Kinh tạng Tây Tạng (Kangyur Đại Học) — 005_འདུལ་བ།_ཅ

ཤེས་པས། གལ་ཏེ་ཁྱེའུ་དག་དབྲོག་པར་ནུས་ན་ནི་བདག་ཅག་གི་འཚོ་བའི་བར་གྱི་འཚོ་བ་ཡོད་ལ། ཅི་སྟེ་མ་ནུས་ན་ནི་རྒྱན་དབྲོག་པར་བྱ་སྟེ། དེས་ཀྱང་བདག་ཅག་
བཙལ་མི་དགོས་པར་ལོ་སྐོར་དུ་ལོངས་སྤྱོད་ཅིང་བདེ་བར་འཁོད་པར་འགྱུར་རོ་སྙམ་པའི་བློ་སྐྱེས་སོ། །དེ་དག་བརྡ་བྱས་ཏེ་ལམ་གྱི་བར་དུ་དོང་ནས་འཁོད་པ་དང་། ཁྱེའུ་དེ་དག་ཀྱང་རྒྱན་ཐམས་ཅད་ཀྱིས་བཀླུབས་ཏེ་འོངས་ནས་ཆོམ་རྐུན་པ་དེ་དག་གིས་ཁྱེའུ་དེ་དག་གྲུར་བཅུག་
སྟེ་ཁྱེར་རོ། །ཁྱེའུ་དེ་དག་གི་ཕྱི་བཞིན་ཁྱེའུ་མངག་གཞུག་པ་དག་འདོང་བ་དེ་དག་གིས་ཁྱེའུ་དེ་དག་ཆོམ་རྐུན་པ་དག་གིས་བརྐུས་པ་མཐོང་ནས། དེ་དག་གིས་ཚེ་དང་ལྡན་པ་པི་ལིན་དའི་བུའི་དམག་པའི་དྲུང་དུ་བརྒྱུགས་ཏེ་སྦྲན་པ། ཇོ་བོ་ཁྱོད་ཀྱི་སྲས་བུ་དག་སྟོན་ཟླ་ཐ་ཆུངས་ཀྱི་

གཡོན་ཅན་དག་གིས་བརྐུས་ཀྱི་ཐབས་དགོངས་ཤིག །བྲམ་ཟེ་ཡང་བརྒྱུགས་ཏེ། མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོའི་གན་དུ་སོང་ནས་སྨྲས་པ། ལྷ་བདག་གི་བུ་དག་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་ཕྲོགས་ཀྱིས་བུའི་སློང་མོ་སྩལ་དུ་གསོལ།
རྒྱལ་པོ་གཟུགས་ཅན་སྙིང་པོས་རྒྱལ་བུ་གཞོན་ནུ་མ་སྐྱེས་དགྲ་ལ་བསྒོ་བ། སོང་ལ་བྲམ་ཟེའི་བུ་རྣམས་དང་། ཆོམ་རྐུན་པ་དག་མྱུར་དུ་ཁུག་ཤིག །མ་སྐྱེས་དགྲ་ཡུན་རིང་པོ་ནས་བྲམ་ཟེ་དེ་དང་། ནང་དང་བཅས་པར་གྱུར་པས་དེའི་མོད་ལ་མ་སོང་ངོ་། །དེ་ནས་ལྷ་གང་དག་
ཚེ་དང་ལྡན་པ་པི་ལིན་དའི་བུ་ལ་མངོན་པར་དད་པ་དེ་དག་གིས་ཚེ་དང་ལྡན་པ་པི་ལིན་དའི་བུ་ལ་འདི་སྐད་ཅེས་སྨྲས་སོ། །འཕགས་པ་མཁྱེན་པར་མཛོད་ཅིག །ཁྱོད་ཀྱི་ཚ་བོ་དག་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་ཕྲོགས་ཀྱིས་བརྩོན་པར་མཛད་དུ་གསོལ། ཚེ་དང་ལྡན་
པ་པི་ལིན་དའི་བུས་གལ་ཏེ་ཁྱེའུ་དག་ལ་མ་བསམས་ན། རེ་ཞིག་ཁྱེའུ་དག་ཕ་མ་དང་བྲལ་བ་ལས་བྱུང་བའི་སྡུག་བསྔལ་ཉམས་སུ་མྱོང་བར་འགྱུར་ཞིང་། ཕ་མ་དག་ཀྱང་བུ་དང་བྲལ་བ་ལས་བྱུང་བའི་སྡུག་བསྔལ་ཉམས་སུ་མྱོང་བར་འགྱུར་ལ། མ་དད་པ་དག་གིས་ཀྱང་
གླགས་རྙེད་པར་འགྱུར་ཞིང་། དད་པ་རྣམས་ཀྱང་འདི་ལྟར་དོང་ངོ་ཅོག་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་འཕྲོགས་པར་བྱེད་ན། ཕྱིན་ཆད་སུ་ཞིག་འོད་མའི་ཚལ་དུ་འགྲོ་བར་འགྱུར་ཞེས་གཞན་དུ་གྱུར་པ་ཉིད་དུ་འགྱུར་གྱིས་བདག་གིས་རྫུ་འཕྲུལ་རྣམ་པར་བསྟན་པར་
བྱའོ་སྙམ་དུ་སེམས་ཤིང་རིག་ནས། ཚེ་དང་ལྡན་པ་པི་ལིན་དའི་བུ་རྫུ་འཕྲུལ་གྱིས་སོང་སྟེ་གྲུའི་དྲུང་དུ་འདུག་པ་དང་གྲུ་དེ་མི་འགུལ་བར་འདུག་གོ། །ཆོམ་རྐུན་པ་དག་གིས་ཅིའི་ཕྱིར་གྲུ་འདི་མི་འགུལ་བར་འདུག་སྙམ་དུ་བསམས་པ་དང་། ཚེ་དང་ལྡན་པ་པི་ལིན་དའི་
བུ་གྲུ་དང་ཉེ་བ་ན་འདུག་པ་མཐོང་ངོ་། །མཐོང་ནས་ཀྱང་ཚེ་དང་ལྡན་པ་པི་ལིན་དའི་བུ་ལ་འདི་སྐད་ཅེས་སྨྲས་སོ། །འཕགས་པ་ཅིའི་སླད་དུ་ཐོ་འཚམ་པར་མཛད། རྒ་བའི་ཆོས་ཅན་དག་ཁོ་བོ་འབའ་ཞིག་ཐོ་འཚམ་པར་བྱེད་དམ། གལ་ཏེ་ཁོ་བོས་ཡོན་ཏན་གྱི་ཚོགས་

འདི་ལྟ་བུ་རྟོགས་པར་མ་གྱུར་དུ་ཟིན་ན་དེང་ཁྱེད་ཀྱི་ཁོ་བོའི་ཚ་བོ་དག་བརྐུས་པར་མི་འགྱུར་རམ། འཕགས་པ་གཏང་དུ་གསོལ་དེང་ཤིག །ཚེ་དང་ལྡན་པ་པི་ལིན་དའི་བུས་རྫུ་འཕྲུལ་མངོན་པར་འདུ་བྱ་བ་དེ་དག་ཕྱིར་བརྟུལ་ནས་ཁྱེའུ་དེ་དག་ལ་འདི་སྐད་
ཅེས་སྨྲས་སོ། །ཁྱེའུ་དག་དེ་རིང་ཁྱེད་ཅག་གི་ཕ་མ་དག་ཡིད་མི་བདེ་བར་འཁོད་ཀྱིས། དེང་ལ་སང་ལྷོགས་ཤིག །ཁྱེའུ་དེ་དག་ཁྱིམ་དུ་འཕགས་པ་དང་། གཞོན་ནུ་མ་སྐྱེས་དགྲ་ཡང་དཔུང་གི་ཚོགས་ཡན་ལག་བཞི་པ་གླང་པོ་ཆེ་བའི་ཚོགས་དང་། རྟ་པའི་
ཚོགས་དང་། ཤིང་རྟ་པའི་ཚོགས་དང་། དཔུང་བུ་ཆུང་གི་ཚོགས་གོ་བསྐོན་ཏེ་རྒྱལ་པོའི་ཁབ་ནས་བྱུང་ངོ་། །མ་སྐྱེས་དགྲས་ཁྱེའུ་དེ་དག་མཐོང་ནས་སྨྲས་པ། ཁྱེའུ་དག་ཁྱེད་ཅག་གར་དོང་དོང་། དེ་དག་གིས་སྨྲས་པ། འོད་མའི་ཚལ་དུ་འདོང་བ་ན་བདག་ཅག་
སྟོན་ཟླ་ཐ་ཆུངས་ཀྱི་གཡོན་ཅན་དག་གིས་བརྐུས་སོ། །འོ་ན་ཁྱེད་ཅག་སུས་ཐར་བར་བྱས། འཕགས་པ་པི་ལིན་དའི་བུས་སོ། །མ་སྐྱེས་དགྲ་ཡིད་དགའ་ཞིང་ཡིད་དགའ་ནས་བདག་ཅག་གི་ཡུལ་ན་འཕགས་པ་དེ་ལྟར་རྫུ་འཕྲུལ་ཆེ་བ། དེ་ལྟར་མཐུ་ཆེ་བ། ཚེ་
འདིའི་དོན་དང་། ཚེ་ཕྱི་མའི་དོན་དང་། ཚེ་འདི་དང་ཕྱི་མའི་དོན་ལ་སྐྱབས་མཛད་པ་བཞུགས་པ་ནི་བདག་ཅག་གིས་རྙེད་པ་ལེགས་པར་རྙེད་དོ་ཞེས་ཆེད་དུ་བརྗོད་པ་ཆེད་དུ་རྗོད་པར་བྱེད་དོ། །དེས་བསྔགས་པ་བརྗོད་ཅིང་རྒྱལ་པོའི་ཁབ་ཏུ་འཇུག་པ་ལ་དྲུག་སྡེ་དག་ཀྱང་ཕྱིར་
བྱུང་ཞིང་དྲུག་སྡེ་དག་གིས་སྨྲས་པ། ཁྱོད་སུའི་བསྔགས་པ་བརྗོད། མ་སྐྱེས་དགྲས་སྨྲས་པ། ཁྱེད་ཀྱིའོ། །ངེད་ཀྱིས་ཅི་བྱས། འཕགས་པ་པི་ལིན་དའི་བུས་བྲམ་ཟེའི་བུ་དག་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་ཕྲོགས་པ་ཐར་བར་བྱས་སོ། །བཀྲེན་པ་དག་ཁོ་བོ་
ཅག་དེ་འདྲ་ཡང་འོན་ཀྱང་འདི་ན་ལ་ལ་བྱི་བོ་གཅེར་བུ་དག་ལ་མངོན་པར་དད་དེ། གལ་ཏེ་གཅེར་བུ་དག་གིས་མཐོང་བར་གྱུར་དུ་ཟིན་ན། དེ་དག་གིས་ལམ་ཡང་ཉེ་བར་བསྟན་པར་འགྱུར་རོ། །དེ་དག་ཅང་མི་སྨྲ་བར་འཁོད་པ་དང་། དྲུག་སྡེ་དག་གིས་སྨྲས་པ། དགའ་བོ་ཉེ་དགའ་

དེ་དག་ལ་གོ་བར་བྱས་སོ། །དོན་ཉུང་ངུ་ལ་ལྟུང་བ་བྱུང་གིས་དོང་ལ་འཆགས་སུ་གཞུག་གོ། །དྲུག་སྡེ་དག་གཙུག་ལག་ཁང་དུ་དོང་སྟེ་ཟས་ཀྱི་བྱ་བ་བྱས་ནས་རྒན་རིམས་ཀྱིས་ཕྱག་འཚལ་ཏེ། ཚེ་དང་ལྡན་པ་པི་ལིན་དའི་བུ་ག་ལ་བ་དེར་དོང་ནས་ཕྱིན་པ་དང་། ཚེ་དང་ལྡན་པ་པི་ལིན་དའི་
བུ་ལ་འདི་སྐད་ཅེས་སྨྲས་སོ། །གནས་བརྟན་ཕྱག་འཚལ་ལོ། །ཚེ་དང་ལྡན་པ་དག་ཨ་རོག་གྱ་གནས་བརྟན་ཇེ་སྐབས་ཕྱེ་ཤིག །ལྟུང་བ་སྡེ་ལྔ་པོ་དག་ལ་སྐབས་ཕྱེའོ། །གནས་བརྟན་གྱིས་བྲམ་ཟེའི་བུ་དག་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་ཕྲོགས་པ་ཐར་བར་བགྱིས་
སམ། དེ་བཞིན་ཏེ་ཐར་བར་བྱས་སོ། །གནས་བརྟན་བདག་ཅག་གིས་གནས་བརྟན་གོ་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པའི་བདེ་བ་དག་ཉམས་སུ་མྱོང་བར་མཛད་ཅིང་བཞུགས་པར་འཚལ་གྱིས། བདག་ཅག་གིས་
ཐུགས་རྗེ་ཕྱོགས་གཅིག་པ་དང་ལྡན་ཞིང་བྲམ་ཟེའི་བུ་དག་ལ་ཐུགས་རྗེ་བར་མཛད་ལ། སྟོན་ཟླ་ཐ་ཆུངས་ཀྱི་གཡོན་ཅན་དག་ལ་ཐུགས་རྗེ་བར་མི་མཛད་པར་མ་འཚལ་ཏོ། །གཞན་དག་གིས་བདག་གིར་བགྱིས་པའི་ནོར་དག་ཐར་བར་བགྱིས་པའི་ལྟུང་བ་བྱུང་བ་ཆོས་བཞིན་དུ་
སླར་མཛོད་ཅིག །ལྟུང་བ་མ་མཐོང་ངོ་། །ཚེ་དང་ལྡན་པ་དག་བཅོམ་ལྡན་འདས་ཀྱིས་ལྟུང་བ་མ་མཐོང་བའི་ཕྱིར་གནས་ནས་དབྱུང་བའི་ལས་བྱའོ་ཞེས་གསུངས་ཀྱིས་ཁང་སྐྱོང་སུ་སྣང་གཎྜཱི་རྡུངས་ཤིག །འདི་གནས་ནས་དབྱུང་བའི་ལས་བྱའོ་ཞེས་ཁང་སྐྱོང་གི་གན་དུ་དོང་ནས་
སྨྲས་པ། ཚེ་དང་ལྡན་པ་གཎྜཱི་རྡུངས་ཤིག །ཅིའི་ཕྱིར་ཚེ་དང་ལྡན་པ་པི་ལིན་དའི་བུ་ལྟུང་བ་བྱུང་བ་ཆོས་བཞིན་དུ་ཕྱིར་མི་བྱེད་པས་དེ་གནས་ནས་དབྱུང་བའི་ལས་བྱའོ། །དེའི་ཚེ་ན་ཚེ་དང་ལྡན་པ་ཤཱ་རིའི་བུ་དགེ་འདུན་གྱི་གནས་བརྟན་བྱེད་ཅིང་བསྟན་པ་ལ་ཆོས་ཀྱི་སྒྱུ་ཐབས་ཀྱིས་མི་
མཐུན་པ་འགའ་མི་འབྱུང་ངམ་ཞེས་ཀུན་ཏུ་སྤྱོད་པའི་ཆོས་རྨེད་པར་བྱེད་པས་དེས་ཁང་སྐྱོང་ལ་རྨས་པ། ཚེ་དང་ལྡན་པ་སུ་ཞིག་ཡོངས་སུ་གནས་པའམ། གཞི་ནས་ཡོངས་སུ་གནས་པའམ། མགུ་བར་བྱ་བའམ། གཞི་ནས་མགུ་བར་བྱ་བའམ། འབྱིན་པར་བྱེད།

གནས་བརྟན་སུ་ཡང་མི་བགྱིད་དེ། འདི་ལྟར་ཚེ་དང་ལྡན་པ་པི་ལིན་དའི་བུ་ལྟུང་བ་བྱུང་བ་ཆོས་བཞིན་དུ་སླར་མི་བགྱིད་པས། དེ་ལྟུང་བ་མ་མཐོང་བའི་སླད་དུ་གནས་ནས་དབྱུང་བའི་ལས་བགྱིད་དོ། །ཚེ་དང་ལྡན་པ་དགེ་སློང་གནས་བརྟན་ལ་ཐོ་མ་
འཚམ་པར་འདི་ལྟར་སངས་རྒྱས་བཅོམ་ལྡན་འདས་འདི་ཐམས་ཅད་མཁྱེན་པ། ཐམས་ཅད་གཟིགས་པ། མཁྱེན་པ་དང་ཤེས་བྱ་དག་ལ་བླ་ན་མེད་པའི་མངའ་བརྙེས་པ། ཐེ་ཙོམ་ཐམས་ཅད་གཅོད་པར་མཛད་པ་ཡིན་གྱིས། དེའི་གན་དུ་སོང་ལ་ཞུས་ཤིག་དང་། བཅོམ་
ལྡན་འདས་ཀྱིས་ཁྱེད་ཅག་ལ་ཇི་སྐད་ལུང་སྟོན་པར་མཛད་པ་དེ་དེ་བཞིན་དུ་ཟུང་ཤིག །སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པ་ཡིན་པས། སངས་རྒྱས་བཅོམ་ལྡན་འདས་
ཀྱིས་ཚེ་དང་ལྡན་པ་པི་ལིན་དའི་བུ་ལ་བཀའ་སྩལ་པ། པི་ལིན་དའི་བུ་ཁྱོད་ཀྱིས་བསམ་པ་ཇི་ལྟ་བུས་རྫུ་འཕྲུལ་རྣམ་པར་བསྟན། བཙུན་པ་བདག་འདི་སྙམ་བགྱིད་དེ། གལ་ཏེ་ཁྱེའུ་དག་ལ་མ་བསམས་ན་རེ་ཞིག་ཁྱེའུ་དག་ཕ་མ་དང་བྲལ་བ་ལས་བྱུང་བའི་སྡུག་
བསྔལ་ཉམས་སུ་མྱོང་བར་འགྱུར་ཞིང་ཕ་མ་དག་ཀྱང་བུ་དང་བྲལ་བ་ལས་བྱུང་བའི་སྡུག་བསྔལ་ཉམས་སུ་མྱོང་བར་འགྱུར་ལ། མ་དད་པ་དག་གིས་ཀྱང་གླགས་རྙེད་པར་འགྱུར་ཞིང་། དད་པ་རྣམས་ཀྱང་འདི་ལྟར་དོང་ངོ་ཅོག་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་ཕྲོགས་
པར་བྱེད་ན། ཕྱིན་ཆད་སུ་ཞིག་འོད་མའི་ཚལ་དུ་འགྲོ་བར་འགྱུར་ཞེས་གཞན་དུ་གྱུར་པ་ཉིད་དུ་འགྱུར་གྱིས། བདག་གིས་རྫུ་འཕྲུལ་རྣམ་པར་བསྟན་པར་བགྱིའོ་སྙམ་དུ་བསམས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་པི་ལིན་དའི་བུས་བསམ་པ་
དེ་ལྟ་བུས་རྫུ་འཕྲུལ་རྣམ་པར་བསྟན་པ་ལ་ལྟུང་བ་མེད་དོ།། །།འདུལ་བ་རྣམ་པར་འབྱེད་པ། བམ་པོ་བདུན་པ། སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །རྒྱལ་པོ་གཟུགས་ཅན་སྙིང་པོའི་ཀུན་ཏུ་

