Kinh tạng Tây Tạng (Kangyur Đại Học) — 036_ཕལ་ཆེན།_ཁ

ི་སར་སངས་རྒྱས་ཀྱི་ཆོས་རྣམ་པར་དག་པ་དང་། སངས་རྒྱས་ཀྱི་སྐུ་གཞན་ལ་རག་ལུས་པ་མེད་པའི་རྟེན་གྱི་ཚུལ་རབ་ཏུ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་
དཔའ་ཆེན་པོ་སེམས་དམའ་བར་བྱས་ཤིང་ས་ལ་བཏིང་བའི་རྡོག་ལམ་དང་འདྲ་བའི་སེམས་སུ་བྱས་ཏེ་ས་དང་འདྲ་བར་སྡུག་བསྔལ་ཐམས་ཅད་བཟོད་པ། མི་འགྱུར་བ། མི་སྐྱོ་བ། སེམས་ཅན་ཐམས་ཅད་རིམ་གྲོ་བྱེད་པས་ངལ་བ་མེད་པའི་ཡིད་དང་ལྡན་
པ། སེམས་ཅན་ཐམས་ཅད་ཀྱི་སྦྱིན་བདག་དགེ་བའི་རྩ་བ་ཐམས་ཅད་ཉེ་བར་སྟོབས་པའི་སེམས་དང་ལྡན་པ། འགྲོ་བ་བྱིས་པས་ཉེ་བར་བྱས་པ། ཉམས་སུ་ལེན་ཅིང་རྣ་ལ་གཟོན་པའི་ངང་ཚུལ་ཅན། དགེ་བ་ཤིན་ཏུ་བརྟན་པ་ལ་བརྩོན་པ་ཡིད་
ལ་བྱེད་པ། བཟང་པོས་གནས་པ་ལ་བརྩོན་པ། སེམས་ཅན་གྱི་ཁམས་ཐམས་ཅད་བསྙེན་བཀུར་བའི་སེམས་ཀྱིས་བདག་ཉིད་རིམ་གྲོ་པར་འབུལ་བའི་ཚེ། དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། ཅི་ནས་ཀྱང་སེམས་ཅན་ཐམས་
ཅད་ཤིན་ཏུ་རིམ་གྲོ་བྱས་པ་དང་། ཅི་ནས་ཀྱང་བྱང་ཆུབ་སེམས་དཔའི་སྤྱོད་པ་རྒྱུན་མི་འཆད་པ་དང་། ཅི་ནས་ཀྱང་བྱང་ཆུབ་སེམས་དཔའི་དོན་ཉམས་པ་མེད་པ་དང་། ཅི་ནས་ཀྱང་བྱང་ཆུབ་སེམས་དཔའི་ལམ་དུ་ལེགས་པར་ཞུགས་
པར་འགྱུར་བ་དང་། ཅི་ནས་ཀྱང་བྱང་ཆུབ་སེམས་དཔའི་མཉམ་པ་ཉིད་ཁོང་དུ་ཆུད་པར་འགྱུར་བ་དང་། ཅི་ནས་ཀྱང་དེ་བཞིན་གཤེགས་པའི་རིགས་སུ་བདག་ཉིད་བགྲང་བར་འགྱུར་བ་དང་། ཅི་ནས་ཀྱང་བྱང་ཆུབ་སེམས་དཔའི་སྤྱོད་པ་
བདེན་པའི་ཚིག་དང་། འགྲོགས་པ་རྗེས་སུ་བསྲུང་བར་འགྱུར་བ་དང་། ཅི་ནས་ཀྱང་ཁམས་གསུམ་ཐམས་ཅད་སངས་རྒྱས་ཀྱི་ཆོས་ཀྱིས་རྣམ་པར་དག་པར་འགྱུར་བ་དང་། ཅི་ནས་ཀྱང་ལྷག་པའི་བསམ་པས་རྟོགས་པར་སངས་རྒྱས་ཀྱི་ཆོས་ཐམས་

ཅད་ཁོང་དུ་ཆུད་པར་འགྱུར་བ་དང་། ཅི་ནས་ཀྱང་སེམས་ཅན་ཐམས་ཅད་ཀྱི་དགེ་བའི་རྩ་བ་སྐྱོན་མེད་ཅིང་རྣམ་པར་དག་པར་འགྱུར་བ་དང་། ཅི་ནས་ཀྱང་སེམས་ཅན་དེ་དག་ཐམས་ཅད་ཡོན་ཏན་ཆེན་པོ་ལ་རབ་ཏུ་ཞུགས་ཏེ།
ཐམས་ཅད་མཁྱེན་པའི་མཐར་ཤིན་ཏུ་ཐུག་པར་འགྱུར་བ་དེ་ལྟར་ཡོངས་སུ་བསྔོའོ། །དེ་འདི་ལྟར་ཡོངས་སུ་བསྔོ་སྟེ། འདི་ལྟར་ལུས་ཀྱི་རིམ་གྲོ་སེམས་ཅན་ཐམས་ཅད་ལ་ཡོངས་སུ་བཏང་བའི་དགེ་བའི་རྩ་བ་གང་བསྩགས་པ་དེས་སེམས་ཅན་ཐམས་ཅད་ཡོངས་སུ་རྟོགས་
པའི་ཆོས་ཅན་རབ་ཏུ་འཛིན་པའི་ཆོས་ཅན། ཡང་དག་པར་ལེན་པའི་ཆོས་ཅན། མི་འཁྲུལ་པའི་ཆོས་ཅན། ཆུད་མི་ཟ་བའི་ཆོས་ཅན། མི་ཉམས་པའི་ཆོས་ཅན། མི་འབྲེལ་བའི་ཆོས་ཅན། ཡིད་ཤིན་ཏུ་དུལ་བའི་ཆོས་ཅན། མ་དུལ་བ་
འདུལ་བའི་ཆོས་ཅན། ཆོས་ཀྱིས་ཉེ་བར་འདུལ་བའི་ཆོས་ཅན་གྱི་རིམ་གྲོ་བ། སངས་རྒྱས་ཐམས་ཅད་ལ་ཤིན་ཏུ་ཉེ་བར་སེམས་པའི་སེམས་དང་ལྡན་པར་གྱུར་ཅིག་ཅེས། དེ་ལྟར་བྱང་ཆུབ་སེམས་དཔའ་སངས་རྒྱས་ཐམས་ཅད་ལ་རིམ་གྲོའི་ནན་ཏན་དུ་
བྱས་ཏེ། སེམས་ཅན་དེ་དག་ཐམས་ཅད་དགེ་བའི་རྩ་བ་དེས་མཆོད་རྟེན་གྱི་དམ་པར་འགྱུར་བ་དང་། འགྲོ་བ་ཐམས་ཅད་བསྙེན་བཀུར་བར་འོས་པར་འགྱུར་བ་དང་། སེམས་ཅན་ཐམས་ཅད་སངས་རྒྱས་ཀྱི་ཡེ་ཤེས་རྟོགས་པར་འགྱུར་བའི་ཕྱིར།
སྦྱིན་པའི་གནས་དམ་པར་འགྱུར་བ་དང་། འགྲོ་བ་ཐམས་ཅད་ལ་སྙིང་བརྩེ་བའི་ཕྱིར་ལེན་པའི་དམ་པར་འགྱུར་བ་དང་། དགེ་བའི་རྩ་བ་ཐམས་ཅད་ལ་འཇུག་པའི་ཕྱིར། བསོད་ནམས་ཀྱི་དོན་དམ་པ་དང་ལྡན་པར་འགྱུར་བ་དང་།
སྦྱིན་པ་ཚད་མེད་པའི་ཕྱིར་སྦྱིན་བསྲེག་དམ་པ་དང་ལྡན་པར་འགྱུར་བ་དང་། ཁམས་གསུམ་ཐམས་ཅད་ནས་འབྱུང་བའི་དམ་པར་འགྱུར་བ་དང་། ལམ་ཇི་ལྟ་བ་བཞིན་ཏུ་ཡང་དག་པར་སྟོན་པའི་ཕྱིར་དེད་དཔོན་དམ་པར་འགྱུར་བ་དང་། སངས་རྒྱས་

ཀྱི་ཆོས་ཐམས་ཅད་ཡང་དག་པར་གཟུང་བའི་ཕྱིར་གཟུངས་བའི་ཕྱིར་གཟུངས་ཀྱི་དམ་པ་རབ་ཏུ་ཐོབ་པར་འགྱུར་བ་དང་། ནམ་མཁའི་དབྱིངས་ལྟར་ཆགས་པ་མེད་པའི་ལམ་གྱིས་འབྱུང་བའི་ཆོས་ཀྱི་དབྱིངས་ཚད་མེད་པ་དམ་པར་འགྱུར་བའི་ཕྱིར་
ཡོངས་སུ་བསྔོ་སྟེ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་བདག་རིམ་གྲོ་བར་ཕུལ་བས་ཡང་དག་པར་བཟུང་བའི་དགེ་བའི་རྩ་བ་དེ་དག་སེམས་ཅན་གྱི་ཁམས་ཐམས་ཅད་ཕྱག་བྱ་བར་འོས་པའི་ཡེ་ཤེས་ཀྱི་ཕུང་པོ་དང་ལྡན་པར་བྱ་བའི་
ཕྱིར་སེམས་ཅན་ཐམས་ཅད་ལ་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ལ་དགའ་བ་དང་། དད་པ་དང་རབ་ཏུ་དགའ་ཞིང་དང་བའི་སེམས་ཀྱིས་སངས་རྒྱས་བཅོམ་ལྡན་འདས་རྣམས་ལ་ཆོས་
དཀོན་མཆོག་བླ་ན་མེད་པ་ལ་མོས་པའི་བསམ་པ་དང་། སངས་རྒྱས་ཐམས་ཅད་ལ་ཕར་སེམས་པའི་སེམས་བསྐྱེད་པ་དང་། ཆོས་བྱེ་བ་གྲངས་མེད་པ་ཚད་མེད་པའི་ཆོས་ཀྱི་ཁོང་དུ་ཆུད་ཅིང་ཡང་དག་པར་བཟུང་བ་དང་། ཤེས་རབ་
ཆེན་པོ་རིན་པོ་ཆེ་ལ་ཡང་དག་པར་གཞོལ་བའི་དགེ་བའི་རྩ་བ་མངོན་དུ་གྱུར་པ་དང་། དེ་བཞིན་གཤེགས་པའི་སྤྱོད་པ་མཐའ་ཡས་པ་རྗེས་སུ་དྲན་པའི་སངས་རྒྱས་ཀྱི་ཡུལ་དང་། དོན་གྱི་རྗེས་སུ་འབྲང་བས་དེ་བཞིན་གཤེགས་པའི་ལྡེམ་
པོ་དག་ཁོང་དུ་ཆུད་པ་དང་། དེ་བཞིན་གཤེགས་པའི་ཆོས་ཀྱི་སྤྲིན་ལས་སངས་རྒྱས་ཐམས་ཅད་ཀྱི་ཆོས་ཀྱི་ཆར་མངོན་པར་འབབ་པ་དང་། རྟུལ་ཕོད་པས་དབང་སྒྱུར་བ་སེམས་ཀྱི་དཔའ་བས་ཐོབ་པ་དང་། ཐམས་ཅད་མཁྱེན་པའི་
ཐེག་པ་ཕུན་སུམ་སུམ་ཚོགས་པ་ཐམས་ཅད་མཁྱེན་པ་གང་ཟག་གི་མཆོག་གི་སར་ཤིན་ཏུ་བསྟན་པ་དང་། ཆོས་ཆེན་པོ་བྱེ་བ་བརྒྱ་སྟོང་ཚད་མེད་པས་ཤིན་ཏུ་བརྟན་པའི་དབང་པོས་བདག་གི་ལུས་འབུལ་ཞིང་དེ་ལྟར་བྱང་ཆུབ་སེམས་དཔའ་

སེམས་དཔའ་ཆེན་པོས་ཆོས་དེ་ལྟ་བུ་དག་ཉན་པས། དེ་བཞིན་གཤེགས་པ་ལ་དགའ་བ་ཚད་མེད་པ་རྣམ་པར་འཕེལ་བའི་སེམས་དང་ལྡན་པ། ཆོས་སྤྱོད་པ་ལ་ཡང་དག་པར་གནས་པའི་སེམས་ཅན་དམ་པ་རང་གི་ཐེ་ཙོམ་ཆད་པ། གཞན་གྱི་ཐེ་ཙོམ་
གཅོད་པ་ལ་རབ་ཏུ་ཞུགས་པ། རབ་ཏུ་དགའ་བའི་མཚན་མས་སེམས་མ་ཉམས་པ་དགེ་བའི་རྩ་བ་ཐམས་ཅད་དང་། ཡོན་ཏན་གྱི་འབྱུང་གནས་རབ་ཏུ་ཐོབ་པ། བསམ་པ་ཚད་མེད་པ་སྤྱོད་པའི་རྗེས་སུ་ཞུགས་པ། སེམས་ཅན་ཐམས་
ཅད་ཀྱི་དོན་ལ་བརྩོན་པའི་སེམས་དང་ལྡན་པ། རྡོ་རྗེའི་སྙིང་པོ་ལྟ་བུའི་ཡེ་ཤེས་དམ་པའི་ཁྱད་བར་ཁོང་དུ་ཆུད་པའི་སེམས་བརྟན་ཞིང་ཤིན་ཏུ་གནས་པ་སངས་རྒྱས་ཐམས་ཅད་ཀྱི་ཞབས་ཀྱི་དྲུང་ན་གནས་ཤིང་རྣམ་པར་དག་པར་བྱེད་པ། དེ་བཞིན་
གཤེགས་པ་ཐམས་ཅད་ཀྱི་ཞབས་ཀྱི་དྲུང་ན་གནས་པ་ལས་མི་འབྲལ་བ་དེ་ཆོས་ཀྱི་རྣམ་པ་འདི་ལྟ་བུ་དག་ལ་རབ་ཏུ་གནས་ཏེ། རང་གི་ལུས་དེ་བཞིན་གཤེགས་པ་ལ་མངོན་པར་འབུལ་བའི་ཚེ། དགེ་བའི་རྩ་བ་དེ་དག་སེམས་ཅན་ཐམས་
ཅད་ལ་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་སངས་རྒྱས་ཐམས་ཅད་ཀྱིས་ཡང་དག་པར་བཟུང་བའི་ལུས་དང་ལྡན་ཞིང་མི་དམའ་བའི་ལུས་ཡོངས་སུ་རྫོགས་པ་རབ་ཏུ་ཐོབ་པར་གྱུར་ཅིག །སེམས་ཅན་
ཐམས་ཅད་སངས་རྒྱས་ཐམས་ཅད་བལྟ་བ་དང་མི་འབྲལ་བའི་རྗེས་སུ་སོང་བའི་སེམས་དང་ལྡན་པས་སངས་རྒྱས་ཐམས་ཅད་ལ་ཉེ་བར་རྟེན་ཅིང་སྤྱོད་པར་གྱུར་ཅིག །སེམས་ཅན་ཐམས་ཅད་ཡེ་ཤེས་ཀྱི་ཡོན་ཏན་དང་ལྡན་ཞིང་ཉམས་
པ་མེད་པའི་ལུས་དང་ལྡན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་མཉེས་པར་བྱ་བ་ལ་བརྩོན་ཞིང་མི་དམྱིགས་པས་ཚངས་པའི་སྤྱད་པ་སྤྱོད་པར་གྱུར་ཅིག །སེམས་ཅན་ཐམས་ཅད་བདག་ཏུ་བྱ་བ་དང་། བདག་གིར་བྱ་བ་

ལས་གྱེན་དུ་འཕགས་ཤིང་བདག་གི་མེད་པའི་ལུས་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་ལུས་འཕོས་པ་མེད་པར་ལུས་ཡང་དག་པར་སྟོན་ཅིང་། སངས་རྒྱས་ཀྱི་ཞིང་ཐམས་ཅད་དུ་ལུས་རྣམ་པར་བཀྲམ་
པར་གྱུར་ཅིག །སེམས་ཅན་ཐམས་ཅད་བདག་གི་མེད་ཅིང་ཡོངས་སུ་འཛིན་པ་མེད་པར་འགྲོ་བས་གཞན་ལ་རག་ལས་པ་མེད་པའི་ལུས་དང་ལྡན་པར་གྱུར་ཅིག །སེམས་ཅན་ཐམས་ཅད་བླ་ན་མེད་པའི་ལུས་ཀྱི་རིགས་དང་ལྡན་ཞིང་སངས་རྒྱས་ཀྱི་སྐུར་མངོན་
པར་སྐྱེས་པར་གྱུར་ཅིག །སེམས་ཅན་ཐམས་ཅད་བཟོད་པའི་སྟོབས་ཀྱིས་སེམས་ལ་ཐུབ་པ་མེད་ཅིང་ཆོས་ཀྱི་སྟོབས་དང་ལྡན་པའི་ལུས་ཅན་དུ་གྱུར་ཅིག །སེམས་ཅན་ཐམས་ཅད་དེ་བཞིན་གཤེགས་པའི་སྐུ་རྣམ་པར་དག་པར་ཡོངས་སུ་རྫོགས་པས་
འདྲ་བ་མེད་པའི་ལུས་དང་ལྡན་པར་གྱུར་ཅིག །སེམས་ཅན་ཐམས་ཅད་དམྱིགས་པ་མེད་པའི་དབྱིངས་སུ་བྱུང་བས་འཇིག་རྟེན་ལས་འདས་པའི་བསོད་ནམས་ཀྱི་ལུས་དང་ལྡན་པར་གྱུར་ཅིག་ཅེས། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་
པོས་དེ་བཞིན་གཤེགས་པ་ལ་རང་གི་ལུས་ཕུལ་བས་ཡང་དག་པར་བསྡུས་པའི་དགེ་བའི་རྩ་བ་དེ་དག་ཅི་ནས་ཀྱང་སེམས་ཅན་གྱི་ཁམས་ཐམས་ཅད་དུས་གསུམ་གྱི་དེ་བཞིན་གཤེགས་པའི་རིགས་དང་རྒྱུད་དུ་ཡང་དག་པར་འགྲུབ་པར་འགྱུར་བར་བྱ་བའི་ཕྱིར་
སེམས་ཅན་ཐམས་ཅད་ལ་ཡོངས་སུ་བསྔོའོ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ། སེམས་ཅན་ཐམས་ཅད་ལ་འགྲོ་བ་ཀུན་གྱི་དགེ་བའི་རྩ་བ་ལྟར་ཕན་འདོགས་པས་བདག་ཉིད་ཡོངས་སུ་གཏོང་བ་དང་། སེམས་ཅན་
ཐམས་ཅད་ཀྱི་དགེ་བའི་རྩ་བ་ལ་ཡང་དག་པར་སེམས་པ་དང་། མར་མེ་ལྟ་བུར་བདག་སེམས་ཅན་རྣམས་ལ་བསྙེན་པ་དང་། བདེ་བ་ལྟ་བུར་བདག་སེམས་ཅན་ཐམས་ཅད་ལ་བྱིན་གྱིས་རློབ་པ་དང་། ཆོས་ཀྱི་གཞི་ལྟ་བུར་བདག་འགྲོ་བ་

