Kinh tạng Tây Tạng (Kangyur Đại Học) — 081_རྒྱུད་འབུམ།_ཅ

མཚུངས་པའི་འོད། །ཡེ་ཤེས་ཆེན་

པོའི་མེ་འབྱུང་བ། །ཀུན་རྟོག་ཐམས་ཅད་འཇོམས་པར་བྱེད། །འཆར་བས་ཕུང་པོ་རྣམ་རྟོག་ནི། །བསྲེགས་བྱས་བར་ཆད་མེད་པའི་ལུས། །རྡོ་རྗེ་ཁམས་ཀྱི་རྣམ་རྟོག་ནི། །བསྡུས་ནས་སླར་ཡང་རང་བཞིན་གྱིས། །གཟུང་དང་འཛིན་པའི་རྣམ་རྟོག་ནི། །སྙིང་
རྗེས་དེར་ནི་སླར་ཡང་སྡུད། །དེ་ལྟར་གང་ལ་ཕྱེ་ལེབ་བཞིན། །འཆིང་བ་ཐམས་ཅད་སྲེག་པར་བྱེད། །རླུང་གི་དེ་ཉིད་མངོན་སྦྱོར་བས། །སྔགས་ཀྱི་ལུས་ཀྱི་སྦྱོར་བ་ཡིས། །རྣམ་པར་རྟོག་པ་ཙམ་ཡང་ནི། །སྲེག་པ་ཉིད་དུ་ཐེ་ཚོམ་མེད། །མཁའ་འགྲོ་སྡུད་པའི་རྒྱུད་
ལས་ནི། །རྣལ་འབྱོར་མཆོག་གི་རིམ་ཤེས་ན། །མཁའ་འགྲོ་ཡེ་ཤེས་རྒྱས་པར་ནི། །རྣལ་འབྱོར་བསྟེན་པས་རིག་པར་བྱ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་མཁའ་འགྲོ་མ་སྡུད་པའི་ལེའུ་སྟེ་སུམ་ཅུ་བཞི་པའོ།། །།དེ་ནས་གཞན་ཡང་
བཤད་ཀྱིས་ཉོན། །རྣམ་རྟོག་རླུང་ནི་རྣམ་པར་གཅོད། །ཉིན་དང་མཚན་དུ་ཤེས་པར་ནི། །བརྒྱ་དང་བརྒྱད་ནི་ལྷག་པར་རྒྱུ། །རླུང་རྣམས་དེ་ནི་རྣམ་རྟོག་ནི། །གང་ཕྱིར་རྣམ་པར་གཅོད་པར་བྱེད། །རྣལ་འབྱོར་དེ་ནི་མཆོག་ཏུ་ཞི། །ཐམས་ཅད་སྟོང་པའི་ངོ་བོར་བྱེད། །ཐེ་
ཚོམ་ཐོག་མར་སྦྱོར་བ་དྲུག །རྣལ་འབྱོར་རིག་པས་མཆོག་ཏུ་བསྒྲུབ། །དེ་ནས་དབྱངས་མེད་ཡི་གེ་ཧ། །ཤིན་ཏུ་རྒྱ་ཆེ་བཟླས་པར་བྱ། །གང་ཕྱིར་མདུད་པ་འཇོམས་བྱེད་ཅིང་། །བདེ་བ་སྐྱེ་བ་སྟེར་བར་བྱེད། །དེ་ཡིས་རྣམ་རྟོག་ཐམས་ཅད་ནི། །སྐད་ཅིག་གིས་ནི་གཅོད་པར་
བྱེད། །རྣལ་འབྱོར་རྗེས་སུ་རྣལ་འབྱོར་དང་། །ཤིན་ཏུ་རྣལ་འབྱོར་རྣལ་འབྱོར་ཆེ། །དེ་ཡི་དབྱེ་བ་བཅྭ་བརྒྱད་ཀྱིས། །དང་པོ་སྦྱོར་བ་བསྒོམ་པར་བྱ། །བཅུ་བདུན་རྗེས་སུ་རྣལ་འབྱོར་སོགས། །དེ་ལས་དཀྱིལ་འཁོར་རྒྱལ་མཆོག་ནི། །རྣལ་འབྱོར་མཆོག་ལ་དབྱེ་བ་ལྔ། །
དེ་ལས་ཀྱང་ནི་ལས་རྒྱལ་མཆོག །རྣལ་འབྱོར་དབྱེ་བ་བཅུ་གཉིས་སོ། །དེ་ཉིད་དབྱེ་བ་བཞི་བཅུ་དགུ། །བསྐྱེད་པའི་རིམ་པ་བསྡུས་པ་ཡིས། །མངོན་སུམ་བྱེད་པའི་རྣལ་འབྱོར་རོ། །དེ་ལ་རྡོ་རྗེ་བཟླས་རིམ་མཆོག །རྫོགས་རིམ་རྣལ་འབྱོར་ཡན་ལག་ནི། །རྣམ་པར་རྟོག་

པ་འཇོམས་བྱེད་པ། །ཕྲ་བའི་དེ་ཉིད་བླ་ན་མེད། །ཆོ་ག་ཇི་བཞིན་རྣལ་འབྱོར་པ། །བློ་དང་ལྡན་པས་སྔོན་བཞིན་བསྒོམ། །སྲིད་པའི་འཆིང་བ་གཅོད་པར་བྱེད། །རྣལ་འབྱོར་ཆེན་པོ་ཡེ་ཤེས་ཆེ། །དེ་ཉིད་ཆེན་པོ་རྨད་འབྱུང་ཆེ། །ངེས་པར་བསྒོམས་པས་ཡང་དག་ནི། །རྣམ་
རྟོག་རླུང་ནི་འཇོམས་པར་བྱེད། །དོན་གྱི་རྗེས་འགྲོ་བཟླས་པ་ཡིས། །དངོས་མེད་ངོ་བོ་གཅིག་པ་དང་། །སྟོང་ཉིད་བསྟེན་པ་མངོན་པར་ཞེན། །སྒོམ་པ་ངེས་པར་བརྟན་པར་བྱེད། །སྒྲུབ་པོས་ཡང་དག་བསྒོམས་བྱས་ན། །རྡོ་རྗེ་བཟླས་རིམ་བླ་ན་མེད། །དེ་ཡི་རིམ་བཞིན་
ཡེ་ཤེས་མཆོག །ཐོབ་འགྱུར་འདི་ལ་ཐེ་ཚོམ་མེད། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རྣམ་པར་རྟོག་པའི་རླུང་གཅོད་པའི་མཚན་ཉིད་ཀྱི་ལེའུ་སྟེ་སུམ་ཅུ་ལྔ་པའོ།། །།དེ་ནས་གཞན་ཡང་བཤད་ཀྱིས་ཉོན། །རྣམ་རྟོག་མེད་པའི་
རླུང་ཤར་ན། །གང་ཤེས་རྡོ་རྗེ་སེམས་དཔའ་ཡི། །རང་དངོས་གོ་འཕང་བཟང་པོ་འཐོབ། །རྣམ་རྟོག་མེད་པའི་རླུང་ཆེན་པོ། །གཉིས་པ་ཐམས་ཅད་རྣམ་པར་སྤངས། །དངོས་པོ་ཀུན་གྱི་རང་བཞིན་བདག །སྒོམ་དང་སྒོམ་མིན་གོ་འཕང་བྲལ། །རྣལ་འབྱོར་ཆེན་པོའི་
ཡེ་ཤེས་ཆེ། །གནས་པ་མེད་ཅིང་དྲི་མ་མེད། །ཕྲ་བའི་ཆ་ཀུན་དབུས་ན་གནས། །ཐིག་ལེ་ནཱ་ད་རྣམ་པར་སྤངས། །ཀུན་ལ་ཁྱབ་ཅིང་ཞི་བ་དང་། །བདག་བྱིན་བརླབ་པའི་མཚན་ཉིད་གཅིག །མཚན་གཞི་མཚན་ཉིད་རྣམས་ལས་གྲོལ། །བག་ཆགས་རྣམ་རྟོག་
རྣམ་པར་སྤངས། །ཚིགས་དང་མདུད་པའི་ལམ་དང་ནི། །སྒོམ་དང་བསྒོམ་བྱ་རྣམ་པར་སྤངས། །སྟོང་ཉིད་ཡེ་ཤེས་མཚན་ཉིད་དོ། །སྔགས་དང་ཕྱག་རྒྱའི་རྣམ་པའི་ཆ། །རྣམ་པའི་སྤྱོད་པ་རྣམ་པར་སྤངས། །བྱ་བ་སྤྱོད་པ་རྣལ་འབྱོར་གྱི། །རྒྱུད་རྣམས་ལ་
ཡང་བཀླག་མི་བྱ། །རྣལ་འབྱོར་ཆེན་པོའི་རྒྱུད་ཆེན་པོ། །བཤད་པར་བྱ་བ་དམ་ཚིག་མཆོག །མན་ངག་ཇི་བཞིན་ཆོ་ག་བཞིན། །ཐོག་མ་ཉིད་དུ་བཤད་པར་རིགས། །དེ་ཡི་རིམ་པའི་རྗེས་འགྲོ་ཤེས། །བླ་མ་བརྒྱུད་པའི་གོ་འཕང་མཆོག །རྣལ་འབྱོར་ཆེན་

པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རྣམ་རྟོག་མེད་པའི་མཚན་ཉིད་ཀྱི་ལེའུ་སྟེ་སུམ་ཅུ་དྲུག་པའོ།། །།དེ་ནས་རྡོ་རྗེ་ཅན་གྱིས་གསུངས། །རྩ་རྣམས་ནུབ་པའི་རྣལ་འབྱོར་ནི། །དེ་ཁོ་ན་ཉིད་བཤད་ཀྱིས་ཉོན། །ཡུལ་དང་དབང་པོ་ཡང་དག་སྦྱོར། །
རྩ་རྣམས་ཀྱང་ནི་འཆར་བར་འགྱུར། །ཤར་ནས་སྔོན་བཞིན་སོང་ནས་ནི། །བསྐྱེད་པའི་རིམ་པ་བླ་ན་མེད། །རྣམ་རྟོག་སྐྱེ་བ་དེ་ཡི་ཕྱིར། །བརྒྱ་དང་བརྒྱད་ཀྱིས་ལྷག་པའི་རིམ། །དེ་ལས་སྐྱེ་དང་རྒ་དང་ན། །འཆི་ཞིང་སླར་ཡང་ལྡོག་པར་འགྱུར། །ཡུལ་རྣམས་དངོས་པོ་
མེད་པ་ཡིས། །སྦྱངས་པའི་ཡེ་ཤེས་དེ་ཉིད་ཕྱིར། །དེ་ཉིད་འདི་ལ་སྤྱོད་པའི་ཕྱིར། །དངོས་སུ་ཡུལ་རྣམས་དངོས་མེད་ཕྱིར། །དབང་པོ་རྣམས་ནི་སྐྱེ་བ་མིན། །དེ་ལས་གཉིས་གཉིས་ཡང་དག་སྦྱོར། །དངོས་དང་དངོས་མེད་སྟོང་པ་ཉིད། །དེ་ནས་རྩ་རྣམས་ནུབ་འགྱུར་
ཏེ། །འཁོར་ལོའི་རིམ་པ་ལ་ཡང་རྟོན། །དེ་རྣམས་ནུབ་པ་ལས་ནི་ཞི། །སྟོང་ཕྲག་བདུན་ཅུ་རྩ་གཉིས་ནི། །ཀུན་ཀྱང་རྩ་ཡི་འཁོར་ལོར་འགྱུར། །དེ་ཉིད་ཀུན་ཆོས་ནང་དུ་ཁྱབ། །སྟོང་ཉིད་བསྒོམ་པ་རྣལ་འབྱོར་ལས། །ཡུལ་རྣམས་ཀྱི་ནི་ངོ་བོ་ཉིད། །ངེས་པ་རུ་ནི་
ཤེས་པ་ཞེས། །རིག་པའི་རྡོ་རྗེ་རྣམ་པར་འཇོམས། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རྩ་རྣམས་ནུབ་པའི་སྦྱོང་བའི་ལེའུ་སྟེ་སུམ་ཅུ་བདུན་པའོ།། །།དེ་ནས་གཞན་ཡང་བཤད་ཀྱིས་ཉོན། །སྤྱོད་དྲུག་གོ་འཕང་མཚན་ཉིད་ནི། །
ཇི་ལྟ་ཇི་ལྟ་བ་བཞིན་སྦྱོར། །ཇི་ལྟར་འདོད་པའི་ཡན་ལག་བརྟེན། །རྣམ་པ་དྲུག་པོ་དེ་ལས་ཕྱེད། །དེ་བཞིན་བརྒྱད་བརྒྱད་དེ་ལས་ལྷག །བརྒྱད་གཉིས་བརྒྱད་ཕྲག་བཞི་དང་ནི། །དེ་ལྟར་གྲངས་ཀྱིས་སྦྱོར་བ་གསལ། །ཟླ་བ་ཕྱེད་པའི་ཆ་ལྟ་བུ། །སྟོང་ཉིད་རླུང་གི་
འཁོར་ལོར་གནས། །ཕྱེད་པ་མ་ཡིན་རྫོགས་པ་མིན། །ཆུ་ཡི་ཟླ་བ་ལྟ་བུར་སྣང་། །སྒྱུ་མ་ཆེན་པོ་འགྲོ་བའི་མ། །ཐམས་ཅད་རྟེན་པའི་མཚན་ཉིད་ནི། །རླུང་གི་འཁོར་ལོ་སྲོག་ཅེས་བཤད། །མཁས་པ་རྣམས་ཀྱི་སྤྱོད་ཡུལ་མིན། །མེ་ཡི་འཁོར་ལོ་

སྟོང་ཉིད་ཁྱབ། །དབུས་ན་ཐིག་ལེ་ལྟ་བུ་ནི། །མི་འགྱུར་ཀུན་དུ་འགྲོ་བ་དང་། །རང་བྱུང་ཀུན་ལ་ཁྱབ་པ་དང་། །བདེ་བ་ཡང་དག་འཕེལ་བར་བྱེད། །དབྱངས་དང་གསལ་བྱེད་རྣམ་པར་སྤངས། །འཇིག་རྟེན་གསུམ་ནི་མ་ལུས་པ། །གཅིག་ཏུ་བྱས་ན་སྐྱེད་པར་
བྱེད། །མི་ཤིགས་ནཱ་དའི་གོ་འཕང་ཅན། །རྣམ་པ་ཐམས་ཅད་རྣམ་པར་སྤངས། །སྦྲུལ་གྱི་ལྕེ་ལྟར་གཡོ་བ་དང་། །ཚངས་པ་ལ་སོགས་ཕ་མེས་དང་། །འཇིགས་པ་མ་ཡིན་གཡོ་བ་མིན། །ཡི་གེ་དང་ནི་ཚིག་མ་ཡིན། །འབྱུང་བའི་ཚོགས་ནི་རྣམ་པར་སྤངས། །
གྲངས་བྲལ་ཟད་མེད་སྐྱེ་བ་མེད། །ལྟེ་བ་སྤྲུལ་པའི་འཁོར་ལོར་གནས། །ཆོས་ཀྱི་འཁོར་ལོའི་དབུས་གནས་པ། །སྒྲ་ཙམ་དྲི་མ་དང་བྲལ་བ། །ཆགས་བྲལ་ཆགས་པ་མེད་པ་དང་། །བྱ་བ་བྱེད་དང་གནས་མེད་པ། །དཔེ་མེད་གནས་པ་མེད་པ་དང་། །སྲོག་དང་
རྩོལ་བ་རྣམ་པར་སྤངས། །ལྷ་ཡི་དབང་ཕྱུག་ཡེ་ཤེས་མཆོག །དེ་ལྟ་བུ་ཡང་རྙེད་པར་དཀའ། །ལོངས་སྤྱོད་འཁོར་ལོ་མཆོག་ཏུ་གནས། །འཆིང་བ་མེད་པའི་རྣམ་པ་མཆོག །མཆོག་ཏུ་ཁོང་དུ་ཆུད་གྱུར་པ། །རྣམ་པ་ཀུན་གྱིས་ཡང་དག་བཞུགས། །རྟེན་ཅིང་
འབྲེལ་འབྱུང་རང་བཞིན་གྱི། །ཆང་གི་རོ་ཡིས་མྱོས་པ་བཞིན། །མཆོག་ནི་དང་པོ་མ་ལུས་པ། །དངོས་པོ་ཀུན་གྱི་ནང་ན་གནས། །ཐོག་མ་ཐ་མ་ལྷག་པར་གནས། །མཚན་ཉིད་མེད་ཅིང་སྣང་བ་མེད། །མཚན་ཉིད་ཐམས་ཅད་རྣམ་པར་སྤངས། །ཞི་བ་མི་འཇིགས་
བརྗོད་དུ་མེད། །རང་བཞིན་ཉམས་མྱོང་རང་ངོ་བོ། །བདེ་བ་ཆེན་པོའི་འཁོར་ལོར་གནས། །བླ་མ་བརྒྱུད་པ་ལས་ནི་ཐོབ། །དེ་ལྟར་ཡེ་ཤེས་བྱེ་བྲག་ཆེ། །རང་གི་ངོ་བོ་རྣམ་ཤེས་དྲུག །སྟེང་དང་འོག་ཏུ་ཡང་དག་སྦྱོར། །རྣལ་འབྱོར་ཞེས་ནི་རབ་ཏུ་གྲགས། །རྣལ་
འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་འཁོར་ལོ་དྲུག་སྒོམ་པའི་ལེའུ་སྟེ་སུམ་ཅུ་བརྒྱད་པའོ།། །།དེ་ནས་བཅོམ་ལྡན་རྡོ་རྗེས་གསུངས། །དུས་ཀྱི་མཚན་ཉིད་སྡོམ་པ་ནི། །རྣལ་འབྱོར་གང་གིས་རྣམ་པར་ཤེས། །གྲངས་ཀྱི་རྣལ་འབྱོར་བླ་

