Luận tạng Tây Tạng (Tengyur) — Tập 72

ས་ན་བའོ། །མགོ་ལྗི་ཞིང་ན་བ་ནི་རླུང་ཡིན་ཏེ། ཡང་ཞིང་གཡོ་བ་ནི་བད་
ཀན་ཡིན་ནོ། །ཚ་ཞིང་ན་བ་ནི་མཁྲིས་པའོ། །ཡང་ཞིང་སྟོང་སོབ་པ་ནི་རླུང་ངོ་། །ལྕི་ཞིང་འགྲིབ་པ་ནི་བད་ཀན་ནོ། །ཚ་ཞིང་སྟོ་བ་ནི་མཁྲིས་པའོ། །དེ་བཞིན་དུ་ནད་གཞན་ལ་སོགས་པ་ཡང་ཤེས་པར་བྱའོ། །རིམས་ནད་མེད་པར་གྱིས་ཤིག་ཅེས་བྱ་བ་ནི། ཚད་པ་ལས་བྱུང་བ་སྟེ། ཚད་པ་དེ་ཡང་རླུང་
ལས་བྱུང་བ་དང་། བད་ཀན་ལས་བྱུང་བ་དང་། མཁྲིས་པ་ལས་བྱུང་བའོ། །ཉིན་གཅིག་པ་དང་། ཉིན་གཉིས་པ་དང་། ཉིན་གསུམ་པ་དང་། ཉིན་བཞི་པ་དང་། ཉིན་བདུན་པ་དང་། ཟླ་བ་ཕྱེད་པ་དང་། ཟླ་བ་གཅིག་པ་དང་། ཟླ་བ་གཉིས་པ་དང་། ཡུད་ཙམ་དང་ཞེས་བྱ་བ་ནི། རིག་སྔགས་ཀྱི་
རྒྱལ་མོའི་བདེན་པས། རིག་སྔགས་དེ་རྣམས་ཀྱང་མི་སྣང་བར་འགྱུར་ཏེ། དེད་དཔོན་དེ་རྣམས་ཀྱང་སྲུང་བ་དང་སྐྱོབ་པར་འགྱུར་རོ། །རྟག་པའི་རིམས་དང་ཞེས་བྱ་བ་ནི། བད་ཀན་དང་རླུང་འདོམ་པའོ། །རིམས་ལྡང་དུབ་པ་ཞེས་བྱ་བ་ནི། ཚད་པ་དང་རླུང་ཤས་ཆེ་བའོ། །འབྱུང་པོའི་རིམས་
དང་ཞེས་བྱ་བ་ནི་ཚད་པ་དྲག་པོར་བྱུང་ཞིང་རྩ་རྩུབ་པའོ། །རླུང་ལས་གྱུར་པ་དང་། བད་ཀན་ལས་གྱུར་པ་དང་། མཁྲིས་པ་ལས་གྱུར་པ་དང་ཞེས་བྱ་བ་ནི། རླུང་ནི་གཡོ་བར་བྱེད་པའོ། །བད་ཀན་ནི་ལྕི་བར་བྱེད་པའོ། །མཁྲིས་པ་ནི་ཚ་བར་བྱེད་པའོ། །འདུས་པ་ལས་གྱུར་པ་དང་
ཞེས་བྱ་བ་ནི། དེ་གསུམ་འདུས་པས་ན་འདུས་པའོ། །ལྡན་པ་ནི་གཉིས་གཉིས་ལྡན་པས་ན་ལྡན་པའོ། །རིམས་ཐམས་ཅད་དང་། ནད་ཐམས་ཅད་དང་ཞེས་བྱ་བ་ནི། ཚད་པའི་རིགས་མི་གཅིག་པ་བཅུ་གཉིས་སོ། །ནད་ནི་ནད་རིགས་མི་གཅིག་པ་བཞི་བརྒྱ་རྩ་བཞིའོ། །གདོན་ཐམས་ཅད་དང་
ཞེས་བྱ་བ་ནི། ལྷའི་གདོན་ལ་སོགས་པ་སྟོང་ཕྲག་བརྒྱད་ཅུའོ། །དུག་ཐམས་ཅད་དང་ཞེས་བྱ་བ་ནི། ནང་གི་དུག་གསུམ་ཕྱིའི་དུག་གསུམ་མོ། །སྡིག་པ་ཐམས་ཅད་དང་ཞེས་བྱ་བ་ནི། ལས་དང་བག་ཆགས་ཤེས་བྱའི་སྒྲིབ་པའོ། །སྡུག་བསྔལ་ཐམས་ཅད་དང་ཞེས་བྱ་བ་ནི། ཉོན་མོངས་

པ་བརྒྱད་ཁྲི་བཞི་སྟོང་དང་། འཁོར་བའི་སྡུག་བསྔལ་ལ་སོགས་པའོ། །འཇིགས་པ་ཐམས་ཅད་བདག་ལ་མེད་པར་གྱིས་ཤིག་ཅེས་བྱ་བ་ནི། རིག་སྔགས་ཀྱི་རྒྱལ་མོའི་གཟི་བརྗིད་ཀྱིས། གནོད་སྦྱིན་གྱི་དེད་དཔོན་ཉི་ཤུ་རྩ་བརྒྱད་དང་། མཐུ་བོ་ཆེ་སུམ་ཅུ་རྩ་གཉིས་དང་།
སངས་རྒྱས་ཀྱི་བསྟན་པ་སྲུང་བ། རིག་སྔགས་ཀྱི་བཀའ་ལས་མི་འདའ་བ། སྲུང་བ་སེམས་ཅན་གྱི་དོན་བྱེད་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོའི། གནོད་སྦྱིན་གྱི་དེད་དཔོན་ཉི་ཤུ་རྩ་བརྒྱད་དང་། མཐུ་བོ་ཆེ་སུམ་ཅུ་རྩ་གཉིས་ཀྱི་གནས་སྐབས་ཏེ་བཅུ་པའོ།། །།
ཀུན་དགའ་བོ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་བཀའ་སྩལ་པའོ། །ཤ་ཟ་ཆེན་མོ་བཅུ་གཉིས་པོ་འདི་དག་ནི་ཞེས་བྱ་བ་ནི་འཇིག་རྟེན་གྱི་ཁམས་ལ་དབང་མཛད་ཅིང་། མཐུ་དང་སྟོབས་དང་ལྡན་པ་སྟེ། ཡང་དག་པར་རྫོགས་པའི་སངས་རྒྱས་ཀྱི་བསྟན་པ་
སྲུང་ཞིང་རིག་སྔགས་ཀྱི་བཀའ་ལས་མི་འདའ་བའོ། །གང་དག་བྱང་ཆུབ་སེམས་དཔའ་མའི་རུམ་དུ་ཞུགས་པ་ན་ཡང་སྲུང་ཞེས་བྱ་བ་ནི། རིག་སྔགས་ཀྱི་རྒྱལ་མོ་འདིའི་གཟི་བརྗིད་ཀྱིས། མི་ཆགས་པ་ཆགས་པར་བྱེད་པ་སྟེ། ཆགས་ནས་མེར་མེར་བའི་དུས་སུ་སྲུང་བ། སྐྱེས་མ་ཐག་ཏུ་
ཡང་སྲུང་པའོ། །བཙའ་ཁ་དང་བཙས་པ་ན་ཡང་བསྲུང་བ་དག་གོ་ཞེས་བྱ་བ་ནི། མ་སྐྱེས་པའི་གོང་དང་སྐྱེས་མ་ཐག་ཏུ་ཡིན་ཏེ། རིག་སྔགས་ཀྱི་གཟི་བརྗིད་ཀྱིས་ཤ་ཟ་མོ་ཆེན་མོ་བཅུ་གཉིས་ཀྱིས་སྲུང་བར་བྱེད་དོ། །བཅུ་གཉིས་ནི་གང་ཞེ་ན་ཞེས་བྱ་བ་ནི། སྔོན་གྱི་ལས་ཀྱི་འཕྲོས་ཤ་ཟ་
མོར་སྐྱེས་ཤིང་། སངས་རྒྱས་ཀྱི་བསྟན་པ་སྲུང་བའོ། །འདི་ལྟ་སྟེ་ཞེས་བྱ་བ་ནི། ཤ་ཟ་མོ་ཆེན་མོ་བཅུ་གཉིས་བལྟའོ། །ཕྲེང་མ་དང་། རྣམ་པར་ཕྲེང་མ་དང་། རབ་ཏུ་ཕྲེང་མ་དང་། ཀུན་དུ་ཕྲེང་མ་དང་། འཕྲོག་མ་དང་། སེང་གེའི་རལ་པ་དང་། སྤྲེའུ་ལྟར་དམར་སེར་དང་། ནག་
མོ་དང་། མི་བཟད་མ་དང་། དུང་མགྲིན་མ་དང་། བྱ་རོག་མ་དང་། བུམ་བུའི་ལྟོ་སྟེ་ཞེས་བྱ་བ་ནི། དེ་བཅུ་གཉིས་པོ་ནི། ཤིན་ཏུ་མཐུ་ཆེ་ཞིང་སྟོབས་དང་ལྡན་པའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། དཀར་མོ་དང་། ནག་མོ་དང་། སེར་མོ་དང་། དམར་མོ་དང་། ལྗང་གུ་

དང་། དཀར་སེར་དང་། དམར་སེར་དང་། མཐིང་ག་དང་། དམར་ནག་དང་། དཀར་མོ་དང་། སྔོ་བསངས་དང་། དམར་སེར་མོའོ། །གཡས་རྣམས་ན་འཁོར་ལོ་དང་། རྡོ་རྗེ་དང་། རིན་པོ་ཆེ་དང་། པདྨ་དང་། རལ་གྲི་དང་། མེ་ལོང་དང་། ཨུཏྤ་ལ་སེར་པོ་དང་། ཨུཏྤ་ལ་དམར་པོ་དང་། ཨུཏྤ་
ལ་སྔོན་པོ་དང་། དུང་དང་། ལྷུང་བཟེད་དང་། བུམ་པ་བསྣམས་པའོ། །གཡོན་རྣམས་ན་ཞགས་པ་དང་། བ་དན་དང་། ཐོད་པ་དང་། དྲིལ་བུ་དང་། རྩེ་གསུམ་དང་། དགྲ་སྟ་དང་། ལྕགས་ཀྱུ་དང་། ཐོད་པ་དང་། རལ་གྲི་དང་། མདའ་གཞུ་དང་། ཕྲེང་བ་དང་། དབྱུག་པ་གསུམ་བསྣམས་
པའོ། །ཤ་ཟ་ཆེན་མོ་འདི་དག་རྫུ་འཕྲུལ་དང་ལྡན་པ་ཞེས་བྱ་བ་ནི། སྟོབས་ཆེན་མོ་བཅུ་གཉིས་ནི། ས་འོག་ས་སྟེང་ས་བླ་རྣམས་རྒྱུ་བ་ནི། སྐད་ཅིག་མས་རྒྱུ་བའོ། །འོད་དང་ལྡན་པ་ཞེས་བྱ་བ་ནི། རང་གི་འོད་ཀྱིས་རང་གསལ་བའོ། །ཁ་དོག་དང་ལྡན་པ་ཞེས་བྱ་བ་ནི། རང་རང་གི་ཁ་དོག་
དཀར་པོ་ལ་སོགས་པས་མཛེས་པར་ལྡན་པའོ། །གྲགས་པ་དང་ལྡན་པ་ཞེས་བྱ་བ་ནི། འཇིག་རྟེན་གྱི་ཁམས་ན་གྲགས་པའོ། །རྫུ་འཕྲུལ་ཆེ་ཞེས་བྱ་བ་ནི། ནམ་མཁའ་ལ་བྱ་བཞིན་དུ་རྒྱུ་སྟེ། ཆུ་ལ་ཉ་བཞིན་ཏེ། ས་ལ་བྱི་བ་བཞིན་དུ་འཛུལ་བའོ། །ལྷ་དང་ལྷ་མ་ཡིན་གྱི་གཡུལ་དག་ཀྱང་མྱོང་བར་
བྱེད་པ་དག་གོ་ཞེས་བྱ་བ་ནི། ལྷ་དང་ལྷ་མ་ཡིན་འཐབ་རྩོད་ལ་སྡེ་བོ་ཆེར་གྲགས་ནས། གང་གི་ངོས་ནས་གྲོགས་བྱས་ན་རྒྱལ་བར་འགྱུར་རོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི་གང་ཟག་འདི་ལ་གུས་པར་བྱེད་པ་ཤ་ཟ་ཆེན་མོ་
བཅུ་གཉིས་ཀྱིས་ཀྱང་སྲུང་བར་བྱེད་པ་དག་གོ། །རིག་སྔགས་ཀྱི་རྒྱལ་མོ་འདི་ནི་ཞལ་གསུམ་ཕྱག་དྲུག་པ། སྐུ་མདོག་དཀར་མོ། གཡས་མཐིང་ག །གཡོན་དམར་བ། སྤྱན་གསུམ་པ། སངས་རྒྱས་ལྔའི་དབུ་རྒྱན་ཅན། དབུ་ལ་འཁོར་ལོས་མཚན་པ། ཕྱག་གཡས་རྣམས་ན་གཤོལ་དང་།
གསེག་ཤང་དང་། འཁོར་ལོའོ། །གཡོན་རྨ་བྱའི་སྒྲོ་དང་། ལྷུང་བཟེད་དང་། ཞགས་པ་བསྣམས་པའོ། །རྡོ་རྗེའི་རིགས་མ། དེ་བཞིན་གཤེགས་པའི་རིགས་མའོ། །ཆོས་ཀྱི་དབྱིངས་ཀྱི་ཡེ་ཤེས་གཟུགས་ཀྱི་ཕུང་པོའོ། །ཞབས་གཡས་བ་རྒྱང་བ། གཡོན་བསྐུམ་པའོ། །ཟླ་བའི་གདན་ལ་ཉི་མའི་

འོད་ཟེར་དང་ལྡན་པ། ཐབས་ཤེས་རབ་གཉིས་སུ་མེད་པའི་ངོ་བོ་ཉིད་དོ། །སྦ་བ་ཞེས་བྱ་བ་ནི། འབྱུང་པོ་རྣམས་ཀྱིས་གླགས་ཚོལ་བ་ལས་སྦ་བའོ། །ཡོངས་སུ་བསྐྱབ་པ་དང་ཞེས་བྱ་བ་ནི་འབྱུང་པོས་འཇིགས་པ་རྣམས་ལས་བསྐྱབ་པའོ། །ཡོངས་སུ་གཟུང་བ་དང་ཞེས་བྱ་བ་
ནི། འབྱུང་པོ་རྣམས་ཀྱིས་གཟུང་བར་འདོད་པ་མི་སྣང་བར་མཛད་པའོ། །ཡོངས་སུ་བསྐྱང་བ་དང་ཞེས་བྱ་བ་ནི། རྡོ་རྗེའི་ཕུང་པོ་བཏགས་ནས་གཞན་རྣམས་ཀྱིས་གླགས་མི་རྙེད་པའོ། །ཞི་བ་དང་ཞེས་བྱ་བ་ནི། མ་རུངས་པའི་འབྱུང་པོ་དང་། ཡི་དགས་རྣམས་ཞི་བས་དབང་དུ་སྡུད་པའོ། །
བདེ་ལེགས་སུ་འགྱུར་བ་དང་ཞེས་བྱ་བ་ནི། བཀྲ་ཤིས་ཤིང་ཕུན་སུམ་ཚོགས་པའོ། །ཆད་པ་སྤང་བ་དང་ཞེས་བྱ་བ་ནི་འབྱུང་པོ་རྣམས་ཀྱི་ཆད་པ་སྤང་བའོ། །མཚོན་ཆ་སྤང་བ་དང་ཞེས་བྱ་བ་ནི། མཚོན་སྣ་ཚོགས་ཀྱི་དབུས་ནས་ཀྱང་མི་ཚུགས་པའོ། །དུག་གཞིལ་བ་དང་ཞེས་བྱ་བ་ནི།
འོང་དུ་མ་བཅུག་པར་སྔར་ནས་བཀག་པའོ། །དུག་གསད་པ་དང་ཞེས་བྱ་བ་ནི། འཁོར་ན་ཡོད་པ་ནུས་པས་གསད་པའོ། །མཚམས་གཅད་པ་དང་ཞེས་བྱ་བ་ནི། དཔག་ཚད་ལྔ་བརྒྱའི་བར་མན་ཆོད་བཅད་པའོ། །ས་བཅིང་བ་དང་ཞེས་བྱ་བ་ནི་འོག་ཏུ་རླུང་གི་དཀྱིལ་འཁོར་ཡན་ཆད་དོ། །ལོ་བརྒྱ་
འཚོ་བར་གྱུར་ཅིག་ཅེས་བྱ་བ་ནི་ན་ཚ་དང་བྲལ་ཞིང་གཞོན་ནུའི་ཚུལ་དུ་གནས་པའོ། །སྟོན་བརྒྱ་མཐོང་བར་ཤོག་ཤིག་ཅེས་བྱ་བ་ནི། འཁོར་དང་བུ་ལ་སོགས་པ་མང་པོ་མཐོང་བའོ། །དེ་ལ་སྔགས་ཀྱི་ཚིག་ནི་འདི་རྣམས་ཡིན་ནོ་ཞེས་བྱ་བ་ནི་ཤ་ཟ་བཅུ་གཉིས་ཀྱི་སྲོག་སྙིང་རིག་སྔགས་ཀྱི་རྒྱལ་
མོའི་ལས་ཀྱི་སྙིང་པོའོ། །ཏདྱ་ཐཱ་ཞེས་བྱ་བ་ནི་རིག་སྔགས་ཀྱི་གསང་སྔགས་འོག་ཏུ་བལྟ་སྟེ། སྔགས་ནི། ཧ་རེ། ཁ་རེ་ལ་སོགས་པའོ། །ཀུན་དགའ་བོ་ཞེས་བྱ་བ་ནི། བྱང་ཆུབ་སེམས་དཔས་བཀའ་སྩལ་པའོ། །ཤ་ཟ་ཆེན་མོ་བརྒྱད་པོ་འདི་དག་ནི་ཞེས་བྱ་བ་ནི། སངས་རྒྱས་ཀྱི་བསྟན་
པ་སྲུང་བ་དང་། སེམས་ཅན་རྣམས་ལ་ཕན་པར་བྱེད་པ། འཇིག་རྟེན་ཁམས་ན་གྲགས་པའོ། །གང་དག་བྱང་ཆུབ་སེམས་དཔའ་མའི་རུམ་དུ་ཞུགས་པ་ན་ཡང་སྲུང་ཞེས་བྱ་བ་ནི། འདིའི་གཞུང་གིས་སྲུང་བར་བྱེད་ན་ཤ་ཟ་བརྒྱད་པོ་དག་གིས་སྲུང་བར་བྱེད་དོ། །བཙའ་ཁ་དང་བཙས་པ་

