Kinh tạng Tây Tạng (Kangyur Đại Học) — 095_རྒྱུད་འབུམ།_ཛ

ཕོ་ཉ་མོ་རྣམས་ཀྱིས་ལས་ཐམས་ཅད་བྱས་ལ་མར་མེ་གཉིས་སྤར་ཏེ། སྟང་ཟིལ་བ་སོའི་གབ་ནང་དུ་བཅུག་ནས་མ་མོའི་གཙོ་མོའི་མདུན་དུ་པུས་མོ་གཉིས་བཙུགས་ཏེ་འདུག་ལ་ལག་པ་གཡོན་
པས་མནན་ཏེ། རིག་སྔགས་ཀྱི་རྒྱལ་པོ་ལན་བརྒྱ་སྟོང་བཟླས་བརྗོད་བྱས་ན་དེ་ནས་དངོས་གྲུབ་ཀྱི་མཚན་མ་འབྱུང་བར་འགྱུར་ཏེ། དྲོ་བ་དང་། དུད་པ་འཐུལ་བ་དང་། འབར་བར་འགྱུར་རོ། །དེ་ལ་འབར་བ་ནི་ནམ་མཁའ་ལ་འགྲོ་བར་འགྱུར་ཞིང་ཉི་མ་ཤར་བའི་ཁ་དོག་དང་
ལྡན་ཏེ་ལོ་བཅུ་དྲུག་ལོན་པའི་ཤ་ཚུགས་ཅན་དུ་འགྱུར་ལ་རིག་སྔགས་འཆང་ཐམས་ཅད་ཀྱིས་མི་སོད་པར་འགྱུར་རོ། །དུད་པ་འཐུལ་ན་ནི་ལུས་མི་སྣང་བར་འགྱུར་ཞིང་རིག་སྔགས་འཆང་གི་རིགས་མེ་ཏོག་ཅེས་བྱ་བ་དང་། རིགས་སྔགས་འཆང་གི་རིགས་དྲི་ཞེས་བྱ་བ་དང་།
རིག་སྔགས་འཆང་གི་རིགས་ཡི་དགས་ཞེས་བྱ་བའི་རིག་སྔགས་འཆང་གི་རིགས་ཐམས་ཅད་ཀྱང་ཤེས་པར་འགྱུར་རོ། །དེ་ལ་རིག་སྔགས་འཆང་གི་རིགས་མེ་ཏོག་ཅེས་བྱ་བ་དེ་དག་ནི་གནོད་སྦྱིན་མོ་རྣམས་དང་། ལྷན་ཅིག་ཏུ་རྩེ་ཞིང་དགའ་ལ་དགའ་མགུར་སྤྱོད་དེ་ཚེ་ལོ་
སྟོང་ཐུབ་ལ་རིག་སྔགས་འཆང་དྲི་ཞེས་བྱ་བ་རྣམས་ཀྱིས་མི་ཚུགས་ཤིང་དབང་ཡང་མི་བྱེད་དོ། །རིག་སྔགས་འཆང་གི་རིགས་དྲི་ཞེས་བྱ་བ་དེ་དག་ནི་རྒྱལ་པོའི་བཙུན་མོ་དག་དང་། དེད་དཔོན་ཆེན་པོའི་རིགས་རྣམས་དང་། ཁྱིམ་བདག་ཁྱིམ་ཆེན་པོའི་རིགས་རྣམས་ཀྱི་བུད་

མེད་གང་དག་ཡིན་པ་དེ་དག་དང་ལྷན་ཅིག་ཏུ་རྩེ་ཞིང་དགའ་ལ་དགའ་མགུར་སྤྱོད་དེ་ཚེ་ལོ་ལྔ་བརྒྱ་ཐུབ་བོ། །དེ་དག་ཀྱང་རིག་སྔགས་འཆང་མེ་ཏོག་ཅེས་བྱ་བ་རྣམས་ཀྱིས་མི་ཚུགས་སོ། །རིག་སྔགས་འཆང་གི་རིགས་ཡི་དགས་ཞེས་བྱ་བ་དེ་དག་ནི་མི་འདོད་དེ་དེ་དག་གི་ཡི་
དགས་རྫུ་འཕྲུལ་ཆེན་པོའི་བུ་མོ་འབྱུང་བར་འགྱུར་ཏེ། དེ་དག་དང་ལྷན་ཅིག་ཏུ་རྩེ་ཞིང་དགའ་ལ་དགའ་མགུར་སྤྱོད་དེ་ཚེ་ལོ་སུམ་བརྒྱ་ཐུབ་བོ། །དེ་ལ་མེ་ཏོག་གི་རིགས་རྣམས་ནི་མེ་ཏོག་གི་མིང་གིས་དགུག་པར་བྱའོ། །དྲིའི་རིགས་རྣམས་ནི་དྲིའི་མིང་རྣམས་ཀྱིས་དགུག་
པར་བྱའོ། །ཡི་དགས་ཀྱི་རིགས་རྣམས་ནི་ཡི་དགས་ཀྱི་མིང་གིས་དགུག་པར་བྱའོ། །དེ་བཀུག་ན་སྐྲག་སྟེ་དྲུང་དུ་འོང་བར་འགྱུར་རོ། །རིག་སྔགས་འཆང་ཐམས་ཅད་ཀྱི་མངའ་བདག་ཏུ་གྱུར་ཏེ་མིང་སྨོས་པ་ཙམ་གྱིས་ཀྱང་རིག་སྔགས་འཆང་རྣམས་སྐྲག་པར་
འགྱུར་རོ། །གང་ཞིག་རྒྱུད་ཕྱི་མ་མཐའ་དག་ཆུབ་པར་བྱེད་པ་ལ་ནི་རིག་སྔགས་ཀྱི་ལྷ་ཐམས་ཅད་དང་། རིག་སྔགས་ཀྱི་རྒྱལ་པོ་ཆེན་པོ་ལག་ན་རྡོ་རྗེ་ཡང་ཕྱི་བཞིན་འབྲང་བར་འགྱུར་ཏེ། ལྷ་ཐམས་ཅད་ཀྱང་སེམས་རངས་པར་འགྱུར་ལ་དངོས་གྲུབ་ཀྱང་བདེ་བླག་
ཏུ་འགྲུབ་པར་འགྱུར་རོ། །ཆོ་ག་རྒྱས་པ་རྒྱུད་ཕྱི་མ་དང་བཅས་པ་ལག་ན་རྡོ་རྗེ་དང་། ལྷ་ཆེན་པོས་གང་བཤད་པ་འདི་ནི་བཅོམ་ལྡན་འདས་ཀྱིས་བསྟོད་ཅིང་བསྔགས་ཏེ། དེ་ལ་ལྷ་ཐམས་ཅད་སེམས་དགའ་ནས་དངོས་གྲུབ་སྦྱིན་པར་བྱེད་དོ། །རིག་སྔགས་ཀྱི་
རྒྱལ་པོ་ཆེན་པོ་རིག་པ་མཆོག་གི་ཆོ་ག་རྒྱས་པའི་སྙིང་པོ་བརྒྱན་པ་བཅོམ་ལྡན་འདས་མ་མཆོག་ལ་དྲག་ཏུ་སྐུལ་བ་བྱེད་པ་གང་ཡིན་པ་དེའི་སྙིང་པོ་ཆེན་པོ་རིག་པ་མཆོག་གི་སྙིང་པོ་ལ་དྲག་ཏུ་སྐུལ་བར་བྱེད་པ་ཡང་ངས་བཤད་ཟིན་ཏོ། རིག་སྔགས་མཆོག་ལ་དྲག་ཤུལ་ཅན་
ཕ་རོལ་གནོན་པ་གང་ཡིན་པ་དེ་དག་ལ་དྲག་ཤུལ་སྐུལ་བར་བྱེད་པ་དེ་ཉིད་ཀྱི་སྙིང་པོ་ཡང་ངས་བཤད་ཟིན་ཏེ། འདི་ནི་དངོས་གྲུབ་གཉིས་ཀ་སྦྱིན་པར་བྱེད་པ་ཡིན་པས་ན་དེས་ནི་ལྷ་རྣམས་ཀྱང་དེ་བཞིན་དུ་ཡིད་སྐྱོད་པར་བྱེད་དོ། །ཉེ་བའི་སྙིང་པོ་བཤད་པ་ན་ལྷའི་ཚོགས་

འཁོད་པ་གང་ཡིན་པ་དེ་དག་སྐྲག་ཅིང་འཇིགས་པར་འགྱུར་ཏེ། དེ་དག་བཅོམ་ལྡན་འདས་ལག་ན་རྡོ་རྗེ་ལ་མགོ་བོས་ཕྱག་འཚལ་ནས་འཁོད་དོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་ལྷ་དག་ལ་བཀའ་སྩལ་པ། ལྷ་དག་རིག་སྔགས་བཤད་པར་
བྱས་ཏེ། རེ་ཞིག་ཁྱེད་ལ་སྙིང་པོ་མཆོག་གི་ལས་རྣམས་ཉོན་ཅིག །དེ་ནས་སྙིང་པོའི་ལས་རྣམས་འབྱུང་སྟེ། བསྲུང་བ་ནི་ལན་བདུན་བཟླས་བརྗོད་བྱས་པའི་ཐལ་བས་བྱའོ། །མཚམས་བཅད་པ་ནི་ལན་བདུན་བཟླས་བརྗོད་བྱས་པའི་ཕུར་བུས་བྱའོ། །བསྐྲད་པ་ནི་
སྐྲས་བྱའོ། །ཀུམྦྷི་ར་ཁ་བཅིང་བར་བྱ་ནི་ལན་བདུན་བཟླས་བརྗོད་བྱས་པའི་གསེག་མས་བྱའོ། །ལས་ཐམས་ཅད་དང་སྒྲུབ་པ་ཐམས་ཅད་ལ་ཡང་རིག་སྔགས་ཀྱི་རྒྱལ་པོའི་སྙིང་པོ་སྦྱར་བར་བྱའོ། །སྒྲུབ་པའི་ཚིག་བགེགས་བསལ་བ་ནི་མེ་སྦར་ལ་ཡུངས་ཀར་
བདག་གི་ཁྲག་གིས་བསྒོས་པས་ལན་བརྒྱད་བརྒྱ་སྦྱིན་སྲེག་བྱས་ན་བགེགས་ཐམས་ཅད་ཆོམས་པར་འགྱུར་རོ། །བགེགས་ཐམས་ཅད་རེངས་པར་བྱ་ན་ཙམ་པ་ཀའི་ས་བོན་ལ་ལན་ཉི་ཤུ་རྩ་གཅིག་བཟླས་བརྗོད་བྱས་པས་བྱའོ། །རོ་ལངས་རེངས་པར་བྱ་ན་ལན་གསུམ་
བཟླས་བརྗོད་བྱས་པའི་ཡུངས་ཀར་གྱིས་བྱའོ། །རོ་ལངས་སྒྲུབ་པ་ཐམས་ཅད་དང་། བགེགས་རེངས་པར་བྱ་བ་ཐམས་ཅད་ལ་ནི་སྙིང་པོས་བྱའོ། །བདག་དང་གྲོགས་རྣམས་བསྲུང་བ་ནི་བཅོམ་ལྡན་འདས་མས་བྱའོ། །མཚམས་བཅད་པ་ནི་རིག་སྔགས་ཀྱི་རྒྱལ་
པོས་བྱ་སྟེ། རྩ་བའི་ལས་རྣམས་ལ་ཡང་སྦྱར་རོ། །ཕྱི་མའི་ལས་རྣམས་ནི་བཅོམ་ལྡན་འདས་མ་ཡུམ་གྱིས་བྱའོ། །རིགས་ཀྱི་རྒྱལ་པོའི་སྙིང་པོའི་ལས་རྣམས་སྒྲུབ་པ་ནི་སྙིང་པོའི་ཕྱི་མའི་ལས་གཞན་རྣམས་རིག་སྔགས་ཀྱི་རྒྱལ་པོ་དང་། བཅོམ་ལྡན་འདས་མས་
བྱའོ། །རིག་སྔགས་ཀྱི་རྒྱལ་པོ་ལ་ནི་བཅོམ་ལྡན་འདས་མ་ཡུམ་གྱིས་བྱའོ། །ཉེ་བའི་སྙིང་པོ་ལ་ནི་སྙིང་པོའམ། ཡུམ་མམ། རིག་སྔགས་ཀྱི་རྒྱལ་པོས་བྱའོ། །ཕོ་ཉའི་གསང་སྔགས་རྒྱུད་ཕྱི་མ་དང་བཅས་པ་ཐམས་ཅད་ནི་བཅོམ་ལྡན་འདས་མས་སྦྱར་བར་བྱའོ། །

ནོར་འདོད་ན་མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ཏེ། ལག་ན་རྡོ་རྗེའི་མདུན་དུ་མཆོད་པ་རྒྱས་པར་བྱས་ལ་སྤྲ་བའི་ཤིང་གིས་མེ་སྦར་ནས་འབྲས་དམར་པོ་ལ་རྡོ་རྗེ་བྱས་ཏེ། མར་གྱི་ནང་དུ་སྨྱུགས་པ་སྟོང་རྩ་བརྒྱད་སྦྱིན་སྲེག་བྱས་ན་དངོས་གྲུབ་ཀྱི་མཚན་མར་མེ་ཏོག་
ཕྲེང་བ་འགུལ་བར་འགྱུར་རོ། །གྲུབ་ནས་ཀྱང་ཏི་ན་ར་ལྔ་བརྒྱའམ་ཡང་ན་ཡུལ་སྦྱིན་པར་བྱེད་དོ། །སྐྱེས་པ་དབང་དུ་བྱ་ན་མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ཏེ། ལྷ་ཆེན་པོའི་གནས་སུ་སོང་སྟེ། གཟུགས་ཀྱི་གཡས་ལོགས་སུ་ཨརྐའི་ཤིང་གིས་མེ་སྦར་ནས་
ཞག་གསུམ་གྱི་བར་དུ་སེང་ལྡེང་གི་ཡམ་སྲེག་ཤིང་སྐུད་པས་དཀྲིས་པ་སྟོང་རྩ་བརྒྱད་རྩ་བརྒྱད་སྦྱིན་སྲེག་བྱས་ན་སྐྱེས་པ་དབང་དུ་འགྱུར་རོ། །མིའི་གཙོ་བོ་དབང་དུ་བྱ་བར་འདོད་ན་ཡར་གྱི་ངོ་ཚེས་བརྒྱད་ལ་ཞག་གཅིག་སྨྱུང་བ་བྱས་ཏེ། གྲོག་མཁར་གྱི་ཕུང་པོ་གཅིག་འདུག་
པར་སོང་ནས་དེའི་སྟེང་དུ་མེ་ཏོག་དང་། དྲི་དང་བདུག་པ་ཕུལ་ལ་དེའི་འོག་ཏུ་ཨ་ཤྭཏྠའི་ཤིང་གིས་མེ་སྦར་ཏེ་ཡུངས་ཀར་གྱི་སྦྱིན་སྲེག་ལན་སྟོང་སྦྱིན་སྲེག་བྱས་ན་མིའི་གཙོ་བོ་དབང་དུ་འགྱུར་རོ། །བུད་མེད་དབང་དུ་བྱ་བར་འདོད་ན་ཞག་གསུམ་གྱི་བར་དུ་དུད་པ་མེད་པའི་མདག་མ་
ལ་འབྲས་དང་ཕུབ་མ་བསྲེས་པས་སྦྱིན་སྲེག་ལན་བརྒྱ་རྩ་བརྒྱད་བྱས་ན་དབང་དུ་འགྱུར་རོ། །ཡུགས་ས་མོ་དབང་དུ་བྱ་ན་ལག་ན་རྡོ་རྗེའི་མདུན་དུ་ཡར་གྱི་ངོ་ཚེས་བརྒྱད་ལ་ཞག་གཅིག་སྨྱུང་བ་བྱས་ཏེ། པ་ལ་ཤའི་ཤིང་གིས་མེ་སྦར་ནས་སྐེ་ཚེ་དང་། ལན་ཚྭ་ལན་བརྒྱ་སྟོང་
སྦྱིན་སྲེག་བྱས་ན་ཡུགས་ས་མོ་དབང་དུ་འགྱུར་རོ། །སྤྱན་མ་མ་གཏོགས་པར་གང་གསང་སྔགས་ཐམས་ཅད་ལ་སྙིང་གཟིར་བར་བྱེད་པ་དང་། གདུང་བར་བྱེད་པ་དང་། རིག་སྔགས་ཀྱི་རྒྱལ་པོ་གདུང་བར་བྱེད་པའི་སྙིང་པོ་དང་བཅས་པར་སྦྱར་བར་བྱའོ། །དེ་ལྟར་སྦྱར་ན་བདེ་བླག་
ཏུ་འགྲུབ་པར་འགྱུར་རོ། །ཟླ་བ་གཅིག་གི་བར་དུ་སློང་མོའི་ཟས་བཟའ་ཞིང་སྙིང་པོ་བཟླས་བརྗོད་བྱས་པ་ལ་དེའི་འོག་ཏུ་མར་གྱི་ངོ་ཞག་བརྒྱད་ལ་སྐྱེས་པའི་རོ་མ་ཉམས་པ་བླངས་ཏེ་སྙིང་པོས་གཏོར་མ་སྦྱིན་ཞིང་དེའི་ལག་ཏུ་ལིག་བུ་མིག་བཞག་ལ་དེ་ནས་རིག་སྔགས་ཀྱི་རྒྱལ་

པོ་བཟླས་བརྗོད་བྱ་སྟེ་ཡི་དགས་ཀྱི་རིག་སྔགས་འཆང་གིས་ལག་ཏུ་ལིག་ཁུ་མིག་འབུལ་བར་འགྱུར་གྱི་བར་དུ་བཟླས་བརྗོད་བྱའོ། །དེ་ནས་འགྲུབ་པར་འགྱུར་ཏེ། དེ་ནས་མིག་གཉིས་བསྐུས་ན་གང་ལ་རེག་པ་དེ་གསེར་དུ་འགྱུར་རོ། །ཉེ་བའི་སྙིང་པོ་ཐོགས་པ་མེད་ཅིང་
སྟོབས་ཀྱིས་ཕ་རོལ་གནོན་པའི་ཕྱི་མའི་ལས་རྣམས་འབྱུང་སྟེ། བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཀྱི་རིག་སྔགས་ཐམས་ཅད་ཀྱི་ཡུམ་གསུངས་པ་གང་དྲན་པར་བྱས་ན་རིག་སྔགས་ཐམས་ཅད་འགྲུབ་པར་འགྱུར་བ་ཡིན་པ་དང་། རིག་སྔགས་
ཐམས་ཅད་ཀྱི་ཉེ་བའི་སྙིང་པོ་དམ་པ་འཇུག་པར་བྱེད་པ་ངས་བཤད་པ་གང་ཡིན་པའི་སྤྱན་དང་། ཉེ་བའི་སྙིང་པོ་དྲན་པར་བྱས་ན་རིག་སྔགས་བསྒྲུབ་པར་དཀའ་བ་ཐམས་ཅད་ཀྱང་འགྲུབ་པར་བྱེད་ཅིང་རིག་སྔགས་རྣམས་ལས་གང་དང་གང་ལ་སྦྱར་བ་དེ་ཡང་མྱུར་དུ་བྱེད་པར་འགྱུར་
རོ། །རིག་སྔགས་གང་ལས་ཐམས་ཅད་ལ་ལས་མི་བྱེད་པ་དེ་ལ་རིག་སྔགས་འཆང་གི་ཡུམ་དང་ཉེ་བའི་སྙིང་པོ་ལྡན་པས་ལག་ན་རྡོ་རྗེའམ་ལྷ་ཆེན་པོའི་མདུན་དུ་སྣ་མའི་མེ་ཏོག་མར་གྱི་ནང་དུ་སྨྱུགས་པ་བརྒྱ་སྟོང་གིས་ལས་ཐམས་ཅད་བདེ་བླག་ཏུ་དངོས་གྲུབ་སྦྱིན་པར་བྱེད་
དོ། །རིག་སྔགས་ཡིད་ལ་བསམས་ཏེ་གྲོག་མཁར་གྱི་ས་ལས་གཟུགས་བྱས་ལ། དྲི་དང་། མེ་ཏོག་དང་། བདུག་པས་བརྒྱན་ནས་ལག་ན་རྡོ་རྗེའི་མདུན་དུ་བཞག་སྟེ་ཡུམ་དང་ཉེ་བའི་སྙིང་པོར་ལྡན་པས་སྣ་མའི་མེ་ཏོག་བརྒྱད་བརྒྱས་བསྣུན་ན་རྨི་ལམ་དུ་སྟོན་དེ་དེ་བཞིན་དུ་
འགྲུབ་པར་འགྱུར་རོ། །རྨི་ལམ་ཉིད་དུ་རིག་སྔགས་འགྲུབ་པའམ། ཡང་ན་མི་འགྲུབ་པ་ཡིན་པའི་རིག་སྔགས་ཐམས་ཅད་སྟོན་པར་བྱེད་དེ། དེ་ལྟར་རྟོགས་ནས་རིག་སྔགས་བདེ་བླག་ཏུ་བསྒྲུབ་པར་བྱའི་གཞན་དུ་ནི་མ་ཡིན་ནོ། །ཡར་གྱི་ངོ་ཚེས་བརྒྱད་ནས་བརྩམས་ཏེ་རྒྱ་
མཚོར་འབབ་པའི་ཆུ་ཀླུང་གི་ནང་དུ་ཞུགས་ལ་སློང་མོའི་ཟས་ཟ་ཞིང་ལན་འབུམ་བཟླས་བརྗོད་བྱས་ན་ཡུལ་སྦྱིན་པར་འགྱུར་རོ། །ཡར་གྱི་ངོ་ཚེས་བརྒྱད་ནས་ཉའི་བར་དུ་ཟས་འོ་མ་དང་ཕྱེ་མའི་འདག་གུ་ཟ་ཞིང་རིག་སྔགས་བཟླས་བརྗོད་བྱས་ན་གཞན་གྱི་ཡུལ་འཁོར་ལ་གནོད་

