Kinh tạng Tây Tạng (Kangyur Đại Học) — 036_ཕལ་ཆེན།_ཁ

་ཐམས་ཅད་ཐོས་པ་ཤིན་ཏུ་འཛིན་པ་ལ་ཞུགས་པར་
གྱུར་ཅིག །སེམས་ཅན་ཐམས་ཅད་སྦྱིན་པའི་མཛོད་ཀྱིས་དགའ་བར་སྤྱོད་ཅིང་གཏོང་བ་ཤིན་ཏུ་བྱེད་པ་དང་། མཆོད་སྦྱིན་ཤིན་ཏུ་བྱས་པས་སངས་རྒྱས་ཀྱི་བསྟན་པ་ལ་ཡོན་ཏན་ཇི་ལྟ་བ་བཞིན་དུ་རྟོགས་པ་ཕུན་སུམ་ཚོགས་པར་གྱུར་ཅིག་ཅེས། དེ་ལྟར་
བྱང་ཆུབ་སེམས་དཔའ་སེམས་དཔའ་ཆེན་པོ། ཉན་ཐོས་དང་རང་སངས་རྒྱས་ལ་ཤིང་རྟ་འབུལ་བའི་ཚེ། དགེ་བའི་རྩ་བ་དེ་དག་སེམས་ཅན་ཐམས་ཅད་ཀྱི་ཡེ་ཤེས་དང་མངོན་པར་ཤེས་པ་རྣམ་པར་དག་པ་མཆོག་དམ་པ་ཕུལ་རབ་ཏུ་འཐོབ་ཅིང་ཅི་ནས་

ཀྱང་མྱི་འཇིགས་པ་དང་ཐམས་ཅད་མཁྱེན་པའི་སྟོབས་དང་མྱི་འཇིགས་པ་རབ་ཏུ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་གནས་དང་ལེན་པ་སྣ་ཚོགས་ཕྱོགས་གཞན་དང་གཞན་ནས་
འོངས་པའི་གང་ཟག་དང་། སློང་བ་ཕོངས་པ་དང་བཀྲེན་པ་མང་པོ་ཚད་མྱེད་པ་བྱང་ཆུབ་སེམས་དཔའི་སྒྲ་ཐོས་ཏེ་འོངས་པ་དང་། བྱང་ཆུབ་སེམས་དཔའི་སྨོན་ལམ་དང་། སེམས་བསྐྱེད་པས་མོས་ཤིང་བསྟབས་པ་ཐམས་ཅད་གཏོང་བས་ཤིན་ཏུ་རེ་བའི་
ཡིད་ཅན་དེ་དག་འོངས་པ་མཐོང་ནས། སློང་བ་ལ་རིམ་གྲོ་བྱ་བས་མྱི་ངོམས་པའི་སེམས་ཀྱིས་སློང་བ་འོངས་པ་རྣམས་ལ་བཟོད་པ་གསོལ་བའི་སེམས་བསྐྱེད་དེ། འདི་ལྟར་བདག་ཉིད་ཕྱོགས་དེ་དག་ཏུ་ཁྱོད་ཀྱི་དྲུང་དུ་སོང་སྟེ་རིམ་གྲོ་བྱ་བ་ཞིག་ན། དེ་འདི་ལྟར་
ཁྱོད་འདིར་ཕྱིན་ཏེ་ཤིན་ཏུ་ངལ་བར་གྱུར་ཏོ། །ཞེས་སྤྱི་བོས་བཏུད་དེ་བཟོད་པ་གསོལ་བས་སློང་བ་ཐམས་ཅད་བཟོད་པར་བྱས་རིམ་གྲོར་བྱས། ངལ་བ་བསྟིས་ནས་ཅི་འདོད་པ་སྦྱིན་པ་དེ་དག་གིས་ཤིན་ཏུ་རིམ་གྲོར་བྱེད་དེ། འདི་ལྟར་ནོར་བུའི་ཤིང་རྟ་
འཛམ་བུའི་གླིང་གི་ན་ཆུང་བཟང་མོ་རིན་པོ་ཆེས་ཡོངས་སུ་གང་བ་དང་། འདི་ལྟ་སྟེ་གསེར་གྱི་ཤིང་རྟ་ཡུལ་གྱི་ན་ཆུང་རིན་པོ་ཆེ་ཤིན་ཏུ་རྣམ་པར་དག་པས་ཡོངས་སུ་བཀང་བ་དང་། འདི་ལྟ་སྟེ་བཻ་ཌཱུརྱའི་ཤིང་རྟ་ཆུང་མའི་འཁོར་གླུ་དང་རོལ་མོ་བརྡུང་ཞིང་དཀྲོལ་
བ་དང་ལྡན་པས་ཡོངས་སུ་བཀང་བ་དང་། འདི་ལྟ་སྟེ་དངུལ་གྱི་ཤིང་རྟ་ཤིན་ཏུ་མཛེས་པ་བུད་མྱེད་གཞོན་ནུ་ལྷའི་བུ་མོ་ལྟ་བུས་ཡོངས་སུ་གང་བ་དང་། འདི་ལྟ་སྟེ་རིན་པོ་ཆེ་བྱེ་བ་ཁྲག་ཁྲིག་བརྒྱ་སྟོང་གྲངས་མྱེད་པའི་རྒྱན་གྱིས་བརྒྱན་པའི་ཤིང་རྟ་བུད་མྱེད་
ཅང་ཤེས་རིན་པོ་ཆེ་རྒྱན་ཐམས་ཅད་ཀྱིས་བརྒྱན་པ་ཚུལ་མཁས་པས་ཡོངས་སུ་གང་བ་དང་། འདི་ལྟ་སྟེ་ཙན་དན་གྱི་ཤིང་རྟ་བྱང་ཆུབ་སེམས་དཔའ་ཞོན་པར་འོས་པ་དང་། འདི་ལྟ་སྟེ་ཤེལ་གྱི་ཤིང་རྟ་བུད་མྱེད་བཟང་མོ་བཞིན་བཟང་བ་ཆ་བྱད་སྡུག་གུ་ཤིན་

ཏུ་བརྒྱན་པ་གཟུགས་མཛེས་པ་ལྟ་ན་སྡུག་ཅིང་མྱི་མཐུན་པ་མེད་པས། ཡོངས་སུ་བཀང་བ་དང་། འདི་ལྟ་སྟེ་ཨ་སྨ་གར་བའི་ཤིང་རྟ་དབང་བསྐུར་བས་ཡོངས་སུ་གང་བ་དང་། འདི་ལྟ་སྟེ་སྤོས་དམ་པའི་ཤིང་རྟ་བུ་དང་བུ་མོས་ཡོངས་
སུ་བཀང་བ་དང་། འདི་ལྟ་སྟེ་རིན་པོ་ཆེའི་ཚོགས་ཐམས་ཅད་ཀྱིས་བརྒྱན་པའི་ཤིང་རྟ་ནང་གི་བཤེས་གཉེན་དབྱེར་མྱི་ཕྱེད་པས་ཡོངས་སུ་བཀང་བ་དང་། དེ་རྣམ་པ་འདི་ལྟ་བུའི་ཤིང་རྟ་གྲངས་མྱེད་པ་རྣམ་པ་སྣ་ཚོགས་སློང་མོ་བ་ཐམས་ཅད་ལ་སྦྱིན་ཞིང་ཡོངས་སུ་གཏོང་
བས་སློང་བ་འདོད་པར་བྱ་བའི་དངོས་པོ་རབ་ཏུ་ཐོབ་པས་ཡིད་ལ་བསམ་པ་ཤིན་ཏུ་རྫོགས་ནས་སློང་བ་དེ་དག་ཐམས་ཅད་སྦྱིན་པ་ཐམས་ཅད་སྦྱིན་པའི་ཚུལ་གྱིས་ཡང་དག་པར་བཟུང་སྟེ། ཤིན་ཏུ་ཚིམ་པར་བྱས་ཤིང་བསམ་པ་རྫོགས་པར་བྱས་ནས་དགའ་བ་དང་མགུ་བ་དང་
རང་ས་པ་དང་ཡིད་བདེ་བ་སྐྱེས་པར་བྱས་ཏེ། དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོའོ། །སེམས་ཅན་ཐམས་ཅད་བྱང་ཆུབ་ཀྱི་ཤིང་དྲུང་དུ་བསམ་གྱིས་མི་ཁྱབ་ཅིང་ཐོགས་པ་མེད་པའི་ཤིང་རྟའི་འཁོར་ལོ་ཕྱིར་མྱི་ལྡོག་པས་འགྲོ་བ་དང་ལྡན་ཏེ།
ཐོག་པ་ཆེན་པོའི་ཤིང་རྟ་ལ་ཞོན་པར་གྱུར་ཅིག །སེམས་ཅན་ཐམས་ཅད་བྱང་ཆུབ་སེམས་དཔའི་སྤྱོད་པ་ཐམས་ཅད་ལ་སྤྱོད་ཅིང་ཕྱི་མའི་མཐའི་བསྐལ་པའི་མུར་ཐུག་པར་ཕྱིར་མྱི་ལྡོག་པར་ཆོས་ཀྱི་ཤིང་རྟ་ཅང་ཤེས་ལ་ཞོན་པར་གྱུར་ཅིག །སེམས་ཅན་ཐམས་ཅད་
ཆོས་ཐམས་ཅད་ལ་རྣམ་པར་རྟོག་པའི་རློམ་སེམས་མེད་ཅིང་ཐམས་ཅད་མཁྱེན་པའི་རིགས་ཀྱི་ལམ་ལ་བརྩོན་པས་ཆོས་ཐམས་ཅད་ཅི་ཡང་མ་ཡིན་པའི་ཤིང་རྟ་ལ་ཞོན་པར་གྱུར་ཅིག །སེམས་ཅན་ཐམས་ཅད་ཐོགས་པ་མེད་པའི་རྫུ་འཕྲུལ་གྱིས། སངས་རྒྱས་ཀྱི་
ཞིང་ཐམས་ཅད་དུ་འགྲོ་བ་ལ་བརྩོན་པས་ཀུན་ཏུ་འགྲོ་བ་དྲི་མ་མྱེད་པའི་ཤིང་རྟ་ལ་ཞོན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་ཀྱི་ཆོས་ལ་དགའ་བས་མོས་ཤིང་ཡང་དག་པར་འགྲོ་བ་ལ་བརྩོན་པས་ཐམས་ཅད་མཁྱེན་པའི་ཐེག་པའི་ཤིང་རྟ་

རྗེས་སུ་འཐུན་པ་ལ་རབ་ཏུ་གནས་པར་གྱུར་ཅིག །སེམས་ཅན་ཐམས་ཅད་བྱང་ཆུབ་སེམས་དཔའི་འབྱུང་བའི་ལམ་བཅུ་དང་། བྱང་ཆུབ་སེམས་དཔའི་ཏིང་ངེ་འཛིན་ཐམས་ཅད་ལ་རབ་ཏུ་དགའ་བའི་ཡིད་དང་ལྡན་ཞིང་བྱང་ཆུབ་སེམས་དཔའི་སྤྱོད་པ་རྣམ་
པར་དག་པའི་ཤིང་རྟ་ལ་ཞོན་པར་གྱུར་ཅིག །སེམས་ཅན་ཐམས་ཅད་ཚུལ་དང་འདྲ་བའི་ཡུལ་ན་གནས་པ་དང་ལྡན་པ་དང་། སྐྱེས་བུ་དམ་པ་ལ་རྟེན་པ་ཐོབ་པས། སྔོན་བྱས་པའི་བསོད་ནམས་ཤིན་ཏུ་བསྩགས་པ་དང་། ཡང་དག་པའི་སྨོན་ལམ་
ལ་ཤིན་ཏུ་བརྩོན་པ་དང་། བྱང་ཆུབ་སེམས་དཔའི་ཚངས་པར་སྤྱོད་པ་རྣམ་པར་དག་པ་ཡོངས་སུ་རྫོགས་པ་ཕུན་སུམ་ཚོགས་པས་འཁོར་ལོ་བཞི་པའི་ཤིང་རྟ་ལ་ཞོན་པར་གྱུར་ཅིག །སེམས་ཅན་ཐམས་ཅད་དེ་བཞིན་གཤེགས་པ་མ་ལུས་པའི་སྟོབས་
དང་ཡེ་ཤེས་ལ་བརྩོན་པས་ཕྱོགས་ཐམས་ཅད་ཀྱི་ཆོས་ཀྱི་དབྱིངས་སུ་ཆོས་ཀྱི་སྣང་བ་གཏོང་བ་ལ་བསླབ་པར་གྱུར་ཅིག །སེམས་ཅན་ཐམས་ཅད་ཆོས་ཀྱི་ཤིང་རྟས་འབྱུང་བའི་ཕ་རོལ་དུ་ཕྱིན་པ་ཐོབ་སྟེ། སངས་རྒྱས་ཀྱི་ཆོས་ཀྱི་ཤིང་རྟ་ལ་ཞོན་པར་གྱུར་ཅིག །
སེམས་ཅན་ཐམས་ཅད་ཕྱོགས་ཐམས་ཅད་དུ་ལེགས་པ་དང་བདེ་བ་ཡང་དག་པར་སྟོན་པས་བསོད་ནམས་ཐམས་ཅད་དགེ་བའི་རྩ་བ་ཚད་མྱེད་པ་དང་། ཆོས་བསམ་གྱིས་མི་ཁྱབ་པའི་ཤིང་རྟ་ལ་མཁས་པར་གྱུར་ཅིག །སེམས་ཅན་ཐམས་ཅད་འཇུངས་པའི་དྲི་
མ་རབ་ཏུ་བྱང་སྟེ་སྦྱིན་པ་གཏོང་བས་འབྱུང་བའི་ཤིང་རྟ་དང་ལྡན་པར་གྱུར་ཅིག །སེམས་ཅན་ཐམས་ཅད་ཆོས་ཀྱི་དབྱིངས་མཐའ་དང་དབུས་མེད་པ་མ་ལུས་པས་ཚུལ་ཁྲིམས་རྣམ་པར་དག་པས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་ཡེ་ཤེས་རྣམ་པར་དག་པའི་
ཤིང་རྟ་དང་ལྡན་པར་གྱུར་ཅིག །སེམས་ཅན་ཐམས་ཅད་སེམས་འཁྲུགས་པ་མྱེད་པར་གནས་པས་འགྲོ་བ་ཐམས་ཅད་ཀྱི་བསམ་པ་འཁྲུགས་པ་མྱེད་ཅིང་བཟོད་པའི་ཕ་རོལ་ཏུ་ཕྱིན་པའི་ཡེ་ཤེས་ཀྱི་ཤིང་རྟ་དང་ལྡན་པར་གྱུར་ཅིག །སེམས་ཅན་ཐམས་

ཅད་འབྱུང་བའི་ཤིང་རྟས་སྙིང་པོ་བྱང་ཆུབ་ཏུ་འགྲོ་བར་སྤྱོད་པའི་གོ་ཆ་བགོས་པས་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་ཡེ་ཤེས་ཀྱི་ཤིང་རྟ་དང་ལྡན་པར་གྱུར་ཅིག །སེམས་ཅན་ཐམས་ཅད་ཤིན་ཏུ་མགྱོགས་པའི་ཤིང་རྟས་སྙིང་པོ་
བྱང་ཆུབ་ཏུ་བྱུང་སྟེ། བསམ་གཏན་གྱི་ཕ་རོལ་ཏུ་ཕྱིན་པའི་ཡེ་ཤེས་ཀྱི་ཤིང་རྟ་དང་ལྡན་པར་གྱུར་ཅིག །སེམས་ཅན་ཐམས་ཅད་ཆོས་ཀྱི་དབྱིངས་ཀྱི་ཤིང་རྟ་ལ་ཤིན་ཏུ་ཞོན་ཞིང་སངས་རྒྱས་ཀྱི་ཡུལ་སྤྲུལ་པས་རྒྱས་པར་བྱེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་
པའི་ཡེ་ཤེས་ཀྱི་ཤིང་རྟ་དང་ལྡན་པར་གྱུར་ཅིག །སེམས་ཅན་ཐམས་ཅད་ཆོས་ཡོངས་སུ་གཏོང་བ་ལ་འཇིགས་པ་མེད་པས་ཐམས་ཅད་མཁྱེན་པ་ཉིད་ཀྱི་དོན་དུ་སྦྱིན་པ་གཏོང་བའི་ཕྱིར་ཆོས་ཀྱི་རྒྱལ་པོའི་ཤིང་རྟ་ལ་ཞོན་པར་གྱུར་ཅིག །སེམས་ཅན་ཐམས་ཅད་
ཆོས་ཀྱི་མཚན་ཉིད་དང་རང་བཞིན་གྱི་ཕྱོགས་ཐམས་ཅད་ལ་རབ་ཏུ་འཇུག་པ་རྨོངས་པ་མེད་པའི་ཕྱིར་སྨོན་ལམ་ལ་མྱི་གནས་པའི་ཡེ་ཤེས་ཀྱི་ཤིང་རྟ་དང་ལྡན་པར་གྱུར་ཅིག །སེམས་ཅན་ཐམས་ཅད་ཐེག་པ་ཆེན་པོ་མ་ནོར་བས་འཇིག་རྟེན་གྱི་ཁམས་ཐམས་ཅད་དུ་སྐྱེ་
ཞིང་ལུས་ཡང་དག་པར་བསྟན་པའི་ཕྱིར་སངས་རྒྱས་ཐམས་ཅད་ཀྱི་ཆོས་ཀྱི་ཤིང་རྟ་ལ་ཞོན་པར་གྱུར་ཅིག །སེམས་ཅན་ཐམས་ཅད་བྱང་ཆུབ་སེམས་དཔའ་ཀུན་ཏུ་བཟང་པོའི་སྨོན་ལམ་སྐྱོ་བ་མྱེད་པར་ཡོངས་སུ་རྫོགས་པར་བྱ་བ་དང་ཡོངས་སུ་རྫོགས་པར་བྱེད་པའི་
ཕྱིར། ཐམས་ཅད་མཁྱེན་པ་རིན་པོ་ཆེའི་ཤིང་རྟ་ལ་ཞོན་པར་གྱུར་ཅིག་ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་གནས་དང་ལེན་པ་དང་སྤོང་བ་སྣ་ཚོགས་ལ་ཤིང་རྟ་དགའ་བ་དང་། རབ་ཏུ་དགའ་བ་དང་མོས་པ་དང་སྤྲོ་བའི་
ཡིད་ཀྱི་རྣམ་པར་རྟོག་པས་བྱིན་པས་ཡོངས་སུ་བསྡུས་པའི་དགེ་བའི་རྩ་བ་དེ་དག་སེམས་ཅན་ཐམས་ཅད་ཐམས་ཅད་མཁྱེན་པའི་ཐེག་པ་ལ་བཞོན་པ་ཤིན་ཏུ་བསྒྲུབས་པས་ཡེ་ཤེས་དང་སེམས་ཀྱི་རྣམ་པ་མཐའ་ཡས་པ་ཡོངས་སུ་རྫོགས་པར་བྱ་བའི་ཕྱིར་

