Kinh tạng Tây Tạng (Kangyur Đại Học) — 081_རྒྱུད་འབུམ།_ཅ

ྡན་འདས་ཐུགས་རྗེས་ཐུགས་བརླན་ཅིང་ཐེ་ཚོམ་ཐམས་ཅད་གཅོད་པ་
ལ་ཕྱག་ན་རྡོ་རྗེས་གསོལ་བ་བཏབ་སྟེ་མཆོག་ཏུ་གསང་བའི་ཚིག་གིས་བཤད་པ་གསུངས་པ་ནི། དབང་བསྐུར་བ་ནི་གཙོ་བོ་སྟེ། །དངོས་གྲུབ་ཐམས་ཅད་རྟག་ཏུ་གནས། །ང་ཡིས་ཇི་བཞིན་དོན་བཤད་ཀྱིས། །དེ་ཕྱིར་ཐོག་མར་ཡང་དག་ཉོན། །ཐོག་མར་སློབ་མ་གང་གི་ཚེ། །བློ་ལྡན་
ཡང་དག་དབང་བསྐུར་ན། །རྫོགས་པའི་རིམ་པའི་རྣལ་འབྱོར་ལ། །དེ་ཡི་ཚེ་ན་སྣོད་དུ་འགྱུར། །ཡང་དག་དབང་བསྐུར་གྱིས་དབེན་ན། །སྒྲུབ་པོས་རྒྱུད་ཀྱི་དོན་ཤེས་ཀྱང་། །སློབ་དཔོན་སློབ་མར་མཚུངས་པར་ནི། །མི་བཟད་དམྱལ་བ་ཆེན་པོར་འགྲོ། །དེ་ཕྱིར་ཡང་དག་བླ་མ་
ནི། །རབ་ཏུ་གུས་པས་བསྙེན་བཀུར་བྱ། །དབང་བསྐུར་ཐོབ་ཅིང་དེ་ཉིད་ཤེས། །བློ་ལྡན་སྙིང་རྗེའི་བདག་ཉིད་ཅན། །ཟབ་ཅིང་རྒྱ་ཆེ་དྲི་མ་མེད། །གནོད་དང་འཚེ་བ་རྣམ་པར་སྤངས། །སྐལ་བཟང་ལུས་ནི་རྫོགས་པ་དང་། །མཚན་དང་དཔེ་བྱད་རྣམ་པར་བརྒྱན། །ཆགས་པ་ཆེ་
ལ་གཅིག་ཏུ་དགའ། །ཡུལ་ལ་ཕྲག་དོག་རྣམ་པར་སྤངས། །བག་ཡོད་རྟག་ཏུ་དགའ་བ་དང་། །རྣལ་འབྱོར་མ་ཡི་མངལ་ནས་སྐྱེས། །རྡོ་རྗེ་ཐེག་པ་གཅིག་ཏུ་མོས། །ཐེག་པ་དམན་ལ་རྒྱབ་ཀྱིས་ཕྱོགས། །དེ་ལ་སོགས་པའི་ཡོན་ཏན་ལྡན། །བླ་མ་སློབ་མས་བསྙེན་
བཀུར་བྱ། །ཡང་དག་བླ་མ་རྙེད་ནས་ནི། །སློབ་མའི་རང་བཞིན་དྲི་མ་རྣམས། །དག་དང་རྟོགས་དང་སྨིན་བྱས་ནས། །ཇི་བཞིན་ཡེ་ཤེས་བཟང་དང་ལྡན། །ཇི་ལྟར་རིན་ཆེན་བདར་བ་དང་། །གསེར་ནི་བསྲེགས་དང་བཅད་པས་བརྟག །དེ་བཞིན་དུ་ནི་སློབ་མ་ཡང་། །ལོ་ནི་བཅུ་
གཉིས་བར་དུ་བརྟག །དེ་ཕྱིར་ཕན་ཚུན་དེ་ལྟ་བུས། །དུས་ཀུན་དུ་ནི་དེ་ལྟར་བརྟག །གཞན་དུ་བགེགས་ནི་འབྱུང་འགྱུར་ཏེ། །དངོས་གྲུབ་འཇོམས་ཤིང་སྡུག་བསྔལ་སྟེར། །དུག་ནི་སྔགས་ཀྱིས་འཇོམས་པ་བཞིན། །སྔགས་ཀྱི་དག་བྱས་བཅུད་ལེན་བྱེད། །དེ་ཕྱིར་འབད་པ་ཐམས་

ཅད་ཀྱིས། །སྔགས་ཀྱི་སློབ་མ་རྟོགས་བྱས་ནས། །བླ་མ་དབང་བསྐུར་ལ་སོགས་ཀྱིས། །དངོས་གྲུབ་ཕྱིར་ནི་ཇི་ལྟའི་དོན། །དེ་ཕྱིར་དབང་བསྐུར་སློབ་མ་ནི། །མ་དག་པ་ཡང་དག་པར་འགྱུར། །རྡོ་རྗེ་སེམས་དཔའ་བདེ་ཆེན་ལ། །དེ་ལ་ལག་ན་རྡོ་རྗེས་ཞུས། །དབང་བསྐུར་ཇི་ལྟར་རྒྱུད་
དུ་ནི། །གཙོ་བོ་རུ་ནི་གསུངས་པ་ལགས། །རྡོ་རྗེ་སེམས་དཔའ་ཐམས་ཅད་མཁྱེན། །ཐེ་ཚོམ་ཐམས་ཅད་གཅོད་མཛད་པ། །དེ་ཁོ་ན་ཉིད་མཁྱེན་པས་ནི། །ལག་ན་རྡོ་རྗེ་ལ་གསུངས་པ། །དོན་དེ་ཇི་ལྟ་བ་བཞིན་དུ། །ང་ཡིས་ཡང་དག་བཤད་ཀྱིས་ཉོན། །དབང་བསྐུར་བ་ཡི་དབྱེ་བ་
ནི། །དང་པོའི་དབང་ནི་གཙོ་བོ་སྟེ། །གཉིས་པ་གསང་བའི་མིང་ཅན་ནོ། །གསུམ་པ་ཀུན་ནས་སྦྱོར་བ་སྟེ། །བཞི་པའི་དོན་ནི་དམ་པའོ། །གཙོ་བོ་དབྱེ་བ་བཅུ་གཅིག་སྟེ། །བཅུ་གཉིས་པ་ནི་གསང་བའོ། །བཅུ་གསུམ་པ་ནི་ཡང་དག་སྦྱོར། །བཅུ་བཞི་པ་ནི་དོན་དམ་སྟེ། །དབང་
བསྐུར་རེ་རེས་རེའོ། །རྣམ་པ་གསུམ་ནི་རྒྱུ་ཡི་དབང་། །བཞི་པ་འབྲས་བུར་ཤེས་པར་བྱ། །དགའ་བ་ལ་སོགས་རིམ་པ་ཡིས། །ཐམས་ཅད་ལ་ནི་ང་ཡིས་ཁྱབ། །མར་ངོ་ཡི་ནི་ཚེས་གསུམ་དང་། །དེ་བཞིན་ཚེས་བཅུ་ཚེས་བཅུ་བཞི། །ཡོན་ཏན་བཟང་ལྡན་སློབ་མ་ལ། །བླ་མས་
ཆོ་ག་བཞིན་དབང་བསྐུར། །ལུས་ཕྲ་ལོ་ནི་བཅུ་དྲུག་ལོན། །གཟུགས་དང་སྐལ་བ་དག་གིས་བརྒྱན། །སྔོ་བསངས་མིག་ནི་ཡངས་པ་དང་། །སྙིང་རྗེའི་བསམ་ལྡན་ཡང་དག་མོས། །ངག་སྙན་དབང་བསྐུར་ཐོབ་པ་དང་། །རྣལ་འབྱོར་རྒྱུད་ལ་ལྷག་པར་མོས། །ཡང་ན་ལོ་ནི་ཉི་ཤུ་
ལོན། །ཉམས་དགའ་བདེ་བར་བྱེད་པ་སྟེ། །དེ་ལས་ལྷག་པར་སྐལ་མེད་འགྱུར། །དེ་ནི་དངོས་གྲུབ་རིང་དུ་བྱེད། །ལྷག་པར་འཇམ་པའི་བུ་མོ་ལ། །ཆུང་མའམ་ཡང་ན་སྲིང་མོའམ། །ཡང་ན་བུ་མོའམ་དད་པ་ཡིས། །བླ་མ་ལ་ནི་དབུལ་བར་བྱ། །གསེར་དང་རིན་ཆེན་གོས་
དང་ནི། །མུ་ཏིག་ཕྲེང་བ་སྣ་ཚོགས་པས། །མཆོད་ནས་བླ་མའི་མདུན་འདུག་ནས། །སློབ་མ་ཡིས་ནི་འདི་སྐད་བརྗོད། །དེང་ནས་བརྩམས་ཏེ་བདག་བྲན་དུ། །གཙོ་བོས་བདག་ནི་མཆོད་པ་བཞེས། །དེ་ལྟའི་རྣམ་པས་མཉེས་ནས་ནི། །བདག་ཉིད་ཀུན་གྱིས་བླ་མ་མཆོད། །

བླ་མའི་ངོ་བོ་རྡོ་རྗེ་འཆང་། །དེ་ཕྱིར་ཡང་དག་བླ་མ་མཆོད། །དེ་ནས་བཅོམ་ལྡན་ཡུམ་ཕྱག་རྒྱ། །ཡང་དག་མཆོད་ནས་བསྟེན་པར་བྱ། །བསྟེན་པ་ལས་ནི་གང་བྱུང་བ། །ལྟུང་བ་སྐལ་བཟང་ཁ་ལ་ནི། །སྦོམ་པོ་ཐ་ལྟག་སྦྱོར་བ་ཡིས། །ཡང་དག་པར་ནི་ལོངས་
སྤྱད་བྱ། །དེ་ལས་སྐྱེས་པའི་ཡེ་ཤེས་ནི། །བདེ་བ་ཆེན་པོ་རང་རིག་པ། །དབྱུང་རྔུབ་པ་ནི་རོ་གཅིག་ཅིང་། །རབ་ཏུ་དགའ་བས་མཆོད་པར་བྱ། །ཧཱུྃ་ཕཊ་སྔགས་ཀྱི་ནོར་བུའི་སྒོར། །བཀོད་དེ་རྡོ་རྗེ་རབ་བསྐྱོད་བྱ། །དགའ་རྣམས་ཇི་ལྟ་བ་བཞིན་དུ། །སྐད་ཅིག་དེ་ལ་སྐྱེས་གྱུར་པ། །
དགའ་བའི་སེམས་ཀྱིས་བདེ་བ་ལ། །རྡོ་རྗེ་བཙུན་མོའི་ཁ་ནས་བརྗོད། །དེ་ཡང་སློབ་མའི་ལག་ཏུ་ནི། །གཏད་ནས་གསལ་བར་འདི་སྐད་བརྗོད། །ཇི་ལྟར་པད་མཆོད་བྱ་བ་ནི། །བྱོས་ལ་ཨེ་བྃ་མཆོག་གི་གདོང་། །གང་ཕྱིར་རྡོ་རྗེ་དབྱིངས་དབང་ཕྱུག །རང་ཉིད་འདི་ཡི་སྙིང་ལ་ཞུགས། །
ཐབས་གཞན་གྱིས་ནི་སངས་རྒྱས་ཉིད། །རྣལ་འབྱོར་པ་ཡིས་ཐོབ་མི་འགྱུར། །ཤིན་ཏུ་ཕྲ་བའི་དངོས་དེ་ཡང་། །བདེ་ཆེན་རྣལ་འབྱོར་པ་ཡིས་རྟོགས། །རབ་ཏུ་འབད་པས་བསྟེན་པར་བགྱིས། །ལྷན་ཅིག་སྐྱེས་དགའི་མཚན་ཉིད་ནི། །དབང་བསྐུར་གཙོ་བོར་གྱུར་པས་ན། །ཐམས་
ཅད་ཇི་ལྟ་བ་བཞིན་ཐོབ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སློབ་དཔོན་དང་སློབ་མ་བརྟག་པ་དང་དབང་བསྐུར་བའི་ལེའུ་སྟེ་གཉིས་པའོ།། །།དེ་ནས་དེ་ཉིད་གཞན་ཡང་ཉོན། །རྡོ་རྗེ་ཕྲེང་བའི་དོན་གསལ་བ། །རྒྱུད་རྣམས་ཀུན་དུ་སྦས་པ་ནི། །
དྲི་བ་གཞན་ལ་བརྗོད་མི་བྱ། །རྡོ་རྗེ་ཕྲེང་བ་ཞེས་བྱའི་མིང་། །དེ་ཡང་ས་ནི་བཅུ་གསུམ་པ། །དགའ་བ་བཞི་ཡི་དོན་གྱི་གནས། །ཐམས་ཅད་སྟོང་པ་དགའ་བ་སྟེ། །ངག་གི་སྤྱོད་ཡུལ་རྣམས་ལས་འདས། །གཉིས་པ་ཐམས་ཅད་རྣམ་པར་སྤངས། །སྐལ་བཟང་རྣལ་འབྱོར་ཀུན་གྱི་
མཐའ། །རྣལ་འབྱོར་མ་ཡི་ངག་གི་ཡུལ། །སྟོང་ཉིད་ཡེ་ཤེས་རྡོ་རྗེ་དང་། །རྡོ་རྗེ་ཕྲེང་བ་ཞེས་བཤད་དོ། །སྟོང་ཉིད་རྡོ་རྗེ་གསང་པདྨ། །རྩ་ནི་རྡོ་རྗེ་དབྱིངས་དབང་ཕྱུག །ཡེ་ཤེས་མཆོག་ཏུ་བདེ་བ་ཆེ། །ལྷན་ཅིག་སྐྱེས་དགའ་རྨད་བྱུང་བ། །རྡོ་རྗེ་དེ་ཡང་རྣམ་རྟོག་རྣམས། །

འབིགས་པར་བྱེད་པར་ཡོངས་སུ་གྲགས། །ཕྲེང་བ་དེ་རྣམས་ཀྱི་ཡང་རྒྱུན། །བྱང་ཆུབ་སེམས་ཀྱི་རྡོ་རྗེ་རྣམས། །མི་ཕྱེད་པས་ནི་རྡོ་རྗེར་གསུངས། །རྒྱུད་རྣམས་ཀུན་དུ་སྦས་པ་ནི། །གང་ཡང་རུང་བས་བརྗོད་མི་བྱ། །དེ་ནི་དབུགས་སུ་ཡོངས་སུ་གྲགས། །ཕྲེང་བ་རྒྱུན་ནི་མི་འཆད་པར། །
དགའ་བ་རབ་འབབ་བདག་ཉིད་ཀྱིས། །རྣམ་རྟོག་རླུང་ཀུན་འབིགས་པར་བྱེད། །རླུང་ལ་འབིགས་པར་མི་ནུས་སོ། །ཉིན་དང་མཚན་མོ་རྟག་ཏུ་ནི། །བརྒྱ་དང་བརྒྱད་ལྷག་གསལ་བར་ཡང་། །རྣམ་རྟོག་རང་བཞིན་རླུང་རྣམས་ནི། །འཆར་བ་དང་ནི་འཇོམས་པ་དག །ཇི་ལྟ་
བ་བཞིན་རབ་དབྱེ་ཡིས། །རླུང་རྣམས་ཀྱི་ནི་མིང་ཉོན་ཅིག །བཏང་བཟུང་དང་ནི་དུང་ཕྱུར་དང་། །མྱོས་པ་དང་ནི་བློ་ངན་དང་། །བསིལ་བྱེད་དང་ནི་གཡའ་བ་དང་། །ངར་སྣབས་དང་ནི་སྟ་རེ་དང་། །གཟེགས་པ་ཆུ་སྲིན་ཛ་ཤ་དང་། །རྣམ་པར་གཙིགས་དང་མྱོས་པའི་དུས། །
འདོད་མྱོས་ཆུ་བ་ཆུ་སྲིན་དང་། །སྣ་ཚོགས་སྐྱེད་དང་འདུད་པ་དང་། །སྙེམས་དང་རྔ་དང་སྒྲ་སྒྲོགས་དང་། །རླུང་ལྷ་དང་ནི་གནད་འབིགས་དང་། །མེ་དང་དུས་དང་ཅི་བགྱི་དང་། །རྡོ་རྗེ་མཆོག་སྦྱིན་ཙུ་ཏ་དང་། །སྦྲ་མ་དང་ནི་ཟླ་བའི་འོད། །ཀམ་པོ་ཛ་དང་རལ་པ་ཅན། །ཡུངས་
ནག་རབ་བཀྲམ་དུས་འགུགས་དང་། །སྡིག་པ་དང་ནི་གཡོན་ཅན་སྟེན། །གྲིམས་མོ་དང་ནི་མགྲིན་པ་དང་། །གུན་སེལ་མཆོག་སྟེར་སྨྱོ་བྱེད་དང་། །ང་རྒྱལ་མཚོ་དང་ཚོགས་བདག་དང་། །རྩངས་པ་དང་ནི་ས་ཡི་བློ། །ཐེག་པ་བཟང་དང་མཆོག་ཏུ་སྐྱེས། །དྲི་མེད་ཕྲུ་གུ་ཉི་མ་
དང་། །གསལ་བྱེད་དང་ནི་ཉི་མ་གནོན། །སྟོབས་བཞིན་ང་རོ་དང་ནི་དུས། །སྡོམ་པ་དང་ནི་མཆོངས་ནས་འགྲོ། །སྦྲང་མ་ཁྱི་དང་མཚན་མ་དང་། །ཐོད་དང་སྒུར་པོ་དྲང་པོ་དང་། །ས་དང་ས་ལ་འགྲོ་མ་དང་། །བྲམ་ཟེ་དང་ནི་སྣ་འགྱུར་གནས། །མ་མོའི་རིགས་དང་ལྕེ་བསྐྱོད་
པ། །མི་སྨྲ་དང་ནི་རྔ་སྒྲའི་སྤྲིན། །དགའ་བར་བྱེད་དང་མིག་ཡངས་དང་། །དྲི་མེད་འོད་སྲུང་ནེ་ཙོ་དང་། །སྣ་ཚོགས་མཆུ་དང་མིག་མཉམ་དང་། །མཛེས་དང་ཆོས་ཀྱི་དབྱིག་པ་དང་། །འགྲོ་ཀུན་སྙིང་སྟོབས་བརྟན་པ་དང་། །ཟ་ཕོད་བོང་བུ་སྙོམ་ལས་དང་། །ཁ་གདངས་