པ་བྱེད་པར་འགྱུར་རོ། །དེ་ནས་ཟས་སུ་ཆུ་དང་ཕྱེའི་འདག་གུ་ཟ་ཞིང་བཟླས་བརྗོད་བྱས་ན་དམག་གི་དཔུང་འཇོམས་པར་བྱེད་དོ། །མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ཏེ་འཕགས་པ་ལག་ན་རྡོ་རྗེའི་རྐང་པ་གཡས་པའི་མཐེ་བོང་བཟུང་ནས་ཉེ་བའི་སྙིང་པོ་བཟླས་
བརྗོད་བྱས་ན་ཇི་ཙམ་ན་ལག་ན་རྡོ་རྗེའི་རྐང་པ་གཡས་པའི་མཐེ་བོང་ལས་འོད་ཟེར་འབྱུང་བར་འགྱུར་ཏེ། འོད་ཟེར་དེས་ཀྱང་རིག་སྔགས་འཆང་གཡས་ཕྱོགས་སུ་བསྐོར་ནས་ལག་ན་རྡོ་རྗེའི་སྤྱི་བོར་མི་སྣང་བར་འགྱུར་རོ། །དེ་ནས་འགྲུབ་པར་འགྱུར་ཏེ། རྒྱལ་པོ་སྦྱིན་པར་བྱེད་
ཅིང་ཚེ་ལོ་བརྒྱ་ཐུབ་པར་འགྱུར་རོ། །སློང་མོའི་ཟས་ཟ་ཞིང་རྒྱ་མཚོར་འབབ་པའི་ཆུ་ཀླུང་གི་ནང་དུ་ཞུགས་ཏེ་ཉེ་བའི་སྙིང་པོ་སྤྱན་དང་བཅས་པར་ལན་འབུམ་བཟླས་བརྗོད་བྱས་ལ་དེ་ནས་རིག་སྔགས་འཆང་གིས་ཆུའི་ནང་དུ་ཡུངས་ཀར་གྱི་སྲེག་བླུགས་ལན་བརྒྱ་སྟོང་བྱས་ན་བར་
སྣང་ལ་རལ་གྲི་མཐོང་བར་འགྱུར་ཏེ་དེ་བླང་བར་བྱའོ། །ཅི་སྟེ་སྣང་བར་མི་བྱད་ན་ནི་རིག་སྔགས་འཆང་གིས་རིག་པ་མཆོག་བཟླས་བརྗོད་བྱས་ན་སྣང་བར་འགྱུར་རོ། །འོག་པག་ཅན་གྱི་རིག་སྔགས་བཟླས་བརྗོད་བྱེད་བཞིན་དུ་བླང་བར་བྱའོ། །དེ་བླངས་པས་སྐྲ་ལྕང་ལོར་
འཁྱིལ་ཞིང་ལོ་བཅུ་དྲུག་ལོན་པའི་ཤ་ཚུགས་ཅན་དུ་འགྱུར་ཏེ། དཔག་ཚད་ཉིས་སྟོང་གྱེན་དུ་འཕག་པ་དང་། རིག་སྔགས་འཆང་ཐམས་ཅད་ཀྱིས་མི་སོང་པ་དང་། ཚེ་ལོ་ཉིས་སྟོང་ཐུབ་པར་འགྱུར་རོ། །གཏེར་འབྱུང་བར་འདོད་ན་རིག་སྔགས་འཆང་གནས་གང་ན་
གཏེར་ཡོད་པར་སོང་ལ་ཚེས་གྲངས་དང་རྒྱུ་སྐར་ཡང་འདམ་མི་དགོས། །སྨྱུང་བ་ཡང་བྱ་མི་དགོས་པར་བིལ་བའི་མེའི་ནང་དུ་ཡུངས་ཀར་དང་། པདྨའི་ལོ་མ་བསྲེགས་པ་ལ་ཉེ་བའི་སྙིང་པོ་ལན་བརྒྱ་སྟོང་སྦྱིན་སྲེག་བྱས་ན་གཏེར་གྱི་ལྷ་དེས་རྨི་ལམ་དུ་སྟོན་པར་བྱེད་དོ། །དེ་ནས་
རིག་པ་མཆོག་གིས་བགེགས་རྣམས་ཀྱི་སྦྱིན་སྲེག་བྱས་ནས་བླང་བར་བྱའོ། །དགའ་བྱེད་གདོང་གིས་གནས་བསྲུང་བར་བྱའོ། །ཉེ་བའི་སྙིང་པོས་ནི་མར་མེ་སྦར་བར་བྱ་སྟེ། བ་ལང་གི་རྭ་ཨརྐའི་ཤིང་བལ་གྱིས་དཀྲིས་ལ། བ་སེར་མོའི་མར་གྱིས་མར་མེ་སྦར་བས་

གཏེར་གང་ན་ཡོད་པ་དེ་བརྟོལ་ཏེ། སྒྲ་ཚིག་ཚིག་པོར་འབྱུང་བར་འགྱུར་རོ། །ཡང་ན་སྲིན་ཕྱེས་ཨརྐའི་ཤིང་བལ་གྱི་དཀྲིས་ལ་རྡོ་རྗེ་ཁྲོ་བོའི་སྔགས་དང་ལྡན་པས་སྲོག་ཆགས་གོ་ཏའི་ཚིལ་གྱིས་མར་མེ་སྦར་རོ། །མཚན་མ་ནི་དེ་ཉིད་དང་འདྲའོ། །ནཱ་ག་
པ་ལའི་ཨརྐའི་ཤིང་བལ་གྱིས་གཡོགས་ཏེ་པདྨའི་རྒྱུས་པས་དཀྲིས་ལ་མིའི་ཚིལ་གྱིས་མེ་སྦར་ཏེ་བཟུང་ངོ་། །མཚན་མ་ནི་དེ་ཉིད་དང་འདྲ་སྟེ་སྙིང་པོ་ཆེན་པོ་ཞེས་བྱའོ། །ལྷ་རྣམས་ངས་རྣམ་པ་སྣ་ཚོགས་མཐོང་ནས་ཉེ་བའི་སྙིང་པོའི་ལས་རྣམས་བཤད་པ་ཡིན་ནོ། །
སྒྲུབ་པའི་སྙིང་པོ་སྟོབས་ལྡན་པ། །གང་དག་སྙིང་སྟོབས་མེད་པ་དང་། །བསོད་ནམས་ཆུང་ངུ་དེ་དག་གི། །ཕ་རོལ་ཕྱིན་པ་རྫོགས་བྱའི་ཕྱིར། །གཏེར་གྱི་སྒོ་ཡི་ཁྱད་པར་དག །བདག་གིས་སུ་ནི་བཤད་པར་བྱ། །བཅོམ་ལྡན་ལག་ན་རྡོ་རྗེ་ཡིས། །དེ་ནས་ཚིག་ནི་
འདི་སྐད་སྨྲས། །གཏེར་སྒོ་གང་དག་ཚངས་པ་ཡིས། །གསང་སྔགས་ཀྱིས་ནི་སྦྱོར་བ་དང་། །ཆོ་ག་ས་ནི་ངེས་བཞག་པ། །མི་རྣམས་ཆོ་ག་མེད་པ་དང་། །སྟོབས་དང་མཐུ་ནི་མེད་པ་ཡི། །རྟག་ཏུ་ཆོམས་པར་མི་འགྱུར་ཏེ། །གང་གིས་མི་རྣམས་བདེ་བླག་ཏུ། །
ལོངས་པར་སྤྱད་པར་འགྱུར་བ་དང་། །ཕ་རོལ་ཕྱིན་པའང་རྫོགས་བྱེད་དང་། །ཇི་ལྟར་ནོར་རྣམས་རབ་བཞག་པ། །དེ་དག་བདག་གིས་བཤད་པར་བྱ། །བཅོམ་ལྡན་ལག་ན་རྡོ་རྗེ་ཡིས། །དེ་སྐད་དུ་ནི་ཚིག་ཀྱང་སྨྲས། །གཏེར་གྱི་སྒོ་ནི་རབ་བཤད་པ། །ས་མཐར་རྒྱ་མཚོར་
ཐུག་པ་ཡི། །ས་ཡི་འོག་གནས་གང་ཡིན་པ། །བདག་གིས་སུ་ནི་རབ་བཤད་ཀྱིས། །ལྷ་རྣམས་ཀྱིས་ནི་མཉན་པར་གྱིས། །དེ་དག་གི་ནི་ཁ་དོག་མཚན། །གསང་སྔགས་གང་གིས་གཞོམ་པ་དང་། །ཆོ་ག་ཇི་བཞིན་ལས་རྣམས་དང་། །བདེ་བླག་ཏུ་ནི་ཐོབ་པ་ཡི། །སྦྱར་སྨན་
བདག་གིས་བཤད་པར་བྱ། །དེ་དག་གི་ནི་མཚན་མ་ཡང་། །སོ་སོ་རུ་ནི་བཤད་པར་བྱ། །གྲུ་གསུམ་དང་ནི་ཟླ་གམ་དང་། །ཟླུམ་པོ་དང་ནི་ཟུར་བཞི་དང་། །པདྨ་ཆུ་ཤིང་ལོ་མ་དང་། །དེ་བཞིན་གཞན་མ་བསིལ་ཡབ་འདྲ། །གཏེར་གྱི་སྒོ་ནི་བརྒྱད་བཤད་པ། །དེ་དག་ཁ་དོག་ལེགས་

པར་ཉོན། །ངང་པའི་མདོག་འདྲ་གཏེར་སྒོ་ཡོད། །ཀ་ར་བཱི་རའི་མདོག་འདྲ་དང་། །འདམ་བུ་ཆུ་གཤེར་འདྲ་བ་དང་། །རྒྱ་སྐྱེགས་ཁུ་བའི་ཁ་དོག་འདྲ། །ལྗང་གུའི་མདོག་ཅན་གཏེར་སྒོ་ཡོད། །བ་བླའི་མདོག་དང་འདྲ་བ་དང་། །གི་ཝང་གི་ནི་ཁ་དོག་འདྲ། །དེ་
བཞིན་འབྲིང་ག་ར་དང་མཚུངས། །ཁ་དོག་བཤད་པ་འདི་དག་གི། །གཏེར་སྒོ་རྣམས་ཀྱི་བགེགས་བསལ་བཞིན། །སྟེང་དང་ས་འོག་གནས་པ་ཡི། །བགེགས་རྣམས་གང་གིས་བརླག་འགྱུར་བའི། །སྦྱིན་སྲེག་ལས་ནི་ཆོ་ག་རྣམས། །རབ་ཏུ་བཤད་ཀྱི་
མཉན་པར་གྱིས། །གཏེར་སྒོ་གསང་སྔགས་གང་གིས་དགོད། །དེ་དག་རིམ་བཞིན་བཤད་པར་བྱ། །ན་མོ་བཛྲ་པཱ་ཎ་ཡེ། ན་མོ་རུ་ཏྲཱ་ཡེ། ན་མོ་མ་ཧཱ་བིདྱ་རཱ་ཛཱ་ཡ། བི་རུ་དྲི་ནེ་སྭཱ་ཧཱ། ར་ར་ནཱ་ར་སྭཱ་ཧཱ། ཨངྒ་ནཱ་ཡ་སྭཱ་ཧཱ། བི་རཱུ་པི་ནི་སྭཱ་ཧཱ། ཏི་བྷ་རི་སྭཱ་ཧཱ། མུཀྟི་ནི་སྭཱ་ཧཱ།
བི་མུཀྟི་ནི་སྭཱ་ཧཱ། པྲེ་ཏ་ཧེ་སྭཱ་ཧཱ། བི་ད་རི་ཎི་སྭཱ་ཧཱ། ཧཽརྒྒ་ཁོ་སྭཱ་ཧཱ། ག་ག་ནེ་སྭཱ་ཧཱ། བི་རི་ཎི་སྭཱ་ཧཱ། ཨངྒ་རི་ཎི་སྭཱ་ཧཱ། བིར་ག་ཎི་སྭཱ་ཧཱ། མ་ཧཱ་བ་ར་ཏེ་སྭཱ་ཧཱ། རུ་ཎི་བ་ནི་སྭཱ་ཧཱ། ཀ་ར་པ་ར་བི་ཀ་ར་སྭཱ་ཧཱ། བི་རཱུ་པི་སྭཱ་ཧཱ། མ་རི་པ་སྭཱ་ཧཱ། བརྫྫ་ནི་སྭཱ་ཧཱ། གརྫྫ་ནི་སྭཱ་ཧཱ། མཱརྨ་ཎི་སྭཱ་ཧཱ། ཀུ་
ནི་པ་ཏི་ན་སྭཱ་ཧཱ། ས་ལ་དཀྱིལ་འཁོར་གྲུ་བཞིར་སྐྱོང་ནུལ་དུ་བྱུགས་ལ་ཀུ་ཤའི་སྟན་བཏིང་ལ་ཤར་ཕྱོགས་སུ་ཁ་བལྟས་ཏེ་འདུག་ནས་གཙང་སྦྲ་དང་། ཚངས་པར་སྤྱད་པ་དང་། དབང་པོ་དུལ་བར་བྱ་སྟེ། ཟས་སུ་ཆུ་གྲོག་འཐུང་ཞིང་ལས་བརྩམས་ལ་ཆོ་ག་འདིས་ལྷ་ཐམས་
ཅད་བཀོད་ནས་འཁུར་བ་བཀྲ་ཤིས་ལྡན་དང་། པེན་ཙེ་དང་། ཙནྡན་དྲི་ཞིམ་པོ་དག་ཕྱོགས་དང་མཚམས་ཀྱི་ལྷ་རྣམས་ལ་དབུལ་ཞིང་ཞོ་དང་དམར་བག་སྦངས་ཏེ། སྔགས་སྔ་མས་ཤ་མྱའི་ཡམ་སྲེག་ཤིང་མར་གྱི་ནང་དུ་སྨྱུགས་པ་བརྒྱ་སྟོང་སྦྱིན་སྲེག་བྱའོ། །བགེགས་
ཐམས་ཅད་ཕུང་བར་བྱེད་པའི་གཅོད་བྱེད་ཅེས་བྱ་བའི་རིག་སྔགས་བསྟན་པར་བྱ་སྟེ། །ན་མོ་བཛྲ་པཱ་ཎི་སྱ། ཀུ་ཏི་ཀུ་ཏི། ཙི་ཏི་ཙི་ཏི། མི་ཏི་མི་ཏི། རི་ཎི་རི་ཎི། མོ་ཏི་ནི་པྲ་མོ་ཏི་ནི་སྭཱ་ཧཱ། རིག་སྔགས་འདིས་ཡུངས་ཀར་ལ་ལན་བདུན་བཟླས་བརྗོད་བྱས་ཏེ། ཕྱོགས་

བཞིར་གཏོར་ན་བསྲུང་བར་བྱས་པར་འགྱུར་རོ། །ན་མོ་བཛྲ་པཱ་ཎི་སྱ། ཨ་མ་ར་ཨ་མ་ར། མ་རི་ཀ་ཏི་ནི་ཏ་ལ་ཏི་སྭཱ་ཧཱ། རིག་སྔགས་འདིས་ཡུངས་ཀར་ལ་བཟླས་བརྗོད་བྱས་ཏེ། མགོ་བོར་གཏོར་ན་བགེགས་རྣམས་འཚེ་བར་མི་བྱེད་དོ། །ན་མོ་
བཛྲ་པཱ་ཎི་སྱ། ཀུ་ཏི་ཀུ་ཏི། ཏུ་ཏི་ཏུ་ཏི། ཧ་ར་ཧ་ར་སྭཱ་ཧཱ། རིག་སྔགས་འདིས་ཆུ་ལ་བཟླས་བརྗོད་བྱས་པའི་སར་བཞག་ན་མེའི་འཇིགས་པ་མི་འབྱུང་ངོ་། །གཏེར་སྒོ་ཀུན་གྱི་བགེགས་རྣམས་ནི། །རྣམ་པ་བརྒྱད་དུ་རབ་བཤད་དོ། །མི་ར་དག་ནི་མིའུ་ཐུང་དང་། །
འཇིགས་པར་བྱེད་པ་སྐད་ཅིག་པ། །གླང་པོ་ཆེ་དང་མ་ཧེ་དང་། །རབ་ཏུ་འཇིགས་པའི་སྲིན་པོ་དང་། །སྟག་དང་བྱ་དང་སྤྱིལ་པོ་ཙམ། །བགེགས་རྣམས་བརྒྱད་པོ་རབ་བཤད་དེ། །དེ་དག་ཕུང་བར་བྱ་བའི་ཕྱིར། །རིག་སྔགས་འདི་ནི་སྦྱར་བར་བྱ། །ན་མོ་བཛྲ་
པཱ་ཎི་སྱ། ཨ་རི་བ་རི། ཏི་རི་མི་རི། ཙི་རི་མི་རི། པ་ར་པ་ན་ར་ཏི། ཀི་རི་ཀི་རི། ཀ་ལི་ཀ་ལི། མི་རི་མི་རི། ཤི་རི་ཤི་རི། ནཱ་ཤ་ནི་ནཱ་ཤ་ནི། སྟམྦྷ་ནི་སྟམྦྷ་ནི། མོ་ཧ་ནི་སྭཱ་ཧཱ། རིག་སྔགས་འདི་དང་། རིག་སྔགས་ཀྱི་རྒྱལ་པོས་ཡུངས་ཀར་ལ་བཟླས་བརྗོད་བྱས་
ཏེ་ཕྱོགས་བཞིར་གཏོར་ན་བགེགས་ཐམས་ཅད་མི་སྣང་བར་འགྱུར་རོ། །ན་མོ་རཏྣ་ཏྲ་ཡཱ་ཡ། ན་མོ་བྷ་ག་བ་ཏེ། །པྲ་ཧཱ་ཡ། ཁ་རི་བི་བི་ཀི་རི། ནཱ་རི་བ་ན་རི། མོ་ཧ་ན་ནི་ཧ་རི་ཧ་རི་ཕོ་ཥཱ་ཎི་སྭཱ་ཧཱ། རིག་སྔགས་འདི་ཆུ་ལ་བཟླས་བརྗོད་བྱས་ཏེ། ཕྱོགས་བཞིར་གཏོར་
ན་བགེགས་ཐམས་ཅད་བཅོམ་ཞིང་མི་སྣང་བར་འགྱུར་རོ། །ན་མོ་བཛྲ་པཱ་ཎི་སྱ། ན་མོ་མི་རི་མི་རི། ཙནྡྲཱི་ཙནྡྲཱི། མནྟི་སྭཱ་ཧཱ། གསང་སྔགས་འདིས་ཆུ་ལ་བཟླས་བརྗོད་བྱས་ཏེ། ཕྱོགས་དང་ཕྱོགས་མཚམས་རྣམས་སུ་གཏོར་ན་ཕྱོགས་བཅིང་བར་བྱས་པར་འགྱུར་
ཏེ། ཁྭ་ཡི་གཟུགས་ནི་མི་སྣང་འགྱུར། །འཕུར་ཞིང་ཆེ་ལ་གསུམ་དུ་སྣང་། །སྤྱིལ་བོ་ཙམ་ཞེས་བྱ་བ་ནི། །ཕྱོགས་རྣམས་ཀུན་ཏུ་ཞི་བར་འགྱུར། །གཏེར་གྱི་སྒོ་ཡི་རི་མོ་ནི། །ཐོད་པ་རབ་འདྲ་རྟོགས་པར་བྱ། །དེ་ན་ཕུར་བུ་ཟེར་སྣང་བ། །འཇའ་ཁུགས་འདྲ་

