Kinh tạng Tây Tạng (Kangyur Đại Học) — 005_འདུལ་བ།_ཅ

་པ་ན། དགེ་སློང་གི་ལག་ནས་ཕྱམ་ཤོར་བས་ཤིང་མཁན་གྱི་མགོར་ཕོག་ནས་དེ་དུས་ལ་བབ་པ་དང་། དགེ་སློང་དེ་དག་ཚེ་དང་ལྡན་པ་དག་བསོད་སྙོམས་པ་ལས་མེད་པས་ལས་ཕྱུང་བས་བདག་ཅག་ལ་ཕམ་པར་འགྱུར་བའི་ལྟུང་བ་མ་བྱུང་
ངམ་སྙམ་དུ་འགྱོད་པ་སྐྱེས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ལ་ནི་ལྟུང་བ་མེད་དེ། ཡང་དགེ་སློང་དག་གིས་མི་བཟོད་པའི་ཁུར་གདེག་པར་མི་བྱའོ། །རྐྱེན་དེ་ལྟ་བུ་
ཞིག་བྱུང་ན་མདོ་མདོར་ཁྱིམ་པ་དག་འཛིན་དུ་གཞུག་པར་བྱ་ཞིང་གདེག་པ་དག་དང་། གཞག་པ་དག་ཀྱང་བརྗོད་པར་བྱ་སྟེ། མཉམ་དུ་གདེག་པ་དང་། མཉམ་དུ་གཞག་པར་བྱའོ། །དགེ་སློང་དག་མི་བཟོད་པའི་ཁུར་འདེག་པར་བྱེད་ན་འགལ་ཚབས་ཅན་དུ་འགྱུར་
རོ། །བཅོམ་ལྡན་འདས་ཀྱིས་དགེ་སློང་དག་གིས་མི་བཟོད་པའི་ཁུར་གདེག་པར་མི་བྱའོ་ཞེས་བཀའ་སྩལ་ནས། དགེ་སློང་རྣམས་ཀྱིས་ཇི་ཙམ་ནི་བཟོད་པ་ཡིན། ཇི་ཙམ་ནི་མི་བཟོད་པ་ཡིན་པ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་པ་གཅིག་གི་ཁུར་གང་ཡིན་པ་
དེ་དགེ་སློང་གཉིས་ཀྱིས་གདེག་པར་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་ཚེ་དང་ལྡན་པ་འཆར་ཀས་གཏུམ་མོ་བཏུལ་ཏེ་སྐྱབས་སུ་འགྲོ་བ་དང་། བསླབ་པའི་གཞི་དག་ལ་བཀོད་པ་དེའི་
ཚེ་དེས་ཚེ་དང་ལྡན་པ་འཆར་ཀའི་རྐང་པ་གཉིས་ལ་ཕྱག་འཚལ་ནས་ཡོད་བྱད་ཐམས་ཅད་ཀྱིས་བསྟབས་པ་དང་། ཚེ་དང་ལྡན་པ་འཆར་ཀས་དང་དུ་མ་བླངས་ཏེ་སྨྲས་པ། སྲིང་མོ་བཅོམ་ལྡན་འདས་ཀྱི་བསྟན་པ་ནི་གཞན་ལ་ཕན་པས་རྗེས་སུ་འཛིན་པར་ཞུགས་པ་ཡིན་པས་ཁོ་བོས་ཀྱང་གཞན་ལ་

ཕན་པ་བྱ་དགོས་སོ། །གཏུམ་མོས་སྨྲས་པ། འཕགས་པ་གལ་ཏེ་དེ་ལྟ་ལགས་ཏེ་དང་དུ་མི་བཞེད་ན། བདག་གིས་འཕགས་པའི་སླད་དུ་དྲང་སྲོང་གི་གདན་བཤམ་པར་བགྱིས། ཁྱོད་ཀྱིས་བསོད་སྙོམས་བརྒྱུས་ནས་དྲང་སྲོང་གི་གདན་ལ་ལོངས་སྤྱད་དེ་གཤེགས་པར་རིགས་སོ། །
ཚེ་དང་ལྡན་པ་འཆར་ཀས་སྨྲས་པ། སྲིང་མོ་དེ་བཞིན་བྱའོ་ཞེས་ཚེ་དང་ལྡན་པ་འཆར་ཀ་ཉི་མ་རེ་རེ་ཞིང་བསོད་སྙོམས་བརྒྱུས་ནས་གཏུམ་མོའི་ཁྱིམ་དུ་དྲང་སྲོང་གི་སྟན་ལ་ལོངས་སྤྱད་དེ་འགྲོའོ། །ཇི་ཙམ་དུས་གཞན་ཞིག་ན་ཚེ་དང་ལྡན་པ་འཆར་ཀ་ལ་ལྗོངས་སུ་བྱ་བ་ཞིག་བྱུང་ནས་ཚེ་དང་ལྡན་
པ་འཆར་ཀས་བསམས་པ། བདག་ཇེ་སོང་ལ་སྲིང་མོ་བལྟ་བར་བྱའོ་སྙམ་ནས། ཚེ་དང་ལྡན་པ་འཆར་ཀ་གཏུམ་མོའི་གན་དུ་སོང་སྟེ་སྨྲས་པ། སྲིང་མོ་ཁོ་བོ་ལྗོངས་རྒྱུར་འགྲོ་ཡིས། ཁྱོད་ཀྱིས་ཆོས་ཀྱི་ལུས་ལ་བག་གྱིས་ཤིག །གཏུམ་མོས་སྨྲས་པ། འཕགས་པ་མྱུར་དུ་སླར་གཤེགས་
པའི་རིགས་ཏེ། དེར་བཞུགས་པར་མི་མཛད་ཅིང་དེར་དགྱེས་པ་མི་བསྐྱེད་དུ་གསོལ། ཚེ་དང་ལྡན་པ་འཆར་ཀས་གཏུམ་མོ་བལྟས་ཏེ་ལྗོངས་རྒྱུར་འཕགས་པ་དང་། ཚེ་དང་ལྡན་པ་ཀུན་དགའ་བོས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་བཅོམ་ལྡན་འདས་ལྗོངས་རྒྱུར་གཤེགས་
ཀྱིས། ཁྱེད་ཅག་ལས་གང་བཅོམ་ལྡན་འདས་དང་ཐབས་ཅིག་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་ཀྱི་ལས་གྱིས་ཤིག །ཚེ་དང་ལྡན་པ་འཆར་ཀས་ཐོས་ནས་བསམས་པ། སངས་རྒྱས་ཀྱི་རྒྱུ་བ་ལ་ནི་ཕན་ཡོན་བཅྭ་བརྒྱད་ཡོད་དེ། རྒྱལ་པོའི་འཇིགས་པ་མེད་པ་དང་། ཆོམ་རྐུན་གྱི་
འཇིགས་པ་མེད་པ་དང་། མེའི་འཇིགས་པ་མེད་པ་དང་། མིའི་འཇིགས་པ་མེད་པ་དང་། མི་མ་ཡིན་པའི་འཇིགས་པ་མེད་པ་དང་། ཀླུའི་འཇིགས་པ་མེད་པ་དང་། གདུག་པའི་འཇིགས་པ་མེད་པ་དང་། སེང་གེའི་འཇིགས་པ་མེད་པ་དང་། སྟག་གི་འཇིགས་པ་མེད་པ་དང་། གུང་གི་
འཇིགས་པ་མེད་པ་དང་། ཕ་རོལ་གྱི་དམག་ཚོགས་ཀྱི་འཇིགས་པ་མེད་པ་དང་། སྤྱང་ཀིའི་འཇིགས་པ་མེད་པ་དང་། ཤོ་གམ་གྱི་འཇིགས་པ་མེད་པ་དང་། ལ་གཅན་གྱི་འཇིགས་པ་མེད་པ་དང་། གྲུ་བཙས་ཀྱི་འཇིགས་པ་མེད་པ་དང་། དུས་དང་དུས་སུ་ལྷའི་གཟུགས་དག་མཐོང་ཞིང་ལྷའི་སྒྲ་དག་

ཐོས་ལ་ཀུན་ཤེས་པ་བརྡ་སྤྲོད་པ་དག་ཐོས་པ་དང་། ཆོས་ཀྱི་ལོངས་སྤྱོད་དང་། ཟང་ཟིང་གི་ལོངས་སྤྱོད་ཡོད་པ་དང་། སངས་རྒྱས་ཀྱི་རྒྱུ་བ་ལ་གནོད་པ་ཉུང་བ་ཡིན་གྱིས། བདག་ཀྱང་བཅོམ་ལྡན་འདས་དང་ཐབས་ཅིག་ལྗོངས་རྒྱུར་འགྲོས་ཕྱིར་ལྡོག་པར་བྱའོ་སྙམ་ནས།
ཚེ་དང་ལྡན་པ་འཆར་ཀ་ཕྱིར་ལོག་གོ། །དེའི་བར་སྐབས་སུ་གཏུམ་མོའི་ཁྱིམ་དུ་བུ་མོ་ཞིག་ལ་ཁྱེའུ་ཞིག་བཙས་ནས་གཏུམ་མོས་ཁྱེའུ་དེའི་མ་ལ་སྨྲས་པ། བུ་མོ་ཁྱེའུ་འདི་ཁྲུས་གྱིས་ལ་གོས་དཀར་པོས་དཀྲིས་ཏེ་དྲང་སྲོང་གི་སྟན་འདི་ལ་སྙོལ་ཅིག་དང་ཡུན་རིང་དུ་འཚོ་བར་འགྱུར་ཞིང་ཚེ་རིང་དུ་སྐྱོང་བར་འགྱུར་
རོ། །བུ་མོ་དེས་ཁྱེའུ་དེ་ཁྲུས་བྱས་ཏེ་གོས་དཀར་པོས་དཀྲིས་ནས་དྲང་སྲོང་གི་སྟན་དེ་ལ་རྟག་ཏུ་བསྙལ་ལོ། །ཚེ་དང་ལྡན་པ་འཆར་ཀ་ཡང་ཉི་མ་གཞན་ཞིག་ན་བསོད་སྙོམས་ལ་ཞུགས་ནས་གཏུམ་མོའི་ཁྱིམ་ག་ལ་བ་དེར་སོང་ངོ་། །དགྲ་བཅོམ་པ་དག་ནི་མ་བསམས་པར་ཤེས་པ་
དང་མཐོང་བ་མི་འཇུག་པས། ཚེ་དང་ལྡན་པ་འཆར་ཀ་དེ་བཞིན་དུ་དྲང་སྲོང་གི་སྟན་དེ་ལ་འདུག་པ་དང་། བུད་མེད་ཀྱི་ཡུལ་དེ་བརྟད་པ་དང་བཅས་ཤིང་འཕགས་པ་ཁྱེའུ་འཕགས་པ་ཁྱེའུ་ཞེས་ཟེར་ནས་ཚེ་དང་ལྡན་པ་འཆར་ཀ་མྱུར་དུ་ལངས་ཏེ་བལྟས་ན་ཁྱེའུ་དུས་ལ་བབ་པ་མཐོང་ངོ་། །ཁྱིམ་
མི་དག་གིས་ཆོ་ངེས་གདབ་པར་བརྩམས་པ་དང་། ཚེ་དང་ལྡན་པ་འཆར་ཀས་སྨྲས་པ། སྲིང་མོ་མ་ངུ་ཤིག །སེམས་ཅན་འདིས་ཚེ་ཐུང་བར་འགྱུར་བའི་ལས་བྱས་ཏེ། བཅོམ་ལྡན་འདས་ཀྱིས་ཀྱང་འདུ་བྱེད་ཐམས་ཅད་ནི་མི་རྟག་གོ། །ཞེས་གསུངས་སོ། །དེ་ལྟ་མོད་ཀྱི་
འདི་ལ་ཁོ་བོས་ངུད་མོས་གདབ་པར་བྱ་བ་ཡིན་ཏེ། འདི་ལྟར་ཁོ་བོས་དགྲ་བཅོམ་པ་ཉིད་ཐོབ་ཀྱང་ཁོ་བོ་ལས་བརྟེན་ཏེ་བཅོམ་ལྡན་འདས་ཀྱིས་འདུལ་བ་ལ། ཉན་ཐོས་རྣམས་ཀྱིས་བསླབ་པའི་གཞི་འཆའ་བར་འགྱུར་རོ། །དེས་སྐབས་དེ་དགེ་སློང་རྣམས་ལ་བརྗོད་ནས། དགེ་སློང་རྣམས་
ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་འཆར་ཀ་ལ་ནི་ལྟུང་བ་མེད་དེ། ཡང་དགེ་སློང་གིས་ཁྱིམ་གཞན་དུ་སྟན་ལ་མ་བརྟགས་པར་འདུག་པར་མི་བྱའོ། །འདུག་ན་འགལ་ཚབས་ཅན་དུ་འགྱུར་རོ། །སངས་རྒྱས་

བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཕྱུག་པ། ནོར་མང་བ། ལོངས་སྤྱོད་ཆེ་བ། ཕན་ཚུན་གཏམ་འདྲེས་པ། ཕེབས་པར་སྨྲ་བ། འགྲོགས་བཤེས། སྨོས་འདྲིན་གཉིས་ཤིག་འཁོད་དོ། །
ཇི་ཙམ་དུས་གཞན་ཞིག་ན་དེ་གཉིས་ནོར་ཟད་པ་དང་། ལོངས་སྤྱོད་ཟད་པར་གྱུར་ནས་དེ་གཉིས་ཀྱིས་གྲོས་བྱ་བར་བརྩམས་པ། བདག་ཅག་གཉིས་འདི་ཉིད་དུ་མཐོས་པ་དང་དམས་པར་གྱུར་པས་རྣམ་པ་འདི་ལྟ་བུའི་འཚོ་བ་ཟ་ཞིང་ལོངས་སྤྱོད་པས་ཅི་བྱ། རབ་ཏུ་འབྱུང་དུ་འདོང་ངོ་
ཞེས་དེ་གཉིས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ངོ་། །དེ་ན་གཅིག་ན་བར་གྱུར་ནས་ཅིག་ཤོས་དེའི་ནད་གཡོག་བྱེད་དོ། །ནད་པ་དེ་ཉམ་དམས་ཤིང་སོས་པར་མ་གྱུར་ནས། ནད་གཡོག་དེས་ནད་པ་ལ་སྨྲས་པ། ཚེ་དང་ལྡན་པ་ཁྱོད་ལ་སྔོན་ཁྱིམ་པའི་ཚེ་
ན་ལན་འགའ་ནད་འདི་ལྟ་བུ་བྱུང་ངམ། སྔོན་ཡང་བྱུང་ངོ་། །འོ་ན་ཇི་ཞིག་གིས་ཞི་བར་གྱུར། ལན་ཚྭའི་སྨན་རྩབས་ཀྱིས་སོ། །འོ་ན་ད་ཅིའི་ཕྱིར་ལན་ཚྭའི་སྨན་རྩབས་མི་འཐུང་ཞེས་ནད་གཡོག་དེས་ལན་ཚྭའི་སྨན་རྩབས་བསླངས་ཏེ་ནད་པ་ལ་བླུད་པ་དང་། ནད་པ་དེས་དུས་ཀྱི་ཆོས་
དང་ལྡན་པར་གྱུར་ནས་དགེ་སློང་དེ་བདག་གིས་འདི་ལ་སྨན་མ་ཡིན་པ་བྱིན་པར་མ་གྱུར་ཏམ་སྙམ་དུ་འགྱོད་པ་སྐྱེས་ནས། དེས་སྐབས་དེ་དགེ་སློང་རྣམས་ལ་བརྗོད་ནས། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་
དག་དགེ་སློང་དེ་ལ་ནི་ལྟུང་བ་མེད་དེ། ཡང་དགེ་སློང་གིས་སྨན་པ་ལ་མ་དྲིས་པར་རང་གི་བློས་ནད་པ་ལ་སྨན་སྦྱིན་པར་མི་བྱའོ། །གལ་ཏེ་སྨན་པ་མེད་ན་སྨན་པ་རབ་ཏུ་བྱུང་བ་ལ་དྲི་བར་བྱའོ་སྨན་པ་རབ་ཏུ་བྱུང་བ་མེད་ན་སྨན་པས་བཀོལ་བ་ལ་དྲི་བར་བྱའོ། །སྨན་པས་བཀོལ་བ་མེད་ན་
ནད་ཀྱིས་ཐེབས་པ་ལ་དྲི་བར་བྱའོ། །ནད་ཀྱིས་ཐེབས་པ་མེད་ན་དགེ་སློང་རྒན་པ་རྒན་པ་དག་ལ་དྲི་བར་བྱའོ། །དགེ་སློང་གིས་སྨན་པ་ལ་མ་དྲིས་སམ། ཇི་སྐད་བསྟན་པའི་རིམ་པ་བཞིན་མ་བྱས་པར་རང་གི་བློས་ནད་པ་ལ་སྨན་སྦྱིན་ན་འགལ་ཚབས་ཅན་དུ་འགྱུར་རོ། །དགེ་སློང་

རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ། སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་དགེ་སློང་དེ་ལ་སྨན་གང་ལགས་པ་དེ་ཉིད་སྨན་མ་ལགས་པ་ཉིད་དུ་གྱུར་པའི་རྒྱུ་ནི་གང་ལགས། རྐྱེན་ནི་གང་ལགས། བཅོམ་ལྡན་འདས་ཀྱིས་
བཀའ་སྩལ་པ། དེ་སྔོན་ཁྱིམ་པའི་ཚེ་ན་རླུང་དང་བད་ཀན་ཅན་དུ་གྱུར་ལ། ད་ལྟར་ནི་རླུང་དང་མཁྲིས་པ་ཅན་དུ་གྱུར་པས་དེས་ན་དེ་ལ་སྨན་གང་ཡིན་པ་དེ་ཉིད་སྨན་མ་ཡིན་པ་ཉིད་དུ་གྱུར་ཏོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་
ཀུན་དགའ་ར་བ་ན་བཞུགས་སོ། །གང་གི་ཚེ་བཅོམ་ལྡན་འདས་ཀྱིས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལྷ་བརྒྱད་ཁྲི་དང་མ་ག་དྷཱར་བྱུང་བའི་བྲམ་ཟེ་དང་ཁྱིམ་བདག་བརྒྱ་སྟོང་ཕྲག་དུ་མ་དང་ལྷན་ཅིག་བདེན་པ་དག་ལ་བཀོད་པ་དེའི་ཚེ་ན་མ་ག་དྷཱར་བྱུང་
བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་རྒྱལ་པོའི་ཁབ་ཏུ་འདི་སྐད་ཅེས་རྒྱལ་པོའི་ཁབ་ན་འཁོད་པ་དང་། ཕོ་བྲང་འཁོར་བ་དང་། ཡུལ་ཐ་དད་པ་ནས་ལྷགས་པའི་ཚོང་པའི་ཚོགས་ཤེས་ལྡན་དག་ཉོན་ཅིག །ངའི་ཡུལ་དུ་གང་གིས་ཀྱང་ཆོམ་རྐུན་མི་བྱའོ། །གང་ངའི་
ཡུལ་དུ་ཆོམ་རྐུན་བྱེད་པ་དེ་ངས་ཡུལ་མེད་པར་བྱའོ། །བཅོམ་པ་རྣམས་ཀྱི་རྐུན་རྫས་ནི་ངའི་མཛོད་དང་བང་བ་ནས་སྦྱིན་ནོ་ཞེས་དྲིལ་གྱི་སྒྲ་བསྒྲགས་པ་བྱས་སོ། །གང་གི་ཚེ་བཅོམ་ལྡན་འདས་ཀྱིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གཞོན་ནུའི་དཔེའི་མདོ་སྡེས་བཏུལ་བ་དེའི་ཚེ་ན་
ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་ཀྱང་མཉན་ཡོད་དུ་འདི་སྐད་ཅེས་མཉན་ཡོད་ན་འཁོད་པ་དང་། ཕོ་བྲང་འཁོར་བ་དང་། ཡུལ་ཐ་དད་པ་ནས་ལྷགས་པའི་ཚོང་པའི་ཚོགས་ཤེས་ལྡན་དག་ཉོན་ཅིག །ངའི་ཡུལ་དུ་གང་གིས་ཀྱང་ཆོམ་རྐུན་མི་བྱའོ། །གང་ངའི་ཡུལ་དུ་ཆོམ་རྐུན་བྱེད་
པ་དེ་ངས་བསད་པའི་གྱོད་ལ་བསྒྲིན་པར་བྱའོ། །བཅོམ་པ་རྣམས་ཀྱི་རྐུན་རྫས་ནི་ངའི་མཛོད་དང་བང་བ་ནས་སྦྱིན་ནོ་ཞེས་དྲིལ་གྱི་སྒྲ་བསྒྲགས་པ་བྱས་སོ། །དེའི་བར་སྐབས་ན་ཆོམ་རྐུན་པ་གང་དག་ཡུལ་མ་ག་དྷཱ་ན་གནས་པ་དག་དང་། ཆོམ་རྐུན་པ་གང་དག་ཡུལ་ཀོ་ས་ལ་ན་གནས་

པ་དེ་དག་ས་མཚམས་ཀྱི་བར་དུ་དོང་སྟེ་འཁོད་དོ། །ཐམས་ཅད་དུ་ཆོམ་རྐུན་པ་གང་དག་ཡུལ་མ་ག་དྷཱ་ན་གནས་པ་དག་དང་། ཆོམ་རྐུན་པ་གང་དག་ཡུལ་ཀོ་ས་ལ་ན་གནས་པ་དེ་དག་ས་མཚམས་ཀྱི་བར་དུ་དོང་སྟེ་འཁོད་ཅིང་དོན་མཐུན་འཇོམས་པར་བྱེད་དོ་ཞེས་བྱ་བའི་སྒྲ་དེ་ལྟ་བུས་ཀྱང་
ཁྱབ་པར་གྱུར་ཏོ། །དེ་ཐོས་ནས་ཡུལ་མ་ག་དྷཱ་ནས་དོན་མཐུན་བསེལ་བ་དང་བཅས་པས་ཡུལ་ཀོ་ས་ལར་འགྲོ་བར་བརྩམས་ཤིང་ཡུལ་ཀོ་ས་ལ་ནས་ཀྱང་དོན་མཐུན་བསེལ་བ་དང་བཅས་པས་ཡུལ་མ་ག་དྷཱར་འགྲོ་བར་བརྩམས་སོ། །ཇི་ཙམ་དུས་གཞན་ཞིག་ན་ཡུལ་མ་ག་དྷཱ་ནས་དོན་
མཐུན་བསལ་བ་དང་བཅས་པ་ཡུལ་ཀོ་ས་ལར་འཕགས་ནས་དེ་གང་གི་ཚེ་ས་མཚམས་ཀྱི་བར་ལས་འདས་ཏེ་ཡུལ་ཀོ་ས་ལར་ཞུགས་པ་དེའི་ཚེ་ན་དེད་དཔོན་གྱིས་སྨྲས་པ། ཤེས་ལྡན་དག་ཀོ་ས་ལར་བྱུང་བའི་རྒྱལ་པོ་གསལ་རྒྱལ་འདི་ནི་གཏུམ་པ། རྟུན་ངས་པ་དྲལ་ཤུལ་ཆེ་བ། དཔའ་བ།
རྩལ་ཆེ་བ་ཞེས་གྲགས་པས། གལ་ཏེ་དོན་མཐུན་ཆོམ་རྐུན་པས་བཅོམ་པར་གྱུར་ན་ཡང་དེས་བདག་ཅག་ལ་རྐུན་རྫས་སྦྱིན་པར་ནུས་ཀྱིས་བསེལ་བ་ཕྱིར་ཐོང་ཤིག །དོན་མཐུན་དག་གིས་སྨྲས་པ། དེད་དཔོན་གལ་ཏེ་དེ་ལྟ་ན་དེ་ལྟ་བགྱིའོ་ཞེས་དེ་དག་གིས་བསེལ་བ་ཕྱིར་བཏང་ངོ་། །
ཆོམ་རྐུན་པ་དེ་དག་གིས་བྱ་མ་རྟ་བཞག་སྟེ་འཁོད་པ་དང་། བྱ་མ་རྟ་དག་གིས་བསེལ་བ་ཕྱིར་བཏང་བ་དེ་མཐོང་ནས་དེ་དག་གིས་སྨྲས་པ། ཤེས་ལྡན་དག་བསེལ་བ་ཕྱིར་ལོག་གིས་དོན་མཐུན་གཞོམ་པར་བྱས་འདོང་ངོ་། །ཞེས་དེ་དག་གིས་དོན་མཐུན་སཱ་ལའི་དགོན་པར་
ཞུགས་པ་བཅོམ་མོ། །དེ་ན་ཚོང་པ་ཁ་ཅིག་ནི་བསད། ཁ་ཅིག་ནི་བྱེར་རོ། །དེ་ན་གང་དག་བྱེར་བ་དེ་དག་མགོ་ས་རྡུལ་གྱིས་བཀང་སྟེ། ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་དྲུང་དུ་དོང་ནས་སྨྲས་པ། ལྷ་བདག་ཅག་ཚོང་པ་རྣམས་ཁྱོད་ཀྱི་ཡུལ་དུ་ཚོང་པར་མི་རུང་བར་རྣམ་
པར་བཀོད་དོ། །ཅི་ཞིག་བྱས། ལྷ་བདག་ཅག་ཆོམ་རྐུན་པ་དག་གིས་བཅོམ་མོ། །རྒྱལ་པོས་དམག་དཔོན་འཕགས་སྐྱེས་པོ་ལ་བསྒོ་བ། གཞོན་ནུ་སོང་ལ་ཆོམ་རྐུན་པ་དག་དང་རྐུན་རྫས་དག་མྱུར་དུ་ཁུག་ཅིག །དམག་དཔོན་འཕགས་སྐྱེས་པོས་ལྷ་བཀའ་

བཞིན་འཚལ་ཞེས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལས་མཉན་ནས་དཔུང་གི་ཚོགས་ཡན་ལག་བཞི་པ་གླང་པོ་ཆེ་བའི་ཚོགས་དང་། རྟ་པའི་ཚོགས་དང་། ཤིང་རྟ་པའི་ཚོགས་དང་། དཔུང་བུ་ཆུང་གི་ཚོགས་གོ་བསྐོན་ཏེ་མྱུར་བ་མྱུར་བར་སཱ་ལའི་དགོན་པར་སོང་
ངོ་། །དེའི་བར་སྐབས་ན་ཆོམ་རྐུན་པ་དག་སཱ་ལའི་དགོན་པ་ཤིན་ཏུ་སྟུག་པོའི་ནང་ན་ཞུགས་ནས་བག་ཕབ་སྟེ་རྐུན་རྫས་བགེད་པར་བྱེད་དོ། །འཕགས་སྐྱེས་པོས་ཀྱང་དེ་དག་གི་སྟེང་དུ་བརྫིས་ནས་དེ་ན་ཆོམ་རྐུན་པ་ཁ་ཅིག་ནི་བསད། ཁ་ཅིག་ནི་བྱེར། ཆོམ་རྐུན་པ་དྲུག་བཅུ་ནི་གསོན་པོར་
བཟུང་ངོ་། །དེ་ནས་གཡུལ་ལས་རྣམ་པར་རྒྱལ་ཞིང་ཆོམ་རྐུན་པ་དང་རྐུན་རྫས་ཁྱེར་ཏེ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་དྲུང་དུ་སོང་ནས་རྐང་པ་གཉིས་ལ་ཕྱག་འཚལ་ཏེ་སྨྲས་པ། ལྷ་ཆོམ་རྐུན་པ་ནི་འདི་དག་ལགས། རྐུན་རྫས་ནི་འདི་དག་ལགས་སོ། །རྒྱལ་པོས་ཆོམ་རྐུན་
པ་དག་ལ་སྨྲས་པ། ཤེས་ལྡན་དག་ངས་འདི་སྐད་ཅེས་ངའི་ཡུལ་དུ་གང་གིས་ཀྱང་ཆོམ་རྐུན་མི་བྱའོ། །གང་ངའི་ཡུལ་དུ་ཆོམ་རྐུན་བྱེད་པ་དེ་ངས་བསད་པའི་གྱོད་ལ་བསྒྲིན་པར་བྱའོ། །བཅོམ་པ་རྣམས་ཀྱི་རྐུན་རྫས་ནི་ངའི་མཛོད་དང་བང་བ་ནས་སྦྱིན་ནོ་ཞེས་དྲིལ་གྱི་སྒྲ་བསྒྲགས་པ་
བྱས་པ་དེ་ཁྱེད་ཀྱིས་མ་ཐོས་སམ། ལྷ་ཐོས་སོ། །འོ་ན་ཁྱེད་ཀྱིས་ཅིའི་ཕྱིར་ཚོང་པ་འདི་དག་བཅོམ། ལྷ་བདག་ཅག་འཚོ་བ་མ་མཆིས་སོ། །གལ་ཏེ་དེ་ལྟ་ན་ཡང་ཅིའི་ཕྱིར་གཞན་བསད་པར་གྱུར། ལྷ་འཇིགས་པ་བསྟན་པའི་སླད་དུའོ། །ངས་ཀྱང་ཁྱེད་ལ་སྔོན་སུས་ཀྱང་མ་
བསྟན་པ་དེ་ལྟ་བུའི་འཇིགས་པ་བསྟན་པར་བྱའོ། །རྒྱལ་པོ་དེ་གཏུམ་པས་དེས་བློན་པོ་རྣམས་ལ་བསྒོ་བ། ཤེས་ལྡན་དག་དེང་ལ་ཆོས་རྐུན་པ་འདི་དག་བསད་སར་ཁྲིད་ལ། ལག་པ་དང་། རྐང་པ་ཆོད་ཅིག །ཚོང་པ་འདི་དག་གི་ཅི་ཕྲོགས་པ་ངའི་བང་བ་དང་མཛོད་
ནས་བྱིན་ཅིག །བློན་པོ་དེ་དག་གིས་ཆོམ་རྐུན་པ་དེ་དག་དུར་ཁྲོད་དུ་ཁྲིད་དེ་ལག་པ་དང་རྐང་པ་བཅད་ནས་ཚོང་པ་རྣམས་ལ་རྐུན་རྫས་རྒྱལ་པོའི་བང་བ་དང་མཛོད་ནས་བྱིན་ནོ། །བཅོམ་ལྡན་འདས་ཀྱིས་དགེ་སློང་དག་བདག་གི་རྒུད་པ་དང་། གཞན་གྱི་རྒུད་པ་ལ་ཡང་དང་ཡང་དུ་

སོ་སོར་རྟོགས་ཤིག །བདག་གི་འབྱོར་པ་དང་། གཞན་གྱི་འབྱོར་པ་ལ་ཡང་དང་ཡང་དུ་སོ་སོར་རྟོགས་ཤིག །དེ་ཅིའི་ཕྱིར་ཞེ་ན། དགེ་སློང་དག་བདག་དང་གཞན་གྱི་རྒུད་པ་ནི་ཡིད་འབྱུང་བའི་གནས་ཡིན་ལ། བདག་དང་གཞན་གྱི་འབྱོར་པ་ཡང་ཡིད་འབྱུང་བའི་གནས་ཡིན་
པའི་ཕྱིར་རོ། །ཞེས་བཀའ་སྩལ་ནས། དགེ་སློང་དག་ལངས་ཤིང་ལངས་ཤིང་དུར་ཁྲོད་རྒྱུར་འགྲོ་བར་བརྩམས་སོ། །དགེ་སློང་མ་དག་ཀྱང་ལངས་ཤིང་ལངས་ཤིང་དུར་ཁྲོད་རྒྱུར་འགྲོ་བར་བརྩམས་སོ། །དེའི་ཚེ་ན་རབ་ཏུ་མང་པོ་དག་དུར་ཁྲོད་རྒྱུར་དོང་ཞིང་དེ་དང་དེ་དག་གིས་ཆོམ་རྐུན་པ་དག་
ལ་ངེས་པར་བརྟགས་པར་བརྩམས་སོ། །མི་གཞན་ཞིག་ཀྱང་དེ་དག་ཉིད་ལ་རྟོག་ཅིང་འདུག་པ་དེས་སྨྲས་པ། གལ་ཏེ་དོན་འདོད་པ་འགའ་ཞིག་གིས་འདི་དག་ལ་ལན་ཚྭའི་སྨན་རྩབས་བླུད་པར་གྱུར་ན། དེས་ན་འདི་དག་འདི་ནས་ཤི་འཕོས་ན་མ་གཞོན་ནུ་དག་གི་ནུ་ཞོ་འཐུང་བར་འགྱུར་རོ། །
དགེ་སློང་མ་དེ་དག་གི་ནང་ན་དགེ་སློང་མ་སྐྱོང་མ་ཞེས་བྱ་བ་སྦོམ་མོ། གླེན་མ། མི་གསལ་བ་ཞིག་འདུག་པ་དེས་དེ་ཐོས་ནས་དེས་བསམས་པ། གལ་ཏེ་བདག་བསོད་ནམས་ཀྱི་ཕུང་པོ་དེ་ལྟ་བུ་ལས་ཡོངས་སུ་ཉམས་པར་གྱུར་ན། བདག་གིས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་
བྱུང་ནས་ཅི་ཞིག་རྙེད་ཀྱིས་བདག་སོང་ལ་ལན་ཚྭའི་སྨན་རྩབས་བསླངས་ཏེ་འདི་དག་ལ་བླུད་པར་བྱའོ་སྙམ་ནས། དགེ་སློང་མ་སྐྱོང་མ་དེ་དགེ་སློང་མ་རྣམས་ཀྱི་ནང་ནས་ཕྱིར་བྱུང་སྟེ། གནས་སུ་སོང་ནས་དེ་ནས་ལན་ཚྭའི་སྨན་རྩབས་ཀྱི་ཕྲུ་བ་དང་། ཁམ་ཕོར་དྲུག་བཅུ་བསླངས་ཏེ།
ཆོམ་རྐུན་པ་དག་གི་དྲུང་དུ་སོང་བ་དང་། ཆོམ་རྐུན་པ་དེ་དག་སྡུག་བསྔལ་གྱི་ཚོར་བ་དག་གིས་ཉེན་ཅིང་སྲོག་ལ་མི་ལྟོས་པ་སྐོམ་པས་གདུངས་པ་དག་གིས་བསམས་པ། ཀྱེ་མ་འཕགས་མ་འདིས་བདག་ཅག་སྐོམ་གྱིས་གདུངས་པ་རྣམས་ལ་བུམ་པ་དེ་ནས་སྐོམ་བླུད་ན་ཅི་མ་རུང་སྙམ་མོ། །སྐྱོང་
མས་བསོད་ནམས་ཀྱི་འདུ་ཤེས་ཀྱིས་རེ་རེ་ལ་ཁམ་ཕོར་བྱིན་ཏེ་ལན་ཚྭའི་སྨན་རྩབས་བྲིམས་པ་དང་། གང་གིས་འཐུངས་པ་དེ་དུས་ལ་བབ་སྟེ་དེ་བཞིན་དུ་ཐམས་ཅད་དུས་ལ་བབ་བོ། །སྐྱོང་མ་ཆོམ་རྐུན་པ་དེ་དག་ལ་ལན་ཚྭའི་སྨན་རྩབས་འདྲིམ་པར་བྱེད་པ་ན་ནམ་སྲོས་པར་གྱུར་ནས་དགེ་

