Luận tạng Tây Tạng (Tengyur) — Tập 23

ུར་ཞེ་ན།
ཕྱག་རྒྱ་ཞེས་པ་ལ་སོགས་པ་ནི་དགའ་བ་ལ་འགྲོ་བས་སམ་སྤྲོས་པ་ཐམས་ཅད་དང་བྲལ་བས་སྟོང་པ་ཉིད་ཡོངས་སུ་དག་པའི་ཕྱིར་རོ། །ཕྱག་རྒྱ་གཉིས་ནི་གཡུང་དྲུང་དང་འཁོར་ལོའོ། །དེ་ལ་མཐར་ཐུག་པའི་སྦྱོར་བ་ནི་གཉིས་སུ་མེད་པའི་ཡེ་ཤེས་སོ། །ཡང་ན་སྲིན་པོའི་ཞལ་ཅུང་ཟད་བསྡམས་པ་
དང་། རྣམ་འོད་དབྱིག་གཉེན་རབ་ཏུ་འབར་བས་ཕྱག་རྒྱ་གཉིས་སོ། །ཡང་ན་བདེ་བ་ཆེན་པོའི་འཁོར་ལོ་དང་སྤྲུལ་པའི་འཁོར་ལོ་གཉིས་ལ་བདེ་བ་ཆེན་པོའི་རོས་ཕྲད་པ་ནི་ཕྱག་རྒྱ་གཉིས་ཀྱིས་རབ་སྦྱོར་རོ། །དེས་ཁམས་གསུམ་སྐུ་གསུམ་དུ་འགྲུབ་པ་ནི་རྫོགས་པར་འགྱུར་རོ། །ཡང་གི་ཚིག་
གིས་དངོས་གྲུབ་ཕྲ་མོ་སྨོས་ཅི་དགོས། འཇིག་རྟེན་དང་འཇིག་རྟེན་ལས་འདས་པའི་ཕུན་སུམ་ཚོགས་པ་ཐམས་ཅད་ཐོབ་པར་འགྱུར་རོ་ཞེས་བྱ་བའི་དོན་ཏོ། །འོན་ཏེ་བསྐྱེད་རིམ་ཙམ་ལ་གནས་པས་དངོས་གྲུབ་ཐོབ་པར་འགྱུར་རོ་ཞེས་ཟེར་ན། སྐད་ཅིག་གིས་ཞེས་བྱ་བ་ལ་སོགས་པ་ནི་ས་བོན་
དང་ཕྱག་མཚན་ལ་སོགས་པ་མེད་པས་སྐད་ཅིག་ནི་ཅིག་ཅར་རོ། །རྣམ་པ་ནི་ལྷའི་རྣམ་པའོ། །དེའི་རྣལ་འབྱོར་ནི་སྟོང་པ་ཉིད་དང་། སྙིང་རྗེ་ཟུང་དུ་འཇུག་པའོ། །བདག་ཉིད་ནི་ངོ་བོ་གང་ལ་ཡོད་པ་དེ་སྐད་ཅིག་རྣམ་པའི་རྣལ་འབྱོར་པ་བདག་གོ། །རྣལ་འབྱོར་པ་ནི་གཉིས་སུ་མེད་པའི་ཡེ་ཤེས་
དང་ལྡན་པས་འགྲུབ་པར་འགྱུར་བ་ནི་ཕྱག་རྒྱ་ཆེན་པོའི་དངོས་གྲུབ་ཐོབ་པར་འགྱུར་རོ། །རྣམ་གཞན་མིན་ཞེས་བྱ་བ་ནི་རྫོགས་རིམ་མེད་པ་ཞེས་བྱ་བའི་དོན་ཏོ། །འདི་ལྟ་སྟེ། རིམ་པ་གཉིས་ནི་ཡང་དག་རྟེན། །རྡོ་རྗེ་ཅན་གྱིས་ཆོས་བསྟན་ཏོ། །བསྐྱེད་པའི་རིམ་པ་དང་རྫོགས་པའི་རིམ་པར་
གནས་པའི་རྣལ་འབྱོར་པས་ཕྱག་རྒྱ་ཆེན་པོའི་དངོས་གྲུབ་མྱུར་དུ་ཐོབ་པར་འགྱུར་རོ་ཞེས་པ་ནི་བསྒོམ་གྱི་ཆོ་གའོ། །སྔགས་བཏུ་བ་ནི་གོ་སླའོ།། །།དེ་ནས་གཏོར་མ་བཤད་པར་བྱ་བ་ནི། གཅེར་བུ་ཞེས་པ་ལ་སོགས་པ་ནི་གཅེར་བུ་སྐྲ་གྲོལ་བས་སྔར་བཤད་པའི་ནུབ་ལ་སོགས་པའི་ཕྱོགས་

སུ་བལྟ་ཞིང་མན་ངག་ཇི་ལྟ་བར་བྱིན་གྱིས་བརླབས་ནས་གཏོར་མ་བཏང་ཞེས་འགུགས་ནས་བཤད་པར་བྱའོ། །འདི་ནི་ཡཾ་ལས་བསྐྱེད་པའི་རླུང་གི་འཁོར་ལོའི་སྟེང་དུ་རཾ་ལས་བསྐྱེད་པའི་མེའི་དཀྱིལ་འཁོར་དེའི་སྟེང་དུ་ཀཾ་ལས་བྱུང་བའི་མི་མགོ་གསུམ་ལ། ཨ་ལས་བྱུང་བའི་པདྨའི་སྣོད་
ཀྱི་བདུད་རྩི་ལྔ་དང་། སྒྲོན་མ་ལྔ་དང་། ཧ་ཧོ་ཧྲཱིཿའི་ཡི་གེ་རྣམས་ཀྱི་ཐ་མལ་པའི་མདོག་དང་། དྲི་དང་ནུས་པ་སྤངས་ནས་རླུང་གིས་བསྐྱོད་པའི་མེ་འབར་བས་བདུད་རྩི་ལྔ་ལ་སོགས་པ་ཞུ་ནས་འོ་མ་དང་སིནྡྷུ་ར་འདྲེས་པ་བཞིན་དུ་བལྟས་ནས་བཾ་ལས་སྐྱེས་པ་ཁ་ཊྭཱཾ་ག་མགོ་ཐུར་དུ་བསྟན་པས་དཀྲུགས་ནས་ཞུ་
ཞིང་དེའི་འོག་ཏུ། ཨོཾ་ཨཱཿཧཱུཾ། བསྒོམས་པའི་འོད་ཟེར་གྱིས་རྒྱ་མཚོ་ལ་སོགས་པའི་བདུད་རྩི་ཡང་བཀུག་པར་བྱས་ལ། གྲུབ་པའི་དངུལ་ཆུ་ལྟར་བདུད་རྩི་ཡང་རབ་ཏུ་གྲུབ་ལ། ཡི་གེ་གསུམ་གྱིས་འདོད་པ་ཇི་ལྟ་བར་བྱིན་གྱིས་བརླབས་ནས། སྔགས་དང་ཕྱག་རྒྱས་བཀུག་པའི་རྡོ་རྗེ་རྣལ་འབྱོར་མ་
ལ་སོགས་པའི་ཚོགས་མདུན་དུ་བཞག་ཅིང་ཡང་དག་པར་མཆོད་དེ། ཧཱུཾ་དཀར་པོ་ལས་རྡོ་རྗེའི་ལྗགས་ཀྱི་བུ་ག་དང་ལྡན་པའི་རྡོ་རྗེ་མཁའ་འགྲོ་མ་ལ། ཨོཾ་བཛྲ་ཌཱ་ཀི་ནཱི། ཨི་མཾ། བ་ལིཾ། གྲྀཧྞ་གྲྀཧྞ་ཧཱུཾ་ཕཊ། ཨོཾ་ཛཿཧཱུཾ་བཾ་ཧོཿ། ས་མ་ཡ་སྟྭཾ་དྲྀ་ཤྱ་ཧོཿ། ཞེས་པའི་སྔགས་འདིས་སོ། །མཁའ་
འགྲོ་མ་ལ་སོགས་པ་ལ་ནི། ཨོཾ་བཛྲ་ཨ་རལླི་ཧོཿཛཿཧཱུཾ་བཾ་ཧོཿ། བཛྲ་ཌཱ་ཀི་ནཱི་ས་མ་ཡ་སྟྭཾ་དྲྀ་ཤྱ་ཧོཿ། ཞེས་པ་འདིས་ལན་གཅིག་གམ་གཉིས་སམ་གསུམ་མམ་བཞིའམ་ལྔ་བརྗོད་པར་བྱའོ། །དེ་ནས་དུར་ཁྲོད་བརྒྱད་ལ་གནས་པའི་ཕྱོགས་སྐྱོང་རྣམས་ལ་དབུལ་བ་ནི། ཨོཾ་ཁ་ཁ་ཁཱ་ཧི་ཁཱ་ཧི།
སརྦྦ་ཡཀྵ་རཱཀྵ་ས། བྷཱུ་ཏེ། པྲེ་ཏ། པི་ཤཱ་ཙ། ཨུནྨཱ་ད་ཀུཥྨཱཎྜ། ཨ་པསྨཱ་ར། ཌཱ་ཀི་ནྱ་ད་ཡ། ཨི་མཾ་བ་ལིཾ། གྲྀཧྞ་ཏུ། ས་མ་ཡཾ་རཀྵན་ཏུ། མ་མ་སརྦྦ་སིདྡྷིམྨེ། པྲ་ཡཙྪན་ཏུ། ཡ་ཐཻ་བཾ། ཡ་ཐེཥྚཾ། བྷུཉྫ་ཐ། པི་པ་ཐ། མཱ་ཏི་ཀྲ་མ་ཐཱ། མ་མ་སརྦྦ་ཀརྟ་ཡ་སཏྶུ་ཁ། བི་བྲྀ་དྷ་
ཡེ། ས་ཧ་ཡི་ཀ་བྷ་བནྟུ། ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་པ་འདི་ལན་བདུན་བརྗོད་པས་དབུལ་ལོ། །བདུད་རྩི་མྱངས་ནས་བདེ་བ་ཆེན་པོ་ཐོབ་པར་འགྱུར་བའི་རྡོ་རྗེ་རྣལ་འབྱོར་མ་ལ་སོགས་པའི་ལྷ་རྣམས་བསྒོམ་པར་བྱའོ། །དེས་ན་རང་གི་ས་བོན་ལས་བྱུང་བའི་མཆོད་པའི་ལྷ་མོ་རྣམས་ཀྱིས་ཡང་དག་

པར་མཆོད་ཅིང་རྐང་པ་བརྒྱད་པའི་སྔགས་ཀྱིས་བསྟོད་དེ་འདོད་པའི་དངོས་གྲུབ་ལ་གསོལ་བ་བཏབ་ནས་ལྷག་ཆད་ལ་སོགས་པའི་ཉེས་པ་སྤངས་ནས་བཟོད་པར་གསོལ་ཏེ། སྲིན་ལག་དང་མཐེ་བོང་གིས་སེ་གོལ་གཏོགས་ཤིང་ཨོཾ་བཛྲ་མུཿ། ཞེས་བརྗོད་པས་སེ་གོལ་གཏོགས་ཤིང་དཀྱིལ་འཁོར་བདག་ཉིད་
ཀྱི་ས་བོན་ལ་བསྟིམ་པར་བྱའོ། །བཅོམ་ལྡན་འདས་མའི་གཏོར་མའོ། །དམ་ཚིག་ཅེས་པ་ནི་འགལ་བར་མི་བྱ་བའི་ཕྱིར་དམ་ཚིག་ནི་སྲོག་གཅོད་པ་ལ་སོགས་པ་ཁ་ན་མ་ཐོ་བའི་ལས་སྡོམ་པའོ། །ཡང་དམ་ཚིག་ནི་ཤེས་རབ་མ་བསྟེན་པ་ལས་བྱུང་བའི་དགའ་བ་བཅུ་དྲུག་གི་ཐིག་ལེའི་བདག་ཉིད་ཀྱི་རོ་
གཅིག་ཏུ་གྱུར་ནས་རྡོ་རྗེ་ནོར་བུ་རབ་ཏུ་འཇུག་པ་ནི་ཚངས་པར་སྤྱོད་པའོ། །ཡང་དམ་ཚིག་ནི་དགའ་བ་བཅུ་དྲུག་གི་ཐིག་ལེ་དེ་ཉིད་འཛག་པར་མི་འགྱུར་བའི་ཚུལ་ཁྲིམས་ཀྱི་རང་བཞིན་ནོ། །དེ་ཇི་ལྟར་ཞེ་ན། རྡོ་རྗེ་ནོར་བུ་ལས་གྱེན་དུ་གསང་བ་དང་། ལྟེ་བ་དང་། སྙིང་ག་དང་། མགྲིན་པ་དང་། དཔྲལ་
བའི་ཟེ་འབྲུས་འདྲེན་པ་ནི་གསང་བའི་དམ་ཚིག་གོ། །བཟའ་བ་ནི་གོ་ཀུ་ད་ཧ་ན། སྒྲོན་མ་ལ་སོགས་པ་ཆོ་ག་ཇི་ལྟ་བུས་བདུད་རྩིར་བསྒྱུར་བའི་བཟའ་བའོ། །དམ་ཚིག་ཉམས་པ་ལ་གླད་གཟེར་དང་མཛེ་ནད་ལ་སོགས་པ་ནད་རྣམ་པ་སྣ་ཚོགས་འབྱུང་བར་འགྱུར་རོ། །དམ་ཚིག་གཉིས་བསྲུངས་པ་ཁོ་ནས་
དངོས་གྲུབ་འགྲུབ་པར་འགྱུར་རོ།། །།རྡོ་རྗེ་ཕག་མོ་ཕྱག་འཚལ་ནས། །ཚེས་བཅུའི་ཆོ་ག་རྒྱས་པ་རུ། །སྒྲུབ་པ་པོ་ལ་ཕན་པའི་ཕྱིར། །སྟོབས་ཆེན་རབ་ཏུ་བརྗོད་པར་བྱ། །ཉོན་མོངས་དྲ་བས་རྣམ་གཅོད་པའི། །མར་གྱི་ཚེས་བཅུ་ངེས་པ་སྟེ། །ཤཱཀྱ་སེང་གེ་སྔར་བྱང་ཆུབ། །སྙིང་པོ་
བྱང་ཆུབ་ཐོབ་པར་འགྱུར། །དང་པོའི་སངས་རྒྱས་མ་དང་གར། །མར་གྱི་ཚེས་བཅུར་སངས་རྒྱས་གྱུར། །མང་པོ་སྨྲས་པས་ཅི་ཞིག་བྱ། །དེ་ཀུན་དེ་བཞིན་གཤེགས་ལས་འབྱུང་། །ལུ་ཨི་བི་རཱུ་ལ་སོགས་རྣམས། །གྲུབ་ཐོབ་གྲུབ་ཉིད་ཐོབ་པར་འགྱུར། །ཚེས་བཅུ་དེ་ཉིད་དེས་ན་དེ། །ཚེས་བཅུ་
མཚུངས་མེད་བསོད་ནམས་ཅན། །དེ་ལ་བསམ་གཏན་བཟླས་བརྗོད་པ། །དེ་བཞིན་གཏོར་མ་སྦྱིན་སྲེག་གོ། །མཐའ་མེད་འབྲས་བུ་བསྟན་པ་ནི། །སྲོད་ལ་ཁྱད་པར་འཕགས་པས་སུ། །དཔའ་བོ་རྣལ་འབྱོར་མ་འཁོར་ལོ། །གཞོན་ནུའི་འཁོར་ལོ་གཅིག་པུའམ། །གྲུབ་ཐོབ་རིམ་པའི་ཆོ་ག་ཡིས། །

མཆོད་ན་དངོས་གྲུབ་ཐོབ་པར་འགྱུར། །རྣལ་འབྱོར་རོལ་པས་རབ་ཞུགས་པའི། །རིམ་གྱིས་ཐིམ་པའི་རླུང་སེམས་ཀྱིས། །སེམས་ཀྱི་སྤྲོས་པ་ཚེས་བཅུ་སྟེ། །རང་རིག་ཚེས་བཅུར་རབ་ཏུ་གྲགས། །བླ་མ་མན་ངག་གིས་གནས་པའི། །མི་ཤིགས་པ་ཡི་སྒྲ་ལས་བྱུང་། །ལྷན་སྐྱེས་ཚེས་
བཅུ་ཚིག་ཏུ་བཤད། །སྲོག་གི་རྣལ་འབྱོར་ཚེས་བཅུ་ཡིན། །དབུ་མའི་ལམ་དུ་རོལ་པ་ཡིས། །གཏུམ་མོ་གྱེན་དུ་འགྲོ་བ་སྟེ། །སྤྱི་བོར་འཁོར་ལོ་ཀུན་ནས་གནོད། །ལུས་ཀྱི་ཚེས་བཅུ་དྲན་པ་ཡིན། །དེ་ནས་ཚེས་བཅུར་ཏིལ་དང་ནི། །སྐྱུ་རུ་ར་དང་ཡུངས་འབྲུ་སྟེ། །བཀྲུས་ནས་སྒྲུབ་པོ་
མཉམ་གཞག་ནས། །མཆོད་པའི་བྱེ་བྲག་འགྲུབ་པར་འགྱུར། །གསང་འདུས་ལ་སོགས་རིམ་པ་ཡིས། །རང་རང་ཡི་དམ་མཆོད་པར་བྱ། །ཁྱད་པར་དུ་ནི་སྲོད་ལ་སྟེ། །སྒྲུབ་པོས་དེ་ཉིད་བསྒོམ་པར་བྱ། །རང་གིས་རྟོགས་པར་བཤད་པའམ། །གྲུབ་ཐོབ་ལམ་གསུངས་གཏོར་མ་འབུལ། །
སྤྱི་ཡི་རིམ་པ་རབ་ཏུ་བཤད། །ད་ནི་ཁྱད་པར་བརྗོད་པར་བྱ། །ཡར་གྱི་ཚེས་བཅུར་མཆོད་སྦྱིན་གཉིས། །མར་ངོར་སྦྱིན་སྲེག་མཆོད་པ་གཉིས། །སྟོན་ཟླ་ཐ་ཆུངས་ཚེས་བཅུ་ལ། །གྲུབ་ཐོབ་བརྒྱུད་པའི་དཔའ་བོ་རྣམས། །སྤོབས་པའི་རང་བཞིན་སེམས་ལྡན་ལ། །ཆང་གི་མཆོག་གིས་མཆོད་པར་བྱ། །
ཀུནྡའི་མེ་ཏོག་རབ་བརྒྱུས་པའི། །མེ་ཏོག་དམར་པོས་མཆོད་པར་བྱ། །ཡིད་ཀྱི་བཟླས་པར་རོལ་པ་ནི། །ས་འོག་ལ་ནི་དམིགས་གྱུར་པ། །མར་ངོར་ཏིལ་ལ་དམར་པོ་ཡིས། །ནནྟི་ནི་ཡི་ཁུ་བས་སྤངས། །དང་པོའི་སྲོད་ལ་སྦྱིན་སྲེག་བྱ། །དབེན་པའི་གནས་སུ་བསྒོམ་གནས་སོ། །དགུན་ཟླ་ར་བར་
སྣམ་བུའམ། །རས་བལ་འབྱུང་གོས་དབུལ་བར་བྱ། །མེ་ཏོག་སེར་པོ་རབ་བརྒྱུས་པའི། །མེ་ཏོག་དམར་པོའི་ཕྲེང་བས་མཆོད། །ཉིང་ལག་རོལ་པས་བཟླས་པ་དང་། །ས་སྟེང་ས་འོག་རྗེས་འབྲངས་པའི། །ཟླ་བ་མར་ངོ་ཏིལ་ནག་གི། །ལྷག་པར་གོང་བཞིན་སྦྱིན་སྲེག་བྱ། །གོང་བཞིན་འབྲིང་
པོར་བ་དམར་དང་། །ཀེཾ་ཀི་ར་ཏས་འདྲེས་མཆོད་པ། །གོང་བཞིན་དུ་ནི་སྤྱད་པར་བྱ། །གསང་སར་ཚིག་གིས་བཟླས་པ་དང་། །མི་ཡི་འཇིག་རྟེན་གནས་རོལ་ནི། །ཟག་པ་ཀུན་ནས་རྣམ་འཇིག་པ། །དེ་བཞིན་ཏིལ་ཀར་སྦྱིན་སྲེག་ནི། །མཚན་ཕྱེད་དག་ལ་ཡང་དག་སྤྱོད། །དགུན་ཟླ་ཐ་ཆུངས་མར་

