Sự Nghiệp Anh Hùng (Apadāna)

ūjāyidaṁ phalaṁ. 
Sampuṇṇe tiṁsakappamhi, 
devabhūtisanāmakā; 
Sattaratanasampannā, 
pañcāsuṁ cakkavattino. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā pupphacaṅkoṭiyo thero imā gāthāyo abhāsitthāti. 
Pupphacaṅkoṭiyattherassāpadānaṁ dasamaṁ. 
Sakacintaniyavaggo sattamo. 
Tassuddānaṁ 
Sakacintī avopupphī, 
sapaccāgamanena ca; 
Parappasādī bhisado, 
sucinti vatthadāyako. 
Ambadāyī ca sumano, 
pupphacaṅkoṭakīpi ca; 
Gāthekasattati vuttā, 
gaṇitā atthadassibhi. 

Therāpadāna 
Nāgasamālavagga 
Nāgasamālattheraapadāna 
“Āpāṭaliṁ ahaṁ pupphaṁ, 
ujjhitaṁ sumahāpathe; 
Thūpamhi abhiropesiṁ, 
sikhino lokabandhuno. 
Ekattiṁse ito kappe, 
yaṁ kammamakariṁ tadā; 
Duggatiṁ nābhijānāmi, 
thūpapūjāyidaṁ phalaṁ. 
Ito pannarase kappe, 
bhūmiyo nāma khattiyo; 
Sattaratanasampanno, 
cakkavattī mahabbalo. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā nāgasamālo thero imā gāthāyo abhāsitthāti. 
Nāgasamālattherassāpadānaṁ paṭhamaṁ. 

Therāpadāna 
Nāgasamālavagga 
Padasaññakattheraapadāna 
“Akkantañca padaṁ disvā, 
tissassādiccabandhuno; 
Haṭṭho haṭṭhena cittena, 
pade cittaṁ pasādayiṁ. 
Dvenavute ito kappe, 
yaṁ saññamalabhiṁ tadā; 
Duggatiṁ nābhijānāmi, 
padasaññāyidaṁ phalaṁ. 
Ito sattamake kappe, 
sumedho nāma khattiyo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā padasaññako thero imā gāthāyo abhāsitthāti. 
Padasaññakattherassāpadānaṁ dutiyaṁ. 

Therāpadāna 
Nāgasamālavagga 
3 Buddhasaññakattheraapadāna 
“Dumagge paṁsukūlikaṁ, 
laggaṁ disvāna satthuno; 
Tato tamañjaliṁ katvā, 
paṁsukūlaṁ avandahaṁ. 
Dvenavute ito kappe, 
yaṁ kammamakariṁ tadā; 
Duggatiṁ nābhijānāmi, 
buddhasaññāyidaṁ phalaṁ. 
Ito catutthake kappe, 
dumasārosi khattiyo; 
Cāturanto vijitāvī, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā buddhasaññako thero imā gāthāyo abhāsitthāti. 
Buddhasaññakattherassāpadānaṁ tatiyaṁ. 

Therāpadāna 
Nāgasamālavagga 
Bhisāluvadāyakattheraapadāna 
“Kānanaṁ vanamogayha, 
vasāmi vipine ahaṁ; 
Vipassiṁ addasaṁ buddhaṁ, 
āhutīnaṁ paṭiggahaṁ. 
Bhisāluvañca pādāsiṁ, 
udakaṁ hatthadhovanaṁ; 
Vanditvā sirasā pāde, 
pakkāmi uttarāmukho. 
Ekanavutito kappe, 
bhisāluvamadaṁ tadā; 
Duggatiṁ nābhijānāmi, 
puññakammassidaṁ phalaṁ. 
Ito tatiyake kappe, 
bhisasammatakhattiyo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā bhisāluvadāyako thero imā gāthāyo abhāsitthāti. 
Bhisāluvadāyakattherassāpadānaṁ catutthaṁ. 
Chaṭṭhabhāṇavāraṁ. 

Therāpadāna 
Nāgasamālavagga 
Ekasaññakattheraapadāna 
“Khaṇḍo nāmāsi nāmena, 
vipassissaggasāvako; 
Ekā bhikkhā mayā dinnā, 
lokāhutipaṭiggahe. 
Tena cittappasādena, 
dvipadinda narāsabha; 
Duggatiṁ nābhijānāmi, 
ekabhikkhāyidaṁ phalaṁ. 
Cattālīsamhito kappe, 
varuṇo nāma khattiyo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ekasaññako thero imā gāthāyo abhāsitthāti. 
Ekasaññakattherassāpadānaṁ pañcamaṁ. 

Therāpadāna 
Nāgasamālavagga 
6 Tiṇasantharadāyakattheraapadāna 
“Himavantassāvidūre, 
mahājātassaro ahu; 
Satapattehi sañchanno, 
nānāsakuṇamālayo. 
Tamhi nhatvā ca pitvā ca, 
avidūre vasāmahaṁ; 
Addasaṁ samaṇānaggaṁ, 
gacchantaṁ anilañjase. 
Mama saṅkappamaññāya, 
satthā loke anuttaro; 
Abbhato oruhitvāna, 
bhūmiyaṁṭhāsi tāvade. 
Visāṇena tiṇaṁ gayha, 
nisīdanamadāsahaṁ; 
Nisīdi bhagavā tattha, 
tisso lokagganāyako. 
Sakaṁ cittaṁ pasādetvā, 
avandi lokanāyakaṁ; 
Paṭikuṭiko apasakkiṁ, 
nijjhāyanto mahāmuniṁ. 
Tena cittappasādena, 
nimmānaṁ upapajjahaṁ; 
Duggatiṁ nābhijānāmi, 
santharassa idaṁ phalaṁ. 
Ito dutiyake kappe, 
miga sammatakhattiyo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā tiṇasantharadāyako thero imā gāthāyo abhāsitthāti. 
Tiṇasantharadāyakattherassāpadānaṁ chaṭṭhaṁ. 

Therāpadāna 
Nāgasamālavagga 
Sūcidāyakattheraapadāna 
“Tiṁsakappasahassamhi, 
sambuddho lokanāyako; 
Sumedho nāma nāmena, 
bāttiṁsavaralakkhaṇo. 
Tassa kañcanavaṇṇassa, 
dvipadindassa tādino; 
Pañca sūcī mayā dinnā, 
sibbanatthāya cīvaraṁ. 
Teneva sūcidānena, 
nipuṇatthavipassakaṁ; 
Tikkhaṁ lahuñca phāsuñca, 
ñāṇaṁ me udapajjatha. 
Kilesā jhāpitā mayhaṁ, 
bhavā sabbe samūhatā; 
Dhāremi antimaṁ dehaṁ, 
sammāsambuddhasāsane. 
Dvipadādhipatī nāma, 
rājāno caturo ahuṁ; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sūcidāyako thero imā gāthāyo abhāsitthāti. 
Sūcidāyakattherassāpadānaṁ sattamaṁ. 

Therāpadāna 
Buddhavagga 
7 Puṇṇamantāṇiputtattheraapadāna 
“Ajjhāyako mantadharo, 
tiṇṇaṁ vedāna pāragū; 
Purakkhatomhi sissehi, 
upagacchiṁ naruttamaṁ. 
Padumuttaro lokavidū, 
āhutīnaṁ paṭiggaho; 
Mama kammaṁ pakittesi, 
saṅkhittena mahāmuni. 
Tāhaṁ dhammaṁ suṇitvāna, 
Abhivādetvāna satthuno; 
Añjaliṁ paggahetvāna, 
Pakkamiṁ dakkhiṇāmukho. 
Saṅkhittena suṇitvāna, 
vitthārena abhāsayiṁ; 
Sabbe sissā attamanā, 
sutvāna mama bhāsato; 
Sakaṁ diṭṭhiṁ vinodetvā, 
buddhe cittaṁ pasādayuṁ. 
Saṅkhittenapi desemi, 
vitthārena tathevahaṁ; 
Abhidhammanayaññūhaṁ, 
kathāvatthuvisuddhiyā; 
Sabbesaṁ viññāpetvāna, 
viharāmi anāsavo. 
Ito pañcasate kappe, 
caturo suppakāsakā; 
Sattaratanasampannā, 
catudīpamhi issarā. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā puṇṇo mantāṇiputto thero imā gāthāyo abhāsitthāti. 
Puṇṇamantāṇiputtattherassāpadānaṁ pañcamaṁ. 

Therāpadāna 
Nāgasamālavagga 
Pāṭalipupphiyattheraapadāna 
“Suvaṇṇavaṇṇaṁ sambuddhaṁ, 
Gacchantaṁ antarāpaṇe; 
Kañcanagghiyasaṅkāsaṁ, 
Bāttiṁsavaralakkhaṇaṁ. 
Seṭṭhiputto tadā āsiṁ, 
sukhumālo sukhedhito; 
Ucchaṅge pāṭalipupphaṁ, 
katvāna abhisaṁhariṁ. 
Haṭṭho haṭṭhena cittena, 
pupphehi abhipūjayiṁ; 
Tissaṁ lokaviduṁ nāthaṁ, 
naradevaṁ namassahaṁ. 
Dvenavute ito kappe, 
yaṁ kammamakariṁ tadā; 
Duggatiṁ nābhijānāmi, 
pupphapūjāyidaṁ phalaṁ. 
Ito tesaṭṭhikappamhi, 
abhisammatanāmako; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā pāṭalipupphiyo thero imā gāthāyo abhāsitthāti. 
Pāṭalipupphiyattherassāpadānaṁ aṭṭhamaṁ. 

Therāpadāna 
Nāgasamālavagga 
Ṭhitañjaliyattheraapadāna 
“Migaluddo pure āsiṁ, 
Araññe kānane ahaṁ; 
Tattha addasaṁ sambuddhaṁ, 
Bāttiṁsavaralakkhaṇaṁ. 
Tatthāhaṁ añjaliṁ katvā, 
pakkāmiṁ pācināmukho; 
Avidūre nisinnassa, 
niyake paṇṇasanthare. 
Tato me asanīpāto, 
matthake nipatī tadā; 
Sohaṁ maraṇakālamhi, 
akāsiṁ punarañjaliṁ. 
Dvenavute ito kappe, 
añjaliṁ akariṁ tadā; 
Duggatiṁ nābhijānāmi, 
añjalissa idaṁ phalaṁ. 
Catupaṇṇāsakappamhi, 
migaketusanāmako; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ṭhitañjaliyo thero imā gāthāyo abhāsitthāti. 
Ṭhitañjaliyattherassāpadānaṁ navamaṁ. 