སློང་མའི་དབྱར་ཁང་སྒོ་བཅད་པ་ན་སྐྱོང་མ་འོངས་ནས་དེས་དལ་བུས་ཁད་ཀྱིས་ཁད་ཀྱིས་སྒོ་གཏན་བརྡུངས་པ་དང་། དགེ་སློང་མ་རྣམས་ཀྱིས་སྨྲས་པ། སྒོ་གཏན་རྡུང་བར་བྱེད་པ་འདི་སུ། སྐྱོང་མས་སྨྲས་པ། བདག་སྐྱོང་མའོ། །ཁྱོད་ནམ་སྲོས་ནས་ག་ལས་འོངས། ཕུ་
ནུ་མོ་དག་རྗེས་སུ་ཡི་རང་བར་གྱིས་ཤིག །རྗེས་སུ་ཡི་རང་བར་གྱིས་ཤིག །ཅི་ཁྱོད་ཀྱིས་དགྲ་བཅོམ་པ་ཉིད་མངོན་དུ་བྱས་སམ། འོན་ཏེ་ཕྱིར་མི་འོང་བའི་འབྲས་བུ་འམ། ལན་གཅིག་ཕྱིར་འོང་བའི་འབྲས་བུའམ། རྒྱུན་དུ་ཞུགས་པའི་འབྲས་བུ་མངོན་དུ་བྱས་སམ། འོན་ཏེ་དགེ་འདུན་གྱི་
གཙུག་ལག་ཁང་བྱེད་དུ་བཅུག །ཕུ་ནུ་མོ་དག་མ་ཡིན་ནོ། །འོ་ན་འབྲས་ཆན་ནམ། སྐྱོ་མ་འམ། ཐུག་པའི་བཏུང་བ་འམ། རས་ཡུག་ཆེན་སྦྱོར་དུ་བཅུག་གམ། སྐྱོང་མས་སྨྲས་པ། ཕུ་ནུ་མོ་དག་ཅི་ཁྱེད་ཅག་འབྲས་ཆན་དང་། སྐྱོ་མ་དང་། ཐུག་པའི་བཏུང་བ་དང་། རས་
ཡུག་ཆེན་སྦྱོར་དུ་གཞུག་པ་བཙལ་བ་ལས་ལས་གཞན་མེད་དམ། འོ་ན་གཞན་ཅི་བྱས། ཁྱེད་ཅག་གིས་ཆོམ་རྐུན་པ་དྲུག་བཅུ་པོ་ལག་པ་དང་། རྐང་པ་བཅད་པ་དེ་དག་མཐོང་ངམ། མཐོང་ངོ་། །བདག་གིས་ལན་ཚྭའི་སྨན་རྩབས་བསླངས་ཏེ་དེ་དག་འཐུང་དུ་བཅུག་ནས་
འཐུངས་པ་དང་། དེ་དག་དུས་ལ་བབ་པས་མ་གཞོན་ནུ་དག་གི་ནུ་ཞོ་འཐུང་དུ་བཅུག་གོ། །སྐལ་ཆད་མ་ཁྱོད་ལྟོ་ཕམ་པར་འགྱུར་བ་དག་གིས་བཀང་བ་ལ་ངེད་ཅག་རྗེས་སུ་ཡི་རང་བ་བྱེད་དུ་འཇུད་དམ། དེ་བདག་ལ་ཡང་དག་པར་ཕམ་པར་འགྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་
སྐྱེས་ནས་དེས་སྐབས་དེ་དགེ་སློང་རྣམས་ལ་བརྗོད་ནས་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་མ་དེ་ལ་འདུ་ཤེས་ཀྱང་ཡོད། སེམས་པ་ཡང་ཡོད་པས་ཕས་ཕམ་པར་གྱུར་ཏོ། །དེ་ལྟ་བས་ན་དགེ་སློང་
ངམ། དགེ་སློང་མས་ནད་པ་ལ་ཇི་ནས་ཀྱང་ནད་པ་དུས་བྱེད་པར་གྱུར་ཅིག་སྙམ་པ་དེ་ལྟ་བུའི་སེམས་ཀྱིས་སྨན་སྦྱིན་པར་མི་བྱ་བར་འདི་ལྟར་ཅི་ནས་ཀྱང་ནད་པ་ནད་སོས་པར་གྱུར་ཅིག་སྙམ་པ་དེ་ལྟ་བུའི་སེམས་ཀྱིས་སྨན་སྦྱིན་པར་བྱའོ། །དགེ་སློང་གིས་ནད་པ་ལ་ཅི་ནས་ཀྱང་ནད་པ་དུས་བྱེད་པར་གྱུར་

ཅིག་སྙམ་པ་དེ་ལྟ་བུའི་སེམས་ཀྱིས་སྨན་སྦྱིན་པར་བྱེད་ན་འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་ཚེ་དང་ལྡན་པ་མཽད་གལ་གྱི་བུ་ཆེན་པོས་ཉེ་བ་འཁོར་
ལ་སོགས་པ་སར་པ་སྐྱེས་ཕྲན་གཞོན་ནུ་བཅུ་བདུན་སྡེའི་ཚོགས་དག་རབ་ཏུ་ཕྱུང་རྫོགས་པར་བསྙེན་པར་བྱས་པ་དེའི་ཚེ་ན་བཅུ་བདུན་སྡེ་དག་གལ་ཏེ་གཅིག་ལ་ལས་སུ་བསྐོ་བ་བབ་ན་ཡང་དེ་དག་ཐམས་ཅད་བསྡོངས་ཏེ་བྱེད་དོ། །ཇི་ཙམ་དུས་གཞན་ཞིག་ན་གཙུག་ལག་ཁང་དེར་མཚན་ཐོག་
ཐག་ཏུ་ཆོས་མཉན་པ་བྱུང་བས་དེར་དེ་དག་ཐམས་ཅད་ཀྱིས་བསྡོངས་ཏེ་ཏྲོན་བྱས་སོ། །ཕྱི་དེ་ཉིན་པར་དགེ་འདུན་གྱི་བསྲོ་ཁང་བྱུང་ནས་དེར་ཡང་དེ་དག་ཐམས་ཅད་ཀྱིས་བསྡོངས་ཏེ་ཏྲོན་བྱས་སོ། །དེའི་ཕྱི་དེ་ཉིན་པར་བཅུ་བདུན་སྡེ་ལས་གཅིག་ལ་དགེ་སྐོས་བབ་ནས་དེའི་ཉིན་མོ་ཡང་
ཐམས་ཅད་ཀྱིས་གཙུག་ལག་ཁང་བརྒྱན་ཏེ་འཁོད་དོ། །དེ་ན་དགེ་སྐོས་ཏྲོན་བྱེད་པའི་ཚེ་བཅུ་བདུན་སྡེ་ལས་གཅིག་ལ་བློ་བྱུང་བ་བདག་ནི་ཆད་ཀྱིས་ཉལ་ལོ། །མི་བཅུ་དྲུག་གིས་ཅིའི་ཕྱིར་ཏྲོན་མི་ནུས་སྙམ་མོ། །དེ་བཞིན་དུ་རེ་རེ་ལ་ཡང་བློ་དེ་ལྟ་བུ་བྱུང་ནས་གཞན་བཅུ་དྲུག་པོ་ཐམས་ཅད་
སོ་སོར་ཉལ་དུ་དོང་ངོ་། །དགེ་སྐོས་དེ་འབའ་ཞིག་གཅིག་པུ། མཚན་ཐོག་ཐག་ལས་བྱས་ཏེ། མཚན་མོ་ནམ་ནངས་པ་དང་། མར་མེའི་ཀོང་བུ་དག་བསྡུས། སྒོ་དག་ཕྱེ། གཙུག་ལག་ཁང་ཆག་ཆག་བཏབ། བྱུག་པ་བྱས་ཏེ། དུས་ཤེས་པར་བྱས་ནས་སྟན་བཤམས་ཤིང་
མཆོད་རྟེན་གྱི་འཁོར་སར་བདུག་སྤོས་བྲིམས་ཏེ། གཙུག་ལག་ཁང་གི་སྟེང་དུ་འགྲེང་ནས་གཎྜཱི་བརྡུང་བར་བརྩམས་སོ། །དེ་ནས་བཅུ་དྲུག་པོ་དེ་དག་གཎྜཱིའི་སྒྲས་སད་ནས་རང་རང་གི་གནས་ཁང་དག་ནས་ལྷུང་བཟེད་ཐོགས་ཏེ་བྱུང་བ་དང་། དེ་དག་གིས་དགེ་སྐོས་དེ་གཅིག་པུ་ཕར་རྒྱུག་ཚུར་
རྒྱུག་ཅིང་འདུག་པ་མཐོང་ནས་དེ་དག་གིས་ཕན་ཚུན་སྨྲས་པ། ཚེ་དང་ལྡན་པ་དག་འདི་གཅིག་པུ་ཕར་རྒྱུག་ཚུར་རྒྱུག་ཅིང་འདུག་ན་ཡུ་བུ་ཅག་ལས་སུས་ཀྱང་འདིའི་གྲོགས་མ་བྱས་སམ། གཅིག་གིས་སྨྲས་པ། ཁོ་བོ་ལ་བློ་བྱུང་བ་བདག་ནི་ཆད་ཀྱིས་ཉལ་ལོ། །མི་བཅུ་དྲུག་གིས་ཅིའི་

ཕྱིར་ཏྲོན་མི་ནུས་སྙམ་མོ། །དེ་བཞིན་དུ་གཞན་ཡང་དེ་སྐད་ཟེར། གཞན་དག་ཀྱང་དེ་སྐད་ཟེར་ཏེ། ཐམས་ཅད་ཀྱིས་དེ་སྐད་སྨྲས་སོ། །དེ་ནས་བཅུ་དྲུག་པོ་དག་གིས་སྨྲས་པ། ཚེ་དང་ལྡན་པ་དག་འདི་བདག་ཅག་གི་འཕྲལ་གྱི་བྱ་བ་ཐམས་ཅད་ལ་ཐོག་མར་འགྲོ་བ་
ཡིན་ན་བདག་ཅག་གིས་འདིའི་གྲོགས་མ་བྱས་པ་ནི་ཡུ་བུ་ཅག་གིས་མ་ལེགས་པ་བྱས་ཏེ། འདི་བདག་ཅག་ལ་གཤེ་བར་འགྱུར་གྱིས་ཟན་ཟོས་མ་ཐག་ཏུ་བཟོད་པ་གསོལ་བར་བྱའོ་ཞེས་དེ་དག་གིས་ཟན་ཟོས་ནས་བཟོད་པ་གསོལ་བར་བརྩམས་ཏེ། གཞོན་པ་རྣམས་ཀྱིས་ནི་དེའི་
རྐང་པ་གཉིས་ལ་གཏུགས། རྒན་པ་རྣམས་ཀྱིས་ནི་མགུལ་ནས་འཁྱུད་དེ་ཚེ་དང་ལྡན་པ་བཟོད་པར་གསོལ་ཞེས་བྱས་ན་དེ་ཅང་མི་སྨྲ་བ་ཉིད་དུ་འདུག་གོ། །དེ་དང་ཆེས་བཤེས་པ་གཅིག་ཡོད་པ་དེས་ག་ག་ཚིལ་བྱས་པ་དང་། དེས་རྒོད་པར་བརྩམས་ཏེ། བཟོད་དོ་ཞེས་ཀྱང་ཟེར་རོ། །
དེ་དག་གིས་བསམས་པ། དེ་ནི་ཐབས་ལེགས་པ་ཡིན་ནོ་སྙམ་ནས་གཞན་གྱིས་ཀྱང་ག་ག་ཚིལ་བྱས་ཤིང་དེ་བཞིན་དུ་ཐམས་ཅད་ཀྱི་བར་གྱིས་ག་ག་ཚིལ་བྱས་པ་དང་། དེ་རླུང་གྱེན་དུ་འཆུགས་ཏེ་དུས་ལ་བབ་བོ། །དེ་དག་བརྟད་ཅིང་མྱ་ངན་བྱ་བར་བརྩམས་པ་དང་། དགེ་སློང་རྣམས་
ཀྱིས་སྨྲས་པ། ཀྱེ་བཅུ་བདུན་སྡེ་དག་ཅིའི་ཕྱིར་བརྟད་ཅིང་མྱ་ངན་བྱེད། དེ་དག་གིས་སྨྲས་པ། བདག་ཅག་སྔོན་ནི་བཅུ་བདུན་སྡེར་གྱུར་ན་ད་ནི་བཅུ་དྲུག་སྡེར་གྱུར་ཏེ་ཚངས་པ་མཚུངས་པར་སྤྱོད་པ་ཡིད་དུ་འོང་བ་དང་བྲལ་ཞིང་ཕམ་པར་གྱུར་པའི་ལྟུང་བ་བྱུང་ངོ་། །དགེ་སློང་དེ་དག་གིས་མ་ལེགས་
སོ་ཞེས་སྨྲས་ཏེ་དོང་ངོ་། །བཅུ་དྲུག་པོ་དེ་དག་ཀྱང་མཐའ་གཅིག་ཏུ་དོང་སྟེ། སེམས་ཁོང་དུ་ཆུད་ཅིང་འཁོད་པ་དགེ་སློང་གཞན་དག་གིས་མཐོང་ནས་དགེ་སློང་དེ་དག་གིས་སྤྱོ་བར་བརྩམས་ཏེ། ཚེ་དང་ལྡན་པ་བཅུ་བདུན་སྡེ་འདི་དག་ནི་སོག་མའི་མེ་བཞིན་དུ་སྐད་ཅིག་གིས་འབར་ཞིང་སྐད་ཅིག་གིས་ཤི་བར་གྱུར་ཏེ།
ཡུད་ཙམ་ཞིག་རྒོད་བག་བྱེད་ཅིང་ཡུད་ཙམ་ཞིག་སེམས་ཁོང་དུ་ཆུད་ཅིང་འཁོད་དོ་ཞེས་ཟེར་རོ། །དེ་དག་མྱ་ངན་གྱི་མེས་ཡིད་གདུངས་པས་ཡོངས་སུ་སྤྱོས་ཀྱང་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་

བཀའ་སྩལ་པ། དགེ་སློང་དག་དགེ་སློང་དེ་རྣམས་ལ་ནི་ལྟུང་བ་མེད་དེ། ཡང་དགེ་སློང་གིས་ག་ག་ཚིལ་མི་བྱའོ། །བྱེད་ན་འགལ་ཚབས་ཅན་དུ་འགྱུར་རོ།། །།འདུལ་བ་རྣམ་པར་འབྱེད་པ། བམ་པོ་བཅུ་གཅིག་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་
བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ནས་ཧ་ཅང་མི་རིང་བ་ན། རི་བྲགས་ཤིག་ཡོད་པ་དེ་ན་ཁྱིམ་བདག་ཕྱུག་པ། ནོར་མང་བ། ལོངས་སྤྱོད་ཆེ་བ་ཞིག་འདུག་སྟེ། དེ་ཡང་དད་པ་ཅན་བཟང་བ་དགེ་བའི་བསམ་པ་ཅན་ཡིན་
པས་དེས་དགེ་འདུན་ལ་བསྔོས་ཏེ་གཙུག་ལག་ཁང་རྟ་བབས་མཐོན་པོ་དང་། སྐར་ཁུང་དང་། སྐར་ཁུང་དྲ་བ་ཅན་དང་། ལན་ཀན་གྱིས་བརྒྱན་པ། སྙིང་དང་མིག་འཕྲོག་པ། མཐོ་རིས་ཀྱི་ཐེམ་སྐས་སུ་གྱུར་པ་ཞིག་བྱེད་དུ་བཅུག་གོ། །གཙུག་ལག་ཁང་དེར་དགེ་སློང་དྲུག་
བཅུས་དབྱར་གནས་པ་དག་བྱས་ཏེ་དོང་ནས་ཁྱིམ་བདག་དེས་དེར་མ་བྱིན་པར་ལེན་པ་དག་གིས་ཁྲིའམ། ཁྲིའུ་དག་མ་རྐུས་པར་གྱིས་ཤིག་ཅེས་སྲུང་མའི་མི་བཞག་གོ། །ཇི་ཙམ་དུས་གཞན་ཞིག་ན་དགེ་སློང་གཞན་དྲུག་བཅུ་ལྗོངས་རྒྱུ་ཞིང་འགྲོ་བ་ན་རི་བྲགས་དེར་ཕྱིན་ནས་བསྟི་
གནས་རྙེན་པར་བྱེད་པ་ན་མི་ཞིག་གིས་སྨྲས་པ། འཕགས་པ་དག་ཁྱེད་ཅག་ཅིའི་སླད་དུ་གཙུག་ལག་ཁང་དུ་མི་གནས། བཞིན་བཟངས་གཙུག་ལག་ཁང་ག་ལ་ཡོད། འཕགས་པ་དག་དགོན་པ་འདི་ནའོ། །དགེ་སློང་དེ་དག་དེར་དོང་བ་དང་སྲུང་མའི་མིས་མཐོང་
ནས་དེས་འོངས་པ་ལེགས་སོ་ཞེས་བྱ་བའི་ཚིག་གིས་བསྙེན་བཀུར་བྱས་ཏེ། གནས་ཁང་དག་བསྐོས་ནས་ཁྲི་དང་། ཁྲིའུ་དང་། སྟན་ནང་ཚངས་ཅན་དང་། ལ་བ་ལ་སོགས་པ་དག་ཕུལ་ཏེ་སྦྱངས་ཚགས་གཡར་ནས་སྨྲས་པ། འཕགས་པ་དག་རེ་ཞིག་ཆབ་བཙག་པ་མཛོད་ཅིག་དང་
དེའི་བར་དུ་བདག་གིས་ཁྱིམ་བདག་ལ་བརྗོད་པར་བགྱིའོ། །ཞེས་མི་དེ་ཁྱིམ་བདག་གི་དྲུང་དུ་སོང་སྟེ་སྨྲས་པ། ཁྱིམ་བདག་དགྱེས་པ་སྐྱེད་ཅིག །ཁྱོད་ཀྱི་གཙུག་ལག་ཁང་དུ་དགེ་སློང་གློ་བུར་དུ་ལྷགས་པ་དྲུག་བཅུ་མཆིས་སོ། །ཁྱིམ་བདག་གུས་པར་བསྒྲིམས་པ་དང་བཅས་

