Kinh tạng Tây Tạng (Kangyur Đại Học) — 036_ཕལ་ཆེན།_ཁ

ྩེ་མོ་ཤིན་ཏུ་མཐོ་བ་བྱུང་སྟེ། དེ་དང་རྐྱེན་དུ་འབབ་པར་དེའི་དྲུང་གི་སྙིང་པོ་བྱང་ཆུབ་ལ་སེང་གེའི་ཁྲི་རྒྱ་ཆེན་པོ་བྱུང་ནས་དེ་ལ་དེ་བཞིན་གཤེགས་པ་མངོན་པར་ཤེས་པའི་བློ་གྲོས་ཐམས་ཅད་ཀྱི་རྒྱལ་པོ་ཞེས་བྱ་བ་
སྙིང་པོ་བྱང་ཆུབ་ཏུ་གཤེགས་ཏེ་བཞུགས་པར་མཐོང་ངོ་། །དེ་ལྟར་དེ་ན་རྒྱན་ཇི་སྙེད་སྣང་བར་གྱུར་པ་དེ་དག་ནི་བསྐལ་པ་ཁྲག་ཁྲིག་ཡོངས་སུ་ཚང་བས་ཀྱང་བརྗོད་པར་དཀའོ། །དེས་ཆོ་འཕྲུལ་ཆེན་པོ་འདི་བསྟན་ནས་བྱང་ཆུབ་སེམས་
པས་འཁོར་དེ་དག་ཐམས་ཅད་དང་། ལྷ་དང་ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། བརྒྱ་བྱིན་དང་ཚངས་པ་དང་འཇིག་རྟེན་གྱི་མགོན་པོ་དང་། དབང་ཕྱུག་ཆེན་པོ་དང་། གནས་གཙང་མའི་རིས་སུ་གཏོགས་པའི་
འཁོར་དེ་དག་ཐམས་ཅད་སོ་སོའི་གནས་ཇི་བཞིན་དུ་བཀོད་པ་དང་། དེ་ནས་འཁོར་དེ་དག་ཐམས་ཅད་ངོ་མཚར་དང་རྨད་དུ་གྱུར་ནས། མི་སྨྲ་བར་བྱང་ཆུབ་སེམས་དཔའ་རྡོ་རྗེའི་སྙིང་པོ་དེ་ཉིད་ལ་སེམས་ཤིང་འཁོད་པར་གྱུར་ཏོ། །དེ་ནས་བྱང་
ཆུབ་སེམས་དཔའི་རྣམ་པར་གྲོལ་བའི་ཟླ་བས། བྱང་ཆུབ་སེམས་དཔའ་རྡོ་རྗེའི་སྙིང་པོ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་ཏིང་ངེ་འཛིན་འདིའི་མཐུ་རྣམ་པར་བཀོད་པ་དེ་ནི་རྨད་དུ་བྱུང་བར་ངོ་མཚར་ཆེ་ན། ཀྱེ་རྒྱལ་བའི་སྲས་ཏིང་
ངེ་འཛིན་དེའི་མྱིང་ཅི་ཞེས་བྱ། བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ་རྒྱལ་བའི་སྲས་ཏིང་ངེ་འཛིན་དེ་ནི་སངས་རྒྱས་ཀྱི་ཞིང་ཐམས་ཅད་ཀྱི་ལྷུན་དང་རང་བཞིན་ཡང་དག་པར་སྟོན་པ་ཞེས་བྱའོ། །བྱང་ཆུབ་སེམས་དཔའ་རྣམ་
པར་གྲོལ་བའི་ཟླ་བས་སྨྲས་པ། ཀྱེ་རྒྱལ་བའི་སྲས་འོ་ན་ཏིང་ངེ་འཛིན་འདིའི་སྤྱོད་ཡུལ་དང་། ཡུལ་དང་རྒྱན་ཇི་ལྟ་བུ་ཡིན། བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ་རྒྱལ་བའི་སྲས་བྱང་ཆུབ་སེམས་དཔའི་ཏིང་ངེ་འཛིན་འདི་

ལ་ཤིན་ཏུ་གོམས་པ་ནི། འདོད་ན་སངས་རྒྱས་ཀྱི་ཞིང་འདི་འདྲ་བ་འཇིག་རྟེན་གྱི་ཁམས་ཆུ་ཀླུང་གང་གཱའི་བྱེ་མ་སྙེད་དམ། དེ་བས་ཀྱང་མང་དུ་རང་གི་ལུས་ལ་སྟོན་ཏོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའི་ས་ཆོས་ཀྱི་སྤྲིན་ལ་གནས་
པའི་བྱང་ཆུབ་སེམས་དཔས་ནི་བྱང་ཆུབ་སེམས་དཔའི་ཏིང་ངེ་འཛིན་འདི་འདྲ་བ་བརྒྱ་སྟོང་ཤིན་ཏུ་མང་བ་རབ་ཏུ་འཐོབ་སྟེ། དེ་བས་བྱང་ཆུབ་སེམས་དཔའ་དེའི་ལུས་སམ། ལུས་ཀྱི་ལས་ནི་བྱང་ཆུབ་སེམས་དཔའ་རྒྱལ་ཚབ་ཀྱི་གོ་འཕང་ཐོབ་ཅིང་བྱང་ཆུབ་སེམས་
པས་ས་ལེགས་པའི་བློ་གྲོས་ལ་གནས་པ་དག་གིས་ཀྱང་ཤེས་པར་སླ་བ་མ་ཡིན་ནོ། །ངག་གམ་ངག་གི་ལས་ཀྱང་ཤེས་པར་སླ་བ་མ་ཡིན་ནོ། །ཡིད་དམ་ཡིད་ཀྱི་ལས་ཀྱང་ཤེས་པར་སླ་བ་མ་ཡིན་ནོ། །རྫུ་འཕྲུལ་ཤེས་པར་སླ་བ་མ་ཡིན་ནོ། །
དུས་གསུམ་ལ་རྣམ་པར་ལྟ་བ་ཤེས་པར་སླ་བ་མ་ཡིན་ནོ། །ཏིང་ངེ་འཛིན་གྱི་སྤྱོད་ཡུལ་ལ་འཇུག་པ་ཤེས་པར་སླ་བ་མ་ཡིན་ནོ། །ཡེ་ཤེས་ཀྱི་ཡུལ་ཤེས་པར་སླ་བ་མ་ཡིན་ནོ། །རྣམ་པར་ཐར་པས་རྣམ་པར་རོལ་པ་ཤེས་པར་སླ་བ་མ་ཡིན་ནོ། །
འཕྲུལ་པའི་ལས་ཤེས་པར་སླ་བ་མ་ཡིན་ནོ། །བྱིན་གྱི་རླབས་ཀྱི་ལས་ཤེས་པར་སླ་བ་མ་ཡིན་ནོ། །མཐུའི་ལས་ཤེས་པར་སླ་བ་མ་ཡིན་པ་ནས་མདོར་བསྡུ་ན་གོམ་པ་འདོར་ཞིང་འདེགས་པའི་ལས་ཀྱི་བར་དུ་ཡང་བྱང་ཆུབ་སེམས་དཔའ་
རྒྱལ་ཚབ་ཀྱི་གོ་འཕང་ཐོབ་ཅིང་བྱང་ཆུབ་སེམས་དཔའི་ས་ལེགས་པའི་བློ་གྲོས་ལ་གནས་པ་རྣམས་ཀྱིས་ཀྱང་ཤེས་པར་སླ་བ་མ་ཡིན་ཏེ། ཀྱེ་རྒྱལ་བའི་སྲས་བྱང་ཆུབ་སེམས་དཔའི་ས་ཆོས་ཀྱི་སྤྲིན་འདི་ནི་མདོར་བསྡུས་ཏེ་བསྟན་ན་ཡང་དེ་ལྟར་ཚད་
མེད་པ་སྟེ། རྒྱ་ཆེར་ནི་བསྐལ་པ་བརྒྱ་སྟོང་གྲངས་མེད་པས་ཀྱང་བསྟན་པའི་མཐར་ཐུག་པར་མི་འགྱུར་བར་ཤེས་པར་བྱའོ། །བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བས་སྨྲས་པ། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་སྤྱོད་ཡུལ་

དང་བྱིན་གྱིས་རླབས་ཀྱང་དེ་ལྟར་ཚད་མེད་ན་དེ་བཞིན་གཤེགས་པ་རྣམས་ཀྱི་སྤྱོད་ཡུལ་དང་ཡུལ་གྱི་རྒྱུད་ཅི་འདྲ་བ་ཞིག་ཡོད། བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། མྱི་ལ་ལ་ཞིག་
གིས་གླིང་བཞི་པའི་འཇིག་རྟེན་གྱི་ཁམས་ནས་རྡེའུ་རྒྱ་ཤུག་གི་ཚིག་གུ་ཙམ་གཉིས་སམ་གསུམ་ཞིག་བླངས་ཏེ། འཇིག་རྟེན་གྱི་ཁམས་མཐའ་ཡས་པ་དག་ན། སའི་ཁམས་ཇི་སྙེད་ཅིག་ཡོད་པ། རྡོ་བ་འདི་ལས་ཇི་ཙམ་ཞིག་གིས་ལྷག་པར་འཕགས་ཤིང་
ལྷག་པར་ཚད་མེད་ཅེས་ཟེར་བ་ཞིག་ཡོད་ན། ཀྱེ་རྒྱལ་བའི་སྲས་དེ་ལྷར་ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་ཚད་མེད་པ་མངའ་བ་རྣམས་ཀྱི་ཆོས་ཉིད་བྱང་ཆུབ་སེམས་དཔའི་ཆོས་ཉིད་ཀྱིས་འཇལ་བ་ནི་ཁྱོད་ཀྱི་
ཚིག་འདི་དེ་དང་འདྲ་བར་བདག་གིས་དཔགས་སོ། །ཀྱེ་རྒྱལ་བའི་སྲས་ཇི་ལྟར་གླིང་བཞི་པའི་འཇིག་རྟེན་གྱི་ཁམས་ནས་གང་བླངས་པའི་སའི་ཁམས་ཆུང་ཟད་ལ་ལྷག་མ་ལས་ཚད་མེད་པ་དེ་བཞིན་དུ། ཀྱེ་རྒྱལ་བའི་སྲས་བྱང་ཆུབ་སེམས་དཔའི་ས་ཆོས་ཀྱི་སྤྲིན་
འདི་ཁོ་ན་ཡང་བསྐལ་པ་གྲངས་མེད་པར་ཤིན་ཏུ་བསྟན་ཀྱང་ཕྱོགས་ཙམ་ཞིག་བསྟན་དུ་ཟད་ན། དེ་བཞིན་གཤེགས་པའི་ས་ལྟ་སྨོས་སུ་འང་ག་ལ་ཡོད། ཀྱེ་རྒྱལ་བའི་སྲས་ཁྱོད་ཀྱིས་ཁོང་དུ་ཆུད་པ་དང་། ཡིད་ཆེས་པར་བྱ་ན་དེ་བཞིན་གཤེགས་པ་འདི་བདག་
གི་མདུན་ན་དཔང་དུ་བཞུགས་ཏེ། ཀྱེ་རྒྱལ་བའི་སྲས། གལ་ཏེ་ཕྱོགས་བཅུའི་ཕྱོགས་རེ་རེའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་མུ་མེད་པའི་རྡུལ་ཤིན་ཏུ་ཕྲ་བ་ཇི་སྙེད་ཅིག་ས་འདི་ལྟ་བུ་ཐོབ་པའི་བྱང་ཆུབ་སེམས་དཔའ་རྣམས་ཀྱིས་བུ་རམ་ཤིང་གི་
ཚལ་ལམ། སྨྱིག་མའི་ཚལ་ལམ། འོད་མའི་ཚལ་ལམ། ཏིལ་གྱི་ཞིང་ཐིབས་པོ་བཞིན་དུ་ཡོངས་སུ་གང་བར་གྱུར་ཀྱང་། བྱང་ཆུབ་སེམས་དཔའི་སྤྱོད་པ་མངོན་པར་བསྒྲུབ་པ་བསྐལ་པ་མུ་མེད་པར་མངོན་པར་བསྒྲུབས་པ་དེ་དག་གིས་ནི་དེ་བཞིན་

གཤེགས་པའི་ཡེ་ཤེས་སྐད་ཅིག་ཡུད་ཙམ་ཐང་ཅིག་ཏུ་བྱུང་བའི་དེ་བཞིན་གཤེགས་པའི་ཡུལ་གྱི་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་། བྱེ་བ་བརྒྱའི་ཆ་དང་། བྱེ་བ་བརྒྱ་སྟོང་གི་ཆ་དང་། བྱེ་བ་ཁྲག་ཁྲིག་བརྒྱ་སྟོང་གི་
ཆར་ཡང་ཉེ་བར་མི་འགྲོ་བ་ནས་གྲངས་དང་ཆ་དང་བགྲང་བ་དང་དཔེ་དང་རྒྱུ་དང་བསྒྲུན་པ་ཙམ་དུ་ཡང་ཉེ་བར་མི་འགྲོའོ། །ཀྱེ་རྒྱལ་བའི་སྲས་དེ་ལྟར་ཡེ་ཤེས་དེ་ལྟ་བུ་དང་ལྡན་པའི་བྱང་ཆུབ་སེམས་དཔའ་དེ་བཞིན་གཤེགས་པའི་སྐུ་དང་གསུང་དང་ཐུགས་དང་
གཉིས་སུ་མེད་པ་ནི། བྱང་ཆུབ་སེམས་དཔའི་ཏིང་ངེ་འཛིན་གྱི་སྟོབས་ཀྱང་ཡོངས་སུ་མི་གཏོང་ལ་སངས་རྒྱས་བལྟ་བ་དང་། མཆོད་པ་དང་། རིམ་གྲོ་ཡང་རབ་ཏུ་བྱེད་དེ། བསྐལ་པ་རེ་རེ་ལ་ཡང་དེ་བཞིན་གཤེགས་པ་མཐའ་ཡས་པ་ལ་
མཆོད་པ་རྣམ་པ་ཐམས་ཅད་དུ་མངོན་པར་བསྒྲུབས་པའི་མཆོད་པ་རྒྱ་ཆེན་པོའི་རྗེས་སུ་སོང་བས་མཆོད་པ་བྱེད་དོ། །སངས་རྒྱས་བཅོམ་ལྡན་འདས་དེ་དག་གི་བྱིན་གྱི་རླབས་ཀྱི་སྣང་བ་ཡང་ཡང་དག་པར་འཛིན་ཏོ། །དེ་ནི་སྔོན་བས་ཀྱང་བསྐལ་པ་དུ་མ་དང་། བསྐལ་པ་བརྒྱ་ཕྲག་དུ་མ་
དང་། བསྐལ་པ་སྟོང་ཕྲག་དུ་མ་དང་། བསྐལ་པ་བརྒྱ་སྟོང་ཕྲག་དུ་མ་དང་། བསྐལ་པ་བྱེ་བ་བརྒྱ་སྟོང་ཕྲག་དུ་མ་དང་། བསྐལ་པ་ཁྲག་ཁྲིག་ཕྲག་དུ་མ་དང་། བསྐལ་པ་ཁྲག་ཁྲིག་བརྒྱ་ཕྲག་དུ་མ་དང་། བསྐལ་པ་ཁྲག་ཁྲིག་སྟོང་ཕྲག་དུ་མ་དང་།
བསྐལ་པ་ཁྲག་ཁྲིག་བརྒྱ་སྟོང་ཕྲག་དུ་མ་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མར་ཆོས་ཀྱི་དབྱིངས་ཡོངས་སུ་དྲིས་པ་ཤིན་ཏུ་བསྟན་པས་མི་འཕྲོགས་པར་གནས་སོ། །ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན། ལྷ་རྫས་ཀྱི་རྒྱན་
གྱི་རྣམ་པ་མགར་བས་མ་བརྡུངས་པ་རིན་པོ་ཆེའི་དམ་པས་སྤྲས་པ། ལྷའི་རྒྱལ་པོ་དབང་བསྒྱུར་གྱི་ཡན་ལག་གི་དམ་པ་མགོའམ་མགུལ་དུ་བཏགས་ན། དེ་མ་ཡིན་པའི་ལྷ་དང་མྱིའི་རྒྱན་གྱི་རྣམ་པ་གཞན་གྱིས་མི་འཕྲོགས་ཤིང་མི་ཐུབ་པ་ཡིན།