ཡོངས་སུ་བསྔོའོ།། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། །བམ་པོ་བཞི་བ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གླང་པོ་ཅང་ཤེས་ཡན་ལག་བདུན་ཤིན་ཏུ་གནས་
པ་ལོ་དྲུག་ཅུ་ལོན་པ་མཆེ་བ་དྲུག་དང་ལྡན་པ། ཁ་དོག་པད་མོ་ལྟ་བུ་གདོང་རྣམ་པར་དག་པ། དཀར་ཞིང་དྲི་མ་མྱེད་པ། གསེར་གྱི་རྒྱལ་མཚན་ཅན་གསེར་གྱི་རྒྱན་དང་ལྡན་པ། གསེར་གྱི་དྲ་བས་ལུས་ཀུན་ནས་ཡོག་པ། སྣ་རིན་པོ་ཆེ་སྣ་ཚོགས་ཀྱི་
དྲ་བའི་རྒྱན་དུ་བཅུག་པ། གསེར་ལྟར་བལྟ་ན་མཛེས་པ་དཔག་ཚད་སྟོང་གི་ཁྱོན་དུ་ངལ་བ་མྱེད་པར་འགྲོ་བ་སྦྱིན་ཞིང་གཏོང་བ་འམ། རྟ་ཅང་ཤེས་གོམ་པ་ཟོ་མདོག་བདེ་བར་འདོར་ཞིང་འདེག་པ་དང་། བྱ་ལྟར་མགྱོགས་པ་དང་ལྡན་པ། རྔོག་མ་ལྕང་
ལོར་འཁྲིལ་བ། ནམ་ཙོང་དང་རྨིག་པར་ལྡན་པ། རྨིག་པའི་དབྱིབས་མཐོ་ཞིང་སྐྱོན་མྱེད་པ་གསེར་གྱི་དྲིལ་བུའི་དྲ་བས་བརྒྱན་པ་རིན་པོ་ཆེ་སྣ་ཚོགས་ཀྱི་ཉི་མའི་དཀྱིལ་འཁོར་དང་། ཟླ་བ་དང་ལྡན་པ། གློ་ཀུན་ནས་བརྒྱན་པ་རིན་པོ་ཆེ་སྣ་ཚོགས་ཀྱི་གདོང་
རྒྱན་གྱིས་རྣམ་པར་བརྒྱན་པ་ཞོན་ན་བདེ་བ་ལུས་ལ་བྱམས་པ་ཤིན་ཏུ་མགྱོགས་པ་ཕྱོགས་བཞིར་ཡིད་ལྟར་མགྱོགས་པའི་ཤུགས་དང་ལྡན་པ། ལྷ་རྫས་ལྟ་བུའི་ལྷབ་ལྷུབ་ཐམས་ཅད་དང་ལྡན་པ་དེ་ལྟ་བུའི་བླ་མའི་སྐྱེ་བོ་དང་། བླ་མར་བྱ་བ་དང་། དགེ་བའི་བཤེས་
གཉེན་དང་། ཕ་དང་མ་དང་ཕོངས་པ་དང་། བཀྲེན་པ་དང་། སློང་བ་དང་ལེན་པའི་འགྲོ་བ་ཐམས་ཅད་ལ་སྦྱིན་ཞིང་ཡོངས་སུ་གཏོང་བ་དང་། སེམས་ཡངས་པས་སྦྱིན་པ་དང་། སེམས་ལ་ཆགས་པ་མེད་པར་གཏོང་བ་དང་། རྗེས་སུ་འགྱོད་པ་མྱེད་
པས་ཡིད་མགུ་བར་བྱེད་པ་དང་། སྙིང་རྗེ་ཆེན་པོས་ཡོངས་སུ་རྒྱས་པའི་བསམ་པས་གཏོང་བ་ཆེན་པོ་རབ་ཏུ་གཏོང་ཞིང་། བྱང་ཆུབ་སེམས་དཔའི་ཡོན་ཏན་ཐམས་ཅད་ལ་རབ་ཏུ་བརྩོན་པ་དང་། བྱང་ཆུབ་སེམས་དཔའི་རིགས་སུ་མངོན་པར་སྐྱེས་

པའི་བསམ་པ་ཡོངས་སུ་སྦྱོང་བའི་ཚེ། དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། སེམས་ཅན་ཐམས་ཅད་བྱང་ཆུབ་སེམས་དཔའ་ཐམས་ཅད་ཀྱི་ཡོན་ཏན་གྱི་རྒྱན་གྱིས་བྱུང་སྟེ། ཅང་ཤེས་ཀྱི་ཐེག་པ་ལ་རབ་ཏུ་གནས་
པར་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་ཀྱི་རྗེས་སུ་འགྲོ་བའི་ཆོས་ཀྱི་ཐེག་པས་བྱུང་སྟེ། ཐེག་པ་བཟང་པོའི་བཞོན་པ་ལ་མངོན་པར་ཞོན་པར་གྱུར་ཅིག །སེམས་ཅན་ཐམས་ཅད་དེ་བཞིན་གཤེགས་པའི་སྟོབས་བསྒྲིབས་པ་མེད་པའི་ཡེ་
ཤེས་ཀྱི་ཐེག་པས་སྣང་བར་གྱུར་ཏེ། ཐེག་པ་ཆེན་པོ་ལ་ཤིན་ཏུ་མོས་པར་གྱུར་ཅིག །སེམས་ཅན་ཐམས་ཅད་སྨོན་ལམ་ཐམས་ཅད་སྒྲོལ་བ་ལ་རབ་ཏུ་ཞུགས་པས་བརྩམ་པ་ཆེན་པོའི་ཐེག་པ་དང་ལྡན་པར་གྱུར་ཅིག །སེམས་ཅན་ཐམས་ཅད་དགེ་བའི་
རྩ་བ་མཉམ་པར་བསྒྲུབ་པ་ཡོངས་སུ་རྫོགས་པར་བྱ་བར་བ་ཏུ་འཐོབ་པ་ལ་ཕ་རོལ་ཏུ་ཕྱིན་པའི་ཐེག་པ་མཉམ་པ་ཉིད་ཀྱིས་བྱུང་བར་གྱུར་ཅིག །སེམས་ཅན་ཐམས་ཅད་བླ་ན་མྱེད་པའི་ཡེ་ཤེས་རིན་པོ་ཆེས་སངས་རྒྱས་ཐམས་ཅད་ཀྱི་ཆོས་ལ་ཤིན་ཏུ་འབྱུང་བའི་ཆོས་
ཅན་དུ་གྱུར་ཏེ། ཐེག་པ་རིན་པོ་ཆེ་ཡོངས་སུ་རྫོགས་པར་གྱུར་ཅིག །སེམས་ཅན་ཐམས་ཅད་བྱང་ཆུབ་སེམས་དཔའི་ཏིང་ངེ་འཛིན་ཐམས་ཅད་ཀྱི་མེ་ཏོག་རྒྱས་པའི་སེམས་དང་རྒྱུད་དུ་གྱུར་ཏེ། བྱང་ཆུབ་སེམས་དཔའི་སྤྱོད་པའི་རྒྱན་རྣམ་པར་བསགས་པའི་
ཐེག་པས་ཤིན་ཏུ་བྱུང་བར་གྱུར་ཅིག །སེམས་ཅན་ཐམས་ཅད་མཐའ་ཡས་པའི་ཐེག་པ་མྱུར་བ་ལ་མངོན་པར་བརྩོན་པའི་ཡེ་ཤེས་ཀྱི་ཆོས་ཅན་དུ་གྱུར་ཏེ། བསྐལ་པ་གྲངས་མེད་པའི་བྱང་ཆུབ་སེམས་དཔའ་སྤྱོད་པའི་རྗེས་སུ་བསམ་པ་རྗེས་སུ་སེམས་ཤིང་
རྣམ་པར་སྦྱོང་བར་གྱུར་ཅིག །སེམས་ཅན་ཐམས་ཅད་བྱང་ཆུབ་སེམས་དཔའ་ཐམས་ཅད་ཀྱིས་ཡང་དག་པར་བསྒྲུབ་པ་ལ་མཁས་པས་ལོངས་སྤྱོད་ཀྱི་མཆོག་ཐམས་ཅད་དང་ཅང་ཤེས་ཀྱི་ཐེག་པ་ཆེན་པོའི་སྦྱིན་པ་བྱེད་པར་གྱུར་ཅིག །སེམས་ཅན་

ཐམས་ཅད་འགྲོ་བ་ཀུན་ཐམས་ཅད་མཁྱེན་པ་ཉིད་ཀྱི་ལམ་གྱི་མཐར་གཏུགས་པར་མངོན་པར་གཟུང་བར་བྱ་བའི་ཕྱིར། ཐེག་པ་ཤིན་ཏུ་མཐོ་བར་གནས་ཤིང་རབ་ཏུ་བརྟན་པ་དང་ལྡན་པར་གྱུར་ཅིག་ཅེས། དེ་ལྟར་བྱང་ཆུབ་སེམས་དཔའ་
སེམས་དཔའ་ཆེན་པོ་གླང་པོ་ཅང་ཤེས་དང་རྟ་ཅང་ཤེས་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པའི་སྦྱིན་པ་བྱེད་པའི་ཚེ། དགེ་བའི་རྩ་བ་དེ་དག་སེམས་ཅན་ཐམས་ཅད་ཆགས་པ་མེད་པའི་ཐེག་པ་ལ་མངོན་པར་བསྐྱོན་ཞིང་ཡེ་ཤེས་ཀྱི་བཞོན་པ། ཡོངས་སུ་འགྲུབ་
པ་དང་དེ་བཞིན་གཤེགས་པའི་ཐེག་པ་བསྒྲིབ་པ་མེད་པས་འབྱུང་བའི་མཐར་ཐུག་པར་ཡོངས་སུ་བསྔོའོ། །འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་ལོས་སྒྱུར་བའི་རྒྱལ་པོར་གྱུར་པ་ཆོས་ཀྱི་དབང་བྱེད་པ། སྟན་གྱི་སྦྱིན་པ་བྱེད་ཅིང་
རྒྱལ་པོ་བཞུགས་པའི་ཁྲི་སྟན་བཟང་པོ་བཻ་ཌཱུརྱའི་རྐང་པ་ཅན་སེང་གེའི་ཁྲི་ལ་གནས་པ། གསེར་གྱི་རྒྱུ་དང་རིན་པོ་ཆེའི་དྲ་བས་བླས་པ། སྟན་རེག་ན་བདེ་བ་གྲངས་མྱེད་པ་དུ་མ་བཏིང་བ། ཉེན་ཀོར་སྤོས་ཀྱི་དམ་པ་ཐམས་ཅད་ཀྱིས་ཤིན་ཏུ་དྲི་ཞིམ་པར་
བྱས་པ་ནོར་བུ་རིན་པོ་ཆེ་སྣ་ཚོགས་ཀྱི་རྒྱལ་མཚན་བསྒྲེང་བ་རིན་པོ་ཆེ་བྱེ་བ་ཁྲག་ཁྲིག་བརྒྱ་སྟོང་དུ་མའི་རྒྱན་གྱིས་བརྒྱན་པ། གསེར་གྱི་དྲ་བའི་བླ་རེ་བྲེས་པ། གསེར་གྱི་དྲིལ་བུའི་དྲ་བ་འཁྲོལ་བའི་སྒྲ་ཡིད་དུ་འོང་བའི་དབྱངས་འབྱུང་བ། རིན་པོ་ཆེའི་འབྲུ་བྱེ་བ་
ཁྲག་ཁྲིག་བརྒྱ་སྟོང་ཕྲག་བཅུས་ཀུན་ནས་བསྐོར་ཏེ་རྣམ་པར་ཕྱེ་བས་ཤིན་ཏུ་འཕགས་ཤིང་བལྟ་ན་མཛེས་པ། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པས་ཀུན་ནས་བལྟ་བ། གདུགས་ཁབ་གཅིག་གིས་ས་ཆེན་པོ་ཐམས་ཅད་སྐྱོང་བར་དབང་
བསྐུར་བ། རྒྱལ་སྲིད་ཀྱི་དབང་ཕྱུག་ཐམས་ཅད་ལ་དབང་བའི་སྟན་དུ་བྱ་བ་དེ་ལ་འདུག་ཅིང་འཁོར་ལོ་ཐོགས་པ་མེད་པས་བསྐྱང་བ་དང་། ཆིས་བྱ་བ་ལ་རྒྱལ་པོའི་བཀའ་ཐམས་ཅད་ཉམས་པ་མེད་པར་ཉན་པ། དཔལ་རྣམ་པར་སྣང་བ་དང་། ཨིན་དྲ་ནཱི་ལ་

དང་། ནོར་བུ་རིན་པོ་ཆེའི་སྙིང་པོས་སྤྲས་པ། ཉི་མ་དང་ཟླ་བ་དང་སྐར་མ་ཆེ་ཕྲ་ལྟ་བུར་རབ་ཏུ་བརྒྱན་པ། རྒྱན་རྣམ་པ་སྣ་ཚོགས་རྨད་དུ་བྱུང་བས་བརྒྱན་པ་རིན་པོ་ཆེ་ཁྱད་པར་དུ་འཕགས་པ་རྒྱ་མཚོས་སྤྲས་པ། རྒྱ་མཚོ་དང་།
རྒྱལ་མཚན་དང་། བཀྲ་ཤིས་དང་། བུམ་པ་སྣ་ཚོགས་ཡོངས་སུ་གང་བ་དང་། དགའ་བ་འཁྱིལ་པའི་རྒྱན་སྣ་ཚོགས་ཀྱིས་རྣམ་པར་བརྒྱན་པ། འཛམ་བུའི་ཆུ་ཀླུང་གི་གསེར་གྱི་གྱིམ་བག་དྲི་མ་མེད་ཅིང་རྡུལ་དང་བྲལ་བས་བཀབ་པ་དེ་ལ་འཛམ་བུའི་གླིང་ཐམས་
ཅད་ཀྱི་བདག་པོ་སྤྱི་བོ་ནས་དབང་བསྐུར་བས་མངོན་པར་དབང་བསྐུར་བའི་བསོད་ནམས་ཀྱི་སྟོབས་དང་ལྡན་པ། བྱམས་པས་དབང་བསྐུར་བ། ཕ་རོལ་གྱི་འཁོར་བཅོམ་པ་དང་ལྡན་པ། བཀའ་ལ་ཟློག་པ་མེད་པ་འདུག་ན་དགའ་བ་དེ་ལྟ་བུའི་སྟན་གྱི་རྣམ་པ་ཚུལ་དེ་འདྲ་བ་
སྦྱིན་ཞིང་ཡོངས་སུ་གཏོང་བ་དང་། དེ་དང་དེ་དག་གི་རྒྱལ་པོ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་ལ་ཁྲི་སྟན་བཟང་པོའི་རྣམ་པ། དེ་ལྟ་བུའི་སྦྱིན་པ་བྱེད་ཅིང་ཡོངས་སུ་གཏོང་བ་དང་། ཡང་དག་པར་རྫོགས་པའི་སངས་རྒྱས་སྦྱིན་པའི་གནས་ཀྱི་དམ་པ་ལ་
གསོལ་བ་འམ། སྐྱེས་བུ་དམ་པ་དགེ་བའི་བཤེས་གཉེན་ནམ། འཕགས་པའི་དགེ་འདུན་དཀོན་མཆོག་གམ། ཆོས་སྨྲ་བ་འམ། ཆོས་ལ་དགབ་པའི་ཕྱིར་ཡོངས་སུ་གཡོག་པའི་སེམས་ཀྱིས་སམ། ཕ་དང་མ་དང་བླ་མའི་སྐྱེ་བོ་འམ། ཉན་
ཐོས་དང་རང་རྒྱལ་བའི་སྦྱིན་པའི་གནས་སམ། བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་ཐམས་ཅད་དམ། དེ་བཞིན་གཤེགས་པ་ཐམས་ཅད་ཀྱི་མཆོད་རྟེན་མཆོད་པའི་ཕྱིར་རམ། ཕོངས་པ་དང་། བཀྲེན་པ་སློང་བ་དཔག་ཏུ་
མྱེད་པ་དག་གམ། སེམས་ཅན་ཐམས་ཅད་ལ་ཕན་གདགས་པའི་ཕྱིར་ཡང་རུང་སྟེ། སྦྱིན་ཞིང་ཡོངས་སུ་གཏོང་བའི་ཚེ། དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་སངས་རྒྱས་ཀྱི་ཆོས་ཐམས་ཅད་