ཚེས་བཅུར། །ཞོ་ནི་དྲི་ཞིམ་དབུལ་བར་བྱ། །གསེར་གྱི་སྙེ་མ་མེ་ཏོག་འདྲེས། །མཆོད་པ་སྔར་བཞིན་སྤྱད་པར་བྱ། །ཡིད་ཀྱིས་བཟླས་པ་རོལ་པ་ནི། །སྨིན་མཚམས་གནས་ལ་གནས་གྱུར་པའི། །མར་ངོ་ཡི་ནི་ཚེས་བཅུ་ལ། །པྲི་ཡང་ཀུ་ནི་སྦྱིན་སྲེག་ནི། །དང་པོའི་ཐུན་ལ་དྲན་པ་ཡིན། །དཔྱིད་
ཟླ་ར་བའི་མར་ངོ་ལ། །བུ་རམ་བཅའ་སྒ་དབུལ་བར་བྱ། །པ་ཊ་ལ་ཡི་མེ་ཏོག་འདྲེས། །མེ་ཏོག་དམར་པོས་མཆོད་པ་དང་། །བཟླས་པས་འོག་མིན་རབ་གནས་པའི། །རོལ་པ་དྲག་པོའི་རོ་དང་བཅས། །མར་ངོར་ལ་ཕུག་ས་བོན་གྱིས། །ཐོ་རས་ཐུན་ལ་སྦྱིན་སྲེག་བྱ། །དཔྱིད་ཟླ་འབྲིང་པོར་ཡར་ཚེས་བཅུར། །
ཨ་ཤོ་ཀ་ནི་དམར་པོ་ཡིས། །དེ་བཞིན་རྣལ་འབྱོར་མཆོད་པར་བྱ། །ཚིག་གིས་བཟླས་དང་རོལ་པ་ནི། །རབ་ཏུ་མི་གནས་གནས་གྱུར་པ། །ཀ་ར་དང་བཅས་མ་ཧེའི་ཞོ། །དྲི་མ་མེད་པ་སྦྱིན་པར་བྱ། །མར་ངོར་མེ་ཏོག་སུ་མ་ཀའི། །སྦྲང་རྩི་མར་བཅས་སྦྱིན་སྲེག་བྱ། །དཔྱིད་ཟླ་ཐ་ཆུངས་ཡར་ངོ་ལ། །
ཀ་ར་བཱི་ར་མ་ལུས་མཆོད། །ཡིད་ཀྱིས་བཟླས་དང་རོལ་པ་ནི། །རི་རབ་སྐྱོད་བྱེད་མཆོག་གྱུར་པ། །རྐེད་དཀྲིས་ཡོངས་སུ་གྱོན་ནས་སུ། །གཡོགས་པའི་གོས་ཕྲ་སྦྱིན་པར་བྱ། །མར་ངོ་མར་དང་འདྲེས་པ་ཡི། །གུ་གུལ་གྱི་ནི་སྦྱིན་སྲེག་བྱ། །དབྱར་ཟླ་ར་བའི་ཡར་ངོ་རུ། །མར་མེ་རླུང་སྨན་
བཙོས་ཏིལ་མར། །མེ་ཏོག་དམར་པོས་རབ་བརྒྱུས་པའི། །སྙེ་མའི་མེ་ཏོག་རྣམས་ཀྱིས་མཆོད། །གསང་བའི་བཟླས་དང་རོལ་པ་ནི། །སྟོང་ཉིད་ལམ་ནི་མཐོང་བྱེད་མ། །མར་ངོ་འོ་ཐུག་མར་དང་བཅས། །རྟག་པར་དེས་ནི་སྦྱིན་སྲེག་བྱ། །དབྱར་ཟླ་འབྲིང་པོ་ཡར་ངོ་ལ། །ཀ་ར་བཱི་རས་མཆོད་
པར་བྱ། །ཚིག་གིས་བཟླས་དང་རོལ་པ་ནི། །ཉིང་ལག་ཀུན་དུ་བལྟ་བར་བྱ། །སྦྲང་རྩིས་བཀང་བའི་འཁར་སྡེར་དང་། །ཡང་ན་རལ་གུ་དབུལ་བར་བྱའོ། །མར་ངོ་གྲུབ་པའི་རྗེས་བཅས་པའི། །འབྲས་ཡོས་ཀྱིས་ནི་སྦྱིན་སྲེག་བྱ། །དབྱར་ཟླ་ཡར་ངོར་ཛ་བ་དང་། །བནྡྷུ་མ་དང་ཡནྟི་ས་
མཆོད། །རྣལ་འབྱོར་བཟླས་དང་རོལ་པ་ནི། །སྣ་ཡི་རྩ་བར་རབ་གཟིགས་པ། །གདུགས་དང་གཙུག་ཏོར་དཀར་པོའམ། །པྲ་ཚིལ་བྱུགས་པའི་རས་སྦྱིན་བྱ། །མར་ངོ་ནས་ཀྱིས་སྦྱིན་སྲེག་བྱ། །ཏིལ་མར་མར་དཀར་འདྲེས་པས་སོ། །སྟོན་ཟླ་ར་བར་ཙམ་པ་ཀ །ནཱ་ག་གེ་སར་ཆུ་སྐྱེས་དང་། །ཨུཏྤལ་

ཀུ་མུ་ད་ཡིས་མཆོད། །རང་གིས་ཐོས་བཟླས་རོལ་པ་ནི། །ནམ་མཁའི་སྐར་མ་དམིགས་པར་བྱ། །ཙུ་ན་ཙུ་ག་ལྷམ་ཞོ་ཆུ། །རབ་ཏུ་གྲགས་པ་སྦྱིན་པར་བྱ། །མར་ངོར་དཱུར་བ་མར་བཅས་པའི། །སྦྱིན་སྲེག་ཚེས་ཀུན་ཕན་པར་གྲགས། །སྟོན་ཟླ་འབྲིང་པོའི་ཡར་ཚེས་བཅུར། །
ཨིནྡི་བ་ར་དམར་པོས་མཆོད། །དྲི་ཞིམ་མདོག་བཟང་མེ་ཏོག་གིས། །ཡི་དམ་ལྷ་ནི་མཉེས་པར་བྱ། །གསང་སར་བཟླས་པ་ཚིག་བརྗོད་བྱུང་། །རོ་མ་རྐྱང་མ་དང་བཅས་པའི། །ཕྱག་རྒྱ་རི་རབ་རྣམ་འཇིག་པ། །ཡོངས་སུ་གྲགས་པར་ཤེས་པར་བྱ། །རྣལ་འབྱོར་གོས་དང་རྣལ་འབྱོར་དབྱུག །
རྣལ་འབྱོར་བསྒོམས་ཐབས་ཁོ་ན་ཉིད། །སྔོན་དུ་བཤད་གཟུགས་བླ་མ་ཡིས། །ཡང་དག་ཏིང་འཛིན་གནས་པས་དབུལ། །མར་ངོར་དྲི་ཞིམ་རྫས་རྣམས་ནི། །མར་བཅས་ཨ་ཀ་རུ་བསྲེག་བྱ། །ཏིལ་རྣམས་དང་ནི་གྲུབ་པའི་རྫས། །ཐམས་ཅད་དག་པ་ཐམས་ཅད་སྦྱོར། །པ་ལ་ཤ་དང་
ཨརྐ་དང་། །ཀསྨི་ར་དང་པ་ཏྲ་དང་། །ཨུ་དུམྺཱ་ར་ཁ་དི་ར། །པ་ལཀྵ་དང་ཨ་ཤྭདྠ། །ཀ་པེད་དཱུར་བ་ཥ་ན་རྣམས། །སྟོན་ཟླ་ཐ་ཆུངས་ལ་སོགས་སུ། །ཡམ་ཤིང་འདི་རྣམས་རིམ་པས་བསྲེག །ཡང་ན་ཇི་ལྟར་རྙེད་པས་སུ། །གྲུབ་པའི་རྫས་དང་བཅས་པ་ཡི། །ཐམས་ཅད་ཀུན་ལ་
བསྲེག་པར་བྱ། །དངོས་གྲུབ་ཡིད་དུ་འོང་འདོད་པས། །སྐྱེས་པའམ་ནི་བུད་མེད་ཀྱིས། །དཔའ་བོའི་ཕྱེ་མ་དང་བཅས་པའི། །འཁར་བའི་སྣོད་དུ་སྦྱིན་པར་བྱ། །རྣལ་འབྱོར་དངོས་གྲུབ་བསྒྲུབ་པ་དང་། །བདུད་འདུལ་ཕྱིར་ནི་སོ་རྩིས་དབུལ། །བུ་འདོད་ཕྱིར་ནི་དགའ་བ་ཡིས། །ཆང་ནི་སྦྲང་རྩི་
འདྲེས་པ་འབུལ། །གང་དང་གང་དུ་ཁྱད་པར་འདོད། །ཁྱད་པར་འཕགས་པ་གང་ཡིན་པ། །མི་ཟད་འབྲས་བུ་འདོད་པ་ཡི། །དེ་དེར་ཚེས་བཅུར་དབུལ་བར་བྱ། །དེར་ནི་གསང་བའི་སྦྱིན་པ་ནི། །སྦྱིན་པ་ཀུན་གྱི་མཆོག་གི་མཆོག །སེམས་ཀྱི་རྣམ་རྟོག་ལས་བྱུང་བ། །དགའ་མཛད་རྣམ་པ་ཇི་སྙེད་
པ། །སྒྲུབ་པ་པོས་ནི་མྱོང་གྱུར་པ། །དེ་དག་དངོས་གྲུབ་ས་བོན་འགྱུར། །དེ་ཕྱིར་གསང་བའི་སྦྱིན་པ་ནི། །དོན་ཀུན་སྒྲུབ་བྱེད་ཁྱད་པར་འགྱུར། །ཟླ་མཚན་མྱོང་བ་དངོས་གྲུབ་ལ། །མ་རྒྱས་པ་ཡི་རྣལ་འབྱོར་ལ། །དར་མས་སྡིག་པ་ཟད་བྱེད་མ། །སངས་རྒྱས་ཆོས་རྣམས་འཕེལ་འགྱུར་མ། །

གང་ལ་གང་དག་འདོད་འགྱུར་མ། །དེ་ལ་དེ་ལྟར་སྦྱིན་པར་བྱ། །གང་གིས་ཟླ་མཚན་བྱུང་བ་ཡི། །སྐྱེ་བ་གང་དུ་སྦྱིན་བྱས་པ། །འདས་པའི་སྐྱེ་བ་བཅུ་ཐམ་པ། །ཁྱབ་བདག་དེས་ནི་སངས་རྒྱས་འགྱུར། །སྐྱེ་བ་དགུ་ལ་ལཱུ་ཡི་པ། །བི་རཱུ་པ་ཡང་དགུ་ལས་བྱུང་། །སྐྱེ་བ་ལྔ་ལ་ཤ་བ་རི། །སྐྱེ་བ་
དྲུག་ལ་དཱ་རི་ཀའོ། །མང་པོས་ཅི་བྱ་ཐམས་ཅད་ནི། །གྲུབ་ཐོབ་རྣམས་ནི་ཐོབ་པར་འགྱུར། །མར་ངོའི་ཚེས་བཅུར་ཟླ་མཚན་ཅན། །སྦྱིན་པར་རབ་ཏུ་ནུས་པ་ནི། །གྲུབ་ཐོབ་གྲུབ་མཐའི་ཕྲེང་བ་རུ། །གཏམ་ནི་རྒྱས་པར་བརྗོད་པ་ཡིན། །ཁྭ་དའི་སྐད་ནི་མི་གྲག་པར། །ཚེས་བཅུར་སྒྲོལ་
མའི་ཡི་གེ་བཅུ། །བྱ་རོག་མ་ཡིན་ཕྱག་རྒྱར་གནས། །ཏིང་ངེ་འཛིན་གྱིས་སྔགས་བཟླས་པས། །འཆི་བའམ་བར་ཆད་ཉིད་གྱུར་ཀྱང་། །རྒྱལ་བར་འགྱུར་བར་ཐེ་ཚོམ་མེད། །དེ་ཉིད་ཁོ་ནའི་དུས་ཚོད་དུ། །ཡི་གེ་གསུམ་པ་སྔགས་བརྗོད་ཅིང་། །ཆུ་ནི་སྙིམ་པ་བརྒྱ་ཕུལ་ན། །ལོ་གཅིག་ནང་
དུ་ནོར་རྙེད་གྱུར། །ཡིད་དུ་འོང་བར་འདོད་བྱེད་པའི། །མཁའ་འགྲོ་མ་ལ་ཕག་མོས་འདྲེན། །འདིར་ནི་མང་སྨྲ་ཅི་ཞིག་བྱ། །དེ་ཚེ་ཐམས་ཅད་འགྲུབ་པར་འགྱུར། །དངོས་གྲུབ་རྟོག་མའི་ཕག་མོ་ཡི། །ཆོ་གས་ནན་དཱི་ནི་དང་བཅས། །མཚན་མོར་ཏིལ་གྱི་སྦྱིན་སྲེག་གིས། །དངོས་གྲུབ་མཆོག་ནི་རྙེད་
པར་འགྱུར། །གྲུབ་ཐོབ་གྲུབ་མཐའི་མཁའ་འགྲོ་མའི། །སྦྱིན་སྲེག་ཆོ་གས་དེ་ཚེ་རུ། །སྦྱིན་སྲེག་བྱེད་པ་སྐྱེ་བོ་དཀྲུགས། །ལ་སོགས་དངོས་གྲུབ་ཐོབ་པར་འགྱུར། །བསམ་གཏན་སྦྱིན་པ་བྱ་སྦྱིན་སྲེག །མཆོད་པས་འཁོར་ལོ་ཚིམ་པར་བྱེད། །གཞན་ལ་ཚེས་བཅུར་སྟོང་འགྱུར་བའི། །འབྲས་
བུ་ཡང་དག་སྐྱེ་བར་འགྱུར། །གུར་ཀུམ་དང་ནི་སིནྡྷུ་ར། །ཀའུ་སུམ་པ་གོས་བཟངས་མདོག །ཟླ་མཚན་བྱུང་བའི་སྦྱིན་པ་དག །ཚེས་བཅུར་ཁྱད་པར་འཕགས་པར་འགྱུར། །བླ་གབ་མེད་པའི་ས་ཕྱོགས་སུ། །མཁས་པས་བྱ་རོག་གཏོར་མ་འབུལ། །ཕྱིར་སོང་ཉི་མའི་གུང་དག་ལ། །ཀུ་ཀུ་ར་ལ་
གཏོར་མ་སྦྱིན། །ཉི་མ་ནུབ་པར་འབྱུང་པོ་རྣམས། །དགའ་བའི་ཆེད་དུ་གཏོར་མ་དབུལ། །མཚན་མོར་གཏོར་མ་བྱིན་ནས་སུ། །སྤྱང་ཀུའི་ཚོགས་རྣམས་དགའ་བར་བྱ། །ཚེས་བཅུར་ཁྱད་པར་གཏོར་མ་འདིས། །དངོས་གྲུབ་ཆེན་པོ་འབྱུང་བར་འགྱུར། །སྟོང་ཕྲག་ཉི་ཤུ་རྩ་བཞི་ལས། །སྙིང་པོའི་

དོན་ནི་བཀུག་ནས་སུ། །ཚེས་བཅུའི་རྟོག་པ་འདི་ཡིན་ཏེ། །སྙིང་རྗེ་ཅན་གྱི་མཁས་པས་བྱ། །མ་ཐུལ་བ་ཡི་སློབ་མ་རྣམས། །ནོར་བདག་ཡིན་ཀྱང་སྦྱིན་མི་བྱ། །གྲུབ་ཐོབ་བརྒྱུད་པར་གནས་པ་ཡིས། །དབང་པོ་དུལ་བ་རྣམས་ལ་སྦྱིན། །དེ་མ་ཡིན་ན་གྲུབ་ཐོབ་བརྒྱུད། །སྣོད་
དང་བྱང་ཆུབ་ཉམས་པར་འགྱུར། །དངོས་གྲུབ་རྒྱ་མཚོ་ཁྱད་པར་དུ། །མཆོད་པ་སྦྱིན་སྲེག་ཆོ་ག་ནི། །གཞུང་དེ་བདག་གིས་རྒྱས་པར་བཤད། །དེ་ཕྱིར་མཁས་པས་ཉམས་སུ་ལོང་། །སེམས་ཅན་ཕན་འདོད་བདག་གིས་ནི། །བྱས་པའི་བསོད་ནམས་གང་ཐོབ་དེས། །རྟག་ཏུ་ཉོན་མོངས་བྲལ་བ་ཡི། །
སེམས་ཅན་ཚོགས་རྣམས་ཡིན་པར་གྱུར། །དཔལ་རྡོ་རྗེ་རྣལ་འབྱོར་མའི་འགྲེལ་པ་ཚེས་བཅུའི་མཆོད་པའི་རྟོག་པ། གྲུབ་ཐོབ་ཆེན་པོ་དཱ་རི་ཀ་པས་མཛད་པ་རྫོགས་སོ།། །།རྒྱ་གར་ཤར་ཕྱོགས་ཛ་ག་ཏ་ལའི་པཎྜི་ཏ་དཔལ་མཁས་པ་ཆེན་པོ་དཱ་ན་ཤཱི་ལས་བོད་ཡུལ་གྱི་དབུས་དྲང་སྲོང་སྲིན་པོ་རིར་
ལྷའི་སྐད་ལས་བོད་ཀྱི་སྐད་དུ་འཁྲུལ་བ་མེད་པ་རང་འགྱུར་དུ་མཛད་པ་རྫོགས་སོ།། །།དེ་ནས་བྱ་རོག་ལ་སོགས་པའི་གཏོར་མའི་སྔགས་བྲི་བ་ནི། ཨོཾ་ཀླཾ་ཀླཾ་ཀླཾ། དྷརྨྨ་ཏཱ། ཨཱ་ཀཱ། ཤཱ་ཙཱ་རི་ཎཿསིདྡྷི། བཱ་ཡ་ས་ནཿཀཾ་བཱ་ཡ། ཤཾ་པ་ལ། སིདྡྷ། ཀཱ་ཀ་སན། ཏ་ན། པྲ་སུ་ཏ། ཀཱ་ཀ །བ་ལིཾ་
གྲྀཧྞ་ཏ། ཀླཾ་ཀླཾ་ཀླཾ། སྭཱ་ཧཱ།། །།ཨོཾ་ཤླཾ་ཤླཾ་ཤླཾ། ཨ་པྲ་ཏིཥྛ། ཙ་ལཱ། ཙཱི་རི་ཎཱཿཤྱ་མ། ཤ་བ་ལ། སིངྡྷི་ཤུ་ན་ཀཱ། སཾ་ཏཱ། ན་ཛཱ། ཤུ་ན་ཀཱ། བ་ལིཾ། གྲྀཧྞནྟུ། གྲྀཧྞནྟུ། ཤླཾ་ཤླཾ་ཤླཾ་སྭཱ་ཧཱ།། །།ཨོཾ་བྷྲིཾ་བྷྲིཾ། ཤཱུ་ནྱ་ཏཱ། ད་ཤཱ་ཤཱ་ཤཱ་ཙཱ་རི་ཎ། ནི་སཾ་བྷ་ལཱ། བྷཾ་བྷ་ལཱ། སིདྡྷ་བྷཱུ་ཏ།
གོ་ཏ། ཛ་ནི། བྷཱུ་ཏ་ནི། བ་ལཱིཾ། གྲྀཧྞ་ཏུ། གྲྀཧྞ་ཏུ། བྷྲིཾ་བྷྲིཾ་བྷྲིཾ་བྷྲཱུཾ་སྭཱ་ཧཱ།། །།ཨོཾ་ཨོཾ་ཨོཾ་ཧྲོཾ་ཧྲོཾ་ཧྲོཾ་ཕེཊ་ཀཱ་ར། ཕེཊ་ཀ་རི་ཎཿཀུ་ལ་ཕྲ། སུ་ཏཱ། སི་བཱ། ཧི་ལི་ཧི་ལི། བ་ལིཾ། གྲྀཧྞནྟུ། སརྦ་སིདྡྷིཾ་ད་དནྟུ། ད་དནྟུ། ཧྲོཾ་ཧྲོཾ་ཧྲོཾ་སྭཱ་ཧཱ།། །།ཚེས་བཅུར་མེ་ཏོག་རྣམས་ཀྱིས་ནི། །རྡོ་རྗེ་
མཁའ་འགྲོ་མ་ལ་མཆོད། །དར་གྱི་ལག་གདུབ་སྦྱིན་པར་བྱ། །གྲུབ་པའི་རྫས་ཆེན་མར་དང་བཅས། །ཏིལ་ནས་ཀྱིས་ནི་གསང་ས་རུ། །སྦྱིན་སྲེག་བཟླས་པ་དོ་ཤལ་སྦྱིན། །མཁའ་སྡིགས་བྱེད་པའི་ཕྱག་རྒྱ་དང་། །ཕྱག་རྒྱ་ཆེན་པོ་དང་བཅས་པའི། །རི་ཁྲོད་དབང་ཕྱུག་སྙིང་པོས་བསྡུས། །