ཀྱེ་རྒྱལ་བའི་སྲས་དེ་བཞིན་དུ་བྱང་ཆུབ་སེམས་དཔའ་ས་བཅུ་པ་ཆོས་ཀྱི་སྤྲིན་འདི་ཐོབ་པའི་བྱང་ཆུབ་སེམས་དཔའི་ཡེ་ཤེས་ཀྱི་རྒྱུད་དེ་དག་ཀྱང་སེམས་ཅན་ཐམས་ཅད་དང་། ཉན་ཐོས་དང་། རང་སངས་རྒྱས་ཐམས་ཅད་དང་།
བྱང་ཆུབ་སེམས་དཔའི་ས་དང་པོ་ཉེ་བར་བཟུང་བ་ཡན་ཅད་བྱང་ཆུབ་སེམས་དཔའི་ས་དགུ་པ་ཐོབ་པའི་བར་གྱི། བྱང་ཆུབ་སེམས་དཔའ་རྣམས་ཀྱིས་ཀྱང་མི་འཕྲོགས་པ་ཡིན། བྱང་ཆུབ་སེམས་དཔའི་ས་འདི་ལ་གནས་པའི་ཡེ་ཤེས་སྣང་བ་ནི་སེམས་
ཅན་རྣམས་ཐམས་ཅད་མཁྱེན་པའི་ཡེ་ཤེས་ལ་གཟུད་པའི་རྒྱུ་ཡིན་ཏེ། དེ་མ་ཡིན་པའི་ཡེ་ཤེས་སྣང་བ་གཞན་གྱིས་མི་འཕྲོགས་སོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། ལྷའི་རྒྱལ་པོ་དབང་ཕྱུག་ཆེན་པོའི་འོད་ཀྱིས་ནི་སྐྱེ་བའི་སྐྱེ་མཆེད་ཐམས་ཅད་དུ་འང་
ཁྱབ་ལ་སེམས་ཅན་རྣམས་ཀྱི་ལུས་ཀྱང་སིམ་པར་བྱེད་དོ། །ཀྱེ་རྒྱལ་བའི་སྲས་དེ་བཞིན་དུ་བྱང་ཆུབ་སེམས་དཔའ་ས་བཅུ་པ་འདི་ལ་གནས་པའི་བྱང་ཆུབ་སེམས་དཔའི་ཡེ་ཤེས་སྣང་བ་ཡང་ཉན་ཐོས་དང་། རང་སངས་རྒྱས་ཐམས་ཅད་དང་། བྱང་ཆུབ་
སེམས་དཔའི་ས་དང་པོ་ལ་ཉེ་བར་བཟུང་བ་ཡན་ཅད་བྱང་ཆུབ་སེམས་དཔའི་ས་དགུ་པ་ལ་གནས་པའི་བར་གྱི་བྱང་ཆུབ་སེམས་དཔའ་རྣམས་ཀྱིས་ཀྱང་མི་འཕྲོགས་པ་ཡིན། ཐམས་ཅད་མཁྱེན་པའི་ཡེ་ཤེས་ཀྱི་བར་གྱི་ཆོས་ཉིད་ལ་ཡང་སེམས་ཅན་རྣམས་
རབ་ཏུ་གཞོག་གོ །ཀྱེ་རྒྱལ་བའི་སྲས་བྱང་ཆུབ་སེམས་དཔའི་ཡེ་ཤེས་དེ་ལྟ་བུ་དང་ལྡན་པ་ལ་ནི། སངས་རྒྱས་བཅོམ་ལྡན་འདས་རྣམས་ཀྱིས་དུས་གསུམ་གྱི་ཡེ་ཤེས་ཡང་དག་པར་སྟོན་ཏོ། །ཆོས་ཀྱི་དབྱིངས་རབ་ཏུ་ཕྱེ་བའི་ཡེ་ཤེས་དང་། འཇིག་
རྟེན་གྱི་ཁམས་ཐམས་ཅད་རྒྱས་པར་དགང་བ་དང་། འཇིག་རྟེན་གྱི་ཁམས་ཐམས་ཅད་དུ་སྣང་བར་བྱིན་གྱིས་བརླབ་པ་དང་། སེམས་ཅན་ཐམས་ཅད་དང་ཞིང་གི་ཆོས་ཡོངས་སུ་ཤེས་པར་བྱ་བ་དང་། སེམས་ཅན་ཐམས་ཅད་ཀྱི་སེམས་དང་། སྤྱོད་པ་ལ་

འཇུག་པའི་ཡེ་ཤེས་ནས་མདོར་བསྡུ་ན། ཐམས་ཅད་མཁྱེན་པའི་ཡེ་ཤེས་ཐོབ་པར་བྱ་བའི་བར་དུ་ཡང་དག་པར་བསྟན་ཏོ། །དེའི་ཕ་རོལ་ཏུ་ཕྱིན་པ་བཅུ་ལས་ཡེ་ཤེས་ཀྱི་ཕ་རོལ་ཏུ་ཕྱིན་པའི་ཤས་ཆེ་བ་ཡིན་ཏེ། ཀྱེ་རྒྱལ་བའི་སྲས་འདི་ནི་བྱང་ཆུབ་
སེམས་དཔའ་རྣམས་ཀྱི་ཆོས་ཀྱི་སྤྲིན་ཅེས་བྱ་བ། བྱང་ཆུབ་སེམས་དཔའི་ས་བཅུ་པ་མདོར་བསྟན་པའོ། །རྒྱ་ཆེར་ནི་བསྐལ་པ་གྲངས་མྱེད་པ་མུ་མྱེད་པས་བསྟན་པའི་མཐར་ཐུག་པར་ཤེས་པར་བྱའོ། །དེ་ལ་གནས་པའི་བྱང་ཆུབ་སེམས་
དཔའ་ནི་ཕལ་ཆེར་ལྷའི་རྒྱལ་པོ་དབང་ཕྱུག་ཆེན་པོར་འགྱུར་ཏེ། སེམས་ཅན་རྣམས་ལ་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའི་ཕ་རོལ་ཏུ་ཕྱིན་པ་བསྟན་པ་ལ་མཁས་ཤིང་མཐུ་ཡོད་པ་ཡིན། ཆོས་ཀྱི་དབྱིངས་རྣམ་
པར་ཕྱེ་བ་ཡོངས་སུ་དྲིས་པ་བསྟན་པས་མི་འཕྲོགས་པ་ཡིན། སྦྱིན་པ་འམ། ངག་སྙན་པ་འམ། དོན་བསྒྲུབ་པ་འམ། དོན་མཐུན་པས་དགེ་བའི་རྩ་བ་གང་ཅི་རྩོམ་ཡང་རུང་སྟེ། དེ་ཐམས་ཅད་ཇི་ལྟར་ན་སེམས་ཅན་ཐམས་ཅད་ཀྱི་མཆོག་ཏུ་
འགྱུར། གཙོ་བོར་འགྱུར། ཐུ་བོར་འགྱུར། ཕུལ་དུ་འགྱུར། དམ་པར་འགྱུར། བླ་ན་མེད་པར་འགྱུར། འདྲེན་པར་འགྱུར། ཡོངས་སུ་འདྲེན་པར་འགྱུར་བ་ནས། ཐམས་ཅད་མཁྱེན་པའི་ཡེ་ཤེས་ལ་རྟེན་པའི་བར་དུ་འགྱུར་སྙམ་སྟེ།
སངས་རྒྱས་ཡིད་ལ་བྱ་བ་དང་། ཆོས་ཡིད་ལ་བྱ་བ་དང་། དགེ་འདུན་ཡིད་ལ་བྱ་བ་དང་། བྱང་ཆུབ་སེམས་དཔའ་ཡིད་ལ་བྱ་བ་དང་། བྱང་ཆུབ་སེམས་དཔའི་སྤྱོད་པ་ཡིད་ལ་བྱ་བ་དང་། བྱང་ཆུབ་སེམས་དཔའི་ས་ཡིད་ལ་བྱ་བ་དང་།
ཕ་རོལ་ཏུ་ཕྱིན་པ་ཡིད་ལ་བྱ་བ་དང་། སྟོབས་ཡིད་ལ་བྱ་བ་དང་། མི་འཇིགས་པ་ཡིད་ལ་བྱ་བ་དང་། སངས་རྒྱས་ཀྱི་ཆོས་མ་འདྲེས་པ་ཡིད་ལ་བྱ་བ་ནས་རྣམ་པའི་མཆོག་ཐམས་ཅད་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་ཡིད་ལ་བྱ་བ་དང་མི་

འབྲལ་བ་ཡིན་ཏེ། དེ་འདོད་ན་སྐད་ཅིག་ཡུད་ཙམ་ཐང་ཅིག་ཏུ་ཏིང་ངེ་འཛིན་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་རབ་ཏུ་འཐོབ་ཅིང་དེ་དག་ལ་སྙོམས་པར་འཇུག་པ་
དང་། སངས་རྒྱས་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་མཐོང་བ་དང་། དེ་དག་གི་བྱིན་གྱི་རླབས་ཀྱང་ཡང་དག་པར་ཤེས་པ་དང་། འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མེད་
པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་སྐྱོད་པ་དང་། སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་དུ་འགྲོ་བ་དང་། འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་
ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་སྣང་བར་བྱ་བ་དང་། སེམས་ཅན་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཡོངས་སུ་སྨིན་པར་བྱ་བ་དང་། བསྐལ་པ་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་
ཁྲིག་བརྒྱ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་དུ་གནས་པར་བྱ་བ་དང་། སྔོན་གྱི་མཐའ་དང་ཕྱི་མའི་མཐའི་བསྐལ་པ་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ལ་རབ་ཏུ་འཇུག་པ་དང་། ཆོས་ཀྱི་སྒོ་
སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་རྣམ་པར་དབྱེ་བར་བྱ་བ་དང་། ལུས་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཡོངས་སུ་བསྟན་པ་དང་། ལུས་རེ་
རེ་ལ་ཡང་བྱང་ཆུབ་སེམས་དཔའི་འཁོར་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཡང་དག་པར་བསྟན་པའི་བརྩོན་འགྲུས་ཀྱི་རྣམ་པ་དེ་ལྟ་བུ་རྩོམ་མོ། །དེ་ཡན་ཅད་བྱང་ཆུབ་སེམས་དཔའི་སྨོན་ལམ་གྱི་མཐུ་

ཅན་རྣམས་སྨོན་ལམ་གྱི་ཁྱད་པར་ཀྱིས་རྣམ་པར་འཕྲུལ་ཏེ། དེ་དག་གི་ལུས་སམ་འོད་དམ། རྫུ་འཕྲུལ་ལམ། མིག་གམ་སྤྱོད་ཡུལ་ལམ། དབྱངས་སམ་སྤྱོད་པ་འམ། རྒྱན་ཏམ། བྱིན་གྱི་རླབས་སམ། མོས་པ་འམ། མངོན་པར་འདུ་
བྱེད་པ་དག་ཀྱང་བསྐལ་པ་དུ་མ་དང་། བསྐལ་པ་བརྒྱ་ཕྲག་དུ་མ་དང་། བསྐལ་པ་སྟོང་ཕྲག་དུ་མ་དང་། བསྐལ་པ་བརྒྱ་སྟོང་ཕྲག་དུ་མའི་བར་གྱིས་ཀྱང་བགྲང་བར་དཀའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའི་ས་བཅུ་པོ་དེ་དག་
ནི་རིམ་གྱིས་མངོན་དུ་གཞོལ་བས། ཐམས་ཅད་མཁྱེན་པའི་ཡེ་ཤེས་ལ་རྣམ་པ་ཐམས་ཅད་དུ་རྗེས་སུ་སོང་བར་བལྟའོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། མཚོ་ཆེན་པོ་མ་དྲོས་པ་ལས་བྱུང་བའི་འབབ་ཆུ་ནི་ཆུ་ཀླུང་ཆེན་པོའི་
རྒྱུད་ཀྱི་སྒོ་བཞིས་འཛམ་བུའི་གླིང་ཡོངས་སུ་ངོམས་པར་བྱས་ནས་མི་ཟད་པར་བྱས་ཏེ། གོང་དུ་རྣམ་པར་འཕེལ་བ་དང་། རྒྱ་མཚོ་ཆེན་པོའི་བར་དུ་ཞེན་པར་འགྱུར་ཏེ། ཆུ་དེ་ནི་ཐོག་མ་ནས་ཀྱང་རྒྱ་མཚོ་ཆེན་པོ་ལ་མངོན་པར་གཞོལ་བ་
ཡིན་ཏེ། ཀྱེ་རྒྱལ་བའི་སྲས་དེ་བཞིན་དུ་བྱང་ཆུབ་ཀྱི་སེམས་ལས་བྱུང་བའི་དགེ་བའི་རྩ་བའི་ཆུ་འབབ་པ་ཡང་སྨོན་ལམ་ཆེན་པོའི་ཆུ་ཀླུང་གི་རྒྱུན་གྱི་སྒོ་ནས་བསྡུ་བའི་དངོས་པོ་བཞིས་སེམས་ཅན་གྱི་ཁམས་ངོམས་པར་བྱས་ཏེ། མི་ཟད་པར་བྱས་
ནས་གོང་དུ་རྣམ་པར་འཕེལ་བ་དང་། རྣམ་པ་ཐམས་ཅད་དུ་ཐམས་ཅད་མཁྱེན་པའི་ཡེ་ཤེས་ཀྱི་བར་གྱི་རྒྱ་མཚོ་ཆེན་པོ་ལ་ཞེན་པར་འགྱུར་ཏེ། དགེ་བའི་རྩ་བའི་ཆུ་དེ་ནི་ཐོག་མ་ནས་ཀྱང་ཐམས་ཅད་མཁྱེན་པ་ཉིད་ཀྱི་རྒྱ་མཚོ་ཆེན་པོ་ལ་མངོན་པར་
གཞོལ་བ་ཡིན། ཀྱེ་རྒྱལ་བའི་སྲས། བྱང་ཆུབ་སེམས་དཔའི་ས་བཅུ་པོ་དེ་དག་ནི་སངས་རྒྱས་ཀྱི་ཡེ་ཤེས་ཀྱི་གཞི་ལས་ཡོད་པར་འགྱུར་ཏེ། ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། ས་ཆེན་པོའི་གཞི་ལས་རིའི་རྒྱལ་པོ་ཆེན་པོ་བཅུ་ཡོད་པར་

གྱུར་པ་འདི་ལྟ་སྟེ། རིའི་རྒྱལ་པོ་ཆེན་པོ་ཁ་བ་ཅན་དང་། རིའི་རྒྱལ་པོ་ཆེན་པོ་སྤོས་ངད་ཅན་དང་། རིའི་རྒྱལ་པོ་ཆེན་པོ་རྣམ་པར་འདལ་བ་དང་། རིའི་རྒྱལ་པོ་ཆེན་པོ་དྲང་སྲོང་རི་དང་། རིའི་རྒྱལ་པོ་ཆེན་པོ་གཉའ་ཤིང་འཛིན་དང་།
རིའི་རྒྱལ་པོ་ཆེན་པོ་རྟ་རྣ་རི་དང་། རིའི་རྒྱལ་པོ་ཆེན་པོ་ས་འཛིན་དང་། རིའི་རྒྱལ་པོ་ཆེན་པོ་ཁོར་ཡུག་དང་། རིའི་རྒྱལ་པོ་ཆེན་པོ་དཔལ་ཆེན་དང་། རིའི་རྒྱལ་པོ་ཆེན་པོ་རི་རབ་བོ། །ཀྱེ་རྒྱལ་བའི་སྲས་དེ་ལ་འདི་ལྟ་སྟེ་དཔེར་ན། རིའི་རྒྱལ་པོ་ཆེན་པོ་ཁ་བ་
ཅན་ནི་སྨན་གྱི་རྣམ་པ་ཐམས་ཅད་ཀྱི་འབྱུང་གནས་ཏེ། སྨན་སྣ་ཚོགས་ཐམས་ཅད་བླངས་པས་མཐར་ཐུག་པ་མེད་དོ། །ཀྱེ་རྒྱལ་བའི་སྲས་དེ་བཞིན་དུ་བྱང་ཆུབ་སེམས་དཔའི་ས་རབ་ཏུ་དགའ་བ་ལ་གནས་པའི་བྱང་ཆུབ་སེམས་དཔའ་ཡང་འཇིག་
རྟེན་པའི་གཙུག་ལག་དང་། ཚིག་དང་སྔགས་དང་། རིག་པའི་གནས་ཀྱི་འབྱུང་གནས་ཡིན་ཏེ། འཇིག་རྟེན་པའི་གཙུག་ལག་དང་ཆིག་དང་སྔགས་དང་། རིག་པའི་གནས་བསྟན་པས་མཐར་ཐུག་པ་མེད་དོ། །ཀྱེ་རྒྱལ་བའི་སྲས་འདི་ལྟ་སྟེ་
དཔེར་ན། རིའི་རྒྱལ་པོ་སྤོས་ཀྱི་ངད་ཅན་ནི། སྤོས་ཀྱི་རྣམ་པ་ཐམས་ཅད་ཀྱི་འབྱུང་གནས་ཡིན་ཏེ། སྤོས་ཀྱི་རྣམ་པ་སྣ་ཚོགས་བླངས་པས་མཐར་ཐུག་པ་མེད་དོ། །ཀྱེ་རྒྱལ་བའི་སྲས། དེ་བཞིན་དུ་བྱང་ཆུབ་སེམས་དཔའི་ས་དྲི་མ་དང་
བྲལ་བ་ལ་གནས་པའི་བྱང་ཆུབ་སེམས་དཔའ་འང་བྱང་ཆུབ་སེམས་དཔའི་ཚུལ་ཁྲིམས་དང་། སྡོམ་པ་དང་ཚུལ་ཐམས་ཅད་ཀྱི་འབྱུང་གནས་ཡིན་ཏེ། བྱང་ཆུབ་སེམས་དཔའི་ཚུལ་ཁྲིམས་དང་སྡོམ་པ་དང་། ཚུལ་རྣམ་པ་སྣ་ཚོགས་ཀྱི་སྤོས་ཀྱི་མཐར་
ཐུག་པ་མེད་དོ། །ཀྱེ་རྒྱལ་བའི་སྲས། འདི་ལྟ་སྟེ་དཔེར་ན། རིའི་རྒྱལ་པོ་རྣམ་པར་འདལ་བ་ནི། རིན་པོ་ཆེའི་རང་བཞིན་ཤིན་ཏུ་དག་པ། རིན་པོ་ཆེའི་རྣམ་པ་ཐམས་ཅད་ཀྱི་འབྱུང་གནས་ཡིན་ཏེ། རིན་པོ་ཆེ་རྣམ་པ་སྣ་ཚོགས་ཐམས་ཅད་བླངས་