Therāpadāna 
Nāgasamālavagga 
10 Tipadumiyattheraapadāna 
“Padumuttaro nāma jino, 
sabbadhammāna pāragū; 
Danto dantaparivuto, 
nagarā nikkhamī tadā. 
Nagare haṁsavatiyaṁ, 
ahosiṁ māliko tadā; 
Yaṁ tattha uttamaṁ tīṇi, 
padmapupphāni aggahiṁ. 
‘Addasaṁ virajaṁ buddhaṁ, 
paṭimaggantarāpaṇe; 
Saha disvāna sambuddhaṁ, 
evaṁ cintesahaṁ tadā. 
Kiṁ me imehi pupphehi, 
rañño upanitehi me; 
Gāmaṁ vā gāmakhettaṁ vā, 
sahassaṁ vā labheyyahaṁ. 
Adantadamanaṁ vīraṁ, 
sabbasattasukhāvahaṁ; 
Lokanāthaṁ pūjayitvā, 
lacchāmi amataṁ dhanaṁ’. 
Evāhaṁ cintayitvāna, 
sakaṁ cittaṁ pasādayiṁ; 
Tīṇi lohitake gayha, 
ākāse ukkhipiṁ tadā. 
Mayā ukkhittamattamhi, 
ākāse patthariṁsu te; 
Dhāriṁsu matthake tattha, 
uddhaṁvaṇṭā adhomukhā. 
Ye keci manujā disvā, 
ukkuṭṭhiṁ sampavattayuṁ; 
Devatā antalikkhamhi, 
sādhukāraṁ pavattayuṁ. 
Accheraṁ loke uppannaṁ, 
buddhaseṭṭhassa vāhasā; 
Sabbe dhammaṁ suṇissāma, 
pupphānaṁ vāhasā mayaṁ. 
Padumuttaro lokavidū, 
āhutīnaṁ paṭiggaho; 
Vīthiyañhi ṭhito santo, 
imā gāthā abhāsatha. 
‘Yo so buddhaṁ apūjesi, 
rattapadmehi māṇavo; 
Tamahaṁ kittayissāmi, 
suṇātha mama bhāsato. 
Tiṁsakappasahassāni, 
devaloke ramissati; 
Tiṁsakappāni devindo, 
devarajjaṁ karissati. 
Mahāvitthārikaṁ nāma, 
byamhaṁ hessati tāvade; 
Tiyojanasatubbiddhaṁ, 
diyaḍḍhasatavitthataṁ. 
Cattārisatasahassāni, 
niyyūhā ca sumāpitā; 
Kūṭāgāravarūpetā, 
mahāsayanamaṇḍitā. 
Koṭisatasahassiyo, 
parivāressanti accharā; 
Kusalā naccagītassa, 
vāditepi padakkhiṇā. 
Etādise byamhavare, 
nārīgaṇasamākule; 
Vassissati pupphavasso, 
dibbo lohitako sadā. 
Bhittikhīle nāgadante, 
dvārabāhāya toraṇe; 
Cakkamattā lohitakā, 
olambissanti tāvade. 
Pattena pattasañchanne, 
antobyamhavare imaṁ; 
Attharitvā pārupitvā, 
tuvaṭṭissanti tāvade. 
Bhavanaṁ parivāretvā, 
samantā satayojane; 
Tepi padmā lohitakā, 
dibbagandhaṁ pavāyare. 
Pañcasattatikkhattuñca, 
cakkavattī bhavissati; 
Padesarajjaṁ vipulaṁ, 
gaṇanāto asaṅkhiyaṁ. 
Sampattiyo duve bhutvā, 
anīti anupaddavo; 
Sampatte pariyosāne, 
nibbānaṁ pāpuṇissati’. 
Sudiṭṭho vata me buddho, 
vāṇijjaṁ supayojitaṁ; 
Padmāni tīṇi pūjetvā, 
anubhosiṁ tisampadā. 
Ajja me dhammappattassa, 
vippamuttassa sabbaso; 
Supupphitaṁ lohitakaṁ, 
dhārayissati matthake. 
Mama kammaṁ kathentassa, 
padumuttarasatthuno; 
Satapāṇasahassānaṁ, 
dhammābhisamayo ahu. 
Satasahassito kappe, 
yaṁ buddhamabhipūjayiṁ; 
Duggatiṁ nābhijānāmi, 
tipadumānidaṁ phalaṁ. 
Kilesā jhāpitā mayhaṁ, 
bhavā sabbe samūhatā; 
Sabbāsavā parikkhīṇā, 
natthi dāni punabbhavo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā tipadumiyo thero imā gāthāyo abhāsitthāti. 
Tipadumiyattherassāpadānaṁ dasamaṁ. 
Nāgasamālavaggo aṭṭhamo. 
Tassuddānaṁ 
Nāgasamālo padasaññī, 
saññakāluvadāyako; 
Ekasaññī tiṇasanthāro, 
sūcipāṭalipupphiyo; 
Ṭhitañjalī tipadumī, 
gāthāyo pañcasattati. 

Therāpadāna 
Timiravagga 
Timirapupphiyattheraapadāna 
“Candabhāgānadītīre, 
anusotaṁ vajāmahaṁ; 
Nisinnaṁ samaṇaṁ disvā, 
vippasannamanāvilaṁ. 
Tattha cittaṁ pasādetvā, 
evaṁ cintesahaṁ tadā; 
Tārayissati tiṇṇoyaṁ, 
dantoyaṁ damayissati. 
Assāsissati assattho, 
santo ca samayissati; 
Mocayissati mutto ca, 
nibbāpessati nibbuto. 
Evāhaṁ cintayitvāna, 
siddhatthassa mahesino; 
Gahetvā timirapupphaṁ, 
matthake okiriṁ ahaṁ. 
Añjaliṁ paggahetvāna, 
katvā ca naṁ padakkhiṇaṁ; 
Vanditvā satthuno pāde, 
pakkāmiṁ aparaṁ disaṁ. 
Aciraṁ gatamattaṁ maṁ, 
migarājā viheṭhayi; 
Papātamanugacchanto, 
tattheva papatiṁ ahaṁ. 
Catunnavutito kappe, 
yaṁ pupphamabhiropayiṁ; 
Duggatiṁ nābhijānāmi, 
pupphapūjāyidaṁ phalaṁ. 
Chappaññāsamhi kappamhi, 
sattevāsuṁ mahāyasā; 
Sattaratanasampannā, 
cakkavattī mahabbalā. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā timirapupphiyo thero imā gāthāyo abhāsitthāti. 
Timirapupphiyattherassāpadānaṁ paṭhamaṁ. 

Therāpadāna 
Timiravagga 
Gatasaññakattheraapadāna 
“Jātiyā sattavassohaṁ, 
pabbajiṁ anagāriyaṁ; 
Avandiṁ satthuno pāde, 
vippasannena cetasā. 
Sattanaṅgalakīpupphe, 
ākāse ukkhipiṁ ahaṁ; 
Tissaṁ buddhaṁ samuddissa, 
anantaguṇasāgaraṁ. 
Sugatānugataṁ maggaṁ, 
pūjetvā haṭṭhamānaso; 
Añjaliñca tadākāsiṁ, 
pasanno sehi pāṇibhi. 
Dvenavute ito kappe, 
yaṁ kammamakariṁ tadā; 
Duggatiṁ nābhijānāmi, 
buddhapūjāyidaṁ phalaṁ. 
Ito aṭṭhamake kappe, 
tayo aggisikhā ahu; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā gatasaññako thero imā gāthāyo abhāsitthāti. 
Gatasaññakattherassāpadānaṁ dutiyaṁ. 

Therāpadāna 
Timiravagga 
3 Nipannañjalikattheraapadāna 
“Rukkhamūle nisinnohaṁ, 
byādhito paramena ca; 
Paramakāruññapattomhi, 
araññe kānane ahaṁ. 
Anukampaṁ upādāya, 
tisso satthā upesi maṁ; 
Sohaṁ nipannako santo, 
sire katvāna añjaliṁ. 
Pasannacitto sumano, 
sabbasattānamuttamaṁ; 
Sambuddhaṁ abhivādetvā, 
tattha kālaṅkato ahaṁ. 
Dvenavute ito kappe, 
yaṁ vandiṁ purisuttamaṁ; 
Duggatiṁ nābhijānāmi, 
vandanāya idaṁ phalaṁ. 
Ito pañcamake kappe, 
pañcevāsuṁ mahāsikhā; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā nipannañjaliko thero imā gāthāyo abhāsitthāti. 
Nipannañjalikattherassāpadānaṁ tatiyaṁ. 

Therāpadāna 
Timiravagga 
Adhopupphiyattheraapadāna 
“Abhibhū nāma so bhikkhu, 
sikhino aggasāvako; 
Mahānubhāvo tevijjo, 
himavantaṁ upāgami. 
Ahampi himavantamhi, 
ramaṇīyassame isi; 
Vasāmi appamaññāsu, 
iddhīsu ca tadā vasī. 
Pakkhijāto viyākāse, 
pabbataṁ adhivatthayiṁ; 
Adhopupphaṁ gahetvāna, 
āgacchiṁ pabbataṁ ahaṁ. 
Satta pupphāni gaṇhitvā, 
matthake okiriṁ ahaṁ; 
Ālokite ca vīrena, 
pakkāmiṁ pācināmukho. 
Āvāsaṁ abhisambhosiṁ, 
patvāna assamaṁ ahaṁ; 
Khāribhāraṁ gahetvāna, 
pāyāsiṁ pabbatantaraṁ. 
Ajagaro maṁ pīḷesi, 
ghorarūpo mahabbalo; 
Pubbakammaṁ saritvāna, 
tattha kālaṅkato ahaṁ. 
Ekattiṁse ito kappe, 
yaṁ pupphamabhiropayiṁ; 
Duggatiṁ nābhijānāmi, 
pupphapūjāyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā adhopupphiyo thero imā gāthāyo abhāsitthāti. 
Adhopupphiyattherassāpadānaṁ catutthaṁ. 