པཎྜི་ཏ་ཀླུའི་སྦྱིན་པའི་རྣལ་འབྱོར་གྱིས་སྙིང་པོའི་དོན་བསྡུས་པ་བསྟན་པའོ། །གྲུབ་པ་ཐོབ་པའི་གནས་དྲང་སྲོང་སྲིན་པོ་རིར་རྒྱ་གར་ཤར་ཕྱོགས་ཀྱི་པཎྜི་ཏ་ཆེན་པོ་དཱ་ན་ཤཱི་ལས་ལྷའི་སྐད་ལས་བོད་ཀྱི་སྐད་དུ་རང་འགྱུར་དུ་མཛད་པའོ།། ༄༅༅། །རྒྱ་གར་སྐད་དུ། བཛྲ་ཡོ་
གི་ནཱི་པཱུ་ཛ་བི་དྷི། བོད་སྐད་དུ། རྡོ་རྗེ་རྣལ་འབྱོར་མའི་མཆོད་པའི་ཆོ་ག །དཔལ་རྡོ་རྗེ་རྣལ་འབྱོར་མ་ལ་ཕྱག་འཚལ་ལོ། །དེ་ནས་མན་ངག་ལས་བྱུང་བའི་མཆོད་པའི་ཆོ་ག་བརྗོད་པར་བྱ་སྟེ། ཨོཾ་ཨཱཿརཀྵ་རཀྵ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པས་ས་སྦྱང་ངོ་། །གནས་དང་ཉེ་བའི་གནས་དང་། ཞིང་དང་ཉེ་
བའི་ཞིང་དང་། ཚོགས་པ་དང་ཉེ་བའི་ཚོགས་པ་དང་། འདུ་བ་དང་ཉེ་བའི་འདུ་བ་ཅན་དང་། པཱ་ལ་བ་དང་། ཨུ་པི་པཱ་ལ་བ་དང་། དུར་ཁྲོད་དང་ཉེ་བའི་དུར་ཁྲོད་དང་ཞེས་བརྗོད་ཅིང་། མཎྜལ་ཉེ་བར་བྱུགས་ལ། དེའི་དབུས་སུ་རྩིབས་དྲུག་པའི་ཆོས་འབྱུང་སྟེ། དེའི་དབུས་སུ་ཡི་གེ་བཾ་དང་ལྡན་པ་
བྲིའོ། །ཨོཾ་སརྦ་བུདྡྷ་ཌཱ་ཀི་ནཱི་ཡེ། བཛྲ་པུཥྤེ་ཨཱཿཧཱུཾ་ཕཊ་སྭཱ་ཧཱ། ཨོཾ་བཛྲ་ཝརྞྞ་ནཱི་ཡེ། བཛྲ་པུཥྤེ་ཨཱཿཧཱུཾ་ཕཊ་སྭཱ་ཧཱ། ཨོཾ་བཛྲ་བཻ་རོ་ཙ་ནཱི་ཡེ། ཨོཾ་བཛྲ་པུཥྤེ་ཨཱཿཧཱུཾ་ཕཊ་སྭཱ་ཧཱ། ཨོཾ་ཨཾ་ཨཱཾ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་ཨིཾ་ཨཱིཾ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་ཨུཾ་ཨཱུཾ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་རྀཾ་ཪཱྀཾ་ཧཱུཾ་ཧཱུཾ་ཧཱུཾ་
ཕཊ་སྭཱ་ཧཱ། ཨོཾ་ལྀཾ་ལཱྀཾ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་ཨེཾ་ཨཻཾ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་ཨོཾ་ཨཽཾ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་ཨཾ་ཨཱཾ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། བཅོམ་ལྡན་འདས་མའི་རྐང་པ་བརྒྱད་པའི་སྔགས་འདིས་མཆོད་པར་བྱའོ། །ཨོཾ་བཾ་བཛྲ་བཱ་རཱ་ཧཱི། བཛྲ་པུཥྤེ་ཨཱཿཧཱུཾ་ཕཊ་སྭཱ་ཧཱ། ཨོཾ་ཧཾ་ཡོཾ། ཡ་མི་ནཱི་
བཛྲ་པུཥྤེ་ཨཱཿཧཱུཾ་ཕཊ་སྭཱ་ཧཱ། ཨོཾ་ཧྲིཾ་མོཾ་ཧཱ་ནཱི། བཛྲ་པུཥྤེ་ཨཱཿཧཱུཾ་ཕཊ་སྭཱ་ཧཱ། ཨོཾ་ཧྲེཾ་ཧྲིཾ། པཉྫ་ལཱི་ནཱི། བཛྲ་པུཥྤེ་ཨཱཿཧཱུཾ་ཕཊ་སྭཱ་ཧཱ། ཨོཾ་ཧཱུཾ་ཧཱུཾ་སནྟྲཱ་ས་ནཱི། བཛྲ་པུཥྤེ་ཨཱཿཧཱུཾ་ཕཊ་སྭཱ་ཧཱ། ཨོཾ་ཕཊ་ཕཊ། ཙཎྜི་ཀཱ། བཛྲ་པུཥྤེ་ཨཱཿཧཱུཾ་ཕཊ་སྭཱ་ཧཱ། རྣལ་འབྱོར་མ་དྲུག་གི་སྔགས་ཏེ་འདིས་གཡོན་སྐོར་གྱིས་
མཆོད་པར་བྱའོ། །ཡང་ཨོཾ་ཨོ་ཌི་ཡ་ན། བཛྲ་པུཥྤེ་ཨཱཿཧཱུཾ་ཕཊ་སྭཱ་ཧཱ། ཨོཾ་པཱུརྞ་གི་རི། བཛྲ་པུཥྤེ་ཨཱཿཧཱུཾ་ཕཊ་སྭཱ་ཧཱ། ཨོཾ་ཀཱ་མ་རཱུ་པ། བཛྲ་པུཥྤེ་ཨཱཿཧཱུཾ་ཕཊ་སྭཱ་ཧཱ། ཨོཾ་ཤྲཱི་ཧཱཊྚ་བཛྲ་པུཥྤེ་ཨཱཿཧཱུཾ་ཕཊ་སྭཱ་ཧཱ། ཞེས་པས་ཤར་ལ་སོགས་པ་དང་། དེའི་རྗེས་སུ་དབང་ལྡན་ལ་སོགས་པའི་མཚམས་

སུ་ནི། ཨོཾ་དྷརྨྨ་ཀཱ་ཡ། བཛྲ་པུཥྤེ་ཨཱཿཧཱུཾ་ཕཊ་སྭཱ་ཧཱ། ཨོཾ་སཾ་བྷོ་ག་ཀཱ་ཡ་བཛྲ་པུཥྤེ་ཨཱཿཧཱུཾ་ཕཊ་སྭཱ་ཧཱ། ཨོཾ་ནིརྨྨ་ཎ་ཀཱ་ཡ་བཛྲ་པུཥྤེ་ཨཱཿཧཱུཾ་ཕཊ་སྭཱ་ཧཱ། ཨོཾ་བཛྲ་མ་ཧཱ་སུ་ཁཱ་ཀཱ་ཡ། བཛྲ་པུཥྤེ་ཨཱཿཧཱུཾ་ཕཊ་སྭཱ་ཧཱ། ཨོཾ་བཛྲ་ཌཱ་ཀི་ནཱི་ཡེ་བཛྲ་པུཥྤེ་ཨཱཿཧཱུཾ་ཕཊ་སྭཱ་ཧཱ། ཨོཾ་ལཱ་མེ། བཛྲ་
པུཥྤེ་ཨཱཿཧཱུཾ་ཕཊ་སྭཱ་ཧཱ། ཨོཾ་ཁཎྜ་རོ་ཧེ་བཛྲ་པུཥྤེ་ཨཱཿཧཱུཾ་ཕཊ་སྭཱ་ཧཱ། ཨོཾ་རཱུ་པི་ཎི་ཡེ་ཨོཾ་བཛྲ་པུཥྤེ་ཨཱཿཧཱུཾ་ཕཊ་སྭཱ་ཧཱ། ལོགས་བཞིའི་དགའ་བ་འཁྱིལ་བ་ལ་མཆོད་པ་ནི། ཨོཾ་ནན་དྱཱ་བརྡྷ། བཛྲ་པུཥྤེ་ཨཱཿཧཱུཾ་ཕཊ་སྭཱ་ཧཱ། ཞེས་པའོ། །ཨོཾ་ཨཾ་ཨཱཾ། ཨིཾ་ཨཱིཾ། ཨུཾ་ཨཱུཾ། རྀཾ་རཱྀ། ལྀཾ་ལྀཾ། ཨེཾ་ཨཻཾ།
ཨོཾ་ཨཽཾ། ཨཾ་ཨཱཾ་ཕཊ་སྭཱ་ཧཱ། ཞེས་པ་ནི་བཅོམ་ལྡན་འདས་མའི་ཕྲེང་བའི་སྔགས་སོ། །གཏོར་མའི་ཆོ་ག་ནི་མདུན་དུ་གཏོར་མའི་སྣོད་ཟན་ལ་སོགས་པས་ཡོངས་སུ་གང་བ་བདུད་རྩིའི་ཆོ་གས་ཡོངས་སུ་སྦྱང་བ་བྱས་ནས། དེའི་རྗེས་སུ། ཨོཾ་ཨ་རལླི་ཧོ། ཛཿཧཱུཾ་བཾ་ཧོཿས་མ་ཡ། མ་ནུ་པཱ་ལ་ཡ། དྲྀ་ཤྱ་ཧོ། །
ཨོཾ་ཁ་ཁ་ཁཱ་ཧི་ཁཱ་ཧི། སརྦྦ་ཡཀྵ། རཱཀྵ་ས། སརྦྦ་བྷཱུ་ཏ་པྲེ་ཏ། པི་ཤཱ་ཙ་སྨ་ར་ཨ་པ་སྨ་ར་ཌཱ་ཀ །ཌཱ་ཀི་ནྱ་ད་ཡ། ཨི་མིཾ། བཾ་ལིཾ། གྲྀཧྞནྟུ། ས་མ་ཡཾ། རཀྵནྟུ། མ་མ་སརྦྦ་སིདྡྷིཾ་མྨེ། པྲ་ཡཙྪནྟུ། ཡ་ཐཻ་བཾ། ཡ་ཐཻཥྚཾ། བྷུཉྫ་ཐ། པི་པ་ཐ། ཛི་གྷྲ་ཐ། མ་ཏི་ཀྲ་མ་ཐ། མ་མ། སརྦྦ་
ཀཱརྟ་ཡ། སཏྶུ་ཁ། བི་བྲྀདྡྷ་ཡེ། ས་ཧ་ཡི་ཀཱ་བྷ་བནྟུ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པ་ནི་གཏོར་མའི་ཆོ་ག་གཅིག་གོ། །ཡང་ན་ལྷ་མོའི་སྔགས་ཉིད་ཀྱིས་ལྷ་ལ་དབུལ་ལོ། །ཕག་ཞལ་མའི་ཕྱིའི་མཆོད་པའི་གཏོར་མའི་ཆོ་གའོ།། །།དང་པོ་རང་གི་མདུན་དུ་གང་ཡང་རུང་བ་སྣང་བ་དེ་བཅོམ་
ལྡན་འདས་མའི་གཟུགས་སུ་ལྷག་པར་མོས་ཏེ་དེ་ཉིད་རང་ལ་བསྟིམ་པར་བྱའོ། །གཉིས་པ་ནི་བདག་ཉིད་བཅོམ་ལྡན་འདས་མའི་གཟུགས་སུ་བསྒོམ་ཞིང་བརྟན་གཡོའི་བདག་ཉིད་སྣ་ཚོགས་པའི་རྣམ་པ་བཅོམ་ལྡན་འདས་མའི་གཟུགས་སུ་བསྒོམ་པའོ། །གསུམ་པ་ནི་དེ་རྣམས་བདག་ལ་ཐིམ་པར་
བསམས་ནས་འཁོར་འདས་དབྱེར་མེད་པར་བསྒོམ་པར་བྱའོ། །བཞི་པ་ནི་བཅོམ་ལྡན་འདས་མའི་རྣལ་འབྱོར་དུ་དམིགས་ཤིང་སྲིན་པོའི་ཞལ་བསྡམས་ཏེ། ལྟེ་བར་པདྨ་དམར་པོ་འདབ་མ་བཞི་པ་དེ་ལ་ལྔ་པ་ལྔའི་གསུམ་པའི་ནཱ་ད་ལས་ཕྱིར་འབྱུང་བའི་རླུང་གི་ཉི་མ་ལྟ་བུའི་སྐུད་པའི་རྣམ་པས་ཕྱིར་

བྱུང་ནས་ནང་དུ་རྒྱུ་བའི་རླུང་གི་ནཱ་ད་དེ་ཁོ་ན་ལ་ཐིམ་པ་སྟེ་དེ་ཉིད་ཕྱག་རྒྱའོ།། །།ལྔ་པ་ནི་རྐང་པ་གཉིས་ཀྱི་བར་དུ་བྱུང་བའི་རླུང་གི་དཀྱིལ་འཁོར་དང་། ལྟེ་བའི་འོག་ཏུ་ཡི་གེ་རཾ་ལས་མེའི་དཀྱིལ་འཁོར་དང་། དེའི་སྟེང་དུ་ལྟེ་བ་ལ་པདྨ་དམར་པོ་འདབ་མ་བཞི་པ་དེ་ལ་ལྔ་པ་ལྔའི་གསུམ་པའི་ནཱ་ད་ལས་ཕྱིར་
འཕྲོ་བའི་འོད་ཟེར་གྱིས་བཅོམ་ལྡན་འདས་མའི་སྐུ་ལུས་ཐམས་ཅད་འོད་ཟེར་གྱི་རང་བཞིན་དུ་བསྒོམ་པར་བྱའོ། །དྲུག་པ་ལ་འོད་ཟེར་དང་བཅས་པའི་སྐུ་ལུས་དེ་ཉིད་དུ། ཇི་ལྟར་དབུགས་རླུང་མེ་ལོང་ལ། །ཀུན་དུ་ཐིམ་པར་འགྱུར་བ་ཉིད། །དེ་བཞིན་རྣལ་འབྱོར་ཡང་དག་མཐར། །ཡང་དང་
ཡང་དུ་རབ་ཏུ་ཐིམ། །ཞེས་པའི་རིམ་པ་འདིས་ཐམས་ཅད་སྟོང་པ་ཉིད་དུ་བསྒོམ་པར་བྱའོ། །སྟོང་པའི་རང་བཞིན་དེ་ལས་ལྔ་པ་ལྔའི་གསུམ་པ་ཉི་མ་ལྟ་བུ་དེའི་སྟེང་དུ་མགོ་ཐུར་དུ་འཕྱང་བའི་ཥི་ཌ་གང་བའི་བྱང་ཆུབ་ཀྱི་སེམས་ཀྱི་རང་བཞིན་ལྔ་པ་ལྔའི་གསུམ་པའི་འོད་ཟེར་གྱིས་བཞུ་ནས་སྔར་བཤད་
པའི་ནཱ་ད་དེ་ཉིད་ལ་རབ་ཏུ་ཐིམ་སྟེ། དེ་ནས་ལྔ་པ་ལྔའི་གསུམ་པའི་ནཱ་ད་དེས་ཟུང་འཇུག་གི་གཟུགས་ཅན་བཅོམ་ལྡན་འདས་མ་བསྒོམ་པར་བྱའོ། །ཁྱད་པར་དུ་སྲིན་པོའི་ཞལ་བསྡམས་ནས། ཕྲེང་བ་གསུམ་མམ་བདུན་རྣམ་པར་བསྒོམས་ལ་ལྟེ་བར་ལྔ་པ་ལྔའི་གསུམ་པའི་ནཱ་དའི་འོད་ཟེར་གྱིས་ཥི་ཌ་
གང་བཞུ་བ་གཉི་གས་བདེ་བ་ཆེན་པོ་གཅིག་ཏུ་གྱུར་ཏེ། ཆོས་འབྱུང་ནས་འཐོན་ནས། སྲིན་པོའི་ཞལ་བསྡམས་པའི་འོད་ཟེར་གྱིས་འཁོར་ལོ་ལྟ་བུར་འཁོར་བའོ། །ཁྱད་པར་གཉིས་པ་ནི་སྲིན་པོའི་ཞལ་བསྡམས་པའི་འོད་ཟེར་གྱིས་ལྕེའི་མདུན་དུ་གཡུང་དྲུང་དམར་པོ་འཁོར་ཞིང་རྣ་བ་གཡོན་པའི་ལ་ལ་
ནཱའི་འོག་སྒོ་ནས་ཆོས་འབྱུང་དུ་སོང་སྟེ། ཕྲེང་བ་གསུམ་མམ་བདུན་གྱིས་གཡོན་སྐོར་འཁོར་ལོ་ལྟ་བུར་འཁོར་བའོ། །གྲུབ་པ་ཐོབ་པ་རྣམས་ཀྱི་མན་ངག་ལས་བྱུང་བ། དཔལ་རྡོ་རྗེ་རྣལ་འབྱོར་མའི་མན་ངག་སློབ་དཔོན་ཆེན་པོ་དཱ་རི་ཀ་པས་མཛད་པ་རྫོགས་སོ།། །།རྒྱ་གར་ཤར་ཕྱོགས་ཛ་
ག་ཏ་ལའི་པཎྜི་ཏ་ཆེན་པོ་དཱ་ན་ཤཱི་ལས་བོད་ཡུལ་དབུས་ཀྱི་དྲང་སྲོང་སྲིན་པོ་རིར་རང་འགྱུར་དུ་མཛད་པའོ།། ༄༅༅། །རྒྱ་གར་སྐད་དུ། ཀཾ་ཀ་ལ་ཏཱ་ར་ན་སཱ་དྷ་ནཾ། བོད་སྐད་དུ། ཀེང་རུས་ཏཱ་ར་ནའི་སྒྲུབ་ཐབས། རྡོ་རྗེ་རྣལ་འབྱོར་མ་ལ་ཕྱག་འཚལ་ལོ། །རྡོ་རྗེའི་

