Kinh tạng Tây Tạng (Kangyur Đại Học) — 005_འདུལ་བ།_ཅ

པ། བློ་ངན་གྱིས་ནི་གང་
འཛིན་པ། །རུ་སྦལ་གྱིས་ནི་གང་འཛིན་བཞིན། །སྐྱོང་མས་ཟིན་པར་གྱུར་པས་ན། །ཁྱོད་ནི་འཚོ་བར་མ་མཐོང་ངོ་། །ཚོང་དཔོན་དེའི་དུས་ལ་བབ་ནས་སྐྱོང་མས་རས་ཀྱིས་གཡོགས་ཏེ་གཞག་གོ། །དེ་ནས་ཚོང་དཔོན་གྱི་ཆུང་མ་ཕྱི་བཞིན་འོངས་ནས་དེས་སྨྲས་པ། སྐྱོང་མ་ཁྱོད་
འདུག་བཞིན་དུ་ཚོང་དཔོན་ཉལ་དུ་བཅུག་གམ་ཞེས་ཚོང་དཔོན་གྱི་ཆུང་མ་དེས་ཚོང་དཔོན་བསླང་བར་བརྩམས་པ་དང་། སྐྱོང་མས་སྨྲས་པ། ངན་བུས་འདིའི་ལྟོ་ན་དགྲ་བོ་མཆིས་པ་ཕྱུང་བས་དེས་ན་འདི་ཉལ་བར་གྱུར་གྱིས་འདི་མ་བསླང་ཤིག །ཚོང་དཔོན་གྱི་ཆུང་མས་བསམས་པ།

འདིའི་དགྲ་བོ་ཅི་འདྲ་བ་ཞིག་ཡིན་པ་དེ་བལྟའོ་སྙམ་ནས། དེས་བརྟག་པར་བརྩམས་པ་དང་། དུས་ལ་བབ་པར་མཐོང་ངོ་། །ཚོང་དཔོན་གྱི་ཆུང་མ་དེ་ལ་བློ་སྐྱེས་པ། འདི་ནི་སྐྱོང་མའི་སྤོབས་པ་མ་ཡིན་གྱི། འདི་ནི་བུ་ཟན་མོའི་བུ་སྡེ་སྣོད་གསུམ་དང་ལྡན་པ་དེའི་སྤོབས་པ་ཡིན།
དེས་སྡེ་སྣོད་གསུམ་བཀླགས་ན་ཆོས་གཞན་འགའ་ཡང་བསྟན་པ་མ་བྱས་པར་ཡབ་ཁྱོད་ཀྱིས་མི་དགྱེས་པར་མི་བགྱི་སྟེ། ཁྱོད་ཡུལ་གཞན་དུ་སོང་ན་ལོ་ལེགས་ཤིང་མཐོ་རིས་ནི་དར་གྱིས་ཆོད་པ་ཙམ། ཐར་པ་ནི་ཡོལ་བས་བསྒྲིབས་པ་ཙམ་སྟེ། ལུས་ཞིག་ན་ཡང་ལྷ་རྣམས་
ཀྱི་ནང་དུ་སྐྱེ་བར་འགྱུར་རོ་ཞེས་བསྟན་པས་ད་ནི་འདིའི་ལུས་ཀྱང་ཞིག །ལྷ་རྣམས་ཀྱི་ནང་དུ་ཡང་སྐྱེས་ཟིན་གྱིས་ཁྱོད་ཚུར་ཤོག །ཁོ་མོ་དང་ལྷན་ཅིག་དགའ་མགུར་སྤྱོད་ཅིག །ཁྱིམ་གྱི་བྱ་བ་ཡང་རྗེས་སུ་སྒྲུབས་ཤིག་ཅེས་ཆུང་མ་སྡུག་བསྔལ་གྱི་ཚོར་བས་ཉེན་པ་དེས་ཚིག་ཏུ་
བརྗོད་ནས། དེའི་འོག་ཏུ་གོས་སྔོན་པོ་དང་། སེར་པོ་དང་། དམར་པོ་དང་། དཀར་པོ་དག་གིས་ཁྱོགས་བརྒྱན་ནས་མཉན་ཡོད་ཀྱི་ཕྱི་རོལ་གྱི་དུར་ཁྲོད་དུ་བསྲེགས་ཏེ་དེ་ནས་མྱ་ངན་བསང་བ་བྱས་ཏེ་འདུག་གོ། །ཆུང་མ་དེས་བར་བར་དུ་ཡང་དེ་སྐད་ཤ་དག་ཟེར་བས་དགེ་སློང་སྡེ་སྣོད་གསུམ་
པ་དེས་བདག་གི་ཕ་དུས་ལ་བབ་པར་ཐོས་ནས་བསམས་པ། འདི་ནི་འདུས་བྱས་རྣམས་ཀྱི་ཆོས་ཉིད་ཡིན་མོད་ཀྱི་འོན་ཀྱང་མ་ཡར་མོ་དེའི་མྱ་ངན་བསང་བ་བྱས་འགྲོའོ་སྙམ་ནས། དེ་སོང་བ་དང་མ་ཡར་མོ་དེས་ཐག་རིང་པོ་ཁོ་ན་ནས་དགེ་སློང་དེ་མཐོང་ངོ་། །མཐོང་ནས་ཀྱང་ཡང་
བུ་ཟན་མོའི་བུ་སྡེ་སྣོད་གསུམ་དང་ལྡན་པས་སྡེ་སྣོད་གསུམ་བཀླགས་ན་ཆོས་གཞན་འགའ་ཡང་བསྟན་པ་མ་བྱས་པར་ཡབ་ཁྱོད་ཀྱིས་མི་དགྱེས་པར་མི་བགྱི་སྟེ། ཁྱོད་ཡུལ་གཞན་དུ་སོང་ན་ལོ་ལེགས་ཤིང་མཐོ་རིས་ནི་དར་གྱིས་ཆོད་པ་ཙམ། ཐར་པ་ནི་ཡོལ་བས་བསྒྲིབས་པ་ཙམ་
སྟེ། ལུས་ཞིག་ན་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་རོ་ཞེས་བསྟན་པས་ད་ནི་འདིའི་ལུས་ཀྱང་ཞིག །ལྷ་རྣམས་ཀྱི་ནང་དུ་ཡང་སྐྱེས་ཟིན་གྱིས་ཁྱོད་ཚུར་ཤོག་ཁོ་མོ་དང་ལྷན་ཅིག་དགའ་མགུར་སྤྱོད་ཅིག །ཁྱིམ་གྱི་བྱ་བ་ཡང་རྗེས་སུ་སྒྲུབས་ཤིག །ཅེས་སྨྲ་བར་བརྩམས་པ་དང་།

དགེ་སློང་དེ་ཉམ་ང་ནས་དེ་ཉིད་ནས་ཕྱིར་ལོག་གོ། །དེ་བདག་གིས་འཆིར་བཅུག་པར་མ་གྱུར་ཏམ་སྙམ་དུ་འགྱོད་པ་སྐྱེས་ནས། དེས་སྐབས་དེ་དགེ་སློང་རྣམས་ལ་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་
བཀའ་སྩལ་པ། དགེ་སློང་དག་དགེ་སློང་དེ་ལ་ལྟུང་བ་མེད་དེ། ཡང་དགེ་སློང་གིས་ནད་པ་ལ་གང་ཐོས་ནས་ནད་པ་འཆི་བར་སེམས་པ་དེ་འདྲ་བའི་ཆོས་བསྟན་པར་མི་བྱའོ། །དགེ་སློང་གིས་ནད་པ་ལ་གང་ཐོས་ནས་ནད་པ་འཆི་བར་སེམས་པ་དེ་འདྲ་བའི་ཆོས་སྟོན་པར་བྱེད་ན་འགལ་
ཚབས་ཅན་དུ་འགྱུར་རོ། །འདི་ཡང་རེ་ཞིག་བྱུང་བ་ཡིན་གྱིས་སངས་རྒྱས་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །སངས་རྒྱས་བཅོམ་ལྡན་འདས་སྤོང་བྱེད་དག་ན་ཆུ་ཀླུང་ཡིད་འོང་ལྡན་གྱི་འགྲམ་ན་སྒྲོན་ཤིང་གི་ཚལ་གསེབ་ན་
བཞུགས་སོ། །དེ་ན་བཅོམ་ལྡན་འདས་དགེ་སློང་གི་དགེ་འདུན་ལ་དགེ་སློང་དག་མི་སྡུག་པ་སྒོམས་ཤིག །མི་སྡུག་པ་བསྟེན་ཅིང་གོམས་པར་བྱས་ལན་མང་དུ་བྱས་ན་འབྲས་བུ་ཆེན་པོ་དང་། ཕན་ཡོན་ཆེན་པོར་འགྱུར་རོ་ཞེས་མི་སྡུག་པ་སྟོན་པར་མཛད་ཅིང་མི་སྡུག་པ་བསྒོམ་པའི་བསྔགས་
པ་བརྗོད་པར་ཡང་མཛད་དོ། །བཅོམ་ལྡན་འདས་ཀྱིས་དགེ་སློང་དག་མི་སྡུག་པ་སྒོམས་ཤིག །མི་སྡུག་པ་བསྟེན་ཅིང་གོམས་པར་བྱས། ལན་མང་དུ་བྱས་ན་འབྲས་བུ་ཆེན་པོ་དང་ཕན་ཡོན་ཆེན་པོར་འགྱུར་རོ་ཞེས་གསུངས་པས་དེའི་ཚེ་ན་དགེ་སློང་དག་མི་སྡུག་པ་སྒོམ་པར་བྱེད་
དེ། དེ་དག་མི་སྡུག་པ་སྒོམ་པར་བྱེད་པ་དེའི་ཚེ་རྣག་གི་ལུས་འདིས་སྒྱིད་ལུག་པ་དང་། མུས་བྱུང་བ་དང་། ཐེ་ཚོམ་ཟ་བ་དང་། སྨོད་པར་བྱེད་པ་ན་མཚོན་ཡང་འབྱིན་པར་བྱེད། དུག་ཀྱང་ཟ་བར་བྱེད། ཐག་པས་འཆིང་བས་ཀྱང་འཆི་བར་བྱེད། གཡང་སར་ཡང་མཆོང་བར་བྱེད་ཅིང་
འདི་ལྟར་དགེ་སློང་གིས་ཀྱང་དགེ་སློང་ལ་རྩོལ་བར་བྱེད་དོ། །དེ་ནས་དགེ་སློང་གཞན་ཞིག་རྣག་གི་ལུས་འདིས་སྒྱིད་ལུག་པ་དང་། མུས་བྱུང་བ་དང་། ཐེ་ཚོམ་ཟ་བ་དང་། སྨོད་པར་བྱེད་པ་ན་རི་དགས་ཟློག་དགེ་སྦྱོང་སྦེད་ག་ལ་བ་དེར་སོང་སྟེ་ཕྱིན་ནས་རི་དགས་ཟློག་དགེ་སྦྱོང་སྦེད་ལ་

འདི་སྐད་ཅེས་སྨྲས་སོ། །བཞིན་བཟངས་ཚུར་ཤོག །ཁོ་བོ་སྲོག་དང་ཕྲོལ་ཅིག་དང་ཁོ་བོའི་ལྷུང་བཟེད་དང་། ཆོས་གོས་གང་ཡིན་པ་དེ་ཁྱོད་ཀྱིར་འགྱུར་རོ། །དེ་ནས་རི་དགས་ཟློག་དགེ་སྦྱོང་སྦེད་ཀྱིས་དགེ་སློང་དེ་སྲོག་དང་ཕྲལ་ནས་རལ་གྲི་ཁྲག་གིས་གོས་པ་ཁྱེར་ཏེ་ཆུ་ཀླུང་ཡིད་
འོང་ལྡན་ག་ལ་བ་དེར་སོང་ནས་ཕྱིན་པ་དང་། ཆུ་ཀླུང་ཡིད་འོང་ལྡན་གྱི་འགྲམ་དུ་ཙོག་ཙོག་པོར་འདུག་སྟེ་རལ་གྲི་ཁྲག་གིས་གོས་པ་འཁྲུ་བར་བྱེད་དོ། །དེ་ནས་བདུད་ཀྱི་རིས་ཀྱི་ལྷ་ཞིག་ཆུ་ཀླུང་ཡིད་འོང་ལྡན་གྱི་རྒྱུན་མ་ཕྱེ་བར་འདུག་ནས་རི་དགས་ཟློག་དགེ་སྦྱོང་སྦེད་ལ་འདི་སྐད་ཅེས་སྨྲས་
སོ། །བཞིན་བཟངས་ལེགས་སོ་ལེགས་སོ། །འདི་ལྟར་ཁྱོད་དགེ་སློང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་དག་མ་རྒལ་བ་རྒལ་བར་བྱེད། མ་གྲོལ་བ་གྲོལ་བར་བྱེད། དབུགས་མ་ཕྱིན་པ་དབུགས་འབྱིན་པར་བྱེད། ཡོངས་སུ་མྱ་ངན་ལས་མ་འདས་པ་ཡོངས་སུ་
མྱ་ངན་ལས་འདའ་བར་བྱེད་པ་ནི་ཁྱོད་ལ་བསོད་ནམས་མང་དུ་སྐྱེ་བར་འགྱུར་ཞིང་། དེ་དག་གི་ལྷུང་བཟེད་དང་ཆོས་གོས་གང་ཡིན་པ་དེ་ཁྱོད་ཀྱིར་འགྱུར་བ་འདི་ཡང་ཁྱོད་ཀྱི་རྙེད་པ་ལྷག་པ་ཡིན་ནོ། །དེ་ལྟར་དེ་ལ་རི་དགས་ཟློག་དགེ་སྦྱོང་སྦེད་འདི་སྙམ་དུ་འདི་ལྟར་བདག་དགེ་སློང་
ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་དག་མ་རྒལ་བ་རྒལ་བར་བྱེད། མ་གྲོལ་བ་གྲོལ་བར་བྱེད། དབུགས་མ་ཕྱིན་པ་དབུགས་འབྱིན་པར་བྱེད། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའ་བར་བྱེད་པ་ནི་བདེན་མོད། བདག་ལ་བསོད་
ནམས་མང་དུ་སྐྱེ་ཞིང་དེ་དག་གི་ལྷུང་བཟེད་དང་། ཆོས་གོས་གང་ཡིན་པ་དེ་བདག་གིར་འགྱུར་བ་འདི་ཡང་། བདག་གི་རྙེད་པ་ལྷག་པ་ཡིན་ནོ་སྙམ་དུ་རྒྱ་ཆེར་སྡིག་པ་ཅན་གྱི་ལྟ་བའི་རྣམ་པ་ཐོབ་པར་གྱུར་ཏོ། །དེ་ནས་རི་དགས་ཟློག་དགེ་སྦྱོང་སྦེད་ལ་རལ་གྲི་རྣོན་པོ་མཆན་ཁུང་
གིས་ཁྱེར་ཏེ། ཀུན་དགའི་ར་བ་ནས་ཀུན་དགའི་ར་བར། གཙུག་ལག་ཁང་ནས་གཙུག་ལག་ཁང་དུ། ཁང་ཁྱིམ་ནས་ཁང་ཁྱིམ་དུ། འཆག་ས་ནས་འཆག་སར་དང་། ལམ་གོལ་བར་རྗེས་སུ་རྒྱུ་བ་ན་དགེ་སློང་དེ་དང་དེ་དག་མཐོང་ནས་འདི་སྐད་ཅེས་སྨྲས་སོ། །དགེ་སྦྱོང་ཚུལ་ཁྲིམས་དང་

