Kinh tạng Tây Tạng (Kangyur Đại Học) — 036_ཕལ་ཆེན།_ཁ

༄༅། །ཕལ་ཆེན་ཁ་བ་བཞུགས་སོ།།

༄༅༅། །སངས་རྒྱས་ཕལ་པོ་ཆེ་ཞེས་བྱ་བ་ཤིན་ཏུ་རྒྱས་པ་ཆེན་པོའི་མདོ། །བམ་པོ་དང་པོའོ། །ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཡོངས་སུ་བསྔོ་བ་
སངས་རྒྱས་ཐམས་ཅད་ལ་ཡང་དག་པར་བསྐྱེད་པ་ཞེས་བྱ་བ་གསུམ་པ་གང་ཞེ་ན། ཀྱེ་རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འདས་པའི་སངས་རྒྱས་བཅོམ་ལྡན་འདས་རྣམས་
ཀྱི་ཡོངས་སུ་བསྔོ་བ་ལ་ཡང་རྗེས་སུ་སློབ་བོ། །མ་བྱོན་པའི་སངས་རྒྱས་བཅོམ་ལྡན་འདས་རྣམས་ཀྱི་ཡོངས་སུ་བསྔོ་བ་ལའང་རྗེས་སུ་སློབ་བོ། །ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་ཡོངས་སུ་
བསྔོ་བ་ལའང་རྗེས་སུ་སློབ་བོ། །དེ་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། མི་མཐུན་པ་མ་ཡིན་ཞིང་ཡིད་དུ་འོང་བའམ། མི་མཐུན་པ་མ་ཡིན་ཞིང་ཡིད་དུ་འོང་བར་རེག་པའམ། མི་མཐུན་པ་མ་ཡིན་
ཞིང་ཡིད་དུ་འོང་བའི་ཆོས་སམ། མི་མཐུན་པ་མ་ཡིན་ཞིང་ཁ་ན་མ་ཐོ་བ་མྱེད་པ་རྣམ་པར་དག་པ། དགེ་བ་ཡངས་པ། འོད་གསལ་བ། གང་གིས་ཡིད་དགའ་བ་སྐྱེ་ཞིང་བདེ་བར་འགྱུར་བ། དང་བ་སྐྱེ་བ།

དགའ་བ་སྐྱེ་བ། རབ་ཏུ་དགའ་བར་གནས་པ། སྤྲོ་བ་རབ་ཏུ་འབྱུང་བ་ཡིད་མི་བདེ་བ་རྣམ་པར་བཟློག་པ། སེམས་བདེ་བར་འགྱུར་བ། ཉམས་དགའ་བར་འགྱུར་བ། བསམ་པ་འཇམ་པར་འགྱུར་བ་དང་། དབང་པོ་སིམ་པར་འགྱུར་བའི་
གཟུགས་གང་ཇི་སྙེད་ཡོད་པ་དེ་དག་ཐམས་ཅད་མཐོང་བར་གྱུར་ཏེ། དེ་བདེ་བའི་འདུ་ཤེས་དེ་དག་མཐོང་བའི་ཚེ། འདི་ལྟར་ཡོངས་སུ་བསྔོ་སྟེ། བདག་གི་བདེ་བ་ཡོངས་སུ་བསྔོ་བ་འདིས་སངས་རྒྱས་བཅོམ་ལྡན་འདས་དེ་དག་སངས་རྒྱས་ཀྱི་རྣམ་པར་སྤྱོད་པའི་བདེ་བ་བསམ་
གྱིས་མི་ཁྱབ་པ་དང་། ཕྱི་ཕྱིར་ཞིང་ཡང་ལྡན་པར་གྱུར་ཅིག །སངས་རྒྱས་ཀྱི་ཏིང་ངེ་འཛིན་གྱི་བདེ་བ་མཚུངས་པ་མྱེད་པས་ཡང་དག་པར་གཟུང་བར་གྱུར་ཅིག །སངས་རྒྱས་ཀྱི་ཐུགས་རྗེ་ཆེན་པོའི་བདེ་བ་མཐའ་ཡས་པ་ཕྱིར་ཞིང་ཡང་ཤིན་ཏུ་བརྟན་པར་གྱུར་ཅིག
སངས་རྒྱས་ཀྱི་རྣམ་པར་ཐར་བའི་བདེ་བ་ཚད་མེད་པ་དང་ཡང་དག་པར་ལྡན་པར་གྱུར་ཅིག །སངས་རྒྱས་ཀྱི་ཆོ་འཕྲུལ་ཚད་མྱེད་པས་ཤིན་ཏུ་གཟུང་བར་གྱུར་ཅིག །སངས་རྒྱས་ཀྱི་ཁྱུ་མཆོག་གི་མཐུ་ཕྱུང་བའི་བདེ་བ་རྙེད་པར་དཀའ་བས་ཤིན་ཏུ་ཁྱབ་པར་གྱུར་ཅིག །སངས་
རྒྱས་ཀྱི་སྟོབས་ཀྱི་བདེ་བ་ཚད་མྱེད་པས་ཤིན་ཏུ་བདེ་བར་གྱུར་ཅིག །ཚོར་བ་ཐམས་ཅད་ཞི་ཞིང་སྐྱེ་བ་མེད་པའི་བདེ་བས་འགྱུར་བ་མེད་པར་བདེ་བར་གྱུར་ཅིག །ཆགས་པ་མེད་པར་གནས་པ་རྟག་ཏུ་མཉམ་པར་གཞག་པའི་དེ་བཞིན་གཤེགས་པའི་བདེ་བ་གཉིས་སུ་མེད་ཅིང་
ཡང་དག་པར་སྤྱོད་པས་འཁྲུག་པ་མྱེད་པའི་བདེ་བར་གྱུར་ཅིག་ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་དགེ་བའི་རྩ་བ་དེ་དག་དེ་བཞིན་གཤེགས་པ་རྣམས་ལ་ཡོངས་སུ་བསྔོས་ནས། བྱང་ཆུབ་སེམས་དཔའ་རྣམས་ལ་ཡོངས་སུ་བསྔོ་བ་བྱེད་དེ།

འདི་ལྟར་བསམ་པ་ཡོངས་སུ་མ་རྫོགས་པ་རྣམས་ཀྱི་བསམ་པ་ཡོངས་སུ་རྫོགས་པར་འགྱུར་བའི་ཕྱིར་ཡོངས་སུ་བསྔོའོ། །ལྷག་པའི་བསམ་པ་ཡོངས་སུ་མ་དག་པ་རྣམས་ཡོངས་སུ་དག་པར་བྱ་བ་དང་། ཕ་རོལ་ཏུ་ཕྱིན་པ་ཡོངས་སུ་མ་རྫོགས་པ་ཐམས་ཅད་ཡོངས་སུ་རྫོགས་
པར་བྱ་བ་དང་། བྱང་ཆུབ་ཀྱི་སེམས་རྡོ་རྗེ་ལྟ་བུ་ཤིན་ཏུ་བརྟན་པར་བྱ་བ་དང་། ཐམས་ཅད་མཁྱེན་པའི་གོ་ཅ་ཕྱིར་མི་ལྡོག་པ་རྒྱུན་མི་འཆད་པར་བྱ་བ་དང་། བྱང་ཆུབ་ཏུ་གཞོལ་བའི་དགེ་བའི་རྩ་བ་རྣམས་ཡོངས་སུ་བསྲུང་བ་དང་། འགྲོ་བ་ཐམས་ཅད་དང་མཉམ་པའི་བྱང་ཆུབ་ཀྱི་སེམས་
བསྐྱེད་པའི་སྨོན་ལམ་ཡོངས་སུ་རྫོགས་པར་བྱ་བ་དང་། བྱང་ཆུབ་སེམས་དཔའ་ཐམས་ཅད་ཀྱི་རྣམ་པར་སྤྱོད་པ་ཐོབ་པར་བྱ་བ་དང་། བྱང་ཆུབ་སེམས་དཔའི་དབང་པོ་ཐམས་ཅད་ཀྱི་མངོན་པར་ཤེས་པ་ཤིན་ཏུ་རྣོ་བར་བྱ་བ་དང་། བྱང་ཆུབ་སེམས་དཔའ་ཐམས་ཅད་ཀྱི་དགེ་བའི་རྩ་བ་
ཐམས་ཅད་མཁྱེན་པ་ཉིད་དུ་ཐུག་པར་འགྱུར་བར་བྱ་བའི་ཕྱིར་ཡོངས་སུ་བསྔོ་སྟེ། དེ་ལྟར་དགེ་བའི་རྩ་བ་དེ་དག་ཐམས་ཅད་བྱང་ཆུབ་སེམས་དཔའ་རྣམས་ཀྱི་དོན་དུ་ཡོངས་སུ་བསྔོའོ། །དེ་ཡང་དགེ་བའི་རྩ་བ་ཆུང་ངུ་ན་སེ་གོལ་གཏོགས་པ་ཙམ་དུ་སངས་རྒྱས་ཞི་བའི་སྒྲ་ཐོས་སམ། ཆོས་
ཉན་ཏམ། འཕགས་པའི་དགེ་འདུན་བསྙེན་བཀུར་བྱེད་དམ། གང་ཅི་ཡང་རུང་སྟེ། དགེ་བའི་རྩ་བ་དེ་དག་སེམས་ཅན་ཐམས་ཅད་ལ་བར་ཆད་མེད་པར་ཡོངས་སུ་བསྔོའོ། །སངས་རྒྱས་རྗེས་སུ་དྲན་པ་ཡོངས་སུ་རྫོགས་པར་ཡོངས་སུ་བསྔོའོ། །ཆོས་རྗེས་སུ་དྲན་པ་རབ་ཏུ་སྦྱོར་
བར་ཡོངས་སུ་བསྔོའོ། །འཕགས་པའི་དགེ་འདུན་རིམ་གྲོ་བྱ་བར་ཡོངས་སུ་བསྔོའོ། །སངས་རྒྱས་མཐོང་བ་དང་མི་འབྲལ་བར་ཡོངས་སུ་བསྔོའོ། །སེམས་རྣམ་པར་དག་པར་ཡོངས་སུ་བསྔོའོ། །སངས་རྒྱས་ཀྱི་ཆོས་ཁོང་དུ་ཆུད་པར་ཡོངས་སུ་བསྔོའོ། ཚད་མྱེད་
བའི་ཡོན་ཏན་ལ་རབ་ཏུ་འཇུག་པའི་ཕྱིར་ཡོངས་སུ་བསྔོའོ། །མངོན་པར་ཤེས་པ་དང་དགེ་བའི་རྩ་བ་རྣམ་པར་དག་པའི་ཕྱིར་ཡོངས་སུ་བསྔོའོ། །ཆོས་ཀྱི་ཐེ་ཙོམ་རྣམ་པར་བསྩལ་བའི་ཕྱིར་ཡོངས་སུ་བསྔོའོ། །ཇི་ལྟར་ཉན་ཐོས་དང་། རང་སངས་རྒྱས་རྣམ་པར་དག་པ་

བསྟན་པ་ལ་སྤྱོད་པའི་སེམས་ཅན་རྣམས་ལ་ཡོངས་སུ་བསྔོ་བ་དེ་བཞིན་དུ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དགེ་བའི་རྩ་བ་དེ་དག་སེམས་ཅན་ཐམས་ཅད་ལ་འང་ཡོངས་སུ་བསྔོ་སྟེ། འདི་ལྟར་སེམས་ཅན་དམྱལ་བའི་ལམ་རྣམ་པར་བཟློག་པའི་
ཕྱིར་ཡོངས་སུ་བསྔོའོ། །བྱོལ་སོང་གི་སྐྱེ་གནས་རྒྱུན་གཅད་པའི་ཕྱིར་ཡོངས་སུ་བསྔོའོ། །གཤིན་རྗེའི་འཇིག་རྟེན་རྩ་བ་ནས་འཆད་པའི་ཕྱིར་ཡོངས་སུ་བསྔོའོ། །ངན་སོང་གི་རྒྱུད་ཐམས་ཅད་མ་ལུས་པར་རྒྱུན་གཅད་པའི་ཕྱིར་ཡོངས་སུ་བསྔོའོ། །སེམས་ཅན་དེ་དག་ཐམས་
ཅད་ཀྱང་བླ་ན་མྱེད་པའི་བྱང་ཆུབ་ཏུ་མོས་ཤིང་ཕྱིར་མི་ལྡོག་པའི་ཕྱིར་ཡོངས་སུ་བསྔོའོ། །ལྷག་པའི་བསམ་པས་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་རབ་ཏུ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །སངས་རྒྱས་ཀྱི་ཆོས་ཐམས་ཅད་མི་སྤང་བའི་ཕྱིར་ཡོངས་སུ་བསྔོའོ། །
ཐམས་ཅད་མཁྱེན་པའི་ས་ཤིན་ཏུ་བདེ་བ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །སེམས་ཅན་ཐམས་ཅད་ཤིན་ཏུ་རྣམ་པར་དག་པར་བྱ་བའི་ཕྱིར་ཡོངས་སུ་བསྔོའོ། །སེམས་ཅན་ཐམས་ཅད་ཡེ་ཤེས་མཐའ་ཡས་པ་ཁོང་དུ་ཆུད་པར་བྱ་བའི་ཕྱིར་ཡོངས་སུ་བསྔོའོ། །བྱང་ཆུབ་སེམས་
དཔའ་ནི་དགེ་བའི་རྩ་བ་གང་ཡང་རུང་སྟེ། བྱང་ཆུབ་ཏུ་དམྱིགས་པ་དང་མ་བྲལ་བའི་སེམས་དང་། ཐམས་ཅད་མཁྱེན་པར་དམྱིགས་པ་ལ་བརྩོན་པའི་ཡིད་ལ་བྱེད་པ་དང་། བདག་གདུལ་བ་དང་ཕ་རོལ་གདུལ་བ་ལ་གཞོལ་བའི་ལྷག་པའི་བསམ་པ་དང་། བདག་དང་གཞན་ཡོངས་
སུ་སྨྱིན་པར་སྦྱོར་བའི་ཐབས་མཁས་པ་དང་། བྱང་ཆུབ་སེམས་དཔའི་ཚུལ་དང་ཡེ་ཤེས་ཀྱི་རྗེས་སུ་འབྲང་བས་ཡོངས་སུ་སྨིན་པར་བྱེད་པའི་རྣམ་པར་ཐར་བ་དང་། སེམས་བསྐྱེད་པ་གནས་པ་མེད་པ་དང་། འགྲོགས་པའི་མཉམ་པར་གཞག་པ་དང་། སྔོན་སྙིང་རྗེ་ཆེན་པོ་བསྐྱེད་པས་ཁྱིམ་
ན་གནས་པ་དང་། བྱམས་པའི་སེམས་དང་ལྡན་པས་རང་གི་ཆུང་མའི་རྗེས་སུ་འབྲང་བ་དང་། སྦྱོར་བ་ཉམས་པ་མྱེད་པ་དང་། བྱང་ཆུབ་སེམས་དཔའི་ལམ་ཤིན་ཏུ་རྣམ་པར་དག་པས་བརྩོན་པ་དང་། ཡང་དག་པར་བརྩོན་པ་དང་། སྒྲུབ་པ་དང་། ཡང་དག་པར་སྒྲུབ་པ་དང་།

སྐྱེད་པ་དང་ཡང་དག་པར་སྐྱེད་པ་དང་། དམྱིགས་པ་ཆེན་པོས་ཡང་དག་པར་སྡུད་པ་དང་། གྲུབ་པར་བྱེད་པ་དང་། རྒྱ་ཆེར་བྱེད་པ་དང་། ཡོངས་སུ་རྫོགས་པར་བྱེད་པ་དང་། ཁྱིམ་ན་གནས་པ་དང་། བུ་དང་འགྲོགས་ཤིང་གནས་པ་ན་འདི་ལྟར་ཡོངས་སུ་བསྔོ་སྟེ། བྱང་
ཆུབ་སེམས་དཔའ་ཁྱིམ་ན་གནས་པའི་ཚེ་གང་ཅི་ཡང་རུང་སྟེ། གོས་དང་ཟས་དང་མལ་སྟན་དང་། ནད་ཀྱི་རྐྱེན་སྨན་དང་། ཡོ་བྱད་དང་འགྲོ་བ་དང་འོང་བ་དང་། སྤྱོད་པ་དང་ལྡན་པ་དང་། སྟན་པ་དང་། སྐྱེ་མཆེད་འབྱུང་བའི་ལས་དང་། སྤྱོད་ལམ་ལ་གནས་པ་དང་། སྤྱོད་ལམ་
བརྟུལ་བ་དང་། ལུས་དང་ངག་གི་ལས་སྤྱོད་པ་དང་། དབང་པོ་དྲུག་བསྡམས་པ་དང་། རང་གི་ལུས་ཕྱི་བ་དང་། མཉེ་བ་དང་། ཁྲུས་བྱེད་པ་དང་། ཟོས་པ་དང་། འཐུངས་པ་དང་། འཆོས་པ་དང་། མྱངས་པ་དང་། བརྐྱང་བ་དང་། བརྐུམ་པ་དང་། ལྟ་བ་དང་། ཀུན་
ཏུ་ལྟ་བ་དང་། ལོག་པ་དང་། སད་པ་དང་། རང་གི་ལུས་བརྟེན་པར་བྱ་བ། དེ་དག་ཐམས་ཅད་བྱང་ཆུབ་སེམས་དཔའ་ཐམས་ཅད་མཁྱེན་པའི་སེམས་དང་ལྡན་པ། ཐམས་ཅད་མཁྱེན་པར་དམྱིགས་པ་ལ་བརྩོན་པ། སེམས་ཅན་ཐམས་ཅད་ལ་ཕན་པ་དང་། བདེ་བར་སེམས་པ།
བྱང་ཆུབ་ཏུ་སྨོན་ལམ་ཚད་མེད་པ་བཏབ་པ་སེམས་ཚད་མྱེད་པ་དང་ལྡན་པ། དགེ་བའི་རྩ་བ་རྒྱ་ཆེན་པོ་ཡོངས་སུ་སྡུད་པ། འགྲོ་བ་ཐམས་ཅད་བསྐྱབ་པར་བརྩོན་པ། དགེ་བའི་རྩ་བ་ལ་རྟག་ཏུ་བརྩོན་པ། རློམ་པ་དང་བག་མྱེད་པ་རྣམ་པར་བཟློག་པ། ཐམས་ཅད་མཁྱེན་པའི་ཆོས་ཉིད་
ལ་རབ་ཏུ་བརྟེན་པ། རྣམ་པར་ཤེས་པ་དང་སེམས་བསྐྱེད་པ་དང་། ཡིད་ལ་བྱེད་པ་གཞན་མེད་པ། སངས་རྒྱས་ཐམས་ཅད་ཀྱི་བྱང་ཆུབ་ལ་མངོན་པར་གནས་པ་ཉོན་མོངས་པའི་ཕྱོགས་ཐམས་ཅད་ལས་ཕྱིར་ཕྱོགས་པ། བྱང་ཆུབ་སེམས་དཔའ་ཐམས་ཅད་ཀྱི་བསླབ་པ་ལ་སློབ་པའི་
སེམས་དང་ལྡན་པ། ཐམས་ཅད་མཁྱེན་པའི་ལམ་ཉམས་པ་མྱེད་པ། ཡེ་ཤེས་ཀྱིས་ལ་རྟེན་པ། བསྟན་པའི་གནས་དང་ལྡན་པ། དགེ་བའི་རྩ་བས་ཤེས་རབ་ཆེ་བ། བུང་བ་བཞིན་དུ་དགེ་བའི་རྩ་བའི་ཚོགས་ཆེན་པོ་སྩོགས་པ། འགྲོ་བ་ཐམས་ཅད་ལས་རྒྱུད་ཤིན་ཏུ་འཕགས་པ། འདུ་བྱེད་