ན་མེད། །དུས་ནི་དུས་ཚོད་ཞེས་ནི་བཤད། །བསམ་དང་བསམ་བྲལ་རང་དངོས་ནི། །དུས་བཟང་དང་ནི་དུས་ངན་དང་། །རྣམ་པ་གཉིས་ལ་ཡང་དག་གནས། །སྣ་ཡི་བུ་ག་ལས་བྱུང་ནས། །ཕྱི་ཡི་སྒོ་ལས་རྟག་ཏུ་འཆར། །ནང་དུ་སྡུད་པར་དུས་བཟང་
གསུངས། །འབྱུང་བ་ཡང་ནི་དུས་ངན་འདོད། །དུས་ངན་ལས་ནི་གཞན་པ་མཆོག །དུས་བཟང་མཆོག་སྟེ་རང་ཉིད་ནི། །རྫོགས་ལྡན་དང་ནི་གསུམ་ལྡན་དང་། །གཉིས་ལྡན་དང་ནི་དུས་བཟང་པོ། །རྩོད་པའི་དུས་ནི་ངན་པ་སྟེ། །དེ་ལྟར་གསུངས་པའི་དུས་མཚན་ཉིད། །
དགའ་དང་མཆོག་ཏུ་དགའ་བ་དང་། །ལྷན་ཅིག་སྐྱེས་པ་དུས་བཟང་སྟེ། །དགའ་དང་བྲལ་བ་ངན་དུས་སོ། །དུས་ཀྱི་མཚན་ཉིད་དེ་ལྟར་བཤད། །འཇུག་པ་དང་ནི་གནས་པའི་དུས། །དུས་བཟང་པོར་ནི་ཡོངས་སུ་གྲགས། །ལྡང་བ་ཡང་ནི་དུས་ངན་ཏེ། །དེ་ལྟར་
དུས་ཀྱི་མཚན་ཉིད་དོ། །དུས་ནི་ཁམས་རྣམས་ཐམས་ཅད་དེ། །མཉམ་པ་རོ་གཅིག་གོ་འཕང་མཆོག །ཡེ་ཤེས་རྣམ་ཤེས་རྣམ་སྤངས་ཏེ། །དུས་ནི་གཅིག་ནི་བརྗོད་པ་ཡིན། །དངོས་དང་དངོས་མེད་སྤྲོས་བྲལ་བ། །བཞི་པའི་སྐད་ཅིག་མཚན་ཉིད་ནི། །བརྗོད་བྱ་
རྗོད་བྱེད་ལས་གྲོལ་བ། །དུས་གཅིག་ཞེས་ནི་བརྗོད་པ་ཡིན། །ཆགས་དང་ཆགས་བྲལ་ངེས་གྲོལ་བ། །བདེ་བ་ཆེན་པོ་གོ་འཕང་སྤངས། །ཕྱག་རྒྱ་ཆེན་པོའི་དོན་གྱི་གཞི། །དུས་གཅིག་ཞེས་ནི་བརྗོད་པ་ཡིན། །མཚན་ཉིད་མེད་ཅིང་སྣང་བ་མེད། །གྲངས་ནི་རྣལ་
འབྱོར་རྣམ་པར་སྤངས། །དེ་ཉིད་དུས་སུ་ངེས་བཤད་དེ། །བླ་མ་བརྒྱུད་པ་ལས་ཤེས་བྱ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་དུས་དང་དུས་ཚད་རྣམ་པར་བཤད་པའི་ལེའུ་སྟེ་སུམ་ཅུ་དགུ་པའོ།། །།དེ་ནས་གཞན་ཡང་བཤད་བྱ་
བ། །གསང་བའི་འབྲས་བུ་མཆོག་ཉོན་ཅིག །གང་གིས་དངོས་གྲུབ་མཆོག་ཏུ་འགྲོ། །ཕྱག་རྒྱ་ཆེན་པོ་ཡང་དག་བསྟེན། །གསང་བ་སྦས་པ་ཞེས་ནི་བཤད། །རྣལ་འབྱོར་བྱིས་པས་མི་ཤེས་ཤིང་། །བཞི་པའི་དབང་ཞེས་བྱ་བའི་མིང་། །ཞལ་ནས་བརྒྱུད་

པའི་རིམ་པ་རྣམས། །མཆོག་ཏུ་ཞི་བའི་ཡེ་ཤེས་ཆེ། །རྣམ་རྟོག་ཐམས་ཅད་རྣམ་པར་སྤངས། །ཕྱག་རྒྱ་ཆེན་པོའི་དངོས་གྲུབ་ཆེ། །རྣལ་འབྱོར་ཆེན་པོའི་དོན་བསྡུས་པ། །རྣལ་འབྱོར་མ་རྒྱུད་ལས་བསླབས་པ། །མཆོག་ཏུ་རྨད་བྱུང་ངོ་བོ་ཉིད། །ཡེ་ཤེས་
ཆེན་པོའི་རོ་འབེབས་པ། །དེ་ཉིད་ཆེན་པོའི་ཡོན་ཏན་ལྡན། །ནམ་མཁའ་མཆོག་ལ་གནས་པའི་ས། །རྡོ་རྗེ་སེམས་དཔའ་རང་ངོ་བོ། །བདེ་བ་རྣམས་ནི་འཕེལ་བར་བྱེད། །བདེ་བ་ཆེན་པོའི་གོ་འཕང་འདས། །ཤེས་དང་ཤེས་བྱ་རྣམ་པར་བྲལ། །སྒོམ་དང་
བསྒོམ་བྱ་རྣམ་པར་སྤངས། །སྔགས་དང་རྒྱུད་ཀྱི་བྱ་བས་སྟོང་། །ཀུན་དུ་རྟོག་པ་ཐམས་ཅད་སྤངས། །དངོས་པོ་ཀུན་གྱི་གོ་འཕང་གསལ། །འཇིག་རྟེན་གསུམ་གྱི་རྣམ་པའི་མི། །ཆགས་དང་ཆགས་བྲལ་རྣམ་པར་སྤངས། །དམ་ཚིག་ཆེན་པོ་ལ་གནས་པ། །གྲངས་
མེད་འཇིག་རྟེན་གསུམ་གཅིག་དངོས། །དངོས་གྲུབ་དེ་ཁོ་ན་ཡི་རྒྱུད། །དེ་ལྟར་གསང་བའི་འབྲས་བུ་གསལ། །གཞན་ནི་གང་དུའང་མ་གསུངས་པ། །རྣལ་འབྱོར་མཆོག་གི་ཡེ་ཤེས་མཆོག །རྣལ་འབྱོར་མ་རྒྱུད་ལས་ཤེས་བྱ། །རྣལ་འབྱོར་ཆེན་པོའི་རྒྱུད་དཔལ་
རྡོ་རྗེ་ཕྲེང་བ་མངོན་པར་རྟོགས་པ་ལས་གསང་བའི་འབྲས་བུ་ཞེས་བྱ་བའི་ལེའུ་སྟེ་བཞི་བཅུ་པའོ།། །།དེ་ནས་བཅོམ་ལྡན་རྡོ་རྗེས་གསུངས། །ཆོས་ཀྱི་དབྱིངས་ཀྱི་གོ་འཕང་མཆོག །ཆོས་ཀྱི་དབྱིངས་ནས་ཁྱབ་པའི་ཁམས། །ཆོས་ཀྱི་དབྱིངས་ཀྱིས་དེ་ལ་བརྗོད། །
ཀུན་ཁྱབ་མཆོག་ཏུ་ཕྲ་བ་དང་། །ཀུན་འགྲོ་རྟག་ཏུ་འཆར་བ་དང་། །ཕུང་པོ་ལྔ་ཉིད་འབྱུང་བ་ལྔ། །ཡུལ་དང་སྐྱེ་མཆེད་རྣམ་ཤེས་དང་། །དེ་དག་ཡང་དག་ལྡན་ཆོས་ཀུན། །བཤད་དེ་གསང་བའི་དབང་ཕྱུག་སྟེ། །དེ་དག་དབུས་ན་གནས་པའི་ཁམས། །ཁྱབ་ཅིང་
སྤྱོད་ཡུལ་མ་ཡིན་པ། །ཇི་ལྟར་ཏིལ་གྱི་ཏིལ་མར་དང་། །ཇི་ལྟར་ཤིང་ལ་མེ་བཞིན་དུ། །དེ་བཞིན་ཆོས་རྣམས་ཐམས་ཅད་ལ། །ཁྱབ་ཀྱང་མཐོང་བ་མ་ཡིན་ནོ། །ནམ་མཁའ་བཞིན་དུ་དྲི་མ་མེད། །ཆོས་ཀུན་གྱི་ནི་གཞི་ཡི་མཆོག །གཟུང་དང་འཛིན་

པའི་ཀུན་རྟོག་གིས། །ཁྱབ་ཀྱང་མཐོང་བ་མ་ཡིན་ནོ། །སྟོང་ཉིད་ཡེ་ཤེས་རྣལ་འབྱོར་གྱིས། །རྣལ་འབྱོར་པ་ཡིས་གསལ་བར་མཐོང་། །ཆོས་དབྱིངས་བྷ་ག་ཞེས་ནི་བརྗོད། །བྷ་ག་རིན་ཆེན་ཟ་མ་ཏོག །གང་ཕྱིར་དབང་ཕྱུག་སོགས་ཡོན་ཏན། །
ལྡན་པ་དེ་ཕྱིར་བྷ་ག་བརྗོད། །བྷ་ག་ཆོས་རྣམས་སུ་ཡང་བཤད། །དབྱིངས་ནི་བྱང་ཆུབ་སེམས་སུ་གསུངས། །ཁམས་གསུམ་པ་ཡི་འགྲོ་བ་ཡི། །རྒྱུ་ནི་བྷ་ག་ཞེས་བྱར་བཤད། །དབྱིངས་ནི་ཡང་དག་སྦྱོར་དངོས་ཀྱིས། །ཆུ་ཟླ་བཞིན་དུ་ཡང་དག་གནས། །དོན་དམ་
གཅིག་པུའི་དེ་ཉིད་ཤེས། །ལག་མཐིལ་སྐྱུ་རུ་བཞག་པ་བཞིན། །མཆོག་གི་དེ་ཉིད་ལྟར་ནི་སྣང་། །རང་རིག་ཤིན་ཏུ་དྲི་མ་མེད། །དངོས་དང་དངོས་མེད་ཟད་ནས་ནི། །རྟག་ཏུ་དེ་ཉིད་མཐོང་ཞིང་སྣང་། །ཆོས་ཀྱི་དབྱིངས་ཀྱི་གོ་འཕང་གསལ། །དེ་ལྟར་ཤིན་ཏུ་
རྒྱས་པར་བཤད། །གཟུང་དང་འཛིན་པ་དང་བྲལ་བས། །སྦྱོར་བྲལ་ཤེས་པ་རྨད་དུ་བྱུང་། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཆོས་ཀྱི་དབྱིངས་ཀྱི་དོན་བཤད་པའི་ལེའུ་སྟེ་བཞི་བཅུ་གཅིག་པའོ།། །།དེ་ནས་བཅོམ་ལྡན་རྡོ་
རྗེས་གསུངས། །རྡོ་རྗེ་ཡི་ནི་མཚན་ཉིད་མཆོག །དེ་ཡི་དོན་དུ་བཤད་ཀྱིས་ཉོན། །ཇི་ལྟ་བ་བཞིན་བཤད་པར་བྱ། །རྡོ་རྗེ་མི་ཕྱེད་ཞེས་ནི་གསུངས། །ཡེ་ཤེས་ལྔ་ཡི་བདག་ཉིད་མཆོག །རྩ་ལྔ་ཡི་ནི་ནམ་མཁར་རྟེན། །རྩེ་མོ་ལྔ་ཡི་རང་ངོ་བོ། །ས་དང་ཆུ་
དང་དེ་བཞིན་མེ། །རླུང་དང་ནམ་མཁའ་ཉིད་དང་ནི། །རྩ་ཡི་ནམ་མཁའི་ཆ་ཡི་གཟུགས། །བླ་མ་བརྒྱུད་ལས་ཤེས་པར་བྱ། །ཨྃ་རྃ་ལྃ་བྃ་ཡྃ་ས་བོན། །བརྗོད་པ་རྩེ་ནི་ལྔ་རྣམས་ཏེ། །འབད་པ་ཡིས་ནི་ཤེས་པར་བྱ། །རྡོ་རྗེས་སྐྱེ་བའི་མཚན་ཉིད་ནི། །པདྨ་
ལྟེ་བའི་དབུས་གནས་པ། །ཐིག་ལེར་བཤད་པ་འགྲོ་བ་མེད། །དམ་ཚིག་གནས་ནི་ཤེས་པ་དང་། །བདུད་རྩི་མཆོག་གིས་རབ་ཏུ་གང་། །རྣམ་པ་ཀུན་ལྡན་རྣམ་པ་མེད། །དེ་ནི་རྡོ་རྗེར་ཡོངས་སུ་གྲགས། །མེ་ལོང་མཉམ་ཉིད་ཡེ་ཤེས་དང་། །སོ་སོར་རྟོག་དད་

བྱ་ནན་ཏན། །རྣམ་པར་དག་པ་ཆོས་ཀྱི་དབྱིངས། །ཡེ་ཤེས་ལྔ་ཡི་རང་བཞིན་ནོ། །དེ་ཡི་ངོ་བོ་ཡོངས་སུ་ཤེས། །རྡོ་རྗེ་རང་ཉིད་ཉམས་མྱོང་མཆོག །ནམ་མཁར་ཆེར་གནས་ཞི་བ་དང་། །རྟོག་པ་མེད་ཅིང་ཉོན་མོངས་མེད། །རྡོ་རྗེ་སེམས་དཔའ་ཡང་དག་གཞི། །
བླ་མ་བརྒྱུད་པ་ལས་ཤེས་བྱ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རྡོ་རྗེ་བཤད་པའི་ལེའུ་སྟེ་བཞི་བཅུ་གཉིས་པའོ།། །།དེ་ནས་བཅོམ་ལྡན་རྡོ་རྗེས་གསུངས། །རིགས་ཀྱི་དབྱེ་བ་དོན་བསྡུས་པ། །དེ་ཚེ་རིགས་ནི་རྣམ་
པ་ལྔ། །རྩ་བའི་རྒྱུད་དུ་གསལ་བར་གསུངས། །རྣལ་འབྱོར་སྤྲོས་པ་དབྱེ་བ་ཡིས། །རྣལ་འབྱོར་ཆེན་པོའི་དམ་ཚིག་གོ། །རྒྱུད་དུ་གྲགས་པ་དབྱེ་བ་ཡི། །མཐར་ཐུག་དེ་ནི་ཡང་དག་གསུངས། །དེ་ཉིད་ལས་ནི་བསྡུས་ནས་ཀྱང་། །རིགས་ཀྱི་དབྱེ་བ་
བརྒྱ་རུ་གསུངས། །སྣ་ཚོགས་སྤྲོས་པའི་རྣལ་འབྱོར་གྱིས། །རྡོ་རྗེ་སེམས་དཔའ་ཞེས་ནི་བརྗོད། །གང་གིས་དེ་ཡི་རྣམ་པ་མཐོང་། །སྣ་ཚོགས་ནོར་བུ་ཇི་བཞིན་ནོ། །སེམས་ཅན་མོས་པ་སྣ་ཚོགས་དང་། །སྣ་ཚོགས་བསམ་པའི་བྱེ་བྲག་གིས། །སྣ་ཚོགས་
ཉོན་མོངས་མནན་ནས་ནི། །འགྲོ་བའི་བླ་མས་གྲོལ་བའི་ཕྱིར། །གཞུང་ནས་གང་གིས་དེ་ཡིས་ནི། །སྣ་ཚོགས་སྤྲོ་བའི་ངོ་བོ་ཉིད། །གྲངས་མེད་པ་ཡི་དབྱེ་བ་ཡིས། །དབྱེ་བ་གྲངས་མེད་སྦྱོར་བ་ཡིས། །དོན་དམ་རིགས་ཀྱི་དབྱེ་བ་ཉིད། །རྒྱུད་གཞན་
རྣམས་སུ་གསུངས་པ་ཡི། །སེམས་ཅན་བསམ་པའི་བྱེ་བྲག་གིས། །དེ་ནི་བསྡུས་ན་དབྱེ་བར་འགྱུར། །རྩ་ཡི་འཁོར་ལོའི་རིམ་པ་ཡིས། །སྟོང་ཕྲག་བདུན་ཅུ་རྩ་གཉིས་པའོ། །དེ་ལ་སྟོང་ཕྲག་སུམ་ཅུ་དྲུག །ལུས་ཀྱི་རྫས་དང་གནས་སོགས་ཀྱིས། །རིམ་
པའི་དབྱེ་བ་དེ་ལས་ཀྱང་། །སྟོང་ཕྲག་ཉི་ཤུ་རྩ་བཞིའོ། །དེ་རྗེས་བརྒྱ་ཡིས་མཆོག་ཏུ་གང་། །བདུན་ཅུ་རྩ་གཉིས་དྲུག་ཅུ་བཞི། །སུམ་ཅུ་རྩ་དྲུག་བསྡུས་པ་ལས། །ཉི་ཤུ་རྩ་བཞི་དེ་ལས་ཀྱང་། །སུམ་ཅུ་དང་ནི་དགུ་ཡང་ངོ་། །དེ་ལས་ལྔ་དང་དེ་ཕྱིར་གསུམ། །

གསུམ་ཡང་བསྡུས་ན་གཅིག་ཉིད་དེ། །རྫོགས་པའི་རིམ་པའི་སྦྱོར་བ་ཡིས། །གཞན་ནས་གཞན་དུ་འདྲེས་ནས་འགྲོ། །དེ་ཡང་འོད་གསལ་གོ་འཕང་ལའོ། །རྣམ་རྟོག་མེད་པའི་བདེ་བ་ཆེ། །གཉིས་མེད་ཡེ་ཤེས་དྲི་མ་མེད། །ཆོས་ཀྱི་དབྱིངས་ཀྱི་
བདག་ཉིད་མཆོག །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རིགས་ཀྱི་དབྱེ་བའི་དོན་བསྡུས་པ་ཞེས་བྱ་བའི་ལེའུ་སྟེ་བཞི་བཅུ་གསུམ་པའོ།། །།དེ་ནས་བཅོམ་ལྡན་རྡོ་རྗེས་གསུངས། །ཕྱག་རྒྱའི་དབྱེ་བ་བླ་ན་མེད། །ཆོས་དང་ལས་དང་
དམ་ཚིག་དང་། །ཕྱག་རྒྱ་ཆེན་པོ་མངོན་པར་བརྗོད། །ལས་ཀྱི་རྣམ་སྨིན་ངེས་པ་ཡིས། །ཀུན་ནས་རྒྱས་བཏབ་ལྟ་བུར་གནས། །གང་ཡང་འདི་ནི་ལས་གང་གིས། །དེ་འབྲས་ཇི་ལྟ་བ་བཞིན་འགྱུར། །ཆོས་རྣམས་རང་བཞིན་མེད་པ་ཉིད། །རང་བཞིན་གྱིས་ནི་རྒྱས་བཏབ་
ནས། །དམ་ཚིག་རང་གི་ཡོན་ཏན་དངོས། །རྒྱལ་སྲས་རྣམས་ཀྱི་རྒྱས་བཏབ་པ། །སྟོང་དང་སྙིང་རྗེ་མི་ཕྱེད་པ། །སངས་རྒྱས་ཞིང་ནི་རྣམ་སྦྱོང་བ། །དེ་བཞིན་གཤེགས་པའི་དམ་ཚིག་ནི། །ཡོངས་སུ་དག་པའི་མཛད་པ་ཡིས། །དེ་ཡི་རང་བཞིན་རང་བཞིན་མེད། །ཕྱག་
རྒྱ་ཆེན་པོ་ཞེས་ནི་བརྗོད། །ལས་ཀྱི་ཕྱག་རྒྱ་ཡོངས་ཤེས་ན། །སྔགས་པ་ལས་ནི་ཐོབ་པར་སྐྱེ། །བླ་མས་ཤེས་རབ་དབང་བསྐུར་ན། །ཇི་ལྟར་མཐོང་བའི་མཚན་ཉིད་ནི། །རྡོ་རྗེ་སེམས་དཔའ་རང་དངོས་དོན། །སྙིང་རྗེའི་བསམ་པས་གསལ་བ་ནི། །དེ་ལས་ངེས་
པར་ཐོབ་ནས་ནི། །ཆོས་ཉིད་སྒོ་ནས་ངེས་པར་བྱེད། །དེ་ལྟར་དེ་ཉིད་དེ་ཡེ་ཤེས། །དེ་ལྟར་རྣལ་འབྱོར་མ་མཚན་ཉིད། །དམ་ཚིག་ལ་ཞེན་མཁས་པ་དང་། །རླུང་གིས་དེ་ཉིད་ཕ་རོལ་སོན། །དཔལ་ལྡན་འདུས་པའི་དོན་བསླབ་པ། །ངག་འཇམ་ཤེས་རབ་ལྡན་མ་དང་། །
མིག་ཡངས་མ་ཡི་བུ་མོ་རྙེད། །གཟུགས་དང་ལང་ཚོས་རྣམ་པར་བརྒྱན། །ཇི་བཞིན་རྣལ་འབྱོར་དམ་ཚིག་ལ། །ཕྱག་རྒྱས་ལྷན་ཅིག་སྒྲུབ་པར་བྱེད། །དེ་ནས་དེ་ཉིད་ཐོབ་པ་ན། །ཕྱག་རྒྱ་ཆེན་པོའི་མཚན་ཉིད་དོ། །དེ་ཉིད་བདེ་ཆེན་གོ་འཕང་ནི། །ཀུན་དུ་རྟོག་པ་

