Luận tạng Tây Tạng (Tengyur) — Tập 28

ར་བྱའོ། །དེའི་མུ་ཁྱུད་ལ་

ཨོཾ་ལ་སོགས་པའི་སྔགས་བྲི་བར་བྱའོ། །དེ་ནས་བདུད་རྩི་ལྔའི་མཎྜལ་བྱས་ཏེ་དེའི་སྟེང་དུ་འབའ་ཏྲིའི་ཆུན་པོ་ལ་བུམ་པ་གཞག་པར་བྱའོ། །བུམ་པའི་ནང་དུ་གྲོང་ཁྱེར་གྱི་ཆང་གི་རྒྱུ་དང་ལྡན་པར་བྱས་ཏེ། དེ་ནས་གྲོང་ཕྱོགས་སུ་མངོན་པར་ཕྱོགས་ལ་གོང་
གི་ལྷའི་འཁོར་ལོ་རབ་ཏུ་གསལ་ཏེ། ཐུགས་ཀའི་གཙོ་བོ་དང་འཁོར་ལོས་སྒྱུར་བྱེད་མ་ལ་སོགས་པའི་ཐུགས་ཀ་ནས་སྤྲུལ་པའི་མཁའ་འགྲོ་མ་སྤྲོས་ཏེ་གང་ཞིག་ཆང་གནས་པའི་གྲོང་ཁྱེར་དེ་བཀུག་ནས་མདུན་གྱི་ནམ་མཁའ་ལ་དམིགས་ཏེ། ནམ་མཁའི་ཆང་གི་བུམ་
པའི་ནང་དུ་འདིར་བྲིས་པ་ལྟ་བུའི་འཁོར་ལོ་བསྐྱེད་པར་བྱའོ། །དེ་ནས་བདག་གི་སྔགས་ཀྱི་བཟླས་པ་བྱས་པའི་སྟོབས་ཀྱིས་ནམ་མཁའི་ཆང་གི་བུམ་པའི་འཁོར་ལོ་ལས་ཆང་རྒྱུན་བབ་པས་མདུན་གྱི་བུམ་པ་ལ་ཆང་རྒྱུན་མི་འཆད་པར་འབབ་པར་འགྱུར་རོ། །དེ་ནས་གཞན་ཡང་
ཨོཾ་གྱི་དང་པོ་དང་ཧཱུཾ་ཧཱུཾ་ཕཊ་ཕཊ་སྭཱ་ཧཱའི་མཐའ་ཅན་གྱིས་དུག་ཞི་བར་བྱའོ། །སྦྲུལ་གྱི་དུག་བསལ་ཞེས་བྱ་བ་ནི་གོང་དུ་བསྟན་པའི་ལྷའི་འཁོར་ལོ་གསལ་བར་བྱས་ལ། བདག་དང་ཐུགས་ཀའི་སྤྱི་བོར་ཡི་གེ་ཏཾ་དཀར་པོ་ལས་འོད་ཟེར་དཀར་པོ་བྱུང་བ་དང་སྔགས་ཀྱིས་དུག་ཞི་བར་
བསམ་པར་བྱའོ། །དེ་སྐད་ཅེས་བཀའ་སྩལ་པ་ཞེས་བྱ་བ་ནི་སྔགས་ཀྱི་ལེའུར་ཐུན་མོང་གི་སྦྱོར་ཀ་བསྟན་པ་ཞེས་བྱ་བའི་དོན་ཏོ། །སྔགས་ཀྱི་ལེའུ་བཤད་པ་སྟེ་གཉིས་པའོ།། །།དེ་ནས་ཞེས་བྱ་བ་ནི་ལྷའི་འཁོར་ལོ་ལ་འཇུག་པར་བྱ་སྟེ། དེ་ལ་དང་པོའི་ཚིག་ཞུས་
པ་ནི་ནག་པོ་ཆེན་པོ་ཞེས་བྱ་བ་ནས་གསོལ་ཏོ་ཞེས་བྱའོ། །གང་ཞིག་སྔགས་ཀྱི་སྦྱོར་བ་རྣམས། །ཞེས་བྱ་བ་ནི་ཐུན་མོང་དང་སྦྱོར་བ་ཆེན་པོ་ཡིན་པའི་ཕྱིར་རོ། །སྟོབས་དང་ལྡན་པར་འགྱུར་ཞེས་བྱ་བ་ནི་བསྐྱེད་པའི་རིམ་པ་དང་ལྡན་པའི་ཕྱིར་རོ། །བཤད་དུ་གསོལ་ཞེས་བྱ་
བ་ནི་དེའི་དོན་དུ་ཞུས་པའོ། །བཅོམ་ལྡན་འདས་ཀྱིས་བཀའ་སྩལ་པ། །ཞེས་བྱ་བ་ནི་རྡོ་རྗེ་འཛིན་པ་དང་ལྷའི་འཁོར་ལོའི་ཏིང་ངེ་འཛིན་ལ་ཞུགས་ཞེས་བྱའོ། །དང་པོའི་ལྷ་ཡི་རྣལ་འབྱོར་གྱིས། །ཞེས་བྱ་བ་ནས་བཀའ་སྩལ་ཏོ་ཞེས་བྱ་བ་ནི་སྔགས་ཀྱི་དོན་དང་སྦྱོར་ཀ་རྣམས་

ཀྱང་ལྷ་བསྐྱེད་པ་དང་ལྡན་དགོས་པས་དེ་ཡང་བསྐྱེད་པའི་རིམ་པ་དང་ལྡན་པར་བསྒྲུབ་པའི་ཕྱིར་དེའི་དགོས་པ་མདོར་བསྟན་ཏོ། །དེ་ནས་ཞེས་བྱ་བ་ནས་ཇི་ལྟར་ལགས་ཞེས་བྱ་བའི་བར་དུ་ནི་དེའི་དོན་དུ་རྒྱས་པར་ཞུས་པའོ། །བཅོམ་ལྡན་འདས་ཀྱིས་བཀའ་སྩལ་པ། །ཞེས་བྱ་བ་ནས་
རྫོགས་པར་བསྐྱེད་ཅེས་བྱ་བ་ནི་བསྐྱེད་པའི་རིམ་པ་མདོར་བསྟན་པའོ། །བཀའ་སྩལ་ཏོ་ཞེས་བྱ་བ་ནི་རྒྱས་པར་བཤད་པའོ། །དུར་ཁྲོད་ལ་སོགས་ཞེས་བྱ་བ་ནི་དུར་ཁྲོད་དང་ཤིང་གཅིག་དང་ཁང་སྟོང་དང་རྒྱ་མཚོའི་གླིང་དང་མཚན་མ་གཅིག་པ་དང་དྲག་པོའི་ཆུ་འགྲམ་དང་། འཐབ་
མོའི་གནས་དེ་དག་ཏུ་བསྒྲུབ་ཅེས་བྱ་བའོ། །ལུས་བདུད་རྩི་ལྔས་བྱུག་ཅེས་བྱ་བ་ནི་གནས་ལྔར་བདུད་རྩི་ལྔས་ཐིག་ལེ་བྱ་སྟེ། གོང་དུ་བསྟན་པའི་ཡི་གེ་ལྔས་བདག་སྐད་ཅིག་མ་གཅིག་གིས་ལྷའི་ང་རྒྱལ་དུ་བྱའོ། །བདེ་བའི་སྟན་ལ་འདུག་ཅེས་བྱ་བ་ནི་དཔའ་བོའི་སེམས་ཀྱི་རོའི་
གདན་ལ་འདུག་པའོ། །ཨོཾ་གྱི་དང་པོ་དང་ཧཱུཾ་ཧཱུཾ་ཕཊ་ཕཊ་སྭཱ་ཧཱའི་མཐའ་ཅན་གྱིས་ནི་རྡོ་རྗེའི་གོ་ཆའི་བདག་ཉིད་དོ། །ལན་གསུམ་དུ་ནི་བསྲུང་བར་བྱ། །ཞེས་བྱ་བ་ནི་བདག་དང་ཞེས་བྱ་བ་ལ་སོགས་པའི་དོན་ཏོ། །དེ་མ་ཐག་ཏུ་ཞེས་བྱ་བ་ནི་ལུས་བདུད་རྩིས་བྱུགས་ནས་བདེ་བའི་སྟན་
ལ་འདུག་པ་ཞེས་བྱ་བ་ནི་དེ་མ་ཐག་ཏུའོ། །སྙིང་གར་ཞེས་བྱ་བ་ནི་པདྨ་དང་ཉི་མའི་དཀྱིལ་འཁོར་རོ། །ཧཱུཾ་ནི་ཧཱུཾ་འོད་ཟེར་ལྔ་དང་ལྡན་པ་སྟེ། གདུག་པ་བསལ་ནས་ཞེས་བྱ་བ་ནི་སེམས་ཅན་ཐམས་ཅད་འོད་ཟེར་གྱིས་ནག་པོ་ཆེན་པོའི་རང་བཞིན་དུ་བྱས་པའོ། །བླ་མ་དང་ཞེས་བྱ་
བ་ལ་སོགས་པ་ནི་གོ་སླའོ། །ཚོགས་བསགས་པའི་ཕྱིར་མཆོད་པར་བྱའོ། །དེ་ཡང་ཨུཀྵེ་པའི་མེ་ཏོག་ལ་སོགས་པས་སོ། །དེ་ཡང་དེ་ཉིད་གསུམ་གྱིས་བྱིན་གྱིས་བརླབས་ལ་ཨི་དཾ་གྱི་སྔགས་ཀྱིས་མཆོད་པར་བྱའོ། །སྡིག་པ་བཤགས་ཞེས་བྱ་བ་ནི་སྡིག་པ་བྲལ་བ་ཉིད་
ཚོགས་ཀྱི་མཆོག་ཡིན་པས་ནི་སྡིག་པ་བཤགས་པའོ། །བསགས་ཞེས་བྱ་བ་ནི་བཤགས་པ་དང་མི་ཕྱེད་པའི་སྡོམ་པ་དང་། རྗེས་སུ་ཡི་རང་བ་དང་། སྐྱབས་སུ་འགྲོ་བ་དང་། བྱང་ཆུབ་མཆོག་ཏུ་སེམས་བསྐྱེད་པ་དང་། དགེ་བའི་རྩ་བ་བསྔོ་བའོ། །དེ་དག་ཀྱང་

གདུག་པ་འདུལ་བ་དང་། སངས་རྒྱས་ཀྱི་བསྟན་པ་ཡུན་རིང་པོར་གནས་པར་བྱ་བའི་ཕྱིར་བསོད་ནམས་སུ་འགྱུར་བའོ། །ནག་པོ་ཆེན་པོའི་སྟོབས་ཀྱིས་ཞེས་བྱ་བ་ནི་ཚོགས་བསགས་པའི་དཀྱིལ་འཁོར་བདག་ལ་བསྟིམ་པར་བྱའོ། །བྱམས་པ་ལ་སོགས་
པ་ཞེས་བྱ་བ་ནི་བདེ་བ་ཐོབ་པར་འདོད་པའི་བྱམས་པ་དང་། སྡུག་བསྔལ་ལས་སྐྱོབ་པར་འདོད་པའི་སྙིང་རྗེ་དང་། བདེ་བ་བརྟན་པ་དང་དྲོད་ཐོབ་པའི་དཀའ་བ་སྟེ། བརྟགས་པའི་དངོས་པོ་ལ་མཉམ་པར་བལྟ་བས་ན་བཏང་སྙོམས་སོ། །དེ་ནས་དངོས་པོ་ཐམས་ཅད་ཀྱི་དེ་ཁོ་ན་ཉིད་
ལ་བལྟ་བར་བྱ་ཞེས་བྱ་བ་ནི་དངོས་པོ་ཐམས་ཅད་གདོད་མ་ནས་མ་སྐྱེས་པ་སྟེ། དེ་ཡང་ཤཱུ་ནྱ་ཏཱས་གསལ་བར་བྱེད་པས་ན་གསལ་བའི་དང་ཞེས་བྱའོ། །དེ་ཡང་ཐུགས་ཀའི་འོད་ཟེར་གྱིས་དངོས་པོའི་འཁྲུལ་པ་བསལ་ནས་ཤཱུ་ནྱ་ཏཱའི་སྔགས་ཀྱིས་སྟོང་པ་གསལ་བར་བྱས་ཏེ། གཞག་ཅེས་བྱ་བ་
ནི་མ་བཅོས་པའི་ངང་ལ་གཞག་པའོ། །འདི་བསྐྱེད་པའི་རྫོགས་པ་སྟེ་སྤྲོས་པར་མ་བྱས་པའོ། །སྟོང་དང་མི་སྟོང་ཞེས་བྱ་བ་ནི་རྫོགས་པའི་རྫོགས་པ་སྟེ་འབྲས་བུ་ཆེན་པོའི་སྐབས་སུ་བསྟན་ཏོ། །སྟོང་པ་ཉིད་ལས་ཡི་གེ་བཾ། །ཞེས་བྱ་བ་ལ་སོགས་པས་ནི་སྲུང་བའི་འཁོར་ལོ་སྟེ། གཟུང་བ་རྣམ་
པར་དག་པའོ། །དབུས་སུ་ཆོས་ཀྱི་འབྱུང་གནས་བསམ། །ཞེས་བྱ་བ་ནི་ཆོས་ཀྱི་དབྱིངས་ཀྱི་རང་བཞིན་འཛིན་པ་རྣམ་པར་དག་པ་སྟེ། རོའི་གདན་ཞེས་བྱ་བ་ནི་དངོས་པོ་ཐམས་ཅད་མ་སྐྱེས་པའོ། །ཟླ་བ་དང་ཞེས་བྱ་བ་ནས་བཞེངས་ཞེས་བྱ་བ་ནི་ཡེ་ཤེས་ལྔའི་བདག་ཉིད་དེ་མངོན་པར་བྱང་
ཆུབ་པས་སྐུ་རྫོགས་པའོ། །ཞལ་གཅིག་པ་ཞེས་བྱ་བ་ནི་ཆོས་ཀྱི་དབྱིངས་ལས་མ་གཡོས་པའི་ཕྱིར་རོ། །ཕྱག་གཉིས་པ་ཞེས་བྱ་བ་ནི་རྟག་པ་དང་ཆད་པའི་མཐའ་སྤོང་བའོ། །གྲི་གུག་ཅེས་བྱ་བ་ནི་མ་རིག་པ་ལ་སོགས་པའི་ཉོན་མོངས་པ་ཡོངས་སུ་གཅོད་ཅིང་གདུག་པ་འདུལ་
བའི་ཕྱིར་རོ། །ཐོད་པ་འཛིན་པ་ཞེས་བྱ་བ་ནི་སྙིང་རྗེ་ཆེན་པོའི་རོས་གང་བའི་བདུད་ཀྱི་ཁྲག་འཐུང་བར་བྱེད་པའོ། །སྤྱན་གསུམ་ཞེས་བྱ་བ་ནི་དུས་གསུམ་གྱི་བསྟན་པ་སྲུང་བར་བྱེད་པའོ། །མེ་མདག་གི་ཕུང་པོ་ཞེས་བྱ་བ་ནི་བགེགས་བསྲེག་པའོ། །དབུ་སྐྲ་གྱེན་དུ་འཁྱིལ་

ཞེས་བྱ་བ་ནི་ཁམས་གསུམ་གྱི་བདུད་ལས་རྒྱལ་བའོ། །ཁ་ནས་ཁྲག་འཛག་ཅེས་བྱ་བ་ནི་གདུག་པ་ཅན་གྱི་ཁྲག་རྣལ་འབྱོར་པའི་རྒྱུད་སྲུང་བ་ལ་ཆགས་ཤིང་མི་སྤོང་བའོ། །སྟག་གི་ཤམ་ཐབས་ཞེས་བྱ་བ་ནི་གདུག་པ་སྣ་ཚོགས་པ་འདུལ་བའི་ཕྱིར་རོ། །ཀླུ་ཆེན་པོ་བརྒྱད་ཀྱིས་
ཡན་ལག་བརྒྱན་ཞེས་བྱ་བ་ནི་ཅོད་པན་ལ་ནོར་རྒྱས་སོ། །མགུར་ཆུ་ལ་འཇོག་པོའོ། །རྣ་བ་གཡས་པ་ལ་སྟོབས་ཀྱི་རྒྱུ། གཡོན་པ་ལ་པདྨའོ། །ཕྱག་གདུབ་གཡས་པ་ལ་པདྨ་ཆེན་པོ། གཡོན་པ་ལ་ཧུ་ལུནྟའོ། །ཞབས་གདུབ་གཡས་པ་ལ་རིགས་ལྡན་ནོ། །གཡོན་
པ་ལ་དུང་སྐྱོང་ངོ་། །དེ་དག་ནི་དབང་ཕྱུག་བདག་གི་བདག་ཉིད་དང་དངོས་གྲུབ་ཆེན་པོ་བརྒྱད་སྦྱིན་པའི་ཕྱིར། བརྒྱ་ཕྱེད་ཐོད་པའི་ཕྲེང་བས་ཞེས་བྱ་བ་ནི་ཡི་གེ་ལྔ་བཅུའི་སྔགས་ཀྱི་བདག་ཉིད་དེ། དེ་ལྟར་རྫོགས་པར་བསྐྱེད་ཅེས་བྱ་བ་ནི་དམ་ཚིག་སེམས་དཔའ་རྫོགས་པར་བསྐྱེད་པའོ། །
རང་གི་སྙིང་གར་ཞེས་བྱ་བ་ནས་ཛཿཧཱུཾ་བཾ་ཧོཿས་གཅིག་ཏུ་བྱས་ཞེས་བྱ་བ་ནི་ཡེ་ཤེས་སེམས་དཔའ་དགུག་གཞུག་བྱ་བ་སྟེ་གོ་སླའོ། །ཐུགས་ཀའི་འོད་ཟེར་ཞེས་བྱ་བ་ནི་ཐུགས་ཀའི་འོད་ཟེར་ལྕགས་ཀྱུ་ལྟ་བུ་སྤྲོས་ཏེ། དེ་བཞིན་གཤེགས་པ་དང་རིག་པའི་ལྷ་མོ་དང་། བྱང་ཆུབ་སེམས་
དཔའ་དང་། ཁྲོ་བོའི་རྒྱལ་པོ་ལ་སོགས་པ་བཀུག་ལ་མཆོད་པར་བྱ་སྟེ། གསོལ་བ་གདབ་པ་དང་དབང་བསྐུར་བར་དམིགས་ཏེ་བདེ་བ་ཆེན་པོར་བུམ་པའོ། །མགྲིན་པར་གསང་བའོ། །སྙིང་གར་ཤེས་རབ་ཡེ་ཤེས་སོ། །ལྟེ་བར་བཞི་པ་མཐར་ཐུག་པར་བསྲུང་བར་བྱའོ། །
དེ་ཡང་སྟོང་དང་སྟོང་མིན་ཞེས་བྱ་བའི་འབྲས་བུ་ཆེན་པོར་བསྟན་པའི་ཚིག་གི་དོན་ཤེས་པར་བྱའོ། །དེའི་མཐར་འཁོར་རྣམས་མི་བསྐྱོད་པ་ལ་འདུས་ལ། མི་བསྐྱོད་པ་དབུ་རྒྱན་དུ་ཞུགས་སོ། །དེ་ནས་འདིར་སོ་སོ་སྐྱེ་བོ་རྨོངས་པར་བྱ་བའི་ཕྱིར། མདུན་བསྐྱེད་རིང་དུ་སྤང་བ་སྟེ།
དེ་ཡང་ཤིན་ཏུ་སྤང་བར་བྱ་བའི་ཕྱིར་རོ། །དེ་ཉིད་རིག་པ་རྣམས་ཀྱིས་ནི་འདིར་བསྐྱེད་པར་ཤེས་པར་བྱའོ། །དུར་ཁྲོད་ཀྱི་མགལ་བ་ཞེས་བྱ་བ་ནི་ལྷའི་རྟེན་དེ་རབ་གནས་བྱའོ། །སྐུ་མཐོ་གང་ཞེས་བྱ་བ་ནི་གསང་བའི་སྐུ་ཡིན་པའི་ཕྱིར་རོ། །དུར་ཁྲོད་ཀྱི་ས་ཞེས་བྱ་བ་ནས་བསྟིམ་

