Kinh tạng Tây Tạng (Kangyur Đại Học) — 005_འདུལ་བ།_ཅ

་ཅན་ལ་འདི་སྐད་ཅེས་སྨྲས་
སོ། །ཞང་པོ་བདག་ཅག་གཉིས་ཕའི་ལས་རྗེས་སུ་སྒྲུབ་ཏུ་མཆིའོ། །མཆུ་ཅན་གྱིས་སྨྲས་པ། ཁོ་བོས་ཁྱེད་གཉིས་དད་པས་སྦྱིན་པར་བྱ་བས་བསྐྱེད་བསྐྱེད་ན་དེ་ཅིའི་ཕྱིར་ཉེས་པར་སྤྱོད་པའི་ལས་འདི་ལྟ་བུ་བྱེད། དེ་གཉིས་ཀྱིས་སྨྲས་པ། ཞང་པོ་བདག་ཅག་གཉིས་མགོ་ལ་
གསེར་གྱི་ཕྲེང་བས་བཅིངས་པ་ནི་ངོ་ཚའི། ཕའི་ལས་རྗེས་སུ་སྒྲུབ་པས་ནི་དེ་ལྟ་མ་ལགས་ཀྱི་མཆིའོ་ཞེས་དེ་གཉིས་ཀྱིས་དེའི་ཚིག་ཚིག་མ་ཡིན་པར་བྱས་ཏེ་དོང་ནས། དེ་གཉིས་རི་དགས་གསོད་ཅིང་འཚོ་བར་བྱེད་དོ། །ཇི་ཙམ་དུས་གཞན་ཞིག་ན་ཤི་རི་ཀ་ན་བར་གྱུར་ནས་མཆུ་

ཅན་དེའི་ནད་གཡོག་བྱེད་པ་ན་ཤི་རི་ཀ་སྡུག་བསྔལ་གྱི་ཚོར་བ་དག་གིས་ཉེན་ནས་བདག་རེ་ཞིག་ཚུལ་ཁྲིམས་དང་ལྡན་པས་བདག་ཡུལ་གཞན་དུ་སོང་ན་ལོ་ལེགས་ཤིང་མཐོ་རིས་ནི་དར་གྱིས་ཆོད་པ་ཙམ། ཐར་བ་ནི་ཡོལ་བས་བསྒྲིབས་པ་ཙམ་སྟེ། ལུས་
ཞིག་ན་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་བས་རྣམ་པ་ཐམས་ཅད་དུ་བདག་ཉིད་གསད་པར་བྱའོ་སྙམ་དུ་སེམས་སོ། །ཡང་བདག་ཉིད་གསོད་པར་བྱེད་པ་ནི་སྡུག་བསྔལ་བ་ཡིན་གྱིས། གསོད་པ་བྱེད་པ་ཞིག་བཙལ་ལོ་སྙམ་དུ་སེམས་ཤིང་དེ་བདག་གི་སྲོག་གཅོད་
པར་བྱེད་པ་སུ་ཡོད་སྙམ་དུ་དཔྱོད་པ་ལ་ཞུགས་པ་དང་། དེ་ལ་མཆུ་ཅན་གྱི་ཚ་བོ་གཉིས་དྲག་ཤུལ་ཅན་ལག་པ་དམར་བ། སྣུན་པ་དང་། རབ་ཏུ་སྣུན་པ་ལ་ཞུགས་པ་གཞན་གྱི་སྲོག་འཕྲོག་པ། གཞན་གྱི་སྲོག་གཅོད་དུ་འཇུད་པ། གཞན་གྱི་སྲོག་གཅོད་པས་
འཚོ་བར་བྱེད་པ་ཡིན་པས་དེ་གཉིས་ཀྱིས་བདག་གསོད་པར་ནུས་ཀྱི། གཞན་སུས་ཀྱང་མི་ནུས་སོ་སྙམ་པའི་བློ་སྐྱེས་ཤིང་རིག་ནས། ཚེ་དང་ལྡན་པ་མཆུ་ཅན་ལ་སྨྲས་པ། ཚེ་དང་ལྡན་པ་མཆུ་ཅན་ཁྱོད་ཀྱི་ཚ་བོ་དེ་གཉིས་མི་སྣང་ན་གར་དོང་། མཆུ་ཅན་གྱིས་སྨྲས་པ།
ཁྱོད་དེ་གཉིས་ཀྱི་མིང་མ་འཛིན་ཅིག །དེ་གཉིས་ནི་འདི་ལྟ་བུའི་སྡིག་པ་བྱེད་པ་ཡིན་ཏེ། དེ་གཉིས་ཁོ་བོས་དད་པས་སྦྱིན་པར་བྱ་བས་བསྐྱེད་བསྐྱེད་ན་དེ་གཉིས་ད་ཉེས་པར་སྤྱོད་པའི་ལས་བྱ་བ་ལ་ཞུགས་ཤིང་ཕའི་ལས་རྗེས་སུ་སྒྲུབ་པར་བྱེད་དེ། གཞན་གྱི་སྲོག་འཕྲོག་པར་
བྱེད། གཞན་གྱི་སྲོག་གཅོད་པས་འཚོ་བར་བྱེད་དོ། །ཤི་རི་ཀས་སྨྲས་པ། དེ་གཉིས་ལ་ཀུན་ནས་མནར་སེམས་མ་སྐྱེད་ཅིག །དེ་ནི་འདུ་འཛིའི་རིག་པ་ཡིན་ཏེ། གང་གི་ཚེ་དེ་གཉིས་རྒྱལ་བྱེད་ཀྱི་ཚལ་ན་འཁོད་པ་དེའི་ཚེ་ན་དེ་གཉིས་ཀྱིས་གྲོག་སྦུར་ཕྲ་མོའི་སྲོག་ཀྱང་
མ་བཅད་དོ། །དེ་གཉིས་དེ་ལྟ་བུ་དང་ལྷན་ཅིག་གནས་པས་དེ་ལྟ་བུའི་ཉེས་པར་སྤྱོད་པ་དག་བྱེད་ན་དེ་གཉིས་དེ་དག་དང་ཤིན་ཏུ་དབྲལ་བར་བྱ་ཞིང་། འདི་ལྟར་གང་གི་ཚེ་ཁྱོད་ག་ཤེད་དུ་འགྲོ་བ་དེའི་ཚེ་ན་ཁོ་བོ་སྲུང་བར་བྱེད་པ་འགའ་ཡང་མེད་པས་གལ་ཏེ་དེ་གཉིས་སྣང་ན་

ཁོ་བོའི་གན་དུ་ཐོང་ལ་དེ་གཉིས་ཁོ་བོ་སྲུང་དུ་ཆུག་ཤིག །ཇི་ཙམ་ན་མཆུ་ཅན་བསོད་སྙོམས་ལ་ཞུགས་པ་ན་དེའི་ཚ་བོ་དེ་གཉིས་ཚོང་འདུས་ན་ཤ་འཚོང་ཞིང་འདུག་པ་དེས་མཐོང་ནས། དེ་གཉིས་ལངས་ཏེ་དེའི་རྐང་པ་གཉིས་ལ་གཏུགས་པ་དང་། དེས་སྨྲས་པ། ཁྱེའུ་
གཉིས་ཁོ་བོ་ཁྱེད་གཉིས་ཀྱི་ཅིར་འོང་། ཞང་པོར་མཆིའོ། །ཤི་རི་ཀ་ཅིར་འོང་། དེ་ཡང་ཞང་པོར་མཆིའོ། །དེ་དུས་དེ་སྲིད་དུ་ན་ན་ཁྱེད་གཉིས་དེ་ལ་ལྟར་མ་དོང་ངམ། ཞང་པོ་བདག་ཅག་གིས་མ་འཚལ་ཏོ། །ད་དེང་ཤིག །བདག་ཅག་གཉིས་ཀྱིས་བགྱི་བ་ཅི་མཆིས་
དེ་ཅི་ཟེར་བ་དེ་བཞིན་དུ་གྱིས་ཤིག །དེ་གཉིས་ཚེ་དང་ལྡན་པ་ཤི་རི་ཀ་ག་ལ་བ་དེར་སོང་སྟེ་ཕྱིན་ནས་དེའི་རྐང་པ་གཉིས་ལ་ཕྱག་འཚལ་ཏེ་མཐའ་གཅིག་ཏུ་འཁོད་དོ། །ཤི་རི་ཀས་སྨྲས་པ། ཁྱེའུ་གཉིས་མཆུ་ཅན་ཁྱེད་གཉིས་ཀྱི་ཅིར་འོང་། ཞང་པོར་མཆིའོ། །ཁོ་བོ་ཅིར་
འོང་། ཞང་པོར་མཆིའོ། །ཁོ་བོ་དུས་དེ་སྲིད་དུ་ན་ན་ཁྱེད་གཉིས་ཀྱིས་ཁོ་བོ་ལན་འགའ་ཡང་མ་བལྟས་སོ། །ཞང་པོ་བདག་ཅག་གཉིས་ཀྱིས་མ་འཚལ་ཏེ། བདག་ཅག་གཉིས་ཀྱིས་ད་གཟོད་ཐོས་ནས་དེའི་སླད་དུ་བདག་ཅག་གཉིས་མཆིས་སོ། །ཚ་བོ་གཉིས་ཁྱེད་གཉིས་
ཁོ་བོ་ལྷ་རྣམས་ཀྱི་ནང་དུ་སྐྱེ་བར་འདོད་དམ། ཞང་པོ་བདག་ཅག་གཉིས་གཞན་ཡང་ལྷ་རྣམས་ཀྱི་ནང་དུ་སྐྱེ་བར་འཚལ་ན་ཞང་པོ་ལྟ་སྨོས་ཀྱང་ཅི་འཚལ། ཚ་བོ་གཉིས་གལ་ཏེ་དེ་ལྟ་ན་ཁོ་བོ་ཡུལ་གཞན་དུ་སོང་ན་ལོ་ལེགས་ཤིང་མཐོ་རིས་ནི་དར་གྱིས་ཆོད་པ་ཙམ། ཐར་
པ་ནི་ཡོལ་བས་བསྒྲིབས་པ་ཙམ་སྟེ། ལུས་ཞིག་ན་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་ན། བདག་ལ་རྩོམ་པར་བྱེད་པ་སྡུག་བསྔལ་བ་ཡིན་གྱིས། ཁྱེད་གཉིས་ཀྱིས་ཁོ་བོ་སོད་ཅིག །ཞང་པོ་གལ་ཏེ་གཞན་འགའ་ཞིག་གིས་ཁྱོད་དགྲོངས་པར་བགྱིད་ན་ཡང་
བདག་ཅག་གཉིས་ཀྱིས་དེ་དགུམ་པར་བགྱི་ན་བདག་ཅག་གཉིས་ཀྱིས་ཞང་པོ་བཀྲོངས་པ་ལྟ་སྨོས་ཀྱང་ཅི་འཚལ། མཆུ་ཅན་གྱིས་ཁྱེད་གཉིས་ལ་ཇི་སྐད་བསྒོ། ཞང་པོ་ཅི་གསུང་བ་དེ་བཞིན་གྱིས་ཤིག་ཅེས་སོ། །ཚ་བོ་གཉིས་གལ་ཏེ་དེ་ལྟ་ན་ཁོ་བོ་འདི་སྐད་ཟེར་ཏེ།

ཁོ་བོ་སྡུག་བསྔལ་གྱི་ཚོར་བས་ཉེན་གྱིས་ཁོ་བོ་སོད་ཅིག །དེ་གཉིས་ཀྱིས་འདི་དང་ཞང་པོ་སྔར་བགྲོས་པར་གྱུར་གོར་མ་ཆག་སྟེ། དེས་ན་ཞང་པོས་བདག་ཅག་གཉིས་འདིའི་གན་དུ་བཏང་ངོ་སྙམ་དུ་བསམས་ནས། དེ་གཉིས་ལས་གཅིག་ཆེས་དྲག་
ཤུལ་ཅན་ཡིན་པ་དེས་མཚོན་རྣོན་པོས་དེའི་མགོ་བཅད་ནས་དེའི་འོག་ཏུ་རས་ཀྱིས་གཡོགས་ཏེ་འཁོད་དོ། །མཆུ་ཅན་སྤྱོད་ཡུལ་ནས་ཕྱིར་འོངས་ཏེ། དེས་དེ་རས་ཀྱིས་གཡོགས་པ་མཐོང་ནས་དེས་སྨྲས་པ། ཚ་བོ་གཉིས་ཁྱེད་གཉིས་འཁོད་བཞིན་དུ་ཡང་འདི་ཉལ་
ལམ། ཞང་པོ་འདི་ལྟར་ནམ་ཡང་ལྡང་བར་མི་འགྱུར་བ་དེ་ལྟར་ཉལ་ལོ། །མཆུ་ཅན་གྱིས་འདི་གཉིས་སྔོན་མ་བྱུང་བའི་ཚིག་སྨྲ་ན། དྲིའོ་སྙམ་དུ་བསམས་ནས། དེས་དེ་གཉིས་ལ་དྲིས་པ་དང་། དེ་གཉིས་ཀྱིས་སྐབས་དེ་རྒྱས་པར་མཆུ་ཅན་ལ་བརྗོད་དོ། །
མཆུ་ཅན་ཡིད་མི་བདེ་བ་སྐྱེས་པས་རས་དེ་བཤུས་པ་དང་། དེ་མཐོང་ནས་དེ་བདག་གིས་མཚོན་ཐོགས་པ་གཉེར་བར་མ་གྱུར་ཏམ་སྙམ་དུ་འགྱོད་པ་ཡང་སྐྱེས། བཤེས་པ་དང་བྲལ་བས་འགྱོད་པས་གདུངས་པའི་སེམས་ཀྱིས་ཡིད་མི་བདེ་བར་གྱུར་ནས། དེས་
སྐབས་དེ་དགེ་སློང་རྣམས་ལ་རྒྱས་པར་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་དེ། ཡང་དགེ་སློང་གིས་ནད་པའི་ནད་གཡོག་མི་མཁས་པ་བཞག་
སྟེ་འགྲོ་བར་མི་བྱའོ། །གལ་ཏེ་འགྲོ་དགོས་པའི་རྐྱེན་དེ་ལྟ་བུ་ཞིག་བྱུང་ན་ནད་གཡོག་མི་མཁས་པ་ལ་གལ་ཏེ་འདི་མེར་མཆོང་ངམ། དུག་ཟའམ། མཚོན་འབྱིན་ཏམ། བདག་ཉིད་གཡང་སར་མཆོང་ངམ། ཐག་པས་འཆིང་ངམ། གཞན་ཡང་མི་འཕྲོད་
པ་ཟ་བར་བྱེད་ན་བཟློག་པར་བྱའོ་ཞེས་བསྒོ་སྟེ་འགྲོ་བར་བྱའོ། །དགེ་སློང་གིས་ནད་གཡོག་མི་མཁས་པ་ལ་མ་བསྒོ་བར་དེ་བཞིན་དུ་འགྲོ་ན་འགལ་ཚབས་ཅན་དུ་འགྱུར་རོ། །འདི་ཡང་བྱུང་བ་ཡིན་གྱི་རེ་ཞིག་སངས་རྒྱས་བཅོམ་ལྡན་འདས་འདུལ་བ་ལ་ཉན་ཐོས་

རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་ཞིག་འདུག་པ་དེའི་ལྷུང་བཟེད་ལ་བཙའ་ཞུགས་ནས། དགེ་
སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་ཁྱོད་ཀྱི་ལྷུང་བཟེད་འདི་བཙའ་ཞུགས་ན་ཅིའི་ཕྱིར་མི་སྲེག །དེས་སྨྲས་པ། འདི་ལ་རྫ་བོ་དང་། ལྕི་བ་དང་། ཏིལ་གྱི་ཚིགས་མ་དང་། ཡོ་བྱད་གཞན་ཡང་མང་དུ་དགོས་སོ། །དགེ་སློང་རྣམས་ཀྱིས་སྨྲས་
པ། ཚེ་དང་ལྡན་པ་ཅི་ལྷུང་བཟེད་མེད་པས་འགྲུབ་པར་འགྱུར་རམ། དེས་སྨྲས་པ། ཁོ་བོ་ལྷུང་བཟེད་མེད་པས་འགྲུབ་པར་མི་འགྱུར་ཏེ། འདི་ལྟར་ཁང་ཁྱིམ་ཆེ་གེ་མོ་ཞིག་ན་དགེ་སློང་ཞིག་ནད་ཀྱིས་བཏབ་ཅིང་སྡུག་བསྔལ་བ་ན་ཚབས་ཆེ་བ་ཡུན་མི་རིང་བར་
དུས་བྱེད་པར་འགྱུར་བ་དེའི་ལྷུང་བཟེད་གསལ་བ། ཟླུམ་པ་ལོངས་སྤྱོད་པར་བཟོད་པ་དེ་བླང་བར་བྱའོ། །དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་ཁྱོད་ལྷུང་བཟེད་ཀྱི་ཕྱིར་གདོལ་བ་དང་འདྲ་བར་དྲག་ཤུལ་གྱི་སེམས་འདི་ལྟ་བུ་བསྐྱེད་དུ་རུང་ངམ། དགེ་
སློང་དེ་ངོ་ཚ་བར་གྱུར་ནས་ཅང་མི་སྨྲ་བར་འདུག་གོ། །སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་དེ། ཡང་དགེ་སློང་གིས་ལྷུང་བཟེད་ཀྱི་ཕྱིར་
གདོལ་པ་དང་འདྲ་བར་དྲག་ཤུལ་གྱི་སེམས་དེ་ལྟ་བུ་བསྐྱེད་པར་མི་བྱའོ། །དགེ་སློང་གིས་ལྷུང་བཟེད་ཀྱི་ཕྱིར་གདོལ་པ་དང་འདྲ་བར་དྲག་ཤུལ་གྱི་སེམས་དེ་ལྟ་བུ་སྐྱེད་པར་བྱེད་ན་འགལ་ཚབས་ཅན་དུ་འགྱུར་རོ། །གཞན་ཡང་དགེ་སློང་གིས་ལྷུང་བཟེད་མིག་བཞིན་
དུ་ཡོངས་སུ་བསྐྱང་བར་བྱ་སྟེ། གླན་པར་འོས་པ་ནི་གླན་པར་བྱའོ། །བསྲེག་པར་འོས་པ་ནི་བསྲེག་པར་བྱའོ། །དགེ་སློང་གིས་ལྷུང་བཟེད་གླན་པར་འོས་པ་གླན་པར་མི་བྱེད་དམ། བསྲེག་པར་འོས་པ་སྲེག་པར་མི་བྱེད་ན་འགལ་ཚབས་ཅན་དུ་འགྱུར་རོ། །འདི་