བས་ཟད་པ་མེད་དོ། །ཀྱེ་རྒྱལ་བའི་སྲས་དེ་བཞིན་དུ་བྱང་ཆུབ་སེམས་དཔའི་ས་འོད་བྱེད་པ་ལ་གནས་པའི་བྱང་ཆུབ་སེམས་དཔའ་ཡང་འཇིག་རྟེན་པའི་བསམ་གཏན་དང་། མངོན་པར་ཤེས་པ་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་རྣམས་
ཀྱི་འབྱུང་གནས་ཡིན་ཏེ། འཇིག་རྟེན་པའི་བསམ་གཏན་དང་། མངོན་པར་ཤེས་པ་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་ཡོངས་སུ་དྲིས་པ་བསྟན་པས་ཟད་པ་མེད་དོ། །ཀྱེ་རྒྱལ་བའི་སྲས་འདི་ལྟ་སྟེ།
དཔེར་ན། རིའི་རྒྱལ་པོ་ཆེན་པོ་དྲང་སྲོང་རི་ནི་རིན་པོ་ཆེའི་རང་བཞིན་རྣམ་པར་དག་པ་དྲང་སྲོང་མངོན་པར་ཤེས་པ་ལྔ་དང་ལྡན་པའི་འབྱུང་གནས་ཏེ། མངོན་པར་ཤེས་པ་ལྔ་དང་ལྡན་པའི་དྲང་སྲོང་བགྲངས་པས་ཟད་པ་མེད་དོ། །ཀྱེ་རྒྱལ་བའི་སྲས།
དེ་བཞིན་དུ་བྱང་ཆུབ་སེམས་དཔའི་ས་འོད་འཕྲོ་བ་ཅན་ལ་གནས་པའི་བྱང་ཆུབ་སེམས་དཔའ་ཡང་ལམ་དང་ལམ་མ་ཡིན་པའི་ཁྱད་པར་དང་། བྱེ་བྲག་ཤེས་པ་ཐམས་ཅད་ཀྱི་འབྱུང་གནས་ཡིན་ཏེ། ལམ་དང་ལམ་མ་ཡིན་པའི་ཁྱད་པར་དང་བྱེ་བྲག་
གི་རྒྱུས་ཡོངས་སུ་དྲིས་པ་ཡོངས་སུ་བསྟན་པས་ཟད་པར་མི་འགྱུར་རོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། རིའི་རྒྱལ་པོ་ཆེན་པོ་གཉའ་ཤིང་འཛིན་ནི་རིན་པོ་ཆེའི་རང་བཞིན་རྣམ་པར་དག་པ་གནོད་སྦྱིན་རྫུ་འཕྲུལ་ཆེན་པོ་དང་ལྡན་པ་རྣམས་ཀྱི་
འབྱུང་གནས་ཡིན་ཏེ། གནོད་སྦྱིན་རྫུ་འཕྲུལ་ཆེན་པོ་ཅན་བགྲངས་བས་ཟད་པ་མེད་དོ། །ཀྱེ་རྒྱལ་བའི་སྲས་དེ་བཞིན་དུ་བྱང་ཆུབ་སེམས་དཔའི་ས་ཤིན་ཏུ་རྒྱལ་བར་དཀའ་བ་ལ་གནས་པའི་བྱང་ཆུབ་སེམས་དཔའ་ཡང་མངོན་པར་ཤེས་པ་དང་།
རྫུ་འཕྲུལ་དང་རྣམ་པར་འཕྲུལ་པ་དང་། ཆོ་འཕྲུལ་ཐམས་ཅད་ཀྱི་འབྱུང་གནས་ཡིན་ཏེ། མངོན་པར་ཤེས་པ་དང་། རྫུ་འཕྲུལ་དང་རྣམ་པར་འཕྲུལ་པ་དང་། ཆོ་འཕྲུལ་ཡོངས་སུ་དྲིས་པ་བསྟན་པས་ཟད་པ་མེད་དོ། །ཀྱེ་རྒྱལ་བའི་སྲས་འདི་ལྟ་སྟེ་

དཔེར་ན། རིའི་རྒྱལ་པོ་ཆེན་པོ་རྟ་རྣ་རི་ནི་རིན་པོ་ཆེའི་རང་བཞིན་རྣམ་པར་དག་པ། ཤིང་ཏོག་གི་རྣམ་པ་ཐམས་ཅད་ཀྱི་འབྱུང་གནས་ཏེ། ཤིང་ཏོག་གི་རྣམ་པ་སྣ་ཚོགས་ཐམས་ཅད་བླངས་པས་ཟད་པར་མི་འགྱུར་རོ། །ཀྱེ་རྒྱལ་
བའི་སྲས། དེ་བཞིན་དུ་བྱང་ཆུབ་སེམས་དཔའི། ས་མངོན་སུམ་ལ་གནས་པའི། བྱང་ཆུབ་སེམས་དཔའ་ཡང་རྟེན་ཅིང་འབྲེལ་པར་འབྱུང་བ་ལ་འཇུག་པ་ཤིན་ཏུ་བསྟན་པའི་འབྱུང་གནས་ཡིན་ཏེ། ཉན་ཐོས་ཀྱི་འབྲས་བུ་མངོན་པར་
ཁོང་དུ་ཆུད་པར་བྱ་བ་ཡོངས་སུ་དྲིས་པ་བསྟན་པས་ཟད་པ་མེད་དོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། རིའི་རྒྱལ་པོ་ཆེན་པོ་ས་འཛིན་ནི་རིན་པོ་ཆེའི་རང་བཞིན་རྣམ་པར་དག་པ། ཀླུ་རྫུ་འཕྲུལ་ཆེན་པོ་དང་ལྡན་པ་རྣམས་ཀྱི་འབྱུང་གནས་ཏེ།
ཀླུ་རྫུ་འཕྲུལ་ཆེན་པོ་ཅན་བགྲངས་པས་ཟད་པ་མེད་དོ། །ཀྱེ་རྒྱལ་བའི་སྲས་དེ་བཞིན་དུ། བྱང་ཆུབ་སེམས་དཔའི་ས་རིང་དུ་སོང་བ་ལ་གནས་པའི་བྱང་ཆུབ་སེམས་དཔའ་ཡང་ཐབས་དང་ཤེས་རབ་ཤིན་ཏུ་བསྟན་པའི་འབྱུང་གནས་ཡིན་ཏེ། རང་
སངས་རྒྱས་ཀྱི་འབྲས་བུ་མངོན་པར་ཁོང་དུ་ཆུད་པར་བྱ་བ་ཡོངས་སུ་དྲིས་པ། བསྟན་པས་ཟད་པ་མེད་དོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། རིའི་རྒྱལ་པོ་ཆེན་པོ་ཁོར་ཡུག་ནི་རིན་པོ་ཆེ་ཆེན་པོའི་རང་བཞིན་རྣམ་པར་དག་པ་དབང་དུ་གྱུར་པ་
རྣམས་ཀྱི་འབྱུང་གནས་ཡིན་ཏེ། དབང་དུ་གྱུར་པ་བགྲངས་པས་ཟད་པ་མེད་དོ། །ཀྱེ་རྒྱལ་བའི་སྲས་དེ་བཞིན་དུ་བྱང་ཆུབ་སེམས་དཔའི་ས་མི་གཡོ་བ་ལ་གནས་པའི་བྱང་ཆུབ་སེམས་དཔའ་ཡང་། བྱང་ཆུབ་སེམས་དཔའི་དབང་མངོན་པར་བསྒྲུབ་པ། ཡོངས་
སུ་དྲིས་པ་ཤིན་ཏུ་བསྟན་པའི་འབྱུང་གནས་ཡིན་ཏེ། འཇིག་རྟེན་གྱི་ཁམས་རྣམ་པར་ཕྱེ་བ་ཡོངས་སུ་དྲིས་པ་བསྟན་པས་ཟད་པ་མེད་དོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། རིའི་རྒྱལ་པོ་དཔལ་དང་ལྡན་པ་ནི་རིན་པོ་ཆེའི་རང་བཞིན་རྣམ་པར་དག་

པ་ལྷ་མ་ཡིན་རྫུ་འཕྲུལ་ཆེན་པོ་དང་ལྡན་པ་རྣམས་ཀྱི་འབྱུང་གནས་ཡིན་ཏེ། ལྷ་མ་ཡིན་རྫུ་འཕྲུལ་ཆེན་པོ་ཅན་བགྲངས་པས་ཟད་པ་མེད་དོ། །ཀྱེ་རྒྱལ་བའི་སྲས་དེ་བཞིན་དུ་བྱང་ཆུབ་སེམས་དཔའི་ས་ལེགས་པའི་བློ་གྲོས་ལ་གནས་པའི་བྱང་ཆུབ་སེམས་
དཔའ་ཡང་སེམས་ཅན་འབྱུང་བ་དང་། འཇིག་པ་ཤེས་པའི་རྒྱུད་ཐམས་ཅད་ཀྱི་འབྱུང་གནས་ཡིན་ཏེ། འགྲོ་བ་ཐམས་ཅད་འབྱུང་བ་ཡོངས་སུ་དྲིས་པ་བསྟན་པས་ཟད་པ་མེད་དོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། རིའི་རྒྱལ་པོ་ཆེན་པོ་རི་རབ་ནི་
རིན་པོ་ཆེའི་རང་བཞིན་རྣམ་པར་དག་པ་ལྷ་རྫུ་འཕྲུལ་ཆེན་པོ་དང་ལྡན་པ་རྣམས་ཀྱི་འབྱུང་གནས་ཡིན་ཏེ། ལྷ་རྫུ་འཕྲུལ་ཆེན་པོ་ཅན་བགྲངས་པས་ཟད་པ་མེད་དོ། །ཀྱེ་རྒྱལ་བའི་སྲས་དེ་བཞིན་དུ་བྱང་ཆུབ་སེམས་དཔའི་ས་ཆོས་ཀྱི་སྤྲིན་ལ་གནས་པའི་བྱང་ཆུབ་
སེམས་དཔའ་ཡང་དེ་བཞིན་གཤེགས་པའི་སྟོབས་དང་། མྱི་འཇིགས་པ་དང་། སངས་རྒྱས་ཀྱི་ཆོས་མ་འདྲེས་པ་རྣམས་ཀྱི་འབྱུང་གནས་ཡིན་ཏེ། སངས་རྒྱས་ཀྱི་འཕྲིན་ལས་ཡང་དག་པར་བསྟན་པ་ཡོངས་སུ་དྲིས་པ་བསྟན་པས་ཟད་པ་མེད་དོ། །ཀྱེ་རྒྱལ་བའི་སྲས་
ཇི་ལྟར་རིན་པོ་ཆེའི་རི་ཆེན་པོ་དེ་དག་རྒྱ་མཚོ་ཆེན་པོ་ལས་བྱུང་ཞིང་རྒྱ་མཚོ་ཆེན་པོ་ལས་སྨོས་པ་དེ་བཞིན་དུ། ཀྱེ་རྒྱལ་བའི་སྲས་བྱང་ཆུབ་སེམས་དཔའི་ས་བཅུ་པོ་འདི་དག་ཀྱང་ཐམས་ཅད་མཁྱེན་པ་ཉིད་ལས་བྱུང་ངོ་། །ཐམས་ཅད་མཁྱེན་པ་ཉིད་ལས་སྨོས་པའོ། །ཀྱེ་རྒྱལ་བའི་
སྲས་འདི་ལྟ་སྟེ་དཔེར་ན། རྒྱ་མཚོ་ཆེན་པོ་ནི་རྣམ་པ་བཅུས་མི་འཕྲོགས་པའི་ཕྱིར་རྒྱ་མཚོའི་གྲངས་སུ་འགྲོ་སྟེ། བཅུ་གང་ཞེ་ན་འདི་ལྟ་སྟེ། རིམ་གྱིས་གཞོལ་བ་དང་། ཤི་བའི་རོ་དང་མྱི་འགོགས་པ་དང་། ཆུ་གཞན་གྱི་གྲངས་ཡོངས་སུ་སྤངས་
པ་དང་། རོ་གཅིག་པ་དང་། རིན་པོ་ཆེ་མང་བ་དང་། ཟབ་ཅིང་གཏིང་རིང་བ་དང་། ཡངས་ཤིང་ཚད་མེད་པ་དང་། འབྱུང་བོ་མང་པོའི་གནས་སུ་གྱུར་པ་དང་། དབྲེས་ཀྱི་ཚུལ་ལས་མི་འདའ་བ་དང་། སྤྲིན་ཆེན་པོའི་ཆར་ཐམས་ཅད་ཡོངས་སུ་

འཛིན་པས་མི་ངོམས་པའོ། །ཀྱེ་རྒྱལ་བའི་སྲས། དེ་བཞིན་དུ་བྱང་ཆུབ་སེམས་དཔའ་ཡང་སྤྱོད་པའི་རྣམ་པ་བཅུས་མི་འཕྲོགས་པའི་གྲངས་སུ་འགྲོའོ། །བཅུ་གང་ཞེ་ན་འདི་ལྟ་སྟེ། བྱང་ཆུབ་སེམས་དཔའི་ས་རབ་ཏུ་
དགའ་བ་ལ་སྨོན་ལམ་ཆེན་པོ་རིམ་གྱིས་མངོན་པར་བསྒྲུབས་པས་གཞོལ་བ་དང་བྱང་ཆུབ་སེམས་དཔའི་ས་དྲི་མ་དང་བྲལ་བ་ལ་ཚུལ་ཁྲིམས་ངན་པའི་རོ་དང་མི་འགྲོགས་པ་དང་། བྱང་ཆུབ་སེམས་དཔའི་ས་འོད་བྱེད་པ་ལ་འཇིག་རྟེན་པ་རྣམ་པར་
གདགས་པའི་གྲངས་ཡོངས་སུ་སྤངས་པ་དང་། བྱང་ཆུབ་སེམས་དཔའི་ས་འོད་འཕྲོ་བ་ཅན་ལ། སངས་རྒྱས་ལ་མོས་པ་མི་ཕྱེད་པའི་རོ་གཅིག་པ་དང་། བྱང་ཆུབ་སེམས་དཔའི་ས་ཤིན་ཏུ་རྒྱལ་བར་དཀའ་བ་ལ་ཐབས་དང་མངོན་པར་ཤེས་པ་ཚད་
མེད་པས་འཇིག་རྟེན་གྱི་བྱ་བ་མངོན་པར་བསྒྲུབས་པའི་རིན་པོ་ཆེ་མང་བ་དང་། བྱང་ཆུབ་སེམས་དཔའི་ས་མངོན་སུམ་ལ་རྟེན་ཅིང་འབྲེལ་པར་འབྱུང་བ་རབ་ཏུ་བརྟགས་པས་ཤིན་ཏུ་ཟབ་པ་དང་། བྱང་ཆུབ་སེམས་དཔའི་ས་རིང་དུ་སོང་བ་ལ་བློ་
དང་རྣམ་པར་འབྱེད་པ་དང་། མཁས་པ་ཡངས་ཤིང་ཚད་མེད་པ་དང་། བྱང་ཆུབ་སེམས་དཔའི་ས་མི་གཡོ་བ་ལ་རྒྱན་ཆེན་པོ་མངོན་པར་བསྒྲུབ་པ་ཡང་དག་པར་བསྟན་པའི་འབྱུང་པོ་མང་པོ་གནས་པ་དང་། བྱང་ཆུབ་སེམས་དཔའི་ས་ལེགས་པའི་
བློ་གྲོས་ལ་རྣམ་པར་ཐར་པ་ཐབ་མོ་དང་། འགྲོ་བ་ཐམས་ཅད་ཀྱི་སྤྱོད་པ་ཇི་ལྟ་བ་བཞིན་དུ་ཁོང་དུ་ཆུད་པའི་ཚུལ་གྱི་དབྲེས་ལས་མི་འདའ་བ་དང་། བྱང་ཆུབ་སེམས་དཔའི་ས་ཆོས་ཀྱི་སྤྲིན་ལ་དེ་བཞིན་གཤེགས་པ་ཐམས་ཅད་ཀྱི་ཆོས་སྣང་བའི་སྤྲིན་ཆེན་པོའི་
ཆར་ཡང་དག་པར་བཟུང་བས། མི་ངོམས་པའོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། ནོར་བུ་རིན་པོ་ཆེ་ནི་རིན་པོ་ཆེའི་མཁན་པོ་མཁས་པས་ཤིན་ཏུ་བསྲེགས་ཤིན་ཏུ་བསྒྲུབས་ཤིན་ཏུ་སྦྱངས་ཤིན་ཏུ་ཡང་དག་པར་བྱས་ལེགས་པར་ཕུག །