པར་བྱ་ཞེས་བྱ་བ་ནི་གོ་སླའོ། །དེ་ནས་ཞེས་བྱ་བ་ནི་ཚོགས་བསག་པ་ལ་འཇུག་པ་སྟེ། དེ་ཡང་གཙོ་བོའི་དམ་ཚིག་ལས་མི་འགལ་བ་དང་། འཁོར་གྱི་ཚོགས་ཐོབ་པར་བྱ་བའི་ཕྱིར་གཙོ་བོ་ལས་སྤྲུལ་པའི་ནག་པོ་ཆེན་པོ་ལས་མཆོད་པ་དང་སྡིག་པ་བཤགས་
པ་ལ་སོགས་པ་བྱའོ། །དེའི་བྱེ་བྲག་ཏུ་དབྱེ་བ་ནི་གོང་དུ་བསྟན་པ་ཡིན་ནོ། །བསམ་གཏན་གཅིག་པར་འགྱུར་ཞེས་བྱ་བ་ནི་གོང་དུ་སྤྲུལ་པའི་ནག་པོ་དེ་ཡན་ལག་བདུན་པ་ཚང་བ་དང་། མདུན་གྱི་ནག་པོ་ཆེན་པོ་ལ་ཐིམ་ནས་བསམ་གཏན་གཅིག་ཏུ་འགྱུར་ཞེས་བྱའོ། །ཚངས་
པའི་གནས་བཞི་ཞེས་བྱ་བ་ནི་དེའི་རྒྱུད་ཀྱིས་བསྒོམ་པར་བྱ་བ་སྟེ་གོང་དུ་བསྟན་པ་བཞིན་ནོ། །དེ་མ་ཐག་ཏུ་ཞེས་བྱ་བ་ནི་ཚངས་པའི་གནས་བཞི་བསྒོམས་པའི་དེ་མ་ཐག་ཏུ་རྒྱུ་བའི་འཁོར་དུ་བཟུང་བའི་ཕྱིར་རོ། །དེ་ཡང་གཙོ་བོའི་ཐུགས་ཀའི་འོད་ཟེར་གྱིས་ཕོག་པས་ནག་པོ་
ཆེན་པོ་ཚུར་བསྡུས་ཏེ་ཞལ་དུ་ཞུགས་ནས་གཙོ་བོའི་ཐུགས་ཀའི་ཧཱུཾ་ལ་ཞུགས་པའོ། །དེ་ནས་ཐུགས་ཀ་ནས་རྒྱུ་བའི་བཀའ་སྡོད་ཀྱི་འོད་ཀྱི་གོང་བུའི་ནང་དུ་སྐུ་མཐོ་གང་གི་ཚད་དུ་གྱུར་པ་བྱུང་སྟེ། དེ་ནས་འབྲས་བུའི་འཁོར་དུ་བསྒྲུབ་པའི་ཕྱིར་སྟོང་པ་ཉིད་དུ་བསམ་ཞེས་བྱའོ། །
དེ་ཡང་གཙོ་བོའི་ཐུགས་ཀའི་འོད་ཟེར་གྱི་རྒྱུའི་བཀའ་སྡོད་ལ་ཕོག་པས་འོད་དུ་ཞུ་ནས་ཡི་གེ་གསུམ་གྱི་བདག་ཉིད་དུ་གྱུར་ཏེ། ཡི་གེ་གསུམ་ཡང་རང་བཞིན་མེད་པའི་ཕྱིར་སྟོང་པ་ཉིད་ཅེས་བྱའོ། །སྟོང་པ་ཉིད་ལས་ཞེས་བྱ་བ་ནི་གཙོ་བོའི་དམ་ཚིག་ལས་མི་འདའ་བ་དང་།
སེམས་བསྐྱེད་པའི་སྟོབས་ཀྱིས་སྟོང་པ་ཉིད་ལས་སྐུ་བཞེངས་པའི་ཕྱིར་རོ། །དེ་ཡང་རྡོ་རྗེའི་བྲག་ལ་སོགས་པ་སྟེ་གོ་སླའོ། །སྐུ་རྫོགས་པ་ཞེས་བྱ་བ་ནི་དམ་ཚིག་སེམས་དཔའི་སྐུ་རྫོགས་པ་སྟེ། ཐུགས་ཀའི་འོད་ཟེར་ཞེས་བྱ་བ་ནི་དེ་ཡང་དབང་བསྐུར་ལ་གཙོ་བོ་དང་དེ་ཉིད་
ཀྱིའོ། །སྤྱན་དྲང་ཞེས་བྱ་བ་ནི་ཕྱག་རྒྱ་བཞིས་སོ། །དུར་ཁྲོད་ཀྱི་ནག་པོ་ཆེན་པོ་ཞེས་བྱ་བ་ནི་དམ་ཚིག་སེམས་དཔའོ། །ནག་པོ་དང་གཉིས་སུ་མེད་པར་ཞེས་བྱ་བ་ནི་རང་བཞིན་གྱི་ནག་པོ་གོང་གི་ཕྱག་རྒྱ་བཞིས་བསྟིམ་པའོ། །དམིགས་པར་བྱས་ལ་ཞེས་བྱ་བ་ནི་དེ་ཡང་དབང་

བསྐུར་ལ། ཕྱིའི་སྙིང་པོ་ཐུགས་ཀ་ནས་ཐུགས་ཀར་བརྒྱ་ཕྲག་གཅིག་བསྟིམ་པར་བྱའོ། །མཆོད་པ་དང་གཏོར་མ་ཞེས་བྱ་བ་ནི་རྩ་བའི་སྔགས་ཀྱིས་འབུལ་ལོ། །བཀའ་སྡོད་ཀྱི་ནག་པོ་ཆེན་པོ་ཞེས་བྱ་བ་ནི་སུ་སྨ་ཏའི་སྔགས་ཐུགས་ཀ་ནས་ཐུགས་ཀར་བརྒྱ་ཕྲག་གཅིག་བསྟིམ་པའི་
ཕྱིར་རོ། །སྔགས་ཀྱི་བཟླས་པ་བྱས་ནས་ཞེས་བྱ་བ་ནི་ནང་གི་སྲོག་གི་སྙིང་པོས་བསྙེན་པ་བསྐྱལ་ལོ། །དུས་གསུམ་དུ་ཞེས་བྱ་བ་ནི་གོ་སླའོ། །དེ་ལྟར་བསྙེན་པའི་མཚན་མ་ཐོབ་པ་དང་ལས་ལ་སྦྱར་བར་བྱས་ཏེ། མཚན་མ་མ་ཐོབ་པས་ནི་མ་ཡིན་ནོ། །འཇིག་རྟེན་པས་
འཕྱ་བར་འགྱུར་བའི་ཕྱིར་རོ། །བཅོམ་ལྡན་འདས་ཀྱིས་བཀའ་སྩལ་ཏོ། །ཞེས་བྱ་བ་ནི་ལྷའི་འཁོར་ལོ་རྫོགས་པས་ཞེས་བྱ་བའི་དོན་ཏོ། །གསོལ་བ་ཞེས་བྱ་བ་ནི་གཙོ་བོ་ལས་ཏེ། དེ་ཡང་ལྷའི་ཆོ་ག་རྫོགས་པར་བྱ་བ་ནི་མཚན་མ་རྙེད་ནས་ཞེས་བྱ་བའི་དོན་ཏོ། །ལས་ཀྱི་སྦྱོར་
བ་ཇི་ལྟར་ལགས། །ཞེས་བྱ་བ་ནི་ལས་སྦྱོར་གྱི་ཁྱད་པར་ཞུས་པའོ། །བཅོམ་ལྡན་འདས་ཀྱིས་བཀའ་སྩལ་པ། །ཞེས་བྱ་བ་ནི། གཙོ་བོའི་ལས་ཀྱི་ཏིང་ངེ་འཛིན་ལ་ཞུགས། །ཞེས་བྱ་བའི་དོན་ཏོ། །ལས་ཀྱི་ཆོ་ག་རྣམས་ཞེས་བྱ་བ་ནས་ཐམས་ཅད་འགྲུབ་ཅེས་བྱ་བ་ནི་
མདོར་བསྟན་པ་སྟེ་གོ་སླའོ། །དེ་ནས་ནག་པོ་ཆེན་པོས་གསོལ་པ་ཞེས་བྱ་བ་ནི་ལས་ཀྱི་ཆོ་ག་ཉེ་བར་ཞུས་པའོ། །དེ་ཡང་གང་ཞེ་ན། གནས་དང་ལིངྒ་བཅས་པ་དང་། དུས་དང་གསད་པའི་སྦྱོར་བ་ཞེས་བྱའོ། །དེའི་ཁྱད་པར་ནི་འདི་ལྟ་སྟེ། ཆུ་འགྲམ་གྱི་དུར་ཁྲོད་ཅེས་བྱ་བ་ནི་
ཆུ་གསུམ་འདུས་པའི་མདོ་ན་གནས་པའོ། །ཤིང་གཅིག་ཅེས་བྱ་བ་ནི་ཤིང་གཉིས་མེད་པའོ། །རོ་བསྲེགས་པའི་དུར་ཁྲོད་ཅེས་བྱ་བ་ནི་རོ་བསྲེགས་པའི་ས་གཞིའམ་མེ་ཐབ་འདྲ་བའི་ཁང་སྟོང་ཡིན་པའི་ཕྱིར་རོ། །མཁའ་འགྲོ་མའི་ཁང་སྟོང་ཞེས་བྱ་བ་ནི་ཚངས་མ་ལ་སོགས་པའི་
མ་མོ་བརྒྱད་གནས་པའི་ཁང་སྟོང་ངོ་། །རྒྱ་མཚོའི་གླིང་ཞེས་བྱ་བ་ནི་གླིང་ན་གནས་པའི་དུར་ཁྲོད་དོ། །རིའི་རྩེ་མོ་ཞེས་བྱ་བ་ནི་རི་གཞན་པས་མཐོ་ཞིང་ཟུར་གསུམ་པ་གནས་པའི་རྩེ་མོའོ། །མ་ཧཱ་དེ་བ་གནས་པའི་ལིངྒ་ཞེས་བྱ་བ་ནི་མ་ཧཱ་དེ་བ་ལ་སོགས་ཕྱི་རོལ་པའི་ལྷ་རྟེན་

ཡོད་པའོ། །གསལ་ཤིང་གི་ནགས་ཚལ་ཞེས་བྱ་བ་ནི་གསལ་ཤིང་ལ་སོགས་པའི་ཚེར་མ་ཡོད་པའི་དུར་ཁྲོད་དོ། །གནས་དེ་དག་ཅེས་བྱ་བ་ནི་ཁྱད་པར་གྱི་གནས་ཏེ་མྱུར་དུ་འགྲུབ་པའི་ཕྱིར་རོ། །འགྲུབ་པར་བྱ་ཞེས་བྱ་བ་ནི་གོང་དུ་བསྟན་པའི་སྦྱོར་ཀ་དེ་དག་
ཀྱང་གནས་དེ་དག་ཏུ་བསྒྲུབ་པར་བྱའོ། །དེ་ནས་ཞེས་བྱ་བ་ནི་གནས་དེ་དག་ཏུ་སྦྱོར་ཀ་ལ་འཇུག་པའི་ཕྱིར་དེ་ནས་ཞེས་བྱའོ། །དེ་ཡང་དང་པོའི་ལིངྒའི་རྒྱུ་སྟ་གོན་ལ་གནས་པར་བྱ་སྟེ། ལིངྒའི་རྒྱུ་ནི་ཚ་བ་གསུམ་ཞེས་བྱ་བ་ནས་བག་ཟན་ཞེས་བྱ་བའི་བར་དུའོ། །སོགས་པ་
ཞེས་བྱ་བ་ནི་བསྒྲུབ་བྱའི་རྣམ་པར་སྣང་མཛད་དང་། ཁྭ་ཏ་དང་མཆེ་བ་སྟོབས་ཅན་གྱིས་ཟོས་པའི་འཕྲོ་དང་། བདུད་རྩི་ལྔ་དང་། ཕྱིའི་ཚ་བ་གསུམ་དང་། དེ་དག་བཀྲ་མི་ཤིས་པའི་ཐོད་པར་བླུགས་ལ། སྣ་ཚོགས་པའི་དུག་ལ་མཎྜལ་བྱས་ལ་བཀའ་སྡོད་ཀྱི་མདུན་དུ་
གཞག་པར་བྱའོ། །དེ་ནས་བདག་ཉིད་ལྷའི་འཁོར་ལོ་རྫོགས་པར་བསྐྱེད་ལ། དེ་ནས་བཀའ་སྡོད་ཀྱི་འཁོར་ལོ་བསྐྱེད་པར་བྱ་སྟེ། དེ་ཡང་ཐུགས་ཀའི་འོད་ཟེར་གྱིས་ལིངྒའི་རྒྱུ་རང་བཞིན་མེད་པར་བྱས་ལ། ཁཾ་ལས་བྱུང་བའི་རྡོ་རྗེའི་བྲག་གི་སྟེང་དུ་པདྨ་དང་ཉི་མའི་དབུས་སུ་
ཧཱུཾ་ལས་བྱུང་བའི་ནག་པོ་ཆེན་པོ་ལ་སོགས་པའི་མཁའ་འགྲོ་མ་གསུམ་བསྐྱེད་པར་བྱ་སྟེ། དེ་ཡང་མཁའ་འགྲོ་མ་ནི་ཡིད་འཕྲོག་མ་ལ་སོགས་པ་གསུམ་སྟེ། ཞལ་གཅིག་མ་ཕྱག་གཉིས་ལ་སོགས་པ་སྐུ་མདོག་དཀར་སེར་སྤྱན་གསུམ་པ་འཇིགས་པའི་གཟུགས་ཅན། ཕྱག་ན་ལྕགས་
ཀྱུ་དང་ཞགས་པ་འཛིན་པའོ། །དེ་ནས་ཐུགས་ཀའི་འོད་ཟེར་གྱིས་རང་བཞིན་གྱི་འཁོར་ལོ་བསྟིམ་པ་དང་དབང་བསྐུར་བ་ལ་སོགས་པ་སྟེ། དེ་ནས་ཕྱིའི་སྲོག་གི་སྙིང་པོ་སོ་སོའི་ཐུགས་ཀར་ཁྱབ་པར་བྱའོ། །དེ་ནས་མཆོད་པ་དང་གཏོར་མ་ཡང་བྱས་ཏེ་དམ་ཚིག་གི་ཆོ་ག་བྱས་ལ་
ནང་གི་སྲོག་གི་སྙིང་པོ་བསྙེན་པ་བསྐྱལ་བར་བྱའོ། །དེ་ནས་བཀའ་སྡོད་ཀྱི་མདུན་དུ་མེའི་དཀྱིལ་འཁོར་གྱི་དབུས་སུ་ལིངྒའི་རྒྱུ་གསལ་བར་དམིགས་ལ། བདག་དང་མཁའ་འགྲོ་མའི་ཐུགས་ཀ་ནས་སྤྲུལ་པའི་གཟུགས་ལྕགས་ཀྱུ་དང་ཞགས་པ་ཅན་མང་དུ་སྤྲོས་ཏེ། བསྒྲུབ་བྱ་

དགུག་གཞུག་གི་སྦྱོར་བ་དང་ལྡན་པར་བྱ་སྟེ། དེ་ལྟ་བུའི་ཆོ་ག་ནི་ལིངྒའི་རྒྱུའི་ཆོ་ག་སྟེ་ཐམས་ཅད་དུ་སྔོན་དུ་འགྲོ་བའོ། །ཡི་གེ་དང་ལྡན་པར་བྱ་བ་ཞེས་བྱ་བ་ནི་མིང་དང་རུས་ཀྱི་ཡི་གེ་གསད་པའི་སྔགས་དང་ཧཱུཾ་གཉིས་ཀྱི་བར་དུ་གཞུག་གོ། །དེ་ལྟར་ལིངྒའི་ཆོ་ག་རྫོགས་པ་དང་དེ་ནས་ཐིག་
ལེ་གཞོམ་པར་བྱ་སྟེ། དེའི་ཚེ་ཞེས་བྱའོ། །དེའི་ཡང་ནག་པོ་ཕྱོགས་གཉིས་ལ་སྔོན་དུ་འགྲོ་བར་བྱ་སྟེ། ཐིག་ལེ་ཤར་བའི་ཚེས་གཅིག་ནས་འཇུག་པར་བྱ་སྟེ། དེ་ཡང་དང་པོར་བདག་ཉིད་ལྷའི་འཁོར་ལོ་རྫོགས་པར་བྱས་ལ། གཙོ་བོའི་མདུན་དུ་བཀའ་སྡོད་ཀྱི་འཁོར་ལོ་
བསྐྱེད་པར་བྱ་སྟེ། རྡོ་རྗེའི་བྲག་ལ་སོགས་པ་ནི་གོང་དུ་བསྟན་པ་བཞིན་ནོ། །དེ་ནས་བཀའ་སྡོད་ཀྱི་འཁོར་ལོ་ནི་དུང་སྐྱོང་ལ་སོགས་པའི་འཁོར་སྐུ་མདོག་ནག་མོ་ཞལ་གཅིག་ཕྱག་གཉིས་སྤྱན་གསུམ་མ་མཆེ་བ་གཙིགས་མ། ཁ་ནས་ཁྲག་འཛག་པའོ། །གཡས་པ་ན་ཐོད་པ་
འཛིན་པ། གཡོན་པ་ན་ཕུར་བུ་འཛིན་པའོ། །དེ་ནས་ཐུགས་ཀའི་འོད་ཟེར་གྱིས་ལྷའི་འཁོར་ལོ་བསྟིམ་པ་ནས་བསྙེན་པའི་བར་དུ་གོང་དུ་བསྟན་པ་བཞིན་ནོ། །འདིར་མ་བསྟན་ཏེ་ཟློས་པའི་སྐྱོན་དུ་འགྱུར་བའི་ཕྱིར་རོ། །དེ་ནས་གཙོ་བོ་དང་མཁའ་འགྲོ་མའི་ཐུགས་ཀ་ནས་
སྤྲུལ་པའི་མཁའ་འགྲོ་མ་ལྕགས་ཀྱུ་དང་ཞགས་པ་འཛིན་པ་མང་དུ་སྤྲོས་ཏེ་བསྒྲུབ་བྱ་དགུག་གཞུག་གི་སྦྱོར་བ་དང་བརྒྱ་ཕྲག་གཅིག་ཏུ་བྱ་སྟེ། དེ་ནས་གསད་པའི་སྦྱོར་བ་བྱ་བ་ནི་གཙོ་བོ་དང་མཁའ་འགྲོ་མའི་ཐུགས་ཀ་ནས་སྤྲུལ་པའི་གཟུགས་ཕུར་བུ་དང་ཐོ་བ་ཐོགས་པ་མང་དུ་
སྤྲོས་ཏེ། ཐིག་ལེའི་གནས་སུ་དེ་དག་གིས་གསད་པའི་སྔགས་བརྗོད་ཅིང་ཕུར་བུས་འདེབས་ཤིང་ཐོ་བས་བརྡུངས་པའི་བསམ་པ་དང་ལྡན་པར་བྱའོ། །བརྒྱ་ཕྲག་གཅིག་ཏུ་གསད་པར་བྱའོ། །ཐིག་ལེའི་གནས་སུམ་ཅུ་རྩ་གཉིས་ཞེས་བྱ་བ་ནི་ཐིག་ལེ་ནི་སྲོག་རྒྱུ་བའི་རྩ་སྟེ། བྱང་
ཆུབ་སེམས་ཀྱི་རང་བཞིན་ནོ། །དེ་ཡང་བདེ་བ་ཆེན་པོའི་གནས་ནས་རྩ་སུམ་ཅུ་རྩ་གཉིས་ཀྱི་བདག་ཉིད་དེ་སུམ་ཅུ་རྩ་གཉིས་ཞེས་བྱ་བ་ནི་འཕེལ་བ་དང་འགྲིབ་པའི་ཁྱད་པར་གྱིས་གཡས་གཡོན་དུ་གནས་སོ། །དེ་ཡང་གཡོན་པའི་མཐེ་བོང་དང་། བོལ་གོང་དང་། ལོང་བུ་དང་།