པས་ནང་མི་དག་ལ་སྨྲས་པ། ཤེས་ལྡན་དག་ཁོ་བོའི་གཙུག་ལག་ཁང་དུ་དགེ་སློང་གི་དགེ་འདུན་བྱོན་པ་དེ་དག་ལེགས་པར་སྦྱར་བའི་བཏུང་བས་ཚིམ་པར་བྱས། བུ་རམ་དང་། ཧྭགས་དང་། ལི་ཁར་དང་། དགུན་དང་། བལ་པོ་སེའུ་ལོང་ཤིག་ཅེས་ཁྱིམ་བདག་
དེས་ལེགས་པར་སྦྱར་བའི་བཏུང་བ་སྦྱར་ནས་གཙུག་ལག་ཁང་དུ་སོང་བ་དང་། དགེ་སློང་དག་ཀྱང་ཆུ་བཙགས་ཏེ་རང་རང་གི་སྤྱོད་ལམ་གྱིས་འཁོད་དོ། །ཁྱིམ་བདག་དེས་དགེ་སློང་དེ་དག་ཐག་རིང་པོ་ཁོ་ན་ནས་མཐོང་སྟེ། དེས་གཙུག་ལག་ཁང་དེ་མཚོ་པད་མས་གང་
བ་བཞིན་དུ་མཐོང་ནས་རྒྱ་ཆེར་དད་པའི་ཤུགས་ཀྱིས་བསྒྱུར་བའི་རྒྱུད་ཀྱིས་ཚིགས་སུ་བཅད་པ་སྨྲས་པ། གྲོང་ངམ་ཡང་ན་དགོན་པའང་རུང་། །གཤོང་ངམ་ཡང་ན་ཐང་ཡང་རུང་། །གང་ན་འོས་པ་གནས་པ་ཡི། །ས་གཞི་དེ་ནི་དགའ་བྱེད་ཡིན། །དེ་ནས་ལེགས་པར་སྦྱར་
བའི་བཏུང་བ་སྟ་གོན་བྱས་ཏེ་རང་གི་ལག་ནས་དགེ་སློང་གི་དགེ་འདུན་དེ་ཚིམ་པར་བྱས་ནས་རང་ཉིད་ཀྱིས་པོག་ཕོར་ཐོགས་ཏེ་དགེ་སློང་གི་དགེ་འདུན་དང་ལྷན་ཅིག་མཆོད་རྟེན་ལ་ཕྱག་འཚལ་ནས་གཙུག་ལག་ཁང་དུ་ཞུགས་ཏེ། རྒན་པའི་མཐའ་ལོགས་སུ་འདུག་གོ། །དགེ་འདུན་གྱི་
གནས་བརྟན་གྱིས་ཡོན་བཤད་ནས་ཁྱིམ་བདག་དེས་རྐང་པ་གཉིས་ལ་ཕྱག་འཚལ་ཏེ་སང་བདག་གི་སྡུམ་པར་འཕགས་པའི་དགེ་འདུན་གྱིས་གདུགས་ཚོད་གསོལ་བར་ཅི་གནང་ཞེས་སྨྲས་པ་དང་། དགེ་སློང་རྣམས་ཀྱིས་ཀྱང་དང་དུ་བླངས་ནས་ཁྱིམ་བདག་དེས་རྐང་པ་གཉིས་ལ་
ཕྱག་འཚལ་ཏེ་སོང་ངོ་། །ཁྱིམ་བདག་དེས་ཕྱི་དེ་ཉིན་པར་ཟས་བསོད་པས་དགེ་སློང་དག་ཚིམ་པར་བྱས་ཤིང་དུས་མ་ཡིན་པར་ཡང་བཏུང་བ་བླུད་ནས་དགེ་སློང་རྣམས་ཀྱིས་ཀྱང་ཆོས་བསྟན་ཏོ། །ཕྱིས་ཀྱང་དེ་ཁོ་ན་བཞིན་དུ་དགེ་འདུན་གྱི་གནས་བརྟན་གྱིས་ཡོན་བཤད་པ་དང་། ཁྱིམ་བདག་དེ་
རྒན་པའི་མཐའ་ལོགས་སུ་འདུག་སྟེ་སྨྲས་པ། འཕགས་པ་དག་བདག་གིས་གཙུག་ལག་ཁང་འདི་བདག་ཉིད་ཀྱི་སླད་དུ་ཡང་བགྱིད་དུ་མ་སྩལ་ཉེ་དུ་རྣམས་ཀྱི་སླད་དུ་ཡང་བགྱིད་དུ་མ་སྩལ་གྱི། འདི་ལྟར་འཕགས་པ་རྣམས་ཀྱི་སླད་དུ་བགྱིད་དུ་སྩལ་བ་ལགས་ཀྱིས་འདི་ཉིད་དུ་དབྱར་གནས་པར་

ཞལ་གྱིས་བཞེས་ཤིག་དང་། བདག་གིས་འཕགས་པ་རྣམས་ལ་ཡོ་བྱད་ཐམས་ཅད་ཀྱིས་མི་བྲེལ་བར་བགྱིའོ། །དགེ་སློང་རྣམས་ཀྱིས་སྨྲས་པ། ཁྱིམ་བདག་མཉན་ཡོད་ན་བཅོམ་ལྡན་འདས་ཆོས་ཀྱི་རྗེ་མངོན་སུམ་དུ་བཞུགས་ཤིང་། དུས་དང་དུས་སུ་དགེ་སློང་ཆེ་གེ་མོ་
ཞིག་གིས་ནི་དགྲ་བཅོམ་པ་ཉིད་མངོན་དུ་བྱས། ཆེ་གེ་མོ་ཞིག་གིས་ནི་མི་སྡུག་པའི་བར་གྲུབ་བོ་ཞེས་ཤེས་པ་བརྡ་སྤྲོད་པ་དག་ཀྱང་ཐོས་པར་འགྱུར། རྒྱལ་པོ་ཡང་བསྟན་པ་ལ་ཤིན་ཏུ་དད། བཙུན་མོ་ཕྲེང་ལྡན་མ་དང་། རྒྱལ་རིགས་དབྱར་ཚུལ་མ་དང་། བླ་མཁྱེན་དྲང་སྲོང་བྱིན་དང་། རྙིང་
པ་དང་། དགེ་བསྙེན་མ་ས་ག་དང་། རི་དགས་འཛིན་གྱི་མ་དང་། གཞན་ཡང་དད་པ་ཅན་མང་དུ་ཡོད་པས་དེ་ཟང་ཟིང་གི་ལོངས་སྤྱོད་དང་། ཆོས་ཀྱི་ལོངས་སྤྱོད་ཆེན་པོ་ཡང་འགྲུབ་པས་བདག་ཅག་དེ་ཉིད་དུ་འདོང་ངོ་། །འཕགས་པ་དག་ཆོས་ཀྱི་ལོངས་སྤྱོད་ནི་འཕགས་པ་ཉིད་ལ་རག་ལས་པ་ལགས་
ཀྱི། ཟང་ཟིང་གི་ལོངས་སྤྱོད་ནི་བདག་ལ་རག་ལས་པ་ལགས་པས་དགྱེས་པ་སྐྱེད་ཅིག་དང་། ཅུང་ཟད་ཀྱང་ཉམས་པར་མི་འགྱུར་རོ། །དགེ་འདུན་གྱི་གནས་བརྟན་གྱིས་སྨྲས་པ། ཚེ་དང་ལྡན་པ་དག་བཅོམ་ལྡན་འདས་ཀྱིས་དད་པ་ཅན་གྱི་དད་པ་སྤེལ་བར་བྱ་ཞིང་སྦྱིན་བདག་ལ་རྗེས་
སུ་སྙིང་བརྩེ་བར་བྱའོ་ཞེས་གསུངས་པས་འདི་ཉིད་དུ་འཁོད་པར་བྱའོ་ཞེས་དེ་དག་དེར་འཁོད་ནས་བློ་བརྟན་པས་གཙུག་ལག་ཁང་དེའི་ཕྱི་ནང་བཅས་པར་སོ་སོར་བརྟག་པར་བརྩམས་པ་དང་། གཙུག་ལག་ཁང་དེ་མེ་ཏོག་ཕུན་སུམ་ཚོགས་པ་དང་། འབྲས་བུ་ཕུན་སུམ་
ཚོགས་པ། ཤིན་ཏུ་དགའ་བར་མཐོང་ནས་དགེ་འདུན་གྱི་གནས་བརྟན་གྱིས་སྨྲས་པ། ཚེ་དང་ལྡན་པ་དག་གཙུག་ལག་ཁང་འདི་མེ་ཏོག་ཕུན་སུམ་ཚོགས་པ། འབྲས་བུ་ཕུན་སུམ་ཚོགས་པ། ཤིན་ཏུ་དགའ་བ་ཡིན་པས་གལ་ཏེ་བདག་ཅག་གིས་འདིར་དབྱར་སྔ་མར་གནས་པར་
ཁས་བླངས་ན་མེ་ཏོག་དང་འབྲས་བུ་ཐམས་ཅད་ཡོངས་སུ་ལོངས་སྤྱོད་པར་མི་འགྱུར་གྱིས། བདག་ཅག་གིས་ངེས་པར་དབྱར་ཕྱི་མར་གནས་པར་ཁས་བླང་བར་བྱའོ་ཞེས་དེ་དག་གིས་དེར་དབྱར་ཕྱི་མར་གནས་པར་ཁས་བླངས་སོ། །ཁྱིམ་བདག་དེ་ལ་གཙུག་ལག་ཁང་དེ་གཅིག་པུ་འབའ་

ཞིག་ཡོད་པས་དེ་སྦྱིན་པ་དང་བྱ་བར་སེམས་པ་གང་ཡིན་པ་དེ་ཐམས་ཅད་གཙུག་ལག་ཁང་དེ་ཉིད་དུ་སྦྱིན་ཞིང་བྱེད་དོ། །རི་བྲགས་དེ་ན་ཡང་གཙུག་ལག་ཁང་གཞན་མེད་པས། རི་བྲགས་པ་དེ་དག་ཀྱང་སྦྱིན་པ་དང་བྱ་བར་སེམས་པ་གང་ཡིན་པ་དེ་ཐམས་ཅད་གཙུག་
ལག་ཁང་དེ་ཉིད་དུ་སྦྱིན་ཞིང་བྱེད་དོ། །རི་བྲགས་དེའི་ཉེན་ཀོར་ན་ཡང་གཙུག་ལག་ཁང་གཞན་མེད་པས་རི་བྲགས་ཀྱི་ཉེན་ཀོར་བ་དེ་དག་ཀྱང་སྦྱིན་པ་དང་བྱ་བར་སེམས་པ་གང་ཡིན་པ་དེ་དག་ཐམས་ཅད་གཙུག་ལག་ཁང་དེ་ཉིད་དུ་སྦྱིན་ཞིང་བྱེད་པས་དེར་དབྱར་གནས་པར་ཁས་བླངས་པའི་
དགེ་སློང་རྣམས་ལ་རྙེད་པ་མང་པོ་བྱུང་ངོ་། །སྟོན་ཟླ་ཐ་ཆུངས་ཀྱི་གཡོན་ཅན་དག་གི་ཀུན་ཏུ་སྤྱོད་པ་ནི་དགག་དབྱེ་བྱས་མ་ཐག་ཏུ་འདུས་ཏེ། བདག་ཅག་གིས་ལས་ཅི་ཞིག་བྱས་ན་དེས་བཙལ་མི་དགོས་པར་ལོ་སྐོར་དུ་ལོངས་སྤྱོད་ཅིང་བདེ་བར་འཁོད་པར་འགྱུར་ཞེས་ཕན་ཚུན་གྲོས་
བྱེད་དོ། །དེ་དག་འདི་སྙམ་དུ་སེམས་ཏེ། ཤཱཀྱའི་སྲས་ཀྱི་དགེ་སྦྱོང་འདི་དག་གཞོམ་པར་བྱའོ་སྙམ་མོ། །གཞན་དག་གིས་སྨྲས་པ། དེ་དག་ནི་སྒོ་འཕར་བརྒྱ་སྙེད་བཟླ་བ་བྱས་ཀྱང་། ལྟོ་ཁེངས་པ་འགྲུབ་པར་དཀའ་བས་དེ་དག་ལ་ཅི་ཡང་མེད་ན་བདག་ཅག་ཅིའི་ཕྱིར་ཡུན་དེ་སྲིད་དུ་
བསྡད་པར་བྱ། དེ་ན་དགེ་སློང་གི་རྒྱུས་ཤེས་པ་གཅིག་འདུག་པས་སྨྲས་པ། ཁྱེད་ཅི་ཤེས་དེ་དག་ལ་མང་དུ་ཡོད་དོ། །ཇི་ལྟར་ཞིག་གཙུག་ལག་ཁང་འདི་གང་གི་ཡིན་པའི་ཁྱིམ་བདག་དེ་ནི་དད་པ་ཅན་བཟང་བ་དགེ་བའི་བསམ་པ་ཅན་ཡིན་ལ་ཁྱིམ་བདག་དེ་ལ་ཡང་
གཙུག་ལག་ཁང་འདི་གཅིག་པུ་འབའ་ཞིག་ཡོད་པས་དེ་སྦྱིན་པ་དང་བྱ་བར་སེམས་པ་གང་ཡིན་པ་དེ་ཐམས་ཅད་གཙུག་ལག་ཁང་འདི་ཉིད་དུ་སྦྱིན་ཞིང་བྱེད་དོ། །རི་བྲགས་འདི་ན་ཡང་གཙུག་ལག་ཁང་གཞན་མེད་པས་རི་བྲགས་པ་འདི་དག་ཀྱང་སྦྱིན་པ་དང་བྱ་བར་སེམས་པ་གང་ཡིན་པ་
དེ་ཐམས་ཅད་གཙུག་ལག་ཁང་འདི་ཉིད་དུ་སྦྱིན་ཞིང་བྱེད་དོ། །རི་བྲགས་འདིའི་ཉེན་ཀོར་ན་ཡང་གཙུག་ལག་ཁང་གཞན་མེད་པས་རི་བྲགས་ཀྱི་ཉེན་ཀོར་པ་འདི་དག་ཀྱང་སྦྱིན་པ་དང་བྱ་བར་སེམས་པ་གང་ཡིན་པ་དེ་ཐམས་ཅད་གཙུག་ལག་ཁང་འདི་ཉིད་དུ་སྦྱིན་པའི་ཞིང་བྱེད་པས་འདིར་དབྱར་

གནས་པར་ཁས་བླངས་པའི་དགེ་སློང་རྣམས་ལ་རྙེད་པ་མང་པོ་བྱུང་ངོ་། །གལ་ཏེ་ཡིད་མི་ཆེས་ན་སོང་ལ་ལྟོས་ཤིག་དང་རང་ཉིད་ཀྱི་མངོན་སུམ་དུ་འགྱུར་རོ། །གལ་ཏེ་དེ་ལྟ་ན་ཁྱོད་ཉིད་ཇེ་སོང་ལ། མངོན་སུམ་དུ་གྱིས་ཤིག་དང་། ཁོ་བོ་ཅག་ཕྱིས་འོང་ངོ་། །དེས་སྨྲས་པ། ལེགས་ཀྱིས་
དེ་བཞིན་གྱིས་ཤིག་དང་ཁོ་བོ་འགྲོའོ་ཞེས་དེ་གོས་ཚགས་བཅོས་ཏེ་འཕགས་ཤིང་དེ་ནས་ཚིགས་སུ་བཅད་པའི་དབྱངས་ཀྱིས་མཆོད་རྟེན་ལ་ཕྱག་འཚལ་ཏེ། གཙུག་ལག་ཁང་དེར་ཞུགས་སོ། །ཇི་ཙམ་ན་སྒོ་ཁང་ན་རྒན་ཞུགས་ཤིག་འདུག་ནས་གཡོན་ཅན་དེས་དེའི་རྐང་པ་ལ་ཕྱག་འཚལ་ཏེ་དྲི་
བར་བརྩམས་པ། འཕགས་པ་གཙུག་ལག་ཁང་སྙིང་དང་མིག་འཕྲོག་པ་མཐོ་རིས་ཀྱི་ཐེམ་སྐས་སུ་གྱུར་པ་འདི་སུའི་ལགས། བཞིན་བཟངས་ཁྱིམ་བདག་ཆེ་གེ་མོ་ཞིག་གི་ཡིན་ནོ། །འཕགས་པ་ཅི་འདི་གཙུག་ལག་ཁང་ལགས་སམ། འོན་ཏེ་ཕོངས་པ་ལགས། བཞིན་བཟངས་གཙུག་ལག་ཁང་ནི་ཇི་
ལྟ་བུ་ཡིན། ཕོངས་པ་ནི་ཇི་ལྟ་བུ་ཡིན། འཕགས་པ་གང་ན་ཡོ་བྱད་ཕུན་སུམ་ཚོགས་པ་ནི་གཙུག་ལག་ཁང་ལགས་སོ། །གང་ན་ཡོ་བྱད་མ་མཆིས་པ་ནི་ཕོངས་པ་ལགས་སོ། །བཞིན་བཟངས་འོ་ན་འདི་ནི་གཙུག་ལག་ཁང་ཡིན་གྱི་ཕོངས་པ་མ་ཡིན་ཏེ། འདི་ནི་ཡོ་བྱད་ཕུན་སུམ་
ཚོགས་པ་ཡོད་ཀྱི་འདི་ན་ཡོ་བྱད་མེད་པ་མ་ཡིན་ནོ། །འཕགས་པ་ཟས་ཟ་བ་ནི་འགའ་ཡང་ས་རྡུལ་མི་ཟ་ལ། གོས་དག་གྱོན་པ་ནི་འགའ་ཡང་ཤིང་ཤུན་དག་མི་གྱོན་པས་ཁྱེད་ཅག་ལ་གོས་ཅུང་ཟད་མཆིས་སམ། རྒན་ཞུགས་དེ་དྲང་པོའི་རང་བཞིན་ཅན་ཡིན་པས་དེས་གཡོན་
ཅན་དེའི་ལག་ནས་བཟུང་སྟེ་གནས་ཁང་དུ་བཅུག་ནས་སྨྲས་པ། བཞིན་བཟངས་གོས་ཀྱི་གདང་གོས་དག་གིས་ཕུར་ཤོག་ཅིང་འདུག་པ་ལ་ལྟོས། འཕགས་པ་ཅི་འདི་ཁྱོད་ཀྱི་ལགས་སམ། འོན་ཏེ་དགེ་འདུན་གྱི་ལགས། བཞིན་བཟངས་འདི་ཁོ་བོ་གང་ཟག་གི་ཡིན་ནོ། །
འཕགས་པ་འོ་ན་ཁྱོད་ནི་གོར་མ་བཀུམ་པར་དགེ་འདུན་གྱི་གནས་བརྟན་ནམ། ཆོས་སྒྲོག་པ་ཞིག་ལགས་སམ། བཞིན་བཟངས་ཁོ་བོ་ནི་དགེ་འདུན་གྱི་གནས་བརྟན་ཡང་མ་ཡིན་ལ། ཆོས་སྒྲོག་པ་ཡང་མ་ཡིན་ཏེ། འདི་ལྟར་ཁོ་བོ་ནི་དགེ་འདུན་གྱི་གསར་བུ་དགེ་ཚུལ་ཞིག་ཡིན་ནོ། །

