Sự Nghiệp Anh Hùng (Apadāna)

cakkassidaṁ phalaṁ. 
Ito ekādase kappe, 
aṭṭhāsiṁsu janādhipā; 
Sahassarājanāmena, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā dhammacakkiko thero imā gāthāyo abhāsitthāti. 
Dhammacakkikattherassāpadānaṁ navamaṁ. 

Therāpadāna 
Bhaddālivagga 
Yāgudāyakattheraapadāna 
“Atithiṁ me gahetvāna, 
agacchiṁ gāmakaṁ tadā; 
Sampuṇṇanadikaṁ disvā, 
saṅghārāmaṁ upāgamiṁ. 
Āraññakā dhutadharā, 
jhāyino lūkhacīvarā; 
Vivekābhiratā dhīrā, 
saṅghārāme vasanti te. 
Gati tesaṁ upacchinnā, 
suvimuttāna tādinaṁ; 
Piṇḍāya te na gacchanti, 
oruddhanaditāya hi. 
Pasannacitto sumano, 
vedajāto katañjalī; 
Taṇḍulaṁ me gahetvāna, 
yāgudānaṁ adāsahaṁ. 
Pañcannaṁ yāguṁ datvāna, 
pasanno sehi pāṇibhi; 
Sakakammābhiraddhohaṁ, 
tāvatiṁsamagacchahaṁ. 
Maṇimayañca me byamhaṁ, 
nibbatti tidase gaṇe; 
Nārīgaṇehi sahito, 
modāmi byamhamuttame. 
Tettiṁsakkhattuṁ devindo, 
devarajjamakārayiṁ; 
Tiṁsakkhattuṁ cakkavattī, 
mahārajjamakārayiṁ. 
Padesarajjaṁ vipulaṁ, 
gaṇanāto asaṅkhiyaṁ; 
Devaloke manusse vā, 
anubhotvā sayaṁ ahaṁ. 
Pacchime bhave sampatte, 
pabbajiṁ anagāriyaṁ; 
Saha oropite kese, 
sabbaṁ sampaṭivijjhahaṁ. 
Khayato vayato cāpi, 
sammasanto kaḷevaraṁ; 
Pure sikkhāpadādānā, 
arahattamapāpuṇiṁ. 
Sudinnaṁ me dānavaraṁ, 
vāṇijjaṁ sampayojitaṁ; 
Teneva yāgudānena, 
pattomhi acalaṁ padaṁ. 
Sokaṁ pariddavaṁ byādhiṁ, 
darathaṁ cittatāpanaṁ; 
Nābhijānāmi uppannaṁ, 
yāgudānassidaṁ phalaṁ. 
Yāguṁ saṅghassa datvāna, 
puññakkhette anuttare; 
Pañcānisaṁse anubhomi, 
aho yāgusuyiṭṭhatā. 
Abyādhitā rūpavatā, 
khippaṁ dhammanisantitā; 
Lābhitā annapānassa, 
āyu pañcamakaṁ mama. 
Yo koci vedaṁ janayaṁ, 
saṅghe yāguṁ dadeyya so; 
Imāni pañca ṭhānāni, 
paṭigaṇheyya paṇḍito. 
Karaṇīyaṁ kataṁ sabbaṁ, 
bhavā ugghāṭitā mayā; 
Sabbāsavā parikkhīṇā, 
natthi dāni punabbhavo. 
So ahaṁ vicarissāmi, 
gāmā gāmaṁ purā puraṁ; 
Namassamāno sambuddhaṁ, 
dhammassa ca sudhammataṁ. 
Tiṁsakappasahassamhi, 
yaṁ dānamadadiṁ tadā; 
Duggatiṁ nābhijānāmi, 
yāgudānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā yāgudāyako thero imā gāthāyo abhāsitthāti. 
Yāgudāyakattherassāpadānaṁ aṭṭhamaṁ. 

Therāpadāna 
Bhaddālivagga 
Patthodanadāyakattheraapadāna 
“Vanacārī pure āsiṁ, 
satataṁ vanakammiko; 
Patthodanaṁ gahetvāna, 
kammantaṁ agamāsahaṁ. 
Tatthaddasāsiṁ sambuddhaṁ, 
sayambhuṁ aparājitaṁ; 
Vanā piṇḍāya nikkhantaṁ, 
disvā cittaṁ pasādayiṁ. 
Parakammāyane yutto, 
puññañca me na vijjati; 
Ayaṁ patthodano atthi, 
bhojayissāmahaṁ muniṁ. 
Patthodanaṁ gahetvāna, 
sayambhussa adāsahaṁ; 
Mama nijjhāyamānassa, 
paribhuñji tadā muni. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Chattiṁsakkhattuṁ devindo, 
devarajjamakārayiṁ; 
Tettiṁsakkhattuṁ rājā ca, 
cakkavattī ahosahaṁ. 
Padesarajjaṁ vipulaṁ, 
gaṇanāto asaṅkhiyaṁ; 
Sukhito yasavā homi, 
patthodanassidaṁ phalaṁ. 
Bhavābhave saṁsaranto, 
labhāmi amitaṁ dhanaṁ; 
Bhoge me ūnatā natthi, 
patthodanassidaṁ phalaṁ. 
Nadīsotapaṭibhāgā, 
bhogā nibbattare mama; 
Parimetuṁ na sakkomi, 
patthodanassidaṁ phalaṁ. 
Imaṁ khāda imaṁ bhuñja, 
imamhi sayane saya; 
Tenāhaṁ sukhito homi, 
patthodanassidaṁ phalaṁ. 
Catunnavutito kappe, 
yaṁ dānamadadiṁ tadā; 
Duggatiṁ nābhijānāmi, 
patthodanassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā patthodanadāyako thero imā gāthāyo abhāsitthāti. 
Patthodanadāyakattherassāpadānaṁ navamaṁ. 

Therāpadāna 
Bhaddālivagga 
Mañcadāyakattheraapadāna 
“Parinibbute kāruṇike, 
siddhatthe lokanāyake; 
Vitthārike pāvacane, 
devamānusasakkate. 
Caṇḍālo āsahaṁ tattha, 
āsandipīṭhakārako; 
Tena kammena jīvāmi, 
tena posemi dārake. 
Āsandiṁ sukataṁ katvā, 
pasanno sehi pāṇibhi; 
Sayamevupagantvāna, 
bhikkhusaṅghassadāsahaṁ. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Devalokagato santo, 
modāmi tidase gaṇe; 
Sayanāni mahagghāni, 
nibbattanti yadicchakaṁ. 
Paññāsakkhattuṁ devindo, 
devarajjamakārayiṁ; 
Asītikkhattuṁ rājā ca, 
cakkavattī ahosahaṁ. 
Padesarajjaṁ vipulaṁ, 
gaṇanāto asaṅkhiyaṁ; 
Sukhito yasavā homi, 
mañcadānassidaṁ phalaṁ. 
Devalokā cavitvāna, 
emi ce mānusaṁ bhavaṁ; 
Mahārahā susayanā, 
sayameva bhavanti me. 
Ayaṁ pacchimako mayhaṁ, 
carimo vattate bhavo; 
Ajjāpi sayane kāle, 
sayanaṁ upatiṭṭhati. 
Catunnavutito kappe, 
yaṁ dānamadadiṁ tadā; 
Duggatiṁ nābhijānāmi, 
mañcadānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā mañcadāyako thero imā gāthāyo abhāsitthāti. 
Mañcadāyakattherassāpadānaṁ dasamaṁ. 
Bhaddālivaggo bācattālīsamo. 
Tassuddānaṁ 
Bhaddālī ekachatto ca, 
tiṇasūlo ca maṁsado; 
Nāgapallaviko dīpī, 
ucchaṅgi yāgudāyako. 
Patthodanī mañcadado, 
gāthāyo gaṇitā ciha; 
Dvesatāni ca gāthānaṁ, 
gāthā cekā taduttari. 

Therāpadāna 
Sakiṁsammajjakavagga 
Sakiṁsammajjakattheraapadāna 
“Vipassino bhagavato, 
pāṭaliṁ bodhimuttamaṁ; 
Disvāva taṁ pādapaggaṁ, 
tattha cittaṁ pasādayiṁ. 
Sammajjaniṁ gahetvāna, 
bodhiṁ sammajji tāvade; 
Sammajjitvāna taṁ bodhiṁ, 
avandiṁ pāṭaliṁ ahaṁ. 
Tattha cittaṁ pasādetvā, 
sire katvāna añjaliṁ; 
Namassamāno taṁ bodhiṁ, 
gañchiṁ paṭikuṭiṁ ahaṁ. 
Tādimaggena gacchāmi, 
saranto bodhimuttamaṁ; 
Ajagaro maṁ pīḷesi, 
ghorarūpo mahabbalo. 
Āsanne me kataṁ kammaṁ, 
phalena tosayī mamaṁ; 
Kaḷevaraṁ me gilati, 
devaloke ramāmahaṁ. 
Anāvilaṁ mama cittaṁ, 
visuddhaṁ paṇḍaraṁ sadā; 
Sokasallaṁ na jānāmi, 
cittasantāpanaṁ mama. 
Kuṭṭhaṁ gaṇḍo kilāso ca, 
apamāro vitacchikā; 
Daddu kaṇḍu ca me natthi, 
phalaṁ sammajjanāyidaṁ. 
Soko ca paridevo ca, 
hadaye me na vijjati; 
Abhantaṁ ujukaṁ cittaṁ, 
phalaṁ sammajjanāyidaṁ. 
Samādhīsu na majjāmi, 
visadaṁ hoti mānasaṁ; 
Yaṁ yaṁ samādhimicchāmi, 
so so sampajjate mamaṁ. 
Rajanīye na rajjāmi, 
atho dussaniyesu ca; 
Mohanīye na muyhāmi, 
phalaṁ sammajjanāyidaṁ. 
Ekanavutito kappe, 
yaṁ kammamakariṁ tadā; 
Duggatiṁ nābhijānāmi, 
phalaṁ sammajjanāyidaṁ. 
Kilesā jhāpitā mayhaṁ, 
bhavā sabbe samūhatā; 
Nāgova bandhanaṁ chetvā, 
viharāmi anāsavo. 
Svāgataṁ vata me āsi, 
mama buddhassa santike; 
Tisso vijjā anuppattā, 
kataṁ buddhassa sāsanaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā sakiṁsammajjako thero imā gāthāyo abhāsitthāti. 
Sakiṁsammajjakattherassāpadānaṁ paṭhamaṁ. 