སྒྲ་ཆེན་སྟོབས་ཀྱིས་རྩེ། །རྩ་བྲན་དབང་བྱེད་གཡོ་སྒྱུ་ཅན། །གཙོ་བོ་ཆེ་དང་རྟག་ཏུ་དགའ། །གློག་ཕྲེང་དང་ནི་དགའ་བྱེད་དང་། །དབུགས་དབྱུང་ར་ག་ལྕེ་དང་ནི། །བདེ་མཆོག་ཨུ་དུམ་བཱ་ར་རྨོངས། །པདྨའི་དྲ་བ་པདྨ་བསྐོར། །དགྲ་སྟ་རྨ་བྱ་རླུང་དང་ནི། །རྡོ་རྗེ་
དབང་ཕྱུག་རླུང་གི་མིང་། །དེ་ལྟར་ང་ཡིས་བསྟན་པ་ཡིན། །བཅོམ་ལྡན་དྲིས་པའི་རླུང་རྣམས་ཀྱི། །གནས་རྣམས་ཀྱི་ནི་དབྱེ་བ་ཡིས། །དེ་དག་གང་ལས་ལྡང་བ་དང་། །མཆེད་པ་རྣམས་སུ་བགྱིད་པ་ལགས། །བཅོམ་ལྡན་རྡོ་རྗེ་ཅན་གྱིས་གསུངས། །རླུང་གི་ཁམས་ཀྱི་
མཚན་ཉིད་ནི། །འཁོར་ལོ་དྲུག་ལ་ཁྱབ་པའི་རླུང་། །ཆོས་ཀྱི་འཁོར་ལོ་རྟག་ཏུ་གནས། །སྲོག་ཅེས་བྱ་བས་འགྲོ་ལ་ཁྱབ། །རྣམ་རྟོག་མེད་པ་མཚན་ཕྱེད་ན། །ནམ་མཁའ་མཆོག་ལས་ཤར་ནས་ནི། །རླུང་གི་རང་བཞིན་འཇོམས་པར་བྱེད། །རླུང་དེ་དགུ་ཡི་རྣམ་པར་
རྒྱུ། །ཆོས་ཀྱི་འཁོར་ལོའི་ཆ་ན་གནས། །མཚན་ཕྱེད་དུས་ནས་བརྩམས་ནས་ནི། །འཁོར་ལོ་དྲུག་ལ་དགུ་བདག་ཉིད། །ཉི་མ་ཕྱེད་ཀྱི་མཐའ་རུ་ནི། །རླུང་རྣམས་ཀྱང་ནི་ལྡང་བར་བྱེད། །ཉི་མ་ཕྱེད་ནས་བརྩམས་ནས་ནི། །འཁོར་ལོ་དྲུག་ལས་དགུ་བདག་ཉིད། །
མཚན་ཕྱེད་ཀྱི་ནི་དུས་ཀྱི་མཐར། །རླུང་རྣམས་གསལ་བར་རྒྱུ་བ་ན། །དེ་ཉིད་གནས་ཀྱི་དབྱེ་བ་ཡིས། །སྣ་ཚོགས་པ་ཡི་རྟོག་པར་འགྲོ། །རྣམ་པར་རྟོག་པ་རྣམས་ཕྱེ་ནས། །དེ་དག་མིང་རྣམས་བཤད་པར་བྱ། །འདོད་ཆགས་ཞེ་སྡང་གཏི་མུག་དང་། །རྒྱགས་དང་ང་
རྒྱལ་མངོན་པར་ཞེན། །ཕྲག་དོག་ཁྲོ་དང་སེར་སྣ་དང་། །གཡོ་དང་སྒྱུ་ལ་ཆ་ལུགས་ངན། །བློ་རྒོད་བརྐམ་ཆགས་གཉིད་དང་ནི། །ཐེ་ཚོམ་དང་ནི་ངར་འཛིན་དང་། །དགའ་དང་ཆགས་བྲལ་དྲེགས་པ་དང་། །འཆབ་དང་སྲེད་དང་བག་ཆགས་དང་། །སྒྱུ་དང་རྨོངས་དང་འདོད་ཆེན་
དང་། །རྩོད་དང་རྩེ་འཇོ་སྤྱི་བརྟོལ་དང་། །ཚུལ་འཆོས་དྲེགས་དང་ཀུན་ནས་གདུངས། །རྣམ་འགྱུར་མ་ཞི་ཤེས་བཞིན་མེད། །བེམས་པོ་ལོག་པའི་ང་རྒྱལ་དང་། །འགྱོད་དང་ཁྲེལ་ནི་མེད་པ་དང་། །གུས་པ་མེད་དང་ཆེས་པ་མེད། །བློ་དམན་ངོ་ཚ་མེད་དང་འཆིང་། །

ངོ་ཚ་ཤེས་དང་ངོ་ཚ་དང་། །མི་སྟེར་བ་དང་མྱ་ངན་དང་། །ཡིད་གཉིས་དང་ནི་རློམ་སེམས་མེད། །བསྒྲིམས་དང་ཐེ་ཚོམ་ངལ་བ་དང་། །དབང་དང་འཁྲུལ་པའི་སྙིང་སྟོབས་དང་། །སྙམ་སེམས་པ་དང་བརྒྱལ་བ་དང་། །ཐིམ་པ་དང་ནི་མི་སྲུན་དང་། །གྱ་གྱུ་སྙོམས་དང་མྱོས་
པ་དང་། །རིག་བྱེད་མིན་དང་བག་ཡོད་དང་། །གནས་ངན་ལེན་དང་ཉམ་ཆུང་ཉིད། །ཡིད་མི་བདེ་དང་ལྷག་པར་རྟོག །སྐྲག་དང་རྨུགས་དང་གཉིད་དང་ནི། །བརྐམ་ཆགས་རོལ་པ་ཁྲུང་ཁྲུང་དང་། །འཚེ་བ་ལེ་ལོ་ཡོན་པོ་ཉིད། །བསམ་དང་སྤྱོད་དང་ཞུམ་པ་དང་། །
ཀུན་རྫོབ་དེ་ཉིད་དོན་ཡོད་དང་། །སྟེར་དང་དགའ་བའི་འདོད་པ་དང་། །འཇིགས་དང་འདར་དང་ཕྲ་བདག་ཉིད། །གསལ་དང་རྣམ་གསལ་ལྷད་འཇུག་དང་། །འབྲེལ་དང་རྟག་པའི་དེ་ཉིད་དང་། །རུས་སྦལ་ངོམས་མེད་གནོད་པ་དང་། །མི་གསལ་བ་དང་ཡིད་དུ་འོང་། །གནས་
མེད་མང་དུ་སྨྲ་བ་དང་། །བདག་ཉིད་སྐྱེས་བུ་ཉིད་དང་ནི། །ཡ་མཚན་དགའ་དང་སྐྱེ་བོ་ངན། །དམན་པའི་དེ་ཉིད་སྡུག་བསྔལ་གསུམ། །འཁོར་བ་ལ་ནི་ཆགས་པ་དང་། །རྟག་ཏུ་བརྒྱ་དང་བརྒྱད་ལྷག་པ། །ཉིན་དང་མཚན་མོར་རྟག་ཏུ་ནི། །རླུང་གི་རང་བཞིན་རྒྱུ་བ་ཡིན། །
རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རྡོ་རྗེ་ཕྲེང་བའི་ཚིག་དབྱེ་བའི་ལེའུ་སྟེ་གསུམ་པའོ།། །།དེ་ནས་རྡོ་རྗེ་གསུམ་ཉི་མ། །གསང་བའི་པདྨ་ཁ་འབྱེད་པ། །བདེ་བ་ཆེན་པོའི་གོ་འཕང་བཞུགས། །འདུས་པའི་མཆོག་དོན་རབ་གསུངས་པ། །
འདུས་པ་འདྲེས་པ་ཞེས་ནི་བཤད། །འདྲེས་པ་ང་ཡིས་ཁྱོད་ལ་བཤད། །འཁོར་ལོ་བཞི་དང་ཐ་མི་དད། །སྔགས་ནི་ལྷན་ཅིག་ཆོ་ག་བཞིན། །དཔའ་བོ་རྣལ་འབྱོར་མ་སྦྱོར་བ། །གང་ཚེ་གསང་བའི་རྩ་གཉིས་ནི། །ཡང་དག་སྦྱོར་བ་རེག་གྱུར་པ། །དེ་ཚེ་ནམ་མཁའ་རྣམ་
རྒྱས་ཉིད། །ནམ་མཁའ་ལས་ནི་སྐྱེས་པའི་རླུང་། །དེ་ཡིས་མེ་ནི་རབ་ཏུ་འབར། །རྩ་ནི་སྟོང་ཕྲག་བདུན་ཅུ་གཉིས། །རྩ་རྣམས་རབ་སད་གཟི་བརྗིད་ཀྱིས། །བདེ་བ་ཀུན་གྱི་གོ་འཕང་མཆོག །བདེ་བ་ཆེན་པོའི་འཁོར་ལོར་ཁྱབ། །བདེ་བ་ཆེན་པོའི་བྱང་ཆུབ་

སེམས། །རྣམ་པར་ཞུ་ནས་རྩར་གནས་པར། །རྡོར་གསུམ་རང་བཞིན་གཅིག་འགྱུར་ཕྱིར། །ཁམས་རྣམས་རོ་གཅིག་གྱུར་པ་དང་། །ཕུང་པོ་རྣམས་ནི་ཡོངས་ཟད་དང་། །ངལ་བསོ་བ་ལ་རླུང་རྣམས་ནི། །དགའ་བ་རྣམས་ནི་ཡང་དག་སྐྱེ། །
དེ་ནས་བྱང་ཆུབ་སེམས་ཀྱང་ནི། །གནས་ཀུན་ནས་ནི་ཞུ་གྱུར་ནས། །ངོ་བོ་གཅིག་ཏུ་གྱུར་པ་དང་། །རྩ་ནི་གཅིག་གི་འབྲས་བུ་ནི། །རོ་གཅིག་ཏུ་ནི་གྱུར་པ་ལ། །འདྲེས་པ་ཞེས་ནི་དེ་ལ་གསུངས། །ཕུང་པོ་ཁམས་དང་དབང་པོ་དང་། །ཡུལ་རྣམས་སུ་ནི་སྦས་པ་རྣམས། །
རྣམ་རྟོག་ཀུན་ནས་ཟད་པ་ལས། །བདེ་བ་ཆེན་པོ་ཡང་དག་སྐྱེ། །རོ་གཅིག་པ་ནི་ངལ་བསོ་བ། །དེ་ནི་འདུས་པ་འདྲེས་པ་སྟེ། །དེ་ཁོ་ན་ཉིད་མཆོག་གསང་བ། །རྡོ་རྗེ་སེམས་དཔའི་གོ་འཕང་གསུངས། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་
འདུས་པའི་ཚིག་ལྷག་པར་བཤད་པའི་ལེའུ་སྟེ་བཞི་པའོ།། །།དེ་ནས་གཞན་ཡང་དེ་ཉིད་ཉོན། །སྟོང་ཉིད་དོན་ནི་རབ་རྒྱས་པ། །སྟོང་པ་ཉིད་ནི་ཆོས་རྣམས་ཀུན། །ནང་དུ་ཁྱབ་པའང་ཆོས་ཉིད་དེ། །དེ་ཉིད་ཡང་དག་ཤེས་པ་ནི། །དེ་བཞིན་ཉིད་དང་རྣམ་མི་རྟོག །
བདག་དང་གང་ཟག་ཆོས་རྣམས་ནི། །བདག་མེད་རང་བཞིན་གཅིག་པ་ཉིད། །སྟོང་པ་ཉིད་དང་རང་རིག་དང་། །ཐམས་ཅད་བདག་ཉིད་རྟག་བཞུགས་པ། །རྣལ་འབྱོར་གཅིག་པུས་རྟོགས་པ་སྟེ། །རྟོག་གེ་པ་ཡི་སྤྱོད་ཡུལ་མིན། །ཆོས་རྣམས་ཐམས་ཅད་མདོར་བསྡུས་
པ། །འཁོར་ལོ་དྲུག་ཏུ་རྣམ་པར་བརྗོད། །དེ་ནས་ནང་དུའང་ཁྱབ་པ་ནི། །རྩ་ཡི་འཁོར་ལོ་ལེགས་རྒྱས་པ། །དེ་ནི་ནམ་མཁའ་ཁྱབ་ཅིང་ཕྲ། །ཁྱབ་བྱེད་ཞི་བའི་མཚན་ཉིད་ཅན། །དམིགས་པ་མེད་ཅིང་རྟེན་པ་མེད། །གཟུགས་མེད་ཉོན་མོངས་མེད་པ་དང་། །རྣམ་པར་
མི་རྟོག་མཆོག་ཏུ་ཞི། །རང་བཞིན་མེད་ཅིང་དྲི་མ་མེད། །གཉིས་སུ་མེད་ཅིང་བྱ་བ་མེད། །གཟུང་དང་འཛིན་པ་རྣམ་པར་སྤངས། །དུས་དང་དཔེ་ལས་འདས་པ་སྟེ། །ངག་གི་ལམ་གྱི་སྤྱོད་ཡུལ་བྲལ། །ཆོས་ཉིད་ཆོས་ནི་ཐམས་ཅད་ཀྱིས། །ཇི་ལྟ་བ་བཞིན་མངོན་པར་

བརྗོད། །དངོས་དང་དངོས་མེད་རྣམ་པར་བྲལ། །དགེ་དང་མི་དགེའི་སྲིད་ལས་གྲོལ། །དེ་ནི་ཀུན་ནས་བསྒྲིབས་པ་མེད། །ནམ་མཁའ་ལྟ་བུར་མཆོག་ཏུ་ཁྱབ། །ཆོས་རྣམས་ཇི་ལྟ་བ་བཞིན་སྐྱེ། །དེ་ནི་དེ་བཞིན་ཉིད་ཅེས་བརྗོད། །གང་ནས་ཀྱང་ནི་མ་འོངས་ཤིང་། །གང་དུ་ཡང་
ནི་འགྲོ་བ་མེད། །རྨོངས་དང་འཁྲུལ་པ་གཅིག་པུ་ལས། །དེ་ནི་རབ་ཏུ་སྤྲོ་བར་སྣང་། །བདེ་བ་དང་ནི་སྡུག་བསྔལ་སྤངས། །འདོད་ཆགས་ཞེ་སྡང་སོགས་མི་གོས། །འཁྲུལ་དང་རྣམ་པར་འཁྲུལ་པར་འབྲེལ། །རྟོག་པ་དང་བྲལ་དྲི་མ་མེད། །བདག་དང་སྲོག་དང་སྐྱེ་བ་
པོ། །སྐྱེས་བུ་དེ་བཞིན་གང་ཟག་དང་། །ཤེད་ལས་སྐྱེས་དང་ཤེད་བུ་དང་། །བྱེད་པ་པོ་དང་ཚོར་བ་པོ། །ཤེས་པ་པོ་དང་མཐོང་བ་པོ། །སྒྲོ་འདོགས་པ་ཡི་རྣམ་པར་སྤངས། །ཕུང་པོ་སྐྱེ་མཆེད་ཁམས་ལ་སོགས། །རྣམ་ཤེས་དང་ནི་གཟུང་བ་ཡིས། །སྒྲིབ་པ་མེད་
ཅིང་མཆོག་ཏུ་ཕྲ། །ནམ་མཁའ་མཆོག་ལ་ཡང་དག་གནས། །དེ་ལྟར་མ་ལུས་སྟོང་ཉིད་དོན། །བརྗོད་དང་བརྗོད་བྱའི་དོན་དང་བྲལ། །མིང་ཙམ་གཅིག་པུ་ཁོ་ན་ཡང་། །རང་བྱུང་མཆོག་ཏུ་རྨད་བྱུང་བའོ། །བརྗོད་པ་ཡི་ནི་ཀུན་རྫོབ་ཏུ། །དེ་ནི་ང་ཡིས་ཡང་དག་བཤད། །
རང་རིག་ཤིན་ཏུ་ཕྲ་བའི་ཕྱིར། །དེ་ཁོ་ན་ཉིད་མཐོང་བ་མེད། །བདག་ཉིད་རང་གི་ངོ་བོར་རིག །ཕ་རོལ་གཞན་གྱི་སྤྱོད་ཡུལ་མིན། །དེ་ནི་རང་རིག་པར་བཤད་དོ། །ཆོས་ཀུན་གནས་ནི་ཞི་བའོ། །རྣམ་རྟོག་གིས་འཁྲུལ་རྟོག་གེ་གང་། །མི་ཤེས་པ་ཡི་རྨོངས་པ་རྣམས། །
དོན་དམ་པར་ནི་མི་ཤེས་ཤིང་། །ཀུན་རྫོབ་དགྲ་ཡི་མཛོད་འཛིན་པ། །ཡེ་ཤེས་མཆོག་ནི་མི་ཤེས་ཤིང་། །རྟོག་གེ་སྟོང་ཉིད་སྨྲ་བར་བྱེད། །རྣལ་འབྱོར་བསམ་གཏན་རྣལ་འབྱོར་པས། །དེ་ནི་མཆོག་ཏུ་ཕྲ་བར་སྤྱོད། །སྟོང་ཉིད་ཡང་དག་ནམ་མཁའ་ཆེ། །ཤེས་དང་
ཤེས་བྱ་རྣམ་པར་སྤངས། །རྟོག་པའི་རྣམ་པ་རྣམས་དང་བྲལ། །སྟོང་པ་ཉིད་ཀྱི་འཁོར་ལོར་བརྗོད། །ཕུང་པོ་ལྔ་ཡི་བདག་ཉིད་ལུས། །འཁོར་ལོ་དྲུག་གི་ཕུག་ནང་ན། །ཟླ་བ་ཕྱེད་པའི་ཆ་ལྟ་བུ། །སྟོང་ཉིད་རླུང་གི་འཁོར་ལོར་གནས། །ཕྱེད་མིན་གང་བ་མེད་པ་