ལ་མངོན་པར་ཞེན་པ་མྱེད་པ། དེ་བཞིན་གཤེགས་པ་ཐམས་ཅད་ཀྱི་གདམས་ངག་འཐུན་པར་འཛིན་པས། ཐམས་ཅད་མཁྱེན་པ་ཉིད་དུ་མ་བསྔོས་པ་གང་ཡང་མེད་དེ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཁྱིམ་ན་གནས་པའི་ཚེ། དགེ་བའི་རྩ་བ་དེ་
དག་ཡང་དག་པ་སྡུད་ཅིང་སྒྲུབ་བོ། །ཡོངས་སུ་བསྔོ་སྟེ་དེ་ལྟར་དེ་ཆུང་ངུ་ན་ཁྱིའི་ལམ་གྱི་རྒྱུད་དུ་གཏོགས་པ་དང་། དེ་མ་ཡིན་པའི་བྱོལ་སོང་གི་རིགས་སུ་གཏོགས་པ་ལ་ཟས་སྣ་འགའ་འམ། ཁམ་འགའ་ཡོངས་སུ་གཏོང་བ་བྱེད་ཀྱང་དེ་ཐམས་ཅད་དེ་དག་ཉིད་ལ་ཕན་པ་དང་། དེ་དག་ཉིད་ལ་
བདེ་བ་དང་། བྱོལ་སོང་གི་སྐྱེ་གནས་དེ་དག་སྡུག་བསྔལ་གྱི་རྒྱ་མཚོ་དེ་དག་དང་། སྡུག་བསྔལ་གྱི་རྒྱུད་དེ་དག་དང་། སྡུག་བསྔལ་གྱི་ཕུང་པོ་དེ་དག་དང་། སྡུག་བསྔལ་གྱི་ཚོར་བ་དེ་དག་དང་། སྡུག་བསྔལ་གྱི་བསྩགས་པ་དེ་དག་དང་། སྡུག་བསྔལ་མངོན་པར་འདུ་བྱེད་པ་དེ་དག་
དང་། སྡུག་བསྔལ་གྱི་གཏེར་དེ་དག་དང་། སྡུག་བསྔལ་གྱི་རྩ་བ་དེ་དག་དང་། སྡུག་བསྔལ་གྱི་སྐྱེ་མཆེད་དེ་དག་ནས་སེམས་ཅན་དེ་དག་ཡོངས་སུ་སྒྲོལ་ཞིང་རྣམ་པར་བཟློག་པའི་ཕྱིར་ཡོངས་སུ་བསྔོའོ། །དེ་ལ་དམྱིགས་པས་སེམས་ཅན་ཐམས་ཅད་མངོན་དུ་བྱེད་དོ། །དམྱིགས་པར་
བྱེད་དོ། ཡིད་ལ་བྱེད་དོ། །དགེ་བའི་རྩ་བ་དེ་དང་དེ་དག་ལ་ཡང་སྔོན་དུ་འགྲོ་བར་བྱེད་དོ། །འདི་ལྟར་ཐམས་ཅད་མཁྱེན་པ་ཉིད་དུ་ཡོངས་སུ་བསྔོའོ། །བྱང་ཆུབ་ཏུ་སེམས་བསྐྱེད་པས་ཡོངས་སུ་འཛིན་ཏོ། །དགེ་བའི་རྩ་བ་དེ་དག་ལ་ཉེ་བར་འཇོག་གོ །འཁོར་བའི་དགོན་པ་ལས་རྣམ་
པར་བཟློག་གོ །སངས་རྒྱས་ཀྱི་བདེ་བ་བསྒྲིབས་པ་མེད་པ་ཡང་མངོན་དུ་བྱེད་དོ། །འཁོར་བའི་རྒྱུད་ལས་འབྱིན་པར་བྱེད་དོ། །སངས་རྒྱས་ཀྱི་ཆོས་ལ་བརྩོན་པའི་བྱམས་པས་ཀྱང་ཡོངས་སུ་རྒྱས་པར་བྱེད་དོ། །སྙིང་རྗེ་ཆེན་པོས་ཀྱང་དེ་དག་ལ་སྙིང་བརྩེ་བར་བྱེད་དེ། བདེ་བ་རྣམ་པར་
དག་པ་ཡང་དེ་དག་ལ་ཡོངས་སུ་བསྔོའོ། །དགེ་བའི་རྩ་བ་ཡོངས་སུ་བསྲུང་བར་བྱ་བའི་ཕྱིར་ཡང་རབ་ཏུ་འཇུག་སྟེ། དེ་དག་སངས་རྒྱས་ཀྱི་ཆོས་ལ་ཉེ་བར་སྡུད་དོ །དེ་དག་བདུད་ཀྱི་ཡུལ་ལས་རྣམ་པར་བཟློག་གོ། །དེ་དག་དེ་བཞིན་གཤེགས་པའི་ཡུལ་ལ་འཇུག་པར་བྱེད་དོ། །

དེ་དག་འཇིག་རྟེན་ཀྱི་རྒྱུད་ཐམས་ཅད་ལས་གྱེན་དུ་སྐྱོད་པར་བྱེད་དོ། །དེ་དག་དེ་བཞིན་གཤེགས་པ་ཐམས་ཅད་ཀྱི་རིགས་ལ་ཡང་དག་པར་བསྒྲུབ་པར་བྱེད་དོ། །དེ་དག་དུས་གསུམ་མཉམ་པ་ཉིད་ལ་རབ་ཏུ་གཞོག་སྟེ། དེ་ལྟར་བྱང་ཆུབ་སེམས་དཔའ་དགེ་བའི་རྩ་བ་གང་ཅི་ཡང་རུང་སྟེ།
ཡང་དག་པར་བསྒྲུབས་པ་དང་། ཡང་དག་པར་བསྒྲུབ་པ་དང་། ཡང་དག་པར་བསྒྲུབ་པར་འགྱུར་བ་དེ་དག་ཐམས་ཅད་འདི་ལྟར་ཡོངས་སུ་བསྔོ་སྟེ། འདི་སྙམ་དུ་སེམས་བ་མེད་དེ། ཇི་ལྟར་འདས་པའི་སངས་རྒྱས་རྣམས་ཀྱིས་སྔོན་བྱང་ཆུབ་སེམས་དཔའི་སྤྱད་པ་སྤྱོད་ཅིང་སངས་རྒྱས་ལ་རིམ་གྲོ་མཛད་པའི་དམྱིགས་པ་དང་།
དགེ་བའི་རྩ་བ་ཐམས་ཅད་ཀྱི་དམྱིགས་པ་ལ་བརྩོན་པར་མཛད་པའི་ཚེ། གཟུགས་ལ་གནས་པ་མྱེད་པ་དང་། ཚོར་བ་ལ་མངོན་པར་མ་ཆགས་པ་དང་། འདུ་ཤེས་ཀྱི་རྣམ་པ་ཕྱིན་ཅི་ལོག་མེད་པ་དང་འདུ་བྱེད་མངོན་པར་འདུ་བྱ་བ་མྱེད་པ་དང་། རྣམ་པར་ཤེས་པ་མངོན་པར་ཆགས་པ་མྱེད་
པ་དང་། སྐྱེ་མཆེད་དྲུག་ལས་གྱེན་དུ་འཕགས་པ་དང་། འཇིག་རྟེན་གྱི་ཆོས་དང་མི་འགྲོགས་པ་དང་། འཇིག་རྟེན་ལས་འདས་པར་ཡོངས་སུ་བསྔོ་བ་དང་། ནམ་མཁའ་ལྟ་བུའི་ཆོས་འབྱམ་ཀླས་པ་རབ་ཏུ་མཁྱེན་པ་དང་། ཆོས་ཐམས་ཅད་གནས་མེད་པར་རབ་ཏུ་རྟོགས་པ་དང་། ཆོས་
ཐམས་ཅད་མ་སྐྱེས་པས་འབྱུང་བ་དང་། ཆོས་ཐམས་ཅད་མ་འགགས་པར་གཟིགས་པ་དང་། མི་བདེན་པའི་ཆོས་ཐམས་ཅད་ལ་མངོན་པར་ཆགས་པ་ལས་གྱེན་དུ་འཕགས་པ་དང་། ཆོས་ཐམས་ཅད་མི་བརྫུན་ཞིང་བདེན་པར་གཟིགས་པ་དང་། ཆོས་ཐམས་ཅད་འཕོ་བ་མེད་པ་ལ་ཤིན་ཏུ་
མོས་པ་དང་། ཆོས་ཐམས་ཅད་ཀྱི་རང་བཞིན་ཡང་དག་པའི་མཐའ་མཉམ་པ་ལ་གནས་པ་དང་། ཆོས་ཐམས་ཅད་མཚན་ཉིད་མེད་པའི་མཚན་ཉིད་ལས་ཤིན་ཏུ་འཕགས་པ་དང་། ཆོས་དེ་ལྟ་བུའི་མཚན་ཉིད་ཅན་ཐམས་ཅད་རང་བཞིན་མྱེད་པའི་རང་བཞིན་དུ་རྟོགས་པ་དང་། སྒོ་ཀུན་ནས་དགེ་བའི་རྩ་བ་ཡང་
དག་པར་བསྒྲུབ་པ་ལ་བརྩོན་པ་དང་། དེ་བཞིན་གཤེགས་པའི་དཀྱིལ་འཁོར་གྱིས་གཟིགས་པ་ཐམས་ཅད་ལ་ཤིན་ཏུ་གཞོལ་བས། དགེ་བའི་རྩ་བ་དེ་དག་ཡོངས་སུ་བསྔོས་པ་དེ་བཞིན་དུ་བདག་གིས་ཀྱང་ཆོས་ཉིད་དེ་དག་ཁོ་ན་ལ་མོས་པར་བྱ་སྟེ། ཆོས་དེ་ལྟ་བུ་ལ་བརྩོན་པའི་སེམས་

བསྐྱེད་པ། ཆོས་ཐམས་ཅད་དང་མི་འགལ་བ། སྒྱུ་མ་ལྟ་བུའི་ཆོས་ལས་བྱུང་བ། མྱིག་ཡོར་དང་ཆུ་ཟླ་ལྟ་བུའི་རྗེས་སུ་སོང་བ་དང་། མེ་ལོང་གི་དཀྱིལ་འཁོར་ལ་གདོང་གི་དཀྱིལ་འཁོར་ཡོད་པ་ལྟ་བུའི་རྒྱུད་དང་ལྡན་པའི་ལས་ཀྱི་མཐུ་དང་། དེ་བཞིན་
གཤེགས་པའི་སའི་མཐར་ཕྱིན་པར་ལས་ཀྱི་རྒྱུ་ཡོངས་སུ་ཤེས་པས་ཡོངས་སུ་བསྔོའོ། །ཞེས་སེམས་བསྐྱེད་དེ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འདས་པའི་སངས་རྒྱས་བཅོམ་ལྡན་འདས་རྣམས་ཀྱི་རྗེས་སུ་སློབ་ཅིང་དགེ་བའི་རྩ་བ་དེ་དག་ཡོངས་སུ་བསྔོའོ། །
འདས་པ་རྣམས་ལ་ཇི་ལྟ་བ་དེ་བཞིན་དུ་མ་བྱོན་པ་དང་། དེ་བཞིན་དུ་ད་ལྟར་བྱུང་བ་དང་། དེ་བཞིན་དུ་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་ཡོངས་སུ་བསྔོ་བའི་རྗེས་སུ་བསླབས་ཏེ། དགེ་བའི་རྩ་བ་དེ་དག་ཡོངས་སུ་བསྔོའོ། །
ཡང་འདི་ལྟར་སེམས་བསྐྱེད་དེ། སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་སེམས་དཔའ་དགེ་བའི་རྩ་བ་འདི་ལྟར་ཡོངས་སུ་བསྔོའོ། །ཞེས་བྱ་བར་ཐུགས་སུ་ཆུད་པ་དེ་ལྟ་བུའི་བསྔོ་བ་རབ་དམ་པ་མཆོག །བླ་ན་མེད་པ་མཉམ་པ་མྱེད་པ། མི་མཉམ་པ་དང་མཉམ་
པ། འདྲ་བ་མྱེད་པ། མཚུངས་པ་མྱེད་པ། གཙོ་བོར་གྱུར་པ། ཐུ་བོར་གྱུར་པ། ཀུན་ཏུ་སྙོམས་པ། མྱི་མཉམ་པ་མྱེད་པ། བདག་ཉིད་ཆེ་བ་ཤིན་ཏུ་ཡངས་པ། དགེ་བ་རྣམ་པར་དག་པ་ཁ་ན་མ་ཐོ་བ་མྱེད་པ། བརྗོད་དུ་མེད་པས་ཡོངས་སུ་བསྔོའོ་སྙམ་དུ་སེམས་བསྐྱེད་དེ།
བྱང་ཆུབ་སེམས་དཔའ་དགེ་བའི་རྩ་བ་དེ་ལྟར་ཡོངས་སུ་བསྔོ་བ་ནི་ལུས་ཀྱི་ལས་རྣམ་པར་དག་པས་ལུས་རྣམ་པར་དག་པ་ཡིན། ངག་གི་ལས་རྣམ་པར་དག་པས་ངག་རྣམ་པར་དག་པ་ཡིན། ཡིད་ཀྱི་ལས་རྣམ་པར་དག་པས་ཡིད་རྣམ་པར་དག་པ་ཡིན། ཁ་ན་མ་ཐོ་བ་མེད་པ་ལ་གནས་པས་
བྱང་ཆུབ་སེམས་དཔའི་སྤྱོད་པ་ལ་གནས་པ་ཡིན། ཁ་ན་མ་ཐོ་བ་མེད་པའི་ལས་དང་ལྡན་པས་དགེ་བའི་རྩ་བ་ལ་བརྩོན་པ་ཡིན། ཐམས་ཅད་མཁྱེན་པ་ཉིད་ལ་རབ་ཏུ་བརྩོན་པས་སེམས་ཉམས་པ་མེད་པ་ཡིན། ཆོས་ཐམས་ཅད་བྱེད་པ་མེད་པ་ལ་ཞུགས་པས་ཤིན་ཏུ་ཆེ་བ་ལ་

གནས་པ་ཡིན། འཇིག་རྟེན་གྱི་ཆོས་ཀྱིས་མ་གོས་པས་འཇིག་རྟེན་ལས་འདས་པའི་ཆོས་དང་འབྱོར་པ་ཡིན། ཡེ་ཤེས་དང་ལྡན་པའི་མངོན་པར་ཤེས་པའི་ལས་དང་ལྡན་པས་ལས་འབྱམ་ཀླས་པ་མཐའ་དང་དབུས་མེད་པ་ཐམས་ཅད་རབ་ཏུ་ཤེས་པ་ཡིན། གནས་པ་ཐམས་ཅད་
ཡང་དག་པར་བཅོམ་པས་ཡོངས་སུ་བསྔོ་བ་ལ་མཁས་པ་ཡིན་ཏེ། ཀྱེ་རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཡོངས་སུ་བསྔོ་བ་གསུམ་པ་སངས་རྒྱས་ཐམས་ཅད་ལ་ཡང་དག་པར་བསྐྱེད་པ་ཞེས་བྱ་བ་སྟེ་བསྔོ་བ་དེ་ལ་གནས་པའི་སེམས་དང་ལྡན་
པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། དེ་བཞིན་གཤེགས་པའི་ཕྲིན་ལས་ཀྱི་ཟིལ་དང་ལྡན་པ་ཡིན། སངས་རྒྱས་ཀྱི་ཕུན་སུམ་ཚོགས་པ་ལ་ཞུགས་པ་ཡིན། ཡེ་ཤེས་ཀྱི་ཡུལ་ལ་ཞུགས་པ་ཡིན། བྱང་ཆུབ་སེམས་དཔའི་ལས་དང་མ་བྲལ་བ་ཡིན། ཐབས་མཁས་པ་རྣམ་
པར་དཔྱོད་པ་ལ་མཁས་པ་ཡིན། ཆོས་ཀྱི་དབྱིངས་ལ་རབ་ཏུ་ཞུགས་པ་ཡིན། བྱང་ཆུབ་སེམས་དཔས་ཡོངས་སུ་སྨྱིན་པར་བྱ་བའི་ཕྱིར། མཚམས་སྦྱོར་བ་ལ་མཁས་པ་དང་ལྡན་པ་ཡིན། དེ་བཞིན་གཤེགས་པ་ཐམས་ཅད་ཀྱི་རིགས་དང་རྒྱུད་དུ་ཆུད་པ་ཡིན། ཆོས་ཐམས་ཅད་ཀྱི་རྒྱུས་
མཐའ་དང་དབུས་མེད་པ་ལ་མཁས་པས་རབ་ཏུ་དབྱེ་བར་ཁོང་དུ་ཆུད་པ་ཡིན། འཇིག་རྟེན་དུ་སྐྱེ་བར་སྣང་ཡང་འཇིག་རྟེན་གྱི་ཆོས་ཀྱིས་མི་བརྗོད་པ་ཡིན་ནོ། །དེ་ནས་བྱང་ཆུབ་སེམས་དཔའ་རྡོ་རྗེའི་རྒྱལ་མཚན་གྱིས། སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་
བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དེ་དག་བསྔོ་བ་བསླབ་པ་བསླབས་པ་སྟེ། །སྐྱེས་བུའི་གཙོ་བོ་ཇི་སྙེད་འདས་པ་དང་། །གང་དག་མ་བྱོན་གང་དག་བཞུགས་པ་རྣམས། །དེ་དག་སྤྱོད་པ་རྗེས་སུ་དཔའ་བ་སློབ། བདེ་བ་ཇི་སྙེད་གང་དག་རྒྱུ་བ་དང་། །
སྐྱེས་བུའི་གཙོ་བོས་གང་དག་རབ་བསྔགས་པ། །མྱིག་དུ་འོང་ཞིང་དག་པ་རྒྱ་ཆེན་རྣམས། །འཇིག་རྟེན་མཁྱེན་པ་རྣམས་ལ་ཡོངས་སུ་བསྔོ། །ལུས་ཀྱི་བདེ་བ་གང་དག་ཤེས་པ་དང་། །མྱིག་བདེ་དེ་བཞིན་རྣ་བའི་བདེ་བ་དང་། །སྣ་དང་ལྕེ་ཡི་བདེ་བ་མཐའ་ཡས་པ། །དེ་དག་རྒྱལ་བ་