ན་ཡང་སྲུང་བ་དག་གོ་ཞེས་བྱ་བ་ནི། གཞན་རྣམས་བྱ་བའི་གདོན་གྱི་དབང་དུ་མི་འགྱུར་བར་རིག་སྔགས་ཀྱི་རྒྱལ་མོའི་གཟི་བརྗིད་ཀྱིས་སྲུང་བར་བྱེད་པའོ། །དེ་དག་ཀྱང་གང་ཞེ་ན་ཞེས་བྱ་བ་ནི། བརྒྱད་པ་དག་སྟོབས་དང་ལྡན་པ། མཐུ་ཆེ་བ་དང་ལྡན་པའོ། །འདི་ལྟ་སྟེ་ཞེས་བྱ་བ་ནི་བརྒྱད་པ་དག་འོག་ཏུ་
བལྟའོ། །རྒྱགས་པ་དང་རྒྱགས་བྱེད་མ་དང་རྒྱགས་བྱེད་མའི་ཤས་ཆེན་མ་དང་། ཉེ་རྒྱགས་མ་དང་། ཡི་དགས་མོ་དང་། གཟི་བྱིན་འཕྲོག་མ་དང་། ཟ་བ་མོ་དང་། འཆའ་བ་མོ་སྟེ་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ་ལ་གནས་པ། །རིག་སྔགས་ཀྱི་བཀའ་ལས་མི་འདའོ། །དེའི་སྐུ་
མདོག་དང་ཕྱག་མཚན་ནི་སེར་མོ་དང་། དམར་སེར་དང་། དཀར་སེར་དང་། སྔོ་བསངས་དང་། ལྗང་སེར་དང་། དཀར་མོ་དང་། དམར་མོ་དང་། ནག་མོའོ། །གཡས་རྣམས་ན་མེ་ལོང་དང་། དྲིའི་ཕོར་བ་དང་། རིན་པོ་ཆེའི་ཕྲེང་བ་དང་། པི་ཝང་དང་། གླིང་བུ་དང་། རྔ་དང་རྔ་རྐེད་ཉག་དང་། རྔ་
རིངས་སོ། །གཡོན་རྣམས་ན་ལྷུང་བཟེད་བསྣམས་པའོ། །ཤ་ཟ་མོ་བརྒྱད་པོ་འདི་དག་ནི་རྫུ་འཕྲུལ་དང་ལྡན་པ་ཞེས་བྱ་བ་ནི་རྫུ་འཕྲུལ་ཆེ་ཞིང་འཇིག་རྟེན་ཁམས་ན་རྒྱུ་བའོ། །འོད་དང་ལྡན་པ་ཞེས་བྱ་བ་ནི་འོད་ཟེར་གྱིས་སྣང་བ་སྟེ། འོད་དེས་གཞན་ཡང་ཁྱབ་པའོ། །ཁ་དོག་དང་ལྡན་པ་ཞེས་བྱ་
བ་ནི། རང་གི་ཁ་དོག་དང་ལྡན་པའོ། །གྲགས་པ་དང་ལྡན་པ་ཞེས་བྱ་བ་ནི། ཁམས་གསུམ་ཙམ་ཡང་གྲགས་པས་ཁྱབ་པའོ། །རྫུ་འཕྲུལ་ཆེ་བ་དང་ལྡན་ཞེས་བྱ་བ་ནི། ས་འོག་ས་སྟེང་ས་བླ་སྐད་ཅིག་མས་རྒྱུ་བའོ། །ལྷ་དང་ལྷ་མ་ཡིན་གྱི་གཡུལ་དག་ཀྱང་མྱོང་བར་བྱེད་པ་དག་གོ་ཞེས་བྱ་བ་ནི་ལྷའི་དབང་
པོ་བརྒྱ་བྱིན་དང་། ལྷ་མ་ཡིན་གྱི་རྒྱལ་པོ་ཐགས་བཟངས་རིས་ཀྱི་འཐབ་རྩོད་དང་། གྲོགས་བྱེད་པར་སྣང་བའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས། སྲུང་བ་གྱིས་ཤིག་ཅེས་བྱ་བ་ནི་གང་ཟག་དག་གིས་རིག་སྔགས་ཀྱི་རྒྱལ་མོ་འདི་ལ་གུས་པར་བྱས་ཤིང་རྗེས་སུ་ཡི་རང་
སྟེ། དེའི་ཡོན་ཏན་གྱིས་ཤ་ཟ་ཆེན་མོ་བརྒྱད་པོ་དག་གིས་ཀྱང་སྲུང་བར་བགྱིད་པའོ། །རིག་སྔགས་ཀྱི་རྒྱལ་མོ་ནི་ཞལ་གསུམ་ཕྱག་དྲུག་པ་སྐུ་མདོག་སེར་མོ། །གཡས་དཀར་གཡོན་དམར་བའོ། །སངས་རྒྱས་ཀྱི་དབུ་རྒྱན་ཅན་སྤྱན་གསུམ་པ་དབུ་ལ་རིན་པོ་ཆེས་བརྒྱན་པ། རྒྱན་ཐམས་

ཅད་ཀྱིས་བརྒྱན་པའོ། །གཡས་པ་གསུམ་ན་རིན་པོ་ཆེ་དང་། གཏུན་ཤིང་དང་། དགྲ་སྟ་བསྣམས་པའོ། །གཡོན་གསུམ་ན། རྨ་བྱའི་སྒྲོ། རྩེ་གསུམ་དང་། ལྕགས་ཀྱུ་བསྣམས་པའོ། །མཉམ་པ་ཉིད་ཀྱི་ཡེ་ཤེས་ཀྱི་རང་བཞིན་ཚོར་བའི་ཕུང་པོ་རིན་པོ་ཆེའི་རིགས་ཐབས་ཤེས་རབ་
གཉིས་སུ་མེད་པ་གཡས་བརྐྱང་བ་གཡོན་བསྐུམ་པའོ། །ཟླ་བའི་གདན་ལ་ཉི་མའི་འོད་དང་ལྡན་པའོ། །སྦ་བ་ལ་སོགས་པ་ཞེས་བྱ་བ་ནི། གོང་དུ་བཤད་པ་བཞིན་ནོ། །ཏདྱ་ཐཱ་ཞེས་བྱ་བ་ནི་འདི་ལྟ་སྟེ། ཤ་ཟ་མོ་བརྒྱད་པོའི་སྲོག་སྙིང་དང་རིག་སྔགས་ལས་ཀྱི་སྙིང་པོ་བལྟའོ། །རིག་སྔགས་ཀྱི་
གསང་སྔགས་ནི། ཧ་རེ། ཁ་རེ་ལ་སོགས་པའོ། །ཀུན་དགའ་བོ་ཞེས་བྱ་བ་ནི། ཐུགས་རྗེ་ཆེན་པོས་ཀུན་དགའ་བོ་ལ་བཀའ་སྩལ་པའོ། །ཤ་ཟ་ཆེན་མོ་ཤ་དང་ཁྲག་ཟ་བ་མི་དག་ལ་རྣམ་པར་འཚེ་བ་བདུན་པོ་འདི་དག་ནི་ཞེས་བྱ་བ་ནི་འཇིག་རྟེན་ཁམས་རྒྱུ་ཞིང་། སྐྱེས་པ་དང་བུད་མེད་ལ་གནོད་པ་སྐྱེལ་
བ་སྟེ། འཐབ་རྩོད་ལ་དགའ་བར་བྱེད་པ་སྟེ། ཕོ་མོ་ལྕེབ་པའི་སེམས་སུ་བྱེད་པའམ། བྱིས་པ་རྣམས་ལ་གནོད་པ་སྟེ། དེ་བཞིན་དུ་སེམས་ཅན་རྣམས་ལ་གླགས་ཚོལ་བའོ། །དེ་བཞིན་དུ་གླགས་ཚོལ་ཞིང་ཁྲག་ལ་དགའ་བའོ། །གང་དག་བྱང་ཆུབ་སེམས་དཔའ་མའི་རུམ་དུ་ཞུགས་པ་ན་ཡང་སྲུང་
བ་དང་ཞེས་བྱ་བ་ནི། རིག་སྔགས་ཀྱི་རྒྱལ་མོའི་དབང་གིས་འདུས་པ་སྟེ། ཤ་ཟ་བདུན་པོ་དེ་དག་ཀྱང་དེ་དག་གི་རིག་སྔགས་ཀྱི་གཟི་བརྗིད་ཀྱིས་སྲུང་བར་བྱེད་པའོ། །བཙའ་ཁ་དང་བཙས་པ་ན་ཡང་སྲུང་བར་བྱེད་པ་དག་གོ་ཞེས་བྱ་བ་ནི་གཞན་གྱི་དབང་དུ་མི་འགྱུར་བར་ཤ་ཟ་མོ་དེ་རྣམས་ཀྱིས་སྲུང་
བའོ། །དེ་དག་ཀྱང་གང་ཞེ་ན་ཞེས་བྱ་བ་ནི་ཤ་ཟ་མོ་བདུན་པོ་མཐུ་ཆེ་ཞིང་སྟོབས་དང་ལྡན་པ། བཞིན་མི་སྡུག་པ་ཁྲོ་མོ་ནད་ཐམས་ཅད་གཏོང་བ། སེམས་ཅན་རྣམས་འཇིགས་པར་བྱེད་པའོ། །འདི་ལྟ་སྟེ་ཞེས་བྱ་བ་ནི་འོག་ཏུ་བལྟའོ། །རབ་འཆར་ལྡན་དང་། སྲུང་བ་མོ་དང་། ཤ་ཟ་ཕྲ་མོ་
དང་། གང་བ་བཟང་མོ་དང་། མེ་སྲུང་མ་དང་། མཛའ་མོ་ནག་མོ་དང་དྲང་སྲོང་སྲུང་མ་སྟེ་ཞེས་བྱ་བ་ནི་དེ་རྣམས་ཀྱིས་ཀྱང་སངས་རྒྱས་ཀྱི་བསྟན་པ་བསྲུང་བ་དང་། རིག་སྔགས་ཀྱི་བཀའ་ལས་འདའ་མི་ནུས་པའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི་དམར་པོ་དང་ལྗང་ནག་དང་།

སྔོན་མོ་དང་། དམར་ནག་དང་། མཐིང་ནག་དང་། ནག་མོ་དང་། ཐལ་བའི་མདོག་ཅན་ནོ། །གཡས་རྣམས་ན་གྲི་གུག་དང་། རྩེ་གསུམ་དང་། དགྲ་སྟ་དང་། ཞགས་པ་དང་། ལྕགས་ཀྱུ་དང་། སྙིང་དང་། སྦྲུལ་གྱི་ཞགས་པ་བསྣམས་པ། གཡོན་རྣམས་ན་ཐོད་པ་ཁྲག་གིས་གང་བ་
བསྣམས་པའོ། །ཤ་ཟ་ཆེན་མོ་བདུན་པོ་འདི་དག་ནི་རྫུ་འཕྲུལ་དང་ལྡན་པ་ཞེས་བྱ་བ་ནི། གཞན་རྣམས་གནོད་པ་སྐྱེལ་བའི་ཕྱིར་གཟུགས་ཆེ་བར་བསྟན་ཏེ། རི་རབ་ཙམ་བསྟན་ནོ། །ཆུང་བ་ནི་བ་སྤུའི་རྩེ་མོ་ཙམ་བསྟན་ཏེ། དེ་ལྟ་བུའི་རྫུ་འཕྲུལ་དང་ལྡན་པའོ། །འོད་དང་ལྡན་པ་ཞེས་བྱ་བ་ནི། དེའི་འོད་ཀྱིས་སེམས་
ཅན་གྱིས་ལྟ་མི་ནུས་པའོ། །ཁ་དོག་དང་ལྡན་པ་ཞེས་བྱ་བ་ནི། ཁ་དོག་དྲག་པོས་ཏེ། མེའི་ཚུལ་དུ་སྣང་བའོ། །གྲགས་པ་དང་ལྡན་པ་ཞེས་བྱ་བ་ནི་གནོད་སྦྱིན་འཇིག་རྟེན་གྱི་ཁམས་སུ་གྲགས་པའོ། །རྫུ་འཕྲུལ་ཆེ་བ་ཞེས་བྱ་བ་ནི། སྐད་ཅིག་མས་ཕྱིའི་རྒྱ་མཚོ་དང་། རི་རབ་ཀྱི་རྩེ་མོ་ལ་རྒྱུ་
བའོ། །ལྷ་དང་ལྷ་མ་ཡིན་གྱི་གཡུལ་དག་ཀྱང་མྱོང་བར་བྱེད་པ་དག་གོ་ཞེས་བྱ་བ་ནི། དྲག་པོའི་ཚུལ་གྱིས་ལྷ་དང་ལྷ་མ་ཡིན་ལ་གྲོགས་བྱེད་པ་དག་གོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི། གང་ཟག་འདི་ལ་གུས་པ་དང་སྲུང་བར་
བྱེད་ན། དེ་རྣམས་ཀྱིས་གནོད་མི་ནུས་ཤིང་གླགས་ཚོལ་བར་མི་ནུས་པའོ། །རིག་སྔགས་ཀྱི་རྒྱལ་མོ་ནི་ཞལ་གསུམ་ཕྱག་དྲུག་པ། སྐུ་མདོག་དམར་མོ་ཅུང་ཟད་ཁྲོ་བ། གཡས་དཀར་གཡོན་མཐིང་ག་དབུ་ལ་རིགས་ལྔའི་དབུ་རྒྱན་ཅན་པདྨས་དབུ་ལ་མཚན་པ། རྒྱན་ཐམས་ཅད་རིན་པོ་ཆེས་བརྒྱན་པ།
སོ་སོར་རྟོག་པའི་ཡེ་ཤེས་པདྨའི་རིགས་གཡས་བརྐྱང་གཡོན་བསྐུམ་པ། ཟླ་བའི་གདན་ལ་ཉི་མའི་འོད་དང་ལྡན་པ། ཐབས་ཤེས་རབ་གཉིས་སུ་མེད་པའོ། །སྦ་བ་ལ་སོགས་པ་ཞེས་བྱ་བ་ནི། སྔར་བཤད་པ་བཞིན་དུ་ཤེས་པར་བྱའོ། །ཏདྱ་ཐཱ་ཞེས་བྱ་བ་ནི། འདི་ལྟ་སྟེ། གང་བལྟ་ཞེ་ན། ཤ་ཟ་མོ་རྣམས་
ཀྱི་སྲོག་སྙིང་དང་། རིག་སྔགས་ཀྱི་ལས་ཀྱི་སྙིང་པོའོ། །རིག་སྔགས་ཀྱི་གསང་སྔགས་ནི། ཧ་རེ། ཁ་རེ་ལ་སོགས་པའོ། །ཀུན་དགའ་བོ་ཞེས་བྱ་བ་ནི། བཅོམ་ལྡན་འདས་ཀྱིས་བཀའ་སྩལ་པའོ། །སྲིན་པོ་ཆེན་པོ་ཤ་དང་ཁྲག་ཟ་བ་མི་དག་ལ་རྣམ་པར་འཚེ་བ་ལྔ་པོ་འདི་དག་ནི་ཞེས་བྱ་བ་ནི།

ཕྱིའི་རྒྱ་མཚོའི་འགྲམ་དུ་གྲོང་ཁྱེར་ལངྐ་ན་སྲིན་པོ་ལྔ་པོ་སྟོབས་དང་ལྡན་པ། མཐུ་ཆེ་བ་སྐད་ཅིག་མས་གླིང་བཞིར་རྒྱུ་བ། སྐྱེས་པ་ཕོ་མོ་ལ་གནོད་པ། ཤ་ཁྲག་ལ་དགའ་བ། སེམས་ཅན་ཐམས་ཅད་ལ་གནོད་པ་བྱེད་པའོ། །གང་དག་བྱང་ཆུབ་སེམས་དཔའ་མའི་རུམ་དུ་ཞུགས་
པ་ན་ཡང་སྲུང་ཞེས་བྱ་བ་ནི། རིག་སྔགས་ཀྱི་རྒྱལ་མོའི་གཟི་བརྗིད་དང་། སྟོབས་དང་མཐུའི་ནུས་པས་སྲིན་པོ་དེ་དག་གིས་ཀྱང་རིག་སྔགས་ཀྱི་བཀའ་ལས་འདའ་བར་མི་ནུས་པ་དེའི་ནུས་པས་དང་པོ་ཡང་སྲུང་བ། བར་དུ་ཡང་སྲུང་བ། ཐ་མར་ཡང་སྲུང་བའོ། །བཙའ་ཁ་དང་བཙས་པ་ན་ཡང་སྲུང་བར་
བྱེད་ཅེས་བྱ་བ་ནི། རིག་སྔགས་ཀྱི་བཀའི་ནུས་པས་སྐྱེ་བ་ལ་ཡང་དག་པར་སྲུང་སྟེ། སྐྱེས་ནས་ཀྱང་ཚེ་མ་ཟད་ཀྱི་བར་དུ་སྲུང་བའོ། །ལྔ་པོ་དེ་དག་ཀྱང་གང་ཞེ་ན་ཞེས་བྱ་བ་ནི་གཟུགས་ཆེ་ཞིང་བཞིན་མི་སྡུག་པ་སེམས་ཅན་ལ་འཇིགས་པ་དང་། སྐྲག་པར་བྱེད་པ་རྨི་ལམ་ན་ཡང་སྡིག་པར་རྨི་བ་དེ་དག་ལྔ་པོའོ།། །།
འདི་ལྟ་སྟེ་ཞེས་བྱ་བ་ནི་སྲིན་མོ་ལྔ་པོ་བལྟའོ། །གཏུམ་མོ་དང་། དེས་གཏུམ་མོ་དང་། དགའ་མོ་དང་། ཁྱབ་འཇུག་ལེན་དང་། སེར་སྐྱ་མོ་སྟེ་ཞེས་བྱ་བ་ནི་གསུས་པ་ཆེ་བ། མིག་དམར་བ། སྐྲ་གཟིངས་པ། དེ་རྣམས་ཀྱི་ཁ་དོག་དང་། ཕྱག་མཚན་ནི་དཀར་པོ་དང་། ནག་པོ་དང་། སེར་པོ་དང་།
དམར་མོ་དང་། ལྗང་གུའོ། །གཡས་རྣམས་ན་སྦྲུལ་གྱི་ཞགས་པ་དང་། བདུད་ཀྱི་ཞགས་པ་དང་། གྲི་ཁྱེའོ་དང་། ལྕགས་ཀྱུ་དང་། རལ་གྲི་བསྣམས་པ། གཡོན་རྣམས་ན་ཐོད་པ་དང་། མི་མགོ་དང་། ཐལ་བའི་སྣོད་དང་། སྙིང་དང་མིའི་པགས་པ་བསྣམས་པའོ། །སྲིན་མོ་ལྔ་པོ་
འདི་དག་ནི། རྫུ་འཕྲུལ་དང་ལྡན་པ་ཞེས་བྱ་བ་ནི་ཉེ་བའམ་བུའམ་བུ་མོའི་གཟུགས་སུ་བྱས་ནས་གནོད་པ་སྐྱེལ་ཏེ། ལ་ལ་བྱའི་གཟུགས་སམ། ཁྱིའི་གཟུགས་སམ། རྨ་བྱ་དང་། ཁྲུང་ཁྲུང་གི་གཟུགས་སུ་བྱས་ནས་རྫུ་འཕྲུལ་དུ་སྤྲུལ་པའོ། །འོད་དང་ལྡན་པ་ཞེས་བྱ་བ་ནི། གཞན་གྱིས་
ཀྱང་འདི་དྲག་པོ་མཐོང་སྟེ། འོད་དེ་ཡང་མེ་ལྕེ་འབར་བའི་འོད་དང་འདྲ་བའོ། །ཁ་དོག་དང་ལྡན་པ་ཞེས་བྱ་བ་ནི་སོ་སོ་རང་རང་གི་ཁ་དོག་དང་ལྡན་པའོ། །གྲགས་པ་དང་ལྡན་པ་ཞེས་བྱ་བ་ནི། འཇིག་རྟེན་གྱི་ཁམས་སུ་གྲགས་པའོ། །རྫུ་འཕྲུལ་ཆེ་བ་ཞེས་བྱ་བ་ནི། སྐད་ཅིག་མས་

