Sự Nghiệp Anh Hùng (Apadāna)

ajeṭṭha narāsabha’. 
Abhitthavitvā sikhinaṁ, 
nimittakaraṇenahaṁ; 
Āsanaṁ abhivādetvā, 
pakkāmiṁ uttarāmukho. 
Ekattiṁse ito kappe, 
yaṁ thaviṁ vadataṁ varaṁ; 
Duggatiṁ nābhijānāmi, 
thomanāya idaṁ phalaṁ. 
Sattavīse ito kappe, 
atulā satta āsu te; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā āsanasanthaviko thero imā gāthāyo abhāsitthāti. 
Āsanasanthavikattherassāpadānaṁ chaṭṭhaṁ. 

Therāpadāna 
Ārakkhadāyakavagga 
Saddasaññakattheraapadāna 
“Sudassano mahāvīro, 
deseti amataṁ padaṁ; 
Parivuto sāvakehi, 
vasati gharamuttame. 
Tāya vācāya madhurāya, 
saṅgaṇhāti mahājanaṁ; 
Ghoso ca vipulo āsi, 
āsīso devamānuse. 
Nigghosasaddaṁ sutvāna, 
siddhatthassa mahesino; 
Sadde cittaṁ pasādetvā, 
avandiṁ lokanāyakaṁ. 
Catunnavutito kappe, 
yaṁ saññamalabhiṁ tadā; 
Duggatiṁ nābhijānāmi, 
buddhasaññāyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā saddasaññako thero imā gāthāyo abhāsitthāti. 
Saddasaññakattherassāpadānaṁ sattamaṁ. 

Therāpadāna 
Subhūtivagga 
Ekañjalikattheraapadāna 
“Suvaṇṇavaṇṇaṁ sambuddhaṁ, 
Gacchantaṁ antarāpaṇe; 
Vipassiṁ satthavāhaggaṁ, 
Naravaraṁ vināyakaṁ. 
Adantadamanaṁ tādiṁ, 
mahāvādiṁ mahāmatiṁ; 
Disvā pasanno sumano, 
ekañjalimakāsahaṁ. 
Ekanavutito kappe, 
yamañjaliṁ kariṁ tadā; 
Duggatiṁ nābhijānāmi, 
añjalissa idaṁ phalaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā ekañjaliko thero imā gāthāyo abhāsitthāti. 
Ekañjalikattherassāpadānaṁ navamaṁ. 

Therāpadāna 
Ārakkhadāyakavagga 
Tiraṁsiyattheraapadāna 
“Kesariṁ abhijātaṁva, 
aggikkhandhaṁva pabbate; 
Obhāsentaṁ disā sabbā, 
siddhatthaṁ pabbatantare. 
Sūriyassa ca ālokaṁ, 
candālokaṁ tatheva ca; 
Buddhālokañca disvāna, 
vitti me udapajjatha. 
Tayo āloke disvāna, 
sambuddhaṁ sāvakuttamaṁ; 
Ekaṁsaṁ ajinaṁ katvā, 
santhaviṁ lokanāyakaṁ. 
Tayo hi ālokakarā, 
loke lokatamonudā; 
Cando ca sūriyo cāpi, 
buddho ca lokanāyako. 
Opammaṁ upadassetvā, 
kittito me mahāmuni; 
Buddhassa vaṇṇaṁ kittetvā, 
kappaṁ saggamhi modahaṁ. 
Catunnavutito kappe, 
yaṁ buddhamabhikittayiṁ; 
Duggatiṁ nābhijānāmi, 
kittanāya idaṁ phalaṁ. 
Ekasaṭṭhimhito kappe, 
eko ñāṇadharo ahu; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā tiraṁsiyo thero imā gāthāyo abhāsitthāti. 
Tiraṁsiyattherassāpadānaṁ aṭṭhamaṁ. 

Therāpadāna 
Ārakkhadāyakavagga 
9 Kandalipupphiyattheraapadāna 
“Sindhuyā nadiyā tīre, 
ahosiṁ kassako tadā; 
Parakammāyane yutto, 
parabhattaṁ apassito. 
Sindhuṁ anucarantohaṁ, 
siddhatthaṁ jinamaddasaṁ; 
Samādhinā nisinnaṁva, 
satapattaṁva pupphitaṁ. 
Satta kandalipupphāni, 
vaṇṭe chetvānahaṁ tadā; 
Matthake abhiropesiṁ, 
buddhassādiccabandhuno. 
Suvaṇṇavaṇṇaṁ sambuddhaṁ, 
Anukūle samāhitaṁ; 
Tidhāpabhinnamātaṅgaṁ, 
Kuñjaraṁva durāsadaṁ. 
Tamahaṁ upagantvāna, 
nipakaṁ bhāvitindriyaṁ; 
Añjaliṁ paggahetvāna, 
avandiṁ satthuno ahaṁ. 
Catunnavutito kappe, 
yaṁ pupphamabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā kandalipupphiyo thero imā gāthāyo abhāsitthāti. 
Kandalipupphiyattherassāpadānaṁ navamaṁ. 

Therāpadāna 
Ārakkhadāyakavagga 
Kumudamāliyattheraapadāna 
“Usabhaṁ pavaraṁ vīraṁ, 
mahesiṁ vijitāvinaṁ; 
Vipassinaṁ mahāvīraṁ, 
abhijātaṁva kesariṁ. 
Rathiyaṁ paṭipajjantaṁ, 
āhutīnaṁ paṭiggahaṁ; 
Gahetvā kumudaṁ mālaṁ, 
buddhaseṭṭhaṁ samokiriṁ. 
Ekanavutito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā kumudamāliyo thero imā gāthāyo abhāsitthāti. 
Kumudamāliyattherassāpadānaṁ dasamaṁ. 
Ārakkhadāyakavaggo bāttiṁsatimo. 
Tassuddānaṁ 
Ārakkhado bhojanado, 
gatasaññī padumiyo; 
Pupphāsanī santhaviko, 
saddasaññī tiraṁsiyo; 
Kandaliko kumudī ca, 
sattapaññāsa gāthakāti. 

Therāpadāna 
Umāpupphiyavagga 
1 Umāpupphiyattheraapadāna 
“Samāhitaṁ samāpannaṁ, 
siddhatthamaparājitaṁ; 
Samādhinā upaviṭṭhaṁ, 
addasāhaṁ naruttamaṁ. 
Umāpupphaṁ gahetvāna, 
buddhassa abhiropayiṁ; 
Sabbapupphā ekasīsā, 
uddhaṁvaṇṭā adhomukhā. 
Sucittā viya tiṭṭhante, 
ākāse pupphasantharā; 
Tena cittappasādena, 
tusitaṁ upapajjahaṁ. 
Catunnavutito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Pañcapaññāsito kappe, 
eko āsiṁ mahīpati; 
Samantachadano nāma, 
cakkavattī mahabbalo. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā umāpupphiyo thero imā gāthāyo abhāsitthāti. 
Umāpupphiyattherassāpadānaṁ paṭhamaṁ. 

Therāpadāna 
Umāpupphiyavagga 
2 Pulinapūjakattheraapadāna 
“Kakudhaṁ vilasantaṁva, 
nisabhājāniyaṁ yathā; 
Osadhiṁva virocantaṁ, 
obhāsantaṁ narāsabhaṁ. 
Añjaliṁ paggahetvāna, 
avandiṁ satthuno ahaṁ; 
Satthāraṁ parivaṇṇesiṁ, 
sakakammena tosayiṁ. 
Susuddhaṁ pulinaṁ gayha, 
gatamagge samokiriṁ; 
Ucchaṅgena gahetvāna, 
vipassissa mahesino. 
Tato upaḍḍhapulinaṁ, 
vippasannena cetasā; 
Divāvihāre osiñciṁ, 
dvipadindassa tādino. 
Ekanavutito kappe, 
pulinaṁ yamasiñcahaṁ; 
Duggatiṁ nābhijānāmi, 
pulinassa idaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā pulinapūjako thero imā gāthāyo abhāsitthāti. 
Pulinapūjakattherassāpadānaṁ dutiyaṁ. 

Therāpadāna 
Umāpupphiyavagga 
Hāsajanakattheraapadāna 
“Dumagge paṁsukūlakaṁ, 
laggaṁ disvāna satthuno; 
Añjaliṁ paggahetvāna, 
bhiyyo uccāritaṁ mayā. 
Dūrato pana disvāna, 
hāso me udapajjatha; 
Añjaliṁ paggahetvāna, 
bhiyyo cittaṁ pasādayiṁ. 
Ekanavutito kappe, 
yaṁ saññamalabhiṁ tadā; 
Duggatiṁ nābhijānāmi, 
buddhasaññāyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā hāsajanako thero imā gāthāyo abhāsitthāti. 
Hāsajanakattherassāpadānaṁ tatiyaṁ. 

Therāpadāna 
Umāpupphiyavagga 
Yaññasāmikattheraapadāna 
“Jātiyā sattavassohaṁ, 
ahosiṁ mantapāragū; 
Kulavattaṁ adhāresiṁ, 
yañño ussāhito mayā. 
Cullāsītisahassāni, 
pasū haññanti me tadā; 
Sārathambhupanītāni, 
yaññatthāya upaṭṭhitā. 
Ukkāmukhapahaṭṭhova, 
khadiraṅgārasannibho; 
Udayantova sūriyo, 
puṇṇamāyeva candimā. 
Siddhattho sabbasiddhattho, 
tilokamahito hito; 
Upagantvāna sambuddho, 
idaṁ vacanamabravi. 
‘Ahiṁsā sabbapāṇīnaṁ, 
kumāra mama ruccati; 
Theyyā ca aticārā ca, 
majjapānā ca ārati. 
Rati ca samacariyāya, 
bāhusaccaṁ kataññutā; 
Diṭṭhe dhamme parattha ca, 
dhammā ete pasaṁsiyā. 
Ete dhamme bhāvayitvā, 
sabbasattahite rato; 
Buddhe cittaṁ pasādetvā, 
bhāvehi maggamuttamaṁ’. 
Idaṁ vatvāna sabbaññū, 
lokajeṭṭho narāsabho; 
Mamevaṁ anusāsitvā, 
vehāsaṁ uggato gato. 
Pubbe cittaṁ visodhetvā, 
pacchā cittaṁ pasādayiṁ; 
Tena cittappasādena, 
tusitaṁ upapajjahaṁ. 
Catunnavutito kappe, 
yadā cittaṁ pasādayiṁ; 
Duggatiṁ nābhijānāmi, 
buddhasaññāyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā yaññasāmiko thero imā gāthāyo abhāsitthāti. 
Yaññasāmikattherassāpadānaṁ catutthaṁ. 

