Luận tạng Tây Tạng (Tengyur) — Tập 28

ུགས་པའོ། །བསམ་གཏན་སྔགས་ཀྱིས་བསླང་བར་བྱ། །ཞེས་བྱ་བ་ནི།
དུར་ཁྲོད་ཆེན་པོའི་དབུས་སུ་ནི། །བདུད་རྩི་བ་ཡི་རྣམ་ལྔ་ཡིས། །དཀྱིལ་འཁོར་གྲུ་བཞིར་བྱས་ནས་ནི། །ཨུ་པཀྵེ་པའི་མེ་ཏོག་གིས། །ལྷ་ཡི་གྲངས་ཀྱི་ཚོམ་བུ་བྱ། །དེ་སྟེང་རོ་ནི་གཞག་པར་བྱེད། །དེ་ནས་བདག་ཉིད་རྣལ་འབྱོར་པ། །ལྷ་ཡི་འཁོར་ལོ་རྫོགས་པར་བྱ། །དེ་ནས་
ཐུགས་ཀའི་འོད་ཟེར་གྱིས། །མདུན་གྱི་རོ་ལ་ཕོག་ནས་ནི། །འོད་དུ་ཞུ་ནས་དཀྱིལ་འཁོར་གྱུར། །དེ་ནས་དཀྱིལ་འཁོར་དེ་ཉིད་ལ། །དམ་ཚིག་དཀྱིལ་འཁོར་བསྐྱེད་པར་བྱ། །དེ་ནས་ཐུགས་ཀའི་འོད་ཟེར་གྱིས། །ཡེ་ཤེས་དཀྱིལ་འཁོར་སྤྱན་དྲངས་ཏེ། །ཕྱག་རྒྱ་བཞི་ཡི་སྦྱོར་བས་
བསྟིམ། །བདེ་གཤེགས་དབང་བསྐུར་རྒྱས་གདབ་བྱ། །དེ་ནས་ཕྱི་ཡི་ཡི་གེ་ཡིས། །སོ་སོའི་ཐུགས་ཀར་ཁྱབ་པར་བྱ། །མཆོད་པ་གཏོར་མ་ལ་སོགས་པའི། །རྩ་བའི་སྔགས་ཀྱིས་དབུལ་བར་བྱ། །དེ་ནས་དམ་ཚིག་ཆོ་ག་བྱ། །ནང་གི་སྙིང་པོ་བཟླས་པ་ཡང་། །སྟོང་ཕྲག་
གཅིག་ཏུ་བྱ་བ་སྟེ། །དེ་ནས་ལྷ་རྣམས་ཐམས་ཅད་ཀྱི། །སོ་སོར་འོད་དུ་ཞུ་བ་ལས། །ཡི་གེ་མུཾ་དུ་གྱུར་པར་བསམ། །དེ་ནས་གྲི་གུག་ལག་ཐོགས་ནས། །དུར་ཁྲོད་རས་ནི་བསླང་བར་བྱ། །ཐོད་པའི་ནང་དུ་གཞག་ཅེས་བྱ་བ་ནི་གོ་སླའོ། །བསྐྱེད་པའི་རིམ་པ་དང་ལྡན་ཞེས་བྱ་བ་ནི།

དཔའ་བོ་རྟོག་པ་མེད་པ་དང་། །རྩེ་གཅིག་བརྩོན་འགྲུས་ཆེ་བ་ཡི། །རིམ་པའི་ཆོ་ག་རྫོགས་པ་ཡིས། །བསྐྱེད་པའི་རིམ་པ་རྫོགས་པར་བྱ། །དེ་ནས་དཀྱིལ་འཁོར་ཆོ་ག་ཡི། །ཚོན་ནི་བྱིན་གྱིས་བརླབ་པ་བཞིན། །ཚོན་རྣམས་སྟ་གོན་གནས་པར་བྱ། །དཔལ་ལྡན་ནག་པོ་ཆེན་པོ་བྲི། །ཞེས་བྱ་
བ་ནི། དུར་ཁྲོད་ཆེན་པོའི་དབུས་སུ་ནི། །དཀྱིལ་འཁོར་འཁོར་ལོ་བྲི་བར་བྱ། །ཡང་ན་རྒྱན་གཅིག་པ་ཉིད་བྲི། །དེ་ནས་ཞེས་བྱ་བ་ལ་སོགས་པ་ནི་བསྙེན་པ་བྱ་བ་སྟེ་གོ་སླའོ། །དང་པོ་ཞེས་བྱ་བ་ནི་གནས་ཀྱི་དང་པོ་སྟེ་དཀྱིལ་འཁོར་བྲི་བའི་ཕྱིར་མཎྜལ་ཞེས་བྱ་བ་ནི་དེ་ཡང་གོང་དུ་བསྟན་པའི་དཀྱིལ་
འཁོར་དེ་ཚོན་གྱིས་བྲི་བའམ་མེ་ཏོག་གིས་ཚོམ་བུར་བྱས་ཏེ། དེ་ནས་བསྐྱེད་པའི་རིམ་པ་དང་ལྡན་པར་བྱས་ལ་ཞེས་བྱ་བ་ནི་དཀྱིལ་འཁོར་དེ་ཉིད་ལ་ཆོ་ག་གསུམ་གྱིས་ལྷའི་འཁོར་ལོ་དེ་ཉིད་རྫོགས་པར་བསྐྱེད་ལ་ཡན་ལག་གི་ཆོ་ག་རྫོགས་པར་བྱ་སྟེ། དེ་ནས་གནས་དེ་ཉིད་དུ་གོང་དུ་བསྟན་པའི་བུམ་པ་
སྟ་གོན་ལ་གནས་པའི་ཆོ་གས་བུམ་པ་སྟ་གོན་ལ་གནས་པར་བྱའོ། །མདུན་གྱི་ཐང་ཀ་ཞེས་བྱ་བ་ནི་ཐང་ཀ་སྟ་གོན་ལ་གནས་པ་ཞེས་བྱ་བ་སྟེ་དེ་ཡང་བཾ་འོད་དུ་ཞུ་བ་ལ་སོགས་ཏེ་གོ་སླའོ། །བསམ་པར་བྱ་ཞེས་བྱ་བ་ནི་ཐང་ཀ་དེ་རང་བཞིན་མེད་པ་ལས་ཆོ་ག་གསུམ་གྱིས་སྐུ་བཞེངས་ཏེ། དེ་ནས་གཙོ་
བོའི་ཐུགས་ཀ་ནས་ཕྱིའི་སྙིང་པོ་སྟོང་ཕྲག་གཅིག་ཏུ་སྤྲོས་ཏེ་ཐུགས་ཀར་བསྟིམ་མོ། །དེ་ནས་ཐུགས་ཀའི་འོད་ཟེར་གྱིས་བསྐུལ་ནས་འོད་དུ་ཞུ་སྟེ། གསུང་དང་ཐུགས་ཀྱི་རང་བཞིན་དུ་སྟ་གོན་ལ་གནས་པར་བྱའོ། །སྟ་གོན་ལ་གནས་པར་ཉི་མ་གཉིས་པ་ལ་རབ་ཏུ་གནས་པར་བྱ་སྟེ། དེ་ཡང་
གོང་དུ་བསྟན་པའི་དཀྱིལ་འཁོར་དབང་བསྐུར་བའི་དོན་གསལ་བར་བསྐྱེད་ལ། བདག་ཉིད་ལྷའི་རྣལ་འབྱོར་རྫོགས་པར་བསྐྱེད་དེ། །ཐུགས་ཀའི་འོད་ཟེར་གྱི་དམ་ཚིག་གིས་བསྐུལ་བའི་ཕྱིར་སྤྲོ་དང་བསྡུ་བ་ཞེས་བྱའོ། །རྗེ་བཙུན་ནག་པོ་ཆེན་པོ་བཞེངས་ཏེ་ཞེས་བྱ་བ་ལ་སོགས་པ་ནི་གོ་
སླའོ། །དེ་ནས་ཐུགས་ཀའི་ས་བོན་ཞེས་བྱ་བ་ནི་ཧཱུཾ་ངོ་། །འོད་ཟེར་ཞེས་བྱ་བ་ནི་རྡོ་རྗེ་ལས་ལྕགས་ཀྱུའི་ཚུལ་ལོ། །དེ་སྤྲོས་ནས་བཀུག་པ་ནི་དེ་བཞིན་གཤེགས་པ་སྟེ་དེ་ཡང་དེ་བཞིན་གཤེགས་པ་དང་། རིག་པའི་ལྷ་མོ་དང་། བྱང་ཆུབ་སེམས་དཔའ་དང་། ཁྲོ་བོའི་རྒྱལ་པོ་ལ་སོགས་པ་

བཀུག་སྟེ་མདུན་གྱི་ནམ་མཁའ་ལ་དམིགས་པར་བྱའོ། །དེ་ནས་མཆོད་པ་དང་གཏོར་མ་ལ་སོགས་པ་དབུལ་བར་བྱའོ། །འདིར་སྐྱེ་བོ་རྨོངས་པར་བྱ་བའི་ཕྱིར་དཀྱིལ་འཁོར་དུ་གཞུག་པ་རིང་དུ་སྤངས་པའོ། །དེ་ཉིད་རིང་བ་རྣམས་ཀྱིས་ནི་འདིར་ཤེས་པར་བྱ་སྟེ། དེ་ཡང་སྔོན་དུ་
འགྲོ་བ་ནི་ཕྱིའི་སྙིང་པོ་དང་དམ་ཚིག་གི་སྔགས་ཀྱིས་སྡོམ་པ་ལ་གནས་ཏེ་ཐུགས་ཀའི་འོད་ཟེར་ཞེས་བྱ་བ་ནི་རིན་པོ་ཆེའི་ཐུར་མའི་དབྱིབས་སུ་སྤྲོས་ཏེ། དེ་ནས་ནག་པོ་ཆེན་པོའི་སྤྱན་དབྱེ་བར་བྱས་པའོ། །སྲིད་པ་རང་བཞིན་ཚིག་བརྗོད་ནས། །འདི་ནི་ཆོས་དབྱིངས་དག་པ་སྟེ། །སེམས་ཅན་
ཁམས་ནི་སྒྲོལ་བའི་ཕྱིར། །དཀྱིལ་འཁོར་ཆེན་པོར་རབ་ཞུགས་ནས། །མ་རིག་མུན་པ་འཇོམས་པ་ཡི། །སྙིང་རྗེ་ཆགས་པའི་སྤྱན་གྱིས་གཟིགས། །དེ་ནས་ཡོལ་བ་རབ་བསལ་ཏེ། །ཨོཾ་གྱི་དང་པོ་དང་ཨཱཏྨ་ཀོ྅ཧཾ་གི་མཐའ་ཅན་གྱིས་སྤྱན་དབྱེ་བར་བྱའོ། །དེ་ནས་དཀྱིལ་འཁོར་དུ་གཞུག་པ་ནི་
ཐུགས་ཀའི་འོད་ཟེར་གྱིས་ཚུལ་བསྡུས་ནས་གཙོ་བོའི་ཐུགས་ཀར་ཞུགས་པར་བྱའོ། །ཧཱུཾ་དང་གཉིས་སུ་མེད་པར་གྱུར། །དེ་ནས་ཧཱུཾ་ལས་བྱུང་བ་ཡི། །ནག་པོ་ཆེན་པོ་ཕྱུང་ནས་ནི། །གོང་གི་གནས་སུ་གཞག་པར་བྱ། །དེ་ནས་དབང་བསྐུར་སྦྱིན་པའི་ཕྱིར། །དབང་བསྐུར་བར་དམིགས་ལ་ཞེས་བྱའོ། །
དེ་ནས་དེ་བཞིན་གཤེགས་པ་ཡི། །རྡོ་རྗེ་དྲིལ་བུའི་ཕྱག་རྒྱ་ཡི། །ནག་པོའི་སྤྱི་བོར་བཟུང་ནས་ནི། །རིག་པའི་ལྷ་མོ་ཐམས་ཅད་ཀྱིས། །སྟ་གོན་གནས་པའི་བུམ་བཟུང་ནས། །སྤྱི་བོར་དབང་བསྐུར་སྦྱིན་པར་བྱ། །དེ་ནས་གོང་དུ་བསྟན་པ་ཡི། །དབུ་རྒྱན་ལ་སོགས་དབང་རྣམས་ཀྱང་། །རིམ་པ་བཞིན་
དུ་བསྐུར་བར་བྱ། །དབང་བསྐུར་དུས་ནི་ཐམས་ཅད་དུ། །བྱང་ཆུབ་སེམས་དཔའ་རྣམས་ཀྱིས་ཀྱང་། །མཆོད་པ་རྒྱུད་མི་འཆད་པར་བྱེད། །སྲིད་པ་རང་བཞིན་ཚིག་བརྗོད་ཅིང་། །ཨོཾ་གྱི་དང་པོ་ཧཱུཾ་གི་མཐའ་ཅན་གྱིས་དུས་ཐམས་ཅད་དུ་དབང་བསྐུར་བར་བྱའོ། །དེ་ནས་རང་གི་ཐུགས་ཀའི་ཞེས་པ་
ནས་སྤྱན་དྲངས་པ་ལ་སོགས་པ་ནི་གོ་སླའོ། །ཨོཾ་གྱི་དང་པོ་དང་ཧཱུཾ་གི་མཐའ་ཅན་གྱིས་སྤྱན་དྲང་བ་སྟེ་དེ་ལ་ཞེས་པ་ནི་གོ་སླའོ། །བསྟིམ་པར་བྱ་ཞེས་བྱ་བ་ནི་ཨོཾ་གྱི་དང་པོ་དང་ཧཱུཾ་གི་མཐའ་ཅན་གྱི་བརྒྱ་ཕྲག་གཅིག་བརྗོད་ལ་བསྟིམ་པར་བྱའོ། །དེ་ཉིད་དུ་ནི་དབང་བསྐུར་བའི། །དཀྱིལ་འཁོར་གྱིས་ཀྱང་

རྒྱས་བཏབ་བྱ། །ཐུགས་ཀའི་འོད་ཟེར་ཞེས་བྱ་བ་ནི་ཕྱིའི་སྙིང་པོ་ཐུགས་ཀ་ནས་ཐུགས་ཀའི་བཟླས་པ་བྱ་བའི་ཕྱིར་རོ། །མཆོད་པ་དང་གཏོར་མ་ཞེས་བྱ་བ་ནི་ཁྱད་པར་གྱི་རྫས་ཀྱི་ཕྱིར་རོ། །དེ་ནས་མཆོད་པ་ཞེས་བྱ་བ་ནི་མཆོད་པའི་དུས་སོ། །ཚོགས་ཀྱི་འཁོར་ལོ་ཞེས་བྱ་བ་ནི་ཚོགས་གཉིས་རྫོགས་པའི་
རྒྱུ་ཡིན་ལ་ཕྱིན་ཅི་ལོག་གི་རྟོག་པ་སྤངས་པའི་ཕྱིར་འཁོར་ལོ་ཞེས་བྱའོ། །དེ་ཡང་མཆོད་པའི་ཁྱད་པར་དུ། །ཞེས་བྱ་བ་ནི་ཤ་རྣམ་པ་ལྔ་ལ་སོགས་པའོ། །ཁ་ཟས་ཚོགས་པར་བྱས་ལ། གོང་གི་ལྷ་ཡི་རྣལ་འབྱོར་རྣམས། །ཤིན་ཏུ་གསལ་བར་བྱས་ནས་ནི། །དེ་ནས་བདུད་རྩི་ཞལ་ཟས་རྣམས། །
ཡེ་ཤེས་བདུད་རྩིར་བྱིན་བརླབས་ལ། །ལྷ་ཡི་འཁོར་ལོ་ཐམས་ཅད་ཀྱི། །ལྕེ་ལ་ཧཱུཾ་ཕྱུང་རྡོ་རྗེ་བསམ། །དམ་ཚིག་བཟའ་དང་བཏུང་བ་དང་། །པདྨའི་ཕྱག་རྒྱའི་སྔོན་དུ་སྦྱིན། །དེ་ནས་ཁ་ཟས་ཐམས་ཅད་ཀྱི། །ཕུད་ཀྱིས་དཀྱིལ་འཁོར་གསལ་བར་མཆོད། །ལྷ་ཡི་རྣལ་འབྱོར་ལྡན་པ་ཡིས། །
ཞལ་ཟས་ཚིམ་པ་བཟའ་བར་བྱ། །ལྷག་མ་དུར་ཁྲོད་གནས་སུ་སྦྱིན། །དེ་ནས་བསྟོད་པས་རབ་བསྟོད་དེ། །སྲིད་པ་རང་བཞིན་ཚིག་གིས་བརྗོད། །རྡོ་རྗེའི་གླུ་ནི་བླང་བྱ་ཞིང་། །ཡང་དང་ཡང་དུ་བདུད་རྩི་ནི། །ལྷ་ཡི་སྦྱོར་བས་བསླང་བར་བྱ། །དེ་ནས་ཚོགས་ཀྱི་འཁོར་ལོའི་རྫས་ལ་ནི་སྤོས་
བསྲེག་ཅེས་བྱ་སྟེ་དེ་ཡང་། སྤོས་དང་དུག་གི་ལ་དུས་མཆོད། །རབ་གནས་བསྙེན་པ་བསྐྱལ་བ་ནི། །ཐུགས་ཀ་ནས་ཐུགས་ཀར་ཞེས་བྱ་བ་སྟེ། དེ་ཡང་ནང་གི་སྙིང་པོ་ཡིས། །ནམ་མཁའ་ལས་ཞེས་བྱ་བ་ལ་སོགས་པ་ནི་རྟགས་ཀྱི་རིམ་པ་སྟེ་གོ་སླའོ། །རབ་གནས་བརྟན་པར་བྱ་བའི་ཕྱིར། །
ཨོཾ་གྱི་དང་པོ་དང་ཧཱུཾ་གི་མཐའ་ཅན་ནོ། །དེ་ཡང་བརྟན་པར་བྱ་བ་ནི། །དངོས་གྲུབ་ཉེ་བར་འགྱུར་བ་དང་། །རྟེན་ཚད་དང་ལྡན་པས་མྱུར་དུ་འགྲུབ་པའི་ཕྱིར། རབ་ཏུ་གནས་པ་ཐོབ་ཅེས་བྱ་བ་ནི། བཅོམ་ལྡན་འདས་ཀྱིས་བཀའ་སྩལ་ཏོ། །ཞེས་བྱ་བ་ནི་སྐུའི་རབ་གནས་སྡུད་པ་པོས་བསྡུས་ཏེ་འཁོར་གྱི་
ཚོགས་ལ་བཤད་ཅེས་བྱ་བའི་དོན་ཏོ། །དེ་ནས་གཞན་ཡང་ཞེས་བྱ་བ་ནི་སྐུའི་དཀྱིལ་འཁོར་ཡང་ཐུགས་ཀྱི་རྟགས་དང་ལྡན་པའི་ཕྱིར་ཞུས་པ་གྲི་གུག་གི་རབ་ཏུ་གནས་པ་བཤད་དུ་གསོལ་ཞེས་པའི་དོན་ཏོ། །བཅོམ་ལྡན་འདས་ཀྱིས་བཀའ་སྩལ་པ། །ཞེས་བྱ་བ་ནི་བཅོམ་ལྡན་འདས་སོ་སོར་