ཐམས་ཅད་ཡང་དག་པར་འཛིན་པ་དང་། སྣང་བ་ལྟ་བུར་བདག་སེམས་ཅན་ཐམས་ཅད་ལ་ཡོངས་སུ་གཏོང་བ་དང་། འགྲོ་བ་ཐམས་ཅད་ཀྱི་མིག་ཡོར་ལྟ་བུར་བདག་སེམས་ཅན་ཐམས་ཅད་ལ་སྣང་བར་བྱེད་པ་དང་། དགེ་བའི་རྩ་བའི་རྒྱུ་ལྟ་བུར་
བདག་འགྲོ་བ་ཐམས་ཅད་ལ་སྟོན་པ་དང་། དགེ་བའི་བཤེས་གཉེན་ལྟ་བུར་བདག་སེམས་ཅན་ཐམས་ཅད་ལ་སྟོབས་པ་དང་། ལམ་ལྟ་བུར་བདག་སེམས་ཅན་ཐམས་ཅད་ལ་ཡང་དག་པར་སྟོན་པ་དང་། བླ་ན་མེད་པའི་བདེ་བའི་རྣམ་པ་རབ་ཏུ་ཐོབ་པ་ལྟ་
བུར་བདག་སེམས་ཅན་ཐམས་ཅད་ལ་ཡོངས་སུ་སྦྱོང་བ་དང་། ཉི་མ་ལྟ་བུར་བདག་འགྲོ་བ་ཐམས་ཅད་ལ་སྙོམས་པར་བྱེད་པ་དང་། དེ་ལྟ་བུའི་ཆོས་དང་ལྡན་པར་བདག་སེམས་ཅན་ཐམས་ཅད་ལ་ཡོངས་སུ་གཏོང་བའི་ཚེ། བདག་བཏང་བས་
བྱུང་བའི་དགེ་བའི་རྩ་བ་དེ་དག་སེམས་ཅན་ཐམས་ཅད་ལ་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་སངས་རྒྱས་ཀྱི་ཡེ་ཤེས་ཀྱི་སར་རབ་ཏུ་ཕྱིན་པར་གྱུར་ཅིག །སེམས་ཅན་ཐམས་ཅད་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ཀྱི་ཡེ་ཤེས་དང་ལྡན་པར་གྱུར་ཅིག །སེམས་ཅན་ཐམས་ཅད་དེ་བཞིན་གཤེགས་པའི་འཁོར་གྱི་དཀྱིལ་འཁོར་དུ་དུལ་བ་ཐོབ་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཕྱིར་སྤྱོད་པ་ལ་མཁས་ཤིང་སྤྱོད་པ།
ཕུན་སུམ་ཚོགས་པ་དང་ལྡན་པར་གྱུར་ཅིག །སེམས་ཅན་ཐམས་ཅད་དོན་དང་ཆོས་དང་ཡེ་ཤེས་དང་མངོན་པར་ཤེས་པ་དང་ལྡན་ཞིང་མྱ་ངན་ལས་འདའ་བའི་མཐུ་ཡོད་པར་གྱུར་ཅིག །སེམས་ཅན་ཐམས་ཅད་དེ་བཞིན་གཤེགས་པའི་རིགས་སུ་
འབྱུང་བས་རབ་ཏུ་ཚིམ་པར་གྱུར་ཅིག །སེམས་ཅན་ཐམས་ཅད་དེ་བཞིན་གཤེགས་པའི་དགོངས་པ་དགེ་བས་མ་རིག་པའི་བསམ་པ་སྤང་བར་གྱུར་ཅིག །སེམས་ཅན་ཐམས་ཅད་བྱང་ཆུབ་ཀྱི་ཤིང་དྲུང་དུ་དགེ་བའི་རྩ་བ་དང་ལྡན་པས་

ཤིན་ཏུ་བྱུང་བར་གྱུར་ཅིག །སེམས་ཅན་ཐམས་ཅད་འཚེ་བའི་སེམས་བསྐྱེད་པ་དང་བྲལ་ཞིང་ཉོན་མོངས་པའི་དགྲ་ཤིན་ཏུ་ཆོམས་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་བསྟན་པ་ཡང་དག་པར་འཛིན་པའི་
ཕྱིར་ཡོངས་སུ་བསྲུང་བ་ཐོབ་པར་གྱུར་ཅིག་ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ལ་བདག་ཡོངས་སུ་བཏང་བས་ཡང་དག་པར་བསྡུས་པའི་དགེ་བའི་རྩ་བ་དེ་དག་འགྲོ་བ་ཐམས་ཅད་ལ་ཕན་པ་དང་། སེམས་
ཅན་ཐམས་ཅད་ཀྱིས་བླ་ན་མེད་པའི་བདེ་བ་དང་ལྡན་པ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཐམས་ཅད་ལ་དྲིན་དུ་གཟོ་བའི་སེམས་བསྐྱེད་པས་སངས་རྒྱས་ཐམས་ཅད་ཀྱི་
རིམ་གྲོ་བྱ་བ་དང་། བུ་ལྟར་བསམ་པ་དང་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཏུ་ལྷག་པའི་བསམ་པ་རྣམ་པར་སྦྱང་བ་དང་། སངས་རྒྱས་ཀྱི་ཆོས་ཐམས་ཅད་ལ་སེམས་འོད་སྣང་ཞིང་དང་བར་བྱིན་གྱིས་བརླབ་པ་དང་། འཇིག་རྟེན་
གྱི་འདུ་ཤེས་ལས་བདག་ཕྱིར་ལོག་པར་བྱ་བ་དང་། བདག་སངས་རྒྱས་ཀྱི་རིགས་སུ་གཏོགས་པར་བགྲང་བ་དང་། བདག་སངས་རྒྱས་ཐམས་ཅད་དང་མཐུན་པར་གཟུང་བ་དང་། བདག་བདུད་ཀྱི་ཡུལ་ལས་རིང་དུ་བྱ་བ་དང་། བདག་སངས་རྒྱས་
ཀྱི་ཡུལ་ལ་མོས་པར་བྱ་བ་དང་། བདག་སངས་རྒྱས་ཀྱི་ཆོས་ཐམས་ཅད་ཀྱི་སྣོད་དུ་བྱིན་ཀྱིས་བརླབ་པ་དང་། དེ་ལྟ་བུའི་ཆོས་ལ་བརྩོན་པར་བྱེད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཐམས་ཅད་ལ་རིམ་གྲོ་བྱེད་པའི་ཚེ། དགེ་
བའི་རྩ་བ་དེ་སེམས་ཅན་ཐམས་ཅད་ལ་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་ཐམས་ཅད་མཁྱེན་པའི་ཡེ་ཤེས་རིན་པོ་ཆེའི་འབྱུང་གནས་སུ་གྱུར་ཏེ། སེམས་ཉེ་བར་བརྟན་པ་རྣམ་པར་དག་པ་རབ་ཏུ་ཐོབ་པར་གྱུར་

ཅིག། །སེམས་ཅན་ཐམས་ཅད་སྡིག་ཏོའི་ལས་ཐམས་ཅད་ལ་ཞེ་སྡང་ཞིང་ཅང་ཤེས་དང་ཡང་དག་པར་འགྲོགས་པར་གྱུར་ཅིག །སེམས་ཅན་ཐམས་ཅད་ཤིན་ཏུ་གཟུང་བའི་ཆོས་ཅན་དུ་གྱུར་ཏེ། མི་ཕྱེད་པའི་གཡོག་དང་ལྡན་པར་གྱུར་ཅིག །སེམས་ཅན་
ཐམས་ཅད་དབང་བསྐུར་བའི་བྱང་ཆུབ་སེམས་དཔའི་ས་ཐོབ་སྟེ། དེ་བཞིན་གཤེགས་པ་ཐམས་ཅད་ཀྱི་སློབ་མར་གྱུར་ཅིག །སེམས་ཅན་ཐམས་ཅད་མི་དགེ་བ་ཐམས་ཅད་ལས་ཤིན་ཏུ་འདས་ཏེ། སངས་རྒྱས་ཐམས་ཅད་ཀྱིས་ཡོངས་སུ་གཟུང་བར་
གྱུར་ཅིག །སེམས་ཅན་ཐམས་ཅད་བྱང་ཆུབ་སེམས་དཔའི་ཆོས་སྐྱོན་མེད་པ་ལ་ཡང་དག་པར་སྤྱོད་ཅིང་། སངས་རྒྱས་ཐམས་ཅད་དང་མཐུན་པར་གྱུར་ཅིག །སེམས་ཅན་ཐམས་ཅད་ཐམས་ཅད་མཁྱེན་པའི་ཡེ་ཤེས་སུ་ལུང་བསྟན་པའི་ཕྱིར་སངས་རྒྱས་
ལ་དམྱིགས་པ་དང་ལྡན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཆོས་ཐམས་ཅད་ལ་དབང་སྒྱུར་ཞིང་སངས་རྒྱས་ཐམས་ཅད་ལ་རག་ལུས་པར་གྱུར་ཅིག །སེམས་ཅན་ཐམས་ཅད་ལེན་པ་མེད་པའི་ལས་མངོན་པར་འདུ་བྱེད་ཅིང་། དེ་བཞིན་
གཤེགས་པ་ཐམས་ཅད་ཀྱིས་ཉེ་བར་གཟུང་བར་གྱུར་ཅིག །སེམས་ཅན་ཐམས་ཅད་ཡེ་ཤེས་ཀྱི་སྤྱོད་པས་སངས་རྒྱས་ཐམས་ཅད་མཉེས་པར་བྱ་བ་ལ་བརྩོན་ཞིང་སངས་རྒྱས་ཐམས་ཅད་ལ་བསྙེན་བཀུར་བྱེད་པའི་དམ་པར་གྱུར་ཅིག་ཅེས། དེ་ལྟར་
བྱང་ཆུབ་སེམས་དཔའ་སེམས་དཔའ་ཆེན་པོ། དེ་བཞིན་གཤེགས་པའི་རིམ་གྲོ་བྱེད་པས། ཡང་དག་པར་བཟུང་བའི་དགེ་བའི་རྩ་བ། དེ་དག་སངས་རྒྱས་ཐམས་ཅད་ཀྱི་བྱང་ཆུབ་མངོན་དུ་གྱུར་པས་ཡོངས་སུ་བསྔོའོ། །འཇིག་རྟེན་
ཐམས་ཅད་ཡོངས་སུ་བསྐྱབ་པའི་སེམས་ཀྱིས་ཡོངས་སུ་བསྔོའོ། །ཁམས་གསུམ་པ་ཐམས་ཅད་ལས་འབྱུང་བའི་སེམས་ཀྱིས་ཡོངས་སུ་བསྔོའོ། །གནོད་པ་མེད་པའི་རྒྱུད་ཀྱིས་ཡོངས་སུ་བསྔོའོ། །ཚད་མེད་པའི་བྱང་ཆུབ་ཡངས་པ་ཐོབ་

པས་ཡོངས་སུ་བསྔོའོ། །སངས་རྒྱས་ཀྱི་ཆོས་ཀྱིས་སྣང་བར་བྱས་པའི་ཤེས་པས་ཡོངས་སུ་བསྔོའོ། །སངས་རྒྱས་ཐམས་ཅད་ཀྱིས་ཤིན་ཏུ་བཟུང་བས་ཡོངས་སུ་བསྔོའོ། །དེ་བཞིན་གཤེགས་པ་ཐམས་ཅད་
ཀྱིས་བྱིན་གྱིས་བརླབས་པས་ཡོངས་སུ་བསྔོའོ། །སངས་རྒྱས་ཐམས་ཅད་ཀྱི་ཆོས་ལ་མོས་པས་ཡོངས་སུ་བསྔོའོ། །འདས་པ་དང་མ་བྱོན་པ་དང་། ད་ལྟར་བྱུང་བའི་སངས་རྒྱས་ཐམས་ཅད་དང་། དགེ་བའི་རྩ་བ་གཅིག་ཏུ་བྱས་ཏེ་ཡོངས་
སུ་བསྔོའོ། །ཅི་ནས་ཀྱང་སངས་རྒྱས་ཀྱི་ཆོས་ཐམས་ཅད་ཁོང་དུ་ཆུད་པར་བྱ་བའི་ཕྱིར་འགྱོད་པ་མེད་པའི་སེམས་ཤིན་ཏུ་རྫོགས་པར་འགྱུར་བར་དགེ་བའི་རྩ་བ་དེ་དག་ཡོངས་སུ་བསྔོའོ།། །།སངས་རྒྱས་རྨད་ག་ཅད་ཅེས་བྱ་
བ་ཤིན་ཏུ་རྒྱས་པ་ཆེན་པོའི་མདོ། །བམ་པོ་བདུན་པ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཡོངས་སུ་འཛིན་པ་ཐམས་ཅད་ལས་རྣམ་པར་འདས་པ། རྒྱལ་པོའི་སྲིད་ལ་ཞེན་པའི་བསམ་པ་མེད་པ། མ་ཆགས་
པའི་སེམས་དང་ལྡན་པ། སྐྱིད་པས་མ་བཅིངས་པ། རྒྱལ་པོ་སྲིད་ལ་ཡོངས་སུ་འཛིན་པ་མེད་པ་ཡོངས་སུ་བཟུང་བ་ལ་ནི་མི་གནས་པ། མ་བཏང་བ་གཏོང་བ། དབང་ཕྱུག་ལ་མ་ཆགས་པ། གནོད་པ་མེད་པའི་ལས་དང་ལྡན་པ།
སེམས་ཅན་ཐམས་ཅད་ལ་ཕན་པ་དང་བདེ་བར་སེམས་པ་དེ་རྒྱལ་པོའི་སྲིད་ཡོངས་སུ་གཏོང་བའི་ཚེ། རྒྱལ་པོའི་སྲིད་བྱིན་པས་ཡང་དག་པར་བཟུང་བའི་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། ཅི་ནས་ཀྱང་ལས་ཀྱི་རྣམ་
པར་སྨིན་པ་ལ་ཡེ་རྔམ་པ་མྱེད་པ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་འཇིག་རྟེན་གྱི་ཆོས་ལ་དགའ་བ་མི་སྐྱེ་བ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་སྲིད་པར་སྐྱེ་བའི་སྐྱེ་མཆེད་ལ་མངོན་

པར་ཞེན་པ་མེད་པར་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་འཇིག་རྟེན་གྱི་ཁམས་ཐམས་ཅད་ཀྱི་གནས་ལ་གནས་ཀྱི་འདུ་ཤེས་མི་བསྐྱེད་པ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་ཕུང་པོ་དང་
ཁམས་དང་། སྐྱེ་མཆེད་ལ་མངོན་པར་ཞེན་པ་མེད་པ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་ཕྱི་ནང་གི་ཆོས་ཐམས་ཅད་དུ་ལུས་ལ་གནས་པའི་སེམས་མི་སྐྱེ་བ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་
ནས་ཀྱང་བྱང་ཆུབ་སེམས་དཔའི་སྤྱོད་པ་ཐམས་ཅད་ལ་རྨོངས་པར་མི་འགྱུར་བ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་དགེ་བའི་བཤེས་གཉེན་ཐམས་ཅད་དང་རིང་དུ་མི་འགྱུར་བ་དེ་ལྟར་དགེ་བའི་རྩ་བ་དེ་དག་ཡོངས་སུ་
བསྔོའོ། །ཅི་ནས་ཀྱང་བྱང་ཆུབ་སེམས་དཔའི་སྤྱོད་པ་ཆེན་པོའི་སྨོན་ལམ་ཉམས་པར་མི་འགྱུར་བ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་དགེ་བའི་བཤེས་གཉེན་ཐམས་ཅད་མངོན་པར་མཉེས་པར་འགྱུར་བ་དེ་
ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །གཞན་ཡང་འདི་ལྟར་ཡོངས་སུ་བསྔོ་སྟེ། རྒྱལ་པོའི་སྲིད་བྱིན་པས་ཡང་དག་པར་བསྡུས་པའི་དགེ་བའི་རྩ་བ་འདིས། སེམས་ཅན་ཐམས་ཅད་ཆོས་ཀྱི་དབང་ཕྱུག་གི་དམ་པ་ཐོབ་སྟེ།
ཆོས་ཀྱི་རྒྱལ་པོའི་སྲིད་ལ་དབང་སྒྱུར་བ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་རྒྱལ་པོའི་དཀྲུགས་མ་དང་དགྲ་ཐམས་ཅད་རབ་ཏུ་གཞོམ་པའི་ཕྱིར་སངས་རྒྱས་ཀྱི་རྒྱལ་སྲིད་རབ་ཏུ་ཐོབ་པར་གྱུར་ཅིག །སེམས་ཅན་ཐམས་
ཅད་དེ་བཞིན་གཤེགས་པའི་ཡེ་ཤེས་ཀྱིས་སངས་རྒྱས་ཀྱི་ཆོས་རབ་ཏུ་བརྗོད་པའི་ཕྱིར། སངས་རྒྱས་ཀྱི་རྒྱལ་སྲིད་ཆེན་པོ་ལ་རབ་ཏུ་གནས་པར་གྱུར་ཅིག །སེམས་ཅན་ཐམས་ཅད་བླ་ན་མེད་པའི་ཆོས་ཀྱི་འཁོར་ལོ་ཐོགས་པ་མེད་པར་བསྐོར་