Therāpadāna 
Umāpupphiyavagga 
Nimittasaññakattheraapadāna 
“Candabhāgānadītīre, 
vasāmi assame ahaṁ; 
Suvaṇṇamigamaddakkhiṁ, 
carantaṁ vipine ahaṁ. 
Mige cittaṁ pasādetvā, 
lokajeṭṭhaṁ anussariṁ; 
Tena cittappasādena, 
aññe buddhe anussariṁ. 
Abbhatītā ca ye buddhā, 
vattamānā anāgatā; 
Evamevaṁ virocanti, 
migarājāva te tayo. 
Catunnavutito kappe, 
yaṁ saññamalabhiṁ tadā; 
Duggatiṁ nābhijānāmi, 
buddhasaññāyidaṁ phalaṁ. 
Sattavīse ito kappe, 
eko āsiṁ mahīpati; 
Araññasattho nāmena, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā nimittasaññako thero imā gāthāyo abhāsitthāti. 
Nimittasaññakattherassāpadānaṁ pañcamaṁ. 

Therāpadāna 
Umāpupphiyavagga 
Annasaṁsāvakattheraapadāna 
“Suvaṇṇavaṇṇaṁ sambuddhaṁ, 
Gacchantaṁ antarāpaṇe; 
Kañcanagghiyasaṅkāsaṁ, 
Bāttiṁsavaralakkhaṇaṁ. 
Siddhatthaṁ sabbasiddhatthaṁ, 
anejaṁ aparājitaṁ; 
Sambuddhaṁ atināmetvā, 
bhojayiṁ taṁ mahāmuniṁ. 
Muni kāruṇiko loke, 
obhāsayi mamaṁ tadā; 
Buddhe cittaṁ pasādetvā, 
kappaṁ saggamhi modahaṁ. 
Catunnavutito kappe, 
yaṁ dānamadadiṁ tadā; 
Duggatiṁ nābhijānāmi, 
bhikkhādānassidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā annasaṁsāvako thero imā gāthāyo abhāsitthāti. 
Annasaṁsāvakattherassāpadānaṁ chaṭṭhaṁ. 

Therāpadāna 
Umāpupphiyavagga 
Nigguṇḍipupphiyattheraapadāna 
“Yadā devo devakāyā, 
cavate āyusaṅkhayā; 
Tayo saddā niccharanti, 
devānaṁ anumodataṁ. 
‘Ito bho sugatiṁ gaccha, 
manussānaṁ sahabyataṁ; 
Manussabhūto saddhamme, 
labha saddhaṁ anuttaraṁ. 
Sā te saddhā niviṭṭhāssa, 
mūlajātā patiṭṭhitā; 
Yāvajīvaṁ asaṁhīrā, 
saddhamme suppavedite. 
Kāyena kusalaṁ katvā, 
vācāya kusalaṁ bahuṁ; 
Manasā kusalaṁ katvā, 
abyāpajjaṁ nirūpadhiṁ. 
Tato opadhikaṁ puññaṁ, 
katvā dānena taṁ bahuṁ; 
Aññepi macce saddhamme, 
brahmacariye nivesaya’. 
Imāya anukampāya, 
devādevaṁ yadā vidū; 
Cavantaṁ anumodanti, 
ehi deva punappunaṁ. 
‘Saṁvego me tadā āsi, 
devasaṅghe samāgate; 
Kaṁsu nāma ahaṁ yoniṁ, 
gamissāmi ito cuto’. 
Mama saṁvegamaññāya, 
samaṇo bhāvitindriyo; 
Mamuddharitukāmo so, 
āgacchi mama santikaṁ. 
Sumano nāma nāmena, 
padumuttarasāvako; 
Atthadhammānusāsitvā, 
saṁvejesi mamaṁ tadā. 
Dvādasamaṁ bhāṇavāraṁ. 
Tassāhaṁ vacanaṁ sutvā, 
buddhe cittaṁ pasādayiṁ; 
Taṁ dhīraṁ abhivādetvā, 
tattha kālaṅkato ahaṁ. 
Upapajjiṁ sa tattheva, 
sukkamūlena codito; 
Vasanto mātukucchimhi, 
puna dhāreti mātuyā. 
Tamhā kāyā cavitvāna, 
tidase upapajjahaṁ; 
Etthantare na passāmi, 
domanassamahaṁ tadā. 
Tāvatiṁsā cavitvāna, 
mātukucchiṁ samokkamiṁ; 
Nikkhamitvāna kucchimhā, 
kaṇhasukkaṁ ajānahaṁ. 
Jātiyā sattavassova, 
ārāmaṁ pāvisiṁ ahaṁ; 
Gotamassa bhagavato, 
sakyaputtassa tādino. 
Vitthārike pāvacane, 
bāhujaññamhi sāsane; 
Addasaṁ sāsanakare, 
bhikkhavo tattha satthuno. 
Sāvatthi nāma nagaraṁ, 
rājā tatthāsi kosalo; 
Rathena nāgayuttena, 
upesi bodhimuttamaṁ. 
Tassāhaṁ nāgaṁ disvāna, 
pubbakammaṁ anussariṁ; 
Añjaliṁ paggahetvāna, 
samayaṁ agamāsahaṁ. 
Jātiyā sattavassova, 
pabbajiṁ anagāriyaṁ; 
Yo so buddhaṁ upaṭṭhāsi, 
ānando nāma sāvako. 
Gatimā dhitimā ceva, 
satimā ca bahussuto; 
Rañño cittaṁ pasādento, 
niyyādesi mahājuti. 
Tassāhaṁ dhammaṁ sutvāna, 
pubbakammaṁ anussariṁ; 
Tattheva ṭhitako santo, 
arahattamapāpuṇiṁ. 
Ekaṁsaṁ cīvaraṁ katvā, 
sire katvāna añjaliṁ; 
Sambuddhaṁ abhivādetvā, 
imaṁ vācaṁ udīrayiṁ. 
‘Padumuttarabuddhassa, 
dvipadindassa satthuno; 
Nigguṇḍipupphaṁ paggayha, 
sīhāsane ṭhapesahaṁ. 
Tena kammena dvipadinda, 
lokajeṭṭha narāsabha; 
Pattomhi acalaṁ ṭhānaṁ, 
hitvā jayaparājayaṁ’. 
Pañcavīsasahassamhi, 
kappānaṁ manujādhipā; 
Abbudanirabbudāni, 
aṭṭhaṭṭhāsiṁsu khattiyā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā nigguṇḍipupphiyo thero imā gāthāyo abhāsitthāti. 
Nigguṇḍipupphiyattherassāpadānaṁ sattamaṁ. 

Therāpadāna 
Subhūtivagga 
Khomadāyakattheraapadāna 
“Nagare bandhumatiyā, 
ahosiṁ vāṇijo tadā; 
Teneva dāraṁ posemi, 
ropemi bījasampadaṁ. 
Rathiyaṁ paṭipannassa, 
vipassissa mahesino; 
Ekaṁ khomaṁ mayā dinnaṁ, 
kusalatthāya satthuno. 
Ekanavutito kappe, 
yaṁ khomamadadiṁ tadā; 
Duggatiṁ nābhijānāmi, 
khomadānassidaṁ phalaṁ. 
Sattarase ito kappe, 
eko sindhavasandhano; 
Sattaratanasampanno, 
catudīpamhi issaro. 
Paṭisambhidā catasso, 
Vimokkhāpi ca aṭṭhime; 
Chaḷabhiññā sacchikatā, 
Kataṁ buddhassa sāsanaṁ”. 
Itthaṁ sudaṁ āyasmā khomadāyako thero imā gāthāyo abhāsitthāti. 
Khomadāyakattherassāpadānaṁ dasamaṁ. 
Tassuddānaṁ 
Subhūti upavāno ca, 
saraṇo sīlagāhako; 
Annasaṁsāvako dhūpo, 
pulino uttiyena ca. 
Añjalī khomadāyī ca, 
daseva tatiye gaṇe; 
Pañcāsītisataṁ vuttā, 
gāthāyo sabbapiṇḍitā. 
Subhūtivaggo tatiyo. 
Catutthabhāṇavāraṁ. 

Therāpadāna 
Umāpupphiyavagga 
8 Sumanāveḷiyattheraapadāna 
“Vessabhussa bhagavato, 
lokajeṭṭhassa tādino; 
Sabbe janā samāgamma, 
mahāpūjaṁ karonti te. 
Sudhāya piṇḍaṁ katvāna, 
āveḷaṁ sumanāyahaṁ; 
Sīhāsanassa purato, 
abhiropesahaṁ tadā. 
Sabbe janā samāgamma, 
pekkhanti pupphamuttamaṁ; 
Kenidaṁ pūjitaṁ pupphaṁ, 
buddhaseṭṭhassa tādino. 
Tena cittappasādena, 
nimmānaṁ upapajjahaṁ; 
Anubhomi sakaṁ kammaṁ, 
pubbe sukatamattano. 
Yaṁ yaṁ yonupapajjāmi, 
devattaṁ atha mānusaṁ; 
Sabbesānaṁ piyo homi, 
pupphapūjāyidaṁ phalaṁ. 
Nābhijānāmi kāyena, 
vācāya uda cetasā; 
Saṁyatānaṁ tapassīnaṁ, 
kataṁ akkositaṁ mayā. 
Tena sucaritenāhaṁ, 
cittassa paṇidhīhi ca; 
Sabbesaṁ pūjito homi, 
anakkosassidaṁ phalaṁ. 
Ito ekādase kappe, 
sahassārosi khattiyo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sumanāveḷiyo thero imā gāthāyo abhāsitthāti. 
Sumanāveḷiyattherassāpadānaṁ aṭṭhamaṁ. 