རིན་པོ་ཆེའི་སྲད་བུས་ལེགས་པར་བཏགས། རིན་པོ་ཆེའི་བཻ་ཌཱུརྱའི་རྩ་བའི་རྒྱལ་མཚན་གྱི་རྩེ་མོ་ལ་བཞག་སྟེ། འོད་ཐམས་ཅད་འབྱུང་བར་འགྱུར་ལ་རྒྱལ་པོས་བསྔགས་པར་གྱུར་ཏེ། རིན་པོ་ཆེའི་རིགས་བཅུ་ལས་འདས་ཤིང་ཤིན་ཏུ་འཕགས་
པར་གྱུར་པ་དེའི་ཚེ། སེམས་ཅན་ཐམས་ཅད་ལ་རིན་པོ་ཆེས་ཕན་གདགས་པའི་དོན་དུ་ཉེ་བར་གནས་པ་ཡིན། ཀྱེ་རྒྱལ་བའི་སྲས་དེ་བཞིན་དུ་བྱང་ཆུབ་སེམས་དཔའི་ཐམས་ཅད་མཁྱེན་པ་ཉིད་ཀྱི་སེམས་རིན་པོ་ཆེ་བསྐྱེད་པ་ཡང་སྦྱངས་པའི་ཡོན་ཏན་གྱི་སྡོམ་པ་
དང་ཚུལ་ཁྲིམས་དང་བརྟུལ་ཤུགས་དང་དཀའ་ཐུབ་ཀྱིས་ཤིན་ཏུ་བསྲེགས། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པས་ཤིན་ཏུ་བསྒྲུབས། ལམ་གྱི་ཡན་ལག་གི་རྣམ་པས་ཤིན་ཏུ་སྦྱངས།
ཐབས་དང་མངོན་པར་ཤེས་པས་ཤིན་ཏུ་དག་པར་བྱས། རྟེན་ཅིང་འབྲེལ་པར་འབྱུང་བས་ཤིན་ཏུ་ཕུག །ཐབས་དང་ཤེས་རབ་རིན་པོ་ཆེ་སྣ་ཚོགས་ཀྱི་སྲད་བུས་ཤིན་ཏུ་བཏགས། དབང་གི་རིན་པོ་ཆེ་བཻ་ཌཱུཪྻའི་ཡུ་བའི་རྒྱལ་མཚན་གྱི་རྩེ་མོ་ལ་
བཞག །སེམས་ཅན་གྱི་སྤྱོད་པ་རབ་ཏུ་བརྟགས་པ་དང་། ཐོས་པའི་ཡེ་ཤེས་ཀྱི་འོད་རབ་ཏུ་འབྱུང་བར་གྱུར་ཏེ། ཆོས་ཀྱི་རྒྱལ་པོ་དེ་བཞིན་གཤེགས་པས་ཡང་དག་པར་རྫོགས་པའི་སངས་རྒྱས་ཀྱི་མངོན་པར་དབང་བསྐུར་བས་དབང་བསྐུར་བར་གྱུར་པ་
དེའི་ཚེ། སེམས་ཅན་ཐམས་ཅད་ལ་སངས་རྒྱས་ཀྱི་ཕྲིན་ལས་རིན་པོ་ཆེ་ཐམས་ཅད་ཀྱིས་ཡང་དག་པར་ཕན་གདགས་པའི་དོན་དུ་ཉེ་བར་གནས་པ་ཡིན་ཏེ། དེའི་ཚེ་ཐམས་ཅད་མཁྱེན་པ་ཞེས་ཀྱང་བྱའོ། །ཀྱེ་རྒྱལ་བའི་སྲས་བྱང་ཆུབ་སེམས་
པས་སྤྱོད་པ་ཡང་དག་པར་བསྒྲུབ་ཅིང་། རྣམ་པ་ཐམས་ཅད་མཁྱེན་པའི་ཡེ་ཤེས་དང་ཡོན་ཏན་ཡང་དག་པར་བསྩགས་པའི་ཆོས་ཀྱི་སྒོའི་རྒྱུད་འདི་ནི་སེམས་ཅན་དགེ་བའི་རྩ་བ་མ་བསྐྱེད་པ་རྣམས་ཀྱི་རྣ་ལམ་དུ་གྲག་པར་མི་འགྱུར་རོ། །བྱང་ཆུབ་

སེམས་དཔའ་རྣམ་པར་གྲོལ་བའི་ཟླ་བས་སྨྲས་པ། ཀྱེ་རྒྱལ་བའི་སྲས་འོ་ན་རྣམ་པ་ཐམས་ཅད་དུ་ཐམས་ཅད་མཁྱེན་པའི་ཡེ་ཤེས་དང་ཡོན་ཏན་ཡང་དག་པར་བསྩགས་པའི་ཆོས་ཀྱི་སྒོའི་རྒྱུད་འདི་གང་གི་རྣ་ལམ་དུ་གྲག་པར་གྱུར་པ་དེ་དག་བསོད་ནམས་
ཀྱི་ཚོགས་ཇི་ཙམ་ཞིག་དང་ལྡན་པར་འགྱུར། བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ་རྒྱལ་བའི་སྲས་ཐམས་ཅད་མཁྱེན་པའི་ཡེ་ཤེས་ཀྱི་མཐུ་ཇི་ཙམ་པ་དེ་སྙེད་ཀྱི་བསོད་ནམས་ཀྱི་ཚོགས་ནི་ཐམས་ཅད་མཁྱེན་པ་ཉིད་དུ་སེམས་བསྐྱེད་ཅིང་བསྒྲུབ་
པར་དམིགས་པ་ལ་ཡོད་དེ། ཆོས་ཀྱི་སྒོའི་རྒྱུད་འདི་གྲག་ཅིང་མངོན་པར་གྱུར་པའི་བསོད་ནམས་ཀྱི་ཚོགས་ཀྱང་དེ་ཙམ་དུ་ཤེས་པར་བྱའོ། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་རྣམ་པ་ཐམས་ཅད་དུ་ཐམས་ཅད་མཁྱེན་པའི་ཡེ་ཤེས་དང་ཡོན་ཏན་ཡང་དག་པར་བསྩགས་པའི་
ཆོས་ཀྱི་རྒྱུད་འདི་ནི་བྱང་ཆུབ་སེམས་དཔའ་མ་ཡིན་པས་མཉན་པ་འམ། མོས་པར་བྱ་བ་འམ། གཟུང་བར་ཡང་མི་ནུས་ན་བསྒོམ་པའི་རྣམ་པར་སྦྱོར་བས་བརྩོན་པར་མི་ནུས་པ་ལྟ་ཅི་སྨོས། དེ་བས་ན་ཀྱེ་རྒྱལ་བའི་སྲས་གང་གིས་ཆོས་ཀྱི་སྒོའི་རྒྱུད་འདི་ཐོས་ཏེ་ཐོས་ནས་
མོས་པར་བྱེད་པ་དང་། མོས་པར་བྱས་ཤིང་འཛིན་པ་དང་། བསྒོམ་པའི་རྣམ་པས་བརྩོན་པར་བྱེད་ན། སེམས་ཅན་དེ་དག་ནི་ཐམས་ཅད་མཁྱེན་པའི་ཡེ་ཤེས་ཀྱི་སྒོ་དང་ལྡན་པར་ཤེས་པར་བྱའོ། །དེ་ནས་དེའི་ཚེ་སངས་རྒྱས་ཀྱི་མཐུ་དང་ཆོས་ཉིད་ཐོབ་པས།
ཕྱོགས་བཅུར་འཇིག་རྟེན་གྱི་ཁམས་སངས་རྒྱས་ཀྱི་ཞིང་ཁྲག་ཁྲིག་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་རྣམ་པ་དྲུག་དང་ལྟས་ཆེན་པོ་བཅྭོ་བརྒྱད་དུ་གཡོས་སོ། །རབ་ཏུ་གཡོས་སོ། །ཀུན་ཏུ་གཡོས་སོ། །འགུལ་ཏོ་རབ་ཏུ་འགུལ་ཏོ། །ཀུན་ཏུ་འགུལ་ཏོ། །
ལྡེག་གོ་རབ་ཏུ་ལྡེག་གོ །ཀུན་ཏུ་ལྡེག་གོ །ཆེམ་ཆེམ་རབ་ཏུ་ཆེམ་ཆེམ། ཀུན་ཏུ་ཆེམ་ཆེམ་མོ། །འུར་འུར་རབ་ཏུ་འུར་འུར། ཀུན་ཏུ་འུར་འུར་རོ། །ཤིག་ཤིག་རབ་ཏུ་ཤིག་ཤིག །ཀུན་ཏུ་ཤིག་ཤིག་གོ །སངས་རྒྱས་ཀྱི་མཐུ་དང་ཆོས་ཉིད་རབ་ཏུ་ཐོབ་པས་

ལྷ་རྫས་ཀྱི་འཕྲེང་བའི་སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་གོས་ཀྱི་སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་རིན་པོ་ཆེའི་སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་གདུགས་ཀྱི་སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་རྒྱལ་མཚན་གྱི་
སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་བ་དན་གྱི་སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་རོལ་མོ་བརྡུང་བ་དང་། དཀྲོལ་བ་དང་གླུའི་དབྱངས་ཀྱི་སྤྲིན་གྱི་སྒྲ་མངོན་པར་སྒྲོག་གོ །ལྷ་རྫས་ལས་འདས་པའི་ཐམས་ཅད་མཁྱེན་པའི་ས་ལ་མངོན་པར་
བསྟོད་པའི་གླུའི་དབྱངས་ཀྱི་སྤྲིན་གྱི་སྒྲ་དབྱངས་མངོན་པར་སྒྲོག་གོ །ཇི་ལྟར་གླིང་བཞི་པའི་འཇིག་རྟེན་གྱི་ཁམས་འདི་གཞན་འཕྲུལ་དབང་བྱེད་ཀྱི་གནས་སུ་ལྷའི་རྒྱལ་པོ་དབང་བསྒྱུར་གྱི་གཞལ་མེད་ཁང་ནོར་བུ་རིན་པོ་ཆེའི་སྙིང་པོར་ཇི་ལྟ་བ་དེ་བཞིན་དུ་འཇིག་
རྟེན་གྱི་ཁམས་ཐམས་ཅད་དུ་ཡང་ཕྱོགས་བཅུ་རྒྱས་པར་གང་ཞིང་ཆོས་བསྟན་པ་འདི་ཡང་ཐམས་ཅད་དུ་བྱུང་བར་གྱུར་ཏོ། །སངས་རྒྱས་ཀྱི་མཐུས་ཕྱོགས་བཅུ་ནས་བྱང་ཆུབ་སེམས་དཔའ་སངས་རྒྱས་ཀྱི་ཞིང་ཁྲག་ཁྲིག་ཕྲག་བཅུའི་རྡུལ་ཤིན་ཏུ་
ཕྲ་བ་སྙེད་ཕྱོགས་བཅུ་རྒྱས་པར་བྱེད་ཅིང་ལྷགས་ཏེ་དེ་དག་ཕྱིན་ནས་ཀྱང་འདི་སྐད་ཅེས་ཟེར་རོ། །ཀྱེ་རྒྱལ་བའི་སྲས་དེ་ལྟར་ཁྱོད་ཀྱིས་བྱང་ཆུབ་སེམས་དཔའི་ཆོས་ཉིད་འདི་བརྗོད་པ་ལེགས་སོ་ལེགས་སོ། །ཀྱེ་རྒྱལ་བའི་སྲས་བདག་ཅག་ཀྱང་
རྡོ་རྗེའི་སྙིང་པོ་ཞེས་བྱ་བར་མིང་མཐུན་པ་ཤ་སྟག་སྟེ། འཇིག་རྟེན་གྱི་ཁམས་རྡོ་རྗེའི་དཔལ་ཞེས་བྱ་བ་ནས་དེ་བཞིན་གཤེགས་པ་མཚན་རྡོ་རྗེའི་རྒྱལ་མཚན་ཞེས་བྱ་བ་དག་གི་དྲུང་ནས་འདིར་ལྷགས་ཏེ། འཇིག་རྟེན་གྱི་ཁམས་དེ་དག་ཐམས་ཅད་ན་ཡང་
ཆོས་བསྟན་པ་འདི་ཉིད་སངས་རྒྱས་ཀྱི་མཐུས་འཁོར་གྱི་རྣམ་པ་འདི་འདྲ་བ་དག་ལ་ཚིག་འདི་དག་ཉིད་དང་ཡི་གེ་འདི་དག་ཉིད་དང་ཁོང་དུ་ཆུད་པར་བྱ་བ་འདི་དག་ཉིད་དང་། དོན་འདི་ཉིད་ལྷག་ཆད་མེད་པར་མངོན་པར་བརྗོད་དེ་འབྱུང་བར་གྱུར་ཏོ། །

ཀྱེ་རྒྱལ་བའི་སྲས་བདག་ཅག་ཀྱང་དབང་དུ་གྱུར་པ་ཤ་སྟག །སངས་རྒྱས་ཀྱི་མཐུས་འཁོར་འདིར་ཕྱིན་ཏོ། །ཀྱེ་རྒྱལ་བའི་སྲས་འཇིག་རྟེན་གྱི་ཁམས་འདིར་བདག་ཅག་ཇི་ལྟར་ཕྱིན་པ་དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་
ཐམས་ཅད་ཀྱི་གླིང་བཞི་པའི་འཇིག་རྟེན་གྱི་ཁམས་རེ་རེའི་གཞན་འཕྲུལ་དབང་བྱེད་ཀྱི་གནས་ཀྱི་ལྷའི་རྒྱལ་པོ་དབང་བསྒྱུར་གྱི་གཞལ་མེད་ཁང་ནོར་བུ་རིན་པོ་ཆེའི་སྙིང་པོར་ཡང་སངས་རྒྱས་ཀྱི་ཞིང་ཁྲག་ཁྲིག་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་བྱང་ཆུབ་སེམས་
དཔའ་རྣམས་ཕྱིན་པར་གྱུར་ཏོ། །དེ་ནས་བྱང་ཆུབ་སེམས་དཔའ་རྡོ་རྗེའི་སྙིང་པོས། ཕྱོགས་བཅུར་བལྟས་ཏེ་འཁོར་གྱི་དཀྱིལ་འཁོར་ཐམས་ཅད་ལ་བལྟས་ནས། ཆོས་ཀྱི་དབྱིངས་ལ་རྣམ་པར་བལྟ་བ་དང་། ཐམས་ཅད་མཁྱེན་པའི་ཡེ་ཤེས་ཀྱི་སེམས་
བསྐྱེད་པ་ཡང་དག་པར་བརྗོད་པ་དང་། བྱང་ཆུབ་སེམས་དཔའི་ཡུལ་ཡང་དག་པར་བསྟན་པ་དང་། སྤྱོད་པའི་སྟོབས་ཡོངས་སུ་སྦྱངས་པ་དང་། རྣམ་པ་ཐམས་ཅད་མཁྱེན་པ་ཡང་དག་པར་བསྒྲུབ་པ་བརྗོད་པ་དང་། འཇིག་རྟེན་གྱི་དྲི་མ་སེལ་བ་དང་།
ཐམས་ཅད་མཁྱེན་པའི་ཡེ་ཤེས་ཉེ་བར་བསྒྲུབ་པ་དང་། བསམ་གྱིས་མི་ཁྱབ་པའི་ཡེ་ཤེས་ཀྱི་རྒྱན་ཡོངས་སུ་བསྟན་པ་དང་། བྱང་ཆུབ་སེམས་དཔའ་ཐམས་ཅད་ཀྱི་ཡོན་ཏན་རབ་ཏུ་བརྗོད་པ་བྱེད་ཅིང་སའི་དོན་འདི་ཡང་བརྟག་པར་བྱ་བ་དང་། བསྟན་
པའི་ཕྱིར་སངས་རྒྱས་ཀྱི་མཐུས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཞི་དང་དུལ་དགའ་ཞི་ཞིང་དུལ་བའི་ཡིད་ལྡན་ལ། །ནམ་མཁའི་དབྱིངས་འདྲ་བར་སྣང་མཁའ་དང་མཚུངས་འདྲ་ཞིང་། །ཐ་བའི་དྲི་མ་རྣམ་སྦྱངས་ལམ་རྣམས་ཤེས་གནས་པའི་
བྱང་ཆུབ་སེམས་དཔའི་སྤྱོད་པའི་ཁྱད་པར་རབ་ལ་ཉོན། །བསྐལ་པ་བྱེ་བར་དགེ་བ་བརྒྱ་སྟོང་རབ་བསགས་ཤིང་། །སངས་རྒྱས་བརྒྱ་སྟོང་དྲང་སྲོང་ཆེན་པོ་མཆོད་བྱས་ཏེ། །དབང་བསྒྱུར་རྣམས་དང་རང་རྒྱལ་མཐའ་ཡས་མཆོད་བྱས་ནས། །འགྲོ་བ་ཀུན་ལ་