སྤྱོད་པ་ནི་ཉི་མ་རེ་རེ་ཞིང་བཅོམ་ལྡན་འདས་དང་། དགེ་སློང་གནས་བརྟན་གནས་བརྟན་རྣམས་ཀྱི་ཞབས་ལ་ཕྱག་འཚལ་དུ་འགྲོའོ། །ཇི་ཙམ་དུས་གཞན་ཞིག་ན། རྒྱལ་པོ་གཟུགས་ཅན་སྙིང་པོ་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ། ཆོས་མཉན་པའི་ཕྱིར་
བཅོམ་ལྡན་འདས་ཀྱི་སྤྱན་སྔར་འདུག་གོ། །བཅོམ་ལྡན་འདས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་མཐའ་གཅིག་ཏུ་འདུག་པ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་
དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་
གསུང་ངོ་། །དེ་ནས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས་སྟན་ལས་ལངས་ཏེ་སོང་ནས། ཚེ་དང་ལྡན་པ་པི་ལིན་དའི་བུའི་གཙུག་ལག་ཁང་ག་ལ་བ་དེར་སོང་ངོ་། །དེའི་ཚེ་ན་ཚེ་དང་ལྡན་པ་པི་ལིན་དའི་བུ་གཙུག་
ལག་ཁང་དེ་ན་རལ་བ་དང་འདྲུམས་པ་རང་ཉིད་ཀྱིས་ཕྱིར་འཆོས་པར་བྱེད་དོ། །ཚེ་དང་ལྡན་པ་པི་ལིན་དའི་བུས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ཐག་རིང་པོ་ཁོ་ན་ནས་མཐོང་ངོ་། །མཐོང་ནས་ཀྱང་ལག་པ་དང་། རྐང་པ་དག་བཀྲུས་ཏེ་སྟན་
བཤམས་པ་ཉིད་ལ་འདུག་གོ། །དེ་ནས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ཚེ་དང་ལྡན་པ་པི་ལིན་དའི་བུའི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་
གཟུགས་ཅན་སྙིང་པོས་ཚེ་དང་ལྡན་པ་པི་ལིན་དའི་བུ་ལ་འདི་སྐད་ཅེས་སྨྲས་སོ། །འཕགས་པ་ཅི་ལགས། རང་ཉིད་ཀྱིས་རལ་བ་དང་འདྲུམས་པ་སླར་འཆོས་པར་མཛད་དམ། རྒྱལ་པོ་ཆེན་པོ་རབ་ཏུ་བྱུང་བ་ནི་རང་ཉིད་ཀྱིས་བྱེད་པ་ཡིན་ཏེ། བདག་ཅག་ནི་རབ་ཏུ་བྱུང་བ་ཡིན་

པས་གཞན་སུ་ཞིག་བྱེད་པར་འགྱུར། འཕགས་པ་གལ་ཏེ་དེ་ལྟ་ན་བདག་གིས་འཕགས་པ་ལ་ཞབས་འབྲིང་བ་དབུལ་ལོ། །རྒྱལ་པོ་ཆེན་པོ་ཨ་རོག་གྱ་དེ་བཞིན་དུ་ལན་བཞིའི་བར་དུ་སྨྲས་ནས། ལན་ལྔ་པ་ལ་ཡང་དེ་ཁོ་ན་སྐད་དུ་བདག་གིས་འཕགས་པ་ལ་
ཞབས་འབྲིང་བ་དབུལ་ལོ་ཞེས་ཟེར་བ་དང་། ཚེ་དང་ལྡན་པ་པི་ལིན་དའི་བུའི་ལྷན་ཅིག་གནས་པ་བདེན་པ་དང་། མཐུན་པ་དང་། ངོ་ཟློག་ཕོད་པར་སྨྲ་བ་ཞིག་གིས་སྨྲས་པ། རྒྱལ་པོ་ཆེན་པོ་གང་ཚུན་ཅད་ནས་རྒྱལ་པོ་ཆེན་པོས་མཁན་པོ་ལ་ཞབས་འབྲིང་བ་དག་གིས་བསྟབས་
པ་ནས་མཁན་པོས་གལ་ཏེ་གཙུག་ལག་ཁང་འདི་ཡལ་བར་བོར་དུ་ལགས་ན་ད་ཙམ་ངོས་རྡིབ་པར་ཡང་གྱུར་ཏོ། །རྒྱལ་པོས་སྨྲས་པ། འཕགས་པ་ཅི་ལགས་བདག་ཅག་གིས་ཡང་དང་ཡང་དུ་ཁས་བླངས་སམ། རྒྱལ་པོ་ཆེན་པོ་ལན་གཅིག་ཏུ་མ་བས་ཀྱི་འདི་ལྟར་འདི་ནི་
ལན་ལྔ་པ་ལགས་སོ། །རྒྱལ་པོ་དེ་བརྗེད་ངས་པས་རྒྱལ་པོ་དེའི་ཀུན་ཏུ་སྤྱོད་པ་ནི་གང་ཡང་རུང་བ་ལ་ཆུང་ཟད་ཁས་བླངས་པ་ཅི་ཡང་རུང་སྟེ། དེ་ཐམས་ཅད་ཕྱི་ན་འདུག་པའི་མིས་ཡི་གེར་འདྲི་བར་བྱེད་པས་རྒྱལ་པོ་དེས་མི་དེ་ལ་སྨྲས་པ། ཀྭའེ་ནང་རྗེ་ཁོ་བོས་ཡང་དང་
ཡང་དུ་ཁས་བླངས་པ་བདེན་ནམ། ལྷ་མད་དེ་འདི་ནི་ལན་ལྔ་པ་ལགས་སོ། །དེ་ལྟ་ན་ཁོ་བོ་ཆད་པའི་ལས་ལ་ཐུག་གིས་ཁོ་བོས་འཕགས་པ་ལ་ཞབས་འབྲིང་བ་ལྔ་བརྒྱ་དབུལ་ལོ། །དེས་བློན་པོ་རྣམས་ལ་བསྒོ་བ། འཕགས་པ་ལ་ཞབས་འབྲིང་བ་ལྔ་བརྒྱ་ཕུལ་ཅིག །
ཚེ་དང་ལྡན་པ་པི་ལིན་དའི་བུས་སྨྲས་པ། རྒྱལ་པོ་ཆེན་པོ་ཁོ་བོ་རང་གི་གཡོག་ཉིད་སྤངས་ཏེ་རབ་ཏུ་བྱུང་བ་ལ་གཡོག་དག་གིས་ཅི་བྱ། འཕགས་པ་དགེ་འདུན་གྱི་དོན་དུ་བཞེས་ཤིག །རྒྱལ་པོ་ཆེན་པོ་གལ་ཏེ་དེ་ལྟ་ན་བཅོམ་ལྡན་འདས་ལ་ཞུའོ། །འཕགས་པ་དེ་མ་
ནོངས་ཀྱིས་ཞུས་ཤིག །སྐབས་དེ་ཚེ་དང་ལྡན་པ་པི་ལིན་དའི་བུས་བཅོམ་ལྡན་འདས་ལ་རྒྱས་པར་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་དོན་དུ་གཡོག་དག་བླང་བར་བྱའོ། །ཚེ་དང་ལྡན་པ་པི་ལིན་དའི་བུས་གཡོག་དེ་དག་

བླངས་པ་དང་། གཡོག་དེ་དག་ཡང་དང་ཡང་དུ་རྒྱལ་པོའི་ཕོ་བྲང་དུ་ལས་བྱེད་དུ་བཅུག་ནས། དེ་དག་གིས་ཚེ་དང་ལྡན་པ་པི་ལིན་དའི་བུ་ལ་འདི་སྐད་ཅེས་སྨྲས་སོ། །འཕགས་པ་བདག་ཅག་འཕགས་པ་དག་གི་ཞབས་འབྲིང་བར་ཕུལ་བ་ནི། བདག་ཅག་གློ་བ་དགའ་ན་ཅིའི་
སླད་དུ་བདག་ཅག་ཡང་དང་ཡང་དུ་རྒྱལ་པོའི་ཕོ་བྲང་དུ་སུག་ལས་བགྱིད། བཞིན་བཟངས་དག་འཁྲུག་ལོང་མ་བྱེད་ཅིག་དང་། ཁོ་བོས་རྒྱལ་པོ་ལ་གསོལ་བར་བྱའོ། །ཇི་ཙམ་དུས་གཞན་ཞིག་ན་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ཡང་ཚེ་དང་ལྡན་པ་
པི་ལིན་དའི་བུའི་དྲུང་དུ་འོངས་ཏེ་རྐང་པ་ལ་ཕྱག་འཚལ་ནས། ཚེ་དང་ལྡན་པ་པི་ལིན་དའི་བུའི་མདུན་དུ་འདུག་པ་དང་། ཚེ་དང་ལྡན་པ་པི་ལིན་དའི་བུས་སྨྲས་པ། རྒྱལ་པོ་ཆེན་པོ་ཁྱོད་དགེ་འདུན་གྱི་དོན་དུ་གཡོག་དག་ཕུལ་བས་འགྱོད་པར་མ་གྱུར་ཏམ། འཕགས་པ་བདག་ལ་
འགྱོད་པ་འགའ་ཡང་མ་མཆིས་སོ། །འོ་ན་ཅིའི་ཕྱིར་གཡོག་དེ་དག་ཡང་རྒྱལ་པོའི་ཕོ་བྲང་དུ་ལས་བྱེད་དུ་བཅུག །རྒྱལ་པོས་སྟན་དེ་ཉིད་ལ་འདུག་བཞིན་དུ་བློན་པོ་རྣམས་ལ་བསྒོ་བ། ཤེས་ལྡན་དག་འཕགས་པ་རྣམས་ཀྱི་ཞབས་འབྲིང་བ་དག་ཕྱིན་ཅད་རྒྱལ་པོའི་ཕོ་བྲང་
དུ་ལས་བྱེད་དུ་མ་གཞུག་ཤིག །བློན་པོ་རྣམས་ཀྱིས་གང་ཡང་རུང་བ་དག་ལ་རྒྱལ་པོའི་ཕོ་བྲང་དུ་ལས་གྱིས་ཤིག་ཅེས་བསྒོ་བ་ན། དེ་དག་ན་རེ་བདག་ཅག་འཕགས་པ་དག་གི་ཡིན་ནོ་ཞེས་ཟེར་ནས། བློན་པོ་རྣམས་ཀྱིས་རྒྱལ་པོ་ལ་སྨྲས་པ། ལྷ་གང་ལ་ཡང་མཆིད་
སྩལ་བར་རྔོ་མ་ཐོག་སྟེ། གང་ཡང་རུང་བ་དག་ལ་རྒྱལ་པོའི་ཕོ་བྲང་དུ་སུག་ལས་ཚོལ་ཅིག་ཅེས་བགྱིས་ན། དེ་དག་བདག་ཅག་འཕགས་པ་རྣམས་ཀྱི་ལགས་སོ་ཞེས་མཆིའོ། །རྒྱལ་པོས་སྨྲས་པ། སོང་ལ་ཐམས་ཅད་ལས་བྱེད་དུ་ཆུག་ཤིག །དེ་དག་ཐམས་ཅད་
ཡང་རྒྱལ་པོའི་ཕོ་བྲང་དུ་ལས་བྱེད་དུ་བཅུག་ནས། དེ་དག་གིས་ཡང་ཚེ་དང་ལྡན་པ་པི་ལིན་དའི་བུ་ལ་སྨྲས་པ། འཕགས་པ་བདག་ཅག་ཡང་དེ་ཁོ་ན་བཞིན་དུ་རྒྱལ་པོའི་ཕོ་བྲང་དུ་སུག་ལས་བགྱིད་དུ་སྩལ་ན། འཕགས་པས་མ་གསོལ་ཏམ། བཞིན་བཟངས་དག་གསོལ་

ཏེ། ཡང་གསོལ་བ་བྱའོ། །ཚེ་དང་ལྡན་པ་པི་ལིན་དའི་བུས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ཡང་དེ་ཁོ་ན་བཞིན་འོངས་པ་ལ་སྨྲས་པ། རྒྱལ་པོ་ཆེན་པོ་ཅི་ལགས། ཁྱོད་ཡང་འགྱོད་པ་སྐྱེས་པར་གྱུར་ཏམ། འཕགས་པ་
ཅི་ནོངས། གཡོག་དག་ཡང་དེ་ཁོ་ན་བཞིན་དུ་ལས་བྱེད་དུ་བཅུག་གོ། །འཕགས་པ་གང་ལ་ཡང་མཆིད་སྩལ་བར་རྔོ་མ་ཐོག་སྟེ། གང་ཡང་རུང་བ་ལ་མཆིད་སྩལ་བ་ན་དེ་དག་བདག་ཅག་འཕགས་པ་དག་གི་ལགས་སོ་ཞེས་མཆིའོ། །ཨེ་མ་འཕགས་པ་དག་གི་ལྷ་འབངས་
ཀྱི་སྡུམ་པ་ལོགས་ཤིག་ཏུ་རྩིག་ཏུ་སྩལ་ན། འདི་དག་ནི་རྒྱལ་པོའི་འོ། །འདི་དག་ནི་འཕགས་པ་དག་གིའོ། །ཞེས་འཚལ་བར་འགྱུར་རོ། །ཚེ་དང་ལྡན་པ་པི་ལིན་དའི་བུས་སྨྲས་པ། བཅོམ་ལྡན་འདས་ལ་ཞུའོ། །དེ་ནས་ཚེ་དང་ལྡན་པ་པི་ལིན་དའི་བུས་དོན་དེ་བཅོམ་
ལྡན་འདས་ལ་རྒྱས་པར་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ལྷ་འབངས་ཀྱི་སྡུམ་པ་རྩིག་ཏུ་འཇུད་པར་རྗེས་སུ་གནང་ངོ་། །དགེ་སློང་དག་གིས་གནས་གང་དུ་ལྷ་འབངས་ཀྱི་སྡུམ་པ་རྩིག་ཏུ་གཞུག་པ་མི་ཤེས་ནས་བཅོམ་ལྡན་འདས་
ཀྱིས་བཀའ་སྩལ་པ། རྒྱལ་པོའི་ཕོ་བྲང་གི་ཕྱི་རོལ་དང་། འོད་མའི་ཚལ་གྱི་ཕྱི་རོལ་གྱི་བར་གང་དུ་སྐད་ཀྱིས་བོས་པ་ཐོས་ནས་དགེ་འདུན་གྱི་དོན་སྒྲུབ་པར་འགྱུར་བ་དེར་ལྷ་འབངས་ཀྱི་སྡུམ་པ་རྩིག་ཏུ་གཞུག་གོ། །དགེ་སློང་རྣམས་ཀྱིས་ཞང་བློན་དག་ལ་བསྒོ་བ། བཅོམ་
ལྡན་འདས་ཀྱིས་ཕྱོགས་འདིར་ལྷ་འབངས་ཀྱི་སྡུམ་པ་རྩིག་ཏུ་ཆུག་ཤིག་ཅེས་བཀའ་སྩལ་གྱིས་དེ་ཁྱེད་ཅག་གིས་ཤེས་པར་གྱིས་ཤིག །ཞང་བློན་དག་གིས་རྒྱལ་པོའི་ཁབ་ཏུ་དྲིལ་གྱི་སྒྲ་སྒྲོག་ཏུ་བཅུག་སྟེ། གང་དག་འཕགས་པ་རྣམས་ཀྱི་ཞབས་འབྲིང་བ་ཡིན་པ་དེ་
དག་རྒྱལ་པོའི་ཁབ་ཀྱི་ཕྱི་རོལ་དང་། འོད་མའི་ཚལ་གྱི་ཕྱི་རོལ་གྱི་བར་དུ་འདུག་པར་ཆད་ཀྱིས་དེང་ལ་དེར་སྡུམ་པ་རྩིགས་ཤིག་ཅེས་བསྒོ་ནས། དེ་དག་དེར་དོང་སྟེ་སྡུམ་པ་བརྩིགས་སོ། །ལྷ་འབངས་ཀྱི་སྡུམ་པ་བརྩིགས་ནས་དེ་དག་གཙུག་ལག་ཁང་དུ་དོང་སྟེ་ལས་