བྱིན་སྙིང་དང་། སྒྱིད་ཁུང་དང་། གཉན་གོང་དང་། བརླའི་རྩ་དང་། མཚན་མ་དང་། ལྟེ་བ་དང་། མཆན་ཁུང་དང་། སྙིང་ག་དང་། རྩེ་ཆུང་དང་། ཁ་སྣ་དང་། རྣ་བ་དང་། མིག་གཡོན་པ་དང་། མཛོད་སྤུ་དང་། དེ་དག་བཅུ་དྲུག་ནི་འཕེལ་བའི་ཐིག་
ལེ་སྟེ་དཀར་པོའི་ཚེས་གཅིག་ནས་སོ། །ཚངས་པའི་བུ་ག་ལ་སོགས་ཏེ་གཡས་པའི་མཐེ་བོང་གི་བར་དུ་གནས་བཅུ་དྲུག་ནི་གོང་མ་དང་འདྲ་སྟེ་འགྲིབ་པའི་ཐིག་ལེ་ཡིན་པའི་ཕྱིར་ནག་པོ་ཚེས་གཅིག་ནས་བཅུ་གཅིག་གི་བར་དུའོ། །གནས་དེ་དག་ཏུ་བསྙེན་པ་དང་། ལས་སྦྱོར་ཐུན་མོང་དུ་བྱ་
བའི་ཐིག་ལེ་རེ་རེ་ཞིང་ཚེས་གྲངས་ཀྱི་བྱེ་བྲག་གིས་ཞག་རེ་རེ་གསད་པར་བྱའོ། །གསལ་ཤིང་གི་ཚེར་མ་ཞེས་བྱ་བ་ནས་བཙན་དུག་གིས་བསྣུན་པར་བྱ་ཞེས་བྱ་བ་ནི་གསད་པའི་ཁྱད་པར་གྱི་རྫས་ཏེ་གོ་སླའོ། །བསམ་གཏན་དང་ཞེས་བྱ་བ་ནི་གཙོ་བོ་དང་མཁའ་འགྲོ་མའི་ཐུགས་
ཀ་ནས་སྤྲུལ་པའི་ཚོགས་ཀྱིས་གསད་པའི་ལས་རྒྱུན་མི་འཆད་པར་བྱེད་པའི་ཕྱིར་རོ། །སྔགས་ཀྱིས་ཞེས་བྱ་བ་ནི་གསད་པའི་སྔགས་ཀྱིས་སོ། །དུས་ཞེས་བྱ་བ་ནི་ཐུན་མོང་དང་ཐུན་མོང་མ་ཡིན་པའོ། །བདུན་ནམ་ཞེས་བྱ་བ་ནི་ཐུན་མོང་མ་ཡིན་པའི་དུས་སོ། །ཞག་བདུན་གྱིས་ལས་སྦྱོར་རྫོགས་པའོ། །དེ་ཡང་
ཐུན་རེ་རེའི་ཐིག་ལེའི་གནས་སུམ་ཅུ་རྩ་གཉིས་ཀར་གསད་པའི་ལས་སྦྱོར་རྫོགས་པའོ། །ཐུན་དྲུག་གི་ཁར་གསད་པའི་སྦྱིན་སྲེག་གིས་ཁ་བསྐང་བར་བྱའོ། །སུམ་ཅུ་རྩ་གཉིས་ཞེས་བྱ་བ་ནི་བསྙེན་པ་དང་ལས་སྦྱོར་ཐུན་མོང་སྟེ་བསྙེན་པ་ཡང་ཡིན་ལ་ལས་སྦྱོར་ཡང་ཡིན་པའི་ཕྱིར་རོ། །དེ་ནས་གཞན་ཡང་ཞེས་བྱ་བ་ནི་ཉེ་བར་བསྒྲུབ་པ་ལ་
འཇུག་པར་བྱ་སྟེ་མཐུན་པའི་དམ་རྫས་བཀའ་སྡོད་ཀྱི་འཁོར་ལོ་མྱུར་དུ་འགྲུབ་པའི་ཕྱིར་རོ། །དཔལ་ནག་པོ་ཆེན་པོའི་བསམ་གཏན་སྐད་ཅིག་གིས་བྱ་སྟེ་ཞེས་བྱ་བ་ནི་དང་པོ་སྣ་ཚོགས་པའི་དུག་དང་བདུད་རྩི་ལྔ་དང་ཤ་ལྔ་དང་ཆང་གིས་ཡོངས་སུ་སྦྱར་ཏེ་རི་ལུ་བྱའོ། །དེ་ནས་ཐོད་པ་རབ་གནས་
བྱས་པའི་ནང་དུ་བཞག་སྟེ་དུར་ཁྲོད་ཀྱི་རས་ཀྱིས་ཁ་བཀབ་པ་ལ་བདུད་རྩི་ལྔའི་མཎྜལ་ལེགས་པར་བྱས་པའི་སྟེང་དུ་བཞག་ལ། བདག་ལྷའི་འཁོར་ལོ་རྫོགས་པར་བྱ་སྟེ། དེ་ནས་བདག་གི་ཐུགས་ཀའི་འོད་ཟེར་གྱིས་ཐོད་པ་དང་ལ་དུའི་རང་བཞིན་མེད་པར་དམིགས་ལ། དེར་ཁཾ་ལས་བྱུང་

བའི་རྡོ་རྗེའི་བྲག་བསམ་པར་བྱ་སྟེ། བྲག་གི་སྟེང་དུ་ཨེའི་རྣམ་པ་ལྟ་བུའི་ཆོས་ཀྱི་འབྱུང་གནས་བསམ་པར་བྱས་ལ། དེའི་དབུས་སུ་པདྨ་དང་ཉི་མ་བསམ་པར་བྱ་སྟེ། དེའི་སྟེང་དུ་ཧཱུཾ་ལས་སྐྱེས་པའི་ལྷའི་འཁོར་ལོ་བསྐྱེད་པར་བྱ་ཞིང་། དེ་ཡང་ནམ་མཁའི་འཁོར་ལོ་མ་ལ་སོགས་པ་གསུམ་
བསྐྱེད་པར་བྱ་སྟེ། ཞལ་གཅིག་མ་དང་ཕྱག་གཉིས་མ། སྐུ་མདོག་ནམ་མཁའི་མདོག་ཅན་མ་སྤྱན་གསུམ་མ། ཕྱག་ནི་རྡོ་རྗེ་དང་ཐོད་ཁྲག་འཛིན་པ་སྟེ། དེ་ནས་ཐུགས་ཀའི་འོད་ཟེར་གྱིས་རང་བཞིན་གྱི་འཁོར་ལོ་བསྟིམ་པ་ལ་སོགས་ཏེ་དམ་ཚིག་གི་ཆོ་གའི་བར་དུ་བྱའོ། །དེ་ནས་
འཁོར་ལོའི་ཐུགས་ཀར་ཟླ་བ་དང་ཉི་མའི་སྟེང་དུ་རེ་ཕ་ལས་ལ་དུའི་གྲངས་ཀྱི་ཉི་མའི་དཀྱིལ་འཁོར་བསམ་པར་བྱ་སྟེ། ཉི་མའི་དཀྱིལ་འཁོར་གྱི་སྟེང་དུ་ཧཱུཾ་ཡོངས་སུ་གྱུར་པ་ལས་འོད་ཀྱི་གོང་བུར་གྱུར་ཏེ། འོད་ཀྱི་གོང་བུའི་དབུས་སུ་ཧཱུཾ་ལས་ནང་གི་སྙིང་པོ་དང་། ལ་དུའི་སྔགས་ཀྱིས་
བསྐོར་བར་དམིགས་ཏེ། དེ་ནས་བདག་དང་མཁའ་འགྲོ་མའི་ཐུགས་ཀ་ནས་ནང་གི་སྙིང་པོ་དང་ལ་དུའི་སྔགས་སྤྲོས་ཏེ། གཙོ་བོའི་ཞལ་དུ་ཞུགས་ནས་ཉི་མའི་དབུས་ཀྱི་གོང་བུའི་སྔགས་ལ་ཐིམ་པར་བསམ་པར་བྱའོ། །དེ་ལྟར་ཞག་གསུམ་གྱི་བར་དུ་བསྙེན་པ་བྱས་ན་འགྲུབ་
པར་འགྱུར་རོ། །སྐད་ཅིག་མ་ཞེས་བྱ་བ་ནི་མྱུར་དུ་འགྲུབ་ཅེས་བྱ་བའི་དོན་ཏོ། །དེ་ཅིའི་ཕྱིར་ཞེ་ན། འཁོར་གྱི་གཙོ་བོའི་ཐུགས་ཀྱི་སྲོག་སྒྲུབ་པ་ཡིན་པའི་ཕྱིར་མྱུར་དུ་འགྲུབ་པར་འགྱུར་རོ། །ལ་དུའི་གཏོར་མ་ཞེས་བྱ་བ་ནི་དེ་ལྟར་བསྙེན་པ་རྫོགས་པའི་དུས་སུ་མཁའ་འགྲོ་མ་རྣམས་
གཙོ་བོ་ལ་འདུས་ཏེ། གཙོ་བོ་འོད་དུ་ཞུ་ནས་ལ་དུའི་རང་བཞིན་དུ་གྱུར་པར་བསམ་པར་བྱའོ། །ལ་དུ་དེ་གཏོར་མ་བྱས་པ་ནི་མཆོག་གི་གཏོར་མ་ཞེས་བྱའོ། །སྔགས་ནི་ཨོཾ་གྱི་ཐོག་མ་དང་ཧཱུཾ་ཧཱུཾ་ཕཊ་ཕཊ་སྭཱ་ཧཱའི་མཐའ་ཅན་ནོ། །དེ་ནས་གཞན་ཞེས་བྱ་བ་ནི་དམ་རྫས་ཀྱིས་སྤོས་
བསྒྲུབ་པར་བྱ་བ་ལ་འཇུག་པར་བྱ་སྟེ། དེ་ཡང་ཐུན་མོང་དུ་བསྒྲུབ་པ་དང་ཁྱད་པར་མཆོག་ཏུ་བསྒྲུབ་པའོ། །དེ་ཡང་དང་པོ་བདུད་རྩི་ལྔ་ལ་མཎྜལ་བྱས་ལ་དེའི་སྟེང་དུ་ཐོད་པ་གསུམ་གྱི་སྒྱེད་པུ་བཙུགས་ཏེ། ཐོད་པའི་སྟེང་དུ་དུར་ཁྲོད་ཀྱི་རས་ཀྱིས་མར་མེའི་སྙིང་པོ་མཐོ་གང་གི་

ཚད་དུ་བྱས་ལ། མར་ནག་ཆེན་པོའི་མར་མེ་གཟུགས་པར་བྱའོ། །དེ་ཡང་སྙིང་པོའི་དབུས་སུ་དུར་ཁྲོད་ཀྱི་སྣག་ཚས་སྲོག་གི་སྙིང་པོ་བྲི་བར་བྱའོ། །དེ་ནས་མེ་སྦར་བ་ལ་མཎྜལ་གྱི་སྟེང་དུ་མར་མེའི་འོད་ཀྱིས་ཁྱབ་པར་བྱས་ལ། ཤར་དུ་ཉུངས་ཀར། ལྷོར་
སྒོག་པ། ནུབ་ཏུ་རང་འབྱུང་། བྱང་དུ་བཙན་དུག །བྱང་ཤར་དུ་ཤ་ཆེན། ཤར་ལྷོར་གུ་གུལ་ཆེན་པོ། ལྷོ་ནུབ་ཏུ་འོད་ཟེར་ཅན། ནུབ་བྱང་དུ་ལུ་ཏི། དེ་རྣམས་ཆ་བསྙམས་མཎྜལ་ལ་དགྲམ། དེ་ནས་བདག་ལྷའི་འཁོར་ལོ་རྫོགས་པར་བྱས་ལ། ཐུགས་ཀའི་
འོད་ཟེར་གྱིས་མར་མེ་མི་དམིགས་པར་བྱས་ཏེ། དེ་ནས་དེ་ཉིད་དུ་བཀའ་སྡོད་ཀྱི་ནག་པོ་ཆེན་པོ་ཆོ་ག་གསུམ་གྱིས་བསྐྱེད་ལ། རང་བཞིན་གྱི་འཁོར་ལོ་བསྟིམ་པ་ལ་སོགས་ཡན་ལག་གི་ཆོ་ག་རྫོགས་པར་བྱས་ཏེ། ཉུངས་ཀར་ལ་སོགས་པའི་རྫས་རྣམས་ལ་ཨཱ་ལི་ལ་
སོགས་པའི་ཟླ་བ་དང་ཉི་མའི་དབུས་སུ་བསམ་པར་བྱའོ། །དེ་ནས་བདག་དང་བཀའ་སྡོད་ཀྱི་ཐུགས་ཀ་ནས་ནང་གི་སྙིང་པོ་སྤོས་སྦྱོར་གྱི་སྔགས་དང་བཅས་པ་སྤྲོས་ཏེ། ཉུངས་ཀར་ལ་སོགས་པ་ལ་ཉི་ཤུ་རྩ་གཅིག་བསྟིམ་པར་བྱའོ། །དེ་ནས་གཅིག་ཏུ་བསྡུས་ཏེ་ཕྱེ་མར་
བྱས་ལ་མར་ནག་ཆེན་པོས་བསྲེས་ལ་ཞེས་བྱའོ། །དེ་ཡང་མཆོག་ཏུ་བསྒྲུབ་པར་བྱ་སྟེ། རབ་གནས་བྱས་པའི་ཐོད་པར་བླུགས་ཏེ་མཎྜལ་གྱི་དབུས་སུ་བཞག་ལ་དེའི་སྟེང་དུ་མར་མེ་བཞག་ལ། དེ་ནས་བདག་ལྷའི་འཁོར་ལོ་རྫོགས་པར་བྱས་ཏེ། དེ་ནས་ཐུགས་ཀའི་འོད་ཟེར་གྱིས་
སྤོས་ལ་སོགས་པ་རང་བཞིན་མེད་པར་བྱ་སྟེ། དེ་ནས་ལྷའི་འཁོར་ལོ་བསྐྱེད་པར་བྱ་སྟེ། དེ་ཡང་བཾ་ལས་བྱུང་བའི་རྡོ་རྗེའི་བྲག་གི་སྟེང་དུ་སྲུང་བའི་འཁོར་ལོའི་དབུས་སུ་ཆོས་ཀྱི་འབྱུང་གནས་བསམ་པར་བྱའོ། །དེའི་དབུས་སུ་པདྨ་དང་ཉི་མའི་སྟེང་དུ་ཧཱུཾ་ལས་བསྐྱེད་པའི་ལྷའི་འཁོར་ལོ་
རྫོགས་པར་བསྐྱེད་ལ་དེ་ཡང་མེའི་གཟུགས་ལ་སོགས་པ་མཁའ་འགྲོ་མ་སྐུ་མདོག་དམར་སེར་ཞལ་གཅིག་མ་ཕྱག་གཉིས་མ་སྤྱན་གསུམ་མ་ཁྲོ་གཉེར་གྱི་གཟུགས་ཅན་གྱིས་གྲི་གུག་དང་ཐོད་པ་ལག་ན་འཛིན་པ་དེ་ལྟར་རྫོགས་པར་བསྐྱེད་ལ། དེ་ནས་རང་བཞིན་གྱི་དཀྱིལ་འཁོར་བསྟིམ་

པ་ལ་སོགས་པ་བྱ་སྟེ། འཁོར་ལོའི་གཙོ་བོའི་ཐུགས་ཀར་ཨཱ་ལི་དང་ཀཱ་ལི་ལས་བསྐྱེད་པའི་ཟླ་བ་དང་ཉི་མའི་དབུས་སུ་ཨ་ལས་གྲུབ་པའི་པདྨའི་སྣོད། དེའི་དབུས་སུ་ཧཱུཾ་ལས་གྱུར་པའི་སྤོས་ཀྱི་རང་བཞིན་འོད་ཟེར་ལྔའི་བདག་ཉིད་དེ། དེའི་དབུས་སུ་ཧཱུཾ་གི་སྙིང་པོ་གསལ་བར་བྱ་སྟེ། དེ་
ནས་ནང་གི་སྙིང་པོ་དང་སྤོས་ཀྱི་སྔགས་ཀྱིས་བསྐོར་བར་བསམ་མོ། །དེ་ནས་བདག་དང་མཁའ་འགྲོ་མའི་ཐུགས་ཀ་ནས་ནང་གི་སྙིང་པོ་དང་སྤོས་སྦྱོར་གྱི་སྔགས་འོད་ཟེར་ལྔའི་བདག་ཉིད་དུ་སྤྲོས་ཏེ། གཙོ་བོའི་ཐུགས་ཀར་སྤྲོས་ལ་ཐིམ་པར་བསམ་མོ། །དེ་ལྟར་སྒྲ་དང་དྲི་དང་འོད་ལ་སོགས་
པ་རྟགས་མ་བྱུང་གི་བར་དུ་བསྙེན་པ་བྱའོ། །བསྙེན་པ་རྫོགས་པ་དང་གཙོ་བོ་དང་མཁའ་འགྲོ་མ་སྤོས་ཀྱི་རང་བཞིན་དུ་གྱུར་པར་བྱའོ། །མདུན་དུ་ཞེས་བྱ་བ་ནི་བཀའ་སྡོད་ཀྱི་མདུན་དུའོ། །ཞག་ལྔར་ཞེས་བྱ་བ་ནི་སྤོས་བསྲེགས་ནས་བསྒྲུབས་པར་འགྱུར་ཞེས་བྱ་བའི་དོན་ཏོ། །དུས་གསུམ་
མཆོད་པ་དང་གཏོར་མ་ལ་སོགས་པ་ནི་གོ་སླའོ། །རྣལ་འབྱོར་པ་དེ་དོན་ཐམས་ཅད་ལྡན་པར་འགྱུར་ཞེས་བྱ་བ་ནི་ཐུན་མོང་དང་མཆོག་གི་དངོས་གྲུབ་ཐོབ་པར་འགྱུར་ཞེས་བྱའོ། །བཀའ་སྩལ་པ་ཞེས་བྱ་བ་ནི་སྡུད་པ་པོས་ལྷའི་དོན་བསྡུས་ཏེ་འཁོར་ལ་བཤད་པའོ། །ལྷའི་ལེའུ་ཞེས་བྱ་
བ་ནི་ལྷ་བསྐྱེད་པའི་ཆོ་གའི་ལེའུའོ། །ལྷའི་ལེའུ་བཤད་པ་སྟེ་གསུམ་པའོ།། །།དེ་ནས་ཞེས་བྱ་བ་ནི་ལྷ་བསྐྱེད་པ་ལ་བསྙེན་པ་བྱ་བའི་ཕྱིར་ལྷ་ལ་དབང་བསྐུར་བ་དང་། སྒྲུབ་པ་པོ་སྨིན་པར་བྱ་བའི་ཕྱིར་དང་། བསྙེན་པའི་རྟེན་ཁྱད་པར་ཅན་དུ་འགྱུར་བའི་ཕྱིར་དེ་བས་ན་
ཞུས་པ་སྟེ། དེ་དཔལ་ནག་པོ་ཞེས་བྱ་བ་ནི་འཁོར་གྱི་གཙོ་བོ་ལ་སོགས་པ་འཁོར་རྣམས་ཀྱིས་སོ། །བཅོམ་ལྡན་འདས་ལ་གསོལ་བ་ཞེས་བྱ་བ་ནི་རྡོ་རྗེ་འཛིན་པ་ལ་ཞུས་ཏེ། རྒྱུད་དོན་ཞེས་བྱ་བ་ནི་རྒྱུད་ཀྱི་དོན་བསྙེན་པ་དང་ལས་སྦྱོར་ཡིན་པའི་ཕྱིར་རོ། །ཆོ་གའི་ཁྱད་པར་ཞེས་བྱ་བ་
ནི་ཁྱད་པར་གྱི་དཀྱིལ་འཁོར་ཡིན་ཞེས་བྱ་བའི་དོན་ཏོ། །བཀའ་སྩལ་པ་ཞེས་བྱ་བ་ནི་མདོར་བསྟན་པ་སྟེ་གོ་སླའོ། །དེ་ནས་གཞན་ཞེས་བྱ་བ་ནི་དཀྱིལ་འཁོར་བྲི་བར་བརྩམ་པར་བྱ་སྟེ། དེ་ཡང་། སློབ་དཔོན་མཚན་ཉིད་ལྡན་པ་ནི། །སྔོན་དུ་བསྙེན་པ་རྫོགས་པ་དང་། །ལྷ་