དང་། །ཇི་ལྟར་བག་ཆགས་ཆུ་ཟླ་བཞིན། །རླུང་གི་འཁོར་ལོ་སྲོག་ཏུ་བཤད། །མཚན་ཕྱེད་སྐད་ཅིག་མ་ལ་འཆར། །དེ་ལྟར་ཡང་དག་བསྒོམ་པ་ནི། །འདི་ནི་སྟོང་ཉིད་སྒོམ་བྱེད་པའོ། །དོན་དམ་གཉིས་མེད་རྣལ་འབྱོར་གྱིས། །ཡང་ན་རྒྱུ་འབྲས་སྦྱོར་
བའི་ཕྱིར། །དེ་ནི་རང་བཞིན་འགྲུབ་པར་བསྒོམ། །དོན་དམ་རང་གི་ངོ་བོར་ནི། །ཀུན་རྫོབ་ཀྱང་ནི་དེ་བཞིན་དུ། །བསྒོམས་པས་འཁོར་བ་འཇོམས་པར་འགྱུར། །ཇི་ལྟར་ཏིལ་ལ་ཏིལ་མར་ནི། །གནས་པ་ཉིད་ལ་མཐོང་མི་འགྱུར། །དེ་བཞིན་ལུས་ལ་སྟོང་པ་ཉིད། །
གནས་ཀྱང་བསྒྲིབས་པས་མཐོང་བ་མེད། །བླ་མའི་ཞལ་ལས་འདི་ཤེས་པར། །ཡང་དག་རིག་པས་ཀུན་རྫོབ་སྤངས། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སྟོང་པ་ཉིད་ཀྱི་དོན་བསྟན་པའི་ལེའུ་སྟེ་ལྔ་པའོ།། །།དེ་ནས་གཞན་ཡང་བཤད་
ཀྱིས་ཉོན། །ཐིག་ལེའི་དབྱེ་བ་བླ་ན་མེད། །འཇིག་རྟེན་ཐིག་ལེ་དབྱེ་བས་དབེན། །འཁོར་བར་ཡང་དང་ཡང་དུ་འཁོར། །མཛོད་སྤུའི་དབུས་ན་གནས་པ་ནི། །ཐིག་ལེ་རླུང་དུ་ཡང་དག་བཤད། །སྔགས་ཀྱི་དེ་ཉིད་ཀྱིས་ནི་འབྱེད། །རྣལ་འབྱོར་མདུད་པ་བཀྲོལ་ནས་ནི། །རླུང་
གི་དེ་ཉིད་རིག་པ་དེ། །མཆོག་ཏུ་འབྱེད་པའི་སྦྱོར་བ་ཡིས། །སྦྱོར་བ་དེ་ཡང་མི་ཤེས་པར། །རླུང་དང་སྔགས་ཀྱི་རྣལ་འབྱོར་གྱིས། །བརྗོད་དང་བརྗོད་བྱའི་དཔེ་ལས་འདས། །མིག་གསལ་ལོག་པར་མཐོང་རྣམས་ཀྱིས། །བསམ་གཏན་བསྒོམ་བྱ་དང་བྲལ་བའི། །
སངས་རྒྱས་རྣམས་ནི་ཐོབ་པ་དཀའ། །རྣལ་འབྱོར་མ་ཡི་དྲིན་གྱིས་ནི། །ཞལ་ནས་ཞལ་དུ་བརྒྱུད་ནས་གནས། །བཅོམ་ལྡན་བདེ་བ་ཆེན་པོ་ལ། །རྡོ་རྗེ་སེམས་དཔས་སླར་ཞུས་པ། །འགྲོ་བའི་མགོན་གྱིས་བསྟན་དུ་གསོལ། །ཐིག་ལེའི་དབྱེ་བ་རིག་བཅས་པ། །རྣལ་འབྱོར་
མཆོག་ནི་གང་གིས་ཤེས། །སྦྱོར་བས་མདུད་པ་འབྱེད་པར་བྱེད། །ཁམས་གསུམ་པ་ཡི་འགྲོ་བ་འདི། །མྱུར་དུ་དངོས་གྲུབ་མཆོག་ཏུ་འགྲོ། །དེ་སྐད་ཞུས་ནས་རྡོ་རྗེ་ཅན། །རྡོ་རྗེ་དབང་ཕྱུག་ལ་གསུངས་པ། །མཆོག་ཏུ་གསང་བ་འདི་ཉིད་ནི། །གང་དུའང་གསལ་

བར་མ་གསུངས་པ། །ཐིག་ལེའི་དབྱེ་བ་དེ་ཡང་ནི། །ང་ཡིས་བཤད་ཀྱིས་དེ་ཉིད་ཉོན། །སྙིང་གི་པད་སྦུབས་ནམ་མཁའ་ལ། །ཡེ་ཤེས་རྡོ་རྗེ་རྟག་ཏུ་བཞུགས། །སྟེང་དང་འོག་ལ་བརྟེན་ནས་ནི། །སྲོག་དང་ཐུར་སེལ་རླུང་ཆེན་གནས། །དེ་ཡང་དབྱེ་བར་དཀའ་བ་ཡི། །
དབུས་སུ་མདུད་པ་གསུམ་གྱིས་དཀྲིས། །དེ་ཡིས་མཆོག་དང་བཅོམ་བྱས་པས། །སྟེང་དུ་འགྲོ་བ་ཐོབ་མི་བྱེད། །དེས་བཅོམ་སླར་ཡང་རྣམ་ལྔ་རྒྱུ། །སྲོག་དང་ཐུར་སེལ་གྱེན་རྒྱུ་དང་། །ཁྱབ་བྱེད་དང་ནི་མཉམ་གནས་ཉིད། །རྩེ་མོ་ལྔ་ལས་རྒྱུན་དུ་ནི། །རྩ་ལྔ་ལ་ནི་ཡང་དག་
བརྟེན། །རྒྱགས་དང་རྣམ་པར་རྒྱས་པ་དང་། །མྱོས་དང་བཏུང་དང་མཛའ་བོ་སྟེ། །དེ་དག་རྩ་ནི་ལྔར་ཤེས་བྱ། །རྡོ་རྗེའི་འོག་ཏུ་གསལ་བར་ཁྱབ། །སྟེང་གི་སྲོག་གི་དབུས་ན་ཡང་། །རྡོ་རྗེའི་ལྟེ་བའི་མཁའ་དབྱིངས་འགྲོ། །སྲོག་ཅེས་བྱ་བའི་རླུང་ཆེན་པོ། །ལྟེ་བ་
མདུད་པ་དང་ཕྲད་པས། །བཅོམ་ནས་ཀྱང་ནི་རྣམ་ལྔར་རྒྱུ། །རྩེ་མོ་རྣམས་ལ་རྩ་ལྔར་ནི། །ཟླ་བའི་ཆ་དང་སྣ་དང་ནི། །བསྙེན་བཀུར་ལྐོག་ཤལ་མཆིན་པ་སྟེ། །རྩ་ནི་ལྔ་ཡི་མིང་ཡིན་ནོ། །རྩ་ནི་ལྔ་ལས་རྒྱུ་བའི་རླུང་། །ཀླུ་དང་རུས་སྦལ་རྩངས་པ་དང་། །ལྷ་སྦྱིན་དང་ནི་གཞུ་
ལས་རྒྱལ། །དེ་ལྟར་རྩ་དེ་དང་བཅས་པ། །ལུས་ཀྱི་ཐུར་དུ་འགྲོ་བས་ན། །སྤྲུལ་པའི་འཁོར་ལོའི་རྩ་རྣམས་ནི། །ཡང་དང་ཡང་དུ་བསྐུལ་བྱས་ནས། །བསྐུལ་བས་ཀྱང་ནི་རྒྱས་པ་ན། །གཏི་མུག་ཆེན་པོས་དབང་དུ་བྱེད། །དེ་སྟེང་ཆོས་ཀྱི་འཁོར་ལོ་ན། །གནས་
པའི་རྩ་ནི་བསྐུལ་བྱས་ནས། །དེ་རྣམས་ལྷན་ཅིག་རྩ་དེ་དག །ཞེ་སྡང་གིས་ནི་དབང་དུ་བྱེད། །ཡང་དག་བསྐུལ་ནས་དེ་སྟེང་གི། །ལོངས་སྤྱོད་མཆོག་ཏུ་ངོ་མཚར་སྐྱེ། །རྩ་དེ་རྣམས་དང་ལྷན་ཅིག་ཏུ། །ཆགས་པ་ཆེན་པོས་དབང་བྱས་ནས། །བསྐུལ་བ་དང་ནི་དེ་སྟེང་གི། །སྤྱི་བོའི་
འཁོར་ལོའི་བདེ་ཆེན་དུ། །རྩ་དེ་རྣམས་དང་ལྷན་ཅིག་ཏུ། །བྱང་ཆུབ་སེམས་ཀྱིས་གང་བར་བྱེད། །རྣམ་རྟོག་རྣམ་པར་རྒྱུ་བྱེད་ཅིང་། །སྣ་ཚོགས་དབྱེ་བ་ཐམས་ཅད་ལས། །སྟེང་མ་རྣམས་ཀྱང་ཐུར་དུ་འགྲོ། །སྲོག་གིས་རབ་ཏུ་བཅོམ་ནས་ནི། །དེ་དག་ཐམས་ཅད་རྡོ་རྗེའི་རྩེར། །ཞུགས་

ནས་ཐུར་དུ་ཁ་བལྟས་པའོ། །དེ་ཡང་ཐུར་དུ་མི་འགྲོ་སྟེ། །མ་རིག་མདུད་པའི་འཁོར་ལོ་ནི། །རྣམ་པར་ཤེས་པའི་ཤིང་རྟའི་རླུང་། །དེ་ནི་བག་ཆགས་དང་འདྲེས་པས། །མིག་དང་རྣ་བ་དེ་བཞིན་སྣ། །ལྕེ་སྟེ་རྣམ་པར་ཤེས་པ་བཞི། །རྩེ་མོ་བཞི་ནས་ཕྱུང་
ནས་ནི། །བག་ཆགས་རྣམ་ཤེས་དང་འདྲེས་ནས། །རྣམ་ཤེས་དབང་པོ་ལྷན་ཅིག་ཏུ། །དོན་ནི་རབ་ཏུ་རྒྱས་པར་བྱེད། །སླར་ཡང་ལམ་དེ་ཉིད་ནས་ནི། །ཇི་ལྟ་བ་ཡི་རིམ་པས་འཇུག །དེ་ཡི་དངོས་ཉིད་དེ་སྦྱོར་བས། །རྣམ་ཤེས་བསྟེན་པའི་སྐད་ཅིག་ལ། །དེ་ཡི་བག་
ཆགས་བཅས་ཀྱིས་འཕེལ། །འཁྲུལ་བཅས་འཁོར་བའི་འཁོར་ལོ་ལས། །དེ་ལྟར་བག་ཆགས་ཀྱིས་བསླད་པའི། །རྣམ་ཤེས་ལས་ཀྱི་ངོ་བོར་འགྲོ། །དེ་ཉིད་ཀྱང་ནི་སྲོག་སྦྱོར་བས། །ཁམས་གསུམ་པར་ནི་འཁྲུལ་པའོ། །བྱེད་པོ་ལས་ཀྱི་འབྲས་བུར་མྱོང་། །གཞན་ཉིད་
དུ་ནི་འཁོར་བ་མེད། །དེ་ཕྱིར་འཁོར་བ་གཞོམ་དོན་དུ། །ཐིག་ལེ་གོ་འཕང་གསལ་བར་དབྱེ། །བསྒོམ་པ་ལ་ནི་འབད་པར་བྱ། །མ་རིག་གཞན་ནི་མི་ཤེས་པ། །དབུས་ཀྱི་མདུད་པ་དེ་ཡང་ནི། །དེ་ཕྱེད་ན་ནི་དངོས་གྲུབ་འགྱུར། །རྣལ་འབྱོར་རྣལ་འབྱོར་གྲུབ་པ་སྟེ། །
ཡེ་ཤེས་ལྔ་ནི་ཐོབ་ནས་ནི། །མངོན་ཤེས་ལྔ་ནི་ཐོབ་པ་དང་། །མཆོག་ཏུ་གསང་བ་ཐོབ་ནས་ནི། །བློ་བཟང་ཇི་ལྟ་བ་བཞིན་གནས། །ཕྲེང་བ་མི་དགོས་བསྒོམ་མི་དགོས། །བྱ་བ་མི་དགོས་དགག་མི་དགོས། །སྔགས་ཀྱི་དེ་ཉིད་གཅིག་པུ་ཡིས། །ཡང་དག་རྫོགས་པའི་སངས་
རྒྱས་འཐོབ། །ལས་ཆོས་དམ་ཚིག་ཕྱག་རྒྱ་ཡི། །དབྱེ་བ་འདི་ནི་མ་གསུངས་སོ། །འཁོར་ལོའི་དབྱེ་བས་མ་ཡིན་ཞིང་། །དེ་བཞིན་དགའ་བ་སོགས་ཀྱིས་མིན། །ཕྱག་རྒྱ་ཆེན་པོའི་གོ་འཕང་གསལ། །སྔགས་ཀྱི་དེ་ཉིད་ཀྱིས་ནི་འཐོབ། །སྟོང་ཉིད་ཡེ་ཤེས་རྡོ་རྗེ་དང་། །གཉིས་
མེད་བདེ་བ་དེ་ཉིད་དང་། །གསང་བའི་ཐིག་ལེའི་དབྱེ་བ་དང་། །རྣལ་འབྱོར་གྲུབ་པའི་བདེ་ཆེན་པོ། །མ་རིག་སྒོ་ངའི་སྦུབས་འབྱེད་ཅིང་། །འཇིག་ཚོགས་ལྟ་བའི་རི་བོ་འཇོམས། །ཕྱག་རྒྱ་ཆེན་པོའི་དངོས་གྲུབ་དང་། །རབ་ཏུ་བྱེད་པ་མཆོག་ཏུ་བཤད། །སྔགས་ཀྱི་དེ་ཉིད་ངེས་

སྦྱོར་བས། །རིགས་ཤིང་ཡན་ལག་གསལ་བ་གང་། །རྣལ་འབྱོར་མ་ཡི་བཀའ་དྲིན་དང་། །བླ་མའི་ཞལ་ལས་ངེས་རྟོགས་འགྱུར། །མན་ངག་མེད་པའི་བཟླས་པ་ནི། །སྔགས་ཀྱི་རྒྱལ་པོ་བློ་རྨོངས་བྱེད། །དེ་ཡིས་དཀའ་བ་གཅིག་པུ་དང་། །ཆུ་བསྲུབས་མར་ནི་མི་འགྱུར་ལྟར། །
དེ་བཞིན་མན་ངག་དང་བྲལ་སྔགས། །སྐྱེས་བུས་ཇི་སྲིད་འཚོ་ཡི་བར། །བཟླས་ཀྱང་དེ་ཡི་འབྲས་བུ་ཡི། །ཆ་ཙམ་ཐོབ་པར་མི་འགྱུར་རོ། །མི་ཤེས་པ་ཡི་མི་འགའ་ཞིག །རྒྱ་མཚོ་བཞི་ཡི་ཕ་མཐའ་ཡི། །ས་ལ་ཤིན་ཏུ་འགྲོ་འདོད་པ། །ལམ་ནི་གང་ཡིན་མི་འདྲི་གང་། །དེ་ལྟར་
བདག་ཉིད་འགྲོ་བར་བྱེད། །དེ་བཞིན་དཀའ་བ་ཆེར་བྱེད་པའི། །མན་ངག་དང་བྲལ་སྒྲུབ་པ་པོ། །འབྲས་བུ་མེད་ཅིང་མཁས་པ་ཡང་། །སྒྲུབ་པ་པོ་ནི་ཁོང་ཁྲོ་སྐྱེ། །ཁོང་ཁྲོ་སྐྱེས་པའི་སྐད་ཅིག་ལ། །འབྲས་བུ་མེད་ཅིང་ངུ་འབོད་འགྲོ། །དེ་ཕྱིར་འབད་པ་ཐམས་ཅད་ཀྱིས། །དད་པས་
བླ་མ་བརྒྱུད་པ་ལས། །མན་ངག་དག་ནི་བསླབ་པར་བྱ། །གང་ཕྱིར་བརྒྱུད་པའི་ལུང་གིས་ཁྱབ། །བརྒྱུད་པའི་རིམ་པས་གནས་པར་བྱེད། །དེ་ནི་རྣལ་འབྱོར་མ་ཞལ་དང་། །བླ་མའི་ཞལ་ལས་འབད་པ་ཡིས། །དེ་ཉིད་མཆོག་ནི་བསླབ་པར་བྱ། །སྔགས་ཀྱི་མན་ངག་བརྒྱུད་
པའི་ལུང་། །དེ་ཐོས་ལག་ན་རྡོ་རྗེས་ཀྱང་། །རྡོ་རྗེ་སེམས་དཔའ་བདེ་བ་ཆེ། །ཐེ་ཚོམ་ཐམས་ཅད་གཅོད་པ་ལ། །ཕྱག་བྱས་ནས་ནི་ཞུས་པ་ནི། །ཁྱེད་ཀྱིས་བསྟན་པ་འདི་ཉིད་མཆོག །བཅོམ་ལྡན་འདས་ཀྱིས་རྒྱལ་པོ་ནི། །སྔགས་ཀྱི་དངོས་གྲུབ་བླ་ན་མེད། །གང་བསླབས་
སྐད་ཅིག་དངོས་གྲུབ་འགྱུར། །དེ་ནས་བཅོམ་ལྡན་རྡོ་རྗེས་གསུངས། །སྔགས་ཀྱི་དེ་ཉིད་རབ་གསལ་བ། །དེ་ཉིད་མཆོག་ཏུ་གསང་བ་ནི། །གང་དུའང་ང་ཡིས་མ་བཤད་པ། །སྐལ་པ་མེད་པ་བསམ་པའི་རྒྱུས། །རྒྱུད་རྣམས་ཀུན་དུ་སྦས་བྱས་ལ། །དེ་ནི་ང་ཡིས་བཤད་ཀྱིས་
ཉོན། །སྔགས་ཀྱི་རྒྱལ་པོ་བླ་ན་མེད། །སྔགས་ཀྱི་སྤྱད་པ་སྤྱོད་པ་ཡིས། །གང་གི་མྱུར་དུ་དངོས་གྲུབ་འགྱུར། །ཐོག་མར་ཨུཥྨའི་ཐ་མ་བྲི། །དབྱངས་ཡིག་དྲུག་པས་རྣམ་པར་བརྒྱན། །སྡེ་ཚན་ཐ་མའི་མཐའ་དང་ལྡན། །དབྱངས་མེད་པ་ཡི་ཆ་དང་བཅས། །ཨུཥྨའི་མཐའ་