གླིང་ལ་རྒྱུ་ནུས་པའོ། །ལྷ་དང་ལྷ་མ་ཡིན་གྱི་གཡུལ་དག་ཀྱང་མྱོང་བར་བྱེད་པ་ཞེས་བྱ་བ་ནི། དྲག་པོའི་ཚུལ་གྱིས་གཡུལ་ལས་བཟློག་ནུས་ཏེ། འཐབ་རྩོད་བྱེད་པ་ལ་རེམ་པའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི། གང་ཟག་
གིས་འདི་ལ་གུས་པར་བསྲུང་བ་དང་སྐྱབས་སུ་གསོལ་ན། སྲིན་པོ་དེ་དག་གིས་ཀྱང་མི་ཚུགས་པ། རིག་སྔགས་ཀྱི་ངོ་བོ་ཉིད་ཐོབ་པའོ། །རིག་སྔགས་ཀྱི་ངོ་བོ་གང་ཞེ་ན། ཐབས་དང་ཤེས་རབ་ཀྱི་རང་བཞིན་ཏེ། ཐབས་ཀྱི་ངོ་བོ་ནི། སྐུ་མདོག་དང་ཕྱག་མཚན་བསྟན་པ། ཤེས་རབ་ཀྱི་ངོ་བོ་ནི་བྱ་བ་ནན་
ཏན་གྱི་ཡེ་ཤེས་སོ། །ཞལ་གསུམ་པ་ཕྱག་དྲུག་པ། སྐུ་མདོག་ལྗང་གུའོ། །གཡས་དཀར་བ། གཡོན་དམར་བ། སྤྱན་གསུམ་པ། དབུ་ལ་རིགས་ལྔའི་དབུ་རྒྱན་ཅན། སྤྱི་བོའི་གཙུག་ན་སྣ་ཚོགས་རྡོ་རྗེས་བརྒྱན་པ། ལས་ཀྱི་རིགས་འདུ་བྱེད་ཀྱི་ཕུང་པོའོ། །གཡས་རྣམས་ན་རལ་གྲི་དང་།
སྣ་ཚོགས་རྡོ་རྗེ་དང་། གཏུན་ཤིང་བསྣམས་པ། གཡོན་རྣམས་ན་རྨ་བྱའི་སྒྲོ་དང་། ཞགས་པ་དང་། ལྕགས་ཀྱུ་བསྣམས་པའོ། །རྒྱན་ཐམས་ཅད་ཀྱིས་བརྒྱན་པའོ། །གཡས་བརྐྱང་བ་གཡོན་བསྐུམ་པ་ཟླ་བའི་གདན་དང་ཉི་མའི་འོད་ཟེར་དང་ལྡན་པ། ཐབས་ཤེས་རབ་གཉིས་སུ་མེད་པའོ། །
སྦ་བ་ལ་སོགས་པ་ཞེས་བྱ་བ་ནི། དེ་ལྟ་བུའི་རིག་སྔགས་ཀྱི་རང་བཞིན་ཏེ། སྲུང་བ་དང་སྐྱོབ་པ་དང་སྐྱོང་བ་ལ་སོགས་པ་བྱེད་པའོ། །ཏདྱ་ཐཱ་ཞེས་བྱ་བ་ནི་འདི་ལྟ་སྟེ་དེ་རྣམས་ཀྱི་སྲོག་སྙིང་དང་རིག་སྔགས་ཀྱི་ལས་ཀྱི་སྙིང་པོར་བལྟའོ། །རིག་སྔགས་ཀྱི་གསང་སྔགས་ནི། ཧ་རེ། ཁ་རེ་ལ་སོགས་པའོ། །
ཀུན་དགའ་བོ་ཞེས་བྱ་བ་ནི། བཅོམ་ལྡན་འདས་ཀྱིས་བཀའ་སྩལ་པའོ། །སྲིན་པོ་ཆེན་པོ་ཤ་དང་ཁྲག་ཟ་བ། མི་རྣམས་ལ་རྣམ་པར་འཚེ་བ་བརྒྱད་པོ་འདི་དག་ནི་ཞེས་བྱ་བ་ནི། འཇིག་རྟེན་གྱི་ཁམས་རྒྱུ་ཞིང་གླགས་ཚོལ་བ་སྟེ། སྨྱོ་བ་དང་། ལྕེབ་པ་དང་། ཁྲོ་བ་དང་། གཏུམ་པ་དང་། འཐབ་
པ་དང་། རྩོད་པ་དང་། གཡུལ་དུ་ཞུགས་ཤིང་། མི་རྣམས་ལ་འཚེ་བར་བྱེད་པ་སྟེ། རིམས་ནད་དང་། ཁྲག་ནད་གཏོང་བར་བྱེད་པ་དག་གོ། །གང་དག་བྱང་ཆུབ་སེམས་དཔའ་མའི་རུམ་དུ་ཞུགས་པ་ན་ཡང་སྲུང་ཞེས་བྱ་བ་ནི། རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་གཟི་བརྗིད་ཀྱིས་འདི་

ལ་གུས་པར་བྱེད་པ་ཙམ་ལ། གནོད་པ་བཅིངས་པ་སྟེ། གང་ཟག་གི་ཐོག་མ་དང་། ཐ་མ་བར་དུ་བསྲུང་བའོ། །བཙའ་ཁ་དང་བཙས་པ་ན་ཡང་སྲུང་བ་དག་གོ་ཞེས་བྱ་བ་ནི་སྐྱེས་པའི་དུས་ནས་རྒས་པའི་བར་དུ་བསྲུང་སྟེ། གློ་བུར་གྱི་རྐྱེན་ཡང་མི་གཏོང་བའོ། །དེ་དག་ཀྱང་གང་ཞེ་ན་ཞེས་
བྱ་བ་ནི་གཟུགས་ཆེ་ཞིང་བཞིན་མི་སྡུག་པ་གསུས་པ་ཆེ་བ། མགོ་ཆེ་བ། མིག་ཀྱང་གློག་དང་འདྲ་བ། སྨིན་མ་ཁྲོ་གཉེར་ཅན་སྐྲ་ཁམ་ནག་གྱེན་དུ་གཟིངས་པ། སྐད་ཆེ་བ་སྦོམ་པ། སེམས་ཅན་རྣམས་ལ་འཇིགས་པ་དང་། སྐྲག་པར་བྱེད་པའོ། །འདི་ལྟ་སྟེ་ཞེས་བྱ་བ་ནི། འཇིགས་པ་དང་སྐྲག་པར་བྱེད་
པ་བརྒྱད་པའོ། །བལྟ་བའོ། །གླེན་མ་དང་། མཚམས་བཟང་མ་དང་། ཀུ་ཤ་ལྟ་བུའི་མིག་ཅན་མ་དང་། སྐྲ་ཅན་དང་། ཀམ་པོ་ཛི་དང་། རབ་མཛེས་མ་དང་། མིག་དམར་མོ་དང་། མི་བཟད་མ་སྟེ་ཞེས་བྱ་བ་ནི། མཐུ་ཆེ་ཞིང་སྟོབས་དང་ལྡན་པ་སྟེ། མི་རྣམས་ལ་འཚེ་བ་ལ་དགའ་བའོ། །དེ་རྣམས་
ཀྱི་སྐུ་མདོག་དང་ཕྱག་མཚན་ནི་ནག་པོ་དང་། སྔོ་བསངས་དང་། ལྗང་ནག་དང་། མཐིང་ནག་དང་། དམར་ནག་དང་། ཐལ་བའི་མདོག་ཅན་དང་། སྔོ་སྐྱ་དང་། ལྗང་གུའོ། །གཡས་རྣམས་ན་མདུང་དང་། འཕང་མདུང་དང་། རྩེ་གཅིག་དང་། ཏོ་མ་ར་དང་། གཏུན་ཤིང་དང་། འཁོར་ལོ་དང་
མདའ་གཞུ་དང་། རྩེ་གསུམ་བསྣམས་པའོ། །གཡོན་རྣམས་ན་ཞགས་པ་དང་། སྦྲུལ་དང་མི་སྙིང་དང་། མི་མགོ་དང་། མིའི་པགས་པ་དང་། རྒྱུ་ཞགས་དང་། ཐོད་པ་དང་། མི་རོ་བསྣམས་པའོ། །དྲི་མི་ཞིམ་པ་སྦྲུལ་གྱིས་བརྒྱན་པའོ། །གཅེར་བུར་གནས་པ། མིའི་ཞིང་ལྤགས་
གོན་པའོ། །དེ་དག་ནི་ཤ་དང་ཁྲག་ཟ་བ་ཞེས་བྱ་བ་ནི། མཛའ་བ་མི་མཛའ་བར་བྱ་སྟེ། འཐབ་རྩོད་ཀྱི་སེམས་བཅུག་ནས་མཚོན་གྱིས་མཚོན་འགྱེད་པར་བྱེད་པ་ཉེ་བ་དང་དམེ་འཁྲུག་པར་བྱེད་པ་ལ་དགའ་བའོ། །སྐྱེས་པ་དང་བུད་མེད་དང་། ཁྱེའུ་དང་། བུ་མོ་དག་ཀྱང་འཕྲོག་པ་ཞེས་བྱ་བ་ནི།
དེ་རྣམས་དང་ཕྲད་གླགས་མེད་པ། གལ་ཏེ་ཕྲད་པར་གྱུར་ན། སྲོག་འཕྲོག་པ་གྲོང་ངམ། གྲོང་ཁྱེར་རམ། ལྗོངས་སམ། གྲོང་རྡལ་ལམ། ཕོ་བྲང་དག་ལ་རྒྱུ་བ་སེམས་ཅན་རྣམས་ལ་འཚེ་བར་བྱེད་ཅིང་། སྲོག་འཕྲོག་པ། ཁྱེའུ་བུ་མོ་མངལ་ན་ཡོད་པ་ཡང་འཕྲོག་པ་སྟེ། དེ་ཤ་ཁྲག་

རྣག་ལ་དགའ་བའོ། །གྲོང་དུ་ཞུགས་པའི་ཁྱིམ་བདག་དང་། ཁང་སྟོང་ལ་བརྟེན་པ་ཞེས་བྱ་བ་ནི། ཤིན་ཏུ་རང་གི་རིགས་སྡང་བ་ལ་སྲུང་བ། སྟོང་པའི་ནང་དུ་གཟུགས་མི་སྣང་བར་འདོད་པ། ཡང་ན་གཟུགས་ཀྱི་རང་བཞིན་མ་ཡིན་ཏེ། ཡིད་ཀྱི་རང་བཞིན་དུ་ཡོད་པ། གཟུགས་མི་སྣང་བའོ། །མུན་
པའི་འོད་འགྲོ་བ་རྗེས་སུ་འགྲོ་བ། སྒྲ་འབྱིན་པ་ཞེས་བྱ་བ་ནི། དུར་ཁྲོད་དམ། ལམ་རྒྱ་གྲམ་མམ། སུམ་མདོ་འམ ། ཕོ་བྲང་ངམ་དེ་རྣམས་མུན་པ་ལ་རྒྱུ་ཞིང་། འཇིགས་པ་དང་། སྐྲག་པར་བྱེད་པ་སྟེ། དེ་བཞིན་དུ་མི་རྣམས་ལ་གནོད་པ་བྱེད་པའོ། །མི་འདི་རྣམས་ཀྱི་མདངས་འཕྲོག་པར་བྱེད་པ་
ཆེ་བའོ་ཞེས་བྱ་བ་ནི། མི་རྣམས་ཀྱི་གཟི་བརྗིད་འཕྲོག་པ། སེམས་ཅན་རྣམས་ལ་འཚེ་བར་གྲགས་པ། ཤུ་བ་དང་། གཡའ་བ་དང་། མཛེ་དང་། ཕོལ་མིག་དང་། ཤ་བཀྲ་དང་། འབྲས་དང་། གཡན་པ་དང་། དམུ་ཆུ་དང་། དེ་ལ་སོགས་པའི་ནད་རྣམས་གཏོང་བར་བྱེད་པ་དག་གོ། །དེ་དག་ནི་
སྙིང་རྗེ་མེད་ཅིང་། མིའི་སྐྱེ་དགུ་སྐྲག་པར་བྱེད་པ་སྟེ་ཞེས་བྱ་བ་ནི་སྲིན་མོ་བརྒྱད་པོ་དེ་དག་ཀྱང་སེམས་ཅན་རྣམས་ལ་རྟག་ཏུ་འཚེ་བ་སྟེ། ཤན་པ་བཞིན་དུ་སེམས་ཅན་ལ་བྱས་པ་སྟེ། ཤ་ཁྲག་ལ་དེ་བཞིན་དུ་དགའ་བ་སྟེ། སྲིན་མོ་དེ་དག་ནི་འཇིགས་པར་སྣང་ངོ་། །སྲིན་མོ་ཆེན་པོ་བརྒྱད་པོ་དེ་
དག་ནི་རྫུ་འཕྲུལ་དང་ལྡན་པ་ཞེས་བྱ་བ་ནི། ཚན་གཅིག་ལ་འཚེ་བའི་དུས་སུ་གཟུགས་ཆེ་བར་བསྟན་ཏེ། ཚན་གཅིག་བ་སྤུའི་བུ་ག་ནས་བཟུང་ནས་གནོད་པ་བྱེད་པའོ། །འོད་དང་ལྡན་པ་ཞེས་བྱ་བ་ནི། མེ་དཔུང་འབར་བའི་འོད་ཟེར་དང་ལྡན་པ། དེ་དག་གི་འོད་ཟེར་ཁ་དོག་དྲུག་དང་
ལྡན་པའོ། །ཁ་དོག་དང་ལྡན་པ་ཞེས་བྱ་བ་ནི། སོ་སོ་རང་རང་གི་ཁ་དོག་དང་ལྡན་པ། དེའི་ཁ་དོག་གིས་མཛེས་པར་སྣང་བའོ། །གྲགས་པ་དང་ལྡན་པ་ཞེས་བྱ་བ་ནི། འཇིག་རྟེན་གྱི་ཁམས་ཀྱི་ནང་ན་གྲགས་པའོ། །རྫུ་འཕྲུལ་ཆེ་བ་ཞེས་བྱ་བ་ནི། སྐད་ཅིག་མས་གླིང་བཞིར་རྒྱུ་བའོ། །
ལྷ་དང་ལྷ་མ་ཡིན་གྱི་གཡུལ་དག་ཀྱང་མྱོང་བར་བྱེད་པ་དག་གོ་ཞེས་བྱ་བ་ནི། དེ་གཉིས་འཐབ་པའི་དུས་སུ་ཡང་དེ་རྣམས་ཀྱིས་འཐབ་རྩོད་བྱེད་པ་སྟེ། ཤིན་ཏུ་སྟོབས་དང་ལྡན་པ། མཐུ་ཆེ་བར་གྲགས་པའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་

བ་གྱིས་ཤིག་ཅེས་བྱ་བ་ནི། གང་ཟག་གིས་འདི་ལ་གུས་པར་བྱེད་པའི་སེམས་ཅན་བརྒྱད་པོ་དེ་དག་གིས་སྲུང་བར་བྱེད་དེ། གནོད་པ་དྲག་པོས་གནོད་པར་མི་ནུས་པ། རིག་སྔགས་ཀྱི་བཀའ་ལས་འདའ་བར་མི་ནུས་པའོ། །རིག་སྔགས་ཀྱི་ངོ་བོ་ནི་མཚོན་བྱ་ནི་མེ་ལོང་ལྟ་བུའི་ཡེ་ཤེས་ཏེ།
ཤེས་རབ་ལྟ་བུའོ། །མཚོན་བྱེད་ནི་གཟུགས་བརྙན་ལྟ་བུ་སྟེ། རིག་སྔགས་ཀྱི་རྒྱལ་མོའི་བདག་ཉིད་དོ། །དེ་ཡང་རྡོ་རྗེའི་རིགས་རྣམ་པར་ཤེས་པའི་ཕུང་པོའོ། །ཡེ་ཤེས་ལྔའི་ངོ་བོ་ཉིད་ཞལ་གསུམ་ཕྱག་དྲུག་པ་སྐུ་མདོག་མཐིང་གར་བཞུགས་པའོ། །ཞལ་གསུམ་དུ་སྣང་བ་ནི་སྐུ་གསུང་ཐུགས་
ཀྱི་རྣམ་པར་དག་པའོ། །སྐུ་མདོག་མཐིང་གར་སྣང་བ་ནི། བྱམས་པ་ཡོངས་སུ་རྫོགས་པའོ། །སྤྱན་གསུམ་དུ་སྣང་བ་ནི་ཡེ་ཤེས་གསུམ་དུ་རྣམ་པར་དག་པའོ། །ཁྲོ་བོར་སྣང་བ་ནི་མ་ལུས་སེམས་ཅན་ཡོངས་སུ་རྫོགས་པར་བྱེད་པའོ། །ཐོད་པ་ལྔའི་དབུ་རྒྱན་ནི། འདོད་པའི་ཡོན་ཏན་
ལྔ་བོར་ནས་ཡེ་ཤེས་ལྔར་ཤར་བའོ། །དབུ་སྐྲ་སེར་པོ་གྱེན་དུ་འབར་བ་ནི་ཐེག་པ་སྣ་ཚོགས་བསྟན་པའོ། །དབུ་ལ་རྡོ་རྗེས་མཚན་པ་ནི་རྡོ་རྗེའི་རིགས་ཀྱི་རྣམ་པར་དག་པའོ། །ཁྲོ་གཉེར་དུ་བསྟན་པ་ནི་ཐེག་པ་གསུམ་དང་ལྡན་པའོ། །མཆེ་བ་གཙིགས་པ་ནི། ཀུན་རྫོབ་དང་དོན་དམ་པའི་རང་བཞིན་བསྟན་
པའོ། །སྦྲུལ་གྱིས་ཡན་ལག་བརྒྱན་པ་ནི་ནང་གི་དུག་དང་ཕྱིའི་དུག་བཅོམ་པའོ། །ཕྱག་དྲུག་དང་ལྡན་པ་ནི་ཕ་རོལ་ཏུ་ཕྱིན་པ་དྲུག་དང་ལྡན་པའོ། །གཡས་བརྐྱང་གཡོན་བསྐུམ་པ་ནི་མྱ་ངན་དང་སྲིད་པས་མ་གོས་པའོ། །ཟླ་བའི་གདན་ལ་ཉི་མའི་འོད་དང་ལྡན་པ་ནི་ཐབས་ཤེས་རབ་གཉིས་སུ་མེད་པའི་བརྡ་
བསྟན་པའོ། །པདྨ་བརྒྱད་པའི་གདན་ནི་རྣམ་པར་ཐར་པ་བརྒྱད་དོ། །ཕྱག་གཡས་ན་རལ་གྲི་བསྣམས་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་དག་པའོ། །དེའི་འོག་རྡོ་རྗེ་བསྣམས་པ་ནི། ཡེ་ཤེས་ལྔའི་རང་བཞིན་དག་པའོ། །ཐ་མ་གཏུན་ཤིང་བསྣམས་པ་ནི། ཐེག་པ་དུ་མ་རྣམ་པར་དག་པའོ། །
གཡོན་རྨ་བྱའི་སྒྲོ་བསྣམས་པ་ནི་དུག་གསུམ་རྣམ་པར་འཇོམས་པའོ། །བར་མ་ན་ཞགས་པ་བསྣམས་པ་ནི། བདུད་བཞི་བཅིང་བའོ། །ཐ་མ་ན་རྩེ་གསུམ་བསྣམས་པ་ནི། སྲིད་གསུམ་རྣམ་པར་འཇོམས་པའོ། །ཡེ་ཤེས་ལྔའི་རང་བཞིན་རྣམ་པར་བསྟན་པ་ནི། རིག་སྔགས་ཀྱི་རང་བཞིན་སྟོང་