ཡི་མཚན་མ་ཐོབ་པ་དེས། །རྣལ་འབྱོར་དངོས་གྲུབ་ཐོབ་པ་དང་། །སློབ་མ་སྨིན་པར་བྱ་བའི་ཕྱིར། །ཡང་དག་པ་ཡི་སློབ་མ་བརྟག །བརྟན་ཞིང་དུལ་ལ་བློ་གྲོས་ལྡན། །དཔའ་བོ་མཚན་ཉིད་ཐམས་ཅད་རྫོགས། །སྔགས་ཀྱི་དངོས་གྲུབ་འདོད་ཅིང་བརྟན། །
བླ་མ་ལ་གུས་སེམས་ཅན་བརྩེ། །དེ་ལྟའི་མགོན་ལ་བསམ་བཅས་ནས། །སློབ་མ་ཡོངས་སུ་གཟུང་བར་བྱ། །དེ་ལྟ་བུ་ཡི་སློབ་མ་དེ། །བླ་མས་དཀྱིལ་འཁོར་གཞུག་པའི་ཕྱིར། །བདུད་རྩི་དང་བཅས་མཎྜལ་དབུལ། །མེ་ཏོག་དང་བཅས་ཐལ་མོ་སྦྱར། །དེ་ནས་གསོལ་བ་གདབ་
པར་བྱ། །ཡེ་ཤེས་ཆེན་པོའི་བདག་ཉིད་ཁྱོད། །སྟོན་པའི་གཙོ་བོ་ཀྱེའི་རྡོ་རྗེ། །སྐུ་གསུང་ཐུགས་ཀྱི་རྡོ་རྗེ་ཡི། །དཔའ་བོ་དམ་ཚིག་བདག་ལ་གསོལ། །དཔལ་ལྡན་ནག་པོ་ཆེན་པོ་ཡིས། །དམ་ཚིག་ཆེན་པོ་བདག་ལ་སྩོལ། །གཙོ་བོ་ནག་པོ་ཆེན་པོ་དང་། །ཐུགས་དང་
དམ་ཚིག་ལས་རྣམས་ཀྱིས། །དཀྱིལ་འཁོར་དམ་པར་གཞུག་ཏུ་གསོལ། །དེ་ལྟར་ལན་གསུམ་གསོལ་བཏབ་ནས། །དེ་ནས་རྡོ་རྗེ་སློབ་དཔོན་གྱིས། །སློབ་མ་ཡོངས་བཟུང་ཐུགས་ཀར་གཞུག །ཧཱུཾ་ལས་ལྷ་ཡི་གཟུགས་སུ་ཕྱུང་། །གནས་གསུམ་བསྲུང་བར་བྱས་ནས་
ནི། །ཡི་གེ་བཅུ་ལ་བཟླས་པར་སྦྱིན། །དེ་ནས་རྡོ་རྗེ་སློབ་དཔོན་གྱིས། །བདག་ཉིད་ཆོ་ག་བསྒོ་བ་དང་། །སློབ་མ་སྒྲིབ་པ་སྦྱང་བའི་ཕྱིར། །འོག་ནས་འབྱུང་བ་བཞིན་དུ་ནི། །དཀྱིལ་འཁོར་བྲིས་ནས་བསྙེན་པ་བྱ། །སློབ་དཔོན་བསྙེན་པ་རྫོགས་པ་དང་། །དཀྱིལ་འཁོར་བྲི་
བ་བརྩམ་པར་བྱ། །དེ་ཡང་དུར་ཁྲོད་ཁ་དོག་ནག་པོ་ཞེས་བྱ་བ་ནི་དུར་ཁྲོད་ལ་སོགས་པ་མི་སྲུན་པའི་ས་ཕྱོགས་ཏེ་མི་མ་ཡིན་པ་འདུ་བས་ནག་པོའོ། །དེ་ཡང་དུར་ཁྲོད་དང་ཤིང་གཅིག་ལ་སོགས་པ་གོང་དུ་བསྟན་པའི་གནས་རྣམས་སོ། །ཁང་སྟོང་ཞེས་བྱ་བ་ནི་སྔོན་དུ་དཀྱིལ་འཁོར་
བྲིས་པའི་སའོ། །གནས་དེ་དག་ཏུ་དཀྱིལ་འཁོར་བརྩམ་པར་བྱ་སྟེ། ས་གཞི་ཤིན་ཏུ་མི་སྲུན་ཤིང་འཇིགས་པའི་དབུས་སུ་བདུད་རྩི་ལྔ་ཡིས་ཆག་ཆག་བཏབ་ལ། ཨུཀྵེ་པའི་མེ་ཏོག་གཅལ་དུ་བཀྲམ་ལ། དེའི་དབུས་བདག་ཉིད་རྣལ་འབྱོར་པ། །འོག་ནས་འབྱུང་བ་

བཞིན་ལྟར་བསྐྱེད། །མཆོད་པ་གཏོར་མ་ཚོགས་བྱས་ནས། །བདག་ཉིད་ཐུགས་ཀའི་འོད་ཟེར་གྱིས། །བགེགས་བསྐྲད་གྲི་གུག་ར་བ་དྲ་གུར་གྱུར། །ཐུགས་ཀྱི་འོད་ཟེར་ལྕགས་ཀྱུ་ཡིས། །ས་ལ་གནས་པའི་ལྷ་མོ་ནི། །བཀུག་སྟེ་མདུན་དུ་ཚུལ་བཞིན་གཞག །གསེར་མདོག་
གཞོན་ནུའི་རྒྱན་ཆ་ཅན། །ཕྱག་ན་བུམ་པ་འཛིན་པ་སྟེ། །དེ་ལ་མཆོད་པ་གཏོར་མ་དབུལ། །མེ་ཏོག་སིལ་མ་གཏོར་ནས་ནི། །འདོད་པའི་གསོལ་བ་གདབ་པར་བྱ། །སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་ལས། །ས་དང་ཕ་རོལ་ཕྱིན་པ་ལ། །
ལྷ་མོ་ཁྱོད་ནི་དབང་དུ་གྱུར། །དཔལ་ལྡན་ནག་པོ་ཆེན་པོ་ཡིས། །གནོད་སྦྱིན་བདུད་སོགས་སྡེ་བཅོམ་བཞིན། །དེ་བཞིན་བདག་གིས་བདུད་ལས་ནི། །རྒྱལ་བར་བྱ་ཕྱིར་དཀྱིལ་འཁོར་བྲི། །ལན་གསུམ་གསོལ་བ་བཏབ་ནས་ནི། །ས་ཡི་ལྷ་མོ་དགའ་མདངས་ཀྱིས། །
གནང་བ་བྱིན་ནས་ས་ལ་ཐིམ། །དེ་ནས་རྣལ་འབྱོར་དབང་ཕྱུག་གིས། །ལས་ཀྱི་རྡོ་རྗེ་བྱིན་གྱིས་བརླབས། །དེ་ཡང་རྣལ་འབྱོར་མི་གཟུགས་སུ་འདུག་ལ་ཁྲུས་བྱས་ལ་ཞེས་བྱ་བ་ནི། །གཟུགས་བཟང་རྟོག་པ་མེད་པ་དང་། །དཔའ་བོའི་སེམས་ཀྱིས་བརྟུལ་ཞུགས་ལྡན། །
དེ་ལྟ་བུ་ལ་བྱིན་བརླབ་བྱ། །བདུད་རྩི་ལྔ་ཡི་ཐིག་ལེ་ཡིས། །གནས་ལྔར་ཐིག་ལེ་བྱས་ནས་ཀྱང་། །བདུད་རྩིའི་མཎྜལ་སྟེང་བཞག་ནས། །འོད་ཀྱིས་རང་བཞིན་མེད་བསྒྲུབས་ལ། །ཧཱུཾ་ལས་རྣལ་འབྱོར་མ་བསྐྱེད་དེ། །གནས་ལྔར་ཉི་མའི་དཀྱིལ་འཁོར་ལ། །ཧཱུཾ་ཡིག་གསལ་བར་
བསམས་ནས་ནི། །རྣལ་འབྱོར་མ་ནི་ཐམས་ཅད་ཀྱིས། །བྱིན་གྱིས་བརླབས་ཞེས་བྱ་བ་ནི། །ཐུགས་དམ་ལས་ཀྱི་མཁའ་འགྲོ་མ། །འཇིགས་བྱེད་འཇིགས་བྱེད་མ་རྣམས་ནི། །མདུན་དུ་གསལ་བར་དགུག་བྱས་ལ། །མཆོད་པ་གཏོར་མ་ཕུལ་ནས་སུ། །གནས་ལྔར་གོ་རིམས་
བཞིན་དུ་བསྟིམ། །དེ་ནས་དབང་བསྐུར་རྒྱས་བཏབ་ལ། །མཆོད་གཏོར་རྩ་བའི་སྔགས་ཀྱིས་སྦྱིན། །བདག་གི་ཐུགས་ཀ་ལས་བྱུང་བའི། །སྙིང་པོ་སྔགས་དང་བཅས་པ་ནི། །གནས་ལྔར་གསལ་བར་བསྟིམ་པར་བྱ། །སྔགས་ནི་ཨོཾ་གྱི་དང་པོ་དང་། །ཧཱུཾ་ཧཱུཾ་ཕཊ་ཕཊ་

སྭཱ་ཧཱའི་མཐའ་ཅན་ནོ། །དེ་ནས་ཞེས་བྱ་བ་ནི་ལས་ཀྱི་རྡོ་རྗེས་ས་དང་ཆུ་བསླང་བྱས་ནས། གནས་དེའི་ས་དང་བསྲེས་ནས་ནི། །བདུད་རྩི་ཆུ་དང་སྔགས་ཀྱིས་ནི། །ས་ཡི་ཉེས་པ་སྦྱང་བར་བྱ། །སྔགས་ནི་ཨོཾ་གྱི་དང་པོ་དང་། །ཧཱུཾ་ཧཱུཾ་ཕཊ་ཕཊ་སྭཱ་ཧཱའི་མཐའ་ཅན་ནོ། །
དེ་ནས་དཀྱིལ་འཁོར་བྱ་བ་ནི། །དཀྱིལ་འཁོར་མཎྜལ་གྲུ་བཞི་ནི། །མཉམ་པར་འཐས་པར་བཅག་པར་བྱ། །བདུད་རྩི་བ་ཡི་རྣམ་ལྔ་ཡིས། །དཀྱིལ་འཁོར་ལེགས་པར་བྱུག་པར་བྱ། །དེ་ནས་རྣལ་འབྱོར་དབང་ཕྱུག་ནི། །དཀྱིལ་འཁོར་དབུས་སུ་ལེགས་འདུག་ནས། །ལྷ་
ཡི་རྣལ་འབྱོར་རྫོགས་པར་བྱ། །དེ་ནས་ཐུགས་ཀའི་འོད་ཟེར་ལས། །སྤྲུལ་པའི་ནག་པོ་མང་སྤྲོས་ཏེ། །ཀུན་ཀྱང་ཞལ་གཅིག་ཕྱག་གཉིས་པ། །སྐུ་མདོག་ནག་པོ་འཇིགས་པའི་གཟུགས། །ཐོ་བ་ཕུར་བུ་འཛིན་པ་སྟེ། །དེ་དག་ཕྱོགས་བཅུར་རབ་སྤྲུལ་ཏེ། །དེར་ནི་བདག་
གིས་བགེགས་བསྐྲད་བསམ། །དེ་ནས་རྣལ་འབྱོར་དབང་ཕྱུག་གིས། །གྲི་གུག་ཐོད་པ་ཐོགས་ནས་ནི། །མཆོག་རྣམས་ཀྱིས་ནི་ལེགས་འཁྱུད་ལ། །རྣལ་འབྱོར་དབང་ཕྱུག་བདག་གིས་ནི། །སངས་རྒྱས་བསྟན་པ་བསྲུང་ཕྱིར་དང་། །ནམ་མཁའ་ལྟ་བུ་དྲི་མེད་པའི། །
ས་གཞི་བཟང་པོ་འདི་ཉིད་ལ། །གཙོ་བོ་དགྱེས་པའི་རྡོ་རྗེ་ཡི། །སྐུ་གསུང་ཐུགས་ལས་བྱུང་བ་ཡི། །དཔལ་ལྡན་ནག་པོ་ཆེན་པོ་ཡི། །དཀྱིལ་འཁོར་དམ་པ་ངས་བཞེངས་ཀྱིས། །ལྷ་དང་ཀླུ་དང་གནོད་སྦྱིན་དང་། །དྲི་ཟ་ལྷ་མ་ཡིན་དང་ནི། །ནམ་མཁའ་ལྡིང་དང་མི་འམ་ཅི། །ལྟོ་
འཕྱེ་ལ་སོགས་པ་ཡི་བདག །དེ་དག་མྱུར་དུ་ངེས་པར་གྱིས། །རྩ་བའི་སྔགས་སོགས་བརྗོད་ཅིང་བསྐྲད། །གོང་དུ་སྤྲུལ་པའི་ཁྲོ་བོ་ཡིས། །ས་དེར་གནས་པའི་བགེགས་རྣམས་ལ། །ཕུར་བུས་གདབ་ཅིང་ཐོ་བས་བརྡུངས། །དེ་ལྟར་བགེགས་རྣམས་ལེགས་པར་བསྐྲད། །
ཁྲོ་བོ་ལེགས་པར་འོད་ཞུ་ནས། །གྲི་གུག་གུར་དང་དྲ་བར་གྱུར། །སྲུང་བའི་འཁོར་ལོ་རྫོགས་པ་དང་། །དེ་ནས་དཀྱིལ་འཁོར་དབུས་གནས་ཏེ། །ལྷ་ཡི་འཁོར་ལོ་བསམ་བྱས་ལ། །མདུན་དུ་ཧཱུཾ་ལས་སྐྱེས་པ་ཡི། །ལྷ་མོ་ཞལ་གཅིག་ཕྱག་གཉིས་མ། །སྤྱན་གསུམ་ཕྱག་

རྒྱ་ལྔ་དང་ལྡན། །གྲི་གུག་ཐོད་པ་འཛིན་པ་སྟེ། །དེ་ལ་མཆོད་པ་གཏོར་མ་དབུལ། །དེ་ནས་གསོལ་བ་གདབ་པར་བྱ། །རང་བཞིན་དག་པའི་ཚིག་བརྗོད་ལ། །གཙོ་བོ་རྡོ་རྗེ་འཛིན་པ་དང་། །དཔལ་ལྡན་ནག་པོ་ཆེན་པོ་ཡི། །དམ་པའི་དཀྱིལ་འཁོར་ངས་བཞེངས་ཀྱིས། །ལྷ་མོ་
ཁྱོད་ནི་དབང་དུ་གྱུར། །སྐུ་གསུང་ཐུགས་ཀྱི་རྡོ་རྗེ་ནི། །བྱིན་གྱིས་རློབ་པ་མཛད་དུ་གསོལ། །དེ་ནས་ལྷ་མོ་འོད་ཞུ་ནས། །ཆོས་འབྱུང་ཉིད་དུ་གྱུར་པར་བསམ། །དཀྱིལ་འཁོར་ས་གཞི་གཟུང་བ་ཡི། །ལྷ་ཡི་འཁོར་ལོ་བསྐྱེད་པའི་ཕྱིར། །དང་པོ་སྟ་གོན་གནས་པར་བྱ། །
དཀྱིལ་འཁོར་བཟང་པོའི་སྟེང་དུ་ནི། །བདུད་རྩི་ལྔ་ཡིས་ཐིག་ལེ་བྱ། །དབུས་ཀྱི་ཐིག་ལེ་རྒྱས་པར་བྱ། །ཐུགས་ཀྱི་མཁའ་འགྲོ་མ་ལ་སོགས། །ལྷ་རྣམས་ཀུན་གྱི་ཐིག་ལེ་བྱ། །དེ་ནས་མེ་ཏོག་སིལ་བཀྲམ་ནས། །གཙོ་བོ་ཆོ་ག་ལྔས་བསྐྱེད་ལ། །འཁོར་རྣམས་ཆོ་ག་གསུམ་གྱིས་
བསྐྱེད། །དཀྱིལ་འཁོར་འོག་ནས་འབྱུང་བ་བཞིན། །མཚན་ཉིད་ཐམས་ཅད་རྫོགས་པར་བསྐྱེད། །དེ་ནས་ཐུགས་ཀའི་འོད་ཟེར་གྱིས། །ཕྱག་རྒྱ་བཞི་ཡི་སྦྱོར་བ་ཡིས། །ཡེ་ཤེས་དཀྱིལ་འཁོར་སྤྱན་དྲངས་བསྟིམ། །བདེ་གཤེགས་སྤྱན་དྲངས་དབང་བསྐུར་ནས། །སོ་
སོའི་སྤྱི་བོར་རྒྱས་བཏབ་བྱ། །དེ་ནས་རྣལ་འབྱོར་ཐུགས་ཀ་ནས། །ཕྱི་ཡི་སྙིང་པོ་རབ་སྤྲོས་ཏེ། །སོ་སོའི་ལྷ་རྣམས་ཐུགས་ཀར་ཐིམ། །དེ་ནས་མཆོད་པ་གཏོར་མ་ནི། །ཀུན་ལ་རྒྱས་པར་སྦྱིན་པར་བྱ། །ཐུགས་ཀ་ནས་བྱིན་དམ་ཚིག་གི །སྔགས་ཀྱིས་ཀུན་ལ་ཁྱབ་པར་བྱ། །
དེ་ནས་ནང་གི་སྙིང་པོ་ཡིས། །བསྙེན་པ་ཅུང་ཟད་བསྐྱལ་བར་བྱ། །དེ་ནས་གསོལ་བ་གདབ་པ་ནི། །ཡེ་ཤེས་ཆེན་པོའི་བདག་ཉིད་ཁྱོད། །སྟོན་པའི་གཙོ་བོ་ཀྱེའི་རྡོ་རྗེ། །དཀྱིལ་འཁོར་ཆེན་པོ་བདག་ཉིད་གཙོ། །དཔལ་ལྡན་ནག་པོ་ཆེན་པོ་དང་། །ཐུགས་ཀའི་མཁའ་འགྲོ་
བརྒྱད་རྣམས་དང་། །དམ་ཚིག་གསུམ་ལ་གནས་པ་ཡི། །རིག་པའི་ལྷ་མོ་རྫུ་འཕྲུལ་ཅན། །ལས་ཀྱི་མཁའ་འགྲོ་ལ་སོགས་པ། །དཀྱིལ་འཁོར་བདག་ཉིད་ཐམས་ཅད་ཀུན། །མ་ལུས་བདག་ལ་དགོངས་སུ་གསོལ། །བདག་རྡོ་རྗེ་འཛིན་པ་འདི་ཞེས་བྱ་བས། ཁྱེད་རྣམས་ལ་

