Kinh tạng Tây Tạng (Kangyur Đại Học) — 095_རྒྱུད་འབུམ།_ཛ

ཉུག་པར་བྱེད་ཅིང་མྱུར་དུ་ཆགས་པ་བྱས་ན་ཆུང་མར་འགྱུར་ཞིང་། དོང་ཙེ་བརྒྱད་དང་། གོས་ཟུང་གཅིག་
སྟེར་བར་བྱེད་དོ། །ཆུ་བོའི་འགྲམ་དུ་སོང་ནས་ཁྲི་བཟླས་ནས། ཡང་མཚན་ཐོག་ཐག་བཟླས་ན། ཐོ་རངས་ངེས་པར་འོང་ངོ་། །འོངས་ནས་ཆུང་མར་འགྱུར་ཞིང་། ཉི་མ་རེ་རེ་ཞིང་དོང་ཙེ་ལྔ་ལྔ་སྟེར་བར་བྱེད་དོ། །མཚན་མོ་ཆུ་བོ་འདུས་པའི་འགྲམ་དུ་སྟོང་ཕྲག་བརྒྱད་བཟླས་

ན་བཟླས་པའི་མཐའ་ལ་ངེས་པར་འོང་ཞིང་ལྟ་བར་བྱེད་དོ། །ཉི་མ་གཉིས་པ་ལ་མདུན་དུ་འདུག་ཅིང་གཏམ་སྨྲ་བར་བྱེད་དོ། །ཉི་མ་གསུམ་པ་ལ་ཆགས་པ་སྤྱད་ན་ངེས་པར་འགྲུབ་ཅིང་། ཆུང་མའི་ལས་ཐམས་ཅད་བྱེད་ལ། དོང་ཙེ་བརྒྱད་དང་། རས་ཕྲུགས་གཅིག་
སྟེར་བར་བྱེད་དོ། །ཉིན་གཅིག་བཞིན་དུ་རིའི་རྩེ་མོར་ཤ་ཟ་ཞིང་ཁྲི་ཁྲི་བཟླས་ན། ལྷ་མོའི་གཟུགས་ཀྱིས་མྱུར་དུ་འོངས་ཤིང་མདུན་དུ་སྡོད་དོ། །འཁྱུད་ཅིང་འོ་བྱས་ཏེ་མི་སྨྲ་བས་ཆགས་པ་བྱས་ན་ཆུང་མར་འགྱུར་ཏེ། དོང་ཙེ་བརྒྱད་སྟོང་སྟེར་ཞིང་ལྷས་མངོན་པར་འདོད་པའི་བཟའ་
བ་སྟེར་བར་བྱེད་དོ། །འབྱུང་པོ་འདུལ་བའི་རྒྱུད་ཀྱི་རྒྱལ་པོ་ཆེན་པོ་ལས། མིའམ་ཅིའི་བུ་མོ་སྒྲུབ་པའི་ཐབས་ཀྱི་ཆོ་ག་རྒྱས་པའི་ལེའུའོ།། །།དེ་ནས་གསང་བའི་བདག་པོ་ཕྱག་ན་རྡོ་རྗེས་འདི་སྐད་ཅེས་བཀའ་སྩལ་ཏོ། །དབང་ཕྱུག་ཆེན་པོ་ལྷ་ཆེན་པོ་ཁྱོད་ཉོན་ཅིག་
འཇིག་རྟེན་གསུམ་གྱི་བདག་པོ་ལྷ་རྣམས་ཀྱིས་འདའ་བར་བྱ་བ་མ་ཡིན་པ། མངག་གཞུག་མ་ལུས་པ་སྒྲུབ་པར་བྱེད་པ། མ་རུངས་པ་རྣམས་དང་ལྷ་རྣམས་ལ་བསྟན་པར་བྱའོ། །དེ་ནས་དབང་ཕྱུག་ཆེན་པོ་ལྷ་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་
མི་ཕྱེད་པ་བསྟན་པ། འཇིག་རྟེན་གསུམ་གྱི་ལྷ་རྣམས་ཀྱིས་འདའ་བར་བྱ་བ་མ་ཡིན་པ། སྒྲུབ་པའི་ཐབས་ཀྱི་ཆོ་ག་རྒྱས་པའི་ལེའུ་དང་། ཕྱག་རྒྱ་དང་། སྔགས་ཀྱི་རིམ་པར་ཕྱེ་བ་བཤད་དུ་གསོལ། དེ་ནས་འཁོར་གྱི་དཀྱིལ་འཁོར་དེ་ན་གནས་པ་རྣམས་ཀྱིས། ལྷ་
ཆེན་པོ་ལེགས་སོ་ཞེས་བྱ་བ་བྱིན་ཏེ། ཤིན་ཏུ་གདུལ་དཀའ་བ་རྣམས་འདུལ་བར་བྱེད་པ། གསོལ་བ་བཏབ་པ་ནི་ལེགས་སོ་ལེགས་སོ། །དེ་ནས་རྡོ་རྗེ་འཆང་། ཁྲོ་བོའི་བདག་པོ་ཆེན་པོས་འདི་སྐད་ཅེས་གསུངས་སོ། །ཁྲོ་བོའི་དཀྱིལ་འཁོར་དམ་པ་ནི། །
གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་རྣམ་པར་བརྒྱན། །ཆ་རྣམས་བཅུ་དྲུག་དག་དང་ལྡན། །རྡོ་རྗེ་ར་བས་མཛེས་པའོ། །དེ་ཡི་དབུས་སུ་དྲག་པོ་ཆེ། །རྡོ་རྗེ་ཁྲོ་བོ་དགོད་བྱ་བ། །འབར་བའི་ཕྲེང་བ་འཁྲུག་ཅིང་གསལ། །བསྐལ་པ་ཐ་མའི་མེ་འོད་

འདྲ། །ལྷ་ཆེན་མིག་སྨན་སྦྱར་འདྲ་ཞིང་། །ཐོད་པའི་ཕྲེང་བས་རྒྱན་དུ་བྱས། །དྲག་ཤུལ་བཞད་ཅིང་ཆེར་འཇིགས་པ། །འཇིག་རྟེན་གསུམ་པོ་འཇིགས་མཛད་པའོ། །བཅོམ་ལྡན་འདས་ཀྱི་གཡས་ལོགས་སུ། །ལྷ་ཆེན་པོ་ནི་བྲི་བྱ་སྟེ། །བ་ཞོ་མུ་ཏིག་ལྟར་དཀར་ཞིང་། །དེ་
བཞིན་དཀར་པོ་དུང་འདྲ་ཞིང་། །མིག་གསུམ་ལག་པ་བཞི་པ་སྟེ། །ཞི་ཞིང་ལག་པ་གཡོན་པ་ན། མདུང་རྩེ་གསུམ་པ་ཐོགས་པའོ། །གཡོན་པའི་ཕྱོགས་ཀྱི་ཆ་རུ་ནི། །སྲེད་མེད་བུ་ནི་བྲི་བྱ་སྟེ། །གཡས་པ་ན་ནི་རྔ་ཡབ་དུང་། །གཡོན་ན་འཁོར་ལོ་གསལ་ཤིང་ངོ་། །རྒྱབ་
ཏུ་བརྒྱ་བྱིན་རྒྱལ་པོ་སྟེ། །དེ་བཞིན་སྨིན་དྲུག་མདུན་དུའོ། །ཚངས་པ་ལག་ན་གདུགས་འཛིན་པ། །ཁ་བ་མེ་ཏོག་ཀུནྡ་དང་། །ཟླ་འདྲ་བརྒྱ་བྱིན་མདུན་བྲི་སྟེ། །རང་གི་སྟན་ལ་འཁོད་པར་རོ། །ཡང་ན་སྔགས་པས་མུ་ཏིག་དང་། །བ་ཡི་ཞོ་འདྲ་དཀར་པོ་ནི། །རྔ་ཡབ་ཐོགས་པར་
སྨིན་དྲུག་བྲི། །ཚངས་པ་ཁ་དོག་དམར་པོ་བྲི། །བརྒྱ་བྱིན་ཁ་དོག་སེར་པོ་བྲི། །རྒྱན་ཀུན་གྱིས་ནི་རྣམ་སྤྲས་ཤིང་། །རྔ་ཡབ་ཐོགས་པར་ཁྱབ་འཇུག་བྲི། །དེ་བཞིན་ཁྱུ་མཆོག་ལ་ཞོན་པར། །ལྷ་ཆེན་པོ་ནི་བྲི་བྱ་སྟེ། །ཀུན་བགེད་ལག་ན་འཁོར་ལོ་ཅན། །ངང་པ་ལ་ཞོན་བྲི་བར་བྱ། །
བརྒྱ་བྱིན་གླང་ཆེན་ཞོན་པ་སྟེ། །སྨིན་དྲུག་རྨ་བྱ་ལ་ཞོན་པའོ། །ཕྱི་རོལ་དང་ནི་གྲྭ་རྣམས་སུ། །འབྱུང་མོ་བརྒྱད་ནི་བྲི་བར་བར་བྱ། །པདྨ་ཅན་དང་པད་ཆེན་དང་། །རྣམ་འབྱུང་མ་དང་ལྷ་འཇོམས་མ། །འཕྲོག་མ་མཆོག་དང་རིན་པོ་ཆེ། །རྒྱན་མ་འགྲོ་བ་སྐྱོང་མ་རྣམས། །དཔལ་གྱི་སྒྲ་ཡིས་
ར་བ་གྲགས་པའི། །འབྱུང་མོ་ཆེན་མོ་བརྒྱད་པོ་སྟེ། །པདྨ་ཅན་དང་པད་ཆེན་མ། །པདྨ་དཀར་པོ་ལྟ་བུར་བྲི། །རྣམ་འབྱུང་མ་དང་ལྷ་འཇོམས་མ། །ཁ་དོག་དམར་པོ་བྲི་བར་བྱ། །འབྱུང་མོ་བཞི་རྣམས་མཚུངས་པར་ནི། །གསེར་གྱི་མདོག་ཏུ་བྲི་བར་བྱ། །རྫུ་འཕྲུལ་ཆེ་ལྡན་འབྱུང་
མོ་བརྒྱད། །ཇི་ལྟར་བསྟན་བཞིན་དེ་ལེགས་བྲི། །དེ་ནས་འདིར་དཀྱིལ་འཁོར་གྱི་ཆོ་ག་བཤད་པ། རྡོ་རྗེ་སློབ་དཔོན་བདག་ཉིད་མེ་ཏོག་སྔོན་པོའི་ཕྲེང་བས་བརྒྱན་ཅིང་གཙུག་ཏོར་སྔོན་པོ་བཅིངས་ནས་རས་སྔོན་པོ་ཟུང་གཅིག་བགོས་ཏེ་སྔོན་བཞིན་དུ་ཁྲོ་བོའི་སྙིང་པོ་འདི་བརྗོད་པར་བྱ་སྟེ། སེམས་

ཅན་ཀུན་ལ་ཕན་དོན་དུ། །མྱུར་དུ་དངོས་གྲུབ་སྦྱིན་མཛད་པ། །གྲུབ་པའི་རྡོ་རྗེ་ཁྲོ་བོ་སྟེ། །ལྷ་ཉིད་དམ་ཚིག་ལ་བཞུགས་ཤིག །ཨོྃ་ཧཱུྃ་བཛྲ་ཕཊ་ས། འདི་བརྗོད་པ་ཙམ་གྱིས་ལྷ་ཐམས་ཅད་གྲུབ་པར་བྱེད་དོ། །དེ་ནས་འདིར་རྡོ་རྗེ་གསོར་བ་བཤད་པ། །འདི་ལྟར་ཡི་གེ་ཧཱུྃ་ཟློས་
ཤིང་ཕྱག་ན་རྡོ་རྗེས་གསུངས་པ་ལྟར། ལྷ་ཐམས་ཅད་གཞོམ་ཞིང་ལྷའི་བུ་མོ་ཐམས་ཅད་དང་། གནོད་སྦྱིན་མོ་དང་། ཀླུ་མོ་དང་། འབྱུང་མོ་རྫུ་འཕྲུལ་ཆེན་མོ་ཅན་རྣམས་སྐད་ཅིག་དེ་ཉིད་ལ་གཞོམ་པར་བྱ་སྟེ། རྡོ་རྗེ་གསོར་བའི་སྦྱོར་བ་དང་ལྡན་པས། ཨོྃ་བཛྲ་དཱིཔྟ་མ་ཧཱ་ཀྲོ་དྷ་ཧ་ན་ད་ཧ་པ་ཙ་
མཱ་ར་ཡ་ཧཱུྃ་ཧཱུྃ་ཕཊ་ཕཊ། བརྒྱ་རྩ་བརྒྱད་བཟླས་ཏེ། སྐད་ཅིག་དེ་ཉིད་ལ་ལྷ་ཐམས་ཅད་གསོད་ཅིང་འཁྲུག་པར་བྱེད་དོ། །ཧཱུྃ་ཧཱུྃ་ཕཊ་ཕཊ། སྦྱོར་བ་འདིས་ཀྱང་ངེས་པར་སངས་རྒྱས་རྣམས་ཀྱང་ཞིག་པར་བྱེད་དོ། །དེ་ནས་སློབ་མ་གཞུག་པར་བྱ་སྟེ། ཁྲོ་བོའི་ཕྱག་རྒྱ་གོ་ཆ་བྱས་ལ་
སྔགས་འདིས་དབབ་པར་བྱའོ། །ཨོཾ་བི་ཤྱ་ཀྲོ་དྷ་ཧཱུྃ་ཧཱུྃ་ཨ་ཛྭ་ལ་མ་ལ་ཨ་ཀུ་ལ། བྷི་ཥ་ཎ་བཛྲ་ཨ། འདི་བརྗོད་པ་ཙམ་གྱིས་ཕྱི་རོལ་གྱི་དབབ་པ་དང་དགུག་པ་དང་ལྟུང་བར་བྱ་བ་རྣམས་ནུས་པར་འགྱུར་རོ། །དེ་ནས་འབྱུང་པོ་འདུལ་བའི་རྒྱུད་ཆེན་པོ་ལས་ཁྲོ་བོའི་དཀྱིལ་འཁོར་གྱི་ཆོ་ག་
རྒྱས་པར་བཤད་པ། ཨོྃ་བྷཱུ་ཤྲཱི་སིདྷ་དྷྭ་ཛ་དྷི་རི་ཧྲཱིཿ། ཁྲོ་བོའི་མདུན་དུའོ། །ཨོྃ་ཧཱུྃ་བྷྲྃ་མ་ཧཱ་པདྨ་བ་ཏི་དྷ་ནུར་བན་དྷ་རི་ཧཱུྃ། རྒྱབ་ཏུའོ། །ཨོྃ་ཧཱུྃ་བི་ཧཱུྃ་ཏི། ཨོྃ་ཀུ་ཤོ་དྷཱ་རི་ཎི་ཧཱུྃ་ཛ། ལྷོ་རུའོ། །ཧཱུྃ་བྷཱུ་སུ་ར་ཧ་རི་ཎི་ཙིནྟཱ་མ་ཎི་དྷཱ་ཛདྷཱ་ར་ཎི་སྲུྃ། གཡོན་དུའོ། །ཨོྃ་ཤྲཱི་བར་ཧ་རི་ཎི་པུཥྤ་ཧ་སྟེ་
ཧཱུྃ། མེ་ཏོག་དབང་ལྡན་གྱི་གྲྭར། ཨོྃ་ཤྲཱི་རཧྣེ་ཤྭ་རི་དྷུ་པ་ཧསྟེ་ཧཱུྃ། སྤོས་མེའི་གྲྭ་རུ་འོ། །ཨོྃ་ཤྲཱི་བྷཱུ་ཥི་ཎི་གནྡྷ་ཧ་སྟེ་ཧཱུྃ། དྲི་བདེན་བྲལ་དུའོ། །ཨོྃ་ཤྲཱི་ཛ་ག་ཏ་པཱ་ལི་ནི་ཨ་དྷི་པ་ཏི་ཧཱུྃ། མར་མེ་རླུང་དུའོ། །དེ་ནས་འབྱུང་མོ་བརྒྱད་ཀྱི་ཕྱག་རྒྱའི་ཆོ་ག་རྒྱས་པར་བཤད་པ་ཁུ་ཚུར་ཕན་ཚུན་
བཅངས་ཏེ་མཛུབ་མོ་གཉིས་བརྐྱང་བ་ནི་སེང་གེའི་རྒྱལ་མཚན་མའི་ཕྱག་རྒྱའོ། །ལག་པ་གཡོན་པ་ཁུ་ཚུར་བཅངས་ཏེ་གུང་མོ་བརྐྱང་བ་ནི་ཡིད་བཞིན་གྱི་ནོར་བུའི་རྒྱལ་མཚན་གྱི་ཕྱག་རྒྱའོ། །ཕྱག་རྒྱ་འདི་ཉིད་རྐེད་པའི་ཕྱོགས་སུ་བཞག་པ་ནི་གཞུ་དང་མདའི་ཕྱག་རྒྱའོ། ལག་པ་