བའི་ཕྱིར་སངས་རྒྱས་ཐམས་ཅད་ཀྱི་ཡུལ་གྱི་རྒྱལ་སྲིད་ལ་རབ་ཏུ་གཞོལ་བར་གྱུར་ཅིག །སེམས་ཅན་ཐམས་ཅད་ཆོས་ཀྱི་དབང་ཕྱུག་སངས་རྒྱས་ཀྱི་རིགས་རྒྱུན་མི་འཆད་པར་ཡང་དག་པར་འཛིན་པའི་ཚུལ་དུ་དེ་བཞིན་གཤེགས་
པ་ཐམས་ཅད་ཀྱི་དགེ་བའི་རྩ་བས་མངོན་པར་བྱུང་བར་གྱུར་ཅིག །སེམས་ཅན་ཐམས་ཅད་བྱང་ཆུབ་སེམས་དཔའ་ཚད་མེད་པ་ཡང་དག་པར་བསྒྲུབ་པའི་ཕྱིར་སངས་རྒྱས་ཀྱི་རྒྱལ་སྲིད་ཡངས་ཤིང་ཚད་མེད་པ་རྗེས་སུ་སྐྱོང་བར་གྱུར་ཅིག །སེམས་ཅན་ཐམས་
ཅད་སངས་རྒྱས་འབྱུང་བ་རྒྱུན་མ་ཆད་པ་དང་ལྡན་ཞིང་ཆོས་ཀྱི་དབྱིངས་ལ་ངེས་པའི་རྒྱལ་སྲིད་དང་ལྡན་པར་གྱུར་ཅིག །སེམས་ཅན་ཐམས་ཅད་འགྲོ་བ་ཀུན་གདུལ་བ་ལ་ཐོགས་པ་མེད་པར་ཞུགས་པས་སངས་རྒྱས་ཀྱི་ཞིང་ཐམས་ཅད་དུ་ཡེ་ཤེས་ཀྱི་དབང་ཕྱུག་ཏུ་
གྱུར་ཅིག །སེམས་ཅན་ཐམས་ཅད་འཇིག་རྟེན་གྱི་ཁམས་ཀུན་གྱི་སེམས་ཅན་ཐེག་པ་ཆེན་པོ་ལ་རབ་ཏུ་གཞོག་པའི་ཚུལ་གྱིས་འཇིག་རྟེན་གྱི་ཁམས་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པ་ཐམས་ཅད་དུ་ཆོས་ཀྱི་སྦྱིན་བདག་དུ་
གྱུར་ཅིག །སེམས་ཅན་ཐམས་ཅད་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་ཐམས་ཅད་དང་། དགེ་བའི་རྩ་བའི་རྒྱུད་ཀྱི་ཚུལ་གཅིག་ཏུ་གྱུར་ཏེ། ལྟོད་པ་མེད་པའི་རྒྱལ་སྲིད་རབ་ཏུ་ཐོབ་པར་གྱུར་ཅིག །དེ་ལྟར་བྱང་ཆུབ་
སེམས་དཔའ་སེམས་དཔའ་ཆེན་པོ་རྒྱལ་སྲིད་ཡོངས་སུ་བཏང་བས་ཡང་དག་པར་བཟུང་བའི་དགེ་བའི་རྩ་བ་དེ་དག་ཅི་ནས་ཀྱང་འགྲོ་བ་ཐམས་ཅད་དུ་ཤིན་ཏུ་བདེ་བ་དང་། ལེགས་པ་འབྱུང་བའི་ཕྱིར་སེམས་ཅན་ཐམས་ཅད་ལ་ཡོངས་སུ་བསྔོའོ། །
འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་མ་འཁྲུགས་པ་དང་། བྱང་ཆུབ་སེམས་དཔའི་སེམས་རྩེ་གཅིག་པ་དང་། སྨོན་ལམ་ཚད་མེད་པར་བྱས་ཏེ། སྙིང་རྗེ་ཆེན་པོ་བསྐྱེད་ཅིང་བྱམས་པ་ཆེན་པོའི་སྟོབས་ཉེ་བར་

བཞག་སྟེ། བསམ་པ་ཤིན་ཏུ་ཚིམ་པར་བྱས་ནས། སེམས་ཅན་ཀྱི་དོན་ལ་བདག་རབ་ཏུ་བཞག་སྟེ། ཡེ་ཤེས་ཆེན་པོ་ལ་ཤིན་ཏུ་མོས་པར་བྱས་ནས། སངས་རྒྱས་ཀྱི་ཆོས་ལ་མཉམ་པའི་སེམས་སུ་བྱས་ཏེ། དགེ་བའི་ཆོས་ཉིད་ལ་རྣམ་པར་དཔྱོད་
ཅིང་ཐམས་ཅད་མཁྱེན་པའི་རྒྱལ་སྲིད་ལ་རབ་ཏུ་གཞོལ་བར་སེམས་བསྐྱེད་པ་དང་། ཆོས་ཀྱི་དབང་ཕྱུག་ལ་ཤིན་ཏུ་བརྩོན་པའི་བསམ་པ་དང་། ཡེ་ཤེས་ལ་དབང་བསྒྱུར་བ་ཐོབ་པའི་ཡིད་ཀྱི་དབང་པོ་དང་། ཡོན་ཏན་ཐམས་ཅད་རྣམ་པར་སྦྱོང་བའི་
རབ་ཏུ་འཇུག་པ་དང་། བློ་བརྟན་པ་དང་ལྡན་པའི་བསམ་པ་ཡངས་པ་དང་། ཚོགས་སུ་གྱུར་པའི་དགེ་བའི་རྩ་བ་ཐམས་ཅད་དང་། བརྩམ་པར་སྐབས་ཕྱེ་བ་དང་ལྡན་པའི་སངས་རྒྱས་ཀྱི་ཆོས་ཀྱི་སྨོན་ལམ་དང་གཞན་ལ་རག་ལས་པ་མེད་པའི་ཐམས་ཅད་
མཁྱེན་པ་ཉིད་ཀྱི་ཆོས་དང་། ཤིན་ཏུ་བརྟན་པའི་བྱང་ཆུབ་ཏུ་སེམས་བསྐྱེད་པའི་སྟོབས་དང་། བརྩམས་པ་ཐམས་ཅད་མཐར་འབྱིན་པའི་བྱང་ཆུབ་སེམས་དཔའ་ཐམས་ཅད་ཀྱི་སྤྱོད་པའི་སྨོན་ལམ་གྱིས་མི་དང་ཡུལ་དུ་བཅས་པ་དང་། གྲོང་ཁྱེར་དང་
རྒྱལ་པོའི་ཕོ་བྲང་འཁོར་རྒྱན་ཐམས་ཅད་ཀྱིས་རྣམ་པར་བརྒྱན་པ་ཐམས་ཅད་བཏང་བར་ཡོངས་སུ་གཏོང་བས་སློང་བ་རྣམས་ལ་ཡོངས་སུ་གཏོང་བའི་ཚེ། ཡུལ་དང་། མིར་བཅས་པ་དང་། གྲོང་ཁྱེར་དང་། རྒྱལ་པོའི་ཕོ་བྲང་
འཁོར་ཡོངས་སུ་བཏང་བས་ཡང་དག་པར་བསྡུས་པའི་དགེ་བའི་རྩ་བ་དེ་དག་སེམས་ཅན་ཐམས་ཅད་ལ་འདི་ལྟར་ཡོངས་སུ་བསྔོ་སྟེ། ཡུལ་དང་མིར་བཅས་པ་དང་། གྲོང་ཁྱེར་དང་རྒྱལ་པོའི་གནས་རབ་ཏུ་བྱིན་པའི་དགེ་བའི་རྩ་བ་འདིས་སེམས་
ཅན་ཐམས་ཅད་ཀྱིས་འཇིག་རྟེན་གྱི་ཁམས་ཐམས་ཅད་རྣམ་པར་སྦྱངས་ཏེ། སངས་རྒྱས་ཐམས་ཅད་བཞུགས་ཤིང་། སྤྱོད་པའི་ཕྱིར་སངས་རྒྱས་ཐམས་ཅད་ལ་འབུལ་བར་གྱུར་ཅིག །སེམས་ཅན་ཐམས་ཅད་ཞི་བའི་གནས་རབ་ཏུ་ཐོབ་ཅིང་།

དགོན་པ་ཤིན་ཏུ་དབེན་པ་ལ་མངོན་པར་མོས་པར་གྱུར་ཅིག །སེམས་ཅན་ཐམས་ཅད་བླ་ན་མེད་པའི་དབེན་པའི་མཐར་ཐུག་པར་གྲོང་དང་། གྲོང་ཁྱེར་དང་། ལྗོངས་དང་། ཁམས་དང་། རྒྱལ་པོའི་གནས་ལ་གནས་མེད་
པར་གྱུར་ཅིག །སེམས་ཅན་ཐམས་ཅད་འཇིག་རྟེན་གྱི་སྨྲ་བ་ཐམས་ཅད་ལས་རྣམ་པར་འདས་ཏེ། འདུ་འཛི་མེད་པར་གྱུར་ཅིག །སེམས་ཅན་ཐམས་ཅད་འགྱོད་པ་མེད་པའི་སྦྱིན་བདག་ཏུ་གྱུར་ཏེ། གཏོང་བའི་སེམས་དང་མི་འབྲལ་བར་གྱུར་ཅིག །
སེམས་ཅན་ཐམས་ཅད་གནས་མེད་པའི་བསམ་པ་རབ་ཏུ་ཐོབ་ཅིང་ཁྱིམ་གྱི་གནས་དང་རབ་ཏུ་བྲལ་བར་གྱུར་ཅིག །སེམས་ཅན་ཐམས་ཅད་གཏོང་བ་ཤིན་ཏུ་གཏོང་བའི་སེམས་དང་ལྡན་ཞིང་གཏང་བར་བྱ་བ་གཏོང་བར་གྱུར་ཅིག །སེམས་ཅན་
ཐམས་ཅད་ཁྱིམ་གྱི་གནས་ལ་ཆགས་པ་ལས་རྣམ་པར་འདས་ཏེ་གནས་པ་ཆུད་ཟ་བ་མེད་པར་གྱུར་ཅིག །སེམས་ཅན་ཐམས་ཅད་གནོད་པ་དང་། འཚེ་བ་དང་། འཇིགས་པ་ཐམས་ཅད་ལས་རྣམ་པར་འདས་ཏེ། གཙེ་བ་ཐམས་ཅད་ཀྱིས་
ཡོངས་སུ་གཏོང་བར་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་ལ་སངས་རྒྱས་ཀྱི་ཞིང་འབུལ་བས་འཇིག་རྟེན་གྱི་ཁམས་ཐམས་ཅད་རྣམ་པར་སྤྱོད་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཡུལ་དང་མིར་བཅས་པ་
དང་། གྲོང་ཁྱེར་དང་རྒྱལ་པོའི་ཕོ་བྲང་འཁོར་ཡོངས་སུ་གཏོང་བའི་ཚེ། དགེ་བའི་རྩ་བ་དེ་དག་སངས་རྒྱས་ཀྱི་ཞིང་གི་གནས་ཡོངས་སུ་དག་པར་བྱ་བའི་ཕྱིར་སེམས་ཅན་ཐམས་ཅད་ལ་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་
སེམས་དཔའ་ཆེན་པོ་གཡོག་དང་། འཁོར་ལ་དགའ་བའི་མཚན་མར་མི་འཛིན་ཅིང་ལྟོས་པ་མེད་པའི་སེམས་དང་ལྡན་པ། འཁོར་ཐམས་ཅད་ལ་ཞེན་པ་མེད་པའི་རྒྱུད་ཅན་འདོད་པའི་དགའ་བ་ཐམས་ཅད་ཀྱིས་སེམས་བཅིངས་པ་མེད་པ།

གཟུགས་ཀྱི་རྣམ་པ་ཐམས་ཅད་ལ་མངོན་པར་མ་ཆགས་པའི་སེམས་དང་ལྡན་པ། འདོད་པའི་དགའ་བ་ཐམས་ཅད་ལ་སེམས་མི་བརྐམས་པ། འདོད་པའི་དགའ་བ་སྣ་ཚོགས་ཡོངས་སུ་སྤྱོད་པ་ལ་རྟོག་པ་མེད་པར་གནས་པ། འདོད་པའི་སྦྱོར་བ་ཐམས་
ཅད་ལ་ཆགས་པ་མེད་པའི་སེམས་དང་ལྡན་པ། བུད་མེད་ཀྱི་དགའ་བ་དང་། རྩེད་མོའི་དགའ་བ་ཡོངས་སུ་སྤྱོད་པ་ཐམས་ཅད་ལ་མཚན་མར་མི་འཛིན་པ། བུད་མེད་རིན་པོ་ཆེའི་ཡན་ལག་དང་ཉིང་ལག་ཐམས་ཅད་ལ་མ་ཆགས་པ། འཇིག་
རྟེན་གྱི་ཕུན་སུམ་ཚོགས་པ་ཐམས་ཅད་ལས་ཕྱིར་མི་ལྡོག་པས་གཡོག་འཁོར་དང་། ཆུང་མའི་འཁོར་དང་རོལ་མོར་བཅས། གླུ་དང་། གར་དང་རྔ་དང་རོལ་མོ་དཀྲོལ་བ་ཕྱེད་ཅིང་སྤྱོད་པ་བསྙེན་བཀུར་ཞིང་རིམ་གྲོ་བྱ་བ་ལ་ཤིན་ཏུ་མཁས་
པར་གྱུར་པ། བཟོ་དང་སྒྱུ་རྩལ་ཤིན་ཏུ་བསླབས་པ། འཇིག་རྟེན་པའི་ཡོན་ཏན་ཐམས་ཅད་དང་ལྡན་པ། དགའ་བར་བྱེད་པ་ཡིད་དུ་འོང་བའི་རིམ་གྲོ་རྩེ་བར་བྱེད་པ། བཀུར་སྟིའི་ཚུལ་ལ་མཁས་པ། རོལ་མོ་བརྡུང་བའི་སྒྲ་ཡིད་
དུ་འོང་བ་ཤིན་ཏུ་ཕྱུང་བ་དང་། རོལ་མོ་དཀྲོལ་བ་དང་། གླུའི་སྒྲ་མི་མཐུན་པ་མེད་པ་དང་། གར་གྱིས་ཉེ་བར་སྤྱོད་པ་དང་ལྡན་པ། བུད་མེད་ཅང་ཤེས་ཀྱི་ཚོགས་ཀྱིས་ཀུན་ནས་བསྐོར་བ། བཞིན་སྡུག་གུ་དང་ཆ་བྱད་སྡུག་གུའི་བུ་མོ་རིན་པོ་ཆེ་
དང་ལྡན་པ། ཕྲེང་བ་དང་། སྤོས་དང་། བདུག་སྤོས་དང་། རྒྱན་གྱི་རིམ་གྲོར་བྱེད་པ། བཞད་གད་དང་། རོལ་མོས་དགའ་བར་རྩེ་ཞིང་བཀུར་སྟི་རྣམ་པ་སྣ་ཚོགས་ཡིད་དུ་འོང་བ་སྟོན་པའི་བུད་མེད་རིན་པོ་ཆེ་འགྲོགས་
འགྲོགས་པ། ངག་ཉན་ཅིང་མཐུན་པར་འཛིན་པ་ངེས་པའི་ཚིག་གིས་དགའ་བར་བྱེད་ཅིང་རིམ་གྲོར་བྱེད་པ་རྒྱན་བཟང་པོ་རབ་ཏུ་མང་པོས་བལྟ་ན་ཡིད་དུ་འོང་བར་བརྒྱན་པས་ཤིན་ཏུ་རྣམ་པར་དག་པ། རོལ་མོ་བརྡུང་བ་དང་། དཀྲོལ་བ་བྱེ་བ་ཁྲག་

ཁྲིག་བརྒྱ་སྟོང་དང་ལྡན་པ། བྱང་ཆུབ་སེམས་དཔའི་ལས་ཀྱི་དགེ་བའི་རྩ་བ་དང་། རྒྱུ་མཐུན་པར་བྱུང་བ། ཅང་ཤེས་ཤིང་བྱང་ཆུབ་སེམས་དཔའི་དབང་གི་རྗེས་སུ་འབྲང་བ། སེམས་དགའ་བར་བྱེད་པ་དེ་ལྟ་
བུའི་གཡོག་འཁོར་དང་། ཆུང་མའི་འཁོར་དང་། རོལ་མོར་བཅས་པ་ཤིན་ཏུ་བཤེས་པ་དེ་དག་ཐམས་ཅད་ཡོངས་སུ་གཏོང་ཞིང་སྦྱིན་པ་བྱེད་པའི་ཚེ། དགེ་བའི་རྩ་བ་དེ་དག་འགྲོ་བ་ཐམས་ཅད་ནས་འབྱུང་བའི་སེམས་ཀྱིས་ཡོངས་སུ་
བསྔོའོ། །སངས་རྒྱས་ཀྱི་ཆོས་ལ་དགའ་བ་རབ་ཏུ་ཐོབ་པས་ཡོངས་སུ་བསྔོའོ། །སྙིང་པོ་བླངས་པའི་སེམས་ཀྱིས་ཡོངས་སུ་བསྔོའོ། །ཡེ་ཤེས་རྡོ་རྗེའི་དབྱིངས་མི་ཤིགས་པའི་སེམས་ཀྱིས་ཡོངས་སུ་བསྔོའོ། །
དེ་བཞིན་གཤེགས་པའི་དཀྱིལ་འཁོར་རབ་ཏུ་ཐོབ་པས་ཡོངས་སུ་བསྔོའོ། །སྙིང་པོ་ལེན་པར་བྱས་ཏེ་ཡོངས་སུ་བསྔོའོ། །བླ་ན་མེད་པའི་སེམས་དང་ལྡན་པས་ཡོངས་སུ་བསྔོའོ། །ཡེ་ཤེས་ཀྱིས་ཁོང་དུ་ཆུད་པའི་སེམས་དང་ལྡན་
པས་ཡོངས་སུ་བསྔོའོ། །དགེ་བའི་རྩ་བ་ཐམས་ཅད་ཀྱི་འབྱུང་གནས་སུ་རེད་པར་བྱས་ཏེ་ཡོངས་སུ་བསྔོའོ། །དུས་གསུམ་གྱི་སངས་རྒྱས་ཐམས་ཅད་དང་མི་འགལ་བར་བྱས་ཏེ་ཡོངས་སུ་བསྔོའོ། །དེ་ལྟ་བུའི་ཆོས་ལ་རྣམ་པར་སྤྱོད་
ཅིང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིགས་དང་ལྡན་པའི་རིགས་ཀྱི་རྒྱུད་དུ་བྱུང་བ། སངས་རྒྱས་ཀྱི་རིགས་རྣམ་པར་དག་པས་རབ་ཏུ་སྐྱེས་པ། ཐམས་ཅད་མཁྱེན་པའི་ལམ་དུ་སེམས་མངོན་པར་སྐྱེས་པ།
བྱང་ཆུབ་སེམས་དཔའི་ལས་དང་ཡེ་ཤེས་འབྱམ་ཀླས་པ་ལ་ཞུགས་པ། འཇིག་རྟེན་གྱི་དྲི་མ་ཐམས་ཅད་རབ་ཏུ་སྦྱོང་བ། སྦྱིན་པ་བྱེད་པ། སྦྱིན་པའི་སེམས་དང་ལྡན་པ། ཡོན་ཏན་ཆེན་པོའི་དཀྱིལ་འཁོར་གྱི་སྦྱིན་པའི་གནས་སུ་གྱུར་པ། འཇིག་རྟེན་

