Sự Nghiệp Anh Hùng (Apadāna)

haṁ, 
pabbataṁ agamāsahaṁ. 
Khāribhārañca pūretvā, 
tindukaphalamāhariṁ; 
Madhunā yojayitvāna, 
phalaṁ buddhassadāsahaṁ. 
Mama nijjhāyamānassa, 
paribhuñji tadā jino; 
Tattha cittaṁ pasādesiṁ, 
pekkhanto lokanāyakaṁ. 
Padumuttaro lokavidū, 
āhutīnaṁ paṭiggaho; 
Mamassame nisīditvā, 
imā gāthā abhāsatha. 
‘Yo maṁ phalena tappesi, 
pasanno sehi pāṇibhi; 
Tamahaṁ kittayissāmi, 
suṇātha mama bhāsato. 
Pañcavīsatikkhattuṁ so, 
devarajjaṁ karissati; 
Sahassakkhattuṁ rājā ca, 
cakkavattī bhavissati. 
Tassa saṅkappamaññāya, 
pubbakammasamaṅgino; 
Annaṁ pānañca vatthañca, 
sayanañca mahārahaṁ. 
Puññakammena saṁyuttā, 
nibbattissanti tāvade; 
Sadā pamudito cāyaṁ, 
bhavissati anāmayo. 
Upapajjati yaṁ yoniṁ, 
devattaṁ atha mānusaṁ; 
Sabbattha sukhito hutvā, 
manussattaṁ gamissati. 
Ajjhāyako mantadharo, 
tiṇṇaṁ vedāna pāragū; 
Sambuddhaṁ upagantvāna, 
arahā so bhavissati’. 
Yato sarāmi attānaṁ, 
yato pattosmi viññutaṁ; 
Bhoge me ūnatā natthi, 
phaladānassidaṁ phalaṁ. 
Varadhammamanuppatto, 
rāgadose samūhaniṁ; 
Sabbāsavaparikkhīṇo, 
natthi dāni punabbhavo. 
Kilesā jhāpitā mayhaṁ, 
bhavā sabbe samūhatā; 
Nāgova bandhanaṁ chetvā, 
viharāmi anāsavo. 
Svāgataṁ vata me āsi, 
mama buddhassa santike; 
Tisso vijjā anuppattā, 
kataṁ buddhassa sāsanaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā tissametteyyo thero imā gāthāyo abhāsitthāti. 
Tissametteyyattherassāpadānaṁ paṭhamaṁ. 

Therāpadāna 
Metteyyavagga 
Puṇṇakattheraapadāna 
“Pabbhārakūṭaṁ nissāya, 
sayambhū aparājito; 
Ābādhiko ca so buddho, 
vasati pabbatantare. 
Mama assamasāmantā, 
panādo āsi tāvade; 
Buddhe nibbāyamānamhi, 
āloko udapajjatha. 
Yāvatā vanasaṇḍasmiṁ, 
acchakokataracchakā; 
Vāḷā ca kesarī sabbe, 
abhigajjiṁsu tāvade. 
Uppātaṁ tamahaṁ disvā, 
pabbhāraṁ agamāsahaṁ; 
Tatthaddassāsiṁ sambuddhaṁ, 
nibbutaṁ aparājitaṁ. 
Suphullaṁ sālarājaṁva, 
sataraṁsiṁva uggataṁ; 
Vītaccikaṁva aṅgāraṁ, 
nibbutaṁ aparājitaṁ. 
Tiṇaṁ kaṭṭhañca pūretvā, 
citakaṁ tatthakāsahaṁ; 
Citakaṁ sukataṁ katvā, 
sarīraṁ jhāpayiṁ ahaṁ. 
Sarīraṁ jhāpayitvāna, 
gandhatoyaṁ samokiriṁ; 
Antalikkhe ṭhito yakkho, 
nāmamaggahi tāvade. 
‘Yaṁ pūritaṁ tayā kiccaṁ, 
sayambhussa mahesino; 
Puṇṇako nāma nāmena, 
sadā hohi tuvaṁ mune’. 
Tamhā kāyā cavitvāna, 
devalokaṁ agacchahaṁ; 
Tattha dibbamayo gandho, 
antalikkhā pavassati. 
Tatrāpi nāmadheyyaṁ me, 
puṇṇakoti ahū tadā; 
Devabhūto manusso vā, 
saṅkappaṁ pūrayāmahaṁ. 
Idaṁ pacchimakaṁ mayhaṁ, 
carimo vattate bhavo; 
Idhāpi puṇṇako nāma, 
nāmadheyyaṁ pakāsati. 
Tosayitvāna sambuddhaṁ, 
gotamaṁ sakyapuṅgavaṁ; 
Sabbāsave pariññāya, 
viharāmi anāsavo. 
Ekanavutito kappe, 
yaṁ kammamakariṁ tadā; 
Duggatiṁ nābhijānāmi, 
tanukiccassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā puṇṇako thero imā gāthāyo abhāsitthāti. 
Puṇṇakattherassāpadānaṁ dutiyaṁ. 

Therāpadāna 
Metteyyavagga 
Mettaguttheraapadāna 
“Himavantassāvidūre, 
asoko nāma pabbato; 
Tatthāsi assamo mayhaṁ, 
vissakammena māpito. 
Sumedho nāma sambuddho, 
aggo kāruṇiko muni; 
Nivāsayitvā pubbaṇhe, 
piṇḍāya me upāgami. 
Upāgataṁ mahāvīraṁ, 
sumedhaṁ lokanāyakaṁ; 
Paggayha sugatapattaṁ, 
sappitelaṁ apūrayiṁ. 
Datvānahaṁ buddhaseṭṭhe, 
sumedhe lokanāyake; 
Añjaliṁ paggahetvāna, 
bhiyyo hāsaṁ janesahaṁ. 
Iminā sappidānena, 
cetanāpaṇidhīhi ca; 
Devabhūto manusso vā, 
labhāmi vipulaṁ sukhaṁ. 
Vinipātaṁ vivajjetvā, 
saṁsarāmi bhavābhave; 
Tattha cittaṁ paṇidhitvā, 
labhāmi acalaṁ padaṁ. 
‘Lābhā tuyhaṁ suladdhaṁ te, 
yaṁ maṁ addakkhi brāhmaṇa; 
Mama dassanamāgamma, 
arahattaṁ bhavissati. 
Vissattho hohi mā bhāyi, 
adhigantvā mahāyasaṁ; 
Mamañhi sappiṁ datvāna, 
parimokkhasi jātiyā’. 
Iminā sappidānena, 
cetanāpaṇidhīhi ca; 
Devabhūto manusso vā, 
labhase vipulaṁ sukhaṁ. 
Iminā sappidānena, 
mettacittavatāya ca; 
Aṭṭhārase kappasate, 
devaloke ramissasi. 
Aṭṭhatiṁsatikkhattuñca, 
devarājā bhavissasi; 
Padesarajjaṁ vipulaṁ, 
gaṇanāto asaṅkhiyaṁ. 
Ekapaññāsakkhattuñca, 
cakkavattī bhavissasi; 
Cāturanto vijitāvī, 
jambumaṇḍassa issaro. 
Mahāsamuddovakkhobho, 
duddharo pathavī yathā; 
Evamevaṁ ca te bhogā, 
appameyyā bhavissare. 
Saṭṭhikoṭī hiraññassa, 
cajitvā pabbajiṁ ahaṁ; 
Kiṁ kusalaṁ gavesanto, 
bāvariṁ upasaṅkamiṁ. 
Tattha mante adhīyāmi, 
chaḷaṅgaṁ nāma lakkhaṇaṁ; 
Tamandhakāraṁ vidhamaṁ, 
uppajji tvaṁ mahāmuni. 
Tava dassanakāmohaṁ, 
āgatomhi mahāmuni; 
Tava dhammaṁ suṇitvāna, 
pattomhi acalaṁ padaṁ. 
Tiṁsakappasahassamhi, 
sappiṁ buddhassadāsahaṁ; 
Etthantare nābhijāne, 
sappiṁ viññāpitaṁ mayā. 
Mama saṅkappamaññāya, 
uppajjati yadicchakaṁ; 
Cittamaññāya nibbattaṁ, 
sabbe santappayāmahaṁ. 
Aho buddhā aho dhammā, 
aho no satthu sampadā; 
Thokañhi sappiṁ datvāna, 
appameyyaṁ labhāmahaṁ. 
Mahāsamudde udakaṁ, 
yāvatā nerupassato; 
Mama sappiṁ upādāya, 
kalabhāgaṁ na hessati. 
Yāvatā cakkavāḷassa, 
kariyantassa rāsito; 
Mama nibbattavatthānaṁ, 
okāso so na sammati. 
Pabbatarājā himavā, 
pavaropi siluccayo; 
Mamānulittagandhassa, 
upanidhiṁ na hessati. 
Vatthaṁ gandhañca sappiñca, 
aññañca diṭṭhadhammikaṁ; 
Asaṅkhatañca nibbānaṁ, 
sappidānassidaṁ phalaṁ. 
Satipaṭṭhānasayano, 
samādhijhānagocaro; 
Bojjhaṅgabhojano ajja, 
sappidānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā mettagū thero imā gāthāyo abhāsitthāti. 
Mettaguttherassāpadānaṁ tatiyaṁ. 