གཡས་པ་ཁུ་ཚུར་བཅངས་ཏེ། མཛུབ་མོ་བརྐྱང་བ་ནས་བསྐྱིལ་བ་ནི་ལྕགས་ཀྱུའི་ཕྱག་རྒྱའོ། །ཐལ་མོ་མཉམ་པར་སྦྱར་ཏེ། མཛུབ་མོ་གཉིས་བཀུག་པ་ནི་མེ་ཏོག་གི་ཕྱག་རྒྱའོ། །སོར་མོ་རྣམས་ཕན་ཚུན་དུ་འཁྱུད་དེ་མཛུབ་མོ་གཉིས་བརྐྱང་བ་ནི་སྤོས་ཀྱི་ཕྱག་རྒྱའོ། །ལག་པ་སོ་སོར་
བརྐྱང་སྟེ། དཔུང་པའི་རྩ་བ་གཉིས་སུ་བཞག་པ་ནི་དྲིའི་ཕྱག་རྒྱའོ། །ལག་པ་གཡས་པ་ཁུ་ཚུར་བཅངས་ཏེ། གུང་མོའི་སོར་མོ་རབ་ཏུ་བརྐྱང་བ་ནི་མར་མེའི་ཕྱག་རྒྱའོ། །འབྱུང་པོ་འདུལ་བའི་རྒྱུད་ཀྱི་རྒྱལ་པོ་ཆེན་པོ་ལས་ཁྲོ་བོའི་དཀྱིལ་འཁོར་གྱི་ཆོ་ག་རྒྱས་པའི་ལེའུའོ།། །།དེ་ནས་འབྱུང་
པོ་བརྒྱད་ཀྱི་སྒྲུབ་པའི་ཐབས་ཀྱི་ཆོ་ག་རྒྱས་པར་བཤད་པ། ཨོྃ་ཧྲཱིཿཛཿ། གཞན་གྱིས་མི་ཐུབ་པའིའོ། །ཨོྃ་ཧཱུྃ་ཛཿ། རྒྱལ་བའིའོ། །ཨོྃ་ཧྲཱི་ཛཿ། རྫོགས་བྱེད་ཀྱིའོ། །ཨོྃ་བྷུྃ་ཛཿ། ཀུན་ཏུ་རྫོགས་བྱེད་ཀྱིའོ། །ཨོྃ་སྲུྃ་ཛཿ། དུར་ཁྲོད་ཀྱི་བདག་པོའིའོ། །ཨོྃ་རུ་ཛཿ། རིག་སྔགས་ཀྱི་དབང་ཕྱུག་གིའོ། །ཨོྃ་ཧྲི་ཧཱུྃ་ཛཿ། འབྱུང་པོའི་དབང་
ཕྱུག་གིའོ། །ཨོྃ་ཨྃ་ཛཿ། མངག་གཞུག་མཆོག་གིའོ། །འབྱུང་པོ་གཞན་གྱིས་མི་ཐུབ་པའི་སྒྲུབ་པའི་ཐབས་བཤད་པ། རྡོ་རྗེ་འཆང་གི་ཁྱིམ་དུ་སོང་སྟེ། སྔོན་དུ་འབུམ་བཟླས་ཏེ། སྔོན་དུ་བསྙེན་པ་བྱས་པར་འགྱུར་རོ། །དེ་ནས་ཟླ་བ་ཉ་ལ་མཆོད་པ་རྒྱ་ཆེན་པོ་བྱས་ཏེ། ཅི་ལྟར་གསུངས་
པའི་འབྲས་ཆན་དཀར་པོ་དང་། སྦྲང་རྩི་དང་ཞོ་དང་། བུ་རམ་དང་འོ་མ་དང་། ཤ་རྣམས་ཀྱིས་མཆོད་ཅིང་གུ་གུལ་གྱི་བདུག་པ་བྱིན་ནས། མཚན་ཐོག་ཐག་བཟླས་ན་ཐོ་རངས་ངེས་པར་འོང་ངོ་། །གལ་ཏེ་ངེས་པར་མ་འོངས་ན་སྐད་ཅིག་དེ་ལ་འཆིའོ། །འོངས་ན་བསྒོ་བ་དོན་མེད་པར་མི་བྱེད་
དོ། །སྒྲུབ་པ་པོས་མངག་གཞུག་གྱིས་ཤིག་ཅེས་བསྒོ་ན་དེ་ཕན་ཆད་མངག་གཞུག་གི་ལས་བྱེད་ལ་རིག་པ་འཛིན་པའི་རྒྱལ་སྲིད་སྟེར་བར་བྱེད་ཅིང་དགྲ་ཐམས་ཅད་ཚར་གཅོད་པར་བྱེད་དོ། །ཟླ་བའི་ལྷ་མོ་བླངས་ནས་སྟེར་ཞིང་རྒྱབ་ཏུ་ཞོན་ན་ལྷའི་འཇིག་རྟེན་དུ་ཡང་འཁྱེར་བར་བྱེད་དོ། །བརྒྱ་
བྱིན་ཉིད་ཀྱང་སྟེར་བར་བྱེད་ཅིང་བསྐལ་པ་བདུན་འཚོའོ། །དེ་ནས་རྒྱལ་བའི་སྒྲུབ་པའི་ཐབས་བཤད་པ། མཚན་མོ་སྦྱིན་བྱེད་མའི་མདུན་དུ་སོང་སྟེ། ཉི་མ་རེ་རེ་སྟོང་ཕྲག་བརྒྱད་བརྒྱད་བཟླས་ན་ཉི་མ་བདུན་པ་ལ་མཆོད་པ་རྒྱས་པར་བྱས་ཏེ། གཏོར་མ་སྦྱིན་ཞིང་གུ་གུལ་གྱི་བདུག་པ་བྱིན་ནས་

བཟླས་ན་བཟླས་པའི་མཐའ་ལ་ངེས་པར་འོང་སྟེ། ཀྱེ་སྒྲུབ་པ་པོས་བཀའ་ཅི་སྩལ་ཞེས་སྨྲ་བར་བྱེད་དོ། །སྒྲུབ་པ་པོས་མངག་གཞུག་གྱིས་ཤིག་ཅེས་བསྒོ་ནས་རྒྱབ་ཏུ་ཞོན་ན་གླིང་བཞི་པ་རྣམས་སུ་ཡང་ཁྱེར་བར་བྱེད་ཅིང་གཞན་ཡང་རྒྱལ་སྲིད་སྟེར་ལ་ལོ་ལྔ་སྟོང་འཚོའོ། །དེ་ནས་རྫོགས་
བྱེད་ཀྱི་སྒྲུབ་པའི་ཐབས་བཤད་པ། རྡོ་རྗེ་འཆང་གི་ཕོ་བྲང་དུ་སོང་སྟེ་ཉི་མ་བདུན་དུ་སྟོང་ཕྲག་བརྒྱད་བརྒྱད་བཟླས་ནས་ཉི་མ་བདུན་པ་ལ་མཆོད་པ་རྒྱས་པར་བྱས་ཏེ། འབྲས་ཆན་དཀར་པོ་དང་། ཞོས་ཇི་ལྟར་གསུངས་པ་ལྟར་བྱིན་ནས་ཅི་སྲིད་ནམ་ཕྱེད་ཀྱི་བར་དུ་བཟླས་ན་ནམ་ཕྱེད་ན་རང་ཉིད་འོང་
ངོ་། །འོངས་པ་ལ་མེ་ཏོག་གི་མཆོད་ཡོན་བྱིན་ན་དགའ་བར་འགྱུར་ཏེ། རྒྱལ་སྲིད་སྟེར་བར་བྱེད་དོ། །བསམ་པ་ཐམས་ཅད་ཡོངས་སུ་རྫོགས་པར་བྱེད་ཅིང་ལོ་སྟོང་འཚོའོ། །ཇི་སྲིད་འཚོ་བ་དེ་སྲིད་དུ་མངག་གཞུག་གི་ལས་བྱེད་དོ། །ཆེ་གེ་མོ་འཚོ་བར་གྱིས་ཤིག །ཆེ་གེ་མོ་སོད་ཅིག་ཅེས་སྨྲས་
ན་དེ་དག་ཐམས་ཅད་བྱེད་དོ། །ཀུན་ཏུ་རྫོགས་བྱེད་ཀྱི་སྒྲུབ་པའི་ཐབས་བཤད་པ་སྐུ་གདུང་དང་བཅས་པའི་མཆོད་རྟེན་གྱི་དྲུང་དུ་ཁྲི་བཟླས་ན་སྔོན་དུ་བསྙེན་པ་བྱས་པར་འགྱུར་རོ། །དེ་ནས་ཟླ་བ་ཉ་ལ་ཅི་ལྟར་འབྱོར་པའི་མཆོད་པ་ཆེན་པོ་བྱས་ཏེ། ཅི་སྲིད་ནམ་ཕྱེད་ཀྱི་བར་དུ་བཟླས་ན་ནམ་ཕྱེད་ན་
རིངས་པར་འོངས་ནས་མདུན་དུ་སྡོད་དོ། །ཀྱེ་སྡུག་པ་ངས་ཅི་བྱ་ཞེས་སྨྲ་བར་བྱེད་དོ། །སྒྲུབ་པ་པོས་མངག་གཞུག་གྱིས་ཤིག་ཅེས་བསྒོ་ན་དེ་ཕན་ཆད་མངག་གཞུག་གི་ལས་ཐམས་ཅད་བྱེད་དོ། །གནོད་སྦྱིན་གྱི་བུ་མོ་བཟང་མོ་བླངས་ནས་སྟེར་ཞིང་གཏེར་ཐམས་ཅད་སྟེར་ལ་ལྷས་འདོད་པའི་
བཟའ་བ་སྟེར་རོ། །ཉིན་གཅིག་བཞིན་དུ་རས་དམར་པོ་ཟུང་རེ་སྟེར་ཞིང་དོང་ཙེ་ལྔ་ལྔ་སྟེར་ལ་ལོ་ལྔ་བརྒྱ་འཚོའོ། །དེ་ནས་དུར་ཁྲོད་ཀྱི་བདག་པོའི་སྒྲུབ་པའི་ཐབས་ཀྱི་ཆོ་ག་རྒྱས་པར་བཤད་པ། མཚན་མོ་དུར་ཁྲོད་དུ་སོང་སྟེ་ཉི་མ་བདུན་དུ་སྟོང་ཕྲག་བརྒྱད་བཟླས་ན་ཉི་མ་བདུན་པ་ལ་འབྱུང་
པོ་ལ་ཤ་དང་། ཉ་དང་། ཏིལ་དང་། འཛམ་བུ་ཏི་དང་། མངར་གསུམ་ཟན་གྱིས་དྲིལ་བའི་རིལ་བུ་དང་། རྟ་ཤ་ཁམ་ཚད་དུ་གཏུབས་པ་བསྲེགས་ནས་མར་ལ་རྔོས་ལ་འཛམ་བུ་ཏི་ཀ་དང་། འབྲས་ཆན་དང་། ཞོ་དང་། བུ་རམ་དང་། འོ་ཐུག་དང་། སྲན་ཚོད་དང་། སྣུམ་ཁུར་

རྣམས་ཀྱིས་ཅི་ལྟར་གསུངས་པ་བྱིན་ནས་གུ་གུལ་གྱི་བདུག་པ་ཡང་བྱིན་ཏེ། ཅི་སྲིད་ནམ་ཕྱེད་ཀྱི་བར་དུ་བཟླས་ན་ཧ་ཧ་ཞེས་བྱ་བའི་སྒྲ་ཐོས་པར་བྱེད་དེ། འཇིགས་པར་མ་བྱས་ན་རང་གི་ཚོགས་ཀྱིས་ཡོངས་སུ་བསྐོར་ཏེ་འོང་ངོ་། །འོངས་པ་ལ་གཏོར་མ་བྱིན་ན་དགའ་བར་འགྱུར་ཏེ། འབྱུང་
པོའི་མངག་གཞུག་ཐམས་ཅད་བྱེད་དོ། །ཉི་མ་རེ་རེ་དོང་ཙེ་བརྒྱད་བརྒྱད་སྟེར་ཞིང་དགྲ་ཐམས་ཅད་འཇོམས་ཏེ་ལོ་ལྔ་སྟོང་འཚོའོ། །དེ་ནས་རིགས་ཀྱི་དབང་ཕྱུག་གི་སྒྲུབ་པའི་ཐབས་བཤད་པ། ལྷའི་ཁང་པར་སོང་སྟེ། སྤོས་དམར་པོ་དང་། མེ་ཏོག་དམར་པོ་དང་། གུ་གུལ་གྱི་བདུག་པ་
སྦྱིན་ཞིང་ཁྲི་བཟླས་ན་སྔོན་དུ་བསྙེན་པ་བྱས་པར་འགྱུར་རོ། །མཚན་མོ་ནག་པོའི་ཚེས་བཅུ་བཞི་ལ་ཉ་དང་། ཤ་དང་ཏིལ་དང་འཛམ་བུ་ཏི་དང་། འབྲས་ཆན་དམར་པོས་ཇི་ལྟ་བར་སྒྲུབ་ཅིང་དུ་རུ་སྐ་དང་མེ་ཏོག་སྦྱིན་ཏེ། ཇི་སྲིད་ནམ་ཕྱེད་ཀྱི་བར་དུ་བཟླས་ན་ནམ་ཕྱེད་ན་སྣང་བ་ཆེན་པོ་དང་།
འཇིགས་པར་བྱེད་པའི་གཟུགས་ཀྱིས་འོང་སྟེ། དེ་ལ་འཇིགས་པར་མ་བྱས་ན་སྡུག་པ་ངས་ཅི་བྱ་ཞེས་སྨྲ་བར་བྱེད་དོ། །སྒྲུབ་པ་པོས་མངག་གཞུག་གྱིས་ཤིག་ཅེས་བསྒོ་ན། ཉི་མ་རེ་དུས་གསུམ་དུ་དོང་ཙེ་ལྔ་ལྔ་སྟེར་བར་བྱེད་དོ། །ལྷས་མངོན་པར་འདོད་པའི་བཟའ་བ་སྟེར་བར་བྱེད་
ཅིང་ལོ་ལྔ་སྟོང་འཚོའོ། །དེ་ནས་འབྱུང་པོའི་དབང་ཕྱུག་གི་སྒྲུབ་པའི་ཐབས་བཤད་པ། མཚན་མོ་ལིང་ཀ་གཅིག་པར་སོང་སྟེ། གཅིག་པུ་ནུབ་གསུམ་དུ་འབྲས་ཆན་དམར་པོ་དང་ཉ་དང་ཤས་གཏོར་མ་སྦྱིན་ཞིང་ར་སྐྱེས་ཀྱི་ཤ་དང་། གུ་གུལ་དང་། སྦྲང་རྩི་དང་ལྡན་པའི་བདུག་
པས་བདུག་ཅིང་སྟོང་ཕྲག་བརྒྱད་བཟླས་ན། ཉི་མ་དང་པོ་ལ་རྨི་ལམ་དུ་མཐོང་བར་བྱེད་དོ། །ཉི་མ་གཉིས་པ་ལ་རང་ཉིད་མཐོང་བར་བྱེད་དོ། །ཉི་མ་གསུམ་པ་ལ་རིངས་པར་འོངས་ཤིང་མདུན་དུ་འདུག་ནས་འདི་སྐད་སྨྲ་བར་བྱེད་དོ། །བཀའ་ཅི་སྩོལ་དེ་ནས་སྒྲུབ་པ་པོས་མངག་
གཞུག་གྱིས་ཤིག་ཅེས་བརྗོད་པར་བྱའོ། །རྟག་ཏུ་ཕྱི་བཞིན་འབྲང་བར་འགྱུར་ཞིང་རང་ཉིད་སོང་ནས་མི་ཟད་པའི་གཏེར་སྟེར་ཞིང་འདས་པ་དང་། མ་འོངས་པ་དང་། ད་ལྟར་བྱུང་བ་རྣམས་སྨྲ་བར་བྱེད་དོ། །གོས་དང་། རྒྱན་དང་། བཟའ་བ་བཟང་པོ་རྣམས་སྟེར་བར་བྱེད་ཅིང་ལོ་

ཉིས་སྟོང་འཚོ་བར་བྱེད་དོ། །དེ་ནས་ཕོ་ཉ་མཆོག་གི་སྒྲུབ་པའི་ཐབས་བཤད་པ་རྡོ་རྗེ་འཆང་གི་ཁང་པར་སོང་སྟེ། ནག་པོའི་ཚེས་བཅུ་བཞི་ལ་ཁྲི་བཟླས་ནས་ཉི་མ་བདུན་པ་ལ་བསྒྲུབ་པ་བརྩམ་པར་བྱ་སྟེ། ཙནྡན་གྱི་དཀྱིལ་འཁོར་བསྒྲུབ་པར་བྱས་ནས་གུ་གུལ་གྱི་བདུག་པ་
སྦྱིན་ཞིང་མེ་ཏོག་དཀར་པོ་དང་། འབྲས་ཅན་དཀར་པོ་དང་། མར་དང་འོ་ཐུག་སྦྱིན་ཞིང་ཀུ་ཤའི་ཁྲི་ལ་འདུག་སྟེ། མར་གྱི་མར་མེ་རབ་ཏུ་སྦར་ནས་མཚན་མོ་ཅི་སྲིད་ནམ་ཕྱེད་ཀྱི་བར་དུ་བཟླས་ན་མངག་གཞུག་མཆོག་རང་ཉིད་འོང་སྟེ། འོངས་པ་ལ་ཙནྡན་གྱི་མཆོད་ཡོན་བྱིན་ན། ཀྱེ་སྒྲུབ་པ་
པོ་བདག་གིས་ཅི་བྱ་ཞེས་སྨྲ་བར་བྱེད་དོ། །དེ་ནས་སྒྲུབ་པ་པོས་བདག་གི་མངག་གཞུག་གྱིས་ཤིག་ཅེས་བསྒོ་ན་དེ་ཕན་ཆད་མངག་གཞུག་པར་འགྱུར་ཞིང་ལྷས་མངོན་པར་འདོད་པའི་བཟའ་བ་སྟེར་རོ། །དངུལ་ཆུ་དང་བཅུད་ཀྱིས་ལེན་སྟེར་ཞིང་གཏེར་རྙེད་པར་བྱེད་ལ་རྒྱབ་ཏུ་ཞོན་ན་མཐོ་རིས་
སུ་ཡང་འཁྱེར་བར་བྱེད་ཅིང་གཞན་ཡང་རྒྱལ་སྲིད་སྟེར་བར་བྱེད་དོ། །འབྱུང་པོ་འདུལ་བའི་རྒྱུད་ཀྱི་རྒྱལ་པོ་ཆེན་པོ་ལས། མངག་གཞུག་སྒྲུབ་པའི་ཆོ་ག་རྒྱས་པའི་ལེའུའོ།། །།དེ་ནས་འདིར་ཡང་དག་པར་བཤད་པ་ནི་དངོས་གྲུབ་སྣ་ཚོགས་སྒྲུབ་པར་བྱེད་པ་སློབ་དཔོན་རྣམས་
ལ་ཕན་པའི་དོན་དུ་ཇི་ལྟར་གསུངས་པ་མངག་གཞུག་པའི་ཐབས་ཏེ། བསྟེན་པར་བྱ་བ་མ་ཡིན་པའི་ལེ་ལོ་ཅན་དང་སྡིག་པ་བྱེད་པ་དང་། བརྫུན་དུ་སྨྲ་བ་དང་། ཚུལ་འཆོས་ཅན་དང་། དབུལ་པོ་དང་། ནད་ཀྱིས་གདུངས་པ་དང་། ཚེ་ཐུང་བ་དང་སེམས་མི་བརྟན་པའི་མི་རྣམས་ཀྱང་སྤང་བར་
མི་བྱ་སྟེ། གལ་ཏེ་ལོངས་སྤྱོད་དང་ནོར་དང་གྲགས་པ་འདོད་ན་ཡང་སྐད་ཅིག་གིས་ཕུན་སུམ་ཚོགས་པར་སྟེར་རོ། །སྔགས་འདིས་དངུལ་ཆུ་དང་། བཅུད་ཀྱིས་ལེན་པའི་དངོས་གྲུབ་དང་། ལྷའི་རྒྱལ་སྲིད་ཀྱི་དངོས་གྲུབ་ཀྱང་གྲུབ་པར་བྱེད་ན་མི་རྣམས་ཀྱི་རྒྱལ་སྲིད་གྲུབ་པར་བྱེད་པ་ལྟ་སྨོས་ཀྱང་
ཅི་དགོས་ཏེ། དེ་བཞིན་དུ་འདི་ལྷའི་བུ་མོ་ཐམས་ཅད་སྐད་ཅིག་ཙམ་གྱིས་གྲུབ་པར་བྱེད་དོ། །གསང་སྔགས་འདི་ནི་བཀླགས་པས་གྲུབ་པར་བྱེད་ཅིང་ཤིན་ཏུ་བརྩོན་འགྲུས་དམན་པ་རྣམས་ལ་ཡང་ཅི་ལྟར་བདེ་བ་ལྟར་མྱུར་དུ་གྲུབ་པར་བྱེད་ཅིང་སེམས་ཅན་ཐམས་ཅད་ལ་བདེ་བ་རབ་ཏུ་སྦྱིན་པ་ཡི་གེ་