ཐམས་ཅད་ཀྱི་གནས་དང་འགྲོ་བ་ཐམས་ཅད་ཀྱི་རྟེན་དུ་གྱུར་པ། སེམས་ཅན་ཐམས་ཅད་རྣམ་པར་དག་པར་བྱ་བ་ལ་ཡང་དག་པར་ཞུགས་པ། དགེ་བའི་རྩ་བ་ཐམས་ཅད་གཟུང་བ་ལ་ཡང་དག་པར་བརྩོན་པ་དེ་འཁོར་ཐམས་ཅད་ཡོངས་སུ་བཏང་བས་ཡང་དག་
པར་བཟུང་བའི་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། །སེམས་ཅན་ཐམས་ཅད་བྱང་ཆུབ་སེམས་དཔའི་ཏིང་ངེ་འཛིན་མི་འཕྲོགས་པ་རབ་ཏུ་ཐོབ་སྟེ། ཏིང་ངེ་འཛིན་ཚད་མེད་པའི་འཁོར་གྱིས་བསྐོར་བར་གྱུར་ཅིག །སེམས་ཅན་ཐམས་
ཅད་སངས་རྒྱས་མཐོང་བས་སྤྲོ་བ་དང་དགའ་བ་རབ་ཏུ་ཐོབ་སྟེ། སངས་རྒྱས་ཐམས་ཅད་ཀྱི་ཏིང་ངེ་འཛིན་གྱི་རྒྱན་ལ་མཉམ་པར་གཞོག་པར་གྱུར་ཅིག །སེམས་ཅན་ཐམས་ཅད་ཚད་མེད་པའི་ཏིང་ངེ་འཛིན་གྱི་རྣམ་པར་འཕྲུལ་པ་ལ་གནས་ཤིང་བྱང་
ཆུབ་སེམས་དཔའི་ཏིང་ངེ་འཛིན་གྱིས་རྣམ་པར་རྩེ་ཞིང་སྤྱོད་པར་གྱུར་ཅིག །སེམས་ཅན་ཐམས་ཅད་སེམས་ལ་འཁྲུག་པ་མེད་ཅིང་ཆོས་དང་མཐུན་པའི་ཏིང་ངེ་འཛིན་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་ཏིང་ངེ་འཛིན་ཐམས་ཅད་ལ་
དབང་སྒྱུར་ཞིང་བྱང་ཆུབ་སེམས་དཔའི་ཏིང་ངེ་འཛིན་ཟབ་མོ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་ཡང་དག་པར་བྲལ་བའི་ཡིད་རབ་ཏུ་ཐོབ་སྟེ། ཏིང་ངེ་འཛིན་གྱི་འཁོར་དང་ལྡན་པར་གྱུར་ཅིག །སེམས་ཅན་ཐམས་ཅད་ཏིང་ངེ་འཛིན་
ཀྱི་མཚན་མ་འཛིན་པ་ཤིན་ཏུ་ཐོབ་སྟེ། ཏིང་ངེ་འཛིན་སྣ་ཚོགས་ལ་མཁས་པར་གྱུར་ཅིག །སེམས་ཅན་ཐམས་ཅད་ཏིང་ངེ་འཛིན་ཐམས་ཅད་སྒོམ་པ་ལ་གནས་ཤིང་ཏིང་ངེ་འཛིན་གྱི་ཁྱད་པར་ཤེས་པར་གྱུར་ཅིག །སེམས་ཅན་ཐམས་ཅད་རྟག་ཏུ་
རྒྱུན་མི་འཆད་པའི་སེམས་ཀྱིས་མི་གཉིས་པའི་ཏིང་ངེ་འཛིན་ལ་ཡང་དག་པར་སྤྱོད་ཅིང་ཆགས་པ་མེད་པའི་ཏིང་ངེ་འཛིན་རབ་ཏུ་ཐོབ་པར་གྱུར་ཅིག་ཅེས། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་ཐམས་ཅད་ཡོངས་སུ་བཏང་བས་ཡང་

དག་པར་བཟུང་བའི་དགེ་བའི་རྩ་བ་དེ་དག་སེམས་ཅན་ཐམས་ཅད་ཀྱི་འཁོར་གཞན་གྱིས་མི་ཕྱེད་ཅིང་རྣམ་པར་དག་པ་དང་། བྱང་ཆུབ་སེམས་དཔའི་འཁོར་གྱི་ཚོགས་རབ་ཏུ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །བྱང་ཆུབ་ཏུ་སེམས་
བསྐྱེད་པ་ཤིན་ཏུ་རྣམ་པར་དག་པར་འགྱུར་བ་དང་། སངས་རྒྱས་ཀྱི་ཆོས་ཡོངས་སུ་རྫོགས་པ་རབ་ཏུ་ཐོབ་པར་འགྱུར་བའི་ཕྱིར་སེམས་ཅན་ཐམས་ཅད་ལ་ཡོངས་སུ་བསྔོའོ། །ཐམས་ཅད་མཁྱེན་པའི་ཡེ་ཤེས་ཁོང་དུ་ཆུད་པ་དང་། ཐམས་ཅད་མཁྱེན་པའི་སྟོབས་ཡོངས་སུ་
རྫོགས་པར་འགྱུར་བའི་ཕྱིར་སེམས་ཅན་ཐམས་ཅད་ལ་ཡོངས་སུ་བསྔོའོ། །སྐལ་པ་མཉམ་པའི་སེམས་ཅན་དང་འགྲོགས་པ་དང་འཐུན་པའི་གཡོག་འཁོར་རབ་ཏུ་འཐོབ་པར་བྱ་བའི་ཕྱིར་སེམས་ཅན་ཐམས་ཅད་ལ་ཡོངས་སུ་བསྔོའོ། །ཁ་ན་མ་ཐོ་བ་མེད་པའི་དགེ་
བའི་རྩ་བ་རབ་ཏུ་འགྲུབ་པ་དང་། ཐམས་ཅད་མཁྱེན་པའི་བསོད་ནམས་ཡོངས་སུ་རྫོགས་པར་འགྱུར་བའི་ཕྱིར་སེམས་ཅན་ཐམས་ཅད་ལ་ཡོངས་སུ་བསྔོའོ། །སངས་རྒྱས་ཀྱི་སྐུ་རྣམ་པར་དག་པ་འཐོབ་པ་དང་གཡོག་ངེས་པ་དང་ལྡན་པར་བྱ་བའི་ཕྱིར་
སེམས་ཅན་ཐམས་ཅད་ལ་ཡོངས་སུ་བསྔོའོ། །སངས་རྒྱས་ཀྱི་ཆོས་མི་ཟད་པ་ཐམས་ཅད་ཀྱི་མཛོད་ཤིན་ཏུ་རིག་པ་ལ་ཞུགས་པས་རབ་ཏུ་སྟོན་པ་དང་། ཐ་དད་པ་ཡང་དག་པར་ཤེས་པ་གཅིག་ནས་གཅིག་ཏུ་བརྒྱུད་པ་ཐམས་ཅད་འཐོབ་པར་བྱ་བའི་ཕྱིར་
སེམས་ཅན་ཐམས་ཅད་ལ་ཡོངས་སུ་བསྔོའོ། །འགྲོ་བ་ཐམས་ཅད་ཀྱི་དགེ་བའི་རྩ་བ་ལས་རྣམ་པར་འདས་པ་དང་། སེམས་ཅན་ཐམས་ཅད་གྲོགས་སུ་འགྱུར་བའི་དགེ་བའི་རྩ་བ་ཡོངས་སུ་རྫོགས་པར་བྱ་བའི་ཕྱིར། སེམས་ཅན་ཐམས་ཅད་
ལ་ཡོངས་སུ་བསྔོའོ། །རྣམ་པར་དག་པའི་ཆོས་ཐམས་ཅད་ཡོངས་སུ་རྫོགས་པར་འགྱུར་བ་དང་། ཁ་ན་མ་ཐོ་བ་མེད་པའི་ལས་ཡོངས་སུ་རྫོགས་པར་བྱ་བའི་ཕྱིར། སེམས་ཅན་ཐམས་ཅད་ལ་ཡོངས་སུ་བསྔོའོ། །ཆོས་སྣང་བ་ཐམས་ཅད་

ཀྱི་རྒྱན་ཡོངས་སུ་དག་པར་བྱ་བ་དང་། སངས་རྒྱས་ཀྱི་ཆོས་ཐམས་ཅད་མངོན་སུམ་དུ་རྫོགས་པར་བྱ་བའི་ཕྱིར། སེམས་ཅན་ཐམས་ཅད་ལ་ཡོངས་སུ་བསྔོའོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བུ་དང་བུ་མོ་དང་། ཆུང་མ་ཡོངས་
སུ་གཏོང་ཞིང་ཇི་ལྟར་གཞོན་ནུ་ཤིན་ཏུ་སྦྱོང་བ་དང་། རྒྱལ་པོ་རྒྱན་ཐམས་ཅད་སྟོན་པ་དང་དེ་མ་ཡིན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་དག་ཀྱང་ཐམས་ཅད་མཁྱེན་པའི་ལམ་ལ་མངོན་པར་གནས་པ་གཏོང་བ་དང་། ཡོངས་སུ་གཏོང་བ་
ཐམས་ཅད་རྣམ་པར་འཕེལ་བར་བྱེད་པ། བྱང་ཆུབ་སེམས་དཔའི་གཏོང་བའི་ལམ་རྣམ་པར་སྦྱོང་བ། ཕྱིས་འགྱོད་པ་མེད་པར་གཏོང་བའི་སེམས་རྣམ་པར་སྦྱོང་བ། གཏོང་བ་རིན་པོ་ཆེ་ཐམས་ཅད་ཀྱིས་ཐམས་ཅད་མཁྱེན་པར་སེམས་བསྐྱེད་པ་ལ་མཉམ་
པར་གཞོག་པ། འགྲོ་བ་ཐམས་ཅད་རྣམ་པར་དག་པར་བྱེད་པའི་ལྷག་པའི་བསམ་པ་རབ་ཏུ་སྒྲུབ་པ། ལྷག་པའི་བསམ་པས་དག་པའི་བྱང་ཆུབ་རྣམ་པ་ཐམས་ཅད་དུ་ཡོངས་སུ་རྫོགས་པར་བྱེད་པ། བྱང་ཆུབ་སེམས་དཔའི་ལམ་གྱིས་བདག་མངོན་པར་
བསྐྱབ་པར་ཡང་དག་པར་ལྟ་བ། སངས་རྒྱས་ཐམས་ཅད་ཀྱི་བྱང་ཆུབ་ཏུ་སེམས་མངོན་དུ་གྱུར་པར་བྱིན་གྱིས་རློབ་པ། དེ་བཞིན་གཤེགས་པ་ཐམས་ཅད་ཀྱི་རིགས་ལ་གནས་པའི་སེམས་བསྐྱེད་པ། ཡོངས་སུ་སྒྱུར་བ་རྣམས་ཀྱིས་བུ་དང་བུ་མོ་དང་
ཆུང་མ་ཡོངས་སུ་བཏང་བ་དེ་ལྟ་བུ་དང་། བུ་མོ་དང་། ཆུང་མ་དེ་དག་བསམ་པ་སྟོབས་དང་ལྡན་པར་བྱས་ཏེ་གཏོང་བ་དང་། བདག་དེ་བཞིན་ཉིད་དུ་མོས་པར་བྱས་ཏེ། སྦྱིན་པར་བྱེད་པ་དང་། བདག་ཉིད་འཇིག་རྟེན་ཐམས་ཅད་ཀྱིས་
ཅི་འདོད་པར་སྤྱོད་པར་ཡང་དག་པར་ལྟ་བ་དང་། བདག་སེམས་ཅན་ཐམས་ཅད་སྦྱིན་པ་ཀུན་གྱི་འབྱུང་གནས་སུ་གྱུར་པར་བྱིན་གྱིས་རློབ་པ་དང་། གང་གིས་སེམས་ཅན་དམའ་བར་གྱུར་པ་དེ་དག་གིས་ཡོངས་སུ་རྒྱས་པར་བྱེད་

པ་དང་། །དེ་ལྟ་བུའི་ཚུལ་གྱིས་བདག་ཡང་དག་པར་འཛིན་པ་དང་། མཆོད་རྟེན་དམ་པར་འགྱུར་རོ་ཞེས་འགྲོ་བ་ཐམས་ཅད་དུ་བདག་སྤྲོ་བར་བྱེད་པ་དང་། ཐམས་ཅད་མཁྱེན་པའི་སེམས་ཉིད་འགྲོ་བ་ཐམས་ཅད་
དུ་ཤིན་ཏུ་སྒྲུབ་པ་དང་། བདག་འགྲོ་བ་ཐམས་ཅད་ལ་ཕན་པའི་མུ་སྟེགས་སུ་རྗེས་སུ་ལྟ་བ་དང་། བདག་འཇིག་རྟེན་ཐམས་ཅད་ཀྱི་འབབ་ས་བདེ་བར་རབ་ཏུ་རྟོགས་པ་དང་། བདག་འགྲོ་བ་ཐམས་ཅད་ཀྱི་སྦྱིན་བདག་དུ་མོས་པར་བྱེད་པ་དང་། བདག་ཡེ་ཤེས་ཀྱི་ཡིད་
དང་ལྡན་པར་བྱས་ཤིང་། བདག་བྱང་ཆུབ་སེམས་དཔའི་སྤྱོད་པ་ལ་རབ་ཏུ་བརྩོན་པར་ཡང་དག་པར་ཤེས་པ་དང་། བདག་ཇི་ལྟར་སྨྲས་པ་དེ་ལྟར་བྱེད་པ་ལ་སྦྱོར་བ་དང་། བདག་གིས་ཐམས་ཅད་མཁྱེན་པའི་གོ་ཅ་བགོས་པར་རབ་ཏུ་རྟོག་ཅིང་ཡེ་ཤེས་
དང་བསོད་ནམས་ཀྱི་ཞིང་ཚོལ་བ་དང་། འགྲོ་བ་ཐམས་ཅད་ལ་དམ་བཅས་པའི་སེམས་རྗེས་སུ་བསྲུང་བ་དང་། རབ་ཏུ་ནན་ཏན་བྱེད་པ་ལ་བདག་ཤིན་ཏུ་གཞོག་པ་དང་། འགྲོ་བ་ཐམས་ཅད་དུ་སྣང་བའི་ཡེ་ཤེས་ཡང་དག་པར་སྐྱེད་པ་དང་།
བྱང་ཆུབ་སེམས་དཔའ་ཐམས་ཅད་ཀྱི་གཏོང་བའི་སེམས་ཡིད་ལ་བྱེད་པ་དང་། དེ་བཞིན་གཤེགས་པ་ཐམས་ཅད་མངོན་སུམ་དུ་དམིགས་པར་བྱེད་པའི་ཚེ། ཆགས་པ་མེད་པ་དང་། གྲོལ་ཞིང་བཅིངས་པ་མེད་པའི་སེམས་དང་ལྡན་པ། སེམས་
ཅན་ཐམས་ཅད་ཀྱི་དོན་དུ་ཡེ་ཤེས་དང་བསོད་ནམས་ཀྱི་ཚོགས་བསགས་པ་དེ་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། བུ་དང་བུ་མོ་དང་ཆུང་མ་ཡོངས་སུ་བཏང་བས་ཡང་དག་པར་བསྡུས་པའི་དགེ་བའི་རྩ་བ་འདིས་སེམས་ཅན་ཐམས་ཅད་ཆོས་
ཐམས་ཅད་ཀྱིས་འཇིག་རྟེན་གྱི་ཁམས་རྒྱས་པར་འགེངས་པའི་ཆོས་ཀྱི་འཁོར་ལོ་ཕྱིར་མི་ལྡོག་པ་ཡང་དག་པར་བསྐོར་བས་སངས་རྒྱས་ཀྱི་བྱང་ཆུབ་ལ་གཞོག་པར་བྱེད་ཅིང་། བདག་གི་ལུས་ཀྱི་སྤྲུལ་པ་རབ་ཏུ་འགྱེད་པར་གྱུར་ཅིག །སེམས་ཅན་ཐམས་