Therāpadāna 
Sakiṁsammajjakavagga 
Ekadussadāyakattheraapadāna 
“Nagare haṁsavatiyā, 
ahosiṁ tiṇahārako; 
Tiṇahārena jīvāmi, 
tena posemi dārake. 
Padumuttaro nāma jino, 
sabbadhammāna pāragū; 
Tamandhakāraṁ nāsetvā, 
uppajji lokanāyako. 
Sake ghare nisīditvā, 
evaṁ cintesi tāvade; 
‘Buddho loke samuppanno, 
deyyadhammo na vijjati. 
Idaṁ me sāṭakaṁ ekaṁ, 
natthi me koci dāyako; 
Dukkho nirayasamphasso, 
ropayissāmi dakkhiṇaṁ’. 
Evāhaṁ cintayitvāna, 
sakaṁ cittaṁ pasādayiṁ; 
Ekaṁ dussaṁ gahetvāna, 
buddhaseṭṭhassadāsahaṁ. 
Ekaṁ dussaṁ daditvāna, 
ukkuṭṭhiṁ sampavattayiṁ; 
‘Yadi buddho tuvaṁ vīra, 
tārehi maṁ mahāmuni’. 
Padumuttaro lokavidū, 
āhutīnaṁ paṭiggaho; 
Mama dānaṁ pakittento, 
akā me anumodanaṁ. 
‘Iminā ekadussena, 
cetanāpaṇidhīhi ca; 
Kappasatasahassāni, 
vinipātaṁ na gacchasi. 
Chattiṁsakkhattuṁ devindo, 
devarajjaṁ karissasi; 
Tettiṁsakkhattuṁ rājā ca, 
cakkavattī bhavissasi. 
Padesarajjaṁ vipulaṁ, 
gaṇanāto asaṅkhiyaṁ; 
Devaloke manusse vā, 
saṁsaranto tuvaṁ bhave. 
Rūpavā guṇasampanno, 
anavakkantadehavā; 
Akkhobhaṁ amitaṁ dussaṁ, 
labhissasi yadicchakaṁ’. 
Idaṁ vatvāna sambuddho, 
jalajuttamanāmako; 
Nabhaṁ abbhuggamī vīro, 
haṁsarājāva ambare. 
Yaṁ yaṁ yonupapajjāmi, 
devattaṁ atha mānusaṁ; 
Bhoge me ūnatā natthi, 
ekadussassidaṁ phalaṁ. 
Paduddhāre paduddhāre, 
dussaṁ nibbattate mamaṁ; 
Heṭṭhā dussamhi tiṭṭhāmi, 
uparicchadanaṁ mama. 
Cakkavāḷaṁ upādāya, 
sakānanaṁ sapabbataṁ; 
Icchamāno cahaṁ ajja, 
dussehacchādayeyya taṁ. 
Teneva ekadussena, 
saṁsaranto bhavābhave; 
Suvaṇṇavaṇṇo hutvāna, 
saṁsarāmi bhavābhave. 
Vipākaṁ ekadussassa, 
nājjhagaṁ katthacikkhayaṁ; 
Ayaṁ me antimā jāti, 
vipaccati idhāpi me. 
Satasahassito kappe, 
yaṁ dussamadadiṁ tadā; 
Duggatiṁ nābhijānāmi, 
ekadussassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ekadussadāyako thero imā gāthāyo abhāsitthāti. 
Ekadussadāyakattherassāpadānaṁ dutiyaṁ. 

Therāpadāna 
Sakiṁsammajjakavagga 
Ekāsanadāyakattheraapadāna 
“Himavantassāvidūre, 
gosito nāma pabbato; 
Assamo sukato mayhaṁ, 
paṇṇasālā sumāpitā. 
Nārado nāma nāmena, 
kassapo iti maṁ vidū; 
Suddhimaggaṁ gavesanto, 
vasāmi gosite tadā. 
Padumuttaro nāma jino, 
sabbadhammāna pāragū; 
Vivekakāmo sambuddho, 
agañchi anilañjasā. 
Vanagge gacchamānassa, 
disvā raṁsiṁ mahesino; 
Kaṭṭhamañcaṁ paññāpetvā, 
ajinañca apatthariṁ. 
Āsanaṁ paññapetvāna, 
sire katvāna añjaliṁ; 
Somanassaṁ paveditvā, 
idaṁ vacanamabraviṁ. 
‘Sallakatto mahāvīra, 
āturānaṁ tikicchako; 
Mamaṁ rogaparetassa, 
tikicchaṁ dehi nāyaka. 
Kallatthikā ye passanti, 
buddhaseṭṭha tuvaṁ mune; 
Dhuvatthasiddhiṁ papponti, 
etesaṁ ajaro bhave. 
Na me deyyadhammo atthi, 
pavattaphalabhojihaṁ; 
Idaṁ me āsanaṁ atthi, 
nisīda kaṭṭhamañcake’. 
Nisīdi tattha bhagavā, 
asambhītova kesarī; 
Muhuttaṁ vītināmetvā, 
idaṁ vacanamabravi. 
‘Vissattho hohi mā bhāyi, 
laddho jotiraso tayā; 
Yaṁ tuyhaṁ patthitaṁ sabbaṁ, 
paripūrissatināgate. 
Na moghaṁ taṁ kataṁ tuyhaṁ, 
puññakkhette anuttare; 
Sakkā uddharituṁ attā, 
yassa cittaṁ paṇīhitaṁ. 
Imināsanadānena, 
cetanāpaṇidhīhi ca; 
Kappasatasahassāni, 
vinipātaṁ na gacchasi. 
Paññāsakkhattuṁ devindo, 
devarajjaṁ karissasi; 
Asītikkhattuṁ rājā ca, 
cakkavattī bhavissasi. 
Padesarajjaṁ vipulaṁ, 
gaṇanāto asaṅkhiyaṁ; 
Sabbattha sukhito hutvā, 
saṁsāre saṁsarissasi’. 
Idaṁ vatvāna sambuddho, 
jalajuttamanāmako; 
Nabhaṁ abbhuggamī vīro, 
haṁsarājāva ambare. 
Hatthiyānaṁ assayānaṁ, 
sarathaṁ sandamānikaṁ; 
Labhāmi sabbamevetaṁ, 
ekāsanassidaṁ phalaṁ. 
Kānanaṁ pavisitvāpi, 
yadā icchāmi āsanaṁ; 
Mama saṅkappamaññāya, 
pallaṅko upatiṭṭhati. 
Vārimajjhagato santo, 
yadā icchāmi āsanaṁ; 
Mama saṅkappamaññāya, 
pallaṅko upatiṭṭhati. 
Yaṁ yaṁ yonupapajjāmi, 
devattaṁ atha mānusaṁ; 
Pallaṅkasatasahassāni, 
parivārenti maṁ sadā. 
Duve bhave saṁsarāmi, 
devatte atha mānuse; 
Duve kule pajāyāmi, 
khattiye atha brāhmaṇe. 
Ekāsanaṁ daditvāna, 
puññakkhette anuttare; 
Dhammapallaṅkamādāya, 
viharāmi anāsavo. 
Satasahassito kappe, 
yaṁ dānamadadiṁ tadā; 
Duggatiṁ nābhijānāmi, 
ekāsanassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ekāsanadāyako thero imā gāthāyo abhāsitthāti. 
Ekāsanadāyakattherassāpadānaṁ tatiyaṁ. 

Therāpadāna 
Sakiṁsammajjakavagga 
Sattakadambapupphiyattheraapadāna 
“Himavantassāvidūre, 
kukkuṭo nāma pabbato; 
Tamhi pabbatapādamhi, 
satta buddhā vasiṁsu te. 
Kadambaṁ pupphitaṁ disvā, 
paggahetvāna añjaliṁ; 
Satta mālā gahetvāna, 
puññacittena okiriṁ. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Catunnavutito kappe, 
yaṁ kammamakariṁ tadā; 
Duggatiṁ nābhijānāmi, 
buddhapūjāyidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sattakadambapupphiyo thero imā gāthāyo abhāsitthāti. 
Sattakadambapupphiyattherassāpadānaṁ catutthaṁ. 

