Sự Nghiệp Anh Hùng (Apadāna)

ha, 
esā buddhānusāsanī. 
Vivādaṁ bhayato disvā, 
avivādañca khemato; 
Samaggā sakhilā hotha, 
esā buddhānusāsanī. 
Pamādaṁ bhayato disvā, 
appamādañca khemato; 
Bhāvethaṭṭhaṅgikaṁ maggaṁ, 
esā buddhānusāsanī. 
Samāgatā bahū buddhā, 
arahantā ca sabbaso; 
Sambuddhe arahante ca, 
vandamānā namassatha. 
Evaṁ acintiyā buddhā, 
buddhadhammā acintiyā; 
Acintiye pasannānaṁ, 
vipāko hoti acintiyo”. 
Itthaṁ sudaṁ bhagavā attano buddhacariyaṁ sambhāvayamāno buddhāpadāniyaṁ nāma dhammapariyāyaṁ abhāsitthāti. 
Buddhāpadānaṁ samattaṁ. 

Therāpadāna 
Tamālapupphiyavagga 
8 Muṭṭhipūjakattheraapadāna 
“Sumedho nāma bhagavā, 
lokajeṭṭho narāsabho; 
Pacchime anukampāya, 
padhānaṁ padahī jino. 
Tassa caṅkamamānassa, 
dvipadindassa tādino; 
Girinelassa pupphānaṁ, 
muṭṭhiṁ buddhassa ropayiṁ. 
Tena cittappasādena, 
sukkamūlena codito; 
Tiṁsakappasahassāni, 
duggatiṁ nupapajjahaṁ. 
Tevīsatikappasate, 
sunelo nāma khattiyo; 
Sattaratanasampanno, 
eko āsiṁ mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā muṭṭhipūjako thero imā gāthāyo abhāsitthāti. 
Muṭṭhipūjakattherassāpadānaṁ aṭṭhamaṁ. 

Therāpadāna 
Tamālapupphiyavagga 
9 Kiṅkaṇikapupphiyattheraapadāna 
“Sumaṅgaloti nāmena, 
sayambhū aparājito; 
Pavanā nikkhamitvāna, 
nagaraṁ pāvisī jino. 
Piṇḍacāraṁ caritvāna, 
nikkhamma nagarā muni; 
Katakiccova sambuddho, 
so vasī vanamantare. 
Kiṅkaṇipupphaṁ paggayha, 
buddhassa abhiropayiṁ; 
Pasannacitto sumano, 
sayambhussa mahesino. 
Catunnavutito kappe, 
yaṁ pupphamabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Chaḷāsītimhito kappe, 
apilāsisanāmako; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā kiṅkaṇikapupphiyo thero imā gāthāyo abhāsitthāti. 
Kiṅkaṇikapupphiyattherassāpadānaṁ navamaṁ. 

Therāpadāna 
Tamālapupphiyavagga 
10 Yūthikapupphiyattheraapadāna 
“Padumuttaro nāma jino, 
āhutīnaṁ paṭiggaho; 
Pavanā nikkhamitvāna, 
vihāraṁ yāti cakkhumā. 
Ubho hatthehi paggayha, 
yūthikaṁ pupphamuttamaṁ; 
Buddhassa abhiropayiṁ, 
mettacittassa tādino. 
Tena cittappasādena, 
anubhotvāna sampadā; 
Kappānaṁ satasahassaṁ, 
duggatiṁ nupapajjahaṁ. 
Ito paññāsakappesu, 
eko āsiṁ janādhipo; 
Samittanandano nāma, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā yūthikapupphiyo thero imā gāthāyo abhāsitthāti. 
Yūthikapupphiyattherassāpadānaṁ dasamaṁ. 
Tamālapupphiyavaggo vīsatimo. 
Tassuddānaṁ 
Tamālatiṇasanthāro, 
khaṇḍaphulli asokiyo; 
Aṅkolakī kisalayo, 
tinduko nelapupphiyo; 
Kiṅkaṇiko yūthiko ca, 
gāthā paññāsa aṭṭha cāti. 
Atha vagguddānaṁ 
Bhikkhādāyī parivāro, 
sereyyo sobhito tathā; 
Chattañca bandhujīvī ca, 
supāricariyopi ca. 
Kumudo kuṭajo ceva, 
tamāli dasamo kato; 
Chasatāni ca gāthāni, 
chasaṭṭhi ca tatuttari. 
Bhikkhāvaggadasakaṁ. 
Dutiyasatakaṁ samattaṁ. 

Therāpadāna 
Kaṇikārapupphiyavagga 
Kaṇikārapupphiyattheraapadāna 
“Kaṇikāraṁ pupphitaṁ disvā, 
ocinitvānahaṁ tadā; 
Tissassa abhiropesiṁ, 
oghatiṇṇassa tādino. 
Dvenavute ito kappe, 
yaṁ pupphamabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Pañcattiṁse ito kappe, 
aruṇapāṇīti vissuto; 
Sattaratanasampanno, 
cakkavattī mahabbalo. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā kaṇikārapupphiyo thero imā gāthāyo abhāsitthāti. 
Kaṇikārapupphiyattherassāpadānaṁ paṭhamaṁ. 

Therāpadāna 
Kaṇikārapupphiyavagga 
Minelapupphiyattheraapadāna 
“Suvaṇṇavaṇṇo bhagavā, 
sataraṁsī patāpavā; 
Caṅkamanaṁ samārūḷho, 
mettacitto sikhīsabho. 
Pasannacitto sumano, 
vanditvā ñāṇamuttamaṁ; 
Minelapupphaṁ paggayha, 
buddhassa abhiropayiṁ. 
Ekattiṁse ito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Ekūnatiṁsakappamhi, 
sumeghaghananāmako; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā minelapupphiyo thero imā gāthāyo abhāsitthāti. 
Minelapupphiyattherassāpadānaṁ dutiyaṁ. 

Therāpadāna 
Kaṇikārapupphiyavagga 
3 Kiṅkaṇipupphiyattheraapadāna 
“Kañcanagghiyasaṅkāso, 
sabbaññū lokanāyako; 
Odakaṁ dahamoggayha, 
sināyi lokanāyako. 
Paggayha kiṅkaṇiṁ pupphaṁ, 
Vipassissābhiropayiṁ; 
Udaggacitto sumano, 
Dvipadindassa tādino. 
Ekanavutito kappe, 
yaṁ pupphamabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Sattavīsatikappamhi, 
rājā bhīmaratho ahu; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā kiṅkaṇipupphiyo thero imā gāthāyo abhāsitthāti. 
Kiṅkaṇipupphiyattherassāpadānaṁ tatiyaṁ. 

Therāpadāna 
Kaṇikārapupphiyavagga 
Taraṇiyattheraapadāna 
“Atthadassī tu bhagavā, 
dvipadindo narāsabho; 
Purakkhato sāvakehi, 
gaṅgātīramupāgami. 
Samatitti kākapeyyā, 
gaṅgā āsi duruttarā; 
Uttārayiṁ bhikkhusaṅghaṁ, 
buddhañca dvipaduttamaṁ. 
Aṭṭhārase kappasate, 
yaṁ kammamakariṁ tadā; 
Duggatiṁ nābhijānāmi, 
taraṇāya idaṁ phalaṁ. 
Teraseto kappasate, 
pañca sabbobhavā ahuṁ; 
Sattaratanasampannā, 
cakkavattī mahabbalā. 
Pacchime ca bhave asmiṁ, 
jātohaṁ brāhmaṇe kule; 
Saddhiṁ tīhi sahāyehi, 
pabbajiṁ satthu sāsane. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā taraṇiyo thero imā gāthāyo abhāsitthāti. 
Taraṇiyattherassāpadānaṁ catutthaṁ. 

Therāpadāna 
Kaṇikārapupphiyavagga 
Nigguṇḍipupphiyattheraapadāna 
“Vipassissa bhagavato, 
āsimārāmiko ahaṁ; 
Nigguṇḍipupphaṁ paggayha, 
buddhassa abhiropayiṁ. 
Ekanavutito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Pañcavīse ito kappe, 
eko āsiṁ janādhipo; 
Mahāpatāpanāmena, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā nigguṇḍipupphiyo thero imā gāthāyo abhāsitthāti. 
Nigguṇḍipupphiyattherassāpadānaṁ pañcamaṁ. 

Therāpadāna 
Kaṇikārapupphiyavagga 
Udakadāyakattheraapadāna 
“Bhuñjantaṁ samaṇaṁ disvā, 
vippasannamanāvilaṁ; 
Ghaṭenodakamādāya, 
siddhatthassa adāsahaṁ. 
Nimmalo homahaṁ ajja, 
vimalo khīṇasaṁsayo; 
Bhave nibbattamānamhi, 
phalaṁ nibbattate mama. 
Catunnavutito kappe, 
udakaṁ yamadāsahaṁ; 
Duggatiṁ nābhijānāmi, 
dakadānassidaṁ phalaṁ. 
Ekasaṭṭhimhito kappe, 
ekova vimalo ahu; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā udakadāyako thero imā gāthāyo abhāsitthāti. 
Udakadāyakattherassāpadānaṁ chaṭṭhaṁ. 

Therāpadāna 
Kaṇikārapupphiyavagga 
7 Salalamāliyattheraapadāna 
“Kaṇikāraṁva jotantaṁ, 
nisinnaṁ pabbatantare; 
Obhāsentaṁ disā sabbā, 
siddhatthaṁ narasārathiṁ. 
Dhanuṁ advejjhaṁ katvāna, 
usuṁ sannayhahaṁ tadā; 
Pupphaṁ savaṇṭaṁ chetvāna, 
buddhassa abhiropayiṁ. 
Catunnavutito kappe, 
yaṁ pupphamabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Ekapaññāsito kappe, 
eko āsiṁ jutindharo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā salalamāliyo thero imā gāthāyo abhāsitthāti. 
Salalamāliyattherassāpadānaṁ sattamaṁ. 

