Bổn Sanh (Jātaka)

hāraṁ samādāya, 
aṇṇave avasīdati. 
Evameva naro pāpaṁ, 
thokaṁ thokampi ācinaṁ; 
Atibhāraṁ samādāya, 
niraye avasīdati. 
Na tāva bhāro paripūro, 
alātassa mahīpati; 
Ācināti ca taṁ pāpaṁ, 
yena gacchati duggatiṁ. 
Pubbevassa kataṁ puññaṁ, 
alātassa mahīpati; 
Tasseva deva nissando, 
yañceso labhate sukhaṁ. 
Khīyate cassa taṁ puññaṁ, 
tathā hi aguṇe rato; 
Ujumaggaṁ avahāya, 
kummaggamanudhāvati. 
Tulā yathā paggahitā, 
ohite tulamaṇḍale; 
Unnameti tulāsīsaṁ, 
bhāre oropite sati. 
Evameva naro puññaṁ, 
thokaṁ thokampi ācinaṁ; 
Saggātimāno dāsova, 
bījako sātave rato. 
Yamajja bījako dāso, 
dukkhaṁ passati attani; 
Pubbevassa kataṁ pāpaṁ, 
tameso paṭisevati. 
Khīyate cassa taṁ pāpaṁ, 
tathā hi vinaye rato; 
Kassapañca samāpajja, 
mā hevuppathamāgamā. 
Yaṁ yañhi rāja bhajati, 
santaṁ vā yadi vā asaṁ; 
Sīlavantaṁ visīlaṁ vā, 
vasaṁ tasseva gacchati. 
Yādisaṁ kurute mittaṁ, 
yādisaṁ cūpasevati; 
Sopi tādisako hoti, 
sahavāso hi tādiso. 
Sevamāno sevamānaṁ, 
samphuṭṭho samphusaṁ paraṁ; 
Saro diddho kalāpaṁva, 
alittamupalimpati; 
Upalepabhayā dhīro, 
neva pāpasakhā siyā. 
Pūtimacchaṁ kusaggena, 
yo naro upanayhati; 
Kusāpi pūti vāyanti, 
evaṁ bālūpasevanā. 
Tagarañca palāsena, 
yo naro upanayhati; 
Pattāpi surabhi vāyanti, 
evaṁ dhīrūpasevanā. 
Tasmā pattapuṭasseva, 
ñatvā sampākamattano; 
Asante nopaseveyya, 
sante seveyya paṇḍito; 
Asanto nirayaṁ nenti, 
santo pāpenti suggatiṁ. 
Ahampi jātiyo satta, 
sare saṁsaritattano; 
Anāgatāpi satteva, 
yā gamissaṁ ito cutā. 
Yā me sā sattamī jāti, 
ahu pubbe janādhipa; 
Kammāraputto magadhesu, 
ahuṁ rājagahe pure. 
Pāpaṁ sahāyamāgamma, 
bahuṁ pāpaṁ kataṁ mayā; 
Paradārassa heṭhento, 
carimhā amarā viya. 
Taṁ kammaṁ nihitaṁ aṭṭhā, 
bhasmacchannova pāvako; 
Atha aññehi kammehi, 
ajāyiṁ vaṁsabhūmiyaṁ. 
Kosambiyaṁ seṭṭhikule, 
iddhe phīte mahaddhane; 
Ekaputto mahārāja, 
niccaṁ sakkatapūjito. 
Tattha mittaṁ asevissaṁ, 
sahāyaṁ sātave rataṁ; 
Paṇḍitaṁ sutasampannaṁ, 
so maṁ atthe nivesayi. 
Cātuddasiṁ pañcadasiṁ, 
bahuṁ rattiṁ upāvasiṁ; 
Taṁ kammaṁ nihitaṁ aṭṭhā, 
nidhīva udakantike. 
Atha pāpāna kammānaṁ, 
Yametaṁ magadhe kataṁ; 
Phalaṁ pariyāga maṁ pacchā, 
Bhutvā duṭṭhavisaṁ yathā. 
Tato cutāhaṁ vedeha, 
roruve niraye ciraṁ; 
Sakammunā apaccissaṁ, 
taṁ saraṁ na sukhaṁ labhe. 
Bahuvassagaṇe tattha, 
khepayitvā bahuṁ dukhaṁ; 
Bhinnāgate ahuṁ rāja, 
chagalo uddhatapphalo. 
Sātaputtā mayā vūḷhā, 
piṭṭhiyā ca rathena ca; 
Tassa kammassa nissando, 
paradāragamanassa me. 
Tato cutāhaṁ vedeha, 
kapi āsiṁ brahāvane; 
Niluñcitaphaloyeva, 
yūthapena pagabbhinā; 
Tassa kammassa nissando, 
paradāragamanassa me. 
Tato cutāhaṁ vedeha, 
dassanesu pasū ahuṁ; 
Niluñcito javo bhadro, 
yoggaṁ vūḷhaṁ ciraṁ mayā; 
Tassa kammassa nissando, 
paradāragamanassa me. 
Tato cutāhaṁ vedeha, 
vajjīsu kulamāgamā; 
Nevitthī na pumā āsiṁ, 
manussatte sudullabhe; 
Tassa kammassa nissando, 
paradāragamanassa me. 
Tato cutāhaṁ vedeha, 
ajāyiṁ nandane vane; 
Bhavane tāvatiṁsāhaṁ, 
accharā kāmavaṇṇinī. 
Vicittavatthābharaṇā, 
āmuttamaṇikuṇḍalā; 
Kusalā naccagītassa, 
sakkassa paricārikā. 
Tattha ṭhitāhaṁ vedeha, 
sarāmi jātiyo imā; 
Anāgatāpi satteva, 
yā gamissaṁ ito cutā. 
Pariyāgataṁ taṁ kusalaṁ, 
yaṁ me kosambiyaṁ kataṁ; 
Deve ceva manusse ca, 
sandhāvissaṁ ito cutā. 
Satta jacco mahārāja, 
niccaṁ sakkatapūjitā; 
Thībhāvāpi na muccissaṁ, 
chaṭṭhā nigatiyo imā. 
Sattamī ca gati deva, 
devaputto mahiddhiko; 
Pumā devo bhavissāmi, 
devakāyasmimuttamo. 
Ajjāpi santānamayaṁ, 
mālaṁ ganthenti nandane; 
Devaputto javo nāma, 
yo me mālaṁ paṭicchati. 
Muhutto viya so dibyo, 
idha vassāni soḷasa; 
Rattindivo ca so dibyo, 
mānusiṁ saradosataṁ. 
Iti kammāni anventi, 
asaṅkheyyāpi jātiyo; 
Kalyāṇaṁ yadi vā pāpaṁ, 
na hi kammaṁ vinassati. 
Yo icche puriso hotuṁ, 
jātiṁ jātiṁ punappunaṁ; 
Paradāraṁ vivajjeyya, 
dhotapādova kaddamaṁ. 
Yā icche puriso hotuṁ, 
jātiṁ jātiṁ punappunaṁ; 
Sāmikaṁ apacāyeyya, 
indaṁva paricārikā. 
Yo icche dibyabhogañca, 
dibbamāyuṁ yasaṁ sukhaṁ; 
Pāpāni parivajjetvā, 
tividhaṁ dhammamācare. 
Kāyena vācā manasā, 
appamatto vicakkhaṇo; 
Attano hoti atthāya, 
itthī vā yadi vā pumā. 
Ye kecime mānujā jīvaloke, 
Yasassino sabbasamantabhogā; 
Asaṁsayaṁ tehi pure suciṇṇaṁ, 
Kammassakāse puthu sabbasattā. 
Iṅghānucintesi sayampi deva, 
Kutonidānā te imā janinda; 
Yā te imā accharāsannikāsā, 
Alaṅkatā kañcanajālachannā”. 
Iccevaṁ pitaraṁ kaññā, 
rucā tosesi aṅgatiṁ; 
Mūḷhassa maggamācikkhi, 
dhammamakkhāsi subbatā. 
Athāgamā brahmalokā, 
nārado mānusiṁ pajaṁ; 
Jambudīpaṁ avekkhanto, 
addā rājānamaṅgatiṁ. 
Tato patiṭṭhā pāsāde, 
vedehassa puratthato; 
Tañca disvānānuppattaṁ, 
rucā isimavandatha. 
Athāsanamhā oruyha, 
rājā byathitamānaso; 
Nāradaṁ paripucchanto, 
idaṁ vacanamabravi. 
“Kuto nu āgacchasi devavaṇṇi, 
Obhāsayaṁ sabbadisā candimāva; 
Akkhāhi me pucchito nāmagottaṁ, 
Kathaṁ taṁ jānanti manussaloke”. 
“Ahañhi devato idāni emi, 
Obhāsayaṁ sabbadisā candimāva; 
Akkhāmi te pucchito nāmagottaṁ, 
Jānanti maṁ nārado kassapo ca”. 
“Accherarūpaṁ tava yādisañca, 
Vehāyasaṁ gacchasi tiṭṭhasī ca; 
Pucchāmi taṁ nārada etamatthaṁ, 
Atha kena vaṇṇena tavāyamiddhi”. 
“Saccañca dhammo ca damo ca cāgo, 
Guṇā mamete pakatā purāṇā; 
Teheva dhammehi susevitehi, 
Manojavo yena kāmaṁ gatosmi”. 
“Accheramācikkhasi puññasiddhiṁ, 
Sace hi etehi yathā vadesi; 
Pucchāmi taṁ nārada etamatthaṁ, 
Puṭṭho ca me sādhu viyākarohi”. 
“Pucchassu maṁ rāja tavesa attho, 
Yaṁ saṁsayaṁ kuruse bhūmipāla; 
Ahaṁ taṁ nissaṁsayataṁ gamemi, 
Nayehi ñāyehi ca hetubhī ca”. 
“Pucchāmi taṁ nārada etamatthaṁ, 
Puṭṭho ca me nārada mā musā bhaṇi; 
Atthi nu devā pitaro nu atthi, 
Loko paro atthi jano yamāhu”. 
“Attheva devā pitaro ca atthi, 
Loko paro atthi jano yamāhu; 
Kāmesu giddhā ca narā pamūḷhā, 
Lokaṁ paraṁ na vidū mohayuttā”. 
“Atthīti ce nārada saddahāsi, 
Nivesanaṁ paraloke matānaṁ; 
Idheva me pañca satāni dehi, 
Dassāmi te paraloke sahassaṁ”. 
“Dajjemu kho pañca satāni bhoto, 
Jaññāmu ce sīlavantaṁ vadaññuṁ; 
Luddaṁ taṁ bhontaṁ niraye vasantaṁ, 
Ko codaye paraloke sahassaṁ. 
Idheva yo hoti adhammasīlo, 
Pāpācāro alaso luddakammo; 
Na paṇḍitā tasmiṁ iṇaṁ dadanti, 
Na hi āgamo hoti tathāvidhamhā. 
Dakkhañca posaṁ manujā viditvā, 
Uṭṭhānakaṁ sīlavantaṁ vadaññuṁ; 
Sayameva bhogehi nimantayanti, 
Kammaṁ karitvā puna māharesi. 
Ito cuto dakkhasi tattha rāja, 
Kākolasaṅghehi vikassamānaṁ; 
Taṁ khajjamānaṁ niraye vasantaṁ, 
Kākehi gijjhehi ca senakehi; 
Sañchinnagattaṁ ruhiraṁ savantaṁ, 
Ko codaye paraloke sahassaṁ. 
