Kinh tạng Tây Tạng (Kangyur Đại Học) — 095_རྒྱུད་འབུམ།_ཛ

འདས་མ་གོས་དཀར་ཅན་འདམ་བུ་མདའ་རྒྱུའི་མདོག་དང་ལྡན་པ། ཐོར་ཚུགས་བྱས་ཤིང་པདྨའི་ཕྲེང་བས་བརྒྱན་པ། པདྨ་ལ་བཞུགས་ཏེ་ཡིད་ཙམ་གྱིས་འདུད་པར་བྱའོ། །དེ་ནས་རིག་སྔགས་འཆང་སྤྱད་པ་བྱས་པས་མར་གྱི་
ངོ་ཞག་ལྔ་ལ་སྐུ་གདུང་དང་ལྡན་པའི་མཆོད་རྟེན་གྱི་དྲུང་དུ་རི་མོའི་སྐུ་གཟུགས་བཀྲམ་སྟེ། མཆོད་པ་རྒྱས་པར་བྱས་ལ་ལྷ་བཤོས་ཀྱང་རྒྱས་པར་དབུལ་ལོ། །རི་མོའི་གཟུགས་ཀྱི་མདུན་དུ་པྲི་ཡང་ཀུའི་ཕྱེ་མ་བརྫིས་པས་གཟུགས་བྱས་ཏེ། སྤྱན་རས་གཟིགས་ཀྱི་
གསང་སྔགས་སྙིང་པོ་དང་བཅས་པས་ལན་བརྒྱད་བརྒྱ་བཟླས་བརྗོད་བྱའོ། །དེ་ནས་མཇུག་བརྟུལ་ཏེ་རིག་སྔགས་ཀྱི་རྒྱལ་པོ་བཟླས་བརྗོད་བྱས་པས་མཚམས་རྣམས་བཅད་པར་བྱའོ། །བཅོམ་ལྡན་འདས་མས་ནི་སྟེང་དང་འོག་བཅིང་བར་བྱའོ། །སྟེང་དང་འོག་
བཅིང་བ་ན་ལྷོ་ཕྱོགས་སུ་སྐར་མདའ་ལྟུང་བར་འགྱུར་ཏེ། དེ་ནས་དངོས་གྲུབ་འགྲུབ་པའི་མཚན་མར་ཤེས་པར་བྱའོ། །དེ་ནས་རིག་སྔགས་འཆང་གིས་ཡང་ཉེ་རེག་བྱས་ལ་རི་མོའི་གཟུགས་ཀྱི་མདུན་དུ་ཀུ་ཤའི་སྟན་བྱས་ལ་འདུག་སྟེ། རིག་སྔགས་ལན་བརྒྱ་
སྟོང་བཟླས་བརྗོད་བྱས་ན་རི་མོའི་གཟུགས་འགུལ་ཞིང་ས་ཡང་གཡོ་བར་འགྱུར་རོ། །དེ་ནས་འགྲུབ་པར་འགྱུར་ཏེ་བླ་མ་ལ་ཕྱག་བྱས་ནས། རིག་སྔགས་བཟླས་བརྗོད་བྱེད་བཞིན་དུ་གྱེན་དུ་འཕགས་པར་བྱའོ། །འདོད་དགུར་སྒྱུར་བའི་གཟུགས་ཅན་དུ་འགྱུར་ཞིང་
དཔག་ཚད་སྟོང་དུ་གྱེན་དུ་འཕགས་ཤིང་རྣ་བ་གསང་ཞིང་མིག་རྣོ་བ་དང་རིག་སྔགས་འཆང་ཐམས་ཅད་ཀྱིས་མི་སོད་པ་དང་། །ཚེ་ལོ་དགུ་སྟོང་ཐུབ་པར་འགྱུར་རོ། །ལུས་དང་བྲལ་བའི་འོག་ཏུ་ཡང་བདེ་བ་ཅན་དུ་སྐྱེ་བར་འགྱུར་རོ། །གོས་དཀར་ཅན་གྱི་རིག་སྔགས་
ཀྱི་ཆོ་ག་ལ་གཞེན་འདེབས་ཤིང་སྒྲུབ་པར་བྱེད་པའི་གསང་སྔགས་ཆེན་པོ་ཡང་ངས་སྦྱིན་པར་བྱའོ། །ཨོྃ་ཤྲཱི་བཱཎྜ་ར་པཱ་སི་ནི། ན་ཛ་ཊ་མུ་ཀུ་དྷཱ་ད་ར་ཎེ་སྭཱ་ཧཱ། ཀ་བེ་ཀ་བེ་ཀི་བི་རི་སྭཱ་ཧཱ། རིག་སྔགས་འདི་ལག་ན་རྡོ་རྗེའི་མདུན་དུ་འཕགས་པ་སྤྱན་རས་གཟིགས་

དབང་ཕྱུག་གི་གཟུགས་གཞག་པར་བྱའོ། །དེའི་གཡོན་རོལ་དུ་ནི་གོས་དཀར་ཅན་གཞག་པར་བྱའོ། །དེ་ནས་རིག་སྔགས་འཆང་གིས་ཡར་གྱི་ངོ་ཟླ་བ་ཉ་ལ་ཉིན་མཚན་དུ་སྨྱུང་བ་བྱས་ཏེ། མེ་ཏོག་དང་དྲི་དང་བདུག་པ་ལ་སོགས་པས་མཆོད་པ་བྱས་ནས་ཞག་
གསུམ་གྱི་བར་དུ་བཟླས་བརྗོད་བྱས་ན། དེ་ནས་གོས་དཀར་ཅན་འགྲུབ་པར་འགྱུར་རོ། །གོས་དཀར་ཅན་གྱི་ཆོ་ག་རྫོགས་སོ།། །།ལྷ་རྣམས་ངས་འཕགས་པ་སྤྱན་རས་གཟིགས་དབང་ཕྱུག་གི་ལས་རྣམས་བཤད་ཟིན་ཏེ། གཞོན་ནུ་རྡོ་རྗེ་སྡེའི་ཐོགས་པ་མེད་པའི་
ལས་རྣམས་ཀྱང་བཤད་པར་བྱའོ། །སྟོན་ཟླ་ར་བ་ཚེས་བརྒྱད་ལ་ཞག་གཅིག་སྨྱུང་བ་བྱས་ཏེ། ལག་ན་རྡོ་རྗེའི་མདུན་དུ་ཀ་ར་པཱི་རའི་མེ་ཏོག་བརྒྱ་སྟོང་ལན་རེ་བཟླས་བརྗོད་བྱས་པས་འཕགས་པ་རྡོ་རྗེ་སྡེ་ལ་བསྣུན་ནས་མདུན་དུ་འདུག་པར་འགྱུར་ཏེ། ཕོ་ཉ་མོ་རྣམས་ཀྱིས་ལྷའི་
ཚོགས་སོ་ཅོག་འགུགས་པར་འགྱུར་ཞིང་དངོས་གྲུབ་སྦྱིན་དུ་འཇུག་སྟེ། །མངགས་མ་ཐག་ཏུ་ཡིད་ཅི་སེམས་པ་འགྲུབ་པར་འགྱུར་རོ། །གདོན་རྣམས་ཀྱི་སྙིང་གཞོམ་པར་བྱ་ན། ལན་བདུན་བཟླས་བརྗོད་བྱས་པའི་ཡུངས་ཀར་གྱིས་བྱའོ། །བཅའ་སྒ་ལ་ལན་བདུན་བཟླས་
བརྗོད་བྱ་སྟེ། གདོན་ལ་བསྟན་ན་གདོན་གྱི་ལུས་ཚ་བས་འདེབས་པར་འགྱུར་རོ། །ནད་དོ་ཅོག་ལ་ས་ལ་ལན་བདུན་བཟླས་བརྗོད་བྱས་ཏེ་བྱིན་ན་ནད་མེད་པར་འགྱུར་རོ། །གཞོན་ནུ་མཆོག་གི་གཞེན་འདེབས་ཤིང་སྒྲུབ་པར་བྱེད་པའི་སྙིང་པོ་བཤད་ཟིན་ཏོ། །དྲག་ཏུ་བསྐུལ་པ་
གཞན་ཡང་བཤད་པར་བྱའོ། །ན་མོ་བཛྲ་པཱ་ཎི་སྱ། ཨོྃ་ཧུ་ཡུ་ཧུ་ཡུ་སྭཱ་ཧཱ། །འཕགས་པ་རྡོ་རྗེ་སྡེའི་སྙིང་པོའོ། །མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ཏེ། ལག་ན་རྡོ་རྗེའི་མདུན་དུ་རྡོ་རྗེའི་སྡེ་བཞག་ནས་མེ་ཏོག་དཀར་པོ་བརྒྱ་སྟོང་སྙིང་པོ་དང་སྦྱར་ཏེ། འཕགས་པ་
རྡོ་རྗེ་སྡེ་ལ་བསྣུན་ན་དེ་ནས་འཕགས་པ་རྡོ་རྗེ་སྡེ་འགྲུབ་པར་འགྱུར་ཏེ། །དྲག་ཏུ་བསྐུལ་བའི་སྙིང་པོ་མཆོག་བཟླས་བརྗོད་བྱས་པས་ཐམས་ཅད་བྱེད་པར་འགྱུར་རོ། །འཕགས་པ་རྡོ་རྗེའི་སྡེའི་ཆོ་ག་རྫོགས་སོ།། །།ལྷ་རྣམས་ངས་འཕགས་པ་རྡོ་རྗེ་སྡེའི་ལས་གང་

དག་གིས་མྱུར་དུ་མདུན་ན་གནས་པར་གྱུར་པ་རྣམས་བཤད་ཟིན་ཏེ་འགིང་བར་དགའ་བ་མཐུ་དང་ཕ་རོལ་གནོན་པ་དཔག་ཏུ་མེད་པའི་རྒྱུད་ཕྱི་མ་གང་གིས་རྩེ་བཞིན་དུ་བདེ་བླག་ཏུ་ལས་རྣམས་བྱེད་པ་ཡང་བཤད་པར་བྱའོ། །མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བྱས་ཏེ་
འཕགས་པ་ལག་ན་རྡོ་རྗེའི་མདུན་དུ་ཨརྐའི་ཤིང་གིས་མེ་སྦར་ནས་ཡུངས་ཀར་མར་དང་སྦྱར་བས་ལན་བརྒྱ་སྟོང་སྦྱིན་སྲེག་བྱས་ན་གཞོན་ནུ་མཆོག་འགྲུབ་པར་འགྱུར་ཏེ། ལས་དེ་གྲུབ་པས་ཆོ་ག་རྒྱས་པར་གཞན་དག་བདེ་བླག་ཏུ་འགྲུབ་པར་འགྱུར་རོ། །རིག་སྔགས་འཆང་
རིག་སྔགས་སྒྲུབ་པ་ན་གཞོན་ནུའི་གསང་སྔགས་དྲན་པར་བྱས་ཏེ། དྲན་པ་ཙམ་གྱིས་མྱུར་དུ་མདུན་ན་འདུག་པར་འགྱུར་རོ། །རྩེ་ཞིང་སྒྲུབ་ན་ལྷ་ཐམས་ཅད་གཞོན་ནུ་བལྟ་བའི་ཕྱིར་འོང་བར་འགྱུར་ཏེ། འོངས་ནས་དངོས་གྲུབ་སྦྱིན་པར་བྱའོ། །ཞག་གསུམ་སྨྱུང་བ་བྱས་ཏེ་མར་
གྱི་ངོ་ཞག་བཅུ་བཞི་ལ་ལྷ་ཆེན་པོའི་གནས་སམ། ཡང་ན་ཀུན་དགའི་ར་བའམ། ཁང་སྟོང་དུ་སོང་ནས་བེའུ་དཀར་པོ་བླངས་ཏེ། དྲི་དང་། མེ་ཏོག་དང་། བདུག་པས་བརྒྱན་ལ་ཁ་ལྷོ་ཕྱོགས་སུ་བསྟན་ནས་སྦྲང་རྩི་དང་། ཨ་ལམ་བུ་མས་ལག་པ་གཉིས་བསྐུས་ཏེ། རྐང་པ་གཡས་པ་
བྱུག་པར་བྱའོ། །རིག་སྔགས་ཀྱང་ལན་བརྒྱད་སྟོང་བཟླས་བརྗོད་བྱས་ཏེ། བེའུ་སྨྲར་གཞུག་གོ། །དེ་སྟེ་སྨྲར་མི་བཏུབ་ན་ཡང་ལན་བརྒྱད་སྟོང་བཟླས་བརྗོད་བྱ་སྟེ། དེ་ནས་སྨྲར་བཅུག་ན་ཅི་བྱ་ཞེས་སྨྲ་བར་འགྱུར་རོ། །དེས་ཀྱང་འདོད་པ་ཐམས་ཅད་སྦྱིན་པར་གྱིས་ཤིག་ཅེས་སྨྲོས་ཤིག་
དེ་ནས་ཡིད་ལ་གང་བསམས་པ་དེ་ཐམས་ཅད་འགྲུབ་པར་འགྱུར་ཏེ་ཚེ་ལོ་སྟོང་ཉིས་བརྒྱ་ཐུབ་པར་འགྱུར་རོ། །གཞོན་ནུའི་ལས་རིག་སྔགས་སྒྲུབ་པར་བྱེད་པ་བཤད་ཟིན་ཏོ། །ཅི་སྟེ་རྡོ་རྗེའི་རིགས་བསྒྲུབ་པར་འདོད་ན། ལག་ན་རྡོ་རྗེའི་སྲས་གཙུག་ནས་བྱུང་གཏུམ་པ། དྲག་པ། འདུལ་
དཀའ་བ་བསྟན་པར་བྱའོ། །བསྒྲུབ་པར་འདོད་པ་གང་ཡིན་པས་ཡུམ་སྙིང་ལ་དྲན་པར་བྱས་ཏེ། སྲས་གཏུམ་པོ་དྲན་པར་བྱའོ། །འདི་ལས་གང་བསྒྲུབ་ན་རྡོ་རྗེའི་རིགས་འགྲུབ་པར་འགྱུར་བ་ཡང་བཤད་པར་བྱ་སྟེ། མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ནས་འཕགས་པ་

ལག་ན་རྡོ་རྗེའི་གློ་གཡས་ཕྱོགས་སུ་ནི་འཕགས་པ་རྡོ་རྗེ་སྡེ། གཡོན་ཕྱོགས་སུ་ནི་འཕགས་པ་གཙུག་ནས་བྱུང་བཞག་གོ། །དེ་དག་ལ་དྲི་དང་། མེ་ཏོག་དང་། བདུག་པ་རྣམས་དབུལ་བར་བྱ་སྟེ། འཕགས་པ་རྡོ་རྗེ་སྡེ་ལ་ནི་ཙནྡན་དཀར་པོ་དབུལ་ལོ། །འཕགས་པ་ལག་ན་རྡོ་
རྗེ་དང་། གཞོན་ནུ་ལ་ནི་ཙནྡན་དམར་པོ་དབུལ་ལོ། མེ་ཏོག་དཀར་པོ་དང་། དམར་པོ་ཡང་ཚུལ་དེ་དང་འདྲ་བར་དབུལ་བར་བྱ་སྟེ། དེའི་མདུན་དུ་སེང་ལྡེང་གི་ཤིང་གིས་མེ་སྦར་ལ། ཡུམ་གྱི་གསང་སྔགས་ཀྱིས་ཙནྡན་དམར་པོའི་ཡམ་སྲེག་ཤིང་མར་གྱི་ནང་དུ་སྨྱུགས་པ་བརྒྱ་
སྟོང་སྦྱིན་སྲེག་བྱའོ། །དེ་ནས་གཞོན་ནུ་འགྲུབ་པར་འགྱུར་ཏེ། བགེགས་མེད་པ་བདེ་བླག་ཏུ་ཆོ་ག་རྒྱས་པ་འགྲུབ་པར་འགྱུར་རོ། །ལག་ན་རྡོ་རྗེས་བཤད་པ་བཞིན། རིག་སྔགས་རྒྱལ་པོ་མངའ་བདག་མཆོག །གང་ཞིག་ཕྱག་འཚལ་མཆོད་བྱེད་དང་། གང་ཞིག་རྟག་
ཏུ་ལན་གཅིག་གམ། །ཡང་དང་ཡང་དུ་རྗོད་བྱེད་དང་། །གཟི་ཆེན་སྲས་ནི་ཡུམ་དང་བཅས། །ལེགས་པ་རུ་ནི་དྲན་པར་བྱེད། །དེ་ལ་ངས་ནི་ཁོར་ཟུག་ཏུ། །ལག་ན་རྡོ་རྗེས་བསྐུལ་བ་བཞིན། །དངོས་གྲུབ་ཀྱང་ནི་སྦྱིན་པར་བྱ། །གང་ཞིག་ཆོ་ག་རྒྱས་པ་འདི། །གསང་
བཅས་གསང་ཆེན་ལྡན་པ་དང་། །ལག་ན་རྡོ་རྗེས་སྔགས་བཤད་དང་། །གཟི་ཆེན་ཕྱི་མའི་རྒྱུད་ཀློག་དང་། །གཞོན་ནུ་དམ་པ་མངའ་བདག་ནི། །སྤྱན་དང་ལྷན་ཅིག་ལྡན་པ་དང་། །ཕྱི་མའི་རྒྱུད་ལས་བཤད་པ་ཡིན། །ལས་རྣམས་གང་ཞིག་ལྟ་བྱེད་པ། །དེ་ལ་དཔལ་
ལྡན་རྡོ་རྗེ་འཛིན། །ལུས་ཀྱི་སྤྱི་བོར་རྟག་ཏུ་གནས། །དེ་ནས་བཅོམ་ལྡན་འདས་ལག་ན་རྡོ་རྗེས་སངས་རྒྱས་ཀྱི་སྤྱན་སྤྱི་བོལ་བཀུར་ཏེ། རྡོ་རྗེ་འབར་བའི་ཏིང་ངེ་འཛིན་ལ་སྙོམས་པར་ཞུགས་སོ། །བཅོམ་ལྡན་འདས་ལག་ན་རྡོ་རྗེས་རྡོ་རྗེ་འབར་བའི་ཏིང་ངེ་འཛིན་ལ་
སྙོམས་པར་ཞུགས་མ་ཐག་ཏུ་ལྷ་ཐམས་ཅད་སེམས་འཇིགས་པར་འགྱུར་ཏེ། ལྷགས་ནས་ཁྱབ་འཇུག་ནི་བཅོམ་ལྡན་འདས་ཀྱི་གློ་གཡོན་ཕྱོགས་སུ་འདུག་གོ། །ལྷ་ཆེན་པོ་ནི་གཡས་ཕྱོགས་སུ་འདུག་གོ། །སྨིན་དྲུག་མ་ནི་འཛེམ་བཞིན་དུ་རྒྱབ་ལོགས་སུ་འདུག་གོ། །དཀའ་