ལ་དབྱངས་ཡིག་འདི། །དགུ་པ་དང་ནི་ཡང་དག་ལྡན། །མཐར་ནི་ཚེག་དྲག་མཆོག་གི་སྒྲ། །སྔགས་ཀྱི་གཙོ་བོ་བཏུ་བར་བྱ། །དེ་ལྟར་ཡི་གེ་གཉིས་ཀྱི་མིང་། །སྔགས་ཀྱི་བརྡ་ནི་རྨད་བྱུང་བ། །འཛིན་པ་ཐམས་ཅད་སྤངས་པའི་ཕྱིར། །སྒྲ་དང་ཐིག་ལེའི་
མིང་དུ་བྱས། །རླུང་གཉིས་ཀྱིས་ནི་ཕྱེ་ནས་ནི། །མ་རིག་མདུད་པ་འབྱེད་པར་བྱེད། །ཕྱག་རྒྱ་ཆེན་པོ་མཆོག་གི་རྒྱུ། །མཆོག་ཏུ་ཞི་བའི་ཡི་གེ་གཉིས། །མན་ངག་ཐོབ་པའི་འདོད་པའི་དོན། །གང་གིས་ཟླ་བ་དྲུག་བཟླས་ན། །ཐིག་ལེའི་སྒྲ་ཡི་གོ་འཕང་གསལ། །འདོད་པའི་
དོན་ཀུན་སྒྲུབ་པར་བྱེད། །སྐྱེ་བོས་དབེན་པ་ལྷ་ཡི་གནས། །སྒྲ་ཡི་ཚེར་མ་རྣམས་དང་བྲལ། །བགེགས་མེད་སྐལ་བཟང་ཉམས་དགའ་བ། །སྐྱེད་མོས་ཚལ་གཞི་བདེ་བ་ཆེ། །འདོད་པ་ལྔ་ལ་ལོངས་སྤྱོད་པས། །སྔགས་ཀྱི་གཙོ་བོ་འགྲུབ་པར་འགྱུར། །འདི་ནི་གཞན་
ཡང་བཤད་ཀྱིས་ཉོན། །ཁྱིམ་དུ་བདེ་བའི་ཕྱག་རྒྱས་གནས། །གང་གིས་དངོས་གྲུབ་མཆོག་ཏུ་འགྱུར། །སྒྲུབ་པོ་བདེ་བའི་སྟན་འདུག་ནས། །མིག་གཉིས་སྣ་རྩེར་གཏད་བྱས་ནས། །སྣ་ནི་ལྕེ་ཡི་ཚད་དུ་བཞག །ཕྲག་གོང་བསྙམས་ལ་ལྕེ་རྐན་སྦྱར། །སོ་དང་མཆུ་ནི་བདེ་བར་
བཞག །དབུགས་ཀྱི་འབྱུང་རྔུབ་ཀློད་ནས་ནི། །ཅུང་ཟད་ཅུང་ཟད་རྩོལ་བྲལ་ནས། །ཇི་ལྟ་བ་བཞིན་འབྱུང་རྔུབ་ནི། །རྡོ་རྗེ་སྐྱིལ་ཀྲུང་ལེགས་གནས་པས། །དེ་ལྟར་ཕྱག་རྒྱ་དང་ལྡན་པས། །ཡི་གེ་གཉིས་ནི་རྟག་ཏུ་བཟླས། །ཐིག་ལེའི་དབྱེ་བས་བདེ་བ་ཆེ། །ཟླ་བ་
དྲུག་གིས་རྣལ་འབྱོར་མཆོག །ཐོབ་འགྱུར་འདི་ལ་ཐེ་ཚོམ་མེད། །རྩ་བའི་རྒྱུད་ནི་དང་པོ་འདི། །ཨ་བ་དྷཱུ་ཏཱི་དྲི་མེད་གནས། །རླུང་གི་དེ་ཉིད་ཡེ་ཤེས་ཆེ། །རྡོ་རྗེ་སེམས་དཔའ་ཡི་ནི་རྒྱུ། །རིལ་བུ་རལ་གྲི་རོ་ལངས་དང་། །རྒྱལ་པོ་མིག་སྨན་བཅུད་ཀྱིས་ལེན། །དམག་
དཔུང་རེངས་དང་རྩིག་པ་འབིགས། །རིག་འཛིན་གྱི་ནི་གོ་འཕང་མཆོག །མི་སྣང་བ་དང་གཏེར་མཐོང་བ། །འདོད་དགུར་བསྒྱུར་དང་གཟུགས་མཐོང་དང་། །གསེར་འགྱུར་དང་ནི་དུག་ལས་རྒྱལ། །མེ་ཡི་ནང་དུ་འཇུག་པ་དང་། །མངོན་ཤེས་ལྔ་ཡི་གོ་འཕང་དང་། །ཡེ་ཤེས་

ལྔ་ནི་ཐོབ་པར་འགྱུར། །དེ་ལྟར་སྐད་ཅིག་གཅིག་ལ་ནི། །བྱང་ཆུབ་མཚན་ཉིད་གོ་འཕང་ངོ་། །དཀའ་བ་སྤྱོད་པ་སྤངས་ནས་ནི། །ཤེས་རབ་སྙིང་རྗེ་ཡང་དག་ལྡན། །བཤད་པའི་བདེ་བ་ཆེན་པོ་སྟེར། །སྡོམ་པ་མི་དགོས་སྦྱིན་སྲེག་མིན། །ཕྲེང་བ་མི་དགོས་བགྲང་མི་དགོས། །འདི་
ནི་བསྐྱེད་རིམ་དབྱེ་མི་དགོས། །གསུངས་པའི་དཀའ་ཐུབ་སོགས་མི་དགོས། །སྔགས་ཀྱི་རྣལ་འབྱོར་གཅིག་པུ་ཡིས། །བླ་མའི་ཞལ་ལས་བརྒྱུད་པ་དང་། །ཟླ་བ་དྲུག་ཏུ་མངོན་སྦྱོར་བས། །གོ་འཕང་མཆོག་ནི་ཐོབ་པར་འགྱུར། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་
བ་མངོན་པར་རྟོགས་པ་ལས་ཐིག་ལེའི་དབྱེ་བ་དང་རྣལ་འབྱོར་མཆོག་ཐོབ་པར་བྱེད་པའི་ལེའུ་སྟེ་དྲུག་པའོ།། །།དེ་ནས་གཞན་ཡང་དེ་ཉིད་ཉོན། །བླ་ན་མེད་པ་ནཱ་དའི་དོན། །གང་གིས་ཤེས་པ་ཙམ་གྱིས་ནི། །ཚེ་འདི་ཉིད་ལ་དངོས་གྲུབ་འགྱུར། །སྒྲ་ཡང་མི་ཤིགས་
པར་ནི་བཤད། །རང་བཞིན་འོད་གསལ་དྲི་མ་མེད། །རྣམ་པ་ཀུན་ལས་རྣམ་པར་གྲོལ། །ལྟེ་བ་སྤྲུལ་པ་ཡང་དག་གནས། །སྦྲུལ་གྱི་ལྕེ་ལྟར་ཕྲ་བ་ནི། །གཉིས་མེད་ཡེ་ཤེས་རྨད་བྱུང་བ། །ཚངས་པ་ཁྱབ་འཇུག་དྲག་པོ་དང་། །དབང་ཕྱུག་དང་ནི་རྟག་ཞི་བ། །དེ་
དག་དེ་ལྟར་རིན་པོ་ཆེ། །སྐྱེད་པ་པོ་ཡི་ཕ་དང་མས། །ཡི་གེ་མེད་ཅིང་གོང་དུ་མེད། །འབྱུང་བ་ཆེན་པོ་རྣམ་པར་སྤངས། །དུས་དང་རྟོག་པ་རྣམས་ལས་གྲོལ། །སྐྱེ་མེད་ཟད་མེད་རྨད་དུ་བྱུང་། །འཛིན་པ་ཀུན་ལ་ཞེན་ལ་སོགས། །སྤངས་ཤིང་ལྷག་མ་མེད་པ་དང་། །མཆོག་གི་
མཆོག་སྟེ་ཞི་བ་མེད། །དངོས་པོ་ཀུན་གྱི་དབུས་ན་གནས། །རྣམ་རྟོག་མེད་ཅིང་བརྟེན་པ་མེད། །ཀུན་གཞི་རྣམ་ཤེས་ཞེས་གསུངས་པ། །ཉོན་མོངས་ཅན་གྱི་ཡིད་ཀྱིས་ནི། །བེམས་པོ་རྣམས་ཀྱིས་སད་པར་བྱེད། །མཆོག་ཏུ་གཉིས་མེད་རྣལ་འབྱོར་གྱིས། །ཐོབ་པའི་
གོ་འཕང་བླ་ན་མེད། །གཉིས་མེད་མཆོག་ཏུ་གསལ་བ་དང་། །རླུང་གི་དེ་ཉིད་ཡང་དག་རྟེན། །ཡི་གེ་ཧོཿཡིས་བསྐུལ་ནས་ནི། །མེ་ཡི་འཁོར་ལོ་སད་པར་བྱེད། །དེ་ལྟའི་ནཱ་དའི་གོ་འཕང་དོན། །བླ་མའི་ཞལ་ལས་ཡང་དག་གནས། །རྣལ་འབྱོར་ཆེན་པོའི་རྒྱུད་དཔལ་

རྡོ་རྗེ་ཕྲེང་བ་མངོན་པར་རྟོགས་པ་ལས་ནཱ་དའི་ཚིག་རྣམ་པར་བཤད་པའི་ལེའུ་སྟེ་བདུན་པའོ།། །།དེ་ནས་གཞན་ཡང་གསང་བའི་དོན། །བླ་ན་མེད་པ་བཤད་ཀྱིས་ཉོན། །གསང་བ་བྷ་ག་ཞེས་སུ་གསུངས། །བྷ་ག་དེ་བཞིན་ཆོས་འབྱུང་བ། །བདེ་བ་ཆེན་
པོའི་གོ་འཕང་རྟེན། །དགའ་བ་སྐྱེད་པར་བྱེད་པའི་རྒྱུ། །རྡོ་རྗེ་སེམས་དཔའ་ཡི་ནི་གནས། །ཡེ་ཤེས་ལྔ་ཡི་བདག་ཉིད་གསལ། །ཡེ་ཤེས་ཆེན་པོ་སྤྲོས་པ་མེད། །རྣམ་པར་རྟོག་པ་ཐམས་ཅད་སྤངས། །བྲལ་དགའི་མཐའ་སྟེ་མཆོག་ཏུ་ཕྲ། །ལྷན་ཅིག་སྐྱེས་དགའ་
ཀུན་བདག་གནས། །དགའ་བྲལ་ལ་སོགས་སྐད་ཅིག་གནས། །ཕྲ་བ་ཡང་དག་བྱང་ཆུབ་སེམས། །སྲོག་ལ་ཕན་པར་འཚོ་བ་སྟེ། །སྲང་མདའི་འཁྲུལ་འཁོར་ལྟ་བུར་གནས། །དུས་བྲལ་རྣམ་རྟོག་མེད་པ་སྟེ། །སྟོང་ཉིད་སྐྱེ་མེད་འཆི་བ་མེད། །སྤྲུལ་པའི་འཁོར་
ལོར་ཐིམ་པ་དང་། །བདེ་བ་ཆེན་པོའི་འཁོར་ལོ་སྐྱེ། །བསམ་གྱིས་མི་ཁྱབ་ཞི་བ་སྟེ། །ཆགས་བྲལ་འགྲོ་ཀུན་སྐྱེ་བ་མེད། །རྡོ་རྗེ་པདྨ་མཉམ་སྦྱོར་བས། །བདེ་བ་ཐམས་ཅད་སྟེར་བར་བྱེད། །རླུང་གི་དེ་ཉིད་རིག་པ་ཡིས། །རྩ་ཡི་དབུས་སུ་འཛིན་པར་བྱེད། །གང་དེ་སྐྱེ་བ་ཉམས་
མྱོང་བར། །གསང་བ་ཞེས་ནི་བྱ་བར་གྲགས། །དེ་ཉིད་གསང་བ་ཡི་ནི་མཆོག །བླ་མའི་ཞལ་ལ་ལྷག་པར་གནས། །ཕན་ཚུན་བརྒྱུད་པའི་རིམ་པ་ཡིས། །བླ་མ་བཟང་པོའི་ཞལ་ལས་ཤེས། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་གསང་བ་ཆེན་
པོའི་ཚོགས་མ་ལུས་པར་བསྟན་པ་ཞེས་བྱ་བའི་ལེའུ་སྟེ་བརྒྱད་པའོ།། །།དེ་ནས་གཞན་གང་སྡོམ་པའི་དོན། །དེ་ཁོ་ན་ཉིད་བཤད་ཀྱིས་ཉོན། །སྡོམ་པ་སྲུང་བར་བྱེད་པ་གང་། །དེ་ནི་བྱང་ཆུབ་སེམས་ཞེས་བརྗོད། །རྡོ་རྗེའི་རྩེ་མོར་སེམས་འཛིན་པ། །དེ་ནི་བསྲུང་བ་ཞེས་ནི་
གྲགས། །དབང་པོ་རྣམས་ནི་ཡུལ་རྣམས་ལ། །འཇུག་ཅིང་རྟག་ཏུ་གང་གནས་པ། །དེ་ནི་སྡོམ་པ་བསྲུང་བ་དང་། །དམ་ཚིག་བསྲུང་བར་བཤད་པ་ཡིན། །གདུལ་དཀའ་ཚུལ་འཆོས་གཡོ་སྒྱུ་ཅན། །རྨོངས་དང་སེམས་ཁྲོས་གཡོ་ཅན་དང་། །དད་མེད་རྟོག་གེ་བ་ལྷན་ཅིག །

རྟགས་ཀྱིས་ཉེ་བར་འཚོ་བ་དང་། །ཉན་ཐོས་ནོར་ལ་བརྐམ་ཆགས་ཅན། །དེ་ཁོ་ན་ཉིད་སུན་འབྱིན་ཅིང་། །དོན་དམ་པ་ནི་མི་ཤེས་པ། །མེད་པར་ལྟ་དང་ཚུལ་ཁྲིམས་འཆལ། །གཏམ་དང་ཚིག་ནི་ཀྱལ་པ་དང་། །འདྲི་བ་ལ་སོགས་མི་བྱ་ཞིང་། །སེ་གོལ་གཏོགས་པ་
ཙམ་དུ་ཡང་། །དེ་དང་ལྷན་ཅིག་གནས་མི་བྱ། །ལས་ཀྱི་ཕྱག་རྒྱ་ཉམས་དགའ་བ། །གལ་ཏེ་བྱིས་པའི་སྐྱེ་བོ་དང་། །དེ་དང་ལྷན་ཅིག་དམ་ཚིག་ནི། །མི་བྱ་རྣལ་འབྱོར་ཉམས་པར་འགྱུར། །སྐྱེད་ན་དམ་ཚིག་དབུས་ཞུགས་དང་། །པད་སྣོད་ཕྱག་རྒྱ་སོགས་བརྟེན་དང་། །
བརྐམ་དང་འབྲེལ་པས་འཇུག་པ་དང་། །དམ་ཚིག་ལ་ནི་འཇུག་མི་བྱ། །སྣོད་དང་ཅང་ཏེའུ་གྲི་གུག་དང་། །གླེགས་བམ་དང་ནི་བགྲང་ཕྲེང་དང་། །དམ་ཚིག་མེད་པ་གཞན་དག་ལ། །གང་དུའང་བསྟན་པར་མི་བྱའོ། །དགེ་སློང་སྡོམ་ལ་གནས་པ་ལ། །རྣལ་འབྱོར་སྤྱོད་
སོགས་བྱ་བ་དང་། །མན་ངག་རྣམས་ནི་བསྟན་མི་བྱ། །རས་རིས་ལ་སོགས་མི་བསྟན་ཅིང་། །གང་གིས་དམ་ཚིག་ལྷན་ཅིག་ཏུ། །ཇི་ལྟར་སྤྱོད་པ་ཡང་དག་སྤྱོད། །བླ་མ་ལ་ཡང་སྨྲ་མིན་ན། །གཞན་རྣམས་ལ་ནི་སྨོས་ཅི་དགོས། །དབང་པོ་ཡུལ་ལ་སྤྱོད་པ་ནི། །གང་ནས་
དེ་ནི་བསྡམས་ནས་ནི། །སྟོང་ཉིད་གཉིས་མེད་སྒྱུ་མ་ལ། །སོགས་པས་ཀུན་རྫོབ་ལྷག་སྤྱད་ན། །ཤེས་རབ་ཡེ་ཤེས་དབང་བསྐུར་སོགས། །ཉམས་སུ་མྱོང་བའི་བདེ་བ་ཡིས། །བདེ་བ་ཆེན་པོའི་དྲན་པ་ཡིས། །དབང་པོ་རྣམས་ནི་ཡུལ་ལས་ལྡོག །བདག་བསྟོད་གཞན་
ལ་སྨོད་པ་དང་། །ཡེ་ཤེས་སྙེམས་སོགས་ངེས་སྤངས་པ། །བློ་ལྡན་རྡོ་རྗེ་དབང་ཕྱུག་གི། །ཡང་དག་སྡོམ་པ་བཤད་པ་ཡིན། །དེ་ལྟ་བུ་སོགས་དམ་ཚིག་ནི། །རྣལ་འབྱོར་པ་ཡིས་རྟག་བསྲུང་བྱ། །གཞན་དུ་རྣལ་འབྱོར་ཉམས་པར་འགྱུར། །རྣལ་འབྱོར་ལྡན་པ་རྡོ་རྗེ་ཅན། །
བགྲང་ཕྲེང་དང་ནི་དབུ་རྒྱན་དང་། །རུས་པའི་རང་བཞིན་ཕྱག་རྒྱ་དང་། །གླེགས་བམ་བསམ་གཏན་རས་རིས་དང་། །ཐོད་པ་ལ་སོགས་རྣལ་འབྱོར་མ། །ཐམས་ཅད་དུ་ནི་དངོས་གྲུབ་ཕྱིར། །བླ་མ་ལ་ཡང་སྦ་བར་བྱ། །སྔགས་ནི་ཚིག་ཏུ་བརྗོད་མི་བྱ། །མཆུ་འགུལ་བར་ཡང་

མི་མངོན་ཞིང་། །ཅུང་ཟད་མགྲིན་པར་བརྗོད་བྱ་ཡིས། །སྔགས་ཀྱི་རྒྱལ་པོ་དེ་ལྟར་བཟླས། །གསང་ལས་དངོས་གྲུབ་མཚུངས་པ་མེད། །གང་ཕྱིར་དེ་ནི་སྡོམ་པར་བཤད། །སྣོད་མིན་ནོར་ནི་ཆེན་པོ་དང་། །ལྡན་ཡང་རྒྱུད་ལས་སྐྱོན་དུ་གསུངས། །བླ་མས་བླ་མེད་
དངོས་གྲུབ་ཕྱིར། །འབད་པ་ཡིས་ནི་སྤང་བར་བྱ། །བཟའ་བཏུང་གོས་ལ་སོགས་པ་དང་། །ནོར་ནི་ཆེན་པོ་ལ་ཆགས་ཤིང་། །སྣོད་མིན་སློབ་མ་མན་ངག་མཆོག །རྨད་དུ་བྱུང་བ་སྨྲ་བ་གང་། །རྣལ་འབྱོར་ཤེས་པ་ཚེ་འདི་ལ། །དེ་ནི་དམྱལ་བ་ངུ་འབོད་འགྲོ། །རྣལ་འབྱོར་
ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སྡོམ་པའི་ཚིག་གཏན་ལ་དབབ་པའི་ལེའུ་སྟེ་དགུ་པའོ།། །།དེ་ནས་གཞན་ཡང་དེ་ཉིད་ཉོན། །དམ་ཚིག་དོན་ནི་བླ་ན་མེད། །བཟའ་བ་ཡི་ནི་དམ་ཚིག་གང་། །དེ་ནི་དེ་ཡི་དོན་བཤད་བྱ། །བཟའ་བ་རུ་ནི་བཤད་པ་གང་། །
དེ་ནི་བདུད་རྩི་ལྔ་རུ་བརྗོད། །རླུང་གི་དེ་ཉིད་སྦྱོར་བ་ཡིས། །ཞུ་ནས་རོ་གཅིག་སླར་ཡང་ནི། །རྡོ་རྗེ་ལམ་ནས་སྟེང་སོང་སྟེ། །གཅིག་ཏུ་གྱུར་པ་བཟའ་བའོ། །དམ་ཚིག་ལུས་དང་ངག་ཡིད་ཀྱིས། །དེ་ཉིད་གསུམ་དང་གང་ཤར་དང་། །འཁོར་ལོ་བཞི་པོ་རྣམས་ལ་ཡང་། །
བདེ་བ་ཉམས་སུ་མྱང་བ་གང་། །དེ་དང་རོ་གཅིག་རྣལ་འབྱོར་པ། །རྟག་ཏུ་སྤྱོད་པ་བཟའ་བའོ། །བྱང་ཆུབ་སེམས་ཀྱི་དེ་ཉིད་མཆོག །བདེ་བ་ཆེན་པོའི་གོ་འཕང་ཐིམ། །ཞུ་བ་རླུང་གི་དེ་ཉིད་ཀྱིས། །བཟའ་བ་བསམ་གཏན་བཟང་པོའོ། །སྤྱི་བོ་ཐོད་པའི་སླད་
ནས་ནི། །དེ་ཙམ་རྣལ་འབྱོར་པས་རྟག་ཏུ། །དེ་ལ་སྙིང་རྗེ་བཏུང་བ་ནི། །བྱང་ཆུབ་སེམས་དཔའ་བདེ་བ་ཆེ། །སྣོད་མཆོག་གསང་བའི་པདྨར་བླུགས། །རྟེན་ནི་བཟའ་བ་རབ་རྟོགས་བྱེད། །སེམས་ཀྱིས་བདུད་རྩི་འཐུང་བྱེད་ན། །བདུད་རྩི་ལྔ་ཡི་རོ་རྫས་འཐུང་། །དེ་ཟ་བ་ནི་
རྡོ་རྗེ་འཆང་། །གླང་མོ་རྟ་ཁྱི་བ་ལང་མི། །བྱང་ཆུབ་སེམས་དང་བཅས་པའི་ཁྲག །བསྲེས་ནས་སྐད་ཅིག་དེ་ལ་བཟའ། །དེ་ནི་བདུད་རྩི་ལྔ་ཞེས་བརྗོད། །རྣམ་རྟོག་དང་ནི་ཀུན་རྟོག་གི། །སྟོང་པ་ཉིད་དུ་གསལ་བའི་སྣོད། །རྡོ་རྗེ་ཅན་གྱིས་རྟག་ཏུ་བཟའ། །སྟོང་ཉིད་ཡེ་