རྣམ་པར་འཚང་རྒྱ་བའི་ཡེ་ཤེས་དང་ལྡན་ཞིང་ཤིན་ཏུ་བྱང་ཆུབ་པའི་སྟན་དང་ལྡན་པར་གྱུར་ཅིག །སེམས་ཅན་ཐམས་ཅད་བདུད་ཀྱི་དཀྲུགས་མ་དང་དཔུང་རབ་ཏུ་གཞོམ་པའི་ཕྱིར། ཆོས་ཀྱི་དབང་ཕྱུག་ཐམས་ཅད་ཀྱི་རྡོ་རྗེའི་རི་རྣམ་པ་ཐམས་ཅད་དུ་
ཐུབ་པ་མེད་པའི་ལུས་དང་ལྡན་ཞིང་འགྲོ་བ་ཐམས་ཅད་ལ་དབང་བའི་སྟན་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་འགྲོ་བ་ཐམས་ཅད་ཀྱིས་བལྟ་བར་འོས་ཤིང་སངས་རྒྱས་རྣམ་པར་རོལ་པའི་སེང་གེའི་གདན་རབ་ཏུ་ཐོབ་པར་གྱུར་ཅིག །སེམས་ཅན་
ཐམས་ཅད་འགྲོ་བ་ཀུན་ལ་ཆོས་ཀྱི་དབང་ཕྱུག་གིས་སྐྱོང་བའི་ཕྱིར་སྟན་གྱི་རྒྱན་དང་འཁོར་རྣམ་པར་དག་པ་བརྗོད་དུ་མྱེད་པའི་ཡང་བརྗོད་དུ་མེད་པ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་དགེ་བའི་རྩ་བ་ཚོགས་ཆེན་པོ་རྣམ་པར་དག་པས། ཁམས་གསུམ་པས་
ཟིལ་གྱིས་མྱི་ནོན་པའི་སྟན་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་བསྐལ་པ་གྲངས་མྱེད་པར་སངས་རྒྱས་ཀྱི་གདན་གྱི་ཡོན་ཏན་བསྔགས་པ་མཐར་ཐུག་པ་མྱེད་པ་དང་ལྡན་ཞིང་འཇིག་རྟེན་གྱི་ཁམས་བརྗོད་དུ་མྱེད་པའི་ཡང་བརྗོད་དུ་མྱེད་པ་སྟན་གྱིས་
རྒྱས་པར་བྱེད་པའི་བྱིན་གྱི་རླབས་དང་ལྡན་པར་གྱུར་ཅིག །སེམས་ཅན་ཐམས་ཅད་ཆོས་ཀྱི་དབྱིངས་ཐམས་ཅད་ལུས་ཀྱིས་རྒྱས་པར་བྱེད་པའི་ཕྱིར་གཏེར་ཆེན་པོའི་ཚོགས་ཀྱི་སྟན་ལ་གནས་པར་གྱུར་ཅིག །སེམས་ཅན་ཐམས་ཅད་ཇི་ལྟར་དམ་
བཅས་པའི་སེམས་ཅན་གྱི་ཁམས་ཐམས་ཅད་ལ་ཆོས་ཀྱི་སྦྱིན་པས་རིམ་གྲོ་བྱེད་པའི་ཕྱིར། རྒྱན་གྱི་རྣམ་པ་བསམ་གྱིས་མི་ཁྱབ་པ་སྣ་ཚོགས་དང་ལྡན་པའི་སྟན་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་རྫུ་འཕྲུལ་དང་། རྣམ་པར་འཕྲུལ་པ་ཐམས་
ཅད་དང་། སངས་རྒྱས་ཀྱི་ཁྱུ་མཆོག་གི་མཐུ་ཕྱུང་བ་ཡང་དག་པར་སྟོན་པའི་ཕྱིར་དགེ་བའི་སྟན་ལ་རབ་ཏུ་གནས་པར་གྱུར་ཅིག །སེམས་ཅན་ཐམས་ཅད་དེ་བཞིན་གཤེགས་པའི་ཡེ་ཤེས་ཀྱིས་རྣམ་པར་འཚང་རྒྱ་ཞིང་དེ་བཞིན་གཤེགས་པའི་བདག་ཉིད་ཆེ་བ་

ཐམས་ཅད་དང་། ཁྱུ་མཆོག་གི་མཐུ་ཕྱུང་བ་ཡང་དག་པར་སྟོན་པའི་ཕྱིར། རིན་པོ་ཆེ་ཐམས་ཅད་ཀྱི་སྟན་དང་སྤོས་ཐམས་ཅད་ཀྱི་སྟན་དང་། མེ་ཏོག་ཐམས་ཅད་ཀྱི་སྟན་དང་། གོས་ཐམས་ཅད་ཀྱི་སྟན་དང་། ཕྲེང་བ་ཐམས་
ཅད་ཀྱི་སྟན་དང་། ནོར་བུ་རིན་པོ་ཆེ་ཐམས་ཅད་ཀྱི་སྟན་དང་། བཻ་ཌཱུརྱ་སྣ་ཚོགས་བསམ་གྱིས་མི་ཁྱབ་པའི་སྟན་དང་། འཇིག་རྟེན་གྱི་ཁམས་བརྗོད་དུ་མྱེད་པའི་ཡང་བརྗོད་དུ་མྱེད་པ་ལྟར་ཚད་མྱེད་པའི་སྟན་དང་འགྲོ་བ་ཐམས་ཅད་མ་ལུས་པར་རྒྱན་གྱིས་རྣམ་
པར་དག་པའི་སྟན་དང་། རྡོ་རྗེའི་གདན་ཐམས་ཅད་ལ་འཁོད་པར་གྱུར་ཅིག་ཅེས། དེ་ལྟར་བྱང་ཆུབ་སེམས་དཔའ་སྟན་གྱི་སྦྱིན་པས་ཡང་དག་པར་བཟུང་བའི་དགེ་བའི་རྩ་བ་དེ་དག་སེམས་ཅན་ཐམས་ཅད་འགྲོ་བ་ཐམས་ཅད་ཀྱིས་མ་གོས་པའི་བྱང་ཆུབ་ཀྱི་
སྟན་རབ་ཏུ་ཐོབ་ཅིང་། སངས་རྒྱས་ཀྱི་ཆོས་ཐམས་ཅད་རྣམ་པར་འཚང་རྒྱ་བའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གདུགས་ཀྱི་སྦྱིན་པ་བྱེད་ཅིང་དབང་ཕྱུག་གི་ལུས་ལ་དགབ་པའི་གདུགས་རིན་པོ་
ཆེའི་རྒྱན་ཆེན་པོས་ཤིན་ཏུ་བརྒྱན་པ་བྱེ་བ་ཁྲག་ཁྲིག་བརྒྱ་སྟོང་ཁྱད་པར་དུ་འཕགས་ཤིང་དབང་ཆེ་བའི་ཡོ་བྱད་དུ་བྱ་བ། རིན་པོ་ཆེའི་རྩ་བ་ཅན་དྲིལ་བུའི་དྲ་བས་ཀུན་ནས་བསྐོར་བ། རིན་པོ་ཆེའི་སྲད་བུས་གསེར་གྱི་དྲིལ་བུ་སྦྱངས་བའི་སྒྲ་འབྱུང་བ། རིན་པོ་ཆེའི་བཻ་
ཌཱུརྱའི་ཕྲེང་བ་རབ་ཏུ་སྦྱངས་པ། ཉེན་ཀོར་ནས་རྔའི་སྒྲ་དབྱངས་ཡིད་དུ་འོང་བ་འབྱུང་བ། གསེར་གྱི་དྲ་བ་རྣམ་པར་དག་པས་གཡོགས་ཤིང་བརྒྱན་པ། རིན་པོ་ཆེའི་དྲ་བ་བརྒྱ་ཕྲག་སྟོང་གི་བླ་རེ་བྲེས་པ། ནོར་བུ་རིན་པོ་ཆེའི་འབྲུ་གྲངས་མྱེད་པས་
སྤྲས་པ། རིན་པོ་ཆེ་བྱེ་བ་ཁྲག་ཁྲིག་བརྒྱ་སྟོང་དུ་མས་སྣ་ཚོགས་སུ་བྲེས་ཤིང་བརྒྱན་པ། ཨ་ག་རུ་དང་། ཙན་དན་དང་། སྤོས་ཀྱི་དམ་པ་སྣ་ཚོགས་བྱེ་བ་ཁྲག་ཁྲིག་བརྒྱ་སྟོད་དུ་མས། ཉེན་ཀོར་དྲི་ཞིམ་པར་བསྒོས་ཤིང་བདུགས་པ། འཛམ་བུ་ཆུ་ཀླུང་

གི་གསེར་ལྟར་འོད་གསལ་ཞིང་དག་པ་རྒྱན་བྱེ་བ་ཁྲག་ཁྲིག་བརྒྱ་སྟོང་མཐའ་ཡས་པས་བརྒྱན་པ་དེ་བས་ཀྱང་ཆེས་ལྷག་པའི་གདུགས་བྱེ་བ་ཁྲག་ཁྲིག་བརྒྱ་སྟོང་གྲངས་མྱེད་པ་དག་ཁ་ན་མ་ཐོ་བ་མེད་པའི་སེམས་ཀྱིས་སྦྱིན་པ་བྱེད་ཅིང་སེམས་ཅན་གྱི་གཙོ་བོ་མངོན་དུ་
གྱུར་པ་འམ། དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་མཆོད་རྟེན་བརྒྱན་པའི་ཕྱིར་རམ། ཆོས་བཙལ་བའི་ཕྱིར་བྱང་ཆུབ་སེམས་དཔའ་དང་། དགེ་བའི་བཤེས་གཉེན་ནམ། བྱང་ཆུབ་སེམས་དཔའ་ཆོས་སྨྲ་བ་བཙུན་པར་བྱ་བ་དག་
གམ། ཕ་དང་མ་འམ་དགེ་འདུན་དཀོན་མཆོག་གམ། སངས་རྒྱས་ཐམས་ཅད་ཀྱི་བསྟན་པ་འམ། སྦྱིན་པའི་གནས་ཀྱི་གང་ཟག་སྣ་ཚོགས་སམ། སློབ་དཔོན་དང་བླ་མ་དང་། བྱང་ཆུབ་ཀྱི་ཐེག་པ་གྲུབ་པ་འམ། དེ་ལ་ཞུགས་པ་དག་གམ།
ཕོངས་པ་དང་། བཀྲེན་པ་སློང་བ་དང་། ལེན་པ་དག་ལ་འབུལ་བ་དང་། ཡོངས་སུ་གཏོང་བ་དང་སྦྱིན་པ་བྱེད་པའི་ཚེ། དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། སེམས་ཅན་ཐམས་ཅད་སངས་རྒྱས་ཐམས་ཅད་ཀྱི་གཡོག་པ་རབ་ཏུ་ཐོབ་
སྟེ། དགེ་བའི་རྩ་བས་ཡང་དག་པར་གཡོགས་པར་གྱུར་ཅིག །སེམས་ཅན་ཐམས་ཅད་ཉོན་མོངས་པ་དང་། ཉེ་བའི་ཉོན་མོངས་པ་ཐམས་ཅད་ལས་ཡོངས་སུ་འདས་ཏེ། ཡོན་ཏན་དང་ཡེ་ཤེས་ཀྱིས་མངོན་པར་བཀབ་པར་གྱུར་ཅིག །སེམས་ཅན་ཐམས་ཅད་
འཇིག་རྟེན་གྱི་རྡུལ་དང་མུན་པ་དང་ཡོངས་སུ་གདུང་བ་ཐམས་ཅད་ལས་རྣམ་པར་འདས་ཏེ་ལུས་ཤིན་ཏུ་བཀབ་པར་གྱུར་ཅིག །སེམས་ཅན་ཐམས་ཅད་འགྲོ་བ་ཐམས་ཅད་ཀྱིས་བལྟ་ན་སྡུག་ཅིང་སངས་རྒྱས་ཐམས་ཅད་ལ་མངའ་བའི་ཡེ་ཤེས་ཀྱི་སྙིང་པོ་ཅན་དུ་
གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཆོས་ལ་ལོག་པ་མྱེད་པར་འཇུག་པར་བརྩོན་པས་མ་འཁྲུགས་པའི་ཆོས་དཀར་པོས་ཤིན་ཏུ་བཀབ་པར་གྱུར་ཅིག །སེམས་ཅན་ཐམས་ཅད་ཆོས་ཀྱི་ལུས་ཀྱིས་སངས་རྒྱས་ཀྱི་སྐུའི་མཐར་གཏུགས་ཏེ་མངོན་

པར་བགབ་པའི་ལུས་དང་ལྡན་པར་གྱུར་ཅིག །སེམས་ཅན་ཐམས་ཅད་འཇིག་རྟེན་ཀུན་ལ་སྟོབས་བཅུའི་ཡེ་ཤེས་ཀྱི་བླ་རེས་སྐྱོབ་པས་གདུགས་སུ་རེད་པར་གྱུར་ཅིག །སེམས་ཅན་ཐམས་ཅད་ཁམས་གསུམ་ཐམས་ཅད་
ལས་ཤིན་ཏུ་འཕགས་ཤིང་ཆགས་པ་མེད་པའི་ཡེ་ཤེས་ཀྱི་སྙིང་པོ་དང་ལྡན་པས་ཡེ་ཤེས་ཀྱིས་རྣམ་པར་སྣང་བར་གྱུར་ཅིག །སེམས་ཅན་ཐམས་ཅད་སྦྱིན་པའི་གནས་དམ་པ་ལ་བསོད་ནམས་ཐམས་ཅད་ཀྱིས་མཆོད་པའི་ཕྱིར་གདུགས་སུ་འོས་པར་གྱུར་ཅིག །
སེམས་ཅན་ཐམས་ཅད་བླ་ན་མེད་པའི་ཡེ་ཤེས་ཀྱི་གདུགས་རྣམ་པར་སངས་རྒྱས་པས་གདུགས་ཀྱི་དམ་པར་གྱུར་ཅིག་ཅེས། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་གདུགས་ཀྱི་སྦྱིན་པ་བྱེད་པའི་ཚེ། དགེ་བའི་རྩ་བ་དེ་དག་སེམས་ཅན་ཐམས་ཅད་
ཀྱིས་ཆོས་ལ་དབང་བའི་གདུགས་ཡང་དག་པར་བཟུང་བ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །གདུགས་གཅིག་གིས་ནམ་མཁའ་ཐམས་ཅད་ཀྱི་དབྱིངས་ཀྱིས་ཀླས་པ། ཆོས་ཀྱི་དབྱིངས་ཀྱི་མཐས་གཏུགས་པའི་འཇིག་རྟེན་གྱི་ཁམས་ཐམས་
ཅད་དུ་སངས་རྒྱས་ཐམས་ཅད་ཀྱི་ཁྱུ་མཆོག་གི་མཐུ་ཕྱུང་བ་ཡང་དག་པར་བསྟན་པ་ལས་ཕྱིར་མྱི་ལྡོག་པའི་ཕྱིར་ཡོངས་སུ་བསྔོའོ། །ཆོས་ཀྱི་དབྱིངས་ཐམས་ཅད་གདུགས་གཅིག་གིས་བརྒྱན་ཏེ། དེ་བཞིན་གཤེགས་པ་མཆོད་པར་བྱ་བའི་ཕྱིར་ཡོངས་སུ་བསྔོའོ། །
གདུགས་དང་རྒྱལ་མཚན་དང་བ་དན་ཡིད་དུ་འོང་བས་དེ་བཞིན་གཤེགས་པ་ཐམས་ཅད་ཀྱི་སྐུ་ལ་མངོན་པར་དགབ་པའི་ཕྱིར་ཡོངས་སུ་བསྔོའོ། །སངས་རྒྱས་ཀྱི་ཞིང་ཐམས་ཅད་མ་ལུས་པར་གདུགས་ཀྱི་རྒྱན་གྱིས་ཀུན་ཏུ་གཡོག་པར་བྱ་བའི་ཕྱིར་ཡོངས་
སུ་བསྔོའོ། །སངས་རྒྱས་ཀྱི་མཚན་ལ་མོས་པའི་སེམས་ཅན་ཐམས་ཅད་དང་འགྲོ་བའི་ཚོགས་ཐམས་ཅད་གདུགས་ཐམས་ཅད་ཀྱིས་དགབ་བའི་ཕྱིར་ཡོངས་སུ་བསྔོའོ། །རིན་པོ་ཆེ་ཐམས་ཅད་ཀྱི་གདུགས་སྣ་ཚོགས་བརྗོད་དུ་མེད་པའི་ཡང་བརྗོད་དུ་མྱེད་པ་སངས་

རྒྱས་གཅིག་ལ་ཕུལ་བས་སངས་རྒྱས་ཐམས་ཅད་ལ་བརྗོད་དུ་མྱེད་པའི་གདུགས་ཕུལ་བར་སེམས་ཤིང་ཡོངས་སུ་བསྔོའོ། །སངས་རྒྱས་ཐམས་ཅད་ཀྱི་བྱང་ཆུབ་མངོན་པར་བྱང་ཆུབ་པས་འཕགས་པའི་གདུགས་ཀྱིས་སངས་རྒྱས་ཐམས་ཅད་དགབ་པའི་ཕྱིར་ཡོངས་སུ་བསྔོའོ། །
སངས་རྒྱས་ཀྱི་སྐུ་ཇི་སྙེད་འཇིག་རྟེན་གྱི་ཁམས་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པ་ཐམས་ཅད་ན་བཞུགས་པ་ཐམས་ཅད་ལ་གདུགས་ཀྱིས་དགབ་པའི་ཕྱིར་ཡོངས་སུ་བསྔོའོ། །ནོར་བུ་རིན་པོ་ཆེ་ཐམས་ཅད་ཀྱིས་བརྒྱན་པའི་གདུགས་
དང་རིན་པོ་ཆེ་ཐམས་ཅད་ཀྱི་ཕྲེང་བ་བརྒྱུས་ཤིང་ཀླུབས་པ་དང་། སྤོས་ཐམས་ཅད་ཀྱི་མཆོག་གི་དྲི་ཞིམ་པོའི་ངད་འབྱུང་བའི་གདུགས་དང་རིན་པོ་ཆེ་སྣ་ཚོགས་ཀྱིས་རྣམ་པར་སྤྲས་པའི་གདུགས་དང་། རྒྱན་མཛེས་ཤིང་རྣམ་པར་དག་པའི་གདུགས་དང་། རྒྱན་
ཚད་མེད་པར་ཡངས་ཤིང་རྒྱ་ཆེ་བ་དང་། གསེར་གྱི་དྲ་བས་ཀུན་ནས་ཡོག་པར་བརྒྱན་པ། དྲིལ་བུའི་དྲ་བ་ཀུན་ནས་སྦྱངས་པའི་སྒྲ་ཡིད་དུ་འོང་ཞིང་སྙན་པ་འབྱུང་བའི་གདུགས་དང་། ཡེ་ཤེས་བསྒྲིབས་པ་མྱེད་ཅིང་ཆགས་པ་མྱེད་པའི་གདུགས་དང་། སངས་
རྒྱས་ཐམས་ཅད་ལ་མངོན་པར་དགབ་པའི་གདུགས་ཡོངས་སུ་བཏང་བའི་ཕྱིར་ཡོངས་སུ་བསྔོ་སྟེ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་གདུགས་ཀྱི་སྦྱིན་པས་ཡང་དག་པར་བཟུང་བའི་དགེ་བའི་རྩ་བ་དེ་དག་སེམས་ཅན་ཐམས་ཅད་
ལ་ཡེ་ཤེས་མཆོག་གི་གདུགས་ཀྱིས་མངོན་པར་དགབ་པའི་ཕྱིར་ཡོངས་སུ་བསྔོའོ། །སངས་རྒྱས་ཐམས་ཅད་ཀྱི་ཡོན་ཏན་གྱིས་ཀུན་ནས་ཡོག་ཅིང་རབ་ཏུ་བརྒྱན་པའི་ཕྱིར་ཡོངས་སུ་བསྔོའོ། །སངས་རྒྱས་ཀྱི་ཡེ་ཤེས་དང་ཡོན་ཏན་དང་དགོངས་པ་དམ་པ་
རྣམ་པར་དག་པར་བྱ་བའི་ཕྱིར་ཡོངས་སུ་བསྔོའོ། །སེམས་རིན་པོ་ཆེ་མཐའ་ཡས་པ་ལ་དབང་སྒྱུར་བ་རབ་ཏུ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །ཆོས་ཐམས་ཅད་ལ་ཡེ་ཤེས་ཀྱིས་དབང་སྒྱུར་བ་ཀུན་ཏུ་རྫོགས་པར་བྱ་བའི་ཕྱིར་ཡོངས་སུ་བསྔོའོ། །