ཁྲུས་ནི་བྱས་ནས་ནི། །ལག་པས་ལུས་ལ་ལྷ་རྣམས་དགོད། །གནས་དང་རྣལ་འབྱོར་བདག་བསྲུང་བྱ། །རྩེ་གཅིག་གི་ནི་སེམས་ཀྱིས་བསྒྲུབ། །འཁོར་ལོ་འདི་ནི་ནམ་མཁའ་འདྲ། །བདེ་བ་ཆེན་པོས་རབ་ཏུ་གང་། །ཐུབ་པ་གོ་མཚམས་མེད་པར་བཞུགས། །བདེ་བ་
བདག་གིས་བརྗོད་མི་ནུས། །དེ་དག་ན་ཡི་དོན་ཡིན་ནོ། །ནམ་མཁའ་གཉིས་ནི་ཁ་སྦྱོར་ལས། །འཁོར་ལོ་དྲུག་པོ་འོད་ཟེར་རྫོགས། །འགྲོ་དྲུག་རྒྱུ་ནི་མེད་པར་བྱེད། །དེ་ནི་ཡེ་ཤེས་ཆེན་པོ་གནས། །དེ་ཉིད་མ་ཡི་དོན་དུ་བཤད། །ཤྲཱི་ཡིས་འཁོར་ལོ་སྐྱེད་པར་བྱེད། །འདབ་མ་གསུམ་ལྡན་
སྐུད་པ་ཅན། །དེ་ཉིད་གསུམ་གྱི་རང་བཞིན་ལྡན། །གསུམ་གྱི་ལམ་དུ་བཤད་པ་ཡིན། །ཤྲཱི་ཡི་དོན་དུ་ཤེས་པར་བྱ། །བ་ལས་སྐྱེས་པ་རྒྱལ་མཚན་ཏེ། །དེ་ཉིད་ཕྱག་རྒྱ་བཞི་ཡིས་བརྒྱན། །བསམ་གཏན་བཞི་དང་ལྡན་པའི་མཆོག །རྣམ་ཐར་བཞི་ཡང་དེ་ལས་གྲུབ། །བ་ཡི་དོན་དུ་ཤེས་
པར་གྱིས། །ཛ་ལས་བཀྲ་ཤིས་འབྱུང་བ་ཡིས། །ཤིན་ཏུ་མྱུར་བར་འཁོར་བ་ལས། །དགའ་བ་མཆོག་དགའི་རང་བཞིན་ཅན། །ལྷན་ཅིག་སྐྱེས་པ་སྟེར་བར་བྱེད། །ཛ་ཡི་རང་བཞིན་དེས་ཤེས་བྱོས། །ཛོ་ལས་བྱུང་བའི་དོན་མཆོག་ནི། །སྙོམས་འཇུག་རྫོགས་པའི་ངོ་བོར་འདོད། །གཉིས་
མེད་ཡེ་ཤེས་མཐོང་བར་བྱེད། །ཕྱག་རྒྱ་ཆེན་པོ་སྟེར་མཛད་པ། །ཛོ་ཡི་ངོ་བོ་དེ་ལྟ་བུ། །གཞན་ཡང་གི་ལས་བྱུང་བ་ནི། །ཉི་མའི་གཟུགས་དང་ཟླ་བ་ཡི། །དེ་ནི་གར་ཡང་གནས་པ་མེད། །ཆོས་ཀྱི་སྐུ་ཡི་གནས་ཀྱང་སྟེར། །གི་ཡི་དོན་དུ་ཤེས་པར་གྱིས། །ནི་ལས་བྱུང་བའི་རང་བཞིན་
ནི། །བླ་མ་དམ་པའི་མན་ངག་གིས། །བརྟན་གཡོ་ཐམས་ཅད་སྟོང་པར་ཤེས། །དེ་ཡིས་སངས་རྒྱས་མྱུར་དུ་ཐོབ། །ནི་ཡི་རང་བཞིན་བཤད་པའོ། །ཡི་གེ་དེ་བརྒྱད་དཀྱིལ་འཁོར་ནི། །དངོས་གྲུབ་འདོད་པས་བྲི་བར་བྱ། །བདུད་རྩི་ལྔའམ་ཆང་ཡང་རུང་། །ཡུང་འབྲས་ཡང་ན་འོ་མས་བྱས། །
སྟོབས་ལྡན་བཙོས་པའི་ཁུ་བའམ། །དྲི་ཞིམ་རྣམས་ཀྱི་ཆུ་ཡང་རུང་། །ཁུ་བའི་རྣམ་པ་ཅི་ཡོད་པས། །གདམས་པས་གཟབས་ཏེ་བྲི་བར་བྱ། །དེ་དག་གིས་ནི་གུག་པོ་བྲི། །དེ་ལ་ཀེང་རུས་ཏཱ་ར་ན། །དམ་ཆོས་བདུད་རྩི་དེ་ཉིད་ཡིན། །སྒོ་ཡི་མན་ངག་དེ་ཉིད་ཡིན། །དེ་ཡི་དབུས་ན་

མཁའ་འགྲོའི་གཙོ། །ཡི་གེ་ནི་ལས་བྱུང་བ་ཡིན། །རྡོ་རྗེ་རྣལ་འབྱོར་མ་དང་བཅས། །དེ་ནི་མ་ལས་བྱུང་ཞེས་བརྗོད། །བདག་ཉིད་ཡིན་པར་རྟོགས་གྱིས་ལ། །ལྷན་སྐྱེས་ཡེ་ཤེས་བསྒྲུབ་པར་བྱ། །ཚོགས་གཉིས་བསགས་པས་ཡེ་ཤེས་སྐྱེ། །དེ་ཉིད་དེ་ཡི་ཐབས་སུ་བཤད། །རབ་དགའ་ལ་
སོགས་ས་བཅུ་པོ། །སངས་རྒྱས་རྣམས་ཀྱིས་ལམ་དུ་གསུངས། །སྙོམས་འཇུག་ཡོངས་སུ་རྫོགས་པ་ལས། །ཐིག་ལེ་གཉིས་པོ་འོད་ཟེར་འཕྲོ། །ཐིག་ལེ་ལ་ནི་ཐིག་ལེ་ཐིམ། །མཁས་པ་ཡིས་ནི་བསྒོམ་པར་བྱ། །འདི་རྣམས་བསྒོམ་པ་བྱས་པ་ཡིས། །མཚན་དང་དཔེ་བྱད་ཐོབ་པར་
འགྱུར། །འདི་ལས་སྐྱེས་པའི་རྣལ་འབྱོར་མ། །རྡོ་རྗེ་རྣལ་འབྱོར་མ་རུ་གྱུར། །ལྟེ་བའི་ནང་ལོགས་པདྨ་བལྟ། །ཉོན་མོངས་ཐམས་ཅད་བྱང་བར་བྱེད། །བ་ལས་སྐྱེས་པ་སྐུ་མདོག་གནག །སྙིང་གར་ཡ་མ་ནི་རུ་ཤེས། །ཛ་ལས་སྐྱེས་པའི་དཀར་མོ་ནི། །ངག་ལ་མོ་ཧ་ནི་རུ་བསམ། །ཡོ་ལས་
བྱུང་བའི་སེར་མོ་ནི། །སཉྫ་ལི་ཞེས་མགོ་ལ་གནས། །གི་ལས་སྐྱེས་པ་ཤིན་ཏུ་སྔོ། །སནྟྲ་ས་ནི་སྤྱི་གཙུག་གནས། །ནི་ལས་བྱུང་བའི་མི་བཟད་པ། །ཙཎྜི་སྣ་ཚོགས་ཀུན་ལ་ཁྱབ། །ཕྱག་འཚལ་ཡི་གེ་ཐམས་ཅད་ལས། །ལྷ་མཆོག་ཏུ་ནི་བྱིན་གྱིས་བརླབས། །བདེ་བ་ཆེན་པོ་ལས་སྐྱེས་པ། །
ཟབ་མོར་བྱུང་བའི་མན་ངག་གོ། །དེ་དོན་ཡང་ནི་བཤད་པར་བྱ། །བསྲུབས་པའི་སྦྱོར་བའི་ནང་དུ་ནི། །ན་ལས་འཁོར་ལོ་སྡོམ་པ་འབྱུང་། །མ་ལས་རྡོ་རྗེ་རྣལ་འབྱོར་མ། །པདྨར་ཡི་གེ་བྷ་ག་ལས། །བདེ་བ་ཆེན་པོ་ལས་སྐྱེས་པ། །དེ་ཉིད་རྣལ་འབྱོར་མ་རུ་ཤེས། །རྡོ་རྗེ་གཉིས་ཀྱི་བར་གནས་པའི། །
དམ་པ་དེ་ནི་ཤིན་ཏུ་བསྟན། །རྩ་བར་འཁོར་ལོ་ཡོད་པ་ལ། །རྩིབས་བརྒྱད་འོད་དང་བཅས་པའོ། །དཀར་པོ་ཕྱི་རོལ་འཁོར་ལོས་བསྐོར། །སྟོབས་དང་ལྡན་པ་ལ་སོགས་བརྒྱད། །གཡོན་ཕྱོགས་སུ་ནི་རབ་བསྐོར་ཞིང་། །དབུས་ན་ཡེ་ཤེས་རྒྱ་མཚོའོ། །འཁོར་ལོ་དམར་མོ་རྩིབས་བརྒྱད་པ། །
པདྨའི་ཕྲེང་བས་བསྐོར་བའོ། །འཇིགས་བྱེད་ལ་སོགས་བརྒྱད་པོ་ནི། །འཁོར་ལོ་རྩིབས་བརྒྱད་ལ་གནས་ཤིང་། །གཡས་ཕྱོགས་སུ་ནི་རབ་ཏུ་བསྐོར། །ཚོགས་ཀྱི་ཞལ་ནི་དབུས་གནས་པའོ། །རྡོ་རྗེ་རིན་ཆེན་འཁོར་ལོ་བསྡུས། །རྩིབས་བརྒྱད་འོད་དང་བཅས་པའོ། །རྡོ་རྗེ་ནག་པོའི་ཕྲེང་བས་

བསྐོར། །ཐོད་པའི་དུམ་བུ་ལ་སོགས་བརྒྱད། །དབུས་ན་སྙོམས་འཇུག་རང་བཞིན་བསྟན། །བསྐལ་པ་འཇིག་པའི་མེ་ལྟ་བུ། །སྐུད་ཅན་པདྨ་རྡོར་དྲིལ་དབུས། །མཁས་པ་ཡིས་ནི་བསྒོམ་པར་བྱ། །ཨོཾ་ཧ་སྐུད་པའི་དབུས་ནའོ། །ཟླ་བ་མེ་ཏོག་དཀར་པོ་འདྲ། །བཽ་ཥཊ་ཧེ་དང་
པོ་ལ། །ན་མཿཧི་ནག་པོ་གཡས་སྐུད་ལ། །སྭཱ་ཧཱ་དམར་པོ་རྒྱབ་ནའོ། །ཕཊ་ཕཊ་ཧཾ་ལྗང་གུ་གཡོན་ཕྱོགས་ནི། །ཧཱུཾ་ཧཱུཾ་ཧོ་སེར་པོ་སྟེང་ནའོ། །མེ་འབར་བ་ཡི་འོད་མངའ་བ། །སྔར་བཤད་པ་ཡི་འཁོར་ལོ་ནི། །ཀ་ཀོ་ལ་ཡི་བར་དུའོ། །རྒྱུན་མི་འཆད་པར་འཁོར་བར་ལྟ། །སྒོམ་
པ་འདི་ལྟར་བསྒོམ་པར་བྱ། །གཏོར་མ་དྲུག་ཅུ་རྩ་བཞི་སྦྱིན། །ཉོན་མོངས་རྣམས་ནི་བྱང་འགྱུར་ཞིང་། །ཕན་ཡོན་མཉམ་མེད་ཐོབ་པར་འགྱུར། །ཟབ་མོར་གྱུར་པའི་རིམ་པའོ། །ན་ལས་ནཱ་དའི་གཟུགས་ཀྱིས་སོ། །ཐབས་དང་རྩེ་བ་དྲི་མ་མེད། །དངོས་པོའི་རང་བཞིན་
དཔྱོད་པས་སྟོང་། །བདེ་བ་སྐྱེས་པ་སྦྱིན་པར་བྱེད། །མ་ནི་སྟོང་པའི་ངོ་བོ་ལ། །ཤེས་རབ་ངེས་པའི་རང་བཞིན་ཡིན། །བདེ་བ་ཆེན་པོས་རབ་ཏུ་གང་། །ཕྱག་རྒྱ་ཆེན་པོ་དེ་ཉིད་ཡིན། །གཉིས་པོ་གཅིག་ཏུ་འགྱུར་བ་ཡིན། །རྟོག་པ་མེད་ཅིང་དྲི་མ་བྲལ། །རང་བྱུང་ཡེ་ཤེས་
མཉམ་པ་མེད། །འཇིག་རྟེན་གསུམ་གྱི་གཙོ་བོ་ཡིན། །སེམས་ལས་སེམས་འབྱུང་བལྟ་བར་བྱ། །སེམས་ཀྱི་དབུས་སུ་བཞག་པ་ཡིན། །དེ་གཉིས་འདྲེས་པས་དང་པ་གཉིས། །མི་འབྱུང་བ་ནི་བརྟན་པ་ཡིན། །འདི་སྒྲུབ་རྡོ་རྗེ་ཏིང་འཛིན་གྱིས། །སྐད་ཅིག་གིས་ནི་བདེ་བ་རྒྱས། །
ལྷན་སྐྱེས་དྲི་མེད་ཐིག་ལེ་གཉིས། །དྲི་མེད་ལྡན་པས་དྲི་མེད་སྤྲོ། །སྐྱེ་བ་དང་ནི་འགག་པའི་གཟུགས། །དེ་གཉིས་རྟོགས་པས་དྲི་མ་བྲལ། །འཇིག་རྟེན་ཤེས་པ་མེ་ཏོག་དཀར། །འཇིག་རྟེན་བླ་མ་བདེ་ཆེན་གཟུགས། །མཆོག་ཏུ་ཟབ་པ་ཀེང་རུས་ཏཱ་ར་ནའི་རིམ་པ། །རྡོ་རྗེ་རྣལ་འབྱོར་
མའི་སྒྲུབ་ཐབས་བདག་བྱིན་གྱིས་བརླབས་པ་དཔལ་རྡོ་རྗེ་གདན་ན་བཞུགས་པ། ལྷ་འདྲེ་བྲན་དུ་འཁོལ་བའི་སློབ་དཔོན་ཆེན་པོ་དཱ་རི་ཀ་པས་མཛད་པ་རྫོགས་སོ།། ༄༅༅། །རྒྱ་གར་སྐད་དུ། ཀཾ་ཀ་ལ་ཏཱ་ར་ན་སཱ་དྷ་ནཾ་ཊཱི་ཀཱ་པ་ར་ཧི་ཏ་ནཱ་མ། བོད་སྐད་དུ།

ཀེང་རུས་ཏཱ་ར་ནའི་སྒྲུབ་ཐབས་ཀྱི་འགྲེལ་པ་གཞན་ལ་ཕན་པ་ཞེས་བྱ་བ། དཔལ་རྡོ་རྗེ་རྣལ་འབྱོར་མ་ལ་ཕྱག་འཚལ་ལོ། །བླ་མ་རྡོ་རྗེ་ཕག་མོ་ཡི། །ཞབས་ལ་སྤྱི་བོས་ཕྱག་འཚལ་ཏེ། །བློ་དམན་རྣམས་ཀྱིས་རྟོགས་བྱའི་ཕྱིར། །དེ་ཡི་སྒྲུབ་ཐབས་བདག་གིས་བཤད། །རྡོ་རྗེའི་ཁྲུས་
ནི་བྱས་ནས་ནི། །ཞེས་པ་ལ་སོགས་པའི་དོན་ནི། །སྔགས་པས་དབེན་ཞིང་ཡིད་དུ་འོང་བའི་གནས་སུ་སྟན་བདེ་བ་ལ་འདུག་ནས། སེམས་ཅན་རྣམས་བྱང་ཆུབ་ལ་དགོད་པར་བསམ། བླ་མ་རྣམས་སྤྱི་བོར་བལྟ། དག་པ་གསུམ་བརྗོད་པས་བདག་ཉིད་ལྷ་མོའི་ང་རྒྱལ་དུ་བྱ། གདོང་
བཞི་པས་བསྲུང་འཁོར་བྱ། རྣམ་པར་སྦྱངས་པའི་བདུད་རྩིས་ཁྲུས་བྱས་ལ་གོ་བགོ། །དེའི་འོག་ཏུ་སེམས་རྩེ་གཅིག་གིས་ཡི་གེ་བརྒྱད་ཀྱི་དོན་ལས་རྡོ་རྗེ་རྣལ་འབྱོར་མའི་རང་བཞིན་བསྒོམ་པར་བྱ་སྟེ་དེ་ལ། འཁོར་ལོ་འདི་ནི་ནམ་མཁའ་འདྲ། །ཞེས་པ་ནི་ཕྱི་སྣོད་ཀྱི་འཇིག་རྟེན་ནི་
ནམ་མཁའ་དང་འདྲ་སྟེ་མཐའ་མེད་པའོ། །བདེ་བ་ཆེན་པོས་རབ་ཏུ་གང་། །ཞེས་པ་ནི་དེ་ཉིད་གདོད་མ་ནས་མ་སྐྱེས་པའི་ཕྱིར་རང་བཞིན་གྱིས་སྟོང་པ་ཉིད་ཡིན་ནོ། །ཐུབ་པ་གོ་མཚམས་མེད་པར་བཞུགས། །ཞེས་པ་ནི་ནང་བཅུད་ཀྱི་སེམས་ཅན་རྣམས་ངོ་བོ་ཉིད་ཀྱི་སངས་རྒྱས་ཀྱི་རང་
བཞིན་ཡིན་པས་སོ། །དེ་ཡང་རྟག་པ་གཉིས་པ་ལས། །སེམས་ཅན་རྣམས་ནི་སངས་རྒྱས་ཏེ། །འོན་ཀྱང་གློ་བུར་དྲི་མས་བསྒྲིབས། །དེ་ཉིད་བསལ་ནས་སངས་རྒྱས་ཉིད། །ཅེས་པ་དང་། ཡང་། རང་དང་རང་གི་རྟོག་པ་ལས། །སངས་རྒྱས་མ་ཡིན་སེམས་ཅན་ནི། །གཅིག་
ཀྱང་ཡོད་པ་མ་ཡིན་ནོ། །ཞེས་གསུངས་པས་སོ། །ཐུབ་པ་ནི་སྒྲིབ་པ་གཉིས་ཐུབ་པའོ། །གོ་མཚམས་མེད་པ་ནི། སྣོད་ཀྱི་ཁྱབ་ཚད་དུ་བཅུད་ཀྱིས་ཁྱབ་པས་ན་གོ་མཚམས་མེད་པས་སོ། །བདེ་བ་ངག་གིས་བརྗོད་མི་ནུས། །ཞེས་པ་ནི་དེ་གཉིས་ཀ་བདེ་བ་ཆེན་པོའི་ཡེ་ཤེས་ཡིན་
པས་བརྗོད་དུ་མེད་པའོ། །ཡང་ན། འཁོར་ལོ་འདི་ནི་ནམ་མཁའ་འདྲ། །ཞེས་པ་ནི། ལུས་ནི་ནམ་མཁའ་དང་འདྲ་སྟེ། །རང་བཞིན་མེད་པས་སོ། །བདེ་བ་ཆེན་པོས་རབ་ཏུ་གང་། །ཞེས་པ་ནི་ལུས་ཀྱི་རྩ་དང་ཐིག་ལེ་ལ་བརྟེན་ནས། བདེ་བ་ཆེན་པོ་སྐྱེ་བས་སོ། །ཐུབ་པ་གོ་