Therāpadāna 
Sīhāsaniyavagga 
Raṭṭhapālattheraapadāna 
“Padumuttarassa bhagavato, 
Lokajeṭṭhassa tādino; 
Varanāgo mayā dinno, 
Īsādanto urūḷhavā. 
Setacchatto pasobhito, 
sakappano sahatthipo; 
Agghāpetvāna taṁ sabbaṁ, 
saṅghārāmaṁ akārayiṁ. 
Catupaññāsasahassāni, 
pāsāde kārayiṁ ahaṁ; 
Mahoghadānaṁ karitvāna, 
niyyādesiṁ mahesino. 
Anumodi mahāvīro, 
sayambhū aggapuggalo; 
Sabbe jane hāsayanto, 
desesi amataṁ padaṁ. 
Taṁ me buddho viyākāsi, 
jalajuttaranāmako; 
Bhikkhusaṅghe nisīditvā, 
imā gāthā abhāsatha. 
‘Catupaññāsasahassāni, 
pāsāde kārayī ayaṁ; 
Kathayissāmi vipākaṁ, 
suṇotha mama bhāsato. 
Aṭṭhārasasahassāni, 
kūṭāgārā bhavissare; 
Byamhuttamamhi nibbattā, 
sabbasoṇṇamayā ca te. 
Paññāsakkhattuṁ devindo, 
devarajjaṁ karissati; 
Aṭṭhapaññāsakkhattuñca, 
cakkavattī bhavissati. 
Kappasatasahassamhi, 
okkākakulasambhavo; 
Gotamo nāma gottena, 
satthā loke bhavissati. 
Devalokā cavitvāna, 
sukkamūlena codito; 
Aḍḍhe kule mahābhoge, 
nibbattissati tāvade. 
So pacchā pabbajitvāna, 
sukkamūlena codito; 
Raṭṭhapāloti nāmena, 
hessati satthu sāvako. 
Padhānapahitatto so, 
upasanto nirūpadhi; 
Sabbāsave pariññāya, 
nibbāyissatināsavo’. 
Uṭṭhāya abhinikkhamma, 
jahitā bhogasampadā; 
Kheḷapiṇḍeva bhogamhi, 
pemaṁ mayhaṁ na vijjati. 
Vīriyaṁ me dhuradhorayhaṁ, 
yogakkhemādhivāhanaṁ; 
Dhāremi antimaṁ dehaṁ, 
sammāsambuddhasāsane. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā raṭṭhapālo thero imā gāthāyo abhāsitthāti. 
Raṭṭhapālattherassāpadānaṁ aṭṭhamaṁ. 

Therāpadāna 
Kaṇikārapupphiyavagga 
Koraṇḍapupphiyattheraapadāna 
“Akkantañca padaṁ disvā, 
cakkālaṅkārabhūsitaṁ; 
Padenānupadaṁ yanto, 
vipassissa mahesino. 
Koraṇḍaṁ pupphitaṁ disvā, 
samūlaṁ pūjitaṁ mayā; 
Haṭṭho haṭṭhena cittena, 
avandiṁ padamuttamaṁ. 
Ekanavutito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Sattapaññāsakappamhi, 
eko vītamalo ahuṁ; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā koraṇḍapupphiyo thero imā gāthāyo abhāsitthāti. 
Koraṇḍapupphiyattherassāpadānaṁ aṭṭhamaṁ. 

Therāpadāna 
Kaṇikārapupphiyavagga 
Ādhāradāyakattheraapadāna 
“Ādhārakaṁ mayā dinnaṁ, 
sikhino lokabandhuno; 
Dhāremi pathaviṁ sabbaṁ, 
kevalaṁ vasudhaṁ imaṁ. 
Kilesā jhāpitā mayhaṁ, 
bhavā sabbe samūhatā; 
Dhāremi antimaṁ dehaṁ, 
sammāsambuddhasāsane. 
Sattavīse ito kappe, 
ahesuṁ caturo janā; 
Samantavaraṇā nāma, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ādhāradāyako thero imā gāthāyo abhāsitthāti. 
Ādhāradāyakattherassāpadānaṁ navamaṁ. 

Therāpadāna 
Kaṇikārapupphiyavagga 
10 Pāpanivāriyattheraapadāna 
“Tissassa tu bhagavato, 
devadevassa tādino; 
Ekacchattaṁ mayā dinnaṁ, 
vippasannena cetasā. 
Nivutaṁ hoti me pāpaṁ, 
kusalassupasampadā; 
Ākāse chattaṁ dhārenti, 
pubbakammassidaṁ phalaṁ. 
Carimaṁ vattate mayhaṁ, 
bhavā sabbe samūhatā; 
Dhāremi antimaṁ dehaṁ, 
sammāsambuddhasāsane. 
Dvenavute ito kappe, 
yaṁ chattamadadiṁ tadā; 
Duggatiṁ nābhijānāmi, 
chattadānassidaṁ phalaṁ. 
Dvesattatimhito kappe, 
aṭṭhāsiṁsu janādhipā; 
Mahānidānanāmena, 
rājāno cakkavattino. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā pāpanivāriyo thero imā gāthāyo abhāsitthāti. 
Pāpanivāriyattherassāpadānaṁ dasamaṁ. 
Kaṇikārapupphiyavaggo ekavīsatimo. 
Tassuddānaṁ 
Kaṇikāro minelañca, 
kiṅkaṇi taraṇena ca; 
Nigguṇḍipupphī dakado, 
salalo ca kuraṇḍako; 
Ādhārako pāpavārī, 
aṭṭhatālīsa gāthakāti. 

Therāpadāna 
Hatthivagga 
Hatthidāyakattheraapadāna 
“Siddhatthassa bhagavato, 
dvipadindassa tādino; 
Nāgaseṭṭho mayā dinno, 
īsādanto urūḷhavā. 
Uttamatthaṁ anubhomi, 
santipadamanuttaraṁ; 
Nāgadānaṁ mayā dinnaṁ, 
sabbalokahitesino. 
Catunnavutito kappe, 
yaṁ nāga madadiṁ tadā; 
Duggatiṁ nābhijānāmi, 
nāgadānassidaṁ phalaṁ. 
Aṭṭhasattatikappamhi, 
soḷasāsiṁsu khattiyā; 
Samantapāsādikā nāma, 
cakkavattī mahabbalā. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā hatthidāyako thero imā gāthāyo abhāsitthāti. 
Hatthidāyakattherassāpadānaṁ paṭhamaṁ. 

Therāpadāna 
Hatthivagga 
Pānadhidāyakattheraapadāna 
“Āraññikassa isino, 
cirarattatapassino; 
Vuddhassa bhāvitattassa, 
adāsiṁ pānadhiṁ ahaṁ. 
Tena kammena dvipadinda, 
lokajeṭṭha narāsabha; 
Dibbayānaṁ anubhomi, 
pubbakammassidaṁ phalaṁ. 
Catunnavute ito kappe, 
yaṁ kammamakariṁ tadā; 
Duggatiṁ nābhijānāmi, 
pānadhissa idaṁ phalaṁ. 
Sattasattatito kappe, 
aṭṭha āsiṁsu khattiyā; 
Suyānā nāma nāmena, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā pānadhidāyako thero imā gāthāyo abhāsitthāti. 
Pānadhidāyakattherassāpadānaṁ dutiyaṁ. 

Therāpadāna 
Hatthivagga 
Saccasaññakattheraapadāna 
“Vessabhū tamhi samaye, 
bhikkhusaṅghapurakkhato; 
Deseti ariyasaccāni, 
nibbāpento mahājanaṁ. 
Paramakāruññapattomhi, 
samitiṁ agamāsahaṁ; 
Sohaṁ nisinnako santo, 
dhammamassosi satthuno. 
Tassāhaṁ dhammaṁ sutvāna, 
devalokaṁ agacchahaṁ; 
Tiṁsakappāni devesu, 
avasiṁ tatthahaṁ pure. 
Ekattiṁse ito kappe, 
yaṁ saññamalabhiṁ tadā; 
Duggatiṁ nābhijānāmi, 
saccasaññāyidaṁ phalaṁ. 
Chabbīsamhi ito kappe, 
eko āsiṁ janādhipo; 
Ekaphusitanāmena, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā saccasaññako thero imā gāthāyo abhāsitthāti. 
Saccasaññakattherassāpadānaṁ tatiyaṁ. 

Therāpadāna 
Hatthivagga 
Ekasaññakattheraapadāna 
“Dumagge paṁsukūlikaṁ, 
laggaṁ disvāna satthuno; 
Añjaliṁ paggahetvāna, 
paṁsukūlaṁ avandahaṁ. 
Ekattiṁse ito kappe, 
yaṁ saññamalabhiṁ tadā; 
Duggatiṁ nābhijānāmi, 
buddhapūjāyidaṁ phalaṁ. 
Pañcavīse ito kappe, 
eko āsiṁ janādhipo; 
Amitābhoti nāmena, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ekasaññako thero imā gāthāyo abhāsitthāti. 
Ekasaññakattherassāpadānaṁ catutthaṁ. 