ཕན་ཕྱིར་བྱང་ཆུབ་སེམས་སྐྱེའོ། །བརྟུལ་ཞུགས་དཀའ་ཐུབ་དཀའ་སྤྱད་དུལ་བཟོད་ལྡན་གྱུར་ལ། །ཁྲེལ་ཡོད་དཔལ་གྱིས་སྤྱོད་ལྡན་ཡེ་ཤེས་དགེ་འཕགས་ཤིང་། །བློ་གྲོས་རིག་ཡངས་སངས་རྒྱས་ཡེ་ཤེས་སེམས་ལྡན་གྱི། །བྱང་ཆུབ་སེམས་རབ་རྒྱལ་
བའི་སྟོབས་དང་མཉམ་འདྲ་སྐྱེ། །དུས་གསུམ་རྒྱལ་བ་ཇི་སྙེད་མཆོད་རབ་མཆོད་པའི་ཕྱིར། །ནམ་མཁའི་དབྱིངས་ཚད་ཞིང་རྣམས་ཐམས་ཅད་ཡོངས་སུ་སྦྱོང་། །ཆོས་རྣམས་ཐམས་ཅད་ཇི་སྙེད་དེ་དག་མཉམ་རྟོགས་པས། །འགྲོ་བ་དགྲོལ་བའི་དོན་དུ་
བྱང་ཆུབ་སེམས་སྐྱེའོ། །གཞལ་ཡས་སེམས་སྐྱེས་ས་མཆོག་རབ་ཏུ་ཐོབ་གྱུར་ནས། །སྡིག་པ་ཐམས་ཅད་བསལ་ཕྱིར་རྡུལ་མེད་རབ་ཏུ་དགའ། །སྨོན་ལམ་སྟོབས་དཔྱད་དཀར་ཆོས་ཡང་དག་བསྩགས་བྱས་ནས། །སྙིང་རྗེ་བརྩེ་ལྡན་ས་ཡི་
གོང་མ་ཡོངས་སུ་གནོན། །འགྲོ་ཕྱིར་བྱམས་སེམས་ཚུལ་ཁྲིམས་ཐོས་དང་ཡོན་ཏན་ལྡན། །དྲི་མེད་དྲི་བྲལ་རང་བཞིན་ཡང་དག་བསམ་པ་ཡིས། །འཇིག་རྟེན་ཐམས་ཅད་མེ་གསུམ་འབར་བར་མཐོང་གྱུར་ནས། །གསུམ་པ་རྣམ་ཡངས་བློ་
ཡིས་འགྲོ་བའི་དོན་དུ་གནོན། །སྡུག་བསྔལ་མི་རྟག་ནད་པ་ཟུག་རྔུས་མི་བདེ་བའི། །ཁམས་གསུམ་རྟག་ཏུ་སྡུག་བསྔལ་བརྒྱ་ཡི་མེ་འབར་བས། །འདུས་བྱས་ཉེས་མཐོང་རྒྱལ་བའི་ལེགས་པ་མངོན་མོས་ཤིང་། །ཡེ་ཤེས་འོད་འཕྲོ་ཡངས་ལྡན་འོད་
འཕྲོ་ཡོད་པ་གནོན། །དྲན་དང་བློ་ལྡན་ལམ་གྱི་ཡེ་ཤེས་ཐོབ་གྱུར་ཅིང་། །ས་མཆོག་དེ་ལ་སངས་རྒྱས་བརྒྱ་སྟོང་བསྙེན་བཀུར་ནས། །མི་ཡི་གཙོ་བོའི་ཡོན་ཏན་རྟག་ཏུ་དྲན་བྱེད་ཅིང་། །འགྲོ་བ་ཀུན་གྱིས་ཐུབ་དཀའ་རྒྱལ་བར་དཀའ་བ་གནོན། །
ཡེ་ཤེས་བློ་གྲོས་ཐབས་དང་ཤེས་རབ་བློ་དཔྱོད་པས། །འགྲོ་དོན་མཐའ་ཡས་སྣ་ཚོགས་བྱ་བ་བསྟེན་བྱས་ཤིང་། །སྟོབས་བཅུ་མཆོད་པ་སེམས་ཅན་དོན་རྣམས་བསྒྲུབས་བྱས་ཏེ། །མི་སྐྱེ་མངོན་སུམ་མཐའ་ཡས་ས་དྲུག་ཡོངས་སུ་གནོན། །འཇིག་

རྟེན་ཀུན་ཏུ་འགྲོ་བས་ཤེས་དཀའ་སྤྱོད་བྱེད་ཅིང་། །བདག་བྲལ་བྱེད་མེད་ཡོད་དང་མེད་པ་རྣམ་བསྩལ་བའི། །རང་བཞིན་སྟོང་ཆོས་ཡན་ལག་བཅུ་གཉིས་རབ་འབྱུང་ཞེས། །ཕྲ་ཞིང་རྣོ་བའི་སེམས་ལྡན་བདུན་པ་ཡོངས་སུ་གནོན། །
ཐབས་དང་ཤེས་རབ་སེམས་ཡངས་རབ་ཏུ་ཐོབ་གྱུར་ཅིང་། །རིང་དུ་སོང་བ་གདུལ་དཀའ་རིང་དུ་སོང་བ་གནོན། །རང་བཞིན་དུལ་ཞིང་ཞི་ཕྱིར་དུ་མའི་སེམས་སྤངས་ཏེ། །དེ་ནས་ནམ་མཁའ་འདྲ་བའི་མི་གཡོ་ཡོངས་སུ་གནོན། །དེ་ལ་མཁས་པའི་ཡེ་
ཤེས་ལས་རྣམས་སྣ་ཚོགས་ཕྱིར། །ཞི་བ་དེ་ལས་བསླང་ཞིང་མི་ཡི་མཆོག་ཏུ་བསྣམས། །དབང་བཅུ་ལྡན་ཞིང་འཇིག་རྟེན་ཡང་དག་ཉིད་དཔྱད་པའི། །རང་བཞིན་ཆེན་པོ་འགྲོ་ཕྱིར་ལེགས་པའི་བློ་གྲོས་གནོན། །འདི་ལ་ཤིན་ཏུ་ཕྲ་བར་
འཇིག་རྟེན་ཀུན་དཔྱད་ཅིང་། །སེམས་ཅན་ཐིབས་པོའི་སྤྱོད་ལྡན་ཉོན་མོངས་ལས་དཔྱད་དེ། །དེ་དག་གདུལ་བའི་སྤྱོད་པས་ཡོན་ཏན་མང་པོ་གནོན། །བདེ་གཤེགས་མཛོད་ཐོབ་དོན་གྱི་དམ་པ་རབ་ཏུ་སྟོན། །དཀར་ཆོས་རིམ་གྱིས་དེ་
འདྲའི་སྤྱོད་དང་ལྡན་གྱུར་པས། །ས་དགུའི་བར་དུ་བསོད་ནམས་ཡེ་ཤེས་ཚོགས་ཐོབ་ཅིང་། །རྒྱལ་བ་རྣམས་ཀྱི་སྟོབས་མཆོག་དོན་དམ་མངོན་འདོད་པ། །ཡེ་ཤེས་ཡོན་ཏན་དབང་བསྐུར་སངས་རྒྱས་ཀུན་ལས་འཐོབ། །བརྒྱ་སྟོང་ཕྲག་བཅུའི་ཏིང་
འཛིན་གྲངས་མེད་གང་ཡོད་པ། །སྤྱོད་ཡུལ་ཤེས་པ་ཆེ་ཉིད་ཤེས་ཡངས་ཐོབ་གྱུར་ནས། །དེ་ཡི་རྗེས་ལ་ཐམས་ཅད་མཁྱེན་པར་དབང་བསྐུར་འཐོབ། །ཡུལ་ཡངས་ཏིང་འཛིན་དེ་དག་ཐོས་པ་དེ་མི་སྒུལ། །གང་ཚེ་དེ་ཡིས་ཀུན་མཁྱེན་དབང་བསྐུར་ཐོབ་པའི་
ཚེ། །པད་མོ་རྒྱ་ཆེན་རིན་ཆེན་ཀུན་གྱིས་བརྒྱན་པ་འབྱུང་། །དེ་ཡི་ཚུལ་མཐུན་ལུས་ཀྱི་དབུས་སུ་གནས་པར་འགྱུར། །རྒྱལ་བའི་སྲས་ཀྱིས་ཡོངས་བསྐོར་དེ་ལ་ལྟ་ཞིང་གནས། །དེ་ཡི་འོད་གཟེར་ཁྲག་ཁྲིག་མཐའ་ཡས་སྟོང་ཕྲག་མང་། །ཕྱོགས་

བཅུའི་འགྲོ་བའི་སྡུག་བསྔལ་ཀུན་ཀྱང་ཞི་བར་བྱེད། །མགོ་ཡི་གཙུག་ནས་འོད་གཟེར་བྱེ་བ་སྟོང་བྱུང་ཞིང་། །ཕྱོགས་རྣམས་ཀུན་གྱི་མི་ཡི་གཙོ་བོའི་འཁོར་དུ་རྒྱུ། །སྟེང་གི་ནམ་མཁའི་དབྱིངས་ལ་འོད་གཟེར་དྲ་བ་གནས། །སངས་རྒྱས་མཆོད་ཕྱིར་བརྩོན་
པར་རྒྱལ་བའི་ཞབས་སུ་འདོང་། །དེའི་ཚེ་རྒྱལ་བ་རྣམས་དང་རྒྱལ་སྲས་རྣམས་ཀྱིས་ཀྱང་། །ཆོས་རབ་དོན་དུ་རྒྱལ་སྲས་དབང་བསྐུར་ཐོབ་པར་མཁྱེན། །མཆོད་པའི་དོན་དུ་རྒྱལ་སྲས་མཐའ་ཡས་ཀུན་ཀྱང་འོང་། །དེ་ཆོ་ཀུན་མཁྱེན་དབང་བསྐུར་མི་མཆོག་
མཛོད་སྤུ་ནས། །དབང་བསྐུར་འོད་གཟེར་དམ་པ་མང་པོ་འབྱུང་བར་འགྱུར། །འོད་གཟེར་མཆོག་གིས་བསྐོར་ཞིང་སྤྱི་བོའི་གཙུག་ཏུ་ནུབ། །གང་ཚེ་རྒྱལ་མཆོག་བུ་ཡི་ཐུ་བོ་སྲིད་མཆོག་ལ། །དབང་བསྐུར་བཞིན་དུ་སངས་རྒྱས་ཀུན་གྱིས་དབང་བསྐུར་ཚེ། །
ཕྱོགས་བཅུའི་འཇིག་རྟེན་ཐམས་ཅད་ཀུན་ནས་གཡོ་བར་འགྱུར། །མནར་མེད་བར་གྱི་སྡུག་བསྔལ་དེ་ཚེ་ཞི་ཞིང་འདུག །གང་ཚེ་ཀུན་མཁྱེན་དབང་གིས་མངོན་པར་དབང་བསྐུར་བ། །དེ་ཕྱིར་མཁས་པས་ཆོས་སྤྲིན་ས་མཆོག་ཐོབ་ཅེས་བྱ། །མཁས་པ་འདི་ལ་གནས་
པའི་ཤེས་རྒྱུད་ཚད་མེད་དེ། །ས་རབ་འདི་ལ་གནས་པ་འགྲོ་ཀུན་གཙོ་ཡིན་ནོ། །གཟུགས་དང་གཟུགས་མེད་དེ་བཞིན་འདོད་པའི་ཁམས་ཡངས་དང་། །སེམས་ཅན་ཁམས་དང་ཞིང་དང་ཆོས་ཁམས་ཡངས་པ་དང་། །གྲངས་དང་གྲངས་མེད་ནམ་
མཁའི་ཁམས་ཀྱི་བར་དུ་སྟེ། །ཆོས་དབྱིངས་ཡངས་པ་ཐམས་ཅད་མ་ནོར་ཁོང་དུ་ཆུད། །འདི་ལ་གནས་པ་མཐུ་ཆེན་སྤྲུལ་པའི་ལས་ཀུན་དང་། །དེ་བཞིན་བྱིན་རླབས་རྒྱལ་བའི་ཡེ་ཤེས་ཕྲ་བ་དང་། །མི་མཆོག་གསང་བ་བསྐལ་བའི་གྲངས་རྣམས་
ཤེས་བྱ་དང་། །སྐྲ་རྩེ་གཅིག་ཏུ་འཇིག་རྟེན་ཁམས་རྣམས་གཟུད་པ་དང་། །མི་ཡི་གཙོ་བོ་འབྱུང་དང་སྐུ་ཚེ་འཚང་རྒྱ་དང་། །འཁོར་ལོ་དམ་པ་བསྐོར་དང་མྱ་ངན་འདའ་བའི་རྣམས། །ཐམས་ཅད་རབ་ཤེས་གོང་དུ་རྣམ་ཐར་ཞི་བ་དག །སྔན་ཆད་མ་ཐོབ་ཀུན་

ཀྱང་དེ་ཚེ་རབ་ཏུ་འཐོབ། །འདི་ལ་གནས་པའི་མཐུ་ཆེན་རྒྱལ་བའི་ཆོས་ཀྱི་སྤྲིན། །ཐམས་ཅད་ཁོང་དུ་ཆུད་བྱེད་དྲན་པས་ཀུན་ཀྱང་འཛིན། །ཀླུ་རྣམས་ཀུན་གྱི་སྤྲིན་ཆར་རྒྱ་མཚོ་འཛིན་པ་ལྟར། །དེ་བཞིན་རྒྱལ་བའི་ཆོས་
སྤྲིན་ཆར་ཆེན་ཀུན་ཀྱང་འཛིན། །རྒྱལ་བ་གཅིག་ལས་ཆོས་གང་མཐུ་ཆེན་དེས་ཐོབ་པ། །དེ་ལ་ཕྱོགས་བཅུ་མཐའ་ཡས་ཞིང་གི་སེམས་ཅན་རྣམས། །ཐམས་ཅད་བདེ་གཤེགས་ཉན་ཐོས་ཐོས་པ་འཛིན་གྱུར་ཀྱང་། །བྱང་ཆུབ་སེམས་དཔའ་ཐོས་པའི་གྲངས་ཆར་
ཉེར་མི་འགྲོ། །ཡེ་ཤེས་སྤྱོད་པའི་སྟོབས་ཀྱིས་སྔན་ཅད་སྤྱད་པའི་མཐུས། །སྐད་ཅིག་ཡུད་ཙམ་གཅིག་ཏུ་ཁྲག་ཁྲིག་ཞིང་བཀང་ཞིང་། །བདུད་རྩིའི་ཆར་འབེབས་ཉོན་མོངས་ཀུན་ཀྱང་ཞི་བར་བྱེད། །དེ་ཕྱིར་རྒྱལ་བས་འདི་མིང་ཆོས་ཀྱི་སྤྲིན་ཅེས་
གསུངས། །འདི་ནས་མཐུ་ཆེན་ལྷ་ཡི་འཇིག་རྟེན་གཙོར་གྱུར་པའི། །ཕྱོགས་རྣམས་ཀུན་ཏུ་མི་ཡི་གཙོ་བོའི་ཡུལ་ཡང་སྟོན། །རྣམ་འཕྲུལ་ཁྲག་ཁྲིག་སྟོང་ཕྲག་དུ་མ་ཡང་སྟོན་ཏེ། །བྱང་ཆུབ་སྤྱོད་པ་དེ་སེམས་འགྲོ་བ་མྱོས་པར་འགྱུར། །
མཁས་པ་ལེགས་ལྡན་འདི་གནས་གོམ་པ་བོར་བ་ཙམ། །ས་དགུའི་བར་དུ་གནས་པས་ཤེས་པར་མི་ནུས་ན། །སེམས་ཅན་གཞན་གྱིས་ཤེས་པར་མི་འགྱུར་སྨོས་ཅི་དགོས། །དུས་གསུམ་ཉན་ཐོས་རང་རྒྱལ་ཀུན་གྱིས་དེ་བཞིན་ནོ། །འདི་
གནས་ཐམས་ཅད་མཁྱེན་པར་འགྲོ་བ་ཀུན་ལ་སྟོན། །ཤེས་པས་དུས་གསུམ་ཀུན་ཏུ་ཐོགས་མེད་ཞི་ཆོས་ཅན། །ཞིང་རྣམས་ཀུན་ཏུ་རྒྱས་བཀང་ཆོས་རྣམས་ཀུན་གྱི་བར། །རྒྱལ་བ་ཀུན་གྱི་ཡོན་ཏན་བརྗོད་ཅིང་སྟོན་པ་བྱེད། །མཁས་པ་འདི་ལ་
གནས་པ་སངས་རྒྱས་མཆོད་བྱེད་ཅིང་། །ཕྱོགས་རྣམས་ཀུན་ཏུ་ཞིང་དང་ཆོས་ཀྱི་དབྱིངས་བཀང་སྟེ། །རྒྱལ་བ་མངོན་དུ་མཆོད་པས་མཆོད་བྱེད་འཕྲོགས་པ་མེད། །ཡོན་ཏན་ཀུན་ལྡན་ས་ཡི་ལྷ་ཡི་ལྷ་ཞེས་བྱ། །མཁས་པ་འདི་གནས་ཤེས་

