་མཱཾ། ཨོཾ་ཀྲྀ་ཏྱ་ཨ་ནུཥྛ་ན་ཛྙཱ་ན་བཛྲ་
ཨ་བྷི་ཥིཉྩ་མཱཾ། ཨོཾ་ཙཀྲ་ཨ་མོ་གྷ་ཛྙཱ་ན་ཨ་བྷི་ཥིཉྩ་མཱཾ། དེ་ནས་རྡོ་རྗེ་སྦྱིན་ཏེ། ཨོཾ་བཛྲ་ས་མ་ཡ་སྟྭཾ་ཨ་བྷི་ཥིཉྩ་མཱཾ། དེ་ནས་རྒྱན་དང་སྲུང་བ་སྦྱིན་ལ། ཨོཾ་བཛྲ་རཀྵ་རཀྵ་ཧཱུཾ་ཨ་བྷི་ཥིཉྩ་མཱཾ། ལུང་བསྟན་ཅིང་དབུགས་ཕྱུང་ལ། ཨོཾ་ཏཱ་རེ་ཏུཏྟཱ་རེ་ཏུ་རེ་སིདྡྷ་ས་མ་ཡ་སྟྭཾ་སྭ་བྷཱ་བ་ཨ་བྷི་ཥིཉྩ་མཱཾ།
རྡོ་རྗེ་སློབ་དཔོན་ཉིད་དུ་དབང་བསྐུར་ལ། ཨོཾ་ཏཱ་རེ་ཏུཏྟཱ་རེ་ཏུ་རེ་ཧེ་ཧེ་ཨ་བྷི་ཥིཉྩ་མཱཾ། ཕྱིར་མི་ལྡོག་པར་དབང་བསྐུར་ལ། ཨོཾ་བཛྲ་བེ་ཝརྟི་ཨ་བྷི་ཥེ་ཀ་ཨ་བྷི་ཥིཉྩ་མཱཾ། ཆོས་ཀྱི་རྒྱལ་པོར་དབང་བསྐུར་ལ། ཨོཾ་དྷརྨཱ་རཱ་ཛཱ་པྲ་ཏི་སྭཱ་ཧཱ། རྗེས་སུ་གནང་བའི་དབང་བསྐུར་ལ། ཨོཾ་བཛྲ་ཨ་
ནུཉྩ་ཨ་བྷི་ཥིཉྩ་མཱཾ། འདི་དག་སློབ་མའི་དབང་བཅུ་སྟེ། །ཕལ་ཆེར་བུམ་པ་ལ་གནས་ཕྱིར། །བུམ་པའི་དབང་དུ་བརྗོད་པ་ཡིན། །དང་པོ་ཡང་ནི་ཐོབ་པར་བྱེད། །དེ་བཞིན་གསང་བ་ཤེས་རབ་ཀྱི། །དབང་བསྐུར་བཅུ་ཡི་ཡེ་ཤེས་དང་། །སྐུ་གསུམ་ཐོབ་བྱེད་བླ་མའི་ཞལ། །
བདུད་རྩི་བཞི་པས་རྡོ་རྗེ་འཛིན། །རྗེ་བཙུན་མ་སྒྲོལ་མ་མྱ་ངན་སེལ་བྱེད་ཀྱི་དཀྱིལ་འཁོར་དུ་འཇུག་པའི་ཡན་ལག་ཅེས་བྱ་བ་རྫོགས་སོ།། །།ཕྱག་འཚལ་ས་གཞི་སྐྱོང་བའི་ཚོགས་རྣམས། །ཐམས་ཅད་འགུགས་པར་ནུས་པ་ཉིད་མ། །ཁྲོ་གཉེར་གཡོ་བ་ཡི་གེ་ཧཱུཾ་གིས། །
ཕོངས་པ་ཐམས་ཅད་རབ་ཏུ་སྒྲོལ་མ། །དཔལ་ལྡན་ས་སྐྱོང་ཕྱོགས་རྣམས་དང་། །ཕྱོགས་བྲལ་མ་ལུས་འགུགས་བྱེད་མ། །དེ་ཉིད་སྙིང་པོ་རབ་གཡོ་བས། །ཕོངས་པ་མཐའ་དག་སེལ་མཛད་བསྒོམ། །རྗེས་མཐུན་ཆོ་གས་ལས་བསྒྲུབས་ནས། །པད་ཉི་ལ་བཞུགས་གཡས་

བརྐྱང་རོལ། །མུན་མདོག་ཞལ་གཅིག་ཕྱག་གཉིས་གཡས། །ལྕགས་ཀྱུ་གཟའ་འགུགས་ཞགས་བསྣམས་འཆིང་། །དཔའ་མོ་བསྙེན་པས་འགྲོ་ཕན་ཡིད། །བརྒྱ་རྩ་བརྒྱད་ནི་གུས་བསྒོམས་ལ། །པདྨའམ་བིལ་འབྲས་དེ་བཞིན་དུ། །ཀ་ར་བཱི་རའི་མེས་མཆོད་བྱ། །བུམ་བཟང་སྣོད་