Therāpadāna 
Timiravagga 
Raṁsisaññakattheraapadāna 
“Pabbate himavantamhi, 
vāsaṁ kappesahaṁ pure; 
Ajinuttaravāsohaṁ, 
vasāmi pabbatantare. 
Suvaṇṇavaṇṇaṁ sambuddhaṁ, 
Sataraṁsiṁva bhāṇumaṁ; 
Vanantaragataṁ disvā, 
Sālarājaṁva pupphitaṁ. 
Raṁsyā cittaṁ pasādetvā, 
vipassissa mahesino; 
Paggayha añjaliṁ vandiṁ, 
sirasā ukkuṭī ahaṁ. 
Ekanavutito kappe, 
yaṁ kammamakariṁ tadā; 
Duggatiṁ nābhijānāmi, 
raṁsisaññāyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā raṁsisaññako thero imā gāthāyo abhāsitthāti. 
Raṁsisaññakattherassāpadānaṁ pañcamaṁ. 

Therāpadāna 
Timiravagga 
6 Dutiyaraṁsisaññakattheraapadāna 
“Pabbate himavantamhi, 
vākacīradharo ahaṁ; 
Caṅkamañca samārūḷho, 
nisīdiṁ pācināmukho. 
Pabbate sugataṁ disvā, 
phussaṁ jhānarataṁ tadā; 
Añjaliṁ paggahetvāna, 
raṁsyā cittaṁ pasādayiṁ. 
Dvenavute ito kappe, 
yaṁ saññamalabhiṁ tadā; 
Duggatiṁ nābhijānāmi, 
raṁsisaññāyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā raṁsisaññako thero imā gāthāyo abhāsitthāti. 
Dutiyaraṁsisaññakattherassāpadānaṁ chaṭṭhaṁ. 

Therāpadāna 
Timiravagga 
Phaladāyakattheraapadāna 
“Pabbate himavantamhi, 
kharājinadharo ahaṁ; 
Phussaṁ jinavaraṁ disvā, 
phalahattho phalaṁ adaṁ. 
Yamahaṁ phalamadāsiṁ, 
vippasannena cetasā; 
Bhave nibbattamānamhi, 
phalaṁ nibbattate mama. 
Dvenavute ito kappe, 
yaṁ phalaṁ adadiṁ ahaṁ; 
Duggatiṁ nābhijānāmi, 
phaladānassidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā phaladāyako thero imā gāthāyo abhāsitthāti. 
Phaladāyakattherassāpadānaṁ sattamaṁ. 

