Kinh tạng Tây Tạng (Kangyur Đại Học) — 081_རྒྱུད་འབུམ།_ཅ

ར་ཡི་འོ་མ་ཁ་ར་ཀར། །ཏིལ་རྣམས་ཆ་མཉམ་བྱས་ནས་ནི། །མོས་པ་ཡིས་ནི་སྦྱིན་སྲེག་བྱ། །ཉལ་ཀར་དེ་
ལ་བཟའ་བ་སྦྱིན། །བླ་ན་མེད་པའི་བཟའ་བ་པོ། །དེ་ལྟར་རིག་པས་ཆོག་ཤེས་ནས། །སུ་ལའང་སྨྲ་བར་མི་བྱའོ། །ཐམས་ཅད་སྔོན་བཞིན་ཞི་བ་ནི། །མྱུར་དུ་དངོས་གྲུབ་སྟེར་བར་བྱེད། །ཟླ་བ་དྲུག་ཏུའང་གང་བསྟེན་པ། །དེ་ནི་རྡོ་རྗེའི་ལུས་སུ་འགྱུར། །བཅུད་ཀྱིས་ལེན་དང་
གསེར་འགྱུར་སོགས། །ཚེ་དགུག་པ་ནི་བླ་ན་མེད། །རབ་ཏུ་འབད་པས་བསྟེན་པར་བྱ། །ཕྱག་རྒྱ་ཆེ་དོན་སྒྲུབ་པ་པོས། །རྒས་པ་མེད་ཅིང་སྲིན་ནད་མེད། །སྙོམ་ལས་མེད་ཅིང་ལྐུགས་པ་མེད། །གློ་སྐམ་རླུང་མཁྲིས་ནད་སོགས་མེད། །ནད་དང་འབྲས་དང་འབྲུམ་བུ་དང་། །

ཤུ་བ་གཡན་པ་འབྲུམ་ཕྲན་མེད། །མཛེ་ནད་མཚན་མར་རྡོལ་བ་མེད། །དུང་དང་པད་དཀར་དཔལ་ལུས་ལྡན། །འཛམ་བུ་ཆུ་བོའི་གསེར་ལྟར་འབར། །རིག་པ་འཛིན་པའི་བུ་མོ་མཆོག །དེ་ནི་རྟག་ཏུ་འགུགས་པར་བྱེད། །དེ་ཡི་མཛའ་ཆེན་ལྷ་རྣམས་ཏེ། །རྣལ་འབྱོར་མ་
རྣམས་སེམས་པར་བྱེད། །ལུས་ཀྱི་རང་བཞིན་རྟག་ཏུ་ནི། །ཕྱག་བྱ་བ་དང་མཆོད་པར་འགྱུར། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རླུང་གི་གྲངས་ཀྱི་རིམ་པའི་གནས་བསྟན་པའི་ལེའུ་སྟེ་བཅུ་དྲུག་པའོ།། །།དེ་ནས་གཞན་ཡང་རྩ་རྣམས་
ནི། །གྲངས་དང་གནས་ནི་བསྡུས་པ་ཉོན། །འཁོར་ལོའི་གྲངས་ཀྱི་དབྱེ་བ་ཡིས། །ཇི་བཞིན་རྨད་དུ་བྱུང་བའི་མཆོག །འཁོར་ལོ་དྲུག་ལ་རྟེན་བཅུ་དྲུག །ལུས་ལ་ལྷ་ཡི་གཞལ་ཡས་ཁང་། །རྣལ་འབྱོར་ཇི་བཞིན་གནས་ཇི་བཞིན། །མདོར་བསྡུས་ནས་ནི་བཤད་པར་བྱ། །
རླུང་གི་འཁོར་ལོར་གནས་པའི་རྩ། །འདབ་དྲུག་རླུང་ནི་མཁའ་ལ་སྤྱོད། །འདབ་གསུམ་མེ་ཡི་འཁོར་ལོར་བཤད། །རྩ་གསུམ་གནས་ནི་རིམ་གྱིས་འཆར། །དེ་བཞིན་ལོངས་སྤྱོད་འཁོར་ལོ་ཡང་། །རྩ་ནི་བཅུ་དྲུག་ཡང་དག་བརྗོད། །ཆོས་ཀྱི་འཁོར་ལོར་གནས་པའི་རྩ། །
བརྒྱད་ནི་ཀུན་ལ་ཁྱབ་པའོ། །དེ་བཞིན་སྤྲུལ་པའི་འཁོར་ལོ་ཡང་། །དྲུག་ཅུ་རྩ་བཞིར་འཆར་བར་བཤད། །བདེ་བ་ཆེན་པོའི་འཁོར་ལོ་ཆེར། །རྩ་ནི་སུམ་ཅུ་གཉིས་སུ་བཤད། །དེ་ལྟར་མདོར་བསྡུས་རིམ་པ་ཡང་། །བརྒྱ་དང་སུམ་ཅུ་གཅིག་ལྷག་པར། །རྩ་རྣམས་སུ་
ནི་ཡང་དག་བཤད། །གཞན་དག་ཏུ་ནི་རྒྱས་པར་ཡང་། །རྩ་ནི་བདུན་ཁྲི་ཉིས་སྟོང་དུ། །གནས་ཀྱི་དབྱེ་བས་ཕྱེ་བ་ནི། །ངེས་པར་བརྗོད་པ་འབུམ་སྡེར་གསུངས། །རྒྱུད་ནི་ཆུང་ངུའང་འདི་ཉིད་དུ། །སྙིང་པོ་ལས་ནི་སྙིང་པོར་གསུངས། །སྨིན་མའི་དབུས་གནས་རླུང་འཁོར་ལོ། །
བྱེ་བ་འཁྱིལ་པ་མི་བཟད་པ། །མི་བཟང་བརྟན་དང་མཚན་ཉིད་ཅན། །རྩ་ཐུང་དྲུག་གི་མཚན་ཉིད་དོ། །འཛིན་པ་རྟོག་མེད་གང་བ་ནི། །རྩ་གསུམ་གྲུ་གསུམ་མེ་དཀྱིལ་འཁོར། །མགྲིན་པའི་འོག་ཏུ་བཤད་པ་ཡིན། །དྲི་མ་དང་བྲལ་གསལ་བ་དང་། །དྲག་པོ་

དང་ནི་གསུམ་ཡིན་ནོ། །ཡང་དག་ཞུགས་དང་ཤིན་ཏུ་ཞུགས། །ཤིན་ཏུ་བཟང་དང་བཟང་པོར་འགྲོ། །སྟོབས་ཆེན་དང་ནི་མི་བཟད་ཆེ། །མཛེས་ཆེན་མདུན་དུ་སྐྱེས་པ་ཆེ། །རྒྱགས་པའི་རྟག་དང་རྒྱགས་པའི་ཆ། །རྒྱགས་པའི་ཆུ་དང་རྒྱགས་སྨྱོ་བྱེད། །
རྒྱགས་དང་རྒྱགས་པའི་རྒྱུ་མཐུན་དང་། །རྒྱགས་པའི་རླན་དང་རྒྱགས་པ་འཆང་། །རྩུབ་དང་མཁའ་དང་འབྱུང་བརླང་དང་། །དབུགས་མི་བདེ་དང་གཡའ་མཁའ་འགྲོ། །འདབ་ཆགས་ཡན་ལག་ཁྭ་ཡི་གདོང་། །ཟ་ཕོད་མི་བཟད་སྒྲ་སྒྲོགས་དང་། །དྲི་ལྡན་རྡེག་དང་རྔུལ་བ་
དང་། །དབྱངས་དང་དབྱངས་སྐྱེས་དང་ནི་སྤྲིན། །ཆུ་བ་མཐོང་དང་རྒྱུན་ལྟར་སྔོ། །ཡུད་ཙམ་གཙོ་བོ་ཡུད་མ་སྐྱེས། །རྒྱབ་ཏུ་ཁ་བལྟས་དབྱུག་པ་དང་། །དབྱུག་སྙེམས་དང་ནི་རྙིང་པ་དང་། །ཚིགས་ཀྱི་ལྟོ་དང་ཚིགས་ཀྱི་ཚིག །ཚིགས་ཀྱི་ཚད་དང་བརྟུལ་བ་དང་། །ཚིགས་
ཀྱི་གནས་དང་ཚིགས་ཀྱི་གདོང་། །ཚིགས་འོད་ཚིགས་ཀྱི་ལུ་གུ་རྒྱུད། །དུལ་བྱེད་དུད་འགྲོ་གཟི་བརྗིད་དང་། །དྲི་མེད་དུལ་བའི་སྙེམས་པ་དང་། །ཆུ་འཕྱང་ལྟོ་དང་ཆུ་འཕྱང་ཆགས། །ཆུན་འཕྱང་ཆུན་འཕྱང་ཕྱེད་སྦྲང་བུ། །ཕྲུ་གུ་ཕྲུ་གུ་སྟེར་དྲི་བ། །ལོ་མ་ལོ་མའི་མགྲིན་
པ་དང་། །རབ་མཆོག་མ་དང་རབ་གསལ་ཏེ། །དེ་ལྟར་དྲུག་ཅུ་རྩ་བཞིར་བཤད། །ལྟེ་བ་སྤྲུལ་པའི་འཁོར་ལོ་གནས། །བདུད་རྩི་མཆོག་གིས་ཡོངས་སུ་གང་། །རིན་ཆེན་ཆེན་པོ་པདྨ་དང་། །རྡོ་རྗེ་ཆེན་པོ་སྟོབས་པོ་ཆེ། །མགོ་བོ་ཆེ་དང་སྒྲ་ཆེ་དང་། །ཉེས་དགའ་
ཆེན་པོ་མྱོས་བ་ཆེ། །འདི་བརྒྱད་ཆོས་ཀྱི་འཁོར་ལོའི་དབུས། །སྙིང་གའི་པདྨར་ཡང་དག་གནས། །ལོངས་སྤྱོད་ལོངས་སྤྱོད་སྟེར་ལྡན་དང་། །ཉི་འགྲོ་གསལ་དང་སྐལ་བ་དང་། །སྒོམ་པ་དང་ནི་ཐལ་བའི་གདོང་། །བཟའ་སྟེར་བཟའ་དང་བཀྲེས་པ་དང་། །བཅུད་ལེན་
རོས་ནི་སྐྱུར་བ་དང་། །རོ་འཇིགས་པ་དང་རོ་དང་ནི། །ཁྲུང་ཁྲུང་ལོངས་སྤྱོད་འཁོར་ལོར་གནས། །གྲངས་ནི་བཅུ་དྲུག་ཏུ་ནི་བརྗོད། །དེ་སྟེང་རིམ་རིགས་འདོད་པ་ཅན། །འདོད་ཅན་མ་དང་སྲོག་གི་ལུས། །ཟླ་ཐུང་ཟླ་སྟེར་མཛེས་པ་ནི། །འདོད་ཆགས་མིན་སྨྲ་ཀུ་ཤ་དང་། །

ཤ་བི་སྤོ་དང་དག་པ་དང་། །མི་དང་མི་རོ་ནེ་ཙོ་དང་། །གང་ལ་གཉིས་རོ་ལྡན་པ་དང་། །ཀིས་རིང་ཆང་སྟེར་བདུད་རྩི་དང་། །དུང་ཅན་དང་ནི་དུང་རྣ་དང་། །དུག་གི་མིག་དང་དུག་གི་སྣ། །རྒྱགས་དབང་རྒྱགས་པ་བརྐམ་པ་དང་། །རྒྱགས་པས་བརྒྱལ་དང་ངོ་མཚར་རྒྱགས། །
སྙེམས་པ་དང་ནི་ཚོགས་ཀྱི་སྟེན། །སུམ་ཅུ་རྩ་གཉིས་ཞེས་ནི་བརྗོད། །བདེ་བ་ཆེན་པོའི་འཁོར་ལོ་ཆེ། །མཆོག་ཏུ་དགའ་བ་སྟེར་བར་བྱེད། །ཕྲ་དང་རེག་བྱ་མཆོག་ཏུ་ཕྲ། །གཟུང་དང་འཛིན་པ་རྣམ་པར་སྤངས། །རང་ཉིད་བདེ་ཆེན་རང་བཞིན་དང་། །གཞན་དག་ལ་
ཡང་སྟེར་བར་བྱེད། །དེ་ལྟར་ཡང་དག་རྩ་ཡི་རིམ། །བླ་མའི་ཞལ་ལས་ཤེས་པར་བྱ། །རྩ་ཡི་རིམ་མེད་ངེས་པར་ནི། །ཕུང་པོ་ལ་སོགས་མི་འབྱུང་ངོ་། །ཕུང་པོ་མེད་ན་ཡེ་ཤེས་ཆེ། །རྣལ་འབྱོར་པ་ཡིས་ཐོབ་མི་འགྱུར། །ཕུང་པོ་ལྔ་ཡི་བདག་ཉིད་ལུས། །མཁའ་
འགྲོ་ལྔར་ནི་རབ་ཏུ་གྲགས། །དེ་ཉིད་འབྱུང་བ་ལྔ་ཡིས་ནི། །ཡེ་ཤེས་ལྔར་ནི་རྣམ་པར་གནས། །དེ་ཕྱིར་འབད་པ་ཐམས་ཅད་ཀྱིས། །རྩ་ཡི་འཁོར་ལོ་ཤེས་པར་བྱ། །ཇི་ལྟར་ཆུ་ཡི་དབུས་ཀྱི་ཤིང་། །མྱུར་དུ་ཡང་ནི་འཕེལ་ནས་འགྲོ། །དེ་ལས་འབྲས་བུ་སོགས་ལྡན་
པ། །སྟེར་བར་འདི་ལ་ཐེ་ཚོམ་མེད། །དེ་བཞིན་ཕུང་པོ་ཤིང་ཞེས་བྱ། །རྩ་ཡི་ཆུ་ཡིས་འཕེལ་ནས་ནི། །འཕེལ་བས་ཡང་དག་འབྲས་བུ་ནི། །ཐམས་ཅད་མཁྱེན་པ་ཉིད་སྟེར་བྱེད། །ལྷ་ཡི་རྣམ་པའི་ངོ་བོ་ཡིས། །རྩ་རྣམས་རང་བཞིན་བསྒོམ་པར་བྱ། །གཉིས་
ཕྲད་པ་ལས་རེག་བྱ་གཉིས། །གལ་ཏེ་རྡོ་རྗེ་ལྷག་གྱུར་ན། །དེ་ཚེ་མེ་ནི་ཡང་དག་འབར། །དེ་རྗེས་མེ་ཡི་འཁོར་ལོའི་དབུས། །འཁོར་ལོའི་མིང་ཅན་པདྨ་རྣམས། །རིམ་གྱིས་རིམ་གྱིས་བྱེ་བར་འགྱུར། །འདི་ནི་རྩ་ལས་འབབ་དེ་ལས། །བྱང་ཆུབ་སེམས་ནི་བདེ་
བ་ཆེ། །སྤྲུལ་པའི་སྙིང་པོ་ཡང་དག་ཐོབ། །ངོ་བོ་གཅིག་གྱུར་བསྡུས་ནས་ནི། །འབབ་པའི་ཉི་མ་ཟླ་བའོ། །མི་དབང་དཀྱིལ་འཁོར་དབུས་སུ་ཡང་། །གང་ཕྱིར་སྲད་བུའི་རྣམ་པར་གནས། །རྒྱུ་གཅིག་ཏུ་ཡང་ཤེས་ནས་ནི། །དེ་ཉིད་འབྲས་བུ་རྣམ་པ་གཉིས། །

གཡས་པ་ཉི་མའི་རྣམ་པ་དང་། །གཡོན་པ་ཟླ་བའི་རྣམ་པར་འབྱུང་། །གང་ཚེ་གཡས་པའི་ཉི་མ་ནི། །དེ་ཚེ་ཁྲག་འགྱུར་བདེ་བའོ། །གང་ཚེ་གཡོན་པའི་ཟླ་བ་གསལ། །བདེ་བ་ཀུན་ཀྱང་དེ་ལྟ་བུའོ། །དེ་གཉིས་ཁོངས་སུ་ཆུད་པའི་མེ། །ཡན་ལག་བདུན་
ཉིད་ཡང་དག་གནས། །སྔོན་ལ་རླུང་གི་རྣམ་ཤེས་ནི། །བརྒྱ་ལམ་གང་ཚེ་འཁྲུལ་གྱུར་ན། །ཕ་ཡི་མཁའ་ལ་མཚུངས་པར་གནས། །དེ་ཚེ་ཆགས་པའི་དབང་དུ་འགྱུར། །གསང་གནས་ཟླ་མཚན་ལྡན་པའི་རྩ། །མེ་དང་ཉི་མ་འཆར་བ་ན། །དེ་ཚེ་ལྷག་པར་ཆགས་
པས་ནོན། །ཆགས་པ་མཆོག་ཏུ་འདོད་པར་འགྱུར། །རྡོ་རྗེ་པདྨ་འདྲེས་པའི་གདོང་། །འཇུག་པ་ཕ་ཡི་ཁ་ཡི་རླུང་། །དེ་ཚེ་ས་བོན་དུ་ནི་འགྱུར། །ས་བོན་ལས་ནི་སེམས་ཅན་འབྱུང་། །དེ་ཕྱིར་རྩ་ལས་ཡང་དག་འཆར། །འབྲས་བུ་ངོ་མཚར་ཅན་ནི་སྐྱེ། །དེ་ཉིད་བྱང་
ཆུབ་སེམས་ཀྱང་ནི། །འཛིན་པ་སྲོག་ནི་བསྡུས་པའོ། །ཡེ་ཤེས་མཆོག་དང་དེ་ཉིད་མཆོག །མཆོག་ཏུ་བདེ་བ་རྨད་བྱུང་ཆེ། །ཡེ་ཤེས་རྣལ་འབྱོར་ཐོབ་པ་ཡིས། །མཆོག་ཏུ་བདེ་བ་བླ་ན་མེད། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རྩའི་འཁོར་ལོའི་
གནས་ཀྱི་རིམ་པར་བསྟན་པའི་ལེའུ་སྟེ་བཅུ་བདུན་པའོ།། །།དེ་ནས་གཞན་ཡང་བཤད་བྱ་བ། །རྣལ་འབྱོར་ལུས་ལ་རིམ་ཇི་བཞིན། །རྩ་རྣམས་རྟག་ཏུ་ཡང་དག་ནི། །རྒྱུད་པ་ཡི་ནི་རིགས་ཀྱིས་སྐྱེ། །གསལ་བ་རུ་ནི་མ་གསུངས་པ། །དད་པའི་བསམ་པ་རྣམ་སྤངས་
པ། །སྐྱེ་བོ་སྐལ་བ་མེད་དོན་དུ། །གང་དུའང་གསལ་བར་མ་གསུངས་པ། །སྙིགས་མ་ལྔ་ཞེས་བྱ་བའི་དུས། །སེམས་ཅན་མྱུར་དུ་དངོས་གྲུབ་དོན། །སྣོད་དུ་བྱ་བར་འདོད་པ་ཡིས། །རང་བྱུང་ཡེ་ཤེས་རྨད་བྱུང་བ། །རྣལ་འབྱོར་ལུས་ཀྱི་བདེ་ཆེན་པོའི། །འཁོར་ལོའི་
རྩ་ནི་སུམ་ཅུ་གཉིས། །བྱང་ཆུབ་སེམས་ནི་གསལ་འབབ་པའི། །རྩ་རྣམས་ཡང་དག་རྣམ་བཤད་བྱ། །དེ་ནི་བདེ་བ་ཆེན་པོའི་གནས། །དེ་ནི་མཚན་ཉིད་བཤད་པར་བྱ། །ཀ་ཙ་ཊ་ཏ་པའི་སྡེ་ཚན། །ཡ་རལ་ཝ་ཥ་ཤ་ས། །དེ་དག་རིམ་པར་ཤེས་པར་བྱ། །སླར་ཡང་དེ་