དུ་ལྔ་ཕྲག་ལྔ། །རིན་ཆེན་གཟུགས་སྤྲས་སྙིང་པོ་གཞུག །གང་འདོད་བཞིར་ནི་བགེགས་བསལ་ལ། །ལྷ་མོ་ནོར་གྱི་དབང་ཕྱུག་བརྟེན། །ཨོཾ་ཏཱ་རེ་ཏུཏྟཱ་རེ་ཛཾ་བྷེ་མོ་ཧེ་སྭཱ་ཧཱ། རྗེ་བཙུན་མ་སྒྲོལ་མ་འགྲོ་བ་འགུགས་ཤིང་ཕོངས་པ་སེལ་མ་ཞེས་བྱ་བའི་སྒྲུབ་ཐབས་རྫོགས་སོ།། །།
ཕྱག་འཚལ་ཟླ་བའི་དུམ་བུས་དབུ་བརྒྱན། །བརྒྱན་པ་ཐམས་ཅད་ཤིན་ཏུ་འབར་མ། །རལ་པའི་ཁུར་ནས་འོད་དཔག་མེད་ལས། །རྟག་པར་ཤིན་ཏུ་འོད་རབ་འཛག་མ། །གང་གིས་གསོལ་བཏབ་བཀྲ་ཤིས་དང་། །དགེ་ལེགས་རྒྱས་མཛད་ཟླ་ཚེས་བརྒྱན། །འོད་དཔག་མེད་
ལས་འོད་འཛགས་པས། །བསོད་ནམས་འོད་དཔུང་འབར་མཛད་བསྒོམ། །མཚན་མས་རྗེས་མཐུན་ལས་བསྒྲུབས་ནས། །སླར་ཡང་ཆུ་སྐྱེས་རི་བོང་ཅན། །རྡོ་རྗེའི་སྐྱིལ་ཀྲུང་གིས་གནོན་དཔལ། །གསེར་མདོག་ཞལ་གཅིག་ཕྱག་བརྒྱད་བལྟ། །རྩེ་གསུམ་ལྕགས་ཀྱུ་རྡོ་རྗེ་གྲི། །
རིན་ཆེན་ལྕགས་ཀྱུ་དབྱུ་གུ་རིལ། །ཐུགས་རྗེས་ཚར་གཅོད་རྗེས་འཛིན་མ། །རྒྱུན་མི་འཆད་པར་འདོད་སྟེར་མའོ། །ཤིས་པའི་ཕྱོགས་སུ་ཐབ་བརྩིགས་ཏེ། །དབུས་སུ་ཏཱཾ་ལྡན་ཨུཏྤལ་བསྐོར། །སྲེག་རྫས་གཡས་དང་མཆོད་རྫས་གཡོན། །འོ་མ་ཅན་ཤིང་སྦྲང་རྩི་མར། །
བསངས་ཏེ་སོ་སོར་བྱིན་གྱིས་བརླབས། །རིན་ཆེན་ལས་བྱས་ཚད་ལྡན་གྱིས། །དགང་གཟར་བླུགས་གཟར་རྡོ་རྗེ་དྲིལ། །བསངས་ཏེ་ཀུ་ཤས་གཅལ་བཀྲམ་བྱ། །རྒྱུན་བཞག་བྲམ་ཟེའི་མེས་སྦར་ལ། །བསང་ཞིང་རླུང་ཡབ་ཀྱིས་བསྐྱོད་བྱ། །འབར་བའི་ཆེད་དུ་ལན་གསུམ་གསུམ། །
བདག་མེད་བྱིན་ཟ་མཆོད་ནས་བསྟིམ། །པདྨའི་འདུག་སྟངས་ལན་གཉིས་ཏེ། །གསུམ་གསུམ་གྱིས་ནི་ལན་བདུན་དུ། །མར་གྱི་དགང་བླུགས་གུས་པས་སྦྱིན། །རྣལ་འབྱོར་ལྡན་པས་རྩེ་གཅིག་གོ །ཨོཾ་ཨགྣ་ཡེ་ཨ་དི་བྱ་ཨ་བི་ས་མ་ཡ་རཱ་ཤྲི་ཡེ་ཧ་བྱ་ཀ་བྱ་མ་ཧཱ་ཀ་ན་སྭཱ་ཧཱ། །མེ་བལྟས་ངན་ན་

བགེགས་དགྲ་བཟློག །བཟང་ན་གསོལ་བཏབ་དངོས་གྲུབ་བླང་། །སྡིག་ལྡན་སྤངས་ནས་གསོ་སྦྱོང་ཅན། །གུས་ཤིང་སྙིང་རྗེ་ལྡན་པར་མཆོད། །ཨོ་ཨ་བྷི་བྷ་ཀྵ་ཨགྣ་ཡེ་མ་མ་ཤཱནྟིཾ་ཀུ་རུ་སྭཱ་ཧཱ། དེ་རྗེས་དགང་བླུགས་ཞབས་བསིལ་བྱ། །མཆོད་བསྟོད་འདོད་དོན་