Therāpadāna 
Umāpupphiyavagga 
9 Pupphacchattiyattheraapadāna 
“Siddhatthassa bhagavato, 
lokajeṭṭhassa tādino; 
Saccaṁ pakāsayantassa, 
nibbāpentassa pāṇino. 
Jalajaṁ āharitvāna, 
satapattaṁ manoramaṁ; 
Pupphassa chattaṁ katvāna, 
buddhassa abhiropayiṁ. 
Siddhattho ca lokavidū, 
āhutīnaṁ paṭiggaho; 
Bhikkhusaṅghe ṭhito satthā, 
imaṁ gāthaṁ abhāsatha. 
‘Yo me cittaṁ pasādetvā, 
pupphacchattaṁ adhārayiṁ; 
Tena cittappasādena, 
duggatiṁ so na gacchati’. 
Idaṁ vatvāna sambuddho, 
siddhattho lokanāyako; 
Uyyojetvāna parisaṁ, 
vehāsaṁ nabhamuggami. 
Vuṭṭhite naradevamhi, 
setacchattampi vuṭṭhahi; 
Purato buddhaseṭṭhassa, 
gacchati chattamuttamaṁ. 
Catunnavutito kappe, 
yaṁ chattaṁ abhiropayiṁ; 
Duggatiṁ nābhijānāmi, 
pupphacchattassidaṁ phalaṁ. 
Catusattatikappamhi, 
aṭṭha jalasikhā ahū; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā pupphacchattiyo thero imā gāthāyo abhāsitthāti. 
Pupphacchattiyattherassāpadānaṁ navamaṁ. 

Therāpadāna 
Umāpupphiyavagga 
Saparivārachattadāyakattheraapadāna 
“Padumuttaro lokavidū, 
āhutīnaṁ paṭiggaho; 
Ākāse jalavuṭṭhīva, 
vassate dhammavuṭṭhiyā. 
Tamaddasāsiṁ sambuddhaṁ, 
desentaṁ amataṁ padaṁ; 
Sakaṁ cittaṁ pasādetvā, 
agamāsiṁ sakaṁ gharaṁ. 
Chattaṁ alaṅkataṁ gayha, 
upagacchiṁ naruttamaṁ; 
Haṭṭho haṭṭhena cittena, 
ākāse ukkhipiṁ ahaṁ. 
Susaṅgahitayānaṁva, 
dantova sāvakuttamo; 
Upagantvāna sambuddhaṁ, 
matthake sampatiṭṭhahi. 
Anukampako kāruṇiko, 
buddho lokagganāyako; 
Bhikkhusaṅghe nisīditvā, 
imā gāthā abhāsatha. 
‘Yena chattamidaṁ dinnaṁ, 
alaṅkataṁ manoramaṁ; 
Tena cittappasādena, 
duggatiṁ so na gacchati. 
Sattakkhattuñca devesu, 
devarajjaṁ karissati; 
Bāttiṁsakkhattuñca rājā, 
cakkavattī bhavissati. 
Kappasatasahassamhi, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādo, 
oraso dhammanimmito; 
Sabbāsave pariññāya, 
nibbāyissatināsavo’. 
Buddhassa giramaññāya, 
vācāsabhimudīritaṁ; 
Pasannacitto sumano, 
bhiyyo hāsaṁ janesahaṁ. 
Jahitvā mānusaṁ yoniṁ, 
Dibbaṁ yoniṁ samajjhagaṁ; 
Vimānamuttamaṁ mayhaṁ, 
Abbhuggataṁ manoramaṁ. 
Vimānā nikkhamantassa, 
setacchattaṁ dharīyati; 
Tadā saññaṁ paṭilabhiṁ, 
pubbakammassidaṁ phalaṁ. 
Devalokā cavitvāna, 
manussattañca āgamiṁ; 
Chattiṁsakkhattuṁ cakkavattī, 
sattakappasatamhito. 
Tamhā kāyā cavitvāna, 
āgacchiṁ tidasaṁ puraṁ; 
Saṁsaritvānupubbena, 
mānusaṁ punarāgamiṁ. 
Okkantaṁ mātukucchiṁ maṁ, 
setacchattaṁ adhārayuṁ; 
Jātiyā sattavassohaṁ, 
pabbajiṁ anagāriyaṁ. 
Sunando nāma nāmena, 
brāhmaṇo mantapāragū; 
Phalikaṁ chattamādāya, 
sāvakaggassa so tadā. 
Anumodi mahāvīro, 
sāriputto mahākathī; 
Sutvānumodanaṁ tassa, 
pubbakammamanussariṁ. 
Añjaliṁ paggahetvāna, 
sakaṁ cittaṁ pasādayiṁ; 
Saritvā purimaṁ kammaṁ, 
arahattamapāpuṇiṁ. 
Uṭṭhāya āsanā tamhā, 
sire katvāna añjaliṁ; 
Sambuddhaṁ abhivādetvā, 
imaṁ vācaṁ udīrayiṁ. 
Satasahassito kappe, 
buddho loke anuttaro; 
Padumuttaro lokavidū, 
āhutīnaṁ paṭiggaho. 
Tassa chattaṁ mayā dinnaṁ, 
vicittaṁ samalaṅkataṁ; 
Ubho hatthehi paggaṇhi, 
sayambhū aggapuggalo. 
Aho buddhā aho dhammā, 
aho no satthusampadā; 
Ekacchattassa dānena, 
duggatiṁ nupapajjahaṁ. 
Kilesā jhāpitā mayhaṁ, 
bhavā sabbe samūhatā; 
Sabbāsave pariññāya, 
viharāmi anāsavo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā saparivārachattadāyako thero imā gāthāyo abhāsitthāti. 
Saparivārachattadāyakattherassāpadānaṁ dasamaṁ. 
Umāpupphiyavaggo tettiṁsatimo. 
Tassuddānaṁ 
Umāpupphañca pulinaṁ, 
hāso yañño nimittako; 
Saṁsāvako nigguṇḍī ca, 
sumanaṁ pupphachattako; 
Saparivārachatto ca, 
gāthā sattasatuttarāti. 

Therāpadāna 
Gandhodakavagga 
Gandhadhūpiyattheraapadāna 
“Siddhatthassa bhagavato, 
gandhadhūpaṁ adāsahaṁ; 
Sumanehi paṭicchannaṁ, 
buddhānucchavikañca taṁ. 
Kañcanagghiyasaṅkāsaṁ, 
buddhaṁ lokagganāyakaṁ; 
Indīvaraṁva jalitaṁ, 
ādittaṁva hutāsanaṁ. 
Byagghusabhaṁva pavaraṁ, 
abhijātaṁva kesariṁ; 
Nisinnaṁ samaṇānaggaṁ, 
bhikkhusaṅghapurakkhataṁ. 
Disvā cittaṁ pasādetvā, 
paggahetvāna añjaliṁ; 
Vanditvā satthuno pāde, 
pakkāmiṁ uttarāmukho. 
Catunnavutito kappe, 
yaṁ gandhamadadiṁ tadā; 
Duggatiṁ nābhijānāmi, 
gandhapūjāyidaṁ phalaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā gandhadhūpiyo thero imā gāthāyo abhāsitthāti. 
Gandhadhūpiyattherassāpadānaṁ paṭhamaṁ. 

Therāpadāna 
Gandhodakavagga 
Udakapūjakattheraapadāna 
“Suvaṇṇavaṇṇaṁ sambuddhaṁ, 
Gacchantaṁ anilañjase; 
Ghatāsanaṁva jalitaṁ, 
Ādittaṁva hutāsanaṁ. 
Pāṇinā udakaṁ gayha, 
ākāse ukkhipiṁ ahaṁ; 
Sampaṭicchi mahāvīro, 
buddho kāruṇiko isi. 
Antalikkhe ṭhito satthā, 
padumuttaranāmako; 
Mama saṅkappamaññāya, 
imaṁ gāthamabhāsatha. 
‘Iminā dakadānena, 
pītiuppādanena ca; 
Kappasatasahassampi, 
duggatiṁ nupapajjati’. 
Tena kammena dvipadinda, 
lokajeṭṭha narāsabha; 
Pattomhi acalaṁ ṭhānaṁ, 
hitvā jayaparājayaṁ. 
Sahassarājanāmena, 
tayo ca cakkavattino; 
Pañcasaṭṭhikappasate, 
cāturantā janādhipā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā udakapūjako thero imā gāthāyo abhāsitthāti. 
Udakapūjakattherassāpadānaṁ dutiyaṁ. 

Therāpadāna 
Gandhodakavagga 
Punnāgapupphiyattheraapadāna 
“Kānanaṁ vanamogayha, 
vasāmi luddako ahaṁ; 
Punnāgaṁ pupphitaṁ disvā, 
buddhaseṭṭhaṁ anussariṁ. 
Taṁ pupphaṁ ocinitvāna, 
sugandhaṁ gandhitaṁ subhaṁ; 
Thūpaṁ katvāna puline, 
buddhassa abhiropayiṁ. 
Dvenavute ito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Ekamhi navute kappe, 
eko āsiṁ tamonudo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā punnāgapupphiyo thero imā gāthāyo abhāsitthāti. 
Punnāgapupphiyattherassāpadānaṁ tatiyaṁ. 