ཤེས་ཕ་རོལ་འགྲོ། །དགའ་བ་གསུམ་པའི་བདེ་བ་ནི། །ལྷན་སྐྱེས་ལྷན་ཅིག་སྣོད་དུ་ནི། །རྡོ་རྗེ་ཅན་གྱིས་རྟག་ཏུ་བཟའ། །བདེ་བ་ཆེན་པོའི་གོ་འཕང་གནས། །རྣམ་རྟོག་རླུང་རྣམས་ཐམས་ཅད་ནི། །ཞི་བའི་དེ་ཉིད་སྣོད་བཟང་པོར། །རླུང་གི་དེ་ཉིད་ཤེས་པས་བཟའ། །
རྣམ་རྟོག་མེད་པའི་གོ་འཕང་གནས། །ཕྱག་རྒྱ་གསུམ་དང་ཡང་དག་སྦྱོར། །ཕྱག་རྒྱ་ཆེན་པོར་བཤད་སྣོད་དུ། །རྣལ་འབྱོར་དེ་ཉིད་ཤེས་པས་བཟའ། །སྲོག་དང་རྩོལ་བའི་གོ་འཕང་གནས། །རྣམ་རྟོག་དང་ནི་ཀུན་རྟོག་གིས། །སྒོམ་དང་སྒོམ་མིན་སོགས་འཁྲུལ་པ། །སྲོག་
ཆེན་པོ་ཡི་སྣོད་དུ་ནི། །རྣམ་རྟོག་དྲ་བའི་ས་བོན་སོགས། །ཕུང་པོའི་བུད་ཤིང་སྣོད་བཟང་པོར། །ཡེ་ཤེས་ཆེན་པོའི་མེ་ཡིས་མིན། །སྔགས་ཀྱི་དེ་ཉིད་རྟོགས་པས་བཟའ། །བདུད་བཞིའི་ཁྲོ་བོ་ཆེན་པོ་ཡི། །སྟོབས་ཀྱི་རིག་པས་སྒྲུབ་པ་པོ། །སྒྲུབ་པོས་ལེགས་པར་
མཉམ་གཞག་ནས། །རྟག་ཏུ་རྣལ་འབྱོར་སྣོད་དུ་བཟའ། །རླུང་དང་སྔགས་དང་རྫས་རྣམས་ཀྱི། །ཐིག་ལེ་གསུམ་སྟེ་བླ་ན་མེད། །མི་ཤིགས་གོ་འཕང་སྣོད་དུ་ནི། །ཟོས་ན་རྣལ་འབྱོར་ཕ་རོལ་འགྲོ། །སྟོང་ཉིད་ཡེ་ཤེས་མཚུངས་མེད་པ། །སྙིང་རྗེའི་སྣོད་ཀྱིས་མཆོག་ཏུ་ནི། །
ཡེ་ཤེས་ཆེན་པོ་མཉམ་གཞག་ནས། །བཏུང་ཞིང་རྟག་ཏུ་བཏུང་བའོ། །ཕྱག་རྒྱའི་དམ་ཚིག་ཅེས་སུ་བཤད། །རྡོ་རྗེ་པདྨ་ཡང་དག་སྦྱོར། །དེ་ཁོ་ན་ཉིད་མཆོག་སྐྱེས་གང་། །དེ་ནི་སྐལ་ལྡན་སྣོད་ལ་ནི། །རྣལ་འབྱོར་པས་འཐུངས་ཉམས་དགའ་བ། །བསྒྲུབ་པར་བྱ་བའི་དེ་ཉིད་
མཆོག །ཉོན་མོངས་དང་བྲལ་ལྷན་ཅིག་སྐྱེས། །ཕྱག་རྒྱ་ཆེན་པོའི་དོན་བསྒྲུབ་བྱ། །དེ་ལྟ་བུ་སོགས་དམ་ཚིག་སོགས། །གཞན་ནི་གང་དུའང་ངས་མ་བཤད། །རྡོ་རྗེ་སེམས་དཔའི་གོ་འཕང་མཆོག །བླ་མའི་ཞལ་ལས་གསལ་བར་རྟོགས། །རྣལ་འབྱོར་ཆེན་པོའི་རྒྱུད་དཔལ་
རྡོ་རྗེ་ཕྲེང་བ་མངོན་པར་རྟོགས་པ་ལས་དམ་ཚིག་གི་དོན་གཏན་ལ་དབབ་པའི་ལེའུ་སྟེ་བཅུ་པའོ།། །།དེ་ནས་གཞན་ཡང་བཤད་ཀྱིས་ཉོན། །སྒྲ་ཙམ་དོན་ནི་བཤད་པར་བྱ། །གང་གིས་ཤེས་པ་ཙམ་གྱིས་ནི། །འཕོ་བ་མེད་པའི་གོ་འཕང་འཐོབ། །ཆོས་ཀྱི་འཁོར་ལོའི་པད་

སྦུབས་སུ། །སྒྲ་ཙམ་ཡང་དག་གནས་པ་ནི། །ཆགས་མེད་སྣང་བ་མེད་པ་དང་། །གཉིས་སུ་མེད་ཅིང་དྲི་མ་མེད། །དཔེ་བྲལ་གཡོ་བ་མེད་པ་དང་། །གཞི་མེད་བླ་གབ་མེད་པ་དང་། །ལྷ་ཡི་དབང་ཕྱུག་ཡེ་ཤེས་མཆོག །འབྱུང་དང་རྔུབ་པ་རྣམ་པར་
སྤངས། །རྣལ་འབྱོར་རྣམས་ཀྱི་ལྷ་དབང་ཕྱུག །དེ་ལྟ་བུ་ནི་རྙེད་པར་དཀའ། །མཆོག་ཏུ་ཞི་བ་བདེ་བ་ཆེ། །གཟུགས་མཆོག་འཆི་བ་མེད་པའི་མཆོག །རྟེན་ཅིང་འབྲེལ་འབྱུང་རང་བཞིན་གྱིས། །རྒུན་ཆང་རོ་ཡིས་མྱོས་པ་ལྟར། །མཆོག་ཏུ་ནང་དུ་སོང་གྱུར་ནས། །དེ་བཞིན་རྣམ་
པ་ཀུན་གྱི་གནས། །སྔགས་ཀྱི་དེ་ཉིད་རིག་པའི་རྟེན། །རང་གི་ཉམས་མྱོང་རྟོག་པའི་གནས། །དེ་ནས་སྟོན་པ་བླ་མེད་པ། །རྡོ་རྗེ་སེམས་དཔས་ཞུས་པ་ནི། །བཅོམ་ལྡན་དེ་ཉིད་ཞི་བ་མཁྱེན། །སྔགས་ཀྱི་དེ་ཉིད་རབ་དབྱེ་བ། །གང་གིས་རྣམ་པར་ཤེས་ཙམ་གྱིས། །དེ་ཁོ་ན་ཉིད་
འགྲུབ་པར་འགྱུར། །དེ་ནས་རྡོ་རྗེ་ཅན་གྱིས་གསུངས། །སྔགས་ཀྱི་དེ་ཉིད་བླ་ན་མེད། །མཆོག་དང་རབ་མཆོག་ཕྲ་བ་དང་། །ཡེ་ཤེས་ཆེན་པོ་མཆོག་ཆེན་པོ། །སྙིང་པོ་ཡི་ཡང་སྙིང་པོ་མཆོག །ཡང་དག་བཤད་ཀྱིས་མཉན་པར་གྱིས། །རྒྱུད་རྣམས་ཀུན་དུ་སྦས་པ་རྣམས། །
གསང་བའི་གོ་འཕང་འཕོ་བ་མེད། །ལྟེ་བའི་འཁོར་ལོ་དེ་ཉིད་མཆོག །སྒྲ་ཙམ་དུ་ནི་ཡང་དག་གནས། །སྟོང་ཉིད་ཆེན་པོའི་དབུས་སུ་ཐིམ། །བདེ་བ་ཆེན་པོའི་གོ་འཕང་གསལ། །གཉིས་མེད་འཇིགས་བྲལ་ཞི་བ་དང་། །སྣང་བ་མེད་ཅིང་ཀུན་རྫོབ་མེད། །གཉིས་མེད་ཏིང་
འཛིན་སྦྱོར་བ་ཡིས། །སྔགས་ཀྱི་དེ་ཉིད་རབ་གསལ་བ། །ཐོག་མ་མེད་ཅིང་ཞི་བ་དང་། །དངོས་དང་དངོས་མེད་བདག་ཉིད་གཙོ། །སྟོང་ཉིད་སྙིང་རྗེ་དབྱེར་མེད་པ། །བྱང་ཆུབ་སེམས་ཀྱི་རང་བཞིན་ནི། །དེ་ཚེ་ཐོག་མར་སྟོང་ཉིད་སྒོམ། །སྣང་བ་མེད་པའི་གོ་འཕང་ཞི། །རང་
བཞིན་མེད་གནས་ཉམས་དགའ་བ། །རྣམ་རྟོག་མེད་ལ་མཆོག་ཏུ་བརྟེན། །སྟོང་ཉིད་ཡེ་ཤེས་མཚུངས་པ་མེད། །བྱང་ཆུབ་སེམས་ཀྱི་རྒྱུད་དང་ནི། །ཡི་གེ་ཧཱུྃ་ལས་ཡང་དག་བྱུང་། །རྣལ་འབྱོར་ཤེས་པ་རྨད་བྱུང་ཆེ། །དེ་ཉིད་གསུམ་ནི་རོ་གཅིག་དོན། །ཨ་བདྷཱུ་ཏཱིའི་

གོ་འཕང་གནས། །སླར་ཡང་དགའ་བའི་སྦྱོར་བ་ཡིས། །འཇུག་པ་ལ་སོགས་རྣམ་པར་སྤངས། །བདེ་བ་ཆེན་པོའི་གོ་འཕང་ནི། །བྱང་ཆུབ་སེམས་ནི་དྲི་མ་མེད། །སྣ་ཚོགས་སྐད་ཅིག་དབྱེར་མེད་པ། །བརྗོད་པའི་བདག་ཉིད་དབྱངས་བྲལ་བ། །རྟག་ཏུ་གནས་པའི་
རྒྱུན་གྱིས་ཀྱང་། །བྱང་ཆུབ་སེམས་ནི་འབབ་པ་ནི། །སྔགས་ཀྱི་རྣལ་འབྱོར་གྱིས་ནི་ཐོབ། །སྐྱེ་མེད་ཞི་བའི་ཐིག་ལེ་ཙམ། །སྔགས་ཀྱི་སྤྱོད་པས་སྤྱད་པས་ན། །ཡེ་ཤེས་མཆོག་ནི་རང་རིག་པའོ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སྒྲ་ཙམ་
གྱི་དོན་གཏན་ལ་དབབ་པའི་ལེའུ་སྟེ་བཅུ་གཅིག་པའོ།། །།དེ་ནས་རླུང་གི་དེ་ཉིད་མཆོག །དོན་དམ་པ་ནི་བཤད་ཀྱིས་ཉོན། །རྣལ་འབྱོར་པ་ཡིས་རླུང་བསྒོམས་ན། །མྱུར་དུ་དངོས་གྲུབ་ཐོབ་པར་འགྱུར། །རླུང་གི་ཐིག་ལེ་ཡེ་ཤེས་ཆེ། །ཕྲ་ཞིང་དེ་ཉིད་གོ་འཕང་གསལ། །
དངོས་གྲུབ་ཀུན་བྱེད་ཉམས་དགའ་བ། །གཉིས་མེད་རྣལ་འབྱོར་མི་ཟད་པ། །སྐྱེ་མེད་ཀུན་འགྲོ་ཞི་བ་དང་། །ལུས་རྣམས་ཀུན་ལ་ཁྱབ་པ་དང་། །མ་ཕམ་སྟོང་པ་བསམ་མི་ཁྱབ། །ཐམས་ཅད་བདག་ཉིད་རྟག་ཏུ་བཞུགས། །སྒོམ་དང་བསམ་གཏན་རྣལ་འབྱོར་གྱིས། །ཐིག་
ལེ་རང་གི་ངོ་བོ་ཤེས། །ཆོས་རྣམས་གཅིག་ཏུ་གྱུར་པའི་གནས། །སྔགས་ཀྱི་དེ་ཉིད་ཀྱི་ནི་རྒྱུ། །བག་ཆགས་ཀུན་ལས་རྣམ་པར་གྲོལ། །ཀུན་མཁྱེན་བདེ་བ་ཀུན་གསལ་བ། །སྣ་ཡི་རྩེ་མོར་དེ་ཉིད་མཆོག །འོད་ཟེར་ཐིག་ལེ་བསམ་པར་བྱ། །སྲོག་དང་རྩོལ་བ་ཡང་དག་སྦྱོར། །
རྟོག་པ་རྣམས་ཀྱི་གྲངས་སྟེར་བ། །སྐལ་བཟང་ཡེ་ཤེས་ལྔ་ཡི་བདག །སངས་རྒྱས་ལྔ་ཡི་ཆོ་ག་ནི། །རིན་ཆེན་ལྔ་ཡི་སྦྱོར་བའི་གཟུགས། །འབྱུང་བ་ལྔ་ཡི་བདག་ཉིད་ཙམ། །ཐོག་མ་ལུས་ཀྱི་ཕྱག་རྒྱའི་དངོས། །ངག་གི་གྲངས་ཀྱི་ཟློས་མཚན་ཉིད། །ཡིད་ཀྱི་རྣལ་འབྱོར་ཆེ་ལ་
ཞེན། །སྒོམ་པའི་གོ་འཕང་མི་ཟད་པ། །དབུགས་ཀྱི་ཚེགས་ནི་བགྲང་བ་དང་། །རླུང་གི་རྣམ་པར་དཔྱད་པ་དང་། །གནས་ཀྱི་དབྱེ་བ་རྩ་རྣམས་ཀྱི། །དུས་ཀྱི་དབྱེ་བ་རྟོགས་པ་དང་། །རླུང་རྣམས་ཀྱི་ནི་ཟློག་པ་དང་། །རྟོག་པ་དང་བཅས་སྤངས་པ་སྟེ། །དེ་ལྟར་མདོར་བསྡུས་རྣམ་

དྲུག་གིས། །འབྱུང་དང་རྔུབ་པ་ཞེས་སུ་བརྗོད། །ཐོག་མར་འབྱུང་དང་རྔུབ་པ་རྣམས། །ཉི་ཁྲི་དང་ནི་ཆིག་སྟོང་དང་། །དེ་བཞིན་གྲངས་ནི་བརྒྱ་ཕྲག་དྲུག །ཉིན་དང་མཚན་མོ་ངེས་པ་ནི། །ཇི་སྲིད་གྲངས་ནི་ཐོབ་པའི་གནས། །ཉིན་ཞག་ཉི་ཤུ་རྩ་བདུན་དུ། །གྲངས་
ཀྱི་རྗེས་སུ་སྦྱོར་བ་ཡིས། །གྲངས་ནི་ཡང་དང་ཡང་དུ་བརྟག །དུས་མཚམས་ཀྱི་ནི་རབ་དབྱེ་བས། །དེ་ནས་རྗེས་སུ་ཟློས་པར་འགྱུར། །ཐུན་ཚོད་སོ་སོར་སྲོག་རྣམས་དང་། །རྩོལ་བ་རུ་ནི་བརྟག་པ་སྟེ། །ཉིས་སྟོང་བདུན་བརྒྱའི་གྲངས་ཀྱིས་ནི། །ཡང་དག་པར་ནི་ངེས་བཟུང་
མེད། །ཡོངས་སུ་གསལ་བར་བཅད་ནས་ནི། །ཉིན་ཞག་ཉི་ཤུ་རྩ་བདུན་ལ། །འཁོར་ལོ་བཞི་ཡི་དབྱེ་བ་ཡིས། །ཉིན་དང་མཚན་དུ་ངེས་པར་ནི། །དེ་རྗེས་གནས་ཀྱི་རྩོལ་བ་ཡིས། །ཐ་དད་དུ་ནི་རབ་ཏུ་བརྟག །རྩ་ཡི་འཁོར་ལོ་རྒྱུ་བ་ཡིས། །འབྱུང་དང་རྔུབ་པ་ངེས་
པར་ནི། །ངེས་པར་གཟུང་བའི་སྦྱོར་བ་ལས། །རྩ་ཡི་འཁོར་ལོ་སྤྱད་པར་བྱ། །དེ་ཡི་འཁོར་ལོའི་རྩ་དབྱེ་བས། །ཉིན་ཞག་ཉི་ཤུ་རྩ་བདུན་ལས། །དེ་རྗེས་གནས་ཀྱི་སྦོལ་པའི་ས། །གནས་ཀྱི་དབྱེ་བས་བརྟག་པར་བྱ། །གནས་ནི་སོ་སོར་བརྟགས་པ་ཡིས། །བརྒྱ་དང་བརྒྱད་ནི་
ལྷག་པར་རྒྱུ། །རྣམ་རྟོག་མེད་པའི་སྦྱོར་བ་མཆོག །རྟོག་པ་སྤངས་པའི་མཚན་ཉིད་ཅན། །དངོས་པོ་ཀུན་གྱི་རང་བཞིན་བདག །བརྒྱ་དང་བརྒྱད་ནི་ལྷག་པར་རྒྱུ། །འདི་ནི་ཡང་དག་རྣལ་འབྱོར་མཆོག །ཉིན་ཞག་ཉི་ཤུ་རྩ་བདུན་གྱིས། །མཚན་ཉིད་སྒོམ་པའི་རྣལ་འབྱོར་པ། །
ཇི་ལྟར་གནས་པར་རང་ངོ་བོ། །རྟོག་དང་བཅས་པའི་རྣལ་འབྱོར་པ། །དེ་ནས་རྣལ་འབྱོར་ལོག་ནས་ནི། །རྟོག་པ་དང་བྲལ་རླུང་ཆེན་པོ། །རྩ་ཡི་འཁོར་ལོ་རྣམ་པར་རྒྱུ། །དེ་ཐོབ་ནས་ནི་ལོག་པ་དང་། །ཀུན་ནས་ཉོན་མོངས་རྣལ་འབྱོར་པས། །ངེས་པ་ལ་ནི་དོན་དམ་པ། །
ཉིན་ཞག་ཉི་ཤུ་རྩ་བདུན་ལས། །ལས་དང་པོ་པའི་སྦྱོར་བ་ཡིས། །བློ་དང་ལྡན་པ་ལོག་པ་ལས། །དེ་ནས་དགག་པ་དེ་དག་ཀྱང་། །ཡང་དག་རྣལ་འབྱོར་སྟོབས་ཀྱིས་ནི། །སྲོག་དང་རྩོལ་བའི་རྣམ་རྟོག་རྣམས། །ཀུན་ནས་རབ་ཏུ་སྤངས་ནས་ནི། །རླུང་གི་དེ་ཁོ་ན་ཉིད་