Therāpadāna 
Hatthivagga 
Raṁsisaññakattheraapadāna 
“Udentaṁ sataraṁsiṁva, 
pītaraṁsiṁva bhāṇumaṁ; 
Byagghūsabhaṁva pavaraṁ, 
sujātaṁ pabbatantare. 
Buddhassa ānubhāvo so, 
jalate pabbatantare; 
Raṁse cittaṁ pasādetvā, 
kappaṁ saggamhi modahaṁ. 
Avasesesu kappesu, 
kusalaṁ caritaṁ mayā; 
Tena cittappasādena, 
buddhānussatiyāpi ca. 
Tiṁsakappasahasseto, 
yaṁ saññamalabhiṁ tadā; 
Duggatiṁ nābhijānāmi, 
buddhasaññāyidaṁ phalaṁ. 
Sattapaññāsakappamhi, 
eko āsiṁ janādhipo; 
Sujāto nāma nāmena, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā raṁsisaññako thero imā gāthāyo abhāsitthāti. 
Raṁsisaññakattherassāpadānaṁ pañcamaṁ. 

Therāpadāna 
Hatthivagga 
6 Sandhitattheraapadāna 
“Assatthe haritobhāse, 
saṁvirūḷhamhi pādape; 
Ekaṁ buddhagataṁ saññaṁ, 
alabhiṁhaṁ patissato. 
Ekattiṁse ito kappe, 
yaṁ saññamalabhiṁ tadā; 
Tassā saññāya vāhasā, 
patto me āsavakkhayo. 
Ito terasakappamhi, 
dhaniṭṭho nāma khattiyo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sandhito thero imā gāthāyo abhāsitthāti. 
Sandhitattherassāpadānaṁ chaṭṭhaṁ. 

Therāpadāna 
Hatthivagga 
Tālavaṇṭadāyakattheraapadāna 
“Tālavaṇṭaṁ mayā dinnaṁ, 
tissassādiccabandhuno; 
Gimhanibbāpanatthāya, 
pariḷāhopasantiyā. 
Sannibbāpemi rāgaggiṁ, 
dosaggiñca taduttariṁ; 
Nibbāpemi ca mohaggiṁ, 
tālavaṇṭassidaṁ phalaṁ. 
Kilesā jhāpitā mayhaṁ, 
bhavā sabbe samūhatā; 
Dhāremi antimaṁ dehaṁ, 
sammāsambuddhasāsane. 
Dvenavute ito kappe, 
yaṁ kammamakariṁ tadā; 
Duggatiṁ nābhijānāmi, 
tālavaṇṭassidaṁ phalaṁ. 
Tesaṭṭhimhi ito kappe, 
mahānāmasanāmako; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā tālavaṇṭadāyako thero imā gāthāyo abhāsitthāti. 
Tālavaṇṭadāyakattherassāpadānaṁ sattamaṁ. 

Therāpadāna 
Sīhāsaniyavagga 
Sopākattheraapadāna 
“Pabbhāraṁ sodhayantassa, 
vipine pabbatuttame; 
Siddhattho nāma bhagavā, 
āgacchi mama santikaṁ. 
Buddhaṁ upagataṁ disvā, 
lokajeṭṭhassa tādino; 
Santharaṁ paññapetvāna, 
pupphāsanamadāsahaṁ. 
Pupphāsane nisīditvā, 
siddhattho lokanāyako; 
Mamañca gatimaññāya, 
aniccatamudāhari. 
‘Aniccā vata saṅkhārā, 
uppādavayadhammino; 
Uppajjitvā nirujjhanti, 
tesaṁ vūpasamo sukho’. 
Idaṁ vatvāna sabbaññū, 
lokajeṭṭho narāsabho; 
Nabhaṁ abbhuggami vīro, 
haṁsarājāva ambare. 
Sakaṁ diṭṭhiṁ jahitvāna, 
bhāvayāniccasaññahaṁ; 
Ekāhaṁ bhāvayitvāna, 
tattha kālaṁ kato ahaṁ. 
Dve sampattī anubhotvā, 
sukkamūlena codito; 
Pacchime bhave sampatte, 
sapākayonupāgamiṁ. 
Agārā abhinikkhamma, 
pabbajiṁ anagāriyaṁ; 
Jātiyā sattavassohaṁ, 
arahattamapāpuṇiṁ. 
Āraddhavīriyo pahitatto, 
Sīlesu susamāhito; 
Tosetvāna mahānāgaṁ, 
Alatthaṁ upasampadaṁ. 
Catunnavutito kappe, 
yaṁ kammamakariṁ tadā; 
Duggatiṁ nābhijānāmi, 
pupphadānassidaṁ phalaṁ. 
Catunnavutito kappe, 
yaṁ saññaṁ bhāvayiṁ tadā; 
Taṁ saññaṁ bhāvayantassa, 
patto me āsavakkhayo. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā sopāko thero imā gāthāyo abhāsitthāti. 
Sopākattherassāpadānaṁ navamaṁ. 

Therāpadāna 
Hatthivagga 
Akkantasaññakattheraapadāna 
“Kusāṭakaṁ gahetvāna, 
upajjhāyassahaṁ pure; 
Mantañca anusikkhāmi, 
ganthādosassa pattiyā. 
Addasaṁ virajaṁ buddhaṁ, 
Āhutīnaṁ paṭiggahaṁ; 
Usabhaṁ pavaraṁ aggaṁ, 
Tissaṁ buddhaṁ gaṇuttamaṁ. 
Kusāṭakaṁ pattharitaṁ, 
akkamantaṁ naruttamaṁ; 
Samuggataṁ mahāvīraṁ, 
lokajeṭṭhaṁ narāsabhaṁ. 
Disvā taṁ lokapajjotaṁ, 
vimalaṁ candasannibhaṁ; 
Avandiṁ satthuno pāde, 
vippasannena cetasā. 
Catunnavutito kappe, 
yaṁ adāsiṁ kusāṭakaṁ; 
Duggatiṁ nābhijānāmi, 
kusāṭakassidaṁ phalaṁ. 
Sattatiṁse ito kappe, 
eko āsiṁ janādhipo; 
Sunando nāma nāmena, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā akkantasaññako thero imā gāthāyo abhāsitthāti. 
Akkantasaññakattherassāpadānaṁ aṭṭhamaṁ. 

Therāpadāna 
Hatthivagga 
Sappidāyakattheraapadāna 
“Nisinno pāsādavare, 
nārīgaṇapurakkhato; 
Byādhitaṁ samaṇaṁ disvā, 
abhināmesahaṁ gharaṁ. 
Upaviṭṭhaṁ mahāvīraṁ, 
devadevaṁ narāsabhaṁ; 
Sappitelaṁ mayā dinnaṁ, 
siddhatthassa mahesino. 
Passaddhadarathaṁ disvā, 
vippasannamukhindriyaṁ; 
Vanditvā satthuno pāde, 
anusaṁsāvayiṁ pure. 
Disvā maṁ suppasannattaṁ, 
iddhiyā pāramiṅgato; 
Nabhaṁ abbhuggamī dhīro, 
haṁsarājāva ambare. 
Catunnavutito kappe, 
yaṁ dānamadadiṁ tadā; 
Duggatiṁ nābhijānāmi, 
sappitelassidaṁ phalaṁ. 
Ito sattarase kappe, 
jutideva sanāmako; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sappidāyako thero imā gāthāyo abhāsitthāti. 
Sappidāyakattherassāpadānaṁ navamaṁ. 

Therāpadāna 
Hatthivagga 
Pāpanivāriyattheraapadāna 
“Piyadassissa bhagavato, 
caṅkamaṁ sodhitaṁ mayā; 
Naḷakehi paṭicchannaṁ, 
vātātapanivāraṇaṁ. 
Pāpaṁ vivajjanatthāya, 
kusalassupasampadā; 
Kilesānaṁ pahānāya, 
padahiṁ satthu sāsane. 
Ito ekādase kappe, 
aggidevoti vissuto; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā pāpanivāriyo thero imā gāthāyo abhāsitthāti. 
Pāpanivāriyattherassāpadānaṁ dasamaṁ. 
Hatthivaggo bāvīsatimo. 
Tassuddānaṁ 
Hatthi pānadhi saccañca, 
ekasaññi ca raṁsiko; 
Sandhito tālavaṇṭañca, 
tathā akkantasaññako; 
Sappi pāpanivārī ca, 
catuppaññāsa gāthakāti. 

Therāpadāna 
Ālambaṇadāyakavagga 
1 Ālambaṇadāyakattheraapadāna 
“Atthadassissa bhagavato, 
lokajeṭṭhassa tādino; 
Ālambaṇaṁ mayā dinnaṁ, 
dvipadindassa tādino. 
Dharaṇiṁ paṭipajjāmi, 
vipulaṁ sāgarapparaṁ; 
Pāṇesu ca issariyaṁ, 
vattemi vasudhāya ca. 
Kilesā jhāpitā mayhaṁ, 
bhavā sabbe samūhatā; 
Tisso vijjā anuppattā, 
kataṁ buddhassa sāsanaṁ. 
Ito dvesaṭṭhikappamhi, 
tayo āsiṁsu khattiyā; 
Ekāpassitanāmā te, 
cakkavattī mahabbalā. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā ālambaṇadāyako thero imā gāthāyo abhāsitthāti. 
Ālambaṇadāyakattherassāpadānaṁ paṭhamaṁ. 

