Kinh tạng Tây Tạng (Kangyur Đại Học) — 081_རྒྱུད་འབུམ།_ཅ

ག་གི་འཁོར་ལོས་འདོད་པ་སྤྱོད་ཅིང་ཅང་མི་གསུང་བར་གྱུར་ཏོ། །དེ་ནས་ནམ་མཁའི་དབྱིངས་
འདི་དག་ཐམས་ཅད་ནི་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་དམ་ཚིག་གི་ཁུ་བས་ཡོངས་སུ་གང་སྟེ། བུམ་པ་རྡོ་རྗེ་ཆུས་གང་བ་ལྟར་གནས་པར་གྱུར་ཏོ། །དེ་ནས་རྡོ་རྗེ་ནམ་མཁའི་དབྱིངས་འདི་ན་གང་སེམས་ཅན་སྐུ་གསུམ་ཡང་དག་པར་འབྱུང་བ་དེ་རྣམས་རྡོ་རྗེའི་དཔལ་
གྱིས་ཡང་དག་པར་རིག་པ་དེ་དག་ཐམས་ཅད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེ་གསུམ་གྱི་ཡེ་ཤེས་ཅན་དུ་གྱུར་ཏོ། །དེ་ནས་བརྩམས་ཏེ་སེམས་ཅན་ཐམས་ཅད་ཀུན་ནས་བཟང་པོ། ཀུན་དུ་བཟང་པོ་ཞེས་དེ་བཞིན་གཤེགས་པ་ཐམས་ཅད་ཀྱི་སྐུ་
དང་གསུང་དང་ཐུགས་རྡོ་རྗེས་དབང་བསྐུར་བར་གྱུར་ཏོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་བདག་པོ་ཕྱག་ན་རྡོ་རྗེས་དེ་བཞིན་གཤེགས་པ་དེ་དག་ཐམས་ཅད་ལ་འདི་སྐད་ཅེས་བཀའ་སྩལ་ཏོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཆོས་ཐམས་ཅད་ཀྱི་མཉམ་པ་ཉིད་མཐོང་
ངམ། དེ་ནས་དེ་བཞིན་གཤེགས་པ་དེ་དག་ཐམས་ཅད་ཀྱིས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་མཉམ་པ་ཉིད་དང་། རྡོ་རྗེ་ཡེ་ཤེས་ཀྱི་སྤྱོད་པ་མཐོང་ལགས་སོ། །བདེ་བར་

གཤེགས་པ་མཐོང་ལགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་དེ་བཞིན་གཤེགས་པ་ཐམས་ཅད་ཀྱི་བཙུན་མོའི་བྷ་ག་ལས་མངོན་པར་བྱུང་ནས་བཅོམ་ལྡན་འདས་དེ་བཞིན་གཤེགས་པ་ཕྱག་ན་རྡོ་རྗེ་ཆེན་པོ་ལ་འདི་སྐད་ཅེས་གསོལ་ཏོ། །གང་གི་ཕྱིར་འདོད་ཆགས་ཀྱི་
ཡི་གེའི་ཚིག་གིས་སངས་རྒྱས་ཀྱི་བྱང་ཆུབ་རྗེས་སུ་རྟོགས་པར་བྱའོ་ཞེས་བྱ་བ་ནི་བཅོམ་ལྡན་འདས་ངོ་མཚར་ཏོ། །བདེ་བར་གཤེགས་པ་ངོ་མཚར་ཏོ། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་དེ་བཞིན་གཤེགས་པ་དེ་དག་ཐམས་ཅད་ལ་འདི་སྐད་ཅེས་བཀའ་སྩལ་ཏོ། །
བཅོམ་ལྡན་འདས་དེ་བཞིན་གཤེགས་པ་ཐམས་ཅད་དེ་སྐད་མ་གསུངས་ཤིག །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་ནམ་མཁའ་རྡོ་རྗེའི་དམ་ཚིག་དང་མཚུངས་པའི་ཕྱིར་གཟུགས་ཀྱི་ཕུང་པོ་མ་ཡིན། ཚོར་བའི་ཕུང་པོ་མ་ཡིན། འདུ་ཤེས་ཀྱི་ཕུང་པོ་མ་ཡིན། འདུ་བྱེད་ཀྱི་ཕུང་པོ་མ་ཡིན།
རྣམ་པར་ཤེས་པའི་ཕུང་པོ་མ་ཡིན། ཁམས་མ་ཡིན་སྐྱེ་མཆེད་མ་ཡིན། དེ་བཞིན་དུ་འདོད་ཆགས་མ་ཡིན་ཞེ་སྡང་མ་ཡིན་གཏི་མུག་མ་ཡིན། ཆོས་མ་ཡིན་ཆོས་མ་ཡིན་པ་ཡང་མ་ཡིན་ནོ། །དེ་ནས་དེ་བཞིན་གཤེགས་པ་དེ་དག་ཐམས་ཅད་ཅང་མི་གསུང་བར་གྱུར་ཏོ། །དེ་ནས་བཅོམ་ལྡན་
འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་ཕྱག་ན་རྡོ་རྗེས་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་དེ་རྣམས་ལ་བཀའ་སྩལ་པ། ཁྱེད་རྣམས་ཀྱིས་འཇིག་རྟེན་གྱི་ཁམས་ཐམས་ཅད་དུ་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེ་གསང་བ་འདི་
བསྒོམ་པར་གྱིས་ཤིག །དེ་ཅིའི་ཕྱིར་ཞེ་ན། ཕྱོགས་བཅུ་ན་གནས་པའི་བྱང་ཆུབ་སེམས་དཔའ་འདི་རྣམས་ལ་ཆོས་ཀྱི་རྣམ་གྲངས་འདིའི་སྐལ་བ་ཡོད་པའི་ཕྱིར་རོ། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་རྡོ་རྗེ་ཆོས་ལ་བཀའ་སྩལ་པ། རིགས་ཀྱི་བུ་དེ་བཞིན་
གཤེགས་པ་ཐམས་ཅད་ཀྱི་དམ་ཚིག་གི་དེ་ཁོ་ན་ཉིད་འདི་ཟུང་ཤིག །ཁྱོད་ནི་དེ་བཞིན་གཤེགས་པ་ཐམས་ཅད་ཀྱིས་ཆོས་ཐམས་ཅད་ཀྱི་དབང་ཕྱུག་རྡོ་རྗེ་ཞེས་བྱ་བར་དབང་བསྐུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་ཆོས་ཀྱིས་དེ་བཞིན་དུ་བགྱིའོ་ཞེས་གསོལ་ནས་

ཅང་མི་སྨྲ་བར་གྱུར་ཏོ། །དེ་ནས་དེ་བཞིན་གཤེགས་པ་དེ་དག་ཐམས་ཅད་རྡོ་རྗེ་སེམས་དཔའི་ཡི་གེ་གསུམ་ལ་རང་གི་སྐུ་དང་གསུང་དང་ཐུགས་ཞུགས་པར་གྱུར་ཏོ། །དེ་ནས་དེ་བཞིན་གཤེགས་པ་རྣམ་པར་སྣང་མཛད་ཁམས་གསུམ་པ་ཐམས་ཅད་ཀྱི་ལུས་རྡོ་རྗེ་ལ་གནས་
ཤིང་དེ་བཞིན་གཤེགས་པ་ཐམས་ཅད་ཀྱི་སྐུ་མཉམ་པ་ཉིད་ལ་དམིགས་ནས་ཅང་མི་གསུང་བར་གྱུར་ཏོ། །དེ་ནས་དེ་བཞིན་གཤེགས་པ་གསུང་རྡོ་རྗེ་ཁམས་གསུམ་པ་ཐམས་ཅད་ཀྱི་ངག་རྡོ་རྗེ་ལ་གནས་ཤིང་དེ་བཞིན་གཤེགས་པ་ཐམས་ཅད་ཀྱི་གསུང་མཉམ་པ་ཉིད་ལ་དམིགས་ནས་ཅང་མི་གསུང་བར་
གྱུར་ཏོ། །དེ་ནས་དེ་བཞིན་གཤེགས་པ་ཕྱག་ན་རྡོ་རྗེ་ཁམས་གསུམ་པ་ཐམས་ཅད་ཀྱི་སེམས་རྡོ་རྗེ་ལ་གནས་ཤིང་དེ་བཞིན་གཤེགས་པ་ཐམས་ཅད་ཀྱི་ཐུགས་མཉམ་པ་ཉིད་ལ་དམིགས་ནས་ཅང་མི་གསུང་བར་གྱུར་ཏོ། །དེ་སྐད་ཅེས་བཀའ་སྩལ་ཏོ། །དེ་བཞིན་གཤེགས་པ་ཐམས་ཅད་ཀྱི་སྐུ་
དང་གསུང་དང་ཐུགས་ཀྱི་གསང་ཆེན་གསང་བ་འདུས་པ་ལས་དེ་བཞིན་གཤེགས་པ་ཐམས་ཅད་ཀྱི་དམ་ཚིག་དང་སྡོམ་པ་རྡོ་རྗེའི་བྱིན་གྱི་རླབས་ཀྱི་རྒྱལ་པོ་ཞེས་བྱ་བའི་ལེའུ་སྟེ་བཅུ་བདུན་པའོ།། །།དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་ཆེན་གསང་བ་འདུས་པ་
ཞེས་བྱ་བ་བརྟག་པའི་རྒྱལ་པོ་ཆེན་པོ་རྫོགས་སོ།། །།རྒྱ་གར་གྱི་མཁན་པོ་ཤྲད་དྷཱ་ཀ་ར་ཝརྨ་དང་། ཞུ་ཆེན་གྱི་ལོ་ཙྪ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པ། སླད་ཀྱིས་པཎྜི་ཏ་བླ་མ་རྡོ་རྗེ་འཛིན་པ་ཆེན་པོ་རྗེ་བཙུན་ཉི་མའི་དབང་པོའི་ཞལ་སྔ་ནས་ཆག་ལོ་ཙྪ་བ་དགེ་སློང་
ཆོས་རྗེ་དཔལ་གྱིས་གུས་པས་ཞུས་ཤིང་དག་པར་བཅོས་ཏེ་གཏན་ལ་ཕབ་པ།། ༄༅༅། །རྒྱུད་ཕྱི་མ། །དེ་ནས་བྱམས་པ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བ་དང་སྐུ་དང་གསུང་
དང་ཐུགས་ཀྱི་གསང་བ་བསྟན་པ་ལ་དངོས་པོ་ཐམས་ཅད་ཀྱིས་ཇི་ལྟ་བ་དང་། དུས་ཇི་ལྟ་བ་བཞིན་དུ་མཐོང་ཞིང་ཐོས་ལ་ཁོང་དུ་ཆུད་ནས་ཆོས་གཟིགས་པ་དང་ལྡན་པའི་དེ་བཞིན་གཤེགས་པ་དེ་དག་ཐམས་ཅད་ལ་འདི་སྐད་ཅེས་གསོལ་ཏོ། །ཨེ་མའོ་ཀུན་དུ་བཟང་པོ་ཡི། །སྐུ་གསུང་ཐུགས་ཀྱི་ངེས་པར་

དག །རྡོ་རྗེ་གསུམ་གྱིས་ཀུན་དུ་ནི། །རྡོ་རྗེ་གསུམ་ལ་ཀུན་དུ་བཞུགས། །སེམས་ཅན་ཐམས་ཅད་དུས་གསུམ་གྱི། །རྡོ་རྗེའི་ངོ་བོར་ཡང་དག་བྱུང་། །སངས་རྒྱས་རྡོ་རྗེ་རྫུ་འཕྲུལ་ཆེ། །བྱང་ཆུབ་རྡོ་རྗེའི་གནས་ཐོབ་པའོ། །ཨེ་མའོ་འདི་རབ་ངོ་མཚར་ཆེ། །ཨེ་མའོ་ཞི་བ་དབང་པོ་འདས། །ཨེ་
མའོ་འཁོར་བདག་གི་རྒྱུན། །ཨེ་མའོ་མཆོག་ཏུ་མྱ་ངན་འདས། །དེ་ནས་དེ་བཞིན་གཤེགས་པ་དེ་དག་ཐམས་ཅད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་ལ་འདི་སྐད་ཅེས་བཀའ་སྩལ་ཏོ། །བྱང་ཆུབ་སེམས་དཔའ་དེ་དེ་བཞིན་ནོ། །སེམས་དཔའ་ཆེན་པོ་དེ་དེ་བཞིན་ནོ། །
དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་ཡང་འདུས་པར་གྱུར་ནས། །དེ་བཞིན་གཤེགས་པ་དེ་དག་ཐམས་ཅད་ལ་གསང་བ་དང་། ཕྱིའི་མཆོད་པ་རྣམས་ཀྱིས་ཡང་དག་པར་མཆོད་ནས་ཕྱག་བྱས་ཏེ་མགྲིན་གཅིག་ཏུ་འདི་སྐད་ཅེས་གསོལ་ཏོ། །ཨེ་མའོ་ཤིན་ཏུ་
རྙེད་དགའ་བ། །བྱང་ཆུབ་སྒྲུབ་པའི་ཐབས་འདི་ཡིན། །རྒྱུད་ཀྱི་མཆོག་གི་མཆོག་གྱུར་པ། །གསང་བ་འདུས་པ་ཞེས་བྱའི་རྒྱུད། །སྦས་པ་དེ་ནི་རྟོགས་ཕྱིར་དང་། །སེམས་ཅན་རྣམས་ལ་ཕན་འདོད་པས། །ཡང་དག་གསུང་བས་གང་བཤད་པ། །མགོན་པོ་ཁྱེད་ལ་གསོལ་བར་
འཚལ། །དེ་ནས་དེ་བཞིན་གཤེགས་པ་དེ་དག་ཐམས་ཅད་ཀྱིས་བྱང་ཆུབ་སེམས་དཔའ་དེ་རྣམས་ལ་འདི་སྐད་ཅེས་བཀའ་སྩལ་ཏོ། །གང་ཞིག་སྦས་པའི་རྒྱུད་ཚིག་དེ། །དེ་དག་ཐམས་ཅད་འདྲི་འདོད་པ། །སེམས་དཔའ་ཆེན་པོ་ལེགས་སོ་ལེགས། །ཡོན་ཏན་འབྱུང་གནས་ལེགས་སོ་
ལེགས། །དེ་ནས་བྱང་ཆུབ་སེམས་དཔའ་ཀུན། །རབ་ཏུ་དགའ་བས་མིག་གདངས་ཏེ། །ཡང་དང་ཡང་དུ་ཕྱག་འཚལ་ནས། །འདི་ཡི་སོམ་ཉི་ཞུས་པར་གྱུར། །གསང་བ་ཞེས་འདི་གང་ལ་བགྱི། །འདུས་པ་ཞེས་ནི་གང་ལ་བརྗོད། །རྒྱུད་ཀྱི་འབྲེལ་པ་ཇི་ལྟ་བུ། །རྣལ་འབྱོར་
རྒྱུད་འདིར་ཅི་ལ་བགྱི། །དེ་ཉིད་རྣམ་པ་དུ་རུ་བཤད། །དེ་བཞིན་གསང་བ་རྣམ་པ་དུ། །གསང་ཆེན་ཞེས་ནི་གང་ལ་བགྱི། །དམ་པ་རྣམ་པ་དུ་ཞིག་མཆིས། །བྱང་ཆུབ་སེམས་ཞེས་གང་ལ་བགྱི། །དེ་བཞིན་རིག་པའི་སྐྱེས་བུ་ཅི། །བཛྲ་དྷྲྀཀ་ཅེས་ཅི་ལ་བགྱི། །དེ་བཞིན་ཛི་ན་

ཛི་ཀ་ནི་གང་། །དེ་ལ་རདྣ་དྷྲྀཀ་ནི་གང་། །དེ་བཞིན་ཨཱ་རོ་ལི་ཀ་ནི་ཅི། །པྲཛྙཱ་དྷྲི་ཀ་ཅེས་གང་ལ་བགྱི། །རིགས་འདིར་དེ་བཞིན་གང་ཞིག་ལགས། །མོ་ཧ་ཞེས་ནི་གང་ལ་བགྱི། །དྭེ་ཥ་ཞེས་བྱ་འདིར་གང་ལགས། །རཱ་ག་ཞེས་ནི་ཅི་ལ་བགྱི། །བཛྲ་སྔགས་ནི་གང་ལ་བགྱི། །ར་ཏི་
ཞེས་འདིར་གང་ལ་བགྱི། །ཕུན་སུམ་ཚོགས་པ་གང་ཞིག་ལགས། །ཡ་མཱནྟྭ་ཀྲྀ་ཏ་དོན་ནི་གང་། །དེ་བཞིན་པྲཛྙཱནྟ་ཀྲྀ་ཏ་ཅི། །པད་མཱནྟ་ཀྲྀ་ཏ་མིང་ཅི་ལྟ། །དེ་བཞིན་བིགྷྣཱཏྣ་ཀྲྀ་ཏ་ཅི། །ཀུན་དུ་སྤྱོད་པ་གང་ཅི་ལགས། །དེ་བཞིན་སྔགས་ཀྱི་སྤྱོད་པ་གང་། །འདིར་ནི་བཟླས་པ་གང་ཞིག་ལགས།
རྒྱས་བཏབ་པ་ཞེས་གང་ལ་བགྱི། །ཆོས་འབྱུང་བ་ནི་ཇི་ལྟར་བསྒོམ། །དེ་བཞིན་སྡོམ་པ་ཇི་ལྟ་བུ། །ཞེ་སྡང་གཏི་མུག་འདོད་ཆགས་ཆོས། །སེམས་ཅན་དོན་མཛད་ཇི་ལྟ་བུ། །དཀྱིལ་འཁོར་ཞེས་ནི་གང་ལ་བགྱི། །ཕྱག་རྒྱའི་དགོད་པ་ཇི་ལྟར་ལགས། །འདིར་ནི་མེ་ཏོག་ཅི་ཞིག་ལགས།
མཆོད་རྟེན་ཞེས་ནི་གང་ལ་བཤད། །ཡེ་ཤེས་འཁོར་ལོ་ཇི་ལྟར་ཞེས། །འདིར་ནི་གནས་ཤེས་གང་ལ་བཤད། །མགོན་པོ་བསྐུལ་བ་ཇི་ལྟ་བུ། །གཏོང་བ་དག་ཀྱང་ཇི་ལྟ་བུ། །ཇི་ལྟར་དེ་རྣམས་སྤྱན་དྲང་བགྱི། །བཅིང་བ་འདིར་ནི་ཇི་ལྟ་བུ། །དབང་བསྐུར་བ་ནི་ཇི་ལྟར་སྩལ། །དེ་བཞིན་
རིག་པའི་བརྟུལ་ཞུགས་གང་། །བདུད་རྩི་ལྔ་རྣམས་ཅི་ལྟར་བཟའ། །དེ་བཞིན་དཔའ་བོ་ལྔ་གང་ལགས། །དངོས་གྲུབ་ཐ་མལ་ཇི་ལྟ་བུ། །དེ་བཞིན་མཆོག་ཀྱང་ཇི་ལྟ་བུ། །དེ་ལ་ཐབས་ནི་རྣམ་པ་དུ། །དེ་བཞིན་ཐབས་བྱུང་ཇི་ལྟ་བུ། །རྣལ་འབྱོར་རྡོ་རྗེ་ཅན་ཀུན་གྱི། །བཀའ་ནི་ཇི་ལྟར་
བསྒོ་བར་བགྱི། །ལས་ཀྱི་མཆོག་གི་ཚོགས་རྣམས་ནི། །སྣ་ཚོགས་ཇི་ལྟར་བྱེད་པར་འགྱུར། །དེ་ནས་དེ་བཞིན་གཤེགས་པ་དེ་དག་ཐམས་ཅད་བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་ཀྱིས་ཞུས་པའི་ཚིག་ཉེ་བར་གསན་ནས། བྱང་ཆུབ་སེམས་དཔའ་ཆེན་པོ་རྡོ་རྗེ་འཛིན་པ་ལ་
དམིགས་པར་མཛད་ནས་སྐད་ཅིག་ཅང་མི་གསུང་བར་གྱུར་ཏོ། །དེ་ནས་བྱང་ཆུབ་སེམས་དཔའ་ཆེ། །སྙིང་རྗེའི་བདག་ཉིད་རབ་དགའ་ནས། །རྫོགས་པའི་སངས་རྒྱས་བདེ་བར་གཤེགས། །མགོན་ལ་ཡང་དང་ཡང་རབ་བསྐུལ། །དེ་ནས་དེ་བཞིན་གཤེགས་པ་དེ་དག་ཐམས་ཅད་ཀྱིས་བྱང་