དག་བསྡུས་ནས་ནི། །སྡེ་ཚན་ཙམ་ནི་གཅིག་ཏུ་འགྲོ། །དེ་ཡང་ཞི་བའི་ཡེ་ཤེས་མཆོག །བྱང་ཆུབ་སེམས་ལ་ཐིམ་ནས་འགྲོ། །ཀུན་རྟོག་ཐམས་ཅད་སྤངས་ནས་ནི། །བདེ་བ་ཀུན་གྱི་གཞི་ཡི་མཆོག །ཤེས་དང་ཤེས་བྱ་རྣམ་པར་སྤངས། །ཐམས་ཅད་བདག་ཉིད་རྟག་
ཏུ་བཞུགས། །དེ་ལས་འཁོར་ལོ་གསུམ་དབྱེ་བས། །རྩ་ནི་བརྒྱད་ཀྱི་དབྱེ་བ་ལས། །སྐུ་གསུང་ཐུགས་ཀྱི་སྔགས་ཀྱིས་ནི། །གསུམ་ཕྱེ་བདུན་ཅུ་རྩ་གཉིས་གསལ། །དེ་ནི་སྟོང་དུ་རབ་ཕྱེ་བ། །སོ་སོར་འཕྲོས་པའི་བདག་ཉིད་ཅན། །སྟོང་ཕྲག་བདུན་ཅུ་རྩ་གཉིས་ཀྱིས། །རྩ་
རྣམས་ཀྱི་ནི་གྲངས་ཞེས་བྱ། །རླུང་དང་མཁྲིས་པ་བད་ཀན་ནི། །ཁམས་གསུམ་གྱི་ནི་དབྱེ་བ་ཡིས། །སྟོང་ཕྲག་ཉི་ཤུ་རྩ་བཞིར་ནི། །འཁོར་ལོ་འཁོར་ལོའི་དབྱེ་བ་ཡིས། །རྣལ་འབྱོར་ཆེན་པོའི་རྒྱུད་ཀྱི་ནི། །ངེས་པའི་མན་ངག་རྗེས་འབྲངས་ནས། །ཕྱག་རྒྱའི་རྣལ་འབྱོར་དེ་ཉིད་
མཆོག །ལྷ་ཡི་རིམ་པའི་མཚན་ཉིད་ནི། །རྩ་ནི་སོ་སོར་དབྱེ་བ་ཡིས། །བླ་མའི་ཞལ་ལས་ཤེས་པར་བྱའོ། །དེ་ལས་ཡང་ནི་སྡོམ་སྦྱོར་བར། །སོང་ནས་ཕན་ཚུན་ཀུན་ནས་བརྟེན། །སླར་ཡང་བདུན་ཅུ་རྩ་གཉིས་འགྲོ། །བདེ་ཆེན་འཁོར་ལོ་རྩ་ཡི་གནས། །རྩ་ནི་སུམ་ཅུ་རྩ་གཉིས་
ལས། །དེ་ཡང་འཁོར་ལོ་སྡོམ་པར་འགྱུར། །འཁོར་ལོ་རེ་རེའི་གཙོ་བོའི་རྩ། །བརྒྱད་བརྒྱད་དུ་ནི་འགྱུར་བར་གསལ། །རྣལ་འབྱོར་ལུས་ཀྱི་རྩ་མཆོག་ཅེས། །རྨད་བྱུང་སུམ་ཅུ་རྩ་གཉིས་ནི། །ཡི་གེ་སུམ་ཅུ་གཉིས་དབྱེ་བས། །རྟག་ཏུ་རྣལ་འབྱོར་གཙོ་བོས་ཐོབ། །
ཕུང་པོ་ཁམས་དང་དོན་ཡུལ་ཉིད། །དབང་པོའི་སྒོ་ནི་སྲུང་བའོ། །སུམ་ཅུ་རྩ་གཉིས་དབྱེ་བདག་ཉིད། །གསལ་བ་ཡི་ནི་དཀྱིལ་འཁོར་མཆོག །ལུས་ཀྱི་གཞལ་ཡས་ཁང་དུ་ཡང་། །དེ་ཉིད་ཀྱི་ནི་ནང་བཞུགས་པ། །དེ་བཞིན་གཤེགས་དང་ལྷ་མོ་དང་། །གཟུགས་
ལ་སོགས་དང་རྒྱལ་སྲས་རྣམས། །ཁྲོ་བོ་བཅུ་ཞེས་བྱ་བ་ཡི། །དེ་ཉིད་མཆོག་ནི་ཡང་དག་བཞུགས། །སླར་ཡང་ཁྲོ་བོ་རྒྱལ་སྲས་ལ། །ནང་དུ་མི་སྣང་བར་ནི་འགྲོ། །རྒྱལ་སྲས་རྣམས་ནི་གཟུགས་ལ་སོགས། །ལྷ་མོ་རྣམས་ལ་བསྡུས་ནས་ནི། །དེ་རྣམས་ཀྱང་ནི་

ས་སོགས་འགྲོ། །དེ་དག་དེ་བཞིན་གཤེགས་ལྔ་ལ། །སྐུ་གསུང་ཐུགས་ཀྱི་རྡོ་རྗེ་ལ། །དེ་དག་ལ་ཡང་བསྡུས་ནས་འགྲོ། །དེ་ཁོ་ན་ཉིད་བདེ་གཅིག་པུ། །དེ་ལ་ཡང་ནི་ཐིམ་ནས་འགྲོ། །གཟུང་དང་འཛིན་པ་རྣམས་ལས་གྲོལ། །བདེ་བ་ཀུན་རྟེན་པ་ཡི་
མཆོག །དེ་ཡང་ཉམས་མྱོང་ཙམ་ལས་སླར། །དེ་ནི་ཡི་གེ་ཙམ་ལ་ཐིམ། །ཡི་གེ་ཙམ་ནི་ཐིག་ལེར་ཐིམ། །ཐིག་ལེ་ཡང་ནི་སྒྲ་ལ་ཐིམ། །སྒྲ་ཡང་སྒྲ་ཙམ་ལ་ནི་ཐིམ། །སྒྲ་ཙམ་འོད་གསལ་བ་ལའོ། །འོད་གསལ་གོ་འཕང་ཡང་དག་པར། །སྤྲོ་དང་བསྡུ་བའི་མཚན་
ཉིད་དོ། །རྣམ་པར་ཤེས་དང་ཆོས་དབྱིངས་དང་། །དོན་དམ་པ་དང་བདེ་བ་ཆེ། །གཟུང་དང་འཛིན་པ་ལས་གྲོལ་བ། །བྱང་ཆུབ་སེམས་ནི་དྲི་མ་མེད། །རྡོ་རྗེ་སེམས་དཔའི་ཞི་བ་ཆེ། །གཉིས་མེད་ཡེ་ཤེས་རྨད་དུ་བྱུང་། །དབང་བསྐུར་བཞི་པ་བདེ་བ་དང་། །བཞི་བའི་
དགའ་བ་གོ་འཕང་མཆོག །དེ་ལ་སོགས་མིང་བྱེ་བྲག་གིས། །གོ་འཕང་མཆོག་ནི་གསུངས་པ་ཡིན། །སྤྲོ་དང་བསྡུ་བའི་དབྱེ་བ་ཡིས། །རིམ་པ་ཇི་ལྟ་བ་བཞིན་དུ། །དེ་ལྟར་བསྐྱེད་དང་རྫོགས་པ་ཡི། །རིམ་དོན་བླ་མ་བརྒྱུད་ལས་ཤེས། །ཞི་བ་གཉིས་མེད་
མཚན་ཉིད་ཅན། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རྣལ་འབྱོར་པའི་ལུས་ཀྱི་རྩ་བསྡུས་པའི་ལེའུ་སྟེ་བཅྭ་བརྒྱད་པའོ།། །།དེ་ནས་གཞན་ཡང་བཤད་བྱ་བ། །སྣ་ཚོགས་ལ་སོགས་སྐད་ཅིག་བདག །ཡང་དག་གཞུང་ལུགས་མཚན་
ཉིད་ནི། །དེ་ཉིད་ཇི་ལྟ་བ་བཞིན་ཉོན། །རྣམ་པ་སྣ་ཚོགས་རྣམ་པར་སྨིན། །རྣམ་པར་འཇོམས་དང་མཚན་ཉིད་བྲལ། །སྐད་ཅིག་མ་ནི་བཞི་ཞེས་གསུངས། །རྣམ་པར་ཕྱེ་ནས་སླར་བཤད་བྱ། །རྣམ་པ་སྣ་ཚོགས་མངོན་པར་འདོད། །དེ་ཡི་སྐད་ཅིག་དབྱེ་བར་བྱ། །ཨ་ལིད་
ག་ན་དང་། ཙུམྦ་ན་དང་། ཙུ་མ་ཤ་ན་དང་། ཀུ་ཙ་གྲ་ཧ་དང་། བུ་ལ་ཏྲ་ཏྲ་ཧ་ན་དང་། ད་ཤ་ན་དང་། ཁ་ད་ན་དང་། དོ་ལ་དང་། པུ་ཙི་ཙི་དང་། ཀུར་པ་ལ་སོགས་པའི་ཀ་ར་ན་དང་། །རྣམ་པ་སྣ་ཚོགས་སྐད་ཅིག་གོ། །ན་ལི་སྟོང་ཕྲག་བདུན་ཅུ་གཉིས། །ལུས་ནི་བདེ་བ་རྒྱས་

པ་ན། མགྲིན་པ་དག་ཏུ་གང་ཕྱིན་པ། །རྣམ་སྨིན་ཞེས་བྱ་སྐད་ཅིག་གོ། །ལྷན་ཅིག་སྐྱེས་བའི་ཡེ་ཤེས་ནི། །རྡོ་རྗེ་ཕྲེང་བའི་མཚན་ཉིད་ཅན། །ཐམས་ཅད་མངོན་པར་བྱང་ཆུབ་པའི། །རྣམ་པ་མེད་པའི་སྐད་ཅིག་གོ། །ན་ལི་ལས་བྱུང་ཤུ་ཀྲ་འདས། །རྣམ་པ་དང་བྲལ་སྐད་ཅིག་གོ། །ཡེ་ཤེས་
བཞི་དང་སྟོང་བ་བཞི། །སྐད་ཅིག་མ་ནི་བཞི་ལས་རྟོགས། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སྐད་ཅིག་མའི་མཚན་ཉིད་རྒྱས་པར་བཤད་པའི་ལེའུ་སྟེ་བཅུ་དགུ་པའོ།། །།དེ་ནས་གཞན་ཡང་བཤད་བྱ་བ། །དགའ་བ་བཞི་ཡི་མཚན་ཉིད་ནི། ལུགས་
འབྱུང་ལུགས་ལས་བཟློག་པ་ཡི། །ཇི་ལྟ་བ་ཡི་རིམ་པ་ཡི། །དགའ་བའི་བདེ་བ་དང་པོ་སྟེ། །མཆོག་ཏུ་དགའ་བ་གཉིས་པ་དང་། །དགའ་བྲལ་ཞེས་པ་གསུམ་པ་དང་། །བཞི་པ་ལྷན་ཅིག་སྐྱེས་པར་བཤད། །སྤྲུལ་པའི་འཁོར་ལོར་དགའ་བ་དང་། །མཆོག་དགའ་ཆོས་ཀྱི་འཁོར་
ལོར་གནས། །ལོངས་སྤྱོད་བྲལ་བའི་དགའ་བ་དང་། །ལྷན་ཅིག་སྐྱེས་དང་བདེ་བ་ཆེ། །ལུགས་བཟློག་རིམ་པ་ཞེས་ནི་གསུངས། །དེ་རྗེས་ལུགས་འབྱུང་བཤད་བྱ་སྟེ། །བདེ་ཆེན་འཁོར་ལོ་སྤྱི་བོ་ལ། །དེ་ནི་དགའ་བར་བཤད་པ་ཡིན། །ལོངས་སྤྱོད་འཁོར་ལོར་མཆོག་དགའ་
དང་། །དགའ་བྲལ་ཆོས་ཀྱི་འཁོར་ལོར་གནས། །སྤྲུལ་པའི་འཁོར་ལོར་ལྷན་ཅིག་སྐྱེས། །དགའ་བ་ཉམས་སུ་མྱོང་བར་བྱེད། །བལྟ་དང་དགུག་དང་དེ་བཞིན་བརྡ། །ཁ་ལ་ཙུམྦ་བྱེད་པ་ཡི། །དགའ་བ་ཉམས་སུ་མྱོང་བར་ཤེས། །རྣམ་པ་སྣ་ཚོགས་མཚན་ཉིད་དོ། །རྣལ་
འབྱོར་རྣལ་འབྱོར་མ་མཆོག་ཏུ། །དེ་བཞིན་སྐྲ་ལ་འཛིན་པ་དང་། །རྡོ་རྗེ་པདྨར་བཞག་ནས་ནི། །ཉམས་མྱོང་ས་ནི་སྐད་ཅིག་མཆོག །རྣམ་སྨིན་ཞེས་བྱ་སྐད་ཅིག་ཉིད། །དེ་ཉིད་རྒྱུར་ནི་རྣམ་པར་ཤེས། །རྩ་ཡི་དབུས་ན་རབ་གསལ་གནས། །གཏུམ་མོ་ཡང་ནི་རྣམ་རྟོག་
འཇོམས། །བདེ་བ་ཆེན་པོའི་འཁོར་ལོ་ཆེ། །མཆོག་གི་ཆ་ནི་ཞུ་བར་བྱེད། །བྲལ་དགའི་གནས་སུ་མྱོང་བ་ནི། །རྣམ་རྟོག་སྐད་ཅིག་མཚན་ཉིད་དོ། །དེ་ལ་རོ་གཅིག་རང་བཞིན་ནི། །རྩ་ནི་གཅིག་གི་རྒྱུན་ལ་རྟེན། །བདེ་བ་ཆེན་པོའི་གོ་འཕང་ཞི། །ལྷན་ཅིག་

སྐྱེས་པའི་མཚན་ཉིད་ནི། །རྣམ་པ་སྣ་ཚོགས་སྐད་ཅིག་གསུངས། །སྟོང་ཉིད་ཀུན་གྱི་གཞི་ཡི་མཆོག །ཆོས་ཀྱི་འཁོར་ལོ་དེ་ལས་སྟེང་། །རྣལ་འབྱོར་པ་ཡིས་བསྒྲུབ་བྱ་བ། །ཉམས་སུ་མྱོང་བ་མཆོག་དགའ་སྟེ། །རྣམ་སྨིན་སྐད་ཅིག་མཚན་ཉིད་དོ། །
ལོངས་སྤྱོད་འཁོར་ལོ་དེ་ལས་ནི། །སྟེང་དུ་བྱེད་པའི་སྐད་ཅིག་ལ། །ཉམས་མྱོང་བྲལ་བའི་དགའ་བ་ནི། །རྣམ་འཇོམས་མཚན་ཉིད་སྐད་ཅིག་གོ། །བདེ་བ་ཆེན་པོའི་འཁོར་ལོ་ཆེ། །དེ་ཐོབ་མཚན་ཉིད་སྐད་ཅིག་མ། །ལྷན་ཅིག་སྐྱེས་དགའི་ཉམས་མྱོང་བ། །མཚན་ཉིད་དང་
བྲལ་སྐད་ཅིག་གོ། །རྩ་གསུམ་ཀུན་གྱི་ནམ་མཁའ་ཆེ། །རྣལ་འབྱོར་མ་ཚོགས་ཡང་དག་གཟུགས། །དེ་ལས་རབ་སད་ཉམས་མྱོང་བ། །མཚན་ཉིད་གཅིག་པར་རོ་མཚུངས་པ། །རྣལ་འབྱོར་ཆེན་པོས་ཉམས་སུ་མྱོང་། །སླར་ཡང་མཚན་ཉིད་མེད་པར་འགྲོ། །རབ་ཏུ་
སད་པ་ཉམས་སུ་མྱོང་། །སྟོང་ཕྲག་བཅུ་དྲུག་བདག་ཉིད་དོ། །བདེ་ཆེན་གོ་འཕང་མི་ཕྱེད་པ། །གཉིས་མེད་རྡོ་རྗེ་སེམས་དཔའི་གནས། །དེ་ལྟར་འདི་ནི་དགའ་དབྱེ་བ། །གཞན་དུ་གསལ་བར་མ་གསུངས་སོ། །རྣལ་འབྱོར་མ་ཡི་བཀའ་དྲིན་གྱིས། །བླ་མ་བརྒྱུད་
པ་ལས་ཤེས་བྱ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་དགའ་བའི་མཚན་ཉིད་རྣམ་པར་དབྱེ་བའི་ལེའུ་སྟེ་ཉི་ཤུ་པའོ།། །།དེ་ནས་གཞན་ཡང་བཤད་ཀྱིས་ཉོན། །ཐིག་ལེ་གསུམ་ནི་བླ་ན་མེད། །གང་གིས་ཤེས་པ་ཙམ་གྱིས་ནི། །
རྣལ་འབྱོར་པ་ཡི་དངོས་གྲུབ་འགྱུར། །རྩ་རྣམས་ཀུན་དུ་འབབ་པ་དང་། །བྱང་ཆུབ་སེམས་ནི་ཞུ་བྱས་པ། །རྡོ་རྗེ་འམ་ནི་པདྨའི་རྩེ། །རླུང་ནི་བཟུང་བའི་སྐད་ཅིག་ལ། །རྐན་དགུག་པ་ཡི་སྦྱོར་བ་དང་། །ཀྵྨི་གྱི་སྔགས་ཀྱི་སྦྱོར་བ་ཡིས། །རྣལ་འབྱོར་མཆོག་ནི་ཐོབ་པར་
བྱེད། །བདེ་བ་ཀུན་གྱི་གཞི་ཡི་མཆོག །ཆོས་ཀྱི་འཁོར་ལོ་དེ་ཉིད་མཆོག །སྙིང་གའི་པདྨའི་ལྟེ་བ་ལ། །དབུས་སུ་ཧཱུྃ་ནི་བཀོད་ནས་ནི། །ཐམས་ཅད་སྟོང་པའི་མཚན་ཉིད་ནི། །དངོས་དང་དངོས་མེད་རྣམ་པར་གྲོལ། །དེ་ཁོ་ན་ཉིད་ལུས་སྐྱོབ་པ། །ཕྱོགས་ཡུལ་