བཞི་པོ་ཆེར་གསང་བ། དངོས་གྲུབ་ཐམས་ཅད་སྟེར་བར་བྱེད་པ་བཀླགས་པ་ཙམ་གྱིས་མངོན་པར་གྲུབ་པར་བྱེད་པ་སྟེ། འདི་ལ་ཐེ་ཚོམ་མི་བྱའོ། །འབྱུང་པོ་འདུལ་བའི་རྒྱུད་ཆེན་པོ་ལས་དངོས་གྲུབ་ཀྱི་བསྒྲུབ་པའི་ཆོ་ག་རྒྱས་པའི་ལེའུའོ།། །།དེ་ནས་འབྱུང་པོ་འདུལ་བའི་རྒྱུད་ཆེན་པོ་ལས་འབྱུང་
པོ་བརྒྱད་ཀྱི་ཕྱག་རྒྱའི་མཚན་ཉིད་བཤད་པ། སོར་མོ་རྣམས་ཕན་ཚུན་འཁྱུད་དེ། གུང་མོ་བརྐྱང་ནས་ཁབ་ལྟར་བཟུང་བ་ནི་འབྱུང་པོ་ཆེན་པོ་གཞན་གྱིས་མི་ཐུབ་པའི་ཕྱག་རྒྱའོ། །ཕྱག་རྒྱ་འདི་ཉིད་གུང་མོ་བཀུག་ཅིང་མཛུབ་མོ་བརྐྱང་ནས་བཀུག་པ་ནི་རྒྱལ་བའི་ཕྱག་རྒྱའོ། །ཕྱག་རྒྱ་འདི་ཉིད་ལས་
མཛུབ་མོ་གཡོན་པ་བསྐྱིལ་ཞིང་མཐེའུ་ཆུང་བརྐྱང་སྟེ། སོ་སོར་བཟུང་བ་ནི་རྫོགས་བྱེད་ཀྱི་ཕྱག་རྒྱའོ། །སོར་མོ་ཕན་ཚུན་འཁྱུད་དེ་བཟུང་བ་ནི་ཀུན་ཏུ་རྫོགས་པར་བྱེད་པའི་ཕྱག་རྒྱའོ། །ཕྱག་རྒྱ་འདི་ཉིད་ལས་མཐེའུ་ཆུང་དང་མཐེ་བོ་ནང་དུ་བཀུག་སྟེ་བཟུང་བ་ནི་དུར་ཁྲོད་ཀྱི་བདག་པོའི་ཕྱག་རྒྱའོ། །
མཐེའུ་ཆུང་གཉིས་རབ་ཏུ་བརྐྱང་སྟེ་བཟུང་བ་ནི་རིགས་ཀྱི་དབང་ཕྱུག་གི་ཕྱག་རྒྱའོ། །ཐལ་མོ་སྦྱར་ཏེ་མཛུབ་མོ་གཉིས་བཀུག་པ་ནི་ཕོ་ཉ་མཆོག་གི་ཕྱག་རྒྱའོ། །འབྱུང་པོ་འདུལ་བའི་རྒྱུད་ཀྱི་རྒྱལ་པོ་ཆེན་པོ་ལས། འབྱུང་པོའི་རྒྱལ་པོ་ཆེན་པོ་བརྒྱད་ཀྱི་ཕྱག་རྒྱའི་མཚན་ཉིད་རྫོགས་སོ།། །།
དེ་ནས་གསང་བའི་བདག་པོ་ཕྱག་ན་རྡོ་རྗེ་ལ་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །རྡོ་རྗེ་སློབ་དཔོན་ལ་ཕན་པའི་དོན་དུ་བསྙེན་བཀུར་མའི་སྒྲུབ་པའི་ཐབས་དཔལ་ཆེན་པོ་ཞེས་བྱ་བའི་འབྱུང་མོ་རྡོ་རྗེ་སློབ་དཔོན་གྱིས་བསྒྲུབ་པར་བྱ་སྟེ། འབྱུང་མོ་རྣམས་ཀྱིས་ནི་ཡིད་ལ་དགའ་བ་སྐྱེད་
ཅིང་ཕན་ཚུན་ཚིམ་པར་བྱེད་པའོ། །དེ་ནས་འབྱུང་པོ་འདུལ་བའི་རྒྱུད་ཆེན་པོ་ལས་འབྱུང་མོ་དཔལ་ཆེན་མོའི་སྒྲུབ་པའི་ཐབས་ཀྱི་ཆོ་ག་རྒྱས་པར་བཤད་པ། དཔལ་ཁྲོ་བོའི་བདག་པོ་བཅོམ་ལྡན་འདས་ཀྱི་མདུན་དུ་འབུམ་བཟླས་ན་སྔོན་དུ་བསྙེན་པ་བྱས་པར་འགྱུར་རོ། །དེ་ནས་ཟླ་བ་ཉ་ལ་ཅི་ལྟར་
འབྱོར་པའི་མཆོད་པ་བྱས་ཏེ། གུ་གུལ་གྱི་བདུག་པ་སྦྱིན་ཞིང་མཚན་ཐོག་ཐག་བཟླས་སོ། །དེ་ནས་ཐོ་རངས་ངེས་པར་འོང་ངོ་། །འོངས་པ་ལ་ཙནྡན་གྱི་མཆོད་ཡོན་སྦྱིན་ཞིང་ལེགས་པར་འོངས་སོ་ཞེས་བརྗོད་ན་ཀྱེ་སྒྲུབ་པ་པོ་ཅི་བཀའ་སྩལ་ཅེས་སྨྲའོ། །སྒྲུབ་པ་པོས་བདག་གི་ཆུང་མ་གྱིས་

ཤིག་ཅེས་བརྗོད་ན་ལྷའི་དངུལ་ཆུ་དང་། བཅུད་ཀྱིས་ལེན་སྟེར་ཞིང་དངོས་གྲུབ་ཀྱི་རྫས་དང་གཏེར་དང་། རྒྱལ་སྲིད་རྣམས་སྟེར་བར་བྱེད་དོ། །ཞི་བའི་སྒྲུབ་པའི་ཐབས་ཀྱི་ཆོ་ག་རྒྱས་པ་དང་པོའོ།། །།དེ་ནས་གཞན་ཡང་ནན་ཏུར་གྱིས་སྒྲུབ་པའི་ཐབས་བཤད་པ།
གྲོ་བའི་འདབ་མ་ལ་འབྱུང་མོ་དཔལ་ཆེན་མོ་བྲིས་ཏེ། མཚན་མོ་གཅེར་བུར་གྱུར་པས། དཔལ་རྡོ་རྗེ་འཆང་གི་མདུན་དུ་སྟོང་ཕྲག་བརྒྱད་བཟླས་ན་མྱུར་དུ་འོང་ངོ་། །འོངས་པ་ལ་ཆགས་པ་བྱས་ན་དགའ་བར་འགྱུར་རོ། །འཇིག་རྟེན་གསུམ་གྱི་རྒྱལ་སྲིད་ཀྱང་སྟེར་བར་བྱེད་དོ། །བརྒྱ་བྱིན་ཉིད་ཀྱང་
སྟེར་རོ། །རྒྱབ་ཏུ་ཞོན་ན་མཐོ་རིས་སུ་ཡང་འཁྱེར་ཞིང་ལོ་ཁྲི་འཚོའོ། །གལ་ཏེ་མ་གྲུབ་ན་མིག་དང་སྤྱི་བོ་འགས་ཤིང་སྐམས་ཏེ་སྐད་ཅིག་དེ་ཉིད་ལ་འཆིའོ། །ཞེས་ཁྲོ་བོ་ཉིད་ཀྱིས་གསུངས་སོ། །གུར་གུམ་གྱིས་མིང་བྲིས་ཏེ་རྐང་པ་གཡོན་པས་མན་ནས་རྡོ་རྗེ་གསོར་ཞིང་ཡི་གེ་ཧཱུྃ་ཧཱུྃ་ཕཊ་ཕཊ་
ལན་བདུན་བརྗོད་ན་བརྗོད་པར་གྱུར་པས་ངེས་པར་སྐད་ཅིག་གིས་འཆི་བར་བྱེད་དོ། །འབྱུང་པོ་འདུལ་བའི་རྒྱུད་ཀྱི་རྒྱལ་པོ་ལས། སྒྲུབ་པའི་ཐབས་ཀྱི་ཆོ་ག་རྒྱས་པའོ།། །།གུ་གུལ་གྱི་བདུག་པ་སྦྱིན་ཞིང་གཏོར་མ་བཤམས་ཏེ་རས་དཀར་པོས་བཀབ་ལ། སྔགས་
འདི་ལན་གསུམ་བརྗོད་དོ། །དེ་བ་སྃ་བྷཱུ་ཏ་མ་ཧི་ཏ། པྲ་ཎི་པ་ཏཱ་ཡ། བི་བ་ཛ་ཡེད་པྲྀ་ཐག་པྲྀ་ཐག་མ་ཧཱ་བྷཱུ་ཏ། སྭ་སྠཱ་ན་མ། ཏ་ཏྲ་གཙྪ་ཏིཤྨ་ཤཱ་ནི་དེ་བ་ཨཱ་ལ་ཡེ་ཥུ་ན་དཱི་ཏ་ཏེ། ཙ་ཏུ་ཥུ་ཐེ། ཨེ་ཀ་ལིང་གེ་ཝ་དེ་བ་ཨཱ་ཡ་ཏ་ནཻ་ཝ། ཤྲཱི་གྷྲྃ་གཙྪ་ཏུ། བྷུ་ཏ་ནཱ་མ་ས་མ་ཡ་པྲ་ཏི་པཱ་ལ་ནུ་ཡ། ཡ་ཏི་ས་ཨི་བན་གཙྪ་
ཏི་ཏ་ཀྵེ་ཎ་མུར་དྷ་ནི། སུ་ལ་ཡེད། བྷཱུ་ཏཱ་ནཱཾ་རཻ་ར་ཝྃ་ན་ར་ཀཾ་པ་ཏེད། ཡ་ཐ་ཡ་ཐ། སྭ་སྠཱ་ནེ་གཙྪ་ཏུ། ཡ་ཐཱ་སུ་ཁཱི་སྭཱ་ཧཱ། རྡོ་རྗེ་སློབ་དཔོན་གྱིས་ལྷ་རྣམས་ཉེ་བར་བསྡུ་བར་བྱའོ། །འབྱུང་པོ་འདུལ་བའི་རྒྱུད་ཀྱི་རྒྱལ་པོ་ཆེན་པོ་ལས། རིམ་པར་ཕྱེ་བ་གཉིས་པ་རྫོགས་ཏེ།
འབྱུང་པོ་འདུལ་བ་ཞེས་བྱ་བའི་རྒྱུད་སྟོང་ཕྲག་བཅུ་དྲུག་པ་ལས་ཇི་སྙེད་པ་རྫོགས་སོ།། །།རྒྱ་གར་གྱི་མཁན་པོ་བུདྡྷ་ཨཱ་ཀ་ར་བ་རྨ་དང་། ལོ་ཙྪ་བ་དགེ་སློང་ཆོས་ཀྱི་ཤེས་རབ་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།

༄༅༅། །རྒྱ་གར་སྐད་དུ། ཨཱརྱ་ནཱི་ལཱཾ་བར་དྷ་ར་བཛྲ་པཱ་ཎི་ཀལྤ་ནཱ་མ་དྷཱ་ར་ཎཱི། བོད་སྐད་དུ། འཕགས་པ་ལག་ན་རྡོ་རྗེ་གོས་སྔོན་པོ་ཅན་གྱི་ཆོ་ག་ཞེས་བྱ་བའི་གཟུངས། དཀོན་མཆོག་གསུམ་ལ་ཕྱག་འཚལ་ལོ། །གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གོས་སྔོན་པོ་ཅན་སངས་
རྒྱས་གང་གཱའི་ཀླུང་གི་བྱེ་མ་སྙེད་ཀྱིས་རྗེས་སུ་གནང་བ། མཆེ་བ་གཙིགས་པ་དང་འཚམ་པ། མིག་མེ་མདག་གི་ཕུང་པོ་འདྲ་བ། དབུགས་མེ་ལྕེ་ལྟར་འབར་བ། འཇིགས་པའི་ང་རོ་ཅན། ལག་པ་དང་རྐང་པ་ཀླུ་ནོར་རྒྱས་ཀྱི་བུས་བརྒྱན་པ། ཀླུ་ནག་པོ་སེ་རལ་ཁར་ཐོགས་པ། ཀླུ་
དགའ་བོ་དང་ཉེ་དགའ་བོ་འབར་བས་རྣ་ཆ་བྱས་པ། སྦྲུལ་འབར་བ་རིན་པོ་ཆེའི་ཅོད་པན་ཐོགས་པ། སྦྲུལ་གདུག་པ་འབར་བ་ཟ་བ། བཞིན་རྒྱས་པ། སྨིན་མ་དང་དཔྲལ་བ་བསྡུས་པ། ཡ་སོས་མ་མཆུ་མནན་པ། གཤིན་རྗེའི་ཆ་བྱད་ཅན། ལྕེ་གློག་ལྟར་འགྱུ་བ་གསུས་པོ་ཆེ་སྦྲུལ་
ཟ་བ། ལག་པ་བརྡབས་པའི་སྒྲས་འཇིགས་པར་བྱེད་པ། ཀླུའི་རྒྱལ་པོ་འདབ་བཟངས་སྐ་རགས་སུ་བཅིངས་པ། ཨ་ལ་ལ་ཞེས་སྒྲོགས་པར་བྱེད་པ། རྒྱ་མཚོའི་ཟབས་སུ་དཔག་ཚད་བརྒྱད་ཁྲི་ཡོད་པས་རྐང་པའི་པུས་མོར་ཕྱིན་པ་དབང་པོ་དང་ཉི་མ་ཕྲག་པ་ལ་ཁུར་བ། ཀླུ་ཐམས་
ཅད་རླག་པར་བྱེད་པ་གད་རྒྱངས་ཆེན་པོ་དགོད་པས་ཀུན་ཏུ་འཁྲུགས་པར་བྱེད་པ། གཤིན་རྗེའི་གཟུགས་ཅན་ཁམས་གསུམ་པ་འཇིགས་པར་བྱེད་པ་ཀླུ་རྣམས་འཆིང་བར་བྱེད་པ་ལ་ཕྱག་འཚལ་ལོ། །དེ་ནས་སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་ཀྱིས་གསུངས་པའི་
རིག་སྔགས་འདི་བརྗོད་པར་བྱའོ། །ཏདྱ་ཐཱ། བྷོ་བྷོ་བཱནྣཱགཱདྷི་པ་ཏ་ཡེ། ཨི་དཾ་ནཱི་ལཱཾ་བར་དྷ་ར་ཤ་རཱི་རཾ། བཛྲ་པཱ་ཎི་ཧྲྀ་ད་ཡཾ་ཡཿ། ས་མཱ་ཏི་ཀྲ་མ་ཐ། ཨུཏྶཱ་ད་ནཾ་བྷ་བི་ཥྱ་ཏི། ཏ་དྱ་ཐཱ། བུདྡྷ་བུདྡྷ། བི་བུདྡྷ་བི་བུདྡྷ། མ་ཧི་པྲཱཔྟ། ཧ་ར་ཧ་ར་ནཱ་གཱ་ནཱཾ། པྲ་ཧ་ར་པྲ་ཧ་ར་ནཱ་གཱ་ནཱཾ། ཙྪིནྡ་ཙྪིནྡནཱག་ཧྲྀ་ད་
ཡཱ་ནི། བྷིནྡ་བྷིནྡ་ནཱ་ག་མརྨཱ་ཎི། བྷི་སཱིརྱ་ནྟུ་ནཱག་ཤ་རཱི་རཱ་ཎི། བི་སྥོ་ཊ་ཡ། ནཱག་ན་ཡ་ནཱ་ནི། ཏ་དྱ་ཐཱ་ཧཱུྃ་ཕཊ། ནཱག་བི་དཱ་ར་ཎཱ་ཡ་ཕཊ། ནཱ་གོཏྶཱ་ད་ཎཱ་ཡ་ཕཊ། ནཱི་ལཱཾ་བ་ས་ནཱ་ཡ་ཕཊ། ཨ་པྲ་ཏི་ཧ་ཏ་བ་ལ་པ་རཱ་ཀྲ་མཱ་ཡ་ཕཊ། ཀྲྀ་ཏཱནྟ་ཡ་ཕཊ། ཀྲྀ་ཏཱནྟ་རཱུ་ཕཱ་ཡ་ཕཊ། རོ་ཥཎཱ་ཡ་ཕཊ། ཏྲཱ་ས་ནཱ་