ཅད་སངས་རྒྱས་ཀྱི་ཞིང་ཐམས་ཅད་དུ་སྨོན་ལམ་གྱིས་འདོང་ཞིང་ལུས་ལ་མངོན་པར་ཆགས་པ་མེད་པར་གྱུར་ཅིག །སེམས་ཅན་ཐམས་ཅད་ཀྱི་ཆགས་པ་དང་། ཁོང་ཁྲོ་བ་སྤངས་ཤིང་སྡུག་པ་དང་། མི་སྡུག་པའི་སེམས་དང་བྲལ་བར་གྱུར་ཅིག །
སེམས་ཅན་ཐམས་ཅད་སངས་རྒྱས་ཀྱི་རིགས་ཀྱི་རྗེས་སུ་སྤྱོད་ཅིང་དེ་བཞིན་གཤེགས་པའི་སྲས་སུ་རེད་པར་གྱུར་ཅིག །སེམས་ཅན་ཐམས་ཅད་ཐ་དད་པ་མེད་པའི་སེམས་ཀྱིས་བྱུང་ཞིང་། སངས་རྒྱས་ཐམས་ཅད་ལ་རབ་ཏུ་འདུ་ཤེས་ཐོབ་པར་གྱུར་
ཅིག །སེམས་ཅན་ཐམས་ཅད་སངས་རྒྱས་ཐམས་ཅད་ཀྱི་ཆོས་ཀྱི་སྐུ་ལས་བྱུང་བ། གསུང་ལས་སྐྱེས་པར་གྱུར་ཏེ། ངེས་པར་སངས་རྒྱས་ཀྱི་སྲས་སུ་གྱུར་ཅིག །སེམས་ཅན་ཐམས་ཅད་དེ་བཞིན་གཤེགས་པའི་ཡེ་ཤེས་ཁོང་དུ་ཆུད་པར་འགྱུར་
བའི་ཕྱིར། གོ་སྐབས་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་ཡང་དག་པར་བྲལ་བའི་མཐར་ཕྱིན་ཏེ། སངས་རྒྱས་ཀྱི་བྱང་ཆུབ་དང་ལྡན་པར་གྱུར་ཅིག །སེམས་ཅན་ཐམས་ཅད་བླ་ན་མེད་པའི་ཆོས་གཏོང་བ་ལ་བརྩོན་
ཞིང་སངས་རྒྱས་ཀྱི་བྱང་ཆུབ་ཡང་དག་པར་འགོད་པ་དང་ལྡན་པར་གྱུར་ཅིག །སེམས་ཅན་ཐམས་ཅད་རྐྱེན་ཐམས་ཅད་ཀྱིས་ཟད་པར་མི་ནུས་ཤིང་ཤིན་ཏུ་རྟོགས་པར་གཞག་པའི་སེམས་དང་ལྡན་པར་གྱུར་ཅིག །སེམས་ཅན་ཐམས་ཅད་
བྱང་ཆུབ་ཀྱི་ཤིང་དྲུང་དུ་རྣམ་པའི་མཆོག་ཐམས་ཅད་དང་ལྡན་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་རྣམ་པར་སངས་རྒྱས་ཏེ། ཆོས་ལས་སྐྱེས་པ་དང་། ཆོས་ལས་བྱུང་བའི་བུ་དང་། བུ་མོ་དང་ཆུང་མ་རབ་ཏུ་འཕྲོ་བར་བྱེད་
པར་གྱུར་ཅིག་ཅེས། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་བུ་དང་། བུ་མོ་དང་། ཆུང་མ་ཡོངས་སུ་བཏང་བ་ལས་བྱུང་བའི་དགེ་བའི་རྩ་བ་དེ་དག་བསྒྲིབས་པ་མེད་པའི་ཡེ་ཤེས་རབ་ཏུ་ཐོབ་པ་དང་། ཁམས་གསུམ་པ་

ཐམས་ཅད་ལ་ཆགས་པ་མེད་པའི་རྣམ་པར་ཐར་པ་ཁོང་དུ་ཆུད་པར་བྱ་བའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཁྱིམ་གྱི་དངོས་པོ་ལ་ཆགས་པར་གནས་པའི་རྣམ་པ་ལ་མོས་པ་མེད་
པ། ཁྱིམ་གྱི་རྣམ་པར་རྟོག་པས་ཡོངས་སུ་རྟོག་པ་མེད་པ་ཁྱིམ་གྱི་ཡོ་བྱད་ཐམས་ཅད་ལ་དོན་དུ་གཉེར་བ་མེད་པ། ཁྱིམ་གྱི་ཆགས་པ་ཐམས་ཅད་ཀྱིས་འདོད་པར་གྱུར་པ་མེད་པ། ཁྱིམ་གྱི་ལོངས་སྤྱོད་ཐམས་ཅད་ལ་རོ་མྱོང་བར་ལྟ་བ་མེད་པ། ཁྱིམ་
གྱི་ལོངས་སྤྱོད་ཐམས་ཅད་ཁོང་དུ་ཆུད་པའི་སེམས་དང་ལྡན་པ། ཁྱིམ་ལ་མངོན་པར་ཆགས་པ་ཐམས་ཅད་ལས་གྱེན་དུ་སྤགས་པའི་སེམས་དང་ལྡན་པ། ཁྱིམ་དང་གནས་ལ་རྟེན་པ་ཐམས་ཅད་ལ་མངོན་པར་མོས་པ་མེད་པར་གྱུར་པ།
ཁྱིམ་དང་གནས་ལ་རྟེན་པ་ཐམས་ཅད་ཡུད་ཙམ་གྱི་འདུ་ཤེས་ཀྱིས་བྱིན་གྱིས་བརླབ་པ། སངས་རྒྱས་ཀྱི་བསྟན་པ་ལ་ཤིན་ཏུ་འབྱུང་བའི་བསམ་པ་དང་ལྡན་པ། བྱང་ཆུབ་སེམས་དཔའི་གནས་ཐམས་ཅད་ལ་ཞུགས་པའི་སེམས་དང་ལྡན་པ།
སངས་རྒྱས་ཀྱི་ཆོས་ཐམས་ཅད་ཀྱིས་བརྒྱན་པའི་སེམས་དང་ལྡན་པ། གཅིག་ནས་གཅིག་ཏུ་རྗེས་སུ་འགྱོད་པ་མེད་པར་གཏོང་བ། དམིགས་པའི་དངོས་པོ་ཐམས་ཅད་ཀྱི་སྒོ་ནས་སངས་རྒྱས་ཐམས་ཅད་ཀྱིས་ཡང་དག་པར་བསྔགས་པ་
འགྱོད་པ་མེད་པར་གཏོང་བའི་སེམས་དང་ལྡན་པ། ཁྱིམ་ཡོངས་སུ་བཟུང་བ་ཤིན་ཏུ་གཏོང་བ་ལ་མངོན་པར་ཆགས་པ་མེད་པའི་ཡིད་དང་ལྡན་པ། ཕྱོགས་དང་ཡུལ་ཐམས་ཅད་ལ་གནས་པ་མེད་པར་གནས་པ། ཁྱིམ་དང་གནས་ལ་ཆགས་པས་
རྩོམ་པ་མེད་པ་ཡོངས་སུ་བཟུང་བ་ཐམས་ཅད་སྦྱིན་པར་ཤིན་ཏུ་གཏོང་བས་གཏོང་བ། སློང་བ་ཐམས་ཅད་མཐོང་ན་རབ་ཏུ་དགའ་བ་དང་། སྤྲོ་བ་དང་། ཡིད་དགའ་བ་སྐྱེ་བས་སློང་བ་རྣམས་ལ་ཚུལ་དང་ལྡན་པའི་སེམས་ཀྱིས་ཁྱིམ་དང་

ཁྱིམ་གྱི་ཡོ་བྱད་དང་། རྒྱན་ཐམས་ཅད་ཡོངས་སུ་གཏོང་བའི་ཚེ། ཁྱིམ་གྱི་སྦྱིན་པ་ཡོངས་སུ་བཏང་བས་ཡང་དག་པར་བསྡུས་པའི་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། སེམས་ཅན་ཐམས་ཅད་དཀོན་མཆོག་དམ་པར་འབྱུང་བ་ལ་མངོན་པར་
མོས་ཤིང་བུ་དང་། བུ་མོ་ཤིན་ཏུ་གཏང་བར་གྱུར་ཅིག །སེམས་ཅན་ཐམས་ཅད་ཁྱིམ་མེད་པར་རབ་ཏུ་བྱུང་ཞིང་ཁྱིམ་ལས་རྣམ་པར་གྲོལ་ཏེ་ཡང་དག་པར་རྫོགས་པའི་སངས་རྒྱས་ཀྱི་བསྟན་པ་ལ་ཚངས་པའི་སྤྱད་པ་སྤྱོད་པར་གྱུར་ཅིག །སེམས་ཅན་
ཐམས་ཅད་ཕྱིར་མི་ལྡོག་པའི་སེམས་ཀྱིས་འཇུག་པ་མེད་པར་གནས་ཤིང་ཐམས་ཅད་ཡོངས་སུ་གཏོང་བ་ལ་མངོན་པར་མོས་པར་གྱུར་ཅིག །སེམས་ཅན་ཐམས་ཅད་སྩོགས་པ་མེད་ཅིང་ཆོས་ཤེས་པ་ལ་བརྩོན་པས། ཁྱིམ་གྱི་ཆོས་དང་རབ་ཏུ་བྲལ་བར་གྱུར་ཅིག །
སེམས་ཅན་ཐམས་ཅད་སངས་རྒྱས་ཀྱི་ཕོ་བྲང་དང་གནས་ལ་ཡང་དག་པར་གནས་ཤིང་ཁྱིམ་དང་། གནས་ལ་གནས་མེད་པར་གྱུར་ཅིག །སེམས་ཅན་ཐམས་ཅད་བར་དུ་གཅོད་པའི་ནན་ཏན་ཐམས་ཅད་འགག་པར་གྱུར་ཏེ། སྒྲིབ་པའི་ཆོས་ཐམས་ཅད་
ཤིན་ཏུ་སྤངས་པར་གྱུར་ཅིག །སེམས་ཅན་ཐམས་ཅད་གོས་པ་མེད་པའི་སེམས་ཀྱི་གནས་ལ་རྟེན་པས་ལྗན་ལྗིན་མེད་པའི་ཁྱིམ་དང་ལྡན་པར་གྱུར་ཅིག །སེམས་ཅན་ཐམས་ཅད་ཁྱིམ་ན་གནས་པས་མངོན་པར་རྫོགས་པར་སངས་རྒྱས་
པ་མཐོང་བའི་ཡེ་ཤེས་དང་ལྡན་ཞིང་ཡོངས་སུ་སྨིན་པར་བྱ་བ་ལ་མཁས་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་ཀྱི་གནས་ཀྱི་རྗེས་སུ་སོང་བའི། སེམས་ཀྱི་ཡེ་ཤེས་དང་ལྡན་ཞིང་། ཁྱིམ་གྱི་གནས་རྣམ་པར་རིག་པ་རབ་ཏུ་
མཐོང་བར་གྱུར་ཅིག །སེམས་ཅན་ཐམས་ཅད་ཁྱིམ་གྱིས་སངས་རྒྱས་ཀྱི་རྣམ་པར་སྤྱོད་པ་རབ་ཏུ་ཐོབ་ཅིང་། སེམས་ཅན་མཐའ་ཡས་པ་ཚིམ་པར་བྱེད་པར་གྱུར་ཅིག་ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཁྱིམ་གྱི་སྦྱིན་པ་ཡོངས་སུ་

བཏང་བས། ཡང་དག་པར་བསྡུས་པའི་དགེ་བའི་རྩ་བ་དེ་དག་སེམས་ཅན་ཐམས་ཅད་ཀྱིས། བྱང་ཆུབ་སེམས་དཔའི་སྤྱོད་པ་དང་། སྨོན་ལམ་དང་། རྣམ་པར་འཕྲུལ་པ་སྣ་ཚོགས་རབ་ཏུ་ཐོབ་པར་བྱ་བའི་ཕྱིར་ཡོངས་
སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བཟའ་ཤིང་གི་ར་བ་དགའ་བ་དང་རྩེ་བ་དང་ལོངས་སྤྱོད་མང་པོ་སྣ་ཚོགས་ཀྱི་གནས་ཡོངས་སུ་གཏོང་ཞིང་སྦྱིན་པ་དང་། སྟོབས་པ་དང་བདག་སེམས་ཅན་ཐམས་ཅད་ཀྱི་བཟའ་ཤིང་གི་ར་བར་
གྱུར་པའོ་ཞེས་ཡང་དག་པར་ལྟ་བ་དང་། བདག་ཆོས་ཀྱི་དགའ་བར་གྱུར་པར་འཇིག་རྟེན་ཐམས་ཅད་ལ་ཡོངས་སུ་སྟོན་པ་དང་། བདག་སེམས་ཅན་ཐམས་ཅད་ལ་ཡིད་བདེ་བའི་སྦྱིན་པ་བྱེད་པར་བྱིན་གྱིས་རློབ་པ་དང་། བདག་འགྲོ་བ་ཐམས་ཅད་
དུ་དགའ་བ་མཐའ་ཡས་པ་ཡང་དག་པར་སྐྱེས་པར་ཤིན་ཏུ་སྟོན་པ་དང་། བདག་ཁམས་གསུམ་ཐམས་ཅད་ན་ཆོས་དཀར་པོ་སྐྱེ་བའི་སྒོར་གྱུར་པར་ཡང་དག་པར་འཛིན་པ་དང་། བདག་འགྲོ་བ་ཐམས་ཅད་ཀྱི་སེམས་དགའ་བ་རྟག་ཏུ་སྐྱེ་བར་བྱེད་པར་འཇིག་རྟེན་
ཐམས་ཅད་དུ་གནས་པར་བྱེད་པ་དང་། བདག་སེམས་ཅན་ཐམས་ཅད་ལ་སངས་རྒྱས་ཀྱི་བྱང་ཆུབ་སྟོབས་པར་སྨོན་ལམ་འདེབས་པ་དང་། བདག་སྐྱེ་དགུ་ཐམས་ཅད་ཀྱི་ཕ་དང་འདྲ་བར་ནན་ཏན་བྱེད་པ་དང་། བདག་ཁམས་གསུམ་ཐམས་ཅད་ན་ཡེ་ཤེས་ཀྱི་
འབྱུང་གནས་སུ་གྱུར་པར་རབ་ཏུ་རྟོག་པ་དང་། བདག་སེམས་ཅན་གྱི་ཁམས་ཐམས་ཅད་ན་ཡོ་བྱད་ཀྱིས་མི་བྲེལ་བར་བྱེད་པ་རབ་ཏུ་གཞོག་པ་དང་། བདག་སྨོན་ལམ་ཐམས་ཅད་ཀྱིས་དགེ་བའི་རྩ་བ་ཐམས་ཅད་མ་དང་འདྲ་བར་སྐྱེད་པར་ཡང་དག་པར་སྒྲུབ་
པའི་ཚེ། དགེ་བའི་རྩ་བ་དེ་དག་སེམས་ཅན་ཐམས་ཅད་སྐྱོན་གྱི་སྐྱོ་བ་མེད་པར་ཡོངས་སུ་བསྔོའོ། །སེམས་ཅན་ཐམས་ཅད་ཀྱི་གནོད་པས་འཁྲུལ་པ་མེད་པའི་སེམས་ཀྱིས་ཡོངས་སུ་བསྔོའོ། །འཇིག་རྟེན་གྱི་གནས་དྲིན་དུ་མི་གཟོ་བས་ཡོངས་

སུ་གང་བས་ཡོངས་སུ་ཡི་ཆད་པ་མེད་པས་ཡོངས་སུ་བསྔོའོ། །སེམས་ཅན་ཐམས་ཅད་ལས་འཐོབ་པར་བྱ་བ་ལ་རེ་བ་མེད་པས་ཡོངས་སུ་བསྔོའོ། །འཇིག་རྟེན་ཐམས་ཅད་ལ་སྨོན་པ་མེད་པའི་སེམས་ཀྱིས་ཡོངས་སུ་བསྔོའོ། །འཇིག་རྟེན་ཐམས་ཅད་ཀྱི་
སྡུག་བསྔལ་བསྩལ་བའི་སེམས་ཀྱིས་འགྲོ་བ་ཐམས་ཅད་ལ་ཡོངས་སུ་བསྔོའོ། །བར་སྣང་དང་མཉམ་པའི་སེམས་ཀྱིས་འགྲོ་བ་ཐམས་ཅད་གོས་པ་མེད་པར་བྱ་བའི་ཕྱིར་ཡོངས་སུ་བསྔོའོ། །དགེ་བའི་རྩ་བ་ཐམས་ཅད་སྔོན་དུ་འགྲོ་བའི་སེམས་ཀྱིས་ཡང་དག་པར་ཇི་ལྟ་བ་
བཞིན་དུ་རབ་ཏུ་རྟོགས་པའི་ཕྱིར་ཡོངས་སུ་བསྔོའོ། །སེམས་ཅན་ཐམས་ཅད་ཀྱི་སྡུག་བསྔལ་བླང་བའི་གོ་ཆ་བགོས་པའི་སེམས་ཀྱིས་སྐྱེ་དགུ་ཐམས་ཅད་ལ་ཡོངས་སུ་བསྔོའོ། །ལྟ་བའི་རྣམ་པ་ཐམས་ཅད་ཤིན་ཏུ་བཟློག་པའི་བྱང་ཆུབ་སེམས་དཔའི་སྤྱོད་པ་ཆེན་
པོ་དང་སྨོན་ལམ་མཉམ་པ་མེད་པ་ལ་རབ་ཏུ་བརྩོན་པ་དང་། ཐེག་པ་ཆེན་པོའི་སྨོན་ལམ་གྱིས་སྐྱོ་བ་མེད་པར་ཡོངས་སུ་བསྔོ་སྟེ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་བཟའ་ཤིང་གི་ར་བ་ཡོངས་སུ་བཏང་བས་ཡང་དག་པར་བསྡུས་
པའི་དགེ་བའི་རྩ་བ་དེ་དག་ཡོངས་སུ་བསྔོའོ། །དེ་དེ་ལྟར་ཡིད་ལ་བྱེད་པས་རབ་ཏུ་རྟོག་པའི་སེམས་དང་ལྡན་པར་བྱས་ཤིང་འདི་ལྟར་ཡང་ཡོངས་སུ་བསྔོ་སྟེ། སེམས་ཅན་ཐམས་ཅད་ཀྱིས་གོང་ནས་གོང་དུ་ཡེ་ཤེས་ཀྱི་བཟའ་ཤིང་གི་ར་བ་རབ་ཏུ་ཐོབ་སྟེ།
དགེ་བའི་རྩ་བ་གསར་པ་དང་། གསར་པ་ཡང་དག་པར་འབྱུང་བ་དང་ལྡན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་ལ་ལྟ་ཞིང་བསྙེན་བཀུར་བ་དང་། རིམ་གྲོ་བྱེད་པའི་ཕྱིར་འཁྲུག་པ་མེད་པའི་ཆོས་ཅན་དུ་གྱུར་ཅིག །
སེམས་ཅན་ཐམས་ཅད་སངས་རྒྱས་ཀྱི་ཞིང་གི་བཟའ་ཤིང་གི་ར་བ་ལ་དགའ་བ་རབ་ཏུ་ཐོབ་སྟེ། ཆོས་ལ་ཡོངས་སུ་དགའ་བས་དགའ་བར་གྱུར་ཅིག །སེམས་ཅན་ཐམས་ཅད་མངོན་པར་དགའ་བའི་བཟའ་ཤིང་གི་ར་བར་སངས་རྒྱས་ཀྱི་ཆོ་འཕྲུལ་ཡང་དག་པར་མཐོང་བའི་