འཕགས་པ་དེ་ནི་མཇལ་ན་འདི་ན་དགེ་འདུན་གྱི་གནས་མལ་ཅུང་ཟད་མཆིས་སམ། བཞིན་བཟངས་མང་དུ་ཡོད་དེ་རེ་ཞིག་ཁོ་བོའི་བྱུག་རིས་སུ་ཡང་དངོས་པོ་བདུན་པོ་དག་འཐོབ་བོ། །འཕགས་པ་དེ་ཡང་མཇལ་གྱིས་འདི་ཞུའོ། །གཙུག་ལག་ཁང་འདི་ན་གང་ལ་ལ་
འཚལ་མ་བགྱིད་པ་ད་ཅི་རྫ་མཁན་གྱི་སྣོད་དུ་འཚོད་དམ། འོན་ཏེ་ཟངས་མའི་སྣོད་དུ་འཚོད་བཞིན་བཟངས་ཁྱོད་ཀྱིས་གནས་ཁང་འདི་དག་མཐོང་ངམ། འཕགས་པ་མཐོང་ངོ་། །བཞིན་བཟངས་གནས་ཁང་འདི་དག་ཟངས་མའི་སྣོད་ཀྱིས་གང་ཞིང་འདུག་གོ། །གཡོན་ཅན་དེས་བསམས་
པ་ལེགས་པར་བྲིད་ཟིན་གྱིས་ད་ནི་འགྲོའོ་སྙམ་ནས་གཡོན་ཅན་དེས་སྨྲས་པ། འཕགས་པ་ཁྱོད་ཀྱི་དགེ་བའི་ཕྱོགས་ཡོངས་སུ་ཉམས་ལ་བདག་གི་དོན་ཡོངས་སུ་ཉམས་པ་ལགས་པས་བདག་སླད་ཀྱིས་ཀྱང་མཆི་ཡིས་ད་ནི་མཆིའོ། །བཞིན་བཟངས་དེ་བཞིན་གྱིས་ཤིག །གཡོན་ཅན་དེས་རྒན་ཞུགས་
དེའི་རྐང་པ་ལ་ཕྱག་འཚལ་ཏེ་སོང་ནས་གཡོན་ཅན་དེ་ཆོམ་རྐུན་པ་དེ་དག་གི་དྲུང་དུ་སོང་སྟེ་སྨྲས་པ། པད་མའི་མིག་ཅན་དག་རྫས་ཐམས་ཅད་ཀྱིས་གང་བའི་གྲུ་བོ་ཆེ་སྐམས་ལ་འདུག་གིས་ཕྲོགས་ཤིག །ཕྲོགས་ཤིག །དེ་ན་གཅིག་གིས་སྨྲས་པ། དེ་ན་འཁོད་པའི་རབ་ཏུ་བྱུང་བ་དྲུག་བཅུ་པོ་དག་ནི་འཕོང་
གི་སློབ་དཔོན་ཤ་སྟག་ཡིན་ཞེས་གྲག་པས་དེ་བཞིན་དུ་གཞོམ་པར་མི་ནུས་ཀྱིས། གང་གི་ཚེ་དེ་དག་མཚན་མོ་ཆོས་ཉན་པ་དེའི་ཚེ་གཞོམ་མོ། །གཞན་དག་གིས་སྨྲས་པ། ཉི་མ་གང་ལ་དེ་དག་གི་ཆོས་ཉན་པ་འབྱུང་བར་འགྱུར། དེས་སྨྲས་པ། ཚེས་བརྒྱད་དང་། བཅུ་
བཞི་ལ་འབྱུང་སྟེ། དེ་ལ་ཚེས་བརྒྱད་ནི་ཐལ་ཟིན་པས་ཚེས་བཅུ་བཞི་ལ་འབྱུང་བར་འགྱུར་རོ། །དེ་དག་སོར་མོ་དག་གིས་ཉི་མ་བགྲང་ཞིང་འཁོད་འཁོད་པ་ནས་ཇི་ཙམ་ན་ཚེས་བཅུ་བཞི་ལ་བབ་སྟེ། དགེ་འདུན་གྱི་གནས་བརྟན་གྱིས་སོ་སོར་ཐར་པའི་མདོ་བཏོན་ཏེ་དགེ་
འདུན་གྱིས་གསོ་སྦྱོང་བྱས་ནས་ཆོས་སྒྲོག་པ་སེང་གེའི་ཁྲི་ལ་འཛེགས་ཏེ་འདི་སྐད་ཅེས། མི་མཆོག་འདུལ་བའི་ཁ་ལོ་སྒྱུར་མཛད་པ། །ཀུན་སྦྱོར་འཆིང་བ་གཅོད་པ་དེ་བཞིན་གཤེགས། །དབང་པོ་ཞི་ཞིང་ཉེར་ཞི་ཞི་ལ་མཁས། །མཉན་ཡོད་བཞུགས་པས་བཀའ་བཞིན་བྱེད་ལ་

གསུངས། །ཞེས་སྨྲ་བར་བརྩམས་པ་དང་། གཡོན་ཅན་དེ་དག་གིས་སྒོ་བརྡུངས་སོ། །དགེ་སློང་དེ་དག་གིས་ཚོར་ནས་སྨྲས་པ། ཤེས་ལྡན་དག་ཁྱེད་ཅག་སུ་ཡིན། འཕགས་པ་དག་བདག་ཅག་རིགས་ཀྱི་བུ་དག་གོ། །དགེ་སློང་རྣམས་ཀྱིས་བསམས་པ། རི་བྲགས་ནས་
སྐྱེ་བོའི་ཚོགས་དག་ཆོས་ཉན་དུ་ལྷགས་གོར་མ་ཆག་གིས་སྒོ་དབྱེའོ་སྙམ་ནས་དེ་དག་གིས་སྒོ་ཕྱེ་བ་དང་དེ་དག་ཞུགས་སོ། །ཇི་ཙམ་ན་གཞོམ་པར་བརྩམས་པ་དང་། དགེ་སློང་རྣམས་ཀྱིས་སྨྲས་པ། ཤེས་ལྡན་དག་ཁྱེད་ཅག་ན་རེ་བདག་ཅག་རིགས་ཀྱི་བུ་དག་གོ་ཞེས་ཟེར་ན་ད་
ངེད་ཅག་འཇོམས་པར་བྱེད་དམ། དེ་དག་གིས་སྨྲས་པ། འཕགས་པ་དག་བདག་ཅག་ལ་མིང་གཉིས་མཆིས་ཏེ། སླད་རོལ་དུ་ནི་རིགས་ཀྱི་བུ་དག་ཅེས་བགྱི་ལ། ནང་དུ་ནི་ཆོམ་རྐུན་པ་དག་ཅེས་བགྱིའོ། །ཁྱེད་ཅག་མིང་འདོགས་པར་བྱེད་པ་ནི་ཉམས་སོ། །གཡོན་ཅན་དེ་དག་གིས་
དགེ་སློང་དེ་དག་བཅོམ་སྟེ་དོང་ནས། དགེ་སློང་བཅོམ་པ་དེ་དག་གིས་གྲོས་བྱས་པ། ཚེ་དང་ལྡན་པ་དག་བཅོམ་ལྡན་འདས་ཀྱིས་ལྷག་མ་དང་བཅས་པར་བཞོ་བར་བྱའོ་ཞེས་གསུངས་པས་རེ་ཞིག་ཁྱིམ་བདག་འདི་ཕྱོགས་བཞིའི་དགེ་སློང་གི་དགེ་འདུན་ལ་སྦྱིན་དུ་བཅུག་སྟེ་ཡང་ཅི་བྱ།
བདག་ཅག་ལ་སྦྱིན་དུ་བཅུག་སྟེ་ཡང་ཅི་བྱས། བདག་ཅག་མཉན་ཡོད་ཉིད་དུ་དོང་ན་དེར་བདག་ཅག་རེ་རེ་ལ་ཚངས་པ་མཚུངས་པར་སྤྱོད་པ་དག་གིས་ཆོས་གོས་དག་གིས་མི་ཕོངས་པར་བྱེད་པར་འགྱུར་རོ་ཞེས་གྲོས་བྱས་སོ། །ཇི་ལྟར་འདོང་བར་བྱ། མཚན་མོ་འགེབས་པས་
འདོང་ཞིང་། ཉིན་མོ་ཐིབས་པོར་ཞུགས་ཏེ་འགྲོ་བར་བྱའོ་ཞེས་དེ་དག་གིས་ཁྱིམ་བདག་ལ་ཡང་མ་བལྟས་པར་དོང་ངོ་། །ཇི་ཙམ་ན་མཐར་གྱིས་མཉན་ཡོད་དུ་ཕྱིན་པ་དང་། དགེ་སློང་དག་ནམ་གྱི་ཆ་སྟོད་དང་ཆ་སྨད་ལ་མི་ཉལ་བར་སྦྱོར་བའི་རྗེས་སུ་བརྩོན་པར་གནས་པ་
དེ་དག་གིས་དགེ་སློང་དེ་དག་སྒྲེན་མོར་སྒོའི་གམ་ཡོ་ན་རྒྱུ་བ་མཐོང་ནས་སྨྲས་པ། གཅེར་བུ་སྒྲེ་བྱི་དག་ཁྱེད་ཅག་འདིར་ཅི་འདོད། འདི་ཁྱེད་ཀྱི་གཙུག་ལག་ཁང་ཡང་མ་ཡིན་ལ་འདུག་གནས་ཀྱང་མ་ཡིན་ནོ། །དེ་དག་གིས་སྨྲས་པ། ཚེ་དང་ལྡན་པ་དག་བདག་

ཅག་གཅེར་བུ་པ་དག་མ་ཡིན་ནོ། །འོ་ན་ཁྱེད་སུ་ཡིན། དགེ་སློང་དག་གོ། །འདི་ལྟ་བུ་དག་དགེ་སློང་ཡིན་ནམ། གང་དག་ཆོམ་རྐུན་པ་དག་གིས་བཅོམ་པ་དེ་དག་ཇི་ལྟ་བུ་ཡིན། ཁྱེད་ཅག་མིང་ཅི། སངས་རྒྱས་འཚོའོ། །ཆོས་འཚོའོ། །དགེ་འདུན་འཚོའོ། །
ཚེ་དང་ལྡན་པ་དག་འོངས་པ་ལེགས་སོ། །འོངས་པ་ལེགས་སོ། །ཞེས་དེ་དག་གིས་སྒོ་ཕྱེ་ནས་དགེ་སློང་དེ་དག་འཇུག་ཏུ་བཅུག་སྟེ། དེ་དག་ལ་ལ་ལས་ནི་ཆོས་གོས་བྱིན། ལ་ལས་ནི་ཤམ་ཐབས་བྱིན། ལ་ལས་ནི་རྡུལ་གཟན་བྱིན། ལ་ལས་ནི་ལྷུང་བཟེད་བྱིན། ལ་ལས་ནི་ཆུ་ཚགས་བྱིན་ཏེ། བགོ་བཤའ་ཇི་ལྟ་བ་
བཞིན་དུ་ཐམས་ཅད་བགོ་བཤའ་བྱས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། མི་ཤེས་པ་ལ་གཙུག་ལག་ཁང་གི་སྒོ་གྱ་ཚོམ་དུ་དབྱེ་བར་མི་བྱ་སྟེ། གལ་ཏེ་འགའ་ཞིག་མཚན་མོ་སྒོ་འདོད་ན་དེའི་མིང་དང་
རིས་དྲི་བར་བྱ་ཞིང་གལ་ཏེ་ངོ་ཤེས་ན་སྒོ་དབྱེ་བར་བྱ་ཞིང་། ངོ་མི་ཤེས་ན་སྒོ་དབྱེ་བར་མི་བྱའོ། །གཞན་ཡང་ཆོས་མཉན་པ་ལ་བབ་པའི་ཚེ་དགེ་སློང་མེལ་ཙེ་བ་གཞག་པར་བྱ་ཞིང་། གལ་ཏེ་ཆོམ་རྐུན་པ་འོངས་ན་གཎྜཱི་འོན་ཅིག །གཎྜཱིའི་ཐེའུ་འོན་ཅིག །དུས་ཀྱི་འཁོར་ལོ་
འོན་ཅིག །སྣམ་སྦྱར་དང་། བདུན་པ་དང་། ལྔ་པ་དང་། གཏུར་བུ་དང་། རྒྱ་ཅང་དང་། ཤུར་བུ་དང་། ལྕག་པོད་དང་། ཤུར་བུ་ཕྲེའུ་འོན་ཅིག་ཅེས་ཚམ་ངམ་བྱའོ། །གཞན་ཡང་ངས་དགེ་སློང་དགེ་འདུན་གྱི་གནས་བརྟན་གྱིས་ཀུན་ཏུ་སྤྱོད་པའི་ཆོས་དག་བཅའ་བར་བྱ་སྟེ།
དགེ་སློང་དགེ་འདུན་གྱི་གནས་བརྟན་གྱིས་ཆོས་མཉན་པ་ལ་བབ་པའི་ཚེ་དགེ་སྐོས་ལ་ཚེ་དང་ལྡན་པ་ཁྱོད་ཀྱིས་གཙུག་ལག་ཁང་གི་སྒོ་བཅད་དམ། སོ་སོར་བརྟགས་སམ། ཆོས་སྨྲ་བ་ལ་གསོལ་བ་བཏབ་བམ། བཤང་བ་དང་གཅི་བའི་སྐྱབས་བྱི་དོར་བྱས་སམ་ཞེས་དྲི་བར་བྱའོ། །
དགེ་སློང་དགེ་འདུན་གྱི་གནས་བརྟན་གྱིས་ཀུན་དུ་སྤྱོད་པའི་ཆོས་ཇི་ལྟར་བཅས་པ་དག་ཡང་དག་པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །དེ་ནས་ཆོམ་རྐུན་པས་བཅོམ་པའི་དགེ་སློང་དེ་དག་ལ་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་ཁོ་བོ་ཅག་

གིས་ཁྱེད་ཅག་ལ་བགོ་བཤའ་ཇི་ལྟ་བ་བཞིན་དུ་བགོ་བཤའ་བྱས་མོད་ཀྱི་འོན་ཀྱང་ད་དུང་ཁྱེད་ཅག་ཆོས་གོས་དག་གིས་བྲེལ་གྱིས་ཁྱེད་ཅག་ཁྱིམ་བདག་གང་གི་གཙུག་ལག་ཁང་དུ་བཅོམ་པར་གྱུར་པའི་ཁྱིམ་བདག་དེ་ནི་དད་པ་ཅན་བཟང་བ་དགེ་བའི་བསམ་པ་ཅན་ཡིན་པས། དེ་ཉིད་ཀྱི་གཙུག་
ལག་ཁང་དུ་དེང་ཤིག་དང་དེ་ཉིད་ཀྱིས་ཁྱེད་ཅག་ལ་ཆོས་གོས་དག་གིས་མི་བྲེལ་བར་བྱེད་པར་འགྱུར་རོ། །དགེ་སློང་དེ་དག་མཐའ་གཅིག་ཏུ་དོང་སྟེ་ཕན་ཚུན་གྲོས་བྱ་བར་བརྩམས་པ། ཚེ་དང་ལྡན་པ་དག་ཚངས་པ་མཚུངས་པར་སྤྱོད་པ་འདི་དག་ཟེར་བ་ནི་བཟང་སྟེ། བདག་ཅག་
གིས་ཁྱིམ་བདག་ལ་མ་བལྟས་པར་འོངས་པས་ཡང་ཕྱིར་དེ་ཉིད་དུ་དོང་ན་དེས་བདག་ཅག་ལ་ཆོས་གོས་དག་གིས་བགོ་བཤའ་བྱེད་པར་འགྱུར་བའི་གནས་ཀྱང་ཡོད་དོ། །ཞེས་དེ་དག་ཡང་ཕྱིར་དེར་དོང་ངོ་། །དེ་ནས་ཁྱིམ་བདག་དེས་མཐོང་ནས་སྨྲས་པ། འཕགས་པ་དག་ཅིའི་
སླད་དུ་ཁྱེད་ཀྱིས་བདག་ལ་མ་གཟིགས་པར་བཞུད། དགེ་སློང་དེ་དག་གིས་སྨྲས་པ། ཁྱིམ་བདག་བཅོམ་ལྡན་འདས་ཀྱིས་ལྷག་མ་དང་བཅས་པར་བཞོ་བར་བྱའོ་ཞེས་གསུངས་པས་དེས་ན་བདག་ཅག་ལ་བློ་བྱུང་བ་རེ་ཞིག་ཁྱིམ་བདག་འདི་ཕྱོགས་བཞིའི་དགེ་སློང་གི་དགེ་འདུན་ལ་
སྦྱིན་དུ་བཅུག་སྟེ་ཡང་ཅི་བྱ། བདག་ཅག་ལ་སྦྱིན་དུ་བཅུག་སྟེ་ཡང་ཅི་བྱས། བདག་ཅག་མཉན་ཡོད་དུ་དོང་ན་དེར་བདག་ཅག་ལ་ཚངས་པ་མཚུངས་པར་སྤྱོད་པ་དག་གིས་ཆོས་གོས་དག་གིས་མི་ཕོངས་པར་བྱེད་པར་འགྱུར་རོ། །སྙམ་ནས་དེའི་ཕྱིར་བདག་ཅག་མཉན་ཡོད་དུ་དོང་
ངོ་། །ཁྱིམ་བདག་གིས་སྨྲས་པ། འཕགས་པ་དག་གལ་ཏེ་བདག་གི་གཙུག་ལག་ཁང་བཅོམ་པས་ཅི་ཁྱིམ་ན་བདག་དབང་བའི་རྫས་དག་ཀྱང་བཅོམ་སྙམ་མམ། འཕགས་པ་དག་ཁྱེད་ཅག་གང་གི་སླད་དུ་བྱོན་པ་ནི་བྱོན་པ་ལེགས་སོ། །ཞེས་ཁྱིམ་བདག་དེས་ཡང་རྒྱ་ཆེར་
གུས་པ་དང་བཅས་པས་མཁོས་སུ་ཕབ་སྟེ་དགེ་སློང་རེ་རེ་ལ་ཡང་ཡོ་བྱད་བཅུ་གསུམ་བཅུ་གསུམ་ཕུལ་ལོ། །ཆོམ་རྐུན་པ་དེ་དག་ཡང་ཕྱིར་འོངས་ཏེ་གཙུག་ལག་ཁང་གི་སྒོ་རྡུང་བར་བྱེད་པ་དང་། དགེ་སློང་རྣམས་ཀྱིས་ཚོར་ནས་དེ་དག་གིས་སྨྲས་པ། ཚེ་དང་ལྡན་པ་དག་