ཡ་ཕཊ། ཀུམྦྷཱཎྜོཏསཱ་ད་ནྡ་ཡ་ཕཊ། པྲེ་ཏ་པི་ཤཱ་ཙི་བི་ནཱ་ཤ་ཀ་རཱ་ཡ་ཕཊ། ཡཀྵཱ་པསྨཱར་བི་ནཱ་ས་ཀ་རཱ་ཡ་ཕཊ། ཧ་ས་ཧ་ས། དཱ་ར་དཱ་ར། མཱ་ར་ཡ་མཱ་ར་ཡ། ནཱ་ཤ་ཡ་ནཱ་ཤ་ཡ། སརྦ་བིགྷྣཾ་བི་ནཱ་ཤ་ཀ་རཱ་ཡ་ཕཊ། སརྦ་ཤཏྲཱུཾ་སཾ་གྷ་བི་ནཱ་ཤ་ཀ་རཱ་ཡ་ཕཊ། ཨོྃ་ནཱི་ཝཱཾ་བར་དྷ་ར་བཛྲ་པཱ་ཎི་
རཱཛྙཱ་པ་ཡ་ཏི་སྭཱ་ཧཱ། དེའི་ཆོ་ག་ལ་གནོད་སྦྱིན་གྱིས་ཟིན་པ་ལ་ཆུ་ལ་སྔགས་ཀྱིས་བཏབ་སྟེ་གཏོར་ན་བཏང་བར་འགྱུར་རོ། །ཀླུ་བཟློག་པར་འདོད་ན་སྨྱག་ཤད་ཀྱི་ལྕུག་མའམ་བལ་པོའི་སེའུའི་ལྕུག་མས་བྱའོ། །ཡི་དགས་དང་བརྗེད་བྱེད་རྣམས་ལ་སྐུད་པས་བྱའོ། །རིམས་ནད་མེད་པར་བྱ་བ་
དང་། གཞོགས་ཕྱེད་ན་བ་དང་ཡིག་འཆུས་པ་ལ་ནི་སྐུད་པ་སྔོན་པོས་བྱའོ། །ནོར་འདོད་ན་ཞག་གཅིག་སྨྱུང་བར་འདུག་སྟེ་སྤོས་ཕོར་གྱིས་བདུགས་ན་རྨི་ལམ་དུ་དགེ་བ་དང་མི་དགེ་བའི་དོན་ཐམས་ཅད་སྟོན་ལ་གསེར་གྱི་དོང་ཙེ་བདུན་སྟོང་སྦྱིན་པར་བྱེད་དོ། །རྒྱས་བཏབ་པ་དགྲོལ་བར་འདོད་
ན་ཐལ་བས་བྱའོ། །སྒོ་ལྕགས་དབྱེ་བར་འདོད་ན་ཡུངས་ཀར་གྱིས་བྱའོ། །འཇིགས་པ་ཐམས་ཅད་བསྲུང་བ་ལ་ནི་མར་རྙིང་པའམ་ཐལ་བའམ། ཡུངས་ཀར་གྱིས་བྱའོ། །ནད་ཀྱི་འཇིགས་པ་ཐམས་ཅད་ལ་ནི་སྐུད་པ་སྔོན་པོ་ལ་བསྲུང་བའི་མདུད་པ་བྱས་ཏེ་མགུལ་དུ་བཏགས་ན་
བསྲུང་བའི་མཆོག་ཏུ་འགྱུར་རོ། །བྱིས་པ་གདོན་གྱིས་ཉེན་པ་ལ་ནི་ཚོན་སྣ་ལྔའི་སྐུད་པ་ལ་བསྲུང་བའི་མདུད་པ་བྱས་ཏེ་མགུལ་དུ་བཏགས་ན་བསྲུང་བའི་མཆོག་ཏུ་འགྱུར་རོ། །ཆོམ་རྐུན་བཟློག་པར་འདོད་ན་སས་བྱའོ། །དུག་ལ་ནི་རྩྭ་ཀུ་ཤས་བྱབ་པར་བྱའོ། །བདག་བསྲུང་བ་ལ་ནི་ཡིད་
ཀྱིས་སམ་ཆུས་བྱའོ། །གཞན་བསྲུང་བ་ལ་ནི་སྐུད་པ་སྔོན་པོས་བྱའོ། །ལས་དེ་དག་ཐམས་ཅད་ལ་སྔགས་བརྗོད་པ་ནི་ལན་གསུམ་མམ། བདུན་ནམ། བཅུ་བཞིའམ། ཉི་ཤུ་རྩ་གཅིག་གམ། བརྒྱ་རྩ་བརྒྱད་བརྗོད་པར་བྱའོ། །དེ་ལྟར་བྱས་ན་འགྲུབ་པར་འགྱུར་རོ། །
མཆོད་རྟེན་སྐུ་གདུང་དང་ལྡན་པའི་དྲུང་དུ་མེ་ཏོག་སྔོན་པོས་མཆོད་དེ། སྔགས་སྟོང་བཟླས་བརྗོད་བྱས་ན་འགྲུབ་པར་འགྱུར་རོ། །འཕགས་པ་ལག་ན་རྡོ་རྗེ་གོས་སྔོན་པོ་ཅན་གྱི་ཆོ་ག་ཞེས་བྱ་བའི་གཟུངས་རྫོགས་སོ།། །།རྒྱ་གར་གྱི་མཁན་པོ་དཱི་པཾ་ཀ་ར་ཤྲཱི་ཛྙཱ་ན་དང་།

བོད་ཀྱི་ལོ་ཙྪ་བ་རྒྱ་བརྩོན་འགྲུས་སེང་གེས་དཔལ་ན་ལན་དའི་སྒོ་འགྲམ་དུ་བསྒྱུར།། ༄༅༅། །འཕགས་པ་ལག་ན་རྡོ་རྗེའི་མཚན་བརྒྱད་པ་གསང་སྔགས་དང་བཅས་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དེ་ནས་བྱང་
ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་འཁོར་གྱི་ནང་ནས་ལངས་ཏེ། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་རྣམས་ཀྱི་དོན་གྱི་སླད་དུ་རིག་པ་མཆོག་
གི་ཆོ་ག་རྒྱས་པ་ཆེན་པོ་གསང་བ་དང་བཅས་པ། གསང་ཆེན་དང་བཅས་པ་བདག་གིས་བཤད་ལགས་ཀྱིས། བཅོམ་ལྡན་འདས་རྒྱལ་པོའི་ཕོ་བྲང་ལྕང་ལོ་ཅན་དུ་མཆིས་ལ་སེམས་ཅན་རྣམས་གདུལ་བར་འཚལ་ལོ། །དེ་སྐད་ཅེས་གསོལ་ནས། བཅོམ་ལྡན་འདས་ཀྱིས་གསང་བའི་བདག་པོ་
ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་གང་ཁྱོད་ཀྱིས་རིག་པ་མཆོག་གི་ཆོ་ག་རྒྱས་པ་ཆེན་པོ་འདི་བཤད་པ་ནི། ཁྱོད་གཏུམ་པ་ཡིན་བསྟེན་པར་དཀའ་བ་ཡིན། ཤིན་ཏུ་ཐུབ་པར་དཀའ་བ་ཡིན། འཕགས་པའི་ཚུལ་མེད་པ་ཡིན་ཏེ། ལག་ན་རྡོ་རྗེ་ཁྱོད་ཀྱིས་རིག་
པ་མཆོག་གི་ཆོ་ག་རྒྱས་པ་ཆེན་པོ་བཤད་པ་གང་ཡིན་པ་དེ་དག་ཐམས་ཅད་ནི་གསང་བ་མེད་པར་ལས་མི་བྱེད་དོ། །ལག་ན་རྡོ་རྗེ་དེ་བས་ན་རྡོ་རྗེའི་རིགས་འདི་དང་། རིག་པ་མཆོག་གི་ཆོ་ག་རྒྱས་པ་ཆེན་པོ་འདི་བདེ་བླག་ཏུ་འགྲུབ་པར་བྱ་བའི་ཕྱིར་ཁྱོད་ཀྱི་མིང་བརྒྱད་པ་གསང་བ་གསང་
སྔགས་ཀྱི་འཁོར་དང་བཅས་པ་གང་ཐོས་ན་མཚམས་མེད་པ་ལྔ་བྱེད་པ་ཡང་སྡིག་པ་འབྱང་བར་འགྱུར་བ་དང་། ལག་ན་རྡོ་རྗེ་ཁྱོད་ཀྱང་མཐོང་བར་འགྱུར་བ་དང་། བགེགས་དང་ལོག་འདྲེན་ཐམས་ཅད་ཀྱང་འབྱེར་བར་འགྱུར་བ་དང་། ལོག་འདྲེན་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་
ཅུ་རྩ་བཞི་རྣམས་ཀྱང་ཕྱོགས་བཅུར་འབྱེར་བར་འགྱུར་བ་དང་། གང་ཐོས་ན་ཚངས་པར་མ་སྤྱད་པ་ཡང་ཚངས་པར་སྤྱད་པར་འགྱུར་བ་དང་། ཐུབ་པར་མ་བྱས་པ་ཡང་ཐུབ་པར་བྱས་པར་འགྱུར་བ་དང་། སྨྱུང་བར་མ་བྱས་པ་ཡང་སྨྱུང་བ་བྱས་པར་འགྱུར་བ་དང་། དགེ་སྦྱོང་མ་ཡིན་པ་

ཡང་དགེ་སྦྱོང་གི་འབྲས་བུ་དང་ལྡན་པར་འགྱུར་བ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱང་དེ་ལ་སྲུང་བར་མཛད་པ་དང་། ལས་ཀྱི་དངོས་གྲུབ་ཀྱང་སྩོལ་བར་འགྱུར་བ་བཤད་པར་བྱའོ། །དེ་ནས་བཅོམ་ལྡན་འདས་ལག་ན་རྡོ་རྗེས་བཅོམ་ལྡན་འདས་
ཀྱི་ཞབས་གཉིས་ལ་གཏུགས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གི་མིང་བརྒྱད་པ་གསང་བ་གསང་སྔགས་ཀྱི་འཁོར་དང་བཅས་པ་རྣམས་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་ངས་བཤད་ཀྱིས་
ཉོན་ཅིག །འདི་ལྟ་སྟེ། ཁྱོད་ནི་གླང་པོ་ཆེའི་རྣ་བ་ཅན་ཡིན། ཁྱོད་ནི་རྒྱན་བཟང་པོ་དང་ལྡན་པ་ཡིན། །ཁྱོད་ནི་རྣམ་པར་གནོན་པ་ཡིན། ཁྱོད་ནི་རིན་པོ་ཆེའི་འབྱུང་གནས་ཡིན། ཁྱོད་ནི་བདེན་པ་ཉིད་ཡིན། ཁྱོད་ནི་གཟུགས་སྡུག་པའི་རྒྱན་དང་ལྡན་པ་ཡིན། ཁྱོད་ནི་འབར་བའི་
མེ་ལྕེ་དང་ལྡན་པ་ཡིན། ཁྱོད་ནི་གཟུགས་མཛེས་པ་ཡིན་ནོ། །ཁྱོད་ཀྱི་མིང་འདི་དག་མཁས་པ་དག་གིས་ཐོས་ན། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བདུན་གྱི་བར་དུ་སེམས་ཅན་དམྱལ་བར་སྐྱེ་བར་མི་འགྱུར་རོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱང་
དེ་འཆི་བའི་དུས་ཀྱི་ཚེ་མདུན་ན་བཞུགས་ཤིང་དེ་དག་དེ་ལ་ཆོས་སྟོན་པར་མཛད་དོ། །ཆོས་བསྟན་པ་དེས་ན་དེ་དག་དགའ་ལྡན་གྱི་ལྷ་རྣམས་ཀྱི་ནང་དུ་སྐྱེ་བར་འགྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་ཐབས་ཅིག་ཏུ་གནས་པར་འགྱུར་རོ། །ན་མོ་བུདྡྷ་སྱ། ན་
མོ་དྷརྨ་སྱ། ནམཿསོྃ་གྷ་སྱ། ན་མོ་བཛྲ་པཱ་ཎི་སྱ། ཏ་དྱ་ཐཱ། ཨཊྚེ། ཨཊྚེ། ཁ་རཊྚེ། སོ་མེ་སོ་མཱ་སུ་ཁི། ཧི་རི་ཧི་རི། མི་རི་ཀི་རི། བྷི་རི་བི་ས་ནི་སིདྡྷྱན་ཏུ། སརྦ་ཀཱརྱཱ་ཎི། སཱ་དྷ་ཡ་མནྟྲ་པ་ད་སྭཱ་ཧཱ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེས་བཅོམ་
ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ལེགས་སོ་ལེགས་སོ། །འདི་ལྟར་གསང་བ་ཆེན་པོ་བཀའ་སྩལ་པ་གང་ལགས་པ་དེ་ནི་ལེགས་ཏེ། བཅོམ་ལྡན་འདས་དེ་དེ་ལགས་སོ། །དེ་དེ་ལགས་ཏེ། བཅོམ་ལྡན་འདས་རིག་པ་མཆོག་སྒྲུབ་པ་ནི་

བཟླས་བརྗོད་བགྱིད་པ་དང་། སྒྲུབ་པའི་ཚེ་མཆོད་པ་བགྱིས་ལ་མིང་བརྒྱད་པ་བཀླག་པར་བགྱིའོ། །བཀླགས་ནས་བདག་བསྟོད་པར་འགྱུར་ཏེ། དགའ་ནས་དངོས་གྲུབ་སྩལ་བར་འཚལ་ལོ། །བགེགས་ཀྱང་འབྱུང་བར་མི་འགྱུར་ལ། ལྷ་རྣམས་ཀྱང་དགའ་ནས་མྱུར་དུ་དངོས་གྲུབ་སྩོལ་བར་
བགྱིད་དོ། །ཉལ་བའི་ཚེ་བཀླགས་ན་རྨི་ལམ་ངན་པ་མཐོང་བར་མི་འགྱུར། སྐུ་གདུང་དང་ལྡན་པའི་མཆོད་རྟེན་གྱི་དྲུང་དུ་ལན་འབུམ་དུ་བཟླས་བརྗོད་བགྱིས་ན་སྡིག་པ་ཐམས་ཅད་ལས་གྲོལ་བར་འགྱུར་རོ། །མཚམས་མེད་པ་ལྔ་བགྱིད་པ་ཡང་བསྐལ་པ་བཟང་པོར་བྱང་ཆུབ་སེམས་དཔར་
འགྱུར་རོ་ཞེས་བདག་མཆིའོ། །ཡང་ལན་འབུམ་བཟླས་བརྗོད་བགྱིས་ན་སློབ་དཔོན་དུ་འགྱུར་རོ། །ལག་ན་རྡོ་རྗེའི་མཚན་བརྒྱད་པ་གསང་སྔགས་དང་བཅས་པ་རྫོགས་སོ།། ༄༅༅། །རྒྱ་གར་སྐད་དུ། བཛྲ་བི་དཱ་ར་ཎཱ་ནཱ་མ་དྷཱ་ར་ཎཱི། བོད་སྐད་དུ། རྡོ་
རྗེས་རྣམ་པར་འཇོམས་པ་ཞེས་བྱ་བའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྡོ་རྗེ་ལ་བཞུགས་ཏེ། སངས་རྒྱས་ཀྱི་མཐུས་ལག་ན་རྡོ་རྗེས་ལུས་ཐམས་ཅད་རྡོ་རྗེར་བྱིན་གྱིས་
བརླབས་ནས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་ལག་ན་རྡོ་རྗེ་སངས་རྒྱས་ཀྱི་མཐུ་དང་། སངས་རྒྱས་ཀྱི་བྱིན་གྱིས་བརླབས་དང་། བྱང་ཆུབ་སེམས་དཔའ་ཐམས་ཅད་ཀྱིས་བྱིན་གྱིས་བརླབས་ཀྱིས་རྡོ་རྗེ་ཁྲོ་བོ་ལས་བྱུང་བ་རྡོ་རྗེ་སྙིང་པོས་རབ་ཏུ་སྨྲས་ཏེ། མི་ཐུབ་
པ། མི་ཆོད་པ། མི་ཤིགས་པ། བདེན་པ། སྲ་བ། བརྟན་པ། ཐམས་ཅད་དུ་ཐོགས་པ་མེད་པ། ཐམས་ཅད་དུ་མ་ཕམ་པ། སེམས་ཅན་ཐམས་ཅད་སྐྲག་པར་བྱེད་པ། སེམས་ཅན་ཐམས་ཅད་འཇིལ་བར་བྱེད་པ། རིག་སྔགས་ཐམས་ཅད་གཅོད་པར་བྱེད་པ། རིག་སྔགས་
ཐམས་ཅད་གནོན་པར་བྱེད་པ། ལས་ཐམས་ཅད་འཇོམས་པར་བྱེད་པ། གཞན་གྱི་ལས་ཐམས་ཅད་འཇིག་པར་བྱེད་པ། གདོན་ཐམས་ཅད་རླག་པར་བྱེད་པ། གདོན་ཐམས་ཅད་ལས་ཐར་བར་བྱེད་པ། འབྱུང་པོ་ཐམས་ཅད་འགུགས་པར་བྱེད་པ། འབྱུང་པོ་ཐམས་ཅད་ཚར་