Therāpadāna 
Ālambaṇadāyakavagga 
Ajinadāyakattheraapadāna 
“Ekattiṁse ito kappe, 
gaṇasatthārako ahaṁ; 
Addasaṁ virajaṁ buddhaṁ, 
āhutīnaṁ paṭiggahaṁ. 
Cammakhaṇḍaṁ mayā dinnaṁ, 
sikhino lokabandhuno; 
Tena kammena dvipadinda, 
lokajeṭṭha narāsabha. 
Sampattiṁ anubhotvāna, 
kilese jhāpayiṁ ahaṁ; 
Dhāremi antimaṁ dehaṁ, 
sammāsambuddhasāsane. 
Ekattiṁse ito kappe, 
ajinaṁ yaṁ adāsahaṁ; 
Duggatiṁ nābhijānāmi, 
ajinassa idaṁ phalaṁ. 
Ito pañcamake kappe, 
rājā āsiṁ sudāyako; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ajinadāyako thero imā gāthāyo abhāsitthāti. 
Ajinadāyakattherassāpadānaṁ dutiyaṁ. 

Therāpadāna 
Ālambaṇadāyakavagga 
3 Dverataniyattheraapadāna 
“Migaluddo pure āsiṁ, 
araññe kānane ahaṁ; 
Addasaṁ virajaṁ buddhaṁ, 
āhutīnaṁ paṭiggahaṁ. 
Maṁsapesi mayā dinnā, 
vipassissa mahesino; 
Sadevakasmiṁ lokasmiṁ, 
issaraṁ kārayāmahaṁ. 
Iminā maṁsadānena, 
ratanaṁ nibbattate mama; 
Duveme ratanā loke, 
diṭṭhadhammassa pattiyā. 
Tehaṁ sabbe anubhomi, 
maṁsadānassa sattiyā; 
Gattañca mudukaṁ mayhaṁ, 
paññā nipuṇavedanī. 
Ekanavutito kappe, 
yaṁ maṁsamadadiṁ tadā; 
Duggatiṁ nābhijānāmi, 
maṁsadānassidaṁ phalaṁ. 
Ito catutthake kappe, 
eko āsiṁ janādhipo; 
Mahārohitanāmo so, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā dverataniyo thero imā gāthāyo abhāsitthāti. 
Dverataniyattherassāpadānaṁ tatiyaṁ. 
Dasamaṁ bhāṇavāraṁ. 

Therāpadāna 
Ālambaṇadāyakavagga 
Ārakkhadāyakattheraapadāna 
“Siddhatthassa bhagavato, 
vedi kārāpitā mayā; 
Ārakkho ca mayā dinno, 
sugatassa mahesino. 
Tena kammavisesena, 
na passiṁ bhayabheravaṁ; 
Kuhiñci upapannassa, 
tāso mayhaṁ na vijjati. 
Catunnavutito kappe, 
yaṁ vediṁ kārayiṁ pure; 
Duggatiṁ nābhijānāmi, 
vedikāya idaṁ phalaṁ. 
Ito chaṭṭhamhi kappamhi, 
apassenasanāmako; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ārakkhadāyako thero imā gāthāyo abhāsitthāti. 
Ārakkhadāyakattherassāpadānaṁ catutthaṁ. 

Therāpadāna 
Ālambaṇadāyakavagga 
Abyādhikattheraapadāna 
“Vipassissa bhagavato, 
aggisālaṁ adāsahaṁ; 
Byādhikānañca āvāsaṁ, 
uṇhodakapaṭiggahaṁ. 
Tena kammenayaṁ mayhaṁ, 
attabhāvo sunimmito; 
Byādhāhaṁ nābhijānāmi, 
puññakammassidaṁ phalaṁ. 
Ekanavutito kappe, 
yaṁ sālamadadiṁ tadā; 
Duggatiṁ nābhijānāmi, 
aggisālāyidaṁ phalaṁ. 
Ito ca sattame kappe, 
ekosiṁ aparājito; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā abyādhiko thero imā gāthāyo abhāsitthāti. 
Abyādhikattherassāpadānaṁ pañcamaṁ. 

Therāpadāna 
Ālambaṇadāyakavagga 
6 Aṅkolapupphiyattheraapadāna 
“Nārado iti me nāmaṁ, 
kassapo iti maṁ vidū; 
Addasaṁ samaṇānaggaṁ, 
vipassiṁ devasakkataṁ. 
Anubyañjanadharaṁ buddhaṁ, 
āhutīnaṁ paṭiggahaṁ; 
Aṅkolapupphaṁ paggayha, 
buddhassa abhiropayiṁ. 
Ekanavutito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Catusattatito kappe, 
romaso nāma khattiyo; 
Āmukkamālābharaṇo, 
sayoggabalavāhano. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā aṅkolapupphiyo thero imā gāthāyo abhāsitthāti. 
Aṅkolapupphiyattherassāpadānaṁ chaṭṭhaṁ. 

Therāpadāna 
Ālambaṇadāyakavagga 
Sovaṇṇavaṭaṁsakiyattheraapadāna 
“Uyyānabhūmiṁ niyyanto, 
addasaṁ lokanāyakaṁ; 
Vaṭaṁsakaṁ gahetvāna, 
sovaṇṇaṁ sādhunimmitaṁ. 
Sīghaṁ tato samāruyha, 
hatthikkhandhagato ahaṁ; 
Buddhassa abhiropesiṁ, 
sikhino lokabandhuno. 
Ekattiṁse ito kappe, 
yaṁ pupphamabhiropayiṁ; 
Duggatiṁ nābhijānāmi, 
pupphapūjāyidaṁ phalaṁ. 
Sattavīse ito kappe, 
eko āsiṁ janādhipo; 
Mahāpatāpanāmena, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sovaṇṇavaṭaṁsakiyo thero imā gāthāyo abhāsitthāti. 
Sovaṇṇavaṭaṁsakiyattherassāpadānaṁ sattamaṁ. 

Therāpadāna 
Sīhāsaniyavagga 
Sumaṅgalattheraapadāna 
“Āhutiṁ yiṭṭhukāmohaṁ, 
paṭiyādetvāna bhojanaṁ; 
Brāhmaṇe paṭimānento, 
visāle māḷake ṭhito. 
Athaddasāsiṁ sambuddhaṁ, 
piyadassiṁ mahāyasaṁ; 
Sabbalokavinetāraṁ, 
sayambhuṁ aggapuggalaṁ. 
Bhagavantaṁ jutimantaṁ, 
sāvakehi purakkhataṁ; 
Ādiccamiva rocantaṁ, 
rathiyaṁ paṭipannakaṁ. 
Añjaliṁ paggahetvāna, 
sakaṁ cittaṁ pasādayiṁ; 
Manasāva nimantesiṁ, 
‘āgacchatu mahāmuni’. 
Mama saṅkappamaññāya, 
satthā loke anuttaro; 
Khīṇāsavasahassehi, 
mama dvāraṁ upāgami. 
Namo te purisājañña, 
namo te purisuttama; 
Pāsādaṁ abhirūhitvā, 
sīhāsane nisīdataṁ. 
Danto dantaparivāro, 
tiṇṇo tārayataṁ varo; 
Pāsādaṁ abhirūhitvā, 
nisīdi pavarāsane. 
Yaṁ me atthi sake gehe, 
āmisaṁ paccupaṭṭhitaṁ; 
Tāhaṁ buddhassa pādāsiṁ, 
pasanno sehi pāṇibhi. 
Pasannacitto sumano, 
vedajāto katañjalī; 
Buddhaseṭṭhaṁ namassāmi, 
aho buddhassuḷāratā. 
Aṭṭhannaṁ payirūpāsataṁ, 
bhuñjaṁ khīṇāsavā bahū; 
Tuyheveso ānubhāvo, 
saraṇaṁ taṁ upemahaṁ. 
Piyadassī ca bhagavā, 
lokajeṭṭho narāsabho; 
Bhikkhusaṅghe nisīditvā, 
imā gāthā abhāsatha. 
‘Yo so saṅghaṁ abhojesi, 
ujubhūtaṁ samāhitaṁ; 
Tathāgatañca sambuddhaṁ, 
suṇātha mama bhāsato. 
Sattavīsatikkhattuṁ so, 
devarajjaṁ karissati; 
Sakakammābhiraddho so, 
devaloke ramissati. 
Dasa aṭṭha cakkhattuṁ so, 
cakkavattī bhavissati; 
Pathabyā rajjaṁ pañcasataṁ, 
vasudhaṁ āvasissati’. 
Araññavanamoggayha, 
kānanaṁ byagghasevitaṁ; 
Padhānaṁ padahitvāna, 
kilesā jhāpitā mayā. 
Aṭṭhārase kappasate, 
yaṁ dānamadadiṁ tadā; 
Duggatiṁ nābhijānāmi, 
bhattadānassidaṁ phalaṁ. 
Paṭisambhidā catasso, 
Vimokkhāpi ca aṭṭhime; 
Chaḷabhiññā sacchikatā, 
Kataṁ buddhassa sāsanaṁ”. 
Itthaṁ sudaṁ āyasmā sumaṅgalo thero imā gāthāyo abhāsitthāti. 
Sumaṅgalattherassāpadānaṁ dasamaṁ. 
Tassuddānaṁ 
Sīhāsanī ekathambhī, 
nando ca cūḷapanthako; 
Pilindarāhulo ceva, 
vaṅganto raṭṭhapālako. 
Sopāko maṅgalo ceva, 
daseva dutiye vagge; 
Satañca aṭṭhatiṁsa ca, 
gāthā cettha pakāsitā. 
Sīhāsaniyavaggo dutiyo. 