ཟློག་མ་ནི་མདུན་ཕྱོགས་སུ་འདུག་གོ། །གཞོན་ནུ་དྲིལ་མཛེས་དང་། སྨིན་དྲུག་གི་བུ་ནི་གློ་གཡས་ཕྱོགས་སུ་འདུག་གོ། །ཚོགས་རྣམས་ནི་གཡོན་ཕྱོགས་སུ་འདུག་གོ། །ཕོ་ཉ་མོ་དྲུག་གིས་བསྐོར་བའི་དཔལ་གྱི་ལྷ་མོ་གཟི་བརྗིད་ཆེན་མོ་ཤིན་ཏུ་འོད་འབར་བ་དྲག་མོ་
ཕ་རོལ་གནོན་པ་དྲག་མོ་ནི་ཕྱོགས་གཅིག་ཏུ་འདུག་སྟེ། དེའི་ལྷ་ཡུལ་བ་དང་། ལྷ་མ་ཡིན་དང་། གྲུབ་པས་བརྟན་པའི་འཁོར་གྱི་དཀྱིལ་འཁོར་དེར་མ་ཞུགས་སོ། །དེ་ནས་བཅོམ་ལྡན་འདས་ལག་ན་རྡོ་རྗེ་ཏིང་ངེ་འཛིན་ལས་བཞེངས་ཏེ་ལྷ་དེ་དག་ལ་གླང་པོ་ཆེའི་ལྟ་སྟངས་ཀྱིས་བལྟས་སོ། །
དེ་ནས་ཕྱོགས་གཅིག་ན་འདུག་པའི་དཔལ་གྱི་ལྷ་མོ་དང་། །ཕོ་ཉ་མོ་སྟོབས་ཆེན་མོ་ལྷའི་ཕ་རོལ་གནོན་པ་དང་ལྡན་པ་དྲུག་ཀྱང་བལྟས་སོ། །དེ་ནས་ཕོ་ཉ་མོ་དྲུག་པོ་རྣམས་ཀྱི་དཔལ་གྱི་ལྷ་མོ་ཆེན་མོ་ལ་ལེགས་པར་བལྟས་ནས། །ཕོ་ཉ་མོ་དེ་དག་གིས་བསྟོད་དེ། །ཕོ་ཉ་མོ་ཆེན་མོ་མེ་ལྕེ་མ་
དང་། མེ་སྟག་མ་དང་། །ཕྲེང་ལྡན་མ་དང་། མཛོད་ལྡན་མ་དང་། འབར་ལྡན་མ་དང་། ཁ་འབར་མ་དང་། འདི་དག་གིས་དཔལ་གྱི་ལྷ་མོ་ལ་བསྟོད་པ། ཨགྣི་ཛི་ཧྭཱ་སྭཱ་ཡཾ་ན་མཿ། པི་ཏ་དཾཥྚཱ་ཡ་ན་མཿ། ཡ་མཱ་ཡ་ན་མཿ། ད་ཧ་ནཱ་ཡ་ནམཿ། བི་དུ་ཛི་ཧྭཱ་ཡ་ནཱ་མཿ ཨཱ་དརྴ་ནཱ་ཡ་ན་མཿ། བྲི་ཤ་
ལཱ་ཡ་ན་མཿསྭཱ་ཧཱ། མེ་ལྕེ་མས་བསྟོད་ནས་ལྷ་རྣམས་དགའ་བར་གྱུར་ཏོ། མེ་སྟག་མའི་རིག་སྔགས་བཤད་དེ། །ཙུ་རུ་ཙུ་རུ། མུ་རུ་མུ་རུ། པུ་རུ་པུ་རུ་སྭཱ་ཧཱ། ཨཱ་ཀེཙྪ་བ་ཏི་སྭཱ་ཧཱ། མེ་སྟག་མས་བསྟོད་ནས་ཕྲེང་ལྡན་མས་བསྟོད་པ། ན་མོ་བཛྲ་པཱ་ཎ་ཡེ། དེ་བ་ཏི། དེ་བ་ཡ།
ཙི་ལི་མི་ལི། ཀ་ལི་པྲ་ཏཱིཙྪ་བི་ལི་དེ་བ་ཏི་སྭཱ་ཧཱ། ཕྲེང་ལྡན་མས་བསྟོད་ནས་མཛོད་ལྡན་མས་བསྟོད་པ། །ན་མོ་བཛྲ་པཱ་ཎ་ཡེ་དྭེ་བ་ཏི་དྷ་བཱ་ཡ་ཏི་པ་རི་སི་རི་རི། བི་དུ་རི། ཛ་པེ་ན་ཏ་ཏོ་ད་ནེ་སྭཱ་ཧཱ། མཛོད་ལྡན་མས་བསྟོད་ནས་འབར་ལྡན་མས་མངོན་པར་བསྟོད་དོ། །ན་མོ་བཛྲ་
པཱ་ཎི་སྱ། ན་མཿཔྲ་ཙནྡྲ་སྱ། ན་མ་སྐྲྀ་ཏྭཱ་སརྦ་བྷཱུ་ཏ། པྲ་ཤ་མ་ནི། སརྦ་ཨརྟ་སིངྣཾ་བ་ཤེ་མི་ཧུ་ན་ནི་ཧུ་ན་ནི། མོ་ཧ་ནི་མོ་ཧ་ནི། ཧི་ཧི་བཛྲ་པཱ་ཎི་སྭཱ་ཧཱ། །འབར་ལྡན་མས་བསྟོད་ནས་ཁ་འབར་མས་མངོན་པར་བསྟོད་པ། ཤྲི་ཡེ་མ་ཧཱ་ཤྲི་ཡེ། ཙ་ལ་མ་ཧཱ་ཙ་ལེ། ཨིརྱིད་དེ་ཀ་ནི།

མ་ཧཱ་བྷོ་གི་ནི། བྷོ་ག་བ་ཏཱི། མ་མཱ་བ་ལོ་ཀ་སྭཱ་ཧཱ། ཁ་འབར་མས་བསྟོད་ནས་ལྷའི་མིག་གིས་རྣམ་པར་བལྟས་སོ། །དེ་ནས་དཔལ་གྱི་ལྷ་མོ་ཆེན་མོས་ལག་ན་རྡོ་རྗེ་ལ་བསྟོད་ནས་དེ་ནས་བསྐྱོད་པར་བརྩམས་སོ། །དེ་ནས་ལྷའི་དཀྱིལ་འཁོར་དེ་དག་གིས་དཔལ་གྱི་ལྷ་མོ་ཆེན་མོ་
རྒྱང་རིང་པོ་ནས་འོང་བར་མཐོང་ནས་མྱུར་དུ་ལངས་ཏེ། ལག་ན་རྡོ་རྗེའི་གཡས་ཕྱོགས་སུ་འཁོད་དོ། །སྟོབས་པོ་ཆེའི་ཚོགས་བརྒྱད་ལ་གཏུམ་བྱེད་དང་། གསར་ཅན་དང་། །རྨུགས་བྱེད་དང་། རྫོང་ལྡན་དང་། ལྕགས་ཅན་དང་། སོ་ཅན་དང་། མཚན་སྦྱིན་དང་།
བདུད་རྩི་ཐབ་སྦྱོར་ལ་སོགས་པ་ཚོགས་བརྒྱད་པོ་དེ་དག་གིས་མངོན་པར་བསྟོད་དོ། །ཚོགས་རྣམས་ཀྱིས་དཔལ་གྱི་ལྷ་མོ་ཆེན་མོ་སྟོབས་ཆེན་མོ་བསྟོད་པ་ནི་སྤྱན་དང་ལག་ན་རྡོ་རྗེ་ལ་ཕྱག་འཚལ་ནས། ཐོག་མར་གཏུམ་བྱེད་མ་བརྗོད་པ། ན་མོ་བཛྲ་པཱ་ཎི་ཡེ། ད་མ་ད་མ་
རང་གཱ་རང་གཱ། ག་ག་ག་ཡ་ག་ཡ་ག་ཡ། ཙནྡ་ཀོ་ཛྙཱ་པ་ཡ་ཏི་སྭཱ་ཧཱ། གཉིས་པ་སྟེ་གསར་ཅན་བརྗོད་པ། ན་མོ་བཛྲ་པཱ་ཎི་སྱ། བ་ན་བ་ན། ཙ་པ་ལ་ཙ་པ་ལ། །ན་མོ་ཛཱ་ཀཱ་ཛྙཱ་པ་ཡ་ཏི་སྭཱ་ཧཱ། །གསུམ་པ་སྟེ་རྨུགས་བྱེད་བརྗོད་པ། ན་མོ་བཛྲ་པཱ་ཎི་སྱ། ད་ཧ་ད་ཧ། པ་ཙ་པ་
ཙ། ཙཱུརྞ་ཙཱུརྞ། ནཱ་ཤ་ཡ། བི་ནཱ་ཤ་ཡ་ཛཾ་བྷ་ཀོ་ཨ་ཛྙཱ་པ་ཡེ་ཏི་སྭཱ་ཧཱ། བཞི་པ་སྟེ་རྫོང་ལྡན་བརྗོད་པ། ན་མོ་བཛྲ་པཱ་ནི་སྱ། ཙུ་རུ་ཙུ་རུ། ཏ་ཏ་ཏ་ཏ། མ་ཏ་མ་ཏ། ཀོཏྟ་ཀོཏྟ་ཛྙཱ་པ་ཡ་ཏི་སྭཱ་ཧཱ། ལྔ་པ་སྟེ་ཚོགས་ཆེན་མོ་ལྕགས་ཅན་བརྗོད་པ། ན་མོ་བཛྲ་པཱ་ཎི་སྱ། ཏ་དྱ་ཐ། ར་བ་ར་བ།
ད་བ་ད་བ། མ་ར་མ་ར། མཱ་ར་མཱ་ར། བྷཉྫ་བྷཉྫ། ཧ་ནེ་ཧ་ན། ད་ཧེ་ད་ཧ། པ་ཙ་པ་ཙ། གྲྀཧྞ་གྲྀཧྞ། ཚིནྡ་ཚིནྡ། བྷིནྡ་བྷིནྡ། ཧ་ན་ལོ་ཧཱ་ཀ་བཛྲ་ཎ་སྭཱ་ཧཱ། དྲུག་པ་སྟེ་སོ་ཅན་བརྗོད་པ། ན་མོ་བཛྲ་པཱ་ཎི་སྱ། ཧུ་ཏ་ཧུ་ཏ། གྲཱ་ཧ་མ་བ་ཧ་རི། ཤུ་མི་བཛྲ་ཧ་སྟེ་ན། སུ་པྲ་ཏ་ན་ད་ན་ཏ་ཀཱཛྙཱ་པ་ཡ་
ཏི་སྭཱ་ཧཱ། བདུན་པ་སྟེ་ཚོགས་གཟི་བོ་ཆེ་སྟོབས་པོ་ཆེ་མཚན་སྦྱིན་བརྗོད་པ། ན་མོ་བཛྲ་པཱ་ཎི་སྱ། ཏིཥྛ་ཏིཥྛ། བྷོ་མ་ཧཱ་གྲ་ཧ་བཛྲ་ས་ཏྱེ་ན་སུ་པྲ་ཏི་པི་བ་བི་ལ་ཏོ་དཱ་ཛྙ་པ་ཡ་ཏི་སྭཱ་ཧཱ། བརྒྱད་པ་སྟེ་ཚོགས་ཆེན་པོ་བདུད་རྩི་ཐབས་སྦྱོར་བརྗོད་པ། ན་མོ་བཛྲ་པཱ་ཎི་སྱ། ཧུ་ལུ་ཧུ་ལུ། ཏིཥྛ་ཏིཥྛ།

ཨ་མྲྀ་ཏ་ཀུནྜ་ལི། ཁ་ཁ་ཁཱ་ཧི་ཁཱ་ཧི། བནྡྷ་བནྡྷ་སྭཱ་ཧཱ། ལྷ་དེ་དག་གིས་ཚོགས་ཆེན་པོ་བརྒྱད་པོ་འདི་དག་ལས་བརྩམས་ཏེ། དཔལ་གྱི་ལྷ་མོ་ཆེན་མོ་ལ་བསྟོད་ནས། ཚོགས་ཆེན་པོ་དེ་དག་གིས་ཀྱང་དཔལ་གྱི་ལྷ་མོ་ཆེན་མོ་ལ་རིམ་གྲོ་བྱེད་ཅིང་ལག་ན་རྡོ་རྗེའི་འཁོར་
གྱི་དཀྱིལ་འཁོར་དུ་སོང་ངོ་། །དེ་ནས་གཞོན་ནུ་སྨིན་དྲུག་གི་བུས་ལྷ་མོ་དེ་དག་ལ་བསྟོད་པ་མཐོང་ནས། རང་གི་རིག་སྔགས་ཀྱིས་དཔལ་གྱི་ལྷ་མོ་ཆེན་མོ་ལ་བསྟོད་པ། ན་མོ་བཛྲ་པཱ་ཎི་སྱ། ཏྲཻ་ལོཀྱ་ཛཱ་ལ་ནི་བི་དྲཱ་པ་ཎི། སརྦ་དྷརྨཱ་ཎི། ས་མ་ཎི། ས་མི་ར་ཎི། སརྦ་ལོ་ཀ་པ་ཤྱཾ་ཀ་རི།
ཛཛྫེ་མུ་ཛེ། ཧྲྀ་ད་ཡཾ། ཨ་བརྟི་ནི། མི་ལི་མི་ལི། མི་ལི་ཙ་ལཱ་ཡ། སརྦ་ལོ་ཀོཏྶཱ་ད་ནི། ཨ་ནུ་ན་ཧ་ན་སྭཱ་ཧཱ། དེ་ནས་དཔལ་གྱི་ལྷ་མོ་ཆེན་མོ་གཞོན་ནུ་སྨིན་དྲུག་གི་བུས་བསྟོད་ནས་ཡིད་རབ་ཏུ་དགའ་ཞིང་། འཁོར་གྱི་དཀྱིལ་འཁོར་གྱི་ནང་དུ་སོང་ངོ་། །དེ་ནས་དཔལ་གྱི་ལྷ་མོ་ཆེན་མོ་འཁོར་
གྱི་དཀྱིལ་འཁོར་གྱི་ནང་དུ་སོང་བ་དྲུག་མས་མཐོང་ནས་རང་གི་རིག་སྔགས་ཀྱིས་བསྟོད་པ། ན་མོ་བཛྲ་པཱ་ཎི་སྱ། ན་མཿསཏྱ་པཱ་ཎི་ནཾ། སཏྱ་བཱ་ཙ་ནེ་ནས་ཏྱ། བ་ཏི་ནི་ས་ཏྱཾ་བ་དེ་ས་ཏྱཾ། བ་ཧི་ཏེ་ཛ་བ་ཏི། མཱ་ལ་ནི། ཧ་རི་ཎི་བརྟ་ནི། ཛ་ལོ་ཏིཅྩ་ལི། སརྦ་ལོ་ཀ་པ་ཤྱངྐ་རི། ཨཱཏྨ་ནཾ་མུ་
ནི་སྱ། ཀི་བི་ཏི། ཡོ་ག་མེ་ད་རེ། ཧི་ལི་ཧི་ལི། ན་མོ་སྟུ་དེ་སྭཱ་ཧཱ། དྲུག་མས་བསྟོད་པ། དཀའ་ཟློག་མས་མཐོང་ནས་མངོན་པར་བསྟོད་པ། ན་མོ་བཛྲ་པཱ་ཎི་སྱ། སྱད་དེ། ད་ཡི་ཏེ། ཨ་ཏི་ཏྲེ། སྭ་མེ་བྲཧྨ། བི་ད་ནི། རྀ་ཥྀ་རྀ་ཥི། ནཀྵ་ཏྲེ། ཡ་སྟ་ཏྲ་སྱ་དྱ་ན། ཏམ་བ་ཏ་ཀ་
ཏེ་ཡ་ནི་སྭཱ་ཧཱ། དེ་ནས་དཔལ་གྱི་ལྷ་མོ་ཆེན་མོ་ལ་དྲུག་མ་དང་དཀའ་ཟློག་མ་གཉིས་ཀྱིས་བསྟོད་ནས་དྲུག་མ་དང་དཀའ་ཟློག་མ་གཉིས་ལ་ཡང་བལྟས་ཏེ། ལག་ན་རྡོ་རྗེའི་འཁོར་གྱི་དཀྱིལ་འཁོར་གྱི་ནང་དུ་སོང་ངོ་། །དེ་ནས་དཔལ་གྱི་ལྷ་མོ་ཆེན་མོ་ལྷ་རྣམས་ཀྱིས་བསྟོད་དེ། ལག་ན་
རྡོ་རྗེ་འཁོར་གྱི་དཀྱིལ་འཁོར་གྱི་ནང་དུ་ཞུགས་ནས་རིག་པ་མཆོག་གི་ཆོ་ག་ཆེན་པོ་རྒྱས་པ་ཕྱིར་ཞིང་འཕེལ་བར་བྱ་བ་དང་། རིག་པ་མཆོག་གི་ཆོ་ག་རྒྱས་པ་ཆེན་པོ་བརྒྱན་པ་དང་། རིག་པ་མཆོག་གི་ཆོ་ག་ཆེན་པོ་རྒྱས་པ་བསྒྲུབ་པ་དང་། རིག་པ་མཆོག་གི་ཆོ་ག་རྒྱས་པ་ཆེན་པོའི་དཔལ་བསྐྱེད་