ཀུན་ལ་ཡོངས་སུ་བསྔོ། །འགྲོ་བ་ཀུན་ན་དགེ་བ་གང་ཡོད་པ། །སྐྱེས་བུ་འདུལ་བས་ཐུགས་སུ་ཆུད་པ་རྣམས། །དེ་དག་ཐམས་ཅད་མ་ལུས་བསྡུ་བྱས་ཏེ། །འཇིག་རྟེན་ཕན་ཕྱིར་དེ་ལ་རྗེས་སུ་དགའ། །འཇིག་རྟེན་མཁྱེན་པའི་དེ་ལ་དགར་བྱས་ནས། །སྐྱེས་
བུའི་སེང་གེའི་བདེ་བ་གང་མངའ་བ། །དེ་འདྲའི་བདེ་དང་འགྲོ་བ་ལྡན་གྱུར་ཅེས། །འགྲོ་བ་ཀུན་ལ་དེ་དག་བསྔོ་བ་བྱེད། །འཇིག་རྟེན་དག་ན་བདེ་འགྱུར་གང་ཡོད་པ། །སྐྱེས་བུ་དམ་པས་ཐུགས་སུ་ཆུད་པ་རྣམས། །བདེ་བ་དེ་དང་འགྲོ་ཀུན་ལྡན་འགྱུར་ཏེ། །འཇིག་རྟེན་སྒྲོན་
མ་བཞིན་དུ་ཀུན་གྱུར་ཅིག །བདེ་བ་དེ་དག་ཡོངས་སུ་བསྔོ་བྱེད་ཀྱང་། །མཚུངས་མེད་རྟག་ཏུ་འགྲོ་ཕན་བྱེད་པ་དག །སེམས་ཅན་ཕན་པར་རྟག་ཏུ་ཞུགས་པ་རྣམས། །ཡོངས་སུ་བསྔོ་བས་རློམ་སེམས་ནམ་ཡང་མྱེད། །དེ་ལྟར་དེ་དག་ཡོངས་སུ་བསྔོ་བ་ན། །ཚེ་རབས་སྐྱེས་བུ་
སེང་གེ་ཅི་འདྲ་བ། །དེ་འདྲའི་དམ་པར་བསོད་ནམས་འདི་གྱུར་ཅིག །སྙིང་རྗེ་ཆེན་པོས་སེམས་ཀྱང་ཡོངས་སུ་བསྐྱེད། །འཇིག་རྟེན་འདི་ན་བྱང་ཆུབ་སྤྱད་སྤྱོད་ཅིང་། །འགྲོ་བ་དག་ཏུ་ཇི་ལྟར་ལས་བསྒྲུབས་པས། །རྒྱལ་བས་ཇི་ལྟར་མཁྱེན་པ་མཚུངས་མེད་པའི། །བདེ་བ་ཀུན་དང་
འབྲལ་བར་མ་གྱུར་ཅིག །གང་ཡང་འགྲོ་བ་ཀུན་ན་ཡོད་པ་ཡི། །སྐྱེ་མཆེད་བསྡམས་པ་ཡང་དག་སྐྱེས་པ་རྣམས། །ཡེ་ཤེས་དང་གིས་བསླབ་བ་སླབས་པ་དག །སྐྱེ་དགུ་ཀུན་ལ་ཕན་ཕྱིར་ཡོངས་སུ་བསྔོ། །ལུས་དང་ངག་དང་ཡིད་ཀྱི་ལས་ཀྱི་རྣམས། །གང་ཡང་
རུང་བའི་ལམ་ལ་ཡོད་པ་དག །ཡེ་ཤེས་དང་གིས་བསླབ་བྱ་བསླབས་པ་རྣམས། །གཏི་མུག་མྱེད་པས་ཡོངས་སུ་བསྔོ་བ་བྱེད། །ཇི་སྙེད་དེ་དག་རབ་ཏུ་སྤྱོད་པ་རྣམས། །རྒྱལ་སྲས་རྣམས་ཀྱི་ཡང་དག་བསྡུ་བྱ་བ། །དེ་ནི་མཚུངས་མེད་རྒྱལ་བའི་རྗེས་སུ་བྱུང་། །དེ་དག་ཞི་བའི་ཡིད་
ཕྱིར་ཡོངས་སུ་བསྔོ། །འཇིག་རྟེན་ཐམས་ཅད་མ་ལུས་བསྡུ་བྱས་ཏེ། །འགྲོ་ཡངས་འདི་ན་ཇི་སྙེད་དགེ་ཡོད་པ། །བདེ་བ་དེ་དང་ཡོངས་སུ་ལྡན་པའི་ཕྱིར། །དེ་ལ་དེ་དག་ཡོངས་སུ་བསྔོ་བ་བྱེད། །བདག་ལ་བདེ་བ་ནམ་ཡང་མི་ཚོལ་ཏེ། །བདེ་བ་ཀུན་ལའང་རྟག་པར་རབ་

ཏུ་ཞུགས། །སྤྲོས་པ་རྣམས་ལ་ནམ་ཡང་མོས་པ་མྱེད། །བདག་མེད་ཆོས་ལ་འང་རྟག་པར་འཇུག་པ་ཡིན། །རྒྱལ་བ་ཀུན་གྱིས་ཇི་སྙེད་གཟིགས་པ་ཡི། །རྒྱལ་སྲས་ཇི་སྙེད་ཡོད་པ་དེ་དག་ཕྱིར། །མྱུར་དུ་མ་ལུས་སངས་རྒྱས་གྱུར་ཅིག་ཅེས། །བསོད་ནམས་དེ་དག་ཡོངས་སུ་
བསྔོ་བ་བྱེད། །བདག་གིས་ལེགས་བསྩགས་ལས་ནི་གང་ཡོད་པ། །དེ་ཡིས་འཇིག་རྟེན་མ་ལུས་ཐམས་ཅད་ཀྱི། །ལམ་རྒྱུད་འགྲོ་བར་གཏོགས་པའི་སེམས་ཅན་རྣམས། །དེ་དག་མ་ལུས་མི་ཡི་གཙོར་གྱུར་ཅིག །སྨོན་ལམ་མང་པོ་ཇི་སྙེད་གང་ཡོད་པ། །མཚུངས་པ་མེད་པའི་
རྒྱལ་བས་བསྟན་པ་རྣམས། །རྒྱལ་སྲས་བསམ་པ་ཡོངས་སུ་གྲུབ་གྱུར་ཏེ། །སྨོན་ལམ་དེ་དག་རྣམ་པར་དག་གྱུར་ཅིག །འཇིག་རྟེན་ཇི་སྙེད་ལས་ཀྱིས་རྣམ་བྲིས་པ། །ཕྱོགས་ན་ཡོད་པ་ཐམས་ཅད་མཐོང་ནས་ཀྱང་། །དེ་དག་ཡོངས་བཙལ་བསླབ་བྱ་བསླབས་པའི་རྣམས། །མ་
ལུས་བསོད་ནམས་ཐམས་ཅད་ཡོངས་སུ་བསྔོ། །གཉིས་ཀྱི་ཆོས་ཀྱིས་འཇལ་བར་མི་བྱེད་དེ། །གཉིས་མེད་ཆོས་ནི་དེ་དག་མངོན་པར་ཤེས། །གཉིས་སུ་མྱེད་དང་གཉིས་སུ་མྱེད་པ་ལ། །རྒྱལ་སྲས་དེ་དག་བསམ་པ་མི་རྟོན་ཏོ། །འགྲོ་བའི་འདུ་ཤེས་རྒྱུ་བ་ཇི་སྙེད་པའི། །མ་ལུས་
འཇིག་རྟེན་འདུ་ཤེས་འཇུག་བྱེད་ཀྱང་། །འགྲོ་བའི་འདུ་ཤེས་རྒྱུ་བ་རབ་རྟོགས་པས། །འདུ་ཤེས་ཡོད་མྱིན་འདུ་ཤེས་མེད་མི་འགྱུར། །དེ་དག་ལུས་ཀྱིས་ཡོངས་སུ་དག་གྱུར་ཅིག །དེ་དག་ཡིད་ཀྱང་ཡོངས་སུ་དག་པ་ཡིན། །དེ་དག་ངག་གིས་ཤིན་ཏུ་བསྡམས་བྱས་ཤིང་། །དེ་དག་
ཡིད་ཀྱིས་ཡོངས་སུ་དག་པ་ཡིན། །དེ་དག་བདེ་གཤེགས་མྱ་ངན་འདས་པ་དྲན། །མ་བྱོན་སངས་རྒྱས་དེ་དག་རྗེས་སུ་སེམས། །ཕྱོགས་བཅུ་དག་ན་བཞུགས་པའི་སངས་རྒྱས་ཀྱང་། །དེ་དག་རྗེས་སློབ་ཆོས་རྣམས་སྟོན་པ་བྱེད། །དུས་གསུམ་རྒྱལ་བ་ཡེ་ཤེས་མཁས་པ་
རྣམས། །ཆགས་པ་མེད་པའི་ཐུགས་ཀྱིས་ཇི་ལྟ་བུར། །བྱང་ཆུབ་དོན་ཕྱིར་ཕྲིན་ལས་བསྒྲུབ་མཛད་པ། །དེ་དག་འཇིག་རྟེན་ཕན་ཕྱིར་ཡོངས་སུ་བསྔོ། །མཆོག་གི་བློ་དང་ཚུལ་ཁྲིམས་ལྡན་པའི་བློ། །བདེན་པའི་བློ་དང་གཞན་དུ་མི་འགྱུར་བློ། །ཡང་དག་བློ་དང་རྣམ་པར་

དག་པའི་བློ། །དེ་འདྲའི་བློ་ཡི་དམ་པས་ཡོངས་སུ་བསྔོ། །སངས་རྒྱས་ཐམས་ཅད་ལ་ཡང་དག་པར་བསྐྱེད་པ་ཞེས་བྱ་བ་སྟེ་ཡོངས་སུ་བསྔོ་བ་གསུམ་པའོ། །ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་
ཡོངས་སུ་བསྔོ་བ་བཞི་པ་ཐམས་ཅད་དུ་རྗེས་སུ་སོང་བ་ཞེས་བྱ་བ་གང་ཞེ་ན། །ཀྱེ་རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་ལ་བརྩོན་པར་བྱེད་པའི་ཚེ། དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། འདི་ལྟར་ཡང་དག་པའི་
མཐའ་ཐམས་ཅད་རྗེས་སུ་སོང་ཞིང་དངོས་པོ་ཐམས་ཅད་ཀྱི་རྗེས་སུ་སོང་བ་དང་། འགྲོ་བ་ཐམས་ཅད་ཀྱི་རྗེས་སུ་སོང་བ་དང་། སེམས་ཅན་ཐམས་ཅད་ཀྱི་རྗེས་སུ་སོང་བ་དང་། ཞིང་ཐམས་ཅད་ཀྱི་རྗེས་སུ་སོང་བ་དང་། ཆོས་ཐམས་ཅད་ཀྱི་རྗེས་སུ་སོང་བ་དང་། ནམ་མཁའ་ཐམས་ཅད་
ཀྱི་རྗེས་སུ་སོང་བ་དང་། དུས་གསུམ་ཐམས་ཅད་ཀྱི་རྗེས་སུ་སོང་བ་དང་། འདུས་བྱས་དང་། འདུས་མ་བྱས་ཐམས་ཅད་ཀྱི་རྗེས་སུ་སོང་བ་དང་། སྤྱོད་པའི་སྒྲ་ཐམས་ཅད་ཀྱི་རྗེས་སུ་སོང་བ་དེ་བཞིན་དུ་དགེ་བའི་རྩ་བ་འདི་ཡང་དུས་གསུམ་གྱི་སངས་རྒྱས་སྐྱེ་བ་ཐམས་ཅད་དུ་
རྒྱས་པར་ཁྱབ་པར་གྱུར་ཅིག །འདས་པའི་དུས་ཀྱི་སངས་རྒྱས་ཐམས་ཅད་མཆོད་ཅིང་བསྙེན་བཀུར་བའི་རྒྱུར་གྱུར་ཅིག །མ་འོངས་པའི་དུས་ཀྱི་སངས་རྒྱས་ཐམས་ཅད་ཀྱི་སྨོན་ལམ་ཡོངས་སུ་རྫོགས་པའི་རྒྱུར་གྱུར་ཅིག །ད་ལྟར་བྱུང་བའི་དུས་ཀྱི་འཇིག་རྟེན་གྱི་ཁམས་ནམ་མཁའི་དབྱིངས་
ཀྱིས་ཀླས་པ། ཆོས་ཀྱི་དབྱིངས་ཀྱི་མཐས་གཏུགས་པ། ལྷ་རྫས་དང་། ལྷ་རྫས་མ་ཡིན་པའི་རིམ་གྲོ་འབྱམ་ཀླས་པ་དང་ལྡན་པ། སངས་རྒྱས་ཐམས་ཅད་མངོན་དུ་གྱུར་པའི་སངས་རྒྱས་ཐམས་ཅད་ཀྱི་འཁོར་གྱི་དཀྱིལ་འཁོར་གྱི་རྒྱན་གྱི་དེ་བཞིན་གཤེགས་པ་ཐམས་ཅད་ཀྱི་
རྒྱན་རྣམ་པར་བཀོད་པའི་རྒྱུར་གྱུར་ཅིག །བློ་བདག་ཉིད་ཆེ་བ་ལ་མོས་ཤིང་ཤིན་ཏུ་ཡངས་པའི་དོན་དུ་བསྒྲིབས་པ་མེད་པའི་དགེ་བའི་རྩ་བ་ཐམས་ཅད་རྒྱ་ཆེར་ཡོངས་སུ་བསྔོ་བའི་ཕྱིར། འཇིག་རྟེན་གྱི་ཁམས་མཐའ་དང་དབུས་མེད་པ་ཐམས་ཅད་སེམས་བསྐྱེད་པས་རྒྱས་པར་གྱུར་ཅིག །

སངས་རྒྱས་བཅོམ་ལྡན་འདས་གང་ཇི་སྙེད་ཆོས་ཀྱི་དབྱིངས་མཐའ་དང་དབུས་མེད་པའི་འཇིག་རྟེན་གྱི་ཁམས་དང་། ནམ་མཁའི་དབྱིངས་འབྱམ་ཀླས་པ་ལ་རབ་ཏུ་གནས་པའི་འཇིག་རྟེན་གྱི་ཁམས་ཀྱི་རྒྱུད་དང་། ལས་གཞན་དང་གཞན་གྱིས་ཤིན་ཏུ་བསྒྲུབས་པའི་
ཕྱོགས་འབྱམ་ཀླས་པ་དང་། འཇིག་རྟེན་གྱི་ཁམས་བརྗོད་དུ་མེད་པར་རྣམ་པར་རྒྱུ་བའི་འཇིག་རྟེན་གྱི་ཁམས་དང་། སངས་རྒྱས་ཀྱི་ཞིང་བརྗོད་དུ་མེད་པའི་འཇིག་རྟེན་གྱི་ཁམས་ཀྱི་ཁོངས་མཐའ་ཡས་པ་དང་། སངས་རྒྱས་ཀྱི་དམྱིགས་པ་ལ་གནས་པའི་འཇིག་རྟེན་གྱི་
ཁམས་དུ་མ་དང་། འཇིག་རྟེན་གྱི་ཁམས་སྣ་ཚོགས་འབྱམ་ཀླས་པ་དང་། ས་མཚམས་མྱེད་པའི་འཇིག་རྟེན་གྱི་འཁོར་དང་སྣྲེལ་ཞིར་རྒྱུ་བའི་འཇིག་རྟེན་གྱི་ཁམས་མངོན་པར་གྲུབ་པ་དང་། སྤྱིའུ་ཚུགས་སུ་རྒྱུ་བའི་ཕྱོགས་ཀྱི་འཁོར་གྱི་རྒྱུད་ཀྱི་འཇིག་རྟེན་གྱི་ཁམས་འབྱམ་
ཀླས་པ་དང་། སེམས་ཀྱི་འཁོར་མཐའ་དང་དབུས་མེད་པའི་འཇིག་རྟེན་གྱི་ཁམས་འབྱམ་ཀླས་པ་ཤིན་ཏུ་བསྟན་པ་ཐམས་ཅད་མ་ལུས་པ་དེ་དག་ན་བཞུགས་ཤིང་འཚོ་བ་དང་། སངས་རྒྱས་ཀྱི་འཕྲུལ་པ་དང་། ཆོ་འཕྲུལ་ཡང་དག་པར་སྟོན་པ་དང་། བྱང་
ཆུབ་སེམས་དཔའ་དེ་དག་ཆོས་ཀྱི་དབྱིངས་མ་ལུས་པ་དང་། ནམ་མཁའི་དབྱིངས་སུ་རྩ་བ་མ་རྙེད་པ། འགྲོ་བ་ཐམས་ཅད་ཡོངས་སུ་གཟུང་བར་བསྒྲུབ་པའི་དེ་བཞིན་གཤེགས་པའི་བྱིན་གྱི་རླབས་ཡང་དག་པར་སྟོན་པ་དང་། སངས་རྒྱས་ཀྱི་གཟིགས་པ་ཡེ་ཤེས་
འབྱམ་ཀླས་པའི་མངོན་པར་ཤེས་པས་ཐུགས་སུ་ཆུད་པ། རབ་ཏུ་བརྗོད་པ་རྣམ་པར་འཕྲུལ་པ་མཐའ་དང་དབུས་མེད་པས་རབ་ཏུ་བྱུང་བ། ཆོས་ཐམས་ཅད་ཀྱི་རང་བཞིན་གྱི་རྗེས་སུ་སོང་བ་ཐ་མི་དད་པའི་ཆོས་ཀྱི་དབྱིངས་གཞི་མཉམ་པ་ལ་རབ་ཏུ་ཞུགས་པ།
དེ་བཞིན་གཤེགས་པའི་སྙིང་པོའི་ལུས་སུ་གཅིག་པ། ཆོས་ཐམས་ཅད་ཀྱིས་རབ་ཏུ་ཞུགས་པ་མེད་པ། འགྲོ་བ་ཐམས་ཅད་ལ་ཡང་དག་པར་སྟོན་པས་ན་ཕྱིར་ལྡོག་པ་མེད་པ། འཇིག་རྟེན་གྱི་ཁམས་ཐམས་ཅད་མངོན་པར་བསྒྲུབ་པ་ལ་མཁས་པ་ཐུགས་སུ་ཆུད་པས་