རྟོག་པའི་ཡེ་ཤེས་ཀྱི་ཏིང་ངེ་འཛིན་ལ་ཞུགས་སོ་ཞེས་བྱ་བའི་དོན་ཏོ། །འགུགས་དང་ཞེས་བྱ་བ་ནས་བཤད་པར་བྱ་བའི་བར་མདོར་བསྟན་པ་སྟེ་གོ་སླའོ། །དཔའ་བོ་སྟོབས་དང་ལྡན་པའི་ལྕགས། །ཞེས་བྱ་བ་ནི་ཕན་ཚུན་གཡུལ་དགྱེ་བས་བསད་པའི་མཚོན་ཆའོ། །སོར་བཅུ་
གཉིས་ཞེས་བྱ་བ་ནི་གཅོད་པར་བྱེད་པའོ། །སོར་བཞི་ཞེས་བྱ་བ་ནི་ལྕགས་ཀྱུའི་ཚུལ་དུ་གནས་པ་སྟེ་འགུགས་པར་བྱེད་པའོ། །ཧཱུཾ་ཞེས་བྱ་བ་ནི་ཉི་མའི་དཀྱིལ་འཁོར་གྱི་དབུས་སུ་མཚན་པའི་ཕྱིར་རོ། །དེ་ནས་རབ་གནས་ལ་འཇུག་པར་བྱ་སྟེ། བདུད་རྩིའི་མཎྜལ་ཞེས་བྱ་བ་ནི་གྲུ་བཞི་པར་བྱས་
པ་ལ་བདུད་རྩིས་ཐིག་ལེ་ལྷའི་གྲངས་སུ་བྱ་སྟེ། །དེར་ནི་ལྷ་ཡི་འཁོར་ལོ་སྟེ། །ཆོ་ག་གསུམ་གྱིས་རྫོགས་པར་བསྐྱེད། །ཡན་ལག་ཆོ་ག་ཐམས་ཅད་ཀྱི། །སྔོན་དུ་འགྲོ་བ་བྱས་ནས་ནི། །དེ་ནས་ཆོ་ག་བརྩམ་པར་བྱ། །གྲི་གུག་བདུད་རྩིས་བྱུགས་ནས་ཞེས་བྱ་བ་ནི་གྲི་གུག་གི་ཡུ་བའི་ཧཱུཾ་ལ་ནང་
གི་སྙིང་པོས་བསྐོར་ཏེ་བདུད་རྩིས་བྲི་བའི་ཕྱིར་རོ། །མཎྜལ་ཞེས་བྱ་བ་ནི་རང་གི་མདུན་དུ་གཞག་པར་བྱའོ། །འདིར་གོ་རིམས་བསྐུར་བ་སྟེ་འོད་ཟེར་ཞེས་བྱ་བ་ནི་ཧཱུཾ་ལས་བྱུང་བའི་འོད་ཟེར་རོ། །དག་པར་བྱ་ཞེས་བྱ་བ་ནི་གྲི་གུག་མི་དམིགས་པར་བྱ་སྟེ། པདྨ་དང་ཉི་མ་ལ་ཞེས་བྱ་བ་ནི་པཾ་དང་
རཾ་ལས་སྐྱེས་པའོ། །ཐོག་ཏུ་ཞེས་བྱ་བ་ནི་ཧཱུཾ་བསམ་པར་རོ། །གྲི་གུག་གཞག་ཅེས་བྱ་བ་ནི་ཧཱུཾ་ཡོངས་སུ་གྱུར་པ་ལས་སོ། །ནག་པོ་ཆེན་པོའི་གྲི་གུག་གི་རང་བཞིན་དུ་བྱས་ལ་ཞེས་བྱ་བ་ནི་ཐུགས་ཀའི་འོད་ཟེར་གྱིས་རང་བཞིན་གྱི་ནག་པོ་ཆེན་པོ་སྤྱན་དྲངས་ཏེ་མཆོད་པ་ལ་སོགས་བྱ་སྟེ་གྲི་
གུག་ལ་བསྟིམ་ཞེས་བྱ་བའི་དོན་ཏོ། །ཡུ་བའི་ཧཱུཾ་ལས་ཞེས་བྱ་བ་ནི་ཉི་མའི་དཀྱིལ་འཁོར་ལས་སོ། །སྔགས་ཞེས་བྱ་བ་ནི་ནང་གི་སྙིང་པོ་དང་ལྡན་པར་བྱ་སྟེ་བཟླས་པར་བྱའོ་ཞེས་བྱ་བ་ནི་གཙོ་བོའི་ཐུགས་ཀ་ན་ཡང་ཉི་མ་དང་ཧཱུཾ་ལ་སྔགས་འོད་དང་ལྡན་པ་སྟེ། དེ་ཡང་སྔགས་འོད་ཟེར་དང་
བཅས་པ་སྤྲོས་ཏེ་གྲི་གུག་གི་སྔགས་ལ་བསྟིམ་པའི་བཟླས་པ་སྟོང་ཕྲག་གཅིག་ཏུ་བྱས་ཏེ། དེ་ཡང་ཨོཾ་གྱི་དང་པོ་དང་ཨཱཏྨ་ཀོ྅ཧཾ་གིས་ཏེ། བཟླས་པ་བྱས་པ་ནི་ཧཱུཾ་ཧཱུཾ་ཕཊ་ཕཊ་སྭཱ་ཧཱ་ཞེས་བྱ་བས་སོ། །དེ་ནས་ཐུགས་ཀྱི་རང་བཞིན་གྱི་རྟགས་ཡིན་པའི་ཕྱིར་དང་། ནག་པོ་ཆེན་པོ་དང་ཐ་མི་དད་པས་མཆོད་པ་

ཞེས་བྱ་བ་ནི་གོ་སླའོ། །དེ་ནས་གཞན་ཡང་ཞེས་བྱ་བ་ནི་སྐུའི་འཁོར་ལོ་ལས་གསུང་གི་རྟགས་སུ་གྱུར་པ་སྟེ། ཐོད་པའི་རབ་ཏུ་གནས་པ་ལ་འཇུག་པར་བྱ་བའི་ཕྱིར་གཞན་ཡང་ཞེས་བྱ་བ། ཨཱ་ལི་ཞེས་བྱ་བ་ནི་སུམ་ཅུ་རྩ་གཉིས་པའོ། །ཀཱ་ལི་ཞེས་བྱ་བ་ནི་བརྒྱད་ཅུ་ལས་ཕྱུང་བའོ། །དབུས་སུ་ཞེས་བྱ་བ་
ནི་ཟླ་བ་དང་ཉི་མའི་དབུས་སུའོ། །ཨཱ་ལི་དང་ཀཱ་ལི་ཞེས་བྱ་བ་ནི་ཕྱི་དང་ནང་བརྒྱན་པའོ། །ཐུགས་ཀའི་འོད་ཟེར་ཞེས་བྱ་བ་ནི་གོ་སླའོ། །བསྟིམ་པར་བྱ་ཞེས་བྱ་བ་ནི་བསྟིམས་ནས་ཐོད་པའི་རང་བཞིན་དུ་གྱུར་པ་སྟེ། ཐོད་པའི་དབུས་སུ་ཉི་མའི་སྟེང་ན་ཨ་ལས་ནང་གི་སྙིང་པོ་དང་བཅས་ཏེ་བསྐོར་བར་བསམ། དེ་
ཡང་ཨོཾ་གྱི་དང་པོ་དང་ཧཱུཾ་གི་མཐའ་ཅན་ནོ། །བཟླས་པ་བྱ་ཞེས་བྱ་བ་ནི་ཐུགས་ཀ་ནས་སྤྲོས་ཏེ་ཐོད་པའི་ནང་གི་རྫས་ལ་ཐིམ་པར་བྱའོ། །དེ་ནས་གཞན་ཡང་ཞེས་བྱ་བ་ནི་སྐུ་གསུང་ཐུགས་ཀྱི་ཡོན་ཏན་གྱི་སྒོ་ནས་ཕྲིན་ལས་རྫོགས་པར་བྱ་བའི་ཕྱིར་ཕུར་བུའི་རབ་ཏུ་གནས་པ་ལ་འཇུག་པར་བྱ་སྟེ། སྔགས་
བྲི་ཞེས་བྱ་བ་ནི་ཐུགས་ཀའི་འོད་ཟེར་གྱིས་མི་དམིགས་པར་བྱས་པའོ། །ཐོད་པའི་ནང་དུ་གཞག་ཅེས་བྱ་བ་ནི་ཆོས་ཀྱི་འབྱུང་གནས་ཀྱི་དབུས་སུ་ཕུར་བུའི་ཆ་བྱད་ལྷའི་སྐུ་བསྐྱེད་པའི་ཕྱིར་གཞག་ཅེས་བྱའོ། །ཐུགས་ཀའི་འོད་ཟེར་གྱིས་ཞེས་བྱ་བ་ལ་སོགས་པ་ནི་གོ་སླའོ། །བསྟིམ་ཞེས་བྱ་བ་ནི་གཉིས་
སུ་མེད་པར་གྱུར་པའོ། །དེ་ཡང་ཐུགས་ཀ་ནས་ཐུགས་ཀར་ནང་གི་སྙིང་པོ་དང་བཅས་པར་བསྟིམ་པར་བྱའོ། །དེ་ཡང་ཨོཾ་གྱི་དང་པོ་དང་ཨཱཏྨ་ཀོ྅ཧཾ་གི་མཐའ་ཅན་ནོ། །བཀའ་སྩལ་ཏོ་ཞེས་བྱ་བ་ནི་ཡན་ལག་གི་རབ་ཏུ་གནས་པ་སྡུད་པ་པོས་ཏེ་འཁོར་ལ་བཤད་པའོ། །དེ་ནས་ཞེས་བྱ་བ་ནི་རབ་
གནས་ཀྱི་དུས་ཞུས་པ་སྟེ་གོ་སླའོ། །ཁྱད་པར་གྱི་དུས་ཞེས་བྱ་བ་ནི་ཞིང་ངམ་དུར་ཁྲོད་ན་ཚོགས་ཀྱི་འཁོར་ལོ་བསྐོར་བའི་ས་དེར་རབ་ཏུ་གནས་པར་བྱའོ། །ཐུན་མོང་གི་དུས་ནི་གོ་སླའོ། །བཅོམ་ལྡན་འདས་ཀྱིས་བཀའ་སྩལ་ཏོ། །ཞེས་བྱ་བ་ནི་དུས་ངེས་པར་བཟུང་བ་སྟེ་འཁོར་ལ་བཤད་པའོ། །
དཔལ་ལྡན་ནག་པོ་ཆེན་པོས་གསོལ་བ་ཞེས་བྱ་བ་ནི་རབ་ཏུ་གནས་པའི་དམ་ཚིག་ཞུས་པའོ། །བཅོམ་ལྡན་འདས་ཀྱིས་བཀའ་སྩལ་པ། །ཞེས་བྱ་བ་ནི་དམ་ཚིག་གི་འཁོར་ལོའི་ཏིང་ངེ་འཛིན་ལ་ཞུགས་པ་ཉིད་དོ། །བླ་མ་ལ་གུས་ཞེས་བྱ་བ་ནི་སློབ་དཔོན་གྱི་རྩ་བ་དང་ཡན་ལག་གི་དམ་ཚིག་མི་

སྤོང་བའོ། །རྣལ་འབྱོར་བརྩོན་ཞེས་བྱ་བ་ནི་བསྐྱེད་པའི་རིམ་པ་དང་རྫོགས་པའི་རིམ་པ་དང་མི་འབྲལ་བར་བརྩོན་པའོ། །ཆོ་གའི་ཡན་ལག་ཅེས་བྱ་བ་ནི་གསད་པ་དང་བསྐྲད་པ་ལ་སོགས་པའོ། །རྟག་ཏུ་དམ་ཚིག་སྲུང་ཞེས་བྱ་བ་ནི་རྒྱུན་དུ་གསང་བའི་དམ་
ཚིག་ལ་གནས་པ་ཉིད་དོ་ཞེས་བྱ་བའོ། །བཅོམ་ལྡན་འདས་ཀྱིས་བཀའ་སྩལ་པ་ཞེས་བྱ་བ་ཁྱད་པར་གྱི་དམ་ཚིག་མདོར་བསྡུས་ཏེ་འཁོར་ལ་བཤད་པའོ། །དེ་ནས་བཅོམ་ལྡན་འདས་ལ་གསོལ་བ་ཞེས་བྱ་བ་ནས་དངོས་གྲུབ་ཉེ་བའི་རྒྱུར་གསུངས་ཞེས་བྱ་བ་ནི་ཉེ་བའི་རྒྱུར་གསུངས་པ་སྟེ་གོ་སླའོ། །
བཅོམ་ལྡན་འདས་ཀྱིས་བཀའ་སྩལ་པ། །ཞེས་བྱ་བ་ནི་གཙོ་བོའི་བདུད་རྩི་ཆེན་པོའི་ཏིང་ངེ་འཛིན་ལ་ཞུགས་ཞེས་བྱ་བའི་དོན་ཏོ། །གསུམ་དུ་བཤད་ཅེས་བྱ་བ་ནི་བསྙེན་པ་དང་ལས་སྦྱོར་དང་མྱུར་དུ་བསྒྲུབ་པའོ། །དེ་ནས་མདུན་དུ་རབ་ཏུ་གནས་པར་བྱ་བའི་ཐོད་པའི་ནང་དུ་མཐུན་པའི་དམ་རྫས་ཚོགས་པར་བྱས་
ལ་གཞག་པར་བྱའོ། །རླུང་ཞེས་བྱ་བ་ནི་ཡཾ་ལས་བསྐྱེད་པའི་གཞུའི་དབྱིབས་མེ་ཞེས་བྱ་བ་ནི་རཾ་ལས་སྐྱེས་པ་ཟུར་གསུམ་འབར་བའི་མེ། སྟེང་དུ་ཞེས་བྱ་བ་ནི་ཧཱུཾ་སྐྱེས་ཐོད་རློན་སྒྱེད་པུ་གསུམ་སྟེ། དེ་སྟེང་གནས་པ་ཐོད་པ་ལ་ཉ་ཤ་ཞེས་བྱ་བ་ལ་སོགས་པ་ནི་གོ་སླའོ། །ཤ་ལྔ་དང་
བདུད་རྩི་ལྔ་ཞེས་བྱ་བ་ནི་རྫས་རྣམས་ཀྱི་རང་བཞིན་ཏེ་མིང་གི་ཡི་གེས་མཚན་པར་བྱེད་པའོ། །དེ་ཡང་གོ་ཀུ་ད་ཧ་ན་ནི་ཤ་ལྔའི་བདག་ཉིད་དོ། །མ་ར་མུ་སུ་པ་ནི་བདུད་རྩི་ལྔའི་བདག་ཉིད་དོ། །སྟེང་དུ་ཉི་མ་ལ་ཞེས་བྱ་བ་ནི་ཟླ་བ་དང་ཉི་མའི་སྟེང་དུ་ནི་ཆུད་པར་རྫས་ལས་ཉི་མའི་སྟེང་དུ་གྲི་
གུག་ལ་སོགས་པ་སྟེ་གོ་སླའོ། །དམ་ཚིག་བདུད་རྩིར་གྱུར་ཞེས་བྱ་བ་ནི་བྱང་ཆུབ་སེམས་ཀྱི་རང་བཞིན་དུ་གྱུར་པའོ། །སྟེང་གི་ཞེས་བྱ་བ་ནི་ཧཱུཾ་ལས་བྱུང་བའོ། །འདི་ཡིས་བྱིན་གྱིས་བརླབས་ཞེས་བྱ་བ་ནི་གཙོ་བོའི་ཐུགས་ཀ་ནས་ནང་གི་སྙིང་པོ་དང་བཅས་ཏེ་སྤྲོས་ནས་དམ་
ཚིག་དང་ཡེ་ཤེས་ཀྱི་རྫས་ལ་ཕོག་ནས་གཉིས་སུ་མེད་པར་གྱུར་པའོ། །སྔགས་ནི་ཨོཾ་གྱི་དང་པོ་དང་ཨོཾ་ཨཱཿཧཱུཾ་གི་མཐའ་ཅན་དུ་ཤེས་པར་བྱའོ། །མདུན་གྱི་ནག་པོ་ཆེན་པོ་ཞེས་བྱ་བ་ནི་གོ་སླའོ། །རྩ་བའི་སྔགས་ཀྱི་དབུས་ཞེས་བྱ་བ་ནི་སྟོང་པའི་ཡི་གེ་དང་ལྡན་པར་བྱའོ། །དེ་ནས་

གཞན་ཡང་ཞེས་བྱ་བ་ནི་ལས་ལ་སྦྱོར་བ་ལ་འཇུག་པར་བྱ་སྟེ། དེ་ཡང་ལིངྒ་རྒྱུ་ཚོགས་པར་བྱས་ལ་ལིངྒ་སོར་བརྒྱད་པའི་ཚད་དུ་བྱས་ལ་གཏོར་མའི་ནང་དུ་ལྡན་པར་བྱས་ཏེ་དགུག་གཞུག་གི་སྦྱོར་བ་དང་ལྡན་པར་བྱའོ། །བསྒྲུབ་བྱ་ཞེས་བྱ་བ་ནི་སྙིང་གར་པདྨ་འདབ་མ་བརྒྱད་བསམ་པར་བྱའོ། །
པདྨའི་འདབ་མ་རྣམས་ལ་ས་བོན་དང་ལྕགས་ཀྱུས་མཚན་ཞེས་བྱའོ། །གྲི་གུག་ཧཱུཾ་གིས་མཚན་ཞེས་བྱ་བ་ནི་པདྨའི་ལྟེ་བ་ན་གནས་པ་སྟེ། ཧཱུཾ་ལ་ནང་གི་སྙིང་པོས་ལྡན་པའོ། །སྟོབས་ཞེས་བྱ་བ་ནི་གཙོ་བོ་དང་བཀའ་སྡོད་ཀྱི་ཐུགས་ཀ་ནས་ནང་གི་སྙིང་པོ་སྤྲོས་ཏེ་བསྒྲུབ་བྱའི་སྟེང་སྒོ་
དང་འོག་སྒོ་ནས་གྲངས་མང་དུ་སྙིང་གའི་སྔགས་བསྐུལ་ནས། སྔགས་ཀྱི་འོད་ཟེར་གྱིས་ལུས་ཀྱི་རྩ་ཐམས་ཅད་མར་མེ་ལྟ་བུར་གྱུར་ཏེ་ཁྲག་འཕེལ་བའི་ཕྱིར་རོ། །བཞུ་ནས་ཞེས་བྱ་བ་ནི་དམ་ཚིག་གི་བདུད་རྩིར་གྱུར་པ་དང་། ཡེ་ཤེས་ཀྱི་བདུད་རྩི་བཀུག་ཅེས་བྱ་བའི་
དོན་ཏོ། །སྔགས་ཀྱི་འོད་ཟེར་ཞེས་བྱ་བ་ནི་ཐུགས་ཀ་ནས་སྤྲོས་པའི་གྲི་གུག་ཅེས་བྱ་བའི་ཕྱག་མཚན་གྱིས་སོ། །ཡང་ན་ཞེས་བྱ་བ་ནི་མྱུར་བར་བསྒྲུབ་པའོ། །ནག་པོའི་ཐོད་པ་ཞེས་བྱ་བ་ནི་ཕྱག་མཚན་གྱི་ཐོད་པའོ། །བསྒྲུབ་བྱ་བཀུག་ནས་ཞེས་བྱ་བ་ནི་གཙོ་བོ་དང་
བཀའ་སྡོད་ཀྱི་ཐུགས་ཀའི་འོད་ཟེར་གྱིས་གསལ་བར་བཀུག་པའོ། །ཁྲག་བསྐྱེད་ལ་ཞེས་བྱ་བ་ནི་བསྒྲུབ་བྱའི་སྙིང་གའི་འོད་ཟེར་གྱིས་ཁྲག་བསྐྱེད་པ་དང་ཕྱག་མཚན་གྱི་གྲི་གུག་གིས་གཏུབས་ནས་ཁྲག་འཐུང་བའི་ཕྱིར་རོ། །ཁྲག་འཛག་ཅེས་བྱ་བ་ནི་གདུག་པ་སྒྲོལ་བ་ལ་
ཆགས་པའི་ཕྱིར་ཁྲག་འཛག་ཅེས་བྱའོ། །རྒྱུན་མི་འཆད་ཅེས་བྱ་བ་ནི་ཟས་ཀྱི་རྣལ་འབྱོར་གྱི་དུས་སུ་ཡང་དེ་ལྟར་བྱ་བའི་ཕྱིར་རོ། །དངོས་གྲུབ་ངེས་པ་ཞི་ཞེས་བྱ་བ་ནི་བསྙེན་པ་དང་ལས་སྦྱོར་ཐམས་ཅད་ཀྱི་སྔོན་དུ་འགྲོ་བའི་ཕྱིར་རོ། །བཀའ་སྩལ་ཏོ་ཞེས་བྱ་བ་ནི་གཏོར་མའི་ཆོ་ག་
སྡུད་པ་པོས་བསྡུས་ཏེ་འཁོར་ལ་བཤད་པའོ། །དཀྱིལ་འཁོར་གྱི་ལེའུ་ཞེས་བྱ་བ་ནི་བཞི་པའི་དོན་ཏོ། །སློབ་མ་དཀྱིལ་འཁོར་དུ་སྨིན་པར་བྱ་བ་དང་། དཀྱིལ་འཁོར་ལ་སོགས་ཏེ་རྟེན་སྒྲུབ་པའི་དོན་སྟོན་པའི་ལེའུའོ། །དཀྱིལ་འཁོར་གྱི་ལེའུའི་བཤད་པ་སྟེ་བཞི་པའོ།། །།