Therāpadāna 
Sakiṁsammajjakavagga 
Koraṇḍapupphiyattheraapadāna 
“Vanakammiko pure āsiṁ, 
pitumātumatenahaṁ; 
Pasumārena jīvāmi, 
kusalaṁ me na vijjati. 
Mama āsayasāmantā, 
tisso lokagganāyako; 
Padāni tīṇi dassesi, 
anukampāya cakkhumā. 
Akkante ca pade disvā, 
tissanāmassa satthuno; 
Haṭṭho haṭṭhena cittena, 
pade cittaṁ pasādayiṁ. 
Koraṇḍaṁ pupphitaṁ disvā, 
pādapaṁ dharaṇīruhaṁ; 
Sakosakaṁ gahetvāna, 
padaseṭṭhamapūjayiṁ. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Yaṁ yaṁ yonupapajjāmi, 
devattaṁ atha mānusaṁ; 
Koraṇḍavaṇṇakoyeva, 
suppabhāso bhavāmahaṁ. 
Dvenavute ito kappe, 
yaṁ kammamakariṁ tadā; 
Duggatiṁ nābhijānāmi, 
padapūjāyidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā koraṇḍapupphiyo thero imā gāthāyo abhāsitthāti. 
Koraṇḍapupphiyattherassāpadānaṁ pañcamaṁ. 

Therāpadāna 
Sakiṁsammajjakavagga 
6 Ghatamaṇḍadāyakattheraapadāna 
“Sucintitaṁ bhagavantaṁ, 
lokajeṭṭhaṁ narāsabhaṁ; 
Upaviṭṭhaṁ mahāraññaṁ, 
vātābādhena pīḷitaṁ. 
Disvā cittaṁ pasādetvā, 
ghatamaṇḍamupānayiṁ; 
Katattā ācitattā ca, 
gaṅgā bhāgīrathī ayaṁ. 
Mahāsamuddā cattāro, 
ghataṁ sampajjare mama; 
Ayañca pathavī ghorā, 
appamāṇā asaṅkhiyā. 
Mama saṅkappamaññāya, 
bhavate madhusakkarā; 
Cātuddīpā ime rukkhā, 
pādapā dharaṇīruhā. 
Mama saṅkappamaññāya, 
kapparukkhā bhavanti te; 
Paññāsakkhattuṁ devindo, 
devarajjamakārayiṁ. 
Ekapaññāsakkhattuñca, 
cakkavattī ahosahaṁ; 
Padesarajjaṁ vipulaṁ, 
gaṇanāto asaṅkhiyaṁ. 
Catunnavutito kappe, 
yaṁ dānamadadiṁ tadā; 
Duggatiṁ nābhijānāmi, 
ghatamaṇḍassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ghatamaṇḍadāyako thero imā gāthāyo abhāsitthāti. 
Ghatamaṇḍadāyakattherassāpadānaṁ chaṭṭhaṁ. 

Therāpadāna 
Sakiṁsammajjakavagga 
7 Ekadhammassavaniyattheraapadāna 
“Padumuttaro nāma jino, 
sabbadhammāna pāragū; 
Catusaccaṁ pakāsento, 
santāresi bahuṁ janaṁ. 
Ahaṁ tena samayena, 
jaṭilo uggatāpano; 
Dhunanto vākacīrāni, 
gacchāmi ambare tadā. 
Buddhaseṭṭhassa upari, 
gantuṁ na visahāmahaṁ; 
Pakkhīva selamāsajja, 
gamanaṁ na labhāmahaṁ. 
Udake vokkamitvāna, 
evaṁ gacchāmi ambare; 
Na me idaṁ bhūtapubbaṁ, 
iriyāpathavikopanaṁ. 
Handa metaṁ gavesissaṁ, 
appevatthaṁ labheyyahaṁ; 
Orohanto antalikkhā, 
saddamassosi satthuno. 
Sarena rajanīyena, 
savanīyena vaggunā; 
Aniccataṁ kathentassa, 
taññeva uggahiṁ tadā; 
Aniccasaññamuggayha, 
agamāsiṁ mamassamaṁ. 
Yāvatāyuṁ vasitvāna, 
tattha kālaṅkato ahaṁ; 
Carime vattamānamhi, 
saddhammassavanaṁ sariṁ. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Tiṁsakappasahassāni, 
devaloke ramiṁ ahaṁ; 
Ekapaññāsakkhattuñca, 
devarajjamakārayiṁ. 
Ekavīsatikkhattuñca, 
cakkavattī ahosahaṁ; 
Padesarajjaṁ vipulaṁ, 
gaṇanāto asaṅkhiyaṁ. 
Anubhomi sakaṁ puññaṁ, 
sukhitohaṁ bhavābhave; 
Anussarāmi taṁ saññaṁ, 
saṁsaranto bhavābhave; 
Na koṭiṁ paṭivijjhāmi, 
nibbānaṁ accutaṁ padaṁ. 
Pitugehe nisīditvā, 
samaṇo bhāvitindriyo; 
Kathaṁsa paridīpento, 
aniccatamudāhari. 
‘Aniccā vata saṅkhārā, 
uppādavayadhammino; 
Uppajjitvā nirujjhanti, 
tesaṁ vūpasamo sukho’. 
Saha gāthaṁ suṇitvāna, 
pubbasaññamanussariṁ; 
Ekāsane nisīditvā, 
arahattamapāpuṇiṁ. 
<b>Jātiyā sattavassena</b>, 
arahattamapāpuṇiṁ; 
Upasampādayī buddho, 
dhammassavanassidaṁ phalaṁ. 
Satasahassito kappe, 
yaṁ dhammamasuṇiṁ tadā; 
Duggatiṁ nābhijānāmi, 
dhammassavanassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ekadhammassavaniyo thero imā gāthāyo abhāsitthāti. 
Ekadhammassavaniyattherassāpadānaṁ sattamaṁ. 

Therāpadāna 
Kuṇḍadhānavagga 
Kapparukkhiyattheraapadāna 
“Siddhatthassa bhagavato, 
thūpaseṭṭhassa sammukhā; 
Vicittadusse lagetvā, 
kapparukkhaṁ ṭhapesahaṁ. 
Yaṁ yaṁ yonupapajjāmi, 
devattaṁ atha mānusaṁ; 
Sobhayanto mama dvāraṁ, 
kapparukkho patiṭṭhati. 
Ahañca parisā ceva, 
ye keci mama vassitā; 
Tamhā dussaṁ gahetvāna, 
nivāsema mayaṁ sadā. 
Catunnavutito kappe, 
yaṁ rukkhaṁ ṭhapayiṁ ahaṁ; 
Duggatiṁ nābhijānāmi, 
kapparukkhassidaṁ phalaṁ. 
Ito ca sattame kappe, 
suceḷā aṭṭha khattiyā; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā kapparukkhiyo thero imā gāthāyo abhāsitthāti. 
Kapparukkhiyattherassāpadānaṁ dasamaṁ. 
Kuṇḍadhānavaggo catuttho. 
Tassuddānaṁ 
Kuṇḍasāgatakaccānā, 
udāyī mogharājako; 
Adhimutto lasuṇado, 
āyāgī dhammacakkiko; 
Kapparukkhī ca dasamo, 
gāthā dvayadasasataṁ. 

Therāpadāna 
Sakiṁsammajjakavagga 
Sucintitattheraapadāna 
“Nagare haṁsavatiyā, 
ahosiṁ kassako tadā; 
Kasikammena jīvāmi, 
tena posemi dārake. 
Susampannaṁ tadā khettaṁ, 
Dhaññaṁ me phalinaṁ ahu; 
Pākakāle ca sampatte, 
Evaṁ cintesahaṁ tadā. 
Nacchannaṁ nappatirūpaṁ, 
jānantassa guṇāguṇaṁ; 
Yohaṁ saṅghe adatvāna, 
aggaṁ bhuñjeyya ce tadā. 
Ayaṁ buddho asamasamo, 
dvattiṁsavaralakkhaṇo; 
Tato pabhāvito saṅgho, 
puññakkhetto anuttaro. 
Tattha dassāmahaṁ dānaṁ, 
navasassaṁ pure pure; 
Evāhaṁ cintayitvāna, 
haṭṭho pīṇitamānaso. 
Khettato dhaññamāhatvā, 
sambuddhaṁ upasaṅkamiṁ; 
Upasaṅkamma sambuddhaṁ, 
lokajeṭṭhaṁ narāsabhaṁ; 
Vanditvā satthuno pāde, 
idaṁ vacanamabraviṁ. 
‘Navasassañca sampannaṁ, 
āyāgosi ca tvaṁ mune; 
Anukampamupādāya, 
adhivāsehi cakkhuma’. 
Padumuttaro lokavidū, 
āhutīnaṁ paṭiggaho; 
Mama saṅkappamaññāya, 
idaṁ vacanamabravi. 
‘Cattāro ca paṭipannā, 
cattāro ca phale ṭhitā; 
Esa saṅgho ujubhūto, 
paññāsīlasamāhito; 
Yajantānaṁ manussānaṁ, 
puññapekkhāna pāṇinaṁ. 
Karotopadhikaṁ puññaṁ, 
saṅghe dinnaṁ mahapphalaṁ; 
Tasmiṁ saṅgheva dātabbaṁ, 
tava sassaṁ tathetaraṁ. 
Saṅghato uddisitvāna, 
bhikkhū netvāna saṅgharaṁ; 
Paṭiyattaṁ ghare santaṁ, 
bhikkhusaṅghassa dehi tvaṁ’. 
Saṅghato uddisitvāna, 
bhikkhū netvāna saṅgharaṁ; 
Yaṁ ghare paṭiyattaṁ me, 
bhikkhusaṅghassadāsahaṁ. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Tattha me sukataṁ byamhaṁ, 
sovaṇṇaṁ sappabhassaraṁ; 
Saṭṭhiyojanamubbedhaṁ, 
tiṁsayojanavitthataṁ. 
Ekūnavīsatimaṁ bhāṇavāraṁ. 
Ākiṇṇaṁ bhavanaṁ mayhaṁ, 
nārīgaṇasamākulaṁ; 
Tattha bhutvā pivitvā ca, 
vasāmi tidase ahaṁ. 
Satānaṁ tīṇikkhattuñca, 
devarajjamakārayiṁ; 
Satānaṁ pañcakkhattuñca, 
cakkavattī ahosahaṁ; 
Padesarajjaṁ vipulaṁ, 
gaṇanāto asaṅkhiyaṁ. 
Bhavābhave saṁsaranto, 
labhāmi amitaṁ dhanaṁ; 
Bhoge me ūnatā natthi, 
navasassassidaṁ phalaṁ. 
Hatthiyānaṁ assayānaṁ, 
sivikaṁ sandamānikaṁ; 
Labhāmi sabbamevetaṁ, 
navasassassidaṁ phalaṁ. 
Navavatthaṁ navaphalaṁ, 
navaggarasabhojanaṁ; 
Labhāmi sabbamevetaṁ, 
navasassassidaṁ phalaṁ. 
Koseyyakambaliyāni, 
khomakappāsikāni ca; 
Labhāmi sabbamevetaṁ, 
navasassassidaṁ phalaṁ. 
Dāsīgaṇaṁ dāsagaṇaṁ, 
nāriyo ca alaṅkatā; 
Labhāmi sabbamevetaṁ, 
navasassassidaṁ phalaṁ. 
Na maṁ sītaṁ vā uṇhaṁ vā, 
pariḷāho na vijjati; 
Atho cetasikaṁ dukkhaṁ, 
hadaye me na vijjati. 
Idaṁ khāda idaṁ bhuñja, 
imamhi sayane saya; 
Labhāmi sabbamevetaṁ, 
navasassassidaṁ phalaṁ. 
Ayaṁ pacchimako dāni, 
carimo vattate bhavo; 
Ajjāpi deyyadhammo me, 
phalaṁ tosesi sabbadā. 
Navasassaṁ daditvāna, 
saṅghe gaṇavaruttame; 
Aṭṭhānisaṁse anubhomi, 
kammānucchavike mama. 
Vaṇṇavā yasavā homi, 
mahābhogo anītiko; 
Mahāpakkho sadā homi, 
abhejjapariso sadā. 
Sabbe maṁ apacāyanti, 
ye keci pathavissitā; 
Deyyadhammā ca ye keci, 
pure pure labhāmahaṁ. 
Bhikkhusaṅghassa vā majjhe, 
buddhaseṭṭhassa sammukhā; 
Sabbepi samatikkamma, 
denti mameva dāyakā. 
Paṭhamaṁ navasassañhi, 
datvā saṅghe gaṇuttame; 
Imānisaṁse anubhomi, 
navasassassidaṁ phalaṁ. 
Satasahassito kappe, 
yaṁ dānamadadiṁ tadā; 
Duggatiṁ nābhijānāmi, 
navasassassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sucintito thero imā gāthāyo abhāsitthāti. 
Sucintitattherassāpadānaṁ aṭṭhamaṁ. 