Andhaṁtamaṁ tattha na candasūriyā, 
Nirayo sadā tumulo ghorarūpo; 
Sā neva rattī na divā paññāyati, 
Tathāvidhe ko vicare dhanatthiko. 
Sabalo ca sāmo ca duve suvānā, 
Pavaddhakāyā balino mahantā; 
Khādanti dantehi ayomayehi, 
Ito paṇunnaṁ paralokapattaṁ. 
Taṁ khajjamānaṁ niraye vasantaṁ, 
Luddehi vāḷehi aghammigehi ca; 
Sañchinnagattaṁ ruhiraṁ savantaṁ, 
Ko codaye paraloke sahassaṁ. 
Usūhi sattīhi ca sunisitāhi, 
Hananti vijjhanti ca paccamittā; 
Kāḷūpakāḷā nirayamhi ghore, 
Pubbe naraṁ dukkaṭakammakāriṁ. 
Taṁ haññamānaṁ niraye vajantaṁ, 
Kucchismiṁ passasmiṁ vipphālitūdaraṁ; 
Sañchinnagattaṁ ruhiraṁ savantaṁ, 
Ko codaye paraloke sahassaṁ. 
Sattī usū tomarabhiṇḍivālā, 
Vividhāvudhā vassanti tattha devā; 
Patanti aṅgāramivaccimanto, 
Silāsanī vassati luddakamme. 
Uṇho ca vāto nirayamhi dussaho, 
Na tamhi sukhaṁ labbhati ittarampi; 
Taṁ taṁ vidhāvantamalenamāturaṁ, 
Ko codaye paraloke sahassaṁ. 
Sandhāvamānampi rathesu yuttaṁ, 
Sajotibhūtaṁ pathaviṁ kamantaṁ; 
Patodalaṭṭhīhi sucodayantaṁ, 
Ko codaye paraloke sahassaṁ. 
Tamāruhantaṁ khurasañcitaṁ giriṁ, 
Vibhiṁsanaṁ pajjalitaṁ bhayānakaṁ; 
Sañchinnagattaṁ ruhiraṁ savantaṁ, 
Ko codaye paraloke sahassaṁ. 
Tamāruhantaṁ pabbatasannikāsaṁ, 
Aṅgārarāsiṁ jalitaṁ bhayānakaṁ; 
Sudaḍḍhagattaṁ kapaṇaṁ rudantaṁ, 
Ko codaye paraloke sahassaṁ. 
Abbhakūṭasamā uccā, 
kaṇṭakanicitā dumā; 
Ayomayehi tikkhehi, 
naralohitapāyibhi. 
Tamāruhanti nāriyo, 
narā ca paradāragū; 
Coditā sattihatthehi, 
yamaniddesakāribhi. 
Tamāruhantaṁ nirayaṁ, 
simbaliṁ ruhiramakkhitaṁ; 
Vidaḍḍhakāyaṁ vitacaṁ, 
āturaṁ gāḷhavedanaṁ. 
Passasantaṁ muhuṁ uṇhaṁ, 
pubbakammāparādhikaṁ; 
Dumagge vitacaṁ gattaṁ, 
ko taṁ yāceyya taṁ dhanaṁ. 
Abbhakūṭasamā uccā, 
asipattācitā dumā; 
Ayomayehi tikkhehi, 
naralohitapāyibhi. 
Tamāruhantaṁ asipattapādapaṁ, 
Asīhi tikkhehi ca chijjamānaṁ; 
Sañchinnagattaṁ ruhiraṁ savantaṁ, 
Ko codaye paraloke sahassaṁ. 
Tato nikkhantamattaṁ taṁ, 
asipattācitā dumā; 
Sampatitaṁ vetaraṇiṁ, 
ko taṁ yāceyya taṁ dhanaṁ. 
Kharā kharodakā tattā, 
duggā vetaraṇī nadī; 
Ayopokkharasañchannā, 
tikkhā pattehi sandati. 
Tattha sañchinnagattaṁ taṁ, 
vuyhantaṁ ruhiramakkhitaṁ; 
Vetaraññe anālambe, 
ko taṁ yāceyya taṁ dhanaṁ”. 
“Vedhāmi rukkho viya chijjamāno, 
Disaṁ na jānāmi pamūḷhasañño; 
Bhayānutappāmi mahā ca me bhayā, 
Sutvāna kathā tava bhāsitā ise. 
Āditte vārimajjhaṁva, 
dīpaṁvoghe mahaṇṇave; 
Andhakāreva pajjoto, 
tvaṁ nosi saraṇaṁ ise. 
Atthañca dhammaṁ anusāsa maṁ ise, 
Atītamaddhā aparādhitaṁ mayā; 
Ācikkha me nārada suddhimaggaṁ, 
Yathā ahaṁ no nirayaṁ pateyyaṁ”. 
“Yathā ahū dhataraṭṭho, 
Vessāmitto aṭṭhako yāmataggi; 
Usindaro cāpi sivī ca rājā, 
Paricārakā samaṇabrāhmaṇānaṁ. 
Ete caññe ca rājāno, 
ye saggavisayaṁ gatā; 
Adhammaṁ parivajjetvā, 
dhammaṁ cara mahīpati. 
Annahatthā ca te byamhe, 
ghosayantu pure tava; 
Ko chāto ko ca tasito, 
ko mālaṁ ko vilepanaṁ; 
Nānārattānaṁ vatthānaṁ, 
ko naggo paridahissati. 
Ko panthe chattamāneti, 
pādukā ca mudū subhā; 
Iti sāyañca pāto ca, 
ghosayantu pure tava. 
Jiṇṇaṁ posaṁ gavāssañca, 
māssu yuñja yathā pure; 
Parihārañca dajjāsi, 
adhikārakato balī. 
Kāyo te rathasaññāto, 
manosārathiko lahu; 
Avihiṁsāsāritakkho, 
saṁvibhāgapaṭicchado. 
Pādasaññamanemiyo, 
hatthasaññamapakkharo; 
Kucchisaññamanabbhanto, 
vācāsaññamakūjano. 
Saccavākyasamattaṅgo, 
apesuññasusaññato; 
Girāsakhilanelaṅgo, 
mitabhāṇisilesito. 
Saddhālobhasusaṅkhāro, 
nivātañjalikubbaro; 
Athaddhatānatīsāko, 
sīlasaṁvaranandhano. 
Akkodhanamanugghātī, 
dhammapaṇḍarachattako; 
Bāhusaccamapālambo, 
ṭhitacittamupādhiyo. 
Kālaññutācittasāro, 
vesārajjatidaṇḍako; 
Nivātavuttiyottako, 
anatimānayugo lahu. 
Alīnacittasanthāro, 
vuddhisevī rajohato; 
Sati patodo dhīrassa, 
dhiti yogo ca rasmiyo. 
Mano dantaṁ pathaṁ neti, 
samadantehi vāhibhi; 
Icchā lobho ca kummaggo, 
ujumaggo ca saṁyamo. 
Rūpe sadde rase gandhe, 
vāhanassa padhāvato; 
Paññā ākoṭanī rāja, 
tattha attāva sārathi. 
Sace etena yānena, 
samacariyā daḷhā dhiti; 
Sabbakāmaduho rāja, 
na jātu nirayaṁ vaje”. 
“Alāto devadattosi, 
sunāmo āsi bhaddaji; 
Vijayo sāriputtosi, 
moggallānosi bījako. 
Sunakkhatto licchaviputto, 
guṇo āsi acelako; 
Ānando sā rucā āsi, 
yā rājānaṁ pasādayi. 
Uruvelakassapo rājā, 
pāpadiṭṭhi tadā ahu; 
Mahābrahmā bodhisatto, 
evaṁ dhāretha jātakan”ti. 
Mahānāradakassapajātakaṁ aṭṭhamaṁ. 

Jātaka 
Mahānipāta 
Mūgapakkhavagga 
Vidhurajātaka 
1 Dohaḷakaṇḍa 
“Paṇḍu kisiyāsi dubbalā, 
Vaṇṇarūpaṁ natavedisaṁ pure; 
Vimale akkhāhi pucchitā, 
Kīdisī tuyhaṁ sarīravedanā”. 
“Dhammo manujesu mātīnaṁ, 
Dohaḷo nāma janinda vuccati; 
Dhammāhataṁ nāgakuñjara, 
Vidhurassa hadayābhipatthaye”. 
“Candaṁ kho tvaṁ dohaḷāyasi, 
Sūriyaṁ vā atha vāpi mālutaṁ; 
Dullabhañhi vidhurassa dassanaṁ, 
Ko vidhuramidha mānayissati”. 
“Kiṁ nu tāta tuvaṁ pajjhāyasi, 
Padumaṁ hatthagataṁva te mukhaṁ; 
Kiṁ nu dummanarūposi issara, 
Mā tvaṁ soci amittatāpana”. 
“Mātā hi tava irandhati, 
Vidhurassa hadayaṁ dhaniyati; 
Dullabhañhi vidhurassa dassanaṁ, 
Ko vidhuramidha mānayissati. 
Tassa bhattupariyesanaṁ cara, 
Yo vidhuramidha mānayissati”; 
Pituno ca sā sutvāna vākyaṁ, 
Rattiṁ nikkhamma avassutiṁ cari. 
“Ke gandhabbe rakkhase ca nāge, 
Ke kimpurise cāpi mānuse; 
Ke paṇḍite sabbakāmadade, 
Dīgharattaṁ bhattā me bhavissati”. 
“Assāsa hessāmi te pati, 
Bhattā te hessāmi anindalocane; 
Paññā hi mamaṁ tathāvidhā, 
Assāsa hessasi bhariyā mama”. 
Avacāsi puṇṇakaṁ irandhatī, 
Pubbapathānugatena cetasā; 
“Ehi gacchāma pitu mamantike, 
Esova te etamatthaṁ pavakkhati”. 
Alaṅkatā suvasanā, 
mālinī candanussadā; 
Yakkhaṁ hatthe gahetvāna, 
pitusantikupāgami. 
“Nāgavara vaco suṇohi me, 
Patirūpaṁ paṭipajja suṅkiyaṁ; 
Patthemi ahaṁ irandhatiṁ, 
Tāya samaṅgiṁ karohi maṁ tuvaṁ. 
Sataṁ hatthī sataṁ assā, 
sataṁ assatarīrathā; 
Sataṁ valabhiyo puṇṇā, 
nānāratnassa kevalā; 
Te nāga paṭipajjassu, 
dhītaraṁ dehirandhatiṁ”. 
“Yāva āmantaye ñātī, 
mitte ca suhadajjane; 
Anāmanta kataṁ kammaṁ, 
taṁ pacchā anutappati”. 
Tato so varuṇo nāgo, 
pavisitvā nivesanaṁ; 
Bhariyaṁ āmantayitvāna, 
idaṁ vacanamabravi. 
“Ayaṁ so puṇṇako yakkho, 
yācatī maṁ irandhatiṁ; 
Bahunā vittalābhena, 
tassa dema piyaṁ mamaṁ”. 
“Na dhanena na vittena, 
Labbhā amhaṁ irandhatī; 
Sace ca kho hadayaṁ paṇḍitassa, 
Dhammena laddhā idha māhareyya; 
Etena vittena kumāri labbhā, 
Nāññaṁ dhanaṁ uttari patthayāma”. 