དགེ་བའི་རྩ་བ་ཐམས་ཅད་ཀྱིས་མངོན་པར་ཡོག་པར་ཡོངས་སུ་བསྔོ་བའི་དོན་དུ་ཡོངས་སུ་བསྔོའོ། །འགྲོ་བ་ཐམས་ཅད་ཀྱིས་ཡེ་ཤེས་མཆོག་གི་གདུགས་རབ་ཏུ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །སངས་རྒྱས་
ཐམས་ཅད་ཀྱི་སྟོབས་བཅུའི་བླ་རེར་བྲེས་པའི་གདུགས་སུ་འགྱུར་བར་བྱ་བའི་ཕྱིར་ཡོངས་སུ་བསྔོའོ། །ཆོས་ཀྱི་དབྱིངས་ཐམས་ཅད་སངས་རྒྱས་ཀྱི་ཞིང་གཅིག་གིས་ཡོག་པར་བྱ་བའི་ཕྱིར་ཡོངས་སུ་བསྔོའོ། ཆོས་ཐམས་ཅད་ལ་དབང་ཕྱུག་ཏུ་དབང་སྒྱུར་བའི་
དབང་ཐོབ་པར་བྱ་བའི་ཕྱིར་ཡོངས་སུ་བསྔོའོ། །མཐུ་ཆེན་པོ་དང་དབང་ཆེན་པོའི་སེམས་ཀྱི་རྒྱུད་ཐོབ་པར་བྱ་བའི་ཕྱིར་ཡོངས་སུ་བསྔོའོ། །བློ་ཡངས་པ་དང་སེམས་རྒྱ་ཆེ་བ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །ཡོན་ཏན་ཚད་མྱེད་པས་འགྲོ་བ་ཐམས་
ཅད་མངོན་པར་དགའ་བའི་ཕྱིར་ཡོངས་སུ་བསྔོའོ། །ཡོན་ཏན་ཐམས་ཅད་ཀྱིས་སེམས་མངོན་པར་དགབ་པའི་ཕྱིར་ཡོངས་སུ་བསྔོའོ། །སེམས་ཅན་ཐམས་ཅད་ཀྱིས་འགྲོ་བ་ཐམས་ཅད་མངོན་པར་དགབ་པའི་ཕྱིར་ཡོངས་སུ་བསྔོའོ། །ཡེ་ཤེས་ཆེན་པོས་
མཉམ་པར་དགབ་པ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །སེམས་ཅན་ཐམས་ཅད་ཀྱིས་བསྔོ་བའི་ཚུལ་མ་ལུས་པར་ཐོབ་པར་བྱ་བའི་ཕྱིར་ཡོངས་སུ་བསྔོའོ། །སེམས་དང་བསམ་པ་རྣམ་པར་དག་པར་འགྱུར་བའི་ཕྱིར་ཡོངས་སུ་བསྔོའོ། །བསམ་
པ་དགེ་བ་དང་ཡིད་ཀྱི་དབང་པོ་རྣམ་པར་དག་པ་དང་ལྡན་པར་བྱ་བའི་ཕྱིར་ཡོངས་སུ་བསྔོའོ། །འགྲོ་བ་ཐམས་ཅད་ཡོངས་སུ་བསྔོ་བ་ཆེན་པོས་མངོན་པར་དགབ་ཅིང་ཡང་དག་པར་བསྡུ་བའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་
དཔའ་ཆེན་པོ་རྒྱལ་མཚན་དང་བ་དན་རིན་པོ་ཆེ་སྣ་ཚོགས་རྣམ་པ་ཐ་དད་པའི་ཡུ་བ་ཅན། རིན་པོ་ཆེའི་དྲིལ་བུའི་དྲ་བ་འཁྲོལ་བའི་སྒྲ་ཡིད་དུ་འོང་བ་འབྱུང་བ་སྣམ་བུ་རིན་པོ་ཆེ་རྣམ་པ་སྣ་ཚོགས་སྤྱངས་པ། ཁ་དོག་དང་ཚོན་སྣ་ཚོགས་ཀྱིས་སྣམ་བུས་བརྒྱན་ཅིང་

བསྒྲེང་བ། གསེར་གྱི་དྲ་བས་ཀུན་ནས་སྤྱངས་ཤིང་ཀླུབས་པ། གསེར་གྱི་དྲིལ་བུའི་སྒྲ་འབྱུང་བ་དྲིལ་བུ་གཡེར་ཀའི་དྲ་བས་ཤིན་ཏུ་བརྒྱན་པའི་རྒྱལ་མཚན་དང་། བ་དན་བྱེ་བ་ཁྲག་ཁྲིག་བརྒྱ་སྟོང་ཁ་དོག་ཐ་དད་པ་ཚོན་ཐ་དད་པ་ཤིན་ཏུ་མཐོ་བ་རིན་པོ་ཆེས་རྣམ་པ་སྣ་
ཚོགས་སུ་བརྒྱན་པ། རྒྱལ་མཚན་གྱི་རྩེ་མོ་ཟླ་ཁམ་གྱིས་མཛེས་པར་བརྒྱན་པ། འཛམ་བུའི་ཆུ་ཀླུང་གི་གསེར་གྱི་ཉི་མའི་དཀྱིལ་འཁོར་བཅུག་པ། འོད་གཟེར་རྣམ་པ་སྣ་ཚོགས་འབྱུང་བ། རྒྱལ་མཚན་གྱི་རྒྱན་གྱིས་ཐམས་ཅད་ཀུན་ཏུ་ཡོག་པ། རྒྱལ་
མཚན་གྱི་རྒྱན་རྣམ་པ་དུ་མ་འོད་དང་ལྡན་པས་རབ་ཏུ་བརྒྱན་པའི་རྒྱལ་མཚན་རྣམ་པ་སྣ་ཚོགས་བསྒྲེང་བའི་རྒྱན་དེ་ལྟ་བུ་དག་འཇིག་རྟེན་གྱི་ཁམས་ཐམས་ཅད་ཀྱི་ལས་ཀྱི་རྣམ་པར་སྨིན་པ་ལ་མོས་པའི་རྒྱལ་མཚན་གྱི་རྒྱན་གྱིས་ཀུན་ཏུ་ཁྱབ་པར་བྱ་བ་དང་། འཇིག་
རྟེན་གྱི་ཁམས་ཆོས་ཀྱི་དབྱིངས་ཐམས་ཅད་འབྱམ་ཀླས་པ། སངས་རྒྱས་ཀྱི་ཞིང་ནམ་མཁའི་དབྱིངས་ཐམས་ཅད་འབྱམ་ཀླས་པ་ལ་གནས་པ། ཡངས་པ་ཀུན་ཏུ་རྒྱལ་མཚན་གྱི་སྦྱིན་པ་ཡོངས་སུ་གཏོང་བར་མོས་པས་འཇིག་རྟེན་གྱི་ཁམས་ཐམས་ཅད་
རྒྱས་པར་བྱ་བ་དང་། བྱང་ཆུབ་སེམས་དཔའི་བསམ་པ་དང་མོས་པའི་ཁྱད་པར་རྣམ་པར་དག་པར་བྱ་བའི་ཕྱིར། སངས་རྒྱས་བཅོམ་ལྡན་འདས་མངོན་དུ་གྱུར་པ་རྣམས་ལ་འབུལ་བའམ། དེ་བཞིན་གཤེགས་པ་ཡོངས་སུ་མྱ་ངན་ལས་འདས་
པའི་མཆོད་རྟེན་ནམ། ཆོས་དཀོན་མཆོག་མཆོད་པ་འམ། དགེ་འདུན་དཀོན་མཆོག་ལ་འབུལ་ལམ། དགེ་བའི་བཤེས་གཉེན་བྱང་ཆུབ་སེམས་དཔའ་རྣམས་སམ། ཉན་ཐོས་དང་། རང་སངས་རྒྱས་རྣམས་སམ། འཁོར་གྱི་ཚོགས་
སུ་གྱུར་པའམ། གང་ཟག་གི་རྣམ་པ་གཞན་སུ་འང་རུང་སྟེ། སློང་བ་ཐམས་ཅད་ལ་རིམ་གྲོ་བྱ་བའི་ཕྱིར་སྦྱིན་ཞིང་ཡོངས་སུ་གཏོང་བ་ན། རྒྱལ་མཚན་དང་བ་དན་སྦྱིན་པས་ཡང་དག་པར་བསྡུས་པའི་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ།

དགེ་བའི་རྩ་བ་འདིས་སེམས་ཅན་ཐམས་ཅད་ཡེ་ཤེས་ཀྱི་རྒྱལ་མཚན་དང་། བ་དན་ལ་ཐུབ་པ་མེད་པས་དགེ་བའི་རྩ་བ་དང་། བསོད་ནམས་ཐམས་ཅད་ཡང་དག་པར་བསྒྲེང་བའི་རྒྱལ་མཚན་ཅན་དུ་གྱུར་ཅིག །སེམས་ཅན་ཐམས་
ཅད་ཆོས་ཀྱི་གོམ་འཕང་བྲིས་པ་སྦེད་པའི་ཆོས་ཉིད་ཀྱིས་ཆོས་ཐམས་ཅད་ལ་དབང་སྒྱུར་བའི་རྒྱལ་མཚན་བསྒྲེང་བར་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་ཀྱི་བྱང་ཆུབ་ཀྱི་ཆོས་ཡང་དག་པར་འཛིན་པའི་ཆོས་ཅན་དུ་གྱུར་ཏེ། རིན་པོ་ཆེའི་
གཞི་ལ་སངས་རྒྱས་ཀྱི་ཆོས་བྲིས་པ་དང་ལྡན་པར་གྱུར་ཅིག །སེམས་ཅན་ཐམས་ཅད་འགྲོ་བ་ཀུན་ལ་མར་མེ་སྣང་བར་གྱུར་ཏེ། རྒྱལ་མཚན་ཤིན་ཏུ་འཕགས་པར་གྱུར་ཅིག །སེམས་ཅན་ཐམས་ཅད་བདུད་ཐམས་ཅད་རྣམ་པར་འཇོམས་པའི་ཕྱིར། ཐུབ་
པ་མྱེད་པའི་རྒྱལ་མཚན་དང་བ་དན་ཅན་དུ་གྱུར་ཅིག །སེམས་ཅན་ཐམས་ཅད་བདུད་ཐམས་ཅད་ཀྱིས་མི་ཐུབ་པའི་ཆོས་ཅན་དུ་གྱུར་ཏེ། ཡེ་ཤེས་དང་སྟོབས་ཀྱི་རྒྱལ་མཚན་རབ་ཏུ་བསྒྲེང་བར་གྱུར་ཅིག །སེམས་ཅན་ཐམས་ཅད་རྒྱལ་མཚན་ཐམས་ཅད་མི་
ལྟུང་བའི་སྣང་བ་ཅན་དུ་གྱུར་ཏེ། ཡེ་ཤེས་མཐུ་བོ་ཆེའི་རྒྱལ་མཚན་དང་ལྡན་པར་གྱུར་ཅིག །སེམས་ཅན་ཐམས་ཅད་ཡེ་ཤེས་ཀྱི་དཀྱིལ་འཁོར་གྱིས་ཆོས་ཀྱི་དབྱིངས་ཐམས་ཅད་རྣམ་པར་དག་པར་གྱུར་ཏེ། ཡེ་ཤེས་ཀྱི་ཉི་མའི་དཀྱིལ་འཁོར་འོད་ཟེར་རབ་ཏུ་འགྱེད་པའི་
རྒྱལ་མཚན་དང་ལྡན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་མཆོད་པ་ལ་བརྩོན་ཞིང་རྒྱལ་མཚན་སྣ་ཚོགས་རབ་ཏུ་བསྒྲེང་བས་སངས་རྒྱས་ཐམས་ཅད་ཀྱི་ཞིང་བརྗོད་དུ་མེད་པ་རྒྱས་པར་འགེངས་པའི་ཕྱིར་རིན་པོ་ཆེའི་རྒྱལ་མཚན་གྱི་རྒྱན་དང་ལྡན་
པར་གྱུར་ཅིག །སེམས་ཅན་ཐམས་ཅད་ཞགས་པ་འཐུབ་པ་དགུ་བཅུ་རྩ་དྲུག་གི་རྒྱལ་མཚན་གྱིས་དབེན་ཞིང་སེམས་འདོད་ཆགས་དང་བྲལ་བར་གྱུར་ཏེ། སངས་རྒྱས་ཀྱི་རྒྱལ་མཚན་རབ་ཏུ་ཐོབ་པར་གྱུར་ཅིག་ཅེས། དེ་ལྟར་བྱང་ཆུབ་སེམས་དཔའ་སེམས་

དཔའ་ཆེན་པོ་རྒྱལ་མཚན་དང་། བ་དན་གྱི་སྦྱིན་པ་བྱེད་པའི་ཚེ། དགེ་བའི་རྩ་བ་དེ་དག་སེམས་ཅན་ཐམས་ཅད་བྱང་ཆུབ་སེམས་དཔའི་སྤྱོད་པ་རྒྱ་ཆེ་ཞིང་ཡངས་པ་དང་། ཟབ་མོ་ཐམས་ཅད་དང་ལྡན་པར་བྱ་བའི་ཕྱིར་ཡོངས་སུ་བསྔོའོ། །བྱང་ཆུབ་སེམས་
དཔའ་ཐམས་ཅད་ཀྱི་སྤྱོད་པ་དང་རྣམ་པར་འཕྲུལ་པ་དང་འབྱུང་བའི་རྒྱལ་མཚན་དང་ལྡན་ཞིང་ཐ་དད་པ་ཡང་དག་པར་ཤེས་པ་རྣམ་པར་དག་པ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེ་ཐམས་
ཅད་གཏོང་བ་ལ་མོས་པ་དང་སེམས་ཅན་ཐམས་ཅད་ནོར་གྱིས་ཕྱུག་པར་བྱེད་པ་དང་། རིན་པོ་ཆེའི་མཛོད་ཐམས་ཅད་འབྱེད་པ་དང་། རིན་པོ་ཆེའི་གཏེར་ཐམས་ཅད་གཏོང་བ་དང་། རིན་པོ་ཆེའི་འབྱུང་གནས་ཐམས་ཅད་ཡོངས་སུ་གཏོང་བ་དང་། ནོར་བུ་རིན་པོ་
ཆེ་ཐམས་ཅད་ཀྱི་སྦྱིན་པ་བྱེད་པ་དང་། རིན་པོ་ཆེ་ཀུན་གྱིས་སེམས་ཅན་ཐམས་ཅད་ལ་ཁྱབ་པར་བྱེད་པ་དང་། རིན་པོ་ཆེའི་ཚོགས་ཐམས་ཅད་ཕོངས་པར་མི་སེམས་པའི་ཡིད་ཀྱིས་གཏོང་བ་དང་། རིན་པོ་ཆེའི་ཚོགས་ཐམས་ཅད་འཐོར་བ་འམ། རིན་པོ་ཆེ་
ཐམས་ཅད་ཡོངས་སུ་གཏང་བར་སེམས་བསྐྱེད་པའི་ཚེ། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་གྲངས་མྱེད་པ་ལ་རིན་པོ་ཆེ་བྱིན་པས་ཡོངས་སུ་བཟུང་བའི་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། སེམས་ཅན་ཐམས་ཅད་དྲན་པའི་རྒྱུད་རྨོངས་པ་མྱེད་ཅིང་།
སངས་རྒྱས་མཐོང་བ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་ཀྱི་ཆོས་ཀྱི་མཛོད་འཛིན་པས་ཆོས་དཀོན་མཆོག་གི་སྣང་བ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་སྦྱིན་པ་དང་ཡོངས་སུ་གཏོང་བ་ཤིན་ཏུ་བརྟན་པས་
དགེ་འདུན་དཀོན་མཆོག་ཡོངས་སུ་འཛིན་པར་གྱུར་ཅིག །སེམས་ཅན་ཐམས་ཅད་ཕྱིར་མྱི་ལྡོག་པའི་བྱང་ཆུབ་ཀྱི་སེམས་རྣམ་པར་དག་པས་ཐམས་ཅད་མཁྱེན་པ་ཉིད་ཀྱི་སེམས་རིན་པོ་ཆེ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་སངས་