ཐམས་ཅད་མངོན་པར་མཁྱེན་པ། ཆོས་ཐམས་ཅད་ཀྱི་རང་བཞིན་གྱིས་ཤིན་ཏུ་འཕགས་པ། བསྒྲིབས་པ་མེད་པའི་བྱིན་གྱི་རླབས་ཀྱིས་ཕྱིར་མི་ལྡོག་པ། སངས་རྒྱས་ཀྱི་དགེ་བའི་རྩ་བས་ཡང་དག་པར་བྱུང་བའི་ཕྱིར་ཆགས་པ་མེད་པར་གཟིགས་
པའི་བདག་ཉིད་ཆེ་བ་ཅན་བཞུགས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་དང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ལ་མེ་ཏོག་གམ། སྤོས་སམ། ཕྲེང་བ་འམ། བྱུག་པ་འམ། གདུགས་སམ། རྒྱལ་མཚན་ནམ། བ་དན་
ནམ། རིན་པོ་ཆེའམ། མེ་མར་གྱིས་དེ་བཞིན་གཤེགས་པའི་སྐུ་འམ། མཆོད་རྟེན་ལ་འང་རུང་སྟེ། དམྱིགས་པ་ཚད་མེད་པས་སྦྱར་བའི་དགེ་བའི་རྩ་བའི་ཚོགས་ཐམས་ཅད་ཀྱིས་དགེ་བའི་རྩ་བ་གང་དང་གང་བསྐྱེད་ཀྱང་རུང་སྟེ། འཁྲུག་པ་མེད་པའི་སེམས་དང་རྩེ་གཅིག་ཏུ་གྱུར་པ་
མེད་པའི་སེམས་དང་། གཡོ་བ་མེད་པའི་སེམས་དང་། རྨོངས་པ་མེད་པའི་སེམས་དང་། མྱི་སྒུལ་བའི་སེམས་དང་། གནས་མེད་པའི་སེམས་དང་། མྱི་གནས་པའི་སེམས་དང་། སྲོག་མེད་པའི་སེམས་དང་། མྱི་གཡེང་བའི་སེམས་དང་། ཞི་བའི་སེམས་སུ་བྱས་ཏེ།
འདི་ལྟར་ཡོངས་སུ་བསྔོ་ཞིང་། འདི་སྙམ་དུ་དགེ་བའི་རྩ་བ་འདི་ཆོས་ཀྱི་དབྱིངས་ཤིན་ཏུ་བསྟན་པས་འདུས་པའི་སངས་རྒྱས་ཐམས་ཅད་མཁྱེན་པའི་བྱང་ཆུབ་ཀྱིས་འདུས་པའི་མྱིང་མང་པོ་དང་། ཚིག་དང་ངེས་པའི་ངག་མཐའ་ཡས་པ་དང་། དུས་ཐ་དད་པར་མངོན་པར་འཚང་རྒྱ་བའི།
དེ་བཞིན་གཤེགས་པ་དང་། ཕྱི་མའི་མཐར་ཐུག་པའི་བསྐལ་པར་བྱིན་གྱིས་བརླབས་པའི་སྐུ་ཚེའི་ཚད་དང་། མཐའ་དང་དབུས་མེད་པར་ཤིན་ཏུ་བསྟན་པའི་སྔོན་གྱི་མཐའ་དང་ཕྱི་མའི་མཐའ་དང་། ད་ལྟར་བྱུང་བའི་ཡང་དག་པར་རྫོགས་པའི་བྱང་ཆུབ་ཀྱིས་རྒྱས་པ་དང་། ཆོས་
ཀྱི་དབྱིངས་དེ་བཞིན་གཤེགས་པའི་འབྱུང་གནས་སངས་རྒྱས་ཐམས་ཅད་ཀྱི་སྐུའི་རྒྱན་གྱིས་བརྒྱན་པའི་སངས་རྒྱས་ཀྱི་ཞིང་དང་། ཆོས་ཀྱི་དབྱིངས་ཡོངས་སུ་གང་བའི་འཁོར་གྱི་དཀྱིལ་འཁོར་དུ་དུས་ཇི་ལྟ་བ་བཞིན་དུ་ཡང་དག་པར་སྟོན་པའི་སངས་རྒྱས་འབྱུང་བའི་དེ་བཞིན་གཤེགས་

དེ་དག་གི་སྤོས་ཀྱི་གདུགས་ཚད་མེད་པ་ཡོངས་སུ་འབྱུང་བར་གྱུར་ཅིག །སྤོས་ཀྱི་རྒྱལ་མཚན་ཚད་མྱེད་པ་ཡོངས་སུ་འབྱུང་བར་གྱུར་ཅིག །སྤོས་ཀྱི་བ་དན་ཚད་མེད་པ་ཡོངས་སུ་འབྱུང་བར་གྱུར་ཅིག །སྤོས་ཀྱི་གཞལ་མེད་ཁང་ཚད་མྱེད་པ་ཡོངས་སུ་འབྱུང་བར་གྱུར་ཅིག །སྤོས་
ཀྱི་དྲ་བ་ཚད་མྱེད་པ་ཡོངས་སུ་འབྱུང་བར་གྱུར་ཅིག །སྤོས་ཀྱི་སྐུ་གཟུགས་ཚད་མེད་པ་ཡོངས་སུ་འབྱུང་བར་གྱུར་ཅིག །སྤོས་ཀྱི་འོད་ཚད་མེད་པ་ཡོངས་སུ་འབྱུང་བར་གྱུར་ཅིག །སྤོས་ཀྱི་འོད་གཟེར་ཚད་མྱེད་པ་ཡོངས་སུ་འབྱུང་བར་གྱུར་ཅིག །སྤོས་ཀྱི་སྤྲིན་ཚད་མྱེད་པ་
ཡོངས་སུ་འབྱུང་བར་གྱུར་ཅིག །སྤོས་ཀྱི་གདན་ཚད་མྱེད་པ་ཡོངས་སུ་འབྱུང་བར་གྱུར་ཅིག །སྤོས་ཀྱི་འཆགས་ཚད་མེད་པ་ཡོངས་སུ་འབྱུང་བར་གྱུར་ཅིག །སྤོས་ཀྱི་གཙུག་ལག་ཁང་ཚད་མེད་པ་ཡོངས་སུ་འབྱུང་བར་གྱུར་ཅིག །སྤོས་ཀྱི་ཞིང་ཚད་མེད་པ་ཡོངས་སུ་འབྱུང་བར་གྱུར་
ཅིག །སྤོས་ཀྱི་རི་རབ་ཚད་མེད་པ་ཡོངས་སུ་འབྱུང་བར་གྱུར་ཅིག །སྤོས་ཀྱི་རྒྱ་མཚོ་ཚད་མེད་པ་ཡོངས་སུ་འབྱུང་བར་གྱུར་ཅིག །སྤོས་ཀྱི་ཆུ་གླུང་ཚད་མེད་པ་ཡོངས་སུ་འབྱུང་བར་གྱུར་ཅིག །སྤོས་ཀྱི་ཤིང་ཚད་མེད་པ་ཡོངས་སུ་འབྱུང་བར་གྱུར་ཅིག །སྤོས་ཀྱི་ན་བཟའ་ཚད་
མེད་པ་ཡོངས་སུ་འབྱུང་བར་གྱུར་ཅིག །སྤོས་ཀྱི་པད་མོ་ཚད་མེད་པ་ཡོངས་སུ་འབྱུང་བར་གྱུར་ཅིག །སྤོས་ཀྱི་ཕོ་བྲང་ཚད་མེད་པ་ཡོངས་སུ་འབྱུང་བར་གྱུར་ཅིག །མེ་ཏོག་གི་གདུགས་དཔག་ཏུ་མེད་པ་ཡོངས་སུ་འབྱུང་བར་གྱུར་ཅིག་ཅེས་བྱ་བ་ནས། ཚུལ་དེ་བཞིན་དུ་མེ་ཏོག་
གི་ཕོ་བྲང་གི་བར་དུ་དཔག་ཏུ་མེད་པ་ཡོངས་སུ་འབྱུང་བར་གྱུར་ཅིག །ཕྲེང་བའི་གདུགས་གྲངས་མེད་པ་ཡོངས་སུ་འབྱུང་བར་གྱུར་ཅིག་ཅེས་བྱ་བ་ནས། ཕྲེང་བའི་ཕོ་བྲང་གི་བར་དུ་གྲངས་མེད་པ་ཡོངས་སུ་འབྱུང་བར་གྱུར་ཅིག །བྱུག་པའི་གདུགས་བསམ་གྱིས་མི་ཁྱབ་པ་
ཡོངས་སུ་འབྱུང་བར་གྱུར་ཅིག་ཅེས་བྱ་བ་ནས། བྱུག་པའི་ཕོ་བྲང་གི་བར་དུ་བསམ་གྱིས་མི་ཁྱབ་པ་ཡོངས་སུ་འབྱུང་བར་གྱུར་ཅིག །ཕྱེ་མའི་གདུགས་མཚུངས་པ་མྱེད་པ་ཡོངས་སུ་འབྱུང་བར་གྱུར་ཅིག་ཅེས་བྱ་བ་ནས། ཕྱེ་མའི་ཕོ་བྲང་གི་བར་དུ་མཚུངས་པ་མེད་པར་

ཡོངས་སུ་འབྱུང་བར་གྱུར་ཅིག །ན་བཟའི་གདུགས་ཀུན་ཏུ་མཐའ་ཡས་པ་ཡོངས་སུ་འབྱུང་བར་གྱུར་ཅིག་ཅེས་བྱ་བ་ནས། ན་བཟའི་ཕོ་བྲང་གི་བར་དུ་ཀུན་ཏུ་མཐའ་ཡས་པ་ཡོངས་སུ་འབྱུང་བར་གྱུར་ཅིག །རིན་པོ་ཆེའི་གདུགས་ཀུན་ཏུ་
མུ་མེད་པ་ཡོངས་སུ་འབྱུང་བར་གྱུར་ཅིག་ཅེས་བྱ་བ་ནས། རིན་པོ་ཆེའི་ཕོ་བྲང་གི་བར་དུ་ཀུན་ཏུ་མུ་མྱེད་པ་ཡོངས་སུ་འབྱུང་བར་གྱུར་ཅིག །མར་མེ་སྣང་བའི་གདུགས་གཞལ་དུ་མྱེད་པ་ཡོངས་སུ་འབྱུང་བར་གྱུར་ཅིག །ཅེས་བྱ་བ་ནས། མར་མེ་སྣང་བའི་ཕོ་བྲང་གི་བར་
དུ་གཞལ་དུ་མེད་པ་ཡོངས་སུ་འབྱུང་བར་གྱུར་ཅིག །ལྷབ་ལྷུབ་ཀྱི་གདུགས་བརྗོད་དུ་མེད་པ་ཡོངས་སུ་འབྱུང་བར་གྱུར་ཅིག་ཅེས་བྱ་བ་ནས། ལྷབ་ལྷུབ་ཀྱི་ཕོ་བྲང་གི་བར་དུ་བརྗོད་དུ་མེད་པ་ཡོངས་སུ་འབྱུང་བར་གྱུར་ཅིག །ནོར་བུ་རིན་པོ་ཆེའི་གདུགས་བརྗོད་དུ་མེད་པའི་ཡང་བརྗོད་དུ་མེད་པ་
ཡོངས་སུ་འབྱུང་བར་གྱུར་ཅིག་ཅེས་བྱ་བ་ནས། ནོར་བུ་རིན་པོ་ཆེའི་ཕོ་བྲང་གི་བར་དུ་བརྗོད་དུ་མེད་པའི་ཡང་བརྗོད་དུ་མེད་པ་ཡོངས་སུ་འབྱུང་བར་གྱུར་ཅིག །དེ་བཞིན་དུ་ནོར་བུ་རིན་པོ་ཆེའི་རྒྱལ་མཚན་དང་། ནོར་བུ་རིན་པོ་ཆེའི་བ་དན་དང་། ནོར་བུ་རིན་པོ་ཆེའི་བླ་རེ་དང་།
ནོར་བུ་རིན་པོ་ཆེའི་དྲ་བ་དང་། ནོར་བུ་རིན་པོ་ཆེའི་སྐུ་གཟུགས་དང་། ནོར་བུ་རིན་པོ་ཆེའི་འོད་དང་། ནོར་བུ་རིན་པོ་ཆེའི་འོད་གཟེར་དང་། ནོར་བུ་རིན་པོ་ཆེའི་སྤྲིན་དང་། ནོར་བུ་རིན་པོ་ཆེའི་གདན་དང་། ནོར་བུ་རིན་པོ་ཆེའི་འཆགས་དང་། ནོར་བུ་རིན་པོ་ཆེའི་གཙུག་
ལག་ཁང་དང་། ནོར་བུ་རིན་པོ་ཆེའི་ཞིང་དང་། ནོར་བུ་རིན་པོ་ཆེའི་རི་རབ་དང་། ནོར་བུ་རིན་པོ་ཆེའི་རྒྱ་མཚོ་དང་། ནོར་བུ་རིན་པོ་ཆེའི་ཆུ་ཀླུང་དང་། ནོར་བུ་རིན་པོ་ཆེའི་ཤིང་དང་། ནོར་བུ་རིན་པོ་ཆེའི་ན་བཟའ་དང་། ནོར་བུ་རིན་པོ་ཆེའི་པད་མོ་དང་། ནོར་བུ་
རིན་པོ་ཆེའི་ཕོ་བྲང་བརྗོད་དུ་མེད་པའི་ཡང་བརྗོད་དུ་མེད་པ་དག་ཀྱང་ཀུན་ནས་གནས་པར་གྱུར་ཅིག །དམྱིགས་པ་རེ་རེ་ལ་ཡང་གྲངས་མེད་པའི་རྒྱན་རྣམས་ཀུན་ནས་གནས་པར་གྱུར་ཅིག །གྲངས་མེད་པའི་གཙུག་ལག་ཁང་དག་ཀུན་ནས་གནས་པར་གྱུར་ཅིག་

གྲངས་མེད་པའི་ཁང་པ་བརྩེགས་པ་དག་ཀུན་ནས་གནས་པར་གྱུར་ཅིག །གྲངས་མེད་པའི་རྟ་བབས་དག་ཀུན་ནས་གནས་པར་གྱུར་ཅིག །གྲངས་མེད་པའི་ཟླ་གམ་དག་ཀུན་ནས་གནས་པར་གྱུར་ཅིག །གྲངས་མེད་པའི་རིན་པོ་ཆེའི་པུ་ཤུ་དག་ཀྱང་ཀུན་ནས་གནས་
པར་གྱུར་ཅིག །གྲངས་མེད་པའི་རིན་པོ་ཆེའི་སྐར་ཁུང་རྣམ་པ་ཐ་དད་པ་ཀུན་ནས་གནས་པར་གྱུར་ཅིག །རིན་པོ་ཆེའི་ཁ་དོག་རྣམ་པར་དག་པ་གྲངས་མེད་པ་ཀུན་ནས་གནས་པར་གྱུར་ཅིག །གྲངས་མེད་པའི་རྒྱན་རྣམ་པའི་མཆོག་ཐམས་ཅད་དང་ལྡན་པ་ཐམས་ཅད་
དང་། དཔེ་མེད་པ་དག་ཀུན་ནས་གནས་པར་གྱུར་ཅིག །འཇིག་རྟེན་གྱི་ཁམས་ཐམས་ཅད་དུ་མ་ལུས་པར་སངས་རྒྱས་ཀྱི་རིམ་གྲོ་དང་། རྒྱན་རྣམ་པ་འདི་ལྟ་བུས་རྣམ་པར་དག་པར་གྱུར་ཅིག །སེམས་ཅན་ཐམས་ཅད་མ་ལུས་པར་སྟོབས་བཅུའི་སར་འབྱུང་བར་གྱུར་
ཅིག །སེམས་ཅན་ཐམས་ཅད་ཤེས་པར་བསྟན་པའི་ཕྱིར། ཆོས་ཐམས་ཅད་མ་ལུས་པ་ལ་ཆོས་ཀྱི་སྣང་བ་བསྒྲིབས་པ་མེད་པ་སྐྱེ་བར་གྱུར་ཅིག །འགྲོ་བ་ཐམས་ཅད་གདུལ་བའི་ཕྱིར་དགེ་བའི་རྩ་བ་ཐམས་ཅད་མ་ལུས་པར་ཡོངས་སུ་བསྔོ་བར་གྱུར་ཅིག །འཕོ་བ་མེད་
པའི་ཆོས་ཉིད་དུ་དུས་ཐམས་ཅད་མ་ལུས་པ་ལ་འཇུག་པར་བྱ་བའི་ཕྱིར་ནམ་མཁའ་དབྱིངས་མ་ལུས་པ་ཐམས་ཅད་དང་འདྲ་བའི་སེམས་ཚད་མེད་པས་ཞིང་ཐམས་ཅད་ཡོངས་སུ་རྒྱས་པར་གྱུར་ཅིག །འགྲོ་བ་ཐམས་ཅད་ཀྱིས་སངས་རྒྱས་མཐོང་བ་ཡོངས་སུ་རྫོགས་པར་བྱ་
བའི་ཕྱིར་དགེ་བའི་རྩ་བ་ཐམས་ཅད་རབ་ཏུ་འབུལ་བར་གྱུར་ཅིག །འགྲོ་བ་ཐམས་ཅད་ཀྱིས་ཐེག་པ་ཆེན་པོ་ཤིན་ཏུ་གྲུབ་པ་དང་། ཆོས་ཐམས་ཅད་མ་ལུས་པ་ལ་མངོན་པར་ཆགས་པ་མེད་པར་བྱ་བའི་ཕྱིར་དགེ་བའི་རྩ་བ་མ་ལུས་པ་ལ་གནས་པས། ཀུན་ནས་གནས་པར་
གྱུར་ཅིག །སྤྱོད་པ་མཐའ་ཡས་པ་བྱིན་གྱིས་བརླབ་པ་དང་། ཆོས་ཀྱི་དབྱིངས་མཐའ་དང་དབུས་མེད་པ་ལ་འཇུག་པར་བྱ་བའི་ཕྱིར་དགེ་བའི་རྩ་བ་ཐམས་ཅད་ལ་ཡོངས་སུ་སྤྱོད་པར་གྱུར་ཅིག །དེ་བཞིན་གཤེགས་པ་ཐམས་ཅད་ཀྱི་རྣམ་པར་འཕྲུལ་པ་ལ་འཇུག་