Therāpadāna 
Sakiṁsammajjakavagga 
9 Sovaṇṇakiṅkaṇiyattheraapadāna 
“Saddhāya abhinikkhamma, 
pabbajiṁ anagāriyaṁ; 
Vākacīradharo āsiṁ, 
tapokammamapassito. 
Atthadassī tu bhagavā, 
lokajeṭṭho narāsabho; 
Uppajji tamhi samaye, 
tārayanto mahājanaṁ. 
Balañca vata me khīṇaṁ, 
byādhinā paramena taṁ; 
Buddhaseṭṭhaṁ saritvāna, 
puline thūpamuttamaṁ. 
Karitvā haṭṭhacittohaṁ, 
sahatthena samokiriṁ; 
Soṇṇakiṅkaṇipupphāni, 
udaggamanaso ahaṁ. 
Sammukhā viya sambuddhaṁ, 
thūpaṁ paricariṁ ahaṁ; 
Tena cetopasādena, 
atthadassissa tādino. 
Devalokaṁ gato santo, 
labhāmi vipulaṁ sukhaṁ; 
Suvaṇṇavaṇṇo tatthāsiṁ, 
buddhapūjāyidaṁ phalaṁ. 
Asītikoṭiyo mayhaṁ, 
nāriyo samalaṅkatā; 
Sadā mayhaṁ upaṭṭhanti, 
buddhapūjāyidaṁ phalaṁ. 
Saṭṭhituriyasahassāni, 
bheriyo paṇavāni ca; 
Saṅkhā ca ḍiṇḍimā tattha, 
vaggū vajjanti dundubhī. 
Cullāsītisahassāni, 
hatthino samalaṅkatā; 
Tidhāpabhinnamātaṅgā, 
kuñjarā saṭṭhihāyanā. 
Hemajālābhisañchannā, 
upaṭṭhānaṁ karonti me; 
Balakāye gaje ceva, 
ūnatā me na vijjati. 
Soṇṇakiṅkaṇipupphānaṁ, 
vipākaṁ anubhomahaṁ; 
Aṭṭhapaññāsakkhattuñca, 
devarajjamakārayiṁ. 
Ekasattatikkhattuñca, 
cakkavattī ahosahaṁ; 
Pathabyā rajjaṁ ekasataṁ, 
mahiyā kārayiṁ ahaṁ. 
So dāni amataṁ patto, 
asaṅkhataṁ sududdasaṁ; 
Saṁyojanaparikkhīṇo, 
natthi dāni punabbhavo. 
Aṭṭhārase kappasate, 
yaṁ pupphamabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sovaṇṇakiṅkaṇiyo thero imā gāthāyo abhāsitthāti. 
Sovaṇṇakiṅkaṇiyattherassāpadānaṁ navamaṁ. 

Therāpadāna 
Sakiṁsammajjakavagga 
10 Soṇṇakontarikattheraapadāna 
“Manobhāvaniyaṁ buddhaṁ, 
attadantaṁ samāhitaṁ; 
Iriyamānaṁ brahmapathe, 
cittavūpasame rataṁ. 
Nittiṇṇaoghaṁ sambuddhaṁ, 
jhāyiṁ jhānarataṁ muniṁ; 
Upatitthaṁ samāpannaṁ, 
indivaradalappabhaṁ. 
Alābunodakaṁ gayha, 
buddhaseṭṭhaṁ upāgamiṁ; 
Buddhassa pāde dhovitvā, 
alābukamadāsahaṁ. 
Āṇāpesi ca sambuddho, 
padumuttaranāmako; 
‘Iminā dakamāhatvā, 
pādamūle ṭhapehi me’. 
Sādhūtihaṁ paṭissutvā, 
satthugāravatāya ca; 
Dakaṁ alābunāhatvā, 
buddhaseṭṭhaṁ upāgamiṁ. 
Anumodi mahāvīro, 
cittaṁ nibbāpayaṁ mama; 
‘Iminālābudānena, 
saṅkappo te samijjhatu’. 
Pannarasesu kappesu, 
devaloke ramiṁ ahaṁ; 
Tiṁsatikkhattuṁ rājā ca, 
cakkavattī ahosahaṁ. 
Divā vā yadi vā rattiṁ, 
caṅkamantassa tiṭṭhato; 
Sovaṇṇaṁ kontaraṁ gayha, 
tiṭṭhate purato mama. 
Buddhassa datvānalābuṁ, 
labhāmi soṇṇakontaraṁ; 
Appakampi kataṁ kāraṁ, 
vipulaṁ hoti tādisu. 
Satasahassito kappe, 
yaṁlābumadadiṁ tadā; 
Duggatiṁ nābhijānāmi, 
alābussa idaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā soṇṇakontariko thero imā gāthāyo abhāsitthāti. 
Soṇṇakontarikattherassāpadānaṁ dasamaṁ. 
Sakiṁsammajjakavaggo tecattālīsamo. 
Tassuddānaṁ 
Sakiṁsammajjako thero, 
ekadussī ekāsanī; 
Kadambakoraṇḍakado, 
ghatassavanikopi ca. 
Sucintiko kiṅkaṇiko, 
soṇṇakontarikopi ca; 
Ekagāthāsatañcettha, 
ekasattatimeva ca. 

Therāpadāna 
Ekavihārivagga 
1 Ekavihārikattheraapadāna 
“Imamhi bhaddake kappe, 
brahmabandhu mahāyaso; 
Kassapo nāma gottena, 
uppajji vadataṁ varo. 
Nippapañco nirālambo, 
ākāsasamamānaso; 
Suññatābahulo tādī, 
animittarato vasī. 
Asaṅgacitto nikleso, 
asaṁsaṭṭho kule gaṇe; 
Mahākāruṇiko vīro, 
vinayopāyakovido. 
Uyyutto parakiccesu, 
vinayanto sadevake; 
Nibbānagamanaṁ maggaṁ, 
gatiṁ paṅkavisosanaṁ. 
Amataṁ paramassādaṁ, 
jarāmaccunivāraṇaṁ; 
Mahāparisamajjhe so, 
nisinno lokatārako. 
Karavīkaruto nātho, 
brahmaghoso tathāgato; 
Uddharanto mahāduggā, 
vippanaṭṭhe anāyake. 
Desento virajaṁ dhammaṁ, 
diṭṭho me lokanāyako; 
Tassa dhammaṁ suṇitvāna, 
pabbajiṁ anagāriyaṁ. 
Pabbajitvā tadāpāhaṁ, 
cintento jinasāsanaṁ; 
Ekakova vane ramme, 
vasiṁ saṁsaggapīḷito. 
Sakkāyavūpakāso me, 
hetubhūto mamābhavī; 
Manaso vūpakāsassa, 
saṁsaggabhayadassino. 
Kilesā jhāpitā mayhaṁ, 
bhavā sabbe samūhatā; 
Nāgova bandhanaṁ chetvā, 
viharāmi anāsavo. 
Svāgataṁ vata me āsi, 
mama buddhassa santike; 
Tisso vijjā anuppattā, 
kataṁ buddhassa sāsanaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā ekavihāriko thero imā gāthāyo abhāsitthāti. 
Ekavihārikattherassāpadānaṁ paṭhamaṁ. 