ཕྱིར་དགའ་བའི་སེམས་དང་ལྡན་པར་གྱུར་ཅིག །སེམས་ཅན་ཐམས་ཅད་ཡེ་ཤེས་ཀྱི་ཡུལ་ལ་རྣམ་པར་རྩེ་ཞིང་། སྤྱོད་པས་སངས་རྒྱས་ཀྱི་དགྱེས་པ་དང་། རོལ་པ་ལ་རབ་ཏུ་བརྩོན་པར་གྱུར་ཅིག །སེམས་ཅན་ཐམས་
ཅད་སངས་རྒྱས་ཀྱི་ཞིང་དང་། དེ་བཞིན་གཤེགས་པའི་འཁོར་གྱི་དཀྱིལ་འཁོར་དང་འདུལ་བར་འདོད་པས་དགའ་བ་དང་། རྩེ་བ་དང་ལོངས་སྤྱོད་ལ་རབ་ཏུ་བརྩོན་པར་གྱུར་ཅིག །སེམས་ཅན་ཐམས་ཅད་བྱང་ཆུབ་སེམས་དཔའི་རྣམ་པར་ཐར་པས་ཕྱི་མའི་
མཐར་ཐུག་པའི་བསྐལ་པར་བྱང་ཆུབ་སེམས་དཔའི་སྤྱོད་པས་ཡོངས་སུ་མི་སྐྱོ་བའི་སེམས་ཀྱིས་གནས་པའི་ཕྱིར་བྱང་ཆུབ་སེམས་དཔའི་རྩེ་བ་དང་ལོངས་སྤྱོད་དང་། དགའ་བ་ལ་མོས་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་བཟའ་ཤིང་གི་ར་བ་
སེམས་ཆེན་པོ་བསྐྱེད་པས་དགའ་བ་ལ་སྟེན་ཅིང་ཆོས་ཀྱི་དབྱིངས་ཐམས་ཅད་སངས་རྒྱས་ཀྱིས་གང་བར་ཆུད་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཞིང་སྣ་ཚོགས་སུ་སངས་རྒྱས་མཆོད་པ་དང་། རིམ་གྲོ་བྱ་བ་ལ་དགའ་ཞིང་སངས་རྒྱས་
ཀྱི་ཞིང་ཐམས་ཅད་དུ་འགྲོ་བ་ལ་བརྩོན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཞིང་ཐམས་ཅད་རབ་ཏུ་བརྒྱན་པར་བྱ་བ་རྣམ་པར་དག་པར་འགྱུར་པའི་ཕྱིར་དགའ་ཞིང་མོས་པའི་སེམས་དང་ལྡན་པར་གྱུར་ཅིག་ཅེས། དེ་ལྟར་བྱང་ཆུབ་
སེམས་དཔའ་སེམས་དཔའ་ཆེན་པོ་བཟའ་ཤིང་གི་ར་བ་རྩེ་བ་དང་། དགའ་བ་དང་། ལོངས་སྤྱོད་ཀྱི་གནས་ཡོངས་སུ་གཏོང་བའི་ཚེ། དགེ་བའི་རྩ་བ་དེ་དག་སེམས་ཅན་ཐམས་ཅད་སངས་རྒྱས་ཐམས་ཅད་ཀྱི་བཟའ་ཤིང་གི་ར་བ་ལ་རོལ་པའི་
གནས་སུ་འདོང་ཞིང་སངས་རྒྱས་ཐམས་ཅད་མཐོང་བར་འགྲུབ་པར་འགྱུར་བར་བྱ་བའི་ཕྱིར་ཡོངས་སུ་བསྔོའོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་མཆོད་སྦྱིན་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་དུ་མ་རུང་བ། །སངས་རྒྱས་

ཐམས་ཅད་ཀྱིས་བསྔགས་པ། སེམས་ཅན་ཐམས་ཅད་ལ་མི་འཚེ་བར་གཞོལ་བ། འགྲོ་བ་ཐམས་ཅད་རྣམ་པར་དག་པར་བྱ་བ་ལ་བརྩོན་པ། གཏན་པ་མེད་པའི་ལས་ཀྱི་ལམ་གསུམ་ཤིན་ཏུ་དག་པ་ཡེ་ཤེས་ཀྱིས་གྲུབ་པའི་མཆོད་སྦྱིན་ཡོ་བྱད་གྲངས་མེད་པ་
བསྩོགས་པ་དམྱིགས་པ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པས་རྣམ་པར་དག་པ། སྦྱིན་པ་རྣམ་པ་ཐ་དད་པའི་ཚུལ་གྱིས་ཡང་དག་པར་བཟུང་བ། ཡོ་བྱད་ཀྱི་རྣམ་པ་དུ་མ་དང་ལྡན་པ་སྦྱིན་པའི་ཚོགས་སྣ་ཚོགས་བྱེ་བ་ཁྲག་ཁྲིག་བརྒྱ་སྟོང་གྲངས་
མེད་པ་ཅན་གྱི་མཆོད་སྦྱིན་དུ་བྱེད་པའི་ཚེ། མཆོད་སྦྱིན་བྱས་པའི་སྦྱིན་པ་ཆེན་པོས་ཡང་དག་པར་བཟུང་བའི་དགེ་བའི་རྩ་བ་དེ་དག་བྱང་ཆུབ་ཀྱི་སེམས་དཀོན་པ་སྦྱིན་པའི་ཚོགས་ཚད་མེད་པས་སེམས་ཅན་ཐམས་ཅད་རྣམ་པར་དག་པར་བྱ་བ་ལ་ཞུགས་པ་
དགེ་བ་བརྩམས་པ་ཐོག་མ་དང་། བར་མ་དང་ཐ་མར་རྣམ་པར་དག་པ་སྣ་ཚོགས་དང་ལྡན་པ། མོས་པ་བྱེ་བ་ཁྲག་ཁྲིག་བརྒྱ་སྟོང་གི་བསམ་པ་ཅན། སེམས་ཅན་གྲངས་མེད་པ་མངོན་པར་མགུ་བར་བྱེད་པ། བྱམས་པ་ཚད་མེད་པ། བསྒོམ་པ་དང་།
ཡང་དག་པར་སྤྱོད་པས་ཉེ་བར་གནས་པ། འགྲོ་བ་ཐམས་ཅད་སྙིང་རྗེ་ཆེན་པོས་ཡོངས་སུ་བསྐྱབ་པ་ཤིན་ཏུ་གྲུབ་པ། འདས་པ་དང་མ་བྱོན་པ་དང་ད་ལྟར་བྱུང་བའི་དེ་བཞིན་གཤེགས་པ་མངོན་པར་མཉེས་པར་བྱེད་པ། སངས་རྒྱས་ཐམས་ཅད་ཀྱི་རིགས་ཀྱི་ཕྱིར་
རྗེས་སུ་འགྱོད་པ་མེད་པས་གཏོང་བའི་སེམས་དང་ལྡན་པ། ཕྱིས་མྱ་ངན་དུ་བྱ་བ་མེད་པར་ཡང་དག་པར་སྤྱོད་པས་ཁྱད་པར་རྣམ་པར་འཕེལ་བར་བྱེད་པ། དད་པའི་དབང་པོ་སེམས་སྐད་ཅིག་གིས་ཚད་མེད་པར་རྣམ་པར་འཕེལ་བར་བྱེད་པས། གཏོང་
བ་དང་ལྡན་པ་དེས་འདི་ལྟར་ཡོངས་སུ་བསྔོ་སྟེ། ཐེག་པ་ཆེན་པོས་སེམས་བསྐྱེད་པས་གྲུབ་པའི་མཆོད་སྦྱིན་བྱས་པའི་དགེ་བའི་རྩ་བ་འདིས་སེམས་ཅན་ཐམས་ཅད་གཏོང་བ་ཆེན་པོ་དང་ཤིན་ཏུ་གཏོང་བ་དང་། རབ་ཏུ་གཏོང་བ་དང་། མཆོག་ཏུ་གཏོང་བ་དང་།

གྱ་ནོམ་པར་གཏོང་བ་དང་ཕུལ་དུ་གཏོང་བ་དང་། བླ་ན་མེད་པར་གཏོང་བ་དང་། མཉམ་པ་མེད་པར་གཏོང་བ་དང་། འཇིག་རྟེན་ཐམས་ཅད་ལས་འཕགས་པའི་གཏོང་བ་དང་། སངས་རྒྱས་ཐམས་ཅད་ཀྱིས་བསྔགས་པའི་ཆོས་
གཏོང་བ་དང་ལྡན་ཞིང་སྦྱིན་བདག་གི་དམ་པ་སེམས་ཅན་གྱི་ཁམས་ཐམས་ཅད་ངན་སོང་ནས་འདོན་པ། ཡེ་ཤེས་ཀྱི་ལམ་ལ་རབ་ཏུ་གཞོག་པའི་སྨོན་ལམ་མཉམ་པ་མེད་པ་དང་ལྡན་པ། དགེ་བའི་རྩ་བ་ནོར་བ་མེད་པ་དང་ལྡན་པ། བདག་མཉམ་པ་མེད་པའི་ཡེ་ཤེས་
རྗེས་སུ་སངས་རྒྱས་པ་དང་ལྡན་ཞིང་སེམས་ཅན་ཐམས་ཅད་ཞི་བའི་ཡེ་ཤེས་ལ་རབ་ཏུ་གཞོག་པ། མངོན་པར་ཤེས་པའི་ཡེ་ཤེས་ཉམས་པ་མེད་པས་འགྲོ་བ་ཐམས་ཅད་ལ་ཤིན་ཏུ་མཁས་པར་བྱས་པ། ཡེ་ཤེས་ཀྱི་ས་དང་སངས་རྒྱས་ཀྱི་ཆོས་ལ་གཞོལ་བ།
སངས་རྒྱས་ཐམས་ཅད་ཀྱི་རྒྱན་གྱི་ཕ་རོལ་ཏུ་ཕྱིན་པ་དང་ལྡན་པ། སངས་རྒྱས་ཀྱི་ཆོས་ཐམས་ཅད་ཕྱིར་མི་ལྡོག་པས་རྒྱུན་ཆད་པ་མེད་པར་གྱུར་ཏེ། མཆོད་སྦྱིན་ཤིན་ཏུ་བྱས་པར་གྱུར་ཅིག །སེམས་ཅན་ཐམས་ཅད་འགྲོ་བ་ཀུན་ལ་རིམ་གྲོ་བྱེད་ཅིང་
བླ་ན་མེད་པའི་ཡེ་ཤེས་ཀྱི་མཐར་ཐུག་པར་རྒྱུན་ཆད་པ་མེད་པས་ཕྱིར་མི་ལྡོག་པའི་མཆོད་སྦྱིན་བྱེད་པར་གྱུར་ཅིག །སེམས་ཅན་ཐམས་ཅད་ཚད་མེད་མཐའ་ཡས་པའི་བསོད་ནམས་བསྩགས་པའི་ཕ་རོལ་ཏུ་ཕྱིན་ཅིང་དགེ་བའི་རྩ་བ་ལེགས་པར་བསྐྱེད་པ་དང་ལྡན་
པར་གྱུར་ཅིག །སེམས་ཅན་ཐམས་ཅད་བསོད་ནམས་ཀྱི་དཀྱིལ་འཁོར་གྱིས་ཆོས་ཀྱི་དབྱིངས་ཚད་མེད་པར་བླ་ན་མེད་པར་སྣང་བའི་བདེ་བ་ཡོངས་སུ་གཏོང་ཞིང་སངས་རྒྱས་ཐམས་ཅད་ཀྱིས་བསྔགས་པར་འགྲོ་བ་ཐམས་ཅད་ཀྱི་སྦྱིན་བདག་ཏུ་གྱུར་ཅིག །སེམས་
ཅན་ཐམས་ཅད་སེམས་ཅན་གྱི་ཁམས་སུ་སྙོམས་པར་དགེ་བའི་རྩ་བས་ཡང་དག་པར་འཛིན་པའི་ཕ་རོལ་ཏུ་ཕྱིན་པ་ཐོབ་ཅིང་མཉམ་པའི་སེམས་ཀྱིས་མཆོད་སྦྱིན་བྱེད་པར་གྱུར་ཅིག །སེམས་ཅན་ཐམས་ཅད་ཐེག་པའི་མཆོག་ལ་འགྲོ་བ་ཐམས་ཅད་རབ་

ཏུ་དགོད་པར་བརྩོན་ཞིང་མཆོད་སྦྱིན་གྱི་དམ་པ་བྱེད་པར་གྱུར་ཅིག །སེམས་ཅན་ཐམས་ཅད་དུས་མ་ཡིན་པ་ཐམས་ཅད་ལས་འདས་ཤིང་དུས་ཐམས་ཅད་ལ་བབ་པའི་མཆོད་སྦྱིན་གྱི་མཐར་ཕྱིན་པར་འགྲོ་བ་ཐམས་ཅད་མཚན་ཉིད་གཅིག་ཏུ་གྱུར་པའི་མཆོད་
སྦྱིན་བྱེད་པར་གྱུར་ཅིག །སེམས་ཅན་ཐམས་ཅད་སྐྱེས་བུ་དམ་པའི་མཆོད་སྦྱིན་ཕུན་སུམ་ཚོགས་པའི་ཕ་རོལ་ཏུ་ཕྱིན་པ་དང་། ལྡན་ཞིང་མཆོད་སྦྱིན་ལེགས་པ་དང་ལྡན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་ཀྱིས་ཉེ་བར་
བསྟན་ཏེ། ཐམས་ཅད་མཁྱེན་པ་ཉིད་ཀྱི་མཐར་ཕྱིན་པ་ལ་བཀོད་དེ་མཆོད་སྦྱིན་གྱི་རྒྱན་མཐའ་ལས་རྒལ་བ་རྣམ་པ་སྣ་ཚོགས་ཀྱིས་མཆོད་སྦྱིན་བྱེད་པར་གྱུར་ཅིག །སེམས་ཅན་ཐམས་ཅད་ཆོས་ཀྱི་དབྱིངས་ཚད་མེད་པར་བསོད་ནམས་ཀྱི་མཆོད་སྦྱིན་བྱེད་
པས་མཐའ་དང་དབུས་མེད་པའི་བསོད་ནམས་བསྩགས་པའི་ཕ་རོལ་ཏུ་ཕྱིན་པ་ཡང་དག་པར་སྒྲུབ་ཅིང་ཐམས་ཅད་མཁྱེན་པའི་རྣམ་པར་དག་པ་དང་ལྡན་པར་གྱུར་ཅིག །སེམས་ཅན་ཐམས་ཅད་སྨོན་ལམ་ཆེན་པོས་སེམས་ཅན་གྱི་ཁམས་ཐམས་ཅད་
སྒྲོལ་ཞིང་དེ་བཞིན་གཤེགས་པའི་གནས་སུ་གཞོག་པས་འགྲོ་བ་ཀུན་གྱི་མཆོད་སྦྱིན་གྱི་བདག་པོར་གྱུར་ཅིག་ཅེས། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་མཆོད་སྦྱིན་བྱས་པའི་བསོད་ནམས་ཆེན་པོ་བྱིན་པས་ཡང་དག་པར་བསྡུས་པའི་
དགེ་བའི་རྩ་བ་དེ་དག་ཅི་ནས་ཀྱང་སེམས་ཅན་གྱི་ཁམས་ཐམས་ཅད་ཀྱིས་མཆོད་སྦྱིན་ལེགས་པར་བྱས་པར་འགྱུར་བ་དང་། མཆོད་སྦྱིན་ཆུད་མི་ཟ་བར་འགྱུར་བ་དང་། སངས་རྒྱས་ཐམས་ཅད་མངོན་པར་མཉེས་པའི་མཆོད་སྦྱིན་དང་ལྡན་པར་འགྱུར་བ་དང་།
སེམས་ཅན་ཐམས་ཅད་ལ་ཞེ་སྡང་བ་མེད་པའི་མིག་གིས་མཆོད་སྦྱིན་དུ་འགྱུར་བ་དང་། འགྲོ་བ་ཐམས་ཅད་ཡོངས་སུ་སྐྱོབ་པའི་མཆོད་སྦྱིན་དུ་འགྱུར་བ་དང་། ཐམས་ཅད་མཁྱེན་པའི་ཡེ་ཤེས་ཀྱིས་གྲུབ་པའི་མཆོད་སྦྱིན་བྱས་པར་འགྱུར་བ་དང་།

སངས་རྒྱས་ཐམས་ཅད་བལྟ་བ་དང་མི་འབྲལ་བའི་མཆོད་སྦྱིན་དུ་འགྱུར་བ་དང་། ཆོ་ག་དང་ཤིན་ཏུ་ལྡན་པའི་མཆོད་སྦྱིན་ཏུ་འགྱུར་བ་དང་། བྱང་ཆུབ་སེམས་དཔའི་ཡོན་ཏན་ཐམས་ཅད་ཀྱིས་ཡོངས་སུ་གྲུབ་པའི་སངས་རྒྱས་ཀྱི་
ཡེ་ཤེས་ཀྱི་མཆོད་སྦྱིན་དུ་འགྱུར་བ་དང་། སེམས་ཅན་ཐམས་ཅད་བླ་ན་མེད་པའི་མཆོད་སྦྱིན་བྱེད་ཅིང་དེ་བཞིན་གཤེགས་པའི་མཆོད་སྦྱིན་གྱི་མཐར་ཐུག་པར་འགྱུར་བར་ཡོངས་སུ་བསྔོའོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་
ཡོ་བྱད་ཀྱི་ཚོགས་དང་། དངོས་པོ་ལ་ཆགས་པ་མེད་པའི་སེམས་དང་ལྡན་པ། མངོན་པར་མ་ཆགས་པའི་སེམས་དང་ལྡན་པ། རྣམ་པར་སྨིན་པ་ལ་མི་རེ་བའི་སེམས་དང་ལྡན་པ། འཇིག་རྟེན་གྱི་ཕུན་སུམ་ཚོགས་པ་ཐམས་ཅད་རེ་ཞིང་འདོད་པ་མེད་
པའི་སེམས་དང་། སྐྱོན་མེད་པའི་སེམས་དང་། རྨོངས་པ་མེད་པའི་སེམས་དང་། ཆོས་ལ་རྟོགས་པས་ཤིན་ཏུ་བསྩལ་བའི་སེམས་དང་། སེམས་ཅན་ཐམས་ཅད་དོན་ལ་གཞག་པར་ཡོངས་སུ་བསྔོ་བའི་སེམས་དང་། ཆོས་ཐམས་ཅད་ཀྱི་རང་བཞིན་ཡང་དག་པ་ཇི་
ལྟ་བ་བཞིན་དུ་རབ་ཏུ་རྟོགས་པའི་སེམས་དང་ལྡན་པ། ལོངས་སྤྱོད་མཐའ་ཡས་པ་སྣ་ཚོགས་ཐམས་ཅད་ལ་དམིགས་པ་ཚད་མེད་པའི་རིམ་གྲོ་བྱེད་པའི་ཚུལ་ཅན་སེམས་ཅན་ལ་ཕན་པ་རྣམ་པ་ཐ་དད་པས་རྣམ་པ་སྣ་ཚོགས་དུ་མར་ཡང་དག་པར་སྤྱོད་པ་དངོས་
པོའི་རྣམ་པ་ཚད་མེད་པ་བརྗོད་དུ་མེད་པ་དང་། མངོན་པར་འདུ་བྱ་བའི་རྒྱན་མཚན་ཉིད་སྣ་ཚོགས་ཅན་ཐམས་ཅད་སྦྱིན་པའི་ཚོགས་ལ་རབ་ཏུ་བརྩོན་པ། གཏང་བར་བྱ་བ་མཐའ་ཡས་པ་སྟོབས་པས་གཏོང་བ་ཐམས་ཅད་ཡང་དག་པར་གཏོང་བ་ལ་གཞོལ་བ། ཕྱི་
ནང་གི་ཡུལ་ཟད་མི་ཤེས་པའི་དམིགས་པ་ཐམས་ཅད་ཤིན་ཏུ་སྟོན་པས་དེ་དག་གཏོང་བ་དང་། ཡོངས་སུ་གཏོང་བ་དང་། སྟོབས་པ་དང་། སྦྱིན་པར་བྱེད་པ་དང་། འབུལ་བ་དང་། བསམ་པའི་སྟོབས་རྣམ་པར་འཕེལ་བར་བྱེད་པ་དང་། འགྲོ་བ་ཐམས་