Tato so varuṇo nāgo, 
nikkhamitvā nivesanā; 
Puṇṇakāmantayitvāna, 
idaṁ vacanamabravi. 
“Na dhanena na vittena, 
Labbhā amhaṁ irandhatī; 
Sace tuvaṁ hadayaṁ paṇḍitassa, 
Dhammena laddhā idha māharesi; 
Etena vittena kumāri labbhā, 
Nāññaṁ dhanaṁ uttari patthayāma”. 
“Yaṁ paṇḍitotyeke vadanti loke, 
Tameva bāloti punāhu aññe; 
Akkhāhi me vippavadanti ettha, 
Kaṁ paṇḍitaṁ nāga tuvaṁ vadesi”. 
“Korabyarājassa dhanañcayassa, 
Yadi te suto vidhuro nāma kattā; 
Ānehi taṁ paṇḍitaṁ dhammaladdhā, 
Irandhatī padacarā te hotu”. 
Idañca sutvā varuṇassa vākyaṁ, 
Uṭṭhāya yakkho paramappatīto; 
Tattheva santo purisaṁ asaṁsi, 
“Ānehi ājaññamidheva yuttaṁ. 
Jātarūpamayā kaṇṇā, 
kācamhicamayā khurā; 
Jambonadassa pākassa, 
suvaṇṇassa uracchado”. 
Devavāhavahaṁ yānaṁ, 
Assamāruyha puṇṇako; 
Alaṅkato kappitakesamassu, 
Pakkāmi vehāyasamantalikkhe. 
So puṇṇako kāmarāgena giddho, 
Irandhatiṁ nāgakaññaṁ jigīsaṁ; 
Gantvāna taṁ bhūtapatiṁ yasassiṁ, 
Iccabravī vessavaṇaṁ kuveraṁ. 
“Bhogavatī nāma mandire, 
Vāsā hiraññavatīti vuccati; 
Nagare nimmite kañcanamaye, 
Maṇḍalassa uragassa niṭṭhitaṁ. 
Aṭṭālakā oṭṭhagīviyo, 
Lohitaṅkassa masāragallino; 
Pāsādettha silāmayā, 
Sovaṇṇaratanehi chāditā. 
Ambā tilakā ca jambuyo, 
Sattapaṇṇā mucalindaketakā; 
Piyaṅgu uddālakā sahā, 
Uparibhaddakā sinduvārakā. 
Campeyyakā nāgamallikā, 
Bhaginīmālā atha mettha koliyā; 
Ete dumā pariṇāmitā, 
Sobhayanti uragassa mandiraṁ. 
Khajjurettha silāmayā, 
Sovaṇṇadhuvapupphitā bahū; 
Yattha vasato papātiko, 
Nāgarājā varuṇo mahiddhiko. 
Tassa komārikā bhariyā, 
Vimalā kañcanavelliviggahā; 
Kālā taruṇāva uggatā, 
Pucimandatthanī cārudassanā. 
Lākhārasarattasucchavī, 
Kaṇikārāva nivātapupphitā; 
Tidivokacarāva accharā, 
Vijjuvabbhaghanā vinissaṭā. 
Sā dohaḷinī suvimhitā, 
Vidhurassa hadayaṁ dhaniyati; 
Taṁ tesaṁ demi issara, 
Tena te denti irandhatiṁ mamaṁ”. 
So puṇṇako bhūtapatiṁ yasassiṁ, 
Āmantaya vessavaṇaṁ kuveraṁ; 
“Tattheva santo purisaṁ asaṁsi, 
Ānehi ājaññamidheva yuttaṁ”. 
Jātarūpamayā kaṇṇā, 
kācamhicamayā khurā; 
Jambonadassa pākassa, 
suvaṇṇassa uracchado. 
Devavāhavahaṁ yānaṁ, 
Assamāruyha puṇṇako; 
Alaṅkato kappitakesamassu, 
Pakkāmi vehāyasamantalikkhe. 
So aggamā rājagahaṁ surammaṁ, 
Aṅgassa rañño nagaraṁ durāyutaṁ; 
Pahūtabhakkhaṁ bahuannapānaṁ, 
Masakkasāraṁ viya vāsavassa. 
Mayūrakoñcāgaṇasampaghuṭṭhaṁ, 
Dijābhighuṭṭhaṁ dijasaṅghasevitaṁ; 
Nānāsakuntābhirudaṁ suvaṅgaṇaṁ, 
Pupphābhikiṇṇaṁ himavaṁva pabbataṁ. 
So puṇṇako vepulamābhirūhi, 
Siluccayaṁ kimpurisānuciṇṇaṁ; 
Anvesamāno maṇiratanaṁ uḷāraṁ, 
Tamaddasā pabbatakūṭamajjhe. 
Disvā maṇiṁ pabhassaraṁ jātimantaṁ, 
Manoharaṁ maṇiratanaṁ uḷāraṁ; 
Daddallamānaṁ yasasā yasassinaṁ, 
Obhāsatī vijjurivantalikkhe. 
Tamaggahī veḷuriyaṁ mahagghaṁ, 
Manoharaṁ nāma mahānubhāvaṁ; 
Ājaññamāruyha manomavaṇṇo, 
Pakkāmi vehāyasamantalikkhe. 
So aggamā nagaramindapatthaṁ, 
Oruyhupāgacchi sabhaṁ kurūnaṁ; 
Samāgate ekasataṁ samagge, 
Avhettha yakkho avikampamāno. 
“Ko nīdha raññaṁ varamābhijeti, 
Kamābhijeyyāma varaddhanena; 
Kamanuttaraṁ ratanavaraṁ jināma, 
Ko vāpi no jeti varaddhanena”. 
“Kuhiṁ nu raṭṭhe tava jātibhūmi, 
Na korabyasseva vaco tavedaṁ; 
Abhītosi no vaṇṇanibhāya sabbe, 
Akkhāhi me nāmañca bandhave ca”. 
“Kaccāyano māṇavakosmi rāja, 
Anūnanāmo iti mavhayanti; 
Aṅgesu me ñātayo bandhavā ca, 
Akkhena devasmi idhānupatto”. 
“Kiṁ māṇavassa ratanāni atthi, 
Ye taṁ jinanto hare akkhadhutto; 
Bahūni rañño ratanāni atthi, 
Te tvaṁ daliddo kathamavhayesi”. 
“Manoharo nāma maṇī mamāyaṁ, 
Manoharaṁ maṇiratanaṁ uḷāraṁ; 
Imañca ājaññamamittatāpanaṁ, 
Etaṁ me jinitvā hare akkhadhutto”. 
“Eko maṇī māṇava kiṁ karissati, 
Ājāniyeko pana kiṁ karissati; 
Bahūni rañño maṇiratanāni atthi, 
Ājāniyā vātajavā anappakā”. 
Dohaḷakaṇḍaṁ nāma. 
2. Maṇikaṇḍa 
“Idañca me maṇiratanaṁ, 
passa tvaṁ dvipaduttama; 
Itthīnaṁ viggahā cettha, 
purisānañca viggahā. 
Migānaṁ viggahā cettha, 
sakuṇānañca viggahā; 
Nāgarājā supaṇṇā ca, 
maṇimhi passa nimmitaṁ. 
Hatthānīkaṁ rathānīkaṁ, 
asse pattī ca vammine; 
Caturaṅginimaṁ senaṁ, 
maṇimhi passa nimmitaṁ. 
Hatthārohe anīkaṭṭhe, 
rathike pattikārake; 
Balaggāni viyūḷhāni, 
maṇimhi passa nimmitaṁ. 
Puraṁ uddhāpasampannaṁ, 
bahupākāratoraṇaṁ; 
Siṅghāṭakesu bhūmiyo, 
maṇimhi passa nimmitaṁ. 
Esikā parikhāyo ca, 
palikhaṁ aggaḷāni ca; 
Aṭṭālake ca dvāre ca, 
maṇimhi passa nimmitaṁ. 
Passa toraṇamaggesu, 
nānādijagaṇā bahū; 
Haṁsā koñcā mayūrā ca, 
cakkavākā ca kukkuhā. 
Kuṇālakā bahū citrā, 
sikhaṇḍī jīvajīvakā; 
Nānādijagaṇākiṇṇaṁ, 
maṇimhi passa nimmitaṁ. 
Passa nagaraṁ supākāraṁ, 
abbhutaṁ lomahaṁsanaṁ; 
Samussitadhajaṁ rammaṁ, 
soṇṇavālukasanthataṁ. 
Passettha paṇṇasālāyo, 
vibhattā bhāgaso mitā; 
Nivesane nivese ca, 
sandhibyūhe pathaddhiyo. 
Pānāgāre ca soṇḍe ca, 
sūnā odaniyā gharā; 
Vesī ca gaṇikāyo ca, 
maṇimhi passa nimmitaṁ. 
Mālākāre ca rajake, 
gandhike atha dussike; 
Suvaṇṇakāre maṇikāre, 
maṇimhi passa nimmitaṁ. 
Āḷārike ca sūde ca, 
naṭanāṭakagāyino; 
Pāṇissare kumbhathūnike, 
maṇimhi passa nimmitaṁ. 
Passa bherī mudiṅgā ca, 
saṅkhā paṇavadindimā; 
Sabbañca tāḷāvacaraṁ, 
maṇimhi passa nimmitaṁ. 
Sammatālañca vīṇañca, 
naccagītaṁ suvāditaṁ; 
Tūriyatāḷitasaṅghuṭṭhaṁ, 
maṇimhi passa nimmitaṁ. 
Laṅghikā muṭṭhikā cettha, 
māyākārā ca sobhiyā; 
Vetālike ca jalle ca, 
maṇimhi passa nimmitaṁ. 
Samajjā cettha vattanti, 
ākiṇṇā naranāribhi; 
Mañcātimañce bhūmiyo, 
maṇimhi passa nimmitaṁ. 
Passa malle samajjasmiṁ, 
phoṭente diguṇaṁ bhujaṁ; 
Nihate nihatamāne ca, 
maṇimhi passa nimmitaṁ. 
Passa pabbatapādesu, 
nānāmigagaṇā bahū; 
Sīhā byagghā varāhā ca, 
acchakokataracchayo. 
Palāsādā gavajā ca, 
mahiṁsā rohitā rurū; 
Eṇeyyā ca varāhā ca, 
gaṇino nīkasūkarā. 
Kadalimigā bahū citrā, 
biḷārā sasakaṇṭakā; 
Nānāmigagaṇākiṇṇaṁ, 
maṇimhi passa nimmitaṁ. 
Najjāyo supatitthāyo, 
soṇṇavālukasanthatā; 
Acchā savanti ambūni, 
macchagumbanisevitā. 
Kumbhīlā makarā cettha, 
susumārā ca kacchapā; 
Pāṭhīnā pāvusā macchā, 
balajā muñjarohitā. 
Nānādijagaṇākiṇṇā, 
nānādumagaṇāyutā; 
Veḷuriyakarodāyo, 
maṇimhi passa nimmitaṁ. 
Passettha pokkharaṇiyo, 
suvibhattā catuddisā; 
Nānādijagaṇākiṇṇā, 
puthulomanisevitā. 
Samantodakasampannaṁ, 
mahiṁ sāgarakuṇḍalaṁ; 
Upetaṁ vanarājehi, 
maṇimhi passa nimmitaṁ. 
Purato videhe passa, 
goyāniye ca pacchato; 
Kuruyo jambudīpañca, 
maṇimhi passa nimmitaṁ. 