ཆུབ་སེམས་དཔའ་དེ་རྣམས་ལ་འདི་སྐད་ཅེས་བཀའ་སྩལ་ཏོ། །སྐུ་གསུང་ཐུགས་ཀྱི་རྡོ་རྗེ་ཡིས། །སྐུ་གསུང་ཐུགས་ནི་རྡོ་རྗེ་ལ། །བཞག་ནས་བྱང་ཆུབ་སེམས་དབང་པོ། །ཞུས་པ་རྒྱ་ཆེན་མཉན་པར་གྱིས། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་དེ་བཞིན་གཤེགས་པ་
དེ་དག་ཐམས་ཅད་ཀྱིས་རྗེས་སུ་གསུངས་པའི་བཀའ་སྤྱི་བོས་རབ་ཏུ་མནོས་ཏེ། བཅོམ་ལྡན་འདས་ལེགས་སོ་ལེགས་སོ། །བདེ་བར་གཤེགས་པ་ལེགས་སོ་ལེགས་སོ་ཞེས་གསོལ་ནས། རང་རང་གི་ལུས་དང་ངག་དང་ཡིད་རྡོ་རྗེས་བྱང་ཆུབ་སེམས་དཔའ་ཆེན་པོ་རྡོ་རྗེ་འཛིན་པ་ཆེན་པོའི་སྐུ་དང་གསུང་
དང་ཐུགས་རྡོ་རྗེ་ལ་དམིགས་ཏེ་ཅང་མི་སྨྲ་བར་གྱུར་ཏོ། །དེ་ནས་དེ་བཞིན་གཤེགས་པ་དེ་དག་ཐམས་ཅད་རང་རང་གི་ཐུགས་རྡོ་རྗེ་ཆེན་པོ་ལ་དམིགས་པར་བྱིན་གྱིས་བརླབས་ནས་བྱང་ཆུབ་སེམས་དཔའ་ཆེན་པོ་དེ་དག་རྣམས་ལ་ཞུས་པ་དེ་དག་གསུང་གཅིག་གིས་བཀའ་སྩལ་པ། སྐུ་གསུང་ཐུགས་ནི་
རྣམ་པ་གསུམ། །གསང་བ་ཞེས་ནི་བསྟན་པ་ཡིན། །སངས་རྒྱས་ཐམས་ཅད་ཅེས་བྱ་བ། །ཚོགས་པ་འདུས་པ་ཡིན་པར་བཤད། །ལྔ་པ་དང་ནི་དགུ་པ་དང་། །བཅུ་བདུན་པ་དང་བཅུ་གསུམ་པ། །སངས་རྒྱས་བྱང་ཆུབ་སེམས་རྣམས་ཀྱིས། །བསྟན་པ་དག་ནི་སྒྲུབ་ཆེན་ཡིན། །བཞི་པ་དང་ནི་བཅུ་
དྲུག་པ། །བརྒྱད་པ་དེ་བཞིན་བཅུ་གཉིས་པ། །སློབ་དཔོན་སྤྱི་ཡི་ལས་དང་ནི། །དངོས་གྲུབ་བརྟུལ་ཞུགས་སྡོམ་པ་ཡིན། །དྲུག་པ་དང་ནི་གཉིས་པ་དང་། །བཅུ་པ་དང་ནི་བཅུ་བཞི་པ། །དྲག་སྤྱོད་རྗེས་སུ་ཆགས་པ་དང་། །ཉེ་བར་སྒྲུབ་པའི་སྡོམ་པའོ། །བདུན་པ་དང་ནི་གསུམ་པ་དང་། །བཅུ་གཅིག་པ་དང་
བཅོ་ལྔ་པ། །དངོས་གྲུབ་ཞིང་དང་མཚན་མ་ནི། །བསྙེན་པ་སྒྲུབ་པའི་སྡོམ་པའོ། །དེ་བཞིན་གཤེགས་པ་ཀུན་གྱི་ལས། །ཚར་གཅོད་ཕན་འདོགས་སྤྱོད་པ་དག །དུལ་དང་གདུལ་དཀའ་ཞི་བ་ཡི། །སེམས་ཅན་རྣམས་ཀྱི་འཇུག་པའོ། །བསྐྱེད་པའི་རིམ་དང་འབྲེལ་པ་ཡི། །བསྙེན་པ་རྡོ་རྗེའི་
ཆོ་ག་བཞི། །ཐུན་མོང་དངོས་གྲུབ་འབྲེལ་པ་ཡིན། །མཆོག་ཏུ་གྱུར་པའི་གཞུང་ཉིད་དོ། །དཀྱིལ་འཁོར་བརྟུལ་ཞུགས་འབྲེལ་པ་ཡི། །གཞུང་ནི་སློབ་དཔོན་ཕུན་ཚོགས་པའོ། །བླ་མས་སྔགས་ཀྱི་ལམ་གྱིས་ནི། །སློབ་མ་ཡོངས་སུ་སྨིན་བྱ་བ། །བརྟུལ་ཞུགས་བཟང་དང་དབང་བསྐུར་བ། །རང་གི་

སློབ་མ་བདག་ཉིད་ཆེ། །སངས་རྒྱས་བྱང་ཆུབ་སེམས་རྣམས་ཀྱིས། །སྟོན་པས་ཡོངས་སུ་གྲོལ་བ་ཡིན། །ཐབས་དང་ཤེས་རབ་སྙོམས་འཇུག་པ། །རྣལ་འབྱོར་ཞེས་ནི་བཤད་པ་ཡིན། །གང་ཞིག་དངོས་མེད་ཤེས་རབ་སྟེ། །ཐབས་ནི་དངོས་པོའི་མཚན་ཉིད་དོ། །རྒྱུད་ནི་རྒྱུན་ཞེས་
བྱ་བར་གྲགས། །རྒྱུན་དེ་རྣམ་པ་གསུམ་འགྱུར་ཏེ། །གཞི་དང་དེ་བཞིན་རང་བཞིན་དང་། །མི་འཕྲོག་པ་ཡིས་རབ་ཕྱེ་བ། །རྣམ་པ་རང་བཞིན་རྒྱུ་ཡིན་ཏེ། །དེ་བཞིན་མི་འཕྲོགས་འབྲས་བུའོ། །གཞི་ནི་ཐབས་ཤེས་བྱ་བ་སྟེ། །གསུམ་གྱིས་རྒྱུད་ཀྱི་དོན་བསྡུས་
བའོ། །རིགས་ནི་ལྔ་དང་གསུམ་དག་དང་། །ངོ་བོ་ཉིད་གཅིག་རིགས་བརྒྱའོ། །བྱང་ཆུབ་རྡོ་རྗེ་བཅས་གསུངས་པ། །དེ་ནི་ཕྱི་མའི་རྒྱུད་དུ་འདོད། །དེ་ཉིད་རྣམ་པ་ལྔ་རུ་བཤད། །གསང་བ་རྣམ་པ་གསུམ་དུ་བཤད། །ལྷག་མའི་ལྷ་ནི་གསང་ཆེན་ཏེ། །དམ་
པའི་རིགས་ནི་རྣམ་པ་བརྒྱ། །ཐོག་མ་ཐ་མ་མེད་ཞི་བ། །དངོས་དང་དངོས་མེད་ཟད་པའི་གཙོ། །སྟོང་ཉིད་སྙིང་རྗེ་མི་ཕྱེད་པ། །བྱང་ཆུབ་སེམས་ཞེས་བྱ་བ་ཡིན། །སྐུ་གསུང་ཐུགས་ཀྱི་རྡོ་རྗེ་ཡིས། །མི་ཕྱེད་དབྱེ་བའི་ངོ་བོ་ཉིད། །རིགས་དང་ལྷན་ཅིག་
ལྡན་པས་ན། །རིག་པའི་སྐྱེས་བུ་ཞེས་བརྗོད་དོ། །རྒྱུ་ལྔ་དང་ནི་འབྲས་བུ་ལྔ། །རྡོ་རྗེ་ཞེས་ནི་བཤད་པ་ཡིན། །འཆང་བ་འཛིན་པ་ཞེས་གྲགས་ཏེ། །རྣམ་ཤེས་རྡོ་རྗེ་འཛིན་དུ་འདོད། །བཛྲ་དྷྲྀཀ་ནི་རྣམ་ཤེས་ཡིན། །ཡོད་དང་མེད་དང་དབུས་ལས་འདས། །
འབྱུང་དང་འབྱུང་ལས་གྱུར་ལས་བྱུང་། །སེམས་ཅན་ཀུན་གྱི་ལུས་ཡིན་ཏེ། །སྐྱེ་ལས་རྒྱལ་བ་ཛི་ནི་ཛི་ཀ །དོན་རྣམས་ཐམས་ཅད་འབྱུང་བས་ན། །སེམས་ནི་རིན་པོ་ཆེ་ཞེས་བྱ། །ཚོར་བ་པོ་ཡིས་ངེས་ཚོར་བས། །ཚོར་བ་རཏྣ་དྷྲྀཀ་ཏུ་འདོད། །མཚན་གཞི་
མཚན་ཉིད་དངོས་པོ་ཡིས། །ཀུན་ལ་ཀུན་གྱིས་ཐམས་ཅད་དུ། །དགའ་བའི་མཚན་ཉིད་མཚན་གཞི་ནི། །ཨཱ་རོ་ལི་ཀ་ཅེས་བཤད་པ་ཡིན། །རྣམ་ཤེས་རབ་མཐར་ཕྱིན་བྱེད་པ། །གང་ཡིན་དེ་ནི་ཤེས་རབ་སྟེ། །འདུ་བྱེད་སེམས་པ་འཛིན་པས་ན། །པྲཛྙཱ་དྷྲྀཀ་ཅེས་བྱ་

བར་བཤད། །རིགས་ནི་རྒྱུད་ཅེས་བྱ་བར་བཤད། །རྒྱུད་ནི་ཐོག་མ་ཞེས་བརྗོད་དེ། །མི་འཇིགས་སྐྱེ་བ་མེད་གང་ཡིན། །མགོན་པོ་དེ་ནི་ཡིན་པར་བཤད། །རྒྱུ་འབྲས་གཉིས་ལ་སྡང་བས་ན། །རྣམ་ཤེས་ཞེ་སྡང་ཡིན་པར་བཤད། །བེམས་པོ་བཅིངས་པའི་རང་བཞིན་
པས། །གཟུགས་ནི་གཏི་མུག་ཅེས་བྱར་བཤད། །བདག་ཏུ་རློམ་པའི་ངོ་བོ་བས། །ཚོར་བ་དྲེགས་པ་ཡིན་པར་བཤད། །དངོས་ལ་ཆགས་པའི་མཚན་ཉིད་ཅན། །འདུ་ཤེས་ཡང་དག་ཆགས་བདག་ཉིད། །རྒྱན་གྱིས་དྲང་བའི་བདག་ཉིད་ཅན། །འདུ་བྱེད་
རྟག་ཏུ་ཕྲག་དོག་ཡིན། །བྱང་ཆུབ་སེམས་ཀྱི་ངོ་བོ་ཉིད། །སྲིད་པ་ཀུན་འབྱུང་ཐམས་ཅད་དུ། །འདོད་ཆགས་ཞེ་སྡང་རྨོངས་ལྡན་པའི། །སེམས་ནི་འདོད་པ་ཞེས་བྱར་བཤད། །དམ་ཚིག་སྣ་ཚོགས་འདྲ་བ་ཡིན། །མངོན་ཕྱོགས་ལས་ལས་སྐྱེས་འབྲས་བུ། །
གཉིས་མེད་ཡེ་ཤེས་ཆོས་རྣམས་ལ། །ང་རྒྱལ་བྱེད་པ་རྨོངས་ཞེས་བཤད། །དེ་ལ་ཕན་ཚུན་འཛེར་བ་ནི། །ཞེ་སྡང་ཞེས་ནི་བྱ་བར་བཤད། །མཚན་ཉིད་འདོད་ཆགས་ཞེན་པ་ཡིན། །ཡེ་ཤེས་ཐབས་ནི་རྡོ་རྗེར་བཤད། །དགའ་བ་རྫོགས་པའི་ལོངས་སྤྱོད་མཆོག །བུད་
མེད་བདེ་མཆོག་ཕུན་སུམ་ཚོགས། །གཏི་མུག་ཞེ་སྡང་འདོད་ཆགས་དང་། །རྡོ་རྗེ་ལ་དགའ་རྟག་པར་གནས། །དེས་ན་སངས་རྒྱས་རྣམས་ཀྱི་ཐབས། །རྡོ་རྗེ་ཐེག་པ་ཞེས་བཤད་དོ། །མི་འཇིག་བདག་ཉིད་ཆོས་རྣམས་ནི། །མ་སྐྱེས་པ་ཡི་ངོ་བོ་ཉིད། །དངོས་པོ་
ཀུན་གྱི་དམ་ཚིག་སྟེ། །དེ་ཉིད་གཤིན་རྗེ་མཐར་བྱེད་དོ། །རྣམ་ཤེས་མིན་བདག་ཆོས་རྣམས་ནི། །དོན་དམ་མི་འགྱུར་དག་གྱུར་ཏེ། །སེམས་ཀུན་གྱི་ནི་དམ་ཚིག་སྟེ། །ད་ནས་རྒྱལ་བ་ཤེས་མཐར་བྱེད། །བརྗོད་མེད་བདག་ཉིད་ཆོས་རྣམས་ནི། །མིང་དང་གཟུགས་བློ་
དངོས་པོ་མེད། །ཆོས་རྣམས་ཀུན་གྱི་དམ་ཚིག་སྟེ། །དེས་ན་ཁྱབ་བདག་པད་མཐར་བྱེད། །མི་རྟོག་བདག་ཉིད་ཆོས་རྣམས་ནི། །རང་བཞིན་གྱིས་ནི་ཞི་བའི་དངོས། །རྡོ་རྗེ་ཀུན་གྱི་དམ་ཚིག་སྟེ། །དེས་ན་གཙོ་བོ་བགེགས་མཐར་བྱེད། །མི་འཇིག་རྣམ་པར་མི་ཤེས་པ།

བརྗོད་དུ་མེད་དང་རྟོག་བྲལ་བ། །སངས་རྒྱས་བྱང་ཆུབ་ཡེ་ཤེས་འདི། །ཤེས་ན་བདེ་བ་ཐོབ་པར་འགྱུར། །གཏི་མུག་གཏི་མུག་ལོངས་སྤྱོད་པས། །གཏི་མུག་ཟད་ཕྱིར་གཤིན་རྗེ་གཤེད། །དེས་ན་ལུས་མཐར་བྱེད་པ་སྟེ། །དེས་ན་ཤེས་བྱ་མཐར་བྱེད་འགྱུར། །
ཉེས་པ་ཉེས་པ་ལོངས་སྤྱོད་པས། །ཉེས་པ་ཟད་ཕྱིར་ཤེས་མཐར་བྱེད། །དེས་ན་སེམས་ནི་མཐར་བྱེད་དེ། །དེས་ན་ཉོན་མོངས་མཐར་བྱེད་འགྱུར། །འདོད་ཆགས་འདོད་ཆགས་ལོངས་སྤྱོད་པས། །འདོད་ཆགས་ཟད་པས་པད་མཐར་བྱེད། །དེས་ན་ཆགས་པ་མཐར་བྱེད་
དེ། །དེ་བཞིན་སྙོམས་འཇུག་མཐར་བྱེད་འགྱུར། །ཉོན་མོངས་ཀུན་ཟད་གང་ཡིན་དང་། །དེ་བཞིན་ལས་ནི་ཐམས་ཅད་ཟད། །སྒྲིབ་པ་ཀུན་ཟད་ཡེ་ཤེས་ནི། །བགེགས་མཐར་བྱེད་ཅེས་བྱ་བར་བཤད། །ཉོན་མོངས་རྡོ་རྗེའི་སྒྲིབ་དག་ན། །ལས་རྣམས་ཐམས་ཅད་རྣམ་
པར་དག །ལས་རྣམས་ཐམས་ཅད་རྣམ་དག་པས། །ལས་སྐྱེས་འབྲས་བུ་རྣམ་དག་འགྱུར། །གཟུང་དང་ཆགས་པ་ཉིད་དང་ནི། །རྣམ་པ་དེ་བཞིན་མི་གཡོ་དང་། །རྒྱུ་ཉིད་འབྲས་བུ་ཉིད་དག་སྟེ། །དྲུག་ལས་ཐུགས་ནི་ཀུན་དུ་འབྱུང་། །འདོད་པའི་རྒྱལ་པོ་ལ་སོགས་དྲུག །
ཁྲོ་བོའི་དབང་པོར་རྣམ་པར་གྲགས། །དམ་ཚིག་རྡོ་རྗེ་ལ་སོགས་དྲུག །ས་ལ་སོགས་པ་རྣམ་པ་ལྔ། །འབྱུང་དང་འབྱུང་ལས་གྱུར་པར་གྲགས། །རིག་པའི་རྒྱལ་པོར་ཞེས་བཤད་དོ། །གཟུགས་ཀྱི་རྡོ་རྗེ་ལ་སོགས་དྲུག །རྡོ་རྗེའི་བདག་པོ་ཞེས་བཤད་དོ། །
སྐུ་གསུང་ཐུགས་ཀྱི་རྡོ་རྗེ་ལས། །བདག་ཉིད་ཆེན་པོ་ཀུན་དུ་འབྱུང་། །ཐབས་དང་ཤེས་རབ་ལས་བྱང་བའི། །ཕུང་པོ་ཁམས་དང་སྐྱེ་མཆེད་གཟུགས། །རྫོགས་པའི་རིམ་པའི་སྦྱོར་བ་ཡིས། །སྔགས་པས་སྦྱོར་བ་ངེས་བྱས་ལ། །ཐམས་ཅད་དག་པར་མོས་པ་
ཡིས། །འཇིགས་པ་ཐམས་ཅད་སྤངས་ནས་སུ། །དོགས་པ་མེད་པའི་སེམས་ཀྱིས་ནི། །སྔགས་པས་སེང་གེ་བཞིན་དུ་སྤྱོད། །འདི་ལ་མི་བྱ་ཅི་ཡང་མེད། །དེ་བཞིན་མི་བཟའང་ཡོད་མ་ཡིན། །སྨྲ་བར་མི་བྱ་ཅུང་ཟད་མེད། །རྟག་ཏུ་མི་