གསོལ་བ་གདབ། །དེ་རྗེས་ལྷ་བསྐྱེད་སོགས་མཆོད་ནས། །དགང་བླུགས་ཕུལ་ལ་རྫས་རྣམས་མཆོད། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཨོཾ་ཏཱ་རེ་ཏུཏྟཱ་རེ་ཏུ་རེ་མ་མ་ཤཱནྟིཾ་ཀུ་རུ་སྭཱ་ཧཱ། དགང་བླུགས་
དབུལ་ཞིང་མཆོད་བསྟོད་ལ། །སླར་ཡང་མེ་ལྷ་བསྐྱེད་རྫས་དབུལ། །མཆོད་བསྟོད་བཤགས་ཤིང་བྱང་ཆུབ་བསྔོ། །ཀུན་དོན་ཕྲིན་ལས་ཐམས་ཅད་གྲུབ། །རྗེ་བཙུན་མ་སྒྲོལ་མ་བཀྲ་ཤིས་ཐམས་ཅད་སྦྱིན་མའི་སྦྱིན་སྲེག་བྱ་བའི་སྒྲུབ་ཐབས་རྫོགས་སོ།། །།ཕྱག་འཚལ་བསྐལ་པ་ཐ་མའི་
མེ་ལྟར། །འབར་བའི་ཕྲེང་བའི་དབུས་ན་གནས་མ། །གཡས་བརྐྱང་གཡོན་བསྐུམ་ཀུན་འཁོར་དགའ་བའི། །དགྲ་ཡི་དཔུང་ནི་རྣམ་པར་འཇོམས་མ། །སྨིན་བྱེད་རླག་བྱེད་དཔའ་མོ་ནི། །མི་བཟད་མེ་དཔུང་དབུས་ན་བརྗིད། །རྟེན་བྱེད་སྡང་བྱེད་དགའ་མཛད་ཅིང་། །འཇོམས་བྱེད་དགྲ་
གཟུགས་ཅན་དེ་བསྒོམ། །པདྨ་དམར་དང་ཉི་མ་ལ། །བཞེངས་པའི་དོར་སྟབས་བརྐྱང་བསྐུམ་མ། །མི་བཟད་རཱ་ག་ལྟར་དམར་མདོག །ཀུན་དུ་འཕྲོ་ཞིང་ཀུན་བསྲེག་མཛད། །ཞལ་གཅིག་ཕྱག་བཞི་མཆུ་སྨིན་གཡོ། །རལ་གྲི་མདའ་དང་འཁོར་ལོ་གཞུ། །གཅོད་འབིགས་གཤག་ཅིང་བསྣུན་
བྱེད་ལས། །བགེགས་དགྲ་ཕྲ་རབ་རྡུལ་མི་གནས། །གསེར་མདོག་ནོར་བུ་ཨིནྡྲ་དང་། །སྦུར་ལོང་འཕགས་པའི་གདུང་ཐལ་དང་། །བྲི་ཧ་ཏི་དང་གུ་གུལ་དང་། །བདུད་རྩི་ལྔ་སོགས་སྦྱར་བའི་སྤོས། །རྣལ་འབྱོར་ལྡན་པས་བདུག་བྱས་ན། །སྟོང་ཕྲག་བརྒྱད་ཅུའི་མ་ལུས་བགེགས། །
ནགས་མེས་ཤིང་སྐམ་ཇི་བཞིན་འཇོམས། །རིམས་སོགས་དུག་སོགས་དེ་བཞིན་ནོ། །བསྒྲུབ་བྱའི་གཟུགས་ལ་ལྷ་མོ་ཡིས། །ང་རྒྱལ་གྱིས་བཀུག་རྩུབ་མོའི་ཤིང་། །རྟེན་ཕྲལ་ལིང་ག་གཏུབས་ནས་བསྲེགས། །བསྙེན་བསྒྲུབ་ལས་ལ་གོ་རིམས་བཞིན། །འབུམ་ཕྲག་སྟོང་ཕྲག་བརྒྱ་རྩ་བརྒྱད། །