ལྡན་པ། ཡོན་ཏན་དང་ལྡན་པ། མ་རྒལ་བ་རྒལ་བར་བྱ་བ། མ་གྲོལ་བ་གྲོལ་བར་བྱ་བ། དབུགས་མ་ཕྱིན་པ་དབུགས་དབྱུང་བར་བྱ་བ། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའ་བར་བྱ་བ་གང་ཡིན། དེ་ནས་དགེ་སློང་ཞིག་རྣག་གི་
ལུས་འདིས་སྒྱིད་ལུག་པ་དང་། མུས་བྱུང་བ་དང་། ཐེ་ཚོམ་ཟ་བ་དང་། སྨོད་པ་ན་གནས་ནས་ཕྱིར་བྱུང་སྟེ། རི་དགས་ཟློག་དགེ་སྦྱོང་སྦེད་ལ་འདི་སྐད་ཅེས་སྨྲས་སོ། །བཞིན་བཟངས་བདག་མ་རྒལ་བ་ཡིན་གྱིས་སྒྲོལ་ཅིག །བདག་མ་གྲོལ་བ་ཡིན་གྱིས་ཁྲོལ་ཅིག །བདག་དབུགས་
མ་ཕྱིན་པ་ཡིན་གྱིས་དབུགས་ཕྱུང་ཤིག །བདག་ཡོངས་སུ་མྱ་ངན་ལས་མ་འདས་པ་ཡིན་གྱིས་ཡོངས་སུ་མྱ་ངན་ལས་ཟློས་ཤིག །དེ་ནས་རི་དགས་ཟློག་དགེ་སྦྱོང་སྦེད་ཀྱིས་དགེ་སློང་དེ་སྲོག་དང་བྲལ་བར་བྱས་ཏེ། དེ་བཞིན་དུ་གཉིས་དང་། གསུམ་ནས་དགེ་སློང་དྲུག་བཅུའི་བར་
དག་སྲོག་དང་བྲལ་བར་བྱས་སོ། །དེའི་ཚེ་དགེ་སློང་དག་ཉུང་ངུར་གྱུར། ཉམས་པར་གྱུར། རྔ་རྔོར་གྱུར་ཅིང་། དགེ་སློང་གི་དགེ་འདུན་སྲབས་པར་གྱུར་ཏོ། །དེ་ནས་བཅོམ་ལྡན་འདས་དེ་ཉིད་ཀྱི་ཚེས་བཅྭ་ལྔའི་གསོ་སྦྱོང་ལ་དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་
ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་འཁོར་ཐམས་ཅད་ལ་རྣམ་པར་གཟིགས་ཏེ། ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་གང་གིས་ད་ལྟར་དགེ་སློང་དག་ཉུང་ངུར་གྱུར། ཉམས་པར་གྱུར། རྔ་རྔོར་གྱུར་ཅིང་དགེ་སློང་གི་དགེ་འདུན་
སྲབས་པར་གྱུར་པའི་རྒྱུ་ནི་གང་ཡིན། རྐྱེན་ནི་གང་ཡིན། བཙུན་པ་དུས་གཅིག་ན་བཅོམ་ལྡན་འདས་དགེ་སློང་གི་དགེ་འདུན་ལ་དགེ་སློང་དག་མི་སྡུག་པ་སྒོམས་ཤིག །མི་སྡུག་པ་བསྟེན་ཅིང་གོམས་པར་བྱས་ལན་མང་དུ་བྱས་ན། འབྲས་བུ་ཆེན་པོ་དང་ཕན་ཡོན་ཆེན་པོར་འགྱུར་རོ་ཞེས་
མི་སྡུག་པ་སྟོན་པར་མཛད་ཅིང་མི་སྡུག་པ་བསྒོམ་པའི་བསྔགས་པ་རྗོད་པར་ཡང་མཛད་དོ། །དེའི་ཚེ་ན་དགེ་སློང་དག་མི་སྡུག་པ་སྒོམ་པར་བགྱིད་དེ། དེ་དག་མི་སྡུག་པ་སྒོམ་པར་བགྱིད་པའི་ཚེ་རྣག་གི་ལུས་འདིས་སྒྱིད་ལུག་པ་དང་། མུས་བྱུང་བ་དང་། ཐེ་ཚོམ་ཟ་བ་དང་། སྨོད་

པར་བགྱིད་པ་ན་མཚོན་ཡང་འབྱིན་པར་བགྱིད། དུག་ཀྱང་འཚལ་བར་བགྱིད། ཐག་པས་འཆིང་བས་ཀྱང་འགུམ་པར་བགྱིད། གཡང་སར་ཡང་མཆོང་བར་བགྱིད་ཅིང་དགེ་སློང་གིས་ཀྱང་དགེ་སློང་ལ་རྩོལ་བར་བགྱིད་དོ། །དེ་ནས་དགེ་སློང་གཞན་ཞིག་རྣག་གི་ལུས་འདིས་སྒྱིད་
ལུག་པ་དང་། མུས་བྱུང་བ་དང་། ཐེ་ཚོམ་ཟ་བ་དང་། སྨོད་པར་བགྱིད་པ་ན་རི་དགས་ཟློག་དགེ་སྦྱོང་སྦེད་ག་ལ་བ་དེར་མཆིས་ཏེ་ཕྱིན་ནས། རི་དགས་ཟློག་དགེ་སྦྱོང་སྦེད་ལ་འདི་སྐད་ཅེས་བཞིན་བཟངས་ཚུར་ཤོག་ཁོ་བོ་སྲོག་དང་ཕྲོལ་ཅིག་དང་ཁོ་བོའི་ལྷུང་བཟེད་དང་ཆོས་གོས་གང་ཡིན་པ་
དེ་ཁྱོད་ཀྱིར་འགྱུར་རོ་ཞེས་མཆིའོ། །དེ་ནས་རི་དགས་ཟློག་དགེ་སྦྱོང་སྦེད་ཀྱིས་དགེ་སློང་དེ་སྲོག་དང་ཕྲལ་ནས་རལ་གྲི་ཁྲག་གིས་གོས་པ་འཚལ་ཏེ་ཆུ་ཀླུང་ཡིད་འོང་ལྡན་ག་ལ་བ་དེར་མཆིས་ནས་ཕྱིན་པ་དང་། ཆུ་ཀླུང་ཡིད་འོང་ལྡན་གྱི་འགྲམ་དུ་ཙོག་ཙོག་པོར་མཆིས་ཏེ། རལ་
གྲི་ཁྲག་གིས་གོས་པ་འཁྲུ་བར་བགྱིད་དོ། །དེ་ནས་བདུད་ཀྱི་རིས་ཀྱི་ལྷ་ཞིག་ཆུ་ཀླུང་ཡིད་འོང་ལྡན་གྱི་རྒྱུན་མ་ཕྱེ་བར་མཆིས་ནས་རི་དགས་ཟློག་དགེ་སྦྱོང་སྦེད་ལ་འདི་སྐད་ཅེས་བཞིན་བཟངས་ལེགས་སོ་ལེགས་སོ། །འདི་ལྟར་ཁྱོད་དགེ་སློང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་དག་
མ་རྒལ་བ་རྒལ་བར་བྱེད། མ་གྲོལ་བ་གྲོལ་བར་བྱེད། དབུགས་མ་བྱིན་པ་དབུགས་འབྱིན་པར་བྱེད། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའ་བར་བྱེད་པ་ནི་ཁྱོད་ལ་བསོད་ནམས་མང་དུ་སྐྱེ་བར་འགྱུར་ཞིང་། དེ་དག་གི་ལྷུང་བཟེད་དང་ཆོས་གོས་གང་ཡིན་པ་དེ་
ཁྱོད་ཀྱིར་འགྱུར་བ་འདི་ཡང་ཁྱོད་ཀྱི་རྙེད་པ་ལྷག་པ་ཡིན་ནོ་ཞེས་མཆི་ནས། དེ་ལྟར་དེ་ལ་རི་དགས་ཟློག་དགེ་སྦྱོང་སྦེད་འདི་སྙམ་དུ་འདི་ལྟར་བདག་དགེ་སློང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་དག་མ་རྒལ་བ་རྒལ་བར་བྱེད། མ་གྲོལ་བ་གྲོལ་བར་བྱེད། དབུགས་མ་ཕྱིན་པ་
དབུགས་འབྱིན་པར་བྱེད། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའ་བར་བྱེད་པ་ནི་བདེན་མོད། བདག་ལ་བསོད་ནམས་མང་དུ་སྐྱེ་ཞིང་དེ་དག་གི་ལྷུང་བཟེད་དང་ཆོས་གོས་གང་ཡིན་པ་དེ་བདག་གིར་འགྱུར་བ་འདི་ཡང་བདག་གི་རྙེད་པ་ལྷག་པ་ཡིན་ནོ་སྙམ་དུ་རྒྱ་ཆེར་སྡིག་

པ་ཅན་གྱི་ལྟ་བའི་རྣམ་པ་ཐོབ་པར་གྱུར་ཏོ། །དེ་ནས་རི་དགས་ཟློག་དགེ་སྦྱོང་སྦེད་རལ་གྲི་རྣོན་པོ་མཆན་ཁུང་གིས་འཚལ་ཏེ། ཀུན་དགའི་ར་བ་ནས་ཀུན་དགའི་ར་བར། གཙུག་ལག་ཁང་ནས་གཙུག་ལག་ཁང་དུ། ཁང་ཁྱིམ་ནས་ཁང་ཁྱིམ་དུ། འཆག་ས་ནས་
འཆག་སར་དང་། ཤུལ་གོལ་བར་རྗེས་སུ་རྒྱུ་བ་ན་དགེ་སློང་དེ་དང་དེ་དག་མཐོང་ནས། འདི་སྐད་ཅེས་དགེ་སློང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། མ་རྒལ་བ་རྒལ་བར་བྱ་བ། མ་གྲོལ་བ་གྲོལ་བར་བྱ་བ། དབུགས་མ་ཕྱིན་པ་དབུགས་དབྱུང་བར་བྱ་བ། ཡོངས་སུ་
མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའ་བར་བྱ་བ་གང་ཡིན་ཞེས་མཆིའོ། །དེ་ནས་དགེ་སློང་ཞིག་རྣག་གི་ལུས་འདིས་སྒྱིད་ལུག་པ་དང་། མུས་བྱུང་བ་དང་། ཐེ་ཚོམ་ཟ་བ་དང་། སྨོད་པ་ན་གནས་ནས་སླར་བྱུང་སྟེ། རི་དགས་ཟློག་དགེ་སྦྱོང་སྦེད་ལ་འདི་སྐད་ཅེས་
བཞིན་བཟངས་བདག་མ་རྒལ་བ་ཡིན་གྱིས་སྒྲོལ་ཅིག །བདག་མ་གྲོལ་བ་ཡིན་གྱིས་ཁྲོལ་ཅིག །བདག་དབུགས་མ་ཕྱིན་པ་ཡིན་གྱིས་དབུགས་ཕྱུང་ཤིག །བདག་ཡོངས་སུ་མྱ་ངན་ལས་མ་འདས་པ་ཡིན་གྱིས་ཡོངས་སུ་མྱ་ངན་ལས་ཟློས་ཤིག་ཅེས་མཆིའོ། །དེ་ནས་རི་དགས་
ཟློག་དགེ་སྦྱོང་སྦེད་ཀྱིས་དགེ་སློང་དེ་སྲོག་དང་བྲལ་བར་བགྱིས་ཏེ། དེ་བཞིན་དུ་གཉིས་དང་། གསུམ་ནས་དགེ་སློང་དྲུག་བཅུའི་བར་དག་སྲོག་དང་བྲལ་བར་བགྱིས་པས་བཙུན་པ་གང་གིས་ད་ལྟར་དགེ་སློང་དག་ཉུང་ངུར་གྱུར། ཉམས་པར་གྱུར། རྔ་རྔོར་གྱུར་ཅིང་དགེ་སློང་གི་དགེ་འདུན་
སྲབས་པར་གྱུར་པའི་རྒྱུ་ནི་དེ་ལགས། རྐྱེན་ནི་དེ་ལགས་སོ། །ཀུན་དགའ་བོ་དགེ་སློང་དག་ཀྱང་དགེ་སློང་ལ་རྩོལ་བར་བྱེད་དམ། བཙུན་པ་རྩོལ་བར་བགྱིད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ།
ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་སྨོད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་

རྣམས་ཀྱི་བསླབ་པའི་གཞི་བཅའ་བར་བྱ་སྟེ། འདི་ལྟ་སྟེ། དགེ་འདུན་བསྡུ་བའི་ཕྱིར་དང་། དགེ་འདུན་ལེགས་པར་བྱ་བའི་ཕྱིར་དང་། དགེ་འདུན་བདེ་བར་གནས་པར་བྱ་བའི་ཕྱིར་དང་། གནང་མི་བཀུར་བའི་གང་ཟག་རྣམས་ཚར་གཅད་པར་བྱ་བའི་ཕྱིར་དང་། ངོ་ཚ་ཤེས་པ་རྣམས་
བདེ་བར་གནས་པར་བྱ་བའི་ཕྱིར་དང་། མངོན་པར་མ་དད་པ་རྣམས་མངོན་པར་དད་པར་བྱ་བའི་ཕྱིར་དང་། མངོན་པར་དད་པ་རྣམས་ཕྱིར་ཞིང་འབྱུང་བར་བྱ་བའི་ཕྱིར་དང་། ཚེ་འདིའི་ཟག་པ་རྣམས་བསྡམ་པར་བྱ་བའི་ཕྱིར་དང་། ཚེ་རབས་ཕྱི་མའི་རྣམས་བཟློག་པར་བྱ་བའི་ཕྱིར་དང་།
ངའི་ཚངས་པར་སྤྱོད་པ་སྐྱེ་བོ་མང་པོ་ལ་ཕན་པ་ཡངས་པར་གྱུར་པ་ལྷ་དང་མིའི་བར་དག་ལ་ཡང་དག་པར་རབ་ཏུ་བསྟན་པ་ཡུན་རིང་དུ་གནས་པར་འགྱུར་བའོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་མིའམ་
མིར་ཆགས་པ་ལ་བསམས་བཞིན་དུ་རང་གི་ལག་དར་དེ་སྲོག་གཅད་དམ། དེ་ལ་མཚོན་བྱིན་ནམ། དེ་ལ་མཚོན་ཐོགས་པ་གཉེར་ཏམ། དེ་འཆིར་བཅུག་གམ། དེ་ལ་འཆི་བའི་བསྔགས་པ་བརྗོད་ཀྱང་རུང་སྟེ། དེ་ལ་འདི་སྐད་ཅེས་ཀྱེ་མི་ཁྱོད་འཚོ་བ་སྡིག་པ་མི་
གཙང་བ་ངན་པ་འདིས་ཅི་ཞིག་བྱ། ཀྱེ་མི་ཁྱོད་གསོན་པ་བས་ཤི་བླའོ་ཞེས་ཟེར་ཞིང་སེམས་ཀྱི་འདོད་པ་དང་། སེམས་ཀྱི་ཀུན་ཏུ་རྟོག་པ་དག་གིས་རྣམ་གྲངས་དུ་མས་དེ་འཆིར་བཅུག་གམ། དེ་ལ་འཆི་བའི་བསྔགས་པ་བརྗོད་དེ། དེ་ཡང་རྩོམ་པ་དེས་དུས་བྱས་ན་
དགེ་སློང་དེ་ཡང་ཕམ་པར་གྱུར་པ་ཡིན་གྱིས་གནས་པར་མི་བྱའོ། །ཡང་དགེ་སློང་གང་ཞེས་བྱ་བ་ནི་དགེ་སློང་རྣམ་པ་བཞི་པོ་མིང་གི་དགེ་སློང་དང་། ཁས་འཆེ་བའི་དགེ་སློང་དང་། སློང་བའི་ཕྱིར་དགེ་སློང་དང་། ཉོན་མོངས་པ་བཅོམ་པའི་ཕྱིར་དགེ་སློང་ངོ་། །མིང་གི་དགེ་སློང་
གང་ཞེ་ན། གང་གི་མིང་དང་། མིང་དུ་བརྗོད་པ་དང་། ཚིག་གཉིས་པ་དང་། ཚིག་བླ་དགས་དང་། འདུ་ཤེས་དང་། བོད་པ་དང་། གདགས་པ་དང་། ཐ་སྙད་དགེ་སློང་ཞེའམ། དགེ་སློང་གི་རིགས་ཞེའམ། དགེ་སློང་དང་འདྲ་བར་གྱུར་པ་ཞེས་བྱ་བ་དེ་ནི་མིང་གི་དགེ་སློང་