བའི་འོད་དང་བཅས། །ཕུར་བུ་དེ་ནི་དཔལ་གཟུགས་ལྡན། །དེ་ལ་ལག་པས་རེག་མི་བྱ། །ལུས་ནི་སྦྱར་སྨན་བསྐུས་ནས་ཀྱང་། །དེ་ནས་ཕུར་བུ་དབྱུང་བར་བྱ། །གང་གིས་ས་ལ་དེ་ལྷུང་བའི། །ནམ་མཁའི་ཕུབ་མ་ཤུ་དག་ཡུང་། །ནིམ་པའི་ལོ་མ་ལྡོང་
རོས་དང་། །སྒོག་སྐྱ་ནས་དང་ཤིང་ཀུན་རྣམས། །མི་ཁྲག་གིས་ནི་སྦྱར་བ་ཡི། །བྱུགས་པས་དེ་ལ་བསྐུ་བར་བྱ། །དེ་ནས་ས་ལ་ལྷུང་བར་འགྱུར། །དེ་ལྟར་མ་བྱས་ནུས་མི་འགྱུར། །ཤྲི་རི་ཤ་ཡི་མེ་ཏོག་དང་། །དེ་ཡི་རྩ་བ་ཤུན་ལྤགས་དང་། །རུ་རྟ་རྒྱ་
སྤོས་འབྲི་ཧ་ཏི། །ཡུངས་ཀར་འདི་རྣམས་ཆ་མཉམ་པ། །ར་གཅིན་དག་དང་བཏག་པར་བྱ། །ལུས་ལ་བསྐུས་པའི་སྦྱར་སྨན་འདི། །ཁྲག་འཇོམས་པ་ཡི་མཆོག་ཡིན་ནོ། །རུ་རྟ་དང་ནི་རྒྱ་སྤོས་དང་། །ལིག་བུ་མིག་དང་ལྡོང་རོས་བཅས། །སྦལ་པའི་
ཚིལ་དང་ལྡན་བྱས་ཏེ། །དུད་པའི་མིག་རྩི་རབ་སྦྱར་བ། །འདི་ནི་མིག་རྩིའི་རྒྱལ་པོ་སྟེ། །གཏེར་གྱི་སྒོ་རྣམས་གཅོད་པ་ཡིན། །ཉ་རི་ཀུན་དའི་ཤུན་ལྤགས་བླངས། །སིནྡུ་བ་རའི་གི་ཝང་བཅས། །བྲིང་གའི་དུད་པས་རབ་བདུགས་པ། །འདི་ནི་སྦྱར་སྨན་མཆོག་
ཡིན་ཏེ། །སྦྱར་སྨན་གྱིས་ནི་ལུས་བསྐུས་ནས། །དེ་ནས་ཕུར་བུ་དབྱུང་བར་བྱ། །ཅི་སྟེ་སྣང་བར་མི་བྱེད་ན། །ཁྲ་ཡི་འཁྲུལ་འཁོར་རེངས་བྱེད་ཅིང་། །བགེགས་ཀུན་ཕུང་བར་བྱེད་པ་ཡི། །རིག་སྔགས་འདི་ནི་དེ་ཡིས་སྦྱར། །ཀ་རུངྒཱ་ཀ་རུང་གི་དཱི་བྱ། རཱུ་
པི་ན། ཀནྣེ་ཏུམྤ་ཀ་གཱ་ཏྲ། སམྦྷ་བེ་བི་དུ་ལུ་ནི། ཀུ་མི་ནི། ཧཱི་ཧཱི་ནི། ཧཱུ་ཧཱུ་ཧཱུ་ནི། ཀི་རི་ཀི་རི། ཀཱ་ལ་ཀ་ར་ཎི། མ་ཧཱ་བིདྱཱ་དེ། ཧ་ར་ཧ་ར་ཧ་ར། ཙ་ལ་ཙ་ལ་ཙ་ལ། ར་ར་ར། ཐ་ཐ་ཐ། ཤ་ཤ་ཤ། སྟམྦྷ་ཡ། ནཱ་ཤ་ཡ་ནཱ་ཤ་ཡ། ཧི་རི་ཧི་རི། གི་ནི་གི་ནི། ཧུ་ན་ད་
ཧུ་ན་ད། གྲྀཧྞ་མུ་ཡ། ཧ་ན་བྲཧྨ་ཎི། པ་ཏ་ནི། མོ་ཧ་ནི། བི་ཙི་རི། མ་བ་ན། ཐ་ར་ཐ་ར། མི་ཏི་མི་ཏི། སི་ཏི་སི་ཏི། མི་རི་མི་རི། བི་རི་བི་རི། ཧི་རི་ཧི་རི། དེ་མྱ་ནི་དེ་མྱ་ནི། བིཏྟི་བ་ཏི། པ་ཏ་ནི་པ་ཏ་ནི། ཧ་ཧ་ཧ་ནི་སྭཱ་ཧཱ། ཕུར་བུ་འབྱིན་པ་ན་འདོམ་གསུམ་དུ་བཅལ་ཏེ་ཆུ་

དང་ཡུངས་ཀར་གྱིས་བསྣུན་ན་ཁྲ་དེ་རེངས་པར་འགྱུར་རོ། །ཡང་ན་རྒྱང་རིང་པོར་ལྷུང་བར་འགྱུར་ཏེ་རིག་སྔགས་འདིས་ནི་བགེགས་ཐམས་ཅད་བཅོམ་པར་འགྱུར་རོ། །ན་མོ་བཛྲ་པཱ་ཎ་ཡེ། ན་མོ་རུ་དྲྭ་ཡ། ན་མོ་བྲཧྨཱ་ཡ། གརྴ་རི་ཤི་རི་རི། སི་སི་རི་རི།
མི་རི། བ་བ་པ་སྭཱ་ཧཱ། རིག་སྔགས་འདིའམ་ཡང་ན་གོས་དཀར་ཅན་གྱིས་གཙུག་ཕུད་བཅིང་བར་བྱའོ། །གང་གིས་ནོར་རྣམས་བླང་བྱ་བའི། །གྲུ་གསུམ་འཇོམས་པ་འདི་ཡིན་ཏེ། །ཁོ་ར་ཁོར་ཡུག་སྦྱང་བྱས་ལ། །རབ་ཏུ་བསྒྲིམས་ཏེ་བརྟག་པར་བྱ། །དེ་ཡི་
མཚམས་ཀྱི་དབུས་དག་ཏུ། །རི་མོ་གྲུ་གསུམ་གནག་པ་ཡོད། །ཅི་སྟེ་དེ་ལྟར་མི་སྣང་ན། །དེ་ནས་འོ་མས་གཏོར་བར་བྱ། །ཨ་པ་མརྒའི་ཐལ་སྨན་གྱིས། །མཁས་པ་དག་གིས་རབ་གཏོར་ཞིང་། །དུང་གི་ཕྱེ་མས་ཕྱི་བར་བྱ། །ཁོ་ར་ཁོར་ཡུག་གཏོར་བྱ་
ཞིང་། །གཏོར་དང་བྱི་དོར་བྱས་ནས་ཀྱང་། །ཅི་སྟེ་མཚན་མ་མཐོང་འགྱུར་ན། །སྦྱར་སྨན་གྱིས་ནི་བསྐུས་ན་ཡང་། །ལྕགས་ཀྱི་ཁར་བས་བརྡབ་བྱས་ན། །ཆག་པར་འགྱུར་ཏེ་གཞན་དུ་མིན། །ཟླ་གམ་དག་གི་དབུས་དག་ན། །བཀྲ་ཤིས་ལྡན་པའི་གཟུགས་ཀྱང་སྣང་། །
ཅི་སྟེ་དེ་ལྟར་མི་སྣང་ན། །ཐལ་བའི་སྨན་འདི་སྦྱར་བར་བྱ། །ཨེ་འདྲ་བྱེའུ་རུག་ལོ་མ་རྣམས། །མཉམ་པར་བཞག་པས་བཙིར་ནས་ནི། །བ་གཅིན་དག་དང་ལྷན་ཅིག་སྦྱར། །བསྐོལ་ནས་གཏོར་བ་བྱས་ནས་ནི། །བཀྲ་ཤིས་ལྡན་པ་དེར་སྣང་སྟེ། །འདི་ལ་བློ་ལྡན་
ཐེ་ཚོམ་མེད། །སྦྱར་སྨན་གྱིས་ནི་བསྐུས་ནས་ཀྱང་། །ལྕགས་ཀྱི་ཁར་བས་བརྡབ་པར་བྱ། །དེས་ན་ས་ལ་དེ་ལྟུང་སྟེ། །རྣམ་པ་གཞན་དུ་འགྱུར་བ་མེད། །ཟླུམ་པོ་གཞོམ་པའི་ཆོ་ག་ཡིས། །སྦྱར་བར་བྱ་བ་རབ་བཤད་དེ། །ཁོ་ར་ཁོར་ཡུག་སྦྱངས་ནས་ནི། །
རབ་ཏུ་བསྒྲིམས་ཏེ་བརྟག་པར་བྱ། །པདྨའི་རྩ་བའི་མདོག་འདྲ་བ། །སྦྲུལ་མགོ་གདེངས་ཀའི་རི་མོ་སྣང་། །ཅི་སྟེ་དེ་དག་མི་སྣང་ན། །ཐལ་བའི་སྨན་འདི་སྦྱར་བར་བྱ། །ཀ་ལི་ཤ་ཡི་ས་བོན་དང་། །བཙོད་རྣམས་དང་ནི་བ་གཅིན་གྱིས། །སྦྱར་ནས་ཀུན་ཏུ་བླུགས་

པར་བྱ། །དེ་ནས་མཚན་མ་སྣང་འགྱུར་ཏེ། །སྦྱར་སྨན་གྱིས་ནི་ལུས་བསྐུས་ནས། །ལྕགས་ཀྱི་ཁར་བ་བརྡབ་པར་བྱ། །དེས་ན་དེས་ནི་འཇིག་འགྱུར་ཏེ། །རྣམ་པ་གཞན་དུ་འགྱུར་བ་མེད། །གྲུ་བཞི་པོ་ཡི་རི་མོ་ཡང་། །གྲུ་བཞི་ཡིན་ཏེ་བཤད་པར་བྱ། །ཅི་སྟེ་དེ་
ནི་མི་སྣང་ན། །ཐལ་བའི་སྨན་འདི་སྦྱར་བར་བྱ། །སྣུ་ཧ་ཤ་རའི་ཡལ་ག་བླངས། །མཉམ་པར་བཞག་པས་བཙིར་བྱས་ལ། །བ་གཅིན་གྱིས་ནི་སྦྱར་ནས་ཀྱང་། །མཁས་པ་ཡིས་ནི་བླུགས་པར་བྱ། །བླུགས་ནས་མཚན་མ་སྣང་འགྱུར་ཏེ། །དེ་ལ་སྨན་གྱིས་
བསྐུས་བྱས་ཤིང་། །ལྕགས་ཀྱི་ཁར་བས་བརྡབ་བྱས་ན། །ཆག་པར་འགྱུར་ཏེ་གཞན་དུ་མིན། །པདྨ་ཡི་ནི་དབུས་སུ་ཡང་། །སྙིང་པོ་དག་ནི་སྣང་བ་ཡོད། །སྨན་རྣམས་ཀྱིས་ནི་ལུས་བསྐུས་ནས། །རྡོ་བ་ཡིས་ནི་བརྡབ་བྱ་ཞིང་། །དེ་ནི་སྙིང་པོ་གཞོམ་པར་བྱ། །
དེ་ན་ཡོད་པར་ཐེ་ཚོམ་མེད། །ཇི་ལྟར་བདག་གིས་བཞག་པ་བཞིན། །ལྷག་པར་ཡང་ནི་བླང་བར་བྱ། །ཆུ་ཤིང་ལོ་མའི་དབྱིབས་འདྲ་བ། །སྦྱར་བའི་ཐབས་ནི་མཉན་པར་བྱ། །དེ་ནི་མཚན་མ་སྣང་བ་ནི། །གི་ཝང་ཐིག་ལེ་འདྲ་བ་ཡིན། །རི་མོ་གཉིས་སམ་གསུམ་
ཡང་རུང་། །ཡང་ན་བཞིའམ་ལྔ་ཡོད་དེ། །མཚན་མ་འདི་དག་སྣང་བར་འགྱུར། །ཅི་སྟེ་མཚན་མ་མི་སྣང་ན། །ཐལ་བའི་སྨན་འདི་སྦྱར་བར་བྱ། །ཨ་ཤྭཏྠ་དང་པ་ཏ་པའི། །ལོ་མ་ཨ་པ་མརྒ་རྣམས། །ར་ཡི་གཅིན་གྱིས་སྦྱར་ནས་སུ། །ཁོ་ར་ཁོར་ཡུག་བླུགས་
པར་བྱ། །བླུགས་མ་ཐག་ཏུ་སྣང་འགྱུར་ཏེ། །སྦྱར་སྨན་གྱིས་ནི་བསྐུས་ནས་ཀྱང་། །ལྕགས་ཀྱི་ཁར་བར་བརྡབ་བྱས་ན། །ཆག་པར་གྱུར་ཏེ་གཞན་དུ་མིན། །བསིལ་ཡབ་དག་དང་འདྲ་བ་ནི། །ཡུ་བར་བཅས་པར་སྣང་བར་འགྱུར། །གཤོར་གྱིས་ལེགས་
པར་སྦྱར་བྱས་ལ། །དེ་ཡི་མཚན་མ་བརྟག་པར་བྱ། །ཅི་སྟེ་དེ་ན་མི་སྣང་ན། །ཐལ་བའི་སྨན་འདི་སྦྱར་བར་བྱ། །ཨིནྡྲ་ཤིང་གི་ལོ་མ་དང་། །ནིར་རྒུན་དག་གི་ལོ་མ་དག །རྟ་ཡི་གཅིན་གྱིས་སྦྱར་ནས་ཀྱང་། །ཁོ་ར་ཁོར་ཡུག་བླུགས་ནས་ནི། །དེ་ནས་མཚན་

མ་སྣང་བ་དེར། །སྦྱར་སྨན་གྱིས་ནི་བསྐུས་ནས་ཀྱང་། །ལྕགས་ཀྱི་ཁར་བས་བརྡབ་བྱས་ན། །ཆག་པར་འགྱུར་ཏེ་གཞན་དུ་མིན། །ཆུ་ཤིང་ལོ་མ་འདྲ་བ་ལས། །རུས་སྦལ་རྒྱབ་དང་འདྲ་བ་དང་། །རྡོ་རྗེ་ཅི་སྟེ་རབ་འོངས་པ། །དེ་ནི་གཞོམ་དུ་མེད་པ་ཡིན། །
གཏེར་གྱི་སྒོ་ནི་ཐམས་ཅད་ལ། །ཕུར་བུ་རྣམ་པ་བཞི་ཡོད་དོ། །དབང་པོ་གཤིན་རྗེ་ལུས་ངན་དང་། །ཁྱབ་འཇུག་ཕུར་བུ་བཞི་པའོ། །གཏེར་གྱི་སྒོ་ནི་ཐམས་ཅད་དུ། །རིག་སྔགས་འདིས་གཏོར་མ་སྦྱིན་པར་བྱ་སྟེ། །གཤིན་རྗེ་ལ་ནི་བསྲེག་བྱ་རྣམས་སོ། །ཁྱབ་
འཇུག་ལ་ནི་འབྲས་ཅན་སྣ་ཚོགས་པའོ། །ཀུ་བེ་རལ་ནི་སྦྱར་ཐུག་གོ། །དཔལ་ལྡན་ལ་ནི་འབྲས་ཀྱི་འོ་ཐུག་སྦྱིན་པར་བྱའོ། །ན་མོ་བཛྲ་པཱ་ཎི་སྱ། ནན་ཏེ་སུ་ནན་ཏེ། གྷོ་བིནྟེ། རི་ཏི་རི་ཏི། མི་ཏི་མི་ཏི། མོ་རི་ཏི་སྭཱ་ཧཱ། །སྔགས་འདིས་ཅི་འདོད་པའི་གཏོར་མ་ཐམས་ཅད་
བྱིན་ལ་དེ་ནས་ལས་བརྩམ་པར་བྱའོ། །གཞོར་གྱི་སྔགས་ནི་འདི་ཡིན་ཏེ། །ན་མོ་བཛྲ་པཱ་ཎི་སྱ། ཏི་ཤ་ཡ་བི་ཏི་ཤ་ཡ། ན་མོ་མ་ཧཱ་ཥ་ཡཱ་ཡ་སྭཱ་ཧཱ། །སྔགས་འདི་དག་གིས་ཆུ་ལ་བཟླས་བརྗོད་བྱས་ཏེ། །བསང་གཏོར་བྱ་སྟེ་དེ་ནས་ལས་བྱའོ། །དེ་ལ་གཏེར་སྒོ་གཅོག་པའི་
མཆོག །རྡོ་རྗེ་རྣམས་དང་གཞན་ཡང་གང་། །ཁྲ་ཡི་རིགས་རྣམས་གཅོག་པ་ཡི། །སྦྱར་སྨན་རྣམས་ཀྱང་བཤད་པར་བྱ། །ཀ་ན་ཀ་ཡི་རྩ་བ་དང་། །ཨ་ཤ་ནཀྟའི་གི་ཝང་དང་། །སྤུ་ཡི་རྩ་བ་འདི་དག་རྣམས། །ཨརྐ་དར་བའི་ཤུན་ལྤགས་དང་། །རིལ་བུ་སྲན་
ཙམ་བྱས་ནས་ཀྱང་། །གྲིབ་མ་དག་ཏུ་བསྐམ་པར་བྱ། །གཏེར་སྒོ་ཐམས་ཅད་གཅོག་པ་འདི། །འབྱུང་པོའི་མཆོག་ཅེས་བྱ་བ་ཡིན། །འབམ་པོ་དང་ནི་གཅོད་རྣམས་དང་། །གི་ཝང་ལྡོང་རོས་བཅས་པ་དང་། །ཀ་ར་བཱི་རའི་རྩ་བ་དང་། །ཨརྐ་དཀར་པོའི་ཤུན་ལྤགས་
དང་། །ཤོ་ན་ཀ་ཡི་ཤུན་ལྤགས་དང་། །འདི་དག་ཆ་ནི་བསྙམས་བྱས་ལ། །བ་གཅིན་དག་དང་བཏག་པར་བྱ། །གཏེར་སྒོ་ཐམས་ཅད་གཅོག་པ་ཡིན། །སྦྱར་སྨན་དག་གི་དམ་པ་སྟེ། །ལག་ན་རྡོ་རྗེས་བཤད་པ་ཡིན། །ཨགྣི་མནྟའི་ལོ་མ་དང་། །ཨེ་རནྟ་ཡི་