ཡང་བྱུང་བ་ཡིན་གྱི་རེ་ཞིག་སངས་རྒྱས་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །
མཉན་ཡོད་ན་དགེ་སློང་ཞིག་འདུག་པ་དེའི་སྣམ་སྦྱར་རྙིངས་ཤིང་དྲི་མས་གོས་ལ། རྡོལ་བར་གྱུར་ནས་དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་ཁྱོད་ཀྱི་སྣམ་སྦྱར་འདི་རྙིངས་ཤིང་དྲི་མས་གོས་ལ། རྡོལ་བར་གྱུར་ན་ཅིའི་ཕྱིར་འདི་མི་ཁྲུ། མི་འཚེམ། ཁ་
སྒྱུར་བར་མི་བྱེད། དེས་སྨྲས་པ། འདི་ལ་ཟངས་དང་། ཆུ་དང་། ཤིང་དང་། སྐུད་པ་དང་། ཚོན་དང་། ཡོ་བྱད་གཞན་ཡང་མང་དུ་དགོས་སོ། །དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་ཅི་སྣམ་སྦྱར་མེད་པས་འགྲུབ་པར་འགྱུར་རམ། དེས་སྨྲས་པ། ཁོ་བོ་སྣམ་
སྦྱར་མེད་པས་འགྲུབ་པར་མི་འགྱུར་ཏེ། འདི་ལྟར་ཁང་ཁྱིམ་ཆེ་གེ་མོ་ཞིག་ན་དགེ་སློང་ཞིག་ནད་ཀྱིས་བཏབ་ཅིང་སྡུག་བསྔལ་བ་ན་ཚབས་ཆེ་བ། ཡུན་མི་རིང་བར་དུས་བྱེད་པར་འགྱུར་བ་དེའི་སྣམ་སྦྱར་ཉི་རིམ་དམར་སེར་ཚོན་སར་པས་ཁ་བསྒྱུར་བ། ལོངས་སྤྱད་པར་བཟོད་
པ་དེ་བླང་བར་བྱའོ། །དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་ཁྱོད་སྣམ་སྦྱར་གྱི་ཕྱིར་གདོལ་པ་དང་འདྲ་བར་དྲག་ཤུལ་གྱི་སེམས་འདི་ལྟ་བུ་བསྐྱེད་དུ་རུང་ངམ། དེ་ངོ་ཚ་བར་གྱུར་ནས་ཅང་མི་སྨྲ་བར་འདུག་གོ། །སྐབས་དེ་དགེ་སློང་རྣམས་ཀྱིས་བཅོམ་ལྡན་
འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་དེ། ཡང་དགེ་སློང་གིས་སྣམ་སྦྱར་གྱི་ཕྱིར་གདོལ་པ་དང་འདྲ་བར་དྲག་ཤུལ་གྱི་སེམས་དེ་ལྟ་བུ་བསྐྱེད་པར་མི་བྱའོ། །དགེ་སློང་གིས་སྣམ་སྦྱར་གྱི་ཕྱིར་གདོལ་པ་དང་
འདྲ་བར་དྲག་ཤུལ་གྱི་སེམས་དེ་ལྟ་བུ་སྐྱེད་པར་བྱེད་ན་འགལ་ཚབས་ཅན་དུ་འགྱུར་རོ། །གཞན་ཡང་དགེ་སློང་གིས་སྣམ་སྦྱར་པགས་པ་བཞིན་དུ་ཡོངས་སུ་བསྐྱང་བར་བྱ་སྟེ། བཀྲུ་བར་འོས་པ་ནི་བཀྲུ་བར་བྱ། བཙེམ་པར་འོས་པ་ནི་བཙེམ་པར་བྱ། ཁ་བསྒྱུར་བར་འོས་པ་ནི་

ཁ་བསྒྱུར་བར་བྱའོ། །དགེ་སློང་གིས་སྣམ་སྦྱར་བཀྲུ་བར་འོས་པ་འཁྲུ་བར་མི་བྱེད་དམ། བཙེམ་པར་འོས་པ་འཚེམ་པར་མི་བྱེད་དམ། ཁ་བསྒྱུར་བར་འོས་པ་ཁ་བསྒྱུར་བར་མི་བྱེད་ན་འགལ་ཚབས་ཅན་དུ་འགྱུར་རོ། །འདི་ཡང་བྱུང་བ་ཡིན་གྱི་རེ་ཞིག་སངས་རྒྱས་བཅོམ་ལྡན་འདས་
འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་སྟོབས་སྡེ་ཞེས་བྱ་བ་ཕྱུག་པ། ནོར་མང་བ།
ལོངས་སྤྱོད་ཆེ་བ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལ་དུས་གཞན་ཞིག་ན་སེམས་ཅན་
ཞུགས་པར་གྱུར་ནས། དེ་ཟླ་བ་བརྒྱད་དམ། དགུ་འདས་ཏེ་བཙས་པ་ལས་ཁྱེའུ་གཟུགས་བཟང་བ། བལྟ་ན་སྡུག་པ། མཛེས་པ་ཞིག་བྱུང་ངོ་། །ཉི་མ་བདུན་གསུམ་ཉི་ཤུ་གཅིག་ཏུ་དེའི་བཙས་པའི་བཙས་སྟོན་རྒྱ་ཆེར་བྱས་ནས་ཁྱེའུའི་མིང་ཅིར་གདགས་ཞེས་མིང་
འདོགས་པར་བྱེད་པ་ན་ཉེ་དུ་རྣམས་ཀྱིས་སྨྲས་པ། གང་གི་ཕྱིར་ཁྱེའུ་འདི་ཁྱིམ་བདག་སྟོབས་སྡེའི་བུ་ཡིན་པ་དེའི་ཕྱིར་ཁྱེའུ་སྡེ་པ་ཞེས་བྱའོ་ཞེས་དེའི་མིང་སྡེ་པ་ཞེས་བྱ་བར་བཏགས་སོ། །ཁྱིམ་བདག་སྟོབས་སྡེ་དེ་ཡང་རྩེ་བར་བྱེད། དགའ་བར་བྱེད། དགའ་མགུར་སྤྱོད་
པར་བྱེད་པ་ལས་བུ་ཞིག་བཙས་ནས་དེའི་མིང་ནི་ཉེ་སྡེ་ཞེས་བྱ་བར་བཏགས་སོ། །ཇི་ཙམ་དུས་གཞན་ཞིག་ན་ཁྱིམ་བདག་སྟོབས་སྡེའི་ཆུང་མ་དུས་ལ་བབ་ནས་དེ་དེ་དག་གིས་གོས་སྔོན་པོ་དང་། སེར་པོ་དང་། དམར་པོ་དང་། དཀར་པོ་དག་གིས་ཁྱོགས་བརྒྱན་ཏེ།
དུར་ཁྲོད་དུ་བསྐྱལ་ནས་བསྲེགས་ཏེ་མྱ་ངན་བསང་བ་བྱས་ཏེ་འཁོད་དོ། །ཁྱིམ་བདག་སྟོབས་སྡེ་དེའི་ཤིང་དག་བྱས་ནས་གལ་ཏེ་བདག་གིས་ཆུང་མ་གཞན་བླངས་པར་གྱུར་ན་ཁྱེའུ་གཉིས་སྡུག་བསྔལ་བར་འགྱུར་གྱིས། བདག་གིས་སྡེ་པའི་ཁྱིམ་དབུབ་པར་བྱའོ་སྙམ་དུ་

བསམས་ནས། དེས་དེའི་ཁྱིམ་ཕུབ་བོ། །ཇི་ཙམ་དུས་གཞན་ཞིག་ན་ཁྱིམ་བདག་སྟོབས་སྡེ་ན་བར་གྱུར་ནས། དེ་ལ་རྩ་བ་དང་། སྡོང་བུ་དང་། འདབ་མ་དང་། མེ་ཏོག་དང་། འབྲས་བུའི་སྨན་དག་གིས་བསྙེན་བཀུར་བྱས་ཀྱང་ནད་དེ་ཉེ་བར་ཞི་བར་མ་གྱུར་
ཅིང་ཉམ་དམས་ནས་དེས་སྡེ་པ་དང་། ཉེ་སྡེ་གཉིས་ལ་སྙིང་བཞོས་ནས། བསགས་པ་ཀུན་གྱི་མཐའ་ཟད་ཅིང་། །མཐོན་པོ་རྣམས་ཀྱི་མཐའ་ལྟུང་འགྱུར། །ཕྲད་པའི་མཐའ་ནི་འབྲལ་བ་སྟེ། །གསོན་པོའི་མཐའ་ནི་འཆི་བ་ཡིན། །ཞེས་བྱ་བ་ཡིན་པས་དུས་ཀྱི་
ཆོས་དང་ལྡན་པར་གྱུར་ཏོ། །དེ་ཁྱེའུ་གཉིས་ཀྱིས་གོས་སྔོན་པོ་དང་། སེར་པོ་དང་། དམར་པོ་དང་། དཀར་པོ་དག་གིས་ཁྱོགས་སྤྱིལ་བརྒྱན་ཏེ་དུར་ཁྲོད་དུ་བསྐྱལ་ནས་བསྲེགས་ཏེ། དེའི་འོག་ཏུ་མྱ་ངན་བསང་བ་བྱས་ནས་ཤིད་དག་བྱས་ཏེ་འཁོད་དོ། །སྡེ་པས་བསམས་པ།
གང་གི་ཚེ་བདག་ཅག་ཕ་གསོན་པ་དེའི་ཚེ་ན་ནི་གཞན་གྱིས་སྲོག་གསོ་བར་བྱེད་ན། ད་ནི་དེ་དུས་ལ་བབ་པས་ཁྱིམ་གྱི་བྱ་བ་སྦྱར་བར་བྱ་དགོས་ཏེ། གལ་ཏེ་ཁྱིམ་གྱི་བྱ་བ་དམས་པ་ཡལ་བར་བོར་ན་ཉེ་དུ་རྣམས་ཀྱིས་ཁྲེལ་བར་འགྱུར་བས་བདག་ཟོང་ཐོགས་ཏེ་ཡུལ་གཞན་
དུ་འགྲོའོ་སྙམ་དུ་རིག་ནས། ཉེ་སྡེ་ལ་སྨྲས་པ། ནུ་བོ་གང་གི་ཚེ་བདག་ཅག་ཕ་གསོན་པ་དེའི་ཚེ་ན་ནི་གཞན་གྱིས་སྲོག་གསོ་བར་བྱེད་ན་ད་དེ་དུས་ལ་བབ་པས་ཁྱིམ་གྱི་བྱ་བ་སྦྱར་བར་བྱ་དགོས་ཏེ། གལ་ཏེ་ཁྱིམ་གྱི་བྱ་བ་དམས་པ་ཡལ་བར་བོར་ན་ཉེ་དུ་རྣམས་ཀྱིས་ཁྲེལ་བར་
འགྱུར་གྱིས། ཁྱོད་ནི་འདི་ཉིད་ན་ཁྱིམ་གྱི་བྱ་བ་གྱིས་ཤིག །ཁོ་བོ་ནི་ཟོང་ཐོགས་ཏེ་ཡུལ་གཞན་དུ་འགྲོའོ། །ཉེ་སྡེས་སྨྲས་པ། དེ་ལྟར་མཛོད་ཅིག་སྡེ་པ་ཟོང་མང་པོ་ཐོགས་ཏེ་ཡུལ་གཞན་དུ་སོང་བ་དང་། དེས་དེར་ཁེ་སྤོགས་མང་པོ་གྲུབ་ནས་སྡེ་པས་ནུ་བོ་ཉེ་སྡེ་ལ་
ནུ་བོ་ཁོ་བོས་ཁེ་སྤོགས་མང་པོ་གྲུབ་སྟེ་རིང་པོར་མི་ཐོགས་པར་འོང་གིས་བརྟན་པ་དང་། སྤུངས་དང་སྤྲོ་བ་ཆེན་པོར་གྱིས་ཤིག་ཅེས་སྤྲིང་ཡིག་བསྐུར་རོ། །སྡེ་པས་ཕྱིར་ཞིང་ཡང་ཁེ་སྤོགས་མང་པོ་གྲུབ་ནས་དེས་ཕྱིས་ཀྱང་དེ་ཁོ་ན་བཞིན་དུ་སྤྲིང་ཡིག་བསྐུར་རོ། །ཡང་སྡེ་པས་

ཕྱི་ཕྱིར་ཞིང་ཡང་ཁེ་སྤོགས་མང་པོ་གྲུབ་ནས། དེས་ཡང་དེ་ཁོ་ན་བཞིན་དུ་སྤྲིང་ཡིག་བསྐུར་ཏེ། སྡེ་པ་དེ་དེ་བཞིན་དུ་དུས་དང་མཐུན་པའི་དུས་སུ་སྤྲིང་ཡིག་བསྐུར་བར་བྱེད་དོ། །ཆོས་ཉིད་ཀྱིས་ན། གང་ཕྱིར་རྙེད་པ་དེ་ཕྱིར་ཆགས། །རྙེད་ལ་ཆགས་པ་སྐྱེ་
བར་འགྱུར། །ཆགས་པས་ཟིལ་ནོན་མི་ཡིས་ནི། །བྱ་དང་བྱ་མིན་རྟོགས་མི་འགྱུར། །ཞེས་བྱ་བ་ཡིན་པས་སྡེ་པ་དེ་ཤིན་ཏུ་ཐག་རིང་པོར་སོང་ནས་ཕྱིན་ཆད་སྤྲིང་ཡིག་སྐུར་བར་མི་བྱེད་དོ། །དེ་ནས་སྡེ་པའི་ཆུང་མ་གོས་དང་ཟས་བཟང་བས་ཉོན་མོངས་པ་
དག་གིས་གནོན་པར་གྱུར་ནས། དེས་ཉེ་སྡེ་ལ་མཚན་མ་སྟོན་པར་བྱེད་པ་དང་། ཉེ་སྡེས་དབང་པོ་རྣམས་ཕྱིར་བླན་ཏེ་འདུག་གོ། །སྡེ་པའི་ཆུང་མ་དེ་ངོ་ཚ་མེད་པར་གྱུར་ནས་ཡང་སྨྲས་པ། ཉེ་སྡེ་ཚུར་སྤྱོན། འདི་དང་འདི་ལྟ་བུ་བགྱིའོ། །ཉེ་སྡེས་རྣ་བ་བཀབ་སྟེ་སྨྲས་
པ། ཁྱོད་ཁོ་བོའི་མ་དང་འདྲས་ཕྱིན་ཅད་དེ་སྐད་མ་ཟེར་ཅིག །བུད་མེད་ཀྱི་ཡུལ་ནི་མ་བསླབས་པར་མཁས་པ་ཡིན་པས་སྡེ་པའི་ཆུང་མ་དེ་ཉེ་དུའི་ཁྱིམ་དུ་སོང་ནས། གོས་དྲི་མ་ཅན་དག་བགོས་ཏེ། ཁྲི་ཞིག་པ་ལ་འདུག་ཅིང་འདུག་གོ། །དེ་ལ་མ་དང་། ནང་གི་མི་དག་
གིས་སྨྲས་པ། ཁྱོད་ཅིའི་ཕྱིར་འདི་ལྟར་འདུག །སྡེ་པའི་ཆུང་མས་སྨྲས་པ། ཅི་བུད་མེད་ཀྱི་ཡུལ་ལ་གང་གནོད་པ་དེ་མི་ཤེས་སམ། ཁོ་མོ་ཉོན་མོངས་པ་དག་གིས་ཤིན་ཏུ་གནོད་པར་གྱུར་ཏོ། །དེ་དག་གིས་སྨྲས་པ། ཁྱོད་ཀྱི་སྐུད་ཕོ་ཉེ་སྡེ་གཟུགས་བཟང་བ། བལྟ་
ན་སྡུག་པ། མཛེས་པ་ཡིན་ན་ཅིའི་ཕྱིར་དེ་ལ་འཆོལ་བར་མི་བྱེད། སྡེ་པའི་ཆུང་མས་སྨྲས་པ། བདག་གིས་དེ་ལ་བཅོལ་ན་མ་གྲུབ་བོ། །དེ་དག་གིས་སྨྲས་པ། བུད་མེད་གཞན་གང་དག་ཁྱིམ་ཐབ་དག་ཆེས་ཡུན་རིང་ནས་དོང་སྟེ། དུས་སུ་མ་འཁོར་བ་དེ་དག་ཆེས་དཀའ་
བ་བྱེད་པ་ཡིན་ནོ། །སྡེ་པའི་ཆུང་མས་སྨྲས་པ། དེ་དག་ལ་ནི་ཁྱིམ་ཐབ་དག་གིས་དུས་དང་མཐུན་པའི་དུས་སུ་གཏམ་རྨེད་པར་བྱེད་དེ། ཁོ་མོ་ལ་ཡང་གང་གི་ཚེ་ཁྱིམ་ཐབ་གསོན་པར་གྱུར་པ་དེའི་ཚེ་ན་ནི་དུས་དང་མཐུན་པའི་དུས་སུ་སྤྲིང་ཡིག་སྐུར་བར་ཡང་གྱུར་ན། ད་སྐུར་