པ་དང་། རིག་པ་མཆོག་གི་ཆོ་ག་རྒྱས་པ་ཆེན་པོའི་རིག་སྔགས་ཀྱི་ལས་ཐམས་ཅད་བྱ་བའི་ཕྱིར། རིག་སྔགས་ཀྱི་རྒྱལ་པོ་ཆེན་པོའི་མཆོག་ལག་ན་རྡོ་རྗེས་རྗེས་སུ་ཡི་རང་བ། མ་གྲུབ་པ་རྣམས་གྲུབ་པར་བྱེད་པ། གྲུབ་པ་རྣམས་ཆུད་མི་ཟ་བར་བྱེད་པ། འདོད་པ་ཐམས་ཅད་རབ་
ཏུ་སྦྱིན་པ་དང་། རྟག་ཏུ་དཔལ་མངོན་པར་འཕེལ་བར་བྱེད་པ། དཀྱིལ་འཁོར་ཐམས་ཅད་གསལ་བར་བྱེད་པ། དཀྱིལ་འཁོར་ཐམས་ཅད་ཀྱི་ནང་དུ་གཏོགས་པ། དཀྱིལ་འཁོར་ཐམས་ཅད་དུ་འཇུག་པར་བྱེད་པ། དཀྱིལ་འཁོར་ཐམས་ཅད་སྒྲུབ་པའི་རིག་སྔགས་བཤད་དེ། དེ་
བཞིན་གཤེགས་པ་ཐམས་ཅད་ལ་ཕྱག་འཚལ་ནས་རིག་སྔགས་ཀྱི་རྒྱལ་པོ་ཆེན་པོ་ལག་ན་རྡོ་རྗེའི་སྤྱི་བོ་ལ་བཀུར་ཏེ། རིག་སྔགས་འདི་བཤད་དོ། །ན་མོ་བུདྡྷ་སྱ། ན་མོ་དྷརྨ་སྱ། ན་མཿསངྒྷ་སྱ། ན་མོ་བཛྲ་པཱ་ཎི་སྱ། ན་མོ་ཡཀྵཱ་ནཱཾ། ན་མོ་མ་ཧཱ་ཤྲི་ཡེ། ཙི་ལི་ཙི་ལི། ཨུནྨཱ་ད། པྲ་
མནྟེ། དྲྀཌྷ། ཤྲི་ཡེ། ཙ་ལེ་ཙ་ལེ། ཤྲི་ཡེ། ཙ་ལེ་ཙ་ལེ། ཤྲི་ཡེ། ཨ་ཀི་ར་ཎི། ཨུ་པ་ཏིཥྛ། ཨུ་པ་ཏིཥྛ། ཨི་མི་ཏིཥྛ། ཨི་མཾ་པུ་རུ་ཥ། མ་ན་མ་ཨུ་པ་ཏིཥྛ། མ་ཡ་རམ། གྲི་ཧེ་གྲི་ཧེ། དེ་པ་ཏི་བཛྲ་སྭ་མཱཾ་སྭཱ་ཧཱ། རིག་སྔགས་ཀྱི་རྒྱལ་པོ་མོ་ཆེན་མོ་དཔལ་གྱི་ལྷ་མོ་ཆེན་མོས་རིག་སྔགས་བཤད་མ་
ཐག་ཏུ་ལྷ་རྣམས་ཀྱིས་དེ་ཐོས་ནས་སྙིང་འདར་ཏེ་ལག་ན་རྡོ་རྗེའི་ཞལ་དུ་ལྟ་ཞིང་འཁོད་དོ། །དེ་ནས་རིག་སྔགས་ཀྱི་རྒྱལ་པོ་ཆེན་པོ་ལག་ན་རྡོ་རྗེས་ལྷ་དེ་དག་ལ་འདི་སྐད་ཅེས་སྨྲས་སོ། །ལྷ་རྣམས་ཁྱེད་ཀྱིས་རིག་སྔགས་ཀྱི་རྒྱལ་པོ་ཆེན་པོ་དཔལ་གྱི་ལྷ་མོ་ཆེན་མོས་རིག་སྔགས་བཤད་པ་གང་ཡིན་
པ་ཉོན་ཅིག །རིག་པ་མཆོག་གི་ཆོ་ག་རྒྱས་པ་ཆེན་པོའི་ཕྱིར་འཕེལ་བར་བྱ་བ་དང་། རིག་པ་མཆོག་གི་ཆོ་ག་རྒྱས་པ་ཆེན་པོ་བརྒྱན་པ་དང་། རིག་པ་མཆོག་གི་ཆོ་ག་རྒྱས་པ་ཆེན་པོ་བསྒྲུབ་པ་དང་། རིག་པ་མཆོག་གི་ཆོ་ག་རྒྱས་པ་ཆེན་པོའི་དཔལ་མངོན་པར་བསྐྱེད་པ་དང་། རིག་
པ་མཆོག་གི་ཆོ་ག་རྒྱས་པ་ཆེན་པོའི་རིག་སྔགས་ཀྱི་ལས་ཐམས་ཅད་བྱ་བའི་ཕྱིར་མ་གྲུབ་པ་རྣམས་གྲུབ་པར་བྱེད་པ། གྲུབ་པ་རྣམས་ཆུད་མི་ཟ་བར་བྱེད་པ། འདོད་པ་ཐམས་ཅད་རབ་ཏུ་སྦྱིན་པ། རྟག་ཏུ་དཔལ་འཕེལ་བར་བྱེད་པ། དཀྱིལ་འཁོར་ཐམས་ཅད་གསལ་བར་བྱེད་པ། དཀྱིལ་

འཁོར་ཐམས་ཅད་ཀྱི་ནང་དུ་གཏོགས་པ། དཀྱིལ་འཁོར་ཐམས་ཅད་དུ་འཇུག་པར་བྱེད་པ། དཀྱིལ་འཁོར་ཐམས་ཅད་སྒྲུབ་པའི་རིག་སྔགས་བཤད་པ་དེ་བཟོད་ལྡན་དག་ཁྱེད་ཀྱིས་རྒྱགས་པ་མེད་པའི་སེམས་ཀྱིས་ཉོན་ཅིག །ངས་རྡོ་རྗེ་འབར་ཞིང་རབ་ཏུ་འབར་ལ་
ཀུན་ཏུ་རབ་ཏུ་འབར་བས་སྤྱི་བོ་གཤགས་ས་རེ། དེ་ནས་ལྷ་རྣམས་སྙིང་འདར་ཏེ་ལག་ན་རྡོ་རྗེའི་ཞལ་དུ་བལྟ་ཞིང་རིག་སྔགས་ཀྱི་རྒྱལ་པོ་ལག་ན་རྡོ་རྗེ་དཀྱིལ་འཁོར་གྱི་ནང་དུ་གཏོགས་པའི་རིག་སྔགས་ཀྱིས་ཀྱང་མངོན་པར་བསྟོད་དེ། རིག་སྔགས་ཀྱི་རྒྱལ་པོ་ཆེན་པོ་དཔལ་གྱི་ལྷ་མོས་རིག་
སྔགས་བཤད་པ་གང་ཡིན་པ་དེ་དག་གིས་ལག་ན་རྡོ་རྗེ་ལ་བསྟོད་ནས་ཚིག་འདི་སྐད་ཅེས་སྨྲས་སོ། །རིག་སྔགས་ཀྱི་རྒྱལ་པོ་ཆེན་པོ་དཔལ་གྱི་ལྷ་མོ་ཀུན་ཏུ་ལྟ་བ་ཆེན་པོའི་རིག་སྔགས་དཀྱིལ་འཁོར་གྱི་ནང་དུ་གཏོགས་པའི་ལས་རྣམས་བཤད་དུ་གསོལ། དེ་ནས་རིག་
སྔགས་ཀྱི་རྒྱལ་པོ་ཆེན་པོ་ལག་ན་རྡོ་རྗེས་ལྷ་དེ་དག་ལ་འདི་སྐད་ཅེས་སྨྲས་སོ། །ལྷ་རྣམས་ངས་བཤད་ཀྱིས་ཁྱེད་ཉོན་ཅིག །རིག་སྔགས་འཆང་ཐམས་ཅད་ཀྱིས་དཔལ་མངོན་པར་འབྱུང་བར་བྱེད་པ་ཞེས་བྱ་བའི་དཀྱིལ་འཁོར་དཔལ་ཐམས་ཅད་སྐྱེད་པར་བྱེད་པ། ཕ་རོལ་ཏུ་ཕྱིན་པ་
ཐམས་ཅད་ཀྱི་ཚོགས་སུ་གྱུར་པའི་དཀྱིལ་འཁོར་གྱི་རྒྱལ་པོ་དེ་ངས་བཤད་པར་བྱ་སྟེ། གང་མཐོང་ནས་རིག་སྔགས་འཆང་ཐམས་ཅད་ཀྱི་དཔལ་ཐམས་ཅད་ཀྱི་མངོན་པར་འགྱུར་བ་དང་། ལྷ་ཐམས་ཅད་བསྐྱེད་པར་འགྱུར་བ་དང་། ལོག་འདྲེན་ཐམས་ཅད་ཞི་བར་འགྱུར་བ་དང་། རྒྱལ་སྲིད་
ཐམས་ཅད་བརྟན་པར་འགྱུར་བ་དང་། དགྲ་ཐུལ་བར་འགྱུར་བ་དང་། རིག་སྔགས་འཆང་གི་དཔལ་རྣམས་འཕེལ་བར་འགྱུར་བའི་དཀྱིལ་འཁོར་གྱི་རྒྱལ་པོ་དེ་ངས་བཤད་དོ། །ས་གཞི་མཉམ་པར་བརྟག་བྱས་ལ། །ཤེས་རབ་ཅན་གྱིས་དཀྱིལ་འཁོར་བྲི། །ཁྲུ་ནི་བཞིའམ་བཅུ་དྲུག་
པ། །གྱོ་མོ་དང་ནི་གསེག་མ་མེད། །དུར་ཁྲོད་ཡང་ན་ཤིང་གཅིག་དྲུང་། །ཡང་ན་ཆུ་ཀླུང་འདུས་པའི་མདོ། །ས་གཞི་དེ་དག་བརྟག་བྱས་ལ། །དེ་ནས་མཁས་པས་དཀྱིལ་འཁོར་བྲི། །ས་དེ་ལྟ་བུ་མཐོང་ནས་སྨྱུང་བ་བྱས་ཏེ་གསོ་སྦྱོང་དང་ལྡན་པས་དུ་གུ་ལའི་རས་དཀར་པོ་བགོས་

ལ། ལག་ན་པོག་ཕོར་ཐོགས་ནས་ཕྱེ་མ་རེད་ཀྱི་དུས་མཚམས་སུ་དཔལ་གྱི་ལྷ་མོའི་རིག་སྔགས་ཀྱིས་ལྷ་རྣམས་སྤྱན་དྲང་བར་བྱའོ། །དེ་ནས་ནམ་ཕྱེད་ཀྱི་དུས་སམ། ཡང་ན་ནང་པར་དཀྱིལ་འཁོར་བྲི་བར་བྱ་སྟེ་ཅི་སྟེ་གསེར་གྱི་ཕྱེ་མས་བྲི་ན་ནི་ལྷའི་དཔལ་འཐོབ་པར་འགྱུར་རོ། །དངུལ་
གྱིས་ནི་དགྲ་ལས་རྒྱལ་བར་འགྱུར་རོ། །ཟངས་ཀྱིས་ནི་ཞི་བར་འགྱུར་རོ། །ཡང་ན་ཙནྡན་གྱི་ཕྱེ་མས་བྲིས་ན། ནི་དཔལ་ཐོབ་པར་འགྱུར་རོ། །ཙནྡན་དམར་པོའི་ཕྱེ་མས་ནི་དགྲ་ལས་རྒྱལ་བར་འགྱུར་རོ། །པུ་ཤེལ་ཅིས་ནི་གྲོང་ཁྱེར་ཞི་བར་འགྱུར་རོ། །ཡང་ན་འབྲས་ཕྱེ་དཀར་པོས་
བྲིས་ན་ནི་དཔལ་ཐོབ་པར་འགྱུར་རོ། །ནས་རྗེན་པའི་ཕྱེས་བྲིས་ན་ནི་དགྲ་ལས་རྒྱལ་བར་འགྱུར་རོ། །ཡང་ན་མེའི་བསྲེག་བྱ་བྱས་པའི་ཐལ་བས་བྲིས་ན་ནི་ཞི་བར་འགྱུར་རོ། །ཅི་སྟེ་སོ་ཕག་གི་ཕྱེ་མའམ་སོལ་ཕྱེའམ། དུར་ཁྲོད་ཀྱི་ཐལ་བ་ཡང་རུང་སྟེ། ཚོན་རྩི་འདི་གསུམ་
གྱིས་དཀྱིལ་འཁོར་བྲིས་ན་ནི་ཡུལ་འཁོར་ལ་གནོད་པར་འགྱུར་རོ། །རིག་སྔགས་འཆང་བ་བདག་ཉིད་དག་པར་བྱ་སྟེ། །རྒྱུ་སྐར་དང་མཐུན་པའི་དུས་སུ་སྨྱུང་བ་བྱས་ལ། ཉི་མ་བཟང་བའམ་ཡང་ན་ཡར་གྱི་ངོ་ཚེས་ལྔ་ལ་དཀྱིལ་འཁོར་ཁྲུ་བཅུ་དྲུག་པའམ་ཡང་ན་ཁྲུ་བཅུ་བཞི་པ་བྲིའོ། །ཅི་
སྟེ་ཐོག་མར་ཤར་ཕྱོགས་སུ་ཐིག་བཏབ་ན་ནི་རིག་སྔགས་འཆང་རྣམས་ཀྱི་དཔལ་འཕེལ་བར་འགྱུར་རོ། །ཅི་སྟེ་ལྷོ་ཕྱོགས་སུ་ཐིག་བཏབ་ན་ནི་གྲོང་ཁྱེར་ལ་གནོད་པར་འགྱུར་རོ། །ཅི་སྟེ་ནུབ་ཕྱོགས་སུ་ཐིག་བཏབ་ན་ནི་རིག་སྔགས་འཆང་རྣམས་ཕན་ཚུན་མི་མཐུན་པར་འགྱུར་རོ། །ཅི་སྟེ་
བྱང་ཕྱོགས་སུ་ཐིག་བཏབ་ན་ནི་དགྲ་ཐམས་ཅད་ལས་རྒྱལ་བར་འགྱུར་རོ། །ཅི་སྟེ་ཐོག་མར་ཚོན་དཀར་པོ་བཀྱེ་ན་ནི་རྒྱལ་པོ་རྒྱལ་བར་འགྱུར་ཞིང་རིག་སྔགས་འཆང་རྣམས་ཀྱི་ལས་འགྲུབ་པར་འགྱུར་རོ། །ཅི་སྟེ་ཚོན་དམར་པོ་བཀྱེ་ན་ནི་གྲོང་ཁྱེར་ཞི་བར་འགྱུར་རོ། །ཅི་སྟེ་ནག་པོ་
བཀྱེ་ན་ནི་གྲོང་ཁྱེར་ལ་མི་དགེ་བར་འགྱུར་རོ། །དེ་ནས་རིག་སྔགས་འཆང་གིས་རིག་སྔགས་ཀྱི་རྒྱལ་པོ་བཟླས་བརྗོད་བྱེད་བཞིན་དུ་དཀྱིལ་འཁོར་བྲི་བར་བྱ་སྟེ། །བྱང་ཕྱོགས་སུ་ནི་གངས་ཀྱི་རི་གཞག་གོ། །ལྷོ་ཕྱོགས་སུ་ནི་རི་འབིགས་བྱེད་གཞག་གོ། །དེ་ནས་ཁོར་ཡུག་གི་རིས་བསྐོར་

བར་བྱའོ། །དབུས་སུ་ནི་སངས་རྒྱས་བཅོམ་ལྡན་འདས་བྲིའོ། །གཡོན་ལོགས་སུ་ནི་ལག་ན་རྡོ་རྗེ་བྲིའོ། །བཅོམ་ལྡན་འདས་ཀྱི་གཡས་ལོགས་སུ་ནི་དཔལ་ལྷ་མོ་ཆེན་མོ་བྲིའོ། །ལག་ན་རྡོ་རྗེའི་དྲུང་དུ་ནི་ཕོ་ཉ་མ་དྲུག་བྲིའོ། །བྱང་ཕྱོགས་ངོས་སུ་ནི་ཁྱབ་འཇུག་
དང་ལྷ་ཆེན་པོ་དང་ཚངས་པ་རྣམས་དེ་དག་དང་མཐུན་པའི་འཁོར་དང་བདུད་རྩི་གཞག་གོ། །ནུབ་ཕྱོགས་སུ་དྲུག་མ་དང་། དཀའ་བཟློག་མ་དང་། གཞོན་ནུ་འཁོར་དང་བཅས་པ་གཞག་གོ། །ལྷོ་ཕྱོགས་སུ་ནི་ཚོགས་དྲུག་ཅུ་རྩ་བཞི་པོ་རྣམས་གཞག་གོ། །སྒོ་རེ་རེར་ཡང་ཚོགས་
རྣམས་གཞག་པར་བྱ་སྟེ། །ཤར་ཕྱོགས་ཀྱི་སྒོར་གཏུམ་བྱེད་དང་། གསར་ཅན་གཉིས་གཞག་གོ། །ལྷོ་ཕྱོགས་ཀྱི་སྒོར་ནི་བདུད་རྩི་ཐབ་སྦྱོར་དང་། རྨུགས་བྱེད་གཉིས་གཞག་གོ། །ནུབ་ཕྱོགས་ཀྱི་སྒོར་ནི་རྫོང་ལྡན་དང་། མཚན་སྦྱིན་གཉིས་གཞག་གོ། །
བྱང་ཕྱོགས་ཀྱི་སྒོར་ནི་ལྕགས་ཅན་དང་སོ་ཅན་གཉིས་གཞག་གོ། །ནང་དུ་ནི་བཅོམ་ལྡན་འདས་ཚིག་ལྡན་མ་དྲི་ཟའི་འཁོར་གྱིས་བསྐོར་བ་གཞག་གོ། །ཀཱརྵཱ་པ་ཎ་བརྒྱ་རྩ་ཚང་བའམ། ཡང་ན་པཱ་ཎ་བརྒྱས་རྡོ་རྗེ་བྱས་ཏེ་བཞག་ལ་དེའི་སྟེང་དུ་སྤྱན་གྱིས་བཟླས་བརྗོད་བྱས་པའི་བུམ་པ་
མི་གནག་ཅིང་རྩ་བ་མེད་ལ་མགྲིན་བཅིངས་དང་བཅས་པ་གཞག་པར་བྱ་སྟེ། བུམ་པ་དེའི་ནང་དུ་ས་བོན་ཐམས་ཅད་དང་། རིན་པོ་ཆེ་ཐམས་ཅད་གཞུག་ཅིང་། འོ་མ་ཡོད་པའི་ཤིང་གི་ཡལ་ག་གཞག་གོ། །གྲྭ་བཞིར་ཡང་བུམ་པ་བཞིར་གཞག་པར་བྱ་སྟེ། མགྲིན་བཅིངས་དང་ལྡན་
པ་ལ་ས་བོན་དང་རིན་པོ་ཆེ་ཐམས་ཅད་བཅུག་སྟེ་འོ་མ་ཡོད་པའི་ཤིང་གི་ཡལ་ག་གཞུག་གོ། །དེ་ནས་རིག་སྔགས་འཆང་གང་དག་དཔལ་ལམ་རིག་སྔགས་འཆང་ལས་བྱུང་བའི་འབྲས་བུ་འདོད་ན། རིག་སྔགས་འཆང་དེས་བླ་མ་ལ་བསྙེན་བཀུར་བྱའོ། །བླ་མ་དེས་ཀྱང་རིག་སྔགས་འཆང་
སྨྱུང་བར་བྱས་པ། བྱང་ཆུབ་ཀྱི་སེམས་ཡོངས་སུ་གཟུང་བ། གསོ་སྦྱོང་གི་ཡན་ལག་དང་ལྡན་པ། གོས་གཙང་མ་བགོས་པ། དར་དཀར་གྱིས་གདོང་གཡོགས་པ། དཀྱིལ་འཁོར་དུ་གཞུག་པར་བྱའོ། །དེ་ལ་ནུབ་ཕྱོགས་ཀྱི་སྒོར་བཅུག་ན་ནི་དཔལ་མངོན་པར་འཕེལ་བར་འགྱུར་