གཡོན་ཅན་དེ་དག་ཉིད་ལྷགས་ཀྱིས་ཚམ་ངམ་གྱིས་ཤིག་ཅེས་གཎྜཱི་འོན་ཅིག་ཅེས་གཎྜཱི་དེའི་ཐེའུ་དང་། དུས་ཀྱི་འཁོར་ལོ་དང་། སྣམ་སྦྱར་དང་། བདུན་པ་དང་། ལྔ་པ་དང་། གཏུར་བུ་དང་། རྒྱ་ཅང་དང་། ཤུར་བུ་དང་། ལྕག་པོད་དང་། ཤུར་བུ་ཕྲེའུ་འོན་
ཅིག་ཅེས་ཚམ་ངམ་བྱ་བར་བརྩམས་པ་དང་། གཡོན་ཅན་དེ་དག་སྐྲག་སྟེ་འབྱེར་བར་བརྩམས་པ་ན་ལྷས་ཚིགས་སུ་བཅད་པ་སྨྲས་པ། ལེགས་གསུངས་རྐང་གཉིས་གཙོ་བོ་ཐུབ་པ་ཡིས། །ཉན་ཐོས་རྣམས་ཀྱི་ཚམ་ངམ་གང་བསྟན་པ། །ཚམ་ངམ་རབ་བརྩོན་པ་
དག་མཆོག་ཡིན་གྱི། །གཡོན་ཅན་གཡུལ་ལ་སྔར་བ་གོ་གྱོན་པ། །ལྔ་བརྒྱ་དག་ནི་དེ་ལྟ་མ་ཡིན་ནོ། །གཡོན་ཅན་དེ་དག་ལ་དགེ་སློང་གི་རྒྱུས་ཤེས་པ་དེས་སྨྲས་པ། ཤེས་ལྡན་དག་ཁྱེད་ཅག་ཅིའི་ཕྱིར་འབྱེར་བར་བྱེད། དེ་དག་གིས་སྨྲས་པ། ཁྱེད་ཉིད་ན་རེ་འདི་ན་
འཁོད་པའི་རབ་ཏུ་བྱུང་བ་དྲུག་བཅུ་པོ་དག་ནི་འཕོང་གི་སློབ་དཔོན་ཤ་སྟག་ཡིན་ནོ་ཞེས་ཟེར་བས་ཇི་ལྟར་མི་འབྲོས་སུ་རུང་། གཞན་ཡང་བདག་ཅག་གིས་གཎྜཱི་ཞེས་བྱ་བ་ལ་སོགས་པའི་མཚོན་དེ་ལྟ་བུ་དག་གི་མིང་ནི་སྔོན་ལན་འགའ་ཡང་མ་ཐོས་སོ། །དེས་སྨྲས་པ། དེ་དག་
ནི་མཚོན་མ་ཡིན་ནོ། །འོ་ན་དེ་དག་ཅི་ཡིན། རེ་ཞིག་གཎྜཱི་ཞེས་བྱ་བ་ནི་དེ་དག་གི་བརྡུང་བའོ། །གཎྜཱིའི་ཐེའུ་ཞེས་བྱ་བ་ནི་གང་གི་རྡུང་བར་བྱེད་པའོ། །དུས་ཀྱི་འཁོར་ལོ་ཞེས་བྱ་བ་ནི་དུས་ཡོངས་སུ་གཅོད་པར་བྱེད་པའོ། །སྣམ་སྦྱར་དང་། བདུན་པ་དང་། ལྔ་པ་ཞེས་བྱ་བ་དེ་དག་ནི་ཆོས་གོས་
དག་གི་མིང་ངོ་། །གཏུར་བུ་ཞེས་བྱ་བ་ནི་གང་དུ་དེ་དག་གཞུག་པའོ། །རྒྱ་ཅང་དང་། ཤུར་བུ་དང་། ལྕག་པོད་དང་། ཤུར་བུ་ཕྲེའུ་ཞེས་བྱ་བ་དེ་དག་ནི་སྐ་རགས་ཀྱི་མིང་ཡིན་གྱིས་ཁྱེད་ཅག་མ་སྡར་བར་ཡང་ཕྱིར་འདོང་ལ་གཞོམ་པར་བྱའོ་ཞེས་སྨྲས་ནས། དེ་དག་ཡང་ཕྱིར་ལོག་སྟེ་
ཆོམ་རྐུན་པའི་དམག་དཔོན་གྱིས་ཡ་གད་བཙུགས་ཏེ་འཛེག་པར་བརྩམས་པ་དང་། དེ་ན་རྒན་ཞུགས་ཞིག་མེལ་ཙེ་བར་བཞག་པ་དེས་ཆོམ་རྐུན་པའི་དམག་དཔོན་འཛེག་པ་དེ་མཐོང་ནས་རྒན་ཞུགས་དེས་བསམས་པ། གཡོན་ཅན་འདི་དག་ནི་གང་དག་གིས་བདག་ཅག་ལྷུང་བཟེད་

དང་ཆོས་གོས་ཕྲོགས་ཏེ་སྒྲེན་མོར་བཞག་པ་དག་ཡིན་གྱིས། གལ་ཏེ་འདི་དག་ལ་བཏང་སྙོམས་བྱས་ན་ཡང་འདི་དག་གིས་བདག་ཅག་ལྷུང་བཟེད་དང་ཆོས་གོས་ཕྲོགས་ཏེ་སྒྲེན་མོར་བཞག་པར་འགྱུར་བས་འདི་དག་བསྡིགས་པར་བྱའོ་སྙམ་ནས། རྒན་ཞུགས་དེས་དལ་བུས་ཁད་
ཀྱིས་ཁད་ཀྱིས་སོང་སྟེ་ཆོམ་རྐུན་པའི་དམག་དཔོན་དེའི་མགོར་གཎྜཱི་འཕངས་པ་དང་དེའི་ཀླད་པ་ཞོམ་ནས་དེ་བསྣུན་པ་དྲག་པོས་ཕོག་པས། སྡུག་བསྔལ་གྱི་ཚོར་བ་དག་གིས་ཉེན་ནས་ཚེགས་ཆེན་པོས་བབས་ཏེ་ཅུང་ཞིག་ཏུ་སོང་བ་དང་དུས་ལ་བབ་བོ། །རྒན་ཞུགས་དེས་ཆོམ་རྐུན་
པ་ཆོམ་རྐུན་པ་ཞེས་ཀུ་ཅོའི་སྒྲ་ཕྱུང་བ་དང་། དགེ་སློང་རྣམས་ཀྱིས་ཆོས་ཉན་པ་བཅད་དེ། ཁང་སྟེང་དུ་འཛེགས་ནས་སྨྲས་པ། ཆོམ་རྐུན་པ་དེ་དག་གར་དོང་རྒན་ཞུགས་ཀྱིས་སྨྲས་པ། ཕྱོགས་འདིར་ཡ་གད་བཙུགས་ཏེ་འཛེགས་པ་ན་ཁོ་བོས་བསྡིགས་ནས་བྱེར་རོ། །དགེ་སློང་
རྣམས་ཀྱིས་སྨྲས་པ། གལ་ཏེ་བྱེར་ན་ལེགས་སོ་ཞེས་དེ་དག་བབས་ཏེ། ཇི་ཙམ་ན་མཚན་མོ་ནམ་ནངས་པ་དང་། གཙུག་ལག་ཁང་གི་ཉེན་ཀོར་སོ་སོར་བརྟགས་པར་བརྩམས་ཏེ། ཆོམ་རྐུན་པ་དེ་དག་འཛེགས་པར་གྱུར་པའི་ཕྱོགས་དེ་གང་ཡིན་ཞེས་དེ་དག་གིས་སོ་སོར་བརྟགས་
པ་ན་ཁྲག་མཐོང་ངོ་། །དེ་དག་ཁྲག་རྗེས་སུ་དོང་བ་དང་ཆོམ་རྐུན་པའི་དམག་དཔོན་བསད་པ་མཐོང་ངོ་། །མཐོང་ནས་ཀྱང་བསླབ་པ་འཁྲུགས་པའི་འཇིགས་པས་སྐྲག་སྟེ་སྨྲ་བར་བརྩམས་པ། ཚེ་དང་ལྡན་པ་དག་བདག་ཅག་སྔོན་མ་བཅོམ་གྱི་བདག་ཅག་གང་གིས་ཕམ་པར་གྱུར་པའི་
ལྟུང་བ་བྱུང་བས་ད་ནི་བཅོམ་པར་གྱུར་ཏོ་ཞེས་དེ་དག་འགྱོད་པ་སྐྱེས་པའི་སྐབས་དེ་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ལ་ནི་ལྟུང་བ་མེད་དེ། ཡང་དགེ་སློང་གིས་ཅི་ནས་ཀྱང་འདི་ལ་བསྣུན་པས་བསྣུན་པར་བྱའོ་
སྙམ་པ་དེ་ལྟ་བུའི་སེམས་ཀྱིས་འཕངས་པར་མི་བྱ་བར་འདི་ལྟར་གློའམ་རྒྱབ་ལོགས་སུ་འཕང་བར་བྱ་ཞིང་བསྡིགས་པ་བསྐྱེད་པའི་ཕྱིར་ཚམ་ངམ་བྱའོ། །དགེ་སློང་གིས་ཅི་ནས་ཀྱང་བསྣུན་པས་བསྣུན་པར་བྱའོ་སྙམ་པ་དེ་ལྟ་བུའི་སེམས་ཀྱིས་འཕེན་པར་བྱེད་ན་འགལ་ཚབས་ཅན་དུ་འགྱུར་རོ། །

སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་
མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལ་དུས་གཞན་ན་སེམས་ཅན་ཞུགས་པར་གྱུར་ནས། དེ་ཟླ་བ་བརྒྱད་དམ་དགུ་འདས་ཏེ་བཙས་པ་ལས་ཁྱེའུ་ཞིག་བྱུང་ནས་དེ་བསྲིངས་ཤིང་བསྐྱེད་དེ་ཆེན་པོར་གྱུར་ཏོ། །ཇི་ཙམ་དུས་
གཞན་ཞིག་ན་ཁྱིམ་བདག་དེའི་ཉེ་དུ་ཟད་པར་གྱུར་ཅིང་ནོར་དང་ལོངས་སྤྱོད་ཀྱང་ཟད་པར་གྱུར། དེའི་ཆུང་མ་ཡང་དུས་ལ་བབ་ནས་དེས་བུ་ལ་སྨྲས་པ། བུ་ཁོ་བོས་ནི་རྒས་པའི་གནས་སྐབས་སུ་ནོར་བསྒྲུབ་ཏུ་འགྲོ་མི་ནུས་ཀྱིས་རབ་ཏུ་འབྱུང་དུ་འགྲོའོ། །བུས་སྨྲས་པ། ཡབ་གལ་ཏེ་དེ་ལྟ་ན་བདག་
ཀྱང་རབ་ཏུ་འབྱུང་ངོ་། །བུ་ལེགས་སོ། །ཞེས་དེས་ཁྱེའུ་ཁྲིད་དེ་རྒྱལ་བྱེད་ཀྱི་ཚལ་དུ་སོང་ནས་དགེ་སློང་གི་དྲུང་དུ་སོང་སྟེ་རྐང་པ་གཉིས་ལ་ཕྱག་འཚལ་ནས་སྨྲས་པ། འཕགས་པ་བདག་རབ་ཏུ་འབྱུང་བར་འཚལ་ལོ། །དགེ་སློང་དེས་སྨྲས་པ། ཅི་ཁྱེའུ་འདི་ཡང་རབ་ཏུ་འབྱུང་ངམ།
འཕགས་པ་རབ་ཏུ་འབྱུང་ངོ་། །དགེ་སློང་དེ་ཁྱེའུ་དེ་འདོད་པས་དེ་བུ་དང་བཅས་ཏེ་རབ་ཏུ་ཕྱུང་ངོ་། །ཆོས་ཉིད་ཀྱིས་ན་རྒན་པའི་མཐའ་ནས་རྙེད་པ་འཐོབ་ལ། གཞོན་པའི་མཐའ་ནས་ལས་སུ་བསྐོ་བ་ཡིན་པས་རྒན་ཞུགས་ཀྱི་བུ་རྟག་ཏུ་ལས་སུ་སྐོ་བར་བྱེད་ནས། དེས་ཕ་ལ་སྨྲས་པ། ཡབ་
བདག་ཅག་གཉིས་གང་ཅུང་ཟད་ཟིལ་གྱིས་ནོན་པ་དེ་ཐམས་ཅད་ཐོས་པ་ཉུང་བ་ལས་གྱུར་པ་ལགས་ཀྱིས་བཞེངས་ཤིག་དང་། སྐོལ་ཅག་གཉིས་ཡུལ་གཞན་དུ་བཞུད་ལ་ཐོས་པ་གཟུང་བར་བགྱིའོ། །རྒན་ཞུགས་ཀྱིས་སྨྲས་པ། བུ་ལེགས་ཀྱིས་འདོང་ངོ་ཞེས་དེ་གཉིས་ཡུལ་
གཞན་དུ་དོང་ངོ་། །འོན་ཀྱང་གཞོན་པའི་མཐའ་ཉིད་ནས་ལས་སུ་སྐོ་བས་དེ་གཉིས་སོན་མ་ཐག་ཁོ་ནར་ལས་སུ་སྐོ་བར་བསྐོས་པ་དང་། བུས་རྒན་ཞུགས་ལ་སྨྲས་པ། ཡབ་མཉན་ཡོད་ན་ལས་སུ་སྐོ་བ་མཆིས་སུ་ལགས་ཀྱང་དེ་ན་བཅོམ་ལྡན་འདས་ཆོས་ཀྱི་རྗེ་མངོན་སུམ་དུ་བཞུགས་ཤིང་དུས་དང་།

དུས་སུ་དགེ་སློང་ཆེ་གེ་མོ་ཞིག་གིས་ནི་དགྲ་བཅོམ་པ་ཉིད་མངོན་དུ་བྱས་སོ། །ཆེ་གེ་མོ་ཞིག་གིས་ནི་མི་སྡུག་པའི་བར་གྲུབ་བོ་ཞེས་ཤེས་པ་བརྡ་སྤྲོད་པ་ཡང་ཐོས་པར་འགྱུར། རྒྱལ་པོ་ཡང་བསྟན་པ་ལ་ཤིན་ཏུ་དད་ཅིང་བཙུན་མོ་ཕྲེང་ལྡན་མ་དང་། རྒྱལ་རིགས་དབྱར་ཚུལ་མ་
དང་། བླ་མཁྱེན་དྲང་སྲོང་བྱིན་དང་། རྙིང་པ་དང་། དགེ་བསྙེན་མ་ས་ག་དང་། རི་དགས་འཛིན་གྱི་མ་དང་། གཞན་ཡང་དད་པ་ཅན་མང་དུ་མཆིས་པས། དེ་ན་ཟང་ཟིང་གི་ལོངས་སྤྱོད་དང་། ཆོས་ཀྱི་ལོངས་སྤྱོད་ཆེན་པོ་ཡང་མཆིས་ཀྱིས་དེར་བཞུད་དོ་ཞེས་སྨྲས་ནས། དེ་གཉིས་ཅི་དགའ་བར་
ལྗོངས་སུ་འཁོད་ནས་མཉན་ཡོད་ག་ལ་བ་དེར་རྒྱུ་ཞིང་དོང་བ་ན་མཐར་གྱིས་རྒྱུ་ཞིང་འདོང་བའི་ཚེ་མཉན་ཡོད་དུ་ཕྱིར་ཕྱིན་ཏོ། །ཇི་ཙམ་ན་རྒྱལ་བྱེད་ཀྱི་ཚལ་དང་ཉེ་བར་ཕྱིན་པ་ན་གཎྜཱི་ཡང་བརྡུངས་ནས་བུས་སྨྲས་པ། ཡབ་གཙུག་ལག་ཁང་དུ་གཎྜཱི་བརྡུངས་ཀྱིས་མྱུར་བ་མྱུར་བར་བཞུད་དོ། །
རྒན་ཞུགས་དེ་རྒན་པར་གྱུར་པས་ཤིན་ཏུ་ངལ་ཞིང་འགྲོ་མི་ནུས་པས་དེ་དལ་བུས་འགྲོ་བ་ན་བུས་དེའི་གཉའ་བ་ནས་བཟུང་སྟེ་ཕུལ་བ་དང་། རྒན་ཞུགས་དེས་མྱུར་བ་མྱུར་བར་འགྲོ་བར་བརྩམས་སོ། །བུས་བསམས་པ། ཐབས་འདི་ནི་བཟང་པོ་ཞིག་ཡིན་གྱིས་ཡང་དབུལ་བར་བྱའོ་སྙམ་
ནས། བུ་དེས་རྒན་ཞུགས་དེ་ཡང་དེ་བཞིན་དུ་ཕུལ་བ་དང་། རྒན་ཞུགས་དེ་ས་ལ་ཁས་བུབ་ཏུ་སྒྱེལ་ནས་དེའི་ཁ་ཕང་ལོས་གློགས་པའི་སས་གང་སྟེ་དུས་ལ་བབ་བོ། །བུ་དེས་ངུད་མོས་བཏབ་སྟེ། རྒན་ཞུགས་ཀྱི་རོ་དེ་ལམ་གྱི་མཐའ་གཅིག་ཏུ་བོར་རོ། །དེ་ནས་བུ་དེས་ལྷུང་བཟེད་དང་
ཆོས་གོས་ཁྱེར་ཏེ་རྒྱལ་བྱེད་ཀྱི་ཚལ་དུ་སོང་བ་དང་། དགེ་སློང་རྣམས་ཀྱིས་དེ་མཐོང་ནས་སྨྲས་པ། རྒན་ཞུགས་ཀྱི་བུ་འོངས་པ་ལེགས་སོ། །འོངས་པ་ལེགས་སོ། །ཁྱོད་ཀྱི་རྒན་ཞུགས་དེ་ག་ལ་འདུག་ཅེས་དྲིས་པ་དང་། གསར་བུ་དེས་ངུ་བར་བརྩམས་སོ། །དགེ་སློང་རྣམས་ཀྱིས་
སྨྲས་པ། བུ་ཅིའི་ཕྱིར་ངུ་བར་བྱེད། གསར་བུ་དེས་སྨྲས་པ། བདག་གི་རྒན་ཞུགས་དེ་དུས་ལ་བབ་བོ། །དགེ་སློང་དེ་དག་གིས་སྨྲས་པ། བུ་འདུ་བྱེད་ཐམས་ཅད་ཀྱི་ཆོས་དེ་ལྟ་བུ་ཡིན་ལ་ཁྱོད་ནི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་ཡིན་པས་མྱ་ངན་མ་བྱེད་ཅིག །