བར་མི་བྱེད་པས་དུས་ལ་བབ་གོར་མ་ཆག་གོ། །དེ་དག་གིས་སྡེ་པའི་ཆུང་མ་དེ་ལ་ཐབས་དུ་མ་དག་གིས་ཡིད་བཞོས་ཀྱང་ཁྲི་ལས་ལྡང་བར་མི་བྱེད་ཅིང་། དེས་སྨྲས་པ། གལ་ཏེ་ཁོ་མོ་གཞན་ལ་མི་སྦྱིན་ན་ཁོ་མོས་ངེས་པར་རིགས་གཉི་ག་ལ་མི་སྙན་པ་
འབྱུང་བར་བྱའོ། །དེ་ནས་སྡེ་པའི་ཆུང་མའི་ཕ་མ་དང་། ཉེ་དུ་དང་རྩ་ལག་གི་ཚོགས་དག་གིས་གྲོས་བྱ་བར་བརྩམས་ཏེ། འདི་དེ་ལྟར་ཟློག་ཏུ་མ་བཏུབ་པས་ངེས་པར་རིགས་གཉི་ག་ལ་མི་སྙན་པ་འབྱུང་བར་བྱེད་ཀྱིས་ཉེ་སྡེ་མགྲོན་དུ་བོས་ཏེ་ཟན་བྱིན་ལ་དེ་ལ་འདི་སྦྱིན་པར་བྱ་
བ་ནི་འདིར་དུས་ལ་བབ་པ་ཡིན་ནོ་ཞེས་གྲོས་བྱས་ནས། དེ་དག་གིས་ཉེ་སྡེ་མགྲོན་དུ་བོས་ཏེ་ཟན་བྱིན་ནས་སྨྲས་པ། ཉེ་སྡེ་ཁྱོད་ཀྱི་ཕུ་བོའི་ཆུང་མ་འདི་ཉོན་མོངས་པ་ཀུན་ཏུ་སྤྱོད་པས་ཤིན་ཏུ་གཡེན་སྤྱོ་བར་གྱུར་པས་ངེས་པར་རིགས་གཉི་ག་ལ་མི་སྙན་པ་འབྱིན་པར་བྱེད་ན།
གལ་ཏེ་ཁྱོད་འདི་དང་ལྷན་ཅིག་ཏུ་ཀུན་ཏུ་སྤྱོད་པར་བྱེད་ན་དེ་ལྟ་ན་ལེགས། གལ་ཏེ་མི་བྱེད་ན་བདག་ཅག་གིས་འདི་གཞན་ལ་སྦྱིན་པར་བྱའོ། །ཉེ་སྡེས་བསམས་པ། འདི་བདག་ཅག་གིས་བྱིས་པ་ནས་བསྐྱེད་པ་ཡིན་པས་གལ་ཏེ་གཞན་དུ་འགྲོ་བར་འགྱུར་ཞིང་རིགས་གཉི་
ག་ལ་མི་སྙན་པ་འབྱིན་པར་གྱུར་ན་མ་ལེགས་ཀྱིས། བདག་གིས་འདི་བདག་གིར་བྱའོ་སྙམ་དུ་རིག་ནས། དས་དང་དུ་བླང་བས་ཁས་བླངས་སོ། །དེ་ནས་ཉེ་སྡེས་སྡེ་པའི་ཆུང་མ་རང་གི་ཁྱིམ་དུ་ཁྲིད་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་
སྤྱོད་པར་བྱེད་དོ། །དེ་ལ་མངལ་ན་གནས་པའི་མཚན་མ་དག་བྱུང་བར་གྱུར་ནས། དེ་ལ་ན་ཟླ་དག་གིས་སྨྲས་པ། འདི་ག་ལས་འོངས། སྡེ་པའི་ཆུང་མས་སྨྲས་པ། ཁོ་མོ་ཚུལ་ཁྲིམས་དང་ལྡན་པ་ཁོ་ན་ཡིན་གྱིས་ཁྱེད་ཅག་བརྫུན་གྱི་སྐུར་པས་ཁོ་མོ་ལ་ཀུན་དུ་མ་
སྤྱོད་ཅིག །དེའི་གྲོགས་མོ་ཆེས་མཛའ་བ་ཞིག་ཡོད་པ་དེས་སྨྲས་པ། ཅིའི་ཕྱིར་གསང་བར་བྱེད། འདི་གདོན་མི་ཟ་བར་གྲགས་པར་འགྱུར་གྱིས་སྨྲོས་ཤིག །སྡེ་པའི་ཆུང་མས་སྨྲས་པ། ཉེ་སྡེ་ལས་སོ། །ལེགས་ཏེ་ཁྱིམ་ཐབ་ལས་སམ། སྐུད་པོ་ལས་ཀྱང་རུང་

འདི་ལ་ཉེས་པ་འགའ་ཡང་མེད་དོ། །སྡེ་པའི་ཆུང་མ་དེ་སེམས་ཅན་དང་ལྡན་པར་གྱུར་པ་ན། སྡེ་པས་ཉེ་སྡེ་ལ་ནུ་བོ་བརྟན་པ་དང་། སྤུངས་དང་། སྤྲོ་བ་ཆེར་གྱིས་ཤིག །ཁོ་བོ་ཡང་ཡི་གེའི་རྗེས་བཞིན་ཁོ་ནར་འོང་ངོ་ཞེས་སྤྲིང་ཡིག་བསྐུར་རོ། །ཉེ་སྡེས་ཐོས་ནས་
ཉམ་ང་བར་གྱུར་ཏེ་བསམས་པ། གང་གི་ཚེ་བདག་ཕུ་བོ་དེ་ལ་སྤྲིན་བཞིན་དུ་ལྟ་བར་འདོད་པ་དེའི་ཚེ་ན་ནི་དེ་མ་འོངས་ལ། ད་བདག་གིས་ཉེས་པར་སྤྱད་པ་འདི་ལྟ་བུ་བྱས་ན་དེ་འོང་བར་གྱུར་ཏེ་ཁོན་རྣམས་ཀྱི་ནང་ན་འདི་ལྟ་སྟེ། བུད་མེད་ཀྱི་ཁོན་ཐ་ཆད་ཡིན་པས་བདག་ལ་
གནོད་པ་བྱེད་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་ཀྱིས་བྲོས་ཏེ་འགྲོའོ་སྙམ་མོ། །ཡང་བསམས་པ། ཡུལ་ཡོངས་སུ་གཏོང་བར་བྱེད་པ་ནི་སྡུག་བསྔལ་བ་ཡིན་ཏེ། ཤཱཀྱའི་སྲས་ཀྱི་དགེ་སྦྱོང་འདི་དག་གིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལས་
གཞོན་ནུའི་ཡོངས་སུ་སྤང་བ་ཐོབ་པས་དེ་དག་གི་ནང་དུ་རབ་ཏུ་བྱུང་ནས་དེས་དེར་ཅི་ཞིག་བྱ་བར་འགྱུར་སྙམ་ནས། ཉེ་སྡེ་རྒྱལ་བྱེད་ཀྱི་ཚལ་དུ་སོང་སྟེ་དགེ་སློང་གི་གན་དུ་ཕྱིན་ནས་སྨྲས་པ། འཕགས་པ་བདག་རབ་ཏུ་འབྱུང་བར་འཚལ་ལོ། །དགེ་སློང་དེས་སྨྲས་པ། བཞིན་
བཟངས་ལེགས་ཏེ་ལོངས་སྤྱོད་དག་ནི་འགྱུར་བ་ཡིན་གྱིས་རབ་ཏུ་བྱུང་ཤིག །དགེ་སློང་དེས་ཉེ་སྡེ་རབ་ཏུ་ཕྱུང་རྫོགས་པར་བསྙེན་པ་བྱས་ནས་དེའི་འོག་ཏུ་ཉི་མ་གཉིས་སམ། གསུམ་དུ་ཀུན་ཏུ་སྤྱོད་པའི་ཆོས་དག་སློབ་དུ་བཅུག་ནས་སྨྲས་པ། བཞིན་བཟངས་རི་དགས་
ཀྱིས་རི་དགས་མི་སོས། མཉན་ཡོད་རྒྱ་ཆེ་ལ་རང་གི་སྤྱོད་ཡུལ་དང་ཡབ་ཀྱི་ཡུལ་ཡིན་གྱིས་བསོད་སྙོམས་རྒྱུས་ལ་འཚོ་བར་གྱིས་ཤིག །ཉེ་སྡེ་མཁན་པོས་དེ་སྐད་བསྒོ་ནས་མཁན་པོ་བཀའ་བཞིན་འཚལ་ཞེས་སྨྲས་ཏེ། སྔ་དྲོ་ཤམ་ཐབས་བགོས་ལྷུང་བཟེད་
དང་ཆོས་གོས་ཐོགས་ཏེ། མཉན་ཡོད་དུ་བསོད་སྙོམས་ལ་ཞུགས་སོ། །དེ་སྤྱོད་ཡུལ་ལ་མི་མཁས་པས་གྲོང་རིམ་གྱིས་རང་གི་ཁྱིམ་དུ་ཞུགས་པ་དང་། སྡེ་པའི་ཆུང་མས་ཉེ་སྡེ་མཐོང་ནས་དེས་བྲང་བརྡུངས་ཏེ་སྨྲས་པ། ཉེ་སྡེ་ཅིའི་སླད་དུ་ཁྱོད་ཀྱིས་ཁོ་མོ་སྤངས་

ཏེ་རབ་ཏུ་བྱུང་། ཉེ་སྡེས་སྨྲས་པ། ཁྱོད་ཀྱང་དེ་སྐད་ཅེས་ཅིའི་སླད་དུ། ཁྱོད་ཀྱིས་ཁོ་མོ་སྤངས་ཏེ་རབ་ཏུ་བྱུང་ཞེས་ཟེར་རམ། གང་གི་ཚེ་བདག་ཕུ་བོ་དེ་ལ་སྤྲིན་བཞིན་དུ་ལྟ་བར་འདོད་པ་དེའི་ཚེ་ན་ནི་དེ་མ་འོངས་ལ། ད་བདག་གིས་ཉེས་པར་སྤྱད་
པ་འདི་ལྟ་བུ་བྱས་ན་དེ་འོང་བར་འགྱུར་ཏེ། ཁོན་རྣམས་ཀྱི་ནང་ན་འདི་ལྟ་སྟེ། བུད་མེད་ཀྱི་ཁོན་ཐ་ཆད་ཡིན་པས་བདག་ལ་གནོད་པར་བྱེད་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་དོ། །སྡེ་པའི་ཆུང་མས་སྨྲས་པ། ཁྱོད་ཀྱིས་ནི་རེ་ཞིག་བདག་ཉིད་ཐར་བར་བགྱིས་
ན། ཁོ་མོས་ཇི་ལྟར་བསྒྲུབ་པར་བགྱི། ཉེ་སྡེས་སྨྲས་པ། དེ་ནི་ཁྱོད་ཉིད་ཀྱིས་ཉོན་མོངས་པའི་དབང་གིས་རྣམ་པར་བསམས་པ་ཡིན་གྱི་ཁོ་བོ་ནི་མི་འདོད་བཞིན་བྱེད་དུ་བཅུག་པ་ཡིན་པས་ཁྱོད་ཉིད་ཤེས་སོ་ཞེས་སྨྲས་ཏེ་སོང་ངོ་། །ཉེ་སྡེའི་ཆུང་པོ་གྲོགས་སྔོན་སྨན་པ་
སྤོས་འཚོང་གི་ཁྱེའུ་ཞིག་ཡོད་པ་དེ་སྡེ་པའི་ཆུང་མའི་ཁྱིམ་དུ་སོང་སྟེ། ཉེ་སྡེ་གར་སོང་ཞེས་དྲིས་པ་དང་། སྡེ་པའི་ཆུང་མས་སྨྲས་པ། ཉེ་སྡེ་ལམ་ལམ་པོར་བྱས་ཏེ་རབ་ཏུ་བྱུང་ངོ་། །གང་དུ་ཤཱཀྱའི་སྲས་ཀྱི་དགེ་སྦྱོང་རྣམས་ཀྱི་ནང་དུའོ། །གལ་ཏེ་ཡིད་མི་ཆེས་ན་
རྒྱལ་བྱེད་ཀྱི་ཚལ་དུ་སོང་ལ་ལྟོས་ཤིག །དེ་རྒྱལ་བྱེད་ཀྱི་ཚལ་དུ་སོང་བ་ན་རབ་ཏུ་བྱུང་བ་ཐམས་ཅད་ཆ་ལུགས་འདྲ་བས་དེ་གང་ཡིན་མི་ཤེས་ནས། དེས་དགེ་སློང་ཞིག་ལ་དྲིས་པ། འཕགས་པ་མཉན་ཡོད་པའི་ཁྱིམ་བདག་གི་བུ་ཉེ་སྡེ་ཞེས་བགྱི་བ་འདིར་རབ་ཏུ་བྱུང་
ན་ག་ལ་མཆིས། དགེ་སློང་དེས་བསྟན་ནས། སྤོས་འཚོང་གི་ཁྱེའུ་དེ་ཉེ་སྡེའི་དྲུང་དུ་སོང་སྟེ་སྨྲས་པ། ཉེ་སྡེ་ཁྱོད་ཀྱིས་ཅི་ཞིག་རྗེས་སུ་བསྒྲུབས་ན་ཁོ་བོ་ལ་ཡང་མ་དྲིས་པར་རབ་ཏུ་བྱུང་། ཉེ་སྡེས་སྨྲས་པ། ཁྱོད་ཀྱང་དེ་སྐད་ཅེས་ཁྱོད་ཅི་ཞིག་རྗེས་སུ་བསྒྲུབས་ན་ཁོ་
བོ་ལ་ཡང་མ་དྲིས་པར་རབ་ཏུ་བྱུང་ཞེས་ཟེར་རམ། གང་གི་ཚེ་བདག་ཕུ་བོ་དེ་ལ་སྤྲིན་བཞིན་དུ་ལྟ་བར་འདོད་པ་དེའི་ཚེ་ན་ནི་དེ་མ་འོངས་ལ། ད་བདག་གིས་ཉེས་པར་སྤྱད་པ་འདི་ལྟ་བུ་བྱས་ན་དེ་འོང་བར་འགྱུར་ཏེ། ཁོན་རྣམས་ཀྱི་ནང་ན་འདི་ལྟ་སྟེ། བུད་མེད་ཀྱི་ཁོན་

ཐ་ཆད་ཡིན་པས་བདག་ལ་གནོད་པར་བྱེད་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་དོ། །སྤོས་འཚོང་གི་ཁྱེའུས་སྨྲས་པ། ཁོ་བོ་ཅག་སྤོས་འཚོང་གི་ཁྱེའུ་དག་ནི་སྨན་པའི་ཕྱིར་ཡིན་པས་ཁོ་བོས་རེ་ཞིག་མངལ་ན་གནས་པ་བླུགས་པར་བྱ་བ་དེ་ལྟ་བུ་དག་
བྱིན་པར་གྱུར་ན་དེས་མངལ་ན་གནས་པ་དེ་དུམ་བུ་དུམ་བུར་ཞིག་པར་འགྱུར་བ་ཞིག་ན། ཁྱོད་ཀྱིས་ཁོ་བོ་ལ་ཅིའི་ཕྱིར་མ་སྨྲས། འདི་ལྟར་ད་ཡང་སྦྱིན་པར་བྱའོ། །ཉེ་སྡེས་དང་དུ་བླངས་སོ། །དེ་ནས་སྤོས་འཚོང་གི་ཁྱེའུ་དས་རྫས་རྣོན་པོ་དག་ཕྱེ་མར་བྱས་
ཏེ་བུ་མོ་ཞིག་གི་ལག་ཏུ་བྱིན་ནས་སྨྲས་པ། ཁྱོད་སོང་ལ་སྡེ་པའི་ཁྱིམ་དུ་སོང་སྟེ། སྡེ་པའི་ཆུང་མ་ལ་ཉེ་སྡེ་ན་རེ་ཕྱེ་མ་འདི་ཆུ་དྲོན་མོ་དང་སྦྱོར་ལ་འཐུང་ཤིག་དང་ཁྱོད་སོས་པར་འགྱུར་ཞེས་ཟེར་རོ་ཞེས་གྱིས་ཤིག །བུ་མོ་དེས་ཇོ་བོ་བཀའ་བཞིན་འཚལ་ཞེས་སྤོས་འཚོང་
གི་ཁྱེའུ་ལས་མཉན་ནས་སྡེ་པའི་ཁྱིམ་ག་ལ་བ་དེར་སོང་སྟེ་ཕྱིན་ནས། སྡེ་པའི་ཆུང་མ་ལ་སྨྲས་པ། ཉེ་སྡེའི་ཞལ་ནས་ཕྱེ་མ་འདི་ཆུ་དྲོན་མོ་དང་སྦྱོར་ལ་འཐུང་ཤིག་དང་ཁྱོད་སོས་པར་འགྱུར་ཞེས་གསུང་ངོ་། །སྡེ་པའི་ཆུང་མ་དེས་ཕྱེ་མ་དེ་ཆུ་དྲོན་མོ་དང་སྦྱར་ཏེ་འཐུངས་
པ་དང་། དེ་ནས་དེའི་མངལ་ན་གནས་པ་དེ་དུམ་བུ་དུམ་བུར་ཞིག་པར་གྱུར་ཅིང་མངལ་ན་གནས་པའི་མཚན་མ་དག་ཀྱང་མེད་པར་གྱུར་ཏོ། །ཡང་ན་ཟླ་དག་གིས་མཐོང་ནས་དེ་དག་གིས་སྨྲས་པ། ཁྱོད་ཀྱི་མངལ་ན་གནས་པ་དེ་གར་སོང་། སྡེ་པའི་ཆུང་མས་སྨྲས་
པ། ཁོ་མོས་དང་པོ་ཉིད་ནས་ཁོ་མོ་ཚུལ་ཁྲིམས་དང་ལྡན་པ་ཉིད་ཡིན་གྱིས་ཁྱེད་ཅག་བརྫུན་གྱི་སྐུར་པས་ཁོ་མོ་ལ་ཀུན་ཏུ་མ་སྤྱོད་ཅིག་ཅེས་མ་སྨྲས་སམ། དེའི་གྲོགས་མོ་ཆེས་མཛའ་བ་དེ་དེའི་གན་དུ་སོང་སྟེ་སྨྲས་པ། ཁྱོད་ཀྱིས་སྔར་འདི་སྐད་ཅེས་ཉེ་སྡེ་ལས་སོ་ཞེས་
ཁོ་མོ་ལ་སྨྲས་པའི་མངལ་ན་གནས་པ་དེ་ད་གར་སོང་། སྡེ་པའི་ཆུང་མས་སྨྲས་པ། གང་ཁོ་ན་ལས་འོངས་པ་དེ་ཁོ་ནར་སོང་ངོ་། །ཇི་ལྟར་གྱུར། ཉེ་སྡེས་ཕྱེ་མ་རྣོན་པོ་དེ་ལྟ་བུ་བྱིན་པས་དེས་ན་མངལ་ན་གནས་པ་དེ་དུམ་བུ་དུམ་བུར་ཞིག་པར་གྱུར་ཏོ། །དེ་ཤཱཀྱའི་