པར་བྱ་བའི་ཕྱིར་དགེ་བའི་རྩ་བ་ཐམས་ཅད་ཡོངས་སུ་འགྱུར་བར་ཤོག་ཤིག །སེམས་ཅན་ཐམས་ཅད་ཀྱིས་ཐམས་ཅད་མཁྱེན་པའི་ཡེ་ཤེས་ཁོང་དུ་ཆུད་པར་བྱ་བའི་ཕྱིར་དགེ་བའི་རྩ་བ་འདི་དག་མ་ལུས་པར་རྐྱེན་དུ་འགྱུར་བར་ཤོག་ཤིག །ཅི་ནས་ཀྱང་བདག་
མེད་པའི་ཆོས་ཀྱི་དབྱིངས་ལས་ཆོས་ཐམས་ཅད་འདའ་བར་མི་འགྱུར་བར་དགེ་བའི་རྩ་བ་འདི་དག་གིས་སེམས་ཅན་ཐམས་ཅད་སངས་རྒྱས་ཐམས་ཅད་ལ་བསྙེན་བཀུར་ཡོངས་སུ་སྤྱོད་པས་ཡང་དག་པར་ཟིན་པར་གྱུར་ཅིག །ཆགས་པ་མེད་པ་ལ་འཇུག་པའི་ཕྱིར་ཆོས་ཐམས་ཅད་
ལ་ཡང་དག་པར་ཟིན་པར་གྱུར་ཅིག །བྱང་ཆུབ་སེམས་དཔའ་ཐམས་ཅད་དགེ་བའི་རྩ་བ་ཐམས་ཅད་ཀྱི་གྲོགས་གཅིག་ཏུ་འཐུན་པ་ཡང་དག་པར་ཟིན་པར་གྱུར་ཅིག །བྱང་ཆུབ་སེམས་དཔའི་སྤྱོད་པ་ཐམས་ཅད་སྨོན་ལམ་ཡོངས་སུ་རྫོགས་པས་ཡང་དག་པར་ཟིན་པར་གྱུར་ཅིག
བསྒྲིབས་པ་མེད་པ་ཁོང་དུ་ཆུད་པར་བྱ་བའི་ཕྱིར་བྱང་ཆུབ་སེམས་དཔའི་ཆོས་སྣང་བ་ཐམས་ཅད་ཡང་དག་པར་ཟིན་པར་གྱུར་ཅིག་མཐའ་དང་དབུས་མྱེད་པ་ལ་མཁས་པར་བྱ་བའི་ཕྱིར། དེ་བཞིན་གཤེགས་པ་ཐམས་ཅད་ཀྱི་རྣམ་པར་འཕྲུལ་པས་ཡང་དག་པར་ཟིན་པར་གྱུར་ཅིག
སེམས་ཚད་མེད་པས་ཡོངས་སུ་རྒྱས་པར་བྱ་བའི་ཕྱིར་སངས་རྒྱས་ཐམས་ཅད་ཀྱི་སྟོབས་དང་མི་བསྙེངས་པས་ཡང་དག་པར་ཟིན་པར་གྱུར་ཅིག །མི་གཉིས་པའི་སྣང་བ་གྲུབ་པས་བྱང་ཆུབ་སེམས་དཔའི་ཏིང་ངེ་འཛིན་དང་སྤོབས་པ་དང་། གཟུངས་ཀྱི་སྒོར་འཇུག་
པས་ཡང་དག་པར་ཟིན་པར་གྱུར་ཅིག །དེ་བཞིན་གཤེགས་པའི་རྣམ་པར་འཕྲུལ་པ་དང་། ཆོ་འཕྲུལ་ཆེན་པོ་ཤིན་ཏུ་བསྟན་པ་བསྒྲུབ་པའི་ཕྱིར། དེ་བཞིན་གཤེགས་པ་ཐམས་ཅད་ཀྱི་ཚུལ་ལ་མཁས་པས་ཡང་དག་པར་ཟིན་པར་གྱུར་ཅིག །སྐྱེ་བ་དང་རྣམ་པར་འཚང་
རྒྱ་བ་དང་། འཁོར་ལོ་བསྐོར་བ་དང་། མྱ་ངན་ལས་འདའ་བ་དང་། ཉེ་བར་གཤེགས་པ་བསྟན་པ་དང་། མཆོད་པ་དང་རིམ་གྲོ་དང་། སེམས་ཅན་གདུལ་བ་ལ་འཇུག་པའི་ཕྱིར། དེ་བཞིན་གཤེགས་པ་དུས་གསུམ་དུ་བྱོན་པ་མཐའ་དང་དབུས་མེད་པ་ཐམས་ཅད་

མ་ལུས་པའི་སྐྱེ་བ་དང་། སངས་རྒྱས་ཀྱི་བྱང་ཆུབ་ཏུ་མངོན་པར་འཚང་རྒྱ་བས་ཡང་དག་པར་ཟིན་པར་གྱུར་ཅིག །འཇིག་རྟེན་གྱི་ཁམས་ཐམས་ཅད་མ་ལུས་པར་བླ་ན་མྱེད་པའི་སངས་རྒྱས་ཀྱི་ཞིང་ཡོངས་སུ་དག་པས་ཟིན་པར་གྱུར་ཅིག །བསྐལ་པ་འབྱམ་ཀླས་པ་
མཐའ་དང་དབུས་མེད་པ་ཐམས་ཅད་མ་ལུས་པར་བྱང་ཆུབ་སེམས་དཔའི་སྤྱོད་པ་འབྲེལ་བ་རྒྱུན་མི་འཆད་པས་ཡང་དག་པར་ཟིན་པར་གྱུར་ཅིག །འཇིག་རྟེན་དུ་སྐྱེ་བའི་ཡུལ་ཐམས་ཅད་མ་ལུས་པར་ཐམས་ཅད་དུ་སྐྱེ་བ་ཤིན་ཏུ་བསྟན་པས་ཡང་དག་པར་ཟིན་པར་གྱུར་ཅིག
སེམས་ཅན་གྱི་ཁམས་ཐམས་ཅད་མ་ལུས་པར་བྱང་ཆུབ་སེམས་དཔའི་ཀུན་ཏུ་བཟང་པོའི་སྤྱོད་པས་ཡོངས་སུ་སྨྱིན་པར་བྱ་བས་ཡང་དག་པར་ཟིན་པར་གྱུར་ཅིག །སེམས་ཅན་གྱི་ཉོན་མོངས་པ་དང་། བག་ལ་ཉལ་བ་དང་། བག་ཆགས་ཐམས་ཅད་མ་ལུས་པ་རྙོག་
པ་མེད་པའི་ཚུལ་གྱིས་ཡང་དག་པར་ཟིན་པར་གྱུར་ཅིག །སེམས་ཅན་གྱི་དབང་པོ་འབྱམ་ཀླས་པ་ཐམས་ཅད་མ་ལུས་པར་མཐའ་དང་དབུས་མེད་པ་ལ་འཇུག་པས་ཡང་དག་པར་ཟིན་པར་གྱུར་ཅིག །འགྲོ་བ་ཐམས་ཅད་ཀྱི་མོས་པ་དང་། ལྷག་པའི་བསམ་པ་ཐམས་
ཅད་མ་ལུས་པར་ཉོན་མོངས་པ་མེད་ཅིང་ཡོངས་སུ་དག་པས་ཡང་དག་པར་ཟིན་པར་གྱུར་ཅིག །འགྲོ་བ་ཐམས་ཅད་ཡོངས་སུ་སྨྱིན་པར་བྱ་བ་དང་། གདུལ་བ་ཐམས་ཅད་མ་ལུས་པར་དུས་ལ་ཇི་ལྟར་འབབ་པ་བཞིན་དུ་ཀུན་ཏུ་བསྟན་པས་ཡང་དག་པར་ཟིན་པར་
གྱུར་ཅིག །སེམས་ཅན་ཐམས་ཅད་མ་ལུས་པར་འགྲོ་བ་ཐམས་ཅད་སྤྲུལ་པ་ལྟ་བུར་ཁོང་དུ་ཆུད་པས་ཡང་དག་པར་ཟིན་པར་གྱུར་ཅིག །དེ་བཞིན་གཤེགས་པའི་རགས་ཐམས་ཅད་མ་ལུས་པར་སངས་རྒྱས་བྱུང་བ་ཐམས་ཅད་ཀྱི་བསྟན་པ་བཟུང་ཞིང་བསྲུང་བས་
ཡང་དག་པར་ཟིན་པར་གྱུར་ཅིག་ཅེས་སེམས་བསྐྱེད་ཅིང་། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་དེ་དག་དམྱིགས་པ་མེད་པའི་ཚུལ་གྱིས་ཡོངས་སུ་བསྔོ་སྟེ། ལས་ཀྱིས་ནི་རྣམ་པར་སྨྱིན་པ་ལ་ཡོངས་སུ་རྟོག་པར་མི་བྱེད། རྣམ་

པར་སྨྱིན་པས་ནི་ལས་ལ་ཡོངས་སུ་རྟོག་པར་མི་བྱེད་དེ། ཆོས་ཀྱི་དབྱིངས་རྟོག་པ་མེད་པ་ལ་ཡང་དག་པར་འཇུག་གོ །དགེ་བའི་རྩ་བ་བྱེད་པ་མེད་པས་གནས་པ་ཡིན་ནོ། །ཆོས་ཉིད་གཡེང་བ་མེད་པ་ལ་འང་རབ་ཏུ་བརྩོན་པ་ཡིན་ནོ། །དེ་ནི་ཆོས་
ཐམས་ཅད་ལ་ཡང་དད་པས་ཡང་དག་པར་འཇུག་སྟེ། ཆོས་གང་རང་བཞིན་གྱིས་ཡོངས་སུ་གྲུབ་པར་བྱེད་པ་འམ། རྣམ་པར་བྱེད་པ་དེ་དག་གང་ཡང་མི་མཐོང་ངོ་། །ཆོས་ཉིད་དབང་པོ་མེད་པའི་མཐར་ཐུག་པ་ལ་ཡང་ཡང་དག་པར་འཇུག་སྟེ། ཆོས་ཀྱི་དབྱིངས་ལྟ་བ་
པོ་མེད་པར་ཡང་རབ་ཏུ་ཤེས་ཤིང་ཆོས་ཐམས་ཅད་ཤེས་པ་པོ་མེད་པར་ཡང་རབ་ཏུ་རྟོགས་སོ། །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ཅད་ཀྱི་དཀྱིལ་འཁོར་ཚད་མེད་པ་རབ་ཏུ་ཤེས་པ། ཆོས་ཐམས་ཅད་ཀྱི་རྐྱེན་གྱི་གནས་ཁོང་དུ་ཆུད་པ།
ཆོས་ཐམས་ཅད་ལུས་པ་མེད་པར་རབ་ཏུ་མཐོང་བ། ཆོས་ཐམས་ཅད་འདོད་ཆགས་དང་བྲལ་བའི་མཐར་ཕྱིན་པར་རྗེས་སུ་ལྟ་བ། འཇིག་རྟེན་འགྱུར་བ་ཐམས་ཅད་སྤྲུལ་པ་ལྟ་བུར་རྗེས་སུ་རྟོགས་པ། ཆོས་གཅིག་ལ་སེམས་ཅན་ཐམས་ཅད་དུ་རྗེས་སུ་མཐོང་བ།
ཆོས་ཀྱི་དབྱིངས་མྱི་གཉིས་པར་རབ་ཏུ་རིག་པ་ལས་ཀྱི་དམྱིགས་པ་དང་ཉེ་བར་ལེན་པ་ལ་མཁས་པས་མ་བཏང་བ་འདུས་བྱས་ཀྱི་ཁམས་འདུས་མ་བྱས་སུ་མངོན་པར་བསྒྲུབས་པས་ཞིག་པར་མི་བྱེད་པ། འདུས་མ་བྱས་ཀྱི་ཁམས་འདུས་བྱས་སུ་སྒྲོ་གདགས་པ་ཐམས་
ཅད་ཀྱིས་རྣམ་པར་མི་རྟོག་པ། ཆོས་ཐམས་ཅད་རབ་ཏུ་ཞི་བ་ལ་གཞོལ་བ། དགེ་བའི་རྩ་བ་མངོན་པར་བསྒྲུབ་པ། ཐམས་ཅད་མངོན་པར་བསྒྲུབ་པ། སེམས་ཅན་ཐམས་ཅད་ཡོངས་སུ་བསྐྱབ་པར་བྱ་བའི་སེམས་དང་ལྡན་པ། ཆོས་རྒྱ་མཚོ་ཐམས་ཅད་མངོན་པར་
ཤེས་པ་རྨོངས་པ་མེད་པར་ཆོས་ཉིད་ལ་བརྩོན་པ། དགེ་བའི་རྩ་བ་ནམ་མཁའ་ལྟ་བུར་ཐམས་ཅད་ཡོངས་སུ་བསྔོ་བ། བསོད་ནམས་ཀྱིས་རྒྱས་པར་འགྲོ་བས་འཇིག་རྟེན་ལས་འདས་པའི་ལམ་དུ་ཞུགས་པ། འཇིག་རྟེན་གྱི་ཆོས་ཀུན་ནས་མི་རྒྱུ་བ། མྱིག་ལ་

རབ་རིབ་མེད་པ། ཡེ་ཤེས་ཀྱི་སྣང་བ་རབ་ཏུ་ཐོབ་པ། ཐབས་མཁས་པས་ཡོངས་སུ་བསྔོ་བའི་ངང་ཚུལ་ཅན་དེ་ནི་ཅི་ནས་ཀྱང་སངས་རྒྱས་ཐམས་ཅད་ཀྱི་བྱིན་གྱིས་བརླབས་པ་དང་། ཅི་ནས་ཀྱང་ཞིང་ཐམས་ཅད་ཡོངས་སུ་དག་པར་འགྱུར་བ་དང་། ཅི་ནས་
ཀྱང་སེམས་ཅན་ཐམས་ཅད་ཡོངས་སུ་སྨྱིན་པར་འགྱུར་བ་དང་། ཅི་ནས་ཀྱང་སངས་རྒྱས་ཀྱི་ཆོས་ཐམས་ཅད་ཉེ་བར་བླང་བར་འགྱུར་བ་དང་། ཅི་ནས་ཀྱང་འཇིག་རྟེན་ཐམས་ཅད་དུ་བསོད་ནམས་ཀྱི་ཞིང་དམ་པར་འགྱུར་བ་དང་། ཅི་ནས་ཀྱང་སེམས་ཅན་ཐམས་ཅད་ཀྱི་དེད་
དཔོན་དུ་ཐོག་མར་འགྲོ་བ་དང་། ཅི་ནས་ཀྱང་སྣང་བའི་དཀྱིལ་འཁོར་སྐྱེ་དགུ་ཐམས་ཅད་ལ་འཆར་བར་འགྱུར་བ་དང་། ཅི་ནས་ཀྱང་དགེ་བའི་རྩ་བ་ཐམས་ཅད་ཀྱིས་ཆོས་ཀྱི་དབྱིངས་ཐམས་ཅད་རྒྱས་པར་འགྱུར་བ་དང་། ཅི་ནས་ཀྱང་འགྲོ་བ་ཐམས་ཅད་ཀྱི་རྟེན་དུ་འགྱུར་བ་དང་།
ཅི་ནས་ཀྱང་ཡོན་ཏན་ཐམས་ཅད་ཀྱིས་སེམས་ཅན་གྱི་ཁམས་ཐམས་ཅད་རྣམ་པར་སྦྱོང་བར་འགྱུར་བ། དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོ་སྟེ། དེ་དེ་ལྟར་ཡོངས་སུ་བསྔོ་བས་སངས་རྒྱས་ཀྱི་རིགས་ཡང་དག་པར་འཛིན་པ་ཡིན། སེམས་ཅན་གྱི་རིགས་
ཡོངས་སུ་སྨྱིན་པར་བྱེད་པ་ཡིན། ཞིང་གི་རིགས་རྣམ་པར་སྤྱོད་པ་ཡིན། ཆོས་ཀྱི་རིགས་འགལ་བར་མི་བྱེད་པ་ཡིན། ལས་ཀྱི་རིགས་ཡོངས་སུ་ཤེས་པ་ཡིན། མྱི་གཉིས་པའི་རིགས་མཉམ་པར་བྱེད་པ་ཡིན། ཕྱོགས་ཀྱི་རིགས་སུ་ཁྱབ་པར་འགྲོ་བ་ཡིན།
འདོད་ཆགས་དང་བྲལ་བའི་རིགས་ལ་ཡང་དག་པར་རྟོག་པ་ཡིན། ཤིན་ཏུ་མོས་པའི་རིགས་རབ་ཏུ་སྒྲུབ་པ་ཡིན། དབང་པོའི་རིགས་ཤིན་ཏུ་སྣང་བར་བྱེད་པ་ཡིན་ཏེ། ཀྱེ་རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་
ཡོངས་སུ་བསྔོ་བ་བཞི་པ་སྟེ། ཐམས་ཅད་དུ་རྗེས་སུ་སོང་བ་ཞེས་བྱ་བའོ། །དེ་ལ་གནས་ཤིང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དགེ་བའི་རྩ་བ་ཐམས་ཅད་ཡོངས་སུ་བསྔོ་བར་བྱེད་དེ། དེ་དེ་ལྟར་བསྔོ་བས་འཇིག་རྟེན་གྱི་ཁམས་ཐམས་ཅད་དུ་ཡང་