བསམ་ཅི་ཡང་མེད། །མཉམ་པར་མ་བཞག་སྦྱོར་བ་ཡིས། །རྟག་པ་ཉིད་དུ་མཉམ་པར་འཇོག །གང་གིས་སེམས་ཀུན་ལ་སྤྱོད་པ། །ཀུན་དུ་སྤྱོད་པ་ཞེས་བཤད་དོ། །དབང་པོ་དང་ནི་ཡུལ་རྣམས་ཀྱི། །རྐྱེན་གྱིས་གང་དང་གང་བྱུང་ཡིད། །ཡིད་དེ་མན་ཞེས་བྱ་བར་བཤད། །
ཏྲ་ནི་སྐྱོབ་པར་བྱེད་པའི་དོན། །འཇིག་རྟེན་སྤྱོད་ལས་རྣམ་གྲོལ་བར། །གང་བཤད་དམ་ཚིག་སྡོམ་པ་སྟེ། །རྡོ་རྗེ་ཀུན་གྱིས་བསྲུངས་པ་ནི། །སྔགས་ཀྱི་སྤྱོད་པ་ཞེས་བཤད་དོ། །རང་རང་གི་ནི་ངོ་བོ་ཉིད། །སྙིང་པོ་ཡིད་ཀྱིས་རྣམ་བསམས་ཏེ། །གསང་སྔགས་
ཟློས་པའི་དབྱེ་བ་ཡིས། །ཟློས་པར་བྱེད་ཅིང་སྤྲོ་ཞིང་བསྡུ། །སངས་རྒྱས་སྣ་ཚོགས་རྡོ་རྗེའི་བདག །ཡེ་ཤེས་ས་བོན་དག་གིས་བསྡུ། །བྱང་ཆུབ་བདག་མེད་ས་བོན་གྱིས། །བརྟུལ་ཞུགས་ཅན་གྱིས་བདག་མེད་གཟུང་། །སྣ་ཚོགས་བཞིན་དུ་སྣ་ཚོགས་སྤྲོ། །དུས་
གསུམ་ས་བོན་དག་གིས་བཟླ། །བཟླས་པ་སྨྲ་བར་གྲགས་བས་ན། །ངག་ཀུན་བཟླས་པ་ཞེས་བཤད་ལ། །སྔགས་ཀུན་འབོད་པ་ཞེས་བཤད་དེ། །དེ་ཉིད་བསྐུལ་བར་སྨྲ་བའོ། །ཇི་ལྟར་ཐུགས་སོགས་བྱིན་རློབ་པ། །ཏིང་ངེ་འཛིན་ཀྱང་དེ་བཞིན་ནོ། །དེ་རྣམས་
སྤྱི་བོར་དབང་བསྐུར་དང་། །དེ་བཞིན་ཀུན་དུ་མཆོད་པའོ། །རྡོ་རྗེ་འཆང་བ་གང་ཡིན་པའི། །རིག་པ་ཡོད་པའི་སྦྱོར་བ་དང་། །བདག་བྱིན་བརླབ་སོགས་དེ་བཞིན་ཏེ། །དེ་ཡི་ལོངས་སྤྱོད་བཞིར་ཤེས་བྱ། །དཔའ་བོ་རྡོ་རྗེ་གཅིག་པུ་ཡི། །སྤྱི་བོར་དབང་བསྐུར་རེ་རེ་
སྟེ། །སྙིང་པོ་ཕྱག་རྒྱ་སྔགས་ཙམ་དང་། ང་རིགས་རིམ་གྱིས་རྒྱས་གདབ་པའོ། །འབྲས་བུས་རྒྱུ་ནི་རྒྱས་གདབ་ཅིང་། །རྒྱུ་ཡིས་འབྲས་བུ་རྒྱས་གདབ་པར། །བསྒོམ་གྱི་གཞན་དུ་དངོས་གྲུབ་ནི། །བསྐལ་པ་བྱེ་བར་འབྱུང་མི་འགྱུར། །ལོངས་སྤྱོད་བཞི་དང་ཡང་
དག་ལྡན། །རིག་པའི་སྐྱེས་བུ་རྡོ་རྗེ་ཅན། །སྐུ་གསུང་ཐུགས་ཀྱི་དབྱེ་བ་ཡིས། །གྲུ་གསུམ་དུ་ནི་རྣམ་པར་བསྒོམ། །ཀུན་ནས་སེར་བའི་འཁོར་ལོ་ནི། །རྩིབས་བཅུ་དེ་དབུས་རྣམ་པར་བསྒོམ། །རྩིབས་ཀུན་ལ་ནི་ཁྲོ་བོ་བཅུ། །ཡེ་ཤེས་བདག་ཉིད་བཅུ་ལས་བྱུང་། །

འགོག་པའི་རྡོ་རྗེས་བསྒོམ་བྱ་ཞིང་། །མཆོག་ཏུ་མཛེས་པས་བསྒྲུབ་པར་བྱ། །རྡོ་རྗེ་འབར་བའི་སྤྲིན་སྤྲོས་པས། །མི་གཡོ་བ་དང་མཚུངས་པར་འཁོར། །དེ་ལྟར་ཆོས་འབྱུང་ཡེ་ཤེས་ནི། །རང་བཞིན་དྲི་མ་མེད་ཞི་བ། །བསྒོམས་པས་སྐད་ཅིག་
ཉིད་ཀྱིས་ནི། །སངས་རྒྱས་སྤྱན་ནི་རབ་ཏུ་འབྱུང་། །རྡོ་རྗེ་ཅན་གྱིས་ཆོས་བསྟན་པ། །རིམ་པ་གཉིས་ལ་ཡང་དག་བརྟེན། །བསྐྱེད་པ་ཡི་ནི་རིམ་ཉིད་དང་། །དེ་བཞིན་རྫོགས་པའི་རིམ་པའོ། །སྒྲུབ་པ་དང་ནི་ནན་ཏན་དང་། །དམ་ཚིག་དེ་བཞིན་སྡོམ་པ་རྣམས། །
སྔར་ནི་དེ་ཀུན་རྒྱས་པར་ནི། །རིམ་པའི་དབྱེ་བས་ཕྱེ་བ་ཡིན། །གཟུགས་དང་སྒྲ་སོགས་འདོད་པ་ནི། །བདེ་སྡུག་གཉི་གའི་བདག་ཉིད་ཅན། །འདོད་ཆགས་ཞེ་སྡང་གཏི་མུག་སོགས། །རྟག་ཏུ་སྙིང་ལ་སྐྱེ་བར་འགྱུར། །ཆགས་ལ་འདོད་ཆགས་རྡོ་རྗེ་ཅན། །
རྡོ་རྗེ་འདྲ་བར་རིན་ཆེན་འབྱུང་། །རིན་ཆེན་བཞིན་དུ་དམ་ཚིག་ཤེས། །འདོད་པ་དེ་རྣམས་དམ་ཚིག་མཚུངས། །རྣམ་བཅས་དང་ནི་རྣམ་པ་མེད། །ཀུན་འགྲོ་ཡི་གེ་གསུམ་བདག་ཉིད། །བྱ་བ་དང་ནི་དབྲོག་པ་དང་། །སྤྲོ་དང་རང་གི་བཟླས་པ་བྱའོ། །
དེ་ལྟར་ཞེ་སྡང་གཏི་མུག་དག །ས་གསུམ་དུ་ནི་བསྐྱེད་པར་བྱ། །གསང་བའི་བདག་པོས་རྒྱས་བཏབ་ཅིང་། །རྡོ་རྗེ་ཅན་གྱི་དོན་བྱེད་དོ། །ཞེ་སྡང་སྦྱོར་བའི་རྣལ་འབྱོར་པས། །ཞེ་སྡང་འཁོར་ལོ་བསྐྱེད་ནས་སུ། །རྡོ་རྗེ་དྲག་པོས་བཅོམ་ནས་ནི། །
ཡེ་ཤེས་རྡོ་རྗེ་ཅན་གྱིས་བསྡུ། །དེ་ནི་སྤྲོ་བས་རྟོགས་བྱས་ལ། །དེ་བཞིན་སྤར་ཡང་བསྡུ་བར་བྱའོ། །འདི་ལྟའི་སྦྱོར་བ་གོམས་བྱས་ན། །ཞེ་སྡང་རྡོ་རྗེར་བདག་ཉིད་འགྱུར། །ཁམས་གསུམ་པོ་ནི་མ་ལུས་པ། །བསད་དང་དེ་བཞིན་གསོ་བ་དང་། །སྐད་ཅིག་ཙམ་གྱིས་
བྱེད་པར་ནི། །མངོན་དུ་ནུས་པར་ཐེ་ཚོམ་མེད། །གཏི་མུག་སྦྱོར་བའི་རྣལ་འབྱོར་པས། །གཏི་མུག་འཁོར་ལོ་བསྐྱེད་ནས་ནི། །རྒྱན་ལ་སོགས་པ་གང་ཅིའང་རུང་། །དེ་དག་ཐམས་ཅད་རྟག་ཏུ་བརྐུ། །གཏི་མུག་སེམས་ཀྱི་རྒྱ་མཚོ་བསྒོམ། །རིན་ཆེན་

ཀུན་གྱིས་རབ་ཏུ་དགང་། །གཏི་མུག་འཁོར་ལོ་ཅན་ཀུན་གྱིས། །སྦྱིན་པའི་ཆར་ནི་རབ་ཏུ་འབེབས། །རྫས་རྣམས་ཐམས་ཅད་མ་ལུས་པར། །རབ་ཏུ་སྦྱིན་དང་དབྲོག་པ་ཉིད། །སེམས་ཀྱི་རྡོ་རྗེ་བརྟན་པོ་ཡིས། །སྐད་ཅིག་ཙམ་གྱིས་དབྱེ་བར་འགྱུར། །འདོད་ཆགས་
སྦྱོར་བའི་རྣལ་འབྱོར་པས། །འདོད་ཆགས་འཁོར་ལོ་བསྐྱེད་ནས་ནི། །ལྷ་མོ་ཐམས་ཅད་ཕྲོགས་ནས་སུ། །འདོད་པའི་སྦྱོར་བས་འདོད་པ་སྤྱོད། །དགའ་སྡུག་བདེ་བས་རངས་པ་ཡིས། །འདོད་པའི་རྩེད་མོས་རྣམ་པར་འཕྲུལ། །དེ་ནས་འཁོར་ལོ་ཅན་ཀུན་ལ། །
ལྷ་མོ་རབ་ཏུ་དབུལ་བར་བྱ། །ཁམས་གསུམ་དག་ཏུ་བྱུང་བ་ཡི། །ལྷ་དང་ལྷ་མིན་ཆུང་མ་ཡང་། །སྐད་ཅིག་ཙམ་གྱིས་འདོད་སྤྱོད་ན། །མི་ཡི་བུད་མེད་སྨོས་ཅི་དགོས། །དཀྱིལ་འཁོར་དང་ནི་དབང་བསྐུར་དང་། །ལས་མཆོག་གི་ནི་ཚོགས་རྣམས་དག །ཉམས་སུ་
ལེན་ཅིང་བྱིན་རློབ་པ། །གྲུབ་པའི་བགྲོད་པ་གཞན་ཡིན་ནོ། །བྷ་གའི་དཀྱིལ་འཁོར་ཞེས་གྲགས་དང་། །བྱང་ཆུབ་སེམས་ཀྱི་དཀྱིལ་འཁོར་དང་། །ལུས་ཀྱི་དཀྱིལ་འཁོར་ཞེས་བཤད་པ། །གསུམ་པོ་དཀྱིལ་འཁོར་ཡིན་པར་གསུངས། །ཕུང་པོ་སྐྱེ་མཆེད་ཁམས་
རྣམས་ནི། །སངས་རྒྱས་ཐམས་ཅད་རྒྱས་བཏབ་པའོ། །དེས་ནི་རྟག་པར་རྒྱ་དགོད་པ། །དཀྱིལ་འཁོར་ཞེས་ནི་བསྟན་པ་ཡིན། །ལྕགས་ཀྱུ་དབྱིག་ཏོ་རྩེ་གསུམ་དང་། །རལ་གྲི་མཚམས་སུ་རྣམ་པར་དགོད། །འདོད་རྒྱལ་དབྱིག་སྔོན་སྟོབས་མི་གཡོ། །སྟེང་དུ་
འཁོར་ལོ་འོག་གནོད་མཛེས། །རིག་རྒྱལ་རྡོ་རྗེ་ཅན་རྣམས་ཀྱི། །འཁོར་ལོས་སྒྱུར་བ་དྲུག་གི་རྒྱ། །ས་ལ་སོགས་པ་སེམས་དཔའ་ཡི། །ཕྱག་རྒྱ་རང་གི་དཀྱིལ་འཁོར་བ། །མེ་ལོང་པི་ཝང་དུང་དང་ནི། །དེ་བཞིན་སྣོད་དང་སྣ་ཚོགས་རས། །ཆོས་འབྱུང་བ་ཡི་
ཕྱག་རྒྱ་དྲུག །རྡོ་རྗེའི་བདག་པོ་རྡོ་རྗེ་ཅན། །སངས་རྒྱས་བྱང་ཆུབ་སེམས་དཔའ་དང་། །ཁྲོ་རྒྱལ་རྣམས་ཀྱིས་རྒྱས་གདབ་བོ། །དེ་ནས་གཞན་ཡང་དཔའ་བོ་གཅིག །རིགས་ནི་ཁ་དོག་དག་གིས་བརྟག །ལྷ་མོ་དགུ་དང་ནམ་མཁའི་ཁམས། །མེ་ཏོག་ཅེས་ནི་

བཤད་པ་ཡིན། །སྐུ་གསུང་ཐུགས་ཀྱི་དབྱེ་བ་ཡིས། །རིགས་ཀྱི་རིམ་གྱིས་དགོད་པར་བྱ། །མཆོད་རྟེན་སངས་རྒྱས་ཐམས་ཅད་ཀྱི། །བཞུགས་གནས་ཕོ་བྲང་ཡིན་པར་བཤད། །ཡེ་ཤེས་སེམས་དཔས་གང་རེག་པ། །ཡེ་ཤེས་འཁོར་ལོ་ཞེས་
བཤད་དོ། །མི་འགྱུར་རྡོ་རྗེ་གསུམ་ཡི་གེ། །ས་བོན་ཡི་གེ་གནས་ཞེས་བཤད། །སྐུ་གསུང་ཐུགས་ཀྱི་དེ་ཉིད་ནི། །སད་པར་བྱས་པས་བསྐུལ་བར་བཤད། །ཕྱོགས་བཅུའི་འཇིག་རྟེན་ཁམས་རྣམས་སུ། །འོད་ཟེར་འགྱེད་པ་གཏོང་བའོ། །རྡོ་རྗེ་ཅན་
ཀུན་སྤྱན་འདྲེན་པས། །རྡོ་རྗེ་ཅན་ཀུན་སྤྱན་དྲང་བའོ། །རྡོ་རྗེ་ཅན་གྱི་གནས་དེ་ཡི། །འོད་ཟེར་གྱིས་ནི་རྡོ་རྗེ་ཀུན། །བསྡུས་ནས་གོང་བུའི་ཚུལ་གྱིས་སུ། །བཅིངས་པ་བཅིང་བ་ཡིན་པར་བཤད། །སྐུ་གསུང་ཐུགས་ཀྱི་རྡོ་རྗེ་ཡིས། །སྐུ་གསུང་ཐུགས་ཀྱི་དཀྱིལ་
འཁོར་དུ། །སྐུ་གསུང་ཐུགས་ནི་རྒྱས་བཏབ་སྟེ། །རི་མོའི་དཀྱིལ་འཁོར་བརྟག་པར་བྱ། །དབང་བསྐུར་དབྱེ་བ་རྣམ་གསུམ་དུ། །རྒྱུད་འདི་ལ་ནི་རབ་ཏུ་བརྟག །བུམ་པའི་དབང་བསྐུར་དང་པོ་སྟེ། །གཉིས་པ་གསང་བའི་དབང་བསྐུར་བ། །ཤེས་རབ་ཡེ་ཤེས་གསུམ་པ་སྟེ།
བཞི་པ་དེ་ཡང་དེ་བཞིན་ནོ། །མིག་ཡངས་སྔགས་ཀྱི་སྣོད་དུ་རུང་། །མེ་ཏོག་བཅས་ཤིང་ས་བོན་བྱུང་། །བླངས་ནས་གསང་བའི་དབང་བསྐུར་བ། །སྔགས་པས་སློབ་མ་དག་ལ་སྦྱིན། །ནམ་མཁའི་དབྱིངས་ཀྱི་དབུས་གནས་པར། །དྲི་ཆུ་རྐང་དང་ཡང་དག་ལྡན། །རྡོ་རྗེ་པདྨའི་
སྦྱོར་བ་ཡིས། །རྡོ་རྗེ་ཅན་ཀུན་ཡང་དག་བསྡུ། །སྐུ་གསུང་ཐུགས་ཀྱི་རྡོ་རྗེ་ཡིས། །དེ་དག་ཐམས་ཅད་སྙིང་གང་བསྡུ། །རྡོ་རྗེའི་ལམ་ནས་བྱུང་ནས་སུ། །སློབ་མའི་ཁར་ནི་དབབ་པར་བྱ། །འདི་ནི་གསང་སྔགས་དེ་ཀུན་གྱི། །དབང་བསྐུར་བ་ཡི་གོ་འཕང་མཆོག །ལས་
མཆོག་གི་ནི་ཚོགས་རྣམས་དང་། །གསང་སྔགས་ཐམས་ཅད་འགྲུབ་པར་འགྱུར། །མཆོག་ཏུ་དད་ཅིང་ཤེས་རབ་ཆེ། །གཟུགས་བཟང་སྒྲུབ་པ་པོ་ལ་དགའ། །སྦྱོར་བ་གཅིག་གིས་བྱ་བ་གོམས། །དམ་ཚིག་དག་གི་དམ་ཚིག་ཅན། །བླ་མ་ལ་ནི་སློབ་མ་ཡིས། །ཡོན་རྣམས་