Therāpadāna 
Metteyyavagga 
Dhotakattheraapadāna 
“Gaṅgā bhāgīrathī nāma, 
himavantā pabhāvitā; 
Haṁsavatiyā dvārena, 
anusandati tāvade. 
Sobhito nāma ārāmo, 
gaṅgākūle sumāpito; 
Tattha padumuttaro buddho, 
vasate lokanāyako. 
Tidasehi yathā indo, 
manujehi purakkhato; 
Nisīdi tattha bhagavā, 
asambhītova kesarī. 
Nagare haṁsavatiyā, 
vasāmi brāhmaṇo ahaṁ; 
Chaḷaṅgo nāma nāmena, 
evaṁnāmo mahāmuni. 
Aṭṭhārasa sissasatā, 
parivārenti maṁ tadā; 
Tehi sissehi samito, 
gaṅgātīraṁ upāgamiṁ. 
Tatthaddasāsiṁ samaṇe, 
nikkuhe dhotapāpake; 
Bhāgīrathiṁ tarantehaṁ, 
evaṁ cintesi tāvade. 
‘Sāyaṁ pātaṁ tarantāme, 
buddhaputtā mahāyasā; 
Vihesayanti attānaṁ, 
tesaṁ attā vihaññati. 
Sadevakassa lokassa, 
buddho aggo pavuccati; 
Natthi me dakkhiṇe kāraṁ, 
gatimaggavisodhanaṁ. 
Yannūna buddhaseṭṭhassa, 
setuṁ gaṅgāya kāraye; 
Kārāpetvā imaṁ kammaṁ, 
santarāmi imaṁ bhavaṁ’. 
Satasahassaṁ datvāna, 
setuṁ kārāpayiṁ ahaṁ; 
Saddahanto kataṁ kāraṁ, 
vipulaṁ me bhavissati. 
Kārāpetvāna taṁ setuṁ, 
upesiṁ lokanāyakaṁ; 
Sirasi añjaliṁ katvā, 
imaṁ vacanamabraviṁ. 
‘Satasahassassa vayaṁ, 
datvā kārāpito mayā; 
Tavatthāya mahāsetu, 
paṭiggaṇha mahāmune’. 
Padumuttaro lokavidū, 
āhutīnaṁ paṭiggaho; 
Bhikkhusaṅghe nisīditvā, 
imā gāthā abhāsatha. 
‘Yo me setuṁ akāresi, 
pasanno sehi pāṇibhi; 
Tamahaṁ kittayissāmi, 
suṇātha mama bhāsato. 
4.1. Setudānaānisaṁsa 
Darito pabbatato vā, 
rukkhato patitopiyaṁ; 
Cutopi lacchatī ṭhānaṁ, 
setudānassidaṁ phalaṁ. 
Virūḷhamūlasantānaṁ, 
nigrodhamiva māluto; 
Amittā nappasahanti, 
setudānassidaṁ phalaṁ. 
Nāssa corā pasahanti, 
nātimaññanti khattiyā; 
Sabbe tarissatāmitte, 
setudānassidaṁ phalaṁ. 
Abbhokāsagataṁ santaṁ, 
kaṭhinātapatāpitaṁ; 
Puññakammena saṁyuttaṁ, 
na bhavissati vedanā. 
Devaloke manusse vā, 
hatthiyānaṁ sunimmitaṁ; 
Tassa saṅkappamaññāya, 
nibbattissati tāvade. 
Sahassassā vātajavā, 
sindhavā sīghavāhanā; 
Sāyaṁ pātaṁ upessanti, 
setudānassidaṁ phalaṁ. 
Āgantvāna manussattaṁ, 
sukhitoyaṁ bhavissati; 
Vehāsaṁ manujasseva, 
hatthiyānaṁ bhavissati. 
Kappasatasahassamhi, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādo, 
oraso dhammanimmito; 
Sabbāsave pariññāya, 
nibbāyissatināsavo’. 
Aho me sukataṁ kammaṁ, 
jalajuttamanāmake; 
Tattha kāraṁ karitvāna, 
pattohaṁ āsavakkhayaṁ. 
Padhānaṁ pahitattomhi, 
upasanto nirūpadhi; 
Nāgova bandhanaṁ chetvā, 
viharāmi anāsavo. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā dhotako thero imā gāthāyo abhāsitthāti. 
Dhotakattherassāpadānaṁ catutthaṁ. 

Therāpadāna 
Metteyyavagga 
5 Upasivattheraapadāna 
“Himavantassāvidūre, 
anomo nāma pabbato; 
Assamo sukato mayhaṁ, 
paṇṇasālā sumāpitā. 
Nadī ca sandatī tattha, 
supatitthā manoramā; 
Anūpatitthe jāyanti, 
padumuppalakā bahū. 
Pāṭhīnā pāvusā macchā, 
balajā muñjarohitā; 
Macchakacchapasañchannā, 
nadikā sandate tadā. 
Timirā pupphitā tattha, 
asokā khuddamālakā; 
Punnāgā giripunnāgā, 
sampavanti mamassamaṁ. 
Kuṭajā pupphitā tattha, 
tiṇasūlavanāni ca; 
Sālā ca saḷalā tattha, 
campakā pupphitā bahū. 
Ajjunā atimuttā ca, 
mahānāmā ca pupphitā; 
Asanā madhugandhī ca, 
pupphitā te mamassame. 
Uddālakā pāṭalikā, 
yūthikā ca piyaṅgukā; 
Bimbijālakasañchannā, 
samantā aḍḍhayojanaṁ. 
Mātaggārā sattaliyo, 
pāṭalī sinduvārakā; 
Aṅkolakā bahū tattha, 
tālakuṭṭhi ca pupphitā; 
Seleyyakā bahū tattha, 
pupphitā mama assame. 
Etesu pupphajātesu, 
sobhanti pādapā bahū; 
Samantā tena gandhena, 
vāyate mama assamo. 
Harītakā āmalakā, 
ambajambuvibhītakā; 
Kolā bhallātakā billā, 
phārusakaphalāni ca. 
Tindukā ca piyālā ca, 
madhukā kāsumārayo; 
Labujā panasā tattha, 
kadalī badarīphalā. 
Ambāṭakā bahū tattha, 
vallikāraphalāni ca; 
Bījapūrasapāriyo, 
phalitā mama assame. 
Āḷakā isimuggā ca, 
tato modaphalā bahū; 
Avaṭā pakkabharitā, 
pilakkhudumbarāni ca. 
Pipphalī marīcā tattha, 
nigrodhā ca kapitthanā; 
Udumbarakā bahavo, 
kaṇḍupaṇṇā ca hariyo. 
Ete caññe ca bahavo, 
phalitā assame mama; 
Puppharukkhāpi bahavo, 
pupphitā mama assame. 
Āluvā ca kaḷambā ca, 
biḷālī takkalāni ca; 
Ālakā tālakā ceva, 
vijjanti assame mama. 
Assamassāvidūre me, 
mahājātassaro ahu; 
Acchodako sītajalo, 
supatittho manoramo. 
Padumuppalā bahū tattha, 
puṇḍarīkasamāyutā; 
Mandālakehi sañchannā, 
nānāgandhasameritā. 
Gabbhaṁ gaṇhanti padumā, 
aññe pupphanti kesarī; 
Opupphapattā tiṭṭhanti, 
padumākaṇṇikā bahū. 
Madhu bhisamhā savati, 
khīraṁ sappi mulāḷibhi; 
Samantā tena gandhena, 
nānāgandhasameritā. 
Kumudā ambagandhi ca, 
nayitā dissare bahū; 
Jātassarassānukūlaṁ, 
ketakā pupphitā bahū. 
Suphullā bandhujīvā ca, 
setavārī sugandhikā; 
Kumbhilā susumārā ca, 
gahakā tattha jāyare. 
Uggāhakā ajagarā, 
tattha jātassare bahū; 
Pāṭhīnā pāvusā macchā, 
balajā muñjarohitā. 
Macchakacchapasañchannā, 
atho papaṭakāhi ca; 
Pārevatā ravihaṁsā, 
kukutthā ca nadīcarā. 
Dindibhā cakkavākā ca, 
pampakā jīvajīvakā; 
Kalandakā ukkusā ca, 
senakā uddharā bahū. 
Koṭṭhakā sukapotā ca, 
tuliyā camarā bahū; 
Kāreniyo ca tilakā, 
upajīvanti taṁ saraṁ. 
Sīhā byagghā ca dīpī ca, 
acchakokataracchakā; 
Vānarā kinnarā ceva, 
dissanti mama assame. 
Tāni gandhāni ghāyanto, 
bhakkhayanto phalānahaṁ; 
Gandhodakaṁ pivanto ca, 
vasāmi mama assame. 
Eṇīmigā varāhā ca, 
pasadā khuddarūpakā; 
Aggikā jotikā ceva, 
vasanti mama assame. 
Haṁsā koñcā mayūrā ca, 
sālikāpi ca kokilā; 
Majjārikā bahū tattha, 
kosikā poṭṭhasīsakā. 
Pisācā dānavā ceva, 
kumbhaṇḍā rakkhasā bahū; 
Garuḷā pannagā ceva, 
vasanti mama assame. 
Mahānubhāvā isayo, 
santacittā samāhitā; 
Kamaṇḍaludharā sabbe, 
ajinuttaravāsanā; 
Jaṭābhārabharitāva, 
vasanti mama assame. 
Yugamattañca pekkhantā, 
nipakā santavuttino; 
Lābhālābhena santuṭṭhā, 
vasanti mama assame. 
Vākacīraṁ dhunantā te, 
phoṭentājinacammakaṁ; 
Sabalehi upatthaddhā, 
gacchanti ambare tadā. 
Na te dakaṁ āharanti, 
kaṭṭhaṁ vā aggidārukaṁ; 
Sayañca upasampannā, 
pāṭihīrassidaṁ phalaṁ. 
Lohadoṇiṁ gahetvāna, 
vanamajjhe vasanti te; 
Kuñjarāva mahānāgā, 
asambhītāva kesarī. 
Aññe gacchanti goyānaṁ, 
aññe pubbavidehakaṁ; 
Aññe ca uttarakuruṁ, 
sakaṁ balamavassitā. 
Tato piṇḍaṁ āharitvā, 
paribhuñjanti ekato; 
Sabbesaṁ pakkamantānaṁ, 
uggatejāna tādinaṁ. 
Ajinacammasaddena, 
vanaṁ saddāyate tadā; 
Edisā te mahāvīra, 
sissā uggatapā mama. 
Parivuto ahaṁ tehi, 
vasāmi mama assame; 
Tositā sakakammena, 
vinītāpi samāgatā. 
Ārādhayiṁsu maṁ ete, 
sakakammābhilāsino; 
Sīlavanto ca nipakā, 
appamaññāsu kovidā. 
Padumuttaro lokavidū, 
āhutīnaṁ paṭiggaho; 
Samayaṁ saṁviditvāna, 
upagacchi vināyako. 
Upagantvāna sambuddho, 
ātāpī nipako muni; 
Pattaṁ paggayha sambuddho, 
bhikkhāya mamupāgami. 
Upāgataṁ mahāvīraṁ, 
jalajuttamanāyakaṁ; 
Tiṇasantharaṁ paññāpetvā, 
sālapupphehi okiriṁ. 
Nisādetvāna sambuddhaṁ, 
haṭṭho saṁviggamānaso; 
Khippaṁ pabbatamāruyha, 
agaḷuṁ aggahiṁ ahaṁ. 
Kumbhamattaṁ gahetvāna, 
panasaṁ devagandhikaṁ; 
Khandhe āropayitvāna, 
upagacchiṁ vināyakaṁ. 
Phalaṁ buddhassa datvāna, 
agaḷuṁ anulimpahaṁ; 
Pasannacitto sumano, 
buddhaseṭṭhaṁ avandihaṁ. 
Padumuttaro lokavidū, 
āhutīnaṁ paṭiggaho; 
Isimajjhe nisīditvā, 
imā gāthā abhāsatha. 
‘Yo me phalañca agaḷuṁ, 
āsanañca adāsi me; 
Tamahaṁ kittayissāmi, 
suṇātha mama bhāsato. 
Gāme vā yadi vāraññe, 
pabbhāresu guhāsu vā; 
Imassa cittamaññāya, 
nibbattissati bhojanaṁ. 
Devaloke manusse vā, 
upapanno ayaṁ naro; 
Bhojanehi ca vatthehi, 
parisaṁ tappayissati. 
Upapajjati yaṁ yoniṁ, 
devattaṁ atha mānusaṁ; 
Akkhobhabhogo hutvāna, 
saṁsarissatiyaṁ naro. 
Tiṁsakappasahassāni, 
devaloke ramissati; 
Sahassakkhattuṁ rājā ca, 
cakkavattī bhavissati. 
Ekasattatikkhattuñca, 
devarajjaṁ karissati; 
Padesarajjaṁ vipulaṁ, 
gaṇanāto asaṅkhiyaṁ. 
Kappasatasahassamhi, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādo, 
oraso dhammanimmito; 
(…) 
Sabbāsave pariññāya, 
viharissatināsavo’. 
Suladdhalābho laddho me, 
yohaṁ addakkhiṁ nāyakaṁ; 
Tisso vijjā anuppattā, 
kataṁ buddhassa sāsanaṁ. 
Gāme vā yadi vāraññe, 
pabbhāresu guhāsu vā; 
Mama saṅkappamaññāya, 
bhojanaṁ hoti me sadā. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā upasivo thero imā gāthāyo abhāsitthāti. 
Upasivattherassāpadānaṁ pañcamaṁ. 