ཞེས་བྱའོ། །ཁས་འཆེ་བའི་དགེ་སློང་གང་ཞེ་ན། གང་དགེ་སློང་མ་ཡིན་བཞིན་དུ་བདག་ཉིད་དགེ་སློང་ངོ་ཞེས་ཁས་འཆེ་བར་བྱེད་པ་དང་། རྐུ་ཐབས་སུ་གནས་ཤིང་དགེ་སློང་དུ་དམ་འཆའ་བར་བྱེད་པ་དེ་ནི་ཁས་འཆེ་བའི་དགེ་སློང་ཞེས་བྱའོ། །སློང་བའི་ཕྱིར་
དགེ་སློང་གང་ཞེ་ན། གང་ཆོས་དང་ལྡན་པས་སློང་མོ་སྤྱོད་པས་འཚོ་བར་བྱེད་པ་དེ་ནི་སློང་བའི་ཕྱིར་དགེ་སློང་ཞེས་བྱའོ། །ཉོན་མོངས་པ་བཅོམ་པའི་ཕྱིར་དགེ་སློང་གང་ཞེ་ན། གང་གིས་ཟག་པ་ཀུན་ནས་ཉོན་མོངས་པར་བྱེད་པ། ཡང་སྲིད་པར་བྱེད་པ། རིམས་ནད་དང་བཅས་པ།
རྣམ་པར་སྨིན་པ་སྡུག་བསྔལ་བ། ཕྱི་མ་ལ་སྐྱེ་བ་དང་། རྒ་བ་དང་། འཆི་བར་འགྱུར་བ་གང་དག་ཡིན་པ་དེ་དག་སྤངས་པ་དང་། ཡོངས་སུ་ཤེས་པ་དང་། རྩ་བ་ནས་བཅད་པ་དང་། ཤིང་ཏ་ལའི་མགོ་བཞིན་དུ་གཞི་མི་སྣང་བ་དང་། ཕྱི་མ་ལ་མི་སྐྱེ་བའི་ཆོས་ཅན་དུ་གྱུར་པ་དེ་
ནི་ཉོན་མོངས་པ་བཅོམ་པའི་ཕྱིར་དགེ་སློང་ཞེས་བྱའོ། །དོན་འདིར་ནི་གསོལ་བ་དང་བཞིའི་ལས་མི་གཡོ་བ་བཞག་པར་མི་འོས་པས་བསྙེན་པར་རྫོགས་པ་གང་ཡིན་པ་དེ་ནི་དགེ་སློང་དུ་དགོངས་ཏེ། དེས་ན་ཡང་དགེ་སློང་གང་ཞེས་གསུངས་སོ། །མིའམ་ཞེས་བྱ་བ་ནི་གང་གིས་
མའི་ལྟོར་དབང་པོ་དྲུག་པོ་འདི་ལྟ་སྟེ། མིག་གི་དབང་པོ་དང་། རྣ་བའི་དབང་པོ་དང་། སྣའི་དབང་པོ་དང་། ལྕེའི་དབང་པོ་དང་། ལུས་ཀྱི་དབང་པོ་དང་། ཡིད་ཀྱི་དབང་པོ་ཐོབ་པར་གྱུར་པའོ། །མིར་ཆགས་པ་ལ་ཞེས་བྱ་བ་ནི་གང་གིས་མའི་ལྟོར་དབང་པོ་གསུམ་པོ་འདི་ལྟ་སྟེ།
ལུས་ཀྱི་དབང་པོ་དང་། ཚོར་བའི་དབང་པོ་དང་། ཡིད་ཀྱི་དབང་པོ་ཐོབ་པར་གྱུར་པ་ལའོ། །བསམས་བཞིན་དུ་ཞེས་བྱ་བ་ནི་རྣམ་པར་བརྟགས་ནས་སོ། །རང་གི་ལག་དར་ཏེ་ཞེས་བྱ་བ་ནི་ལག་པས་ལག་དར་ཏེའོ། །སྲོག་བཅད་དམ་ཞེས་བྱ་བ་ནི་དེའི་སྲོག་བཅད་པར་གྱུར་ནའོ། །
དེ་ལ་མཚོན་བྱིན་ནམ་ཞེས་བྱ་བ་ནི་རལ་གྲིའམ། སྤུ་གྲིའམ། ཆུ་གྲིའོ། །དེ་ལ་མཚོན་ཐོགས་པ་གཉེར་ཏམ་ཞེས་བྱ་བ་ནི་སྐྱེས་པ་འམ། བུད་མེད་དམ། མ་ནིང་ངོ་། །དེ་འཆིར་བཅུག་གམ་ཞེས་བྱ་བ་ནི་འཆིར་གཞུག་པ་ནི་རྣམ་པ་གསུམ་སྟེ། ཚུལ་ཁྲིམས་འཆལ་བ་

དང་། ཚུལ་ཁྲིམས་དང་ལྡན་པ་དང་། ནད་པའོ། །ཚུལ་ཁྲིམས་འཆལ་བ་ལ་ཇི་ལྟར་ཞེ་ན། འདི་ལྟར་དགེ་སློང་ཚུལ་ཁྲིམས་འཆལ་བ་ལ་ལྷུང་བཟེད་དམ། ཆོས་གོས་སམ། དྲ་བ་འམ། ཕོར་བུ་འམ། སྐ་རགས་སམ། དགེ་སྦྱོང་གི་
འཚོ་བའི་ཡོ་བྱད་གང་ཡང་རུང་བ་ཅུང་ཞིག་རག་ལུས་པ་ན་དེ་འདི་སྙམ་དུ་སེམས་ཏེ། ཇི་སྲིད་དུ་ཚེ་དང་ལྡན་པ་འདི་གསོན་པ་དེ་སྲིད་དུ་བདག་གིས་ཐོབ་པར་མི་འགྱུར་གྱིས། བདག་དེའི་དྲུང་དུ་སོང་ལ་འཆིར་གཞུག་གོ་སྙམ་ནས་དེ་དེའི་དྲུང་དུ་སོང་སྟེ། འདི་སྐད་
ཅེས་ཚེ་དང་ལྡན་པ་ནི་ཚུལ་ཁྲིམས་འཆལ་བ། སྡིག་པའི་ཆོས་ཅན། ལུས་ཀྱིས་ཉེས་པར་སྤྱད་པ་དང་ལྡན་པ། ངག་དང་ཡིད་ཀྱིས་ཉེས་པར་སྤྱད་པ་དང་ལྡན་པ་ཡིན་པས་ཚེ་དང་ལྡན་པ་ཇི་སྲིད་ཡུན་རིང་དུ་འཚོ་བར་འགྱུར་བ་དེ་སྲིད་དུ་བསོད་ནམས་མ་ཡིན་པ་མང་དུ་འཕེལ་བར་འགྱུར་
ཞིང་། བསོད་ནམས་མ་ཡིན་པ་མང་དུ་འཕེལ་ན་ཡུན་རིང་དུ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ་ཞེས་སྨྲས་པ་ན། ཚུལ་ཁྲིམས་འཆལ་བ་དེ་དགེ་སློང་དེ་ལ་འདི་སྐད་ཅེས་ཚེ་དང་ལྡན་པ་འོ་ན་ཁོ་བོ་ཇི་ལྟར་བྱ་ཞེས་ཟེར་བའི་ཚེ་ཚེ་དང་ལྡན་པ་ཚུར་ཤོག་ཁྱོད་ཀྱིས་བདག་ཉིད་ཐོང་
ཤིག །བདག་ཉིད་སོད་ཅིག །བདག་ཉིད་སྲོག་དང་བྲལ་བར་བྱེད་དུ་ཆུག་ཤིག་ཅེས་སྨྲས་ན། གལ་ཏེ་ཚུལ་ཁྲིམས་འཆལ་བ་དེ་བདག་ཉིད་གཏོང་བར་བྱེད་དམ། བདག་ཉིད་གསོད་པར་བྱེད་དམ། བདག་ཉིད་སྲོག་དང་བྲལ་བར་བྱེད་དུ་འཇུད་ན་དགེ་སློང་དེ་ཕམ་པར་འགྱུར་རོ། །
གལ་ཏེ་ཚུལ་ཁྲིམས་འཆལ་བ་དེ་འདི་སྙམ་དུ་དེ་ལྟར་ཡིན་ནོ་སྙམ་མོད་ཀྱི་འོན་ཀྱང་འདི་སྐད་ཅེས་ཁོ་བོ་བདག་ཉིད་མི་གཏོང་ངོ་། །ཁོ་བོ་བདག་ཉིད་མི་གསོད་དོ། །ཁོ་བོ་བདག་ཉིད་སྲོག་དང་བྲལ་བར་བྱེད་དུ་མི་འཇུད་དོ་ཞེས་ཟེར་ཞིང་། གལ་ཏེ་བདག་ཉིད་གཏོང་བར་མི་བྱེད། བདག་
ཉིད་གསོད་པར་མི་བྱེད། བདག་ཉིད་སྲོག་དང་བྲལ་བར་བྱེད་དུ་མི་འཇུག་ན། དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གལ་ཏེ་དགེ་སློང་དེ་དེ་སྐད་སྨྲས་ནས་འགྱོད་པར་གྱུར་ཅིང་། དེ་ཚུལ་ཁྲིམས་འཆལ་བ་དེའི་གན་དུ་སོང་སྟེ། འདི་སྐད་ཅེས་

ཚེ་དང་ལྡན་པ་ཤེས་པར་གྱིས་ཤིག །འདི་ལྟ་སྟེ། བྱིས་པ། བླུན་པ། མི་གསལ་བ། མི་མཁས་པ་བདག་གིས་ཏེ་པོར་གྱ་ཙོམ་དང་། བྱུང་རྒྱལ་གྱིས་སོ་སོར་མ་བརྟགས་པར་ཚིག་སྨྲས་ཏེ། འདི་ལྟར་ཚེ་དང་ལྡན་པས་དགེ་བའི་བཤེས་གཉེན་འགའ་ཞིག་མགུ་བར་
བྱས་ན། དེས་ལུས་ཀྱི་ཀུན་ཏུ་སྤྱོད་པ་ཡོངས་སུ་མ་དག་པ་ཉིད་འདི་ལས་བསླང་སྟེ། ལུས་ཀྱིས་ཀུན་ཏུ་སྤྱོད་པ་ཡོངས་སུ་དག་པ་ཉིད་ལ་འཇོག་པ་དང་། ངག་དང་ཡིད་ཀྱིས་ཀུན་ཏུ་སྤྱོད་པ་ཡོངས་སུ་མ་དག་པ་ཉིད་འདི་ལས་བསླང་སྟེ་ངག་དང་། ཡིད་ཀྱི་ཀུན་ཏུ་སྤྱོད་པ་ཡོངས་སུ་
དག་པ་ཉིད་ལ་འཇོག་པར་གྱུར་པ། དེ་ལྟ་ན་ཚེ་དང་ལྡན་པ་ལུས་ཀྱི་ཀུན་དུ་སྤྱོད་པ་ཡོངས་སུ་དག་པ་དང་། ངག་དང་ཡིད་ཀྱིས་ཀུན་ཏུ་སྤྱོད་པ་ཡོངས་སུ་དག་པ་ཡིན་པས་ལུས་ཞིག་ན་ཡང་བདེ་འགྲོ་མཐོ་རིས་ཀྱི་འཇིག་རྟེན་ལྷ་རྣམས་ཀྱི་ནང་དུ་སྐྱེ་བར་འགྱུར་རོ་ཞེས་སྨྲས་པ་ན། གལ་ཏེ་
ཚུལ་ཁྲིམས་འཆལ་བ་དེ་དགེ་སློང་དེ་ལ་འདི་སྐད་ཅེས་ཚེ་དང་ལྡན་པ་འོ་ན་ཁོ་བོས་ཇི་ལྟར་བྱ་ཞེས་ཟེར་བའི་ཚེ་དགེ་སློང་དེས་འདི་སྐད་ཅེས་ཚེ་དང་ལྡན་པ་ཁྱོད་བདག་ཉིད་མ་གཏོང་ཤིག །བདག་ཉིད་མ་གསོད་ཅིག །བདག་ཉིད་སྲོག་དང་བྲལ་བར་བྱེད་དུ་མ་འཇུད་ཅིག་ཅེས་སྨྲས་ནས།
གལ་ཏེ་ཚུལ་ཁྲིམས་འཆལ་བ་དེ་བདག་ཉིད་གཏོང་བར་མི་བྱེད། བདག་ཉིད་གསོད་པར་མི་བྱེད། བདག་ཉིད་སྲོག་དང་བྲལ་བར་བྱེད་དུ་མི་འཇུག་ཀྱང་དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གལ་ཏེ་ཚུལ་ཁྲིམས་འཆལ་བ་དེ་འདི་སྙམ་དུ་དེ་ལྟ་
ཡིན་ནོ་སྙམ་མོད་ཀྱི་འོན་ཀྱང་འདི་སྐད་ཅེས་ཁོ་བོ་བདག་ཉིད་གཏོང་ངོ་། །ཁོ་བོ་བདག་ཉིད་གསོད་དོ། །ཁོ་བོ་བདག་ཉིད་སྲོག་དང་བྲལ་བར་བྱེད་དུ་འཇུད་དོ་ཞེས་ཟེར་ཞིང་། གལ་ཏེ་དེ་བདག་ཉིད་གཏོང་བར་བྱེད། བདག་ཉིད་གསོད་པར་བྱེད། བདག་ཉིད་སྲོག་དང་བྲལ་བར་
བྱེད་དུ་འཇུད་ན་དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་ཏེ། རེ་ཞིག་ཚུལ་ཁྲིམས་འཆལ་བ་ལ་ནི་དེ་ལྟར་རོ། །ཚུལ་ཁྲིམས་དང་ལྡན་པ་ལ་ཇི་ལྟར་ཞེ་ན། འདི་ལྟར་དགེ་སློང་ཚུལ་ཁྲིམས་དང་ལྡན་པ་ལ་ལྷུང་བཟེད་དམ། ཆོས་གོས་སམ། དྲ་བའམ།