Therāpadāna 
Ālambaṇadāyakavagga 
Miñjavaṭaṁsakiyattheraapadāna 
“Nibbute lokanāthamhi, 
sikhimhi vadataṁ vare; 
Vaṭaṁsakehi ākiṇṇaṁ, 
bodhipūjaṁ akāsahaṁ. 
Ekattiṁse ito kappe, 
yaṁ pūjamakariṁ tadā; 
Duggatiṁ nābhijānāmi, 
bodhipūjāyidaṁ phalaṁ. 
Ito chabbīsatikappe, 
ahuṁ meghabbhanāmako; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā miñjavaṭaṁsakiyo thero imā gāthāyo abhāsitthāti. 
Miñjavaṭaṁsakiyattherassāpadānaṁ aṭṭhamaṁ. 

Therāpadāna 
Ālambaṇadāyakavagga 
9 Sukatāveḷiyattheraapadāna 
“Asito nāma nāmena, 
mālākāro ahaṁ tadā; 
Āveḷaṁ paggahetvāna, 
rañño dātuṁ vajāmahaṁ. 
Asampattomhi rājānaṁ, 
addasaṁ sikhināyakaṁ; 
Haṭṭho haṭṭhena cittena, 
buddhassa abhiropayiṁ. 
Ekattiṁse ito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Pañcavīse ito kappe, 
rājāhosiṁ mahabbalo; 
Vebhāro nāma nāmena, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sukatāveḷiyo thero imā gāthāyo abhāsitthāti. 
Sukatāveḷiyattherassāpadānaṁ navamaṁ. 

Therāpadāna 
Ālambaṇadāyakavagga 
10 Ekavandaniyattheraapadāna 
“Usabhaṁ pavaraṁ vīraṁ, 
vessabhuṁ vijitāvinaṁ; 
Pasannacitto sumano, 
buddhaseṭṭhamavandahaṁ. 
Ekattiṁse ito kappe, 
yaṁ kammamakariṁ tadā; 
Duggatiṁ nābhijānāmi, 
vandanāya idaṁ phalaṁ. 
Catuvīsatikappamhi, 
vikatānandanāmako; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ekavandaniyo thero imā gāthāyo abhāsitthāti. 
Ekavandaniyattherassāpadānaṁ dasamaṁ. 
Ālambaṇadāyakavaggo tevīsatimo. 
Tassuddānaṁ 
Ālambaṇañca ajinaṁ, 
maṁsadārakkhadāyako; 
Abyādhi aṅkolaṁ soṇṇaṁ, 
miñjaāveḷavandanaṁ; 
Pañcapaññāsa gāthāyo, 
gaṇitā atthadassibhi. 

Therāpadāna 
Udakāsanavagga 
Udakāsanadāyakattheraapadāna 
“Ārāmadvārā nikkhamma, 
phalakaṁ santhariṁ ahaṁ; 
Udakañca upaṭṭhāsiṁ, 
uttamatthassa pattiyā. 
Ekattiṁse ito kappe, 
yaṁ kammamakariṁ tadā; 
Duggatiṁ nābhijānāmi, 
āsane codake phalaṁ. 
Ito pannarase kappe, 
abhisāmasamavhayo; 
Sattaratanasampanno, 
cakkavattī mahabbalo. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā udakāsanadāyako thero imā gāthāyo abhāsitthāti. 
Udakāsanadāyakattherassāpadānaṁ paṭhamaṁ. 

Therāpadāna 
Udakāsanavagga 
2 Bhājanapālakattheraapadāna 
“Nagare bandhumatiyā, 
kumbhakāro ahaṁ tadā; 
Bhājanaṁ anupālesiṁ, 
bhikkhusaṅghassa tāvade. 
Ekanavutito kappe, 
bhājanaṁ anupālayiṁ; 
Duggatiṁ nābhijānāmi, 
bhājanassa idaṁ phalaṁ. 
Tepaññāse ito kappe, 
anantajālināmako; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā bhājanapālako thero imā gāthāyo abhāsitthāti. 
Bhājanapālakattherassāpadānaṁ dutiyaṁ. 

Therāpadāna 
Udakāsanavagga 
Sālapupphiyattheraapadāna 
“Aruṇavatiyā nagare, 
ahosiṁ pūpiko tadā; 
Mama dvārena gacchantaṁ, 
sikhinaṁ addasaṁ jinaṁ. 
Buddhassa pattaṁ paggayha, 
sālapupphaṁ adāsahaṁ; 
Sammaggatassa buddhassa, 
vippasannena cetasā. 
Ekattiṁse ito kappe, 
Yaṁ pupphamabhidāsahaṁ; 
Duggatiṁ nābhijānāmi, 
Sālapupphassidaṁ phalaṁ. 
Ito cuddasakappamhi, 
ahosiṁ amitañjalo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sālapupphiyo thero imā gāthāyo abhāsitthāti. 
Sālapupphiyattherassāpadānaṁ tatiyaṁ. 

Therāpadāna 
Udakāsanavagga 
Kilañjadāyakattheraapadāna 
“Tivarāyaṁ pure ramme, 
naḷakāro ahaṁ tadā; 
Siddhatthe lokapajjote, 
pasannā janatā tahiṁ. 
Pūjatthaṁ lokanāthassa, 
kilañjaṁ pariyesati; 
Buddhapūjaṁ karontānaṁ, 
kilañjaṁ adadiṁ ahaṁ. 
Catunnavutito kappe, 
yaṁ kammamakariṁ tadā; 
Duggatiṁ nābhijānāmi, 
kilañjassa idaṁ phalaṁ. 
Sattasattatikappamhi, 
rājā āsiṁ jaladdharo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā kilañjadāyako thero imā gāthāyo abhāsitthāti. 
Kilañjadāyakattherassāpadānaṁ catutthaṁ. 

Therāpadāna 
Udakāsanavagga 
5 Vedikārakattheraapadāna 
“Vipassino bhagavato, 
bodhiyā pādaputtame; 
Pasannacitto sumano, 
kāresiṁ vedikaṁ ahaṁ. 
Ekanavutito kappe, 
kāresiṁ vedikaṁ ahaṁ; 
Duggatiṁ nābhijānāmi, 
vedikāya idaṁ phalaṁ. 
Ito ekādase kappe, 
ahosiṁ sūriyassamo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā vedikārako thero imā gāthāyo abhāsitthāti. 
Vedikārakattherassāpadānaṁ pañcamaṁ. 

Therāpadāna 
Udakāsanavagga 
6 Vaṇṇakārattheraapadāna 
“Nagare aruṇavatiyā, 
vaṇṇakāro ahaṁ tadā; 
Cetiye dussabhaṇḍāni, 
nānāvaṇṇaṁ rajesahaṁ. 
Ekattiṁse ito kappe, 
yaṁ vaṇṇaṁ rajayiṁ tadā; 
Duggatiṁ nābhijānāmi, 
vaṇṇadānassidaṁ phalaṁ. 
Ito tevīsatikappe, 
vaṇṇasamasanāmako; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā vaṇṇakāro thero imā gāthāyo abhāsitthāti. 
Vaṇṇakārattherassāpadānaṁ chaṭṭhaṁ. 

Therāpadāna 
Udakāsanavagga 
Piyālapupphiyattheraapadāna 
“Migaluddo pure āsiṁ, 
araññe kānane ahaṁ; 
Piyālaṁ pupphitaṁ disvā, 
gatamagge khipiṁ ahaṁ. 
Ekanavutito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā piyālapupphiyo thero imā gāthāyo abhāsitthāti. 
Piyālapupphiyattherassāpadānaṁ sattamaṁ. 