མཚམས་མེད་པར་བཞུགས། །ཞེས་པ་ནི་ཕུང་པོ་དང་། ཁམས་དང་སྐྱེ་མཆེད་རྣམས་ལྷ་དང་ལྷ་མོའི་རང་བཞིན་ཡིན་པས་སོ། །བདེ་བ་ངག་གིས་བརྗོད་མི་ནུས་ནི། ཡེ་ཤེས་ཆེན་པོ་དེ་བརྗོད་པའི་ཡུལ་ལས་འདས་པའོ། །ཡང་ན་འཁོར་ལོ་འདི་ནི་དོན་དམ་གྱི་བདེན་
པའོ། །ནམ་མཁའ་འདྲ་ནི་སྤྲོས་པ་མེད་ཅིང་མཐའ་དབུས་དང་བྲལ་བའོ། །བདེ་བ་ཆེན་པོས་རབ་ཏུ་གང་ནི། ཡེ་ཤེས་དེ་མི་རྟོག་ཅིང་མི་འགྱུར་བས་སོ། །ཐུབ་པ་གོ་མཚམས་མེད་པར་བཞུགས་ནི། དུས་གསུམ་གྱི་སངས་རྒྱས་རྣམས་ཏེ། ཡེ་ཤེས་དེའི་བདག་ཉིད་ཡིན་པའི་ཕྱིར་
རོ། །བདེ་བ་ངག་གིས་བརྗོད་མི་ནུས་ནི། དོན་དམ་གྱི་བདེན་པ་དེ་ནི་ཤེས་བརྗོད་ཐམས་ཅད་ལས་འདས་པའོ། །དེ་དག་ནི་ཡི་གེ་ནའི་དོན་བཤད་པའོ། །ནམ་མཁའ་གཉིས་ནི་ཁ་སྦྱོར་ལས། །ཞེས་པ་ནི་ནམ་མཁའ་དང་ས་གཞི་གཉིས་ཁ་སྦྱོར་གྱི་རྣམ་པའོ། །དབང་ཕྱུག་
རྒྱུར་སྨྲ་བ་རྣམས་ན་རེ། ནམ་མཁའ་ནི་དབང་ཕྱུག་ཆེན་པོའོ། །ས་གཞི་ནི་ལྷ་མོ་ཨུ་མའོ་ཞེས་བྱ་སྟེ། ཁམས་གསུམ་བརྟན་གཡོ་རྣམས་དེ་ལས་བྱུང་བའོ། །ནམ་མཁའ་སྐབས་ཕྱེ་ས་གཞིས་རྟེན་བྱས་པའི་ཕྱིར་རོ། །དེ་བས་ན་ཐམས་ཅད་ཀྱི་བྱེད་པ་པོ་དབང་ཕྱུག་ཡིན་ནོ་
ཞེས་ཟེར་རོ། །དེས་ན་ཐབས་དང་ཤེས་རབ་ལས་མ་འདས་པའོ། །འཁོར་ལོ་དྲུག་པོ་འོད་ཟེར་རྫོགས་ནི། དེ་ཉིད་ལ་བརྟེན་ནས་རིགས་དྲུག་གནས་པའོ། །འགྲོ་དྲུག་རྒྱུ་ནི་མེད་པར་བྱེད་ནི། །རང་བཞིན་གྱིས་སྟོང་པའོ། །ཡང་ན། ནམ་མཁའ་གཉིས་ནི་ཁ་སྦྱོར་ལས་ནི།
ལུས་དང་སེམས་སོ། །དེ་གཉིས་ལ་འགྲོ་བ་རིགས་དྲུག་གྲུབ་ནས་དབང་པོ་དྲུག་རྫོགས་པར་བྱུང་བའོ། །དེ་གཉིས་ཀྱི་རྒྱུ་ལས་དང་ཉོན་མོངས་པ་ཡིན་ལ། གཉིས་སུ་མེད་པའི་ཡེ་ཤེས་ཀྱིས་དེ་སྤོང་བར་བྱེད་པའོ། །དེ་ནི་ཡེ་ཤེས་ཆེན་པོའི་གནས་ནི་ཆོས་ཀྱི་སྐུའི་ཡེ་ཤེས་དེ་ནི་བདེ་
བ་ཆེན་པོའི་རང་བཞིན་ནོ། །ཡང་ན། ནམ་མཁའ་གཉིས་ནི་ཁ་སྦྱོར་ལས་ནི། ཐབས་དང་ཤེས་རབ་བོ། །འཁོར་ལོ་དྲུག་གི་འོད་ཟེར་རྫོགས་ནི། ཟུང་འཇུག་གི་ཡེ་ཤེས་ལས་སངས་རྒྱས་དྲུག་འབྱུང་བའོ། །འགྲོ་དྲུག་རྒྱུ་ནི་མེད་པར་བྱེད་ནི། སངས་རྒྱས་དྲུག་པོ་དེ་ཉིད་ལ་

ཡང་རང་བཞིན་མེད་དེ། ཆོས་ཀྱི་སྐུ་ཡིན་པའི་ཕྱིར་རོ། །དེ་ནི་ཡེ་ཤེས་ཆེན་པོའི་གནས་ནི། །ཆོས་ཀྱི་སྐུ་དེ་ཉིད་ཡེ་ཤེས་ལྔའི་རང་བཞིན་ཡིན་པའི་ཕྱིར་རོ། །དེ་ཉིད་མ་ཡི་དོན་དུ་བཤད། །ཤྲཱི་ཡིས་འཁོར་ལོ་སྐྱེད་པར་བྱེད་ནི། འཁོར་ལོ་ནི་དམར་པོ་ཨཱ་ལི་ཀཱ་ལིའི་སྙིང་པོ་ཅན་ནོ། །
འདབ་མ་གསུམ་ལྔ་ནི་གྲུ་གསུམ་པའོ། །སྐུད་པ་ཅན་ནི་རེའུ་མིག་བཞི་བཅུ་ཞེ་དགུ་སོ་སོར་འབྱེད་པའི་རེ་ཁཱའོ། །དེ་ཉིད་གསུམ་གྱི་རང་བཞིན་ལྡན་ནི། ལུས་ངག་ཡིད་གསུམ་གྱི་ངོ་བོ། །ཡང་ན་སྐུ་གསུམ་གྱི་རང་བཞིན་ནོ། །གསུམ་པོ་ལམ་དུ་བཤད་པ་ཡིན་ནི། ལུས་
ངག་ཡིད་གསུམ་གྱིས་མི་དགེ་བ་རྣམས་སྤོང་ཞིང་དགེ་བ་རྣམས་སྤྱོད་པ་ནི་གསུམ་པོ་ལམ་དུ་བཤད་པའོ། །ཡང་ན་རླུང་འབྱུང་འཇུག་གནས་པ་གསུམ་ངོ་བོ་ཉིད་ཀྱིས་ཡི་གེ་གསུམ་ལྷ་གསུམ་གྱི་བདག་ཉིད་དུ་གནས་པ་དང་སྒོམ་པས་སྐུ་གསུམ་ཐོབ་པ་ནི་གསུམ་པོ་ལམ་དུ་བཤད་པའོ། །
ཡི་གེ་ཤྲཱིའི་བཤད་པའོ། །བ་ལས་སྐྱེས་པ་རྒྱལ་མཚན་ཏེ། །ཞེས་པ་ནི་ཁ་ཊྭཱཾ་ག་ལ་འཕྱང་བའི་བ་དན་ནོ། །དེ་ཉིད་ཕྱག་རྒྱ་བཞི་ཡིས་བརྒྱན་ནི། །ལས་ཀྱི་ཕྱག་རྒྱ་དང་། དམ་ཚིག་གི་ཕྱག་རྒྱ་དང་། ཆོས་ཀྱི་ཕྱག་རྒྱ་དང་ཕྱག་རྒྱ་ཆེན་པོ་སྟེ། དེ་བཞིའི་བདག་ཉིད་དོ། །ཡང་
ན་ཕྱག་རྒྱ་བཞི་ཡིས་བརྒྱན་ནི། འདུས་བྱས་ཐམས་ཅད་མི་རྟག་པ་དང་། ཆོས་ཐམས་ཅད་བདག་མེད་པ་དང་། ཟག་པ་དང་བཅས་པ་རྣམས་སྡུག་བསྔལ་བ་དང་། མྱ་ངན་ལས་འདས་པ་ནི་ཞི་བས་ཏེ་བཞི་དང་ལྡན་པས་མཚོན་པའོ། །བསམ་གཏན་བཞི་དང་ལྡན་པའི་
མཆོག་ནི། བསམ་གཏན་བཞིའི་རང་བཞིན་ཡིན་པས་དེ་ཐོབ་པར་འགྱུར་བའོ། །རྣམ་ཐར་བཞི་ཡང་དེ་ལས་འགྲུབ་ནི། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། མངོན་པར་འདུས་མ་བྱས་པ་སྟེ། དེ་རྣམས་ཀྱང་ཐོབ་པར་འགྱུར་ཞེས་པའི་དོན་ཏོ། །
ཡི་གེ་བའི་བཤད་པའོ། །ཛ་ལས་བཀྲ་ཤིས་འབྱུང་བ་ཡིས། །ཞེས་པ་ནི་གཡུང་དྲུང་འཁྱིལ་བའོ། །ཤིན་ཏུ་མྱུར་བར་འཁོར་བ་ལས། །ཞེས་པ་ནི། སྟེང་དུ་གཡུང་དྲུང་འཁྱིལ་བ། དེའི་འོག་ཏུ་འཁོར་ལོ་དེ་ཉིད་དྲག་ཏུ་འཁོར་བས་སོ། །དགའ་བ་མཆོག་དགའི་རང་བཞིན་

ཅན་ནི། ཧཾ་ལས་ཐིག་ལེ་བསམ་པ་ལས་དགའ་བ་གསུམ་པོ་རིམ་གྱིས་སྐྱེ་བའོ། །ལྷན་ཅིག་སྐྱེས་པ་སྟེར་བར་བྱེད། །ཅེས་པ་ནི་ཐིག་ལེ་ལས་ཨཾ་ལ་སླེབ་པའི་དུས་ན་ལྷན་ཅིག་སྐྱེས་པའི་ཡེ་ཤེས་སྐྱེས་ཏེ། མི་རྟོག་པའི་རང་བཞིན་དུ་འགྱུར་རོ། །ཡི་གེ་ཛའི་བཤད་པའོ། །ཛོ་
ལས་བྱུང་བའི་དོན་མཆོག་ནི། །ཞེས་པ་ནི་དེའི་དོན་བཤད་པར་བྱ་ཞེས་པའི་དོན་ཏོ། །སྙོམས་འཇུག་རྫོགས་པའི་ངོ་བོར་འདོད། །ཅེས་པ་ནི་ཐབས་དང་ཟུང་དུ་འཇུག་པ་སྟེ། ལས་ཀྱི་ཕྱག་རྒྱ་མ་ལ་བརྟེན་པའམ། རྩ་དང་ཐིག་ལེ་ལ་བརྟེན་པས་སོ། །གཉིས་མེད་ཡེ་ཤེས་
མཐོང་བར་བྱེད། །ཅེས་པས་ནི་སྙོམས་འཇུག་མཐར་ཐུག་པ་ལས་ལྷན་ཅིག་སྐྱེས་པའི་ཡེ་ཤེས་ངོས་གཟུང་བའོ། །ཕྱག་རྒྱ་ཆེན་པོ་སྟེར་བར་མཛད། །ཅེས་པ་ནི་ཡེ་ཤེས་དེ་ཉིད་ལ་རྒྱུན་མི་ཆད་པར་གོམས་པར་བྱས་པས་སངས་རྒྱས་ཐོབ་པར་བྱེད་དོ་ཞེས་པའི་དོན་ཏོ། །
གཞན་ཡང་གི་ལས་བྱུང་བ་ནི། །ཉི་མའི་གཟུགས་དང་ཟླ་བ་རྒྱས། །ཞེས་གསུངས་ཏེ། གཡས་དང་གཡོན་དུ་རྒྱུ་བའི་རླུང་གཉིས་དབུ་མར་འཛུད་པའོ། །དེ་ནི་གར་ཡང་གནས་པ་མེད། །ཅེས་པ་ནི། རླུང་དབུ་མར་ཚུད་པ་ན་གར་ཡང་མི་གནས་པ་སྟེ། མི་རྟོག་
པར་གྱུར་པའོ། །ཆོས་ཀྱི་སྐུ་ཡི་གནས་ཀྱང་སྟེར། །ཞེས་པ་ནི་སྟོང་པ་ཉིད་ཀྱི་ཡེ་ཤེས་ལས་ཆོས་ཀྱི་སྐུ་ཐོབ་པས་ན་རྒྱུ་ཡིན་ནོ། །ཡི་གེ་གིའི་དོན་བཤད་པའོ། །ནི་ལས་བྱུང་བའི་དོན་མཆོག་ནི། བླ་མ་དམ་པའི་མན་ངག་གིས། །ཞེས་གསུངས་ཏེ། བླ་མ་དམ་པའི་གསང་
སྔགས་ཀྱི་ཐེག་པ་སྟོན་པའི་སློབ་དཔོན་རྣམས་སོ། །མན་ངག་གིས་ནི་རིམ་པ་གཉིས་ཀྱི་རྣལ་འབྱོར་རོ། །བརྟན་གཡོ་ཐམས་ཅད་སྟོང་པར་ཤེས་ནི་ཁམས་གསུམ་སྣོད་དང་བཅུད་དུ་བཅས་པ་རང་བཞིན་མེད་པར་ཁོང་དུ་ཆུད་པའོ། །དེ་ཡིས་སངས་རྒྱས་མྱུར་དུ་ཐོབ་ནི། དེ་
ལྟ་བུའི་རྣལ་འབྱོར་པས་རིང་པོ་མི་ཐོགས་པར་སངས་རྒྱས་ཐོབ་པར་འགྱུར་རོ་ཞེས་བྱ་བའི་དོན་ཏོ། །ཡི་གེ་ནའི་བཤད་པའོ། །ཡི་གེ་དེ་བརྒྱད་དཀྱིལ་འཁོར་ནི། །ཞེས་པ་ནི་ཡི་གེ་དེ་བརྒྱད་ཀྱི་དོན་ནི་རྡོ་རྗེ་རྣལ་འབྱོར་མའི་རང་བཞིན་ནོ། །དཀྱིལ་འཁོར་ནི་འཁོར་ལོ་སྟེ། དམར་པོ་ནི་གྲུ་

གསུམ་པ་ཨཱ་ལི་ཀཱ་ལིའི་སྙིང་པོ་ཅན་ནོ། །དངོས་གྲུབ་འདོད་པས་བྲི་བར་བྱ་ནི། མཆོག་དང་ཐུན་མོང་གི་དངོས་གྲུབ་ཐོབ་པར་བྱ་བའི་ཕྱིར་འཁོར་ལོ་བྲིས་ལ་ཕྱི་རོལ་གྱི་མཆོད་པ་བྱའོ་ཞེས་པའི་དོན་ཏོ། །འཁོར་ལོ་དེ་ཅི་ཡིས་བྲི་བར་བྱ་ཞེ་ན། བདུད་རྩི་ལྔ་ལ་སོགས་པའི་ཁུ་བའི་རྣམ་པ་ཅི་
ཡོད་པས་སོ། །གདམས་པས་གཟབས་ཏེ་བྲི་བར་བྱ་ནི། བླ་མའི་མན་ངག་བཞིན་དུ་མ་འཁྲུལ་བར་བྲི་བར་བྱའོ། །དེ་དག་གིས་ནི་གུག་པོ་བྲི་ནི་ཆོས་འབྱུང་དང་། ཨཱ་ལི་ཀཱ་ལིའི་སྙིང་པོ་ཅན་གཡུང་དྲུང་འཁྱིལ་པ་བཞི་དང་བཅས་པ་བྲིས་ལ། ཡེ་ཤེས་སེམས་དཔའ་བཀུག་ལ་བསྟིམ་
པ་མཆོད་པ་དང་བསྟོད་པ་ནས་གཤེགས་སུ་གསོལ་བའི་བར་དུ་དེ་ཁོ་ན་ཉིད་ཡེ་ཤེས་གྲུབ་པའི་སྒྲུབ་ཐབས་ནས་བཤད་བཞིན་དུ་བྱའོ། །དེ་ནི་ཕྱི་རོལ་གྱི་མཆོད་པ་བསྟན་ནས། ནང་ལྷའི་རྣལ་འབྱོར་བསྒོམ་པ་བསྟན་པར་བྱ་སྟེ། དེ་ལ་ཀེང་རུས་ཏཱ་ར་ན། །ཞེས་པ་ནི་ཀེང་རུས་སུམ་ཅུ་
རྩ་གཉིས་ཀྱིས་ཕྱོགས་བཞིར་བསྐོར་བ་བཅུ་དྲུག་གིས་གདུགས་བྱས་པའི་དབུས་སུ་ལྷ་མོ་བསྒོམ་པའོ། །དམ་ཆོས་བདུད་རྩི་དེ་ཉིད་ཡིན། །ཞེས་པ་ནི་རིམ་པ་གཉིས་ཀྱིས་རྣལ་འབྱོར་བྱ་བ་སྟེ། ཆོ་ག་བརྒྱད་པའི་དེ་ཁོ་ཉིད་ཡེ་ཤེས་གྲུབ་པ་ནས་བཤད་པ་བཞིན་ནོ། །སྒོ་ཡི་མན་ངག་དེ་ཉིད་
ཡིན། །ཞེས་པ་ནི་ཕྱོགས་གསུམ་གྱི་ཀེང་རུས་རྣམས་ནི་སྐུ་གསུང་ཐུགས་ཀྱི་ལྷ་ཚོགས་སོ། །ཕྱོགས་གཅིག་གི་ཀེང་རུས་རྣམས་ནི་བདེ་བ་ཆེན་པོའི་འཁོར་ལོའི་ལྷ་མོ་བཞི་དང་ཐོད་པ་བཞིའོ། །གདུགས་ཀྱི་བཅུ་དྲུག་མ་བརྒྱད་ནི་དམ་ཚིག་གི་འཁོར་ལོའི་ལྷ་མོ་བརྒྱད་པའོ། །བརྒྱད་
ནི་དུར་ཁྲོད་བརྒྱད་དོ། །དེ་རྣམས་ཀྱིས་བསྐོར་བའི་དབུས་ན་ལྷ་མོ་བཞུགས་པའོ། །གཡོན་གྱི་ཁ་ཊྭཱཾ་ག་ནི་དཔལ་བདེ་མཆོག་གོ། །དེ་ལྟར་ན་འདི་ལྟར་བསྒོམས་པས་དཔལ་བདེ་མཆོག་གི་དཀྱིལ་འཁོར་ཡོངས་སུ་རྫོགས་པར་བསྒོམས་པར་འགྱུར་བའོ། །དེས་ནི་ལྷ་མོ་བསྒོམས་པ་བསྟན་
ཏོ། །ད་ནི་ཡབ་ཡུམ་མཉམ་པར་སྦྱོར་བའི་རྣལ་འབྱོར་བསྟན་པར་བྱ་སྟེ། །དེ་ཡི་དབུས་ན་མཁའ་འགྲོའི་གཙོ། །ཡི་གེ་ནི་ལས་བྱུང་བ་ཡིན། །ཞེས་པ་ནི་བདག་ཉིད་ལྷ་མོར་བསྒོམས་པའི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ནི་ལས་བྱུང་བའི་དཔལ་འཁོར་ལོ་སྡོམ་པ་ཞལ་