གཅོད་པ། རིག་སྔགས་ཀྱི་ལས་ཐམས་ཅད་བྱེད་དུ་འཇུག་པ། མ་གྲུབ་པ་རྣམས་གྲུབ་པར་བྱེད་པ། གྲུབ་པ་རྣམས་ཆུད་མི་ཟ་བར་བྱེད་པ། འདོད་པ་ཐམས་ཅད་རབ་ཏུ་སྦྱིན་པ། སེམས་ཅན་ཐམས་ཅད་བསྲུང་བ། ཞི་བ། རྒྱས་པ། སེམས་ཅན་ཐམས་ཅད་
རེངས་པར་བྱེད་པ། རྨུགས་པར་བྱེད་པའི་གསང་སྔགས་ཀྱི་མཐུ་ཆེན་པོ་འདི་སངས་རྒྱས་ཀྱི་མཐུས་ལག་ན་རྡོ་རྗེས་རབ་ཏུ་སྨྲས་སོ། །ན་མོ་རཏྣ་ཏྲ་ཡཱ་ཡ། ན་མཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཏ་དྱ་ཐཱ། ཨོྃ་ཏྲུ་ཊ་ཏྲུ་ཊ། །ཏྲོ་ཊ་ཡ་ཏྲོ་ཊ་ཡ། སྥུ་ཊ་སྥུ་ཊ། སྥོ་ཊ་ཡ་སྥོ་ཊ་
ཡ། གྷཱུརྞྞ་གྷཱུརྞྞ། གྷཱུརྞྞ་པ་ཡ་གྷཱུརྞྞ་པ་ཡ། སརྦ་སཏྭཱ་ནི། བོ་དྷ་ཡ་བོ་དྷ་ཡ། སཾ་བོ་དྷ་ཡ་སཾ་བོ་དྷ་ཡ། བྷྲ་མ་བྷྲ་མ། སཾ་བྷྲཱ་མ་ཡ་སཾ་བྷྲཱ་མ་ཡ། སརྦ་བྷཱུ་ཏཱ་ནི། ཀུ་ཊ་ཀུ་ཊ། སཾ་ཀུ་ཊ་ཡ་སཾ་ཀུ་ཊ་ཡ། སརྦ་ཤ་ཏྲཱུན། གྷ་ཊ་གྷ་ཊ། །སཾ་གྷ་ཊ་ཡ་སཾ་གྷ་ཊ་ཡ། སརྦ་བིདྱཱ་བཛྲ་བཛྲ། སྥོ་ཊ་ཡ་བཛྲ་བཛྲ།
ཀ་ཊ་བཛྲ་བཛྲ། མ་ཊ་བཛྲ་བཛྲ། མ་ཐ་བཛྲ་བཛྲ། ཨཊྚ་ཧཱ་ས་ནཱི་ལ་བཛྲ། སུ་བཛྲཱ་ཡ་སྭཱ་ཧཱ། ཧེ་ཕུལླུ། ནི་རུ་ཕུལླུ། ནི་གྲྀཧྞ་ཀུལླུ། མི་ལི་ཙུལླུ། ཀུ་རུ་ཀུལླུ། བཛྲ་བི་ཛ་ཡཱ་ཡ་སྭཱ་ཧཱ། ཀཱི་ལི་ཀཱི་ལཱ་ཡ་སྭཱ་ཧཱ། ཀ་ཊ་ཀ་ཊ། མ་ཊ་མ་ཊ། ར་ཊ་ར་ཊ། མོ་ཊ་ན་པྲ་མོ་ཊ་ནཱ་ཡ་སྭཱ་ཧཱ། ཙ་ར་ནི་ཙ་
ར། ཧ་ར་ཧ་ར། ས་ར་ས་ར། མཱ་ར་ཡ། བཛྲ་བི་དཱ་རཱ་ཡ་སྭཱ་ཧཱ། ཙྪིནྡ་ཙྪིནྡ། བྷིནྡ་བྷིནྡ། མ་ཧཱ་ཀཱི་ལི་ཀཱི་ལཱ་ཡ་སྭཱ་ཧཱ། བནྡྷ་བནྡྷ། ཀྲོ་དྷ་ཀྲོ་དྷ། ཀཱི་ལི་ཀཱི་ལཱ་ཡ་སྭཱ་ཧཱ། ཙུ་རུ་ཙུ་རུ་ཙཎྜ་ལ་ཀཱི་ལི་ཀཱི་ལཱ་ཡ་སྭཱ་ཧཱ། ཏྲཱ་ས་ཡ་ཏྲཱ་ས་ཡ། བཛྲ་ཀཱི་ལི་ཀཱི་ལཱ་ཡ་སྭཱ་ཧཱ། ཧ་ར་ཧ་ར་བཛྲ་དྷ་རཱ་ཡ་སྭཱ་ཧཱ།
པྲ་ཧ་ར་པྲ་ཧ་ར། བཛྲ་པྲ་བྷཉྫ་ནཱ་ཡ་སྭཱ་ཧཱ། མ་ཏི་སྠི་ར་བཛྲ། ཤྲུ་ཏི་སྠི་ར་བཛྲ། པྲ་ཏི་སྠི་ར་བཛྲ། མ་ཧཱ་བཛྲ། ཨ་པྲ་ཏི་ཧ་ཏ་བཛྲ། ཨ་མོ་གྷ་བཛྲ། ཨེ་ཧི་བཛྲ། ཤཱི་གྷཾབཛྲཱ་ཡ་སྭཱ་ཧཱ། དྷ་ར་དྷ་ར། དྷི་རི་དྷི་རི། དྷུ་རུ་དྷུ་རུ། སརྦ་བཛྲ་ཀུ་ལ་མཱ་བརྟ་ཡ་སྭཱ་ཧཱ། ཨ་མུ་ཀཾ་མཱ་ར་ཡ་ཕཊ། ན་
མསྶམནྟ་བཛྲཱ་ནཱྃ། སརྦ་བ་ལྃ་ཨཱ་བརྟྟ་ཡ། མ་ཧཱ་བ་ལེ། ཀ་ཊ་བེ། ཏ་ཏ་ལེ། ཨ་ཙ་ལེ། མཎྜལ་མཱ་ཡེ། ཨ་ཏི་བཛྲ། མ་ཧཱ་བ་ལེ། བེ་ག་ར་ཎ། ཨ་ཛི་ཏེ། ཛྭ་ལ་ཛྭ་ལ། ཏི་ཊི་ཏི་ཊི། ཏིངྒ་ལེ། ད་ཧ་ད་ཧ། ཏེ་ཛོ་བ་ཏི། ཏི་ལི་ཏི་ལི། བནྡྷ་བནྡྷ། མ་ཧཱ་བ་ལེ། བཛྲཱཾཀུ་ཤ་ཛྭ་ལ་ཡ་སྭཱ་

ཧཱ། ན་མོ་རཏྣ་ཏྲ་ཡཱ་ཡ། ན་མཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཏ་དྱ་ཐ། ཨོྃ་ཧ་ར་ཧ་ར་བཛྲ། མ་ཐ་མ་ཐ་བཛྲ། དྷུ་ན་དྷུ་ན་བཛྲ། ད་ཧ་ད་ཧ་བཛྲ། པ་ཙ་པ་ཙ་བཛྲ། དྷ་ར་དྷ་ར་བཛྲ། དྷཱ་ར་ཡ་དྷཱ་ར་ཡ་བཛྲ། དཱ་རུ་ཎ་དཱ་རུ་ཎ་བཛྲ། ཙྪིནྡ་ཙྪིནྡ་བཛྲ། བྷིནྡ་བྷིནྡ་བཛྲ་ཧཱུྃ་ཕཊ། ན་མཤྩཎྜ་བཛྲ་ཀྲོ་
དྷཱ་ཡ། ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ཨ་མྲྀ་ཏེ་ཧཱུྃ་ཕཊ། སྡིག་པ་ཐམས་ཅད་བྱང་བྱས་ནས། །སྡུག་བསྔལ་ཐམས་ཅད་མེད་པར་བྱེད། །རྒྱུད་དོ་ཅོག་གི་རྩ་བ་སྟེ། །དཔལ་ཀུན་གྱིས་ནི་ལེགས་པར་བརྒྱན། །སེམས་ཅན་དབང་པོ་ཉམས་པ་དང་། །ཚེ་ཟད་པ་དང་ཚེ་ཉམས་
དང་། །ཕུན་སུམ་ཚོགས་མིན་གང་ཆགས་དང་། །ལྷ་རྣམས་རྒྱབ་ཀྱིས་ཕྱོགས་པ་དང་། །མཛའ་སྡུག་སྐྱེ་བོ་སྡང་བ་དང་། །བྲན་བཟའ་ལ་སོགས་གཙེས་པ་དང་། །ཕན་ཚུན་མཐུན་པ་མ་ཡིན་དང་། །ནོར་འགྲིབས་པས་ནི་གནོད་པ་དང་། །མྱ་ངན་ངལ་ལས་གནོད་པ་དང་། །འཇིགས་པ་
དང་ནི་ཕོངས་པ་དང་། །གཟའ་དང་རྒྱུ་སྐར་བྱད་སྟེམས་དང་། །མི་བཟད་གདོན་གྱིས་ཉེན་པ་དང་། །མྱ་ངན་ངལ་ལས་བྱུང་བ་ཡི། །རྨི་ལམ་སྡིག་པ་མཐོང་ན་ཡང་། །དེས་ནི་རབ་བཀྲུས་གཙང་མ་ཡིན། །མདོ་སྡེ་དམ་པ་མཉན་པར་བྱ། །གང་དག་ཡིད་དགེ་སེམས་དང་ཞིང་། །གཙང་མའི་
གོས་ཀྱིས་རབ་བརྒྱན་ཏེ། །ཟབ་མོ་སངས་རྒྱས་སྤྱོད་ཡུལ་བ། །མདོ་སྡེ་འདི་ནི་ཉན་བྱེད་ན། །མདོ་སྡེ་འདི་ཡི་གཟི་བརྗིད་ཀྱིས། །སྲོག་ཆགས་དག་ནི་ཐམས་ཅད་ཀྱི། །མི་བཟད་པ་ཡི་ནད་རྣམས་ཀྱང་། །དེ་དག་ཐམས་ཅད་ཞི་བར་བལྟ། །ཚེ་དང་བསོད་ནམས་འཕེལ་བར་འགྱུར། །
སྡིག་པ་ཀུན་ལས་རྣམ་པར་གྲོལ། །ནོར་བུ་ཡུངས་ཀར་དཱུར་བ་དང་། །རིན་ཆེན་རྨ་མེད་ཙནྡན་བཅས། །ཤེལ་དང་རྡོ་རྗེ་མེ་ཏོག་དང་། །ཆུ་ཡིས་གསེར་རམ་ཡང་ན་ནི། །དངུལ་གྱི་བུམ་པ་དག་ཀྱང་རུང་། །གཙང་མའི་གོས་ཀྱིས་དཀྲི་ཞིང་དགང་། །ལན་གྲངས་ཉི་ཤུ་རྩ་གཅིག་གམ། །ཡང་ན་ལན་གྲངས་
བརྒྱ་རྩ་བརྒྱད། །རྡོ་རྗེ་རྣམ་འཇོམས་བཟླས་ནས་ནི། །རྒྱལ་པོ་རྟག་ཏུ་ཁྲུས་གྱིས་ཤིག །རྡོ་རྗེས་རྣམ་པར་འཇོམས་པ་ཞེས་བྱ་བའི་གཟུངས་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། དཱ་ན་ཤཱི་ལ་དང་། བོད་ཀྱི་ལོ་ཙྪ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།

༄༅༅། །རྒྱ་གར་སྐད་དུ། ཨཱརྱ་མ་ཧཱ་བཛྲ་མེ་རུ་ཤི་ཁར་ཀཱུ་ཊ་གཱ་ར་དྷཱ་ར་ཎཱི། བོད་སྐད་དུ། འཕགས་པ་རྡོ་རྗེའི་རི་རབ་ཆེན་པོའི་རྩེ་མོའི་ཁང་པ་བརྩེགས་པའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་
གཅིག་ན། བཅོམ་ལྡན་འདས་རྡོ་རྗེའི་ལྷུན་པོ་ཆེན་པོའི་རྩེ་མོའི་ཁང་པ་བརྩེགས་པ་རྡོ་རྗེ་ཆེན་པོའི་ཏིང་ངེ་འཛིན་གྱི་སའི་གནས་རྡོ་རྗེ་ཆེན་པོའི་དཔག་བསམ་གྱི་ཤིང་ལྗོན་པས་ལེགས་པར་བརྒྱན་པ། རྡོ་རྗེ་ཆེན་པོའི་རྫིང་གི་རིན་པོ་ཆེའི་པདྨའི་འོད་ཀྱིས་སྣང་བར་བྱས་པ། ས་ཕྱོགས་རྡོ་རྗེ་ཆེན་པོའི་བྱེ་མ་
བདལ་བ། རྡོ་རྗེ་ཆེན་པོར་བྱིན་གྱིས་བརླབས་པ། འཁོར་གྱི་ཁྱམས་རྡོ་རྗེ་ཆེན་པོ་ལས་བྱས་པ། ལྷའི་དབང་པོ་བརྒྱ་བྱིན་གྱི་རྡོ་རྗེ་ཆེན་པོའི་སེང་གེའི་ཁྲི་བྱེ་བ་ཁྲག་ཁྲིག་འབུམ་ཕྲག་སྟོང་གིས་རྣམ་པར་མཛེས་པ། ཆོས་བསྟན་པ་དང་། ཆོ་འཕྲུལ་ཅན། སངས་རྒྱས་ཐམས་ཅད་ཀྱི་བྱིན་
གྱི་རླབས་ཀྱིས་བྱིན་གྱིས་བརླབས་པ། ཆོས་ཐམས་ཅད་ཀྱི་མཉམ་པ་ཉིད་ལ་འཇུག་པ། ཐམས་ཅད་མཁྱེན་པ་ཉིད་ཀྱིས་ངེས་པར་འབྱུང་བ་ན། བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་བརྒྱད་ཅུ་རྩ་བཞི་ཐམས་ཅད་ཀྱང་སྐྱེ་བ་གཅིག་གིས་ཐོགས་པ། བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ལས་ཕྱིར་མི་ལྡོག་པ། མཐུ་ཆེན་པོ་ཐོབ་པ། རྡོ་རྗེ་ཆེན་པོའི་རྣམ་པར་ཐར་པའི་ཏིང་ངེ་འཛིན་གྱིས་སངས་རྒྱས་ཀྱི་ཞིང་རྣམ་པར་འཕྲུལ་བ་དང་། ཆོ་འཕྲུལ་ཆེན་པོ་ཀུན་དུ་སྟོན་པ། སེམས་ཀྱི་སྐད་ཅིག་ཐང་ཅིག་ཡུད་ཙམ་ཅིག་ལ་སེམས་ཅན་ཐམས་ཅད་ཀྱི་སེམས་དང་སྤྱོད་
པའི་རྗེས་སུ་འཇུག་པའི་ཆོས་བསྟན་པ་སྣ་ཚོགས་མཉམ་པ་ཉིད་སྙན་ཅིང་རྒྱ་ཆེ་ལ་ཟབ་པ་དང་། སྤོབས་པ་དང་། ཆོ་འཕྲུལ་དང་ལྡན་པ། སངས་རྒྱས་ཀྱི་ཞིང་དུ་མར་དེ་བཞིན་གཤེགས་པ་ལ་མཆོད་པ་ཆེན་པོའི་སྤྲིན་གྱིས་མཆོད་པ་དང་། རྣམ་པར་ཐར་པའི་སྒོ་དང་། གཟུངས་དང་། ཏིང་
ངེ་འཛིན་དང་། དབང་དང་། མངོན་པར་ཤེས་པ་དང་། མ་འདྲེས་པ་དང་། བྱང་ཆུབ་ཀྱི་ཡན་ལག་དང་། ལམ་དང་། ས་བཅུ་དང་། ཕ་རོལ་ཏུ་ཕྱིན་པ་དང་། ཐབས་ལ་མཁས་པ་དང་། བསྡུ་བའི་དངོས་པོ་དང་། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་

དང་། བྱམས་པའི་སྟོབས་དང་། དབེན་པ་དང་། ཡོངས་སུ་བྱང་བའི་སེམས་ཀྱི་རྒྱུན་དང་ལྡན་པ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་སྙིང་པོ་ཞེས་བྱ་བ་དང་། རྡོ་རྗེའི་མིག་དང་། རྡོ་རྗེའི་ལུས་དང་། རྡོ་རྗེ་བློ་གྲོས་དང་། ལག་ན་རྡོ་རྗེ་དང་། རྡོ་རྗེ་འདུས་
པ་དང་། རྡོ་རྗེ་མཐུ་བོ་ཆེ་དང་། རྡོ་རྗེ་རྣམ་པར་འཕྲུལ་བ་དང་། རྡོ་རྗེ་བརྩེགས་པ་དང་། རྡོ་རྗེ་ཕུང་པོ་དང་། རྡོ་རྗེ་ང་རོ་དང་། རྡོ་རྗེ་བཟང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་ཏོག་ཅེས་བྱ་བ་དང་། དེ་དག་ལ་སོགས་པ་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་
བརྒྱད་ཅུ་རྩ་བཞི་དང་། ཉན་ཐོས་ཆེན་པོ་རབ་ཏུ་མང་པོ་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། སྲིད་པར་ཀུན་ཏུ་སྦྱོར་བ་ཆད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ། རྫུ་འཕྲུལ་གྱི་སྟོབས་དང་། ཆོ་འཕྲུལ་བསམ་གྱིས་མི་ཁྱབ་པས། རྣམ་པར་འཕྲུལ་བའི་
མཐུ་ཆེན་པོ་ཐོབ་པ། ལྟ་བ་ཆགས་པ་མེད་པ། ཐམས་ཅད་ཀྱང་དྲི་མ་དང་བྲལ་བ། ཀུན་ནས་ཉོན་མོངས་པའི་བག་ཆགས་ཀྱི་ས་བོན་ངེས་པར་བསྲེགས་པ་ཤ་སྟག་ལ་འདི་ལྟ་སྟེ། ཚེ་དང་ལྡན་པ་ཤ་ར་དྭ་ཏིའི་བུ་དང་། ཚེ་དང་ལྡན་པ་བྱམས་མའི་བུ་གང་པོ་དང་། ཚེ་དང་ལྡན་པ་ཀ་པིན་དང་།
ཚེ་དང་ལྡན་པ་རབ་འབྱོར་དང་། ཚེ་དང་ལྡན་པ་མཽད་གལ་གྱི་བུ་ཆེན་པོ་དང་། ཚེ་དང་ལྡན་པསྐུལ་བྱེད་དང་། ཚེ་དང་ལྡན་པ་དགའ་བྱེད་དང་། ཚེ་དང་ལྡན་པ་ག་ཡཱ་འོད་སྲུང་དང་། ཚེ་དང་ལྡན་པ་འོད་སྲུང་ཆེན་པོ་དང་། ཚེ་དང་ལྡན་པ་ལྟེང་རྒྱས་འོད་སྲུང་དང་། དེ་དག་ལ་སོགས་པ་ཉན་
ཐོས་ཆེན་པོ་རབ་ཏུ་མང་པོ་དང་། ལྷའི་བུ་དབང་ཕྱུག་ཆེན་པོ་ལ་སོགས་པ་གནས་གཙང་མའི་རིས་ཀྱི་ལྷའི་བུ་གྲངས་མེད་དཔག་ཏུ་མེད་པ་གཞལ་དུ་མེད་པ་དག་དང་། མི་མཇེད་ཀྱི་བདག་པོ་ཚངས་པ་དང་། ལྷའི་བུ་ཚངས་པ་བཟང་པོ་ལ་སོགས་པ་ཚངས་རིས་ཀྱི་ལྷའི་བུ་རྣམས་དང་།
ལྷའི་བུ་རབ་འཐབ་བྲལ་གཡོག་འཐབ་བྲལ་གྱི་ལྷའི་རིས་ཀྱི་ལྷའི་བུ་དང་བཅས་པ་དང་། ཡོངས་སུ་དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་དང་། ལྷའི་དབང་པོ་བརྒྱ་བྱིན་ལྷའི་བུ་ཐམས་ཅད་ཀྱི་འཁོར་ཅན་དང་། ལྷ་མ་ཡིན་གྱི་དབང་པོ་ཐགས་ཟངས་

