Kinh tạng Tây Tạng (Kangyur Đại Học) — 095_རྒྱུད་འབུམ།_ཛ

ཞི་བར་གྱུར་ནས་ཕྱིར་གསོ་བ་ལ་ནི་མངར་གསུམ་གྱི་སྦྱིན་སྲེག་བྱའོ། །ན་མོ་བཛྲ་པཱ་ཎི་རཱ་
ནུ་ག་ཏེ་ན་ཧི་རི་ཀི་རི། ག་མེ། བཛྲ་ཧཱ་ཎི་ཀུ་རུ་བྷིཿསྭཱ་ཧཱ། མེའི་སྔགས་སོ། །ན་མཿཏི་ནི་སྭཱ་ཧཱ། མིག་སྨན་གྱི་སྔགས་ཏེ། ལིག་བུ་མིག་དང་། རྡོ་ཕ་བང་ལོང་བུ་དང་། ཨུ་དུམ་བཱ་ར་དང་། སུ་ནོད་ཛ་དང་། ས་ཧ་ཛ་ར་དང་། གླང་པོ་ཆེའི་རྡུལ་རྣམས་ནི་དབང་དུ་
བྱ་བའི་མིག་རྩི་ཡིན་ཏེ། །གང་ལ་བལྟས་པ་དེ་དབང་དུ་འགྱུར་རོ། །ན་མོ་བཛྲེ་ཎ་ཧ་ན་ཧི་ས་མ་ཡེ་ན་ཏིཥྛ་ཏི་བཱ་ཤ་མི་ཡ་ག་རི། བྷུ་རི་བྷུ་རི། པ་ཏྲ་ཤཱི་ཏི་ནི་སྭཱ་ཧཱ། ཆུ་ཁྱོར་གང་ལ་བཟླས་བརྗོད་བྱས་ཏེ། །ཤིང་ལ་གཏོར་ན་ལོ་མ་རྣམས་རྙིས་པར་འགྱུར་རོ། །ནཱ་བྷེ་ནཱ་བྷེ། བ་

ན་ག་ཏ་དེ། བ་ན་ག་ཏ་དེ། བ་ནག་ཏ་དེ། སྟི་རི་སྟི་རི་སྭཱ་ཧཱ། ནགས་ཁུང་དུ་འགྲོ་ན་བསྲུང་བའི་སྔགས་སོ། །ན་མཿཀི་མོ་ཀ་མེ། ཀུ་མཱ་རི་ཎི་སྭཱ་ཧཱ། སྨན་གྱི་སྔགས་ཏེ་བུ་མོ་གཞོན་ནུས་བཀལ་བའི་སྐུད་པས་བྱ་ཞིང་རྐང་པ་སྣུམ་གྱིས་བསྐུ་བར་བྱའོ། །ན་མཿ
ཀུཎྜཱ་ནི་ཀུཎྜཱ་ནི་སྭཱ་ཧཱ། ཕོ་ཉ་མའི་རིག་སྔགས་བལྟ་བའི་སྔགས་ཏེ། རྫ་མཁན་གྱི་སྣོད་ནས་ཟས་དང་སྨན་བླང་བར་བྱའོ། །ན་མོ་གྷ་ཏེ་གྷ་ཏེ་གྷི་ཏི་ནི་སྭཱ་ཧཱ། གཞོན་ནུ་མའི་སྔགས་སོ། །ན་མཿཀུ་རུ་ཎ། བ་ཤེན། བ་ཤེན། བཛྲ་པཱ་ཎི། ཧི་ཧི་ནི། ཏི་རཱུ་པ་མ་མ་མ་ཀརྨ་ཀུ་རུ་སྭཱ་ཧཱ།
ལས་ཐམས་ཅད་བྱེད་པའོ། །ན་མཿཀི་རི་ཀི་རི་སྭཱ་ཧཱ། ཨུཏྐ་རུ་ཎི། ཏྲོ་ཊ་ནི་སྥོ་ཊ་ནི་སྭཱ་ཧཱ། གནོད་སྦྱིན་མོའི་རིག་སྔགས་ཏེ་ཅི་འདོད་པ་ཐམས་ཅད་འགྲུབ་པའོ། །ན་མཿཡེ་ལ་ལ་ཏེ་ལ་བྷི་ནི་བཛྲི་ཎི་སྭཱ་ཧཱ། །རྐང་པ་བསྐུ་བའི་སྔགས་སོ། །ན་མཿཀུམྦྷེ་ཀུམྦྷ་ནི་སྭཱ་ཧཱ། སྨན་
བླང་བ་དང་། ནགས་ཚལ་གྱི་ཤིང་ཏོག་བླང་བའི་སྔགས་སོ། །ན་མཿསྟེ་ཛ་ཛ་ནི། དྷུ་ན་དྷུ་ན་དྷུ་མ་ཏི་སྭཱ་ཧཱ། ཐམས་ཅད་དབྲོག་པའི་སྔགས་ཀྱིས་འགྲུབ་པར་འགྱུར་རོ། །ན་མོ་ཧུ་ཛ་ཧུ་ཛ་ཧུ་ཛ་ནེ་ཏི་སྭཱ་ཧཱ། སྨན་ནོ་ཅོག་བླང་བའི་སྔགས་སོ། །ན་མཿཤྱཱ་མ་རི་བི་མ་རི་སཾ་ཀྲ་
སཾ་ཀྲ་མ་ཎི་སྭཱ་ཧཱ། རྨས་པའི་རྨ་སྤོ་བའོ། །ན་མཿཧི་ནི། པ་ཙ་པ་ཙ། བནྡྷ་བནྡྷ་ནི་ཁྲི་རི་ཎི་སྭཱ་ཧཱ། ཁྲུས་བྱ་བའི་སྔགས་ཏེ་ལས་ཐམས་ཅད་བྱེད་པ་ཡང་ཡིན་ནོ། །ན་མཿཨ་རེ་ཏེ་མཉྩ་རི་པཉྩ་བ་བ་ན་བ་སི་ནི་ཏུ་ཏི་ཀཱ་ལ་ཀཱ་ལ་སི་སྭཱ་ཧཱ། གང་གི་མིང་གིས་སྐ་རགས་དུམ་བུ་དུམ་བུར་
བཅད་ན་མིང་དེ་བཅད་པར་འགྱུར་རོ། །ན་མཿཔུ་ཤ་མཉྩ་རི་ཛ་ཡཱ་མཉྫ་རི་པུ་ཤ་པཱུ་རི་ཀེ་ནཱི་ལ་གྲཱི་བེ་དྷུ་ན་དུ་བི་ནི་ཏི་རི་སྭཱ་ཧཱ། སྒོ་ལྕགས་དབྱེ་བ་དང་གཉིད་ལོག་ཏུ་གཞུག་པ་དང་དགྲོལ་བ་དང་དབྱུང་བའི་སྔགས་ཏེ། བརྡབ་པར་བྱའོ། །ཡུངས་ཀར་ལ་བསྔགས་པས་ཀྱང་སྒོ་ལ་
བསྣུན་པར་བྱའོ། །ན་མོ་བྷི་ན་ཡ་དུཾ་དུ་བྷི་ག་ཏཱ་ཡ་དུཾ་དུ་བྷི་ཐ། སུམྦྷ་སུམྦྷ་དྷ་རི་བྷསྨ་ཧ་ཧི། ས་མ་ཡཾ་མ་ཏེ་ན་ནུ་མ་ཏེ་ན་བྲྀཀྵ་མཱཛྙཱ་པ་ཡ་ཏི་ཨུཏྒ་ཏ་ནི་པ་ཏི་ནི་སྭཱ་ཧཱ། སྒོ་ལྕགས་དབྱེ་བ་དང་གཉིད་ལོག་ཏུ་གཞུག་པ་དང་དགྲོལ་བ་དང་། དབྱུང་བ་དང་། གཞོམ་པ་དང་། རབ་ཏུ་

གཞོམ་པ་དང་། གཞིག་པ་དང་། བསྒྱེལ་བ་དང་། གཅད་པའི་སྔགས་ཏེ། ལས་ཐམས་ཅད་བྱེད་པ་ཡང་ཡིན་ནོ། །ན་མོ་བཱ་རེ་བཱ་རེ་བཱ་ར་དཏྟེ་སིདྡྷ་སི་སྭཱ་ཧཱ། སྨན་བླང་བ་དང་གདོན་དང་རིམས་ཀྱིས་ཐེབས་སུ་གཞུག་པའི་སྔགས་ཏེ་ལས་ཐམས་ཅད་བྱེད་པ་ཡང་ཡིན་ནོ། །ན་
མཿཀི་རི་ཀི་རི་བཛྲ་པཱ་ཎི་ཏི་ལ་རི་ཏི་ལི་རི་ཎི་ལི་ཛ་རི་སྭཱ་ཧཱ། དབང་དུ་བྱ་བ་སྟེ་ཡུངས་ཀར་དང་། ལན་ཚྭ་དང་། ཅི་ཡང་རུང་བས་སྦྱིན་སྲེག་བྱའོ། །ན་མོ་མ་ཏི་མ་ཏིབྷྲ་མ་རི་བྷྲ་མ་རི་སྭཱ་ཧཱ། དབང་དུ་བྱ་བ་སྟེ་ཅི་ཡང་རུང་བས་བྱའོ། །ན་མོ་དིཾ་བྷེ་དིཾ་བྷི། དཾ་བྷེ་དཾ་བྷེ། དཾ་བྷེ་དཾ་བྷེ། བཛྲ་དྷི་ད་
ཡཙྪེ་ད་ནི་བེ་ད་ནི། ཡེ་མཻ་ཡ་མཻ། ཡ་མ་ཡ་མེ་བི་སྟི་བི་རི་བཛྲི་ཎི་ཙ་ཏེ་སྭཱ་ཧཱ། སེམས་ཅན་ཐམས་ཅད་བཅིང་བ་དང་། ལས་ཐམས་ཅད་བྱེད་པའོ། །ན་མཿཨུཏྟོ་ཊ་ཡ་ཏྲོ་ཊ་ནི་བྷིནྡ་པ་ནི། བྷིནྡ་པ་ནཾ་སྭཱ་ཧཱ། དབང་དུ་བྱ་བ་སྟེ་ཅི་ཡང་རུང་བས་སྦྱིན་སྲེག་བྱའོ། །ནི་སུམྦྷ་ནི་སུམྦྷ།
བཛྲ་ཧ་ན་ནི་ཏེ་བྷི་རི་བྷི་རི་སྭཱ་ཧཱ། རིག་སྔགས་དགྲོལ་བ་དང་ལས་ཐམས་ཅད་བྱེད་པའོ། །ན་མཤྩཎྜེ་རི་ག་ཤི་ནི་ཨསྠི་ནི་ཙྱཱ་སྱ་བི་ཤྱ་ཧེ་མིཛྫ་མྱེ་ཙཎྜ་ཨཱ་ཧ་ར་སྭཱ་ཧཱ། ཚུལ་ཇི་ལྟ་བ་བཞིན་དུ་འདུག་ལ་བཟླས་བརྗོད་ཅིང་མིང་བརྗོད་པར་བྱའོ། །ལས་ཐམས་ཅད་བྱེད་པ་ཡང་ཡིན་ནོ། །
ན་མཿཔ་ཀོ་པ་ཏི་ནི། མི་བྷི་མི་བྷི། ཏཾ་ཀེ་ཀེ་མཾ་མེ། ཀུ་རུ་ཀ་ར་པ་མ་བཛྲ་ཧ་ན་ནེ་སྭཱ་ཧཱ། སྒོ་ལྕགས་དབྱེ་བ་དང་། དབང་དུ་བྱ་བ་དང་གཞིག་པ་ལ་སྦྱིན་སྲེག་བྱའོ། ན་མཿབི་ཤི་ལི་བེ་ཤེ་ལེ། ཙི་ཏི་ལི། ཙི་ལི་བྷི་ཙི་ལི། ཙི་ལི་བྷི་ཙི་ལི། ཙ་རུ་ཎི་ཏི་ཙ་རུ་ཎི་སྭཱ་ཧཱ། མོ་མཚན་
བཅིང་བ་སྟེ། ལས་ཐམས་ཅད་བྱེད་པ་ཡང་ཡིན་ནོ། ན་མཿསུམྦྷ་ནི་སུམྦྷ་བནྡྷ་དྷ་ལ་ཧཱུྃ་ཨཱ་ན་ཡེ་སྭཱ་ཧཱ། ཅི་ཡང་རུང་བས་སྦྱིན་སྲེག་བྱའོ། །ཧི་ཧི་ཧི་ནི་ལི་ནི་ཨི་རི་ཏི་སུམྦྷ་བཛྲ་པཱ་ཎི། ཧུ་རུ་ཧུ་རུ་བྷཉྫཱ་ནི་སྭཱ་ཧཱ། བདུག་པ་ཐོགས་པ་དང་། མེ་ཏོག་སྟེང་དུ་འདོར་བའི་སྔགས་སོ། །
ན་མཿཧུ་ལུ་ཧུ་ལུ་ཧུ་ལཱ་ཡ། ཀུ་ལུ་ཀུ་ལུ་ཀུ་ལཱ་ཡ། ཀི་ལི་ཀི་ལི་ཀི་ལཱ་ཡ་སྭཱ་ཧཱ། འདི་ནི་ལག་ན་རྡོ་རྗེ་སྦྱིན་སྲེག་ཐོག་མར་བྱ་བ་ཡིན་ཏེ། གནོད་པར་བྱ་བ་ལ་སྦྱིན་སྲེག་བྱས་ནས་དེའི་འོག་ཏུ་བདུག་པས་དགྲོལ་བར་བྱའོ། །ཧི་རི་མི་རི་ཧི་ལི་མུ་ལི་ཛི་མུ་ལུ་མུ་ལུ་ཙི་སྭཱ་ཧཱ། ལག་

ན་རྡོ་རྗེ་སྨྲར་གཞུག་གོ། །པི་རི་ལི་ཙི་རི་ལི། བཛྲ་པཱ་ཎི་བྷི་རི་བྷི་རི་ཨ་ནེ་མེ་ཧི་སྭཱ་ཧཱ། དགོད་དུ་གཞུག་པའོ། །བི་ལི་བི་རི་ཎི། ཨི་ལི་ཀུ་རུ་བ་ཏི། པྲ་སིདྡྷ་ཀ་ཏོསྨི་ཀུ་རུ་མེ་བ་རཾ་སྭཱ་ཧཱ། མི་འཇིགས་པ་སྦྱིན་པའོ། །ན་མཿཀི་ལི་མི་ལི་ནི་རི་ནི། སུ་རུ་ཀུ་རུ།
ས་མཱ་ཡ་མ་ནུ་བརྟ་ཧྲྀ་ད་ཡཾ་བནྡྷ་སྭཱ་ཧཱ། སྤྱན་དྲང་བ་དང་ལས་ཐམས་ཅད་བྱེད་པའོ། །ན་མོ་རཀྵ་ཧ་རཱ་ཡ་ཨ་གྲ་གྲྀ་བ་རི་ཎི། རུ་ཎི་རུ་ཎི། བ་རི་ཎི་ཤི་མ་ནི། པྲ་སཱ་དྷ་ནི། བཛྲ་པཱ་ཎི། རཱཛྙཱ་པ་ཡ་ཏི་སྭཱ་ཧཱ། རབ་ཏུ་བསྒྲུབ་པ་སྟེ་བཟླས་བརྗོད་བྱེད་ཅིང་བདུག་པ་བསྲེགས་པར་བྱའོ། །
ན་མོ་བྷ་གྷ་རུ་གཊཱུ་གཎྜེ་ཛ་ཧ་ར་ཨཱུརྡྷཾ་སཏྱ། ན་ས་མ་ཡེ་ན་པྲ་སཱ་དྷ་ཡ་སི་བཛྲེ་ཎ་སྭཱ་ཧཱ། དགའ་བར་བྱ་བ་སྟེ། བིལ་བ་དང་ཤུ་ཏིས་ཁྲུས་བྱེད་ཅིང་ལས་བྱའོ། །ཧི་རི་མི་རི་ཨ་བ་ཧཱ་ཡཱ་མྲྀ་ཏ་ནཱ་མ་མ་ཧི་ས་མ་ཡ་མུ་པ་ཏཱིཀྵྞ་སྭཱ་ཧཱ། བཟླས་བརྗོད་བྱེད་ཅིང་བདུག་པ་བསྲེགས་པས་འཇིགས་
པ་འབྱུང་བར་མི་འགྱུར་རོ། །མུ་ནེ་མོ་ནེ། མུ་ནེ་མོ་ནེ། ཀཱརྱ་མི་དཾ་ཀུ་རུ་བྷཻ་ར་བ་བཛྲ་པཱ་ཎི་ཧ་ཧ་སྭཱ་ཧཱ། ལས་ཐམས་ཅད་བྱེད་པའོ། །བཛྲ་དྷུཾ་ད་མ་ཧཱ་བེ་གཾ་བཛྲ་གྷོ་ན་པ་ཡཾ་ཀཾ་བཛྲེ་བཛྲེ་ན་ཧ་ན་པ་ཏ་ཡ་ནི་པ་ཏ་ཡ་སྭཱ་ཧཱ། མིའི་གཙོ་བོ་དབང་དུ་བྱ་བ་སྟེ། སྦྱིན་སྲེག་གིས་བྱའོ། །ལས་
ཐམས་ཅད་བྱེད་པ་ཡང་ཡིན་ནོ། །ཀཱ་ལི་ཀཱ་ལི། ཀོ་ནི་ཀྵེ། ཨ་ཨི་ཏི་བི་ལི་ལི། པི་ལི་ལི། པི་ལི་ལི་སྭཱ་ཧཱ། ན་མོ་བནྡྷ་མི་ཏྱ་མུ་ཁཾ་ཨ་མུ་ཀ་བཛྲ་ཧསྟ་སྱ་བི་ནི་ན་ཨ་ལི་ཙི་ལི་བི་ལི་མི་ལི། ན་མོ་བཛྲ་པཱ་ཎི་སྱ་སྭཱ་ཧཱ། ལན་བདུན་བཟླས་བརྗོད་བྱས་ཏེ། །རས་ཀྱི་ཚར་
ཚར་ལ་མདུད་པ་དོར་བར་བྱའོ། །ན་མཿཙི་ལི་ཙི་ལི། ཀུཊྚུ་ཀུཊྚུ། སུ་ཁཱི་བྷ་བ་ཏུ་བཛྲ་པཱ་ཎི། མ་ཧཱ་ཡཀྵ་སེ་ནཱ་པ་ཏི་ཨི་མི་ནི། པུཥྤ་ནི་གྲྀ་ཧི་ཏྭ། ཨ་མུ་ཀོ་བྷ་ཤ་མ་གཙྪ་ཏི་སྭཱ་ཧཱ། སྣ་མའི་མེ་ཏོག་ལ་ལན་བརྒྱད་བརྒྱ་བཟླས་ཏེ། བཅོམ་ལྡན་འདས་ཀྱི་ཞབས་དྲུང་དུ་ནུབ་མོ་
ནས་དབུལ་ལོ། །ན་མོ་བཛྲ་རཱ་ཛྙཱ་པ་ཡ་ཏི་ཧི་ཧི་ཧི་ཧི་ཤུ་ཀྲ་ཤོ་ན་ཏི་བནྦྷ་ནི། མ་ཧཱ་བིདྱཱ་ཤུ་ཀྲ་མེ་བནྡྷ་རཀྵ་ཙ་མཱཾ་སྭཱ་ཧཱ། སྐུད་པ་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ནས། མདུད་པ་བྱས་ཏེ་རྐེད་པ་ལ་བཏགས་ན་ཁུ་བ་དང་ཁྲག་བཅིངས་པར་འགྱུར་ཏེ། ལག་ན་རྡོ་རྗེའི་ཆོ་ག་