གཅིག་ཕྱག་གཉིས་པར་གྱུར་པའོ། །རྡོ་རྗེ་རྣལ་འབྱོར་མ་དང་བཅས། །དེ་ནི་མ་ལས་བྱུང་ཞེས་བརྗོད། །ཅེས་པ་ནི་ཡི་གེ་དེ་གཉིས་ལས་ཡབ་ཡུམ་གཉིས་དུས་གཅིག་ལ་བྱུང་བའོ། །བདག་ཉིད་ཡིན་པར་རྟོགས་གྱིས་ལ་ནི་སྟོང་པ་ཉིད་དང་། སྙིང་རྗེ་གཉིས་རོ་
གཅིག་པར་སྒོམ་པའོ། །ལྷན་སྐྱེས་ཡེ་ཤེས་བསྒྲུབ་པར་བྱ་ནི་ཡབ་ཡུམ་གཉིས་སྙོམས་འཇུག་བྱས་པ་ལས་བདེ་བ་ཆེན་པོའི་ཡེ་ཤེས་བསྐྱེད་པའོ། །ཚོགས་གཉིས་བསགས་པས་ཡེ་ཤེས་སྐྱེ་ནི་ཐབས་དང་ཤེས་རབ་གཉིས་ཟུང་དུ་འཇུག་པ་གཉིས་སུ་མེད་པའི་ཡེ་ཤེས་སྐྱེ་བའོ། །དེ་
ཉིད་དེ་ཡི་ཐབས་སུ་བཤད་ནི། སྔགས་ཀྱི་ཐེག་པ་འདིར་ཐབས་དང་ཤེས་རབ་ཀྱི་སྙོམས་འཇུག་ལས་མི་རྟོག་པ་སྐྱེ་བ་འདི་ཉིད་ཐབས་སུ་གསུངས་པའོ། །རབ་དགའ་ལ་སོགས་ས་བཅུ་པོ། །སངས་རྒྱས་རྣམས་ཀྱིས་ལམ་དུ་གསུངས། །ཞེས་པ་ནི་ཕ་རོལ་ཏུ་ཕྱིན་པའི་ཐེག་པ་
ལས་ནི་ལམ་ལྔ་དང་། ཕ་རོལ་ཏུ་ཕྱིན་པ་དྲུག་དང་། ས་བཅུ་པོ་སངས་རྒྱས་ཀྱི་ལམ་དུ་གསུངས་སོ། །སྙོམས་འཇུག་ཡོངས་སུ་རྫོགས་པ་ལས་ནི། ཡབ་ཡུམ་བསྲུབས་པའི་སྦྱོར་བ་བྱས་པས་སོ། །ཐིག་ལེ་གཉིས་པོ་ནི་ཀུན་རྫོབ་བྱང་ཆུབ་ཀྱི་སེམས་དང་དོན་དམ་བྱང་ཆུབ་
ཀྱི་སེམས་སོ། །འོད་ཟེར་འཕྲོ་ནི་དགའ་བཞི་རིམ་གྱིས་སྐྱེ་བའོ། །ཐིག་ལེ་ལ་ནི་ཐིག་ལེ་ཐིམ་ནི། ལྷན་སྐྱེས་ཀྱི་དགའ་བ་སྟེ་གཉིས་མེད་ཀྱི་ཡེ་ཤེས་སོ། །མཁས་པ་ཡིས་ནི་བསྒོམ་པར་བྱ་ནི། བླ་མའི་མན་ངག་ཁོང་དུ་ཆུད་པའི་རྣལ་འབྱོར་པས་བསྒོམ་པར་བྱ་ཞེས་པའི་དོན་
ཏོ། །འདི་རྣམས་བསྒོམ་པ་བྱས་པ་ཡིན། །མཚན་དང་དཔེ་བྱད་ཐོབ་པར་འགྱུར། །ཞེས་པ་ནི་གཉིས་སུ་མེད་པའི་ཡེ་ཤེས་བསྒོམ་པ་ལས་མཚན་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུ་ལྡན་པའི་སངས་རྒྱས་ཐོབ་པར་འགྱུར་རོ་ཞེས་པའི་དོན་ཏོ། །ཡང་རྣལ་འབྱོར་མི་
འདྲ་བ་གཞན་སྟོན་ཏེ། འདི་ལས་སྐྱེས་པའི་རྣལ་འབྱོར་མ་ནི། ཐབས་དང་ཤེས་རབ་ལས་བྱུང་བའི་ཟུང་འཇུག་གི་ཡེ་ཤེས་སོ། །རྡོ་རྗེ་རྣལ་འབྱོར་མ་རུ་གྱུར་ནི། བདེ་བ་ཆེན་པོའི་ཡེ་ཤེས་དེ་ལས་རྡོ་རྗེ་རྣལ་འབྱོར་མའི་སྐུ་རུ་གྱུར་པའོ། །ལྟེ་བའི་ནང་སོགས་པདྨ་བལྟ་ནི། སྤྲུལ་

པའི་འཁོར་ལོའི་སྟེང་དུའོ། །ཉོན་མོངས་ཐམས་ཅད་བྱང་བར་བྱེད་ནི་དེ་ལྟར། བསྒོམས་པས་སྒྲིབ་པ་གཉིས་སྤོང་པའོ། །ཡི་གེ་དྲུག་གིས་ལྷ་མོའི་གནས་དྲུག་ཏུ་གོ་བགོ་བ་ནི་གོ་སླའོ། །ཕྱག་འཚལ་ཡི་གེ་ཐམས་ཅད་ལས་ནི། ཡི་གེ་བརྒྱད་པའོ། །ལྷ་མཆོག་ཏུ་ནི་བྱིན་གྱིས་བརླབ་
ནི་ཡི་གེ་དེ་བརྒྱད་ལས་ཡབ་ཡུམ་གཉིས་དང་གོ་ཆའི་ལྷ་མོ་དྲུག་བསྐྱེད་པའི་ས་བོན་ཡིན་ནོ་ཞེས་པའི་དོན་ཏོ། །བདེ་བ་ཆེན་པོ་ལས་སྐྱེས་པ་ནི་ཟུང་འཇུག་ལྷན་སྐྱེས་ཀྱི་ཡེ་ཤེས་ལས་ལྷ་མོ་དེ་བྱུང་བས་སོ། །ཟབ་མོར་འབྱུང་བའི་མན་ངག་གོ་ནི། རྣལ་འབྱོར་འདི་ནི་རྟོགས་པར་དཀའ་
བ་སྟེ། མན་ངག་འདི་ཤིན་ཏུ་ཡང་ཁོང་དུ་ཆུད་པར་དཀའ་བའོ་ཞེས་པའི་དོན་ཏོ། །དེ་དོན་ཡང་ནི་བཤད་པར་བྱ་ནི། ཟབ་མོའི་དོན་གྱི་རྣལ་འབྱོར་མི་འདྲ་བ་གཞན་ཡང་བསྟན་པར་བྱའོ་ཞེས་པའི་དོན་ཏོ། །བསྲུབས་པའི་སྦྱོར་བའི་ནང་དུ་ནི་ཞེས་པ་ནི་རྡོ་རྗེ་དང་པདྨོ་གཉིས་བསྲུབས་པ་
ལས་ཐིག་ལེ་བྱུང་བའོ། །ན་ལས་འཁོར་ལོ་སྡོམ་པ་བྱུང་ནི། ཐབས་ཀྱི་ཐིག་ལེ་ན་རུ་གྱུར་པ་ལས་འཁོར་ལོ་སྡོམ་པ་བྱུང་བའོ། །མ་ལས་རྡོ་རྗེ་རྣལ་འབྱོར་མ་ནི། ཤེས་རབ་ཀྱི་ཐིག་ལེ་མ་རུ་གྱུར་པ་ལས་རྡོ་རྗེ་རྣལ་འབྱོར་མ་བྱུང་བའོ། །པདྨར་ཡི་གེ་བྷ་ག་ལས་ནི། ཡུམ་
གྱི་བྷ་གའི་ནང་དུ་ཡི་གེ་དེ་གཉིས་ལས་ཡབ་ཡུམ་གཉིས་བྱུང་བའོ། །བདེ་བ་ཆེན་པོ་ལས་སྐྱེས་པ་ནི། ལྷན་ཅིག་སྐྱེས་པའི་ཡེ་ཤེས་ལས་བྱུང་བའོ། །དེ་ཉིད་རྣལ་འབྱོར་མ་རུ་ཤེས་ནི། ཤེས་རབ་ཀྱི་རང་བཞིན་ཡིན་པས་རྣལ་འབྱོར་མའོ། །རྡོ་རྗེ་གཉིས་ཀྱི་དབུས་
གནས་པའི་ནི། རྡོ་རྗེ་པདྨའི་དབུས་ན་ཡོད་པའོ། །དམ་པ་དེ་ནི་ཤིན་ཏུ་བསྟན་ནི། འདི་ནི་ཕྲ་མོའི་རྣལ་འབྱོར་ཡིན་པས་གསལ་པོར་བསྟན་པར་བྱའོ། །རྩ་བར་འཁོར་ལོ་ཡོད་པ་ལ་ནི། འདིར་འཁོར་ལོ་གསུམ་པདྨ་དང་བཞི་བརྩེགས་སུ་བསྒོམས་པའོ། །རྩིབས་
བརྒྱད་འོད་དང་བཅས་པའོ། །དཀར་པོ་ཕྱི་རོལ་འཁོར་ལོས་བསྐོར། །སྟོབས་དང་ལྡན་པ་ལ་སོགས་བརྒྱད། །གཡོན་ཕྱོགས་སུ་ནི་རབ་བསྐོར་ཞིང་། །དབུས་ན་ཡེ་ཤེས་རྒྱ་མཚོའོ། །ཞེས་པ་ནི་སྐུའི་འཁོར་ལོའོ། །འཁོར་ལོའི་ཤར་ཕྱོགས་ཀྱི་རྩིབས་ལ་སྟོབས་པོ་ཆེ།

བྱང་དུ་རིན་ཆེན་རྡོ་རྗེ། ནུབ་ཏུ་རྟ་མགྲིན། ལྷོ་རུ་ནམ་མཁའི་སྙིང་པོ། ཤར་ལྷོར་དཔལ་ཧེ་རུ་ཀ །བྱང་ཤར་དུ་རྡོ་རྗེ་སེམས་དཔའ། ནུབ་བྱང་དུ་རྣམ་པར་སྣང་མཛད། ལྷོ་ནུབ་ཏུ་པདྨ་གར་གྱི་དབང་ཕྱུག་གོ། །དབུས་ན་ཡེ་ཤེས་རྒྱ་མཚོ་སྟེ་སྐུ་རྡོ་རྗེའོ། །
འཁོར་ལོ་དམར་པོ་རྩིབས་བརྒྱད་པ། །པདྨའི་ཕྲེང་བས་བསྐོར་བའོ། །འཇིགས་བྱེད་ལ་སོགས་བརྒྱད་པོ་ནི། །འཁོར་ལོའི་རྩིབས་བརྒྱད་ལ་གནས་ཤིང་། །གཡས་ཕྱོགས་སུ་ནི་རབ་ཏུ་བསྐོར། །ཆོས་ཀྱི་ཞལ་ནི་དབུས་གནས་པའོ། །ཞེས་པ་ནི་གསུང་གི་འཁོར་ལོའོ། །
ཤར་གྱི་རྩིབས་ལ་འཇིགས་བྱེད་ཡང་ན་ཨཾ་ཀུ་རིའོ། །ལྷོ་ཕྱོགས་སུ་ནི་རྡོ་རྗེ་ཧཱུཾ་མཛད་པའོ། །ནུབ་ཕྱོགས་སུ་དཔའ་བོ་ཆེན་པོ། བྱང་དུ་རྡོ་རྗེ་རལ་པ་ཅན། ཤར་ལྷོར་རབ་ཏུ་བཟང་པོ། ལྷོ་ནུབ་ཏུ་རྡོ་རྗེ་བཟང་པོ། ནུབ་བྱང་དུ་འཇིགས་བྱེད་ཆེན་པོ། བྱང་ཤར་དུ་མིག་མི་
བཟང་ངོ་། །དབུས་སུ་ཆོས་ཀྱི་ཞལ་ཏེ་གསུང་རྡོ་རྗེའོ། །རྡོ་རྗེ་རིན་ཆེན་འཁོར་ལོ་དབུས། །རྩིབས་བརྒྱད་འོད་དང་བཅས་པའོ། །རྡོ་རྗེ་ནག་པོའི་ཕྲེང་བས་བསྐོར། །ཐོད་པའི་དུམ་བུ་ལ་སོགས་བརྒྱད། །དབུས་ན་སྙོམས་འཇུག་རང་བཞིན་བསྟན། །ཞེས་པ་ནི་
ཐུགས་ཀྱི་འཁོར་ལོའོ། །ཤར་གྱི་རྩིབས་ལ་ཁཎྜ་ཀ་པཱ་ལ། བྱང་དུ་མ་ཧཱ་ཀཾ་ཀ་ལ། ནུབ་ཏུ་ཀཾ་ཀ་ལ། ལྷོ་རུ་མཆེ་བ་རྣམ་པར་གཙིགས་པ། ཤར་ལྷོ་རུ་སུ་ར་བྷེ་རི། ལྷོ་ནུབ་ཏུ་འོད་དཔག་མེད། ནུབ་བྱང་དུ་རྡོ་རྗེའི་འོད། བྱང་ཤར་དུ་རྡོ་རྗེའི་སྐུའོ། །དབུས་ན་སྙོམས་
འཇུག་གི་རང་བཞིན་ཏེ་ཐུགས་རྡོ་རྗེའོ། །བསྐལ་པ་འཇིག་པའི་མེ་ལྟ་བུ་ནི། ཇི་ལྟར་བསྐལ་པ་འཇིག་པའི་མེས་སྣོད་ཀྱི་འཇིག་རྟེན་མ་ལུས་པར་བསྲེགས་པ་བཞིན་དུ་འཁོར་ལོ་འདི་རྣམས་ཀྱི་འོད་ཀྱིས་ཀྱང་སྒྲིབ་པ་གཉིས་མ་ལུས་པར་སྲེག་པར་བྱེད་པའོ། །སྐུ་ཅན་པདྨ་རྡོར་དྲིལ་
དབུས་ནི། སྣ་ཚོགས་པདྨ་འདབ་མ་བཞི་པའོ། །མཁས་པ་ཡིས་ནི་བསྒོམ་པར་བྱ་ནི། འཁོར་ལོའི་སྟེང་དུ་པདྨ་དེ་ལ་དཔའ་བོ་དྲུག་གི་གོ་ཆའི་སྔགས་དགོད་པར་བྱ་བ་སྟེ་གོ་སླའོ། །འཁོར་ལོ་རྣམས་ཀྱི་རིམ་པ་ཡང་། །སྐུའི་འཁོར་ལོའི་སྟེང་དུ་གསུང་གི་འཁོར་ལོའོ། །དེའི་

སྟེང་དུ་ཐུགས་ཀྱི་འཁོར་ལོའོ། །མེ་ལྟར་འབར་བའི་འོད་མངའ་བ་ནི། འཁོར་ལོ་དེ་རྣམས་ལ་མེ་དཔུང་འབར་བའི་འོད་འཕྲོ་བས་ཕྱི་ནང་གི་བར་ཆད་རྣམས་བསྲེག་པའོ། །སྔར་བཤད་པའི་འཁོར་ལོ་ནི་གོང་དུ་བསྟན་པའི་འཁོར་ལོ་གསུམ་དང་པདྨའོ། །ཀ་ཀོ་ལའི་བར་དུའོ་ནི་ལྷ་
མོའི་པདྨའི་ནང་དུའོ། །རྡོ་རྗེའི་རྩེ་མོ་དང་པདྨའི་ཕུག་གི་བར་དུ་བཞི་བརྩེགས་སུ་སྒོམ་པའོ། །རྒྱུན་མི་འཆད་པར་འཁོར་བར་བལྟ་ནི། འཁོར་ལོ་དེ་རྣམས་གཡོན་སྐོར་དུ་འཁོར་བར་བལྟའོ། །སྒོམ་པ་འདི་ལྟར་བསྒོམ་པ་བྱ་ནི་འཁོར་ལོ་རྣམས་རྒྱུན་མི་འཆད་པར་
འཁོར་བ་ལ་སེམས་གཏད་པས་ཨཾ་ལས་མེ་ལངས་པས་འཁོར་ལོ་གསུམ་པོ་སྲེག་པའོ། །གཏོར་མ་དྲུག་ཅུ་རྩ་བཞི་སྦྱིན་ནི། སྤྱི་གཙུག་བདེ་བ་ཆེན་པོའི་འཁོར་ལོ་ལ་གནས་པའི་ཧཾ་བཞུ་ནས་བདུད་རྩིའི་རྒྱུན་མར་བབས་ཏེ། ལྟེ་བ་སྤྲུལ་པའི་འཁོར་ལོ་འདབ་མ་དྲུག་ཅུ་རྩ་བཞི་
པ་ལ་གནས་པའི་ཨཾ་ལ་བབས་པས། བདེ་བ་ཆེན་པོའི་ཡེ་ཤེས་སྐྱེས་པས་རྟོག་པ་མཐའ་དག་འགག་པའོ། །ཉོན་མོངས་རྣམས་ནི་བྱང་གྱུར་ཞིང་། །ཞེས་པ་ནི་དེ་ལྟར་བསྒོམས་ན་སྒྲིབ་པ་གཉིས་མ་ལུས་པ་ཟད་པར་འགྱུར་རོ། །ཕན་ཡོན་མཉམ་མེད་ཐོབ་པར་འགྱུར་ནི།
འབྲས་བུ་བླ་ན་མེད་པའི་བྱང་ཆུབ་ཐོབ་པར་འགྱུར་རོ་ཞེས་པའི་དོན་ཏོ། །ཟབ་མོར་གྱུར་པའི་རིམ་པའོ་ནི། དེ་རྣམས་ཤིན་ཏུ་ཟབ་པའི་རྣལ་འབྱོར་རིམ་པ་བཞིན་དུ་བཤད་པའོ། །ཡང་རྣལ་འབྱོར་མི་འདྲ་བ་གཞན་སྟོན་ཏོ། །ན་ལས་ནཱ་དའི་གཟུགས་ཀྱིས་སོ་ནི། སྙིང་གར་
ཡི་གེ་ན་གྱུར་པ་ལས་བདག་ཉིད་ཀྱི་ལུས་ནཱ་ད་ཤིན་ཏུ་ཕྲ་བར་གྱུར་པར་བསམ་མོ། །ཐབས་དང་བརྩེ་བ་དྲི་མ་མེད་ནི། དེ་ཉིད་ཐབས་ཡིན་ཏེ་དམིགས་པ་དང་བཅས་པས་སོ། །བརྩེ་བ་ནི་སྙིང་རྗེའི་སྟེ་ནཱ་ད་དེ་ཀུན་རྫོབ་ཡིན་པས་སོ། །དྲི་མ་མེད་ནི་རིག་པར་འཛིན་པའི་ཤེས་པ་མེད་
པ་སྟོང་པ་ཉིད་ཀྱི་ཡེ་ཤེས་ཀྱི་དངོས་ཀྱི་རྒྱུ་ཡིན་པས་སོ། །དངོས་པོ་རང་བཞིན་སྤྱོད་པས་སྟོང་ནི་ནཱ་ད་དེ་ཡང་དཔྱད་ན་གང་གི་ངོ་བོར་ཡང་མ་གྲུབ་པའོ། །བདེ་བ་སྐྱེ་བ་སྦྱིན་པར་བྱེད་ནི། ཆོས་ཀྱི་སྐུའི་ཡེ་ཤེས་སྐྱེ་བའི་ཐོགས་པ་མེད་མའི་རྒྱུ་བྱེད་པས་སོ། །མ་ནི་སྟོང་པའི་ངོ་བོ་ལ་ནི།