རབ་ཏུ་ཕུལ་ནས་ནི། །བླ་མས་དེ་ནི་བྱིན་བརླབས་ཏེ། །སྒྲུབ་པ་པོ་ལ་སྦྱིན་པར་བྱ། །རྨོངས་པས་གཏི་མུག་བདག་ཉིད་སྦྱོར། །གཏི་མུག་དགའ་དང་ཡང་དག་ལྡན། །གཏི་མུག་རྒྱུན་གྱིས་དབང་བསྐུར་ན། །གཏི་མུག་རྡོ་རྗེར་བདག་ཉིད་འགྱུར། །ཞེ་སྡང་སྡང་བའི་བདག་ཉིད་
སྦྱོར། །ཞེ་སྡང་དགའ་དང་ཡང་དག་ལྡན། །ཞེ་སྡང་རྒྱུན་གྱིས་དབང་བསྐུར་ན། །ཞེ་སྡང་རྡོ་རྗེར་བདག་ཉིད་འགྱུར། །ཆགས་པས་འདོད་ཆགས་བདག་ཉིད་སྦྱོར། །འདོད་ཆགས་དགའ་དང་ཡང་དག་ལྡན། །འདོད་ཆགས་རྒྱུན་གྱིས་དབང་བསྐུར་ན། །འདོད་ཆགས་རྡོ་རྗེར་
བདག་ཉིད་འགྱུར། །ཤེས་རབ་ཡེ་ཤེས་བདག་ཉིད་སྦྱོར། །རྡོ་རྗེ་དགའ་བ་ཡང་དག་ལྡན། །ཡེ་ཤེས་རྒྱུན་གྱིས་དབང་བསྐུར་ན། །ཤེས་རབ་ཡེ་ཤེས་བདག་ཉིད་འགྱུར། །རིག་པའི་ལྷ་མོ་དེ་ཉིད་ནི། །རྡོ་རྗེ་ཅན་གྱི་སློབ་མས་བླང་། །ལག་པར་ལག་པ་བཞག་ནས་ནི། །
དེ་བཞིན་གཤེགས་རྣམས་དབང་བྱས་ལ། །སློབ་མའི་མགོ་བོར་ལག་བཞག་སྟེ། །བླ་མ་རྡོ་རྗེ་ཅན་གྱིས་བསྒོ། །ཐབས་གཞན་གྱིས་ནི་འཚང་མི་རྒྱ། །དེ་བས་རིག་པ་འདི་མཆོག་ཡིན། །ཆོས་ཀུན་གཉིས་སུ་མེད་པ་ལ། །དངོས་པོ་གཉིས་སུ་བཏགས་པ་ཡིན། །དེ་བས་
འཁོར་བ་རྣམ་བྲལ་བར། །རྟག་ཏུ་ཁྱོད་ཀྱིས་མི་བྱའོ། །འདི་ནི་སངས་རྒྱས་ཐམས་ཅད་ཀྱི། །རིག་པའི་བརྟུལ་ཞུགས་བླ་མེད་པའོ། །རྨོངས་པ་གང་ཞིག་འདས་གྱུར་ན། །དེ་ཡི་དངོས་གྲུབ་མཆོག་མི་འགྱུར། །ཐ་མལ་ལུས་ཀྱི་ཆོས་ལ་ནི། །དྲི་མ་ལྔ་རྣམས་སྣང་བ་
ནི། །ཡེ་ཤེས་ལྔ་ཡིས་བྱིན་བརླབས་པས། །བདུད་རྩི་ལྔ་ཞེས་བྱ་བར་བཤད། །སྦར་དང་དེ་བཞིན་སྲེག་པ་དང་། །སྣང་བར་བྱེད་དང་གཟུགས་སྣང་བ། །སྔགས་ཀྱི་ལུས་སུ་རབ་སྦྱོར་བས། །བདུད་རྩི་ལྔ་ནི་བཟའ་བར་བྱ། །རྡོ་རྗེ་ཧཱུྃ་ལས་བྱུང་བ་ནི། །བར་སྣང་ལ་
གནས་བསམ་པར་བྱ། །ཨཱཿལས་བྱུང་བའི་པདྨ་ནི། །དེ་ཡི་འོག་ཏུ་བསྒོམ་པར་བྱ། །ཨོཾ་གྱིས་མཚན་པའི་བདུད་རྩི་ནི། །དེ་ཡི་དབུས་སུ་གཞག་པར་བྱ། །རྡོ་རྗེའི་པདྨ་མཉམ་སྦྱོར་བ། །འབར་བས་རྣལ་འབྱོར་ཚིམ་པར་བྱ། །ཤེལ་དང་མཚུངས་པར་སྣང་གྱུར་

ཅིང་། །ཡེ་ཤེས་ཉི་མ་གཉིས་པར་གྱུར། །ཕྱོགས་བཅུའི་འཇིག་རྟེན་ཁམས་རྣམས་ཀྱི། །མཚོན་ཆ་མཆོག་གིས་དྲངས་ནས་ནི། །བདུད་རྩི་དེ་རུ་ཕབ་ནས་ཀྱང་། །བཟའ་བའི་སྦྱོར་བས་བཟའ་བར་བྱ། །བསྒྲུབ་བྱའི་དངོས་གྲུབ་ཆོ་ག་ཡིས། །དེ་བཞིན་དཔའ་
བོ་ལྔ་རྣམས་བཟའ། །ཡིག་གསུམ་ས་བོན་ལས་བསྐྱེད་བྱ། །གཞན་དུ་དེ་ནི་འགྲུབ་མི་འགྱུར། །མི་སྣང་ལ་སོགས་དངོས་གྲུབ་ནི། །ཐ་མལ་པ་ཞེས་བཤད་པ་ཡིན། །སངས་རྒྱས་ཉིད་བསྒྲུབ་སངས་རྒྱས་ཀྱིས། །དངོས་གྲུབ་མཆོག་ཅེས་གསུངས་པ་ཡིན། །ཐབས་
ནི་རྣམ་པ་བཞི་པོ་དག །བྱང་ཆུབ་རྡོ་རྗེ་ཅན་གྱིས་གསུངས། །རྣལ་འབྱོར་རྒྱུད་ནི་ཐམས་ཅད་དུ། །རྣལ་འབྱོར་པ་ཡིས་རྟག་པར་བསྔགས། །བསྙེན་པའི་ཆོ་ག་དང་པོ་སྟེ། །ཉེ་བར་སྒྲུབ་པ་གཉིས་པ་ཡིན། །སྒྲུབ་པ་ཡང་ནི་གསུམ་པ་སྟེ། །སྒྲུབ་པ་ཆེན་པོ་བཞི་པའོ། །
ཐུན་མོང་མཆོག་གི་བྱེ་བྲག་གིས། །བསྙེན་པ་རྣམ་པ་གཉིས་སུ་འགྱུར། །རྡོ་རྗེ་བཞི་པོ་ཐུན་མོང་སྟེ། །ཡེ་ཤེས་བདུད་རྩི་མཆོག་ཡིན་ནོ། །དང་པོ་སྟོང་ཉིད་བྱང་ཆུབ་སྟེ། །གཉིས་པ་ས་བོན་བསྡུ་བ་ཡིན། །གསུམ་པ་གཟུགས་ནི་རྫོགས་པ་སྟེ། །བཞི་པ་ཡི་གེ་དགོད་
པའོ། །རྡོ་རྗེ་རྣམ་བཞི་འདི་དག་གིས། །ཐ་མལ་སྒྲུབ་ལ་བསྙེན་པ་བྱ། །མཆོག་གི་ཡེ་ཤེས་བདུད་རྩི་ཉིད། །སྦྱོར་བ་དྲུག་གི་བྱ་བ་ཡི། །བསྙེན་པ་ཡན་ལག་དྲུག་གིས་ནི། །བྱས་པས་སྒྲུབ་པ་མཆོག་ཏུ་འགྱུར། །གཞན་དུ་བསྒྲུབས་པར་གྱུར་ན་ནི། །དངོས་གྲུབ་མཆོག་
ནི་འབྱུང་མི་འགྱུར། །སོ་སོར་སྡུད་དང་བསམ་གཏན་དང་། །སྲོག་རྩོལ་དེ་བཞིན་འཛིན་པ་དང་། །རྗེས་སུ་དྲན་དང་ཏིང་འཛིན་ཏེ། །སྦྱོར་བའི་ཡན་ལག་དྲུག་ཏུ་བཤད། །དབང་པོ་བཅུ་པོ་རྣམས་ཀྱི་ཡང་། །རང་གི་འཇུག་གནས་ཐམས་ཅད་དུ། །འདོད་པ་སོ་སོར་སྡུད་པས་ན། །སོ་
སོར་སྡུད་པ་ཞེས་བཤད་དོ། །འདོད་པ་ལྔ་ནི་མདོར་བསྡུས་ནས། །སངས་རྒྱས་ལྔ་རུ་སྦྱོར་བ་ཡིས། །བརྟག་པ་བསམ་གཏན་ཞེས་བཤད་དེ། །བསམ་གཏན་དེ་ནི་རྣམ་ལྔར་འགྱུར། །རྟོག་དང་དཔྱོད་དང་དགའ་བ་དང་། །དེ་བཞིན་བདེ་བ་ཉིད་དང་ཡང་། །སེམས་ཀྱི་རྩེ་

གཅིག་ཉིད་དག་སྟེ། །ལྔ་པོ་དེར་ནི་བསམ་གཏན་བསྡུ། །གསང་བའི་རྒྱུད་ནི་ཐམས་ཅད་དུ། །རྣམ་པ་དུ་མར་ཡོངས་བཤད་པ། །གསང་བ་གསུམ་འབྱུང་རྟོག་པ་སྟེ། །དེ་ཡི་ལོངས་སྤྱོད་བྱེད་པའོ། །དགའ་དང་འདྲ་བ་གསུམ་པ་སྟེ། །བདེ་བ་བསྡུས་པ་བཞི་པའོ། །ཤེས་
དང་ཤེས་བྱ་བྱུང་ཟད་པའི། །རང་སེམས་ལྔ་པར་ཤེས་པར་བྱ། །སངས་རྒྱས་ཀུན་དངོས་ཞི་བ་ནི། །འདོད་པ་ཀུན་ལ་རབ་ཏུ་གནས། །ཡེ་ཤེས་ལྔ་ཡི་རང་བཞིན་དབུགས། །འབྱུང་བ་ལྔ་ཡི་ངོ་བོ་ཉིད། །གོང་བུའི་གཟུགས་ཀྱི་ཕྱུང་ནས་ནི། །སྣ་ཡི་རྩེ་མོར་རབ་ཏུ་བརྟག །རིན་ཆེན་
ཁ་དོག་སྣ་ལྔ་པ། །སྲོག་དང་རྩོལ་བ་ཞེས་བྱར་བཤད། །རང་སྔགས་སྙིང་གར་བསམས་ནས་ནི། །སྲོག་ནི་ཐིག་ལེར་གྱུར་པར་བཞག །རང་དབང་རིན་ཆེན་དག་པ་ཡིན། །གཟུང་བ་འཛིན་པ་ཡིན་པར་བཤད། །སེམས་ནི་འགོག་པའི་རྡོ་རྗེར་གྱུར། །མཚན་མར་ཉེར་འཛིན་འབྱུང་
བར་འགྱུར། །མཚན་མའི་ཁམས་ནི་རྣམ་པ་ལྔར། །བྱང་ཆུབ་རྡོ་རྗེས་གསུངས་པ་ཡིན། །སྨིག་རྒྱུ་འདྲ་བ་དང་པོ་སྟེ། །དུ་བ་ལྟ་བུ་གཉིས་པ་ཡིན། །མཁའ་སྣང་འདྲ་བ་གསུམ་པ་སྟེ། །མར་མེ་ལྟར་འབར་བཞི་པའོ། །སྤྲིན་མེད་ནམ་མཁའ་ལྟ་བུར་ནི། །རྟག་ཏུ་སྣང་
བ་ལྔ་པའོ། །བརྟན་གྱུར་རྡོ་རྗེའི་ལམ་ནས་ནི། །ནམ་མཁའི་ཁམས་སུ་སྤྲོ་བར་བྱ། །རྗེས་དྲན་གང་ཞིག་རྣམ་བསྒོམ་པ། །དེ་དང་འདྲ་བར་སྤྲོ་བར་བྱ། །རྗེས་སུ་དྲན་པ་ཞེས་བཤད་དེ། །སོ་སོར་སྣང་བ་དེ་ལ་སྐྱེ། །ཐབས་དང་ཤེས་རབ་སྙོམས་འཇུག་པས། །དངོས་པོ་
ཐམས་ཅད་མདོར་བསྡུས་པ། །གོང་བུའི་ཚུལ་གྱིས་བསྡུས་ནས་ནི། །དབུས་སུ་གཟུགས་ནི་རྣམ་པར་བསྒོམ། །ཡུད་ཀྱིས་ཡེ་ཤེས་རྫོགས་བྱེད་པ། །ཏིང་ངེ་འཛིན་ཅེས་བྱ་བར་གནས། །སོ་སོར་སྡུད་ལ་སྙོམས་འཇུག་ན། །སྔགས་རྣམས་ཐམས་ཅད་བྱིན་གྱིས་རློབ། །བསམ་
གཏན་ཡེ་ཤེས་སྙོམས་འཇུག་ན། །མངོན་ཤེས་ལྔ་པོ་འཐོབ་པར་འགྱུར། །སྲོག་དང་རྩོལ་བས་ངེས་པར་ནི། །བྱང་ཆུབ་སེམས་དཔའ་རྣམས་ཀྱིས་གཟིགས། །རྟག་ཏུ་འཛིན་པའི་སྟོབས་ཀྱིས་ནི། །རྡོ་རྗེ་སེམས་དཔའ་ཡང་དག་འབྱུང་། །རྗེས་དྲན་མཉམ་པར་སྦྱོར་བ་ཡིས། །

འོད་ཀྱི་དཀྱིལ་འཁོར་འབྱུང་བར་འགྱུར། །ཏིང་འཛིན་དབང་གྱུར་ཙམ་གྱིས་ནི། །སྒྲིབ་པ་རྣམས་དང་བྲལ་བར་འགྱུར། །སྙིང་པོ་དེ་ནི་ཐུགས་ཀ་རུ། །ཟླ་བ་རྡོ་རྗེའི་སྦྱོར་བས་བལྟ། །མཚོན་ཆ་མཆོག་གིས་དྲངས་ནས་ནི། །སེམས་ནི་སྔགས་ཀྱི་དངོས་བྱས་ཏེ། །སྔགས་ཀྱི་གཟུགས་
ཀྱི་ཚུལ་གྱིས་ནི། །བྱང་ཆུབ་ཚིགས་བཅད་བརྗོད་པར་བྱ། །ཆོ་ག་ཡང་དག་སྦྱོར་བསྒོམ་པས། །རང་གི་དཀྱིལ་འཁོར་ལ་གནས་ཏེ། །སེམས་དེ་ཡེ་ཤེས་གཟུགས་ཀྱིས་ནི། །བསྒོམ་པ་ཉེ་བར་བསྒྲུབ་པའོ། །ཇི་སྲིད་མཐོང་བ་དེ་སྲིད་དུ། །རྣམ་གཉིས་ཟླ་བ་དྲུག་ཏུ་བསྒོམ། །འདོད་
པ་ཀུན་ལ་ལོངས་སྤྱོད་པས། །ཐམས་ཅད་དུ་ནི་རྟག་ཏུ་བྱ། །གལ་ཏེ་ཟླ་བ་དྲུག་གིས་ནི། །ཇི་སྐད་གསུངས་པ་མ་མཐོང་ན། །ཇི་སྐད་བཤད་པའི་ཆོ་ག་དང་། །སྡོམ་པ་ལན་གསུམ་བརྩམ་པར་བྱ། །དེ་ལྟར་བྱས་ཀྱང་སྒྲུབ་པ་པོས། །མཐོང་བ་འབྱུང་བར་མ་གྱུར་ཅིང་། །གང་ཚེ་བྱ་བ་མ་
གྲུབ་ན། །དྲག་ཤུལ་སྦྱོར་བས་བསྒྲུབ་པར་བྱ། །དེ་ཚེ་དེ་ཡི་ཡེ་ཤེས་ནི། །འགྲུབ་པ་ངེས་པར་ཉེ་བར་འབྱུང་། །རིགས་ཀྱི་དབྱེ་བའི་སྦྱོར་བས་ནི། །རྡོ་རྗེ་ཕུར་བུས་ཕུར་བུ་གདབ། །དེ་ནས་དབང་དུ་བྱ་བ་དང་། །སྲུང་བའི་སྦྱོར་བ་དག་ཀྱང་བྱ། །འདོད་ཆགས་ཆེན་པོའི་ཚུལ་ཉིད་ཀྱིས། །ཡེ་
ཤེས་འཁོར་ལོ་ཅན་རྣམས་བསྡུ། །ལྷ་མོ་དགུ་ནི་སྤྲོས་ནས་སུ། །བསྒྲུབ་པར་བྱ་བའི་ལུས་ལ་དགོད། །ཡོངས་སུ་གྱུར་ལས་ཕྱག་རྒྱ་བཞི། །དཀྱིལ་འཁོར་དེར་ནི་བརྟག་པར་བྱ། །བདག་ཉིད་དབུས་སུ་གནས་བྱས་ལ། །འཁོར་ལོ་ཅན་ཀུན་བསྡུ་བར་བྱ། །ཐམས་ཅད་རྡོ་རྗེའི་དངོས་
བྱས་ལ། །དེ་འོག་བྱང་ཆུབ་བསྒོམ་པར་བྱ། །བསྐུལ་བའི་གླུ་དབྱངས་བཞི་ཡིས་ནི། །ལྷ་མོས་སྙིང་པོ་བསྐུལ་བ་ཡིས། །དུས་གསུམ་རྡོ་རྗེའི་རང་བཞིན་སེམས། །ཡེ་ཤེས་ལྟ་བུར་ལུས་སྒོམ་མོ། །དྲེགས་པས་ཁ་དོག་རྣམ་པར་དབྱེ། །དེ་བཞིན་ཉམས་ཀྱི་སྙིང་པོ་སྟེ། །དབང་བསྐུར་བས་ནི་རང་གི་རྒྱུ། །
གཞི་ཡིས་འབྲས་བུ་ཕྱེ་བ་ཡིན། །སྔགས་ཀྱིས་ཆོས་ནི་བྱེད་འགྱུར་ལ། །རིག་པའང་ཆོས་ཀྱི་ཕྱག་རྒྱས་སོ། །འཁོར་ལོས་སྒྱུར་བའི་རྒྱལ་པོ་དྲུག །གཙུག་ཏོར་ཞེས་ནི་རྣམ་པར་གྲགས། །རྫུ་འཕྲུལ་ཆེན་པོས་ལོངས་སྤྱོད་བཞི། །རིག་པའི་རྒྱལ་མོ་ཞེས་བྱར་གྲགས། །དེ་བཞིན་རྡོ་རྗེའི་བདག་པོ་