བྱེད་ཅིང་། དགེ་སློང་རྣམས་ཀྱིས་དེ་དག་ལ་ལས་འདི་ནི་རུང་བ་ཡིན་གྱིས་ཁྱེད་ཀྱིས་བྱའོ། །འདི་ནི་རུང་བ་མ་ཡིན་གྱིས་ཁྱེད་ཀྱིས་མི་བྱའོ་ཞེས་ལས་བསྟན་ནས། དེ་དག་ལས་རུང་བ་བྱེད་པས་ལྷ་འབངས་ལྷ་འབངས་ཞེས་བྱ་བའི་མིང་དུ་གྱུར་ཏོ། །དགེ་འདུན་གྱི་
ཀུན་དགའ་ར་བ་སྐྱོང་བར་བྱེད་པས་རྩེ་རྒོད་རྩེ་རྒོད་ཅེས་བྱ་བའི་མིང་དུ་གྱུར་ཏོ། །དེ་དག་ཐམས་ཅད་གཙུག་ལག་ཁང་དུ་འཇུག་པས་ཀླག་ཅོར་གྱི་སྒྲས་དགེ་སློང་དག་གིས་སེམས་རྩེ་གཅིག་པ་ཉིད་མི་སྒྲུབ་ནས། བཅོམ་ལྡན་འདས་ཀྱིས་བཀའ་སྩལ་པ། ཇི་སྙེད་དག་
གིས་ལས་འགྲུབ་པ་དེ་སྙེད་འཇུག་པར་བྱའི་ཐམས་ཅད་མི་བྱའོ། །དགེ་སློང་དག་གིས་དེ་དག་ཐམས་ཅད་ལ་ཟས་དང་གོས་སྦྱིན་པར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། གང་དག་ལས་བྱེད་པ་དེ་དག་ལ་ཟས་དང་གོས་སྦྱིན་པར་བྱའི་ཐམས་ཅད་ལ་མི་བྱའོ། །
དགེ་སློང་རྣམས་ཀྱིས་དེ་དག་ན་བ་ཡལ་བར་བོར་ནས་བཅོམ་ལྡན་འདས་ཀྱིས་བཀའ་སྩལ་པ། གང་དག་ན་བ་དེ་དག་ལ་ཟས་དང་གོས་སྦྱིན་པར་བྱ་ཞིང་བསྙེན་བཀུར་ཡང་བྱའོ། །ཇི་ཙམ་དུས་གཞན་ཞིག་ན་ཉེ་དགའ་དགེ་སྐོས་བྱེད་པས་དེས་ལྷ་འབངས་དེ་དག་ལ་སྨྲས་པ། བཞིན་བཟངས་
དག་ཁོ་བོ་དགེ་སྐོས་བྱེད་ཀྱིས་ཁྱེད་ཅག་ནང་པར་སྔར་ཤོག་ཤིག །རྒྱལ་པོའི་ཁབ་ན་སྟོན་ཟླ་ཐ་ཆུངས་ཀྱི་གཡོན་ཅན་ཞེས་བྱ་བ་ཆོམ་རྐུན་པ་དག་གིས་ཀུན་ཏུ་སྤྱོད་པ་དེ་དག་དགག་དབྱེ་བྱས་མ་ཐག་ཏུ་ཤེས་ལྡན་དག་བདག་ཅག་གིས་ལས་ཅི་ཞིག་བྱས་ན་དེས་བཙལ་མི་དགོས་པར་ལོ་
སྐོར་དུ་ལོངས་སྤྱོད་ཅིང་བདེ་བར་གནས་པར་འགྱུར་ཞེས་ཕན་ཚུན་གྲོས་བྱེད་དོ། །དེ་ན་དགེ་སློང་གི་རྒྱུས་ཤེས་པ་ཅིག་འདུག་པ་དེས་སྨྲས་པ། ཤེས་ལྡན་དག་འཕགས་པ་དག་གི་གཡོག་གང་དག་གྲོང་ཁྱེར་གྱི་ཕྱི་རོལ་ན་འཁོད་པ་དེ་དག་གཞོམ་པར་བྱའོ། །གཞན་དག་
གིས་སྨྲས་པ། རེ་ཞིག་དེ་དག་གི་ཇོ་བོ་གང་དག་ཡིན་པ་དེ་དག་ཀྱང་སྒོ་འཕར་བརྒྱ་སྙེད་བཟླ་བ་བྱས་ཀྱང་ལྟོ་ཁེངས་པ་འགྲུབ་པར་དཀའ་བས་དེ་དག་ལ་ཡང་ཅུང་ཟད་ཀྱང་མེད་ན་དེ་དག་གི་གཡོག་དེ་དག་ལྟ་སྨོས་ཀྱང་ཅི་དགོས། དགེ་སློང་གི་རྒྱུས་ཤེས་པ་དེས་སྨྲས་པ། ཤེས་

ལྡན་དག་ཁྱེད་མི་ཤེས་ཏེ། དེ་དག་ནི་ཟན་གཞན་ལས་ཟ་ཞིང་རང་གི་ལས་རྗེས་སུ་སྒྲུབ་པ་དེ་ལྷུར་ལེན་ཏེ། ཐབས་དུ་མ་དག་གིས་ནོར་སྒྲུབ་པར་བྱེད་པས་དེ་དག་ལ་གང་ཡོད་པ་དེ་ནི་གྲོང་ཁྱེར་འདི་ན་ཡང་མེད་ཀྱིས་ཅུང་ཞིག་གཞོམ་པར་བྱའོ། །དེ་དག་
གིས་བརྡ་བྱས་ཏེ་དོང་ནས་དེ་དག་གཞོམ་པར་བརྩམས་སོ། །དེ་ནས་ལྷ་གང་དག་ཚེ་དང་ལྡན་པ་པི་ལིན་དའི་བུ་ལ་མངོན་པར་དད་པ་དེ་དག་གིས་ཚེ་དང་ལྡན་པ་པི་ལིན་དའི་བུ་ལ་འདི་སྐད་ཅེས་སྨྲས་སོ། །འཕགས་པ་མཁྱེན་པར་མཛོད་ཅིག །ཁྱེད་ཀྱི་ཞབས་འབྲིང་བ་
དག་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་འཇོམས་པར་འགྱུར་གྱིས་བརྩོན་པར་མཛད་དུ་གསོལ། ཚེ་དང་ལྡན་པ་པི་ལིན་དའི་བུས་གལ་ཏེ་གཡོག་དག་ལ་མ་བསམས་ན་གཡོག་དག་ཀྱང་རེ་ཞིག་ནོར་དང་བྲལ་བ་ལས་བྱུང་བའི་སྡུག་བསྔལ་ཉམས་སུ་མྱོང་བར་འགྱུར་ལ། མ་
དད་པ་རྣམས་ཀྱིས་ཀྱང་གླགས་རྙེད་པར་འགྱུར་ཞིང་དད་པ་རྣམས་ཀྱང་འདི་ལྟར་སྦྱིན་པར་བྱ་བའི་ཆོས་བྱིན་པ་དག་ཡོངས་སུ་སྐྱོང་བར་མི་བྱེད་ན། ཕྱིན་ཆད་སུ་ཞིག་ཤཱཀྱའི་སྲས་ཀྱི་དགེ་སློང་རྣམས་ལ་སྦྱིན་པ་དང་བྱ་བར་སེམས་ཤེས་གཞན་དུ་གྱུར་པ་ཉིད་དུ་འགྱུར་གྱིས། རྫུ་འཕྲུལ་
རྣམ་པར་བསྟན་པར་བྱའོ་སྙམ་དུ་བསམས་ཤིང་རིག་ནས། ཚེ་དང་ལྡན་པ་པི་ལིན་དའི་བུས་ལྷ་འབངས་ཀྱི་སྡུམ་པ་དེ་ལྕགས་ཀྱི་ར་བས་བསྐོར་ཏོ། །ཆོམ་རྐུན་པ་དག་གིས་རྐུན་རྫས་ཐོགས་ཏེ་འཕགས་པ་དང་། ལྕགས་ཀྱི་ར་བ་མཐོང་ནས་དེ་དག་གིས་ཕན་ཚུན་ཀུན་ཏུ་འགྲོ་བར་
བརྩམས་ན་ལམ་མ་རྙེད་དོ། །དེ་དག་གིས་རྐུན་རྫས་བོར་ཏེ་འཕགས་པ་དང་། ལྕགས་ཀྱི་ར་བ་དེ་ཡང་མི་སྣང་བར་གྱུར་ཏོ། །དེ་དག་གིས་ཡང་རྐུན་རྫས་བླངས་པ་དང་། ལྕགས་ཀྱི་ར་བ་དེ་ཡང་ཡང་ཕྱིར་བྱུང་སྟེ། ལན་བདུན་གྱི་བར་དུ་དེ་ལྟར་གྱུར་པ་དང་། དེ་དག་གིས་སྨྲས་
པ། ཤེས་ལྡན་དག་འཕགས་པ་རྫུ་འཕྲུལ་ཆེ་བ། མཐུ་ཆེ་བ་འགའ་ཞིག་གིས་འདི་དག་ལ་དགོངས་པ་འདྲས་རྐུན་རྫས་བོར་ལ་བྲོས་པར་བྱའོ། །དེ་དག་གིས་རྐུན་རྫས་ཕྱོགས་གཅིག་ཏུ་བོར་ཏེ་བྲོས་སོ། །ལྷ་འབངས་དེ་དག་སད་པ་དང་། ཤེས་ལྡན་དག་བདག་ཅག་བཅོམ་

མོ། །བདག་ཅག་བཅོམ་མོ་ཞེས་ཀུ་ཅོ་འདོན་ཅིང་དེ་དག་ནོར་དང་བྲལ་བ་ལས་བྱུང་བའི་ཡིད་མི་བདེ་བ་དང་ལྡན་ཞིང་ཐམས་ཅད་འདུས་ནས་ལྷ་འབངས་ཀྱི་སྡུམ་པ་ཀུན་ཏུ་བྱུལ་བར་བརྩམས་པ་དང་། ཕྱོགས་གཅིག་ན་རྫས་ཐམས་ཅད་སྤུངས་ཏེ་བཞག་པ་མཐོང་ངོ་། །དེ་
ནས་དགའ་བ་དང་ཡིད་བདེ་བ་སྐྱེས་ཏེ་རང་རང་གི་རྫས་བླངས་ནས་ཁྱིམ་ཁྱིམ་དུ་དོང་ངོ་། །དེ་དག་གིས་སོ་སོའི་ཁྱིམ་སྲུང་བ་བཞག་སྟེ། གཉིད་ལོག་པ་ན་ལྷ་དེས་དེ་དག་གི་རྨི་ལམ་དུ་སྦྲན་པ། ཤེས་ལྡན་དག་ཁྱེད་ཅག་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་མ་བཅོམ་
པ་འདི་དག་ཐམས་ཅད་ནི་འཕགས་པ་པི་ལིན་དའི་བུའི་མཐུ་ཡིན་ནོ། །དེ་ནས་མཚན་མོ་ནམ་ནངས་པ་དང་། ཐམས་ཅད་འདུས་ཏེ་སྨྲས་པ། ཤེས་ལྡན་དག་ལྷས་རྨི་ལམ་དུ་ཁྱེད་ཅག་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་མ་བཅོམ་པ་འདི་དག་ཐམས་ཅད་ནི་འཕགས་
པ་པི་ལིན་དའི་བུའི་མཐུ་ཡིན་ནོ་ཞེས་བསྟན་ཏོ། །དེ་ནི་དེ་ཁོ་ན་བཞིན་ཡིན་གྱིས་གཞན་དུ་ན་འཕགས་པ་པི་ལིན་དའི་བུ་མ་གཏོགས་པར་གཞན་སུ་ཞིག་བདག་ཅག་ལ་སྙིང་རྗེ་བར་འགྱུར། དེའི་ཚེ་དེ་དག་ཇེ་བྱི་དོར་བྱས་ལ་ཕྱིས་གཙུག་ལག་ཁང་དུ་འདོང་ངོ་ཞེས་དེ་དག་
ཁྲུས་བྱས་ཤིང་གོས་དཀར་པོ་དང་། དྲི་དང་། ཕྲེང་བ་རྒྱུས་བརྒྱན་ཏེ། བྱི་དོར་བྱས་ཏེ་གཙུག་ལག་ཁང་དུ་དོང་ངོ་། །ཉེ་དགའ་ཡང་ནང་པར་སྔར་ལངས་ནས་ལྡེ་མིག་དང་ལྡེ་མིག་ཀྱོག་པོ་ཐོགས་ནས་གཙུག་ལག་ཁང་གི་སྒོ་ཕྱེ་སྟེ། མར་མེའི་ཀོང་བུ་བསལ་ནས་གཙུག་
ལག་ཁང་དུ་ཆག་ཆག་དང་བྱུག་པ་བྱས་ཏེ། གནས་མལ་བཤམས་ནས་མཆོད་རྟེན་གྱི་འཁོར་སར་བདུག་སྤོས་བྲིམས་ནས་ཁང་སྟེང་དུ་འཛེགས་ཏེ། གཎྜཱི་རྡུང་ཞིང་ཕྱོགས་བཞིར་རྣམ་པར་ལྟའོ། །དེས་དེ་དག་གོས་དཀར་པོ་དང་། དྲི་དང་། ཕྲེང་བ་རྒྱུས་བརྒྱན་
པ་དག་མཐོང་ནས། དེ་འདི་དག་ནོར་ཅན་དག་གམ། ཚོང་དཔོན་དག་གམ། དེད་དཔོན་གཙུག་ལག་ཁང་ལྟར་འོང་བ་སུ་ཞིག་ཡིན་སྙམ་དུ་སེམས་སོ། །གང་གི་ཚེ་མཆོད་རྟེན་གྱི་འཁོར་སར་ཞུགས་པ་དེའི་ཚེ་དེས་དེ་དག་ངོ་ཤེས་ནས་ཉེ་དགའས་གཤེ་ཞིང་སྨྲས་པ།

ངས་ཁྱེད་ཅག་ལ་སང་ནང་པར་སྔར་ཤོག་ཤིག་ཅེས་མ་བསྒོ་འམ། ཁྱེད་གར་དོང་དོང་། དེ་དག་གིས་སྨྲས་པ། འཕགས་པ་གལ་ཏེ་བདག་ཅག་ལ་འཕགས་པ་པི་ལིན་དའི་བུས་མ་དགོངས་སུ་ལགས་ན། བདག་ཅག་དེང་ཁོ་ནར་སྟོན་ཟླ་ཐ་
ཆུངས་ཀྱི་གཡོན་ཅན་དག་གིས་ཚུལ་མ་ལགས་པས། སྡུག་བསྔལ་བསྒྲུབས་པར་འགྱུར་རོ། །ཉེ་དགའས་གཤེ་ཞིང་སྨྲས་པ། ཁྱེད་ཅག་རེ་ཞིག་གང་གི་མཐུས་སྙེམས་པ་དེ་ལ་ཡང་ཇེ་ཁྲིམས་བཅའ་བར་བྱའོ་ཞེས་རིག་ནས་དྲུག་སྡེ་དག་སྦྲན་ཏེ། ཚེ་དང་ལྡན་པ་པི་ལིན་
དའི་བུ་ག་ལ་བ་དེར་དོང་ནས་ཕྱིན་པ་དང་། ཚེ་དང་ལྡན་པ་པི་ལིན་དའི་བུ་ལ་འདི་སྐད་ཅེས་སྨྲས་སོ། །གནས་བརྟན་ལ་ཕྱག་འཚལ་ལོ། །ཚེ་དང་ལྡན་པ་དག་ཨ་རོག་གྱ། གནས་བརྟན་ཇེ་སྐབས་ཕྱེ་ཤིག །ལྟུང་བ་སྡེ་ལྔ་པོ་དག་ལ་སྐབས་ཕྱེའོ། །གནས་བརྟན་གྱིས་བ་
ཞབས་འབྲིང་བ་དག་གི་ནོར་སྟོན་ཟླ་ཐ་ཆུངས་ཀྱི་གཡོན་ཅན་དག་གིས་བརྐུས་པ་ཐར་བར་བགྱིས་སམ། དེ་བཞིན་ཏེ་ཐར་བར་བྱས་སོ། །གནས་བརྟན་བདག་ཅག་གིས་གནས་བརྟན་གོ། །བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམ་པར་
འཇུག་པ་དག་གི་བདེ་བ་ཉམས་སུ་མྱོང་བར་མཛད་ཅིང་བཞུགས་པར་འཚལ་གྱི། བདག་ཅག་གིས་ཐུགས་རྗེ་ཕྱོགས་གཅིག་པ་དང་ལྡན་ཞིང་ཞབས་འབྲིང་བ་དག་ལ་ཐུགས་རྗེ་བར་མཛད་ལ། སྟོན་ཟླ་ཐ་ཆུངས་ཀྱི་གཡོན་ཅན་དག་ལ་མི་མཛད་པར་མ་འཚལ་ཏོ། །གཞན་
དག་གིས་བདག་གིར་བགྱིས་པའི་ནོར་དག་ཐར་བར་བགྱིས་པའི་ལྟུང་བ་བྱུང་བ་ཆོས་བཞིན་དུ་སླར་མཛོད་ཅིག །ལྟུང་བ་མ་མཐོང་ངོ་། །ཚེ་དང་ལྡན་པ་དག་བཅོམ་ལྡན་འདས་ཀྱིས་ལྟུང་བ་མ་མཐོང་བའི་ཕྱིར་གནས་ནས་དབྱུང་བའི་ལས་བྱའོ་ཞེས་གསུངས་ཀྱིས། ཁང་སྐྱོང་
སུ་སྣང་། གཎྜཱི་རྡུངས་ཤིག །འདི་གནས་ནས་དབྱུང་བའི་ལས་བྱའོ་ཞེས་དེ་དག་ཁང་སྐྱོང་གི་དྲུང་དུ་དོང་ནས་སྨྲས་པ། ཚེ་དང་ལྡན་པ་གཎྜཱི་རྡུངས་ཤིག །ཅིའི་ཕྱིར་དོན་ཉུང་ངུ་ལ་ལྟུང་བ་བྱུང་བ་ཆོས་བཞིན་དུ་ཕྱིར་མི་འཆོས་པས་དེ་གནས་ནས་དབྱུང་བའི་ལས་བྱའོ། །དེའི་