རོ། །ལྷོ་ཕྱོགས་སུ་ནི་རྟག་ཏུ་རྒྱལ་བར་འགྱུར་རོ། །ཤར་ཕྱོགས་སུ་ནི་འཐབ་མོ་འབྱུང་བར་འགྱུར་རོ། །བྱང་ཕྱོགས་སུ་ནི་བླ་མའི་སྒོ་ཡིན་ཏེ་འཇུག་པར་མི་བྱའོ། །དེ་ནས་བླ་མས་རིག་སྔགས་འཆང་དུ་གུ་ལའི་རས་དཀར་པོས་གདོང་གཡོགས་ལ། དཔལ་གྱི་ལྷ་
མོའི་རིག་སྔགས་ཀྱིས་མགོ་བོར་བསང་གཏོར་བྱས་ཏེ་གཞུག་གོ། །དེ་ནས་འགྲོན་བུ་བརྒྱད་བརྒྱ་ལྷ་ལ་དོར་བར་བྱའོ། །འགྲོན་བུ་དེ་ཡང་ལོ་མས་དཀྲིས་ན་ནི་རིག་སྔགས་འགྲུབ་པར་འགྱུར་རོ། །རས་དཀར་པོས་དཀྲིས་ཏེ་བོར་ན་ནི་ཞག་བདུན་གྱིས་དཔལ་འོང་བར་འགྱུར་
རོ། །རིག་སྔགས་འཆང་དེ་དག་ལ་ལྷ་རྣམས་ཀྱང་བསྟན་པར་བྱའོ། །དེ་ནས་ཕྱིར་བྱུང་སྟེ་བྱང་ཕྱོགས་སུ་སོང་ལ་དབུས་ཀྱི་བུམ་པའི་ཆུ་ཁྱོར་བའི་ནང་དུ་སྦྱིན་ནོ། །རིག་སྔགས་འཆང་རྣམས་ཀྱིས་ཀྱང་ལག་པ་གཡོན་པས་མནོས་ཏེ་བཏུང་བར་བྱའོ། །རིག་སྔགས་རྣམས་
ལ་ཡང་སེམས་ཅན་ཐམས་ཅད་བདག་གིས་ཡོངས་སུ་གཟུང་ངོ་ཞེས་སྨྲོས་ཤིག་ཅེས་བསྒོ་བར་བྱའོ། །དེའི་འོག་ཏུ་དེ་དག་གི་དོན་གྱི་ཕྱིར་བདག་གིས་ཕ་རོལ་ཏུ་ཕྱིན་པ་དྲུག་པོ་རྣམས་ཡོངས་སུ་རྫོགས་པར་བྱའོ་ཞེས་སྨྲར་གཞུག་གོ། །དེའི་འོག་ཏུ་དེ་དག་གི་དོན་གྱི་ཕྱིར་རིག་སྔགས་
ཀྱི་ཚོགས་རྣམས་བདག་ལ་འགྲུབ་པར་གྱུར་ཅིག་ཅེས་སྨྲར་གཞུག་གོ། །དེ་ནས་རིག་སྔགས་འཆང་བ་སྤུ་ལྡང་བར་འགྱུར་ཞིང་བསྟོད་པའི་གླུའི་སྒྲ་ཡང་ཐོས་པར་འགྱུར་ཏེ། དེའི་འོག་ཏུ་འོང་བའི་བྲམ་ཟེ་རྣམས་ཀྱང་རྒྱལ་བར་གྱུར་ཅིག །དར་བར་གྱུར་ཅིག་ཅེས་བརྗོད་པར་འགྱུར་
རོ། །དུང་གི་སྒྲ་དང་རྔ་སྒྲ་ཡང་ཐོས་པར་འགྱུར་རོ། །ཅི་སྟེ་བུད་མེད་གོས་དཀར་པོ་བགོ་ཞིང་སྣོད་གང་བ་ཐོགས་པ་མཐོང་ན་ནི་ལག་ན་རྡོ་རྗེས་ཇི་སྐད་བཤད་པ་བཞིན་དུ་རིག་སྔགས་འཆང་དེ་ལ་དཔལ་འོང་བར་འགྱུར་རོ། །ཅི་སྟེ་ཐུབ་གང་བ་མཐོང་ན་ནི་རྒྱལ་སྲིད་དམ། །ཡུལ་གྲུའམ། །གྲོང་
གི་བདག་པོ་ཐོབ་པར་འགྱུར་རོ། །དེ་ནས་རིག་སྔགས་འཆང་གི་དཔལ་ཐོབ་པར་འདོད་ན་དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་ཆེན་པོ་འདི་མཐོང་ན་རིག་སྔགས་འཆང་ཐམས་ཅད་ཀྱི་རྒྱལ་པོར་འགྱུར་ཏེ། རིག་སྔགས་འཆང་ཐམས་ཅད་ལས་རྒྱལ་བར་འགྱུར་

རོ། །ཅི་སྟེ་དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་ཐམས་ཅད་མཐོང་ན་ནི་དེ་ཡང་རྒྱལ་བར་འགྱུར་ཏེ། དགྲ་རྣམས་བཏུལ་ནས་སའི་སྟེང་འཁོལ་བར་འགྱུར་རོ། །མི་ཕལ་པ་གང་ལ་ལ་དཔལ་འདོད་པས་དཔལ་ཐམས་ཅད་མངོན་པར་འབྱུང་བར་བྱེད་པའི་
དཀྱིལ་འཁོར་ཆེན་པོ་མཐོང་ན་ཡང་སྐལ་བ་ཅན་གྱི་ཁྱད་པར་དུ་འགྱུར་ཞིང་། རྒྱལ་སྲིད་དམ། ཡུལ་གྲུའི་བདག་པོའམ། གྲོང་གི་བདག་པོར་འགྱུར་ཏེ་དཀྱིལ་འཁོར་ཆེན་པོ་འདིའི་ལས་འདི་ནི་དོན་ཡོད་པ་ཡིན་ནོ། །ཞེས་རྡོ་རྗེ་འཛིན་པས་བཤད་དོ། །དེ་ནས་རིག་སྔགས་འཆང་
རིག་སྔགས་ཀྱི་དངོས་གྲུབ་འདོད་པས་དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་ཆེན་པོ་མཐོང་ལ་མཐོང་ནས་ཞག་ཉི་ཤུ་རྩ་གཅིག་གི་བར་དུ་ངེས་པར་གནས་པར་བྱ་སྟེ། རིག་སྔགས་གང་འདོད་པ་བཟླས་བརྗོད་བྱས་ན་ཞག་ཉི་ཤུ་རྩ་གཅིག་གིས་དེ་ལ་རིག་སྔགས་དེ་
འགྲུབ་པར་འགྱུར་རོ། །རྒྱལ་པོ་མཐོང་སྟེ་ཞག་ཉི་ཤུ་རྩ་གཅིག་གི་བར་དུ་ངེས་པར་གནས་ན་ཡང་ཡིད་ལ་བསམས་པ་ཐམས་ཅད་ཐོབ་པར་འགྱུར་རོ། །ལས་རྣམས་ཟིན་ནས་རིག་སྔགས་ཀྱི་ལྷ་བཤོས་སྣ་ཚོགས་དང་། མེ་ཏོག་སྣ་ཚོགས་རྙིང་པ་དེ་རྣམས་ཀྱང་བསྡུས་ལ་དུར་ཁྲོད་དམ།
ཆུ་ཀླུང་གང་ཡང་རུང་བར་དོར་བར་བྱའོ། །དེ་ནས་རིག་སྔགས་འཆང་དབང་ཕྱུག་ཉམས་པའམ། རྒྱལ་པོའི་དཔལ་ཉམས་པ་སླར་གྲོན་པར་འདོད་ན་རིག་སྔགས་འཆང་དེས་ཞག་གསུམ་སྨྱུང་བ་བྱས་ཏེ། ཟླ་བ་ཉའི་ནུབ་མོ་གནས་དབེན་པའམ། ཡང་ན་ནྱ་གྲོ་དྷའི་དྲུང་དུ་དཔལ་
ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་ཁྲུ་བཅུ་དྲུག་པ། སྒོ་བཞི་ཡོད་པ། མེའི་སྦྱིན་སྲེག་བྱས་པའི་ཐལ་བས་བྲི་ཞིང་དཔལ་གྱི་ལྷ་མོའི་རིག་སྔགས་དང་སྦྱར་ཏེ་དེའི་དབུས་སུ་སངས་རྒྱས་བཅོམ་ལྡན་འདས་བྲིའོ། །གཡོན་ཕྱོགས་སུ་ནི་རྡོ་རྗེ་བྲིའོ། །དེ་བཞིན་གཤེགས་
པའི་གཡས་ཕྱོགས་སུ་ནི་དཔལ་གྱི་ལྷ་མོ་ཆེན་མོ་བྲིའོ། །དེ་ནས་རིག་སྔགས་འཆང་གིས་དཀྱིལ་འཁོར་གྱི་ཤར་ཕྱོགས་ཀྱི་ངོས་སུ་བུམ་པ་ཉི་ཤུ་རྩ་བདུན་དགོད་པར་བྱའོ། །བྱང་དང་ནུབ་དང་ལྷོར་ཡང་དེ་བཞིན་དུ་དགོད་པར་བྱའོ། །བུམ་པ་དེ་དག་གི་ནང་དུ་ཡང་ས་བོན་དང་། རིན་པོ་ཆེ་ཐམས་

ཅད་གཞུག་གོ། །བུམ་པ་ཐམས་ཅད་ཀྱང་མགྲིན་བཅིངས་དང་ལྡན་པར་བྱའོ། །བུམ་པ་དེ་དག་ཐམས་ཅད་དུ་འོ་མ་ཡོད་པའི་ཤིང་གི་ཡལ་ག་ཡང་བཅུག་སྟེ་ལན་བདུན་བདུན་བསྔགས་སོ། །དེ་ནས་སངས་རྒྱས་བཅོམ་ལྡན་འདས་དང་། འཕགས་པ་ལག་ན་རྡོ་རྗེ་དང་
དཔལ་གྱི་ལྷ་མོ་ཆེན་མོ་ལ་ལྷ་བཤོས་རྒྱས་པར་དབུལ་ཞིང་མཆོད་པ་རྒྱས་པར་བྱའོ། །སངས་རྒྱས་བཅོམ་ལྡན་འདས་ཀྱི་སྤྱན་སྔར་དཀྱིལ་འཁོར་གུར་གུམ་གྱིས་སྐྱོང་ནུལ་དུ་བྱུགས་ལ་དེའི་མདུན་དུ་བིལ་བའི་ཤིང་གིས་མེ་སྦར་ཏེ། བ་སེར་མོ་བེའུ་ཡོད་པའི་མར་གྱི་ནང་དུ་ཨ་ག་
རུའི་ཡམ་སྲེག་ཤིང་ངམ། །ཡང་ན་པདྨ་བརྒྱད་སྟོང་སྨྱུགས་ཏེ་སྦྱིན་སྲེག་བྱས་ལ་མར་གྱི་མར་མེ་བརྒྱད་སྟོང་སྦར་ཏེ་དེ་ནས་ལས་བྱའོ། །ལས་ཟིན་ནས་བུམ་པ་དེ་དག་གིས་རྒྱལ་པོ་དེ་ཁྲུས་བྱེད་དུ་བཅུག་ལ་ཞག་ཉི་ཤུ་རྩ་གཅིག་གི་བར་དུ་ངེས་པར་གནས་པར་བྱས་ན་ཟིན་པའི་རྗེས་ལ་རྒྱལ་
སྲིད་ཐོབ་པར་འགྱུར་རོ། །ཕལ་པ་གང་ལ་ལས་ཁྲུས་བྱས་ན་དེའི་ལོངས་སྤྱོད་ཀྱི་གཞི་འགྲུབ་པར་འགྱུར་ཏེ། །རྒྱལ་སྲིད་དམ། ཡུལ་གྲུའི་བདག་པོའམ། གྲོང་གི་བདག་པོར་འགྱུར་རོ། །ཅི་སྟེ་བ་ལང་དང་བྲམ་ཟེ་གསོད་པར་བྱེད་ན་ཡང་སྡིག་པ་ཐམས་ཅད་ལས་ཐར་བར་འགྱུར་རོ། །
གང་དང་གང་འདོད་པའི་ཕྱིར་བྱས་ན་ཡང་འདོད་པ་དེ་དང་དེ་ཐོབ་པར་འགྱུར་ཏེ། ཇི་ལྟར་ང་དེ་བཞིན་གཤེགས་པའི་ཞམ་རིང་ན་རྟག་ཏུ་གནས་པ་དེ་བཞིན་དུ་དཔལ་གྱི་ལྷ་མོ་ཆེན་མོ་འདི་དེའི་ཐད་ན་གནས་པར་འགྱུར་རོ། །ཇི་ལྟར་རྡོ་རྗེ་འདི་རྟག་ཏུ་ང་ལ་གནས་པ་དེ་བཞིན་དུ་དཔལ་གྱི་ལྷ་མོ་འདི་
རྟག་ཏུ་དེ་ལ་གནས་པར་འགྱུར་རོ། །གང་ཞིག་རྟག་ཏུ་དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་འཆང་དེ་ལ་ནི་རྟག་ཏུ་ལྷ་རྣམས་སྲུང་བར་བྱེད་ཅིང་ཞི་བ་དང་བདེ་ལེགས་སུ་འགྱུར་རོ། །རིག་སྔགས་འཆང་ངམ། རིག་སྔགས་འཆང་གི་བུའམ། རིག་སྔགས་
འཆང་མ་གང་ཞིག་དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་ཆེན་པོ་མཐོང་ན་ཐམས་ཅད་འཕེལ་བར་བྱེད་པའི་དཔལ་ཐོབ་པར་འགྱུར་རོ། །དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་རྫོགས་སོ།། །།དེ་ནས་དྲང་སྲོང་ལྔ་དགའ་བའི་

ཚལ་དུ་འཁོད་ནས་གཅིག་ལ་གཅིག་བལྟས་ཏེ་འདི་སྐད་སྨྲས་སོ། །བྱང་ཆུབ་སེམས་དཔའ་སེམས་དཔའ་ཆེ། །རྡོ་རྗེ་འཛིན་པ་འདི་ཉིད་ནི། །སེམས་ཅན་རྣམས་ལ་ཕན་འདོད་ཕྱིར། །ཐུབ་པའི་དྲུང་ན་གསང་བའི་སྔགས། །རྣམ་པ་སྣ་ཚོགས་ཐབས་ཀྱིས་སུ། །
རིག་མཆོག་ཆོ་ག་ཆེན་པོ་གང་། །ལྷ་རྣམས་ལ་ནི་གྲུབ་སྦྱིན་ཞིང་། །ཐོས་ནས་རྟག་ཏུ་ལྷ་རྣམས་ནི། །ལྷ་མིན་ལས་རྒྱལ་སྔོན་བྱེད་ཀྱིས། །སེམས་ཅན་རྣམས་ཀྱི་དོན་གྱི་ཕྱིར། །གསང་བའི་བདག་པོ་སྟོབས་པོ་ཆེ། །ཞི་བ་དང་ནི་དུལ་བ་ཡི། །ཐད་དུ་སོང་ནས་བྲི་བར་
བྱ། །དེ་ནས་ལྷའི་དྲང་སྲོང་འོད་ཟེར་ཅན་དང་། འོད་སྲུང་དང་། ཀུན་ཤེས་དང་། གནས་འཇོག་དང་། མི་སྦྱིན་གྱི་བུ་ལ་སོགས་པ་བཅོམ་ལྡན་འདས་དང་། ལག་ན་རྡོ་རྗེ་དང་། དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་གྱི་རྒྱལ་པོ་ག་ལ་བ་དེར་དོང་སྟེ་ཕྱིན་ནས་
ལྷའི་གླུ་དབྱངས་ཀྱིས་བཅོམ་ལྡན་འདས་ལག་ན་རྡོ་རྗེ་ལ་མངོན་པར་བསྟོད་དོ། །དེ་ནས་བཅོམ་ལྡན་འདས་ལག་ན་རྡོ་རྗེས་དཀྱིལ་འཁོར་དེ་ནས་ལངས་ནས་ལྷའི་དྲང་སྲོང་དེ་དག་ལ་སྨྲས་པ། དྲང་སྲོང་ཆེན་པོ་ཁྱེད་རྣམས་སེམས་ཅན་ཐམས་ཅད་ལ་ཕན་པའི་ཕྱིར་བརྩོན་པ་དང་། སེམས་
ཅན་ཐམས་ཅད་ལ་ཕན་པའི་ཕྱིར་ཞུགས་པ་དང་། དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་གྱི་རྒྱལ་པོའི་ནང་དུ་འོངས་པ་ལེགས་སོ་ལེགས་སོ། །དེ་ནས་དགའ་བའི་ཚལ་ཆེན་པོ་ཡིད་དུ་འོང་བ་དང་། ཤིང་ཆེན་པོ་ཡོངས་འདུལ་གནས་པའི་སྲིན་མོ་ནམ་གྲུ་ཞེས་
བྱ་བ་སྟོབས་ཆེན་མོ། བརྩོན་འགྲུས་ཆེན་མོ། འཇིག་རྟེན་གསུམ་ན་བྱིས་པ་རྣམས་གསོད་པ། འདོད་དགུར་སྒྱུར་བའི་གཟུགས་ཅན་དེ་ཡང་དྲང་སྲོང་དེ་དག་གི་ཐད་དུ་སོང་སྟེ་མཐོང་ནས་ལྟད་མོར་གྱུར་ཏེ། དཀྱིལ་འཁོར་དེ་དང་ཉེ་བ་ཞིག་ཏུ་སོང་ནས་རྒྱང་ན་འདུག་ཅིང་རྡོ་རྗེ་འབར་བའི་གཟི་བྱིན་
གྱིས་དེའི་ནང་དུ་འོང་མ་ནུས་སོ། །དེ་ནས་དབང་ཕྱུག་ཆེན་པོ་ལ་སོགས་པ་ལྷ་རྣམས་དང་། མི་སྦྱིན་གྱི་བུ་ལ་སོགས་པ་དྲང་སྲོང་རྣམས་ལག་ན་རྡོ་རྗེའི་ཞལ་དུ་བལྟ་ཞིང་། རྡོ་རྗེ་འཛིན་སྲིན་མོ་ནམ་གྲུ་ཞེས་བྱ་བ་སྟོབས་ཆེན་མོ། །བརྩོན་འགྲུས་ཆེན་མོ། །འདི་ནི་སྐྱེ་བོ་གནས་པ་དང་འགྲོ་

བ་འཇིག་པར་བྱེད་པ་ལགས་ཀྱིས། །རྡོ་རྗེ་འཛིན་ཆེན་པོ་སྲིན་མོའི་འཇིགས་པ་དེ་ལས་བདག་ཅག་ཡོངས་སུ་སྐྱོབས་ཤིག །དེ་ནས་དཔལ་དང་ལྡན་པ་རྡོ་རྗེ་འཛིན་ཁྲོས་ཏེ་མིག་དམར་པོར་བསྒྱུར་ནས་རང་གི་དཔུང་ལ་བལྟས་ཏེ་ལྷ་དེ་དག་ལ་འདི་སྐད་ཅེས་སྨྲས་སོ། །ལྷ་རྣམས་རེ་ཞིག་
འཁོད་ཅིག་དང་། འཇིག་རྟེན་ན་སྡང་བ་གང་ཇི་སྙེད་ཡོད་པ་དེ་དག་གཞིག་པར་བྱའོ། །དེ་ནས་ལྷ་རྣམས་དང་། དྲང་སྲོང་དེ་དག་གིས་ལག་ན་རྡོ་རྗེ་དང་། སྤྱན་ལ་བསྟོད་ནས་རྡོ་རྗེ་འཛིན་སྲིན་མོ་ཆེན་མོ། བརྩོན་འགྲུས་ཆེན་མོ། སྟོབས་ཆེན་མོ། ཁྱོད་ཀྱི་དཀྱིལ་འཁོར་དུ་འཇུག་
མི་ནུས་ཀྱིས། རྡོ་རྗེ་འཛིན་ཁྱོད་ཀྱིས་ཀྱང་སྲིན་མོ་ཆེན་མོ་འདི་ལ་བསྟོད་པར་མཛོད་ཅིག་དང་། དེས་ན་དཀྱིལ་འཁོར་དུ་འོང་བར་འགྱུར་རོ། །དེ་ནས་བཅོམ་ལྡན་འདས་ལག་ན་རྡོ་རྗེས་ལྷ་དེ་དག་ལ་སྙིང་རྗེའི་སེམས་ཀྱིས་བལྟས་ནས་སྲིན་མོ་ནམ་གྲུ་ལ་རང་གི་ཆོ་འབྲང་ལས་བསྟོད་པ། ནམ་
གྲུ་ཁྱོད་ཀྱི་ཆོ་འབྲང་དང་། །མཚན་ཉིད་དག་ནི་བཤད་བྱ་ན། །ནོར་བུའི་རང་བཞིན་ཁྱོད་ཀྱི་ལུས། །རྒྱབ་ནི་འཛམ་བུ་ཆུ་བོའི་གསེར། །ཁྱོད་ཀྱི་གདོང་ཡང་དངུལ་ཡིན་ཏེ། །ལྟོ་བའི་ངོས་ནི་རྡོ་རྗེས་གཏམས། །མིང་པོ་མཛོད་དང་མཛོད་སྲུང་བ། །ཁྱོད་ཀྱི་མ་ནི་ཀུན་འགྲོ་མ། །
ཁྱོད་ཀྱི་ཕ་ནི་རླུང་ཞེས་བྱ། །སྐལ་ལྡན་ཤིང་རྟ་ཁྱོད་ཀྱི་རུས། །ལྷ་ཡུལ་དག་ཏུ་གྲགས་པ་ཡིན། དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་སྲིན་མོ་ནམ་གྲུ་རང་གི་ཆོ་འབྲང་ལ་བསྟོད་ནས། སངས་རྒྱས་བཅོམ་ལྡན་འདས་ལ་མགོ་བོས་ཕྱག་འཚལ་ཏེ། །རྡོ་རྗེ་འཛིན་པ་
བདག་ཉིད་ཆེ། །ཚངས་དང་གསུམ་ལ་ཕྱག་འཚལ་ཏེ། །དབང་ཕྱུག་ཆེ་ལ་ཕྱག་འཚལ་ནས། །ས་འཛིན་ཀླུ་རྣམས་གང་ཡིན་དང་། །གང་དག་གནོད་སྦྱིན་སྟོབས་པོ་ཆེ། །གྲུབ་པ་རྒྱུ་བ་དྲི་ཟ་རྣམས། །དྲང་སྲོང་ལྷ་དང་ལྷ་མིན་པ། །དེ་ནས་འབྱུང་པོ་ཐམས་ཅད་དང་། །
འོད་ཟེར་ཅན་དང་འོད་སྲུང་དང་། །ཀུན་ཤེས་དང་ནི་གནས་འཇོག་དང་། །ཐུབ་པ་ཆེན་པོ་མི་སྦྱིན་བུ། །དབང་པོ་གཏུམ་པོ་ཁྱབ་འཇུག་དང་། །འདི་རྣམས་བདག་ལ་གྲུབ་སྦྱིན་ཤོག །ནམ་གྲུ་མོ་ནི་བཤད་བྱ་ན། །མཚན་མོ་ནག་མོ་འཇིགས་བྱེད་མ། །གཤིན་རྗེའི་སྲིང་མོ་