དག་པར་བསྟན་པར་བྱ་བའི་ཕྱིར་ཐམས་ཅད་དུ་རྗེས་སུ་སོང་བའི་ལུས་ཀྱི་ལས་རབ་ཏུ་འཐོབ་བོ། །སངས་རྒྱས་ཀྱི་ཞིང་ཐམས་ཅད་དུ་རྣམ་པར་བསྟན་པ་བསྒྲིབས་པ་མེད་པའི་ཕྱིར་ཐམས་ཅད་ཀྱི་རྗེས་སུ་སོང་བའི་ངག་གི་ལས་རབ་ཏུ་འཐོབ་བོ། །སངས་རྒྱས་
ཀྱི་ཆོས་ཐམས་ཅད་བསྟན་ཅིང་གཟུང་བའི་ཕྱིར་ཐམས་ཅད་དུ་རྗེས་སུ་སོང་བའི་ཡིད་ཀྱི་ལས་རབ་ཏུ་འཐོབ་བོ། །སེམས་ཅན་ཐམས་ཅད་རྗེས་སུ་འབྲང་བར་བྱ་བའི་ཕྱིར་ཐམས་ཅད་ཀྱི་རྗེས་སུ་སོང་པའི་རྫུ་འཕྲུལ་དང་རྣམ་པར་འཕྲུལ་པ་རབ་ཏུ་འཐོབ་བོ། །ཆོས་ཐམས་ཅད་ལ་ཡང་
དག་པར་འཇུག་པར་བྱ་བའི་ཕྱིར་ཐམས་ཅད་དུ་རྗེས་སུ་སོང་བའི། ཆོས་ཁོང་དུ་ཆུད་པ་རབ་ཏུ་འཐོབ་བོ། །སེམས་ཅན་ཐམས་ཅད་ཀྱི་བསམ་པ་ཚིམ་པར་བྱ་བའི་ཕྱིར་ཐམས་ཅད་ཀྱི་རྗེས་སུ་སོང་བའི་གཟུངས་དང་སྤོབས་པ་ཐོབ་པར་བྱ་བར་རབ་ཏུ་འཐོབ་བོ། །སྤུའི་
སྦུབས་གཅིག་ཏུ་འཇིག་རྟེན་གྱི་ཁམས་ཐམས་ཅད་གཟུད་པར་བྱ་བའི་ཕྱིར་ཐམས་ཅད་དུ་རྗེས་སུ་སོང་བའི་ཆོས་ཀྱི་དབྱིངས་ལ་འཇུག་པ་རབ་ཏུ་འཐོབ་བོ། །སེམས་ཅན་གཅིག་གི་ལུས་སུ་སེམས་ཅན་ཐམས་ཅད་ཀྱི་ལུས་ཡང་དག་པར་གཞོལ་བར་བྱ་བའི་ཕྱིར་ཐམས་ཅད་ཀྱི་རྗེས་སུ་
སོང་བའི་ལུས་ལ་འཇུག་པ་རབ་ཏུ་འཐོབ་བོ། །བསྐལ་པ་ཐམས་ཅད་དུ་དེ་བཞིན་གཤེགས་པ་མཐོང་བ་དང་མི་འབྲལ་བ་ལ་འདུག་པའི་ཕྱིར་ཐམས་ཅད་ཀྱི་རྗེས་སུ་སོང་བའི་བསྐལ་པའི་གྲངས་ལ་འཇུག་པ་རབ་ཏུ་འཐོབ་བོ། །སྐད་ཅིག་གཅིག་གིས་དེ་བཞིན་གཤེགས་པ་འབྱུང་
བ་ཐམས་ཅད་མངོན་སུམ་དུ་བསྟན་པའི་ཕྱིར། ཐམས་ཅད་རྗེས་སུ་སོང་བའི་སྐད་ཅིག་ལ་འཇུག་པ་རབ་ཏུ་འཐོབ་བོ། །དེ་ནས་བྱང་ཆུབ་སེམས་དཔའ་རྡོ་རྗེའི་རྒྱལ་མཚན་གྱིས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་
སུ་བཅད་པ་འདི་དག་སྨྲས་སོ། །འཇིག་རྟེན་མཐའ་དང་དབུས་མེད་གང་ལ་ཡང་། །དེ་དག་གནས་འཆའ་གང་ཡང་ཡོད་པ་མྱིན། །སེམས་ཅན་ཕན་པའི་དོན་ལས་ཕྱིར་མི་ལྡོག །མི་རབ་དེ་དག་ཡེ་ཤེས་འདི་འདྲའོ། །ཞིང་རྣམས་ལ་ཡང་གནས་པར་མི་བྱེད་དེ། །

ཕྱོགས་རྣམས་ལ་ཡང་དེ་དག་གནས་མི་འཆའ། །ཚེ་དང་ཆོས་ཀྱིས་རློམ་སེམས་མི་བྱེད་དེ། །འཇིག་རྟེན་དག་ན་རྣམ་པར་རྟོག་མི་བྱེད། །ཕྱོགས་བཅུའི་འཇིག་རྟེན་དག་ན་ཇི་ཡོད་པའི། །འགྲོ་བ་དེ་དག་མ་ལུས་ཀུན་བསྡུས་ཤིང་། །དངོས་པོ་དངོས་མེད་
ཆོས་ལ་དབང་བསྒྱུར་འཇུག །དེ་དག་ཐམས་ཅད་མ་ལུས་དུས་སུ་བསྔོ། །འདུས་བྱས་འདུས་མ་བྱས་ཀྱི་ཆོས་བླངས་ཤིང་། །འཇིག་རྟེན་འདི་ལ་རྣམ་པར་རྟོག་མི་བྱེད། །ཇི་ལྟར་འཇིག་རྟེན་དེ་བཞིན་ཆོས་རྣམས་ཏེ། །དེ་ལྟར་འཇིག་རྟེན་སྒྲོན་མ་རྣམ་པར་དག །ཇི་
སྙེད་ལས་རྣམས་ཡང་དག་རྩོམ་པ་གང་། །རབ་དང་འབྲིང་དང་དེ་བཞིན་ཐ་མ་རྣམས། །དེ་དག་ཕྱོགས་བཅུའི་འཇིག་རྟེན་མཁྱེན་པ་རྣམས། །ཇི་སྙེད་བཞུགས་ལ་ཡོངས་སུ་བསྔོ་བ་བྱེད། །དེ་དག་ཡོངས་སུ་བསྔོ་བའི་མཐར་ཕྱིན་པ། །སངས་རྒྱས་མཆོག་རྗེས་བསླབ་
བྱ་བསླབས་པ་རྣམས། །ཡེ་ཤེས་དམ་པ་རྗེས་སུ་སེམས་བྱེད་ཅིང་། །མི་ཡི་དམ་པའི་ཆོས་རྣམས་རབ་ཏུ་འཐོབ། །སེམས་ཅན་ཕན་པའི་དོན་དུ་རྟག་ཞུགས་ཤིང་། །འགྲོ་བ་ཀུན་ཏུ་འཇིག་རྟེན་སྒྲོན་མ་བཞིན། །ཕྱོགས་རྣམས་ཀུན་ཏུ་མ་ལུས་གྱུར་ཅིག
ཅེས། །དགེ་བ་དེ་དག་ཡོངས་སུ་བསྔོ་བ་བྱེད། །དེ་དག་སེམས་ཅན་རྣམ་པར་རྟོག་མི་བྱེད། །ཆོས་ལའང་རྣམ་པར་རྟོག་པ་མི་བྱེད་དེ། །འཇིག་རྟེན་གྱིས་ཀྱང་རློམ་སེམས་མྱེད་པ་ཡིན། །འགྲོ་བ་ཀུན་ནས་ཕྱིར་ཡང་མི་ལྡོག་གོ །བརྟན་པ་དེ་དག་ཞི་རབ་རབ་ཏུ་
ཞི། །དེ་དག་མྱ་ངན་འདས་པའི་སྤྱོད་ཡུལ་ཐོབ། །སེམས་ཅན་རྒྱུད་ན་འང་མི་སྤྱོད་མ་ཡིན་ཏེ། །འདི་འདྲའི་ཡེ་ཤེས་དམ་པ་ཁོང་དུ་ཆུད། །དེ་དག་ནམ་ཡང་རྟོག་དང་རྣམ་རྟོག་མེད། །རྣམ་པར་སྨྱིན་ལ་འང་དེ་དག་གནས་མི་འཆའ། །འཇིག་རྟེན་ཐམས་ཅད་
རྒྱུ་དང་བཅས་པས་ན། །ཆོས་རྣམས་རྒྱུ་མེད་པར་ཡང་ལྟ་མ་ཡིན། །དེ་དག་སྤྱོད་ཡུལ་འདི་འདྲ་ཐོབ་པ་སྟེ། །དེ་ལ་རྟོག་དང་རྣམ་པར་རྟོག་པ་བྱེད། །བློ་མཆོག་དེ་དག་འགྲོ་ཀུན་ཁ་ལོ་སྒྱུར། །ཡེ་ཤེས་ཚུལ་ལ་མཁས་པས་ཡོངས་སུ་བསྔོ། །ཐམས་

ཅད་རྗེས་སུ་སོང་བ་ཞེས་བྱ་བ་སྟེ། ཡོངས་སུ་བསྔོ་བ་བཞི་པའོ།། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་གཉིས་པ། །ཀྱེ་རྒྱལ་བའི་སྲས་དག །བྱང་ཆུབ་
སེམས་དཔའ་སེམས་དཔའ་ཆེན་པོ་རྣམས་ཀྱི་ཡོངས་སུ་བསྔོ་བ་ལྔ་པ་བསོད་ནམས་མྱི་ཟད་པའི་མཛོད་ཅེས་བྱ་བ་གང་ཞེ་ན། ཀྱེ་རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ། སྒྲིབ་པའི་ལས་ཐམས་ཅད་ལས་བག་ཡོངས་སུ་བྱ་བའི་
ཕྱིར་བཤགས་པ་དང་འབྲེལ་བའི་དགེ་བའི་རྩ་བ་འམ། འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་ཐམས་ཅད་དང་། འདས་པ་དང་། མ་འོངས་པ་དང་། ད་ལྟར་བྱུང་བའི་སེམས་ཅན་གྱི་ཁམས་ཐམས་ཅད་ཀྱི་དུས་
གསུམ་གྱི་དགེ་བའི་རྩ་བ་ལ་རྗེས་སུ་ཡི་རང་བས་རྗེས་སུ་ཡི་རང་བ་དང་འབྲེལ་བའི་དགེ་བའི་རྩ་བ་འམ། འདས་པ་དང་། མ་བྱོན་པ་དང་། ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་ལ་ནན་ཏན་དུ་བྱས་པས་ཕྱག་བྱ་བ་དང་། འབྲེལ་བའི་དགེ་བའི་རྩ་བ་
འམ། སངས་རྒྱས་ཀྱི་ཆོས་ཐམས་ཅད་ལ་བརྩོན་པས་སངས་རྒྱས་ཐམས་ཅད་ལ་གསོལ་བ་གདབ་པ་དང་། འབྲེལ་བའི་དགེ་བའི་རྩ་བ་འམ། འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་དགེ་བའི་རྩ་བ་མི་ཟད་
པ་གང་ལ། བྱང་ཆུབ་སེམས་དཔས་བརྩོན་པར་བྱ་བའི་དགེ་བའི་རྩ་བ་འབྱམ་ཀླས་པ་བསམ་གྱིས་མི་ཁྱབ་པ་དེ་དག་ལ་ཡང་དག་པར་འཇུག་པར་བྱེད་པ་འམ། གང་ཡང་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་
མངོན་པར་བྱང་ཆུབ་བའི་དགེ་བའི་རྩ་བ་དེ་དག་ལ་རྗེས་སུ་ཡི་རང་བར་བྱེད་ཅིང་། དགེ་བའི་རྩ་བ་དེ་དག་ལ་གནས་པར་བྱེད་པ་འམ། སངས་རྒྱས་བཅོམ་ལྡན་འདས་འདས་པ་དང་། མ་བྱོན་པ་དང་། ད་ལྟར་བྱུང་བའི་ཆོས་ཀྱི་འཁོར་ལོ་བསྐོར་བས་སེམས་

ཅན་མཐའ་དང་དབུས་མེད་པ་དུལ་བར་གྱུར་པ་དེ་དག་ལ་རྗེས་སུ་ཡི་རང་བ་དང་ལྡན་པའི་སེམས་བསྐྱེད་པས་ཁོང་དུ་ཆུད་པར་བྱེད་པ་འམ། གང་ཡང་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་དེ་དག་དང་པོ་ཐུགས་བསྐྱེད་
པ་ནས་བཟུང་སྟེ། བྱང་ཆུབ་སེམས་དཔའི་སྤྱོད་པ་ཐམས་ཅད་ལ་ཡང་དག་པར་བྱུང་བར་གྱུར་པ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱ་བར་གྱུར་པ་དང་། མྱ་ངན་ལས་འདས་པ་ཡང་དག་པར་བསྟན་པའི་བར་གྱི་དགེ་བའི་རྩ་བ་དེ་དག་
ཐམས་ཅད་སངས་རྒྱས་ཐམས་ཅད་དང་རྒྱུད་ཀྱི་ཚུལ་གཅིག་ཏུ་གྱུར་བའི་ཡེ་ཤེས་ཀྱི་བྱིན་གྱིས་བརླབས་ཀྱི་རྗེས་སུ་ཡི་རང་བའམ། དེ་བཞིན་གཤེགས་པ་དེ་དག་ཡོངས་སུ་མྱ་ངན་ལས་འདས་པའི་བསྟན་པ་ཡང་དག་པར་བཟུང་བ་ནས་ཉེ་བར་བཟུང་སྟེ། ཆོས་ཐམས་ཅད་
ཀྱི་མཐར་ཐུག་པའི་བར་དུ་དགེ་བའི་རྩ་བ་ཇི་སྙེད་ཡང་དག་པར་བསྒྲུབ་པར་འགྱུར་བ་འམ། སངས་རྒྱས་ལ་དམྱིགས་པའི་བསམ་པ་འབྱམ་ཀླས་པ་བརྗོད་དུ་མེད་པ་དང་། རང་གི་དམྱིགས་པ་ལ་དགེ་བའི་རྩ་བ་གང་བསྩགས་པ་དེ་དག་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ཏུ་བསྒྲིབས་པ་མྱེད་པར་དམྱིགས་པར་མཐར་ཕྱིན་པར་བྱེད་པར་ཡང་རུང་སྟེ། དགེ་བའི་རྩ་བ་རྣམ་པར་ཕྱེ་བ་ཚད་མེད་ཅིང་འབྱམ་ཀླས་པ། དམྱིགས་པ་རྒྱ་ཆེན་པོ་གྲངས་མེད་པས་བསྩགས་པ་དེ་དག་ཐམས་ཅད་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་གང་
ཡང་དག་པར་བསྒྲུབས་པ་དང་། གང་མོས་པར་བྱས་པ་དང་། གང་རྗེས་སུ་ཡི་རང་བ་དང་། གང་ཡོངས་སུ་རྫོགས་པར་བྱས་པ་དང་། གང་ཡོངས་སུ་གྲུབ་པར་བྱས་པ་དང་། གང་སྤྱད་པ་དང་། གང་ཐོབ་པར་བྱས་པ་དང་། གང་སེམས་པ་དང་།
གང་རྩོམ་པ་དང་། གང་མཐུ་དང་ལྡན་པར་བྱེད་པའི་དགེ་བའི་རྩ་བ་དེ་དག་གིས་གང་ཇི་སྙེད་དུ་སྔོན་གྱི་འདས་པའི་དུས་ཐམས་ཅད་འབྱམ་ཀླས་པའི་དུས་ལ་འཇུག་པ་དང་། འཇིག་རྟེན་གྱི་ཁམས་ཤིན་ཏུ་བསྟན་པ་གྲངས་ལས་འདས་པ་ཐམས་ཅད་དུ་

སངས་རྒྱས་ཀྱི་ཞིང་གི་རྒྱན་བྱུང་བ་དང་། གང་ཇི་སྙེད་དུ་དེ་བཞིན་ཉིད་ཀྱི་གོ་སྐབས་ཐམས་ཅད་ཀྱི་སྔོན་གྱི་མུའི་བསྐལ་པའི་མཐར་གྱུར་པ། ས་མཚམས་མེད་པའི་སངས་རྒྱས་ཀྱི་རིགས་མཐའ་ཡས་པ་དང་། དེ་བཞིན་གཤེགས་པ་
ཐམས་ཅད་ཀྱི་ཡེ་ཤེས་ཀྱིས་ཐུགས་སུ་ཆུད་པ། བྱང་ཆུབ་སེམས་དཔའི་བསམ་པས་རྣམ་པར་ཤེས་པ། བྱང་ཆུབ་སེམས་དཔའི་སེམས་ཀྱིས་ཡང་དག་པར་བཟུང་བ་དག་ཏུ་སངས་རྒྱས་ཀྱི་ཞིང་གི་རྒྱན་ཡོངས་སུ་དག་པ་བྱུང་བ་དང་། གང་ཡང་ལས་དང་རྒྱུ་འཐུན་པའི་འབྲས་བུའམ། གང་
ཡང་སྤྱོད་པ་ལས་ཡང་དག་པར་བྱུང་བ་འམ། གང་ཡང་སེམས་ཅན་བསྒྲལ་བར་བྱ་བའི་ཚོགས་རྣམ་པར་བསྟན་པ་འམ། གང་ཡང་ཤིན་ཏུ་མོས་པ་རྣམ་པར་དག་པ་འམ། གང་ཡང་དེ་བཞིན་གཤེགས་པའི་བྱིན་གྱི་རླབས་ཀྱིས་ཤེས་པར་བྱ་བ་འམ། གང་ཡང་སངས་རྒྱས་ཀྱི་རྣམ་པར་འཕྲུལ་
བ་ཡང་དག་པར་བསྟན་པ་འམ། གང་ཡང་བྱང་ཆུབ་སེམས་དཔའི་ས་རྣམས་སུ་རྣམ་པར་རིག་པ་འམ། གང་ཡང་དེ་བཞིན་གཤེགས་པའི་ཕྲིན་ལས་འཇིག་རྟེན་ལས་འདས་པས་བྱུང་བ་འམ། གང་ཡང་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་འབྱམ་ཀླས་པས་བྱུང་བ་འམ། གང་
ཡང་མངོན་པར་འཚང་རྒྱ་བའི་དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་ཀྱིས་བྱུང་བ་འམ། ཕྱི་མའི་མཐའི་བསྐལ་པར་མངོན་པར་འཚང་རྒྱ་བ་རྒྱུན་ཆད་པ་མེད་པའི་འཇིག་རྟེན་གྱི་ཁམས་ཀྱི་ཚུལ་ཐམས་ཅད་ཤིན་ཏུ་བསྟན་པ། ནམ་མཁའི་དབྱིངས་ཀྱིས་ཀླས་པ་ཆོས་ཀྱི་དབྱིངས་ཀྱི་མཐས་གཏུགས་པ་
འཇིག་རྟེན་གྱི་ཁམས་ཐམས་ཅད་འབྱམ་ཀླས་པ་མ་འོངས་པའི་དུས་མཐའ་ཡས་པའི་རིགས་སུ་བསྟན་པ་མ་འོངས་པའི་ལམ་གྱི་རྒྱུད་རྣམ་པ་ཐ་དད་པ་གྲངས་མེད་པ་བརྗོད་པ། མ་འོངས་པའི་དུས་རྒྱུན་ཆད་པ་མེད་ཅིང་ས་མཚམས་ཀྱི་མཐའ་མེད་པ། དེ་བཞིན་གཤེགས་པའི་ཡེ་ཤེས་ཀྱིས་མངོན་པར་བསྒྲུབས་པས་
ཐུགས་སུ་ཆུད་པ། མ་འོངས་པའི་དུས་ཀྱི་སྐད་ཅིག་རྒྱུན་ཆད་པ་མེད་པ། ཆོས་ཀྱི་དབྱིངས་དང་། འཇིག་རྟེན་གྱི་ཁམས་དང་། བསྐལ་པ་གཅིག་ནས་གཅིག་ཏུ་བརྒྱུད་པ་ཐམས་ཅད་མཐའ་ཡས་པ་དང་། དེ་བཞིན་གཤེགས་པའི་སྟོབས་ཀྱིས་མངོན་པར་འཚང་རྒྱ་བ་ཚད་མེད་པར་གྱུར་པ་དང་།