སྲས་ཀྱི་དགེ་སྦྱོང་རྣམས་ཀྱི་དགེ་སྦྱོང་གི་ཚུལ་ནི་ཚིག་གོ། །བྲམ་ཟེའི་ཚུལ་ནི་ཚིག་སྟེ། འདི་ལྟར་མངལ་ན་གནས་པ་ཡང་བླུགས་པར་བྱེད་དོ། །ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་དོ། །ཉེ་སྡེས་སྡིག་པའི་ལས་འདི་
དང་འདི་ལྟ་བུ་བྱས་སོ་ཞེས་བྱ་བའི་སྒྲ་དེ་ཡང་མཉན་ཡོད་ཀུན་དུ་གྲགས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཉེ་སྡེ་ལ་རྨས་པ། ཉེ་སྡེ་ཁྱོད་ཀྱིས་སྡིག་པའི་ལས་དེ་ལྟ་བུ་དེ་
བྱས་པ་བདེན་ནམ། བཙུན་པ་མ་བགྱིས་ཏེ། འདི་ལྟར་བདག་གིས་རྗེས་སུ་ཡི་རངས་པར་ནི་བགྱིས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་ཉེ་སྡེ་ལ་ནི་ལྟུང་བ་མེད་དོ། །ཡང་དགེ་སློང་གིས་གནས་དེ་ལྟ་བུ་ལ་རྗེས་སུ་ཡི་
རངས་པར་མི་བྱའོ། །དགེ་སློང་གནས་དེ་ལྟ་བུ་ལ་རྗེས་སུ་ཡི་རངས་པར་བྱེད་ན་འགལ་ཚབས་ཅན་དུ་འགྱུར་རོ། །དེའི་བར་སྐབས་སུ་སྡེ་པ་དོན་ལེགས་པར་གྲུབ་སྟེ་མཉན་ཡོད་དང་ཉེ་བར་ཕྱིན་ཏོ། །འཇིག་རྟེན་ནི་འབྱོར་པ་འདོད་ལ། རྒུད་པ་དང་མི་མཐུན་པ་ཡིན་
པས་ཁ་ཅིག་གིས་མྱུར་བ་མྱུར་བར་དོང་སྟེ་སྡེ་པའི་ཆུང་མ་ལ་སྨྲས་པ། ཁྱོད་ཀྱི་ཁྱིམ་ཐབ་དོན་ལེགས་པར་གྲུབ་སྟེ་མཉན་ཡོད་དང་ཉེ་བར་འོངས་ཀྱིས་སྤྲོ་བ་སྐྱེད་ཅིག །བུད་མེད་ཀྱི་ཡུལ་ནི་མ་བསླབས་པར་མཁས་པ་ཡིན་པས་སྡེ་པའི་ཆུང་མ་དེ་ཡི་ཆད་པའི་སེམས་
ཀྱིས་གོས་དྲི་མ་ཅན་དག་བགོས་ཏེ། ཁྲི་ཞིག་པ་ལ་འདུག་ཅིང་འདུག་གོ། །ཅི་ཙམ་ན་སྡེ་པ་མཉན་ཡོད་དུ་ཞུགས་ནས་ཟོང་མཛོད་དུ་མཁོས་སུ་ཕབ་སྟེ་རང་གི་ཁྱིམ་དུ་འོངས་པ་དང་། ཁྱིམ་མ་བྱུགས། བྱི་དོར་མ་བྱས། གསལ་བ་མེད་པ་མཐོང་ནས་དེས་བུ་མོ་མངག་
གཞུག་མ་ལ་དྲིས་པ། ཁྱིམ་བདག་གི་ཆུང་མ་གར་སོང་། བུ་མོས་སྨྲས་པ། རྗེའི་སྲས་སྤྱོད་ལམ་བཅད་དེ་ཁྲི་ཞིག་པ་ལ་མཆིས་ཤིང་མཆིས་སོ། །དེ་ནས་སྡེ་པ་ཡིད་མི་བདེ་བ་སྐྱེས་ཏེ་ཆུང་མའི་གན་དུ་སོང་ནས་སྨྲས་པ། བཟང་མོ་ཁྱོད་ཁོ་བོ་འོངས་པས་མི་བདེ་འམ།

རྗེའི་སྲས་བདག་ཁྱོད་བྱོན་པས་མི་བདེ་བ་མ་མཆིས་ཏེ། འདི་ལྟར་རྗེའི་སྲས་ཀྱི་སྲུང་མ་གང་ལགས་པ་དེ་དག་ཉིད་རྐུན་མ་དག་ལགས་སོ། །ཅི་ཞིག་བྱས། བཀག་བཞིན་དུ་ཉེ་སྡེས་ནན་གྱིས་ཁོ་མོ་བདག་གིར་བགྱིས་སོ། །བཟང་མོ་དེ་ནི་དེས་ཁྱོད་ཟིལ་གྱིས་མནན་པ་མ་ཡིན་
གྱིས་ཁོ་བོ་ཟིལ་གྱིས་མནན་པ་ཡིན་གྱིས་ལོངས་ཤིག་དང་ཁོ་བོས་དེ་ལ་མཚམས་གཅད་པར་བྱའོ། །བཟང་མོ་ཉེ་སྡེ་ག་ལ་འདུག །རྗེའི་སྲས་ཁྱོད་བྱོན་པ་ཐོས་ནས་རབ་ཏུ་བྱུང་ངོ་། །གང་དུ་རྒྱལ་བྱེད་ཀྱི་ཚལ་དུ་ཤཱཀྱའི་སྲས་ཀྱི་དགེ་སྦྱོང་རྣམས་ཀྱི་ནང་དུའོ། །བཟང་མོ་ཅི་
དེ་འཇིགས་པ་མེད་པའི་གྲོང་ཁྱེར་ཡིན་ནམ། ཁོ་བོ་དེར་སོང་ལ་དེ་ལ་མཚམས་ཆེན་པོ་གཅད་པར་བྱའོ། །འཇིག་རྟེན་ནི་མཛའ་བཤེས་དང་། དགྲ་བོ་དང་། བར་མ་ཡིན་པས་ཁ་ཅིག་ཉེ་སྡེའི་དྲུང་དུ་སོང་སྟེ་སྨྲས་པ། ཉེ་སྡེ་ཁྱོད་ཀྱི་ཕུ་བོ་འོངས་སོ། །ཉེ་སྡེས་སྨྲས་པ་ཇི་སྐད་
ཟེར། དེ་དག་གིས་སྨྲས་པ། ཅི་དེ་འཇིགས་པ་མེད་པའི་གྲོང་ཁྱེར་ཡིན་ནམ། ཁོ་བོ་དེར་ཡང་སོང་ལ་དེ་ལ་མཚམས་ཆེན་པོ་གཅད་པར་བྱའོ་ཞེས་ཟེར་རོ། །ཉེ་སྡེས་དེ་ཐོས་ནས་ཉམ་ང་བར་གྱུར་ཏེ་བསམས་པ། བདག་འཇིགས་པ་གང་གིས་རབ་ཏུ་བྱུང་བ་དེ་འདིར་ཡང་
འབྱུང་བར་མི་འགྱུར་རམ། འདི་ལྟར་བདག་ཅག་རྒྱལ་པོས་གཞོན་ནུའི་ཡོངས་སུ་སྤང་བ་བྱིན་མོད་ཀྱི་འོན་ཀྱང་བདག་ཉེས་པ་དང་བཅས་པ་ཡིན་པས་གལ་ཏེ་བདག་ལ་འདིར་ཡང་གནོད་པ་བྱེད་པར་འགྱུར་བའི་གནས་ཡོད་ཀྱིས་བྲོས་ཏེ་འགྲོའོ་སྙམ་ནས། དེས་མཁན་པོ་
ལ་མཁན་པོ་བདག་འཇིགས་པ་གང་གིས་རབ་ཏུ་བྱུང་བ་དེ་འདིར་ཡང་རྗེས་སུ་འབྲེལ་བར་གྱུར་ཏོ་ཞེས་བྱུང་བའི་མཐའ་དེ་རྒྱས་པར་བརྗོད་དོ། །མཁན་པོས་སྨྲས་པ། བུ་ཅི་ཉེས་མཁན་པོ་བདག་གི་ཕུ་བོ་དེ་མཆིས་ནས་ཏེ་པོར་མཆིད་འབོ་ཞིང་ཇི་དེ་འཇིགས་པ་མེད་པའི་
གྲོང་ཁྱེར་ཡིན་ནམ། ཁོ་བོ་དེར་ཡང་སོང་ལ་དེ་ལ་མཚམས་ཆེན་པོ་གཅད་པར་བྱའོ་ཞེས་མཆིའོ། །འདི་ལྟར་བདག་ཅག་རྒྱལ་པོས་གཞོན་ནུའི་ཡོངས་སུ་སྤང་བ་སྩལ་མོད་ཀྱི་འོན་ཀྱང་བདག་ནོངས་པ་དང་བཅས་པ་ལགས་པས་གལ་ཏེ་ན་འདིར་ཡང་བདག་ལ་གནོད་

པ་བགྱིད་པར་འགྱུར་བའི་གནས་མཆིས་ཀྱིས་བྲོས་ཏེ་མཆིའོ། །བུ་གང་དུ་འགྲོ་མཁན་པོ་རྒྱལ་པོའི་ཁབ་ཏུའོ། །བུ་དེ་ན་ཁོ་བོའི་མཛའ་བཤེས་དགེ་སློང་ཞིག་འདུག་གིས་དེ་ལ་སྤྲིང་ཡིག་བསྐུར་གྱིས། དེའི་དྲུང་ན་འདུག་ཤིག་དང་། དེ་ཁྱོད་ལ་བྱམས་
པས་རྗེས་སུ་སྐྱོང་བར་འགྱུར་རོ། །མཁན་པོ་ལེགས་སོ། །དེས་དགེ་སློང་དེ་ལ་སྔར་བྲོ་རྨ་བ་བྲིས་ཏེ། བདག་གི་ལྷན་ཅིག་གནས་པ་འདི་བདག་གིས་ཁྱོད་ཀྱི་གན་དུ་བཏང་སྟེ་འོང་གིས། དེའི་སླད་དུ་ཇི་ལྟར་འདི་ན་མངོན་པར་དགའ་བ་བཞིན་དུ་བྱམས་པས་རྗེས་
སུ་སྐྱོང་ཤིག་ཅེས་སྤྲིང་ཡིག་བྲིས་ནས། ཉེ་སྡེས་སྤྲིང་ཡིག་དེ་མནོས་ཏེ་བག་ཚ་བ་ཡིད་མི་བདེ་ཞིང་ཕྱོགས་སུ་རྣམ་པར་ལྟ་བཞིན་དུ་རྒྱལ་པོའི་ཁབ་ཏུ་འཕགས་ཏེ་མཐར་གྱིས་རྒྱལ་པོའི་ཁབ་ཏུ་སོང་ནས་ཐོས་པ་བརྒྱུད་པས་དགེ་སློང་དེའི་གན་དུ་ཕྱིན་ནས་རྐང་པ་གཉིས་ལ་
མགོ་བོས་ཕྱག་འཚལ་ཏེ་སྤྲིང་ཡིག་ཕུལ་ནས་མཐའ་གཅིག་ཏུ་འདུག་གོ། །དེ་ནས་དགེ་སློང་དེས་སྤྲིང་ཡིག་བླགས་ཏེ་སྨྲས་པ། ཚེ་དང་ལྡན་པ་འོངས་པ་ལེགས་སོ་འོངས་པ་ལེགས་སོ། །ཇི་ལྟར་ཁྱོད་དེའི་ཉེ་གནས་ཡིན་པ་དེ་བཞིན་དུ་ཁོ་བོའི་ཡང་ཡིན་གྱིས་བསླབ་
པ་ལ་གུས་པར་གྱིས་ཤིག་དང་། ཁོ་བོས་ཁྱོད་ལྷུང་བཟེད་དང་། ཆོས་གོས་དང་། དྲ་བ་དང་། ཕོར་བུ་དང་། སྐ་རགས་ཀྱིས་མི་བྲེལ་བར་བྱའོ། །གཞན་ཡང་དགེ་སློང་གི་ལས་ནི་གཉིས་ཏེ། བསམ་གཏན་དང་། ཀློག་པ་ཡིན་ན་ཁྱོད་བསམ་གཏན་དང་། ཀློག་
པ་གང་འདོད། བསམ་གཏན་འཚལ་ལོ། །བུ་ལེགས་སོ། །དེས་དེ་ལ་གདམས་ངག་བྱིན་ནས་ཉེ་སྡེ་བསིལ་བ་ཚལ་གྱི་དུར་ཁྲོད་དུ་སོང་སྟེ་བརྩོན་པ་དང་། འབད་པ་དང་། བརྩལ་བས་ཉོན་མོངས་པ་ཐམས་ཅད་སྤངས་ནས་དགྲ་བཅོམ་པ་ཉིད་མངོན་དུ་བྱས་ཏེ།
དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུ། རིག་པས་སྒོ་ངའི་སྦུབས་དྲལ་བར་གྱུར་ཅིང་། རིག་པ་དང་། མངོན་པར་

ཤེས་པ་དང་། སོ་སོ་ཡང་དག་པར་རིག་པ་ཐོབ་པ། སྲིད་པ་དང་། འདོད་པའི་རྙེད་པ་དང་། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་། ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང་། རྗེད་པར་བྱ་བ་དང་། མངོན་དུ་སྨྲ་བར་བྱ་བར་གྱུར་ཏོ། །དེའི་
བར་སྐབས་སུ་སྡེ་པ་ཡང་རྒྱལ་བྱེད་ཀྱི་ཚལ་དུ་སོང་སྟེ་དགེ་སློང་རྣམས་ལ་དྲིས་པ། འཕགས་པ་དག་འདི་ན་མཉན་ཡོད་པའི་ཁྱིམ་བདག་གི་བུ་རབ་ཏུ་བྱུང་བ་ཞིག་མཆིས་སམ། རབ་ཏུ་བྱུང་ངོ་། །དེ་ག་ལ་མཆིས། རྒྱལ་པོའི་ཁབ་ཏུ་སོང་ངོ་། །དེ་ཁྱོད་ཀྱི་ཅིར་འོང་། ནུ་བོར་
མཆིའོ། །སྡེ་པས་དགེ་སློང་དེ་དག་གི་རྐང་པ་ལ་ཕྱག་འཚལ་ཏེ་སོང་ནས་བསམས་པ། རྒྱལ་པོའི་ཁབ་ཀྱང་འཇིགས་པ་མེད་པའི་གྲོང་ཁྱེར་མ་ཡིན་གྱིས་བདག་དེར་ཡང་སོང་ལ་དེ་ལ་མཚམས་ཆེན་པོ་གཅད་པར་བྱའོ་སྙམ་ནས། དེ་ལམ་བརྒྱགས་མང་པོ་དང་། ཀཱར་
ཥཱ་པ་ཎ་དག་ཁྱེར་ཏེ་རྒྱལ་པོའི་ཁབ་ཏུ་སོང་ངོ་། །དེ་འོད་མའི་ཚལ་དུ་སོང་ནས་དགེ་སློང་རྣམས་ལ་དྲིས་པ། འཕགས་པ་དག་འདི་ན་མཉན་ཡོད་པའི་ཁྱིམ་བདག་གི་བུ་རབ་ཏུ་བྱུང་བ་ཞིག་མཆིས་སམ། འདིར་འོངས་སོ། །དེ་ཁྱོད་ཀྱི་ཅིར་འོང་། ནུ་བོར་མཆིའོ། །
དེ་ག་ལ་མཆིས། བསིལ་བ་ཚལ་གྱི་དུར་ཁྲོད་ནའོ། །སྡེ་པ་དེ་བསིལ་བ་ཚལ་གྱི་དུར་ཁྲོད་དུ་སོང་བ་དང་། དེས་ཉེ་སྡེ་བྱིས་པའི་གནས་སྐབས་ན་མཐོང་བ་ཆེན་པོར་གྱུར་པས་མཁས་པ་དང་། རྣམ་པར་གནོན་པ་ལས་ངོ་མི་ཤེས་མོད་ཀྱི་ཏེ་པོར་བརྟགས་པ་དང་། བཞིན་
གཟུགས་ལས་ངོ་ཤེས་པར་གྱུར་ནས། དེས་བསམས་པ། གལ་ཏེ་འདིས་བདག་ངོ་ཤེས་པར་གྱུར་ན་ངེས་པར་འདིས་བདག་གསོད་པར་བྱེད་པས་དེའི་ཐབས་སྦྱར་བར་བྱའོ་སྙམ་ནས། དེ་མཐའ་གཅིག་ཏུ་སོང་སྟེ་ཕྱོགས་སུ་རྣམ་པར་ལྟ་ཞིང་འདུག་གོ། །ཇི་ཙམ་ན་ལམ་
དེར་རྔོན་པ་ལག་ན་མདའ་གཞུ་ཐོགས་པ་ཞིག་རི་དགས་ཤོར་བའི་ཕྱིར་འོངས་པ་དང་། སྡེ་པ་དེའི་གན་དུ་སོང་སྟེ་སྨྲས་པ། ཀྱེ་གྲོགས་པོ་ཁྱོད་ལག་ན་མདའ་གཞུ་ཐོགས་ཏེ་གར་འགྲོ། དེས་སྨྲས་པ། གྲོགས་པོ་རི་དགས་ཤོར་དུའོ། །དེ་ལས་ཁྱོད་ཀྱིས་རྙེད་པ་ཇི་ཙམ་