བཟླས་ཏེ་ཁྲོ་མོའི་ཧོཾ་ཁུང་ཞལ། །ཕུལ་ནས་གསུམ་བདུན་ཉི་ཤུ་གཅིག །ཞག་གིས་ཚངས་པར་གྱུར་ཀྱང་གསོད། །ཨོཾ་ཏཱ་རེ་ཏུཏྟཱ་རེ་ཏུ་རེ་དྷ་མ་དྷ་རེ་ས་ཧཱུཾ། སྥོ་ཊ་བྷསྨི་ཀུ་རུ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སྭཱ་ཧཱ། རྗེ་བཙུན་མ་སྒྲོལ་མ་ཡོངས་སུ་སྨིན་པས་དགྲ་བགེགས་གཞོམ་པའི་སྒྲུབ་ཐབས་རྫོགས་
སོ།། །།ཕྱག་འཚལ་ས་གཞིའི་ངོས་ལ་ཕྱག་གིས། །མཐིལ་གྱིས་བསྣུན་ཅིང་ཞབས་ཀྱིས་བརྡུངས་མ། །ཁྲོ་གཉེར་གཡོ་བའི་ཡི་གེ་ཧཱུཾ་གིས། །རིམ་པ་བདུན་པོ་རྣམས་ནི་འགེམས་མ། །འགུགས་བྱེད་སྣུན་བྱེད་རྡུང་བྱེད་མ། །ཡིག་མཆོག་འཛིན་རིམ་གཉིས་བདུན་འགེམས། །
ལྷ་མོ་ཉིད་བསྙེན་གུས་པ་ཡིས། །ཞེ་སྡང་དང་བྲལ་ཁྲོ་བས་བསྒྲུབ། །སྟོང་ཟིལ་གནག་མདོག་ཞལ་གསུམ་མ། །གཡས་དཀར་གཡོན་དམར་ཁྲོས་པའི་ཞལ། །ཐོད་པའི་དོ་ཤལ་རྒྱུ་མ་གསོལ། །སྦྲུལ་བརྒྱད་ཀྱིས་བརྒྱན་སྟག་ལྤགས་གསོལ། །ཕྱག་དྲུག་རལ་གྲི་ལྕགས་ཀྱུ་དང་། །
དབྱུ་གུ་དེ་བཞིན་ཐོད་ཁྲག་བཀང་། །ཞགས་པ་ཚངས་པའི་མགོ་འཛིན་མ། །ཁམས་གསུམ་རིམ་བདུན་ཅིག་ཅར་འགེམས། །རྗེས་མཐུན་ལས་རྣམས་སྔོན་སོང་བས། །དར་དཀར་དྲིལ་བྱུག་ལྷ་སྦྱོར་གྱིས། །ཆུ་སྐྱེས་གེ་སར་ཨོཾ་དང་ཨའི། །མཐའ་རྟེན་མདའ་བརྒྱད་འབྲུ་བརྒྱད་བྲི། །བདེན་
བཞིའི་རྟེན་འབྲེལ་མཐའ་སྐོར་དང་། །རིགས་ལྔའི་སྙིང་པོས་བརྒྱན་པ་ཡི། །སྣ་ཚོགས་རྡོ་རྗེས་མཛེས་པ་དང་། །ཨཱ་ལི་ཀཱ་ལི་མུ་ཁྱུད་བསྐོར། །མཐར་བྱེད་སྔགས་དང་རལ་གྲི་ཡི། །ར་བ་ཕྱི་རོལ་རིམ་གཉིས་དགོད། །དེ་ནས་འབར་བའི་ར་བ་སྟེ། །ཤིས་པའི་སྣག་ཚས་མཉམ་གཞག་བྲི། །མཆོད་
ཅིང་ཡེ་ཤེས་འཁོར་ལོ་གཞུག །ང་རྒྱལ་ལྡན་པས་རྒྱས་བཏབ་ལ། །བདུག་པས་བདུག་ཅིང་མགུལ་དུ་གདགས། །འདི་ཡིས་མི་སྲུང་གང་ཡང་མེད། །རྗེ་བཙུན་མ་སྒྲོལ་མ་འགུགས་བྱེད་མས་བསྲུང་བའི་འཁོར་ལོ་བྱ་བའི་སྒྲུབ་ཐབས་རྫོགས་སོ།། །།ཕྱག་འཚལ་བདེ་མ་དགེ་མ་ཞི་མ། །
མྱ་ངན་འདས་ཞི་སྤྱོད་ཡུལ་ཉིད་མ། །སྭཱ་ཧཱ་ཨོཾ་དང་ཡང་དག་ལྡན་མ། །སྡིག་པ་ཆེན་པོ་འཇོམས་པ་ཉིད་མ། །ལྷ་མོ་བདེ་མས་མཐོ་རིས་སྦྱིན། །དགེ་མས་ཐར་པ་སྦྱིན་པ་སྟེ། །དེ་བཞིན་ཞི་མས་རྫོགས་སངས་རྒྱས། །སྦྱིན་མཛད་སྡིག་འཇོམས་བསྒོམ་པར་བྱ། །པདྨ་དཀར་དང་ཟླ་བ་ལ། །རྡོ་རྗེའི་སྐྱིལ་