རྒྱས་པ་ཆེན་པོ་ལས་ཕོ་ཉ་མ་དྲུག་ཅུ་རྩ་བཞི་རྫོགས་སོ།། །།དེ་ནས་ཕོ་ཉ་མོ་བཅུའི་ཆོ་ག་རྒྱས་པར་བཤད་པར་བྱ་སྟེ། རས་མ་ཉམས་པ་ལ་ཚོན་རྩི་སྦྱིན་མེད་པས། བཅོམ་ལྡན་འདས་ཀྱི་སྐུ་གཟུགས་ཆོས་འཆད་པའི་ཚུལ་དུ་བཞུགས་པར་བྲིའོ། །གཡོན་
ལོགས་སུ་གནོད་སྦྱིན་ལག་ན་རྡོ་རྗེ་བྲི་བར་བྱ་སྟེ། དེ་ཡང་འཁོར་དང་བཅས་པར་བྱའོ། །དེའི་མདུན་དུ་རྡོ་རྗེའི་གཟུགས་བྲིའོ། །གཡས་ལོགས་སུ་ནི་ཕོ་ཉ་མོ་བཅུ་འཁོར་དང་བཅས་པར་བྲི་སྟེ་རྒྱན་ཐམས་ཅད་ཀྱིས་བརྒྱན་ལ་ཐམས་ཅད་ཀྱི་མགོ་བོར་རྡོ་རྗེའི་མཚན་མ་ཡོད་པར་བྲིས་
ནས། སྐུ་གདུང་དང་ལྡན་པའི་མཆོད་རྟེན་གྱི་དྲུང་དུའམ་ཡང་ན་ཆེད་དུ་སྐུ་གདུང་བཞག་སྟེ་སྐུ་གཟུགས་ཁ་ནུབ་ཕྱོགས་སུ་བསྟན་ལ་སྐུ་གཟུགས་ཀྱི་མདུན་དུ་གསེར་དང་དངུལ་དང་ཟངས་རྣམ་གསུམ་ལས་བྱས་པའི་རྡོ་རྗེ་རས་སར་པ་མཉམས་པའི་སྟེང་དུ་བཞག་སྟེ་སྟེང་གཡོགས་
པར་བྱའོ། །དེའི་ངོས་གཅིག་ཏུ་ཐབ་ཁུང་རྡོ་རྗེའི་དབྱིབས་འདྲ་བར་བྱའོ། །དེ་ནས་ཉེ་བར་འགྲོ་བའི་གཞོན་ནུ་ཟླ་བ་ཕྱེད་གསུམ་ལ་བསྒྲུབ་པར་བྱ་སྟེ། གསོ་སྦྱོང་གི་ཡན་ལག་བརྒྱད་དང་ལྡན་ཞིང་ཟས་སུ་འོ་མ་དང་ཕྱེའི་འདག་གུ་ཟ་བ་དང་། དུས་གསུམ་དུ་ཁྲུས་བྱེད་
ཅིང་དུས་གསུམ་དུ་གོས་བརྗེ་བ་དང་། རྩྭ་དཱུར་བའི་སྟན་ལ་ཉལ་བར་བྱའོ། །རྟག་ཏུ་དུས་གསུམ་དུ་བདུག་པ་དང་། དྲི་དང་། མེ་ཏོག་དབུལ་ཞིང་རིག་སྔགས་བཟླས་བརྗོད་བྱའོ། །སྦྱིན་སྲེག་ཀྱང་ཐམས་ཅད་ཀྱིས་བྱ་སྟེ། སེང་ལྡེང་གི་ཡམ་སྲེག་ཤིང་དང་
ཡུངས་ཀར་དང་། སྦྲང་རྩི་མར་དང་སྦྱར་བའི་སྦྱིན་སྲེག་བྱའོ། །ལྷ་བཤོས་ཀྱང་རྟག་པར་དབུལ་བར་བྱའོ། །མར་གྱི་མར་མེ་ཅི་འབྱོར་པ་ཡང་མཚན་རངས་པར་སྦྱར་རོ། །བཅོམ་ལྡན་འདས་ལ་རྟག་ཏུ་མཆོད་པར་བྱའོ། །ཟླ་བ་ཕྱེད་ཕྱེད་ཀྱི་མཚམས་སུ་ཡང་ཞག་
གསུམ་སྨྱུང་བར་བྱའོ། །དེ་ལྟར་སྦྱར་ན་འགྲུབ་པར་འགྱུར་ཏེ། དོན་ཐམས་ཅད་བྱེད་དོ། །དེའི་ལས་རྣམས་འབྱུང་སྟེ། སྐྱེས་པ་དང་བུད་མེད་དབང་དུ་བྱ་བ་ལ་བ་རུ་རའི་ཤིང་ངམ་མར་དང་སྦྲང་རྩི་དང་ཡུངས་ཀར་རྣམས་ཀྱིས་ཞག་བདུན་གྱི་བར་དུ་སྦྱིན་སྲེག་བྱའོ། །

དེ་བཞིན་དུ་མིའི་གཙོ་བོའམ། མི་ཆེན་པོའམ། གནོད་སྦྱིན་དང་། མི་འམ་ཅི་ཡང་དབང་དུ་ཁུགས་པར་འགྱུར་ཏེ། ཅི་ནུས་ཀྱིས་སྨྱུང་བ་བྱའོ། །བྲམ་ཟེ་ལ་ནི་ཞག་གསུམ་རྒྱལ་རིགས་ལ་ནི་ཞག་གཉིས་རྗེའི་རིགས་ལ་ཞག་གཅིག་སྨྱུང་བར་བྱའོ། །དམངས་
རིགས་ལ་ནི་སྨྱུང་བ་བྱ་མི་དགོས་པར་ནིམ་པའི་ཡམ་སྲེག་ཤིང་གིས་བྱའོ། །གཞིག་པ་ལ་ནི་དུག་དང་ཁྲག་དང་འབྱུང་པོའི་ཟས་ཀྱིས་སྦྱིན་སྲེག་བྱའོ། །གདོན་གྱིས་ཐེབས་སུ་གཞུག་པ་ལ་ནི་ཨེ་རཎྜས་བྱའོ། །འཁྲུག་པར་བྱ་བ་ལ་ནི་བའི་མར་གྱིས་བྱའོ། །དབྱེ་
བ་ལ་ནི་སྦྲུལ་གྱི་པགས་པ་བརྗེས་པར་བྱའོ། །དབང་དུ་བྱ་བ་ལ་ནི་མར་དང་ནེའུ་ལེའུ་སྦུས་བྱའོ། །སྙིང་པོ་གཅད་པ་ལ་ནི་ལན་ཚྭ་དང་ཀ་རས་སྦྱིན་སྲེག་བྱའོ། །གདོན་དགུག་པ་ལ་ནི་གུ་གུལ་གྱི་བདུག་པས་བྱའོ། །དབབ་པ་ལ་ནི་གུ་གུལ་དང་ཏུ་ལ་སིའི་ལི་མས་བྱའོ། །
ཉའི་སྦྱིན་སྲེག་གིས་ནི་རྨི་ལམ་དུ་སྟོན་པར་འགྱུར་རོ། །བསྲུང་བའི་ལས་ལ་ནི་སྐུད་པའམ་ཐལ་བའམ་ཆུས་བྱའོ། །གཙུག་ཕུད་བཅིང་བ་ལ་ནི་ཆུས་བྱའོ། །དུག་ཞི་བར་བྱ་བ་ལ་ནི་བཟླས་བརྗོད་ཀྱིས་བྱའོ། །གདོན་དང་རྨི་ལམ་གྱི་འཇིགས་པ་ལ་ནི་ལན་ཚྭས་བྱའོ། །
སྒོ་ལྕགས་དབྱེ་བ་དང་། གདོན་དབང་དུ་བྱ་བ་དང་། སྐྱེས་པ་དང་བུད་མེད་དབང་དུ་བྱ་བ་དང་། གདོན་དབབ་པ་དང་། བརྡེག་པ་དང་། སྨྲར་གཞུག་པ་དང་། གཟིར་དུ་གཞུག་པ་ནི་རའི་གཟུགས་བྱའོ། །མར་གྱིས་བསྐུས་ན་ཕྱིར་འཚོ་བར་འགྱུར་རོ། །སྨྲར་
གཞུག་པ་དང་། ཁུས་འདེབས་སུ་གཞུག་པ་དང་། གར་བྱེད་དུ་གཞུག་པ་དང་། དུར་གཞུག་པ་དང་། ཆོ་རིགས་བྲི་བ་དང་། བྱི་བ་ཟར་གཞུག་པ་དང་། བུང་བ་ཟར་གཞུག་པ་ལ་ཡང་རའི་གཟུགས་བྱའོ། །མར་གྱིས་བསྐུས་ན་ནི་ཕྱིར་འཚོ་བར་འགྱུར་
རོ། །ལས་འདི་དག་དང་གཞན་ཡང་གྲངས་མེད་པ་དག་བྱེད་པར་འགྱུར་ཏེ། བརྡེག་པ་ནི་གཏུན་ཤིང་ངམ་སྐྲའི་ཐག་གུས་བྱའོ། །རོ་བསྲེགས་པའི་སོལ་བས་གཟུགས་བྲིས་ལ་ས་ལས་བྱས་པའི་རྡོ་རྗེས་བཀབ་ན་གདོན་དབུགས་ཆད་པར་འགྱུར་རོ། །མར་གྱི་ངོ་

ཞག་བཅུ་བཞི་ལ་ལམ་གྱི་བཞི་མདོའམ་ཚན་གཅིག་པུ་འདུག་པར་ཀ་ར་བཱི་ར་དམར་པོའི་མེ་ཏོག་ཁ་མ་བྱེ་བ་ལ་བཟླས་བརྗོད་བྱ་སྟེ་ནུབ་མོ་ནས་གཞག་ལ་ཕྱི་དེ་ཉིན་བར་གྱི་དུས་མཚམས་དང་པོར་ལན་བདུན་བདུན་བཟླས་བརྗོད་བྱས་ནས་དགྲ་ལ་བལྟས་ཏེ་བོར་ན་གདོན་གྱིས་ཐེབས་པར་
འགྱུར་རོ། །དགྲོལ་བ་ལ་ནི་ཀ་ར་བཱི་རའི་མེ་ཏོག་དཀར་པོས་བྱའོ། །ཆོ་ག་དེ་དག་ཉིད་ཀྱིས་སུག་སྨེལ་དང་། ཤུ་དག་དང་། ལིག་བུ་མིག་དང་། ཐིང་རིལ་གྱི་སྒོ་ངའི་ཤུན་ལྤགས་རྣམས་ཆ་བསྙམས་ཏེ་ཞག་གསུམ་སྨྱུང་བ་བྱས་ནས་བརྒྱ་སྟོང་བཟླས་བརྗོད་བྱའོ། །དེ་ལྟར་བྱས་ན་
ལུས་མི་སྣང་བར་འགྲུབ་པར་འགྱུར་རོ། །དེ་བཞིན་དུ་བྱ་གང་དང་། བྱ་གར་དང་། ནེ་ཙོ་དང་། བྱ་ཙ་ཤ་རྣམས་ལས་གང་ཡང་རུང་བ་གཅིག་གི་སྒོ་ངའི་ཤུན་ལྤགས་དང་། ཉ་རོ་ཧི་ཏའི་སྒོ་ངའི་ཤུན་ལྤགས་དང་། ཡུང་བ་དང་། པུ་ཙེ་ཤེལ་དང་། ཉ་མཁྲིས་རྣམས་
སྦྱར་བས་ཀྱང་ལུས་མི་སྣང་བར་བྱེད་དོ། །ཀྲྀཥྞ་བ་ལི་དང་། ཀུ་བེ་ར་དང་། ཀུ་བེ་ར་ཀྵི་རྣམས་ཆར་པའི་ཆུ་དང་བཏགས་པའི་རིལ་བུས་ལུས་བསྐུས་ན་རྒྱལ་པོའི་ཕོ་བྲང་དུ་འོངས་པ་དང་། སྐལ་བ་བཟང་པོ་དང་ལྡན་ཞིང་བཟའ་བ་དང་བཏུང་བ་དང་ལྡན་པར་འགྱུར་རོ། །ལུས་
མི་སྣང་བ་བསྒྲུབ་པ་ནི་ཞག་གསུམ་སྨྱུང་བ་བྱས་ཏེ། མར་གྱི་ངོ་ཞག་བཅུ་བཞི་ལ་ལུས་བསྐུ་བར་བྱའོ། །ཨ་ཤོ་ཨ་ཀ་དང་། སྤོ་ར་དང་། ཤ་བྷ་རའི་རྩ་བ་དང་། གཟེ་མ་དང་། འབྲས་དང་། རིམ་པ་འདི་དག་ནི་གདོན་གྱིས་མི་ཚུགས་པའི་སྦྱར་སྨན་ཡིན་ནོ། །གུར་
གུམ་དང་། རྒྱ་སྤོས་དང་། རུ་རྟ་དང་། སྤོས་དང་། ཀི་རི་ཀི་ར་ཎི་ནི་ཀ་དང་། ཨི་དྲ་བ་ནུ་ནིའི་རྩ་བ་དང་། ཨ་མྲྀ་ཏ་ལྔའི་འཇིམ་པ་རྣམས་ཀྱི་སྦྱར་སྨན་ནི་གདོན་གྱིས་འཇིགས་པ་ལ་ལུས་བསྐུ་བར་བྱའོ། །རིལ་བུའི་སྦྱོར་བ་ཐམས་ཅད་ནི་ཞག་གསུམ་སྨྱུང་བར་བྱས་ཏེ་མར་
གྱི་ངོ་ཞག་བཅུ་བཞི་ལ་ལན་བརྒྱད་སྟོང་བཟླས་བརྗོད་བྱས་ན་དེས་འགྲུབ་པར་འགྱུར་རོ། །ལན་ཚྭ་ལས་དུག་མའི་གཟུགས་བྱས་ལ་དེའི་རྐང་པའི་དྲུང་དུ་སྦྱིན་སྲེག་བྱས་ཏེ་རོ་བསྲེགས་པའི་སོལ་བས་གཟུགས་བྲིས་ལ་འཇིམ་པ་ལས་རྡོ་རྗེ་བྱས་པས་བཀབ་ན་དབུགས་ཆད་པར་འགྱུར་

རོ། །དེ་ནས་བློ་གྲོས་རྡོ་རྗེ་མ་ཉི་ཚེའི་ཆོ་ག་བཤད་པར་བྱ་སྟེ། ཡར་གྱི་ངོ་ཚེས་གཅིག་ལ་བརྩམས་ལ་སྐུ་གདུང་དང་ལྡན་པའི་སྐུ་གཟུགས་བཞག་སྟེ། ཕོ་ཉ་མའི་རི་མོའི་གཟུགས་ཆོ་ག་བཞིན་དུ་ནུབ་ཕྱོགས་སུ་བསྟན་ནས་དེའི་མདུན་དུ་བ་ལང་གི་ལྕི་བའམ་
ས་དཀར་གྱིས་དཀྱིལ་འཁོར་སྐྱོང་ནུལ་གྱིས་བྱུགས་ལ་དེའི་སྟེང་དུ་གུར་གུམ་དང་ཙནྡན་དཀར་པོས་བྱུགས་ཏེ། ཙནྡན་དཀར་པོའམ་ཡུངས་ཀར་གྱིས་རྡོ་རྗེ་བྲིའོ། །དེའི་ཕྱོགས་གཅིག་ཏུ་ཐབ་ཁུང་རྡོ་རྗེའི་དབྱིབས་འདྲ་བར་བྱས་ལ། དེ་ནས་ལས་བརྩམ་པར་བྱ་སྟེ། དུས་
གསུམ་དུ་ཁྲུས་བྱེད་ཅིང་དུས་གསུམ་དུ་གོས་བརྗེ་བ་དང་། ཕྱི་རོལ་དུ་རྩྭ་དཱུར་བའི་སྟན་ལ་ཉལ་བ་དང་། གསོ་སྦྱོང་གི་ཡན་ལག་བརྒྱད་དང་ལྡན་པ་དང་། ཁ་ཟས་དུས་གཅིག་ཏུ་འོ་མ་དང་། འབྲས་སཱ་ལུའི་ཆན་བཟའ་ཞིང་དཀའ་ཐུབ་སྤྱོད་པས་ནང་དུ་ལྷ་བཤོས་
དབུལ་བར་བྱའོ། །གཏོར་མ་ཡང་ཏིལ་ཟན་དང་། འབྱུང་པོའི་ཟས་སྦྱིན་པར་བྱའོ། །བདུག་པ་ནི་བཅོམ་ལྡན་འདས་ལ་ཨ་ག་རུ་དབུལ་ལོ། །ལག་ན་རྡོ་རྗེ་ལ་ནི་གུ་གུལ་དང་། ཐང་ཆུ་དབུལ་ལོ། །བཅོམ་ལྡན་འདས་ལ་ནི་མེ་ཏོག་དྲི་ཞིམ་པོ་རྣམས་དབུལ་ལོ། །
ལག་ན་རྡོ་རྗེ་ལ་ནི་ཀ་ར་བཱི་ར་དམར་པོ་དབུལ་ལོ། །མཚན་མོ་ནི་མར་མེ་གཉིས་དབུལ་བར་བྱ་སྟེ། དུས་གསུམ་དུ་ལན་བརྒྱད་བརྒྱ་བཟླས་བརྗོད་བྱས་ལ་སྦྱིན་སྲེག་ཀྱང་བྱའོ། །མཇུག་ཏུ་ཞག་གསུམ་སྨྱུང་བར་བྱས་ནས་ཟླ་བ་ཉ་ལ་མཆོད་པ་རྒྱས་པར་བྱས་ཏེ། ནམ་
ཞིག་རང་བཞིན་གྱི་ཚུལ་གྱིས་འོང་བའམ། ཡང་ན་འོད་སྟོན་པའམ། ཡང་ན་རྨི་ལམ་ལེགས་པར་སྟོན་པའམ། ཡང་ན་གནོད་སྦྱིན་མོ་འམ། རིག་སྔགས་སམ། ཅི་འདོད་པ་ཐམས་ཅད་སྦྱིན་པར་འགྱུར་གྱི་བར་དུ་ཕོ་ཉ་མའི་བཟླས་བརྗོད་གྲངས་མེད་པར་བྱའོ། །བདུག་
པའི་གསང་སྔགས་ལ། ན་མོ་བ་ར་མུ་ནི་བ་ར་མུ་ནི་བ་ར་མུ་ནི་པྲ་ཏཱིཙྪ་མེ་བྷ་ག་ཏྱོ་པ་ནི་ཏཾ་པུ་ཥྤ་གནྡྷ་མཱ་ལྱེ་པ་ཧ་ར་མ་ཨི་ལི་མི་ལི་ལི་མེ། ཨི་ལི་མི་ལི་ལི་མེ་སྭཱ་ཧཱ། འདིས་དུས་གསུམ་དུ་དྲི་དང་། བདུག་པ་དང་། མེ་ཏོག་གི་ཕྲེང་བའི་མཆོད་པ་དབུལ་བར་