Therāpadāna 
Buddhavagga 
Upālittheraapadāna 
“Nagare haṁsavatiyā, 
sujāto nāma brāhmaṇo; 
Asītikoṭinicayo, 
pahūtadhanadhaññavā. 
Ajjhāyako mantadharo, 
tiṇṇaṁ vedāna pāragū; 
Lakkhaṇe itihāse ca, 
sadhamme pāramiṁ gato. 
Paribbājā ekasikhā, 
gotamā buddhasāvakā; 
Carakā tāpasā ceva, 
caranti mahiyā tadā. 
Tepi maṁ parivārenti, 
brāhmaṇo vissuto iti; 
Bahujjano maṁ pūjeti, 
nāhaṁ pūjemi kiñcanaṁ. 
Pūjārahaṁ na passāmi, 
mānatthaddho ahaṁ tadā; 
Buddhoti vacanaṁ natthi, 
tāva nuppajjate jino. 
Accayena ahorattaṁ, 
padumuttaranāmako; 
Sabbaṁ tamaṁ vinodetvā, 
loke uppajji cakkhumā. 
Vitthārike bāhujaññe, 
puthubhūte ca sāsane; 
Upāgami tadā buddho, 
nagaraṁ haṁsasavhayaṁ. 
Pitu atthāya so buddho, 
dhammaṁ desesi cakkhumā; 
Tena kālena parisā, 
samantā yojanaṁ tadā. 
Sammato manujānaṁ so, 
sunando nāma tāpaso; 
Yāvatā buddhaparisā, 
pupphehacchādayī tadā. 
Catusaccaṁ pakāsente, 
seṭṭhe ca pupphamaṇḍape; 
Koṭisatasahassānaṁ, 
dhammābhisamayo ahu. 
Sattarattindivaṁ buddho, 
vassetvā dhammavuṭṭhiyo; 
Aṭṭhame divase patte, 
sunandaṁ kittayī jino. 
Devaloke manusse vā, 
saṁsaranto ayaṁ bhave; 
Sabbesaṁ pavaro hutvā, 
bhavesu saṁsarissati. 
Kappasatasahassamhi, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādo, 
oraso dhammanimmito; 
Mantāṇiputto puṇṇoti, 
hessati satthu sāvako. 
Evaṁ kittayi sambuddho, 
sunandaṁ tāpasaṁ tadā; 
Hāsayanto janaṁ sabbaṁ, 
dassayanto sakaṁ balaṁ. 
Katañjalī namassanti, 
sunandaṁ tāpasaṁ janā; 
Buddhe kāraṁ karitvāna, 
sodhesi gatimattano. 
Tattha me ahu saṅkappo, 
sutvāna munino vacaṁ; 
Ahampi kāraṁ kassāmi, 
yathā passāmi gotamaṁ. 
Evāhaṁ cintayitvāna, 
kiriyaṁ cintayiṁ mama; 
Kyāhaṁ kammaṁ ācarāmi, 
puññakkhette anuttare. 
Ayañca pāṭhiko bhikkhu, 
sabbapāṭhissa sāsane; 
Vinaye agganikkhitto, 
taṁ ṭhānaṁ patthaye ahaṁ. 
Idaṁ me amitaṁ bhogaṁ, 
akkhobhaṁ sāgarūpamaṁ; 
Tena bhogena buddhassa, 
ārāmaṁ māpaye ahaṁ. 
Sobhanaṁ nāma ārāmaṁ, 
nagarassa puratthato; 
Kiṇitvā satasahassena, 
saṅghārāmaṁ amāpayiṁ. 
Kūṭāgāre ca pāsāde, 
maṇḍape hammiye guhā; 
Caṅkame sukate katvā, 
saṅghārāmaṁ amāpayiṁ. 
Jantāgharaṁ aggisālaṁ, 
atho udakamāḷakaṁ; 
Nhānagharaṁ māpayitvā, 
bhikkhusaṅghassadāsahaṁ. 
Āsandiyo pīṭhake ca, 
paribhoge ca bhājane; 
Ārāmikañca bhesajjaṁ, 
sabbametaṁ adāsahaṁ. 
Ārakkhaṁ paṭṭhapetvāna, 
pākāraṁ kārayiṁ daḷhaṁ; 
Mā naṁ koci viheṭhesi, 
santacittāna tādinaṁ. 
Satasahassenāvāsaṁ, 
saṅghārāme amāpayiṁ; 
Vepullaṁ taṁ māpayitvā, 
sambuddhaṁ upanāmayiṁ. 
Niṭṭhāpito mayārāmo, 
sampaṭiccha tuvaṁ muni; 
Niyyādessāmi taṁ vīra, 
adhivāsehi cakkhuma. 
Padumuttaro lokavidū, 
āhutīnaṁ paṭiggaho; 
Mama saṅkappamaññāya, 
adhivāsesi nāyako. 
Adhivāsanamaññāya, 
sabbaññussa mahesino; 
Bhojanaṁ paṭiyādetvā, 
kālamārocayiṁ ahaṁ. 
Ārocitamhi kālamhi, 
padumuttaranāyako; 
Khīṇāsavasahassehi, 
ārāmaṁ me upāgami. 
Nisinnaṁ kālamaññāya, 
annapānena tappayiṁ; 
Bhuttāviṁ kālamaññāya, 
idaṁ vacanamabraviṁ. 
Kīto satasahassena, 
tattakeneva kārito; 
Sobhano nāma ārāmo, 
sampaṭiccha tuvaṁ muni. 
Iminārāmadānena, 
cetanāpaṇidhīhi ca; 
Bhave nibbattamānohaṁ, 
labhāmi mama patthitaṁ. 
Paṭiggahetvā sambuddho, 
saṅghārāmaṁ sumāpitaṁ; 
Bhikkhusaṅghe nisīditvā, 
idaṁ vacanamabravi. 
Yo so buddhassa pādāsi, 
saṅghārāmaṁ sumāpitaṁ; 
Tamahaṁ kittayissāmi, 
suṇātha mama bhāsato. 
Hatthī assā rathā pattī, 
senā ca caturaṅginī; 
Parivāressantimaṁ niccaṁ, 
saṅghārāmassidaṁ phalaṁ. 
Saṭṭhi tūrasahassāni, 
bheriyo samalaṅkatā; 
Parivāressantimaṁ niccaṁ, 
saṅghārāmassidaṁ phalaṁ. 
Chaḷasītisahassāni, 
nāriyo samalaṅkatā; 
Vicittavatthābharaṇā, 
āmuttamaṇikuṇḍalā. 
Aḷārapamhā hasulā, 
susaññā tanumajjhimā; 
Parivāressantimaṁ niccaṁ, 
saṅghārāmassidaṁ phalaṁ. 
Tiṁsakappasahassāni, 
devaloke ramissati; 
Sahassakkhattuṁ devindo, 
devarajjaṁ karissati. 
Devarājena pattabbaṁ, 
sabbaṁ paṭilabhissati; 
Anūnabhogo hutvāna, 
devarajjaṁ karissati. 
Sahassakkhattuṁ cakkavattī, 
rājā raṭṭhe bhavissati; 
Pathabyā rajjaṁ vipulaṁ, 
gaṇanāto asaṅkhiyaṁ. 
Kappasatasahassamhi, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādo, 
oraso dhammanimmito; 
Upāli nāma nāmena, 
hessati satthu sāvako. 
Vinaye pāramiṁ patvā, 
ṭhānāṭhāne ca kovido; 
Jinasāsanaṁ dhārento, 
viharissatināsavo. 
Sabbametaṁ abhiññāya, 
gotamo sakyapuṅgavo; 
Bhikkhusaṅghe nisīditvā, 
etadagge ṭhapessati. 
Aparimeyyupādāya, 
patthemi tava sāsanaṁ; 
So me attho anuppatto, 
sabbasaṁyojanakkhayo. 
Yathā sūlāvuto poso, 
rājadaṇḍena tajjito; 
Sūle sātaṁ avindanto, 
parimuttiṁva icchati. 
Tathevāhaṁ mahāvīra, 
bhavadaṇḍena tajjito; 
Kammasūlāvuto santo, 
pipāsāvedanaṭṭito. 
Bhave sātaṁ na vindāmi, 
ḍayhanto tīhi aggibhi; 
Parimuttiṁ gavesāmi, 
yathāpi rājadaṇḍito. 
Yathā visādo puriso, 
visena paripīḷito; 
Agadaṁ so gaveseyya, 
visaghātāyupāyanaṁ. 
Gavesamāno passeyya, 
agadaṁ visaghātakaṁ; 
Taṁ pivitvā sukhī assa, 
visamhā parimuttiyā. 
Tathevāhaṁ mahāvīra, 
yathā visahato naro; 
Sampīḷito avijjāya, 
saddhammāgadamesahaṁ. 
Dhammāgadaṁ gavesanto, 
addakkhiṁ sakyasāsanaṁ; 
Aggaṁ sabbosadhānaṁ taṁ, 
sabbasallavinodanaṁ. 
Dhammosadhaṁ pivitvāna, 
visaṁ sabbaṁ samūhaniṁ; 
Ajarāmaraṁ sītibhāvaṁ, 
nibbānaṁ phassayiṁ ahaṁ. 
Yathā bhūtaṭṭito poso, 
bhūtaggāhena pīḷito; 
Bhūtavejjaṁ gaveseyya, 
bhūtasmā parimuttiyā. 
Gavesamāno passeyya, 
bhūtavijjāsu kovidaṁ; 
Tassa so vihane bhūtaṁ, 
samūlañca vināsaye. 
Tathevāhaṁ mahāvīra, 
tamaggāhena pīḷito; 
Ñāṇālokaṁ gavesāmi, 
tamato parimuttiyā. 
Athaddasaṁ sakyamuniṁ, 
kilesatamasodhanaṁ; 
So me tamaṁ vinodesi, 
bhūtavejjova bhūtakaṁ. 
Saṁsārasotaṁ sañchindiṁ, 
taṇhāsotaṁ nivārayiṁ; 
Bhavaṁ ugghāṭayiṁ sabbaṁ, 
bhūtavejjova mūlato. 
Garuḷo yathā opatati, 
pannagaṁ bhakkhamattano; 
Samantā yojanasataṁ, 
vikkhobheti mahāsaraṁ. 
Pannagaṁ so gahetvāna, 
adhosīsaṁ viheṭhayaṁ; 
Ādāya so pakkamati, 
yenakāmaṁ vihaṅgamo. 
Tathevāhaṁ mahāvīra, 
yathāpi garuḷo balī; 
Asaṅkhataṁ gavesanto, 
dose vikkhālayiṁ ahaṁ. 
Diṭṭho ahaṁ dhammavaraṁ, 
santipadamanuttaraṁ; 
Ādāya viharāmetaṁ, 
garuḷo pannagaṁ yathā. 
Āsāvatī nāma latā, 
jātā cittalatāvane; 
Tassā vassasahassena, 
ekaṁ nibbattate phalaṁ. 
Taṁ devā payirupāsanti, 
tāvadūraphale sati; 
Devānaṁ sā piyā evaṁ, 
āsāvatī latuttamā. 
Satasahassupādāya, 
tāhaṁ paricare muni; 
Sāyaṁ pātaṁ namassāmi, 
devā āsāvatiṁ yathā. 
Avañjhā pāricariyā, 
amoghā ca namassanā; 
Dūrāgatampi maṁ santaṁ, 
khaṇoyaṁ na virādhayi. 
Paṭisandhiṁ na passāmi, 
vicinanto bhave ahaṁ; 
Nirūpadhi vippamutto, 
upasanto carāmahaṁ. 
Yathāpi padumaṁ nāma, 
sūriyaraṁsena pupphati; 
Tathevāhaṁ mahāvīra, 
buddharaṁsena pupphito. 
Yathā balākayonimhi, 
na vijjati pumo sadā; 
Meghesu gajjamānesu, 
gabbhaṁ gaṇhanti tā sadā. 
Cirampi gabbhaṁ dhārenti, 
yāva megho na gajjati; 
Bhārato parimuccanti, 
yadā megho pavassati. 
Padumuttarabuddhassa, 
dhammameghena gajjato; 
Saddena dhammameghassa, 
dhammagabbhaṁ agaṇhahaṁ. 
Satasahassupādāya, 
puññagabbhaṁ dharemahaṁ; 
Nappamuccāmi bhārato, 
dhammamegho na gajjati. 
Yadā tuvaṁ sakyamuni, 
ramme kapilavatthave; 
Gajjasi dhammameghena, 
bhārato parimuccahaṁ. 
Suññataṁ animittañca, 
Tathāppaṇihitampi ca; 
Caturo ca phale sabbe, 
Dhammevaṁ vijanayiṁ ahaṁ. 
Dutiyabhāṇavāraṁ. 
Aparimeyyupādāya, 
patthemi tava sāsanaṁ; 
So me attho anuppatto, 
santipadamanuttaraṁ. 
Vinaye pāramiṁ patto, 
yathāpi pāṭhiko isi; 
Na me samasamo atthi, 
dhāremi sāsanaṁ ahaṁ. 
Vinaye khandhake cāpi, 
tikacchede ca pañcame; 
Ettha me vimati natthi, 
akkhare byañjanepi vā. 
Niggahe paṭikamme ca, 
ṭhānāṭhāne ca kovido; 
Osāraṇe vuṭṭhāpane, 
sabbattha pāramiṁ gato. 
Vinaye khandhake vāpi, 
nikkhipitvā padaṁ ahaṁ; 
Ubhato viniveṭhetvā, 
rasato osareyyahaṁ. 
Niruttiyā sukusalo, 
atthānatthe ca kovido; 
Anaññātaṁ mayā natthi, 
ekaggo satthu sāsane. 
Rūpadakkho ahaṁ ajja, 
sakyaputtassa sāsane; 
Kaṅkhaṁ sabbaṁ vinodemi, 
chindāmi sabbasaṁsayaṁ. 
Padaṁ anupadañcāpi, 
akkharañcāpi byañjanaṁ; 
Nidāne pariyosāne, 
sabbattha kovido ahaṁ. 
Yathāpi rājā balavā, 
niggaṇhitvā parantape; 
Vijinitvāna saṅgāmaṁ, 
nagaraṁ tattha māpaye. 
Pākāraṁ parikhañcāpi, 
esikaṁ dvārakoṭṭhakaṁ; 
Aṭṭālake ca vividhe, 
kāraye nagare bahū. 
Siṅghāṭakaṁ caccarañca, 
suvibhattantarāpaṇaṁ; 
Kārayeyya sabhaṁ tattha, 
atthānatthavinicchayaṁ. 
Nigghātatthaṁ amittānaṁ, 
chiddāchiddañca jānituṁ; 
Balakāyassa rakkhāya, 
senāpaccaṁ ṭhapeti so. 
Ārakkhatthāya bhaṇḍassa, 
nidhānakusalaṁ naraṁ; 
Mā me bhaṇḍaṁ vinassīti, 
bhaṇḍarakkhaṁ ṭhapeti so. 
Mamatto hoti yo rañño, 
vuddhiṁ yassa ca icchati; 
Tassādhikaraṇaṁ deti, 
mittassa paṭipajjituṁ. 
Uppātesu nimittesu, 
lakkhaṇesu ca kovidaṁ; 
Ajjhāyakaṁ mantadharaṁ, 
porohicce ṭhapeti so. 
Etehaṅgehi sampanno, 
khattiyoti pavuccati; 
Sadā rakkhanti rājānaṁ, 
cakkavākova dukkhitaṁ. 
Tatheva tvaṁ mahāvīra, 
hatāmittova khattiyo; 
Sadevakassa lokassa, 
dhammarājāti vuccati. 
Titthiye nihanitvāna, 
mārañcāpi sasenakaṁ; 
Tamandhakāraṁ vidhamitvā, 
dhammanagaraṁ amāpayi. 
Sīlaṁ pākārakaṁ tattha, 
ñāṇaṁ te dvārakoṭṭhakaṁ; 
Saddhā te esikā vīra, 
dvārapālo ca saṁvaro. 
Satipaṭṭhānamaṭṭālaṁ, 
paññā te caccaraṁ mune; 
Iddhipādañca siṅghāṭaṁ, 
dhammavīthi sumāpitā. 
Suttantaṁ abhidhammañca, 
vinayañcāpi kevalaṁ; 
Navaṅgaṁ buddhavacanaṁ, 
esā dhammasabhā tava. 
Suññataṁ animittañca, 
vihārañcappaṇīhitaṁ; 
Āneñjañca nirodho ca, 
esā dhammakuṭī tava. 
Paññāya aggo nikkhitto, 
paṭibhāne ca kovido; 
Sāriputtoti nāmena, 
dhammasenāpatī tava. 
Cutūpapātakusalo, 
iddhiyā pāramiṁ gato; 
Kolito nāma nāmena, 
porohicco tavaṁ mune. 
Porāṇakavaṁsadharo, 
uggatejo durāsado; 
Dhutavādīguṇenaggo, 
akkhadasso tavaṁ mune. 
Bahussuto dhammadharo, 
Sabbapāṭhī ca sāsane; 
Ānando nāma nāmena, 
Dhammārakkho tavaṁ mune. 
Ete sabbe atikkamma, 
pamesi bhagavā mamaṁ; 
Vinicchayaṁ me pādāsi, 
vinaye viññudesitaṁ. 
Yo koci vinaye pañhaṁ, 
pucchati buddhasāvako; 
Tattha me cintanā natthi, 
taññevatthaṁ kathemahaṁ. 
Yāvatā buddhakhettamhi, 
ṭhapetvā taṁ mahāmuni; 
Vinaye mādiso natthi, 
kuto bhiyyo bhavissati. 
Bhikkhusaṅghe nisīditvā, 
evaṁ gajjati gotamo; 
Upālissa samo natthi, 
vinaye khandhakesu ca. 
Yāvatā buddhabhaṇitaṁ, 
navaṅgaṁ satthusāsanaṁ; 
Vinayogadhaṁ taṁ sabbaṁ, 
vinayamūlapassino. 
Mama kammaṁ saritvāna, 
gotamo sakyapuṅgavo; 
Bhikkhusaṅghe nisīditvā, 
etadagge ṭhapesi maṁ. 
Satasahassupādāya, 
imaṁ ṭhānaṁ apatthayiṁ; 
So me attho anuppatto, 
vinaye pāramiṁ gato. 
Sakyānaṁ nandijanano, 
kappako āsahaṁ pure; 
Vijahitvāna taṁ jātiṁ, 
putto jāto mahesino. 
Ito dutiyake kappe, 
Añjaso nāma khattiyo; 
Anantatejo amitayaso, 
Bhūmipālo mahaddhano. 
Tassa rañño ahaṁ putto, 
candano nāma khattiyo; 
Jātimadenupatthaddho, 
yasabhogamadena ca. 
Nāgasatasahassāni, 
sabbālaṅkārabhūsitā; 
Tidhāpabhinnā mātaṅgā, 
parivārenti maṁ sadā. 
Sabalehi paretohaṁ, 
uyyānaṁ gantukāmako; 
Āruyha sirikaṁ nāgaṁ, 
nagarā nikkhamiṁ tadā. 
Caraṇena ca sampanno, 
guttadvāro susaṁvuto; 
Devalo nāma sambuddho, 
āgacchi purato mama. 
Pesetvā sirikaṁ nāgaṁ, 
buddhaṁ āsādayiṁ tadā; 
Tato sañjātakopo so, 
nāgo nuddharate padaṁ. 
Nāgaṁ duṭṭhamanaṁ disvā, 
buddhe kodhaṁ akāsahaṁ; 
Vihesayitvā sambuddhaṁ, 
uyyānaṁ agamāsahaṁ. 
Sātaṁ tattha na vindāmi, 
siro pajjalito yathā; 
Pariḷāhena ḍayhāmi, 
macchova baḷisādako. 
Sasāgarantā pathavī, 
ādittā viya hoti me; 
Pitu santikupāgamma, 
idaṁ vacanamabraviṁ. 
Āsīvisaṁva kupitaṁ, 
aggikkhandhaṁva āgataṁ; 
Mattaṁva kuñjaraṁ dantiṁ, 
yaṁ sayambhumasādayiṁ. 
Āsādito mayā buddho, 
ghoro uggatapo jino; 
Purā sabbe vinassāma, 
khamāpessāma taṁ muniṁ. 
No ce taṁ nijjhāpessāma, 
attadantaṁ samāhitaṁ; 
Orena sattadivasā, 
raṭṭhaṁ me vidhamissati. 
Sumekhalo kosiyo ca, 
siggavo cāpi sattako; 
Āsādayitvā isayo, 
duggatā te saraṭṭhakā. 
Yadā kuppanti isayo, 
saññatā brahmacārino; 
Sadevakaṁ vināsenti, 
sasāgaraṁ sapabbataṁ. 
Tiyojanasahassamhi, 
purise sannipātayiṁ; 
Accayaṁ desanatthāya, 
sayambhuṁ upasaṅkamiṁ. 
Allavatthā allasirā, 
sabbeva pañjalīkatā; 
Buddhassa pāde nipatitvā, 
idaṁ vacanamabravuṁ. 
Khamassu tvaṁ mahāvīra, 
abhiyācati taṁ jano; 
Pariḷāhaṁ vinodehi, 
mā no raṭṭhaṁ vināsaya. 
Sadevamānusā sabbe, 
sadānavā sarakkhasā; 
Ayomayena kūṭena, 
siraṁ bhindeyyu me sadā. 
Dake aggi na saṇṭhāti, 
bījaṁ sele na rūhati; 
Agade kimi na saṇṭhāti, 
kopo buddhe na jāyati. 
Yathā ca bhūmi acalā, 
appameyyo ca sāgaro; 
Anantako ca ākāso, 
evaṁ buddhā akhobhiyā. 
Sadā khantā mahāvīrā, 
khamitā ca tapassino; 
Khantānaṁ khamitānañca, 
gamanaṁ taṁ na vijjati. 
Idaṁ vatvāna sambuddho, 
pariḷāhaṁ vinodayaṁ; 
Mahājanassa purato, 
nabhaṁ abbhuggami tadā. 
Tena kammenahaṁ vīra, 
hīnattaṁ ajjhupāgato; 
Samatikkamma taṁ jātiṁ, 
pāvisiṁ abhayaṁ puraṁ. 
Tadāpi maṁ mahāvīra, 
ḍayhamānaṁ susaṇṭhitaṁ; 
Pariḷāhaṁ vinodesi, 
sayambhuñca khamāpayiṁ. 
Ajjāpi maṁ mahāvīra, 
ḍayhamānaṁ tihaggibhi; 
Nibbāpesi tayo aggī, 
sītibhāvañca pāpayī. 
Yesaṁ sotāvadhānatthi, 
suṇātha mama bhāsato; 
Atthaṁ tumhaṁ pavakkhāmi, 
yathā diṭṭhaṁ padaṁ mama. 
Sayambhuṁ taṁ vimānetvā, 
santacittaṁ samāhitaṁ; 
Tena kammenahaṁ ajja, 
jātomhi nīcayoniyaṁ. 
Mā vo khaṇaṁ virādhetha, 
khaṇātītā hi socare; 
Sadatthe vāyameyyātha, 
khaṇo vo paṭipādito. 
Ekaccānañca vamanaṁ, 
ekaccānaṁ virecanaṁ; 
Visaṁ halāhalaṁ eke, 
ekaccānañca osadhaṁ. 
Vamanaṁ paṭipannānaṁ, 
phalaṭṭhānaṁ virecanaṁ; 
Osadhaṁ phalalābhīnaṁ, 
puññakkhettaṁ gavesinaṁ. 
Sāsanena viruddhānaṁ, 
visaṁ halāhalaṁ yathā; 
Āsīviso diṭṭhaviso, 
evaṁ jhāpeti taṁ naraṁ. 
Sakiṁ pītaṁ halāhalaṁ, 
uparundhati jīvitaṁ; 
Sāsanena virujjhitvā, 
kappakoṭimhi ḍayhati. 
Khantiyā avihiṁsāya, 
mettacittavatāya ca; 
Sadevakaṁ so tāreti, 
tasmā vo avirodhiyā. 
Lābhālābhe na sajjanti, 
sammānanavimānane; 
Pathavīsadisā buddhā, 
tasmā te na virodhiyā. 
Devadatte ca vadhake, 
core aṅgulimālake; 
Rāhule dhanapāle ca, 
sabbesaṁ samako muni. 
Etesaṁ paṭigho natthi, 
rāgomesaṁ na vijjati; 
Sabbesaṁ samako buddho, 
vadhakassorasassa ca. 
Panthe disvāna kāsāvaṁ, 
chaḍḍitaṁ mīḷhamakkhitaṁ; 
Sirasmiṁ añjaliṁ katvā, 
vanditabbaṁ isiddhajaṁ. 
Abbhatītā ca ye buddhā, 
vattamānā anāgatā; 
Dhajenānena sujjhanti, 
tasmā ete namassiyā. 
Satthukappaṁ suvinayaṁ, 
dhāremi hadayenahaṁ; 
Namassamāno vinayaṁ, 
viharissāmi sabbadā. 
Vinayo āsayo mayhaṁ, 
vinayo ṭhānacaṅkamaṁ; 
Kappemi vinaye vāsaṁ, 
vinayo mama gocaro. 
Vinaye pāramippatto, 
samathe cāpi kovido; 
Upāli taṁ mahāvīra, 
pāde vandati satthuno. 
So ahaṁ vicarissāmi, 
gāmā gāmaṁ purā puraṁ; 
Namassamāno sambuddhaṁ, 
dhammassa ca sudhammataṁ. 
Kilesā jhāpitā mayhaṁ, 
bhavā sabbe samūhatā; 
Sabbāsavā parikkhīṇā, 
natthi dāni punabbhavo. 
Svāgataṁ vata me āsi, 
buddhaseṭṭhassa santike; 
Tisso vijjā anuppattā, 
kataṁ buddhassa sāsanaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā upāli thero imā gāthāyo abhāsitthāti. 
Upālittherassāpadānaṁ chaṭṭhaṁ. 