Therāpadāna 
Metteyyavagga 
Nandakattheraapadāna 
“Migaluddo pure āsiṁ, 
Araññe kānane ahaṁ; 
Pasadaṁ migamesanto, 
Sayambhuṁ addasaṁ ahaṁ. 
Anuruddho nāma sambuddho, 
sayambhū aparājito; 
Vivekakāmo so dhīro, 
vanamajjhogahī tadā. 
Catudaṇḍe gahetvāna, 
catuṭṭhāne ṭhapesahaṁ; 
Maṇḍapaṁ sukataṁ katvā, 
padmapupphehi chādayiṁ. 
Maṇḍapaṁ chādayitvāna, 
sayambhuṁ abhivādayiṁ; 
Dhanuṁ tattheva nikkhippa, 
pabbajiṁ anagāriyaṁ. 
Naciraṁ pabbajitassa, 
byādhi me udapajjatha; 
Pubbakammaṁ saritvāna, 
tattha kālaṅkato ahaṁ. 
Pubbakammena saṁyutto, 
tusitaṁ agamāsahaṁ; 
Tattha soṇṇamayaṁ byamhaṁ, 
nibbattati yadicchakaṁ. 
Sahassayuttaṁ hayavāhiṁ, 
dibbayānamadhiṭṭhito; 
Āruhitvāna taṁ yānaṁ, 
gacchāmahaṁ yadicchakaṁ. 
Tato me niyyamānassa, 
devabhūtassa me sato; 
Samantā yojanasataṁ, 
maṇḍapo me dharīyati. 
Sayanehaṁ tuvaṭṭāmi, 
acchanne pupphasanthate; 
Antalikkhā ca padumā, 
vassante niccakālikaṁ. 
Marīcike phandamāne, 
tappamāne ca ātape; 
Na maṁ tāpeti ātāpo, 
maṇḍapassa idaṁ phalaṁ. 
Duggatiṁ samatikkanto, 
apāyā pihitā mama; 
Maṇḍape rukkhamūle vā, 
santāpo me na vijjati. 
Mahīsaññaṁ adhiṭṭhāya, 
loṇatoyaṁ tarāmahaṁ; 
Tassa me sukataṁ kammaṁ, 
buddhapūjāyidaṁ phalaṁ. 
Apathampi pathaṁ katvā, 
gacchāmi anilañjase; 
Aho me sukataṁ kammaṁ, 
buddhapūjāyidaṁ phalaṁ. 
Pubbenivāsaṁ jānāmi, 
dibbacakkhu visodhitaṁ; 
Āsavā me parikkhīṇā, 
buddhapūjāyidaṁ phalaṁ. 
Jahitā purimā jāti, 
buddhassa oraso ahaṁ; 
Dāyādomhi ca saddhamme, 
buddhapūjāyidaṁ phalaṁ. 
Ārādhitomhi sugataṁ, 
Gotamaṁ sakyapuṅgavaṁ; 
Dhammadhajo dhammadāyādo, 
Buddhapūjāyidaṁ phalaṁ. 
Upaṭṭhitvāna sambuddhaṁ, 
gotamaṁ sakyapuṅgavaṁ; 
Pāraṅgamaniyaṁ maggaṁ, 
apucchiṁ lokanāyakaṁ. 
Ajjhiṭṭho kathayī buddho, 
gambhīraṁ nipuṇaṁ padaṁ; 
Tassāhaṁ dhammaṁ sutvāna, 
pattomhi āsavakkhayaṁ. 
Aho me sukataṁ kammaṁ, 
parimuttomhi jātiyā; 
Sabbāsavaparikkhīṇo, 
natthi dāni punabbhavo. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā nandako thero imā gāthāyo abhāsitthāti. 
Nandakattherassāpadānaṁ chaṭṭhaṁ. 

Therāpadāna 
Metteyyavagga 
Hemakattheraapadāna 
“Pabbhārakūṭaṁ nissāya, 
anomo nāma tāpaso; 
Assamaṁ sukataṁ katvā, 
paṇṇasāle vasī tadā. 
Siddhaṁ tassa tapo kammaṁ, 
siddhipatto sake bale; 
Sakasāmaññavikkanto, 
ātāpī nipako muni. 
Visārado sasamaye, 
paravāde ca kovido; 
Paṭṭho bhūmantalikkhamhi, 
uppātamhi ca kovido. 
Vītasoko nirārambho, 
appāhāro alolupo; 
Lābhālābhena santuṭṭho, 
jhāyī jhānarato muni. 
Piyadassī nāma sambuddho, 
aggo kāruṇiko muni; 
Satte tāretukāmo so, 
karuṇāya pharī tadā. 
Bodhaneyyaṁ janaṁ disvā, 
piyadassī mahāmuni; 
Cakkavāḷasahassampi, 
gantvā ovadate muni. 
Mamuddharitukāmo so, 
mamassamamupāgami; 
Na diṭṭho me jino pubbe, 
na sutopi ca kassaci. 
Uppātā supinā mayhaṁ, 
lakkhaṇā suppakāsitā; 
Paṭṭho bhūmantalikkhamhi, 
nakkhattapadakovido. 
Sohaṁ buddhassa sutvāna, 
tattha cittaṁ pasādayiṁ; 
Tiṭṭhanto vā nisinno vā, 
sarāmi niccakālikaṁ. 
Mayi evaṁ sarantamhi, 
bhagavāpi anussari; 
Buddhaṁ anussarantassa, 
pīti me hoti tāvade. 
Kālañca punarāgamma, 
upesi maṁ mahāmuni; 
Sampattepi na jānāmi, 
ayaṁ buddho mahāmuni. 
Anukampako kāruṇiko, 
piyadassī mahāmuni; 
Sañjānāpesi attānaṁ, 
‘ahaṁ buddho sadevake’. 
Sañjānitvāna sambuddhaṁ, 
piyadassiṁ mahāmuniṁ; 
Sakaṁ cittaṁ pasādetvā, 
idaṁ vacanamabraviṁ. 
‘Aññe pīṭhe ca pallaṅke, 
āsandīsu nisīdare; 
Tuvampi sabbadassāvī, 
nisīda ratanāsane’. 
Sabbaratanamayaṁ pīṭhaṁ, 
nimminitvāna tāvade; 
Piyadassissa munino, 
adāsiṁ iddhinimmitaṁ. 
Ratane ca nisinnassa, 
pīṭhake iddhinimmite; 
Kumbhamattaṁ jambuphalaṁ, 
adāsiṁ tāvade ahaṁ. 
Mama hāsaṁ janetvāna, 
paribhuñji mahāmuni; 
Tadā cittaṁ pasādetvā, 
satthāraṁ abhivādayiṁ. 
Piyadassī tu bhagavā, 
lokajeṭṭho narāsabho; 
Ratanāsanamāsīno, 
imā gāthā abhāsatha. 
‘Yo me ratanamayaṁ pīṭhaṁ, 
amatañca phalaṁ adā; 
Tamahaṁ kittayissāmi, 
suṇātha mama bhāsato. 
Sattasattati kappāni, 
devaloke ramissati; 
Pañcasattatikkhattuñca, 
cakkavattī bhavissati. 
Dvattiṁsakkhattuṁ devindo, 
devarajjaṁ karissati; 
Padesarajjaṁ vipulaṁ, 
gaṇanāto asaṅkhiyaṁ. 
Soṇṇamayaṁ rūpimayaṁ, 
pallaṅkaṁ sukataṁ bahuṁ; 
Lohitaṅgamayañceva, 
lacchati ratanāmayaṁ. 
Caṅkamantampi manujaṁ, 
puññakammasamaṅginaṁ; 
Pallaṅkāni anekāni, 
parivāressare tadā. 
Kūṭāgārā ca pāsādā, 
sayanañca mahārahaṁ; 
Imassa cittamaññāya, 
nibbattissanti tāvade. 
Saṭṭhi nāgasahassāni, 
sabbālaṅkārabhūsitā; 
Suvaṇṇakacchā mātaṅgā, 
hemakappanavāsasā. 
Ārūḷhā gāmaṇīyehi, 
tomaraṅkusapāṇibhi; 
Imaṁ paricarissanti, 
ratnapīṭhassidaṁ phalaṁ. 
Saṭṭhi assasahassāni, 
sabbālaṅkārabhūsitā; 
Ājānīyāva jātiyā, 
sindhavā sīghavāhino. 
Ārūḷhā gāmaṇīyehi, 
illiyācāpadhāribhi; 
Tepimaṁ paricarissanti, 
ratnapīṭhassidaṁ phalaṁ. 
Saṭṭhi rathasahassāni, 
sabbālaṅkārabhūsitā; 
Dīpā athopi veyagghā, 
sannaddhā ussitaddhajā. 
Ārūḷhā gāmaṇīyehi, 
cāpahatthehi vammibhi; 
Parivāressantimaṁ niccaṁ, 
ratnapīṭhassidaṁ phalaṁ. 
Saṭṭhi dhenusahassāni, 
dohaññā puṅgavūsabhe; 
Vacchake janayissanti, 
ratnapīṭhassidaṁ phalaṁ. 
Soḷasitthisahassāni, 
sabbālaṅkārabhūsitā; 
Vicittavatthābharaṇā, 
āmukkamaṇikuṇḍalā. 
Aḷārapamhā hasulā, 
susaññā tanumajjhimā; 
Parivāressantimaṁ niccaṁ, 
ratnapīṭhassidaṁ phalaṁ. 
Aṭṭhārase kappasate, 
gotamo nāma cakkhumā; 
Tamandhakāraṁ vidhamitvā, 
buddho loke bhavissati. 
Tassa dassanamāgamma, 
pabbajissatikiñcano; 
Tosayitvāna satthāraṁ, 
sāsanebhiramissati. 
Tassa dhammaṁ suṇitvāna, 
kilese ghātayissati; 
Sabbāsave pariññāya, 
nibbāyissatināsavo’. 
Vīriyaṁ me dhuradhorayhaṁ, 
yogakkhemādhivāhanaṁ; 
Uttamatthaṁ patthayanto, 
sāsane viharāmahaṁ. 
Idaṁ pacchimakaṁ mayhaṁ, 
carimo vattate bhavo; 
Sabbāsavā parikkhīṇā, 
natthi dāni punabbhavo. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā hemako thero imā gāthāyo abhāsitthāti. 
Hemakattherassāpadānaṁ sattamaṁ. 
Sattarasamaṁ bhāṇavāraṁ. 