ཚེ་ན་ཚེ་དང་ལྡན་པ་ཤཱ་རིའི་བུ་དགེ་འདུན་གྱི་གནས་བརྟན་བྱེད་ཅིང་བསྟན་པ་ལ་ཆོས་ཀྱི་སྒྱུ་ཐབས་ཀྱིས་མི་མཐུན་པ་འགའ་འབྱུང་བར་མི་འགྱུར་རམ་ཞེས་ཀུན་ཏུ་སྤྱོད་པའི་ཆོས་རྨེད་པར་བྱེད་པས་དེས་ཁང་སྐྱོང་ལ་རྨས་པ། ཚེ་དང་ལྡན་པ་སུ་ཞིག་ཡོངས་སུ་གནས་པའམ། གཞི་
ནས་ཡོངས་སུ་གནས་པའམ། མགུ་བར་བྱ་བའམ། གཞི་ནས་མགུ་བར་བྱ་བའམ། འབྱིན་པར་བྱེད། སུ་ཡང་མི་བགྱིད་དེ། འདི་ལྟར་ཚེ་དང་ལྡན་པ་པི་ལིན་དའི་བུ་ལྟུང་བ་བྱུང་བ་ཆོས་བཞིན་དུ་སླར་མི་བགྱིད་པ་དེ་ལྟུང་བ་མ་མཐོང་བའི་སླད་དུ་གནས་ནས་དབྱུང་བའི་ལས་
བགྱིད་དོ། །ཚེ་དང་ལྡན་པ་དགེ་སློང་གནས་བརྟན་ལ་ཐོ་མ་འཚམ་པར་འདི་ལྟར་སངས་རྒྱས་བཅོམ་ལྡན་འདས་འདི་ཐམས་ཅད་མཁྱེན་པ། ཐམས་ཅད་གཟིགས་པ། མཁྱེན་པ་དང་ཤེས་བྱ་དག་ལ་བླ་ན་མེད་པའི་མངའ་བརྙེས་པ། ཐེ་ཚོམ་ཐམས་ཅད་གཅོད་པར་
མཛད་པ་ཡིན་གྱིས་དེའི་གན་དུ་དེང་ལ་དོན་འདི་ཞུས་ཤིག་དང་། བཅོམ་ལྡན་འདས་ཀྱིས་ཁྱེད་ལ་ཇི་སྐད་ལུང་བསྟན་པ་དེ་དེ་ཁོ་ན་བཞིན་དུ་ཟུང་ཤིག །སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །སངས་རྒྱས་བཅོམ་ལྡན་འདས་རྣམས་ནི་
མཁྱེན་བཞིན་དུ་རྨེད་པར་མཛད་པ་ཡིན་པས་སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་པི་ལིན་དའི་བུ་ལ་རྨས་པ། པི་ལིན་དའི་བུ་ཁྱོད་ཀྱིས་བསམ་པ་ཇི་ལྟ་བུས་རྫུ་འཕྲུལ་རྣམ་པར་བསྟན། བཙུན་པ་བདག་འདི་སྙམ་བགྱིད་དེ། གལ་ཏེ་སུག་རྗེད་
དག་ལ་མ་བསམས་ན། སུག་རྗེད་དག་ཀྱང་རེ་ཞིག་ནོར་དང་བྲལ་བ་ལས་བྱུང་བའི་སྡུག་བསྔལ་ཉམས་སུ་མྱོང་བར་འགྱུར་ཞིང་མ་དད་པ་རྣམས་ཀྱིས་ཀྱང་གླགས་རྙེད་པར་འགྱུར་ལ། དད་པ་རྣམས་ཀྱང་འདི་ལྟར་སྦྱིན་པར་བྱ་བའི་ཆོས་བྱིན་པ་ཡོངས་སུ་སྐྱོང་བར་མི་
བྱེད་པས་ཕྱིན་ཅད་སུ་ཞིག་ཤཱཀྱའི་སྲས་ཀྱི་དགེ་སྦྱོང་རྣམས་ལ་སྦྱིན་པ་དང་བྱ་བར་སེམས་ཤེས་གཞན་དུ་གྱུར་པ་ཉིད་དུ་འགྱུར་གྱིས། བདག་གིས་རྫུ་འཕྲུལ་རྣམ་པར་བསྟན་པར་བགྱིའོ་སྙམ་པས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་

སློང་པི་ལིན་དའི་བུས་བསམ་པ་དེ་ལྟ་བུས་རྫུ་འཕྲུལ་རྣམ་པར་བསྟན་པ་ལ་ལྟུང་བ་མེད་དོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ནོར་ཅན་གྱིས་དགེ་སློང་
གི་དགེ་འདུན་སྐྱོན་མ་མཆིས་ཤིང་ཆུ་བུར་མ་མཆིས་པ་ལ་དེའི་དང་པོར་འདི་ལྟ་སྟེ། མ་བྱིན་པར་ལེན་པའི་རྐྱེན་གྱིས་ཆུ་བུར་བྱུང་བ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་དུ་མ་ཟད་ཀྱིས། འདི་ལྟར་འདས་པའི་དུས་ན་ཡང་འདིས་
འཇིག་རྟེན་སྐྱོན་མེད་ཅིང་ཆུ་བུར་མེད་པ་ལ་དེའི་དང་པོར་འདི་ལྟ་སྟེ། མ་བྱིན་པར་ལེན་པའི་རྐྱེན་གྱིས་ཆུ་བུར་ཕྱུང་སྟེ། དེ་ཉོན་ཅིག་དགེ་སློང་དག་འཇིག་རྟེན་འདི་འཇིག་པའི་དུས་གང་ཡིན་པ་དེ་ཡང་ཡོད་དེ། འཇིག་རྟེན་འཇིག་པ་ན་སེམས་ཅན་དག་ཕལ་ཆེར་འོད་གསལ་གྱི་
ལྷའི་རིགས་སུ་སྐྱེའོ། །དེ་དག་དེ་ན་གཟུགས་ཅན་ཡིད་ལས་བྱུང་བ་མ་ཚང་བ་མེད་པ། དབང་པོ་མ་ཉམས་པ། ཡན་ལག་དང་ཉིང་ལག་ཐམས་ཅད་དང་ལྡན་པ། བཟང་བ། ཁ་དོག་དང་ལྡན་པ། རང་ལས་འོད་འབྱུང་བ། ནམ་མཁའ་ལ་འགྲོ་བ། དགའ་
བ་ཟ་བ། དགའ་བའི་ཟས་དང་ལྡན་པ། ཚེ་རིང་ཞིང་ཡུན་རིང་དུ་གནས་སོ། །དེའི་ཚེ་ན་ས་ཆེན་པོ་འདི་ཆུ་འབའ་ཞིག་དང་། རྒྱ་མཚོ་འབའ་ཞིག་ཏུ་གྱུར་ཏེ། ས་ཆེན་པོ་ཆུ་འབའ་ཞིག་དང་། རྒྱ་མཚོ་འབའ་ཞིག་ཏུ་གྱུར་པའི་སྟེང་དུ་རླུང་གིས་སྤྲིས་མ་ཀུན་ཏུ་འཆགས་
པར་བྱེད། ཀུན་ཏུ་འཐས་པར་བྱེད། ཀུན་ཏུ་ཁྱབ་པར་བྱེད་དེ། འདི་ལྟ་སྟེ། དཔེར་ན་འོ་མ་བསྐོལ་བ་གྲངས་པར་གྱུར་པའི་སྟེང་དུ་རླུང་གིས་སྤྲིས་མ་ཀུན་ཏུ་འཆགས་པར་བྱེད། ཀུན་ཏུ་འཐས་པར་བྱེད། ཀུན་ཏུ་ཁྱབ་པར་བྱེད་པ་དེ་བཞིན་དུ། ས་ཆེན་པོ་ཆུ་
འབའ་ཞིག་དང་། རྒྱ་མཚོ་འབའ་ཞིག་ཏུ་གྱུར་པའི་སྟེང་དུ་ཡང་རླུང་གིས་སྤྲིས་མ་ཀུན་ཏུ་འཆགས་པར་བྱེད། ཀུན་ཏུ་འཐས་པར་བྱེད། ཀུན་ཏུ་ཁྱབ་པར་བྱེད་དོ། །དེ་ནི་སའི་བཅུད་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ་ཡིན་

ཏེ། ཁ་དོག་གིས་ནི་འདི་ལྟ་བུ་སྟེ། འདི་ལྟ་སྟེ། དཔེར་ན་མར་ལྟ་བུའོ། །རོས་ནི་འདི་ལྟ་བུ་སྟེ། འདི་ལྟ་སྟེ། དཔེར་ན་སྦྲང་བུའི་སྦྲང་རྩི་མ་བསྐོལ་བ་ལྟ་བུའོ། །དགེ་སློང་དག་འཇིག་རྟེན་འདི་འཆགས་པའི་དུས་གང་ཡིན་པ་དེ་ཡང་ཡོད་དེ། འཇིག་རྟེན་འཆགས་
པ་ན་འོད་གསལ་གྱི་ལྷའི་རིས་དེ་ནས་སེམས་ཅན་ཁ་ཅིག་ཚེ་ཟད། ལས་ཟད། བསོད་ནམས་ཟད་པས་ཤི་འཕོས་ཏེ། འདི་ལྟ་བུ་ཉིད་དུ་མི་རྣམས་དང་སྐལ་བ་མཐུན་པ་ཉིད་དུ་འོང་ཞིང་འདིར་ཡང་གཟུགས་ཅན་ཡིད་ལས་བྱུང་བ། མ་ཚང་བ་མེད་པ། དབང་པོ་མ་ཉམས་པ།
ཡན་ལག་དང་ཉིང་ལག་ཐམས་ཅད་དང་ལྡན་པ། བཟང་བ། ཁ་དོག་དང་ལྡན་པ། རང་ལས་འོད་འབྱུང་བ། ནམ་མཁའ་ལ་འགྲོ་བ། དགའ་བ་ཟ་བ། དགའ་བའི་ཟས་དང་ལྡན་པ། ཚེ་རིང་ཞིང་ཡུན་རིང་དུ་གནས་སོ། །དེའི་ཚེ་ན་འཇིག་རྟེན་དུ་ཉི་མ་དང་ཟླ་བ་དག་ཀྱང་མ་བྱུང་
ངོ་། །འཇིག་རྟེན་དུ་རྒྱུ་སྐར་དག་ཀྱང་མ་བྱུང་། མཚན་མོ་དང་། ཉིན་མོ་དག་ཀྱང་མ་བྱུང་། སྐད་ཅིག་དང་། ཐང་ཅིག་དང་། ཡུད་ཙམ་དག་ཀྱང་མ་བྱུང་། ཟླ་བ་དང་། ཟླ་བ་ཕྱེད་དང་། དུས་ཚིགས་དང་། ལོ་དག་ཀྱང་མ་བྱུང་ངོ་། །བུད་མེད་ཀྱང་མེད། སྐྱེས་པ་ཡང་མེད།
སེམས་ཅན་སེམས་ཅན་ཞེས་བྱ་བ་འབའ་ཞིག་གི་གྲངས་སུ་འགྲོའོ། །དེ་ནས་སེམས་ཅན་བརྐམ་པའི་རང་བཞིན་ཅན་ཞིག་སོར་མོའི་རྩེ་མོས་སའི་བཅུད་མྱོང་བར་བྱེད་དོ། །ཇི་ལྟ་ཇི་ལྟར་མྱོང་བར་བྱེད་པ་དེ་ལྟ་དེ་ལྟར་འདོད་པར་བྱེད་དོ། །ཇི་ལྟ་ཇི་ལྟར་འདོད་པར་བྱེད་པ་དེ་ལྟ་
དེ་ལྟར་ཁམ་གྱི་ཟས་ཀྱི་རྩོམ་པས་ཟོས་པར་གྱུར་ཏོ། །སེམས་ཅན་གཞན་དག་གིས་ཀྱང་སེམས་ཅན་དེ་སོར་མོའི་རྩེ་མོས་སའི་བཅུད་མྱོང་བར་བྱེད་པ་ན་ཇི་ལྟ་ཇི་ལྟར་མྱོང་བར་བྱེད་པ་དེ་ལྟ་དེ་ལྟར་འདོད་པར་བྱེད་པ་དང་། ཇི་ལྟ་ཇི་ལྟར་འདོད་པར་བྱེད་པ་དེ་ལྟ་དེ་ལྟར་ཁམ་གྱི་
ཟས་ཀྱི་རྩོམ་པས་ཟོས་པར་གྱུར་པ་མཐོང་ངོ་། །མཐོང་ནས་སེམས་ཅན་དེ་དག་ཀྱང་འདི་སྙམ་དུ་ཀྱེ་མ་དེ་ནི་ལེགས་སོ། །ཀྱེ་མ་དེ་ནི་བཟང་ངོ་། །བདག་ཅག་གིས་ཀྱང་སོར་མོའི་རྩེ་མོས་སའི་བཅུད་མྱང་བར་བྱའོ་སྙམ་དུ་སེམས་ཤིང་། དེ་དག་ཀྱང་སོར་མོའི་རྩེ་

མོས་སའི་བཅུད་མྱོང་བར་བྱེད་དོ། །ཇི་ལྟ་ཇི་ལྟར་མྱོང་བར་བྱེད་པ་དེ་ལྟ་དེ་ལྟར་འདོད་པར་བྱེད་དོ། །ཇི་ལྟ་ཇི་ལྟར་འདོད་པར་བྱེད་པ་དེ་ལྟ་དེ་ལྟར་ཁམ་གྱི་ཟས་ཀྱི་རྩོམ་པས་ཟོས་པར་གྱུར་ཏོ། །གང་གི་ཕྱིར་སེམས་ཅན་དེ་དག་གིས་སའི་བཅུད་ཁམ་གྱི་
ཟས་ཀྱི་རྩོམ་པས་ཟོས་པར་གྱུར་པ་དེའི་ཕྱིར་དེ་དག་གི་ལུས་ལ་སྲ་བ་ཉིད་དང་། ལྕི་བ་ཉིད་བྱུང་ཞིང་དེ་དག་གི་ཁ་དོག་གསལ་བ་བཟང་པོ་གང་ཡིན་པ་དེ་ཡང་མེད་པར་གྱུར། འཇིག་རྟེན་དུ་མུན་པ་ཡང་བྱུང་བར་གྱུར་ཏོ། །དགེ་སློང་དག་ཆོས་ཉིད་ཀྱིས་ན་འཇིག་རྟེན་དུ་མུན་
པ་བྱུང་བ་ན་འཇིག་རྟེན་དུ་ཉི་མ་དང་། ཟླ་བ་དག་ཀྱང་འབྱུང་བར་འགྱུར་རོ། །འཇིག་རྟེན་དུ་རྒྱུ་སྐར་དག་དང་། མཚན་མོ་དང་། ཉིན་མོ་དག་དང་། སྐད་ཅིག་དང་། ཐང་ཅིག་དང་། ཡུད་ཅིག་དག་དང་། ཟླ་བ་དང་། ཟླ་བ་ཕྱེད་དང་། དུས་ཚིགས་དང་། ལོ་དག་ཀྱང་
འབྱུང་བར་འགྱུར་རོ། །དེ་དག་དེ་ཟ་ཞིང་ཟས་དེ་དག་དང་ལྡན་ལ་ཚེ་རིང་ཞིང་ཡུན་རིང་དུ་གནས་སོ། །དེ་དག་ལས་གང་ཟས་ཆེས་ཆུང་ངུ་ཟ་བ་དེ་ནི་ཁ་དོག་དང་ལྡན་པར་འགྱུར་ལ། གང་ཟས་ཆེས་ཆེར་ཟ་བ་དེ་ནི་ཁ་དོག་ངན་པར་འགྱུར་རོ། །དེ་ལྟར་ཟས་རྣམ་གཉིས་
ཉིད་ལ་ཁ་དོག་རྣམ་གཉིས་ཉིད་དུ་མངོན་ལ། ཁ་དོག་རྣམ་གཉིས་ཉིད་དུ་གྱུར་པ་ན་སེམས་ཅན་གྱིས་སེམས་ཅན་ལ། ཀྭའེ་སེམས་ཅན་ང་ནི་ཁ་དོག་དང་ལྡན་པ་ཡིན་ལ། ཁྱོད་ནི་ཁ་དོག་ངན་པ་ཡིན་ནོ་ཞེས་ཁྱད་དུ་གསོད་པར་བྱེད་དོ། །དེ་དག་ཁ་དོག་གིས་མངོན་
པའི་ང་རྒྱལ་ཅན་དུ་གྱུར་པ་ན་སྡིག་པ་ཅན་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་རྒྱུས་སའི་བཅུད་མེད་པར་གྱུར་ཏོ། །དགེ་སློང་དག་སེམས་ཅན་དེ་དག་སའི་བཅུད་མེད་པར་གྱུར་པ་ན་འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་
འདོན་པར་བྱེད་ཅིང་འདི་སྐད་ཅེས་ཀྱེ་མའོ་བཅུད། ཀྱེ་མའོ་བཅུད་ཅེས་ཀྱང་ཟེར་ཏེ། འདི་ལྟ་སྟེ་དཔེར་ན་དེང་སང་མི་དག་ཟས་ཞིམ་པ་བཟང་པོ་ཅུང་ཞིག་རྙེད་ནས་ཡི་གེ་དང་སྦྱར་བ་དང་ཚིག་རྙིང་པ་དེ་དག་ཉིད་ཀྱིས་རྗེས་སུ་ཐ་སྙད་འདོགས་ཤིང་འདི་སྐད་ཅེས་ཀྱེ་མའོ་བཅུད།