དུས་དང་རྣམ་པར་གྲོལ། །སྟེང་དང་འོག་ནི་རྣམ་པར་སྤངས། །སེམས་བྲལ་རང་གི་ངོ་བོར་གནས། །ངག་གི་དྲ་བ་ཡོངས་སུ་སྤངས། །རྒྱུད་དང་མཚན་མ་དང་བྲལ་ཞིང་། །རྟོག་པའི་སྤྱོད་ཡུལ་རྣམས་དང་བྲལ། །གཉིས་པ་ཀུན་ལས་རྣམ་པར་གྲོལ། །མཆོག་ཏུ་རྟག་ཅིང་ཞི་
བའོ། །རླུང་གི་ཐིག་ལེ་རྣལ་འབྱོར་མཆོག །ཁ་དོག་ལྔ་པ་གསལ་བ་ཆེ། །སྣ་རྩེར་སྦྱོར་བའི་རྣལ་འབྱོར་གྱིས། །ཀུན་ནས་ཀྱང་ནི་བསྒོམ་པར་བྱ། །ཡི་གེ་ཨོྃ་ནི་སྔགས་ཀྱི་མཆོག །རྣལ་འབྱོར་བ་ཡིས་བཟླ་བར་བྱ། །སྔ་མ་བཞིན་དུ་ཡེ་ཤེས་ལྔ། །ཞི་བ་ལ་སོགས་
དེ་བཞིན་བསྒྲུབ། །བག་ཆགས་རིམ་པའི་མཚན་ཉིད་ནི། །སྐུ་གསུང་ཐུགས་ཀྱི་དབྱེ་བ་ཡིས། །རྩ་ནི་གསུམ་པོ་འདི་ནི་མཆོག །བསྡུས་ནས་སླར་ཡང་དབྱེ་བ་ནི། །ཕན་ཚུན་དུ་ནི་སོ་སོར་འགྲོ། །རྫས་ཀྱི་ཐིག་ལེ་ཁོང་ཆུད་པ། །ཐིག་ལེ་གཉིས་ཏེ་སྔགས་དང་རླུང་། །སྔགས་ཀྱི་
ཐིག་ལེ་དེ་ཉིད་མཆོག །ཐིག་ལེ་གཉིས་ནི་འོད་དང་རྫས། །སླར་ཡང་རླུང་གི་ཐིག་ལེ་ཡང་། །ཐིག་ལེ་གཉིས་ཀྱི་ནང་དུ་འགྲོ། །སྔགས་དང་རྫས་ཀྱི་བདག་ཉིད་ཅན། །རྣལ་འབྱོར་པ་ཡིས་ཡང་དག་ཤེས། །ཟླ་བ་ཉི་མ་མེ་ཡི་རྩ། །གསུམ་ཞེས་བྱ་བའི་མཚན་ཉིད་དོ། །
ལ་ལ་ནཱ་དང་ར་ས་ནཱ། །ཨ་བ་དྷཱུ་ཏཱི་ཞེས་བྱའི་མིང་། །སྐུ་གསུང་ཐུགས་ཀྱི་རང་བཞིན་དང་། །དེ་ཉིད་དུ་ནི་ཡོངས་སུ་གྲགས། །སྟེང་དང་འོག་ཏུ་ཁྱབ་པ་ཉིད། །སོ་སོར་ལུ་གུ་རྒྱུད་ཚུལ་དུ། །རྩ་རྣམས་ཀུན་ལ་ཁྱབ་ནས་ནི། །ཡང་དག་མན་ངག་རིམ་པས་གནས། །དེ་ལྟར་
རྣལ་འབྱོར་མཆོག་ཏུ་ཕྲ། །ཤེས་དང་ཤེས་བྱ་རྣམ་པར་སྤངས། །དངོས་གྲུབ་ཐམས་ཅད་ཀྱི་ནི་གཞི། །རྣལ་འབྱོར་ཆེན་པོའི་རྨད་བྱུང་ཆེ། །གསོ་སྦྱོང་གིས་མིན་བཟླས་པས་མིན། །ཕྲེང་བས་མ་ཡིན་འགོག་པས་མིན། །གྲངས་མིན་དུས་མིན་སྦྱིན་སྲེག་མིན། །འབྱིན་བྱེད་
འགོགས་བྱེད་ཀྱིས་ནི་མིན། །ཡེ་ཤེས་ཆེན་པོའི་གོ་འཕང་ཞི། །རྣལ་འབྱོར་གཅིག་བུས་རྟོགས་པར་བྱེད། །མངོན་པར་ཤེས་པ་ལྔ་དང་ནི། །དེ་བཞིན་ཡེ་ཤེས་ལྔ་ཡི་མཆོག །ཐིག་ལེ་གསུམ་ནི་རྣམ་སྒོམ་པ། །ཞི་སོགས་བྱ་བ་ཡང་དག་ནི། །རྣལ་འབྱོར་

མཆོག་གིས་འགྲུབ་པར་འགྱུར། །སྟོང་ཉིད་ཡེ་ཤེས་མཚན་ཉིད་ནི། །ཡེ་ཤེས་སེམས་དཔའ་རྡོ་རྗེ་སེམས། །དམ་ཚིག་སེམས་དཔའ་ཞེས་བྱ་གསུངས། །གནས་དང་གྲངས་ཀྱི་དབྱེ་བ་ཡིས། །བླ་མ་བརྒྱུད་པ་ལས་ཤེས་བྱ། །རྣལ་འབྱོར་ཆེན་པོའི་
རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཐིག་ལེ་གསུམ་རྣམ་པར་དབྱེ་བའི་ལེའུ་སྟེ་ཉི་ཤུ་གཅིག་པའོ།། །།དེ་ནས་གཞན་ཡང་དེ་ཉིད་ཉོན། །དེ་ཉིད་གསུམ་གྱི་གོ་འཕང་མཆོག །སྐུ་གསུང་ཐུགས་ཀྱི་རྡོ་རྗེ་ཡི། །སྙིང་པོ་བདག་ཉིད་དམ་ཚིག་ནི། །ཡི་གེ་གསུམ་
ནི་སྐུ་གསུང་ཐུགས། །སྙིང་པོ་ཡང་ནི་བཤད་པར་བྱ། །དེ་ནི་རྣམ་ཕྱེ་ཁྱོད་ཉོན་ཅིག །དེ་ནི་ཇི་ལྟ་བ་བཞིན་བཤད། །ཨོྃ་ནི་སྐུ་ཡི་རྡོ་རྗེ་ཡི། །སྙིང་པོ་རུ་ནི་ཡང་དག་བཤད། །ཡི་གེ་ཨ་དང་ཡི་གེ་ཨུ། །ཡི་གེ་མ་ཞེས་བྱ་བ་གསུམ། །ཨཱཿནི་ཆོས་འཁོར་པདྨ་ལ། །རླུང་གི་
འཁོར་ལོ་ལ་ནི་ཁྱབ། །སྒྲིབ་མེད་པ་ཡི་རླུང་ཆེན་པོ། །སྲོག་ཏུ་གསུངས་པ་ཐམས་ཅད་བསྡུས། །ཆ་མེད་ཆ་དང་བྲལ་བ་དང་། །དངོས་པོ་དངོས་མེད་དབུས་ན་གནས། །ཐིག་ལེ་འཁོར་ལོའི་ཆ་ལ་ཁྱབ། །ནམ་མཁའི་ཁམས་ཀྱི་ཡི་གེ་མཆོག །སྔགས་རྣམས་
ཀུན་གྱི་དོན་གྱི་གནས། །སྔགས་རྣམས་ཐམས་ཅད་རབ་སད་བྱེད། །སྔགས་རྣམས་ཀུན་གྱི་ཕན་བྱེད་ཅིང་། །ངག་གི་འཁོར་ལོ་རབ་སད་བྱེད། །དངོས་སུ་ལན་གསུམ་གྱི་ནི་གཞི། །འབྱུང་བ་ཐམས་ཅད་དབང་དུ་བྱེད། །ཟད་མེད་འཕེལ་བ་མེད་པའི་གནས། །བྱང་ཆུབ་
ས་བོན་བདེ་བ་ཆེ། །གཟུགས་མེད་ཁམས་སུ་ཡང་དག་བཤད། །འཁོར་ལོ་བཞི་ཡི་དོན་བསྡུས་པའོ། །ཨུ་ནི་ལོངས་སྤྱོད་འཁོར་ལོར་གནས། །མེ་དང་ཉི་མ་འདྲ་བ་ཡི། །མགྲིན་པའི་མཐའ་ནས་སྤྱི་གཙུག་མཐའ། །ཁྱབ་པ་གཟི་བརྗིད་ཀྱི་ནི་ལུས། །གཟུགས་ཀྱི་ཁམས་
ཞེས་བྱ་བར་ཤེས། །གནས་རིས་བཅུ་བདུན་བདག་ཉིད་ཅན། །བདེ་ཆེན་འཁོར་ལོ་ཞེས་བྱར་བཤད། །ཡི་གེ་མ་ནི་ཐིག་ལེ་ཙམ། །གདོང་ཚད་མཐའ་ཡི་སོར་བཞི་ཙམ། །དགའ་བའི་གཙུག་ཏོར་གནས་ན་གནས། །ཟླ་བའི་གཟུགས་དང་འདྲ་བ་ཡི། །བདེ་བ་ཆེན་

བོའི་གོ་འཕང་ཞི། །རྩ་ནི་ཀུན་ལ་ཁྱབ་པ་པོ། །མི་ཕྱེད་ལུས་ཀྱི་གོ་འཕང་ནི། །འདོད་པའི་ཁམས་ཞེས་བཤད་པ་ཡིན། །བསྡུས་ན་གནས་རིས་ཉི་ཤུའོ། །དེ་ལྟར་རླུང་ནི་གནས་གསུམ་གྱི། །རྩ་གསུམ་གྱི་ནི་གནས་སུ་འདུས། །ཡི་གེ་ཨོྃ་གྱི་བརྡ་ཤེས་ན། །ཁམས་གསུམ་
རྣམ་པར་སད་པར་བྱེད། །རྣམ་པར་སྣང་མཛད་འགྲོ་བའི་གཟུགས། །སྤྲོ་བའི་བདག་ཉིད་ཅན་གྱི་རྒྱུ། །རྣམ་པར་རྟོག་པའི་རླུང་གཉིས་ནི། །སྣ་ཡི་བུ་ག་ནས་ནི་བྱུང་། །ཡང་དག་ཉི་མ་ཟླ་བ་གཉིས། །སྦས་པ་ནང་ནས་རྒྱུ་བར་བྱེད། །མེ་ནི་འབར་བ་རྩེ་མོ་ལ། །སྨིན་མའི་
དབུས་སུ་སྲོག་གི་རླུང་། །དེ་ལྟར་གཅིག་པུའང་གསུམ་དུ་བཤད། །གཏན་ལ་ཕབ་སྟེ་དེ་ཉིད་གསུམ། །ཞི་བ་ཁམས་གསུམ་ལ་ཁྱབ་པ། །སྐྱེ་བའི་ས་བོན་རྒྱས་པའོ། །ཡི་གེ་ཨ་ནི་ཡེ་ཤེས་མཆོག །གསུང་གི་རྡོ་རྗེ་སྙིང་པོ་མཆོག །ཨ་ནི་གཉིས་དང་ཡི་གེ་ཧྃ། །
རིང་པོར་བྱས་ཏེ་དབྱེ་བ་གསུམ། །ཆོས་ཀྱི་དབྱིངས་ཀྱི་དོན་བསྡུས་པ། །ཡི་གེ་ཨཱཿནི་སྔར་བཤད་ཟིན། །གཉིས་པ་ཡང་ནི་སྲོག་གི་རླུང་། །སྟོང་ཉིད་ཡེ་ཤེས་མིང་ཅན་ཏེ། །སྲོག་དང་རྩོལ་བ་གཉིས་སུ་རིགས། །ཡུལ་དང་དབང་པོ་བསྡུས་པའོ། །ཀུན་གཞི་དང་ནི་ཉོན་
མོངས་ཡིད། །གཟུང་དང་འཛིན་པའི་ངོ་བོ་ཉིད། །ངོ་བོ་གཅིག་ཏུ་གྱུར་ནས་ནི། །གསུང་གི་རྡོ་རྗེ་བརྗོད་པའི་མཆོག །ཨཱཿནི་ཆོས་འཁོར་པདྨ་ལས། །མགྲིན་པར་ཡི་གེ་ཨཱཿཉིད་འགྱུར། །སྲོག་ཉིད་དང་ནི་ཐུར་སེལ་དང་། །ཡི་གེ་ཧ་ཡིས་ཀུན་ནས་ནི། །མགྲིན་པའི་
དབུས་ན་གནས་པ་བཅིངས། །ཨ་ཧྃ་ཁ་ནས་གསལ་བར་བརྗོད། །རོ་འབབ་པ་ཡི་ཁྲུང་ཁྲུང་ནི། །རོ་སྐྱུར་པ་ཞེས་བྱ་བར་གསུངས། །བཀུག་ནས་རྟག་ཏུ་ཁྱབ་པར་བྱེད། །གཟུགས་ཀྱི་ཁམས་ནི་འབར་བའོ། །ཧ་དང་དེ་བཞིན་ཡི་གེ་ཨཱུ། །དེ་ནི་ཡི་གེ་མ་དང་གསུམ། །རྐང་
པ་ནས་ནི་མགོ་མཐའི་བར། །འཁོར་ལོ་བཞི་ཡི་དོན་བསྡུས་པ། །ཧ་ནི་ཐུར་སེལ་མིང་ཅན་རླུང་། །བཤང་སྒོ་གསང་བའི་དབུས་ན་གནས། །ཡི་གེ་ཨུ་ནི་ཁྱབ་བྱེད་རླུང་། །མགྲིན་པ་པདྨའི་དབུས་ན་གནས། །ཡི་གེ་མ་ནི་སྲོག་རླུང་ཡིན། །དཔྲལ་བ་རླུང་གི་འཁོར་ལོ་

ལ། །དེ་དག་གཅིག་གྱུར་སྙིང་ག་ནས། །ཐུགས་ཀྱི་ས་བོན་དུ་ནི་བརྗོད། །མི་བསྐྱོད་སྙིང་པོ་ཁ་དོག་གནག །གཟུགས་མེད་ཁམས་ཀྱི་མིང་ཅན་ནོ། །སྐུ་གསུང་ཐུགས་ཀྱི་རྡོ་རྗེ་ཡི། །སྙིང་པོ་གསུམ་དུ་རབ་ཏུ་བཤད། །ལག་ན་རྡོ་རྗེས་ཐལ་སྦྱར་ནས། །
སླར་ཡང་ཐམས་ཅད་མཁྱེན་ལ་ཞུས། །རྡོ་རྗེ་གསུམ་གྱི་སྔགས་དོན་དང་། །གནས་ཀྱི་དབྱེ་བ་འཚལ་ལགས་ན། །འདི་རྣམས་དབུས་ན་བདག་པོ་གང་། །ཇི་ལྟ་བུ་ཞིག་གཙོ་བོས་གསུངས། །གཙོ་བོ་རྡོ་རྗེ་འཆང་བ་ཆེ། །བཅོམ་ལྡན་འདས་ཀྱིས་སླར་གསུངས་པ། །གསང་
བའི་མཆོག་ཏུ་གསུངས་པ་ཡི། །སྦས་པའི་དོན་ནི་ཁྱོད་འདྲི་བ། །རྒྱུད་རྣམས་ཀུན་དུ་མ་གསུངས་པ། །རབ་ཏུ་བཤད་ཀྱིས་མཉན་པར་གྱིས། །ཐུགས་ཀྱི་ས་བོན་བདག་པོ་སྟེ། །ཀུན་གྱི་ནང་ན་རྣམ་རྟོག་མེད། །གང་ཕྱིར་གཙོ་བོས་གཞན་རྣམས་ནི། །སྒྲིབ་དང་དེ་བཞིན་འཕྲོག་
པ་དང་། །རྣམ་པར་རྟོག་པའི་རླུང་གཉིས་ནི། །ལུས་ཀུན་ལ་ནི་ཁྱབ་པར་བྱེད། །སྣ་ཡི་བུ་ག་ལས་ནི་རྒྱུ། །ལུས་ལ་རྟག་ཏུ་འབྱུང་བར་བྱེད། །འགྲོ་བ་དྲུག་གི་འཁོར་ལོའི་ལམ། །གང་གི་སྟོབས་ཀྱིས་ཁྱབ་པར་བྱེད། །གསུམ་པ་རྣལ་འབྱོར་པ་ཡིས་རྟོགས། །རྣམ་
རྟོག་མེད་པར་རྨད་བྱུང་ཆེ། །རླུང་རྣམས་ཐམས་ཅད་འགགས་པས་ན། །སྐྱེས་པ་དེ་ཉིད་རྟོགས་པའོ། །རླུང་ནི་ཐམས་ཅད་འགོག་པ་ཡང་། །ཡང་དག་རིགས་པར་ང་ཡིས་བཤད། །སྤྲུལ་པའི་ཆོས་ཀྱི་འཁོར་ལོའི་དབུས། །རྒྱུད་འདི་པདྨ་གཉིས་སུ་གསུངས། །དྲུག་ཅུ་རྩ་
བཞི་བརྒྱད་འདབ་གཉིས། །སྟེང་དང་འོག་ཏུ་ཁ་བལྟས་ནས། །སླར་ཡང་ཁ་སྦྱོར་ཚུལ་དུ་གནས། །སྲོག་དང་ཐུར་སེལ་རྒྱུ་བར་བྱེད། །དེ་ཉིད་རྟོག་པ་དང་བཅས་པ། །རླུང་གཉིས་སུ་ནི་གསལ་བར་གསུངས། །སྐུ་དང་གསུང་གི་སྙིང་པོ་གཉིས། །ལ་ལ་ནཱ་དང་ར་ས་ནཱ། །ཨ་བ་དྷཱུ་
ཏཱི་མཆོག་གི་གནས། །དེ་གཉིས་དབུས་ན་མཆོག་གི་མཆོག །རྣམ་རྟོག་མེད་བ་རླུང་གི་རླུང་། །རྟག་ཏུ་རྒྱུ་ཞིང་ཀུན་ལ་ཁྱབ། །རྣམ་རྟོག་གང་ཐོབ་རྟག་ཏུ་ནི། །ལས་ཀུན་བྱེད་ཅིང་མཁས་པར་འགྱུར། །རླུང་གི་རང་བཞིན་བྱེ་བྲག་ནི། །བརྒྱ་དང་བརྒྱད་ལས་གང་རྒྱལ་བ། །