Therāpadāna 
Kuṇḍadhānavagga 
8 Āyāgadāyakattheraapadāna 
“Nibbute lokanāthamhi, 
sikhimhi vadataṁ vare; 
Haṭṭho haṭṭhena cittena, 
avandiṁ thūpamuttamaṁ. 
Vaḍḍhakīhi kathāpetvā, 
mūlaṁ datvānahaṁ tadā; 
Haṭṭho haṭṭhena cittena, 
āyāgaṁ kārapesahaṁ. 
Aṭṭha kappāni devesu, 
abbokiṇṇaṁ vasiṁ ahaṁ; 
Avasesesu kappesu, 
vokiṇṇaṁ saṁsariṁ ahaṁ. 
Kāye visaṁ na kamati, 
satthāni na ca hanti me; 
Udakehaṁ na miyyāmi, 
āyāgassa idaṁ phalaṁ. 
Yadicchāmi ahaṁ vassaṁ, 
mahāmegho pavassati; 
Devāpi me vasaṁ enti, 
puññakammassidaṁ phalaṁ. 
Sattaratanasampanno, 
tiṁsakkhattuṁ ahosahaṁ; 
Na maṁ kecāvajānanti, 
puññakammassidaṁ phalaṁ. 
Ekattiṁse ito kappe, 
āyāgaṁ yamakārayiṁ; 
Duggatiṁ nābhijānāmi, 
āyāgassa idaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā āyāgadāyako thero imā gāthāyo abhāsitthāti. 
Āyāgadāyakattherassāpadānaṁ aṭṭhamaṁ. 

Therāpadāna 
Metteyyavagga 
Todeyyattheraapadāna 
“Rājāsi vijayo nāma, 
ketumatīpuruttame; 
Sūro vikkamasampanno, 
puramajjhāvasī tadā. 
Tassa rañño pamattassa, 
aṭaviyo samuṭṭhahuṁ; 
Otārā tuṇḍikā ceva, 
raṭṭhaṁ viddhaṁsayuṁ tadā. 
Paccante kupite khippaṁ, 
sannipātesirindamo; 
Bhaṭe ceva balatthe ca, 
ariṁ niggāhayi tadā. 
Hatthārohā anīkaṭṭhā, 
sūrā ca cammayodhino; 
Dhanuggahā ca uggā ca, 
sabbe sannipatuṁ tadā. 
Āḷārikā ca kappakā, 
nhāpakā mālakārakā; 
Sūrā vijitasaṅgāmā, 
sabbe sannipatuṁ tadā. 
Khaggahatthā ca purisā, 
cāpahatthā ca vammino; 
Luddā vijitasaṅgāmā, 
sabbe sannipatuṁ tadā. 
Tidhāpabhinnā mātaṅgā, 
kuñjarā saṭṭhihāyanā; 
Suvaṇṇakacchālaṅkārā, 
sabbe sannipatuṁ tadā. 
Khamā sītassa uṇhassa, 
ukkāruharaṇassa ca; 
Yodhājīvā katakammā, 
sabbe sannipatuṁ tadā. 
Saṅkhasaddaṁ bherisaddaṁ, 
atho utujasaddakaṁ; 
Etehi te hāsayantā, 
sabbe sannipatuṁ tadā. 
Tisūlakontimantehi ca, 
kavacatomarehi ca; 
Koṭṭentānaṁ nipātentā, 
sabbe sannipatuṁ tadā. 
Kimevātinisāmetvā, 
sarājā ajitaṁ jino; 
Saṭṭhi pāṇasahassāni, 
sūle uttāsayiṁ tadā. 
Saddaṁ mānusakākaṁsu, 
‘aho rājā adhammiko; 
Niraye paccamānassa, 
kadā anto bhavissati’. 
Sayanehaṁ tuvaṭṭento, 
passāmi niraye tadā; 
Na supāmi divārattiṁ, 
sūlena tajjayanti maṁ. 
Kiṁ pamādena rajjena, 
vāhanena balena ca; 
Na te pahonti dhāretuṁ, 
tāpayanti mamaṁ sadā. 
Kiṁ me puttehi dārehi, 
rajjena sakalena ca; 
Yannūna pabbajeyyāhaṁ, 
gatimaggaṁ visodhaye. 
Saṭṭhi nāgasahassāni, 
sabbālaṅkārabhūsite; 
Suvaṇṇakacche mātaṅge, 
hemakappanavāsase. 
Ārūḷhe gāmaṇīyehi, 
tomaraṅkusapāṇibhi; 
Saṅgāmāvacare ṭhāne, 
anapekkho vihāyahaṁ; 
Sakakammena santatto, 
nikkhamiṁ anagāriyaṁ. 
Saṭṭhi assasahassāni, 
sabbālaṅkārabhūsite; 
Ājānīyeva jātiyā, 
sindhave sīghavāhane. 
Ārūḷhe gāmaṇīyehi, 
cāpahatthehi vammibhi; 
Pahāretvāna te sabbe, 
nikkhamiṁ anagāriyaṁ. 
Saṭṭhi rathasahassāni, 
sabbālaṅkārabhūsite; 
Dīpe athopi veyagghe, 
sannaddhe ussitaddhaje; 
Te sabbe parihāretvā, 
pabbajiṁ anagāriyaṁ. 
Saṭṭhi dhenusahassāni, 
sabbā kaṁsūpadhāraṇā; 
Tāyopi chaḍḍayitvāna, 
pabbajiṁ anagāriyaṁ. 
Saṭṭhi itthisahassāni, 
sabbālaṅkārabhūsitā; 
Vicittavatthābharaṇā, 
āmukkamaṇikuṇḍalā. 
Aḷārapamhā hasulā, 
susaññā tanumajjhimā; 
Tā hitvā kandamānāyo, 
pabbajiṁ anagāriyaṁ. 
Saṭṭhi gāmasahassāni, 
paripuṇṇāni sabbaso; 
Chaḍḍayitvāna taṁ rajjaṁ, 
pabbajiṁ anagāriyaṁ. 
Nagarā nikkhamitvāna, 
himavantamupāgamiṁ; 
Bhāgīrathīnadītīre, 
assamaṁ māpayiṁ ahaṁ. 
Paṇṇasālaṁ karitvāna, 
Agyāgāraṁ akāsahaṁ; 
Āraddhavīriyo pahitatto, 
Vasāmi assame ahaṁ. 
Maṇḍape rukkhamūle vā, 
suññāgāre ca jhāyato; 
Na tu vijjati tāso me, 
na passe bhayabheravaṁ. 
Sumedho nāma sambuddho, 
aggo kāruṇiko muni; 
Ñāṇālokena jotanto, 
loke uppajji tāvade. 
Mama assamasāmantā, 
yakkho āsi mahiddhiko; 
Buddhaseṭṭhamhi uppanne, 
ārocesi mamaṁ tadā. 
‘Buddho loke samuppanno, 
sumedho nāma cakkhumā; 
Tāreti janataṁ sabbaṁ, 
tampi so tārayissati’. 
Yakkhassa vacanaṁ sutvā, 
saṁviggo āsi tāvade; 
Buddho buddhoti cintento, 
assamaṁ paṭisāmayiṁ. 
Aggidāruñca chaḍḍetvā, 
saṁsāmetvāna santhataṁ; 
Assamaṁ abhivanditvā, 
nikkhamiṁ vipinā ahaṁ. 
Tato candanamādāya, 
gāmā gāmaṁ purā puraṁ; 
Devadevaṁ gavesanto, 
upagacchiṁ vināyakaṁ. 
Bhagavā tamhi samaye, 
sumedho lokanāyako; 
Catusaccaṁ pakāsento, 
bodheti janataṁ bahuṁ. 
Añjaliṁ paggahetvāna, 
sīse katvāna candanaṁ; 
Sambuddhaṁ abhivādetvā, 
imā gāthā abhāsahaṁ. 
‘Vassike pupphamānamhi, 
santike upavāyati; 
Tvaṁ vīra guṇagandhena, 
disā sabbā pavāyasi. 
Campake nāgavanike, 
atimuttakaketake; 
Sālesu pupphamānesu, 
anuvātaṁ pavāyati. 
Tava gandhaṁ suṇitvāna, 
himavantā idhāgamiṁ; 
Pūjemi taṁ mahāvīra, 
lokajeṭṭha mahāyasa’. 
Varacandanenānulimpiṁ, 
sumedhaṁ lokanāyakaṁ; 
Sakaṁ cittaṁ pasādetvā, 
tuṇhī aṭṭhāsi tāvade. 
Sumedho nāma bhagavā, 
lokajeṭṭho narāsabho; 
Bhikkhusaṅghe nisīditvā, 
imā gāthā abhāsatha. 
‘Yo me guṇe pakittesi, 
candanañca apūjayi; 
Tamahaṁ kittayissāmi, 
suṇātha mama bhāsato. 
Ādeyyavākyavacano, 
brahmā uju patāpavā; 
Pañcavīsatikappāni, 
sappabhāso bhavissati. 
Chabbīsatikappasate, 
devaloke ramissati; 
Sahassakkhattuṁ rājā ca, 
cakkavattī bhavissati. 
Tettiṁsakkhattuṁ devindo, 
devarajjaṁ karissati; 
Padesarajjaṁ vipulaṁ, 
gaṇanāto asaṅkhiyaṁ. 
Tato cutoyaṁ manujo, 
manussattaṁ gamissati; 
Puññakammena saṁyutto, 
brahmabandhu bhavissati. 
Ajjhāyako mantadharo, 
tiṇṇaṁ vedāna pāragū; 
Tilakkhaṇena sampanno, 
bāvarī nāma brāhmaṇo. 
Tassa sisso bhavitvāna, 
hessati mantapāragū; 
Upagantvāna sambuddhaṁ, 
gotamaṁ sakyapuṅgavaṁ. 
Pucchitvā nipuṇe pañhe, 
bhāvayitvāna añjasaṁ; 
Sabbāsave pariññāya, 
viharissatināsavo’. 
Tividhaggi nibbutā mayhaṁ, 
bhavā sabbe samūhatā; 
Sabbāsave pariññāya, 
viharāmi anāsavo. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā todeyyo thero imā gāthāyo abhāsitthāti. 
Todeyyattherassāpadānaṁ aṭṭhamaṁ. 