ཀྱེ་མའོ་བཅུད་ཅེས་ཀྱང་ཟེར་བ་དེ་བཞིན་དུ་སེམས་ཅན་དེ་དག་ཀྱང་སའི་བཅུད་མེད་པར་གྱུར་པ་ན་འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད་དེ། སྨྲེ་སྔགས་འདོན་པར་བྱེད་ཅིང་འདི་སྐད་ཅེས་ཀྱེ་མའོ་བཅུད། ཀྱེ་མའོ་བཅུད་ཅེས་ཟེར་ཡང་སྨྲས་པ་འདིའི་
དོན་ནི་འདིའོ། །སྨྲས་པ་འདིའི་དོན་ནི་འདིའོ་ཞེས་སྨྲས་པ་དེའི་དོན་མི་ཤེས་སོ། །དགེ་སློང་དག་སེམས་ཅན་དེ་དག་གི་སའི་བཅུད་མེད་པར་གྱུར་པ་ནས་ཞག་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ་བྱུང་བར་གྱུར་ཏེ། ཁ་དོག་
གིས་ནི་འདི་ལྟ་བུ་སྟེ། འདི་ལྟ་སྟེ་དཔེར་ན་དོང་ཀའི་མེ་ཏོག་ལྟ་བུའོ། །རོས་ནི་འདི་ལྟ་བུ་སྟེ། འདི་ལྟ་སྟེ། དཔེར་ན་སྦྲང་བུའི་སྦྲང་རྩི་མ་བསྐོལ་བ་ལྟ་བུའོ། །དེ་དག་དེ་ཟ་ཞིང་ཟས་དེ་དང་ལྡན་ལ་ཚེ་རིང་ཞིང་ཡུན་རིང་དུ་གནས་སོ། །དེ་དག་ལས་གང་ཟས་ཆེས་ཆུང་
ངུ་ཟ་བ་དེ་ནི་ཁ་དོག་དང་ལྡན་པར་འགྱུར་ལ། གང་ཟས་ཆེས་ཆེར་ཟ་བ་དེ་ནི་ཁ་དོག་ངན་པར་འགྱུར་རོ། །དེ་ལྟར་ཟས་རྣམ་གཉིས་ཉིད་ལ་བརྟེན་ནས་ཁ་དོག་རྣམ་གཉིས་ཉིད་དུ་མངོན་ལ་ཁ་དོག་རྣམ་གཉིས་ཉིད་དུ་གྱུར་པ་ན་སེམས་ཅན་གྱིས་སེམས་ཅན་ལ། ཀྭའེ་སེམས་ཅན་ང་ནི་ཁ་དོག་
དང་ལྡན་པ་ཡིན་ལ། ཁྱོད་ནི་ཁ་དོག་ངན་པ་ཡིན་ནོ། །ཞེས་ཁྱད་དུ་གསོད་པར་བྱེད་དོ། །དེ་དག་ཁ་དོག་གིས་མངོན་པའི་ང་རྒྱལ་ཅན་དུ་གྱུར་པ་ན་སྡིག་པ་ཅན་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་རྒྱུས་ས་ཞག་མེད་པར་གྱུར་ཏོ། །དགེ་སློང་དག་སེམས་ཅན་དེ་དག་ས་
ཞག་མེད་པར་གྱུར་པ་ན་འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང་འདི་སྐད་ཅེས་ཀྱེ་མའོ་ཀྱེ་མའོ་ཞེས་ཀྱང་ཟེར་ཏེ། འདི་ལྟ་སྟེ། དཔེར་ན་དེང་སང་མི་དག་སྡུག་བསྔལ་དང་། ཡིད་མི་བདེ་བ་འབའ་ཞིག་གིས་རེག་པ་ན་ཡི་གེ་དང་
སྦྱར་བ་དང་། ཚིག་རྙིང་པ་དེ་དག་ཉིད་ཀྱིས་རྗེས་སུ་ཐ་སྙད་འདོགས་ཤིང་། འདི་སྐད་ཅེས་ཀྱེ་མའོ་ཀྱེ་མའོ་ཞེས་ཀྱང་ཟེར་བ་དེ་བཞིན་དུ་སེམས་ཅན་དེ་དག་ཀྱང་ས་ཞག་མེད་པར་གྱུར་པ་ན་འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང་

འདི་སྐད་ཅེས་ཀྱེ་མའོ་ཀྱེ་མའོ་ཞེས་ཟེར་ཡང་སྨྲས་པ་འདིའི་དོན་ནི་འདིའོ། །སྨྲས་པ་འདིའི་དོན་ནི་འདིའོ་ཞེས་སྨྲས་པ་དེའི་དོན་མི་ཤེས་སོ། །དགེ་སློང་དག་སེམས་ཅན་དེ་དག་གིས་ཞག་མེད་པར་གྱུར་པ་ན་མྱུ་གུའི་ཚལ་ཁ་དོག་ཕུན་སུམ་ཚོགས་པ། དྲི་ཕུན་
སུམ་ཚོགས་པ། རོ་ཕུན་སུམ་ཚོགས་པ་བྱུང་བར་གྱུར་ཏེ། ཁ་དོག་གིས་ནི་འདི་ལྟ་བུ་སྟེ། འདི་ལྟ་སྟེ། དཔེར་ན་ཀ་དམ་བུ་ཀའི་མེ་ཏོག་ལྟ་བུའོ། །རོས་ནི་འདི་ལྟ་བུ་སྟེ། འདི་ལྟ་སྟེ། དཔེར་ན་སྦྲང་བུའི་སྦྲང་རྩི་མ་བསྐོལ་བ་ལྟ་བུའོ། །དེ་དག་དེ་ཟ་ཞིང་ཟས་དེ་དང་ལྡན་ལ།
ཚེ་རིང་ཞིང་ཡུན་རིང་དུ་གནས་སོ། །དེ་དག་ལས་གང་ཟས་ཆེས་ཆུང་ངུ་ཟ་བ་དེ་ནི་ཁ་དོག་དང་ལྡན་པར་འགྱུར་ལ། གང་ཟས་ཆེས་ཆེར་ཟ་བ་དེ་ནི་ཁ་དོག་ངན་པར་འགྱུར་རོ། །དེ་ལྟར་ཟས་རྣམ་གཉིས་ཉིད་ལ་བརྟེན་ནས་ཁ་དོག་རྣམ་གཉིས་ཉིད་དུ་མངོན་ལ། ཁ་དོག་རྣམ་གཉིས་
ཉིད་དུ་གྱུར་པ་ན། སེམས་ཅན་གྱིས་སེམས་ཅན་ལ་ཀྭའེ་སེམས་ཅན་ང་ནི་ཁ་དོག་དང་ལྡན་པ་ཡིན་ལ། ཁྱོད་ནི་ཁ་དོག་ངན་པ་ཡིན་ནོ་ཞེས་ཁྱད་དུ་གསོད་པར་བྱེད་དོ། །དེ་དག་ཁ་དོག་གིས་མངོན་པའི་ང་རྒྱལ་ཅན་དུ་གྱུར་པ་ན། སྡིག་པ་ཅན་མི་དགེ་བའི་ཆོས་དེ་དག་ཉིད་
ཡང་དག་པར་བླངས་པའི་རྒྱུས་མྱུ་གུའི་ཚལ་མེད་པར་གྱུར་ཏོ། །དགེ་སློང་དག་སེམས་ཅན་དེ་དག་མྱུ་གུའི་ཚལ་མེད་པར་གྱུར་པ་ན་འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང་འདི་སྐད་ཅེས་ཕར་སོང་ཕར་སོང་ཞེས་ཀྱང་ཟེར་ཏེ།
འདི་ལྟ་སྟེ། དཔེར་ན་དེང་སང་མི་དག་སྨད་པ་རྣོན་པོ་འགའ་ཞིག་གིས་སྨད་པ་ན་ཡི་གེ་དང་སྦྱར་བ་དང་། ཚིག་རྙིང་པ་དེ་དག་ཉིད་ཀྱིས་རྗེས་སུ་ཐ་སྙད་འདོགས་ཤིང་འདི་སྐད་ཅེས་ཕར་སོང་ཕར་སོང་ཞེས་ཀྱང་ཟེར་བ་དེ་བཞིན་དུ། སེམས་ཅན་དེ་དག་ཀྱང་མྱུ་གུའི་ཚལ་མེད་པར་
གྱུར་པ་ན་འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང་། འདི་སྐད་ཅེས་ཕར་སོང་ཕར་སོང་ཞེས་ཟེར་ཡང་སྨྲས་པ་འདིའི་དོན་ནི་འདིའོ། །སྨྲས་པ་འདིའི་དོན་ནི་འདིའོ། །ཞེས་སྨྲས་པ་དེའི་དོན་ནི་མི་ཤེས་སོ། །དགེ་སློང་

དག་སེམས་ཅན་དེ་དག་གི་མྱུ་གུའི་ཚལ་མེད་པར་གྱུར་པ་ན་མ་རྨོས་མ་བཏབ་པའི་འབྲས་སཱ་ལུའི་འབྲུ་སོ་བ་མེད་པ། སྦུན་པ་མེད་པ། དག་པ་གཙང་བ། སོར་བཞི་པ། ཀུན་ནས་མ་དཀྲིས་པ། ནུབ་བརྔས་ན་ནང་རྒྱལ་ཞིང་ཕྱིར་སྐྱེ་ལ། ནང་བརྔས་ན་ནུབ་རྒྱལ་ཞིང་ཕྱིར་
སྐྱེ་བ། བརྔས་སོ་ཅོག་ཕྱིར་སྐྱེ་བ། བརྔས་པར་ཡང་མི་མངོན་པར་བྱུང་བར་གྱུར་ཏེ། དེ་དག་དེ་ཟ་ཞིང་ཟས་དེ་དང་ལྡན་ལ་ཚེ་རིང་ཞིང་ཡུན་རིང་དུ་གནས་སོ། །གང་གི་ཕྱིར་སེམས་ཅན་དེ་དག་གིས་མ་རྨོས་མ་བཏབ་པའི་འབྲས་སཱ་ལུའི་འབྲུ་ཁམ་གྱིས་ཟས་ཀྱི་རྩོམ་པས་ཟོས་
པར་གྱུར་པ་དེའི་ཕྱིར་དེ་དག་ལ་དབང་པོ་ཐ་དད་པ་བྱུང་བར་གྱུར་ཏེ། ཁ་ཅིག་ནི་ཕོའི་དབང་པོ་དང་ལྡན། ཁ་ཅིག་ནི་མོའི་དབང་པོ་དང་ལྡན་ནོ། །དེ་ན་གང་དག་ཕོའི་དབང་པོ་དང་ལྡན་པ་དང་། གང་དག་མོའི་དབང་པོ་དང་ལྡན་པ་དེ་དག་གཅིག་ལ་གཅིག་མིག་གིས་མིག་ལ་
བརྟེན་ཏེ་བལྟ་བར་བྱེད་དོ། །ཇི་ལྟ་ཇི་ལྟར་གཅིག་ལ་གཅིག་མིག་གིས་མིག་ལ་བརྟེན་ཏེ་བལྟ་བར་བྱེད་པ་དེ་ལྟ་དེ་ལྟར་ཀུན་ཏུ་ཆགས་སོ། །ཇི་ལྟ་ཇི་ལྟར་ཀུན་ཏུ་ཆགས་པ་དེ་ལྟ་དེ་ལྟར་དྲལ་ཏོ། །ཇི་ལྟ་ཇི་ལྟར་དྲལ་བ་དེ་ལྟ་དེ་ལྟར་ལོག་པར་ཞུགས་སོ། །སེམས་ཅན་གཞན་
དག་གིས་ཀྱང་སེམས་ཅན་སེམས་ཅན་ལ་ལོག་པར་ཞུགས་པ་མཐོང་ངོ་། །མཐོང་ནས་སས་ཀྱང་འཐོར་བར་བྱེད། བོང་བ་དང་། གསེག་མ་དང་། གྱོ་མོ་དང་། གྱོ་དུམ་དག་ཀྱང་འཕེན་པར་བྱེད་ཅིང་། འདི་སྐད་ཅེས་སེམས་ཅན་ངན་པ་གྲོང་པ་བྱ་བ་མ་ཡིན་པ་བྱེད་པ།
སེམས་ཅན་ངན་པ་གྲོང་པ་བྱ་བ་མ་ཡིན་པ་བྱེད་པ་ཀྭའེ་སེམས་ཅན་ཁྱོད་ཅིའི་ཕྱིར་སེམས་ཅན་སུན་པར་བྱེད་ཅེས་ཀྱང་ཟེར་ཏེ། འདི་ལྟ་སྟེ། དཔེར་ན་དེང་སང་སེམས་ཅན་དག་བག་སར་བག་མར་ལེན་པ་ན་ཕྱེ་མས་ཀྱང་འཐོར་བར་བྱེད། དྲི་དང་། མེ་ཏོག་དང་། འབྲས་
ཡོས་དག་གིས་ཀྱང་འཐོར་བར་བྱེད་ཅིང་། འདི་སྐད་ཅེས་སྲུ་བདེ་བར་གྱུར་ཅིག་ཅེས་ཀྱང་ཟེར་བ་དེ་བཞིན་དུ། སེམས་ཅན་དེ་དག་གིས་ཀྱང་སེམས་ཅན་སེམས་ཅན་ལ་ལོག་པར་ཞུགས་པ་མཐོང་ནས་སས་ཀྱང་འཐོར་བར་བྱེད། བོང་བ་དང་། གསེག་མ་དང་། གྱོ་མོ་དང་།

གྱོ་དུམ་དག་ཀྱང་འཕེན་པར་བྱེད་ཅིང་། འདི་སྐད་ཅེས་སེམས་ཅན་ངན་པ་གྲོང་པ་བྱ་བ་མ་ཡིན་པ་བྱེད་པ། སེམས་ཅན་ངན་པ་གྲོང་པ་བྱ་བ་མ་ཡིན་པ་བྱེད་པ། ཀྭའེ་སེམས་ཅན་ཁྱོད་ཅིའི་ཕྱིར་སེམས་ཅན་སུན་པར་བྱེད་ཅེས་ཀྱང་ཟེར་རོ། །དགེ་སློང་དག་
དེ་ལྟར་ན་སྔོན་ཆོས་མ་ཡིན་པར་གྲགས་པ་གང་ཡིན་པ་དེ་ནི་དེང་སང་ཆོས་སུ་གྲགས་ལ། སྔོན་འདུལ་བ་མ་ཡིན་པར་གྲགས་པ་གང་ཡིན་པ་དེ་ནི་དེང་སང་འདུལ་བར་གྲགས། སྔོན་སྨད་པར་བྱ་བ་གང་ཡིན་པ་དེ་ནི་དེང་སང་བསྟོད་པར་བྱ་བ་ཡིན་ནོ། །དེ་ཉི་མ་གཅིག་ཙམ་སྤོང་
བར་བྱེད། ཉི་མ་གཉིས་སམ། གསུམ་མམ། བདུན་ཙམ་སྤོང་བར་བྱེད་དོ། །གང་གི་ཕྱིར་སེམས་ཅན་དེ་དག་སྡིག་པ་ཅན་དམ་པ་མ་ཡིན་པའི་ཆོས་དེ་ལ་ཤིན་ཏུ་ལྟུང་བར་བྱེད་པས་བརྟུལ་ཞུགས་ལ་ཞུགས་པ་དེའི་ཕྱིར་དེ་དག་ཁྱིམ་བརྩིག་པ་ལ་ཞུགས་ཏེ། བདག་ཅག་གིས་
འདིར་བྱ་བ་མ་ཡིན་པ་བྱའོ། །བདག་ཅག་གིས་འདིར་བྱ་བ་མ་ཡིན་པ་བྱའོ་ཞེས་ཟེར་བ་ལས་ཁྱིམ་ཁྱིམ་ཞེས་བྱ་བའི་མིང་བྱུང་ངོ་། །དགེ་སློང་དག་འདི་ནི་ཁྱིམ་གྱི་ལས་ཀྱི་མཐའ་དག་འཇིག་རྟེན་དུ་འབྱུང་བའི་དང་པོ་རྩོམ་པ་ཡིན་ཏེ། དེ་ཡང་ཆོས་ཀྱིས་ཡིན་གྱིས་ཆོས་མ་ཡིན་པས་
ནི་མ་ཡིན་ནོ། །དེ་ལ་ཆོས་ནི་འདི་ཡིན་ཏེ། རྒྱལ་བ་དབང་པོ་རྣམས་ཀྱི་ཆོས་མཆོག་ཡིན་ནོ། །དེ་དག་དགོངས་ཀར་ཡང་དགོངས་ཀ་ཟ་འདོད་པས་སཱ་ལུའི་དོན་དུ་འདོང་བར་བྱེད་ནང་པར་ཡང་ནང་པར་ཟ་འདོད་པས་སཱ་ལུའི་དོན་དུ་འདོང་བར་བྱེད་དོ། །དེ་ནས་སེམས་ཅན་ལེ་ལོའི་
རང་བཞིན་ཅན་ཞིག་གིས་དགོངས་ཀ་དང་ནང་པར་གྱི་སཱ་ལུ་གཅིག་ཅར་བླངས་པར་གྱུར་ཏོ། །སེམས་ཅན་ཞིག་གིས་སེམས་ཅན་དེ་ལ་སྨྲས་པ། ཀྭའེ་སེམས་ཅན་ཚུར་ཤོག་སཱ་ལུའི་ཕྱིར་འདོང་ངོ་། །སེམས་ཅན་དེས་སྨྲས་པ། ཀྭའེ་སེམས་ཅན་ཁྱོད་རང་གི་སཱ་ལུའི་
ཕྱིར་སོམས་ཤིག །བདག་གིས་དགོངས་ཀ་དང་། ནང་པར་གྱི་སཱ་ལུ་གཅིག་ཅར་བླངས་ཟིན་ཏོ། །དེ་ནས་སེམས་ཅན་དེ་འདི་སྙམ་དུ་ཀྱེ་མ་དེ་ནི་ལེགས་སོ། །ཀྱེ་མ་དེ་ནི་བཟང་ངོ་། །བདག་གིས་ཀྱང་ཉི་མ་གཉིས་ཀྱི་དང་། ཉི་མ་གསུམ་གྱི་དང་། ཉི་མ་བདུན་གྱི་བར་གྱི་སཱ་