Therāpadāna 
Ekavihārivagga 
Ekasaṅkhiyattheraapadāna 
“Vipassino bhagavato, 
mahābodhimaho ahu; 
Mahājanā samāgamma, 
pūjenti bodhimuttamaṁ. 
Na hi taṁ orakaṁ maññe, 
buddhaseṭṭho bhavissati; 
Yassāyaṁ īdisā bodhi, 
pūjanīyā ca satthuno. 
Tato saṅkhaṁ gahetvāna, 
bodhirukkhamupaṭṭhahiṁ; 
Dhamanto sabbadivasaṁ, 
avandiṁ bodhimuttamaṁ. 
Āsannake kataṁ kammaṁ, 
devalokaṁ apāpayī; 
Kaḷevaraṁ me patitaṁ, 
devaloke ramāmahaṁ. 
Saṭṭhituriyasahassāni, 
tuṭṭhahaṭṭhā pamoditā; 
Sadā mayhaṁ upaṭṭhanti, 
buddhapūjāyidaṁ phalaṁ. 
Ekasattatime kappe, 
rājā āsiṁ sudassano; 
Cāturanto vijitāvī, 
jambumaṇḍassa issaro. 
Tato aṅgasatā turiyā, 
parivārenti maṁ sadā; 
Anubhomi sakaṁ kammaṁ, 
upaṭṭhānassidaṁ phalaṁ. 
Yaṁ yaṁ yonupapajjāmi, 
devattaṁ atha mānusaṁ; 
Mātukucchigatassāpi, 
vajjare bheriyo sadā. 
Upaṭṭhitvāna sambuddhaṁ, 
anubhutvāna sampadā; 
Sivaṁ sukhemaṁ amataṁ, 
pattomhi acalaṁ padaṁ. 
Ekanavutito kappe, 
yaṁ kammamakariṁ tadā; 
Duggatiṁ nābhijānāmi, 
buddhapūjāyidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ekasaṅkhiyo thero imā gāthāyo abhāsitthāti. 
Ekasaṅkhiyattherassāpadānaṁ dutiyaṁ. 

Therāpadāna 
Ekavihārivagga 
3 Pāṭihīrasaññakattheraapadāna 
“Padumuttaro nāma jino, 
āhutīnaṁ paṭiggaho; 
Vasīsatasahassehi, 
nagaraṁ pāvisī tadā. 
Nagaraṁ pavisantassa, 
upasantassa tādino; 
Ratanāni pajjotiṁsu, 
nigghoso āsi tāvade. 
Buddhassa ānubhāvena, 
bherī vajjumaghaṭṭitā; 
Sayaṁ vīṇā pavajjanti, 
buddhassa pavisato puraṁ. 
Buddhaseṭṭhaṁ namassāmi, 
padumuttaramahāmuniṁ; 
Pāṭihīrañca passitvā, 
tattha cittaṁ pasādayiṁ. 
Aho buddhā aho dhammā, 
aho no satthusampadā; 
Acetanāpi turiyā, 
sayameva pavajjare. 
Satasahassito kappe, 
yaṁ saññamalabhiṁ tadā; 
Duggatiṁ nābhijānāmi, 
buddhasaññāyidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā pāṭihīrasaññako thero imā gāthāyo abhāsitthāti. 
Pāṭihīrasaññakattherassāpadānaṁ tatiyaṁ. 

Therāpadāna 
Ekavihārivagga 
Ñāṇatthavikattheraapadāna 
“Kaṇikāraṁva jalitaṁ, 
dīparukkhaṁva jotitaṁ; 
Kañcanaṁva virocantaṁ, 
addasaṁ dvipaduttamaṁ. 
Kamaṇḍaluṁ ṭhapetvāna, 
vākacīrañca kuṇḍikaṁ; 
Ekaṁsaṁ ajinaṁ katvā, 
buddhaseṭṭhaṁ thaviṁ ahaṁ. 
‘Tamandhakāraṁ vidhamaṁ, 
mohajālasamākulaṁ; 
Ñāṇālokaṁ dassetvāna, 
nittiṇṇosi mahāmuni. 
Samuddharasimaṁ lokaṁ, 
sabbāvantamanuttaraṁ; 
Ñāṇe te upamā natthi, 
yāvatājagatogati. 
Tena ñāṇena sabbaññū, 
iti buddho pavuccati; 
Vandāmi taṁ mahāvīraṁ, 
sabbaññutamanāvaraṁ’. 
Satasahassito kappe, 
buddhaseṭṭhaṁ thaviṁ ahaṁ; 
Duggatiṁ nābhijānāmi, 
ñāṇatthavāyidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ñāṇatthaviko thero imā gāthāyo abhāsitthāti. 
Ñāṇatthavikattherassāpadānaṁ catutthaṁ. 

Therāpadāna 
Ekavihārivagga 
Ucchukhaṇḍikattheraapadāna 
“Nagare bandhumatiyā, 
dvārapālo ahosahaṁ; 
Addasaṁ virajaṁ buddhaṁ, 
sabbadhammāna pāraguṁ. 
Ucchukhaṇḍikamādāya, 
buddhaseṭṭhassadāsahaṁ; 
Pasannacitto sumano, 
vipassissa mahesino. 
Ekanavutito kappe, 
yaṁ ucchumadadiṁ tadā; 
Duggatiṁ nābhijānāmi, 
ucchukhaṇḍassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ucchukhaṇḍiko thero imā gāthāyo abhāsitthāti. 
Ucchukhaṇḍikattherassāpadānaṁ pañcamaṁ. 

Therāpadāna 
Ekavihārivagga 
6 Kaḷambadāyakattheraapadāna 
“Romaso nāma sambuddho, 
vasate pabbatantare; 
Kaḷambaṁ tassa pādāsiṁ, 
pasanno sehi pāṇibhi. 
Catunnavutito kappe, 
yaṁ dānamadadiṁ tadā; 
Duggatiṁ nābhijānāmi, 
kaḷambassa idaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā kaḷambadāyako thero imā gāthāyo abhāsitthāti. 
Kaḷambadāyakattherassāpadānaṁ chaṭṭhaṁ. 

Therāpadāna 
Ekavihārivagga 
Ambāṭakadāyakattheraapadāna 
“Vipine buddhaṁ disvāna, 
sayambhuṁ aparājitaṁ; 
Ambāṭakaṁ gahetvāna, 
sayambhussa adāsahaṁ. 
Ekatiṁse ito kappe, 
yaṁ phalamadadiṁ tadā; 
Duggatiṁ nābhijānāmi, 
phaladānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ambāṭakadāyako thero imā gāthāyo abhāsitthāti. 
Ambāṭakadāyakattherassāpadānaṁ sattamaṁ. 

Therāpadāna 
Upālivagga 
1 Bhāgineyyupālittheraapadāna 
“Khīṇāsavasahassehi, 
parivuto lokanāyako; 
Vivekamanuyutto so, 
gacchate paṭisallituṁ. 
Ajinena nivatthohaṁ, 
tidaṇḍaparidhārako; 
Bhikkhusaṅghaparibyūḷhaṁ, 
addasaṁ lokanāyakaṁ. 
Ekaṁsaṁ ajinaṁ katvā, 
sire katvāna añjaliṁ; 
Sambuddhaṁ abhivādetvā, 
santhaviṁ lokanāyakaṁ. 
Yathāṇḍajā ca saṁsedā, 
opapātī jalābujā; 
Kākādipakkhino sabbe, 
antalikkhacarā sadā. 
‘Ye keci pāṇabhūtatthi, 
saññino vā asaññino; 
Sabbe te tava ñāṇamhi, 
anto honti samogadhā. 
Gandhā ca pabbateyyā ye, 
himavantanaguttame; 
Sabbe te tava sīlamhi, 
kalāyapi na yujjare. 
Mohandhakārapakkhando, 
ayaṁ loko sadevako; 
Tava ñāṇamhi jotante, 
andhakārā vidhaṁsitā. 
Yathā atthaṅgate sūriye, 
honti sattā tamogatā; 
Evaṁ buddhe anuppanne, 
hoti loko tamogato. 
Yathodayanto ādicco, 
vinodeti tamaṁ sadā; 
Tatheva tvaṁ buddhaseṭṭha, 
viddhaṁsesi tamaṁ sadā. 
Padhānapahitattosi, 
buddho loke sadevake; 
Tava kammābhiraddhena, 
tosesi janataṁ bahuṁ’. 
Taṁ sabbaṁ anumoditvā, 
padumuttaro mahāmuni; 
Nabhaṁ abbhuggamī dhīro, 
haṁsarājāva ambare. 
Abbhuggantvāna sambuddho, 
mahesi padumuttaro; 
Antalikkhe ṭhito satthā, 
imā gāthā abhāsatha. 
Yenidaṁ thavitaṁ ñāṇaṁ, 
opammehi samāyutaṁ; 
Tamahaṁ kittayissāmi, 
suṇātha mama bhāsato. 
‘Aṭṭhārasañca khattuṁ so, 
devarājā bhavissati; 
Pathabyā rajjaṁ tisataṁ, 
vasudhaṁ āvasissati. 
Pañcavīsatikkhattuñca, 
cakkavattī bhavissati; 
Padesarajjaṁ vipulaṁ, 
gaṇanāto asaṅkhiyaṁ. 
Kappasatasahassamhi, 
okkākakulasambhavo; 
Gotamo nāma gottena, 
satthā loke bhavissati. 
Tusitā hi cavitvāna, 
sukkamūlena codito; 
Hīnova jātiyā santo, 
upāli nāma hessati. 
So pacchā pabbajitvāna, 
virājetvāna pāpakaṁ; 
Sabbāsave pariññāya, 
nibbāyissatināsavo. 
Tuṭṭho ca gotamo buddho, 
sakyaputto mahāyaso; 
Vinayādhigataṁ tassa, 
etadagge ṭhapessati’. 
Saddhāyāhaṁ pabbajito, 
katakicco anāsavo; 
Sabbāsave pariññāya, 
viharāmi anāsavo. 
Bhagavā cānukampī maṁ, 
vinayehaṁ visārado; 
Sakakammābhiraddho ca, 
viharāmi anāsavo. 
Saṁvuto pātimokkhamhi, 
indriyesu ca pañcasu; 
Dhāremi vinayaṁ sabbaṁ, 
kevalaṁ ratanākaraṁ. 
Mamañca guṇamaññāya, 
satthā loke anuttaro; 
Bhikkhusaṅghe nisīditvā, 
etadagge ṭhapesi maṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā upāli thero imā gāthāyo abhāsitthāti. 
Bhāgineyyupālittherassāpadānaṁ paṭhamaṁ. 