བྱའོ། །འདི་ནི་སྦྱིན་སྲེག་གི་སྔགས་ཏེ། །ན་མཿཨིནྡྲཱ་ཡ་སྭཱ་ཧཱ། ཡ་མཱ་ཡ་སྭཱ་ཧཱ། བ་རུ་ཎཱ་ཡ་སྭཱ་ཧཱ། ཨགྣ་ཡེ་སྭཱ་ཧཱ། པྲ་ཛ་བ་ཏ་ཡེ་སྭཱ་ཧཱ། བྷ་ག་བ་ག་ཏེ་སྭཱ་ཧཱ། བི་རཱུ་པཱཀྵ་ཡ་སྭཱ་ཧཱ། བཱ་ཡ་བེ་སྭཱ་ཧཱ། ཀུ་བེ་རཱ་ཡ་སྭཱ་ཧཱ། བཛྲ་པཱ་ཎ་ཡེ་སྭཱ་ཧཱ། ཛྭ་ལ་ཛྭ་ལ་མི་ལི་
ཏི་ཨི་ཏི་མི་རི་ཛཱུ་ཧི་རི་སྭཱ་ཧཱ། གསང་སྔངས་འདིས་ཨ་པ་མརྒ་དང་། ས་མི་དང་། ཤིང་འོ་མ་ཅན་གྱི་ཡམ་སྲེག་ཤིང་གི་སྲེག་བླུགས་སྣ་རེ་ཡང་བརྒྱད་བརྒྱ་བརྒྱད་བརྒྱ་ཞོ་དང་སྦྲང་རྩི་དང་མར་གྱི་ནང་དུ་སྨྱུགས་ཏེ་སྦྱིན་སྲེག་བྱས་ལ་དེའི་འོག་ཏུ་གྲངས་ངེས་པར་ཕོ་ཉ་མའི་བཟླས་བརྗོད་བྱའོ། །
གསང་སྔགས་འདིས་བཅིང་བར་བྱ་སྟེ། ན་མོ་མ་ལི་མ་ལི་མ་ཧཱ་མ་ལི། ཨི་ཏི་མི་ཏི། ཡེ་ཏྲ་བི་ཧ་རི་ཎི་ཧིཾ་སྲ་ནནྟི་ཤ་བནྡྷ། མཱ་ཛྙཱ་ན་པ་ཡ་ཏི་རཀྵ་མཾ་སརྦ་ཏྭ་ཏི། ཙི་ཧི་རི་ཀི་རི་སྭཱ་ཧཱ། ལན་བདུན་བཟླས་བརྗོད་བྱས་པའི་ཆུ་དང་སྐུད་པས་བྱའོ། །འདི་ནི་ལག་ན་རྡོ་རྗེ་སླར་གཏང་བའི་
སྔགས་ཏེ། ན་མཿཙི་ལི་ཙི་ལི་བཛྲ་པཱ་ཎི་སྭ་བྷཱ་བ་ནཱཾ་གཙྪ་པུ་ན་རཱ་ག་མ་ནཱ་ཡ། སུ་ན་པྲ་ཏི་ག་མ་ནཱ་ཡ་སྭཱ་ཧཱ། ཆུས་སླར་གཏང་བར་བྱའོ། །དེ་ལྟར་དེ་བསྒྲུབ་པ་ནི་འདོད་པ་ཐམས་ཅད་སྦྱིན་པར་འགྱུར་ཏེ། འདིས་བསྒྲུབས་ན་འདོད་པ་ཐམས་ཅད་སྦྱིན་པར་འགྱུར་ཏེ། མ་གྲུབ་ན་
ཡང་ལས་རྣམས་བྱང་བར་བྱེད་དོ། །གདོན་དབབ་པ་གཙུག་ཕུད་བཅིང་བ་ནི་ཆུས་བྱའོ། །གནོད་པར་བྱ་བ་ནི་ཤིང་ཤུན་ཐག་གུའམ། ཏ་ལའི་ལོ་མས་སྦྱིན་སྲེག་བྱའོ། །རྨི་ལྟས་ཀྱི་རིག་སྔགས་དང་བསྲུང་བའི་སྐུད་པ་ནི་ཡུངས་ཀར་དང་། ཆུ་དང་། ཐལ་བ་རྣམས་ཀྱིས་
བྱའོ། །དུག་ཞི་བར་བྱ་བ་ནི་བཟླས་བརྗོད་བྱའོ། །གདོན་བདུན་པོ་སྐྲག་པར་བྱ་བ་ལ་ནི་ལན་ཚྭའི་སྦྱིན་སྲེག་གིས་བྱའོ། །སྒོ་ལྕགས་དབྱེ་བ་དང་། གདོན་དབང་དུ་བྱ་བ་དང་། མིའི་གཙོ་བོ་དང་། མི་ཆེན་པོ་དབང་དུ་བྱ་བ་ནི་ཞག་བདུན་གྱི་བར་དུ་དུས་གསུམ་དུ་སྦྲང་རྩི་དང་།
མར་དང་། ཡུངས་ཀར་དང་། སེང་ལྡེང་གི་ཡམ་སྲེག་ཤིང་གིས་ལན་བརྒྱ་རྩ་བརྒྱད་སྦྱིན་སྲེག་གིས་བྱ་སྟེ། དུས་གསུམ་དུ་ཁྲུས་བྱེད་ཅིང་གཙང་མས་གོས་གཙང་མ་བགོས་ནས་བྱའོ། །དེ་ལྟར་བྱས་ན་གནོད་སྦྱིན་མོའམ། དྲི་ཟ་མོའམ། སྲིན་མོ་ཡང་དབང་དུ་ཁུག་

པར་འགྱུར་རོ། །ཟླ་བ་གཅིག་གིས་ནི་འདོད་ཆགས་དང་བྲལ་བ་དང་། ཤི་བ་མ་གཏོགས་པར་སེམས་ཅན་ཐམས་ཅད་ཇི་ལྟ་ཇི་ལྟར་འདོད་པ་བཞིན་དུ་དབང་དུ་ཁུགས་པར་འགྱུར་རོ། །བློ་གྲོས་རྡོ་རྗེ་མའི་ཆོ་ག་གཉིས་པ་ནི་མར་གྱི་ངོ་ཞག་བརྒྱད་ལ་བརྩམས་ཏེ།
ཟས་སུ་འོ་མ་དང་འབྲས་ཆན་ཟ་ཞིང་ལག་ན་རྡོ་རྗེའི་མདུན་དུ་ཐབ་ཁུང་གྲུ་བཞི་པ་བྱས་ཏེ། །སེང་ལྡེང་གི་མེ་སྤར་ལ། །ཨུ་དུམ་བཱ་རའི་ཡམ་སྲེག་ཤིང་བརྒྱད་བརྒྱད་སྦྲང་རྩིའི་ནང་དུ་སྨྱུགས་པས་དུས་གསུམ་དུ་སྦྱིན་སྲེག་བྱའོ། །ཐབ་ཁུང་དུ་ཡང་རྩྭ་ཀུ་ཤས་བསྐོར་བར་བྱའོ། །ཡུངས་
ཀར་གྱིས་ཀྱང་བསྲུང་བར་བྱའོ། །སྣ་མའི་མེ་ཏོག་གིས་ཀྱང་སངས་རྒྱས་ཀྱི་གཟུགས་རྣམས་ལ་མཆོད་པར་བྱའོ། །སྣ་མའི་མེ་ཏོག་གིས་མཆོད་པ་བྱས་ནས་སྣ་མའི་མེ་ཏོག་གི་ཕྲེང་བ་ཡང་ཕྱག་དུ་དབུལ་ལོ། །ལག་ན་རྡོ་རྗེ་ལ་ཡང་ཟླ་བ་ཉ་ལ་ཞག་གཅིག་སྨྱུང་བ་བྱས་ཏེ་མཚན་
མོ་ཀུ་རན་ཏས་ལེན་བརྒྱད་སྟོང་སྦྱིན་སྲེག་བྱས་ན་ལས་རྣམས་འགྲུབ་པར་འགྱུར་ཏེ། མེ་ཏོག་གི་ཕྲེང་བ་འབུལ་བར་འགྱུར་རོ། །དེ་ལྟར་འགྲུབ་པར་གྱུར་ན་ཕྱི་དེ་ཉིན་པར་མཆོད་པ་ཤིན་ཏུ་རྒྱས་པའོ། །དེ་ནས་རྡོ་རྗེ་བློ་གྲོས་མ་དེའི་བསྒྲུབ་པའི་ཆོ་ག་ཡིན་ཏེ། རས་མ་ཉམས་པ་ལ་ཚོན་
རྩི་སྦྱིན་མེད་པས་བློ་གྲོས་རྡོ་རྗེ་མ་པདྨའི་མདོག་འདྲ་མ་ལག་ན་པདྨ་ཐོགས་ཤིང་པདྨ་ལ་འདུག་པ་བྲིའོ། །དེ་ནས་ཞག་ལྔའི་བར་དུ་ནི་བ་གཅིན་དང་། ཕྱེའི་འདེ་གུ་ཟ་ཞིང་དུས་གསུམ་དུ་ཁྲུས་བྱས་པ་དང་། དུས་གསུམ་དུ་གོས་བརྗེ་བ་དང་། རྩྭ་དཱུར་བའི་སྟན་གྱི་སྟེང་དུ་ཉལ་
བར་བྱ་སྟེ། དུས་གསུམ་དུ་པདྨ་བརྒྱད་བརྒྱ་ལ་ལན་རེ་རེ་བཟླས་བརྗོད་བྱས་ཏེ་དབུལ་ལོ། །མཇུག་ཏུ་ཟླ་བ་ཉ་ལ་ཞག་གཅིག་སྨྱུང་བ་བྱས་ཏེ། མཆོད་པ་ནི་རྒྱས་པར་བྱས་ནས་ལྷ་བཤོས་ཀྱང་ཕུལ་ལ་མཚན་མོ་པདྨོ་བརྒྱད་སྟོང་ཕུལ་ན་འགྲུབ་པར་འགྱུར་རོ། །འདོད་པ་ཐམས་
ཅད་སྦྱིན་པར་འགྱུར་རོ། །མཆོད་པ་ཡང་ཅི་འབྱོར་པས་བྱའོ། །འདི་ནི་བློ་གྲོས་རྡོ་རྗེ་མ་དེའི་ཆོ་ག་ཡིན་ནོ། །ན་མོ་བུདྡྷཱ་ཡ། ན་མོ་དྷརྨཱ་ཡ། ན་མཿསཾ་གྷཱ་ཡ། ན་མཤྩཎྜ་བཛྲ་པཱ་ཎ་ཡེ། མ་ཏི་བཛྲོ་བཛྲི་ནི། བཛྲ་བཛྲི་ནི་སྨ་ར་ས་མཱ་ཡཾ། བྷི་རི་བྷི་རི། ཀི་རི་ཀི་རི། བནྡྷ་བནྡྷ། ཀ་ལ་ཀ་ལ།

བ་ལ་བ་ལ། ར་ལ་ར་ལ། བཛྲེ། ཧ་ན་ཧ་ན་ཧ་ན། པ་ཙ་པ་ཙ་པ་ཙ། དཱུ་ཏི་བརྞ་ས་ཧ་སྲཾ་མེ་པྲ་ཡཙྪ་ཧུ་རུ་ཧུ་རུ། སིདྡྷ་ཤྩཎྜ་བཛྲ་པཱ་ཎི་རཱ་ཛྙཱ་པ་ཡ་ཏི་སྭཱ་ཧཱ། ཆོ་ག་ནི་ཡར་གྱི་ངོ་ཚེས་བཅུ་གསུམ་ལ་བརྩམས་ཏེ། གསོ་སྦྱོང་གི་ཡན་ལག་བརྒྱད་དང་ལྡན་པས་ཟས་མི་ཟ་བར་དུས་གསུམ་
དུ་ལས་བྱའོ། །བཅོམ་ལྡན་འདས་ལ་མེ་ཏོག་དྲི་ཞིམ་པོ་དང་། ཨ་ག་རུའི་བདུག་པ་དང་། ལྷ་བཤོས་དཀར་པོ་དང་མར་གྱི་མར་མེ་རྣམས་ཕུལ་ཏེ། ལག་ན་རྡོ་རྗེའི་ཞབས་དྲུང་དུ་ཨ་ཤ་ཀུ་རའི་སྐྱོང་ནུལ་གྱིས་དཀྱིལ་འཁོར་བྱུགས་ཏེ། དེར་གུར་གུམ་མམ། ཙནྡན་དམར་
པོས་རྡོ་རྗེ་བྲིའོ། །ལག་ན་རྡོ་རྗེ་དང་། རྡོ་རྗེ་ལ་ཡང་གུར་གུམ་དང་། ཙནྡན་དང་། མེ་ཏོག་དམར་པོ་དང་། ལྷ་བཤོས་དམར་པོ་དང་། སེར་པོ་དང་། དཀར་པོ་དང་། མར་གྱི་མར་མེ་རྣམས་དབུལ་ཞིང་། དུས་གསུམ་དུ་ཁྲུས་བྱས་ཏེ་ལས་དང་མཆོད་པ་བྱའོ། །དེ་ནས་
རྡོ་རྗེའི་དྲུང་དུ་སྣོད་སར་པའམ། ཁམ་ཕོར་སར་པའི་ནང་དུ་མེ་སྦར་ཏེ། གུ་གུལ་གྱི་རིལ་བུ་བརྒྱད་བརྒྱ་ལ་ལན་རེ་རེ་བཟླས་བརྗོད་བྱས་པས་སྦྱིན་སྲེག་བྱ་སྟེ། ཞག་གསུམ་སྨྱུང་བར་བྱས་ནས། ཟླ་བ་ཉ་ལ་ལན་བརྒྱད་སྟོང་བྱའོ། །དེའི་མཇུག་ཏུ་དངོས་གྲུབ་ཀྱི་རྟགས་གཡོ་བར་འགྱུར་
ཏེ། ཟླ་བ་དྲུག་ཚང་ནས་འབྲས་བུ་ཡོད་པར་འགྱུར་རོ། །དེ་ནས་བློ་གྲོས་རྡོ་རྗེ་མའི་ཆོ་ག་ཐ་དད་པར་བཤད་དེ་ཡར་གྱི་ངོ་ཚེས་གཅིག་ལ་བརྩམས་ཏེ། ཟས་སུ་དཀར་གསུམ་ཟ་ཞིང་། ལིག་བུ་མིག་གམ། ལྡོང་རོས་ལས་ཞོ་གཉིས་གཉིས་སམ། སྲང་རེ་རེ་བླངས་ཏེ་བཟླས་བརྗོད་
བྱས་ཏེ། དུས་གསུམ་དུ་ཁྲུས་བྱེད་ཅིང་། དུས་གསུམ་དུ་གོས་བརྗེ་བ་དང་། རྩྭ་དཱུར་བའི་སྟན་ལ་ཉལ་ཞིང་དུས་གསུམ་དུ་བརྒྱད་བརྒྱ་བཟླས་བརྗོད་བྱས་ནས་བཅོམ་ལྡན་འདས་ལག་ན་རྡོ་རྗེ་ལ་མཆོད་པ་བྱས་ལ་མཇུག་ཏུ་ཞག་གསུམ་སྨྱུང་བར་བྱས་ཏེ། ཟླ་བ་ཉ་ལ་ཡང་བཅོམ་ལྡན་
འདས་དང་། ལག་ན་རྡོ་རྗེ་ལ་མཆོད་པ་བྱས་ནས་ལིག་བུ་མིག་དང་ལྡོང་རོས་ཨ་ཤྲཏྠའི་ལོ་མ་བཞིའི་སྟེང་དུ་བཞག་ལ། གསུམ་གྱིས་བཀབ་ནས་ལག་པ་གཡས་པས་མནན་ཏེ། གཡོན་པས་ཙནྡན་དམར་པོའམ། བེ་ཀངྐ་ཏའམ། གྲོག་མཁར་གྱིས་ལས་བྱས་པའི་

རྡོ་རྗེ་སྲིད་དུ་སོར་བརྒྱད་ཡོད་པ་རྩེ་ལྔ་པ་བླངས་ཏེ་བསྲུང་བ་བྱས་ཤིང་ཆོ་ག་བཞིན་དུ་ལྷ་བཤོས་ཕུལ་ནས་དངོས་གྲུབ་འགྲུབ་པའི་གནས་གང་ཡིན་པར་ཉི་མའམ་ཟླ་བ་ལ་གཟའ་འཇུག་པའི་ཚེ། ནམ་དྲོ་བར་འགྱུར་བའི་དུད་པ་འཐུལ་བའམ་འབར་བར་གྱུར་གྱི་བར་དུ་བཟླས་
བརྗོད་བྱའོ། །མཆོད་རྟེན་གྱི་དྲུང་ངམ་སྐུ་གཟུགས་སམ། བྱང་ཆུབ་ཀྱི་ཤིང་དྲུང་དུ་བ་མར་སྲང་གཅིག་གསེར་རམ་དངུལ་ལམ། ཟངས་ཀྱི་སྣོད་དུ་བཞག་སྟེ། བཅོམ་ལྡན་འདས་དང་ལག་ན་རྡོ་རྗེ་ལ་མཆོད་པ་བྱས་ཏེ། ཟླ་བ་མི་མཐོང་བར་རྩྭ་དཱུར་བས་བཙུགས་ཏེ།
བཟླས་བརྗོད་བྱས་ལ་དྲོ་བར་གྱུར་ནས་འཐུངས་ན་འཇིག་རྟེན་ཐམས་ཅད་དབང་དུ་བྱེད་པར་འགྱུར་རོ། །དབུ་བ་བྱུང་ནས་འཐུངས་ན་ནི་ཐོས་པ་འཛིན་པར་འགྱུར་རོ། །དུད་པ་འཐུལ་ནས་འཐུངས་ན་ནི་ལུས་མི་སྣང་བར་འགྱུར་རོ། །འབར་བར་གྱུར་ནས་འཐུངས་ན་ནམ་མཁའ་ལ་
རྒྱུ་བར་འགྱུར་ཏེ། དངོས་གྲུབ་ཆེན་པོ་ཡིན་ནོ། །དེ་ནས་ནོར་བསྒྲུབ་པ་འབྱུང་སྟེ། ཙནྡན་དམར་པོ་ལས་བློ་གྲོས་རྡོ་རྗེ་མའི་གཟུགས་རྒྱན་ཐམས་ཅད་ཀྱིས་བརྒྱན་ལ། དེའི་ལག་པ་གཡས་པ་ན་པདྨ་ཐོགས་པ། གཡོན་པ་ན་རྡོ་རྗེ་ཐོགས་པར་བྱས་ཏེ། གཙང་
མའི་ཕྱོགས་སུ་གྲོག་མཁར་གྱི་ས་ལས་སྟེགས་བུ་སོར་བརྒྱད་པ་བྱས་ནས་དེར་ཁ་ནུབ་ཕྱོགས་སུ་བསྟན་ཏེ་བཞག་ལ། ཟླ་བ་ཉ་ལ་ཞག་གཅིག་སྨྱུང་བར་བྱས་ནས་ཐབ་ཁུང་རྡོ་རྗེའི་དབྱིབས་འདྲ་བར་བྱས་པའི་ནང་དུ་བ་ལང་གི་ལྕི་བས་མེ་སྤར་ཏེ། དགང་བླུགས་ཕུལ་ལ་
ཙནྡན་དམར་པོའི་ཕྱེ་མ་སྦྲང་རྩི་དང་མར་དང་སྦྱར་བའི་སྲེག་བླུགས་ལན་བརྒྱད་སྟོང་སྦྱིན་སྲེག་བྱས་ན་འགྲུབ་པར་འགྱུར་རོ། །དེ་ནས་ཟ་གཅིག་པ་བྱས་ཏེ། གཙང་མ་བཟླས་བརྗོད་བྱས་ལ་བརྩོན་པས་དུས་མཚམས་ཀྱི་དུས་སུ་བ་ལང་གི་རྨིག་པ་མར་གྱིས་བཀང་བས་རྩྭ་དཱུར་
བ་དང་བཅས་པར་སྦྱིན་སྲེག་བྱས་ནས་ལན་བརྒྱད་བརྒྱ་བཟླས་བརྗོད་བྱའོ། །ཉིན་གཅིག་བཞིན་དུ་དེ་བཞིན་བྱས་ནས་བ་ལང་གི་རྨིག་པ་ཇི་སྙེད་ཅིག་སྦྱིན་སྲེག་བྱས་པ་རྨིག་པ་རེ་རེ་ཞིང་བ་ལང་བརྒྱད་བརྒྱ་ཐོབ་པར་འགྱུར་རོ། །མ་ཧེ་དང་ར་ཡང་དེ་དང་འདྲའོ། །ཡང་ན་