Passa candaṁ sūriyañca, 
obhāsante catuddisā; 
Sineruṁ anupariyante, 
maṇimhi passa nimmitaṁ. 
Sineruṁ himavantañca, 
sāgarañca mahītalaṁ; 
Cattāro ca mahārāje, 
maṇimhi passa nimmitaṁ. 
Ārāme vanagumbe ca, 
pāṭiye ca siluccaye; 
Ramme kimpurisākiṇṇe, 
maṇimhi passa nimmitaṁ. 
Phārusakaṁ cittalataṁ, 
missakaṁ nandanaṁ vanaṁ; 
Vejayantañca pāsādaṁ, 
maṇimhi passa nimmitaṁ. 
Sudhammaṁ tāvatiṁsañca, 
pārichattañca pupphitaṁ; 
Erāvaṇaṁ nāgarājaṁ, 
maṇimhi passa nimmitaṁ. 
Passettha devakaññāyo, 
nabhā vijjurivuggatā; 
Nandane vicarantiyo, 
maṇimhi passa nimmitaṁ. 
Passettha devakaññāyo, 
devaputtapalobhinī; 
Devaputte ramamāne, 
maṇimhi passa nimmitaṁ. 
Parosahassapāsāde, 
veḷuriyaphalasanthate; 
Pajjalante ca vaṇṇena, 
maṇimhi passa nimmitaṁ. 
Tāvatiṁse ca yāme ca, 
Tusite cāpi nimmite; 
Paranimmitavasavattino, 
Maṇimhi passa nimmitaṁ. 
Passettha pokkharaṇiyo, 
vippasannodikā sucī; 
Mandālakehi sañchannā, 
padumuppalakehi ca. 
Dasettha rājiyo setā, 
dasanīlā manoramā; 
Cha piṅgalā pannarasa, 
haliddā ca catuddasa. 
Vīsati tattha sovaṇṇā, 
vīsati rajatāmayā; 
Indagopakavaṇṇābhā, 
tāva dissanti tiṁsati. 
Dasettha kāḷiyo chacca, 
mañjeṭṭhā pannavīsati; 
Missā bandhukapupphehi, 
nīluppalavicittikā. 
Evaṁ sabbaṅgasampannaṁ, 
accimantaṁ pabhassaraṁ; 
Odhisuṅkaṁ mahārāja, 
passa tvaṁ dvipaduttama”. 
Maṇikaṇḍaṁ nāma. 
3. Akkhakaṇḍa 
“Upāgataṁ rāja mupehi lakkhaṁ, 
Netādisaṁ maṇiratanaṁ tavatthi; 
Dhammena jissāma asāhasena, 
Jito ca no khippamavākarohi. 
Pañcāla-paccuggata-sūrasena, 
Macchā ca maddā saha kekakebhi; 
Passantu note asaṭhena yuddhaṁ, 
Na no sabhāyaṁ na karonti kiñci”. 
Te pāvisuṁ akkhamadena mattā, 
Rājā kurūnaṁ puṇṇako cāpi yakkho; 
Rājā kaliṁ viccinamaggahesi, 
Kaṭaṁ aggahī puṇṇako nāma yakkho. 
Te tattha jūte ubhaye samāgate, 
Raññaṁ sakāse sakhīnañca majjhe; 
Ajesi yakkho naravīraseṭṭhaṁ, 
Tatthappanādo tumulo babhūva. 
“Jayo mahārāja parājayo ca, 
Āyūhataṁ aññatarassa hoti; 
Janinda jīnosi varaddhanena, 
Jito ca me khippamavākarohi”. 
“Hatthī gavāssā maṇikuṇḍalā ca, 
Yañcāpi mayhaṁ ratanaṁ pathabyā; 
Gaṇhāhi kaccāna varaṁ dhanānaṁ, 
Ādāya yenicchasi tena gaccha”. 
“Hatthī gavāssā maṇikuṇḍalā ca, 
Yañcāpi tuyhaṁ ratanaṁ pathabyā; 
Tesaṁ varo vidhuro nāma kattā, 
So me jito taṁ me avākarohi”. 
“Attā ca me so saraṇaṁ gatī ca, 
Dīpo ca leṇo ca parāyaṇo ca; 
Asantuleyyo mama so dhanena, 
Pāṇena me sādiso esa kattā”. 
“Ciraṁ vivādo mama tuyhañcassa, 
Kāmañca pucchāma tameva gantvā; 
Esova no vivaratu etamatthaṁ, 
Yaṁ vakkhatī hotu kathā ubhinnaṁ”. 
“Addhā hi saccaṁ bhaṇasi, 
na ca māṇava sāhasaṁ; 
Tameva gantvā pucchāma, 
tena tussāmubho janā”. 
“Saccaṁ nu devā vidahū kurūnaṁ, 
Dhamme ṭhitaṁ vidhuraṁ nāmamaccaṁ; 
Dāsosi rañño uda vāsi ñāti, 
Vidhuroti saṅkhā katamāsi loke”. 
“Āmāyadāsāpi bhavanti heke, 
Dhanena kītāpi bhavanti dāsā; 
Sayampi heke upayanti dāsā, 
Bhayā paṇunnāpi bhavanti dāsā. 
Ete narānaṁ caturova dāsā, 
Addhā hi yonito ahampi jāto; 
Bhavo ca rañño abhavo ca rañño, 
Dāsāhaṁ devassa parampi gantvā; 
Dhammena maṁ māṇava tuyha dajjā”. 
“Ayaṁ dutīyo vijayo mamajja, 
Puṭṭho hi kattā vivarettha pañhaṁ; 
Adhammarūpo vata rājaseṭṭho, 
Subhāsitaṁ nānujānāsi mayhaṁ”. 
“Evañce no so vivarettha pañhaṁ, 
Dāsohamasmi na ca khosmi ñāti; 
Gaṇhāhi kaccāna varaṁ dhanānaṁ, 
Ādāya yenicchasi tena gaccha”. 
Akkhakaṇḍaṁ nāma. 
4. Gharāvāsapañhā 
“Vidhura vasamānassa, 
gahaṭṭhassa sakaṁ gharaṁ; 
Khemā vutti kathaṁ assa, 
kathaṁ nu assa saṅgaho. 
Abyābajjhaṁ kathaṁ assa, 
saccavādī ca māṇavo; 
Asmā lokā paraṁ lokaṁ, 
kathaṁ pecca na socati”. 
Taṁ tattha gatimā dhitimā, 
matimā atthadassimā; 
Saṅkhātā sabbadhammānaṁ, 
vidhuro etadabravi. 
“Na sādhāraṇadārassa, 
na bhuñje sādumekako; 
Na seve lokāyatikaṁ, 
netaṁ paññāya vaḍḍhanaṁ. 
Sīlavā vattasampanno, 
appamatto vicakkhaṇo; 
Nivātavutti atthaddho, 
surato sakhilo mudu. 
Saṅgahetā ca mittānaṁ, 
saṁvibhāgī vidhānavā; 
Tappeyya annapānena, 
sadā samaṇabrāhmaṇe. 
Dhammakāmo sutādhāro, 
bhaveyya paripucchako; 
Sakkaccaṁ payirupāseyya, 
sīlavante bahussute. 
Gharamāvasamānassa, 
gahaṭṭhassa sakaṁ gharaṁ; 
Khemā vutti siyā evaṁ, 
evaṁ nu assa saṅgaho. 
Abyābajjhaṁ siyā evaṁ, 
saccavādī ca māṇavo; 
Asmā lokā paraṁ lokaṁ, 
evaṁ pecca na socati”. 
Gharāvāsapañhā nāma. 
5. Lakkhaṇakaṇḍa 
“Ehi dāni gamissāma, 
dinno no issarena me; 
Mamevatthaṁ paṭipajja, 
esa dhammo sanantano”. 
“Jānāmi māṇava tayāhamasmi, 
Dinnohamasmi tava issarena; 
Tīhañca taṁ vāsayemu agāre, 
Yenaddhunā anusāsemu putte”. 
“Taṁ me tathā hotu vasemu tīhaṁ, 
Kurutaṁ bhavajja gharesu kiccaṁ; 
Anusāsataṁ puttadāre bhavajja, 
Yathā tayī pecca sukhī bhaveyya”. 
“Sādhū”ti vatvāna pahūtakāmo, 
Pakkāmi yakkho vidhurena saddhiṁ; 
Taṁ kuñjarājaññahayānuciṇṇaṁ, 
Pāvekkhi antepuramariyaseṭṭho. 
Koñcaṁ mayūrañca piyañca ketaṁ, 
Upāgami tattha surammarūpaṁ; 
Pahūtabhakkhaṁ bahuannapānaṁ, 
Masakkasāraṁ viya vāsavassa. 
Tattha naccanti gāyanti, 
avhāyanti varāvaraṁ; 
Accharā viya devesu, 
nāriyo samalaṅkatā. 
Samaṅgikatvā pamadāhi yakkhaṁ, 
Annena pānena ca dhammapālo; 
Atthattha mevānuvicintayanto, 
Pāvekkhi bhariyāya tadā sakāse. 
Taṁ candanagandharasānulittaṁ, 
Suvaṇṇajambonadanikkhasādisaṁ; 
Bhariyaṁvacā “ehi suṇohi bhoti, 
Puttāni āmantaya tambanette”. 
Sutvāna vākyaṁ patino anujjā, 
Suṇisaṁvaca tambanakhiṁ sunettaṁ; 
“Āmantaya vammadharāni cete, 
Puttāni indīvarapupphasāme”. 
Te āgate muddhani dhammapālo, 
Cumbitvā putte avikampamāno; 
Āmantayitvāna avoca vākyaṁ, 
“Dinnāhaṁ raññā idha māṇavassa. 
Tassajjahaṁ attasukhī vidheyyo, 
Ādāya yenicchati tena gacchati; 
Ahañca vo sāsitumāgatosmi, 
Kathaṁ ahaṁ aparittāya gacche. 
Sace vo rājā kururaṭṭhavāsī, 
Janasandho puccheyya pahūtakāmo; 
Kimābhijānātha pure purāṇaṁ, 
Kiṁ vo pitā anusāse puratthā. 
Samāsanā hotha mayāva sabbe, 
Konīdha rañño abbhatiko manusso; 
Tamañjaliṁ kariya vadetha evaṁ, 
Mā hevaṁ deva na hi esa dhammo; 
Viyaggharājassa nihīnajacco, 
Samāsano deva kathaṁ bhaveyya”. 
Lakkhaṇakaṇḍaṁ nāma. 
6. Rājavasati 
So ca putte amacce ca, 
ñātayo suhadajjane; 
Alīnamanasaṅkappo, 
vidhuro etadabravi. 
“Ethayyo rājavasatiṁ, 
nisīditvā suṇātha me; 
Yathā rājakulaṁ patto, 
yasaṁ poso nigacchati. 
Na hi rājakulaṁ patto, 
aññāto labhate yasaṁ; 
Nāsūro nāpi dummedho, 
nappamatto kudācanaṁ. 
Yadāssa sīlaṁ paññañca, 
soceyyaṁ cādhigacchati; 
Atha vissasate tyamhi, 
guyhañcassa na rakkhati. 
Tulā yathā paggahitā, 
samadaṇḍā sudhāritā; 
Ajjhiṭṭho na vikampeyya, 
sa rājavasatiṁ vase. 