ནི་མཆོད་པ་དང་། །སློབ་མ་སྨིན་པར་བྱ་བའི་ཕྱིར། །བདག་དང་སློབ་མར་བཅས་པ་ཡི། །ཚོགས་པ་ཐམས་ཅད་དཀྱིལ་འཁོར་དུ། །བྱིན་གྱིས་རློབ་པ་མཛད་དུ་གསོལ། །དེ་ནས་ཚོགས་ཀྱི་འཁོར་ལོ་བྱ། །དེ་ལྟར་ལྷ་རྣམས་ཐམས་ཅད་ནི། །སྟ་གོན་གནས་པར་
གྱུར་བྱས་ལ། །དབང་བསྐུར་རབ་གནས་བྱ་བའི་ཕྱིར། །བུམ་པའི་ཆོ་ག་བྱ་བ་ཡི། །བདུད་རྩི་མཎྜལ་བྱས་ནས་ནི། །ལྷ་ཡི་རྣལ་འབྱོར་གསལ་བྱས་ནས། །དཔལ་ལྡན་ནག་པོ་ཆེན་པོ་ཡི། །སྤོས་ཀྱི་བུམ་པ་བདུག་བྱས་ལ། །མི་སྐྲའི་སྦུ་གུའི་སྟེང་བཞག་ནས། །ཐུགས་ཀའི་
འོད་ཀྱིས་དག་བྱས་ཏེ། །བཾ་ལས་བྱུང་བའི་བུམ་པ་ནི། །དཀར་པོ་གནས་ཤིང་ནག་པོ་མེད། །ལྟོ་བ་ཆེ་ཞིང་མགྲིན་པ་མཐོ། །མཆུ་འཕྱང་ཞབས་སྟེགས་མེད་པ་ཉིད། །དེ་ལ་རྩ་བའི་སྔགས་ཀྱིས་ནི། །བསྔགས་ཏེ་རྫས་རྣམས་གཞུག་པར་བྱ། །དབུས་སུ་གྲི་གུག་ཐོད་པ་ནི། །
དུར་ཁྲོད་སྣག་ཚས་བྲི་བར་བྱ། །སྨན་དང་འབྲུ་དང་རིན་པོ་ཆེ། །བདུད་རྩི་ལྔ་ལ་སོགས་པ་བླུགས། །དུར་ཁྲོད་རས་ཀྱིས་མགུལ་ཆིངས་བྱས། །ཁ་རྒྱན་ལྕང་ལོ་ཅན་གྱིས་བྱ། །དེ་ལྟར་བུམ་པ་བསྐྱེད་པ་ནི། །ལྷ་ཡི་གྲངས་སམ་བཅུ་ཡན་ཆད། །བསྒྲུབ་པའི་བུམ་པ་གཉིས་སུ་
བཤད། །དེ་ལྟར་བུམ་པ་རྫོགས་པ་དང་། །དེ་ལྟའི་བུམ་པ་རེ་རེ་ལ། །མཆོད་དང་གཏོར་མ་བཤམ་པར་བྱ། །དེ་ནས་བདག་ཉིད་རྣལ་འབྱོར་པས། །ལྷ་ཡི་འཁོར་ལོ་རྫོགས་པར་བསྐྱེད། །དེ་ནས་བུམ་པའི་ནང་དུ་ནི། །ལྷ་ཡི་འཁོར་ལོ་བསྐྱེད་པར་བྱ། །ལྷ་ཡི་གྲངས་ཀྱི་བུམ་པ་ནི། །བུམ་པ་རེ་རེར་ལྷ་རེ་
བསྐྱེད། །དེ་ནས་འདུས་པའི་བུམ་པ་ནི། །གཙོ་བོའི་བུམ་པར་འཁོར་ལོ་ནི། །ཐམས་ཅད་རྫོགས་པར་བསྐྱེད་པར་བྱ། །ཁཾ་བྱུང་བྲག་སྟེང་པད་ཉི་ལ། །ཧཱུཾ་ལས་སྐྱེས་པའི་ལྷ་རྣམས་ནི། །ཕྱག་དང་ཕྱག་མཚན་སྐུ་མདོག་ཀྱང་། །འོག་ནས་འབྱུང་བ་བཞིན་དུ་བསམ། །དེ་ནས་ཐུགས་ཀའི་
འོད་ཟེར་གྱིས། །རང་བཞིན་དཀྱིལ་འཁོར་སྤྱན་དྲངས་ནས། །ཕྱག་རྒྱ་བཞི་ཡི་སྦྱོར་བས་བསྟིམ། །བདེ་གཤེགས་སྤྱན་དྲངས་དབང་བསྐུར་མཐར། །མི་བསྐྱོད་པ་ཡིས་དབུ་བརྒྱན་བསམ། །དེ་ནས་ཕྱི་ཡི་སྙིང་པོ་ཡིས། །སོ་སོའི་ཐུགས་ཀར་ཐིམ་པར་བྱ། །མཆོད་དང་

གཏོར་མ་བྱས་ནས་ནི། །དེ་ནས་དམ་ཚིག་ཆོ་ག་བྱ། །དེ་ནས་ནང་གི་སྙིང་པོ་ཡིས། །བུམ་པའི་ལྷ་རྣམས་ཐམས་ཅད་ཀྱི། །ཐུགས་ཀར་བསྙེན་པ་སྟོང་ཕྲག་བསྐྱལ། །དེ་ལྟར་བུམ་པ་ཐམས་ཅད་ལ། །སྟ་གོན་གྱི་ནི་གནས་དེ་ཉིད། །ཡོལ་བས་བྲེས་ཏེ་གཞག་པར་བྱ། །དེ་ནས་
དཀྱིལ་འཁོར་ཤར་ཕྱོགས་སུ། །གོང་དུ་བསྟན་པའི་སློབ་མའི་མཆོག །སྟ་གོན་ལ་གནས་བརྩམ་པར་བྱ། །དེ་ནས་རྡོ་རྗེ་སློབ་དཔོན་གྱིས། །ལྷ་ཡི་འཁོར་ལོ་རྫོགས་པར་བྱ། །སློབ་མ་མདུན་དུ་བཀུག་བྱས་ནས། །དེ་ལྟ་བུ་ཡི་སློབ་མ་དེས། །བླ་མའི་མདུན་དུ་མཎྜལ་དབུལ། །
དེ་ནས་གསོལ་བ་གདབ་པར་བྱ། །ཆོས་དབྱིངས་ཡེ་ཤེས་ལས་བྱུང་བའི། །དཔའ་ཆེན་ཁྱོད་ལ་སྐྱབས་སུ་མཆི། །སྐུ་དང་གསུང་དང་ཐུགས་རྡོ་རྗེ། །དཔལ་ལྡན་ནག་པོ་ཆེན་པོ་ཡི། །བྱང་ཆུབ་སེམས་ལས་བྱུང་བ་ཡི། །དམ་ཚིག་ཆེན་པོ་བདག་ལ་གསོལ། །དཔལ་ལྡན་ནག་
པོ་ཆེན་པོ་དང་། །ཐུགས་ཀྱི་རྡོ་རྗེ་བརྒྱད་རྣམས་དང་། །དམ་ཚིག་སྐྱོང་བའི་མཁའ་འགྲོ་དང་། །ཕྲིན་ལས་རྫོགས་པའི་བདག་ཉིད་སོགས། །གསང་བའི་ཕོ་བྲང་དམ་པ་ནི། །དེ་བཞིན་བདག་ནི་གཞུག་ཏུ་གསོལ། །དེ་ཡི་ལྷ་རྣམས་ཐམས་ཅད་ཀྱིས། །གསང་བའི་དམ་ཚིག་བདག་ལ་
སྩོལ། །དམ་ཚིག་ཡོན་ནི་ཕུལ་ནས་ཀྱང་། །དེ་ལྟར་གསོལ་བ་ལན་གསུམ་གདབ། །དེ་ནས་རྡོ་རྗེ་སློབ་དཔོན་གྱིས། །རྩ་བའི་སྔགས་ཀྱིས་བསང་གཏོར་བྱ། །སེམས་ནི་གཟེངས་བསྟོད་བྱ་བའི་ཕྱིར། །བུ་ཚུར་ཐེག་པ་ཆེན་པོ་ལས། །དེ་ལ་སོགས་པའི་ཚིགས་བཅད་བརྗོད། །
དེ་ནས་གཞན་ཡང་བརྗོད་པ་ནི། །དཔལ་ལྡན་ནག་པོ་ཆེན་པོ་ཡི། །དུར་ཁྲོད་ཆེན་པོའི་ཕོ་བྲང་དུ། །གནོད་སྦྱིན་བདུད་དང་སྲིན་པོའི་ཚོགས། །དེ་དག་འཇོམས་པར་མཛད་པ་ནི། །དྲག་པོ་ཆེན་པོའི་སྐུ་བཞེངས་ནས། །གདུག་པ་ཐམས་ཅད་གཞོམ་མཛད་པའི། །བུ་ཡིས་བློ་གྲོས་
འདི་གྱིས་ཤིག །དེ་བས་སློབ་མའི་མཆོག་ལ་ནི། །སྡོམ་པ་གཟུང་བར་བྱ་བའི་ཕྱིར། །ཆོ་ག་གཞན་ཡང་འབྱུང་བ་ཡིན། །སྐྱབས་འགྲོ་སེམས་བསྐྱེད་བྱས་ནས་ནི། །འདི་དག་གིས་ཀྱང་སྡོམ་པ་བཟུང་། །གཙོ་བོ་དགྱེས་པའི་རྡོ་རྗེ་དང་། །ནག་པོ་ཆེན་པོའི་དཀྱིལ་འཁོར་དུ། །

བདག་གི་མིང་ནི་འདི་ཞེས་པ། །དུས་གསུམ་སངས་རྒྱས་ཐམས་ཅད་ཀྱི། །བསྟན་པ་རིན་ཆེན་བསྲུང་བའི་ཕྱིར། །གདུག་པ་མ་ལུས་གཞོམ་པར་གྱིས། །བྱང་ཆུབ་སེམས་མཆོག་རིན་པོ་ཆེ། །དམ་པ་བདག་གིས་བསྐྱེད་པར་བགྱི། །དུས་གསུམ་བཞུགས་པར་
ལྡན་པ་ནི། །དམ་པ་བདག་གིས་ཐོབ་པར་བགྱི། །བདག་གིས་སྡོམ་པ་ལེགས་པར་གཟུང་། །བདག་དང་གཞན་གྱི་དོན་གྱི་ཕྱིར། །གདུག་པ་ཐམས་ཅད་གདུལ་བར་བགྱི། །སེམས་ཅན་རྣམས་ཀྱི་དོན་གྱི་ཕྱིར། །རྣལ་འབྱོར་བརྒྱད་ནི་བསྲུང་བར་བགྱི། །དེ་ལྟར་སྡོམ་པ་བཟུང་
ནས་ནི། །དཀྱིལ་འཁོར་ཆེན་པོའི་ཤར་ཕྱོགས་ནས། །བདུད་རྩི་བ་ཡི་རྣམ་ལྔ་ཡིས། །མཎྜལ་གྲུ་བཞི་བྱས་ནས་ནི། །དབུས་སུ་པདྨ་འདབ་བརྒྱད་བྲི། །དེ་ནས་སོ་ཤིང་ཆོ་ག་བྱ། །མ་ཡོ་མ་གས་འབུས་མ་ཟོས། །སོར་ནི་བཅུ་གཉིས་ཚད་དུ་བྱ། །བདུད་རྩི་དྲི་ཡིས་བྱུགས་
པ་ཡིས། །གནས་གསུམ་མེ་ཏོག་བཅིང་བར་བྱ། །ཡི་གེ་གསུམ་གྱིས་བྱིན་བརླབས་ཏེ། །རྩ་བའི་སྔགས་ཀྱིས་སློབ་མ་སྦྱིན། །སློབ་མ་མཎྜལ་སྟེང་བཞག་ནས། །ཤར་གྱི་ཕྱོགས་སུ་ཁ་བལྟས་ཏེ། །དཀྱིལ་འཁོར་ལྷ་ལ་སེམས་དམིགས་ཏེ། །ཡི་གེ་བཅུ་པ་བརྗོད་ནས་
ནི། །སོ་ཤིང་དྲང་པོར་དོར་བར་བྱ། །སོ་ཤིང་དངོས་གྲུབ་མཚན་བལྟས་ཏེ། །དཀྱིལ་འཁོར་ཆོ་ག་གཞན་ཤེས་བྱ། །དེ་ནས་སློབ་མ་མདུན་བཀུག་ནས། །རྩ་བའི་སྔགས་ཀྱིས་མིང་བསྔགས་ཏེ། །གནས་གསུམ་དུ་ནི་བསྲུང་བར་བགྱི། །དེ་ནས་མདུན་གྱི་སློབ་མ་ལ། །ཐོད་
པར་བདུད་རྩི་བླུགས་ནས་ནི། །སློབ་མ་ལ་ནི་འཐོར་འཐུང་སྦྱིན། །ཨོཾ་ཧྲཱིཿབི་ཤོ་དྷ་ཡ་སརྦ་པཱ་པཾ་ཙ་སཾ་ཤོ་དྷ་ཡ་བི་ཀལྤ་ན་ཨ་པ་ན་ཡ་ཧཱུཾ་ཕཊ། དེས་ནི་ལན་གསུམ་སྦྱིན་པར་བྱ། །དེ་ནས་སྐུད་པ་དམར་པོ་ལ། །ཀ་བ་ཙ་ཡི་སྔགས་ཀྱིས་ནི། །མདུད་པ་གསུམ་དང་ལྡན་པར་བྱ། །
སྲུང་སྐུད་དཔུང་པ་གཡས་པར་གདགས། །རྩ་བའི་སྔགས་ཀྱིས་བསྔགས་པ་ཡི། །ཀུ་ཤ་གསུམ་ནི་སྦྱིན་པར་བྱ། །དེ་ནས། སློབ་མའི་སེམས་ནི་གཟེངས་བསྟོད་ཕྱིར། །ཨུ་དུམྺཱ་རའི་དཔེ་ཡིས་ནི། །ཆོས་ནི་ལེགས་པར་བཤད་པར་བྱ། །དེ་ནས་སློབ་མའི་མཆོག་གིས་

ནི། །སེམས་བསྐྱེད་སྔོན་དུ་སོང་བ་ཡིས། །ཡི་གེ་བཅུ་པ་བཟླས་པར་སྦྱིན། །དེ་ནས་དགའ་བའི་སེམས་ཀྱིས་ནི། །ནམ་མཁའི་མཐར་ནི་རྨི་ལམ་བརྟགས། །དེ་ལྟར་སྟ་གོན་བྱས་ནས་ནི། །དེ་ལྟར་རྡོ་རྗེ་སློབ་དཔོན་གྱིས། །སྟ་གོན་བྱས་པའི་དཀྱིལ་འཁོར་ལ། །མཆོད་པ་གཏོར་མ་
དབུལ་བར་བྱ། །མིའི་སྐྲའི་སྐུད་པའི་ཐིག་གདབ་ཅེས་བྱ་བ་ནི། དེ་ནས་རྡོ་རྗེ་སློབ་དཔོན་གྱིས། །ཐིག་གི་ཆོ་ག་བརྩམ་པར་བྱ། །གོང་དུ་བྱིན་རླབས་རྣལ་འབྱོར་མས། །དུར་ཁྲོད་རས་དང་སྐྲ་བསྲེས་ཏེ། །ཐིག་སྐུད་ལེགས་པར་བཀལ་བར་བྱ། །དུར་ཁྲོད་ཚོན་གྱིས་ཁ་བསྒྱུར་
ལ། །ཐོད་པ་ལྔ་ཡི་ནང་དུ་ནི། །བཞག་ནས་དཀྱིལ་འཁོར་དབུས་སུ་བཀོད། །དེ་ནས་རྡོ་རྗེ་སློབ་དཔོན་གྱིས། །རོ་ཡི་གདན་ལ་བཞུགས་ནས་ནི། །ལྷ་ཡི་འཁོར་ལོ་རྫོགས་པར་བསྐྱེད། །དེ་ནས་ཐུགས་ཀའི་འོད་ཟེར་གྱིས། །ཐིག་སྐུད་གནས་སུ་ཕོག་ནས་ནི། །རང་བཞིན་
མེད་པར་དམིགས་པ་ལས། །ཨཱ་ལི་ཀཱ་ལི་ལས་བྱུང་བའི། །ཟླ་བ་ཉི་མའི་དབུས་སུ་ནི། །ཡི་གེ་ལྔར་ནི་དམིགས་པར་བྱ། །དེ་ནས་ཐུགས་ཀའི་འོད་ཟེར་གྱིས། །བདེ་གཤེགས་སྤྱན་དྲངས་ནམ་མཁར་གཞག །དེ་ནས་མཆོད་པ་བྱས་ནས་ནི། །བདེ་གཤེགས་ལྔ་ཡི་བདག་
ཉིད་དུ། །ཐིག་སྐུད་ལ་ནི་བསྟིམ་པར་བྱ། །ཨོཾ་ས་མ་ཡ་སཱུ་ཏྲ་མཱ་ཏི་ཀྲ་མ་ཧཱུཾ། ནང་གི་སྙིང་པོ་དང་ལྡན་ཏེ། །ཐུགས་ཀ་ནས་སྤྲོས་སྔགས་ཀྱིས་ནི། །ཟླ་བ་ཉི་མའི་དབུས་གནས་པར། །ཐིག་སྐུད་ལ་ནི་བསྟིམ་པར་བྱ། །དེ་ནས་ཐིག་སྐུད་གཅིག་ཏུ་བསྒྲིལ། །དཀྱིལ་འཁོར་
དབུས་སུ་བཞག་ནས་ནི། །ཐིག་སྐུད་ཡོངས་སུ་གྱུར་པ་ལས། །དཔལ་ལྡན་ནག་པོ་ཆེན་པོར་བསྐྱེད། །ཡེ་ཤེས་འཁོར་ལོ་སྤྱན་དྲངས་བསྟིམ། །དབང་བསྐུར་ཕྱི་ཡི་བཟླས་པ་བྱ། །མཆོད་གཏོར་དམ་ཚིག་བཟླས་པ་བྱ། །དེ་ནས་ནང་གི་སྙིང་པོ་ལ། །ཐུགས་ཀར་སྔགས་ཀྱི་
འཁོར་ལོ་ཡི། །བཟླས་པ་སྟོང་ཕྲག་གཅིག་ཏུ་བྱ། །དེ་ནས་འོད་དུ་ཞུ་ནས་ནི། །ཡེ་ཤེས་སྐུད་པར་གྱུར་པར་བསམ། །དེ་ནས་བདག་དང་བཀའ་སྡོད་ཀྱི། །དཀྱིལ་འཁོར་ཐིག་གདབ་བརྩམ་པར་བྱ། །དེ་ནས་ཐིག་གིས་བསྐུལ་བ་ཡིས། །ཡེ་ཤེས་འཁོར་ལོ་སྤྱན་དྲངས་ཏེ། །