འབྲས་མ་བརྡུངས་པ་མར་དང་སྦྱར་བའི་ཡུལ་མ་ག་དྷཱའི་བྲེ་ཚད་གཅིག་ཙམ་གྱི་སྲེག་བླུགས་ཆོ་ག་གོང་མ་བཞིན་ཞག་བདུན་སྦྱིན་སྲེག་བྱས་ལ་བརྒྱད་བརྒྱ་རྫོགས་ཤིང་དགང་བླུགས་ཕུལ་ན་ཉིན་རེ་ཞིང་བྲེ་རེ་རེ་ཐོབ་པར་འགྱུར་རོ། །དེ་བཞིན་དུ་འབྲུ་ཐམས་ཅད་དབུལ་བར་བྱ་སྟེ། དཱུར་བའི་
མྱུ་གུ་སྦྱིན་སྲེག་བྱའོ། །མར་འཐུང་བར་འདོད་པས་ནི་མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བར་བྱས་ཏེ། །གུ་གུལ་སྲང་གཅིག་སེང་ལྡེང་གི་ཐང་ཆུ་དང་བཅས་པ་ལ་ལན་བརྒྱད་སྟོང་བཟླས་བརྗོད་བྱས་ནས་མར་དང་སྦྱར་ཏེ། འཐུངས་ན་ནད་ཐམས་ཅད་མེད་པར་འགྱུར་
རོ། །ཟླ་བ་ཉ་ལ་ཞག་གཅིག་སྨྱུང་བ་བྱས་ཏེ། ཡུངས་ཀར་སྲང་གཅིག་ཨ་ཤྭཏྠའི་ལོ་མ་བཞིའི་སྟེང་དུ་བཞག་ནས་གསུམ་གྱིས་བཀབ་སྟེ། ལག་པས་མནན་ལ་ལན་བརྒྱད་སྟོང་བཟླས་བརྗོད་བྱས་ན་ལས་ཐམས་ཅད་དང་འཇིགས་པ་ཐམས་ཅད་དང་། ཅི་ཡང་རུང་བ་ཐམས་ཅད་ལ་
མགོ་བོར་གདགས་པར་བྱའོ། །མར་གྱི་ངོ་ཞག་བཅུ་བཞི་ལ་སྐུད་པ་ནག་པོ་ལ་ལན་བརྒྱད་བརྒྱ་བཟླས་བརྗོད་བྱས་ཏེ་མདུད་པ་བོར་ན་འཇིགས་པ་ཐམས་ཅད་བསྲུང་བ་རྣམས་ལ་སུ་ཡང་འགལ་བར་མི་བྱེད་དོ། །རིག་སྔགས་ཞུ་དག་པར་འདོད་ན་ཡར་གྱི་ངོ་ཚེས་གཅིག་ལ་བརྩམས་ཏེ།
ཟས་སུ་དཀར་གསུམ་ཟོས་ལ་རིག་སྔགས་ཞུ་དག་པར་འདོད་པ་དེ་གྲོ་ག་ལ་བྲིས་ནས་སྨྱུ་གུ་དང་སྣག་ཚ་དང་བཅས་པར་བུམ་པ་སར་པའི་ནང་དུ་གཞུག་གོ། །དེ་ཡང་བུམ་པ་མི་གནག་ཅིང་རྩ་བ་མེད་པའི་ནང་དུ་གཞུག་པར་བྱའོ། །མར་གྱི་མར་མེ་ཡང་སྦྱར་ལ་ལྷ་བཤོས་སུ་ཁུ་
བཅུད་དབུལ་བར་བྱའོ། །དེ་ནས་དུས་གསུམ་དུ་ལན་བརྒྱད་བརྒྱ་བཟླས་བརྗོད་བྱེད་ཅིང་ཐང་ཆུའི་བདུག་པ་བསྲེགས་ལ། གཙང་མས་གོས་གཙང་མ་བགོས་ནས་དེ་ཉིད་ཀྱི་དྲུང་དུ་ས་ལ་ཉལ་བར་བྱའོ། །མཇུག་ཏུ་ཟ་མ་བཞི་སྨྱུང་བར་བྱས་ལ་ཟླ་བ་ཉ་ལ་མཆོད་པ་ཤིན་ཏུ་རྒྱས་པར་བྱས་
ཏེ། གྲངས་ངེས་པ་མེད་པས་བཟླས་བརྗོད་བྱས་ལ་ཚེས་བཅུ་དྲུག་ལ་ཁ་ཕྱེ་ན་ཐམས་ཅད་ཞུ་དག་པར་འགྱུར་རོ། །ཡང་ན་ལས་ཐམས་ཅད་ལ་རྡོ་རྗེ་ལག་ཏུ་བླངས་ཏེ་སྔར་བསྙེན་པ་བྱའོ། །བློ་གྲོས་རྡོ་རྗེ་མའི་ཆོ་ག་རྫོགས་སོ།། །།དེ་ནས་རྡོ་རྗེ་ནག་མོའི་ཆོ་

ག་བཤད་པར་བྱ་སྟེ། རས་མཉམས་པ་ལ་ཚོན་རྩི་སྦྱིན་མེད་པས་བཅོམ་ལྡན་འདས་ཀྱི་གཟུགས་འདྲིར་གཞུག་སྟེ། གཡོན་ལོགས་སུ་ནི་ལག་ན་རྡོ་རྗེ་བྲིའོ། །གཡས་ཕྱོགས་སུ་ཕོ་ཉ་མ་རྒྱན་ཐམས་ཅད་ཀྱིས་བརྒྱན་པ་བཅོམ་ལྡན་འདས་ལ་ཐལ་མོ་སྦྱར་བ་བྲིའོ། །
དེ་ནས་སྐུ་གདུང་དང་ལྡན་པའི་མཆོད་རྟེན་ནམ་སྐུ་གཟུགས་ཀྱི་དྲུང་དུ་རས་ཀྱི་སྐུ་གཟུགས་ཁ་ནུབ་ཕྱོགས་སུ་བསྟན་ནས། དེའི་མདུན་དུ་དཀྱིལ་འཁོར་བ་ལང་གི་ལྕི་བའི་སྐྱོང་ནུལ་གྱིས་བྱུགས་ལ་དེའི་སྟེང་དུ་མཆོད་པ་བྱ་ཞིང་དེའི་སྟེང་དུ་དྲིས་ཀྱང་བྱུགས་ཏེ་དེའི་སྟེང་དུ་ཡུངས་ཀར་ལས་
སྟེགས་བུ་རྡོ་རྗེའི་དབྱིབས་འདྲ་བ་བྱས་ནས་དེའི་སྟེང་དུ་ཙནྡན་དམར་པོ་ལས་བྱས་པའི་རྡོ་རྗེ་ཤར་ཕྱོགས་སུ་བསྟན་ཏེ་གཞག་གོ། །བཅོམ་ལྡན་འདས་དང་ལག་ན་རྡོ་རྗེ་ལ་ཡང་མཆོད་དེ། དུས་གསུམ་དུ་ཀ་ར་བཱི་ར་དམར་པོའི་མེ་ཏོག་བརྒྱད་བརྒྱ་ལ་ལན་རེ་རེ་བཟླས་བརྗོད་བྱས་པས་རྡོ་
རྗེ་ལ་བསྣུན་པར་བྱའོ། །དེའི་མཇུག་ཏུ་ཟ་མ་བཞི་སྨྱུང་བ་བྱས་ལ་ཟླ་བ་ཉ་ལ་མཆོད་པ་ཤིན་ཏུ་རྒྱས་པ་བྱས་ཏེ། གཏོར་མ་ལ་སོགས་པ་ཡང་བྱས་ནས་མར་གྱི་མར་མེ་གཉིས་སྤར་ལ། ལྷག་མ་ནི་ཅི་འབྱོར་པས་བྱ་སྟེ། ནམ་དངོས་གྲུབ་ཀྱི་རྟགས་འོད་སྟོན་པའམ། རང་བཞིན་
གྱི་ཚུལ་གྱིས་འོང་བའམ། བཅོམ་ལྡན་འདས་ལ་ཕུལ་བའི་མར་མེ་མེ་ལྕེ་ཆེན་པོར་གྱུར་པའམ། རྨི་ལམ་དུ་སྟོན་པར་གྱུར་གྱི་བར་དུ་རྡོ་རྗེ་ལ་བསྣུན་ན་དེ་ནས་ལས་ཐམས་ཅད་བྱེད་པར་འགྱུར་རོ། །མིའི་གཙོ་བོའམ་མི་ཆེན་པོ་སྐྱེས་བུའི་ཁྱད་པར་འདི་གཉིས་དབང་
དུ་བྱ་བར་འདོད་ན་ཡར་གྱི་ངོ་ཚེས་བརྒྱད་ལ་བརྩམས་ཏེ་གསོ་སྦྱོང་གི་ཡན་ལག་བརྒྱད་དང་ལྡན་པས་ཟས་སུ་དཀར་གསུམ་བཟའ་ཞིང་སྦྱིན་སྲེག་བྱ་སྟེ། བཻ་ཀངྐ་ཏའི་བུད་ཤིང་ངམ། དེ་མ་རྙེད་ན་པ་ལ་ཤའི་བུད་ཤིང་གིས་མེ་སྤར་ནས་སྦྲང་རྩི་དང་། མར་དང་ལན་ཚྭས་
སྦྱིན་སྲེག་བྱས་ན་མིའི་གཙོ་བོའམ་མི་ཆེན་པོ་དབང་དུ་འགྱུར་རོ། །དུས་གསུམ་དུ་ཡུངས་ཀར་མར་དང་སྦྱར་བའི་སྦྱིན་སྲེག་བྱ་བ་ནི་ལྷག་པར་ཡང་གཙུག་ནས་བྱུང་བའི་ཆོ་གའི་ཁྱད་པར་གྱི་ཐབས་ཡིན་ནོ། །རྡོ་རྗེ་ནག་མོའི་ཆོ་ག་རྫོགས་སོ།། །།

གཞན་གྱིས་མི་ཐུབ་པའི་ཆོ་ག་ལས་གདོན་ཐམས་ཅད་དབབ་པ་དང་། བཙས་པ་ཟ་བ་དང་གྲུལ་བུམ་བསལ་བ་དང་། མདངས་འཕྲོག་པ་དང་། གནོད་སྦྱིན་དང་འབྱུང་པོ་དང་སྲིན་པོ་དང་ཤ་ཟ་དང་ཡི་དགས་ལ་སོགས་པ་བསལ་བ་དང་གཞིག་པར་བྱ་བ་ནི། ཨི་རཎྜའི་ཤིང་གིས་མེ་
སྤར་ལ། །ཨེ་རཎྜའི་ཡམ་སྲེག་ཤིང་དང་ཡུངས་ཀར་མར་དང་སྦྱར་བས་ཅིག་ཤར་སྦྱིན་སྲེག་བྱའོ། །གདོན་གྱིས་མ་རུངས་པར་བྱས་པ་ལ་ནིམ་པའི་ཡམ་སྲེག་ཤིང་གིས་བྱའོ། །དབབ་པ་ལ་ནི་སེང་ལྡེང་གི་ཡམ་སྲེག་ཤིང་གིས་བྱ་སྟེ། །ཁྲག་གི་སྦྱིན་སྲེག་བྱའོ། །དེ་ནས་
གདོན་ཁུས་འདེབས་ཤིང་གཏོར་བ་དང་འཕོ་བར་འགྱུར་རོ། །འབྱུང་པོའི་ཟས་ཀྱིས་ནི་སྤྱིར་ཡང་འབེབས་པར་འགྱུར་རོ། །གསང་བ་པ་དང་ཀླུ་ནི་ཟླ་བ་ཕྱེད་ཀྱིས་དབང་དུ་འགྱུར་རོ། །གནོད་སྦྱིན་མོ་ནི་ཞག་བདུན་གྱིས་སོ། །སྐྱེས་པ་ནི་ཞག་གསུམ་གྱིས་སོ། །བུད་མེད་ནི་ཟ་
མ་བཞེས་དབང་དུ་འགྱུར་ཏེ། འདི་ལྟར་སྣ་མའི་མེ་ཏོག་དང་བེ་ཀངྐ་ཏའི་ཡམ་སྲེག་ཤིང་སྦྲང་རྩི་དང་མར་གྱི་ནང་དུ་སྨྱུགས་པས་སྦྱིན་སྲེག་བྱས་ལ་དུས་གསུམ་དུ་ལན་བརྒྱད་བརྒྱ་བཟླས་བརྗོད་བྱས་ཏེ་བདག་བསྲུང་བར་བྱའོ། །སེམས་ཅན་ཐམས་ཅད་ཁ་བཅིང་བར་བྱ་བ་ནི་མང་
པོ་ཡང་རུང་། གཅིག་ལ་ཡང་རུང་། སྲད་བུ་ལ་མདུད་པ་བྱས་ཏེ་བཟླས་བརྗོད་ལན་བརྒྱད་བརྒྱ་དང་མདུད་པ་ལན་བརྒྱད་བརྒྱ་བྱའོ། །གཞིག་པ་ལ་ནི་ལན་ཚྭས་བྱའོ། །གདོན་གཞོམ་པ་ནི་ནིམ་པའི་ཡམ་སྲེག་ཤིང་གིས་བྱ་སྟེ། ཆོ་ག་སྔ་མ་བཞིན་དུ་བྱའོ། །རས་སྔོན་པོ་ལ་ལན་
བདུན་བཟླས་བརྗོད་བྱས་ཏེ་རོ་སྨད་དུ་བཅིངས་ན་སུས་ཀྱང་མི་ཐུབ་པའི་རྒྱན་དུ་འགྱུར་རོ། །དེ་བཞིན་དུ་གཡུལ་འགྱེད་པ་དང་། འཁྲུག་པ་དང་། འཐབ་པ་དང་། རྩོད་པ་ཐམས་ཅད་ལ་བསྲུང་བའི་ཕྱིར་བཅིངས་ན་རྒྱལ་ཞིང་ཐེབས་པར་འགྱུར་རོ། །དུར་ཁྲོད་དུ་ལས་བྱ་བ་
རྣམས་དང་། ཞི་བར་བྱ་བ་དང་རྒྱས་པར་བྱ་བ་དང་། གདོན་དགུག་པ་དང་། དམ་ཚིག་འཛིན་དུ་གཞུག་པར་བྱ་བ་ལ་ནི་ཆོ་ག་བཞིན་དུ་བཟླས་བརྗོད་དང་། རྡོ་རྗེའི་ཕྱག་རྒྱས་བྱའོ། །རྨི་ལམ་དུ་སྟོན་དུ་གཞུག་པ་ལ་ནི་གཙུག་ཕུད་དང་རས་ཀྱི་ཚར་ཚར་རམ་ཆོས་གོས་ཀྱི་གྲྭ་ལ་ལན་

བདུན་བཟླས་བརྗོད་བྱས་ཏེ་མདུད་པ་བྱའོ། །གཞན་གྱིས་མི་ཐུབ་པའི་ཆོ་ག་རྫོགས་སོ།། །།རིག་སྔགས་ཐམས་ཅད་ཀྱི་སྤྱིའི་ཆོ་ག་བཤད་པར་བྱ་སྟེ། ས་གཞི་མདོག་སྡུག་ཅིང་གསེག་མ་དང་རུས་པ་དང་། སྲོག་ཆགས་ཀྱི་གནས་མེད་པར་བཀྲ་ཤིས་
པའི་ཕྱོགས་སུ་མར་གྱི་ངོ་ཞག་བརྒྱད་ལས་ཡོངས་སུ་སྦྱང་བ་བརྩམས་ནས་དཀྱིལ་འཁོར་ཁྲུ་བཅུ་དྲུག་གྲུ་བཞི་པ་བྱས་ནས། མར་གྱི་ངོ་ཞག་བཅུ་བཞི་ལ་ཚོན་རྩི་སྣ་ལྔས་བྲི་བར་བྱ་སྟེ། སྒོ་བཞི་གདོད་པར་བྱའོ། །ཚོན་རྩི་འབྱུང་ཁུངས་ནས་བྱུང་བའི་ཚོན་གྱིས་བྲི་བར་བྱ་སྟེ། དཀྱིལ་འཁོར་གྱི་
དབུས་སུ་ལག་ན་རྡོ་རྗེ་གནས་པའི་སྟེགས་བུ་བྱས་ལ་དེའི་ཕྱོགས་གཅིག་ཏུ་གུར་གུམ་གྱིས་རྡོ་རྗེ་སོར་བརྒྱད་ཙམ་བྲིའོ། །དེའི་སྟེང་དུ་ཡང་ཡུངས་ཀར་གྱིས་རྡོ་རྗེ་བྱའོ། །དེའི་སྟེང་དུ་ཡང་ཙནྡན་དམར་པོ་ལས་རྡོ་རྗེ་སོར་བརྒྱད་པ་བྱས་ལ་གཞག་གོ། །དཀྱིལ་འཁོར་གྱི་ཕྱི་རོལ་ཤར་ཕྱོགས་ཀྱི་སྒོར་ནི་རྡོ་རྗེ་དང་འཁོར་
ལོ་གཞག་གོ་ལྷོ་ཕྱོགས་སུ་ནི་རྡོ་རྗེ་དང་དབྱུག་པ་གཞག་གོ། །ནུབ་ཕྱོགས་སུ་ནི་རྡོ་རྗེ་དང་ཞགས་པ་གཞག་གོ། །བྱང་ཕྱོགས་སུ་ནི་རྡོ་རྗེ་དང་བེ་ཅོན་གཞག་གོ། །དཀྱིལ་འཁོར་ཟླུམ་པོའི་ནང་དུ་ཕྱོགས་བཞི་ནས་རྡོ་རྗེ་ཐམས་ཅད་གཞག་གོ། །དེ་དག་གི་ཕྱི་རོལ་དུ་ཁྲུ་གང་ཙམ་གྱིས་དཔག་སྟེ།
དཀྱིལ་འཁོར་གྱི་མཚམས་ཀྱིས་བསྐོར་ནས་ཚེས་གཅིག་ལ་བརྩམས་ཏེ་བསྒྲུབ་པར་བྱའོ། །སྒོ་བཞིར་ནི་བུམ་པ་མི་གནག་ཅིང་རྩ་བ་མེད་པ་བཞི་འོ་མས་བཀང་སྟེ་གཞག་གོ། །ཉིན་གཅིག་བཞིན་དུ་མཚན་མོ་མར་གྱི་མར་མེ་ཡང་དབུལ་ལོ། །ལྔ་པ་སྟེ་ལག་ན་རྡོ་རྗེ་དང་བཅོམ་ལྡན་
འདས་ལ་ཡང་དབུལ་ལོ། །སྟེགས་བུ་དེར་སྐུ་གདུང་དང་ལྡན་པའི་སྐུ་གཟུགས་བཞག་ལ་དེའི་མདུན་དུ་ལྷ་དང་རྡོ་རྗེ་དྲི་ཐམས་ཅད་ཀྱིས་ལེགས་པར་བྲི་བར་བྱ་སྟེ་ཁྲུ་གང་ཚུན་དུ་བྱའོ། །དེའི་ཕྱོགས་གཅིག་ཏུ་ཐབ་ཁུང་རྡོ་རྗེའི་དབྱིབས་འདྲ་བར་བྱས་ལ་དེར་ཤིང་འོ་མ་ཅན་གྱི་ཡམ་སྲེག་ཤིང་
གིས་མེ་སྤར་ཏེ་དགང་བླུགས་ཕུལ་ནས། ཞོ་དང་སྦྲང་རྩི་དང་། འོ་མ་དང་། ཡུངས་ཀར་གྱིས་སྦྱིན་སྲེག་བྱས་ལ་དེ་ནས་བཟླས་བརྗོད་ལན་བརྒྱད་སྟོང་བྱའོ། །ཟས་སུ་འོ་མ་དང་ཕྱེའི་འདེ་གུ་ཟ་ཞིང་དུས་གསུམ་དུ་བདུག་པ་དང་མེ་ཏོག་གི་ཕྲེང་བ་ལ་སོགས་པས་མཆོད་དེ་དུས་གསུམ་དུ་གོས་