ཀྲུང་ཀུནྡའི་མདོག །ཕྲེང་བ་མཆོག་སྦྱིན་དབྱུ་གུ་དང་། །པདྨ་སྤྱི་བླུགས་པོ་ཏི་འཛིན། །རྩ་བའི་བསྙེན་ལྡན་ཁྲུས་བྱས་ཏེ། །བགེགས་བསལ་བསོད་ནམས་སྤེལ་ཕྱིར་རོ། །ལྷ་སྦྱོར་ལྡན་དང་རྫས་ཚང་དང་། །དད་དང་སྙིང་རྗེ་བརྩོན་པས་ཡིད། །
ཉམས་དགའི་ཕྱོགས་སུ་སྟེགས་བུ་བཅས། །སྣ་ཚོགས་པདྨ་འདབ་བཞི་ལྡན། །རྡོ་རྗེ་མེ་ཕྲེང་མཛེས་བསྐོར་ཞིང་། །ཕྱོགས་སྐྱོང་བཀྲ་ཤིས་རྟགས་ལྡན་བྲི། །རལ་གྲི་མེ་ཏོག་མདའ་དང་དར། །རྨ་བྱ་ཚོན་སྐུད་དུང་དཀར་སོགས། །བ་དན་བླ་རེ་རྒྱལ་མཚན་གདུགས། །
མེ་ཏོག་ཕྲེང་སོགས་མཆོད་གཏོར་བཤམ། །ལྷ་མོའི་ཏིང་འཛིན་ལས་སྤྲུལ་པ། །རིན་ཆེན་ཁང་བརྩེགས་རྒྱ་ཆེན་ནང་། །དངོས་གྲུབ་མཚོ་སྐྱེས་བཅོམ་ལྡན་མ། །ཆོ་ག་གསུམ་གྱིས་བསྐྱེད་གཞུག་མཆོད། །ན་མོ་རཏྣ་ཏྲ་ཡཱ་ཡ། ན་མོ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ།
མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་གྲ་ཧེ། སརྦ་བྱ་དྷི། སརྦ་ཙོ་ར། སརྦ་བ་ཏྱི། སརྦ་དུར་སྭཔ་ནི་བྷྱཿ སརྦ་པཱ་པཾ་ཤ་མ་ནཱ་ཡ་སྭཱ་ཧཱ། རིག་པའི་རྒྱལ་མོའི་མཐའ་སྐོར་དུ། །གཟུགས་མཛེས་ཀྱིས་ནི་བརྒྱ་སྟོང་གྲངས། །བསྐོར་ཞིང་འཕྲོ་འདུའི་
འོད་འབར་བས། །བཞུ་སྟེ་བདུད་རྩིའི་རྫིང་བུར་བྱས། །དུག་སེལ་སྒྲོས་བྱབ་སྡིག་གདོན་སོགས། །མི་སྡུག་གཟུགས་སུ་ཕྱུང་བྱས་ཁྲུས། །རིག་སྔགས་བཀྲ་ཤིས་བཅས་ཏེ་གདོན། །རྗེས་ལ་མཆོད་བསྟོད་བཟོད་པར་གསོལ། །ལན་ཅིག་ལན་གསུམ་ལྔ་དང་བདུན། །
ཁྲུས་བྱས་ནད་སེལ་གདོན་ཞི་བྱེད། །སྡིག་འཇོམས་དོན་ཀུན་འགྲུབ་འགྱུར་ཏེ། །རྟག་ཏུ་བྱས་ན་དངོས་གྲུབ་ཐོབ། །རྗེ་བཙུན་མ་སྒྲོལ་མ་ཞི་བ་ཆེན་མོ་ཕྱི་ཁྲུས་ཀྱི་ཆོ་གའི་སྒྲུབ་ཐབས་རྫོགས་སོ།། །།ཕྱག་འཚལ་ཀུན་ནས་བསྐོར་རབ་དགའ་བའི། །དགྲ་ཡི་དཔུང་ནི་རབ་