པ་ཉིད་དུ་བསྟན་པའོ། །མེ་ལོང་ལྟ་བུའི་ཡེ་ཤེས་ནི་འཇིག་རྟེན་གྱི་ཁམས་མེ་ལོང་ལྟ་བུ་སྟེ། སྒྱུ་མ་ལྟ་བུ་སྣང་བ་རྣམ་པར་དག་པའོ། །དེ་ལྟ་བུའི་རིག་སྔགས་ལ་གང་ཟག་དག་གིས་མོས་པར་གྱུར་ན། བརྒྱད་པོ་དེ་དག་གིས་གནོད་པར་མི་ནུས་ཏེ། དེ་རྣམས་ཀྱིས་ཀྱང་མཆོད་པར་འོས་པའོ། །སྦ་བ་ལ་
སོགས་པ་ཞེས་བྱ་བ་ནི། རིག་སྔགས་ཀྱི་རྒྱལ་མོ་དེའི་གཟི་བརྗིད་ཀྱིས་སྦ་བ་ལ་སོགས་པའོ། །ཏདྱ་ཐཱ་ཞེས་བྱ་བ་ནི་འདི་ལྟ་སྟེ། བརྒྱད་པོའི་སྲོག་སྙིང་དང་རིག་སྔགས་ཀྱི་ལས་ཀྱི་སྙིང་པོའོ། །རིག་སྔགས་ཀྱི་གསང་སྔགས་ནི། ཧ་རེ། ཁ་རེ་ལ་སོགས་པའོ། །ཀུན་དགའ་བོ་ཞེས་བྱ་བ་ནི་གཽ་ཏ་
མས་བཀའ་སྩལ་པའོ། །སྲིན་མོ་ཆེན་མོ་བཅུ་བོ་འདི་དག་ནི་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་ཞིང་། རིག་སྔགས་ཀྱི་བཀའ་ལས་མི་འདའ་བ། སེམས་ཅན་རྣམས་ཀྱི་དོན་བྱེད་པའོ། །གང་དག་བྱང་ཆུབ་སེམས་དཔའ་མའི་རུམ་དུ་ཞུགས་ན་ཡང་སྲུང་ཞེས་བྱ་བ་ནི། རིག་སྔགས་ཀྱི་
བཀའ་ལས་མི་འདའ་བར་བྱང་ཆུབ་སེམས་དཔའི་རྒྱུ་ཅན་སེམས་ཅན་མའི་ས་བོན་སྲུང་བའོ། །བཙའ་ཁ་དང་བཙས་པ་ན་ཡང་བསྲུང་བ་དག་གོ་ཞེས་བྱ་བ་ནི། རྒྱུའི་བྱང་ཆུབ་སེམས་དཔའི་ཕུང་པོ་ལྔའི་རང་བཞིན་རྒྱུའི་སེམས་དཔས་བསྲུང་བའོ། །དེ་དག་ཀྱང་གང་ཞེ་ན་ཞེས་བྱ་བ་ནི། བཅུ་པོ་
སྲིན་མོའི་རང་བཞིན་རྣམ་པར་སྨིན་པ་ལས་བྱུང་བ་སེམས་ཅན་གྱི་དོན་མཛད་པའོ། །འདི་ལྟ་སྟེ་ཞེས་བྱ་བ་ནི། སྲིན་མོ་བཅུ་པོར་བལྟའོ། །སྲིན་མོ་འཕྲོག་མ་དང་། སྲིན་མོ་དགའ་མོ་དང་། སྲིན་མོ་དམར་སེར་མོ་དང་། སྲིན་མོ་དུང་ཅན་མ་དང་། སྲིན་མོ་ལུས་ལས་བྱུང་མ་དང་། སྲིན་མོ་ལྷ་བཤོས་
མ་དང་། སྲིན་མོ་བུམ་པ་མ་དང་། སྲིན་མོ་མེ་ཏོག་ཀུནྡའི་མཆེ་བ་ཅན་དང་། སྲིན་མོ་འཕྱང་མ་དང་། སྲིན་མོ་མེ་སྟེ་ཞེས་བྱ་བ་ནི། དེ་རྣམས་ནི་སྟོབས་ཆེ་ཞིང་མཐུ་ཆེ་བ་སྟེ། སངས་རྒྱས་ཀྱི་བསྟན་པ་བསྲུང་བ་སྟེ། སེམས་ཅན་གྱི་དོན་མཛད་པའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི།
སེར་མོ་དང་། ནག་མོ་དང་། དམར་སེར་མ་དང་། དཀར་མོ་དང་། སྔོ་སྐྱ་དང་། དམར་མོ་དང་། ལྗང་གུ་དང་། དཀར་སེར་དང་། མཐིང་ག་དང་། གསེར་གྱི་མདོག་ཅན་མའོ། །གཡས་རྣམས་ན་ཨུཏྤལ་དང་། པདྨ་དང་། པདྨ་དམར་པོ་དང་། དུང་དང་འཁོར་ལོ་དང་། ཀུནྡ་དང་མེ་ཏོག་

སུནྡ་དང་པུཎྜ་རཱི་ཀ་དང་། ཨུཏྤལ་སེར་པོ་བསྣམས་པའོ། །གཡོན་རྣམས་ན་ལྷུང་བཟེད་བསྣམས་པའོ། །སྲིན་མོ་ཆེན་མོ་བཅུ་གཉིས་པོ་འདི་དག་ནི་རྫུ་འཕྲུལ་དང་ལྡན་པ་ཞེས་བྱ་བ་ནི། གོང་ནས་གོང་དུ་འགྲོ་བ་སྐད་ཅིག་མས་སླེབས་ཏེ། ཆར་དང་མེ་འབར་བར་ནུས་སོ། །འོད་
ཟེར་དང་ལྡན་པ་ཞེས་བྱ་བ་ནི། རང་གི་འོད་ཟེར་གྱིས་དཔག་ཚད་ལྔ་བརྒྱ་ཡང་གསལ་ལོ། །དེ་བཞིན་དུ་གཞན་ཡང་གསལ་ལོ། །ཁ་དོག་དང་ལྡན་པ་ཞེས་བྱ་བ་ནི། རང་རང་གི་ཁ་དོག་མཛེས་པ་དང་ལྡན་པའོ། །གྲགས་པ་དང་ལྡན་པ་ཞེས་བྱ་བ་ནི། འཇིག་རྟེན་གྱི་ཁམས་སུ་དགེ་བར་
གྲགས་པའོ། །རྫུ་འཕྲུལ་ཆེ་བ་ཞེས་བྱ་བ་ནི། ཁམས་གསུམ་དུ་སྐད་ཅིག་མས་རྒྱུ་བ་སྟེ། སེམས་ཅན་གྱི་དོན་ལ་རྫུ་འཕྲུལ་དང་ལྡན་པའོ། །ལྷ་དང་ལྷ་མ་ཡིན་གྱི་གཡུལ་དག་ཀྱང་མྱོང་བར་བྱེད་པ་དག་གོ་ཞེས་བྱ་བ་ནི། ལྷ་དང་ལྷ་མ་ཡིན་གྱི་འཐབ་རྩོད་ལ་སྟོབས་དང་ལྡན་ཞིང་མཐུ་
དང་ལྡན་པའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི། གང་ཟག་གང་གིས་རིག་སྔགས་ཀྱི་རྒྱལ་མོ་ལ་གུས་པར་བྱས་ཏེ། དེའི་གཟི་བརྗིད་ཀྱིས་སྲིན་མོ་བཅུ་གཉིས་པོ་འདི་དག་གིས་སྲུང་བ་དང་སྐྱོབ་པར་བྱེད་པའོ། །རིག་སྔགས་ནི་ཞལ་གཅིག་
ཕྱག་བཞི་པ། སྐུ་མདོག་དཀར་མོ་སའི་ཁམས་ཀྱི་རང་བཞིན། དབུ་ལ་འཁོར་ལོས་མཚན་པ། སྤྱན་གསུམ་པ་རིགས་ལྔའི་དབུ་རྒྱན་ཅན། ཡེ་ཤེས་ལྔ་དང་ལྡན་པ་རྒྱན་ཐམས་ཅད་ཀྱིས་བརྒྱན་པ། གཡས་པ་གཉིས་ན་འཁོར་ལོ་དང་མེ་ལོང་བསྣམས་པ། གཡོན་གཉིས་ན་རྨ་བྱའི་སྒྲོ་དང་
རིན་པོ་ཆེ་བསྣམས་པའོ། །ཞབས་གཡས་པ་བརྐྱང་བ་གཡོན་པ་བསྐུམ་པ། ཟླ་བའི་གདན་ལ་ཉི་མའི་འོད་དང་ལྡན་པའོ། །སྦ་བ་ལ་སོགས་པ་ཞེས་བྱ་བ་ནི་གོང་བཞིན་དུ་ཤེས་པར་བྱའོ། །ཏདྱ་ཐཱ་ཞེས་བྱ་བ་ནི་འདི་ལྟ་སྟེ་དེ་རྣམས་ཀྱི་སྲོག་སྙིང་དང་རིག་སྔགས་ཀྱི་སྙིང་པོར་བལྟའོ། །རིག་
སྔགས་ཀྱི་གསང་སྔགས་ནི། ཧ་རེ། ཁ་རེ་ལ་སོགས་པའོ། །ཀུན་དགའ་བོ་ཞེས་བྱ་བ་ནི་ཤཱཀྱ་སེང་གེའི་ཐུགས་རྗེས་དགོངས་ནས་བཀའ་སྩལ་པའོ། །སྲིན་མོ་ཆེན་མོ་བཅུ་གཉིས་པོ་འདི་དག་ནི་ཞེས་བྱ་བ་ནི་དེ་དག་གིས་སངས་རྒྱས་ཀྱི་བསྟན་པ་བསྲུང་བ་སེམས་ཅན་གྱི་དོན་མཛད་པའོ། །

གང་དག་བྱང་ཆུབ་སེམས་དཔའ་མའི་རུམ་དུ་ཞུགས་པ་ན་ཡང་སྲུང་ཞེས་བྱ་བ་ནི་རྒྱུའི་སེམས་དཔའ་མངལ་ན་སྲུང་སྟེ། དེ་ཡང་བར་དུ་སྲུང་། ཐ་མར་ཡང་སྲུང་བའོ། །བཙའ་ཁ་དང་བཙས་པ་ན་ཡང་སྲུང་བ་དག་གོ་ཞེས་བྱ་བ་ནི་མ་བཙས་པ་ནས་བསྲུང་སྟེ། སྐྱེས་ནས་ལོ་བརྒྱ་བཅུ་གཉིས་བར་དུ་བསྲུང་
བའོ། །དེ་དག་ཀྱང་གང་ཞེ་ན་ཞེས་བྱ་བ་ནི་བྱང་ཆུབ་སེམས་དང་ལྡན་པ། སྲིན་མོ་བཅུ་གཉིས་སྟོབས་དང་ལྡན་པ་མཐུ་ཆེ་བ་དག་གོ། །འདི་ལྟ་སྟེ་ཞེས་བྱ་བ་ནི་སྲིན་མོ་རྣམས་བལྟའོ། །སྲིན་མོ་མགོན་མེད་མ་དང་། སྲིན་མོ་རྒྱ་མཚོ་མ་དང་། སྲིན་མོ་དྲག་མོ་དང་། སྲིན་མོ་སྲོག་འཕྲོག་མ་དང་། སྲིན་མོ་རིག་མ་དང་།
སྲིན་མོ་གཞུ་འཛིན་མ་དང་། སྲིན་མོ་མདའ་འཛིན་མ་དང་། སྲིན་མོ་རལ་གྲི་འཛིན་མ་དང་། སྲིན་མོ་གཤོལ་འཛིན་མ་དང་། སྲིན་མོ་འཁོར་ལོ་འཛིན་མ་དང་། སྲིན་མོ་ཁོར་ཡུག་དང་། སྲིན་མོ་འཇིགས་བྱེད་མ་སྟེ་ཞེས་བྱ་བ་ནི། སངས་རྒྱས་ཀྱི་བསྟན་པ་བསྲུང་ཞིང་སེམས་ཅན་གྱི་དོན་བྱེད་པ་བྱང་ཆུབ་སེམས་
མའི་རང་བཞིན་ནོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། མཐིང་ག་དང་། དཀར་མོ་དང་། སྔོ་བསངས་དང་། དམར་མོ་དང་། སེར་མོ་དང་། སྔོན་མོ་དང་། ལྗང་གུ་དང་། དམར་སེར་དང་། དཀར་སེར་དང་། དུད་ཀ་དང་། ལྗང་ནག་དང་། ནག་མོའོ། །གཡས་རྣམས་ན་བུམ་པ་དང་།
རལ་གྲི་དང་། བུམ་པའི་སྤྱི་བླུགས་དང་། ཕྲེང་བ་དང་། དུང་དང་། གཞུ་དང་། མདའ་དང་། རལ་གྲི་དང་། གཤོལ་དང་། འཁོར་ལོ་དང་། མདུང་རྩེ་གསུམ་དང་། དགྲ་སྟ་བསྣམས་པའོ། །གཡོན་རྣམས་ན་རིན་པོ་ཆེའི་མྱུ་གུ་བསྣམས་པའོ། །སྲིན་མོ་ཆེན་མོ་བཅུ་གཉིས་པོ་འདི་དག་ནི། རྫུ་འཕྲུལ་
དང་ལྡན་པ་ཞེས་བྱ་བ་ནི་གཟུགས་སྣ་ཚོགས་སྤྲུལ་ཞིང་། རྫུ་འཕྲུལ་སྣ་ཚོགས་བྱེད་པའོ། །འོད་དང་ལྡན་པ་ཞེས་བྱ་བ་ནི་རང་གི་འོད་ཀྱིས་གསལ་བའོ། །ཁ་དོག་དང་ལྡན་པ་ཞེས་བྱ་བ་ནི་རང་གི་ཁ་དོག་དང་མཛེས་པར་ལྡན་པའོ། །གྲགས་པ་དང་ལྡན་པ་ཞེས་བྱ་བ་ནི་འཇིག་རྟེན་གྱི་ཁམས་ན་གྲགས་
པའོ། །རྫུ་འཕྲུལ་དང་ལྡན་པ་ཞེས་བྱ་བ་ནི། སྐད་ཅིག་མས་གང་དུ་ཡང་འཁོར་བའོ། །ལྷ་དང་ལྷ་མ་ཡིན་གྱི་གཡུལ་ཡང་མྱོང་བར་བྱེད་པ་དག་གོ་ཞེས་བྱ་བ་ནི་ལྷ་དང་ལྷ་མ་ཡིན་འཐབས་པའི་དུས་སུ་ཡང་རྫུ་འཕྲུལ་སྣང་བའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་