མ་འོངས་པའི་དུས་སུ་མཚམས་མེད་ཅིང་རིས་སུ་མི་ཆོད་པ་དག་ཏུ་མ་བྱོན་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཀྱི་དབྱིངས་ཐམས་ཅད་དུ་ཁྱབ་པར་གཤེགས་པའི་སངས་རྒྱས་ཀྱི་ཞིང་གི་ཡོན་ཏན་དང་རྒྱན་ཡོངས་སུ་དག་པ།
རིན་པོ་ཆེའི་རྒྱན་རྣམ་པར་བྲེ་བ་དུ་མ་དང་། སྤོས་ཀྱི་རྒྱན་ཡིད་དུ་འོང་བ་དང་། ལྡན་པ་ཐམས་ཅད་དང་། མེ་ཏོག་ཐམས་ཅད་ཀྱི་རྒྱན་གྱི་ཆར་རབ་ཏུ་འབེབ་པ། ན་བཟའ་ཐམས་ཅད་ཀྱི་རྒྱན་གྱི་སྤྲིན་སྣ་ཚོགས་ཡོན་ཏན་ཐམས་ཅད་ཀྱིས་བརྒྱན་པ། རྣམ་པ་ཐ་དད་
པའི་མཛོད་དེ་བཞིན་གཤེགས་པའི་རྒྱན་གྱི་བྱིན་གྱི་རླབས་ཀྱིས་རྣམ་པར་བྲེས་པ། སངས་རྒྱས་ཀྱི་ཞིང་ཐམས་ཅད་ཀྱི་རྒྱན་རབ་ཏུ་བརྒྱན་པར་བྱ་བ། རྣམ་པ་སྣ་ཚོགས་པ་ཐ་དད་པ་བརྗོད་དུ་མེད་པས་རབ་ཏུ་བརྒྱན་ཅིང་གྲུབ་པ། གྲོགས་བསམ་གྱིས་མི་ཁྱབ་པ་རྣམ་པར་དག་
པས་ཡོངས་སུ་བསྒྲུབས་པ། དེ་བཞིན་གཤེགས་པ་མངོན་པར་འཚང་རྒྱ་བའི་བྱིན་གྱི་རླབས་ཀྱིས་རྒྱན་གྱི་རྣམ་པར་དག་པ་རྣམས་འབྱུང་བར་འགྱུར་བ་དང་། གང་ཡང་མ་བྱོན་པའི་དེ་བཞིན་གཤེགས་པ་ཐམས་ཅད་མངོན་པར་འཚང་རྒྱ་བའི་སངས་རྒྱས་ཀྱི་ཞིང་ཡོངས་
སུ་དག་པ། བྱང་ཆུབ་སེམས་དཔའི་མིག་འཇིག་རྟེན་ལས་འདས་པ་ཐུན་མོང་མ་ཡིན་པས་རྣམ་པར་མཐོང་བ། བྱང་ཆུབ་སེམས་དཔའི་མཐུ་ཆེན་པོའི་དགེ་བའི་རྩ་བ་རབ་ཏུ་མྱོང་བར་འགྱུར་བ་ཆོས་ཐམས་ཅད་སྒྱུ་མའི་རྣམ་པ་ལྟ་བུར་ཁོང་དུ་ཆུད་པ། ཆོས་ཐམས་
ཅད་ཀྱི་མཐུ་སྤྲུལ་པ་ལྟ་བུས་རྣམ་པར་དག་པ། བྱང་ཆུབ་སེམས་དཔའི་ལས་འབྱམ་ཀླས་པ། མཉམ་པ་ཉིད་ཀྱི་རྗེས་སུ་སོང་བས་རྣམ་པར་དག་པ། བྱང་ཆུབ་སེམས་དཔའི་རྣམ་པར་འཕྲུལ་པ་དང་། ཏིང་ངེ་འཛིན་གྱི་ཚུལ་བསམ་གྱིས་མི་ཁྱབ་པ་ལ་
ཞུགས་པ། སངས་རྒྱས་ཀྱི་ཁྱུ་མཆོག་གི་མཐུ་ཕྱུང་བ། ཡང་དག་པར་རྒྱུ་བ། སངས་རྒྱས་ཀྱི་འོད་བླ་ན་མེད་པས་སྣང་བར་བྱས་པ། རྒྱ་ཆེ་བ་སྣ་ཚོགས་པ། ཚད་མེད་པ། བསམ་གྱིས་མི་ཁྱབ་པ་རྣམས་ཡང་དག་པར་གནས་པར་འགྱུར་བ་དང་།

མ་བྱོན་པའི་སངས་རྒྱས་དེ་དག་ཐམས་ཅད་ཀྱི་སངས་རྒྱས་ཀྱི་ཞིང་ཡོངས་སུ་དག་པར་འགྱུར་བ་དེ་བཞིན་དུ། ད་ལྟར་བྱུང་བའི་སངས་རྒྱས་ཐམས་ཅད་ཀྱི་སངས་རྒྱས་ཀྱི་ཞིང་ཡོངས་སུ་དག་པར་རབ་ཏུ་བྱུང་བ་ཤིན་ཏུ་གྲུབ་པ་རྣམ་པར་དག་པ།
རྣམ་པ་སྣ་ཚོགས་པ་ཐ་དད་པ་ཀུན་ནས་ཡོན་ཏན་ཅན་བསྔགས་པར་བྱ་བ། ཚད་མེད་པ་དྲི་ཞིམ་པོ་བསམ་གྱིས་མི་ཁྱབ་པ། མཐའ་ཡས་པ། ཤིང་ཚད་མྱེད་པ་དང་ལྡན་པ། རྒྱན་གྲངས་མེད་པ་ཅན། གཙུག་ལག་ཁང་གྲངས་མེད་པ་དང་ལྡན་པ། ཡིད་དུ་འོང་
བའི་སྒྲ་གྲངས་མེད་པ་ཡོད་པ། མཐའ་ཡས་པར་ཡང་དག་པར་སྟོན་པ། རྗེས་སུ་སྤྱོད་པའི་གྲོགས་ཚད་མེད་པ་དང་ལྡན་པ། ཡོན་ཏན་སྣ་ཚོགས་ཟད་མི་ཤེས་པ་དང་ལྡན་པ། རྒྱན་ཐམས་ཅད་ཀྱིས་བརྒྱན་པ། སྤོས་ཐམས་ཅད་ཀྱིས་བརྒྱན་པ། ཕྲེང་བ་
ཐམས་ཅད་ཀྱིས་བརྒྱན་པ། ཕྱེ་མ་ཐམས་ཅད་ཀྱིས་བརྒྱན་པ། རིན་པོ་ཆེ་ཐམས་ཅད་ཀྱིས་བརྒྱན་པ། ན་བཟའ་ཐམས་ཅད་ཀྱིས་བརྒྱན་པ། རྒྱལ་མཚན་ཐམས་ཅད་ཀྱིས་བརྒྱན་པ། བ་དན་ཐམས་ཅད་ཀྱིས་བརྒྱན་པ། རིན་པོ་ཆེ་སྣ་ཚོགས་ཀྱི་སྣམ་བུ་ཀུན་
ཏུ་བཏིང་བས་བརྒྱན་པ། རིན་པོ་ཆེ་ཐམས་ཅད་ཀྱི་སྟེགས་བུས་བརྒྱན་པ། གསེར་གྱི་དྲ་བ་གྲངས་མེད་པས་ཀུན་ཏུ་གཡོག་པར་བརྒྱན་པ། ཆུ་ཀླུང་གྲངས་མེད་པའི་རྒྱན་གྱིས་བརྒྱན་པ། གྲངས་མེད་པའི་སྤྲིན་གྱི་ཆར་རབ་ཏུ་འབབ་པས་བརྒྱན་པ། རོལ་མོ་བརྡུང་བ་དང་
དཀྲོལ་བའི་ཚོགས་གྲངས་མེད་པས་ཡིད་དུ་འོང་བ་རྣམ་པར་དག་པ་དེ་དག་དང་། དེ་བཞིན་དུ་མ་ལུས་པ་ཐམས་ཅད་རབ་ཏུ་བཟུང་སྟེ། སངས་རྒྱས་ཀྱི་ཞིང་གི་ཡོན་ཏན་དང་རྒྱན་ཡོངས་སུ་དག་པ་གང་ཇི་སྙེད་པ། གང་དང་གང་སངས་རྒྱས་ཐམས་ཅད་ཀྱིས་རབ་
ཏུ་མཁྱེན་པ། འཇིག་རྟེན་གྱི་ཁམས་ཀྱི་རྒྱུད་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པ་ཞིང་གི་གནས་སུ་གྱུར་པ་ཐམས་ཅད་ཕྱོགས་ཀྱི་འཁོར་མཐའ་ཡས་པར་ཤིན་ཏུ་བསྟན་པས་ཕྱོགས་བཅུར་རྣམ་པར་བཀོད་པ། འཇིག་རྟེན་གྱི་ཁམས་

འབྱམ་ཀླས་པ་ལས་རྣམ་པ་སྣ་ཚོགས་ཀྱིས་མངོན་པར་འདུས་བྱས་པ། ནམ་མཁའི་ཁམས་དང་འཇིག་རྟེན་གྱི་ཁམས་ཐམས་ཅད་ཀྱིས་ཡོངས་སུ་བསྡུས་པ། འཇིག་རྟེན་གྱི་ཁམས་ཕྱོགས་གཞན་དང་གཞན་གྱི་རྗེས་སུ་སོང་བར་རབ་ཏུ་གནས་པ། ལས་རྣམ་པ་ཐ་
དད་པས་ཤིན་ཏུ་བྱུང་བའི་འཇིག་རྟེན་གྱི་ཁམས་བརྗོད་དུ་མེད་པར་ཤིན་ཏུ་བསྟན་པ། འཇིག་རྟེན་གྱི་འབྱུང་གནས་ནམ་མཁའི་གོས་གཏོགས་པ། ཞིང་གི་རྒྱུད་རྣམ་པ་ཐ་དད་པ་བརྗོད་དུ་མེད་པ་འཇིག་རྟེན་གྱི་ཁམས་མཐའ་དང་དབུས་མེད་པའི་ཆོས་ཀྱི་དབྱིངས་ཀྱིས་ཤིན་ཏུ་
བསྟན་པ། དེ་ལྟར་མ་ལུས་པ་ཐམས་ཅད་ཡོངས་སུ་བཟུང་སྟེ། ཆོས་ཀྱི་དབྱིངས་ཐམས་ཅད་ཀྱི་སངས་རྒྱས་ཀྱི་ཞིང་ཐམས་ཅད་ཀྱི་རྒྱན་ལ་འཇུག་པས་རྒྱན་རྣམ་པར་དག་པ་ཐམས་ཅད་དང་ལྡན་པ། སངས་རྒྱས་ཀྱི་ཞིང་ཡོངས་སུ་དག་པ་ཐམས་ཅད་ཇི་སྐད་དུ་
བཤད་པ་དང་། ཇི་སྐད་དུ་བསྟན་པ་དང་། ཇི་སྐད་དུ་བརྗོད་པ་དང་། ཇི་སྐད་དུ་གསལ་བར་བྱས་པ་དང་། ཇི་སྐད་དུ་སྨོས་པ་དང་། ཇི་སྐད་དུ་སྨྲས་པ་དང་། ཇི་སྐད་དུ་བསླབས་པ་དང་། ཇི་སྐད་དུ་བཀྲོལ་བ་དང་། ཇི་ལྟ་བུར་བརྟགས་པ་དང་། ཇི་ལྟ་བུར་རྣམ་པར་
བཀོད་པ་དེ་དང་དེ་དག་དུ་དེ་བཞིན་གཤེགས་པ་སྐྱེས་པའི་སངས་རྒྱས་ཀྱི་ཞིང་གི་རྒྱན་དང་། སངས་རྒྱས་ཀྱི་ཞིང་རྣམ་པར་དག་པ་དང་། སངས་རྒྱས་ཀྱི་ཞིང་མཉམ་པ་ཉིད་དང་། སངས་རྒྱས་ཀྱི་ཞིང་དགེ་བ་དང་། སངས་རྒྱས་ཀྱི་ཞིང་བདག་ཉིད་ཆེ་བ་དང་། སངས་རྒྱས་
ཀྱི་ཞིང་ཡངས་པ་དང་། སངས་རྒྱས་ཀྱི་ཞིང་བདེ་བར་བསྐྱང་པ་དང་། སངས་རྒྱས་ཀྱི་ཞིང་ཟིལ་གྱིས་མི་ནོན་པ་དང་། སངས་རྒྱས་ཀྱི་ཞིང་ཟད་མི་ཤེས་པ་དང་། སངས་རྒྱས་ཀྱི་ཞིང་ཤིན་ཏུ་ཆེ་བ་དང་། སངས་རྒྱས་ཀྱི་ཞིང་མྱི་འཕྲོགས་པ་དང་། སངས་རྒྱས་ཀྱི་
ཞིང་མི་འཇིགས་པ་དང་། སངས་རྒྱས་ཀྱི་ཞིང་འོད་གསལ་བ་དང་། སངས་རྒྱས་ཀྱི་ཞིང་ཡིད་དུ་འོང་བ་དང་། སངས་རྒྱས་ཀྱི་ཞིང་མི་མཐུན་པ་མྱེད་པ་དང་། སངས་རྒྱས་ཀྱི་ཞིང་ཀུན་ཏུ་སྣང་བ་དང་། སངས་རྒྱས་ཀྱི་ཞིང་རབ་ཏུ་སྣང་བ་དང་། སངས་རྒྱས་ཀྱི་

ཞིང་རྣམ་པར་བརྒྱན་པ་དང་། སངས་རྒྱས་ཀྱི་ཞིང་རབ་ཏུ་བརྒྱན་པ་དང་། སངས་རྒྱས་ཀྱི་ཞིང་ཤིན་ཏུ་རྣམ་པར་ཕྱེ་བ་དང་། སངས་རྒྱས་ཀྱི་ཞིང་མཆོག་དང་། སངས་རྒྱས་ཀྱི་ཞིང་གཙོ་བོ་དང་། སངས་རྒྱས་ཀྱི་ཞིང་རབ་དང་། སངས་རྒྱས་
ཀྱི་ཞིང་ཕུལ་དང་། སངས་རྒྱས་ཀྱི་ཞིང་དམ་པ་དང་། སངས་རྒྱས་ཀྱི་ཞིང་གྱ་ནོམ་པ་དང་། སངས་རྒྱས་ཀྱི་ཞིང་རྨད་དུ་བྱུང་བ་དང་། སངས་རྒྱས་ཀྱི་ཞིང་བླ་ན་མེད་པ་དང་། སངས་རྒྱས་ཀྱི་ཞིང་མཉམ་པ་མེད་པ་དང་། སངས་རྒྱས་ཀྱི་ཞིང་འདྲ་བ་མེད་པ་དང་། སངས་
རྒྱས་ཀྱི་ཞིང་མཐའ་ཡས་པ་དང་། དེ་ལྟར་ཡོངས་སུ་བཟུང་སྟེ། འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་ཐམས་ཅད་ཀྱི་སངས་རྒྱས་ཀྱི་ཞིང་གི་རྒྱན་རྣམ་པར་དག་པ་གང་ཇི་སྙེད་པའི་རྒྱན་རྣམ་པར་དག་པ་དང་། དགེ་བའི་རྩ་བ་འདིས་འཇིག་རྟེན་གྱི་ཁམས་
ཐམས་ཅད་རྣམ་པར་དག་པར་གྱུར་ཅིག །སངས་རྒྱས་ཀྱི་ཞིང་ཐམས་ཅད་རྣམ་པ་འདི་ལྟ་བུའི་རྣམ་པར་དག་པ་དང་ལྡན་པར་གྱུར་ཅིག །འཇིག་རྟེན་གྱི་ཁམས་རེ་རེར་ཡང་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་ཐམས་ཅད་ཀྱི་སངས་རྒྱས་ཀྱི་ཞིང་གི་རྒྱན་ཇི་སྙེད་པ་དེ་དག་ཐམས་ཅད་ཡང་
དག་པར་གནས་པར་གྱུར་ཅིག །གྲུབ་པར་གྱུར་ཅིག །རྣམ་པར་དག་པར་གྱུར་ཅིག །ཡོངས་སུ་དག་པར་གྱུར་ཅིག །ཡང་དག་པར་གྲུབ་པར་གྱུར་ཅིག །རབ་ཏུ་བྱུང་བར་གྱུར་ཅིག །རབ་ཏུ་བརྒྱན་པར་གྱུར་ཅིག །ཀུན་ཏུ་བརྒྱན་པར་གྱུར་ཅིག །བྱང་བར་གྱུར་
ཅིག །བྱིན་གྱིས་བརླབས་པར་གྱུར་ཅིག །འཇིག་རྟེན་གྱི་ཁམས་གཅིག་ཏུ་ཇི་ལྟ་བ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་དུ་འང་མ་ལུས་པར་བཟུང་སྟེ། སངས་རྒྱས་ཀྱི་ཞིང་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པ་ཐམས་ཅད་མ་ལུས་
པར་དེ་སྙེད་ཀྱི་རྒྱན་གྱིས་ཡོངས་སུ་བརྒྱན་པར་གནས་པར་གྱུར་ཅིག །སངས་རྒྱས་ཀྱི་ཞིང་ཐམས་ཅད་མ་ལུས་པར་དུས་གསུམ་ཐམས་ཅད་ཀྱི་སངས་རྒྱས་ཀྱི་ཞིང་གི་ཡོན་ཏན་རྣམ་པར་ཕྱེ་བ་དང་། སངས་རྒྱས་ཀྱི་ཞིང་གི་རྒྱན་དང་། སངས་རྒྱས་ཀྱི་ཞིང་གི་བདག་ཉིད་ཆེ་བ་དང་། སངས་