རྣམས། །འདོད་པ་ཐམས་ཅད་ཅེས་བྱར་བཤད། །བསམ་གཏན་རྡོ་རྗེ་ཐམས་ཅད་ལ། །དབང་བསྐུར་བ་ནི་རབ་ཏུ་བསྔགས། །ཆོ་གའི་སྦྱོར་བ་འདི་ཡིས་ནི། །ཡེ་ཤེས་ལུས་དང་ལྷན་ཅིག་ཏུ། །སྐུ་གསུང་ཐུགས་ཀྱི་རྡོ་རྗེ་ཡིས། །གཉིས་སུ་མེད་པར་བྱེད་སྒྲུབ་པ། །སྔར་བཤད་པ་ཡི་རིམ་གྱིས་ནི། །རིག་པའི་
སྐྱེས་བུ་རྡོ་རྗེ་ཅན། །བདག་དང་འདྲ་བར་དཀྱིལ་འཁོར་བསྐྱེད། །སྒྲུབ་པ་ཆེན་པོ་ཞེས་བཤད་དོ། །བསྙེན་པའི་དུས་སུ་གཙུག་ཏོར་ཆེ། །སྦྱོར་བ་ཉིད་ཀྱིས་གཟུགས་སུ་དམིགས། །ཉེ་བར་སྒྲུབ་པའི་དུས་སུ་ནི། །བདུད་རྩི་འཁྱིལ་པའི་གཟུགས་ཀྱི་བར། །སྔགས་པ་ཆོ་ག་ཤེས་པ་ཡིས། །སྒྲུབ་པ་རང་ལྷའི་
སྦྱོར་བས་བྱ། །སྒྲུབ་པ་ཆེན་པོའི་དུས་སུ་ནི། །གཙོ་བོ་སངས་རྒྱས་བདག་པོའི་སྐུ། །འདི་ནི་རྡོ་རྗེ་ཅན་ཀུན་དང་། །རྣལ་འབྱོར་མཆོག་གི་གསང་བ་ཆེ། །དེ་ལྟའི་རྣམ་ཕྱེས་ཤེས་བྱས་ནས། །དངོས་གྲུབ་མཆོག་ནི་བསྒྲུབ་པར་བྱ། །གཞན་དུ་བསྐལ་པ་བྱེ་བས་ནི། །སངས་རྒྱས་སྐྱོབ་པ་རྣམས་ཀྱིས་
ཀྱང་། །དངོས་གྲུབ་མཆོག་ནི་ཞི་བ་དག །ངེས་པར་འབྱུང་བར་མི་འགྱུར་རོ། །བསྒྲུབ་བྱ་བསྒྲུབ་པར་ཡང་དག་སྦྱོར། །གང་ཡིན་དེ་ནི་བསྙེན་པར་བཤད། །རྡོ་རྗེ་པདྨ་མཉམ་སྦྱོར་བ། །ཉེ་བར་སྒྲུབ་པ་ཞེས་བཤད་དོ། །ཡི་གེ་ཧཱུྃ་དང་ཕཊ་ལྡན་པ། །བསྐྱེད་པ་སྒྲུབ་པ་ཞེས་བཤད་པ། །ངོ་བོ་ཉིད་ནི་ཞི་བདེ་བ། །
སྒྲུབ་པ་ཆེན་པོ་ཞེས་བཤད་དོ། །དཔལ་ལྡན་སངས་རྒྱས་ཀུན་གྱི་བདག །རྡོ་རྗེ་འཆང་བ་ཆེན་པོའི་གནས། །སངས་རྒྱས་ཀུན་གྱི་ཐབས་ལས་བྱུང་། །དེ་ཉིད་ཆོས་རྣམས་ཆོས་ཉིད་དོ། །ལས་དང་རྗེས་མཐུན་གང་གང་གིས། །རྣལ་འབྱོར་པ་ཡིས་སྦྱོར་བ་དམིགས། །དཀྱིལ་འཁོར་དེ་དང་དེ་
བསྐྱེད་ནས། །དམ་ཚིག་མི་ཟད་བསྒོམ་པར་བྱ། །སྐུ་གསུང་ཐུགས་ཀྱི་རྡོ་རྗེ་ཡི། །དམ་ཚིག་དང་པོ་བསྲུང་བར་བྱ། །དེ་ནས་གཙུག་ཏོར་དམ་ཚིག་ནི། །ཆོ་ག་ཇི་སྐད་གསུངས་ལས་བྱུང་། །ལས་དང་གང་གང་རྗེས་མཐུན་པས། །རང་གི་འཁོར་ལ་བཀའ་ཡང་བསྒོ། །བསྒྲུབ་བྱའི་ལུས་གང་
ཡིན་པ་ལའང་། །དཀྱིལ་འཁོར་རྣམ་པར་བསྒོམས་ནས་སུ། །དེ་ཡི་ལུས་གནས་འཁོར་ལོ་ལ། །དེ་ཡི་ཉེས་པ་བསྒྲག་པར་བྱ། །དེ་ནས་དེ་རྣམས་དེས་བཅོམ་ནས། །བྱུང་བར་གྱུར་པ་རྣམ་པར་བསྒོམ། །དངོས་པོ་ཀུན་གྱིས་རྣམ་བསྒོམས་ནས། །དངོས་པོ་ཀུན་གྱིས་དྲངས་ནས་ནི། །

དེ་ནི་རང་གི་འཁོར་ལོར་གཞུག །ཇི་སྐད་གསུངས་པའི་རྫས་རྣམས་ཀྱིས། །དེ་ཡི་གཟུགས་བརྙན་བྱས་ནས་ནི། །ཁྲོ་བས་ཁྱབ་པའི་སེམས་ཀྱིས་ནི། །རྐང་པས་མཚན་མ་མནན་པར་བྱ། །དེ་ནས་བཀའ་མནོས་ཁྲོ་བོ་ནི། །སྣ་ཚོགས་ཚོགས་ཀྱིས་བསྐོར་བ་རྣམས། །སྒྲུབ་པ་རྡོ་རྗེ་
ཅན་གྱིས་ནི། །བསྒྲུབ་བྱ་གསང་ཕྱིར་གཏང་བར་བྱ། །ཁྲོ་བོའི་རྒྱལ་པོ་དེས་བསྐོར་ནས། །དེ་ནི་བཅིང་ཞིང་བརྡེག་པ་དང་། །དེ་ནས་གདུངས་ཤིང་སྐྲག་གྱུར་པ། །སྒྲུབ་པ་པོས་ནི་དགུག་པར་བྱ། །རྡོ་རྗེ་གསུམ་གྱི་སྔགས་ཀྱིས་ནི། །དེ་ཡི་གཟུགས་བརྙན་ལ་ཕབ་ནས། །སྔགས་པས་རྡོ་རྗེ་
དག་གིས་ནི། །སྤྱི་བོ་མགྲིན་པ་སྙིང་ག་རུ། །ཕུར་བུའི་སྔགས་ཀྱིས་ཕུར་བུ་གདབ། །ཡམས་དང་ཉེ་བར་འཚེ་བ་ཀུན། །སྣ་ཚོགས་ཡུལ་ལས་བྱུང་བ་རྣམས། །གཟུགས་དེ་ལ་ནི་ཕབ་ནས་སུ། །དེ་རྣམས་ཀྱིས་ནི་ཕུར་བུས་གདབ། །དེ་ནས་སྦྱོར་བ་ཐམས་ཅད་ཀྱིས། །ཆོ་ག་ཇི་སྐད་གསུངས་པ་
བཞིན། །འཁྲུལ་འཁོར་སྔགས་ཀྱི་སྦྱོར་ལ་སོགས། །ལས་ཀྱི་དབྱེ་བས་སྦྱར་བར་བྱ། །མཚན་མ་མནན་ནས་བཟླས་པའམ། །ཁྲོ་བོའི་དཀྱིལ་འཁོར་སྦྱིན་སྲེག་གམ། །བསྒོམ་པས་གདུག་པའི་སེམས་ཅན་ནི། །ཟོས་པར་གྱུར་པར་རབ་ཏུ་བརྟག །ཞི་ལ་ཞི་བའི་སེམས་ཀྱིས་བྱ། །རྒྱས་ལ་
དགའ་བའི་ཡིད་ཀྱིས་ཏེ། །དབང་ལ་ཆགས་པའི་ཡིད་དུ་བྱ། །ཁྲོ་ལ་གཏུམ་པས་རབ་ཏུ་བསྒྲུབ། །ཅེས་པའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དེ་དག་ཐམས་ཅད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་ཀྱི་ཐེ་ཚོམ་ཐམས་ཅད་བཅད་པར་མཛད་ནས། ཐེ་ཚོམ་ཐམས་
ཅད་གཅོད་པར་མཛད་པ་སྐུ་དང་གསུང་དང་ཐུགས་རྡོ་རྗེ་རང་གི་སྐུ་དང་གསུང་དང་ཐུགས་རྡོ་རྗེ་ལ་ཞུགས་ཏེ། རང་གི་སྐུ་དང་གསུང་དང་ཐུགས་ཀྱིས་དམིགས་ནས་ཅང་མི་གསུང་བར་བཞུགས་པར་གྱུར་ཏེ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་ཀྱིས་དེ་བཞིན་གཤེགས་པ་
དེ་དག་ཐམས་ཅད་ལ་བསྟོད་པའི་རྒྱལ་པོ་འདིས་བསྟོད་དོ། །ཐམས་ཅད་སྐུ་ཁྱོད་ཕྱག་འཚལ་ལོ། །ཐམས་ཅད་གསུང་ལ་ཕྱག་འཚལ་འདུད། །ཐམས་ཅད་ཐུགས་ཁྱོད་ཕྱག་འཚལ་ལོ། །ཐམས་ཅད་མཛད་ལ་ཕྱག་འཚལ་འདུད། །སྐུ་གསུང་ཐུགས་ནི་རྡོ་རྗེ་ཡི། །སྐུ་གསུང་ཐུགས་ནི་

ཐོབ་འགྱུར་བས། །སེམས་ཅན་སངས་རྒྱས་མི་མཉམ་མཉམ། །བསྒྲུབ་བྱ་སུ་ཡིན་སྒྲུབ་པོ་གང་། །སྒྲུབ་པའི་དབང་པོ་བདག་ཉིད་ཆེ། །སངས་རྒྱས་ཐམས་ཅད་གསོད་པ་ཡིས། །ཇི་ལྟར་སྡིག་པས་གོས་མི་འགྱུར། །གལ་ཏེ་གོས་འགྱུར་འབྲས་བུ་གང་། །དེ་ནས་དེ་བཞིན་གཤེགས་པ་དེ་
དག་ཐམས་ཅད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་ལ་ལེགས་སོ་ལེགས་སོ་ཞེས་བྱ་བ་བྱིན་ཏེ། སེམས་དཔའ་ཆེན་པོ་ལེགས་སོ་ལེགས། །བདག་ཉིད་ཆེན་པོ་ལེགས་སོ་ལེགས། །གསུང་དབྱངས་ཆེན་པོ་ལེགས་སོ་ལེགས། །མཆོད་པ་ཆེན་པོ་ལེགས་སོ་ལེགས། །སློབ་དཔོན་
བྱང་ཆུབ་རྡོ་རྗེ་ཅན། །དཔལ་ལྡན་སངས་རྒྱས་ཀུན་གྱི་བདག །དངོས་རྣམས་ཐམས་ཅད་སྒྱུ་མ་བཞིན། །སྐྱེད་དང་སྡུད་པར་མཛད་པ་པོ། །དེས་ན་དེ་ཡི་སྡིག་མི་འགྱུར། །བསོད་ནམས་དག་ཀྱང་དེ་བཞིན་ནོ། །གང་ལ་སྡིག་དང་བསོད་ནམས་མེད། །དེ་ནི་བྱང་ཆུབ་ཡིན་པར་གསུངས། །མགོན་པོ་དེ་
ཡི་སླུ་བ་ཡིས། །ལུས་ཅན་ཐམས་ཅད་འཇིག་མཛད་ཅིང་། །ངན་འགྲོར་སྐྱེ་བར་མི་འགྱུར་ཞིང་། །བྱང་ཆུབ་ཀྱང་ནི་རྙེད་མི་དཀའ། །སྔོན་ནི་མི་བཟད་ལས་བྱས་པས། །གལ་ཏེ་དམྱལ་བ་རྣམས་སུ་ནི། །སྐྱེ་བོ་སྐྱེ་འགྱུར་དེ་རྣམས་ཀྱི། །དམྱལ་བ་རྣམས་ཀྱི་འབྲས་བུ་ཆེ། །བྱང་ཆུབ་རྡོ་རྗེས་བསྒྲུབ་
བྱ་འདི། །ཡེ་ཤེས་ཀྱིས་ནི་རྒྱས་བཏབ་པས། །སེམས་ཅན་རྣམས་ལ་སྦྱོར་བ་དེས། །མཆོག་ཏུ་ཕན་བཏགས་ཤེས་པར་བྱ། །ཚར་གཅོད་པ་དང་རྗེས་བཟུང་ལས། །བདག་ཉིད་ཆེན་པོ་དེ་ཡིས་བྱ། །སྒྲུབ་པ་ཆེན་པོའི་མཐར་ཐུག་པར། །བྱས་ནས་ལས་རྣམས་བརྩམ་པར་བྱ། །དེ་ནས་བྱང་ཆུབ་སེམས་
དཔའ་སེམས་དཔའ་ཆེན་པོ་དེ་རྣམས་རྡོ་རྗེ་ཅན་ཐམས་ཅད་ཀྱི་ཐུགས་རྗེ་ཆེན་པོའི་ཚུལ་གྱིས་ཆོས་ཐོས་པས་དགའ་ཞིང་རབ་ཏུ་དགའ་ལ་མགུ་བའི་ཡིད་ཀྱིས་ལེགས་སོ་ཞེས་བྱ་བ་གསོལ་ཏེ། མགོན་པོ་ཆེན་པོ་ལེགས་སོ་ལེགས། །ཐུབ་པ་ཆེན་པོ་ལེགས་སོ་ལེགས། །ཆོས་རྣམས་ཆེན་པོ་ལེགས་སོ་ལེགས། །ཐུགས་
རྗེ་ཆེན་པོ་ལེགས་སོ་ལེགས། །ཨེ་མའོ་ཀུན་དུ་བཟང་པོ་ཡི། །ཐུགས་རྗེ་ཆེན་པོ་དྲི་མ་མེད། །གདུག་པའི་མི་བཟད་ལས་ཀྱིས་ཀྱང་། །སངས་རྒྱས་ཉིད་ཀྱི་འབྲས་བུ་སྩོལ། །དེ་ནས་དེ་བཞིན་གཤེགས་པ་དེ་དག་ཐམས་ཅད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་ལ་འདི་སྐད་

ཅེས་བཀའ་སྩལ་ཏོ། །རིགས་ཀྱི་བུ་དེ་ལྟ་བས་ན་དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བའི་གསང་བ་འདུས་པར་དབང་བསྐུར་བའི་སྔགས་པས་འཇིགས་པར་མི་བྱ་ཞིང་། སྐྲག་པར་མི་བྱ། དངང་བར་མི་བྱའོ། །དེ་ཅིའི་ཕྱིར་ཞེ་ན། །བྱང་ཆུབ་རྡོ་རྗེ་ལས་
བྱུང་བ། །ཞེ་སྡང་རྡོ་རྗེ་ཆེ་ལ་སོགས། །སྔགས་ཀྱི་རྒྱུན་ནི་བསྡུས་པ་དག །ཡོངས་སུ་སྤང་བར་མི་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་ཀྱིས། དེ་བཞིན་གཤེགས་པ་དེ་དག་ཐམས་ཅད་ལ་མགྲིན་གཅིག་ཏུ་ཚིགས་སུ་བཅད་པ་འདིས་
མངོན་པར་བསྟོད་དོ། །དུས་གསུམ་རྡོ་རྗེའི་ཐུགས་ཡིན་སྲིད་དང་ཐར་གྱུར་གང་། །ཞི་ཞིང་སྒྲིབ་མེད་ནམ་མཁའ་དག་པའི་ངོ་བོ་ཉིད། །སངས་རྒྱས་རྣམ་རྒྱས་བྱང་ཆུབ་དབང་ཕྱུག་རྡོ་རྗེ་ཅན། །དེ་ལ་ལུས་ངག་ཡིད་ཀྱིས་རྟག་ཏུ་ཕྱག་འཚལ་ལོ། །གང་ཞིག་གཟུགས་
དང་ཚོར་བ་འདུ་ཤེས་འདུ་བྱེད་དང་། །རྣམ་པར་ཤེས་དང་སྐྱེ་མཆེད་དྲུག་དང་དབང་པོ་དྲུག །ས་ཆུ་མེ་དང་རླུང་དང་ནམ་མཁའ་ཐམས་ཅད་ནི། །བྱང་ཆུབ་སེམས་འདྲ་རྒྱ་ཆེན་དེ་ལ་ཕྱག་འཚལ་ལོ། །གཏི་མུག་ཉེས་པ་འདོད་ཆགས་རྡོ་རྗེ་ཆོས་བཅས་གང་། །
རིག་པའི་སྦྱོར་བ་ལས་བྱུང་རྟག་ཏུ་རབ་འབྲེལ་བར། །རྣམ་པ་སྣ་ཚོགས་དགའ་བས་མྱོས་པའི་དངོས་གྱུར་བ། །བྱང་ཆུབ་སེམས་འདྲ་རྒྱ་ཆེན་དེ་ལ་ཕྱག་འཚལ་ལོ། །སྤྲོ་དང་དགའ་དང་རྣམ་པ་དེ་བཞིན་མི་འགྱུར་དང་། །རྒྱུ་དང་འབྲས་བུའི་རང་བཞིན་སེམས་
སུ་རྗེས་གཏོགས་ཆོས། །རྨོངས་དང་ཞེ་སྡང་འདོད་ཆགས་སྒྲིབ་པ་རྡོ་རྗེ་སྟེ། །བྱང་ཆུབ་སེམས་འདྲ་རྒྱ་ཆེན་དེ་ལ་ཕྱག་འཚལ་ལོ། །གང་ཞིག་ཐོག་མེད་དངོས་པོ་རྣམ་དག་འདི་སྒོམ་པ། །ཐབས་དང་ཤེས་རབ་ལས་བྱུང་སྤྲོས་དང་རྣམ་པར་བྲལ། །
གསང་བའི་དབང་བསྐུར་བརྟུལ་ཞུགས་དམ་ཚིག་སྦྱོར་བ་བརྟག །བྱང་ཆུབ་རྡོ་རྗེ་འདྲར་བལྟ་དེ་ལ་རྟག་ཕྱག་འཚལ། །གང་ཞིག་དངོས་གྲུབ་མཆོག་གི་ཐབས་ནི་འདི་སྒོམ་ཞིང་། །བསྙེན་པའི་ཆོ་ག་ཉེ་བར་སྒྲུབ་དང་སྒྲུབ་པ་དང་། །སྒྲུབ་པ་ཆེན་པོས་བློ་མི་འགྱུར་