Tulā yathā paggahitā, 
samadaṇḍā sudhāritā; 
Sabbāni abhisambhonto, 
sa rājavasatiṁ vase. 
Divā vā yadi vā rattiṁ, 
rājakiccesu paṇḍito; 
Ajjhiṭṭho na vikampeyya, 
sa rājavasatiṁ vase. 
Divā vā yadi vā rattiṁ, 
rājakiccesu paṇḍito; 
Sabbāni abhisambhonto, 
sa rājavasatiṁ vase. 
Yo cassa sukato maggo, 
rañño suppaṭiyādito; 
Na tena vutto gaccheyya, 
sa rājavasatiṁ vase. 
Na rañño sadisaṁ bhuñje, 
kāmabhoge kudācanaṁ; 
Sabbattha pacchato gacche, 
sa rājavasatiṁ vase. 
Na rañño sadisaṁ vatthaṁ, 
na mālaṁ na vilepanaṁ; 
Ākappaṁ sarakuttiṁ vā, 
na rañño sadisamācare; 
Aññaṁ kareyya ākappaṁ, 
sa rājavasatiṁ vase. 
Kīḷe rājā amaccehi, 
bhariyāhi parivārito; 
Nāmacco rājabhariyāsu, 
bhāvaṁ kubbetha paṇḍito. 
Anuddhato acapalo, 
nipako saṁvutindriyo; 
Manopaṇidhisampanno, 
sa rājavasatiṁ vase. 
Nāssa bhariyāhi kīḷeyya, 
na manteyya rahogato; 
Nāssa kosā dhanaṁ gaṇhe, 
sa rājavasatiṁ vase. 
Na niddaṁ bahu maññeyya, 
na madāya suraṁ pive; 
Nāssa dāye mige haññe, 
sa rājavasatiṁ vase. 
Nāssa pīṭhaṁ na pallaṅkaṁ, 
Na kocchaṁ na nāvaṁ rathaṁ; 
Sammatomhīti ārūhe, 
Sa rājavasatiṁ vase. 
Nātidūre bhaje rañño, 
nāccāsanne vicakkhaṇo; 
Sammukhañcassa tiṭṭheyya, 
sandissanto sabhattuno. 
Na ve rājā sakhā hoti, 
na rājā hoti methuno; 
Khippaṁ kujjhanti rājāno, 
sūkenakkhīva ghaṭṭitaṁ. 
Na pūjito maññamāno, 
medhāvī paṇḍito naro; 
Pharusaṁ patimanteyya, 
rājānaṁ parisaṅgataṁ. 
Laddhadvāro labhe dvāraṁ, 
neva rājūsu vissase; 
Aggīva saṁyato tiṭṭhe, 
sa rājavasatiṁ vase. 
Puttaṁ vā bhātaraṁ vā saṁ, 
sampaggaṇhāti khattiyo; 
Gāmehi nigamehi vā, 
raṭṭhehi janapadehi vā; 
Tuṇhībhūto upekkheyya, 
na bhaṇe chekapāpakaṁ. 
Hatthārohe anīkaṭṭhe, 
rathike pattikārake; 
Tesaṁ kammāvadānena, 
rājā vaḍḍheti vetanaṁ; 
Na tesaṁ antarā gacche, 
sa rājavasatiṁ vase. 
Cāpovūnudaro dhīro, 
vaṁsovāpi pakampaye; 
Paṭilomaṁ na vatteyya, 
sa rājavasatiṁ vase. 
Cāpovūnudaro assa, 
macchovassa ajivhavā; 
Appāsī nipako sūro, 
sa rājavasatiṁ vase. 
Na bāḷhaṁ itthiṁ gaccheyya, 
sampassaṁ tejasaṅkhayaṁ; 
Kāsaṁ sāsaṁ daraṁ balyaṁ, 
khīṇamedho nigacchati. 
Nātivelaṁ pabhāseyya, 
na tuṇhī sabbadā siyā; 
Avikiṇṇaṁ mitaṁ vācaṁ, 
patte kāle udīraye. 
Akkodhano asaṅghaṭṭo, 
sacco saṇho apesuṇo; 
Samphaṁ giraṁ na bhāseyya, 
sa rājavasatiṁ vase. 
Mātāpettibharo assa, 
kule jeṭṭhāpacāyiko; 
Saṇho sakhilasambhāso, 
sa rājavasatiṁ vase. 
Vinīto sippavā danto, 
katatto niyato mudu; 
Appamatto suci dakkho, 
sa rājavasatiṁ vase. 
Nivātavutti vuddhesu, 
sappatisso sagāravo; 
Surato sukhasaṁvāso, 
sa rājavasatiṁ vase. 
Ārakā parivajjeyya, 
sahituṁ pahitaṁ janaṁ; 
Bhattāraññevudikkheyya, 
na ca aññassa rājino. 
Samaṇe brāhmaṇe cāpi, 
sīlavante bahussute; 
Sakkaccaṁ payirupāseyya, 
sa rājavasatiṁ vase. 
Samaṇe brāhmaṇe cāpi, 
sīlavante bahussute; 
Sakkaccaṁ anuvāseyya, 
sa rājavasatiṁ vase. 
Samaṇe brāhmaṇe cāpi, 
sīlavante bahussute; 
Tappeyya annapānena, 
sa rājavasatiṁ vase. 
Samaṇe brāhmaṇe cāpi, 
sīlavante bahussute; 
Āsajja paññe sevetha, 
ākaṅkhaṁ vuddhimattano. 
Dinnapubbaṁ na hāpeyya, 
dānaṁ samaṇabrāhmaṇe; 
Na ca kiñci nivāreyya, 
dānakāle vanibbake. 
Paññavā buddhisampanno, 
vidhānavidhikovido; 
Kālaññū samayaññū ca, 
sa rājavasatiṁ vase. 
Uṭṭhātā kammadheyyesu, 
appamatto vicakkhaṇo; 
Susaṁvihitakammanto, 
sa rājavasatiṁ vase. 
Khalaṁ sālaṁ pasuṁ khettaṁ, 
gantā cassa abhikkhaṇaṁ; 
Mitaṁ dhaññaṁ nidhāpeyya, 
mitaṁva pācaye ghare. 
Puttaṁ vā bhātaraṁ vā saṁ, 
sīlesu asamāhitaṁ; 
Anaṅgavā hi te bālā, 
yathā petā tatheva te; 
Coḷañca nesaṁ piṇḍañca, 
āsīnānaṁ padāpaye. 
Dāse kammakare pesse, 
sīlesu susamāhite; 
Dakkhe uṭṭhānasampanne, 
ādhipaccamhi ṭhāpaye. 
Sīlavā ca alolo ca, 
anurakkho ca rājino; 
Āvī raho hito tassa, 
sa rājavasatiṁ vase. 
Chandaññū rājino cassa, 
cittaṭṭho assa rājino; 
Asaṅkusakavutti’ssa, 
sa rājavasatiṁ vase. 
Ucchādaye ca nhāpaye, 
dhove pāde adhosiraṁ; 
Āhatopi na kuppeyya, 
sa rājavasatiṁ vase. 
Kumbhampañjaliṁ kariyā, 
cāṭañcāpi padakkhiṇaṁ; 
Kimeva sabbakāmānaṁ, 
dātāraṁ dhīramuttamaṁ. 
Yo deti sayanaṁ vatthaṁ, 
yānaṁ āvasathaṁ gharaṁ; 
Pajjunnoriva bhūtāni, 
bhogehi abhivassati. 
Esayyo rājavasati, 
vattamāno yathā naro; 
Ārādhayati rājānaṁ, 
pūjaṁ labhati bhattusu”. 
Rājavasati nāma. 
7. Antarapeyyāla 
Evaṁ samanusāsitvā, 
ñātisaṅghaṁ vicakkhaṇo; 
Parikiṇṇo suhadehi, 
rājānamupasaṅkami. 
Vanditvā sirasā pāde, 
katvā ca naṁ padakkhiṇaṁ; 
Vidhuro avaca rājānaṁ, 
paggahetvāna añjaliṁ. 
“Ayaṁ maṁ māṇavo neti, 
kattukāmo yathāmati; 
Ñātīnatthaṁ pavakkhāmi, 
taṁ suṇohi arindama. 
Putte ca me udikkhesi, 
yañca maññaṁ ghare dhanaṁ; 
Yathā pecca na hāyetha, 
ñātisaṅgho mayī gate. 
Yatheva khalatī bhūmyā, 
bhūmyāyeva patiṭṭhati; 
Evetaṁ khalitaṁ mayhaṁ, 
etaṁ passāmi accayaṁ”. 
“Sakkā na gantuṁ iti mayha hoti, 
Chetvā vadhitvā idha kātiyānaṁ; 
Idheva hohī iti mayha ruccati, 
Mā tvaṁ agā uttamabhūripañña”. 
“Mā hevadhammesu manaṁ paṇīdahi, 
Atthe ca dhamme ca yutto bhavassu; 
Dhiratthu kammaṁ akusalaṁ anariyaṁ, 
Yaṁ katvā pacchā nirayaṁ vajeyya. 
Nevesa dhammo na puneta kiccaṁ, 
Ayiro hi dāsassa janinda issaro; 
Ghātetuṁ jhāpetuṁ athopi hantuṁ, 
Na ca mayha kodhatthi vajāmi cāhaṁ”. 
Jeṭṭhaputtaṁ upaguyha, 
vineyya hadaye daraṁ; 
Assupuṇṇehi nettehi, 
pāvisī so mahāgharaṁ. 
Sālāva sammapatitā, 
mālutena pamadditā; 
Senti puttā ca dārā ca, 
vidhurassa nivesane. 
Itthisahassaṁ bhariyānaṁ, 
dāsisattasatāni ca; 
Bāhā paggayha pakkanduṁ, 
vidhurassa nivesane. 
Orodhā ca kumārā ca, 
vesiyānā ca brāhmaṇā; 
Bāhā paggayha pakkanduṁ, 
vidhurassa nivesane. 
Hatthārohā anīkaṭṭhā, 
rathikā pattikārakā; 
Bāhā paggayha pakkanduṁ, 
vidhurassa nivesane. 
Samāgatā jānapadā, 
negamā ca samāgatā; 
Bāhā paggayha pakkanduṁ, 
vidhurassa nivesane. 
Itthisahassaṁ bhariyānaṁ, 
dāsisattasatāni ca; 
Bāhā paggayha pakkanduṁ, 
“kasmā no vijahissasi”. 
Orodhā ca kumārā ca, 
vesiyānā ca brāhmaṇā; 
Bāhā paggayha pakkanduṁ, 
“kasmā no vijahissasi”. 
Hatthārohā anīkaṭṭhā, 
rathikā pattikārakā; 
Bāhā paggayha pakkanduṁ, 
“kasmā no vijahissasi”. 
Samāgatā jānapadā, 
negamā ca samāgatā; 
Bāhā paggayha pakkanduṁ, 
“kasmā no vijahissasi”. 
Katvā gharesu kiccāni, 
anusāsitvā sakaṁ janaṁ; 
Mittāmacce ca bhacce ca, 
puttadāre ca bandhave. 
Kammantaṁ saṁvidhetvāna, 
ācikkhitvā ghare dhanaṁ; 
Nidhiñca iṇadānañca, 
puṇṇakaṁ etadabravi. 