རྒྱས་ཀྱི་ཆོས་ཐམས་ཅད་ལ་རྨོངས་པ་མྱེད་པར་གཞོལ་བས་ཡེ་ཤེས་རིན་པོ་ཆེ་ལ་ཞུགས་པར་གྱུར་ཅིག །སེམས་ཅན་ཐམས་ཅད་ཡེ་ཤེས་རིན་པོ་ཆེ་ཚད་མྱེད་པ་ཡང་དག་པར་བསྟན་པར་བྱ་བའི་ཕྱིར་བྱང་ཆུབ་སེམས་དཔའི་ཡོན་ཏན་རིན་པོ་
ཆེ་གྲངས་མྱེད་པ་ཕུན་སུམ་ཚོགས་པར་གྱུར་ཅིག །སེམས་ཅན་ཐམས་ཅད་སྟོབས་བཅུའི་ཡེ་ཤེས་རིན་པོ་ཆེ་མངོན་པར་འཚང་རྒྱ་བ་ལ་བརྩོན་པས་ཡོན་ཏན་རིན་པོ་ཆེ་མཐའ་ཡས་པའི་བསྔགས་པ་དང་ལྡན་པར་གྱུར་ཅིག །སེམས་ཅན་ཐམས་ཅད་ཡེ་ཤེས་
རིན་པོ་ཆེ་ཤིན་ཏུ་ཡངས་པའི་མཐར་ཐུག་པས་ཡེ་ཤེས་རིན་པོ་ཆེ་བཅུ་དྲུག་གི་སྙོམས་པར་འཇུག་པ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་དེ་བཞིན་གཤེགས་པའི་ཡེ་ཤེས་རིན་པོ་ཆེ་ལ་རྣམ་པར་སངས་རྒྱས་པས་རིན་པོ་ཆེའི་དམ་པས་སྦྱིན་
པའི་གནས་ཀྱི་མཆོག་ཏུ་གྱུར་ཅིག །སེམས་ཅན་ཐམས་ཅད་ཐ་དད་པ་ཡང་དག་པར་ཤེས་པ་མྱི་ཟད་པའི་མཛོད་ཀྱི་ཆོས་རིན་པོ་ཆེ་རབ་ཏུ་སྟོན་པ་ལ་བརྩོན་པས་རིན་པོ་ཆེའི་དབང་པོ་དམ་པར་གྱུར་ཅིག་ཅེས། དེ་ལྟར་བྱང་ཆུབ་སེམས་དཔའ་སེམས་དཔའ་
ཆེན་པོ་རིན་པོ་ཆེ་དེ་དག་ཡོངས་སུ་གཏོང་ཞིང་སྦྱིན་པ་བྱས་པའི་ཚེ། སེམས་ཅན་ཐམས་ཅད་སངས་རྒྱས་ཀྱི་སྤྱན་རིན་པོ་ཆེ་རྣམ་པར་དག་ཅིང་ཉམས་པ་མྱེད་པས། ཡེ་ཤེས་དམ་པ་རིན་པོ་ཆེ་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོའོ། །
འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་དང་ཡན་ལག་དང་། ཉིང་ལག་ཐམས་ཅད་རྒྱན་གྱིས་ཤིན་ཏུ་བརྒྱན་པ། ལུས་བལྟ་ན་སྡུག་པ་ལུས་རྣམ་པར་དག་ཅིང་མྱི་མཐུན་པ་མྱེད་པའི་རྒྱན་ཀྱིས་ལུས་ཤིན་ཏུ་བརྒྱན་པ། རིན་པོ་ཆེ་
ཐམས་ཅད་ཀྱིས་རབ་ཏུ་བརྒྱན་པ། རིན་པོ་ཆེའི་རྒྱན་སྣ་ཚོགས་རྣམ་པ་ཐ་དད་པ་བྱེ་བ་ཁྲག་ཁྲིག་བརྒྱ་སྟོང་གིས་ཤིན་ཏུ་བརྒྱན་པ། སེམས་ཅན་ཐམས་ཅད་ཀྱི་ལུས། རྒྱན་གྱིས་བརྒྱན་པར་བརྩོན་པ། སེམས་ཅན་ཐམས་ཅད་ལ་བུའི་འདུ་ཤེས་ཀྱིས་

འཇིག་རྟེན་གྱི་བདེ་བ་དང་། སངས་རྒྱས་ཀྱི་བདེ་བ་ཐམས་ཅད་སྟོབས་པ། དགའ་བ་སྣ་ཚོགས་ཀྱིས་སེམས་ཅན་རབ་ཏུ་དགའ་བར་བྱེད་པ་དེ་རྒྱན་སྣ་ཚོགས་རྣམ་པ་ཐ་དད་པ་དག །སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། སངས་
རྒྱས་ཀྱི་ཆོས་ཐམས་ཅད་ལ་རབ་ཏུ་དགོད་པའི་ཕྱིར་སྦྱིན་ཞིང་ཡོངས་སུ་གཏོང་བའི་ཚེ། རྒྱན་ཡོངས་སུ་བཏང་བས་ཡང་དག་པར་བསྡུས་པའི་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། སེམས་ཅན་ཐམས་ཅད་ཡེ་ཤེས་ཀྱི་རྒྱན་རྣམ་པར་དག་པས།
ལྷ་དང་བཅས་པའི་འཇིག་རྟེན་གྱི་རྒྱན་དུ་རེད་པར་གྱུར་ཅིག །སེམས་ཅན་ཐམས་ཅད་བསོད་ནམས་ཀྱི་རྒྱུད་ཀྱི་མཚན་རྣམ་པར་དག་པ་དང་ལྡན་ཞིང་། མཚན་གྱིས་ལུས་ཤིན་ཏུ་བརྒྱན་པར་གྱུར་ཅིག །སེམས་ཅན་ཐམས་ཅད་བསོད་ནམས་བརྒྱའི་མཚན་དང་
ལྡན་པའི་ལུས་ཅན་དུ་རེད་དེ། ལུས་མཚན་གྱིས་ཤིན་ཏུ་བརྒྱན་པར་གྱུར་ཅིག །སེམས་ཅན་ཐམས་ཅད་ལུས་ཀྱི་ཡན་ལག་མཚན་ཀུན་གྱིས་བརྒྱན་པ་དང་ལྡན་ཞིང་ལུས་མཚན་གྱིས་ཤིན་ཏུ་རྣམ་པར་བྲིས་པ་ཕུན་སུམ་ཚོགས་པར་གྱུར་ཅིག །
སེམས་ཅན་ཐམས་ཅད་ཐ་དད་པ་ཡང་དག་པར་ཤེས་པ། མྱི་ཟད་པའི་མཛོད་དང་ལྡན་ཞིང་ཚིག་གི་རྒྱན་གྱིས་ཤིན་ཏུ་བརྒྱན་པར་གྱུར་ཅིག །སེམས་ཅན་ཐམས་ཅད་དབྱངས་ཀྱི་ཡན་ལག་ཡིད་དུ་འོང་ཞིང་། རྣམ་པར་དག་པ་དང་ལྡན་ཞིང་ཡོན་
ཏན་གྱིས་བརྒྱན་པའི་དབྱངས་དང་ལྡན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཆོས་ཀྱི་ཚིག་གི་ཚུལ་རྣམ་པར་དག་པས། འགྲོ་བ་ཀུན་མགུ་བར་བྱེད་ཅིང་། སངས་རྒྱས་ཀྱི་ཆོས་ཐམས་ཅད་ཀྱིས་ཚིག་ཡིད་དུ་འོང་བར་བརྒྱན་པ་
དང་ལྡན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀུན་ལ་ལྟ་བས་སྙོམས་པར་འཇུག་ཅིང་། སེམས་ཀྱི་རྒྱན་གྱིས་བརྒྱན་པར་གྱུར་ཅིག །སེམས་ཅན་ཐམས་ཅད་ཆོས་སྣང་བ་ཐམས་ཅད་གྱིས། སངས་རྒྱས་ཀྱི་ཆོས་རབ་ཏུ་

ཐོབ་ཅིང་། གཟུངས་ཐམས་ཅད་ཀྱི་རྒྱན་གྱིས་རབ་ཏུ་བརྒྱན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཡེ་ཤེས་ཀྱིས་རྒྱུད་ཤིན་ཏུ་བརྒྱན་པས། སེམས་ཡེ་ཤེས་ཀྱིས་ཡང་དག་པར་བརྒྱན་པ་དང་ལྡན་པར་
གྱུར་ཅིག་ཅེས། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་ལུས་ཀྱི་རྒྱན་དེ་དག་ཡོངས་སུ་གཏོང་བའི་ཚེ། དགེ་བའི་རྩ་བ་དེ་དག་སེམས་ཅན་ཐམས་ཅད་ཀྱིས་སངས་རྒྱས་ཀྱི་ཆོས་ཚད་མེད་པ་ཐམས་ཅད་ཀྱི་ཡོན་ཏན་དང་། ཡེ་ཤེས་ཀྱི་རྒྱན་
ཡོངས་སུ་རྫོགས་ཏེ་སེམས་ཅན་ཐམས་ཅད་ཀྱི་རིས་ན་ང་རྒྱལ་དང་། རྒྱགས་པ་དང་། དྲེགས་པ་མེད་པར་བྱ་བའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དབང་ཕྱུག་ལ་སྤྱི་བོ་ནས་དབང་བསྐུར་བས་
མངོན་པར་དབང་བསྐུར་བ། ཅོད་པན་དང་གཙུག་གི་རིན་པོ་ཆེའི་སྦྱིན་པ་བྱེད་ཅིང་ཡོངས་སུ་གཏོང་བ་དང་། མངོན་པར་སྟོབས་པ་དང་། སེམས་ཅན་ཐམས་ཅད་ལ་ཕན་འདོགས་པ་དང་། ལྟོས་པ་མྱེད་པར་ཡོངས་སུ་གཏོང་བའི་སེམས་རྣམ་པར་འཕེལ་
བར་བྱེད་པ་དང་། སྦྱིན་པས་བསྒོས་པའི་རྒྱུད་ཡོངས་སུ་སྒོམ་པ་དང་། སྦྱིན་པ་ལ་དབང་སྒྱུར་བ་རབ་ཏུ་འཇུག་པ་དང་། སྦྱིན་པའི་ཡེ་ཤེས་ལ་རབ་ཏུ་སློབ་པ་དང་། སྦྱིན་པ་གཏོང་བའི་དབང་པོ་ཡོངས་སུ་སྐྱེད་པ་དང་། སྦྱིན་པ་གཏོང་བའི་བློ་རྒྱ་ཆེར་
བྱེད་པའི་ཚེ། ཅོད་པན་དང་། གཙུག་གི་རིན་པོ་ཆེ་ཡོངས་སུ་བཏང་བས། ཡང་དག་པར་བསྡུས་པའི་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་ཐམས་ཅད་མཁྱེན་པ་ཉིད་དུ། སངས་རྒྱས་ཀྱི་
ཆོས་ཐམས་ཅད་ཀྱིས་སྤྱི་བོ་ནས་དབང་བསྐུར་བས། དབང་པོ་ཐམས་ཅད་ལ་ཤིན་ཏུ་དབང་བསྐུར་བར་གྱུར་ཅིག །སེམས་ཅན་ཐམས་ཅད་ཡེ་ཤེས་ཀྱི་གཙུག་གི་ཕ་རོལ་ཏུ་ཕྱིན་པ་ཐོབ་པས། །སྤྱི་བོ་གཙུག་ཏོར་ཅན་གྱི་མགོ་དང་ལྡན་པར་

གྱུར་ཅིག །སེམས་ཅན་ཐམས་ཅད་འགྲོ་བ་ཀུན་གྱི་ཡོན་ཏན་གྱི་སྤྱི་བོའི་མཐར་ཕྱིན་པས། ཡེ་ཤེས་རིན་པོ་ཆེ་མཆོག་གིས་སེམས་ཅན་ཐམས་ཅད་ཡང་དག་པར་སྡུད་པར་གྱུར་ཅིག །སེམས་ཅན་ཐམས་ཅད་འགྲོ་བ་ཀུན་གྱི་སྤྱི་བོས་ཕྱག་བྱ་བར་འོས་
ཤིང་། ཡེ་ཤེས་རིན་པོ་ཆེ་མཆོག་ལ་ཡང་དག་པར་གནས་པར་གྱུར་ཅིག །སེམས་ཅན་ཐམས་ཅད་ཆོས་ཀྱི་སྐྱེད་པ་ལ་དབང་སྒྱུར་བ་རབ་ཏུ་ཐོབ་སྟེ། ཡེ་ཤེས་ཀྱི་ཅོད་པན་ཤིན་ཏུ་བཅིངས་པར་གྱུར་ཅིག །སེམས་ཅན་ཐམས་ཅད་འཇིག་རྟེན་ཀུན་གྱིས་
བལྟ་བར་མི་ནུས་པའི་ཆོས་ཅན་དུ་གྱུར་ཏེ། ཡེ་ཤེས་ཀྱི་ནོར་བུ་རིན་པོ་ཆེས་མགོ་རབ་ཏུ་བརྒྱན་པར་གྱུར་ཅིག །སེམས་ཅན་ཐམས་ཅད་སྤྱི་བོར་གྱུར་པའི་ཡེ་ཤེས་ཀྱིས་སངས་རྒྱས་ཀྱི་ཆོས་ཐམས་ཅད་ལ་རྣམ་པར་བལྟ་བའི་ཆོས་ཅན་དུ་གྱུར་ཏེ། སྤྱི་
བོ་ཤིན་ཏུ་བཙུན་པ་དང་ལྡན་པར་གྱུར་ཅིག །སེམས་ཅན་ཐམས་ཅད་ཡེ་ཤེས་རིན་པོ་ཆེ་རྒྱ་མཚོའི་སྙིང་པོ་རྣམ་པར་དག་པ་དང་ལྡན་ཞིང་སྟོབས་བཅུའི་རྒྱན་ཅོད་པན་གྱིས་མགོ་རབ་ཏུ་བརྒྱན་པར་གྱུར་ཅིག །སེམས་ཅན་ཐམས་ཅད་འདོད་པའི་ཁམས་ཀྱི་
དང་པོ་ནས་བདུད་ཐམས་ཅད་རྣམ་པར་འཇོམས་པའི་ཕྱིར། སའི་དམ་པ་ལ་གནས་པར་གྱུར་ཅིག །སེམས་ཅན་ཐམས་ཅད་སྟོབས་བཅུའི་མཐར་ཐུག་སྟེ། ཆོས་ཀྱི་ཡེ་ཤེས་ཀྱི་སྤྱི་བོ་རྣམ་པར་དག་པར་གྱུར་ཅིག །སེམས་ཅན་ཐམས་ཅད་ཐམས་
ཅད་མཁྱེན་པའི་དབུ་ཟིལ་གྱིས་མྱི་ནོན་པའི་སྣང་བ་རབ་ཏུ་ཐོབ་སྟེ། རྒྱལ་པོའི་མཆོག་དམ་པར་གྱུར་ཅིག་ཅེས། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཅོད་པན་དང་གཙུག་གི་རིན་པོ་ཆེ་ཡོངས་སུ་གཏོང་བའི་ཚེ། དགེ་བའི་རྩ་བ་
དེས་སེམས་ཅན་ཐམས་ཅད་ཀྱིས་ཡེ་ཤེས་མཆོག་གི་འབྱུང་གནས་རྣམ་པར་དག་པ་དང་། ཡེ་ཤེས་ཀྱི་ཅོད་པན་དང་། ནོར་བུ་རིན་པོ་ཆེ་རབ་ཏུ་ཐོབ་པའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་

པོས་བཙོན་རར་བཅུག་ཅིང་བཙོན་ཆས་བཅིངས་པའི་སེམས་ཅན་སྡུག་བསྔལ་བ། སྡུག་བསྔལ་གྱི་ཁྱིམ་གྱིས་བསྐོར་བ། ཤིང་སྒྲོག་དང་ལྕགས་སྒྲོག་དང་། ལྟུང་གི་བཅིང་བས་བཅིངས་པ། ལུས་ལྕགས་
ཐག་གིས་བཏགས་པ། བསྡམས་པ་ཤིན་ཏུ་རྒྱུ་བའི་ལུས་ཅན་མི་བདེ་བས་ལུས་ཤིན་ཏུ་མནར་བ། སྐྱབས་མྱེད་པར་ལྟུང་བ། བཀྲེས་པ་དང་སྐོམ་པས་ཉེན་པ། གོས་མེད་པ་མུན་པས་ཡོག་ཅིང་ཁེབས་པ། ཤིན་ཏུ་རྐེ་བ། བརླ་ལྕགས་སྒྲོག་གིས་
བསྒྲོགས་པ་དེ་ལྟ་བུ་དག་མཐོང་ནས། བྱང་ཆུབ་སེམས་དཔའ་སྙིང་རྗེ་ཅན་དང་། རྒྱལ་པོ་མྱིག་བཟངས་ཀྱིས་ཇི་ལྟར་བྱས་པ་བཞིན་དུ་བདག་དང་། འཁོར་དུ་བཅས་ནོར་ཐམས་ཅད་དང་བཅས་པར་ཡོངས་སུ་བཏང་སྟེ། བྱིན་ནས་བཙོན་ར་དེ་ནས་སེམས་
ཅན་དེ་དག་ཡོངས་སུ་ཐར་བར་བྱེད་དོ། །དེས་བཙོན་ར་དེ་ནས་སེམས་ཅན་དེ་དག་ཐར་བར་བྱས་ནས་ཀྱང་ནོར་གྱི་སྦྱིན་པ་ཐམས་ཅད་མངོན་པར་བྱིན་ནས་སྨན་དང་། སྨན་པ་དང་སྔགས་ཀྱི་རྣམ་པས་ལུས་ནད་མེད་པར་བྱས་ཏེ། བདེ་བ་དང་ཡིད་དགའ་བ་
ལ་རབ་ཏུ་བཀོད་ནས། ཆོས་རིན་པོ་ཆེ་ཐོས་པར་བྱས་ཏེ། དགའ་བའི་གཏམ་གྱིས་དགེ་བའི་རྩ་བ་ལ་བཀོད་ནས། སངས་རྒྱས་ཀྱི་བསྟན་པ་ལས་མྱི་ཉམས་པར་བྱེད་དོ། །དེ་དེ་ལྟར་སེམས་ཅན་བཙོན་ར་ནས་བཀྱེ་བས། ཡང་དག་པར་བསྡུས་པའི་
དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་སྲེད་པའི་བཅིངས་པ་དང་། ཞགས་པ་ལས་ཤིན་ཏུ་གྲོལ་བར་གྱུར་ཅིག །སེམས་ཅན་ཐམས་ཅད་ཡེ་ཤེས་མཐོང་བའི་ཕ་རོལ་ཏུ་ཕྱིན་ཅིང་འཁོར་བའི་
རྒྱུད་ཤིན་ཏུ་ཆད་པར་གྱུར་ཅིག །སེམས་ཅན་ཐམས་ཅད་བག་ལ་ཉལ་བ་ཤིན་ཏུ་བཅོམ་སྟེ། ཀུན་ནས་འཁོར་བ་དང་། རྣམ་པར་བྲལ་བས་མ་རིག་པའི་མུན་པ་དང་རབ་རིབ་དང་། ལིང་ཏོག་རྣམ་པར་བསྩལ་ཅིང་། རབ་རིབ་མྱེད་པའི་ཡེ་ཤེས་