རབ་སྣང་བས་འགྲོ་ཀུན་གྱི། །མུན་པ་ཀུན་བསྩལ་ཆོས་ཀྱི་ཚུལ་ཡང་རབ་ཏུ་སྟོན། །དབང་ཕྱུག་དམ་པའི་མཐུ་ཡིས་འགྲོ་བའི་འདོད་ཆགས་སེལ། །དེ་བས་རྒྱལ་སྲས་ཉོན་མོངས་སེལ་ལ་མཁས་ཞེས་བྱ། །འདི་ལ་གནས་པ་དེ་དག་ཁམས་གསུམ་
དབང་ཕྱུག་འགྱུར། །ཡེ་ཤེས་ཚུལ་ཤེས་ཐེག་པ་གསུམ་པོ་སྟོན་ལ་མཁས། །སྐད་ཅིག་ཡུད་ཙམ་ཅིག་གསི་ཏིང་འཛིན་གཅིག་མིན་ཐོབ། །ཕྱོགས་བཅུ་ཀུན་ཏུ་རྒྱལ་བའི་དམ་པ་གཅིག་མིན་སྟོན། །འདི་ནི་བདག་གིས་རྒྱལ་སྲས་ས་རྣམས་མདོར་
བསྟན་གྱི། །རྒྱ་ཆེར་བསྐལ་པ་བརྒྱ་ཕྲག་སྟོང་གིས་བསྟན་མི་ནུས། །ཡོན་ཏན་འདི་འདྲའི་སངས་རྒྱས་ཡེ་ཤེས་ས་འདི་ལ། །གནས་པ་རྟག་ཏུ་རི་ཡི་རྒྱལ་པོ་བཞིན་མི་གཡོ། །རྒྱལ་སྲས་ཐོག་མ་གཙུག་ལག་ཀུན་གྱིས་མི་གཡོ་སྟེ། །སྨན་གྱི་རྣམ་པ་
ཀུན་ནས་རི་རྒྱལ་གངས་བཞིན་ནོ། །ཚུལ་ཁྲིམས་ཐོས་པས་གཉིས་པ་སྤོས་ངད་སྤོས་དང་འདྲ། །རྣམ་འདལ་མེ་ཏོག་ཇི་བཞིན་གསུམ་པ་ཤེས་པར་བྱ། །ལམ་ལ་མོས་བཞིན་མི་འཁྲུགས་འོད་འཕྲོ་ཐོབ་པ་སྟེ། །དྲང་སྲོང་གནས་བཞིན་མཁས་
པ་རྣམས་ཀྱི་རྟེན་གྱུར་པའོ། །གནོད་སྦྱིན་གཉའ་ཤིང་འཛིན་བཞིན་བསམ་ཡས་ལྔ་པ་ཐོབ། །རྟ་རྣའི་ཤིང་ཏོག་འདྲ་བར་དྲུག་པའི་འབྲས་བུ་སྟེ། །བདུན་པ་ས་འཛིན་ཀླུ་བཞིན་ཤེས་རབ་ཆེན་པོས་ཐོབ། །ཁོར་ཡུག་དབང་ལྡན་བཞིན་དུ་
བརྒྱད་པ་དབང་ཅན་ཐོབ། །དགུ་པ་དྲི་མ་སེལ་བ་དཔལ་ཅན་ལྷ་མིན་བཞིན། །བཅུ་པ་རྒྱལ་བའི་ལེགས་ལྡན་རི་རབ་ལྷ་གནས་འདྲ། །དང་པོ་སྨོན་ལམ་སྔོན་འགྲོ་གོང་མ་ཚུལ་ཁྲིམས་ཚོགས། །གསུམ་པ་སྤྱོད་པའི་ཡོན་ཏན་བཞི་པ་གཅིག་གི་དངོས། །
ལྔ་པ་དགེ་མང་དྲུག་པ་ཤིན་ཏུ་ཟབ་པའི་དངོས། །བརྒྱད་པ་བློ་གྲོས་ཡངས་པ་ཀུན་ཏུ་གཅིག་མིན་རྒྱན། །དགུ་པ་མཁས་པ་ཡེ་ཤེས་ཕྲ་ཞིང་ཟབ་དང་ལྡན། །འགྲོ་རྒྱུད་ཐམས་ཅད་ཡེ་ཤེས་ལྡན་པས་རབ་ཏུ་གནོན། །བཅུ་པ་རྒྱལ་བ་རྣམས་ལས་ཡང་

དག་ཆོས་འཛིན་ཏེ། །རྒྱལ་སྲས་སྤྱོད་པ་མི་སྒུལ་རྒྱ་མཚོ་དེ་འདྲའོ། །སྤྱོད་པ་བཅུ་འདས་ཐོག་མའི་སེམས་རབ་སྐྱེ་བར་འགྱུར། །དཀའ་ཐུབ་རྟུལ་བས་གཉིས་པ་གསུམ་པ་བསམ་གཏན་གྱིས། །དག་པས་བཞི་པ་ཤིན་ཏུ་
བྱང་བས་ལྔ་པའོ། །དྲུག་པ་རྣོན་པོས་རྟོགས་པ་བདུན་པ་མི་ཕྱེད་ས། །བརྒྱད་པ་མཐུ་ཆེན་རྡོ་རྗེའི་རྒྱལ་མཚན་ལྡན་པ་ཡིན། །དགུ་ལ་ཡེ་ཤེས་ལྡན་པས་ཐིབས་པོའི་སྤྱོད་པ་ཤེས། །བཅུ་ལ་རྒྱལ་བས་དབང་བསྐུར་རྒྱལ་པོ་དབང་ཐོབ་བཞིན། །ཡོན་ཏན་
རིན་ཆེན་དག་པས་དེ་བཞིན་རིམ་དུ་འཕར། །ཕྱོགས་རྣམས་ཀུན་གྱི་ཞིང་རྣམས་བཤིག་སྟེ་བགྲང་བར་ནུས། །རྣམ་ཤེས་གཅིག་གིས་འགྲོ་བ་ཀུན་སེམས་ཤེས་པར་རུང་། །ནམ་མཁའི་དབྱིངས་ཀུན་སྐྲ་ཡིས་གཞལ་བར་ནུས་སྲིད་ཀྱི། །རྒྱལ་བའི་ཡོན་
ཏན་བསྐལ་པ་ཁྲག་ཁྲིག་བཤད་མི་ནུས། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་མངོན་པར་གནང་སྟེ། ཡིད་དགའ་བར་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོས་དེ་སྐད་ཅེས་སྨྲས་པ་
དང་། བཅོམ་ལྡན་འདས་གཞན་འཕྲུལ་དབང་བྱེད་ཀྱི་ལྷའི་ནང་ན་བཞུགས་ཤིང་མངོན་པར་སངས་རྒྱས་ནས་རིང་པོར་མ་ལོན་ཏེ། ཞག་བདུན་པ་གཉིས་ལ་བབ་པའི་ཚེ་ལྷའི་རྒྱལ་པོ་དབང་བྱེད་ཀྱི་གཞལ་མེད་ཁང་ནོར་བུ་རིན་པོ་ཆེའི་སྙིང་པོ་ཅན་ན་བཞུགས་
པས། བྱང་ཆུབ་སེམས་དཔའ་རྡོ་རྗེའི་སྙིང་པོས་བཤད་པ་ལ་མངོན་པར་དགྱེས་པ་མཛད་དོ། །བྱང་ཆུབ་སེམས་དཔའི་འཁོར་དེ་དག་ཐམས་ཅད་དང་། ལྷ་དང་ཀླུ་དང་གནོད་སྦྱིན་དང་། དྲི་ཟ་དང་ལྷ་མ་ཡིན་དང་། བརྒྱ་བྱིན་དང་ཚངས་པ་དང་།
འཇིག་རྟེན་གྱི་མགོན་དང་། དབང་ཕྱུག་ཆེན་པོ་དང་། གཙང་མའི་རིས་སུ་གཏོགས་པའི་འཁོར་ཐམས་ཅད་ཀྱང་མངོན་པར་དགའོ། །ས་བཅུའི་ལེའུ་སྟེ་སུམ་ཅུ་གཅིག་པའོ།། །།སངས་རྒྱས་རྨད་གཅད་ཅེས་བྱ་བ་ཤིན་

ཏུ་རྒྱས་པ་ཆེན་པོའི་མདོ། བམ་པོ་ཉི་ཤུ་གཉིས་པ། བཅོམ་ལྡན་འདས་དེ་བཞིན་གཤེགས་པའི་བྱིན་གྱི་རླབས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་སོགས་པ་ཐམས་ཅད་ཀྱང་བྱང་ཆུབ་སེམས་དཔའ་
ཀུན་ཏུ་བཟང་པོའི་སྤྱོད་པ་ལ་གནས་པ། སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུ་དང་ཐབས་གཅིག་ཏུ་བཞུགས་ཏེ། དེའི་ཚེ་འཁོར་གྱི་དཀྱིལ་འཁོར་དེ་ཉིད་དུ། ཕྱོགས་བཅུ་ནས་
བྱང་ཆུབ་སེམས་དཔའ་སེམས་དཔའ་ཆེན་པོ་སེང་གེའི་ཁྲི་ཆགས་པ་མེད་པའི་རྒྱན་གྱི་སྙིང་པོ་ཅན་ལ་འཁོད་པ་བཅུ་འཐོན་པར་གྱུར་ཏེ། བྱང་ཆུབ་སེམས་དཔའ་དེ་དག་རེ་རེ་ཞིང་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་འཁོར་སེང་
གེའི་ཁྲི་ཆགས་པ་མེད་པའི་རྒྱན་གྱི་སྙིང་པོ་ཅན་ལ་འཁོད་པ། སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས་བསྐོར་ཅིང་མདུན་དུ་བྱས་པ་ཤ་སྟག་གོ །བྱང་ཆུབ་
སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་ཀྱང་མིང་འདི་ཞེས་བྱ་བ་དག་སྟེ། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་སྣང་བའི་མཛོད་ཀྱི་སྙིང་པོས་བྱུང་བ་ཞེས་བྱ་བ་དང་། བྱང་ཆུབ་སེམས་དཔའ་
སེམས་དཔའ་ཆེན་པོ་ཟབ་མོའི་མཛོད་ཀྱི་སྙིང་པོས་བྱུང་བ་ཞེས་བྱ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དཔལ་གྱི་གཟི་བརྗིད་ཀྱི་མཛོད་ཀྱི་སྙིང་པོས་བྱུང་བ་ཞེས་བྱ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤྲིན་སྒྲ་
ཟབ་མོ་རྣམ་པ་ཐ་དད་པའི་མཛོད་ཀྱི་སྙིང་པོས་བྱུང་བ་ཞེས་བྱ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་མི་ཕྱེད་པའི་གཙུག་གི་མཛོད་ཀྱི་སྙིང་པོས་བྱུང་བ་ཞེས་བྱ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དག་གི་

ལམ་མྱི་གཡོ་བར་ཀུན་ཏུ་འགྲོ་བའི་འོད་གཟེར་སྣང་བའི་གཟི་བརྗིད་ཀྱི་མཛོད་ཀྱི་སྙིང་པོས་བྱུང་བ་ཞེས་བྱ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གྲགས་པ་སྙན་པ་ཀུན་ཏུ་རྣམ་པར་གྲགས་པའི་འོད་ཀྱི་གཟི་
བརྗིད་ཀྱི་མཛོད་ཀྱི་སྙིང་པོས་བྱུང་བ་ཞེས་བྱ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རིའི་རྒྱལ་པོ་མི་གཡོ་བའི་འོད་ཟེར་སྣང་བའི་གཟི་བརྗིད་ཀྱི་མཛོད་ཀྱི་སྙིང་པོས་བྱུང་བ་ཞེས་བྱ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ནས་
བལྟ་བའི་གཟུགས་རྣམ་པར་དམིགས་པའི་འོད་གཟེར་གྱི་རྒྱལ་པོ་སྣང་བའི་གཟི་བརྗིད་ཀྱི་མཛོད་ཀྱི་སྙིང་པོས་བྱུང་བ་ཞེས་བྱ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྟོབས་བཅུ་རྣམ་པར་དག་པ་ཐུབ་པ་མེད་པའི་འོད་གཟེར་སྣང་
བའི་གཟི་བརྗིད་ཀྱི་མཛོད་ཀྱི་སྙིང་པོས་བྱུང་བ་ཞེས་བྱ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དེ་ལྟར་འཐོན་མ་ཐག་ཏུ་དེའི་མོད་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་མ་གཏོགས་པར་
བྱང་ཆུབ་སེམས་དཔའི་འཁོར་དེ་དག་ཐམས་ཅད་ཀྱང་ལངས་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོའི་འོད་མ་གཏོགས་པར་འོད་ཐམས་ཅད་ཀྱང་མི་སྣང་བར་གྱུར་ཏེ། ཐམས་ཅད་ཀྱང་ཟིལ་གྱིས་གནོན་
པར་གྱུར་ཏོ། །སངས་རྒྱས་ཀྱི་མཆོད་པ་བསམ་གྱིས་མི་ཁྱབ་པ་ཆོས་ཀྱི་དབྱིངས་ཐམས་ཅད་རྒྱས་པར་ཁྱབ་པ་མང་པོ་འང་མངོན་པར་བྱུང་བར་གྱུར་ཏེ། འདི་ལྟར་སྤོས་ཀྱི་སྤྲིན་ཆོས་ཀྱི་དབྱིངས་ཐམས་ཅད་རྒྱས་པར་ཁྱབ་པ་བྱེད་པ་བྱེ་བ་ཁྲག་ཁྲིག་བརྒྱ་སྟོང་གི་ཆར་མངོན་
པར་བབ་པར་གྱུར་ཏོ། །མེ་ཏོག་གི་སྤྲིན་ཆོས་ཀྱི་དབྱིངས་ཐམས་ཅད་རྒྱས་པར་ཁྱབ་པ་བརྗོད་དུ་མེད་པའི་ཡང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་ཆར་མངོན་པར་བབ་པར་གྱུར་ཏོ། །བྱུག་པའི་སྤྲིན་ཆོས་ཀྱི་དབྱིངས་ཐམས་ཅད་རྒྱས་པར་ཁྱབ་པ་བྱེ་བ་ཁྲག་

ཁྲིག་བརྒྱ་སྟོང་གི་ཆར་མངོན་པར་བབ་པར་གྱུར་ཏོ། །གདུགས་ཀྱི་སྤྲིན་ཆོས་ཀྱི་དབྱིངས་ཐམས་ཅད་རྒྱས་པར་ཁྱབ་པ་བྱེ་བ་ཁྲག་ཁྲིག་བརྒྱ་སྟོང་གི་ཆར་མངོན་པར་བབ་པར་གྱུར་ཏོ། །གོས་ཀྱི་སྤྲིན་ཆོས་ཀྱི་དབྱིངས་ཐམས་ཅད་རྒྱས་པར་ཁྱབ་པ་བྱེ་བ་ཁྲག་ཁྲིག་
བརྒྱ་སྟོང་གི་ཆར་མངོན་པར་བབ་པར་གྱུར་ཏོ། །རིན་པོ་ཆེའི་སྤྲིན་ཆོས་ཀྱི་དབྱིངས་ཐམས་ཅད་རྒྱས་པར་ཁྱབ་པ་བྱེ་བ་ཁྲག་ཁྲིག་བརྒྱ་སྟོང་གི་ཆར་མངོན་པར་བབ་པར་གྱུར་ཏོ། །རྒྱལ་མཚན་གྱི་སྤྲིན་ཆོས་ཀྱི་དབྱིངས་ཐམས་ཅད་རྒྱས་པར་ཁྱབ་པ་བྱེ་བ་
ཁྲག་ཁྲིག་བརྒྱ་སྟོང་གི་ཆར་མངོན་པར་བབ་པར་གྱུར་ཏོ། །བ་དན་གྱི་སྤྲིན་ཆོས་ཀྱི་དབྱིངས་ཐམས་ཅད་རྒྱས་པར་ཁྱབ་པ་བྱ་བ་ཁྲག་ཁྲིག་བརྒྱ་སྟོང་གི་ཆར་མངོན་པར་བབ་པར་གྱུར་ཏོ། །འཇིག་རྟེན་གྱི་ཁམས་ཡོངས་སུ་དག་པའི་སྤྲིན་ཆོས་ཀྱི་དབྱིངས་
ཐམས་ཅད་རྒྱས་པར་ཁྱབ་པ་བྱེ་བ་ཁྲག་ཁྲིག་བརྒྱ་སྟོང་གི་ཆར་མངོན་པར་བབ་པར་གྱུར་ཏོ། །བྱང་ཆུབ་སེམས་དཔའི་འཁོར་གྱི་དཀྱིལ་འཁོར་གྱི་སྤྲིན་ཆོས་ཀྱི་དབྱིངས་ཐམས་ཅད་རྒྱས་པར་ཁྱབ་པ་བྱེ་བ་ཁྲག་ཁྲིག་བརྒྱ་སྟོང་གི་ཆར་མངོན་པར་
བབ་པར་གྱུར་ཏོ། །འོད་གཟེར་གྱི་དྲ་བ་སྣང་བ་ཆེན་པོའི་སྤྲིན་ཆོས་ཀྱི་དབྱིངས་ཐམས་ཅད་རྒྱས་པར་ཁྱབ་པ་བྱེ་བ་ཁྲག་ཁྲིག་བརྒྱ་སྟོང་གི་ཆར་མངོན་པར་བབ་པར་གྱུར་ཏོ། །རིན་པོ་ཆེ་སྣ་ཚོགས་ཀྱི་གཞལ་མེད་ཁང་གི་སྤྲིན་ཆོས་ཀྱི་དབྱིངས་ཐམས་ཅད་རྒྱས་
པར་ཁྱབ་པ་བྱེ་བ་ཁྲག་ཁྲིག་བརྒྱ་སྟོང་གི་ཆར་མངོན་པར་བབ་པར་གྱུར་ཏོ། །སྙིང་པོ་བྱང་ཆུབ་ཀྱི་རྒྱན་རྣམ་པར་ཕྱེ་བའི་སྤྲིན་ཆོས་ཀྱི་དབྱིངས་ཐམས་ཅད་རྒྱས་པར་ཁྱབ་པ་བྱེ་བ་ཁྲག་ཁྲིག་བརྒྱ་སྟོང་གི་ཆར་མངོན་པར་བབ་པར་གྱུར་ཏོ། །དེ་བཞིན་གཤེགས་
པའི་གཟུགས་བརྙན་སྣང་བའི་གོས་ཀྱི་སྤྲིན་ཆོས་ཀྱི་དབྱིངས་ཐམས་ཅད་རྒྱས་པར་ཁྱབ་པ་བྱེ་བ་ཁྲག་ཁྲིག་བརྒྱ་སྟོང་གི་ཆར་མངོན་པར་བབ་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གི་སེང་གེའི་ཁྲི་མང་པོ་དེ་དག་ལས་བྱང་