Therāpadāna 
Metteyyavagga 
Jatukaṇṇittheraapadāna 
“Nagare haṁsavatiyā, 
seṭṭhiputto ahosahaṁ; 
Samappito kāmaguṇe, 
paricāremahaṁ tadā. 
Tato pāsādamāruyha, 
mahābhoge valañjako; 
Tattha naccehi gītehi, 
paricāremahaṁ tadā. 
Tūriyā āhatā mayhaṁ, 
sammatāḷasamāhitā; 
Naccantā itthiyo sabbā, 
harantiyeva me mano. 
Celāpikā vāmanikā, 
kuñjavāsī timajjhikā; 
Laṅghikā sokajjhāyī ca, 
parivārenti maṁ sadā. 
Vetāḷino kumbhathūnī, 
naṭā ca naccakā bahū; 
Naṭakā nāṭakā ceva, 
parivārenti maṁ sadā. 
Kappakā nhāpakā sūdā, 
mālākārā supāsakā; 
Jallā mallā ca te sabbe, 
parivārenti maṁ sadā. 
Etesu kīḷamānesu, 
sikkhite katupāsane; 
Rattindivaṁ na jānāmi, 
indova tidasaṅgaṇe. 
Addhikā pathikā sabbe, 
yācakā varakā bahū; 
Upagacchanti te niccaṁ, 
bhikkhayantā mamaṁ gharaṁ. 
Samaṇā brāhmaṇā ceva, 
puññakkhettā anuttarā; 
Vaḍḍhayantā mamaṁ puññaṁ, 
āgacchanti mamaṁ gharaṁ. 
Paṭagā laṭukā sabbe, 
nigaṇṭhā pupphasāṭakā; 
Tedaṇḍikā ekasikhā, 
āgacchanti mamaṁ gharaṁ. 
Ājīvakā viluttāvī, 
godhammā devadhammikā; 
Rajojalladharā ete, 
āgacchanti mamaṁ gharaṁ. 
Parittakā santipattā, 
kodhapugganikā bahū; 
Tapassī vanacārī ca, 
āgacchanti mamaṁ gharaṁ. 
Oḍḍakā damiḷā ceva, 
sākuḷā malavāḷakā; 
Savarā yonakā ceva, 
āgacchanti mamaṁ gharaṁ. 
Andhakā muṇḍakā sabbe, 
koṭalā hanuvindakā; 
Ārāvacīnaraṭṭhā ca, 
āgacchanti mamaṁ gharaṁ. 
Alasandakā pallavakā, 
dhammarā niggamānusā; 
Gehikā cetaputtā ca, 
āgacchanti mamaṁ gharaṁ. 
Mādhurakā kosalakā, 
kaliṅgā hatthiporikā; 
Isiṇḍā makkalā ceva, 
āgacchanti mamaṁ gharaṁ. 
Celāvakā ārabbhā ca, 
oghuḷhā meghalā bahū; 
Khuddakā suddakā ceva, 
āgacchanti mamaṁ gharaṁ. 
Rohaṇā sindhavā ceva, 
citakā ekakaṇṇikā; 
Suraṭṭhā aparantā ca, 
āgacchanti mamaṁ gharaṁ. 
Suppārakā kumārā ca, 
mallasovaṇṇabhūmikā; 
Vajjītaṅgā ca te sabbe, 
āgacchanti mamaṁ gharaṁ. 
Naḷakārā pesakārā, 
cammakārā ca tacchakā; 
Kammārā kumbhakārā ca, 
āgacchanti mamaṁ gharaṁ. 
Maṇikārā lohakārā, 
soṇṇakārā ca dussikā; 
Tipukārā ca te sabbe, 
āgacchanti mamaṁ gharaṁ. 
Usukārā bhamakārā, 
pesakārā ca gandhikā; 
Rajakā tunnavāyā ca, 
āgacchanti mamaṁ gharaṁ. 
Telikā kaṭṭhahārā ca, 
udahārā ca pessikā; 
Sūpikā sūparakkhā ca, 
āgacchanti mamaṁ gharaṁ. 
Dovārikā anīkaṭṭhā, 
Bandhikā pupphachaḍḍakā; 
Hatthāruhā hatthipālā, 
Āgacchanti mamaṁ gharaṁ. 
Ānandassa mahārañño, 
mamatthassa adāsahaṁ; 
Sattavaṇṇena ratanena, 
ūnatthaṁ pūrayāmahaṁ. 
Ye mayā kittitā sabbe, 
nānāvaṇṇā bahū janā; 
Tesāhaṁ cittamaññāya, 
tappayiṁ ratanenahaṁ. 
Vaggūsu bhāsamānāsu, 
vajjamānāsu bherisu; 
Saṅkhesu dhamayantesu, 
sakagehe ramāmahaṁ. 
Bhagavā tamhi samaye, 
padumuttaranāyako; 
Vasīsatasahassehi, 
parikkhīṇāsavehi so. 
Bhikkhūhi sahito vīthiṁ, 
paṭipajjittha cakkhumā; 
Obhāsento disā sabbā, 
dīparukkhova jotati. 
Vajjanti bheriyo sabbā, 
gacchante lokanāyake; 
Pabhā niddhāvate tassa, 
sataraṁsīva uggato. 
Kavāṭantarikāyāpi, 
paviṭṭhena ca rasminā; 
Antogharesu vipulo, 
āloko āsi tāvade. 
Pabhaṁ disvāna buddhassa, 
pārisajje avocahaṁ; 
‘Nissaṁsayaṁ buddhaseṭṭho, 
imaṁ vīthimupāgato’. 
Khippaṁ oruyha pāsādā, 
agamiṁ antarāpaṇaṁ; 
Sambuddhaṁ abhivādetvā, 
idaṁ vacanamabraviṁ. 
‘Anukampatu me buddho, 
jalajuttamanāyako; 
Vasīsatasahassehi, 
adhivāsesi so muni’. 
Nimantetvāna sambuddhaṁ, 
abhinesiṁ sakaṁ gharaṁ; 
Tattha annena pānena, 
santappesiṁ mahāmuniṁ. 
Bhuttāviṁ kālamaññāya, 
buddhaseṭṭhassa tādino; 
Sataṅgikena tūriyena, 
buddhaseṭṭhaṁ upaṭṭhahiṁ. 
Padumuttaro lokavidū, 
āhutīnaṁ paṭiggaho; 
Antoghare nisīditvā, 
imā gāthā abhāsatha. 
‘Yo maṁ tūriyehupaṭṭhāsi, 
annapānañcadāsi me; 
Tamahaṁ kittayissāmi, 
suṇātha mama bhāsato. 
Pahūtabhakkho hutvāna, 
sahirañño sabhojano; 
Catudīpe ekarajjaṁ, 
kārayissatiyaṁ naro. 
Pañca sīle samādāya, 
dasakammapathe tato; 
Samādāya pavattento, 
parisaṁ sikkhāpayissati. 
Tūriyasatasahassāni, 
bheriyo samalaṅkatā; 
Vajjayissantimaṁ niccaṁ, 
upaṭṭhānassidaṁ phalaṁ. 
Tiṁsakappasahassāni, 
devaloke ramissati; 
Catusaṭṭhikkhattuṁ devindo, 
devarajjaṁ karissati. 
Catusaṭṭhikkhattuṁ rājā, 
cakkavattī bhavissati; 
Padesarajjaṁ vipulaṁ, 
gaṇanāto asaṅkhiyaṁ. 
Kappasatasahassamhi, 
okkākakulasambhavo; 
Gotamo nāma gottena, 
satthā loke bhavissati. 
Upapajjati yaṁ yoniṁ, 
devattaṁ atha mānusaṁ; 
Anūnabhogo hutvāna, 
manussattaṁ gamissati. 
Ajjhāyako bhavitvāna, 
tiṇṇaṁ vedāna pāragū; 
Uttamatthaṁ gavesanto, 
carissati mahiṁ imaṁ. 
So pacchā pabbajitvāna, 
sukkamūlena codito; 
Gotamassa bhagavato, 
sāsanebhiramissati. 
Ārādhayitvāna sambuddhaṁ, 
gotamaṁ sakyapuṅgavaṁ; 
Kilese jhāpayitvāna, 
arahāyaṁ bhavissati’. 
Vipine byaggharājāva, 
migarājāva kesarī; 
Abhīto viharāmajja, 
sakyaputtassa sāsane. 
Devaloke manusse vā, 
dalidde duggatimhi vā; 
Nibbattiṁ me na passāmi, 
upaṭṭhānassidaṁ phalaṁ. 
Vivekamanuyuttomhi, 
upasanto nirūpadhi; 
Nāgova bandhanaṁ chetvā, 
viharāmi anāsavo. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā jatukaṇṇitthero imā gāthāyo abhāsitthāti. 
Jatukaṇṇittherassāpadānaṁ navamaṁ. 