སྲུང་བ་གྱིས་ཤིག་ཅེས་བྱ་བ་ནི། གང་ཟག་གིས་རིག་སྔགས་འདི་ལ་གུས་པར་བྱས་ན། རིག་སྔགས་ཀྱི་གཟི་བརྗིད་ཀྱིས་དེ་རྣམས་ཀྱིས་སྲུང་བ་དག་གོ། །རིག་སྔགས་ནི་ཞལ་གཅིག་ཕྱག་བཞི་པ། སྐུ་མདོག་སེར་མོ་ཆུའི་ཁམས། སངས་རྒྱས་ལྔའི་དབུ་རྒྱན་ཅན། སྤྱན་
གསུམ་པ། རྒྱན་ཐམས་ཅད་ཀྱིས་བརྒྱན་པ་དབུ་ལ་རིན་པོ་ཆེས་མཚན་པ། ཡེ་ཤེས་ལྔ་དང་ལྡན་པ། ཕྱག་གཡས་པ་གཉིས་ན། རྡོ་རྗེ་དང་ཨུཏྤལ་སེར་པོ་བསྣམས་པ། གཡོན་པ་གཉིས་ན་རྨ་བྱའི་སྒྲོ་དང་དུང་སེར་པོ་བསྣམས་པའོ། །གཡས་བརྐྱང་གཡོན་བསྐུམ་པ། ཟླ་བའི་གདན་ལ་ཉི་མའི་
འོད་དང་ལྡན་པ། ཐབས་ཤེས་རབ་གཉིས་སུ་མེད་པའོ། །སྦ་བ་དང་ཞེས་བྱ་བ་ལ་སོགས་པ་ནི། གོང་བཞིན་དུ་ཤེས་པར་བྱའོ། །ཏདྱ་ཐཱ་ཞེས་བྱ་བ་ནི་འདི་ལྟ་སྟེ། སྲིན་མོ་བཅུ་གཉིས་ཀྱི་སྲོག་སྔགས་དང་རིག་སྔགས་ཀྱི་སྙིང་པོའོ། །རིག་སྔགས་ཀྱི་གསང་སྔགས་ནི། ཧ་རེ། ཁ་རེ་ལ་
སོགས་པའོ། །ཀུན་དགའ་བོ་ཞེས་བྱ་བ་ནི་བཅོམ་ལྡན་འདས་ཀྱིས་བཀའ་སྩལ་པའོ། །མ་མོ་བཅུ་གཉིས་པོ་ཞེས་བྱ་བ་འདི་དག་ནི། ལྷ་དང་ལྷ་མ་ཡིན་གྱི་ཁྲག་ཁྲུག་དུས་སུ་ཕྱུང་ཞིང་། ལྷ་མ་ཡིན་རྣམས་འདུལ་བར་བྱེད་པ། ད་ལྟར་མིའི་འཇིག་རྟེན་གྱི་ཁམས་གྱི་གནོད་བྱེད་དང་ཕན་བྱེད་པའོ། །
གང་དག་བྱང་ཆུབ་སེམས་དཔའ་མའི་རུམ་དུ་ཞུགས་པ་ན་ཡང་སྲུང་ཞེས་བྱ་བ་ནི། འཇིག་རྟེན་གྱི་མར་གྲགས་ཤིང་དབང་ཕྱུག་མར་འགྱུར་ཏེ། དེ་རྣམས་ཀྱིས་ཀྱང་རྒྱུའི་བྱང་ཆུབ་སེམས་དཔའ་སྲུང་བའོ། །བཙའ་ཁ་དང་བཙས་པ་ན་ཡང་སྲུང་ཞིང་ཞེས་བྱ་བ་ནི། དང་པོ་སྐྱེ་ཁར་སྲུང་སྟེ། བར་མ་སྐྱེས་ནས་ཀྱང་
སྲུང་ངོ་། ཐ་མ་རྒས་ཀ་ན་ཡང་སྲུང་བའོ། །གང་དག་སེམས་ཅན་ལ་གནོད་པར་བྱེད་པ་སྐྲག་པར་བྱེད་པ་རྣམ་པར་འཚེ་བ་དག་གོ་ཞེས་བྱ་བ་ནི་ཁམས་གསུམ་ཙམ་ལ་སྐད་ཅིག་མས་རྒྱུ་ཞིང་བཅུ་གཉིས་པོ་དེ་དག་གིས་ཀྱང་། ཤ་ཁྲག་ལ་དགའ་ཞིང་འཇིག་རྟེན་ཙམ་ལ་གནོད་བྱེད་དང་ཕན་བྱེད་པའོ། །
དེ་དག་ཀྱང་གང་ཞེ་ན་ཞེས་བྱ་བ་ནི། འཇིག་རྟེན་གྱི་མ་མོ་བཅུ་གཉིས་མཐུ་དང་སྟོབས་དང་ལྡན་པའོ། །འདི་ལྟ་སྟེ་ཞེས་བྱ་བ་ནི། མ་མོ་བཅུ་གཉིས་པོར་བལྟའོ། །ཚངས་པའི་ཆུང་མ་དང་། དྲག་པོའི་ཆུང་མ་དང་། གཞོན་ནུའི་ཆུང་མ་དང་། ཁྱབ་འཇུག་གི་ཆུང་མ་དང་། ཕག་གི་ཆུང་མ་དང་། དབང་པོའི་

ཆུང་མ་དང་། ལུས་ངན་གྱི་ཆུང་མ་དང་། རླུང་ལྷའི་ཆུང་མ་དང་། གཤིན་རྗེའི་ཆུང་མ་དང་། རླུང་གི་ཆུང་མ་དང་། མེའི་ཆུང་མ་དང་། ནག་མོ་ཆེན་མོ་སྟེ་ཞེས་བྱ་བ་ནི། སངས་རྒྱས་ཀྱི་བསྟན་པ་བསྲུང་བ་དང་། རིག་སྔགས་ཀྱི་བཀའ་ལས་མི་འདའ་བའོ། །དེ་རྣམས་ཀྱི་ཕྱག་མཚན་དང་སྐུ་མདོག་
ནི་ཞལ་གཅིག་ཕྱག་བཞི་པའོ། །ཚངས་པ་མོ་ལ་སོགས་པ་རིམ་བཞིན་དུ་གཡས་རྣམས་ན་ཕྱག་འཚལ་བ་དང་། བུམ་པ་དང་། རྩེ་གསུམ་དང་། ཨ་འབྲས་དང་། རྩེ་གཅིག་དང་། ཕྲེང་བ་དང་། འཁོར་ལོ་དང་། ཨ་འབྲས་ཀྱི་སྙིང་པོའོ། །རྡོ་རྗེ་དང་། ཐོད་པ་དང་། ཉ་དང་། དགྲ་སྟ་དང་། རིན་
པོ་ཆེ་དང་། ནོར་གྱི་རྐྱལ་པ་དང་། སྦྲུལ་གྱི་ཞགས་པ་དང་། དུང་དཀར་པོ་དང་། བེ་ཅོན་དང་། གྲི་གུག་དང་། རླུང་འཁྲིལ་དང་། རྩེ་གསུམ་དང་། རྩེ་གཅིག་དང་། ཕྲེང་བ་དང་། གྲི་གུག་དང་། རྩེ་གསུམ་མོ། །གཡོན་རྣམས་ན་རིམ་པ་བཞིན་དུ། དབྱུ་གུ་གསུམ་དང་ཕྲེང་བ་
བྲེང་བ་དང་། ཐོད་པ་དང་། །ཕྲེང་བ་དང་རྨ་བྱའི་སྒྲོའོ། །དབྱུག་ཏོ་དང་དུང་ངོ་། །གྲི་གུག་དང་ཐོད་པའི་ནང་ན་སྨན་ཕུད་དོ། །གྲི་གུག་དང་ཐོད་པའོ། །འབྲས་ཀྱི་སྙེ་མ་དང་ནེའུ་ལེའི་རྐྱལ་པའོ། །བུམ་པ་དང་ཞགས་པའོ། །སྡིགས་མཛུབ་དང་མི་མགོའོ། །བ་དན་དང་ཞགས་པའོ། །
ཕྲེང་བ་དང་རྩེ་གཅིག་གོ། །ཞགས་པ་དང་ཐོད་པའོ། །སྐུ་མདོག་ནི་རིམ་པ་བཞིན་དུ། དཀར་མོ་དང་། སྔོ་སྐྱ་དང་། དམར་མོ་དང་། ལྗང་གུ་དང་། སེར་མོ་དང་། དམར་མོ་དང་། དམར་སེར་དང་། དཀར་སེར་དང་། མཐིང་ག་དང་། དུད་ཀ་དང་། དམར་ནག་དང་། ནག་པོའོ། །དེ་དག་གིས་
ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི། འཇིག་རྟེན་དབང་ཕྱུག་མ་བཅུ་གཉིས་ཀྱིས་ཀྱང་། གང་ཟག་གིས་འདི་ལ་གུས་པར་གྱུར་ན་མ་མོ་བཅུ་གཉིས་ཀྱིས་ཀྱང་སྲུང་བ་དང་། །སྐྱོབ་པར་བྱེད་པའོ། །སྦ་བ་ལ་སོགས་པ་ཞེས་བྱ་བ་ལ་སོགས་
པ་ནི་གོང་བཞིན་ནོ། །མ་མོ་དེ་དག་ནི་རྫུ་འཕྲུལ་དང་ལྡན་ཞིང་ཁ་དོག་དང་ལྡན་པ། གྲགས་པ་དང་ལྡན་པ། རྫུ་འཕྲུལ་དང་ལྡན་པས། ལྷ་དང་ལྷ་མ་ཡིན་གྱི་གཡུལ་དག་ཀྱང་མྱོང་བར་བྱེད་པ་དག་གོ། །དེ་དག་དང་ལྡན་པའི་མ་མོ་བཅུ་གཉིས་པོ་རིག་སྔགས་ཀྱི་བཀའ་ལས་མི་

འདའ་བའོ། །རིག་སྔགས་ཀྱི་ངོ་བོ་ནི། ཞལ་གཅིག་ཕྱག་བཞི་པ། སྐུ་མདོག་དམར་མོ་མེའི་ཁམས། སངས་རྒྱས་ལྔའི་དབུ་རྒྱན་ཅན། སྤྱན་གསུམ་པ་དབུ་ལ་པདྨས་མཚན་པ། ཡེ་ཤེས་ལྔ་དང་ལྡན་པ། ཕྱག་གཡས་པ་གཉིས་ན་པདྨ་དང་འཁོར་ལོ། གཡོན་པ་གཉིས་ན་རྨ་བྱ་དང་
ལྷུང་བཟེད་བསྣམས་པའོ། །རྒྱན་ཐམས་ཅད་ཀྱིས་བརྒྱན་པ། གཡས་བརྐྱང་བ་གཡོན་བསྐུམ་པ། ཟླ་བའི་གདན་ལ་ཉི་མའི་འོད་དང་ལྡན་པ། ཐབས་ཤེས་རབ་གཉིས་སུ་མེད་པའོ། །ཏདྱ་ཐཱ་ཞེས་བྱ་བ་ནི་འདི་ལྟ་སྟེ། མ་མོའི་སྲོག་སྙིང་དང་རིག་སྔགས་ཀྱི་ལས་ཀྱི་སྙིང་པོར་བལྟའོ། །རིག་སྔགས་
ཀྱི་གསང་སྔགས་ནི། ཧ་རེ། ཁ་རེ་ལ་སོགས་པའོ། །ཀུན་དགའ་བོ་ཞེས་བྱ་བ་ནི། སེམས་ཅན་གྱི་དོན་ལ་ཐུགས་རྗེ་ཆེན་པོས་བཀའ་སྩལ་པའོ། །སྲིན་པོའི་ཆུང་མ་ཤ་ཟ་ཆེན་མོ་རལ་པ་གཅིག་མ་ཞེས་བྱ་བ་ནི། སྲིན་པོའི་རྒྱལ་པོ་ལངྐ་མགྲིན་བཅུའི་ཆུང་མ་ཆེན་མོ་སྟེ། དེས་སེམས་ཅན་
རྣམས་ལ་གནོད་པ་བྱེད་པའོ། །རྒྱ་མཚོའི་ངོས་ལ་གནས་པ་གང་དག་ཁྲག་གི་དྲི་ཚོར་ན་ཞེས་བྱ་བ་ནི། ལྷོའི་འཛམ་བུ་གླིང་གི་ལྷོ་ནུབ་མཚམས་ན། ཕྱིའི་རྒྱ་མཚོའི་ཚལ་ན། ཡུལ་ལངྐའི་གྲོང་ཁྱེར་ན་ཤ་ཟ་ཆེན་མོས་ཤ་ཁྲག་གི་དྲི་ཚོར་ན་མི་སྲུན་པའོ། །མཚན་གཅིག་ལ་དཔག་ཚད་བརྒྱད་
ཁྲིར་འགྲོ་བ་ཡོད་དེ་ཞེས་བྱ་བ་ནི་ཤ་ཁྲག་གི་དྲིའི་རྣམ་པ་ཚོར་ན་མཚན་གཅིག་ལ་གང་ན་ཡོད་པ་ཡང་ལེན་ནུས་སོ། །དེ་བཞིན་དུ་སེམས་ཅན་རྣམས་ལ་གནོད་པ་བྱེད་པའོ། །དེ་ཡང་བྱང་ཆུབ་སེམས་དཔའ་མའི་རུམ་དུ་ཞུགས་པ་ན་ཡང་སྲུང་ཞེས་བྱ་བ་ནི། དེ་ཡང་རིག་སྔགས་ཀྱི་རྒྱལ་མོའི་གཟི་
བརྗིད་ཀྱིས་སྲུང་བར་བྱེད་པའོ། །བཙའ་ཁ་དང་བཙས་པ་ན་ཡང་སྲུང་བའོ་ཞེས་བྱ་བ་ནི། ཐོག་མ་བར་དང་ཐ་མ་གསུམ་སྲུང་སྟེ། གཟི་བརྗིད་ཆེ་བ། གྲགས་པ་དང་ལྡན་པ་འོད་ཟེར་དང་ལྡན་པ། ཁ་དོག་དང་ལྡན་པ། རྫུ་འཕྲུལ་དང་ལྡན་པ། ལྷ་དང་ལྷ་མ་ཡིན་གྱི་གཡུལ་ཡང་མྱོང་བར་བྱེད་པ་
དག་གོ། །དེའི་ཁ་དོག་དང་ཕྱག་མཚན་ནི་ཞལ་གཅིག་ཕྱག་བཞི་པ། སྐུ་མདོག་ནག་པོའོ། །རལ་པ་གཅིག་ཏུ་ཡོད་པ། བཞིན་མི་སྡུག་པ། གཡས་གཉིས་ན་གྲི་གུག་དང་རྩེ་གསུམ་གཡོན་གཉིས་ན་ཞགས་པ་དང་ཐོད་པ་བསྣམས་པའོ། །དེས་ཀྱང་རིག་སྔགས་ཀྱི་རྒྱལ་མོ་རྨ་བྱ་

ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི། གང་ཟག་གང་གིས་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ལ་གུས་པར་བྱས་ན་ཤ་ཟ་ཆེན་མོ་དེས་ཀྱང་སྲུང་བ་དང་སྐྱོབ་པར་བགྱིད་པའོ། །རིག་སྔགས་ནི་ཞལ་གཅིག་ཕྱག་བཞི་པ། སྐུ་མདོག་ལྗང་གུ་རླུང་གི་ཁམས་སྤྱན་གསུམ་པ། རིགས་
ལྔའི་དབུ་རྒྱན་གྱིས་བརྒྱན་པ། དབུ་ལ་སྣ་ཚོགས་རྡོ་རྗེས་བརྒྱན་པ། ཡེ་ཤེས་ལྔ་དང་ལྡན་པ། རྒྱན་ཐམས་ཅད་ཀྱིས་བརྒྱན་པ། གཡས་གཉིས་ན་ཨུཏྤ་ལ་སྔོན་པོ་དང་། པདྨའོ། །གཡོན་གཉིས་ན་པདྨའི་སྒྲོ་དང་གོས་སྣ་ཚོགས་པའོ། །གཡས་བརྐྱང་བ། གཡོན་བསྐུམ་པའོ། །ཟླ་བའི་གདན་
ལ་ཉི་མའི་འོད་དང་ལྡན་པའོ། །ཐབས་ཤེས་རབ་གཉིས་སུ་མེད་པའོ། །སྦ་བ་ལ་སོགས་པ་ཞེས་བྱ་བ་ནི། སྔར་བཤད་པ་བཞིན་དུ་ཤེས་པར་བྱའོ། །ཏདྱ་ཐཱ་ཞེས་བྱ་བ་ནི་འདི་ལྟ་སྟེ། ཤ་ཟ་ཆེན་མོའི་སྲོག་སྙིང་དང་། རིག་སྔགས་ཀྱི་བཀའ་ལས་ཀྱི་སྙིང་པོའོ། །རིག་སྔགས་ཀྱི་ལས་ཀྱི་སྙིང་པོ་ལྟ་བའོ། །
རིག་སྔགས་ཀྱི་གསང་སྔགས་ནི། ཧ་རེ། ཁ་རེ་ལ་སོགས་པའོ། །ཀུན་དགའ་བོ་ཞེས་བྱ་བ་ནི། ཐམས་ཅད་མཁྱེན་པས་སེམས་ཅན་གྱི་དོན་ལ་ཡང་ནས་ཡང་དུ་བསྲུང་བའོ། །ཁྱོད་ཀྱིས་སྲིན་མོ་རྣམས་ཀྱི་མིང་ཟུང་ཤིག་ཅེས་བྱ་བ་ནི་སྔོན་ཡང་བྱང་ཆུབ་སེམས་དཔའ་སྤྱན་རས་གཟིགས་དབང་
ཕྱུག་གི་དུས་སུ། ཟངས་གླིང་གི་རྒྱལ་ཁམས་ན་སྲིན་མོ་ལྔ་བརྒྱ་ཡོད་དོ། །དེ་ཡང་འཕགས་པ་སྤྱན་རས་གཟིགས་ཀྱི་མདོ་ཟ་མ་ཏོག་གི་མདོ་ལས་ཤེས་པར་བྱའོ། །ད་ལྟར་ཡང་སྲིན་མོ་བདུན་ཅུ་ཐམ་པ་མཐུ་དང་སྟོབས་དང་ལྡན་པ་སངས་རྒྱས་དང་རིག་སྔགས་ཀྱི་བཀའ་ལས་མི་འདའ་བའོ། །
འདི་ལྟ་སྟེ་ཞེས་བྱ་བ་ནི། སྲིན་མོ་བདུན་ཅུར་བལྟའོ། །སྲིན་མོ་སེར་སྐྱ་མ་ཞེས་བྱ་བ་དང་། སྲིན་མོ་པདྨ་ཞེས་བྱ་བ་དང་། སྲིན་མོ་མ་ཧེ་མོ་ཞེས་བྱ་བ་དང་། སྲིན་མོ་དཀར་མོ་ཞེས་བྱ་བ་དང་། སྲིན་མོ་སྦུ་གུ་ཅན་ཞེས་བྱ་བ་དང་། སྲིན་མོ་འབར་མ་ཞེས་བྱ་བ་དང་། སྲིན་མོ་གདུང་མ་ཞེས་བྱ་བ་དང་། སྲིན་མོ་
བུམ་པ་ཅན་ཞེས་བྱ་བ་དང་། སྲིན་མོ་དྲི་མེད་ཅེས་བྱ་བ་དང་། སྲིན་མོ་ས་ཞེས་བྱ་བ་དང་ཞེས་བྱ་བ་ནི་མཐུ་དང་ལྡན་པ། རིག་སྔགས་ཀྱི་བཀའ་ལས་མི་འདའ་བའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། དམར་སེར་དང་། ནག་པོ་དང་། ཐལ་བའི་མདོག་དང་། དམར་པོ་དང་། དཀར་