ལུ་བླངས་པར་བྱའོ་སྙམ་ནས། དེས་ཉི་མ་གཉིས་ཀྱི་དང་། ཉི་མ་གསུམ་གྱི་དང་། ཉི་མ་བདུན་གྱི་བར་གྱི་སཱ་ལུ་བླངས་པར་གྱུར་ཏོ། །དེ་ནས་སེམས་ཅན་ཞིག་གིས་སེམས་ཅན་དེ་ལ་འདི་སྐད་ཅེས་སྨྲས་སོ། །ཀྭའེ་སེམས་ཅན་ཚུར་ཤོག་སཱ་ལུའི་ཕྱིར་འདོང་ངོ་། །སེམས་
ཅན་དེས་སྨྲས་པ། ཀྭའེ་སེམས་ཅན་ཁྱོད་རང་གི་སཱ་ལུའི་ཕྱིར་སོམས་ཤིག །བདག་གིས་ཉི་མ་གཉིས་ཀྱི་དང་། ཉི་མ་གསུམ་གྱི་དང་། ཉི་མ་བདུན་གྱི་སཱ་ལུ་བླངས་ཟིན་ཏོ། །དེ་ནས་སེམས་ཅན་དེ་འདི་སྙམ་དུ། ཀྱེ་མ་དེ་ནི་ལེགས་སོ། །ཀྱེ་མ་དེ་ནི་བཟང་ངོ་། །
བདག་གིས་ཀྱང་ཟླ་བ་ཕྱེད་ཀྱི་དང་། ཟླ་བ་གཅིག་གི་སཱ་ལུ་བླངས་པར་བྱའོ་སྙམ་ནས། དེས་ཟླ་བ་ཕྱེད་ཀྱི་དང་། ཟླ་བ་གཅིག་གི་སཱ་ལུ་བླངས་པར་གྱུར་ཏོ། །གང་གི་ཕྱིར་སེམས་ཅན་དེ་དག་གིས་མ་རྨོས་མ་བཏབ་པའི་འབྲས་སཱ་ལུའི་འབྲུ་སོགས་འཇོག་གི་ཡོངས་སུ་སྤྱོད་པས་ཟོས་
པར་གྱུར་པ་དེའི་ཕྱིར་སཱ་ལུ་དེ་ལ་སོ་བ་དང་། སྦུན་པ་དང་། འབྲས་ཀུན་ནས་དཀྲིས་པར་གྱུར་ཅིང་བརྔས་སོ་ཅོག་ཀྱང་ཕྱིར་མི་སྐྱེ་ལ། བརྔས་པར་ཡང་མངོན་ཞིང་། སཱ་ལུ་བྱིངས་དང་བྱིངས་མ་ཡིན་པ་དག་ན་རྣམ་པར་གནས་སོ། །དེ་ནས་སེམས་ཅན་དེ་དག་འདུས་ཤིང་ལྷགས་
ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང་ཤེས་ལྡན་དག་བདག་ཅག་སྔོན་གཟུགས་ཅན་ཡིད་ལས་བྱུང་བ་མ་ཚང་བ་མེད་པ། དབང་པོ་མ་ཉམས་པ། ཡན་ལག་དང་ཉིང་ལག་ཐམས་ཅད་དང་ལྡན་པ། བཟང་བ། ཁ་དོག་དང་ལྡན་པ། རང་ལས་འོད་
འབྱུང་བ། ནམ་མཁའ་ལ་འགྲོ་བ། དགའ་བ་ཟ་བ། དགའ་བའི་ཟས་དང་ལྡན་པ། ཚེ་རིང་ཞིང་ཡུན་རིང་དུ་གནས་པ་ན་བདག་ཅག་ལ་སའི་བཅུད་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ་བྱུང་བར་གྱུར་ནས། གང་གི་ཕྱིར་བདག་
ཅག་གིས་སའི་བཅུད་ཁམ་གྱི་ཟས་ཀྱི་རྩོམ་པས་ཟོས་པར་གྱུར་པ་དེའི་ཕྱིར་བདག་ཅག་གི་ལུས་ལ་སྲ་བ་ཉིད་དང་། ལྕི་བ་ཉིད་བྱུང་ཞིང་བདག་ཅག་གི་མདོག་གསལ་བ་བཟང་པོ་གང་ཡིན་པ་དེ་ཡང་མེད་པར་གྱུར། འཇིག་རྟེན་དུ་མུན་པ་ཡང་བྱུང་བར་གྱུར་ཏོ། །བདག་ཅག་

དེ་ཟ་ཞིང་ཟས་དེ་དང་ལྡན་ལ་ཚེ་རིང་ཞིང་ཡུན་རིང་དུ་གནས་པ་ལ་བདག་ཅག་ལས་གང་ཟས་ཆེས་ཆུང་ངུ་ཟ་བ་དེ་ནི་ཁ་དོག་དང་ལྡན་པར་གྱུར་ལ། གང་ཟས་ཆེས་ཆེར་ཟ་བ་དེ་ནི་ཁ་དོག་ངན་པར་གྱུར་ཏོ། །དེ་ལྟར་ཟས་རྣམ་གཉིས་ཉིད་ལ་བརྟེན་ནས་ཁ་དོག་
རྣམ་གཉིས་ཉིད་དུ་མངོན་ལ། ཁ་དོག་རྣམ་གཉིས་ཉིད་དུ་གྱུར་པ་ན་སེམས་ཅན་གྱིས་སེམས་ཅན་ལ་ཀྭའེ་སེམས་ཅན་ང་ནི་ཁ་དོག་དང་ལྡན་པ་ཡིན་ལ། ཁྱོད་ནི་ཁ་དོག་ངན་པ་ཡིན་ནོ་ཞེས་ཁྱད་དུ་གསོད་པར་བྱེད་དོ། །བདག་ཅག་ཁ་དོག་གིས་མངོན་པའི་ང་རྒྱལ་ཅན་དུ་གྱུར་པ་
ན་སྡིག་པ་ཅན་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་རྒྱུས་སའི་བཅུད་མེད་པར་གྱུར་ཏོ། །སའི་བཅུད་མེད་པར་གྱུར་པ་ནས་ཞག་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ་བྱུང་བར་གྱུར་ཏེ། བདག་ཅག་དེ་ཟ་ཞིང་ཟས་
དེ་དང་ལྡན་ལ་ཚེ་རིང་ཞིང་ཡུན་རིང་དུ་གནས་སོ། །བདག་ཅག་ལས་གང་ཟས་ཆེས་ཆུང་ངུ་ཟ་བ་དེ་ནི་ཁ་དོག་དང་ལྡན་པར་གྱུར་ལ། གང་ཟས་ཆེས་ཆེར་ཟ་བ་དེ་ནི་ཁ་དོག་ངན་པར་གྱུར་ཏེ། དེ་ལྟར་ཟས་རྣམ་གཉིས་ཉིད་ལ་བརྟེན་ནས་ཁ་དོག་རྣམ་གཉིས་ཉིད་དུ་མངོན་ལ། ཁ་
དོག་རྣམ་གཉིས་ཉིད་དུ་གྱུར་པ་ན་སེམས་ཅན་གྱིས་སེམས་ཅན་ལ། ཀྭའེ་སེམས་ཅན་ང་ནི་ཁ་དོག་དང་ལྡན་པ་ཡིན་ལ། ཁྱོད་ནི་ཁ་དོག་ངན་པ་ཡིན་ནོ་ཞེས་ཁྱད་དུ་གསོད་པར་བྱེད་དོ། །བདག་ཅག་ཁ་དོག་གིས་མངོན་པའི་ང་རྒྱལ་ཅན་དུ་གྱུར་པ་ན་སྡིག་པ་ཅན་མི་དགེ་བའི་
ཆོས་དེ་དག་ཉིད་ཡང་དག་པར་བླངས་པའི་རྒྱུས་ས་ཞག་མེད་པར་གྱུར་ཏོ། །ས་ཞག་མེད་པར་གྱུར་པ་ན་མྱུ་གུའི་ཚལ་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ་བྱུང་བར་གྱུར་ཏེ། བདག་ཅག་དེ་ཟ་ཞིང་ཟས་དེ་དང་ལྡན་ལ་ཚེ་རིང་ཞིང་
ཡུན་རིང་དུ་གནས་སོ། །བདག་ཅག་ལས་གང་ཟས་ཆེས་ཆུང་ངུ་ཟ་བ་དེ་ནི་ཁ་དོག་དང་ལྡན་པར་གྱུར་ལ། གང་ཟས་ཆེས་ཆེར་ཟ་བ་དེ་ནི་ཁ་དོག་ངན་པར་གྱུར་ཏོ། །དེ་ལྟར་ཟས་རྣམ་གཉིས་ཉིད་ལ་བརྟེན་ནས་ཁ་དོག་རྣམ་གཉིས་ཉིད་དུ་མངོན་ལ། ཁ་དོག་རྣམ་གཉིས་ཉིད་

དུ་གྱུར་པ་ན་སེམས་ཅན་གྱིས་སེམས་ཅན་ལ་ཀྭའེ་སེམས་ཅན་ང་ནི་ཁ་དོག་དང་ལྡན་པ་ཡིན་ལ། ཁྱོད་ན་ཁ་དོག་ངན་པ་ཡིན་ནོ་ཞེས་ཁྱད་དུ་གསོད་པར་བྱེད་དོ། །བདག་ཅག་ཁ་དོག་གིས་མངོན་པའི་ང་རྒྱལ་ཅན་དུ་གྱུར་པ་ན་སྡིག་པ་ཅན་མི་དགེ་བའི་ཆོས་དེ་དག་ཉིད་ཡང་
དག་པར་བླངས་པའི་རྒྱུས་མྱུ་གུའི་ཚལ་མེད་པར་གྱུར་ཏེ། མྱུ་གུའི་ཚལ་མེད་པར་གྱུར་པ་ན་མ་རྨོས་མ་བཏབ་པའི་འབྲས་སཱ་ལུའི་འབྲུ་སོ་བ་མེད་པ། སྦུན་པ་མེད་པ། དག་པ་གཙང་བ་སོར་བཞི་པ་ཀུན་ནས་མ་དཀྲིས་པ་ནུབ་བརྔས་ན་ནང་རྒྱལ་ཞིང་ཕྱིར་སྐྱེ་ལ། ནང་བརྔས་
ན་ནུབ་རྒྱལ་ཞིང་ཕྱིར་སྐྱེ་བ། བརྔས་སོ་ཅོག་ཕྱིར་སྐྱེ་བ། བརྔས་པར་ཡང་མི་མངོན་པ་བྱུང་བར་གྱུར་ཏེ། བདག་ཅག་དེ་ཟ་ཞིང་ཟས་དེ་དང་ལྡན་ལ་ཚེ་རིང་ཞིང་ཡུན་རིང་དུ་གནས་སོ། །གང་གི་ཕྱིར་བདག་ཅག་གིས་མ་རྨོས་མ་བཏབ་པའི་འབྲས་སཱ་ལུའི་འབྲུ་སོགས་
འཇོག་གི་ཡོངས་སུ་སྤྱོད་པས་ཟོས་པར་གྱུར་པ་དེའི་ཕྱིར་བདག་ཅག་ལ་འབྲས་སཱ་ལུ་དེ་སོ་བ་དང་། སྦུན་པ་དང་། འབྲས་ཀུན་ནས་དཀྲིས་པར་གྱུར་ཅིང་བརྔས་སོ་ཅོག་ཀྱང་ཕྱིར་མི་སྐྱེ་ལ། བརྔས་པར་ཡང་མངོན་ཞིང་སཱ་ལུ་བྱིངས་དང་བྱིངས་མ་ཡིན་པ་དག་ན་རྣམ་པར་གནས་པར་གྱུར་
གྱིས་བདག་ཅག་འདུས་ཤིང་ལྷགས་ནས་མཚམས་གཅད་པར་བྱ་ཞིང་འདི་ནི་ཁྱོད་ཀྱིའོ། །འདི་ནི་ངའི་འོ་ཞེས་མུ་ཐུག་རྣམ་པར་གཞག་པར་བྱ་བ་སྙམ་ཞེས་དེ་དག་འདུས་ཤིང་ལྷགས་ནས། མཚམས་གཅོད་པར་བྱེད་ཅིང་འདི་ནི་ཁྱོད་ཀྱིའོ། །འདི་ནི་ངའི་འོ་ཞེས་མུ་ཐུག་
རྣམ་པར་འཇོག་པར་བྱེད་དོ། །དགེ་སློང་དག་འདི་ནི་མུ་ཐུག་གི་ལས་ཀྱི་མཐའ་དག་འཇིག་རྟེན་དུ་འབྱུང་བའི་དང་པོ་རྩོམ་པ་ཡིན་ཏེ། དེ་ཡང་ཆོས་ཀྱིས་ཡིན་གྱིས་ཆོས་མ་ཡིན་པས་ནི་མ་ཡིན་ནོ། །དེ་ལ་ཆོས་ནི་འདི་ཡིན་ཏེ། རྒྱལ་བ་དབང་པོ་རྣམས་ཀྱི་ཆོས་མཆོག་ཡིན་ནོ། །དེ་
ནས་སེམས་ཅན་གཞན་ཞིག་གིས་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་བླངས་སོ། །སེམས་ཅན་གཞན་ཞིག་གིས་སེམས་ཅན་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་ལེན་པ་དེ་མཐོང་ངོ་། །མཐོང་ནས་ཀྱང་སེམས་ཅན་དེ་ལ་འདི་སྐད་ཅེས་སྨྲས་

སོ། །ཀྭའེ་སེམས་ཅན་ཁྱོད་ཅིའི་ཕྱིར་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་ལེན། ཀྭའེ་སེམས་ཅན་ཁྱོད་སོང་ལ་ཕྱིན་ཆད་དེ་ལྟར་མ་བྱེད་ཅིག །སེམས་ཅན་དེས་ལན་གཉིས་ལན་གསུམ་དུ་ཡང་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་
མ་བྱིན་པར་བླངས་སོ། །སེམས་ཅན་གཞན་དེས་ཀྱང་སེམས་ཅན་ལན་གཉིས་ལན་གསུམ་དུ་ཡང་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་ལེན་པ་དེ་མཐོང་ངོ་། །མཐོང་ནས་ཀྱང་ཡང་སེམས་ཅན་དེ་ལ་འདི་སྐད་ཅེས་སྨྲས་སོ། །ཀྭའེ་སེམས་ཅན་ཁྱོད་ཅིའི་ཕྱིར་
རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་ལེན་ཅེས་སེམས་ཅན་དེས་སེམས་ཅན་དེ་འདྲེན་པར་བྱེད། ཁྲིད་པར་བྱེད་ཅིང་འཁོར་གྱི་ནང་དུ་ཡང་ཤེས་ལྡན་དག་སེམས་ཅན་འདི་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་ལེན་ཏོ་ཞེས་སྨོད་པའི་བར་དུ་བྱེད་དོ། །དེ་
ནས་སེམས་ཅན་དེ་དག་གིས་སེམས་ཅན་དེ་ལ་འདི་སྐད་ཅེས་སྨྲས་སོ། །ཀྭའེ་སེམས་ཅན་ཁྱོད་ཅིའི་ཕྱིར་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་ལེན། ཀྭའེ་སེམས་ཅན་ཁྱོད་སོང་ལ་ཕྱིན་ཆད་དེ་ལྟར་མ་བྱེད་ཅིག །དེ་ནས་སེམས་ཅན་མ་བྱིན་པར་ལེན་པ་
དེས་སེམས་ཅན་དེ་དག་ལ་འདི་སྐད་ཅེས་སྨྲས་སོ། །ཤེས་ལྡན་དག་སེམས་ཅན་འདིས་ཁོ་བོ་ལ་སཱ་ལུའི་ཕྱིར་སྨྲས་ཏེ་འདྲེན་པར་བྱེད། ཁྲིད་པར་བྱེད་ཅིང་འཁོར་གྱི་ནང་དུ་སྨོད་པའི་བར་དུ་བྱེད་དོ། །དེ་ནས་སེམས་ཅན་དེ་དག་གིས་སེམས་ཅན་སཱ་ལུའི་ཕྱིར་སྨྲ་བ་དེ་ལ་འདི་སྐད་
ཅེས་སྨྲས་སོ། །ཀྭའེ་སེམས་ཅན་ཁྱོད་ཅིའི་ཕྱིར་སཱ་ལུའི་ཕྱིར་སེམས་ཅན་ལ་སྨྲས་ཤིང་འདྲེན་པར་བྱེད། ཁྲིད་པར་བྱེད་ལ་འཁོར་གྱི་ནང་དུ་སྨད་པའི་བར་དུ་བྱེད། ཀྭའེ་སེམས་ཅན་ཁྱོད་སོང་ལ་ཕྱིན་ཆད་དེ་ལྟར་མ་བྱེད་ཅིག །དེ་ནས་སེམས་ཅན་དེ་དག་འདི་སྙམ་དུ་ཤེས་ལྡན་
དག་སཱ་ལུའི་ཕྱིར་འདྲེན་པར་བྱེད། ཁྲིད་པར་བྱེད་པ་ནས་འཁོར་གྱི་ནང་དུ་སྨོད་པར་བྱེད་པའི་བར་དག་སྣང་གིས། བདག་ཅག་འདུས་ཤིང་ལྷགས་ནས་བདག་ཅག་གི་ནང་ནས་སེམས་ཅན་གང་ཆེས་གཟུགས་བཟང་བ། ཆེས་བལྟ་ན་སྡུག་པ། ཆེས་མཛེས་པ། ཆེས་ལུས་ཆེ་

བ་དེ་དག་བདག་ཅག་གིས་ཞིང་རྣམས་ཀྱི་བདག་པོར་བསྐོས་ནས། བདག་ཅག་ལས་གང་ཆད་པས་གཅད་པར་བྱ་བ་ཡང་ཆད་པས་གཅོད་པར་འགྱུར་ཞིང་། ཕན་གདགས་པར་བྱ་བ་ལ་ཡང་ཕན་འདོགས་པར་འགྱུར་ལ། བདག་ཅག་གི་ཞིང་དག་ལས་ཅི་འབྱུང་བར་འགྱུར་
བ་དེ་ལས་ཆོས་དང་ལྡན་པའི་ཐོག་ཤས་ཀྱང་དབུལ་བར་བྱའོ་སྙམ་ནས་སེམས་ཅན་དེ་དག་འདུས་ཤིང་ལྷགས་ནས་དེ་དག་གི་ནང་ནས་སེམས་ཅན་གང་ཆེས་གཟུགས་བཟང་བ། ཆེས་བལྟ་ན་སྡུག་པ། ཆེས་མཛེས་པ། ཆེས་ལུས་ཆེ་བ་དེ་ཞིང་རྣམས་ཀྱི་བདག་པོར་བསྐོ་ཞིང་འདི་
སྐད་ཅེས། ཀྱེ་སེམས་ཅན་ཁྱོད་ཚུར་སྤྱོན། ཁྱོད་ཀྱིས་བདག་ཅག་ལས་གང་ཆད་པས་གཅད་པར་བྱ་བ་ཡང་ཆད་པས་ཆོད་ཅིག་ཕན་གདགས་པར་བྱ་བ་ལ་ཡང་ཕན་ཐོགས་ཤིག །བདག་ཅག་གི་ཞིང་དག་ལས་ཅི་འབྱུང་བ་དེ་ལས་ཀྱང་བདག་ཅག་གིས་ཁྱོད་ལ་ཆོས་དང་
མཐུན་པའི་ཐོག་ཤས་དབུལ་ལོ་ཞེས་སྨྲས་ཏེ། དེ་ལྟར་སྐྱེ་བོ་མང་པོས་བཀུར་ཅིང་སྐྱེ་བོ་མང་པོས་བཀུར་བས་དེ་མང་པོས་བཀུར་བ་མང་པོས་བཀུར་བ་ཞེས་བྱ་བའི་མིང་དུ་གྱུར་ཏོ། །ཞིང་རྣམས་ཀྱི་བདག་པོ་དང་། སྨས་པ་ལས་སྐྱོང་བར་བྱེད་པས་རྒྱལ་རིགས་རྒྱལ་རིགས་
ཞེས་བྱ་བའི་མིང་དུ་གྱུར་ཏོ། །ཚུལ་ཁྲིམས་ཀྱི་སྤྱོད་པ་ཀུན་ཏུ་སྤྱོད་པ་དང་། ཤེས་རབ་ཀྱི་སྤྱོད་པ་ཀུན་ཏུ་སྤྱོད་པས་ཆོས་ཀྱིས་སྐྱེ་དགུ་དགའ་བར་བྱེད་པས་རྒྱལ་པོ་རྒྱལ་པོ་ཞེས་བྱ་བའི་མིང་དུ་གྱུར་ཏོ། །དགེ་སློང་དག་འདི་ནི་རྒྱལ་རིགས་ཀྱི་དཀྱིལ་འཁོར་འཇིག་རྟེན་དུ་འབྱུང་
བའི་དང་པོ་རྩོམ་པ་ཡིན་ཏེ། དེ་ཡང་ཆོས་ཀྱིས་ཡིན་གྱི་ཆོས་མ་ཡིན་པས་ནི་མ་ཡིན་ནོ། །དེ་ལ་ཆོས་ནི་འདི་ཡིན་ཏེ། རྒྱལ་བ་དབང་པོ་རྣམས་ཀྱི་ཆོས་མཆོག་ཡིན་ནོ། །དགེ་སློང་དག་བྲམ་ཟེའི་དཀྱིལ་འཁོར་འཇིག་རྟེན་དུ་འབྱུང་བའི་དང་པོ་རྩོམ་པ་གང་ཞེ་ན། དགེ་
སློང་དག་དེ་ནས་སེམས་ཅན་ཁ་ཅིག་གིས་ཡོངས་སུ་འཛིན་པ་ནི་ནད་དོ། །ཡོངས་སུ་འཛིན་པ་ནི་འབྲས་སོ། །ཡོངས་སུ་འཛིན་པ་ནི་ཟུག་རྔུའོ། །ཡོངས་སུ་འཛིན་པ་ནི་སྡུག་བསྔལ་གྱི་རྩ་བའོ་ཞེས་བྱ་བར་རིག་ནས། གྲོང་ནས་དགོན་པའི་གནས་སུ་དོང་སྟེ། ཡལ་