Therāpadāna 
Timiravagga 
Saddasaññakattheraapadāna 
“Pabbate himavantamhi, 
vasāmi paṇṇasanthare; 
Phussassa dhammaṁ bhaṇato, 
sadde cittaṁ pasādayiṁ. 
Dvenavute ito kappe, 
yaṁ kammamakariṁ tadā; 
Duggatiṁ nābhijānāmi, 
puññakammassidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā saddasaññako thero imā gāthāyo abhāsitthāti. 
Saddasaññakattherassāpadānaṁ aṭṭhamaṁ. 

Therāpadāna 
Timiravagga 
Bodhisiñcakattheraapadāna 
“Vipassissa bhagavato, 
mahābodhimaho ahu; 
Pabbajjupagato santo, 
upagacchiṁ ahaṁ tadā. 
Kusumodakamādāya, 
bodhiyā okiriṁ ahaṁ; 
Mocayissati no mutto, 
nibbāpessati nibbuto. 
Ekanavutito kappe, 
yaṁ bodhimabhisiñcayiṁ; 
Duggatiṁ nābhijānāmi, 
bodhisiñcāyidaṁ phalaṁ. 
Tettiṁse vattamānamhi, 
kappe āsuṁ janādhipā; 
Udakasecanā nāma, 
aṭṭhete cakkavattino. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā bodhisiñcako thero imā gāthāyo abhāsitthāti. 
Bodhisiñcakattherassāpadānaṁ navamaṁ. 

Therāpadāna 
Timiravagga 
Padumapupphiyattheraapadāna 
“Pokkharavanaṁ paviṭṭho, 
Bhañjanto padumānihaṁ; 
Tatthaddasaṁ phussaṁ buddhaṁ, 
Bāttiṁsavaralakkhaṇaṁ. 
Padumapupphaṁ gahetvāna, 
ākāse ukkhipiṁ ahaṁ; 
Pāpakammaṁ saritvāna, 
pabbajiṁ anagāriyaṁ. 
Pabbajitvāna kāyena, 
manasā saṁvutena ca; 
Vacīduccaritaṁ hitvā, 
ājīvaṁ parisodhayiṁ. 
Dvenavute ito kappe, 
yaṁ pupphamabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Padumābhāsanāmā ca, 
aṭṭhārasa mahīpatī; 
Aṭṭhārasesu kappesu, 
aṭṭhatālīsamāsisuṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā padumapupphiyo thero imā gāthāyo abhāsitthāti. 
Padumapupphiyattherassāpadānaṁ dasamaṁ. 
Timiravaggo navamo. 
Tassuddānaṁ 
Timiranaṅgalīpuppha, 
nippannañjaliko adho; 
Dve raṁsisaññī phalado, 
saddasaññī ca secako; 
Padmapupphī ca gāthāyo, 
chappaññāsa pakittitā. 