Therāpadāna 
Gandhodakavagga 
Ekadussadāyakattheraapadāna 
“Nagare haṁsavatiyā, 
ahosiṁ tiṇahārako; 
Tiṇahārena jīvāmi, 
tena posemi dārake. 
Padumuttaro nāma jino, 
sabbadhammāna pāragū; 
Tamandhakāraṁ nāsetvā, 
uppajji lokanāyako. 
Sake ghare nisīditvā, 
evaṁ cintesahaṁ tadā; 
‘Buddho loke samuppanno, 
deyyadhammo ca natthi me. 
Idaṁ me sāṭakaṁ ekaṁ, 
natthi me koci dāyako; 
Dukkho nirayasamphasso, 
ropayissāmi dakkhiṇaṁ’. 
Evāhaṁ cintayitvāna, 
sakaṁ cittaṁ pasādayiṁ; 
Ekaṁ dussaṁ gahetvāna, 
buddhaseṭṭhassadāsahaṁ. 
Ekaṁ dussaṁ daditvāna, 
ukkuṭṭhiṁ sampavattayiṁ; 
Yadi buddho tuvaṁ vīra, 
tārehi maṁ mahāmuni. 
Padumuttaro lokavidū, 
āhutīnaṁ paṭiggaho; 
Mama dānaṁ pakittento, 
akā me anumodanaṁ. 
‘Iminā ekadussena, 
cetanāpaṇidhīhi ca; 
Kappasatasahassāni, 
vinipātaṁ na gacchati. 
Chattiṁsakkhattuṁ devindo, 
devarajjaṁ karissati; 
Tettiṁsakkhattuṁ rājā ca, 
cakkavattī bhavissati; 
Padesarajjaṁ vipulaṁ, 
gaṇanāto asaṅkhiyaṁ. 
Devaloke manusse vā, 
saṁsaranto tuvaṁ bhave; 
Rūpavā guṇasampanno, 
anavakkantadehavā; 
Akkhobhaṁ amitaṁ dussaṁ, 
labhissati yadicchakaṁ’. 
Idaṁ vatvāna sambuddho, 
jalajuttamanāmako; 
Nabhaṁ abbhuggamī dhīro, 
haṁsarājāva ambare. 
Yaṁ yaṁ yonupapajjāmi, 
devattaṁ atha mānusaṁ; 
Bhoge me ūnatā natthi, 
ekadussassidaṁ phalaṁ. 
Paduddhāre paduddhāre, 
dussaṁ nibbattate mamaṁ; 
Heṭṭhā dussamhi tiṭṭhāmi, 
upari chadanaṁ mama. 
Cakkavāḷamupādāya, 
sakānanaṁ sapabbataṁ; 
Icchamāno cahaṁ ajja, 
dussehi chādayeyyahaṁ. 
Teneva ekadussena, 
saṁsaranto bhavābhave; 
Suvaṇṇavaṇṇo hutvāna, 
saṁsarāmi bhavābhave. 
Vipākaṁ ekadussassa, 
najjhagaṁ katthacikkhayaṁ; 
Ayaṁ me antimā jāti, 
vipaccati idhāpi me. 
Satasahassito kappe, 
yaṁ dussamadadiṁ tadā; 
Duggatiṁ nābhijānāmi, 
ekadussassidaṁ phalaṁ. 
Kilesā jhāpitā mayhaṁ, 
bhavā sabbe samūhatā; 
Nāgova bandhanaṁ chetvā, 
viharāmi anāsavo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ekadussadāyako thero imā gāthāyo abhāsitthāti. 
Ekadussadāyakattherassāpadānaṁ catutthaṁ. 

Therāpadāna 
Gandhodakavagga 
5 Phusitakampiyattheraapadāna 
“Vipassī nāma sambuddho, 
lokajeṭṭho narāsabho; 
Khīṇāsavehi sahito, 
saṅghārāme vasī tadā. 
Ārāmadvārā nikkhamma, 
vipassī lokanāyako; 
Saha satasahassehi, 
aṭṭha khīṇāsavehi so. 
Ajinena nivatthohaṁ, 
vākacīradharopi ca; 
Kusumodakamādāya, 
sambuddhaṁ upasaṅkamiṁ. 
Sakaṁ cittaṁ pasādetvā, 
vedajāto katañjalī; 
Kusumodakamādāya, 
buddhamabbhukkiriṁ ahaṁ. 
Tena kammena sambuddho, 
jalajuttamanāmako; 
Mama kammaṁ pakittetvā, 
agamā yena patthitaṁ. 
Phusitā pañcasahassā, 
yehi pūjesahaṁ jinaṁ; 
Aḍḍhateyyasahassehi, 
devarajjaṁ akārayiṁ. 
Aḍḍhateyyasahassehi, 
cakkavattī ahosahaṁ; 
Avasesena kammena, 
arahattamapāpuṇiṁ. 
Devarājā yadā homi, 
manujādhipatī yadā; 
Tameva nāmadheyyaṁ me, 
phusito nāma homahaṁ. 
Devabhūtassa santassa, 
athāpi mānusassa vā; 
Samantā byāmato mayhaṁ, 
phusitaṁva pavassati. 
Bhavā ugghāṭitā mayhaṁ, 
kilesā jhāpitā mama; 
Sabbāsavaparikkhīṇo, 
phusitassa idaṁ phalaṁ. 
Candanasseva me kāyā, 
tathā gandho pavāyati; 
Sarīrato mama gandho, 
aḍḍhakose pavāyati. 
Dibbagandhaṁ sampavantaṁ, 
puññakammasamaṅginaṁ; 
Gandhaṁ ghatvāna jānanti, 
phusito āgato idha. 
Sākhāpalāsakaṭṭhāni, 
tiṇānipi ca sabbaso; 
Mama saṅkappamaññāya, 
gandho sampajjate khaṇe. 
Satasahassito kappe, 
candanaṁ abhipūjayiṁ; 
Duggatiṁ nābhijānāmi, 
phusitassa idaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā phusitakampiyo thero imā gāthāyo abhāsitthāti. 
Phusitakampiyattherassāpadānaṁ pañcamaṁ. 

Therāpadāna 
Gandhodakavagga 
Pabhaṅkarattheraapadāna 
“Padumuttarabhagavato, 
lokajeṭṭhassa tādino; 
Vipine cetiyaṁ āsi, 
vāḷamigasamākule. 
Na koci visahi gantuṁ, 
cetiyaṁ abhivandituṁ; 
Tiṇakaṭṭhalatonaddhaṁ, 
paluggaṁ āsi cetiyaṁ. 
Vanakammiko tadā āsiṁ, 
pitumātumatenahaṁ; 
Addasaṁ vipine thūpaṁ, 
luggaṁ tiṇalatākulaṁ. 
Disvānāhaṁ buddhathūpaṁ, 
garucittaṁ upaṭṭhahiṁ; 
Buddhaseṭṭhassa thūpoyaṁ, 
paluggo acchatī vane. 
Nacchannaṁ nappatirūpaṁ, 
jānantassa guṇāguṇaṁ; 
Buddhathūpaṁ asodhetvā, 
aññaṁ kammaṁ payojaye. 
Tiṇakaṭṭhañca valliñca, 
sodhayitvāna cetiye; 
Vanditvā aṭṭha vārāni, 
paṭikuṭiko agacchahaṁ. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Tattha me sukataṁ byamhaṁ, 
sovaṇṇaṁ sapabhassaraṁ; 
Saṭṭhiyojanamubbiddhaṁ, 
tiṁsayojanavitthataṁ. 
Tisatāni ca vārāni, 
devarajjamakārayiṁ; 
Pañcavīsatikkhattuñca, 
cakkavattī ahosahaṁ. 
Bhavābhave saṁsaranto, 
mahābhogaṁ labhāmahaṁ; 
Bhoge me ūnatā natthi, 
sodhanāya idaṁ phalaṁ. 
Sivikā hatthikhandhena, 
vipine gacchato mama; 
Yaṁ yaṁ disāhaṁ gacchāmi, 
saraṇaṁ sampate vanaṁ. 
Khāṇuṁ vā kaṇṭakaṁ vāpi, 
nāhaṁ passāmi cakkhunā; 
Puññakammena saṁyutto, 
sayamevāpanīyare. 
Kuṭṭhaṁ gaṇḍo kilāso ca, 
apamāro vitacchikā; 
Daddu kacchu ca me natthi, 
sodhanāya idaṁ phalaṁ. 
Aññampi me acchariyaṁ, 
buddhathūpassa sodhane; 
Nābhijānāmi me kāye, 
jātaṁ piḷakabindukaṁ. 
Aññampi me acchariyaṁ, 
buddhathūpamhi sodhite; 
Duve bhave saṁsarāmi, 
devatte atha mānuse. 
Aññampi me acchariyaṁ, 
buddhathūpamhi sodhite; 
Suvaṇṇavaṇṇo sabbattha, 
sappabhāso bhavāmahaṁ. 
Aññampi me acchariyaṁ, 
buddhathūpamhi sodhite; 
Amanāpaṁ vivajjati, 
manāpaṁ upatiṭṭhati. 
Aññampi me acchariyaṁ, 
buddhathūpamhi sodhite; 
Visuddhaṁ hoti me cittaṁ, 
ekaggaṁ susamāhitaṁ. 
Aññampi me acchariyaṁ, 
buddhathūpamhi sodhite; 
Ekāsane nisīditvā, 
arahattamapāpuṇiṁ. 
Satasahassito kappe, 
yaṁ kammamakariṁ tadā; 
Duggatiṁ nābhijānāmi, 
sodhanāya idaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā pabhaṅkaro thero imā gāthāyo abhāsitthāti. 
Pabhaṅkarattherassāpadānaṁ chaṭṭhaṁ. 