ཡང་དག་པར་མཐོང་བར་གྱུར་ཅིག །སེམས་ཅན་ཐམས་ཅད་འགྲོ་བ་ཀུན་གདོན་པར་བྱ་བའི་ཡེ་ཤེས་ཀྱི་མཐར་ཐུག་པར་གྱུར་ཏེ། ཁམས་གསུམ་པའི་བཅིངས་པ་ཐམས་ཅད་དང་བྲལ་བར་གྱུར་ཅིག །སེམས་ཅན་ཐམས་ཅད་ཉོན་མོངས་པ་མྱེད་པའི་སར་ཡེ་ཤེས་
བསྒྲིབས་པ་མྱེད་པ་མཐོང་བའི་ཕ་རོལ་ཏུ་ཕྱིན་པ་ཐོབ་ཅིང་ཉོན་མོངས་པའི་བཅིངས་པ་ཐམས་ཅད་ཤིན་ཏུ་ཤིགས་པར་གྱུར་ཅིག །སེམས་ཅན་ཐམས་ཅད་རློམ་སེམས་ཀྱི་གཡོ་བ་རྣམ་པར་རྒྱུ་བ་ཐམས་ཅད་ཡང་དག་པར་གཞོམ་པའི་ཕྱིར་གཡོ་བ་མྱེད་པའི་ཡེ་ཤེས་ལ་
ཡང་དག་པར་གཞོལ་ཞིང་གཡོ་བ་དང་རློམ་སེམས་ཀྱི་བཅིངས་པ་ཐམས་ཅད་དང་བྲལ་བར་གྱུར་ཅིག །སེམས་ཅན་ཐམས་ཅད་ཁམས་གསུམ་ཐམས་ཅད་ཏུ་ཆགས་པ་མེད་པར་གནས་ཤིང་འདོད་པའི་དྲི་མ་ཐམས་ཅད་དང་བྲལ་ཏེ། འདོད་པའི་བཅིངས་
པ་ཐམས་ཅད་རྣམ་པར་སྤངས་པར་གྱུར་ཅིག །སེམས་ཅན་ཐམས་ཅད་བསམ་པ་སངས་རྒྱས་ཐམས་ཅད་ལ་བཏང་བས་ལྷག་པའི་བསམ་པ་ཤིན་ཏུ་གྲོལ་བར་གྱུར་ཅིག །སེམས་ཅན་ཐམས་ཅད་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་
མཐས་གཏུགས་པ་དག་ཏུ་སེམས་ཆགས་པ་མྱེད་པ་དང་། གྲོལ་ཞིང་བཅིངས་པ་མྱེད་པར་གྱུར་ཅིག །སེམས་ཅན་ཐམས་ཅད་འཇིག་རྟེན་གྱི་ཁམས་ཐམས་ཅད་དུ་འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བ་དང་། ཐེག་པ་ཆེན་པོ་ལ་དགོད་པར་བྱ་བའི་ཕྱིར་རྣམ་
པར་རྒྱུ་ཞིང་བྱང་ཆུབ་སེམས་དཔའི་མངོན་པར་ཤེས་པས། འཇིག་རྟེན་གྱི་ཁམས་ཐམས་ཅད་དུ་འདོང་བར་གྱུར་ཅིག་ཅེས། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་བཙོན་ར་དང་། བཙོན་ཅ་ནས་བཀྱེ་བས་ཡང་དག་
པར་བཟུང་བའི་དགེ་བའི་རྩ་བ་དེ་དག་སེམས་ཅན་ཐམས་ཅད་ཤིན་ཏུ་གྲོལ་ཞིང་། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ས་ལ་གནས་པར་འགྱུར་བའི་ཕྱིར་ཡོངས་སུ་བསྔོའོ། །འདི་ལྟར་ཡང་སེམས་ཅན་ལ་ལ་ཞིག་སྲོག་དང་བྲལ་བའི་

ཕྱིར་གསད་དུ་ཁྲིད་པ་སྡུག་བསྔལ་གྱི་རྣམ་པ་གཞན་དང་། གཞན་གྱིས་མྱི་བཟད་ཅིང་འདར་བ་བཅིང་བ་ལྔས་བཅིངས་པ། སྐྱེ་བོ་བརྒྱ་ཕྲག་སྟོང་གིས་ཀུན་ནས་བསྐོར་ཅིང་འཛམ་བུའི་གླིང་དུ་གཏོགས་པ་སྣ་ཚོགས་ནས། བཤལ་
ཞིང་བཀྲི་བ་གཉེན་བཤེས་ཀྱི་རྒྱུད་དང་། མཛའ་བོའི་རྒྱུད་ཐམས་ཅད་དང་བྲལ་བར་གྱུར་པ། རལ་གྲིས་གཙབ་ཅིང་གཤེགས་པ། གསལ་ཤིང་བསྒྲེང་བ་ལ་བསྐྱོན་པ། ལུས་ཐམས་ཅད་ཀུན་ནས་གླེགས་ཏེ། མེ་འབར་བའི་ནང་དུ་དོར་བའམ། སྡུག་
བསྔལ་གྱི་རྣམ་པ་མྱི་བདེ་བ་ཐམས་ཅད་ཀྱིས་མྱི་བདེ་བར་བྱ་བ། གཙེ་བ་སྣ་ཚོགས་ཐམས་ཅད་དུ་བསྒྲེ་བ་ཞིག །བྱང་ཆུབ་སེམས་དཔའ་སེམས་དཔའ་ཆེན་པོས་མཐོང་བར་གྱུར་ན། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་གསད་
པར་བྱ་བ་དེའི་དོན་དུ་ལུས་ཡོངས་སུ་གཏོང་སྟེ། ཇི་ལྟར་བྱང་ཆུབ་སེམས་དཔའ་མི་ཕམ་པ་དང་། རྒྱལ་པོ་ཁྱད་པར་དུ་འགྲོ་བས་ཇི་ལྟར་བྱས་པ་དང་། དེ་མ་ཡིན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་རྣམས་ཀྱང་སེམས་ཅན་གསད་པ་
བླུ་བའི་དོན་དུ་ལུས་གཏོང་ཞིང་། སྡུག་བསྔལ་གྱི་ཚོར་བ་ཐམས་ཅད་ཉམས་སུ་ལེན་པ་དེ་བཞིན་དུ་རབ་ཏུ་གཏོང་བ་བྱེད་ཅིང་ཚིག་འདི་སྐད་དུ་སྨྲའོ། །ཁྱེད་ཀྱིས་མྱི་བདེ་བ་འདི་དག་བདག་ལ་གྱིས་ཤིག །ལུས་འདི་ཡོངས་སུ་གཏོང་གིས་ངའི་སྲོག་
གཅད་པར་གྱིས་ཤིག །ངལ་ནི་ཅི་བྱས་སོ་ཅོག་ཀྱང་མི་ཉན་པ་མྱེད་ཀྱིས། ཁྱེད་ཀྱིས་མྱི་འདི་ལ་ཇི་བྱ་བར་འདོད་པ་དེ་ལས་གྲངས་མེད་པའི་འགྱུར་དུ་སྡུག་བསྔལ་གྱི་རྣམ་པས་གཙེ་བ་ཐམས་ཅད་ཀྱིས་མྱི་བདེ་བ་སྣ་ཚོགས་སུ་གྱིས་ཤིག་ཅེས་ཏེ། འདི་
ལྟར་བདག་གིས་གསད་པར་བཀྲི་བ་མཐོང་ཡང་བདག་གི་ལུས་དང་སྲོག་གིས་མྱི་བླུ་བ་ནི། བདག་ལ་ཚུལ་དང་མི་འདྲའོ། །དེ་ཅིའི་ཕྱིར་ཞེ་ན། བདག་གིས་ནི་སེམས་ཅན་ཐམས་ཅད་ལ་དམྱིགས་ཏེ། འགྲོ་བ་ཐམས་ཅད་བསྲུང་བའི་ཕྱིར་

ཐམས་ཅད་མཁྱེན་པ་ཉིད་དུ་སེམས་བསྐྱེད་དོ། །སྙམ་ནས་བདག་གི་ལུས་དང་སྲོག་ཡོངས་སུ་བཏང་སྟེ། གསད་པར་བྱ་བ་དེ་བླུས་ནས་དགེ་བའི་རྩ་བ་དེ་འདི་ལྟར་ཡོངས་སུ་བསྔོའོ། །སེམས་ཅན་ཐམས་ཅད་གཞན་གྱིས་གཙེ་བའི་སྡུག་བསྔལ་
ཉེ་བར་བྱུང་བས་ལུས་དང་སྲོག་ཤིན་ཏུ་མི་འཕྲོགས་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་ལས་ཐམས་ཅད་མཁྱེན་པའི་བྱང་ཆུབ་སྟོབས་བཅུར་ལུང་བསྟན་པའི་གནས་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་ངན་
སོང་ཐམས་ཅད་ཀྱི་ལམ་ལས་ཡོངས་སུ་འདས་ཏེ། འཇིགས་པ་ཐམས་ཅད་ལས་རབ་ཏུ་ཐར་བར་གྱུར་ཅིག །སེམས་ཅན་ཐམས་ཅད་འཆི་བ་མེད་པའི་ཡེ་ཤེས་ཀྱི་དབྱིངས་སུ་ཞུགས་པས་འཚོ་བ་ཐམས་ཅད་ཀྱི་སྐབས་རབ་ཏུ་རྙེད་པར་གྱུར་ཅིག །སེམས་
ཅན་ཐམས་ཅད་དགེ་བའི་བཤེས་གཉེན་དེ་བཞིན་གཤེགས་པས་ཡོངས་སུ་བཟུང་བས། དགྲས་འཇིགས་པ་ཐམས་ཅད་དང་བྲལ་བར་གྱུར་ཅིག །སེམས་ཅན་ཐམས་ཅད་ཁ་ན་མ་ཐོ་བ་མྱེད་པའི་ལས་དགེ་བ་ཐམས་ཅད་སྤྱོད་པས་རལ་གྲིས་གཙབ་པ་
ལྟ་བུའི་མྱི་བདེ་བ་ཐམས་ཅད་ལས་འདས་པར་གྱུར་ཅིག །སེམས་ཅན་ཐམས་ཅད་བྱང་ཆུབ་ཀྱི་ཤིང་དམ་པའི་དྲུང་དུ་ཕྱིན་ཅིང་། འཇིགས་པ་མྱེད་པར་བདུད་ཀྱི་སྡེ་ཐམས་ཅད་རྣམ་པར་འཐོར་བས་བག་ཚ་བ་དང་། འཇིགས་ཤིང་སྐྲག་པ་ཐམས་ཅད་དང་
བྲལ་བར་གྱུར་ཅིག །སེམས་ཅན་ཐམས་ཅད་བླ་ན་མྱེད་པའི་ཆོས་ཀྱི་འཇིགས་པ་མྱེད་པས་རྣམ་པར་དག་ཅིང་ཁྱུ་མཆོག་དང་། སེང་གེའི་ང་རོ་འབྱིན་པས་འཁོར་གྱི་འཇིགས་པ་དང་། བག་ཚ་བ་ཐམས་ཅད་དང་བྲལ་བར་གྱུར་ཅིག །སེམས་ཅན་ཐམས་
ཅད་ཁ་ན་མ་ཐོ་བ་མྱེད་པའི་ལས་ལ་ཡང་དག་པར་སྤྱོད་ཅིང་། འགྲོ་བ་ཐམས་ཅད་ཀྱི་ནང་ན་བསྒྲིབས་པ་མྱེད་པའི་ཡེ་ཤེས་དང་ལྡན་པའི་སེང་གེར་གྱུར་ཅིག །སེམས་ཅན་ཐམས་ཅད་སྐྱེ་བོ་ཀུན་ཡོངས་སུ་སྐྱོང་བའི་སེམས་དང་ལྡན་ཞིང་། འགྲོ་བ་ཀུན་ཏུ་འཇིགས་

པ་མྱེད་པའི་ཁང་པར་ཞུགས་པར་གྱུར་ཅིག་ཅེས། དེ་ལྟར་གསད་པར་གྱུར་པ་དག །བྱང་ཆུབ་སེམས་དཔའ་སེམས་དཔའ་ཆེན་པོས་རང་གི་ལུས་དང་། སྲོག་བཏང་སྟེ། བླུས་ནས། དགེ་བའི་རྩ་བ་དེ་དག་སེམས་ཅན་
ཐམས་ཅད་ཀྱི་འཁོར་བའི་བཙོན་རའི་སྡུག་བསྔལ་ཀུན་སྤང་བ་དང་སངས་རྒྱས་ཐམས་ཅད་ཀྱི་བདེ་བ་མྱི་སྤང་བའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ལ་མགོ་ལས་གཙུག་ཕུད་དང་། ཐོར་པག་ཏུ་བཅས་
པ་བསླངས་ན། རྒྱལ་པོ་གཙུག་ན་རིན་པོ་ཆེ་དང་། བྱང་ཆུབ་སེམས་དཔའ་ཡན་ལག་དམ་པ་ཤིན་ཏུ་འཕགས་པ་དང་། དེ་མ་ཡིན་པའི་བྱང་ཆུབ་སེམས་དཔའ་གཞན་དག་གིས་ཇི་ལྟར་བྱིན་པ་དེ་བཞིན་དུ། དེས་སློང་བ་དེ་དག་མཐོང་ནས།
གཏོང་བར་མོས་པའི་ཚིག་དགེ་བས་ཐོར་པག་དང་། གཙུག་ཕུད་དུ་བཅས་ཏེ་ཁྱེར་ཅིག་ཅེས་སྟོབས་ཤིང་། ཀྱེ་ཚུར་ཤེག་བདག་གི་མགོ་ལས་གཙུག་ཕུད་དང་། ཐོར་བག་ཏུ་བཅས་པ་ལོང་ཤིག་ཅེས་ནས། བྱང་ཆུབ་སེམས་དཔའ་འཛམ་བུའི་གླིང་ན་བཙུན་
པ་མྱིའི་དམ་པ་དེས། ཡིད་རྩེ་གཅིག་ཏུ་བྱས་ཏེ། ཡིད་མ་འཁྲུགས་པ་དང་། ཡིད་མ་འདྲེས་པ་དང་། ལས་གཞན་ལ་མི་སེམས་པའི་ཡིད་དང་། འཇིག་རྟེན་ལས་འཕགས་པའི་ཡིད་དང་། རབ་ཏུ་ཞི་བའི་ཡིད་དང་། ཐམས་ཅད་
མཁྱེན་པ་ཉིད་ཀྱི་ཡིད་དང་། དག་པའི་ཡིད་དང་། དྲང་བའི་ཡིད་དང་། རིགས་པ་ལ་བརྩོན་པའི་ཡིད་ཀྱིས་གཙུག་ཕུད་དང་། ཐོར་པག་ཏུ་བཅས་པ་དེ་སློང་བ་ལ་གཏོང་བའི་ཚེ། གཙུག་ཕུད་དང་། ཐོར་པག་ཏུ་བཅས་པར་མཚོན་གྱིས་ཕོག་སྟེ།
མགོ་ལས་ཕབ་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། རིམ་གྲོ་དང་བཅས་པའི་ལུས་ཀྱིས་སོར་མོ་བཅུའི་ཐལ་མོ་སྦྱར་ནས། འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་ཐམས་ཅད་ཀྱི་བྱང་ཆུབ་ཀྱི་སྤྱོད་པ་

རྗེས་སུ་དྲན་པའི་སེམས་བསྐྱེད་པ་དང་། དགའ་བས་རྣམ་པར་སྤེལ་བའི་ལྷག་པའི་བསམ་པ་དང་། ཆོས་ཀྱིས་ཡོངས་སུ་རྒྱས་པའི་ཡིད་ཀྱི་དབང་པོ་དང་། སྡུག་བསྔལ་གྱི་ཚོར་བས་དེངས་པར་མི་འགྱུར་བའི་ཡིད་ཀྱི་དབང་པོ་དང་། སྡུག་བསྔལ་གྱི་ཚོར་བ་
སྐྱེ་བའི་མཚན་ཉིད་དང་། ཐ་དད་པར་ཁོང་དུ་ཆུད་པ་དང་། ཚོར་བ་གཅིག་ནས་གཅིག་ཏུ་བརྒྱུད་པ་དེ་དག་ཐམས་ཅད་མྱི་རྟོག་གོ །ཞེས་བྱ་བར་རབ་ཏུ་ཤེས་པ་དང་། བྱང་ཆུབ་སེམས་དཔའ་འདས་པ་དང་། མ་འོངས་པ་དང་། ད་ལྟར་བྱུང་བ་ཐམས་ཅད་
དང་། རྒྱུད་ཀྱི་ཚུལ་གཅིག་ཏུ་གྱུར་པའི་གཏོང་བའི་སེམས་དང་། སེམས་ཐམས་ཅད་མཁྱེན་པ་ཉིད་དུ་བསྐྱེད་པ་ལས་ཕྱིར་མྱི་ལྡོག་པ་དང་། བྱང་ཆུབ་སེམས་དཔའི་སྤྱོད་པ་ལྷག་པའི་བསམ་པའི་རྣམ་པས་ཐོབ་པ། གཞན་གྱི་དྲིང་མྱི་འཇོག་
པས། དགེ་བའི་བཤེས་གཉེན་གྱིས་བསྟན་པའི་ཚུལ་ལ་གནས་ཏེ། གཙུག་ཕུད་དང་། ཐོར་པག་དུ་བཅས་པ་མགོ་ལས་ཕོག་སྟེ། ཡོངས་སུ་གཏོང་བའི་ཚེ། དགེ་བའི་རྩ་བ་དེ་འདི་ལྟར་ཡོངས་སུ་བསྔོ་སྟེ། སེམས་ཅན་ཐམས་ཅད་བྱང་ཆུབ་
སེམས་དཔའི་གཙུག་གི་མཆོད་རྟེན་དུ་གྱུར་ཏེ། གཙུག་ཏོར་བལྟར་མི་སྣང་བར་གྱུར་ཅིག །སེམས་ཅན་ཐམས་ཅད་སྐྲ་ཤིན་ཏུ་ཕྲ་བ་དང་། ཉོན་མོངས་པ་ཐམས་ཅད་རྣམ་པར་བསྩལ་ཅིང་། སྐྲ་རྡོ་རྗེ་ནག་པོའི་དམ་པ་ལྟ་བུར་གྱུར་ཅིག །སེམས་
ཅན་ཐམས་ཅད་སྐྲ་སྟུག་ཅིང་སྐྲ་མཚམས་ལེགས་པ་དང་། སྐྲ་སྣུམ་པར་གྱུར་ཅིག །སེམས་ཅན་ཐམས་ཅད་མགོ་ལེགས་པ་ལས་ཤིན་ཏུ་ལེགས་པར་སྐྱེས་པའི་སྐྲ་རབ་ཏུ་འཇམ་པ་དང་ལྡན་པར་གྱུར་ཅིག །སེམས་ཅན་ཐམས་ཅད་སྐྲ་དགའ་བ་འཁྱིལ་པ་ལྟར་
གཡས་ཕྱོགས་སུ་འཁྱིལ་ཅིང་དཔལ་གྱི་བེའུ་དང་། བཀྲ་ཤིས་ཀྱི་སྐྲ་དང་ལྡན་པར་གྱུར་ཅིག །སེམས་ཅན་ཐམས་ཅད་ཉོན་མོངས་པ་དང་། ཉེ་བའི་ཉོན་མོངས་པ་ལས་རྣམ་པར་འདས་ཤིང་སངས་རྒྱས་ཀྱི་མཚན་དང་ལྡན་པའི་སྐྲ་ཐོབ་པར་གྱུར་ཅིག །སེམས་ཅན་