རྒྱུ། །རྣལ་འབྱོར་མཆོག་ནི་བསྒོམ་པར་བྱ། །གཉིས་མེད་མཆོག་གི་རྣལ་འབྱོར་གྱིས། །ཉིན་ཞག་ཉི་ཤུ་རྩ་བདུན་ལ། །རླུང་གི་དེ་ཁོ་ན་ཉིད་རྟེན། །འཁྲུལ་པའི་རྣལ་འབྱོར་དག་པ་ནི། །དེ་ལ་རྩེ་གཅིག་སེམས་ཀྱིས་ནི། །རྟོག་མེད་དེ་ཁོ་ན་ཉིད་ཀྱིས། །རླུང་གི་དེ་ཉིད་རྣལ་འབྱོར་མཆོག །ཡང་
དག་རྩོལ་ལ་བྱས་པ་གསལ། །ཁང་བཟངས་བྱེད་པ་བཞིན་དུ་ནི། །ཐོག་མར་ས་ནི་ཡོངས་སུ་སྦྱང་། །དེ་སྟེང་བགེགས་དང་བྲལ་བྱས་ལ། །གནས་ནི་ལེགས་པར་དག་པར་བྱ། །ཁང་བཟངས་སྐལ་བ་ཉམས་དགའ་བ། །བློ་ལྡན་ཇི་ལྟར་འདོད་པར་བྱ། །དེ་བཞིན་རྣལ་འབྱོར་སྤྱོད་པས་
མཆོག །རླུང་གི་དེ་ཉིད་རྣམ་པར་བསྒོམ། །སྔ་མ་བཞིན་དུ་མཉམ་གཞག་ནས། །སྲོག་དང་རྩོལ་བའི་སྦྱོར་བ་དང་། །རྣལ་འབྱོར་མཆོག་གི་ཡེ་ཤེས་ཆེ། །རྣལ་འབྱོར་རིག་པ་བསྒོམ་པར་བྱ། །ཐོག་མར་རླུང་གི་དེ་ཉིད་དང་། །དེ་ནས་སྔགས་ཀྱི་དེ་ཉིད་གསལ། །དེ་ལ་རླུང་གི་འོད་ཟེར་
མཆོག །གསལ་བ་ཆེན་པོའི་ཁ་དོག་ལྔ། །དེ་བཞིན་གཤེགས་པ་ལྔ་རང་བཞིན། །ཕུང་པོ་ལྔ་ཡི་རང་ངོ་བོ། །དེ་ནི་ཡེ་ཤེས་ལྔ་དག་པ། །རླུང་ལྔ་རུ་ནི་རྒྱུ་བར་བྱེད། །མངོན་པར་བྱང་ཆུབ་རྣམ་པ་ལྔའི། །དེ་ཉིད་མཚན་ཉིད་གོ་འཕང་མཆོག །སྣ་ཡི་རྩེ་མོ་དེ་ཉིད་མཆོག །རླུང་ལྔ་
དང་ནི་རང་ངོ་བོ། །རླུང་གི་ཐིག་ལེ་ཞེས་ནི་བཤད། །ཡང་དག་དེ་ཉིད་གསལ་བ་ཡང་། །སྣ་རྩེར་ཡུངས་ཀར་དེ་ཡང་ནི། །རྒྱུད་གཞན་རྣམས་སུ་གསུངས་པ་ནི། །སྣ་རྩེར་ཡུངས་ཀར་དེ་ཡང་ནི། །སྲོག་དང་རྩོལ་བའི་བརྟག་པ་སྟེ། །སྲོག་དང་རྩོལ་བ་ལ་གནས་པ། །འོད་ལྔ་སངས་
རྒྱས་རྣམས་སུ་བསྒོམ། །སྟེང་གི་སྣ་ལས་ངེས་འབྱུང་བ། །གཡས་དང་གཡོན་དང་གཉིས་ཀ་ཡང་། །དལ་བར་རྒྱུ་དང་རྣམ་བཞིར་འགྱུར། །ནང་གི་དུས་ནི་ཡིན་པར་བཤད། །ལྐོག་མ་སྙིང་ག་ལྟེ་བ་དང་། །གསང་བའི་པདྨར་འགྲོ་འོང་སྟོན། །ཐུན་ཕྱེད་ཀྱི་ནི་དུས་དག་ཏུ། །གོ་རིམས་
ཇི་བཞིན་གནས་པས་བསྟན། །གཡས་པ་ནས་ནི་འབྱུང་བའི་ཁམས། །མེ་ཡི་དཀྱིལ་འཁོར་ཉིད་ཡིན་ཏེ། །ཁ་དོག་དམར་ཞིང་གསལ་བ་ཉིད། །པདྨའི་མགོན་པོ་རྒྱུ་བའོ། །གཡོན་པ་ནས་ནི་འབྱུང་བའི་ཁམས། །རླུང་གི་དཀྱིལ་འཁོར་ཞེས་བྱ་བ། །ལྗང་སེར་དག་ཏུ་སྣང་

བ་སྟེ། །ལས་ཀྱི་མགོན་པོ་རྒྱུ་བའོ། །གཉིས་ཀ་ལས་ནི་འབྱུང་བའི་ཁམས། །གསེར་གྱི་མདོག་ཏུ་སྣང་བ་སྟེ། །དབང་ཆེན་གྱི་ནི་དཀྱིལ་འཁོར་ཉིད། །རིན་ཆེན་མགོན་པོ་རྒྱུ་བའོ། །དལ་ཞིང་རྒྱུ་བ་མེད་པའི་ཁམས། །དག་པའི་ཤེལ་ལྟར་སྣང་བ་ནི། །ཆུ་
ཡི་དཀྱིལ་འཁོར་ཉིད་ཡིན་ཏེ། །རྡོ་རྗེ་མགོན་པོ་རྒྱུ་བའོ། །ལུས་ཀུན་ལ་ནི་གནས་པའི་རླུང་། །བྱ་བ་ཀུན་ལ་འཇུག་པའོ། །འདི་ནི་རྣམ་སྣང་ངོ་བོ་སྟེ། །འཆི་བའི་ལུས་ལ་འབྱུང་བར་འགྱུར། །རླུང་གི་དེ་ཉིད་གསལ་བ་འདི། །ཡེ་ཤེས་ལྔ་ཡི་རང་བཞིན་ཅན། །རྣལ་འབྱོར་
བྱིས་པའི་ཡུལ་མིན་ཞིང་། །རྟོག་གེ་པ་ཡིས་མི་ཤེས་སོ། །དངོས་གྲུབ་ཐམས་ཅད་གསལ་བྱེད་པ། །རྣལ་འབྱོར་ཀུན་གྱི་དངོས་གྲུབ་པ། །དེ་ཉིད་ཀུན་གྱི་གོ་འཕང་གསལ། །རྣལ་འབྱོར་ཀུན་གྱི་དོན་བསྡུས་པ། །རྡོ་རྗེ་སེམས་དཔའི་གོ་འཕང་གསལ། །ཐམས་ཅད་བདག་
ཉིད་རྟག་ཏུ་བཞུགས། །དེ་ཉིད་མཆོག་ནི་ཤིན་ཏུ་ཕྲ། །བླ་མའི་ཞལ་ལས་རྟོགས་པར་འགྱུར། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རླུང་གི་དེ་ཁོ་ན་ཉིད་བཤད་པའི་ལེའུ་སྟེ་བཅུ་གཉིས་པའོ།། །།དེ་ནས་གཞན་ཡང་བཤད་ཀྱིས་ཉོན། །
བདེ་བ་ཆེན་པོ་གསལ་བའི་ཚིག །རྡོར་སེམས་གོ་འཕང་མི་ཕྱེད་པ། །རང་རིག་པས་ནི་མཆོག་གི་མཆོག །ཀུན་རྟོག་གིས་བརྟགས་ཀྱིས་སྟོང་པ། །བདེ་བ་ཆེན་པོ་ཞེས་འདི་བརྗོད། །ལྷན་ཅིག་སྐྱེས་པའི་དུས་སུ་ནི། །གཟུང་དང་འཛིན་པ་རྣམ་པར་སྤངས། །བདེ་དང་
སྡུག་བསྔལ་རྣམ་པར་སྤངས། །ཞི་བ་གཉིས་མེད་རྣམ་པར་བྲལ། །དངོས་པོ་ཀུན་གྱི་རང་བཞིན་བདག །བདེ་ཆེན་ཞེས་ནི་འདི་ལ་བརྗོད། །རྡོ་རྗེ་ཡེ་ཤེས་ལྔ་ཡི་དངོས། །སངས་རྒྱས་ལྔ་ཡི་རང་བཞིན་ཅན། །ལྔ་ནི་རྩ་ནས་འབབ་པའི་རྒྱུན། །སྟོང་ཉིད་རྡོ་རྗེའི་གོ་འཕང་གསལ། །
རང་བཞིན་མེད་ཅིང་རྟེན་མེད་པ། །གཉིས་མེད་དངོས་པོ་རྣམ་བྲལ་ཞིང་། །ཆ་མེད་ཆ་ནི་རྣམ་པར་སྤངས། །རྟག་ཏུ་རྟོག་པ་ཀུན་ལས་གྲོལ། །འཕོ་བ་མེད་ཅིང་ཞི་བ་དང་། །ཟད་མེད་བདེ་བ་ཐམས་ཅད་གསལ། །ཉོན་མོངས་ཀུན་ལས་རྣམ་གྲོལ་བ། །བདེ་བ་ཐམས་

ཅད་ལ་འཇུག་པ། །སྟོང་པ་སྟོང་པ་ཆེན་པོ་དང་། །ཤིན་ཏུ་སྟོང་པ་མཆོག་གི་མཆོག །སྟོང་པ་དང་གཞན་སྟོང་པའི་གནས། །ནམ་མཁའ་ལྔ་ཡི་ངོ་བོ་ཉིད། །མི་ཆོད་མི་འགྱུར་ངོ་བོ་ཉིད། །མི་ཚིག་པ་དང་མཆོག་ཏུ་འབིགས། །སངས་རྒྱས་ལྔ་ཡི་ཡེ་ཤེས་མཆོག །རང་བཞིན་རྡོ་རྗེ་
ཞེས་ནི་བརྗོད། །སྙིང་རྗེ་རྣལ་འབྱོར་ཡང་དག་འདྲེས། །མཆོག་ཏུ་སྐྱེ་བའི་བདེ་བ་འདི། །དེ་ཉིད་གསུམ་པོ་རོ་གཅིག་པ། །རྗོད་དང་བརྗོད་བྱ་རྣམ་པར་སྤངས། །བདེ་ཆེན་ཞེས་བྱའི་འཁོར་ལོར་གནས། །དབང་པོ་རྣམས་ཀྱི་སྤྱོད་ཡུལ་མིན། །མཆོག་ཏུ་གཉིས་མེད་རྣལ་འབྱོར་
གྱིས། །ཞི་བ་དགའ་བའི་མཚན་ཉིད་གཅིག །འཁོར་ལོ་བཞི་ཡི་རིམ་གྱིས་ཐོབ། །རྣལ་འབྱོར་བཞི་ཡི་གོ་འཕང་གསལ། །སྟོང་ཉིད་ལྔ་ཡིས་ཀུན་ནས་གང་། །ཆ་བཞི་ཡིས་ནི་རྣམ་བཀག་པ། །རྡོ་རྗེ་མོར་ནི་འཛིན་པ་ནི། །སེམས་དཔའ་ཞེས་བྱར་གཏན་ལ་དབབ། །ནམ་མཁའ་
ལྔ་ཡི་ཆ་ཡིས་གང་། །འདི་ནི་རྡོ་རྗེ་སེམས་དཔར་བརྗོད། །དེ་ཉིད་བདེ་ཆེན་གོ་འཕང་སྟེ། །བཞི་བ་དགའ་བ་ཀུན་ལ་ཁྱབ། །དཔའ་བོ་རྣལ་འབྱོར་མ་སྦྱོར་སྐྱེས། །མི་ཕྱེད་དབྱེ་བ་རྣམ་པར་སྤངས། །དེ་ཡི་ངོ་བོ་དེ་ཉིད་དེ། །རང་ཉིད་ཚོར་བ་རིག་པའོ། །ཕ་རོལ་གཞན་གྱི་སྤྱོད་
ཡུལ་མིན། །དཔེ་བྲལ་མཚོན་པར་དཀའ་བ་དང་། །རང་གི་བློ་ལ་ཡང་དག་གནས། །རང་རིག་པ་ཞེས་བཤད་པའོ། །གཞོན་ནུ་མ་ཡི་རབ་དགའ་བཞིན། །མཆོག་ཏུ་གསལ་བར་ཉམས་སུ་མྱོང་། །དེ་ཉིད་མཆོག་དང་ཕ་རོལ་འགྲོ། །མཆོག་ནི་ཐུབ་པ་ཀུན་ལ་སོགས། །
རྟོག་པ་གསལ་བའི་གོ་འཕང་ནི། །དེ་ནི་མཆོག་དང་བདེ་བ་ཆེ། །དེ་ཉིད་གསུམ་དུ་མཚན་ཉིད་གཅིག །དངོས་དང་དངོས་མེད་ལས་གྲོལ་བདེ་བའི་བདག་ཉིད་འཁོར་བའི་སྡུག་བསྔལ་ལས་ནི་གྲོལ་བར་རྟོགས། །གཉིས་དང་གཉིས་མེད་རྣམ་དཔྱོད་རང་བཞིན་དང་བྲལ་བློ་ནི་ཞི་བའི་བདག་
ཉིད་ཅན། །གསུངས་པའི་ཉོན་མོངས་གཅོད་ཅིང་འཇིག་རྟེན་ཀུན་རྟོག་དང་ནི་བྲལ་བ་ཞེས། །ཤེས་དང་ཤེས་བྱའི་རྣམ་རྟོག་དབེན་པ་སྤངས་ཤིང་བདེན་པའི་རང་བཞིན་དང་། །མཐར་གྱུར་ཀུན་ཁྱབ་ཞི་བ་མཆོག་དང་མཆོག་རབ་དེ་ཉིད་འགྲོ་བ་བདེ་ལ་སྩོལ། །དུས་ནི་དུས་ཀྱི་མཐའ་ཞེས་བརྗོད། །

བཞི་པའི་དུས་སྦྱོར་ཞེས་བྱ་བ། །འཁོར་བ་འཁྲུལ་བའི་རྟོག་སྤངས་ཤིང་། །མྱ་ངན་འདས་བ་ཐོབ་པ་སྤངས། །མཉམ་པའི་ཉམས་ནི་ཆེན་པོར་མྱོས། །མཉམ་ཉིད་ཡེ་ཤེས་མཚན་ཉིད་ཅན། །གཟུང་བ་རྣམས་ཀྱི་ཡུལ་རྣམས་ཞེས། །ཀུན་ནས་གཟུགས་ལ་སོགས་པ་
ལས། །འཛིན་པ་དབང་པོ་རྣམ་ཤེས་རྣམས། །མིག་ལ་སོགས་པའི་རང་བཞིན་གྱིས། །དེ་དང་བྲལ་ཞིང་མཆོག་ཏུ་ཕྲ། །ཡེ་ཤེས་བདེ་བ་ཀུན་གྱི་བདག །སྡུག་བསྔལ་ཀུན་ལས་རྣམ་པར་གྲོལ། །གཟུང་དང་འཛིན་པ་རྣམ་པར་སྤངས། །བདེ་བ་སེམས་ནི་ཞི་བ་ཉིད། །སྡུག་བསྔལ་
འཁོར་བའི་མཚན་ཉིད་དེས། །དེ་ལས་རྣམ་གྲོལ་འཇིགས་པ་མེད། །མི་གནས་མྱ་ངན་འདས་པ་པོ། །སྟོང་ཉིད་ཡེ་ཤེས་ཆེན་པོའི་བདག །འཁོར་བའི་སྡུག་བསྔལ་མི་འབྱུང་ཞིང་། །ཐུགས་རྗེ་ཞི་བར་མཛད་པའི་ཕྱིར། །མྱ་ངན་འདས་པའི་བདེ་མི་གནས། །ཉན་ཐོས་
ཡེ་ཤེས་ཞི་བ་ཉིད། །གཉིས་མེད་མཆོག་དང་བསེ་རུའོ། །དེ་དག་བདེ་བ་རྟོགས་པ་ཡི། །དེ་དང་བྲལ་བའི་བདེ་ཆེན་པོ། །དགང་ཕྱིར་མཆོག་ཏུ་དཀའ་བའི་དུས། །ཉན་ཐོས་ཡེ་ཤེས་ཞེས་བརྗོད་དོ། །དེ་མཐའ་བྲལ་བའི་དགའ་བ་ནི། །རང་རྒྱལ་མྱ་ངན་འདས་པ་དང་། །དེ་ནི་གཉིས་
མེད་ཡེ་ཤེས་ཞི། །བདེ་བ་ཡིས་ནི་བྱེ་བྲག་བྱས། །དངོས་པོ་མཁྱེན་པའི་ཡེ་ཤེས་ཆེ། །བྱང་ཆུབ་སེམས་ཀྱང་འཛིན་པར་བྱེད། །རྩ་རྣམས་ཀུན་ལ་བདེ་བ་ནི། །བདེ་བ་ཆེན་པོའི་གོ་འཕང་གནས། །དེ་ཡི་བདག་ཉིད་དེ་ཉིད་ནི། །བདེ་བ་ཆེན་པོ་ཞེས་ནི་བརྗོད། །རྣལ་འབྱོར་
གཅིག་པུས་དེ་ཉིད་ནི། །རྟོག་པ་རྣམ་རྟོག་བདག་ཉིད་མིན། །བསྙེན་ནས་བཟླས་པ་སྦྱིན་སྲེག་མིན། །བསམ་གཏན་རླུང་ནི་བགེགས་པས་མིན། །བྱ་བ་མ་ཡིན་ཕྲེང་བས་མིན། །བསྐྱེད་པའི་རིམ་པ་བསྒོམས་པས་མིན། །ཅུང་ཟད་བཞི་པའི་དབང་བསྐུར་གྱིས། །བླ་མ་དམ་པའི་ཞལ་
ནས་འཐོབ། །རྣལ་འབྱོར་མ་ཀུན་ཀུན་སྤྱོད་ནི། །མཆོག་གི་ཡེ་ཤེས་བདེ་བ་ཆེ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་བདེ་བ་ཆེན་པོའི་ཚིག་རྣམ་པར་བཤད་པའི་ལེའུ་སྟེ་བཅུ་གསུམ་པའོ།། །།དེ་ནས་གཞན་ཡང་བཤད་ཀྱིས་ཉོན། །རྡོ་རྗེ་