དེ་ལྟར་བསྙེན་པའི་ཡན་ལག་ཐམས་ཅད་དང་ལྡན་པས་སྦྱོར་ཀ་ཆེན་པོ་ལ་འཇུག་པའི་ཕྱིར། དེ་ནས་ཞེས་བྱ་བ་ནི་དེ་ཡང་མཁའ་འགྲོ་རྒྱ་མཚོ་ལས་གསུངས་པ། སྔགས་ནི་ལྷ་ཡི་ས་བོན་ཏེ། །ལྷ་ཡི་བདག་ཉིད་རྫོགས་པ་ཉིད། །དཀྱིལ་འཁོར་རབ་གནས་བདག་ཉིད་དོ། །དེ་
ལྟར་བསྙེན་པ་རྫོགས་ནས་ནི། །སྦྱོར་ཀ་ཆེན་པོ་རྫོགས་པར་འགྱུར། །བསྙེན་པའི་ཡན་ལག་མ་ཚང་བར། །ལས་ལ་སྦྱོར་བར་བྱེད་པ་ནི། །དམ་ཚིག་ཉམས་ཤིང་འཇིག་རྟེན་འཕྱ། །ཞེས་འབྱུང་། དཔལ་ནག་པོ་ཆེན་པོ་དང་མཁའ་འགྲོ་མའི་ཚོགས་རྣམས་ཞེས་བྱ་བ་ནི་ཁྱད་པར་གྱི་སྦྱོར་ཀ་ཡིན་
པ་དང་། ཚོགས་ཀྱི་འཁོར་ལོ་ཐམས་ཅད་ཀྱི་ལས་བསྒྲུབ་པའི་ཕྱིར་གཙོ་བོ་ལ་ཞུགས་པའོ། །བཅོམ་ལྡན་འདས་ཞེས་བྱ་བ་ནི་ཞུས་པའི་ཚིག་སྟེ་གོ་སླའོ། །བཅོམ་ལྡན་འདས་ཀྱིས་བཀའ་སྩལ་ཏོ། །ཞེས་བྱ་བ་ནས་བསྟན་པ་སྲུང་བར་ཁས་བླངས་ཞེས་བྱ་བ་འཁོར་རྣམས་ལ་དམ་ཚིག་གི་ཁྱད་པར་གྱིས་
བཀའ་བསྒོས་པ་སྟེ་གོ་སླའོ། །བཀའ་སྩལ་ཏོ་ཞེས་བྱ་བ་ནི་གོང་དུ་བསྟན་པའི་དོན་བསྡུས་ནས་འཁོར་ལ་བཤད་པའོ། །ནག་པོ་ཆེན་པོས་གསོལ་པ་ཞེས་བྱ་བ་ནི་པར་པུའི་སྦྱོར་ཀ་གཙོ་བོ་ལ་ཞུས་པའོ། །བཅོམ་ལྡན་འདས་ཀྱིས་བཀའ་སྩལ་པ། །ཞེས་བྱ་བ་ནི་མདོར་བསྡུས་ཏེ་བཤད་པའོ། །
རྣམ་པ་བཞིས་ཞེས་བྱ་བ་ནི་ཡན་ལག་བཞི་པས་འགྲུབ་ཀྱི་གཞན་གྱིས་མ་ཡིན་པའི་ཕྱིར་རོ། །བཀའ་སྩལ་ཏོ་ཞེས་བྱ་བ་ནི་བཞིའི་དོན་མདོར་བསྡུས་ཏེ་འཁོར་ལ་བཤད་པའོ། །དེ་ནས་གསོལ་བ་ཞེས་བྱ་བ་ནི་བཞིའི་དོན་བྱེ་བྲག་ཏུ་ཞུས་པའོ། །བཅོམ་ལྡན་འདས་ཀྱིས་བཀའ་སྩལ་པ། །ཞེས་བྱ་བ་
ནི་པར་པུའི་གནས་མདོར་བསྡུས་ཏེ་བསྟན་པའོ། །བཀའ་སྩལ་ཏོ་ཞེས་བྱ་བ་ནི་བསྡུས་ཏེ་འཁོར་ལ་བཤད་པའོ། །དེ་ནས་ཞེས་བྱ་བ་ནི་གནས་བསྒྲུབ་པ་ཞེས་པ་སྟེ། རྔམ་པའི་ཞལ་དང་འཇིགས་པའི་སྐུ། །ཞེས་བྱ་བ་ནི་དྲག་པོའི་བཟླས་པ་དང་ལྷའི་འཁོར་ལོས་གནས་བསྒྲུབ་པ་བསྟན་པའོ། །བཅོམ་
ལྡན་འདས་ཀྱིས་བཀའ་སྩལ་པ། །ཞེས་བྱ་བ་ནི་གནས་ཀྱི་འཁོར་ལོའི་ཏིང་ངེ་འཛིན་ལ་ཞུས་པའོ། །དུར་ཁྲོད་ཀྱི་ཕ་གུ་ཞེས་བྱ་བ་ནི་དུར་ཁྲོད་ཀྱི་ས་ལས་ཕ་གུ་བྱས་ནས་རོ་བསྲེགས་ཀྱི་མགལ་པས་བསྲེགས་པ་ཉིད་དོ། །དཔའ་བོའི་ཀེང་རུས་ཞེས་བྱ་བ་ནི་གཡུལ་དུ་བསད་པའི་གྲི་རུས་སོ། །སྒྲུབ་པའི་ཁང་བུ་

ཟུར་གསུམ་བྱ། །ཞེས་བྱ་བ་ནི་གྲོང་ཁྱེར་སུམ་བརྩེགས་དང་མཐུན་པ་སྟེ་རྩེ་གསུམ་པར་བྱའོ། །བརྩེགས་བར་མ་གཡུལ་འགྱེད་པའི་ས་སྟེ་བསྒྲུབ་པར་བྱའོ། །ཟུར་གསུམ་ནི་མེའི་དབྱིབས་སུ་བྱའོ། །ཐོད་པའི་ནང་དུ་འཁོར་ལོ་བྲི། །ཞེས་བྱ་བ་ནི་འཁོར་ལོ་ནི་དུར་ཁྲོད་ཀྱི་སྣག་ཚས་བྲི་བར་བྱ་སྟེ། དེ་
ཡང་། བདུད་རྩིས་མཎྜལ་བྱས་ནས་ནི། །ལྷ་ཡི་རྣལ་འབྱོར་རབ་གསལ་བ། །ལྷོ་ཕྱོགས་སུ་ནི་མངོན་ཕྱོགས་ཏེ། །དུར་ཁྲོད་སོལ་བས་འཁོར་ལོ་བྲི། །འཁོར་ལོ་མེ་ཡི་དཀྱིལ་འཁོར་ལ། །སྣ་བཞི་སྣ་ཚོགས་རྡོ་རྗེས་མཚན། །དབུས་སུ་ནང་གི་སྙིང་པོ་བྲི། །རཻ་ཕ་གསུམ་གྱིས་མཚན་པར་བྲི། །
བར་ཁྱམས་གསུམ་གྱི་ནང་དུ་ཡང་། །ཡི་གེ་ཨོཾ་གྱི་དང་པོ་དང་། །ཧཱུཾ་ཧཱུཾ་ཕཊ་ཕཊ་སྭཱ་ཧཱའི་མཐའ་ཅན་ནི། །མེ་གཉིས་ཀྱི་ནི་ནང་དུ་བྲི། །རྡོ་རྗེའི་ར་ནི་དབུས་མ་ལ། །ཧཱུཾ་ནི་དྲག་པོ་བྲི་བར་བྱ། །འཁོར་ལོ་མཎྜལ་སྟེང་བཞག་ནས། །གཙོ་བོའི་ཐུགས་ཀའི་འོད་ཟེར་གྱིས། །འཁོར་ལོ་རང་བཞིན་མེད་
པར་བྱ། །མེ་ཡི་ས་བོན་ལས་སྐྱེས་པའི། །འཁོར་ལོ་མེ་ཡི་དཀྱིལ་འཁོར་མཚུངས། །གཙོ་བོའི་ཐུགས་ཀའི་འོད་ཟེར་གྱིས། །ལྷ་ཡི་འཁོར་ལོ་སྤྱན་དྲངས་ཏེ། །ཡན་ལག་ཆོ་ག་ཀུན་བྱས་ནས། །འཁོར་ལོ་ལ་ནི་བསྟིམ་པར་བྱས། །ཁང་པའི་ནང་གི་ཟུར་དུ་གཞུག །ཅེས་བྱ་བ་ལ་སོགས་
པ་ནི་གོ་སླའོ། །དུས་གསུམ་དུ་ཞེས་བྱ་བ་ནི་ཇི་སྲིད་ཁང་པ་མ་ཚར་གྱི་བར་དུའོ། །ཐེ་ཚོམ་མེད་པ་ནི་ངེས་པར་འགྲུབ་པའི་ཕྱིར་རོ། །བཀའ་སྩལ་ཏོ་ཞེས་བྱ་བ་ནི་སྡུད་པ་པོས་གནས་ཀྱི་དོན་བསྡུས་ཏེ་འཁོར་ལ་བཤད་པའོ། །དེ་ནས་ནག་པོ་ཆེན་པོས་གསོལ་པ་ཞེས་བྱ་བ་ནི་པར་པུའི་ཆོ་ག་ལས་
ཞུས་པ་སྟེ་གོ་སླའོ། །བཀའ་སྩལ་པ་ཞེས་བྱ་བ་ནི་པར་པུ་བསྒྲུབ་པའི་དོན་མདོར་བསྡུས་ཏེ་བསྟན་པའོ། །གསུམ་ཞེས་བྱ་བ་ནི་བསྒྲུབ་པའི་དོན་གསུམ་དང་ལྡན་པ་འགྲུབ་པར་འགྱུར་གྱི། མི་ལྡན་པས་ནི་མི་འགྲུབ་པའི་ཕྱིར་ཤེས་པར་གྱིས་ཞེས་བྱའོ། །བཀའ་སྩལ་ཏོ་ཞེས་བྱ་བ་ནི་པར་བུའི་དོན་མདོར་
བསྡུས་ཏེ་བསྟན་པའོ། །དེ་ནས་བཅོམ་ལྡན་འདས་ལ་གསོལ་བ་ཞེས་བྱ་བ་ནི་གཙོ་བོ་ལ་པར་བུའི་དོན་རྒྱས་པར་ཞུས་པའོ། །བཀའ་སྩལ་ཏོ་ཞེས་བྱ་བ་ནི་བཅོམ་ལྡན་འདས་དྲག་པོའི་ཏིང་ངེ་འཛིན་ལ་སྙོམས་པར་འཇུག་ཅེས་བྱ་བའི་དོན་ཏོ། །དཀྱིལ་འཁོར་དང་ནི་པར་བུའི་རྒྱུ། །ཞེས་བྱ་བ་ལ་

སོགས་པ་ནི་གོ་སླའོ། །ཆུ་འགྲམ་ཞེས་བྱ་བ་ནི་གྲོག་མཁར་གྱི་སའོ། །སྟེང་དུ་ཞིང་གི་བླ་རེ་བཀོད། །ཅེས་བྱ་བ་ནི་དུར་ཁྲོད་རས་ལ་འཁོར་ལོ་བྱས་ཏེ། དེ་ཡང་ལྷོ་ཕྱོགས་སུ་ནི་ཁ་བསྟན་ཏེ། །བདུད་རྩིས་མཎྜལ་བྱས་ནས་ནི། །དེ་ནི་འཁོར་ལོ་བྲི་བར་བྱ། །བྱ་རོག་འུག་པའི་
ཁྲག་གིས་ནི། །འཁོར་ལོ་གྲུ་བཞིར་བྱས་པ་ལ། །སྣ་ཚོགས་རྡོ་རྗེས་མཚན་པ་སྟེ། །ཕྱི་རོལ་མུ་ཁྱུད་ཟླུམ་པོར་བྱ། །དབུས་སུ་ནང་གི་སྙིང་པོ་ནི། །ཕྱོགས་བཞི་རྣམས་སུ་ལེགས་པར་བྲི། །ཤར་ལ་སོགས་པའི་བར་ཁྱམས་ལ། །ཨོཾ་མ་ཧཱ་ཀཱ་ལ་ཡ། ཕུར་པ་འདིས་བནྡྷ་ལ་སོགས་པའི། །
སྔགས་ནི་ལེགས་པར་བྲི་བར་བྱ། །རྡོ་རྗེའི་ར་ནི་དབུས་མ་ལ། །བཛྲ་བནྡྷ་བྲི་བ་ནི། །ཧཱུཾ་གཉིས་ཀྱི་ནི་བར་དུ་གཞག །རྡོ་རྗེ་ར་གཞན་མཚམས་སུ་ནི། །དྲག་པོའི་ཧཱུཾ་ནི་དགོད་པར་བྱ། །ཕྱི་རོལ་འཁོར་ལོའི་མུ་ཁྱུད་ལ། །རྩ་བའི་སྔགས་ནི་ལེགས་པར་བྲི། །འཁོར་ལོ་མཎྜལ་སྟེང་བཞག་ལ། །
གཙོ་བོའི་ཐུགས་ཀའི་འོད་ཟེར་གྱིས། །འཁོར་ལོ་རང་བཞིན་མེད་བྱས་ལ། །ལཾ་ལས་བྱུང་བའི་འཁོར་ལོ་ནི། །ཁ་དོག་སེར་པོ་གྲུ་བཞི་སྟེ། །རྡོ་རྗེ་བྲག་གིས་མཚན་པ་ལ། །སྔགས་ནི་མར་མེའི་མེ་ལྟར་འབར། །དེ་ནས་ཐུགས་ཀའི་འོད་ཟེར་གྱིས། །བཀའ་ཡི་འཁོར་ལོ་སྤྱན་དྲངས་ཏེ། །ཡན་
ལག་ཆོ་ག་ཀུན་བྱས་ནས། །འཁོར་ལོ་ལ་ནི་བསྟིམ་པར་བྱ། །དེ་ནས་གཙོ་བོའི་ཐུགས་ཀ་ནས། །ནང་གི་སྙིང་པོ་རབ་སྤྲོས་ཏེ། །འཁོར་ལོ་སྟོང་ཕྲག་བསྟིམ་པར་བྱ། །འཁོར་ལོའི་ཟུར་ལ་ཞེས་བྱ་བ་ནི་གོ་སླའོ། །ཐོད་པ་དུམ་བུ་གཅིག་པར་ནི། །ཞེས་བྱ་བ་ནི་བསྟེན་པར་བྱ་བའི་གཏོར་མའོ། །
ནུབ་བྱང་དཀྱིལ་འཁོར་ཟུར་ལ་ནི། །ཞེས་བྱ་བ་ནི་རབ་གནས་བྱས་པའི་ཕྱག་མཚན་ནོ། །ཐོད་པ་ཁྲག་གིས་བཀང་ཞེས་བྱ་བ་ནི་ནག་པོ་གསུམ་གྱི་ཁྲག་སྟེ་མིང་གི་ཡི་གེ་དང་ལྡན་པར་བྱའོ། །བཀའ་སྩལ་ཏོ་ཞེས་བྱ་བ་ནི་པར་བུའི་དཀྱིལ་འཁོར་གྱི་དོན་བསྡུས་ཏེ་བཤད་པའོ། །གཞན་ཡང་ཞེས་བྱ་བ་ནི་
པར་བུའི་རྒྱུ་བསྒྲུབ་པ་ལ་འཇུག་པའོ། །མཆོད་པ་ཡིས་ཞེས་བྱ་བ་ནི་གཅན་གཟན་གྱིས་བརྐོས་པའི་མཆོད་པའི་སའོ། །སྲེག་པའི་སྐྲ་ནི་ལྷོ་ཕྱོགས་སུ་མགོ་བསྟན་ནས་ཤི་བའི་སྐྲའོ། །པར་བུ་ཞེས་བྱ་བ་ནི་ནག་པོའི་ཚེས་གཅིག་ལ་ལྷའི་སྦྱོར་བ་དང་ལྡན་པར་བྱའོ། །ཚ་ཞིང་ཁ་བའི་མེ་ཡིས་བསྲེག །

ཅེས་བྱ་བ་ནི་དུར་ཁྲོད་ཀྱི་མགལ་དུམ་དང་ལྡན་པས་བསྒྲུབ་བྱའི་ཕ་མེས་ཀྱི་རོ་བསྲེགས་པའི་སར་བསྲེག་པར་བྱའོ། །འཁོར་ལོ་བྲིས་ལ་ཞེས་བྱ་བ་ནི། ཕྱི་རོལ་ཟུར་གསུམ་འབར་བར་བྱ། །དབུས་སུ་མུ་ཁྱུད་བཞིས་བསྐོར་ཏེ། །ཕྱི་རོལ་ཟུར་གསུམ་དག་ཏུ་ནི། །རྡོ་རྗེ་འབར་བ་བྲི་བར་བྱ། །དབུས་སུ་ནང་གི་སྙིང་
པོ་ནི། །བསྒྲུབ་བྱའི་མིང་དང་ལྡན་པར་བྲི། །ཕྱི་རོལ་གྱི་ནི་མུ་ཁྱུད་ལ། །ཕྱི་ཡི་སྙིང་པོ་བྲི་བར་བྱ། །དེ་ཡི་ཕྱི་རོལ་མུ་ཁྱུད་ནི། །ལིང་ཚེ་བརྒྱད་དུ་གནས་པ་ལ། །འཁོར་ལོའི་སྔགས་སུ་བཀོད་པ་ནི། །སྡེ་ཚན་བརྒྱད་དུ་རབ་ཕྱེ་སྟེ། །ཧཱུཾ་གི་བར་དུ་བྲི་བར་བྱ། །ཕྱི་རོལ་མུ་ཁྱུད་བརྒྱད་ལ་ནི། །རྩ་བའི་སྔགས་ནི་
དགོད་པར་བྱ། །དེ་ཡི་ཕྱི་རོལ་མུ་ཁྱུད་ལ། །ལས་ཀྱི་སྔགས་ནི་དགོད་པར་བྱ། །ཕྱི་རོལ་རྡོ་རྗེ་སྙིང་པོ་ལ། །ནང་གི་སྙིང་པོ་བྲི་བར་བྱ། །དེ་ནས་རྡོ་རྗེ་རྩེ་གཞན་ལ། །དྲག་པོའི་ཧཱུཾ་ནི་བྲི་བར་བྱ། །ཕྱི་རོལ་ཟུར་གསུམ་བར་ཁྱམས་ལ། །གསང་བའི་སྔགས་ནི་དགོད་པར་བྱ། །ཡི་གེ་དགོད་ཅེས་བྱ་བ་ནི། །
ལུགས་དང་ལུགས་མིན་གཉིས་སུ་དགོད། །གསང་བའི་སྔགས་ནི་བྲི་བ་ནི། །འཁོར་ལོ་རྩིབས་བརྒྱད་བྲི་བར་བྱ། །ལྟེ་བར་མེ་ཡི་དཀྱིལ་འཁོར་བྲི། །མེ་ཡི་དབུས་སུ་ནང་གི་ནི། །སྙིང་པོའི་མིང་དང་བཅས་པ་དགོད། །ཕྱི་རོལ་ཟླ་གམ་གསུམ་ལ་ནི། །ཕྱི་ཡི་སྙིང་པོ་དགོད་པར་བྱ། །འཁོར་ལོའི་
རྩིབས་ནི་ཐམས་ཅད་ལ། །རྩ་བའི་སྔགས་ནི་དགོད་པ་སྟེ། །སྡེ་ཚན་བརྒྱད་དུ་དབྱེ་བར་བྱ། །བར་དུ་བསྒྲུབ་པའི་མིང་ཡིག་གཞུག །ཕྱི་རོལ་འཁོར་ལོའི་མུ་ཁྱུད་ལ། །གསང་བའི་སྔགས་ནི་བྲི་བར་བྱ། །དེ་ཡང་གཡས་སྐོར་གཡོན་སྐོར་དུ། །འཁོར་ལོ་གཉིས་ནི་བྲི་བར་བྱ། །སྟོབས་ཀྱི་པར་
བུ་ཞེས་བྱ་ནི། །ཕྱག་མཚན་གཉིས་ནི་བཀོད་པ་སྟེ། །སྟེང་དང་འོག་ཏུ་ཡང་དག་གནས། །ལིངྒ་ཆོ་གས་གཞུག་པར་བྱ། །ཞེས་བྱ་བ་ནི་ཡིད་འཕྲོག་མ་ལ་སོགས་པའི་མཁའ་འགྲོ་མ་དགུ་སྟ་གོན་ལ་གནས་པར་བྱའོ། །ལྷོ་ནུབ་ཏུ་ཁ་བལྟས་ཏེ་ཞེས་བྱ་བ་ནི། འཁོར་ལོ་བྲི་བའི་དུས་སུའོ། །ལིངྒ་མིང་གི་
ཡི་གེ་ཞེས་བྱ་བ་ལ་སོགས་པ་ནི་གོ་སླའོ། །བུམ་པར་འཁོར་ལོ་གཞུག་པར་བྱ། །ཞེས་བྱ་བ་ནི་ཕྱིར་མི་ལྡོག་པའི་ཆོ་ག་སྟེ་སྲུང་བའི་འཁོར་ལོའོ་ཞེས་བཀའ་སྩལ་ཏོ་ཞེས་བྱ་བ་ནི་པར་བུ་བཅའ་བའི་རིམ་པ་བསྡུས་ཏེ་བསྟན་པའོ། །དེ་ནས་གཞན་ཡང་རབ་བཤད་པ། །ཞེས་བྱ་བ་ནི་སྐུའི་ཆོ་ག་ལ་