ཕོར་བུ་འམ། སྐ་རགས་སམ། དགེ་སྦྱོང་གི་འཚོ་བའི་ཡོ་བྱད་གང་ཡང་རུང་བ་ཅུང་ཞིག་རག་ལུས་པ་ན་དེ་འདི་སྙམ་དུ་སེམས་ཏེ། ཇི་སྲིད་དུ་ཚེ་དང་ལྡན་པ་འདི་གསོན་པ་དེ་སྲིད་དུ་བདག་གིས་ཐོབ་པར་མི་འགྱུར་གྱིས་བདག་དེའི་དྲུང་དུ་སོང་ལ་འཆིར་གཞུག་གོ་སྙམ་ནས་དེ་
དེའི་དྲུང་དུ་སོང་སྟེ་འདི་སྐད་ཅེས་ཚེ་དང་ལྡན་པ་ནི་ཚུལ་ཁྲིམས་དང་ལྡན་པ། དགེ་བའི་ཆོས་ཅན་ལྷུག་པར་གཏོང་ལ་ལག་རྐྱོང་བ། རྣམ་པར་གཏོང་བ་ལ་དགའ་བ། མཆོད་སྦྱིན་རྒྱུན་དུ་བྱེད་པ། གཏོང་བ་ཕུན་སུམ་ཚོགས་པ། སྦྱིན་པ་ལ་འགེད་པར་དགའ་བ་ཡིན་པས་ཚེ་དང་
ལྡན་པ་ཡུལ་གཞན་དུ་སོང་ན་ལོ་ལེགས་ཤིང་མཐོ་རིས་ནི་དར་གྱིས་ཆོད་པ་ཙམ། ཐར་བ་ནི་ཡོལ་བས་བསྒྲིབས་པ་ཙམ་སྟེ། ལུས་ཞིག་ན་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་རོ་ཞེས་སྨྲས་པ་ན། ཚུལ་ཁྲིམས་དང་ལྡན་པ་དེ་དགེ་སློང་དེ་ལ་འདི་སྐད་ཅེས་ཚེ་དང་ལྡན་པ་འོ་ན་ཁོ་བོས་ཇི་
ལྟར་བྱ་ཞེས་ཟེར་བའི་ཚེ་ཚེ་དང་ལྡན་པ་ཚུར་ཤོག །ཁྱོད་ཀྱིས་བདག་ཉིད་ཐོང་ཤིག །བདག་ཉིད་སོད་ཅིག །བདག་ཉིད་སྲོག་དང་བྲལ་བར་བྱེད་དུ་ཆུག་ཤིག་ཅེས་སྨྲས་ནས། གལ་ཏེ་ཚུལ་ཁྲིམས་དང་ལྡན་པ་དེ་བདག་ཉིད་གཏོང་བར་བྱེད་དམ། བདག་ཉིད་གསོད་པར་བྱེད་དམ།
བདག་ཉིད་སྲོག་དང་བྲལ་བར་བྱེད་དུ་འཇུད་ན་དགེ་སློང་དེ་ཕམ་པར་འགྱུར་རོ། །གལ་ཏེ་ཚུལ་ཁྲིམས་དང་ལྡན་པ་དེ་འདི་སྙམ་དུ་དེ་ལྟ་ཡིན་ནོ་སྙམ་མོད་ཀྱི། འོན་ཀྱང་འདི་སྐད་ཅེས་ཁོ་བོ་བདག་ཉིད་མི་གཏོང་ངོ་། །ཁོ་བོ་བདག་ཉིད་མི་གསོད་དོ། །ཁོ་བོ་བདག་ཉིད་སྲོག་དང་བྲལ་བར་
བྱེད་དུ་མི་འཇུད་དོ་ཞེས་ཟེར་ཞིང་། གལ་ཏེ་དེ་བདག་ཉིད་གཏོང་བར་མི་བྱེད། བདག་ཉིད་གསོད་པར་མི་བྱེད། བདག་ཉིད་སྲོག་དང་བྲལ་བར་བྱེད་དུ་མི་འཇུད་ན། དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གལ་ཏེ་དགེ་སློང་དེ་དེ་སྐད་སྨྲས་ནས་འགྱོད་པར་གྱུར་
ཅིང་དེ་ཚུལ་ཁྲིམས་དང་ལྡན་པ་དེའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཤེས་པར་གྱིས་ཤིག །འདི་ལྟ་སྟེ། བྱིས་པ། བླུན་པ། མི་གསལ་བ། མི་མཁས་པ་བདག་གིས་ཏེ་པོར་གྱ་ཙོམ་དང་། བྱུང་རྒྱལ་གྱིས་སོ་སོར་མ་བརྟགས་པར་ཚིག་སྨྲས་ཏེ། འདི་ལྟར་ཚེ་དང་ལྡན་པ་ནི་ཚུལ་

ཁྲིམས་དང་ལྡན་པ་དགེ་བའི་ཆོས་ཅན། ལྷུག་པར་གཏོང་བ། ལག་རྐྱོང་བ་རྣམ་པར་གཏོང་བ་ལ་དགའ་བ། མཆོད་སྦྱིན་རྒྱུན་དུ་བྱེད་པ། གཏོང་བ་ཕུན་སུམ་ཚོགས་པ། སྦྱིན་པ་ལ་འགེད་པར་དགའ་བ་ཡིན་པས་ཚེ་དང་ལྡན་པ་ཇི་སྲིད་ཡུན་རིང་དུ་འཚོ་བར་འགྱུར་བ་དེ་སྲིད་དུ་
བསོད་ནམས་མང་དུ་འཕེལ་བར་འགྱུར་ཞིང་བསོད་ནམས་མང་དུ་འཕེལ་ན་ཡུན་རིང་དུ་མཐོ་རིས་དག་ཏུ་དགའ་བར་འགྱུར་རོ་ཞེས་སྨྲས་པ་ན། གལ་ཏེ་ཚུལ་ཁྲིམས་དང་ལྡན་པ་དེ་དགེ་སློང་དེ་ལ་འདི་སྐད་ཅེས་ཚེ་དང་ལྡན་པ་འོ་ན་ཁོ་བོས་ཇི་ལྟར་བྱ་ཞེས་ཟེར་བའི་ཚེ་དགེ་སློང་དེས་འདི་སྐད་ཅེས་
ཚེ་དང་ལྡན་པ་ཁྱོད་བདག་ཉིད་མ་གཏོང་ཤིག །བདག་ཉིད་མ་གསོད་ཅིག །བདག་ཉིད་སྲོག་དང་བྲལ་བར་བྱེད་དུ་མ་འཇུད་ཅིག་ཅེས་སྨྲས་ནས། གལ་ཏེ་ཚུལ་ཁྲིམས་དང་ལྡན་པ་དེ་བདག་ཉིད་གཏོང་བར་མི་བྱེད། བདག་ཉིད་གསོད་པར་མི་བྱེད། བདག་ཉིད་སྲོག་དང་བྲལ་བར་བྱེད་དུ་
མི་འཇུག་ཀྱང་དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གལ་ཏེ་ཚུལ་ཁྲིམས་དང་ལྡན་པ་དེ་འདི་སྙམ་དུ་དེ་ལྟ་ཡིན་ནོ་སྙམ་མོད་ཀྱི་འོན་ཀྱང་འདི་སྐད་ཅེས་ཁོ་བོ་བདག་ཉིད་གཏོང་ངོ་། །ཁོ་བོ་བདག་ཉིད་གསོད་དོ། །ཁོ་བོ་བདག་ཉིད་སྲོག་དང་བྲལ་བར་བྱེད་
དུ་འཇུད་དོ་ཞེས་ཟེར་ཞིང་། གལ་ཏེ་དེ་བདག་ཉིད་གཏོང་བར་བྱེད། བདག་ཉིད་གསོད་པར་བྱེད། བདག་ཉིད་སྲོག་དང་བྲལ་བར་བྱེད་དུ་འཇུད་ན་དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་ཏེ། ཚུལ་ཁྲིམས་དང་ལྡན་པ་ལ་ནི་དེ་ལྟར་རོ། །ནད་པ་ལ་ཇི་ལྟར་ཞེ་ན་
འདི་ལྟར་དགེ་སློང་ནད་པ་ལ་ལྷུང་བཟེད་དམ། ཆོས་གོས་སམ། དྲ་བའམ། ཕོར་བུའམ། སྐ་རགས་སམ། དགེ་སྦྱོང་གི་འཚོ་བའི་ཡོ་བྱད་གང་ཡང་རུང་བ་ཅུང་ཞིག་རག་ལུས་པ་ན་དེ་འདི་སྙམ་དུ་སེམས་ཏེ། ཚེ་དང་ལྡན་པ་ན་བ། སྡུག་བསྔལ་བ། ནད་ཚབས་ཆེ་བ་འདི་ཇི་སྲིད་དུ་གསོན་
པ་དེ་སྲིད་དུ་བདག་ལ་མི་སྟེར་གྱིས། བདག་དེའི་དྲུང་དུ་སོང་ལ་འཆིར་གཞུག་གོ་སྙམ་ནས་དེ་དེའི་དྲུང་དུ་སོང་སྟེ། འདི་སྐད་ཅེས་ཚེ་དང་ལྡན་པ་ནི་ན་བ། སྡུག་བསྔལ་བ། ནད་ཚབས་ཆེ་བ་ཡིན་པས་ཚེ་དང་ལྡན་པ་ཇི་སྲིད་ཡུན་རིང་དུ་འཚོ་བ་དེ་སྲིད་དུ་ཚོར་བ་སྡུག་བསྔལ་བ། མི་བཟད་པ།

རྩུབ་པ། ཚ་བ། ཡིད་དུ་མི་འོང་བ་དག་ཉམས་སུ་མྱོང་བར་འགྱུར་རོ་ཞེས་སྨྲས་པ་ན། ནད་པ་དེ་དགེ་སློང་དེ་ལ་འདི་སྐད་ཅེས་ཚེ་དང་ལྡན་པ་འོ་ན་ཁོ་བོས་ཇི་ལྟར་བྱ་ཞེས་ཟེར་བའི་ཚེ་ཚེ་དང་ལྡན་པ་ཚུར་ཤོག །ཁྱོད་ཀྱིས་བདག་ཉིད་ཐོང་ཤིག །བདག་ཉིད་སོད་ཅིག །བདག་ཉིད་སྲོག་དང་བྲལ་བར་བྱེད་དུ་
ཆུག་ཤིག་ཅེས་སྨྲས་ནས། གལ་ཏེ་ནད་པ་དེ་བདག་ཉིད་གཏོང་བར་བྱེད་དམ། བདག་ཉིད་གསོད་པར་བྱེད་དམ། བདག་ཉིད་སྲོག་དང་བྲལ་བར་བྱེད་དུ་འཇུད་ན་དགེ་སློང་དེ་ཕམ་པར་འགྱུར་རོ། །གལ་ཏེ་ནད་པ་དེ་འདི་སྙམ་དུ་དེ་ལྟ་ཡིན་ནོ་སྙམ་མོད་ཀྱི། འོན་ཀྱང་འདི་སྐད་ཅེས་ཁོ་བོ་བདག་ཉིད་
མི་གཏོང་ངོ་། །ཁོ་བོ་བདག་ཉིད་མི་གསོད་དོ། །ཁོ་བོ་བདག་ཉིད་སྲོག་དང་བྲལ་བར་བྱེད་དུ་མི་འཇུད་དོ་ཞེས་ཟེར་ཞིང་། གལ་ཏེ་དེ་བདག་ཉིད་གཏོང་བར་མི་བྱེད། བདག་ཉིད་གསོད་པར་མི་བྱེད། བདག་ཉིད་སྲོག་དང་བྲལ་བར་བྱེད་དུ་མི་འཇུད་ན་དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་
པོར་འགྱུར་རོ། །གལ་ཏེ་དགེ་སློང་དེ་དེ་སྐད་སྨྲས་ནས་འགྱོད་པར་གྱུར་ཅིང་དེ་ནད་པ་དེའི་གན་དུ་སོང་སྟེ་འདི་སྐད་ཅེས་ཚེ་དང་ལྡན་པ་ཤེས་པར་གྱིས་ཤིག །འདི་ལྟ་སྟེ། བྱིས་པ། བླུན་པ། མི་གསལ་བ། མི་མཁས་པ་བདག་གིས་ཏེ་པོར་གྱ་ཙོམ་དང་། བྱུང་རྒྱལ་གྱིས་སོ་སོར་མ་བརྟགས་པར་ཚིག་
སྨྲས་ཏེ། འདི་ལྟར་ཚེ་དང་ལྡན་པས་དགེ་བའི་བཤེས་གཉེན་འགའ་ཞིག་མགུ་བར་བྱས་ཏེ་དེས་ཁྱོད་ལ་སྨན་མཐུན་པ་དང་། འཕྲོད་པ་དག་དང་། ཟས་སོ་སོར་བསྟེན་པར་བྱ་བ་དག་དང་། ནད་གཡོག་ཚུལ་དང་མཐུན་པ་དག་གིས་བསྙེན་བཀུར་བྱེད་པར་འགྱུར་ཏེ། དེ་ལྟར་ན་ཚེ་དང་ལྡན་པ་ཡུན་མི་རིང་བ་
ཁོ་ནར་བདེ་བ་དང་། ནད་མེད་པ་དང་། སྟོབས་དང་ལྡན་པ་དང་། གང་དུ་དགའ་བར་འགྲོ་བར་འགྱུར་རོ་ཞེས་སྨྲས་པ་ན། གལ་ཏེ་ནད་པ་དེ་དགེ་སློང་དེ་ལ་འདི་སྐད་ཅེས་ཚེ་དང་ལྡན་པ་འོ་ན་ཁོ་བོས་ཇི་ལྟར་བྱ་ཞེས་ཟེར་བའི་ཚེ་དགེ་སློང་དེས་འདི་སྐད་ཅེས་ཚེ་དང་ལྡན་པ་ཁྱོད་བདག་ཉིད་མ་གཏོང་ཤིག །
བདག་ཉིད་མ་གསོད་ཅིག །བདག་ཉིད་སྲོག་དང་བྲལ་བར་བྱེད་དུ་མ་འཇུད་ཅིག་ཅེས་སྨྲས་ནས། གལ་ཏེ་ནད་པ་དེ་བདག་ཉིད་གཏོང་བར་མི་བྱེད། བདག་ཉིད་གསོད་པར་མི་བྱེད། བདག་ཉིད་སྲོག་དང་བྲལ་བར་བྱེད་དུ་མི་འཇུད་ཀྱང་། དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །

གལ་ཏེ་ནད་པ་དེ་འདི་སྙམ་དུ་དེ་ལྟ་ཡིན་ནོ་སྙམ་མོད་ཀྱི་འོན་ཀྱང་འདི་སྐད་ཅེས་ཁོ་བོ་བདག་ཉིད་གཏོང་ངོ་། །ཁོ་བོ་བདག་ཉིད་གསོད་དོ། །ཁོ་བོ་བདག་ཉིད་སྲོག་དང་བྲལ་བར་བྱེད་དུ་འཇུད་དོ་ཞེས་ཟེར་ཞིང་། གལ་ཏེ་བདག་ཉིད་གཏོང་བར་བྱེད། བདག་ཉིད་གསོད་པར་བྱེད། བདག་ཉིད་སྲོག་དང་
བྲལ་བར་བྱེད་དུ་འཇུད་ན་དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་ཏེ། ནད་པ་ལ་ནི་དེ་ལྟར་རོ། །དེས་ན་དེ་འཆིར་བཅུག་གམ་ཞེས་གསུངས་སོ། །དེ་ལ་འཆི་བའི་བསྔགས་པ་བརྗོད་ཀྱང་རུང་སྟེ་ཞེས་བྱ་བ་ནི་འཆི་བར་མངོན་པར་དགའ་བའི་མདུན་དུ་འཆི་བའི་བསྔགས་པ་བརྗོད་
པའོ། །དེ་ལ་འདི་སྐད་ཅེས་ཀྱེ་མི་ཁྱོད་ཅེས་བྱ་བ་ནི་བོད་པའི་ཚིག་བླ་དགས་ཡིན་ནོ། །འཚོ་བའི་སྡིག་པ་མི་གཙང་བ་ངན་པ་འདིས་ཅི་ཞིག་བྱ། ཀྱེ་མི་ཁྱོད་གསོན་པ་བས་ཤི་བླའོ་ཞེས་བྱ་བ་དེ་དག་ནི་སྨད་པའི་ཚིག་ཡིན་ནོ་ཟེར་ཞིང་ཞེས་བྱ་བ་ནི་རྗོད་པར་བྱེད་ཅིང་ངོ་། །སེམས་ཀྱི་འདོད་པ་དང་། སེམས་
ཀྱི་ཀུན་དུ་རྟོག་པ་དག་གིས་ཞེས་བྱ་བ་ནི་སེམས་ཀྱིས་མངོན་པར་འདོད་པ་དང་། སེམས་ཀྱིས་རྣམ་པར་རྟོག་པ་དག་གིས་སོ། །རྣམ་གྲངས་དུ་མས་ཞེས་བྱ་བ་ནི་རྣམ་པ་མང་པོས་སོ། །དེ་འཆིར་བཅུག་གམ། དེ་ལ་འཆི་བའི་བསྔགས་པ་བརྗོད་དེ་ཞེས་སྨོས་པ་ནི་འཆི་བར་མངོན་པར་དགའ་བའི་
མདུན་དུ་རྣམ་གྲངས་དུ་མས་འཆི་བའི་བསྔགས་པ་བརྗོད་པ་བཟློག་པའི་ཕྱིར་རོ། །དེ་ཡང་རྩོམ་པ་དེས་དུས་བྱས་ན་ཞེས་བྱ་བ་ནི་དེ་ཉིད་ཀྱིས་ཡིན་གྱི་གཞན་གྱིས་མ་ཡིན་ནའོ། །དགེ་སློང་ཞེས་བྱ་བ་ནི་གང་ལ་དགེ་སློང་གི་དངོས་པོ་ཡོད་པ་གང་ཡིན་པའོ། །དགེ་སློང་གི་དངོས་པོ་གང་ཞེ་ན། བསྙེན་པར་
རྫོགས་པ་གང་ཡིན་པའོ། །བསྙེན་པར་རྫོགས་པ་གང་ཞེ་ན། གསོལ་བ་དང་། བཞིའི་ལས་ཀྱི་བྱ་བ་བྱེད་པ་ཉིད་དང་། རྟོག་པ་ཉིད་དང་། ཡང་དག་པར་རྟོག་པ་ཉིད་དང་། མཐར་ཕྱིན་པར་བྱེད་པ་ཉིད་དང་། ཡང་དག་པར་མཐར་ཕྱིན་པར་བྱེད་པ་ཉིད་གང་ཡིན་པ་དང་། གང་ཟག་དེའི་ཁས་
ལེན་པ་དང་། མངོན་པར་ཁས་ལེན་པ་དང་། ཕྱིར་མི་ཟློག་པ་དང་། ཕྱིར་མི་ཟློག་པ་ཉིད་དང་། ངག་དང་། ཚིག་དང་། ཐ་སྙད་དང་། སྐད་དང་། རྗོད་པ་དང་། ངེས་པའི་ཚིག་དང་། ཚིག་གི་ལམ་དང་། ཚིག་གི་སྒྲ་དང་། ངག་གི་ལས་དང་། ངག་གི་རྣམ་པར་རིག་བྱེད་གང་ཡིན་པའོ། །དེ་ཞེས་བྱ་བ་ནི་ཉེ་བར་བསྟན་

པ་དང་། ཀུན་ཏུ་བསྟན་པའི་ཚིག་བླ་དགས་དེའོ། །ཕམ་པར་གྱུར་པ་ཡིན་གྱིས་ཞེས་བྱ་བ་ནི་དེ་མཐར་གྱུར་པ་དང་། ལྟུང་བ་དང་། དམན་པ་དང་། མཇུག་ན་འདུག་པ་དང་། ཐ་ཆད་དང་། ཡིད་དང་མི་མཐུན་པ་ཡིན་པའོ། །ཡང་གང་གིས་ལྟུང་བ་དེ་བྱས་ན་བྱས་མ་ཐག་ཏུ་དགེ་སློང་དུ་མི་རུང་བར་
འགྱུར། དགེ་སྦྱོང་དུ་མི་རུང་། ཤཱཀྱའི་སྲས་ཀྱིར་མི་རུང་། དགེ་སློང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་། ཉམས་པ། བཅོམ་པ། ལྟུང་བ། ཕམ་པར་གྱུར་པ་སྟེ། དེའི་དགེ་སྦྱོང་གི་ཚུལ་ཕྱིར་བླང་དུ་མེད་པར་འགྱུར་རོ། །འདི་ལྟ་སྟེ་དཔེར་ན་ཤིང་ཏ་ལའི་མགོ་
བཅད་ནས་སྔོན་པོར་འགྱུར་དུ་མི་རུང་ལ་འཕེལ་ཞིང་རྒྱས་པ་དང་ཡངས་པར་འགྱུར་དུ་མི་རུང་བ་དེ་བཞིན་དུ་དགེ་སློང་གིས་གནས་དེ་ལྟ་བུ་བྱས་ན་བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང་། ཤཱཀྱའི་སྲས་ཀྱིར་མི་རུང་། དགེ་སློང་གི་དངོས་པོ་ལས་ཉམས་པར་འགྱུར་ཏེ།
དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་། ཉམས་པ། བཅོམ་པ། ལྟུང་བ། ཕམ་པར་གྱུར་པ་སྟེ། དེའི་དགེ་སྦྱོང་གི་ཚུལ་ཕྱིར་བླང་དུ་མེད་པར་འགྱུར་བས་དེས་ན་ཕམ་པར་གྱུར་པ་ཡིན་གྱིས་ཞེས་གསུངས་སོ། །གནས་པར་མི་བྱའོ་ཞེས་བྱ་བ་ནི་དགེ་སློང་རྣམས་ཀྱིས་དེ་དང་གསོ་སྦྱོང་དང་། དགག་
དབྱེ་དང་། གསོལ་བ་དང་། གསོལ་བ་དང་གཉིས་དང་། གསོལ་བ་དང་བཞིའི་ལས་ལ་གནས་པར་མི་བྱའོ། །གང་ཟག་བཅུ་གཉིས་པོ་དག་ཏུ་བསྐོ་བར་མི་བྱ་བ་སྟེ། དེས་ན་གནས་པར་མི་བྱའོ་ཞེས་གསུངས་སོ།། །།འདུལ་བ་རྣམ་པར་འབྱེད་པ། བམ་པོ་བཅུ་པ། དེ་ལ་ལྟུང་བར་ཇི་
ལྟར་འགྱུར་ཞེ་ན།། །།སྡོམ་ལ། བདག་ཉིད་ཀྱིས་ནི་ཟིན་པས་དང་། །ཕྱི་རོལ་དུ་ནི་འཕངས་པས་དང་། །གཉི་ག་དང་ནི་ལྡན་པ་ཡི། །སྡེ་ཚན་ཡང་དག་བསྡུས་པ་ཡིན། །ཇི་ལྟར་བདག་ཉིད་ཀྱིས་ཟིན་པས་ཞེ་ན། དགེ་སློང་གིས་སྐྱེས་པ་དང་། བུད་མེད་དང་། མ་ནིང་ལ་གསད་པའི་སེམས་ཀྱིས་
འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་སོར་མོ་གཅིག་གིས་སྣུན་པར་བྱེད་ཅིང་དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་

ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །སོར་མོ་གཅིག་གིས་ཇི་ལྟ་བ་དེ་བཞིན་དུ་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་སོར་མོ་གཉིས་ཀྱིས་སམ། གསུམ་གྱིས་སམ། བཞིས་སམ། ལྔས་སམ། ཁུ་ཚུར་གྱིས་
སམ། གྲུ་མོས་སམ། ཕྲག་པས་སམ། མགོ་བོས་སམ། གློས་སམ། རྐེད་པས་སམ། བརླས་སམ། པུས་མོས་སམ། རྗེ་ངར་གྱིས་སམ། ལོང་བུས་སམ། རྐང་མཐིལ་གྱིས་སམ། ཐ་ན་རྐང་པའི་མཐེ་བོང་སྣུན་པར་བྱེད་ཅིང་དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་
རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་ཏེ། དེ་ལྟར་བདག་ཉིད་ཀྱིས་ཟིན་པས་སོ། །ཇི་ལྟར་ཕྱི་རོལ་དུ་འཕངས་པས་ཞེ་
ན། དགེ་སློང་གིས་སྐྱེས་པ་དང་། བུད་མེད་དང་། མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་མདས་བསྣུན་པར་བྱེད་ཅིང་དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་
སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ། དེས་དེའི་ཚེ་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །མདས་ཇི་ལྟ་བ་དེ་བཞིན་དུ་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་ལྕགས་མདས་སམ། མདའ་ཕྱེད་
ལྕགས་ལས་བྱས་པས་སམ། སྟེའུ་ཁམས་སམ། མདེའུ་བེའུ་སོ་ལྟ་བུས་སམ། མདེའུ་ཟུར་བཞི་པས་སམ། མདེའུ་ཀ་ར་བཱི་རའི་ལོ་མ་ལྟ་བུས་སམ། མདེའུ་བྱེའུ་སྙིང་མས་སམ། འཁོར་ལོས་སམ། རྡོ་རྗེ་རྩེ་གཅིག་པས་སམ། མདའ་བོ་ཆེས་སམ། མཚོན་རྩེ་གཅིག་པས་སམ། ཐ་ན་རྒྱ་
ཤུག་གི་འབྲས་བུས་སྣུན་པར་བྱེད་ཅིང་དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་

ཏེ། དེ་ལྟར་ཕྱི་རོལ་དུ་འཕངས་པས་སོ། །ཇི་ལྟར་གཉི་ག་དང་ལྡན་པས་ཤེ་ན། དགེ་སློང་གིས་སྐྱེས་པ་དང་། བུད་མེད་དང་། མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་རལ་གྲིས་སྣུན་པར་བྱེད་ཅིང་དེ་ཡང་རྩོམ་པ་དེས་དུས་བྱེད་ན་དགེ་སློང་
ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །རལ་གྲིས་ཇི་ལྟ་བ་དེ་བཞིན་དུ་འདི་ལྟར་རྩོམ་པ་འདིས་འདི་དུས་
བྱེད་པར་གྱུར་ཅིག་སྙམ་པས་ཤང་ལང་གིས་སམ། རལ་གྲི་སོ་གཅིག་པས་སམ། རལ་གྲི་སོ་གཉིས་པས་སམ། མདུང་གིས་སམ། མདུང་ཐུང་གིས་སམ། འཕང་མདུང་གིས་སམ། ཀྱོ་བ་ཁ་བྲག་གིས་སམ། ཚ་ལྕགས་ཀྱིས་སམ། ཐ་ན་རྩྭ་མདས་སྣུན་པར་བྱེད་ཅིང་དེ་ཡང་རྩོམ་པ་
དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་ཏེ། དེ་ལྟར་གཉི་ག་དང་ལྡན་པས་
སོ།། །།སྡོམ་ལ། དུག་དང་ཕྱེ་མའི་སྦྱོར་བ་དང་། །ས་དང་ཤིང་ལ་འཆིང་བ་དང་། །མྱོས་པར་བྱེད་དང་བྲང་འདེབས་དང་། །འཁྲུལ་འཁོར་དང་ནི་རྔོན་སྤྱད་དོ། །དགེ་སློང་གིས་སྐྱེས་པ་དང་། བུད་མེད་དང་། མ་ནིང་ལ་གསད་པའི་སེམས་ཀྱིས། འདི་ལྟར་རྩོམ་པ་འདིས་འདི་དུས་
བྱེད་པར་གྱུར་ཅིག་སྙམ་པས་འདི་ལྟ་སྟེ། བཅའ་བར་རམ། བཟའ་བར་རམ། བལྡག་པར་རམ། བཞིབ་པར་རམ། བཏུང་བར་དུག་གི་སྦྱོར་བ་བྱེད་ཅིང་དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་
ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་སྐྱེས་པ་དང་། བུད་མེད་དང་། མ་ནིང་ལ་གསད་པའི་སེམས་ཀྱིས་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་འདི་ལྟ་སྟེ། དྲིལ་ཕྱིར་རམ། ཁྲུས་སུ་འམ།

མཉེ་བར་རམ། ཕྲེང་བ་དང་། དྲི་དང་། བྱུག་པར་རམ། བདུག་སྤོས་སུ་དུག་གི་ཕྱེ་མའི་སྦྱོར་བ་བྱེད་ཅིང་། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་
དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །འཆིང་བ་ནི་གཉིས་ཏེ། ས་ལ་འཆིང་བ་དང་། ཤིང་ལ་འཆིང་བའོ། །དགེ་སློང་གིས་སྐྱེས་པ་དང་། བུད་མེད་དང་། མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་
སྙམ་པས་སམ། སེང་གེ་དག་གམ། སྟག་དག་གམ། གུང་དག་གམ། མཚའ་དག་གམ། སྤྱང་ཀི་དག་གིས་ཟོས་པར་གྱུར་པས་སམ། རླུང་དང་ཉི་མ་དག་གིས་ཡོངས་སུ་སྐམ་པ་དང་། ཡོངས་སུ་ཟད་པ་དང་། ཡོངས་སུ་གཏུགས་པར་གྱུར་པས་སམ། བཀྲེས་པ་དང་སྐོམ་པའི་ཉམ་ཆུང་བས་
དཀྲིས་པས་དུས་བྱེད་པར་གྱུར་ཅིག་སྙམ་པས་སའི་འཆིང་བར་འཇོག་པར་བྱེད་ཅིང་ལོང་བུ་མན་ཆད་འཇུད་པར་བྱེད་ལ། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་
ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །ལོང་བུ་མན་ཆད་ཇི་ལྟ་བ་དེ་བཞིན་དུ་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག །སྙམ་པས་སམ། སེང་གེ་དག་གམ། སྟག་དག་གམ། གུང་དག་གམ། མཚའ་དག་
གམ། སྤྱང་ཀི་དག་གིས་ཟོས་པར་གྱུར་པས་སམ། རླུང་དང་ཉི་མ་དག་གིས་ཡོངས་སུ་སྐམ་པ་དང་། ཡོངས་སུ་ཟད་པ་དང་། ཡོངས་སུ་གཏུགས་པར་གྱུར་པས་སམ། བཀྲེས་པ་དང་སྐོམ་པའི་ཉམ་ཆུང་བས་དཀྲིས་པས་དུས་བྱེད་པར་གྱུར་ཅིག་སྙམ་པས་བྱིན་པ་མན་ཅད་དམ། བརླ་
མན་ཅད་དམ། རྐེད་པ་མན་ཆད་དམ། བྲང་མན་ཆད་དམ། མགྲིན་པ་མན་ཆད་འཇུད་པར་བྱེད་ལ། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་