Therāpadāna 
Sudhāvagga 
Sudhāpiṇḍiyattheraapadāna 
“Pūjārahe pūjayato, 
buddhe yadi va sāvake; 
Papañcasamatikkante, 
tiṇṇasokapariddave. 
Te tādise pūjayato, 
nibbute akutobhaye; 
Na sakkā puññaṁ saṅkhātuṁ, 
imettamapi kenaci. 
Catunnamapi dīpānaṁ, 
issaraṁ yodha kāraye; 
Ekissā pūjanāyetaṁ, 
kalaṁ nāgghati soḷasiṁ. 
Siddhatthassa naraggassa, 
cetiye phalitantare; 
Sudhāpiṇḍo mayā dinno, 
vippasannena cetasā. 
Catunnavutito kappe, 
yaṁ kammamakariṁ tadā; 
Duggatiṁ nābhijānāmi, 
paṭisaṅkhārassidaṁ phalaṁ. 
Ito tiṁsatikappamhi, 
paṭisaṅkhārasavhayā; 
Sattaratanasampannā, 
terasa cakkavattino. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā sudhāpiṇḍiyo thero imā gāthāyo abhāsitthāti. 
Sudhāpiṇḍiyattherassāpadānaṁ paṭhamaṁ. 

Therāpadāna 
Sudhāvagga 
2 Sucintikattheraapadāna 
“Tissassa lokanāthassa, 
suddhapīṭhamadāsahaṁ; 
Haṭṭho haṭṭhena cittena, 
buddhassādiccabandhuno. 
Aṭṭhārase ito kappe, 
rājā āsiṁ mahāruci; 
Bhogo ca vipulo āsi, 
sayanañca anappakaṁ. 
Pīṭhaṁ buddhassa datvāna, 
vippasannena cetasā; 
Anubhomi sakaṁ kammaṁ, 
pubbe sukatamattano. 
Dvenavute ito kappe, 
yaṁ pīṭhamadadiṁ tadā; 
Duggatiṁ nābhijānāmi, 
pīṭhadānassidaṁ phalaṁ. 
Aṭṭhatiṁse ito kappe, 
tayo te cakkavattino; 
Ruci uparuci ceva, 
mahāruci tatiyako. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sucintiko thero imā gāthāyo abhāsitthāti. 
Sucintikattherassāpadānaṁ dutiyaṁ. 

Therāpadāna 
Sudhāvagga 
3 Aḍḍhaceḷakattheraapadāna 
“Tissassāhaṁ bhagavato, 
upaḍḍhadussamadāsahaṁ; 
Paramakāpaññapattomhi, 
duggatena samappito. 
Upaḍḍhadussaṁ datvāna, 
kappaṁ saggamhi modahaṁ; 
Avasesesu kappesu, 
kusalaṁ kāritaṁ mayā. 
Dvenavute ito kappe, 
yaṁ dussamadadiṁ tadā; 
Duggatiṁ nābhijānāmi, 
dussadānassidaṁ phalaṁ. 
Ekūnapaññāsakappamhi, 
rājāno cakkavattino; 
Samantacchadanā nāma, 
bāttiṁsāsuṁ janādhipā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā aḍḍhaceḷako thero imā gāthāyo abhāsitthāti. 
Aḍḍhaceḷakattherassāpadānaṁ tatiyaṁ. 

Therāpadāna 
Sudhāvagga 
Sūcidāyakattheraapadāna 
“Kammārohaṁ pure āsiṁ, 
bandhumāyaṁ puruttame; 
Sūcidānaṁ mayā dinnaṁ, 
vipassissa mahesino. 
Vajiraggasamaṁ ñāṇaṁ, 
hoti kammena tādisaṁ; 
Virāgomhi vimuttomhi, 
pattomhi āsavakkhayaṁ. 
Atīte ca bhave sabbe, 
vattamāne canāgate; 
Ñāṇena viciniṁ sabbaṁ, 
sūcidānassidaṁ phalaṁ. 
Ekanavutito kappe, 
sattāsuṁ vajiravhayā; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sūcidāyako thero imā gāthāyo abhāsitthāti. 
Sūcidāyakattherassāpadānaṁ catutthaṁ. 

Therāpadāna 
Sudhāvagga 
Gandhamāliyattheraapadāna 
“Siddhatthassa bhagavato, 
gandhathūpaṁ akāsahaṁ; 
Sumanehi paṭicchannaṁ, 
buddhānucchavikaṁ kataṁ. 
Kañcanagghiyasaṅkāsaṁ, 
buddhaṁ lokagganāyakaṁ; 
Indīvaraṁva jalitaṁ, 
ādittaṁva hutāsanaṁ. 
Byagghūsabhaṁva pavaraṁ, 
abhijātaṁva kesariṁ; 
Nisinnaṁ samaṇānaggaṁ, 
bhikkhusaṅghapurakkhataṁ. 
Vanditvā satthuno pāde, 
pakkāmiṁ uttarāmukho; 
Catunnavutito kappe, 
gandhamālaṁ yato adaṁ. 
Buddhe katassa kārassa, 
phalenāhaṁ visesato; 
Duggatiṁ nābhijānāmi, 
buddhapūjāyidaṁ phalaṁ. 
Cattārīsamhi ekūne, 
kappe āsiṁsu soḷasa; 
Devagandhasanāmā te, 
rājāno cakkavattino. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā gandhamāliyo thero imā gāthāyo abhāsitthāti. 
Gandhamāliyattherassāpadānaṁ pañcamaṁ. 

Therāpadāna 
Sudhāvagga 
Tipupphiyattheraapadāna 
“Migaluddo pure āsiṁ, 
araññe kānane ahaṁ; 
Pāṭaliṁ haritaṁ disvā, 
tīṇi pupphāni okiriṁ. 
Patitapattāni gaṇhitvā, 
bahi chaḍḍesahaṁ tadā; 
Antosuddhaṁ bahisuddhaṁ, 
suvimuttaṁ anāsavaṁ. 
Sammukhā viya sambuddhaṁ, 
vipassiṁ lokanāyakaṁ; 
Pāṭaliṁ abhivādetvā, 
tattha kālaṅkato ahaṁ. 
Ekanavutito kappe, 
yaṁ bodhimabhipūjayiṁ; 
Duggatiṁ nābhijānāmi, 
bodhipūjāyidaṁ phalaṁ. 
Samantapāsādikā nāma, 
terasāsiṁsu rājino; 
Ito tettiṁsakappamhi, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā tipupphiyo thero imā gāthāyo abhāsitthāti. 
Tipupphiyattherassāpadānaṁ chaṭṭhaṁ. 

Therāpadāna 
Sudhāvagga 
Madhupiṇḍikattheraapadāna 
“Vipine kānane disvā, 
appasadde nirākule; 
Siddhatthaṁ isinaṁ seṭṭhaṁ, 
āhutīnaṁ paṭiggahaṁ. 
Nibbutattaṁ mahānāgaṁ, 
nisabhājāniyaṁ yathā; 
Osadhiṁva virocantaṁ, 
devasaṅghanamassitaṁ. 
Vitti mamāhu tāvade, 
ñāṇaṁ uppajji tāvade; 
Vuṭṭhitassa samādhimhā, 
madhuṁ datvāna satthuno. 
Vanditvā satthuno pāde, 
pakkāmiṁ pācināmukho; 
Catuttiṁsamhi kappamhi, 
rājā āsiṁ sudassano. 
Madhu bhisehi savati, 
bhojanamhi ca tāvade; 
Madhuvassaṁ pavassittha, 
pubbakammassidaṁ phalaṁ. 
Catunnavutito kappe, 
yaṁ madhuṁ adadiṁ tadā; 
Duggatiṁ nābhijānāmi, 
madhudānassidaṁ phalaṁ. 
Catuttiṁse ito kappe, 
cattāro te sudassanā; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā madhupiṇḍiko thero imā gāthāyo abhāsitthāti. 
Madhupiṇḍikattherassāpadānaṁ sattamaṁ. 

Therāpadāna 
Buddhavagga 
9 Aññāsikoṇḍaññattheraapadāna 
“Padumuttarasambuddhaṁ, 
lokajeṭṭhaṁ vināyakaṁ; 
Buddhabhūmimanuppattaṁ, 
paṭhamaṁ addasaṁ ahaṁ. 
Yāvatā bodhiyā mūle, 
yakkhā sabbe samāgatā; 
Sambuddhaṁ parivāretvā, 
vandanti pañjalīkatā. 
Sabbe devā tuṭṭhamanā, 
ākāse sañcaranti te; 
Buddho ayaṁ anuppatto, 
andhakāratamonudo. 
Tesaṁ hāsaparetānaṁ, 
mahānādo avattatha; 
Kilese jhāpayissāma, 
sammāsambuddhasāsane. 
Devānaṁ giramaññāya, 
vācāsabhimudīrihaṁ; 
Haṭṭho haṭṭhena cittena, 
ādibhikkhamadāsahaṁ. 
Mama saṅkappamaññāya, 
satthā loke anuttaro; 
Devasaṅghe nisīditvā, 
imā gāthā abhāsatha. 
Sattāhaṁ abhinikkhamma, 
bodhiṁ ajjhagamaṁ ahaṁ; 
Idaṁ me paṭhamaṁ bhattaṁ, 
brahmacārissa yāpanaṁ. 
Tusitā hi idhāgantvā, 
yo me bhikkhaṁ upānayi; 
Tamahaṁ kittayissāmi, 
suṇotha mama bhāsato. 
Tiṁsakappasahassāni, 
devarajjaṁ karissati; 
Sabbe deve abhibhotvā, 
tidivaṁ āvasissati. 
Devalokā cavitvāna, 
manussattaṁ gamissati; 
Sahassadhā cakkavattī, 
tattha rajjaṁ karissati. 
Kappasatasahassamhi, 
okkākakulasambhavo; 
Gotamo nāma gottena, 
satthā loke bhavissati. 
Tidasā so cavitvāna, 
manussattaṁ gamissati; 
Agārā pabbajitvāna, 
chabbassāni vasissati. 
‘Tato sattamake vasse, 
buddho saccaṁ kathessati; 
Koṇḍañño nāma nāmena, 
paṭhamaṁ sacchikāhiti’. 
Nikkhantenānupabbajiṁ, 
padhānaṁ sukataṁ mayā; 
Kilese jhāpanatthāya, 
pabbajiṁ anagāriyaṁ. 
Abhigantvāna sabbaññū, 
buddho loke sadevake; 
Isināme migāraññe, 
amatabherimāhani. 
So dāni patto amataṁ, 
santipadamanuttaraṁ; 
Sabbāsave pariññāya, 
viharāmi anāsavo. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā aññāsikoṇḍañño thero imā gāthāyo abhāsitthāti. 
Aññāsikoṇḍaññattherassāpadānaṁ sattamaṁ. 