ཐམས་ཅད་སྤངས། །སྟོང་ཉིད་ཡེ་ཤེས་དྲི་མ་མེད། །ཆོས་ཀྱི་དབྱིངས་ཀྱི་གོ་འཕང་གསལ། །དེ་ནས་གཞན་ཡང་བཤད་བྱ་བ། །ཕྱག་རྒྱའི་དབྱེ་བ་བླ་ན་མེད། །རིགས་དང་ཕ་རོལ་ཕྱིན་དབྱེ་བས། །ཕྱག་རྒྱ་དྲུག་ཏུ་ཡང་དག་བཤད། །ཡྃ་རྃ་ལྃ་བྃ་ཨྃ་ཧྃ་དང་། །ལྷ་མོ་རྣམས་
ཀྱི་རིམ་པ་ལས། །མཆོད་པའི་རིམ་པ་རོ་གཅིག་པ། །རྟག་ཏུ་ཡང་ནི་མཆོད་པར་བྱ། །གདོལ་པ་མོ་དང་ཁྲུས་མཁན་མོ། །སྨེ་ཤ་ཅན་དང་གར་མཁན་མ། །རོ་བསྲེགས་མོ་དང་བྲམ་ཟེ་མོ། །གྲུབ་འགྱུར་དོན་དུ་རྣལ་འབྱོར་པས། །བདག་ཉིད་རོལ་ཅིང་གནས་པར་བྱ། །
ཁྲུས་མཁན་རིན་ཆེན་རིགས་ལས་སྐྱེས། །གདོལ་པ་པདྨའི་རིགས་ལས་སྐྱེས། །དེ་བཞིན་གར་མཁན་ལས་ཀྱི་རིགས། །རོ་བསྲེགས་མ་ནི་འཁོར་ལོའི་རིགས། །སྨེ་ཤ་ཅན་ནི་རྡོ་རྗེའི་རིགས། །ཡེ་ཤེས་ཕྱག་རྒྱ་བྲམ་ཟེ་མོ། །རྡོ་རྗེ་སེམས་དཔའི་རིགས་སུ་བརྗོད། །འདི་ནི་
རིགས་ནི་དྲུག་ཏུ་འགྱུར། །བྲམ་ཟེ་མོ་ནི་མ་ཡིན་ཏེ། །ཁྲུས་མཁན་མོ་ནི་སྲིང་མོར་བརྗོད། །གར་མཁན་མོ་ནི་བུ་མོར་ཤེས། །སྨེ་ཤ་ཅན་ནི་ཆུང་མར་གྲགས། །རོ་བསྲེགས་མོ་ནི་མནའ་མ་སྟེ། །སྒྱུག་མོ་གདོལ་བ་མ་ཞེས་བྱ། །ཤེས་རབ་ཐབས་ཀྱི་ཆོ་ག་ཡིས། །རྣམ་རྟོག་
མེད་པས་བརྗོད་པར་བྱ། །གང་ཕྱིར་རྣམ་རྟོག་མེད་གྱུར་ན། །དངོས་གྲུབ་ཀུན་ལ་དུས་ཀུན་དུ། །སེམས་ནི་མ་རུ་གྱུར་ནས་ནི། །སྲིང་མོ་དག་ཏུ་ཡང་དག་བཤད། །ལུས་ནི་བུ་མོར་ཤེས་པར་བྱ། །སྲོག་ནི་ཆུང་མར་རབ་ཏུ་གསལ། །མནའ་མ་ཐུར་དུ་སེལ་བའི་རླུང་། །དབུ་མའི་རླུང་
ནི་སྒྱུག་མོར་བརྗོད། །མ་ནི་རྒྱགས་པའི་རྩ་ཡི་ཆ། །སངས་རྒྱས་རིན་ཆེན་ཟ་མ་ཏོག །སྲིང་མོ་ཁུ་བ་འབབ་པའི་རྩ། །སྤྱི་བོའི་གནས་ན་ཡང་དག་གནས། །བུ་མོ་ཁྲག་རྒྱུ་བ་ཡི་རྩ། །དེ་ནི་ཕྱེད་ཕྱེད་ལྷག་པར་གནས། །ཆུང་མ་གཅིན་ནི་འབབ་པའི་རྩ། །དེ་ཉིད་ཀྱི་ནི་དབུས་ན་
གནས། །མནའ་མ་མཆི་མ་འཛག་པའི་རྩ། །མགྲིན་པའི་གནས་སུ་ལྷག་པར་གནས། །མ་ནི་ས་རུ་ཡང་དག་བཤད། །ཆུ་ཡི་ཁམས་ནི་སྲིང་མོར་བརྗོད། །མེ་ནི་བུ་མོར་ཤེས་པར་བྱ། །རླུང་ནི་ཆུང་མར་རབ་ཏུ་གྲགས། །མནའ་མ་ནམ་མཁའ་རུ་ནི་བཤད། །

སྒྱུག་མོ་ནམ་མཁའ་ཆེན་པོའོ། །མངར་བར་གྱུར་པས་མ་དང་ནི། །སྐྱུར་བ་སྲིང་མོ་རུ་ནི་བརྗོད། །ཁ་བ་རང་གི་བུ་མོ་དང་། །ལན་ཚྭ་ཆུང་མར་ཡོངས་སུ་གྲགས། །བསྐ་བ་སྒྱུག་མོར་ཤེས་པར་བྱ། །ཚ་བ་མནའ་མར་ཡོངས་སུ་གྲགས། །དེ་དག་འབད་པས་འདོད་
བྱ་ཞིང་། །དངོས་གྲུབ་འདོད་པས་བསྟེན་པར་བྱ། །ལས་ཀྱི་ཕྱག་རྒྱ་དབྱེ་བ་འདི། །དེ་ཡི་ཡོན་ཏན་བསྟེན་པའི་མཆོག །དམ་ཚིག་དེ་དང་རྟོག་པར་འཇུག །ཕྱག་རྒྱ་ཆེན་པོའི་བདེ་བ་ཆེ། །རྡོ་རྗེ་སེམས་དཔའི་གོ་འཕང་ཞི། །ཡེ་ཤེས་མཆོག་ནི་བླ་ན་མེད། །དེ་ལྟར་ཕྱག་རྒྱའི་གོ་
འཕང་གསལ། །རྣལ་འབྱོར་མ་རྒྱུད་སྤྱོད་ཡུལ་ལོ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཕྱག་རྒྱའི་དབྱེ་བ་རྒྱས་པར་བཤད་པའི་ལེའུ་སྟེ་བཞི་བཅུ་བཞི་པའོ།། །།དེ་ནས་གཞན་ཡང་ཡང་དག་བཤད། །ཕུང་སོགས་སྐྱེ་མཆེད་མཚན་ཉིད་
ནི། །རྒྱལ་བ་རྒྱལ་ནི་གཟུགས་ཞེས་བཤད། །རྡོ་རྗེ་འཛིན་ནི་རྣམ་ཤེས་དང་། །རིན་ཆེན་འཛིན་ལ་ཚོར་བར་གསུངས། །འཁོར་བ་ལས་བརྒལ་འདུ་ཤེས་གསུངས། །ཤེས་རབ་འཛིན་ནི་འདུ་བྱེད་དང་། །དེ་ལྟར་ཕུང་པོར་རབ་ཏུ་གྲགས། །ས་ནི་གཏི་མུག་དགའ་མར་
བཤད། །དེ་བཞིན་ཆུ་ནི་ཞེ་སྡང་དགའ། །མེ་ནི་ཆགས་ལ་དགའ་བ་དང་། །དེ་བཞིན་རླུང་ནི་རྡོ་རྗེ་དགའ། །ནམ་མཁའ་རྡོ་རྗེ་དབྱིངས་དབང་ཕྱུག །གཟུགས་ནི་གཟུགས་ཀྱི་རྡོ་རྗེ་དང་། །སྒྲ་ནི་སྒྲ་ཡི་རྡོ་རྗེ་སྟེ། །དྲི་ནི་དྲི་ཡི་རྡོ་རྗེ་དང་། །རོ་ནི་རོ་ཡི་རྡོ་རྗེར་བཤད། །རེག་བྱའི་རྡོ་རྗེ་
རེག་བྱར་འགྱུར། །ཆོས་ཀྱི་དབྱིངས་ཀྱི་དབང་ཕྱུག་མ། །མིག་གཉིས་ས་ཡི་སྙིང་པོ་དང་། །རྣ་བ་ཕྱག་ན་རྡོ་རྗེ་དང་། །སྣ་ནི་ནམ་མཁའི་སྙིང་པོ་དང་། །ལྕེ་ནི་འཇིག་རྟེན་མགོན་པོ་དང་། །ལུས་ནི་སྒྲིབ་པ་རྣམ་སེལ་བརྗོད། །ཡིད་ནི་ཀུན་དུ་བཟང་པོ་དང་། །རྩ་ནི་བྱམས་པ་
རུ་ནི་བརྗོད། །ཡེ་ཤེས་མཆོག་ནི་འཇམ་དཔལ་ཉིད། །ཁྱབ་པ་རུ་ནི་ཡང་དག་བཤད། །དེ་བཞིན་ལུས་ཀྱི་ཆོས་རྣམས་ནི། །ཁྲོ་བོ་བཅུར་ནི་ཡང་དག་བཤད། །དེ་ལྟར་ལུས་ཀྱི་དཀྱིལ་འཁོར་གསུངས། །ཕུང་པོ་ལ་སོགས་སྐྱེ་མཆེད་སོགས། །རྣལ་འབྱོར་གཉིས་མེད་མཆོག་

དེ་ནི། །བླ་མ་བརྒྱུད་པ་ལས་ཤེས་བྱ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཕུང་པོ་ལ་སོགས་པ་དང་སྐྱེ་མཆེད་ཀྱི་མཚན་ཉིད་ཀྱི་ལེའུ་སྟེ་བཞི་བཅུ་ལྔ་པའོ།། །།དེ་ནས་གཞན་ཡང་བཤད་བྱ་བ། །ཕྱག་རྒྱ་ཆེན་པོའི་དོན་མཚན་ཉིད། །
རྣལ་འབྱོར་ཆེན་པོའི་འབྲས་བུ་ཞི། །ཡེ་ཤེས་ཆེན་པོའི་དོན་བསྡུས་པ། །བདེ་བ་ཆེན་པོའི་སྐལ་བ་ཆེ། །རོ་མཆོག་ཆེན་པོའི་བདག་ཉིད་ཅན། །སྒྱུ་མ་ཆེན་མོ་མཆོག་ཏུ་ཕྲ། །ཆེན་པོའི་ཆེན་པོ་ནམ་མཁའ་ཆེ། །ཕྱག་རྒྱ་དེ་བཞིན་གཤེགས་ཡེ་ཤེས། །རྣམ་རྟོག་
མེད་པའི་གོ་འཕང་སྟེ། །མི་ཕྱེད་རྡོ་རྗེ་སེམས་དཔའི་གནས། །རྣམ་རྟོག་མེད་པའི་བདེ་བ་ཆེ། །ནམ་མཁའ་བཞིན་དུ་གོས་པ་མེད། །རང་བཞིན་མེད་ཅིང་གཞི་དང་བྲལ། །གཉིས་མེད་བདག་མེད་བརྗོད་དུ་མེད། །རྣལ་འབྱོར་རྣམས་ནི་རང་རིག་པ། །ཕུང་པོ་ཁམས་དང་
སྐྱེ་མཆེད་ཆའི། །ཀུན་རྟོག་ཆོས་ནི་ཡོངས་སུ་སྤངས། །སྒོམ་དང་བསྒོམ་བྱ་སྙོམས་འཇུག་དང་། །རིམ་པ་གཉིས་ནི་རྣམ་པར་སྤངས། །རྣམ་ཤེས་ཡེ་ཤེས་དང་བྲལ་བ། །སྔགས་དང་བཟླས་བརྗོད་བསྙེན་པ་སྤངས། །དངོས་པོ་ཀུན་གྱི་གནས་ལས་བརྒལ། །ཡེ་ཤེས་ཆེན་པོ་
རབ་གསོལ་བ། །དངོས་གྲུབ་ཆེན་པོ་འདིར་ཤེས་བྱ། །ཕྱག་རྒྱ་ཆེན་པོ་བླ་ན་མེད། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཕྱག་རྒྱ་ཆེན་པོའི་དོན་རྣམ་པར་ངེས་པའི་ལེའུ་སྟེ་བཞི་བཅུ་དྲུག་པའོ།། །།དེ་ནས་བཅོམ་ལྡན་རྡོ་རྗེས་གསུངས། །
ཉམས་ཀྱི་མཚན་ཉིད་དབྱེ་བ་ནི། །གང་གིས་ཡོངས་ཤེས་རྣལ་འབྱོར་པ། །རྣལ་འབྱོར་ཆེན་པོ་དག་ཤེས་པར། །གྱུར་ནས་ཀྱང་ནི་ཡེ་ཤེས་ཆེ། །དེ་ཉིད་རྣལ་འབྱོར་ཀུན་ལས་བསྒྱིངས། །འདར་དང་རྡུལ་དང་བ་སྤུ་ལངས། །དབྱངས་འགྱུར་བ་དང་ལྡིབས་པ་དང་། །མདོག་
འགྱུར་མཆི་འཛག་ཐིམ་པ་དང་། །སྙིང་སྟོབས་ཅན་གྱིས་འདི་བརྒྱད་ཉམས། །དགའ་བ་རྒྱས་པའི་རྩ་ཡི་ཆུ། །རྒྱགས་པའི་ཆ་ཡི་རྩ་དགའ་ནི། །ཁོང་སྟོང་འདར་བར་སྐྱེད་པར་བྱེད། །རྒྱགས་པའི་ཆུ་ཡི་རྩ་སད་ན། །རབ་ཏུ་རྔུལ་བྱེད་སྐྱེད་པར་བྱེད། །དེ་བཞིན་རྒྱགས་པས་གཡེངས་

པའི་རྩ། །ཁོང་སྟོང་བ་སྤུ་ལྡང་བར་བྱེད། །དེ་བཞིན་ན་ས་ར་ཡི་རྩ། །ཁོང་སྟོང་ཚེག་ནི་ལྡིབ་པར་བྱེད། །རུས་སྦལ་ཆེན་པོའི་རྩ་རྒྱས་ན། །ཁ་དོག་འགྱུར་བ་སྐྱེ་བར་བྱེད། །མགོ་བོ་ཆེན་པོའི་རྩ་རྒྱས་ན། །བརྒྱལ་ཞིང་སྡུག་བསྔལ་བཅས་པར་
བྱེད། །འུར་འུར་ཆེན་པོའི་རྩ་བྱེ་ན། །བ་སྤུ་ལངས་པ་སྐྱེད་པར་བྱེད། །དགའ་བ་ཆེན་པོའི་རྩ་རྒྱས་ན། །ཁོང་སྟོང་མཆི་མ་འཛག་པར་བྱེད། །མྱོས་པ་ཆེན་པོའི་རྩ་བྱེ་ན། །སྲོག་གི་རླུང་ནི་ཐིམ་པར་བྱེད། །བརྒྱལ་དང་སེམས་མེད་བདེ་བ་ཆེ། །དེ་ནས་དྲན་པ་ཉམས་
པར་འགྱུར། །སྒེག་པ་ལ་སོགས་ཉམས་སུ་ཤེས། །སྔར་བཤད་རིམ་པས་སད་པར་བྱེད། །ཛཿཧཱུྃ་བྃ་ཧོཿདེ་བཞིན་དུ། །ཨ་ལ་ལ་ལ་ལ་ཧོ་སྔགས། །རབ་ཏུ་བསྐུལ་བས་རྒྱས་ནས་སུ། །ཉམས་ནི་སོ་སོའི་དབྱེ་བས་ཤེས། །དེ་ལྟར་དེ་ནི་དབྱེ་བརྒྱུད་པའོ། །རྣལ་
འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཉམས་ཀྱི་དབྱེ་བ་བཤད་པའི་ལེའུ་སྟེ་བཞི་བཅུ་བདུན་པའོ།། །།དེ་ནས་བཅོམ་ལྡན་རྡོ་རྗེས་གསུངས། །བདག་ཅེས་བྱ་བ་སྒྲ་ཡི་རྟེན། །གང་གིས་ཡང་དག་ཤེས་པ་ཡིས། །སྲིད་པའི་འཆིང་བའི་
མཚན་ཉིད་ནི། །ཨ་ཧྃ་འཁོར་ལོའི་འཆིང་བ་དག །དེ་ནི་ཡོངས་ཟད་གྲོལ་བའོ། །ཨ་ནི་དངོས་པོ་ཀུན་གྱི་མཆོག །ལུས་རྣམས་ཀུན་ལ་ལྷག་པར་གནས། །རྣམ་པ་ཀུན་གྱི་མཆོག་དང་ལྡན། །ཀུན་ཁྱབ་ཀུན་མཁྱེན་ཟད་པ་མེད། །ཐོགས་མེད་སྙིང་སྟོབས་ཞེས་བྱ་བ། །
ཐབས་ཅིག་ཏུ་ནི་སྐྱེ་བར་བྱེད། །སྲིད་དང་སྲིད་རྩེ་བརྩེ་བ་མེད། །སྤྲུལ་པའི་སྐུ་ཡི་མཆོག་དང་ནི། །དོན་ཀུན་བྱེད་པ་ལ་མཁས་པ། །དེ་བཞིན་གཤེགས་པའི་དབུགས་འབྱུང་བའོ། །ཧྃ་ནི་དངོས་པོ་དང་བྲལ་བ། །ལུས་ལ་གནས་ཀྱང་ལུས་བསྐྱེད་མིན། །དབང་པོ་
ལས་འདས་མི་གསལ་བ། །རྣམ་པ་ཐམས་ཅད་རྣམ་པར་སྤངས། །དངོས་དང་དངོས་མེད་ལས་གྲོལ་ཞིང་། །གང་ལའང་ལྷག་པར་གང་གནས་པ། །དངོས་པོ་ཐམས་ཅད་ནུབ་པ་དང་། །ཆོས་ཀྱི་སྐུ་ཡི་ངོ་བོ་ཉིད། །སེམས་ནི་རྡོ་རྗེ་འཆང་དབུགས་ཕྱུང་། །དོན་ཀུན་