ནམ་མཁའ་ལ་ནི་བཞུགས་སུ་གསོལ། །དེ་ཡི་དམ་ཚིག་བསྐུལ་བ་ནི། །འཇིག་རྟེན་ཁམས་རྣམས་ཐམས་ཅད་ཀྱི། །བདུད་སྡེ་མ་ལུས་འདུལ་བའི་ཕྱིར། །སངས་རྒྱས་ལ་སོགས་འགྲོ་དོན་དུ། །ཁྱེད་ཀྱི་དོན་ནི་ཡིན་ཞེས་བསྐུལ། །དེ་ནས་ཚངས་ཐིག་གདབ་པར་
བྱ། །ཚངས་ཐིག་གི་ནི་ངོས་རེ་ལ། །སྲ་བའི་ཤིང་གིས་བར་གཞལ་ཏེ། །ཐིག་རྐང་ཉི་ཤུ་ཉི་ཤུ་གདབ། །རྟ་བབས་སྤྱིར་མཐུན་གཞན་ཤེས་བྱ། །དེ་ལྟར་ཐིག་རྣམས་གདབ་པ་དང་། །ནམ་མཁར་སྤྱན་དྲངས་དཀྱིལ་འཁོར་དེ། །མཆོད་པས་མཆོད་ལ་ཐིག་ལ་བསྟིམ། །དེ་ནས་
ཚོན་གྱི་ཆོ་ག་བརྩམ། །དུར་ཁྲོད་ཕ་གུ་ལ་སོགས་ལ། །དུར་ཁྲོད་ཚོན་ཞེས་བྱ་བ་ནི། །དེ་ཡང་དུར་ཁྲོད་ལས་བྱུང་ཚོན་གྱིས་སོ། །དུར་ཁྲོད་ཕ་གུ་དམར་པོ་དང་། །ལྡོང་རོས་ཀྱིས་ནི་སེར་པོ་དང་། །རྐུན་མའི་ལོ་མས་ལྗང་གུ་དང་། །དཔའ་བོའི་རུས་པའི་དཀར་པོ་དང་། །དུར་ཁྲོད་སོལ་
བའི་ནག་པོའོ། །ཡང་ནི་ཚོན་གྱི་ཁྱད་པར་ནི། །དཔའ་བོའི་རུས་པའི་ཕྱེ་མ་ལ། །བདུད་རྩི་ལྔ་ཡིས་བསྲེས་ནས་སུ། །ཕྱི་ཡི་ཚོན་གྱིས་ཁ་དོག་བསྒྱུར། །དེ་ནས་ཐོད་པར་བླུགས་ནས་ནི། །དཀྱིལ་འཁོར་དབུས་ནས་རིམ་པར་གཞག །དེ་ནས་བདག་ཉིད་རྣལ་འབྱོར་པས། །ལྷ་ཡི་འཁོར་
ལོ་རྫོགས་པར་བྱ། །དེ་ནས་ཐུགས་ཀྱི་འོད་ཟེར་གྱིས། །ཚོན་རྣམས་རང་བཞིན་མེད་པར་བྱ། །ཨཱ་ལི་ཀཱ་ལི་ལས་བྱུང་བའི། །ཟླ་བ་ཉི་མའི་དབུས་སུ་ནི། །བྷྲཱུཾ་ལ་སོགས་པའི་ཡི་གེ་བསམ། །དེ་ནས་ཐུགས་ཀའི་འོད་ཟེར་གྱིས། །དཀྱིལ་འཁོར་སྤྱན་དྲངས་ནམ་མཁར་གཞག །
མཆོད་པས་མཆོད་ལ་ཚོན་ལ་བསྟིམ། །དེ་ནས་ནང་གི་སྙིང་པོ་ཡིས། །བརྒྱ་ཕྲག་རེ་རེ་བསྟིམ་པར་བྱ། །ཐུགས་ཀའི་འོད་ཀྱིས་བསྟིམས་ནས་ནི། །དེ་དག་འོད་དུ་ཞུ་བར་གྱུར། །དམ་པའི་ཚོན་དུ་གྱུར་པར་བསམ། །དེ་ནས་དཀྱིལ་འཁོར་བྲི་བ་བརྩམ། །མཆོད་པ་གཏོར་མ་སྔོན་འགྲོ་
བས། །ལྷ་ཡི་ང་རྒྱལ་རབ་ལྡན་པས། །དཀྱིལ་འཁོར་དམ་པ་བྲི་བར་བྱ། །དང་པོ་གཙོ་བོའི་ཕོ་བྲང་ནི། །དབུས་སུ་མེ་ཡི་དཀྱིལ་འཁོར་བྲི། །མུ་ཁྱུད་ཟླུམ་པོར་བྱ་བ་ན། །གྲི་གུག་གིས་ནི་འཁོར་ལོ་བྱ། །ཕྱི་རོལ་པདྨ་འདབ་བརྒྱད་ནི། །སྣ་ཚོགས་པ་དང་ལྡན་པར་བྱ། །དེ་

ནས་དེ་ཡི་ཕྱི་རོལ་དུ། །གྲུ་ཆད་བཞི་ནི་བྱས་པ་ལ། །ཤར་ལ་སོགས་པའི་ཕྱོགས་སུ་ནི། །པདྨ་འདབ་མ་བརྒྱད་བརྒྱད་བྲི། །སུམ་ཅུ་རྩ་གཉིས་ཟླུམ་པོ་བྱ། །པདྨའི་ལྷ་ཡི་སྐུ་མདོག་བཞིན། །དེ་ནས་ཕྱི་རོལ་མུ་ཁྱུད་ལ། །འདབ་མ་བདུན་ཅུ་རྩ་གཉིས་ནི། །གྲུ་ཆད་ཉི་ཤུ་རྩ་བཞིར་
བྱ། །མུ་ཁྱུད་གྲུ་ཆད་ཐོད་རློན་བྲི། །དེ་ནས་ཕྱི་རོལ་གཞལ་ཡས་ནི། །དཀྱིལ་འཁོར་སྤྱི་དང་མཐུན་པ་སྟེ། །དེ་ནས་ཕྱི་རོལ་དུར་ཁྲོད་ནི། །རྡོ་རྗེ་གྲི་གུག་ར་བར་ནི། །བར་དུ་ལེགས་པར་བྲི་བར་བྱ། །དུར་ཁྲོད་བརྒྱད་ཀྱི་དབུས་སུ་ནི། །འཇིགས་བྱེད་འཇིགས་བྱེད་མ་རྣམས་ཀྱི། །
སྐུ་ནི་ལེགས་པར་བྲི་བར་བྱ། །ཐོད་པ་དཀར་པོ་གྲི་གུག་ནག་པོ་ཞེས་བྱ་བ་ནི་དབུས་ཀྱི་གཙོ་བོ་ལ་སོགས་པའི་ལྷ་རྣམས་ཀུན་གྱི་ཕྱག་མཚན་ཏེ། དབུས་ཀྱི་ཕོ་བྲང་ལ་སོགས་པའི། པདྨའི་འདབ་མ་ཐམས་ཅད་ལ། །ཉི་མའི་སྟེང་ན་རོ་ཡི་གདན། །སྙིང་གར་གྲི་གུག་ཐོད་པ་བྲི། །དེ་ལྟར་
དཀྱིལ་འཁོར་བྲིས་པ་དང་། །བུམ་པ་སྟ་གོན་གནས་པ་ཀུན། །སྤྱན་དྲངས་དཀྱིལ་འཁོར་གནས་སུ་དགོད། །དེ་ནས་མཆོད་དང་གཏོར་མ་ནི། །ལྷ་ཡི་གྲངས་སུ་ཚོགས་པར་བྱ། །དེ་ནས་རྣལ་འབྱོར་བདག་ཉིད་ནི། །དཀྱིལ་འཁོར་བསྒྲུབ་ལ་འཇུག་པར་བྱ། །བསམ་གཏན་དང་
ལྡན་པར་བྱས་ལ་ཞེས་བྱ་བ་ནི། དཀྱིལ་འཁོར་གྱི་ནི་ཤར་ཕྱོགས་སུ། །དེ་ནས་རྡོ་རྗེ་སློབ་དཔོན་ནི། །བདུད་རྩི་ལྔ་ཡིས་ལུས་བྱུགས་ལ། །རོ་ཡི་གདན་ལ་འདུག་ནས་ནི། །ལྷ་ཡི་འཁོར་ལོ་རྫོགས་པར་བསྐྱེད། །དེ་ནས་ཐུགས་ཀའི་འོད་ཟེར་གྱིས། །མདུན་དུ་དཀྱིལ་འཁོར་
དག་པར་བྱ། །དེ་ནས་མདུན་གྱི་ནམ་མཁའ་ལ། །རཾ་སྐྱེས་ཉི་མའི་སྟེང་དུ་ཧཱུཾ། །ཧཱུཾ་ལས་གསལ་བར་སྤྲོ་བ་ནི། །ཁྲོ་བོ་ནག་པོ་ཆེན་པོ་བཅུ། །སྤྲོས་ནས་ཕྱོགས་བཅུའི་བགེགས་རྣམས་བཅོམ། །ཁྲོ་བོ་བགེགས་རྣམས་ཐམས་ཅད་ནི། །འོད་དུ་ཞུ་ནས་རྡོ་རྗེ་ཡི། །ར་བ་གུར་
དང་ས་གཞིར་གྱུར། །དབུས་ཀྱི་ཧཱུཾ་ལས་འོད་ཟེར་ནི། །འཁོར་ལོའི་ནང་དུ་རབ་སྤྲོས་ཏེ། །གྲི་གུག་ར་བ་བླ་རེར་གྱུར། །དབུས་སུ་ཨེ་ཡི་རྣམ་པ་ལས། །ཆོས་ཀྱི་འབྱུང་གནས་བསམ་པར་བྱ། །དེ་དབུས་ཡཾ་ལས་རླུང་དཀྱིལ་འཁོར། །གཞུ་དབྱིབས་སྔོན་པོ་བ་དན་མཚན། །དེ་སྟེང་

རཾ་བྱུང་མེའི་དཀྱིལ་འཁོར། །ཟུར་གསུམ་དམར་པོ་རེ་ཕས་མཚན། །དེ་སྟེང་བཾ་ལས་ཆུའི་དཀྱིལ་འཁོར། །དཀར་པོ་ཟླུམ་པོ་བུམ་པས་མཚན། །དེ་སྟེང་ལཾ་བྱུང་སའི་དཀྱིལ་འཁོར། །གྲུ་བཞི་སེར་པོ་རྡོ་རྗེས་མཚན། །དེ་སྟེང་བྷྲཱུཾ་ལས་འཁོར་ལོ་སྟེ། །འཁོར་
ལོའི་སྟེང་དུ་བྷྲཱུཾ་གྱིས་མཚན། །དེ་དག་ཡོངས་སུ་གྱུར་པ་ལས། །ལྷ་ཡི་གཞལ་ཡས་ཁང་རྫོགས་ཏེ། །གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་རྣམ་པར་བརྒྱན། །དྲ་བ་དྲ་ཕྱེད་ཡང་དག་ལྡན། །ཀ་བ་བརྒྱད་ཀྱིས་ཡང་དག་བརྒྱན། །དུར་ཁྲོད་རྒྱན་གྱིས་ཉེ་བར་བརྒྱན། །
དཀྱིལ་འཁོར་དབུས་ཀྱི་ཕྱོགས་དག་ཏུ། །མེ་ཡི་དཀྱིལ་འཁོར་རབ་འཇིགས་འབར། །མེ་ཡི་དཀྱིལ་འཁོར་ཕྱི་རོལ་དུ། །གཞལ་ཡས་ཁང་དུ་དུས་མཚུངས་སུ། །པདྨའི་གདན་རྣམས་རྫོགས་པར་བསྐྱེད། །དེ་ལྟར་གཞལ་ཡས་ཁང་རྫོགས་ནས། །ནག་པོ་ཆེན་པོ་དང་
མཁའ་འགྲོ་མའི་ཚོགས་བསྐྱེད་ལ་ཞེས་བྱ་བ་ནི། དཀྱིལ་འཁོར་གཞལ་ཡས་ཁང་དུ་ནི། །ལྷ་ཡི་འཁོར་ལོ་བསྐྱེད་པར་བྱ། །མེ་ཡི་དཀྱིལ་འཁོར་དབུས་སུ་ནི། །སྣ་ཚོགས་པད་སྟེང་ཉི་དཀྱིལ་འཁོར། །དེ་སྟེང་རོ་ཡི་གདན་ཉིད་དོ། །དེ་ནས་ལྷ་རྣམས་ཐམས་ཅད་ཀྱི། །གདན་
ཡང་དེ་དང་མཚུངས་པར་བསྐྱེད། །དེ་ནས་རོ་ཡི་སྙིང་གར་ནི། །མེ་ལོང་ཡེ་ཤེས་རང་བཞིན་ནི། །ཨཱ་ལི་ལས་བྱུང་ཟླ་བ་བསམ། །དེ་སྟེང་ཉི་མའི་དཀྱིལ་འཁོར་ནི། །ཀཱ་ལི་ལས་བྱུང་མཉམ་ཉིད་དེ། །དེ་ཡི་དབུས་སུ་གནས་པ་ནི། །གྲི་གུག་ཡུ་བ་ཧཱུཾ་གིས་མཚན། །སོ་སོར་
རྟོག་པའི་རང་བཞིན་ནོ། །ཐམས་ཅད་གཅིག་གྱུར་བྱ་ནན་ཏན། །གཟུགས་བརྙན་རྫོགས་པ་ཆོས་ཀྱི་དབྱིངས། །ཞལ་གཅིག་པ་ལ་ཕྱག་གཉིས་པ། །གྲི་གུག་ཐོད་པ་ལག་ན་འཛིན། །འཇིགས་པ་ཆེན་པོའི་ཆ་བྱད་ཅན། །ཆར་སྤྲིན་མདོག་ལ་སྤྱན་གསུམ་འབར། །དེ་
ལྟར་གཙོ་བོ་རྫོགས་པ་ཡི། །ཐུགས་ཀར་བཀའ་སྡོད་བསྐྱེད་པར་བྱ། །ཆོ་ག་གསུམ་གྱིས་རྫོགས་པའོ། །དེ་ནས་མཁའ་འགྲོ་མ་རྣམས་བསྐྱེད། །མཁའ་འགྲོ་མ་ཡི་གདན་རྣམས་ནི། །ཉི་མའི་སྟེང་ན་རོ་ཡི་གདན། །སྙིང་གར་ཧཱུཾ་ལས་སྐྱེས་པ་སྟེ། །ཀུན་ཀྱང་ཞལ་

གཅིག་ཕྱག་གཉིས་མ། །སྐུ་མདོག་གོང་ནས་འབྱུང་བ་བཞིན། །ཕྱག་མཚན་གྲི་གུག་ཐོད་པ་འཛིན། །སྤྱན་གསུམ་འཇིགས་པའི་ཆ་བྱད་ཅན། །ཐུགས་ཀྱི་རྡོ་རྗེ་ལས་སྤྲུལ་པའི། །མཁའ་འགྲོ་མ་ཡི་གདན་རྣམས་སུ། །ཕྱི་རོལ་ལྷ་མོ་བརྒྱད་མནན་ཏེ། །དཀར་མོ་ཆོམ་རྐུན་
རོ་ལངས་མ། །དྲག་མོ་ལ་སོགས་ལྷ་མོ་བཞི། །གཽ་རཱི་ལ་སོགས་པ་ཡི་གདན། །ཚངས་མ་དབང་པོ་ཉེ་དབང་དྲག །ཙཎྜི་ཀ་ལ་སོགས་པ་བཞི། །བྱང་ཤར་ལ་སོགས་མཚམས་རྣམས་སུ། །པུཀྐ་སཱི་ལ་སོགས་པའི་གདན། །དམ་ཚིག་མཁའ་འགྲོ་ལ་སོགས་པ། །བརྐྱང་
བསྐུམ་རོ་ཡི་སྟེང་ན་འགྱིང་། །ལས་ཀྱི་མཁའ་འགྲོ་ཐམས་ཅད་ནི། །པུལླཱི་ར་ལ་སོགས་པ་ཡི། །གནས་ནི་ཉི་ཤུ་རྩ་བཞི་ན། །མཁའ་འགྲོ་བདུན་ཅུ་རྩ་གཉིས་དག །འཇིགས་པའི་གཟུགས་སུ་ཐམས་ཅད་བསྐྱེད། །གཏུམ་དྲག་ལ་སོགས་དུར་ཁྲོད་དུ། །ནག་པོ་དྲག་པོ་
ལ་སོགས་པའི། །གནོད་སྦྱིན་ཆེན་པོ་བརྒྱད་རྣམས་ཀྱང་། །ཀུན་ཀྱང་ཞལ་གཅིག་ཕྱག་གཉིས་ཏེ། །རོ་ཡི་སྟེང་ན་གར་གྱིས་གནས། །ཤར་ཕྱོགས་ནག་པོ་དྲག་པོ་ནི། །སྐུ་མདོག་ནག་པོ་ཆེར་འཇིགས་པ། །རལ་གྲི་ཐོད་པ་ལྕགས་ཀྱུ་འཛིན། །ལྷོ་ཕྱོགས་རྡོ་རྗེ་གཏུམ་པོ་ནི། །
སྐུ་མདོག་སེར་པོ་མེ་ལྟར་འབར། །གྲི་གུག་ཐོད་པ་ཞགས་པ་འཛིན། །ནུབ་ཕྱོགས་རྡོ་རྗེ་རོ་ལངས་ནི། །སྐུ་མདོག་དམར་པོ་རབ་འཇིགས་པ། །གྲི་གུག་ཐོད་པ་ལྕགས་སྒྲོག་འཛིན། །བྱང་ཕྱོགས་རྡོ་རྗེ་ཀཱ་ལ་ནི། །སྐུ་མདོག་སྔོན་པོ་ཁྲོ་གཉེར་ཅན། །གྲི་གུག་ཐོད་པ་ཁྲག་འཐུང་
ཚུལ། །བྱང་ཤར་ཕྱོགས་ཀྱི་བདག་པོ་ནི། །སྐུ་མདོག་སྟང་ཟིལ་མདོག་ལྟར་གནག །ཕྱག་ན་རྩེ་གསུམ་ལ་ཕུག་འཛིན། །ཤར་ལྷོ་གནོད་སྦྱིན་རུ་རུ་ནི། །སྐུ་མདོག་དཀར་པོ་ཁྲོ་གཉེར་ཅན། །ཕྱག་ན་རྡོ་རྗེ་ཐོད་ཁྲག་འཁྲུག །ལྷོ་ནུབ་མཚམས་ཀྱི་དུར་ཁྲོད་ན། །གནོད་
སྦྱིན་གར་མཁན་མཆོག་གནས་ཏེ། །སྐུ་མདོག་སྨུག་ནག་འཇིགས་པའི་གཟུགས། །ཕྱག་ན་དགྲ་སྟ་ཐོད་པ་འཛིན། །ནུབ་བྱང་མཚམས་ཀྱི་དུར་ཁྲོད་ན། །ལྕགས་ཀྱི་སྨེ་བ་ཅན་གནས་ཏེ། །སྐུ་མདོག་ནག་པོ་ཆེར་འཇིགས་པ། །ཕྱག་ན་གྲི་གུག་ཐོད་པ་འཛིན། །གཞན་ཡང་