ནཱ་ད་དེ་ཡང་མི་དམིགས་པར་བྱས་ནས་འོད་གསལ་གྱི་ཡེ་ཤེས་སུ་གྱུར་པའོ། །ཤེས་རབ་ངེས་པའི་རང་བཞིན་ཡིན་ནི། ཡེ་ཤེས་དེ་ལས་སངས་རྒྱས་ཞེས་བྱ་སྟེ། ཆོས་ཀྱི་སྐུའི་ཡེ་ཤེས་ཡིན་པས་སོ། །བདེ་བ་ཆེན་པོས་རབ་ཏུ་གང་ནི། ཡེ་ཤེས་ཏེ་མི་རྟོག་ཅིང་
མི་འགྱུར་བས་སོ། །ཕྱག་རྒྱ་ཆེན་པོ་དེ་ཉིད་ཡིན་ནི། ཡེ་ཤེས་དེ་གང་གིས་མངོན་དུ་བྱས་པ་དེ་ནི་ཕྱག་རྒྱ་ཆེན་པོའི་དངོས་གྲུབ་ཐོབ་པ་ཡིན་ཏེ། མངོན་པར་རྫོགས་པར་སངས་རྒྱས་པའོ། །གཉིས་པོ་གཅིག་ཏུ་གྱུར་པ་ཡིན་ནི། ནཱ་ད་སྟོང་པར་ཐིམ་ནས་འོད་གསལ་གྱི་ངང་དུ་གྱུར་
པའོ། །རྟོག་པ་མེད་ཅིང་དྲི་མ་བྲལ་ནི། ནམ་མཁའ་ལྟར་རྟོག་པ་དང་བྲལ་བས་གཟུང་འཛིན་གྱི་དྲི་མ་རྣམས་མ་ལུས་པར་ཟད་པའོ། །རང་བྱུང་ཡེ་ཤེས་མཉམ་པ་མེད་ནི། འཇིག་རྟེན་ན་འགྲན་ཟླ་མེད་ཅིང་དཔེ་བརྗོད་ལས་འདས་པའོ། །འཇིག་རྟེན་གསུམ་གྱི་གཙོ་བོ་ཡི་ནི།
ཁམས་གསུམ་གྱི་བླ་མ་ཡིན་ཏེ། ཐམས་ཅད་ཀྱིས་ཕྱག་བྱས་པ་དང་། མཆོད་པའི་འོས་སུ་གྱུར་པའོ། །སེམས་ལས་སེམས་འབྱུང་བལྟ་བར་བྱ་ནི། གོང་གི་ཡེ་ཤེས་དེ་ཉིད་རྒྱུན་མ་ཆད་པར་སྔ་ཕྱི་ཐ་མི་དད་པར་བསྒོམ་པའོ། །སེམས་ཀྱི་དབུས་སུ་གཞག་པ་ཡིས་ནི། སེམས་
བློའི་ནང་དུ་བཙུད་ནས་ཡུལ་ལ་མི་འཕྲོ་བར་རྩེ་གཅིག་ཏུ་བྱེད་པའོ། །དེ་གཉིས་འདྲེས་པས་དང་པ་གཉིས་ནི། སེམས་དང་བློ་གཉིས་རོ་གཅིག་ཏུ་གྱུར་པས་སོ། །དད་པ་གཉིས་ནི་གཡས་གཡོན་ནས་འབྱུང་བའི་རླུང་གཉིས་པའོ། །མི་འབྱུང་བས་ནི་བསྟན་པ་ཡིན་ནི། རླུང་འབྱུང་
བ་དང་འཇུག་པ་གཉིས་འགགས་ནས་སེམས་མི་གཡོ་བར་བརྟན་པོར་གནས་པའོ། །འདི་སྒྲུབ་རྡོ་རྗེ་ཏིང་ངེ་འཛིན་གྱིས་ནི། འདི་སྒྲུབ་ནི་སྐུ་བཞིའོ། །རྡོ་རྗེ་ཏིང་འཛིན་གྱིས་ནི་སྟོང་པ་ཉིད་ཀྱི་ཡེ་ཤེས་ནི་རྡོ་རྗེ་ལྟ་བུ་ཡིན་ཏེ། སྒྲིབ་པ་གཉིས་མ་ལུས་པར་འཇོམས་པའོ། །སྐད་ཅིག་
གིས་ནི་བདེ་བ་རྒྱས་ནི། སྒྲིབ་པ་གཉིས་སྤངས་པའི་སྐད་ཅིག་ལས་འཚང་རྒྱ་བ་སྟེ། སྐུ་བཞི་མངོན་དུ་བྱེད་དོ་ཞེས་པའི་དོན་ཏོ། །ལྷན་སྐྱེས་དྲི་མེད་ཐིག་ལེ་གཉིས་ནི། ཇི་ལྟ་བ་མཁྱེན་པའི་ཡེ་ཤེས་དང་། ཇི་སྙེད་པ་མཁྱེན་པའི་ཡེ་ཤེས་གཉིས་ཐོབ་པ་ཡིན་ནོ་ཞེས་པའི་དོན་ཏོ། །

དྲི་མེད་ལྡན་པས་དྲི་མེད་སྤྲོ་ནི། ཆོས་སྐུ་ལས་གཟུགས་སྐུ་རྣམ་པ་གཉིས་བྱུང་ནས་གཞན་གྱི་དོན་མ་ལུས་པར་མཛད་པའོ། །སྐྱེ་བ་དང་ནི་འགག་པ་གཟུགས་ནི། ཀུན་རྫོབ་ཀྱི་བདེན་པ་དང་། དོན་དམ་པའི་བདེན་པའོ། །དེ་གཉིས་རྟོགས་པས་དྲི་མ་བྲལ་ནི། བདེན་པ་
གཉིས་ཀྱི་དོན་ཐ་མི་དད་དུ་རྟོགས་པས་སྒྲིབ་པ་གཉིས་ཟད་པའོ། །འཇིག་རྟེན་ཤེས་པ་མེ་ཏོག་དཀར་ནི། འཇིག་རྟེན་ཤེས་པ་ནི་དངོས་པོའི་གནས་ལུགས་ཇི་ལྟ་བ་བཞིན་དུ་ཁོང་དུ་ཆུད་པ་སྟེ། ཐམས་ཅད་མཁྱེན་པའི་ཡེ་ཤེས་སོ། །དེ་ཉིད་མེ་ཏོག་དཀར་པོ་དང་འདྲ་བས་དྲི་
མས་མ་གོས་ཤིང་རང་འབྱུང་བའོ། །འཇིག་རྟེན་བླ་མ་བདེ་ཆེན་གཟུགས་ནི། སངས་རྒྱས་བཅོམ་ལྡན་འདས་རྣམས་ནི་འཇིག་རྟེན་གསུམ་གྱི་གཙོ་བོ་ཡིན་ཞིང་བླ་མར་གྱུར་པ་སྟེ། ཡེ་ཤེས་འབའ་ཞིག་གི་སྐུ་ཡིན་ནོ་ཞེས་པའི་དོན་ཏོ། །ཚིག་ཉུང་དོན་ཟབ་སྟོན་པ་ཡིན། །ཀེང་རུས་ཕོ་
བྲང་བཤད་པ་ལས། །བསོད་ནམས་བདག་གིས་གང་བསགས་པ། །འགྲོ་ཀུན་གཉིས་མེད་ཐོབ་པར་ཤོག །ཀེང་རུས་ཏཱ་ར་ནཱའི་རིམ་པ་རྡོ་རྗེ་རྣལ་འབྱོར་མའི་སྒྲུབ་ཐབས་བདག་བྱིན་གྱིས་བརླབ་པའི་འགྲེལ་པ་གཞན་ལ་ཕན་པ་ཞེས་བྱ་བ་མང་དུ་ཐོས་པའི་སློབ་དཔོན་ཀུ་མཱ་ར་བོ་དྷིས་
མཛད་པ་རྫོགས་སོ།། ༄༅༅། །རྒྱ་གར་སྐད་དུ། བཛྲ་ཡོ་གི་ནཱི་སཱ་དྷ་ནཾ་ནཱ་མ། བོད་སྐད་དུ། རྡོ་རྗེ་རྣལ་འབྱོར་མའི་སྒྲུབ་ཐབས་ཞེས་བྱ་བ། རྗེ་བཙུན་དཔལ་རྡོ་རྗེ་ཕག་མོ་ལ་ཕྱག་འཚལ་ལོ། །དང་པོར་རྣལ་འབྱོར་པ་བློ་དང་ལྡན་པས་
ཐེག་པ་ཆེན་པོ་གསང་སྔགས་ཀྱི་དོན་གང་དང་གང་དུ་བསྡུ་བ་དེ་སྔོན་དུ་ཤེས་པར་བྱ་སྟེ། ཆོས་ཐམས་ཅད་ནི་ལུང་དང་བཅས་པ། ལུང་དེ་ཡང་གདམས་ངག་དང་བཅས་པ། གདམས་ངག་དེ་ཡང་བརྒྱུད་པ་དང་བཅས་པ། བརྒྱུད་པ་དེ་ཡང་བྱིན་རླབས་དང་བཅས་པ། དེ་རྣམས་
ནི་ཐེག་པ་ཆེན་པོ་གསང་སྔགས་ཀྱི་དངོས་གྲུབ་ཉེ་བར་ཐོབ་པའི་རྒྱུའོ། །དེའི་རྗེས་ལ་བླ་མའི་ཞལ་ལས་རྟེན་གྱི་གང་ཟག་གཅིག་གི་ཆ་རྐྱེན་ཤེས་པར་བྱ། སྒྲུབ་པའི་དུས་ནི་མར་ངོའི་ཚེས་བཅུའམ། ཡར་ངོའི་ཚེས་བཅུའམ་གནམ་སྟོང་ངོ་། །ཡིད་དང་མཐུན་པའི་གནས་ནི་དང་པོ་བྱིན་

རླབས་ཅན་གྱི་གནས་ཉིད་དུ་བརྟག་པར་བྱའོ། །དེའི་རྗེས་ལ་གནས་བསྲུང་བར་བྱའོ། །དེ་ནས་རྣལ་འབྱོར་པ་སྟན་བདེ་བར་འདུག་སྟེ། དགོན་པ་ཁ་ནུབ་ཏུ་བལྟ་བའམ། ཡང་ན་རྣལ་འབྱོར་པ་ཁ་ནུབ་ཏུ་བལྟ། ཡང་ན་ནུབ་ཏུ་བལྟ་བའི་མོས་པ་བྱ། དེ་ནི་དང་
པོ་ཨུ་རྒྱན་ནས་དར་བ་དང་། དངོས་གྲུབ་ཉེ་བར་འཐོབ་པའི་རྒྱུའོ། །དེའི་རྗེས་ལ་པདྨ་བྷཉྫ་ན་དུམ་བུ་གཅིག་པའམ། གཉིས་པའམ། གསུམ་པའམ། རིན་པོ་ཆེའི་སྣོད་གང་ཡང་རུང་བ་དཔའ་བོའི་བཏུང་བས་གང་བ་དེའི་ནང་དུ་བདུད་རྩིའི་རི་ལུ་བླུགས་པར་བྱའོ། །དེ་ནས་མདུན་
དུ་བཞག་ལ་རྣལ་འབྱོར་པས་ཕུང་པོ་དང་ཁམས་དང་སྐྱེ་མཆེད་སྒྱུ་མ་རྨི་ལམ་ལྟ་བུ་སྐད་ཅིག་གིས་དམིགས་པར་བྱ། དེ་ནས་ལག་པ་གཡས་གཡོན་གཉིས་ལ་ཨ་དང་རཾ་གཉིས་ཡོངས་སུ་གྱུར་པ་ལས། ཉི་ཟླ་གཉིས་ནི་བསམ་པར་བྱའོ། །དེའི་དབུས་སུ་ཨེ་ཝཾ་གཉིས་ཀྱི་མཐའ་མ་ཨཱ་ལི་
ཀཱ་ལིས་བསྐོར་བ་བསམ་པར་བྱའོ། །དེ་རྣམས་འོད་དུ་ཞུ་བ་བདུད་རྩིར་གྱུར་པ་སྣོད་དུ་བླུགས། དེ་ནས་སྣོད་དེ་ལག་པ་གཡས་སུ་བླངས་ལ་གཡོན་པའི་སྲིན་ལག་གིས་ཆོས་འབྱུང་གི་དབུས་སུ་བཾ་བྲི། ཨོཾ་ཨཱཿཧཱུཾ། གསུམ་གྱིས་བྱིན་གྱིས་བརླབ། སྲིན་ལག་གཡོན་པས་བདུད་
རྩིའི་ཟེར་མ་ཕྱོགས་བཅུར་གཏོར། དེའི་ཚེ་སྐུ་གསུང་ཐུགས་ཀྱི་སྔགས་བཟླས། བདུད་རྩིའི་ཟེར་མ་དེ་མཁའ་འགྲོ་མའི་བདག་ཉིད་འཕྲོ་བར་བསམ། དེས་བགེགས་དང་བར་དུ་གཅོད་པ་ཐམས་ཅད་བསལ་ལ་གནས་པ་དང་རྣལ་འབྱོར་བྱིན་གྱིས་བརླབ། དེའི་རྗེས་ལ་བདུད་
རྩི་མྱངས་ལ། ཨོཾ་ཨཱཿཧཱུཾ། གསུམ་གྱིས་སྐུ་གསུང་ཐུགས་བྱིན་གྱིས་བརླབ་པོ། །དེའི་རྗེས་ལ་སྐྱེ་མཆེད་དྲུག་བྱིན་གྱིས་བརླབ་པ་ནི། ཨོཾ་བཾ་བཛྲ་བཱ་རཱ་ཧཱི་ལྟེ་བ་ལའོ། །ཧཾ་ཡོཾ་ཡ་མི་ནི་སྙིང་གར་རོ། །ཧྲཾ་མོཾ་མོ་ཧི་ནི་ཁ་ལའོ། །ཧྲེཾ་ཧྲིཾ་སཾ་ཙ་ལ་ནི་མགོ་ལའོ། །ཧཱུཾ་ཧཱུཾ་སཾ་ཏྲཱ་ས་
ནི་སྤྱི་གཙུག་ཏུའོ། །ཕཊ་ཕཊ་ཙཎྜི་ཀ་ནི་ལུས་ཐམས་ཅད་ལའོ། །དེ་རྣམས་ཀྱི་གོ་ཆ་བྱའོ། །མདུན་དུ་མཎྜལ་གྲུ་བཞིའི་དབུས་སུ་ཟླུམ་པོར་བྱས་ལ། ཙནྡན་དམར་པོ་ལ་སོགས་པའི་དྲི་ཞིམ་པོ་རྣམ་པ་སྣ་ཚོགས་དང་གོང་དུ་དཔའ་བོའི་བཏུང་བ་བྱུག་པར་བྱ། ལག་པ་

གཡོན་པའི་སྲིན་ལག་གི་དབུས་སུ་ཆོས་འབྱུང་ཉིས་བརྩེགས་ཀྱི་གཟུགས་བྲི། ཆོས་འབྱུང་གི་དབུས་སུ་བཾ་བྲི། མེ་ཏོག་གཅིག་དབུས་སུ་བཞག་ལ་བསྲུང་བར་བྱ། ཨོཾ་རཀྵ་རཀྵ་ཧཱུཾ་ཧཱུཾ་ཕཊ་སྭཱ་ཧཱ། ཞེས་སོ། །དེ་ནས་སེམས་བསྐྱེད་པར་བྱའོ། །དེའི་རྗེས་ལ་མེ་ཏོག་སྔོན་མ་བླངས་
ལ་གོ་ཆའི་སྔགས་ཀྱིས་རིམ་པ་བཞིན་དུ་མེ་ཏོག་བཀྲམ། དབུས་སུ་རྡོ་རྗེ་རྣལ་འབྱོར་མའི་སྐུ་རྒྱན་ཆ་ལུགས་དང་ལྡན་པ་ཇི་ལྟ་བ་བཞིན་དུ་དམིགས་པར་བྱ། མཐའ་མ་ལྷ་མོ་དྲུག་ནི་དམར་དང་། སེར་དང་ནག་དང་སྔོ་དང་ལྗང་དང་དུད་ཀའོ། །དེ་ཡང་ཞལ་གཅིག་ཕྱག་
གཉིས་ན་རྡོ་རྗེ་གྲི་གུག་དང་ཐོད་པ་དང་ཁ་ཊྭཱཾ་ག་བསྣམས་པ། ཞབས་གཡས་བརྐྱང་གཡོན་བསྐུམ་པའི་ཚུལ་དུ་རྒྱན་དང་ལྡན་པར་དམིགས་པ་བྱ། དེའི་རྗེས་ལ་ཕྱག་འཚལ། མཆོད་པ་དབུལ། མཆོད་པའི་སྔགས་ནི། ཨོཾ་ཨཱཿཧཱུཾ། ཨརྒྷཾ་པྲ་ཏཱིཙྪ་ཧཱུཾ་སྭཱ་ཧཱ། ཨོཾ་བཛྲ་པུཥྤེ་ཨཱཿ
ཧཱུཾ་སྭཱ་ཧཱ། ཨོཾ་བཛྲ་དྷཱུ་པེ་ཨཱཿཧཱུཾ་སྭཱ་ཧཱ། ཨོཾ་བཛྲ་ཨཱ་ལོ་ཀེ་ཨཱཿཧཱུཾ་སྭཱ་ཧཱ། ཨོཾ་བཛྲ་གནྡྷེ་ཨཱཿཧཱུཾ་སྭཱ་ཧཱ། ཨོཾ་བཛྲ་ནཻ་བིདྱ་ཨཱཿཧཱུཾ་སྭཱ་ཧཱ། ཞེས་མཆོད་པ་བྱས་ལ་སྡིག་པ་བཤགས་པ་དང་། ཕྱིས་མི་བགྱིད་པའི་སྡོམ་པ་འཛིན་པ་དང་། གཞན་གྱི་དགེ་བའི་རྩ་བ་ལ་རྗེས་སུ་ཡི་རང་བ་དང་།
རང་གི་དགེ་བའི་རྩ་བ་བྱང་ཆུབ་ཏུ་བསྔོ་བ་དང་། སྐྱབས་སུ་འགྲོ་བ་དང་། ལམ་འཛིན་པ་དང་། བྱང་ཆུབ་ཏུ་སེམས་བསྐྱེད་པ་དང་། ཆོས་ཀྱི་འཁོར་ལོ་བསྐོར་བར་བསྐུལ་བ་དང་། མྱ་ངན་ལས་མི་འདའ་བར་གསོལ་བ་གདབ་པ་དང་ལུས་དབུལ་བ་ནི་ཕྱིའི་མཆོད་པའོ། །གསང་བའི་
མཆོད་པ་ནི་གོང་གི་བདུད་རྩི་ལ་སོགས་པས་རྩ་བའི་སྔགས་དང་གོ་ཆ་དང་རྐང་པ་བརྒྱད་པའི་སྔགས་ཀྱིས་མཆོད་པར་བྱའོ། །ཨོཾ་ན་མོ་བྷ་ག་བ་ཏེ་བཛྲ་བཱ་རཱ་ཧཱི། ཨཱརྱ་ཨ་པ་རཱ་ཛི་ཏེ་ཏྲཻ་ལོཀྱ་མཱ་ཏེ་མ་ཧཱ་བིདྱེ་ཤྭ་རི། སརྦ་བྷཱུ་ཏ་བྷ་ཡཱ་བ་ཧེ་མ་ཧཱ་བཛྲེ། བཛྲེ་ཨཱ་ས་ན་ཨ་ཛི་ཏེ་ཨ་པ་རཱ་ཛི་ཏེ། བ་ཤཾ་ཀ་རི་ནི་ནེ་
ཏྲ་བྷྲཱ་མ་ཎི། རོ་ཥ་ཎི་ཀྲོ་དྷེ་ཀ་རཱ་ལི་ནེ། ཏྲཱ་ས་ནི་མཱ་ར་ཎི་སུ་པྲ་བྷེ་ད་ནི་པ་རཱ་ཛ་ཡེ། བི་ཛ་ཡེ་ཛམྦྷ་ནི་སྟམྦྷ་ནི་མོ་ཧ་ནི། བཛྲ་བཱ་རཱ་ཧཱི་མ་ཧཱ་ཡོ་གི་ནཱི་ཀཱ་མེ་ཤྭ་རི་ཁ་གེ །པྲོ་ཏཾ་གེ །པྲོ་ཏཾ་གེ །ཧ་ན་ཧ་ན། པྲཱ་ཎཱ་ན། ཀིང་ཀི་ཎཱི་ཁིང་ཁི་ནི། དྷུ་ན་དྷུ་ན། བཛྲ་ཧ་སྟེ། ཤོ་ཥ་ཡ་ཤོ་ཥ་ཡ། བཛྲ་ཀ་པཱ་ལ་ཁ་ཊྭཱཾ་ག་དྷཱ་རི་ཎི།