པོ་དང་། སེར་པོ་དང་། སྔོ་བསངས་དང་། དམར་སེར་དང་། མཐིང་ག་དང་། ལྗང་གུའོ། །གཡས་རྣམས་ན་འཁོར་ལོ་དང་། པདྨ་དང་། རིན་པོ་ཆེ་དང་། རྡོ་རྗེ་དང་། རལ་གྲི་དང་། མདུང་དང་། ཞགས་པ་དང་། དགྲ་སྟ་དང་། རྩེ་གསུམ་དང་། གཏུན་ཤིང་བསྣམས་
པའོ། །གཡོན་རྣམས་ན་ཐོད་པ་ཁྲག་གིས་བཀང་བ་བསྣམས་པའོ། །དེ་རྣམས་ཀྱིས་ཀྱང་སངས་རྒྱས་ཀྱི་བསྟན་པ་སྲུང་བའོ། །སྲིན་མོ་སེང་གེའི་ཟླ་བ་ཞེས་བྱ་བ་དང་། སྲིན་མོ་སྣར་མ་ཞེས་བྱ་བ་དང་། སྲིན་མོ་འོད་ཟེར་མ་དང་། སྲིན་མོ་བསྲེག་བྱ་ཟ་མ་དང་། སྲིན་མོ་ཆུ་ལྷའི་ཆུང་མ་དང་། སྲིན་
མོ་ནག་མོ་དང་། སྲིན་མོ་གླང་ཆེན་མོ་དང་། སྲིན་མོ་སྟོབས་ཅན་མ་དང་། སྲིན་མོ་ཟ་བ་མོ་དང་། སྲིན་མོ་ལག་འགྲོ་མ་དང་ཞེས་བྱ་བ་ནི། རིག་སྔགས་ཀྱི་རྒྱལ་མོའི་བཀའ་ལས་མི་འདའ་ཞིང་སེམས་ཅན་རྣམས་ཀྱི་དོན་བྱེད་པའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། དཀར་མོ་དང་། དམར་མོ་
དང་། དམར་སེར་མ་དང་། དམར་ནག་གི་མདོག་དང་། དཀར་མོ་དང་། ནག་མོ་དང་། སྔོ་སྐྱ་དང་། ལྗང་གུ་དང་། སེར་མོ་དང་། དམར་སེར་མོའོ། །གཡས་རྣམས་ན་རྡོ་རྗེ་དང་། རིན་པོ་ཆེ་དང་། འཁོར་ལོ་དང་། ཞགས་པ་དང་། སྦྲུལ་གྱི་ཞགས་པ་དང་། གྲི་གུག་དང་། མདུང་དང་། འཕང་
མདུང་དང་། དགྲ་སྟ་དང་། རྩེ་གསུམ་མོ། །གཡོན་རྣམས་ན་པདྨ་བསྣམས་པའོ། །སྲིན་མོ་དེ་རྣམས་ཀྱང་སེམས་ཅན་རྣམས་ལ་སྲུང་བ་དང་། སྐྱོབ་པར་བྱེད་པ། རིག་སྔགས་ཀྱི་བཀའ་ལས་མི་འདའ་བའོ། །སྲིན་མོ་མ་ཏང་གི་དང་། སྲིན་མོ་དམར་སེར་མོ་དང་། སྲིན་མོ་ཐིགས་པ་འཛིན་དང་།
སྲིན་མོ་གཏུམ་མོ་མ་དང་། སྲིན་མོ་རི་འཛིན་མ་དང་། སྲིན་མོ་གྲུལ་བུམ་མ་དང་། སྲིན་མོ་ཚོན་ངན་མ་དང་། སྲིན་མོ་ཟློག་བྱེད་མ་དང་། སྲིན་མོ་རྒྱགས་མ་དང་། སྲིན་མོ་མངལ་ཟ་བ་དང་ཞེས་བྱ་བ་ནི། དེ་རྣམས་ཀྱིས་ཀྱང་སངས་རྒྱས་ཀྱི་བསྟན་པ་སྲུང་སྟེ། སེམས་ཅན་རྣམས་ལ་ཕན་པ་
མཛད་པའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། མཐིང་ག་དང་། དམར་སེར་དང་། ཁྲ་བོ་དང་། ནག་མོ་དང་། དཀར་པོ་དང་། ལྗང་གུ་དང་། དམར་པོ་དང་། སེར་པོ་དང་། སྔོ་བསངས་དང་། ལྗང་ནག་གོ། །གཡས་རྣམས་ན་མདུང་དང་། འཕང་མདུང་དང་། ཏོ་མར་

དང་། གཏུན་ཤིང་དང་། ཞགས་པ་དང་། སྦྲུལ་གྱི་ཞགས་པ་དང་། བུམ་པ་དང་། མདའ་གཞུ་དང་། མདུང་རིངས་དང་། རྩེ་གཅིག་བསྣམས་པའོ། །གཡོན་རྣམས་ན་ཨུཏྤ་ལ་བསྣམས་པའོ། །དེ་རྣམས་ཀྱིས་རིག་སྔགས་ཀྱི་བཀའ་ལས་མི་འདའ་བར་གང་ཟག་སྲུང་བར་བྱེད་པའོ། །སྲིན་
མོ་ཁྲག་ཟ་མ་དང་། སྲིན་མོ་སོ་སྟོ་མ་དང་། སྲིན་མོ་དངངས་བྱེད་མ་དང་། སྲིན་མོ་ཚངས་པ་མ་དང་། སྲིན་མོ་ལྟེང་ཀ་སྐྱོང་མ་དང་། སྲིན་མོ་རྡོ་རྗེ་འཛིན་པ་དང་། སྲིན་མོ་སྐེམ་བྱེད་མ་དང་། སྲིན་མོ་མུན་པ་དང་། སྲིན་མོ་ཆར་འབེབས་མ་དང་། སྲིན་མོ་འབྲུག་སྒྲོགས་མ་དང་ཞེས་བྱ་བ་ནི། སངས་རྒྱས་ཀྱི་
བསྟན་པ་སྲུང་ཞིང་སེམས་ཅན་གྱི་དོན་བྱེད་པའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། དམར་པོ་དང་། དཀར་པོ་དང་། ནག་པོ་དང་། སེར་མོ་དང་། ལྗང་གུ་དང་། མཐིང་ག་དང་། དམར་སེར་མ་དང་། སྔོ་སྐྱ་མ་དང་། དཀར་སེར་མ་དང་། དུད་ཀ་མའོ། །དེ་རྣམས་ཀྱི་གཡས་ན་གྲི་གུག་དང་། རྩེ་
གསུམ་དང་། མི་མགོ་དང་། བུམ་པ་དང་། དགྲ་སྟ་དང་། རྡོ་རྗེ་དང་། འཁོར་ལོ་དང་། མདུང་རྩེ་གསུམ་དང་། རལ་གྲི་དང་། རྩེ་གཅིག་བསྣམས་པའོ། །གཡོན་རྣམས་ན་ཐོད་པ་ཁྲག་གིས་བཀང་བ་བསྣམས་པའོ། །དེ་རྣམས་ཀྱང་རིག་སྔགས་ཀྱི་བཀའ་ལས་མི་འདའ་ཞིང་། གང་ཟག་
དག་ལ་སྲུང་བར་བྱེད་པའོ། །སྲིན་མོ་འགེགས་མ་དང་། སྲིན་མོ་སྣང་བྱེད་མ་དང་། སྲིན་མོ་འགྲོ་བ་མ་དང་། སྲིན་མོ་སྒྲོན་མ་ཁ་དང་། སྲིན་མོ་ནོར་འཛིན་མ་དང་། སྲིན་མོ་མཚན་མོ་ནག་མོ་དང་། སྲིན་མོ་གཤིན་རྗེའི་ཕོ་ཉ་མོ་དང་། སྲིན་མོ་མཆེ་བ་མ་དང་། སྲིན་མོ་ཡཱ་མ་དང་། སྲིན་མོ་དྲི་མེད་མ་དང་།
སྲིན་མོ་སྟོབས་བཟང་མ་དང་། སྲིན་མོ་རལ་པ་འགྲེང་དང་ཞེས་བྱ་བ་ནི་སངས་རྒྱས་ཀྱི་བསྟན་པ་སྲུང་ཞིང་། སེམས་ཅན་གྱི་དོན་བྱེད་པའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། ནམ་མཁའི་མདོག་དང་། སེར་མོ་དང་། ལྗང་གུ་དང་། དམར་སེར་དང་། དཀར་སེར་དང་། ནག་མོ་དང་། མཐིང་
ག་དང་། དམར་མོ་དང་། སྔོ་སྐྱ་དང་། ལྗང་ནག་གོ། །གཡས་རྣམས་ན་ནོར་གྱི་རྐྱལ་བུ་དང་། མེ་སྤར་དང་། དབྱུག་ཏོ་དང་། ཐོད་པ་དང་། རིན་པོ་ཆེའི་སྙིམ་དང་། གྲི་གུག་དང་། བེ་ཅོན་དང་། མདུང་དང་། དགྲ་སྟ་དང་། རྩེ་གསུམ་བསྣམས་པའོ། །གཡོན་རྣམས་ན་ཞགས་པ་བསྣམས་

པའོ། །སྲིན་མོ་མགོ་བརྒྱ་མ་དང་། སྲིན་མོ་ལག་བརྒྱ་མ་དང་། སྲིན་མོ་མིག་བརྒྱ་མ་དང་། སྲིན་མོ་གནོད་བྱེད་མ་དང་། སྲིན་མོ་འཇོམས་མ་དང་། སྲིན་མོ་བྱི་ལ་མ་དང་། སྲིན་མོ་ཟླ་བ་མ་དང་། སྲིན་མོ་མཚན་མོ་རྒྱུ་བ་དང་། སྲིན་མོ་ཉིན་མོ་རྒྱུ་བའོ། །སྲིན་མོ་ཞགས་པ་དང་ཞེས་བྱ་བ་ནི།
སངས་རྒྱས་ཀྱི་བསྟན་པ་སྲུང་བ། སེམས་ཅན་རྣམས་ཀྱི་དོན་བྱེད་པའོ། །མགོ་བརྒྱ་དང་ལག་བརྒྱ་མིག་བརྒྱ་གསུམ་པོ་ནི། དེ་བཞིན་དུ་ཡོད་པ་ལུས་ཀྱང་ཁྲ་བོར་གནས་པའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། ནག་མོ་དང་། སེར་མོ་དང་། དཀར་མོ་དང་། དམར་མོ་དང་། སྔོ་སྐྱ་མོ་དང་། དམར་ནག་
མོ་དང་། ལྗང་གུའོ། །དེ་བཞིན་དུ་གསུམ་པོ་རྣམས་ཀྱང་སྣ་ཚོགས་ཀྱི་མཚོན་བསྣམས་པ། སྟོབས་དང་ལྡན་པའོ། །བདུན་པོ་དེ་དག་གི་གཡས་ན་འཁོར་ལོ་དང་མདའ་གཞུ་དང་། ཞགས་པ་དང་། བུམ་པ་དང་། མདུང་རྩེ་གསུམ་པ་དང་། དགྲ་སྟ་དང་། རྩེ་གཅིག་པ་བསྣམས་པའོ། །གཡོན་
རྣམས་བུམ་པ་བསྣམས་པའོ། །སྲིན་མོ་ཁྲོ་མོ་དང་། སྲིན་མོ་རྣམ་པར་འཚེ་དང་། སྲིན་མོ་རལ་གྲི་དང་། སྲིན་མོ་གཏུན་ཤིང་འཛིན་དང་། སྲིན་མོ་ལག་ན་རྩེ་གསུམ་དང་། སྲིན་མོ་སོ་བྲོད་མ་དང་། སྲིན་མོ་ཡིད་དུ་འོང་མ་དང་། སྲིན་མོ་དེས་མ་དང་། སྲིན་མོ་གཏུམ་མོ་དང་། སྲིན་མོ་སོ་དང་།
སྲིན་མོ་འགྲོ་འཁྲུག་མ་དང་། སྲིན་མོ་སྔོན་མོ་དང་། སྲིན་མོ་ཁྲ་མོ་ཞེས་བྱ་བ་ནི་སངས་རྒྱས་ཀྱི་བསྟན་པ་སྲུང་བ། སེམས་ཅན་རྣམས་ཀྱི་དོན་བྱེད་པའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། ནག་མོ་དང་། དམར་མོ་དང་། སྔོ་བསངས་མ་དང་། དཀར་སེར་དང་། དམར་སེར་དང་། མཐིང་
ག་དང་། དཀར་མོ་དང་། ནག་མོ་དང་། དཀར་མོ་དང་། དམར་ནག་གི་མདོག་དང་། སྔོན་མོ་དང་། ཁྲ་མོའོ། །གཡས་རྣམས་ན་དགྲ་སྟ་དང་། རྩེ་གཅིག་རྣམས་དང་། རྩེ་གསུམ་དང་། མཆེ་བ་དང་། ཨུཏྤ་ལ་དང་། པདྨ་དང་། གྲི་གུག་དང་། རལ་གྲི་དང་། དུང་དང་། མདུང་རིངས་དང་།
འཁོར་ལོ་བསྣམས་པའོ། །གཡོན་རྣམས་ན་གཏུན་ཤིང་བསྣམས་པའོ། །སྲིན་མོ་ཆེན་མོ་དེ་དག་ནི་རིག་སྔགས་ཀྱི་བཀའ་ལས་མི་འདའ་བ་གང་ཟག་དག་ལ་སྲུང་བར་བྱེད་དོ། །སྲིན་མོ་ཆེན་མོ་བདུན་ཅུ་པོ་འདི་དག་ནི་ཞེས་བྱ་བ་ནི། ཟངས་གླིང་གི་རྒྱལ་ཁམས་ན་འཁྱམས་ཤིང་། མིའི་འཇིག་

རྟེན་གྱི་ཁམས་ལ་གནོད་པར་བྱེད་པ། བདུན་ཅུ་པོ་དེ་དག་ནི་ལྔ་བརྒྱའི་གཙོ་མོའོ། །ད་ལྟར་ཡང་འཇིག་རྟེན་དབང་ཕྱུག་གིས་སྲིན་མོ་ལྔ་བརྒྱ་བཏུལ་ནས། སངས་རྒྱས་རྣམས་ཀྱི་བསྟན་པ་སྲུང་བ་སྟེ། རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་བཀའ་ལས་འདའ་མི་ནུས་སོ། །རྫུ་འཕྲུལ་དང་ལྡན་པ་ཞེས་བྱ་བ་ནི། རྒྱ་
མཚོའི་ནང་དུ་མེ་དང་རླུང་ལ་སོགས་པ་གཏོང་བར་ནུས་པ། བུད་མེད་ཀྱི་གཟུགས་སྣ་ཚོགས་སྤྲུལ་ཞིང་སེམས་ཅན་ལ་གནོད་པའོ། །འོད་དང་ལྡན་པ་ཞེས་བྱ་བ་ནི། རང་གི་འོད་ཀྱིས་རང་གསལ་ཞིང་། གཞན་ཡང་གསལ་བའོ། །ཡང་ན་དེའི་གཟི་བརྗིད་ཀྱིས་གཞན་རྣམས་ཟིལ་གྱིས་གནོན་པའོ། །ཁ་
དོག་དང་ལྡན་པ་ཞེས་བྱ་བ་ནི། རང་རང་གི་ཁ་དོག་གིས་བདུན་ཅུ་མཛེས་པར་སྣང་བའོ། །གྲགས་པ་དང་ལྡན་པ་ཞེས་བྱ་བ་ནི། ཟངས་གླིང་གི་སྲིན་མོ་ལྔ་བརྒྱ་འཇིག་རྟེན་དུ་གྲགས་པའོ། །རྫུ་འཕྲུལ་དང་ཞེས་བྱ་བ་ནི་ཟངས་གླིང་གི་རྒྱལ་ཁམས་ན་གླིང་བཞི་རི་རབ་དང་བཅས་པར་རྒྱུ་བའོ། །ལྷ་དང་ལྷ་མ་ཡིན་
གྱི་གཡུལ་དག་ཀྱང་མྱོང་བར་བྱེད་པ་དག་གོ་ཞེས་བྱ་བ་ནི། ལྷ་དང་ལྷ་མིན་གཉིས་ཀྱི་འཐབ་རྩོད་ལ་གྲོགས་བྱེད་ནུས་པའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི། གང་ཟག་གིས་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ལ་གུས་པར་བྱས་ན་འཇིགས་
པ་ཐམས་ཅད་དང་བྲལ་ཞིང་། སྲིན་མོ་དེ་རྣམས་ཀྱིས་སྲུང་བར་འགྱུར་རོ། །རིག་སྔགས་ཀྱི་ངོ་བོ་ནི་ཞལ་གཅིག་ཕྱག་བཞི་པ་སྐུ་མདོག་ནག་མོ། ནམ་མཁའི་ཁམས་དང་ལྡན་པ། སྤྱན་གསུམ། རིགས་ལྔའི་དབུ་རྒྱན་ཅན། དབུ་ལ་རྡོ་རྗེས་མཚན་པ། ཡེ་ཤེས་ལྔ་དང་ལྡན་པ། གཡས་
གཉིས་ན་རྡོ་རྗེ་དང་མཆོད་རྟེན། གཡོན་གཉིས་ན་རྨ་བྱའི་སྒྲོ་དང་འཁོར་ལོ་བསྣམས་པ། གཡས་བརྐྱང་གཡོན་བསྐུམ་པ། ཟླ་བའི་གདན་ལ་ཉི་མའི་འོད་དང་ལྡན་པ། ཐབས་ཤེས་རབ་གཉིས་སུ་མེད་པའོ། །སྦ་བ་དང་ཞེས་བྱ་བ་ནི་གཤིན་རྗེའི་འཇིགས་པ་ལས་སྦ་བའོ། །ཡོངས་སུ་
བསྐྱབ་པ་དང་ཞེས་བྱ་བ་ནི། འཁོར་བའི་སྡུག་བསྔལ་ལས་བསྐྱབ་པའོ། །ཡོངས་སུ་གཟུང་བ་དང་ཞེས་བྱ་བ་ནི། སྡུག་བསྔལ་གྱིས་བཟུང་བ་ལས་ཐར་བའོ། །ཡོངས་སུ་བསྐྱང་བ་དང་ཞེས་བྱ་བ་ནི། སྡུག་བསྔལ་བོར་ནས་དགེ་བ་ལ་བསྐྱང་བའོ། །ཞི་བ་དང་ཞེས་བྱ་བ་ནི། ཉོན་