དུས་ཀུན་དུ་ནི་འཕེལ་བར་རིགས། །རྣལ་འབྱོར་བྱིས་པས་མི་ཤེས་པ། །སྐད་ཅིག་གཅིག་མངོན་རྫོགས་བྱང་ཆུབ། །དེ་ཡིས་ཐོབ་པར་རྒྱུད་འདིར་གསུངས། །དེ་ནི་གང་ཚེ་སྐད་ཅིག་ཐོབ། །དེ་ནི་སྐད་ཅིག་མཆོག་ཏུ་གསུངས། །དེ་ཡང་ཇི་ལྟར་ཐོབ་པར་བྱེད། །དེ་ལ་
རིགས་པ་རུ་ནི་བརྗོད། །ཐོག་མར་རྣལ་འབྱོར་པ་ཆེན་པོ། །བློ་བཟང་གིས་ནི་ཞི་གནས་བསྒོམ། །བསྐྱེད་པའི་རིམ་པའི་སྦྱོར་བ་ཡིས། །ཁྲོ་བོའི་ཕྱག་རྒྱ་བྱས་ནས་ཀྱང་། །དབང་པོ་ཡི་ནི་སྒོ་དགུ་ལ། །ཐམས་ཅད་དུ་ནི་ཀུན་རྫོབ་པ། །ཧཱུྃ་བཟླས་པ་ནི་མཚུངས་པ་མེད། །མཆོག་ཏུ་རྒྱུན་མི་འཆད་
པར་ནི། །ཟླ་བ་གཅིག་ཏུ་བཟླས་བྱས་ན། །དེ་རྗེས་སྐད་ཅིག་དེ་ལ་ཐོབ། །གང་ཕྱིར་དེ་ནི་བཟླས་བྱས་ན། །སྙིང་གའི་པདྨའང་སྟེང་བལྟས་འགྲོ། །དེ་ནས་གསང་བའི་པདྨ་ལས། །ཁ་སྦྱོར་བ་ནི་དེ་བས་ཀྱང་། །རྣམ་པར་རྟོག་པའི་རླུང་གཉིས་ནི། །དེ་ལས་རྣམ་པར་བཅས་ནས་འགྲོ། །རྣམ་རྟོག་མེད་པའི་རླུང་ཆེན་པོ། །
སྐུ་གསུང་རྡོ་རྗེ་བཅད་ནས་ནི། །རྣམ་རྟོག་མེད་པའི་བདེ་བ་སྟེར། །སྔགས་ཀྱི་དེ་ཉིད་ཀྱིས་ནི་འཐོབ། །ཨ་བ་དྷཱུ་ཏཱིའི་རྒྱུན་ལ་གནས། །སྨིན་དབུས་རླུང་ནི་བཅད་བྱས་པ། །དེ་ཐོབ་ཐོབ་བྱས་དགའ་བ་ནི། །རྒྱུན་དུ་འཆང་ཞིང་མི་བཟད་པ། །ཆགས་སོགས་བྲལ་ཞིང་ཞི་བ་དང་། །རང་
རིག་བདེ་བ་ཆེན་པོའོ། །འདིར་ནི་རྒྱུ་མཚན་བཤད་པར་བྱ། །སྔགས་གྲུབ་པ་ཡི་རྣལ་འབྱོར་པས། །འདར་དང་རྡུལ་དང་བ་སྤུ་ལངས། །རྟག་ཏུ་དགའ་བའི་བསམ་པ་དང་། །གདོང་ནི་ཟངས་མདོག་ཡིད་དུ་འོང་། །ཀུན་གྱིས་མཐོང་དང་དགའ་བ་དང་། །གྲངས་ལྷག་ཆད་པ་ལ་
སོགས་དང་། །འཇིག་རྟེན་ཆོས་དང་དེ་བཞིན་གནས། །རྣལ་འབྱོར་སྔགས་ཀྱི་དེ་ཉིད་ནི། །གནོད་པ་ཉིད་དུ་མི་འགྱུར་རོ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སྐུ་གསུམ་གྱི་སྙིང་པོ་བཤད་པའི་ལེའུ་སྟེ་ཉི་ཤུ་གཉིས་པའོ།། །།དེ་ནས་གཞན་ཡང་
བཤད་ཀྱིས་ཉོན། །དེ་ཉིད་གསུམ་གྱི་ཚིག་བསྟན་བྱ། །བདག་ཉིད་སྔགས་སོགས་བྱེད་པ་ཡིས། །ཇི་ལྟ་བ་བཞིན་རིམ་པ་རྣམས། །བདག་གི་དེ་ཉིད་རྣལ་འབྱོར་མཆོག །རྡོ་རྗེ་སེམས་དཔའ་ཉིད་ཀྱི་རྒྱུ། །སངས་རྒྱས་ཀུན་གྱི་རང་བཞིན་བདག །སངས་རྒྱས་ཀུན་གྱི་སྐུ་གཅིག་བུ། །

ཀུན་མཁྱེན་གོ་འཕང་མི་གསལ་བྱེད། །རིགས་ཀྱི་དབྱེ་བས་རབ་གསལ་བྱེད། །རིགས་ནི་ལྔ་ཡི་རྣམ་པ་གང་། །དེ་ནི་ཕུང་པོའི་མཚན་ཉིད་དོ། །ཕྲ་རགས་ལ་སོགས་དབྱེ་བ་ཡིས། །ཐོགས་བཅས་ཐོགས་མེད་མཚན་ཉིད་དང་། །འབྱུང་བ་ཆེན་པོ་བཞི་ཡི་དངོས། །
འདི་ནི་གཟུགས་ཀྱི་ཕུང་བོར་གསུངས། །དེར་ནི་རྣམ་སྣང་ངོ་བོ་དང་། །ཐམས་ཅད་སྤྲོ་བར་བྱེད་པའི་རྒྱུ། །བདེ་དང་སྡུག་བསྔལ་མཆོག་ཏུ་ཞི། །གྲང་དང་དྲོ་བ་མཆོག་གི་མཆོག །གང་གིས་ཤིན་ཏུ་རིག་པ་ནི། །དེ་ནི་ཚོར་བའི་ཕུང་པོར་བཤད། །རིན་ཆེན་འབྱུང་ལྡན་ཉིད་ཀྱི་
མཚན། །དེ་བཞིན་གཤེགས་པའི་སྤྲོས་བདག་ཉིད། །གླང་པོ་བོང་བུ་ཅེ་སྤྱང་དང་། །རྟ་དང་རི་དགས་དང་ནི་ཕག །ཕ་དང་མ་དང་ཕ་ཡི་སྤུན། །མཛའ་པོ་སྣག་གི་གཉེན་ཚན་སོགས། །གང་གིས་ཡང་དག་ཤེས་པ་ནི། །འདུ་ཤེས་ཕུང་པོའི་མཚན་ཉིད་ནི། །དེ་བཞིན་
གཤེགས་པ་འོད་དཔག་མེད། །དེ་ནི་སྤྲོས་པ་ཀུན་ནས་གསལ། །འགྲོ་བ་ཁྱབ་པར་ཡོངས་སུ་ཤེས། །དགེ་དང་མི་དགེའི་ལས་འབྲས་བུ། །གཞན་ཡང་ལུང་དུ་མ་བསྟན་མིན། །དེ་ཡི་འདུ་བྱེད་དུ་ནི་བཤད། །དོན་ཡོད་སྤྲོ་བའི་རང་བཞིན་ཅན། །འཁོར་བ་དངོས་དང་
དངོས་མེད་སོགས། །ཀུན་རྟོག་འབྱུང་བའི་བདག་ཉིད་ཅན། །རྣམ་ཤེས་ཞེས་ནི་རྣམ་པར་ཤེས། །མི་བསྐྱོད་སྤྲོ་བའི་བདག་ཉིད་ཅན། །དེ་ལྟར་ཕུང་པོ་ཡོངས་ཤེས་ན། །ལུང་དང་རིགས་པའི་ཤེས་པ་སྐྱེ། །ཛི་ན་ཛིཀ་དང་རཏྣ་དྷྲྀཀ །ཨཱ་རོ་ལིཀ་དང་པྲཛྙཱ་དྷྲྀཀ །བཛྲ་
དྷྲྀཀ་ཅེས་བྱ་བའི་སྔགས། །ཅི་རིགས་པར་ནི་རིམ་བཞིན་ཤེས། །སྤྱན་ལ་སོགས་པ་བཞི་པོ་གང་། །དེ་ནི་ཁམས་གསུམ་ཡོངས་སུ་བརྟག །སྲ་བ་ལ་སོགས་བཞིར་ཕྱེ་བས། །ས་ཡི་ཁམས་སུ་ཡོངས་སུ་བརྟག །གཏི་མུག་དགའ་བར་མངོན་པར་བརྗོད། །དེ་ཡི་
སྤྱན་དུ་ཡོངས་སུ་གྲགས། །ཞུ་བ་ཅི་མཆི་ཁུ་བ་སོགས། །རྫས་ཀྱི་བྱེ་བྲག་ཡང་དག་བསྟེན། །ཆུ་ཡི་ཁམས་སུ་རྣམ་པར་ཤེས། །མཱ་མ་ཀཱི་ཡི་བདག་ཉིད་ཅན། །དྲོ་བ་བཟའ་བཏུང་སྨིན་པ་དང་། །གཟི་བརྗིད་འཕྲོ་བ་ཉིད་ཐམས་ཅད། །མེ་ཡི་ཁམས་སུ་ཤེས་པར་བྱ། །

གོས་དཀར་སྤྲོ་བའི་བདག་ཉིད་ཅན། །འབྱུང་བ་རྔུབ་པ་རབ་ཏུ་འཕེལ། །རླུང་རྣམས་ཀྱི་ནི་ཚོགས་ཀྱི་མཆོག །བརྐྱང་བ་དང་ནི་བསྐུམ་པ་དང་། །སྟེང་དང་འོག་ཏུ་བྱེད་པ་དག །དེ་ནི་རླུང་གི་ཁམས་སུ་ཤེས། །སྒྲོལ་མ་སྤྲོ་བའི་བདག་ཉིད་ཅན། །དེ་ལྟར་འབྱུང་བ་བཞི་པོ་ཡང་། །རྣལ་
འབྱོར་མཆོག་ཉིད་རྣམ་པར་ཤེས། །མོ་ཧར་ཏི་དྭེ་ཥ་ར་ཏི། །རཱ་ག་ར་ཏི་བཛྲ་ར་ཏི། །དེ་ལྟར་རིམ་པས་སྔགས་རྣམས་ནི། །དེ་དག་མངོན་སུམ་ཆོ་ག་ཡིས། །གཟུགས་ལ་སོགས་པ་ཡུལ་གྱི་ཚོགས། །ལྷ་མོའི་གཟུགས་ཀྱི་མཚན་ཉིད་དུ། །རྣལ་འབྱོར་མཆོག་གིས་རྣམ་
པར་ཤེས། །སྟོང་ཉིད་གཅིག་པུ་རྒྱུ་གཅིག་པུ། །སྔོ་སེར་སོགས་ཀྱི་དབྱེ་བ་དང་། །རིང་དང་ཐུང་བའི་རྣམ་པ་ཡིས། །ལྷ་མོ་དེ་གཟུགས་རྡོ་རྗེ་མ། །ཕྱི་རོལ་གཟུང་བའི་རང་བཞིན་ཅན། །འཁར་རྔ་སིལ་སྙན་སྦུབས་རོལ་མོ། །དེ་བཞིན་རྔ་སྙན་པི་བང་དང་། །བསྟོད་དང་
སྨད་སོགས་སྒྲ་དག་ནི། །སྒྲ་ཡི་རྡོ་རྗེ་མ་ཞེས་བྱ། །གཟུང་བ་དང་ནི་རང་བཞིན་མཆོག །རྣམ་པར་ཤེས་པ་སད་པར་བྱེད། །དྲི་ང་བ་དང་དྲི་བཟང་དང་། །སྦྱར་བའི་དྲི་ཡི་མཆོག་རྣམས་ནི། །དྲི་རྡོ་རྗེ་མར་དེ་ཤེས་བྱ། །གཟུང་བའི་རྣམ་པར་ཆེར་དམར་བ། །རོ་དྲུག་མཆོག་ཏུ་ལྡན་
པ་ནི། །ལན་ཚྭ་སྐྱུར་ལ་སོགས་དབྱེ་ཡིས། །རྡོ་རྗེ་རོ་མར་དེ་ཤེས་བྱ། །ཀུན་ཀྱང་གཟུང་བའི་རྣམ་པའོ། །མིག་སོགས་དབང་པོ་ལ་བརྟེན་པ། །རྣམ་པར་ཤེས་པའི་ཚོགས་བརྒྱད་ནི། །རིམ་པ་ཇི་ལྟ་བ་བཞིན་དུ། །བྱང་ཆུབ་སེམས་དཔའ་བརྒྱད་དུ་ཤེས། །བྱང་ཆུབ་
སེམས་དཔའི་བདག་ཉིད་ཆེ། །མིག་གཉིས་ས་ཡི་སྙིང་པོར་གསུངས། །གཟུགས་ལ་སོགས་པ་ཅི་རིགས་པར། །རང་གི་ངོ་བོ་སྤྲོ་བར་བྱེད། །སྒྲ་ཡི་རྣམ་པ་ཐམས་ཅད་ནས། །བྱེ་བྲག་སོ་སོ་ཅི་རིགས་པར། །སྒྲ་ཡི་རྣམ་པར་ཤེས་པ་ནི། །ཕྱག་ན་རྡོ་རྗེར་ཡང་དག་བཤད། །དྲི་
ཡི་བྱེ་བྲག་ལ་སྤྱོད་པ། །སོ་སོར་ཇི་ལྟར་རིགས་པར་ནི། །སྣ་ཡི་རྣམ་ཤེས་མཚན་ཉིད་ནི། །ནམ་མཁའི་སྙིང་པོ་རྣམ་པར་ཤེས། །རོ་ཡི་བྱེ་བྲག་ལ་སྤྱོད་པ། །དབྱེ་བ་སོ་སོའི་གོ་རིམས་བཞིན། །ལྕེ་ཡི་རྣམ་ཤེས་མཚན་ཉིད་ནི། །འཇིག་རྟེན་དབང་ཕྱུག་ཏུ་ནི་ཤེས། །རེག་བྱའི་

བྱེ་བྲག་ལ་སྤྱོད་པ། །བྱེ་བྲག་སོ་སོའི་གོ་རིམས་བཞིན། །རེག་བྱའི་རྣམ་ཤེས་མཚན་ཉིད་ནི། །སྒྲིབ་པ་རྣམ་པར་སེལ་བར་ཤེས། །ཡིད་ཀྱི་བྱེ་བྲག་ལ་སྤྱོད་པ། །དབྱེ་བ་སོ་སོའི་གོ་རིམས་བཞིན། །ཡིད་ཀྱི་རྣམ་ཤེས་ཞེས་གསུངས་པ། །འཇམ་དཔལ་ཞེས་
བྱའི་མིང་ཅན་ནོ། །རྒྱུས་པ་ཀུན་ལ་ཡང་དག་སྦྱོར། །དབྱེ་བ་སོ་སོའི་གོ་རིམས་བཞིན། །བག་ཆགས་ཡུལ་གྱི་བདག་ཉིད་ཅན། །བྱམས་པ་རུ་ནི་རྣམ་པར་ཤེས། །རྩ་རྣམས་སོ་སོའི་མཚན་ཉིད་ཅན། །བདེ་བ་ཀུན་གྱི་གཞི་ཡི་མཆོག །དངོས་པོ་ཀུན་གྱི་རང་བཞིན་
ཅན། །འདི་ནི་ཀུན་དུ་བཟང་པོར་བཤད། །དེ་ལྟར་རྣམ་ཤེས་ཚོགས་བརྒྱད་མཆོག །ཡང་དག་དེ་ཉིད་བླ་ན་མེད། །མིག་སོགས་དབང་པོའི་རྣམ་ཤེས་ནི། །གཟུགས་སོགས་མཐོང་བའི་རང་བཞིན་ནོ། །རྗེ་ངར་དཔུང་པ་བརླ་ཐལ་གོང་། །སྒོ་གཉིས་དང་ནི་ཐམས་ཅད་ཀྱི། །
ཤེས་པ་བཅུ་ཡི་མཚན་ཉིད་ནི། །ཁྱབ་པ་རྣམས་སུ་ཡོངས་སུ་ཤེས། །གཤིན་རྗེ་མཐར་བྱེད་ཤེས་མཐར་བྱེད། །པདྨ་མཐར་བྱེད་བགེགས་མཐར་བྱེད། །འདོད་པའི་རྒྱལ་པོ་མི་གཡོ་བ། །དབྱིག་སྔོན་དང་ནི་སྟོབས་པོ་ཆེ། །གནོད་མཛེས་གཙུག་ཏོར་འཁོར་ལོ་སྒྱུར། །དེ་ལྟར་
དེ་རྣམས་གནས་དབྱེ་བས། །ཡེ་ཤེས་གསུམ་གྱིས་ཡོངས་སུ་གསལ། །ངོ་བོ་གཅིག་ཏུ་གྱུར་ནས་ནི། །ཡང་དག་དེ་ཁོ་ན་ཉིད་རྟེན། །གང་གིས་དེ་ཉིད་ཆོ་ག་བཞིན། །བླ་མ་བརྒྱུད་པ་ལས་ཤེས་བྱ། །སྔགས་ཀྱི་དེ་ཉིད་རྣལ་འབྱོར་མཆོག །ཡེ་ཤེས་ཆེན་པོ་ལེགས་རྒྱས་
པ། །སྐྱེ་མེད་ཟད་མེད་མི་གསལ་དང་། །འགྱུར་བ་མེད་ཅིང་སྒྲིབ་པ་མེད། །གཉིས་མེད་འཇིགས་བྲལ་ཞི་བ་དང་། །བདེ་བ་ཆེན་པོའི་གོ་འཕང་མཆོག །སྦྲུལ་དང་བཏུས་དང་མཐའ་མེད་དང་། །མགོ་མེད་ཡོངས་སུ་དབྱེ་བ་ཡིས། །ཨོཾ་དང་ཧཱུྃ་ཕཊ་སྭཱ་ཧཱའི་མཐའ། །
སྦྲུལ་ཞེས་བྱ་བ་མངོན་པར་བརྗོད། །རང་མིང་ཡོན་ཏན་དང་ནི་གཟུགས། །བཏུས་པའི་མཚན་ཉིད་མིང་ཅན་ནོ། །ཨོྃ་ལ་སོགས་པ་ཞབས་མེད་པ། །མཐའ་མེད་ཅེས་བྱའི་མིང་ཅན་ནོ། །སྭཱ་ཡི་མཐའ་ཅན་ཨོྃ་མེད་པ། །མགོ་མེད་ཅེས་ནི་བཤད་པ་ཡིན། །