འགྲུབ། གྲོགས་པོ་ལན་འགའ་ནི་འགྲུབ། ལན་འགའ་ནི་མི་འགྲུབ་བོ། །གང་གི་ཚེ་འགྲུབ་པ་དེའི་ཚེ་ན་མང་ཉུང་ཇི་ཙམ་གྲོགས་པོ་ཀཱར་ཥཱ་པ་ཎ་ལྔ་བརྒྱ་ཙམ་མོ། །སྡེ་པས་སྨྲས་པ། གྲོགས་པོ་གལ་ཏེ་དེ་ལྟ་ན་རབ་ཏུ་བྱུང་བ་འདི་སོད་ཅིག་
དང་ཁོ་བོས་ཁྱོད་ལ་ཀཱར་ཥཱ་པ་ཎ་ལྔ་བརྒྱ་སྦྱིན་ནོ། །རྔོན་པ་དེ་འདོད་པས་དྲངས་པའི་ཡིད་དང་ལྡན་པས་དེས་སྡེ་པ་ལས་ཀཱར་ཥཱ་པ་ཎ་ལྔ་བརྒྱ་བླངས་ནས་དེའི་འོག་ཏུ་བསམས་པ། རབ་ཏུ་བྱུང་བ་འདི་དག་ནི་རྒྱལ་པོ་གཟུགས་ཅན་སྙིང་པོས་གཞོན་ནུའི་ཡོངས་སུ་སྤང་བ་བྱིན་པ་ཡིན་
ལ། བདག་ནི་ཕྱོགས་འདིར་རྟག་ཏུ་རྒྱུ་བ་ཡིན་པས་གལ་ཏེ་བདག་གིས་རབ་ཏུ་བྱུང་བ་འདི་བསད་པར་གྱུར་ན་བདག་ཀྱང་བུ་དང་། རྩ་ལག་དང་། ཕྱུགས་དང་བཅས་ཏེ་ངེས་པར་བཙོན་རར་བཅུག་ཅིང་བསད་པར་འགྱུར་རོ། །འདི་ལྟར་ཁྱིམ་བདག་འདི་ནི་ན་ལེ་ཤམ་
དཀར་པོ་འབྱུང་བ་དང་འདྲ་བར་འདི་ག་ལས་འོངས་པ་སུས་ཀྱང་མི་ཤེས་པ་ཡིན་གྱིས། རྣམ་པ་ཐམས་ཅད་དུ་འདི་གསད་པར་བྱའོ་སྙམ་ནས་རྔོན་པ་དེས་མདའ་དུག་ཅན་གྱིས་གཞུ་རྔའི་དབྱིབས་ལྟར་རྣ་དྲུང་དུ་ཐུག་པར་བཀང་སྟེ་སྡེ་པའི་གནད་དུ་བསྣུན་ཏོ། །སྡེ་པ་དེ་སྡུག་
བསྔལ་གྱི་ཚོར་བ་དག་གིས་ཉེན་པས་བདག་བསད་པར་གྱུར་པ་གང་ཡིན་པ་དེ་ཐམས་ཅད་ངེས་པར་རབ་ཏུ་བྱུང་བ་འདིས་རྔོན་པ་འདི་དང་ལྷན་ཅིག་བརྡ་བྱས་པ་ཡིན་གྱིས་གང་དུ་འདི་གསོད་པར་འགྱུར་བ་དེར་སྐྱེ་བ་བླང་ངོ་སྙམ་དུ་སེམས་དག་གསོ་བར་བྱེད་ཅིང་དེས་སྨོན་ལམ་
ལོག་པར་བཏབ་ནས། ཉེ་སྡེའི་གནས་ཁང་གི་སྒོ་གླེགས་འདྲུད་པའི་འོག་ཏུ་སྦྲུལ་དུག་མྱུར་དུ་ཁྱབ་པར་བྱེད་པ་ཞིག་ཏུ་སྐྱེས་སོ། །དགྲ་བཅོམ་པ་དག་ནི་མ་བསམས་པར་ཤེས་པ་དང་མཐོང་བ་མི་འཇུག་པས་ཉེ་སྡེས་སྒོ་གླེགས་ཕྱེ་བས་སྦྲུལ་དུག་མྱུར་དུ་ཁྱབ་པར་བྱེད་
པ་དེ་ཤི་བར་གྱུར་ཏོ། །དེ་ནས་སྒོ་གླེགས་འདྲུད་པའི་སྟེང་དུ་སྐྱེས་ནས་དེར་ཡང་ཤི་བར་གྱུར་ཏོ། །དེ་ནས་ཁྲིའི་རྐང་རྟེན་གཅིག་གི་འོག་ཏུ་སྐྱེས་ནས་དེར་ཡང་ཤི་བར་གྱུར་ཏོ། །དེ་བཞིན་དུ་ལན་གཉིས་ལན་གསུམ་ལན་བཞིར་འོག་ཏུ་སྐྱེས་ནས་དེར་ཡང་ཤི་བར་གྱུར་

ཏོ། །ཇི་ལྟ་ཇི་ལྟར་འཆི་བར་འགྱུར་བ། དེ་ལྟ་དེ་ལྟར་དུག་ཤིན་ཏུ་རྣོ་བ་དང་། ལུས་ཤིན་ཏུ་ཕྲ་བས་ཉིང་མཚམས་སྦྱོར་བ་ལེན་པར་བྱེད་དོ། །ཇི་ཙམ་དུས་གཞན་ཞིག་ན་དེ་སྟེང་གི་སྤང་ལེབ་ཀྱི་བར་དུ་སྐྱེས་ནས་ཚེ་དང་ལྡན་པ་ཉེ་སྡེ་གཅིག་པུ་དབེན་པར་སོང་སྟེ་ནང་དུ་ཡང་
དག་འཇོག་ལ་ཞུགས་པའི་ལུས་ལ་ལྷུང་བར་གྱུར་ཏོ། །དེ་ན་ཚེ་དང་ལྡན་པ་ཉེ་སྡེས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་ཁོ་བོའི་ལུས་ལ་སྦྲུལ་དུག་མྱུར་དུ་ཁྱབ་པར་བྱེད་པ། འབར་བ། རྣོ་བ། དུག་དྲག་པ་འདི་ལྟ་སྟེ། དཔེར་ན་མིག་སྨན་གྱི་ཐུར་མ་
ལྟར་ཕྲ་བ་ལྷུང་གིས། ཀྱེ་ཚེ་དང་ལྡན་པ་དག་ལུས་ཀྱི་ཐན་ཀོར་ནས་ཟུང་ལ་འདི་ཉིད་དུ་འདི་ལྟ་སྟེ། དཔེར་ན་སྦུན་པའི་ཆང་བུ་ལྟར་ཞིགས་པར་མི་འགྱུར་བར་གཙུག་ལག་ཁང་གི་ཕྱི་རོལ་དུ་ཕྱུང་ཤིག །དེའི་ཚེ་ན་ཚེ་དང་ལྡན་པ་ཤཱ་རིའི་བུ་ཚེ་དང་ལྡན་པ་ཉེ་སྡེ་དང་ཧ་ཅང་མི་རིང་
བའི་ཤིང་དྲུང་ཞིག་ན་རྟེན་ཅིང་ཉིན་མོ་གནས་པའི་ཕྱིར་འདུག་གོ། །ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་ཉེ་སྡེའི་ཚིག་བརྗོད་པ་རྣམ་པ་དེ་ལྟ་བུ་དེ་ཐོས་སོ། །ཐོས་ནས་ཀྱང་ཚེ་དང་ལྡན་པ་ཉེ་སྡེ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་ཉེ་སྡེ་ལ་འདི་སྐད་ཅེས་སྨྲས་སོ། །བདག་
གིས་ཚེ་དང་ལྡན་པ་ཉེ་སྡེའི་བཞིན་གཞན་དུ་གྱུར་པའམ། དབང་པོ་རྣམས་སྣ་ཚོགས་སུ་གྱུར་པར་མ་མཐོང་ན། འོན་ཀྱང་ཚེ་དང་ལྡན་པ་ཉེ་སྡེ་འདི་སྐད་ཅེས་ཚེ་དང་ལྡན་པ་དག་ཁོ་བོའི་ལུས་ལ་སྦྲུལ་དུག་མྱུར་དུ་ཁྱབ་པར་བྱེད་པ། འབར་བ། རྣོ་བ། དུག་དྲག་པ་འདི་ལྟ་སྟེ། དཔེར་
ན་མིག་སྨན་གྱི་ཐུར་མ་ལྟར་ཕྲ་བ་ལྷུང་གིས། ཀྱེ་ཚེ་དང་ལྡན་པ་དག་ལུས་ཀྱི་ཐན་ཀོར་ནས་ཟུང་ལ་འདི་ཉིད་དུ་འདི་ལྟ་སྟེ། དཔེར་ན་སྦུན་པའི་ཆང་བུ་ལྟར་ཞིགས་པར་མི་འགྱུར་བར་གཙུག་ལག་ཁང་གི་ཕྱི་རོལ་དུ་ཕྱུང་ཤིག་ཅེས་ཟེར། ཚེ་དང་ལྡན་པ་ཤཱ་རིའི་བུ་གང་ལ་འདི་ལྟར་
མིག་བདག་ཡིན་ནོ། །མིག་བདག་གི་ཡིན་ནོ། །རྣ་བ་དང་། སྣ་དང་། ལྕེ་དང་། ལུས་དང་། ཡིད་བདག་ཡིན་ནོ། །ཡིད་བདག་གི་ཡིན་ནོ། །གཟུགས་བདག་ཡིན་ནོ། །གཟུགས་བདག་གི་ཡིན་ནོ། །སྒྲ་དང་། དྲི་དང་། རོ་དང་། རེག་བྱ་དང་། ཆོས་བདག་ཡིན་

ནོ། །ཆོས་བདག་གི་ཡིན་ནོ། །སའི་ཁམས་བདག་ཡིན་ནོ། །སའི་ཁམས་བདག་གི་ཡིན་ནོ། །ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་དང་། རྣམ་པར་ཤེས་པའི་ཁམས་བདག་ཡིན་ནོ། །རྣམ་པར་ཤེས་པའི་
ཁམས་བདག་གི་ཡིན་ནོ། །གཟུགས་ཀྱི་ཕུང་པོ་བདག་ཡིན་ནོ། །གཟུགས་ཀྱི་ཕུང་པོ་བདག་གི་ཡིན་ནོ། །ཚོར་བའི་ཕུང་པོ་དང་། འདུ་ཤེས་ཀྱི་ཕུང་པོ་དང་། འདུ་བྱེད་ཀྱི་ཕུང་པོ་དང་། རྣམ་པར་ཤེས་པའི་ཕུང་པོ་བདག་ཡིན་ནོ། །རྣམ་པར་ཤེས་པའི་ཕུང་པོ་བདག་
གི་ཡིན་ནོ་ཞེས་བྱ་བ་ཡོད་པ་དེ་ལ་ནི་བཞིན་གཞན་དུ་གྱུར་པའམ། དབང་པོ་རྣམས་སྣ་ཚོགས་སུ་གྱུར་པར་འགྱུར་གྱི། ཚེ་དང་ལྡན་པ་ཤཱ་རིའི་བུ་ཁོ་བོ་ལ་ནི་འདི་ལྟར་མིག་བདག་ཡིན་ནོ། །མིག་བདག་གི་ཡིན་ནོ། །རྣ་བ་དང་། སྣ་དང་། ལྕེ་དང་། ལུས་དང་། ཡིད་
བདག་ཡིན་ནོ། །ཡིད་བདག་གི་ཡིན་ནོ། །གཟུགས་བདག་ཡིན་ནོ། །གཟུགས་བདག་གི་ཡིན་ནོ། །སྒྲ་དང་། དྲི་དང་། རོ་དང་། རེག་བྱ་དང་། ཆོས་བདག་ཡིན་ནོ། །ཆོས་བདག་གི་ཡིན་ནོ། །སའི་ཁམས་བདག་ཡིན་ནོ། །སའི་ཁམས་བདག་གི་ཡིན་
ནོ། །ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་དང་། རྣམ་པར་ཤེས་པའི་ཁམས་བདག་ཡིན་ནོ། །རྣམ་པར་ཤེས་པའི་ཁམས་བདག་གི་ཡིན་ནོ། །གཟུགས་ཀྱི་ཕུང་པོ་བདག་ཡིན་ནོ། །གཟུགས་ཀྱི་ཕུང་པོ་
བདག་གི་ཡིན་ནོ། །ཚོར་བའི་ཕུང་པོ་དང་། འདུ་ཤེས་ཀྱི་ཕུང་པོ་དང་། འདུ་བྱེད་ཀྱི་ཕུང་པོ་དང་། རྣམ་པར་ཤེས་པའི་ཕུང་པོ་བདག་ཡིན་ནོ། །རྣམ་པར་ཤེས་པའི་ཕུང་པོ་བདག་གི་ཡིན་ནོ། །ཞེས་བྱ་བ་མེད་པས་ཁོ་བོའི་བཞིན་གཞན་དུ་གྱུར་པའམ། དབང་
པོ་རྣམས་སྣ་ཚོགས་སུ་གྱུར་པར་ག་ལ་འགྱུར། ཚེ་དང་ལྡན་པ་ཉེ་སྡེས་ཡུན་རིང་པོ་ནས་བདག་ཏུ་འཛིན་པ་དང་། བདག་གིར་འཛིན་པ་དང་། ངའོ་སྙམ་པའི་ང་རྒྱལ་དང་། མངོན་པར་ཞེན་པ་དང་། བག་ལ་ཉལ་དག་སྤངས་ཤིང་ཡོངས་སུ་ཤེས་ལ། ཏ་ལའི་

མགོ་བཞིན་དུ་དྲུངས་ནས་བཅད་ཅིང་གཞི་མི་སྣང་ལ་ཕྱིས་ཀྱང་མི་སྐྱེ་བའི་ཆོས་ཅན་དུ་གྱུར་པས་ཁྱོད་ལ་བཞིན་གཞན་དུ་གྱུར་པའམ། དབང་པོ་རྣམས་སྣ་ཚོགས་སུ་གྱུར་པར་ག་ལ་འགྱུར། དེ་ནས་ཚེ་དང་ལྡན་པ་ཤཱ་རིའི་བུ་དགེ་སློང་རབ་ཏུ་མང་པོ་དག་དང་བཅས་པས།
ཚེ་དང་ལྡན་པ་ཉེ་སྡེའི་ལུས་ཀྱི་ཐན་ཀོར་ནས་བཟུང་སྟེ་གཙུག་ལག་ཁང་གི་ཕྱི་རོལ་དུ་བསྐྱལ་ནས། ཚེ་དང་ལྡན་པ་ཉེ་སྡེའི་ལུས་འདི་ལྟ་སྟེ། དཔེར་ན་སྦུན་པའི་ཆང་བུ་ལྟར་རྣམ་པ་བརྒྱར་ཞིགས་སོ། །དེ་ནས་ཚེ་དང་ལྡན་པ་ཤཱ་རིའི་བུས་དེའི་ཚེ་ཚིགས་སུ་བཅད་པ་སྨྲས་པ།
ཚངས་སྤྱོད་ལེགས་པར་སྤྱད་པ་དང་། །ལམ་ཉིད་ལེགས་པར་བསྒོམས་པ་ནི། །ཚེ་ཟད་དགའ་བར་འགྱུར་བ་སྟེ། །ནད་དང་བྲལ་བ་ཇི་བཞིན་ནོ། །ཚངས་སྤྱོད་ལེགས་པར་སྤྱད་པ་དང་། །ལམ་ཉིད་ལེགས་པར་བསྒོམས་པ་ནི། །ཚེ་ཟད་དགའ་བར་འགྱུར་བ་སྟེ། །དུག་
སྣོད་སྤངས་པ་ཇི་བཞིན་ནོ། །ཚངས་སྤྱོད་ལེགས་པར་སྤྱད་པ་དང་། །ལམ་ཉིད་ལེགས་པར་བསྒོམས་པ་ནི། །འབར་བའི་ཁྱིམ་ནས་ཐར་བ་ལྟར། །འཆི་བའི་མཐར་ནི་མྱ་ངན་མེད། །ཚངས་སྤྱོད་ལེགས་པར་སྤྱད་པ་དང་། །ལམ་ཉིད་ལེགས་པར་བསྒོམས་པ་ནི། །
གང་ཚེ་འཇིག་རྟེན་ཤེས་རབ་ཀྱིས། །རྩྭ་དང་ཤིང་འདྲར་མཐོང་གྱུར་པ། །དེ་ཚེ་ཉིང་མཚམས་སྦྱོར་མེད་ལས། །གཞན་པ་འདོད་པར་མི་བྱེད་དོ། །དེ་ནས་ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་ཉེ་སྡེའི་ལུས་ལ་ལུས་ཀྱི་མཆོད་པ་བྱས་ནས། བཅོམ་ལྡན་འདས་ག་ལ་བ་
དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཙུན་པ་ཚེ་དང་ལྡན་པ་ཉེ་སྡེའི་ལུས་ལ་སྦྲུལ་དུག་
མྱུར་དུ་ཁྱབ་པར་བགྱིད་པ། འབར་བ། རྣོ་བ། དུག་དྲག་པ་འདི་ལྟ་སྟེ། དཔེར་བགྱི་ན། མིག་སྨན་གྱི་ཐུར་མ་ལྟར་ཕྲ་བ་ལྷུང་ནས། དེའི་ལུས་འདི་ལྟ་སྟེ། དཔེར་བགྱི་ན་སྦུན་པའི་ཆང་བུ་ལྟར་ཞིགས་པར་གྱུར་ཏོ། །ཤཱ་རིའི་བུ་ཚེ་དང་ལྡན་པ་ཉེ་སྡེ་ལ་གལ་ཏེ་དེའི་