མ་ཧཱ་བི་ཤི་ཏ་མཱཾ་སཱ་ས་ནི། མ་ནུ་ཥ་ཨནྟྲ་པྲཱ་བྲྀ་ཏེ། སཱནྣི་དྷྱ་ན་ར་ཤི་རོ། །མཱ་ལ་གྲནྠི་ཏ་དྷཱ་རི་ནི། སུམྦྷ་ནི་སུམྦྷེ། ཧ་ན་ཧ་ན་སཱ་པཱ་ཎཾ། སརྦ་པཱ་པ་སཏྭཱ་ནཱཾ། སརྦ་པ་ཤུ་ནཱཾ། མ་ཧཱ་མཱཾ་ས། ཙྪེ་ད་ནི་ཀྲོ་དྷ་མཱུ་རྟི། དཾཥྚྲཱ་ཀ་རཱ་སི་ནི། མ་ཧཱ་མུ་དྲེ། ཤྲཱི་ཧེ་རུ་ཀ་དེ་བ་སྱ། ཨ་གྲ་ས་མ་ཧི་ཥཱི། ས་ཧ་སྲ་ཤེ་རེ། ས་ཧ་ས་
བྷ་ཧ་བེ། ས་ཏ་ས་ཧ་སྲ་ན་ནེ། ཛྭ་ལི་ཏ་ཏེ་ཛ་སྱ། ཛྭ་ལ་མུ་ཁི། པིངྒ་ལ་ལོ་ཙ་ནི། བཛྲ་ས་རཱི་རེ། བཛྲ་ཨཱ་ས་ནེ། མི་ལི་མི་ལི། ཏི་མི་ལི་ཏི་མི་ལི། ཧེ་ཧེ་ཧཱུཾ་ཧཱུཾ། ཁ་ཁ། དྷུ་རུ་དྷུ་རུ་དྷུ་རུ་དྷུ་རུ། མུ་རུ་མུ་རུ། ཨ་དྭེ་ཏེ། མ་ཧཱ་ཡོ་གི་ནཱི། པ་ཥི་ཏ། སིདྡྷེ་དྲེཾ་དྷཾ་དྲེཾ་དྷཾ། གྲཾ་གྲཾ། ཧེ་ཧེ་ཧ་ཧ། བྷི་མེ་ཧ་ས་ཧ་ས། བཱི་ར་ཧཱ་ཧཱ། ཧོ་ཧོ་ཧཱུཾ་ཧཱུཾ། ཏྲཻ་ལོ་ཀྱ་བི་ནཱ་ཤ་
ནི། ཤ་ཏ་ས་ཧ་སྲ་ཀོ་ཊི་ཏ་ཐཱ་ག་ཏ་པ་རི་ཝཱ་རེ། ཧཱུཾ་ཧཱུཾ་ཕཊ། སིཾ་ཧ་རཱུ་པེ་ཁཿག་ཛ་རཱུ་པེ་གཿཏྲཻ་ལོ་ཀྱ་ད་རི། ས་མུ་དྲ་མེ་ཁ་ལེ་གྲ་ས་གྲ་ས། ཧཱུཾ་ཧཱུཾ་ཕཊ། བཱི་ར་ཨ་དྲཻ་ཏེ་ཧཱུཾ་ཧཱུཾ་ཕཊ། ཧ་ཧ་མ་ཧཱ་པ་ཤུ། མོ་ཧ་ནི་ཡོ་གཱི་ཤྭ་རི་ཏྭཾ་བཛྲ་ཌཱ་ཀི་ནཱི། སརྦ་ལོ་ཀཱ་ནཱཾ་བནྡྷ་ནི་སདྱ་པྲཏྱ་ཡ་ཀ་རི་ཎི། ཧཱུཾ་ཧཱུཾ་ཕཊ། བྷཱུ་ཏ་ཏྲཱ་ས་ནི། མ་ཧཱ་བཱི་རཻ་བ་ར་མ་སིདྡྷི་ཡོ་གཱི་ཤྭ་རཱི་ཧཱུཾ་ཧཱུཾ་ཕཊ་སྭཱ་ཧཱ།
ལྷ་མོའི་ཕྲེང་བའི་སྔགས་རིང་འདི་ནི་རྐང་པ་བརྒྱད་པ་མཆོད་པའི་སྔགས་སོ། །སྔགས་འདིས་མཆོད་པ་བྱས་ནས། དེའི་རྗེས་ལ་ཚངས་པའི་གནས་བཞི་བསྒོམ་པར་བྱ་སྟེ། དང་པོ་སེམས་ཅན་གྱི་དོན་དུ་བསྐུལ་བ་ནི་བྱམས་པའོ། །དེ་ནས་འཁོར་གྱི་ལྷ་མོ་རྣམས་ཁམས་གསུམ་གྱི་སེམས་ཅན་གྱི་དོན་དུ་སྤྲོས་ཏེ།
སེམས་ཅན་ཐམས་ཅད་སྡུག་བསྔལ་དང་བྲལ་བར་བྱས་ནས་ཐར་པ་མྱ་ངན་ལས་འདས་པ་ལ་བཀོད་པ་ནི་སྙིང་རྗེའོ། །དེ་ནས་ལྷ་མོ་རྣམས་ཀྱིས་ཁམས་གསུམ་གྱི་སེམས་ཅན་ཐམས་ཅད་འཁོར་ལོ་བདེ་མཆོག་གི་གོ་འཕང་ཐོབ་པར་བྱས་ནས་གདན་ལ་བྱོན་པ་ནི་དགའ་བའོ། །དེ་ནས་ལྷ་མོ་དེ་རྣམས་གཙོ་མོ་ལ་འདུས་
གཙོ་མོ་ནི་ས་བོན་ལ་འདུས། ས་བོན་དེ་ཉིད་རྣལ་འབྱོར་པ་ལ་འདུས་སོ། །དེའི་རྗེས་ལ་དག་པ་རྣམ་པ་གསུམ་བསྒོམ་པར་བྱའོ། །ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ། ཆོས་ཐམས་ཅད་རང་བཞིན་གྱིས་རྣམ་པར་དག་པའོ། །ཨོཾ་ཡོ་ག་ཤུདྡྷཿསརྦ་དྷརྨཱ་ཡོ་ག་ཤུདྡྷོ྅ཧཾ། རྣལ་འབྱོར་རང་བཞིན་གྱིས་
རྣམ་པར་དག་པའོ། །ཨོཾ་བཛྲ་ཤུདྡྷཿསརྦ་དྷརྨཱ་བཛྲ་ཤུདྡྷོ྅ཧཾ། རྡོ་རྗེ་རང་བཞིན་གྱིས་རྣམ་པར་དག་པའོ། །དེ་ལྟར་དག་པ་གསུམ་བསྒོམ་པ་ནི་བཏང་སྙོམས་ཏེ། རྒྱུ་བསོད་ནམས་ཀྱི་ཚོགས་ལ་འབྲས་བུ་ཡེ་ཤེས་ཀྱི་ཚོགས་ཀྱི་རྒྱས་བཏབ་པ་ཞེས་བྱའོ། །དེ་རྗེས་སྟོང་ཉིད་བདག་ཉིད་ལས། །ཆོས་འབྱུང་ཕྱག་རྒྱ་

བསྒོམ་པར་བྱ། དེའི་དཀྱིལ་དུ་བཾ་ཡོངས་སུ་གྱུར་པ་ལས། རྡོ་རྗེ་ཕག་མོ་བསྒོམ་པར་བྱ། དམ་ཚིག་སེམས་དཔའ་གསལ་ནས་ནི། །དམ་ཚིག་སེམས་དཔའི་ལྟེ་བ་རུ། །ཆོས་འབྱུང་ཉིས་བརྩེགས་བསྒོམ་པར་བྱ། །དེ་དཀྱིལ་ས་བོན་ཡི་གེ་ལས། །འོད་ཟེར་རྣམས་ནི་འཕྲོ་བར་བསམ། །ཡེ་ཤེས་འཁོར་ལོ་
སྤྱན་དྲངས་ལ། །མདུན་གྱི་ནམ་མཁར་བསྒོམ་པར་བྱ། །དམ་ཚིག་སེམས་དཔའི་སྐུ་ལས་ནི། །ལྷ་མོ་དྲུག་པོ་སྤྲོས་པ་ཡིས། །ཡེ་ཤེས་འཁོར་ལོས་དབང་བསྐུར་ནས། །མཆོད་པ་རྣམས་ནི་དབུལ་བར་བསམ། །དེ་རྗེས་ལྷ་མོ་རྣམས་ནི་ཚུར་འདུས་ནས། །ཡེ་ཤེས་འཁོར་ལོ་གཞུག་པར་
བྱ། །ཛཿཞེས་བྱ་བས་དགུག་ཧཱུཾ་གིས་གཞུག །བཾ་གྱིས་བཅིང་། ཧོཿས་མཉེས་པར་བྱ། ཡེ་ཤེས་འཁོར་ལོ་བཅུག་རྗེས་ནི། །མེ་དང་མེ་ནི་བསྲེས་པའམ། །ཆུ་དང་ཆུ་ནི་བསྲེས་པ་བཞིན། །དེ་ཡི་བདག་ཉིད་བསྒོམ་པར་བྱ། །དེ་རྗེས་ཕྱི་ཡི་རིམ་པ་ནི། །གསལ་བར་ཡོངས་སུ་བསྒོམ་པར་བྱ། །གནས་གསུམ་པ་
ནི་ལྷག་གིས་གསལ་བར་བསྒོམ། །སྲིན་པོའི་ལམ་ནི་ཅུང་ཞིག་བསྡམས། །ཆོས་སྐུའི་ངོ་བོ་ཉིད་ནི་འོད་ཞུ་བས། །བདེ་བ་ཆེན་པོས་ཡོངས་སུ་གང་། །དེ་ཚེ་བདེ་སྟོང་ཟུང་འཇུག་གིས། །ཁམས་གསུམ་པ་ནི་རོ་གཅིག་པ། །ཕྱག་རྒྱ་ཆེན་པོ་མ་ལུས་དོན། །གསལ་བར་ཡོངས་སུ་བསྒོམ་པར་བྱ། །མཐར་ཐུག་འབྲས་བུ་
ཐོབ་པར་འགྱུར། །མཉམ་པར་གཞག་པའི་ཤེས་པའོ། །རྗེས་ཐོབ་བདེ་སྟོང་གཉིས་ཀྱི་ངང་ཉིད་ལས། །རྟོག་བྲལ་ལོངས་སྤྱོད་སྐུ་ནི་གསལ་བར་བསྒོམ། །དེ་རྗེས་དོ་ལི་ལྟར་ནི་བཟླས་པར་བྱ། །བཏུ་ཡིག་རྣམས་ཀྱིས་སྔགས་རྣམས་དག་པར་བྱ། །བཟླས་པའི་སྔགས་ནི་སྐུ་གསུང་ཐུགས་ཀྱི་བཟླ། །སྐུ་གསུམ་
ཕྱག་རྒྱ་རྒྱན་དང་གདན་བཅས་པ། །དེ་རྣམས་རྣམ་པར་དག་པའི་རིམ་པ་ནི། །གཞན་དོན་བླ་མའི་ཞལ་ལས་ཤེས་པར་བྱ། །དེ་རྗེས་གཏོར་མ་ལ་སོགས་བྱ་བ་ནི། །སྣོད་ནི་ཡོངས་སུ་དག་པ་ལས། །ཀ་པཱ་ལའམ་རིན་ཆེན་སྣོད། །ཤ་ལྔ་དང་ནི་བདུད་རྩི་ལྔ། །དེ་རྣམས་ཀྱི་ནི་ས་བོན་ནོ། །གོ་ཀུ་ད་ཧ་ན། བྷྲཱུཾ་ཨཱཾ་
ཛྲཱིཾ་ཁཾ་ཧཱུཾ། དེ་ནས་མེ་རླུང་སྦྱོར་བ་བྱ། །ཡཾ་ལས་རླུང་གི་འཁོར་ལོ། རཾ་ལས་མེའི་དཀྱིལ་འཁོར་ཀཾ་ལས་ཐོད་པ་གསུམ། ཨ་ལས་ཀ་པཱ་ལ། དེའི་ནང་དུ་གོང་གི་ཡི་གེ་རྣམས་ནི་བསམ། དེའི་སྟེང་དུ་ཁ་ཊྭཱཾ་ག་མགོ་ཐུར་དུ་བལྟ་བ། ཡུ་བ་ལ་ཨོཾ་རྐེད་པ་ལ་ཨཱཿརྩེ་མོ་ལ་ཧཱུཾ། དེ་རྣམས་ཁ་སྦྱོར་ཡི་གེ་བསྒོམ་པར་བྱ། །དེ་རྗེས་དེ་རྣམས་

སྦྱངས་ནས་ནི། །ཡེ་ཤེས་བདུད་རྩིའི་བདག་ཉིད་བསྒོམ་པར་བྱ། །ཟླ་བའི་དཀྱིལ་འཁོར་ཁ་ལེབ་བྱས་ནས་ནི། །འཇིག་རྟེན་འཇིག་རྟེན་ལས་འདས་པའི། །མགྲོན་རྣམས་སྤྱན་ནི་དྲང་བར་བྱ། །ལྕེ་ལ་རྡོ་རྗེའི་སྦུ་གུ་བསམ། །ཟླ་བའི་དཀྱིལ་འཁོར་བཙལ་ནས་ནི། །ཡེ་ཤེས་བདུད་རྩི་གསོལ་བར་བསམ། །
འཇིག་རྟེན་འདས་པས་གསོལ་རྗེས་ལ། །འཇིག་རྟེན་པ་ལ་དབུལ་བར་བྱ། །དེ་རྗེས་གནས་སྐྱོང་འབྱུང་པོ་རྣམས་ལ་སྦྱིན། །འདོད་པའི་དོན་རྣམས་བསྒྲུབ་དོན་དུ། །དེ་རྣམས་ལ་ནི་གསོལ་བ་གདབ། །དེ་ནས་རྣལ་འབྱོར་མའི་ཡི་གེ་བརྒྱ་པས། །མགྲོན་རྣམས་གཤེགས་སུ་གསོལ་བར་བྱ། །གཏོར་མའི་སྔགས་ནི།
འདི་ལྟ་སྟེ། ཨོཾ་བཛྲ་ཨ་རལླི་ཧོ། ཛཿཧཱུཾ་བཾ་ཧོཿབཛྲ་ཌཱ་ཀི་ནྱཱ། ས་མ་ཡ་སྟྭཾ་དྲྀ་ཤྱ་ཧོ། །རྡོ་རྗེ་ཐལ་མོ་ཁ་གྱེན་དུ་ཕྱེ་ལ་ནམ་ཕྱེད་ན་གཏོར་མ་སྦྱིན་ནོ། །ཨོཾ་ཁ་ཁ་ཁཱ་ཧི་ཁཱ་ཧི། སརྦ་ཡཀྵ་རཱཀྵ་ས་བྷཱུ་ཏ་པྲེ་ཏ་པི་ཤཱ་ཙ་ཨུན་མཱ་ད། ཨ་པ་སྨཱ་ར་ཌཱ་ཀ་ཌཱ་ཀི་ནྱ། ད་ཡ་ཨི་དཾ་བ་ལིཾ། གྲྀཧྞནྟུ་ས་མ་ཡཾ་རཀྵནྟུ། སརྦ་སིདྡྷི་མྨེ་པྲ་ཡཙྪ་ཐཱ། ཡ་ཐཻ་བཾ་
ཡ་ཐེཥྚཾ་བྷུཉྫ་ཐ། པི་པ་ཐ་མཱ་ཏི་ཀྲ་མ་ཐ། མ་མ་སརྦ་ཀ་ར། སཏྶུ་ཁ་བྲི་བྲྀདྡྷ་ཡེ། ས་ཧཱ་ཡི་ཀ་བྷ་ཝཾ་ཏུ་ཧཱུཾ་ཕཊ་ཕཊ་སྭཱ་ཧཱ། གཏོར་མའི་སྔགས་སོ། །ཨོཾ་བཛྲ་ཡོ་གི་ནཱི་ས་ཏྭ་ས་མ་ཡ། མ་ནུ་པཱ་ལ་ཡ་བཛྲ་ཡོ་གཱི་ནཱི་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་པོ་ཥྱོ་མེ་བྷ་བ། སུ་ཏོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སརྦ་སིདྷི་མྨེ་པྲ་ཡཙྪ། སརྦ་ཀརྨཱ་སུ་
ཙ་མེ་ཙིཏྟཾ་ཤྲི་ཡཿཀུ་རུ་ཧཱུཾ་ཧ་ཧ་ཧ་ཧ་ཧོཿབྷ་ག་བཱན་སརྦ་ཏ་ཐཱ་ག་ཏ་བཛྲ་ཡོ་གི་ནཱི་མཱ་མེ་མུཉྩ། བཛྲི་བྷ་བ་མ་ཧཱ་ས་མ་ཡ་སཏྭ་ཨཱཿརྡོ་རྗེ་རྣལ་འབྱོར་མའི་ཡི་གེ་བརྒྱ་པའོ། །རྡོ་རྗེ་རྣལ་འབྱོར་མའི་སྒྲུབ་ཐབས། སློབ་དཔོན་ཆེན་པོ་ཛཱ་ལནྡྷ་ར་བས་མཛད་པ་རྫོགས་སོ།། ༄༅༅། །རྒྱ་གར་སྐད་དུ། བཛྲ་བཱ་རཱ་ཧཱི་སཱ་དྷ་
ནཾ། བོད་སྐད་དུ། རྡོ་རྗེ་ཕག་མོའི་སྒྲུབ་ཐབས། དཔལ་རྡོ་རྗེ་རྣལ་འབྱོར་མ་ལ་ཕྱག་འཚལ་ལོ། །བདེ་བ་དམ་པ་རྒྱུན་གྱི་རྒྱུ། །རྡོ་རྗེ་ཕག་མོ་ལ་བཏུད་དེ། །དེ་ཡི་སྒྲུབ་ཐབས་དྲག་པོ་ནི། །མདོར་བསྡུས་པ་ནི་བརྩམ་པར་བྱ། །མཾ་ལས་ཉི་མ་ལ་གནས་པའི་ཧྲཱིཿདཀར་པོའི་འོད་ཟེར་ཐོན་ནས་རབ་ཏུ་གཏུམ་
མོ་ལ་སོགས་པ་འཁོར་ལོ་གསུམ་གྱི་ལྷ་མོ་རྣམས་དང་། རྡོ་རྗེ་ཕག་མོ་ལ་སོགས་པ་ཡང་དག་པར་མཆོད་དེ། ངོ་བོ་ཉིད་ཀྱིས་ཡང་དག་པར་མོས་པས་སྟོང་པ་ཉིད་ལ་སོགས་པའི་སྔོན་དུ་འགྲོ་བས་པདྨ་དམར་པོའི་སྟེང་དུ་མཾ་ལས་བྱུང་བའི་ཉི་མ་ལ་ཧཱུཾ་དཀར་པོ་ལས་སྐྱེས་པའི་རྡོ་རྗེ་དཀར་པོ་རྩེ་

ལྔ་པ་ལས་སྐྱེས་པའི་རྡོ་རྗེ་ཕག་མོ་སྤྱན་གསུམ་དམར་བ། ཞལ་མཚེ་བ་གཙིགས་པ། སྐྲ་གྲོལ་བ། རྡོ་རྗེ་ཕྲེང་བ་གཉིས་ཀྱི་བར་དུ་ཐོད་པའི་ཕྲེང་བ་འཛིན་པ། ཕྱག་རྒྱ་ལྔས་རྒྱས་བཏབ་པ། ཕྱག་གཡས་པ་ན་རྡོ་རྗེ་བསྣམས་པ། གཡོན་ན་ཐོད་པ་དང་ཁ་ཊྭཱཾ་ག་བསྣམས་པ། གཡས་བརྐྱང་
བས་བཞུགས་པ། གཅེར་བུ་ལྷ་དང་མི་དང་ལྷ་མ་ཡིན་རྣམས་འཇིགས་པར་མཛད་པ། འོད་ཟེར་མཐའ་ཡས་པ་འཕྲོ་བའི་ཧྲཱིཿཉི་མ་ལ་གནས་པས་སྙིང་གར་བྱིན་གྱིས་བརླབས་པའི་རྡོ་རྗེ་ཕག་མོར་བདག་ཉིད་བསྒོམ་པར་བྱའོ། །རང་གི་སྔགས་ཀྱི་འོད་ཟེར་གྱིས་ཡེ་ཤེས་ཀྱི་འཁོར་ལོ་བཀུག་
སྟེ་དེ་ཆོ་ག་བཞིན་དུ་བཅུག་སྟེ། ཨོཾ་ཡོ་ག་ཤུདྡྷཿསརྦ་དྷརྨཱ་ཡོ་ག་ཤུདྡྷོ྅ཧཾ། དེའི་འོད་ཟེར་གྱིས་དེ་བཞིན་གཤེགས་པ་ཐམས་ཅད་བཀུག་ནས་དབང་བསྐུར་བས་སྤྱི་བོར་མི་བསྐྱོད་པར་གྱུར་པར་བལྟའོ། །རབ་ཏུ་གཏུམ་མོ་ལ་སོགས་པས་བདག་ཉིད་ལ་མཆོད་ནས་བདུད་རྩི་མྱང་བར་བྱ་སྟེ། ལྟེ་བར་
སྣ་ཚོགས་པདྨ་ལ་ཉི་མ་དམར་པོ་ལ་ཧྲཱིཿདཀར་པོ་ཕྲེང་བའི་རྣམ་པ་ལྟ་བུར་སྔ