ཤར་ཕྱོགས་ལ་སོགས་པའི། །ཁྭ་གདོང་ལ་སོགས་འཇིགས་བྱེད་མ། །གནག་དང་སེར་དང་དམར་དང་སྔོ། །དེ་ལྟར་སྐུ་མདོག་འཇིགས་གཟུགས་མ། །གྲི་གུག་ཐོད་པ་ལག་ན་འཛིན། །བྱང་ཤར་མཚམས་སོགས་དུར་ཁྲོད་ན། །གཤིན་རྗེ་ཕོ་ཉ་མོ་
ལ་སོགས། །སྣ་ཚོགས་མདོག་ཅན་ཁྲོ་མོའི་གཟུགས། །གྲི་གུག་ཐོད་པ་ལག་ན་འཛིན། །གཞན་ཡང་དུར་ཁྲོད་དེ་རྣམས་ན། །ཤིང་དང་ཕྱོགས་སྐྱོང་ཀླུ་རྣམས་དང་། །སྤྲིན་གྱི་བདག་པོ་བསམ་པར་བྱ། །ཤི་རི་ཥ་དང་ཙུ་ད་དང་། །ཀ་ཀོ་ལེ་དང་ཨ་ཤྭ་སྟེ། །ཤར་ལ་
སོགས་པར་རིམ་པར་གནས། །འབར་ར་ཀརྩ་གརྣ་དང་། །འབའ་དང་ལ་ཏི་ཀརྟི་ཡི། །བྱང་ཤར་ལ་སོགས་མཚམས་ན་གནས། །དབང་པོ་དང་ནི་གཤིན་རྗེ་དང་། །ཀླུ་ཡི་བདག་པོ་བཞིན་བདག་དང་། །ཤར་ལ་སོགས་པའི་ཕྱོགས་ན་གནས། །དབང་ལྡན་དང་ནི་བྱིན་ཟ་དང་། །
སྲིན་པོའི་དབང་པོ་ཀླུ་ནག་པོ། །བྱང་ཤར་ལ་སོགས་མཚམས་ན་གནས། །ནོར་རྒྱས་དང་ནི་པདྨ་དང་། །སྟོབས་ཀྱི་རྒྱུ་དང་འཇོག་པོ་དང་། །ཤར་ལ་སོགས་པའི་རིམ་པས་གནས། །པདྨ་ཆེན་པོ་ཧུ་ལུནྟ། །རིགས་ལྡན་དང་ནི་དུང་སྐྱོང་རྣམས། །བྱང་ཤར་ལ་སོགས་མཚམས་
ན་གནས། །སྒྲ་ནི་དྲག་དང་འཁྱིལ་བ་དང་། །བདུན་པ་ཅན་དང་རྨུགས་པ་དང་། །ཤར་ལ་སོགས་པའི་རིམ་པས་གནས། །འཁྲིགས་པ་དང་ནི་གང་བ་དང་། །འབབ་པ་དང་ནི་དྲག་པོ་ནི། །བྱང་ཤར་ལ་སོགས་མཚམས་ན་གནས། །འབྱུང་པོ་དེ་དག་ཐམས་ཅད་ཀྱང་། །ཀུན་ཀྱང་
འཇིགས་པའི་གཟུགས་ཅན་ཏེ། །གྲི་གུག་ཐོད་པ་ལག་ན་འཛིན། །གཞན་ཡང་དུར་ཁྲོད་དེ་དག་ན། །འཇིགས་པའི་གཟུགས་ཀྱི་རོ་ལངས་དང་། །འབྱུང་པོ་མང་པོ་འདུས་པ་སྟེ། །ཅེ་སྤྱང་སྒྲ་ནི་སྒྲོགས་པའོ། །དེ་ལྟར་དུར་ཁྲོད་ཐམས་ཅད་ཀྱང་། །ཆོ་གས་རྫོགས་པར་བསྐྱེད་
ནས་སུ། །ནམ་མཁའ་ལས་བྱུང་བའི་དཀྱིལ་འཁོར་བསྟིམ་ཞེས་བྱ་བ་ནི། ནམ་མཁའ་ལས་བྱུང་ཆོས་སྐུ་ཡིན། །དཀྱིལ་འཁོར་ལོངས་སྤྱོད་རྫོགས་པར་བཤད། །བསྟིམ་པ་སྤྲུལ་པས་འགྲོ་དོན་བྱེད། །ད་ཡང་འདི་ལྟར་བྱ་བ་སྟེ། །གཙོ་བོའི་ཐུགས་ཀའི་འོད་ཟེར་ནི། །ཕྱག་

རྒྱ་བཞི་དང་ལྡན་པ་ཡིས། །དཀྱིལ་འཁོར་དགུག་ཅིང་དགྱེས་པར་བྱ། །དེ་ནས་རྒྱུད་ནས་འབྱུང་བ་ཡི། །བདེ་གཤེགས་དབང་བསྐུར་རྒྱས་གདབ་བྱ། །མཆོད་པ་དང་གཏོར་མ་ཞེས་བྱ་བ་ནི། མཐུན་པའི་རྫས་ནི་ཐམས་ཅད་ལ། །མཆོད་པ་གཏོར་མ་བྱས་ནས་སུ། །དཀྱིལ་འཁོར་ལྷ་
རྣམས་ཐམས་ཅད་ལ། །རྩ་བའི་སྔགས་ཀྱིས་དབུལ་བར་བྱ། ཁྱད་པར་གྱི་མཆོད་པ་ཞེས་བྱ་བ་ནི། ཆོ་ག་བྱས་པའི་ལ་དུ་ལ། །ཁྱད་པར་སྤོས་ཀྱི་མཆོད་པས་མཆོད། །དེ་ནས་རྡོ་རྗེ་སློབ་དཔོན་གྱིས། །དཀྱིལ་འཁོར་ལྷ་རྣམས་ཐམས་ཅད་ལ། །ཅང་ཏེའུ་སྒྲ་དཀྲོལ་བསྟོད་
པ་བྱ། །ཧཱུཾ་ཆོས་དབྱིངས་སྟོང་ཉིད་གཉིས་མེད་ངང་ཉིད་ལས། །འཇིག་རྟེན་གདུག་པ་འཇོམས་པའི་ཚུལ་མི་སྤོང་། །ཐབས་ལ་མཁས་པས་ནག་པོའི་སྐུར་སྟོན་པ། །ནག་པོ་འབར་བའི་སྐུ་ལ་ཕྱག་འཚལ་བསྟོད། །མི་ཐུང་སྒེག་པོ་སྤྲིན་གྱི་མདོག་ལྟ་བུ། །སྐུ་ཡི་ཆ་ལུགས་ཟ་བྱེད་
རྔམ་སྟབས་ཅན། །གདུག་པ་འདུལ་མཛད་མཚོན་ཆ་ཕྱག་ན་བསྣམས། །ཀླུ་བརྒྱད་རྒྱན་གྱིས་བརྒྱན་ལ་ཕྱག་འཚལ་བསྟོད། །ལྷག་པར་རོལ་པའི་ཡེ་ཤེས་སྟོབས་མཛད་ཅིང་། །གསུང་གི་ང་རོ་འབྲུག་སྟོང་ལྡིར་བའི་སྒྲས། །མ་ལུས་དབང་དུ་མཛད་ལ་ཕྱག་འཚལ་བསྟོད། །
གདུག་པའི་སྤྲུལ་པ་སྣ་ཚོགས་འགྱེད་མཛད་པའི། །སྲིན་པོའི་གཟུགས་འཆང་མི་བཟད་དྲག་པོའི་སྐུ། །འཇིགས་བྱེད་ནག་པོའི་སྐུ་ལ་ཕྱག་འཚལ་བསྟོད། །ཉོན་མོངས་མ་ལུས་གཏན་ནས་འཇོམས་མཛད་པའི། །གནོད་སྦྱིན་གདུག་པའི་ཁ་ནས་ཁྲག་འཛག་པའི། །རྔམ་
པའི་མཆེ་བ་གཙིགས་ལ་ཕྱག་འཚལ་བསྟོད། །དཔའ་བོ་སྟང་སྟབས་བརྐྱང་བསྐུམ་རོ་ཡི་གདན། །བསྐལ་པའི་ཡེ་ཤེས་མེ་དཔུང་འབར་བའི་སྐུ། །སྟག་ལྤགས་ཤམ་ཐབས་མཛད་ལ་ཕྱག་འཚལ་བསྟོད། །དབུ་སྐྲ་ཁམ་སེར་གྱེན་དུ་འཁྱིལ་མཛད་ཐོད་པའི་དབུ་རྒྱན་ཅན། །
སྔགས་ཀྱི་ཡོན་ཏན་རྫོགས་མཛད་དྲག་པོའི་གདན། །སྦྲུལ་ནག་ཆུན་པོས་བརྒྱན་ལ་ཕྱག་འཚལ་བསྟོད། །ཉི་ཟླ་འབར་བའི་སྤྱན་གསུམ་སྡང་མིག་གིས། །ཁམས་གསུམ་མ་ལུས་དབང་དུ་སྡུད་མཛད་ཅིང་། །བགེགས་དཔུང་སྲེག་མཛད་ཁྱེད་ལ་ཕྱག་འཚལ་བསྟོད། །གཏུམ་

ཆེན་དུས་མཐའི་མེ་ལྟར་གཟི་བརྗིད་འབར། །མ་རིག་ལ་སོགས་གཅོད་པའི་གྲི་གུག་འཛིན། །ནག་པོ་གཟི་བརྗིད་འབར་ལ་ཕྱག་འཚལ་བསྟོད། །ལྷ་ཡི་ཐོད་པར་ལྷ་མིན་ཁྲག་འཛིན་པ། །གདུག་པ་འཇོམས་ཕྱིར་དཀྲུག་འཐུང་རྒྱུན་མི་འཆད། །གསང་སྔགས་
དངོས་སྒྲུབ་སྦྱིན་མཛད་ཕྱག་འཚལ་བསྟོད། །དུར་ཁྲོད་བདག་པོ་མངའ་གསོལ་མ་མོས་སྐོར་མཛད་པའི། །དཔལ་ལྡན་ནག་པོ་རབ་ཏུ་འབར་བའི་སྐུ། །བསྟན་པ་བསྲུང་བར་སེམས་བསྐྱེད་ཁྱོད་ལ་ཕྱག་འཚལ་བསྟོད། །དུས་གསུམ་རྒྱལ་བ་ཐམས་ཅད་ཀྱིས། །བསྟན་
པ་བསྲུང་བར་བྱིན་བརླབས་པའི། །ལྷ་ཡི་དམག་དཔོན་ཁྱོད་ལ་བསྟོད། །གསང་བ་གསུམ་ལས་བྱུང་བའི་ནག་པོ་ཆེན་པོ་ཁྱོད། །མཁའ་འགྲོ་གཙོ་མཛད་མཁའ་ལ་རྒྱུ་མཛད་པའི། །ཚོགས་ཀྱི་བདག་པོ་ཁྱོད་ལ་ཕྱག་འཚལ་བསྟོད། །སྲིད་པ་གསུམ་གྱི་གདུག་པ་འཇོམས་
མཛད་པའི། །གྲོང་ཁྱེར་སུམ་བརྩེགས་འཇིག་མཛད་ནག་པོ་ཆེ། །མ་མོའི་ཚོགས་བསྐོར་ཁྱོད་ལ་ཕྱག་འཚལ་བསྟོད། །རང་གི་རང་བཞིན་ཆགས་དང་རྣམ་བྲལ་ཡང་། །གདུག་པ་འདུལ་ཕྱིར་ཁྲོ་དང་ཁྲོ་མཛད་པའི། །ནག་པོ་གཏུམ་པོ་ཁྱོད་ལ་ཕྱག་འཚལ་བསྟོད། །ཕྱི་
རོལ་ཚངས་མ་དཀར་མོ་ལ་སོགས་བརྒྱན། །དེ་ཡི་གཉེན་པོར་ཉིད་སྐུར་སྤྲུལ་པ་ཡི། །སྣ་ཚོགས་གཟུགས་འཆང་འཇིགས་པ་ཆེན་པོའི་སྐུ། །གྲི་གུག་ཐོད་པ་དྲག་པོ་སྟེ། །ཐུགས་ཀྱི་རྡོ་རྗེ་ཁྱོད་ལ་ཕྱག་འཚལ་བསྟོད། །སྐུ་གསུང་ཐུགས་ལས་བྱུང་བ་ཡི། །དམ་ཚིག་
ཆེན་པོའི་བདག་ཉིད་འཛིན། །གསོད་བྱེད་མ་ལ་སོགས་པ་ཡི། །མཁའ་འགྲོ་སུམ་ཅུ་རྩ་གཉིས་དག །གཙོ་བོའི་དམ་ཚིག་མི་སྤོང་ཞིང་། །གདུག་པ་མ་ལུས་འཇོམས་མཛད་པའི། །དྲག་པོ་ཁྱོད་ལ་ཕྱག་འཚལ་བསྟོད། །གསང་བར་གནས་པའི་ཕོ་བྲང་ནི། །ཉི་ཤུ་རྩ་
གཉིས་བདག་ཉིད་དེ། །པུལླཱི་ར་ལ་སོགས་པ་ཡི། །གསང་བའི་གནས་ནི་དེ་དག་ན། །ཕྲིན་ལས་རྫོགས་པར་བྱེད་པ་ཡི། །ཀུན་ཀྱང་ལས་ཀྱི་བདག་མོ་སྟེ། །ཁྲག་འཐུང་མ་ལ་སོགས་པ་ཡི། །མཁའ་འགྲོ་བདུན་ཅུ་རྩ་གཉིས་དག །ཀུན་ཀྱང་འཇིགས་པའི་གཟུགས་

ཅན་གྱིས། །ཕྲིན་ལས་ཐམས་ཅད་མྱུར་འགྲུབ་པའི། །མཁའ་འགྲོ་ཁྱོད་ལ་ཕྱག་འཚལ་བསྟོད། །དུར་ཁྲོད་ཆེན་པོ་ལ་གནས་པའི། །ནག་པོ་དྲག་པོ་ལ་སོགས་གནོད་སྦྱིན་བརྒྱད། །འཇིགས་བྱེད་ཆེན་པོའི་གཟུགས་ཀྱིས་གནས་པ་སྟེ། །འགྲོ་བ་མ་ལུས་སྒྲོལ་མཛད་ཁྱོད་ལ་
ཕྱག་འཚལ་བསྟོད། །ཁྭ་གདོང་ལ་སོགས་འཇིགས་བྱེད་མ་ཡི་ཚོགས། །དུར་ཁྲོད་གནས་ནས་མཚན་མོ་རྒྱུ་བས་སྣ་ཚོགས་སྤྲུལ་པའི་བདག །འགྲོ་བའི་སྲོག་འཕྲོག་འཇིགས་པའི་གཟུགས་འཆང་ཁྱེད་ལ་ཕྱག་འཚལ་བསྟོད། །འཁོར་གྱི་ཚོགས་སུ་གྱུར་པ་ཐམས་
ཅད་ཀྱིས། །གཙོ་བོའི་འཁོར་ལོ་ཀུན་ནས་མི་སྤོང་ཞིང་། །དམ་ཚིག་ཆེན་པོར་གནས་པ་ཁྱོད་ལ་བསྟོད། །དུར་ཁྲོད་ཆེན་པོ་བརྒྱད་ཀྱི་ཕོ་བྲང་ན། །ཉི་ཤུ་རྩ་བཞི་དྲག་པོའི་ཚོགས་རྣམས་ཀྱིས། །དུས་གསུམ་དུར་ཁྲོད་གནས་རྣམས་སྐོར་མཛད་པའི། །ནག་པོ་དྲག་པོ་ཁྱོད་ལ་
ཕྱག་འཚལ་བསྟོད། །རྡོ་རྗེ་སློབ་དཔོན་སྨོད་བྱེད་དང་། །ཐེག་ཆེན་བསྟན་པ་འཇིག་བྱེད་པ། །གདུག་པ་མ་ལུས་འདུལ་མཛད་པའི། །ནམ་མཁའི་འཁོར་ལོ་རབ་བཞུགས་ཏེ། །གར་མཁན་ཁྱོད་ལ་ཕྱག་འཚལ་བསྟོད། །ཤ་གཏུབས་ཁྲག་ནི་འཐུང་མཛད་པའི། །རང་བཞིན་
གསང་སྔགས་རྫོགས་མཛད་པའི། །འཇིགས་བྱེད་ཁྱོད་ལ་ཕྱག་འཚལ་བསྟོད། །རི་རབ་རྩེ་ཡི་གཙོ་ཆེན་པོ། །ལྷ་མིན་དམག་དཔུང་འཇོམས་མཛད་པའི། །དཔལ་ལྡན་འཁོར་སྐྱོང་ཁྱོད་ཕྱག་འཚལ། །གཏུམ་པའི་སྐུ་འཆང་ཤ་ཆེན་ཟ་བྱེད་པ། །ཐོད་པའི་དོ་ཤལ་སྔགས་ཀྱི་ཕྲེང་
བས་བརྒྱན། །མི་བཟད་གཏུམ་པོ་ཁྱོད་ལ་ཕྱག་འཚལ་ལོ། །དཔལ་ལྡན་ནག་པོ་ཆེན་པོ་ཡིས། །བདག་གི་བསྟན་པ་བསྲུང་བར་གྱིས། །དེ་ལྟར་བསྟོད་ནས། སོ་སོའི་ཐུགས་ཀར་དམ་ཚིག་བསྙེན་པ་བསྐྱལ་ཏེ། དེ་ནས་ལྷ་རྣམས་ཐམས་ཅད་ཀྱི། །ཐུགས་
ཀར་ནང་གི་སྙིང་པོ་ཡིས། །བསྙེན་པ་འབུམ་ཕྲག་བསྐྱལ་བར་བྱ། །དེས་ནི་རྟགས་ནི་ཐོབ་པ་སྟེ། །དུས་གསུམ་དུ་ཞེས་བྱ་བ་ནས་ཞལ་མཐོང་བར་ནི་གོ་སླའོ། །དེ་ལྟར་རྡོ་རྗེ་སློབ་དཔོན་གྱིས། །བསྙེན་པ་རྫོགས་པའི་དཀྱིལ་འཁོར་དུ། །སློབ་མ་གཞུག་པ་བརྩམ་