འཇུག་པར་བྱ་སྟེ། དཀྱིལ་འཁོར་གྱི་ལེའུར་བསྟན་ཟིན་ཏོ། །ཞིང་གི་སྟེང་དུ་བཞུགས་སུ་གསོལ། །ཞེས་བྱ་བ་ནི་མདུན་བསྐྱེད་ཀྱི་ཆོ་ག་རྫོགས་པར་བྱའོ་ཞེས་པའི་སྟོན་ཏོ། །དེ་ཡང་རྒྱུན་དུ་ཞུགས་པའི་རྣལ་འབྱོར་པས་ཉེ་བར་བསྒྲུབ་པའི་བསྙེན་པ་བསྐྱལ་བའོ། །མཐུན་པའི་དམ་རྫས་
ཞེས་བྱ་བ་ལ་སོགས་པ་གོ་སླའོ། །སྐུའི་ཆོ་ག་ཞེས་བྱ་བ་ནི་རྒྱུད་དུ་གསུངས་པའི་པར་བུའི་ཆོ་ག་མ་རྫོགས་བར་དུ་ཆོ་གར་བྱས་པའི་ཕྱིར་རོ། །བཅོམ་ལྡན་འདས་ཀྱིས་བཀའ་སྩལ་ཏོ། །ཞེས་བྱ་བ་ནི་སྐུའི་ཆོ་ག་གསུངས་ཏེ་བཤད་པའོ། །དེ་ནས་གསོལ་པ་ཞེས་བྱ་བ་ནི་པར་བུ་བསྒྲུབ་པར་བྱ་བའི་དོན་
དུ་ཞུས་པའོ། །བཅོམ་ལྡན་འདས་ཀྱིས་བཀའ་སྩལ་པ། །ཞེས་བྱ་བ་ནི་སྐུའི་ཉེ་བར་བསྒྲུབ་པའི་བསྙེན་པ་རྒྱས་པར་བཤད་པའོ། །པར་བུ་སྒྲུབ་པར་འདོད་པའི་རྣལ་འབྱོར་པས། །ཞེས་བྱ་བ་ལ་སོགས་པ་ནི་གོ་སླའོ། །བསམ་གཏན་ཞེས་བྱ་བ་ནི་ཐུགས་ཀའི་གྲི་གུག་ལ་གནས་པའི་ཧཱུཾ་ལས་
འོད་ཟེར་གྲི་གུག་ལྟ་བུ་སྤྲོས་ཏེ་གུར་དང་ར་བ་ལ་སོགས་པར་གྱུར་པའོ། །སྔགས་ཞེས་བྱ་བ་ནི་བཛྲ་ཀ་པ་རྩའི་སྔགས་ཀྱིས་སོ། །མཚམས་བཅད་ཅེས་བྱ་བ་ནི་སྲུང་བའི་འཁོར་ལོ་བྱ་བའི་ཕྱིར་རོ། །མཆོད་པ་ལ་སོགས་པ་ནི་གོ་སླའོ། །མདུན་གྱི་ཞེས་བྱ་བ་ལ་སོགས་པ་ནི་མདུན་དུ་བསྐྱེད་པའི་ཆོ་
ག་རྒྱས་པར་བཤད་པའོ། །སྔགས་ཀྱི་ཕྲེང་བ་ཞེས་བྱ་བ་ནི་ཐུགས་ཀར་གནས་པའོ། །དྲག་པོའི་སྟོབས་ཞེས་བྱ་བ་ནི་སྔགས་ཀྱི་འོད་ཟེར་གྱི་གྲི་གུག་གི་ཕྲེང་བར་སྤྲོ་བའོ། །བསམ་གཏན་ཞེས་བྱ་བ་ནི་གཙོ་བོ་དང་བཀའ་སྡོད་ཀྱི་བར་དུ་བསྒྲུབ་བྱ་དམིགས་ལ། བསྒྲུབ་བྱའི་གནས་གསུམ་དུ་
རྣམ་ཤེས་ཀྱི་ཡི་གེ་བསམ་པའོ། །སྔགས་ཀྱི་བཟླས་པ་ཞེས་བྱ་བ་ནི་སྔགས་ཀྱི་འོད་ཟེར་གྱིས་བསྒྲུབ་བྱའི་རླུང་སྒོར་ཞུགས་ཏེ། ཡི་གེ་གསུམ་ཚངས་པའི་བུ་ག་ནས་ཕྱུང་ནས་པར་བུ་ནག་པོ་ཆེན་པོ་ལ་བསྟིམས་པའམ། ཞལ་ནས་ཞལ་དུ་འཁོར་བའི་ཕྱིར་བཟླས་པ་བྱ་ཞེས་བྱའོ། །དུས་གསུམ་
རྒྱུ་ཞེས་བྱ་བ་ནི་པར་བུའི་ཆོ་ག་མ་རྫོགས་ཀྱི་བར་དུའོ། །མཐུན་པའི་དམ་རྫས་ཞེས་བྱ་བ་ནི་དུག་གི་ལ་དུ་ལ་བརྟེན་པའི་གཏོར་མར་བྱའོ། །རྣལ་འབྱོར་མཚན་མ་ཐོབ་པ་ཡིས། །ཞེས་བྱ་བ་ནི་སྔོན་དུ་ཐུན་མོང་གི་བསྙེན་པ་རྫོགས་པའི་ཕྱིར་རོ། །པར་བུ་ཉེ་བར་སྒྲུབ་པ་དང་ལྡན་པའི་ཕྱིར་རོ། །ཆོ་ག་

བརྩམ་པར་བྱ་བ་ནི་ཤིན་ཏུ་མཐུན་པ་བཞིས་སམ། ཡང་ན་རྣལ་འབྱོར་པ་གཅིག་གིས་གོ་རིམས་ཀྱི་ཆོ་ག་ཤེས་པར་བྱའོ། །བཀའ་སྩལ་ཞེས་བྱ་བ་ནི་མདུན་བསྐྱེད་ཀྱི་ཉེ་བར་སྒྲུབ་པ་རྒྱས་པར་བཤད་པའོ། །ནག་པོས་གསོལ་པ་ཞེས་བྱ་བ་ནི་ཁ་སྦྱོར་གྱི་ཆོ་ག་ལ་འཇུག་པར་བྱ་བ་ཞུས་པའོ། །བཅོམ་
ལྡན་འདས་ཀྱིས་བཀའ་སྩལ་པ། །ཞེས་བྱ་བ་བཅོམ་ལྡན་འདས་གདུག་པ་འདུལ་བའི་ཕྱིར་ཏིང་ངེ་འཛིན་ལ་སྙོམས་པར་ཞུགས་པའོ། །པར་བུ་ནག་པོ་ཆེན་པོར་བསྐྱེད། །ཅེས་བྱ་བ་ནི། སྔོན་དུ་རྣལ་འབྱོར་བདག་ཉིད་ནི། །ལྷ་ཡི་འཁོར་ལོ་རྫོགས་པར་བྱ། །དེ་ནས་ཐུགས་ཀའི་འོད་ཟེར་གྱིས། །
དཀྱིལ་འཁོར་འཁོར་ལོ་སྤྱན་དྲངས་ཏེ། །པར་བུའི་གནས་སུ་དམིགས་ནས་ནི། །ཐུགས་ཀ་ནས་སྤྲུལ་ནག་པོ་ཡི། །མཆོད་དང་སྡིག་པ་བཤགས་སོགས་བྱ། །གཙོ་བོའི་ཐུགས་ཀའི་འོད་ཟེར་གྱིས། །ཚངས་པའི་གནས་བཞི་ལྡན་པར་བྱ། །མདུན་གྱི་དཀྱིལ་འཁོར་གཙོ་བོ་ཡི། །ཐུགས་
ཀའི་འོད་ནི་རབ་སྤྲོས་ཏེ། །ཁམས་གསུམ་གདུག་པ་འཇོམས་མཛད་དེ། །ཚུར་འདུས་དཀྱིལ་འཁོར་ཐམས་ཅད་ནི། །གཙོ་བོའི་ཐུགས་ཀར་ཞུགས་པ་སྟེ། །གཙོ་བོ་འོད་དུ་ཞུས་ནས་ནི། །སྟོང་པ་ཉིད་དུ་གྱུར་པར་བསམ། །ཧཱུཾ་ལས་ཞེས་པ་རྡོ་རྗེའི་བྲག །ཉི་མའི་སྟེང་དུ་གནས་པ་སྟེ། །བྲག་
གི་སྟེང་ན་ཧཱུཾ་གནས་པ། །ཧཱུཾ་ལས་གསལ་བར་སྤྲོ་བ་ནི། །འབར་བའི་ཕྱོགས་སུ་གྱུར་པ་སྟེ། །གྲི་གུག་ཐོད་པ་འཛིན་པ་སྤྲོ། །ཕྱོགས་སྐྱོང་ལ་སོགས་བགེགས་ཚོགས་ཀྱི། །མགོ་བོའི་སྟེང་དུ་རབ་འདུག་སྟེ། །ཏིལ་གྱི་ཚད་དུ་གཏུབས་བྱས་ནས། །ཁྲོ་བོ་བགེགས་ཀྱི་ཚོགས་རྣམས་ཀུན། །
ཀུན་ཀྱང་འོད་དུ་ཞུ་བ་ལས། །གྲི་གུག་གུར་དང་དྲ་སོགས་གྱུར། །དེ་དབུས་ཆོས་འབྱུང་བསམ་པར་བྱ། །དབུས་སུ་སྣ་ཚོགས་པད་ཉི་ལ། །སྟེང་དུ་བསྒྲུབ་བྱ་གསལ་བར་དམིགས། །བསྒྲུབ་བྱ་གནས་པའི་སྟེང་དུ་ནི། །མེ་ཡི་དཀྱིལ་འཁོར་འབར་བསམས་ཏེ། །དབུས་སུ་ཆོ་ག་ལྔ་ཡིས་
ནི། །གཙོ་བོ་ནག་པོ་ཆེན་པོར་བསྐྱེད། །རབ་ཏུ་འཇིགས་བྱེད་མ་ལ་སོགས། །ཟུར་གསུམ་དུ་ནི་བསྐྱེད་པར་བྱ། །སྐུ་མདོག་ནག་མོ་ཆེར་འཇིགས་མ། །གྲི་གུག་ཐོད་པ་འཛིན་པ་སྟེ། །སྤྱན་གསུམ་སྡང་མིག་མཆེ་བ་གཙིགས། །དེ་ཡི་ལྟོ་བར་གནས་པ་ནི། །ཞེས་བྱ་བ་ནི། གཙོ་བོའི་ལྟོ་བར་

གནས་པ་སྟེ། །དེ་ཡང་བསྐྱེད་པར་བྱ་བ་སྟེ། །པར་བུ་ཁ་སྦྱོར་རིམ་པ་གསུམ། །ཞེས་བྱ་བ་ནི་དེ་ཡང་། པར་བུའི་འཁོར་ལོའི་གནས་དང་བཞིའོ། །ཁ་སྦྱོར་ནི་གཡས་སྐོར་དང་གཡོན་སྐོར་དུ་གནས་པའི་ཕྱིར་རོ། །གསུམ་ཞེས་བྱ་བ་ནི་དབྱིབས་དང་། གསང་བ་དང་སྟོབས་ཀྱི་པར་
བུའོ། །དེ་ཡང་། དབྱིབས་ནི་རཾ་ལས་སྐྱེས་པ་སྟེ། །ཁ་དོག་དམར་པོ་མེ་ཡི་དབྱིབས། །སྔགས་ནི་མཚོན་ཆ་བཀོད་དང་མཚུངས། །སྐུ་ཡི་པར་བུ་བཤད་པའོ། །དེ་ནས་གསང་བའི་པར་བུ་ནི། །ཨ་ལས་སྐྱེས་པའི་བདག་ཉིད་དེ། །དུམ་བུ་གཅིག་པ་ཁ་སྦྱོར་གནས། །དེ་ཡི་སྔགས་ཀྱི་ཕྲེང་བ་ནི། །
འཁོར་ལོ་རྩིབས་བརྒྱད་གནས་པའོ། །སྔགས་ནི་མར་མེ་ལྟ་བུར་མཚུངས། །གསུང་གི་པར་བུའི་བདག་ཉིད་དེ། །ཨེ་ཡི་རྣམ་པ་ལས་སྐྱེས་པའི། །གྲུ་གསུམ་སྟོབས་ཀྱི་པར་བུ་བཤད། །སྟེང་དང་འོག་གི་ཕྱོགས་དག་ཏུ། །གྲི་གུག་ཐོད་པའི་བདག་ཉིད་ཅན། །བསྒྲུབ་བྱ་མྱུར་དུ་གསོད་པ་
ཡི། །དྲག་པོ་སྟོབས་དང་ལྡན་པའི་ཕྱིར། །ཐུགས་ཀྱི་པར་བུར་ཡང་དག་བཤད། །སྐུ་གསུང་ཐུགས་ཀྱི་སྦྱོར་བ་ཡིས། །གདུག་པ་མ་ལུས་སྒྲོལ་བའི་ཕྱིར། །པར་བུ་རིམ་པ་གསུམ་དུ་བཤད། །དེ་ཡི་དབུས་སུ་བསམ་ཞེས་བྱ་བ་ལ་སོགས་པ་ནི་བཀའ་སྡོད་བསྐྱེད་པར་བྱ་སྟེ་གོ་སླའོ། །དེ་ནས་
ཐུགས་ཀའི་འོད་ཟེར་གྱིས། །ཞེས་བྱ་བ་ནི། གཙོ་བོའི་ཐུགས་ཀའི་ཧཱུཾ་ལས་ནི། །ལྕགས་ཀྱུའི་ཚུལ་དུ་རབ་སྤྲོས་ཏེ། །ཡེ་ཤེས་འཁོར་ལོ་སྤྱན་དྲངས་ནས། །ཕྱག་རྒྱ་བཞི་ཡི་སྦྱོར་བས་བསྟིམ། །དེ་ནས་ཐུགས་ཀའི་འོད་ཟེར་གྱིས། །བདེ་གཤེགས་སྤྱན་དྲངས་དབང་བསྐུར་ནས། །རིགས་ཀྱི་གཙོ་
བོས་རྒྱས་གདབ་བྱ། །དེ་ནས་ཐུགས་ཀ་ནས་སྤྲོས་པའི། །ཕྱི་ཡི་སྙིང་པོས་ཁྱབ་པར་བྱ། །དེ་ནས་མཆོད་པ་གཏོར་མ་ནི། །ཁྱད་པར་སྔགས་ཀྱིས་དབུལ་བར་བྱ། །དམ་ཚིག་རྗེས་སུ་དྲན་པའི་ཕྱིར། །སྔགས་ནི་ཐུགས་ཀར་བསྟིམ་པར་བྱ། །དེ་ནས་ནང་གི་སྙིང་པོ་ལ། །ཐུགས་ཀར་བསྙེན་པ་བསྐྱལ་ནས་
ནི། །རྩ་བའི་སྔགས་དང་རབ་ལྡན་པས། །ཁྱད་པར་སྔགས་ཀྱི་སྦྱོར་བ་ཡིས། །མཆོད་པ་རྒྱུན་མི་འཆད་པར་བྱ། །དེ་ནས་ཐུགས་ཀའི་འོད་ཟེར་གྱིས། །ཞེས་བྱ་བ་ནི། བདག་གི་ཐུགས་ཀའི་དཀྱིལ་འཁོར་ནི། །རབ་ཏུ་འཇིགས་བྱེད་མ་ལ་སོགས། །མཁའ་འགྲོའི་འཁོར་ལོ་གནས་པ་སྟེ། །དེ་ཡི་