ཆུབ་སེམས་དཔའ་རེ་རེའི་སེང་གེའི་ཁྲིའི་རྒྱན་རིན་པོ་ཆེ་རྣམ་པར་དག་པ་རེ་རེ་དང་དམྱིགས་པ་མང་པོ་དེ་དག་ཐམས་ཅད་ལས་དམིགས་པ་རེ་རེ་ལས་ཀྱང་འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་ཡོངས་སུ་སྣང་བར་གྱུར་ཏོ། །
དམིགས་པ་མང་པོ་དེ་དག་ཐམས་ཅད་ལས་དམིགས་པ་རེ་རེ་ཞིང་ཡང་སེམས་ཅན་གྱི་ཁམས་འབྱམ་ཀླས་པ་ཐམས་ཅད་ཡོངས་སུ་སྣང་བར་གྱུར་ཏོ། །དམིགས་པ་མང་པོ་དེ་དག་ཐམས་ཅད་ལས་དམྱིགས་པ་རེ་རེ་ཞིང་ཡང་དེ་བཞིན་གཤེགས་པ་
འབྱམ་ཀླས་པ་ཐམས་ཅད་ཡོངས་སུ་སྣང་བར་གྱུར་ཏོ། །དམིགས་པ་མང་པོ་དེ་དག་ཐམས་ཅད་ལས་དམིགས་པ་རེ་རེ་ཞིང་ཡང་བྱང་ཆུབ་སེམས་དཔའ་འབྱམ་ཀླས་པ་ཐམས་ཅད་ཡོངས་སུ་སྣང་བར་གྱུར་ཏོ། །དམིགས་པ་མང་པོ་དེ་དག་
ཐམས་ཅད་ལས་དམིགས་པ་རེ་རེ་ཞིང་ཡང་དུས་འབྱམ་ཀླས་པ་ཐམས་ཅད་ཡོངས་སུ་སྣང་བར་གྱུར་ཏོ། །དམིགས་པ་མང་པོ་དེ་དག་ཐམས་ཅད་ལས་དམིགས་པ་རེ་རེ་ཞིང་ཡང་འཇིག་རྟེན་གྱི་ཁམས་ཐམས་ཅད་ཀྱི་འདས་པའི་འཇིག་རྟེན་གྱི་ཁམས་འབྱམ་ཀླས་པ་
བརྗོད་དུ་མེད་པའི་ཡང་བརྗོད་དུ་མེད་པ་སངས་རྒྱས་འབྱུང་བ་དང་བཅས་པ། ཆོས་ཀྱི་འཁོར་ལོ་བསྐོར་བ་དང་བཅས་པ། དེ་བཞིན་གཤེགས་པའི་འཁོར་གྱི་དཀྱིལ་འཁོར་དང་བཅས་པ། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དང་བཅས་པ།
སེམས་ཅན་འདུལ་བ་དང་བཅས་པ། མིང་གི་འཁོར་ལོ་དང་བཅས་པ། མང་པོ་ཡོངས་སུ་སྣང་བར་གྱུར་ཏོ། །བྱང་ཆུབ་སེམས་དཔའ་དེ་དག་གིས་སྔོན་གྱི་མཐའི་མུར་ཐུག་པའི་དུས་དག་ཏུ་འཇིག་རྟེན་གྱི་ཁམས་གང་དང་གང་དུ་
བྱང་ཆུབ་སེམས་དཔའི་སྤྱོད་པ་སྤྱད་པར་གྱུར་པ་དེ་དག་ཀྱང་ཡོངས་སུ་སྣང་བར་གྱུར་ཏོ། །དེ་བཞིན་གཤེགས་པ་དེ་དག་གི་ཞབས་ཀྱི་དྲུང་ན། འཁོད་ཅིང་ཕ་རོལ་ཏུ་ཕྱིན་པ་ཐམས་ཅད་ཡོངས་སུ་སྦྱོང་བ་ཡང་ཡོངས་སུ་སྣང་བར་གྱུར་ཏོ། །དམིགས་

པ་མང་པོ་དེ་དག་ཐམས་ཅད་ལས་དམྱིགས་པ་རེ་རེ་ཞིང་ཡང་ཕྱི་མའི་མཐའི་མུར་ཐུག་པའི་དུས་ཀྱི་འཇིག་རྟེན་གྱི་ཁམས་འབྱམ་ཀླས་པ་བརྗོད་དུ་མེད་པའི་ཡང་བརྗོད་དུ་མེད་པ་སངས་རྒྱས་སྐྱེ་བ་དང་བཅས་པ་ཆོས་ཀྱི་འཁོར་ལོ་དང་བཅས་པ། དེ་བཞིན་གཤེགས་པའི་
འཁོར་གྱི་དཀྱིལ་འཁོར་དང་བཅས་པ། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དང་བཅས་པ། སེམས་ཅན་འདུལ་བ་དང་བཅས་པ། མིང་གི་འཁོར་ལོ་དང་བཅས་པ་མང་པོ་ཡོངས་སུ་སྣང་བར་གྱུར་ཏོ། །བྱང་ཆུབ་སེམས་དཔའ་དེ་དག་གི་
ཕྱི་མའི་མཐའི་མུར་ཐུག་པའི་དུས་དག་ཏུ་འཇིག་རྟེན་གྱི་ཁམས་གང་དུ་བྱང་ཆུབ་སེམས་དཔའི་སྤྱད་པ་སྤྱོད་པར་གྱུར་པ་དེ་དག་ཀྱང་ཡོངས་སུ་སྣང་བར་གྱུར་ཏོ། །དེ་བཞིན་གཤེགས་པ་དེ་དག་གི་ཞབས་ཀྱི་དྲུང་ན་འཁོད་ཅིང་ཕ་རོལ་ཏུ་ཕྱིན་པ་ཡོངས་སུ་སྦྱོང་
བ་བྱེད་པ་དག་ཀྱང་ཡོངས་སུ་སྣང་བར་གྱུར་ཏོ། །དེ་ནས་བྱང་ཆུབ་སེམས་དཔའ་དེ་དག་འདི་སྙམ་དུ་གྱུར་ཏེ། བྱང་ཆུབ་སེམས་དཔའ་འདི་དག་འཇིག་རྟེན་གྱི་ཁམས་འབྱམ་ཀླས་པ་ནི་གང་དང་གང་ནས་ལྷགས། དེ་བཞིན་གཤེགས་པ་ནི་གང་
དང་གང་གི་ཞབས་ཀྱི་དྲུང་ནས་ཕྱིན་སྙམ་སྟེ། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དེ་དག་ཐམས་ཅད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་བྱང་ཆུབ་སེམས་
དཔའ་འདི་དག་ལྷགས་ནི་གང་ནས་ལྷགས། འཇིག་རྟེན་གྱི་ཁམས་འབྱམ་ཀླས་པ་ནི་གང་ཤེད་ནས། དེ་བཞིན་གཤེགས་པ་ནི་གང་ཞིག་གི་ཞབས་ཀྱི་དྲུང་ནས་འདིར་ཕྱིན། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས། བྱང་ཆུབ་
སེམས་དཔའི་འཁོར་གྱི་དཀྱིལ་འཁོར་དེ་དག་ཐམས་ཅད་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་དག་དེ་བས་ན་ཁྱེད་ཉིད་ཀྱིས་བྱང་ཆུབ་སེམས་དཔའ་འདི་དག་འཇིག་རྟེན་གྱི་ཁམས་ནི་གང་ནས་ལྷགས། དེ་བཞིན་གཤེགས་པ་ནི་གང་གི་ཞབས་

ཀྱི་དྲུང་ནས་ཕྱིན་པ་ཡོངས་སུ་བརྟག་པ་དང་། ཡོངས་སུ་དཔྱད་པ་གྱིས་ཤིག །དེ་ནས་བྱང་ཆུབ་སེམས་དཔའ་ཆགས་པ་མེད་པའི་མིག་གིས་ཀུན་ཏུ་འགྲོ་བ་ཞེས་བྱ་བའི་ཏིང་ངེ་འཛིན་དང་། ཐམས་ཅད་ཀྱི་རྗེས་སུ་སོང་བ་ཞེས་བྱ་བ་དང་།
ཆོས་ཀྱི་དབྱིངས་ཤིན་ཏུ་རྣམ་པར་ཕྱེ་བ་ཞེས་བྱ་བ་དང་། མངོན་པར་ཤེས་པ་ཐམས་ཅད་དང་ལྡན་པ་ཞེས་བྱ་བ་དང་། དམིགས་པ་ཐམས་ཅད་ཤིན་ཏུ་རྣམ་པར་ཕྱེ་བའི་སྙིང་པོ་ཞེས་བྱ་བ་དང་། སེམས་ཅན་ཐམས་ཅད་ཀྱི་ལུས་མངོན་པར་ཤེས་པ་དང་ལྡན་
པ་ཞེས་བྱ་བ་དང་། བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཀྱི་ཞིང་ཐམས་ཅད་ཀྱི་གཞི་རབ་ཏུ་རྟོགས་པ་ཞེས་བྱ་བ་དག་ལ་མཉམ་པར་གཞག་གོ །དེ་ལྟར་དེ་དག་ལ་སོགས་པ་བྱང་ཆུབ་སེམས་དཔའི་ཏིང་ངེ་འཛིན་གྲངས་མེད་པ་བྱེ་བ་ཁྲག་ཁྲིག་
བརྒྱ་སྟོང་ཕྲག་བཅུ་ལ་བྱང་ཆུབ་སེམས་དཔའ་རེ་རེས་ཀྱང་མཉམ་པར་གཞག་སྟེ། ཀུན་གྱིས་བྱང་ཆུབ་སེམས་དཔའི་ཏིང་ངེ་འཛིན་གཞན་དང་གཞན་ཤ་སྟག་ལ་མཉམ་པར་གཞག་ཀྱང་འཇིག་རྟེན་གྱི་ཁམས་འབྱམ་ཀླས་པ་དེ་དག་ཀྱང་མ་མཐོང་། དེ་བཞིན་གཤེགས་པ་གང་གི་
ཞབས་ཀྱི་དྲུང་ན་བྱང་ཆུབ་སེམས་དཔའ་དེ་དག་ཚངས་པའི་སྤྱད་པ་སྤྱོད་པ་དེ་དག་ཀྱང་མ་མཐོང་ནས་ཏིང་ངེ་འཛིན་དེ་དག་ལས་ལངས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་བདག་ཅག་བྱང་ཆུབ་སེམས་དཔའ་རེ་རེས་
ཀྱང་བྱང་ཆུབ་སེམས་དཔའི་ཏིང་ངེ་འཛིན་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུ་ལ་མཉམ་པར་གཞག་ཀྱང་འཇིག་རྟེན་གྱི་ཁམས་འབྱམ་ཀླས་པ་དེ་དག་ཀྱང་མ་མཐོང་། བྱང་ཆུབ་སེམས་དཔའ་དེ་དག་སངས་རྒྱས་བཅོམ་ལྡན་འདས་གང་གི་ཞབས་
ཀྱི་དྲུང་ན་ཚངས་པར་སྤྱོད་པའི་དེ་བཞིན་གཤེགས་པ་དེ་དག་ཀྱང་མ་མཐོང་ངོ་། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས། ཡང་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དེ་དག་ལ་སྨྲས་པ། ཀྱེ་རྒྱལ་བའི་སྲས་དག །

ད་དུང་དུ་བྱང་ཆུབ་སེམས་དཔའ་དེ་དག་འཇིག་རྟེན་གྱི་ཁམས་འབྱམ་ཀླས་པ་གང་ནས་ལྷགས་པ་དང་དེ་བཞིན་གཤེགས་པ་གང་གི་ཞབས་ཀྱི་དྲུང་ནས་ལྷགས་པ་བརྟག་པར་གྱིས་ཤིག་དཔྱད་པར་གྱིས་ཤིག །འཇིག་རྟེན་གྱི་ཁམས་འབྱམ་ཀླས་པ་དེ་དག་ནི་
མཐོང་བར་དཀའོ། །སངས་རྒྱས་བཅོམ་ལྡན་འདས་གང་གི་ཞབས་ཀྱི་དྲུང་ན་བྱང་ཆུབ་སེམས་དཔའ་འདི་དག་ཚངས་པའི་སྤྱད་པ་སྤྱོད་པའི་དེ་བཞིན་གཤེགས་པ་དེ་དག་ཀྱང་དེ་བས་ཀྱང་ཤིན་ཏུ་མཐོང་བར་དཀའོ། །དེ་ནས་བྱང་ཆུབ་སེམས་དཔའ་དེ་དག་
ལས་བྱང་ཆུབ་སེམས་དཔའ་རེ་རེས་ཀྱང་། བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ལ་མཉམ་པར་གཞག་གོ །དེ་ལྟར་མཉམ་པར་གཞག་ཀྱང་བྱང་ཆུབ་སེམས་དཔའ་དེ་དག་གིས་འཇིག་རྟེན་གྱི་ཁམས་
འབྱམ་ཀླས་པ་དེ་དག་ཀྱང་མ་མཐོང་། སངས་རྒྱས་བཅོམ་ལྡན་འདས་གང་གི་ཞབས་ཀྱི་དྲུང་ན་བྱང་ཆུབ་སེམས་དཔའ་དེ་དག་ཚངས་པའི་སྤྱད་པ་སྤྱོད་པའི་དེ་བཞིན་གཤེགས་པ་དེ་དག་ཀྱང་མ་མཐོང་ངོ་། །དེ་ནས་བྱང་ཆུབ་སེམས་དཔའ་དེ་དག་ཏིང་ངེ་འཛིན་
དེ་དག་ལས་ལངས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་བདག་ཅག་བྱང་ཆུབ་སེམས་དཔའ་རེ་རེས་བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཀྱི་ཞིང་བཅུའི་རྡུལ་ཤིན་
ཏུ་ཕྲ་བ་སྙེད་ལ་མཉམ་པར་གཞག་ཀྱང་འཇིག་རྟེན་གྱི་ཁམས་འབྱམ་ཀླས་པ་དེ་དག་ཀྱང་མ་མཐོང་ངོ་། །གང་གི་ཞབས་ཀྱི་དྲུང་ན་བྱང་ཆུབ་སེམས་དཔའ་དེ་དག་ཚངས་པའི་སྤྱད་པ་སྤྱོད་པའི་དེ་བཞིན་གཤེགས་པ་དེ་དག་ཀྱང་མ་མཐོང་ངོ་། །དེ་ནས་
བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་སྟན་དེ་ལས་ནམ་མཁའི་དབྱིངས་སུ་འཕགས་ཏེ། བཅོམ་ལྡན་འདས་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། བྱང་ཆུབ་སེམས་དཔའི་འཁོར་གྱི་དཀྱིལ་

འཁོར་ཐམས་ཅད་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་དེ་བཞིན་གཤེགས་པའི་སྐུ་ཆགས་པ་མི་མངའ་བའི་རྒྱན་དང་ལྡན་པ་དུས་གསུམ་མཚུངས་པར་མཉམ་པར་འཇིག་རྟེན་གྱི་ཁམས་འབྱམ་ཀླས་པ་
ཐམས་ཅད་ཀུན་ཏུ་ཁྱབ་པ་ཆོས་ཀྱི་དབྱིངས་ཁོངས་སུ་ཆུད་པ། འགྲོ་བ་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་རྣམ་པར་དམིགས་པ་འདི་ལ་ལྟོས་ཤིག་དང་དེ་ལ་འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་ཀྱང་གཟུགས་བརྙན་དུ་གྱུར་
པར་སྣང་ངོ་། །དེ་བཞིན་གཤེགས་པ་འབྱམ་ཀླས་པ་ཐམས་ཅད་ཀྱང་གཟུགས་བརྙན་དུ་གྱུར་པར་སྣང་ངོ་། །བྱང་ཆུབ་སེམས་དཔའ་འབྱམ་ཀླས་པ་ཐམས་ཅད་ཀྱང་གཟུགས་བརྙན་དུ་གྱུར་པར་སྣང་ངོ་། །སེམས་ཅན་གྱི་ཁམས་འབྱམ་
ཀླས་པ་ཐམས་ཅད་ཀྱང་གཟུགས་བརྙན་དུ་གྱུར་པར་སྣང་ངོ་། །ལམ་གྱི་རྒྱུད་འབྱམ་ཀླས་པ་ཐམས་ཅད་ཀྱང་གཟུགས་བརྙན་དུ་གྱུར་པར་སྣང་ངོ་། །ཀྱེ་རྒྱལ་བའི་སྲས་དག་དེ་བས་ན་ཁྱོད་ཀྱིས་རང་གི་ལུས་ཀུན་ཏུ་ལྟ་བའི་མྱིག་དང་ལྡན་
པར་བྱིན་གྱིས་རློབས་ལ་ཤེས་རབ་ཀྱི་མིག་ནམ་མཁའི་དབྱིངས་ཀྱིས་ཀླས་པར་བྱིན་གྱིས་རློབ་སྟེ། ཡེ་ཤེས་ཡངས་པའི་མིག་དམིགས་པ་ཐམས་ཅད་ཀྱི་རྗེས་སུ་སོང་ལ་ཁོང་དུ་ཆུད་པར་གྱིས་ལ་ཕྱོགས་འབྱམ་ཀླས་པ་ཐམས་ཅད་དུ་དེ་བཞིན་
གཤེགས་པ་ཐམས་ཅད་བྱིན་གྱིས་རློབ་སྟེ། དེ་བཞིན་གཤེགས་པའི་སྐུ་ཐམས་ཅད་དུ་མི་གནས་པ་འདི་ལ་གནས་པ་ཐམས་ཅད་ཡོངས་སུ་བསྩལ་བའི་ལྟ་བས་ལྟོས་ཤིག །མངོན་པར་ཞེན་པ་ཐམས་ཅད་ལས་གྱེན་དུ་འཕགས་པ་དང་
སྲིད་པ་ཐམས་ཅད་ལ་མངོན་པར་ཞེན་པ་མེད་པ་དང་ཤིན་ཏུ་ཕྲ་བའི་ཚུལ་གྱིས་སྟོབས་བཅུའི་སྟོབས་ཡོངས་སུ་ནོན་པ་དང་། དམིགས་པ་ཆུང་ངུ་ལ་རྒྱ་ཆེན་པོར་འཇུག་པའི་བལྟ་བས་ལྟོས་ཤིག །དེ་ནས་བྱང་ཆུབ་སེམས་དཔའ་དེ་དག་གིས་