ཏུ་འགེམས་མ། །ཡི་གེ་བཅུ་པའི་སྔགས་ནི་བཀོད་པས། །རིག་པ་ཧཱུཾ་ལས་སྒྲོལ་བ་ཉིད་མ། །ཡིད་གཞུངས་དྲན་སོགས་ཀུན་ནས་བསྐོར། །མི་ཤེས་དགྲ་དཔུང་རབ་འཇོམས་མ། །བློ་གྲོས་ཡི་གེ་བཅུ་བཀོད་པས། །ཧཱུཾ་ལས་སྲིད་ཞིའི་མུན་སྒྲོལ་བསྒོམ། །པདྨའི་གེ་སར་

ཉི་མ་ལ། །སེམས་དཔའི་སྐྱིལ་ཀྲུང་བྱུ་རུའི་མདོག །དགྲ་འཇོམས་རྩེ་གསུམ་ཐུགས་ཀར་འཛིན། །འབྲས་བཅས་ཤིང་བསྣམས་སྡིགས་མཛུབ་འཕྱར། །ཐུགས་ཀྱི་སྙིང་པོ་རེག་པ་མཆོག །ཡི་གེ་བཅུས་བསྐོར་འདོད་པ་ཡི། །དངོས་གྲུབ་ཀུན་སྟེར་བློ་གྲོས་སྤེལ། །ཐམས་ཅད་
སྙིང་གི་དབུས་གནས་མའོ། །ཐུགས་རྗེའི་རང་བཞིན་ཤེས་རབ་མཆོག །གཅིག་ཏུ་ཕན་མཛད་དངོས་གྲུབ་སྦྱིན། །ཇི་ལྟར་གཞན་བློ་སྤེལ་དེ་ལྟར། །བདག་གི་བློ་མཆོག་རྒྱས་པར་མཛད། །ངག་གི་དབང་ཕྱུག་ཞི་ཕྲ་དམར། །བདག་གྱུར་གཡས་གཡོན་མདུན་རྒྱབ་ཏུ། །ཡིད་
གཞུངས་དྲན་དང་ཤེས་རབ་དང་། །བློ་འཕེལ་ལྷ་མོ་བཞི་བསྒོམ་བྱ། །སྲིད་པའི་འཁོར་ལོ་ཟླ་བའི་དབུས། །རྣམ་སྣང་སྒྲོལ་མ་ལས་བྱུང་དངོས། །རྩ་རིག་འོད་ཀྱིས་མུན་སེལ་བསྐྱེད། །མི་སྨྲའི་སྦྱོར་བས་གསང་སྔགས་བཟླས། །ཨོཾ་ཏཱ་རེ་ཏུཏྟཱ་རེ་ཏུ་རེ་ཧྲཱིཿ། མཧཱ་མ་ཡཱཾ་ག་
པྲཛྙཱ་པྲི་དྷཱ་མ་ཧཱ་ས་ར་ས་ཏྱཻ་ན་མ་པྲ་ཀྲྀ་ཏ་པ་རི་ཤུདྡྷ་སརྦ་དྷརྨཱ་པྲ་ཀྲྀ་ཏ་པ་རི་ཤུདྡྷོ྅ཧཾ། སརྦ་མ་ཧཱ་བྷ་ཡན་ཏཱ་ར་སྭཱ་ཧཱ། སྨན་རྣམས་སྦྱར་བས་བཟླས་ནས་ནི། །ཟླ་བ་དྲུག་དང་གསུམ་མམ་གཅིག །ཟོས་ནས་ཐོས་མང་འཛིན་པ་དང་། །ཚེ་ལྡན་ཚངས་པའི་ང་རོ་ཐོབ། །དེ་བཞིན་
གསེར་མདོག་དྲི་ལྡན་སྔགས། །ཟླ་གཅིག་ཟླ་གསུམ་ཟླ་བ་དྲུག །བསྙེན་པས་ཡིད་གཞུངས་དྲན་ལྡན་ཞིང་། །བློ་འཕེལ་ངག་གི་དབང་ཕྱུག་འགྱུར། །རྗེ་བཙུན་མ་སྒྲོལ་མ་དགྲ་འཇོམས་མས་བློ་འཕེལ་བ་ཞེས་བྱ་བའི་སྒྲུབ་ཐབས་རྫོགས་སོ།། །།ཕྱག་འཚལ་
ཏུ་རེ་ཞབས་ཀྱིས་བརྡབས་པས། །ཧཱུཾ་གི་རྣམ་པའི་ས་བོན་ཉིད་མ། །རི་རབ་མནྡ་ར་དང་འབིགས་བྱེད། །འཇིག་རྟེན་གསུམ་རྣམས་གཡོ་བ་ཉིད་མ། །བདེ་ལྡན་ལྷ་མོས་ཞབས་བརྡབས་པས། །འཇིག་རྟེན་གསུམ་གཡོ་འཇིགས་པར་བྱེད། །ཧཱུཾ་ཡིག་ས་བོན་ལས་སྐྱེས་མགོན། །