མོངས་པ་རྣམས་ལས་ཐར་ནས་དགེ་བ་ལ་གནས་པའོ། །བདེ་ལེགས་སུ་འགྱུར་བ་དང་ཞེས་བྱ་བ་ནི། ལུས་ངག་ཡིད་བདེ་བ་སྟེ། སྟོང་པ་ཉིད་ཀྱི་རང་བཞིན་བསྟན་པའོ། །ཆད་པ་སྤང་བ་དང་ཞེས་བྱ་བ་ནི། སྐྱེ་བ་དང་མྱ་ངན་གྱི་ཆད་པ་སྤང་བ་སྟེ། དེ་ལྟར་ཡང་མི་གནས་པའོ། །མཚོན་
ཆ་སྤང་བ་དང་ཞེས་བྱ་བ་ནི། དམྱལ་བའི་སྡུག་བསྔལ་ཐམས་ཅད་བཅོམ་པའོ། །དུག་གཞིལ་བ་དང་ཞེས་བྱ་བ་ནི། འཇིག་རྟེན་གྱི་དུག་གསུམ་གྱིས་མི་ཚུགས་པའོ། །དུག་གསད་པ་དང་ཞེས་བྱ་བ་ནི་ཡེ་ཤེས་ཀྱི་རང་བཞིན་གྱིས་དུག་ལྔ་བསད་པའོ། །ལོ་བརྒྱ་འཚོ་བར་གྱུར་ཅིག་ཅེས་བྱ་བ་ནི། ཐ་མ་
ཐོག་མ་ད་ལྟར་མེད་པའོ། །སྟོན་བརྒྱ་མཐོང་བར་ཤོག་ཤིག་ཅེས་བྱ་བ་ནི། སེམས་ཅན་རྣམས་བྱང་ཆུབ་ལ་འགོད་པར་བལྟ་བའོ། །ཏདྱ་ཐཱ་ཞེས་བྱ་བ་ནི། འདི་ལྟ་སྟེ། འབྱུང་པོའམ་འཇིག་རྟེན་ཕྱོགས་སྐྱོང་བའམ། རྒྱལ་པོ་ལ་སོགས་པའམ། རིག་སྔགས་ཀྱི་སྙིང་པོ་བལྟ་བའོ། །རིག་སྔགས་
ཀྱི་གསང་སྔགས་ནི། ཧི་ལི་ཧི་ལི་ལ་སོགས་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་མ་མོ་རྣམས་ཀྱི་གནས་སྐབས་ཏེ་བཅུ་གཅིག་པའོ།། །།སངས་རྒྱས་ཐམས་ཅད་ལ་ཕྱག་འཚལ་ལོ་སྭཱ་ཧཱ་ཞེས་བྱ་བ་ནི། འདས་པའི་སངས་རྒྱས་རབས་བདུན་ལ་སོགས་པ་བསམ་གྱིས་མི་ཁྱབ་
པའོ། །མ་འོངས་པའི་སངས་རྒྱས་བྱམས་པ་ལ་སོགས་པ་སྟེ། ད་ལྟར་བཞུགས་པ་ཤཱཀྱ་སེང་གེའོ། །དེ་རྣམས་ལ་ཕྱག་འཚལ་བའོ། །གང་གིས་ཕྱག་འཚལ་ཞེ་ན། རིག་པ་འཛིན་པའི་གང་ཟག་གིས་ཕྱག་འཚལ་བའོ། །སྭཱ་ཧཱ་ནི་གང་གི་རྟེན་ཅིང་འབྲེལ་བའི་དངོས་གྲུབ་ནི། དེ་ལ་
སོགས་པ་གསང་སྔགས་བསམ་གྱིས་མི་ཁྱབ་པ་གནས་པའོ། །རིག་སྔགས་ཆེན་མོ་དང་ཞེས་བྱ་བ་ནི་ཕྱིའི་རིག་པ་དང་ནང་གི་རིག་པ་སྟེ། ཕྱིའི་རིག་པ་ནི་རིག་པ་རྣམ་པ་ལྔའོ། །དེ་ནི་ལྷ་བསྙེན་དང་། དབྱངས་དང་། སྨན་དང་། བཟོ་དང་། སྒྲའོ། །ལྷ་བསྙེན་ནི། རྒྱུད་ལ་སོགས་པའི་
བྱེ་བྲག །སྔགས་དང་། རྒྱུད་དང་། འཁྲུལ་འཁོར་དང་། སྦྱིན་སྲེག་དང་། དཀྱིལ་འཁོར་དང་། སློབ་མ་ལྷག་པར་གནས་པར་བྱེད་པ་ལ་སོགས་པའོ། །དབྱངས་ནི་རིང་པོ་དང་ཐུང་བ་དང་། དྲག་པོ་དང་། མཐུག་པོ་དང་། སྒྲ་ཆུང་ངུ་དང་། དེ་རྣམས་བྱུང་བ་ནི་རིག་བྱེད་བཞི་ལས་

བྱུང་བའོ། །དེ་ལ་མཁས་པས་ན་དབྱངས་སོ། །སྨན་ནི་ཁ་དོག་བརྟག་པ་དང་། རྩ་བརྟག་པ་དང་། འབྱུང་བ་བརྟག་པ་དང་། དུས་བརྟག་པ་དང་། ཉི་མ་བརྟག་པ་དང་། དེའི་བྱེ་བྲག་གིས། སེམས་ཅན་རྣམས་ལ་གསོ་བ་བྱེད་པ་སྟེ། དུས་བཟུང་ནས་སྨན་ལ་བརྟག་པ་སྟེ། དེ་བཞིན་དུ་རླུང་དང་།
བད་ཀན་དང་། མཁྲིས་པ་ལ་སོགས་པའོ། །ཟས་ཀྱི་བྱེ་བྲག་དང་། རྩའི་བྱེ་བྲག་དང་། ཕྱིའི་ཁ་དོག་གི་བྱེ་བྲག་དང་། ཆུ། དྲི་མ། མིག །དབུགས། ལྕེ་ལ་བརྟག་པའོ། །དེ་ལ་བརྟག་པས་ན་སྨན་ནོ། །བཟོ་ནི་འཇིག་རྟེན་གྱི་བྱ་བ་ཐམས་ཅད་ལ་མཁས་པའོ། །སྒྲ་ནི་ཚད་མའི་རང་བཞིན་
གྱི་སྲང་ལ་གཞལ་བ་དང་། གཅིག་མཐོང་བས་མང་པོ་སྨྲ་བ་དང་། གཅིག་གིས་གཅིག་སྨྲ་བ་སྟེ། གཅིག་གིས་གཉིས་སྨྲ་བ་དང་། གཅིག་གིས་གསུམ་སྨྲ་བ་དང་། གཅིག་གིས་མང་པོ་སྨྲ་བའོ། །དེ་ཡང་མཚན་བརྒྱད་དུ་བྱུང་སྟེ། མཚན་བརྒྱད་པ་དེ་ཡང་། རིག་པའི་སྒྲ། བྱཱ་ཀ་ར་ཎའི་
སྒྲའི་གནས་བརྒྱད་དོ། །དེ་ལ་མཁས་པས་སྒྲའོ། །ནང་གི་རིག་པ་ནི་བརྗོད་དུ་མེད་པ་ཁ་དོག་དང་བྲལ་བ། གཟུགས་དང་བྲལ་བ། མཚན་ཉིད་མེད་པ། གཞི་མེད་ཅིང་ངོ་བོ་ཉིད་དང་བྲལ་བའོ། །སྔགས་ནི་མ་མནྟྲ་སྟེ། སྲུང་བ་དང་སྐྱོབ་པར་བྱེད་པ། སྔགས་དེ་ཡང་སྒྱུ་མ་ལྟ་བུའི་རང་བཞིན།
ཕྱོགས་རྣམས་དང་བྲལ་བའོ། །ཆེན་མོ་ནི་ནམ་མཁའ་བཞིན་དུ་འཇིག་རྟེན་གྱི་ཁམས་རྣམས་ཁྱབ་སྟེ། དེ་ཡང་བསམ་གྱིས་མི་ཁྱབ་པའི་རང་བཞིན་ནོ། །གསང་སྔགས་ཆེན་མོ་དང་ཞེས་བྱ་བ་ནི། ཚིག་ཏུ་བརྗོད་པའི་གསང་སྔགས་དང་། ཏིང་ངེ་འཛིན་གྱི་གསལ་བ་དང་། ཏིང་ངེ་འཛིན་རང་ཡང་
དང་པོའི་རྣལ་འབྱོར་ཚོགས་སོགས་པ། གཉིས་པ་རྣལ་འབྱོར་ཆེན་པོ་སྟེ། དམ་ཚིག་སེམས་དཔའ་དང་། ཡེ་ཤེས་སེམས་དཔའི་རང་བཞིན་རྟོགས་པའོ། །རྫོགས་པའི་རྣལ་འབྱོར་ཡེ་ཤེས་གཙོ་བོར་བཟུང་ནས་རྟག་ཆད་དང་བྲལ་བ་དེའི་ངོ་བོ་ཉིད་རྟོགས་པས་ན་གསང་བའོ། །སྔགས་ནི་
སེམས་ཅན་ཐམས་ཅད་ལ་ཕན་པར་བྱེད་པའོ། །དེ་ཉིད་གཟུང་བས་ན་གཟུངས་སྔགས་སོ། །ཆེན་མོ་ནི་བསམ་གྱིས་མི་ཁྱབ་པའོ། །སོ་སོར་འབྲང་མ་ཆེན་མོ་དང་ཞེས་བྱ་བ་ནི་ཐབས་ཤེས་རབ་གཉིས་སུ་མེད་དེ། འཁོར་བ་དང་མྱ་ངན་ལས་འདས་པ་གཉིས་སུ་མེད་དོ། །སོ་སོ་ནི་འགྲོ་བ་རིགས་

དྲུག །འབྲང་མ་ནི་ཆོས་སྐུ། ཆོས་སྐུ་ལ་ཡང་བརྗོད་བྱའི་རང་བཞིན་དཔེར་ན་མདའ་ལ་སྒྲོ་བཏགས་པ་ལྟ་བུའོ། །མ་ནི་སྒྱུ་མའི་རང་བཞིན་ནོ། །དེ་བས་ན་སོ་སོར་འབྲང་མའོ། །ཆེན་མོ་དེ་ལྟ་བུ་བསམ་གྱིས་མི་ཁྱབ་པའོ། །སྲུང་བ་ཆེན་མོ་འདི་དག་གིས་ཞེས་བྱ་བ་ནི། དེ་བཞིན་
གཤེགས་པའི་རིགས་སོ་སོར་འབྲང་མ་དང་། རྡོ་རྗེའི་རིགས་སྟོང་ཆེན་མོ་རབ་ཏུ་འཇོམས་མ་དང་། རིན་པོ་ཆེའི་རིགས་རྨ་བྱ་ཆེན་མོ་དང་། པདྨའི་རིགས་གསང་སྔགས་རྗེས་སུ་འཛིན་མ་དང་། ལས་ཀྱི་རིགས་བསིལ་བའི་ཚལ་དང་ལྔའོ། །ལྔ་པོ་དེ་ཡང་ཡེ་ཤེས་ལྔའི་རང་བཞིན་ཞལ་གཅིག་
ཕྱག་གཉིས་པ་རྣམས་སོ། །སྐུ་མདོག་ཀྱང་དཀར་པོ་དང་། ནག་པོ་དང་། སེར་པོ་དང་། དམར་པོ་དང་། ལྗང་གུའོ། །ཕྱག་མཚན་ཡང་རིམ་པ་བཞིན་དུ། འཁོར་ལོ་དང་། རྡོ་རྗེ་དང་། རིན་པོ་ཆེ་དང་། པདྨ་དང་། སྣ་ཚོགས་རྡོ་རྗེའོ། །གཡོན་རྣམས་ན་རིམ་པ་བཞིན་དུ་དུང་དང་། ཞགས་པ་དང་།
རྨ་བྱའི་སྒྲོ་དང་། བུམ་པའི་སྟེང་ན་རྡོ་རྗེ་དང་། སྐྱབས་སྦྱིན་ནོ། །གཟུགས་ཀྱང་ཞི་བ་དང་། ཁྲོ་བོ་དང་། རྒྱགས་པ་དང་། ཅུང་ཟད་ཁྲོ་བ་དང་། བཞིན་འཛུམ་པ་དང་ངོ་། །དེ་རྣམས་ལ་ཡང་སངས་རྒྱས་ལྔའི་དབུ་རྒྱན་ཅན་སྤྱན་གསུམ་པ། རྒྱན་ཐམས་ཅད་ཀྱིས་བརྒྱན་པ། འཁོར་ལོ་དང་།
རྡོ་རྗེ་དང་། རིན་པོ་ཆེ་དང་། པདྨ་དང་། སྣ་ཚོགས་རྡོ་རྗེས་རིམ་པ་བཞིན་དུ་དབུ་ལ་བརྒྱན་པའོ། །ཞབས་རྡོ་རྗེའི་སྐྱིལ་ཀྲུང་དུ་བཞུགས་པ། ཟླ་བའི་གདན་དང་ཉི་མའི་འོད་དང་ལྡན་པའོ། །ཆེན་མོ་ནི་ཡེ་ཤེས་ལྔ་བསམ་གྱིས་མི་ཁྱབ་པའོ། །འདི་དག་གིས་ནི་སྲུང་བ་ལྔའི་དམ་ཚིག་གོ། །བདག་ལ་
སྲུངས་ཤིག་སྭཱ་ཧཱ་ཞེས་བྱ་བ་ནི། རྟེན་གྱི་གང་ཟག་དང་། སེམས་ཅན་ཐམས་ཅད་དོ། །སྭཱ་ཧཱ་ནི་དེ་གྱུར་ཅིག་ཅེས་པའོ། །གཤེད་བྱེད་རྣམས་བཅོམ་མོ་ཞེས་བྱ་བ་ནི། རིག་སྔགས་ཀྱི་རྒྱལ་མོ་དེ་རྣམས་ཀྱིས་རྣམ་པར་རྟོག་པའི་ལས་བཅོམ་པའོ། །བསྒྱུར་བའི་ལས་རྣམས་དང་ཞེས་བྱ་བ་ནི། ད་ལྟར་
རྐྱེན་གྱིས་བསྒྱུར་བའི་ལས་རྣམས་སོ། །བྱད་དང་ཞེས་བྱ་བ་ནི། སྔོན་གྱི་ལས་འཕྲོའོ། །གཡེངས་བྱེད་རྣམས་དང་ཞེས་བྱ་བ་ནི། དྲན་པ་གཡེངས་པ་ལས་བྱུང་སྟེ། དེ་བཞིན་དུ་རྩུབ་པར་བྱེད་པའོ། །རོ་ལངས་རྣམས་དང་ཞེས་བྱ་བ་ནི། སྔགས་ཀྱིས་ལངས་པ་དང་། ཡི་དགས་ཀྱི་རང་བཞིན་

གྱིས་ལངས་པ་དང་། སྦོད་གཏོང་གི་ནུས་པས་ལངས་པའོ། །སེམས་བསྒྱུར་བ་རྣམས་དང་ཞེས་བྱ་བ་ནི། རིག་པའི་སེམས་བཞག་ནས་མ་རིག་པའི་སེམས་སུ་བསྒྱུར་བ་རྣམས་སོ། །སྦོད་གཏོང་རྣམས་བཅོམ་མོ་ཞེས་བྱ་བ་ནི་མ་རིག་པའི་སེམས་དང་ལྡན་པ། དམོད་མོའི་རང་བཞིན་བཏང་བ།
དྲང་སྲོང་ལ་སོགས་པའོ། །དེ་བཅོམ་པ་ནི་རིག་སྔགས་ཀྱིས་བཅོམ་པའོ། །སྐེམ་བྱེད་རྣམས་དང་ཞེས་བྱ་བ་ནི། སྔངས་ཤིང་འགྱུར་བར་བྱེད་པའོ། །སྨྱོ་བྱེད་དང་ཞེས་བྱ་བ་ནི། མ་རིག་པའི་སེམས་དང་ལྡན་པ། སྔགས་དང་། སྨན་དང་། ཡི་དགས་རྣམས་ཀྱིས་སྨྱོ་བར་བྱེད་པའོ། །གྲིབ་
གནོན་རྣམས་དང་ཞེས་བྱ་བ་ནི། གྲིབ་མ་ལ་བཟུང་ནས་གཟུགས་ཀྱི་ཕུང་པོ་ལ་གནོད་པར་བྱེད་པའོ། །བརྗེད་བྱེད་རྣམས་བཅོམ་མོ་ཞེས་བྱ་བ་ནི་གློ་བུར་དུ་བྱུང་ཞིང་སེམས་ཅན་རྣམས་ལ་གནོད་པའོ། །དེ་ཡང་རིག་པས་བཅོམ་པའོ། །སྐེམ་བྱེད་རྣམས་དང་ཞེས་བྱ་བ་ནི། གཅོང་གི་ནད་བཞིན་དུ་
ཡུན་རིང་པོའོ། །སྐྲག་པ་རྣམས་དང་ཞེས་བྱ་བ་ནི། འཇིགས་པར་བྱེད་ཅིང་སེམས་ཅན་ལ་འཚེ་བར་བྱེད་པའོ། །དབྱིག་དུག་རྣམས་དང་ཞེས་བྱ་བ་ནི། ནོར་བུ་དང་རིན་པོ་ཆེ་ལས་བྱས་པའོ། །དུག་རྣམས་བཅོམ་མོ་ཞེས་བྱ་བ་ནི། རིག་སྔགས་ཀྱི་རྒྱལ་མོའི་གཟི་བརྗིད་ཀྱིས་ཕྱིའི་དུག་དང་། ནང་
གི་དུག་བཅོམ་པའོ། །བཟའ་ཉེས་རྣམས་དང་ཞེས་བྱ་བ་ནི་ཉེ་བ་ལ་སོགས་པའོ། །སྐྱུག་ཉེས་རྣམས་དང་ཞེས་བྱ་བ་ནི། སྨན་དུག་ཏུ་སོང་བའོ། །གནོད་སྒྲིབ་རྣམས་དང་ཞེས་བྱ་བ་ནི། ལྟ་བ་ལོག་པར་བྱེད་པའོ། །གནོད་ལྟས་རྣམས་དང་ཞེས་བྱ་བ་ནི། ལྟ་བ་ལོག་པ་རྣམས་གྱིས་ལྟ་བའོ། །
བྲི་ཉེས་རྣམས་དང་ཞེས་བྱ་བ་ནི། ཕྱིན་ཅི་ལོག་ཏུ་བྲིས་པའོ། །བསྒོམ་ཉེས་རྣམས་དང་ཞེས་བྱ་བ་ནི། མ་རིག་པ་བསྒོམ་པའོ། །སྨད་པ་རྣམས་བཅོམ་མོ་ཞེས་བྱ་བ་ནི། མ་རིག་པའི་ཕོ་ཉ་བྱེད་པ་རྣམས་རིག་སྔགས་ཀྱི་གཟི་བརྗིད་ཀྱིས་བཅོམ་པའོ། །རིམས་ཉིན་གཅིག་པ་རྣམས་དང་ཞེས་བྱ་
བ་ནི། ཉིན་གཅིག་གིས་རྫོགས་པ་ལོང་མེད་པ་རྣམས་སོ། །ཉིན་གཉིས་པ་རྣམས་དང་ཞེས་བྱ་བ་ནི། དེ་བས་རིང་བ་སྟེ་ཉིན་གཉིས་ཀྱིས་རྫོགས་པ་རྣམས་སོ། །ཉིན་གསུམ་པ་རྣམས་དང་ཞེས་བྱ་བ་ནི། ཉིན་མོ་གསུམ་པར་རྫོགས་པ་རྣམས་ཏེ། དེ་གསོད་པར་བྱེད་པའོ། །ཉིན་བཞི་