བའི་སྒྲུབ་དབང་པོ། །བྱང་ཆུབ་རྡོ་རྗེ་འདྲར་བལྟ་དེ་ལ་རྟག་ཕྱག་འཚལ། །གང་ཞིག་ཐུན་བཞིའི་རྡོ་རྗེ་དག་ནི་སྒྲུབ་བྱེད་པ། །མི་སྣང་ལ་སོགས་སྣ་ཚོགས་མཆོག་དང་དམན་གྲུབ་ཅིང་། །བླ་མའི་དྲིན་གྱིས་འདི་ན་མ་ནོར་ལམ་རྟོགས་པ། །བྱང་ཆུབ་རྡོ་རྗེ་འདྲར་བལྟ་དེ་ལ་
རྟག་ཕྱག་འཚལ། །གང་ཞིག་རབ་གསང་འདུས་པའི་རྒྱུད་འདི་ཉན་པ་དང་། །འདོན་པར་བྱེད་དང་ཀློག་པ་དང་ནི་སེམས་པ་དང་། །མཆོད་པར་བྱེད་པ་དང་ནི་འདྲི་འམ་འདྲིར་འཇུག་པ། །བྱང་ཆུབ་རྡོ་རྗེ་འདྲར་བལྟ་དེ་ལ་རྟག་ཕྱག་འཚལ། །གང་དུ་ཞི་སོགས་ལས་ཚོགས་ཤིན་ཏུ་
བརྟགས་པ་ཡིས། །འཁྲུལ་འཁོར་སྔགས་ཀྱི་ཆོ་ག་དེ་བཞིན་རྒྱས་འདེབས་པའི། །བསྒྲུབ་བྱ་འདི་དང་ལྡན་པའི་སྒྲུབ་པའི་དབང་པོ་ནི། །བྱང་ཆུབ་རྡོ་རྗེ་འདྲར་བལྟ་དེ་ལ་རྟག་ཕྱག་འཚལ། །གང་གིས་གཙོ་བོ་སྒྲུབ་པ་པོ་མཐོང་རེག་པ་དང་། །ལེགས་པར་དྲན་དང་མིང་ཙམ་
ངེས་པར་ཐོས་པ་དང་། །དད་པར་བྱེད་ཅིང་ཕྱོགས་གཅིག་ཙམ་ཞིག་འཛིན་པ་དག །བྱང་ཆུབ་རྡོ་རྗེ་འདྲར་བལྟ་དེ་ལ་རྟག་ཕྱག་འཚལ། །བསྟོད་པའི་ཚིག་ནི་ཞི་བ་འདིས། །འདྲེན་པ་ཀུན་ལ་བསྟོད་པ་དང་། །བྱང་ཆུབ་སེམས་དཔའ་མཆོད་ཆེན་ལ། །མགོན་པོ་དེ་དག་རྗེས་ཡི་རང་། །འདུས་པ་གསང་བ་
ལས་བྱུང་བ། །དེ་བཞིན་གཤེགས་པ་ཀུན་གྱི་གསང་། །རྒྱུད་ཀུན་བདག་པོའི་དབང་པོ་ཡིས། །རྒྱུད་འདི་ལེགས་པར་གསུངས་པ་ཡིན། །དེ་ནས་དེ་བཞིན་གཤེགས་པ་དེ་དག་ཐམས་ཅད་དང་། བྱང་ཆུབ་སེམས་དཔའ་དེ་དག་ཐམས་ཅད་ཀྱིས་དེ་སྐད་ཅེས་གསུངས་ནས་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་
ལ་བཞུགས་ཏེ། སྐུ་དང་གསུང་དང་ཐུགས་རྡོ་རྗེའི་སྐུ་དང་གསུང་དང་ཐུགས་རང་གི་སྐུ་དང་གསུང་དང་ཐུགས་རྡོ་རྗེ་ལ་དམིགས་ཏེ་ཅང་མི་གསུང་བར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་ཆེན་པོ་གསང་བ་འདུས་པ་ལས་གསང་བ་ཐམས་ཅད་སྟོན་པ་རྡོ་རྗེའི་ཡེ་
ཤེས་ཀྱིས་བྱིན་གྱིས་རློབ་པ་ཞེས་བྱ་བའི་ལེའུ་སྟེ་བཅྭ་བརྒྱད་པ་རྫོགས་སྷོ།། །།རྒྱ་གར་གྱི་མཁན་པོ་ཨཱ་ཙཱརྱ་ཤྲད་དྷཱ་ཀ་ར་ཝརྨྨ་དང་། ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་ཅིང་བཅོས་ཏེ་གཏན་ལ་ཕབ་པ།། །།

༄༅། །རྒྱ་གར་སྐད་དུ། སན་དྷིབྱཱ་ཀ་ར་ཎ་ནཱ་མ་ཏནྟྲ། བོད་སྐད་དུ། དགོངས་པ་ལུང་བསྟན་པ་ཞེས་བྱ་བའི་རྒྱུད། བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །དེ་ཉིད་འདི་སྐད་བདག་གིས་ཐོས། །ཤིན་ཏུ་གསལ་བའི་དུས་གཅིག་ན། །གསང་གཙོ་
རྡོ་རྗེ་བཅོམ་ལྡན་འདས། །དམ་ཚིག་མཆོག་ནི་རྡོ་རྗེ་གསུམ། །དེ་བཞིན་གཤེགས་ཀུན་ཡེ་ཤེས་ནི། །ཡོན་ཏན་ཕུན་ཚོགས་བསམ་མི་ཁྱབ། །ཡོད་མེད་གཉི་ག་ལས་འདས་པས། །གནས་མེད་པ་ལ་གནས་ཞེས་བྱ། །ནམ་མཁའ་རང་བཞིན་གཅིག་པ་འདིར། །ཀུན་མཁྱེན་ཡེ་ཤེས་རྣམ་
བསྒོམ་པ། །འགྲོ་སྙིང་རྣམ་དག་ཅེས་བྱ་ལ། །ཐུབ་པ་ཆེན་པོ་བཞུགས་པ་ཡིན། །མ་རིག་པ་དང་འདུ་བྱེད་དང་། །རྣམ་པར་ཤེས་དང་མིང་དང་གཟུགས། །སྐྱེ་མཆེད་དྲུག་དང་རེག་པ་དང་། །ཚོར་བ་དང་ནི་སྲེད་པ་དང་། །ཉེར་ལེན་སྲིད་པ་སྐྱེ་བ་དང་། །རྒ་ཤི་ཞེས་བྱ་རིག་མ་ཡིན། །ང་རྒྱལ་
ཆེ་བའི་ང་རྒྱལ་དང་། །ངའོ་སྙམ་རྒྱལ་མངོན་ང་རྒྱལ། །གཞན་ཡང་ང་རྒྱལ་ལས་ང་རྒྱལ། །ཅུང་ཟད་ང་རྒྱལ་ལོག་པར་བཅས། །འདི་དག་རྡོ་རྗེ་མཐའ་ཅན་མཆོག །བྱང་ཆུབ་སེམས་དཔའ་དེ་བཞིན་གཤེགས། །དེ་རྣམས་བརྗོད་མི་ལང་བའི་གྲངས། །བརྗོད་ཀྱིས་མི་ལང་ཉིད་དུ་གྱུར། །
སངས་རྒྱས་ཞིང་ནི་གྲངས་མེད་པའི། །རི་རབ་རྡུལ་ཕྲན་གྲངས་མཉམ་པ། །བྱང་ཆུབ་སེམས་དཔའ་སེམས་དཔའ་ཆེ། །ཏིལ་གྱི་གང་བུ་མཚུངས་པ་དང་། །དེ་བཞིན་གཤེགས་པ་རྣམས་ཀྱིས་ཀྱང་། །ནམ་མཁའི་ཁམས་ཀུན་གང་བར་སྣང་། །དེ་ནས་དཔལ་ལྡན་རྣམ་སྣང་མཛད། །སྐུ་གསུང་
ཐུགས་ཀྱི་རྡོ་རྗེ་ཅན། །འཁོར་གྱི་དཀྱིལ་འཁོར་ལ་གཟིགས་ནས། །དེ་ཉིད་གསུམ་སྐྱེས་སྐུར་མཛད་དོ། །ཚངས་པ་ཁྱབ་འཇུག་ལྷ་ཆེན་དང་། །འདོད་དང་རིག་བྱེད་དེ་བཞིན་ཟུང་། །ཚངས་ལྷ་དེ་བཞིན་ཟླ་བ་སྟེ། །ཕུང་པོ་ལ་སོགས་གྲངས་དང་མཉམ། །སྒྲ་སྒྲོགས་དེ་བཞིན་དགའ་བྱེད་དང་། །
སྐྱ་བསེང་སྐེམ་བྱེད་ཐུབ་པ་དང་། །སྣ་ཡོན་དང་ནི་དཀོན་མཆོག་གསུམ། །དེ་བཞིན་གཤེགས་ཀུན་གཅིག་པུ་ཉིད། །དེ་ཚེ་ཕྱུང་བ་གསོལ་བ་ཡི། །གསང་སྔགས་གསུངས་པ་དང་པོ་ཉིད། །ཐུབ་ཆེན་བྱང་ཆུབ་སེམས་ཚུལ་དུ། །མཛད་པ་གཉིས་པ་ཡིན་པར་བཤད། །རྣམ་ལྔ་མངོན་པར་བྱང་

ཆུབ་པའི། །ཕྲ་མོ་རྣལ་འབྱོར་གསུམ་པ་ཡིན། །དབང་བསྐུར་བ་ནི་རྣམ་པ་བཞི། །གཟུགས་ཀྱི་དཀྱིལ་འཁོར་ཉིད་བཞི་པ། །བསྲུང་བའི་བསླབ་གཞི་རྣམ་བཞི་དང་། །སྤྱོད་པའང་འདིར་ནི་ལྔ་པ་སྟེ། །དྲུག་པ་རང་སངས་རྒྱས་ཉིད་ཀྱི། །ཏིང་འཛིན་ཕྲ་མོའི་རྣལ་འབྱོར་རོ། །བདུན་པ་དེ་
ཉིད་མཆོད་པར་བཤད། །གསང་བའི་དབང་དུ་གཙོ་བོས་མཛད། །ཕྱག་རྒྱས་དབང་བསྐུར་བརྒྱད་པ་བསྟན། །དམ་ཚིག་བཞི་པོ་དགུ་པ་ཡིན། །རྣམ་པ་བཅུར་ཕྱེ་ཡང་དག་རྟོག །བཟླས་པའི་སྔགས་ཀྱང་གསུངས་པ་ཡིན། །བཅུ་གཅིག་མིང་དུ་བྱུང་བ་ན། །ཕྱག་རྒྱ་གཅིག་པར་བཤད་
དཀྱིལ་འཁོར། །བཅུ་གཉིས་པ་ཡི་བདག་ཉིད་སྐུ། །ཉན་ཐོས་བྱང་ཆུབ་སྟོན་པར་མཛད། །དེ་བཞིན་རིག་པ་སྤྱོད་གྲུབ་བ། །མངོན་ཤེས་ལྔ་ནི་བཅུ་གསུམ་པ། །བཅུ་དང་བཞི་པར་བཞི་པོ་དང་། །ཕྲེང་སྔགས་བླ་མ་སྟོན་པར་མཛད། །ཕྱོགས་དང་སྐྱ་བསེང་ཉིད་གྱུར་བ། །དངོས་གྲུབ་དཀྱིལ་
འཁོར་བླ་མེད་པའོ། །སྒྲ་སྒྲོགས་དུས་དང་ཡང་དག་ལྡན། །དཀྱིལ་འཁོར་རྡུལ་ཚོན་ལྡན་པའོ། །སློབ་མ་དབང་བསྐུར་ཉི་ཟླ་དག །ཆགས་བྲལ་སྣ་ཚོགས་ཉིད་གྱུར་བ། །སྣ་ཚོགས་ཚིག་གི་དོན་གྱི་བརྡ། །སྣ་ཚོགས་མིང་ཅན་མིང་གཅིག་བུ། །དེ་ལྟར་རྣམ་པ་སྣ་ཚོགས་པའི། །སོ་
སོར་སྡུད་པ་རབ་ཏུ་བསྟན། །གཅིག་དང་དུ་མ་ལས་གྲོལ་བ། །ཡང་དག་མཐོང་ནས་ཡོངས་སུ་བསྒོམ། །ཡོངས་སུ་བསྒོམས་པར་གྱུར་པའི་བདག །རྟེན་འབྲེལ་དུ་ཡང་བསྟན་པར་བྱ། །དེ་ནས་མ་སྐྱེས་སྦྱོར་བ་ལ། །ཐུབ་པ་རྣམ་པར་སྣང་མཛད་ཆེ། །རྟེན་འབྲེལ་ཡན་ལག་བཅུ་གཉིས་
པའི། །ཏིང་འཛིན་དེ་འོག་སྟོན་པར་མཛད། །འདོད་པའི་ཡན་ལག་འགྲོ་བའི་ཚོགས། །གཉིས་པ་ཐམས་ཅད་དེ་བཞིན་གཤེགས། །འདོད་ཆགས་ཆེ་ཚུལ་ཞེས་བྱ་བའི། །ཏིང་ངེ་འཛིན་ལ་སྙོམས་པར་ཞུགས། །དེ་བཞིན་གཤེགས་ཀུན་གཙོ་བོ་ཡི། །རང་གི་སྐུ་ལ་ཞུགས་པར་མཛད། །
བྱང་ཆུབ་སེམས་དཔའ་སེམས་དཔའ་ཆེ། །རྒྱུན་དེ་ལ་ནི་སྦྱོར་བར་གྱུར། །དེ་ནས་དེ་བཞིན་གཤེགས་ཀུན་དང་། །དེ་བཞིན་བྱང་ཆུབ་སེམས་དཔའ་རྣམས། །དེ་བཞིན་གཤེགས་བདག་མཉེས་བྱའི་ཕྱིར། །དེ་རྣམས་ཞུགས་ནས་བྱུང་གྱུར་བ། །སྲོག་དང་གྱེན་རྒྱུ་ཐུར་སེལ་དང་། །མཉམ་

གནས་ཁྱབ་བྱེད་ཅེས་བྱ་དང་། །ཀླུ་དང་རུས་སྦལ་རྩངས་པ་དང་། །ལྷ་སྦྱིན་གཞུ་རྒྱལ་ཞེས་བྱ་བ། །འདི་དག་ཏུ་ནི་ཉིད་སྐུ་མཛད། །བུད་མེད་གཟུགས་སུ་སླར་སྤྲུལ་ཏེ། །རང་གི་ངོ་བོ་ཇི་བཞིན་དུ། །དེ་སྐུའི་སྐུ་ལས་བྱུང་བར་གྱུར། །དེ་ཉིད་གསུམ་ནི་མཉམ་སྦྱོར་
ལས། །རང་གི་གསང་སྔགས་དེ་དག་བསྒོམ། །ཡན་ལག་ཀུན་ལས་ངེས་གྲོལ་ཞིང་། །ཤིན་ཏུ་ཕྲ་བ་ཉིད་དུ་གྱུར། །དབུ་དགོས་མིང་ལས་བྱུང་བ་ནི། །ཞི་གནས་དང་ནི་ལྷག་མཐོང་སྟེ། །དངོས་མེད་ངོ་བོ་ཉིད་ཡིན་པས། །རང་ཉིད་ཀྱང་ནི་མི་ཤེས་སོ། །འོན་ཀྱང་འདི་ལྟར་ཐུབ་པ་ལ། །
དེ་བཞིན་གཤེགས་རྣམས་གསོལ་བ་འདེབས། །བཅོམ་ལྡན་དགོངས་པ་ལུང་བསྟན་པ། །ཆོས་ཀྱི་མཆོག་ནི་བསྟན་དུ་གསོལ། །ཁྱབ་བདག་ཁྱེད་ནི་ཆོས་འདི་རྣམས། །དངོས་མེད་ཉིད་ནི་ཐུགས་སུ་ཆུད། །འགྲོ་བའི་དོན་ནི་རབ་སྒྲུབ་པས། །ཡིད་བཞིན་ནོར་བུ་ལྟ་བུར་མཛེས། །གང་
ཞིག་ཡང་དག་ཤེས་གྱུར་ན། །འཇིག་རྟེན་པ་དང་རྩོད་མེད་ཅིང་། །དེ་བཞིན་འཇིག་རྟེན་འདས་པ་དང་། །འཇིག་རྟེན་ཤིན་ཏུ་འདས་དེ་བཞིན། །གང་འདི་ཞི་བ་ཉིད་ཀྱི་ཆོས། །ཞི་གནས་ཤིན་ཏུ་སྔོན་འགྲོ་བ། །བྱང་ཆུབ་སེམས་དཔས་ཐོས་ན་ཡང་། །དེ་བཞིན་ཉིད་ཀྱི་བདེ་བ་བྱེད། །དེ་ནས་ས་སྙིང་
ལ་སོགས་པའི། །བྱང་ཆུབ་སེམས་དཔའ་སེམས་དཔའ་ཆེ། །མགོན་པོ་རྣམ་སྣང་ཆེན་པོ་ལ། །དེ་དག་གིས་ནི་ཞུས་གྱུར་པ། །གང་ཤེས་བླ་མེད་བྱང་ཆུབ་ནི། །མ་འོངས་སྐྱེ་བོས་ཐོས་འགྱུར་བའི། །གསང་སྔགས་དེ་ཉིད་དོན་འབྱུང་བ། །རྣལ་འབྱོར་བཅོམ་ལྡན་བཤད་དུ་གསོལ། །ལན་
གཉིས་གསོལ་ཀྱང་མགོན་པོ་ནི། །མི་གསུང་བར་ནི་རྣམ་པར་བཞུགས། །རྡོ་རྗེ་ཅན་གྱིས་དེ་ཤེས་ནས། །དེ་ནས་སླར་ཡང་ཞུས་པར་གྱུར། །གང་འདི་ཞི་གནས་ལ་སོགས་པའི། །རྣལ་འབྱོར་ཟབ་མོ་བླ་མེད་པ། །དེ་ནི་འདི་ལྟར་སྔགས་པས་བསྔགས། །འཚལ་འགྱུར་དེ་ནི་གཙོ་བོས་
གསུངས། །བྱ་བ་དག་བྱའི་རྣལ་འབྱོར་དང་། །རྣལ་འབྱོར་འབའ་ཞིག་པ་ཉིད་དང་། །ལུང་ནི་ཡང་དག་གང་ཡིན་པ། །དེ་ནི་བསྟན་པར་མཛད་པའི་རིགས། །ཞུས་པའི་དོན་ནི་མཁྱེན་ནས་ནི། །བཅོམ་ལྡན་རྡོ་རྗེ་ཅན་གྱིས་གསུངས། །གསང་སྔགས་ཚུལ་ནི་མཆོག་གྱུར་འདི། །