པདྨ་མཉམ་པར་སྦྱོར། །གང་གིས་ཡང་དག་དངོས་གྲུབ་འགྱུར། །ཚེ་འདི་ཉིད་ལ་རྣལ་འབྱོར་པ། །མི་ཕྱེད་རྡོ་རྗེ་ཞེས་ནི་བརྗོད། །དེ་ནི་རླུང་དུ་ཡང་དག་གྲགས། །ཡི་གེ་ཨ་ནི་ཕྱེ་བ་ཡིས། །རྣལ་འབྱོར་ཤེས་པས་རྟག་མཆོག་སྩོལ། །དེ་རྟེན་སྙིང་གའི་པདྨ་ཡིས། །འདབ་
མ་བརྒྱད་ཀྱིས་རྣམ་པར་བརྒྱན། །ཆོས་ཀྱི་འཁོར་ལོ་སྐལ་བ་བཟང་། །ཐམས་ཅད་བདག་ཉིད་རྟག་ཏུ་བཞུགས། །དེ་ཡི་འདབ་མ་ལ་སྐྱེས་པ། །རྣམ་ཤེས་བརྒྱད་ནི་ཀུན་རྫོབ་བོ། །མིག་ལ་སོགས་པ་ཡང་དག་རྟེན། །འགྲོ་བ་གསུམ་དུ་རྣམ་པར་སྤྱོད། །དེ་དག་འཇོམས་པ་
རླུང་རྡོ་རྗེ། །བགེགས་མཐར་བྱེད་པ་ཞེས་ནི་བརྗོད། །རྣམ་ཤེས་རྣམས་དང་གང་དེ་ལ། །འཇིག་རྟེན་སྐྱོང་བ་རྣམས་སུ་བརྗོད། །འཇིག་རྟེན་གསུམ་དུ་ཀུན་ནས་ཁྱབ། །འཇིག་རྟེན་པ་ཡི་ལྷ་རྣམས་གནས། །སྐྱོང་བ་ཡང་ནི་ཐམས་ཅད་ཀྱིས། །ཡུལ་ལ་སོགས་པའི་འབྲས་བུ་
གནས། །དེ་ལ་རླུང་གིས་ཡང་དག་སྦྱོར། །རྡོ་རྗེ་པདྨོ་ཞེས་ནི་བརྗོད། །རྡོ་རྗེ་སྙིང་རྗེར་ཤེས་པར་བྱ། །པདྨ་ཡང་ནི་སྟོང་པ་ཉིད། །དེ་དག་སྦྱོར་བའི་མཆོག་ཏུ་ཤེས། །རྡོ་རྗེ་པདྨ་མཉམ་སྦྱོར་བ། །རྡོ་རྗེ་ཉི་མ་ཞེས་ནི་གསུངས། །འོད་ཟེར་ཚོགས་ཀྱི་བདག་ཉིད་ཅན། །དེ་རྣམས་
ཀྱིས་ནི་འབྱེད་པ་གང་། །དེ་ནི་པདྨ་ཞེས་སུ་བརྗོད། །དེ་ཡི་རྣལ་འབྱོར་མཆོག་ཏུ་ཤེས། །རྡོ་རྗེ་པདྨ་མཉམ་སྦྱོར་བ། །བྱང་ཆུབ་སེམས་ཀྱང་རྡོ་རྗེར་འགྱུར། །བདེ་ཆེན་འཁོར་ལོ་པདྨའོ། །དེ་ལའང་དེ་ཡི་སྦྱོར་བ་གང་། །སྦྱོར་བ་མཆོག་ཏུ་རྨད་དུ་བྱུང་། །བླ་མའི་གསུང་ནི་རྡོ་རྗེ་སྟེ། །སློབ་
མ་བཟང་གིས་ཐོས་པའི་སྣོད། །པདྨ་དེ་ཡི་གནས་དེ་ལ། །དེ་ཡི་སྦྱོར་བའང་མཆོག་ཏུ་གསལ། །ཞི་གནས་པདྨ་ཞེས་གསུངས་ལ། །དེ་ལ་ལྷག་མཐོང་རྡོ་རྗེའོ། །དེ་གཉིས་གཅིག་གྱུར་རྣལ་འབྱོར་ནི། །སྒོམ་པ་ཡིས་ནི་དེ་ཉིད་མཐོང་། །རྣལ་འབྱོར་མ་ཞལ་པདྨར་གནས། །རྡོ་རྗེ་བདེ་
ཆེན་བླ་ན་མེད། །པདྨ་སློབ་མ་བཟང་གི་ཁ། །མན་ངག་གི་ནི་དོན་གྱི་སྣོད། །དེ་གཉིས་རྣལ་འབྱོར་ཀུན་བདག་ཉིད། །ཡང་དག་དེ་ཉིད་དོན་མཐོང་བྱེད། །བློ་ལྡན་རྣམ་རྟོག་བྲལ་བ་ཡི། །རྡོ་རྗེ་ལིངྒ་ཞེས་ནི་བཤད། །རྣམ་རྟོག་བྲལ་བའི་བློ་ལྡན་གྱིས། །བྷ་ག་པདྨ་ཞེས་ནི་བརྗོད། །

དམ་ཚིག་གིས་བརླན་རྣལ་འབྱོར་མ། །དེ་གཉིས་དངོས་གཅིག་ཡང་དག་སྦྱོར། །གཉིས་མེད་ཡེ་ཤེས་མཐོང་བར་བྱེད། །སྟོང་ཕྲག་གཉིས་དང་བདུན་ཁྲི་ཡི། །རྩ་རྣམས་རྡོ་རྗེ་ཞེས་ནི་བརྗོད། །བྱང་ཆུབ་སེམས་ནི་འབབ་པའི་རྩ། །པདྨ་ཞེས་ནི་ཡོངས་སུ་གྲགས། །དེ་
ནི་ཀུན་དུ་སྦྱོར་བ་དེས། །དགའ་བ་སྐྱེད་པར་བྱེད་པ་ཡིས། །རྡོ་རྗེ་ཡི་ཡང་ཉམས་དགའི་སྟན། །རང་རིག་རྡོ་རྗེ་འཆང་པདྨ། །དེ་ལ་དེ་གཉིས་མཉམ་སྦྱོར་བ། །སངས་རྒྱས་ཡེ་ཤེས་གོ་འཕང་གསལ། །དབང་བསྐུར་མཆོག་ནི་རྡོ་རྗེ་སྟེ། །བླ་མ་སློབ་མ་སྣོད་བཟང་པོ། །དེ་གཉིས་
མཆོག་ཏུ་ཡང་དག་སྦྱོར། །ཡང་དག་དེ་གཉིས་ཀྱི་ནི་རྒྱུ། །ཨེ་ནི་པདྨ་ཞེས་སུ་བརྗོད། །ཡི་གེ་བྃ་ནི་རྡོ་རྗེ་ཉིད། །ཐིག་ལེ་དེ་ཉིད་མི་ཤིགས་པ། །དེ་གཉིས་སྦྱོར་བའི་ངོ་མཚར་ནི། །དེ་ལྟར་སྦྱོར་བ་མཆོག་ཏུ་ཤེས། །རྡོ་རྗེ་པད་སྣོད་སྡོམ་པ་ནི། །རྣལ་འབྱོར་མ་ཡི་མན་ངག་དང་། །བླ་མའི་
དྲིན་གྱིས་ཡོངས་སུ་ཤེས། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རྡོ་རྗེ་པདྨ་ཡང་དག་པར་སྦྱོར་བ་བཤད་པའི་ལེའུ་སྟེ་བཅུ་བཞི་པའོ།། །།སྔགས་ཀྱི་དེ་ཉིད་ཡེ་ཤེས་མཆོག །བཤད་ཀྱིས་རྡོ་རྗེ་ཅན་ནི་ཉོན། །སྔགས་ཀྱི་སྤྱོད་པ་སྤྱད་པ་ཡིས། །
གང་གིས་དངོས་གྲུབ་མྱུར་འགྲུབ་འགྱུར། །སྐུ་གསུང་ཐུགས་ཀྱི་རྡོ་རྗེ་རྣམས། །སྔགས་ནི་གཟུངས་བཞིན་བཟླས་བརྗོད་བྱ། །དེ་ཡིས་མྱུར་དུ་དངོས་གྲུབ་འགྱུར། །རླུང་གི་དེ་ཉིད་ཕ་མཐར་ཕྱིན། །རྡོ་རྗེའི་ཕྱག་རྒྱ་གོ་འཕང་ཞི། །ཕྱག་རྒྱ་ཆེན་པོའི་སྡོམ་པའི་དོན། །མཆོག་གི་དེ་ཉིད་ཡེ་
ཤེས་ཆེ། །སྔགས་ཀྱི་དེ་ཉིད་བསྟན་པ་ཡིན། །དམིགས་པ་མེད་པའི་གོ་འཕང་གསལ། །རྡོ་རྗེ་སེམས་དཔའ་ངེས་པའི་རྒྱུ། །སྔགས་ནི་ཡོན་ཏན་ཀུན་གྱིས་གསལ། །ལུས་ངག་ཡིད་ཀྱི་སྡོམ་པའོ། །དེ་ཉིད་དེ་སྐྱེས་ཡེ་ཤེས་མཆོག །དེ་ཉིད་ཀུན་གྱི་དོན་བསྡུས་པ། །སྙིང་གའི་པདྨར་མཆོག་ཏུ་
གསལ། །དེ་ཉིད་ཡེ་ཤེས་བླ་ན་མེད། །ཟླ་དྲུག་བཟླས་པས་འགྲུབ་པར་ནི། །འགྱུར་ཏེ་གཞན་དུ་མ་ཡིན་ནོ། །རྣལ་འབྱོར་མཆོག་གི་ཐབས་དང་ནི། །རྣལ་འབྱོར་པས་ནི་ཡོངས་སུ་གྲགས། །དམིགས་མེད་ཞེས་ནི་གང་གསུངས་པ། །དེ་ནི་དོན་དམ་པར་ནི་བརྗོད། །སྦྲུལ་སོགས་པ་ཡི་དབྱེ་

བ་ཡིས། །སྔགས་མི་ཟློས་པ་གཉིས་སུ་མེད། །འོན་ཀྱང་མི་ཕྱེད་དེ་ཉིད་གསུམ། །སྔགས་ཀྱི་དོན་དམ་བསྡུས་པའོ། །བཟླས་པའི་དངོས་གྲུབ་མཚུངས་པ་མེད། །ཡང་དག་མཉམ་པར་གཞག་བཟླས་ན། །དངོས་གྲུབ་མཚུངས་པ་མེད་པར་འགྲོ། །རྣམ་དག་གོ་འཕང་བཟང་པོ་གསལ། །
གང་ཤེས་དེ་ནི་འགྲོ་བའི་བླ། །སྔགས་དོན་སྔགས་དེ་ཉིད་དང་ནི། །སྔགས་ཀྱི་མན་ངག་ཁ་བརྒྱུད་པ། །སྔགས་ཀྱི་མན་ངག་མི་གསལ་བ། །གང་ཤེས་དེ་ནི་འགྲོ་བའི་བླ། །དེ་ནས་རྡོ་རྗེ་སེམས་དཔའ་ནི། །ཀུན་མཁྱེན་འགྲོ་བའི་བླ་མ་ལ། །རྡོ་རྗེ་སེམས་དཔས་ཡང་ནས་ཡང་། །ཕྱག་བྱས་
ནས་ནི་ཡོངས་སུ་ཞུས། །སྔགས་ཀྱི་མཚན་ཉིད་ཇི་ལྟ་བུ། །བཅོམ་ལྡན་འདས་ཀྱིས་མིང་དང་དོན། །རང་བཞིན་ཅི་ཞིག་རབ་གསལ་བ། །སྔགས་ཀྱི་དེ་ཉིད་མན་ངག་ནི། །སྔགས་ཀྱི་སྡོམ་དོན་ཇི་ལྟ་བུ། །དེ་ནས་བཅོམ་ལྡན་རྡོ་རྗེས་གསུངས། །རྣལ་འབྱོར་གསུམ་གྱི་འབྲས་བདག་ཉིད། །
སྔགས་ཀྱི་དོན་དང་མིང་མཆོག་དང་། །གཉིས་མེད་ཡེ་ཤེས་མཚན་ཉིད་ཅན། །དེ་ཁོ་ན་ཉིད་བཤད་ཀྱིས་ཉོན། །སྙིང་པོའི་སྙིང་པོའི་དོན་བསྡུས་པ། །ཐོག་མ་མེད་ཅིང་ཞི་བ་དང་། །དངོས་དང་དངོས་མེད་བདག་ཉིད་གཙོ། །སྟོང་ཉིད་སྙིང་རྗེ་དབྱེར་མེད་པ། །སྔགས་དོན་རིག་པའི་མཚན་
ཉིད་ནི། །ཉོན་མོངས་མེད་ཅིང་མི་གསལ་བ། །རང་བཞིན་མེད་པའི་མཆོག་གི་མཆོག །མིང་མེད་རང་བཞིན་མེད་པ་དང་། །རྣམ་པ་མེད་པའི་ཆེན་པོའི་མཆོག །གཉིས་པ་ཐམས་ཅད་རྣམ་པར་སྤངས། །བདེ་བ་ཡང་དག་འཕེལ་བར་བྱེད། །སྐལ་བཟང་བདེ་བ་འཕེལ་བར་བྱེད། །ཐམས་
ཅད་ཤེས་ཤིང་ཆ་དང་བྲལ། །གཉིས་མེད་ཡེ་ཤེས་རྣལ་འབྱོར་སྐྱེས། །དེ་ཉིད་དེ་ནི་དོན་དམ་ཡང་། །དེ་ཉིད་དེ་བཞིན་ཉིད་གཞན་མིན། །དེ་ཉིད་རྡོ་རྗེ་འཆང་བའི་དངོས། །ཡེ་ཤེས་ལྔ་ཡི་རང་བཞིན་ཉིད། །ཁྱབ་པ་ཀུན་འགྲོ་སྟོང་པ་ཉིད། །ཉོན་མོངས་ཐམས་ཅད་རབ་ཏུ་འཇོམས། །
དྲི་མེད་དྲི་བྲལ་དགའ་བ་དང་། །རང་རིག་པ་ཡི་གོ་འཕང་མཆོག །དང་པོའི་ལྷ་སྟེ་ཉམས་དགའ་བཟང་། །ཆ་ཡི་ཚོགས་རྣམས་རྒྱས་པར་བྱེད། །མན་ངག་གནས་ཀྱི་བྱེ་བྲག་གིས། །འཁོར་ལོའི་དབྱེ་བས་བཏུ་བར་བྱ། །རྩ་དང་མགྲིན་པ་སྙིང་ག་རྐན། །རྩོལ་བ་ཇི་བཞིན་བརྗོད་པ་ཡི། །དེ་

བཞིན་དུ་ནི་ལས་བྱ་བ། །ཞི་བ་ལ་སོགས་གོ་རིམས་བཞིན། །ཇི་བཞིན་དངོས་གྲུབ་ཡེ་ཤེས་དང་། །ཇི་བཞིན་ཉམས་སུ་མྱོང་མཚན་ཉིད། །རང་བཞིན་རྫོགས་པ་ཇི་ལྟ་བུ། །རྒྱུན་གྱི་དབྱེ་བ་ཇི་ལྟ་བུ། །རིག་པ་ཇི་བཞིན་སྦྱོར་ཇི་བཞིན། །འབྲས་བུ་ཇི་ལྟ་བ་བཞིན་
གནས། །ཡང་དག་བསམ་གཏན་ཕྱག་རྒྱའི་རིམ། །གཟུགས་རྫོགས་པ་ལ་སོགས་པ་ཡི། །བླ་མ་བརྒྱུད་པས་ཡང་དག་གནས། །རབ་ཏུ་འབད་པས་བསླབ་པར་བྱ། །གསེར་དང་དོ་ཤལ་གོས་དང་ནི། །རིན་ཆེན་སྣ་ཚོགས་ཡོན་ཏན་མཆོག །བྲན་དང་ལས་བྱེད་གྲངས་མེད་དང་། །
དད་ཅིང་གུས་པ་ལ་སོགས་ཀྱིས། །ཇི་ལྟར་བཞེད་པ་སྟོན་པ་ལ། །རྙེད་པར་དཀའ་བའི་དངོས་རྣམས་ཀྱིས། །སྔགས་ཀྱི་དོན་སྟོན་བླ་མ་ནི། །དགོངས་པ་ཡོངས་སུ་རྫོགས་པར་བྱ། །ཕྱག་བྱས་དེ་རྗེས་སྔགས་པ་ཡིས། །ཡང་དག་བཟུང་ནས་འབྲས་བུའི་དོན། །མི་ཡི་རུས་པའི་སྨྱུ་
གུ་དང་། །ས་གཞི་རིན་ཆེན་རབ་འབར་བ། །ཡང་ན་དུར་ཁྲོད་ཐལ་བ་ནི། །རབ་བརྡལ་དངོས་གྲུབ་སྟེར་བར་བྱེད། །ཐོག་མར་དབང་བསྐུར་བླང་བྱས་ནས། །མདུན་དུ་དཀྱིལ་འཁོར་ལ་སོགས་བྱ། །བགེགས་མཐར་བྱེད་ལ་གཏོར་མ་ནི། །ཆེན་པོ་གཙུག་ལག་ཁང་དུ་སྦྱིན། །སྐུ་གསུང་
ཐུགས་ནི་སྒྲུབ་བྱེད་པའི། །མཚུངས་པ་མེད་པའི་སྔགས་བཏུ་བྱ། །དང་པོའི་ཡི་གེ་ཐོག་མར་བྲི། །དབྱངས་ཡིག་ལྔ་པ་ཡང་དག་ལྡན། །སྡེ་ཚན་ཐ་མའི་མཐའ་ཆ་ལྡན། །སྐུ་ཡི་ས་བོན་དུ་ནི་བརྗོད། །ཐོག་མའི་ཡི་གེ་ཉིས་འགྱུར་ལ། །ཨུཥྨ་ཥ་ཡི་ཆ་དང་ལྡན། །མཚུངས་པ་མེད་
པའི་སྔགས་བཏུ་བྱ། །གསུང་གི་རྡོ་རྗེ་སྙིང་པོ་མཆོག །ཨུཥྨ་ཥ་ཡི་ཆ་དང་བཅས། །དབྱངས་ཡིག་དྲུག་པར་ཡང་དག་ལྡན། །སྡེ་ཚན་མཐའ་ཡི་མཐའ་ཆར་བཅས། །ཐུགས་ཀྱི་རྡོ་རྗེ་གོ་འཕང་གསལ། །སྐུ་གསུང་ཐུགས་ཀྱི་དམ་ཚིག་གསུམ། །འཇིག་རྟེན་གསུམ་ཡང་འགྲུབ་པར་
བྱ། །རྣལ་འབྱོར་པ་ཡི་དེ་ཉིད་མཆོག །སྔགས་བཏུ་བ་ནི་བླ་ན་མེད། །དེ་ཉིད་དངོས་གྲུབ་ཐམས་ཅད་བྱེད། །སྔགས་རྣམས་ཀུན་གྱི་དོན་བསྡུས་པ། །སྔགས་ཀྱི་ཐེག་པ་ཀུན་ཡིན་ནོ། །རྒྱུ་དང་མི་རྒྱུ་ས་ཉིད་ལ། །དངོས་གྲུབ་རྣམས་ཀྱི་རྣལ་འབྱོར་མཆོག །རྣལ་འབྱོར་ཡེ་