བྱེད་པ་དང་བྲལ་བ། །སྟོང་པའི་རང་བཞིན་མྱ་ངན་འདས། །ཡེ་ཤེས་སྐུ་ཡི་རང་བཞིན་ཉིད། །རྗོད་དང་བརྗོད་བྱ་རྣམ་པར་གྲོལ། །དེ་ཡང་ཡི་གེ་ཧྃ་དུ་གྲགས། །ཐམས་ཅད་ཨ་ཧྃ་ཀུན་ལ་ཁྱབ། །ཐམས་ཅད་བདག་ཉིད་རྟག་ཏུ་བཞུགས། །ཨ་ཧྃ་དངོས་པོ་ཐམས་ཅད་ལ། །
ཁྱབ་པའི་ས་ནི་ལྷག་པར་གནས། །ཨ་ཧྃ་དང་བྲལ་སྐྱེས་བུ་ནི། །རྩ་བ་བཅད་པའི་ཤིང་བཞིན་ནོ། །ཧྃ་ནི་དཔྲལ་བའི་སྐྲ་མཚམས་ན། །ཨ་ནི་ལྟེ་བར་ཡང་དག་གནས། །འདིར་ནི་ཨ་ལས་ཟླ་བར་བཤད། །འོད་ཟེར་སྟོང་འགྱེད་པ་ཡི་ཧྃ། །འདིར་ཡང་ཨ་ཡི་མིང་ལ་བརྟེན། །རྟེན་
པའི་ཧྃ་དུ་རབ་ཏུ་གྲགས། །ཨ་ནི་སྲོག་གི་རླུང་དུ་བཤད། །དེ་བཞིན་ཐུར་སེལ་ཧྃ་དུ་བརྗོད། །དེ་གཉིས་གཅིག་གྱུར་འཁོར་བ་སྟེ། །དེས་ན་ཨ་ཧྃ་ཞེས་པར་གྲགས། །རྣམ་རྟོག་བྲལ་བའི་གནས་པ་ནི། །ཨ་ཧྃ་གང་དུ་གནས་པ་མེད། །གཞན་ནི་འགའ་ཞིག་འདི་ལ་
ཡང་། །དོན་དམ་པར་ནི་དམིགས་སུ་མེད། །དེ་ལྟར་ཨ་ཧྃ་ང་ཡིས་བཤད། །རྒྱུད་རྣམས་ཀུན་དུ་རྙེད་པར་དཀའ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཨ་ཧྃ་གི་སྒྲའི་དོན་བཤད་པའི་ལེའུ་སྟེ་བཞི་བཅུ་བརྒྱད་པའོ།། །།དེ་ནས་
བཅོམ་ལྡན་རྡོ་རྗེས་གསུངས། །སྟོང་ཉིད་དབྱེ་བ་བསྡུས་པ་ནི། །རྣལ་འབྱོར་པ་ནི་གང་གིས་ཤེས། །སྟོང་ཉིད་དེ་ནི་ཤེས་པར་འགྱུར། །མི་མཐུན་པ་དང་གཉེན་པོའི་ཕྱིར། །སྟོང་ཉིད་བསྒོམ་པར་ཡོངས་སུ་གསུངས། །ནང་གི་བདག་ཉིད་ཆོས་རྣམས་ནི། །ཀུན་དུ་རྟོག་
པའི་གཉེན་པོ་དང་། །ཕྱིན་ཅི་ལོག་ནི་རྣམ་དག་པ། །ཕྱི་ནས་སྟོང་པ་ཉིད་དུ་འདོད། །ཕྱི་རོལ་དམིགས་པ་དང་བྲལ་བ། །ནང་གི་བདག་ཉིད་ཆོས་རྣམས་དང་། །ཕྱི་རོལ་དུ་ཡང་མི་རྟོག་པ། །འདིར་ནི་ཕྱི་དང་ནང་གི་ནི། །སྟོང་པ་ཉིད་དུ་ཡང་དག་བཤད། །སྣོད་ཀྱི་འཇིག་རྟེན་དང་
བྲལ་བ། །ཆེན་པོ་སྟོང་པ་ཉིད་དུ་བརྗོད། །ཡེ་ཤེས་གང་གིས་དེ་སྟོང་པར། །མཐོང་བ་དེ་ཡང་སྟོང་པར་བརྗོད། །མེ་ལོང་ཡེ་ཤེས་རྫོགས་པ་ལ། །རྗེས་སུ་དམིགས་པར་བྱེད་ཕྱིར་རོ། །དེ་ཡི་མི་མཐུན་ཕྱོགས་སྟོང་པ། །དངོས་མེད་སྟོང་པ་ཉིད་སྟོང་ཉིད། །དོན་དམ་པར་

ནི་བརྫུན་པའི་དངོས། །ཤེས་པ་དོན་དམ་སྟོང་པ་ཉིད། །འདུས་བྱས་སྦྱིན་པ་ལ་སོགས་ཀྱི། །དགེ་བ་དམིགས་སུ་མེད་པའི་ཕྱིར། །རང་གི་རྣམ་རྟོག་མཚན་ཉིད་སྤྱོད། །འདུས་བྱས་སྟོང་པ་ཉིད་དུ་བཤད། །ཡང་དག་བྱང་ཆུབ་འདུས་མ་བྱས། །རྒྱུ་
མཚན་ཡང་ནི་དམིགས་སུ་མེད། །དངོས་དང་དངོས་མེད་རྣམ་པར་སྤངས། །འདུས་མ་བྱས་པའི་སྟོང་ཉིད་གསུངས། །སེམས་ཅན་དོན་དུ་སྨོན་ལམ་སོགས། །རང་དགའ་སོགས་པ་དམིགས་པ་མེད། །ཤིན་ཏུ་སྟོང་པ་ཉིད་དུ་བཤད། །ཀུན་རྟོག་ཐམས་ཅད་རྣམ་
པར་སྤངས། །མཐའ་ལས་འདས་པའི་སྟོང་ཉིད་གསུངས། །ཐོག་མཐའ་མེད་པའི་འཇིག་རྟེན་གྱི། །འགྲོ་བའི་ཕྱིར་ནི་སྨོན་ལམ་ཉིད། །རློམ་སེམས་མེད་པར་དེ་བརྗོད་དོ། །ཐོག་མཐའ་མེད་པའི་སྟོང་པ་ཉིད། །མྱ་ངན་འདས་ལ་དམིགས་པ་མེད། །དགེ་བའི་
བདག་ཉིད་མི་སྟོང་བ། །རློམ་སེམས་མེད་པ་ཞེས་བཤད་དོ། །དོར་བ་མེད་པ་སྟོང་པ་ཉིད། །འདོད་ཆགས་ལ་སོགས་དྲི་མ་ནི། །བདག་ནི་རང་བཞིན་གྱིས་དག་པའི། །དེ་ལྟར་རློམ་སེམས་མེད་གསུངས་པ། །རང་བཞིན་སྟོང་པ་ཉིད་དུ་གསལ། །མཚན་དང་དཔེ་བྱད་
ལ་སོགས་པ། །སྐྲུ་གཟུགས་དེ་ཡི་ཡོན་ཏན་ནི། །གཞན་རྣམས་ལ་ཡང་མི་དམིགས་པ། །རང་གི་མཚན་ཉིད་སྟོང་པ་ཉིད། །བྱང་ཆུབ་ཕྱོགས་ཀྱི་ཆོས་རྣམས་ཉིད། །སྤྱོད་པ་ལ་ཡང་རློམ་སེམས་མེད། །ཆོས་རྣམས་ཐམས་ཅད་སྟོང་པར་བཤད། །བདག་དང་སྐྱེས་
བའི་ཆོས་རྣམས་ནི། །སྒྲོ་བཏགས་དངོས་པོ་མེད་པའི་མཆོག །འཆིང་བ་ཐམས་ཅད་རྣམ་པར་གཅོད། །དངོས་མེད་སྟོང་པ་ཉིད་དུ་གསུངས། །ཇི་ལྟར་སྔོན་གསུངས་སྟོང་པ་ཉིད། །དེ་ལྟར་དངོས་པོ་མེད་ཤེས་པ། །སླར་ཡང་མི་དམིགས་པ་ཉིད་ནི། །དངོས་པོ་མེད་
པ་སྟོང་ཉིད་འདོད། །དེ་ལྟར་སྟོང་ཉིད་དབྱེ་བ་ཡང་། །བག་ཆགས་རྣམས་ཀྱི་གཉེན་པོའི་ཕྱིར། །རྒྱུ་ཡི་གཉེན་པོ་མི་མཐུན་ཕྱོགས། །བླ་མ་བརྒྱུད་པ་ལས་ཤེས་བྱ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སྟོང་པ་ཉིད་ཀྱི་མཚན་ཉིད་ཀྱི་ལེའུ་སྟེ་བཞི་བཅུ་

དགུ་བའོ།། །།དེ་ནས་བཅོམ་ལྡན་རྡོ་རྗེས་གསུངས། །སྟོང་པ་ཉིད་ནི་སྐྱེ་བའི་རྒྱུ། །རྣམ་པ་མེད་པའི་ཉམས་མྱོང་དངོས། །ལུས་རྣམས་ལ་ནི་ཁྱབ་པ་དང་། །ཕུང་པོ་ལྔ་ནི་རང་བཞིན་ལུས། །འཁོར་ལོ་དྲུག་ལ་ཁྱབ་པ་དང་། །ཆོས་རྣམས་ཀུན་གྱི་དབུས་གནས་ཕྱིར། །རིང་
བ་མ་ཡིན་ཉེ་བ་མིན། །དེ་ནི་ཀུན་རྫོབ་དང་དབྱེར་མེད། །སྟོང་པ་ཉིད་ནི་དོན་དམ་མོ། །རྡོ་རྗེ་ཕྲེང་བ་དེ་ལྟར་བཤད། །སྲོག་གི་རྟེན་གྱི་མཚན་ཉིད་ནི། །སྐུ་མདོག་སྔོན་པོ་ཞལ་གསུམ་པ། །སྤྱན་གསུམ་པོ་ལ་ཕྱག་དྲུག་མཆོག །རྡོ་རྗེ་འཁོར་ལོ་ནོར་བུ་གཡས། །གཡོན་པ་
དྲིལ་བུ་པདྨ་དང་། །རལ་གྲི་ཤིན་ཏུ་རྣོན་པོ་དང་། །ཕྱར་བ་གོ་རིམས་བཞིན་དུ་བསྣམས། །ཨཱ་ལི་ཀཱ་ལི་ལས་བྱུང་བ། །ཟླ་བ་ཉི་མའི་གདན་ལ་བཞུགས། །སྣ་ཚོགས་པད་རྒྱས་གདན་ལ་ནི། །སེམས་དཔའི་སྐྱིལ་མོ་ཀྲུང་གིས་བཞུགས། །ཧཱུྃ་གི་ས་བོན་རྫོགས་པ་དང་། །རྡོ་རྗེ་
ཆེན་པོའི་རིགས་ལས་བྱུང་། །ཀུན་རྟོག་རྣམས་ནི་བསྐྱེད་པའི་རླུང་། །རྣམ་པར་གཅོད་ཅིང་ཐིམ་པར་བྱེད། །གནོད་བྱེད་དེ་དག་སེལ་བར་བྱེད། །གཉིས་པ་ཐམས་ཅད་རྣམ་པར་གཅོད། །སྒྱུ་མ་ཆེན་མོ་སྟོང་བ་ཆེ། །སངས་རྒྱས་ས་ནི་རྨད་དུ་བྱུང་། །སངས་རྒྱས་
ཉིད་ཀྱི་འབྲས་སྟེར་བའོ། །འདི་ཡི་སྔགས་ནི་བརྗོད་པར་བྱ། །ཨོྃ་དང་བཛྲ་མཱ་ལེ་དང་། །དེ་བཞིན་ཨཱཿདང་ཧཱུྃ་དང་གཉིས། །ཕཊ་དང་སྭཱ་ཧཱ་ཡང་དག་ལྡན། །སྔགས་མཆོག་བཏུས་པ་བླ་ན་མེད། །རླུང་འཕྲོག་དེ་ཁོ་ན་ཉིད་ཀྱིས། །ཡིད་ཀྱི་རྣམ་རྟོག་སེལ་བར་བྱེད། །
ཞི་བའི་གནས་དང་ཆུ་འགྲམ་དང་། །ཤིང་གཅིག་ལམ་གྱི་བཞི་མདོ་དང་། །ཡང་ན་སུམ་མདོར་འབུམ་ཕྲག་བཅུ། །གསལ་བར་ཡང་ནི་བཟླས་པར་བྱ། །དེ་ནི་དངོས་གྲུབ་མཆོག་ཏུ་འགྲོ། །རྫོགས་པའི་རིམ་པའི་རྣལ་འབྱོར་གྱིས། །དེ་ཡི་ཡོན་ཏན་གསལ་བར་
འབྱུང་། །ཞི་བ་ལ་སོགས་འབད་མི་དགོས། །སྐད་ཅིག་གཅིག་ལ་མངོན་པར་རྟོགས། །དེ་ནི་དེ་ཉིད་རིགས་མཆོག་ཤེས། །དཔའ་བོ་གཅིག་བུའི་ཆོ་ག་འདི། །དཔའ་མོ་གཅིག་པུ་ཉིད་བསྒྲུབ་པ། །དེ་ཡི་མཚན་ཉིད་སྒོམ་པ་གང་། །རྣམ་རྟོག་སྤངས་པའི་རྣལ་འབྱོར་

པ། །ཤིན་ཏུ་རྣམ་དག་མཁའ་ཡི་དངོས། །རང་གི་དངོས་གྲུབ་མཆོག་ཏུ་འགྲོ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སྟོང་པ་ཉིད་ཀྱི་རྡོ་རྗེའི་ཕྲེང་བ་བསྐྱེད་པའི་མཚན་ཉིད་ཀྱི་ལེའུ་སྟེ་ལྔ་བཅུ་པའོ།། །།དེ་ནས་བཅོམ་ལྡན་རྡོ་རྗེས་
གསུངས། །མཚན་མོ་ཉིན་མོའི་མཚན་ཉིད་ནི། །མཚན་མོ་ཤེས་རབ་ཤེས་པར་བྱ། །འབྱུང་པོ་ཐམས་ཅད་ཐིམ་ནས་འགྲོ། །མཚན་མོའི་ཆ་ནི་ཟླ་བར་འགྱུར། །ཟླ་བ་མྱ་ངན་འདས་མཚན་ཉིད། །ཀུན་རྫོབ་དང་ནི་དོན་དམ་གྱི། །ཤེས་རབ་རྣམ་པ་གཉིས་ཞེས་བྱ། །ཀུན་རྫོབ་
ཤེས་བྱར་ཤེས་པར་བྱ། །དོན་དམ་རེག་བྱ་རྣམ་པར་སྤངས། །རེག་བྱ་དང་བྲལ་བདེ་བ་གང་། །བདེ་བ་མཆོག་དེ་ཐོབ་པར་དཀའ། །ཉིན་མོ་སླར་ཡང་ཐབས་སུ་བཤད། །ཐབས་ནི་ཉིན་མོར་གྱུར་པ་དང་། །གང་ཚེ་དངོས་ལས་སྐྱེས་ཉི་མ། །རྟག་ཏུ་བྷ་གའི་བདག་པོར་
འགྱུར། །འཁོར་བའི་རྣམ་པ་ཉི་མར་འགྱུར། །ཉི་མ་ལས་ནི་ཟླ་བ་སྐྱེ། །དེ་ལས་གཉིས་མེད་ངོ་བོར་བཤད། །འབར་བའི་ཕྱིར་ནི་ཉི་མར་འགྱུར། །རྣམ་པར་དཔྱད་པའི་དོན་དམ་དང་། །ཆགས་བྲལ་མཆོག་ཏུ་ཕྲ་བ་དང་། །མི་སྣང་བ་དང་སྟོང་པའི་ལུས། །འོད་གསལ་བ་
ཡི་གོ་འཕང་ཞི། །གང་དུ་ཡང་དག་མི་གནས་སོ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་མཚན་མོ་ཉིན་མོ་རྒྱས་པར་བཤད་པའི་ལེའུ་སྟེ་ལྔ་བཅུ་གཅིག་པའོ།། །།དེ་ནས་བཅོམ་ལྡན་རྡོ་རྗེས་གསུངས། །ཨཱ་ལི་ཀཱ་ལིའི་དམ་ཚིག་ནི། །རྒྱུད་
རྣམས་གཞན་དུ་མ་གསུངས་པའི། །རྒྱལ་སྲས་རྣམས་ལ་དགོངས་པ་ཡི། །འོད་གསལ་གོ་འཕང་ལས་སྐྱེས་པའི། །སྣང་བ་མཆེད་པའི་མཚན་ཉིད་ནི། །གསལ་བྱེད་སུམ་ཅུ་རྩ་གསུམ་ལྡན། །ཀཱ་ལིའི་དཀྱིལ་འཁོར་རྒྱས་པའོ། །སྣང་བ་མཆེད་པའི་གོ་འཕང་ནི། །སྣང་བ་
ལས་བྱུང་ཟད་པ་མེད། །དབྱངས་ནི་བཅུ་དྲུག་དང་ལྡན་པ། །ཨཱ་ལིའི་དཀྱིལ་འཁོར་རྒྱས་པའོ། །དེ་གཉིས་གསང་བའི་སྦྱོར་བ་ལས། །དབུས་སུ་སྐྱེས་པའི་བདེ་བ་ཆེ། །ཨཱ་ལི་ཀཱ་ལིའི་དམ་ཚིག་ཅེས། །དགོངས་པའི་ཚིག་གིས་བྱེ་བྲག་བྱས། །ཤིན་ཏུ་ཕྲ་བའི་ཡེ་