Therāpadāna 
Gandhodakavagga 
Tiṇakuṭidāyakattheraapadāna 
“Nagare bandhumatiyā, 
ahosiṁ parakammiko; 
Parakammāyane yutto, 
parabhattaṁ apassito. 
Rahogato nisīditvā, 
evaṁ cintesahaṁ tadā; 
Buddho loke samuppanno, 
adhikāro ca natthi me. 
Kālo me gatiṁ sodhetuṁ, 
khaṇo me paṭipādito; 
Dukkho nirayasamphasso, 
apuññānañhi pāṇinaṁ. 
Evāhaṁ cintayitvāna, 
kammasāmiṁ upāgamiṁ; 
Ekāhaṁ kammaṁ yācitvā, 
vipinaṁ pāvisiṁ ahaṁ. 
Tiṇakaṭṭhañca valliñca, 
āharitvānahaṁ tadā; 
Tidaṇḍake ṭhapetvāna, 
akaṁ tiṇakuṭiṁ ahaṁ. 
Saṅghassatthāya kuṭikaṁ, 
niyyādetvāna taṁ ahaṁ; 
Tadaheyeva āgantvā, 
kammasāmiṁ upāgamiṁ. 
Tena kammena sukatena, 
tāvatiṁsamagacchahaṁ; 
Tattha me sukataṁ byamhaṁ, 
kuṭikāya sunimmitaṁ. 
Sahassakaṇḍaṁ satabheṇḍu, 
dhajālu haritāmayaṁ; 
Satasahassaniyyūhā, 
byamhe pātubhaviṁsu me. 
Yaṁ yaṁ yonupapajjāmi, 
devattaṁ atha mānusaṁ; 
Mama saṅkappamaññāya, 
pāsādo upatiṭṭhati. 
Bhayaṁ vā chambhitattaṁ vā, 
lomahaṁso na vijjati; 
Tāsaṁ mama na jānāmi, 
tiṇakuṭikāyidaṁ phalaṁ. 
Sīhabyagghā ca dīpī ca, 
acchakokataracchakā; 
Sabbe maṁ parivajjenti, 
tiṇakuṭikāyidaṁ phalaṁ. 
Sarīsapā ca bhūtā ca, 
ahī kumbhaṇḍarakkhasā; 
Tepi maṁ parivajjenti, 
tiṇakuṭikāyidaṁ phalaṁ. 
Na pāpasupinassāpi, 
sarāmi dassanaṁ mama; 
Upaṭṭhitā sati mayhaṁ, 
tiṇakuṭikāyidaṁ phalaṁ. 
Tāyeva tiṇakuṭikāya, 
anubhotvāna sampadā; 
Gotamassa bhagavato, 
dhammaṁ sacchikariṁ ahaṁ. 
Ekanavutito kappe, 
yaṁ kammamakariṁ tadā; 
Duggatiṁ nābhijānāmi, 
tiṇakuṭikāyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā tiṇakuṭidāyako thero imā gāthāyo abhāsitthāti. 
Tiṇakuṭidāyakattherassāpadānaṁ sattamaṁ. 

Therāpadāna 
Kuṇḍadhānavagga 
Kuṇḍadhānattheraapadāna 
“Sattāhaṁ paṭisallīnaṁ, 
sayambhuṁ aggapuggalaṁ; 
Pasannacitto sumano, 
buddhaseṭṭhaṁ upaṭṭhahiṁ. 
Vuṭṭhitaṁ kālamaññāya, 
padumuttaraṁ mahāmuniṁ; 
Mahantiṁ kadalīkaṇṇiṁ, 
gahetvā upagacchahaṁ. 
Paṭiggahetvā bhagavā, 
sabbaññū lokanāyako; 
Mama cittaṁ pasādento, 
paribhuñji mahāmuni. 
Paribhuñjitvā sambuddho, 
satthavāho anuttaro; 
Sakāsane nisīditvā, 
imā gāthā abhāsatha. 
‘Ye ca santi samitāro, 
yakkhā imamhi pabbate; 
Araññe bhūtabhabyāni, 
suṇantu vacanaṁ mama. 
Yo so buddhaṁ upaṭṭhāsi, 
migarājaṁva kesariṁ; 
Tamahaṁ kittayissāmi, 
suṇātha mama bhāsato. 
Ekādasañcakkhattuṁ so, 
devarājā bhavissati; 
Catutiṁsatikkhattuñca, 
cakkavattī bhavissati. 
Kappasatasahassamhi, 
okkākakulasambhavo; 
Gotamo nāma gottena, 
satthā loke bhavissati. 
Akkositvāna samaṇe, 
sīlavante anāsave; 
Pāpakammavipākena, 
nāmadheyyaṁ labhissati. 
Tassa dhamme sudāyādo, 
oraso dhammanimmito; 
Kuṇḍadhānoti nāmena, 
sāvako so bhavissati’. 
Pavivekamanuyutto, 
jhāyī jhānarato ahaṁ; 
Tosayitvāna satthāraṁ, 
viharāmi anāsavo. 
Sāvakehi parivuto, 
bhikkhusaṅghapurakkhato; 
Bhikkhusaṅghe nisīditvā, 
salākaṁ gāhayī jino. 
Ekaṁsaṁ cīvaraṁ katvā, 
vanditvā lokanāyakaṁ; 
Vadataṁ varassa purato, 
paṭhamaṁ aggahesahaṁ. 
Tena kammena bhagavā, 
dasasahassikampako; 
Bhikkhusaṅghe nisīditvā, 
aggaṭṭhāne ṭhapesi maṁ. 
Vīriyaṁ me dhuradhorayhaṁ, 
yogakkhemādhivāhanaṁ; 
Dhāremi antimaṁ dehaṁ, 
sammāsambuddhasāsane. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā kuṇḍadhāno thero imā gāthāyo abhāsitthāti. 
Kuṇḍadhānattherassāpadānaṁ paṭhamaṁ. 

Therāpadāna 
Gandhodakavagga 
Uttareyyadāyakattheraapadāna 
“Nagare haṁsavatiyā, 
ahosiṁ brāhmaṇo tadā; 
Ajjhāyako mantadharo, 
tiṇṇaṁ vedāna pāragū. 
Purakkhato sasissehi, 
jātimā ca susikkhito; 
Toyābhisecanatthāya, 
nagarā nikkhamiṁ tadā. 
Padumuttaro nāma jino, 
sabbadhammāna pāragū; 
Khīṇāsavasahassehi, 
pāvisī nagaraṁ jino. 
Sucārurūpaṁ disvāna, 
āneñjakāritaṁ viya; 
Parivutaṁ arahantehi, 
disvā cittaṁ pasādayiṁ. 
Sirasmiṁ añjaliṁ katvā, 
namassitvāna subbataṁ; 
Pasannacitto sumano, 
uttarīyamadāsahaṁ. 
Ubho hatthehi paggayha, 
sāṭakaṁ ukkhipiṁ ahaṁ; 
Yāvatā buddhaparisā, 
tāva chādesi sāṭako. 
Piṇḍacāraṁ carantassa, 
mahābhikkhugaṇādino; 
Chadaṁ karonto aṭṭhāsi, 
hāsayanto mamaṁ tadā. 
Gharato nikkhamantassa, 
sayambhū aggapuggalo; 
Vīthiyaṁva ṭhito satthā, 
akā me anumodanaṁ. 
Pasannacitto sumano, 
yo me adāsi sāṭakaṁ; 
Tamahaṁ kittayissāmi, 
suṇotha mama bhāsato. 
‘Tiṁsakappasahassāni, 
devaloke ramissati; 
Paññāsakkhattuṁ devindo, 
devarajjaṁ karissati. 
Devaloke vasantassa, 
puññakammasamaṅgino; 
Samantā yojanasataṁ, 
dussacchannaṁ bhavissati. 
Chattiṁsakkhattuṁ rājā ca, 
cakkavattī bhavissati; 
Padesarajjaṁ vipulaṁ, 
gaṇanāto asaṅkhiyaṁ. 
Bhave saṁsaramānassa, 
puññakammasamaṅgino; 
Manasā patthitaṁ sabbaṁ, 
nibbattissati tāvade. 
Koseyyakambaliyāni, 
khomakappāsikāni ca; 
Mahagghāni ca dussāni, 
paṭilacchatiyaṁ naro. 
Manasā patthitaṁ sabbaṁ, 
paṭilacchatiyaṁ naro; 
Ekadussassa vipākaṁ, 
anubhossati sabbadā. 
So pacchā pabbajitvāna, 
sukkamūlena codito; 
Gotamassa bhagavato, 
dhammaṁ sacchikarissati’. 
Aho me sukataṁ kammaṁ, 
sabbaññussa mahesino; 
Ekāhaṁ sāṭakaṁ datvā, 
pattomhi amataṁ padaṁ. 
Maṇḍape rukkhamūle vā, 
vasato suññake ghare; 
Dhāreti dussachadanaṁ, 
samantā byāmato mama. 
Aviññattaṁ nivāsemi, 
cīvaraṁ paccayañcahaṁ; 
Lābhī annassa pānassa, 
uttareyyassidaṁ phalaṁ. 
Satasahassito kappe, 
yaṁ kammamakariṁ tadā; 
Duggatiṁ nābhijānāmi, 
vatthadānassidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā uttareyyadāyako thero imā gāthāyo abhāsitthāti. 
Uttareyyadāyakattherassāpadānaṁ aṭṭhamaṁ. 

Therāpadāna 
Gandhodakavagga 
9 Dhammasavaniyattheraapadāna 
“Padumuttaro nāma jino, 
sabbadhammāna pāragū; 
Catusaccaṁ pakāsento, 
santāresi bahuṁ janaṁ. 
Ahaṁ tena samayena, 
jaṭilo uggatāpano; 
Dhunanto vākacīrāni, 
gacchāmi ambare tadā. 
Buddhaseṭṭhassa upari, 
gantuṁ na visahāmahaṁ; 
Pakkhīva selamāsajja, 
gamanaṁ na labhāmahaṁ. 
Na me idaṁ bhūtapubbaṁ, 
iriyassa vikopanaṁ; 
Dake yathā ummujjitvā, 
evaṁ gacchāmi ambare. 
Uḷārabhūto manujo, 
heṭṭhāsīno bhavissati; 
Handa menaṁ gavesissaṁ, 
api atthaṁ labheyyahaṁ. 
Orohanto antalikkhā, 
saddamassosi satthuno; 
Aniccataṁ kathentassa, 
tamahaṁ uggahiṁ tadā. 
Aniccasaññamuggayha, 
agamāsiṁ mamassamaṁ; 
Yāvatāyuṁ vasitvāna, 
tattha kālaṅkato ahaṁ. 
Carime vattamānamhi, 
Taṁ dhammasavanaṁ sariṁ; 
Tena kammena sukatena, 
Tāvatiṁsamagacchahaṁ. 
Tiṁsakappasahassāni, 
devaloke ramiṁ ahaṁ; 
Ekapaññāsakkhattuñca, 
devarajjamakārayiṁ. 
Ekasattatikkhattuñca, 
cakkavattī ahosahaṁ; 
Padesarajjaṁ vipulaṁ, 
gaṇanāto asaṅkhiyaṁ. 
Pitugehe nisīditvā, 
samaṇo bhāvitindriyo; 
Gāthāya paridīpento, 
aniccatamudāhari. 
Anussarāmi taṁ saññaṁ, 
saṁsaranto bhavābhave; 
Na koṭiṁ paṭivijjhāmi, 
nibbānaṁ accutaṁ padaṁ. 
Aniccā vata saṅkhārā, 
uppādavayadhammino; 
Uppajjitvā nirujjhanti, 
tesaṁ vūpasamo sukho. 
Saha gāthaṁ suṇitvāna, 
pubbakammaṁ anussariṁ; 
Ekāsane nisīditvā, 
arahattamapāpuṇiṁ. 
Jātiyā sattavassohaṁ, 
arahattamapāpuṇiṁ; 
Upasampādayi buddho, 
guṇamaññāya cakkhumā. 
Dārakova ahaṁ santo, 
karaṇīyaṁ samāpayiṁ; 
Kiṁ me karaṇīyaṁ ajja, 
sakyaputtassa sāsane. 
Satasahassito kappe, 
yaṁ kammamakariṁ tadā; 
Duggatiṁ nābhijānāmi, 
saddhammasavane phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā dhammasavaniyo thero imā gāthāyo abhāsitthāti. 
Dhammasavaniyattherassāpadānaṁ navamaṁ. 