ཐམས་ཅད་ཡོད་ལ་ཨོྃ་མེད་པ། །མགོ་མེད་ཅེས་ནི་བཤད་པ་ཡིན། །དེ་ལྟར་མཚན་ཉིད་ཤེས་ནས་ནི། །སྔགས་ཀྱི་དེ་ཉིད་བླ་ན་མེད། །རྩ་བའི་རྒྱུད་ཀྱི་རྗེས་འབྲངས་ནས། །འདི་ཡི་རྒྱ་ཆེན་དོན་ཤེས་བྱ། །ཡེ་ཤེས་དེ་ཉིད་རྣལ་འབྱོར་མཆོག །གཉིས་པ་ཐམས་ཅད་རྣམ་པར་
སྤངས། །དབང་པོ་ཐམས་ཅད་མཉམ་པར་སྦྱོར། །དངོས་པོ་ཐམས་ཅད་གཅིག་པུའི་ལུས། །ངག་གི་རྣམ་རྟོག་ཀུན་སྤངས་པ། །སྣང་བ་ཐམས་ཅད་རྣམ་སྤངས་པ། །བདག་བྱིན་བརླབ་པའི་རང་བཞིན་ཅན། །ཀུན་ལ་ཁྱབ་པ་རྨད་དུ་བྱུང་། །རང་རིག་པ་ཡི་རྣལ་
འབྱོར་མཆོག །སྐད་ཅིག་བཞི་ཡི་མཚན་ཉིད་ནི། །ཆ་བྲལ་ཀུན་འགྲོ་ཁྱབ་པ་དང་། །རྣལ་འབྱོར་བྱིས་པས་མི་ཤེས་ཤིང་། །ཀུན་རྫོབ་ཡོངས་སུ་མི་ཤེས་པ། །དོན་དམ་རང་གི་ངོ་བོ་ནི། །རྫོགས་པའི་རིམ་པས་དབྱེ་བ་དང་། །སྔགས་ཀྱི་དེ་ཉིད་རབ་ཏུ་གསལ། །
ཨ་ནི་དེ་ཉིད་མཐའ་ཐིག་ལེར། །ཡང་དག་ཐིམ་པ་རྣམ་པར་བསྒོམ། །ཐིག་ལེ་ཡི་གེ་ཨ་ལ་ཐིམ། །ཨ་ནི་མཐའ་ཡི་ཧ་ཙམ་ལའོ། །ཧ་ཡང་ཡི་གེ་ཧཱུྃ་ལའོ། །ཡི་གེ་ཨཱུ་ནི་ཧྃ་ལའོ། །ཡི་གེ་ཧྃ་ཡང་ཨོྃ་ལ་ཐིམ། །ཡི་གེ་ཨ་ནི་ཐིག་ལེ་ཙམ། །ཐིག་ལེ་ཡང་ནི་སྒྲ་ལ་
ཐིམ། །སྒྲ་ཡང་སྒྲ་ཙམ་ལ་ནིའོ། །སྒྲ་ཙམ་མཆོག་ནི་ནམ་མཁའ་ལའོ། །དེ་ཡང་འོད་གསལ་བ་ལ་ཐིམ། །འོད་གསལ་གོ་འཕང་གསལ་བ་ནི། །ཤིན་ཏུ་རྣམ་དག་ཆོས་དབྱིངས་ཏེ། །གཉིས་སུ་མེད་པའི་ཡེ་ཤེས་མཆོག །རབ་ཏུ་སད་ཅིང་རབ་ཏུ་འཆར། །ངག་གི་སྤྱོད་
པ་རྣམས་དང་བྲལ། །གཉིས་པ་ཐམས་ཅད་རྣམ་པར་སྤངས། །ཕུང་པོ་ལྔ་ནི་གཅིག་པུའི་གཞི། །འབྱུང་བ་ལྔ་ནི་ཡང་དག་བསྟེན། །རྣམ་ཤེས་བརྒྱད་ཀྱི་ཚོགས་དབེན་པ། །ཕྱི་ཡི་ཡུལ་དྲུག་བསྡུས་པ་ནི། །རླུང་བཅུས་ཤེས་པ་བཅུ་བསྡུས་པ། །དེ་ལྟར་མཚན་ཉིད་ཀུན་བསྡུས་
པའོ། །ཀུན་ནས་སྤྲོ་བའི་རྣལ་འབྱོར་གྱིས། །གང་གིས་བཞུགས་གནས་སྲིད་པ་གསུམ། །དངོས་གྲུབ་ཀུན་བྱེད་དཔལ་དང་ལྡན། །སྐལ་བ་བཟང་པོ་ཀུན་འཕེལ་བ། །རྡོ་རྗེ་དེ་ནི་རྡོ་རྗེ་སེམས། །རྡོ་རྗེ་འཇིགས་བྱེད་དབང་ཕྱུག་དང་། །ཧེ་རུ་ཀ་དང་དུས་འཁོར་ལོ། །དང་

པོའི་སངས་རྒྱས་ཐུབ་པ་ཆེ། །ཀུན་དུ་བཟང་པོ་འཇམ་དཔལ་དང་། །སྣ་ཚོགས་སྤྲོ་བའི་བདག་ཉིད་ཅན། །སྣ་ཚོགས་ཡོན་ཏན་ཚོགས་ཀྱི་གཞི། །ཀུན་ནས་སྤྲོ་བའི་རྣལ་འབྱོར་ནི། །རྣལ་འབྱོར་ཆེན་པོ་དྲི་མ་མེད། །ཡེ་ཤེས་དེ་ཉིད་གསལ་བ་ནི། །རྟོག་
པ་མེད་ཅིང་གནས་པ་མེད། །ཆོས་དབྱིངས་འཕོ་བ་ཞེས་བཤད་དོ། །བསྐྱེད་དང་རྫོགས་པའི་མཚན་ཉིད་དག །སྐྲ་ཡི་རྩེ་མོ་བརྒྱད་སྟོང་འདྲ། །ཤིན་ཏུ་གསལ་ཞིང་འོད་གསལ་བ། །ལུང་དང་རིགས་པའི་དབྱེ་བ་ཡིས། །བླ་མ་བརྒྱུད་པ་ལས་ནི་ཤེས། །དེ་ལྟར་དེ་ཉིད་གསུམ་
དེ་མཆོག །ཞལ་ནས་བརྒྱུད་པའི་རིམ་པ་སྐྱེ། །གསང་བ་ཡི་ནི་ཡེ་ཤེས་མཆོག །བཞི་པའི་མཚན་ཉིད་སྐད་ཅིག་མཆོག །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་དེ་ཁོ་ན་ཉིད་གསུམ་གྱི་དམ་ཚིག་གཏན་ལ་དབབ་པའི་ལེའུ་སྟེ། ཉི་ཤུ་གསུམ་
པའོ།། །།དེ་ནས་ཡང་དག་བཤད་ཀྱིས་ཉོན། །སྣ་རྩེ་གསུམ་གྱི་མཚན་ཉིད་ནི། །གསང་བ་སྙིང་ག་གདོང་སྣའི་མིང་། །གསུམ་པོ་རྒྱུད་ལས་གསལ་བ་ནི། །འཁོར་ལོ་གསུམ་གྱི་དབྱེ་བ་ཡིས། །རྣལ་འབྱོར་པ་ཡིས་བསྒོམ་པའི་རིམ། །ཤིན་ཏུ་ཆགས་
པའི་དབང་སོང་བའི། །སེམས་ཀྱི་བདེ་བ་སྟེར་བར་བྱེད། །རླུང་གི་དེ་ཉིད་སྦྱོར་བ་ཡིས། །རྩ་ཡི་འཁོར་ལོ་སད་པར་བྱེད། །བདེ་བ་ཆེན་པོ་ཀུན་ནས་སྐྱེ། །ཁམས་གསུམ་རོ་གཅིག་གྱུར་ནས་ནི། །དགུག་དབང་ཆོ་ག་བཞིན་དུ་བྱ། །བྱང་ཆུབ་སེམས་ནི་བདེ་བ་ཆེ། །ལྷན་
སྐྱེས་སྐད་ཅིག་མཚན་ཉིད་ནི། །རྡོ་རྗེ་རྩེ་མོར་གཟུང་བར་བྱ། །དེ་ཉིད་བདེ་བ་ཆེན་པོ་སྟེ། །ཡེ་ཤེས་ལྔ་ཡི་རང་བཞིན་ཅན། །ཀུན་རྟོག་ཐམས་ཅད་རྣམ་པར་སྤངས། །གསང་བའི་སྣ་རྩེར་རྫས་ཐིག་ལེ། །ཡང་དག་གཟུང་བའི་བདག་ཉིད་ཅན། །ཆགས་ཆེན་
སེམས་ནི་གཅིག་པུ་ཡིས། །རྣལ་འབྱོར་མཆོག་ཏུ་ཤེས་པར་བྱ། །པད་འདབ་དྲུག་ཅུ་རྩ་བཞི་ལ། །རྩ་ཡི་འཁོར་ལོ་རིམ་བཞིན་འཆར། །དེ་ཡི་ལྟེ་བ་སྣར་ནི་བཤད། །གསང་བ་བདེ་བ་ཐམས་ཅད་སྟེར། །སྙིང་གའི་པདྨ་འདབ་མ་བརྒྱད། །དེ་ཡང་ལྟེ་བ་སྣར་ནི་བརྗོད། །

ཞེ་སྡང་ཉིད་ཀྱི་སེམས་ནི་བསྒོམ། །གསང་སྔགས་འབར་བའི་ཡེ་ཤེས་སེམས། །ཡང་དག་སྤྲོ་བར་བྱེད་པའི་རྒྱུ། །ངག་གི་རྟོག་པ་ཀུན་སྤངས་པ། །རྨད་བྱུང་ཆེན་པོ་ཡེ་ཤེས་མཆོག །རྟག་ཏུ་སྔགས་ནི་ནཱ་ད་འབྱུང་། །རྣམ་རྟོག་མེད་པའི་བདེ་བ་ཆེ། །བསམ་གཏན་ལ་
སྦྱོར་བདེ་བའི་མཆོག །མན་ངག་ཐོབ་པས་བདེ་བ་རྒྱལ། །ཞེ་སྡང་མྱུར་དུ་དབང་བྱས་ནས། །ཞི་བའི་དེ་ཉིད་རྒྱུ་གཅིག་ནི། །ཟླ་བ་ཉི་མ་མེ་དང་གསུམ། །ལམ་གསུམ་གྱི་ནི་དབུས་ནས་ཁྱབ། །གདོང་གི་སྣ་ནི་ཞེས་བྱར་བཤད། །རླུང་རྣམས་གནས་ཀྱི་མཚན་ཉིད་
དང་། །དེ་ལ་གནས་པའི་ཡེ་ཤེས་ཆེ། །ཐིག་ལེ་གཏི་མུག་གིས་གནོན་ཡིས། །བསམ་གཏན་གཏི་མུག་མཆོག་ལས་རྒྱལ། །དངོས་པོ་ཐམས་ཅད་རྣམ་པར་སྤངས། །ཡེ་ཤེས་ལྔ་ཡི་བདག་ཉིད་གསལ། །དེ་ཁོ་ན་ཉིད་ལྔ་བརྟེན་མཆོག །དེ་ཡི་འོད་ཟེར་ཐིག་ལེ་ཙམ། །
གདོང་གི་སྣ་རྩེར་ཡང་དག་བརྟེན། །རྣལ་འབྱོར་མཆོག་ནི་བསྒོམ་པར་བྱ། །གཏི་མུག་རྒྱ་མཚོ་ལས་ནི་རྒྱལ། །དེ་ཉིད་དམ་ཚིག་སེམས་དཔའ་ཡི། །མིང་ཅན་དུ་ནི་ཡང་དག་བཤད། །སངས་རྒྱས་ཀུན་གྱི་དམ་ཚིག་ནི། །ཡེ་ཤེས་ལྔ་ཡི་མཚན་ཉིད་ཅན། །རྣལ་འབྱོར་
མཁས་པ་རྣམས་ཀྱིས་ནི། །གཏི་མུག་མུན་པ་རྣམ་འཇོམས་པ། །ཀུན་མཁྱེན་རྟོགས་པའི་མཚན་ཉིད་ནི། །སངས་རྒྱས་ལྔ་ཡི་རིགས་གནས་ན། །སྣ་རྩེ་བུ་ག་ལས་བྱུང་ཞིང་། །རླུང་ལྔ་སྟེང་དུ་ཡང་དག་རྒྱུ། །ལུས་ལ་རྟག་ཏུ་སྤྱོད་པར་འགྱུར། །ཀུན་རྫོབ་སྣར་ནི་རྒྱུ་བ་
ཡི། །སྒོ་དེ་ལས་ནི་རྣམ་པར་བྱུང་། །གཡོན་དང་གཡས་དང་གཉིས་ཀ་དང་། །དལ་བར་རྒྱུ་དང་རྣམ་པ་བཞི། །གཡས་པ་ལས་ནི་འབྱུང་བའི་ཁམས། །མེ་ཡི་དཀྱིལ་འཁོར་ཉིད་ཡིན་ཏེ། །ཁ་དོག་དམར་པོ་བཟང་པོ་འདི། །པདྨ་མགོན་པོ་རྒྱུ་བའོ། །གཡོན་
པ་ནས་ནི་འབྱུང་བའི་ཁམས། །རླུང་གི་དཀྱིལ་འཁོར་དང་འདྲེས་པ། །ལྗང་སེར་དག་ཏུ་སྣང་བ་སྟེ། །ལས་ཀྱི་མགོན་པོ་རྒྱུ་བའོ། །གཉིས་ཀ་ལས་ནི་འབྱུང་བའི་ཁམས། །གསེར་གྱི་མདོག་ཏུ་སྣང་བ་སྟེ། །དབང་ཆེན་གྱི་ནི་དཀྱིལ་འཁོར་ཉིད། །རིན་ཆེན་མགོན་པོ་རྒྱུ་

བའོ། །དལ་ཞིང་རྒྱུ་བ་མེད་པའི་ཁམས། །དག་པའི་ཤེལ་ལྟར་སྣང་བ་ནི། །འདི་ནི་ཆུ་ཡི་དཀྱིལ་འཁོར་ཏེ། །རྡོ་རྗེ་མགོན་པོ་རྒྱུ་བའོ། །ཁམས་གསུམ་ལས་ནི་ཡང་དག་བྱུང་། །རྟེན་དང་བརྟེན་པར་བཟུང་བ་ནི། །རྣམ་པར་སྣང་མཛད་རང་བཞིན་ཏེ། །འཆི་
བའི་མཐར་ནི་འབྱུང་བར་འགྱུར། །དཀྱིལ་འཁོར་བཞི་པོ་དེ་དག་ནི། །རྣམ་པར་བཞག་པས་རྟག་ཏུ་ཟློས། །སྔགས་བཟླས་པ་ཡི་གྲངས་ཀྱིས་ནི། །ཉིན་མཚན་རྟག་ཏུ་ཟློས་པ་ཡིན། །དེ་ལྟར་རླུང་ནི་སྣ་རྩེར་ནི། །ཁ་དོག་ལྔ་པར་རྣམ་པར་བསྒོམ། །གཉིས་མེད་
མཆོག་གི་རྣལ་འབྱོར་གྱིས། །འོད་ཟེར་ཚོགས་ནི་དྲི་མ་མེད། །དེ་ཡིས་ཞི་སོགས་བྱ་བ་ནི། །རིམ་གྱིས་སྦྱོར་བས་འགྲུབ་པར་འགྱུར། །རྡོ་རྗེ་སེམས་དཔར་འགྲོ་བར་འགྱུར། །རྡོ་རྗེ་སེམས་དཔའ་འགྲོ་མགོན་ལ། །དེ་ནས་ལག་ན་རྡོ་རྗེས་ཞུས། །ཐིག་ལེ་གསུམ་གྱི་
གཞུང་ལུགས་ནི། །ཁྱོད་ཞབས་བསྙེན་བཀུར་གྱིས་འཚལ་ན། །འདི་ལ་ཅུང་ཟད་ཐེ་ཚོམ་མཆིས། །སྲིད་པ་མཐར་མཛད་གསལ་བར་མཛད། །རྫས་དང་སྔགས་དང་དེ་བཞིན་རླུང་། །ཐིག་ལེ་གསུམ་ནི་བསྒོམས་པ་ན། །རྣལ་འབྱོར་པ་གཅིག་ཉིད་དམ་ནི། །ཡང་
ན་རྣལ་འབྱོར་སོ་སོར་བསྒོམ། །དེ་ལ་ཐེ་ཚོམ་ཀུན་གཅོད་གཙོ། །བཅོམ་ལྡན་རྡོ་རྗེ་སེམས་དཔས་གསུངས། །ཡུན་རིངས་ཆགས་ཆེན་དབང་སོང་བས། །སྲིད་པ་གསུམ་དུ་སྐྱོབ་པ་རྣམས། །དེ་དག་དགྲོལ་བའི་དོན་དུ་ནི། །རྫས་ཀྱི་ཐིག་ལེ་གསུངས་པ་ཡིན། །
ཞེ་སྡང་ཆེན་པོ་དབང་སོང་བ། །མི་གང་མི་སྲུན་པ་ཡི་ལུས། །དེ་རྣམས་མྱུར་དུ་གྲོལ་དོན་དུ། །སྔགས་ཀྱི་ཐིག་ལེར་གསུངས་པ་ཡིན། །གཏི་མུག་ཆེན་པོས་ཀུན་ནས་འཁྲུལ། །སྲིད་པའི་རྒྱ་མཚོ་ལས་སྐྱོབ་གང་། །དེ་དག་དངོས་གྲུབ་བརྒྱད་འབྲས་བུ། །ཐོབ་ཕྱིར་
ཡེ་ཤེས་རྒྱ་མཚོ་ནི། །རླུང་གི་ཐིག་ལེར་གསུངས་པ་ཡིན། །ཡང་དག་དེ་ཉིད་སྤྲོས་པ་ནི། །དེ་ལྟར་ཡང་དག་ཐིག་ལེ་གསུམ། །བསམ་པ་ཇི་བཞིན་སྦྱོར་ཇི་བཞིན། །ཚེ་འདི་ཉིད་ལ་གྲུབ་དོན་དུ། །སྒྲིབ་པ་ཐམས་ཅད་དག་པའི་ཕྱིར། །རྩེ་གཅིག་པ་ཡི་