གསང་བ་ཁྱོད་ལ་བསྟན་པར་བྱ། །འདི་སྐད་ཅེས་བྱའི་གསང་སྔགས་ཆེ། །གསང་སྔགས་ཀུན་དོན་སྔགས་སྟེར་བའོ། །དེར་ནི་ལྔ་ཡི་བདག་གྱུར་ཅིང་། །སྦྱོར་བ་བཞི་དང་བཅུ་ཡི་བདག །ལྔ་པ་ལྔ་པོའི་མིང་འདི་ནི། །གསལ་དང་མི་གསལ་དག་ཏུ་སྦྱར། །རྒྱ་མངོན་ཕྱོགས་པའི་སྦྱོར་
བཤད་པ། །དཀྱིལ་འཁོར་ལྔ་ཡིས་བརྒྱན་པ་ཡིན། །བཅུ་བདུན་ཞེས་ནི་བཤད་པ་འདིའི། །གསུངས་པའི་དོན་དེ་མ་ཤེས་པས། །སྔགས་པས་གསང་སྔགས་སྦྱོར་བ་དག །དེ་ཚེ་ཇི་ལྟར་བྱེད་པར་འགྱུར། །དོན་འདི་རྟོགས་པར་གྱུར་ནས་ནི། །སྣ་ཚོགས་དོན་ནི་སྟོན་པ་དང་། །འགྲོ་
བའི་དོན་ནི་རབ་སྒྲུབ་པ། །གསང་སྔགས་རིག་བ་མཆོག་རྣམས་བྱེད། །བདག་ནི་སྟོང་དང་ཡང་དག་སྦྱར། །ཡི་གེ་ཨ་ནི་སྟེང་དུ་གནས། །ཕྱི་མ་ཞེས་བྱ་གནས་བྱས་ལ། །སྔགས་པས་སེམས་ཅན་དོན་རྣམས་བྱ། །ཡི་གེ་ཨ་གཉིས་སྦྱོར་བ་གང་། །ཨ་སྒོ་ལས་སྐྱེས་ཉིད་དུ་འགྱུར། །སྟེང་
འོག་ཕྱོགས་ཀྱི་རྣམ་པ་དེ། །དངོས་པོ་མེད་པའི་ངོ་བོ་ཉིད། །གང་ཞིག་འདི་ལས་གསུངས་པ་ནི། །བསམ་མི་ཁྱབ་པའི་ཐབས་ཆོས་ཉིད། །བདག་གིས་ཞེས་རྟོགས་དེ་འགྱུར་བ། །ཐོགས་མེད་རྟོག་པ་འདི་གནས་སོ། །སྟོན་པ་པོ་དང་བསྟན་དང་གནས། །ཕྲ་རབ་ཙམ་གྱི་ངོ་བོ་མེད། །ཀུན་རྫོབ་
དུས་གསུམ་སྦྱོར་གཅིག་པ། །སྔགས་པ་རྣམས་ཀྱི་ཐོས་དེ་འགྱུར། །ཤིན་ཏུ་གྲངས་མེད་བསྐལ་པ་རུ། །སངས་རྒྱས་རྣམས་ཀྱིས་གང་མཁྱེན་པ། །སྔགས་པ་རྣམས་ཀྱིས་དུས་གཅིག་ན། །སྐད་ཅིག་ལ་རྫོགས་བྱང་ཆུབ་ཐོབ། །ཀུན་མཁྱེན་ཀུན་རིག་ཐུགས་ཆུད་པ། །གསང་སྔགས་
སྟོན་པའི་ཆོས་ཅན་ཏེ། །དེ་ཉིད་ཁོ་ན་བཅོམ་ལྡན་མཆོག །སྐུ་གསུང་ཐུགས་རྡོ་རྗེ་ལས་སྐྱེས། །མི་རྟོག་ནམ་མཁའ་ཇི་བཞིན་ཏེ། །གསང་སྔགས་ཐམས་ཅད་ཉི་མ་འདྲ། །ས་ལ་རླུང་བཞིན་སྔགས་པ་ནི། །འདོད་པ་ཀུན་ལ་ཉེ་བར་སྤྱོད། །ཐམས་ཅད་འགྱུར་བ་གང་གང་ཡིན། །དེ་དེ་སྟོང་
པ་ཉིད་དུ་འགྱུར། །དེ་བཞིན་སྦྱོར་བ་དེ་མཐོང་བས། །ཀུན་རིག་དེ་ནི་དེ་བཞིན་གཤེགས། །དེ་བཞིན་ཉིད་གཟུགས་བརྙན་གྱུར་པ། །དེ་ནི་སྐུ་ཡི་རྡོ་རྗེར་གྱུར། །འགྲོ་བ་ཡང་དག་ཚིམ་པར་འབྱུང་། །མི་ཕྱེད་གསུང་གི་རྡོ་རྗེར་གྱུར། །ནམ་མཁའི་གནས་ཀྱི་སྦྱོར་བ་གང་། །བསམ་མི་ཁྱབ་པར་སྤྲོ་

བདག་ཉིད། །དེ་ཉིད་ཡེ་ཤེས་རྒྱ་མཚོ་ལ། །ཐུགས་ཀྱི་རྡོ་རྗེ་ཡང་དག་བྱུང་། །སེམས་ཅན་ཀུན་གྱི་སེམས་གང་ཡིན། །ནམ་མཁའ་ཡོངས་སུ་བརྟགས་པ་སྟེ། །དེ་ཡང་དེ་རུ་ཀུན་གནས་པས། །བུད་མེད་ཆོས་གཅིག་པུ་ཡི་གཟུགས། །སངས་རྒྱས་ཀུན་གྱིས་གང་བརྟེན་
པ། །སར་གྱུར་དེ་ནི་བཅུ་གསུམ་པ། །དེ་ནི་བུད་མེད་ཅེས་བཤད་དེ། །དེ་བས་ཆོས་དེ་བྷ་ག་ཡིན། །བྱ་བ་ལ་སོགས་ཇི་སྐད་བཤད། །དམ་ཚིག་ཆེན་པོ་གཅིག་ཏུ་གྱུར། །དངོས་མེད་ཆོས་ཉིད་གཅིག་པུ་རུ། །འདི་ནི་དེ་དག་མཉམ་པར་འགྱུར། །དམ་ཚིག་སྐུ་གསུང་ཐུགས་དང་ནི། །ཏིང་
འཛིན་དེ་བཞིན་རྒྱལ་བ་དང་། །ས་དང་ཆུ་དང་དེ་བཞིན་མེ། །རླུང་དང་ནམ་མཁའ་ཉིད་དག་དང་། །གཟུགས་དང་སྒྲ་དང་དྲི་དང་རོ། །རེག་དང་དེ་བཞིན་ཆོས་ཀྱི་དབྱིངས། །འདི་རྣམས་རྡོ་རྗེའི་མཐའ་ཅན་བྱུང་། །བྱང་ཆུབ་སེམས་དཔའ་རྫུ་འཕྲུལ་ཆེ། །དེ་ལྟར་བརྗོད་མི་ལང་ཞེས་པ། །བརྗོད་མི་
ལང་བ་ཉིད་གྱུར་རྣམས། །སངས་རྒྱས་ཞིང་གི་རི་རབ་ཀྱི། །རྡུལ་ཕྲན་གྱི་ནི་གྲངས་མཉམ་པའི། །བྱང་ཆུབ་སེམས་དཔའ་སེམས་ཆེན་དང་། །ནམ་མཁའ་མཉམ་པའི་དེ་བཞིན་གཤེགས། །མི་བསྐྱོད་རྣམ་སྣང་མཛད་རིན་ཆེན། །དཔག་མེད་ཚེ་དང་གདོན་མི་ཟ། །འདི་དག་ནམ་མཁའི་ཁམས་མཉམ་
པའི། །རྡོ་རྗེ་སྙིང་པོ་དེ་བཞིན་གཤེགས། །དཔེར་ན་ཏིལ་འབྲུ་མཚུངས་པ་ཡི། །དེ་བཞིན་གཤེགས་པ་ཐམས་ཅད་ཀྱིས། །ནམ་མཁའི་ཁམས་ནི་ཡོངས་ཁེབས་པ། །དེ་རྣམས་དེར་ནི་ཡང་དག་སྣང་། །དེ་ནས་མགོན་པོ་རྣམ་སྣང་མཛད། །དེ་བཞིན་ཉིད་དང་གཅིག་ཏུ་གྱུར། །གང་ཡང་དམ་
ཚིག་སྔོན་འགྲོ་དང་། །སྐུ་རྡོ་རྗེ་སོགས་མིང་ཅན་གྱི། །བྱང་ཆུབ་སེམས་དཔའ་སེམས་ཆེན་དང་། །དོན་ཡོད་ཐམས་ཅད་དེ་བཞིན་གཤེགས། །འདི་རྣམས་སྐུ་ཡི་ཡན་ལག་གྲགས། །ཞི་གནས་བསམ་མི་ཁྱབ་ལས་བྱུང་། །མ་སྐྱེས་གཅིག་པུ་གཟིགས་པ་ནི། །འདོད་ཆགས་ཆེན་པོའི་ཚུལ་
དུ་གྱུར། །འདོད་ཆགས་ཆེན་པོའི་ཚུལ་མཆོག་གི། །ཏིང་ངེ་འཛིན་ལ་སྙོམས་ཞུགས་ཏེ། །དེ་བཞིན་གཤེགས་པ་ཀུན་གྱི་ཚོགས། །དེ་ནི་ཉིད་ཀྱི་སྐུ་ལ་བཅུག །དེ་ནི་དེ་བཞིན་གཤེགས་པ་ཀུན། །དེ་ནི་རྣམ་པར་སྣང་མཛད་ཆེ། །འདི་ཉིད་མཉེས་པར་བྱ་བའི་ཕྱིར། །ཉིད་སྐུ་བུད་མེད་

ཉིད་དུ་མཛད། །དེ་ནས་མགོན་པོ་བསམ་ཡས་ལས། །བུད་མེད་གཟུགས་སུ་བྱུང་བར་གྱུར། །དེ་ནི་སངས་རྒྱས་སྤྱན་འདྲ་དང་། །མཱ་མ་ཀཱི་འདྲ་སྦྱོར་བ་དང་། །གོས་དཀར་མོ་འདྲའི་གཟུགས་དང་ནི། །སྒྲོལ་མའི་གཟུགས་སུ་ཡང་དག་གནས། །སྒྲ་ཡི་ངོ་བོའི་གཟུགས་ཅན་དང་། །དྲི་ཡི་
ངོ་བོའི་གཟུགས་དང་ནི། །དེ་བཞིན་རོ་ཡི་ངོ་བོའི་གཟུགས། །རེག་གི་ངོ་བོའི་གཟུགས་ཅན་དང་། །ལ་ལ་གཟུགས་ཀྱི་ངོ་བོ་ཡིས། །དེ་བཞིན་གཤེགས་པ་དེ་རྣམས་བཞུགས། །དེ་ནས་ཚུལ་གསུམ་དོན་གཅིག་དང་། །མི་བསྐྱོད་པ་ཡང་བསྟན་ཕྱིར་དང་། །འཇིག་རྟེན་རྒྱང་པ་ན་གདུལ་དོན་
དུ། །འཇིག་རྟེན་འདས་པའི་ཚུལ་བྱུང་ངོ་། །གཉིས་མེད་མཉམ་པ་ཉིད་རྣལ་འབྱོར། །རྡོ་རྗེ་བུད་མེད་བྷ་ག་མཆོག །དམ་ཚིག་ཆེན་པོའི་དཀྱིལ་འཁོར་དུ། །དེ་ནི་མི་བསྐྱོད་ཡང་དག་བྲི། །ཟུར་བཞི་པ་ལ་སྒོ་བཞི་པ། སྦྱོར་གཞི་གཅིག་ཏུ་སྦྱོར་བ་ཉིད། །དྲི་མ་མེད་པར་བྱིན་བརླབས་པ། །ཀུན་
ནས་ཤིན་ཏུ་གསལ་བའི་གཟུགས། །སངས་རྒྱས་སྤྲིན་གྱིས་ཀུན་དུ་ཁྱབ། །འབར་བ་མང་པོས་རྣམ་པར་འཁྲུག །གསལ་བ་ལ་སོགས་དཀྱིལ་འཁོར་ལྡན། །དེ་བཞིན་གཤེགས་པ་ཀུན་གྱི་གནས། །དེ་ནས་དེ་ནི་བཅོམ་ལྡན་འདས། །དེ་བཞིན་གཤེགས་ཀུན་བདག་པོ་འདི། །དཀྱིལ་
འཁོར་ཆེན་པོའི་དབུས་སུ་ཡང་། །རྣམ་པར་བཞག་སྟེ་བཞུགས་པར་གྱུར། །མི་བསྐྱོད་རིན་ཆེན་དཔག་མེད་དང་། །དོན་གྲུབ་རྣམ་སྣང་དེ་བཞིན་གཤེགས། །དེ་རྣམས་བྱང་ཆུབ་སེམས་རྡོ་རྗེའི། །ཐུགས་ལ་རྣམ་པར་བཞུགས་པར་གྱུར། །དེ་རྣམས་ཟིལ་གྱིས་མནན་པའི་ཕྱིར། །དེ་
བཞིན་གཤེགས་པ་བྱང་ཆུབ་སེམས། །དངོས་མེད་ངོ་བོར་གཅིག་པར་ནི། །མཁའ་འདྲ་རྡོ་རྗེ་ལས་བྱུང་གཟིགས། །ཤེས་རབ་ཏིང་འཛིན་གཞི་གཅིག་པུ། །དེ་ནི་གྲིབ་མ་ལྟར་ཐུགས་ཆུད། །རྡོ་རྗེའི་རང་བཞིན་སྐུར་མཛད་ནས། །འགྲོ་དོན་མཉམ་དང་མི་མཉམ་མཛད། །ཇི་ལྟར་མཚམས་
གནས་ཉི་མ་ཡིས། །འགྲོ་བ་གཉིད་ལོག་སད་པར་བྱེད། །དེ་བཞིན་དེ་བཞིན་གཤེགས་པ་ཀུན། །བྱང་ཆུབ་སེམས་ཀྱིས་སད་པར་བྱེད། །སྐུ་གསུང་ཐུགས་ནི་རྡོ་རྗེ་གཅིག །དེ་རྣམས་སྐྱེ་བར་བཞེད་པ་ཡི། །བྱང་ཆུབ་སེམས་ཀྱི་ངོ་བོ་ཡིས། །རྡོ་རྗེའི་སྔགས་སུ་མཛད་པར་གྱུར། །རིག་

པ་སྐྱེས་བུའི་གཟུགས་དག་ནི། །སྔགས་ཀྱིས་བྱིན་བརླབས་བླ་ན་མེད། །དེར་ནི་ཞལ་གསུམ་པ་ལྟ་བུར། །དེ་བཞིན་གཤེགས་པ་ཀུན་གྱིས་གཟིགས། །དེ་ནས་མགོན་པོ་བཅོམ་ལྡན་གྱི། །ཐུགས་རྗེས་བཞུགས་པ་ལས་བྱུང་སྟེ། །བྱང་ཆུབ་སེམས་ནི་རབ་བསྐོར་ལ། །ལན་
གསུམ་ཆེད་དུ་བརྗོད་པ་མཛད། །བསམ་མི་ཁྱབ་ཅིང་དཔག་མེད་གང་། །དེ་བཞིན་གཤེགས་པ་ཀུན་གྱི་གསང་། །རྡོ་རྗེ་བྱང་ཆུབ་སེམས་གཅིག་ལས། །སྤྱོད་ཡུལ་དེར་ནི་གྱུར་པ་ཡིན། །དེ་ནས་གསང་ཚུལ་ཐོས་པ་དང་། །དེ་འོག་གསང་བའི་བདག་པོས་ནི། །ཁྱབ་བདག་རྣམ་པར་སྣང་མཛད་
ལ། །ཇི་བཞིན་ཚུལ་དུ་དེ་བཏུད་ཞུས། །ཕུང་པོ་ཁམས་ལ་སོགས་པའི་ཆོས། །འདུས་ལ་གང་ཞིག་གནས་པའི་རྣམས། །རྟེན་འབྲེལ་ལས་སྐྱེས་ཡིན་པར་ནི། །ཁྱད་ཆོས་སྟོན་པར་མཛད་པས་ཁུམས། །དམན་པའི་ཆོས་རྣམས་འདི་དག་ནི། །ཞེ་སྡང་ལ་སོགས་རྐྱེན་དང་ལྡན། །འདི་དག་
ཇི་ལྟར་བདེ་གཤེགས་དང་། །རྫུ་འཕྲུལ་ཆེན་པོ་རིགས་མ་ལགས། །བྱང་ཆུབ་སེམས་དཔའ་སེམས་ཆེན་དེ། །ལུས་ལ་སོགས་པ་ཇི་ལྟར་འགྱུར། །གང་ཞིག་ཕྱི་དུས་སྐྱེ་བོ་ཡིས། །འདི་དག་འཚལ་བར་མི་འགྱུར་རོ། །དེ་ནས་བཅོམ་ལྡན་རྡོ་རྗེ་ཅན། །འོད་ཆེན་ལྡན་བས་བཀའ་སྩལ་པ། །
མ་འོངས་སྐྱེ་བོ་མཐོང་ནས་ནི། །གང་ཞིག་ཁྱོད་ཀྱིས་ང་དྲིས་པ། །ལེགས་སོ་ལེགས་སོ་སེམས་དཔའ་ཆེ། །གསང་བའི་བདག་པོ་ཁྱོད་ལེགས་སོ། །སྨྲ་བ་དོན་ཇི་ལྟ་ཇི་ལྟ་བར། །དེ་ལྟར་ཁྱོད་ལ་ལུང་བསྟན་བྱ། །མ་འོངས་དུས་ན་མི་རྣམས་ནི། །འཇིག་རྟེན་རྒྱང་བ་ན་མཆོག་གཞོལ་འགྱུར། །ལོག་
པར་ལྟ་བ་ལ་གནས་ཏེ། །ཅི་དགའ་བར་ཡང་སྤྱོད་པར་བྱེད། །ལ་ལ་གླུ་དང་གར་ལ་དགའ། །དགོད་དང་སྒེག་ལ་མཆོག་ཏུ་གཞོལ། །དྲི་དང་ཕྲེང་བ་ལ་དགའ་ཞིང་། །དེ་བཞིན་འཁྲིག་པ་ལ་དགར་འགྱུར། །རྨོངས་པ་ལ་ལ་སྡང་བ་དང་། །དེ་བཞིན་གཏི་མུག་ལ་རབ་གཞོལ། །ལ་ལ་དེ་
བཞིན་འདོད་ཆགས་ཞེན། །ཤེས་པ་གཞན་དག་འདོད་པར་འགྱུར། །ཉ་དང་ཤ་དང་དེ་བཞིན་ཆང་། །བཤང་གཅི་ཁུ་བ་ཁྲག་རྣམས་ནི། །སྐྱེས་བུ་གླེན་པ་ཟ་བྱེད་ཅིང་། །མེད་པར་སྨྲ་བ་ཆོས་སུ་སྒྲོགས། །མ་དང་སྲིང་མོ་ལ་སོགས་པ། །བགྲོད་མིན་ལ་ནི་འགྲོ་བ་དང་། །ཕ་དང་མ་ཡང་