རིས་དང་། སྟོབས་ཅན་དང་། རབ་སིམ་དང་། སྒྲ་གཅན་དང་། རྣམ་པར་སྣང་བྱེད་དང་། དེ་དག་ལ་སོགས་པ་ལྷ་མ་ཡིན་གྱི་དབང་པོ་ཚད་མེད་གྲངས་མེད་དཔག་ཏུ་མེད་པ་རྣམས་དང་། ཀླུའི་རྒྱལ་པོ་རྒྱ་མཚོ་དང་། མ་དྲོས་པ་དང་། འཇོག་པོ་དང་། ནོར་རྒྱས་ཀྱི་བུ་དང་།
དུངསྐྱོང་དང་། སྟོབས་ཀྱི་རྒྱུ་དང་། པདྨ་དང་། པདྨ་ཆེན་པོ་དང་། མཐའ་ཡས་དང་། དེ་དག་ལ་སོགས་པ་ཀླུའི་རྒྱལ་པོ་ཚད་མེད་གྲངས་མེད་དཔག་ཏུ་མེད་པ་དག་དང་། མིའམ་ཅིའི་རྒྱལ་པོ་ལྗོན་པ་མིའམ་ཅིའི་རྒྱལ་པོའི་གཡོག་དུ་མ་ཅན་དང་། དྲི་ཟའི་རྒྱལ་པོ་གཙུག་ཕུད་ལྔ་པ་དྲི་ཟའི་རྒྱལ་
པོའི་གཡོག་དུ་མ་ཅན་དང་། རིག་སྔགས་འཆང་གི་རྒྱལ་པོ་དོན་ཐམས་ཅད་གྲུབ་པ་རིག་སྔགས་འཆང་གི་རྒྱལ་པོའི་གཡོག་དུ་མ་ཅན་དང་། ནམ་མཁའ་ལྡིང་གི་རྒྱལ་པོ་གསེར་མིག་ནམ་མཁའ་ལྡིང་གི་རྒྱལ་པོའི་གཡོག་དུ་མ་ཅན་དང་། གནོད་སྦྱིན་གྱི་རྒྱལ་པོ་ཆེན་པོ་རྣམ་ཐོས་ཀྱི་བུ་དང་། ནོར་བུ་
བཟང་དང་། གང་བ་བཟང་དང་། གནོད་སྦྱིན་གྱི་རྒྱལ་པོ་ལྔས་རྩེན་གནོད་སྦྱིན་གྱི་རྒྱལ་པོའི་གཡོག་དུ་མ་ཅན་དང་། འཕྲོག་མ་བུ་ལྔ་བརྒྱའི་གཡོག་ཅན་དང་། འཇིག་རྟེན་གྱི་མ་བདུན་དང་། སྲིང་མོ་ཆེན་མོ་བདུན་དང་། དྲང་སྲོང་ཆེན་པོ་བདུན་དང་། བར་སྣང་ལ་རྒྱུ་བའི་རྒྱུ་སྐར་དང་།
གཟའི་ལྷ་ཐམས་ཅད་དང་། ཕྱོགས་ཀྱི་ལྷ་རྣམས་དང་། ཕྱོགས་མཚམས་ཀྱི་ལྷ་རྣམས་དང་། སའི་ལྷ་དང་། དབྱངས་ཅན་དང་། འབྱུང་པོ་རྣམས་དང་། བགེགས་རྣམས་དང་། ལོག་འདྲེན་རྣམས་དང་། ཡི་དགས་དང་། འབྱུང་པོ་རྫུ་འཕྲུལ་ཆེན་པོ་རྣམས་དང་། རིའི་རྒྱལ་པོ་ཐམས་
ཅད་དང་། འཇིག་རྟེན་སྐྱོང་བ་ཆུ་ལྷ་གཡོག་རྒྱ་མཚོའི་ལྷ་ཐམས་ཅད་དང་བཅས་པ་དང་། འཕགས་སྐྱེས་པོ་དང་། མིག་མི་བཟང་དང་། ལག་ན་བེ་ཅོན་དང་། བདེན་བྲལ་དང་། མེའི་ལྷ་དང་། རླུང་གི་ལྷ་ཆེན་པོ་བདུན་དང་། དབང་བདག་ཆུང་མ་དང་བཅས་པ་ཚོགས་བྱེ་བ་ཁྲག་ཁྲིག་འབུམ་
ཕྲག་དུ་མའི་འཁོར་ཅན་དང་། སྲེད་མེད་ཀྱི་བུ་གཡོག་དང་བཅས་པ་དང་། བྱིན་པ་པོ་དང་། ཕྲེང་བ་ཅན་དང་། ལྕགས་ཅན་དང་། ཚོགས་ཀྱི་བདག་པོ་ཆེན་པོ་དང་། སྤྲིན་ཏ་ལ་དང་། ལོག་འདྲེན་དབང་པོ་བགེགས་ལོག་འདྲེན་གྱི་གཡོག་དུ་མ་ཅན་དང་། ཤིང་གསེབ་ཀྱི་ལྷ་དྲུག་ཅུ་

དང་། སྲིང་མོ་བཞི་མིང་པོ་དང་བཅས་པ་དང་། མ་བདུན་དང་། རྡོ་རྗེ་ལྕགས་ཀྱུ་ཅན་དང་། རྡོ་རྗེ་ལུ་གུ་རྒྱུད་དང་། རྡོ་རྗེ་ཕོ་ཉ་མོ་དྲུག་ཅུ་རྩ་བཞི་དང་། རྡོ་རྗེའི་སྡེ་དང་། ལག་བཟངས་དང་། གཙུག་གིས་འགྲོ་དང་། རྡོ་རྗེའི་རིགས་ཀྱི་འཁོར་དུ་མ་དང་བཅས་པ་དང་། དེ་མ་ཡིན་པ་
གཞན་ཡང་སངས་རྒྱས་དང་། ཆོས་དང་། དགེ་འདུན་ལ་མངོན་པར་དད་པའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། འབྱུང་པོ་དང་། ཡི་དགས་དང་། ཤ་ཟ་དང་། སྨྱོ་བྱེད་དང་
བརྗེད་བྱེད་དང་། སྒྲུབ་པ་དང་། སྦྲུལ་འཛིན་བཅས་དང་། གནོན་པོ་ཚད་མེད་དཔག་ཏུ་མེད་གྲངས་མེད་པ་རྣམས་དང་། ལྷའི་བུ་ཉི་མ་དང་། ལྷའི་བུ་ཟླ་བ་དང་། དུས་ཚིགས་ཀྱི་ལྷ་དང་། ནུབ་ཀའི་ལྷ་དང་། དུས་ཀྱི་ལྷ་ཐམས་ཅད་དང་། གནམ་སའི་ལྷ་ཐམས་ཅད་དང་ཡང་ཐབས་ཅིག་གོ། །
དེ་ལྟར་ཡང་བཅོམ་ལྡན་འདས་དེ་ཆོས་ཀྱི་འཁོར་ལོ་ནི་ཤིན་ཏུ་བསྐོར། སངས་རྒྱས་ཀྱི་མཛད་པ་ནི་ཤིན་ཏུ་ཡོངས་སུ་མཐར་ཕྱིན། བསོད་ནམས་དང་ཡེ་ཤེས་ཀྱི་ཚོགས་ནི་ཤིན་ཏུ་ཡོངས་སུ་རྫོགས། ཐམས་ཅད་མཁྱེན་པ་ཉིད་དང་། བྱང་ཆུབ་ཆེན་པོ་དང་། ཕ་རོལ་ཏུ་ཕྱིན་པ་དང་། ས་ནི་བརྙེས་
པས་ནི་ཤིན་ཏུ་ཡོངས་སུ་བཟུང་། སྐྱེས་བུ་ཆེན་པོའི་མཚན་མངའ་བ་སུམ་ཅུ་རྩ་གཉིས་ཀྱིས་ནི་སྐུ་བརྒྱན། དཔེ་བྱད་བཟང་པོ་བརྒྱད་ཅུས་ནི་ཡན་ལག་དང་ཉིང་ལག་ཐམས་ཅད་རྣམ་པར་སྤྲས། སྤྱི་གཙུག་ནི་སེམས་ཅན་ཐམས་ཅད་ཀྱིས་ལྟར་མི་མཐོང་། བདུད་ཀྱི་ཚེར་མ་ཐམས་ཅད་ནི་དཀྲུགས།
དེ་ཁོ་ན་ཉིད་མཁྱེན་པ་ཉིད་ནི་རིམ་པར་ཐུགས་སུ་ཆུད། སྤྱན་རྣམ་པ་ལྔ་ནི་མངའ། རྣམ་པ་ཐམས་ཅད་མཁྱེན་པའི་མཆོག་དང་ནི་ལྡན། ཐམས་ཅད་མཁྱེན་པའི་ཡེ་ཤེས་དང་ནི་ལྡན། སངས་རྒྱས་ཀྱི་ཆོས་ཐམས་ཅད་དང་ནི་ལྡན། བདུད་དང་ཕས་ཀྱི་རྒོལ་པ་དང་། ངན་པའི་ཚོགས་ཅན་
གྱི་ཚོགས་ཐམས་ཅད་ནི་བཅོམ། བརྗོད་པའི་སྒྲ་དང་། ཚིགས་སུ་བཅད་པ་ནི་འཕགས། ཁྱུ་མཆོག་དང་། སེང་གེའི་སྒྲ་ནི་སྒྲོག །མ་རིག་པའི་མུན་པ་ནི་ཀུན་དུ་བསལ། བསྐལ་པ་བྱེ་བ་ཁྲག་ཁྲིག་འབུམ་ཕྲག་གྲངས་མེད་དཔག་ཏུ་མེད་པར་སྦྱིན་པ་དང་། ཚུལ་ཁྲིམས་དང་།

བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་དང་། ཐབས་དང་། སྟོབས་དང་། སྨོན་ལམ་དང་། ཡེ་ཤེས་ཀྱི་ཕ་རོལ་ཏུ་ཕྱིན་པ་དང་། དཀའ་བ་སྤྱད་པས་མངོན་པར་གྲུབ་པའི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་། དཔེ་བྱད་
བཟང་པོ་བརྒྱད་ཅུས་སྐུ་བརྒྱན་པས་ནི་མཛེས་ཤིང་རིན་པོ་ཆེ་རྡོ་རྗེའི་པདྨའི་སྙིང་པོའི་སེང་གེའི་ཁྲི་ལ་ནི་བཞུགས་ཏེ། གདན་རིན་པོ་ཆེ་དང་། རྡོ་རྗེའི་པདྨའི་སེང་གེའི་ཁྲི་རི་རབ་ཙམ་རྡོ་རྗེ་དང་། རིན་པོ་ཆེ་དང་། མུ་ཏིག་དང་ལྡན་པའི་དྲིལ་བུ་གཡེར་ཀའི་དྲ་བ་དུ་མ་སིལ་སིལ་སྒྲ་འབྱུང་བ། རྡོ་རྗེ་དང་
རིན་པོ་ཆེ་དུ་མའི་སྟེགས་བུ་ལ་རྩ་བ་ལེགས་པར་བརྟན་པ། རྡོ་རྗེ་དང་རིན་པོ་ཆེ་དུ་མའི་ཆུ་སྲིན་གྱི་ཁ་ནས་བྱུང་བའི་མུ་ཏིག་དམར་པོའི་ཕྲེང་བ་དང་ལྡན་པའི་སྣམ་རྟེན་དང་བཅས་པ། རིན་པོ་ཆེ་དུ་མའི་པདྨའི་སྙིང་པོ་ལ་ཆགས་པའི་རིན་པོ་ཆེ་ཀེ་ཀེ་རུ་དང་། ཀེ་ཀེ་རུ་ཆེན་པོ་དང་། ཨན་ད་རྙིལ་དང་།
མཐོན་ཀ་ཆེན་པོ་དང་། དུན་ལས་དུ་མའི་འོད་ཟེར་འབར་བས་སྣང་བར་གྱུར་པས་ཀུན་ནས་མཛེས་པ། རིན་པོ་ཆེ་དང་རྡོ་རྗེའི་ཐུར་མས་བརྒྱན་པའི་གདུགས་ཡུ་བས་བསྟོད་པ། བྱེ་བ་ཁྲག་ཁྲིག་འབུམ་ཕྲག་དུ་མས་གྲིབ་མར་བསྒྲིབས་ཤིང་བསྐྱབས་པ། དཔག་བསམ་གྱི་ཤིང་དུ་མས་མཛེས་
པར་བྱས་པ་རྒྱ་ཆེ་བ་ལ་བཞུགས་ཏེ། གསེར་གྱི་རི་བོ་ལྟར་དཔལ་གྱིས་འབར་བ། ཉི་མ་སྟོང་བས་ལྷག་པའི་འོད་ཀྱི་དཀྱིལ་འཁོར་འབྱོར་པས་ས་ཕྱོགས་མཛེས་པར་གྱུར་པ། ཟླ་བ་ཉ་ལྟར་འཇིག་རྟེན་ཀུན་གྱིས་མཐོང་ན་དགའ་བ། དཔག་བསམ་གྱི་ཤིང་ལྗོན་པ་ཆེན་པོ་ལྟར་སངས་རྒྱས་ཀྱི་
ཆོས་རྣམས་ཀྱིས་ཡང་དག་པར་རྒྱས་པ་ཆོས་སྟོན་ཏེ། ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ་དང་། ཡོངས་སུ་དཀར་བ་ཡང་དག་པར་སྟོན་ཏོ། །དེ་ནས་བཅོམ་ལྡན་
འདས་ཀྱི་སྤྱི་གཙུག་གི་མཚམས་ཀྱི་མཛོད་སྤུ་ནས་སངས་རྒྱས་ཀྱི་ཞིང་ཐམས་ཅད་ཀུན་དུ་སྟོན་པ་ཞེས་བྱ་བའི་འོད་ཟེར་གྱི་དྲ་བ་ཆེན་པོ་བྱུང་སྟེ། འོད་ཟེར་གྱི་དྲ་བ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་སྣང་བས་གསལ་བར་བྱས་པར་གྱུར་ཏོ། །གང་གཱའི་ཀླུང་གི་བྱེ་མ་

ཇི་སྙེད་པ་དང་མཉམ་པའི་སངས་རྒྱས་ཀྱི་ཞིང་དེ་དག་ཐམས་ཅད་ཀྱང་སྣང་བ་དེས་གསལ་བར་སྣང་བར་གྱུར་ཏོ། །སངས་རྒྱས་ཀྱི་ཞིང་དེ་དག་ན་སངས་རྒྱས་བཅོམ་ལྡན་འདས་གང་དག་བཞུགས་པ་དེ་དག་ཀྱང་སེང་གེའི་ཁྲི་དུ་མ་བཀོད་པའི་ཁང་པ་བརྩེགས་པའི་གཞལ་མེད་ཁང་རྣམས་ན་ཆོས་སྟོན་ཏོ། །
ཉན་ཐོས་ཆེན་པོ་དེ་དག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དག་དང་ཐབས་ཅིག་གོ། །དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་
ཅི་དང་། ལྟོ་འཕྱེ་ཆེན་པོ་རྣམས་དང་ཡང་ཐབས་ཅིག་གོ། །དེ་དག་ཐམས་ཅད་ཀྱང་རྡོ་རྗེའི་ལྷུན་པོ་ཆེན་པོའི་རྩེ་མོའི་ཁང་པ་བརྩེགས་པའི་གཟུངས་ཡང་དག་པར་རབ་ཏུ་སྟོན་ཏོ། །དེ་དག་ཐམས་ཅད་ཀྱང་ཀུན་དུ་སྣང་ངོ་། །སྐད་ཅིག་དེ་ལ་སེམས་ཅན་དེ་དག་ཐམས་ཅད་བདེ་བ་ཐམས་ཅད་ཀྱིས་ཚིམ་པར་
གྱུར་ཏོ། །འོན་པ་རྣམས་ནི་སྒྲ་ཐོས་སོ། །ལོང་བ་རྣམས་ནི་མིག་ཐོབ་བོ། །སྨྱོན་པ་རྣམས་ནི་དྲན་པ་རྙེད་དོ། །ནད་པ་རྣམས་ནི་སོས་པར་གྱུར་ཏོ། །སྦྲུམ་མ་རྣམས་ནི་བདེ་བར་བཙས་སོ། །སེམས་ཅན་དམྱལ་བ་ཐམས་ཅད་ཀྱི་སྡུག་བསྔལ་རྣམས་ནི་མེད་པར་གྱུར་ཏོ། །ཡུད་ཙམ་དེ་ལ་
དུད་འགྲོའི་སྐྱེ་གནས་དང་། ཡི་དགས་ཀྱི་སྐྱེ་གནས་དང་། གཤིན་རྗེའི་འཇིག་རྟེན་རྣམས་ཀྱི་མིང་ཡང་མི་གྲག་པར་གྱུར་ཏོ། །འཇིག་རྟེན་གྱི་བར་གང་དག་མུན་པ་མུན་ནག་དང་། མུན་པ་མུན་ནག་ཆེན་པོར་འདུག་པ་དེ་དག་ཐམས་ཅད་ཀྱང་གསལ་བར་སྣང་བར་གྱུར་ཏོ། །དེར་སེམས་ཅན་གང་དག་
སྐྱེས་པ་དེ་དག་ཐམས་ཅད་དང་། སེམས་ཅན་གཞན་འདིར་སྐྱེས་པ་རྣམས་ཀྱང་གཅིག་གིས་གཅིག་ཤེས་སོ། །དེ་ནས་སེམས་ཅན་དེ་དག་ཐམས་ཅད་ཀྱི་ངོ་མཚར་རྨད་དུ་བྱུང་བའི་ཆོས་ཀྱི་དགའ་བ་ཐོབ་སྟེ་བདེ་བ་མཆོག་གིས་ཚིམ་པར་གྱུར་ནས་ཀུན་དུ་བལྟས་པ་དང་། དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་མཐོང་སྟེ། དེ་དག་གིས་གསེར་གྱི་མཆོད་སྡོང་ལྟར་དཔལ་གྱིས་འབར་ཞིང་རང་གི་གཟི་བརྗིད་ཀྱིས་མངོན་པར་འཕགས་པ་དེ་མཐོང་ནས་དེ་ཉིད་ལ་སྐྱབས་སུ་དོང་ངོ་། །སྐྱབས་སུ་དོང་མ་ཐག་ཏུ་དེ་དག་ཐམས་ཅད་དེ་བཞིན་གཤེགས་པའི་འཁོར་