ཐུགས་ཀའི་འོད་ཟེར་ནི། །ལྕགས་ཀྱུ་ཞགས་པའི་ཚུལ་དུ་སྤྲོ། །ཞེས་བྱའོ། །བསྒྲུབ་བྱ་གསལ་བར་དམིགས་ནས་ནི། །གནས་ལྔར་ལྕགས་ཀྱུ་ཞུགས་ནས་ནི། །ཞགས་པས་ཡན་ལག་བཅིང་བྱ་སྟེ། །བཀུག་ནས་བཀའ་སྡོད་ལྟོ་བར་བསྟིམ། །དེ་ལྟར་དགུག་པའི་སྦྱོར་བ་ནི། །རྣལ་འབྱོར་བསམ་
གཏན་གཅིག་པས་ནི། །རྒྱུན་མི་འཆད་པར་ཞེས་བྱའོ། །བླ་མ་རྡོ་རྗེ་འཛིན་པ་ཞེས་བྱ་བ་ལ་སོགས་པ་ནི་ཐམས་ཅད་དུ་སྔོན་དུ་འགྲོ་བའི་ཚིག་སྟེ་གོ་སླའོ། །དྲག་པོའི་བསམ་གཏན་ལྡན་གྱུར་ནས། །ཞེས་བྱ་བ་ནི། དེ་ནས་རྣལ་འབྱོར་དབང་ཕྱུག་གི །ཐུགས་ཀར་ལྷ་ཡི་འཁོར་ལོ་ནི། །མེ་ཡི་
དབུས་སུ་གནས་པར་བསམ། །དེ་ཡི་ཐུགས་ཀའི་འོད་ཟེར་ནི། །གྲི་གུག་ཕྲེང་བ་ལྟར་སྤྲོས་ཏེ། །བསྒྲུབ་བྱའི་ལུས་ནི་ཐམས་ཅད་ལ། །གྲི་གུག་འཁོར་ལོ་འཁོར་བའི་ཕྱིར། །དྲག་པོ་བསམ་གཏན་ཞེས་བྱའོ། །གྲི་གུག་ཐོད་པ་ཐོགས་ཞེས་བྱ་བ་ནས། བསམ་གཏན་སྔགས་ཀྱིས་གསད་པར་བྱ། །
ཞེས་བྱ་བ་ནི། དེ་ཡང་བསམ་གཏན་ནི་པར་བུའི་སྔགས་ལས། མཚོན་ཆ་ལྟ་བུའི་འོད་སྤྲོས་ཏེ། །བསྒྲུབ་བྱའི་ཤ་ནི་གཅོད་པར་བསམ། །སྔགས་ཞེས་བྱ་བ་ནི། བདག་གི་ཐུགས་ཀའི་འོད་ཟེར་གྱིས། །གྲི་གུག་ཕྲེང་བ་ལྟར་སྤྲོས་ཏེ། །བསྒྲུབ་བྱའི་ལུས་ལ་འཁོར་བར་བྱ། །མཐུན་པའི་དམ་རྫས་
ཞེས་བྱ་བ་ནི་བསྟེན་པའི་གཏོར་མ་སྟེ་རྒྱུན་དུ་སྦྱིན་པའོ། །ཞག་བདུན་དུ་ཞེས་བྱ་བ་ནི་མདོར་བསྟན་པའི་ཚིག་གོ། །བཀའ་སྩལ་ཏོ་ཞེས་བྱ་བ་ནི་སྡུད་པ་པོས་པར་བུའི་ཆོ་ག་བསྡུས་ཏེ་འཁོར་ལ་བཤད་པའོ། །དེ་ནས་ཞེས་བྱ་བ་ལ་སོགས་པ་ནི་སྔགས་ཀྱི་བྱེ་བྲག་ཞུས་པ་སྟེ་གོ་སླའོ། །དང་པོར་པར་
བུ་བཅའ་བ་ཞེས་བྱ་བ་ནི། དང་པོར་ལྷ་ཡི་འཁོར་ལོ་ནི། །པར་བུ་ཉིད་ལ་བསྐྱེད་པའི་ཕྱིར། །དང་པོར་པར་བུ་བཅའ་བར་བཤད། །གཉིས་པ་ལྷ་ལ་བསྙེན་པར་འགྱུར། །ཞེས་བྱ་བ་ནི། ཉི་མ་གཉིས་པས་ནི་ལྷའི་ནུས་པ་དང་ལྡན་པའི་ཕྱིར་རོ། །གསུམ་པ་བསྒྲུབ་བྱ་དགུག་ཅེས་བྱ་བ་
ནི་གསུམ་པ་ཉིད་ཀྱིས་བསྒྲུབ་བྱ་དགུག་པའི་མཐུ་དང་ལྡན་པའི་ཕྱིར་རོ། །བཞི་པ་མྱོས་པར་བྱེད་ཅེས་བྱ་བ་ནི་བསྒྲུབ་བྱ་སྲོག་སྐྱོབ་པའི་ལྷ་དང་བྲལ་བའི་ཕྱིར་རོ། །ལྔ་པ་ནི་གསོད་པར་བྱེད་ཅེས་བྱ་བ་ནི་ཉི་མ་ལྔ་པས་གསོད་པའི་མཐུ་དང་ལྡན་པའི་ཕྱིར་རོ། །དྲུག་པས་ལྡོག་པ་མེད་པར་བྱེད། །

ཅེས་བྱ་བ་ནི་ཐེ་ཚོམ་དང་བྲལ་བའི་ཕྱིར་རོ། །ཕུང་པོ་རྣམ་ཤེས་བྲལ་བྱས་ཏེ། །ཞེས་བྱ་བ་ནི། ཉི་མ་བདུན་གྱི་སྦྱོར་བ་ཡིས། །རྣམ་ཤེས་བྲལ་བ་ནུས་པའི་ཕྱིར། །དེ་ཡི་སྦྱོར་བ་ལྡན་པར་བྱ། །གཙོ་བོའི་ཐུགས་ཀའི་འོད་ཟེར་ནི། །བསྒྲུབ་བྱའི་གནས་གསུམ་ལ་ཐིམ་སྟེ། །བསྒྲུབ་
བྱའི་རྣམ་ཤེས་བདག་ཉིད་ནི། །ཡི་གེ་གསུམ་དུ་རབ་བྱུང་སྟེ། །བདག་གི་ཐུགས་ཀར་གཞུག་པར་བྱ། །ཧཱུཾ་དང་གཉིས་སུ་མེད་པ་ལས། །རྩ་བའི་སྔགས་ཀྱི་བཟླས་པ་ནི། །ཧཱུཾ་ལ་འཁོར་བར་བཟླ་བར་བྱ། །བར་མ་སྐྱེ་བའི་བསམ་གཏན་ནི། །ཐུགས་ཀའི་ཧཱུཾ་ལས་བསྐྱེད་པ་སྟེ། །མདུན་གྱི་ནམ་
མཁའི་དཀྱིལ་འཁོར་དུ། །མངོན་པར་བྱང་ཆུབ་ལྔ་ཡིས་ནི། །ལྷའི་འཁོར་ལོ་རབ་བསྐྱེད་དེ། །ཡེ་ཤེས་སྤྱན་དྲངས་ལ་སོགས་པའི། །དབང་བསྐུར་མཆོད་བསྟོད་བདུད་རྩི་མྱང་། །དེ་དག་ཐམས་ཅད་བྱས་ནས་ནི། །སྙིང་གི་དབུས་གྱུར་པདྨར་ནི། །ཡི་གེ་རྣམས་ཀྱི་མཆོག་གྱུར་པ། །སྐུ་གསུང་
ཐུགས་ཀྱི་རྡོ་རྗེ་ཡིས། །ཡེ་ཤེས་ཆེན་པོའི་ཐིག་ལེ་བསམ། །དེ་ཡང་བསམ་གྱིས་མི་ཁྱབ་སྟེ། །བསམ་གྱིས་མི་ཁྱབ་དེ་བསམས་ན། །དེས་ནི་གཟུགས་ནི་ཐོབ་པའི་ཕྱིར། །དགའ་ལྡན་གནས་སུ་བསྐྱལ་ཞེས་བྱ། །འབྲས་བུ་ཆེན་པོ་ཞེས་པ་ནི། །རྫོགས་པ་ཆེན་པོའི་རིམ་པ་སྟེ། །པར་
བུའི་ལྷ་ཡི་བདག་ཉིད་ཀྱིས། །རྫོགས་པ་ཆེན་པོ་བསྒྲུབ་པར་བྱ། །རྡོ་རྗེ་རྩེ་མོ་འབར་བ་ནི། །སེམས་དཔའི་ཡི་གེ་བསམ་པར་བྱ། །ཚངས་པའི་སྒོ་ཡི་ནང་དུ་ནི། །བདེ་བའི་ཐིག་ལེ་བསམ་པར་བྱ། །རྡོ་རྗེ་རྩེ་མོ་འབར་བ་ལས། །ཡེ་ཤེས་མེ་བདུན་རབ་སྤྲོས་ཏེ། །ཕུང་པོ་ཁམས་རྣམས་
གཞོམ་པར་མཛད། །བདེ་ཆེན་ཧཾ་ལས་བྱུང་བ་ཡི། །བྱང་ཆུབ་སེམས་ཀྱི་ཆུ་བོས་བཀྲུ། །དེ་ལྟར་ཆུ་བདུན་རྫོགས་པ་དང་། །ཡེ་ཤེས་རླུང་གིས་རབ་འཇིག་སྟེ། །ལྷ་ཡི་ལེའུར་གསུངས་པ་ཡི། །ཐོག་མ་ཐ་མ་དབུས་མེད་ཅིང་། །དཔེ་མེད་ཀུན་འགྲོ་ནམ་མཁའི་ངོས། །འབྲས་བུ་ཆེན་པོར་
རབ་ཏུ་བཤད། །དབང་ཕྱུག་ཆེན་པོ་ཞེས་བྱ་བ་ལ་སོགས་པ་ནི་པར་བུའི་ཆེ་བའི་ཡོན་ཏན་ཏེ་གོ་སླའོ། །གསང་བ་ཞེས་བྱ་བ་ནི་འབྱུང་བར་དཀའ་བ་དང་ཐུན་མོང་མ་ཡིན་པའི་ཕྱིར་གསང་བའོ། །པར་བུའི་ཆོ་ག་འབའ་ཞིག་ཡོངས་སུ་བསྡུས་ཏེ་བཤད་པས་ན་པར་བུའི་ལེའུ་ཞེས་བྱའོ། །

པར་བུའི་ལེའུའི་བཤད་པ་སྟེ་ལྔ་པའོ།། །།དེ་ནས་ཞེས་བྱ་བ་ནི་སྦྱོར་ཀ་བྱེ་བྲག་གཞན་ལ་འཇུག་པ་སྟེ། འཁོར་གྱི་ཚོགས་རྣམས་ཀྱིས་ཞུས་པའོ། །གསང་བའི་པར་བུ་ཞེས་བྱ་བ་ནི་པར་བུ་ལས་གཞན་པའི་སྦྱོར་ཀ་བསྟན་པའི་ཕྱིར་དེའི་ཕྱིར་ཞེས་བྱ་བ་ལ་སོགས་པ་ནི་གོ་སླའོ། །
བཀའ་སྩལ་ཏོ་ཞེས་བྱ་བ་ནི་སྡུད་པ་པོས་མདོར་བསྟན་པའོ། །དེ་ནས་གསོལ་བ་ཞེས་བྱ་བ་ནི་བཀའ་སྩལ་ཏོ་ཞེས་བྱ་བས་འཁོར་ལོའི་ཆོ་གའི་དོན་བསྡུས་པའོ། །དེ་ཡང་དང་པོ་འཁོར་ལོ་བཅའ་བ་ཞེས་བྱ་བ་ནས་གསད་པར་བྱའོ་ཞེས་བྱ་བ་ནི་དོན་གསུམ་གྱིས་འགྲུབ་པར་འགྱུར་གྱི་གཞན་གྱིས་ནི་
མ་ཡིན་པའི་ཕྱིར་རོ། །གསོལ་པ་ཞེས་བྱ་བ་ནི་དོན་གསུམ་གྱི་བདག་ཉིད་རྒྱས་པར་ཞུས་པའོ། །བཅོམ་ལྡན་འདས་ཀྱིས་བཀའ་སྩལ་པ། ཞེས་བྱ་བ་ནི་བཅོམ་ལྡན་འདས་འཁོར་ལོ་ཆེན་པོའི་ཏིང་ངེ་འཛིན་ལ་ཞུགས་ཞེས་བྱ་བའོ། །དང་པོར་ཞེས་བྱ་བ་ནི་འཁོར་ལོའི་ཆོ་གའི་སྔོན་དུ་འགྲོ་བའོ། །
རྣལ་འབྱོར་གྱི་དབང་ཕྱུག་ཅེས་བྱ་བ་ནི། ནག་པོ་ཆེན་པོའི་དཀྱིལ་འཁོར་དུ་དབང་བསྐུར་ཞིང་རྗེས་སུ་གནང་བ་ཐོབ་པའོ། །བསམ་གཏན་དང་ལྡན་པར་བྱས་ནས་ཞེས་བྱ་བ་ནི་སྔོན་དུ་བསྙེན་པ་རྫོགས་པར་གྱུར་པའོ། །དུར་ཁྲོད་གནས་སུ་ཞེས་བྱ་བ་ནི་འཁོར་ལོ་ཡང་དུར་ཁྲོད་གནས་སུ་བསྒྲུབ་པའི་ཕྱིར་དེ་ནི་
འཁོར་ལོ་བྲི་ཞེས་བྱ་བ་ལ་སོགས་པ་ནི་གོ་སླའོ། །ཆོ་གས་སྣག་ཚ་བྱ་ཞེས་བྱ་བ་ནི། བདུད་རྩིས་མཎྜལ་བྱས་ནས་སུ། །ཐོད་པར་སྣག་ཚ་ཚོགས་བྱ་སྟེ། །གཙོ་བོའི་ཐུགས་ཀར་འོད་ཟེར་གྱིས། །ཕོག་ནས་རང་བཞིན་མེད་པར་གྱུར། །དེར་ནི་ནག་པོ་ཆེན་པོ་ཡི། །ཆོ་གས་སྐུ་ནི་བསྐྱེད་པར་བྱ། །ཡེ་ཤེས་
སྤྱན་དྲངས་ལ་སོགས་པའི། །ཡན་ལག་ཆོ་ག་ཀུན་བྱས་ཏེ། །ནག་པོ་ཆེན་པོའི་ལྟོ་བར་ནི། །ཨཱ་ལི་ཀཱ་ལི་ལས་བྱུང་བའི། །ཟླ་བ་ཉི་མའི་དབུས་སུ་ནི། །ཧཱུཾ་གི་བདག་ཉིད་བསམ་པར་བྱ། །དེ་ནས་ཐུགས་ཀའི་འོད་ཟེར་གྱིས། །རྩ་བའི་སྙིང་པོའི་སྔགས་སྤྲོས་ཏེ། །ཧཱུཾ་ལ་སྟོང་ཕྲག་བསྟིམ་པར་བྱ། །
དེ་རྣམས་འོད་དུ་ཞུ་བ་ལས། །འཁོར་ལོའི་སྣག་ཚར་གྱུར་པར་བསམ། །ལྷོ་ནུབ་མཚམས་སུ་ཁ་བལྟས་ཏེ། །ཞེས་བྱ་བ་ནི་བསྐྱེད་པའི་རིམ་པ་དང་ལྡན་པར་བྱའོ། །མི་མཐུན་སྒྲོ་ཞེས་བྱ་བ་ནི་བྱ་རོག་དང་འུག་པའི་སྒྲོས་བྱ་བའོ། །འཁོར་ལོ་བཞི་རིམ་ཞེས་བྱ་བ་ལ་སོགས་པ་ནི་གོ་སླའོ། །བསྒྲུབ་

བྱའི་མིང་ཡིག་གཞུག་ཅེས་བྱ་བ་ནི་ཧཱུཾ་གཉིས་ཀྱི་བར་དུའོ། །འོག་མ་གཡས་སུ་ཞེས་བྱ་བ་ནི་ཉི་མ་ཕྱེད་ན་བྲི་བའོ། །སྟེང་མ་གཡོན་དུ་ཞེས་བྱ་བ་ནི་ཡིག་ལོག་ཏུ་བྲི་བ་སྟེ་ནམ་ཕྱེད་ན་བྲི་བའོ། །འཁོར་ལོའི་ནག་པོ་ཆེན་པོ་ཞེས་བྱ་བ་ནི་ཆོ་གར་བྱས་པའི་ཚོན་གྱིས་སྐུ་མཚན་ཉིད་དང་ལྡན་པར་བྲི།
ཞལ་དུ་བསྒྲུབ་བྱའི་མིང་ཡིག་དགོད། །ཅེས་བྱ་བ་ནི་འགུགས་པའི་ཡི་གེའི་བར་དུ་ལྡན་པར་བྱའོ། །དེ་ནས་གཞན་ཡང་ཞེས་བྱ་བ་ནི་འཁོར་ལོ་བྲི་བ་ཚར་ནས་ལིངྒའི་ཆོ་ག་ལ་འཇུག་པར་བྱ་སྟེ། དེ་ཡང་ཚ་བ་གསུམ་ཞེས་བྱ་བ་ལ་སོགས་པའོ། །ཆོ་གར་བྱ་བ་ལ་ནི་གོང་དུ་བསྟན་པའི་ལིངྒའི་རྒྱུ་སྟ་གོན་ལ་
གནས་པའི་ཆོ་ག་རྫོགས་པར་བྱ་བའོ། །སྙིང་གར་གཞུག་ཅེས་བྱ་བ་ནི་གྲོ་ག་ལ་རེ་བ་ལས་བྱུང་བའི་འཁོར་ལོ་བྲིས་ཏེ། དབུས་སུ་ཨོཾ་གྱི་དང་པོ་དང་། ཧཱུཾ་ཧཱུཾ་ཕཊ་ཕཊ་ཀྱི་མཐའ་ཅན་གྱི་སྔགས་བྲིས་ཏེ་གཞུག་པར་བྱའོ། །ལིངྒ་འཁོར་ལོའི་ནང་དུ་གཞག་པར་བྱ་བ་ནི། སྣ་ཚོགས་དུག་ལ་མཎྜལ་ནི། །
མེ་ཡི་དབྱིབས་སུ་བྲི་བར་བྱ། །དེ་ནས་དེ་ཡི་དབུས་སུ་ནི། །དཔའ་བོའི་ཐོད་རུས་ཕྱེ་མ་ཡིས། །ཧཱུཾ་གི་ཡི་གེ་བྲི་བར་བྱ། །དེ་ཡི་སྟེང་དུ་འཁོར་ལོ་ནི། །མཉམ་པའི་མྱུ་གུས་རབ་བརྟེན་ཏེ། །སྟེང་དང་འོག་ཏུ་གཞག་པར་བྱ། །དེ་ནས་ཆོ་གར་བྱ་བ་ནི། །གཙོ་བོའི་ལྷ་ཡི་འཁོར་ལོ་ནི། །སྔོན་དུ་རྫོགས་
པར་བྱས་ནས་ནི། །དེ་ནས་ཐུགས་ཀའི་འོད་ཟེར་གྱིས། །འཁོར་ལོ་རང་བཞིན་མེད་བྱས་ནས། །དེར་ནི་ཧཱུཾ་ལས་སྐྱེས་པ་ཡི། །ཉི་མའི་སྟེང་ན་རྡོ་རྗེའི་བྲག །དེ་ཡི་སྟེང་ན་ཧཱུཾ་གནས་པ། །ཧཱུཾ་ལས་གསལ་བར་སྤྲོ་བ་ནི། །འབར་བའི་ཚོགས་སུ་རབ་སྤྲོས་ཏེ། །བགེགས་ཀྱི་ཚོགས་རྣམས་རབ་
བཅོམ་ནས། །དེ་ནས་སྲུང་བའི་འཁོར་ལོར་གྱུར། །དེ་ཡི་དབུས་སུ་ཆོས་འབྱུང་བསམ། །ཆོས་འབྱུང་དབུས་སུ་པད་ཉི་ལ། །དེ་ཡི་སྟེང་དུ་བསྒྲུབ་བྱ་ནི། །ཁ་དོག་ཉམས་པའི་གཟུགས་ཀྱིས་གནས། །དེ་ཡི་སྙིང་གར་བསྐྱེད་པ་ནི། །ཆོ་ག་ལྔ་ཡི་སྦྱོར་བ་ཡིས། །ལྷ་ཡི་འཁོར་ལོ་
བསྐྱེད་པར་བྱ། །ཚནྡོ་ཧ་ཡི་བདག་མོ་སོགས། །ལྷ་མོ་གསུམ་ནི་བསྐྱེད་པར་བྱ། །སྐུ་མདོག་སྔོན་མོ་ཁྲོ་གཉེར་མ། །ཞལ་གཅིག་ཕྱག་གཉིས་འཇིགས་གཟུགས་མ། །ལྕགས་ཀྱུ་ཞགས་པ་འཛིན་པ་སྟེ། །བརྐྱང་བསྐུམ་བསྒྲུབ་བྱའི་སྟེང་ན་འགྱིང་། །དེ་ནས་གཙོ་བོའི་ལྟོ་བར་ནི། །རཾ་