ཅད་དུ་ཡོན་ཏན་ཆེན་པོ་ཐོབ་པས་སེམས་རིན་པོ་ཆེ་དང་། འགྲོགས་པ་དང་། ལན་ལ་རེ་བ་མེད་པར་འགྲོ་བ་ཐམས་ཅད་སྙིང་རྗེས་རྗེས་སུ་སྐྱོང་བ་དང་། འགྲོ་བ་རིན་པོ་ཆེ་ཐམས་ཅད་ཀྱི་བསམ་པ་རིན་པོ་ཆེ་ཤིན་ཏུ་སྒྲུབ་པ་དང་། འདས་པ་དང་མ་བྱོན་པ་དང་ད་ལྟར་
བྱུང་བའི་སངས་རྒྱས་ཐམས་ཅད་དང་། གཅིག་ཏུ་བགྲང་བའི་དགེ་བའི་རྩ་བ་ཐམས་ཅད་མཁྱེན་པ་ཉིད་རྣམ་པར་འཕེལ་བར་བྱེད་པའི་ཚེ། ཡོ་བྱད་ཐམས་ཅད་ཀྱི་སྦྱིན་པ་ཡོངས་སུ་བཏང་བས་ཡང་དག་པར་བསྡུས་པའི་དགེ་བའི་རྩ་བ་དེ་དག་སེམས་ཅན་གྱི་ཁམས་ཐམས་
ཅད་མ་ལུས་པར་ཡོངས་སུ་སྨིན་པར་བྱ་བ་དང་། གདུལ་བ་གཅིག་ནས་གཅིག་ཏུ་བརྒྱུད་པ་རྣམ་པར་དག་པར་བྱ་བའི་ཕྱིར་ཡོངས་སུ་བསྔོའོ། །ཞིང་ཐམས་ཅད་མ་ལུས་པར་གཅིག་ནས་གཅིག་ཏུ་བརྒྱུད་པ་ཉེ་བའི་ཉོན་མོངས་པ་མེད་ཅིང་རྒྱན་རྣམ་པར་དག་པས་
རྣམ་པར་དབྱེ་བ་དང་། རབ་ཏུ་བརྒྱན་པ་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོའོ། །ཆོས་ཀྱི་དབྱིངས་ཐམས་ཅད་མ་ལུས་པར་སེམས་གཅིག་གིས་རྒྱས་པར་དགང་བ་རྣམ་པར་དག་པར་བྱ་བའི་ཕྱིར་ཡོངས་སུ་བསྔོའོ། །ནམ་མཁའི་ཁམས་
ཐམས་ཅད་མ་ལུས་པའི་མཐར་ཐུག་པར་ཡོངས་སུ་རྒྱས་པར་བྱ་བའི་ཕྱིར་ཡོངས་སུ་བསྔོའོ། །དུས་མཐའ་དང་དབུས་མེད་པ་ཐམས་ཅད་མ་ལུས་པ་ལ་འཇུག་ཅིང་ཐམས་ཅད་མཁྱེན་པས་འདུལ་བས་དུས་ཐམས་ཅད་དུ་ཆོས་ཀྱི་འཁོར་ལོ་རབ་ཏུ་བསྐོར་བའི་ཕྱིར་
ཡོངས་སུ་བསྔོའོ། །ཡེ་ཤེས་ཀྱི་བྱིན་རླབས་ཐམས་ཅད་མ་ལུས་པ་ལ་མཁས་པ་ཡང་དག་པར་བསྟན་པས་འགྲོ་བ་ཐམས་ཅད་ལ་ཕན་གདགས་པའི་ཕྱིར་ཡོངས་སུ་བསྔོའོ། །སངས་རྒྱས་ཀྱི་བྱང་ཆུབ་ཐམས་ཅད་མ་ལུས་པར་མངོན་པར་འཚང་རྒྱ་བར་བྱ་བས།
ཕྱི་མའི་མཐའི་མུར་ཐུག་པའི་བསྐལ་བར་བསྟན་པ། འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་དུ་རྒྱུན་མི་འཆད་པས་སེམས་ཅན་ཀུན་གྱིས་སངས་རྒྱས་ཀྱི་ཆོས་ཤེས་པར་བྱ་བའི་ཕྱིར་ཡོངས་སུ་བསྔོའོ། །བསྐལ་པའི་གྲངས་ཐམས་ཅད་མ་ལུས་པ་

བྱང་ཆུབ་སེམས་དཔའི་སྤྱོད་པས་རྒྱས་པར་དགང་བའི་ཕྱིར་ཡོངས་སུ་བསྔོའོ། །འཇིག་རྟེན་གྱི་ཁམས་ཀྱི་གྲངས་དང་འཇིག་རྟེན་གྱི་ཁམས་ཀྱི་རྒྱུད་དང་འཇིག་རྟེན་གྱི་ཁམས་འབྱམ་ཀླས་པ་ཀུན་ནས་ཉོན་མོངས་པ་དང་། རྣམ་པར་དག་
པ་དང་ཆེ་བ་དང་། ཆུང་བ་དང་། ཕྲ་བ་དང་། ཡངས་པ་དང་། སྣྲེལ་ཞིར་རྒྱུ་བ་དང་། སྤྱིའུ་ཚུགས་སུ་བསྟན་པ་དང་། རྒྱན་གཅིག་པ་དང་། རྒྱན་ཐ་དད་པ་དང་། འཇིག་རྟེན་གྱི་ཁམས་སྣ་ཚོགས་སུ་བགྲང་ཞིང་བསྟན་པ་ཐམས་ཅད་མ་ལུས་པར་བྱང་
ཆུབ་སེམས་དཔའི་སྤྱོད་པས་ཡོངས་སུ་རྒྱས་པར་དགང་བའི་ཕྱིར་ཡོངས་སུ་བསྔོའོ། །སངས་རྒྱས་ཀྱི་ཕྲིན་ལས་ཐམས་ཅད་མ་ལུས་པ་ལ་དུས་གསུམ་དུ་བརྩོན་པས་སེམས་སྐད་ཅིག་རེ་རེ་ཞིང་ཐམས་ཅད་མཁྱེན་པར་གདུལ་བ་དང་། རབ་ཏུ་དགོད་པར་བྱ་
བའི་ཕྱིར་ཡོངས་སུ་བསྔོ་སྟེ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་གྱི་ཁམས་གྲངས་མེད་པ་ཐམས་ཅད་གཟུང་བར་བྱ་བའི་ཕྱིར་སངས་རྒྱས་ཀྱི་ལམ་རྒྱུན་མི་གཅད་པ་ལ་ཞུགས་པ་སྙིང་རྗེ་ཆེན་པོས་འགྲོ་བ་ཐམས་ཅད་ཡོངས་
སུ་སྐྱོབ་ཅིང་བྱམས་པ་ཆེན་པོ་ཚད་མེད་པ་ལ་གནས་པ། བྱང་ཆུབ་སེམས་དཔའི་སྤྱོད་པ་ཐམས་ཅད་ཀྱི་རྗེས་སུ་སློབ་པར་ཞུགས་པ། དེ་བཞིན་གཤེགས་པའི་གདམས་ངག་ཐམས་ཅད་ཀྱི་ཚུལ་ལ་གནས་པ། སངས་རྒྱས་ཐམས་ཅད་ལ་དགེ་བའི་རྩ་
བ་རྒྱུན་མི་འཆད་པར་སྐྱེད་པ། དུས་ཐམས་ཅད་དུ་སློང་བ་ལ་སྐྱོ་བ་མེད་པར་རིམ་གྲོ་བྱེད་པའི་སེམས་དང་ལྡན་པ། གཏང་བ་ཐམས་ཅད་བཏང་བས་འགྱོད་པ་མེད་པའི་སེམས་དང་ལྡན་པ། སྦྱིན་པ་བརྩམས་པ་ཐམས་ཅད་མཁྱེན་
པར་ཡོངས་སུ་བསྔོ་བ་ལ་བརྩོན་པ་དེས་སློང་བ་དེ་དང་དེ་དག་འོངས་ཤིང་ཡོ་བྱད་གྱི་དངོས་པོ་མཐའ་ཡས་པ་སློང་བ་དང་སློང་བ་ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱེད་པའི་བྱང་ཆུབ་སེམས་དཔའི་སྤྱོད་པས་དུས་གཞན་དང་གཞན་དུ་སློང་བ་

འོངས་པ་དང་། སློང་བ་དེ་དང་དེ་དག་ཡུལ་དེར་འོངས་ཤིང་དུས་གཞན་དང་གཞན་དུ་ཕྱིན་པ། དམིགས་པའི་དངོས་པོ་རྣམ་པ་ཐ་དད་པ་སློང་བ་དང་སློང་བའི་སེམས་ཅན་སྣ་ཚོགས་བསམ་པ་འཐུན་པས་གདོང་དུ་ལྟ་བ་དང་། སེམས་ཅན་སློང་བ་
གྲངས་མེད་པར་འདུས་ཤིང་། བྱང་ཆུབ་སེམས་དཔས་སྐབས་ཕྱེ་བ་ལ་གནས་པ་དང་། སྦྱིན་པ་འཐོབ་པ་ལ་སྡོད་པའི་སློང་བ་སྣ་ཚོགས་དང་། ལེན་པ་སྣ་ཚོགས་དང་། སེམས་ཅན་སྣ་ཚོགས་དང་། གང་ཟག་གཞན་དང་གཞན་སེམས་སྣ་ཚོགས་དང་ལྡན་པ་
ཕྱོགས་གཞན་དང་གཞན་ནས་འོངས་པའི་མི་རྣམ་པ་ཐ་དད་པ་གཞན་དང་གཞན་དུ་གྱུར་པ། སྐྱེ་གནས་ཐ་དད་པས་ཟིན་པ་སྦྱིན་པའི་གནས་གཞན་དང་གཞན་དུ་གྱུར་པ། དེ་ལྟ་བུའི་སློང་པའི་ཚོགས་ཆེན་པོ་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་ཀུན་
ནས་འདུས་པ་མཐོང་ན་སློང་བ་དེ་དག་ཐམས་ཅད་ལ་སེམས་དགའ་བ་དང་། སེམས་དད་པ་དང་། སློང་བ་ལ་བྱམས་པ་དང་། དགེ་བའི་བཤེས་གཉེན་མཐོང་བའི་འདུ་ཤེས་ཀྱི་སྙིང་རྗེ་ཆེན་པོས་རིམ་གྲོ་བྱེད་པའི་སེམས་དང་། ཡིད་རབ་ཏུ་སྤྲོ་བ་དང་། སེམས་
ཤིན་ཏུ་ཚིམ་པ་རབ་ཏུ་ཐོབ་སྟེ། ཕྱིར་ལྡོག་པ་མེད་པའི་དད་པས་གཏོང་བ་རྒྱུན་མཱི་ཆད་པར་བྱ་བའི་སེམས་དང་། སྐྱོ་བ་མེད་ཅིང་ཁྱད་པར་དུ་འཕེལ་བར་གཏོང་བའི་སེམས་ཀྱིས་སློང་བ་ཇི་ལྟར་འོངས་པ་དང་། དངོས་པོ་ཇི་སློང་བ་དེ་དག་ཡོངས་སུ་ཚིམ་པ་དང་།
ཡོངས་སུ་རྒྱས་པ་དང་། ལག་གང་བ་དང་། སྣོད་གང་བ་དང་། བསམ་པ་གང་བ་དང་། ཅི་འདོད་པའི་དངོས་པོ་ཐོབ་པ་དང་། ཡིད་བདེ་བ་མཐའ་ཡས་པས་རྒྱས་པ་དང་། དབུལ་བོར་བ་དང་། ནོར་དང་ཡོ་བྱད་ཐམས་ཅད་བསྡུད་པས་བརྟན་
པ་དང་། དངོས་པོ་ཡོངས་སུ་གཏང་བ་ཐམས་ཅད་ཀྱིས་ཤིན་ཏུ་བསྡུད་པ་དང་། ཅི་བསླངས་པའི་དངོས་པོ་ཐམས་ཅད་ཐོབ་པས་ཡིད་བདེ་སྟེ། སྒྲ་ཆེ་ཞིང་མཐོ་བ་འབྱིན་པ་དང་། ཇི་བདེར་འདོང་ཞིང་སྤྱོད་པ་དང་། བསམ་པ་ཇི་བཞིན་དུ་ཤིན་ཏུ་ཚིམ་པ་དང་

ཉོན་མོངས་པ་མེད་པར་སྦྱིན་པ་ཐོབ་པ་དང་། ཆད་ཅིང་དུབ་པ་མེད་པའི་སེམས་དང་ལྡན་པར་བྱེད་དེ། སློང་བ་དེ་དག་མཐོང་བ་ཙམ་གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཤིན་ཏུ་དགའ་བར་འགྱུར་གྱི། བརྒྱ་བྱིན་
གྱི་སྟན་ལ་འདུག་པས་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་གནས་པས་ནི་མ་ཡིན་ནོ། །རབ་མཚེ་མའི་དབང་ཕྱུག་ལ་བསྐལ་པ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པར་གནས་པས་མ་ཡིན་ནོ། །དགའ་ལྡན་དུ་སྐྱེས་ཏེ་སྐྱེ་བ་དང་། འཆི་འཕོ་བ་ལས་རྣམ་པར་འདས་
པས་མ་ཡིན་ནོ། །རབ་འཕྲུལ་དགའི་དབང་ཕྱུག་ལ་བསྐལ་པ་གྲངས་མེད་པར་བདེ་བའི་རྣམ་པ་ཐོབ་པས་མ་ཡིན་ནོ། །དབང་སྒྱུར་བའི་དབང་གིས་བསྐལ་པ་བསམ་གྱིས་མི་ཁྱབ་པར་ཡིད་དུ་འོང་བའི་བུད་མེད་གྱི་བདེ་བ་ལ་གནས་པས་མ་ཡིན་ནོ། །ཚངས་
པའི་སྟན་ལ་གནས་པས་བསྐལ་པ་བརྗོད་དུ་མེད་པར་ཚངས་པའི་བདེ་བ་ལ་སྤྱོད་པས་མ་ཡིན་ནོ། །མིར་གྱུར་ཏེ་འཁོར་ལོ་སྒྱུར་བའི་རྒྱལ་སྲིད་སྟོང་གསུམ་གྱི་མཐར་ཐུག་པའི་བདེ་བའི་རྣམ་པས་བསྐལ་པས་མཚམས་མེད་ཅིང་ཚད་མེད་པར་དགའ་
བ་དང་། རྩེ་བ་དང་ལོངས་སྤྱོད་ཐོབ་པར་གྱུར་པས་ནི་མ་ཡིན་ནོ། །དགེ་རྒྱས་ཀྱི་ལྷའི་བདེ་བ་ལ་བསྐལ་པ་མཚུངས་པ་མེད་པར་བདེ་བའི་རྣམ་པ་ཟད་མི་ཤེས་པ་དང་། འགྲོགས་པས་མ་ཡིན་ནོ། །གཙང་མའི་གནས་ན་གནས་པས་བསྐལ་པ་མུ་མེད་
པར་བདེ་བ་དང་། འགྲོགས་པར་གྱུར་པས་མ་ཡིན་ཏེ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སློང་བ་སྣ་ཚོགས་མཐོང་ན་དགའ་བར་འགྱུར་རོ། །སྤྲོ་བ་སྐྱེའོ། །མོས་པ་འབྱུང་ངོ་། །རབ་ཏུ་དགའ་བ་འགྲུབ་པོ། །དད་པ་
འཕེལ་ལོ། །བསམ་པ་འབྱུང་ངོ་། །དབང་པོ་ལས་སུ་རུང་བར་འགྱུར་རོ། །དགའ་བའི་སེམས་ཡོངས་སུ་རྫོགས་པར་འགྱུར་རོ། །མོས་པ་ཆེན་པོས་བསྐྱེད་པའི་སེམས་ཀྱི་ཤུགས་རྣམ་པར་འཕེལ་ལོ། །སངས་རྒྱས་ཀྱི་བྱང་ཆུབ་རྩ་བ་