Therāpadāna 
Metteyyavagga 
Udenattheraapadāna 
“Himavantassāvidūre, 
padumo nāma pabbato; 
Assamo sukato mayhaṁ, 
paṇṇasālā sumāpitā. 
Nadiyo sandare tattha, 
supatitthā manoramā; 
Acchodakā sītajalā, 
sandare nadiyo sadā. 
Pāṭhīnā pāvusā macchā, 
balajā muñjarohitā; 
Sobhentā nadiyo ete, 
vasanti nadiyā sadā. 
Ambajambūhi sañchannā, 
kareritilakā tathā; 
Uddālakā pāṭaliyo, 
sobhenti mama assamaṁ. 
Aṅkolakā bimbijālā, 
māyākārī ca pupphitā; 
Gandhena upavāyantā, 
sobhenti mama assamaṁ. 
Atimuttā sattalikā, 
nāgā sālā ca pupphitā; 
Dibbagandhaṁ sampavantā, 
sobhenti mama assamaṁ. 
Kosambā saḷalā nīpā, 
aṭṭhaṅgāpi ca pupphitā; 
Dibbagandhaṁ sampavantā, 
sobhenti mama assamaṁ. 
Harītakā āmalakā, 
ambajambuvibhītakā; 
Kolā bhallātakā billā, 
phalāni bahu assame. 
Kalambā kandalī tattha, 
pupphanti mama assame; 
Dibbagandhaṁ sampavantā, 
sobhenti mama assamaṁ. 
Asokapiṇḍivārī ca, 
nimbarukkhā ca pupphitā; 
Dibbagandhaṁ sampavantā, 
sobhenti mama assamaṁ. 
Punnāgā giripunnāgā, 
timirā tattha pupphitā; 
Dibbagandhaṁ sampavantā, 
sobhenti mama assamaṁ. 
Nigguṇḍī sirinigguṇḍī, 
camparukkhettha pupphitā; 
Dibbagandhaṁ sampavantā, 
sobhenti mama assamaṁ. 
Avidūre pokkharaṇī, 
cakkavākūpakūjitā; 
Mandālakehi sañchannā, 
padumuppalakehi ca. 
Acchodakā sītajalā, 
supatitthā manoramā; 
Acchā phalikasamānā, 
sobhenti mama assamaṁ. 
Padumā pupphare tattha, 
puṇḍarīkā ca uppalā; 
Mandālakehi sañchannā, 
sobhenti mama assamaṁ. 
Pāṭhīnā pāvusā macchā, 
balajā muñjarohitā; 
Vicarantāva te tattha, 
sobhenti mama assamaṁ. 
Kumbhīlā susumārā ca, 
kacchapā ca gahā bahū; 
Ogahā ajagarā ca, 
sobhenti mama assamaṁ. 
Pārevatā ravihaṁsā, 
cakkavākā nadīcarā; 
Dindibhā sāḷikā cettha, 
sobhenti mama assamaṁ. 
Nayitā ambagandhī ca, 
ketakā tattha pupphitā; 
Dibbagandhaṁ sampavantā, 
sobhenti mama assamaṁ. 
Sīhā byagghā ca dīpī ca, 
acchakokataracchakā; 
Anusañcarantā pavane, 
sobhenti mama assamaṁ. 
Jaṭābhārena bharitā, 
ajinuttaravāsanā; 
Anusañcarantā pavane, 
sobhenti mama assamaṁ. 
Ajinānidharā ete, 
nipakā santavuttino; 
Appāhārāva te sabbe, 
sobhenti mama assamaṁ. 
Khāribhāraṁ gahetvāna, 
ajjhogayha vanaṁ tadā; 
Mūlaphalāni bhuñjantā, 
vasanti assame tadā. 
Na te dāruṁ āharanti, 
udakaṁ pādadhovanaṁ; 
Sabbesaṁ ānubhāvena, 
sayamevāharīyati. 
Cullāsītisahassāni, 
isayettha samāgatā; 
Sabbeva jhāyino ete, 
uttamatthagavesakā. 
Tapassino brahmacārī, 
codentā appanāva te; 
Ambarāvacarā sabbe, 
vasanti assame tadā. 
Pañcāhaṁ sannipatanti, 
ekaggā santavuttino; 
Aññoññaṁ abhivādetvā, 
pakkamanti disāmukhā. 
Padumuttaro nāma jino, 
sabbadhammāna pāragū; 
Tamandhakāraṁ vidhamaṁ, 
uppajji tāvade jino. 
Mama assamasāmantā, 
yakkho āsi mahiddhiko; 
So me saṁsittha sambuddhaṁ, 
jalajuttamanāyakaṁ. 
‘Esa buddho samuppanno, 
Padumuttaro mahāmuni; 
Khippaṁ gantvāna sambuddhaṁ, 
Payirūpāsa mārisa’. 
Yakkhassa vacanaṁ sutvā, 
vippasannena cetasā; 
Assamaṁ saṁsāmetvāna, 
nikkhamiṁ vipinā tadā. 
Ceḷeva ḍayhamānamhi, 
nikkhamitvāna assamā; 
Ekarattiṁ nivāsetvā, 
upagacchiṁ vināyakaṁ. 
Padumuttaro lokavidū, 
āhutīnaṁ paṭiggaho; 
Catusaccaṁ pakāsento, 
desesi amataṁ padaṁ. 
Suphullaṁ padumaṁ gayha, 
upagantvā mahesino; 
Pasannacitto sumano, 
buddhassa abhiropayiṁ. 
Pūjayitvāna sambuddhaṁ, 
jalajuttamanāyakaṁ; 
Ekaṁsaṁ ajinaṁ katvā, 
santhaviṁ lokanāyakaṁ. 
‘Yena ñāṇena sambuddho, 
vasatīha anāsavo; 
Taṁ ñāṇaṁ kittayissāmi, 
suṇātha mama bhāsato. 
Saṁsārasotaṁ chinditvā, 
tāresi sabbapāṇinaṁ; 
Tava dhammaṁ suṇitvāna, 
taṇhāsotaṁ taranti te. 
Tuvaṁ satthā ca ketu ca, 
dhajo yūpo ca pāṇinaṁ; 
Parāyaṇo patiṭṭhā ca, 
dīpo ca dvipaduttama. 
Yāvatā gaṇino loke, 
satthavāhā pavuccare; 
Tuvaṁ aggosi sabbaññu, 
tava antogadhāva te. 
Tava ñāṇena sabbaññu, 
tāresi janataṁ bahuṁ; 
Tava dassanamāgamma, 
dukkhassantaṁ karissare. 
Ye kecime gandhajātā, 
loke vāyanti cakkhuma; 
Tava gandhasamo natthi, 
puññakkhette mahāmune. 
Tiracchānayoniṁ nirayaṁ, 
parimocesi cakkhuma; 
Asaṅkhataṁ padaṁ santaṁ, 
desesi tvaṁ mahāmune’. 
Padumuttaro lokavidū, 
āhutīnaṁ paṭiggaho; 
Bhikkhusaṅghe nisīditvā, 
imā gāthā abhāsatha. 
‘Yo me ñāṇaṁ apūjesi, 
pasanno sehi pāṇibhi; 
Tamahaṁ kittayissāmi, 
suṇātha mama bhāsato. 
Tiṁsakappasahassāni, 
devaloke ramissati; 
Sahassakkhattuṁ rājā ca, 
cakkavattī bhavissati’. 
Suladdhalābhaṁ laddhomhi, 
tosayitvāna subbataṁ; 
Sabbāsave pariññāya, 
viharāmi anāsavo. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā udeno thero imā gāthāyo abhāsitthāti. 
Udenattherassāpadānaṁ dasamaṁ. 
Metteyyavaggo ekacattālīsamo. 
Tassuddānaṁ 
Metteyyo puṇṇako thero, 
mettagū dhotakopi ca; 
Upasivo ca nando ca, 
hemako sattamo tahiṁ. 
Todeyyo jatukaṇṇī ca, 
udeno ca mahāyaso; 
Tīṇi gāthāsatānettha, 
asīti tīṇi cuttariṁ. 