ལས་མེ་ཡི་དཀྱིལ་འཁོར་བསམ། །དེ་ཡི་དབུས་སུ་བསྐྱེད་པ་ནི། །བཀའ་སྡོད་འཁོར་ལོ་དང་བཅས་བསྐྱེད། །གཙོ་བོའི་ཐུགས་ཀའི་འོད་ཟེར་གྱིས། །རང་བཞིན་འཁོར་ལོ་སྤྱན་དྲངས་བསྟིམ། །བདེ་གཤེགས་སྤྱན་དྲངས་དབང་བསྐུར་ནས། །རིགས་ཀྱི་བདག་པོས་རྒྱས་གདབ་བྱ། །དེ་ནས་ཐུགས་
ཀའི་འོད་ཟེར་ནི། །ཕྱི་ཡི་སྙིང་པོ་སྤྲོས་པ་སྟེ། །སོ་སོའི་ཐུགས་ཀར་བརྒྱ་ཕྲག་བསྟིམ། །དེ་ནས་མཆོད་པ་གཏོར་མ་ནི། །རྩ་བའི་སྔགས་ཀྱིས་དབུལ་བར་བྱ། །དམ་ཚིག་ཆོ་ག་བྱས་ནས་ནི། །ནང་གི་སྙིང་པོས་བསྙེན་པ་ནི། །ཐུན་རེ་སྟོང་ཕྲག་རེ་རེ་བསྐྱལ། །དེ་ནས་དགུག་པའི་སྦྱོར་བ་ནི། །གཙོ་
བོའི་ཐུགས་ཀའི་འོད་ཟེར་གྱིས། །མཁའ་འགྲོ་རྣམས་ནི་བསྐུལ་ནས་སུ། །མཁའ་འགྲོ་གསུམ་གྱི་ཐུགས་ཀ་ནས། །སྤྲུལ་པའི་མཁའ་འགྲོ་མ་སྤྲུལ་ཏེ། །བསྒྲུབ་བྱ་གསལ་བར་དམིགས་བྱས་ལ། །གཙོ་བོའི་ལྟེ་བར་གཞུག་པར་བྱ། །དེ་ལྟར་དགུག་གཞུག་སྦྱོར་བ་ནི། །ཐུན་དྲུག་ཏུ་ནི་
དགུག་པར་བྱ། །དེ་ནས་ཞེས་བྱ་བ་ནི་གོ་སླའོ། །ཁྱིའམ་དོམ་གྱི་ཐོད་པ་ལ། །བཙན་དུག་ཚ་བའི་རྫས་ཀྱིས་བྱུགས། །སྣ་ཚོགས་རྡོ་རྗེ་ནང་དུ་བྲི། །ལྟེ་བའི་རྡོ་རྗེ་སྙིང་པོ་ལས། །གསད་པའི་སྔགས་ནི་བྲི་བར་བྱ། །ཐོད་པ་དེར་ནི་འཁོར་ལོ་གཞུག །སྐུད་པ་དམར་ནག་ཅེས་བྱ་བ་ལ་སོགས་པ་ནི་གོ་
སླའོ། །ཐོད་པའི་འཁོར་ལོ་བྲི་ཞེས་བྱ་བ་ནི། འཁོར་ལོ་རྩིབས་བཞི་མུ་ཁྱུད་བཅས། །དབུས་སུ་མེ་ཡི་འཁོར་ལོ་ནི། །རེ་ཕ་གསུམ་གྱིས་མཚན་པ་བྲི། །དབུས་སུ་ནང་གི་སྙིང་པོ་ནི། །གསད་པའི་ཡི་གེ་ལྡན་པར་བྲི། །དེ་ནས་འཁོར་ལོའི་རྩིབས་ལ་ནི། །གསང་བའི་སྔགས་ནི་བྲི་བར་བྱ། །
དེ་ཡང་གཡས་སྐོར་གཡོན་སྐོར་དུ། །འཁོར་ལོ་ལེགས་པར་བྲི་བར་བྱ། །ཕྱི་རོལ་ཚ་བའི་རྫས་ཀྱིས་བྱུག །ཅེས་བྱ་བ་ལ་སོགས་པ་ནི་གོ་སླའོ། །ཕུར་བུའི་རབ་གནས་ཞེས་བྱ་བ་ནི་དཀྱིལ་འཁོར་གྱི་ལེའུར་ཤེས་པར་བྱའོ། །འཁོར་ལོ་མཎྜལ་སྟེང་བཞག་ནས། །ཞེས་བྱ་བ་ནི་གོང་དུ་
བསྟན་པའི་མཎྜལ་གྱི་སྟེང་དུ་འཁོར་ལོ་བཞག་ནས། བསྐྱེད་པའི་རིམ་པ་ཚུལ་བཞིན་བསྒོམ། །ཞེས་བྱ་བ་ནི། སྔོན་དུ་ལྷ་ཡི་རྣལ་འབྱོར་ནི། །རྣལ་འབྱོར་བདག་ཉིད་ལྡན་པར་བྱ། །དེ་ནས་མཎྜལ་འཁོར་ལོ་ནི། །ཇི་ལྟར་གོང་དུ་བསྟན་པ་བཞིན། །ལྷ་ཡི་འཁོར་ལོ་རྫོགས་པར་བསྐྱེད། །མཆོད་

དང་གཏོར་མ་ཞེས་བྱ་བ་ལ་སོགས་པ་ནི་གོ་སླའོ། །ཐུགས་ཀའི་འོད་ཟེར་ཞེས་བྱ་བ་ནི་དགུག་གཞུག་གི་སྦྱོར་བ་སྟེ་གོང་དུ་བསྟན་པ་བཞིན་ནོ། །དཔལ་ལྡན་ནག་པོ་ཁ་སྦྱོར་གྱིས། །ཞེས་བྱ་བ་ནི་གཙོ་བོའི་ལྟོ་བར་གནས་པའི་བཀའ་སྡོད་ཁ་སྦྱོར་འཁོར་ལོའི་དབུས་སུ་མེའི་དཀྱིལ་
འཁོར་བསམ། བར་དུ་བསྒྲུབ་བྱ་གཞུག་པར་བྱ། །ཞེས་བྱ་བ་ནི་མེའི་དཀྱིལ་འཁོར་དབུས་སུའོ། །བསྒྲུབ་བྱ་གསལ་བར་ཞེས་བྱ་བ་ནི་སྲོག་སྐྱོབ་པའི་ལྷ་དང་བྲལ་བར་བསམ་མོ། །གྲི་གུག་ནི་ཧཱུཾ་ལས་སོ། །འོད་ཅེས་བྱ་བ་ནི་གྲི་གུག་ལས་གྲི་གུག་ལྟ་བུ་སྤྲོས་ཏེ། ལུས་ཀྱི་རྩ་གཅོད་པའི་ཕྱིར་
སྲོག་གཅོད་པ་ཞེས་བྱ་བའོ། །ནས་གཡས་གཡོན་ཞེས་བྱ་བ་ནི་འབྱུང་བ་དང་འཇུག་པའི་རླུང་ངོ་། །སྙིང་གི་ཁྲག་ཅེས་བྱ་བ་ནི་སྲོག་འཛིན་པའི་རླུང་སྙིང་ལ་གནས་པའོ། །འཐུང་ཞེས་བྱ་བ་ནི་གཙོ་བོ་དང་འཁོར་གྱི་ལྷ་རྣམས་ཀྱི་ལྕེ་ལ་ཧཱུཾ་ལས་རྡོ་རྗེ་སྦུབས་མ་བསམ། རྡོ་རྗེ་སྦུབས་མའི་སྦྱོར་བ་ནི། །
བསྒྲུབ་བྱའི་སྣ་ནས་ཞུགས་ནས་ནི། །སྙིང་གི་དབུས་ནས་འདྲེན་པ་ཡི། །ལུས་ཀྱི་བཅུད་རྣམས་འཐུང་བར་བསམ། །འོད་ཟེར་ཞེས་བྱ་བ་ནི་འགུགས་པའི་སྦྱོར་བ་སྟེ་གོང་དུ་བསྟན་ཏོ། །ལན་བདུན་ཞེས་བྱ་བ་ནི་བདུན་ལ་སོགས་སྟོང་རྩ་བརྒྱད་ཀྱི་བར་དུའོ། །ལྕགས་ཀྱུའི་ཕྱག་རྒྱ་ཞེས་བྱ་བ་
ནི་འགུགས་པའི་གྲི་གུག་གི་ཕྱག་རྒྱའོ། །སྔགས་ནི་ཨོཾ་གྱི་དང་པོ་དང་ཧཱུཾ་ཧཱུཾ་ཕཊ་ཕཊ་ཀྱི་མཐའ་ཅན་ནོ། །དགུག་པའི་སྦྱོར་བ་ལྡན་གྱུར་ནས། །གསད་པའི་ལས་ལ་འཇུག་པར་བྱ། །ཕུར་བུ་ཞེས་བྱ་བ་ནི་ཁྲོ་བོར་བསྐྱེད་པ་ཉིད་དོ། །ཉུངས་ཀར་ནི་ཆོ་ག་བྱས་པའོ། །གསང་བའི་སྔགས་
ཞེས་བྱ་བ་ནི་ཁྱད་པར་དུ་གསད་པའོ། །འདི་ན་སྔགས་ཀྱི་རྒྱལ་པོ་སྟེ། །མ་བྱུང་འབྱུང་བར་མི་འགྱུར་རོ། །དེ་ཡང་ཨོཾ་གྱི་དང་པོ་དང་། །ཧཱུཾ་ཧཱུཾ་ཕཊ་ཕཊ་ཀྱི་མཐའ་ཅན་ནོ། །ལུས་ཀྱི་ཐིག་ལེ་ཞེས་བྱ་བ་ནི་ལྷའི་ལེའུར་བསྟན་པ་སྟེ་གོ་སླའོ། །ཐོད་པའི་འཁོར་ལོ་ཞེས་བྱ་བ་ནི་གོ་སླའོ། །རྒྱ་གྲམ་
དུ་ནི་བཅིང་བར་བྱ། །ཞེས་བྱ་བ་ནི། ཐོད་པ་སྟེང་དང་འོག་ཏུ་ནི། །རྡོ་རྗེ་རྒྱ་གྲམ་བཀོད་པ་སྟེ། །དེ་ལྟར་སྔགས་ནི་བྲི་བར་བྱ། །ཕྱོགས་བཞིར་ར་ནི་དབུས་མ་ལ། །སྔགས་ནི་སོ་སོར་བྲི་བར་བྱ། །ཡི་གེ་ཨོཾ་གྱི་དང་པོ་དང་། །ཧཱུཾ་ཧཱུཾ་ཕཊ་ཀྱི་མཐའ་ཅན་ནོ། །དེ་དག་བཟླས་ལ་འཁོར་ལོ་བཅིང་། །ཞེས་

བྱ་བ་ནི། གཙོ་བོའི་ཐུགས་ཀའི་དཀྱིལ་འཁོར་ནས། །ནང་གི་སྙིང་པོ་དང་བཅས་ཏེ། །སྤྲོས་པ་ཐོད་པའི་རྡོ་རྗེ་ལ། །སྟོང་ཕྲག་གཅིག་ནི་བསྟིམ་པར་བྱ། །དེ་ནས་མཆོད་རྟེན་ནག་པོ་ཞེས་བྱ་བ་ལ་སོགས་པ་ནི་མནན་པ་ལས་ཀྱི་ཁ་བསྐང་བ་སྟེ་གོ་སླའོ། །དེ་ནས་གཙོ་བོའི་འཁོར་ལོ་ཡི། །ཁྱད་
པར་ལས་ནི་ཡིན་པར་བཤད། །ཡང་ན་ཞེས་བྱ་བ་ནི། མུ་ཁྱུད་གསད་པའི་རིམ་པ་ནི། །བཀའ་སྡོད་འཁོར་ལོ་བསྒྲུབ་པར་བྱ་བ་སྟེ། དུར་ཁྲོད་འཇིགས་པའི་དབུས་སུ་ནི། །དཀྱིལ་འཁོར་འཁོར་ལོའི་ཁང་པ་བརྩིགས། །དུར་ཁྲོད་འཁོར་ན་ཐམས་ཅད་དམ། །ཕྱོགས་བཞི་གནོད་སྦྱིན་བསྒྲུབ་པར་
བྱ། །དེ་ཡང་མཁའ་འགྲོ་རྒྱ་མཚོར་ནི། །སྒྲུབ་པའི་ཆོ་ག་རྒྱས་པར་བཤད། །འདི་ནི་འཁོར་རྣམས་བསྒྲུབ་པ་ཡི། །འཁོར་ལོ་རྩིབས་བརྒྱད་མུ་ཁྱུད་ལ། །དབུས་སུ་མེ་ཡི་དཀྱིལ་འཁོར་ནི། །ལྟེ་བའི་མུ་ཁྱུད་ཟླུམ་པོ་ལ། །ཐོད་རློན་འབུར་དུ་བཀོད་པར་བྱ། །ཕྱི་རོལ་འཁོར་ལོའི་མུ་ཁྱུད་ནི། །
ར་བ་གསུམ་དང་ལྡན་པར་བྱ། །ཤར་ལ་སོགས་པའི་རྩིབས་བརྒྱད་ལ། །རབ་ཏུ་གཏུམ་པ་ལ་སོགས་པའི། །དུར་ཁྲོད་བརྒྱད་པོ་བྲི་བར་བྱ། །ཤིང་དང་ཕྱོགས་སྐྱོང་ལ་སོགས་པའི། །མཚན་ཉིད་ཐམས་ཅད་ལྡན་པར་བྱ། །དུར་ཁྲོད་རས་ལ་འཁོར་རྣམས་ཀྱི། །སྐུ་ནི་ལེགས་པར་བྲི་བར་བྱ། །དེ་
ཡང་ཤར་ལ་སོགས་པར་ནི། །ནག་པོ་དྲག་པོ་ལ་སོགས་དང་། །ཁྭ་གདོང་ལ་སོགས་ཐམས་ཅད་ཀྱང་། །དཀྱིལ་འཁོར་ལེའུ་ལས་གསུངས་ལྟར། །སྐུ་མདོག་ཕྱག་མཚན་བྲི་བར་བྱ། །དེ་ནས་རབ་གནས་བྱས་ནས་ཀྱང་། །འཁོར་ལོའི་རྩིབས་རྣམས་དབུས་སུ་ནི། །རིམ་པས་ལེགས་པར་
དགོད་པར་བྱ། །དེ་ནས་ཐོད་པའི་ནང་དུ་ནི། །མི་ལ་སོགས་པའི་ཤ་ལྔ་དང་། །ཆང་དང་བདུད་རྩི་ལ་སོགས་པའི། །མཐུན་པའི་རྫས་ཀྱི་གཏོར་མ་ནི། །ལྷ་རྣམས་མདུན་དུ་གཞག་པར་བྱ། །དེ་ནས་བདག་ཉིད་རྣལ་འབྱོར་པ། །ལྷ་ཡི་འཁོར་ལོ་བསྐྱེད་པར་བྱ། །དེ་ནས་ཐུགས་ཀའི་འོད་
ཟེར་གྱིས། །འཁོར་ལོ་དག་པར་བྱས་ནས་ནི། །ནམ་མཁའ་ལྟ་བུའི་དབུས་སུ་ཡཾ། །རཾ་ལས་བྱུང་བའི་ཉི་མ་ལ། །དེ་སྟེང་ཧཱུཾ་ལས་རྡོ་རྗེའི་བྲག །སྟེང་དུ་ཧཱུཾ་ནི་འབར་བ་ལ། །འོད་ཟེར་གུར་དང་དྲ་སོགས་གྱུར། །དེ་ཡི་དབུས་སུ་ཆོས་འབྱུང་བསམ། །ཆོས་འབྱུང་དབུས་སུ་ཡཾ་ལ་སོགས། །ཡི་གེ་

བཞི་ལས་བྱུང་བ་ཡི། །དཀྱིལ་འཁོར་རིམ་པས་བསྐྱེད་པར་བྱ། །སྟེང་དུ་བྷྲཱུཾ་ལས་འཁོར་ལོ་ནི། །དབུས་སུ་བྷྲཱུཾ་གྱིས་མཚན་པ་བསྐྱེད། །དེ་དག་ཡོངས་སུ་གྱུར་པ་ལས། །དཀྱིལ་འཁོར་འཁོར་ལོའི་ཁང་པ་བསྐྱེད། །དབུས་སུ་མེ་ཡི་དཀྱིལ་འཁོར་ནི། །ཤིན་ཏུ་འབར་བའི་དབྱིབས་
སུ་གནས། །འཁོར་ལོའི་རྩིབས་ནི་བརྒྱད་པོ་ལ། །དྲག་ཏུ་གཏུམ་པ་ལ་སོགས་པའི། །དུར་ཁྲོད་བརྒྱད་པོ་ཐམས་ཅད་ཀྱང་། །ཤིན་ཏུ་འཇིགས་པའི་གཟུགས་ཀྱིས་གནས། །འཁོར་ལོའི་རྩིབས་ཀྱི་ཕྱི་རོལ་དུ། །མེ་ཡི་དཀྱིལ་འཁོར་བསམ་པར་བྱ། །དེ་ནས་འཁོར་ལོ་དེ་དག་ཏུ། །ལྷ་ཡི་འཁོར་
ལོ་བསྐྱེད་པར་བྱ། །དེ་ཡང་དབུས་ལ་སོགས་པ་ནི། །སྣ་ཚོགས་པདྨ་ཉི་མ་ནི། །བཾ་དང་རཾ་ལས་བསྐྱེད་པར་བྱ། །དེ་ཡི་སྟེང་དུ་རོ་ཡི་གདན། །སྙིང་གར་ཧཱུཾ་ལས་སོ་སོ་ཡི། །ཕྱག་མཚན་གསལ་བར་བསྐྱེད་པར་བྱ། །དེ་དག་ཡོངས་སུ་གྱུར་པ་ལས། །གཙོ་བོ་ལ་སོགས་ལྷ་རྣམས་བསྐྱེད། །ཀུན་
ཀྱང་ཞལ་གཅིག་ཕྱག་གཉིས་པ། །བརྐྱང་བསྐུམ་རོ་ཡི་གདན་ལ་གནས། །ཀུན་ཀྱང་འཇིགས་པའི་གཟུགས་ཅན་ཏེ། །ལྷ་རྣམས་སྐུ་མདོག་ཕྱག་མཚན་ནི། །ལྷ་ཡི་ལེའུར་ཤེས་པར་བྱ། །དེ་ནས་ཐུགས་ཀའི་འོད་ཟེར་གྱིས། །རང་བཞིན་དཀྱིལ་འཁོར་སྤྱན་དྲངས་བསྟིམ། །བདེ་
གཤེགས་སྤྱན་དྲངས་དབང་བསྐུར་མཆོད། །རིགས་ཀྱི་གཙོ་བོས་རྒྱས་གདབ་བྱ། །དེ་ནས་ཐུགས་ཀའི་འོད་ཟེར་ནི། །ཕྱི་ཡི་སྙིང་པོར་རབ་སྤྲོས་ཏེ། །སོ་སོའི་ཐུགས་ཀར་ཐིམ་པར་བྱ། །དེ་ནས་མཆོད་པ་གཏོར་མ་ནི། །རྩ་བའི་སྔགས་ལས་སོ་སོ་ཡི། །སྙིང་པོ་ལྡན་པས་དབུལ་བར་
བྱ། །དེ་ནས་དམ་ཚིག་ཆོ་ག་ཡིས། །སོ་སོའི་ཐུགས་ཀར་བསྐྱལ་བར་བྱ། །དེ་ནས་ནང་གི་སྙིང་པོ་ནི། །སོ་སོའི་སྙིང་པོ་རབ་ལྡན་ཏེ། །བསྙེན་པ་ཁྲི་ཕྲག་བསྐྱལ་བར་བྱ། །དེ་ནས་རྟགས་ཀྱི་རྣམ་པ་ལས། །འཇིགས་པ་བསྐྱེད་པར་མི་བྱ་སྟེ། །རང་གི་འདོད་པའི་དངོས་གྲུབ་ནི། །མཆོད་ནས་
གསོལ་བ་གདབ་ལ་སྦྱིན། །དེ་ནི་དངོས་གྲུབ་ཐམས་ཅད་ལ། །ཐོགས་པ་མེད་པར་འགྲུབ་པར་འགྱུར། །དེ་ནས་ལས་སྦྱོར་བརྩམ་པར་བྱ། །དུར་ཁྲོད་ལས་བྱུང་རས་ལ་ནི། །སྐེ་ཚེ་བཙན་དུག་ད་དུ་ར། །སྒྲུབ་པའི་རྣམ་པར་སྣང་མཛད་ཀྱིས། །རས་ལ་ལེགས་པར་བྱུག་པར་བྱ། །ཆོ་ག་བྱས་པའི་