རི་རབ་ཀུན་བསྐྱོད་དབང་སྡུད་བསྒོམ། །རབ་དཀར་པད་དབུས་ཉི་མ་ལ། །ཧཱུཾ་ཡིག་ལས་སྐྱེས་ཀུན་བདེ་སྟེར། །སེམས་དཔའི་སྐྱིལ་ཀྲུང་དམར་སེར་མཛེས། །ཕྱག་གཉིས་རི་བོང་འཛིན་བསྣམས་པའོ། །དེ་བསྙེན་དབེན་པར་གཙང་ཁང་བཤམ། །ཞི་མཛད་ལྷ་ལ་མེ་

ཏོག་གི། །མཎྜལ་མཆོད་བཅས་གཏོར་མར་བཅས། །དེ་བཞིན་གཏུམ་མོ་མེ་མཆོད་བཅས། །ཆོམ་རྐུན་ལ་སོགས་སྙིང་བརྩེ་བས། །ལྷ་མོ་གཏོར་མ་འདོད་བྱིན་ལ། །ཡན་ལག་དགུ་ལྡན་མཆོད་བྱས་ནས། །ཞི་དྲག་གཉིས་ཀར་གསོལ་བ་གདབ། །
སྙིང་གའི་འོད་ཀྱིས་སེམས་ཅན་ཁམས། །ཀུན་ཁྱབ་སླར་ཡང་ཐུགས་རྗེ་ཡི། །ཨ་ལས་བསིལ་ཟེར་དེ་སྟེང་ཏཱཾ། །ཡོངས་གྱུར་སྔར་གཟུགས་ལྷ་མོ་ཡི། །གཡས་གཡོན་མི་འཇིགས་ཨུཏྤལ་ཅན། །སྣ་ཚོགས་རྒྱན་མཛེས་ལྷ་རྫས་ཀྱི། །མཆོད་སྤྲིན་དབུས་བཞུགས་ཆེ་
དགུས་མཆོད། །མགུལ་རྒྱན་གདུ་བུ་དོ་ཤལ་འཛིན། །འབྲུ་གསུམ་གྱིས་བརྒྱན་ནམ་མཁའ་ཡི། །ཚོན་གཟུགས་དང་བལྟས་གསལ་བར་བྱ། །ཕྱག་གི་བདུད་རྩིས་བདག་སྐྱོང་བར། །བསམས་ལ་གསང་སྔགས་ལོ་གྲངས་གདོན། །ན་མོ་ཨཱརྱཱ་བ་ལོ་ཀི་ཏེ་ཤྭ་རཱ་
ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་དུཥྚཱཾ་པྲ་དུཥྚཱཾ་མ་མ་ཀྲྀ་ཏྭཱན། ཛཾ་བྷ་ཡ། སྟཾ་བྷ་ཡ། མོ་ཧ་ཡ། བནྡྷ་བནྡྷ་ཡ། ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སརྦ་སྟཾ་བྷ་ནི་ཏཱ་རེ་སྭཱ་ཧཱ། ཕྱི་ཡི་ཕྱག་རྒྱ་ཞབས་འོག་མནན། །ནང་གི་དབུགས་
ཀྱིས་དྲངས་ཏེ་བསྲེག །བསྒྲུབ་བྱའི་འཁོར་ལོ་བཅིངས་ཏེ་དྲིལ། །དེ་སྐྱོང་ལྷ་ནི་གཏོར་མས་བསྐྲད། །གང་འགྲོའི་ཕྱོགས་སུ་དཔལ་ཆེན་མོ། །ཞལ་བཟང་བདག་ལ་གཟིགས་པར་བསམ། །དེ་ལ་བསྟོད་དང་བཟླས་གསོལ་བྱ། །དེས་ནི་འཇིགས་པ་ཀུན་སྐྱོབ་འགྱུར། །རྗེ་
བཙུན་མ་འཕགས་མ་སྒྲོལ་མ་བདེ་ལྡན་མས་ཆོམ་རྐུན་བཅིང་བ་ཞེས་བྱ་བའི་སྒྲུབ་ཐབས་རྫོགས་སོ།། །།ཕྱག་འཚལ་ལྷ་ཡི་མཚོ་ཡི་རྣམ་པའི། །རི་དགས་རྟགས་ཅན་ཕྱག་ན་བསྣམས་མ། །ཏཱ་ར་གཉིས་བརྗོད་ཕཊ་ཀྱི་ཡི་གེས། །དུག་རྣམས་མ་ལུས་པར་ནི་སེལ་མ། །