ག་དང་། ལོ་མའི་སྤྱིལ་པོ་དག་བྱས་ནས་གནས་བཅས་ཏེ་འཁོད་དོ། །དེ་དག་དགོངས་ཀར་ཡང་དགོངས་ཀའི་ཟས་འདོད་པས་གྲོང་དུ་བསོད་སྙོམས་ལ་ཞུགས་སོ། །ནང་པར་ཡང་ནང་པར་གྱི་ཟས་འདོད་པས་གྲོང་དུ་བསོད་སྙོམས་ལ་ཞུགས་སོ། །དེ་
ན་སེམས་ཅན་གཞན་དག་འདི་སྙམ་དུ། ཤེས་ལྡན་འདི་དག་གིས་འདི་ལྟར་ཡོངས་སུ་འཛིན་པ་ནི་ནད་དོ། །ཡོངས་སུ་འཛིན་པ་ནི་འབྲས་སོ། །ཡོངས་སུ་འཛིན་པ་ནི་ཟུག་རྔུའོ། །ཡོངས་སུ་འཛིན་པ་ནི་སྡུག་བསྔལ་གྱི་རྩ་བའོ། །ཞེས་བྱ་བར་རིག་ནས་
གྲོང་ནས་དགོན་པའི་གནས་སུ་དོང་སྟེ། ཡལ་ག་དང་ལོ་མའི་སྤྱིལ་པོ་དག་བྱས་ནས་གནས་བཅས་ཏེ་འཁོད་ཅིང་། དགོངས་ཀར་ཡང་དགོངས་ཀའི་ཟས་འདོད་པས་གྲོང་དུ་བསོད་སྙོམས་ལ་འཇུག་པར་བྱེད། ནང་པར་ཡང་ནང་པར་གྱི་ཟས་འདོད་པས་གྲོང་དུ་བསོད་
སྙོམས་ལ་འཇུག་པར་བྱེད་པ་ནི་དཀའ་བ་བྱེད་པ་ཡིན་ནོ་སྙམ་ནས། དེ་དག་ལ་ཏེ་པོར་སྦྱིན་པ་དང་བྱ་བར་སེམས་སོ། །དེ་ནས་སེམས་ཅན་ཁ་ཅིག་བསམ་གཏན་དེ་དང་། རབ་ཏུ་དབེན་པ་དེ་མངོན་པར་རྫོགས་པར་མ་རྟོགས་པ་ན་མཐའ་གཅིག་ཏུ་དོང་སྟེ། ཡལ་ག་དང་ལོ་
མའི་སྤྱིལ་པོ་དག་བྱས་ནས་འདིར་བདག་ཅག་གིས་གསང་སྔགས་ཀྱི་གཞུང་དག་བྱ། རིག་བྱེད་དག་སྦྱོར་བར་བྱའོ་ཞེས་གནས་བཅས་ཏེ་འཁོད་པར་གྱུར་ཅིང་། དེ་དག་དེ་ན་གསང་སྔགས་ཀྱི་གཞུང་དག་བྱེད། རིག་བྱེད་དག་སྦྱོར་བར་བྱེད་དོ། །དེ་ནས་དེ་ལས་སེམས་ཅན་
ཁ་ཅིག་གིས་བསམ་གཏན་དེ་དང་། རབ་ཏུ་དབེན་པ་དེ་དང་། གསང་སྔགས་ཀྱི་གཞུང་དེ་དང་། རིག་བྱེད་སྦྱར་བ་དེ་མངོན་པར་རྫོགས་པར་མ་རྟོགས་པ་ན་ཡང་ཕྱིར་དགོན་པ་ནས་གྲོང་མཐར་ལྷགས་ཏེ་ཁང་ཁྱིམ་སྒོ་བཞི་པ་དག་བརྩིགས་ནས་འདིར་བདག་ཅག་གིས་སྦྱིན་པ་དག་
སྦྱིན་པར་བྱ། བསོད་ནམས་དག་སྤེལ་བར་བྱ། སྐྱེ་བོ་འགྲོན་པ་འོངས་ཤིང་ལྷགས་པ་རྣམས་ལ་ཅི་ནུས་ཅི་ལྕོགས་སུ་བཟའ་བ་དང་། བཏུང་བས་ཚིམ་པར་བྱའོ་ཞེས་དེ་དག་དེ་ན་སྦྱིན་པ་དག་སྦྱིན། བསོད་ནམས་དག་བྱེད། སྐྱེ་བོ་འགྲོན་པ་འོངས་ཤིང་ལྷགས་པ་རྣམས་

ལ་ཅི་ནུས་ཅི་ལྕོགས་སུ་བཟའ་བ་དང་བཏུང་བས་ཚིམ་པར་བྱེད་དོ། །འདི་དག་གྲོང་ལས་ཕྱི་རོལ་དུ་བརྟེན་ཅིང་ཕྱི་རོལ་དུ་སེམས་པ་ཞེས་བྱ་བ་ལས་བྲམ་ཟེ་བྲམ་ཟེ་ཞེས་བྱ་བའི་མིང་དུ་གྱུར་ཏོ། །ཡང་འདི་དག་ནི་བསམ་གཏན་མི་བྱེད་དོ་ཞེས་བྱ་བ་ལས་ཀློག་ཏུ་འཛུད་པ་ཀློག་
ཏུ་འཛུད་པ་ཞེས་བྱ་བའི་མིང་དུ་གྱུར་ཏོ། །དགོན་པ་ནས་ཡང་ཕྱིར་གྲོང་མཐར་ལྷགས་པས་གྲོང་པ་གྲོང་པ་ཞེས་བྱ་བའི་མིང་དུ་གྱུར་ཏོ། །དགེ་སློང་དག་འདི་ནི་བྲམ་ཟེའི་དཀྱིལ་འཁོར་འཇིག་རྟེན་དུ་འབྱུང་བའི་དང་པོ་རྩོམ་པ་ཡིན་ཏེ། དེ་ཡང་ཆོས་ཀྱིས་ཡིན་གྱི་ཆོས་མ་ཡིན་
པས་ནི་མ་ཡིན་ནོ། །དེ་ལ་ཆོས་ནི་འདི་ཡིན་ཏེ། རྒྱལ་བ་དབང་པོ་རྣམས་ཀྱི་ཆོས་མཆོག་ཡིན་ནོ། །དགེ་སློང་དག་རྗེའུ་རིགས་ཀྱི་དཀྱིལ་འཁོར་འཇིག་རྟེན་དུ་འབྱུང་བའི་དང་པོ་རྩོམ་པ་གང་ཞེ་ན། དགེ་སློང་དག་དེ་ནས་སེམས་ཅན་ཁ་ཅིག་ཁང་ཁྱིམ་སོ་སོ་དང་ལྡན་
པའི་བཟོའི་གནས་དང་། ལས་ཀྱི་གནས་དག་ལ་བརྩོན་པ་དག་ལ་སེམས་ཅན་འདི་དག་བཟོའི་གནས་དང་། ལས་ཀྱི་གནས་སོ་སོར་སྒྲུབ་པར་བྱེད་དོ་ཞེས་བྱ་བ་ལས་རྗེའུ་རིགས་རྗེའུ་རིགས་ཞེས་བྱ་བའི་མིང་དུ་གྱུར་ཏོ། །དགེ་སློང་དག་འདི་ནི་རྗེའུ་རིགས་ཀྱི་དཀྱིལ་
འཁོར་འཇིག་རྟེན་དུ་འབྱུང་བའི་དང་པོ་རྩོམ་པ་ཡིན་ཏེ། དེ་ཡང་ཆོས་ཀྱིས་ཡིན་གྱི་ཆོས་མ་ཡིན་པས་ནི་མ་ཡིན་ནོ། །དེ་ལ་ཆོས་ནི་འདི་ཡིན་ཏེ། རྒྱལ་བ་དབང་པོ་རྣམས་ཀྱི་ཆོས་མཆོག་ཡིན་ནོ། །དགེ་སློང་དག་ཆོས་ཉིད་ཀྱིས་ན་དཀྱིལ་འཁོར་གསུམ་པོ་དག་འཇིག་
རྟེན་དུ་བྱུང་བས་བཞི་པ་དགེ་སྦྱོང་གི་དཀྱིལ་འཁོར་ཡང་འཇིག་རྟེན་དུ་འབྱུང་བར་འགྱུར་རོ། །ཇི་ལྟར་ཞེ་ན། དགེ་སློང་དག་རྒྱལ་རིགས་ཀྱི་ཁྱིམ་ནས་ཀྱང་རིགས་ཀྱི་བུ་དག་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་
པར་རབ་ཏུ་འབྱུང་བར་བྱེད་པས་རྒྱལ་རིགས་ཀྱིས་ཀྱང་དེ་དག་ལ་མངོན་དུ་སྨྲ་བ་དང་། ཕྱག་བྱ་བ་དང་། ལྡང་བ་དང་། ཐལ་མོ་སྦྱར་བ་དང་གདུད་པའི་ལས་བྱ་བར་འོས་པ་ཡིན་ལ། བྲམ་ཟེ་དང་། རྗེའུ་རིགས་དག་གིས་ཀྱང་མངོན་དུ་སྨྲ་བ་དང་། ཕྱག་བྱ་བ་དང་། ལྡང་བ་

དང་། ཐལ་མོ་སྦྱར་བ་དང་། གདུད་པའི་ལས་བྱ་བར་འོས་པ་ཡིན་ནོ། །བྲམ་ཟེའི་ཁྱིམ་དང་རྗེའུ་རིགས་ཀྱི་ཁྱིམ་ནས་ཀྱང་རིགས་ཀྱི་བུ་དག་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་
ཏུ་འབྱུང་བར་བྱེད་ཅིང་། རྒྱལ་རིགས་ཀྱིས་ཀྱང་དེ་དག་ལ་མངོན་དུ་སྨྲ་བ་དང་། ཕྱག་བྱ་བ་དང་། ལྡང་བ་དང་། ཐལ་མོ་སྦྱར་བ་དང་། གདུད་པའི་ལས་བྱ་བར་འོས་པ་ཡིན་ལ། བྲམ་ཟེ་དང་། རྗེའུ་རིགས་དག་གིས་ཀྱང་དེ་དག་ལ་མངོན་དུ་སྨྲ་བ་དང་། ཕྱག་བྱ་བ་དང་།
ལྡང་བ་དང་། ཐལ་མོ་སྦྱར་བ་དང་། གདུད་པའི་ལས་བྱ་བར་འོས་པ་ཡིན་ནོ། །དགེ་སློང་དག་དེ་ལ་དེའི་ཚེ་དེའི་དུས་ན་གང་གིས་དེའི་དང་པོར་རང་གི་སཱ་ལུ་ཡོད་བཞིན་དུ་གཞན་གྱི་སཱ་ལུ་མ་བྱིན་པར་བླངས་པའི་སེམས་ཅན་དེ་ནི་དགེ་སློང་ནོར་ཅན་ཏེ། འདིས་དེའི་ཚེ་ཡང་
འཇིག་རྟེན་སྐྱོན་མེད་ཅིང་ཆུ་བུར་མེད་པ་ལ་དེའི་དང་པོར་འདི་ལྟ་སྟེ། མ་བྱིན་པར་ལེན་པའི་རྐྱེན་གྱིས་ཆུ་བུར་ཕྱུང་ངོ་། །འདིས་ད་ལྟར་ཡང་དགེ་སློང་གི་དགེ་འདུན་སྐྱོན་མེད་ཅིང་ཆུ་བུར་མེད་པ་ལ་དེའི་དང་པོར་འདི་ལྟ་སྟེ། མ་བྱིན་པར་ལེན་པའི་རྐྱེན་གྱིས་ཆུ་བུར་ཕྱུང་ངོ་། །དགེ་
སློང་དག་དེ་ལྟ་བས་ན་འདི་ལྟར་བསླབ་པར་བྱ་སྟེ། འདོད་ཆགས་སྤང་བའི་ཕྱིར་འབད་པར་བྱའོ། །ཞེ་སྡང་སྤང་བའི་ཕྱིར་དང་། གཏི་མུག་སྤང་བའི་ཕྱིར་འབད་པར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་
པ་དང་། ཚོར་བ་དག་གིས་ཉེན་པ་ལ་ནི་ལྟུང་བ་མེད་དོ། །ཕམ་པར་འགྱུར་བ་གཉིས་པ་རྫོགས་སོ།། །།འདུལ་བ་རྣམ་པར་འབྱེད་པ། བམ་པོ་བརྒྱད་པ། ཕམ་པར་འགྱུར་བ་གསུམ་པའི་སྤྱི་སྡོམ་ལ། བྲན་པ་དང་ནི་བདག་ཉིད་དང་། །དུག་དང་རོ་ལངས་
བསྲོ་གང་ངོ་།། །།སྡོམ་ལ། བྲན་པ་དང་ནི་སྐྱོང་བ་དང་། །མཆུ་ཅན་དང་ནི་ཤི་རི་ཀ། །ལྷུང་བཟེད་དང་ནི་ཆོས་གོས་དང་། །མངལ་ན་གནས་དང་ཚོང་དཔོན་ནོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་

བཞུགས་སོ། །མཉན་ཡོད་ན་དགེ་སློང་བྲན་པ་དང་། སྐྱོང་བ་ཞེས་བྱ་བ་ཕན་ཚུན་གཏམ་འདྲེས་པ། ཕེབས་པར་སྨྲ་བ། འགྲོགས་བཤེས་སྨོས་འདྲིན་མཐུན་པར་བརྗོད་པ་གཉིས་ཤིག་འཁོད་དོ། །ཇི་ཙམ་དུས་གཞན་ཞིག་ན་སྐྱོང་བ་ན་བར་གྱུར་ནས་དེའི་ནད་གཡོག་བྲན་པ་བྱེད་
པ་ན་སྐྱོང་བས་མཚན་མོ་སྒྲ་བསྒྲགས་པར་བརྩམས་པ་དང་། བྲན་པས་སྨྲས་པ། ཚེ་དང་ལྡན་པ་སྐྱོང་བ་ཅིའི་ཕྱིར་སྒྲ་སྒྲོགས་པར་བྱེད། སྐྱོང་བས་སྨྲས་པ། ཁོ་བོ་བཀྲེས་སོ། །སྐོམ་མོ། །བྲན་པས་སྨྲས་པ། ཚེ་དང་ལྡན་པ་སྐྱོང་བ་རབ་ཏུ་བྱུང་བའི་སེམས་ཉེ་
བར་གཞག་པར་གྱིས་ཤིག །གལ་ཏེ་ད་ལྟར་སྨན་ཡོད་དུ་ཟིན་ཀྱང་རེ་ཞིག་བྱིན་ལེན་སྟོབས་པ་ཡང་མེད་ན་ཁྱོད་ལ་སྨན་ལྟ་སྨོས་ཀྱང་ཅི་དགོས་ཏེ་མེད་དོ། །སྐྱོང་བ་དེ་སོ་སོར་རྟོག་པ་མི་མངའ་བ་ཡིན་པས་དེ་ཁོ་བོ་སྐོམ་མོ། །བཀྲེས་སོ། །ཞེས་སྒྲ་སྒྲོགས་བཞིན་པ་ལས་ནམ་
ནངས་པ་དང་། བྲན་པས་སྨྲས་པ། ཚེ་དང་ལྡན་པ་སྐྱོང་བ་ཁོ་བོས་སྨན་པ་ལ་དྲིས་ཏེ་འོང་གི་བར་དུ་ཁྱོད་ཀྱིས་རེ་ཞིག་སོ་ཤིང་འོར་ཅིག །བྲན་པས་སྨན་པའི་གན་དུ་སོང་སྟེ་སྨྲས་པ། བཞིན་བཟངས་གཞོན་ནུ་ཞིག་ན་ན་དེ་ལ་འཕྲོད་པའི་སྨན་སྟོན་ཅིག །སྨན་པས་སྨྲས་པ།
འཕགས་པ་དགེ་སློང་དེའི་སྨན་ནི་འདི་དང་འདི་ལྟ་བུ་ལགས་སོ། །བྲན་པ་སྨན་པའི་གན་དུ་ཇི་སྲིད་སོང་བ་དེའི་ཚེ་ན་ཚེ་དང་ལྡན་པ་སྐྱོང་བ་ཁྲི་ལས་ལངས་ཏེ་ཤམ་ཐབས་གྱོན་ནས་འདག་རྫས་དང་རིལ་བ་སྤྱི་བླུགས་དང་། སོ་ཤིང་ཐོགས་ཏེ་བང་རིམ་དུ་བྱུང་ནས་སོ་ཤིང་དོར་
བར་བརྩམས་པ་དང་། དེ་ལ་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་སྐྱོང་བ་ཅིའི་ཕྱིར་མཚན་མོ་ཏེ་པོར་སྒྲ་སྒྲོགས་པར་བྱེད། སྐྱོང་བས་སྨྲས་པ། ཚེ་དང་ལྡན་པ་དག་ཁོ་བོ་ཏེ་པོར་སྐོམ་པ་དང་། བཀྲེས་པར་གྱུར་ཏོ། །དེ་ན་དགེ་སློང་ཞིག་གིས་སྨྲས་པ།
ཚེ་དང་ལྡན་པ་སྐྱོང་བ་ཁོ་བོ་ལ་ཆུའི་ཐུག་པ་ཡོད་ན་ཅི་མི་འཐུང་ངམ། སྐྱོང་བས་སྨྲས་པ། མ་ནོངས་ཀྱིས་བཏུང་ངོ་ཞེས་དེས་དེ་འཐུངས་སོ། །དགེ་སློང་གཞན་དག་གིས་སྨྲས་པ། ཁོ་བོ་ཅག་ལ་འོ་ཐུག་དང་། ཞོ་ཐུག་དང་། ཁུར་བ་དང་། ཤ་དང་། སྤྱན་གཟིགས་དག་ཡོད་ན་