བརྗེ་བ་དང་། མི་སྨྲ་བ་བསྒྲུབ་པར་བྱའོ། །དེའི་མཇུག་ཏུ་ཞག་གསུམ་སྨྱུང་བ་བྱས་ཏེ། ཟླ་བ་ཉ་ལ་མཆོད་པ་རྒྱས་པར་བྱས་ནས་བསྒྲུབ་ཅིང་ལག་པས་རྡོ་རྗེ་མནན་ཏེ་ནམ་དྲོ་བར་གྱུར་པ་དང་། དུད་པ་འཐུལ་བ་དང་། འབར་བར་གྱུར་པ་དང་། ནམ་མཁའ་ལ་འཕགས་པར་གྱུར་གྱི་བར་དུ་བཟླས་
བརྗོད་བྱའོ། །དེ་ནས་བླངས་ན་ལག་ན་རྡོ་རྗེ་དང་མཐུ་མཉམ་པར་འགྱུར་ཏེ་ཚེ་བསྐལ་པར་ཐུབ་ཅིང་མངོན་པར་ཤེས་པ་ལྔ་དང་ལྡན་ལ། དམོད་པ་འདོར་བ་དང་། ཕན་འདོགས་ནུས་པར་འགྱུར་རོ། །སྨྱུང་བར་འདུག་པའི་ཉིན་མོ་ནི་རྟག་ཏུ་མནན་ཏེ་བཟླས་བརྗོད་བྱའོ། །ལག་ན་རྡོ་རྗེ་དང་འཇིག་
རྟེན་སྐྱོང་བ་རྣམས་ལ་ཡང་ཕྱོགས་ཐམས་ཅད་ཀྱང་ལྷ་བཤོས་རྒྱས་པ་དབུལ་ལོ། །སྒོ་རེ་རེར་ཡང་མར་གྱི་མར་མེ་གཉིས་དབུལ་ལོ། །ནང་དུ་མར་གྱི་མར་མེ་བཞི་དབུལ་ལོ། །ཐོག་མ་ནི་དཀྱིལ་འཁོར་གྱི་གནས་བ་ལང་གི་ལྕི་བས་སྐྱོང་ནུལ་བྱུགས་ལ་དྲི་བྱུགས་ནས་གདོད་བྲི་བར་བྱའོ། །འདི་ནི་ཕོ་ཉ་མ་ཐམས་
ཅད་ཀྱི་རྡོ་རྗེ་བསྒྲུབ་པ་སྤྱིའི་ཆོ་ག་ཡིན་ཏེ་ལས་ཐམས་ཅད་ཀྱང་ལས་ཀྱི་རྡོ་རྗེ་ལག་ན་ཐོགས་པར་བྱའོ། །དེ་ནས་མེ་ཏོག་གི་ཆུན་པོ་འགུལ་བར་འགྱུར་རོ། །དེ་ལྟར་གྲུབ་ནས་ཕྱི་དེ་ཉིན་པར་མཆོད་པ་ཤིན་ཏུ་རྒྱས་པར་བྱའོ། །བློ་གྲོས་རྡོ་རྗེ་མ་བསྒྲུབ་པའི་ཆོ་ག་གསུམ་པ་ནི་རས་མཉམས་པ་ལ་ཚོན་
རྩི་སྦྱིན་མེད་པས་བློ་གྲོས་རྡོ་རྗེ་མ་པདྨའི་མདོག་ཅན་ལག་ན་པདྨ་ཐོགས་ཤིང་པདྨ་ལ་འདུག་པ་བྲིའོ། །དེ་ནས་ཞག་ལྔའི་བར་དུ་བ་གཅིན་དང་། ཕྱེའི་འདེ་གུ་ཟ་ཞིང་དུས་གསུམ་དུ་ཁྲུས་བྱ་ཞིང་དུས་གསུམ་དུ་གོས་བརྗེ་བ་དང་། རྩྭ་དཱུར་བའི་སྟན་ལ་ཉལ་བས་དུས་གསུམ་དུ་པདྨ་བརྒྱད་བརྒྱ་ལ་ལན་
རེ་བཟླས་བརྗོད་བྱས་ཏེ་དབུལ་ལོ། །ཟླ་བ་ཉ་ལ་ཉིན་མཚན་དུ་སྨྱུང་བར་བྱས་ཏེ་མཆོད་པ་རྒྱས་པར་བྱས་ནས་ལྷ་བཤོས་ཀྱང་ཕུལ་ལ་ནུབ་གསུམ་པདྨ་བརྒྱད་སྟོང་ཕུལ་ན་འགྲུབ་པར་འགྱུར་རོ། །འདོད་པ་ཐམས་ཅད་སྦྱིན་པར་འགྱུར་རོ། །བློ་གྲོས་རྡོ་རྗེ་མའི་ཆོ་ག་རྫོགས་སོ།། །།ན་མོ་
རཏྣ་ཏྲ་ཡཱ་ཡ། ན་མོ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ནི་རི་ནི་རི། པཱ་ཤྱེ་བཱ་ཤྱེ་ནེ་སྭཱ་ཧཱ། འདི་ཕོ་ཉ་མ་ལྟ་བ་མ་ཞེས་བྱ་བ་སྟེ། འདི་ནི་ལས་ཐམས་ཅད་རྒྱས་པར་བཤད་པར་བྱའོ། །གསལ་སྣང་གི་ཆོ་ག་བྱ་བར་འདོད་ན་ནི་རི་མོའི་གཟུགས་ཀྱི་མདུན་དུ་དཀྱིལ་འཁོར་སྐྱོང་ནུལ་གྱིས་བྱུགས་ཏེ།

བདུག་པ་དང་། མེ་ཏོག་དང་དྲི་ཕུལ་ནས་བུ་མོ་གཞོན་ནུས་བཀལ་བའི་སྐུད་པ་ཕྲ་མོ་ཉིས་བལྟབ་ཏུ་བྱས་པ་སོར་བཞི་པ་གཉིས་བྱས་ལ། དེ་ནས་ལན་བདུན་བཟླས་བརྗོད་བྱས་ཏེ་དཀྱིལ་འཁོར་དེའི་སྟེང་དུ་བཞག་ལ་དེ་ནས་རིག་སྔགས་བརྗོད་པར་བྱ་སྟེ། འདི་སྐད་དུ་ཅི་སྟེ་དོན་འདི་
འགྲུབ་པ་ལྟ་ན་གཅིག་ལ་གཅིག་འཁྲི་བར་གྱུར་ཅིག །མི་འགྲུབ་པ་ལྟ་ན་སོ་སོར་གྱེས་པར་གྱུར་ཅིག་ཅེས་བྱའོ། །དེ་ནས་ཡང་དག་པ་ཇི་ལྟ་བ་བཞིན་དུ་ལྟས་སྟོན་པར་འགྱུར་ཏེ། གཙང་ཞིང་ཚངས་པར་སྤྱོད་པ་དང་། སྨྱུང་བར་བྱས་པས་བྱའོ། །སྐྱེས་པ་དང་བུད་མེད་དབང་དུ་བྱ་བར་འདོད་ན་
དེའི་མིང་དང་ལྡན་པར་རིག་སྔགས་བརྗོད་པར་བྱ་སྟེ། མ་ད་ནའི་ཤིང་ལས་གཟུགས་བྱས་ནས་ཚ་བ་གསུམ་གྱིས་བཀང་ལ་ཚིགས་བདུན་དུ་མ་ད་ནའི་ཚེར་མ་བདུན་གྱིས་བཏབ་ནས། ཟངས་ཀྱི་ཐུར་མ་རྐུབ་ཏུ་བཙུགས་ཏེ་སྤྱི་བོར་ཕྱུང་ལ་སེང་ལྡེང་གི་མདག་མའི་དུགས་ཀྱིས་བདུག་ཅིང་། ཞག་
བདུན་གྱི་བར་དུ་ཁ་ཤར་ཕྱོགས་སུ་བསྟན་ཏེ་དུས་གསུམ་དུ་ལན་བརྒྱད་བརྒྱ་བཟླས་བརྗོད་བྱས་ནས་མཇུག་ཏུ་ལན་སྟོང་བྱས་ན་འགྲུབ་པར་འགྱུར་རོ། །དེ་ནས་གཞིག་པར་འདོད་ན་ཡུངས་ནག་གི་འབྲུ་ལས་གཟུགས་བྱས་ལ་རྐང་པ་གཡས་པ་ནས་བརྩམས་ཏེ། སེང་ལྡེང་གི་མེའི་ནང་དུ་དུས་
གསུམ་དུ་སྦྱིན་སྲེག་བྱས་ན་ཞག་བདུན་གྱིས་འཇིག་པར་འགྱུར་རོ། །དེ་ནས་མར་གྱི་ངོ་ཞག་བརྒྱད་ལ་གསོ་སྦྱོང་དང་ལྡན་པས་རོ་བསྲེགས་པའི་སོལ་བ་བླངས་ཏེ། ལན་བརྒྱད་སྟོང་བཟླས་བརྗོད་བྱས་ནས་དགྲའི་གཟུགས་བྲིས་ལ་རྟག་ཏུ་མགོ་བོ་དང་། སྙིང་ག་དང་ལག་པ་གཉིས་དང་། རྐང་པ་
གཉིས་སུ་ལྕགས་ཀྱི་ཕུར་བུ་རེ་བཏབ་ན་ལྕེ་འཆིངས་པར་འགྱུར་རོ། །དེ་མིང་ནས་སྨོས་ཤིང་དེའི་རྐང་པའི་དྲུང་དུ་ནིམ་པའི་བུད་ཤིང་ཁྲག་གི་ནང་དུ་སྨྱུགས་པས་མེ་བུས་པ་ཡུངས་ནག་དང་ལན་ཚྭ་དང་ཏིལ་ནག་པོ་བསྲེགས་ཏེ། ཁྲག་དང་སྦྱར་བས་དུས་གསུམ་དུ་ལན་ཉི་ཤུ་རྩ་རེ་རེ་སྦྱིན་སྲེག་
བྱས་ན་ཞག་ཉི་ཤུ་རྩ་གཅིག་གིས་འཇིག་པར་འགྱུར་རོ། །བདག་ཉིད་ཀྱི་མཐུ་བ་སྐྱེད་པར་འདོད་ན་སྐུ་གདུང་དང་ལྡན་པའི་མཆོད་རྟེན་གྱི་དྲུང་དུ་བདུག་པ་དང་། མེ་ཏོག་དང་དྲི་ཕུལ་ལ་བུམ་པ་སར་པ་ཆུས་བཀང་སྟེ། སྨན་ཐམས་ཅད་དང་ས་བོན་ཐམས་ཅད་དང་དབྱིག་རྣམས་བླུགས་ལ་ལན་

བརྒྱད་བརྒྱ་བཟླས་བརྗོད་བྱས་ནས་རས་མ་ཉམས་པས་སྨད་གཡོགས་བྱས་ཏེ། ཁྲུས་བྱས་ན་སྡིག་པ་ཐམས་ཅད་རབ་ཏུ་བཅོམ་པར་འགྱུར་རོ། །དེ་ནས་མིག་སྨན་བསྒྲུབ་པར་འདོད་ན་ཨུཏྤ་ལ་དམར་པོ་དང་། པདྨ་སྐྱོན་མེད་པ་དང་། པད་མོཏྟ་ར་དང་། ས་ཧ་ཙ་ར་དང་། གིའུ་ཝང་
དང་། རྡོ་ཕ་བང་ལོང་བུ་དང་། མིག་སྨན་གྱི་གཙོ་བོ་འདི་དག་གླང་པོའི་རྡུལ་དང་སྦྱར་ནས་རྒྱུན་མ་ཆད་པར་ལན་སྟོང་སྦྱིན་སྲེག་བྱ་སྟེ། སྐར་མ་རྒྱལ་ལ་མིག་བསྐུས་ནི་དེ་མ་ཐག་ཏུ་འཇིག་རྟེན་ཐམས་ཅད་ལ་དབང་སྒྱུར་བར་འགྱུར་རོ། །དེ་ནས་ལུས་མི་སྣང་བར་འདོད་ན་མིག་སྨན་གོང་མ་
དེ་ཉིད་ལྕགས་ལས་མིའི་གཟུགས་བྱས་པའི་སྤྱི་བོ་ཕུག་ལ་དེའི་ལྟོ་བ་མིག་སྨན་གྱིས་བཀང་སྟེ། ལྕགས་ཀྱི་ཕུར་བུས་བཏབ་ནས་ཞག་གསུམ་སྨྱུང་བར་བྱས་ལ་མར་གྱི་ངོ་ཞག་བཅུ་བཞིའི་ནུབ་མོ་བཟླས་བརྗོད་བྱས་ཏེ། རོ་བསྲེགས་པའི་མེ་འབར་བའི་ནང་དུ་བོར་ནས་འབྱུང་པོའི་གཏོར་
མ་ཐམས་ཅད་ཕུལ་ལ་གྲངས་ངེས་པ་མེད་པར་བཟླས་བརྗོད་བྱའོ། །དེ་ནས་རྨི་ལམ་དུ་མི་ནག་པོ་མཐོང་བར་འགྱུར་ཏེ་གྲུབ་ཟིན་ནོ་ཞེས་ཟེར་བ་དང་ནང་པར་ལངས་ཏེ་དེས་མིག་བསྐུས་ན་ལུས་མི་སྣང་བར་འགྱུར་རོ། །རྡུལ་ལ་ལན་བརྒྱད་བརྒྱ་བཟླས་བརྗོད་བྱས་ཏེ། གདོང་བསྐུས་ན་རྒྱལ་
པོའི་ཕོ་བྲང་དང་རྩོད་པའི་ནང་དུ་རྒྱལ་བར་འགྱུར་ཏེ། དོན་ཡང་གྲུབ་པར་འགྱུར་རོ། །གསལ་སྣང་བྱ་བར་འདོད་ན་སྨྱུང་བ་བྱས་ལ་བདུག་པ་དང་མེ་ཏོག་དང་། དྲི་དང་ལྷ་བཤོས་ཕུལ་ཏེ་མཐེ་བོང་རྒྱ་སྐྱེགས་ཀྱི་ཁུ་བས་མདོག་བསྒྱུར་ནས་དྲི་ཞིམ་པོས་བགོས་པའི་ཏིལ་མར་གྱིས་བསྐུས་ཏེ།
བྱིས་པ་བྱད་བཟང་ལ་མདོག་གནག་པ་བྱེད་དུ་བཅུག་ནས། རིག་སྔགས་བཟླས་བརྗོད་བྱས་ན་ངེས་པར་རྟོགས་པར་འགྱུར་རོ། །ཡང་ན་མེ་ལོང་ལ་ཡང་བྱ་སྟེ། མིག་ལ་སྔགས་ཀྱིས་གདབ་བོ། །གོས་དང་རྒྱན་ཐམས་ཅད་ལ་ཡང་སྔགས་ཀྱིས་གདབ་བོ། །ལྟ་བ་མའི་ཆོ་ག་རྫོགས་
སོ།། །།དེ་ནས་ལྷ་ཀུན་ལུ་གུ་རྒྱུད། །ལག་ན་རྡོ་རྗེའི་གཡུང་དྲུང་ལས། །རྡོ་རྗེ་ལུ་གུ་རྒྱུད་གྲགས་པ། །བདག་གིས་རབ་ཏུ་བཤད་པར་བྱ། །དེ་ནས་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་རིག་སྔགས་ཀྱི་རྒྱལ་མོ་

འདི་ནི་ཐམས་ཅད་དུ་གཞན་གྱིས་མི་ཐུབ་ཅིང་དོན་ཐམས་ཅད་ལ་འགྲུབ་པ་ལགས་ཀྱིས་སྐྱེ་བོ་མང་པོ་ལ་སྨན་པ་དང་། སྐྱེ་བོ་མང་པོ་ལ་བདེ་བ་སྩལ་བ་དང་། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་རྣམས་ལ་སྨན་པ་གང་ལགས་པ་བདག་གིས་
འདི་བཅོམ་ལྡན་འདས་ཀྱིས་བཞེས་སུ་གསོལ། སའི་སྟེང་གང་ན་བདུད་སྡིག་ཅན་གྱི་དབང་དུ་གྱུར་པ་དད་པ་མ་མཆིས་པ་འདོད་པ་ན་སྤྱོད་པའི་བར་གང་དག་བཅོམ་ལྡན་འདས་ཀྱི་བསྟན་པ་ལ་བགེགས་བགྱིད་པ་དེ་དག་གཞོམ་པའི་སླད་དུ་རིག་སྔགས་རྡོ་རྗེ་ལུ་གུ་རྒྱུད་ཅེས་བགྱི་བ་འདི་
བགེགས་ཐམས་ཅད་རབ་ཏུ་ཞི་བར་བགྱིད་པ། ལས་ཐམས་ཅད་བགྱིད་པ། ཐམས་ཅད་གཞན་གྱིས་མི་ཐུབ་པའི་སྡིག་པ་ཐམས་ཅད་རབ་ཏུ་ཞི་བར་བགྱིད་པ་འདིའི་སླད་དུ་བཅོམ་ལྡན་འདས་ཀྱིས་བདག་ལ་ཐུགས་བརྩེ་བར་མཛད་དུ་གསོལ། དེ་ནས་ལག་ན་རྡོ་རྗེས་རིག་སྔགས་ཀྱི་ཚོགས་
རྣམས་ལ་བལྟས་སོ། །དེ་ནས་རིག་སྔགས་རིག་སྔགས་ཀྱི་ཚོགས་ཀྱིས་བསྐོར་བའི་རིག་སྔགས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། དེའི་ཚེ་ཆེད་དུ་བརྗོད་པ་འདི་ཆེད་དུ་བརྗོད་དོ། །ནད་མེད་པ་ནི་རྙེད་པའི་མཆོག །ཆོག་
ཤེས་པ་ནི་ནོར་གྱི་མཆོག །ཡིད་བརྟན་པ་ནི་གཉེན་གྱི་མཆོག །མྱ་ངན་འདས་པ་བདེ་བའི་མཆོག །དཀོན་མཆོག་གསུམ་ལ་ཕྱག་འཚལ་ལོ། །གསང་བ་པའི་བདག་པོ་ལག་ན་རྡོ་རྗེ་རྡོ་རྗེ་འཛིན་གནོད་སྦྱིན་གྱི་སྡེ་དཔོན་ཆེན་པོ་འཁོར་དང་བཅས་པ་གཡོག་དང་བཅས་པ། ཕྱི་བཞིན་
འབྲང་བ་དང་བཅས་པ་ལ་ཕྱག་འཚལ་ལོ། །འཇིག་རྟེན་སྐྱོང་བ་བཞི་ལ་ཕྱག་འཚལ་ལོ། །དེ་ནས་རིག་སྔགས་ཀྱི་རྒྱལ་མོ་ཆེན་མོ་རྡོ་རྗེ་ལུ་གུ་རྒྱུད་བཤད་པར་བྱའོ། །རྡོ་རྗེ་ལུ་གུ་རྒྱུད་ལ་ཕྱག་འཚལ་ལོ། །རྡོ་རྗེ་མཆོག་འཛིན་པ་ལག་ན་རྡོ་རྗེ་ལ་ཕྱག་འཚལ་ལོ། །རྡོ་རྗེ་མཛེས་པ་ལག་ན་
འཁོར་ལོ་དང་རྡོ་རྗེ་ཐོགས་པ་ལ་ཕྱག་འཚལ་ལོ། །རིག་སྔགས་རྡོ་རྗེའི་རིགས་སུ་གཏོགས་པ་ལ་ཕྱག་འཚལ་ལོ། །རྡོ་རྗེ་ཞགས་པ་དང་རྡོ་རྗེ་ལུ་གུ་རྒྱུད་ལ་ཕྱག་འཚལ་ལོ། །རྡོ་རྗེ་རྣམ་པར་རྒྱལ་བ་ལ་ཕྱག་འཚལ་ལོ། །རྡོ་རྗེ་དགའ་བར་བྱེད་པ་ལ་ཕྱག་འཚལ་ལོ། །ནོར་བུ་རྡོ་རྗེ་