Therāpadāna 
Ekavihārivagga 
Harītakadāyakattheraapadāna 
“Harītakaṁ āmalakaṁ, 
ambajambuvibhītakaṁ; 
Kolaṁ bhallātakaṁ billaṁ, 
sayameva harāmahaṁ. 
Disvāna pabbhāragataṁ, 
jhāyiṁ jhānarataṁ muniṁ; 
Ābādhena āpīḷentaṁ, 
adutīyaṁ mahāmuniṁ. 
Harītakaṁ gahetvāna, 
sayambhussa adāsahaṁ; 
Khādamattamhi bhesajje, 
byādhi passambhi tāvade. 
Pahīnadaratho buddho, 
anumodamakāsi me; 
‘Bhesajjadāneniminā, 
byādhivūpasamena ca. 
Devabhūto manusso vā, 
jāto vā aññajātiyā; 
Sabbattha sukhito hotu, 
mā ca te byādhimāgamā’. 
Idaṁ vatvāna sambuddho, 
sayambhū aparājito; 
Nabhaṁ abbhuggamī dhīro, 
haṁsarājāva ambare. 
Yato harītakaṁ dinnaṁ, 
sayambhussa mahesino; 
Imaṁ jātiṁ upādāya, 
byādhi me nupapajjatha. 
Ayaṁ pacchimako mayhaṁ, 
carimo vattate bhavo; 
Tisso vijjā sacchikatā, 
kataṁ buddhassa sāsanaṁ. 
Catunnavutito kappe, 
bhesajjamadadiṁ tadā; 
Duggatiṁ nābhijānāmi, 
bhesajjassa idaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā harītakadāyako thero imā gāthāyo abhāsitthāti. 
Harītakadāyakattherassāpadānaṁ aṭṭhamaṁ. 

Therāpadāna 
Ekavihārivagga 
Ambapiṇḍiyattheraapadāna 
“Hatthirājā tadā āsiṁ, 
īsādanto uruḷhavā; 
Vicaranto brahāraññe, 
addasaṁ lokanāyakaṁ. 
Ambapiṇḍaṁ gahetvāna, 
adāsiṁ satthuno ahaṁ; 
Paṭiggaṇhi mahāvīro, 
siddhattho lokanāyako. 
Mama nijjhāyamānassa, 
paribhuñji tadā jino; 
Tattha cittaṁ pasādetvā, 
tusitaṁ upapajjahaṁ. 
Tato ahaṁ cavitvāna, 
cakkavattī ahosahaṁ; 
Eteneva upāyena, 
anubhutvāna sampadā. 
Padhānapahitattohaṁ, 
upasanto nirūpadhi; 
Sabbāsave pariññāya, 
viharāmi anāsavo. 
Catunnavutito kappe, 
yaṁ phalamadadiṁ tadā; 
Duggatiṁ nābhijānāmi, 
phaladānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ambapiṇḍiyo thero imā gāthāyo abhāsitthāti. 
Ambapiṇḍiyattherassāpadānaṁ navamaṁ. 

Therāpadāna 
Ekavihārivagga 
10 Ambaphaliyattheraapadāna 
“Padumuttarabuddhassa, 
lokajeṭṭhassa tādino; 
Piṇḍāya vicarantassa, 
dhārato uttamaṁ yasaṁ. 
Aggaphalaṁ gahetvāna, 
vippasannena cetasā; 
Dakkhiṇeyyassa vīrassa, 
adāsiṁ satthuno ahaṁ. 
Tena kammena dvipadinda, 
lokajeṭṭha narāsabha; 
Pattomhi acalaṁ ṭhānaṁ, 
hitvā jayaparājayaṁ. 
Satasahassito kappe, 
yaṁ dānamadadiṁ tadā; 
Duggatiṁ nābhijānāmi, 
aggadānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ambaphaliyo thero imā gāthāyo abhāsitthāti. 
Ambaphaliyattherassāpadānaṁ dasamaṁ. 
Ekavihārivaggo catucattālīsamo. 
Tassuddānaṁ 
Thero ekavihārī ca, 
saṅkhiyo pāṭihīrako; 
Thaviko ucchukhaṇḍī ca, 
kaḷambaambāṭakado. 
Harītakambapiṇḍī ca, 
ambado dasamo yati; 
Chaḷasīti ca gāthāyo, 
gaṇitāyo vibhāvibhi. 

Therāpadāna 
Vibhītakavagga 
1 Vibhītakamiñjiyattheraapadāna 
“Kakusandho mahāvīro, 
sabbadhammāna pāragū; 
Gaṇamhā vūpakaṭṭho so, 
agamāsi vanantaraṁ. 
Bījamiñjaṁ gahetvāna, 
latāya āvuṇiṁ ahaṁ; 
Bhagavā tamhi samaye, 
jhāyate pabbatantare. 
Disvānahaṁ devadevaṁ, 
vippasannena cetasā; 
Dakkhiṇeyyassa vīrassa, 
bījamiñjamadāsahaṁ. 
Imasmiṁyeva kappamhi, 
yaṁ miñjamadadiṁ tadā; 
Duggatiṁ nābhijānāmi, 
bījamiñjassidaṁ phalaṁ. 
Kilesā jhāpitā mayhaṁ, 
bhavā sabbe samūhatā; 
Nāgova bandhanaṁ chetvā, 
viharāmi anāsavo. 
Svāgataṁ vata me āsi, 
mama buddhassa santike; 
Tisso vijjā anuppattā, 
kataṁ buddhassa sāsanaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā vibhītakamiñjiyo thero imā gāthāyo abhāsitthāti. 
Vibhītakamiñjiyattherassāpadānaṁ paṭhamaṁ. 

Therāpadāna 
Vibhītakavagga 
Koladāyakattheraapadāna 
“Ajinena nivatthohaṁ, 
Vākacīradharo tadā; 
Khāriyā pūrayitvāna, 
Kolaṁhāsiṁ mamassamaṁ. 
Tamhi kāle sikhī buddho, 
eko adutiyo ahu; 
Mamassamaṁ upāgacchi, 
jānanto sabbakālikaṁ. 
Sakaṁ cittaṁ pasādetvā, 
vanditvāna ca subbataṁ; 
Ubho hatthehi paggayha, 
kolaṁ buddhassadāsahaṁ. 
Ekatiṁse ito kappe, 
yaṁ phalamadadiṁ tadā; 
Duggatiṁ nābhijānāmi, 
koladānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā koladāyako thero imā gāthāyo abhāsitthāti. 
Koladāyakattherassāpadānaṁ dutiyaṁ. 

Therāpadāna 
Vibhītakavagga 
3 Billiyattheraapadāna 
“Candabhāgānadītīre, 
assamo sukato mama; 
Billarukkhehi ākiṇṇo, 
nānādumanisevito. 
Sugandhaṁ beluvaṁ disvā, 
buddhaseṭṭhamanussariṁ; 
Khāribhāraṁ pūrayitvā, 
tuṭṭho saṁviggamānaso. 
Kakusandhaṁ upāgamma, 
billapakkamadāsahaṁ; 
Puññakkhettassa vīrassa, 
vippasannena cetasā. 
Imasmiṁyeva kappasmiṁ, 
yaṁ phalamadadiṁ tadā; 
Duggatiṁ nābhijānāmi, 
phaladānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā billiyo thero imā gāthāyo abhāsitthāti. 
Billiyattherassāpadānaṁ tatiyaṁ. 

Therāpadāna 
Vibhītakavagga 
4 Bhallātadāyakattheraapadāna 
“Suvaṇṇavaṇṇaṁ sambuddhaṁ, 
Dvattiṁsavaralakkhaṇaṁ; 
Vipinaggena gacchantaṁ, 
Sālarājaṁva phullitaṁ. 
Tiṇattharaṁ paññāpetvā, 
buddhaseṭṭhaṁ ayācahaṁ; 
‘Anukampatu maṁ buddho, 
bhikkhaṁ icchāmi dātave’. 
Anukampako kāruṇiko, 
atthadassī mahāyaso; 
Mama saṅkappamaññāya, 
orūhi mama assame. 
Orohitvāna sambuddho, 
nisīdi paṇṇasanthare; 
Bhallātakaṁ gahetvāna, 
buddhaseṭṭhassadāsahaṁ. 
Mama nijjhāyamānassa, 
paribhuñji tadā jino; 
Tattha cittaṁ pasādetvā, 
abhivandiṁ tadā jinaṁ. 
Aṭṭhārase kappasate, 
yaṁ phalamadadiṁ tadā; 
Duggatiṁ nābhijānāmi, 
phaladānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā bhallātadāyako thero imā gāthāyo abhāsitthāti. 
Bhallātadāyakattherassāpadānaṁ catutthaṁ. 