ཚེ་ཚིགས་སུ་བཅད་པ་འདི་དག་དང་། གསང་སྔགས་ཀྱི་ཚིག་འདི་དག་སྣང་བར་གྱུར་ན་དེའི་ལུས་ལ་སྦྲུལ་དུག་མྱུར་དུ་ཁྱབ་པར་བྱེད་པ། འབར་བ། རྣོ་བ། དུག་དྲག་པས་ཚུགས་པར་མི་འགྱུར་ཞིང་། དེའི་ལུས་འདི་ལྟ་སྟེ། དཔེར་ན་སྦུན་པའི་ཆང་
བུ་ལྟར་ཞིགས་པར་ཡང་མི་འགྱུར་རོ། །བཙུན་པ་ཚིགས་སུ་བཅད་པ་དེ་དག་དང་། གསང་སྔགས་ཀྱི་ཚིག་དེ་དག་གང་ལགས། དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་བཀའ་སྩལ་པ། ང་ནི་ཡུལ་འཁོར་སྲུངས་ལ་བྱམས། །ས་སྲུང་བུ་ལ་
བྱམས་པ་སྟེ། །ལ་བ་དང་ནི་མགྱོགས་མཆོག་དང་། །གཅོད་ལྡན་བུ་ལ་ང་བྱམས་སོ། །གཽ་ཏ་མ་ནི་ནག་པོ་དང་། །མིག་མི་བཟང་ལ་ང་བྱམས་ཏེ། །ཀླུ་གང་དགའ་བོ་ཉེ་དགའ་བོ། །དེ་གཉིས་ལ་ནི་ང་རྟག་བྱམས། །རྐང་མེད་རྣམས་ལ་ང་བྱམས་ཏེ། །རྐང་གཉིས་
རྣམས་ལའང་ང་བྱམས་སོ། །རྐང་བཞི་རྣམས་ལ་ང་བྱམས་ཏེ། །རྐང་མངས་རྣམས་ལའང་ང་བྱམས་སོ། །གང་དག་རྒྱ་མཚོར་རྟེན་པ་ཡི། །ཀླུ་རྣམས་ཀུན་ལ་ང་བྱམས་སོ། །སེམས་ཅན་གང་དག་མགུལ་གནས་པའི། །སེམས་ཅན་ཀུན་ལ་ང་བྱམས་སོ། །སེམས་
ཅན་ཀུན་དང་སྲོག་ཆགས་ཀུན། །འབྱུང་པོ་ཀུན་དང་མ་འདྲེས་ཤོག །ཐམས་ཅད་བདེ་བ་ཉིད་གྱུར་ཅིང་། །ཐམས་ཅད་ནད་ནི་མེད་གྱུར་ཅིག །ཀུན་གྱིས་བཟང་པོ་མཐོང་གྱུར་ཅིང་། །གང་ལའང་སྡིག་པར་མ་གྱུར་ཅིག །སྦྲུལ་གྱིས་གང་བའི་བྱ་སྐྱིབས་སུ། །རྟག་ཏུ་
བདག་ནི་གནས་གྱུར་ཀྱང་། །དུག་མྱུར་ཁྱབ་དང་དུག་དྲག་པོས། །བདག་གི་སྲོག་ལ་གནོད་མ་གྱུར། །བདག་གི་བདེན་ཚིག་གང་གིས་ནི། །སྟོན་པ་འཇིག་རྟེན་བླ་ན་མེད། །བདག་གི་བདེན་ཚིག་དེ་ཡིས་ནི། །བདག་གི་ལུས་ལ་དུག་མ་འཇུག །འདོད་ཆགས་
ཞེ་སྡང་གཏི་མུག་རྣམས། །དེ་དག་འཇིག་རྟེན་དུག་གསུམ་སྟེ། །སངས་རྒྱས་བཅོམ་ལྡན་དུག་མི་མངའ། །སངས་རྒྱས་བདེན་པས་དུག་བཅོམ་མོ། །འདོད་ཆགས་ཞེ་སྡང་གཏི་མུག་རྣམས། །དེ་དག་འཇིག་རྟེན་དུག་གསུམ་སྟེ། །སངས་རྒྱས་ཆོས་ནི་དུག་མི་

མངའ། །ཆོས་ཀྱི་བདེན་པས་དུག་བཅོམ་མོ། །འདོད་ཆགས་ཞེ་སྡང་གཏི་མུག་རྣམས། །དེ་དག་འཇིག་རྟེན་དུག་གསུམ་སྟེ། །བཅོམ་ལྡན་དགེ་འདུན་དུག་མི་མངའ། །དགེ་འདུན་བདེན་པས་དུག་བཅོམ་མོ། །དུག་དང་དྲག་པོའི་དུག་བཅོམ་སྟེ། །སྲུང་བས་ཡོངས་སུ་
བསྲུང་བར་བྱས། །སངས་རྒྱས་ཐམས་ཅད་དུག་བཅོམ་པས། །བྲང་འགྲོ་ཁྱོད་ཀྱི་དུག་བཅོམ་མོ། །དེ་ལ་གསང་སྔགས་ཀྱི་ཚིགས་རྣམ་ནི་འདི་དག་ཡིན་ཏེ། ཏདྱ་ཐཱ། ཨོཾ་ཏུམ་བི་ལེ། ཏུམ་བི་ལེ། ཏུ་མ་བེ་པྲ་ཏུ་མ་བེ། ན་ཊ་ཊེ་སུ་ན་ཊ་ཊ། ཀེ་བ་ཊ་ཊེ། མུ་ན་ཡེ་
ས་མ་ཡེ། དན་ཏེ་དན་ཏི་ལེ། ནཱི་ལེ་ནཱི་ལ་ཀེ་ཤེ །བཱ་ལེ་བཱ་ལ་ཀོ་བེ། ཨོ་ལེ་ནྱང་གོ་ལེ་སྭཱ་ཧཱ། ཤཱ་རིའི་བུ་གལ་ཏེ་དེའི་ཚེ་རིགས་ཀྱི་བུ་ཉེ་སྡེ་ལ་ཚིགས་སུ་བཅད་པ་དེ་དག་དང་། གསང་སྔགས་ཀྱི་ཚིག་དེ་དག་སྣང་བར་གྱུར་ན་དེའི་ལུས་ལ་དུག་མྱུར་དུ་ཁྱབ་པར་བྱེད་པས་
ཚུགས་པར་མི་འགྱུར་ཞིང་། དེའི་ལུས་འདི་ལྟ་སྟེ། དཔེར་ན་སྦུན་པའི་ཆང་བུ་ལྟར་རྣམ་པ་བརྒྱར་ཞིགས་པར་ཡང་མི་འགྱུར་རོ། །བཙུན་པ་དེའི་ཚེ་ན་ཚེ་དང་ལྡན་པ་ཉེ་སྡེས་ཚིགས་སུ་བཅད་པ་དེ་དག་དང་། གསང་སྔགས་ཀྱི་ཚིག་དེ་དག་སྔོན་མ་ཐོས་པས་དེ་ལ་ད་ལྟར་
བཅོམ་ལྡན་འདས་ལ་ཇི་ལྟ་བ་བཞིན་དུ་སྣང་བར་ག་ལ་འགྱུར། དེ་ནས་ཚེ་དང་ལྡན་པ་ཤཱ་རིའི་བུས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་
བཅོམ་ལྡན་འདས་ཀྱི་སྤྱན་སྔ་ནས་སོང་ངོ་།། །།འདུལ་བ་རྣམ་པར་འབྱེད་པ། བམ་པོ་དགུ་པ། དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཉེ་སྡེས་ལས་ཅི་
ཞིག་བགྱིས་ན་ལས་དེའི་རྣམ་པར་སྨིན་པས་ཕྱུག་པ་ནོར་མང་བ་ལོངས་སྤྱོད་ཆེ་བའི་ཁྱིམ་དུ་སྐྱེས། ལས་ཅི་ཞིག་བགྱིས་ན་དེས་བཅོམ་ལྡན་འདས་ཀྱི་སྤྱན་སྔར་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བགྱིས། ལས་ཅི་

ཞིག་བགྱིས་ན་དེས་དགྲ་བཅོམ་པ་ཉིད་ཐོབ་ཀྱང་དུག་གིས་གཟིར་བའི་བསྙུན་གྱིས་ཡོངས་སུ་མྱ་ངན་ལས་འདས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རིགས་ཀྱི་བུ་ཉེ་སྡེ་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་
བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་ཉེ་སྡེ་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་
སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་། སྐྱེ་མཆེད་དག་ལ་རྣམ་པར་སྨིན་
པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་འདས་པའི་དུས་ན་སངས་རྒྱས་རྣམས་འབྱུང་བ་མེད་པའི་ཚེ་རང་སངས་རྒྱས་དམན་པ་
དང་། བཀྲེན་པ་ལ་རྗེས་སུ་སྙིང་བརྩེ་བ། བས་མཐའི་གནས་མལ་ལ་དགའ་བ། བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་དག་འཇིག་རྟེན་དུ་བྱུང་ངོ་། །ཇི་ཙམ་ན་རི་བྲགས་ཤིག་ན་རྔོན་པ་ཞིག་འདུག་སྟེ། རི་བྲགས་དེ་དང་ཧ་ཅང་མི་རིང་བ་ཞིག་ན་རི་དགས་
དང་བྱ་མང་པོ་དག་གི་རྟེན་དུ་གྱུར་པ་མཚེའུ་ཞིག་ཡོད་པ་དེར་རྔོན་པ་དེ་ཉི་མ་རེ་རེ་ཞིང་རི་དགས་དང་བྱ་མང་པོ་དག་དྲུངས་དབྱུང་བའི་ཕྱིར་དང་། ཉམས་པར་བྱ་བའི་ཕྱིར་དང་། ཚུལ་མ་ཡིན་པས་སྡུག་བསྔལ་བར་བྱ་བའི་ཕྱིར་རྔོན་སྤྱད་དང་། རྙི་དང་རྙོང་མང་པོ་དག་འཛུགས་པར་བྱེད་དོ། །
དེའི་རྔོན་སྤྱད་དང་། རྙི་དང་། རྙོང་དེ་དག་ཀྱང་དོན་ཡོད་པ་ཡིན་ནོ། །ཇི་ཙམ་དུས་གཞན་ཞིག་ན་རང་སངས་རྒྱས་ཞིག་ལྗོངས་རྒྱུ་ཞིང་སོང་བ་ན་རི་བྲགས་དེར་ཕྱིན་ནས་ལྷའི་གནས་ཤིག་ཏུ་མཚན་མོ་གནས་པར་ཁས་བླངས་ནས་དེ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་

ཐོགས་ཏེ་རི་བྲགས་དེར་བསོད་སྙོམས་ལ་ཞུགས་སོ། །དེར་བསོད་སྙོམས་བརྒྱུས་ནས་བསམས་པ། ལྷའི་གནས་འདི་ཉིན་མོ་རྒྱུན་ལུགས་མང་བ་ཡིན་གྱིས། རི་བྲགས་ཀྱི་ཕྱི་རོལ་གྱི་གནས་ཞི་བ་ཞིག་ཏུ་བསོད་སྙོམས་བཟའོ་སྙམ་ནས་དེ་རི་བྲགས་ནས་བྱུང་སྟེ་འདི་ནི་ཞི་བའོ། །འདི་
ནི་ཞི་བའོ་ཞེས་མཚེའུ་དེ་ག་ལ་བ་དེར་སོང་སྟེ་ཕྱིན་ནས་ལྷུང་བཟེད་དང་ཆུ་ཚགས་མཐའ་གཅིག་ཏུ་བཞག་སྟེ་རྐང་པ་གཉིས་བཀྲུས་ནས་ལག་པ་གཉིས་བསྙལ་ཏེ་ཆུ་བཅགས་ནས་ལོ་མ་ལྷགས་པ་དག་བླངས་ཏེ་འདུག་ནས་ཟས་ཀྱི་བྱ་བ་བྱས་ཏེ་ལག་པ་གཉིས་བསྙལ་ནས། ཁ་བཀྲུས་ཏེ་ལྷུང་
བཟེད་དང་ཆུ་ཚགས་གནས་ཇི་ལྟ་བ་བཞིན་དུ་བཞག་ནས་རྐང་པ་གཉིས་བཀྲུས་ཏེ་ཤིང་དྲུང་ཞིག་ཏུ་བརྟེན་ནས་བྲང་འགྲོའི་རྒྱལ་པོ་ཉལ་བའི་ལུས་བསྐྱིལ་བ་ལྟར་སྐྱིལ་མོ་ཀྲུང་བཅས་ཏེ་སྤྱོད་ལམ་ཞི་བར་འདུག་པ་དང་། དེའི་ཉིན་མོ་མིའི་དྲིས་རི་དགས་གཅིག་ཀྱང་མ་ཟིན་ཏོ། །དེ་ནས་རྔོན་
པ་དེ་ནང་པར་སྔར་ལངས་ཏེ་མཚེའུ་དེ་ག་ལ་བ་དེར་སོང་ནས་དེས་རྔོན་སྤྱད་དང་། རྙི་དང་། རྙོང་དེ་དག་བྱུལ་བར་བརྩམས་པ་དང་། རི་དགས་གཅིག་ཀྱང་མ་མཐོང་ནས་དེ་འདི་སྙམ་དུ་སེམས་ཏེ། བདག་གི་རྔོན་སྤྱད་དང་། རྙི་དང་། རྙོང་འདི་དག་དོན་ཡོད་པ་ཡིན་ན་གང་གི་ཕྱིར་
དེང་རི་དགས་གཅིག་ཀྱང་མ་ཟིན་པ་འདིའི་རྒྱུ་གང་ཡིན་སྙམ་ནས། དེས་མཚེའུ་དེའི་ཐན་ཀོར་བྱུལ་བར་བརྩམས་པ་དང་། མིའི་རྗེས་མཐོང་ནས་དེ་རྗེས་དེའི་ཕྱི་བཞིན་དུ་སོང་བ་དང་རང་སངས་རྒྱས་སྤྱོད་ལམ་ཞི་བར་འདུག་པ་དེ་མཐོང་ནས་དེས་བསམས་པ། རབ་ཏུ་བྱུང་བ་སེམས་
ཞི་བ་འདི་དག་གནས་འདི་ལྟ་བུ་དག་ཏུ་མངོན་པར་དགའ་བར་བྱེད་པས་གལ་ཏེ་བདག་གིས་འདིའི་སྲོག་གཅད་པ་མ་བྱས་ན་འདི་དག་གིས་ངེས་པར་བདག་གི་འཚོ་བ་གཅོད་པར་བྱེད་ཀྱིས། རྣམ་པ་ཐམས་ཅད་དུ་འདི་གསད་པར་བྱའོ་སྙམ་ནས། སྙིང་རྗེ་མེད་པའི་སེམས་དང་ལྡན་
པ་འཇིག་རྟེན་ཕ་རོལ་བཏང་བ་དེས་མདའ་དུག་ཅན་གྱིས་གཞུ་རྔའི་དབྱིབས་འདྲ་བར་རྣ་དྲུང་དུ་ཐུག་པར་བཀང་སྟེ་རང་སངས་རྒྱས་དེའི་གནད་དུ་བསྣུན་ཏོ། །རང་སངས་རྒྱས་བདག་ཉིད་ཆེན་པོ་དེས་བསམས་པ། རྔོན་པ་ཉོན་མོངས་པ་འདི་ཧ་ཅང་སྨས་པ་དང་། ཉམས་པར་གྱུར་ན་མི་

རུང་གིས་འདི་ལ་ལག་ནས་དྲང་བ་སྦྱིན་ནོ་སྙམ་ནས་དེས་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས། འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པའི་ཆོ་འཕྲུལ་དག་བྱ་བར་བརྩམས་
སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པར་བྱེད་པ་ཡིན་པས་རྔོན་པ་དེ་ཤིང་ལྗོན་པ་རྩ་བ་ནས་བཅད་པ་བཞིན་དུ། རང་སངས་རྒྱས་དེའི་རྐང་པ་གཉིས་ཀྱི་དྲུང་དུ་སྒྱེལ་ནས་སྨྲས་པ། ཡོན་གནས་ཡང་དག་པར་གྱུར་པ་མར་གཤེགས་སུ་གསོལ། མར་གཤེགས་
སུ་གསོལ། ཉོན་མོངས་པའི་འདམ་དུ་བྱིང་བ་བདག་གི་སུག་པ་ནས་དྲང་བ་སྩལ་དུ་གསོལ། རང་སངས་རྒྱས་དེ་རྔོན་པ་དེ་ལ་རྗེས་སུ་སྙིང་བརྩེ་བའི་ཕྱིར་སྟེང་གི་ནམ་མཁའ་ལས་ཤོད་དུ་བབས་སོ། །དེ་ནས་རྔོན་པ་དེས་ཟུག་རྔུ་མེད་པར་བྱས་ཏེ་རྨ་ལྷན་གྱིས་གླན་ནས་སྨྲས་པ།
འཕགས་པ་སྡུམ་པར་གཤེགས་སུ་གསོལ། གལ་ཏེ་འདིར་གསེར་གྱི་ལྷན་པས་གླན་པར་མཛད་ན་དེ་ཡང་བདག་གིས་སྦྱར་བར་བགྱིའོ། །རང་སངས་རྒྱས་ཀྱིས་བསམས་པ་བདག་གིས་རྣག་གི་ལུས་འདིས་ཐོབ་པར་བྱ་བ་གང་ཡིན་པ་ཐོབ་ཟིན་པས་དེའི་ཕྱིར་ད་ནི་ཞི་བ་ཕུང་པོའི་
ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་འཇུག་པར་བྱའོ་སྙམ་ནས་དེ་རྔོན་པ་དེ་ཉིད་ཀྱི་མདུན་དུ་ཡང་ནམ་མཁའི་དཀྱིལ་དུ་འཕགས་ཏེ་ཆོ་འཕྲུལ་རྣམ་པ་སྣ་ཚོགས་དག་རྣམ་པར་བསྟན་ནས་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་
ངན་ལས་འདས་སོ། །རྔོན་པ་དེ་ནོར་དང་ལྡན་པ་ཡིན་པས་དེས་སྤོས་ཀྱི་ཤིང་ཐམས་ཅད་ཀྱིས་ཕུང་པོར་བཅེར་ཏེ་བསྲེགས་ནས་ཕུང་པོ་དེ་འོ་མས་ཞི་བར་བྱས་ཏེ། རུས་པ་དེ་དག་གསེར་གྱི་བུམ་པར་བཅུག་ནས་ལམ་པོ་ཆེའི་བཞི་མདོར་ལུས་ཀྱི་མཆོད་རྟེན་རྩིག་ཏུ་
བཅུག་སྟེ། གདུགས་དང་། རྒྱལ་མཚན་དང་། བ་དན་དག་བསྒྲེང་ཞིང་། དྲི་དང་། ཕྲེང་བ་རྒྱུ་དང་། བདུག་སྤོས་དང་། ཕྱེ་མ་དང་། སིལ་སྙན་དག་གིས་མཆོད་པ་བྱས་ནས་རྐང་པ་གཉིས་ལ་ཕྱག་འཚལ་ཏེ་སྨོན་ལམ་འདི་སྐད་ཅེས་བདག་ཡོན་གནས་ཡང་དག་པར་གྱུར་