སེམས་ཀྱིས་ནི། །ཡེ་ཤེས་གསུམ་གནས་ཉམས་དགའ་བ། །མེ་ཏོག་འབྲས་བུ་ཆུ་ཡིས་བརྒྱན། །སྐྱེ་བོས་དབེན་པའི་རི་ཡི་རྩེར། །དངོས་གྲུབ་ཐམས་ཅད་བསྡུས་པ་ནི། །འབད་པ་ཡིས་ནི་བསྒྲུབ་པར་བྱ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་
པ་ལས་སྣའི་རྩེ་མོ་གསུམ་གཏན་ལ་ཕབ་པའི་ལེའུ་སྟེ་ཉི་ཤུ་བཞི་པའོ།། །།དེ་ནས་ཡང་དག་བཤད་ཀྱིས་ཉོན། །སྟོང་ཉིད་ཡེ་ཤེས་མཚན་ཉིད་ནི། །ལུས་ལ་གནས་པ་དེ་ཉིད་མཆོག །ཐམས་ཅད་བདག་ཉིད་རྟག་ཏུ་བཞུགས། །ཆོས་རྣམས་ཐམས་ཅད་སྣང་
བར་བྱེད། །མཚན་ཉིད་སྟོང་པ་ཉིད་དུ་འདོད། །དེ་ལས་ཡེ་ཤེས་བདེ་བ་ཆེ། །འོད་གསལ་བ་ནི་རྣམ་དག་པ། །གང་ཕྱིར་ཨ་བ་དྷཱུ་ཏཱིར་ཞུགས། །ཡང་དག་སྟོང་པ་ཉིད་དུ་འདོད། །ཆོས་རྣམས་རྣམ་རྟོག་སྣང་བ་མཆེད། །ཀུན་རྟོག་ཐམས་ཅད་གཅོད་པར་བྱེད། །རྣམ་
རྟོག་རླུང་གི་ངལ་བསོ་བ། །དེ་ནི་སྟོང་པ་ཉིད་དུ་བཤད། །གཙོ་བོ་ཆེན་པོ་མི་བསྐྱོད་པའི། །འཇིག་རྟེན་ཁམས་ནི་དེ་ཉིད་དོ། །དེར་ནི་རྟག་ཏུ་བཞུགས་པའི་ས། །སྲོག་གི་ཡེ་ཤེས་མིང་ཅན་ཏེ། །གཟུགས་མེད་དྲག་པོ་ཆེན་པོ་ཡི། །ཞི་བའི་རང་བཞིན་མཚན་
ཉིད་ཅན། །དེ་ལ་ཡེ་ཤེས་བདེ་བ་ཆེ། །བྱང་ཆུབ་སེམས་ཀྱིས་གང་བ་ཉིད། །དེ་ཉིད་བདེ་ཆེན་གོ་འཕང་གནས། །ཡེ་ཤེས་ཡང་དག་བྱང་ཆུབ་སེམས། །དེ་ལ་སོགས་པ་མིང་གི་སྒྲས། །བརྗོད་བྱ་གཅིག་པུ་བདེ་བ་ཆེ། །དངོས་པོ་གཅིག་དང་ལྡན་པ་ཉིད། །སྟོང་
ཉིད་ཡེ་ཤེས་ཞེས་ནི་བརྗོད། །བདེ་བ་ཅན་ཞེས་དེ་ལ་བཤད། །བདེ་བ་དགེ་བའི་ཐོབ་མཚན་ཉིད། །གང་དེ་བདེ་བར་གནས་པ་ནི། །དེ་ནི་བདེ་བ་ཅན་ཞེས་བརྗོད། །ཚེ་དཔག་མེད་པའི་ཞིང་ཁམས་ན། །བདེ་བ་ཀུན་གྱི་གཞི་ཡི་མཆོག །བྱང་ཆུབ་སེམས་ནི་ཚེ་
དཔག་མེད། །དེ་ལས་བྱུང་ཞིང་སྐྱེ་བའི་འོད། །དེ་ཕྱིར་འོད་དཔག་མེད་དུ་ཤེས། །བདེ་བ་ཀུན་གྱི་གཞི་ཡི་མཆོག །སྟོང་ཉིད་རྡོ་རྗེ་དབྱིངས་དབང་ཕྱུག །ཡེ་ཤེས་རྡོ་རྗེའི་དབང་ཕྱུག་དང་། །དེ་ཉིད་མཉམ་པར་སྦྱོར་བ་ནི། །སྟོང་ཉིད་ཡེ་ཤེས་ཞེས་ནི་བརྗོད། །ཤེས་

རབ་པདྨ་ལ་ལ་ནཱ། །ཟླ་མཚན་ཉི་མ་འབབ་པ་ན། །དེ་ཡང་སྟོང་པར་རྣམ་པར་ཤེས། །གཉིས་པ་ཐམས་ཅད་རྣམ་པར་སྤངས། །ཐབས་ཀྱི་རྡོ་རྗེ་ར་ས་ནཱ། །ཟླ་བ་ཤུ་ཀྲ་རབ་ཏུ་འབབ། །དེ་ནི་ཡེ་ཤེས་མཆོག་ཏུ་གསུངས། །བདེ་བ་ཆེན་པོའི་གོ་
འཕང་མཆོག །དེ་གཉིས་སྦྱོར་བ་མཆོག་ཏུ་ཤེས། །སྟོང་ཉིད་ཡེ་ཤེས་མི་ཟད་པ། །ཟླ་བ་ཉ་དང་དེ་ཉིད་ཡིན། །རྣལ་འབྱོར་མ་ཡི་ཞལ་ལས་ཤེས། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སྟོང་པ་ཉིད་ཀྱི་ཚིག་བཤད་པའི་ལེའུ་སྟེ། ཉི་ཤུ་ལྔ་
པའོ།། །།དེ་ནས་གཞན་ཡང་བཤད་ཀྱིས་ཉོན། །ལུས་ནི་སྟོང་པ་ཉིད་ཀྱི་གནས། །ལུས་ནི་གང་གིས་ཤེས་པ་ནི། །ལྷ་རྣམས་ཀུན་གྱི་ཕོ་བྲང་མཆོག །ལོངས་སྤྱོད་ཆོས་དང་སྤྲུལ་པ་དང་། །བདེ་བ་ཆེན་པོ་ཡི་ནི་རྟེན། །འཁོར་ལོ་ཡང་ནི་གང་བཤད་པ། །རིམ་
པ་ཇི་བཞིན་མ་ལུས་པ། །དེ་ལྟར་རྟག་ཏུ་ཡང་དག་བཞུགས། །ཐིམ་དང་ལོངས་སྤྱོད་བདག་པོ་ནི། །ལྷ་ཉིད་མཆོག་ཏུ་གཉིས་སུ་མེད། །ཡང་དག་ངོ་བོའི་གོ་འཕང་རྟེན། །ཡེ་ཤེས་ཆེན་པོའི་གོ་འཕང་ཕྱིར། །བདེ་བ་ཆེན་པོའི་ཡང་དག་རྟེན། །ཞེ་སྡང་ཆེ་དང་གཏི་མུག་ཆེ། །ཕྲག་
དོག་ཆེ་དང་ཆགས་དངོས་ཀྱིས། །ཁྲོ་བོ་ཆེ་དང་རྣམ་པའི་མཆོག །འཁོར་བའི་མདུད་པ་ངེས་གཅོད་པ། །ས་དང་ཆུ་དང་དེ་བཞིན་མེ། །རླུང་དང་ནམ་མཁའི་དབྱེ་བ་ཡིས། །གཟུགས་དང་སྒྲ་དང་དེ་བཞིན་དྲི། །རོ་དང་རེག་བྱ་ཉིད་དང་ནི། །ཆོས་ཀྱི་དབྱིངས་དང་མིག་བཟངས་དང་། །
རྣ་བ་སྣ་དང་ལྕེ་དང་ནི། །ལུས་ཀྱི་རྣམ་ཤེས་ཆོས་དང་ནི། །ཀུན་གཞི་ཉོན་མོངས་ཅན་གྱི་ཡིད། །དད་དང་བརྩོན་འགྲུས་དྲན་ཏིང་འཛིན། །ཤེས་རབ་དབང་པོའི་དབྱེ་བ་ཡིས། །དད་སྟོབས་བརྩོན་འགྲུས་སྟོབས་དང་ནི། །དྲན་པའི་སྟོབས་དང་ཏིང་འཛིན་སྟོབས། །ཤེས་རབ་
སྟོབས་ནི་བླ་ན་མེད། །ཇི་བཞིན་གནས་སུ་ཡང་དག་ཤེས། །ལུས་ཀྱི་ལྷ་རུ་གསལ་བ་ཡིན། །སྔོན་བཞིན་མིང་གི་དབྱེ་བ་ཡིས། །སྔགས་ཀྱི་དབྱེ་བས་རིམ་པ་དང་། །སྔགས་དགོད་པ་ཡི་རྣལ་འབྱོར་གྱིས། །རིམ་བཞིན་གནས་ཀྱི་དབྱེ་བ་ཡིས། །ལུང་གིས་རྣམ་པར་ངེས་

བྱས་པའི། །ཡང་དག་གནས་ཀྱི་དབྱེ་བ་དང་། །ལྷ་མོ་རྟག་ཏུ་རྣལ་འབྱོར་པས། །བདག་ལ་བྱིན་རླབས་གོ་འཕང་གནས། །འདོད་པ་ལྔ་ལ་ལོངས་སྤྱོད་ཅིང་། །རབ་ཏུ་འབད་དེ་མཆོད་པ་བྱ། །།རྡོ་ཤིང་ས་ཡི་རང་བཞིན་གྱི། །ཕྱི་རོལ་ལྷ་ལ་ཕྱག་མི་བྱ། །བདག་ལ་བྱིན་རླབས་རིམ་དེ་
ཉིད། །གཞན་དུ་སྲིད་པ་གསུམ་ན་མེད། །དེ་ཁོ་ན་ཉིད་རྣལ་འབྱོར་མཆོག །བདག་ལ་བྱིན་རླབས་སྒྲིབ་མེད་པ། །སྔགས་དང་ཕྱག་རྒྱའི་རིམ་པ་སོགས། །ཕྱི་ཡི་དངོས་པོ་མི་བགྲང་སྟེ། །དེ་ཉིད་ཐོབ་པའི་རྣལ་འབྱོར་པ། །རྣལ་འབྱོར་མ་ལ་མཆོག་ཏུ་ནི། །འབད་པས་བྱིན་གྱིས་
བརླབ་པར་འདོད། །བདག་བྱིན་རློབ་ཐབས་མཚན་ཉིད་དོ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ལུས་ཀྱི་ལྷ་ཡེ་ཤེས་ཀྱི་མཚན་ཉིད་ཀྱི་ལེའུ་སྟེ་ཉི་ཤུ་དྲུག་པའོ།། །།དེ་ནས་གཞན་ཡང་ལྷ་མོ་ཡི། །དེ་རྣམས་ཀྱི་ནི་མིང་བཤད་བྱ། །འཁོར་
ལོ་བཞི་ཡི་དབྱེ་བ་ཡིས། །རྩ་ཡི་རིམ་པའི་གྲངས་ཀྱིས་ནི། །ལས་དང་རྡོ་རྗེ་པདྨ་དང་། །འཁོར་ལོ་ལ་སོགས་རིགས་དབྱེ་བས། །རིམ་པ་བཞི་ཡི་དབྱེ་བ་ཡིས། །རྩ་ཡི་རིམ་པས་ཡང་དག་བཞུགས། །འདིར་ནི་རིགས་ནི་ལྔ་པར་ཡང་། །དེ་ཁོ་ན་ཉིད་ཉམས་མྱོང་མཆོག །
ཚོར་བ་ཉམས་སུ་མྱོང་བ་ཡི། །ཐམས་ཅད་ལ་ནི་ཁྱབ་པར་གནས། །སྤྲུལ་པ་རང་གི་རིགས་ལས་སྐྱེས། །ལྷ་མོ་འདི་དག་ཡང་དག་ཞུགས། །མཁྱེན་མ་གཏུམ་མོ་དཔའ་མོ་མ། །ལས་སྒྲོལ་མ་དང་ཡིད་གཅུགས་མ། །འཁྲུལ་འཁོར་མ་དང་འབུད་མ་དང་། །དེ་བཞིན་
རླུང་རྒྱུ་མ་དང་ནི། །སྙིང་སྟོབས་ཡང་དག་སངས་རྒྱས་མ། །རབ་དང་མ་དང་ཡིད་འོང་མ། །གྲུབ་མ་སྤྲུལ་འཚོ་སྒྲ་མ་དང་། །གཏེར་འཛིན་ལྷ་ཡི་དབང་ཕྱུག་མ། །གེ་སར་པདྨ་དྲི་མེད་མ། །རླུང་གི་ལུ་གུ་རྒྱུད་བྱེད་མ། །བཟང་མོ་དང་ནི་ཁྭ་ཡི་གདོང་། །གཉིད་ལོག་མ་དང་
མི་འཕེལ་མ། །འཕར་མ་སྔོ་བསངས་དུས་མཚན་མ། །རྩེ་འཇོ་མ་དང་སྐལ་བཟང་འཕེལ། །ན་ར་ཛ་ན་ཁྱི་གདོང་མ། །ཆགས་མ་དགའ་མ་རྣམ་སྒེག་མ། །བརྩོན་འགྲུས་འཕེལ་དང་དཀར་མོ་དང་། །བདུད་རྩི་ལྔ་ནི་འཕེལ་བ་མ། །དངོས་འབེབས་ཤིན་ཏུ་དཔའ་མོ་དང་། །

པདྨ་རྔ་དང་འདོད་མ་དང་། །སྒྱུ་མ་ཡིད་འོང་མཛའ་མོ་དང་། །སྐྱུར་དང་ཆང་གི་དབང་ཕྱུག་མ། །མི་བཟད་ཆེ་དང་ལས་སྐལ་བཟང་། །མེ་ཏོག་བཟང་མོ་གདུག་རྨོངས་མ། །སྟེང་གཟིགས་ཞལ་དང་རྩེ་གསུམ་མཚན། །མཛེས་མ་དང་ནི་ལྗགས་བསྐྱོད་
མ། །རྟག་བམ་མ་དང་གར་མ་དང་། །རི་དགས་མིག་དང་ཆགས་དགའ་མ། །སྣ་ཚོགས་རྨོངས་པར་རོལ་པ་མོ། །དཀར་མོ་འཇིག་རྟེན་གསུམ་པ་མོ། །རོ་བླན་དྲི་མེད་འགྲོ་བསྟུན་མ། །རལ་ག་རྣམས་ནི་ཡང་དག་བཞུགས། །རྟག་ཏུ་བརྒྱད་དང་བརྒྱད་སྤེལ་གྲངས། །ཞལ་
གསུམ་ཕྱག་དྲུག་དྲི་མ་མེད། །རིགས་ཀྱི་ཕྱག་རྒྱ་དབྱེ་བ་ཡིས། །མཚོན་ཆ་རྣམས་ཀྱིས་ཡང་དག་བརྒྱན། །དེ་དག་སྣ་ཚོགས་རྡོ་རྗེ་གཡས། །གཡོན་པ་འགྱིང་བས་ཨུཏྤལ། །གཡས་ན་འཁོར་ལོ་རིན་ཆེན་དང་། །དེ་བཞིན་རལ་གྲི་ཆོས་འབྱུང་ནི། །གཡོན་གྱི་
ཕྱག་གཉིས་ལ་ནི་འགྱུར། །སེམས་དཔའི་སྐྱིལ་ཀྲུང་གིས་ལེགས་བཞུགས། །ཞལ་ནི་ལྗང་ཁུ་སྤྱན་གསུམ་པ། །དོན་ཡོད་གྲུབ་པའི་ཅོད་པན་ཅན། །ཞལ་རྣམས་བཞད་པར་བསྒོམ་པ་དང་། །བདེ་བ་ཐམས་ཅད་འཕེལ་བར་བྱེད། །རང་གི་མིང་གི་དབྱེ་བ་ཡིས། །ཡི་
གེ་གསུམ་དང་རྣམ་པར་སྤེལ། །སྔགས་ཀྱིས་ཀྱང་ནི་ཡང་དག་མཆོད། །འདོད་པའི་དེ་ཉིད་རབ་སྩོལ་མཛད། །ཆོས་ཀྱི་འཁོར་ལོ་རྩིབས་བརྒྱད་དབུས། །ལྷ་འདི་དག་ནི་ཡང་དག་བཞུགས། །རྡོར་དབྱིངས་དབང་ཕྱུག་ལཱ་མ་དང་། །རྡོ་རྗེ་ཕྱག་རྒྱ་སྟོབས་ཆེན་མོ། །རྡོ་རྗེ་སྒེག་
མོ་རྡོ་རྗེ་གདོང་། །རྡོ་རྗེ་ཆོས་མ་རྡོ་རྗེ་བཟང་། །རྡོ་རྗེ་རོལ་མོར་ཤེས་པར་བྱ། །ཆོས་ཀྱི་འཁོར་ལོར་དགུ་བདག་ཉིད། །ཞལ་གསུམ་ཕྱག་དྲུག་རྣམ་པ་དང་། །སེམས་དཔའི་སྐྱིལ་ཀྲུང་གིས་ལེགས་བཞུགས། །རྡོ་རྗེ་འཁོར་ལོ་རིན་ཆེན་དང་། །གཡས་པ་ཡི་ནི་ཕྱག་
ན་འཛིན། །གཡོན་ན་རལ་གྲི་པདྨ་དང་། །དྲིལ་བུ་འཛིན་པ་བླ་ན་མེད། །སྐུ་མདོག་སྔོན་པོ་སྤྱན་གསུམ་པ། །ཞལ་གྱི་མཆེ་བ་ཅུང་ཟད་གཙིགས། །རང་མིང་ཡི་གེ་གསུམ་དང་སྤེལ། །སྔགས་ཀྱིས་དེ་དག་རབ་ཏུ་མཆོད། །ལོངས་སྤྱོད་འདབ་མ་བཅུ་དྲུག་ལ། །པདྨའི་

དབུས་ན་ལྷ་རྣམས་བཞུགས། །པདྨའི་སྒྲོལ་མ་པད་དཀར་མོ། །པདྨ་ཀུ་མུ་ད་འཕེལ་མ། །པདྨའི་སྤྱན་དང་པད་གཙུག་ཕུད། །པདྨའི་ཕྲེང་བ་པད་སྐྱེས་མ། །པད་གདན་པདྨའི་དྲ་བ་མ། །དེ་བཞིན་པདྨའི་འོད་དང་ནི། །པདྨའི་སྤྱན་དང་པད་བཟངས་སམ། །པདྨའི་ནང་བཞུགས་པད་སྐྱེས་མ། །
པདྨའི་གེ་སར་པདྨ་མ། །དེ་ལྟར་འདི་ནི་ཡང་དག་བཤད། །ཞལ་གསུམ་ཕྱག་དྲུག་རྣམ་པ་ཅན། །སེམས་དཔའི་སྐྱིལ་ཀྲུང་གིས་ལེགས་བཞུགས། །གཡས་ན་པདྨ་འཁོར་ལོ་དང་། །རྡོ་རྗེ་ཡང་ནི་འདེབས་པར་མཛད། །གཡོན་ན་རལ་གྲི་དྲིལ་བུ་དང་། །རིན་པོ་ཆེ་ཡིས་རྣམ་པར་སྒེག །
སྤྱན་གསུམ་རྣམ་པར་འཆར་བ་དང་། །པདྨ་དམར་པོའི་མདོག་ལྟར་དམར། །ཉི་མའི་དཀྱིལ་འཁོར་ཉེར་བཞུགས་ཤིང་། །སེམས་དཔའི་སྐྱིལ་མོ་ཀྲུང་གིས་བཞུགས། །རང་མིང་ཡི་གེ་གསུམ་དང་བཅས། །འདི་རྣམས་སྔགས་ནི་བླ་ན་མེད། །བདེ་བ་ཆེན་པོའི་འཁོར་ལོ་ཆེ། །
པད་འདབ་སུམ་ཅུ་རྩ་གཉིས་ལ། །རྟག་ཏུ་ལྷ་མོ་རྣམས་ནི་བཞུགས། །རབ་ཏུ་སད་པ་འབད་པ་ཅན། །འཁོར་ལོའི་ཤུགས་མ་རྡོ་རྗེ་ལྡན། །རིན་ཆེན་སྒྲོལ་མ་པད་ཞུགས་མ། །སྣ་ཚོགས་ལས་མ་གཏི་མུག་དགའ། །ཞེ་སྡང་རྡོ་རྗེ་དགའ་ཆགས་མ། །རྡོ་རྗེ་ལས་ཆགས་གཟུགས་
རྡོ་རྗེ། །སྒྲ་ཡི་རྡོ་རྗེ་རོ་རྡོ་རྗེ། །རེག་བྱ་རྡོ་རྗེ་ཆོས་དབྱིངས་མ། །སྤྱན་འོད་མ་དང་ཐོད་དབྱངས་མ། །སྣ་ཡི་སྣང་བ་རོ་དགའ་མ། །སྐུ་ཡི་རྒྱལ་མཚན་ཡིད་དགའ་མ། །ཁམས་བཅས་མ་དང་རྒྱུ་འབབ་མ། །གཤིན་རྗེ་འཇོམས་པའི་བློ་ཡི་ནི། །བྱེ་བྲག་རྣམ་པར་རྒྱས་མ་དང་། །
པདྨའི་རལ་པ་གྱེན་དུ་བརྫེས། །བགེགས་རྣམས་ཐམས་ཅད་འཇོམས་པ་མོ། །སྦས་པའི་མཐིལ་དང་དབྱུག་སྔོན་མ། །ཤིན་ཏུ་བརྟན་མ་སྟོབས་ཆེན་མ། །རང་བྱུང་མ་དང་འཁོར་ལོའི་གཙུག །དེ་ལྟར་རྩ་ཡི་དབུས་ནས་ཤར། །སླར་ཡང་ལྷ་མོ་ཞལ་གསུམ་དང་། །ཕྱག་
དྲུག་བདེ་བ་འཕེལ་བ་ཅན། །ཟླ་བའི་དཀྱིལ་འཁོར་ལ་ཡང་བཞུགས། །དྲི་མེད་པདྨ་དཀར་མོའི་མདོག །ཞི་བ་ཞལ་གསུམ་སྤྱན་གསུམ་པ། །གཡས་པའི་ཕྱག་ན་བསྣམས་པ་ནི། །འཁོར་ལོ་ལྕགས་ཀྱུ་རྡོ་རྗེ་རིམ། །དེ་བཞིན་གཡོན་པའི་ཕྱག་གསུམ་ལ། །པདྨ་