Therāpadāna 
Subhūtivagga 
Subhūtittheraapadāna 
“Himavantassāvidūre, 
nisabho nāma pabbato; 
Assamo sukato mayhaṁ, 
paṇṇasālā sumāpitā. 
Kosiyo nāma nāmena, 
jaṭilo uggatāpano; 
Ekākiyo adutiyo, 
vasāmi nisabhe tadā. 
Phalaṁ mūlañca paṇṇañca, 
na bhuñjāmi ahaṁ tadā; 
Pavattaṁva supātāhaṁ, 
upajīvāmi tāvade. 
Nāhaṁ kopemi ājīvaṁ, 
cajamānopi jīvitaṁ; 
Ārādhemi sakaṁ cittaṁ, 
vivajjemi anesanaṁ. 
Rāgūpasaṁhitaṁ cittaṁ, 
yadā uppajjate mama; 
Sayaṁva paccavekkhāmi, 
ekaggo taṁ damemahaṁ. 
‘Rajjase rajjanīye ca, 
dussanīye ca dussase; 
Muyhase mohanīye ca, 
nikkhamassu vanā tuvaṁ. 
Visuddhānaṁ ayaṁ vāso, 
nimmalānaṁ tapassinaṁ; 
Mā kho visuddhaṁ dūsesi, 
nikkhamassu vanā tuvaṁ. 
Agāriko bhavitvāna, 
yadā puttaṁ labhissasi; 
Ubhopi mā virādhesi, 
nikkhamassu vanā tuvaṁ. 
Chavālātaṁ yathā kaṭṭhaṁ, 
na kvaci kiccakārakaṁ; 
Neva gāme araññe vā, 
na hi taṁ kaṭṭhasammataṁ. 
Chavālātūpamo tvaṁsi, 
na gihī nāpi saññato; 
Ubhato muttako ajja, 
nikkhamassu vanā tuvaṁ. 
Siyā nu kho tava etaṁ, 
ko pajānāti te idaṁ; 
Saddhādhuraṁ vahisi me, 
kosajjabahulāya ca. 
Jigucchissanti taṁ viññū, 
asuciṁ nāgariko yathā; 
Ākaḍḍhitvāna isayo, 
codayissanti taṁ sadā. 
Taṁ viññū pavadissanti, 
samatikkantasāsanaṁ; 
Saṁvāsaṁ alabhanto hi, 
kathaṁ jīvihisi tuvaṁ. 
Tidhā pabhinnaṁ mātaṅgaṁ, 
kuñjaraṁ saṭṭhihāyanaṁ; 
Balī nāgo upagantvā, 
yūthā nīharate gajaṁ. 
Yūthā vinissaṭo santo, 
sukhaṁ sātaṁ na vindati; 
Dukkhito vimano hoti, 
pajjhāyanto pavedhati. 
Tatheva jaṭilā tampi, 
nīharissanti dummatiṁ; 
Tehi tvaṁ nissaṭo santo, 
sukhaṁ sātaṁ na lacchasi. 
Divā vā yadi vā rattiṁ, 
sokasallasamappito; 
Ḍayhasi pariḷāhena, 
gajo yūthāva nissaṭo. 
Jātarūpaṁ yathā kūṭaṁ, 
neva jhāyati katthaci; 
Tathā sīlavihīno tvaṁ, 
na jhāyissasi katthaci. 
Agāraṁ vasamānopi, 
kathaṁ jīvihisi tuvaṁ; 
Mattikaṁ pettikañcāpi, 
natthi te nihitaṁ dhanaṁ. 
Sayaṁ kammaṁ karitvāna, 
gatte sedaṁ pamocayaṁ; 
Evaṁ jīvihisi gehe, 
sādhu te taṁ na ruccati. 
Evāhaṁ tattha vāremi, 
saṅkilesagataṁ manaṁ; 
Nānādhammakathaṁ katvā, 
pāpā cittaṁ nivārayiṁ’. 
Evaṁ me viharantassa, 
appamādavihārino; 
Tiṁsavassasahassāni, 
vipine me atikkamuṁ. 
Appamādarataṁ disvā, 
uttamatthaṁ gavesakaṁ; 
Padumuttarasambuddho, 
āgacchi mama santikaṁ. 
Timbarūsakavaṇṇābho, 
appameyyo anūpamo; 
Rūpenāsadiso buddho, 
ākāse caṅkamī tadā. 
Suphullo sālarājāva, 
vijjūvabbhaghanantare; 
Ñāṇenāsadiso buddho, 
ākāse caṅkamī tadā. 
Sīharājāvasambhīto, 
gajarājāva dappito; 
Lāsito byaggharājāva, 
ākāse caṅkamī tadā. 
Siṅgīnikkhasavaṇṇābho, 
khadiraṅgārasannibho; 
Maṇi yathā jotiraso, 
ākāse caṅkamī tadā. 
Visuddhakelāsanibho, 
puṇṇamāyeva candimā; 
Majjhanhikeva sūriyo, 
ākāse caṅkamī tadā. 
Disvā nabhe caṅkamantaṁ, 
evaṁ cintesahaṁ tadā; 
‘Devo nu kho ayaṁ satto, 
udāhu manujo ayaṁ. 
Na me suto vā diṭṭho vā, 
mahiyā ediso naro; 
Api mantapadaṁ atthi, 
ayaṁ satthā bhavissati’. 
Evāhaṁ cintayitvāna, 
sakaṁ cittaṁ pasādayiṁ; 
Nānāpupphañca gandhañca, 
sannipātesahaṁ tadā. 
Pupphāsanaṁ paññapetvā, 
sādhucittaṁ manoramaṁ; 
Narasārathinaṁ aggaṁ, 
idaṁ vacanamabraviṁ. 
‘Idaṁ me āsanaṁ vīra, 
paññattaṁ tavanucchavaṁ; 
Hāsayanto mamaṁ cittaṁ, 
nisīda kusumāsane’. 
Nisīdi tattha bhagavā, 
asambhītova kesarī; 
Sattarattindivaṁ buddho, 
pavare kusumāsane. 
Namassamāno aṭṭhāsiṁ, 
sattarattindivaṁ ahaṁ; 
Vuṭṭhahitvā samādhimhā, 
satthā loke anuttaro; 
Mama kammaṁ pakittento, 
idaṁ vacanamabravi. 
‘Bhāvehi buddhānussatiṁ, 
bhāvanānamanuttaraṁ; 
Imaṁ satiṁ bhāvayitvā, 
pūrayissasi mānasaṁ. 
Tiṁsakappasahassāni, 
devaloke ramissasi; 
Asītikkhattuṁ devindo, 
devarajjaṁ karissasi; 
Sahassakkhattuṁ cakkavattī, 
rājā raṭṭhe bhavissasi. 
Padesarajjaṁ vipulaṁ, 
gaṇanāto asaṅkhiyaṁ; 
Anubhossasi taṁ sabbaṁ, 
buddhānussatiyā phalaṁ. 
Bhavābhave saṁsaranto, 
mahābhogaṁ labhissasi; 
Bhoge te ūnatā natthi, 
buddhānussatiyā phalaṁ. 
Kappasatasahassamhi, 
okkākakulasambhavo; 
Gotamo nāma gottena, 
satthā loke bhavissati. 
Asītikoṭiṁ chaḍḍetvā, 
dāse kammakare bahū; 
Gotamassa bhagavato, 
sāsane pabbajissasi. 
Ārādhayitvā sambuddhaṁ, 
gotamaṁ sakyapuṅgavaṁ; 
Subhūti nāma nāmena, 
hessati satthu sāvako. 
Bhikkhusaṅghe nisīditvā, 
dakkhiṇeyyaguṇamhi taṁ; 
Tathāraṇavihāre ca, 
dvīsu agge ṭhapessati’. 
Idaṁ vatvāna sambuddho, 
jalajuttamanāmako; 
Nabhaṁ abbhuggamī vīro, 
haṁsarājāva ambare. 
Sāsito lokanāthena, 
namassitvā tathāgataṁ; 
Sadā bhāvemi mudito, 
buddhānussatimuttamaṁ. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsaṁ agacchahaṁ. 
Asītikkhattuṁ devindo, 
devarajjamakārayiṁ; 
Sahassakkhattuṁ rājā ca, 
cakkavattī ahosahaṁ. 
Padesarajjaṁ vipulaṁ, 
gaṇanāto asaṅkhiyaṁ; 
Anubhomi susampattiṁ, 
buddhānussatiyā phalaṁ. 
Bhavābhave saṁsaranto, 
mahābhogaṁ labhāmahaṁ; 
Bhoge me ūnatā natthi, 
buddhānussatiyā phalaṁ. 
Satasahassito kappe, 
yaṁ kammamakariṁ tadā; 
Duggatiṁ nābhijānāmi, 
buddhānussatiyā phalaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā subhūti thero imā gāthāyo abhāsitthāti. 
Subhūtittherassāpadānaṁ paṭhamaṁ. 

Therāpadāna 
Udakāsanavagga 
Ambayāgadāyakattheraapadāna 
“Sake sippe apatthaddho, 
agamaṁ kānanaṁ ahaṁ; 
Sambuddhaṁ yantaṁ disvāna, 
ambayāgaṁ adāsahaṁ. 
Ekanavutito kappe, 
yaṁ dānamadadiṁ tadā; 
Duggatiṁ nābhijānāmi, 
ambayāgassidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ambayāgadāyako thero imā gāthāyo abhāsitthāti. 
Ambayāgadāyakattherassāpadānaṁ aṭṭhamaṁ. 

Therāpadāna 
Udakāsanavagga 
Jagatikārakattheraapadāna 
“Nibbute lokanāthamhi, 
atthadassi naruttame; 
Jagatī kāritā mayhaṁ, 
buddhassa thūpamuttame. 
Aṭṭhārase kappasate, 
yaṁ kammamakariṁ tadā; 
Duggatiṁ nābhijānāmi, 
jagatiyā idaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā jagatikārako thero imā gāthāyo abhāsitthāti. 
Jagatikārakattherassāpadānaṁ navamaṁ. 

Therāpadāna 
Udakāsanavagga 
Vāsidāyakattheraapadāna 
“Kammārohaṁ pure āsiṁ, 
tivarāyaṁ puruttame; 
Ekā vāsi mayā dinnā, 
sayambhuṁ aparājitaṁ. 
Catunnavutito kappe, 
yaṁ vāsimadadiṁ tadā; 
Duggatiṁ nābhijānāmi, 
vāsidānassidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā vāsidāyako thero imā gāthāyo abhāsitthāti. 
Vāsidāyakattherassāpadānaṁ dasamaṁ. 
Udakāsanavaggo catuvīsatimo. 
Tassuddānaṁ 
Udakāsanabhājanaṁ, 
sālapupphī kilañjako; 
Vedikā vaṇṇakāro ca, 
piyālaambayāgado; 
Jagatī vāsidātā ca, 
gāthā tiṁsa ca aṭṭha ca. 

Therāpadāna 
Tuvaradāyakavagga 
1 Tuvaradāyakattheraapadāna 
“Migaluddo pure āsiṁ, 
araññe kānane ahaṁ; 
Bharitvā tuvaramādāya, 
saṅghassa adadiṁ ahaṁ. 
Ekanavutito kappe, 
yaṁ dānamadadiṁ tadā; 
Duggatiṁ nābhijānāmi, 
tuvarassa idaṁ phalaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā tuvaradāyako thero imā gāthāyo abhāsitthāti. 
Tuvaradāyakattherassāpadānaṁ paṭhamaṁ. 

Therāpadāna 
Tuvaradāyakavagga 
Nāgakesariyattheraapadāna 
“Dhanuṁ advejjhaṁ katvāna, 
vanamajjhogahiṁ ahaṁ; 
Kesaraṁ ogataṁ disvā, 
patapattaṁ samuṭṭhitaṁ. 
Ubho hatthehi paggayha, 
sire katvāna añjaliṁ; 
Buddhassa abhiropesiṁ, 
tissassa lokabandhuno. 
Dvenavute ito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Tesattatimhi kappamhi, 
satta kesaranāmakā; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā nāgakesariyo thero imā gāthāyo abhāsitthāti. 
Nāgakesariyattherassāpadānaṁ dutiyaṁ. 