འཕགས་མ་ལྷ་ཡི་ངང་པ་འཛིན། །ཟག་མེད་བདེ་རྒྱས་དུག་སེལ་མ། །མཉེས་བྱས་རྫས་དང་སྔགས་སྦྱོར་བས། །དུག་རྣམས་ལས་རྒྱལ་བསྒོམ་པར་བྱ། །པདྨ་དཀར་སྟེང་ཟླ་དབུས་སུ། །འདབ་བཟང་ཁྲི་སྟེང་སྐྱིལ་ཀྲུང་བཞུགས། །གཉིས་ཀྱི་སྤྱི་བོར་ལྕགས་ཀྱུ་འཛིན། །

གཞན་གཉིས་མཆོག་སྦྱིན་པོ་ཏི་བསྣམས། །ལྷ་མཉེས་རྣལ་འབྱོར་ལྡན་པ་ཡིས། །གདོན་རིགས་ལྔ་ཡིས་དུག་བརྟགས་ལ། །རྫས་རིགས་ལྔ་ལ་གསང་སྔགས་ལྔ། །འབུམ་ཕྲག་གསུམ་བཟླས་གནས་ལྔར་བྱུགས། །ཨོཾ་ཏཱ་རེ་ཏུཏྟཱ་རེ་ཏུ་རེ་ཀུ་རུ་ཀུལླེ་ཧྲཱིཿ། སརྦ་ཤ་ཏྲཱུཾ་བྷཀྵ་ཡ་ཧཱུཾ་
ཧཱུཾ་ནཱ་ག་སྟཾ་བྷ་ཡ་མོ་ཧཱ་ཡ་བནྡྷ་ཡ་རཾ་ཡཾ་ཁཾ་སུཾ་ནེ་ར་པ་ནེ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། དམ་ཚིག་རྫས་ནི་དང་པོ་ལ། །གུ་གུལ་གླ་རྩི་ཤུ་དག་དང་། །རུ་རྟ་བཙན་དུག་ཤིང་ཀུན་ཉིད། །གླ་རྩི་མི་བསྐྱོད་བཅས་སྦྱོར་བའོ། །གཉིས་པ་གཉིས་འགྱུར་ཤུ་དག་བླ། །རུ་རྟ་གུ་གུལ་མུ་ཟི་ཉིད། །རོ་
རས་རྒྱ་ཚིལ་གཤིན་དྲི་ཆེན། །ཕག་བཅུད་སྒོག་སྐྱ་མ་དྷུ་ར། །མི་ཡི་བཅུད་དང་རུས་པའི་ཕྱེ། །མི་ཡི་བཅུད་བསྡུས་རིལ་བུའོ། །སྔ་མའི་གཉིས་འགྱུར་བསྙེན་པ་ཡིས། །རིག་པ་ཉིད་དང་ལྷ་སྦྱོར་ཉིད། །གསུམ་པ་ལ་ནི་གསུམ་འགྱུར་ཉིད། །གཞན་ཡང་ཀླུ་དུག་བདུད་རྩི་
བསྟེན། །བཞི་པ་ཡང་ན་བཞི་འགྱུར་ཉིད། །ཀླུ་དུག་རྣམ་རྒྱལ་བསྟེན་པར་བྱ། །ལྔ་པ་ལྔ་འགྱུར་ཨ་རུ་ར། །མི་བསྐྱོད་གླ་རྩི་ཁྱད་པར་བསྟེན། །ཉི་འོད་མུན་པ་མི་ཡི་རྡུལ། །ཇི་བཞིན་དུག་རྣམས་འཇོམས་པར་བྱེད། །རྗེ་བཙུན་མ་སྒྲོལ་མ་རྣམ་པར་རྒྱལ་མས་ཀླུ་ནད་གསོ་བའི་
སྒྲུབ་ཐབས་རྫོགས་སོ།། །།ཕྱག་འཚལ་ལྷ་ཡི་ཚོགས་རྣམས་རྒྱལ་པོ། །ལྷ་དང་མི་འམ་ཅི་ཡིས་བསྟེན་མ། །ཀུན་ནས་གོ་ཆ་དགའ་བའི་བརྗིད་ཀྱིས། །རྩོད་དང་རྨི་ལམ་ངན་པ་སེལ་མ། །ས་གསུམ་དབང་པོས་རབ་མཆོད་ཅིང་། །ཀུན་ནས་དགའ་བསྐྱེད་འབར་བ་
ཡི། །གཟི་ཡིས་ལྟས་ངན་སྡུག་བསྔལ་སེལ། །བརྩོན་པས་དུས་དྲུག་བསྒོམ་པར་བྱ། །པདྨ་དཀར་དང་ཉི་སྟེང་དུ། །གཡས་བརྐྱང་སྐྱིལ་ཀྲུང་ཀུནྡའི