མ་ཡིན་ན། དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་སྐྱེས་པ་དང་། བུད་མེད་དང་། མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་སམ། སེང་གེ་དག་གམ། སྟག་དག་གམ། གུང་དག་གམ།
མཚའ་དག་གམ། སྤྱང་ཀི་དག་གིས་ཟོས་པར་གྱུར་པས་སམ། རླུང་དང་ཉི་མ་དག་གིས་ཡོངས་སུ་སྐམ་པ་དང་། ཡོངས་སུ་ཟད་པ་དང་། ཡོངས་སུ་གཏུགས་པར་གྱུར་པས་སམ། བཀྲེས་པ་དང་སྐོམ་པས་ཉམ་ཆུང་བའི་དཀྲིས་པས་དུས་བྱེད་པར་གྱུར་ཅིག་སྙམ་པས་ཤིང་ལ་འཆིང་
བར་བྱེད། འཇོག་པར་བྱེད་ཅིང་། ཀ་བའམ། ཕུར་པ་བརྟན་པོ་ལ་འབྲེང་རློན་གྱིས་ལོང་བུ་མན་ཆད་འཆིང་བར་བྱེད་ལ། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་
ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །ལོང་བུ་མན་ཆད་ཇི་ལྟ་བ་དེ་བཞིན་དུ་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་སམ། སེང་གེ་དག་གམ། སྟག་དག་གམ། གུང་དག་གམ། མཚའ་དག་
གམ། སྤྱང་ཀི་དག་གིས་ཟོས་པར་གྱུར་པས་སམ། རླུང་དང་ཉི་མ་དག་གིས་ཡོངས་སུ་སྐམ་པ་དང་། ཡོངས་སུ་ཟད་པ་དང་། ཡོངས་སུ་གཏུགས་པར་གྱུར་པས་སམ། བཀྲེས་པ་དང་སྐོམ་པའི་ཉམ་ཆུང་བས་དཀྲིས་པས་དུས་བྱེད་པར་གྱུར་ཅིག་སྙམ་པས་བྱིན་པ་མན་ཆད་དམ། བརླ་མན་
ཆད་དམ། རྐེད་པ་མན་ཆད་དམ། བྲང་མན་ཆད་དམ། མགྲིན་པ་མན་ཆད་འཆིང་བར་བྱེད་ལ། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་
མ་ཡིན་ན། དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་སྐྱེས་པ་དང་། བུད་མེད་དང་། མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་སམ། སེང་གེ་དག་གམ། སྟག་དག་གམ། གུང་དག་གམ།

མཚའ་དག་གམ། སྤྱང་ཀི་དག་གིས་ཟོས་པར་གྱུར་པས་སམ། རླུང་དང་ཉི་མ་དག་གིས་ཡོངས་སུ་སྐམ་པ་དང་། ཡོངས་སུ་ཟད་པ་དང་། ཡོངས་སུ་གཏུགས་པར་གྱུར་པས་སམ། བཀྲེས་པ་དང་སྐོམ་པའི་ཉམ་ཆུང་བས་དཀྲིས་པས་དུས་བྱེད་པར་གྱུར་ཅིག་སྙམ་པས་
ཆང་གིས་མྱོས་པར་བྱེད་དུ་འཇུད་ཅིང་། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་
པ་སྦོམ་པོར་འགྱུར་རོ། །ཆང་གིས་ཇི་ལྟ་བ་དེ་བཞིན་དུ་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་སམ། རྒྱལ་པོའམ། བློན་པོ་འམ། ཆོམ་རྐུན་པ་དག་གིས་སམ། གཡོན་ཅན་དག་གིས་སམ། ཐོང་མི་པ་དག་གིས་སམ། དགྲ་བོ་དག་གིས་སམ།
ཕས་ཀྱི་དགྲ་དག་གིས་དུས་བྱེད་པར་གྱུར་ཅིག་སྙམ་པས་བཅོས་པའི་ཆང་གིས་སམ། འབྲུའི་ཆང་དང་། བཅོས་པའི་ཆང་གིས་སམ། རྩ་བའི་བཏུང་བས་སམ། སྡོང་བུའི་བཏུང་བས་སམ། འདབ་མའི་བཏུང་བས་སམ། མེ་ཏོག་གི་བཏུང་བས་སམ། འབྲས་བུའི་བཏུང་
བས་མྱོས་པར་བྱེད་དུ་འཇུད་དམ། གསང་སྔགས་དག་གམ། སྨན་དག་གམ། རིག་སྔགས་དག་གིས་སེམས་འཁྲུགས་པར་བྱེད་དམ། གཉིད་ལོག་པར་བྱེད་ཅིང་། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་
ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་སྐྱེས་པ་དང་། བུད་མེད་དང་། མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་
དུས་བྱེད་པར་གྱུར་ཅིག་སྙམ་པས་བྲང་དུ་འདེབས་པ་སྦྱོར་བར་བྱེད་ཅིང་། སྐྱེས་པ་འམ། བུད་མེད་དམ། མ་ནིང་ཆེ་གེ་མོ་ཞིག་འོང་བར་འགྱུར་བ་དེའི་ལག་པ་འམ། རྐང་པ་འམ། གདོང་ངམ། ཡན་ལག་དང་། ཉིང་ལག་གང་ཡང་རུང་བ་གཅོད་པར་གྱུར་ཅིག་སྙམ་

པའམ། ཐམས་ཅད་ཀྱི་ཐམས་ཅད་དུ་སྲོག་དང་བྲལ་བར་བྱེད་པར་གྱུར་ཅིག་སྙམ་པས་དེ་ལ་ཡང་རལ་གྲི་འམ། སྤུ་གྲིའམ། ཆུ་གྲི་འདོགས་པར་བྱེད་ཅིང་། གལ་ཏེ་དེས་དེའི་ལག་པའམ། རྐང་པའམ། གདོང་ངམ། ཡན་ལག་དང་ཉིང་ལག་གང་ཡང་རུང་བ་གཅོད་པར་
བྱེད་དམ། ཐམས་ཅད་ཀྱི་ཐམས་ཅད་དུ་སྲོག་དང་བྲལ་བར་བྱེད་ཅིང་དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་
སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །འཁྲུལ་འཁོར་དང་རྔོན་སྤྱད་ལ་ཡང་དེ་བཞིན་དུ་བརྗོད་པར་བྱའོ།། །།སྡོམ་ལ། རོ་ལངས་དང་ནི་རོ་ལངས་ཕྱེད། །དཀུ་མཉེད་པ་དང་སྲོག་འགོག་དང་། །གཡང་ས་ཆུ་དང་མེ་དང་ནི། །མངགས་པ་དང་ནི་གྲང་དྲོའོ། །དགེ་སློང་
གིས་སྐྱེས་པ་དང་། བུད་མེད་དང་། མ་ནིང་ལ་གསད་པའི་སེམས་ཀྱིས་ཟླ་བ་མར་གྱི་ངོའི་ཚེས་བཅུ་བཞི་ལ་དུར་ཁྲོད་དུ་སོང་སྟེ་ཤི་བའི་རོ་ཐ་ན་སྲོག་ཆགས་གྲོག་སྦུར་ཕྲ་མོས་ཀྱང་མ་སྨས་མ་ཉམས་པ་ཚོལ་བར་བྱེད་ཅིང་རྙེད་ནས་ས་ཀར་གྱིས་དྲིལ་ཕྱི་བྱེད་ཅིང་། ས་ཀར་གྱིས་དྲིལ་ཕྱི་
བྱས་ནས་སྤོས་ཆུས་འཁྲུ་བར་བྱེད་ལ་སྤོས་ཆུས་བཀྲུས་ནས་རས་སར་པ་སྐོན་པར་བྱད་ཅིང་། དེའི་རྐང་པ་གཉིས་ཀྱང་སྐུད་པར་བྱེད། གསང་སྔགས་ཀྱང་རྗོད་པར་བྱེད་པ་ན་དེ་ལངས་པར་འགྱུར་ཏེ་བྱ་སྨྱངས་བྱེད་པའི་ཚེ་དེས་དེ་འཁོར་ལོ་གཉིས་དང་ལྡན་པའི་ཤིང་རྟ་ལ་འཇོག་
པར་བྱེད་ཅིང་། དེའི་མགུལ་དུ་དྲིལ་བུ་གཉིས་ཀྱང་འདོགས་པར་བྱེད། ལག་པར་རལ་གྲི་སོ་གཉིས་པ་ཡང་སྦྱིན་པར་བྱེད་པ་ན་དེ་ལངས་ཏེ་བླག་བླག་ཟེར་ཞིང་འདི་སྐད་ཅེས་ངས་གང་གཏང་བར་བྱ། ངས་གང་གསད་པར་བྱ། ངས་གང་སྲོག་དང་བྲལ་བར་བྱ་ཞེས་ཟེར་བའི་ཚེ་དགེ་
སློང་དེས་རོ་ལངས་དེ་ལ་འདི་སྐད་ཅེས་ཁྱོད་ཀྱིས་སྐྱེས་པ་དང་། བུད་མེད་དང་། མ་ནིང་ཆེ་གེ་མོ་ཞིག་ཤེས་སམ་ཞེས་སྨྲས་པ་ན། ཤེས་སོ་ཞེས་ཟེར་བའི་ཚེ་དེ་ཐོང་ཤིག །དེ་སོད་ཅིག །དེ་སྲོག་དང་བྲལ་བར་གྱིས་ཤིག་ཅེས་སྨྲས་ནས། གལ་ཏེ་རོ་ལངས་དེས་དེ་གཏོང་བར་བྱེད་དམ།

གསོད་པར་བྱེད་དམ། སྲོག་དང་བྲལ་བར་བྱེད་ན་དགེ་སློང་ཕམ་པར་འགྱུར་རོ། །གལ་ཏེ་དེ་ན་སྲུང་བར་བྱེད་པ་འདི་ལྟ་བུ་འདི་ལྟ་སྟེ། སྒོར་ནགས་ཀྱི་ཕྲེང་བ་བཏགས་པ་འམ། བུམ་པ་གང་བ་བཞག་པ་འམ། བ་དང་བེའུ་འདྲ་བ་བཏགས་པ་འམ། ལུག་བཏགས་
པ་འམ། མཆིག་མཆིག་གུ་དང་བཅས་པ་བཞག་པ་འམ། སྒོར་འཁོར་གཏན་བསྙལ་བ་འམ། མེ་ཚུགས་སྦར་བ་འམ། རྒྱལ་བ་བཞུགས་པ་འམ། རྒྱལ་བས་བཀའ་སྩལ་པའམ། འཁོར་ལོས་སྒྱུར་བ་འམ། འཁོར་ལོས་སྒྱུར་བའི་མའི་མངལ་དུ་འཁོར་ལོས་སྒྱུར་བ་ཞུགས་
པའམ། བྱང་ཆུབ་སེམས་དཔའ་འམ། བྱང་ཆུབ་སེམས་དཔའ་མའི་མངལ་དུ་བྱང་ཆུབ་སེམས་དཔའ་ཞུགས་པ་འདུག་པ་འམ། སོ་སོར་ཐར་པའི་མདོ་མ་བཏོན་པ་འདོན་པར་བྱེད་པ་འམ། བཏོན་པ་རྒྱ་ཆེར་དབྱངས་ཀྱིས་ཁ་ཏོན་བྱེད་པའམ། མདོ་སྡེའི་སྡེ་ཚན་བཞི་པོ་གང་ཡང་རུང་
བ་མ་བཏོན་པ་འདོན་པར་བྱེད་པའམ། བཏོན་པ་རྒྱ་ཆེར་དབྱངས་ཀྱིས་ཁ་ཏོན་བྱེད་པའམ། མདོ་ཆེན་པོ་ཆེ་བ་འདི་ལྟ་སྟེ། ཆུང་ངུ་སྟོང་པ་ཉིད་དང་། ཆེན་པོ་སྟོང་པ་ཉིད་དང་། ལྔ་གསུམ་པ་དང་། སྒྱུ་མའི་དྲ་བ་དང་། གཟུགས་ཅན་སྙིང་པོས་བསུ་བ་དང་། རྒྱལ་མཚན་དམ་པ་
དང་། ཀུན་ཏུ་རྒྱུ་བ་དང་། ཀུན་ཏུ་མི་རྒྱུ་བ་དང་། མཐུན་པའི་མདོ་དང་། འདུས་པ་ཆེན་པོའི་མདོ་དེ་དག་མ་བཏོན་པ་འདོན་པར་བྱེད་པ་དང་། བཏོན་པ་དག་རྒྱ་ཆེར་དབྱངས་ཀྱིས་ཁ་ཏོན་བྱེད་པ་བཞག་པར་གྱུར་ན། གཏང་ཉེས་པ་ཡིན་པས་རོ་ལངས་ཀྱིས་དགེ་སློང་བདག་ཉིད་གསོད་
པར་སེམས་པར་འགྱུར་བས། གལ་ཏེ་རོ་ལངས་ཀྱིས་དགེ་སློང་གསོད་པར་བྱེད་ན་དགེ་སློང་ལ་ཉེས་པ་སྦོམ་པོར་འགྱུར་རོ། །གལ་ཏེ་དགེ་སློང་གིས་རོ་ལངས་གསོད་པར་བྱེད་ན་དགེ་སློང་ལ་ཉེས་པ་སྦོམ་པོ་གཉིས་སུ་འགྱུར་ཏེ། གཅིག་ནི་རོ་ལངས་བསད་པ་ལས་སོ། །གཉིས་པ་ནི་
སྦྱོར་བ་སྔ་མ་དེ་ཉིད་ལས་སོ། །རོ་ལངས་ལ་ཇི་ལྟ་བ་བཞིན་དུ་རོ་ལངས་ཕྱེད་ལ་ཡང་དེ་བཞིན་ཏེ། རོ་ལངས་དང་། རོ་ལངས་ཕྱེད་ལ་བྱེ་བྲག་ནི་འདི་ཡོད་དེ། འཁོར་ལོ་གཅིག་དང་ལྡན་པའི་ཤིང་རྟ་ལ་འཇོག་པ་དང་། མགུལ་དུ་དྲིལ་བུ་གཅིག་འདོགས་པ་དང་། ལག་པར་རལ་གྲི་སོ་

གཅིག་པ་སྦྱིན་པ་ནི་རོ་ལངས་ཕྱེད་ཅེས་བྱའོ། །ལྟུང་བ་རྣམ་པར་གཞག་པ་ནི་ཐམས་ཅད་སྔ་མ་བཞིན་དུ་བརྗོད་པར་བྱའོ། །དགེ་སློང་གིས་བུད་མེད་གསད་པའི་སེམས་ཀྱིས་བུད་མེད་གསད་པར་བྱའི། མངལ་ན་གནས་པ་ནི་མི་བྱའོ་སྙམ་པས་སྦྲུམ་མའི་དཀུ་མཉེད་པར་བྱེད་ཅིང་།
གལ་ཏེ་བུད་མེད་ཤི་བར་གྱུར་ལ། མངལ་ན་གནས་པ་མ་ཡིན་ན་དགེ་སློང་ཕམ་པར་འགྱུར་རོ། །གལ་ཏེ་མངལ་ན་གནས་པ་ཤི་བར་གྱུར་ལ་བུད་མེད་མ་ཤི་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གཉི་ག་ཤི་བར་གྱུར་ན་དགེ་སློང་ཕམ་པར་
འགྱུར་རོ། །གཉི་ག་ཤི་བར་མ་གྱུར་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་མངལ་ན་གནས་པ་གསད་པའི་སེམས་ཀྱིས་མངལ་ན་གནས་པ་གསད་པར་བྱའི། བུད་མེད་ནི་མི་བྱའོ་སྙམ་པས་བུད་མེད་ཀྱི་དཀུ་མཉེད་པར་བྱེད་ཅིང་།
གལ་ཏེ་མངལ་ན་གནས་པ་ཤི་བར་གྱུར་ལ། བུད་མེད་མ་ཤི་ན་དགེ་སློང་ཕམ་པར་འགྱུར་རོ། །གལ་ཏེ་བུད་མེད་ཤི་བར་གྱུར་ལ་མངལ་ན་གནས་པ་མ་ཤི་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གཉི་ག་ཤི་བར་གྱུར་ན་དགེ་སློང་ཕམ་པར་འགྱུར་རོ། །གཉི་
ག་ཤི་བར་མ་གྱུར་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་སྐྱེས་པ་དང་། བུད་མེད་དང་། མ་ནིང་ལ་གསད་པའི་སེམས་ཀྱིས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད། དཀྱིལ་འཁོར་ཉུག་པར་བྱེད། མེ་སྦར་བར་
བྱེད། ཡམ་སྲེག་ཤིང་འཇུད་པར་བྱེད། གསང་སྔགས་རྗོད་པར་བྱེད་ཅིང་ཡམ་སྲེག་ཤིང་འདི་དག་ཀྱང་ཚིག་པར་གྱུར་ཅིག །སྐྱེས་པ་འམ། བུད་མེད་དམ། མ་ནིང་ཆེ་གེ་མོ་ཞིག་གི་སྲོག་ཀྱང་ཉེ་བར་འགག་པར་གྱུར་ཅིག་སྙམ་པ་ལས། གལ་ཏེ་ཡམ་སྲེག་ཤིང་དེ་དག་འཚིག་པ་ན་
སྐྱེས་པ་འམ། བུད་མེད་དམ། མ་ནིང་དེའི་སྲོག་ཉེ་བར་འགག་པར་མ་གྱུར་ན། དགེ་སློང་ལ་ཉེས་པ་སྦོམ་པོར་འགྱུར་རོ། །གལ་ཏེ་ཡམ་སྲེག་ཤིང་དེ་དག་ཚིག་པར་གྱུར་པ་ན་སྐྱེས་པའམ། བུད་མེད་དམ། མ་ནིང་དེའི་སྲོག་ཀྱང་ཉེ་བར་འགགས་པར་གྱུར་ན། དགེ་སློང་ཕམ་པར་འགྱུར་རོ། །