Therāpadāna 
Gandhodakavagga 
Ukkhittapadumiyattheraapadāna 
“Nagare haṁsavatiyā, 
ahosiṁ māliko tadā; 
Ogāhetvā padumasaraṁ, 
satapattaṁ ocināmahaṁ. 
Padumuttaro nāma jino, 
sabbadhammāna pāragū; 
Saha satasahassehi, 
santacittehi tādibhi. 
Khīṇāsavehi suddhehi, 
chaḷabhiññehi jhāyibhi; 
Mama vuddhiṁ samanvesaṁ, 
āgacchi mama santikaṁ. 
Disvānahaṁ devadevaṁ, 
sayambhuṁ lokanāyakaṁ; 
Vaṇṭe chetvā satapattaṁ, 
ukkhipimambare tadā. 
Yadi buddho tuvaṁ vīra, 
lokajeṭṭho narāsabho; 
Sayaṁ gantvā satapattā, 
matthake dhārayantu te. 
Adhiṭṭhahi mahāvīro, 
lokajeṭṭho narāsabho; 
Buddhassa ānubhāvena, 
matthake dhārayiṁsu te. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Tattha me sukataṁ byamhaṁ, 
satapattanti vuccati; 
Saṭṭhiyojanamubbiddhaṁ, 
tiṁsayojanavitthataṁ. 
Sahassakkhattuṁ devindo, 
devarajjamakārayiṁ; 
Pañcasattatikkhattuñca, 
cakkavattī ahosahaṁ. 
Padesarajjaṁ vipulaṁ, 
gaṇanāto asaṅkhiyaṁ; 
Anubhomi sakaṁ kammaṁ, 
pubbe sukatamattano. 
Tenevekapadumena, 
anubhotvāna sampadā; 
Gotamassa bhagavato, 
dhammaṁ sacchikariṁ ahaṁ. 
Kilesā jhāpitā mayhaṁ, 
bhavā sabbe samūhatā; 
Nāgova bandhanaṁ chetvā, 
viharāmi anāsavo. 
Satasahassito kappe, 
yaṁ pupphamabhipūjayiṁ; 
Duggatiṁ nābhijānāmi, 
ekapadumassidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ukkhittapadumiyo thero imā gāthāyo abhāsitthāti. 
Ukkhittapadumiyattherassāpadānaṁ dasamaṁ. 
Gandhodakavaggo catutiṁsatimo. 
Tassuddānaṁ 
Gandhadhūpo udakañca, 
punnāga ekadussakā; 
Phusito ca pabhaṅkaro, 
kuṭido uttarīyako. 
Savanī ekapadumī, 
gāthāyo sabbapiṇḍitā; 
Ekaṁ gāthāsatañceva, 
catutālīsameva ca. 

Therāpadāna 
Ekapadumiyavagga 
Ekapadumiyattheraapadāna 
“Padumuttaro nāma jino, 
sabbadhammāna pāragū; 
Bhavābhave vibhāvento, 
tāresi janataṁ bahuṁ. 
Haṁsarājā tadā homi, 
dijānaṁ pavaro ahaṁ; 
Jātassaraṁ samogayha, 
kīḷāmi haṁsakīḷitaṁ. 
Padumuttaro lokavidū, 
āhutīnaṁ paṭiggaho; 
Jātassarassa upari, 
āgacchi tāvade jino. 
Disvānahaṁ devadevaṁ, 
sayambhuṁ lokanāyakaṁ; 
Vaṇṭe chetvāna padumaṁ, 
satapattaṁ manoramaṁ. 
Mukhatuṇḍena paggayha, 
pasanno lokanāyake; 
Ukkhipitvāna gagane, 
buddhaseṭṭhaṁ apūjayiṁ. 
Padumuttaro lokavidū, 
āhutīnaṁ paṭiggaho; 
Antalikkhe ṭhito satthā, 
akā me anumodanaṁ. 
‘Iminā ekapadumena, 
cetanāpaṇidhīhi ca; 
Kappānaṁ satasahassaṁ, 
vinipātaṁ na gacchasi’. 
Idaṁ vatvāna sambuddho, 
jalajuttamanāmako; 
Mama kammaṁ pakittetvā, 
agamā yena patthitaṁ. 
Satasahassito kappe, 
yaṁ kammamakariṁ tadā; 
Duggatiṁ nābhijānāmi, 
buddhapūjāyidaṁ phalaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā ekapadumiyo thero imā gāthāyo abhāsitthāti. 
Ekapadumiyattherassāpadānaṁ paṭhamaṁ. 

Therāpadāna 
Ekapadumiyavagga 
2 Tīṇuppalamāliyattheraapadāna 
“Candabhāgānadītīre, 
ahosiṁ vānaro tadā; 
Addasaṁ virajaṁ buddhaṁ, 
nisinnaṁ pabbatantare. 
Obhāsentaṁ disā sabbā, 
sālarājaṁva phullitaṁ; 
Lakkhaṇabyañjanūpetaṁ, 
disvā attamano ahuṁ. 
Udaggacitto sumano, 
pītiyā haṭṭhamānaso; 
Tīṇi uppalapupphāni, 
matthake abhiropayiṁ. 
Pupphāni abhiropetvā, 
vipassissa mahesino; 
Sagāravo bhavitvāna, 
pakkāmiṁ uttarāmukho. 
Gacchanto paṭikuṭiko, 
vippasannena cetasā; 
Selantare patitvāna, 
pāpuṇiṁ jīvitakkhayaṁ. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Satānaṁ tīṇikkhattuñca, 
devarajjaṁ akārayiṁ; 
Satānaṁ pañcakkhattuñca, 
cakkavattī ahosahaṁ. 
Ekanavutito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā tīṇuppalamāliyo thero imā gāthāyo abhāsitthāti. 
Tīṇuppalamāliyattherassāpadānaṁ dutiyaṁ. 

Therāpadāna 
Ekapadumiyavagga 
Dhajadāyakattheraapadāna 
“Tisso nāma ahu satthā, 
lokajeṭṭho narāsabho; 
Tayopadhikkhaye disvā, 
dhajaṁ āropitaṁ mayā. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Satānaṁ tīṇikkhattuñca, 
devarajjaṁ akārayiṁ; 
Satānaṁ pañcakkhattuñca, 
cakkavattī ahosahaṁ. 
Padesarajjaṁ vipulaṁ, 
gaṇanāto asaṅkhiyaṁ; 
Anubhomi sakaṁ kammaṁ, 
pubbe sukatamattano. 
Dvenavute ito kappe, 
yaṁ kammamakariṁ tadā; 
Duggatiṁ nābhijānāmi, 
dhajadānassidaṁ phalaṁ. 
Icchamāno cahaṁ ajja, 
sakānanaṁ sapabbataṁ; 
Khomadussena chādeyyaṁ, 
tadā mayhaṁ kate phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā dhajadāyako thero imā gāthāyo abhāsitthāti. 
Dhajadāyakattherassāpadānaṁ tatiyaṁ. 

Therāpadāna 
Ekapadumiyavagga 
4 Tikiṅkaṇipūjakattheraapadāna 
“Himavantassāvidūre, 
bhūtagaṇo nāma pabbato; 
Tatthaddasaṁ paṁsukūlaṁ, 
dumaggamhi vilaggitaṁ. 
Tīṇi kiṅkaṇipupphāni, 
ocinitvānahaṁ tadā; 
Haṭṭho haṭṭhena cittena, 
paṁsukūlaṁ apūjayiṁ. 
Ekattiṁse ito kappe, 
yaṁ kammamakariṁ tadā; 
Duggatiṁ nābhijānāmi, 
tiṇṇaṁ pupphānidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā tikiṅkaṇipūjako thero imā gāthāyo abhāsitthāti. 
Tikiṅkaṇipūjakattherassāpadānaṁ catutthaṁ. 

Therāpadāna 
Ekapadumiyavagga 
Naḷāgārikattheraapadāna 
“Himavantassāvidūre, 
hārito nāma pabbato; 
Sayambhū nārado nāma, 
rukkhamūle vasī tadā. 
Naḷāgāraṁ karitvāna, 
tiṇena chādayiṁ ahaṁ; 
Caṅkamaṁ sodhayitvāna, 
sayambhussa adāsahaṁ. 
Catuddasasu kappesu, 
devaloke ramiṁ ahaṁ; 
Catusattatikkhattuñca, 
devarajjaṁ akārayiṁ. 
Catusattatikkhattuñca, 
cakkavattī ahosahaṁ; 
Padesarajjaṁ vipulaṁ, 
gaṇanāto asaṅkhiyaṁ. 
Ubbiddhaṁ bhavanaṁ mayhaṁ, 
Indalaṭṭhīva uggataṁ; 
Sahassathambhaṁ atulaṁ, 
Vimānaṁ sapabhassaraṁ. 
Dve sampattī anubhotvā, 
sukkamūlena codito; 
Gotamassa bhagavato, 
sāsane pabbajiṁ ahaṁ. 
Padhānapahitattomhi, 
upasanto nirūpadhi; 
Nāgova bandhanaṁ chetvā, 
viharāmi anāsavo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā naḷāgāriko thero imā gāthāyo abhāsitthāti. 
Naḷāgārikattherassāpadānaṁ pañcamaṁ. 