འོད་ལ་ཕྱག་འཚལ་ལོ། །གསེར་དང་། ནོར་བུ་དང་། མུ་ཏིག་དང་། བྱི་རུ་དང་། རྡོ་རྗེ་མཛེས་པ་སྣ་ཚོགས་ཅན་ལ་ཕྱག་འཚལ་ལོ། །ལྷ་ཐམས་ཅད་ཀྱིས་ཕྱག་བྱས་ཤིང་བསྟོད་པ་ཁྱོད་ལ་ཕྱག་འཚལ་ལོ། །དྲི་ཟ་ཐམས་ཅད་ཀྱིས་མཆོད་པ་ཁྱོད་ལ་ཕྱག་འཚལ་ལོ། །ཀླུའི་དབང་པོ་ཐམས་
ཅད་ཀྱིས་བརྗོད་པ་ཁྱོད་ལ་ཕྱག་འཚལ་ལོ། །གནོད་སྦྱིན་ཐམས་ཅད་ཀྱིས་ཕྱག་བྱས་པ་ཁྱོད་ལ་ཕྱག་འཚལ་ལོ། །འབྱུང་པོས་བརྗོད་པ་ཁྱོད་ལ་ཕྱག་འཚལ་ལོ། །འཇིག་རྟེན་སྐྱོང་གིས་བརྗོད་པ་ཁྱོད་ལ་ཕྱག་འཚལ་ལོ། །རིག་སྔགས་ཐམས་ཅད་ཀྱིས་ཕྱག་བྱས་པ་ཁྱོད་ལ་ཕྱག་འཚལ་ལོ། །
དབང་པོ་དང་གཤིན་རྗེ་དང་ཆུ་ལྷ་དང་། ཀུ་བེ་ར་དང་། ཕུར་བུ་དང་། དྲང་སྲོང་བདུན་གྱིས་ཕྱག་བྱས་པ་ལ་ཕྱག་འཚལ་ལོ། །དཀར་མོས་ཕྱག་བྱས་པ་ལ་ཕྱག་འཚལ་ལོ། །དྲི་ལེན་གྱིས་ཕྱག་བྱས་པ་ལ་ཕྱག་འཚལ་ལོ། །ནག་མོས་ཕྱག་བྱས་པ་ལ་ཕྱག་འཚལ་ལོ། །མ་ཏང་གིས་
ཕྱག་བྱས་པ་ལ་ཕྱག་འཚལ་ལོ། །ཚངས་པས་ཕྱག་བྱས་པ་ལ་ཕྱག་འཚལ་ལོ། །དབང་པོས་ཕྱག་བྱས་པ་ལ་ཕྱག་འཚལ་ལོ། །ཁྱབ་འཇུག་གིས་ཕྱག་བྱས་པ་ལ་ཕྱག་འཚལ་ལོ། །གཞོན་ནུས་ཕྱག་བྱས་པ་ལ་ཕྱག་འཚལ་ལོ། །ཉི་མ་དང་ཟླ་བས་ཕྱག་བྱས་པ་ལ་ཕྱག་འཚལ་
ལོ། །བྲམ་ཟེས་ཕྱག་བྱས་པ་ལ་ཕྱག་འཚལ་ལོ། །སྔོན་གྱི་དྲང་སྲོང་གིས་མཆོད་པ་ལ་ཕྱག་འཚལ་ལོ། །རླུང་ལྷས་ཕྱག་བྱས་པ་ལ་ཕྱག་འཚལ་ལོ། །དེ་ནས་བཅོམ་ལྡན་འདས་ལག་ན་རྡོ་རྗེ་ཕོ་ཉ་མའི་ཚོགས་ཀྱི་འཁོར་དང་བཅས་པར་མི་སྣང་བར་གྱུར་ཏོ། །བཅོམ་ལྡན་འདས་ཀྱིས་
དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་དང་། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་དང་། ཕུར་བུ་གསུམ་པ་ལ་སོགས་པ་དང་། འཇིག་རྟེན་སྐྱོང་བ་བཞི་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་
པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་རིག་པ་མཆོག་གི་རྒྱུད་ཆེན་པོ་རྫོགས་སོ།། །།རྒྱ་གར་གྱི་མཁན་པོ་བིདྱཱ་ཀ་ར་པྲ་བྷ་དང་། ལོ་ཙཱ་བ་བནྡེ་དཔལ་བརྩེགས་ཀྱིས་བསྒྱུར་བའོ།། །།

༄༅༅། །རྒྱ་གར་སྐད་དུ། བྷུ་ཏ་ཌཱ་མ་ར་མ་ཧཱ་ཏནྟྲ་རཱ་ཛ་ནཱ་མ། བོད་སྐད་དུ། འབྱུང་པོ་འདུལ་བ་ཞེས་བྱ་བའི་རྒྱུད་ཀྱི་རྒྱལ་པོ་ཆེན་པོ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །དེ་ནས་འདིར་ནི་བཤད་བྱ་བ། །འབྱུང་པོ་འདུལ་བའི་རྒྱུད་ཆེན་རྒྱལ། །འབྱུང་པོ་འབྱུང་མོ་ཀུན་
བསྒྲུབ་པའི། ཆོ་ག་རབ་ཏུ་རྒྱས་པའོ། །རྡོ་རྗེ་འཆང་ཆེན་པོ་འཇིག་རྟེན་གསུམ་གྱི་བདག་པོས་འདི་སྐད་ཅེས་གསུངས་སོ། །ཆུ་བོའི་འགྲམ་དང་། དུར་ཁྲོད་དང་། ཤིང་གཅིག་པ་དང་། ལྷ་གནས་པའི་ཁང་པ་དང་། དཔལ་རྡོ་རྗེ་འཆང་གི་ཁྱིམ་དང་། རིགས་ཀྱི་གནས་རྣམས་སུ་
བསྒྲུབ་པར་བྱ་སྟེ། སྐད་ཅིག་ཉིད་ཀྱིས་འགྲུབ་པར་འགྱུར་རོ། །གལ་ཏེ་མ་གྲུབ་ན་འབྱུང་པོ་དང་འབྱུང་མོ་རིགས་དང་རྒྱུད་དུ་བཅས་པ་མ་ལུས་པ་ཕུང་བར་འགྱུར་རོ། །དེ་ནས་དབང་ཕྱུག་ཆེན་པོའི་ལྷ་ཆེན་པོས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ། བཅོམ་ལྡན་འདས་
ལ་འདི་སྐད་ཅེས་གསོལ་ཏོ། །ཁྲོ་བོའི་བདག་པོ་ཆེན་པོ་གདུག་པ་དང་མ་རུངས་པ་རྣམས་གསོད་པར་བྱེད་པ་བཤད་དུ་གསོལ། དེ་ནས་དབང་ཕྱུག་ཆེན་པོའི་ལྷ་ཆེན་པོ་ལ་ལེགས་སོ་ལེགས་སོ་ཞེས་བྱ་བ་བྱིན་ནས་འབྱུང་པོ་ཐམས་ཅད་གསོད་པའི་སྔགས་ཀྱི་ཚིག་གསུངས་པ། ཨོྃ་
བཛྲ་ཛྭ་ལི་ཧ་ན་ཧ་ན་སརྦ་བྷཱུ་ཏཱ་ན་ཧཱུྃ་ཕཊ། དེ་ནས་འདི་གསུངས་པ་ཙམ་གྱིས་དཔལ་རྡོ་རྗེ་འཆང་གི་བ་སྤུའི་བུ་ག་རྣམས་ནས་རྡོ་རྗེ་འབར་བ་དུ་མ་བྱུང་བར་གྱུར་ཏེ། འབྱུང་པོ་དང་འབྱུང་མོ་ཐམས་ཅད་ཀྱི་ལུས་བསྐམས་ཤིང་བརྒྱ་བྱིན་དང་། ཚངས་པ་དང་། ཁྱབ་འཇུག་ལ་སོགས་པ་ལྷ་ཐམས་ཅད་
བསད་པར་གྱུར་ཏོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས་ངོ་མཚར་བ་དང་བཅས་པས་འདི་སྐད་ཅེས་གསུངས་སོ། །ལེགས་སོ་དཔལ་ལྡན་རྡོ་རྗེ་འཆང་ཁྲོ་བོའི་བདག་པོ་ཆེན་པོ་མ་འོངས་པའི་ཚེ་མ་འོངས་པའི་དུས་ན་འབྱུང་པོ་དང་འབྱུང་མོ་ཚར་གཅོད་པར་བྱེད་པ་ནི་ལེགས་སོ། །དེ་
ནས་ཡང་སླར་རོའི་རྣམ་པར་ཤེས་པ་འགུགས་པའི་སྔགས་གསུངས་པ། ཨོྃ་བཛྲ་ཨཱ་ཡུ་ཥེ་ས་ར་སཱ་རཱ་སྨིན། དེ་ནས་གསུངས་པ་ཙམ་གྱིས་དཔལ་རྡོ་རྗེ་འཆང་གི་ཤངས་ཀྱི་བུ་ག་ནས་རླུང་ཆེན་པོ་རོ་འཚོ་བར་བྱེད་པ་བྱུང་བར་གྱུར་ཏེ། དེ་བྱུང་བ་ཙམ་གྱིས་འབྱུང་པོ་དང་འབྱུང་མོ་རྣམས་

ཀྱི་ལུས་ལ་ཞུགས་སོ། །ཞུགས་པ་ཙམ་གྱིས་འབྱུང་པོ་དང་འབྱུང་མོ་རྣམས་ལངས་ཏེ་ཆེར་འཇིགས་ཤིང་རབ་ཏུ་འདར་བར་གྱུར་པས་བཅོམ་ལྡན་འདས་བསྐྱབ་ཏུ་གསོལ། བདེ་བར་གཤེགས་པ་བསྐྱབ་ཏུ་གསོལ། བཅོམ་ལྡན་འདས་ཀྱི་བཀའ་བཞིན་བགྱིད་དོ་ཞེས་སྨྲས་སོ། །དེ་ནས་
འབྱུང་པོའི་བདག་པོ་གཞན་གྱིས་མི་ཐུབ་པ་འཁོར་གྱི་དཀྱིལ་འཁོར་དེར་བཅོམ་ལྡན་འདས་ཀྱི་ཞབས་གཉིས་ལ་སྤྱི་བོས་ཕྱག་འཚལ་ནས་བཅོམ་ལྡན་འདས་ཁྲོ་བོའི་བདག་པོ་ཆེན་པོ་དཔལ་སྲིད་པ་གསུམ་ལས་རྣམ་པར་རྒྱལ་བ་བདེ་བར་གཤེགས་པ་བསྐྱབ་ཏུ་གསོལ། བཅོམ་ལྡན་འདས་
ཡོངས་སུ་བསྐྱབ་ཏུ་གསོལ། དེ་ནས་བཅོམ་ལྡན་འདས་ཀྱིས་བཀའ་སྩལ་པ། འབྱུང་པོའི་བདག་པོ་གླིང་བཞི་པ་ཐམས་ཅད་ཀྱི་མི་རྣམས་ལ་དངོས་གྲུབ་རྫོགས་པར་བྱིན་ཅིག །འཛམ་བུའི་གླིང་པའི་མི་རྣམས་ལ་དངུལ་ཆུ་དང་བཅུད་ཀྱིས་ལེན་པའི་རྫས་རྣམས་སྒྲུབ་ཅིང་བདེ་བར་
བྱིན་ཅིག །དབྱིག་དང་། གསེར་དང་། དངུལ་དང་། མུ་ཏིག་དང་། བཻ་ཌཱུརྱ་དང་། པདྨ་རཱ་ག་དང་། མེ་དང་ཆུའི་ཤེལ་དང་། སྤོས་དང་ལྷའི་ན་བཟའ་རྣམས་བྱིན་ཅིག །འདི་ཟློས་པའི་འབྲས་བུ་འགྲུབ་པར་གྱིས་ཤིག །བསྙེན་བཀུར་གྱིས་ཤིག །དེ་བཞིན་གཤེགས་
པ་ཐམས་ཅད་ཟློས་པའི་རིན་པོ་ཆེའི་ཅོད་པན་དང་། གོས་དང་། དྲི་དང་། བདུག་པ་དང་། མེ་ཏོག་ལ་སོགས་པ་དང་། ཡོ་བྱད་དང་། རྫས་ཐམས་ཅད་བགེགས་མེད་པར་བྱིན་ཅིག །རྒྱལ་པོའི་འཇིགས་པ་དང་། དགྲའི་འཇིགས་པ་དང་། སེང་གེའི་འཇིགས་པ་དང་།
སྟག་གི་འཇིགས་པ་ཐམས་ཅད་ཟློག་ཅིག །ཀྱེ་ཀྱེ་གཞན་གྱིས་མི་ཐུབ་པ་འབྱུང་པོའི་དབང་ཕྱུག་ཆེན་པོ་མྱུར་དུ་མྱུར་དུ་ཉོན་ཅིག་ཉོན་ཅིག །ལེ་ལོ་ཅན་དང་། ཚུལ་ཁྲིམས་འཆལ་བ་དང་། སྡིག་པ་བྱེད་པ་དང་། བརྫུན་སྨྲ་བ་རྣམས་ལ་ངེས་པར་དངོས་གྲུབ་བྱིན་ཅིག །
གལ་ཏེ་རིག་སྔགས་འཆང་ལ་དངོས་གྲུབ་མི་སྦྱིན་ན་ཀླུ་མོ་དང་། གནོད་སྦྱིན་མོ་དང་། ས་ལ་འཇོམས་མ་དང་། ལྷ་མ་ཡིན་མོ་དང་། མིའམ་ཅི་མོ་དང་། ནམ་མཁའ་ལྡིང་མོ་དང་། ལྟོ་འཕྱེ་ཆེན་མོ་དང་། ཤ་ཟ་མོ་དང་། འབྱུང་མོ་དང་། དྲི་ཟ་མོ་རྣམས་ཀྱི་སྤྱི་བོ་མི་ཕྱེད་པའི་རྡོ་

རྗེས་དགས་པར་བྱ་ཞིང་དམྱལ་བ་ཆེན་པོ་བརྒྱད་དུ་ལྟུང་བར་བྱའོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས་འདི་སྐད་དུ་ལེགས་སོ་ལེགས་སོ། །ལག་ན་རྡོ་རྗེ་ལེགས་པར་བཤད་དོ། །མི་རྣམས་ལ་ཕན་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་
བརྩོན་འགྲུས་དང་སྟོབས་དང་ཕ་རོལ་གནོན་པ་མི་ཕྱེད་པར་གྲགས་པ། ལྷ་ཐམས་ཅད་ཀྱིས་ཕྱག་བྱས་པ་ཁམས་གསུམ་པའི་ཆོས་ཀྱི་རྒྱལ་པོ་ཆེན་པོ་གླིང་བཞི་པའི་འཇིག་རྟེན་གྱི་ཁམས་ཐམས་ཅད་གྲུབ་པར་བྱེད་པ་ཆོས་ཀྱི་འཁོར་ལོ་ཐམས་ཅད་སྐོར་བར་བྱེད་པ། སྡུག་བསྔལ་
ཐམས་ཅད་འཇོམས་པར་བྱེད་པའི་སྒྲུབ་པའི་ཐབས་རྒྱ་ཆེན་པོ་ཆོ་ག་སྣ་ཚོགས་པ་ཕྱག་རྒྱ་དང་། སྔགས་ཀྱི་ཚིག་གིས་སྒྲུབ་པའི་ཐབས་ཁྲོ་བོའི་རྒྱལ་པོ་ཆེན་པོ་བཅོམ་ལྡན་འདས་ཁྲོ་བོའི་རྒྱལ་པོ་ཆེན་པོ་བདག་པོས་ཤོད་ཅིག་ཅེས་གསུངས་སོ། །དེ་ནས་རྡོ་རྗེ་འཆང་ཁྲོ་བོའི་བདག་པོ་
ཆེན་པོས་རོ་འཚོ་བར་བྱེད་པའི་སྔགས་གསུངས་པ། ཨོྃ་ཀརྡྷ་ཀརྡྷ་མི་ཏྲ་སོྃ་ཛཱི་བ་ཡ་ཏི་དྷཱ་ཡ། དེ་ནས་འདི་གསུངས་པ་ཙམ་གྱིས་ལྷ་ཐམས་ཅད་མྱོས་ཏེ་བརྒྱལ་ཞིང་འགྱེལ་ནས་ཆེར་འཇིགས་ཤིང་རབ་ཏུ་འདར་བར་གྱུར་ཏེ་གནས་སོ། །དེ་ནས་ལྷ་ཆེན་པོས་གསོལ་པ། བྱང་ཆུབ་
སེམས་དཔའ་ཆེན་པོ་སྐྱོབས་ཤིག་སྐྱོབས་ཤིག །དེ་ནས་རྡོ་རྗེ་འཆང་ཁྲོ་བོའི་བདག་པོ་ཆེན་པོས་འདི་སྐད་ཅེས་གསུངས་སོ། །མ་འཇིགས་ཤིག་མ་འཇིགས་ཤིག །ཀྱེ་འབྱུང་པོའི་བདག་པོ་ཁྱེད་རྣམས་གཞན་ལས་རྒྱལ་བར་བྱ་བའི་ཕྱིར་ལྷ་ཐམས་ཅད་དབང་དུ་བསྡུ་ཞིང་འབྱུང་
པོ་ཐམས་ཅད་ཚར་གཅད་པར་བྱའོ། །དེ་ནས་རིག་སྔགས་འཆང་གི་དབང་པོ་དང་། ལྷའི་བུད་མེད་ཐམས་ཅད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བསྐྱབ་ཏུ་གསོལ། དཔལ་རྡོ་རྗེ་འཆང་རྒྱལ་པོ་ཆེན་པོས་བསྐྱབ་ཏུ་གསོལ། དེ་ནས་ཁྲོ་བོ་ཆེན་པོ་རྡོ་རྗེ་
ཆེན་པོ་རྡོ་རྗེ་འཆང་གིས་འདི་སྐད་ཅེས་གསུངས་སོ། །ཀྱེ་བུད་མེད་རྣམས་གོ་བར་གྱིས་ཤིག །དཔལ་རྡོ་རྗེ་འཆང་རྒྱལ་པོ་ཆེན་པོ་ལ་སོགས་པའི་བསྙེན་བཀུར་བྱོས་ཤིག །དབྱིག་དང་། གསེར་དང་། མུ་ཏིག་དང་། རིན་པོ་ཆེ་དང་། བཻ་ཌཱུརྱ་དང་། པདྨ་རཱ་ག་དང་། རྫས་

ཐམས་ཅད་ཕུལ་ཅིག །དེ་ནས་ལྷའི་བུད་མེད་ལ་སོགས་པ་ལྷའི་བུ་མོ་དང་གནོད་སྦྱིན་མོ་ཐམས་ཅད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་འགུམ་མོ་འགུམ་མོ། །དཔལ་རྡོ་རྗེ་ཁྲོ་བོ་ཟློས་པ་རྣམས་ཀྱི་བྲན་མོ་བགྱིད་དོ། །བསྙེན་བཀུར་བགྱིད་དོ། །གལ་ཏེ་ཁྲོ་བོ་ཟློས་པའི་
བསྙེན་བཀུར་མ་བགྱིས་ན་རིགས་དང་རྒྱུད་དུ་བཅས་པ་བརླག་པར་གྱུར་ཅིག །དམ་པའི་ཆོས་སྤངས་པར་གྱུར་ཅིག །དེ་བཞིན་གཤེགས་པ་ཐམས་ཅད་ལ་སྨད་པར་གྱུར་ཅིག །བཅོམ་ལྡན་འདས་ཀྱི་ཁྲོ་བོ་ཆེན་པོའི་རྡོ་རྗེས་སྤྱི་བོ་ཁོས་ཤིག །ལན་བརྒྱད་རྣམ་པར་གཤེགས་ཤིང་ཤི་ནས་
མྱུར་བ་ཉིད་དུ་དམྱལ་བ་ཆེན་པོ་བརྒྱད་དུ་འཇུག་པར་གྱུར་ཅིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་ལྷའི་བུད་མེད་ཐམས་ཅད་དང་། ཀླུ་མོ་དང་གནོད་སྦྱིན་མོ་རྣམས་ལ་ལེགས་སོ་ཞེས་བྱ་བ་བྱིན་ཏེ། ལྷའི་བུ་མོ་དང་ཀླུ་མོ་དང་། གནོད་སྦྱིན་མོ་རྣམས་ལེགས་
སོ་ལེགས་སོ། །མ་འོངས་པའི་ཚེ་མ་འོངས་པའི་དུས་ན་དེ་བཞིན་གཤེགས་པ་ཟློས་པའི་མི་རྣམས་ཀྱི་བསྙེན་བཀུར་གྱིས་ཤིག །དེ་ནས་འབྱུང་པོའི་བྲན་རྣམས་ཀྱིས་འབྱུང་པོའི་རྒྱལ་པོ་གཞན་གྱིས་མི་ཐུབ་པ་ལ་སོགས་པ་འཁོར་དང་བཅས་པ་ལངས་ཏེ། དཔལ་རྡོ་རྗེ་འཆང་ཁྲོ་བོའི་བདག་
པོ་ཆེན་པོའི་ཞབས་ལ་མགོ་བོས་བཏུད་ནས་རང་གི་སྙིང་པོ་ཕུལ་བ། ཨོྃ་ཤྲཱི་མ་ཧཱ་བྷཱུ་ཏ་ཀུ་ལ་སུནྡ་རི་ཧཱུྃ། ཨོྃ་ཤྲཱི་བི་ཛ་ཡ་སུནྡ་རི་ཧྲཱིཿ། ཨོྃ་ཤྲཱི་བི་མ་ལ་སུནྡ་རི་ཨ། ཨོྃ་ཤྲཱི་ར་ཏི་སུནྡ་རི་དྷུ། ཨོྃ་ཤྲཱི་མ་ནོ་ཧ་ར་སུནྡ་རི་ཨི། ཨོྃ་ཤྲཱི་བྷུ་ཥ་ཎ་སུནྡ་རི་མཱྃ། ཨོྃ་ཤྲཱི་ད་བ་ལ་སུནྡ་རི་ཡ། ཨོྃ་ཤྲཱི་
ཙཀྵུརྨ་དྷུ་མ་སུནྡ་རི་ཏི། ཞེས་པ་འདི་རྣམས་ནི་འབྱུང་པོའི་རྒྱལ་མོ་ཆེན་མོ་སྟེ། དཔལ་གྱི་སྒྲ་ཡིས་རབ་ཏུ་གྲགས་པའོ། །དེ་ནས་དཔལ་གྱི་སྒྲུབ་པའི་ཐབས་བཀླགས་པ་ཙམ་གྱིས་དངོས་གྲུབ་སྟེར་བ་སྟེ། དཔལ་རྡོ་རྗེ་འཆང་གི་མཚན་བརྗོད་པ་ཙམ་གྱིས་འབྱུང་པོ་དང་འབྱུང་མོ་ཐམས་ཅད་མངག་
གཞུག་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། གང་གི་ཚེ་དམ་ཚིག་ལས་འདས་ན་འཕྲལ་དུ་འབྱུང་པོ་དང་འབྱུང་མོ་ཐམས་ཅད་རིགས་དང་རྒྱུད་དུ་བཅས་ཏེ་ཕུང་བར་བྱའོ། །དེ་ནས་འབྱུང་པོ་ཆེན་པོ་གཞན་གྱིས་མི་ཐུབ་པས་འདི་སྐད་ཅེས་གསོལ་ཏོ། །ལྷ་ཆེན་པོའི་