Therāpadāna 
Tuvaradāyakavagga 
Naḷinakesariyattheraapadāna 
“Jātassarassa vemajjhe, 
vasāmi jalakukkuṭo; 
Addasāhaṁ devadevaṁ, 
gacchantaṁ anilañjase. 
Tuṇḍena kesariṁ gayha, 
vippasannena cetasā; 
Buddhassa abhiropesiṁ, 
tissassa lokabandhuno. 
Dvenavute ito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Tesattatimhi kappamhi, 
satta kesaranāmakā; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā naḷinakesariyo thero imā gāthāyo abhāsitthāti. 
Naḷinakesariyattherassāpadānaṁ tatiyaṁ. 

Therāpadāna 
Tuvaradāyakavagga 
4 Viravapupphiyattheraapadāna 
“Khīṇāsavasahassehi, 
niyyāti lokanāyako; 
Viravapupphamādāya, 
buddhassa abhiropayiṁ. 
Ekanavutito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā viravapupphiyo thero imā gāthāyo abhāsitthāti. 
Viravapupphiyattherassāpadānaṁ catutthaṁ. 

Therāpadāna 
Tuvaradāyakavagga 
Kuṭidhūpakattheraapadāna 
“Siddhatthassa bhagavato, 
ahosiṁ kuṭigopako; 
Kālena kālaṁ dhūpesiṁ, 
pasanno sehi pāṇibhi. 
Catunnavutito kappe, 
yaṁ kammamakariṁ tadā; 
Duggatiṁ nābhijānāmi, 
dhūpadānassidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā kuṭidhūpako thero imā gāthāyo abhāsitthāti. 
Kuṭidhūpakattherassāpadānaṁ pañcamaṁ. 

Therāpadāna 
Tuvaradāyakavagga 
Pattadāyakattheraapadāna 
“Paramena damathena, 
siddhatthassa mahesino; 
Pattadānaṁ mayā dinnaṁ, 
ujubhūtassa tādino. 
Catunnavutito kappe, 
yaṁ dānamadadiṁ tadā; 
Duggatiṁ nābhijānāmi, 
pattadānassidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā pattadāyako thero imā gāthāyo abhāsitthāti. 
Pattadāyakattherassāpadānaṁ chaṭṭhaṁ. 

Therāpadāna 
Tuvaradāyakavagga 
Dhātupūjakattheraapadāna 
“Nibbute lokanāthamhi, 
siddhatthamhi naruttame; 
Ekā dhātu mayā laddhā, 
dvipadindassa tādino. 
Tāhaṁ dhātuṁ gahetvāna, 
buddhassādiccabandhuno; 
Pañcavasse paricariṁ, 
tiṭṭhantaṁva naruttamaṁ. 
Catunnavutito kappe, 
yaṁ dhātuṁ pūjayiṁ tadā; 
Duggatiṁ nābhijānāmi, 
dhātupaṭṭhahane phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā dhātupūjako thero imā gāthāyo abhāsitthāti. 
Dhātupūjakattherassāpadānaṁ sattamaṁ. 

Therāpadāna 
Subhūtivagga 
2 Upavānattheraapadāna 
“Padumuttaro nāma jino, 
sabbadhammāna pāragū; 
Jalitvā aggikkhandhova, 
sambuddho parinibbuto. 
Mahājanā samāgamma, 
pūjayitvā tathāgataṁ; 
Citaṁ katvāna sukataṁ, 
sarīraṁ abhiropayuṁ. 
Sarīrakiccaṁ katvāna, 
dhātuṁ tattha samānayuṁ; 
Sadevamānusā sabbe, 
buddhathūpaṁ akaṁsu te. 
Paṭhamā kañcanamayā, 
dutiyāsi maṇīmayā; 
Tatiyā rūpiyamayā, 
catutthī phalikāmayā. 
Tathā pañcamiyā bhūmi, 
lohitaṅgamayā ahu; 
Chaṭṭhā masāragallassa, 
sabbaratanamayūpari. 
Jaṅghā maṇimayā āsi, 
vedikā ratanamayā; 
Sabbasoṇṇamayo thūpo, 
uddhaṁ yojanamuggato. 
Devā tattha samāgantvā, 
ekato mantayuṁ tadā; 
Mayampi thūpaṁ kassāma, 
lokanāthassa tādino. 
Dhātu āveṇikā natthi, 
sarīraṁ ekapiṇḍitaṁ; 
Imamhi buddhathūpamhi, 
kassāma kañcukaṁ mayaṁ. 
Devā sattahi ratnehi, 
aññaṁ vaḍḍhesu yojanaṁ; 
Thūpo dviyojanubbedho, 
timiraṁ byapahanti so. 
Nāgā tattha samāgantvā, 
ekato mantayuṁ tadā; 
Manussā ceva devā ca, 
buddhathūpaṁ akaṁsu te. 
Mā no pamattā assumha, 
appamattā sadevakā; 
Mayampi thūpaṁ kassāma, 
lokanāthassa tādino. 
Indanīlaṁ mahānīlaṁ, 
atho jotirasaṁ maṇiṁ; 
Ekato sannipātetvā, 
buddhathūpaṁ achādayuṁ. 
Sabbaṁ maṇimayaṁ āsi, 
tāvatā buddhacetiyaṁ; 
Tiyojanasamubbiddhaṁ, 
ālokakaraṇaṁ tadā. 
Garuḷā ca samāgantvā, 
ekato mantayuṁ tadā; 
Manussā devā nāgā ca, 
buddhathūpaṁ akaṁsu te. 
‘Mā no pamattā assumha, 
appamattā sadevakā; 
Mayampi thūpaṁ kassāma, 
lokanāthassa tādino’. 
Sabbaṁ maṇimayaṁ thūpaṁ, 
akaruṁ te ca kañcukaṁ; 
Yojanaṁ tepi vaḍḍhesuṁ, 
āyataṁ buddhacetiyaṁ. 
Catuyojanamubbiddho, 
buddhathūpo virocati; 
Obhāseti disā sabbā, 
sataraṁsīva uggato. 
Kumbhaṇḍā ca samāgantvā, 
ekato mantayuṁ tadā; 
Manussā ceva devā ca, 
nāgā ca garuḷā tathā; 
Paccekaṁ buddhaseṭṭhassa, 
akaṁsu thūpamuttamaṁ. 
‘Mā no pamattā assumha, 
appamattā sadevakā; 
Mayampi thūpaṁ kassāma, 
lokanāthassa tādino; 
Ratanehi chādessāma, 
āyataṁ buddhacetiyaṁ’. 
Yojanaṁ tepi vaḍḍhesuṁ, 
āyataṁ buddhacetiyaṁ; 
Pañcayojanamubbiddho, 
thūpo obhāsate tadā. 
Yakkhā tattha samāgantvā, 
ekato mantayuṁ tadā; 
Manussā devā nāgā ca, 
garuḷā kumbhaaṇḍakā. 
Paccekaṁ buddhaseṭṭhassa, 
akaṁsu thūpamuttamaṁ; 
‘Mā no pamattā assumha, 
appamattā sadevakā. 
Mayampi thūpaṁ kassāma, 
lokanāthassa tādino; 
Phalikāhi chādessāma, 
āyataṁ buddhacetiyaṁ’. 
Yojanaṁ tepi vaḍḍhesuṁ, 
āyataṁ buddhacetiyaṁ; 
Cha yojanāni ubbiddho, 
thūpo obhāsate tadā. 
Gandhabbā ca samāgantvā, 
ekato mantayuṁ tadā; 
‘Manujā devatā nāgā, 
garuḷā kumbhayakkhakā. 
Sabbekaṁsu buddhathūpaṁ, 
mayamettha akārakā; 
Mayampi thūpaṁ kassāma, 
lokanāthassa tādino’. 
Vediyo satta katvāna, 
chattamāropayiṁsu te; 
Sabbasoṇṇamayaṁ thūpaṁ, 
gandhabbā kārayuṁ tadā. 
Sattayojanamubbiddho, 
thūpo obhāsate tadā; 
Rattindivā na ñāyanti, 
āloko hoti sabbadā. 
Abhibhonti na tassābhā, 
candasūrā satārakā; 
Samantā yojanasate, 
padīpopi na pajjali. 
Tena kālena ye keci, 
thūpaṁ pūjenti mānusā; 
Na te thūpamāruhanti, 
ambare ukkhipanti te. 
Devehi ṭhapito yakkho, 
abhisammatanāmako; 
Dhajaṁ vā pupphadāmaṁ vā, 
abhiropeti uttari. 
Na te passanti taṁ yakkhaṁ, 
dāmaṁ passanti gacchato; 
Evaṁ passitvā gacchantā, 
sabbe gacchanti suggatiṁ. 
Viruddhā ye pāvacane, 
pasannā ye ca sāsane; 
Pāṭiheraṁ daṭṭhukāmā, 
thūpaṁ pūjenti mānusā. 
Nagare haṁsavatiyā, 
ahosiṁ bhatako tadā; 
Āmoditaṁ janaṁ disvā, 
evaṁ cintesahaṁ tadā. 
‘Uḷāro bhagavā heso, 
yassa dhātudharedisaṁ; 
Imā ca janatā tuṭṭhā, 
kāraṁ kubbaṁ na tappare. 
Ahampi kāraṁ kassāmi, 
lokanāthassa tādino; 
Tassa dhammesu dāyādo, 
bhavissāmi anāgate’. 
Sudhotaṁ rajakenāhaṁ, 
uttareyyapaṭaṁ mama; 
Veḷagge ālaggetvāna, 
dhajaṁ ukkhipimambare. 
Abhisammatako gayha, 
ambarehāsi me dhajaṁ; 
Vāteritaṁ dhajaṁ disvā, 
bhiyyo hāsaṁ janesahaṁ. 
Tattha cittaṁ pasādetvā, 
samaṇaṁ upasaṅkamiṁ; 
Taṁ bhikkhuṁ abhivādetvā, 
vipākaṁ pucchahaṁ dhaje. 
So me kathesi ānanda, 
pītisañjananaṁ mama; 
‘Tassa dhajassa vipākaṁ, 
anubhossasi sabbadā. 
Hatthī assā rathā pattī, 
senā ca caturaṅginī; 
Parivāressanti taṁ niccaṁ, 
dhajadānassidaṁ phalaṁ. 
Saṭṭhitūriyasahassāni, 
bheriyo samalaṅkatā; 
Parivāressanti taṁ niccaṁ, 
dhajadānassidaṁ phalaṁ. 
Chaḷāsītisahassāni, 
nāriyo samalaṅkatā; 
Vicittavatthābharaṇā, 
āmuttamaṇikuṇḍalā. 
Aḷārapamhā hasulā, 
susaññā tanumajjhimā; 
Parivāressanti taṁ niccaṁ, 
dhajadānassidaṁ phalaṁ. 
Tiṁsakappasahassāni, 
devaloke ramissasi; 
Asītikkhattuṁ devindo, 
devarajjaṁ karissasi. 
Sahassakkhattuṁ rājā ca, 
cakkavattī bhavissasi; 
Padesarajjaṁ vipulaṁ, 
gaṇanāto asaṅkhiyaṁ. 
Kappasatasahassamhi, 
okkākakulasambhavo; 
Gotamo nāma gottena, 
satthā loke bhavissati. 
Devalokā cavitvāna, 
sukkamūlena codito; 
Puññakammena saṁyutto, 
brahmabandhu bhavissasi. 
Asītikoṭiṁ chaḍḍetvā, 
dāse kammakare bahū; 
Gotamassa bhagavato, 
sāsane pabbajissasi. 
Ārādhayitvā sambuddhaṁ, 
gotamaṁ sakyapuṅgavaṁ; 
Upavānoti nāmena, 
hessasi satthu sāvako’. 
Satasahasse kataṁ kammaṁ, 
phalaṁ dassesi me idha; 
Sumutto saravegova, 
kilese jhāpayī mama. 
Cakkavattissa santassa, 
catudīpissarassa me; 
Tiyojanāni samantā, 
ussīsanti dhajā sadā. 
Satasahassito kappe, 
yaṁ kammamakariṁ tadā; 
Duggatiṁ nābhijānāmi, 
dhajadānassidaṁ phalaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā upavāno thero imā gāthāyo abhāsitthāti. 
Upavānattherassāpadānaṁ dutiyaṁ. 