ཆེན་མོ་སྟེ། །ཡོངས་འདུའི་ཤིང་ལ་གནས་པ་ཡིན། །རི་ལ་ཁྱབ་འཇུག་གཅིག་པུ་ནི། །བདེ་བར་ཉལ་བར་མི་ཉམ་སྟེ། །དེས་ནི་བྱ་ཡི་གཟུགས་ཀྱིས་སུ། །མཚན་མོ་ཁྱབ་འཇུག་སྐྲག་པར་བྱེད། །ལྷ་མོ་ནག་མོ་སྟོབས་མོ་ཆེས། །དེ་མཐོང་ནས་
ནི་འོང་བར་འགྱུར། །དེ་ནས་རྩེད་མོ་བྱེད་བཞིན་དུ། །བྱིས་པ་གསོད་པའི་མགྲིན་པ་ནས། །ལག་པ་གཡོན་པས་བཟུང་ནས་ནི། །འཇིགས་པའི་སྒྲ་ཡང་འབྱིན་པར་བྱེད། །རྣ་གཉིས་ཀྱང་ནི་མི་མཐོང་སྟེ། །སེམས་ཉམས་པས་ནི་དེ་མཐོང་ནས། །ཤིན་ཏུ་བྲེད་ཅིང་བཞིན་
ཡང་འགྱུར། །ཁྱོད་ནི་ང་ལ་མ་འཚེ་བར། །ལྷ་ཡི་དགའ་གནས་དགའ་བར་གྱིས། །དེ་ནས་ཁྲོས་ནས་དེ་ཉིད་དུ། །བྱིས་པ་གསོད་ལ་བསྒོ་བ་ནི། །ལོ་གཅིག་པ་དང་ལོ་གཉིས་དང་། །ལོ་དགུ་པ་ལ་མ་འཇུག་པར། །བཟང་མོ་སོང་ལ་སྐྱེ་དགུ་འདི། །རང་གི་ལས་ཀྱིས་
བཟའ་བར་གྱིས། །བ་ལང་རྣམས་ལ་གོར་ཡང་བྱོས། །ཝ་རྣམས་ལ་ནི་ཝ་གསོད་དང་། །རི་དགས་ལ་ནི་རི་དགས་ནད། །མི་རྣམས་ལ་ནི་མི་ངས་བྱོས། །ཁྱོད་ཀྱི་ལུས་ལ་དེང་བརླག་གྱུར། །བྱིས་པ་རྣམས་ནི་རྩེ་གྱུར་ཅིག །བྱིས་པ་རྣམས་ལ་ཕན་གདགས་ཕྱིར། །མ་མོ་
རྣམས་ལ་སྙེམས་པའི་མཆོག །མི་རྣམས་ཀྱང་ནི་རིམ་བཞིན་དུ། །དེ་ནི་བདག་གིས་བཤད་པར་བྱ། །དཀྱིལ་འཁོར་འདི་ནི་མཐོང་བ་ལ། །གདོན་ནི་གང་ཞིག་ལྡོག་མི་བྱེད། །གདོན་མང་དག་གིས་དེ་སྤངས་ནས། །མུན་པ་མི་བཟད་གནས་པར་འགྱུར། །གང་གིས་
སུ་ནི་ཞི་འགྱུར་བ། །འདི་ཡང་ལྷ་རྣམས་མཉན་པར་གྱིས། །གང་ན་བུད་མེད་སྲུང་བྱེད་པ། །དེར་ནི་བྱིས་པ་བསྲུང་བྱ་སྟེ། །གསེར་དག་དང་ནི་ལུང་ཏང་རྣམས། །པུད་ཏྲན་ཛི་བ་ལིག་བུ་མིག །གི་ཝང་མར་དང་སྦྲང་རྩི་དང་། །ཡང་ན་ཤུ་དག་གྲོ་བ་རྣམས། །འདི་དག་
གང་གི་ཁྱིམ་ན་ཡོད། །དེར་ནི་བྱིས་པ་བསྲུང་བར་བྱ། །དེ་ནས་གསང་བའི་བདག་པོ་ལག་ན་རྡོ་རྗེ་སྟོབས་པོ་ཆེས་རིག་སྔགས་བཤད་པ། ན་མོ་བཛྲ་པཱ་ཎི་སྱ། ཙི་ལི་ཙི་ལི། བྷིནྡ་བྷིནྡ། མུཉྩ་མུཉྩ། ཧི་བ་ལ་ཀཾ་སྭཱ་ཧཱ། བཛྲ་པཱ་ཎི་རཱ་ཛྙཱ་པ་ཡ་ཏི་སྭཱ་ཧཱ། དེ་བཱ་ས་མཱ་ཛྙཱ་པ་ཡ་ཏི་སྭཱ་ཧཱ།

རི་ཥཱ་ཡ། ས་མཱཛྙཱ་པ་ཡ་ཏི་སྭཱ་ཧཱ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་སྟོབས་པོ་ཆེས་འདི་བཤད་མ་ཐག་ཏུ་སྲིན་མོ་སྟོབས་མོ་ཆེ་ནམ་གྲུས་སྐད་ཆེན་པོ་ཕྱུང་ནས། དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་ཆེན་པོ་གང་ན་བ་དེར་སོང་སྟེ་ཕྱིན་
ནས། བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །སྟོབས་པོ་ཆེ་ཚོགས་མི་བཟད་པ་མཆོག་ཏུ་མི་བཟད་པ་མཆོག་ཏུ་འཇིགས་པ་ལས་བདག་བསྐྱབ་ཏུ་གསོལ། །དེ་ནས་རིག་སྔགས་ཀྱི་རྒྱལ་པོ་ཆེན་པོ་ལག་ན་རྡོ་རྗེས་སྲིན་མོ་དེ་དག་ལ་འདི་སྐད་
ཅེས་སྨྲས་སོ། །སྲིན་མོ་མ་འཇིགས་ཤིག །མ་འཇིགས་ཤིག །རིག་སྔགས་ཀྱི་རྒྱལ་པོ་ཆེན་པོ་དྲན་པར་གྱིས་ཤིག །བཅོམ་ལྡན་འདས་ཤཱཀྱ་ཐུབ་པ་དེ་བཞིན་གཤེགས་པ་དྲན་པར་གྱིས་ཤིག་དང་། དེས་ན་འཇིགས་པར་མི་འགྱུར་རོ། །སྐལ་བ་ཆེན་པོ་ལྡོག་
པར་གྱིས་ཤིག །སྟོབས་པོ་ཆེ་ངའི་བཀའ་ཉོན་ཅིག །དེ་ནས་སྲིན་མོ་ཆེན་མོ་ནམ་གྲུས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བྱང་ཆུབ་སེམས་དཔའ་ཆེན་པོ་བདག་གིས་གཏང་ལགས་ཀྱིས། །བདག་གིས་ཅི་བགྱི་བ་བཀའ་སྩོལ་ཅིག །
དེ་ནས་བཅོམ་ལྡན་འདས་ལག་ན་རྡོ་རྗེས་སྲིན་མོ་དེ་ལ་སྨྲས་པ། གང་ན་རིག་སྔགས་ཀྱི་རྒྱལ་པོ་གནས་པ་དེར་ཁྱོད་མ་འདུག་ཤིག །དཔལ་ཐམས་ཅད་འབྱུང་བར་བྱེད་པའི་དཀྱིལ་འཁོར་ཆེན་པོ་མཐོང་བ་གང་ཡིན་པ་དང་། །ཁྱོད་ཀྱི་ཆོ་འབྲང་དང་། མཚན་ཉིད་གྲོ་ག་ལ་བྲིས་ཏེ་འཆང་བ་
དེར་ཡང་ཁྱོད་ཀྱིས་སྲུངས་ལ་ཞི་བ་དང་བདེ་ལེགས་སུ་གྱིས་ཤིག །སྨྲས་པ། སྟོབས་པོ་ཆེ་དེ་ལྟར་བགྱི་སྟེ་གང་བདག་གི་ཆོ་འབྲང་དང་། མཚན་ཉིད་གྲོ་ག་ལ་གི་ཝང་གིས་བྲིས་ནས་སྣོད་དུ་བཅུག་སྟེ་འཆང་བ་དང་། དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་
ཆེན་པོ་མཐོང་བ་དང་། ཡུལ་ལམ་གྲོང་ཁྱེར་གང་ན་དཀྱིལ་འཁོར་ཆེན་པོ་འདི་འདྲི་བའི་ཡུལ་དེ་ཞི་བ་དང་བདེ་ལེགས་སུ་འགྱུར་ཏེ། དེས་ན་སེམས་ཅན་སྡང་བར་སེམས་པ་རྣམས་ཀྱིས་ཁྱོད་ཀྱི་བཀའ་མཉན་ནས་སྲུང་བར་བྱེད་དེ་ཞི་བ་དང་བདེ་ལེགས་སུ་འགྱུར་རོ། །བྱིས་པ་གང་

ནམ་གྲུའི་ཆོ་འབྲང་དང་མཚན་ཉིད་སྣོད་དུ་བཅུག་སྟེ་འཆང་བ་དེ་ལ་ནི་གདོན་ཐམས་ཅད་ཀྱིས་འཇིགས་པར་མི་འགྱུར་རོ། །གང་ཞིག་དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་ཆེན་པོ་བྲིས་པའི་དབུས་སུ་རྡོ་རྗེའི་དབྱིབས་ཀྱི་ཐབ་ཁུང་བྱས་ཏེ། རབ་
ཏུ་གྲུབ་པར་བྱེད་པའི་རྒྱུད་ཆེན་པོ་ལས་ཁྲོ་བོ་སྟོབས་པོ་ཆེ་ངས་བཤད་པ་གང་ཡིན་པའམ། ཡང་ན་རིག་སྔགས་ཀྱི་རྒྱལ་པོ་ཆེན་པོས་གུ་གུལ་ལམ་འབྲུའི་སྦྱིན་སྲེག་བྱས་ན་ལག་ན་རྡོ་རྗེས་བཤད་པ་བཞིན་དུ་ཡུལ་ལམ། གྲོང་ཁྱེར་གྱི་མི་ནད་ཞི་བར་འགྱུར་རོ། །ཞི་བའི་ཆོ་ག་
རྫོགས་སོ།། །།དེ་ནས་བཅོམ་ལྡན་འདས་ལག་ན་རྡོ་རྗེས་ལྷ་དེ་དག་ལ་འདི་སྐད་ཅེས་སྨྲས་སོ། །བཟོད་ལྡན་དག་ཁྱེད་ཉོན་ཅིག །དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་ཆེན་པོ་ལས་ངས་རིག་སྔགས་བཤད་པ་གང་ཡིན་པ་དེ་དག་གི་ལས་ཀྱི་
འབྲས་བུ་སྟོན་པ་རྣམ་པ་སྣ་ཚོགས་ངས་བཤད་པར་བྱའོ། །སྨྲས་པ། །རིག་སྔགས་ཀྱི་རྒྱལ་པོ་སྔགས་ཐམས་ཅད་ཀྱི་ལས་ཤོད་ཅིག་ཤོད་ཅིག། སྨྲས་པ། ལྷ་རྣམས་ངའི་བཀའ་གཅོག་པ་དེ་ནི་ངས་རྡོ་རྗེ་འབར་བ་ཀུན་ཏུ་རབ་ཏུ་འབར་བར་སྤྱི་བོ་གཤེག་པར་བྱའོ། །དཔལ་ཐམས་ཅད་
མངོན་པར་འབྱུང་བར་བྱེད་པའི་དཀྱིལ་འཁོར་ཆེན་པོའི་ཆོ་ག་ངས་བཤད་པ་གང་ཡིན་པ་དེ་ཡང་དེ་བཞིན་དུ་གྱིས་ཤིག །ནམ་གྲུའི་ཆོ་འབྲང་དང་། མཚན་ཉིད་ཀྱི་ཆོ་ག་བཤད་པར་བྱ་སྟེ། ཡུལ་གང་དུ་མི་ནད་ཀྱི་གནོད་པ་བྱུང་བ་དེར་ངས་ཆོ་ག་བཤད་པའི་ཆོ་ག་དེས་དཔལ་ཐམས་ཅད་
མངོན་པར་འབྱུང་བར་བྱེད་པའི་དཀྱིལ་འཁོར་ཆེན་པོ་བྲིས་ལ། དེའི་དབུས་སུ་རབ་ཏུ་གྲུབ་པར་བྱེད་པའི་རྒྱུད་ལས་བཤད་པའི་རྡོ་རྗེ་ཁྲོ་བོས་གུ་གུལ་ལས་འབྲུའི་སྦྱིན་སྲེག་བྱའོ། །སྲིན་མོ་ཆེན་མོ་དེའི་གཏོར་མ་གང་གིས་མི་ནད་ཞི་བར་གྱུར་པ་ཡང་བཤད་པར་བྱ་སྟེ། འབྲས་ཀྱི་འོ་
ཐུག་སྦྱར་ཐུག་དང་། །འབྲས་ཅན་མོན་སྲན་གྲེའུ་སྦྱར་དང་། །འབྲས་ཅན་བུ་རམ་སྦྱར་བ་དང་། །ཏིལ་དང་སྦྱར་བའི་སྣུམ་འཁུར་དང་། །འབྲས་ཀྱི་ཞིང་དེ་ངུ་ཞོ་དང་། །པེན་ཙེར་འཁུར་བ་བཀྲ་ཤིས་ལྡན། །འབྲས་ཀྱི་ཆུང་པེད་ལ་ཕུག་ཏིལ། །བུར་མར་འོ་མ་ཉ་དང་ཤ། །

ཏིལ་ཕྱེ་ལས་བྱས་འཁུར་བ་དང་། །ཆང་དང་དབྱིག་དང་བཅས་པ་དང་། །མེ་ཏོག་ཕྲེང་བ་དྲི་དང་བྱུག །གཏོར་མ་དེ་དག་བྱིན་ན་ནི། །མི་ནད་ཀུན་ཞི་ཕན་པར་འགྱུར། །ལྷ་ཐམས་ཅད་ལ་ཡང་བཤོས་སྣ་ཚོགས་དབུལ་བར་བྱ་ཞིང་དེར་ཤིན་ཏུ་བཀྲ་ཤིས་པའི་ཚིགས་སུ་
བཅད་པ་ཡང་བཀླག་པར་བྱའོ། །རྣམ་པར་རྒྱལ་བའི་རྒྱུད་ཆེན་པོ་ལས་བཅོམ་ལྡན་འདས་ཀྱིས་གསུངས་པའི་རིག་སྔགས་ཀྱི་རྒྱལ་མོ་ཆེན་མོ་རྨ་བྱ་ཆེན་མོའི་རིག་སྔགས་བདུན་བརྒྱས་བསྐོར་བ་གང་ཡིན་པ་དེ་ཡང་དེར་བཀླག་པར་བྱ་སྟེ། །རིམ་གྲོ་བྱ་ཞིང་བླ་མར་བྱས་ལ་དྲི་དང་།
མེ་ཏོག་དང་། བདུག་པ་དང་། བཤོས་རྣམས་ཀྱིས་མཆོད་པར་བྱའོ། །ནམ་གྲུའི་ཆོ་འབྲང་དང་། མཚན་ཉིད་ཀྱང་བཀླག་པར་བྱ་སྟེ། གྲོ་ག་ལ་བྲིས་ནས་མགོ་ལ་བཏགས་ན་ཡུལ་དེར་ཞི་བ་དང་བདེ་ལེགས་སུ་འགྱུར་ཏེ། ཡུལ་དེར་མི་ནད་ཀྱི་གནོད་པ་འབྱུང་བར་མི་འགྱུར་
རོ། །ནམ་གྲུའི་ཆོ་འབྲང་མཚན་ཉིད་ནི། །ལག་ན་རྡོ་རྗེས་བཤད་པ་བཞིན། །དེ་ནི་བདག་གིས་ངེས་པར་བསྟན། ཕོ་ཉ་མོ་སྟོབས་ཆེན་མོ་རྣམས་ཀྱི་ལས་ཀྱང་བཤད་པར་བྱ་སྟེ། དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་ཆེན་པོ་ལ་ཕོ་ཉ་མོ་སྟོབས་
ཆེན་མོ་དྲུག་ངས་བཤད་པ་གང་ཡིན་པ་རྣམས་དང་། ཚོགས་རྣམས་ཀྱི་ནང་ན་ཕོ་ཉ་མོ་རྣམས་ཀྱི་ལས་སྒྲུབ་པ་ལྕགས་ཅན་བསྟན་པ་གང་ཡིན་པ་དང་། མཐོང་བར་དགའ་བར་བཤད་པ་ཕོ་ཉ་ཚོགས་དྲུག་གིས་བསྐོར་བ་ཚོགས་ཆེན་པོ་ལྕགས་ཅན་གང་གིས་མཐོང་བ་དེས་ཕོ་
ཉ་མོ་རྣམས་དང་། འགྲོགས་པ་མི་བཟད་པ་དཔའ་བོ་ཚོགས་ཆེན་པོ་དང་། ཕོ་ཉ་མ་རྣམས་དང་ལྷན་ཅིག་གནས་པ་དྲག་པོ་མི་བཟད་པ་ལས་དྲག་པོ་བྱེད་པ། གཟུགས་བཟང་པོ་དང་། ལྕགས་ཅན་ཕོ་ཉ་མ་རྣམས་དང་ལྷན་ཅིག་ན་གནས་པ་སྟོབས་པོ་ཆེ་སྒྲུབ་པ་ནི་མར་གྱི་
ངོ་ཞག་བརྒྱད་ལ་སྨྱུང་བར་བྱས་ཏེ་བཅོམ་ལྡན་འདས་ལག་ན་རྡོ་རྗེའི་མདུན་དུ་མཆོད་པ་རྣམ་པ་སྣ་ཚོགས་དེ་བཞིན་དུ་བྱས་ལ། དེ་ནས་ཕོ་ཉ་མ་སྟོབས་མོ་ཆེ་དྲུག་གཞག་པར་བྱའོ། །དེ་ལ་དབུས་སུ་ནི་ལག་ན་རྡོ་རྗེ་སྟོབས་པོ་ཆེ་དྲག་པོའི་ལས་བྱེད་པ་གཟུགས་བཟང་པོ་གཞག་གོ། །