པར་བྱ། །སློབ་མའི་མཆོག་ཏུ་གྱུར་པ་དེས། །ཡོལ་བའི་ཕྱི་རོལ་གནས་ནས་ནི། །ལག་གཉིས་མེ་ཏོག་བཟུང་བྱས་ལ། །བླ་མའི་མདུན་དུ་མཎྜལ་དབུལ། །སྐུ་གསུང་ཐུགས་ལས་བྱུང་བ་ཡི། །རྡོ་རྗེ་ཆེན་པོའི་བདག་ཉིད་ཁྱོད། །དཔལ་ལྡན་ནག་པོ་ཆེན་པོ་ཡིས། །
གསང་བའི་འཁོར་ལོའི་ཕོ་བྲང་དུ། །དེ་བཞིན་བདག་ནི་གཞུག་ཏུ་གསོལ། །དེ་ནས་རྡོ་རྗེ་སློབ་དཔོན་གྱིས། །རྩ་བའི་སྔགས་ཀྱིས་བསང་གཏོར་བྱ། །དུར་ཁྲོད་རས་ཀྱིས་གདོང་གཡོགས་ལ། །སློབ་མ་མདུན་དུ་གཞུག་པར་བྱ། །སློབ་མས་ཡོན་མཆོག་ཕུལ་ནས་ནི། །གོང་
དུ་གསུངས་པའི་བསྟོད་པ་ཡིས། །སློབ་མས་དཀྱིལ་འཁོར་ལྷ་ལ་བསྟོད། །དེ་ནས་རྡོ་རྗེ་སློབ་དཔོན་གྱིས། །སྡོམ་པ་བཟུང་བའི་ཆོ་ག་ཡིས། །འདི་ནི་སངས་རྒྱས་ཐམས་ཅད་ཀྱི། །དམ་ཚིག་འཁོར་ལོ་ཡིན་པ་སྟེ། །དུས་གསུམ་བདེ་གཤེགས་ཐམས་ཅད་ཀྱི། །བསྟན་པ་
བསྲུང་བར་སེམས་བསྐྱེད་ཅིག །སློབ་མས་གསོལ་བ་གདབ་པར་བྱ། །སྐུ་གསུང་ཐུགས་ལས་བྱུང་བ་ཡི། །དཔལ་ལྡན་ནག་པོ་ཆེན་པོ་དང་། །མཁའ་འགྲོའི་དཀྱིལ་འཁོར་འཁོར་ལོའི་བདག །དེ་བཞིན་བདག་ལ་དབབ་ཏུ་གསོལ། །དེ་ནས་ཐུགས་ཀའི་འོད་ཟེར་གྱིས། །ནག་
པོ་ཆེན་པོ་ལ་སོགས་པའི། །དཀྱིལ་འཁོར་འཁོར་ལོ་སྤྱན་དྲངས་ནས། །སློབ་མའི་སྙིང་གར་གཞུག་པར་བྱ། །ཨོཾ་ཤྲཱི་མ་ཧཱ་ཀཱ་ལ་ག་ན་ཙཀྲ། ཨཱ་དཪྴ་ཡ་ཏོ་བྷ་ཡ། རཱ་རཱ་རཱ་རཱ། བ་ལ་ཡ་ཙི་ཏཱ་ཡ། ཧཱུཾ་ཧ་ཨཱ་ཛྷཻ། སློབ་མ་ཁྲོ་གཉེར་བཞིན་གྱུར་ནས། །དྲག་པོའི་སྔགས་ནི་བརྗོད་པ་
དང་། །བརྟུལ་ཞུགས་གར་ནི་བྱེད་པར་འགྱུར། །ཨོཾ་གཱ་གཱ་མ་ཏེ་ཏེ་བཛྲས་བརྟན་པར་བྱ། སློབ་མ་ཤར་དུ་གནས་ནས་ནི། །སློབ་དཔོན་གྱིས་ནི་གཞུག་པར་བྱ། །དཔལ་ལྡན་ནག་པོ་ཆེན་པོ་དང་། །འཁོར་ལོའི་དཀྱིལ་འཁོར་ཐམས་ཅད་དུ། །གསང་བའི་
ཕོ་བྲང་ཆེན་པོར་ནི། །བདག་གིས་སློབ་མ་གཞུག་པར་བྱ། །སློབ་མས་རིག་པའི་མེ་ཏོག་ནི། །དཀྱིལ་འཁོར་དབུས་སུ་གཏོར་བར་བྱ། །ཨོཾ་མ་ཧཱ་ཀཱ་ལ་ཡ་པྲ་ཏི་ཛ་བཛྲ་ཧོཿཡིས་སོ། །དེ་ནས་གདོང་གཡོགས་ཕུད་ནས་ནི། །དཔལ་ལྡན་ནག་པོ་ཆེན་པོ་དང་། །ཐུགས་ཀྱི་

རྡོ་རྗེ་བརྒྱད་ཀྱི་འཁོར། །དམ་ཚིག་ལས་བྱུང་སུམ་ཅུ་གཉིས། །ལས་ཀྱི་བདུན་ཅུ་རྩ་གཉིས་ཏེ། །ཐུགས་ཀྱི་འཁོར་ལོ་བརྒྱད་ཀྱི་འཁོར། །དཀྱིལ་འཁོར་བཟང་པོ་འདི་ལ་ལྟོས། །ཞེས་བྱ་བ་ལ་སོགས་པས། དཀྱིལ་འཁོར་དམ་པ་བསྟན་པར་བྱ། །དཔལ་ལྡན་ནག་པོ་ཆེན་པོ་དང་། །
དམ་ཚིག་འཁོར་ལོ་ཐམས་ཅད་ཀྱིས། །དབང་བསྐུར་བ་ནི་བདག་ལ་སྩོལ། །དེ་ནས་བདག་པོ་སློབ་དཔོན་གྱིས། །ལྷ་ཡི་འཁོར་ལོ་རབ་གསལ་ཏེ། །ལས་ཀྱི་བུམ་པས་བགེགས་བསྐྲད་དེ། །གཙོ་བོའི་བུམ་པས་དབང་བསྐུར་བྱ། ཨོཾ་མ་ཧཱ་ཀཱ་ལཱ་ཡ། ཨཱ་དཪྴ་ཛྙཱ་ན་ཨ་བྷི་ཥིཉྩ་
ཧཱུཾ་ཧཱུཾ། ཐོད་རུས་ལས་བྱུང་དབུ་རྒྱན་ལ། །རིན་ཆེན་བདག་པོ་བསྐྱེད་པར་བྱ། །ཐུགས་ཀར་ནག་པོ་ཆེན་པོ་ནི། །ཡན་ལག་གོ་ཆ་ཀུན་བྱས་ཏེ། །སྤྱི་བོར་དབང་བསྐུར་སྦྱིན་པར་བྱ། །ཨོཾ་མ་ཧཱ་ཀཱ་ལཱ་ཡ། ས་མནྟཱ་ཛྙཱ་ན་ཨ་བྷི་ཥིཉྩ་ཏྲཱཾ། རྡོ་རྗེ་སྣང་བ་མཐའ་ཡས་སུ། །
བསྐྱེད་ནས་ནག་པོ་ཆེན་པོ་ནི། །ཐུགས་ཀར་ཡང་དག་གནས་པར་བྱ། །དེ་ནས་དབང་བསྐུར་སྦྱིན་པ་ནི། །ཨོཾ་མ་ཧཱ་ཀཱ་ལཱ་ཡ། པྲ་ཏྱ་བེཀྵ་ཛྙཱ་ན་ཨ་བྷི་ཥིཉྩ་ཨཱཾ། དྲིལ་བུ་དོན་ཡོད་གྲུབ་པར་ནི། །བསྐྱེད་ནས་ཐུགས་ཀར་རིགས་བདག་བསམ། །ཡན་ལག་ཆོ་ག་ཀུན་བྱས་ཏེ། །དེ་ནས་
དབང་བསྐུར་སྦྱིན་པར་བྱ། །ཨོཾ་མ་ཧཱ་ཀཱ་ལཱ་ཡ་ཀྲྀ་ཏ་ཨ་ནུ་སྠཱ་ན་ཨ་བྷི་ཥིཉྩ་ཁཾ། དེ་ནས་བདག་གི་ལྷ་ཡིས་ནི། །མིང་གི་དབང་འདི་བསྐུར་བྱ་སྟེ། །བུམ་པ་ལ་སོགས་རྫས་ཚོགས་ནས། །ཨོཾ་མ་ཧཱ་ཀཱ་ལཱ་ཡ་དྷརྨ་དྷཱ་ཏུ་ཛྙཱ་ན་ཨ་བྷི་ཥིཉྩ་ཤྲོ་ན་མ་ཨ་བྷི་ཥེ་ཀ་ཏ་ཨོཾ། དཔལ་དང་རྡོ་རྗེ་
མཐའ་ཡས་ཀྱི། །མིང་གི་དབང་ནི་བསྐུར་བར་བྱ། །དེ་ནས་སློབ་མ་མཆོག་གི་ནི། །ཡོན་གྱི་མཆོག་ཕུལ་གསོལ་བ་གདབ། །ནམ་མཁའ་ལས་བྱུང་རྡོ་རྗེའི་སྐུ། །དེ་བཞིན་བདག་ལ་སྩལ་དུ་གསོལ། །དཔལ་ལྡན་ནག་པོ་ཆེན་པོ་དང་། །དཔའ་བོ་མཁའ་འགྲོ་མ་རྣམས་ཀྱི། །སྐུ་
གསུང་ཐུགས་ཀྱི་རྡོ་རྗེའི་དབང་། །དབང་བསྐུར་བ་ནི་བདག་ལ་སྩོལ། །གདུག་པ་མ་ལུས་བསྒྲལ་བ་དང་། །བདེ་གཤེགས་བསྟན་པ་བསྲུང་བའི་ཕྱིར། །བདག་ནི་རྟག་པར་སློབ་དཔོན་བགྱི། །དེ་ནས་སློབ་མའི་སྙིང་གར་ནི། །ཧཱུཾ་གི་ཡི་གེ་གསལ་བར་བསམ། །དེ་ནས་ཐུགས་

ཀའི་འོད་ཟེར་གྱིས། །བསྐུལ་ནས་ནག་པོའི་སྐུར་བསྐྱེད་དེ། །སློབ་མའི་ཐུགས་ཀར་བཀའ་སྡོད་བསམ། །དེ་ནས་ཡེ་ཤེས་སེམས་དཔའ་ནི། །ཕྱག་རྒྱ་བཞི་ཡི་སྦྱོར་བས་བསྟིམ། །དེ་ནས་བུམ་པ་ལ་སོགས་པའི། །དབང་བསྐུར་བ་ནི་སྦྱིན་པར་བྱ། །དེ་
ནས་གྲི་གུག་ཐོད་པ་སྦྱིན། །ཡེ་ཤེས་འབར་བའི་བདག་ཉིད་དེ། །ཉོན་མོངས་མ་ལུས་གཅོད་པའི་མཆོག །བདུད་ཁྲག་འབྱུང་བའི་ཀ་པཱ་ལ། །དཔའ་བོའི་རྟགས་སུ་སྦྱིན་པར་བྱ། །དཔལ་ལྡན་ནག་པོ་ཆེན་པོ་ཡིས། །ཅོད་པན་ལ་སོགས་ཕྱག་རྒྱ་དྲུག །སྐུ་ཡི་རྟགས་སུ་སྦྱིན་
པར་བྱ། །དུར་ཁྲོད་སྣག་ཚས་བྲིས་པ་ཡིས། །པུསྟི་གསུང་གི་རྟགས་སུ་སྦྱིན། །དུང་དང་མདའ་གཞུ་སྦྱིན་པར་བྱ། །དེ་ནས་རྡོ་རྗེ་སློབ་དཔོན་གྱིས། །ཐུགས་ཀའི་ཧཱུཾ་ལས་རབ་སྤྲོས་ཏེ། །རྩ་བའི་སྙིང་པོའི་སྔགས་དང་ནི། །ནང་གི་སྙིང་པོ་རབ་སྤྲོས་ཏེ། །སློབ་མའི་སྙིང་གར་
བསྟིམ་པར་བྱ། །སྔགས་རེ་སྟོང་ཕྲག་རེ་རེ་བསྟིམ། །དེ་ནས་ཤ་ལྔ་བདུད་རྩི་ལྔ། །དམ་ཚིག་ཆོ་གས་སྦྱིན་པར་བྱ། །དེ་ནས་རྡོ་རྗེ་རྩེ་མོ་ཡིས། །འབར་བའི་བསམ་གཏན་བརྟན་ནས་ནི། །རྗེས་སུ་གནང་བ་སྦྱིན་པར་བྱ། །དཔལ་ལྡན་ནག་པོ་ཆེན་པོ་ཡི། །སྐུ་གསུང་ཐུགས་ཀྱི་
འཁོར་ལོ་ནི། ཁྱོད་ཀྱིས་རྟག་ཏུ་གོམས་པར་གྱིས། །དངོས་གྲུབ་ཐམས་ཅད་ཁྱོད་མངོན་གྱུར། །གསང་སྔགས་ལ་ཡང་བརྩོན་པར་གྱིས། །དམ་ཚིག་ཐམས་ཅད་སྤྱོད་པར་གྱིས། །གསད་པ་ལ་སོགས་ལས་ཀྱི་ཚོགས། །གདུག་པ་འདུལ་ཕྱིར་གྲུབ་པར་གྱིས། །དེ་ནས་དཀྱིལ་འཁོར་
ཤར་ཕྱོགས་སུ། །རོ་ཡི་གདན་ལ་རབ་འདུག་སྟེ། །གྲི་གུག་ཐོད་པ་ཐོགས་ནས་ནི། །ཤར་ལ་སོགས་པར་མངོན་ཕྱོགས་ནས། །སློབ་མའི་མིང་ནི་འདི་ཞེས་བྱ། །རྡོ་རྗེ་རིགས་ལ་སོགས་པ་ཡི། །དེ་བཞིན་གཤེགས་པ་ཐམས་ཅད་དང་། །མགྲིན་པ་གཅིག་ཏུ་ལུང་བསྟན་ནི། །དེ་
ལྟར་ང་ཡིས་ལུང་བསྟན་པ། །དཔལ་ལྡན་ནག་པོ་ཆེན་པོ་དང་། །མཁའ་འགྲོ་འཁོར་ལོ་ཐམས་ཅད་ནི། །དང་པོ་མཆོག་ཏུ་བསྒྲུབ་པའི་ཕྱིར། །མགྲིན་པ་གཅིག་ཏུ་ལུང་བསྟན་ཏོ། །སྲིད་པ་གདུག་པ་འདུལ་མཛད་པའི། །ཨོཾ་ཤྲཱི་མ་ཧཱ་ཀཱ་ལ་ན་མ་སྶརྦ་ཏ་ཐཱ་ག་ཏ་སིདྡྷི་ས་མ་ཡ་སྟྭཾ་བྷུར་བྷུ་བ་

སྭཿ དེ་ལྟར་ལུང་བསྟན་རྫོགས་པ་དང་། །སེམས་ཀྱི་གཟེངས་ནི་བསྟོད་པར་བྱ། །དཔལ་ལྡན་ནག་པོ་ཆེན་པོ་དཀྱིལ་འཁོར་གྱི། །ཁྱོད་ནི་བདག་པོར་གྱུར་པ་དེ། །འཁོར་ལོ་གསུམ་ལ་གནས་པ་ཡི། །མཁའ་འགྲོ་མ་རྣམས་ཐམས་ཅད་ཀྱི། །ཁྱོད་ཀྱིས་བསྒོ་བའི་ལས་རྣམས་བྱེད། །གསད་
པ་ལ་སོགས་ལས་རྣམས་ནི། །བརྩམས་པ་ཙམ་གྱིས་ཐོགས་མེད་འགྱུར། །དེ་ལྟར་ཆོ་ག་རྫོགས་པ་དང་། །རྒྱུད་ཀྱི་དོན་ནི་བཤད་པར་བྱ། །འདི་ཡི་ཆོ་གའི་ཁྱད་པར་ནི། །མ་བྱུང་འབྱུང་བར་མི་འགྱུར་ཏེ། །འདི་ནི་དམ་པས་བླང་བར་བྱ། །དེ་སྐད་ཅེས་བཀའ་སྩལ་ཏེ་ཞེས་བྱ་བ་ནི། དཀྱིལ་
འཁོར་གྱི་དོན་བསྡུས་ཏེ་བཤད་པའི་ཕྱིར་རོ། །དེ་ནས་གཞན་ཡང་ཞེས་བྱ་བ་ནས་བཀའ་སྩལ་པ་ཞེས་བྱ་བ་ནི་དཀྱིལ་འཁོར་ལ་བརྟེན་ནས་བསྒྲུབ་པར་བྱ་སྟེ་གོ་སླའོ། །ས་ལ་དཀྱིལ་འཁོར་བྲི་ཞེས་བྱ་བ་ནི་གོང་དུ་བསྟན་པའི་དཀྱིལ་འཁོར་ཏེ་བསྒྲུབ་པར་བྱ་བའི་ཆེད་དུ་བཞེས་པའོ། །རོ་
བསྲེགས་ཤིང་ཞེས་བྱ་བས་ནི། །དབང་བསྐུར་བྱ་སྟེ་དེ་ཡང་། །དུར་ཁྲོད་གནས་སུ་སོང་ནས་ནི། །བདུད་རྩིས་མཎྜལ་བྱས་ནས་སུ། །དེ་སྟེང་རོ་བསྲེགས་ཤིང་བཞག་ནས། །ལྷ་ཡི་འཁོར་ལོ་རྫོགས་བྱས་ཏེ། །ཐུགས་ཀའི་འོད་ཟེར་རབ་སྤྲོས་པས། །དཔལ་ལྡན་ནག་པོ་སྤྱན་དྲངས་
བསྟིམ། །ཡན་ལག་ཆོ་ག་བྱས་ནས་ནི། །མཆོད་པ་གཏོར་མ་དབུལ་བར་བྱས། །དེ་ནས་ནང་གི་སྙིང་པོ་ཡིས། །བསྙེན་པ་སྟོང་ཕྲག་གཅིག་ཏུ་བྱ། །དེར་ནི་སྐུ་ཡི་མཐོ་གང་ཚད། །ལེགས་པར་བྱས་ཏེ་རབ་གནས་བྱ། །ཆད་པའི་ས་དང་གྲི་རུས་ལ། །ཞེས་བྱ་བ་ནི་ལྡེར་སོ་ཞེས་བྱ་བ་སྟེ་
ཆོ་ག་ནི་གོང་མ་དང་མཚུངས་སོ། །དུར་ཁྲོད་གནས་ཞེས་བྱ་བ་ནི་གོང་དུ་བསྟན་པའི་གནས་ཆེན་པོ་བརྒྱད་དུའོ། །བསམ་གཏན་དང་ཞེས་བྱ་བ་ནས་གནས་པར་བྱ་ཞེས་པ་ནི་མདོར་བསྟན་པ་སྟེ་གོ་སླའོ། །དངོས་གྲུབ་ཅེས་བྱ་བ་ནི་རབ་ཏུ་གནས་པའི་རྟགས་ཐོབ་པའོ། །བཀའ་སྩལ་ཏོ་ཞེས་བྱ་
བ་ནི་མདོར་བསྟན་པའི་ཚིག་གོ། །རྣལ་འབྱོར་གྱི་དབང་ཕྱུག་ཅེས་བྱ་བ་ནི་ནག་པོ་ཆེན་པོའི་དཀྱིལ་འཁོར་དུ་དབང་བསྐུར་ཞིང་བསྙེན་པའི་རྟགས་ཐོབ་པའོ། །བསམ་གཏན་སྔགས་དང་ལྡན་གྱུར་ན། །ཞེས་བྱ་བ་ནི་རབ་ཏུ་གནས་པའི་བསྙེན་པར་བྱའོ། །གཉིས་མེད་སྟོབས་དང་ལྡན་པར་

གྱུར། །ཞེས་བྱ་བ་ནི་བསྙེན་པའི་རྟགས་ཐོབ་པའི་ཕྱིར་རོ། །ནག་པོ་ཆེན་པོས་གསོལ་བ་ཞེས་བྱ་བ་ནས། ཕུར་བུ་རབ་ཏུ་གནས་པ་ཞེས་བྱ་བ་ནི་སྐུ་ལ་སོགས་པའི་རབ་གནས་མདོར་བསྡུས་ཏེ་ཞུས་པའོ། །བཅོམ་ལྡན་འདས་ཀྱིས་བཀའ་སྩལ་ཏེ། །ཞེས་བྱ་བ་ནི་བཅོམ་
ལྡན་འདས་ཡེ་ཤེས་ཆེན་པོའི་ཏིང་ངེ་འཛིན་ལ་ཞེས་བྱ་བའི་དོན་ཏོ། །དེ་ནས་གཞན་ལ་ཞེས་བྱ་བ་ནི་རབ་ཏུ་གནས་པ་རྒྱས་པར་བཤད་དོ། །དང་པོ་ཞེས་བྱ་བ་ནི་བསྙེན་པ་རྫོགས་པ་སྟེ་དེ་མ་ཐག་ཏུའོ། །དུར་ཁྲོད་ཅེས་བྱ་བ་ནི་ལྷོ་ཕྱོགས་ཀྱི་དུར་ཁྲོད་དེ། ང་རྒྱལ་དང་ལྡན་པ་ཞེས་བྱ་བ་ནི་དུར་
ཁྲོད་ཀྱི་དབུས་སུ་ལྷའི་འཁོར་ལོ་རྫོགས་པར་བསྐྱེད་ནས་ཅང་ཏེའུ་དཀྲོལ་ཞིང་ཧ་ཧ་ཞེས་སྒྲོགས་པའོ། །དཔའ་བོ་ཁ་དོག་ནག་པོ་ཞེས་བྱ་བ་ནི་རྩེ་གསུམ་མམ་རལ་གྲིས་གསད་པ་ཉིད་དེ། ཡང་ན་གསལ་ཤིང་ལ་བཙ