“Avasī tuvaṁ mayha tīhaṁ agāre, 
Katāni kiccāni gharesu mayhaṁ; 
Anusāsitā puttadārā mayā ca, 
Karoma kaccāna yathāmatiṁ te”. 
“Sace hi katte anusāsitā te, 
Puttā ca dārā anujīvino ca; 
Handehi dānī taramānarūpo, 
Dīgho hi addhāpi ayaṁ puratthā. 
Achambhitova gaṇhāhi, 
ājāneyyassa vāladhiṁ; 
Idaṁ pacchimakaṁ tuyhaṁ, 
jīvalokassa dassanaṁ”. 
“Sohaṁ kissa nu bhāyissaṁ, 
yassa me natthi dukkaṭaṁ; 
Kāyena vācā manasā, 
yena gaccheyya duggatiṁ”. 
So assarājā vidhuraṁ vahanto, 
Pakkāmi vehāyasamantalikkhe; 
Sākhāsu selesu asajjamāno, 
Kālāgiriṁ khippamupāgamāsi. 
Itthisahassaṁ bhariyānaṁ, 
dāsisattasatāni ca; 
Bāhā paggayha pakkanduṁ, 
yakkho brāhmaṇavaṇṇena; 
Vidhuraṁ ādāya gacchati. 
…pe… 
Samāgatā jānapadā, 
negamā ca samāgatā; 
Bāhā paggayha pakkanduṁ, 
yakkho brāhmaṇavaṇṇena; 
Vidhuraṁ ādāya gacchati. 
Itthisahassaṁ bhariyānaṁ, 
dāsisattasatāni ca; 
Bāhā paggayha pakkanduṁ, 
“paṇḍito so kuhiṁ gato”. 
…pe… 
Samāgatā jānapadā, 
negamā ca samāgatā; 
Bāhā paggayha pakkanduṁ, 
“paṇḍito so kuhiṁ gato. 
Sace so sattarattena, 
nāgacchissati paṇḍito; 
Sabbe aggiṁ pavekkhāma, 
natthattho jīvitena no”. 
“Paṇḍito ca viyatto ca, 
vibhāvī ca vicakkhaṇo; 
Khippaṁ mociya attānaṁ, 
mā bhāyitthāgamissati”. 
Antarapeyyālaṁ nāma. 
8. Sādhunaradhammakaṇḍa 
So tattha gantvāna vicintayanto, 
“Uccāvacā cetanakā bhavanti; 
Nayimassa jīvena mamatthi kiñci, 
Hantvānimaṁ hadayamānayissaṁ”. 
So tattha gantvā pabbatantarasmiṁ, 
Anto pavisitvāna paduṭṭhacitto; 
Asaṁvutasmiṁ jagatippadese, 
Adhosiraṁ dhārayi kātiyāno. 
So lambamāno narake papāte, 
Mahabbhaye lomahaṁse vidugge; 
Asantasanto kurūnaṁ kattuseṭṭho, 
Iccabravi puṇṇakaṁ nāma yakkhaṁ. 
“Ariyāvakāsosi anariyarūpo, 
Asaññato saññatasannikāso; 
Accāhitaṁ kammaṁ karosi ludraṁ, 
Bhāve ca te kusalaṁ natthi kiñci. 
Yaṁ maṁ papātasmiṁ papātumicchasi, 
Ko nu tavattho maraṇena mayhaṁ; 
Amānusasseva tavajja vaṇṇo, 
Ācikkha me tvaṁ katamāsi devatā”. 
“Yadi te suto puṇṇako nāma yakkho, 
Rañño kuverassa hi so sajibbo; 
Bhūmindharo varuṇo nāma nāgo, 
Brahā sucī vaṇṇabalūpapanno. 
Tassānujaṁ dhītaraṁ kāmayāmi, 
Irandhatī nāma sā nāgakaññā; 
Tassā sumajjhāya piyāya hetu, 
Patārayiṁ tuyha vadhāya dhīra”. 
“Mā heva tvaṁ yakkha ahosi mūḷho, 
Naṭṭhā bahū duggahītena loke; 
Kiṁ te sumajjhāya piyāya kiccaṁ, 
Maraṇena me iṅgha suṇomi sabbaṁ”. 
“Mahānubhāvassa mahoragassa, 
Dhītukāmo ñātibhatohamasmi; 
Taṁ yācamānaṁ sasuro avoca, 
Yathā mamaññiṁsu sukāmanītaṁ. 
Dajjemu kho te sutanuṁ sunettaṁ, 
Sucimhitaṁ candanalittagattaṁ; 
Sace tuvaṁ hadayaṁ paṇḍitassa, 
Dhammena laddhā idha māharesi; 
Etena vittena kumāri labbhā, 
Naññaṁ dhanaṁ uttari patthayāma. 
Evaṁ na mūḷhosmi suṇohi katte, 
Na cāpi me duggahitatthi kiñci; 
Hadayena te dhammaladdhena nāgā, 
Irandhatiṁ nāgakaññaṁ dadanti. 
Tasmā ahaṁ tuyhaṁ vadhāya yutto, 
Evaṁ mamattho maraṇena tuyhaṁ; 
Idheva taṁ narake pātayitvā, 
Hantvāna taṁ hadayamānayissaṁ”. 
“Khippaṁ mamaṁ uddhara kātiyāna, 
Hadayena me yadi te atthi kiccaṁ; 
Ye kecime sādhunarassa dhammā, 
Sabbeva te pātukaromi ajja”. 
So puṇṇako kurūnaṁ kattuseṭṭhaṁ, 
Nagamuddhani khippaṁ patiṭṭhapetvā; 
Assatthamāsīnaṁ samekkhiyāna, 
Paripucchi kattāramanomapaññaṁ. 
“Samuddhato mesi tuvaṁ papātā, 
Hadayena te ajja mamatthi kiccaṁ; 
Ye kecime sādhunarassa dhammā, 
Sabbeva me pātukarohi ajja”. 
“Samuddhato tyasmi ahaṁ papātā, 
Hadayena me yadi te atthi kiccaṁ; 
Ye kecime sādhunarassa dhammā, 
Sabbeva te pātukaromi ajja. 
Yātānuyāyī ca bhavāhi māṇava, 
Allañca pāṇiṁ parivajjayassu; 
Mā cassu mittesu kadāci dubbhī, 
Mā ca vasaṁ asatīnaṁ nigacche”. 
“Kathaṁ nu yātaṁ anuyāyī hoti, 
Allañca pāṇiṁ dahate kathaṁ so; 
Asatī ca kā ko pana mittadubbho, 
Akkhāhi me pucchito etamatthaṁ”. 
“Asanthutaṁ nopi ca diṭṭhapubbaṁ, 
Yo āsanenāpi nimantayeyya; 
Tasseva atthaṁ puriso kareyya, 
Yātānuyāyīti tamāhu paṇḍitā. 
Yassekarattampi ghare vaseyya, 
Yatthannapānaṁ puriso labheyya; 
Na tassa pāpaṁ manasāpi cintaye, 
Adubbhapāṇiṁ dahate mittadubbho. 
Yassa rukkhassa chāyāya, 
nisīdeyya sayeyya vā; 
Na tassa sākhaṁ bhañjeyya, 
mittadubbho hi pāpako. 
Puṇṇampi cemaṁ pathaviṁ dhanena, 
Dajjitthiyā puriso sammatāya; 
Laddhā khaṇaṁ atimaññeyya tampi, 
Tāsaṁ vasaṁ asatīnaṁ na gacche. 
Evaṁ kho yātaṁ anuyāyī hoti, 
Allañca pāṇiṁ dahate punevaṁ; 
Asatī ca sā so pana mittadubbho, 
So dhammiko hohi jahassu adhammaṁ”. 
Sādhunaradhammakaṇḍaṁ nāma. 
9. Kāḷāgirikaṇḍa 
“Avasiṁ ahaṁ tuyha tīhaṁ agāre, 
Annena pānena upaṭṭhitosmi; 
Mitto mamāsī visajjāmahaṁ taṁ, 
Kāmaṁ gharaṁ uttamapañña gaccha. 
Api hāyatu nāgakulā attho, 
Alampi me nāgakaññāya hotu; 
So tvaṁ sakeneva subhāsitena, 
Muttosi me ajja vadhāya pañña”. 
“Handa tuvaṁ yakkha mamampi nehi, 
Sasuraṁ te atthaṁ mayi carassu; 
Mayañca nāgādhipatiṁ vimānaṁ, 
Dakkhemu nāgassa adiṭṭhapubbaṁ”. 
“Yaṁ ve narassa ahitāya assa, 
Na taṁ pañño arahati dassanāya; 
Atha kena vaṇṇena amittagāmaṁ, 
Tuvamicchasi uttamapañña gantuṁ”. 
“Addhā pajānāmi ahampi etaṁ, 
Na taṁ pañño arahati dassanāya; 
Pāpañca me natthi kataṁ kuhiñci, 
Tasmā na saṅke maraṇāgamāya”. 
“Handa ca ṭhānaṁ atulānubhāvaṁ, 
Mayā saha dakkhasi ehi katte; 
Yatthacchati naccagītehi nāgo, 
Rājā yathā vessavaṇo naḷiññaṁ. 
Taṁ nāgakaññā caritaṁ gaṇena, 
Nikīḷitaṁ niccamaho ca rattiṁ; 
Pahūtamālyaṁ bahupupphachannaṁ, 
Obhāsatī vijjurivantalikkhe. 
Annena pānena upetarūpaṁ, 
Naccehi gītehi ca vāditehi; 
Paripūraṁ kaññāhi alaṅkatāhi, 
Upasobhati vatthapilandhanena. 
So puṇṇako kurūnaṁ kattuseṭṭhaṁ, 
Nisīdayī pacchato āsanasmiṁ; 
Ādāya kattāramanomapaññaṁ, 
Upānayī bhavanaṁ nāgarañño. 
Patvāna ṭhānaṁ atulānubhāvaṁ, 
Aṭṭhāsi kattā pacchato puṇṇakassa; 
Sāmaggipekkhamāno nāgarājā, 
Pubbeva jāmātaramajjhabhāsatha. 
Yannu tuvaṁ agamā maccalokaṁ, 
Anvesamāno hadayaṁ paṇḍitassa; 
Kacci samiddhena idhānupatto, 
Ādāya kattāramanomapaññaṁ”. 
“Ayañhi so āgato yaṁ tvamicchasi, 
Dhammena laddho mama dhammapālo; 
Taṁ passatha sammukhā bhāsamānaṁ, 
Sukho have sappurisehi saṅgamo”. 
Kāḷāgirikaṇḍaṁ nāma. 
“Adiṭṭhapubbaṁ disvāna, 
macco maccubhayaṭṭito; 
Byamhito nābhivādesi, 
nayidaṁ paññavatāmiva”. 
“Na camhi byamhito nāga, 
na ca maccubhayaṭṭito; 
Na vajjho abhivādeyya, 
vajjhaṁ vā nābhivādaye. 
Kathaṁ no abhivādeyya, 
abhivādāpayetha ve; 
Yaṁ naro hantumiccheyya, 
taṁ kammaṁ nupapajjati”. 
“Evametaṁ yathā brūsi, 
saccaṁ bhāsasi paṇḍita; 
Na vajjho abhivādeyya, 
vajjhaṁ vā nābhivādaye. 
Kathaṁ no abhivādeyya, 
abhivādāpayetha ve; 
Yaṁ naro hantumiccheyya, 
taṁ kammaṁ nupapajjati”. 