Therāpadāna 
Ekapadumiyavagga 
Campakapupphiyattheraapadāna 
“Himavantassāvidūre, 
jāpalo nāma pabbato; 
Buddho sudassano nāma, 
vihāsi pabbatantare. 
Pupphaṁ hemavantaṁ gayha, 
Gacchaṁ vehāyasenahaṁ; 
Addasaṁ virajaṁ buddhaṁ, 
Oghatiṇṇamanāsavaṁ. 
Satta campakapupphāni, 
sīse katvānahaṁ tadā; 
Buddhassa abhiropesiṁ, 
sayambhussa mahesino. 
Ekattiṁse ito kappe, 
yaṁ pupphamabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā campakapupphiyo thero imā gāthāyo abhāsitthāti. 
Campakapupphiyattherassāpadānaṁ chaṭṭhaṁ. 

Therāpadāna 
Ekapadumiyavagga 
Padumapūjakattheraapadāna 
“Himavantassāvidūre, 
romaso nāma pabbato; 
Buddhopi sambhavo nāma, 
abbhokāse vasī tadā. 
Bhavanā nikkhamitvāna, 
padumaṁ dhārayiṁ ahaṁ; 
Ekāhaṁ dhārayitvāna, 
puna bhavanupāgamiṁ. 
Ekanavutito kappe, 
yaṁ pupphamabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā padumapūjako thero imā gāthāyo abhāsitthāti. 
Padumapūjakattherassāpadānaṁ sattamaṁ. 
Terasamaṁ bhāṇavāraṁ. 

Therāpadāna 
Kuṇḍadhānavagga 
Sāgatattheraapadāna 
“Sobhito nāma nāmena, 
ahosiṁ brāhmaṇo tadā; 
Purakkhato sasissehi, 
ārāmaṁ agamāsahaṁ. 
Bhagavā tamhi samaye, 
bhikkhusaṅghapurakkhato; 
Ārāmadvārā nikkhamma, 
aṭṭhāsi purisuttamo. 
Tamaddasāsiṁ sambuddhaṁ, 
dantaṁ dantapurakkhataṁ; 
Sakaṁ cittaṁ pasādetvā, 
santhaviṁ lokanāyakaṁ. 
Ye keci pādapā sabbe, 
mahiyā te virūhare; 
Buddhimanto tathā sattā, 
ruhanti jinasāsane. 
Satthavāhosi sappañño, 
mahesi bahuke jane; 
Vipathā uddharitvāna, 
pathaṁ ācikkhase tuvaṁ. 
Danto dantaparikiṇṇo, 
jhāyī jhānaratehi ca; 
Ātāpī pahitattehi, 
upasantehi tādibhi. 
Alaṅkato parisāhi, 
puññañāṇehi sobhati; 
Pabhā niddhāvate tuyhaṁ, 
sūriyodayane yathā. 
Pasannacittaṁ disvāna, 
mahesī padumuttaro; 
Bhikkhusaṅghe ṭhito satthā, 
imā gāthā abhāsatha. 
‘Yo so hāsaṁ janetvāna, 
mamaṁ kittesi brāhmaṇo; 
Kappānaṁ satasahassaṁ, 
devaloke ramissati. 
Tusitā hi cavitvāna, 
sukkamūlena codito; 
Gotamassa bhagavato, 
sāsane pabbajissati. 
Tena kammena sukatena, 
arahattaṁ labhissati; 
Sāgato nāma nāmena, 
hessati satthu sāvako’. 
Pabbajitvāna kāyena, 
pāpakammaṁ vivajjayiṁ; 
Vacīduccaritaṁ hitvā, 
ājīvaṁ parisodhayiṁ. 
Evaṁ viharamānohaṁ, 
tejodhātūsu kovido; 
Sabbāsave pariññāya, 
viharāmi anāsavo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sāgato thero imā gāthāyo abhāsitthāti. 
Sāgatattherassāpadānaṁ dutiyaṁ. 

Therāpadāna 
Ekapadumiyavagga 
Tiṇamuṭṭhidāyakattheraapadāna 
“Himavantassāvidūre, 
lambako nāma pabbato; 
Upatisso nāma sambuddho, 
abbhokāsamhi caṅkami. 
Migaluddo tadā āsiṁ, 
araññe kānane ahaṁ; 
Disvāna taṁ devadevaṁ, 
sayambhuṁ aparājitaṁ. 
Vippasannena cittena, 
tadā tassa mahesino; 
Nisīdanatthaṁ buddhassa, 
tiṇamuṭṭhimadāsahaṁ. 
Datvāna devadevassa, 
bhiyyo cittaṁ pasādayiṁ; 
Sambuddhaṁ abhivādetvā, 
pakkāmiṁ uttarāmukho. 
Aciraṁ gatamattaṁ maṁ, 
migarājā apothayi; 
Sīhena pothito santo, 
tattha kālaṅkato ahaṁ. 
Āsanne me kataṁ kammaṁ, 
buddhaseṭṭhe anāsave; 
Sumutto saravegova, 
devalokaṁ agañchahaṁ. 
Yūpo tattha subho āsi, 
puññakammābhinimmito; 
Sahassakaṇḍo satabheṇḍu, 
dhajālu haritāmayo. 
Pabhā niddhāvate tassa, 
sataraṁsīva uggato; 
Ākiṇṇo devakaññāhi, 
āmodiṁ kāmakāmahaṁ. 
Devalokā cavitvāna, 
sukkamūlena codito; 
Āgantvāna manussattaṁ, 
pattomhi āsavakkhayaṁ. 
Catunnavutito kappe, 
nisīdanamadāsahaṁ; 
Duggatiṁ nābhijānāmi, 
tiṇamuṭṭhiyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā tiṇamuṭṭhidāyako thero imā gāthāyo abhāsitthāti. 
Tiṇamuṭṭhidāyakattherassāpadānaṁ aṭṭhamaṁ. 

Therāpadāna 
Ekapadumiyavagga 
Tindukaphaladāyakattheraapadāna 
“Kaṇikāraṁva jotantaṁ, 
nisinnaṁ pabbatantare; 
Addasaṁ virajaṁ buddhaṁ, 
oghatiṇṇamanāsavaṁ. 
Tindukaṁ saphalaṁ disvā, 
bhinditvāna sakosakaṁ; 
Pasannacitto sumano, 
sayambhussa madāsahaṁ. 
Ekanavutito kappe, 
yaṁ phalamadadiṁ tadā; 
Duggatiṁ nābhijānāmi, 
phaladānassidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā tindukaphaladāyako thero imā gāthāyo abhāsitthāti. 
Tindukaphaladāyakattherassāpadānaṁ navamaṁ. 

Therāpadāna 
Ekapadumiyavagga 
Ekañjaliyattheraapadāna 
“Romaso nāma sambuddho, 
nadīkūle vasī tadā; 
Addasaṁ virajaṁ buddhaṁ, 
pītaraṁsiṁva bhāṇumaṁ. 
Ukkāmukhapahaṭṭhaṁva, 
khadiraṅgārasannibhaṁ; 
Osadhiṁva virocantaṁ, 
ekañjalimakāsahaṁ. 
Catunnavutito kappe, 
yaṁ añjalimakāsahaṁ; 
Duggatiṁ nābhijānāmi, 
añjaliyā idaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ekañjaliyo thero imā gāthāyo abhāsitthāti. 
Ekañjaliyattherassāpadānaṁ dasamaṁ. 
Ekapadumiyavaggo pañcatiṁsatimo. 
Tassuddānaṁ 
Padumī uppalamālī, 
dhajo kiṅkaṇikaṁ naḷaṁ; 
Campako padumo muṭṭhi, 
tindukekañjalī tathā; 
Cha ca saṭṭhi ca gāthāyo, 
gaṇitāyo vibhāvibhi. 

Therāpadāna 
Saddasaññakavagga 
Saddasaññakattheraapadāna 
“Migaluddo pure āsiṁ, 
araññe kānane ahaṁ; 
Tatthaddasāsiṁ sambuddhaṁ, 
devasaṅghapurakkhataṁ. 
Catusaccaṁ pakāsentaṁ, 
uddharantaṁ mahājanaṁ; 
Assosiṁ madhuraṁ vācaṁ, 
karavīkarudopamaṁ. 
Brahmasarassa munino, 
sikhino lokabandhuno; 
Ghose cittaṁ pasādetvā, 
pattomhi āsavakkhayaṁ. 
Ekattiṁse ito kappe, 
yaṁ kammamakariṁ tadā; 
Duggatiṁ nābhijānāmi, 
pasādassa idaṁ phalaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā saddasaññako thero imā gāthāyo abhāsitthāti. 
Saddasaññakattherassāpadānaṁ paṭhamaṁ. 

Therāpadāna 
Saddasaññakavagga 
Yavakalāpiyattheraapadāna 
“Nagare aruṇavatiyā, 
āsiṁ yavasiko tadā; 
Panthe disvāna sambuddhaṁ, 
yavakalāpaṁ santhariṁ. 
Anukampako kāruṇiko, 
sikhī lokagganāyako; 
Mama saṅkappamaññāya, 
nisīdi yavasanthare. 
Disvā nisinnaṁ vimalaṁ, 
mahājhāyiṁ vināyakaṁ; 
Pāmojjaṁ janayitvāna, 
tattha kālaṅkato ahaṁ. 
Ekattiṁse ito kappe, 
yaṁ kammamakariṁ tadā; 
Duggatiṁ nābhijānāmi, 
yavatthare idaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā yavakalāpiyo thero imā gāthāyo abhāsitthāti. 
Yavakalāpiyattherassāpadānaṁ dutiyaṁ. 

Therāpadāna 
Saddasaññakavagga 
Kiṁsukapūjakattheraapadāna 
“Kiṁsukaṁ pupphitaṁ disvā, 
paggahetvāna añjaliṁ; 
Buddhaṁ saritvā siddhatthaṁ, 
ākāse abhipūjayiṁ. 
Catunnavutito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā kiṁsukapūjako thero imā gāthāyo abhāsitthāti. 
Kiṁsukapūjakattherassāpadānaṁ tatiyaṁ. 