དམ་ཚིག་ལ་གནས་ཤིང་འཇིག་རྟེན་པའི་སྔགས་དང་ཕྱག་རྒྱའི་ཆོ་ག་ཐམས་ཅད་ཀྱི་དངོས་གྲུབ་སྩལ་བར་བགྱིའོ། །དཔལ་རྡོ་རྗེ་འཆང་བཟླས་པ་ཙམ་གྱིས་ཐམས་ཅད་འགྲུབ་པར་འགྱུར་ཏེ། གལ་ཏེ་མ་གྲུབ་ན་རིགས་དང་རྒྱུད་དུ་བཅས་པ་བརླག་པར་གྱུར་ཅིག །དེ་བཞིན་
གཤེགས་པ་ཐམས་ཅད་ཀྱིས་གསུངས་པའི་དམ་ཚིག་ཉམས་པར་གྱུར་ཅིག །དེ་བཞིན་གཤེགས་པའི་ཁྲོ་བོའི་རྡོ་རྗེས་སྤྱི་བོ་བཀས་པར་གྱུར་ཅིག །མྱུར་བ་ཉིད་དུ་ཤི་སྟེ་རྣམ་པ་ཐམས་ཅད་དུ་དམྱལ་བ་ཆེན་པོ་བརྒྱད་དུ་འཇུག་པར་གྱུར་ཅིག །དེ་ནས་ཡང་དག་བཤད་བྱ་བ། །
སྒྲུབ་པ་པོ་ཡི་གནས་མཆོག་སྟེ། །ཆུ་བོའི་འགྲམ་དང་དུར་ཁྲོད་དང་། །ཕྱག་ན་རྡོ་རྗེའི་ཁྱིམ་དག་སྟེ། །དེར་ནི་འབྱུང་པོ་འབྱུང་མོ་ཀུན། །འགྲུབ་འགྱུར་འདི་ལ་ཐེ་ཙོམ་མེད། །འབྱུང་པོའི་རྒྱལ་མོ་ཆེན་པོ་བརྒྱད་ཀྱི་བསྒྲུབ་པའི་གནས་སོ། །དེ་ནས་ཕྱག་རྒྱ་བཤད་བྱ་བ། །
འབྱུང་མོ་བརྒྱད་ཀྱི་སྒྲུབ་པ་སྟེ། །ལག་གཡོན་ཁུ་ཚུར་དམ་བཅངས་ནས། །གུང་མོ་རབ་ཏུ་བརྐྱང་བྱས་པ། །སྤྱན་དྲང་མཆོད་པའི་ཕྱག་རྒྱ་སྟེ། །རིགས་ཀྱི་མཆོག་ནི་སྒྲུབ་བྱེད་པའོ། །ཁུ་ཚུར་ཕན་ཚུན་བཅངས་ནས་ནི། །མཛུབ་མོ་རབ་ཏུ་བརྐྱང་བྱས་པ། །རང་གི་
དམ་ཚིག་བསྲུང་བ་ཡི། །འབྱུང་མོ་སྐད་ཅིག་དེ་ལ་སྒྲུབ། །ལག་གཡོན་ཁུ་ཚུར་དམ་བཅངས་ནས། །མཐེ་ཆུང་རབ་ཏུ་བརྐྱང་བྱས་པ། །ཉེ་བར་བྱེད་པའི་ཕྱག་རྒྱ་སྟེ། །འབྱུང་པོ་ཐམས་ཅད་རྗེས་འབྲང་བའོ། །ལག་པ་གཡོན་པ་བརྐྱང་ནས་ནི། །མཛུབ་མོ་བསྐྱིལ་བ་བྱས་
ནས་སུ། །མཐེ་བོང་གཡས་ནི་མནན་བྱས་པ། །འབྱུང་ཀུན་དབང་དུ་བྱེད་པའོ། །ལག་གཡོན་ཁུ་ཚུར་བཅངས་པ་ལས། །སྲིན་ལག་རབ་ཏུ་བརྐྱང་བ་ནི། །འབྱུང་མོ་ཐམས་ཅད་འགུགས་པ་སྟེ། །བགེགས་ཀུན་ཟློག་པར་བྱེད་པའོ། །ལག་གཡོན་ཁུ་ཚུར་བཅངས་ནས་ནི། །
མཛུབ་མོ་རབ་ཏུ་བརྐྱང་བྱས་པ། །འབྱུང་མོ་མངོན་ཕྱོགས་བྱེད་པ་སྟེ། །གདུག་པ་ཐམས་ཅད་ཟ་བྱེད་པའོ། །ལག་པ་གཡོན་པས་ཁུ་ཚུར་བཅངས་ཏེ། མཐེ་ཆུང་བརྐྱང་བ་ནི་འབྱུང་མོའི་དམ་ཚིག་གི་ཕྱག་རྒྱ་སྟེ། ཐམས་ཅད་དུ་ལས་ཐམས་ཅད་བྱེད་པའོ། །ལག་པ་གཉིས་ཀའི་སོར་མོ་

རྣམས་གཅིག་གི་སྟེང་དུ་གཅིག་བསྐྱོན་པ་བྱས་པ་ལ་ལག་པ་གཡས་པ་རྐེད་པ་གཡས་པར་བཞག་ལ། ལག་པ་གཡོན་པས་གཡས་མནན་པའི་སྟེང་དུ་བཞག་པ་ནི་མཆོག་གི་སྙིང་པོ་སྟེ་འབྱུང་མོ་ཐམས་ཅད་ཀྱི་ཕྱག་རྒྱའོ། །ཕྱག་རྒྱ་འདི་དག་བཅིངས་པ་ཙམ་གྱིས་འབྱུང་མོ་རྣམས་མྱུར་དུ་འོང་སྟེ། གལ་ཏེ་
མི་འོང་ན་མིག་དང་སྤྱི་བོ་འགས་ཤིང་བསྐམས་ཏེ་འཆི་བར་གྱུར་ཅིག །དེ་ནས་དཔལ་རྡོ་རྗེ་འཆང་ཁྲོ་བོའི་བདག་པོ་ཆེན་པོས་འདི་སྐད་ཅེས་བཀའ་སྩལ་ཏོ། །གལ་ཏེ་འབྱུང་མོ་རྣམས་དམ་ཚིག་ལས་འདའ་བར་བྱེད་ན་ཁྲོ་བོ་འདི་དང་བཅས་པས་དགུག་པའི་ཕྱིར་བཟླ་སྟེ། ཨོྃ་ཀ་ཊུ་ཀ་ཊུ་སྲུ་ཧྲཱིཿ
ཆེ་གེ་མོ་བྷུ་ཏི་ནི་ཧཱུྃ་ཕཊ། ཁྲོ་བོ་འདི་དང་བཅས་པས་བརྒྱ་ཕྲག་བརྒྱད་བཟླས་ན་མྱུར་བར་འོང་བར་འགྱུར་རོ། །གལ་ཏེ་མྱུར་དུ་མ་འོངས་ན་མིག་དང་སྤྱི་བོ་འགས་པའམ་བསྐམས་ཏེ་འཆིའོ། །དེ་ནས་སྒྲུབ་པའི་ཐབས་ཀྱི་ཆོ་ག་བཤད་པ། ཆུ་བོའི་འགྲམ་དུ་སོང་སྟེ་ཙནྡན་གྱི་དཀྱིལ་འཁོར་བྱས་ནས་
མེ་ཏོག་གཅལ་དུ་བཀྲམ་སྟེ། གུ་གུལ་གྱི་དུད་པས་བདུག་ཅིང་སྟོང་ཕྲག་བརྒྱད་བཟླས་ན་འགྲུབ་པར་འགྱུར་རོ། །མཚན་མོ་ཡང་སྟོང་བཟླས་ན་འོང་སྟེ། འོངས་ནས་འདོད་པ་སྦྱིན་པར་འགྱུར་ཏེ་ཆུང་མར་འགྱུར་རོ། །གསེར་སྲང་བརྒྱ་མལ་དུ་དོར་ནས་ཐོ་རངས་ཀྱིས་འགྲོ་བར་བྱེད་དོ། །ཉི་མ་
རེ་རེ་འདི་ལྟར་བྱས་ན་ཟླ་བ་གཅིག་གི་བར་དུ་ངེས་པར་འགྲུབ་བོ། །ཆུ་བོའི་འགྲམ་དུ་སོང་སྟེ་ཙནྡན་གྱིས་དཀྱིལ་འཁོར་བྱས་ནས་ཞོ་དང་འབྲས་ཆན་གྱི་གཏོར་མ་བྱིན་ན་ཉི་མ་བདུན་ན་ངེས་པར་འོང་ངོ་། །འོངས་ནས་ཙནྡན་གྱི་ཆུའི་མཆོད་ཡོན་བྱིན་ན་དགའ་བར་གྱུར་ཏེ། སྡུག་པ་ངས་ཅི་བྱ་ཟེར་ཏེ་སྒྲུབ་པ་
པོ་ཡིས་རྒྱལ་སྲིད་སློང་ཅིག་ཅེས་སྨྲའོ། །དེ་ནས་ཡུལ་འཁོར་ཡང་ཡོངས་སུ་སྐྱོང་བར་བྱེད་དོ། །གོས་དང་རྒྱན་དང་བཟའ་བ་ལ་སོགས་པ་མཐུན་པར་སྦྱིན་པར་བྱེད་དོ། །དཔལ་རྡོ་རྗེ་འཆང་གི་ཁང་པར་སོང་སྟེ། ཀ་ར་བཱི་རའི་མེ་ཏོག་སྦྱིན་ཞིང་གུ་གུལ་གྱི་བདུག་པས་བདུགས་ལ་སྟོང་ཕྲག་
བརྒྱད་བཟླས་ན་འགྲུབ་པར་འགྱུར་ཏེ། མཚན་མོ་ཡང་སྟོང་བཟླས་ན་ངེས་པར་འོང་ངོ་། །འོངས་པ་ལ་མེ་ཏོག་གི་སྟན་སྦྱིན་ཞིང་ལེགས་པར་འོངས་སོ་ཞེས་བརྗོད་ན་ཆུང་མར་འགྱུར་ཏེ། ལྷའི་དངུལ་ཆུ་དང་བཅུད་ཀྱིས་ལེན་དང་། རྫས་ཀྱི་དངོས་གྲུབ་སྟེར་ཞིང་དགྲ་ཐམས་ཅད་འཇོམས་པར་བྱེད་དོ། །

རྒྱབ་ཏུ་ཞོན་ན་མཐོ་རིས་སུ་ཡང་འཁྱེར་བར་བྱེད་དོ། །ལོ་སྟོང་ཕྲག་བཅུར་འཚོའོ། །ཆུ་བོའི་འགྲམ་དུ་སོང་སྟེ་སྤོས་དཀར་པོས་དཀྱིལ་འཁོར་བྱས་ནས་མེ་ཏོག་དཀར་པོ་བྱིན་ཏེ། དུ་རུ་སྐས་བདུགས་ལ་སྟོང་ཕྲག་བཅུ་བཟླས་ན་འགྲུབ་པར་འགྱུར་རོ། །མཚན་མོ་ཡང་སྟོང་
བཟླས་ན་ངེས་པར་འོང་ངོ་། །འོངས་པ་ལ་མེ་ཏོག་གི་ཆུའི་ཡོན་ཆབ་བྱིན་ནས་བསྒོ་ན་སྲིང་མོར་འགྱུར་རོ། །དངུལ་ཆུ་དང་། བཅུད་ཀྱིས་ལེན་དང་། རྫས་ཀྱི་དངོས་གྲུབ་སྟེར་ཞིང་དཔག་ཚད་སྟོང་དུ་སོང་ནས་བུད་མེད་བཟང་མོ་བླངས་ནས་སྟེར་བར་བྱེད་ཅིང་མཚན་མོ་སླར་འཁྱེར་རོ། །ལྷ་
ཁང་སྟོང་པར་སོང་ནས་ཇི་ལྟར་གསུངས་པའི་གཏོར་མ་དང་མཆོད་པ་བྱས་ཏེ་སྟོང་ཕྲག་བརྒྱད་དུ་བཟླས་ན་འགྲུབ་པར་འགྱུར་རོ། །མཚན་མོ་ཡང་གཏོར་མ་བྱིན་ནས་སྟོང་ཕྲག་བརྒྱད་བཟླས་ན་ངེས་པར་འོང་ངོ་། །འོངས་པ་ལ་འདོད་པ་བྱས་ན་ཆུང་མར་འགྱུར་ཏེ། ཉི་མ་རེ་རེ་དོང་ཙེ་སྟོང་སྟོང་
སྟེར་ཞིང་རྒྱབ་ཏུ་ཞོན་ན་རི་རབ་ལ་ཡང་ཁྱེར་བར་བྱེད་དོ། །གཞན་ཡང་རྒྱལ་སྲིད་སྦྱིན་པར་བྱེད་ཅིང་རྒྱལ་པོའི་བུ་མོ་བཀུག་ནས་སྟེར་ཏེ། ལོ་སྟོང་ཕྲག་ལྔ་འཚོ་ཞིང་ཤི་ནས་ཀྱང་རྒྱལ་རིགས་སུ་སྐྱེའོ། །ཆུ་བོ་འདུས་པའི་འགྲམ་དུ་སོང་སྟེ། ཤའི་བཟའ་བ་དང་ཀ་ར་བཱི་རའི་མེ་ཏོག་སྦྱིན་ཞིང་
གུ་གུལ་གྱི་དུད་པས་བདུགས་ལ་སྟོང་ཕྲག་བརྒྱད་བཟླས་ན་འགྲུབ་པར་འགྱུར་རོ། །མཚན་མོ་ཡང་མཆོད་པ་རྒྱས་པར་བྱས་ཏེ་མར་གྱི་མར་མེ་རབ་ཏུ་སྤར་ནས་སྟོང་ཕྲག་བརྒྱད་བཟླས་ན་འཁོར་ལྔ་བརྒྱས་ཡོངས་སུ་བསྐོར་ནས་རྐང་གདུབ་ཀྱི་སྒྲ་ཆེན་པོས་འོང་ངོ་། །འོངས་པ་ལ་མི་སྨྲ་བར་གྱུར་པས་
འདོད་པར་བྱ་སྟེ་ཆུང་མར་འགྱུར་རོ། །གལ་ཏེ་སྤང་བར་བྱས་ན་འཆི་བར་འགྱུར་རོ། །རྒྱབ་ཏུ་ཞོན་ན་ཉི་མ་རེ་རེ་མཐོ་རིས་སུ་ཡང་ཁྱེར་བར་བྱེད་དོ། །གཞན་ཡང་རྒྱལ་སྲིད་སྟེར་ཞིང་ལོ་སྟོང་ཕྲག་ལྔ་འཚོ་ལ་ཤི་ནས་ཀྱང་རྒྱལ་རིགས་སུ་སྐྱེའོ། །ཆུ་བོའི་འགྲམ་དུ་སོང་སྟེ། གུ་གུལ་
གྱིས་དཀྱིལ་འཁོར་བྱས་ནས་ཨ་ག་རུའི་བདུག་པ་སྦྱིན་ཞིང་ཇི་ལྟར་གསུངས་པའི་གཏོར་མ་བྱིན་ནས་སྟོང་ཕྲག་བརྒྱད་བཟླས་ན་འགྲུབ་པར་འགྱུར་རོ། །མཚན་མོ་ཡང་མཆོད་པ་རྒྱས་པར་བྱས་ཏེ་སྟོང་བཟླས་ན་རང་ཉིད་འོང་སྟེ་སྣང་བ་ཆེན་པོ་བྱས་ནས་ཙནྡན་གྱི་ཆུས་མཆོད་ཡོན་བྱིན་ན་དགའ་

བར་འགྱུར་རོ། །སྡུག་པ་ངས་ཅི་བྱ་ཞེས་སྨྲ་བར་བྱེད་དོ། །སྒྲུབ་པ་པོས་མ་གྱིས་ཤིག་ཅེས་སྨྲ་བར་བྱ་སྟེ། མ་བཞིན་དུ་ཡོངས་སུ་སྐྱོང་བར་བྱེད་དོ། །འཁོར་ལྔ་བརྒྱའི་འབྲས་ཆན་དང་། རྒྱན་དང་གོས་རྣམས་ཉི་མ་རེ་རེ་ཞིང་སྟེར་ཞིང་ལོ་ཁྲི་འཚོ་ལ་གང་གི་ཚེ་འཆི་བ་ན་བྲམ་ཟེའི་རིགས་སུ་
སྐྱེའོ། །ཆུ་བོ་འདུས་པའི་འགྲམ་དུ་སོང་སྟེ། མཆོད་པ་རྒྱས་པ་བྱས་ནས་མར་གྱི་མར་མེ་རབ་ཏུ་སྤར་ཏེ་མཚན་ཐོག་ཐག་བཟླས་ཏེ། དེ་ནས་ནམ་ཕྱེད་ཀྱི་དུས་སུ་འབྱུང་མོ་སྣང་བ་ཆེན་པོ་བྱས་ནས་འོང་སྟེ། སྡུག་པ་ངས་ཅི་བྱ་ཞེས་སྨྲ་བར་བྱེད་དེ། དེ་ནས་རྒྱལ་སྲིད་བྱིན་ཅིག་ཅེས་
སྨྲས་ན་ཉི་མ་རེ་རེ་ཞིང་དོང་ཙེ་འབུམ་འབུམ་སྟེར་རོ། །ལོ་ཁྲི་འཚོ་ཞིང་གང་གི་ཚེ་འཆི་བ་ན་སའི་བདག་གི་རྒྱལ་པོ་བྱེད་དོ། །འབྱུང་མོའི་རྒྱལ་མོ་ཆེན་མོ་བརྒྱད་ཀྱི་བརྟག་པ་རྫོགས་སོ།། །།དེ་ནས་འབྱུང་མོ་ཆེན་མོ་དུར་ཁྲོད་དུ་འཇུག་པ་རྣམས་ལངས་ཏེ་དཔལ་རྡོ་རྗེ་
འཆང་གི་ཞབས་ལ་ཕྱག་འཚལ་ནས་རང་གི་སྙིང་པོ་ཕུལ་བ། ཨོྃ་ཧྲཱིཿཧཱུྃ་ཧ། མཆོག་གི་སྙིང་པོའོ། །ཨོྃ་ཧཱུྃ་ཀཊྚ་ཀཊྚ་སརྦ་བྷཱུ་ཏཱ་ནཱྃ་ས་མ་མ་ནུ་པཱ་ལ་ཡ། ཧ་ར་ཧ་ར་བནྡྷ་བནྡྷ། ཨཱ་ཀྲ་མ། ཨཱ་ཀྲ་མ། བྷོ་བྷོ་མ་ཧཱ་རཽ་དྲི་སྨ་ཤཱ་ན་བ་སི་ནི་ཨཱ་གཙྪ་ཨཱ་གཙྪ་ཤཱི་གྷྲྃ་དྷུྃ་ཧ་ཧཱུྃ་ཕཊ།
འབྱུང་མོ་དུར་ཁྲོད་ན་གནས་པ་རྣམས་དགུག་པའི་སྔགས་སོ། །ཨོྃ་བནྡྷ་བནྡྷ་དྷུ་ན་དྷུ་ན། ཙ་ལ་ཙ་ལ། ཙ་ལ་ཡ་ཙ་ལ་ཡ། ཕྲེ་པཱ་ཤ་ཕྲེ་པཱ་ཤ། །ཏུ་ར་ཏུ་ར། ཧ་ན་ཧ་ན། ཏིཥྛ་ཏིཥྛ། ས་མ་ཡ་མ་ནུ་པཱ་ལ་ཡ་བྷོཥྨ་ཤཱ་ན་པྲ་བེ་ཤ་ནི་ཧཱུྃ་ཕཊ་ཕཊ་སྭཱ་ཧཱ། འབྱུང་མོ་ཐམས་ཅད་ཀྱི་དམ་ཚིག་
གི་སྔགས་སོ། །ཨོྃ་ཙ་ལ་ཙ་ལ། དྷ་ཀ་དྷ་ཀ །མ་ཧཱ་བྷུ་ཏི་ནི་སཱ་དྷ་ཀ་ན་པྲི་ཡེ། ས་ར་ས་ར། བི་ས་ར་བི་ས་ར། ཀཊྚ་ཀཊྚ། ཙཱ་ལ་ཡ་ཙཱ་ལ་ཡ། བྷཉྫ་བྷཉྫ། རྃ་ག་རྃ་ག །གྲྀཧྞ་གྲྀཧྞ་ཧཱུྃ་ཧཱུྃ་ཕཊ་ཧྲཱིཿསྭཱ་ཧཱ། མཆེ་བ་གཙིགས་མའིའོ། །ཨོྃ་གྷོ་རཱ་མུ་ཁི་སྨ་ཤཱ་ན་བ་སི་ནི་སཱ་དྷ་
ཀ་ཨ་ནུ་ཀུ་ལེ། ཨ་པྲ་ཏི་ཧ་ཏ་སིདྡྷི་དྷ་བ་ཏི་ཀེ་ཨོྃ་ཨོྃ་ཨོྃ་ཨོྃ་ན་མཿསྭཱ་ཧཱ། གདོང་དྲག་མོའིའོ། །ཨོྃ་ཛརྫ་རི་མུ་ཁི། ཙི་ར་ཙི་ར། ཙིནྟ་ཨཱ་བེ་ཤ། སརྦ་ཤ་ཏྲཱུྃ་བྷ་ཡྃ་ཀ་རི། ཧ་ན་ཧ་ན། ད་ཧ་ད་ཧ། པ་ཙ་པ་ཙ། མཱ་ར་ཡ་མཱ་ར་ཡ། མ་མ་ཨ་ཀཱ་ལ་མྲྀ་ཏྱུ་ཀྵ་ཡྃ་ཀ་རི། སརྦ་ནཱ་ག་བྷ་