པ་འདི་ལྟ་བུ་ལ་གནོད་པ་བྱས་པ་གང་ཡིན་པའི་ལས་དེའི་ཆ་དང་མཐུན་པར་མི་འགྱུར་བར་མཆོད་པ་བྱས་པ་གང་ཡིན་པའི་དགེ་བའི་རྩ་བ་འདིས་བདག་ཕྱུག་པ། ནོར་མང་བ། ལོངས་སྤྱོད་ཆེ་བའི་ཁྱིམ་དུ་གཟུགས་བཟང་བ། བལྟ་ན་སྡུག་པ། མཛེས་པར་སྐྱེས་ཤིང་འདི་བས་ཆེས་
ཁྱད་པར་དུ་འཕགས་པའི་སྟོན་པ་མཉེས་པར་བྱེད་ཅིང་ཐུགས་བྱུང་བར་མི་བྱེད་པར་ཡོན་ཏན་གྱི་རྣམ་པ་དེ་ལྟ་བུ་ཐོབ་པར་གྱུར་ཅིག་ཅེས་བཏབ་བོ། །དགེ་སློང་དག་དེ་ལ་དེའི་ཚེ་དེའི་དུས་ན་རྔོན་པ་གང་ཡིན་པ་དེ་ནི་ཉེ་སྡེ་འདི་ཡིན་ཏེ། དེས་རང་སངས་རྒྱས་ཀྱི་གནད་དུ་མདའ་དུག་ཅན་
གྱིས་བསྣུན་པ་གང་ཡིན་པའི་ལས་དེའི་རྣམ་པར་སྨིན་པས་བསྐལ་པར་སེམས་ཅན་དམྱལ་བ་ཆེན་པོ་མནར་མེད་པར་གདུངས་ནས། ལས་དེ་ཉིད་ཀྱི་ལྷག་མས་ཚེ་རབས་ལྔ་བརྒྱར་དུག་གིས་དུས་ལ་བབ་སྟེ། ད་ལྟར་གྱི་བར་དུ་ཡང་དགྲ་བཅོམ་པ་ཐོབ་ཀྱང་དེ་དུག་གིས་ཡོངས་སུ་མྱ་
ངན་ལས་འདས་སོ། །མཆོད་པ་བྱས་ནས་སྨོན་ལམ་བཏབ་པ་གང་ཡིན་པ་དེས་ནི་ད་ལྟར་ཕྱུག་པ། ནོར་མང་བ། ལོངས་སྤྱོད་ཆེ་བའི་ཁྱིམ་དུ་གཟུགས་བཟང་བ། བལྟ་ན་སྡུག་པ། མཛེས་པར་སྐྱེས་ཤིང་། ངའི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་
བཅོམ་པ་ཉིད་མངོན་དུ་བྱས་ཤིང་འདིས་རང་སངས་རྒྱས་བྱེ་བ་ཕྲག་འབུམ་པས་ཆེས་ཁྱད་པར་དུ་འཕགས་པའི་སྟོན་པ་ང་མཉེས་པར་བྱས་ཤིང་ཐུགས་བྱུང་བར་མ་བྱས་སོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། ལས་
གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་རྣམས་སྤངས་ཏེ། ལས་གཅིག་ཏུ་དཀར་བ་རྣམས་ལ་བརྩལ་
བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །འདི་ཡང་རེ་ཞིག་བྱུང་བ་ཡིན་གྱི་སངས་རྒྱས་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་

ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཚོང་དཔོན་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་
མགུར་སྤྱོད་པར་བྱེད་པ་དེ་ལ་བུ་བཙས་ནས་དེ་བཙས་པའི་རིམ་གྱིས་རིགས་དང་མཐུན་པའི་མིང་བཏགས་ཏེ། དེ་བསྲིངས་ཤིང་བསྐྱེད་ནས་ཆེན་པོར་གྱུར་ཏོ། །ཇི་ཙམ་ན་ཚོང་དཔོན་དེའི་ཆུང་མ་དུས་ལ་བབ་ནས་དེས་ཆུང་མ་གཞན་ཞིག་བླངས་ཏེ། ཚོང་དཔོན་དེས་ཆུང་མ་དེ་ལ་
སྨྲས་པ། བཟང་མོ་གཞན་ལས་སྐྱེས་པས་ནི་བྱ་བ་བྱེད་པར་ནུས་ཀྱི། མི་མཐུན་པར་སྐྱེས་པས་ནི་མི་ནུས་པས་ཁྱེའུ་འདི་ཁྱོད་ཀྱི་བུ་ཡིན་གྱིས་ཁྱོད་ཀྱི་འདི་ལ་མཁོ་བ་བསྟབས་པར་བྱའོ། །ཇི་ཙམ་དུས་གཞན་ཞིག་ན་ཆུང་མ་གཉིས་པ་དེ་ལ་ཡང་སེམས་ཅན་ཞུགས་པར་གྱུར་
ནས་དེས་བསམས་པ། བདག་ལ་ཡང་བུ་ཡོད་པར་གྱུར་པས་ཁྱེའུ་འདི་དེའི་ཟླ་བོར་འགྱུར་གྱིས་འདི་བསྟོད་པར་མི་བྱའོ་སྙམ་ནས་དེས་ཁྱེའུ་དེ་ཟས་ངན་པ་དང་། གོས་ངན་པ་སྲེལ་དུ་འཛུད་ཅིང་ཁུ་ཚུར་དང་ཐལ་ལྕག་དག་གིས་ཀྱང་ཡང་དང་ཡང་དུ་རྡེག་པར་བྱེད་དོ། །ཁྱེའུ་དེ་
ཕའི་གན་དུ་སོང་སྟེ་སྨྲས་པ། ཡབ་བདག་ལ་མ་ཡར་མོ་འདིས་ཟས་ངན་པ་དང་། གོས་ངན་པ་སྲེལ་དུ་སྩོལ་ཅིང་ཁུ་ཚུར་དང་ཐལ་ལྕག་དག་གིས་ཀྱང་ཡང་དང་ཡང་དུ་རྡེག་པར་བགྱིད་དོ། །ཚོང་དཔོན་དེས་སྨྲས་པ། བུ་ཅི་ནས་ཀྱང་ཕྱིན་ཆད་དེ་ལྟར་མི་བྱེད་པར་བཟློག་པར་བྱའོ། །
ཚོང་དཔོན་དེས་ཆུང་མ་ལ་སྨྲས་པ། བཟང་མོ་ཁྱོད་ལ་ཁོ་བོས་དང་པོ་ཉིད་ནས་གཞན་ལས་སྐྱེས་པས་ནི་བྱ་བ་བྱེད་པར་ནུས་ཀྱི་མི་མཐུན་པར་སྐྱེས་པས་ནི་མི་ནུས་པས་ཁྱེའུ་འདི་ཁྱོད་ཀྱི་བུ་ཡིན་གྱིས་ཁྱོད་ཀྱིས་འདི་ལ་མཁོ་བ་བསྟབས་པར་བྱའོ་ཞེས་མ་སྨྲས་སམ། ཅིའི་ཕྱིར་ཁྱོད་ཀྱིས་
འདི་ལ་ཟས་ངན་པ་དང་། གོས་ངན་པ་སྲེལ་དུ་འཛུད་ཅིང་ཁུ་ཚུར་དང་ཐལ་ལྕག་དག་གིས་ཀྱང་ཡང་དང་ཡང་དུ་རྡེག་པར་བྱེད། ཆུང་མས་སྨྲས་པ། རྗེའི་སྲས་བདག་གིས་འདི་བསླབ་པར་བགྱི་སྟེ། འདི་ནི་ཚོང་དཔོན་གྱི་བུ་ལགས་པས་གལ་ཏེ་མ་བསླབས་ན་རྗེའི་སྲས་ཉིད་ལ་ཡང་

འཇིག་རྟེན་དག་ངེས་པར་སྨོད་པར་འགྱུར་རོ། །ཚོང་དཔོན་གྱིས་སྨྲས་པ། ཁྱོད་འདི་སློབ་པར་མ་བསྐོས་ཀྱིས་ཕྱིན་ཆད་འདི་ཟས་ངན་པ་དང་། གོས་ངན་པ་བསྲེལ་དུ་མི་གཞུག་ཅིང་ཁུ་ཚུར་དང་། ཐལ་ལྕག་དག་གིས་ཀྱང་ཡང་དང་ཡང་དུ་མ་རྡེག་ཤིག །ཆུང་མ་དེས་ཚོང་དཔོན་དེ་ཤིན་
ཏུ་གནང་ཆེན་ཡིན་པས་ཆུང་མ་དེས་ཁྱེའུ་དེ་ཕྱིར་ཞིང་ཤས་ཆེར་གོས་ངན་པ་དང་། ཟས་ངན་པ་སྲེལ་དུ་འཛུད་ཅིང་། ཁུ་ཚུར་དང་ཐལ་ལྕག་དག་གིས་ཀྱང་ཡང་དང་ཡང་དུ་རྡེག་པར་བྱེད་དོ། །ཁྱེའུ་དེས་བསམས་པ། བདག་གི་ཕས་མ་ཡར་མོ་འདི་དྲག་ཏུ་མ་བཟློག་པས་དེས་མ་ཡར་མོ་
འདི་བདག་ལ་ཕྱིར་ཞིང་ཤས་ཆེར་ཟས་ངན་པ་དང་། གོས་ངན་པ་སྲེལ་དུ་འཛུད་ཅིང་། ཁུ་ཚུར་དང་ཐལ་ལྕག་དག་གིས་ཀྱང་ཡང་དང་ཡང་དུ་རྡེག་པར་བྱེད་ཀྱིས་བདག་རབ་ཏུ་འབྱུང་དུ་འགྲོའོ་སྙམ་ནས། ཁྱེའུ་དེས་ཕ་ལ་ཡབ་ཁྱོད་ཀྱིས་བདག་གི་མ་ཡར་མོ་འདི་བཟློག་ཀྱང་འདིར་སླར་ཞིང་
ཤས་ཆེར་བདག་ཟས་ངན་པ་དང་། གོས་ངན་པ་སྲེལ་དུ་སྩལ་ཅིང་། ཁུ་ཚུར་དང་ཐལ་ལྕག་དག་གིས་ཀྱང་ཡང་དང་ཡང་དུ་རྡེག་པར་བགྱིད་ཀྱིས་བདག་རབ་ཏུ་འབྱུང་དུ་མཆིའོ། །ཞེས་ཅི་ནས་ཅིར་བསྒྱུར་ཏེ་གསོལ་བ་བྱས་སོ། །ཚོང་དཔོན་དེ་ཆུང་མ་དེ་ལ་ཧ་ཅང་བྱམས་ཤིང་དེའི་སེམས་
སྲུང་བས་དེ་དྲག་ཏུ་བཟློག་པར་མ་ནུས་ནས་དེས་སྨྲས་པ། བུ་ཁྱིམ་བདག་གི་ཆུང་མ་འདི་གཏུམ་པ་བརྟུན་ངས་པ། དྲག་ཤུལ་ཆེ་བ་ཡིན་གྱིས་སོང་ལ་རབ་ཏུ་བྱུང་ཤིག་དང་། ཁྱོད་གསོན་པ་མཐོང་བར་ཡང་འགྱུར་གྱི། གལ་ཏེ་ན་འདི་ཁྱོད་ལ་གནོད་པ་བྱེད་པར་འགྱུར་བའི་གནས་ཀྱང་
ཡོད་དོ། །ཁྱེའུ་དེ་ཕས་གནང་ནས་རྒྱལ་བྱེད་ཀྱི་ཚལ་དུ་སོང་སྟེ་དགེ་སློང་གི་དྲུང་དུ་སོང་ནས་རྐང་པ་གཉིས་ལ་ཕྱག་འཚལ་ཏེ་སྨྲས་པ། འཕགས་པ་བདག་རབ་ཏུ་འབྱུང་བར་འཚལ་ལོ། །དགེ་སློང་དེས་སྨྲས་པ། བཞིན་བཟངས་ཁྱོད་ཀྱིས་སེམས་བསྐྱེད་པ་ལེགས་ཏེ། ལོངས་
སྤྱོད་དག་ནི་འགྱུར་བ་ཡིན་གྱིས་རབ་ཏུ་བྱུང་ཤིག །དགེ་སློང་དེས་ཁྱེའུ་དེ་རབ་ཏུ་ཕྱུང་རྫོགས་པར་བསྙེན་པར་བྱས་ནས་སྨྲས་པ། བཞིན་བཟངས་དགེ་སློང་གི་ལས་ནི་གཉིས་ཏེ། བསམ་གཏན་དང་། ཀློག་པ་ཡིན་ནོ། །ཁོ་བོ་ནི་བསམ་གཏན་པ་ཡིན་ན་ཁྱོད་བསམ་གཏན་དང་། ཀློག་

པ་གང་བྱེད་དེས་སྨྲས་པ། མཁན་པོ་ཀློག་པའོ། །བུ་ལེགས་ཀྱིས་ཁྱོད་ཀྱིས་སྡེ་སྣོད་གསུམ་པོ་དག་བཀླག་པར་བྱའོ། །དེས་བསམས་པ། གཞུང་མང་ལ་མཁན་པོ་རྗེས་སུ་བསྲུང་དགོས་པས། འདི་ན་བདག་ལ་ཀློག་ཏུ་འཛུད་པ་མེད་ཀྱིས་ཡུལ་གཞན་
དུ་འགྲོའོ་སྙམ་ནས་དེ་ཡུལ་གཞན་དུ་སོང་ངོ་། །དེས་དེར་སྡེ་སྣོད་གསུམ་པོ་དག་བཀླགས་ཤིང་སྡེ་སྣོད་གསུམ་དང་ལྡན་པ། ཆོས་སྒྲོགས་པ། རིགས་པ་དང་གྲོལ་བའི་སྤོབས་པ་ཅན་དུ་གྱུར་ཏོ། །དེས་བསམས་པ། བཅོམ་ལྡན་འདས་ཀྱིས་དགེ་སློང་དག་བུའི་ཕ་མ་སྙོད་
པར་བྱེད་པ། གསོ་བར་བྱེད་པ། སྐྱེད་པར་བྱེད་པ་ནུ་མ་སྣུན་པར་བྱེད་པ། འཛམ་བུའི་གླིང་སྣ་ཚོགས་སྟོན་པར་བྱེད་པ་གཉིས་ནི་དཀའ་བ་བྱེད་པ་དག་ཡིན་ཏེ། བུས་ཕྲག་པ་གཅིག་གིས་ནི་ཕ། ཅིག་ཤོས་ཀྱིས་ནི་མ་ལོ་བརྒྱ་ཐམ་པར་ཡོངས་སུ་པང་བ་བྱས་སམ། ས་ཆེན་
པོ་འདིར་ནོར་བུ་དང་། མུ་ཏིག་དང་། བཻ་ཌཱུརྱ་དང་། མན་ཤེལ་དཀར་པོ་དང་། བྱི་རུ་དང་། དངུལ་དང་། ས་ལེ་སྦྲམ་དང་། རྡོའི་སྙིང་པོ་དང་། སྤུག་དང་། དམར་པོ་དང་། གཡས་སུ་འཁྱིལ་པ་དང་། དེ་ལྟ་བུའི་དབང་ཕྱུག་གི་བདག་པོ་ལ་བཀོད་པར་གྱུར་པ་གང་ཡིན་པ་དེ་
ཙམ་གྱིས་ནི་བུས་ཕ་མ་གཉིས་ལ་བྱས་པ་དང་། ཉེ་བར་བྱས་པར་མི་འགྱུར་གྱི། དེས་ཕ་མ་མ་དད་པ་གཉིས་དད་པ་ཕུན་སུམ་ཚོགས་པ་ཡང་དག་པར་འཛིན་དུ་འཇུད། འདུལ་བར་བྱེད། འཛུད་པར་བྱེད། རབ་ཏུ་འགོད་པར་བྱེད་པ་དང་། ཚུལ་ཁྲིམས་འཆལ་པ་གཉིས་
ཚུལ་ཁྲིམས་ཕུན་སུམ་ཚོགས་པ་དང་། སེར་སྣ་ཅན་གཉིས་གཏོང་བ་ཕུན་སུམ་ཚོགས་པ་དང་། ཤེས་རབ་འཆལ་པ་གཉིས་ཤེས་རབ་ཕུན་སུམ་ཚོགས་པ་ཡང་དག་པར་འཛིན་དུ་འཇུད། འདུལ་བར་བྱེད། འཛུད་པར་བྱེད། རབ་ཏུ་འགོད་པར་བྱད་ན། དེ་ཙམ་གྱིས་ནི་བུས་
ཕ་མ་གཉིས་ལ་བྱས་པ་དང་ཉེ་བར་བྱས་པར་འགྱུར་རོ། །ཞེས་གསུངས་པས་བདག་གི་ཕ་དེ་ཡང་མ་དད་པ་ཡིན་གྱིས་བདག་སོང་ལ་དེ་ལ་ཆོས་བསྟན་པར་བྱའོ་སྙམ་ནས་དེ་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་ག་ལ་བ་དེར་རྒྱུ་ཞིང་སོང་བ་ན་མཐར་གྱིས་མཉན་ཡོད་