པ་རྣམས་དང་ཞེས་བྱ་བ་ནི། ཉིན་བཞི་ལོན་ནས་ཕན་པ་མེད་པའོ། །ཉིན་བདུན་པ་རྣམས་དང་ཞེས་བྱ་བ་ནི། རིམས་ཚད་པ་སྟེ་དྲུག་མ་བཟློག་ན་བདུན་པ་ལ་འཆི་བའོ། །ཟླ་བ་ཕྱེད་པ་རྣམས་དང་ཞེས་བྱ་བ་ནི། གཞན་ཚེས་གྲངས་རྣམས་མ་བཟློག་ན་དུས་དེར་འཆི་བའོ། །ཟླ་བ་གཅིག་པ་
རྣམས་དང་ཞེས་བྱ་བ་ནི། རིམས་ནར་མ་སྟེ། དུས་གཞན་ལ་མ་བཟློག་ན། ཟླ་བ་གཅིག་ལོན་ནས་འཆི་བའོ། །ཉིན་མོ་པ་རྣམས་དང་ཞེས་བྱ་བ་ནི། སྔ་དྲོ་ནས་དགོངས་ཀ་ལ་ཕན་མེད་པར་འགྲོ་བའོ། །ཡུད་ཙམ་པ་རྣམས་དང་ཞེས་བྱ་བ་ནི། གློ་བུར་གྱི་ནད་གང་གིས་ཀྱང་ཕན་མེད་པའོ། །རྟག་པའི་
རིམས་རྣམས་དང་ཞེས་བྱ་བ་ནི། ལོ་ནས་ལོར་འགོར་བ་སྟེ་གཞི་ཚད་པས་མ་བཏང་པའོ། །རིམས་ལྡང་དུབ་པ་རྣམས་དང་ཞེས་བྱ་བ་ནི། གསོ་བ་དཀའ་བ་རེས་འབྱུང་ཞིང་རེས་དྲག་པའོ། །རླུང་ལས་གྱུར་པ་རྣམས་དང་ཞེས་བྱ་བ་ནི། རླུང་ལས་གྱུར་པ་བཞི་བརྒྱ་རྩ་བཞིའོ། །མཁྲིས་པ་ལས་གྱུར་པ་
རྣམས་དང་ཞེས་བྱ་བ་ནི། མཁྲིས་པ་ལ་ནད་མི་གཅིག་པ་བཞི་བརྒྱ་རྩ་བཞིའོ། །བད་ཀན་ལས་གྱུར་པ་རྣམས་དང་ཞེས་བྱ་བ་ནི། བད་ཀན་ལས་གྱུར་པ་བཞི་བརྒྱ་རྩ་བཞིའོ། །འདུས་པ་ལས་གྱུར་པ་རྣམས་དང་ཞེས་བྱ་བ་ནི། དེ་གསུམ་འདུས་པ་སྟེ། འདུས་པའི་ནད་རིགས་མི་གཅིག་པ་ཡང་བཞི་བརྒྱ་
རྩ་བཞིར་གནས་སོ། །མིའི་རིགས་རྣམས་དང་ཞེས་བྱ་བ་ནི། རྐུན་མའམ་རྒྱལ་པོའམ་དེ་ལ་འཇིགས་སྐྲག་གི་རྐྱེན་གྱིས་བྱུང་བས་ན་མིའི་རིགས་སོ། །མི་མ་ཡིན་པའི་རིམས་བཅོམ་མོ་ཞེས་བྱ་བ་ནི། མ་རུངས་པའི་འབྱུང་པོ་རྣམས་ཀྱིས་ཀྱང་རླུང་བད་ཀན་དུ་བསྟན། བད་ཀན་རླུང་དུ་བསྟན།
མཁྲིས་པ་བད་ཀན་དུ་བསྟན་ཏེ། ཕྱིན་ཅི་ལོག་པར་བསྟན་པ་ནི། མི་མ་ཡིན་པའི་རིམས་སོ། །རིམས་ཐམས་ཅད་བཅོམ་མོ་ཞེས་བྱ་བ་ནི། རིག་སྔགས་ཀྱི་གསང་སྔགས་ཀྱི་ནུས་པས་དེ་དག་གི་རིམས་རྣམས་ནི་འབྱུང་བར་མི་ནུས་པའོ། །ཤུ་བ་དང་། གཡའ་བ་དང་། འབྲུམ་བུ་ཕྲ་མོ་དང་།
མཛེ་དང་། ཕོལ་མིག་དང་། གཡན་པ་དང་། མེ་དབལ་དང་། ལྷོག་པ་རྣམས་བཅོམ་མོ་ཞེས་བྱ་བ་ནི། མ་རུངས་པའི་ནད་དེ་རྣམས་ལ་སོགས་པ་བཅོ་བརྒྱད་དེ། དེ་ཡང་རིག་སྔགས་ཀྱི་གཟི་བརྗིད་ཀྱིས་བཅོམ་པའོ། །ཀླད་པ་ན་བ་དང་ཞེས་བྱ་བ་ལ་སོགས་པ་ནི། རླུང་དང་བད་ཀན་མཁྲིས་པ་

གསུམ་དེ་གསུམ་གྱིས་བསྒྱུར་ནས་ཡན་ལག་ན་བ་ཉི་ཤུ་རྩ་བཞི་སྟེ། དེ་ཡང་དེ་ལ་སོགས་པ་ནད་བཞི་བརྒྱ་རྩ་བཞི་བཅོམ་མོ། །གདོན་ཐམས་ཅད་དང་ཞེས་བྱ་བ་ནི། ལྷའི་གདོན་ལ་སོགས་པ་བགེགས་རིགས་མི་གཅིག་པ་སྟོང་ཕྲག་བརྒྱད་ཅུའོ། །དུག་ཐམས་ཅད་དང་ཞེས་བྱ་བ་ནི། ཕྱིའི་དུག་
གསུམ་དང་ནང་གི་དུག་གསུམ་ཕྱིའི་བསྡད་པ་དང་འགྲོ་བ་དང་བྱེད་པའོ། །བསྡད་པ་ནི་བཙན་དུག་ལ་སོགས་པ་རྩྭ་དང་ལོ་མའི་དུག་གོ། །འགྲོ་བ་ལ་ཡང་བསམ་པ་རེག་པ་མཐོང་བ་ཁ་རླངས་སོ། །བྱེད་པ་ཡང་དབྱིག་དུག་ལ་སོགས་པ་བསམ་གྱིས་མི་ཁྱབ་པའོ། །ནད་ཐམས་ཅད་དང་
ཞེས་བྱ་བ་ནི། ནད་རིགས་མི་གཅིག་པ་བརྒྱ་རྩ་བཞི་རིག་སྔགས་ཀྱི་གསང་སྔགས་ཀྱིས་བཅོམ་པའོ། །བདག་ལ་བདེ་ལེགས་སུ་གྱུར་ཅིག་ཅེས་བྱ་བ་ནི། གང་ཟག་གང་དག་དང་སེམས་ཅན་རྣམས་ལ་བདེ་ལེགས་སུ་འགྱུར་རོ། །མཚན་མོ་བདེ་ལེགས་ཉིན་བདེ་ལེགས། །ཞེས་བྱ་བ་ནི་རིག་སྔགས་
ཀྱི་གཟི་བརྗིད་ཀྱིས། ལུས་ངག་ཡིད་མི་བདེ་བའི་རྐྱེན་བྱེད་པ་མཚན་མོ་དང་ཉིན་མོ་བདེ་བར་འགྱུར་རོ། །ཉི་མའི་གུང་གིས་བདེ་ལེགས་དང་། །ཞེས་བྱ་བ་ནི་ཉི་མ་ཕྱེད་ན་ཡང་མི་བདེ་བར་མི་གནས་པའོ། །ཉིན་མཚན་ཀུན་གྱི་བདེ་ལེགས་དག །ཅེས་བྱ་བ་ནི་ཉིན་མོ་དང་མཚན་མོའི་བར་ནས་རྟག་ཏུ་
བདེ་བ་སྟེ། རྒས་ནས་མ་ཤི་བའི་བར་དུ་ཡང་བདེ་བའོ། །སངས་རྒྱས་ཀུན་གྱིས་བདག་ལ་སྩོལ། །ཞེས་བྱ་བ་ནི་གང་ཟག་དག་གིས་འདས་པ་དང་མ་འོངས་པ་དང་། ད་ལྟར་བ་རྣམས་ལ་ཕྱག་འཚལ་བའོ། །སངས་རྒྱས་ཕྱག་འཚལ་བྱང་ཆུབ་ཕྱག་འཚལ་ལོ། །ཞེས་བྱ་བ་ནི་སངས་རྒྱས་ནི་སྔ་
མ་བཞིན་དུ་བཤད་པ་རྣམས་ཏེ། གཞི་མ་གྲུབ་རྐྱེན་གྱིས་མ་གོས་པ་རྣམས་ལ་ཕྱག་འཚལ་བའོ། །བྱང་ཆུབ་ནི་སེམས་ཅན་རྣམས་ཀྱི་དོན་བྱེད་པ། ས་བཅུ་ལ་ནི་འཐོབ་པ་སྟེ། །དེ་རྣམས་ལ་ནི་ཕྱག་འཚལ་ལོ། །གྲོལ་གྱུར་ཕྱག་འཚལ་གྲོལ་ལ་ཕྱག་འཚལ་ལོ། །ཞེས་བྱ་བ་ནི་གྲོལ་གྱུར་
ནི་བྱང་ཆུབ་སེམས་དཔའ་རྣམས་ཏེ། གྲོལ་བ་ནི་སངས་རྒྱས་ཀྱི་བདེན་པས་རིག་སྔགས་ཀྱི་བཀའ་ལས་གྲོལ་བའོ། །ཞི་གྱུར་ཕྱག་འཚལ་ཞི་ལ་ཕྱག་འཚལ་ལོ། །ཞེས་བྱ་བ་ནི་ཞི་གྱུར་ནི་ཡང་དག་པའི་དོན་མི་འགྱུར་ཏེ། འཁོར་བའི་སྡུག་བསྔལ་ལས་གྲོལ་ནས་ནམ་མཁའ་ལྟ་བུའོ། །ཞི་ལ་

ནི་སྤྲུལ་པའི་སྐུའི་རང་བཞིན། ཤཱཀྱ་ཐུབ་པ་ལྟ་བུར་སྟོང་གསུམ་གྱི་སྟོང་ཆེན་པོར་སྙིང་རྗེས་ཁྱབ་པའོ། །རྣམ་གྲོལ་ཕྱག་འཚལ་གྲོལ་ལ་ཕྱག་འཚལ་ལོ། ཞེས་བྱ་བ་ནི་རྣམ་གྲོལ་ནི་འགྲོལ་བྱེད་དེ་རྣམ་པར་གྲོལ་བར་བྱེད་པ་ནི་རིག་སྔགས་ཀྱི་རྒྱལ་མོའོ། །འགྲོལ་བ་ནི་
འཁོར་བ་ལས་འགྲོལ་བའོ། །བྲམ་ཟེ་གང་དག་སྡིག་པའི་ཆོས་བསལ་བར་གྱུར་པ་དེ་དག་ལ་ཡང་ཕྱག་འཚལ་ལོ་ཞེས་བྱ་བ་ནི། རིག་སྔགས་ཀྱི་རྒྱལ་པོ་བྲམ་ཟེ་དག་ཡིན་ཏེ། དེས་སྡིག་བོར་ནས་དགེ་བ་ལ་གནས་པ་དེ་ལ་སོགས་པ་སྡིག་པ་ཐམས་ཅད་སེལ་བ་རྣམས་ལ་ཕྱག་འཚལ་ལོ། །དེ་དག་
གིས་ཀྱང་བདག་ལ་སྲུང་བ་གྱིས་ཤིག་ཅེས་བྱ་བ་ནི། གང་ཟག་རིག་སྔགས་ལ་གུས་པར་བྱེད་པ་དག་ལ་གང་ཡང་དེ་རྣམས་ཀྱིས་སྲུང་བར་བྱེད་པ་དག་གོ། །ཕ་བདེ་ལེགས་སུ་གྱུར་ཅིག་ཅེས་བྱ་བ་ནི། བསྐྱེད་པའི་ས་བོན་གཏོང་བའི་ཕའོ། །མ་བདེ་ལེགས་སུ་གྱུར་ཅིག་ཅེས་བྱ་བ་ནི། སྐྱེས་
པའི་མ་ལན་གྱིས་མི་འཁོར་བའོ། །མངལ་བདེ་ལེགས་སུ་གྱུར་ཅིག་ཅེས་བྱ་བ་ནི། མའི་མངལ་ན་ཡོད་པ་ཡང་བདེ་བའོ། །རྐང་གཉིས་པ་རྣམས་བདེ་ལེགས་སུ་གྱུར་ཅིག་ཅེས་བྱ་བ་ནི། སེམས་ཅན་མི་ལ་སོགས་པའོ། །རྐང་བཞི་པ་རྣམས་བདེ་ལེགས་སུ་གྱུར་ཅིག་ཅེས་པ་ནི། སྟག་དང་
སེང་གེ་ལ་སོགས་པའོ། །རྐང་མེད་རྣམས་བདེ་ལེགས་སུ་གྱུར་ཅིག་ཅེས་བྱ་བ་ནི། སེམས་ཅན་སྦྲུལ་ལ་སོགས་པའོ། །སྲིད་པ་གསུམ་དུ་གཏོགས་པའི་སེམས་ཅན་ཐམས་ཅད་བདེ་ལེགས་སུ་གྱུར་ཅིག་ཅེས་བྱ་བ་ནི། ས་འོག་ས་སྟེང་ས་བླ་རྣམས་ཀྱི་སེམས་ཅན་ཐམས་ཅད་བདེ་ལེགས་
པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་སྔགས་བཤད་པའི་གནས་སྐབས་ཏེ་བཅུ་གཉིས་པའོ།། །།ཀུན་དགའ་བོ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཀྱིས་ཀུན་དགའ་བོ་ལ་བཀའ་སྩལ་པའོ། །ཁྱོད་ཀྱིས་ཀླུའི་རྒྱལ་པོ་རྣམས་ཀྱི་མིང་ཟུང་ཤིག་ཅེས་བྱ་བ་ནི།
བྱང་ཆུབ་སེམས་དང་ལྡན་པ་སངས་རྒྱས་ཀྱི་བསྟན་པ་སྲུང་ཞིང་རིགས་ཀྱི་བཀའ་ལས་མི་འདའ་བའོ། །འདི་ལྟ་སྟེ་ཞེས་བྱ་བ་ནི་ཀླུའི་རྒྱལ་པོ་རྣམས་བལྟ་བའོ། །ཀླུའི་རྒྱལ་པོ་དེ་རྣམས་ཀྱང་རིགས་བཞི་དུག་བཞི་དུས་བཞིར་གནས་པ་སྟེ། རིགས་བཞི་ལ་ཡང་བྲམ་ཟེ། རྒྱལ་པོ། རྗེའུ་

རིགས། དམངས་རིགས་སོ། །རིགས་བཞི་ལས་བྱུང་བ་ནི་དེའི་འོག་མ་ནི། བྲམ་ཟེའི་བྲམ་ཟེ། རྒྱལ་པོའི་རྒྱལ་པོ། རྗེའུའི་རྗེའུ། དམངས་རིགས་ཀྱི་དམངས་རིགས། དེ་ནི་བསམ་གྱིས་མི་ཁྱབ་པའོ། །དུག་བཞི་ལ་བསམས་པ་ལས་ཚོར་བ་བྱུང་ངོ་། །མཐོང་བ་ལ་ཡང་གཉིས་ཏེ། མངོན་
ཤེས་ཀྱིས་མཐོང་བ་དང་། མིག་གིས་མཐོང་བའོ། །རེག་པ་ཡང་གཉིས་ཏེ། རེག་པའི་རང་བཞིན་དང་། གཟུང་བའོ། །ཁ་རླངས་ལ་གཉིས་ཏེ། ཁ་རླངས་དབུགས་ལས་བྱུང་བ་དང་། མཆེ་བའི་དུག་གོ། །རིགས་ཀྱང་དེ་བཞིན་དུ་ཡིན་ཏེ། འཕྲལ་ཡང་སེམས་ཅན་དུག་བཞི་ཡོད་པའོ། །
དུས་བཞི་ལ་ཡང་སྔ་དྲོ་དང་། ཉི་མ་ཕྱེད་དང་། ཕྱི་དྲོ་དང་། དགོངས་མོའོ། །ནུབ་མོ་ལ་སྲོད་དང་ནམ་ཕྱེད་དང་། ཕྱེད་ཡོལ་དང་། ཐོ་རངས་སོ། །དེ་བཞིན་དུ་ཀླུ་ཡང་དུས་བཞི་ལ་རྒྱུ་བའོ། །དེ་དང་ལྡན་པའི་ཀླུའི་རྒྱལ་པོ་རྣམས་ལ་ཟུང་ཤིག་གོ། །ཀླུའི་རྒྱལ་པོ་སངས་རྒྱས་བཅོམ་ལྡན་
འདས་དང་ཀླུའི་རྒྱལ་པོ་ཚངས་པ་དང་། ཀླུའི་རྒྱལ་པོ་ཚངས་ཆེན་དང་། ཀླུའི་རྒྱལ་པོ་དབང་པོ་དང་། ཀླུའི་རྒྱལ་པོ་ཉེ་བའི་དབང་པོ་དང་ཞེས་བྱ་བ་ནི་བྱང་ཆུབ་སེམས་དཔའི་རིགས་སངས་རྒྱས་དང་ཆོས་དང་དགེ་འདུན་ལ་སྐྱབས་སུ་འགྲོ་བའོ། །རིག་སྔགས་ཀྱི་བཀའ་ལས་མི་འདའ་བའོ། །དེ་རྣམས་ཀྱི་སྐུ་མདོག་
དང་ཕྱག་མཚན་ནི། འཛམ་བུའི་གླིང་གི་གསེར་གྱི་མདོག་དང་། དཀར་པོ་དང་། དཀར་སེར་དང་། དམར་པོ་དང་། དམར་སེར་རོ། །ཞལ་གཅིག་ཕྱག་གཉིས་པ། བལྟ་ན་སྡུག་པ། ལྷའི་ཆ་བྱད་ཅན། དབུ་ལ་སྦྲུལ་གྱི་གདེངས་ཀ་དང་བཅས་པ། སྦྲུལ་གྱི་མདུད་པའི་སྟེང་ན་བཞུགས་པའོ། །གཡས་རྣམས་
ས་གནོན་གྱི་ཕྱག་རྒྱ་མཛད་པ་དང་། ཕྲེང་བ་དང་། བུམ་པ་སྤྱི་བླུགས་དང་། རྡོ་རྗེ་དང