ཐམས་ཅད་ཕྱོགས་བཅུའི་འཇིག་རྟེན་དུ་འགྲོ་བ་ཐམས་ཅད། རྒྱས་པར་རང་གི་སྐྲ་ལས་འོད་གཟེར་རབ་ཏུ་འགྱེད་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་དབུ་ཤིན་ཏུ་རྣམ་པར་དག་པ་ལྟར་སྐྲ་ཤིན་ཏུ་མཛེས་པར་
གྱུར་ཅིག །སེམས་ཅན་ཐམས་ཅད་སེམས་མཉམས་ཤིང་། སངས་རྒྱས་ཀྱི་དབུ་སྐྲ་དང་དབུ་ལྟ་བུར་མཛེས་པ་དང་ལྡན་པས་སྤྱི་བོ་ལ་གཞག་པའི་མཆོད་རྟེན་དུ་འོས་པའི་སྐྲ་དང་ལྡན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་དབུ་ལྟར་ཆགས་པ་མྱེད་པའི་
སྐྲ་མཛེས་པར་སྐྱེས་པས། མུན་པ་དང་། རྡུལ་མྱི་ཆགས་པ་དང་ལྡན་པར་གྱུར་ཅིག་ཅེས། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་གཙུག་ཕུད་དང་། ཐོར་པག་ཏུ་བཅས་པ་ཡོངས་སུ་བཏང་བས་ཡང་དག་པར་བཟུང་བའི་དགེ་བའི་རྩ་བ་དེ་དག་
སེམས་ཅན་ཐམས་ཅད་ཀྱིས་ས་ལྟ་བུར་ཤིན་ཏུ་ཞི་བའི་སེམས་ཡོངས་སུ་རྫོགས་པར་བྱ་བ་དང་། ཐམས་ཅད་མཁྱེན་པའི་སྟོབས་བཅུའི་མཐས་གཏུགས་པར་བྱ་བའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་
སློང་བ་རྣམས་ལ་ཇི་ལྟར་བྱང་ཆུབ་སེམས་དཔའ་དགའ་བ་བྱེད་པ་དང་། རྒྱལ་པོ་ཟླ་འོད་དང་དེ་མ་ཡིན་པའི་བྱང་ཆུབ་སེམས་དཔའ་ཚད་མེད་པ་གཞན་དག་གིས་གཏོང་བའི་མྱིག་ཡོངས་སུ་སྦྱངས་པའི་སེམས་དང་། ཡེ་ཤེས་ཀྱི་མྱིག་ཡོངས་སུ་སྦྱངས་པའི་བློ་
དང་། ཆོས་ཀྱི་སྣང་བ་རབ་ཏུ་ཐོབ་པའི་ཡིད་ཀྱི་གནས་དང་། བླ་ན་མེད་པའི་སངས་རྒྱས་མངོན་དུ་གྱུར་པའི་ཡིད་ཀྱི་རྣམ་པ་དང་། མངོན་པར་ཤེས་པ་ཐམས་ཅད་ཀྱི་མཐར་ཐུག་པའི་ཡོངས་སུ་བསྔོ་བ་དང་། ཡེ་ཤེས་ཀྱི་སྐྱེ་མཆེད་ལ་ཡང་དག་པར་བཏང་བའི་
སེམས་དང་། དུས་གསུམ་གྱི་བྱང་ཆུབ་སེམས་དཔའ་དང་། མཉམ་པར་བྱས་པའི་སྦྱིན་པ་དང་། གཏོང་བའི་སེམས་དང་། ཞེ་སྡང་བ་མེད་པའི་མིག་གིས་དད་པ་མྱི་ཟློག་པའི་དབང་དང་། སློང་བ་རྣམས་ལ་ཕན་འདོགས་པའི་སེམས་དང་། སངས་

རྒྱས་ཀྱི་སྤྱན་ལ་གཞོལ་བས་བྱང་ཆུབ་སེམས་དཔའི་ཐེག་པ་ཆེན་པོ་དང་། བྱམས་པ་དང་། སྙིང་རྗེ་ཡོངས་སུ་བསྒོམས་པ་དང་། དབང་པོ་དྲུག་ཤིན་ཏུ་བསྡམས་པས་སློང་བ་རྣམས་ལ་མྱིག་བྱིན་པ་དེ་བཞིན་དུ་དེ་ཡང་མིག་ཡོངས་སུ་གཏོང་ཞིང་ཆོས་དེ་ལྟ་བུ་
ལ་ཞུགས་པའི་སེམས་ཀྱིས་སློང་བ་དང་། འདོད་པ་དག་ལ་སྦྱིན་པ་བྱེད་ཅིང་མཆོད་སྦྱིན་གྱི་དོན་ལ་འཇུག་པ་དང་། ཆོས་ཀྱི་མཐུ་ཤིན་ཏུ་བསྐྱེད་པ་དང་། འཇིག་རྟེན་ཐམས་ཅད་ཀྱི་དགའ་བར་བལྟ་བ་དང་། བག་མྱེད་པའི་སྲེད་པ་རྣམ་པར་ཟློག་པར་
བྱེད་པ་དང་། འཇིག་རྟེན་གྱི་དགའ་བ་དང་། འདོད་པ་སྣ་ཚོགས་མཐོང་བས་རང་གི་དགའ་བ་ཁོང་དུ་ཆུད་པར་བྱེད་པ་དང་། བྱང་ཆུབ་སེམས་དཔའི་དགའ་བ་མྱོང་བར་བྱེད་པ་དང་། ཅི་བསླངས་པའི་དངོས་པོས་ཁ་མྱི་སྟོངས་པར་བྱེད་པ་དང་། མྱི་གཉིས་པའི་
སྦྱིན་པ་རྗེས་སུ་སྲུང་བ་དང་། རློམ་སེམས་མྱེད་པས་ཤིན་ཏུ་སྦྱིན་པ་ཡོངས་སུ་གཏོང་བ་དང་། སློང་བ་རྣམས་ཀྱིས་དངོས་པོ་ཅི་བསླངས་པ་སྦྱིན་པར་བྱེད་པའི་ཚེ། དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་
འགྲོ་བ་ཐམས་ཅད་ཀྱི་མྱིག་ཏུ་གྱུར་ཏེ། མྱིག་གི་དམ་པར་གྱུར་ཅིག །སེམས་ཅན་ཐམས་ཅད་ཡེ་ཤེས་ཀྱི་མཛོད་ཤིན་ཏུ་ཡངས་པས་ཉམས་པ་མྱེད་པའི་མྱིག་ཏུ་གྱུར་ཅིག །སེམས་ཅན་ཐམས་ཅད་སྣང་བ་མྱི་འཕྲོགས་པ་དང་ལྡན་ཞིང་ཤའི་མྱིག་རྣམ་པར་དག་
པ་ཡོངས་སུ་གྲུབ་པར་གྱུར་ཅིག །སེམས་ཅན་ཐམས་ཅད་ཤི་འཕོ་དང་། སྐྱེ་བ་ཤེས་ཤིང་ལྷའི་མྱིག་རྣམ་པར་དག་པར་གྱུར་ཅིག །སེམས་ཅན་ཐམས་ཅད་དེ་བཞིན་གཤེགས་པའི་ཡེ་ཤེས་ཀྱི་རྗེས་སུ་འདོང་ཞིང་ཆོས་ཀྱི་མྱིག་རབ་ཏུ་ཐོབ་པར་གྱུར་ཅིག།
སེམས་ཅན་ཐམས་ཅད་གཏོང་བ་ཐམས་ཅད་རྣམ་པར་སྟོན་པས་ཤེས་རབ་ཀྱི་མྱིག་ཐོབ་པར་གྱུར་ཅིག །སེམས་ཅན་ཐམས་ཅད་ཆོས་ཐམས་ཅད་མངོན་པར་འཚང་རྒྱ་བའི་ཕྱིར། སངས་རྒྱས་ཀྱི་སྤྱན་དང་ལྡན་པར་གྱུར་ཅིག །སེམས་ཅན་ཐམས་ཅད་

ཆགས་པ་མྱེད་པའི་མྱིག་གི་མཐར་ཐུག་སྟེ། ཀུན་ཏུ་ལྟ་བའི་མིག་དང་ལྡན་པར་གྱུར་ཅིག །སེམས་ཅན་ཐམས་ཅད་སེམས་ཅན་གྱི་ཁམས་ཡོངས་སུ་ཤེས་ཤིང་། རབ་རིབ་མེད་པའི་མིག་དང་ལྡན་པར་གྱུར་ཅིག །སེམས་
ཅན་ཐམས་ཅད་སྟོབས་བཅུ་མངའ་བའི་དེ་བཞིན་གཤེགས་པར་ཕྱིན་པས་བསྒྲིབས་པ་མེད་པའི་མྱིག་དང་ལྡན་པར་གྱུར་ཅིག་ཅེས། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་མྱིག་ཡོངས་སུ་གཏོང་བ་ན། ཐམས་ཅད་མཁྱེན་པའི་ཚད་ཀྱི་མྱིག་གི་ཆོས་
སེམས་ཅན་ཐམས་ཅད་ཡོངས་སུ་བསྔོ་བ་ལ་ཉེ་བར་འགོད་དོ།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། །བམ་པོ་ལྔ་པ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཇི་ལྟར་རྒྱལ་པོ་
ཁྱད་པར་དུ་འགྲོ་བ་དང་། བྱང་ཆུབ་སེམས་དཔའ་མདུད་པ་མེད་པའི་སྤྱི་གཙུག་གིས་ཡོངས་སུ་བཏང་བ་བཞིན་དུ་སློང་བ་ཉེ་བར་འོངས་པ་ལ་བྱང་ཆུབ་སེམས་དཔའི་སྤྱོད་པ་བླང་བའི་སེམས་དང་། དེ་བཞིན་གཤེགས་པའི་རིགས་སུ་རིགས་དང་ལྡན་པར་བྱུང་བས། སངས་རྒྱས་
ཀྱི་རིགས་སུ་བྱུང་བའི་སྦྱིན་པའི་སེམས་དང་། བྱང་ཆུབ་སེམས་དཔའ་ཐམས་ཅད་རྗེས་སུ་དྲན་པའི་སྤྱོད་པ་ལ་བརྩོན་པ་དང་། སངས་རྒྱས་ཀྱི་བྱང་ཆུབ་ཏུ་མཐུན་པར་སྐྱེས་པ་དང་། དབང་པོ་དང་། ཡེ་ཤེས་དང་། ཡོན་ཏན་གྱིས་ཤིན་ཏུ་བཙུན་པ་དང་། ཁམས་
གསུམ་མ་དག་ཅིང་སྙིང་པོ་མེད་པ་ལ་སྙིང་པོར་རབ་ཏུ་རྟོགས་པ་དང་། སངས་རྒྱས་དང་བྱང་ཆུབ་སེམས་དཔའ་བལྟ་བ་རབ་ཏུ་ཐོབ་པས། རང་གི་ལུས་ལ་ཆགས་པ་མེད་པའི་སེམས་དང་། གནས་མེད་པའི་སངས་རྒྱས་ཀྱི་ཆོས་ཐམས་ཅད་རྗེས་སུ་དྲན་པར་
གནས་པ་དང་། དུལ་བ་དང་ཞི་བའི་སེམས་དང་། དབང་པོའི་རྒྱུ་བ་ཤིན་ཏུ་ཞི་བ་དང་། འགྲོ་བའི་མྱ་ངམ་ཐམས་ཅད་ནས་སེམས་ཅན་གདོན་པར་སེམས་པའི་ཡེ་ཤེས་འབྱུང་བའི་ཤེས་རབ་དང་། བསོད་ནམས་ཀྱི་འབྱུང་གནས་དང་། རྒྱུད་ཆེད་དུ་བརྗོད་

པ་རྒྱ་མཚོས་གཏོང་བའི་སེམས་ཡངས་པར་བྱས་པ་དང་། དོན་ལ་རྣམ་པར་ངེས་པའི་ཆོས་དང་། མགོན་པོ་ཐམས་ཅད་ཀྱི་ལམ་དུ་འཇུག་པ་དང་། ཆོས་ཀྱི་དབང་ཕྱུག་ལ་ཡེ་ཤེས་ཀྱིས་སྤྱོད་པ་དང་། རང་གི་ལུས་སྙིང་པོ་མེད་པ་ལས་སྙིང་པོ་བླང་བའི་
བློས་ཡོངས་སུ་གཏོང་བའི་ཚེ། རྣ་བ་དང་། སྣ་ཡོངས་སུ་བཏང་བས་ཡང་དག་པར་བཟུང་བའི་དགེ་བའི་རྩ་བ་དེ་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་ཆོས་ཐམས་ཅད་ཀྱི་སྒྲ་རྣམ་པར་རིག་པར་བྱ་བ་ལ་ཆགས་པ་མྱེད་པའི་རྣ་བ་
དང་ལྡན་པར་གྱུར་ཅིག །སེམས་ཅན་ཐམས་ཅད་ཀྱིས་སྒྲ་ཐམས་ཅད་སྐད་ཇི་ལྟ་བ་བཞིན་དུ་ཤེས་པར་བྱ་བའི་ཕྱིར་བསྒྲིབས་པ་མེད་པའི་རྣ་བ་དང་ལྡན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་སྙན་དང་ལྡན་པས་ཐོགས་པ་མྱེད་པའི་རྣ་བ་དང་ལྡན་པར་
གྱུར་ཅིག །སེམས་ཅན་ཐམས་ཅད་རྣ་བའི་སྐྱེ་མཆེད་ཤིན་ཏུ་བསྒོམས་པས་རྣ་བ་རྣམ་པར་དག་པར་གྱུར་ཅིག །སེམས་ཅན་ཐམས་ཅད་རྣམ་པར་ཤེས་པ་ཞི་བ་སྐྱེ་བའི་ཕྱིར་བསྒྲིབས་པ་མེད་པའི་རྣ་བ་དང་ལྡན་པར་གྱུར་ཅིག །སེམས་ཅན་ཐམས་ཅད་སངས་རྒྱས་
ཐམས་ཅད་ཀྱི་གསུང་ཁོང་དུ་ཆུད་པའི་ཕྱིར་ཆོས་ཀྱི་དབྱིངས་ལ་གཞོལ་བའི་རྣ་བ་དང་ལྡན་པར་གྱུར་ཅིག །སེམས་ཅན་ཐམས་ཅད་བསྒྲིབས་པ་མྱེད་པའི་ཆོས་རྣམ་པར་རིག་པར་བྱ་བའི་ཕྱིར་གནས་མྱེད་པའི་རྣ་བ་དང་ལྡན་པར་གྱུར་ཅིག །སེམས་ཅན་ཐམས་ཅད་ཕྱིར་
རྒོལ་བ་འཇིག་པར་བྱེད་པའི་ཤེས་པ་ལ་མྱི་ཕྱེད་པའི་རྣ་བ་དང་ལྡན་པར་གྱུར་ཅིག །སེམས་ཅན་ཐམས་ཅད་རྣ་བ་ཤིན་ཏུ་དག་པ་ལ་དབང་སྒྱུར་བས་ཀུན་ཏུ་འཇུག་པའི་རྣ་བ་དང་ལྡན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་སྙན་རབ་ཏུ་ཐོབ་པར་བྱ་བ་
ཐོབ་པས་ལྷའི་རྣ་བ་རབ་ཏུ་ཐོབ་པར་གྱུར་ཅིག་ཅེས། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་རྣ་བ་ཡོངས་སུ་བཏང་བས་ཡང་དག་པར་བསྡུས་པའི་དགེ་བའི་རྩ་བ་དེ་དག་སེམས་ཅན་ཐམས་ཅད་ཀྱི། རྣ་བ་རྣམ་པར་དག་པའི་ཕྱིར་ཡོངས་སུ་བསྔོས་ནས།