ཤེས་མཆོག །བླ་མ་བརྒྱུད་ལས་ཤེས་པར་བྱ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཨཱ་ལི་ཀཱ་ལི་རྒྱས་པར་བཤད་པའི་ལེའུ་སྟེ་ལྔ་བཅུ་གཉིས་པའོ།། །།དེ་ནས་གཞན་ཡང་བཤད་ཀྱིས་ཉོན། །མཚམས་ཀྱི་མཚན་ཉིད་བླ་ན་མེད། །སྣང་
དང་མི་སྣང་བྲལ་བའི་མཚམས། །ཤེས་རབ་རྡོ་རྗེ་ལས་བྱུང་བ། །གཉིས་མེད་འདྲེས་པའི་དབུས་ན་གནས། །འབགས་ཤིང་གོས་པ་རྣམ་པར་སྤངས། །རྡོ་རྗེ་པདྨ་འཆི་མེད་སྐྱེས། །ཟླ་བ་ཉི་མ་ཡང་དག་འདྲེས། །མཐར་ནི་ཡང་དག་མི་འགྲོ་གང་། །མཚམས་མེད་
འཁོར་བ་དག་པར་བྱེད། །རང་གི་ངོ་བོ་རྣམ་པ་མཆོག །ཕྲ་བའི་མཚན་ཉིད་བསམ་མི་ཁྱབ། །སེམས་ཅན་ཀུན་གྱི་མཚམས་ཀྱི་ནི། །རྡོ་རྗེ་འཆང་གི་བཙུན་མོ་དང་། །འཆར་བ་མཆོག་ཏུ་དག་པར་བཤད། །དགའ་བྲལ་ལ་སོགས་རྣམ་པར་སྤངས། །མདུད་
པའི་རྩེར་གནས་མཆོག་ཏུ་ཞི། །ཙ་ན་ཀ་ཡི་ཚིག་གུ་ཙམ། །མཚན་མོ་བདག་པོ་དེ་ཤར་བ། །གང་ཕྱིར་སྟེང་གི་གོ་འཕང་གནས། །ལ་ལ་ཐིག་ལེའི་རང་ངོ་བོར། །རྣམ་པ་བཞི་ཡིས་ཡང་དག་གནས། །ལ་ལར་ཐོག་མ་ལ་སོགས་སྤངས། །ལ་ལར་དེ་ཡང་
དམིགས་སུ་མེད། །གང་ཕྱིར་རང་གི་བདག་ཉིད་ཅན། །དེ་ཕྱིར་བརྗོད་དུ་མེད་པའོ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་མཚམས་ཀྱི་འཆར་བའི་མཚན་ཉིད་ཀྱི་ལེའུ་སྟེ་ལྔ་བཅུ་གསུམ་པའོ།། །།དེ་ནས་བཅོམ་ལྡན་རྡོ་རྗེས་གསུངས། །
རྣམ་པ་ཉི་ཤུའི་མིང་ཙམ་ནི། །སློབ་དཔོན་ལས་སུ་ཡོངས་སུ་བཤད། །སྔགས་ཀྱི་རྣལ་འབྱོར་ལེགས་རྒྱས་པ། །སྔོན་དུ་བསྙེན་པ་ས་སྦྱང་དང་། །འབྱུང་པོ་བསྐྲད་པ་ཉིད་དང་ནི། །ས་གཟུང་ཉིད་དང་ཐིག་སྐུད་ནི། །སྦྱང་དང་ལྷག་པར་གནས་པ་དང་། །བགེགས་བསྐྲད་དེ་བཞིན་དཀྱིལ་འཁོར་
གྱི། །ཐིག་ནི་རབ་ཏུ་གསལ་བ་དང་། །ཕུར་བུས་ཡང་དག་གདབ་པ་དང་། །བུམ་པ་བྱིན་གྱིས་བརླབས་པ་དང་། །བཅོམ་ལྡན་འདས་ཀྱི་ལྷག་གནས་དང་། །ཁྲུས་དང་རབ་ཏུ་སྦྱང་བ་དང་། །མཆོད་པ་རབ་གནས་གཏོར་མ་དང་། །སློབ་མ་ལྷག་པར་གནས་པ་དང་། །

མེ་ལ་སྦྱིན་སྲེག་ཆོ་ག་བཞིན། །དབང་བསྐུར་བ་དང་གཤེགས་སུ་གསོལ། །དེ་ལྟར་ཆོ་ག་ཉི་ཤུའི་ལས། །གང་གིས་དེ་ཤེས་འགྲོ་བའི་བླ། །དགེ་སློང་རྡོ་རྗེ་འཛིན་པས་བྱ། །བདུད་ལས་སྡིགས་མཛུབ་དེ་ནི་མཆོག །ཡི་གེ་གསུམ་ཟློས་པ་ལ་ཞེ་ན། །རྡོ་རྗེ་
ཐེག་པ་ལྷག་པར་གྲོལ། །ཞི་བ་ལ་སོགས་ལས་གང་གིས། །རྟག་ཏུ་ལག་པའི་མཐིལ་ལ་གནས། །དེ་ཡི་ཡང་དག་ཆོ་ག་ཡིས། །ཆོ་ག་མཆོག་ནི་བྱ་བ་ཡིན། །རྣལ་འབྱོར་རྗེས་སུ་རྣལ་འབྱོར་སོགས། །ཆོ་ག་ལ་སོགས་བརྩམ་པར་བྱ། །བགེགས་མཐར་བྱེད་པའི་སྙིང་པོའི་
སྔགས། །ཡི་གེ་ཉི་ཤུ་རྩ་བཞི་མཆོག །སྟོང་ཕྲག་བཅུ་ནི་ཡོངས་སུ་བཟླ། །ཐོག་མར་མཁས་པ་ཇི་བཞིན་དུ། །བགེགས་རྣམས་ཐམས་ཅད་བསལ་བའི་ཕྱིར། །སྔོན་དུ་བསྙེན་པ་ཞེས་ནི་བཤད། །དེ་འོག་ཡི་གེ་གསུམ་ཁྲིར་ནི། །བསམ་པ་ཀུན་གྱིས་བཟླས་བྱས་ན། །ཡིད་ལ་
འདོད་པའི་དངོས་གྲུབ་སྟེར། །སློབ་མ་རྣམས་ཀྱི་དངོས་གྲུབ་རྒྱུར། །སྐྱེ་བོས་དབེན་པའི་ཕྱག་དར་བྱས། །ས་བཟུང་ཆུ་ནི་ཉེ་བར་བཅས། །གྲོང་དང་ཧ་ཅང་མི་ཉེ་ཞིང་། །རིང་པོར་ཡང་ནི་བརྩམ་མི་བྱ། །ཤིན་ཏུ་འཇམ་ཞིང་སྲོག་ཆགས་མེད། །རྒྱལ་པོའི་ཕོ་བྲང་ཤིན་ཏུ་རིང་། །
ཁང་ཁྱིམ་ཚོང་དུས་ལས་རྒྱང་རིང་། །ཡང་ན་བདེ་གཤེགས་རྟེན་ལ་ནི། །ཐོག་མར་སོར་མོ་རྣམས་ལ་ནི། །བདེ་བར་གཤེགས་པའི་སྔགས་དགོད་བྱ། །ཁྲུ་གང་སོར་ནི་བཞི་པ་ཡིས། །སེང་ལྡེང་ཕུར་པ་བྱས་ནས་ནི། །ཡི་གེ་གསུམ་སྔགས་ཆུ་ཡིས་བཀྲུ། །ཡི་གེ་བརྒྱ་
པ་ལན་བདུན་དང་། །ཡི་གེ་གསུམ་གྱི་སྔགས་ཀྱིས་བརྐོ། །ས་ནི་ཆུ་ཡི་མཐར་ཐུག་པ། །ཡང་ན་ཁྲུ་ནི་ཕྱེད་དང་གསུམ། །ཡང་ན་སེམས་ཀྱིས་སྦྱང་བར་བྱ། །དེ་ལ་གནས་པའི་འབྱུང་པོ་ནི། །ཡང་དག་འགྲོར་ནི་འཇུག་པར་བྱ། །ཨོྃ་མ་ཧཱ་ཀྲོ་དྷ་ཛྭ་ལཱརྐ། །ཧཱུྃ་ཕཊ་
མཐའ་དང་ཡང་དག་ལྡན། །དེ་ལྟར་ལག་མཐིལ་སྔགས་བཀོད་ལ། །འབྱུང་པོ་རྣམས་ནི་བསྐྲད་པར་བྱ། །ས་ལ་ཐལ་མོ་ལན་གསུམ་དུ། །བརྡབ་པ་བྱས་ནས་སྔགས་བཟླས་ཏེ། །ཨུད་གཙྪད་ལན་གཉིས་བརྗོད། །སརྦ་བྷུ་ཏ་གྲ་ཧ་ཨུ་ད་གཙྪ། །ཡི་གེ་གསུམ་ནི་མཐའ་རུ་

བརྗོད། །བཛྲ་ས་ཏྭ་བེ་ཤད་དེ། །ལས་ནི་ཐམས་ཅད་པར་གསུངས་པའི། །གཏོར་མ་བྱིན་ནས་འགྲོ་རུ་གཞུག །ས་ནི་ཡོངས་སུ་བཟུང་རྗེས་ལ། །རྡོ་རྗེ་སློབ་དཔོན་གྱིས་བརྩམ་བྱ། །ཚ་སྒོ་མེད་ཅིང་དྲི་མ་བསལ། །མཉམ་ཞིང་ཟུག་རྔུ་མེད་པ་དང་། །མེ་ལོང་ལྟ་བུར་འཇམ་པ་
དང་། །མཉམ་པ་ཡང་ནི་མཁས་པས་བྱ། །བ་ཡི་ལྕི་བ་ལ་སོགས་པ། །རྣམ་པ་ལྔ་ཡིས་བྱུག་པར་བྱ། །བྱུགས་ནས་དེ་རྗེས་ཁྲུས་བྱས་ལ། །སློབ་དཔོན་ཁྲོ་བོའི་སྐུ་དང་ནི། །དཀྱིལ་འཁོར་འཇམ་པའི་རྡོ་རྗེ་ཡི། །མཆོག་ཏུ་མི་གཡོ་གཟུགས་ཀྱིས་ནི། །འཇམ་པ་དང་
ནི་སུམ་སྒྲིལ་གྱིས། །རས་སམ་ཡང་ན་གསོ་མ་ཡིས། །ཡི་གེ་གསུམ་གྱིས་རྣམ་པར་སྦྱང་། །ཐིག་སྐུད་གྱིས་ནི་ཀུན་ནས་མཉམ། །གྲུ་བཞི་པར་ནི་བྱས་ནས་ཀྱང་། །རྡོ་རྗེ་ཅན་གྱིས་ཁྲུ་གསུམ་གསུམ། །གྲུ་བཞི་པར་ནི་གཟུང་བར་བྱ། །དེ་ཡི་དབུས་སུ་ལྟེ་བའི་ཆ། །སྒྲིབ་པའི་སྐྱོན་
ནི་སྤང་བར་བྱ། །སྐུ་གདུང་དང་ནི་རིན་ཆེན་གཞུག །ལེགས་པར་བསངས་ནས་བྱིན་གྱིས་བརླབ། །ཡི་གེ་གསུམ་ཡང་སྭཱ་ཧཱའི་མཐའ། །ཕཊ་ཀྱི་དབུས་སུ་ཡང་དག་སྦྱར། །སྔགས་འདི་ཡང་ནི་བཟླས་པར་བྱ། །བརྒྱ་དང་བརྒྱད་ཀྱིས་ལྷག་པར་གསལ། །ཚངས་པའི་
ཐིག་ནི་བཏབ་ནས་ནི། །ཡི་གེ་བརྒྱ་པ་བཟླ་བར་བྱ། །དེ་རྗེས་དེ་ལ་མེ་ཏོག་ཆར། །སྔགས་ནི་བརྗོད་ནས་གཏོར་བར་བྱ། །ཨོྃ་དང་ཨ་མོ་གྷཱ་པདྨོ། །དེ་བཞིན་དུ་ནི་ཕྱི་ནས་སུ། །བྷ་སུ་དྷ་རི་དྷ་ར་གཉིས། །དྷ་ར་ཎི་མཎྜ་ལི་ཧཱུྃ། །ཡི་གེ་བརྒྱ་པའི་སྔགས་དང་ནི། །ལན་
གསུམ་བར་དུ་ཐིག་སྐུད་ལ། །ཞབས་བསིལ་ཆུ་ཡིས་བསང་བར་བྱ། །ཡི་གེ་གསུམ་གྱིས་ཐིག་གདབ་བྱ། །ཟུར་བཞི་པ་ལ་སྒོ་བཞི་པ། །རྡོ་རྗེ་ཅན་གྱིས་མཚམས་བཞི་པ། །ཐོག་མར་ཤར་དང་བྱང་དང་ནི། །ཇི་སྲིད་ལྷོ་དང་ནུབ་དག་དང་། །མཚམས་སུ་ཡང་དག་ཐིག་སྐུད་དང་། །
སླར་ཡང་ཡང་དག་གདབ་པར་བྱ། །ཤར་དང་ལྷོ་ཡི་མཚམས་དང་ནི། །ནུབ་དང་བྱང་གི་མཚམས་སུ་ནི། །ཐིག་སྐུད་གྱིས་ནི་ཚད་གཞལ་བྱ། །ཟུར་བཞི་དང་ནི་ཐིག་སྐུད་བྱ། །སྐོར་ཐིག་གསུམ་ནི་སྒོ་བཞི་པ། །རྡོ་རྗེ་ཕྲེང་བ་གསུམ་གྱིས་མཛེས། །ཚངས་པའི་ཐིག་

གཉིས་བཏབ་ནས་ནི། །དེ་ལས་དབང་པོའི་ཕོ་བྲང་ནི། །རྣམ་པ་ཀུན་གྱིས་ཡང་དག་ཐིག །རྒྱལ་བ་ཀུན་གྱི་བཞུགས་གནས་གསལ། །དེ་ལ་རིག་པ་འཛིན་པ་བྲི། །སླར་ཡང་རིན་ཆེན་ཕྱེ་མའམ། །ཚོན་སྣ་ལྔ་རྣམས་མེ་ཏོག་དང་། །རྫས་སམ་ལས་ཀྱི་སྦྱོར་
བ་ལས། །རིམ་པ་ཇི་ལྟ་བ་བཞིན་དུ། །མཚན་མའི་ཕྱག་རྒྱ་ལ་སོགས་བྲི། །མི་བསྐྱོད་སྐུ་མདོག་ཕྱག་རྒྱ་སོགས། །རིགས་ནི་དབུས་སུ་དགོད་པར་བྱ། །རྒྱལ་བ་རྒྱལ་དང་རིན་ཆེན་འཆང་། །འཁོར་བ་འདས་དང་ཤེས་རབ་འཆང་། །རིམ་བཞིན་སྐུ་མདོག་དབྱེ་བ་ཡིས། །
ཤར་ལ་སོགས་པའི་ཕྱོགས་སུ་དགོད། །གཏི་མུག་ཞེ་སྡང་ཆགས་པ་དང་། །རྡོ་རྗེ་དགའ་སོགས་རིམ་པ་བཞིན། །མེ་ལ་སོགས་པའི་མཚམས་རྣམས་སུ། །ཇི་ལྟ་བ་བཞིན་དགོད་པར་བྱ། །སྣ་ཚོགས་པདྨ་ཟླ་བ་ཡི། །གདན་བདུན་གཞན་གྱི་ཉི་མ་གཉིས། །འཁོར་དགའ་ཞེ་སྡང་
དགའ་བར་བཅས། །ཀ་ཡི་ཕྲེང་གིས་རྣམ་པར་བརྒྱན། །ཞལ་གསུམ་ཕྱག་དྲུག་རྣམ་པ་ཅན། །གཡོན་ན་ཤེས་རབ་རལ་གྲི་བསྣམས། །གཟུགས་དང་དབྱིབས་རྣམས་ཇི་བཞིན་དུ། །དབུས་ཀྱི་དཀྱིལ་འཁོར་མཆོད་པར་བྱ། །ཕྱི་རོལ་གཟུགས་ཀྱི་རྡོ་རྗེ་སོགས། །མཚམས་
ཀྱི་ཆར་ནི་རྣམ་པར་དགོད། །ཤར་ལ་སོགས་པའི་སྣམ་བུ་ལ། །བྱམས་པ་ས་ཡི་སྙིང་པོ་ཤར། །འཇམ་དཔལ་ཕྱག་ན་རྡོ་རྗེ་ལྷོར། །མཁའ་སྙིང་འཇིག་རྟེན་དབང་ཕྱུག་ནི། །ཀུན་ནས་ནུབ་ཏུ་བསྒོམ་པར་བྱ། །སྒྲིབ་པ་རྣམ་པར་སེལ་བ་དང་། །ཀུན་དུ་བཟང་པོ་བྱང་དུ་དགོད། །ཞལ་
གསུམ་ཕྱག་དྲུག་རྣམ་པ་ཅན། །གཡོན་ན་རལ་གྲི་དགོད་པ་དང་། །ཕྱག་ན་རྡོ་རྗེ་དྲི་མེད་པའི། །ཉི་མའི་དཀྱིལ་འཁོར་གྱི་ནི་གདན། །ལྷ་མོ་རྣམས་ལ་ཟླ་བའི་གདན། །སྣ་ཚོགས་པདྨའི་སྟེང་ན་གསལ། །རྣམ་པར་སྣང་མཛད་རིགས་ལས་བྱུང་། །མཚན་མའི་ཕྱག་རྒྱ་ལ་
སོགས་དགོད། །ཤར་ལ་སོགས་པའི་སྒོ་རྣམས་སུ། །གཤིན་རྗེ་གཤེད་ལ་སོགས་པ་དགོད། །ཞལ་གསུམ་ཕྱག་དྲུག་རྣམ་པ་ཅན། །དེ་བཞིན་རལ་གྲི་གཡོན་ན་འཛིན། །མི་གཡོ་ལ་སོགས་མཚམས་རྣམས་སུ། །གཤིན་རྗེ་གཤེད་ཀྱི་རང་ངོ་བོ། །ཞལ་གསུམ་