Therāpadāna 
Bhaddālivagga 
Bhaddālittheraapadāna 
“Sumedho nāma sambuddho, 
aggo kāruṇiko muni; 
Vivekakāmo lokaggo, 
himavantamupāgami. 
Ajjhogāhetvā himavaṁ, 
sumedho lokanāyako; 
Pallaṅkaṁ ābhujitvāna, 
nisīdi purisuttamo. 
Samādhiṁ so samāpanno, 
sumedho lokanāyako; 
Sattarattindivaṁ buddho, 
nisīdi purisuttamo. 
Khāribhāraṁ gahetvāna, 
vanamajjhogahiṁ ahaṁ; 
Tatthaddasāsiṁ sambuddhaṁ, 
oghatiṇṇamanāsavaṁ. 
Sammajjaniṁ gahetvāna, 
sammajjitvāna assamaṁ; 
Catudaṇḍe ṭhapetvāna, 
akāsiṁ maṇḍapaṁ tadā. 
Sālapupphaṁ āharitvā, 
maṇḍapaṁ chādayiṁ ahaṁ; 
Pasannacitto sumano, 
abhivandiṁ tathāgataṁ. 
Yaṁ vadanti sumedhoti, 
bhūripaññaṁ sumedhasaṁ; 
Bhikkhusaṅghe nisīditvā, 
imā gāthā abhāsatha. 
Buddhassa giramaññāya, 
sabbe devā samāgamuṁ; 
Asaṁsayaṁ buddhaseṭṭho, 
dhammaṁ deseti cakkhumā. 
Sumedho nāma sambuddho, 
āhutīnaṁ paṭiggaho; 
Devasaṅghe nisīditvā, 
imā gāthā abhāsatha. 
‘Yo me sattāhaṁ maṇḍapaṁ, 
dhārayī sālachāditaṁ; 
Tamahaṁ kittayissāmi, 
suṇātha mama bhāsato. 
Devabhūto manusso vā, 
hemavaṇṇo bhavissati; 
Pahūtabhogo hutvāna, 
kāmabhogī bhavissati. 
Saṭṭhi nāgasahassāni, 
sabbālaṅkārabhūsitā; 
Suvaṇṇakacchā mātaṅgā, 
hemakappanavāsasā. 
Ārūḷhā gāmaṇīyehi, 
tomaraṅkusapāṇibhi; 
Sāyaṁ pāto upaṭṭhānaṁ, 
āgamissantimaṁ naraṁ; 
Tehi nāgehi parivuto, 
ramissati ayaṁ naro. 
Saṭṭhi assasahassāni, 
sabbālaṅkārabhūsitā; 
Ājānīyāva jātiyā, 
sindhavā sīghavāhino. 
Ārūḷhā gāmaṇīyehi, 
illiyācāpadhāribhi; 
Parivāressantimaṁ niccaṁ, 
buddhapūjāyidaṁ phalaṁ. 
Saṭṭhi rathasahassāni, 
sabbālaṅkārabhūsitā; 
Dīpā athopi veyagghā, 
sannaddhā ussitaddhajā. 
Ārūḷhā gāmaṇīyehi, 
cāpahatthehi vammibhi; 
Parivāressantimaṁ niccaṁ, 
buddhapūjāyidaṁ phalaṁ. 
Saṭṭhi gāmasahassāni, 
paripuṇṇāni sabbaso; 
Pahūtadhanadhaññāni, 
susamiddhāni sabbaso; 
Sadā pātubhavissanti, 
buddhapūjāyidaṁ phalaṁ. 
Hatthī assā rathā pattī, 
senā ca caturaṅginī; 
Parivāressantimaṁ niccaṁ, 
buddhapūjāyidaṁ phalaṁ. 
Aṭṭhārase kappasate, 
devaloke ramissati; 
Sahassakkhattuṁ rājā ca, 
cakkavattī bhavissati. 
Satānaṁ tīṇikkhattuñca, 
devarajjaṁ karissati; 
Padesarajjaṁ vipulaṁ, 
gaṇanāto asaṅkhiyaṁ. 
Tiṁsakappasahassamhi, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādo, 
oraso dhammanimmito; 
Sabbāsave pariññāya, 
viharissatināsavo’. 
Tiṁsakappasahassamhi, 
addasaṁ lokanāyakaṁ; 
Etthantaramupādāya, 
gavesiṁ amataṁ padaṁ. 
Lābhā mayhaṁ suladdhaṁ me, 
yamahaññāsi sāsanaṁ; 
Tisso vijjā anuppattā, 
kataṁ buddhassa sāsanaṁ. 
Namo te purisājañña, 
namo te purisuttama; 
Tava ñāṇaṁ pakittetvā, 
pattomhi acalaṁ padaṁ. 
Yaṁ yaṁ yonupapajjāmi, 
devattaṁ atha mānusaṁ; 
Sabbattha sukhito homi, 
phalaṁ me ñāṇakittane. 
Idaṁ pacchimakaṁ mayhaṁ, 
carimo vattate bhavo; 
Nāgova bandhanaṁ chetvā, 
viharāmi anāsavo. 
Kilesā jhāpitā mayhaṁ, 
bhavā sabbe samūhatā; 
Nāgova bandhanaṁ chetvā, 
viharāmi anāsavo. 
Svāgataṁ vata me āsi, 
mama buddhassa santike; 
Tisso vijjā anuppattā, 
kataṁ buddhassa sāsanaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā bhaddālitthero imā gāthāyo abhāsitthāti. 
Bhaddālittherassāpadānaṁ paṭhamaṁ. 

Therāpadāna 
Bhaddālivagga 
Ekachattiyattheraapadāna 
“Candabhāgānadītīre, 
assamo sukato mama; 
Susuddhapulinākiṇṇo, 
pannasālā sumāpitā. 
Uttānakūlā nadikā, 
supatitthā manoramā; 
Macchakacchapasampannā, 
susumāranisevitā. 
Acchā dīpī ca mayūrā, 
karavīkā ca sāḷikā; 
Kūjanti sabbadā ete, 
sobhayantā mamassamaṁ. 
Kokilā mañjubhāṇī ca, 
haṁsā ca madhurassarā; 
Abhikūjanti te tattha, 
sobhayantā mamassamaṁ. 
Sīhā byagghā varāhā ca, 
accha kokataracchakā; 
Giriduggamhi nādenti, 
sobhayantā mamassamaṁ. 
Eṇīmigā ca sarabhā, 
bheraṇḍā sūkarā bahū; 
Giriduggamhi nādenti, 
sobhayantā mamassamaṁ. 
Uddālakā campakā ca, 
pāṭalī sinduvārakā; 
Atimuttā asokā ca, 
sobhayanti mamassamaṁ. 
Aṅkolā yūthikā ceva, 
sattalī bimbijālikā; 
Kaṇikārā ca pupphanti, 
sobhayantā mamassamaṁ. 
Nāgā sālā ca saḷalā, 
puṇḍarīkettha pupphitā; 
Dibbagandhaṁ sampavantā, 
sobhayanti mamassamaṁ. 
Ajjunā asanā cettha, 
mahānāmā ca pupphitā; 
Sālā ca kaṅgupupphā ca, 
sobhayanti mamassamaṁ. 
Ambā jambū ca tilakā, 
nimbā ca sālakalyāṇī; 
Dibbagandhaṁ sampavantā, 
sobhayanti mamassamaṁ. 
Asokā ca kapiṭṭhā ca, 
girimālettha pupphitā; 
Dibbagandhaṁ sampavantā, 
sobhayanti mamassamaṁ. 
Kadambā kadalī ceva, 
isimuggā ca ropitā; 
Dhuvaṁ phalāni dhārenti, 
sobhayantā mamassamaṁ. 
Harītakā āmalakā, 
ambajambuvibhītakā; 
Kolā bhallātakā billā, 
phalino mama assame. 
Avidūre pokkharaṇī, 
supatitthā manoramā; 
Mandālakehi sañchannā, 
padumuppalakehi ca. 
Gabbhaṁ gaṇhanti padumā, 
aññe pupphanti kesarī; 
Opattakaṇṇikā ceva, 
pupphanti mama assame. 
Pāṭhīnā pāvusā macchā, 
balajā muñjarohitā; 
Acchodakamhi vicaraṁ, 
sobhayanti mamassamaṁ. 
Nayitā ambagandhī ca, 
anukūle ca ketakā; 
Dibbagandhaṁ sampavantā, 
sobhayanti mamassamaṁ. 
Madhu bhisamhā savati, 
khīrasappi muḷālibhi; 
Dibbagandhaṁ sampavantā, 
sobhayanti mamassamaṁ. 
Pulinā sobhanā tattha, 
ākiṇṇā jalasevitā; 
Opupphā pupphitā senti, 
sobhayantā mamassamaṁ. 
Jaṭābhārena bharitā, 
ajinuttaravāsanā; 
Vākacīradharā sabbe, 
sobhayanti mamassamaṁ. 
Yugamattamapekkhantā, 
nipakā santavuttino; 
Kāmabhoge anapekkhā, 
vasanti mama assame. 
Parūḷhakacchanakhalomā, 
paṅkadantā rajassirā; 
Rajojalladharā sabbe, 
vasanti mama assame. 
Abhiññāpāramippattā, 
antalikkhacarā ca te; 
Uggacchantā nabhaṁ ete, 
sobhayanti mamassamaṁ. 
Tehi sissehi parivuto, 
vasāmi vipine tadā; 
Rattindivaṁ na jānāmi, 
sadā jhānasamappito. 
Bhagavā tamhi samaye, 
atthadassī mahāmuni; 
Tamandhakāraṁ nāsento, 
uppajji lokanāyako. 
Atha aññataro sisso, 
āgacchi mama santikaṁ; 
Mante ajjhetukāmo so, 
chaḷaṅgaṁ nāma lakkhaṇaṁ. 
Buddho loke samuppanno, 
atthadassī mahāmuni; 
Catusaccaṁ pakāsento, 
deseti amataṁ padaṁ. 
Tuṭṭhahaṭṭho pamudito, 
dhammantaragatāsayo; 
Assamā abhinikkhamma, 
idaṁ vacanamabraviṁ. 
‘Buddho loke samuppanno, 
dvattiṁsavaralakkhaṇo; 
Etha sabbe gamissāma, 
sammāsambuddhasantikaṁ’. 
Ovādapaṭikarā te, 
sadhamme pāramiṁ gatā; 
Sādhūti sampaṭicchiṁsu, 
uttamatthagavesakā. 
Jaṭābhārabharitā te, 
ajinuttaravāsanā; 
Uttamatthaṁ gavesantā, 
nikkhamiṁsu vanā tadā. 
Bhagavā tamhi samaye, 
atthadassī mahāyaso; 
Catusaccaṁ pakāsento, 
deseti amataṁ padaṁ. 
Setacchattaṁ gahetvāna, 
buddhaseṭṭhassa dhārayiṁ; 
Ekāhaṁ dhārayitvāna, 
buddhaseṭṭhaṁ avandahaṁ. 
Atthadassī tu bhagavā, 
lokajeṭṭho narāsabho; 
Bhikkhusaṅghe nisīditvā, 
imā gāthā abhāsatha. 
‘Yo me chattaṁ adhāresi, 
pasanno sehi pāṇibhi; 
Tamahaṁ kittayissāmi, 
suṇātha mama bhāsato. 
Imassa jāyamānassa, 
devatte atha mānuse; 
Dhāressati sadā chattaṁ, 
chattadānassidaṁ phalaṁ. 
Sattasattatikappāni, 
devaloke ramissati; 
Sahassakkhattuṁ rājā ca, 
cakkavattī bhavissati. 
Sattasattatikkhattuñca, 
devarajjaṁ karissati; 
Padesarajjaṁ vipulaṁ, 
gaṇanāto asaṅkhiyaṁ. 
Aṭṭhārase kappasate, 
gotamo sakyapuṅgavo; 
Tamandhakāraṁ nāsento, 
uppajjissati cakkhumā. 
Tassa dhammesu dāyādo, 
oraso dhammanimmito; 
Sabbāsave pariññāya, 
viharissatināsavo’. 
Yato ahaṁ kammamakaṁ, 
chattaṁ buddhassa dhārayaṁ; 
Etthantare na jānāmi, 
setacchattaṁ adhāritaṁ. 
Idaṁ pacchimakaṁ mayhaṁ, 
carimo vattate bhavo; 
Chattadhāraṇamajjāpi, 
vattate niccakālikaṁ. 
Aho me sukataṁ kammaṁ, 
atthadassissa tādino; 
Sabbāsavā parikkhīṇā, 
natthi dāni punabbhavo. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ekachattiyo thero imā gāthāyo abhāsitthāti; 
Ekachattiyattherassāpadānaṁ dutiyaṁ. 