སྣ་རྣམ་པར་དག་པར་ཡོངས་སུ་བསྔོ་སྟེ། སེམས་ཅན་ཐམས་ཅད་ལེགས་པར་མཐོང་བའི་སྣ་དང་། དཔེ་བྱད་བཟང་པོའི་སྣ་དང་། མཚན་བཟང་པོའི་སྣ་དང་། ཤིན་ཏུ་ཡིད་དུ་འོང་བའི་སྣ་དང་། རྣམ་པར་དག་པའི་
སྣ་དང་། རིམ་གྱིས་གཞོལ་བའི་སྣ་དང་། མཛེས་པ་འཕགས་པའི་སྣ་དང་། དགྲ་ཐམས་ཅད་རབ་ཏུ་འདུལ་བའི་སྣ་དང་། ངོ་བལྟ་ན་སྡུག་པའི་སྣ་དང་། དེ་བཞིན་གཤེགས་པ་སངས་རྒྱས་ཀྱི་ཤངས་རབ་ཏུ་འཐོབ་པའི་ཕྱིར་ཡོངས་སུ་བསྔོའོ། །སེམས་
ཅན་ཐམས་ཅད་ངོ་ལ་མི་སྡུག་པ་མེད་པ་དང་ཆོས་ཐམས་ཅད་ཀྱི་ངོ་དང་། ཆགས་པ་མེད་པའི་ངོ་དང་། བལྟ་ན་སྡུག་པའི་ངོ་དང་། མི་མཐུན་པ་མྱེད་པའི་ངོ་དང་། ཤིན་ཏུ་རྣམ་པར་དག་པའི་ངོ་དང་། ཁ་ན་མ་ཐོ་བ་མྱེད་པའི་ངོ་དང་། དེ་བཞིན་གཤེགས་པའི་ཞལ་གྱི་
དཀྱིལ་འཁོར་ལྟ་བུའི་ངོ་དང་། ཀུན་ནས་བལྟ་བའི་ངོ་དང་། ཡིད་དུ་འོང་ཞིང་ཚད་མེད་པའི་ངོ་དང་ལྡན་པར་གྱུར་ཅིག་ཅེས། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣ་བ་དང་། སྣ་ཡོངས་སུ་བཏང་བས་ཡང་དག་པར་བསྡུས་པའི་དགེ་བའི་
རྩ་བ་དེ་དག་སེམས་ཅན་ཐམས་ཅད་ལ་ཡོངས་སུ་བསྔོ་སྟེ། ཅི་ནས་ཀྱང་སེམས་ཅན་ཐམས་ཅད་སངས་རྒྱས་ཀྱི་ཆོས་ཐམས་ཅད་ལ་རབ་ཏུ་འཇུག་པར་འགྱུར་བ་དང་། ཅི་ནས་ཀྱང་སེམས་ཅན་ཐམས་ཅད་ཀྱིས་སངས་རྒྱས་ཀྱི་ཆོས་ཐམས་ཅད་ཤིན་ཏུ་འདུས་
པར་འགྱུར་བ་དང་། ཅི་ནས་ཀྱང་སེམས་ཅན་ཐམས་ཅད་ཀྱིས་སངས་རྒྱས་ཀྱི་ཆོས་ཐམས་ཅད་ཤིན་ཏུ་ཤེས་པར་འགྱུར་བ་དང་། ཅི་ནས་ཀྱང་སེམས་ཅན་ཐམས་ཅད་ཀྱིས་སངས་རྒྱས་ཀྱི་ཆོས་ཐམས་ཅད་ལ་ཤིན་ཏུ་འཇུག་པར་འགྱུར་བ་དང་། ཅི་ནས་ཀྱང་
སེམས་ཅན་ཐམས་ཅད་ཀྱིས་དེ་བཞིན་གཤེགས་པ་ཐམས་ཅད་ཤིན་ཏུ་མཐོང་བར་འགྱུར་བ་དང་། ཅི་ནས་ཀྱང་སེམས་ཅན་ཐམས་ཅད་ཀྱིས་སངས་རྒྱས་ཀྱི་ཆོས་ཀྱི་སྒོ་ཁོང་དུ་ཆུད་པར་འགྱུར་བ་དང་། ཅི་ནས་ཀྱང་སེམས་ཅན་ཐམས་ཅད་ཤིན་ཏུ་ཟིལ་

གྱིས་མྱི་ནོན་པའི་ཡོངས་སུ་དག་པ་འཐོབ་པར་འགྱུར་བ་དང་། ཅི་ནས་ཀྱང་སེམས་ཅན་ཐམས་ཅད་ཀྱིས་སངས་རྒྱས་ཀྱི་ཆོས་ཐམས་ཅད་ལ་སྣང་བ་རབ་ཏུ་འཐོབ་པར་འགྱུར་བ་དང་། ཅི་ནས་ཀྱང་སེམས་ཅན་ཐམས་ཅད་ཀྱི་སངས་རྒྱས་ཀྱི་ཞིང་ཐམས་ཅད་ཡོངས་སུ་
དག་པར་འགྱུར་བ་དང་། ཅི་ནས་ཀྱང་སེམས་ཅན་ཐམས་ཅད་དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་པའི་ལུས་དང་ལྡན་པར་འགྱུར་བ་དེ་ལྟ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་
དཔའ་ཆེན་པོ་སྐྱིད་པ་ཟིལ་གྱིས་མྱི་ནོན་པའི་ས་ལ་གནས་ཏེ། ཨུ་དུམ་པ་ར་ལྟར་ཤིན་ཏུ་དཀོན་པར་སེམས་པའི་སེམས་རྣམ་པར་དག་པ་དང་། གཏོང་བ་མྱི་ཟད་ཅིང་འབྱམ་ཀླས་པ་དང་། ངད་ཅིང་ཀླུང་སྤྲུགས་ཏེ་གཏང་བའི་སེམས་དང་། ཡོངས་སུ་གཏོང་
བའི་བློ་མཐའ་ཡས་པ་དང་། དུལ་བ་དང་། ཡོངས་སུ་དུལ་བའི་ཡིད་ཀྱིས་གཏོང་བའི་དབང་པོ་དང་། གཏོང་བ་ཐམས་ཅད་ཡོངས་སུ་གཏོང་བའི་མཐར་ཐུག་པའི་ཐམས་ཅད་མཁྱེན་པའི་སྨོན་ལམ་དང་འགྲོ་བ་ཐམས་ཅད་བདེ་བར་བྱེད་པའི་གཏོང་བའི་
འབྲས་བུ་དང་། གཏོང་བ་ཆེན་པོ་དང་། ཤིན་ཏུ་གཏོང་བ་དང་། རབ་ཏུ་གཏོང་བ་དང་། མཆོག་ཏུ་གཏོང་བའི་སེམས་ཀྱིས་རང་གི་ལུས་དང་། ཡན་ལག་དང་། གདོང་གིས་ཀྱང་ཕན་འདོགས་པ་དང་། མྱི་སྨོན་པར་གཏོང་བའི་སེམས་ཀྱིས་རྣམ་པ་དེ་
ལྟ་བུའི་ཆོས་ལ་རབ་ཏུ་གནས་ཏེ་ཇི་ལྟར་རྒྱལ་པོ་མེ་ཏོག་སོ་དང་། གླང་པོའི་རྒྱལ་པོ་མཆེ་བ་དྲུག་པས་སོ་ཇི་ལྟར་བྱིན་པ་དེ་བཞིན་དུ་རང་གི་ལུས་དང་། ཁ་ནས་སོ་ཡོངས་སུ་གཏོང་བའི་ཚེ། དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། །སེམས་ཅན་
ཐམས་ཅད་འགྲོ་བ་ཀུན་གྱིས་མཆོད་རྟེན་དུ་མཆོད་པར་འོས་པར་གྱུར་ཏེ། མཆེ་བ་དཀར་ཞིང་རྣོ་བ་དང་ལྡན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་མཚན་རབ་ཏུ་ཐོབ་པས་སོ་མཉམ་ཞིང་ཐགས་བཟང་བར་གྱུར་ཅིག །སེམས་ཅན་ཐམས་ཅད་

བྱང་ཆུབ་སེམས་དཔའི་ཕ་རོལ་ཏུ་ཕྱིན་པ་ལ་ལེགས་པར་ཞུགས་ཤིང་། དུལ་བའི་སེམས་ཀྱིས་ཉེ་བར་སྤྱོད་པར་གྱུར་ཅིག །སེམས་ཅན་ཐམས་ཅད་གདོང་གི་དཀྱིལ་འཁོར་བལྟ་ན་སྡུག་ཅིང་ཁའི་ནད་དང་སོ་རྣམ་པར་དག་པར་གྱུར་
ཅིག །སེམས་ཅན་ཐམས་ཅད་ཁ་དང་སོ་དཔེ་མྱེད་པ་རྣམ་པར་དག་ཅིང་། བཞིན་དྲན་པའི་རྒྱན་གྱིས་བརྒྱན་པར་གྱུར་ཅིག །སེམས་ཅན་ཐམས་ཅད་སོ་བཟང་པོའི་གསེབ་ནས་སྤོས་ཞིམ་པོའི་མཆོག་གྲངས་མེད་པ་ཡིད་དུ་འོང་བའི་དགའ་བ་བསྐྱེད་
པའི་ངད་འབྱུང་བས་ཡོངས་སུ་དག་ཅིང་སོ་བཞི་བཅུ་ཚང་བ་དང་ལྡན་པར་གྱུར་ཅིག །སེམས་ཅན་ཐམས་ཅད་ཤིན་ཏུ་དུལ་བའི་སོ་རབ་ཏུ་ཐོབ་ཅིང་བཀྲ་ཤིས་དང་། དགའ་བ་འཁྱིལ་པ་དང་། པད་མོ་སྣ་ཚོགས་ཀྱིས་མཛེས་པར་བྲིས་པའི་སོ་དང་
ལྡན་པར་གྱུར་ཅིག །སེམས་ཅན་ཐམས་ཅད་གདོང་གི་དཀྱིལ་འཁོར་ནས་ཚད་མེད་པའི་འོད་གཟེར་སྣང་བ་བྱུང་བས་འོད་ཟེར་བྱེ་བ་ཁྲག་ཁྲིག་བརྒྱ་སྟོང་མཐའ་ཡས་པ་རབ་ཏུ་འབྱུང་བའི་སོ་དང་ལྡན་པར་གྱུར་ཅིག །སེམས་ཅན་ཐམས་ཅད་ཁ་ཟས་ལ་མ་
ཆགས །མ་ཞེན་ཅིང་ཁ་ན་མ་ཐོ་བ་མེད་པར་སྤྱོད་པས་སྦྱིན་པའི་གནས་དམ་པའི་མཐར་ཐུག་པར་གྱུར་ཏེ། །སོའི་ཐགས་ལེགས་ཤིང་འབྲས་ཆན་ཁ་ཕྱེ་བ་ལྟ་བུར་གྱུར་ཅིག །སེམས་ཅན་ཐམས་ཅད་བྱང་ཆུབ་སེམས་དཔའི་དམ་པ་ལུང་སྟོན་ཅིང་
སོའི་གསེབ་ཀུན་ནས་འོད་འཕྲོ་བ་ཁ་དོག་མཐའ་ཡས་པའི་སྣང་བ་འབྱུང་བ་དང་ལྡན་པར་གྱུར་ཅིག་ཅེས། དེ་ལྟར་བྱང་ཆུབ་སེམས་དཔའ་སོའི་སྦྱིན་པས་ཡང་དག་པར་བསྡུས་པའི་དགེ་བའི་རྩ་བ་དེ་དག་སེམས་ཅན་མ་ལུས་པར་ཐམས་ཅད་མཁྱེན་པ་ཉིད་དུ་
ཡང་དག་པར་བསྐྱེད་པ་དང་། ཆགས་པ་མེད་པའི་རྒྱན་གྱིས་ཆོས་ཐམས་ཅད་ཤེས་པ་རྣམ་པར་དག་པར་བྱ་བའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ལ་ལྕེ་བསླངས་ན་ཇི་ལྟར་རྒྱལ་པོ་བཞིན་བཟངས་དང་།

བྱང་ཆུབ་སེམས་དཔའ་ཕྱིར་མི་ལྡོག་པ་དང་། དེ་མ་ཡིན་པའི་བྱང་ཆུབ་སེམས་དཔའ་གཞན་དག་གིས་ཀྱང་སྐྱེ་བའི་སྐྱེ་མཆེད་རྣམ་པ་སྣ་ཚོགས་དག་ལ་གནས་ཤིང་ཚེ་རབས་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་དེ་དག་ཏུ་ཡོངས་སུ་བཏང་བར་གྱུར་པ་དེ་བཞིན་
དུ་དེས་ཀྱང་སློང་བ་དེ་དག་རྒྱལ་པོ་ལ་འོས་པའི་སེང་གེའི་གདན་དག་ལ་བཀོད་ཅིང་སློང་བས་མོས་པའི་སེམས་ཀྱི་ཡིད་དུ་འོང་ཞིང་འཇམ་པའི་ངག་དང་། བྱམས་པ་ལ་སྤྱོད་པའི་སེམས་ཀྱིས་རང་གི་ལྕེ་གཏོང་བའི་ཚེ། གཤེ་བ་མེད་པའི་སེམས་དང་། རྨ་མེད་པའི་
སེམས་དང་། ཉམས་པ་མེད་པའི་སེམས་དང་། རིགས་ཆེན་པོའི་རིགས་དང་ལྡན་པའི་སེམས་དང་། སངས་རྒྱས་ཀྱི་རིགས་སུ་འབྱུང་བའི་སེམས་དང་། བྱང་ཆུབ་ཀྱི་སེམས་ལ་དགོད་ཅིང་གཞག་པའི་སེམས་དང་། རྒྱུད་འཁྲུག་པ་མེད་
པའི་སེམས་དང་། མཐུ་སྟོབས་ཆེན་པོའི་ཤུགས་ཀྱི་སེམས་དང་། ལུས་ལ་མ་ཆགས་པའི་སེམས་དང་། ཚིག་ཏུ་བརྗོད་པ་ལ་ཆགས་པ་མེད་པའི་སེམས་སུ་བྱས་ཏེ། པུས་མོའི་ལྷ་ང་ས་ལ་བཙུགས་ཤིང་བདག་གི་ཁ་ནས་ལྕེ་ཕྱུང་སྟེ།
ལུས་ཐམས་ཅད་ལ་སློང་བ་དབང་བྱེད་དུ་བཅུག་ནས། ཚིག་མཉེན་ཞིང་འཇམ་པ་དང་། ཡིད་དུ་འོང་བ་དང་། བྱམས་པར་སྤྱོད་པས་ཚིག་ཏུ་བརྗོད་ཅིང་། ཅི་ནས་ཀྱང་ཁྱེད་དགའ་ཞིང་ཡིད་བདེ་བ་དང་། མགུ་ཞིང་རངས་པར་བདག་གི་ལྕེ་ལོང་ལ་གང་
དུ་དགོས་པ་དེའི་དགོས་པ་སྒྲུབས་ཤིག་ཅེས་ནས། དེ་ལྕེ་སྦྱིན་ཞིང་ཡོངས་སུ་གཏོང་བའི་ཚེ། ལྕེ་ཡོངས་སུ་བཏང་བས། ཡང་དག་པར་བཟུང་བའི་དགེ་བའི་རྩ་བ་དེའི་ད་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་
ཚིག་གི་ཚུལ་ཐམས་ཅད་ཀྱིས་ཤེས་པར་བྱེད་པའི་ཕྱིར་ལྕེ་ཤིན་ཏུ་ཡངས་པ་དང་ལྡན་པར་གྱུར་ཅིག །སེམས་ཅན་ཐམས་ཅད་ཡང་དག་པ་ཇི་ལྟ་བ་བཞིན་གྱི་ཚིག་བདེན་པ་གཉིས་སུ་བྱ་བ་མེད་པ་དང་ལྡན་པར་གྱུར་ཏེ། གདོང་གི་དཀྱིལ་འཁོར་

ཁེབས་པའི་ལྕེ་དང་ལྡན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་ཀྱི་ཆོ་འཕྲུལ་དང་རྣམ་པར་འཕྲུལ་པ་ཡང་དག་པར་སྟོན་པའི་ཕྱིར་སངས་རྒྱས་ཀྱི་ཞིང་ཐམས་ཅད་དུ་ཁྱབ་པའི་ལྕེ་དང་ལྡན་པར་གྱུར་ཅིག །སེམས་
ཅན་ཐམས་ཅད་རོ་བྲོ་བའི་མཆོག་ཤིན་ཏུ་རྣམ་པར་དག་པ་དང་། ལྡན་ཞིང་ཤིན་ཏུ་སྲབ་པའི་ལྕེ་དང་ལྡན་པར་གྱུར་ཅིག །སེམས་ཅན་ཐམས་ཅད་འགྲོ་བ་ཀུན་གྱི་ཚིག་ཤེས་པས་ཐེ་ཙོམ་གཅོད་པའི་ཕྱིར་ངེས་པའི་ཚིག་གི་དབྱངས་མཐའ་ཡས་པ་ཡོད་པའི་
ལྕེ་དང་ལྡན་པར་གྱུར་ཅིག །སེམས་ཅན་ཐམས་ཅད་ལྕེའི་མཛོད་ནས་འོད་གཟེར་བྱེ་བ་ཁྲག་ཁྲིག་བརྗོད་དུ་མེད་པའི་ཡང་བརྗོད་དུ་མེད་པ་འགྱེད་པའི་ཕྱིར་སྣང་བ་མཐའ་ཡས་པ་འབྱུང་བའི་ལྕེ་དང་ལྡན་པར་གྱུར་ཅིག །སེམས་ཅན་ཐམས་ཅད་ཆོས་ཐམས་ཅད་
རྣམ་པར་ངེས་པའི་སྤོབས་པའི་ཚོགས་མི་ཟད་པས་སྟོན་ཅིང་བརྗོད་པས་ཚིག་ཤིན་ཏུ་ངེས་པར་བརྗོད་པའི་ལྕེ་དང་ལྡན་པར་གྱུར་ཅིག །སེམས་ཅན་ཐམས་ཅད་སྤྱོད་པ་ཀུན་བརྗོད་པ་ཚད་མེད་པའི་མཛོད་ཀྱི་ལྕེ་དང་ལྡན་ཞིང་འདུལ་བའི་མཐའ་དང་མཉམ་པར་
སེམས་ཅན་ཀུན་གྱི་ཚིག་ཐམས་ཅད་དང་། སྨྲ་བ་ཐམས་ཅད་རྣམ་པར་འགྲེལ་བའི་ལྕེ་དང་ལྡན་པར་གྱུར་ཅིག །སེམས་ཅན་ཐམས་ཅད་སྤྱོད་པ་རྗེས་སུ་བརྗོད་པའི་ཚིག་གི་རྒྱ་མཚོ་ཐམས་ཅད་ལ་རབ་ཏུ་ཞུགས་པས་དབྱངས་ཀྱི་ཚོགས་དང་། ཚིག་
གི་རྣམ་པར་ཤེས་པའི་ལྕེ་དང་ལྡན་པར་གྱུར་ཅིག །སེམས་ཅན་ཐམས་ཅད་སྤྱོད་པ་ཐམས་ཅད་མངོན་པར་བརྗོད་པའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ཐོབ་ཅིང་ཆོས་ཐམས་ཅད་ཀྱི་ཚིག་ཐམས་ཅད་ཤིན་ཏུ་སྟོན་པའི་ལྕེ་དང་ལྡན་པར་གྱུར་ཅིག་ཅེས། དེ་ལྟར་བྱང་ཆུབ་སེམས་
དཔའ་སེམས་དཔའ་ཆེན་པོ་ཐམས་ཅད་མཁྱེན་པ་ཉིད་དུ་དམྱིགས་པའི་སྨོན་ལམ་ལ་རབ་ཏུ་བརྩོན་པ་དེ་ལྕེ་ཡོངས་སུ་བཏང་བས། ཡང་དག་པར་བསྡུས་པའི་དགེ་བའི་རྩ་བ་དེ་དག་སེམས་ཅན་ཐམས་ཅད་ཀྱིས་བསྒྲི