ཡྃ་ཀ་རི། ཨཊྚ་ཧཱ་སི་ནི་ས་བྷཱུ་ཏེ་ཤྭ་རི། ཐཱ་ཐཱ་ཐཱ་ཐཱ། དྷ་དྷ་དྷ་དྷ། ཨོྃ་ཨོྃ་ཨོྃ་ཨོྃ་སྭཱ་ཧཱ། རྒན་མོ་གདོང་གིའོ། །ཨོྃ་ཀ་མ་ལ་ལོ་ཙ་ནི་མ་ནི་མ་ནུ་ཥུ་པཉྩ་ལི། སརྦ་དུཿཁ་ནི་ནཱ་ཤ་ནི། སཱ་དྷ་ཀ་པྲི་ཡེ་ཛ་ཡ་ཛ་ཡ། དི་བྱ་རཱུ་པི་ཎི་ཧྲཱིཿགྲྀཧྞ་གྲྀཧྞ། ཛྃ་ཛྃ་ཧཱུྃ་ཧཱུྃ་ཕཊ་ཕཊ་ན་མཿསྭཱ་ཧཱ།
པདྨའི་མིག་ཅན་མའིའོ། །ཨོྃ་བི་ཀ་ཊ་དུཿམུ་ཁི་དྃཥྚྲ་ཀ་རཱ་ལོ་ཛྭ་ལི་ཏ་ལོ་ཙ་ནི། སརྦ་ཡཀྵ་བྷ་ཡྃ་ཀ་རི། དྷ་བ་དྷ་བ། གཙྪ་གཙྪ་བྷོ་བྷོ་སཱ་དྷ་ཀཱ་ནཱྃ་ཨཱ་ཛྭཱ་པ་ཡ་ཏི་སྭཱ་ཧཱ། མི་སྡུག་གདོང་མའིའོ། །ཨོྃ་དྷུ་དྷུ་རི་ཀརྞ་བི་ཤཱ་ཙི་ནི་ཀ་ཊྱ་ཀ་ཊྱ། དྷུ་ན་དྷུ་ན་མ་ཧཱ་སཱུརྱ་པཱུ་ཛི་ཏེ། ཙྪིནྡ་ཙྪིནྡ་མ་ཧཱ་ཀརྞ་པི་ཤཱ་ཙི་ནི་བྷཱོ་བྷཱོ་
སཱ་དྷ་ཀ་ཀི་ཀ་དོ་མི་ཊི། ཧཱུྃ་ཧཱུྃ་ཕཊ་ཕཊ་སྭཱ་ཧཱ། སྤྱོད་ངན་མའིའོ། །ཨོྃ་ས་ར་ས་ར། ཀཊྚ་ཀཊྚ། ཛྃ་བྷ་ཡ་ཛྃ་བྷ་ཡ། སྟྃ་བྷ་ཡ་སྟྃ་བྷ་ཡ། མོ་ཧ་ཡ་མོ་ཧ་ཡ། བདྷྱུ་ཏ་ཀ་རཱ་ལི་ཨ་པྲ་ཏི་ཧ་ཏ་བ་རི་སིདྡྷི་ད་ཡ་ཀེ་ཧ་ཧ་ཧ་ཧཱུྃ་ཕཊ་སྭཱ་ཧཱ། གློག་ལྟར་འཇིགས་མའིའོ། །ཨོྃ་སཽ་མྱ་མུ་ཁི་ཨཱ་
ཀཪྵ་ཡ་ཨཱ་ཀཪྵ་ཡ་སརྦ་བྷཱུ་ཏ་ན་ཛ་ཡ་ཛ་ཡ་བྷོ་བྷོ་མ་ཧཱ་ས་ཏྭ་ཀ་ནི་ཏིཥྛ་ཏིཥྛ་ས་མ་ཡ་མ་ནུ་པཱ་ལ་ཡ་ཨཱ་ཛྙཱ་པ་ཡ་ཏི་སྭཱ་ཧཱ། བཞིན་མཛེས་མའིའོ། །དུར་ཁྲོད་དུ་འཇུག་མ་ཆེན་མོ་བརྒྱད་ཀྱི་སྔགས་ཀྱི་ཚིག་གོ། །དེ་ནས་འདིར་དུར་ཁྲོད་དུ་འཇུག་མ་རྣམས་ཀྱི་ཕྱག་རྒྱའི་མཚན་ཉིད་རྣམ་པར་བཤད་པ་
ཁུ་ཚུར་ཕན་ཚུན་བཅངས་ནས་མཛུབ་མོ་གཉིས་བརྐྱང་བ་ནི་འབྱུང་མོའི་དམ་ཚིག་ཕྱག་རྒྱ་སྟེ། ཕྱག་རྒྱ་འདི་ཉིད་ཀྱིས་དགུག་པ་ཡང་བྱའོ། །དུར་ཁྲོད་དུ་འཇུག་པའི་ཤ་ཟ་མོ་འབྱུང་མོ་ཆེན་མོ་བརྒྱད་ཀྱི་ཕྱག་རྒྱ་བཤད་པ། གཡོན་པའི་མཛུབ་མོ་བརྐྱང་བ་ནི་གདོང་དྲག་མའི་ཕྱག་རྒྱའོ། །ཁུ་ཚུར་
སོ་སོར་བཅངས་ནས་མཐེ་ཆུང་གཉིས་འཁྱུད་དེ་མཛུབ་མོ་གཉིས་བརྐྱང་ནས་ཁའི་ཕྱོགས་སུ་སྦྱར་བ་ནི་མཆེ་བ་གཙིགས་མའི་ཕྱག་རྒྱའོ། །ལག་པ་གཡོན་པ་ཁུ་ཚུར་བཅངས་ཏེ་གུང་མོ་བརྐྱང་བ་ནི་རྒན་མོ་གདོང་གི་ཕྱག་རྒྱའོ། །ཕྱག་རྒྱ་དེ་ཉིད་ལས་གུང་མོ་བཀུག་ཅིང་སྲིན་ལག་བརྐྱང་བ་ནི་པདྨའི་
མིག་ཅན་མའི་ཕྱག་རྒྱའོ། །ཕྱག་རྒྱ་དེ་ཉིད་ལས་སྲིན་ལག་བཀུག་ནས་མཐེ་ཆུང་བརྐྱང་བ་ནི་མི་སྡུག་གདོང་མའི་ཕྱག་རྒྱའོ། །ལག་པ་གཡས་པ་ཁུ་ཚུར་བཅངས་ནས་མཛུབ་མོ་བརྐྱང་བ་ནི་སྤྱོད་ངན་མའི་ཕྱག་རྒྱའོ། །ཕྱག་རྒྱ་དེ་ཉིད་ལས་མཛུབ་མོ་བཀུག་ཅིང་གུང་མོ་བརྐྱང་བ་ནི་གློག་ལྟར་

འཇིགས་མའི་ཕྱག་རྒྱའོ། །ཕྱག་རྒྱ་འདི་ཉིད་ལས་མཐེའུ་ཆུང་རབ་ཏུ་བརྐྱང་བ་ནི་བཞིན་མཛེས་མའི་ཕྱག་རྒྱའོ། །དུར་ཁྲོད་དུ་འཇུག་མའི་འབྱུང་མོ་ཆེན་མོ་བརྒྱད་ཀྱི་ཕྱག་རྒྱའི་མཚན་ཉིད་ཀྱི་ཆོ་ག་རྒྱས་པའི་ལེའུའོ།། །།དེ་ནས་འདིར་ནི་བཤད་བྱ་བ། །འབྱུང་པོ་འདུལ་བའི་རྒྱུད་
ཆེན་རྒྱལ། །དུར་ཁྲོད་འཇུག་པའི་འབྱུང་ཆེན་མོ། །བརྒྱད་པོ་སྒྲུབ་པའི་ཆོ་ག་སྟེ། །དབུལ་པོ་རྣམས་ལ་ཕན་དོན་དུ། །བྲན་མོའི་སྒྲུབ་ཐབས་དམ་པའོ། །དུར་ཁྲོད་དུ་སོང་ནས་སྟོང་ཕྲག་བརྒྱད་བཟླས་ན་སྔོན་དུ་བསྙེན་པ་བྱས་པར་འགྱུར་རོ། །དེ་ནས་སྒྲུབ་པ་བརྩམ་པར་བྱ་སྟེ། མཚན་
མོ་དུར་ཁྲོད་དུ་སོང་ནས་སེང་ལྡེང་གི་ཡམ་ཤིང་ཞོ་དང་སྦྲང་རྩི་དང་མར་གྱིས་བྱུག་པས་སྦྱིན་སྲེག་བརྒྱ་བྱས་ན་དེ་ནས་འབྱུང་མོ་དུར་ཁྲོད་དུ་འཇུག་མ་མྱུར་དུ་འོང་སྟེ། ངས་ཅི་བྱ་ཞེས་མངག་གཞུག་བྱེད་པར་འགྱུར་རོ། །དེ་ནས་ཞིང་བསྐྱེད་པའི་ཞིང་གི་ལས་བྱེད་ཅིང་ཉི་མ་རེ་རེ་ཞིང་དོང་ཙེ་རེ་རེ་སྟེར་
རོ། །མཚན་མོའི་ཞིང་གི་གསེབ་ཏུ་སོང་སྟེ་ཉ་དང་ཤས་ཇི་ལྟར་གསུངས་པའི་གཏོར་མ་སྦྱིན་ཞིང་ལན་ཉི་ཤུ་རྩ་གཅིག་ཡོངས་སུ་བཟླས་ན་ལས་ཀྱི་ཤ་ཟ་མོ་ཇི་ལྟར་བསྟན་པའི་ལས་ཐམས་ཅད་བྱེད་དོ། །མཚན་མོ་དུར་ཁྲོད་དུ་སོང་སྟེ་སྟོང་ཕྲག་བརྒྱད་བཟླས་ན་ཤ་ཟ་མོ་ཉན་རྣམ་མྱུར་དུ་བཟང་མོའི་
གཟུགས་ཀྱིས་འོང་སྟེ་མངག་གཞུག་མར་འགྱུར་རོ། །ཁྱིམ་གྱི་ལས་དང་བྱ་བ་དང་ཤགས་དང་དྲག་པོའི་ལས་ལ་སོགས་པ་བྱེད་དོ། །མཚན་མོ་དུར་ཁྲོད་དུ་སོང་ནས་སྟོང་ཕྲག་བརྒྱ་བཟླས་ན་ཤ་ཟ་མོ་ཉན་རྣམ་འབྱུང་མོའི་འཁོར་ལྔ་བརྒྱས་ཡོངས་སུ་བསྐོར་ཏེ་མྱུར་དུ་འོང་ངོ་། །འོངས་
པ་ལ་ཉ་དང་ཤ་ལས་བྱས་པའི་གཏོར་མ་དམར་པོ་བྱིན་ན་དགའ་བར་འགྱུར་རོ། །བྲན་གྱི་ལས་བྱེད་ཅིང་རས་ཟུང་གཅིག་དང་དོང་རྩེ་གཅིག་དང་འབྲས་ཆན་དང་རྒྱན་ལ་སོགས་པ་སྒྲུབ་པ་པོ་དང་འགྲོ་བ་ལྔ་ལ་ཉི་མ་རེ་རེ་ཞིང་སྟེར་རོ། །དཔག་ཚད་བརྒྱ་ནས་ཀྱང་བུད་མེད་བཟང་མོ་བླངས་
ནས་སྟེར་རོ། །མདོར་ན་བྲན་དང་བྲན་མོ་དང་འདྲ་བར་ཇི་སྲིད་འཚོའི་བར་དུ་ལས་ཐམས་ཅད་བྱེད་དོ། །འབྱུང་པོ་འདུལ་བའི་རྒྱུད་ཆེན་པོ་ལས་ཀྱི་ཤ་ཟ་མོའི་ཆོ་ག་རྒྱས་པའི་ལེའུའོ།། །།དེ་ནས་འབྱུང་མོ་གཏུམ་མོ་ཆེན་མོ་ཀ་ཏ་ཡ་ན་གཏུམ་མོ་ཆེན་མོ་རྣམས་ལངས་

ཏེ། འཁོར་གྱི་དཀྱིལ་འཁོར་ཆེན་པོ་དེར་དཔལ་ཁྲོ་བོའི་བདག་པོ་ཆེན་པོའི་ཞབས་ལ་ཕྱག་འཚལ་ཏེ་རང་གི་སྙིང་པོ་ཕུལ་བ། ཨོྃ་ཏྲུྃ་ཧཱུྃ་ཧཱུྃ་ཕཊ་ཕཊ། ཀ་ཏ་ཡ་ན་ཞི་བ་མའིའོ། །ཨོྃ་བྷཱུར་ཛཱ་ལ་ཧཱུྃ་ཕཊ། ཀ་ཏ་ཡ་ན་ཆེན་མོའིའོ། །ཨོྃ་ཨོྃ་ཧྲཱིཿཧྲཱིཿཧཱུྃ་ཧཱུྃ་ཧེ་ཧེ་
ཕཊ་ཕཊ་སྭཱ་ཧཱ། དྲག་མོ་ཀ་ཏ་ཡ་ནའིའོ། །ཨོྃ་རཽ་དྲི་བྷ་ཡཾ་ཀ་རི་ཨཊྚ་ཧ་སི་ནི་སཱ་དྷ་ཀ་པྲི་ཡེ་མ་ཧཱ་པི་ཙི་ཏ་རཱུ་པེ་རཏྣ་ཀ་རི་སུ་བརྞ་ཧ་ཏེ་ཡ་མ་ནི་ཀྲྀནྟ་ནི་སརྦ་དུཿཁ་པྲ་ཤ་མ་ནི་ཨོྃ་ཨོྃ་ཨོྃ་ཨོྃ་ཧཱུྃ་ཧཱུྃ་ཧཱུྃ་ཧཱུྃ་ཤཱི་གྷྲཾ་སིདྡྷི་པྲ་ཡཙྪ་ཧྲཱིཿཛཿསྭཱ་ཧཱ། འབྱུང་པོའི་དབང་ཕྱུག་མ་གཏུམ་མོ་ཀ་ཏ་ཡ་ནའིའོ། །ཨོྃ་ཡ་
མ་ནི་ཀྲྀནྟ་ནི་ཨ་ཀཱ་ལ་མྲྀ་ཏྱུ་ནི་བ་ར་ཎི་ཁཌྷ་ཤུ་ལ་ཧ་སྟེ་ཤཱི་གྷྲྃ་པྲ་སིདྡྷི་ད་དྷ་ཏུ་སཱ་དྷ་ཀ་མཱ་ཛྙཱ་པ་ཡ་ཏི་ཧིཿསྭཱ་ཧཱ། ཀ་ཏ་ཡ་ན་དྲེགས་མའིའོ། །ཨོྃ་ཧེ་མ་ཀུཎྜ་ལིདྷ་ཀ་དྷ་ཀ་ཛྭ་ལ་ཛྭ་ལ་དི་བྱ་ཀུཎྜ་ལི་བྷཱུ་ཥི་ཏེ་དམ་ནི་མ་ཐ་ནི་བྷ་ག་བཱ་ན་ཨཱ་ཛྙཱ་པ་ཡ་ཏི་སྭཱ་ཧཱ། ཀ་ཏ་ཡ་ན་རྣ་ཆ་ཅན་གྱིའོ། །ཨོྃ་བྷྲྀ་ཀུ་ཊི་
མུ་ཁི་ཀ་ཧ་ཀ་ཧ། དྷ་བ་དྷ་བ། ཛྭ་ལ་ཛྭ་ལ། ཧུ་ཏ་ཨཱ་ས་ན་མུ་ཁི་ཨཱ་གཙྪ་ཨཱ་གཙྪ་བེ་ཏ་ཧོཏ་ཐ་བ་ནི། ཨཱ་བི་ཤ་ཨཱ་བི་ཤ། ཧཱུྃ་ཧཱུྃ་ཧཱུྃ། ཕཊ་ཕཊ་ཕཊ། བྷ་ག་བཱན་ཨཱཛྙཱ་པ་ཡ་ཏི་ཧྲཱིཿསྭཱ་ཧཱ། ཀ་ཏ་ཡ་ན་རྒྱལ་བའི་བཞིན་ཅན་མའིའོ། །ཨོྃ་བི་ཀུ་མ་ཐཱ་ནི་ཀ་ཧ་ཀ་ཧ། ཛ་ཡ་ཛ་ཡ།
སརྦ་ཨ་སུ་ར་པ་ཙ་ཏེ་ཧཱུྃ་ཕཊ་སྭཱ་ཧཱ། ཀ་ཏ་ཡ་ན་མཛེས་མའིའོ། །ཨོྃ་སུ་ར་ཏ་པྲི་ཡེ་དི་བྱ་ལོ་ཙ་ནི་ཀཱ་མེ་ཤྭ་རི་ཛ་ག་ཏ་མོ་ཧ་ནི་སུ་བྷ་གེ་ཀཉྩ་ན་ཨ་མ་ལཾ་བྷཱུ་ཥ་ཎེ་ནུ་པཱུ་ར་ཤབྡེ། ཨཱ་བེ་ཤ་ཨཱ་བེ་ཤ། །པི་པུ་ར་པུ་ར་སཱ་དྷ་ཀ་པྲི་ཡེ་ཧྲཱིཿསྭཱ་ཧཱ། ཀ་ཏ་ཡ་ན་དེས་མའིའོ། །ཀ་ཏ་ཡ་ན་ནི་
འབྱུ