Therāpadāna 
Vibhītakavagga 
5 Uttalipupphiyattheraapadāna 
“Nigrodhe haritobhāse, 
saṁviruḷhamhi pādape; 
Uttalimālaṁ paggayha, 
bodhiyā abhiropayiṁ. 
Imasmiṁyeva kappamhi, 
yaṁ bodhimabhipūjayiṁ; 
Duggatiṁ nābhijānāmi, 
bodhipūjāyidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā uttalipupphiyo thero imā gāthāyo abhāsitthāti. 
Uttalipupphiyattherassāpadānaṁ pañcamaṁ. 

Therāpadāna 
Vibhītakavagga 
Ambāṭakiyattheraapadāna 
“Supupphitaṁ sālavanaṁ, 
ogayha vessabhū muni; 
Nisīdi giriduggesu, 
abhijātova kesarī. 
Pasannacitto sumano, 
ambāṭakamapūjayiṁ; 
Puññakkhettaṁ anuttaraṁ, 
pasanno sehi pāṇibhi. 
Ekatiṁse ito kappe, 
yaṁ pupphamabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ambāṭakiyo thero imā gāthāyo abhāsitthāti. 
Ambāṭakiyattherassāpadānaṁ chaṭṭhaṁ. 

Therāpadāna 
Vibhītakavagga 
Sīhāsanikattheraapadāna 
“Padumuttarassa bhagavato, 
Sabbabhūtahitesino; 
Pasannacitto sumano, 
Sīhāsanamadāsahaṁ. 
Devaloke manusse vā, 
yattha yattha vasāmahaṁ; 
Labhāmi vipulaṁ byamhaṁ, 
sīhāsanassidaṁ phalaṁ. 
Soṇṇamayā rūpimayā, 
lohitaṅgamayā bahū; 
Maṇimayā ca pallaṅkā, 
nibbattanti mamaṁ sadā. 
Bodhiyā āsanaṁ katvā, 
jalajuttamanāmino; 
Ucce kule pajāyāmi, 
aho dhammasudhammatā. 
Satasahassito kappe, 
sīhāsanamakāsahaṁ; 
Duggatiṁ nābhijānāmi, 
sīhāsanassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sīhāsaniko thero imā gāthāyo abhāsitthāti. 
Sīhāsanikattherassāpadānaṁ sattamaṁ. 

Therāpadāna 
Upālivagga 
2 Soṇakoḷivisattheraapadāna 
“Anomadassissa munino, 
lokajeṭṭhassa tādino; 
Sudhāya lepanaṁ katvā, 
caṅkamaṁ kārayiṁ ahaṁ. 
Nānāvaṇṇehi pupphehi, 
caṅkamaṁ santhariṁ ahaṁ; 
Ākāse vitānaṁ katvā, 
bhojayiṁ buddhamuttamaṁ. 
Añjaliṁ paggahetvāna, 
abhivādetvāna subbataṁ; 
Dīghasālaṁ bhagavato, 
niyyādesimahaṁ tadā. 
Mama saṅkappamaññāya, 
satthā loke anuttaro; 
Paṭiggahesi bhagavā, 
anukampāya cakkhumā. 
Paṭiggahetvāna sambuddho, 
dakkhiṇeyyo sadevake; 
Bhikkhusaṅghe nisīditvā, 
imā gāthā abhāsatha. 
‘Yo so haṭṭhena cittena, 
dīghasālaṁ adāsi me; 
Tamahaṁ kittayissāmi, 
suṇātha mama bhāsato. 
Imassa maccukālamhi, 
puññakammasamaṅgino; 
Sahassayuttassaratho, 
upaṭṭhissati tāvade. 
Tena yānenayaṁ poso, 
devalokaṁ gamissati; 
Anumodissare devā, 
sampatte kusalabbhave. 
Mahārahaṁ byamhaṁ seṭṭhaṁ, 
ratanamattikalepanaṁ; 
Kūṭāgāravarūpetaṁ, 
byamhaṁ ajjhāvasissati. 
Tiṁsakappasahassāni, 
devaloke ramissati; 
Pañcavīsati kappāni, 
devarājā bhavissati. 
Sattasattatikkhattuñca, 
cakkavattī bhavissati; 
Yasodharasanāmā te, 
sabbepi ekanāmakā. 
Dve sampattī anubhotvā, 
Vaḍḍhetvā puññasañcayaṁ; 
Aṭṭhavīsatikappamhi, 
Cakkavattī bhavissati. 
Tatrāpi byamhaṁ pavaraṁ, 
vissakammena māpitaṁ; 
Dasasaddāvivittaṁ taṁ, 
puramajjhāvasissati. 
Aparimeyye ito kappe, 
bhūmipālo mahiddhiko; 
Okkāko nāma nāmena, 
rājā raṭṭhe bhavissati. 
Soḷasitthisahassānaṁ, 
sabbāsaṁ pavarā ca sā; 
Abhijātā khattiyānī, 
nava putte janessati. 
Nava putte janetvāna, 
khattiyānī marissati; 
Taruṇī ca piyā kaññā, 
mahesittaṁ karissati. 
Okkākaṁ tosayitvāna, 
varaṁ kaññā labhissati; 
Varaṁ laddhāna sā kaññā, 
putte pabbājayissati. 
Pabbājitā ca te sabbe, 
gamissanti naguttamaṁ; 
Jātibhedabhayā sabbe, 
bhaginīhi vasissare. 
Ekā ca kaññā byādhīhi, 
bhavissati parikkhatā; 
Mā no jāti pabhijjīti, 
nikhaṇissanti khattiyā. 
Khattiyo nīharitvāna, 
tāya saddhiṁ vasissati; 
Bhavissati tadā bhedo, 
okkākakulasambhavo. 
Tesaṁ pajā bhavissanti, 
koḷiyā nāma jātiyā; 
Tattha mānusakaṁ bhogaṁ, 
anubhossatinappakaṁ. 
Tamhā kāyā cavitvāna, 
devalokaṁ gamissati; 
Tatrāpi pavaraṁ byamhaṁ, 
labhissati manoramaṁ. 
Devalokā cavitvāna, 
sukkamūlena codito; 
Āgantvāna manussattaṁ, 
soṇo nāma bhavissati. 
Āraddhavīriyo pahitatto, 
Padahaṁ satthu sāsane; 
Sabbāsave pariññāya, 
Nibbāyissatināsavo. 
Anantadassī bhagavā, 
gotamo sakyapuṅgavo; 
Visesaññū mahāvīro, 
aggaṭṭhāne ṭhapessati’. 
Vuṭṭhamhi deve caturaṅgulamhi, 
Tiṇe anileritaaṅgaṇamhi; 
Ṭhatvāna yogassa payuttatādino, 
Tatottariṁ pāramatā na vijjati. 
Uttame damathe danto, 
cittaṁ me supaṇīhitaṁ; 
Bhāro me ohito sabbo, 
nibbutomhi anāsavo. 
Aṅgīraso mahānāgo, 
abhijātova kesarī; 
Bhikkhusaṅghe nisīditvā, 
etadagge ṭhapesi maṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā soṇo koḷiviso thero imā gāthāyo abhāsitthāti. 
Soṇakoḷivisattherassāpadānaṁ dutiyaṁ. 

Therāpadāna 
Vibhītakavagga 
Pādapīṭhiyattheraapadāna 
“Sumedho nāma sambuddho, 
aggo kāruṇiko muni; 
Tārayitvā bahū satte, 
nibbuto so mahāyaso. 
Sīhāsanassa sāmantā, 
sumedhassa mahesino; 
Pasannacitto sumano, 
pādapīṭhamakārayiṁ. 
Katvāna kusalaṁ kammaṁ, 
sukhapākaṁ sukhudrayaṁ; 
Puññakammena saṁyutto, 
tāvatiṁsamagacchahaṁ. 
Tattha me vasamānassa, 
puññakammasamaṅgino; 
Padāni uddharantassa, 
soṇṇapīṭhā bhavanti me. 
Lābhā tesaṁ suladdhaṁ vo, 
ye labhanti upassutiṁ; 
Nibbute kāraṁ katvāna, 
labhanti vipulaṁ sukhaṁ. 
Mayāpi sukataṁ kammaṁ, 
vāṇijjaṁ suppayojitaṁ; 
Pādapīṭhaṁ karitvāna, 
soṇṇapīṭhaṁ labhāmahaṁ. 
Yaṁ yaṁ disaṁ pakkamāmi, 
kenaci kiccayenahaṁ; 
Soṇṇapīṭhe akkamāmi, 
puññakammassidaṁ phalaṁ. 
Tiṁsakappasahassamhi, 
yaṁ kammamakariṁ tadā; 
Duggatiṁ nābhijānāmi, 
pādapīṭhassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā pādapīṭhiyo thero imā gāthāyo abhāsitthāti. 
Pādapīṭhiyattherassāpadānaṁ aṭṭhamaṁ. 