སྣག་ཚ་ཡིས། །འཁོར་ལོའི་ཁང་པ་ལྟ་བུར་བྲི། །དབུས་སུ་མེ་ཡི་དཀྱིལ་འཁོར་ལ། །ནང་གི་སྙིང་པོས་བསྐོར་ནས་ནི། །དབུས་སུ་བསྒྲུབ་བྱའི་མིང་ཡིག་དགོད། །འཁོར་ལོ་ལྟེ་བའི་མུ་ཁྱུད་ལ། །གསད་པའི་སྔགས་ནི་བྲི་བར་བྱ། །འཁོར་ལོ་ཤར་ཕྱོགས་རྩིབས་ལ་ནི། །རུ་ཏྲ་ཀ་ལ་ཡཀྵ་ཨཾ་པུརྞ། །ཀ་ལོ་
ཡཾ་ཀཾ་ཀ་ཏྲ་ཏྲ། །ལྷོ་ཕྱོགས་སུ་ནི་བཛྲ་ཙནྡྲ་ཀྲོ་དྷ་བི་ཤ་ན་རཱུ་པ་ལ། ནུབ་ཕྱོགས་སུ་ནི་བཛྲ་བེ་ཏ་ལ་བི་ཤ་ན་རཱུ་པ་ལ། བྱང་ཕྱོགས་སུ་ནི་བཛྲ་ཀཱ་ལ་མ་ཧཱ་ཡཀྵ། བྱང་ཤར་དུ་བཛྲ་ག་ཎ་པ་ཏི། མ་བིད་ཏ་རཱུ་པ། ཤར་ལྷོར་ནི་མ་ཧཱ་རུ་དུ་མེ་ཧོ་ཀུ་རུ་དུ། ཏྲེ་ལུ་པ་བིད་ཏྲ། ལྷོ་ནུབ་ཏུ་དད་ཏྲ་ཀ་ར་ལ། པུ་ཏ་ཀཱ་ཡ།
ནུབ་བྱང་དུ་ནི་ཡཀྵ་ནར་ཏ་ཀ་ར། ཤར་ཕྱོགས་སུ་ནི་ཀཱ་ཀཱ་སྱེ། ལྷོ་ཕྱོགས་སུ་ནི་སཱུ་ཀ་རཱ་སྱེ། ནུབ་ཕྱོགས་སུ་ནི་ཤྭ་ནཱ་སྱེ། བྱང་ཕྱོགས་སུ་ནི་ཨུ་ལུ་ཀཱ་སྱེ། བྱང་ཤར་དུ་ཡ་མ་དཱུ་ཏི། ཤར་ཕྱོགས་སུ་ཡ་མ་ད་དྷི། ལྷོ་ནུབ་ཏུ་ཡ་མ་དཥྚྲཾ་ནི། བྱང་ནུབ་ཏུ་ཡ་མ་མ་ཐ་ནི། དེ་དག་ནི་ལྷ་ཡི་སྙིང་པོ་སྟེ།
འཁོར་ལོ་དག་པར་དགོད་པར་བྱ། །ཡི་གེ་ཨོཾ་གྱི་དང་པོ་དང་། །ཧཱུཾ་ཧཱུཾ་ཕཊ་ཀྱི་མཐའ་ཅན་ཏེ། །དབུས་སུ་གསང་བའི་ཡི་གེ་ནི། །བསྒྲུབ་བྱའི་མིང་དང་ལྡན་པར་བྱ། །མཆོད་པ་གཏོར་མ་དབུལ་བ་ཡང་། །མཐར་གྱུར་སྔགས་ཀྱིས་དབུལ་བར་བྱ། །འཁོར་ལོ་ཕྱི་རོལ་མུ་ཁྱུད་ལ། །རྩ་བའི་སྔགས་
ནི་བྲི་བར་བྱ། །དེ་ལྟར་འཁོར་ལོ་བྲིས་ནས་ནི། །རྒྱུད་དུ་གསུངས་པའི་རྫས་ལ་ནི། །ལིངྒ་སོར་བརྒྱད་བྱས་ནས་ནི། །སྙིང་གར་འཁོར་ལོ་བཅུག་ནས་ནི། །གོང་གི་དཀྱིལ་འཁོར་དབུས་སུ་གཞག །དེ་ནས། བདག་ཉིད་རྣལ་འབྱོར་ལྡན་བྱས་ནས། །གོང་དུ་ལྷ་ཡི་འཁོར་ལོ་ནི། །འདིར་ནི་འཁོར་ལོ་
རྫོགས་པར་བསྐྱེད། །ཡན་ལག་ཆོ་ག་ཀུན་བྱས་ཏེ། །འདིར་ནི་ནང་གི་སྙིང་པོ་དང་། །ཁྭ་གདོང་ལ་སོགས་ལྷ་མོ་བཞི། །ཕྱག་རྒྱ་བཞི་དང་རབ་ལྡན་ནས། །སྔགས་ནི་སྟོང་ཕྲག་གཅིག་ཏུ་ཡང་། །བསྒྲུབ་བྱ་དགུག་གཞུག་སྦྱོར་བ་བྱ། །དེ་ནས་གསད་པའི་སྦྱོར་བ་ནི། །གསང་བའི་སྔགས་ལ་
ལྷ་རྣམས་ཀྱི། །སྙིང་པོ་གསད་པའི་ཡི་གེར་བཅས། །ཐུན་རེ་སྟོང་ཕྲག་རེ་རེ་ནི། །གསད་པའི་སྦྱོར་བ་ལྡན་པར་བྱ། །ཕུར་བུ་ཉུངས་ཀར་ལ་བསྔགས་ཏེ། །སུམ་ཅུ་རྩ་གཉིས་གནས་སུ་གདབ། །དེ་ལྟར་ཞག་བདུན་བྱས་ནས་ནི། །ཅེ་སྤྱང་ཐོད་པར་གཞུག་པར་བྱ། །དུར་ཁྲོད་དབུས་སུ་གནས་པ་ལས། །

ཡང་ན་འཁོར་ལོ་གནས་སུ་གཞག །རང་གི་ལུས་སུ་བརྟེན་པར་བྱ། །ཞེས་བྱ་བ་ནི། གོང་དུ་བསྟན་པའི་འཁོར་ལོ་དེ། །ཐོད་པ་ཁ་སྦྱོར་ནང་དུ་ནི། །ལིངྒ་དང་བཅས་གཞག་པར་བྱ། །ཇི་སྲིད་མ་གྲུབ་བར་དུ་ནི། །གསད་པའི་ཆོ་ག་བྱ་བའི་ཕྱིར། །ལུས་ལ་བརྟེན་ཞེས་བྱ་བའོ། །
བསམ་གཏན་དང་ལྡན་པར་བྱ་ཞེས་བྱ་བ་ནི་ལྷ་བཅུ་བདུན་གྱི་རྣལ་འབྱོར་དང་དེའི་སྔགས་དང་ལྡན་པའོ། །གང་ཞིག་ཅེས་བྱ་བ་ལ་སོགས་པ་ནི་གོ་སླའོ། །ཨོཾ་གྱི་དང་པོ་དང་ཧཱུཾ་གི་མཐའ་ཅན་ནི་གནད་ལ་བོར་བའོ། །བཀའ་སྩལ་པ་ཞེས་བྱ་བ་ནི་གསང་བའི་འཁོར་ལོ་བསྡུས་ཏེ་བསྟན་པའོ། །དེ་ནས་ཞེས་
བྱ་བ་ནི་འཁོར་ལོའི་ཆོ་ག་ལ་གཞན་ཞུས་པའོ། །བཅོམ་ལྡན་འདས་ཀྱིས་བཀའ་སྩལ་པ། །ཞེས་བྱ་བ་ནི་ཀླུ་འདུལ་བའི་ཏིང་ངེ་འཛིན་གྱི་འཁོར་ལ་ཞུས་པའོ། །དུར་ཁྲོད་ཀྱི་གཡམ་པ་ལ་སོགས་པ་ནི་གོ་སླའོ། །དུར་ཁྲོད་སྣག་ཚ་ཞེས་བྱ་བ་ནི། དུར་ཁྲོད་མ་རུངས་དབུས་སུ་ནི། །བདུད་རྩི་
མཎྜལ་བྱས་ནས་ཀྱང་། །ཐོད་རློན་སྒྱེད་བུ་གཟུགས་པར་བྱ། །དེ་ཡི་སྟེང་དུ་མར་མེ་ནི། །དུར་ཁྲོད་རས་ལ་བདུད་རྩི་ཡི། །སྙིང་པོ་བྱས་ནས་མར་མེ་ནི། །མར་ནག་ཆེན་པོ་སྦར་བར་བྱ། །ཐོད་པ་དུམ་བུ་གཅིག་པ་ལ། །པདྨ་འདབ་བརྒྱད་བྲིས་ནས་ནི། །དབུས་སུ་ནང་གི་སྙིང་པོ་བཀོད། །
དེ་ནས་པདྨའི་འདབ་མ་ལ། །ཕྱི་ཡི་སྙིང་པོ་དགོད་པར་བྱ། །དེ་ནས་བར་མའི་མུ་ཁྱུད་ལ། །རྩ་བའི་སྔགས་ནི་དགོད་པར་བྱ། །དེ་ནས་མར་མེ་ཐོག་ཏུ་གཞག །ལྷ་ཡི་འཁོར་ལོ་རྫོགས་བྱས་ལ། །དེ་ནས་ཐུགས་ཀའི་འོད་ཟེར་གྱིས། །མར་མེ་རང་བཞིན་མེད་བྱས་ལ། །དེར་ནི་ནག་པོ་ཆེན་པོ་
ཡི། །ཆོ་ག་ལྔ་ཡིས་བསྐྱེད་པར་བྱ། །དེ་ཡི་ལྟོ་བར་གནས་པ་ནི། །བཀའ་སྡོད་ཆོ་ག་གསུམ་གྱིས་བསྐྱེད། །དེ་ནས་ཐུགས་ཀའི་འོད་ཟེར་གྱིས། །ཡེ་ཤེས་དགུག་གཞུག་ལ་སོགས་པའི། །ཡན་ལག་ཆོ་ག་ཐམས་ཅད་བྱ། །ཐུགས་ཀར་པདྨ་ཉི་མ་ལ། །གྲི་གུག་ཡུ་བར་ཉི་མ་ལ། །
ཧཱུཾ་ལས་ནང་གི་སྙིང་པོར་ནི། །བསྐོར་ཏེ་ཐུགས་ཀ་ནས་སྤྲོས་པས། །སྟེང་གི་འཁོར་ལོ་ཐིམ་པར་བསམ། །དེ་ལྟར་བཟླས་པ་སྟོང་ཕྲག་གཅིག །བྱས་ནས་སྣག་ཚ་བསྡུ་བར་བྱ། །བསམ་གཏན་སྔགས་དང་ལྡན་གྱུར་པས། །ཞེས་བྱ་བ་ནི་བདག་ཉིད་ལྷའི་རྣལ་འབྱོར་དང་ལྡན་པར་བྱའོ། །ནག་

པོ་སྦྲུལ་དང་ལྡན་པར་བསྐྱེད། །ཅེས་བྱ་བ་ནི། གཙོ་བོའི་ཐུགས་ཀའི་འོད་ཟེར་གྱིས། །འཁོར་ལོ་རང་བཞིན་མེད་པར་བྱ། །དེར་ནི་ནག་པོ་ཆེན་པོ་དང་། །གོང་དུ་བསྟན་པའི་ལྷ་མོ་གསུམ། །ཀླུ་རྣམས་ཆོ་ག་གསུམ་གྱིས་བསྐྱེད། །ཀླུ་ནི་ཡི་གེ་ཕུཿལས་སོ། །དེ་ཡི་ཐུགས་ཀའི་འོད་ཟེར་གྱིས། །
རང་བཞིན་སྤྱན་དྲངས་དཀྱིལ་འཁོར་བསྟིམ། །བདེ་གཤེགས་དབང་བསྐུར་བྱས་ནས་ནི། །དེ་ནས་ཕྱི་ཡི་སྙིང་པོ་ཡིས། །ཀུན་གྱི་ཐུགས་ཀར་ཐིམ་པར་བྱ། །མཆོད་པ་ཞེས་བྱ་བ་ནི་གོ་སླའོ། །སྔགས་ཀྱི་བཟླས་པ་ཞེས་བྱ་བ་ནི་ནང་གི་སྙིང་པོ་དང་བཅས་པ་སྟེ། ཡི་གེ་ཨོཾ་གྱི་དང་པོ་དང་། །
ཧཱུཾ་ཧཱུཾ་ཕཊ་ཕཊ་སྭཱ་ཧཱའི་མཐའ་ཅན་ནོ། །གཙོ་བོའི་ཐུགས་ཀའི་འོད་ཟེར་གྱིས། །འཁོར་ལོ་ཀུན་ལ་ཁྱབ་པར་བྱ། །དེས་ནི་ཆར་ནི་འབེབས་པར་འགྱུར། །ཞེས་བྱའོ། །གལ་ཏེ་ཞེས་བྱ་བ་ནི་མ་ཕེབས་ན་སྤོགས་པའི་ཆོ་ག་སྟེ་གོ་སླའོ། །འཁོར་ལོ་བཟློག་ཅེས་བྱ་བ་ནི་ཀླུ་ལ་སོགས་པ་བཟློག་པ་
བྲིའོ། །སྟེང་དུ་སྦྱིན་སྲེག་ཅེས་བྱ་བ་ནི་གསང་བའི་སྦྱིན་སྲེག་སྟེ་དེ་ཡང་གོང་གི་ལྷ་མོ་དང་། སྐུ་མདོག་ཕྱག་མཚན་མཐུན་པར་བསྐྱེད། །སྔགས་བཟློག་ཅེས་བྱ་བ་ནི་སྭཱ་ཧཱ་ནས་བྱའོ། །བསྒྲུབ་བྱ་ཞེས་བྱ་བ་ནི་གོ་སླའོ། །དེ་ནས་གཞན་ཡང་ཞེས་བྱ་བ་ནི་སེར་བ་སྲུང་བའི་འཁོར་ལོའི་བྱ་བ་ལ་
འཇུག་པ་སྟེ། ཁ་ཊི་ཁ་ཡིས་འཁོར་ལོ་བྲི། །ཞེས་བྱ་བ་ནི། བདུད་རྩིས་ཕྱི་ནས་བྱུགས་ནས་ནི། །འཁོར་ལོ་དབུས་སུ་གྲུ་བཞི་སྟེ། །དེ་ནི་བསྲུང་བའི་ཡུལ་མིང་བྲི། །ཟུར་བཞི་སྣ་ཚོགས་རྡོ་རྗེ་ནི། །རྩེ་མོར་ཧཱུཾ་དང་ལྡན་པར་བྱ། །དེ་ཡི་ཕྱི་རོལ་གྲུ་བཞིར་དགོད། །རྡོ་རྗེ་བཞི་ཡི་བར་ཁྱམས་
སུ། །སྲུང་བའི་སྔགས་ནི་བྲི་བར་བྱ། །ཕྱི་རོལ་ཕྱོགས་ནི་བཞི་རྣམས་ལ། །སྣ་ཚོགས་རྡོ་རྗེ་བྲི་བ་སྟེ། །དབུས་སུ་ཧཱུཾ་གི་སྙིང་པོ་ལྡན། །ཕྱི་རོལ་མུ་ཁྱུད་ཟླུམ་པོ་ལ། །རྩ་བའི་སྔགས་ནི་བྲི་བར་བྱ། །འཁོར་ལོ་མཎྜལ་སྟེང་བཞག་ནས། །བདག་ཉིད་ལྷ་ཡི་རྣལ་འབྱོར་ནི། །དང་པོ་རྫོགས་པར་བྱས་
ནས་ནི། །གཙོ་བོའི་ཐུགས་ཀའི་འོད་ཟེར་གྱིས། །འཁོར་ལོ་རང་བཞིན་མེད་བྱས་ནས། །དེར་ནི་ལྷ་ཡི་འཁོར་ལོ་ནི། །ལྷ་མོ་གསུམ་དང་བཅས་པ་སྟེ། །ཆོ་ག་གསུམ་གྱིས་རྫོགས་པར་བསྐྱེད། །དེ་ནས་ཐུགས་ཀའི་འོད་ཟེར་གྱིས། །ཡེ་ཤེས་འཁོར་ལོ་སྤྱན་དྲངས་བསྟིམ། །བདེ་གཤེགས་

དབང་བསྐུར་ལ་སོགས་པའི། །ཡན་ལག་ཆོ་ག་ཐམས་ཅད་བྱ། །དེ་ནས་གཙོ་བོའི་ལྟོ་བར་ནི། །ཧཱུཾ་གཉིས་བར་དུ་བསམ་བྱ་སྟེ། །དེ་ཡོངས་གྱུར་པས་རྡོ་རྗེ་ཡི། །སྲུང་བའི་འཁོར་ལོས་བསྲུང་བར་བྱ། །དེ་ཡི་དབུས་སུ་བསྲུང་བྱ་ཡི། །ཡུལ་ནི་ལེགས་པར་བསམ་པར་བྱ། །དེ་ནས་བཟླས་པ་
བྱ་བ་སྟེ། །ཡུལ་དང་ཞེས་བྱ་བ་ལ་སོགས་པའོ། །སྔགས་ནི་ཨོཾ་གྱི་དང་པོ་དང་། །ཧཱུཾ་ཧཱུཾ་ཕཊ་ཀྱི་མཐའ་ཅན་ནོ། །ཕྱོགས་བཞིར་གཞག་པར་བྱ་བ་ནི། །གང་ཞིག་བསྲུང་བྱའི་ཡུལ་དུ་ནི། །ཕྱོགས་བཞིར་གོང་གི་ཆོ་ག་བྱ། །དེ་ནས་གཞན་ཡང་ཞེས་བྱ་བ་ནི་ཛམྦྷ་ལ་བསྒྲུབ་པ་ལ་འཇུག་པར་བྱའོ། །གསལ་བར་
བསྐྱེད་ཅེས་བྱ་བ་ནི། ལྷ་མོ་དང་བཅས་འཁོར་ལོ་ནི། །ཆོ་ག་གསུམ་གྱིས་རྫོགས་པར་བསྐྱེད། །སྔགས་ནི་ཨོཾ་གྱི་དང་པོ་དང་། །སྭཱ་ཧཱའི་མཐའ་ཅན་ཏེ། ཆུ་སྦྱིན་དང་བསྙེན་པའི་ཆོ་གར་ཤེས་པར་བྱའོ། །བཅོམ་ལྡན་འདས་ཀྱིས་བཀའ་སྩལ་ཏོ། །ཞེས་བྱ་བ་ནི་ཡན་ལག་གི་འཁོར་ལོ་འཁོར་ལ་བསྡུས་
ཏེ་བཤད་པའོ། །འཁོར་ལོའི་ལེའུ་ཞེས་བྱ་བ་ནི་གསད་པའི་ལས་གྲུབ་པར་བསྟན་པ་སྟེ་དེ་བསྡུས་པའི་ལེའུའོ། །འཁོར་ལོའི་ལེའུའི་བཤད་པ་སྟེ་དྲུག་པའོ།། །།དེ་ནས་ཞེས་བྱ་བ་ནི་འཁོར་ལོའི་ལས་ཀྱི་ཁ་བསྐང་བར་བྱ་བ་དང་། མནན་པ་འབའ་ཞིག་གིས་གསད་པའི་ཕྱིར་ཞུས་པ་སྟེ་གོ་སླའོ། །
བཀའ་སྩལ་ཏོ་ཞེས་བྱ་བ་ནི་མནན་པའི་ཁྱད་པར་གསུངས་པའོ། །དེ་ནས་ཞེས་བྱ་བ་ནི་མནན་པའི་བསྒྲུབ་པར་བྱས་པ་ལ་འཇུག་པ་བསྡུས་པའོ། །བཅོམ་ལྡན་འདས་ཀྱིས་བཀའ་སྩལ་པ། །ཞེས་བྱ་བ་ནི་སྟོབས་ཆེན་པོའི་ཏིང་ངེ་འཛིན་ལ་ཞུགས་ཞེས་བྱ་བའི་དོན་ཏོ། །དུར་ཁྲོད་ཅེས་བྱ་བ་ནི་དུར་ཁྲོད་ལ་
སོགས་པའི་གནས་བརྒྱད་དུའོ། །ཏིང་ངེ་འཛིན་དང་ལྡན་པར་གྱུར་ནས་ཞེས་བྱ་བ་ནི་སྔོན་དུ་བསྙེན་པ་རྫོགས་པའོ། །བསམ་གཏན་ཞེས་བྱ་བ་ནི་ཐུགས་ཀའི་གྲི་གུག་འོད་ཟེར་རོ། །སྔགས་ཞེས་བྱ་བ་ནི་བཛྲ་ཀ་པ་ཙིའི་སྔགས་སོ། །མཚམས་བཅད་པ་ཞེས་བྱ་བ་ནི་སྲུང་བའི་འཁོར་ལོའོ། །ཐོད་པ་
ཞེས་བྱ་བ་ནི་གོ་སླའོ། །འཁོར་ལོ་བྲི་ཞེས་བྱ་བ་ནི་ཐོད་པའི་ནང་དུ་སྣ་ཚོགས་རྡོ་རྗེ་བྲི་བར་བྱའོ། །རྡོ་རྗེ་དབུས་ཀྱི་ལྟེ་བ་ལ་ནང་གི་སྙིང་པོ་བྲི་བར་བྱའོ། །རྡོ་རྗེ་ར་ཡི་དབུས་མ་ལ། །འཁོར་ལོའི་སྔགས་ནི་དགོད་པར་བྱ། །ཕྱོགས་བཞི་ལེགས་པར་བྲི་བར་བྱ། །དེ་ཡི་ཕྱི་རོལ་མུ་ཁྱུད་ལ། །གསད་པའི་སྔགས་