གྱི་དཀྱིལ་འཁོར་དེ་ཉིད་དུ་བདག་སོན་པ་སྙམ་དུ་ཤེས་སོ། །སྣང་བ་དེས་བདུད་ཀྱི་ཁྱིམ་ཐམས་ཅད་ཀུན་དུ་འབར་རབ་ཏུ་འབར་ཀུན་དུ་རབ་ཏུ་མཆེད་ཅིང་འབར་ཏེ་མེ་ལྕེ་གཅིག་ཏུ་གྱུར་པར་ཀུན་དུ་སྣང་ངོ་། །བདུད་ཀྱི་རིས་ཀྱི་ལྷ་དེ་དག་ཀྱང་སྐད་ཅིག་དེ་ལ་ཉམ་ཐག་པའི་སྒྲར་ངུ་ཞིང་སྐྲག་ནས་བྱེར་
རོ། །བདུད་སྡིག་ཅན་ཡང་བཞིན་བཟང་པོ་རྙི་རྙི་པོར་གྱུར་ཅིང་ལུས་རྔུལ་ནས་བདུད་ཀྱི་རིས་ཀྱི་ལྷའི་བུ་ཐམས་ཅད་ལ་སྨྲས་པ། གྲོགས་པོ་དག་བདུད་ཀྱི་ཁྱིམ་ཐམས་ཅད་ཀུན་དུ་འབར་རབ་ཏུ་འབར་ཀུན་དུ་རབ་ཏུ་མཆེད་ཅིང་འབར་ཏེ་མེ་ལྕེ་གཅིག་ཏུ་གྱུར་པ་དང་། དགེ་སྦྱོང་གཽ་ཏ་མ་རི་རབ་ཀྱི་རྩེ་མོའི་
ཁང་པ་བརྩེགས་པ་ན་ཆོས་བསྟན་པ་འདི་ལ་ལྟོས། དེས་བདག་ཅག་ཕང་ངོ་། །མཐོ་བཙམས་སོ། །ཕྱོགས་གང་ན་གནས་སུ་གཏོལ་མེད་དོ། །ལོངས་ལ་དགེ་སྦྱོང་གཽ་ཏམ་དེའི་གན་དུ་དོང་སྟེ། བདུད་ཀྱི་ཡུལ་འདི་ཐལ་བར་བྱས་པར་མ་གྱུར་གྱི་བར་དུ་གཞོམ་མོ། །དེ་སྐད་ཅེས་སྨྲས་
པ་དང་། བདུད་ཀྱི་རིས་ཀྱི་ལྷའི་བུ་དེ་དག་ཐམས་ཅད་ཀྱིས་རྗེ་བཀའ་བཞིན་འཚལ་ཞེས་སྨྲས་ནས། རང་རང་གི་གནས་སུ་དོང་སྟེ། ལག་ན་མཚོན་ཆ་སྣ་ཚོགས་ཅན། ལུས་ལ་གོ་ཆ་སྣ་ཚོགས་པ། ཆ་བྱད་དང་། རྒྱན་སྣ་ཚོགས་ཅན། མཆེ་བ་མི་བཟད་པར་འཇིགས་སུ་རུང་བ། བཞིན་
མི་སྡུག་པར་བསྒྱུར་བ། མིག་དང་བཞིན་དང་། སྐྲ་ཀུན་དུ་འབར་ཞིང་རབ་ཏུ་འབར་བ་དག་སྐད་ཅིག་དེ་ཉིད་ལ་གཅིག་ཏུ་འདུས་ནས་བདུད་སྡིག་ཅན་ག་ལ་བ་དེར་དོང་སྟེ་ཕྱིན་ནས་བདུད་སྡིག་ཅན་ལ་འདི་སྐད་ཅེས་སྨྲས་སོ། །བཞེངས་བཞེངས་ཐོག་མར་བཞུད་ལ་ཇི་ཙམ་དུ་དགེ་སྦྱོང་གཽ་ཏ་
མ་ཉན་ཐོས་དང་། བྱང་ཆུབ་སེམས་དཔའི་དགེ་འདུན་དང་བཅས་པ་དེ་ཅི་ནས་ཀྱང་ཕྱིས་བདག་ཅག་གི་ཡུལ་དུ་གནོད་པ་ཅུང་ཟད་ཀྱང་མི་སྐྱེད་པ་དང་། བདག་ཅག་གི་ཡུལ་གནོད་པར་མི་འགྱུར་བར་དེང་ཉིད་དུ་ཕྱེ་མར་བརླག་གོ། །རྣམ་པར་གཞོམ་མོ། །དེ་ནས་བདུད་སྡིག་ཅན་དགའ་
ཞིང་མགུ་སྟེ་ཤིན་ཏུ་དགའ་བས་སྤུའི་ཁུང་བུ་ཁྱབ་ནས་སྐད་ཅིག་དེ་ཉིད་ལ་བདུད་ཀྱི་རིས་ཀྱི་ལྷའི་བུ་ཐམས་ཅད་དང་ལྷན་ཅིག་ཏུ་བདུད་ཀྱི་རྣམ་པར་འཕྲུལ་བ་ཆེན་པོ་དང་། བདུད་ཀྱི་སྡེ་ཆེན་པོས་བར་སྣང་དཔག་ཚད་སྟོང་ཕྲག་བརྒྱད་ཅུ་རྩ་བཞིར་ཁྱབ་པར་བྱས་ཏེ། དུང་དང་། རྔ་དང་། རྫ་རྔ་དང་།

འཁར་རྔ་དང་། རྒྱུད་གཅིག་པ་དང་། ལྕགས་ཀྱི་སིལ་ད་ཀྲོལ་དང་། རྔ་བོ་ཆེ་རྡུང་ཞིང་ཧུ་ཧུ་ཞེས་བྱ་བ་དང་། བི་ཙི་ཞེས་བྱ་བ་དང་། ཟུང་ཤིག་ཟུང་ཤིག །སོད་ཅིག་སོད་ཅིག་ཅེས་བྱ་བའི་སྒྲ་འབྱིན་ཅིང་གཤོལ་དང་། གཏུན་ཤིང་དང་། གཏུན་རྐེད་ཉག་པ་དང་། ཕུར་བུ་དང་། རྡོ་རྗེ་
རྩེ་གཅིག་པ་དང་། མདའ་བོ་ཆེ་དང་། མདུང་ཐུང་དང་། རྩེ་གསུམ་པ་དང་། རལ་གྲི་དང་། འཁོར་ལོ་དང་། གཞུ་དང་། མདའ་ལ་སོགས་པའི་མཚོན་ཆ་ལག་ན་ཐོགས་ཤིང་བཅོམ་ལྡན་འདས་ག་ལ་བ་དེར་སོང་སྟེ། སྐད་ཅིག་དེ་ཉིད་ལ་ཨ་ལ་ལ་ཞེས་བྱ་བའི་སྒྲ་ཕྱུང་ནས། བཅོམ་ལྡན་འདས་
ལ་མཚོན་ཆ་ཐམས་ཅད་ཀྱི་ཆར་ཕབ་པ་དང་། སངས་རྒྱས་ཀྱི་མཐུས་མཚོན་ཆ་དེ་དག་ཐམས་ཅད་མེ་ཏོག་གི་གདུགས་ཀྱི་སྤྲིན་ཆེན་པོར་གྱུར་པར་སྣང་ངོ་། །བདུད་ཀྱི་སྒྲ་དེ་དག་ཐམས་ཅད་ཀྱང་སངས་རྒྱས་ཀྱི་སྒྲ་དང་། ཆོས་ཀྱི་སྒྲ་དང་། དགེ་འདུན་གྱི་སྒྲ་དང་། ཡང་དག་པར་བགྲོ་བའི་སྒྲ་རྣམས་སུ་གྲག་
གོ། །བདུད་སྡིག་ཅན་ནི་ཞགས་པ་ལྔའི་བཅིངས་པས་བདག་ཉིད་བཅིངས་པར་མཐོང་ངོ་། །དེ་ནས་བདུད་ཀྱི་རིས་ཀྱི་ལྷའི་བུ་དེ་དག་ཐམས་ཅད་ཀྱིས་བཅོམ་ལྡན་འདས་ཀྱི་རྫུ་འཕྲུལ་གྱི་ཆོ་འཕྲུལ་ངོ་མཚར་ཆེན་པོ་དེ་མཐོང་ནས་ངོ་མཚར་དུ་གྱུར་ཅིང་དགའ་བ་ཐོབ་སྟེ། བཅོམ་ལྡན་འདས་དེ་ཉིད་ལ་སྐྱབས་
སུ་དོང་ངོ་། །བདུད་སྡིག་ཅན་ནི་བདག་ཉིད་དགྲོལ་བར་འདོད་ན་འགྲོལ་མ་ནུས་ཏེ། དེ་བཞིན་གཤེགས་པའི་འཁོར་གྱི་ཁྱམས་སུ་བཅོམ་ལྡན་འདས་ཀྱི་སྤྱན་སྔར་ཤིང་རྩ་བ་ནས་བཅད་པ་བཞིན་དུ་རྡོ་རྗེ་འཁོར་གྱི་ཁྱམས་ཆེན་པོར་འགྱེལ་ཏོ། །དེ་ནས་བཅོམ་ལྡན་འདས་ཀྱིས་དེའི་ཚེ་བྱམས་པ་ཆེན་
པོའི་ཐུགས་དང་། ཐུགས་རྗེ་ཆེན་པོས་བརླན་པའི་སྤྱན་གྱིས་དེ་བཞིན་གཤེགས་པའི་འཁོར་གྱི་ཁྱམས་ཐམས་ཅད་དུ་གཟིགས་ནས་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་ལག་ན་རྡོ་རྗེ་བདུད་སྡིག་ཅན་འདི་འཁོར་གྱི་ཁྱམས་འདི་ནས་
སློང་ལ་སྟན་ལ་ཞོག་སྟེ། རྡོ་རྗེའི་རྣམ་པར་ཐར་པའི་སྒོ་ཆེན་པོའི་ཏིང་ངེ་འཛིན་གྱི་རྣམ་པར་འཕྲུལ་བའི་བའི་བྱིན་གྱིས་བརླབས་བསམ་གྱིས་མི་ཁྱབ་པར་བདུད་ཀྱི་དཀྱིལ་འཁོར་ཐམས་ཅད་འཇོམས་པར་བྱེད་པ་ཞེས་པ་གང་གིས་བདུད་ཀྱི་རིས་ཀྱི་ལྷའི་བུ་འདི་དག་དང་། བདུད་སྡིག་ཅན་འདི་སངས་རྒྱས་

ལ་སྐྱབས་སུ་འདོང་བ་དང་། གཞན་ཡང་གང་དག་སྡང་བ་བགེགས་དང་། ལོག་འདྲེན་དང་། ཡི་དགས་དང་། བརྗེད་བྱེད་དང་། འབྱུང་པོ་དང་། གདོན་དང་། མཁའ་འགྲོ་མ་དང་། སྒྲུབ་པ་དང་། སྦྲུལ་འཛིན་བཅས་དང་། གནོན་པོ་དང་། ཟས་སུ་བཙས་པ་ཟ་
བ་ལ་སོགས་པ་སྡང་བའི་སེམས་དང་ལྡན་པ། རབ་ཏུ་སྡང་བའི་སེམས་དང་ལྡན་པ། དེ་བཞིན་གཤེགས་པའི་བསྟན་པ་ལ་མ་གུས་པ་དང་། དེ་བཞིན་གཤེགས་པའི་ཆོས་ཉིད་ཁོང་དུ་མ་ཆུད་པ་དེ་དག་ཐམས་ཅད་གང་གིས་འཛུད་པ་དང་། དཀོན་མཆོག་གསུམ་ལ་སྐྱབས་སུ་འགྲོ་བར་བྱེད་པ་
ཡང་སྟོན་ཅིག །དེ་ཅིའི་ཕྱིར་ཞེ་ན། དེས་ངན་འགྲོ་ལོག་པར་ལྟུང་བར་འགྲོ་བའི་ཕྱིར་རོ། །དེ་སྐད་ཅེས་བཀའ་སྩལ་པ་དང་། གསང་བ་པའི་བདག་པོ་ལག་ན་རྡོ་རྗེས་བཅོམ་ལྡན་འདས་ཀྱི་བཀའ་མཉན་ནས། རིན་པོ་ཆེའི་པདྨའི་རྡོ་རྗེའི་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་
ནས་པུས་མོ་གཡས་པའི་ལྷ་ང་རིན་པོ་ཆེའི་པདྨའི་སྙིང་པོ་ལ་བཞུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །སེམས་ཅན་ཀུན་གྱི་ཉོན་མོངས་པ། །གཞག་
པའི་སླད་དུ་འདྲེན་པར་བྱུང་། །ཁྱོད་ནི་བདུད་རྣམས་ཀུན་ལས་རྒྱལ། །འཇིག་རྟེན་རྩ་ལག་གཅིག་པུ་ཁྱོད། །ཐར་པའི་གྲོང་ཁྱེར་འཇུག་པའི་ལམ། །ཡེ་ཤེས་མ་ལུས་ཁྱོད་གཅིག་པུས། །ཡང་དག་བརྙེས་ནས་ཐུགས་རྗེ་ཡིས། །བརླན་པའི་ཐུགས་ཀྱིས་བསྟན་པ་མཛད། །ཁྱོད་སྔོན་
སྦྱིན་དང་ཚུལ་ཁྲིམས་དང་། །བཟོད་དང་བརྩོན་འགྲུས་བསམ་གཏན་དང་། །ཤེས་རབ་ལ་སོགས་ཡོན་ཏན་གྱིས། །བདག་མཛད་སླད་ཀྱིས་སེམས་ཅན་བཙུད། །ཁྱོད་ཀྱིས་ཆོས་རྣམས་སྐྱེ་མེད་པར། །བཤད་ཅིང་དེ་བཞིན་རྣམ་ཕྱེ་ཡང་། །འབྲས་བུར་དོགས་པ་མ་མཆིས་པ། །ཀྱེ་
མ་མགོན་པོ་ཁྱོད་ཀྱིས་བཤད། །འཁོར་ལོ་ཡན་ལག་བཅུ་གཉིས་པ། །ཁྱོད་ཉིད་མཁྱེན་ནས་རབ་ཏུ་བསྐོར། །མུ་སྟེགས་ཅན་དང་བདུད་བཏུལ་ཏེ། །ཆོས་ཀྱི་སྣང་བ་གསལ་བར་མཛད། །ཉོན་མོངས་བྲག་ཆེན་རྣམ་ཀུན་དུ། །ཡེ་ཤེས་རྡོ་རྗེས་རབ་བཅོམ་ནས། །སུས་ཀྱང་ཐོབ་པར་

མ་གྱུར་པའི། །བྱང་ཆུབ་བླ་ན་མེད་པ་བརྙེས། །གང་གི་མཚན་ཡང་རྫོགས་པ་ཡི། །བྱང་ཆུབ་ས་བོན་ཉིད་འགྱུར་བ། །ཁྱོད་ནི་འཇིག་རྟེན་མཆོག་གཅིག་པུ། །དམ་པ་རབ་སྦྱིན་བདག་པོ་ལགས། །ཁྱོད་ནི་མགོན་པོ་ཁྱོད་ནི་ཕ། །ཁྱོད་སྐྱབས་ཁྱོད་ནི་དཔུང་གཉེན་ལགས། །ཐུགས་རྗེ་
ཆེན་པོ་ཡེ་ཤེས་ཉིད། །མྱ་ངན་འདས་ནས་གཅིག་པུ་ཁྱོད། །ཁྱོད་ཉིད་གཤེགས་ནས་སེམས་ཅན་རྣམས། །སེམས་ཅན་དམྱལ་ལས་རྣམ་པར་བཀྲོལ། །རང་གི་སྐུ་ཡང་ཡོངས་བཏང་ནས། །ཁྱོད་ཀྱིས་སྲོག་ཆགས་རྣམས་ཀྱང་བསྲུངས། །ལུས་ཅན་ཀུན་གྱིས་མ་ཐོབ་པའི། །ཡེ་
ཤེས་ཁྱོད་ཀྱིས་བརྙེས་གྱུར་ནས། །གྲོལ་ཏེ་འཇིག་རྟེན་རྣམས་ཀྱང་གྲོལ། །ཀྱེ་མ་ཁྱོད་ནི་རྩ་ལག་བཟང་། །མགོན་པོ་ཁྱོད་ཀྱི་འོད་ཟེར་གྱི། །དྲ་བས་འཇིག་རྟེན་ཁམས་ཁྱབ་སྟེ། །མྱ་ངན་འདས་ལས་ལྷག་པ་བདེ། །ལུས་ཅན་ཀུན་གྱིས་ཐོབ་པར་མཛད། །ཁྱོད་ཀྱི་འོད་ཀྱི་
གཟིས་བཅོམ་པ། །གཟའ་རྣམས་ཀུན་དང་དགུང་ཟླ་དང་། །གདུགས་རྣམས་དང་ནི་ཞུགས་རྣམས་དང་། །ནོར་བུ་ལམ་མེར་མ་གྱུར་ཏོ། །དེ་ནས་གསང་བ་པའི་བདག་པོ་ལག་ན་རྡོ་རྗེས་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་བཅོམ་ལྡན་འདས་ལ་མངོན་པར་བསྟོད་ནས་ཡང་
རིན་པོ་ཆེའི་པདྨའི་སྙིང་པོ་ལ་འདུག་སྟེ། བཅོམ་ལྡན་འདས་ལེགས་སོ་ཞེས་གསོལ་ནས་རྡོ་རྗེའི་རྣམ་པར་ཐར་བའི་སྒོ་ཆེན་པོའི་ཏིང་ངེ་འཛིན་བདུད་ཀྱི་དཀྱིལ་འཁོར་ཐམས་ཅད་འཇོམས་པར་བྱེད་པ་ཞེས་བྱ་བ་ལ་སྙོམས་པར་ཞུགས་སོ། །གསང་བ་པའི་བདག་པོ་ལག་ན་རྡོ་རྗེས་རྡོ་རྗེའི་རྣམ་
པར་ཐར་པའི་སྒོ་ཆེན་པོའི་ཏིང་ངེ་འཛིན་བདུད་ཀྱི་དཀྱིལ་འཁོར་ཐམས་ཅད་འཇོམས་པར་བྱེད་པ་ཞེས་བྱ་བ་འདི་ལ་སྙོམས་པར་ཞུགས་མ་ཐག་ཏུ་དེ་ནས་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས། ཀུན་དུ་རབ་ཏུ་གཡོས་ཏེ། ཤར་ཕྱོགས་མཐོ་ན་ནུབ་ཕྱོགས་
དམའ། ནུབ་ཕྱོགས་མཐོ་ན་ཤར་ཕྱོགས་དམའ། ལྷོ་ཕྱོགས་མཐོ་ན་བྱང་ཕྱོགས་དམའ། བྱང་ཕྱོགས་མཐོ་ན་ལྷོ་ཕྱོགས་དམའ། མཐའ་མཐོ་ན་དབུས་དམའ། དབུས་མཐོ་ན་མཐའ་དམའ་བར་གྱུར་ཏོ། །ཕྱོགས་ཐམས་ཅད་དང་། ཕྱོགས་མཚམས་ཐམས་ཅད་ཀྱང་དགའ་