ཕྱག་དྲུག་རྣམ་པ་ཅན། །གཡོན་ན་རལ་གྲི་རྣམ་པར་བསམ། །གང་ཕྱིར་ཤེས་རབ་རང་བཞིན་གཡོན། །དེ་བཞིན་གཡོན་ནས་རལ་གྲི་བརྗོད། །གནོད་མཛེས་དེ་བཞིན་གཙུག་ཏོར་ནི། །འོག་དང་སྟེང་དུ་རྣམ་པར་དགོད། །ཁྲོ་བོ་རྣམས་ནི་ཉི་མར་བཞུགས། །དེ་བཞིན་སྣ་ཚོགས་
པདྨའི་གདན། །དེ་བཞིན་ཕྱག་རྒྱ་དབྱུག་ལ་སོགས། །ཉེ་བར་མཚོན་ནས་དགོད་པར་བྱ། །དེ་བཞིན་གཤེགས་པ་རྣམ་དག་པའི། །རི་མོ་ལྔ་ནི་རྣམ་པར་དགོད། །དེ་ལ་རྡོ་རྗེ་འབར་བའི་ཕྲེང་། །ར་བ་ཡིས་ནི་ཡོངས་སུ་བསྐོར། །རིན་ཆེན་དྲ་བ་རྔ་མ་དང་། །ལྷ་མོ་རྣམས་ཀྱི་
སྣམ་བུ་ཡིས། །ཀ་བ་རྟ་བབས་འཁོར་ལོར་མཚན། །རི་དགས་རྣམས་ཀྱི་མཚན་པས་བརྒྱན། །གདུགས་དང་རྒྱལ་མཚན་བ་དན་སོགས། །རྔ་ཡབ་མེ་ལོང་ལ་སོགས་ཀྱིས། །བརྒྱན་པ་རུ་ནི་རྣམ་པར་བཤད། །སངས་རྒྱས་རྣམས་ཀྱིས་ཡང་དག་བརྟེན། །སློབ་དཔོན་
མཆོག་གི་དཀྱིལ་འཁོར་ནི། །རང་གི་ལུས་ཀྱི་གཟུགས་བརྙན་ནོ། །རྡོ་རྗེ་སློབ་དཔོན་གྱིས་བྱ་བ། །བགེགས་བསྐྲད་པ་ནི་སྔོན་སོང་བས། །སུམྦྷའི་སྒྲ་དང་ནི་སུམྦྷ། །ཐོག་མར་ཨོྃ་དང་ངོ་མཚར་ཆེ། །ཧཱུྃ་གཉིས་ཕཊ་ཀྱི་མཐའ་དང་ལྡན། །ཤར་གྱི་སྒོ་རུ་དགོད་པར་བྱ། །
ཨོྃ་དང་གྲྀཧྞ་གྲྀཧྞ་ཞེས། །ཧཱུྃ་གཉིས་ཕཊ་དང་ཡང་དག་ལྡན། །བློ་དང་ལྡན་པས་ལྷོ་རུ་དགོད། །ཨོྃ་དང་གྲྀཧྞཱ་པ་ཡ་གཉིས། །ཧཱུྃ་གཉིས་ཕཊ་ཀྱི་མཐའ་དང་ལྡན། །ནུབ་ཏུ་ཡང་དག་སྤྲོ་བར་བྱ། །ཨོྃ་ཨཱ་ན་ཡ་ཧོ་བྷ་ག །བཱན་དང་བིདྱཱ་རཱ་ཛ་དང་། །ཧཱུྃ་གཉིས་དང་ནི་ཕཊ་མཐར་
དགོད། །དེ་རྗེས་ཡང་ནི་བྱང་དུ་དགོད། །འདི་ཡིས་གདུག་པ་བཀུག་ནས་ནི། །དེ་ནས་སྔགས་པས་ཕུར་པ་གདབ། །སེང་ལྡེང་ལས་ནི་བྱས་པ་ཡི། །ཕུར་བུ་སོར་ནི་བཅུ་གཉིས་ཚད། །ཟུར་གསུམ་ཡི་གེ་གསུམ་གྱིས་མཚན། །ཡི་གེ་བརྒྱ་པ་སོ་སོར་བཟླས། །སྔགས་ཀྱི་
ཆུ་ཡིས་བསངས་ནས་ནི། །ཕྱོགས་དང་མཚམས་སུ་དགོད་པར་བྱ། །ཨོྃ་དང་ཡི་གེ་གྷ་ལན་གཉིས། །དེ་བཞིན་གྷཱ་ཏ་ཡ་ནི་གཉིས། །སརྦ་དཥྚཱཾ་ཕཊ་ཞེས་དང་། །དེ་བཞིན་ཀཱི་ལ་ཡ་གཉིས་དང་། །སརྦ་པཱ་པཾ་ཕཊ་དང་ནི། །ཧཱུྃ་གསུམ་བཛྲ་ཀཱི་ལ་ཡ། །བཛྲ་དྷ་ར་ཨཱཛྙཱ་པ་

ཡ་ཏི། །ཀཱ་ཡ་བཱཀྩིཏྟ་བཛྲ་དང་། །ཀཱི་ལ་ཡ་ཧཱུྃ་ཕཊ་ཡི་གེའི། །མཐའ་ཅན་གྱི་ནི་ཕུར་བུས་གདབ། །ཨོྃ་དང་བཛྲ་མུཏྒ་ར། །བཛྲ་ཀཱི་ལ་ཡ་ཨཱ་ཀོ་ཊ། །ཡ་དང་ཧཱུྃ་གཉིས་ཕཊ་མཐའ་དང་། །སྔགས་དང་ཕུར་བུས་བརྡུང་བ་བརྗོད། །དེ་རྗེས་བགེགས་ནི་
འཇུག་ལ་སོགས། །བསྐྲད་དོན་རྡོ་རྗེ་ར་བ་དང་། །སྟེང་དུ་མདའ་ཡི་དྲ་བ་དང་། །འོག་ཏུ་སྣ་ཚོགས་རྡོ་རྗེ་དང་། །གཙུག་ཏོར་གནོད་མཛེས་སྔགས་ཀྱིས་ནི། །བྱིན་གྱིས་བརླབ་པའི་ཆོ་ག་ཡིས། །བུམ་པ་བཅུ་འམ་ཡང་ན་དྲུག །རིན་ཆེན་ལས་བྱས་རྣམ་དག་པ། །སྨན་ལྔ་
དང་ནི་འབྲས་བུ་ལྔ། །འབྲུ་ལྔ་ལ་སོགས་ཀྱིས་གང་བ། །རིན་ཆེན་ལྔ་དང་སྣ་མ་སོགས། །ལོ་མ་ལྔ་ཡིས་རྣམ་པར་བརྒྱན། །གུར་གུམ་གླ་རྩི་ག་པུར་དང་། །ཙནྡན་ཆུ་ཡིས་གང་བར་བྱ། །མེ་ཏོག་ལ་སོགས་ཀྱིས་མཆོད་བྱ། །རང་རང་སྔགས་ཀྱིས་བྱིན་གྱིས་བརླབ། །བཛྲ་དྷྲྀག་དང་ཛི་
ན་ཛིག །རཏྣ་དྷྲྀག་དང་ཨཱ་རོ་ལིཀ།།དེ་བཞིན་པྲཛྙཱ་དྷྲྀཀ་སྔགས་དང་། །ལྕགས་ཀྱུའི་རྣམ་པའི་འོད་ཟེར་གྱིས། །འོག་མིན་འཇིག་རྟེན་ཁམས་ནས་ནི། །བུམ་པ་རང་གིས་བསྐུར་བྱས་པ། །དེ་ནས་སྤྱན་དྲངས་ནས་ནི་གཞུག །དེ་ནས་ལྷ་མོའི་གཟུགས་སྤྲོས་ནས། །དེ་རྗེས་
གཞན་ལ་དགོད་པར་བྱ། །ཨོྃ་དང་རུ་རུ་སྥུ་རུ་དང་། །དེ་ནས་ཛྭ་ལ་ཏིཥྛ་གསལ། །དེ་བཞིན་སིད་དྷ་ལོ་ཙ་ནི། །སརྦ་ཨརྠ་སཱ་དྷ་ནེ། །སྭཱ་ཧཱ་ཞེས་ནི་དེ་ལ་བཟླས། །སྤྱན་གྱི་རྣམ་པ་རྫོགས་ནས་ནི། །བུམ་པའི་དབུས་སུ་མཆོད་པར་བྱ། །ཨོྃ་དང་ཤཾ་ཀ་རེ་དང་ཡང་། །དེ་ལས་
ཤཱནྟིཾ་ཀུ་རུ་དང་། །དེ་བཞིན་གྷུཊྚི་གྷུཊྚེ་དང་། །གྷུཊྚི་ནེ་དང་གྷུཊྚི་ནེ། །གྷཱ་ཏ་ཡ་ནི་ལན་གཉིས་བརྗོད། །སྭཱ་ཧཱའི་མཐའ་ཅན་སྔགས་བརྗོད་བྱ། །མཱ་མ་ཀཱི་ཡི་རྣམ་པ་རྫོགས། །བུམ་པའི་དབུས་སུ་མཆོད་པར་བྱ། །ཨོྃ་དང་ཀ་ཊེ་བི་ཀ་ཊེ། །ནི་ཀ་ཊེ་ཀ་ཊཾ་ཀ་ཊེ། །ཀ་རོ་ཊ་
བཱིརྱེ་སྭཱ་ཧཱ། །གོས་དཀར་རྣམ་པར་རྫོགས་ནས་ནི། །བུམ་པའི་དབུས་སུ་མཆོད་པར་བྱ། །ཨོྃ་དང་ཏཱ་རེ་ཏུཏྟཱ་རེ། །ཏུ་རེ་སྭཱ་ཧཱ་དགོད་པར་བྱ། །སྒྲོལ་མའི་རྣམ་པ་རྫོགས་ནས་ནི། །བུམ་པའི་དབུས་སུ་མཆོད་པར་བྱ། །གཤིན་རྗེ་གཤེད་སོགས་གཞན་རྣམས་

ལ། །གཅིག་ལ་ལས་ནི་ཐམས་ཅད་པ། །ཨོཾ་ན་མཿས་མནྟ་ཀཱ་ཡ་བཱཀྩིཏྟ་བཛྲཱཎཱཾ། ན་མོ་བཛྲ་ཀྲོ་དྷཱ་ཡ། མ་ཧཱ་དཾཥྚྲོ་ཏ་ཀ་ཊ་བྷཻ་ར་ཝཱ་ཡ། ཨ་སི་མུ་ས་ལ། །བ་ར་ཤུ་པཱ་ཤ་ཧསྟཱ་ཡ། །ཨོྃ་ཨ་མྲྀ་ཏ་ཀུཎྜ་ལི། ཁ་ཁ་ཁཱ་ཧི་ཁཱ་ཧི། ཏིཥྠ་ཏིཥྠ། བནྡྷ་བནྡྷ། ཧ་ན་ཧ་ན། ད་ཧ་ད་ཧ།
གརྫྫ་གརྫྫ། བི་སྥོ་ཊ་ཡ་བི་སྥོ་ཊ་ཡ། སརྦ་བིགྷྣཱཾ་བི་ནཱ་ཡ་ཀཱན། མ་ཧཱ་ག་ཎ་པ་ཏི། །ཛཱི་བི་ཏ་ཨནྟ་ཀ་རཱ་ཡ་ཧཱུྃ་ཕཊ་སྭཱ་ཧཱ། སྔགས་འདི་ལན་བདུན་བར་དུ་ནི། །ལས་ནི་ཐམས་ཅད་པ་ཡིན་ཏེ། །སྙིང་པོའི་སྔགས་ནི་བཟླས་བྱས་ལ། །རིགས་ཀྱི་དབང་ཕྱུག་མཆོད་པར་བྱ། །ཡི་
གེ་བརྒྱ་པའི་སྔགས་ཀྱིས་ནི། །ལན་བདུན་བར་དུ་བསྒོམ་པར་བྱ། །བརྒྱ་དང་རྩ་བརྒྱད་རིམ་པ་ཡིས། །ཡི་གེ་གསུམ་ཡང་བཟླས་པ་ནི། །དེ་ནས་རང་ལྷའི་རྣལ་འབྱོར་གྱིས། །མཆོད་ཡོན་སྣོད་དུ་མཆོད་པར་བྱ། །དེ་ནས་དུ་གུ་ལ་རས་ནི། །ག་པུར་ཨ་ག་རུས་བདུགས་པ། །བཀབ་
ནས་རང་རང་སྔགས་དང་ནི། །དེ་ལ་རིམ་བཞིན་ལྷག་གནས་བྱ། །ཞལ་གསུམ་ཕྱག་དྲུག་རྣམ་པ་ཅན། །སྤྲིན་བྲལ་ནམ་མཁའ་ལྟ་བུའོ། །དེ་ལྟ་བུ་ཡི་སྐུ་མདོག་ཕྱག །རང་སྣང་བ་ཡི་སྐུ་ལ་འཁྱུད། །ཨཱ་ལི་ཀཱ་ལི་ལས་བྱུང་བ། །སྣ་ཚོགས་པདྨའི་གདན་ལ་བཞུགས། །
གཞལ་ཡས་ཁང་དབུས་ཉམས་དགའ་བའི། །འོག་མིན་ཞིང་ཁམས་ན་བཞུགས་པའི། །དཀྱིལ་འཁོར་འཁོར་དང་བཅས་པར་ནི། །སངས་རྒྱས་ལྔ་ཡི་ཅོད་པན་ཅན། །བསྒོམས་ནས་དེ་ལས་འོད་ཟེར་སྤྲོ། །ཁ་དོག་ལྔ་དང་ལྕགས་ཀྱུ་ཡི། །དེ་ཡི་སྤྱན་དྲངས་
སློབ་དཔོན་གྱིས། །སྔགས་བརྗོད་ནས་ནི་སྤྱན་དྲང་བྱ། །ཨེ་ཧྱེ་ཧི་དང་བྷ་ག་བཱ་ན། །ས་མ་ཡ་མ་ནུ་སྨྲ་ར། །ཏིཥྛ་གཉིས་དང་ས་མ་ཡ། །དེ་ལ་ཨ་ནུ་སྨ་ར་གཉིས། །སྐུ་གསུང་ཐུགས་ཀྱི་རྡོ་རྗེ་དང་། །སྭཱ་ཧཱའི་མཐའ་ཅན་ལན་གསུམ་བརྗོད། །འཇམ་པའི་རྡོ་རྗེ་
སྤྱན་དྲང་བྱ། །དཀྱིལ་འཁོར་བ་དང་ཡང་དག་ལྡན། །དཀྱིལ་འཁོར་དབུས་སུ་སྤྱན་དྲང་བ། །རང་གི་གདན་གྱི་དབྱེ་བ་ལ། །བཞུགས་ཤིང་ཡང་དག་མཆོད་པར་བྱ། །རང་རང་སྔགས་དང་རིམ་ཇི་བཞིན། །ལྷ་ཡི་མེ་ཏོག་སོགས་ཀྱིས་མཆོད། །འཁོར་ལོ་

མཆོག་ནི་མཆོད་པར་བྱ། །བདག་མིང་འདི་ཞེས་བགྱི་བ་འདིར། །ཆོས་ཀྱི་དབྱིངས་ཀྱི་རང་བཞིན་གྲོང་། །ཡོ་བྱད་ཅི་འབྱོར་པ་ཡིས་ནི། །དཀྱིལ་འཁོར་མཆོད་པ་བགྱི་བར་འཚལ། །ཐུགས་ཀྱིས་བརྩེ་བར་ཉེར་དགོངས་ཏེ། །མགོན་པོས་མཆོད་པ་འདི་བཞེས་ཤིག །
ཨོྃ་སརྦ་ཏ་ཐཱ་ག་ཏཱ་ནཱཾ། །བཱུ་ཛོ་པ་སྦྲཱ་ན་ཡཱ་ཨཱཏྨ་ནཾ་ནི་རྱཱ་ཏ་ཡཱ་མི། བླ་མས་ཡི་གེ་གསུམ་ནི་བརྗོད། །ལྷ་ཡི་རྣམ་པར་བྱས་ནས་ནི། །དེ་རྗེས་བདག་ལ་མཆོད་པར་བྱ། །ཨོྃ་སརྦ་ཏ་ཐཱ་ག་ཏ། །པཱུ་ཛཱ་བཛྲ་སྭ་བྷཱ་བ། །ཨཱཏྨ་ཀོ྅་ཧཾ་ཞེས་ནི་བརྗོད། །རང་ལྷའི་ང་རྒྱལ་བྱས་ནས་
ནི། །ཇི་ལྟར་བསྐྱེད་པའི་ཡུལ་རྣམས་དང་། །གནོད་བྱེད་ཁ་ན་མ་ཐོ་མེད། །ཞེ་སྡང་ཆེན་པོའི་རིགས་ལས་བྱུང་། །དཀྱིལ་འཁོར་དབང་ཕྱུག་མཆོད་བྱ་ཞིང་། །དེ་ནས་ལྷ་རྣམས་ལྷག་གནས་བྱ། །ཡིད་འཕྲོག་སྣ་ཚོགས་ལྷ་ཡི་གོས། །ག་པུར་ཨ་ཀ་རུ་ཡིས་བདུག །
སྔགས་ཀྱིས་དག་བྱས་དགབ་པར་བྱ། །ཨོྃ་དང་ཏིཥྛ་བཛྲ་ཧོཿ། །བརྗོད་ནས་དཀྱིལ་འཁོར་ལྷག་གནས་བྱའོ། །ཨོྃ་དང་སྥ་ར་བཛྲ་ཧོཿ། །བློ་དང་ལྡན་པས་སྔགས་འདི་བརྗོད། །མེ་ཏོག་སྤར་བས་གཏོར་ནས་ནི། །ལྷག་གནས་དེར་ནི་གཤེགས་པར་བྱ། །རྣམ་པ་
ཀུན་དང་ཡང་དག་ལྡན། །དཀྱིལ་འཁོར་མཆོག་ནི་མཐོང་བར་བྱ། །རིགས་ལྔའི་རང་བཞིན་བཟང་པོ་ཡིས། །བཅོམ་ལྡན་གཟུགས་བརྙན་བསྒོམས་ནས་ནི། །མེ་ལོང་སོགས་ལ་ཁྲུས་བྱ་ཞིང་། །དེ་བཞིན་རྫས་དང་འོ་མ་སོགས། །ཇི་ལྟར་བལྟམས་པ་ཙམ་གྱིས་
ཀྱང་། །དེ་བཞིན་གཤེགས་ཀུན་ཁྲུས་གསོལ་བ། །དེ་བཞིན་བདག་གི་སྐུ་ཁྲུས་གསོལ། །ཅོད་པན་དབང་ཕྱུག་རྡོ་རྗེ་སེམས། །དབུས་སུ་ཡི་གེ་གསུམ་དང་སྤེལ། །སྭཱ་ཧཱའི་མཐའ་ཅན་བརྗོད་པར་བྱ། །ལས་ཀྱི་དེ་ཉིད་ཆོ་ག་ཤེས། །དེ་རྗེས་སྦྱར་བའི་གཏོར་མ་བྱ། །ཨོྃ་
སརྦ་ཨཱ་བ་ར་ཎ། །ཤུདྡྷ་སརྦ་པཱ་པཾ་དང་། །བི་ཤུདྡྷ་བཛྲ་ཧཱུྃ་ཕཊ། །སྭཱ་ཧཱའི་མཐའ་ཅན་སྔགས་བརྗོད་བྱ། །པདྨ་བསྐོར་བའི་ཕྱག་རྒྱ་དང་། །ཡུངས་ཀར་དཀར་པོ་བསྲེགས་བྱས་ནས། །ཉོན་མོངས་པ་ནི་སེལ་བར་བྱེད། །འཁྱུད་ཅིང་བསྐོར་བས་དོར་བར་བྱ། །དེ་ནས་ཆོ་ག་