ནི་དགོད་པར་བྱ། །དེ་ཡང་ཐོད་པ་གཉིས་ལ་ནི། །ལུགས་དང་ལུགས་མིན་བྲི་བར་བྱ། །མིང་དང་ཡི་གེ་ལྡན་པར་བྲི། །ཞེས་བྱ་བ་ནི་བསྒྲུབ་བྱའི་གཟུགས་བྲི་བ་སྟེ། སྙིང་ག་ལ་སོགས་གནས་ལྔར་ནི། །བསྒྲུབ་བྱའི་མིང་གི་ཡི་གེ་ནི། །ཧཱུཾ་གི་བར་དུ་ལྡན་པར་བྱ། །འཁོར་ལོའི་ནང་དུ་གཞུག་ཅེས་བྱ་བ་ནི་གོ་
སླའོ། །ཕྱི་རོལ་དུར་ཁྲོད་རས་ཀྱིས་གཏུམ། །ཞེས་བྱ་བ་ནི་དུར་ཁྲོད་ནས་བྱུང་བའི་སྲད་བུས་རྒྱ་གྲམ་དུ་བཅིངས་པའོ། །མཆེད་པའི་ས་ཞེས་བྱ་བ་ལ་སོགས་པ་ནི་གོ་སླའོ། །བསྐྱེད་པའི་རིམ་པ་ཚུལ་བཞིན་ཞེས་བྱ་བ་ནི། དང་པོར་བདག་ཉིད་རྣལ་འབྱོར་ནི། །ལྷ་ཡི་འཁོར་ལོ་རྫོགས་པར་བྱ། །དེ་ཡི་
ཐུགས་ཀའི་འོད་ཟེར་གྱིས། །འཁོར་ལོ་གནས་པའི་སྐུ་གཟུགས་ལ། །ཕོག་ནས་རང་བཞིན་མེད་པར་བྱ། །དེ་ནི་ལྷ་ཡི་འཁོར་ལོ་ནི། །ཆོ་ག་གསུམ་གྱིས་བསྐྱེད་པར་བྱ། །ཤིན་ཏུ་འཇོམས་མ་ལ་སོགས་པའི། །མཁའ་འགྲོ་གསུམ་ནི་བསྐྱེད་པར་བྱ། །སྐུ་མདོག་ནག་པོ་ཆེར་འཇིགས་མ། །གྲི་
གུག་ཐོད་པ་འཛིན་པ་སྟེ། །ཞལ་གཅིག་ཕྱག་གཉིས་སྤྱན་གསུམ་འཇིགས། །དེ་ནས་ཐུགས་ཀའི་འོད་ཟེར་གྱིས། །ཡེ་ཤེས་འཁོར་ལོ་བསྟིམ་པའི་ཕྱིར། །བླ་མ་ཞེས་བྱ་ལ་སོགས་པའི། །བདེ་གཤེགས་སྤྱན་དྲངས་དབང་བསྐུར་ནས། །ཐུགས་ཀའི་བདག་པོས་རྒྱས་གདབ་བྱ། །དེ་ནས་
ཐུགས་ཀའི་འོད་ཟེར་ནི། །ཕྱི་ཡི་སྙིང་པོ་རབ་སྤྲོས་ཏེ། །ལྷ་རྣམས་སོ་སོའི་ཐུགས་ཀར་ཐིམ། །དེ་ནས་མཆོད་པ་ཞེས་བྱ་བ་ལ་སོགས་པ་ནི་གོ་སླའོ། །སྔགས་ཀྱི་བཟླས་པ་ཞེས་བྱ་བ་ནི་དམ་ཚིག་དང་ལྡན་པར་བྱས་ཏེ། ནང་གི་སྙིང་པོ་ལ་བསྙེན་པ་བསྐྱལ་བའོ། །ཐུགས་ཀའི་འོད་ཟེར་ཞེས་བྱ་བ་
ནི་གཙོ་བོ་ལ་སོགས་པའི་ལྷ་རྣམས་ཀྱི་ཐུགས་ཀ་ནས་སྤྲོས་པའོ། །བསྒྲུབ་བྱ་གསལ་ཞེས་བྱ་བ་ནི་སྲོག་སྐྱོབ་པའི་ལྷ་དང་བྲལ་བར་གསལ་བའི་ཕྱིར་རོ། །སྔགས་དང་ཞེས་བྱ་བ་ནི་དགུག་པའི་སྔགས་སོ། །གྲི་གུག་ཐོད་པ་ཐོགས་པ་ཞེས་བྱ་བ་ནི་གསད་པའི་སྦྱོར་བ་ལ་འཇུག་པར་བྱ་བ་གསད་པའི་སྔགས་
སོ། །ཐུན་མཚམས་ཞེས་བྱ་བ་ལ་སོགས་པ་ནི་གོ་སླའོ། །དུར་ཁྲོད་དབུས་སུ་ཞེས་བྱ་བ་ནི་མེ་ཐབ་ཀྱི་དབུས་སུ་བརྐོས་ཏེ་ཚ་བའི་རྫས་ཀྱིས་བྱུག་པར་བྱའོ། །མདུན་གྱི་ཞེས་བྱ་བ་ནི་དེའི་དབུས་སོ། །དུར་ཁྲོད་ཀྱི་ཕ་གུ་ལ་འཁོར་ལོ་བྲི་ཞེས་བྱ་བ་ནི། དབུས་སུ་སྣ་ཚོགས་རྡོ་རྗེ་ལ། །ཕྱི་རོལ་འཁོར་ལོ་རྩིབས་བརྒྱད་བྱ། །

སྣ་ཚོགས་རྡོ་རྗེའི་ལྟེ་བ་ལ། །ནང་གི་སྙིང་པོ་དགོད་པར་བྱ། །རྡོ་རྗེ་ར་ཡི་སྙིང་པོ་ལ། །ཕྱི་ཡི་སྙིང་པོ་བྲི་བར་བྱ། །དེ་ནས་འཁོར་ལོ་རྩིབས་བརྒྱད་ལ། །ཡི་གེ་ཨོཾ་གྱི་དང་པོ་དང་། །ཧཱུཾ་ཧཱུཾ་ཕཊ་ཕཊ་སྭཱ་ཧཱ་ཡི། །མཐའ་ཅན་རིམ་པར་དགོད་པར་བྱ། །དེ་ནས་འཁོར་ལོའི་སྟེང་དུ་ནི། །གང་དུ་ལྷ་ཡི་འཁོར་ལོ་
བསྐྱེད། །ཡེ་ཤེས་སྤྱན་དྲངས་ལ་སོགས་པའི། །ཡན་ལག་ཆོ་ག་རྫོགས་པར་བྱ། །དེ་ནི་གསད་པའི་སྦྱིན་སྲེག་བྱ། །མནན་པས་གསད་པ་ཞེས་བྱ་བ་ནི་གསད་པ་འབའ་ཞིག་ཏུ་གསུངས་པའི་ཕྱིར་རོ། །བཅོམ་ལྡན་འདས་ཀྱིས་བཀའ་སྩལ་པ། །ཞེས་བྱ་བ་ནི་མནན་པའི་དོན་འཁོར་གྱི་ཚོགས་ལ་བཤད་
པའི་དོན་འབའ་ཞིག་སྟོན་པའི་ལེའུའོ། །མནན་པའི་ལེའུའི་བཤད་པ་སྟེ་བདུན་པའོ།། །།དེ་ནས་ཞེས་བྱ་བ་ནི་ལས་ཐམས་ཅད་ཀྱི་སྦྱོར་ཀ་ལ་འཇུག་པ་སྟེ་སྦྱིན་སྲེག་གི་ལས་ལ་འཇུག་པ་ཞུས་པའོ། །སྦྱིན་སྲེག་གི་ལས་ཞུས་པ་སྟེ་གོ་སླའོ། །བཅོམ་ལྡན་འདས་ཀྱིས་བཀའ་སྩལ་པ། །ཞེས་བྱ་བ་ནི་སྦྱིན་
སྲེག་གི་ཁྱད་པར་བསྟན་པའོ། །དེ་ནས་ཞེས་བྱ་བ་ནི་སྦྱིན་སྲེག་ལ་འཇུག་པར་བྱ་ཞེས་པའོ། །དེ་ཡང་གསུངས་པ་ཁྱད་པར་བདུན་ཞེས་བྱ་བ་ལ་སོགས་པ་ནི་མདོར་བསྟན་པ་ནི་གོ་སླའོ། །དེ་ནས་ཞེས་བྱ་བ་ལ་སོགས་པ་ནི་རྒྱས་པར་ཞུས་པའོ། །བཅོམ་ལྡན་འདས་ཀྱིས་བཀའ་སྩལ་པ། །ཞེས་བྱ་བ་ནི་
བདག་ཉིད་ཆེན་པོའི་ཏིང་ངེ་འཛིན་ལ་སྙོམས་པར་ཞུགས་ཞེས་བྱ་བའི་དོན་ཏོ། །དང་པོར་བདག་ཉིད་ཅེས་བྱ་བ་ནི་མཆོད་པ་ལ་སོགས་པ་སྟེ་སྟོང་པ་ཉིད་ཀྱི་བར་དུ་ཚོགས་བསགས་པར་བྱའོ། །སྲུང་བའི་འཁོར་ལོ་བསྒོམ་པ་ཞེས་བྱ་བ་ནི་སྟོང་པ་ཉིད་ལས། རཾ་ལས་བྱུང་བའི་ཉི་མ་དང་། །ཧཱུཾ་ལས་བྱུང་བའི་རྡོ་རྗེ་
བྲག །དེ་ཡི་སྟེང་དུ་ཧཱུཾ་གནས་པ། །སྤྲོ་དང་བསྡུ་བའི་འོད་ཟེར་གྱིས། །སྲུང་བའི་འཁོར་ལོ་བསྒོམ་པར་བྱ། །ཆོས་འབྱུང་ཨེ་ལས་བསྐྱེད་པའོ། །རྡོ་རྗེ་ནི་ཁཾ་ལས་བསྐྱེད་པའོ། །པདྨ་ནི་པཾ་ལས་བསྐྱེད་པའོ། །ཉི་མ་ནི་རཾ་ལས་བསྐྱེད་པའོ། །རོ་ནི་ཀཾ་ལས་བསྐྱེད་པའོ། །དེ་ཡི་སྟེང་དུ་ཧཱུཾ་གནས་ཞེས་བྱ་བ་
ནི་ཆོ་ག་ལྔས་གཙོ་བོ་བསྐྱེད་པ་སྟེ་གོ་སླའོ། །མདུན་གྱི་ནག་པོ་ཆེན་པོ་ཡང་། །ཞེས་བྱ་བ་ནི་བཀའ་སྡོད་ཀྱི་འཁོར་ལོ་བསྐྱེད་པ་སྟེ་དེ་ཡང་ཆོ་ག་གསུམ་གྱིས་བསྐྱེད་པའོ། །བཀའ་སྡོད་ལྷ་ཡི་འཁོར་ལོ་ནི། །མི་ཡི་དབུས་སུ་གནས་པ་སྟེ། །པདྨའི་དབང་ཕྱུག་ལ་སོགས་གསུམ། །སྐུ་མདོག་དམར་མོ་

མེ་ལྟར་འབར། །ཞལ་གཅིག་ཕྱག་གཉིས་སྤྱན་གསུམ་པ། །མེ་ཐབ་ཐོད་པ་གནས་པ་སྟེ། །བརྐྱང་བསྐུམ་རོ་ཡི་སྟེང་ན་འགྱིང་། །གཙོ་བོའི་ཐུགས་ཀའི་འོད་ཟེར་གྱིས། །ཡེ་ཤེས་འཁོར་ལོ་སྤྱན་དྲངས་བསྟིམ། །བདེ་གཤེགས་སྤྱན་དྲངས་དབང་བསྐུར་ནས། །རིགས་ཀྱི་བདག་པོས་རྒྱས་གདབ་
བྱ། །དེ་ནས་ཐུགས་ཀའི་འོད་ཟེར་ནི། །ཕྱི་ཡི་སྙིང་པོ་རབ་སྤྲོས་ཏེ། །ལྷ་རྣམས་ཐུགས་ཀར་ཐིམ་པར་བྱ། །མཆོད་པ་གཏོར་མ་དམ་ཚིག་གི །ཆོ་ག་རིམ་པས་བྱས་ནས་ཀྱང་། །གཉིས་མེད་ཐུགས་ཀར་ཞེས་བྱ་བ་ནི་ནང་གི་སྙིང་པོ་ལ་བསྙེན་པ་བྱའོ། །དེ་ནས་སྦྱིན་སྲེག་བརྩམ་པར་བྱ། །
ཞེས་བྱ་བ་ནི་སྦྱིན་སྲེག་གི་ལས་ལ་འཇུག་པར་བྱ་བ་སྟེ། དེ་ཡང་རིང་དུ་སྤངས་པའི་དོན་ནི་སྐྱེ་བོ་རྨོངས་པར་བྱ་བའི་ཕྱིར་རོ། །འདིར་ཤེས་པར་བྱ་བ་ནི་རྫས་ཀྱི་ཆོ་ག་སྟེ་སྔོན་དུ་འགྲོ་བའོ། །ལིངྒ་རྫས་ཀྱི་ཆོ་ག་སྔོན་དུ་འགྲོ་བའོ། །དེ་ཡང་རྐང་རྗེས་ས་ཞེས་བྱ་བ་ལ་སོགས་པར་ཚོགས་པར་བྱས་
ལ་རྒྱུ་སྟ་གོན་ལ་གནས་པའི་ཆོ་ག་བྱས་ཏེ། དེ་ནས་ལིངྒ་བྱས་ལ། བདག་ཉིད་ལྷའི་རྣལ་འབྱོར་རྫོགས་པར་བྱ་སྟེ། མགོ་ལུས་ཚ་བའི་རྫས་ཀྱིས་བྱུག །ཅེས་བྱ་བ་ནི། སྐེ་ཚེ་དང་། ཉུངས་ཀར་དང་། བཙན་དུག་གིས་གནས་སུམ་ཅུ་རྩ་གཉིས་སུ་བསྣུན་པའོ། །བསྒྲུབ་བྱ་
བཀུག་ལ་བསྟིམ་ཞེས་བྱ་བ་ནི། གཙོ་བོ་དང་བཀའ་སྡོད་ཀྱི་འཁོར་གྱི་ཐུགས་ཀ་ནས་ཞགས་པ་དང་ལྕགས་ཀྱུའི་སྦྱོར་བས་བསྒྲུབ་བྱ་དགུག་པར་བྱའོ། །དབྱེ་བའི་ཆོ་ག་ཞེས་བྱ་བ་ནི་སྔགས་ཀྱི་ལེའུ་རུ་ཤེས་པར་བྱའོ། །མགོ་ནས་རྐང་པའི་མཐིལ་གྱི་བར། །ཞེས་བྱ་བ་ནི་ཐིག་ལེའི་གནས་སུམ་ཅུ་རྩ་
གཉིས་སོ། །གསང་སྔགས་ཞེས་བྱ་བ་ནི་གཙོ་བོ་དང་བཀའ་སྡོད་ཀྱི་ཐུགས་ཀ་ནས་སྤྲོས་པའོ། །ཚེར་མ་ཞེས་བྱ་བ་ནི་ནི་རཾ་སུའི་ཕུར་བུ་ལ་སོགས་པའོ། །འབུམ་ཕྲག་ཅེས་བྱ་བ་ནི་སྔགས་ཀྱི་གྲངས་སོ། །དེ་ནས་ཞེས་བྱ་བ་ལ་སོགས་པ་ནི་གོ་སླའོ། །དགང་གཟར་བླུགས་གཟར་ཞེས་བྱ་བ་ནི་ཉི་མའི་
སྟེང་དུ་ཨོཾ་དང་ཧཱུཾ་གིས་མཚན་པའོ། །ཡམ་ཤིང་དུག་གི་རིགས་ལས་བྱུང་བའི་ཤིང་ལ་ཚ་བའི་རྫས་ཀྱིས་བྱུགས་ཤིང་རེ་ཕས་མཚན་པའོ། །ཉུངས་མར་ལ་སོགས་པའི་བདུད་རྩི་ལྔས་བསང་གཏོར་བྱ་ཞིང་རྩ་བའི་སྔགས་ཀྱིས་བྱིན་གྱིས་བརླབ་པའོ། །གཞན་ཡང་མཆོད་པ་དང་གཏོར་མ་ལ་སོགས་པ་ཡང་

ཚོགས་པར་བྱའོ། །མེ་ཐབ་ཀྱི་མཚན་ཉིད་ནི་བྱེ་བྲག་ཏུ་མ་བཤད་དེ་གོ་སླ་བའི་ཕྱིར་རོ། །དེ་ནས་ཞེས་བྱ་བ་ནི་མེ་ལྷ་བསྐྱེད་པར་བྱ་བ་ལ་འཇུག་པའོ། །བསམ་གཏན་སྔགས་དང་ལྡན་གྱུར་ནས། །ཞེས་བྱ་བ་ནི་བདག་ཉིད་ལྷའི་རྣལ་འབྱོར་དང་ལྡན་པར་བྱ་སྟེ། དེ་ཡང་ཐུགས་
ཀའི་འོད་ཟེར་གྱིས། །མེ་ཐབ་རང་བཞིན་མེད་བྱས་ལ། །དེར་ནི་རཾ་ལས་བྱུང་བའོ། །འབར་བའི་མེ་ནི་བསམ་པར་བྱ། །དེ་ནས་པད་ཉི་ཧཱུཾ་ཞེས་བྱ་བ་ལ་སོགས་པ་ནི་དམ་ཚིག་གི་མེ་ལྷ་བསྐྱེད་པ་སྟེ་གོ་སླའོ། །ཕྱག་རྒྱ་བཞིའི་སྦྱོར་བ་ཞེས་བྱ