ཅི་མི་ཟའམ། སྐྱོང་བས་དགེ་སློང་དེ་དག་ལས་ཚངས་པ་མཚུངས་པར་སྤྱོད་པ་རྗེས་སུ་བསྲུང་བ་དང་བརྐམ་ཆགས་ཉིད་ཀྱིས་ཅུང་ཟད་ཅུང་ཟད་ལོངས་སྤྱད་པ་དང་། ཧ་ཅང་ཟས་དྲགས་ནས་དེ་གློས་ཕབ་སྟེ་ཉལ་ལོ། །བྲན་པ་ཡང་སྨན་པ་ལ་དྲིས་ནས་མྱུར་
བ་མྱུར་བར་འོངས་ཏེ། དེ་ནས་སྨན་པས་ཇི་སྐད་བསྟན་པའི་སྨན་སྦྱར་ཏེ་སྨྲས་པ། ཚེ་དང་ལྡན་པ་སྐྱོང་བ་ལོངས་ལ་སོ་ཤིང་འོར་ཅིག །སྐྱོང་བས་སྨྲས་པ། བོར་ཟིན་ཏོ། །བྲན་པས་སྨྲས་པ། མ་ཉེས་སོ་ཞེས་དེས་དཀྱིལ་འཁོར་བྱུགས་ཤིང་སྣོད་དང་ཁ་གཟར་བྱི་དོར་བྱས་
ཏེ། ལོངས་ལ་ཟོ་ཅིག་ཅེས་སྨྲས་པ་དང་། སྐྱོང་བས་དེ་རྗེས་སུ་སྲུང་བས་ལངས་སོ། །བྲན་པས་སྨན་བྱིན་ལེན་བྱེད་དུ་བཅུག་སྟེ་ཕུལ་བ་དང་། སྐྱོང་བས་ཁ་གཟར་དོ་འམ། གསུམ་བཀང་སྟེ་ཟོས་ནས་གློས་ཕབ་སྟེ་ཉལ་ལོ། །བྲན་པས་སྨྲས་པ། ཚེ་དང་ལྡན་པ་སྐྱོང་བ་ཅིའི་
ཕྱིར་མི་ཟ། སྐྱོང་བས་སྨྲས་པ། ཁོ་བོ་མི་འདོད་དོ། །བྲན་པས་སྨྲས་པ། ཁྱོད་ཀྱིས་མཚན་ཐོག་ཐག་ཏུ་ཁོ་བོ་བཀྲེས་སོ། །སྐོམ་མོ་ཞེས་ཁོ་བོ་ལ་ཐོ་བཙམས་ན། ད་ནི་ཁྱོད་མི་འདོད་དོ་ཞེས་ཟེར་ན་ད་ཁྱོད་དུས་ལ་བབ་བོ། །དགེ་སློང་རྣམས་ཀྱིས་བྲན་པ་ལ་སྨྲས་པ། ཚེ་དང་
ལྡན་པ་བྲན་པ་འདི་ལ་བག་བྱོས་ཤིག །འདིས་ཁོ་བོ་ཅག་ལས་ཆུའི་ཐུག་པ་དང་། འོ་ཐུག་དག་འཐུངས་ཤིང་ཁུར་བ་དང་། ཤ་དང་། སྤྱན་གཟིགས་དག་ཟོས་སོ། །བྲན་པས་སྨྲས་པ། ཚེ་དང་ལྡན་པ་སྐྱོང་བ་ཁྱོད་ཀྱིས་དེ་ལྟ་བྱས་པ་བདེན་ནམ། སྐྱོང་བ་ཉེས་པ་དང་བཅས་
པས་ཡི་གེ་བསྒྱངས་ཏེ་སྨྲས་པ་བྱས་སོ། །བྲན་པས་སྨྲས་པ། ཁོ་བོ་ལྷུང་བཟེད་ཟད་ཟད། ཆོས་གོས་དེངས་དེངས། དགེ་བའི་ཕྱོགས་ཉམས་ཉམས་སུ་ཁྱོད་ཀྱི་ནད་གཡོག་བྱེད་ན། ཁྱོད་དེ་ལྟར་མི་མཐུན་པ་བྱེད་པས་ཁྱོད་ཀྱིས་དུག་ཟོས་པར་གྱུར་པ་ནི་བླའི། དེ་ལྟར་མི་མཐུན་
པར་ཟོས་པ་ནི་མ་ཡིན་ནོ། །སྐྱོང་བ་ངོ་ཚ་ནས་བདག་གི་ཚངས་པ་མཚུངས་པར་སྤྱོད་པ་ཟེར་བ་བཟང་སྟེ། འདི་ལྷུང་བཟེད་ཟད་ཟད། ཆོས་གོས་དེངས་དེངས། དགེ་བའི་ཕྱོགས་ཉམས་ཉམས་སུ་བདག་གི་ནད་གཡོག་བྱེད་ན། བདག་དེ་ལྟར་མི་མཐུན་པ་བྱེད་པས་བདག་

གིས་དུག་ཟོས་པ་ནི་བླའི། དེ་ལྟར་མི་མཐུན་པ་བྱེད་པ་ནི་མ་ཡིན་པས་བདག་གིས་དུག་བཟའོ་སྙམ་དུ་བསམས་ནས་དེ་ལངས་ཏེ་སྣོད་དུ་བརྟག་པར་བརྩམས་པ་དང་། དེས་བར་བུར་སྣོད་ན་དུག་གི་དུམ་བུ་མཐོང་ནས་དེས་དེ་ཟོས་པ་དང་། དེ་དུག་གིས་ཡོངས་སུ་འཁྲུགས་པར་
གྱུར་པའི་སེམས་ཀྱིས་འཆི་བར་བརྩམས་ཏེ་ཁ་ཆུ་འཛག །མིག་འགྱུར་བཞིན་སྒྱུར་ཞིང་འདི་སྐད་ཅེས་བྲན་པ་ཁོ་བོ་ཤིའོ། །ཁོ་བོ་ཤིའོ་ཞེས་ཀྱང་ཟེར་རོ། །བྲན་པས་ཐོས་ནས་བརྟད་ཅིང་མྱུར་བ་མྱུར་བར་སྨྲས་པ། ཚེ་དང་ལྡན་པ་སྐྱོང་བ་ཅིའི་ཕྱིར་དེ་སྐད་ཀུ་ཅོ་འདོན་པར་བྱེད།
སྐྱོང་བས་སྨྲས་པ། ཁྱོད་ན་རེ་ཚེ་དང་ལྡན་པ་སྐྱོང་བ་ཁོ་བོ་ལྷུང་བཟེད་ཟད་ཟད། ཆོས་གོས་དེངས་དེངས། དགེ་བའི་ཕྱོགས་ཉམས་ཉམས་སུ་ཁྱོད་ཀྱི་ནད་གཡོག་བྱེད་ན་ཁྱོད་དེ་ལྟར་མི་མཐུན་པ་བྱེད་པས་ཁྱོད་ཀྱིས་དུག་ཟོས་པར་གྱུར་པ་ནི་བླའི། ཁྱོད་ཀྱིས་དེ་ལྟར་མི་མཐུན་པ་
ཟོས་པ་ནི་མ་ཡིན་ནོ་ཞེས་ཟེར་བས་བདག་ལ་བདག་གི་ཚངས་པ་མཚུངས་པར་སྤྱོད་པ་ཟེར་བ་བཟང་སྟེ། འདི་ལྷུང་བཟེད་ཟད་ཟད། ཆོས་གོས་དེངས་དེངས། དགེ་བའི་ཕྱོགས་ཉམས་ཉམས་སུ་བདག་གི་ནད་གཡོག་བྱེད་ན་བདག་དེ་ལྟར་མི་མཐུན་པ་བྱེད་པས་བདག་གིས་
དུག་ཟོས་པར་གྱུར་པ་ནི་བླའི། དེ་ལྟར་མི་མཐུན་པ་ཟོས་པ་ནི་མ་ཡིན་པས་བདག་གིས་དུག་བཟའོ་སྙམ་པའི་བློ་སྐྱེས་ནས། བདག་གི་སྣོད་དུ་བརྟག་པར་བརྩམས་པ་དང་བར་བུར་སྣོད་ན་དུག་གི་དུམ་བུ་མཐོང་ནས་བདག་གིས་དེ་ཟོས་སོ། །བྲན་པས་ཡི་ཆད་པའི་བཞིན་གྱིས་
སྨྲས་པ། ཚེ་དང་ལྡན་པ་ཁྱོད་ཀྱིས་མ་ལེགས་པ་བྱས་སོ་ཞེས་སྨྲས་ཏེ། སྨན་པའི་དྲུང་དུ་སོང་བ་དང་། དུག་དེ་རྣོན་པོ་ཞིག་ཡིན་པས་གཟུང་བར་མ་ནུས་ཏེ་དེ་དུས་ལ་བབ་བོ། །བྲན་པས་སྨན་པ་ཁྲིད་དེ་འོངས་པ་ན་དེ་དུས་ལ་བབ་པ་མཐོང་ནས་བྲན་པ་བདག་གིས་འཆིར་
བཅུག་པར་མ་གྱུར་ཏམ་སྙམ་དུ་འགྱོད་པ་སྐྱེས་ནས། དེས་སྐབས་དེ་དགེ་སློང་རྣམས་ལ་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་དེ། ཡང་དགེ་སློང་

གིས་ནད་པ་ལ་གང་ཐོས་ནས་ནད་པ་འཆི་བའི་ཕྱིར་རྩོལ་བར་བྱེད་པ་དེ་ལྟ་བུའི་གཏམ་ཉེ་བར་བརྗོད་པ་ཉེ་བར་བརྗོད་པར་མི་བྱའོ། །དགེ་སློང་གིས་ནད་པ་ལ་གང་ཐོས་ནས་ནད་པ་འཆི་བའི་ཕྱིར་རྩོལ་བར་འགྱུར་བ་དེ་ལྟ་བུའི་གཏམ་ཉེ་བར་བརྗོད་པ་ཉེ་བར་རྗོད་
པར་བྱེད་ན་འགལ་ཚབས་ཅན་དུ་འགྱུར་རོ། །འདི་ནི་རེ་ཞིག་བྱུང་བ་ཡིན་གྱི་སངས་རྒྱས་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་མི་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་
གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་མཆུ་ཅན་དང་། ཤི་རི་ཀ་ཞེས་བྱ་བ་གཏམ་འདྲེས་པ། ཕེབས་པར་སྨྲ་བ། འགྲོགས་བཤེས་སྨོས་འདྲིན་མཚུངས་པར་བརྗོད་པ་གཉིས་ཤིག་འཁོད་དེ། མཆུ་ཅན་ནི་རྔོན་པ་ལས་རབ་ཏུ་བྱུང་བ་ཡིན་ལ།
ཤི་རི་ཀ་ནི་ཁྱིམ་བདག་ལས་རབ་ཏུ་བྱུང་བ་ཡིན་ནོ། །ཇི་ཙམ་དུས་གཞན་ཞིག་ན་མཆུ་ཅན་གྱི་ཚ་བོ་གཉིས་ཤིག་ཕ་མ་དང་བྲལ་བས་དེ་དང་དེར་འཁྱམ་པ་ན་རྒྱལ་བྱེད་ཀྱི་ཚལ་དུ་ཕྱིན་ཏེ་སྒོ་ན་སྡོད་དོ། །མཆུ་ཅན་ཕྱིར་བྱུང་བ་དང་དེས་དེ་གཉིས་བཞིན་གཟུགས་ལས་ངོ་ཤེས་
ནས་དེས་དེ་གཉིས་ལ་སྨྲས་པ། ཁྱེད་གཉིས་ཀྱི་ཕ་མ་གར་དོང་། དེ་གཉིས་ཀྱིས་སྨྲས་པ། དུས་ལ་བབ་བོ། །དེ་ཉེ་དུ་ལ་མཉེས་གཤིན་པས་ཐོས་ནས་མཆི་མ་དང་བཅས་པའི་སྐད་ཀྱིས་འདུག་པ་དང་། དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་
མཆུ་ཅན་ཁྱེའུ་འདི་གཉིས་སུ། མཆུ་ཅན་གྱིས་སྨྲས་པ། བདག་གི་ཚ་བོ་གཉིས་ཡིན་ནོ། །དགེ་སློང་རྣམས་ཀྱིས་སྨྲས་པ། ཅིའི་ཕྱིར་འདི་གཉིས་སྡུད་པར་མི་བྱེད། མཆུ་ཅན་གྱིས་སྨྲས་པ། བདག་ཀྱང་རེ་ཞིག་དཀའ་བས་བསོད་སྙོམས་སྒྲུབ་པར་བྱེད་ན་
འདི་གཉིས་ཅི་ཞིག་གིས་བསྡུ་བར་བྱ། དགེ་སློང་དག་གིས་སྨྲས་པ། འདི་གཉིས་འདོད་ན་དགེ་སློང་རྣམས་ལ་འདབ་མ་དང་། མེ་ཏོག་དང་། འབྲས་བུ་དང་། སོ་ཤིང་དག་འབུལ་དུ་ཆུག་ཤིག་དང་། དགེ་སློང་དག་གིས་ཀྱང་འདི་གཉིས་ལ་ལྷུང་བཟེད་ཀྱི་ལྷག་མ་སྦྱིན་

པར་འགྱུར་རོ། །མཆུ་ཅན་གྱིས་དེ་གཉིས་བླངས་ནས། དེ་གཉིས་ཀྱང་གྲིམས་པ། ལེ་ལོ་མེད་པ། སྒྲུབ་ཕོད་པ་ཡིན་པས་དགེ་སློང་རྣམས་ལ་འདབ་མ་དང་། མེ་ཏོག་དང་། འབྲས་བུ་དང་། སོ་ཤིང་དག་འབུལ་བར་བྱེད་ནས་དགེ་སློང་རྣམས་ཀྱིས་ཀྱང་དེ་གཉིས་
ལ་ལྷུང་བཟེད་ཀྱི་ལྷག་མ་སྦྱིན་པར་བྱེད་དོ། །དེ་གཉིས་ཀྱང་གོས་དང་། ཟས་བཟང་པོ་དུས་ཡུན་མི་རིང་བས་པགས་པ་དང་། ཤ་དང་། ཁྲག་རྟས་ཤིང་དེ་གཉིས་སྟོབས་དང་སྙེམས་པ་དང་ལྡན་པར་གྱུར་ཏོ། །དེ་གཉིས་དུས་གཞན་ཞིག་ན་རྒྱལ་བྱེད་ཀྱི་ཚལ་གྱི་སྒོ་ན་རྩེ་ཞིང་འཁོད་པ་
དང་། དེ་གཉིས་ཀྱི་ཉེ་དུ་དག་ལག་ན་མདའ་གཞུ་ཐོགས་ཤིང་རྒྱལ་བྱེད་ཀྱི་ཚལ་གྱི་སྒོ་ནས་རི་དགས་ཤོར་དུ་འདོང་བ་དེ་དག་གིས་དེ་གཉིས་མཐོང་ནས་དེ་དག་གིས་སྨྲས་པ། ཁྱེའུ་གཉིས་ཁྱེད་གཉིས་ག་ལས་འདིར་འོངས། ཁྱེའུ་གཉིས་ཀྱིས་སྨྲས་པ། ཤཱཀྱའི་སྲས་ཀྱི་དགེ་སྦྱོང་
གི་ནང་འདི་ན་བདག་ཅག་གཉིས་ཀྱི་ཞང་པོ་རབ་ཏུ་བྱུང་བ་དེའི་གན་ན་འཁོད་དོ། །དེ་དག་གིས་སྨྲས་པ། ཁྱེད་གཉིས་ཀྱི་ཞང་པོ་དེ་ཡང་རེ་ཞིག་ཤཱཀྱའི་སྲས་ཀྱི་དགེ་སྦྱོང་ལས་མེད་པའི་ངང་ཚུལ་ཅན་རྣམས་ཀྱི་ནང་དུ་རབ་ཏུ་བྱུང་བ་ཡིན་ན། ཅི་ཁྱེད་གཉིས་ཀྱང་ལས་མེད་པའི་ངང་
ཚུལ་ཅན་དུ་བྱེད་དམ། ཚུར་ཤེག་ཕའི་ལས་རྗེས་སུ་སྒྲུབས་ཤིག་དེ་གཉིས་ཀྱིས་སྨྲས་པ། ཁོ་བོ་ཅག་གཉིས་ལ་ཞང་པོས་ཕན་བཏགས་པས་ཇེ་དེ་ལ་དྲི་བར་བྱའོ་ཞེས་དེ་གཉིས་ཚེ་དང་ལྡན་པ་མཆུ་ཅན་ག་ལ་བ་དེར་དོང་སྟེ་ཕྱིན་ནས་ཚེ་དང་ལྡན་པ་མཆུ