འོག་ལོགས་སུ་ནི་རྐང་པ་གཡས་པའི་ལྷོ་ཕྱོགས་སུ་ནི་ཕོ་ཉ་མོ་སྟོབས་མོ་ཆེ་དྲུག་གཞག་གོ། །རྐང་པ་གཡས་པ་དེ་ཡང་འདེགས་པར་བྱ་སྟེ། ཚོགས་ཆེན་པོ་ལྕགས་ཅན་སྟོབས་པོ་ཆེ་ཚོགས་བདུན་གྱིས་བསྐོར་བས་ལག་པ་གཉིས་ཀྱིས་རྡོ་རྗེ་འཛིན་ཆེན་
པོའི་རྐང་པ་གཡས་པ་སྟོན་ཅིང་འཛིན་པར་བྱའོ། །དེ་ནས་ལྕགས་ཅན་གྱི་འོག་ལོགས་སུ་རིན་པོ་ཆེ་ཐམས་ཅད་དང་འབྲུ་ཐམས་ཅད་གཞག་པར་བྱའོ། །ཡང་ན་ཀཱརྵཱ་པ་ཎི་བརྒྱ་རྩ་བརྒྱད་ཚང་བར་དབུལ་བར་བྱའོ། །ལག་ན་རྡོ་རྗེ་དང་ལྕགས་ཅན་ལ་སོགས་པ་ཚོགས་
རྣམས་དང་། ཕོ་ཉ་མོ་སྟོབས་མོ་ཆེ་དེ་དག་ཀྱང་ཚོན་རྩི་སྣ་གསུམ་གྱིས་བྲི་བར་བྱའོ། །དེ་ནས་ལག་ན་རྡོ་རྗེ་དང་ཚོགས་ཆེན་པོ་རྣམས་དང་། ཕོ་ཉ་མོའི་ཚོགས་དེ་དག་ལ་ལྷ་བཤོས་སྣ་ཚོགས་དབུལ་བར་བྱའོ། །དེ་ནས་ཚོགས་ཆེན་པོ་ལྕགས་ཅན་གྱི་སྔགས་ལན་བརྒྱ་རྩ་བརྒྱད་བཟླས་
པར་བྱའོ། །དེ་ནས་མཚན་མོ་རྨི་ལམ་བཟང་པོ་རྨི་བར་འགྱུར་རོ། །ཡང་ན་སྐྱེས་པའམ། བུད་མེད་མཐོང་བར་འགྱུར་ཏེ། ཅི་སྟེ་སྐྱེས་པ་ནག་པོ་མིག་དམར་ལ་གོས་སེར་པོ་གྱོན་པ་ཞིག་མཐོང་ན་ནི་དེ་ཕྱིན་ཅད་རིག་སྔགས་འཆང་གི་ཞི་བ་དང་རྒྱས་པ་དང་དྲག་ཤུལ་གྱི་ལས་རྣམས་འགྲུབ་
པར་འགྱུར་རོ། །ཅི་སྟེ་བུད་མེད་གོས་དཀར་པོ་གྱོན་པ་མདོག་ནག་པའམ་སྔོ་བསངས་སམ་དཀར་པོ་མཐོང་བར་གྱུར་ན་དེ་ཇི་སྟེ་དཀར་པོ་མཐོང་ན་ནི་ལྡོང་རོས་བསྒྲུབ་པར་བྱའོ། །ཅི་སྟེ་སྔོ་བསངས་མཐོང་ན་ནི་མཚོན་ཆ་ཐམས་ཅད་འགྲུབ་པར་འགྱུར་རོ། །ཅི་སྟེ་ནག་པོ་མཐོང་ན་ནི་ལིག་བུ་མིག་དང་
ཕ་བང་ལོང་བུ་དང་། སྟང་ཟིལ་ལ་སོགས་པའི་མིག་སྨན་རྣམས་འགྲུབ་པར་འགྱུར་རོ། །ཕོ་ཉ་མ་རྣམས་ཀྱི་ལས་ཐམས་ཅད་ལ་ནི་ནང་པར་བླ་མ་དང་ཚོགས་ལག་ན་རྡོ་རྗེ་དང་འདྲ་བར་བྱ་སྟེ། བདག་ཉིད་ཀྱིས་ཕོ་ཉ་མོ་རྣམས་ཀྱི་ཐབས་སུ་བུད་མེད་གང་ཡང་རུང་བ་ཀུ་ཤའི་སྟན་བྱས་
པ་ལ་འདུག་པ་ལ་ཅི་རིགས་པའི་ཁ་ཟས་ཀྱིས་སྟོན་ན་ཕོ་ཉ་མོ་དྲུག་དང་། ཚོགས་སྟོབས་པོ་ཆེ་བརྒྱད་པོ་རྣམས་འགྲུབ་པར་འགྱུར་ཏེ་ཞག་གསུམ་ན་ཕོ་ཉ་མའི་ཚོགས་རྣམས་ཡོངས་སུ་མགུ་བར་གྱུར་པས་གློ་བུར་དུ་སྐྱེས་པ་དང་། བུད་མེད་ཀྱི་གཟུགས་ཀྱིས་ཤིང་ཐོག་སྦྱིན་པར་བྱེད་དོ། །

དེ་ནས་རིག་སྔགས་འཆང་གིས་ཤིང་ཐོག་བླངས་ལ་བདག་གྲུབ་པོ་སྙམ་དུ་ཤེས་པར་བྱས་ནས་ལག་ན་རྡོ་རྗེ་དང་ཕོ་ཉ་མའི་ཚོགས་རྣམས་ལ་མཆོད་པར་བྱའོ། །བཅོམ་ལྡན་འདས་ལག་ན་རྡོ་རྗེ་ཕོ་ཉ་མའི་ཚོགས་དང་ལྷན་ཅིག་ཏུ་ཚོན་རྩི་སྣ་གསུམ་གྱིས་བྲིས་པ་འདི་ནི་གང་
གིས་མཐོང་ན་ཡང་ཕོ་ཉ་མའི་ཚོགས་ཐམས་ཅད་འགྲུབ་པར་འགྱུར་ན་སྒྲུབ་པ་དང་འཆང་བ་ལྟ་ཅི་སྨོས། དབྱིག་དེ་དག་ཀྱང་ལག་པར་བཞག་སྟེ་བླ་མ་ལ་དབུལ་བར་བྱའོ། །ཕུལ་ནས་ཀྱང་ཕོ་ཉ་མོའི་ཚོགས་རྣམས་བདག་ལ་གྲུབ་པར་གྱུར་ཅིག །ཅེས་སྨྲས་ལ། དེ་ནས་
ཀྱང་བསྒྲིམས་ཏེ་ཕོ་ཉ་མོའི་ཚོགས་ཀྱིས་བལྟས་པའི་ལུས་འདི་བསྒྲུབ་པར་བྱའོ། །དེ་ནས་ཕོ་ཉ་མོ་དྲུག་དང་། ཚོགས་སྟོབས་པོ་ཆེ་བརྒྱད་པོ་རྣམས་ལས་སྣ་ཚོགས་ཀྱིས་བསྒྲུབ་པར་བྱའོ། །ཕོ་ཉ་མོ་རྣམས་ཀྱི་ལས་སྣ་ཚོགས་རྣམས་བཤད་པར་བྱ་སྟེ། མེ་ལྕེ་མའི་ལས་འདི་
རྣམས་བསྲུང་བ་ནི་ལན་བདུན་བཟླས་བརྗོད་བྱས་པའི་སྐུད་པས་བྱའོ། །མཚམས་བཅད་པ་ནི་ཐལ་བས་བྱའོ། །དུག་ལས་གསོ་བ་ནི་ཡལ་གས་བྱའོ། །གདོན་ཐམས་ཅད་ལ་ནི་ཡུངས་ཀར་གྱིས་གདབ་པའི་ལས་བྱའོ། །གཞོན་ནུའི་གདོན་ལ་ནི་རྣ་བར་བཤིབས་ཏེ་བཟླས་
བརྗོད་བྱས་པས་གཏོང་བར་བྱེད་དེ། གཞོན་ནུ་ཐམས་ཅད་ལ་རྟག་ཏུ་སྦྱར་བར་བྱའོ། །དབབ་པ་ནི་གུ་གུལ་གྱིས་བདུག་པར་བྱའོ། །མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ཏེ། འཕགས་པ་ལག་ན་རྡོ་རྗེ་ལ་མེ་ཏོག་དཀར་པོ་སྟོང་གིས་བསྣུན་ན་ལོངས་སྤྱོད་ཀྱི་གཞི་
སྦྱིན་པར་བྱེད་དོ། །ཟླ་བ་གཅིག་གི་བར་དུ་སློང་མོའི་ཟས་བཟའ་ཞིང་རིག་སྔགས་བཟླས་བརྗོད་བྱས་ནས་མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ཏེ། འཕགས་པ་ལག་ན་རྡོ་རྗེའི་མདུན་དུ་ལྕགས་ཅན་བཞག་ནས་མཆོད་པ་རྒྱས་པར་བྱས་ལ། དེའི་མདུན་དུ་དོང་ཀའི་
ཤིང་གིས་མེ་སྦར་ལ་ལྡོང་རོས་བ་ལང་གི་མཁྲིས་པ་དང་སྦྱར་བས་ལན་བརྒྱད་སྟོང་སྦྱིན་སྲེག་བྱས་ན་གློ་བུར་དུ་ཧ་ཧ་ཞེས་བྱ་བའི་སྒྲ་ཐོས་པར་འགྱུར་ཏེ། དེ་ནས་ཚོགས་ཆེན་པོ་རྨུགས་བྱེད་འོང་བར་འགྱུར་རོ། །འོངས་ནས་རྨུགས་བྱེད་ཀྱིས་ལྡོང་རོས་སྦྱིན་པར་བྱེད་དེ། དེ་ཐོགས་པས་

འདོད་དགུར་སྒྱུར་བའི་གཟུགས་ཅན་དུ་འགྱུར་ཞིང་ལྕགས་ཅན་དང་། ཁ་དོག་མཚུངས་ལ་བསྐལ་པར་གནས་པར་འགྱུར་རོ། །ཡང་ན་སློང་མོའི་ཟས་བཟའ་ཞིང་དབེན་པའི་གནས་སུ་ལན་འབུམ་བཟླས་བརྗོད་བྱས་ན་ཚོགས་ཆེན་པོ་ལྕགས་ཅན་གྱིས་རལ་གྲི་སྦྱིན་པར་
བྱེད་དེ། དེ་ཐོགས་པས་སྟོབས་དང་ཕ་རོལ་གནོན་པ་དཔག་ཏུ་མེད་ཅིང་བསྐལ་པར་གནས་པར་འགྱུར་རོ། །བྱན་ལག་གི་ཚང་ནས་ཤིང་བུ་བླངས་ལ། འཕགས་པ་ལག་ན་རྡོ་རྗེའི་མདུན་དུ་ལན་འབུམ་བཟླས་བརྗོད་བྱས་ན་དེ་ཐོགས་པས་ཡིད་ལ་གང་བསམས་པ་དེ་འགྲུབ་པར་འགྱུར་
ཏེ། སྐྱེས་པ་དང་། བུད་མེད་དང་། ཟས་དང་། གོས་དང་། མལ་སྟན་རྣམས་ཡིད་ལ་བསམས་པས་འགྲུབ་པར་འགྱུར་རོ། །དེ་ལྟ་བུའི་ཤིང་བུ་ཆུ་ཀླུང་ཆེན་པོར་བོར་ཏེ་དེ་ནས་ཉི་མ་ལ་བལྟས་ལ་ཆུ་ངོགས་སུ་བཟླས་བརྗོད་བྱས་ན་ཡིད་ལ་གང་བསམས་པ་དེ་དག་ཐམས་ཅད་འགྲུབ་
ཅིང་ཚེ་ལོ་ཁྲི་ཐུབ་པར་འགྱུར་ཏེ། མིའི་ཐོད་པ་ལ་དབབ་པ་དང་། རལ་གྲི་དང་། མེ་ལོང་ལ་དབབ་པ་ཡང་བྱེད་ནུས་པར་འགྱུར་རོ། །ཡར་གྱི་ངོ་ཟླ་བ་ཉ་ལ་བརྩམས་ཏེ་སློང་མོའི་ཟས་ཟ་ཞིང་། འཕགས་པ་ལག་ན་རྡོ་རྗེའི་ཞབས་ཀྱི་དྲུང་དུ་ལན་འབུམ་བཟླས་བརྗོད་བྱས་ན་བུད་མེད་ཐོབ་པར་
འགྱུར་རོ། །དཔལ་ཐམས་ཅད་མངོན་པར་འབྱུང་བར་བྱེད་པའི་ལས་བྱ་བ་དང་། ལྷ་རྣམས་ལ་དྲི་དབུལ་བ་ཡང་འདིའི་རིག་སྔགས་ཀྱིས་བྱའོ། །མེ་ལྕེ་མའི་ཆོ་ག་སྟེ་དང་པོ་རྫོགས་སོ།། །།མེ་སྟག་མའི་ལས་རྣམས་འབྱུང་སྟེ། དབབ་པ་ནི་ལན་བདུན་བཟླས་བརྗོད་བྱས་
པའི་ཆུས་བྱའོ། །རྒྱ་གཞོམ་པ་ནི་སོ་ཕག་གིས་བྱའོ། །དུག་ལས་གསོ་བ་ནི་ཡལ་གས་བྱའོ། །སྡོམ་དང་ལུ་ཏས་ཟིན་པ་རྣམས་ལ་ནི་བྱ་བ་པས་བྱའོ། །མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ཏེ་དུར་ཁྲོད་ཀྱི་གསེག་མ་བླངས་ནས་འཕགས་པ་ལག་ན་རྡོ་རྗེའི་མདུན་དུ་
ལན་བརྒྱད་སྟོང་བཟླས་བརྗོད་བྱས་ན་གསེག་མ་དེ་ཐོགས་པས་གང་ལ་བསྡིགས་པ་དེ་རྒྱས་བཏབ་པར་འགྱུར་ལ། གུ་གུལ་གྱིས་བདུགས་ན་གྲོལ་བར་འགྱུར་རོ། །མི་རོ་ལ་བལྟས་ཏེ་ལོངས་ཞེས་སྨྲས་ན་ལྡང་བར་འགྱུར་ཏེ་དོན་དུ་གཉེར་བའི་མཆོག་སྟོན་པར་འགྱུར་རོ། །དེ་ནས་རྨ་བྱ་སྒྲུབ་

པར་འདོད་ན་ཞག་གསུམ་སྨྱུང་བ་བྱས་ཏེ་མར་གྱི་ངོ་ཞག་བཅུ་བཞི་ལ་གཞོན་ནུའི་གནས་སུ་སོང་ལ་ཚོན་རྩི་སྣ་གསུམ་གྱིས་རྨ་བྱ་བྲིས་ནས་དེའི་ལུས་ལ་རྨ་བྱའི་སྒྲོ་བཞག་སྟེ། ལྷ་བཤོས་སྣ་ཚོགས་ཕུལ་ལ་དེ་ནས་སྐད་ལན་གསུམ་ཕྱུང་གི་བར་དུ་རིག་སྔགས་བཟླས་བརྗོད་བྱས་ན་དེ་ཕྱིན་ཆད་
དུག་གསོ་བའི་ལས་ཐམས་ཅད་འགྲུབ་པར་འགྱུར་རོ། །རྨ་བྱའི་སྒྲོ་དེ་ཡང་དུད་པ་བཀག་སྟེ་བསྲེགས་ལ་དེས་མིག་བསྐུས་ན་ཕྱེ་མ་རེད་ལུས་མི་སྣང་བར་འགྱུར་ཏེ་ཡིད་ལ་གང་བསམས་པའི་དོན་དེ་བྱེད་ནུས་པར་འགྱུར་རོ། །སེམས་ཅན་ཐམས་ཅད་ལ་ཡང་མཚམས་བཅད་པར་ནུས་
སོ། །འབྲུའི་ཞིང་གི་སྟེང་དུ་སོང་ལ་ལན་སྟོང་བཟླས་བརྗོད་བྱས་ན་འབྲུ་རྣམས་རྒྱས་པར་འགྱུར་རོ། །འབྲུ་མ་རུང་བར་བྱ་བར་འདོད་ན་མིའི་རུས་པའི་ཕུར་བུ་ལ་ལན་སྟོང་བཟླས་བརྗོད་བྱས་ཏེ་བཙུགས་ནམ་རུངས་པར་འགྱུར་རོ། །དཔལ་ཐམས་ཅད་མངོན་པར་འབྱུང་བར་བྱེད་
པའི་དཀྱིལ་འཁོར་ཆེན་པོ་ལ་མེ་ཏོག་དབུལ་བ་དང་། ལྷ་ཐམས་ཅད་ལ་ཡང་ལྷ་བཤོས་དབུལ་བ་ཡང་འདིའི་རིག་སྔགས་ཀྱིས་བྱའོ། །མེ་སྟག་མའི་ཆོ་ག་སྟེ་གཉིས་པ་རྫོགས་སོ།། །།ཕྲེང་ལྡན་མའི་ལས་རྣམས་འབྱུང་སྟེ། བུད་མེད་དབང་དུ་བྱ་ན་ཞག་གསུམ་
གྱི་བར་དུ་དུས་གསུམ་དུ་ལན་ཚྭའི་སྦྱིན་སྲེག་བྱས་ན་དབང་དུ་འགྱུར་རོ། །ཟླ་བ་གཅིག་གི་བར་དུ་དུས་གསུམ་དུ་ཁྲུས་བྱས་ཏེ་དུས་གསུམ་དུ་ལན་སྟོང་རྩ་བརྒྱད་བཟླས་བརྗོད་བྱས་ན་ཟླ་བ་གཅིག་ལོན་ནས་བཅོམ་ལྡན་འདས་ལག་ན་རྡོ་རྗེ་མཐོང་བར་འགྱུར་ཏེ་བསམས་པ་ཐམས་ཅད་
ཡོངས་སུ་རྫོགས་པར་བྱེད་ཅིང་ཚེ་ལོ་ལྔ་བརྒྱ་ཐུབ་པར་འགྱུར་རོ། །ཡར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ཏེ་དགོན་པའི་གནས་སུ་ལན་བརྒྱད་སྟོང་བཟླས་བརྗོད་བྱས་ན་གློ་བུར་དུ་འོང་བར་འགྱུར་ཏེ། འོངས་ནས་གཏེར་སྦྱིན་པར་བྱེད་ལ་དེ་ཡང་མི་ཟད་པར་འགྱུར་རོ། །ཞག་
གསུམ་སྨྱུང་བ་བྱས་ཏེ་ཡར་གྱི་ངོ་ཚེས་ལྔ་ལ་བུམ་པ་ས་བོན་དང་རིན་པོ་ཆེ་ཐམས་ཅད་ཀྱིས་བཀང་སྟེ་མགྲིན་བཅིངས་དང་བཅས་པར་བཞག་སྟེ། རིག་སྔགས་ཀྱང་ལན་བརྒྱད་སྟོང་བཟླས་བརྗོད་བྱས་ལ་ཆུ་དེས་རྒྱལ་པོ་འམ། རྒྱལ་པོའི་བུ་ཁྲུས་བྱེད་དུ་བཅུག་ན་ཡུལ་དེ་དཔལ་དང་ལྡན་