“Asassataṁ sassataṁ nu tavayidaṁ, 
Iddhī jutī balavīriyūpapatti; 
Pucchāmi taṁ nāgarājetamatthaṁ, 
Kathaṁ nu te laddhamidaṁ vimānaṁ. 
Adhiccaladdhaṁ pariṇāmajaṁ te, 
Sayaṅkataṁ udāhu devehi dinnaṁ; 
Akkhāhi me nāgarājetamatthaṁ, 
Yatheva te laddhamidaṁ vimānaṁ”. 
“Nādhiccaladdhaṁ na pariṇāmajaṁ me, 
Na sayaṅkataṁ nāpi devehi dinnaṁ; 
Sakehi kammehi apāpakehi, 
Puññehi me laddhamidaṁ vimānaṁ”. 
“Kiṁ te vataṁ kiṁ pana brahmacariyaṁ, 
Kissa suciṇṇassa ayaṁ vipāko; 
Iddhī jutī balavīriyūpapatti, 
Idañca te nāga mahāvimānaṁ”. 
“Ahañca bhariyā ca manussaloke, 
Saddhā ubho dānapatī ahumhā; 
Opānabhūtaṁ me gharaṁ tadāsi, 
Santappitā samaṇabrāhmaṇā ca. 
Mālañca gandhañca vilepanañca, 
Padīpiyaṁ seyyamupassayañca; 
Acchādanaṁ sāyanamannapānaṁ, 
Sakkacca dānāni adamha tattha. 
Taṁ me vataṁ taṁ pana brahmacariyaṁ, 
Tassa suciṇṇassa ayaṁ vipāko; 
Iddhī jutī balavīriyūpapatti, 
Idañca me dhīra mahāvimānaṁ”. 
“Evañce te laddhamidaṁ vimānaṁ, 
Jānāsi puññānaṁ phalūpapattiṁ; 
Tasmā hi dhammaṁ cara appamatto, 
Yathā vimānaṁ puna māvasesi”. 
“Nayidha santi samaṇabrāhmaṇā ca, 
Yesannapānāni dademu katte; 
Akkhāhi me pucchito etamatthaṁ, 
Yathā vimānaṁ puna māvasema”. 
“Bhogī hi te santi idhūpapannā, 
Puttā ca dārā anujīvino ca; 
Tesu tuvaṁ vacasā kammunā ca, 
Asampaduṭṭho ca bhavāhi niccaṁ. 
Evaṁ tuvaṁ nāga asampadosaṁ, 
Anupālaya vacasā kammunā ca; 
Ṭhatvā idha yāvatāyukaṁ vimāne, 
Uddhaṁ ito gacchasi devalokaṁ”. 
“Addhā hi so socati rājaseṭṭho, 
Tayā vinā yassa tuvaṁ sajibbo; 
Dukkhūpanītopi tayā samecca, 
Vindeyya poso sukhamāturopi”. 
“Addhā sataṁ bhāsasi nāga dhammaṁ, 
Anuttaraṁ atthapadaṁ suciṇṇaṁ; 
Etādisiyāsu hi āpadāsu, 
Paññāyate mādisānaṁ viseso”. 
“Akkhāhi no tāyaṁ mudhā nu laddho, 
Akkhehi no tāyaṁ ajesi jūte; 
Dhammena laddho iti tāyamāha, 
Kathaṁ nu tvaṁ hatthamimassa māgato”. 
“Yo missaro tattha ahosi rājā, 
Tamāyamakkhehi ajesi jūte; 
So maṁ jito rājā imassadāsi, 
Dhammena laddhosmi asāhasena”. 
Mahorago attamano udaggo, 
Sutvāna dhīrassa subhāsitāni; 
Hatthe gahetvāna anomapaññaṁ, 
Pāvekkhi bhariyāya tadā sakāse. 
“Yena tvaṁ vimale paṇḍu, 
yena bhattaṁ na ruccati; 
Na ca me tādiso vaṇṇo, 
ayameso tamonudo. 
Yassa te hadayenattho, 
āgatāyaṁ pabhaṅkaro; 
Tassa vākyaṁ nisāmehi, 
dullabhaṁ dassanaṁ puna”. 
Disvāna taṁ vimalā bhūripaññaṁ, 
Dasaṅgulī añjaliṁ paggahetvā; 
Haṭṭhena bhāvena patītarūpā, 
Iccabravi kurūnaṁ kattuseṭṭhaṁ. 
“Adiṭṭhapubbaṁ disvāna, 
macco maccubhayaṭṭito; 
Byamhito nābhivādesi, 
nayidaṁ paññavatāmiva”. 
“Na camhi byamhito nāgi, 
na ca maccubhayaṭṭito; 
Na vajjho abhivādeyya, 
vajjhaṁ vā nābhivādaye. 
Kathaṁ no abhivādeyya, 
abhivādāpayetha ve; 
Yaṁ naro hantumiccheyya, 
taṁ kammaṁ nupapajjati”. 
“Evametaṁ yathā brūsi, 
saccaṁ bhāsasi paṇḍita; 
Na vajjho abhivādeyya, 
vajjhaṁ vā nābhivādaye. 
Kathaṁ no abhivādeyya, 
abhivādāpayetha ve; 
Yaṁ naro hantumiccheyya, 
taṁ kammaṁ nupapajjati”. 
“Asassataṁ sassataṁ nu tavayidaṁ, 
Iddhī jutī balavīriyūpapatti; 
Pucchāmi taṁ nāgakaññetamatthaṁ, 
Kathaṁ nu te laddhamidaṁ vimānaṁ. 
Adhiccaladdhaṁ pariṇāmajaṁ te, 
Sayaṅkataṁ udāhu devehi dinnaṁ; 
Akkhāhi me nāgakaññetamatthaṁ, 
Yatheva te laddhamidaṁ vimānaṁ”. 
“Nādhiccaladdhaṁ na pariṇāmajaṁ me, 
Na sayaṁ kataṁ nāpi devehi dinnaṁ; 
Sakehi kammehi apāpakehi, 
Puññehi me laddhamidaṁ vimānaṁ”. 
“Kiṁ te vataṁ kiṁ pana brahmacariyaṁ, 
Kissa suciṇṇassa ayaṁ vipāko; 
Iddhī jutī balavīriyūpapatti, 
Idañca te nāgi mahāvimānaṁ”. 
“Ahañca kho sāmiko cāpi mayhaṁ, 
Saddhā ubho dānapatī ahumhā; 
Opānabhūtaṁ me gharaṁ tadāsi, 
Santappitā samaṇabrāhmaṇā ca. 
Mālañca gandhañca vilepanañca, 
Padīpiyaṁ seyyamupassayañca; 
Acchādanaṁ sāyanamannapānaṁ, 
Sakkacca dānāni adamha tattha. 
Taṁ me vataṁ taṁ pana brahmacariyaṁ, 
Tassa suciṇṇassa ayaṁ vipāko; 
Iddhī jutī balavīriyūpapatti, 
Idañca me dhīra mahāvimānaṁ”. 
“Evañce te laddhamidaṁ vimānaṁ, 
Jānāsi puññānaṁ phalūpapattiṁ; 
Tasmā hi dhammaṁ cara appamattā, 
Yathā vimānaṁ puna māvasesi”. 
“Nayidha santi samaṇabrāhmaṇā ca, 
Yesannapānāni dademu katte; 
Akkhāhi me pucchito etamatthaṁ, 
Yathā vimānaṁ puna māvasema”. 
“Bhogī hi te santi idhūpapannā, 
Puttā ca dārā anujīvino ca; 
Tesu tuvaṁ vacasā kammunā ca, 
Asampaduṭṭhā ca bhavāhi niccaṁ. 
Evaṁ tuvaṁ nāgi asampadosaṁ, 
Anupālaya vacasā kammunā ca; 
Ṭhatvā idha yāvatāyukaṁ vimāne, 
Uddhaṁ ito gacchasi devalokaṁ”. 
“Addhā hi so socati rājaseṭṭho, 
Tayā vinā yassa tuvaṁ sajibbo; 
Dukkhūpanītopi tayā samecca, 
Vindeyya poso sukhamāturopi”. 
“Addhā sataṁ bhāsasi nāgi dhammaṁ, 
Anuttaraṁ atthapadaṁ suciṇṇaṁ; 
Etādisiyāsu hi āpadāsu, 
Paññāyate mādisānaṁ viseso”. 
“Akkhāhi no tāyaṁ mudhā nu laddho, 
Akkhehi no tāyaṁ ajesi jūte; 
Dhammena laddho iti tāyamāha, 
Kathaṁ nu tvaṁ hatthamimassa māgato”. 
“Yo missaro tattha ahosi rājā, 
Tamāyamakkhehi ajesi jūte; 
So maṁ jito rājā imassadāsi, 
Dhammena laddhosmi asāhasena”. 
Yatheva varuṇo nāgo, 
pañhaṁ pucchittha paṇḍitaṁ; 
Tatheva nāgakaññāpi, 
pañhaṁ pucchittha paṇḍitaṁ. 
Yatheva varuṇaṁ nāgaṁ, 
dhīro tosesi pucchito; 
Tatheva nāgakaññampi, 
dhīro tosesi pucchito. 
Ubhopi te attamane viditvā, 
Mahoragaṁ nāgakaññañca dhīro; 
Achambhī abhīto alomahaṭṭho, 
Iccabravi varuṇaṁ nāgarājānaṁ. 
“Mā rodhayi nāga āyāhamasmi, 
Yena tavattho idaṁ sarīraṁ; 
Hadayena maṁsena karohi kiccaṁ, 
Sayaṁ karissāmi yathāmati te”. 
“Paññā have hadayaṁ paṇḍitānaṁ, 
Te tyamha paññāya mayaṁ sutuṭṭhā; 
Anūnanāmo labhatajja dāraṁ, 
Ajjeva taṁ kuruyo pāpayātu”. 
Sa puṇṇako attamano udaggo, 
Irandhatiṁ nāgakaññaṁ labhitvā; 
Haṭṭhena bhāvena patītarūpo, 
Iccabravi kurūnaṁ kattuseṭṭhaṁ. 
“Bhariyāya maṁ tvaṁ akari samaṅgiṁ, 
Ahañca te vidhura karomi kiccaṁ; 
Idañca te maṇiratanaṁ dadāmi, 
Ajjeva taṁ kuruyo pāpayāmi”. 
“Ajeyyamesā tava hotu metti, 
Bhariyāya kaccāna piyāya saddhiṁ; 
Ānandi vitto sumano patīto, 
Datvā maṇiṁ mañca nayindapatthaṁ”. 
Sa puṇṇako kurūnaṁ kattuseṭṭhaṁ, 
Nisīdayī purato āsanasmiṁ; 
Ādāya kattāramanomapaññaṁ, 
Upānayī nagaraṁ indapatthaṁ. 
Mano manussassa yathāpi gacche, 
Tatopissa khippataraṁ ahosi; 
Sa puṇṇako kurūnaṁ kattuseṭṭhaṁ, 
Upānayī nagaraṁ indapatthaṁ. 
“Etindapatthaṁ nagaraṁ padissati, 
Rammāni ca ambavanāni bhāgaso; 
Ahañca bhariyāya samaṅgibhūto, 
Tuvañca pattosi sakaṁ niketaṁ”. 