ཤེས་བླ་ན་མེད། །རྡོ་རྗེ་སེམས་དཔའི་སྙིང་པོ་ནི། །ཡེ་ཤེས་བླ་ན་མེད་པའི་མཆོག །མན་ངག་ཇི་བཞིན་སྔགས་ཟློས་པ། །དངོས་གྲུབ་ཕྱིར་ནི་ལུང་བཞིན་གྱིས། །དེ་ཡི་དངོས་གྲུབ་རྒྱ་ཆེན་འགྲོ། །ཚེ་འདི་ཉིད་ལ་སྔགས་ཤེས་པས། །ཡེ་ཤེས་ཆེན་པོ་ཞེས་བཤད་པའི། །སྐུ་གསུང་
ཐུགས་ཀྱི་རྣལ་འབྱོར་ཆེ། །རབ་གསལ་སྔགས་ནི་མཚུངས་པ་མེད། །འདོད་པ་ཀུན་ལ་ལོངས་སྤྱོད་བྱེད། །གང་ཞིག་སྔགས་ནི་མགུལ་པ་རུ། །རྟག་འཆང་དེ་ཁོ་ན་ཉིད་ཤེས། །རྟོག་པ་ཀུན་ཡང་འགྲུབ་པར་བྱེད། །དཀྱིལ་འཁོར་ཀུན་དུ་ཞུགས་པ་དང་། །དམ་ཚིག་ཐམས་ཅད་
ཤེས་པ་དང་། །བློ་བཟང་འཇིག་རྟེན་གསུམ་ཡང་འགྲུབ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སྔགས་ཀྱི་དེ་ཁོ་ན་ཉིད་གསུངས་པའི་ལེའུ་སྟེ་བཅོ་ལྔ་པའོ།། །།དེ་ནས་གཞན་ཡང་བཤད་ཀྱིས་ཉོན། །གྲངས་ཀྱི་རིམ་པ་བླ་ན་མེད། །ཇི་
ལྟར་གནས་པའི་རླུང་རྣམས་ཀྱི། །རིམ་པ་ཇི་ལྟ་བ་བཞིན་དུ། །གང་གིས་ཐོབ་པ་སྐལ་པ་བཟང་། །སྲོག་ནི་ཐམས་ཅད་བདག་ཉིད་གནས། །གང་གིས་ཡང་དག་ཡོངས་སུ་ཤེས། །རྣལ་འབྱོར་མཆོག་ནི་ཐོབ་པར་བྱེད། །རླུང་གི་མཚན་ཉིད་མི་ཤེས་པ། །འཇིག་རྟེན་གསུམ་
དུ་རྣམ་པར་འཁོར། །གོམས་པ་ཐོབ་པ་དེ་ཡང་ནི། །བླ་མ་རྣལ་འབྱོར་དེ་ཤེས་བརྒྱུད། །རླུང་གི་མཚན་ཉིད་ཇི་ལྟ་བུ། །ལོ་ཚིགས་ཀྱི་ནི་མཚན་ཉིད་ནི། །མདོར་བསྡུས་ནས་ནི་བཤད་པར་བྱ། །སྤྲིན་གྱི་དཔལ་ལས་གསལ་བ་གང་། །མདོར་བསྡུས་ནས་ནི་དུས་ནི་དྲུག །ལོ་ཚིགས་སུ་ནི་
ཡོངས་སུ་གྲགས། །སྦྱོར་བ་གཉིས་ནི་དུས་ཡིན་ཏེ། །དུས་དེ་ཉིན་ཞག་དྲུག་ཅུའོ། །ཉིན་དང་མཚན་དུ་ངེས་པ་ལ། །ཉིན་ཞག་གཅིག་ཅེས་ཡོངས་སུ་གྲགས། །ཉིན་མཚན་ཆུ་ཚོད་དྲུག་ཅུ་སྟེ། །དེ་བཞིན་དབྱུག་གུ་ཙ་ཤའོ། །འབྱུང་དང་རྔུབ་པའི་དུས་དྲུག་ལ། །ཙ་ཤ་ཞེས་ནི་
ཡོངས་སུ་གྲགས། །སྐད་ཅིག་མ་དྲུག་ལ་ནི་དབུགས། །དེ་ཉིད་སེ་གོལ་གཏོགས་པའི་ཚད། །ཐང་ཅིག་གསུམ་ལ་སྐད་ཅིག་གོ། །དེ་ལ་ཡུངས་ཀར་བསྐོར་བ་ཙམ། །དབུགས་གསུམ་ལ་ནི་ཐང་ཅིག་གོ། །ཐང་ཅིག་དེ་ནི་ཡུད་ཙམ་མོ། །ཐང་ཅིག་གསུམ་ལ་མིག་བཙུམས་

ཏེ། །དེ་ཡང་མིག་ནི་འཛུམས་པ་ཡི། །ཙམ་གསུམ་ལ་ནི་མིག་བཙུམས་ཏེ། །ཙམ་ནི་ཐལ་མོ་བརྡབས་པའོ། །བདེ་བ་འཆར་བ་དེ་གསུམ་ཙམ། །དེ་ནི་ཐིག་ལེ་འཕོ་བའོ། །སྔགས་པ་གསུམ་ལ་བདེ་བར་གནས། །དེ་ནི་རབ་འགྱེལ་འཇིགས་པར་བརྗོད། །དུས་གསུམ་
ལ་ནི་འཇིགས་པར་བཤད། །དུས་ནི་ཕྲ་བ་སྐད་ཅིག་བདག །འདས་པ་དང་ནི་ད་ལྟར་དང་། །མ་འོངས་པ་ཡི་མཚན་ཉིད་དོ། །འདས་པའི་སྐད་ཅིག་གསུམ་དུ་གསུངས། །ད་ལྟར་ཡང་ནི་སྐད་ཅིག་གསུམ། །མ་འོངས་སྐད་ཅིག་གསུམ་དུ་བཤད། །དེ་ལས་སླར་ཡང་སྐད་ཅིག་
གསུམ། །དེ་ལྟར་སྐད་ཅིག་གསུམ་གྱི་ཆ། །དེ་ལས་ཆ་གསུམ་དེ་ལས་ཆ། །དེ་སྲིད་གྲངས་ནི་ཇི་སྲིད་དུ། །རྟོག་པ་སྟོང་པ་གཉིས་སུ་མེད། །རྣལ་འབྱོར་མཆོག་ནི་ཐོབ་པར་འགྱུར། །སྲོག་གི་གནས་ནི་བླ་ན་མེད། །ཕྱོགས་དང་དུས་ཀྱི་རྟོག་པ་བྲལ། །རིགས་པའི་མཚན་ཉིད་
སྤངས་པ་དང་། །དེ་ཡི་སྲོག་ནི་ཤར་ནས་ཐིམ། །གཉིས་མེད་དེ་ནི་བསྡུས་པའོ། །གཞན་ཡང་བཤད་པར་བྱ་ཡིས་ཉོན། །སྲོག་ནི་ཐིམ་དང་འཆར་བ་ཡི། །གང་ཚེ་སྐད་ཅིག་ལ་སོགས་རྟོགས། །ཀུན་ནས་རབ་ཏུ་མ་ཞི་བ། །དེ་སྲིད་སྲོག་ནི་རླུང་གི་གནས། །གྲོལ་བའི་གནས་
ནི་མི་ཤེས་སོ། །བཤང་སྒོ་གསང་བའི་དབུས་ན་གནས། །མིང་ནི་མ་སྐྱེས་ཆ་ཆེན་པོ། །དེ་ཡང་རྣམ་ཤེས་དང་བྲལ་བ། །ཡེ་ཤེས་ལུས་ནི་བདག་མེད་པ། །དེར་ནི་སྐྱེ་བ་མཆོག་གི་མཆོག །སྲོག་ཆགས་རྣམས་ཀྱི་མཆོག་ཏུ་བརྗོད། །རྣམ་པར་ཤེས་པའི་ངོ་བོ་སྟོན། །ཐོག་མར་འབྱུང་
བ་བཞི་པོ་ལ། །སྒྲོ་འདོགས་བསྐྱེད་པའི་ངོ་བོར་བྱེད། །དེ་ཚེ་རང་གི་གནས་སུ་ཐིམ། །རྣམ་ཤེས་ལས་ནི་སྐྱེ་བ་རླུང་། །དེ་ལས་མེ་ནི་སྐྱེ་བར་འགྱུར། །མེ་ལས་ཆུ་ནི་འབྱུང་བར་བྱེད། །དེ་ལས་ས་ནི་ཡང་དག་སྐྱེ། །དེ་དག་རྣམས་ལས་ཕུང་པོར་བྱུང་། །དེ་ཕྱིར་སྐྱེ་མཆེད་རྣམས་དང་ནི། །
དེ་ལས་རྣམ་ཤེས་རང་བཞིན་མེད། །བརྒྱ་དང་བརྒྱད་ཀྱིས་ལྷག་པའི་རིམ། །ཇི་ལྟར་སྐྱེ་བོ་དེ་ཡི་གནས། །ཐིམ་ནས་འགྲོ་བའི་རང་བཞིན་དུ། །རྒྱགས་པ་བསྐྱེད་པའི་རླུང་ཆེན་པོ། །ཉོན་མོངས་ཡིད་ནི་འདས་ནས་ནི། །སྔགས་ཐོབ་ནས་ནི་རྣམ་རྒྱས་ཏེ། །སྐྱེ་མཆེད་རྣམས་ནི་སྡུད་

པར་བྱེད། །དེ་ལས་རྒྱགས་པ་ས་ཆུ་ཡི་རླུང་། །རྒྱགས་པ་བསྐྱེད་པ་ཟ་བའི་ཕྱིར། །ཕུང་པོ་རྣམས་ཀྱང་སྡུད་བྱེད་ཉིད། །རིམ་གྱིས་ལུས་ཆེན་སྒྲ་སྒྲོགས་བྱེད། །དེ་ལས་རྒྱགས་པའི་ཆ་ནི་འབྱུང་། །རྒྱགས་པའི་ཆུ་ནི་སྡུད་བར་བྱེད། །འབྱུང་བ་རྣམས་ཀྱིས་བསྡུས་ནས་ཀྱང་། །གོ་རིམས་
ཇི་ལྟ་བ་བཞིན་དུ། །དེ་ལ་རླུང་ནི་བཏང་བཟུང་འབྱུང་། །རྒྱགས་པའི་ཆ་ནི་ཟ་བར་བྱེད། །དེ་ནས་ཀྱང་ནི་རླུང་ནི་སྡུད། །ཁྱབ་ཅིང་ཕྲ་ལ་སྒྲིབ་པར་བྱེད། །དེ་ལས་མི་ཟད་བཏང་བཟུང་དང་། །རྣམ་ཤེས་སྐད་ཅིག་སྒྲིབ་པར་བྱེད། །བསྒྲིབས་ནས་དེ་ལས་རྣམ་ཤེས་ཀྱང་། །བེམས་པོར་
སོང་ནས་བརྒྱལ་བར་འགྱུར། །སྐྱེ་མཆེད་ཆ་ནི་སྒྲིབ་པར་བྱེད། །དག་པའི་ཡེ་ཤེས་མཆོག་གི་མཆོག །དེ་ལས་ཐིམ་པར་གྱུར་པའི་སྲོག །རྣམ་ཤེས་དང་ནི་མཚུངས་པར་ལྡན། །དེ་ཉིད་མཆོག་ནི་དེ་ལྟར་བཤད། །སྲོག་ནི་ཐིམ་ཞིང་འཆར་བ་དང་། །ཇི་ལྟ་བ་བཞིན་ཡོངས་སུ་
ཤེས། །བླ་མ་བརྒྱུད་པའི་རིམ་པ་འབྱུང་། །རིགས་པ་གཞན་ཡང་བཤད་པར་བྱ། །རྡོ་རྗེའི་སྐུ་ནི་བསྒྲུབ་པའི་ཕྱིར། །འཆི་བ་མེད་པའི་བསྒྲུབ་པ་ནི། །གང་གིས་འཆི་མེད་ལུས་མཆོག་ནི། །ཐོབ་པ་ཡོན་ཏན་རྣམས་ཀྱི་རྟེན། །གང་ཕྱིར་སེམས་ཅན་ཚེ་ཐུང་བས། །འཆི་མེད་
གོ་འཕང་བསྒྲུབ་མི་ནུས། །དེ་ཕྱིར་འབད་པ་ཐམས་ཅད་ཀྱིས། །འཆི་བ་མེད་པར་རབ་བསྒྲུབ་བྱ། །བཅོམ་ལྡན་མགོན་པོ་ཡེ་ཤེས་མཆོག །རྣལ་འབྱོར་དེ་ཉིད་ཕ་རོལ་བྱོན། །རྡོ་རྗེ་སེམས་དཔས་ཕྱག་བྱས་ཞུས། །འཆི་བ་མེད་ཉིད་རིགས་པར་ནི། །ཇི་ལྟར་ཡང་དག་ཐིམ་པ་
ལགས། །དེ་ནས་བཅོམ་ལྡན་རྡོ་རྗེས་གསུངས། །བྱ་བ་ཀུན་བསྒྲུབ་གོ་འཕང་ནི། །འཆི་བ་མེད་པའི་རྣལ་འབྱོར་ཆེ། །ཡང་དག་དེ་ཉིད་རྣམ་ངེས་པ། །སེམས་ཅན་ཚེ་ནི་ཐུང་བ་ཡིས། །དངོས་གྲུབ་འགྲུབ་པ་གང་ཡང་མེད། །དེ་བས་རྣལ་འབྱོར་བཟང་པོ་རྣམས། །ཚེ་རིང་
བ་ནི་དགེ་བའོ། །དེ་ལ་ཐོག་མར་རྣལ་འབྱོར་མཆོག །བློ་བཟང་ནང་གི་བདག་ཉིད་བསྒྲུབ། །ལྕེ་ནི་རྐན་གྱི་དབུས་སྦྱར་བ། །བྱས་ནས་དེ་ཁོ་ཉིད་ཚིག་བཟླ། །སེམས་དཔའི་སྐྱིལ་ཀྲུང་བཅས་ནས་ནི། །ཡང་དག་རྣལ་འབྱོར་རྗེས་དྲན་བྱ། །སྣ་རྩེར་དབུགས་ནི་རྒྱུ་བྱ་ཞིང་། །

ཁ་ནི་གསལ་བར་དགག་པར་བྱ། །རྐན་གྱི་གནས་སོན་ཟླ་བ་ནི། །སྔགས་ཀྱི་རྣལ་འབྱོར་གྱིས་ནི་ཞུ། །ཞུ་བ་རླུང་གི་རྣལ་འབྱོར་གྱིས། །རྟག་ཏུ་རྣལ་འབྱོར་གཙོ་བོས་བཏུང་། །མཚན་ཕྱེད་ཀྱི་ནི་དུས་ཚོད་མཐར། །ཇི་སྲིད་ཐུན་གཅིག་མ་ཆད་པར། །དེ་སྲིད་རྣལ་
འབྱོར་པས་སྔགས་བཟླ། །རྡོ་རྗེའི་ལུས་ནི་བྱེད་པར་འགྱུར། །སྡེ་ཚན་གཉིས་པའི་གསུམ་པ་ལ། །དབྱངས་བཅས་པ་དང་ཡང་དག་ལྡན། །ཡན་ལག་མ་ཉམས་རྟག་ཏུ་བཟླ། །སྒྲུབ་པ་པོ་ཡི་སྲོག་ནི་འགུགས། །རྫས་ཀྱང་རྟག་ཏུ་བསྟེན་པར་བྱ། །དེ་ཉིད་ལྔ་ཡི་རིམ་པས་སྐྱེ། །
བཟླས་པ་རྫོགས་ནས་རྟག་ཏུ་ནི། །ལུས་ལ་འབྱུང་བའི་དྲི་མ་མེད། །ལྕགས་ལྔའི་རང་བཞིན་སྣོད་དུ་ནི། །བཞག་ནས་ཇི་སྲིད་ཉི་མ་ནི། །འཆར་ཀར་དེ་ནས་དེ་ལ་ཡང་། །ཡོ་ཥི་རག་གཏམ་བདེ་བ་ནི། །བླུགས་ནས་རྟག་ཏུ་རྫས་ཀྱི་མཆོག །བདུད་རྩི་བདུན་པའི་མིང་ཅན་ནོ། །ཉལ་
ཀར་ཡང་ནི་དེ་འཐུངས་ན། །རྫས་ཀྱིས་ཚེ་ནི་འཕེལ་བར་བྱེད། །སྔགས་ཀྱི་རྒྱལ་པོ་ཨོྃ་ཨཱཿཧཱུྃ། །དེ་ནས་ལན་བདུན་བཟླ་བར་བྱ། །ལག་གཡས་བ་དན་གྱིས་མཚན་ལ། །སྣོད་བཟངས་དེ་ལ་བཀབ་ནས་སུ། །ཡི་གེ་བརྒྱ་པའི་སྔགས་ཀྱིས་ནི། །ལན་གསུམ་དུ་ནི་དག་པར་བྱ། །དེ་ཕྱིར་
བུད་མེད་གཞོན་ནུ་ནི། །རྟག་ཏུ་འཁུར་བ་བཀང་ཞིང་བཏུད། །དེ་ནི་བཟའ་བ་སྦྱིན་པ་ཡང་། །མར་ལ་བཏགས་པའི་འབྲས་དང་ནི། །མ་ཤ་དང་ནི་ཉི་དགའ་དང་། །