གསོད་པ་དང་། །དེ་བཞིན་སྲོག་ཆགས་གཞན་རྣམས་གསོད། །བརྫུན་གྱི་ཚིག་ཉིད་སྨྲ་བ་དང་། །ཁྱད་པར་དུ་ཡང་བརྐུ་བ་དང་། །གཞན་གྱི་ཆུང་མའི་ཐད་འགྲོ་ཞིང་། །སྨད་པ་གཞན་ཡང་བྱེད་པར་འགྱུར། །ལ་ལ་དམ་ཆོས་སྤོང་བ་དང་། །དེ་བཞིན་མཚམས་མེད་བྱེད་པ་སྟེ། །སྣ་ཚོགས་
སྡིག་པ་བྱས་ནས་ཀྱང་། །སྔགས་པ་དངོས་གྲུབ་འདོད་པར་འགྱུར། །གཟེར་ནད་དུག་དང་སྦྱར་བའི་དུག །སྣ་ཚོགས་ནད་ནི་མི་བཟད་པར། །འདི་རྣམས་ཀྱིས་ནི་གཟིར་གྱུར་ནས། །ཞི་བ་ཉིད་ནི་འདོད་པར་འགྱུར། །འདོར་བར་བྱེད་པ་རྨོངས་པ་དེ། །མི་བཟད་སྡིག་པ་བྱས་པ་དང་། །ལོག་
པར་ལྟ་ལ་མཆོག་གཞོལ་རྣམས། །ངན་སོང་གསུམ་དུ་འགྲོ་བར་འགྱུར། །དེ་རྣམས་རྗེས་སུ་གཟུང་བའི་ཕྱིར། །གསང་བ་འདི་ལྟར་བསྟན་པ་ཡིན། །གང་ཞིག་ཡང་དག་ཐོབ་པ་ཉིད། །འདིར་ནི་དེ་བཞིན་གཤེགས་པར་འགྱུར། །གསང་བའི་བདག་པོ་མཁས་རྣམས་ཀྱིས། །ཚུལ་མཆོག་
འདི་ནི་རྙེད་གྱུར་ནས། །དོན་གསལ་ཡང་དག་རྙེད་པ་དང་། །དེ་ཡང་ང་རྒྱལ་དག་ཏུ་ལྟུང་། །དེ་རྣམས་ཏིང་འཛིན་ཞི་ཉིད་དང་། །ཤེས་རབ་ཉིད་ཀྱང་ཤིན་ཏུ་རིང་། །རབ་ཏུ་དགའ་དང་ལྡན་པ་ཡིས། །རྣལ་འབྱོར་པ་ནི་བདག་ཉིད་ཅེས། །མངོན་པའི་ང་རྒྱལ་ལ་རྟག་དགའ། །སྒྱུ་དང་བཅོས་
མའི་ཆོས་དང་ལྡན། །མྱ་ངན་འདས་དང་གཞན་འགྲོ་བ། །ཕན་ཚུན་དག་ནི་སུན་ཡང་འབྱིན། །གསང་སྔགས་སྨྲ་བ་ལ་བརྟེན་ནས། །གཅིག་ལ་གཅིག་ནི་རྩོད་པར་འགྱུར། །དེ་རྣམས་བདུད་ཀྱི་བྱིན་བརླབས་ཀྱིས། །གལ་ཏེ་དངོས་གྲུབ་ཕྲ་ཐོབ་ན། །དེས་ནི་མངོན་པར་ང་རྒྱལ་བས། །
མཁས་པ་སྙམ་དུ་ཤེས་པར་འགྱུར། །ཚོགས་པའི་ནང་དུ་རྩོད་པ་དང་། །ཁྱི་བཞིན་ཁ་ཟས་ལ་སྤྱོད་འགྱུར། །རང་ལས་འབྲས་ལས་བྱུང་བ་ཡི། །ཕན་པ་ལ་ནི་གནོད་པ་བྱེད། །དེ་རྣམས་དགེ་དང་མི་དགེ་རྣམས། །བདག་ཅག་རྣམས་ཀྱི་སྟོབས་ཡིན་ཟེར། །མངོན་སུམ་སངས་རྒྱས་
འདྲ་བ་ཡི། །སློབ་དཔོན་སྨོད་ཅིང་བསྙེན་བཀུར་མེད། །སྐད་ཅིག་གཅིག་གིས་སྡང་བྱེད་ཅིང་། །དེ་ལ་སྐད་ཅིག་གིས་རྗེས་ཆགས། །ཁྱི་དང་ཕག་དང་ཁྭ་རྣམས་ཀྱི། །སྤྱོད་པ་དག་ནི་སྟོན་པར་བྱེད། །དེ་རྣམས་ཕན་ཚུན་རྣམ་འཚེ་བར། །མངོན་པར་དགའ་བར་བྱེད་པར་འགྱུར། །གསང་

བ་འདུས་པ་མི་ཤེས་པར། །དམ་ཚིག་ལ་སོགས་བྱེད་པར་འགྱུར། །གསང་བ་སྲུང་བར་མི་བྱེད་པར། །ཐམས་ཅད་དུ་ནི་སྟོན་པར་བྱེད། །འཇིག་རྟེན་ལ་ནི་སྨད་བྱས་ནས། །གཞན་དག་ལ་ཡང་རབ་གསལ་བྱེད། །བདག་ཉིད་རྩ་བ་མེད་པར་ནི། །དམ་ཚིག་འདས་པར་བྱེད་
པར་འགྱུར། །སྒྲ་བཅས་སྤྲོར་ལྡན་གྱིས་བསྐུལ་བས། །རང་ལ་རང་གི་གླགས་རྙེད་མེད། །དེ་ཉིད་ཡེ་ཤེས་འབྱུང་བ་ཡི། །ཏིང་འཛིན་དེ་ཡིས་ཤེས་མི་འགྱུར། །ཉེས་པ་ཅུང་ཟད་ཙམ་གྱི་ཕྱིར། །མངོན་སྤྱོད་རབ་ཏུ་བྱེད་པར་འགྱུར། །རྣལ་འབྱོར་རབ་སྦྱོར་དམན་བ་ཡི། །སྔགས་པ་རྣམས་
ནི་འགྲུབ་མི་འགྱུར། །ཕྱི་རོལ་བསྟན་བཅོས་ལ་རྟག་དགའ། །དེ་ཡི་སྦྱོར་ལ་གཅིག་ཏུ་མཁས། །རང་གི་དམ་ཚིག་ཡོངས་སྤངས་ནས། །ལྕགས་ཀྱུ་མེད་པ་བཞིན་དུ་སྤྱོད། །སྔགས་དང་ཕྱག་རྒྱའི་སྦྱོར་བ་ཡིས། །དེ་རྣམས་འཚོ་བ་སྒྲུབ་པར་འགྱུར། །གང་དུ་རྙེད་པ་ཐོབ་འགྱུར་བར། །
དམ་པའི་ཆོས་ནི་སྟོན་པར་བྱེད། །དེ་རྣམས་ཡང་དག་སྡུད་བྱེད་པའི། །གསང་བ་དགོངས་པས་བཤད་པ་ཡིན། །དམ་ཚིག་ཉམས་ཏེ་གནས་པ་རྣམས། །འདི་ཡིས་ཐམས་ཅད་དགུག་པར་བྱ། །རང་གི་རྗེས་རིག་མི་ཤེས་ན། །དེ་རྣམས་ཞི་བར་ག་ལ་འགྱུར། །དེ་ནས་རྗེས་སུ་གཟུང་དོན་
དུ། །ཚུལ་འདི་དག་ནི་གྱུར་པ་ཡིན། །དེ་ནས་བཅོམ་ལྡན་དེ་བཞིན་གཤེགས། །གཅིག་ཏུ་འདུས་པར་གྱུར་ནས་སུ། །དེ་བཞིན་གཤེགས་ཀུན་བདག་པོ་ལ། །རང་མཆོད་དེ་ཉིད་དམ་ཚིག་སྤྲིན། །ཡང་དག་འབྱུང་བས་ལེགས་མཆོད་དེ། །ཕྱག་འཚལ་ནས་ནི་འདི་སྐད་གསོལ། །དེ་
བཞིན་གཤེགས་པ་གསང་བ་མཆོག །དེ་བཞིན་གཤེགས་པ་ཀུན་བསྡུས་པ། །འདུས་པ་གཉིས་མེད་རྣལ་འབྱོར་པའི། །ཉམས་དགའ་རྡོ་རྗེ་སྙིང་པོ་འདི། །དེ་ཉིད་བསྡུས་པ་རྣམས་ཀྱི་མཆོག །དེ་ཉིད་བཅོམ་ལྡན་བཤད་དུ་གསོལ། །དེ་ནས་དེ་བཞིན་གཤེགས་ཀུན་ལ། །བཅོམ་
ལྡན་འདས་ཀྱིས་སླར་གསུངས་པ། །གང་ཡང་འདི་ལྟར་གསོལ་འདེབས་པ། །དེ་བཞིན་གཤེགས་རྣམས་ལེགས་སོ་ལེགས། །འདི་ནི་དེ་བཞིན་གཤེགས་རྣམས་ཀྱང་། །ཐེ་ཚོམ་སྐྱེ་བར་བྱེད་ཡིན་ན། །བྱང་ཆུབ་སེམས་གཞན་ཅི་སྨོས་ཞེས། །དེ་བཞིན་གཤེགས་དེ་རྣམས་ལ་གསུངས། །

དེ་ནས་ངོ་མཚར་རྨད་བྱུང་ནས། །ཐེ་ཚོམ་ཐམས་ཅད་གཅོད་མཛད་པའི། །བཅོམ་ལྡན་དེ་བཞིན་གཤེགས་ཀུན་གྱི། །བདག་པོ་ལ་ནི་འདི་སྐད་ཞུས། །བཅོམ་ལྡན་དེ་བཞིན་གཤེགས་ཀུན་གྱི། །ཡོན་ཏན་ཀུན་གྱིས་ཕུལ་ཕྱུང་ཡང་། །གཙོ་བོ་འདིར་ནི་སྟོན་མཛད་པར། །ཇི་ལྟར་སྤྲོ་བ་མངའ་
མ་གྱུར། །བྱིན་གྱིས་བརླབ་པའི་གནས་མཛད་དེ། །དེ་བཞིན་གཤེགས་ཡིད་བདེ་ལ་སོགས། །ཡེ་ཤེས་རྒྱུ་འབྲས་ཐོབ་པའི་ཕྱིར། །དེ་ནི་ཡང་དག་བཤད་དུ་གསོལ། །དེ་བཞིན་གཤེགས་ཀུན་བདག་པོ་ནི། །དེ་རྣམས་ཞུ་བར་མཁྱེན་ནས་སུ། །ཡེ་ཤེས་སྒྲོན་མ་རྡོ་རྗེ་གྲགས། །ཏིང་འཛིན་
ཞེ་སྡང་རིགས་འབྱུང་བ། །གཙོ་བོས་མི་བསྐྱོད་སྙིང་པོ་ནི། །སྐུ་གསུང་ཐུགས་ནི་དཔལ་ལྡན་པས། །དེ་ནས་ཡང་དག་ཕྱུང་བ་ནི། །བཛྲ་དྷྲྀཀ་ཅེས་བྱ་བའི་སྔགས། །དེ་ནས་འདི་ནི་གསུངས་ཙམ་གྱིས། །ཞེ་སྡང་རིགས་བྱུང་ལས་སྐྱེས་པ། །དེ་ནི་རིག་པ་སྐྱེས་བུར་འགྱུར། །མི་བསྐྱོད་རྒྱ་ཆེན་
ཐབས་ཀྱིས་སྦྱོར། །ཞལ་གསུམ་གནག་དང་དཀར་དང་དམར། །བདག་ཉིད་ཆེན་པོ་དེ་ཞལ་ཡིན། །རྡོ་རྗེ་གསུམ་འདིར་དེ་བཞིན་གཤེགས། །བཞུགས་པ་ཡེ་ཤེས་ཞེས་བྱའོ། །དེ་ནས་དེ་བཞིན་གཤེགས་བདག་པོ། །དམ་ཚིག་འབྱུང་རྡོ་རྗེ་ཞེས་བྱ། །ཏིང་ངེ་འཛིན་ལ་གཙོ་བོ་ནི། །
སྙོམས་པར་ཞུགས་པ་ཉིད་དུ་མཛོད། །དེ་ནས་ཛི་ན་ཛིཀ་ཅེས་པའི། །སྙིང་པོ་དེ་བཞིན་ཡང་དག་ཕྱུང་། །དེ་ནས་གསུངས་པ་ཙམ་གྱིས་ཀྱང་། །གཏི་མུག་རིགས་བྱུང་ལས་སྐྱེས་པ། །རིག་བཅས་སྐྱེས་བུར་གྱུར་པ་ནི། །རྣམ་པར་སྣང་མཛད་དེ་བཞིན་གཤེགས། །དཀར་དང་གནག་དང་
དམར་བཅས་པའི། །ཞལ་གྱིས་མདུན་དུ་བཞུགས་པར་གྱུར། །དེ་ནས་རིན་ཆེན་བྱུང་བ་ཡི། །དཔལ་ཞེས་བྱ་བའི་ཏིང་འཛིན་ལ། །སྙོམས་པར་ཞུགས་ནས་བདེར་གཤེགས་ཀུན། །བདེ་དང་ཡིད་བདེར་གྱུར་པའི་ཕྱིར། །ཡིད་བཞིན་ནོར་བུ་རིན་ཆེན་རིགས། །དེ་བཞིན་གཤེགས་ཀུན་
བདག་པོ་འདི། །དེ་ནས་རཏྣ་དྷྲྀཀ་ཅེས་བྱའི། །སྙིང་པོ་དཔལ་ལྡན་དེ་ཚེ་བྱུང་། །དེ་ནས་ཕྱུང་བ་ཙམ་གྱིས་ནི། །རིག་དང་བཅས་པའི་སྐྱེས་བུར་གྱུར། །སེར་དང་དཀར་དང་གནག་པ་ཡི། །ཞལ་དང་རིན་ཆེན་འབྱུང་ལྡན་ནི། །རྡོ་རྗེ་གསུམ་གྱི་བདག་པོ་ཡི། །ལྷོ་ཕྱོགས་ལོགས་སུ་

བཞུགས་པར་གྱུར། །དེ་ཡང་བྱང་དུ་གཟིགས་གྱུར་ཏེ། །མཉམ་ཉིད་ཡེ་ཤེས་ཞེས་བྱའོ། །དེ་ནས་བཅོམ་ལྡན་བདག་པོ་དེ། །རྡོ་རྗེ་གསུམ་གྱི་དམ་ཚིག་བདག །འདོད་ཆགས་ཆེན་པོ་ལས་བྱུང་བ། །རྡོ་རྗེ་ཞེས་ནི་བྱ་བ་ཡི། །ཏིང་ངེ་འཛིན་ལ་སྙོམས་ཞུགས་
ཏེ། །འདོད་ཆགས་ཆེན་པོའི་རིགས་ལས་བྱུང་། །ཨཱ་རོ་ལིཀ་ཅེས་བྱ་སྙིང་པོ། །རྡོ་རྗེ་གསུམ་ལས་དེ་ནས་ཕྱུང་། །དེ་ནས་ཕྱུང་བ་ཙམ་གྱིས་ནི། །དེ་འོག་བཅོམ་ལྡན་གཙོ་བོ་ནི། །རིག་དང་བཅས་པའི་སྐྱེས་བུར་གྱུར། །འཇིག་རྟེན་དབང་པོ་འོད་དང་མཚུངས། །དམར་དང་དཀར་དང་
གནག་པའི་ཞལ། །དཔལ་ལྡན་རིགས་ཆེན་པོ་ཡི་བདག །དེ་བཞིན་གཤེགས་པའི་བདག་པོ་ཡི། །ནུབ་ཕྱོགས་སུ་ནི་བཞུགས་པར་གྱུར། །དེ་ནས་བཅོམ་ལྡན་སྣ་ཚོགས་པ། །དོན་ཡོད་དམ་ཚིག་ཅེས་བྱ་བའི། །ཏིང་འཛིན་རྡོ་རྗེ་ཡང་དག་བྱུང་། །རྡོ་རྗེ་དེ་ལ་སྙོམས་ཞུགས་ནས། །
སྙིང་པོ་མཆོག་གི་མཆོག་ཅེས་བྱའོ། །དམ་ཚིག་རྣམས་ནི་དགུད་པའི་རིགས། །སྙིང་པོ་པྲཛྙཱ་དྷྲྀཀ་ཅེས་པ། །རྡོ་རྗེ་གསུམ་ཞེས་བྱ་ལས་བྱུང་། །དེ་ནས་ཕྱུང་བ་ཙམ་གྱིས་ནི། །དོན་ཡོད་རྡོ་རྗེ་སྦྱོར་བ་ཡི། །དེ་ཉིད་མགོན་པོ་བཅོམ་ལྡན་འདས། །སྐུ་གསུང་ཐུགས་ཀྱི་རྡོ་རྗེ་ཅན། །རིག་
དང་བཅས་པའི་སྐྱེས་བུར་གྱུར། །ལྗང་དང་གནག་དང་དཀར་བའི་ཞལ། །དེ་བཞིན་གཤེགས་པའི་བདག་པོ་ཡི། །བྱང་ཕྱོགས་སུ་ནི་བཞུགས་པར་གྱུར། །ཞེ་སྡ