Therāpadāna 
Tuvaradāyakavagga 
8 Sattalipupphapūjakattheraapadāna 
“Satta sattalipupphāni, 
sīse katvānahaṁ tadā; 
Buddhassa abhiropesiṁ, 
vessabhumhi naruttame. 
Ekattiṁse ito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sattalipupphapūjako thero imā gāthāyo abhāsitthāti. 
Sattalipupphapūjakattherassāpadānaṁ aṭṭhamaṁ. 

Therāpadāna 
Tuvaradāyakavagga 
9 Bimbijāliyattheraapadāna 
“Padumuttaro nāma jino, 
sayambhū aggapuggalo; 
Catusaccaṁ pakāseti, 
dīpeti amataṁ padaṁ. 
Bimbijālakapupphāni, 
puthu katvānahaṁ tadā; 
Buddhassa abhiropesiṁ, 
dvipadindassa tādino. 
Aṭṭhasaṭṭhimhito kappe, 
caturo kiñjakesarā; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā bimbijāliyo thero imā gāthāyo abhāsitthāti. 
Bimbijāliyattherassāpadānaṁ navamaṁ. 

Therāpadāna 
Tuvaradāyakavagga 
10 Uddālakadāyakattheraapadāna 
“Kakudho nāma nāmena, 
sayambhū aparājito; 
Pavanā nikkhamitvāna, 
anuppatto mahānadiṁ. 
Uddālakaṁ gahetvāna, 
sayambhussa adāsahaṁ; 
Saṁyatassujubhūtassa, 
pasannamānaso ahaṁ. 
Ekattiṁse ito kappe, 
yaṁ pupphamabhipūjayiṁ; 
Duggatiṁ nābhijānāmi, 
pupphadānassidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā uddālakadāyako thero imā gāthāyo abhāsitthāti. 
Uddālakadāyakattherassāpadānaṁ dasamaṁ. 
Tuvaradāyakavaggo pañcavīsatimo. 
Tassuddānaṁ 
Tuvaranāganaḷinā, 
viravī kuṭidhūpako; 
Patto dhātusattaliyo, 
bimbi uddālakena ca; 
Sattatiṁsati gāthāyo, 
gaṇitāyo vibhāvibhi. 

Therāpadāna 
Thomakavagga 
Thomakattheraapadāna 
“Devaloke ṭhito santo, 
vipassissa mahesino; 
Dhammaṁ suṇitvā mudito, 
imaṁ vācaṁ abhāsahaṁ. 
‘Namo te purisājañña, 
namo te purisuttama; 
Bahujjanaṁ tārayasi, 
desento amataṁ padaṁ’. 
Ekanavutito kappe, 
yaṁ vācamabhaṇiṁ tadā; 
Duggatiṁ nābhijānāmi, 
thomanāya idaṁ phalaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā thomako thero imā gāthāyo abhāsitthāti. 
Thomakattherassāpadānaṁ paṭhamaṁ. 

Therāpadāna 
Thomakavagga 
Ekāsanadāyakattheraapadāna 
“Vijahitvā devavaṇṇaṁ, 
sabhariyo idhāgamiṁ; 
Adhikāraṁ kattukāmo, 
buddhaseṭṭhassa sāsane. 
Devalo nāma nāmena, 
padumuttarasāvako; 
Tassa bhikkhā mayā dinnā, 
vippasannena cetasā. 
Satasahassito kappe, 
yaṁ kammamakariṁ tadā; 
Duggatiṁ nābhijānāmi, 
piṇḍapātassidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ekāsanadāyako thero imā gāthāyo abhāsitthāti. 
Ekāsanadāyakattherassāpadānaṁ dutiyaṁ. 

Therāpadāna 
Thomakavagga 
Citakapūjakattheraapadāna 
“Ānando nāma sambuddho, 
sayambhū aparājito; 
Araññe parinibbāyi, 
amanussamhi kānane. 
Devalokā idhāgantvā, 
citaṁ katvānahaṁ tadā; 
Sarīraṁ tattha jhāpesiṁ, 
sakkārañca akāsahaṁ. 
Ekanavutito kappe, 
yaṁ kammamakariṁ tadā; 
Duggatiṁ nābhijānāmi, 
buddhapūjāyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā citakapūjako thero imā gāthāyo abhāsitthāti. 
Citakapūjakattherassāpadānaṁ tatiyaṁ. 

Therāpadāna 
Thomakavagga 
4 Ticampakapupphiyattheraapadāna 
“Himavantassāvidūre, 
vikato nāma pabbato; 
Tassa vemajjhe vasati, 
samaṇo bhāvitindriyo. 
Disvāna tassopasamaṁ, 
vippasannena cetasā; 
Tīṇi campakapupphāni, 
gahetvāna samokiriṁ. 
Ekanavutito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ticampakapupphiyo thero imā gāthāyo abhāsitthāti. 
Ticampakapupphiyattherassāpadānaṁ catutthaṁ. 

Therāpadāna 
Thomakavagga 
Sattapāṭaliyattheraapadāna 
“Kaṇikāraṁva jotantaṁ, 
nisinnaṁ pabbatantare; 
Satta pāṭalipupphāni, 
buddhassa abhiropayiṁ. 
Catunnavutito kappe, 
yaṁ pupphamabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sattapāṭaliyo thero imā gāthāyo abhāsitthāti. 
Sattapāṭaliyattherassāpadānaṁ pañcamaṁ. 

Therāpadāna 
Thomakavagga 
Upāhanadāyakattheraapadāna 
“Ahosiṁ candano nāma, 
sambuddhassatrajo tadā; 
Ekopāhano mayā dinno, 
bodhiṁ sampajja me tuvaṁ. 
Ekanavutito kappe, 
yaṁ pānadhiṁ dadiṁ tadā; 
Duggatiṁ nābhijānāmi, 
upāhanassidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā upāhanadāyako thero imā gāthāyo abhāsitthāti. 
Upāhanadāyakattherassāpadānaṁ chaṭṭhaṁ. 

Therāpadāna 
Thomakavagga 
Mañjaripūjakattheraapadāna 
“Mañjarikaṁ karitvāna, 
rathiyaṁ paṭipajjahaṁ; 
Addasaṁ samaṇānaggaṁ, 
bhikkhusaṅghapurakkhataṁ. 
Pasannacitto sumano, 
paramāya ca pītiyā; 
Ubho hatthehi paggayha, 
buddhassa abhiropayiṁ. 
Dvenavute ito kappe, 
yaṁ pupphamabhipūjayiṁ; 
Duggatiṁ nābhijānāmi, 
pupphapūjāyida