Therāpadāna 
Bhaddālivagga 
3 Tiṇasūlakachādaniyattheraapadāna 
“Jātiṁ jarañca maraṇaṁ, 
paccavekkhiṁ ahaṁ tadā; 
Ekako abhinikkhamma, 
pabbajiṁ anagāriyaṁ. 
Caramānonupubbena, 
gaṅgātīraṁ upāgamiṁ; 
Tatthaddasāsiṁ pathaviṁ, 
gaṅgātīre samunnataṁ. 
Assamaṁ tattha māpetvā, 
vasāmi assame ahaṁ; 
Sukato caṅkamo mayhaṁ, 
nānādijagaṇāyuto. 
Mamupenti ca vissatthā, 
kūjanti ca manoharaṁ; 
Ramamāno saha tehi, 
vasāmi assame ahaṁ. 
Mama assamasāmantā, 
migarājā catukkamo; 
Āsayā abhinikkhamma, 
gajji so asanī viya. 
Nadite migarāje ca, 
hāso me udapajjatha; 
Migarājaṁ gavesanto, 
addasaṁ lokanāyakaṁ. 
Disvānāhaṁ devadevaṁ, 
tissaṁ lokagganāyakaṁ; 
Haṭṭho haṭṭhena cittena, 
pūjayiṁ nāgakesaraṁ. 
Uggacchantaṁva sūriyaṁ, 
sālarājaṁva pupphitaṁ; 
Osadhiṁva virocantaṁ, 
santhaviṁ lokanāyakaṁ. 
‘Tava ñāṇena sabbaññu, 
mocesimaṁ sadevakaṁ; 
Tavaṁ ārādhayitvāna, 
jātiyā parimuccare. 
Adassanena sabbaññu, 
buddhānaṁ sabbadassinaṁ; 
Patantivīcinirayaṁ, 
rāgadosehi ophuṭā. 
Tava dassanamāgamma, 
sabbaññu lokanāyaka; 
Pamuccanti bhavā sabbā, 
phusanti amataṁ padaṁ. 
Yadā buddhā cakkhumanto, 
uppajjanti pabhaṅkarā; 
Kilese jhāpayitvāna, 
ālokaṁ dassayanti te’. 
Kittayitvāna sambuddhaṁ, 
tissaṁ lokagganāyakaṁ; 
Haṭṭho haṭṭhena cittena, 
tiṇasūlaṁ apūjayiṁ. 
Mama saṅkappamaññāya, 
tisso lokagganāyako; 
Sakāsane nisīditvā, 
imā gāthā abhāsatha. 
‘Yo maṁ pupphehi chādesi, 
pasanno sehi pāṇibhi; 
Tamahaṁ kittayissāmi, 
suṇātha mama bhāsato. 
Pañcavīsatikkhattuṁ so, 
devarajjaṁ karissati; 
Pañcasattatikkhattuñca, 
cakkavattī bhavissati. 
Padesarajjaṁ vipulaṁ, 
gaṇanāto asaṅkhiyaṁ; 
Tassa kammanissandena, 
pupphānaṁ pūjanāya ca. 
Sīsaṁnhāto cayaṁ poso, 
pupphamākaṅkhate yadi; 
Puññakammena saṁyuttaṁ, 
purato pātubhavissati. 
Yaṁ yaṁ icchati kāmehi, 
taṁ taṁ pātubhavissati; 
Saṅkappaṁ paripūretvā, 
nibbāyissatināsavo’. 
Aṭṭhārasamaṁ bhāṇavāraṁ. 
Kilese jhāpayitvāna, 
sampajāno patissato; 
Ekāsane nisīditvā, 
arahattamapāpuṇiṁ. 
Caṅkamanto nipajjanto, 
nisinno uda vā ṭhito; 
Buddhaseṭṭhaṁ saritvāna, 
viharāmi ahaṁ sadā. 
Cīvare piṇḍapāte ca, 
paccaye sayanāsane; 
Tattha me ūnatā natthi, 
buddhapūjāyidaṁ phalaṁ. 
So dāni patto amataṁ, 
santaṁ padamanuttaraṁ; 
Sabbāsave pariññāya, 
viharāmi anāsavo. 
Dvenavute ito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā tiṇasūlakachādaniyo thero imā gāthāyo abhāsitthāti. 
Tiṇasūlakachādaniyattherassāpadānaṁ tatiyaṁ. 

Therāpadāna 
Bhaddālivagga 
Madhumaṁsadāyakattheraapadāna 
“Nagare bandhumatiyā, 
sūkariko ahosahaṁ; 
Ukkoṭakaṁ randhayitvā, 
madhumaṁsamhi okiriṁ. 
Sannipātaṁ ahaṁ gantvā, 
ekaṁ pattaṁ gahesahaṁ; 
Pūrayitvāna taṁ pattaṁ, 
bhikkhusaṅghassadāsahaṁ. 
Yottha therataro bhikkhu, 
niyyādesi mamaṁ tadā; 
Iminā pattapūrena, 
labhassu vipulaṁ sukhaṁ. 
Duve sampattiyo bhutvā, 
sukkamūlena codito; 
Pacchime vattamānamhi, 
kilese jhāpayissati. 
Tattha cittaṁ pasādetvā, 
tāvatiṁsamagacchahaṁ; 
Tattha bhutvā pivitvā ca, 
labhāmi vipulaṁ sukhaṁ. 
Maṇḍape rukkhamūle vā, 
pubbakammaṁ anussariṁ; 
Annapānābhivasso me, 
abhivassati tāvade. 
Idaṁ pacchimakaṁ mayhaṁ, 
carimo vattate bhavo; 
Idhāpi annapānaṁ me, 
vassate sabbakālikaṁ. 
Teneva madhudānena, 
sandhāvitvā bhave ahaṁ; 
Sabbāsave pariññāya, 
viharāmi anāsavo. 
Ekanavutito kappe, 
yaṁ dānamadadiṁ tadā; 
Duggatiṁ nābhijānāmi, 
madhudānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā madhumaṁsadāyako thero imā gāthāyo abhāsitthāti. 
Madhumaṁsadāyakattherassāpadānaṁ catutthaṁ. 

Therāpadāna 
Bhaddālivagga 
5 Nāgapallavattheraapadāna 
“Nagare bandhumatiyā, 
rājuyyāne vasāmahaṁ; 
Mama assamasāmantā, 
nisīdi lokanāyako. 
Nāgapallavamādāya, 
buddhassa abhiropayiṁ; 
Pasannacitto sumano, 
sugataṁ abhivādayiṁ. 
Ekanavutito kappe, 
yaṁ pallavamapūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā nāgapallavo thero imā gāthāyo abhāsitthāti. 
Nāgapallavattherassāpadānaṁ pañcamaṁ. 

Therāpadāna 
Bhaddālivagga 
Ekadīpiyattheraapadāna 
“Parinibbute sugate, 
siddhatthe lokanāyake; 
Sadevamānusā sabbe, 
pūjenti dvipaduttamaṁ. 
Āropite ca citake, 
siddhatthe lokanāyake; 
Yathāsakena thāmena, 
citaṁ pūjenti satthuno. 
Avidūre citakassa, 
dīpaṁ ujjālayiṁ ahaṁ; 
Yāva udeti sūriyo, 
dīpaṁ me tāva ujjali. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Tattha me sukataṁ byamhaṁ, 
ekadīpīti ñāyati; 
Dīpasatasahassāni, 
byamhe pajjalare mama. 
Udayantova sūriyo, 
deho me jotate sadā; 
Sappabhāhi sarīrassa, 
āloko hoti me sadā. 
Tirokuṭṭaṁ tiroselaṁ, 
samatiggayha pabbataṁ; 
Samantā yojanasataṁ, 
passāmi cakkhunā ahaṁ. 
Sattasattatikkhattuñca, 
devaloke ramiṁ ahaṁ; 
Ekatiṁsatikkhattuñca, 
devarajjamakārayiṁ. 
Aṭṭhavīsatikkhattuñca, 
cakkavattī ahosahaṁ; 
Padesarajjaṁ vipulaṁ, 
gaṇanāto asaṅkhiyaṁ. 
Devalokā cavitvāna, 
nibbattiṁ mātukucchiyaṁ; 
Mātukucchigatassāpi, 
akkhi me na nimīlati. 
Jātiyā catuvassohaṁ, 
pabbajiṁ anagāriyaṁ; 
Aḍḍhamāse asampatte, 
arahattamapāpuṇiṁ. 
Dibbacakkhuṁ visodhesiṁ, 
bhavā sabbe samūhatā; 
Sabbe kilesā sañchinnā, 
ekadīpassidaṁ phalaṁ. 
Tirokuṭṭaṁ tiroselaṁ, 
pabbatañcāpi kevalaṁ; 
Samatikkamma passāmi, 
ekadīpassidaṁ phalaṁ. 
Visamā me samā honti, 
andhakāro na vijjati; 
Nāhaṁ passāmi timiraṁ, 
ekadīpassidaṁ phalaṁ. 
Catunnavutito kappe, 
yaṁ dīpamadadiṁ tadā; 
Duggatiṁ nābhijānāmi, 
ekadīpassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ekadīpiyo thero imā gāthāyo abhāsitthāti. 
Ekadīpiyattherassāpadānaṁ chaṭṭhaṁ. 

Therāpadāna 
Bhaddālivagga 
Ucchaṅgapupphiyattheraapadāna 
“Nagare bandhumatiyā, 
ahosiṁ māliko tadā; 
Ucchaṅgaṁ pūrayitvāna, 
agamaṁ antarāpaṇaṁ. 
Bhagavā tamhi samaye, 
bhikkhusaṅghapurakkhato; 
Mahatā ānubhāvena, 
niyyāti lokanāyako. 
Disvāna lokapajjotaṁ, 
vipassiṁ lokatāraṇaṁ; 
Pupphaṁ paggayha ucchaṅgā, 
buddhaseṭṭhaṁ apūjayiṁ. 
Ekanavutito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ucchaṅgapupphiyo thero imā gāthāyo abhāsitthāti. 
Ucchaṅgapupphiyattherassāpadānaṁ sattamaṁ. 

Therāpadāna 
Kuṇḍadhānavagga 
Dhammacakkikattheraapadāna 
“Siddhatthassa bhagavato, 
sīhāsanassa sammukhā; 
Dhammacakkaṁ me ṭhapitaṁ, 
sukataṁ viññuvaṇṇitaṁ. 
Cāruvaṇṇova sobhāmi, 
sayoggabalavāhano; 
Parivārenti maṁ niccaṁ, 
anuyantā bahujjanā. 
Saṭṭhitūriyasahassehi, 
paricāremahaṁ sadā; 
Parivārena sobhāmi, 
puññakammassidaṁ phalaṁ. 
Catunnavutito kappe, 
yaṁ cakkaṁ ṭhapayiṁ ahaṁ; 
Duggatiṁ nābhijānāmi, 
dhamma