རྒྱས་ཀྱི་ཞིང་བལྟ་ན་མྱི་ངོམས་པ་དང་། སངས་རྒྱས་ཀྱི་ཞིང་ཚད་མེད་པ་དང་། སངས་རྒྱས་ཀྱི་ཞིང་ཡངས་པ་དང་། སངས་རྒྱས་ཀྱི་ཞིང་གྲངས་མྱེད་པ་དང་། སངས་རྒྱས་ཀྱི་ཞིང་བསམ་གྱིས་མྱི་ཁྱབ་པ་དང་། སངས་རྒྱས་ཀྱི་ཞིང་མཚུངས་པ་མེད་པ་དང་། སངས་རྒྱས་
ཀྱི་ཞིང་མཐའ་ཡས་པ་ཇི་སྙེད་པ་དེ་དག་གི་རྒྱན་གྱིས་རྣམ་པར་དག་པར་གྱུར་ཅིག །སངས་རྒྱས་ཀྱི་ཞིང་དེ་དག་ཐམས་ཅད་ཀྱང་བྱང་ཆུབ་སེམས་དཔའ་ཡོངས་སུ་རྫོགས་པ་རྗེས་སུ་འཇུག་པ། འཇིག་རྟེན་གྱི་ཁམས་ལ་རབ་ཏུ་འཇུག་པ། ཀུན་ཏུ་སྤྱོད་པ་
མང་བ། སེམས་ཅན་གྱི་ཁམས་རྟོགས་པར་བྱ་བ་ཁོང་དུ་ཆུད་པ། ཆོས་ཀྱི་དབྱིངས་ལ་འཇུག་པ་རབ་ཏུ་རྟོགས་པ། ནམ་མཁའི་དབྱིངས་ལ་འཇུག་པ་རྨོངས་པ་མྱེད་པ། སངས་རྒྱས་རྗེས་སུ་དྲན་པ་རབ་ཏུ་ཐོབ་པ། བསམ་གྱིས་མི་ཁྱབ་པའི་ཆོས་རྗེས་སུ་དྲན་པའི་
ཚུལ་ཅན་ཚད་མྱེད་པའི་དགེ་འདུན་རྗེས་སུ་དྲན་པ་ལ་རབ་ཏུ་ཞུགས་པ། གཏོང་བ་ལ་ཤིན་ཏུ་མོས་པ། གཏོང་པའི་རྗེས་སུ་དྲན་པ་རབ་ཏུ་ཐོབ་པ། ཡེ་ཤེས་ཀྱི་འོད་གཟེར་དང་ལྡན་པའི་ཆོས་ཀྱི་ཉི་མའི་དཀྱིལ་འཁོར་ཅན་ཆགས་པ་མྱེད་པར་ལྟ་བ་དམྱིགས་སུ་
མེད་པ་ལས་རབ་ཏུ་བྱུང་བ། སངས་རྒྱས་ཀྱི་ཆོས་ཀྱི་གནས་སུ་གྱུར་པ། དགེ་བའི་རྩ་བ་དམ་པས་ཐོག་མར་འགྲོ་བ་དང་། དགེ་བའི་རྩ་བའི་དབང་གིས་སངས་རྒྱས་ཀྱི་བྱང་ཆུབ་ཏུ་བྱུང་བ། དེ་བཞིན་གཤེགས་པའི་སྟོབས་ཀྱི་རྗེས་སུ་སོང་བ། ཐམས་ཅད་མཁྱེན་པ་
ཉིད་ཀྱི་ཡུལ་གྱི་འོད་གཟེར་རབ་ཏུ་འགྱེད་པ། བདུད་ཀྱི་ལས་ཐམས་ཅད་རྣམ་པར་སྦྱངས་པ། སེམས་ཅན་གྱི་ཁམས་ཐམས་ཅད་ཀྱི་རང་བཞིན་ཁོང་དུ་ཆུད་པ། ཕྱིན་ཅི་ལོག་མྱེད་པས་ཡང་དག་པར་བྱུང་བ། དགེ་བའི་རྩ་བ་དང་སྨོན་ལམ་ལ་གཏི་མུག་མྱེད་པ་ཤ་
སྟག་གིས་ཡོངས་སུ་གང་བར་གྱུར་ཅིག །བྱང་ཆུབ་སེམས་དཔའ་དེ་ལྟ་བུའི་ཚུལ་ཅན་དེ་ལྟ་བུའི་སྤྱོད་པ་ལ་ཞུགས་པ་དེ་ལྟ་བུའི་ཡོན་ཏན་དང་ལྡན་པ་དགེ་བའི་རྩ་བ་མཚུངས་པ་མྱེད་པ་ཅན་རྟག་ཏུ་སངས་རྒྱས་ཀྱི་ཕྲིན་ལས་ལ་གཞོལ་བ། སངས་རྒྱས་ཀྱི་བྱང་ཆུབ་སྣང་བ་

རབ་ཏུ་ཐོབ་པ། མུན་པ་མྱེད་པའི་ཆོས་ཀྱི་དབྱིངས་ཀྱི་ཡེ་ཤེས་དང་ལྡན་པ། ཆོས་ཀྱི་དབྱིངས་ཐམས་ཅད་ལུས་གཅིག་གིས་ཁྱབ་པར་བྱེད་པའི་རྣམ་པར་འཕྲུལ་པ་ཆེན་པོ་ཡང་དག་པར་སྟོན་པ། ཡེ་ཤེས་ཆེན་པོ་ཁོང་དུ་ཆུད་པས་ཐམས་
ཅད་མཁྱེན་པ་ཉིད་ཀྱི་སྤྱོད་ཡུལ་དང་ལྡན་པ། ཆོས་ཀྱི་དབྱིངས་མཐའ་ཡས་པའི་ཚིག་རབ་ཏུ་དབྱེ་བ། མངོན་པར་བསྒྲུབ་པ་ལ་མཁས་པ། ཞིང་ཐམས་ཅད་ཀྱི་རྗེས་སུ་སོང་བ་གནས་མེད་པར་སངས་རྒྱས་ཀྱི་ཞིང་ཐམས་ཅད་ན་གནས་པ། ནམ་མཁའི་དབྱིངས་སུ་
མོས་པས་མྱི་གནས་པའི་ཡིད་དང་ལྡན་པ། ཆོས་ཀྱི་དབྱིངས་ཐམས་ཅད་དུ་རྣམ་པར་ཕྱེ་བའི་བསམ་པ་ཅན། བྱང་ཆུབ་སེམས་དཔའི་ཏིང་ངེ་འཛིན་བསམ་གྱིས་མི་ཁྱབ་པ་ལ་མཉམ་པར་གཞོལ་བ་ལ་མཁས་པ། ཐམས་ཅད་མཁྱེན་པའི་སྤྱོད་ཡུལ་ཀྱི་སངས་རྒྱས་ཀྱི་
ཞིང་ལ་གནས་པ། སངས་རྒྱས་ཐམས་ཅད་ཀྱི་བྱིན་གྱི་རླབས་ཤེས་པར་བྱ་བ་ལ་མཁས་པ། ཆོས་གྲངས་མྱེད་པ་བསྟན་ཅིང་བཤད་པ་ལ་འཇིགས་པ་མྱེད་པ། འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་ཐམས་ཅད་ཀྱི་དགེ་བའི་རྗེས་སུ་སོང་བ།
དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་དབྱིངས་ལ་གནས་པ། སངས་རྒྱས་ཐམས་ཅད་ཀྱིས་ཆོས་བསྟན་པ་ཡོངས་སུ་འཛིན་པ། སྒྲ་བསམ་གྱིས་མི་ཁྱབ་པ་རྣམ་པར་དབྱེ་ཞིང་མངོན་པར་བསྒྲུབ་པ་ལ་མཁས་པ། གྲངས་མྱེད་པའི་སྐད་རྣམ་པ་ཐ་དད་པ་ཤེས་
པ། བླ་ན་མྱེད་པའི་སངས་རྒྱས་ཀྱི་རྣམ་པར་འཕྲུལ་པའི་ས་ཁོང་དུ་ཆུད་པ། འཇིག་རྟེན་གྱི་ཁམས་ཐམས་ཅད་ཀྱི་རྗེས་སུ་སོང་ཞིང་ཆགས་པ་མྱེད་པར་སྤྱོད་པ། ཉོན་མོངས་པ་མྱེད་པའི་ཆོས་ཀྱི་ཚུལ་ལ་ཆོས་སུ་རྟོགས་པས་གནས་པ་མྱེད་པ། སེམས་བསྐྱེད་པ་
ཡངས་པ་ཤིན་ཏུ་རྣམ་པར་བསྒོམས་པ་རབ་ཏུ་ཐོབ་པ། ཡེ་ཤེས་གཅིག་ནས་གཅིག་ཏུ་བརྒྱུད་པའི་རྒྱུད་ལ་མཁས་པ། དོན་གཅིག་ནས་གཅིག་ཏུ་བསྟན་པ་རབ་ཏུ་གྲུབ་པ། དེ་ལྟ་བུ་དག་གིས་འཇིག་རྟེན་གྱི་ཁམས་དེ་དག་ཡོངས་སུ་བརྒྱན་པར་གྱུར་

ཅིག། །ཡོངས་སུ་གང་བར་གྱུར་ཅིག །རྣམ་པར་མཛེས་པར་གྱུར་ཅིག །རྗེས་སུ་དོང་བར་གྱུར་ཅིག །ཀུན་ཏུ་གནས་པར་གྱུར་ཅིག །བསྒོམས་པར་གྱུར་ཅིག །ཤིན་ཏུ་བསྒོམས་པར་གྱུར་ཅིག །སྦྱངས་པར་གྱུར་ཅིག །ཤིན་ཏུ་སྦྱངས་པར་གྱུར་ཅིག
ཞི་བར་བྱེད་པར་གྱུར་ཅིག །སངས་རྒྱས་ཀྱི་ཞིང་རེ་རེའི་ཕྱོགས་རེ་རེ་ཞིང་ཡང་བྱང་ཆུབ་སེམས་དཔའ་ཚད་མྱེད་པ་གྲངས་མྱེད་པ་བསམ་གྱིས་མི་ཁྱབ་པ། གཞལ་དུ་མེད་པ། མུ་མྱེད་པ། ས་མཚམས་མྱེད་པ། དཔག་ཏུ་མྱེད་པ། བརྗོད་དུ་མེད་པ། བརྗོད་དུ་མེད་པའི་ཡང་བརྗོད་དུ་མྱེད་པས་ཡོངས་སུ་
རྒྱས་པར་གྱུར་ཅིག །ཕྱོགས་གཅིག་ཇི་ལྟ་བ་དེ་བཞིན་དུ་སངས་རྒྱས་ཀྱི་ཞིང་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པ། མ་ལུས་པ་ལུས་པ་མྱེད་པ། ལྷག་མ་མྱེད་པ་ཐམས་ཅད་ཀྱང་བྱང་ཆུབ་སེམས་དཔའ་འདི་ལྟ་བུའི་ཚུལ་ཅན་གྱིས་ཡོངས་སུ་རྒྱས་
ཤིང་ཡོངས་སུ་གང་བར་གྱུར་ཅིག་ཅེས། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་ཡོངས་སུ་བསྔོ་སྟེ། ཚུལ་དེ་ལྟ་བུས་སངས་རྒྱས་ཀྱི་ཞིང་ཐམས་ཅད་དང་། ཚུལ་དེ་ལྟ་བུས་འབྱུང་བ་ཐམས་ཅད་དང་། ཚུལ་དེ་ལྟ་བུས་སེམས་ཅན་གྱི་ཁམས་
ཐམས་ཅད་རྣམ་པར་དག་པ་དང་། ཚུལ་དེ་ལྟ་བུས་སངས་རྒྱས་ཐམས་ཅད་ཀྱི་བྱང་ཆུབ་དང་། ཚུལ་དེ་ལྟ་བུས་སྨོན་ལམ་ཐམས་ཅད་དང་། ཚུལ་དེ་ལྟ་བུས་འཇིག་རྟེན་གྱི་ཁམས་ཐམས་ཅད་དུ་སངས་རྒྱས་སྐྱེས་པ་མཐོང་བ་དང་། མྱི་འབྲལ་བ་དང་། ཚུལ་དེ་ལྟ་བུས་དེ་
བཞིན་གཤེགས་པའི་སྐུ་ཚེ་ཚད་མྱེད་པ་དང་། ཚུལ་དེ་ལྟ་བུས་ཐོགས་པ་མྱེད་པར། ཆོས་ཀྱི་དབྱིངས་ཐམས་ཅད་དུ་ཆོས་ཀྱི་འཁོར་ལོ་བསྐོར་བ། ཕྱིར་མྱི་ལྡོག་པའི་ཕྱིར་ཡོངས་སུ་བསྔོའོ། །དེ་ལྟར་བྱང་ཆུབ་སེམས་དཔའ་དེ་དགེ་བའི་རྩ་བ་དེ་དག་སངས་རྒྱས་ཀྱི་ཞིང་ཐམས་
ཅད་ཀྱི་རྗེས་སུ་སོང་བའི་སངས་རྒྱས་ཀྱི་ཞིང་ཡོངས་སུ་དག་པ་དང་། སེམས་ཅན་ཐམས་ཅད་ཀྱི་རྗེས་སུ་སོང་བའི་བྱང་ཆུབ་སེམས་དཔའ་ཡོངས་སུ་དག་པ་དང་། སངས་རྒྱས་ཀྱི་སྐྱེ་བ་ཐམས་ཅད་ཀྱིས་མ་ལུས་པར་གང་བར་བྱས་པའི་ཆོས་ཀྱི་དབྱིངས་ཡོངས་སུ་དག་པ་དང་། སངས་རྒྱས་ཀྱི་

ཞིང་ཐམས་ཅད་མ་ལུས་པར་ཤིན་ཏུ་བྱུང་བའི་དེ་བཞིན་གཤེགས་པའི་སྐུ་དང་། ཐམས་ཅད་མཁྱེན་པར་འབྱུང་བར་བགོ་སྐལ་མེད་པར་ཡོངས་སུ་བསྔོས་པ་དང་། ནམ་མཁའི་ཁམས་ཚད་མེད་པའི་རྗེས་སུ་སོང་བའི་སེམས་ཀྱི་ས་དང་། ཡོངས་
སུ་བསྔོ་བའི་ཚད་བསམ་གྱིས་མི་ཁྱབ་པའི་རྗེས་སུ་ཞུགས་པ་དང་། ཡོངས་སུ་བསྔོ་བ་མཉམ་པ་ཉིད་ལས་ཀྱི་རྣམ་པར་སྨིན་པ་ཐམས་ཅད་ལས་རྣམ་པར་གྲོལ་ཞིང་ཤིན་ཏུ་མོས་པ་དང་། ཡོངས་སུ་བསྔོ་བའི་ཁྱད་པར་མཐའ་ཡས་པར་འབྲེལ་བར་བྱས་པ་དང་། ཡོངས་སུ་
བསྔོ་བའི་ཚུལ་ཆོས་ཀྱི་དབྱིངས་ཐམས་ཅད་ཀྱི་རྗེས་སུ་སོང་བས་ཡོངས་སུ་བསྔོ་བའི་ཚེ་བདག་ལ་མི་རྟོག་གོ །བདག་གི་ལུས་ལ་རྣམ་པར་མི་རྟོག་གོ །སངས་རྒྱས་ལ་མི་རྟོག་གོ །སངས་རྒྱས་ཀྱི་ཆོས་ལ་རྣམ་པར་མི་རྟོག་གོ །ཞིང་ལ་མི་རྟོག་གོ །ཞིང་གི་ཡང་དག་པར་སྤྱོད་པས་རྣམ་
པར་དག་པ་ལ་རྣམ་པར་མི་རྟོག་གོ །སེམས་ཅན་ལ་རྣམ་པར་མི་རྟོག་གོ །སེམས་ཅན་གདུལ་བ་ལ་རྣམ་པར་མི་རྟོག་གོ །ལས་ལ་མི་རྟོག་གོ །ལས་ཀྱི་རྣམ་པར་སྨིན་པ་ལ་རྣམ་པར་མི་རྟོག་གོ །སེམས་པ་ལ་ཆགས་པར་མི་བྱེད་དོ །བསམ་པས་ཀྱང་མངོན་པར་ཆགས་པར་མི་བྱེད་དོ། །
རྒྱུ་ཆུད་གཟོན་པར་མི་བྱེད་དོ། །རྒྱུ་དང་འབྲས་བུ་ཆུད་གཟོན་པར་མི་བྱེད་དོ། །དངོས་པོ་ཉེ་བར་ལེན་པར་མི་བྱེད་དོ། །དངོས་པོའི་ཆོས་ལ་ཆགས་པར་ཡང་མི་བྱེད་དོ། །འཁོར་བའི་རྣམ་པ་ཐ་དད་པ་གཅིག་ཏུ་མི་བྱེད་དོ། །ཞི་བ་རྣམ་པར་བརྟགས་པ་མེད་པས་རློམ་སེམས་མི་བསྐྱེད་
དོ། །དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཡུལ་གྱིས་བསྙེམས་པར་མི་བྱེད་དོ། །ཆོས་གང་གིས་ཀྱང་ཆོས་ལ་གནས་པར་མི་བྱེད་དོ། །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་དེ་དག་ཉེ་བར་སྟོབས་སོ། །ཁོང་དུ་ཆུད་པར་བྱེད་དོ། །ཡོངས་སུ་བསྔོའོ། །ཡོངས་སུ་སྨིན་པར་བྱེད་
དོ། །མཉམ་པར་བྱེད་དོ། །སྒྲུབ་བོ། །མཚན་མར་མི་བྱེད་དོ། །དམིགས་པར་མི་བྱེད་དོ། །མི་འཇལ་ལོ། །མི་རྟོག་གོ །རྣམ་པར་མི་རྟོག་གོ །བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་ཡོངས་སུ་བསྔོ་བ་ནི་འདས་པ་དང་མ་བྱོན་པ་དང་ད་ལྟར་བྱུང་བའི་སངས་རྒྱས་ཐམས་ཅད་རྗེས་སུ་དྲན་པས་དགེ་བའི་རྩ་བ་མྱི་ཟད་པ་ཡིན།

བྱང་ཆུབ་སེམས་དཔའ་ཐམས་ཅད་ལ་ཡང་དག་པར་འཇུག་པས། དགེ་བའི་རྩ་བ་ཐམས་ཅད་མྱི་ཟད་པ་ཡིན། ཞིང་རྣམ་པར་དག་པས་ཡོངས་སུ་བསྔོ་བས་དགེ་བའི་རྩ་བ་མྱི་ཟད་པ་ཡིན། སེམས་ཅན་གྱི་ཁམས་རྣམ་པར་དག་པ་ལ་རྣམ་པར་དཔྱོད་པས་དགེ་བའི་རྩ་བ་མྱི་ཟད་པ་ཡིན།
ཆོས་ཀྱི་དབྱིངས་སུ་འཇུག་པ་ལ་ཞུགས་པས་དགེ་བའི་རྩ་བ་མྱི་ཟད་པ་ཡིན། ནམ་མཁའི་ཁམས་ལྟར་ཚད་མྱེད་པའི་སེམས་ལ་ཡོངས་སུ་སྒོམ་པས་དགེ་བའི་རྩ་བ་མྱི་ཟ