རྩ་བ་དང་། །སྣུ་ཧ་ག་ཤི་རི་སྒོག་སྐྱ་རྣམས། །བ་གཅིན་དག་དང་བཏག་པར་བྱ། །གཏེར་སྒོ་གཅོག་པའི་སྦྱར་སྨན་འདི། །རྡོ་རྗེ་ཞེས་ནི་བྱ་བ་ཡིན། །ཀ་ར་བཱི་རའི་རྩ་བ་དང་། །ཆུ་ཤིང་ས་བོན་སྐྱེར་པ་དང་། །ཡུང་དང་ནག་ཏ་མ་ལ་དང་། །གི་རི་ཀར་ནི་དཀར་པོ་རྣམས། །
བ་གཅིན་དག་དང་བཏག་པར་བྱ། །སྦྱར་སྨན་གྱི་ནི་རྒྱལ་པོ་འདི། །གཏེར་སྒོ་གཅོག་པའི་མཆོག་ཡིན་ནོ། །བིདྱུད་ཛི་ཧྭ་མོ་ར་ཏི། །དེ་བཞིན་རམ་ཉེའུ་ཡུངས་ཀར་རྣམས། །བ་གཅིན་གྱིས་ནི་ལེགས་སྦྱར་བ། །གཏེར་སྒོ་གཅོག་པ་དམ་པ་ཡིན། །བ་ལུང་གི་ནི་
མེ་ཏོག་དང་། །ཤལ་ལ་ཀ་ཡི་སྙིང་པོ་དང་། །འབམ་པོ་སྣི་ཧ་ཀྵི་རི་དང་། །གི་ཝང་དག་དང་ལྡན་པར་ནི། །ར་གཅིན་དག་དང་བཏག་བྱས་པ། །རྡོ་རྗེ་འཇོམས་པའི་མཆོག་ཡིན་ནོ། །ཀོ་ཤ་ཏ་ཀའི་ས་བོན་དང་། །ཀོ་བི་ར་ཡི་འབྲས་བུ་དང་། །དུ་རུ་སྐ་ཡི་ལོ་མ་
རྣམས། །བ་གཅིན་དག་དང་བཏག་བྱས་ལ། །ཞག་གྲངས་བཞི་བཅུ་དགུར་བཞག་པ། །རྡོ་རྗེ་འཇོམས་པའི་དམ་པ་ཡིན། །པ་རི་ཛཱ་ཏིའི་རྩ་བ་དང་། །སུ་བརྞ་དང་ཏ་ཀ་དང་། །སྤེན་མ་ཡི་ནི་ལོ་མ་དང་། །སྦྲང་རྩི་དང་ནི་ཤིང་ཀྲུ་དང་། །གི་ཝང་དག་དང་སྦྱར་བ་ནི། །གཏེར་
སྒོ་གཅོག་པའི་དམ་པ་ཡིན། །སྦྱར་སྨན་དམ་པ་འདི་དག་ནི། །རྡོ་རྗེ་འཇོམས་པ་ཡིན་པར་བཤད། །གསེར་རྣམས་བླང་བར་འདོད་པ་ཡི། །ལག་པ་བསྐུ་བ་ང་ལས་ཉོན། །རུ་རྟ་དང་ནི་རྒྱ་སྤོས་དང་། །ཨ་ལི་ཏ་དང་མོ་ར་ཏི། །ལག་པ་བསྐུ་བའི་མཆོག་ཡིན་ཏེ། །རྡོ་རྗེ་
འབར་བྱེད་འཇིགས་པ་ཡིན། །ཞིམ་ཐིག་ལེ་ཡི་ས་བོན་དང་། །ནག་ཏ་མ་ལེའི་འབྲས་བུ་རྣམས། །བ་གཅིན་དག་དང་སྦྱར་བ་ནི། །བདེ་བར་བྱེད་པའི་ལག་སྐུད་ཡིན། །པདྨའི་རྩ་བ་རྒྱ་སྤོས་དང་། །ས་རཀྵི་དང་སྤུ་རྣམས་ནི། །ར་ཡི་གཅིན་དང་ལེགས་སྦྱར་བའི། །བདེ་བར་
བྱེད་པའི་ལག་སྐུད་ཡིན། །ཀ་གན་འཛི་ཡི་ས་བོན་དང་། །ཀར་ཎི་ཀ་རའི་མེ་ཏོག་དང་། །པྲི་ཡང་ཀུ་དང་རྒྱ་སྤོས་དང་། །སུ་ར་བི་དང་ཙནྡན་དཀར། །གི་ཝང་དག་དང་ལྡན་པ་ནི། །བདེ་བར་བྱེད་པའི་ལག་སྐུད་ཡིན། །སྒོ་གླེགས་ལག་པས་རེག་པ་ན། །

མཚམས་ནས་ཀྱང་ནི་འབྱེ་བར་འགྱུར། །དེ་ཉིད་རེངས་པ་བྱ་བའི་ཕྱིར། །རིག་སྔགས་འདི་ནི་སྦྱར་བར་བྱ། །ན་མོ་བཛྲ་པཱ་ཎི་སྱ། །ཏི་རི་ཏི་རི། མི་རི་སྭཱ་ཧཱ། །རིག་སྔགས་འདིས་ཆུ་ལ་ལན་བདུན་བསྔགས་ཏེ་སྒོ་གླེགས་ཀྱི་ངོས་ལ་གཏོར་ན་རེངས་པར་འགྱུར་
ཏེ། བདེ་བླག་ཏུ་གཟུང་བར་འགྱུར་རོ། །གཏེར་གྱི་སྒོ་རྣམས་ཐམས་ཅད་ལ། །རིག་སྔགས་འདི་ནི་སྦྱར་བར་བྱ། །རེངས་བྱེད་རྨོངས་བྱེད་དགེ་བ་སྟེ། །བགེགས་རྣམས་ཐམས་ཅད་འཇོམས་བྱེད་པ། །ཚངས་པ་ཉིད་ཀྱིས་བྱས་པ་སྟེ། །རྨོངས་བྱེད་སྒོ་ཡི་ཐེམ་པའི་
ཕྱིར། །རི་རབ་བརྟོལ་ནས་བྱུང་བ་སྟེ། །དྲི་ཟ་ལྷ་མོ་རྣམས་དང་ནི། །མིའམ་ཅིས་ནི་རབ་ཏུ་མཆོད། །འཇོམས་པར་བྱེད་ཅིང་སྐྲག་བྱེད་པ། །ལྷ་ཡི་གཟུགས་ལྡན་བློ་གྲོས་ཆེ། །རིག་སྔགས་འདི་ནི་བཤད་པར་བྱ། །ཀི་ལི་ཀི་ལི། །པིངྒ་ལཱཀྵི་ཧ་ཧ་བྷི་མངྒི།
ཧ་ན་ཧ་ན། ཤཱུ་ལེ་ན་བི་དཱ་ར་ཡ་བཛྲ་ཎ། ཀི་ལི་ཀི་ལི། །ཤཔྡེ་ཎ། སྟམྦྷ་ཡ་རུ་ཏྲེ་ཎ། དེ་ན་ཧ་ན་ཧ་ན། ཤཀྟི་ན། ཀི་རི་ཀི་རི། ཙི་རི་ཙི་རི། མི་རི་མི་རི། །ན་རུ་ཏི་ན་རུ་ཏི། ཐ་ར་ཐ་ར། ཐ་ཐ། ར་ར། པ་ཏ་ཡ་པ་ཏ་ཡ། སྟམྦྷ་ཡ་སྟམྦྷ་ཡ། པ་ཏ་ཡ་པ་ཏ་ཡ། གརྫ་
གརྫ། མརྫ་མརྫ། ཏརྫ་ཏརྫ། ཀིངྐི་ནི་ཀིངྐི་ནི། དུནྡུ་བྷི་དུཎྡུ་བྷི། ཤུཀླ་དཾཥྚྲ་ཀ་རཱ་ལཱ་ན་ནེ། ཀ་ན་ནེ་དཱི་པྱ་རཱུ་པེ། ཙ་མ་བི་དུས་སཾ་མ་དཱ། དཱི་པྱ་བྲ་བེ། བ་ཤ་ནེ། ཀ་ཧ་ཀ་ཧ། ཁཌྒ་ཧ་སྟེ། ཏྲི་ནེ་ཏྲེ། རུ་དྲཱ་ཡ་ནེཤྨ་ཤཱ་ནེ། ཡ་དཱ་ཀྲི་ད་སེ། གློ་པ་གླེ་བཱ་ག་གླེཾ་བ་
ཡུརྤ་ར་ཎི། ཨནྡྷ་ཀཱ་རེ་སྭ་ཡཾ་ཀེ་ཤ་ཀི་མུ་ཀུ་ཊ། ཙནྷྲཱཾ་ཀ །ཤིཪྵེ། དེ་བ་གནྡྷརྦ། ཡཀྵ་བིདྱཱ། ད་རཻ་ཨ་ཙི་ཏེ། སུ་པཱུ་ཛི་ཏེ། དྲེམྦཱ་དྲེམྦཱ། ཐི་ཐི། མ་བ་པ་སྤཪྴ་མ་བ། ཧ་ཧ་མ་པ། ཀ་ཀམ་པ། ཙིཏྟྲེ། ཧ་ན་ཧ་ན། སྟམྦྷ་ཡ་སྟམྦྷ་ཡ། མ་ཧཱ་བིདྱཱ་ཙ་ཏུརྨུ་ཁ། ཨཱ་ཛྙཱ་
པ་ཡ་ཏི་སྭཱ་ཧཱ། རིག་སྔགས་འདིས་ཡུངས་ཀར་དང་ཆུ་དང་ཐལ་བ་རྣམས་ལས་གང་ཡང་རུང་བ་ཅིག་བླངས་ཏེ། རིག་སྔགས་བཟླས་བརྗོད་བྱས་ལ་ཕྱོགས་བཞིར་གཏོར་ན་བགེགས་ཐམས་ཅད་རེངས་པར་འགྱུར་ཞིང་། ཁྲ་ཡང་བཅོམ་པར་འགྱུར་རོ། །དེ་ཉིད་ཀྱིས་བསད་པ་དང་།

གཉིད་ལོག་ཏུ་གཞུག་པ་དང་། མུན་པར་བྱ་བ་དང་། གར་དང་གླུ་དང་རོལ་མོ་ལ་སོགས་པ་བྱེད་དུ་གཞུག་པ་དང་། གཞན་ཡང་སེམས་ཅན་མི་སྣང་བ་གང་ཡིན་པ་དག་དང་། སྣང་བ་གང་ཡིན་པ་དག་དང་། བགེགས་དང་ལོག་འདྲེན་གང་ཡིན་པ་དང་། ཅི་སྟེ་
རྒྱལ་པོའི་ཕོ་བྲང་ངམ། དུར་ཁྲོད་ཀྱི་གནོད་པ་བྱུང་ངམ། སྦྲུལ་གྱིས་བཅིངས་པའང་རུང་། །གཞན་ཡང་སེམས་ཅན་གནོད་པར་བྱེད་པ་གང་ཡིན་པ་དེ་དག་ཐམས་ཅད་འཇོམས་པར་བྱེད་ཅིང་རྨོངས་པར་བྱེད་པ་ཡིན་ནོ་ཞེས་བཅོམ་ལྡན་འདས་རྡོ་རྗེ་འཛིན་གྱིས་དེ་སྐད་
བཤད་དོ། །གསེར་ལེན་པ་ན་རྡོ་རྗེ་ལག་ན་ཐོགས་ཤིང་རིག་སྔགས་ཀྱི་མཆོག་འདིས་སྦྱིན་སྲེག་ལེགས་པར་བྱའོ། །ན་མོ་བཛྲ་པཱ་ཎི་སྱ། བི་བེ་ཏཱ་ཡ་སྭཱ་ཧཱ། ཏི་སྟེཾ་སུ་ཁ་ལ་ཧཱ་ཡ་སྭཱ་ཧཱ། ཀུམྦ་ཥྚེ་ན་ཡཱ། བ་རནྟི་ཨསྟ་ནཱ་ཡ་སྭཱ་ཧཱ། ནིདྲཱ་དྷི་པཱ་ཏ་ཡེ་སྭཱ་ཧཱ། ཤ་ཡེ་ཡུརྦཱ་
ཡུ་སྭཱ་ཧཱ། ལི་བི་གྲ་རེ་ཏཱ་ཡ་སྭཱ་ཧཱ། བ་ཧུ་ཡཀྵཱ་ཡ་སྭཱ་ཧཱ། ཡ་སྭཱ་ཧཱ། ག་ཎཱ་ཡ་སྭཱ་ཧཱ། ག་ཎ་པ་ཏཱ་ཡ་སྭཱ་ཧཱ། ཀཱ་མ་རཱུ་པཱ་ཡ་སྭཱ་ཧཱ། ཀང་ལི་ནི་སྭཱ་ཧཱ། བྱཱ་གྷྲཱ་ཡ་སྭཱ་ཧཱ། བྱཱགྷྲཱ་དྷི་པ་ཏ་ཡེ་སྭཱ་ཧཱ། རཱཀྵ་སཱ་ཡ་སྭཱ་ཧཱ། རཱཀྵ་སཱ་དྷི་པ་ཏེ་ཡེ་སྭཱ་ཧཱ། ཁ་ཌྒཱ་ཡ་སྭཱ་ཧཱ། ཁཌྒཱ་དྷི་
པ་ཏ་ཡེ་སྭཱ་ཧཱ། །རུ་དྲཱ་ཡ་སྭཱ་ཧཱ། ཡ་མཱ་ཡ་སྭཱ་ཧཱ། བ་རུ་ཎཱ་ཡ་སྭཱ་ཧཱ། ཀུ་བེ་རཱ་ཡ་སྭཱ་ཧཱ། པྲྀ་ཐི་བྱཻ་སྭཱ་ཧཱ། མ་ཏྲི་བྱཻ་སྭཱ་ཧཱ། བྲཧྨ་ཡ་སྭཱ་ཧཱ། གང་གསང་སྔགས་འདི་དག་གིས་ཤ་མའི་ཡམ་སྲེག་ཤིང་བརྒྱད་བརྒྱ་སྦྱིན་སྲེག་བྱས་ན་བགེགས་ཐམས་ཅད་བཅོམ་པར་
འགྱུར་རོ། །ཞེས་བཅོམ་ལྡན་འདས་རྡོ་རྗེ་འཛིན་གྱིས་བཤད་དེ། དེ་ཡང་འཁྲུལ་འཁོར་ཐམས་ཅད་འཇོམས་པའི་ཉེ་བའི་སྙིང་པོ་དང་ལྡན་པས་སྦྱིན་སྲེག་བྱའོ། །ཡང་ན་ཉེ་བའི་སྙིང་པོ་གཅིག་པུས་བྱའོ། །དེ་ལྟར་མ་བྱས་ན་བརླག་པར་འགྱུར་རོ། །དེ་ནས་དབང་
ལྡན་གྱིས་བཅོམ་ལྡན་འདས་ལག་ན་རྡོ་རྗེ་ལ་ཞུས་པ། བཅོམ་ལྡན་འདས་སྟོབས་པོ་ཆེ་ཕ་རོལ་གནོན་པ། མི་རྣམས་ལ་ཕན་པའི་ཕྱིར་ཉན་པར་འཚལ་བ་དེ་བདག་ལ་གསུངས་ཤིག །ཁྲ་རྣམས་བཤད་པ་དུ་ཞིག་མཆིས། །བརྩོན་འགྲུས་མཐུ་སྟོབས་ཅི་ཙམ་ལགས། །

བདག་གི་ཐེ་ཚོམ་དེ་དག་གསུངས། །ཇི་བཞིན་དུ་ནི་གསུངས་པའི་རིགས། །རྡོ་རྗེ་འཛིན་ཆེན་མངའ་བདག་གིས། །དབང་ལྡན་གྱི་ནི་ཚིག་ཐོས་ནས། །དབང་ལྡན་གཟི་བརྗིད་ཆེན་པོ་པ། །ཚངས་པས་བཤད་པའི་ཁྲ་དེ་ཉིད། །སྔོན་ནི་ས་འདི་
སྟེང་དག་ན། །རྟག་ཏུ་གཏེར་རྣམས་མང་པོ་ཡོད། །གཏེར་དེ་དག་ནི་བསྲུང་བའི་ཕྱིར། །ཚངས་པ་ཉིད་ཀྱིས་ཁྲ་རྣམས་ཡོད། །ཁྲ་ཡི་རྣམ་པ་བརྒྱད་བཤད་པ། །བརྩོན་འགྲུས་ཆེ་ཞིང་སྟོབས་པོ་ཆེ། །ལག་ན་རྡོ་རྗེ་བཀའ་མཆོག་གིས། །དེ་དག་གང་གིས་
བརྒྱར་འགྱེས་དང་། །གཏོར་མའི་སྔགས་རྣམས་ཇི་བཞིན་པ། །དེ་དག་བདག་གིས་བཤད་པར་བྱ། །གནག་དང་དཀར་དང་དེ་བཞིན་དམར། །མགྲིན་པ་མཐོན་ཀར་གྲགས་པ་དང་། །ཀ་པིཉྫ་ར་མིག་དམར་དང་། །འདབ་བཀྲ་དང་ནི་ཤེལ་མིག་ཅན། །དེ་ལ་
ནག་པོ་ནི་གཤིན་རྗེ་ལྷར་འཛིན་པ་ཡིན་ནོ། །དཀར་པོ་ནི་ཚངས་པ་ལྷར་འཛིན་པ་ཡིན་ནོ། །དེ་བཞིན་དུ་མགྲིན་པ་མཐོན་ཀ་ནི་སྨིན་དྲུག་གི་བུ་ལྷར་འཛིན་པ་ཡིན་ནོ། །ཀ་པིཉྫ་ར་ནི་ཁྱབ་འཇུག་ལྷར་འཛིན་པ་ཡིན་ནོ། །མིག་དམར་ནི་ཀུ་བེ་ར་ལྷར་འཛིན་པ་ཡིན་ནོ། །
དེ་བཞིན་དུ་འདབ་བཀྲ་ནི་དབང་པོ་ལྷར་འཛིན་པ་ཡིན་ནོ། །ཤེལ་མིག་ཅན་ནི་སའི་ལྷ་ལྷར་འཛིན་པ་ཡིན་ནོ། །ཁྲ་དེ་དག་གི་ཁ་དོག་མཚན། །རྟགས་རྣམས་བདག་གིས་བཤད་པ་ཡིན། །དེ་དག་གི་ནི་མདོག་དང་དབྱིབས། །རིམ་བཞིན་དུ་ནི་བཤད་པར་བྱ། །
ནག་པོ་ཡི་ནི་གཟུགས་གང་དང་། །མཐུ་སྟོབས་གང་ཡིན་རབ་བཤད་དེ། །ཁ་དོག་རབ་ཏུ་གནག་པ་དང་། །བོང་ཚད་ཆེ་ཞིང་འཇིགས་པར་བྱེད། །དཔག་ཚད་གཅིག་ན་གནས་བཞིན་དུ། །དྲིལ་བུའི་སྐད་འདྲ་འབྱིན་པར་བྱེད། །གཏོར་མ་འདོད་ཕྱིར་ཡང་
དང་ཡང་། །དེ་བཞིན་རྒྱུན་དུ་སྐད་ཀྱང་འབྱིན། །གང་གིས་ཞི་བར་འགྱུར་བ་ཡི། །ཟས་རྣམས་ཀྱང་ནི་བཤད་པར་བྱ། །ཤ་བཙོས་དེ་བཞིན་བརྔོས་པ་རྣམས། །བྱ་རྗེ་ལ་ནི་སྦྱིན་པར་བྱ། །མྱུར་དུ་སྔགས་ཀྱང་སྦྱར་བྱ་ཞིང་། །གཏོར་མ་ཡང་ནི་སྦྱིན་པར་བྱ། །