Therāpadāna 
Vibhītakavagga 
9 Vedikārakattheraapadāna 
“Padumuttarassa bhagavato, 
Bodhiyā pādaputtame; 
Vedikaṁ sukataṁ katvā, 
Sakaṁ cittaṁ pasādayiṁ. 
Atoḷārāni bhaṇḍāni, 
katāni akatāni ca; 
Antalikkhā pavassanti, 
vedikāya idaṁ phalaṁ. 
Ubhato byūḷhasaṅgāme, 
pakkhandanto bhayānake; 
Bhayabheravaṁ na passāmi, 
vedikāya idaṁ phalaṁ. 
Mama saṅkappamaññāya, 
byamhaṁ nibbattate subhaṁ; 
Sayanāni mahagghāni, 
vedikāya idaṁ phalaṁ. 
Satasahassito kappe, 
yaṁ vedikamakārayiṁ; 
Duggatiṁ nābhijānāmi, 
vedikāya idaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā vedikārako thero imā gāthāyo abhāsitthāti. 
Vedikārakattherassāpadānaṁ navamaṁ. 

Therāpadāna 
Vibhītakavagga 
10 Bodhigharadāyakattheraapadāna 
“Siddhatthassa bhagavato, 
dvipadindassa tādino; 
Pasannacitto sumano, 
bodhigharamakārayiṁ. 
Tusitaṁ upapannomhi, 
vasāmi ratane ghare; 
Na me sītaṁ vā uṇhaṁ vā, 
vāto gatte na samphuse. 
Pañcasaṭṭhimhito kappe, 
cakkavattī ahosahaṁ; 
Kāsikaṁ nāma nagaraṁ, 
vissakammena māpitaṁ. 
Dasayojanaāyāmaṁ, 
aṭṭhayojanavitthataṁ; 
Na tamhi nagare atthi, 
kaṭṭhaṁ vallī ca mattikā. 
Tiriyaṁ yojanaṁ āsi, 
addhayojanavitthataṁ; 
Maṅgalo nāma pāsādo, 
vissakammena māpito. 
Cullāsītisahassāni, 
thambhā soṇṇamayā ahuṁ; 
Maṇimayā ca niyyūhā, 
chadanaṁ rūpiyaṁ ahu. 
Sabbasoṇṇamayaṁ gharaṁ, 
vissakammena māpitaṁ; 
Ajjhāvutthaṁ mayā etaṁ, 
gharadānassidaṁ phalaṁ. 
Te sabbe anubhotvāna, 
devamānusake bhave; 
Ajjhapattomhi nibbānaṁ, 
santipadamanuttaraṁ. 
Tiṁsakappasahassamhi, 
bodhigharamakārayiṁ; 
Duggatiṁ nābhijānāmi, 
gharadānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā bodhigharadāyako thero imā gāthāyo abhāsitthāti. 
Bodhigharadāyakattherassāpadānaṁ dasamaṁ. 
Vibhītakavaggo pañcacattālīsamo. 
Tassuddānaṁ 
Vibhītakī kolaphalī, 
billabhallātakappado; 
Uttalambaṭakī ceva, 
āsanī pādapīṭhako. 
Vediko bodhighariko, 
gāthāyo gaṇitāpi ca; 
Ekūnāsītikā sabbā, 
asmiṁ vagge pakittitā. 

Therāpadāna 
Jagatidāyakavagga 
Jagatidāyakattheraapadāna 
“Dhammadassissa munino, 
bodhiyā pādaputtame; 
Pasannacitto sumano, 
jagatiṁ kārayiṁ ahaṁ. 
Darito pabbatato vā, 
rukkhato patito ahaṁ; 
Cuto patiṭṭhaṁ vindāmi, 
jagatiyā idaṁ phalaṁ. 
Na me corā vihesanti, 
nātimaññanti khattiyā; 
Sabbāmittetikkamāmi, 
jagatiyā idaṁ phalaṁ. 
Yaṁ yaṁ yonupapajjāmi, 
devattaṁ atha mānusaṁ; 
Sabbattha pūjito homi, 
jagatiyā idaṁ phalaṁ. 
Aṭṭhārase kappasate, 
jagatiṁ kārayiṁ ahaṁ; 
Duggatiṁ nābhijānāmi, 
jagatidānassidaṁ phalaṁ. 
Kilesā jhāpitā mayhaṁ, 
bhavā sabbe samūhatā; 
Nāgova bandhanaṁ chetvā, 
viharāmi anāsavo. 
Svāgataṁ vata me āsi, 
mama buddhassa santike; 
Tisso vijjā anuppattā, 
kataṁ buddhassa sāsanaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā jagatidāyako thero imā gāthāyo abhāsitthāti. 
Jagatidāyakattherassāpadānaṁ paṭhamaṁ. 

Therāpadāna 
Jagatidāyakavagga 
Morahatthiyattheraapadāna 
“Morahatthaṁ gahetvāna, 
upesiṁ lokanāyakaṁ; 
Pasannacitto sumano, 
morahatthamadāsahaṁ. 
Iminā morahatthena, 
cetanāpaṇidhīhi ca; 
Nibbāyiṁsu tayo aggī, 
labhāmi vipulaṁ sukhaṁ. 
Aho buddhā aho dhammā, 
aho no satthusampadā; 
Datvānahaṁ morahatthaṁ, 
labhāmi vipulaṁ sukhaṁ. 
Tiyaggī nibbutā mayhaṁ, 
bhavā sabbe samūhatā; 
Sabbāsavā parikkhīṇā, 
natthi dāni punabbhavo. 
Ekatiṁse ito kappe, 
yaṁ dānamadadiṁ tadā; 
Duggatiṁ nābhijānāmi, 
morahatthassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā morahatthiyo thero imā gāthāyo abhāsitthāti. 
Morahatthiyattherassāpadānaṁ dutiyaṁ. 

Therāpadāna 
Jagatidāyakavagga 
3 Sīhāsanabījiyattheraapadāna 
“Tissassāhaṁ bhagavato, 
bodhirukkhamavandiyaṁ; 
Paggayha bījaniṁ tattha, 
sīhāsanamabījahaṁ. 
Dvenavute ito kappe, 
sīhāsanamabījahaṁ; 
Duggatiṁ nābhijānāmi, 
bījanāya idaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sīhāsanabījiyo thero imā gāthāyo abhāsitthāti. 
Sīhāsanabījiyattherassāpadānaṁ tatiyaṁ. 

Therāpadāna 
Jagatidāyakavagga 
4 Tiṇukkadhāriyattheraapadāna 
“Padumuttarabuddhassa, 
bodhiyā pādaputtame; 
Pasannacitto sumano, 
tayo ukke adhārayiṁ. 
Satasahassito kappe, 
sohaṁ ukkamadhārayiṁ; 
Duggatiṁ nābhijānāmi, 
ukkadānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā tiṇukkadhāriyo thero imā gāthāyo abhāsitthāti. 
Tiṇukkadhāriyattherassāpadānaṁ catutthaṁ. 

Therāpadāna 
Jagatidāyakavagga 
Akkamanadāyakattheraapadāna 
“Kakusandhassa munino, 
brāhmaṇassa vusīmato; 
Divāvihāraṁ vajato, 
akkamanamadāsahaṁ. 
Imasmiṁyeva kappamhi, 
yaṁ dānamadadiṁ tadā; 
Duggatiṁ nābhijānāmi, 
akkamanassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā akkamanadāyako thero imā gāthāyo abhāsitthāti. 
Akkamanadāyakattherassāpadānaṁ pañcamaṁ. 

Therāpadāna 
Jagatidāyakavagga 
Vanakoraṇḍiyattheraapadāna 
“Siddhatthassa bhagavato, 
lokajeṭṭhassa tādino; 
Vanakoraṇḍamādāya, 
buddhassa abhiropayiṁ. 
Catunnavutito kappe, 
yaṁ pupphamabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā vanakoraṇḍiyo thero imā gāthāyo abhāsitthāti. 
Vanakoraṇḍiyattherassāpadānaṁ chaṭṭhaṁ. 
Vīsatimaṁ bhāṇavāraṁ. 

Therāpadāna 
Jagatidāyakavagga 
Ekachattiyattheraapadāna 
“Aṅgārajātā pathavī, 
kukkuḷānugatā mahī; 
Padumuttaro bhagavā, 
abbhokāsamhi caṅkami. 
Paṇḍaraṁ chattamādāya, 
addhānaṁ paṭipajjahaṁ; 
Tattha disvāna sambuddhaṁ, 
vitti me upapajjatha. 
Marīciyotthaṭā bhūmi, 
aṅgārāva mahī ayaṁ; 
Upahanti mahāvātā, 
sarīrassāsukhepanā. 
Sītaṁ uṇhaṁ vihanantaṁ, 
vātātapanivāraṇaṁ; 
Paṭiggaṇha imaṁ chattaṁ, 
phassayissāmi nibbutiṁ. 
Anukampako kāruṇiko, 
padumuttaro mahāyaso; 
Mama saṅkappamaññāya, 
paṭiggaṇhi tadā jino. 
Tiṁsa kappāni devindo, 
devarajjamakārayiṁ; 
Satānaṁ pañcakkhattuñca, 
cakkavattī ahosahaṁ. 
Padesarajjaṁ vipulaṁ, 
gaṇanāto asaṅkhiyaṁ; 
Anubhomi sakaṁ kammaṁ, 
pubbe sukatamattano. 
Ayaṁ me pacchimā jāti, 
carimo vattate bhavo; 
Ajjāpi setacchattaṁ me, 
sabbakālaṁ dharīyati. 
Satasahassito kappe, 
yaṁ chattamadadiṁ tadā; 
Duggatiṁ nābhijānāmi, 
chattadānassidaṁ phalaṁ.