གསར་བུ་དེས་སྨྲས་པ། དེ་བདག་གིས་བསད་དོ། །དགེ་སློང་དེ་དག་གིས་སྨྲས་པ། བུ་འོ་ན་ཁྱོད་ཀྱིས་མཚམས་མེད་པའི་ལས་གང་ཡིན་པ་ཡང་བྱས་ལ་ཕམ་པར་འགྱུར་བའི་ལྟུང་བ་གང་ཡིན་པ་ཡང་བྱུང་བས་ཡུན་རིང་པོར་སེམས་ཅན་དམྱལ་བ་ཆེན་པོ་མནར་
མེད་པར་གནས་པར་འགྱུར་བས་ད་ངུ་བའི་རིགས་སོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་དེ། ཡང་དགེ་སློང་ལམ་དུ་ཞུགས་པས་དགེ་སློང་
ལམ་གྱིས་དུབ་པ་ཕུལ་བར་མི་བྱའོ། །ངས་དགེ་སློང་ལམ་དུ་ཞུགས་པའི་ཀུན་དུ་སྤྱོད་པའི་ཆོས་དག་བཅའ་བར་བྱ་སྟེ། དགེ་སློང་ལམ་དུ་ཞུགས་པས་དགེ་སློང་ལམ་གྱིས་དུབ་པ་ངལ་སོར་གཞུག་པར་བྱ། ཆོས་གོས་གསུམ་དང་། ལྷུང་བཟེད་དང་། ཆུ་ཚགས་དང་། ལྷུང་བཟེད་
ཀྱི་སྣོད་དང་། བར་བུར་སྣོད་ཀྱི་རྫས་བླང་བར་བྱའོ། །དུས་ཤེས་པར་བྱ་སྟེ། གལ་ཏེ་འགྲོ་ནུས་ན་དེ་ལྟ་ན་ལེགས། གལ་ཏེ་འགྲོ་མི་ནུས་ན་ཆེས་སྔར་སོང་སྟེ། ལྷུང་བཟེད་བཀྲུ་བར་བྱ། གོ་གཞག་པར་བྱ། སྣོད་དག་བྱིན་ལེན་བྱེད་དུ་བཅུག་ནས་སོ་སོར་བརྟག་པར་བྱའོ། །འོན་ཏེ་འོང་མི་
ནུས་པ་ན་ཟན་མནོས་ཏེ་བསུ་བར་བྱའོ། །དུས་མ་ཡིན་ན་སྐོམ་གྱིས་བསུ་བར་བྱའོ། །དགེ་སློང་ལམ་དུ་ཞུགས་པས་ཀུན་ཏུ་སྤྱོད་པའི་ཆོས་ཇི་ལྟར་བཅས་པ་དག་ཡང་དག་པར་བསླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་
ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་རྒན་ཞུགས་ཀྱི་བུ་འདིས། ཕ་སྲོག་དང་ཕྲལ་ཡང་མཚམས་མ་མཆིས་པའི་ཁ་ན་མ་ཐོ་བས་ཀྱང་མ་རེག་ལ། ཕམ་པར་འགྱུར་བའི་ལྟུང་བ་ཡང་མ་བྱུང་བ་ལ་གཟིགས། བཅོམ་ལྡན་
འདས་ཀྱིས་བཀའ་སྩལ་པ། དགེ་སློང་དག་ད་ལྟར་འབའ་ཞིག་ཏུ་མ་ཟད་དེ་འདི་ལྟར་འདས་པའི་དུས་ན་ཡང་འདིས་ཕ་སྲོག་དང་ཕྲལ་ཡང་མཚམས་མེད་པའི་ཁ་ན་མ་ཐོ་བས་མ་རེག་སྟེ་དེ་ཉོན་ཅིག །དགེ་སློང་དག་སྔོན་བྱུང་བ་འདས་པའི་དུས་ན་རི་བྲགས་ཤིག་ན་བཙོ་བླག་མཁན་ཞིག་

འདུག་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལས་བུ་བྱུང་ནས་དེ་བསྲིངས་ཤིང་བསྐྱེད་དེ་ཆེན་པོར་གྱུར་ཏོ། །ཇི་ཙམ་
དུས་གཞན་ཞིག་ན་རི་བྲགས་དེར་དུས་སྟོན་བྱུང་ནས་དེ་ལ་གོས་བཀྲུ་བཤལ་བྱ་བ་མང་པོ་དག་བྱུང་བ་དང་དེས་བུ་ལ་སྨྲས་པ། བུ་གོས་མང་པོ་དག་བཀྲུ་བཤལ་བྱ་དགོས་པས་ཁོ་བོ་ཁྱིམ་དུ་སོང་སྟེ་ཟན་ཟ་མི་ནུས་ཀྱིས་ཚུར་ཤོག་གོས་དག་ཁྱེར་ཏེ་འདོང་ངོ་། །ཕྱིར་སོང་ལ་ཟན་ཁྱེར་ཏེ་ཤོག་ཤིག །
དེ་བུ་དང་ལྷན་ཅིག་གོས་དག་ཁྱེར་ཏེ་སོང་ངོ་། །བུ་ཕྱིར་སོང་སྟེ་ཟན་ཁྱེར་ཏེ་འོངས་ནས་དེས་ཟན་ཟོས་ཏེ་སྨྲས་པ། བུ་ཁོ་བོ་ངལ་གྱིས་ཉལ་ལོ། །ཁྱོད་རེ་ཞིག་གོས་དག་བཀྲུ་བཤལ་གྱིས་ཤིག །བུས་སྨྲས་པ། དེ་ལྟར་བགྱིའོ། །བཙོ་བླག་མཁན་དེ་ཕྱོགས་གཅིག་ཏུ་གློས་ཕབ་སྟེ་
གཉིད་ལོག་གོ། །དེ་སྤྱི་ཅེར་ཞིག་ཡིན་པས་དེའི་མགོ་ལ་སྦྲང་བུ་ཆགས་སོ། །ཇི་ཙམ་ན་བཙོ་བླག་མཁན་གྱི་བུ་དེས་གོས་དག་བཀྲུ་བཤལ་བྱས་ནས་ཕའི་གན་དུ་སོང་བ་དང་ཕའི་མགོ་ལ་སྦྲང་བུ་ཆགས་པ་མཐོང་ནས་དེས་བསྐྲད་པར་བརྩམས་པ་དང་། སྦྲང་བུ་ཁྲག་གིས་མྱོས་པ་འཕུར་
དུ་མ་བཏུབ་ནས་བུ་དེ་མི་བཟོད་པ་སྐྱེས་ཏེ་བསམས་པ། སྦྲང་བུ་འདིས་བདག་གི་ཕ་གསོན་བཞིན་དུ་ཁྲག་འཐུང་བར་བྱེད་ཀྱིས་གསད་པར་བྱའོ་སྙམ་ནས། བུ་དེས་དེ་ལ་སྤང་ལེབ་ཀྱིས་བསྣུན་པ་དང་། སྦྲང་བུ་དེ་ནི་བྲོས་ཏེ་སོང་གི་ཕའི་ཀླད་པ་ཞོམ་ནས་དེས་དུས་ལ་བབ་པ་དང་། ལྷས་ཚིགས་
སུ་བཅད་པ་སྨྲས་པ། དགྲ་བོ་བློ་གྲོས་ལྡན་པ་མཆོག་ཡིན་ཏེ། །མཛའ་བཤེས་བློ་གྲོས་བྲལ་བ་དེ་ལྟ་མིན། །བློ་གྲོས་ཆུང་ངུས་སྦྲང་བུ་གསད་སྙམ་ནས། །ཐོ་བས་ཕ་ཡི་ཀླད་པ་བཅོམ་པར་གྱུར། །དགེ་སློང་དག་ཇི་སྙམ་དུ་སེམས། །དེའི་ཚེ་དེའི་དུས་ན་བཙོ་བླག་མཁན་གང་
ཡིན་པ་དེ་ནི་རྒན་ཞུགས་འདི་ཉིད་ཡིན་ནོ། །དེའི་ཚེ་དེའི་དུས་ན་བཙོ་བླག་མཁན་གྱི་བུ་གང་ཡིན་པ་དེ་ནི་རྒན་ཞུགས་ཀྱི་བུ་འདི་ཉིད་ཡིན་ཏེ། འདིས་དེའི་ཚེ་ཡང་ཕ་སྲོག་དང་ཕྲལ་ཡང་མཚམས་མེད་པའི་ཁ་ན་མ་ཐོ་བས་མ་རེག་ལ། འདིས་ད་ལྟར་ཡང་ཕ་སྲོག་དང་ཕྲལ་ཡང་མཚམས་མེད་པའི་

ཁ་ན་མ་ཐོ་བས་ཀྱང་མ་རེག་ལ་ཕམ་པར་འགྱུར་བའི་ལྟུང་བ་ཡང་མ་བྱུང་ངོ་། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ནི་ལྟུང་བ་མེད་དོ། །ཕམ་པར་འགྱུར་བ་གསུམ་པ་རྫོགས་སྷོ།། །།སངས་
རྒྱས་བཅོམ་ལྡན་འདས་ཡངས་པ་ཅན་ན་སྤྲེའུ་རྫིང་གི་འགྲམ་ན་ཁང་པ་བརྩེགས་པའི་ཁང་བཟངས་ན་བཞུགས་སོ། །དེའི་ཚེ་ན་ཉ་པ་ལྔ་བརྒྱ་ཆུ་ཀླུང་ཡིད་འོང་ལྡན་ལ་རྟེན་ཅིང་འཁོད་དོ། །དེ་དག་ལ་རྒྱ་མོ་སྤྱོད་པ་དང་། སྤྱོད་པ་ཆེན་མོ་ཞེས་བྱ་བ་གཉིས་ཤིག་ཡོད་དོ། །དེ་དག་ལན་འགའ་
ནི་རྒྱ་མོ་སྤྱོད་པ་འཛུད་པར་བྱེད་ལ། ལན་འགའ་ནི་སྤྱོད་པ་ཆེན་མོ་འཛུད་པར་བྱེད་དེ། གང་གི་ཚེ་ཉ་དག་ཉོ་བ་མེད་པ་དེའི་ཚེ་ནི་རྒྱ་མོ་སྤྱོད་པ་འཛུད་པར་བྱེད་ལ། གང་གི་ཚེ་ཉ་དག་ཉོ་བ་ཡོད་པ་དེའི་ཚེ་ནི་སྤྱོད་པ་ཆེན་མོ་འཛུད་པར་བྱེད་དོ། །ཇི་ཙམ་དུས་གཞན་ཞིག་ན་ཡངས་པ་ཅན་དུ་དུས་
སྟོན་བྱུང་ནས། དེ་དག་གིས་རྒྱ་མོ་གཉིས་ཀ་བཅུག་སྟེ། ཉིས་བརྒྱ་ལྔ་བཅུས་ནི་རྒྱ་མོ་སྤྱོད་པ་བཅུག །ཉིས་བརྒྱ་ལྔ་བཅུས་ནི་སྤྱོད་པ་ཆེན་མོ་བཅུག་གོ། །གང་དག་གིས་རྒྱ་མོ་སྤྱོད་པ་བཅུག་པ་དེ་དག་གིས་ནི་ཉ་དང་། རུས་སྦལ་དང་། སྦལ་པ་དང་། ཆུ་སྲིན་བྱིས་པ་གསོད་དང་།
ཉ་ཁྱི་བ་ལ་སོགས་པ་མང་པོ་དག་འདི་ལྟ་སྟེ། དཔེར་ན་ཏིལ་དང་། འབྲས་ཐུག་པོ་ཆེ་དང་། རྒྱ་ཤུག་དང་། རྒྱ་སྲན་ལ་སོགས་པ་བཞིན་དུ་ཕུང་པོ་ཆེན་པོར་རྣམ་པར་བཞག་གོ། །གང་དག་གིས་རྒྱ་མོ་སྤྱོད་པ་ཆེན་མོ་བཅུག་པ་དེ་དག་གིས་ནི་རྒྱ་མཚོ་ཆེན་པོ་ནས་ཆུ་ཀླུང་ཡིད་འོང་ལྡན་དུ་
ཞུགས་པ་ཆུ་སྲིན་ཉའི་རིགས་བོང་ཚོད་ཆེན་པོ་ཉལ་བ་ཟིན་ནས་དེ་དག་གིས་དེ་དྲང་བར་བརྩམས་སོ། །དེ་དག་གིས་དྲངས་པ་ན་དེ་སད་ནས་ཉ་པ་ཉིས་བརྒྱ་ལྔ་བཅུ་པོ་དེ་དག་དང་རྒྱ་མོ་སྤྱོད་པ་ཆེན་མོ་ཁྱེར་ཏེ་རྒྱུན་ཕྱོགས་སུ་ཞུགས་སོ། །ཉ་པ་དེ་དག་གིས་ཉ་པ་ཉིས་བརྒྱ་ལྔ་བཅུ་པོ་
གཞན་དག་ལ་ཤེས་ལྡན་དག་རྒྱ་མོ་སྤྱོད་པ་ཆེན་མོ་དང་བདག་ཅག་ཁྱེར་གྱིས་ར་མདའ་ཟློག་ཤིག་ཅེས་བྱས་སོ། །དེ་དག་གིས་ཐོས་ནས་ཉ་པ་ཉིས་བརྒྱ་ལྔ་བཅུ་པོ་གཞན་དག་ཀྱང་ལྷགས་ཏེ་དེ་ཉིད་ལ་རུབ་པ་དང་དེས་ཉ་པ་ལྔ་བརྒྱ་དང་རྒྱ་མོ་སྤྱོད་པ་ཆེན་མོ་ཁྱེར་ཏེ་རྒྱུན་ཕྱོགས་སུ་

ཞུགས་ནས་གཟུང་བར་མ་ནུས་སོ། །སྐྱབས་མེད་པ་དེ་དག་གིས་ཀུན་དུ་ཤེས་ལྡན་དག་རྒྱ་མོ་སྤྱོད་པ་ཆེན་མོ་དང་བདག་ཅག་ཁྱེར་གྱིས་གྲོགས་གྱིས་ཤིག་ཅེས་ར་མདའ་བ་བཟློག་པ་དང་ལས་མ་མཐོང་བའི་མི་བ་ལང་རྫི་དག་དང་། ཕྱུགས་རྫི་དག་དང་། ཤིང་ཐུན་དག་དང་། རྩྭ་ཐུན་དག་དང་།
ལམ་གྱིས་འཚོ་བ་དག་དང་། ལམ་གོལ་བས་འཚོ་བའི་མི་དག་དང་། གཞན་ཡང་སྲོག་ཆགས་བརྒྱ་སྟོང་ཕྲག་དུ་མ་དག་ལོག་ནས་དེ་དག་གི་ལུས་སྨས་པ་དང་། རྣམ་པར་སྨས་པ་དག་གིས་རྒྱ་མོ་རལ་པ་དང་རབ་ཏུ་རལ་པས་ཆུ་སྲིན་དེ་ཆུ་ནས་སྐམ་ལ་ཕྱུང་ངོ་། །དེ་ལ་མགོ་
བཅྭ་བརྒྱད་དང་། མིག་སུམ་བཅུ་རྩ་དྲུག་ཡོད་དོ། །དེའི་མགོ་ལ་ལ་ནི་གླང་པོ་ཆེའི་མགོ་འདྲ། ལ་ལ་ནི་རྟའི་མགོ་འདྲ། ལ་ལ་ནི་རྔ་མོའི་མགོ་དང་། བོང་བུའི་མགོ་དང་། བ་ལང་གི་མགོ་དང་། སྤྲེའུའི་མགོ་དང་། སེང་གེའི་མགོ་དང་། སྟག་གི་མགོ་དང་། དོམ་གྱི་མགོ་
དང་། དྲེད་མོའི་མགོ་དང་། གུང་གི་མགོ་དང་། བྱི་ལའི་མགོ་དང་། རའི་མགོ་དང་། ལུག་གི་མགོ་དང་། རི་དགས་ཀྱི་མགོ་དང་། མ་ཧེའི་མགོ་དང་། ཕག་གི་མགོ་དང་། ཁྱིའི་མགོ་འདྲའོ། །ཀུན་དུ་ཆུ་ཀླུང་ཡིད་འོང་ལྡན་པའི་ཉ་པ་ལྔ་བརྒྱས་རྒྱ་མཚོ་ཆེན་པོ་
ནས་ཆུ་ཀླུང་ཡིད་འོང་ལྡན་དུ་ཞུགས་པའི་ཆུ་སྲིན་ཉའི་རིགས་བོང་ཚོད་ཆེན་པོ་ཞིག་རྒྱ་མོ་སྤྱོད་པ་ཆེན་མོས་ཟིན་ཏེ། ཆུ་ནས་སྐམ་ལ་ཕྱུང་ཞིང་དེ་ལ་མགོ་བཅྭ་བརྒྱད་དང་མིག་སུམ་བཅུ་རྩ་དྲུག་ཡོད་དོ་ཞེས་སྒྲས་ཁྱབ་པར་གྱུར་ཏོ། །དེ་ཐོས་ནས་སྲོག་ཆགས་བརྒྱ་སྟོང་ཕྲག་དུ་མ་དག་
ཆུ་ཀླུང་ཡིད་འོང་ལྡན་གྱི་འགྲམ་དུ་ལྷགས་ཏེ། ཁ་ཅིག་ནི་ལྟད་མོ་སྐྱེས་པར་གྱུར། ཁ་ཅིག་ནི་སྔོན་གྱི་དགེ་བའི་རྩ་བ་དག་གིས་བསྐུལ་བར་གྱུར་ཏོ། །རྫོགས་བྱེད་ལ་སོགས་པ་སྟོན་པ་དྲུག་པོ་ཡངས་པ་ཅན་ན་རྟེན་ཅིང་གནས་པ་དེ་དག་ཀྱང་ལྟད་མོ་སྐྱེས་ཏེ་དེར་ལྷགས་སོ། །
སྐྱེ་བོའི་ཚོགས་ཆེན་པོ་ཡང་ཡ་མཚན་སྐྱེས་ཏེ་མིག་ཚུགས་སུ་རྟོག་ཅིང་ཤེས་ལྡན་དག་འདིའི་མགོ་ལ་ལ་ནི་གླང་པོ་ཆེའི་མགོ་འདྲལ་དེ་ནས་རྟོག་པར་བྱེད། འདིའི་མགོ་ལ་ལ་ནི་ཁྱིའི་བར་གྱི་མགོ་འདྲ་ལ་དེ་ནས་རྟོག་པར་བྱེད་དོ་ཞེས་ཀྱང་ཟེར་རོ། །དེའི་སྐབས་སུ་སངས་རྒྱས་བཅོམ་