ན་མོ་བཛྲ་པཱ་ཎི་སྱ། ཀྲྀཥྞ་ཡཀྵ་ཡ་ཀྲྀཥྞ་ཨ་དྷི་པ་ཏ་ཡེ་སྭཱ་ཧཱ། །གཏོར་མ་ལ་ཡང་སྔགས་འདིས་བསྔགས་ལ་དེ་ནས་སྦྱིན་པར་བྱའོ། །དཀར་པོ་ཡི་ནི་གཟུགས་གང་དང་། །མཐུ་སྟོབས་གང་ཡིན་རབ་བཤད་དེ། །ནམ་མཁའ་ལ་དག་བསྐོར་བྱས་ནས། །དེ་ནི་ཆུ་
སྐྱར་མདོག་འདྲ་ཡི། །འདབ་མའི་ཤུགས་ཀྱིས་འོང་བར་འགྱུར། །རྒྱུན་དུ་ཁོ་ར་ཁོར་ཡུག་ནས། །འདབ་མའི་གཤོག་སྒྲ་ཆེན་པོ་ཡིས། །འབྲུག་སྒྲ་ཆེན་པོ་འབྱིན་པར་བྱེད། །གནས་རྣམས་སུ་ནི་ལན་ཅིག་གམ། །ལན་གཉིས་ལན་གསུམ་སྐོར་བར་བྱེད། །
གདོན་རྣམས་ལན་གསུམ་ཚང་བའི་བར། །དེ་སྲིད་དུ་ནི་གཏོར་མ་སྦྱིན། །སྣ་མ་འབྲས་ཡོས་མར་དག་གི །གཏོར་མ་རྣམས་ནི་སྦྱིན་པར་བྱ། །སྔགས་ལ། །ན་མོ་བཛྲ་པཱ་ཎི་སྱ། །ཤོ་དྷ་ཡ་ཤོ་དྷ་ཡ། པ་ཏ་ཡ། ཤོ་པ་དྷི་པ་ཏ་ཡེ་སྭཱ་ཧཱ། དམར་པོ་ཡི་
ནི་གཟུགས་གང་དང་། །མཐུ་སྟོབས་གང་ཡིན་རབ་བཤད་དེ། །བཞད་བཞིན་དུ་ནི་སྐད་འབྱིན་ཅིང་། །ཟབ་མོའི་སྒྲ་ནི་རབ་ཏུ་སྒྲོགས། །ལན་ལྔའི་བར་དུ་སྐད་འབྱིན་ཞིང་། །དེ་ནི་མྱུར་དུ་འོང་བར་བྱེད། །ཇི་སྲིད་ལན་ལྔ་སྐད་འབྱིན་པ། །དེ་སྲིད་དུ་ནི་གཏོར་མ་
སྦྱིན། །དྲི་དམར་དང་ནི་མེ་ཏོག་དམར། །པུ་པ་ལི་ཀ་སྦྱིན་པར་བྱ། །བཟའ་བ་དང་ནི་ལ་ཏུ་དང་། །ཏིལ་གྱི་ཁུ་བ་སྦྱིན་པར་བྱ། །སྔགས་ལ། །ན་མོ་བཛྲ་པཱ་ཎི་སྱ། །རཀྟེ་རཀྟ། ཀྵེ་རཱཀྟཱ་དྷི་པ་ཏ་ཡེ་སྭཱ་ཧཱ། མགྲིན་པ་མཐོན་ཀའི་གཟུགས་གང་དང་། །མཐུ་སྟོབས་
གང་ཡིན་རབ་བཤད་དེ། །སྡེར་མོས་ཀྱང་ནི་བྲད་པར་བྱེད། །དེ་ནི་ཁྭ་ལྟར་སྐད་འབྱིན་ཅིང་། །ལན་བདུན་བར་དུ་སྐད་འབྱིན་ཏེ། །དེ་ནི་མྱུར་དུ་འོང་བར་འགྱུར། །གཏོར་མ་མྱུར་དུ་སྦྱིན་པར་བྱ། །སྔགས་ཀྱང་ལེགས་པར་དྲན་པར་བྱ། །ལན་ཚྭ་མེད་པའི་ཤ་སྦྱིན་
ཅིང་། །ཡམ་སྲེག་ཤིང་ཡང་སྦྱིན་པར་བྱ། །གཏོར་མའི་ལས་ནི་འདི་དག་གིས། །དེ་ནི་མྱུར་དུ་ལྟུང་བར་འགྱུར། །སྔགས་ལ། ན་མོ་བཛྲ་པཱ་ཎི་སྱ། ནཱི་ལ་ག་ཤོ། ནཱི་ལ་ཏེ་ཛོ། ནཱི་ལཱ་དྷི་པ་ཏ་ཡེ་སྭཱ་ཧཱ། ཀ་བིཉྫ་རའི་གཟུགས་གང་དང་། །མཐུ་སྟོབས་གང་ཡིན་རབ་

བཤད་དེ། །སྲིན་བྱ་བཞིན་དུ་ཡང་དང་ཡང་། །སྲིན་བྱ་བཞིན་དུ་ཡང་དང་ཡང་། །སྐད་པོ་ཆེ་ནི་འབྱིན་པར་བྱེད། །མྱུར་བ་མྱུར་བར་སྐད་འབྱིན་ཅིང་། །དེ་བཞིན་སྒྲ་ཡང་ལན་གསུམ་འབྱིན། །ཉེ་བ་དག་ཏུ་འོང་བར་འགྱུར། །དེ་ཚེ་ཟས་ཀྱང་སྦྱིན་པར་བྱ། །གསང་སྔགས་ཀྱིས་
ནི་བྱ་བ་ཡིན། །ཁྲག་གིས་སུ་ནི་བཀང་བ་ཡི། །མངོན་སུམ་དག་ཀྱང་སྦྱིན་པར་བྱེད། །དེ་བཞིན་ཉ་དང་ཤ་རྗེན་སྦྱིན། །སྔགས་ལ། ན་མོ་བཛྲ་པཱ་ཎི་སྱ། ཀ་རཱ་ལི། པི་ཀ་རཱ་ལི། ཀ་རཱ་ལཱ་དྷི་པ་ཏ་ཡེ་སྭཱ་ཧཱ། མིག་དམར་གྱི་ནི་གཟུགས་གང་དང་། མཐུ་སྟོབས་
གང་ཡིན་རབ་བཤད་དེ། །རྟ་བཞིན་དུ་ནི་སྐད་འབྱིན་ཅིང་། །ཁར་བའི་སྒྲ་ལྟར་ཚེར་ཚེར་པོ། །དེ་བཞིན་སྒྲ་ཆེར་སྒྲོགས་པར་བྱེད། །མེ་ལྕེ་འབར་བ་ཁ་ནས་འབྱིན། །ཐེ་ཙོམ་མེད་ཅིང་མྱུར་བ་རུ། །དེ་ལ་གཏོར་མ་སྦྱིན་པར་བྱ། །དེ་བཞིན་ཤ་ནི་རྗེན་པ་དང་། །ཆང་
གིས་བཀང་བའི་སྣོད་ཀྱང་སྦྱིན། །སྔགས་ལ། ན་མོ་བཛྲ་པཱ་ཎི་སྱ། རཀྟ་ཀནེ་ཏྲོ་རཀྟ་ནི་བ། །རཀྟཱ་དྷི་པ་ཏ་ཡེ་སྭཱ་ཧཱ། འདབ་བཀྲ་ཡི་ནི་གཟུགས་གང་དང་། །མཐུ་སྟོབས་གང་ཡིན་རབ་བཤད་དེ། །འབྲུག་སྒྲ་བཞིན་དུ་སྐད་འབྱིན་ཅིང་། །དེ་ཡང་དེ་བཞིན་འོང་བར་
འགྱུར། །རང་གི་ལུས་ལས་དེ་བཞིན་འདབ། །གློག་གི་རྒྱུད་འདྲར་སྣང་བར་འགྱུར། །རྔ་མོ་ལྟར་ནི་བརྟུལ་ཞིང་འོང་། །ངུར་བ་བཞིན་དུ་ཡང་དང་ཡང་། །ལན་བརྒྱད་དུ་ནི་སྐད་འབྱིན་ཞིང་། །དེ་ནི་མྱུར་དུ་འོང་བར་འགྱུར། །དེ་ལ་གཏོར་མ་སྦྱིན་བྱ་ཞིང་། །གསང་
སྔགས་ཀྱང་ནི་བྱ་བ་ཡིན། །བུ་རམ་ཞོ་དང་སྦྱར་བ་ཡི། །ཟས་ཀྱང་རབ་ཏུ་སྦྱིན་པར་བྱ། །སྔགས་ལ། ན་མོ་བཛྲ་པཱ་ཎི་སྱ། ཙི་ཏྲ་ཙི་ཏྲ་ཀྵོ། བི་ཙི་ཏྲ། ཨ་དྷི་བ་ཏ་ཡེ་སྭཱ་ཧཱ། ཤེལ་མིག་ཅན་གྱི་གཟུགས་གང་དང་། །མཐུ་སྟོབས་གང་ཡིན་རབ་བཤད་དེ། །ནམ་
མཁའ་དག་ནི་ཁེབས་པར་བྱེད། །དེ་ནི་དལ་ནས་འོང་བར་བྱེད། །གླང་པོ་ཆེ་ལྟར་སྐད་འབྱིན་ཅིང་། །འདབ་མས་རླུང་ནི་གཡོ་བར་བྱེད། །འདབ་མ་དེ་ནི་རླུང་གིས་སུ། །གྲང་བར་ཡང་ནི་བྱེད་པར་འགྱུར། །སྐད་ནི་ལན་གཉིས་འབྱིན་བྱེད་ཅིང་། །དེ་ནི་ཁད་ཀྱིས་འོད་

བར་འགྱུར། །དེ་ལ་གཏོར་མ་སྦྱིན་བྱ་ཞིང་། །གསང་སྔགས་ཀྱང་ནི་བྱ་བ་ཡིན། །དེ་བཞིན་མར་དང་སྦྱར་བྱ་ཡི། །ནས་ཀྱི་ཟས་ཀྱང་སྦྱིན་པར་བྱ། །བ་ཡི་མར་དང་དེ་བཞིན་ཤ། །བུ་རམ་ཆང་གིས་བཀང་བར་སྦྱིན། །སྔགས་ལ། །ན་མོ་བཛྲ་པཱ་ཎི་སྱ། ཀེ་ཀ་
རཀྵ། ཀ་ཀ་ར་དྲྀཥྚི། ཀེ་ཀ་རཱ་དྷི་པ་ཏ་ཡེ་སྭཱ་ཧཱ། ཁྲ་འདི་དག་ནི་བདག་གིས་སུ། །མཚོན་བཅས་ཆོ་གར་ལྡན་པར་བཤད། །གང་ཞིག་ཁྲ་ནི་ནག་པོ་ཡི། །སྔགས་ལས་བརྟེན་ཏེ་ལས་རྩོམ་པ། །དེ་ལ་འཇིགས་པ་ཅི་ཡང་རུང་། །ཅུང་ཟད་ཀྱང་ནི་འབྱུང་མི་འགྱུར། །
དེ་ལ་སྦྲང་རྩི་འོ་མར་སྦྱར། །དེ་ལས་འགལ་བར་ལས་བྱ་བ། །གང་ཡིན་དེ་ནི་བདག་ཉིད་བརླག །བདག་ཉིད་ཆེན་པོ་ཁྲ་འདི་དག །མཆོད་པ་བྱས་ན་ལྡོག་འགྱུར་ཏེ། །ལག་ན་རྡོ་རྗེས་བཤད་པ་བཞིན། །ཁྲ་ཐམས་ཅད་ཀྱི་གསང་སྔགས་ནི་ལྷག་པར་སྤྱན་དང་
རིག་སྔགས་ཀྱི་རྒྱལ་པོ་དང་སྦྱར་བར་བྱའོ། །ཁྲ་གཞོམ་པའི་རིག་སྔགས་ཚངས་པས་སྨྲས་པ། ངས་བཤད་ཟིན་ཏེ། །དེ་དང་སྦྱར་ཞིང་ལས་བྱའོ། །ངས་ཀྱང་ཁྲ་ཐམས་ཅད་ཕུང་བར་བྱ་བའི་ཕྱིར་གཏུམ་པོ་མི་བཟད་པའི་རིག་སྔགས་གང་ཐོས་པས་བྲག་ལ་
ཐོག་ཐོག་འབབ་པ་བཞིན་དུ་དུམ་བུ་བརྒྱར་འགྲོ་བར་འགྱུར་བར་བཤད་པར་བྱའོ། །ན་མོ་བཛྲ་པཱ་ཎི་སྱ། མ་ཧཱ་ཙནྡེ་ཙནྡེ་ཙིནྟ་ནམ་ན་ཙ་མ་ནེ། སྟམྦྷ་ནི། ཛམྦྷ་ནི། མོ་ཧ་ནི། ཧི་ཧི་ག་ཀ་རེ། བ་རེ་ཡེ་སྭཱ་ཧཱ། ཁྲ་ཐམས་ཅད་བཟློག་པ་ལ་ཡུངས་ཀར་གྱིས་བྱའོ། །
དེ་ནས་རྡོ་རྗེ་འབྱར་བྱེད་གཞོམ་པར་འདོད་ན་རྡོ་རྗེ་འབྱར་བྱེད་ལ་བལྟས་ལ། རྡོ་རྗེ་ཁྲོ་བོ་ཉིད་བསྔགས་ཏེ་བླང་བར་བྱའོ། །སྨན་འདི་དག་ཀྱང་གཏོར་བར་བྱ་སྟེ། རྒྱ་སྲན་གྱི་ཁུ་བ་དང་། སྲུ་སྲུའི་རྩ་བ་དང་། འོམ་བུ་བསྲེགས་པའི་ཁུ་བ་དང་། སོ་མ་དང་སོ་མ་ཏ་བ་དང་།
སོ་མ་ཛ་ཏི་དང་། འདི་རྣམས་བསྲེས་པའི་ཆུས་གཏོར་ལ་ཉི་མའི་འོད་ཀྱིས་གདུང་བར་བྱའོ། །གང་ན་ཉི་མ་མེད་པ་དེར་ནོར་བུ་མེ་ཤེལ་བསྟན་པར་བྱའོ། །དེ་ནས་བཅོས་མའི་རྡོ་རྗེ་འབྱར་བྱེད་གཞིག་པར་འདོད་ན། །སྭ་རི་ཀའི་ཐལ་བ་དང་། །གཟེ་མ་དང་། ཀནྟ་ག་

དང་། །ཨབ་ཡག་དང་དུནྟི་ཀའི་ཐལ་བ་དང་འདི་རྣམས་བསྲེས་བས་བཤིག་ན་དེས་འཇིག་པར་འགྱུར་རོ། །དེ་ནས་བཅོས་མའི་རྡོ་རྗེ་འབྱར་བྱེད་བྱ་བར་འདོད་ན་ལྷང་ཚེར་སྲང་གཉིས་དང་། །སོ་མ་ར་ཙའི་ས་བོན་སྲང་གཅིག་དང་། །བ་བླ་སྲང་ཕྱེད་དང་།
མོན་སྲན་གྲེའུའི་ཕྱེ་མ་སྲང་གཉིས་དང་། ཕྱེ་མ་ཞོ་གཉིས་དང་། ས་མ་ཛ་ཏི་ཞོ་གཉིས་དང་། ཀ་ལ་པ་ཏའི་ས་བོན་ཞོ་གཉིས་དང་། འདི་རྣམས་ལྷན་ཅིག་ཏུ་སྦྱར་ཏེ་ཕྱེ་མ་ཞིབ་མོར་བྱའོ། །ལྷང་ཚེར་ཡང་བཏག་པར་བྱ་སྟེ། ཀ་ཙ་པ་
ལ་བསྲེགས་པའི་ཆུ་དང་། འོམ་བུ་དང་། ཨིནྡྲ་བྲིཀྵ་བསྲེགས་པའི་ཆུ་དང་ལྷན་ཅིག་ཏུ་སྦྱར་ལ་མ་ཐང་གིས་བསྐུས་པའི་སྣོད་ཀྱི་ནང་དུ་ཟླ་བ་གཅིག་གི་བར་དུ་བཞག་ནས་ཀྲ་ཀནྟི་དང་། མུ་ཟིའི་ཕྱེ་མས་བཏབ་ན་དེ་ནས་རྡོ་རྗེ་འབྱར་བྱེད་དེ་དག་དང་བར་འགྱུར་སྟེ།
སྒོ་གླེགས་སམ། རྩིག་ངོས་སམ། གང་འདོད་པ་ལ་བཏུན་པའི་ཕྱིར་གྱིས་བསྐུས་ན་རྡོ་རྗེ་འབྱར་བྱེད་དེ་ཨ་ཤོ་ཀའི་མེ་ཏོག་འདྲ་བར་དམར་པོར་འགྱུར་རོ། །ལས་ཐམས་ཅད་ལ་ཡང་ཉེ་བའི་སྙིང་པོ་དང་ལྡན་པར་འགྱུར་རོ། །གཏེར་
སྒོ་འདི་དག་ངས་བཤད་དེ། གཏེར་རྣམས་འདི་ན་ཡོད་དོ་ཞེས། །མངོན་པའི་རྟགས་ནི་གང་དག་གིས། །ངེས་པར་རྟོགས་པར་འགྱུར་འདི་ཉོན། །རྫས་ཀྱི་ཚད་ནི་ཇི་ཙམ་པ། །དེ་ཀུན་བདག་གིས་བཤད་པར་བྱ། །ཤིང་མེད་ཁྲད་ཁྲོད་གནས་དག་ན། །ས་ལ་ཐ་ཡི་ཤིང་འདྲ་བ། །དཀར་ཞིང་དྲི་ཞིམ་
སྣང་བ་ཡོད། །ཟབས་སུ་མི་འགྲེང་གཉིས་ཙམ་ན། །ནོར་རྣམས་ཁྲི་ཕྲག་དྲུག་ཡོད་དེ། །དེ་ནི་ཀླུ་དང་ལྡན་པ་ཡིན། །ཤིང་གི་གནས་ནི་དུ་མ་ན། །པདྨའི་འདབ་མ་འདྲ་བ་དང་། །པདྨ་ཆེན་པོའི་དྲི་ཞིམ་ཡོད། །ཟབས་སུ་མི་འགྲེང་གཉིས་ཙམ་ཡོད། །ནོར་ནི་
དྲུག་ཁྲི་ལྔ་སྟོང་ཡོད། །དེ་ནི་སྲིན་དང་ལྡན་པ་ཡིན། །ཤིང་མེད་པ་ཡི་གནས་དག་ན། །ས་ལ་ཐ་ལའི་འབྲུ་འདྲ་བ། །ཏ་ལའི་དྲི་དང་ལྡན་པ་ཡོད། །ཟབས་སུ་མི་འགྲེང་གཉིས་ཙམ་ན། །འབུམ་ལས་ལྷག་པའི་ནོར་ཡོད་དེ། །དེ་ནི་གནོད་སྦྱིན་ལྡན་པ་ཡིན། །ཤིང་