Therīapadāna 
Sumedhāvagga 
Udakadāyikātherīapadāna 
“Nagare bandhumatiyā, 
ahosiṁ udahārikā; 
Udahārena jīvāmi, 
tena posemi dārake. 
Deyyadhammo ca me natthi, 
puññakkhette anuttare; 
Koṭṭhakaṁ upasaṅkamma, 
udakaṁ paṭṭhapesahaṁ. 
Tena kammena sukatena, 
tāvatiṁsamagacchahaṁ; 
Tattha me sukataṁ byamhaṁ, 
udahārena nimmitaṁ. 
Accharānaṁ sahassassa, 
ahañhi pavarā tadā; 
Dasaṭṭhānehi tā sabbā, 
abhibhomi sadā ahaṁ. 
Paññāsaṁ devarājūnaṁ, 
mahesittamakārayiṁ; 
Vīsaticakkavattīnaṁ, 
mahesittamakārayiṁ. 
Duve bhave saṁsarāmi, 
devatte atha mānuse; 
Duggatiṁ nābhijānāmi, 
dakadānassidaṁ phalaṁ. 
Pabbatagge dumagge vā, 
antalikkhe ca bhūmiyaṁ; 
Yadā udakamicchāmi, 
khippaṁ paṭilabhāmahaṁ. 
Avuṭṭhikā disā natthi, 
santattā kuthitāpi ca; 
Mama saṅkappamaññāya, 
mahāmegho pavassati. 
Kadāci nīyamānāya, 
ñātisaṅghena me tadā; 
Yadā icchāmahaṁ vassaṁ, 
mahāmegho ajāyatha. 
Uṇhaṁ vā pariḷāho vā, 
sarīre me na vijjati; 
Kāye ca me rajo natthi, 
dakadānassidaṁ phalaṁ. 
Visuddhamanasā ajja, 
apetamanapāpikā; 
Sabbāsavaparikkhīṇā, 
natthi dāni punabbhavo. 
Ekanavutito kappe, 
yaṁ dakaṁ adadiṁ tadā; 
Duggatiṁ nābhijānāmi, 
dakadānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavā. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ udakadāyikā bhikkhunī imā gāthāyo abhāsitthāti. 
Udakadāyikātheriyāpadānaṁ dasamaṁ. 
Sumedhāvaggo paṭhamo. 
Tassuddānaṁ 
Sumedhā mekhalādāyī, 
maṇḍapaṁ saṅkamaṁ dadā; 
Naḷamālī piṇḍadadā, 
kaṭacchu uppalappadā. 
Dīpadā dakadā ceva, 
gāthāyo gaṇitā iha; 
Ekagāthāsatañceva, 
tiṁsati ca taduttari. 

Therīapadāna 
Ekūposathikavagga 
1 Ekūposathikātherīapadāna 
“Nagare bandhumatiyā, 
bandhumā nāma khattiyo; 
Divase puṇṇamāya so, 
upavasi uposathaṁ. 
Ahaṁ tena samayena, 
kumbhadāsī ahaṁ tahiṁ; 
Disvā sarājakaṁ senaṁ, 
evāhaṁ cintayiṁ tadā. 
‘Rājāpi rajjaṁ chaḍḍetvā, 
upavasi uposathaṁ; 
Saphalaṁ nūna taṁ kammaṁ, 
janakāyo pamodito’. 
Yoniso paccavekkhitvā, 
duggaccañca daliddataṁ; 
Mānasaṁ sampahaṁsitvā, 
upavasiṁ uposathaṁ. 
Ahaṁ uposathaṁ katvā, 
sammāsambuddhasāsane; 
Tena kammena sukatena, 
tāvatiṁsamagacchahaṁ. 
Tattha me sukataṁ byamhaṁ, 
ubbhayojanamuggataṁ; 
Kūṭāgāravarūpetaṁ, 
mahāsanasubhūsitaṁ. 
Accharā satasahassā, 
upatiṭṭhanti maṁ sadā; 
Aññe deve atikkamma, 
atirocāmi sabbadā. 
Catusaṭṭhi devarājūnaṁ, 
mahesittamakārayiṁ; 
Tesaṭṭhi cakkavattīnaṁ, 
mahesittamakārayiṁ. 
Suvaṇṇavaṇṇā hutvāna, 
bhavesu saṁsarāmahaṁ; 
Sabbattha pavarā homi, 
uposathassidaṁ phalaṁ. 
Hatthiyānaṁ assayānaṁ, 
rathayānañca sīvikaṁ; 
Labhāmi sabbamevetaṁ, 
uposathassidaṁ phalaṁ. 
Soṇṇamayaṁ rūpimayaṁ, 
athopi phalikāmayaṁ; 
Lohitaṅgamayañceva, 
sabbaṁ paṭilabhāmahaṁ. 
Koseyyakambaliyāni, 
khomakappāsikāni ca; 
Mahagghāni ca vatthāni, 
sabbaṁ paṭilabhāmahaṁ. 
Annaṁ pānaṁ khādanīyaṁ, 
vatthasenāsanāni ca; 
Sabbametaṁ paṭilabhe, 
uposathassidaṁ phalaṁ. 
Varagandhañca mālañca, 
cuṇṇakañca vilepanaṁ; 
Sabbametaṁ paṭilabhe, 
uposathassidaṁ phalaṁ. 
Kūṭāgārañca pāsādaṁ, 
maṇḍapaṁ hammiyaṁ guhaṁ; 
Sabbametaṁ paṭilabhe, 
uposathassidaṁ phalaṁ. 
Jātiyā sattavassāhaṁ, 
pabbajiṁ anagāriyaṁ; 
Aḍḍhamāse asampatte, 
arahattamapāpuṇiṁ. 
Kilesā jhāpitā mayhaṁ, 
bhavā sabbe samūhatā; 
Sabbāsavā parikkhīṇā, 
natthi dāni punabbhavo. 
Ekanavutito kappe, 
yaṁ kammamakariṁ tadā; 
Duggatiṁ nābhijānāmi, 
uposathassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavā. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ ekūposathikā bhikkhunī imā gāthāyo abhāsitthāti. 
Ekūposathikātheriyāpadānaṁ paṭhamaṁ. 

Therīapadāna 
Ekūposathikavagga 
2 Saḷalapupphikātherīapadāna 
“Candabhāgānadītīre, 
ahosiṁ kinnarī tadā; 
Addasāhaṁ devadevaṁ, 
caṅkamantaṁ narāsabhaṁ. 
Ocinitvāna saḷalaṁ, 
buddhaseṭṭhassadāsahaṁ; 
Upasiṅghi mahāvīro, 
saḷalaṁ devagandhikaṁ. 
Paṭiggahetvā sambuddho, 
vipassī lokanāyako; 
Upasiṅghi mahāvīro, 
pekkhamānāya me tadā. 
Añjaliṁ paggahetvāna, 
vanditvā dvipaduttamaṁ; 
Sakaṁ cittaṁ pasādetvā, 
tato pabbatamāruhiṁ. 
Ekanavutito kappe, 
yaṁ pupphamadadiṁ tadā; 
Duggatiṁ nābhijānāmi, 
buddhapūjāyidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavā. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ saḷalapupphikā bhikkhunī imā gāthāyo abhāsitthāti. 
Saḷalapupphikātheriyāpadānaṁ dutiyaṁ. 

Therīapadāna 
Ekūposathikavagga 
Modakadāyikātherīapadāna 
“Nagare bandhumatiyā, 
kumbhadāsī ahosahaṁ; 
Mama bhāgaṁ gahetvāna, 
gacchaṁ udakahārikā. 
Panthamhi samaṇaṁ disvā, 
santacittaṁ samāhitaṁ; 
Pasannacittā sumanā, 
modake tīṇidāsahaṁ. 
Tena kammena sukatena, 
cetanāpaṇidhīhi ca; 
Ekanavutikappāni, 
vinipātaṁ nagacchahaṁ. 
Sampatti taṁ karitvāna, 
sabbaṁ anubhaviṁ ahaṁ; 
Modake tīṇi datvāna, 
pattāhaṁ acalaṁ padaṁ. 
Kilesā jhāpitā mayhaṁ, 
…pe… 
viharāmi anāsavā. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ modakadāyikā bhikkhunī imā gāthāyo abhāsitthāti. 
Modakadāyikātheriyāpadānaṁ tatiyaṁ. 