ཞགས་པ་རིན་པོ་ཆེ། །འཆར་དང་འདེབས་དང་སྒེག་པར་མཛད། །པདྨ་དཀར་པོ་འདྲ་བའི་འོད། །སྤྱི་བོར་རྣམ་པར་སྣང་མཛད་འཆང་། །རང་གི་མིང་དང་ཡིག་གསུམ་མིང་། །འདི་དག་སྔགས་ནི་གོ་རིམས་བཞིན། །དེ་ཉིད་མཆོག་ནི་རབ་ཏུ་གསལ། །
སྐུ་གསུང་ཐུགས་ཀྱི་སྡོམ་པ་ནི། །དེ་ལྟ་བུ་ཡི་སྡོམ་པ་མཆོག །ལྷ་མོ་རྣམས་ཀྱི་དེ་ཉིད་མཆོག །རྟག་ཏུ་གཉིད་ལོག་ལུས་ལ་གནས། །འདོད་པ་ལྔ་ཡི་ལོངས་སྤྱོད་བསྟེན། །མཆོད་པ་ཉིད་ཀྱིས་ཡང་དག་མཉེས། །རྡོ་རྗེ་པདྨའི་བདེ་བས་མྱོས། །རྡོ་རྗེ་སེམས་དཔའི་
གོ་འཕང་མཆོག །མཉེས་ནས་སླར་ཡང་གསོ་བར་བྱེད། །དེ་ཡི་ཞི་སོགས་བྱ་བ་རྣམས། །འགྲུབ་འགྱུར་འདི་ལ་ཐེ་ཚོམ་མེད། །བསམ་གཏན་རྣལ་འབྱོར་སོགས་སྤྱོད་དང་། །སྔགས་དབྱིབས་ལ་སོགས་བྱ་བ་ནི། །དགོས་མེད་མཆོག་ཏུ་ཅུང་ཟད་ནི། །བླ་མའི་ལུང་ལས་
ཡང་དག་སྐྱེས། །དེ་ཕྱིར་རྡོ་རྗེ་སློབ་དཔོན་ནི། །འབད་པས་དངོས་གྲུབ་ཀྱིས་མཉེས་བྱ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་འཁོར་ལོ་བཞིའི་ལྷ་མོ་བཞི་རིམ་པ་རྣམ་པར་ཕྱེ་བའི་ལེའུ་སྟེ་ཉི་ཤུ་བདུན་པའོ།། །།དེ་ནས་གཞན་ཡང་བཤད་བྱ་
བ། །འཆར་དང་ནུབ་པའི་མཚན་ཉིད་ནི། །རྩ་རྣམས་ཀྱིས་ནི་རྣལ་འབྱོར་མཆོག །དངོས་གྲུབ་ཐམས་ཅད་ཀྱི་ནི་གནས། །མདུན་གནས་པ་ཡི་ཡུལ་རྣམས་ལས། །ཡིད་ལ་བྱེད་པས་དེར་མི་འགྲོ། །སྔོན་གྱི་བག་ཆགས་ནང་གནས་པ། །དེ་ཚེ་དབང་པོ་རབ་ཏུ་གསལ། །
དེ་ཡིས་དེ་ནི་རབ་ཏུ་སད། །དེ་རྣམས་རྩ་ལ་རིམ་བཞིན་གནས། །རབ་སད་དེ་ཡིས་སད་བྱས་ནས། །ལྷ་མོ་རང་ཡང་འཁོར་ལོ་ལས། །དེ་ཡིས་འཆར་བའི་རིམ་པར་གསུངས། །ནུབ་པ་ཡང་ནི་བཤད་པར་བྱ། །ཡུལ་རྣམས་ཀྱང་ནི་དངོས་བྲལ་མེད། །ཡིད་ལ་
བྱེད་ནས་གཞན་དུ་གནས། །བག་ཆགས་ཀྱང་ནི་སད་མི་སད། །རྩ་རྣམས་འཆར་བར་མི་འགྱུར་ཞིང་། །ལྷ་རྣམས་ཡང་དག་སད་པར་ནི། །དེ་ཡི་ཕྱིར་ནི་མི་འགྱུར་ཏེ། །སྙིང་གི་དབུས་ནས་བདེ་བའི་དངོས། །སངས་རྒྱས་ཉི་མ་གསལ་བའི་འོད། །གཟུང་དང་འཛིན་

པའི་གཟུགས་ཀྱིས་ཀྱང་། །དེ་ནི་འོད་ཟེར་བཅུ་གཉིས་ཏེ། །འོད་འཕེལ་འོད་ཟེར་གཟི་བརྗིད་མ། །གསལ་བ་འབར་མ་འོད་འབར་མ། །མིག་ལ་སོགས་པ་ལ་བརྟེན་ནས། །ཕྱི་རོལ་གཟུགས་སོགས་འཛིན་པའོ། །མུན་སེལ་འོད་མ་སྣང་བ་མོ། །གསལ་མཛེས་གསལ་འོད་ཉི་མ་
གསལ། །ཕྱི་རོལ་གཟུགས་སོགས་རྣམ་པའོ། །དྲུག་པོ་འདི་དག་འོག་ཏུ་འདོད། །ལྷ་མོ་རྣམས་ནི་གང་འཆར་བའང་། །ཡེ་ཤེས་ཉི་མ་འཆར་བ་ཡིན། །དེ་ཡང་ཡང་དག་ནུབ་པ་ནི། །དེ་ཡང་མཆོག་ཏུ་ནུབ་པའོ། །འཆར་བ་ནུབ་པ་རྣམས་ཆད་པ། །གོ་འཕང་མཆོག་
ཏུ་ཤེས་པར་བྱ། །རྣལ་འབྱོར་ཆེན་པོ་ལེགས་པར་སད། །སངས་རྒྱས་ཉི་མ་སྡོམ་པའོ། །འདི་ནི་རྣལ་འབྱོར་དེ་ཉིད་མཆོག །འཆར་དང་ནུབ་པའི་མཚན་ཉིད་དོ། །རྡོ་རྗེ་གསང་བའི་རྗེས་འབྲངས་ནས། །བླ་མ་བརྒྱུད་པ་ལས་ཤེས་བྱ། །རྣལ་འབྱོར་ཆེན་པོའི་རྒྱུད་དཔལ་
རྡོ་རྗེ་ཕྲེང་བ་མངོན་པར་རྟོགས་པ་ལས་འཆར་བ་དང་ནུབ་པའི་ལེའུ་སྟེ་ཉི་ཤུ་བརྒྱད་པའོ།། །།དེ་ནས་གཞན་ཡང་བཤད་ཀྱིས་ཉོན། །དགའ་བ་སྐྱེས་པའི་མཚན་ཉིད་ནི། །གང་གིས་ཡང་དག་ཤེས་པ་ཡིས། །རྡོ་རྗེ་སེམས་དཔའི་གོ་འཕང་མཆོག །དེ་ནི་རྩ་ཡི་འཁོར་
ལོ་ལ། །སླར་ཡང་རྒྱས་དང་བསྡུས་པ་ཡིས། །འཁོར་ལོ་བཞི་ཡི་ཡང་དག་སྦྱོར། །རྩ་རྣམས་བརྒྱད་དང་གཉིས་ལྷག་པ། །མཚམས་ཀྱི་རྩ་ཡི་རིམ་པ་ཡང་། །རྩ་ནི་བཅུ་དྲུག་ལ་ཡང་བརྟེན། །བཞི་དང་བཞི་ཡིས་རྟག་ཏུ་ཁྱབ། །དེ་རྣམས་དགའ་བའི་རིམ་པའོ། །ཆུ་ཁམས་
ཁོང་དུ་ཆུད་པ་ཅན། །པདྨའི་སྣལ་མ་ལྟ་བུ་ཡི། །དེ་ནས་དེ་ཡིས་ཁྱབ་བྱས་ཤིང་། །བདེ་བ་ཆེན་པོ་ཕན་པར་བྱེད། །འཁོར་ལོ་སོ་སོའི་དབྱེ་བ་ཡིས། །ཆ་བཞི་པ་ཡི་ཡི་གེ་ཧ། །ཤིན་ཏུ་ཕྲ་བའི་ཆ་དག་ཏུ། །ཁྱབ་པ་བརྟེན་གྱི་ཚུལ་དུ་གནས། །རིམ་པ་བཞི་ཡི་དབྱེ་བ་ལས། །
རིམ་པ་བཅུ་དྲུག་དབྱེ་བས་འཐོབ། །ཕྲེང་བའི་བདག་ཉིད་རྨད་བྱུང་བའོ། །རོ་གཅིག་པ་ཡི་གོ་འཕང་འཐོབ། །རིམ་གྱིས་སོ་སོར་ཉམས་མྱོང་ལས། །སྣ་ཚོགས་ཆུ་ཡི་སྦྱོར་བ་ལས། །རིམ་གྱིས་རྒྱ་མཚོ་ཆུ་བཞིན་དུ། །སྦྱོར་བ་བཞི་ཡི་འཁོར་ལོའི་དུས། །དགའ་བ་

བཞི་ནི་དེ་ལ་བརྗོད། །རྣལ་འབྱོར་མ་རྒྱུད་སྤྱོད་པ་ལས། །གོ་འཕང་མཆོག་ནི་ཐོབ་པར་འགྱུར། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་དགའ་བ་བསྐྱེད་པའི་མཚན་ཉིད་ཀྱི་ལེའུ་སྟེ་ཉི་ཤུ་དགུ་པའོ།། །།དེ་ནས་གཞན་ཡང་ཡང་དག་
ཉོན། །རྡོ་རྗེ་བརྟན་པའི་ལུས་ཀྱིས་ནི། །རྟག་ཏུ་རྩ་རྣམས་ཀྱི་ནི་རྒྱུན། །དེ་ཁོ་ན་ཉིད་ངས་བཤད་བྱ། །སྟོང་ཕྲག་ཉི་ཤུ་རྩ་བཞི་ནི། །རྩ་ནི་རྟག་ཏུ་རྨད་བྱུང་བ། །བྱང་ཆུབ་སེམས་ནི་འབབ་པར་ཤེས། །བདེ་བ་ཐམས་ཅད་རབ་ཏུ་འཕེལ། །རྟག་ཏུ་རྨད་དུ་བྱུང་བའི་རྩ། །སྟོང་
ཕྲག་ཉི་ཤུ་རྩ་བཞི་ནི། །ཁྲག་འབབ་པར་ནི་ཤེས་པར་བྱ། །ཉི་མ་འཕོ་བའི་བདག་ཉིད་ཅན། །རྟག་ཏུ་རྨད་དུ་བྱུང་བའི་རྩ། །སྟོང་ཕྲག་ཉི་ཤུ་རྩ་བཞི་ནི། །རླུང་རྒྱུ་བར་ནི་ཤེས་པར་བྱ། །རྒྱ་མཚོ་ཆེན་པོའི་རྒྱུད་ལས་ནི། །ལུས་ཀྱི་གནས་ནི་དབྱེ་བ་ཡིས། །དེ་ཉིད་ཉི་ཤུ་རྩ་
བཞིར་བརྗོད། །ཐིམ་དང་ལོངས་སྤྱོད་བདག་པོ་ཉིད། །གྲངས་ནི་བདུན་ཅུ་རྩ་གཉིས་བརྗོད། །རེ་རེའང་འཁོར་ལོ་སྟོང་སྟོང་ངོ་། །ཐིམ་པ་ལོངས་སྤྱོད་བདག་འདོད་པ། །གཙོ་བོ་ཡང་ནི་བསྡུས་པ་ལས། །གནས་རྣམས་ཀྱི་ནི་གྲངས་སུ་འགྱུར། །སླར་ཡང་བསྡུས་ནས་འགྲོ་བ་
ན། །གསུམ་པོ་བརྒྱད་བརྒྱད་དབྱེ་བའང་ནི། །ཉིན་དང་མཚན་མོའི་དབྱེ་བ་དང་། །ཐུན་ཚོད་སྐད་ཅིག་སྦྱོར་བ་ཡིས། །རྩ་རྣམས་གོང་ནས་གོང་དུ་ནི། །ནང་དུ་འགྲོ་བར་ཤེས་པར་བྱ། །གཡོན་པ་བྱང་ཆུབ་ཟླ་བ་འབབ། །གཡས་པ་ཁྲག་དང་ཉི་མ་འབབ། །དབུས་ནི་རླུང་རྒྱུ་
བ་ཡིས་ནི། །མི་སད་བྱེད་པར་ཤེས་པར་བྱ། །ལ་ལ་ནཱ་དང་ར་ས་ནཱ། །ཨ་བ་དྷཱུ་ཏཱི་ཞེས་བྱའི་མིང་། །དེ་རྣམས་སྤྲོ་བའི་སྦྱོར་བ་ཡིས། །རེ་རེའི་རིམ་གྱིས་ཐུན་བརྒྱད་བརྒྱད། །གསུམ་པོ་ཉི་ཤུ་རྩ་བཞི་འགྲོ། །ཐིམ་དང་ལོངས་སྤྱོད་བདག་པོའི་ཕྱིར། །རིམ་གྱིས་གྲངས་ནི་
བདུན་ཅུ་གཉིས། །སླར་ཡང་དེ་སྤྲོ་སྦྱོར་བ་ཡིས། །རེ་རེ་འང་སྟོང་སྟོང་དབྱེ་བ་ཡིས། །རྟག་ཏུ་གྲངས་ཉིད་འགྱུར་བ་ནི། །སྟོང་ཕྲག་བདུན་ཅུ་རྩ་གཉིས་སོ། །གཙོ་བོ་གསུམ་པོ་སླར་ཡང་ནི། །སྦྱོར་བས་གཅིག་པ་ཉིད་དུ་འགྲོ། །དང་པོ་ལས་ནི་རྣལ་འབྱོར་ཕས། །ཕྲ་བ་

དེ་ནི་ཤེས་པར་དཀའ། །བསམ་གྱིས་མི་ཁྱབ་མཆོག་ཏུ་ནི། །ཐིག་ལེ་ནཱ་ད་རྣམ་པར་སྤངས། །བདེ་བ་ཀུན་གྱི་གཞི་གསང་བ། །སྲོག་གི་རྟེན་གྱི་མཚན་ཉིད་དང་། །རྡོ་རྗེ་དབྱིངས་ཀྱི་དབང་ཕྱུག་དང་། །དུས་ཀྱི་རྩ་ནི་རྣམ་པར་བཤད། །རོ་གཅིག་གོ་འཕང་བདག་ཉིད་ཅན། །རྣལ་
འབྱོར་མ་ཡི་རྒྱུད་ལས་ཤེས། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རྩ་འབབ་པའི་མཚན་ཉིད་ཀྱི་གོ་ཆ་ཞེས་བྱ་བའི་ལེའུ་སྟེ་སུམ་ཅུ་པའོ།། །།དེ་ནས་གཞན་ཡང་བཤད་ཀྱིས་ཉོན། །མཚམས་ཀྱི་རྩ་ཡི་ངོ་བོ་ཉིད། །རྩ་རྣམས་སྡོམ་པ་
འཆར་བ་ནི། །གང་གིས་ཤེས་ན་རྟག་ཏུ་ནི། །མཆོག་ཏུ་དགའ་བ་ཉམས་མྱོང་བ། །ལྷ་ཡི་ཡེ་ཤེས་གསལ་བར་བྱེད། །ལྷ་ཡི་སྔགས་སུ་ཡང་དག་སྦྱོར། །ལྷ་ཡི་རྣལ་འབྱོར་དོན་ངེས་པ། །དེ་ཉིད་གསུམ་སྦྱོར་དྲི་མ་མེད། །དེ་གསུམ་ཅིག་ཆར་བདག་ཉིད་སྡོམ། །
འཇིག་རྟེན་གསུམ་དུ་ཁྱབ་ཅིང་ཕྲ། །ལུས་ཀུན་ལ་ནི་ཡང་དག་བརྟེན། །ཡེ་ཤེས་སེམས་དཔའ་རྡོ་རྗེ་སེམས། །གང་ཕྱིར་དམ་ཚིག་སེམས་དཔའ་བདེ། །རྣལ་འབྱོར་མཆོག་ཏུ་ཤེས་པར་བྱ། །ཁྱབ་པའི་དེ་ཉིད་རྨད་བྱུང་བ། །མཆོག་རབ་མཆོག་དང་ཕྲ་བ་
དང་། །རང་བྱུང་ཡེ་ཤེས་མི་ཟད་པ། །བྱང་སེམས་སུམ་ཅུ་རྩ་གཉིས་འབབ། །རྩ་ནི་ཐམས་ཅད་མཆོག་ཏུ་རྒྱས། །བདེ་བ་ཆེན་པོའི་འཁོར་ལོར་གནས། །ཆ་ཀུན་བདག་ཉིད་རྩ་བ་ནི། །དེ་ཡི་དབུས་སུ་རྩ་གསུམ་སྟེ། །གཙོ་བོ་ཡང་ནི་ཡང་དག་བཤད། །ཟླ་བ་
ཉི་མ་མེ་རྒྱུ་བ། །འབྱུང་བ་ཐམས་ཅད་ལ་ནི་ཁྱབ། །ཇི་ལྟར་ཤིང་རྩ་ཅུང་ཟད་ཅིག །ས་ལ་བརྟན་པར་གནས་པ་ན། །སྡོང་བུ་ཡལ་ག་འདབ་ཕྲེའུ། །སོགས་པ་ཡིས་ནི་ཀུན་ནས་ཁྱབ། །དེ་བཞིན་སྐྱེས་བུ་མགོར་ལྡན་པས། །ཕུང་པོ་ཁམས་ལ་སོགས་ཚོགས་
ལ། །མཆོག་ཏུ་ཀུན་ནས་ཁྱབ་པའོ། །རྣམ་པར་ཐར་པའི་སྒོ་གསུམ་དངོས། །དེ་ཁོ་ན་ཉིད་གསུམ་སྡོམ་པ། །འདོད་ཆགས་ཞེ་སྡང་གཏི་མུག་དང་། །རང་བཞིན་མཚན་ཉིད་དབྱེ་བ་གསུམ། །མཚན་མོ་ཉིན་མོ་མཚམས་ཀྱིས་ཀྱང་། །དམ་ཚིག་མཚན་ཉིད་རྣམ་པ་