Sa puṇṇako kurūnaṁ kattuseṭṭhaṁ, 
Oropiya dhammasabhāya majjhe; 
Ājaññamāruyha anomavaṇṇo, 
Pakkāmi vehāyasamantalikkhe. 
Taṁ disvā rājā paramappatīto, 
Uṭṭhāya bāhāhi palissajitvā; 
Avikampayaṁ dhammasabhāya majjhe, 
Nisīdayī pamukhamāsanasmiṁ. 
“Tvaṁ no vinetāsi rathaṁva naddhaṁ, 
Nandanti taṁ kuruyo dassanena; 
Akkhāhi me pucchito etamatthaṁ, 
Kathaṁ pamokkho ahu māṇavassa”. 
“Yaṁ māṇavotyābhivadī janinda, 
Na so manusso naravīraseṭṭha; 
Yadi te suto puṇṇako nāma yakkho, 
Rañño kuverassa hi so sajibbo. 
Bhūmindharo varuṇo nāma nāgo, 
Brahā sucī vaṇṇabalūpapanno; 
Tassānujaṁ dhītaraṁ kāmayāno, 
Irandhatī nāma sā nāgakaññā. 
Tassā sumajjhāya piyāya hetu, 
Patārayittha maraṇāya mayhaṁ; 
So ceva bhariyāya samaṅgibhūto, 
Ahañca anuññāto maṇi ca laddho”. 
“Rukkho hi mayhaṁ padvāre sujāto, 
Paññākkhandho sīlamayassa sākhā; 
Atthe ca dhamme ca ṭhito nipāko, 
Gavapphalo hatthigavāssachanno. 
Naccagītatūriyābhinādite, 
Ucchijja senaṁ puriso ahāsi; 
So no ayaṁ āgato sanniketaṁ, 
Rukkhassimassāpacitiṁ karotha. 
Ye keci vittā mama paccayena, 
Sabbeva te pātukarontu ajja; 
Tibbāni katvāna upāyanāni, 
Rukkhassimassāpacitiṁ karotha. 
Ye keci baddhā mama atthi raṭṭhe, 
Sabbeva te bandhanā mocayantu; 
Yatheva yaṁ bandhanasmā pamutto, 
Evamete muñcare bandhanasmā. 
Unnaṅgalā māsamimaṁ karontu, 
Maṁsodanaṁ brāhmaṇā bhakkhayantu; 
Amajjapā majjarahā pivantu, 
Puṇṇāhi thālāhi palissutāhi. 
Mahāpathaṁ nicca samavhayantu, 
Tibbañca rakkhaṁ vidahantu raṭṭhe; 
Yathāññamaññaṁ na viheṭhayeyyuṁ, 
Rukkhassimassāpacitiṁ karotha”. 
Orodhā ca kumārā ca, 
vesiyānā ca brāhmaṇā; 
Bahuṁ annañca pānañca, 
paṇḍitassābhihārayuṁ. 
Hatthārohā anīkaṭṭhā, 
rathikā pattikārakā; 
Bahuṁ annañca pānañca, 
paṇḍitassābhihārayuṁ. 
Samāgatā jānapadā, 
negamā ca samāgatā; 
Bahuṁ annañca pānañca, 
paṇḍitassābhihārayuṁ. 
Bahujano pasannosi, 
disvā paṇḍitamāgate; 
Paṇḍitamhi anuppatte, 
celukkhepo pavattathāti. 
Vidhurajātakaṁ navamaṁ. 

Jātaka 
Mahānipāta 
Mūgapakkhavagga 
Vessantarajātaka 
1. Dasavarakathā 
“Phussatī varavaṇṇābhe, 
varassu dasadhā vare; 
Pathabyā cārupubbaṅgi, 
yaṁ tuyhaṁ manaso piyaṁ”. 
“Devarāja namo tyatthu, 
kiṁ pāpaṁ pakataṁ mayā; 
Rammā cāvesi maṁ ṭhānā, 
vātova dharaṇīruhaṁ”. 
“Na ceva te kataṁ pāpaṁ, 
na ca me tvamasi appiyā; 
Puññañca te parikkhīṇaṁ, 
yena tevaṁ vadāmahaṁ. 
Santike maraṇaṁ tuyhaṁ, 
vinābhāvo bhavissati; 
Paṭigaṇhāhi me ete, 
vare dasa pavecchato”. 
“Varañce me ado sakka, 
sabbabhūtānamissara; 
Sivirājassa bhaddante, 
tattha assaṁ nivesane. 
Nīlanettā nīlabhamu, 
nilakkhī ca yathā migī; 
Phussatī nāma nāmena, 
tatthapassaṁ purindada. 
Puttaṁ labhetha varadaṁ, 
yācayogaṁ amacchariṁ; 
Pūjitaṁ paṭirājūhi, 
kittimantaṁ yasassinaṁ. 
Gabbhaṁ me dhārayantiyā, 
majjhimaṅgaṁ anunnataṁ; 
Kucchi anunnato assa, 
cāpaṁva likhitaṁ samaṁ. 
Thanā me nappapateyyuṁ, 
palitā na santu vāsava; 
Kāye rajo na limpetha, 
vajjhañcāpi pamocaye. 
Mayūrakoñcābhirude, 
nārivaragaṇāyute; 
Khujjacelāpakākiṇṇe, 
sūtamāgadhavaṇṇite. 
Citraggaḷerughusite, 
surāmaṁsapabodhane; 
Sivirājassa bhaddante, 
tatthassaṁ mahesī piyā”. 
“Ye te dasa varā dinnā, 
mayā sabbaṅgasobhane; 
Sivirājassa vijite, 
sabbe te lacchasī vare”. 
Idaṁ vatvāna maghavā, 
devarājā sujampati; 
Phussatiyā varaṁ datvā, 
anumodittha vāsavo. 
Dasavarakathā nāma. 
“Parūḷhakacchanakhalomā, 
paṅkadantā rajassirā; 
Paggayha dakkhiṇaṁ bāhuṁ, 
kiṁ maṁ yācanti brāhmaṇā”. 
“Ratanaṁ deva yācāma, 
sivīnaṁ raṭṭhavaḍḍhanaṁ; 
Dadāhi pavaraṁ nāgaṁ, 
īsādantaṁ urūḷhavaṁ”. 
“Dadāmi na vikampāmi, 
yaṁ maṁ yācanti brāhmaṇā; 
Pabhinnaṁ kuñjaraṁ dantiṁ, 
opavayhaṁ gajuttamaṁ”. 
Hatthikkhandhato oruyha, 
rājā cāgādhimānaso; 
Brāhmaṇānaṁ adā dānaṁ, 
sivīnaṁ raṭṭhavaḍḍhano. 
Tadāsi yaṁ bhiṁsanakaṁ, 
tadāsi lomahaṁsanaṁ; 
Hatthināge padinnamhi, 
medanī sampakampatha. 
Tadāsi yaṁ bhiṁsanakaṁ, 
tadāsi lomahaṁsanaṁ; 
Hatthināge padinnamhi, 
khubhittha nagaraṁ tadā. 
Samākulaṁ puraṁ āsi, 
ghoso ca vipulo mahā; 
Hatthināge padinnamhi, 
sivīnaṁ raṭṭhavaḍḍhane. 
Uggā ca rājaputtā ca, 
vesiyānā ca brāhmaṇā; 
Hatthārohā anīkaṭṭhā, 
rathikā pattikārakā. 
Kevalo cāpi nigamo, 
sivayo ca samāgatā; 
Disvā nāgaṁ nīyamānaṁ, 
te rañño paṭivedayuṁ. 
“Vidhamaṁ deva te raṭṭhaṁ, 
putto vessantaro tava; 
Kathaṁ no hatthinaṁ dajjā, 
nāgaṁ raṭṭhassa pūjitaṁ. 
Kathaṁ no kuñjaraṁ dajjā, 
īsādantaṁ urūḷhavaṁ; 
Khettaññuṁ sabbayuddhānaṁ, 
sabbasetaṁ gajuttamaṁ. 
Paṇḍukambalasañchannaṁ, 
pabhinnaṁ sattumaddanaṁ; 
Dantiṁ savāḷabījaniṁ, 
setaṁ kelāsasādisaṁ. 
Sasetacchattaṁ saupādheyyaṁ, 
Sāthabbanaṁ sahatthipaṁ; 
Aggayānaṁ rājavāhiṁ, 
Brāhmaṇānaṁ adā gajaṁ. 
Annaṁ pānañca yo dajjā, 
vatthasenāsanāni ca; 
Etaṁ kho dānaṁ patirūpaṁ, 
etaṁ kho brāhmaṇārahaṁ. 
Ayaṁ te vaṁsarājā no, 
sivīnaṁ raṭṭhavaḍḍhano; 
Kathaṁ vessantaro putto, 
gajaṁ bhājeti sañjaya. 
Sace tvaṁ na karissasi, 
sivīnaṁ vacanaṁ idaṁ; 
Maññe taṁ saha puttena, 
sivī hatthe karissare”. 
“Kāmaṁ janapado māsi, 
raṭṭhañcāpi vinassatu; 
Nāhaṁ sivīnaṁ vacanā, 
rājaputtaṁ adūsakaṁ; 
Pabbājeyyaṁ sakā raṭṭhā, 
putto hi mama oraso. 
Kāmaṁ janapado māsi, 
raṭṭhañcāpi vinassatu; 
Nāhaṁ sivīnaṁ vacanā, 
rājaputtaṁ adūsakaṁ; 
Pabbājeyyaṁ sakā raṭṭhā, 
putto hi mama atrajo. 
Na cāhaṁ tasmiṁ dubbheyyaṁ, 
ariyasīlavato hi so; 
Asilokopi me assa, 
pāpañca pasave bahuṁ; 
Kathaṁ vessantaraṁ puttaṁ, 
satthena ghātayāmase”. 
“Mā naṁ daṇḍena satthena, 
na hi so bandhanāraho; 
Pabbājehi ca naṁ raṭṭhā, 
vaṅke vasatu pabbate”. 
“Eso ce sivīnaṁ chando, 
chandaṁ na panudāmase; 
Imaṁ so vasatu rattiṁ, 
kāme ca paribhuñjatu. 
Tato ratyā vivasāne, 
sūriyassuggamanaṁ pati; 
Samaggā sivayo hutvā, 
raṭṭhā pabbājayantu naṁ. 
Uṭṭhehi katte taramāno, 
gantvā vessantaraṁ vada; 
‘Sivayo deva te kuddhā, 
negamā ca samāgatā. 
Uggā ca rājaputtā ca, 
vesiyānā ca brāhmaṇā; 
Hatthārohā anīkaṭṭhā, 
rathikā pattikārakā; 
Kevalo cāpi nigamo, 
sivayo ca samāgatā. 
Asmā ratyā vivasāne, 
sūriyassuggamanaṁ pati; 
Samaggā sivayo hutvā, 
raṭṭhā pabbājayanti taṁ’”. 
Sa kattā taramānova, 
sivirājena pesito; 
Āmuttahatthābharaṇo, 
suvattho candanabhūsito. 
Sīsaṁ nhāto udake so, 
āmuttamaṇikuṇḍalo; 
Upāgami puraṁ rammaṁ, 
vessantaranivesanaṁ. 
Tatthaddasa kumāraṁ so, 
ramamānaṁ sake pure; 
Parikiṇṇaṁ amaccehi, 
tidasānaṁva vāsavaṁ. 
So tattha gantvā taramāno, 
kattā vessantaraṁbravi