བཞིན་ལེགས་མཆོད། །སིལ་སྙན་གླུ་ལ་སོགས་པ་དང་། །བཅོམ་ལྡན་འདས་ལ་དབུལ་བར་བྱ། །རང་རང་སྔགས་དང་གོ་རིམས་བཞིན། །ཨོྃ་སརྦ་ཏ་ཐཱ་ག་ཏ། །བུཥྤ་པཱུ་ཛཱ་མེ་གྷ་དང་། །ས་མུ་དྲ་དང་སྥ་ར་ཎ། །ས་མ་ཡ་དང་ཤྲི་ཡེ་ཨཱཿ། །ཧཱུྃ་གི་སྔགས་ནི་རྗེས་སུ་བརྗོད། །
རྫས་རྣམས་ཀུན་ལ་རང་མིང་ནི། །གཟུགས་ལ་སོགས་པ་སྔ་མ་བཞིན། །ཆོ་ག་བཞིན་དུ་ཡང་དག་བརྗོད། །རྡོ་རྗེ་སེམས་དཔའ་ལེགས་བསྒྱིངས་པ། །རྡོ་རྗེ་སློབ་དཔོན་ཆོ་ག་ཤེས། །སྔགས་འདི་ཡིས་ནི་རབ་གནས་བྱ། །ཨོྃ་དང་སུ་པྲ་ཏིཥྛ་དང་། །བཛྲ་སྭཱ་ཧཱའི་མཐའ་ཅན་བཟླས། །
ཡི་གེ་གསུམ་གྱི་སྙིང་པོ་ནི། །སྐུ་གསུང་ཐུགས་ལ་བཀོད་ནས་ནི། །མེ་ཏོག་ཆར་ནི་དབབ་པར་བྱ། །སློབ་དཔོན་སློབ་མའི་ཚོགས་དང་བཅས། །གླུ་ཡིས་ཡང་དག་བསྐུལ་ནས་ནི། །སད་པ་ན་ནི་ཕྱག་ཀྱང་བྱས། །ལས་ཀུན་བདག་ཉིད་རྣལ་འབྱོར་བདག །གཏོར་མ་དོན་ཀུན་
གྲུབ་པར་བྱེད། །ལས་ལ་བྱང་ཞིང་མཁས་པ་དང་། །ཆོ་ག་བཞིན་དུ་བསྒྱིངས་བཅས་དང་། །ཆང་དང་སྣ་ཚོགས་ཤ་དང་ནི། །དེ་བཞིན་ལ་དུ་འོ་མ་དང་། །འབྲས་ཆན་ཕྱེ་ཡི་ཁུར་བ་དང་། །སྲན་ཁུར་བྱེ་བ་མང་པོ་དང་། །མཆོད་ཡོན་མེ་ཏོག་སོགས་ཀྱིས་མཆོད། །སྣོད་
བཅུ་ཆུ་ཡིས་གང་བ་ལའོ། །གསུངས་པའི་ཁྲོ་བོ་བཅུ་སྔགས་ཀྱིས། །སྔ་མ་བཞིན་དུ་ཆོ་ག་ཡིས། །དེ་དབུས་འབྱུང་པོ་ཀུན་ལ་ནི། །ངོ་མཚར་ཆེན་པོའི་གཏོར་མ་སྦྱིན། །སྔ་མ་བཞིན་དུ་ཆོ་ག་ཡིས། །ཏིལ་བསྲེགས་བཟའ་བས་ཁྱད་པར་དུ། །བློ་དང་ལྡན་པས་སྔགས་བཟླས་བྱ། །
འདི་ནི་དོན་ཀུན་སྒྲུབ་བྱེད་པ། །ཨོྃ་བྲཧྨ་དེ་བ་ཏཱ་སརྦ། ཨིནྡྲ་ད་ཤ་ལོ་ཀ་རཀྵ་ཀ། ནཱ་ག་གན་དྡརྦྦ་ཀུཾ་བྷཱཎྜ། ཡཀྵ་བྷཱུ་ཏ་ག་ཎཱཿ། ཏ་ཐཱ་བྲེ་ཏ་ཨུཏྒ་ཏ། པི་ཤཱ་ཙི་ཨ་པ་སྨཱ་ར། ཌཱ་ཀི་ནཱི་གྲ་ཧ། །བིགྷྣཱཾ་མཱ་ཏྲྀ་ག་ཎཱ། སརྦྦ་ཏ་ཐཱ་ག་ཏ་ཨག་ནི་མ་ར་གྲ་ཧཱ། །ཨོྃ་ཛོ་བྷཀྵ་མ་ཧཱ་ཏེ་ཛ། མ་ནུ་ཥྱ་ནཱ་མ། བི་ཧིཾ་
ས་ཀ། །མུ་དྲཱ་མནྟྲ་ཨ་དྷི་དྷོ་བྷྱཿཙ། གྲ་ཧཱ་ནཀྵ་ཏྲ་མ་ནུ་ཥྱ། ཨི་མཾ་བ་ལིཾ། པྲ་གྲྀ་ཧྣནྟུ། སིདྡྷི་མྨེ་པྲ་ཡཙྪནྟུ་མེ་སན་དྷ། ས་ཏྱ་མ་ནེ་ཥུ་ཀར་མེ་ཥུ། སཏ་ས་ཧ་ཡ་བྷ་བན་ཏུ་ཙེ། དྷཱ་ན་དྷཱ་ན། སུ་པར་ནཉྩ། དྷ་ཌཱནྟུ་མ་མ་ཏོ་ཥི་ཏ། ཨི་ཏི་ཨུ་པཱ་ཏྲཱ་ཎ་ཏྲོ་ཥ་ཎི་སཏྭཱ་ཏ་ནཱ་མ་ནཱ་ཤ་ཡནྟུ་ཙེ། ཐོག་མར་ཨོྃ་

དང་ཨཱཿཧཱུྃ་ཕཊ། །སྭཱ་ཧཱའི་མཐའ་ཅན་ལས་ཀུན་བྱེད། །དེ་ལྟར་སྔགས་འདི་སྣོད་ལ་བཟླས། །རྡོ་རྗེ་སེམས་དཔའ་རྣམ་པར་རོལ། །སློབ་མ་ལྷག་པར་གནས་པར་བྱ། །མཚན་ཉིད་ཡོན་ཏན་གྱིས་བརྒྱན་པ། །ཙནྡན་ག་པུར་གླ་རྩི་ཡི། །ཆུ་ཡིས་ཀྱང་ནི་ཁྲུས་
བྱས་ཏེ། །དད་པའི་ཆུ་ནི་འཆང་བ་ཡིས། །སེམས་ཀྱི་དྲི་མ་རྣམ་པར་འཁྲུད། །བདོག་བ་ཐམས་ཅད་གཏོང་བར་བྱེད། །གོས་གཙང་བ་ནི་མཆོག་ཏུ་བགོ། །ཁང་པ་བརྩེགས་མ་བྱས་ནས་ནི། །རས་ཀྱི་ཡོལ་བ་ཀུན་ནས་བྲེ། །ཡི་གེ་གསུམ་དང་ཡང་དག་ལྡན། །རྡོ་
རྗེ་ཅན་གྱིས་སྔགས་ཆུ་ནི། །ལན་བདུན་གདོང་ལ་གཏོར་བ་ཡིས། །ལས་སྐྱེས་དྲི་མ་སྦྱོང་བར་བྱེད། །དེ་ནས་ས་ཡི་སྙིང་པོ་སོགས། །མིག་ལ་སོགས་ལ་རྣམ་པར་དགོད། །སོར་མོ་དབུ་མ་གཉིས་ཀྱིས་ནི། །དབང་པོ་སོ་སོ་ལ་རེག་པས། །སྔགས་བརྗོད་བྱ་ཞིང་བྱིན་
གྱིས་བརླབ། །ལུས་ཀྱི་དཀྱིལ་འཁོར་རྣལ་འབྱོར་གྱིས། །ཨོྃ་དང་ཙཀྵུ་ཙཀྵུཿདང་། །ས་མནྟ་དང་ཅཀྵུཿབཟླས། །མཻ་ཏྲི་སཏྭ་ལོ་ཙ་ནེ། །སརྦ་ཨརྠ་སཱ་དྷ་ནི། །སྭཱ་ཧཱའི་མཐའ་དང་སྔགས་འདི་བརྗོད། །མཐེ་བོ་གུང་མོ་ཡང་དག་སྦྱར། །ཞབས་བསིལ་ཆུ་དང་མཉེས་ནས་
ནི། །སྔགས་དེ་ལན་གསུམ་བཟླས་པར་བྱ། །སློབ་མའི་མིག་ལ་སོ་སོར་ནི། །མཐེ་བོའི་ཕྱག་རྒྱས་རེག་པར་བྱ། །ཁྲུ་གང་བ་ལ་སོར་བཞི་པའི། །སྐུད་པ་ཞགས་པ་འདྲ་པ་ལ། །ཡི་གེ་བརྒྱ་པའི་སྔགས་ལན་གསུམ། །བཟླས་ནས་ཞབས་བསིལ་ཆུས་བསང་བྱ། །
སྐུད་པ་ལན་གསུམ་དཀྲིས་པ་ནི། །རྡོ་རྗེ་གསུམ་ནི་མདུད་པར་ལྡན། །དཔུང་བ་གཡོན་པར་བཅིངས་པ་ནི། །སྔགས་འདི་ལན་གསུམ་བརྗོད་པར་བྱ། །ཨོྃ་དང་ལོ་ཙ་ནེ་ཡི་སྒྲ། །ཡ་ཏ་ཏྭད་ཏཾ་སཾ་པྲ་ཏཾ། །མི་བྷ་བི་ཤུདྡཱི་ཡི་སྒྲ། །རྃ་དང་རཏྣ་ཏྲ་ཡཱ་ཡ། །སིདྡྷི་ན་ནི་ད་ད་ཤ། །
ཡ་སྭཱ་ཧཱ་ཡི་སྔགས་འདི་ནི། །ཐེག་པ་བླ་མེད་ལན་བདུན་བཟླས། །སློབ་མ་ལ་ནི་མེ་ཏོག་གཏོར། །དེ་ནས་རྡོ་རྗེ་འཆང་གིས་ནི། །སོར་ནི་བཅུ་གཉིས་གཞལ་བ་ཡི། །ཟུར་ནི་གསུམ་དུ་ཡོངས་སུ་བྱ། །ཡི་གེ་གསུམ་གྱིས་བྱིན་བརླབ་བསྒོམ། །སློབ་མའི་ལག་ཏུ་གཏད་

པར་བྱ། །ཨོྃ་དང་པྲ་ཏི་བཛྲ་དང་། །ས་མནྟ་དང་ཨི་ཤྭ་རི། །ཨཱཿཧཱུྃ་སྭཱ་ཧཱའི་མཐའ་ཅན་སྔགས། །བཟླས་ནས་སློབ་མས་དོར་བར་བྱ། །སར་འབབ་པ་ཡི་ཕུར་བུ་སྟེ། །ཕྱོགས་ནི་གང་དུ་ལྟ་བ་ཉིད། །སློབ་དཔོན་དང་ནི་སློབ་མ་ཡིས། །དེ་ཡི་ཕྱོགས་བལྟས་ཉལ་བར་བྱ། །
ནམ་ལངས་ཡང་དག་བླ་མ་ལ། །ཇི་ལྟར་མཐོང་བའི་དོན་ཀུན་ཞུ། །དེ་ལ་དམིགས་ནས་སྦྱིན་སྲེག་ནི། །ཞི་བ་ལ་སོགས་རབ་དབྱེ་བས། །ལས་ནི་ཐམས་ཅད་པ་ཉིད་དམ། །བགེགས་ཞི་བ་ཡི་དོན་དུ་བྱ། །རྡོ་རྗེ་སེམས་དཔའ་བསྒྱིངས་བཅས་པས། །རྣལ་འབྱོར་ཇི་བཞིན་
ཆོ་ག་བཞིན། །སྔར་བཞིན་འདིར་ཡང་གཏོར་མ་ནི། །བགེགས་རྣམས་ཞི་ཕྱིར་སྦྱིན་པར་བྱ། །དེ་ནས་གསོལ་འདེབས་སློབ་མ་ནི། །རྡོ་རྗེ་སློབ་དཔོན་ཐུགས་རྗེས་ཁྱབ། །ཐལ་མོ་སྦྱར་བར་བྱས་ནས་ནི། །མདུན་དུ་འདུག་ནས་ཕྱག་བྱས་ཏེ། །དགའ་ཆེན་ཁྱོད་བདག་སྟོན་པ་
བས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་སྩལ་དུ་གསོལ། །སྡོམ་པ་རྣམས་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་འཇུག་པར་
འཚལ། །དེ་ནས་བླ་མས་དེ་ལ་ཡང་། །བྱ་དང་མི་བྱ་གསུངས་པ་ནི། །སེམས་ཅན་ལས་ཀྱི་སྲད་བུས་གདབ། །རྡུལ་ཚོན་བཀྱེ་བའི་རིམ་པ་དགྱེ། །འགྲོ་བ་འདི་དག་དཀྱིལ་འཁོར་ཏེ། །རང་བཞིན་དག་པ་གཉིས་མེད་པའོ། །ཐོག་མར་དཀྱིལ་འཁོར་རྣལ་འབྱོར་བདག །རྡོ་རྗེ་
སློབ་དཔོན་རང་ཉིད་བསྒོམ། །སློབ་མ་བདག་ཉིད་འདྲར་དམིགས་ནས། །དེ་འོག་ཐམས་ཅད་རབ་བསྒྲུབ་བྱ། །བླ་མ་བཟང་ལ་དབང་བསྐུར་ཕྱིར། །སློབ་མས་དེ་རྗེས་གསོལ་བ་གདབ། །འདི་ནས་འཁོར་བའི་རྒྱ་མཚོ་ལ། །ཉོན་མོངས་ཆུ་སྲིན་ན་ཀྲས་ཁྱབ། །ལས་ཀྱི་རླུང་གིས་
དབའ་ཀློང་འཁྲུགས། །བདག་བྱིན་ཐུགས་རྗེའི་རྒྱ་མཚོ་ཀྱེ། །མི་ཤེས་ལིང་ཏོག་གིས་བསྒྲིབས་མིག །ཉོན་མོངས་དབང་དུ་བྱ་བ་ནི། །བདེ་བ་སྡུག་བསྔལ་འཇིགས་ལས་སྐྱོབ། །ཐུགས་རྗེའི་རྒྱ་མཚོས་བདག་སྐྱབས་མཛོད། །དེ་འདྲ་ཚིག་གསན་རྡོ་རྗེ་ཅན། །ཐུགས་རྗེའི་

ཐུགས་ནི་ཡོངས་སུ་གང་། །སློབ་མ་ལ་ནི་ཡོངས་སུ་གསུངས། །བུ་ཁྱོད་དུས་འདི་ནས་བཟུང་སྟེ། །རྡོ་རྗེ་ཐེག་པའི་གཞུང་ལུགས་བསྟན། །རྣལ་འབྱོར་མཆོག་ནི་ཁྱོད་ཀྱིས་ཟུང་། །རྡོ་རྗེ་སེམས་དཔའི་སྤྱོད་པའི་གནས། །བུ་ཁྱོད་འདི་ནི་བདུད་རྩི་སྟེ། །སྲུངས་
ཤིག་མ་སྲུང་ན་ནི་སྲེག །བསྲུངས་ན་དངོས་གྲུབ་ཀུན་འགྲུབ་འགྱུར། །ཉོན་མོངས་ཐམས་ཅད་སེལ་བའི་ཀླུང་། །ཨོྃ་དང་པཉྩ་ཨ་མྲྀ་ཏ། །ཨུ་ད་ཀ་དང་ཨཱཿཧཱུྃ་ཋ། །སློབ་མས་བདུད་རྩི་ལྔ་བཏུང་བྱ། །རྡོ་རྗེ་ཡེ་ཤེས་རྨད་བྱུང་བའོ། །གསང་བ་དྲན་ན་སྐྱོན་འགྱུར་ཕྱིར། །
རྡོ་རྗེ་སློབ་མ་ལ་ནི་དབབ། །དྲི་ཆེན་དྲི་ཆུ་ལ་སོགས་པ། །མཚལ་ཆེན་འབབ་པའི་བུ་མོའི་གོས། །ཁྲག་དང་ཁུ་བས་ཡང་དག་བསྒོས། །གུ་གུལ་དང་ནི་རྣམ་པར་བསྲེས། །ཡི་དགས་མེ་ནི་བླངས་ནས་སུ། །པདྨའི་སྣོད་དུ་བཞག་ནས་ནི། །དེར་ནི་ཐམས་ཅད་གཞུག་པར་བྱ། །ཁྲོ་བོ་རྡོ་རྗེ་
གསུམ་བདག་ཉིད། །གཡས་བརྐྱང་བ་ཡི་གནས་པས་གནས། །རྡོ་རྗེ་འཆང་དབང་སློབ་མ་ལ། །རྨད་བྱུང་ཆེན་པོའི་བདུག་པས་བདུགས། །འབབ་པར་འགྱུར་བར་ཐེ་ཚོམ་མེད། །ཨོྃ་ཏིཥྛ་མ་ཧཱ་ཀྲོ་དྷ། །དེ་བཞིན་ཨཱ་བེ་ཤ་ཡ་ཧཱུྃ། །རྣལ་འབྱོར་པ་ཡིས་སྔགས་འདི་བརྗོད། །
སློབ་མ་ལ་ནི་གསལ་བར་དབབ། །བཛྲ་ས་ཏྭ་ཧི་མ་ཧེ། །བིདྱ་རཱ་ཛ་ཡ་བིདྱ་མ་ཧེ། །དེ་ལྟར་སྔགས་ནི་འདི་ཡིས་ཀྱང་། །སླར་ཡང་སློབ་མ་དབང་བསྐུར་ནས། །རང་བཞིན་གྱིས་དག་རང་གི་ལུས། །དཀྱིལ་འཁོར་མཆོག་འདི་མཐོང་བ་ན། །དེ་བཞིན་གཤེགས་དང་ལྷ་མོ་དང་། །རྒྱལ་
བའི་སྲས་ཀྱི་ཡང་དག་གཞི། །ཁྲོ་བོ་ཁྱབ་པའི་གསང་བའི་མཆོག །རྡོ་རྗེ་སེམས་དཔའ་རྟེན་དང་ནི། །ཕྱི་དང་ནང་གི་དཀྱིལ་འཁོར་ནི། །གཉིས་པོ་དེ་ལ་བསྟན་པར་བྱ། །སླར་ཡང་སློབ་མས་གསོལ་བ་གདབ། །བདག་ལ་དབང་བསྐུར་མཛད་དུ་གསོལ། །རྣམ་རྒྱལ་བུམ་པ་
བླངས་ནས་ནི། །པདྨའི་སྣོད་ནི་བཟང་པོ་ལ། །དེ་ཡི་དབུས་སུ་བློ་བཟང་པོ། །ཧཱུྃ་རྡོར་ལས་བྱུང་མི་བསྐྱོད་བསྒོམ། །རང་ཉིད་ཡེ་ཤེས་ས་བོན་གྱི། །འོད་ཟེར་ཡང་དག་བསྐུལ་བས་བྱུང་། །སླར་ཡང་ཡེ་ཤེས་སེམས་དཔའ་བསྒོམ། །མི་བསྐྱོད་པ་ཡི་རྣམ་པ་མཆོག །