གསུམ། །སངས་རྒྱས་དམ་ཆོས་དགེ་འདུན་ནི། །གསུམ་ཕྱེ་དམ་ཚིག་མཚན་ཉིད་དང་། །སྟོང་ཉིད་ཡེ་ཤེས་རྡོ་རྗེ་ནི། །རྣམ་གསུམ་དེ་ཉིད་མཚན་ཉིད་དོ། །རྒྱུ་དང་འབྲས་བུ་ཉེ་འཁོར་ནི། །རྣལ་འབྱོར་གསུམ་གྱི་མཚན་ཉིད་དོ། །རླུང་དང་བད་ཀན་མཁྲིས་
པ་ནི། །གསུམ་ཕྱེ་ཁམས་ནི་བསྡུས་པའོ། །འདོད་ཁམས་གཟུགས་ཁམས་གཟུགས་མེད་ཁམས། །འཇིག་རྟེན་གསུམ་པོའི་མཚན་ཉིད་དོ། །རྩ་བ་གསུམ་དང་འབྲས་བུ་གཅིག །རིམ་བཞིན་གྱུར་ནས་ཆོས་འཁོར་འགྲོ། །དེ་ནི་སྤྲུལ་པ་གསུམ་དུ་གསལ། །སྐུ་གསུང་
ཐུགས་ཀྱི་རང་བཞིན་གྱིས། །གང་ཚེ་དེ་ལ་དེ་སྦྱོར་བ། །དེ་ནི་གཟས་ཟིན་མཚན་ཉིད་དོ། །གང་ཚེ་ཅུང་ཟད་སྦྱོར་བ་ན། །དེ་ཚེ་ཕྱེད་འཛིན་མཚན་ཉིད་དོ། །གང་ཕྱིར་སྲོག་གི་རླུང་བཅོམ་ན། །དེ་ཚེ་འཆི་བའི་མཚན་ཉིད་ཡིན། །རྩ་ཡི་གཙོ་བོའང་ཉིད་རྣམས་ནི། །གསུམ་པོ་ངེས་པ་
ཞེས་ནི་བྱ། །རྒྱས་པར་རྣལ་འབྱོར་མ་རྒྱུད་ལས། །རྣལ་འབྱོར་པ་ཡིས་གསལ་པོར་ཤེས། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་མཚམས་ཀྱི་རྩ་གསུམ་གྱི་ངེས་པའི་ལེའུ་སྟེ་སུམ་ཅུ་གཅིག་པའོ།། །།དེ་ནས་གཞན་ཡང་བཤད་ཀྱིས་
ཉོན། །རླུང་སྐྱེ་བ་ཡི་མཚན་ཉིད་ནི། །དུས་ཀྱི་གླགས་ནི་བཙལ་བ་ན། །ཇི་ལྟར་དངོས་སུ་ཡང་དག་ཤེས། །བག་ཆགས་ཉོན་མོངས་ཅན་གྱི་ཡིད། །རང་གི་ངོ་བོ་གཟུགས་གཞན་མཐོང་། །དོན་ནི་ཤེས་པར་མི་ཤེས་ཤིང་། །རླུང་ཙམ་གཅིག་པུས་རྨོངས་པའོ། །ཀུན་
གཞི་རྣམ་ཤེས་བཀུག་ནས་ནི། །བག་ཆགས་ནང་དུ་རྣམ་པར་སྤྱོད། །བག་ཆགས་ཀྱིས་ནི་རྣམ་ཤེས་བཟུང་། །བག་ཆགས་དང་འདྲེས་རིམ་པ་ལས། །ནང་གི་བག་ཆགས་བསྒོས་པ་ཡིས། །དེ་རྣམས་ཟླ་མཚན་དུས་སུ་ནི། །མངལ་གྱི་རྩལ་འཇུག་པ་ན། །རྡོ་རྗེ་ཁུ་
ཁྲག་ཞུ་ཐིག་ལེ། །འདྲེས་པ་རུ་ནི་གྱུར་པ་དང་། །ཀུན་གཞི་ལས་ནི་རྣམ་ཤེས་སྐྱེ། །ཇི་ལྟར་ཆང་རོས་མྱོས་པ་བཞིན། །ཀུན་གཞི་རྣམ་ཤེས་བག་ཆགས་ལས། །རྣམ་པར་ཤེས་པའི་རྒྱུན་ནི་སྐྱེ། །ཉོན་མོངས་ཅན་ཉིད་སྲོག་རླུང་ཉིད། །སྐད་ཅིག་གཅིག་ལ་ཡང་དག་འགྲོ། །

ཐོག་མར་འཕོ་བའི་དུས་སུ་ནི། །ཉ་ཡི་རྣམ་པ་ལྟ་བུར་འགྱུར། །འཕོ་བ་གཉིས་པའི་དུས་སུ་ནི། །སླར་ཡང་ཁྲག་དང་འདྲེས་པ་ནི། །སྟེང་དང་འོག་གི་དབྱེ་བ་ཡིས། །སྲོག་གི་རླུང་ནི་གཉིས་སུ་འགྲོ། །ཐུར་སེལ་རླུང་གི་འགྲོ་འོང་ལ། །རུས་སྦལ་རྣམ་པར་འཛིན་པར་འགྱུར། །
དེ་ནས་འཕོ་བ་གསུམ་པ་ལ། །ཁྲག་དང་ཁུ་བ་ཟོས་པ་ན། །ཐུར་དུ་སེལ་བའི་རླུང་གི་ཚོགས། །བསྐམས་ནས་ཀུན་དུ་རླུང་ནི་འབྱུང་། །སྟེང་དུ་ཁ་བལྟས་ནས་ནི་གནས། །ཕག་རྒོད་འདྲ་བའི་ལུས་འཆང་འགྱུར། །སླར་ཡང་འཕོ་བ་བཞི་པ་ལ། །ཁྲག་དང་ཁུ་བ་
བསྒོས་པ་ནི། །གྱེན་དུ་རྒྱུ་བའི་རླུང་བཀུག་ནས། །འོག་ཏུ་ཁ་བལྟས་ནས་ནི་འགྲོ། །སེང་གེའི་རྣམ་པ་ཡིས་ཀྱང་ནི། །ཁྱབ་བྱེད་རླུང་ནི་སྤྲོ་བར་བྱེད། །དེ་ནས་འཕོ་བ་ལྔ་པ་ལ། །ཁྲག་དང་ཁུ་བ་འཕེལ་ནས་ནི། །མཉམ་གནས་རླུང་ནི་འདར་ནས་ནི། །མེ་ཡི་གཟུགས་
རེད་རིམ་བཞིན་འགྲོ། །མཉམ་གནས་རླུང་གིས་ཁྱབ་བྱེད་སྤྲོ། །གང་གིས་འགུལ་དང་འདར་བར་འགྱུར། །ཕུང་པོ་ལྔ་ནི་རྫོགས་པ་ན། །དེ་ལྟར་གསུངས་པ་དེ་ལས་སླར། །འཕོ་བ་དྲུག་པའི་དུས་ཚོད་ལ། །ས་ཡི་ཁམས་དང་མིག་གཉིས་དང་། །ཁྱབ་བྱེད་རླུང་གིས་
ཀླུ་རླུང་སྤྲོ། །རླུང་གི་དངོས་པོ་འཕེལ་བར་བྱེད། །དེ་ནས་འཕོ་བ་བདུན་པ་ལ། །ཆུ་ཡི་ཁམས་དང་སྣ་བུག་དོད། །ཀླུ་ཡི་རླུང་གིས་རུས་སྦལ་རླུང་། །སྤྲོས་ནས་གཉིས་སུ་མེད་པར་སྤྲོད། །དེ་ནས་འཕོ་བ་བརྒྱད་པ་ལ། །མེ་དང་སྣ་ཡི་བུ་ག་འབྱུང་། །རུས་སྦལ་རླུང་
གིས་རྩངས་རླུང་སྤྲོ། །རང་གི་རང་བཞིན་ཤེས་པར་བྱེད། །དེ་ནས་འཕོ་བ་དགུ་པ་ལ། །རླུང་གི་ཁམས་དང་རོ་ནི་ཚོར། །རྩངས་པ་ཞེས་བྱའི་རླུང་ཆེན་པོས། །ལྷ་སྦྱིན་རླུང་ནི་སྤྲོ་བར་བྱེད། །དེ་རྗེས་འཕོ་བ་བཅུ་པ་ལ། །ལྷ་སྦྱིན་རླུང་གིས་གཞུ་རྒྱལ་སྤྲོ། །རླུང་ཀུན་བསྡུས་
པའི་མཚན་ཉིད་ཅན། །དགུ་པའི་དབུས་ན་ཁྱབ་པའི་ཁམས། །ཕྲ་ཞིང་ཐོགས་མེད་མཚན་ཉིད་ཅན། །རྩ་དང་རྒྱུ་མ་རྒྱུས་པའི་སྦུབས། །སྒོ་ནི་དགུ་པོ་རྒྱས་པར་བྱེད། །ལུས་ཀྱི་མཆོག་ཏུ་ཚོར་བ་དང་། །གཅིག་ཏུ་རེག་པའི་མཚན་ཉིད་འཛིན། །རབ་སད་མཆོག་ནི་

ནམ་མཁའ་ལ། །འོད་གསལ་བཟང་པོ་ཡང་དག་གནས། །སངས་རྒྱས་རྣམས་ཀྱི་ཤེས་པ་བཅུ། །དེ་ལྟ་བུ་ཉིད་བཤད་པར་བྱ། །འཕོ་བ་བཅུ་ནི་ས་བཅུ་སྟེ། །རིམ་པ་ཡི་ནི་རྣམ་པར་ཤེས། །མ་ནི་ཤེས་རབ་ཕ་རོལ་ཕྱིན། །བྷ་ག་ཕྱག་རྒྱ་ཆེན་པོར་
བརྗོད། །བྱིས་པ་ཡང་དག་རྫོགས་སངས་རྒྱས། །ཐམས་ཅད་མཁྱེན་ཅིང་ཐམས་ཅད་གཟིགས། །མགོ་བོའི་སྐྲ་ནི་བྲེགས་པ་དང་། །ཕྲུ་མའི་ཆོས་གོས་དམར་པོ་བགོས། །དཔལ་དང་ལྡན་པ་ཐལ་མོ་སྦྱར། །སྤྱི་བོ་ས་ལ་གཏུགས་པ་ཕྱག །མཚན་ནི་སུམ་ཅུ་རྩ་གཉིས་
འཆང་། །དཔེ་བྱད་བཟང་པོ་བརྒྱད་ཅུས་བརྒྱན། །ཡེ་ཤེས་ཆེན་པོ་ལེགས་པར་སད། །འདུ་བྱེད་ཐོབ་པ་གྲོལ་དང་བཅས། །དཔའ་བོ་ཆེན་པོ་རྣམ་རྟོག་མེད། །སྐྱེད་བྱེད་ཤ་ནི་འཇིག་པར་བྱེད། །བདུད་རྩི་ལྔ་ནི་ཡེ་ཤེས་ཆེ། །རྟག་ཏུ་བདུད་རྩི་ལྔ་མྱོང་བྱེད། །དངོས་པོ་
ཐམས་ཅད་རྣམ་སྤངས་པ། །རྣལ་འབྱོར་སེང་གེ་བཞིན་དུ་སྤྱོད། །འདི་གཉིས་མཆོག་ནི་གསང་བ་སྟེ། །གང་དུ་ཡང་ནི་མ་གསུངས་སོ། །རླུང་སྐྱེས་པ་ཡི་ངེས་པ་ནི། །བླ་མ་བརྒྱུད་པ་ལས་ཤེས་བྱ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རླུང་
གིས་བསྐྱེད་པ་སྐྱེས་བུ་སྐྱེ་བ་འཇུག་པའི་ལེའུ་སྟེ་སུམ་ཅུ་གཉིས་པའོ།། །།དེ་ནས་གཞན་ཡང་བཤད་བྱ་བ། །རླུང་རྣམས་མཆོག་ཏུ་ནུབ་པ་ནི། །གང་གིས་ཡང་དག་ཤེས་པ་ཡིས། །འཆི་བའི་སྐད་ཅིག་མཚན་ཉིད་ནི། །ཕན་ཚུན་དུ་ནི་ཡང་དག་སད། །སྐྱེ་བའི་རིམ་ལྟར་
ཐིམ་པར་འགྱུར། །རླུང་རྣམས་ཡང་དག་སྐྱེ་བ་ནི། །ཕན་ཚུན་ནུབ་པའི་ཉི་མ་བཞིན། །ཐོག་མར་ལོ་བཅུ་ལོན་ནས་ནི། །རྒྱགས་པས་མྱོས་པའི་རླུང་སྐྱེས་ན། །གཞུ་ལས་རྒྱལ་བའི་རླུང་ཟོས་ཏེ། །རིམ་གྱིས་སྒྲ་གཅན་ཟླ་བ་བཞིན། །དེ་རྗེས་ལོ་བཅུ་ཕྱིན་པ་ནི། །རྒྱགས་ཆུ་
རླུང་གིས་ཡང་དག་སྐྱེ། །ལྷ་སྦྱིན་ཞེས་བྱའི་རླུང་ནི་ཟ། །རླུང་གི་རིམ་པ་སྔ་མ་བཞིན། །གཞན་ཡང་ལོ་བཅུ་ཕྱིན་པ་ན། རྒྱགས་པའི་ཆུ་རླུང་སྐྱེ་བར་འགྱུར། །རྩངས་པ་ཞེས་བྱའི་རླུང་ནི་ཟ། །དེ་ནས་གཞན་ཡང་ལོ་བཅུ་ཕྱིན། །ལོ་ལས་སྐྱེས་པའི་རིམ་པ་ཡིས། །བཏང་

བཟུང་རླུང་ནི་ཆེན་པོ་ཡིས། །རུས་སྦལ་རླུང་ནི་ཟ་བར་བྱེད། །ཀླུ་ཡི་རླུང་དང་བཏང་བཟུང་རླུང་། །སྟོབས་དང་གཟི་བརྗིད་མཚུངས་པའི་ཕྱིར། །དུས་གཞན་ལོ་བཅུར་ཕྱིན་པ་ན། །གནོད་པར་བྱེད་པར་མི་ནུས་ཏེ། །སྟོབས་དང་ནུས་པ་མཚུངས་པའི་ཕྱིར། །གང་གིས་གང་ལ་
གནོད་པ་ནི། །བྱེད་པ་ཉིད་དུ་མི་ནུས་སོ། །བཅུ་དེ་གཞན་དུ་ཕྱིན་པའོ། །ལོང་བ་བཏང་བཟུང་སྟོབས་ཆེན་ཐོབ། །ཀླུ་ཡི་རླུང་ནི་རིམ་གྱིས་ཟ། །དེ་ནས་བཅུ་པ་གཞན་ཕྱིན་ན། །ཁྲག་དང་ཤ་ནི་རྣམ་པར་འཕེལ། །རྒྱགས་ཤིང་མྱོས་པའི་རིམ་པ་ཡིས། །བཏང་བཟུང་
རླུང་ནི་ཟ་བར་བྱེད། །དེ་རྗེས་ལོ་བཅུ་ལོན་པ་ན། །མྱོས་ཆུ་རླུང་ནི་བཀུག་ནས་ནི། །ཚིལ་དང་ཁ་ཆུ་རྣམ་པར་འཕེལ། །དེ་ཡི་བཏང་བཟུང་ཀླུ་ཟ་བྱེད། །དེ་ནས་བཅུ་པ་གཞན་ཕྱིན་པའི། །ལོ་ལ་བཏང་བཟུང་རླུང་སྟོབས་སྐྱེས། །མྱོས་པའི་དུས་རླུང་ཟ་བར་བྱེད། །
མེ་དང་རླུང་ནི་འཕེལ་བར་བྱེད། །བཏང་བཟུང་རླུང་ཉིད་རྣམ་གྱུར་ནས། །ལོངས་སྤྱོད་ཆེན་པོ་འཕེལ་གྱུར་ནས། །དེ་ནས་ལོ་བཅུ་གཞན་ལོན་ནས། །རླུང་གིས་ལུས་རྒྱས་ལྕི་བར་འགྱུར། །ཆུ་དང་རླུང་ནི་འདྲེས་པ་ན། །ཁྱབ་ཅིང་སྒྲིབ་བྱས་རིམ་པ་ལས། །དེ་ལས་ལོ་བཅུ་གཞན་
དུ་ཕྱིན། །ཆུ་ཤིང་འབྲས་བུ་བཞིན་དུ་མེད། །རྩ་བ་དང་བཅས་མེད་པར་འགྱུར། །ལས་ཀྱི་རྣམ་སྨིན་མཐའ་ཡིས་ནི། །དེ་ལྟར་རིམ་པ་བཅུ་པ་ཡིས། །ཟླ་བའམ་ནི་ཉིན་ཞག་གཞན། །ཚེ་ནི་ཉུང་ངུར་བྱས་ནས་ནི། །སྲོག་ཟད་པར་ནི་ཤེས་པར་བྱ། །མཁའ་འགྲོ་སྡུད་པའི་
རྒྱུད་ལས་ནི། །ཤིན་ཏུ་རྒྱས་པར་ཤེས་པར་བྱ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རླུང་གི་རིམ་པས་སྲོག་ཟད་པ་རྒྱས་པར་བཤད་པའི་ལེའུ་སྟེ་སུམ་ཅུ་གསུམ་པའོ།། །།དེ་ནས་གཞན་ཡང་བཤད་ཀྱིས་ཉོན། །མཚན་ཉིད་ཆེན་པོ་ཡེ་
ཤེས་མཆོག །བསྡུ་བའི་མཁའ་འགྲོ་རྣལ་འབྱོར་མཆོག །སྙིང་པོས་སྙིང་པོའི་དོན་བསྡུས་པ། །གང་ཕྱིར་མཁའ་འགྲོ་མས་བསྡུས་པ། །དེ་ཕྱིར་བསྡུས་པའི་མཁའ་འགྲོ་བརྗོད། །ལྟེ་བའི་དབུས་ན་རྟག་བཞུགས་པ། །ཉི་མ་སྟོང་དང་