མེད་པ་ཡི་གནས་དག་ན། །ས་ལ་ཏ་ལའི་ཤིང་འདྲ་བ། །གཅིག་པུ་དྲི་ཞིམ་ལྡན་པ་ཡོད། །ཟབས་སུ་མི་འགྲེང་གསུམ་ཙམ་ན། །ནོར་རྣམས་བྱེ་བ་སྙེད་ཡོད་དེ། །དེ་ན་རྣམ་ཐོས་བུ་ཡང་གནས། །ཤིང་མེད་པ་ཡི་གནས་རྣམས་ན། །ས་ལ་ཏ་ཡི་མིག་
འདྲ་བ། །དཀར་ཞིང་དྲི་ཞིམ་ལྡན་པ་ཡོད། །ཟབས་སུ་མི་འགྲེང་གསུམ་ཙམ་ན། །ནོར་རྣམས་བཞི་ཁྲི་དྲུག་སྟོང་ཡོད། །དེ་དག་ན་ནི་དབང་ལྡན་ཡོད། །ཤིང་མེད་པ་ཡི་གནས་རྣམས་ན། །ཇི་སྟེ་ས་ལའི་ཁྲི་འདྲ་བ། །རྐང་པ་བཞི་ལ་ལྡན་པ་སྟེ། །ཀེ་ཏ་
ཀ་ཏི་དྲི་ཅན་ཡོད། །དེ་ན་བྱེ་བ་སྙེད་ཡོད་དོ། །དེ་ནི་ཀླུ་དང་ལྡན་པ་ཡིན། །མཚན་རྟགས་ཆེན་པོ་འདི་དག་ནི། །བཤད་ཟིན་གཞན་ཡང་ང་ལས་ཉོན། །དབྱར་ཞིང་སྐམ་ལ་རྩུབ་པ་དང་། །རྒུན་ཞིང་གསིང་མར་གྱུར་པ་དང་། །མཛའ་བོ་དེ་བཞིན་བྱི་ལ་སྦྲུལ། །
ལྷན་ཅིག་གཅིག་ཏུ་གནས་པ་དང་། །དེ་བཞིན་སྦྲུལ་དང་ནེའུ་ལེ་གཉིས། །ཁུང་གཅིག་ན་ནི་ལྷན་ཅིག་གནས། །གང་ན་གོ་ད་དཀར་པོ་དང་། །བྱི་བ་དཀར་པོ་ལྷན་ཅིག་གནས། །གང་ན་ཝ་ནི་ཉལ་བ་དང་། །ཅི་སྟེ་ས་ཕྱོགས་དྲོ་བ་དང་། །ཁྱི་ནི་རྟག་ཏུ་གྲོང་བོར་
ནས། །དགོན་པའི་ཕྱོགས་གཅིག་གང་ན་ཉལ། །ཤིང་ནི་ཐུར་དུ་མི་འཁྲུང་པ། །ཅི་སྟེ་ཐུར་དུ་འཁྲུང་འགྱུར་དང་། །འོ་མ་མེད་ལས་འོ་མ་འབྱུང་། །མུ་ཏུའི་རྩ་ནི་གདུགས་འདྲ་དང་། །རྒྱལ་མཚན་འདབ་མ་འདྲ་བ་དང་། །ཤིང་རྣམས་གང་དག་བུམ་པ་འདྲ། །རྩྭ་
ལས་རྩྭ་འབྱུང་ཡལ་ག་འཕྱང་། །རྩུབ་ཅིང་ཁ་རྔ་འདྲ་བ་དང་། །འདབ་མ་སྐམ་ཞིང་ལོ་མ་སྣུམ། །དུས་མ་ཡིན་པར་མེ་ཏོག་འབྱུང་། །རྟག་ཏུ་འབྲས་བུ་ཆགས་པ་དང་། །ཚེར་མ་མེད་ལས་ཚེར་མ་འབྱུང་། །ཚེར་མ་ཅན་ལས་ཚེར་མ་མེད། །རྩེ་གཅིག་ཤིང་རིགས་
གང་ཡིན་པ། །ཅི་སྟེ་ཁྲ་བྲག་གྱུར་པ་དང་། །ཤིང་དྲུང་གྲོག་མཁར་ཕུང་ཆེན་ཡོད། །དུས་མ་ཡིན་པར་མེ་ཏོག་འབྱུང་། །ཤིང་དྲུང་གང་ན་གཟུགས་ཡོད་ལ། །རྟག་ཏུ་འབྲས་བུ་མཆོད་པ་དང་། །མཆོད་པ་མེད་ཅིང་གཟི་བྱིན་ལྡན། །ཤིང་དྲུང་གིས་ནི་ཕྱོགས་

གཅིག་ན། །བདེ་བྱེད་མཚན་ནི་སྣུམ་བྱེད་ཡོད། །ཤིང་དྲུང་གི་ནི་ཕྱོགས་གཅིག་ན། །ཅི་སྟེ་རྡོ་ལེབ་ཡོད་པ་དང་། །གྲོང་གི་ཕྱོགས་གཅིག་མ་མོ་ཡི། །གནས་ཡོད་མཆོད་པ་མེད་པ་དང་། །ཁྲོན་པའི་ཕྱོགས་གཅིག་སངས་རྒྱས་གཟུགས། །
ཅི་སྟེ་ཁྲོན་པའི་ཕྱོགས་གཅིག་ན། །བདེ་བྱེད་མཚན་མ་སྟེགས་བུར་བཅས། །རྟག་ཏུ་སྣུམ་པ་གནས་པ་དང་། །ཁྲོན་པ་ཡི་ནི་ཕྱོགས་གཅིག་ན། །རྡོ་ལེབ་མིང་དང་ལྡན་པ་ཡོད། །ཞིང་གི་ཕྱོགས་གཅིག་ཀླུ་རྣམས་ཀྱིས། །མཆོད་ཅིང་སྟེགས་བུར་བཅས་པ་དང་། །རྟག་
ཏུ་སྣུམ་དང་ལྡན་པ་ཡོད། །ཞིང་གི་དབུས་ནི་གང་དག་ན། །རྡོ་ཡི་ཕུང་པོ་ཆེན་པོ་ཡོད། །དེ་ན་ཁུང་གི་སྒོ་ཡང་ཡོད། །ཞིང་དག་གི་ནི་དབུས་རྣམས་ན། །རྡོ་ལེབ་ཟུར་གསུམ་ཡོད་པ་དང་། །རྫིང་བུ་དག་གི་འགྲམ་དག་ན། །མ་མོ་རྣམས་ཀྱི་གནས་ཡོད་
པ། །མཆོད་པ་མོད་ཅིང་གཟི་བྱིན་ལྡན། །མཆོད་དུ་ཟིན་ཀྱང་གཟི་མེད་ན། །ངེས་པར་དེ་ན་ནོར་ཡོད་དོ། །གྲོང་གི་ཕྱོགས་གཅིག་སླར་སོང་ནས། །རྭ་དང་རྨིག་པས་རྐོ་བར་བྱེད། །ཁང་པ་བརྩེགས་པའི་ཁ་དག་ནས། །བྱ་རོག་ཐུར་དུ་བལྟ་བཞིན་དུ། །རྟག་ཏུ་
སྐད་ཀྱང་འབྱིན་པར་བྱེད། །རྫིང་བུ་ཡི་ནི་འགྲམ་དག་ན། །ཅི་སྟེ་གནོད་སྦྱིན་གཟུགས་ཡོད་དང་། །ཆུ་ཀླུང་འགྲམ་ན་སངས་རྒྱས་གཟུགས། །དབང་ཕྱུག་ཆེ་དང་ལྷན་ཅིག་གནས། །གྲོང་དང་གྲོང་གི་ཕྱོགས་གཅིག་ན། །ས་འབིགས་ཞེས་བྱ་རྡོ་ལེབ་ཡོད། །གྲོང་
རྣམས་ཀྱི་ནི་དབུས་དག་ན། །སྟེགས་བུ་མེད་པའི་མཆོད་ཤིང་ཡོད། །ཀླུ་ཡི་མཆོད་ཤིང་སྟེགས་བུ་དང་། །ལྷན་ཅིག་ན་ནི་གནས་པ་ཡོད། །དེ་དག་གི་ནི་ལྷོ་ཕྱོགས་ན། །གྲོག་མཁར་ཕུང་པོ་ཆེན་པོ་ཡོད། །གྲོང་ངམ་ཡང་ན་དགོན་པ་ན། །མ་མོའི་
གནས་ནི་མཆོད་པ་མེད། །སངས་རྒྱས་གཟུགས་དང་ཉི་མའི་གཟུགས། །ཅི་སྟེ་དེ་དག་གཡོན་ཕྱོགས་ན། །གང་ལ་ཉི་མའི་གཟུགས་ཡོད་པ། །ཀླུ་དག་དང་ནི་ལྷན་ཅིག་གནས། །ཞིང་དབུས་རྡོ་ཕུང་ཆེན་པོ་ཡོད། །གྲོག་མཁར་དང་ཡང་ལྷན་ཅིག་གནས། །

ས་གཞི་དག་ཀྱང་དུད་པར་འཐུལ། །རྩྭ་ཡང་རྙིངས་པར་འགྱུར་བ་སྟེ། །རྟག་ཏུ་ཡང་ནི་གཟི་བྱིན་ལྡན། །ཆུ་ཡང་ཤིན་ཏུ་སྐམ་པར་འགྱུར། །ཆུ་ངོགས་ཕ་གུ་ཕུང་ཆེན་ཡོད། །ས་དག་ཀྱང་ནི་བྱེ་མ་འདྲ། །ཁང་པ་བརྩེགས་པའི་ཕྱོགས་གཅིག་ན། །
རྟག་ཏུ་དུད་པ་འདྲ་བར་འཐུལ། །གྲོང་ངམ་ཡང་ན་དགོན་པའམ། །ཞིང་ངམ་ཡང་ནི་ཁྱིམ་དག་ན། །ཁྲ་དང་ཕུག་རོན་ལྷན་ཅིག་ཏུ། །གང་ན་ཤིན་ཏུ་མཛའ་བར་འགྱུར། །གྲོང་ངམ་ཆའམ་བཀྲེས་པའམ། །སྐོམ་པ་ཡིས་ནི་གཟིར་བཞིན་དུ། །དེ་ལྟར་དུས་
ནི་ཐམས་ཅད་དུ། །ཕྱོགས་གཅིག་ཏུ་ནི་དགའ་བར་འཛིན། །ཞིང་དག་གི་ནི་དབུས་དག་ཏུ། །རྡོ་ལེབ་མིང་དང་ལྡན་པ་ཡོད། །ཤིང་རྣམས་གང་ལ་བ་ལང་རྫི། །བྲུ་བས་གཟིར་ཅིང་སྐོམ་པས་གཟིར། །རྟག་ཏུ་འཛེག་ཅིང་རྩེ་བ་དང་། །སྡུག་བསྔལ་དེ་བཞིན་རབ་བདེར་
འཛིན། །དུས་ཀུན་དུ་ནི་བ་ལང་རྫི། །གང་དུ་དེ་བཞིན་རྩེ་བྱེད་ཅིང་། །གྲང་ཞིང་གྲང་བ་མེད་པར་འཛིན། །དེ་བཞིན་དུ་ནི་སྐྱོ་བ་མེད། །པདྨའི་སྡོང་བུ་གཅིག་པ་ལ། །པདྨ་ལ་ནི་པདྨ་སྐྱེས། །དེ་བཞིན་ཨུཏྤལ་ཀུ་མུ་ད། །ཅི་སྟེ་ཁ་དོག་ངན་པར་འགྱུར། །དྲི་ཡང་ཞིམ་པར་མི་འགྱུར་
དང་། །འདབ་མ་དག་ཀྱང་འཁུམས་པ་དང་། །གང་ལ་འབྲས་བུ་མི་ཆགས་པ། །དེ་ལ་པདྨ་ཀུ་མུ་ད། །བ་གཅིན་དང་ནི་རྟ་གཅིན་དང་། །རྡོ་ཐལ་རྣམས་དང་ལྷན་ཅིག་སྦྱར། །དེ་དང་དེ་ཡི་མེ་ཏོག་དང་། །ཆུ་རྣམས་ལ་ནི་གཏོར་བྱས་ན། །གང་ན་གཏེར་དེ་གནས་པ་ཡི། །ས་
ཕྱོགས་དེ་དང་ཆུ་རྣམས་དང་། །མེ་ཏོག་སྔོན་པོ་དམར་པོར་འགྱུར། །རྟག་ཏུ་ས་ཕྱོགས་གང་དག་ན། །ཆུ་ནི་ཁྱོར་གང་ཙམ་ཡོད་ལ། །ས་གཞི་དེ་ཡང་དྲོ་བ་དང་། །ཁང་པ་བརྩེགས་པ་གང་དག་ལ། །རྡོ་ཐལ་སྔོན་པོར་འདུག་པ་དང་། །བྱི་རུ་ལྟ་བུར་མདོག་དམར་ཞིང་། །བར་བར་
དུ་ནི་གནས་པ་དང་། །ཡང་ན་རབ་ཏུ་མདོག་སྔོ་ཞིང་། །ཕུག་རོན་མདོག་ལྟར་འདུག་ཀྱང་རུང་། །དེ་བཞིན་རོ་ནི་ཁ་བ་དང་། །གང་ན་གཟུགས་ནི་མདོག་སྣུམ་ཞིང་། །བཀྲུས་ཀྱང་ཤིན་ཏུ་སྐམ་པ་ཡོད། །དེ་བཞིན་དྲི་དང་མེ་ཏོག་ཕྲེང་། །དེ་ནི་སྙིང་པོར་ལྡན་པ་སྟེ། །ཡན་ལག་

འབྲུ་མར་བསྐུས་པ་ལ། །མི་ཡི་ལྕེ་ཡིས་བལྡག་བྱས་ན། །མྱུར་དུ་ཡལ་བར་འགྱུར་བ་དང་། །གང་ན་རྡོ་རྗེའི་གཟུགས་ཡོད་པ། །ཐུར་དུ་ཡང་ནི་ལྟ་བར་བྱེད། །ཕྱོགས་གཅིག་ན་ནི་ལྷ་གཞན་གྱི། །ཤིང་ངམ་ཡང་ན་རྡོ་གཟུགས་ཡོད། །མགོ་ལ་
རྫ་ཐོགས་ཅི་སྟེ་སྣང་། །རྫིང་བུ་འགྲམ་གྱི་གནས་དག་ན། །ནོར་ལྷ་ཡི་ནི་བུ་ཡི་གཟུགས། །ནུབ་ཕྱོགས་ཕྱོགས་པ་དེ་འདུག་བཞིན། །ཤར་ཕྱོགས་ལོགས་སུ་བལྟ་བ་དང་། །རྫིང་བུའི་འགྲམ་ན་མ་མོ་གནས། །ནུབ་ཕྱོགས་ཕྱོགས་པ་དེ་འདུག་བཞིན། ཤར་
ཕྱོགས་ལོགས་སུ་བལྟ་བ་དང་། །ཁྲོན་པའི་ཕྱོགས་གཅིག་སངས་རྒྱས་གཟུགས། །ཅི་སྟེ་དུར་ཁྲོད་གནས་དག་ན། །སངས་རྒྱས་གཟུགས་འདྲ་སྣང་བ་དང་། །ཆུ་མེད་ཕྱོགས་ན་སྦྲུལ་གཟུགས་དང་། །གང་ན་མི་རོ་མགོ་མེད་འདྲ། །རྡོའམ་ཡང་ན་ཤིང་ལ་
བྱས། །ལམ་གྱི་བཞི་མདོ་གང་དག་ན། །ཅི་སྟེ་དབང་པོའི་གཟུགས་སྣང་ཞིང་། །སྒྲ་ཆེན་ལ་ནི་ཞོན་བཞིན་དུ། །བུམ་པ་མགོ་ལ་ཐོགས་ནས་ཀྱང་། །ཐུར་དུ་ལྟ་བ་ཡོད་པ་དང་། །མིག་རྣམས་ཡོངས་ཀྱི་མི་གནས་པའི། །ཤིང་མེད་པ་ཡི་གནས་དག་ན། །
མ་མོ་དག་ཀྱང་གནས་འགྱུར་ལ། །མཚན་ནི་ཐུར་དུ་ལྟ་བ་དང་། །ཤིང་གི་ཚལ་ནི་གང་དག་ན། །ཅི་སྟེ་གླང་ཆེན་གཟུགས་ཡོད་དང་། །གྲོང་ནས་ཀྱང་ནི་རྒྱང་རིང་བ། །གང་ན་ཕག་གི་གཟུགས་ཡོད་པ། །རྔོའམ་ཡང་ན་ཤིང་ལས་བྱས། །ཤིང་གི་ཚལ་གྱི་
དབུས་དག་དང་། །ཤིང་མཚམས་བར་ལ་སོགས་པ་ན། །དབང་ཕྱུག་གི་ནི་གཟུགས་ཡོད་དེ། །དེ་ནི་རྟག་ཏུ་ཐུར་དུ་བལྟ། །ཁྲོན་པའི་ཕྱོགས་གཅིག་གནོད་སྦྱིན་གནས། །གཟུགས་བརྙན་སྟེགས་བུར་བཅས་པ་སྟེ། །གང་ན་ཀླུ་དང་གནོད་སྦྱིན་དང་། །ཡང་
ན་གཏུམ་པོའམ་བརྒྱ་བྱིན་གྱི། །ཤ་ཚུགས་འདྲ་ལ་ཤིང་རིངས་ཐོགས། །གང་ན་གླང་གི་གཟུགས་ཡོད་དང་། །གང་ན་གླང་གཟུགས་ཤིང་ལས་བྱས། །ཡང་ནས་ལས་བྱས་པ་ཡོད། །ཤིང་གི་ཚུལ་གྱི་ཕྱི་རོལ་ན། །གང་ན་ཀླུ་ཡི་རྡོ་གཟུགས་ཡོད། །