Therāpadāna 
Saddasaññakavagga 
4 Sakosakakoraṇḍadāyakattheraapadāna 
“Akkantañca padaṁ disvā, 
sikhino lokabandhuno; 
Ekaṁsaṁ ajinaṁ katvā, 
padaseṭṭhaṁ avandahaṁ. 
Koraṇḍaṁ pupphitaṁ disvā, 
pādapaṁ dharaṇīruhaṁ; 
Sakosakaṁ gahetvāna, 
padacakkaṁ apūjayiṁ. 
Ekattiṁse ito kappe, 
yaṁ kammamakariṁ tadā; 
Duggatiṁ nābhijānāmi, 
padapūjāyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sakosakakoraṇḍadāyako thero imā gāthāyo abhāsitthāti. 
Sakosakakoraṇḍadāyakattherassāpadānaṁ catutthaṁ. 

Therāpadāna 
Saddasaññakavagga 
Daṇḍadāyakattheraapadāna 
“Kānanaṁ vanamogayha, 
veḷuṁ chetvānahaṁ tadā; 
Ālambanaṁ karitvāna, 
saṅghassa adadaṁ ahaṁ. 
Tena cittappasādena, 
subbate abhivādiya; 
Ālambanampi datvāna, 
pakkāmiṁ uttarāmukho. 
Catunnavutito kappe, 
yaṁ daṇḍamadadiṁ tadā; 
Duggatiṁ nābhijānāmi, 
daṇḍadānassidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā daṇḍadāyako thero imā gāthāyo abhāsitthāti. 
Daṇḍadāyakattherassāpadānaṁ pañcamaṁ. 

Therāpadāna 
Saddasaññakavagga 
Ambayāgudāyakattheraapadāna 
“Sataraṁsī nāma sambuddho, 
sayambhū aparājito; 
Vuṭṭhahitvā samādhimhā, 
bhikkhāya mamupāgami. 
Paccekabuddhaṁ disvāna, 
ambayāguṁ adāsahaṁ; 
Vippasannamanaṁ tassa, 
vippasannena cetasā. 
Catunnavutito kappe, 
yaṁ kammamakariṁ tadā; 
Duggatiṁ nābhijānāmi, 
ambayāguyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ambayāgudāyako thero imā gāthāyo abhāsitthāti. 
Ambayāgudāyakattherassāpadānaṁ chaṭṭhaṁ. 

Therāpadāna 
Saddasaññakavagga 
7 Supuṭakapūjakattheraapadāna 
“Divāvihārā nikkhanto, 
vipassī lokanāyako; 
Bhikkhāya vicaranto so, 
mama santikupāgami. 
Tato patīto sumano, 
buddhaseṭṭhassa tādino; 
Loṇasupuṭakaṁ datvā, 
kappaṁ saggamhi modahaṁ. 
Ekanavutito kappe, 
yaṁ puṭakamadāsahaṁ; 
Duggatiṁ nābhijānāmi, 
puṭakassa idaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā supuṭakapūjako thero imā gāthāyo abhāsitthāti. 
Supuṭakapūjakattherassāpadānaṁ sattamaṁ. 

Therāpadāna 
Kuṇḍadhānavagga 
3 Mahākaccānattheraapadāna 
“Padumuttaranāthassa, 
padumaṁ nāma cetiyaṁ; 
Silāsanaṁ kārayitvā, 
suvaṇṇenābhilepayiṁ. 
Ratanāmayachattañca, 
paggayha vāḷabījaniṁ; 
Buddhassa abhiropesiṁ, 
lokabandhussa tādino. 
Yāvatā devatā bhummā, 
sabbe sannipatuṁ tadā; 
Ratanāmayachattānaṁ, 
vipākaṁ kathayissati. 
Tañca sabbaṁ suṇissāma, 
kathayantassa satthuno; 
Bhiyyo hāsaṁ janeyyāma, 
sammāsambuddhasāsane. 
Hemāsane nisīditvā, 
sayambhū aggapuggalo; 
Bhikkhusaṅghaparibyūḷho, 
imā gāthā abhāsatha. 
‘Yenidaṁ āsanaṁ dinnaṁ, 
sovaṇṇaṁ ratanāmayaṁ; 
Tamahaṁ kittayissāmi, 
suṇātha mama bhāsato. 
Tiṁsa kappāni devindo, 
devarajjaṁ karissati; 
Samantā yojanasataṁ, 
ābhāyābhibhavissati. 
Manussalokamāgantvā, 
cakkavattī bhavissati; 
Pabhassaroti nāmena, 
uggatejo bhavissati. 
Divā vā yadi vā rattiṁ, 
sataraṁsīva uggato; 
Samantā aṭṭharatanaṁ, 
ujjotissati khattiyo. 
Kappasatasahassamhi, 
okkākakulasambhavo; 
Gotamo nāma gottena, 
satthā loke bhavissati. 
Tusitā hi cavitvāna, 
sukkamūlena codito; 
Kaccāno nāma nāmena, 
brahmabandhu bhavissati. 
So pacchā pabbajitvāna, 
arahā hessatināsavo; 
Gotamo lokapajjoto, 
aggaṭṭhāne ṭhapessati. 
Saṅkhittapucchitaṁ pañhaṁ, 
Vitthārena kathessati; 
Kathayanto ca taṁ pañhaṁ, 
Ajjhāsayaṁ pūrayissati’. 
Aḍḍhe kule abhijāto, 
brāhmaṇo mantapāragū; 
Ohāya dhanadhaññāni, 
pabbajiṁ anagāriyaṁ. 
Saṅkhittenapi pucchante, 
vitthārena kathemahaṁ; 
Ajjhāsayaṁ tesaṁ pūremi, 
tosemi dvipaduttamaṁ. 
Tosito me mahāvīro, 
sayambhū aggapuggalo; 
Bhikkhusaṅghe nisīditvā, 
etadagge ṭhapesi maṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā mahākaccāno thero imā gāthāyo abhāsitthāti. 
Mahākaccānattherassāpadānaṁ tatiyaṁ. 

Therāpadāna 
Saddasaññakavagga 
8 Mañcadāyakattheraapadāna 
“Vipassino bhagavato, 
lokajeṭṭhassa tādino; 
Ekaṁ mañcaṁ mayā dinnaṁ, 
pasannena sapāṇinā. 
Hatthiyānaṁ assayānaṁ, 
dibbayānaṁ samajjhagaṁ; 
Tena mañcakadānena, 
pattomhi āsavakkhayaṁ. 
Ekanavutito kappe, 
yaṁ mañcamadadiṁ tadā; 
Duggatiṁ nābhijānāmi, 
mañcadānassidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā mañcadāyako thero imā gāthāyo abhāsitthāti. 
Mañcadāyakattherassāpadānaṁ aṭṭhamaṁ. 

Therāpadāna 
Saddasaññakavagga 
9 Saraṇagamaniyattheraapadāna 
“Āruhimha tadā nāvaṁ, 
bhikkhu cājīvako cahaṁ; 
Nāvāya bhijjamānāya, 
bhikkhu me saraṇaṁ adā. 
Ekattiṁse ito kappe, 
yañca me saraṇaṁ adā; 
Duggatiṁ nābhijānāmi, 
saraṇāgamane phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā saraṇagamaniyo thero imā gāthāyo abhāsitthāti. 
Saraṇagamaniyattherassāpadānaṁ navamaṁ. 

Therāpadāna 
Saddasaññakavagga 
Piṇḍapātikattheraapadāna 
“Tisso nāmāsi sambuddho, 
vihāsi vipine tadā; 
Tusitā hi idhāgantvā, 
piṇḍapātaṁ adāsahaṁ. 
Sambuddhamabhivādetvā, 
tissaṁ nāma mahāyasaṁ; 
Sakaṁ cittaṁ pasādetvā, 
tusitaṁ agamāsahaṁ. 
Dvenavute ito kappe, 
yaṁ dānamadadiṁ tadā; 
Duggatiṁ nābhijānāmi, 
piṇḍapātassidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā piṇḍapātiko thero imā gāthāyo abhāsitthāti. 
Piṇḍapātikattherassāpadānaṁ dasamaṁ. 
Saddasaññakavaggo chattiṁsatimo. 
Tassuddānaṁ 
Saddasaññī yavasiko, 
kiṁsukoraṇḍapupphiyo; 
Ālambano ambayāgu, 
supuṭī mañcadāyako; 
Saraṇaṁ piṇḍapāto ca, 
gāthā tālīsameva ca. 

Therāpadāna 
Mandāravapupphiyavagga 
1 Mandāravapupphiyattheraapadāna 
“Tāvatiṁsā idhāgantvā, 
maṅgalo nāma māṇavo; 
Mandāravaṁ gahetvāna, 
vipassissa mahesino. 
Samādhinā nisinnassa, 
matthake dhārayiṁ ahaṁ; 
Sattāhaṁ dhārayitvāna, 
devalokaṁ punāgamiṁ. 
Ekanavutito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā mandāravapupphiyo thero imā gāthāyo abhāsitthāti. 
Mandāravapupphiyattherassāpadānaṁ paṭhamaṁ. 

Therāpadāna 
Mandāravapupphiyavagga 
Kakkārupupphiyattheraapadāna 
“Yāmā devā idhāgantvā, 
gotamaṁ sirivacchasaṁ; 
Kakkārumālaṁ paggayha, 
buddhassa abhiropayiṁ. 
Dvenavute ito kappe, 
yaṁ buddhamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā kakkārupupphiyo thero imā gāthāyo abhāsitthāti. 
Kakkārupupphiyattherassāpadānaṁ dutiyaṁ. 

Therāpadāna 
Mandāravapupphiyavagga 
Bhisamuḷāladāyakattheraapadāna 
“Phusso nāmāsi sambuddho, 
sabbadhammāna pāragū; 
Vivekakāmo sabbaññū, 
āgañchi mama santike. 
Tasmiṁ cittaṁ pasādetvā,