པར་འགྱུར་རོ། །དེ་ནས་གནོད་སྦྱིན་དབང་དུ་བྱ་བར་འདོད་ན་དགོན་པའི་གནས་སྐྱེས་པ་དང་བུད་མེད་མེད་པའི་ཕྱོགས་སུ་ཟླ་བ་གཅིག་གི་བར་དུ་སློང་མོའི་ཟས་བཟའ་ཞིང་ས་ལས་གནོད་སྦྱིན་གྱི་གཟུགས་བྱས་ཏེ་དུས་གསུམ་དུ་ལན་བརྒྱད་བརྒྱའམ། ལན་སྟོང་
བཟླས་བརྗོད་བྱས་ན་ཟླ་བ་དྲུག་ལོན་པ་ན་གནོད་སྦྱིན་གྱི་བདག་པོ་འོང་བར་འགྱུར་ཏེ། དེ་ན་རེ་བདག་ཅག་གིས་ཅི་ཞིག་བྱ། དམ་པ་སློངས་ཤིག་ཅེས་ཟེར་བ་དང་། དེ་ནས་དེས་འདི་སྐད་དུ་དཔག་ཚད་བརྒྱ་ཚུན་ཆད་ཀྱི་གནོད་སྦྱིན་ཐམས་ཅད་བདག་གི་དབང་དུ་གྱུར་ཅིག་ཅེས་སྨྲོས་ཤིག །
དེ་ན་རེ་དེ་ལྟར་བྱའོ་ཞེས་སྨྲས་ནས་མི་སྣང་བར་འགྱུར་ཏེ། ཡིད་ལ་ཅི་བསམས་པ་དེ་ཐམས་ཅད་བྱེད་ཅིང་དུས་མ་ཡིན་པར་རྩ་བ་དང་། མེ་ཏོག་དང་། འབྲས་བུ་དང་། ཟས་དང་། གོས་དང་། རིན་པོ་ཆེ་དང་། ཏི་ན་ར་གང་འདོད་པ་རྣམས་སྦྱིན་པར་བྱེད་དོ། །དེ་ནས་ལོངས་སྤྱོད་
ཀྱི་གཞི་བླང་བར་འདོད་ན་ཞག་དྲུག་སྨྱུང་བར་བྱས་ཏེ་བཅོམ་ལྡན་འདས་ལག་ན་རྡོ་རྗེ་ལ་མཆོད་པའི་ཕྱིར་ཞིང་རྒྱས་པར་བྱས་ལ། ཟླ་བ་ཉའི་ནུབ་མོ་ཨ་ག་རུ་དང་། གུ་གུལ་དང་། དུ་རུ་སྐ་བསྲེགས་ཤིང་ནམ་ནངས་ཀྱི་བར་དུ་བཟླས་བརྗོད་བྱས་ཏེ་ཞག་བདུན་གྱི་བར་དུ་ངེས་པར་གནས་
ན་དེ་ནས་ལོངས་སྤྱོད་ཀྱི་གཞི་ཆེན་པོ་ཐོབ་པར་འགྱུར་རོ། །དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་ཆེན་པོའི་མར་མེ་རྣམས་ཀྱང་འདིའི་རིག་སྔགས་ཀྱིས་དབུལ་བར་བྱའོ། །ཕྲེང་ལྡན་མའི་ཆོ་ག་སྟེ་གསུམ་པ་རྫོགས་སོ།། །།མཛོད་ལྡན་མའི་
ལས་རྣམས་འབྱུང་སྟེ། འཕགས་པ་ལག་ན་རྡོ་རྗེའི་མདུན་དུ་ལན་འབུམ་བཟླས་བརྗོད་བྱས་ན་ནད་ཐམས་ཅད་ཐམས་ཅད་ལས་ཐར་བར་འགྱུར་རོ། །དབབ་པ་ནི་གུ་གུལ་གྱིས་བདུག་པར་བྱའོ། །མར་གྱི་ངོ་ཞག་བརྒྱད་ལ་ཞག་གསུམ་ལ་སྨྱུང་བ་བྱས་ལ་གུ་གུལ་དང་། བིལ་བ་ལྷན་ཅིག་ཏུ་སྦྱར་ཏེ་
ལན་སྟོང་བཟླས་བརྗོད་བྱས་ན་ཏི་ན་ར་སྟོང་ཐོབ་པར་འགྱུར་རོ། །མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ཏེ་དུར་ཁྲོད་དུ་སོང་ནས་མིའི་ཐོད་པ་བླངས་ལ་རའི་འོ་མས་བཀང་སྟེ། ཐོད་པ་གསུམ་གྱི་སྟེང་དུ་བཞག་ནས་རིག་སྔགས་བཟླས་བརྗོད་བྱེད་བཞིན་དུ་འབྲས་སཱ་ལུའི་

འོ་ཐུག་བཙོས་ལ། ཟིན་པའི་འོག་ཏུ་རིག་སྔགས་བཟླས་བརྗོད་བྱེད་བཞིན་དུ་འཐུངས་ཏེ་སླར་ཐོད་པའི་ནང་དུ་སྐྱུག་པར་བྱའོ། །དེ་ནས་ཡི་དགས་འོང་བར་འགྱུར་ཏེ་ཡི་དགས་ན་རེ་རིག་སྔགས་འཆང་ང་ལ་འོ་ཐུག་བྱིན་ཅིག་ཅེས་ཟེར་བ་དང་། དེ་ནས་རིག་སྔགས་འཆང་གིས་
རིག་སྔགས་ཐམས་ཅད་ཀྱི་རྒྱལ་པོ་བཟླས་བརྗོད་བྱེད་བཞིན་དུ་ཡི་དགས་དེ་ལ་སྦྱིན་པར་བྱའོ། །ཡི་དགས་དེས་འོ་ཐུང་འཐུངས་ནས་འཆི་བར་འགྱུར་ཏེ་དེའི་ལག་ན་ལྡོང་རོས་འདུག་པ་བླངས་ནས་དེ་ཐོགས་པས་ལག་ན་རྡོ་རྗེ་དང་མཐུ་སྟོབས་མཉམ་ཞིང་བསྐལ་པར་གནས་པར་འགྱུར་རོ། །
རིག་སྔགས་འཆང་གིས་ཟླ་བ་གཅིག་གི་བར་དུ་སློང་མོའི་ཟས་ཟ་ཞིང་། རིག་སྔགས་བཟླས་བརྗོད་བྱས་ན་འདོད་པ་ཐམས་ཅད་ཡོངས་སུ་རྫོགས་པར་འགྱུར་རོ། །ཀུན་དགའ་ར་བར་ཟླ་བ་གཅིག་གི་བར་དུ་སློང་མོའི་ཟས་ཟ་ཞིང་ལན་འབུམ་བཟླས་བརྗོད་བྱས་པའི་མཇུག་ཏུ་
ཞག་གསུམ་སྨྱུང་བ་བྱས་ཏེ། མཚན་རངས་པར་བཟླས་བརྗོད་བྱས་ན་དེ་ནས་ཤིང་གི་ལྷས་གཟུགས་སྟོན་པར་བྱེད་དེ། དེ་ལས་འགྲུབ་པར་འགྱུར་ལ་དེ་ཕྱིན་ཆད་ནགས་ཀྱི་ལྷས་ཁ་ཟས་སྦྱིན་པར་འགྱུར་རོ། །དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་ཆེན་པོའི་
ལྷ་ཐམས་ཅད་ལ་བདུག་པ་དབུལ་བ་ཡང་འདིའི་རིག་སྔགས་ཀྱིས་བྱའོ། །མཛོད་ལྡན་མའི་ཆོ་ག་སྟེ་བཞི་པ་རྫོགས་སོ།། །།འབར་ལྡན་མའི་ཆོ་ག་རྣམས་འབྱུང་སྟེ། དབབ་པ་ནི་གུ་གུལ་གྱིས་བདུག་པར་བྱའོ། །བསྲུང་བ་ནི་སྐུད་པས་བྱའོ། །མཚམས་
བཅད་པ་ནི་སོ་ཕག་གིས་བྱའོ། །བསྐྲད་པ་ནི་ཐལ་མོ་བརྡབས་པས་བྱའོ། །སས་ནི་འབྲས་དང་ཕོལ་མིག་རྣམས་མེད་པར་འགྱུར་རོ། །ཟླ་བ་གཅིག་གི་བར་དུ་མེ་ཏོག་དཀར་པོ་ལ་ལན་བདུན་བསྔགས་ཏེ་ཕྱེ་མ་རེད་བྱང་ཕྱོགས་སུ་བོར་ནས་ཟླ་བ་གཅིག་ལོན་པ་ན་བཅོམ་ལྡན་
འདས་མ་འགྲུབ་པར་འགྱུར་ཏེ་བསམ་པ་ཐམས་ཅད་ཡོངས་སུ་རྫོགས་པར་འགྱུར་ཞིང་ལོ་ལྔ་བརྒྱ་ཐུབ་པར་འགྱུར་རོ། །རྣ་བར་བཤིབས་ཏེ་བཟླས་བརྗོད་བྱས་ན་གདོན་ཐམས་ཅད་ཀྱིས་གཏོང་བར་འགྱུར་ཏེ། གཞོན་ནུ་རྣམས་ལ་རྟག་ཏུ་སྦྱར་བར་བྱའོ། །མར་གྱི་ངོ་ཞག་

བརྒྱད་ལ་ཞག་གཅིག་སྨྱུང་བ་བྱས་ཏེ་འཕགས་པ་ལག་ན་རྡོ་རྗེ་ལ་མེ་ཏོག་དཀར་པོ་སྟོང་གིས་བསྣུན་ན་ལོངས་སྤྱོད་ཀྱི་གཞི་སྦྱིན་པར་འགྱུར་རོ། །ཟླ་བ་གཅིག་གི་བར་དུ་སློང་མོའི་ཟན་བཟའ་ཞིང་རིག་སྔགས་བཟླས་བརྗོད་བྱས་ནས་ཞག་གསུམ་སྨྱུང་བ་བྱས་ཏེ་མར་
གྱི་ངོ་ཞག་བཞི་ལ་འཕགས་པ་ལག་ན་རྡོ་རྗེའི་མདུན་དུ་ལྕགས་ཅན་བཞག་ནས་མཆོད་པ་རྒྱས་པར་བྱས་ཏེ་ལྷ་བཤོས་རྒྱས་པར་ཕུལ་ནས། དེའི་མདུན་དུ་དོང་ཀའི་ཤིང་གིས་མེ་སྦར་ལ་ལྡོང་རོས་ལ་བ་ལང་གི་མཁྲིས་པ་དང་སྦྱར་བས་ལན་བརྒྱད་སྟོང་སྦྱིན་སྲེག་བྱས་ན་གློ་བུར་དུ་ཧ་ཧ་
ཞེས་བྱ་བའི་སྒྲ་ཐོས་ནས་ཚོགས་ཀྱི་བདག་པོ་ཆེན་པོ་རྨུགས་བྱེད་འོང་བར་འགྱུར་རོ། །འོངས་ནས་རྨུགས་བྱེད་ཀྱིས་ལྡོང་རོས་སྦྱིན་པར་བྱེད་དོ། །དེ་ནས་འདོད་དགུར་སྒྱུར་བའི་གཟུགས་ཅན་དུ་འགྱུར་ཞིང་ལྕགས་ཅན་དང་མཐུ་སྟོབས་མཉམ་ལ་བསྐལ་པར་གནས་པར་འགྱུར་
རོ། །ཡར་གྱི་ངོ་ཟླ་བ་ཉ་ལ་བརྩམས་ཏེ་སློང་མོའི་ཟས་བཟའ་ཞིང་འཕགས་པ་ལག་ན་རྡོ་རྗེའི་ཞབས་དྲུང་དུ་ལན་འབུམ་བཟླས་བརྗོད་བྱས་ན་དཔལ་ཐོབ་པར་འགྱུར་རོ། །དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་ཆེན་པོའི་ལས་བྱ་བ་དང་། ལྷ་རྣམས་ལ་
དྲི་དབུལ་བ་ཡང་འདིའི་རིག་སྔགས་ཀྱིས་བྱའོ། །འབར་ལྡན་མའི་ཆོ་ག་སྟེ་ལྔ་པ་རྫོགས་སོ།། །།ཁ་འབར་མའི་ལས་རྣམས་འབྱུང་སྟེ། དབབ་པ་ནི་ཆུས་བྱའོ། །བསྲུང་བ་ནི་ཡུངས་ཀར་གྱིས་བྱའོ། །མཚམས་བཅད་པ་ནི་སོ་ཕག་གིས་བྱའོ། །དུར་ཁྲོད་ཀྱི་ཐལ་
བ་བླངས་ཏེ་མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ནས་ལག་ན་རྡོ་རྗེའི་མདུན་དུ་ལན་སྟོང་བཟླས་བརྗོད་བྱས་ན་ཐལ་བ་དེས་གང་ལ་རིག་པར་བྱས་པ་དེ་གདོན་གྱིས་འདེབས་པར་འགྱུར་ཞིང་། ཚིག་གིས་བསྒོ་བས་གཏོང་བར་འགྱུར་རོ། །ལུས་གཙང་བར་བྱས་ཏེ་ལན་
འབུམ་བཟླས་བརྗོད་བྱས་ན་བ་ལང་བརྒྱ་ཐོབ་པར་འགྱུར་རོ། །དེ་ནས་སྐྱེས་པ་དབང་དུ་བྱ་བར་འདོད་ན་ཟླ་བ་ཉ་ལ་ཞག་གཅིག་སྨྱུང་བ་བྱས་ཏེ། མཆོད་པ་རྒྱས་པར་བྱས་ནས་གུར་གུམ་དང་གསེར་ཕྱེ་མར་དང་སྦྱར་བས་ལན་བརྒྱད་སྟོང་སྦྱིན་སྲེག་བྱས་ན་བརྒྱ་བྱིན་ཡང་དབང་དུ་འགྱུར་

ན་མི་རྣམས་ལྟ་ཅི་སྨོས། དགེ་སློང་དང་བྲམ་ཟེ་བརྒྱད་བརྒྱ་ལ་མཆོད་སྟོན་བྱིན་ལ་སེམས་ཅན་ཐམས་ཅད་ལ་ཡང་བྱམས་པ་བསྒོམས་ན་ནི་བྲམ་ཟེ་གསོད་པས་ཀྱང་འགྲུབ་པར་འགྱུར་རོ། །མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ཏེ་འཕགས་པ་ལག་ན་རྡོ་རྗེའི་མདུན་དུ་
དུར་ཁྲོད་ཀྱི་ཤིང་གིས་མེ་སྦར་ནས་དུར་ཁྲོད་ཀྱི་ཡམ་སྲེག་ཤིང་སྐུད་པ་དམར་པོས་དཀྲིས་པ་བརྒྱད་སྟོང་སྦྱིན་སྲེག་བྱས་ན་དེ་ནས་རྨི་ལམ་དུ་ཚོགས་ཆེན་པོ་ལྕགས་ཅན་སྟོན་པར་བྱེད་དེ་དེ་ནས་འགྲུབ་པར་འགྱུར་རོ། །ཆུ་ཁྱོར་གང་ལ་ལན་བདུན་བསྔགས་ནས་གང་ལ་བལྟས་ཏེ་གཏོར་བ་དེ་
གདོན་གྱིས་ཐེབས་པར་འགྱུར་ལ། ཆུ་ཀླུང་གི་ནང་དུ་ཞུགས་ཏེ་ལན་བརྒྱད་སྟོང་བཟླས་བརྗོད་བྱས་ན་གཏོང་བར་འགྱུར་རོ། །ཁ་འབར་མའི་ཆོ་ག་སྟེ་དྲུག་པ་རྫོགས་སོ།། །།དེ་ནས་བཅོམ་ལྡན་འདས་ཀྱིས་ལྷ་དེ་དག་ལ་སྨྲས་པ། ལྷ་རྣམས་དཔལ་ཐམས་ཅད་མངོན་
པར་འབྱུང་བར་བྱེད་པའི་དཀྱིལ་འཁོར་ཆེན་པོ་ལ་ཕོ་ཉ་མོ་རྣམས་ཀྱི་ལས་རྣམས་འབྱུང་བ་ངས་བཤད་ཟིན་ཏེ། ཚོགས་ཆེན་པོ་རྣམས་ཀྱི་ཡང་བཤད་པར་བྱའོ། །བདུད་རྩི་ཐབ་སྦྱོར་གྱི་ལས་སྔར་ངས་གང་བཤད་པ་གང་ཡིན་པའི་ལས་ཏེ་ཚོགས་ཐམས་ཅད་ལ་སྦྱར་བར་
བྱའོ། །རབ་ཏུ་གྲུབ་པར་བྱེད་པའི་རྒྱུད་ཆེན་པོ་ལས་རྡོ་རྗེ་ཁྲོ་བོ་ངས་བཤད་པ་གང་ཡིན་པ་དེའི་ལས་ཀྱིས་ཀྱང་ཚོགས་ཆེན་པོ་སྟོབས་པོ་ཆེ་རྣམས་ལ་སྦྱར་བར་བྱའོ། །ལྷ་རྣམས་འབྱུང་པོའི་བུ་གཞོན་ནུ་མཆོག་སྨིན་དྲུག་གི་བུ་སྟོབས་པོ་ཆེའི་ལས་རྣམས་ངས་བཤད་ཀྱིས་སེམས་རྩེ་
གཅིག་ཏུ་བྱོས་ལ་ཉོན་ཅིག།།གང་ལ་བསམས་ཏེ་བཟླས་བརྗོད་བྱས་ན་དེའི་དབང་དུ་འགྱུར་རོ། །རྒྱ་གཞོམ་པ་ནི་ཆུས་བྱའོ། །བསྲུང་བ་ནི་སྐུད་པས་བྱའོ། །མཚམས་བཅད་པ་ནི་ཐལ་བས་བྱའོ། །བུད་མེད་དབང་དུ་བྱ་བ་ནི་ཞག་བདུན་གྱི་བར་དུ་དུས་གསུམ་དུ་ཡུངས་ཀར་
གྱིས་ལན་སྟོང་རྩ་བརྒྱད་བརྒྱད་སྦྱིན་སྲེག་བྱས་ན་དབང་དུ་འགྱུར་རོ། །མིའི་གཙོ་བོ་དབང་དུ་བྱ་བར་འདོད་ན་ཞག་བདུན་གྱི་བར་དུ་ཟས་སུ་འོ་མ་དང་ཕྱེའི་འདག་གུ་ཟ་ཞིང་འཕགས་པ་ལག་ན་རྡོ་རྗེ་ལ་མཆོད་པ་བྱས་ཏེ་དུས་གསུམ་དུ་བཻ་ཀངྐ་ཏའི་ཡམ་སྲེག་ཤིང་གིས་འབྲུ་མར་དྲི་ཞིམ་པའི་