ལམ་གྱི་བཞི་མདོ་གང་དག་ན། །ཀླུ་ནི་གཅིག་པུ་གནས་པ་ལ། །ཤིང་རྣམས་ཀྱིས་ཀྱང་བསྐོར་བ་སྟེ། །མི་རྣམས་མེད་པའི་ས་ཕྱོགས་བཟང་། །ཆུ་མེད་པ་ཡི་དགོན་པ་ན། །ཀླུ་ཡི་མཆོད་ཤིང་ཁ་བྲག་བཞི། །དུར་ཁྲོད་ན་ནི་སྦྲུལ་འདྲའི་ཤིང་། །ཡང་ན་ཀླུ་ཡི་མཆོད་
ཤིང་ཡོད། །དུར་ཁྲོད་དེ་ན་ཤིང་ཡོད་པ། །ཀླུ་ཤིང་དག་གིས་ཀུན་ནས་བསྐོར། །དུར་ཁྲོད་གང་ན་ཁྱི་དང་ནི། །ཡང་ན་ཝ་ནི་རྟག་ཏུ་གནས། །གྲོག་མཁར་བ་ཡི་དུས་ཀུན་དུ། །ཝ་རྣམས་སྣང་བ་ཡོད་པ་དང་། །དགུན་ཞིང་གྲོང་གི་ཕྱི་རོལ་དུ། །ཕྱུགས་ནི་རྟག་ཏུ་ཉལ་བར་
བྱེད། །ཕག་གམ་ཡང་ན་ཁྱི་ཡང་རུང་། །སོང་ནས་རྟག་ཏུ་བལྟ་བ་དང་། །རྐང་ལག་དག་གིས་འབྲུ་བར་བྱེད། །བྱ་རོག་ས་ལ་འདུག་ནས་ནི། །རྟག་ཏུ་ཐུར་དུ་ལྟ་བར་བྱེད། །གྲོག་མཁར་གྱི་ནི་ཕྱོགས་གཅིག་ན། །གང་དུ་བྱ་རོག་མཆུ་དག་གིས། །རྟག་ཏུ་རྐོ་
བར་བྱེད་པ་དང་། །ས་ནི་རྟག་ཏུ་དུད་པར་འཐུལ། །གང་ནས་ནི་དཀར་པོར་སྣང་། །དབྱར་ཞིང་སྐམ་ལ་རྩུབ་པ་དང་། །རྟག་ཏུ་ཡང་ནི་དུད་པར་འཐུལ། གཙང་མའི་གནས་ནི་གང་དག་ན། །རྟག་ཏུ་མི་གཙང་སྣང་བ་དང་། །ཉི་མ་ནུབ་ཀ་དག་ཏུ་ཡང་། །དུད་པ་
མེད་པར་དུད་འདྲ་སྣང་། །དབྱར་ཞིང་དྲ་བས་ཁེབས་འགྱུར་ལ། །ཁོ་ར་ཁོར་ཡུག་གས་པ་དང་། །རྟག་ཏུ་ཡང་ནི་རབ་ཏུ་འབར། །ཤིང་དྲུང་གང་ན་རྟག་འབར་དང་། །གེལ་པ་ཁྲི་ཤིང་མེད་པ་ལ། །དབྱར་ཞིང་ཐོག་ཐོག་འབར་བ་དང་། །རྟག་ཏུ་ཚྭ་སྒོ་གང་དག་ན། །
ས་ནི་འཁོར་ལོ་གཤོལ་དག་གིས། །ཁེབས་པར་སྣང་བ་ཡོད་པ་དང་། །གྲང་བའི་དུས་ན་དྲོ་བ་དང་། །དྲོ་བའི་དུས་ན་གྲང་བ་དང་། །གཞན་དག་གིས་ནི་མ་འདྲེས་པའི། །ཤིང་གི་ཚལ་གྱི་དབུས་དག་ན། །མི་ཡི་ཐོད་པ་ཁུང་ཆེན་ཡོད། །ཨ་ནི་ན་ཛ་བྱི་ཛ་ན་ཀན་
ཏེ། །ཤིང་མེད་གནས་ན་གཏེར་ཡོད་དོ། །ཁང་པ་དོག་པ་དག་ན་ཡང་། །བྲག་ཅའི་སྒྲ་ནི་ཡོད་པ་དང་། །མེ་ཏོག་མེད་ཅིང་འབྲས་བུར་ལྡན། །འབྲས་བུ་ལ་ཡང་མེ་ཏོག་ཆགས། །ཤིང་གང་འབྲས་ལས་འབྲས་བུ་འབྱུང་། །མེ་ཏོག་ལས་ཀྱང་མེ་ཏོག་སྐྱེ། །

དཀྱིལ་འཁོར་བཞི་དང་འདྲ་བ་ཡི། །ས་ནི་རབ་ཏུ་འབར་བ་ཡོད། །གང་ན་ཡལ་ག་གཅིག་པུ་ལས། །འབྲས་བུ་འབྱུང་གི་གཞན་ལས་མིན། །ལོ་མ་མེད་པའི་ཡལ་ག་ལས། །མེ་ཏོག་གང་ནས་འབྱུང་བ་ཡོད། །ཉིན་པར་ལོ་མ་འཁུམ་འགྱུར་
ཞིང་། །མཚན་མོ་འདུ་བར་འགྱུར་བ་དང་། །ཤིང་གཉིས་རྩེ་མོའི་ཡལ་ག་དང་། །རབ་ཏུ་འདུ་བར་འགྱུར་བ་ཡང་། །རྫིང་གི་འགྲམ་ན་སྟོབས་བཟངས་གཟུགས། །ཤར་ཕྱོགས་སུ་ནི་ཁ་བལྟ་ཞིང་། །སྲེད་མེད་བུ་ཡང་ལྷོ་ཕྱོགས་འདུག །ཅི་སྟེ་རྫིང་གི་འགྲམ་དག་
ན། །སངས་རྒྱས་སྐུ་གཟུགས་ཡོད་པ་དང་། །ཀུན་དགའ་ར་བའི་ཕྱོགས་གཅིག་ན། །ཅི་སྟེ་གནོད་སྦྱིན་གཟུགས་ཡོད་དང་། །སྐུ་པ་ཡི་ནི་ལོ་མ་རྣམས། །ཕུར་མར་ཆགས་ཤིང་བུ་གུ་ཡོད། །ཅི་སྟེ་ཞིང་གི་དབུས་དག་ན། །ཀླུ་ཡི་གཟུགས་དང་སྐུ་ལ་ཀ །ཡང་ན་
བདེ་བྱེད་མཚན་ཡོད་དང་། །ཅི་སྟེ་ཞིང་གི་དབུས་དག་ན། །ཁྲོན་པ་འགའ་ཞིག་ཡོད་པ་དང་། །བདེ་བྱེད་གནས་ཀྱི་སྟེགས་བུ་ཡི། །ཕྱོགས་གཅིག་ན་ནི་གཟུགས་གཞན་ཡོད། །ལམ་གྱི་བཞི་མདོའི་ཤིང་དྲུང་ན། །ཅི་སྟེ་ཁྲོན་པ་ཡོད་པ་དང་། །དཱུར་བ་དཀར་པོའི་
ཕྱོགས་བཞི་ནས། །རྩྭ་རྣམས་ཀྱིས་ཀྱང་བསྐོར་བ་དང་། །ཤིང་ལ་ཅི་སྟེ་གཟུགས་ཡོད་དང་། །ས་ལ་སྦྲང་མས་རྟག་ཏུ་བསྐོར། །ས་ཕྱོགས་བཟང་པོར་དབྱར་གྱི་དུས། །སྲིན་ཕྱིས་ཕུང་པོ་སྣང་བ་ཡོད། །རྟགས་འདི་རྣམས་ལས་གཏེར་རྣམས་ཀྱི། །མཚན་མ་དག་ནི་
བརྟགས་བྱས་ཏེ། །འབྱུང་བ་དག་ནི་ངས་བཤད་ཟིན། །དེ་ནས་བླུགས་པར་བྱ་བའི་སྨན། །གང་དག་གིས་ནི་རྟོགས་འགྱུར་ནས། །རྟག་ཏུ་ཐེ་ཚོམ་མེད་འགྱུར་བའི། །བླུགས་སྨན་ཆོ་ག་མཉན་པར་གྱིས། །འབྲས་ཅན་ཞོས་སྦྱར་ཏིལ་ཕྱེ་དང་། །ཀུན་ཛ་ར་ཡི་མེ་ཏོག་
རྣམས། །མ་ཧེའི་འོ་མས་སྦྱར་བར་བྱ། །སྣ་མའི་མེ་ཏོག་བཏག་པར་བྱ། །ཀ་ར་བཱི་རའི་མེ་ཏོག་རྣམས། །མ་ཧེའི་འོ་མ་བ་གཅིན་སྦྱར། །སྲན་ཆུང་ཏིལ་དང་ལྷན་ཅིག་ཏུ། །ཆུ་ཡིས་སུ་ནི་བཏག་པར་བྱ། །ཀུན་དའི་མེ་ཏོག་བླངས་བྱས་ལ། །འོ་མ་ཙན་དན་དག་

དང་སྦྱར། །ཨིནྡྲ་བྲིག་ཤའི་ལོ་མ་རྣམས། །ཞོ་ག་ཆུ་དང་བཏག་པར་བྱ། །ཉ་ལྕིབས་ས་ནི་བླངས་ནས་ཀྱང་། །ཆུ་དང་ལྷན་ཅིག་བཏག་པར་བྱ། །ཀུན་དའི་མེ་ཏོག་མ་བྱེ་བ། །བླངས་ནས་འོ་མས་སྦྱར་བར་བྱ། །ཨརྐ་དམར་པོའི་ལོ་མ་རྣམས། །འོ་མ་ཡིས་ནི་
སྦྱར་བར་བྱ། །ཨ་ཤ་ན་ནི་ཞོ་དང་སྦྱར། །མཁས་པས་བླུགས་སྨན་དེ་བྱས་ལ། །རང་བཞིན་གྱུར་པར་རྟོགས་ནས་ནི། །ནོར་ཡོད་པར་ནི་བསྟན་པ་ཡིན། །གཞན་དག་ཀྱང་ནི་བཤད་བྱ་སྟེ། །མ་བསྲེགས་པ་ཡི་ཁམ་ཕོར་དག །འབྲས་ཕྱེ་འདག་གུས་བསྐུས་
བྱས་ལ། །མཛུབ་གང་བརྐོས་ནས་གཞག་པར་བྱ། །རང་བཞིན་གཞན་དུ་གྱུར་ན་ནི། །ནོར་རྣམས་ཡོད་པར་ཤེས་པར་བྱ། །ཡུངས་ཀར་ཨ་དའི་མེ་ཏོག་རྣམས། །གོང་བུ་དག་ཏུ་བརྫིས་ནས་ནི། །རང་བཞིན་གྱུར་ན་ནོར་ཡོད་དོ། །འབྲས་རྣམས་ཏིལ་
དང་ལྷན་ཅིག་ཏུ། །ཞོ་དང་སྦྱར་ཏེ་གོང་བུར་བྱས། །ཁམ་ཕོར་ཁ་སྦྱར་ནང་བཅུག་ལ། །མཛུབ་གང་བརྐོས་པའི་འོག་ཏུ་བཞག །རང་བཞིན་གྱུར་ན་ནོར་ཡོད་དོ། །དགུན་སྨད་དུས་སུ་དུས་རྣམས་ནི། །མར་གྱིས་བཀང་སྟེ་བརྐོས་ནས་བཞག །ཞུ་བར་གྱུར་ན་ནོར་ཡོད་
དོ། །ལྷ་རྣམས་སེམས་ཅན་དོན་གྱི་ཕྱིར། །བླུགས་སྨན་དམ་པའི་ཆོ་ག་རྣམས། །བདག་གིས་སུ་ནི་བཤད་པ་ཡིན། །སེམས་ཅན་རྣམས་ལ་ཕན་གདགས་ཕྱིར། །མིག་སྨན་གང་གིས་མིག་བསྐུས་ན། །ས་ལ་གཏེར་ཀུན་མཐོང་འགྱུར་བའི། །མིག་སྨན་རྣམས་
ཀྱང་བཤད་པར་བྱ། །འུག་པའི་མཆི་མ་ཟག་པ་ཡིས། །ལིག་བུ་མིག་ནི་བསྒོས་ནས་ཀྱང་། །ལྡོང་རོས་དག་དང་ལྷན་ཅིག་ཏུ། །བློ་ཅན་གྱིས་ནི་མིག་ཀྱང་བསྐུ། །ལྡོང་རོས་དག་ནི་ཤིང་མངར་དང་། །གི་ཝང་དང་ནི་འུག་པ་ཡི། །མིག་རྣམས་ལྷན་ཅིག་སྦྱར་བྱས་
ལ། །བློ་ལྡན་གྱིས་ནི་མིག་ཀྱང་བསྐུ། །ར་ཡི་གཅིན་དང་དེ་བཞིན་དུ། །བྱི་ལ་ཡི་ནི་གཅིན་བླངས་ལ། །འུག་པའི་མིག་དང་ལྷན་ཅིག་ཏུ། །དུད་པ་བཀག་སྟེ་བསྲེག་པར་བྱ། །ལིག་བུ་མིག་དང་སྦྱར་བྱས་ལ། །བློ་ལྡན་གྱིས་ནི་མིག་ཀྱང་བསྐུ། །རྡུལ་བྱེའུ་རང་ནི་

ཤི་བ་ཡི། །ཁོང་དུ་ལིག་བུ་མིག་བཅུག་ལ། །དུད་པ་བཀག་སྟེ་བསྲེགས་པ་ནི། །མིག་སྨན་རབ་ཏུ་བཟང་བ་ཡིན། །འཇོན་མོའི་མགོ་ཡི་ནང་དག་ཏུ། །ལིག་བུ་མིག་ནི་བཅུག་ནས་ཀྱང་། །དུད་པ་བཀག་སྟེ་བསྲེགས་ན་ནི། །མིག་སྨན་
རབ་ཏུ་བཟང་བ་ཡིན། །ནེའུ་ལེའི་མགོ་བོ་བླངས་ནས་ནི། །དེ་ཡི་ནང་དུ་ལྡོང་རོས་གཞུག །དུད་པ་བཀག་སྟེ་བསྲེགས་པ་ནི། །མིག་སྨན་རབ་ཏུ་བཟང་བ་ཡིན། །མཐིང་རིལ་སྒོ་ང་བྱ་གག་སྒོང་། །དེ་བཞིན་སྦྲུལ་མགོ་དེ་དག་རྣམས། །དུད་པ་བཀག་སྟེ་བཞག་
པ་ནི། །མིག་སྨན་རབ་ཏུ་བཟང་བ་ཡིན། །ན་མ་སྐ་རི་སྦྲུལ་མགོ་དང་། །ལིག་བུ་མིག་དང་སྦྱར་བྱས་ནས། །དུད་པ་བཀག་སྟེ་བསྲེགས་པ་ནི། །མིག་སྨན་རབ་ཏུ་བཟང་བ་ཡིན། །རང་ཤི་བ་ཡི་སྦྲུལ་དག་གི། །ཁོང་དུ་ལིག་བུ་མིག་བཅུག་ལ། །ལྡོང་རོས་
དང་ནི་ལྷན་ཅིག་ཏུ། །དུད་པ་བཀག་སྟེ་བསྲེགས་པ་ནི། །མིག་སྨན་རབ་ཏུ་བཟང་བ་ཡིན། །ན་མ་སྐ་རི་གི་ཝང་དང་། །འུག་པ་ཡི་ནི་མིག་རྣམས་དང་། །འཇོན་མོའི་མགོ་དང་ཆ་མཉམ་པར། །དུད་པ་བཀག་སྟེ་བསྲེག་པར་བྱ། །ལུང་བོང་གི་ནི་མིག་གཉིས་
དང་། །དེ་བཞིན་བྱི་བའི་མིག་གཉིས་དང་། །བྱ་རྒོད་མགོ་དང་ལྷན་ཅིག་ཏུ། །དུད་པ་བཀག་སྟེ་བསྲེགས་པ་ནི། །མིག་སྨན་རབ་ཏུ་བཟང་བ་ཡིན། །སྤྲེའུ་ཡི་མཇུག་མ་དག་དང་ནི། །དེ་བཞིན་འཇོན་མོའི་མིག་གཉིས་དང་། །སྦྲུལ་གྱི་མགོ་དང་ལྷན་ཅིག་ཏུ། །
དུད་པ་བཀག་སྟེ་བསྲེགས་པ་ནི། །མིག་སྨན་ཀུན་གྱི་མཆོག་ཡིན་ནོ། །སེམས་ཅན་རྣམས་ཀྱི་དོན་གྱི་ཕྱིར། །མིག་སྨན་གྱི་ནི་སྦྱོར་བ་མཆོག །ལྷ་རྣམས་དག་གིས་བཤད་པ་ཡིན། །མིག་སྨན་རྣམས་དང་བླུགས་སྨན་རྣམས་ལ་ནི་ཉེ་བའི་སྙིང་པོ་སྦྱར་བར་བྱའོ། །
གཏེར་གྱི་ལས་ཐམས་ཅད་ནི་རིག་སྔགས་ཀྱི་རྒྱལ་པོས་བྱའོ། །ཉེ་བའི་སྙིང་པོ་རྫོགས་སོ།། །།ངས་སྔར་བཤད་པའི་ཕོ་ཉ་མ་གང་ཡིན་པ་ཐམས་ཅད་ཀྱི་ཕོ་ཉ་མོའི་ལས་བཤད་པར་བྱའོ། །ལྷ་རྣམས་རིག་སྔགས་ཆེན་མོ་སྟོབས་ཆེན་མོའི་འཕྲུལ་གྱི་

རིག་སྔགས་དེ་དག་གི་རིག་སྔགས་ཀྱི་ཆོ་གའི་ལས་ཀྱང་བཤད་པར་བྱའོ། །དེ་ལ་ཕོ་ཉ་མོ་ཐམས་ཅད་ཀྱི་ལས་ནི་འདི་ཡིན་ཏེ། ལོངས་སྤྱོད་ཀྱི་གཞི་བསྒྲུབ་པར་འདོད་པས་ཞག་གསུམ་སྨྱུང་བར་བྱས་ལ། འཕགས་པ་ལག་ན་རྡོ་རྗེའི་མདུན་དུ་ལྷ་བཤོས་སྣ་
ཚོགས་ཕུལ་ནས་མཆོད་པར་བྱས་ཏེ། པྲི་ཡང་ཀུའི་ཤིང་གིས་མེ་སྦར་ལ་པྲི་ཡང་ཀུ་དང་གིའུ་ཝང་དང་། རིལ་བུ་སྟོང་རྩ་བརྒྱད་སྦྱིན་སྲེག་བྱས་ན་ཞག་བདུན་གྱི་ཐ་མར་ལོངས་སྤྱོད་ཀྱི་གཞི་འཐོབ་པར་འགྱུར་རོ། །མར་གྱི་ངོ་ཞག་བཅུ་བཞི་ལ་མཆོད་སྦྱིན་བྱས་
པའི་མཆོད་སྡོང་བླངས་ནས། མི་རོ་བསྲེགས་ན་རིག་སྔགས་ཀྱི་སྙིང་པོ་དང་ལྡན་པར་བཟླས་བརྗོད་བྱེད་བཞིན་དུ། །མདག་མ་བླངས་ལ་བླངས་པ་དེ་སྤྱན་གྱི་སྔགས་བཟླས་བརྗོད་བྱེད་བཞིན་དུ་ཕུག་རོན་གྱི་ཁུང་དུ་ཤི་བར་བྱས་ཏེ། ཕྱི་མའི་མར་གྱི་ངོ་ཞག་བཅུ་
བཞི་ལ་ལྷ་ཆེན་པོའི་གནས་སུ་སོང་ནས་ལོག་འདྲེན་གྱི་སྔགས་ཀྱིས་གཏོར་མའི་ཆོ་ག་ཐམས་ཅད་བྱས་ལ་ཞག་གཅིག་སྨྱུང་བ་བྱས་ཏེ། ལྡུམ་བུ་སོ་མའི་འདབ་མ་བདུན་བླངས་པའི་སྟེང་དུ་སོལ་བ་བཞག་ནས་གཟུགས་ཀྱི་ལྷོ་ཕྱོགས་སུ་རིག་སྔགས་བཟླས་
བརྗོད་བྱ་སྟེ། དུད་པ་འཐུལ་བའི་བར་དུ་བཟླས་བརྗོད་བྱས་ལ། དེ་བླངས་ནས་ནང་པར་བྲམ་ཟེ་རྣམས་དང་། དགེ་སློང་གི་དགེ་འདུན་ལ་མཆོད་སྟོན་བྱས་ལ། དེ་ནས་སྦྱར་བར་བྱ་སྟེ། ཐིག་ལེ་བྱས་ན་ལུས་མི་སྣང་བར་འགྱུར་ཞིང་ཚེ་ལོ་ལྔ་བརྒྱ་ཐུབ་ལ། ཕོ་ཉ་མ་ཐམས་
ཅད་དབང་དུ་འགྱུར་རོ། །ཟས་སུ་འོ་མའི་འདག་གུ་ཟ་ཞིང་ཚེས་གཅིག་ལ་བརྩམས་ཏེ། ཚེས་བདུན་གྱི་བར་དུ་རིག་སྔགས་བཟླས་བརྗོད་བྱས་ནས་ཞག་གཅིག་སྨྱུང་བ་བྱས་ལ་དཀའ་བཟློག་མའི་གནས་སུ་སོང་སྟེ། འབྲས་ཕྱེ་ལས་མདུང་རྩེ་གསུམ་པ་བྱས་པ་བརྒྱ་སྟོང་
སྦྱིན་སྲེག་བྱས་ན་ཡུལ་གྲུ་ཐོབ་པར་འགྱུར་རོ། །ཆོ་ག་འདི་ཉིད་ཀྱིས་མ་མོའི་གནས་སུ་སོང་ལ་མཆོད་པ་བྱས་ཏེ། །དབང་ཕྱུག་ཆེན་པོའི་སྔགས་ཀྱི་ལས་ཐམས་ཅད་བྱའོ། །མ་མོའི་གཙོ་བོའི་མདུན་དུ་འབྲས་ཕྱེ་ལས་ཁུར་བ་དཀྲིས་ཤིང་ལྡན་པར་བྱས་པ་བརྒྱ་སྟོང་