བྱང་ཆུབ་སེམས་དཔའ་སེམས་དཔའ་ཆེན་པོའི་ཀུན་ཏུ་བཟང་པོའི་གདམས་ངག་བཞིན་དུ་ཐལ་མོ་སྦྱར་ཏེ། བཅོམ་ལྡན་འདས་ལ་ཕྱག་འཚལ་ནས་སེམས་ཤིང་རྟོག་པ་དང་། བཅོམ་ལྡན་འདས་ཀྱི་ཞབས་ཀྱི་མཐིལ་གཉིས་ཀྱི་འཁོར་ལོ་རྩིབས་སྟོང་ཡོད་
པ་ལ་འཇིག་རྟེན་གྱི་ཁམས་ཆོས་ཀྱི་དབྱིངས་ཀྱི་འཁོར་ལོ་ཞེས་བྱ་བ་ཡོད་པ་མཐོང་བར་གྱུར་ཏེ། འཇིག་རྟེན་གྱི་ཁམས་དེ་ན་དེ་བཞིན་གཤེགས་པ་ཆོས་ཀྱི་དབྱིངས་ཀྱི་རྒྱན་གྱི་རྒྱལ་པོ་ཞེས་བྱ་བ་བཞུགས་ཤིང་འཚོ་སྐྱོང་ངོ་ཆོས་སྟོན་ཏོ། །དེའི་སངས་རྒྱས་
ཀྱི་ཞིང་ནས་བྱང་ཆུབ་སེམས་དཔའ་ཀུན་ཏུ་སྣང་བ་མཛོད་ཀྱི་སྙིང་པོས་བྱུང་བ་ཞེས་བྱ་བ་བྱང་ཆུབ་སེམས་དཔའི་འཁོར་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས་
བསྐོར་ཅིང་མདུན་དུ་བྱས་ཏེ་འོངས་ནས་སེང་གེའི་ཁྲི་ཆགས་པ་མེད་པའི་རྒྱན་གྱི་སྙིང་པོ་ཅན་ལ་འདུག་གོ །བཅོམ་ལྡན་འདས་ཀྱི་ཞབས་བྱིན་པ་རི་དགས་ཨེ་ན་ཡའི་བྱིན་པ་ལྟ་བུ་གཉིས་ལ་འཇིག་རྟེན་གྱི་ཁམས་ཆགས་པ་མེད་པའི་སྙིང་པོ་ཅན་ཞེས་བྱ་
བ་ཡོད་དེ་དེ་ན་དེ་བཞིན་གཤེགས་པ་འོད་རྒྱ་མཚོ་ཆགས་པ་མེད་ཅིང་དྲི་མ་མེད་པའི་སྙིང་པོ་ཞེས་བྱ་བ་བཞུགས་ཤིང་འཚོ་སྐྱོང་ངོ་། །ཆོས་སྟོན་ཏོ། །དེའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་ཟབ་མོའི་མཛོད་ཀྱི་སྙིང་པོས་བྱུང་བ་ཞེས་
བྱ་བ་བྱང་ཆུབ་སེམས་དཔའི་འཁོར་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས་བསྐོར་ཅིང་མདུན་དུ་བྱས་ཏེ། འོངས་ནས་སེང་གེའི་ཁྲི་ཆགས་པ་མེད་པའི་རྒྱན་
གྱི་སྙིང་པོ་ཅན་ལ་འདུག་གོ །དེ་བཞིན་གཤེགས་པའི་ཞབས་པུས་མོ་གཉིས་ཀྱི་ལྷ་ང་ལ་འཇིག་རྟེན་གྱི་ཁམས་ས་ལེ་སྦྲམ་ཡོད་པ་ཞེས་བྱ་བ་ཡོད་དེ་དེ་ན་དེ་བཞིན་གཤེགས་པ་གསེར་འབར་བ་དམ་པ་ཞེས་བྱ་བ་བཞུགས་ཤིང་འཚོ་སྐྱོང་ངོ་ཆོས་སྟོན་ཏོ། །

དེའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་དཔལ་གྱི་གཟི་བརྗིད་མཛོད་ཀྱི་སྙིང་པོས་བྱུང་བ་ཞེས་བྱ་བ་བྱང་ཆུབ་སེམས་དཔའི་འཁོར་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པ་བྱེ་བ་ཁྲག་ཁྲིག་
བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས་བསྐོར་ཅིང་མདུན་དུ་བྱས་ཏེ། འོངས་ནས་སེང་གེའི་ཁྲི་ཆགས་པ་མེད་པའི་རྒྱན་གྱི་སྙིང་པོ་ཅན་ལ་འདུག་གོ །བཅོམ་ལྡན་འདས་ཀྱི་སྐུ་སྟ་ཟུར་གྱི་དཀྱིལ་འཁོར་ལ་འཇིག་རྟེན་གྱི་ཁམས་རིན་པོ་ཆེ་
སྣ་ཚོགས་ཀྱི་རྒྱན་གྱི་སྙིང་པོ་ཅན་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགེ་བ་སྣ་ཚོགས་ཀྱི་སྙིང་པོ་ཞེས་བྱ་བ་བཞུགས་ཤིང་འཚོ་སྐྱོང་ངོ་ཆོས་སྟོན་ཏོ། །དེའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་སྤྲིན་སྒྲ་ཟབ་མོ་རྣམ་པ་ཐ་དད་
པའི་མཛོད་ཀྱི་སྙིང་པོས་བྱུང་བ་ཞེས་བྱ་བ་བྱང་ཆུབ་སེམས་དཔའི་འཁོར་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས་བསྐོར་ཅིང་མདུན་དུ་བྱས་ཏེ་འོངས་ནས་སེང་
གེའི་ཁྲི་ཆགས་པ་མེད་པའི་རྒྱན་གྱི་སྙིང་པོ་ཅན་ལ་འདུག་གོ །བཅོམ་ལྡན་འདས་ཀྱི་སྐུ་ལྟེ་བའི་དཀྱིལ་འཁོར་ན་འཇིག་རྟེན་གྱི་ཁམས་རྣམ་པར་སྣང་བའི་སྙིང་པོ་ཅན་ཞེས་བྱ་བ་ཡོད་དེ་དེ་ན་དེ་བཞིན་གཤེགས་པ་རྣམ་པར་སྣང་མཛད་གཟི་བརྗིད་ཀྱི་
རྒྱལ་པོ་ཞེས་བྱ་བ་བཞུགས་ཤིང་འཚོ་སྐྱོང་ངོ་ཆོས་སྟོན་ཏོ། །དེའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་རྡོ་རྗེ་མི་ཕྱེད་པའི་གཙུག་གི་མཛོད་ཀྱི་སྙིང་པོས་བྱུང་བ་ཞེས་བྱ་བ་བྱང་ཆུབ་སེམས་དཔའི་འཁོར་སངས་རྒྱས་ཀྱི་ཞིང་བརྗོད་དུ་མེད་པའི་ཡང་
བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས་བསྐོར་ཅིང་མདུན་དུ་བྱས་ཏེ་འོངས་ནས་སེང་གེའི་ཁྲི་ཆགས་པ་མེད་པའི་སྙིང་པོ་ཅན་ལ་འདུག་གོ །བཅོམ་ལྡན་འདས་ཀྱི་ཐུགས་ཀ་ན་འཇིག་རྟེན་གྱི་ཁམས་དཔལ་གྱི་འོད་

གཟེར་སྙིང་པོ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དཔལ་གྱི་བེའུ་རྒྱན་གྱིས་བརྒྱན་པའི་སྙིང་པོ་ཞེས་བྱ་བ་བཞུགས་ཤིང་འཚོ་སྐྱོང་ངོ་ཆོས་སྟོན་ཏོ། །དེའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་དག་གི་ལམ་མི་གཡོ་བར་ཀུན་ཏུ་འགྲོ་བའི་འོད་གཟེར་
སྣང་བའི་གཟི་བརྗིད་ཀྱི་མཛོད་ཀྱི་སྙིང་པོས་བྱུང་བ་ཞེས་བྱ་བ་བྱང་ཆུབ་སེམས་དཔའི་འཁོར་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས་བསྐོར་ཅིང་མདུན་དུ་བྱས་ཏེ་འོངས་ནས་སེང་གེའི་ཁྲི་ཆགས་པ་མེད་
པས་བརྒྱན་པའི་སྙིང་པོ་ཅན་ལ་འདུག་གོ །བཅོམ་ལྡན་འདས་ཀྱི་སྐུ་ཕྲག་པའི་ལྷུན་གཉིས་ལ་འཇིག་རྟེན་གྱི་ཁམས་གསེར་ཡོད་པ་ཞེས་བྱ་བ་ཡོད་དེ་དེ་ན་དེ་བཞིན་གཤེགས་པ་གསེར་འབར་བའི་སྙིང་པོ་ཞེས་བྱ་བ་བཞུགས་ཤིང་འཚོ་སྐྱོང་ངོ་ཆོས་སྟོན་ཏོ། །
དེའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་གྲགས་པ་སྙན་པར་ཀུན་ཏུ་རྣམ་པར་གྲགས་པའི་འོད་ཀྱི་གཟི་བརྗིད་ཀྱི་མཛོད་ཀྱི་སྙིང་པོས་བྱུང་བ་ཞེས་བྱ་བ་བྱང་ཆུབ་སེམས་དཔའི་འཁོར་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པ་བྱེ་བ་ཁྲག་
ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས་བསྐོར་ཅིང་མདུན་དུ་བྱས་ཏེ་འོངས་ནས། སེང་གེའི་ཁྲི་ཆགས་པ་མེད་པའི་རྒྱན་གྱི་སྙིང་པོ་ཅན་ལ་འདུག་གོ། །བཅོམ་ལྡན་འདས་རྣམ་པར་སྣང་མཛད་ཀྱི་ཞལ་གྱི་གསུང་གི་དབྱངས་ལ་འཇིག་རྟེན་གྱི་ཁམས་རིན་
པོ་ཆེ་སྣ་ཚོགས་ཞེས་བྱ་བ་ཡོད་དེ་དེ་ན་དེ་བཞིན་གཤེགས་པ་འོད་གཟེར་དཔག་ཏུ་མེད་པའི་གཟི་བརྗིད་ཀྱིས་རབ་ཏུ་བརྒྱན་པའི་རྒྱལ་པོ་ཞེས་བྱ་བ་བཞུགས་ཤིང་འཚོ་སྐྱོང་ངོ་ཆོས་སྟོན་ཏོ། །དེའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་རིའི་རྒྱལ་པོ་མི་
གཡོ་བའི་འོད་གཟེར་སྣང་བའི་གཟི་བརྗིད་ཀྱི་མཛོད་ཀྱི་སྙིང་པོས་བྱུང་བ་ཞེས་བྱ་བ་བྱང་ཆུབ་སེམས་དཔའི་འཁོར་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས་བསྐོར་ཅིང་

མདུན་དུ་བྱས་ཏེ་འོངས་ནས་སེང་གེའི་ཁྲི་ཆགས་པ་མེད་པའི་རྒྱན་གྱི་སྙིང་པོ་ཅན་ལ་འདུག་གོ །བཅོམ་ལྡན་འདས་རྣམ་པར་སྣང་མཛད་ཀྱི་སྨིན་མཚམས་ན་འཇིག་རྟེན་གྱི་ཁམས་ཆོས་ཀྱི་དབྱིངས་མི་ཟད་པའི་མཛོད་ཅེས་བྱ་བ་ཡོད་དེ།
དེ་ན་དེ་བཞིན་གཤེགས་པ་ཡེ་ཤེས་དུས་གསུམ་དུ་མི་ཟད་པའི་མཛོད་ཅེས་བྱ་བ་བཞུགས་ཤིང་འཚོ་སྐྱོང་ངོ་ཆོས་སྟོན་ཏོ། །དེའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་ཀུན་ནས་བལྟ་བའི་གཟུགས་རྣམ་པར་དམིགས་པའི་འོད་གཟེར་གྱི་རྒྱལ་པོ་སྣང་བའི་
གཟི་བརྗིད་མཛོད་ཀྱི་སྙིང་པོས་བྱུང་བ་ཞེས་བྱ་བ་བྱང་ཆུབ་སེམས་དཔའི་འཁོར་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས་བསྐོར་ཅིང་མདུན་དུ་བྱས་ཏེ། འོངས་ནས་
སེང་གེའི་ཁྲི་ཆགས་པ་མེད་པའི་རྒྱན་གྱི་སྙིང་པོ་ཅན་ལ་འདུག་གོ །བཅོམ་ལྡན་འདས་རྣམ་པར་སྣང་མཛད་ཀྱི་དབུ་ལ་འཇིག་རྟེན་གྱི་ཁམས་གཞི་སྤྱིའུ་ཚུགས་ཀྱི་ལྷུན་ཡོངས་སུ་འཛིན་པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་རིན་པོ་ཆེའི་མེ་ཏོག་
བརྩེགས་པ་ཞེས་བྱ་བ་བཞུགས་ཤིང་འཚོ་སྐྱོང་ངོ་ཆོས་སྟོན་ཏོ། །དེའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་སྟོབས་བཅུ་རྣམ་པར་དག་པ་ཐུབ་པ་མེད་པའི་འོད་གཟེར་སྣང་བའི་གཟི་བརྗིད་ཀྱི་མཛོད་ཀྱི་སྙིང་པོས་བྱུང་བ་ཞེས་བྱ་བ། བྱང་ཆུབ་སེམས་དཔའི་
འཁོར་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས་བསྐོར་ཅིང་མདུན་དུ་བྱས་ཏེ་འོངས་ནས། སེང་གེའི་ཁྲི་ཆགས་པ་མེད་པའི་རྒྱན་གྱི་སྙིང་པོ་ཅན་ལ་འདུག་གོ །དེ་ནས་བྱང་
ཆུབ་སེམས་དཔའ་དེ་དག་ཐམས་ཅད་ཀྱིས་འཇིག་རྟེན་གྱི་ཁམས་རྒྱ་མཚོ་དེ་དག་དང་། དེ་བཞིན་གཤེགས་པའི་འཁོར་གྱི་དཀྱིལ་འཁོར་དེ་དག་དང་། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དེ་དག་དང་སངས་རྒྱས་ཀྱི་རྣམ་པར་འཕྲུལ་པ་དེ་དག་

མཐོང་བར་གྱུར་ནས། བྱང་ཆུབ་སེམས་དཔའ་དེ་དག་ཐམས་ཅད་ལས་བྱང་ཆུབ་སེམས་དཔའ་རེ་རེས་ཀྱང་ཏིང་ངེ་འཛིན་ཆོས་ཀྱི་དབྱིངས་ཀྱི་སྙིང་པོ་ལ་སྩོགས་པ་ཏིང་ངེ་འཛིན་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཐོབ་པར་གྱུར་ཏོ། །
བྱང་ཆུབ་སེམས་དཔའ་རེ་རེས་ཀྱང་གཟུངས་ཆོས་ཐམས་ཅད་ཀྱིས་ལས་སྩོགས་པ་གཟུངས་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཐོབ་པར་གྱུར་ཏོ། །བྱང་ཆུབ་སེམས་དཔའ་རེ་རེས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་རྡུལ་དང་བྲལ་བའི་
སྙིང་པོ་ལ་སོགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཐོབ་པར་གྱུར་ཏོ། །བྱང་ཆུབ་སེམས་དཔའ་དེ་དག་ཐམས་ཅད་ལས་བྱང་ཆུབ་སེམས་དཔའ་རེ་རེས་ཀྱང་སྟོབས་ཀྱི་གློག་ལ་སོགས་པ་
ཐམས་ཅད་མཁྱེན་པ་ཉིད་ཀྱི་གློག །སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཐོབ་པར་གྱུར་ཏོ། །ཀྱེ་རྒྱལ་བའི་སྲས་དག་ཆོས་ཀྱི་སྒོ་འདི་དག་ནི་བསམ་པ་རྡོ་རྗེ་དམ་པ་ལྟ་བུར་བྱས་ཏེ། ཡོངས་སུ་ཆུབ་པར་བྱའོ། །རིམ་གྲོ་
ཆེན་པོ་དང་ལྡན་པའི་བསམ་པས་ཡོངས་སུ་བསྲུང་བར་བྱའོ། །ཀྱེ་རྒྱལ་བའི་སྲས་ཆོས་ཀྱི་སྒོ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་བཤེས་གཉེན་གྱིས་ཡོངས་སུ་ཟིན་པ། ཀུན་ཏུ་བཟང་པོའི་སྤྱོད་པ་ལ་ཞུགས་པ་
རྣམས་མ་གཏོགས་པར་གཞན་གྱི་རྣ་ལམ་དུ་འགྲོ་བར་མི་འགྱུར་རོ། །བྱང་ཆུབ་སེམས་དཔའ་སེམས་