Therīapadāna 
Ekūposathikavagga 
Ekāsanadāyikātherīapadāna 
“Nagare haṁsavatiyā, 
ahosiṁ bālikā tadā; 
Mātā ca me pitā ceva, 
kammantaṁ agamaṁsu te. 
Majjhanhikamhi sūriye, 
addasaṁ samaṇaṁ ahaṁ; 
Vīthiyā anugacchantaṁ, 
āsanaṁ paññapesahaṁ. 
Gonakāvikatikāhi, 
paññapetvā mamāsanaṁ; 
Pasannacittā sumanā, 
idaṁ vacanamabraviṁ. 
‘Santattā kuthitā bhūmi, 
sūro majjhanhike ṭhito; 
Mālutā ca na vāyanti, 
kālo cevettha mehiti. 
Paññattamāsanamidaṁ, 
tavatthāya mahāmuni; 
Anukampaṁ upādāya, 
nisīda mama āsane’. 
Nisīdi tattha samaṇo, 
sudanto suddhamānaso; 
Tassa pattaṁ gahetvāna, 
yathārandhaṁ adāsahaṁ. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Tattha me sukataṁ byamhaṁ, 
āsanena sunimmitaṁ; 
Saṭṭhiyojanamubbedhaṁ, 
tiṁsayojanavitthataṁ. 
Soṇṇamayā maṇimayā, 
athopi phalikāmayā; 
Lohitaṅgamayā ceva, 
pallaṅkā vividhā mama. 
Tūlikāvikatikāhi, 
kaṭṭissacittakāhi ca; 
Uddaekantalomī ca, 
pallaṅkā me susaṇṭhitā. 
Yadā icchāmi gamanaṁ, 
hāsakhiḍḍasamappitā; 
Saha pallaṅkaseṭṭhena, 
gacchāmi mama patthitaṁ. 
Asīti devarājūnaṁ, 
mahesittamakārayiṁ; 
Sattati cakkavattīnaṁ, 
mahesittamakārayiṁ. 
Bhavābhave saṁsarantī, 
mahābhogaṁ labhāmahaṁ; 
Bhoge me ūnatā natthi, 
ekāsanassidaṁ phalaṁ. 
Duve bhave saṁsarāmi, 
devatte atha mānuse; 
Aññe bhave na jānāmi, 
ekāsanassidaṁ phalaṁ. 
Duve kule pajāyāmi, 
khattiye cāpi brāhmaṇe; 
Uccākulīnā sabbattha, 
ekāsanassidaṁ phalaṁ. 
Domanassaṁ na jānāmi, 
cittasantāpanaṁ mama; 
Vevaṇṇiyaṁ na jānāmi, 
ekāsanassidaṁ phalaṁ. 
Dhātiyo maṁ upaṭṭhanti, 
khujjā celāpikā bahū; 
Aṅkena aṅkaṁ gacchāmi, 
ekāsanassidaṁ phalaṁ. 
Aññā nhāpenti bhojenti, 
aññā ramenti maṁ sadā; 
Aññā gandhaṁ vilimpanti, 
ekāsanassidaṁ phalaṁ. 
Maṇḍape rukkhamūle vā, 
suññāgāre vasantiyā; 
Mama saṅkappamaññāya, 
pallaṅko upatiṭṭhati. 
Ayaṁ pacchimako mayhaṁ, 
carimo vattate bhavo; 
Ajjāpi rajjaṁ chaḍḍetvā, 
pabbajiṁ anagāriyaṁ. 
Satasahassito kappe, 
yaṁ dānamadadiṁ tadā; 
Duggatiṁ nābhijānāmi, 
ekāsanassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavā. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ ekāsanadāyikā bhikkhunī imā gāthāyo abhāsitthāti. 
Ekāsanadāyikātheriyāpadānaṁ catutthaṁ. 

Therīapadāna 
Ekūposathikavagga 
Pañcadīpadāyikātherīapadāna 
“Nagare haṁsavatiyā, 
cārikī āsahaṁ tadā; 
Ārāmena ca ārāmaṁ, 
carāmi kusalatthikā. 
Kāḷapakkhamhi divase, 
addasaṁ bodhimuttamaṁ; 
Tattha cittaṁ pasādetvā, 
bodhimūle nisīdahaṁ. 
Garucittaṁ upaṭṭhetvā, 
sire katvāna añjaliṁ; 
Somanassaṁ pavedetvā, 
evaṁ cintesi tāvade. 
‘Yadi buddho amitaguṇo, 
asamappaṭipuggalo; 
Dassetu pāṭihīraṁ me, 
bodhi obhāsatu ayaṁ’. 
Saha āvajjite mayhaṁ, 
bodhi pajjali tāvade; 
Sabbasoṇṇamayā āsi, 
disā sabbā virocati. 
Sattarattindivaṁ tattha, 
bodhimūle nisīdahaṁ; 
Sattame divase patte, 
dīpapūjaṁ akāsahaṁ. 
Āsanaṁ parivāretvā, 
pañca dīpāni pajjaluṁ; 
Yāva udeti sūriyo, 
dīpā me pajjaluṁ tadā. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Tattha me sukataṁ byamhaṁ, 
pañcadīpāti vuccati; 
Saṭṭhiyojanamubbedhaṁ, 
tiṁsayojanavitthataṁ. 
Asaṅkhiyāni dīpāni, 
parivāre jaliṁsu me; 
Yāvatā devabhavanaṁ, 
dīpālokena jotati. 
Parammukhā nisīditvā, 
yadi icchāmi passituṁ; 
Uddhaṁ adho ca tiriyaṁ, 
sabbaṁ passāmi cakkhunā. 
Yāvatā abhikaṅkhāmi, 
daṭṭhuṁ sugataduggate; 
Tattha āvaraṇaṁ natthi, 
rukkhesu pabbatesu vā. 
Asīti devarājūnaṁ, 
mahesittamakārayiṁ; 
Satānaṁ cakkavattīnaṁ, 
mahesittamakārayiṁ. 
Yaṁ yaṁ yonupapajjāmi, 
devattaṁ atha mānusaṁ; 
Dīpasatasahassāni, 
parivāre jalanti me. 
Devalokā cavitvāna, 
uppajjiṁ mātukucchiyaṁ; 
Mātukucchigatā santī, 
akkhi me na nimīlati. 
Dīpasatasahassāni, 
puññakammasamaṅgitā; 
Jalanti sūtikāgehe, 
pañcadīpānidaṁ phalaṁ. 
Pacchime bhave sampatte, 
mānasaṁ vinivattayiṁ; 
Ajarāmataṁ sītibhāvaṁ, 
nibbānaṁ phassayiṁ ahaṁ. 
Jātiyā sattavassāhaṁ, 
arahattamapāpuṇiṁ; 
Upasampādayī buddho, 
guṇamaññāya gotamo. 
Maṇḍape rukkhamūle vā, 
suññāgāre vasantiyā; 
Sadā pajjalate dīpaṁ, 
pañcadīpānidaṁ phalaṁ. 
Dibbacakkhuvisuddhaṁ me, 
samādhikusalā ahaṁ; 
Abhiññāpāramippattā, 
pañcadīpānidaṁ phalaṁ. 
Sabbavositavosānā, 
katakiccā anāsavā; 
Pañcadīpā mahāvīra, 
pāde vandāmi cakkhuma. 
Satasahassito kappe, 
yaṁ dīpamadadiṁ tadā; 
Duggatiṁ nābhijānāmi, 
pañcadīpānidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavā. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ pañcadīpadāyikā bhikkhunī imā gāthāyo abhāsitthāti. 
Pañcadīpadāyikātheriyāpadānaṁ pañcamaṁ. 

Therīapadāna 
Ekūposathikavagga 
6 Naḷamālikātherīapadāna 
“Candabhāgānadītīre, 
ahosiṁ kinnarī tadā; 
Addasaṁ virajaṁ buddhaṁ, 
sayambhuṁ aparājitaṁ. 
Pasannacittā sumanā, 
vedajātā katañjalī; 
Naḷamālaṁ gahetvāna, 
sayambhuṁ abhipūjayiṁ. 
Tena kammena sukatena, 
cetanāpaṇidhīhi ca; 
Jahitvā kinnarīdehaṁ, 
tāvatiṁsamagacchahaṁ. 
Chattiṁsadevarājūnaṁ, 
mahesittamakārayiṁ; 
Manasā patthitaṁ mayhaṁ, 
nibbattati yathicchitaṁ. 
Dasannaṁ cakkavattīnaṁ, 
mahesittamakārayiṁ; 
Ocitattāva hutvāna, 
saṁsarāmi bhavesvahaṁ. 
Kusalaṁ vijjate mayhaṁ, 
pabbajiṁ anagāriyaṁ; 
Pūjārahā ahaṁ ajja, 
sakyaputtassa sāsane. 
Visuddhamanasā ajja, 
apetamanapāpikā; 
Sabbāsavā parikkhīṇā, 
natthi dāni punabbhavo. 
Catunnavutito kappe, 
yaṁ buddhamabhipūjayiṁ; 
Duggatiṁ nābhijānāmi, 
naḷamālāyidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavā. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ naḷamālikā bhikkhunī imā gāthāyo abhāsitthāti. 
Naḷamālikātheriyāpadānaṁ chaṭṭhaṁ. 

Therīapadāna 
Ekūposathikavagga 
Mahāpajāpatigotamītherīapadāna 
Ekadā lokapajjoto, 
vesāliyaṁ mahāvane; 
Kūṭāgāre susālāyaṁ, 
vasate narasārathi. 
Tadā jinassa mātucchā, 
mahāgotami bhikkhunī; 
Tahiṁ kate pure ramme, 
vasī bhikkhunupassaye. 
Bhikkhunīhi vimuttāhi, 
satehi saha pañcahi; 
Rahogatāya tassevaṁ, 
citassāsi vitakkitaṁ. 
“Buddhassa parinibbānaṁ, 
sāvakaggayugassa vā; 
Rāhulānandanandānaṁ, 
nāhaṁ lacchāmi passituṁ. 
Buddhassa parinibbānā, 
sāvakaggayugassa vā; 
Mahākassapanandānaṁ, 
ānandarāhulāna ca. 
Paṭikaccāyusaṅkhāraṁ, 
osajjitvāna nibbutiṁ; 
Gaccheyyaṁ lokanāthena, 
anuññātā mahesinā”. 
Tathā pañcasatānampi, 
bhikkhunīnaṁ vitakkitaṁ; 
Āsi khemādikānampi, 
etadeva vitakkitaṁ. 
Bhūmicālo tadā āsi, 
nāditā devadundubhī; 
Upassayādhivatthāyo, 
devatā sokapīḷitā. 
Vilapantā sukaruṇaṁ, 
tatthassūni pavattayuṁ; 
Mittā bhikkhuniyo tāhi, 
upagantvāna gotamiṁ. 
Nipacca sirasā pāde, 
idaṁ vacanamabravuṁ; 
Tattha toyalavāsittā, 
mayamayye rahogatā. 
Sā calā calitā bhūmi, 
nāditā devadundubhī; 
Paridevā ca suyyante, 
kimatthaṁ nūna gotamī. 
Tadā avoca sā sabbaṁ, 
yathāparivitakkitaṁ; 
Tāyopi sabbā āhaṁsu, 
yathāparivitakkitaṁ. 
“Yadi te rucitaṁ ayye, 
nibbānaṁ paramaṁ sivaṁ; 
Nibbāyissāma sabbāpi, 
buddhānuññāya subbate. 
Mayaṁ sahāva nikkhantā, 
gharāpi ca bhavāpi ca; 
Sahāyeva gamissāma, 
nibbānaṁ padamuttamaṁ”. 
“Nibbānāya vajantīnaṁ, 
kiṁ vakkhāmī”ti sā vadaṁ; 
Saha sabbāhi niggañchi, 
bhikkhunīnilayā tadā. 
“Upassaye yādhivatthā, 
devatā tā khamantu me; 
Bhikkhunīnilayassedaṁ, 
pacchimaṁ dassanaṁ mama.