སྦྱིན་སྲེག་བྱས་ན་ཡུལ་གྲུ་སྦྱིན་པར་བྱེད་དོ། །མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བྱས་ཏེ་འཕགས་པ་ལག་ན་རྡོ་རྗེའི་མདུན་དུ་སྣ་མའི་མེ་ཏོག་ཁ་མ་བྱེ་བ་བརྒྱ་སྟོང་སྦྱིན་སྲེག་བྱས་ན་ཕོ་ཉ་མ་ཐམས་ཅད་ལས་སོ་ཅོག་བྱེད་པར་འགྱུར་རོ། །རིག་
སྔགས་ཀྱི་རྒྱལ་པོ་བསྒྲུབ་པའི་ལས་རྣམས་ལ་ནི་ཕོ་ཉ་མ་རྣམས་སྦྱར་བར་བྱའོ། །ཕོ་ཉ་མ་རྣམས་ལ་ནི་བདུད་རྩི་ཐབ་སྦྱོར་དང་། དགའ་བྱེད་གདོང་སྦྱར་བར་བྱའོ། །བདུད་རྩི་ཐབ་སྦྱོར་ལ་སོགས་པའི་གསང་སྔགས་ཐམས་ཅད་ལ་ནི་རིག་སྔགས་ཀྱི་རྒྱལ་པོ་དང་སྤྱན་སྦྱར་
བར་བྱའོ། །ཡང་ན་བཅོམ་ལྡན་འདས་མ་ཉི་ཚེ་སྦྱར་བར་བྱའོ། །གདོན་ནོ་ཅོག་དབྱེ་བར་འདོད་ནམ་ད་ནའི་ཚེར་མ་དུག་དང་ཁྲག་གི་ནང་དུ་སྨྱུགས་པ་བརྒྱ་སྟོང་སྦྱིན་སྲེག་བྱས་ན་འབྱེར་བར་འགྱུར་རོ། །མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བྱས་ཏེ་སྨིན་དྲུག་གི་
བུའི་གནས་སུ་སོང་ནས། རིག་སྔགས་ལན་བརྒྱད་བརྒྱ་བཟླས་བརྗོད་བྱས་ན་གཞན་གྱི་ཡིད་དུ་འོང་བར་འགྱུར་རོ། །སྐྱེས་པ་དང་བུད་མེད་དབང་དུ་བྱ་བར་འདོད་ན་མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བྱས་ཏེ། ལྷ་ཆེན་པོའི་གནས་སུ་སོང་ལ་གཟུགས་ཀྱི་
ལྷོ་ཕྱོགས་སུ་སེང་ལྡེང་གི་ཤིང་གིས་མེ་སྦར་ནས་ཡུངས་ཀར་གྱིས་ལན་བརྒྱ་སྟོང་སྦྱིན་སྲེག་བྱས་ན་སྐྱེས་པ་དང་། བུད་མེད་དབང་དུ་འགྱུར་རོ། །མར་གྱི་ངོ་ཚེས་བདུན་ལ་རྒྱུ་སྐར་ས་རི་ལ་བབ་པའི་ཚེ་བིལ་པ་ལས་ཤིང་བརྙན་བདུན་སྐྱེས་པ་བླངས་ནས་དུག་མོ་ཡུངས་ཀྱི་
ཤིང་དྲུང་ལན་སྟོང་བཟླས་བརྗོད་བྱས་ཏེ་བཙུགས་ན་གྲོང་ཁྱེར་གྱི་མི་ཐམས་ཅད་གཉིད་ལོག་པར་འགྱུར་རོ། །མར་གྱི་ངོ་ཞག་བརྒྱད་ལ་སྤོས་ཀྱི་རེང་བུ་བླངས་ཏེ། །མིའི་ཚིལ་གྱིས་བསྒོས་ནས་མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བྱས་ཏེ། །ལྷ་ཆེན་པོའི་གནས་
སུ་སོང་ནས་མཆོད་པ་རྒྱས་པར་བྱས་ལ་གཟུགས་ཀྱི་ལྷོ་ཕྱོགས་སུ་སྤོས་ཀྱི་འདག་གུས་མདུང་རྩེ་གསུམ་པ་བྲིས་ནས་དེའི་སྟེང་དུ་མིའི་ཐོད་པ་བཞག་པ་ལ་འདུག་སྟེ། ཐོད་པའི་སྣོད་མི་ཚིལ་གྱིས་བཀང་བའི་ནང་དུ་སྤོས་ཀྱི་རེང་བུ་བཞག་པ་ལས་ཐོད་པའི་ནང་དུ་དུད་པ་

ཆགས་པར་བྱས་ན་དེ་བླངས་པ་ལག་ན་རྡོ་རྗེ་དང་། ལྷ་ཆེན་པོ་དང་། གྲོགས་རྣམས་ལ་ཡང་སྐལ་བ་སྦྱིན་ཏེ། དེ་ནས་མིག་གཉིས་བསྐུས་ན་ལུས་མི་སྣང་བར་འགྱུར་ཞིང་། འདོད་དགུར་སྒྱུར་བའི་གཟུགས་ཅན་སྟོབས་པོ་ཆེ་ཚེ་ལོ་དགུ་བརྒྱ་ཐུབ་པར་འགྱུར་རོ། །གདོན་ལས་
ཐར་བར་བྱ་འདོད་ན་ཨ་ཤྭཏྠའི་ཤིག་གིས་མེ་སྦར་ཏེ་ལན་ཚྭ་དང་སྐེ་ཚེས་ལན་བརྒྱ་སྟོང་སྦྱིན་སྲེག་བྱས་ན་ཆོ་ངེ་བཏོན་ནས་གཏོང་བར་འགྱུར་རོ། །དགུན་ཟླ་ཐ་ཆུང་ས་ཡར་གྱི་ངོ་ཚེས་བཅུ་བཞི་ལ་ཞག་གཅིག་སྨྱུང་བ་བྱས་ཏེ། འཕགས་པ་ལག་ན་རྡོ་རྗེའི་མདུན་དུ་ཨརྐའི་ཤིང་གིས་མེ་
སྦར་ནས་དྲི་ན་ཤུ་ལེའི་མེ་ཏོག་བརྒྱ་སྟོང་སྦྱིན་སྲེག་བྱས་ན་ཕོ་ཉ་མོ་ཐམས་ཅད་ཀྱིས་དམ་པ་སྦྱིན་པར་འགྱུར་རོ། །ཚོགས་ཀྱི་བདག་པོ་ལྕགས་ཅན་ནི་ཕོ་ཉ་མ་ཐམས་ཅད་ཀྱི་གཞེན་འདེབས་པ་དང་། སྒྲུབ་པ་བྱེད་པར་ངས་བསྐོས་ཏེ། དེ་དྲན་པར་བྱས་ན་ཕོ་ཉ་མ་ཐམས་ཅད་མདུན་
ན་འཁོད་པར་འགྱུར་རོ། །ང་དང་ལྷ་རྣམས་ཀྱི་སྙིང་པོ་ལྟ་བུར་གྱུར་པ་འབྱུང་པོའི་བདག་པོའི་ཆོ་ག་རྒྱས་པ་བསྒྲུབ་པ་ཕོ་ཉ་མ་ཐམས་ཅད་ཀྱི་ཡིད་དང་འཐད་པ་ཚོགས་ཀྱི་བདག་པོ་ལྕགས་ཅན་བཤད་པར་བྱའོ། །ན་མོ་རཏྣ་ཏྲ་ཡ་སྱ། །ན་མ་ཤྩཎྜ་བཛྲ་པཱ་ཎི་སྱ། །མ་ཧཱ་ཡཀྵ་
སྱ་ནཱ་པ་ཏི་སྱ། ཏདྱ་ཐཱ། ར་བ་ར་བ། དྷ་བ་དྷ་བ། མ་ར་མ་ར། བྷཉྫ་བྷཉྫ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། གྲྀཧྞ་གྲྀཧྞ། ཙྪིནྡ་ཙྪིནྡ། བྷིནྡ་བྷིནྡ། ཧ་ན་ལ་ཧ་ཀ་བཛྲ་ན་སྭཱ་ཧཱ། ལྕགས་ཅན་སྙིང་ལྟ་བུར་གྱུར་པ། འབྱུང་པོའི་བདག་པོའི་ཆོ་ག་རྒྱས་པར་བསྒྲུབ་བོ། །
ཚོགས་ཀྱི་བདག་པོའི་ཕོ་ཉ་མ་ཐམས་ཅད་ཀྱི་ཡིད་དང་འཐད་པ་བཤད་དེ། ན་མོ་བཛྲ་པཱ་ཎ་ཡེ། ན་མ་ཨཱི་ཤྭ་རཱ་ཡ། ན་མོ་ནནྟ་ཀེ་ཤྭ་རཱ་ཡ། རུ་ལུ་རུ་ལུ། པི་ལ་ཏ་མ་ཏཾ་གི །ཙ་ལ་ལོ་ཧ་ཀ། །དུཥྚ་སཾ་གྲ་ཧ་མི་ནཾ། ཨྭ་བེ་ཤཱ་ཡ་སྭཱ་ཧཱ། འདི་ནི་ཚོགས་ཀྱི་བདག་པོ་ལྕགས་
ཅན་ཕོ་ཉ་མ་རྣམས་ཀྱི་གཞེན་འདེབས་པ་དང་། སྒྲུབ་པར་བྱེད་པ་ཐོགས་པ་མེད་པའི་ལས་ཅན་ནོ། །གདོན་དབབ་པ་ཐམས་ཅད་ལ་ནི་མེ་ཏོག་གིས་བྱའོ། །ལས་སོ་ཅོག་ལ་ཡང་ཚོགས་ཀྱི་བདག་པོ་ལྕགས་ཅན་བརྗོད་ནས་ལས་ཐམས་ཅད་བྱའོ། །ཞག་

གསུམ་སྨྱུང་བ་བྱས་ནས་མར་གྱི་ངོ་ཞག་བརྒྱད་ལ་ལག་ན་རྡོ་རྗེའི་མདུན་དུ་དཀྱིལ་འཁོར་སྐྱོང་ནུལ་གྱིས་བྱུགས་ཏེ་དྲི་དང་། མེ་ཏོག་དང་། བདུག་པ་ཕུལ་ནས་བཻ་ཀངྐ་ཏའི་ཤིང་གིས་མེ་སྦར་ལ་བིལ་པའི་ཡམ་སྲེག་ཤིང་བརྒྱ་སྟོང་སྦྱིན་སྲེག་བྱས། དེའི་འོག་ཏུ་
ཚོགས་ཀྱི་བདག་པོ་ལྕགས་ཅན་གྱིས་མཚན་མོ་རྨི་ལམ་དུ་བསྟན་པར་འགྱུར་རོ། །དེ་ནས་ཕོ་ཉ་མ་ཐམས་ཅད་བྱེད་པར་འགྱུར་རོ། །ཕོ་ཉ་མ་རྣམས་ཀྱི་ཆོ་ག་རྫོགས་སོ།། །།ལོག་འདྲེན་རྣམས་ཀྱི་རིག་སྔགས་བཤད་པ་གང་ཡིན་པ་དེ་ནི་སྙིང་པོའི་མཆོག་
ཀྱང་བཤད་པར་བྱ་སྟེ། ན་མོ་བཛྲ་པཱ་ཎི་སྱ། །ཨོྃ་པི་ཏི་ཏ་མ་ཏི་སྟཻ་ཧ། སྙིང་པོའི་ལས་རྣམས་འབྱུང་སྟེ་བསྒྲུབ་པ་ཐམས་ཅད་དང་། ལས་ཐམས་ཅད་ལ་ལས་འདི་ཉིད་བྱ་སྟེ། གུ་གུལ་དང་ནི་ཡུངས་ཀར་དང་། །གི་ཝང་ཤུ་དག་རུ་རྟ་དང་། །སུག་སྨེལ་ཡང་ནི་དེ་
བཞིན་ཏེ། །སྒྲོན་ཤིང་དང་ནི་ཐང་ཤིང་དང་། །ཙནྡན་དང་ནི་ཨ་ག་རུ། །ཀ་ལེ་ཡ་ཀ་པད་ཏྲ་དང་། །གེ་སར་འདི་རྣམས་ཆ་བསྙམས་ལ། །ཆུ་དང་ལྷན་ཅིག་བཏག་པར་བྱ། །གང་ན་སྦྱར་སྨན་འདི་གནས་པ། །དེར་ནི་འཇིགས་པ་མི་འབྱུང་སྟེ། །ཆོམ་རྐུན་མ་
ཡིན་མཚོན་རྣམས་མིན། །སྦྲུལ་རྣམས་མ་ཡིན་ལྷ་མིན་མིན། །ལག་ན་རྡོ་རྗེའང་འདིས་བསྐུལ་བས། །ས་སྟེངས་དག་ཏུ་རྒྱལ་བར་འགྱུར། །འདི་ཡིས་ལུས་ལ་བསྐུས་པ་ནི། །ལོག་འདྲེན་རྣམས་ལས་ཐར་བར་འགྱུར། །སྦྱར་སྨན་འདི་ནི་བྱས་ནས་ཀྱང་། །སྒྲུབ་
པ་ཐམས་ཅད་བསྒྲུབ་བྱས་ན། །ལོག་འདྲེན་རྣམས་ཀྱིས་མི་ཚུགས་ཏེ། །ལག་ན་རྡོ་རྗེས་བཤད་པ་བཞིན། །ལོག་འདྲེན་རྣམས་ཀྱང་གཞེན་འདེབས་པ། །སྒྲུབ་པ་བྱེད་པར་ནི་འཕགས་པ་ལག་ན་རྡོ་རྗེས་བདུད་རྩི་ཐབ་སྦྱོར་བསྐོས་སོ། །མར་གྱི་ངོ་ཞག་བརྒྱད་
ལ་ཞག་གཅིག་སྨྱུང་བ་བྱས་ཏེ། འཕགས་པ་ལག་ན་རྡོ་རྗེའི་མདུན་དུ་ཙནྡན་དམར་པོའི་ཁུ་བས་འཕགས་པ་བདུད་རྩི་ཐབ་སྦྱོར་བྲིའོ། །དེའི་གཡོག་སུམ་ཅུ་རྩ་གཉིས་ཀྱང་ཐལ་བས་བྲིའོ། །ལོག་འདྲེན་རྣམས་ལ་གཏོར་མ་སྦྱིན་པར་བྱའོ། །བདུད་རྩི་ཐབ་སྦྱོར་ཡང་

ལན་བརྒྱ་བཟླས་བརྗོད་བྱའོ། །དེ་ནས་ལག་ན་རྡོ་རྗེས་བཤད་པ་བཞིན་དུ་ལོག་འདྲེན་རྣམས་འགྲུབ་པར་འགྱུར་རོ། །ལོག་འདྲེན་རྣམས་ཀྱི་ཆོ་ག་རྫོགས་སོ།། །།འཕགས་པ་སྤྱན་རས་གཟིགས་ཀྱི་དབང་ཕྱུག་གིས་རིག་པ་མཆོག་ལས་བཅོམ་ལྡན་
འདས་མ་གོས་དཀར་ཅན་བཤད་པ་གང་ཡིན་པ་དེའི་ཕྱི་མའི་ལས་རྣམས་ངས་བཤད་ཀྱིས་ལྷ་རྣམས་ཉོན་ཅིག །སྒྲུབ་པ་ཐམས་ཅད་ལ་བསྲུང་བ་ཡིན་ཏེ། ཆོམ་རྐུན་དང་། སྟག་དང་། སྦྲུལ་དང་། ཆུ་སྲིན་ན་ཀྲ་དང་། མ་ཀ་ར་རྣམས་ལས་གནས་བསྲུང་བ་
དང་། མཚམས་བཅད་པ་དང་། ཁ་བཅིང་བར་བྱ་བ་རྣམས་ཡིད་ཀྱིས་བྱའོ། །གཏེར་བླང་བ་ནི་གཏེར་གང་ན་ཡོད་པ་དེར་སོང་ལ་སྨྱུང་བར་བྱས་ཏེ། དཀྱིལ་འཁོར་སྐྱོང་ནུལ་གྱིས་བྱུགས་ནས་བིལ་བའི་ཤིང་གིས་མེའི་ནང་དུ་ཡུངས་ཀར་མར་དང་སྦྱར་བས་ལན་བརྒྱ་
སྟོང་སྦྱིན་སྲེག་བྱས་ན་དེའི་འོག་ཏུ་གཏེར་སྟོན་པར་འགྱུར་ཏེ། དེ་ནས་བླངས་པར་བྱའོ། །མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ཏེ། འཕགས་པ་སྤྱན་རས་གཟིགས་དབང་ཕྱུག་གི་མདུན་དུ་མཆོད་པ་བྱས་ནས་སྣ་མའི་མེ་ཏོག་བརྒྱ་སྟོང་ལན་རེ་བཟླས་བརྗོད་
བྱས་ཏེ། འཕགས་པ་སྤྱན་རས་གཟིགས་དབང་ཕྱུག་གི་བྲང་དུ་བསྣུན་ལ་བཟླས་བརྗོད་རྫོགས་པའི་ཏིལ་གྱིས་ལན་བརྒྱ་སྟོང་སྦྱིན་སྲེག་བྱས་ན་དངོས་གྲུབ་གྲུབ་པའི་མཚན་མར་འཕགས་པ་སྤྱན་རས་གཟིགས་དབང་ཕྱུག་གི་ཡན་ལག་དང་ཉིང་ལག་འགུལ་བར་འགྱུར་རོ། །
དེ་ནས་གྲུབ་ནས་ཡུལ་གྲུའམ། ཡང་ན་གསེར་སྦྱིན་པར་འགྱུར་རོ། །ཟླ་བ་གཅིག་གི་བར་དུ་སློང་མོའི་ཟས་ཟ་ཞིང་རིག་སྔགས་བཟླས་བརྗོད་བྱས་ལ་དེ་ནས་རིག་སྔགས་འཆང་གིས་ཟླ་བ་ཉ་ལ་ཞག་གཅིག་སྨྱུང་བ་བྱས་ཏེ། རས་མ་ཉམས་པ་ལ་ཚོན་རྩི་སྦྱིན་མེད་པས་འཕགས་
པ་སྤྱན་རས་གཟིགས་དབང་ཕྱུག་འདྲིར་གཞུག་སྟེ། འདམ་བུ་མདའ་རྒྱུའི་མདོག་ཅན་ཐོར་ཚུགས་བྱས་པ་ལག་པ་གཡོན་པ་ན་པདྨ་ཐོགས་པ། གཡས་པ་ན་སྔགས་ཀྱི་ནོར་བུ་ཐོགས་ཏེ། བྲང་ན་དཔལ་བེའུ་ཡོད་པ། པདྨ་ལ་བཞུགས་པར་བྱ། གཡས་ཕྱོགས་

སུ་བཅོམ་ལྡན་