བ་དང་ཡིད་བདེ་བ་སྐྱེས་པར་གྱུར་ནས། ལྷམ་མེ། ལྷན་ནེ། ལྷང་ངེའོ། །གསང་བ་པའི་བདག་པོ་ལག་ན་རྡོ་རྗེའི་ཡན་ལག་དང་ཉིང་ལག་གི་མཚམས་ཐམས་ཅད་ནས་རྡོ་རྗེ་ཀུན་དུ་འབར་བར་བ་ཏུ་འབར་བ། ཀུན་དུ་རབ་ཏུ་མཆེད་ཅིང་འབར་བ། མེ་ལྕེ་གཅིག་ཏུ་གྱུར་པ་
དག་བྱུང་བར་ཀུན་དུ་སྣང་ངོ་། །རྡོ་རྗེ་འབར་བའི་སྣང་བ་དེས་ཕྱོགས་བཅུའི་འཇིག་རྟེན་གྱི་ཁམས་ཚད་མེད་གྲངས་མེད་དཔག་ཏུ་མེད་པ་ཇི་སྙེད་པ་དག་ན་སངས་རྒྱས་བཅོམ་ལྡན་འདས་གང་དག་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། ཚངས་པར་སྤྱོད་པ། ཐོག་མར་དགེ་
བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ། ཡང་དག་པར་སྟོན་པ། ཉན་ཐོས་ཀྱི་དགེ་འདུན་དང་བཅས་པ། བྱང་ཆུབ་སེམས་དཔའི་དགེ་འདུན་དང་བཅས་པ་
དེ་དག་གི་འཁོར་གྱི་ཁྱམས་རྒྱ་ཆེ་ཞིང་རྒྱ་ཆེ་བདག་ན་ཀུན་དུ་སྣང་ངོ་། །བྱང་ཆུབ་སེམས་དཔའ་དེ་དག་ཐམས་ཅད་ཀྱང་དེ་བཞིན་གཤེགས་པ་དེ་དག་གི་སྤྱན་སྔ་ན་རྡོ་རྗེ་འབར་བའི་སྣང་བ་རྒྱ་ཆེན་པོ་དེས་སྣང་བར་གྱུར་ནས། སངས་རྒྱས་བཅོམ་ལྡན་འདས་དེ་དག་ལ་སོ་སོར་ཞུས་པ། བཅོམ་ལྡན་
འདས་སྣང་བ་རྒྱ་ཆེན་པོ་ཀུན་དུ་གདའ་བ་འདི་སུའི་ལགས། དེ་ནས་སངས་རྒྱས་བཅོམ་ལྡན་འདས་དེ་དག་གིས་སོ་སོའི་བྱང་ཆུབ་སེམས་དཔའ་དེ་དག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་
ཐུབ་པ་ཞེས་བྱ་བ། མི་མཇེད་ཀྱི་འཇིག་རྟེན་གྱི་ཁམས་ན་རི་རབ་ཀྱི་སྟེང་ན་ཆོས་སྟོན་ཏེ། བཅོམ་ལྡན་འདས་དེས་བདུད་སྡིག་ཅན་ཞགས་པའི་བཅིང་བ་ལྔས་བཅིངས་ཏེ། བཅོམ་ལྡན་འདས་ཀྱི་སྤྱན་སྔར་འགྱེལ་བ་གཟིགས་ནས། བྱང་ཆུབ་སེམས་དཔའ་སེམས་དཔའ་ཆེན་པོ་གསང་
བ་པའི་བདག་པོ་ལག་ན་རྡོ་རྗེ་ཞེས་བྱ་བ་ལ་འདི་སྐད་དུ། གསང་བ་པའི་བདག་པོ་ལག་ན་རྡོ་རྗེ་ཁྱོད་ཀྱིས་རང་གི་རྫུ་འཕྲུལ་གྱིས་རྣམ་པར་འཕྲུལ་པའི་ཆོ་འཕྲུལ་སྟོན་ཅིག་ཅེས་བཀའ་སྩལ་ཏོ། །རིགས་ཀྱི་བུ་དག་འདི་ནི་རྡོ་རྗེའི་རྣམ་པར་ཐར་བའི་སྒོ་ཆེན་པོའི་ཏིང་ངེ་འཛིན་ལ་སྙོམས་པར་ཞུགས་ཏེ།

དེའི་རྡོ་རྗེའི་རྣམ་པར་འཕྲུལ་པ་ཆེན་པོའི་བྱིན་གྱིས་བརླབས་སོ། །དེ་སྐད་ཅེས་བཀའ་སྩལ་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་གནང་ནས། རིགས་ཀྱི་བུ་དེ་དག་ཐམས་ཅད་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་དེ་དག་ལ་ཕྱག་འཚལ་ཏེ། བྱང་ཆུབ་སེམས་དཔའ་སེམས་དཔའ་ཆེན་པོའི་རྣམ་པར་འཕྲུལ་པའི་ཆོ་འཕྲུལ་བསམ་གྱིས་མི་ཁྱབ་པས་འཇིག་རྟེན་གྱི་ཁམས་མི་མཇེད་འདིར་ལྷགས་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་ཤཱཀྱ་ཐུབ་པ་དང་། གསང་བ་པའི་བདག་པོ་ལག་ན་རྡོ་རྗེ་ལ་མཆོད་པའི་སྤྲིན་དང་། གདུགས་ཀྱི་སྤྲིན་དང་། རྒྱན་ཕྲེང་གི་སྤྲིན་དང་། དབུ་རྒྱན་གྱི་སྤྲིན་དང་། མེ་ཏོག་གི་སྤྲིན་དང་། ན་བཟའི་སྤྲིན་ཆེན་པོས་མཆོད་པ་ཆེན་པོ་བྱས་ནས། ནམ་མཁའི་དཀྱིལ་ན་འཁོད་
བཞིན་དུ་བཅོམ་ལྡན་འདས་ཤཱཀྱ་ཐུབ་པ་ལ་ལན་བདུན་བསྐོར་བ་བྱས་ཏེ། པུས་མོ་གཡས་པའི་ལྷ་ང་རིན་པོ་ཆེའི་པདྨའི་རྡོ་རྗེའི་སྟན་ལ་བཙུགས་ནས། བཅོམ་ལྡན་འདས་ལ་ལོགས་སུ་ལྟ་ཞིང་བཅོམ་ལྡན་འདས་ལ་ཕྱག་འཚལ་བ་དང་། དེ་བཞིན་གཤེགས་པས་གནང་ནས་རང་རང་གི་རིན་པོ་
ཆེའི་པདྨའི་རྡོ་རྗེའི་སྟན་དེ་དག་ལ་འཁོད་པར་གྱུར་ཏོ། །དེའི་ཚེ་ཤར་ཕྱོགས་ལོགས་ན་འཇིག་རྟེན་གྱི་ཁམས་རྡོ་རྗེ་ཏོག་ཅེས་བྱ་བ་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེའི་སྙིང་པོས་རབ་ཏུ་འཇོམས་པ་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་ཏེ།
འདི་ལྟར་རྡོ་རྗེའི་རི་རབ་ཆེན་པོའི་རྩེ་མོའི་ཁང་པ་བརྩེགས་པའི་གཟུངས་འདི་ཉིད་ལས་བརྩམས་ཏེ་ཆོས་ཀྱང་སྟོན་ཏོ། །རྡོ་རྗེ་འབར་བའི་སྣང་བ་དེས་ཀྱང་འཇིག་རྟེན་གྱི་ཁམས་ཇི་སྙེད་པ་དེ་དག་ཐམས་ཅད་ཀུན་ནས་སྣང་བར་གྱུར་ཏོ། །དེ་ནས་འཇིག་རྟེན་གྱི་ཁམས་དེ་ན་བྱང་ཆུབ་སེམས་དཔའ་སེམས་
དཔའ་ཆེན་པོ་རྡོ་རྗེའི་སྙིང་པོ་ཞེས་བྱ་བ་དེ་བཞིན་གཤེགས་པ་དེའི་འཁོར་གྱི་ཁྱམས་སུ་འདུས་ཏེ་འདུག་པར་གྱུར་པ་དེས་ངོ་མཚར་དེ་མཐོང་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེའི་སྙིང་པོས་རབ་ཏུ་འཇོམས་པ་ཞེས་བྱ་བ་དེ་ལ་ཞུས་ཏེ། བཅོམ་ལྡན་

འདས་རྡོ་རྗེ་འབར་བའི་སྣང་བ་འདི་ལྟ་བུ་གང་གིས་འཇིག་རྟེན་གྱི་ཁམས་འདི་ཐམས་ཅད་སྣང་བར་གྱུར་ཏེ། སེམས་ཅན་ཐམས་ཅད་ཀྱི་སྡུག་བསྔལ་ཐམས་ཅད་རྒྱུན་ཆད་ཅིང་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། ཡི་དགས་དང་། གཤིན་རྗེའི་འཇིག་
རྟེན་གྱི་སྡུག་བསྔལ་ཐམས་ཅད་མི་གདའ་བར་གྱུར། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་ལ་སོགས་པ་འཇིག་རྟེན་གྱི་ཁམས་ན་རྫུ་འཕྲུལ་ཆེ་ཞིང་དབང་ཆེ་བར་གྲགས་པ་ཐམས་ཅད་ཀྱང་ཀུན་ནས་
མཆོད་པའི་སྤྲིན་ཆེན་པོས་དགའ་བ་དང་། ཡིད་བདེ་བ་སྐྱེས་ཏེ། ནུབ་ཕྱོགས་སུ་མཆི་བར་གདའ་བ་འདི་སུའི་ལགས། དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེའི་སྙིང་པོས་རབ་ཏུ་འཇོམས་པས། བྱང་ཆུབ་སེམས་དཔའ་སེམས་དཔའ་ཆེན་པོ་
རྡོ་རྗེ་སྙིང་པོ་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ནུབ་ཕྱོགས་ཀྱི་ལོགས་ན་མི་མཇེད་ཀྱི་འཇིག་རྟེན་གྱི་ཁམས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བར་རྡོ་རྗེ་ཆེན་པའི་རི་རབ་ཀྱི་རྩེ་མོའི་ཁང་པ་བརྩེགས་པ་ན་རྡོ་རྗེ་ཆེན་པོའི་རི་རབ་ཀྱི་རྩེ་
མོའི་ཁང་པ་བརྩེགས་པའི་གཟུངས་ཞེས་བྱ་བའི་ཆོས་ཀྱི་རྣམ་གྲངས་སྟོན་ཏོ། །བཅོམ་ལྡན་འདས་དེས་སྤྱི་གཙུག་གི་མཚམས་ཀྱི་མཛོད་སྤུ་ནས་འོད་ཟེར་གྱི་དྲ་བ་ཆེན་པོ་ཕྱང་སྟེ། འོད་ཟེར་གྱི་དྲ་བ་ཆེན་པོ་དེས་འཇིག་རྟེན་གྱི་ཁམས་དེར་བདུད་སྡིག་ཅན་བསྐུལ་མ་ཐག་ཏུ་ཀུན་དུ་ཁྲོས་ནས་ལྷའི་བུ་ཐམས་
ཅད་དང་། གཞན་ཡང་བདུད་ཀྱི་རིས་ཀྱི་ལྷའི་བུ་རྣམས་དང་། དཔུང་གི་ཚོགས་ཆེན་པོ་དང་ལྷན་ཅིག་ཏུ་བཅོམ་ལྡན་འདས་དེ་ལ་གཙེ་བའི་ཕྱིར་ལྷགས་པ་དང་། དེ་ཡང་སངས་རྒྱས་ཀྱི་མཐུས་དེ་བཞིན་གཤེགས་པའི་འཁོར་གྱི་ཁྱམས་དེ་ཉིད་དུ་ཞགས་པ་ལྔའི་བཅིང་བས་བཅིངས་ནས།
བཅོམ་ལྡན་འདས་ཀྱི་སྤྱན་སྔར་འགྱེལ་ཏེ། དེ་ལ་ཐུགས་བརྩེ་བའི་ཕྱིར་བཅོམ་ལྡན་འདས་དེས་བྱང་ཆུབ་སེམས་དཔའ་སེམས་དཔའ་ཆེན་པོ་གསང་བ་པའི་བདག་པོ་ལག་ན་རྡོ་རྗེ་ལ་སྟོན་ཅིག་པར་བཀའ་ལུང་བྱིན་ནས་གསང་བ་པའི་བདག་པོ་ལག་ན་རྡོ་རྗེ་དེས་རྡོ་རྗེའི་རྣམ་པར་ཐར་པའི་སྒོ་ཆེན་

པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཡན་ལག་དང་ཉིང་ལག་གི་མཚམས་ཐམས་ཅད་ནས་རྡོ་རྗེ་རྣམས་བསྟན་ཏེ། འདི་ནི་རྡོ་རྗེ་དེ་དག་ཉིད་ཀྱི་རྡོ་རྗེ་འབར་བའི་སྣང་བའོ། །རིགས་ཀྱི་བུ་རྡོ་རྗེ་འབར་བའི་སྣང་བ་དེས་ཀྱང་ཕྱོགས་བཅུའི་འཇིག་རྟེན་གྱི་ཁམས་ཚད་མེད་གྲངས་མེད་དཔག་ཏུ་
མེད་པ་རྣམས་སུ་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་དང་མཉམ་པ་ཇི་སྙེད་པ་སྣང་བར་བྱས་ཏེ། འཇིག་རྟེན་གྱི་ཁམས་དེ་དག་ན་སངས་རྒྱས་བཅོམ་ལྡན་འདས་གང་དག་བཞུགས་པ་དེ་དག་ཐམས་ཅད་ཀྱང་བསྐུལ། བྱང་ཆུབ་སེམས་དཔའ་དེ་དག་གི་འཁོར་གྱི་དཀྱིལ་འཁོར་དེ་དག་ཀྱང་
བསྐུལ་བས་ངོ་མཚར་ཐོབ་པར་གྱུར་པ་དག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ་ཡང་སོ་སོར་ཞུས་སོ། །རིགས་ཀྱི་བུ་དེ་ཉིད་ཀྱི་མཐུས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་
དེའི་སྤྱན་སྔ་ན་འདུག་ཅིང་བསྙེན་བཀུར་བྱེད་པ་ཡང་མཐོང་ངོ་། །དེ་སྐད་ཅེས་བཀའ་སྩལ་པ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེའི་སྙིང་པོས་རབ་ཏུ་འཇོམས་པ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོས་འདི་སྐད་ཅེས་
གསོལ་ཏོ། །བཅོམ་ལྡན་འདས་བདག་འཇིག་རྟེན་གྱི་ཁམས་མི་མཇེད་དེར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་ལ་བལྟ་བ་དང་། ཕྱག་བགྱི་བ་དང་། བསྙེན་བཀུར་བགྱི་བ་དང་། གསང་བ་པའི་བདག་པོ་ལག་ན་རྡོ་རྗེ་དེ་ཡང་བལྟ་བར་བགྱི་
བའི་སླད་དུ་མཆིའོ། །དེ་སྐད་ཅེས་གསོལ་པ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེའི་སྙིང་པོས་རབ་ཏུ་འཇོམས་པས། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དེའི་དུས་
ལ་དབབ་པར་ཤེས་ན་སོང་ཤིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་བཅོམ་ལྡན་འདས་དེས་གནང་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེའི་སྙིང་པོས་རབ་ཏུ་འཇོམས་པ་དེ་ལ་ལན་བདུན་

བསྐོར་བ་བྱས་ཏེ། འཇིག་རྟེན་གྱི་ཁམས་དེ་ནས་མི་སྣང་བར་གྱུར་ནས། ནམ་མཁའི་དཀྱིལ་གྱི་ལམ་ནས་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དགུ་བཅུ་རྩ་དགུ་དང་ལྷན་ཅིག་ཏུ་བྱང་ཆུབ་སེམས་དཔའི་རྣམ་པར་འཕྲུལ་པ་ཆེན་པོ་དང་། བྱང་ཆུབ་སེམས་དཔའི་རྫུ་འཕྲུལ་ཆེན་
པོས་འཇིག་རྟེན་གྱི་ཁམས་མི་མཇེད་འདི་ག་ལ་བ་དེར་སོང་སྟེ་ཕྱིན་ནས་བྱང་ཆུབ་སེམས་དཔའ་དེ་དག་ཐམས་ཅད་ལྷན་ཅིག་སྨྲ་བ་ན། བསོད་ནམས་ཀྱི་ཚོགས་ཆེན་པོ་བསགས་པ་ལས་གྲུབ་པས་བྱིན་པའི་རིན་པོ་ཆེ་དེ་དག་ལས་འོད་ཟེར་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། ལྗང་སྔོན་དང་།
ལྗང་སེར་དང་། བཙོད་ཀ་དང་། ཤེལ་དང་། དངུལ་དང་། ནོར་བུ་དང་། མུ་ཏིག་དང་། གསེར་དང་། པདྨ་རཱ་ག་དང་། རྡོའི་སྙིང་པོ་དང་། ཀེ་ཀེ་རུ་དང་། ཀེ་ཀེ་རུ་ཆེན་པོ་དང་། ཨན་ད་རྙིལ་དང་། མཐོན་ཀ་ཆེན་པོ་དང་། དུན་ལས་དང་། གོ་མུ་ཏ་ར་ག་དང་། མུ་ཏིག་དམར་པོའི་ཁ་དོག་ལྟ་བུ་རྣམས་
བྱུང་སྟེ། དེ་དག་གིས་ཐམས་ཅད་དང་ལྡན་པའི་འཇིག་རྟེན་གྱི་ཁམས་ལ་ལན་འབུམ་ཕྲག་དུ་མར་བསྐོར་བ་བྱས་ཏེ། སྟེང་གི་བར་སྣང་ཁྱབ་པར་བྱས་ནས། ལྷའི་སྣང་བས་སྣང་བར་བྱས་ཏེ། འདུས་ནས་འཇའ་ལྟ་བུར་གྱུར་ཏེ། བཅོམ་ལྡན་འདས་དེ་བཞིན