དགེ་སློང་གིས་སྐྱེས་པ་དང་། བུད་མེད་དང་། མ་ནིང་ལ་གསད་པའི་སེམས་ཀྱིས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད། ཏིལ་བྲེའུ་ཆུང་གང་ངམ། ཡུངས་ཀར་བྲེའུ་ཆུང་གང་གཏུན་དུ་བླུགས་ཏེ་གཏུན་བུའི་རྩེ་མོས་རྡུང་བར་བྱེད། གསང་
སྔགས་རྗོད་པར་བྱེད་ཅིང་། འབྲུ་འདི་དག་ཀྱང་འདྲེས་པར་གྱུར་ཅིག་སྐྱེས་པའམ། བུད་མེད་དམ། མ་ནིང་ཆེ་གེ་མོ་ཞིག་གི་སྲོག་ཀྱང་ཉེ་བར་འགག་པར་གྱུར་ཅིག་སྙམ་པ་ལས། གལ་ཏེ་འབྲུ་དེ་དག་འདྲེ་བ་ན་སྐྱེས་པ་འམ། བུད་མེད་དམ། མ་ནིང་དེའི་སྲོག་ཉེ་བར་འགགས་པར་མ་གྱུར་
ན་དགེ་སློང་ལ་ཉེས་པ་སྦོམ་པོར་འགྱུར་རོ། །གལ་ཏེ་འབྲུ་དེ་དག་འདྲེས་པར་གྱུར་པ་ན་སྐྱེས་པ་འམ། བུད་མེད་དམ། མ་ནིང་དེའི་སྲོག་ཀྱང་ཉེ་བར་འགགས་པར་གྱུར་ན་དགེ་སློང་ཕམ་པར་འགྱུར་རོ། །དགེ་སློང་གིས་སྐྱེས་པ་དང་། བུད་མེད་དང་། མ་ནིང་ལ་གསད་པའི་སེམས་ཀྱིས་
ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད། འོ་མ་བྲེའུ་ཆུང་གང་ངམ། ཞོ་བྲེའུ་ཆུང་གང་སྣོད་དུ་བླུགས་ཏེ་སོར་མོས་དཀྲུག་པར་བྱེད། གསང་སྔགས་རྗོད་པར་བྱེད་ཅིང་། འདི་ཡང་ཁྲག་ཏུ་གྱུར་ཅིག །སྐྱེས་པ་འམ། བུད་མེད་དམ། མ་ནིང་ཆེ་གེ་མོ་ཞིག་
གི་སྲོག་ཀྱང་ཉེ་བར་འགག་པར་གྱུར་ཅིག་སྙམ་པ་ལས་གལ་ཏེ་དེ་ཁྲག་ཏུ་འགྱུར་བ་ན་སྐྱེས་པ་འམ། བུད་མེད་དང་། མ་ནིང་དེའི་སྲོག་ཉེ་བར་འགགས་པར་མ་གྱུར་ན། དགེ་སློང་ལ་ཉེས་པ་སྦོམ་པོར་འགྱུར་རོ། །གལ་ཏེ་དེ་ཁྲག་ཏུ་གྱུར་པ་ན། སྐྱེས་པ་འམ། བུད་མེད་དམ། མ་
ནིང་དེའི་སྲོག་ཀྱང་ཉེ་བར་འགགས་པར་གྱུར་ན་དགེ་སློང་ཕམ་པར་འགྱུར་རོ། །དགེ་སློང་གིས་སྐྱེས་པ་དང་། བུད་མེད་དང་། མ་ནིང་ལ་གསད་པའི་སེམས་ཀྱིས་ཚོན་སྣ་ལྔའི་སྐུད་པས་སྣམ་སྦྱར་ལ་འཚེམ་པར་བྱེད། གསང་སྔགས་རྗོད་པར་བྱེད་ཅིང་། སྣམ་སྦྱར་འདི་ཡང་བཙེམས་པར་
གྱུར་ཅིག །སྐྱེས་པ་འམ། བུད་མེད་དམ། མ་ནིང་ཆེ་གེ་མོ་ཞིག་གི་སྲོག་ཀྱང་ཉེ་བར་འགགས་པར་གྱུར་ཅིག་སྙམ་པ་ལས་གལ་ཏེ་སྣམ་སྦྱར་དེ་འཚེམ་པ་ན་སྐྱེས་པ་འམ། བུད་མེད་དམ། མ་ནིང་དེའི་སྲོག་ཉེ་བར་འགགས་པར་མ་གྱུར་ན་དགེ་སློང་ལ་ཉེས་པ་སྦོམ་པོར་འགྱུར་རོ། །གལ་

ཏེ་སྣམ་སྦྱར་དེ་བཙེམས་པར་གྱུར་པ་ན་སྐྱེས་པ་འམ། བུད་མེད་དམ། མ་ནིང་དེའི་སྲོག་ཀྱང་ཉེ་བར་འགགས་པར་གྱུར་ན་དགེ་སློང་ཕམ་པར་འགྱུར་རོ། །དགེ་སློང་གིས་སྐྱེས་པ་དང་། བུད་མེད་དང་། མ་ནིང་ལ་གསད་པའི་སེམས་ཀྱིས་ས་ལ་རི་མོ་བདུན་འདྲེན་པར་བྱེད། གསང་
སྔགས་རྗོད་པར་བྱེད་ཅིང་། རི་མོ་འདི་དག་ཀྱང་བྱིད་པར་གྱུར་ཅིག །སྐྱེས་པ་འམ། བུད་མེད་དམ། མ་ནིང་ཆེ་གེ་མོ་ཞིག་གི་སྲོག་ཀྱང་ཉེ་བར་འགགས་པར་གྱུར་ཅིག་སྙམ་པ་ལས། གལ་ཏེ་རི་མོ་དེ་དག་འབྱིད་པ་ན་སྐྱེས་པ་འམ། བུད་མེད་དམ། མ་ནིང་དེའི་སྲོག་ཉེ་བར་
འགགས་པར་མ་གྱུར་ན་དགེ་སློང་ལ་ཉེས་པ་སྦོམ་པོར་འགྱུར་རོ། །གལ་ཏེ་རི་མོ་དེ་དག་བྱིད་པར་གྱུར་པ་ན། སྐྱེས་པ་འམ། བུད་མེད་དམ། མ་ནིང་དེའི་སྲོག་ཀྱང་ཉེ་བར་འགགས་པར་གྱུར་ན་དགེ་སློང་ཕམ་པར་འགྱུར་རོ། །དགེ་སློང་གིས་སྐྱེས་པ་དང་། བུད་མེད་དང་།
མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་གཡང་ས་ནས་གཡང་དུ་གཏོང་བར་བྱེད་ཅིང་། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་
པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གཡངས་ནས་ཇི་ལྟ་བ་དེ་བཞིན་དུ་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་ཁང་བཟངས་ནས་སམ།
ར་བ་ལས་སམ། གླང་པོ་ཆེའི་གཤུལ་ནས་སམ། རྟའི་རྒྱབ་ནས་སམ། ཁྱོགས་སྤྱིལ་ལས་སམ། ཁྲི་ལས་སམ། ཁྲིའུ་ལས་སམ། ཕྲག་པ་ནས་སམ། བློ་ནས་སམ། རྐེད་པ་ནས་སམ། བརླ་ནས་སམ། བྱིན་པ་ནས་སམ། ཐ་ན་ལོང་བུ་ནས་ས་ལ་ལྟུང་བར་བྱེད་ཅིང་། དེ་ཡང་རྩོམ་པ་
དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་སྐྱེས་པ་དང་། བུད་

མེད་དང་། མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་ཆུར་འཇུད་པར་བྱེད་ཅིང་དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །
དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །ཆུར་ཇི་ལྟ་བ་དེ་བཞིན་དུ་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་ཤར་ཕྱོགས་ཀྱི་རྒྱ་མཚོ་ཆེན་པོར་རམ། ལྷོ་ཕྱོགས་ཀྱི་རྒྱ་མཚོ་ཆེན་པོར་
རམ། ནུབ་ཕྱོགས་ཀྱི་རྒྱ་མཚོ་ཆེན་པོར་རམ། བྱང་ཕྱོགས་ཀྱི་རྒྱ་མཚོ་ཆེན་པོར་རམ། མཚོར་རམ། ལྟེང་ཀར་རམ། ལྗན་ལྗིན་དུ་འཇུད་དམ། ཐ་ན་དེའི་ཁར་སྙིམ་པའི་ཆུ་ལྡུགས་པར་བྱེད་ཅིང་། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་
དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་སྐྱེས་པ་དང་། བུད་མེད་དང་། མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་
འདི་དུས་བྱེད་པར་གྱུར་ཅིག་སྙམ་པས་མེར་འཇུད་པར་བྱེད་ཅིང་དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་
བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །མེར་ཇི་ལྟ་བ་དེ་བཞིན་དུ་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་གྲོང་ཁྱེར་སྲེག་པའམ། གྲོང་སྲེག་པ་འམ། ཡུལ་སྲེག་པ་འམ། རྒྱལ་ཐབས་སམ། ད་ནུར་དུ་འཇུད་དམ། ཐ་ན་དེའི་ཁར་མགལ་བ་ཙམ་འཇུད་པར་
བྱེད་ཅིང་། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་

གིས་སྐྱེས་པ་དང་། བུད་མེད་དང་། མ་ནིང་ལ་གསོད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས། སེང་གེ་དག་གམ། སྟག་དག་གམ། གུང་དག་གམ། མཚའ་དག་གམ། སྤྱང་ཀི་དག་གིས་ཟོས་པར་གྱུར་པས་སམ། ཉི་མ་དང་རླུང་དག་གིས་ཡོངས་སུ་
སྐམ་པ་དང་། ཡོངས་སུ་ཟད་པ་དང་། ཡོངས་སུ་གཏུགས་པར་གྱུར་པས་སམ། བཀྲེས་པ་དང་། སྐོམ་པའི་ཉམ་ཆུང་བས་དཀྲིས་པས་དུས་བྱེད་པར་གྱུར་ཅིག་སྙམ་པས་འཇིགས་པ་དང་བཅས་པའི་ཕྱོགས་སུ་མངག་པ་ཉིད་དུ་གཏོང་བར་བྱེད་ཅིང་། དེ་ཡང་རྩོམ་པ་དེས་དུས་བྱེད་ན་དགེ་
སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་སྐྱེས་པ་དང་། བུད་མེད་དང་། མ་ནིང་ལ་གསད་
པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་དུས་གྲང་བ། མཆོག་ཏུ་གྲང་བ་གང་དག་ཡིན་པ་དེ་དག་གི་ཚེས་བརྒྱད་ཀྱི་བར་གང་དག་ཏུ་འོད་མ་འགས་པའི་རླུང་དག་ལྡང་བ་དེ་དག་ཏུ་ཉིན་མོ་སྟེང་གཡོགས་པར་འཛིན་དུ་བཅུག་ནས་མཚན་མོ་བླ་གབ་མེད་པར་འཛིན་ཅིང་
དེའི་སྟེང་དུ་སོག་མའི་ཆག་ཆག་འདེབས་པར་བྱེད་ཅིང་། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་
པ་སྦོམ་པོར་འགྱུར་རོ། །དགེ་སློང་གིས་སྐྱེས་པ་དང་། བུད་མེད་དང་། མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་དུས་ཚ་བ། མཆོག་ཏུ་ཚ་བ་གང་དག་ཡིན་པ། དེ་དག་གི་སོ་གའི་གུང་གི་ཚ་བ་ལ་བབ་པ་གང་དག་ཏུ་སྲོག་ཆགས་ཕྲ་མོ་སྐྱེ་བ་དེ་དག་ཏུ་ཉིན་མོ་བླ་
གབ་མེད་པར་འཛིན་དུ་བཅུག་ནས་མཚན་མོ་སྟེང་གཡོགས་པར་འཛིན་ཅིང་། དེའི་ལུས་ལ་གསེག་གམ། རེ་ལྡེས་ཀྱང་འཁྲི་བར་བྱེད། དུ་བ་རྔུབ་པས་ཀྱང་འདུག་པར་བྱེད་ཅིང་། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་

ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ།། །།སྡོམ་ལ། བསྲོ་ཁང་དང་ནི་མེ་ཁང་དང་། །འཆར་ཀ་དང་ནི་
གཉིས་པོ་དང་། །སྐྱོང་མ་དང་ནི་བཅུ་བདུན་སྡེ། །རི་བྲགས་པ་དང་རྒན་ཞུགས་སོ། །སངས་རྒྱས་བཅོམ་ལྡན་འདས་འབྲོག་གནས་ན་འབྲོག་གི་ནགས་མཆོག་ན་བཞུགས་སོ། །དེ་ན་དགེ་སློང་བསོད་སྙོམས་པ་ཞིག་ཁྱིམ་བདག་ཅིག་གི་སྡུམ་པར་དུས་དང་མཐུན་པའི་
དུས་སུ་འགྲོ་ཞིང་ཆོས་ཀྱང་སྟོན་པར་བྱེད་དོ། །ཇི་ཙམ་ན་དགེ་སློང་དེས་ཁྱིམ་བདག་དེ་སྐྱབས་སུ་འགྲོ་བ་དང་། བསླབ་པའི་གཞི་དག་ལ་རབ་ཏུ་བཞག་གོ། །དེ་ནས་ཡང་དགེ་སློང་དེ་ཉེ་བར་སོང་ནས་ཁྱིམ་བདག་དེ་ལ་རྫས་ལས་བྱུང་བའི་བསོད་ནམས་བྱ་བའི་གཞི་བདུན་པོ་དག་གི་
བསྔགས་པ་རྒྱ་ཆེར་བརྗོད་པ་དང་། ཁྱིམ་བདག་དེས་སྨྲས་པ། འཕགས་པ་བདག་གིས་ཀྱང་དགེ་འདུན་ལ་རྫས་ལས་བྱུང་བའི་བསོད་ནམས་བྱ་བའི་གཞི་འགའ་ཞིག་བགྱིད་དུ་སྩལ་ཏོ། །བསོད་སྙོམས་པས་སྨྲས་པ། ཁྱིམ་བདག་ལེགས་ཀྱིས་བྱེད་དུ་ཆུག་ཤིག །འཕགས་
པ་ཅི་ཞིག་བགྱིད་དུ་སྩལ། ཁྱིམ་བདག་དགེ་འདུན་ལ་བསྲོ་ཁང་གི་ཁང་པ་མེད་ཀྱིས་དེ་བྱེད་དུ་ཆུག་ཤིག །འཕགས་པ་བདག་ལ་ཀཱར་ཥཱ་པ་ཎ་དག་ནི་མཆིས་མོད་ཀྱི་འོན་ཀྱང་བསོད་ནམས་ཀྱི་གྲོགས་བགྱིད་པ་མ་མཆིས་སོ། །ཁྱིམ་བདག་ཁོ་བོ་ཁྱོད་ཀྱི་བསོད་ནམས་ཀྱི་
གྲོགས་ཡིན་ནོ། །འཕགས་པ་ལེགས་སོ། །ཁྱིམ་བདག་དེས་བསོད་སྙོམས་པ་དེ་ལ་ཀཱར་ཥཱ་པ་ཎ་དག་ཕུལ་ནས་བསོད་སྙོམས་པ་དེ་དགེ་འདུན་གྱི་བསྲོ་ཁང་གི་ཁང་པ་བྱེད་དུ་འཇུད་པ་ལ་ཞུགས་སོ། །ཇི་ཙམ་དུས་གཞན་ཞིག་ན་འབྲོག་གནས་སུ་དུས་སྟོན་བྱུང་ནས་
གླ་མི་དག་མ་འོངས་པ་དང་། བསོད་སྙོམས་པས་དེ་དག་བོས་ཏེ་སྨྲས་པ། བཞིན་བཟངས་དག་དེང་ཁྱེད་ཅག་ཅིའི་ཕྱིར་མ་འོངས། དེ་དག་གིས་སྨྲས་པ། འཕགས་པ་དེང་འཇིག་རྟེན་གྱི་དུས་སྟོན་ལགས་པས་དེའི་སླད་དུ་བདག་ཅག་མ་མཆིས་སོ། །བསོད་སྙོམས་པས་

སྨྲས་པ། བཞིན་བཟངས་དག་གང་དག་བསོད་ནམས་ཀྱི་འབྲས་བུས་འཚོ་བ་དེ་དག་ལ་ནི་དུས་སྟོན་ཡོད་ན། ཁྱེད་ཅག་མཁར་ལེན་གྱི་འབྲས་བུས་འཚོ་བ་དག་དུས་སྟོན་ཅི་འདྲ་བ་དག་ཅིག་ཡོད། ཚུར་ཤེག་ལ་ལས་གྱིས་ཤིག་དང་། དེའི་ཕྱིར་གླ་ཉིས་གྱུར་དུ་སྦྱིན་ནོ། །དེ་དག་
གིས་སྨྲས་པ། འཕགས་པ་གང་དག་བསོད་ནམས་ཀྱི་འབྲས་བུས་འཚོ་བ་དེ་དག་ལ་ནི་རྟག་པ་ཁོ་ནར་དུས་སྟོན་མཆིས་ཀྱི། བདག་ཅག་ནི་མཁར་ལེན་གྱི་འབྲས་བུས་འཚོ་བ་ལགས་པས་དེ་ཉིད་ཀྱིས་ན་བདག་ཅག་ལ་བརྒྱ་ལ་བརྒྱ་ལམ་ན་དུས་སྟོན་འབྱུང་བས་གལ་ཏེ་གླ་སུམ་
གྱུར་དུ་སྩལ་དུ་ལགས་ཀྱང་བདག་ཅག་དེང་ནི་ལས་མི་བགྱིད་དོ་ཞེས་དེ་དག་མ་བཏུབ་སྟེ་དོང་ནས་བསོད་སྙོམས་པ་ཡང་སྙིང་ལས་ཆུང་ངུར་འདུག་གོ། །ཁྱིམ་བདག་གིས་བསམ་པ། བདག་གིས་སྦྱིན་པར་བྱ་བའི་ཆོས་དེ་ལ་ཇི་ཙམ་ནི་བྱས། ཇི་ཙམ་ནི་མ་བྱས་པ་དེ་བལྟར་
འགྲོའོ་སྙམ་ནས་དེ་ནང་པར་སྔར་ལངས་ཏེ་སོང་བ་དང་། འགའ་ཡང་ལས་མི་བྱེད་པ་མཐོང་ནས་དེ་བསོད་སྙོམས་པའི་དྲུང་དུ་སོང་སྟེ་རྐང་པ་གཉིས་ལ་ཕྱག་འཚལ་ནས་སྨྲས་པ། འཕགས་པ་གླ་མི་དག་དེང་ལས་མི་བགྱིད་དམ། ཁྱིམ་བདག་མི་བྱེད་དོ། །ཅིའི་སླད་དུ་
དེ་དག་ན་རེ་དེང་འཇིག་རྟེན་གྱི་དུས་སྟོན་ཡིན་པས་བདག་ཅག་ལས་མི་བྱེད་དོ་ཞེས་ཟེར་རོ། །ཁྱིམ་བདག་གིས་སྨྲས་པ། འཕགས་པ་དེ་དག་ནི་མཁར་ལེན་གྱི་འབྲས་བུས་འཚོ་བ་ལགས་པས་འཕགས་པ་དེ་དག་ལ་གླ་མ་སྩལ་བས་དེས་ན་མ་བཏུབ་གོར་མ་བཀུམ། བསོད་
སྙོམས་པས་སྨྲས་པ། ཁྱིམ་བདག་ཁོ་བོས་གླ་ཉིས་གྱུར་བྱིན་ཡང་མ་གྲུབ་སྟེ། དེ་དག་ན་རེ་འཕགས་པ་གང་དག་བསོད་ནམས་ཀྱི་འབྲས་བུས་འཚོ་བ་དེ་དག་ལ་ནི་རྟག་པ་ཁོ་ནར་དུས་སྟོན་མཆིས་ཀྱི་བདག་ཅག་ནི་མཁར་ལེན་གྱི་འབྲས་བུས་འཚོ་བ་ལགས་པས་དེ་ཉིད་ཀྱིས་ན་
བདག་ཅག་ལ་བརྒྱ་ལ་བརྒྱ་ལམ་ན་དུས་སྟོན་འབྱུང་བས་གལ་ཏེ་གླ་སུམ་གྱུར་དུ་སྩལ་དུ་ལགས་ཀྱང་བདག་ཅག་དེང་ནི་ལས་མི་བགྱིད་དོ་ཞེས་ཟེར་རོ། །ཁྱིམ་བདག་གིས་སྨྲས་པ། འཕགས་པ་བདག་ནི་བདག་གི་སླད་དུ་ཡང་བགྱིད་དུ་མི་སྩོལ་ལ། ཉེ་དུ་རྣམས་ཀྱི་སླད་དུ་ཡང་བགྱིད་

དུ་མི་སྩོལ་གྱི། འདི་ལྟར་འཕགས་པ་རྣམས་ཀྱི་སླད་དུ་བགྱིད་དུ་སྩོལ་བ་ལགས་པས་ཀྱེ་མ་འཕགས་པ་རྣམས་ཀྱིས་ཀྱང་བརྒྱ་ལ་བརྒྱ་ལམ་དུ་མཁར་ལེན་གྱི་སྟོངས་མོ་མཛོད་ཅིག །བསོད་སྙོམས་པས་སྐབས་དེ་དགེ་སློང་རྣམས་ལ་བརྗོད་ནས། དགེ་སློང་རྣམས་ཀྱིས་
བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། གཞི་མ་ཟིན་པ་ལ་དགེ་སློང་རྣམས་ཀྱིས་མཁར་ལེན་གྱི་སྟོངས་མོ་བྱའོ། །བཅོམ་ལྡན་འདས་ཀྱིས་གཞི་མ་ཟིན་པ་ལ་དགེ་སློང་རྣམས་ཀྱིས་མཁར་ལེན་གྱི་སྟོངས་མོ་བྱའོ་ཞེས་བཀའ་སྩལ་ནས། དགེ་སློང་
དག་གིས་མཁར་ལེན་གྱི་སྟོངས་མོ་བྱ་བར་བརྩམས་ནས། དེ་དག་ཕན་ཚུན་སོ་ཕག་འཕེན་པར་བྱེད་དོ། །ཇི་ཙམ་ན་དགེ་སློང་ཞིག་གིས་དགེ་སློང་ལ་སོ་ཕག་འཕངས་པ་དང་ལག་པ་ནས་ཤོར་ཏེ་དགེ་སློང་གི་མགོར་ཕོག་ནས་དེ་དུས་ལ་བབ་བོ། །དགེ་སློང་དེ་དག་འགྱོད་པ་སྐྱེས་ཤིང་།
དེ་དག་ཡིད་མི་བདེ་ནས་འདི་སྐད་ཅེས་ཚེ་དང་ལྡན་པ་དག་བསོད་སྙོམས་པ་ལས་མེད་པས་ལས་ཕྱུང་ནས་བདག་ཅག་ཚངས་པ་མཚུངས་པར་སྤྱོད་པ་ཡིད་དུ་འོང་བ་དང་བྲལ་བར་གྱུར་ཅིང་། བདག་ཅག་ལ་ཕམ་པར་འགྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་པར་གྱུར་ཏོ། །
ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ལ་ནི་ལྟུང་བ་མེད་དེ། ཡང་དགེ་སློང་རྣམས་ཀྱིས་སོ་ཕག་འཕང་བར་མི་བྱ་བར་འདི་ལྟར་ལག་པས་ལག་པར་བརྒྱུད་པར་བྱའོ། །གལ་ཏེ་
བྱེ་བའམ་གས་པ་ཡིན་ན་གོ་བར་བྱ་སྟེ་བརྒྱུད་པར་བྱའོ། །གོ་བར་མ་བྱས་པར་བརྒྱུད་པར་བྱེད་ན་འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་རྣམས་ཀྱིས་མཁར་ལེན་གྱི་སྟོངས་མོ་བྱའོ་ཞེས་བཀའ་སྩལ་ནས། དགེ་སློང་རྣམས་ཉི་མ་རངས་པར་ལས་བྱེད་ནས་
བྲམ་ཟེ་དང་ཁྱིམ་བདག་དག་ཅིའི་ཕྱིར་དགེ་སློང་འདི་དག་ཉི་མ་རངས་པར་གླ་མི་བཞིན་དུ་ལས་བྱེད་ཅེས་འཕྱ་བར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཉི་མ་

རངས་པར་ལས་མི་བྱ་བར་འདི་ལྟར་ལན་གཅིག་བྱའོ། །དགེ་སློང་དག་སོ་ག་ནི་ཕྱི་དྲོ་ལས་བྱེད་ལ། དགུན་ནི་སྔ་དྲོ་ལས་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། སོ་ག་ནི་སྔ་དྲོ་ལས་བྱ་ལ། དགུན་ནི་ཕྱི་དྲོ་ལས་བྱའོ། །དེ་དག་དུས་རྟིང་ལ་ཐུག་པ་ན་གཏོང་ཞིང་འཇིམ་རྫབ་ཀྱིས་གོས་པའི་
ལུས་ཀྱིས་དེ་བཞིན་རིངས་པ་རིངས་པར་བསོད་སྙོམས་ལ་འཇུག་པ་ན་མ་དད་པ་དག་འཕགས་པ་དག་ཁྱེད་ཅག་གིས་གླ་མི་དག་ཀྱང་ཕམ་པར་བྱས་ཏེ། དེ་དག་ཀྱང་ཟས་ཀྱི་དུས་ཡོངས་སུ་སྤོང་བར་བྱེད་ན། ཁྱེད་ཅག་ཟས་ཀྱི་དུས་ཀྱང་སྤོང་བར་མི་བྱེད་དོ་ཞེས་ཅོ་འདྲི་བར་བྱེད་པའི་
སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། བསོད་སྙོམས་པ་གང་དག་ཡིན་པ་དེ་དག་གིས་ནི་སྟ་གོན་བྱས་ནས་གྲོང་དུ་བསོད་སྙོམས་ལ་འཇུག་ཁོམ་པ་དང་། གང་དག་དགེ་འདུན་གྱི་རྙེད་པ་དབང་བ་
དེ་དག་གིས་ནི་སྟ་གོན་བྱས་ནས་དགེ་འདུན་གྱི་དབུས་སུ་འཇུག་ཁོམ་པ་དེ་ལྟར་དུས་ཤེས་པར་བྱས་ཏེ་གཏང་བར་བྱའོ། །བཅོམ་ལྡན་འདས་ཀྱིས་སྟ་གོན་བྱས་ནས་གྲོང་དུ་བསོད་སྙོམས་ལ་འཇུག་པར་བྱ་ཞིང་དགེ་འདུན་གྱི་དབུས་སུ་ཡང་འཇུག་པར་བྱའོ་ཞེས་བཀའ་སྩལ་ནས།
དགེ་སློང་རྣམས་ཀྱིས་ཇི་ཙམ་གྱིས་ན་སྟ་གོན་བྱས་པར་བརྗོད་པར་བྱ་བ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། ཇི་ཙམ་གྱིས་ལག་པ་གཉིས་དང་། རྐང་པ་གཉིས་བཀྲུས་པ་དང་། ལྷུང་བཟེད་བཀྲུས་པར་གྱུར་པ་དེ་ཙམ་གྱིས་སྟ་གོན་བྱས་པར་བརྗོད་པར་
བྱའོ། །གཞན་ཡང་ངས་དགེ་སློང་མཁར་ལེན་བྱེད་པ་དག་གི་ཀུན་ཏུ་སྤྱོད་པའི་ཆོས་དག་བཅའ་བར་བྱ་སྟེ། དགེ་སློང་མཁར་ལེན་བྱེད་པས་དུས་ཇི་ལྟ་བ་བཞིན་དུ་སྔ་དྲོ་ནི་ཁྱེའུ་སུས་དག་སྦྱོར་དུ་གཞུག་པར་བྱའོ། །ཕྱི་དྲོ་ནི་སྐོམ་དང་། ལག་པ་དང་། རྐང་པའི་སྐུ་མཉེ་རྒྱུ་དག་སྦྱོར་དུ་གཞུག་
པར་བྱའོ། །དགེ་སློང་མཁར་ལེན་བྱེད་པས་ཀུན་དུ་སྤྱོད་པའི་ཆོས་ཇི་ལྟར་བཅས་པ་དག་ཡང་དག་པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །འབྲོག་གནས་སུ་བསོད་སྙོམས་པས་བསྲོ་ཁང་བྱེད་དུ་བཅུག་པ་ཇི་ལྟ་བ་བཞིན་དུ་མེ་ཁང་གི་གླེང་གཞི་ཡང་དེ་ཁོ་ན་བཞིན་དུ་

རྒྱས་པར་བརྗོད་པར་བྱའོ། །བྱེ་བྲག་ནི་འདི་ཡོད་དེ། བཅོམ་ལྡན་འདས་ཀྱིས་གཞི་མ་ཟིན་པ་ལ་མཁར་ལེན་གྱི་སྟོངས་མོ་བྱའོ་ཞེས་བཀའ་སྩལ་ནས། དགེ་སློང་དག་མེ་ཁང་གི་ལས་བྱེད་ཅིང་ཕྱམ་དག་ཕར་སྦེད་ཚུར་སྦེད་པ་ན་དེ་དག་གི་འོག་ན་ཤིང་མཁན་ཞིག་ཞལ་
ཏ་བྱེད་དེ། ཇི་ཙམ་ན་ཕྱམ་དག་སྦེད