ནང་དུ་སྨྱུགས་པ་སྟོང་རྩ་བརྒྱད་བརྒྱད་སྦྱིན་སྲེག་བགྱིས་ན་དབང་དུ་འགྱུར་རོ། །མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བྱས་ཏེ་འཕགས་པ་ལག་ན་རྡོ་རྗེའི་མདུན་དུ་གཞོན་ནུ་སྨིན་དྲུག་གི་བུ་བཞག་ནས་དེའི་མདུན་དུ་ཙནྡན་དམར་པོའི་ཤིང་གིས་མེ་སྦར་ནས་
སེང་ལྡེང་གི་ཡམ་སྲེག་ཤིང་མར་གྱི་ནང་དུ་སྨྱུགས་པ་བརྒྱད་སྟོང་སྦྱིན་སྲེག་བྱས་ན་གཞོན་ནུའི་མེ་ཏོག་གི་ཕྲེང་བ་འགུལ་བར་འགྱུར་རོ། །དེ་ནས་འགྲུབ་པར་འགྱུར་ཏེ་ཞག་བདུན་ཚུན་ཆད་ཀྱིས་གཞོན་ནུའི་སྡེའི་བདག་པོ་ཐོབ་པར་འགྱུར་རོ། །མི་རྣམས་ཀྱིས་མི་སོད་ལ་བདག་གི་
ཚེའི་ཚད་ཀྱང་ཤེས་པར་འགྱུར་རོ། །ཟླ་བ་གཅིག་གི་བར་དུ་སློང་མོའི་ཟས་བཟའ་ཞིང་དེ་ནས་མར་གྱི་ངོ་ཞག་བརྒྱད་དམ། །ཞག་བཅུ་བཞི་ལ་ཞག་གསུམ་སྨྱུང་བ་བྱས་ཏེ། ཙནྡན་དམར་པོའི་མདུང་ཐུང་བདེ་བར་གཤེགས་པའི་མཐོ་གང་གི་ཚད་དུ་བྱས་པ་རས་དམར་པོའི་སྟེང་དུ་
བཞག་ནས་མཆོད་པ་རྒྱས་པར་བྱ་ཞིང་ལྷ་བཤོས་རྒྱས་པ་ཕུལ་ལ། དེ་ནས་རིག་སྔགས་འཆང་བ་རྩྭ་ཀུ་ཤའི་སྟན་གྱི་སྟེང་དུ་འདུག་པའི་ལག་པ་གཡས་པས་མནན་ལ་འབར་བར་གྱུར་གྱི་བར་དུ་བཟླས་བརྗོད་བྱས་ན་འགྲུབ་པར་འགྱུར་ཏེ། དེ་ཐོགས་པས་ཕ་རོལ་གྱི་ཡུལ་འཁོར་འབྱེད་
པར་བྱེད་ཅིང་གདོན་ཐམས་ཅད་འཇོམས་པར་བྱེད་པར་འགྱུར་ཏེ། ཡུལ་གང་དུ་བཙུགས་པ་དེར་རྒྱལ་བར་འགྱུར་རོ། །ཀླུའམ། ཀླུ་མོའམ། དྲི་ཟའམ། རིག་སྔགས་འཆང་རྣམས་ལ་བལྟས་ཏེ་བསྡིགས་ན་དེ་དག་ཐམས་ཅད་བཀའ་བཞིན་དུ་འགྱུར་རོ། །གླང་པོ་ཆེ་རྒྱགས་
ཤིང་མྱོས་པ་ལ་བལྟས་ཤིང་བསྡིགས་ན་གླང་པོ་ཆེ་དབང་དུ་འགྱུར་རོ། །སློང་མོའི་ཟས་ཟ་ཞིང་ཆོ་ག་འདི་བཞིན་དུ་འཁོར་ལོ་བསྒྲུབས་ན་རིག་སྔགས་འཆང་གི་འཁོར་ལོས་སྒྱུར་བའི་རྒྱལ་པོར་འགྱུར་ཏེ། བསྐལ་པར་གནས་ཤིང་རིག་སྔགས་འཆང་བརྒྱས་བསྐོར་བ་ལ་མེ་ལོང་ལ་དབབ་
པ་དང་། མཐེ་བོང་ལ་དབབ་པ་དང་། བུམ་པ་ལ་དབབ་པ་ཡང་ནུས་པར་འགྱུར་རོ། །དབྱེ་བར་བྱ་ན་ཞག་གསུམ་གྱི་བར་དུ་ཕུབ་མའི་སྦྱིན་སྲེག་ལན་སྟོང་རྩ་བརྒྱད་བརྒྱད་བྱས་ན་འབྱེ་བར་འགྱུར་རོ། །སྨིན་དྲུག་གི་བུའི་ཆོ་ག་རྫོགས་སོ།། །།ལྷ་མོ་ཆེན་མོ་དྲུག་མའི་

ལས་རྣམས་ཀྱང་བཤད་པར་བྱ་སྟེ། བསྲུང་བ་ནི་ཐལ་བས་བྱའོ། །དུག་ལས་གསོ་བ་ནི་ཆུས་བྱའོ། །མཚམས་བཅད་པ་ནི་སོ་ཕག་གིས་བྱའོ། །དེ་ནས་ལོངས་སྤྱོད་ཀྱི་གཞི་བསླང་བར་འདོད་ན་གཞོན་ནུའི་གནས་སུ་སོང་ལ་ལྷ་མོ་ལ་མཆོད་པ་བྱས་ཏེ་སྨིག་མའི་ཤིང་གིས་
མེ་སྦར་ནས་འོ་ཐུག་དང་མར་དང་། སྦྲང་རྩིར་སྦྱར་བས་ལན་བརྒྱད་སྟོང་སྦྱིན་སྲེག་བྱས་ལ་དེ་ནས་ནང་པར་ལངས་ལ་འཕགས་པ་ལག་ན་རྡོ་རྗེ་ལ་མཆོད་པ་བྱས་ཏེ། །གུར་གུམ་མར་དང་སྦྱར་བས་ལན་སྟོང་རྩ་བརྒྱད་བརྒྱད་སྦྱིན་སྲེག་བྱས་ན་ཞག་བདུན་པའི་ཉིན་པར་སྡེའི་བདག་པོར་འགྱུར་རོ། །
དེ་ནས་འཕགས་པ་ལག་ན་རྡོ་རྗེའི་ཞབས་ཀྱི་དྲུང་དུ་ལེགས་ལྡན་ལྷ་ཆེན་པོ་དང་། གཞོན་ནུ་སྨིན་དྲུག་གི་བུ་དང་། ལྷ་མོ་དྲུག་མ་ཚོན་རྩི་སྣ་གསུམ་གྱིས་བྲིས་ལ་རིག་སྔགས་འཆང་ཟས་སུ་འོ་མ་དང་ཕྱེའི་འདག་གུ་ཟ་ཞིང་ལན་འབུམ་བཟླས་བརྗོད་བྱས་ན་ལྷ་མོ་མཐོང་བར་འགྱུར་ཏེ། དེ་
ཡང་འདོད་པ་ཐམས་ཅད་སྦྱིན་པར་བྱེད་དོ། །བཏོན་པ་ཙམ་གྱིས་རྒྱན་སྐུགས་ལས་རྒྱལ་བར་འགྱུར་རོ། །དེ་ནས་བདག་ཉིད་ཀྱི་ཚེའི་ཚད་ཤེས་པར་འདོད་ན་མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བྱས་ཏེ། བཅོམ་ལྡན་འདས་ལག་ན་རྡོ་རྗེ་ལ་ཡང་མཆོད་པ་རྒྱས་པར་བྱས།
ཨ་ག་རུའི་བདུག་པ་དང་། །དུ་རུ་སྐ་དང་། གུར་གུམ་དང་། གུ་གུལ་དང་། སྦྲང་རྩི་དང་། བ་མར་གྱི་མར་མེ་བཞི་ཕྱོགས་བཞིར་སྦར་ལ། དེ་ཉིད་དུ་རིག་སྔགས་བཟླས་བརྗོད་བྱས་ཏེ་དེ་ཉིད་དུ་ཉལ་ན་འཇིག་རྟེན་གསུམ་ན་ཡོད་པའི་དོན་རྨི་ལམ་དུ་སྟོན་པར་འགྱུར་རོ། །ཁྱོད་ཀྱི་ཚེ་འདི་
སྲིད་དུ་ཐུབ་པར་འགྱུར་རོ། །ཞེས་སྨྲ་ཞིང་ནམ་འཆི་བ་འང་སྟོན་པར་བྱེད་དེ། ག་གེ་མོ་ཞིག་ཏུ་ཆེ་གེ་མོ་ཞིག་གི་ཚེ་སྲོག་འདོར་རོ་ཞེས་སྟོན་པར་འགྱུར་ཏེ། འདི་ནི་དངོས་གྲུབ་མཆོག་གི་ལམ་ཡིན་ནོ། །དེ་ནས་འདས་པ་དང་། མ་འོངས་པའི་ལམ་ཤེས་པར་འདོད་ན་སློང་
མོའི་ཟས་ཟ་ཞིང་འཕགས་པ་ལག་ན་རྡོ་རྗེའི་ཞབས་དྲུང་དུ་ཟླ་བ་གཅིག་གི་བར་དུ་བཟླས་བརྗོད་བྱས་ན་དེ་ནས་བུང་བ་འོང་བར་འགྱུར་ཏེ། །བུང་བ་དེའང་རྣ་བྲུང་དུ་མི་སྣང་བར་གྱུར་ནས་འཇིག་རྟེན་གསུམ་ན་ཡོད་པའི་དོན་སྟོན་པར་འགྱུར་ཞེས་རྡོ་རྗེ་འཛིན་གྱིས་བཤད་དོ། །དྲུག་མའི་ཆོ་

ག་རྫོགས་སོ།། །།ལྷ་མོ་དཀའ་ཟློག་མའི་དྲིལ་མཛེས་ཀྱི་ལས་ཀྱང་བཤད་པར་བྱ་སྟེ། མིག་ལ་བསྔགས་ན་གང་བལྟས་པ་དེ་ཐོབ་པར་འགྱུར་རོ། །གདོང་ལ་ལག་པ་བྱུགས་ཏེ་ཉལ་ན་རྨི་ལམ་ངན་པ་རྨི་བར་མི་འགྱུར་རོ། །དེ་ནས་སྡེ་དཔོན་འདོད་ན་ཡར་
གྱི་ངོ་ཚེས་དགུ་ལ་ཞག་གཅིག་སྨྱུང་བ་བྱས་ཏེ་གཏུམ་མོ་ནུབ་ཕྱོགས་སུ་བསྟན་པ་ལ་བལྟས་ནས། མཆོད་པ་རྒྱས་པར་བྱས་ལ་མར་དང་གུ་གུལ་གྱིས་ལན་སྟོང་སྦྱིན་སྲེག་བྱས་ན་སྡེ་དཔོན་ཐོབ་པར་འགྱུར་རོ། །དེ་ནས་མིའི་གཙོ་བོ་དབང་དུ་བྱ་བར་འདོད་ན་མར་གྱི་ངོ་ཞག་བརྒྱད་ལ་
ཞག་གཅིག་སྨྱུང་བ་བྱས་ཏེ་འཕགས་པ་ལག་ན་རྡོ་རྗེའི་མདུན་དུ་མཆོད་པ་བྱས་ནས་མཚན་རངས་པར་བཟླས་བརྗོད་བྱས་ན་མིའི་གཙོ་བོ་དབང་དུ་ཁུགས་པར་འགྱུར་རོ། །དེ་ནས་རལ་གྲི་བསྒྲུབ་པར་འདོད་ན་ཟླ་བ་གཅིག་གི་བར་དུ་སློང་མོའི་ཟས་ཟ་ཞིང་རིག་སྔགས་ལན་བདུན་
འབུམ་བཟླས་བརྗོད་བྱས་ལ་དེ་ནས་ཞག་གསུམ་སྨྱུང་བ་བྱས་ཏེ་འཕགས་པ་ལག་ན་རྡོ་རྗེའི་མདུན་དུ་མཆོད་པ་རྒྱས་པར་བྱས་ནས་རིག་སྔགས་ཀྱི་རྒྱལ་པོས་བསྲུང་བའི་ཆོ་ག་ཐམས་ཅད་བྱའོ། །དེ་ནས་ལག་པ་གཉིས་གུ་གུལ་གྱིས་བསྐུས་ལ་ལག་པས་རལ་གྲི་བཟུང་སྟེ་
རིག་སྔགས་བཟླས་བརྗོད་བྱས་ན་དངོས་གྲུབ་རྣམ་པ་གསུམ་དུ་འགྱུར་ཏེ། རལ་གྲི་དེ་ལག་ན་ཐོགས་པས་རིག་སྔགས་འཆང་གི་རྒྱལ་པོ་བསྐལ་པར་གནས་པར་འགྱུར་ཞིང་ལྷ་ཆེན་པོའི་ཕོ་བྲང་ན་འདུག་པར་འགྱུར་ཏེ། ལེགས་ལྡན་ལྷ་ཆེན་པོ་དེ་དག་ཀྱང་འབྲས་བུ་ཐོབ་པ་སྦྱིན་པར་
བྱེད་དོ། །དེ་ནས་བྱང་ཆུབ་སེམས་དཔའ་རྣམས་དང་ལྷན་ཅིག་ཏུ་གནས་པར་འགྱུར་ཞིང་། འཕགས་པ་སྤྱན་རས་གཟིགས་ཀྱི་དབང་ཕྱུག་དང་ལྷན་ཅིག་གནས་པར་འགྱུར་ལ། དེ་དང་ལྷན་ཅིག་ཏུ་དེ་བཞིན་གཤེགས་པ་མཐོང་ཞིང་བསྙེན་བཀུར་བྱེད་པར་འགྱུར་ཏེ། ལུས་དང་
བྲལ་བའི་ཚེ་ཡང་བདེ་བ་ཅན་དུ་སྐྱེ་བར་འགྱུར་རོ། །དེ་ནས་ལྷའི་གསང་བ་མངོན་སུམ་དུ་མཐོང་བར་འདོད་ན་ཞག་གསུམ་སྨྱུང་བ་བྱས་ཏེ། ཟླ་བ་ཉ་ལ་སངས་རྒྱས་བཅོམ་ལྡན་འདས་དང་། ལག་ན་རྡོ་རྗེ་གཉིས་ལ་ཅི་ནུས་ཀྱིས་མཆོད་པར་བྱའོ། །དེ་ནས་ཡུད་ཙམ་བཟང་པོ་ལ་བདག་

དང་། རྒྱལ་པོའམ། གཞན་ཡང་རུང་སྟེ་དུ་གུ་ལའི་རས་དཀར་པོ་བགོས་ཏེ་དེ་ནས་ཨ་ག་རུ་བསྲེག་ཅིང་རྒྱལ་པོ་དང་གཉིས་ཀ་ཐད་ཀར་འདུག་སྟེ་མིག་མི་འཛུམས་པར་བཟླས་བརྗོད་བྱས་ན་མིག་སྔ་ན་འདུག་པའི་ལྷས་གང་གི་དོན་བསྟན་པ་དེ་རྒྱལ་པོས་ཀྱང་ཇི་ལྟར་ཐོས་པ་དེ་བཞིན་དུ་
མཐོང་བར་འགྱུར་རོ། །ཆོ་ག་འདི་ནི་བསྟེན་ནས་ལོ་གཅིག་མ་ལོན་པར་ལ་སྦྱིན་པར་མི་བྱའོ། །སྟོང་རྙེད་མ་བྱིན་པ་ལ་ཡང་སྦྱིན་པར་མི་བྱ་སྟེ། ཆོས་ཅན་དད་པ་དང་ལྡན་པ་ལ་སྦྱིན་པར་བྱའོ། །དཀའ་ཟློག་མའི་ཆོ་ག་རྫོགས་སོ།། །།ལྷ་རྣམས་དཔལ་ཐམས་ཅད་མངོན་
པར་འབྱུང་བར་བྱེད་པའི་དཀྱིལ་འཁོར་ཆེན་པོ་ལས་འབྱུང་བའི་རིག་སྔགས་ཀྱི་ལྷ་རྣམས་ཀྱི་ལས་ངས་བཤད་ཟིན་ཏོ། །ངས་ཀྱང་ལྷ་དེ་དག་བསྒྲུབ་པ་དང་། གཞེན་གདབ་པ་དང་། གནོན་པར་བྱ་བ་དང་། བསད་པ་དང་། བསྐམས་པ་དང་། དཔལ་བསྐྱེད་པ་དང་། ལས་
ཉམས་པ་རྣམས་ཀྱི་ལས་སྒྲུབ་པ་དང་། རིག་སྔགས་ཉམས་པ་རྣམས་ཀྱི་རིག་སྔགས་བཀང་བ་དང་། མི་ནད་ཀྱི་གནོད་པ་འབྱུང་བ་ལ་མི་ནད་ཞི་བར་བྱ་བའི་ཕྱིར་རིག་སྔགས་བཤད་པར་བྱའོ། །ན་མོ་བཛྲ་པཱ་ཎི་སྱ། ཨོྃ་བཛྲ་ཛྭ་ལ་བྷཻ་ར་བཱ་ཡ་ཕཊ། ཧཱུྃ་ཛྭ་ལཱ་ན་ཡ་ཕཊ་སྭཱ་ཧཱ། དེ་
ནས་ལྷ་དེ་དག་གིས་རྡོ་རྗེ་འབར་བ་འདི་ཐོས་ནས་སྙིང་འདར་ཞིང་ལག་ན་རྡོ་རྗེའི་ཞལ་དུ་བལྟས་སོ། །དེ་ནས་རིག་སྔགས་ཀྱི་རྒྱལ་པོ་ཆེན་པོ་ལག་ན་རྡོ་རྗེས་ལྷ་དེ་དག་ལ་འདི་སྐད་ཅེས་སྨྲས་སོ། །ལྷ་རྣམས་མ་འཇིགས་ཤིག །མ་འཇིགས་ཤིག །རྡོ་རྗེ་འབར་བ་ཞེས་བྱ་བ་
ཁྲོ་བོ་ཆེན་པོའི་རྒྱུད་དང་མཐུན་པ་འདི་ནི་ལྷ་རྣམས་བསྒྲུབ་པ་དང་། གཞེན་འདེབས་པ་དང་། གནོད་པ་བྱེད་པ་དང་། བསད་པ་དང་། སྐེམས་པ་དང་། དཔལ་བསྐྱེད་པ་དང་། ལས་ཉམས་པ་རྣམས་ཀྱི་ལས་སྒྲུབ་པ་དང་། རིག་སྔགས་ཉམས་པ་རྣམས་ཀྱི་རིག་སྔགས་བསྐྱོད་པ་
དང་། མི་ནད་ཀྱི་གནོད་པ་བྱུང་བ་ལ་མི་ནད་ཞི་བར་བྱེད་པ་ཡིན་ཏེ། ལྷ་རྣམས་ཀྱི་ཆོ་ག་རྒྱས་པ་འགྲུབ་པར་བྱེད་པ་འདི་ནི་རྣམ་པར་རྒྱལ་བའི་རྒྱུད་ཆེན་པོ་ལས་ཀྱང་ངས་བཤད་དོ། །ད་ལྟར་ཡང་ཁྱེད་རྣམས་འགྲུབ་