བརྟན་ཞིང་རྣམ་པར་འཕེལ་བར་འགྱུར་རོ། །དེ་དགེ་བའི་རྩ་བ་དེ་དག་སློང་བ་དེ་དག་དང་། སེམས་ཅན་ཐམས་ཅད་ལ་ཕན་པའི་ཕྱིར་ཡོངས་སུ་བསྔོའོ། །བདེ་བའི་ཕྱིར་ཡོངས་སུ་བསྔོའོ། །དོན་གྱི་ཕྱིར་ཡོངས་སུ་བསྔོའོ། །རྣམ་པར་དག་པའི་ཕྱིར་ཡོངས་སུ་བསྔོའོ། །
བྱང་ཆུབ་ཀྱི་ཕྱིར་ཡོངས་སུ་བསྔོའོ། །མཉམ་པ་ཉིད་ཀྱི་ཕྱིར་ཡོངས་སུ་བསྔོའོ། །ཡིད་བཟང་པོའི་འབྱུང་གནས་སུ་འགྱུར་བའི་ཕྱིར་ཡོངས་སུ་བསྔོའོ། །ཐེག་པ་ཆེན་པོའི་བཟང་བ་ཉིད་ཀྱི་ཕྱིར་ཡོངས་སུ་བསྔོའོ། །བརྩམས་པ་བཟང་པོ་ཐམས་ཅད་ཤེས་
པ་དང་འབྱོར་བར་བྱ་བའི་ཕྱིར་ཡོངས་སུ་བསྔོའོ། །བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་སྨོན་ལམ་ཡོངས་སུ་རྫོགས་པས་སྟོབས་བཅུའི་ཡེ་ཤེས་མངོན་པར་འཚང་རྒྱ་བར་བྱ་བའི་ཕྱིར་ཡོངས་སུ་བསྔོའོ། །དེ་ཡང་སེམས་ཆགས་པ་མེད་
པ་དང་གྲོལ་ཞིང་བཅིངས་པ་མེད་པའི་ལུས་ཀྱི་ལས་ཀྱི་ཕྱིར་ཡོངས་སུ་བསྔོའོ། །སེམས་ཆགས་པ་མེད་པ་དང་གྲོལ་ཞིང་བཅིངས་པ་མེད་པའི་ངག་གི་ལས་ཀྱི་ཕྱིར་ཡོངས་སུ་བསྔོའོ། །སེམས་ཆགས་པ་མེད་པ་དང་གྲོལ་ཞིང་བཅིངས་པ་མེད་པའི་ཡིད་གྱི་
ལས་ཀྱི་ཕྱིར་ཡོངས་སུ་བསྔོའོ། །དེ་ཡང་སེམས་ཅན་ཀྱི་འདུ་ཤེས་ཀྱིས་ཡོངས་སུ་བསྔོ་བ་མ་ཡིན། གཞུང་དེ་བཞིན་དུ་སྲོག་གི་འདུ་ཤེས་ཀྱིས་མ་ཡིན། གང་ཟག་གི་འདུ་ཤེས་ཀྱིས་མ་ཡིན། ཤེད་ལས་སྐྱེས་པའི་འདུ་ཤེས་ཀྱིས་མ་ཡིན།
ཤེད་བདག་གི་འདུ་ཤེས་ཀྱིས་མ་ཡིན། སྐྱེ་བ་པོའི་འདུ་ཤེས་ཀྱིས་མ་ཡིན། བྱེད་པ་པོའི་འདུ་ཤེས་ཀྱིས་མ་ཡིན། ཚོར་བ་པོའི་འདུ་ཤེས་ཀྱིས་མ་ཡིན། ཡོད་པ་དང་མེད་པའི་འདུ་ཤེས་ཀྱིས་ཡོངས་སུ་བསྔོ་བ་མ་ཡིན། འཇིག་རྟེན་འདིའི་འདུ་ཤེས་
ཀྱིས་མ་ཡིན། འཇིག་རྟེན་ཕ་རོལ་གྱི་འདུ་ཤེས་ཀྱིས་མ་ཡིན། ཤི་འཕོ་བའི་འདུ་ཤེས་ཀྱིས་མ་ཡིན། སྐྱེ་བའི་འདུ་ཤེས་ཀྱིས་མ་ཡིན། རྟག་པའི་འདུ་ཤེས་ཀྱིས་མ་ཡིན། མི་རྟག་པའི་འདུ་ཤེས་ཀྱིས་མ་ཡིན། སྲིད་པའི་འདུ་ཤེས་ཀྱིས་མ་

ཡིན། སྲིད་པ་མེད་པའི་འདུ་ཤེས་ཀྱིས་མ་ཡིན། འདུ་ཤེས་མེད་པས་ཡོངས་སུ་བསྔོ་བ་མ་ཡིན། འདུ་ཤེས་མེད་པ་མ་ཡིན་པས་ཡོངས་སུ་བསྔོ་བ་མ་ཡིན་ཏེ། དེ་ཆགས་པ་མེད་པའི་སེམས་ཀྱིས་ཡོངས་སུ་བསྔོའོ། །བཅིངས་
པ་མེད་པའི་སེམས་ཀྱིས་ཡོངས་སུ་བསྔོའོ། །གྲོལ་བ་མེད་པའི་སེམས་ཀྱིས་ཡོངས་སུ་བསྔོ་སྟེ། དེ་ནི་ལས་ཡོངས་སུ་མི་བསྔོའོ། །རྣམ་པར་སྨིན་པ་ཡོངས་སུ་མི་བསྔོའོ། །རྟོག་པ་ཡོངས་སུ་མི་བསྔོའོ། །རྣམ་པར་རྟོག་པ་ཡོངས་སུ་མི་
བསྔོའོ། །སེམས་པ་ཡོངས་སུ་མི་བསྔོའོ། །བསམ་པ་ཡོངས་སུ་མི་བསྔོའོ། །སེམས་ཡོངས་སུ་མི་བསྔོའོ། །སེམས་མེད་པ་ཡོངས་སུ་མི་བསྔོའོ། །དེ་དེ་ལྟར་ཡོངས་སུ་བསྔོ་བའི་ཚེ། ནང་ལ་མངོན་པར་ཆགས་པ་མེད་དོ། །ཕྱི་
རོལ་ལ་མངོན་པར་ཆགས་པ་མེད་དོ། །རྐྱེན་ལ་མངོན་པར་ཆགས་པ་མེད་དོ། །དམིགས་པ་ལ་མངོན་པར་ཆགས་པ་མེད་དོ། །རྒྱུ་ལ་མངོན་པར་ཆགས་པ་མེད་དོ། །རྒྱུ་འདུས་པ་ལ་མངོན་པར་ཆགས་པ་མེད་དོ། །ཆོས་ལ་མངོན་པར་
ཆགས་པ་མེད་དོ། །ཆོས་ཉིད་ལ་མངོན་པར་ཆགས་པ་མེད་དོ། །སེམས་པ་ལ་མངོན་པར་ཆགས་པ་མེད་དོ། །བསམ་པ་ལ་མངོན་པར་ཆགས་པ་མེད་དོ། །དེ་དེ་ལྟར་ཡོངས་སུ་བསྔོ་བའི་ཚེ། གཟུགས་ལ་མངོན་པར་ཆགས་པ་མེད་དོ། །
གཟུགས་ཉེ་བར་ལེན་པ་ལ་ཆགས་པ་མེད་དོ། །གཟུགས་འགོག་པ་ལ་ཆགས་པ་མེད་དོ། །ཚོར་བ་ལ་ཆགས་པ་མེད་དོ། །ཚོར་བ་ཉེ་བར་ལེན་པ་ལ་ཆགས་པ་མེད་དོ། །ཚོར་བ་འགོག་པ་ལ་ཆགས་པ་མེད་དོ། །འདུ་ཤེས་ལ་ཆགས་པ་མེད་
དོ། །འདུ་ཤེས་ཉེ་བར་ལེན་པ་ལ་ཆགས་པ་མེད་དོ། །འདུ་ཤེས་འགོག་པ་ལ་ཆགས་པ་མེད་དོ། །འདུ་བྱེད་ལ་ཆགས་པ་མེད་དོ། །འདུ་བྱེད་ཉེ་བར་ལེན་པ་ལ་ཆགས་པ་མེད་དོ། །འདུ་བྱེད་འགོག་པ་ལ་ཆགས་པ་མེད་དོ། །རྣམ་པར་ཤེས་

པ་ལ་ཆགས་པ་མེད་དོ། །རྣམ་པར་ཤེས་པ་ཉེ་བར་ལེན་པ་ལ་ཆགས་པ་མེད་དོ། །རྣམ་པར་ཤེས་པ་འགོག་པ་ལ་ཆགས་པ་མེད་དོ། །གང་དེ་ལྟ་བུའི་ཆོས་ལ་ཆགས་པ་མེད་པ་དེ་ནི་གཟུགས་ལ་བཅིངས་པ་མེད་དོ། །གཟུགས་ཀྱི་སྐྱེ་བ་ལ་བཅིངས་པ་མེད་
དོ། །གཟུགས་ཀྱི་འགག་པ་ལ་བཅིངས་པ་མེད་དོ། །ཚོར་བ་ལ་བཅིངས་པ་མེད་དོ། །ཚོར་བའི་སྐྱེ་བ་ལ་བཅིངས་པ་མེད་དོ། །ཚོར་བའི་འགག་པ་ལ་བཅིངས་པ་མེད་དོ། །འདུ་ཤེས་ལ་བཅིངས་པ་མེད་དོ། །འདུ་ཤེས་ཀྱི་སྐྱེ་བ་ལ་བཅིངས་པ་མེད་
དོ། །འདུ་ཤེས་ཀྱི་འགག་པ་ལ་བཅིངས་པ་མེད་དོ། །འདུ་བྱེད་ལ་བཅིངས་པ་མེད་དོ། །འདུ་བྱེད་ཀྱི་སྐྱེ་བ་ལ་བཅིངས་པ་མེད་དོ། །འདུ་བྱེད་ཀྱི་འགག་པ་ལ་བཅིངས་པ་མེད་དོ། །རྣམ་པར་ཤེས་པ་ལ་བཅིངས་པ་མེད་དོ། །རྣམ་པར་ཤེས་པའི་སྐྱེ་
བ་ལ་བཅིངས་པ་མེད་དོ། །རྣམ་པར་ཤེས་པའི་འགག་པ་ལ་བཅིངས་པ་མེད་དོ། །གང་ཆོས་དེ་དག་ལ་བཅིངས་པ་མེད་པ་དེ་ནི་ཆོས་ཐམས་ཅད་ལ་ཆགས་པ་མེད་པ་སྟེ། དེ་ཅིའི་ཕྱིར་ཞེ་ན། ཆོས་གང་ཆོས་ལ་འཛིན་པ་འམ། ཆོས་གང་ལ་ཆོས་ཀྱིས་
ཆགས་པར་འགྱུར་བའི་ཆོས་དེ་ལྟ་བུ་སྐྱེས་པའི་སྐྱེ་བ་འམ། སྐྱེ་བར་འགྱུར་བ་གང་ཡང་མེད་དོ། །དེ་ཡང་འདི་ལྟར་ཆོས་ཐམས་ཅད་ནི་འདུ་ཤེས་དང་བྲལ་བའི་ངོ་བོ་ཉིད་ཀྱིས་དངོས་པོ་མེད་པའི་རང་བཞིན་ཏེ། གཅིག་མ་ཡིན་ནོ། །གཉིས་མ་ཡིན་ནོ། །
མང་པོ་མ་ཡིན་ནོ། །ཚད་མེད་པ་མ་ཡིན་ནོ། །ཆུང་ངུ་མ་ཡིན་ནོ། །མང་པོ་མ་ཡིན་ནོ། །དམའ་བ་མ་ཡིན་ནོ། །ཡངས་པ་མ་ཡིན་ནོ། །ཟབ་པ་མ་ཡིན་ནོ། །གསལ་བ་མ་ཡིན་ནོ། །ཞི་བ་མ་ཡིན་ནོ། །སྤྲོས་པ་
མ་ཡིན་ནོ། །གནས་མ་ཡིན་ནོ། །གནས་མེད་པ་མ་ཡིན་ནོ། །ཆོས་མ་ཡིན་ནོ། །ཆོས་མེད་པ་མ་ཡིན་ནོ། །བསྒོམ་པ་མ་ཡིན་ནོ། །བསྒོམ་པ་མེད་པ་མ་ཡིན་ནོ། །ཡོད་པ་མ་ཡིན་ནོ། །མེད་པ་མ་ཡིན་ནོ། །དེ་དེ་ལྟར་ཆོས་མེད་པའི་ཚུལ་

གྱིས་ཆོས་རྣམས་ལ་རྣམ་པར་ལྟ་སྟེ། ཆོས་ཀྱི་ཚིག་གི་ལམ་ལ་གནས་པས། ཆོས་མ་ཡིན་ཞེས་བྱ་བར་ཡང་དག་པར་རྗེས་སུ་མི་མཐོང་ངོ་། །དེ་ལས་ཀྱི་ལམ་ཡང་རྒྱུན་གཅོད་པར་མི་བྱེད་དོ། །བྱང་ཆུབ་སེམས་
པས་སྤྱོད་པ་ཡང་རྣམ་པར་ཐོགས་པར་མི་བྱེད་དོ། །ཐམས་ཅད་མཁྱེན་པ་ཉིད་ལས་ཀྱང་ཕྱིར་མི་ལྡོག་གོ །རྟེན་པའི་ལས་སྒྱུ་མ་ལྟ་བུར་ཡང་རབ་ཏུ་ཤེས་སོ། །ཆོས་སྒྲ་བརྙན་དང་འདྲ་བ་ཡང་འཇིག་པར་མི་བྱེད་དོ། །སེམས་ཅན་སྣང་བས་
ཀྱང་རློམ་སེམས་སུ་མི་བྱེད་དོ། །ཆོས་ཐམས་ཅད་སྒྱུ་མ་དང་མཉམ་པར་ཡང་ཡང་དག་པར་ཇི་ལྟ་བ་བཞིན་དུ་ཤེས་ཏེ། ལས་རྣམས་ཀྱི་རྒྱུའི་མཐུ་དང་ཡང་འགལ་བར་མི་བྱེད་དོ། །ལས་ལ་གཞོལ་བར་ཡང་རབ་ཏུ་འཇུག་སྟེ། ཆོས་རྣམས་མངོན་པར་འདུ་
བྱ་བ་མེད་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། མངོན་པར་འདུ་བྱ་བ་མེད་པའི་ལམ་ཡང་རྒྱུན་མི་གཅོད་དོ། །དེ་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། གང་གི་ཕྱིར་ཐམས་ཅད་མཁྱེན་པ་ཉིད་ཡུལ་མེད་ཅིང་། ཐམས་ཅད་མཁྱེན་
པ་ཉིད་ཀུན་ཏུ་འགྲོ་བས་ཐམས་ཅད་མཁྱེན་པ་ཉིད་ཐམས་ཅད་དུ་ཡོངས་སུ་བསྔོ་ཞིང་ཐམས་ཅད་ལས་ལྡོག་པར་མི་བྱེད་དོ། །ཅིའི་ཕྱིར་ཡོངས་སུ་བསྔོ་བ་ཞེས་བྱ་ཞེ་ན། འདི་ནི་འཇིག་རྟེན་ལས་ཕ་རོལ་ཏུ་གྱུར་པས་ན་དེའི་ཕྱིར་ཡོངས་སུ་བསྔོ་བ་ཞེས་བྱའོ། །ཕུང་པོ་ལས་གཞན་དུ་འགྱུར་བར་
བྱེད་པས་ན་དེའི་ཕྱིར་ཡོངས་སུ་བསྔོ་བ་ཞེས་བྱའོ། །ཚིག་གི་ལམ་ལས་གཞན་དུ་གྱུར་པས་ན་དེའི་ཕྱིར་ཡོངས་སུ་བསྔོ་བ་ཞེས་བྱའོ། །སེམས་ཅན་གྱི་འདུ་ཤེས་སྣ་ཚོགས་ལས་ཕ་རོལ་ཏུ་གྱུར་པས་ན་དེའི་ཕྱིར་ཡོངས་སུ་བསྔོ་བ་ཞེས་བྱའོ། །འཇིག་ཚོགས་མང་པོ་ལས་གཞན་དུ་གྱུར་པས་ན་དེའི་ཕྱིར་ཡོངས་
སུ་བསྔོ་བ་ཞེས་བྱའོ། །མངོན་པར་འདུ་བྱེད་པ་ལས་གཞན་དུ་གྱུར་པས་ན། དེའི་ཕྱིར་ཡོངས་སུ་བསྔོ་བ་ཞེས་བྱའོ། །སྲིད་པ་ལས་གཞན་དུ་གྱུར་པས་ན་དེའི་ཕྱིར་ཡོངས་སུ་བསྔོ་བ་ཞེས་བྱའོ། །ཉེ་བར་ལེན་པ་ལས་གཞན་དུ་གྱུར་པས་ན།

དེའི་ཕྱིར་ཡོངས་སུ་བསྔོ་བ་ཞེས་བྱའོ། །འཇིག་རྟེན་གྱི་ཆོས་ལས་གཞན་དུ་གྱུར་པས་ན། དེའི་ཕྱིར་ཡོངས་སུ་བསྔོ་བ་ཞེས་བྱའོ། །དེ་དེ་ལྟར་ཡོངས་སུ་བསྔོ་བས་སངས་རྒྱས་ཀྱི་རྗེས་སུ་སོང་བ་ཡིན། ཆོས་ཀྱི་རྗེས་སུ་སོང་བ་ཡིན། ཡེ་ཤེས་ཀྱི་
རྗེས་སུ་སོང་བ་ཡིན། བྱང་ཆུབ་ཀྱི་རྗེས་སུ་སོང་བ་ཡིན། དོན་གྱི་རྗེས་སུ་སོང་བ་ཡིན། ཡོངས་སུ་བསྔོ་བའི་རྗེས་སུ་སོང་བ་ཡིན། སྤྱོད་ཡུལ་གྱི་རྗེས་སུ་སོང་བ་ཡིན། སྤྱོད་པའི་རྗེས་སུ་སོང་བ་ཡིན། རང་བཞིན་གྱི་རྗེས་སུ་སོང་བ་ཡིན།
རྣམ་པར་དག་པའི་རྗེས་སུ་སོང་བ་ཡིན་ཏེ། དེ་དེ་ལྟར་ཡོངས་སུ་བསྔོ་བས་ཆོས་ཤེས་པར་བྱ་བ་ཐམས་ཅད་ཁོང་དུ་ཆུད་པར་བྱེད་པ་ཡིན། སངས་རྒྱས་ཐམས་ཅད་མཉེས་པར་བྱ་བ་ཡང་ཡོངས་སུ་རྫོགས་པར་བྱེད་དེ། སངས་རྒྱས་གང་ཡང་
ཐུགས་འབྱུང་བར་བྱས་པ་མེད་པ་ཡིན། ཆོས་གང་ཡང་མི་འཐུན་པར་བྱས་པ་མེད་པ་ཡིན། ཆོས་གང་ཡང་ཆུད་གཟན་པ་མེད་པ་ཡིན། ཆོས་གང་དང་ཡང་འགལ་བར་བྱེད་པ་མེད་པ་ཡིན། དངོས་པོ་གང་ཡང་ཉམས་པར་བྱེད་པ་མེད་
པ་ཡིན། ཆོས་གང་ཡང་བོར་བ་མེད་པ་ཡིན། རྒྱུ་གང་ཡང་བཤིག་པ་མེད་པ་ཡིན། རྐྱེན་གང་ཡང་ཕྱི་ན