ལྡན་འདས་རྣམས་ལ་ནི་མི་མཁྱེན་པ་དང་། མི་གཟིགས་པ་དང་། མ་རིག་པ་དང་། རྣམ་པར་མི་མཁྱེན་པ་ཅུང་ཟད་ཀྱང་མི་མངའ་བས་སངས་རྒྱས་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ། འཇིག་རྟེན་ལ་ཕན་པར་ཞུགས་པ། བསྲུང་བ་
གཅིག་པུ་པ། ཉག་གཅིག་དཔའ་བ། གཉིས་པ་མེད་པ། གཉིས་སུ་མི་གསུང་བ། ཞི་གནས་དང་ལྷག་མཐོང་གིས་བཞུགས་པ་རིག་པ་གསུམ་གསལ་བར་མཛད་པ། བསླབ་པ་གསུམ་ལ་ལེགས་པར་བསླབས་པ། དུལ་བའི་གནས་གསུམ་གྱི་གཞི་ལ་
མཁས་པ། ཆུ་བོ་བཞི་ལས་རྒལ་བ། རྫུ་འཕྲུལ་གྱི་རྐང་པ་བཞིས་སྤྱོད་པའི་གཞི་ལ་ལེགས་པར་གནས་པ། བསྡུ་བའི་དངོས་པོ་བཞི་ལ་ཡུན་རིང་པོ་ནས་ཡོངས་སུ་སྦྱང་བ་མཛད་པ། མི་འཇིགས་པ་བཞིས་བསྙེངས་པ་མི་མངའ་བ། ཡན་ལག་ལྔ་སྤངས་པ། འགྲོ་
བ་ལྔ་ལས་ཡང་དག་པར་འདས་པ། ཡན་ལག་དྲུག་དང་ལྡན་པ། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པ། རྟག་ཏུ་གནས་པ་དྲུག་གིས་གནས་པ། བྱང་ཆུབ་ཀྱི་ཡན་ལག་བདུན་གྱི་མེ་ཏོག་གིས་ཕྱུག་པ། ལམ་གྱི་ཡན་ལག་བརྒྱད་སྟོན་པ། མཐར་གྱིས་
སྙོམས་པར་འཇུག་པ་དགུ་ལ་མཁས་པ། སྟོབས་བཅུའི་སྟོབས་དང་ལྡན་པ། ཕྱོགས་བཅུར་སྙན་པས་ཡང་དག་པར་རྒྱས་པ། བརྒྱ་ཕྲག་བཅུར་དབང་སྒྱུར་བ་ལས་ཁྱད་པར་དུ་འཕགས་པ་རྣམས་ཀྱི་ཆོས་ཉིད་ནི་ཉིན་ལན་གསུམ། མཚན་ལན་གསུམ་སངས་རྒྱས་ཀྱི་
སྤྱན་གྱིས་འཇིག་རྟེན་ལ་རྣམ་པར་གཟིགས་ནས་གང་ནི་ཉམས་པར་གྱུར། གང་ནི་འཕེལ་བར་གྱུར། གང་ནི་གནོད་པར་གྱུར། གང་ནི་ཉམ་ང་བར་གྱུར། གང་ནི་མི་བདེ་བར་གྱུར། གང་ནི་གནོད་པ་དང་། ཉམ་ང་བ་དང་། མི་བདེ་བར་གྱུར། གང་ནི་
ངན་སོང་ལ་གཞོལ། གང་ནི་ངན་སོང་ལ་བབ། གང་ནི་ངན་སོང་ལ་འབབ། ངས་གང་ནི་ངན་སོང་གི་ལམ་ནས་བསླངས་ཏེ་མཐོ་རིས་དང་། ཐར་པ་དང་། འབྲས་བུ་ལ་གཞག་པར་བྱ། འདོད་པའི་འདམ་དུ་བྱིང་བ་གང་གི་ལག་ནས་ནི་དྲང་བར་བྱ། འཕགས་

པའི་ནོར་གྱི་དབྱིག་དང་བྲལ་བ་གང་ནི་འཕགས་པའི་ནོར་གྱི་དབང་ཕྱུག་ལ་གཞག་པར་བྱ། གང་གི་སངས་རྒྱས་འབྱུང་བས་བརྒྱན་པའི་འཇིག་རྟེན་ནི་འབྲས་བུ་དང་བཅས་པར་བྱ། གང་གི་དགེ་བའི་རྩ་བ་དག་མ་བསྐྱེད་པ་ནི་བསྐྱེད་པར་བྱ། གང་གི་དགེ་བའི་རྩ་བ་དག་
བསྐྱེད་པ་ནི་ཡོངས་སུ་སྨིན་པར་བྱ། ཡོངས་སུ་སྨིན་པ་གང་ཡིན་པ་ནི་རྣམ་པར་གྲོལ་བར་བྱ་ཞེས་མཁྱེན་པ་དང་། གཟིགས་པ་འཇུག་གོ། །སྨྲས་པ། ཆུ་སྲིན་གནས་ཀྱི་དུག་ཅན་པ། །དུས་ལས་འདའ་བར་འགྱུར་སྲིད་ཀྱི། །སངས་རྒྱས་གདུལ་ལ་བྱམས་
པ་ནི། །དུས་ལས་འདའ་བར་མི་འགྱུར་རོ། །ཇི་ལྟར་མ་ནི་བུ་སྡུག་གཅིག་པུ་ལ། །རྟོག་ཅིང་དེ་སྲོག་སྲུང་བར་བྱེད་པ་ལྟར། །དེ་བཞིན་གཤེགས་པའང་གདུལ་བའི་སྐྱེ་བོ་ལ། །རྟོག་པར་མཛད་ཅིང་དེ་སྲོག་སྲུང་བར་མཛད། །ཀུན་མཁྱེན་རྒྱུད་ལ་མངའ་
བའི་ཐུགས་རྗེ་ཡི། །གཞོན་མ་གདུལ་བའི་བེའུ་ཚོལ་མི་སྐྱོ་སྟེ། །སྲིད་དང་ངན་འགྲོས་ཉམས་ལ་བྱམས་པ་ནི། །རབ་འབྱམས་བེའུ་ལ་བྱམས་པའི་བ་བཞིན་ནོ། །བཅོམ་ལྡན་འདས་ཀྱིས་དགོངས་པ། ཆུ་སྲིན་ཉའི་རིགས་གནོད་པ་དང་། ཉམ་ང་བ་དང་།
མི་བདེ་བ་ཐོབ་པར་གྱུར་པ་འདི་ནི་སྔོན་གྱི་སངས་རྒྱས་དག་ལ་བྱ་བ་ལྷག་པར་བྱས་པ་ཡིན་གྱིས། ངས་ཆུ་སྲིན་ཉའི་རིགས་འདི་ལ་རྟེན་ཏེ་འདུལ་བར་གྱུར་པའི་རྒྱ་མོ་ཆེན་མོ་དྲང་བར་བྱས། དེའི་ཕྱིར་ཆུ་ཀླུང་ཡིད་འོང་ལྡན་གྱི་འགྲམ་དུ་འགྲོའོ་སྙམ་མོ། །སངས་
རྒྱས་བཅོམ་ལྡན་འདས་འཚོ་ཞིང་བཞུགས་ལ་གསོན་ཞིང་གཞེས་པ་རྣམས་ཀྱིས་ཆོས་ཉིད་ནི་གདུལ་བར་གྱུར་པའི་སྐྱེ་བོ་ལ་རྗེས་སུ་ཐུགས་བརྩེ་བས་དུས་དང་དུས་སུ་སེམས་ཅན་དམྱལ་བ་རྒྱུར་གཤེགས་པ་དང་། དུད་འགྲོ་རྒྱུ་བ་དང་། །ཡི་དགས་རྒྱུ་བ་
དང་། ལྷ་རྒྱུ་བ་དང་། ལྗོངས་རྒྱུ་བ་དང་། ཆུ་ཀླུང་རྒྱུ་བ་དང་། རི་རྒྱུ་བ་དང་། དུར་ཁྲོད་རྒྱུ་བ་དང་། གཙུག་ལག་ཁང་རྒྱུར་གཤེགས་པས་དོན་འདིར་ནི་སངས་རྒྱས་བཅོམ་ལྡན་འདས་ཆུ་ཀླུང་རྒྱུར་གཤེགས་པར་བཞེད་ནས་འཛུམ་པ་མཛད་དོ། །

ཆོས་ཉིད་ཀྱིས་ན་གང་གི་ཚེ་སངས་རྒྱས་བཅོམ་ལྡན་འདས་རྣམས་འཛུམ་པ་མཛད་པ་དེའི་ཚེ་ན་ཞལ་ནས་འོད་ཟེར་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། བཙོད་ཀ་དང་། ཤེལ་དང་། དངུལ་གྱི་ཁ་དོག་ལྟ་བུ་དག་བྱུང་ནས་
ཁ་ཅིག་ནི་འོག་ལོགས་སུ་འདོང་། ཁ་ཅིག་ནི་སྟེང་ལོགས་སུ་འདོང་བས་གང་དག་འོག་ལོགས་སུ་འདོང་བ་དེ་དག་ནི་སེམས་ཅན་དམྱལ་བ་ཡང་སོས་དང་། ཐིག་ནག་དང་། བསྡུས་གཞོམ་དང་། ངུ་འབོད་དང་། ངུ་འབོད་ཆེན་པོ་དང་། ཚ་བ་དང་། རབ་ཏུ་ཚ་བ་དང་།
མནར་མེད་པ་དང་། ཆུ་བུར་ཅན་དང་། ཆུ་བུར་རྡོལ་བ་དང་། སོ་ཐམས་ཐམས་དང་། ཀྱི་ཧུད་ཟེར་དང་། ཨ་ཆུ་ཟེར་བ་དང་། ཨུཏྤལ་ལྟར་གས་པ་དང་། པད་མ་ལྟར་གས་པ་དང་། པད་མ་ལྟར་གས་པ་ཆེན་པོར་དོང་སྟེ། སེམས་ཅན་དམྱལ་བ་ཚ་བ་གང་དག་
ཡིན་པ་དེ་དག་ཏུ་ནི་བསིལ་བར་གྱུར་ཏེ་འབབ་པར་བྱེད་ལ། སེམས་ཅན་དམྱལ་བ་གྲང་བ་གང་དག་ཡིན་པ་དེ་དག་ཏུ་ནི་དྲོ་བར་གྱུར་ཏེ་འབབ་པར་བྱེད་དོ། །དེས་སེམས་ཅན་དེ་དག་གི་གནོད་པའི་བྱེ་བྲག་དག་རྒྱུན་གཅོད་པར་བྱེད་ཅིང་། དེ་དག་འདི་སྙམ་དུ་ཤེས་ལྡན་དག་ཅི་
བདག་ཅག་འདི་ནས་ཤི་འཕོས་སམ། འོན་ཏེ་གཞན་དུ་སྐྱེས་སྙམ་དུ་སེམས་སོ། །དེ་དག་དད་པ་བསྐྱེད་པར་བྱ་བའི་ཕྱིར་བཅོམ་ལྡན་འདས་ཀྱིས་སྤྲུལ་པ་གཏོང་བར་མཛད་དེ། དེ་དག་གིས་སྤྲུལ་པ་མཐོང་ནས་འདི་སྙམ་དུ་ཤེས་ལྡན་དག་བདག་ཅག་འདི་ནས་ཤི་འཕོས་
པ་ཡང་མ་ཡིན་ལ། གཞན་དུ་སྐྱེས་པ་ཡང་མ་ཡིན་ཏེ། འདི་ལྟར་སེམས་ཅན་སྔོན་མ་མཐོང་བ་འདིའི་མཐུས་བདག་ཅག་གི་གནོད་པའི་བྱེ་བྲག་དག་རྒྱུན་ཆད་པར་གྱུར་ཏོ་སྙམ་དུ་སེམས་སོ། །དེ་དག་སྤྲུལ་པ་ལ་སེམས་མངོན་པར་དད་པར་གྱུར་ནས། སེམས་
ཅན་དམྱལ་བ་མྱོང་བར་འགྱུར་བའི་ལས་དེ་ཟད་པར་བྱས་ནས་གང་དུ་བདེན་པ་དག་གི་སྣོད་དུ་གྱུར་པར་འགྱུར་བའི་ལྷ་དང་མི་རྣམས་ཀྱི་ནང་དུ་ཉིང་མཚམས་སྦྱོར་བ་ལེན་པར་བྱེད་དོ། །གང་དག་སྟེང་ལོགས་སུ་འདོང་བ་དེ་དག་ནི་རྒྱལ་ཆེན་བཞི་པ་དང་། སུམ་བཅུ་རྩ་གསུམ་པ་དང་།

འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་དང་། ཚངས་རིས་དང་། ཚངས་པའི་མདུན་ན་འདོན་དང་། ཚངས་ཆེན་དང་། འོད་ཆུང་དང་། ཚད་མེད་འོད་དང་། འོད་གསལ་དང་། དགེ་ཆུང་དང་། ཚད་མེད་དགེ་དང་། དགེ་
རྒྱས་དང་། སྤྲིན་མེད་དང་། བསོད་ནམས་སྐྱེས་དང་། འབྲས་བུ་ཆེ་དང་། མི་ཆེ་དང་། མི་གདུང་བ་དང་། གྱ་ནོམ་སྣང་དང་། ཤིན་ཏུ་མཐོང་དང་། འོག་མིན་གྱི་ལྷ་རྣམས་ཀྱི་ནང་དུ་དོང་ནས་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་ཞེས་བྱ་
བའི་སྒྲ་སྒྲོགས་པར་བྱེད་ཅིང་ཚིགས་སུ་བཅད་པ་གཉིས་པོ། །བརྩམ་པར་བྱ་ཞིང་འབྱུང་བར་བྱ། །སངས་རྒྱས་བསྟན་ལ་འཇུག་པར་བྱ། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །གང་ཞིག་རབ་ཏུ་བག་ཡོད་པར། །ཆོས་
འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་བྱེད་པར་འགྱུར། །ཞེས་བྱ་བ་ཡང་སྨྲས་སོ། །དེ་ནས་འོད་ཟེར་དེ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བྱུལ་ནས། བཅོམ་ལྡན་འདས་ཉིད་ཀྱི་
སླད་བཞིན་སླད་བཞིན་དུ་རྗེས་སུ་འདོང་སྟེ། དེ་ལ་གལ་ཏེ་བཅོམ་ལྡན་འདས་འདས་པའི་ལས་ལུང་སྟོན་པར་བཞེད་ན་ནི་བཅོམ་ལྡན་འདས་ཀྱི་སྣམ་ལོགས་སུ་ནུབ་པར་འགྱུར། མ་འོངས་པའི་ལས་ལུང་སྟོན་པར་བཞེད་ན་ནི་མདུན་ལོགས་སུ་ནུབ་པར་འགྱུར། སེམས་ཅན་དམྱལ་
བར་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐིལ་དུ་ནུབ་པར་འགྱུར། དུད་འགྲོར་སྐྱེ་བར་ལུང་སྟོན་པར་བཞེད་ན་ནི་ལོང་བུར་ནུབ་པར་འགྱུར། ཡི་དགས་སུ་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐེ་བོར་ནུབ་པར་འགྱུར། མིར་སྐྱེ་བར་ལུང་སྟོན་པར་བཞེད་ན་ནི་པུས་མོར་
ནུབ་པར་འགྱུར། སྟོབས་ཀྱི་འཁོར་ལོས་སྒྱུར་བའི་རྒྱལ་སྲིད་ལུང་སྟོན་པར་བཞེད་ན་ནི་ཕྱག་མཐིལ་གཡོན་པར་ནུབ་པར་འགྱུར། འཁོར་ལོས་སྒྱུར་བའི་རྒྱལ་སྲིད་ལུང་སྟོན་པར་བཞེད་ན་ནི་ཕྱག་མཐིལ་གཡས་པར་ནུབ་པར་འགྱུར། ལྷར་སྐྱེ་བར་ལུང་སྟོན་པར་བཞེད་

ན་ནི་ལྟེ་བར་ནུབ་པར་འགྱུར། ཉན་ཐོས་ཀྱི་བྱང་ཆུབ་ལུང་སྟོན་པར་བཞེད་ན་ནི་ཞལ་དུ་ནུབ་པར་འགྱུར། རང་སངས་རྒྱས་ཀྱི་བྱང་ཆུབ་ལུང་སྟོན་པར་བཞེད་ན་ནི་མཛོད་སྤུར་ནུབ་པར་འགྱུར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལུང་སྟོན་པར་
བཞེད་ན་ནི་གཙུག་ཏོར་དུ་ནུབ་པར་འགྱུར་རོ། །དེ་ནས་འོད་ཟེར་དེ་དག་གིས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་བཅོམ་ལྡན་འདས་ཀྱི་ལྟེ་བར་ནུབ་བོ། །དེ་ནས་ཚེ་དང་ལྡན་པ་ཀུན་དགའ་བོས་ཐལ་མོ་སྦྱར་ཏེ་བཅོམ་ལྡན་འདས་ལ་ཞུས་པ། བཙུན་པ་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་རྒྱུ་མ་མཆིས་རྐྱེན་མ་མཆིས་པར་འཛུམ་པ་མི་མཛད་ན། བཙུན་པ་འཛུམ་པ་མཛད་པའི་རྒྱུ་ནི་གང་ལགས། རྐྱེན་ནི་གང་ལགས། ཚིགས་སུ་བཅད་པ་ཡང་གསོལ་པ། ཁ་དོག་སྣ་ཚོགས་
སྟོང་གིས་བཀྲ་བ་ཡི། །ཚོགས་རྣམས་ཞལ་གྱི་སྒོ་ནས་བྱུང་གྱུར་ཏེ། །དེ་ཡིས་ཕྱོགས་རྣམས་ཐམས་ཅད་སྣང་བགྱིས་པ། །ཉི་གདུགས་བདལ་བར་གྱུར་པ་ཇི་བཞིན་ནོ། །རྒོད་བྲལ་ཞུམ་དང་རྒྱགས་པ་རབ་སྤངས་པ། །སངས་རྒྱས་འགྲོ་བར་མཆོག་གི་
རྒྱུར་གྱུར་པ། །རྒྱལ་བ་