མི་བསྐྱོད་ངོ་བོ་དེ་ཉིད་ཀྱིས། །རྣམ་པར་ཤེས་པའི་ཕུང་པོ་བསྒོམ། །སློབ་མའི་མགོ་བོར་ལག་པ་བཞག །རྡོ་རྗེ་སློབ་དཔོན་ཐུགས་རྗེས་ཁྱབ། །ཨོྃ་དང་མ་ཧཱ་ས་ཏྭ་དང་། །དེ་བཞིན་ཨཱི་ཤྭ་ར་ཏཾ་དང་། །ཨ་བྷིཥཱི་ཉྩ་མི་སྭཱ་ཧཱ། །ཨོྃ་སརྦ་ཏ་ཐཱ་ག་ཏ། །ཨ་བྷི་ཥེ་ཀ་ས་མ་ཡ། །ཤྲི་ཡེ་
ཨཱཿཧཱུྃ་དེ་ནས་བཟླ། །ཆུ་ཡི་གཏིང་ནས་སློབ་མ་ལ། །དབུ་རྒྱན་དབང་བསྐུར་དོན་དུ་ནི། །ཅོད་པན་འཇིག་རྟེན་གསུམ་རྒྱལ་པོ། །སེམས་ཅན་ཀུན་གྱི་དོན་སྒྲུབ་པ། །སྙིང་རྗེས་ཁྱབ་པ་ངས་བྱིན་གྱིས། །རྡོ་རྗེ་སེམས་དཔའི་ཡོན་ཏན་གནས། །ས་བོན་ཏྲྃ་ལས་བྱུང་བ་ཡི། །རིན་ཆེན་
འབྱུང་ལྡན་བསྒོམས་ནས་ནི། །རི་མོ་དར་སོགས་ཅོད་པན་ཡང་། །སློབ་མའི་མགོ་ལ་སྦྱིན་པར་བྱ། །ཨོྃ་སརྦ་ཏ་ཐཱ་ག་ཏ། །རཏྣ་མུ་ཀུ་ཊ་སྒྲ་དང་། །དེ་བཞིན་སྒྲ་དང་པཱུ་ཛ་ཡ། །ཨ་ཏིཥྛ་དང་ཨཱཿཧཱུྃ་དང་། །སྔགས་འདི་དག་ནི་བརྗོད་ནས་ནི། །མེ་ཏོག་མགོ་ལ་སྦྱིན་པར་བྱ། །སློབ་
མ་རྡོ་རྗེ་དབང་བསྐུར་ཕྱིར། །སླར་ཡང་བླ་མ་ལ་གསོལ་གདབ། །ཡེ་ཤེས་ལྔ་ཡི་རང་བཞིན་དངོས། །རྡོ་རྗེ་བརྟུལ་ཞུགས་ངས་བྱིན་གྱིས། །གང་གིས་མ་རིག་སྒོ་ང་འབྱེད། །ཡེ་ཤེས་ཐོབ་འགྱུར་ང་ཡིས་བྱས། །ཧྲཱིཿལས་པདྨ་རྫོགས་པར་ནི། །འོད་དཔག་མེད་དུ་རྣམ་པར་
བསྒོམ། །རྡོ་རྗེ་ལག་པ་གཡས་པར་སྦྱིན། །སློབ་མ་ལ་ནི་འདི་སྐད་བརྗོད། །ངས་ཁྱོད་དེ་རིང་དབང་བསྐུར་བྱ། །འདི་དེ་སངས་རྒྱས་ཐམས་ཅད་དེ། །ཀུན་དུ་བཟང་པོའི་བརྟུལ་ཞུགས་བརྟན། །དངོས་གྲུབ་བཟང་ཕྱིར་རྡོ་རྗེ་ཡོང་། །ཁྃ་ལས་བྱུང་བའི་རལ་གྲིའམ། །དོན་ཡོད་གྲུབ་
པའི་རང་ངོ་བོ། །རྫོགས་པར་ལག་པ་གཡོན་པར་ནི། །སློབ་མ་བསྒྱིངས་པའི་ཕྱག་རྒྱ་འཛིན། །འདི་ནི་སངས་རྒྱས་ཐམས་ཅད་ཀྱི། །དྲིལ་བུ་སྒྲ་ཡི་རྗེས་འགྲོར་བརྗོད། །ཁྱོད་ཀྱིས་ཀྱང་ནི་རྟག་ཏུ་བཅང་། །བྱང་ཆུབ་མཆོག་ནི་རྒྱལ་བའི་གཞི། །རྡོ་རྗེ་དྲིལ་བུ་བཟུང་རྗེས་ལ། །རྡོ་རྗེ་
སེམས་དཔའ་རང་ངོ་བོ། །རང་བཞིན་ཡོན་ཏན་རྣམས་ཀྱིས་གང་། །བདག་པོ་ཡི་ནི་རྣལ་འབྱོར་འགྱུར། །རྣམ་པར་སྣང་མཛད་རང་ངོ་བོ། །སློབ་མའི་མགོ་ལ་ལག་བཞག་སྟེ། །རྡོ་རྗེ་ཅན་གྱིས་མིང་དབང་བསྐུར། །གཟུགས་ཀྱི་ཕུང་པོ་རྣམ་པར་བསྒོམ། །ཨོྃ་སརྦ་ཏ་

ཐཱ་ག་ཏ། །ཆེ་གེ་མོ་ཞེས་བཛྲ་ས་ཏྭཾ། །ཨ་བྷི་ཥཱིཉྩ་མི་སྭཱ་ཧཱ། །ཕུང་པོ་ལྔ་ཡི་རྣམ་དག་པས། །ཐོག་མར་ཆུ་ནས་མིང་གི་མཐར། །དབང་བསྐུར་བ་ནི་མཆོག་ཏུ་ཤེས། །རྨད་བྱུང་ཆེན་པོ་བཤད་པར་བྱ། །སངས་རྒྱས་ལྔ་ནི་དག་པ་འདི། །དབང་བསྐུར་ལྔ་ནི་ཐོབ་
བར་འགྱུར། །མ་རིག་པ་ནི་བསལ་ནས་ནི། །ཡེ་ཤེས་ལྔ་ནི་ཐོབ་པར་འགྱུར། །དེ་ནས་རྡོ་རྗེ་སེམས་དཔའ་ཡི། །སློབ་མ་འདོད་དོན་སྔགས་དབང་སྦྱིན། །སྔགས་ཀྱི་དབང་བསྐུར་ཡེ་ཤེས་མཆོག །ངས་བྱིན་དངོས་གྲུབ་སྟེར་བར་བྱེད། །དེ་ནས་ཡི་གེ་དྲུག་སྔགས་ཕཊ། །
སྭཱ་ཧཱའི་མཐའ་ཅན་ཡི་གེ་གསུམ། །ཁ་ནི་དམ་ཚིག་གིས་བཀང་ནས། །སྔགས་ཀྱི་སྐུ་ཡིས་དག་པ་དང་། །བླ་མའི་ཞལ་ལས་ཡང་དག་བརྗོད། །བླ་མས་དངོས་གྲུབ་སྦྱིན་བྱའི་ཕྱིར། །འདི་ནི་སངས་རྒྱས་ཐམས་ཅད་ཀྱི། །སྙིང་པོ་ཡི་ནི་ཡེ་ཤེས་མཆོག །སངས་རྒྱས་ཐམས་ཅད་
བསྡུས་པ་ནི། །ཁྱོད་ཀྱིས་ཀྱང་ནི་རྟག་ཏུ་བཅང་། །དེ་ནས་སློབ་མ་སྤྱོད་བརྟུལ་ཞུགས། །སྣ་ཚོགས་བསམ་པའི་བྱེ་བྲག་གིས། །གང་གི་སྤྱོད་པ་རྣམ་དག་པ། །འདོད་ལ་ཐུགས་རྗེའི་གཙོ་བོ་ཡིས། །སེམས་ཅན་དོན་ནི་བྱེད་པའི་ཐབས། །ང་ཡིས་སྤྱོད་པའི་བརྟུལ་ཞུགས་སྦྱིན། །དེ་
ནས་གླེགས་བམ་དུང་ལ་སོགས། །མདའ་གཞུ་རལ་གྲི་འཁོར་ལོ་དང་། །སྔོན་བཞིན་སྔགས་ཀྱིས་དག་པར་བྱེད། །སློབ་མའི་ལག་ཏུ་རིམ་བཞིན་སྦྱིན། །འདི་ནི་ཀུན་བཟང་སྤྱོད་བརྟུལ་ཞུགས། །བསམ་པ་སྣ་ཚོགས་རྣམ་དག་བྱེད། །ཁྱོད་ཀྱིས་ཀྱང་ནི་རྟག་ཏུ་བཅང་། །སེམས་
ཅན་ཀུན་གྱི་དོན་གྱིས་བྱོས། །ཨོཾ་སརྦ་ཏ་ཐཱ་ག་ཏ། །དེ་བཞིན་དྷྲཱི་ཊ་ར་ཏྭྃ་དང་། །དྷ་རྱ་མི་ཨཱཿཧཱུྃ་དང་། །དེ་ལྟར་སྔགས་འདི་དགོད་པར་བྱ། །དེ་ནས་ལུང་བསྟན་ཐོབ་དོན་དུ། །བསམ་པ་དང་བས་བླ་མ་ལ། །ད་ལྟར་སངས་རྒྱས་རིགས་སུ་འཇུག །ཁྱེད་ཀྱིས་བདག་ལ་ལུང་བསྟན་གསོལ། །
དོན་ཡོད་རྡོ་རྗེ་ཞེས་བྱ་ཁྱོད། །རིགས་ཀྱི་དབང་ཕྱུག་ལུང་བསྟན་བྱ། །དེ་ནས་སློབ་མ་དབུགས་དབྱུང་འདོད། །བླ་མའི་ཞལ་སྔ་ནས་ནི་སྐྱེ། །མགོན་པོ་ཡང་དག་བདག་དབུགས་ཕྱུང་། །བྱང་ཆུབ་སྤྱོད་པའི་བརྟུལ་ཞུགས་བརྟན། །དེ་ནས་རྡོ་རྗེ་ཆོས་གོས་མཐའ། །གཡོན་པའི་ལག་

པས་བཟུང་ནས་ནི། །གཡས་པ་མི་འཇིགས་སྦྱིན་བྱས་ལ། །དབུགས་དབྱུང་བ་ཡི་མཆོག་བྱ་བ། །ང་ཡིས་རྡོ་རྗེ་གསུང་བདག་ཁྱོད། །སངས་རྒྱས་ཀུན་གྱི་གོ་འཕང་མཆོག །རྡོ་རྗེ་སེམས་དཔའ་མངོན་པར་བརྗོད། །ཁམས་གསུམ་གྱི་ནི་རྒྱལ་པོ་ཆེ། །དཔལ་ལྡན་ཡོན་ཏན་
འབྱུང་གནས་བདག །བདུད་ཀྱི་སྟོབས་ནི་ཀུན་ལས་རྒྱལ། །གྲོང་ཁྱེར་མཆོག་ཏུ་ཁྱོད་ཞུགས་སོ། །དེ་ནས་སློབ་མ་དོན་འདོད་ལ། །ཕྱིར་མི་ལྡོག་པའི་དབང་བསྐུར་བྱ། །ཕྱིར་མི་ལྡོག་པའི་དབང་བསྐུར་ཆེ། །རྡོ་རྗེ་སེམས་དཔའ་བདག་ལ་སྩོལ། །དེ་ནས་ཡེ་ཤེས་རྡོར་དབང་
ཕྱུག །ཡེ་ཤེས་སེམས་དཔའི་འོད་ཟེར་གྱིས། །སྤྱན་དྲངས་སངས་རྒྱས་ལྔ་ལ་སོགས། །ལྷ་མོའི་འཁོར་ལོ་རིམ་བཞིན་འབྱུང་། །དེ་ཡིས་ཡེ་ཤེས་ཆུས་བཀང་པའི། །བུམ་པ་ཕྱག་བསྣམས་དེ་བཞིན་གཤེགས། །རྡོ་རྗེ་འཛིན་དང་རྒྱལ་བ་རྒྱལ། །རིན་ཆེན་འཛིན་དང་
འཁོར་བ་སྒྲོལ། །ཤེས་རབ་འཆང་ནི་རིམ་པ་བཞིན། །གཏི་མུག་ཞེ་སྡང་འདོད་ཆགས་ལ། །དེ་བཞིན་རྡོ་རྗེ་དགའ་མ་སོགས། །གཤིན་རྗེ་མཐར་བྱེད་ཤེས་མཐར་བྱེད། །པདྨ་མཐར་བྱེད་བགེགས་མཐར་བྱེད། །འདི་ཡིས་ཀུན་ནས་དབང་བསྐུར་བས། །རྡོ་རྗེ་སློབ་མ་རྣམ་པར་
བསམ། །དབང་བསྐུར་བ་ནི་རྡོ་རྗེ་ཆེ། །ཁམས་གསུམ་ཀུན་གྱིས་ཕྱག་བྱས་པ། །གསང་བ་གསུམ་གྱི་གནས་ལས་བྱུང་། །སངས་རྒྱས་ཀུན་ནི་ང་ཡིས་སྦྱིན། །དེ་ནས་དེ་བཞིན་གཤེགས་ལྷ་མོ། །ཁྲོ་བོ་རང་གི་གནས་སུ་དགོད། །འཇམ་དཔལ་རྣམ་པར་བསྒོམས་ནས་ནི། །ཡེ་
ཤེས་རྡོ་རྗེས་རྣམ་པར་བརྒྱན། །ཨོྃ་དང་སུ་པྲ་ཏིཥྛ་དང་། །བཛྲ་སྭཱ་ཧཱ་ཞེས་ནི་དགོད། །བློ་བཟང་གིས་ནི་སྔགས་བརྗོད་ནས། །སློབ་མ་ལ་ནི་མེ་ཏོག་གཏོར། །དེ་ནས་མེ་ཏོག་སོགས་ཀྱིས་མཆོད། །སློབ་མའི་དཀྱིལ་འཁོར་འཁོར་ལོ་འདྲ། །ཐུགས་རྗེས་ཁྱབ་པའི་
བླ་མ་ཡིས། །དེ་ནས་སློབ་མ་རྗེས་གནང་བྱ། །དེ་ཉིད་ཤེས་པའི་རྣལ་འབྱོར་པས། །མི་བྱ་བ་ནི་ཅི་ཡང་མེད། །དཔལ་ཆེན་ཁྱོད་ཀྱིས་བཀའ་དྲིན་གྱིས། །ད་ནི་འདོད་ཡོན་ལྔ་ལ་སྤྱོད། །སྒྱུ་མ་རྨི་ལམ་འདྲར་ཤེས་ནས། །རྟེན་འབྲེལ་ལས་བྱུང་ཆོས་རྣམས་ནི། །

གཟུགས་བརྙན་ལྟ་བུར་ཤེས་ནས་ནི། །སེམས་ཅན་དོན་ནི་མཉམ་མེད་བྱོས། །བྱ་བ་བྱས་པའི་སློབ་མ་ནི། །ཅི་བདེ་བར་ནི་བསྒྲུབ་པར་གྱིས། །དེ་ནས་བླ་མ་ལ་ཡོན་དབུལ། །བསྟོད་ཅིང་ཀུན་ནས་ཕྱག་ཀྱང་བྱ། །སྐྱེ་བོ་བཟང་དང་ལྷན་ཅིག་ཏུ། །དེ་ནས་བླ་མ་གསང་
དོན་གཉེར། །ཐུར་དུ་ཁ་བལྟས་ཁ་སྦྱར་ཏེ། །ཇི་ལྟར་བདག་ཉིད་ཆེན་པོ་ཁྱེད། །བདག་ཀྱང་དེ་དང་འདྲ་བར་མཛོད། །དེ་ནས་རིགས་ལྔ་ལས་བྱུང་བའི། །ལས་དང་ཆོས་སོགས་དབྱེ་བ་ཡིས། །སྔགས་ཀྱི་ཐེག་པས་ལྷག་པར་གྲོལ། །སྐལ་ལྡན་བུད་མེད་ཕྱག་རྒྱར་བཤད། །སྐྱེ་
བོས་དབེན་པའི་མཚན་ཕྱེད་ན། །རོ་ཡི་གཞི་ཡི་གནས་སོང་ནས། །ཐུགས་རྗེ་ཆེན་པོས་ཁྱབ་པ་ཡི། །རྡོ་རྗེ་སློབ་དཔོན་ཡོན་ཏན་འབྱུང་། །ཇི་ལྟར་དེ་ལྟར་རྙེད་ཕྱག་རྒྱ། །སྙོམས་འཇུག་ལ་ནི་གང་བྱུང་བའི། །བླ་ན་མེད་པའི་རང་བཞིན་གྱི། །སངས་རྒྱས་ཐམས་ཅད་འདུས་པ་ནི། །
རྣལ་འབྱོར་མ་ཡི་ཡང་དག་ལྟུང་། །ཀུན་རྫོབ་བྱང་ཆུབ་སེམས་གང་ཡིན། །གསང་བ་དེ་ཡིས་དབང་བསྐུར་བྱ། །འདི་དེ་སངས་རྒྱས་ཐམས་ཅད་ཀྱི། །དམ་ཚིག་ཆེན་པོ་རྣམ་བྱུང་བ། །ཁམས་ལྔ་ལས་བྱུང་བཅུད་ཀྱིས་ལེན། །བདེ་བ་ཆེན་པོས་མྱོང་བར་གྱིས། །སློབ་མ་
རྟོག་པ་དང་བྲལ་བས། །པདྨ་ལ་གནས་དེ་མྱང་གྱིས། །འདས་པའི་རྡོ་རྗེ་འཆང་བ་ཡིས། །རྒྱལ་སྲས་ཇི་ལྟར་དབང་བསྐུར་བ། །བྱང་ཆུབ་སེམས་ཀྱི་ཆུ་ཡིས་ནི། །བུ་ཁྱོད་དེ་བཞིན་དབང་བསྐུར་བྱ། །དེ་ནས་ཤེས་རབ་དབང་བསྐུར་ཕྱིར། །བླ་མས་དོན་འདོད་སློབ་མ་ལ། །དངོས་
གྲུབ་ཐམས་ཅད་བསྡུས་པ་ནི། །བདག་ལ་ཁྱེད་ཀྱིས་དབང་བསྐུར་སྩོལ། །དེ་ནས་སློབ་དཔོན་བདག་ཉིད་ཆེ། །ཕྱག་རྒྱ་ཡང་དག་བྱིན་གྱིས་རློབ། །མཆོག་ནི་ཐོབ་པར་བྱ་བའི་ཕྱིར། །དེ་འོག་སློབ་མ་ལ་ནི་སྦྱིན། །ལྷ་མོ་ཕྱག་རྒྱ་ཆེན་པོ་འདི། །དཔག་མེད་བདེ་བ་རབ་སྟེར་བ། །
བུ་ཡིས་ཀུན་ནས་བླངས་ནས་ནི། །བླ་ན་མེད་པའི་མཆོད་པ་གྱིས། །དེ་ནས་ཤེས་རབ་ཡེ་ཤེས་དེའི། །སྒྲུབ་པོ་མཆོག་ཏུ་འདོད་པའི་དོན། །ལྷ་མོའི་ཡེ་ཤེས་དེ་ཉིད་མཆོག །དངོས་གྲུབ་དོན་དུ་ང་ཡིས་སྦྱིན། །ལྷ་མོས་དེ་ལ་བཀའ་བསྒོ་བ། །དཔའ་བོའི་བུ་ནི་བླ་ན་མེད། །དཔའ་

བོ་ཁྱོད་ནི་སྤྲོའམ་ཅི། །བྱང་ཆུབ་སེམས་ནི་ཟ་ནུས་སམ། །ཡང་དག་དེ་ནི་ངེས་པར་ནི། །ཇི་ལྟར་འདོད་པ་བཞིན་དུ་སྨྲོས། །ཇི་ལྟར་གསུངས་པའི་དམ་ཚིག་མཆོག །ལྷ་མོ་ཅི་ཕྱིར་བདག་མི་ནུས། །དེ་ནས་ལྷ་མོ་དེ་དགྱེས་ནས། །སྐྲ་བཀྲོལ་གོས་ནི་བོར་ནས་ཀྱང་། །པདྨ་དག་ནི་
འབྱེད་བྱེད་ཅིང་། །བྷཉྫ་མོ་ཀྵ་ཧོ་ཞེ