དུ་ཕྱིན་ནས་དེ་མཉན་ཡོད་དུ་འཇུག་པ་ཉིད་ན་རྒྱལ་བྱེད་ཀྱི་ཚལ་དུ་སོང་ངོ་། །མཉན་ཡོད་ཀུན་དུ་ཚོང་དཔོན་ཆེ་གེ་མོའི་བུ་ཞིག་ལྗོངས་ནས་སྡེ་སྣོད་གསུམ་བཀླགས་ཏེ་རྒྱལ་བྱེད་ཀྱི་ཚལ་དུ་འོངས་སོ། །ཞེས་བྱ་བའི་སྒྲས་ཁྱབ་པར་གྱུར་པ་དེ་ཚོང་དཔོན་དེས་ཐོས་ནས་བདག་གི་བུ་སྡེ་སྣོད་གསུམ་བཀླགས་
ཏེ་ལྗོངས་ནས་རྒྱལ་བྱེད་ཀྱི་ཚལ་དུ་འོངས་ཀྱིས་དེ་ཡང་དག་པར་རབ་ཏུ་དགའ་བར་བྱེད་དུ་འགྲོའོ་སྙམ་ནས། ཚོང་དཔོན་དེ་རྒྱལ་བྱེད་ཀྱི་ཚལ་དུ་སོང་བ་དང་། དེས་བུ་དེ་མཐོང་ནས་སྨྲས་པ། བུ་ཁྱོད་ཀྱིས་ཁོ་བོ་སྤངས་ཏེ་རབ་ཏུ་བྱུང་མོད་ཀྱི། ཁྱོད་དགེ་སློང་དུ་རེད་ཅིང་མང་དུ་ཐོས་པར་གྱུར་པ་ལེགས་
ཏེ། བདག་ཀྱང་ཡོངས་སུ་དགའོ་ཞེས་སྨྲས་ནས་དེའི་མདུན་དུ་འདུག་གོ། །དགེ་སློང་དེས་ཚོང་དཔོན་དེ་ལ་གང་གིས་ཚོང་དཔོན་དེ་དད་པ་སྐྱེས་པས་སྐྱབས་སུ་འགྲོ་བ་དང་། བསླབ་པའི་གཞི་དག་བཟུང་བར་འགྱུར་བ་དེ་འདྲ་བའི་ཆོས་བསྟན་པ་བྱས་སོ། །ཚོང་དཔོན་དེས་བུའི་རྐང་པ་གཉིས་
ལ་ཕྱག་འཚལ་ཏེ་ཕྱི་དེ་ཉིན་པར་ཟན་ལ་མགྲོན་དུ་བོས་པ་དང་། བུ་དེས་ཀྱང་ཅང་མི་སྨྲ་བས་དང་དུ་བླངས་སོ། །དེ་ནས་ཚོང་དཔོན་དེས་བུའི་རྐང་པ་གཉིས་ལ་ཕྱག་འཚལ་ཏེ་སོང་བ་དང་། དེ་ལ་ལམ་ཀར་བློ་སྐྱེས་པ། བདག་གིས་བུ་དེ་མ་བགྲོས་པར་གྱ་ཙོམ་དུ་མགྲོན་དུ་བོས་ན་བདག་
གི་ཆུང་མ་དེ་ཡང་གཏུམ་པ། བརྟུན་ངས་པ། དྲག་ཤུལ་ཆེ་བ་ཡིན་པས་བུ་དེ་ལ་བསྙེན་བཀུར་བྱེད་པར་མི་འགྱུར་ན། དེ་ལ་ཇི་ལྟར་བསྒྲུབ་པར་བྱ་སྙམ་མོ། །ཡང་བསམས་པ། ད་ནི་དེ་མགྲོན་དུ་བོས་ཟིན་པས་ཅི་བྱར་ཡང་མེད་ཀྱིས་བདག་གིས་གང་གིས་ཆུང་མ་དེ་འཁྲུགས་
པར་མི་འགྱུར་བར་རྣམ་པ་ཐམས་ཅད་དུ་དགའ་བ་དང་སྙན་པའི་ཚིག་དག་གིས་ཐབས་བཤམ་པར་བྱའོ་སྙམ་ནས་དེ་ཁྱིམ་དུ་སོང་སྟེ་ཆུང་མ་ལ་སྨྲས་པ། བཟང་མོ་འཁྱམས་པ་དང་། ཤི་བ་དང་། རབ་ཏུ་བྱུང་བ་ཞེས་བྱ་བ་དོན་གཅིག་གམ། འོན་ཏེ་ཐ་དད་དུ་བྱ་བ་ཅུང་ཟད་ཡོད། ཆུང་
མས་སྨྲས་པ། རྗེའི་སྲས་ཐ་དད་དུ་བགྱི་བ་ཅུང་ཟད་ཀྱང་མ་མཆིས་སོ། །ཚོང་དཔོན་གྱིས་སྨྲས་པ། བཟང་མོ་གཞན་དག་ན་རེ་ཁྱོད་ཀྱི་བུ་ཡར་པོ་དེ་དགེ་སློང་བཟང་པོར་རེད་དེ་ལྗོངས་ནས་སྡེ་སྣོད་གསུམ་བཀླགས་ནས་རྒྱལ་བྱེད་ཀྱི་ཚལ་དུ་འོངས་ཏེ། སྡེ་སྣོད་གསུམ་དང་ལྡན་པ་འབའ་

ཞིག་ཏུ་ཡང་མ་ཟད་ཀྱི། ཆོས་སྒྲོགས་པ། རིགས་པ་དང་གྲོལ་བའི་སྤོབས་པ་ཅན་དུ་ཡང་འགྱུར་ཞེས་ཟེར་རོ། །ཆུང་མས་སྨྲས་པ། རྗེའི་སྲས་གལ་ཏེ་དེ་ལྟ་ན་ཅིའི་སླད་དུ་འཚལ་མ་ལ་གཡར་མི་དྲང་། བཟང་མོ་མགྲོན་དུ་བོས་ཀྱིས་ཟས་སྟ་གོན་གྱིས་ཤིག །
ཆུང་མ་དེ་དེ་ལ་ཞེ་སྡང་གི་ཀུན་ནས་དཀྲིས་པ་དང་བྲལ་ནས་དེས་ཟས་བསིལ་བའི་རོ་དང་ལྡན་པ་གང་དག་ཡིན་པ་དེ་དག་ནི་དེ་ཉིད་ཀྱི་ཉིན་མོ་སྟ་གོན་བྱས། ཟས་དྲོ་བའི་རོ་དང་ལྡན་པ་གང་དག་ཡིན་པ་དེ་དག་ནི་ཕྱི་དེ་ཉིན་པར་སྟ་གོན་བྱས་ནས། བཙུན་པ་གདུགས་ཚོད་གཡར་
དགོངས་འཚལ་ལགས་ན་ད་དེའི་དུས་ལགས་པར་དགོངས་སུ་གསོལ་ཞེས་གཡར་འདྲེན་པའི་མི་བཏང་ངོ་། །དགེ་སློང་དེ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ནས་ཕའི་ཁྱིམ་ག་ལ་བ་དེར་སོང་སྟེ་ཕྱིན་ནས་སྟན་བཤམས་པ་ཉིད་ལ་འདུག་གོ། དེ་ནས་
ཚོང་དཔོན་དེ་ཆུང་མ་དང་བཅས་པས་རང་གི་ལག་ནས་ཟས་བསོད་པས་དགེ་སློང་དེ་ཚིམ་པར་བྱས་ཤིང་རང་གི་ལག་ནས་བསྟབས་སོ། །ཚིམ་པར་བྱས་ཤིང་བསྟབས་ཏེ་ཟོས་ཟིན་པར་རིག་ནས་ལག་པ་བསྙལ་ཅིང་ལྷུང་བཟེད་གཞག་པ་ན་རྐང་པ་ལ་ཕྱག་འཚལ་ཏེ་ཆོས་མཉན་པའི་
ཕྱིར་མདུན་དུ་འདུག་གོ། །དེས་མ་ཡར་མོ་དེ་ལ་ཡང་གང་ཐོས་ན་དེས་ཀྱང་སྐྱབས་སུ་འགྲོ་བ་དང་། བསླབ་པའི་གཞི་དག་བཟུང་བར་གྱུར་པའི་རྣམ་པ་དེ་ལྟར་ཆོས་བསྟན་པ་བྱས་སོ། །དེས་ཁྱིམ་དེ་འདི་ལྟར་དགེ་སློང་རྣམས་དང་དགེ་སློང་མ་རྣམས་ཀྱིས་ཁྲོན་པ་ལྟ་བུར་གྱུར་
ཏེ་དེ་ལྟར་བཏུལ་ནས་དེ་དག་སྦྱིན་པ་དང་བྱ་བར་སེམས་པ་གང་ཡིན་པ་ཅི་ཡང་རུང་སྟེ་དེ་ཐམས་ཅད་དགེ་སློང་རྣམས་དང་། དགེ་སློང་མ་རྣམས་ལ་སེམས་སོ། །ཇི་ཙམ་དུས་གཞན་ཞིག་ན་ཚོང་དཔོན་དེའི་འབྱུང་བ་ཆེན་པོ་མ་སྙོམས་པས་ན་བར་གྱུར་ནས། དེའི་བུས་བདག་
གི་ཕ་ན་བར་གྱུར་ཏོ་ཞེས་ཐོས་ནས་དེ་འདི་སྙམ་དུ་སེམས་ཏེ། བདག་སོང་ལ་ཕ་དེ་ལ་མཆོག་ཏུ་དགའ་བར་འགྱུར་བའི་ཆོས་བསྟན་པར་བྱའོ་སྙམ་ནས། དགེ་སློང་དེ་དེའི་དྲུང་དུ་དུས་དང་མཐུན་པའི་དུས་སུ་སོང་ནས་འདི་སྐད་ཅེས་ཡབ་ཁྱོད་ཀྱིས་མི་དགྱེས་པར་མི་བགྱི་སྟེ། འདི་ལྟར་ཁྱོད་

ཀྱིས་དགེ་བའི་བཤེས་གཉེན་བདག་ལ་བརྟེན་ནས་སངས་རྒྱས་ལ་སྐྱབས་སུ་སོང་། ཆོས་དང་དགེ་འདུན་ལ་སྐྱབས་སུ་སོང་ཞིང་བསླབ་པའི་གཞི་དག་བླངས། སྦྱིན་པ་དག་བྱིན། བསོད་ནམས་དག་བྱས་པས་ཁྱོད་ཡུལ་གཞན་དུ་སོང་ན་ལོ་ལེགས་ཤིང་མཐོ་རིས་ནི་དར་གྱིས་ཆོད་པ་
ཙམ། ཐར་པ་ནི་ཡོལ་བས་བསྒྲིབས་པ་ཙམ་སྟེ། ལུས་ཞིག་ན་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་རོ་ཞེས་ཆོས་སྟོན་པར་བྱེད་དོ། །ཚོང་དཔོན་གྱིས་སྨྲས་པ། བུ་དེ་དེ་བཞིན་ནོ། །དེ་དེ་བཞིན་ཏེ། བདག་གིས་དགེ་བའི་བཤེས་གཉེན་ཁྱོད་ལ་བརྟེན་ནས། སངས་རྒྱས་
ལ་སྐྱབས་སུ་སོང་། ཆོས་དང་དགེ་འདུན་ལ་སྐྱབས་སུ་སོང་ཞིང་བསླབ་པའི་གཞི་དག་བླངས་སྦྱིན་པ་དག་བྱིན། བསོད་ནམས་དག་བྱས་པས་བདག་ཡུལ་གཞན་དུ་སོང་ན་ལོ་ལེགས་ཤིང་མཐོ་རིས་ནི་དར་གྱིས་ཆོད་པ་ཙམ། ཐར་པ་ནི་ཡོལ་བས་བསྒྲིབས་པ་ཙམ་སྟེ། ལུས་
ཞིག་ན་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ཚོང་དཔོན་དེའི་བུ་དེས་ཕ་ལ་དེ་ལྟར་ཆོས་བསྟན་ནས་སོང་ངོ་། །ཚོང་དཔོན་དེ་ལ་བློ་སྐྱེས་པ། བདག་གི་བུ་སྡེ་སྣོད་གསུམ་དང་ལྡན་པ། ཆོས་སྒྲོགས་པ། རིགས་པ་དང་། གྲོལ་བའི་སྤོབས་པ་ཅན་དེ་གཞན་དུ་སྨྲ་བར་མི་
འགྱུར་བས་བདག་སྡུག་བསྔལ་གྱི་ཚོར་བས་ཉེན་པ་ནི་ཐུན་མོང་མ་ཡིན་པས་བདག་གིས་བདག་ཉིད་གསོད་པར་བྱའོ་སྙམ་མོ། །ཡང་བསམས་པ། བདག་ཉིད་ལ་རྩོམ་པར་བྱེད་པ་ནི་སྡུག་བསྔལ་བ་ཡིན་ན། དེའི་ཕྱིར་བདག་སྲོག་དང་བྲལ་བར་བྱེད་ནུས་པ་སུ་ཡོད་སྙམ་
ནས། དེ་ལ་བྲན་མོ་མངག་གཞུག་མ་སྐྱོང་མ་ཞེས་བྱ་བ་སྦོམ་མོ། །གླེན་མ། དམན་པ་ཞིག་ཡོད་ནས། ཚོང་དཔོན་དེས་བསམས་པ། སྐྱོང་མ་འདི་ནི་སྦོམ་མོ་གླེན་མ། དམན་པ་ཡིན་པས་འདིས་བདག་སྲོག་དང་བྲལ་བར་བྱེད་ནུས་ཀྱི་གཞན་གྱིས་ནི་མི་ནུས་སྙམ་མོ། །
ཚོང་དཔོན་དེའི་ཁྱིམ་དང་ཧ་ཅང་ཐག་མི་རིང་བ་ཞིག་ན་ཁྱིམ་བདག་ཅིག་གི་བུས་ཆུང་མ་བླངས་པ་དེར་ཚོང་དཔོན་དེའི་ཆུང་མ་བྲན་མོ་མངག་གཞུག་མ་སྐྱོང་མ་དང་བཅས་ཤིང་མགྲོན་དུ་བོས་ཏེ་སོང་ངོ་། །བག་མ་བླངས་པ་དང་། སྟོན་མོ་ཟིན་ནས་ཚོང་དཔོན་གྱི་ཆུང་མས་སྐྱོང་མ་ལ་

སྨྲས་པ། སྐྱོང་མ་ཁྱོད་སོང་ལ་ཚོང་དཔོན་གཉིད་ལོག་པར་མི་འགྱུར་བར་སྲུངས་ཤིག །ཁོ་མོ་ཡང་ཕྱི་བཞིན་འོང་ངོ་། །སྐྱོང་མས་རྗེ་མོའི་ཚིག་མཉན་ཏེ་ཁྱིམ་དུ་སོང་ནས་ཚོང་དཔོན་གྱི་དྲུང་དུ་ཕྱིན་པ་དང་། ཚོང་དཔོན་གྱིས་སྨྲས་པ། སྐྱོང་མ་ཁྱོད་ག་ལས་འདིར་
འོངས། སྐྱོང་མས་སྨྲས་པ། རྗེའི་སྲས་ཁྱིམ་བདག་ཆེ་གེ་མོའི་བུས་བག་མ་བླངས་པ་དེ་བདག་གིས་བལྟས་ཏེ་འཚལ་མ་འཚལ་ནས་མཆིས་སོ། །སྐྱོང་མ་བག་མ་ལེན་པ་བཟང་ངམ། རྗེའི་སྲས་བཟང་ངོ་། །གལ་ཏེ་ངས་ཁྱོད་དེ་ལྟར་བག་མར་གཏང་བར་བྱ་ན་ཁྱོད་
དགའམ། རྗེའི་སྲས་དགའོ། །གལ་ཏེ་དེ་ལྟ་ན་ཁོ་བོ་ཅི་ཟེར་བ་དེ་བཞིན་དུ་བྱེད་ན་ཁོ་བོ་ཁྱོད་དགའ་བར་འགྱུར་བ་ཤེས་སོ། །སྐྱོང་མས་སྨྲས་པ། རྗེའི་སྲས་དེ་བཞིན་དུ་བགྱིའོ། །སྐྱོང་མ་གལ་ཏེ་དེ་ལྟ་ན་ཁོ་བོའི་ལྟོར་མི་མ་ཡིན་པ་ཞིག་ཞུགས་ཀྱིས་དེ་སོད་ཅིག །རྗེའི་སྲས་
གོ་རིམས་ཇི་ལྟར་བགྱི། སྐྱོང་མ་དང་པོར་ངའི་རྐང་པ་གཉིས་ཚིར་ཅིག །དེའི་འོག་ཏུ་བྱིན་པ་གཉིས། དེའི་འོག་ཏུ་པུས་མོ་གཉིས། དེའི་འོག་ཏུ་བརླ་གཉིས། དེའི་འོག་ཏུ་རྐེད་པ། དེའི་འོག་ཏུ་ལྟོ་བ། དེའི་འོག་ཏུ་བྲང་། དེའི་འོག་ཏུ་གྲེ་བ་ཚིར་ལ། གལ་ཏེ་ཁོ་བོ་འགུལ་ན་
མ་བཏང་ཞིག །སྐྱོང་མ་གླེན་མ་དེས་དེ་བཞིན་དུ་བྱས་ཏེ་དེས་དམ་དུ་བཙིར་བ་དང་། ཚོང་དཔོན་གྱིས་བསམས་པ། ཀྱེ་མའོ་བདག་སྐྱོང་མ་འདིས་བཏང་ཡང་ཅི་མ་རུང་སྙམ་ན་སྐྱོང་མས་དེ་བས་ཀྱང་ཆེས་དམ་དུ་བཙིར་ཏོ། །ལྷས་ཚིགས་སུ་བཅད་པ་སྨྲས་