Sự Nghiệp Anh Hùng (Apadāna)

ppasaho, 
acalo uggato brahā; 
Nerūpamo mahāvīro, 
so me buddho nimantito. 
Anantañāṇo asamasamo, 
Atulo aggataṁ gato; 
Gaganūpamo mahāvīro, 
So me buddho nimantito. 
Pannarasamaṁ bhāṇavāraṁ. 
Patiṭṭhā bhayabhītānaṁ, 
tāṇo saraṇagāminaṁ; 
Assāsako mahāvīro, 
so me buddho nimantito. 
Āsayo buddhimantānaṁ, 
puññakkhettaṁ sukhesinaṁ; 
Ratanākaro mahāvīro, 
so me buddho nimantito. 
Assāsako vedakaro, 
sāmaññaphaladāyako; 
Meghūpamo mahāvīro, 
so me buddho nimantito. 
Lokacakkhu mahātejo, 
sabbatamavinodano; 
Sūriyūpamo mahāvīro, 
so me buddho nimantito. 
Ārammaṇavimuttīsu, 
sabhāvadassano muni; 
Candūpamo mahāvīro, 
so me buddho nimantito. 
Buddho samussito loke, 
lakkhaṇehi alaṅkato; 
Appameyyo mahāvīro, 
so me buddho nimantito. 
Yassa ñāṇaṁ appameyyaṁ, 
sīlaṁ yassa anūpamaṁ; 
Vimutti asadisā yassa, 
so me buddho nimantito. 
Yassa dhīti asadisā, 
thāmo yassa acintiyo; 
Yassa parakkamo jeṭṭho, 
so me buddho nimantito. 
Rāgo doso ca moho ca, 
visā sabbe samūhatā; 
Agadūpamo mahāvīro, 
so me buddho nimantito. 
Klesabyādhibahudukkha, 
sabbatamavinodano; 
Vejjūpamo mahāvīro, 
so me buddho nimantito’. 
Buddhoti bho yaṁ vadesi, 
ghosopeso sudullabho; 
Buddho buddhoti sutvāna, 
pīti me udapajjatha. 
Abbhantaraṁ agaṇhantaṁ, 
pīti me bahi nicchare; 
Sohaṁ pītimano santo, 
idaṁ vacanamabraviṁ. 
‘Kahaṁ nu kho so bhagavā, 
lokajeṭṭho narāsabho; 
Tattha gantvā namassissaṁ, 
sāmaññaphaladāyakaṁ. 
Paggayha dakkhiṇaṁ bāhuṁ, 
vedajāto katañjalī; 
Ācikkhi me dhammarājaṁ, 
sokasallavinodanaṁ’. 
‘Udentaṁva mahāmeghaṁ, 
nīlaṁ añjanasannibhaṁ; 
Sāgaraṁ viya dissantaṁ, 
passasetaṁ mahāvanaṁ. 
Ettha so vasate buddho, 
adantadamako muni; 
Vinayanto ca veneyye, 
bodhento bodhipakkhiye’. 
Pipāsitova udakaṁ, 
bhojanaṁva jighacchito; 
Gāvī yathā vacchagiddhā, 
evāhaṁ viciniṁ jinaṁ. 
Ācāraupacāraññū, 
dhammānucchavisaṁvaraṁ; 
Sikkhāpemi sake sisse, 
gacchante jinasantikaṁ. 
‘Durāsadā bhagavanto, 
sīhāva ekacārino; 
Pade padaṁ nikkhipantā, 
āgaccheyyātha māṇavā. 
Āsīviso yathā ghoro, 
migarājāva kesarī; 
Mattova kuñjaro dantī, 
evaṁ buddhā durāsadā. 
Ukkāsitañca khipitaṁ, 
ajjhupekkhiya māṇavā; 
Pade padaṁ nikkhipantā, 
upetha buddhasantikaṁ. 
Paṭisallānagarukā, 
appasaddā durāsadā; 
Durūpasaṅkamā buddhā, 
garū honti sadevake. 
Yadāhaṁ pañhaṁ pucchāmi, 
paṭisammodayāmi vā; 
Appasaddā tadā hotha, 
munibhūtāva tiṭṭhatha. 
Yaṁ so deseti sambuddho, 
khemaṁ nibbānapattiyā; 
Tamevatthaṁ nisāmetha, 
saddhammasavanaṁ sukhaṁ’. 
Upasaṅkamma sambuddhaṁ, 
sammodiṁ muninā ahaṁ; 
Taṁ kathaṁ vītisāretvā, 
lakkhaṇe upadhārayiṁ. 
Lakkhaṇe dve ca kaṅkhāmi, 
passāmi tiṁsalakkhaṇe; 
Kosohitavatthaguyhaṁ, 
iddhiyā dassayī muni. 
Jivhaṁ ninnāmayitvāna, 
kaṇṇasote ca nāsike; 
Paṭimasi nalāṭantaṁ, 
kevalaṁ chādayī jino. 
Tassāhaṁ lakkhaṇe disvā, 
paripuṇṇe sabyañjane; 
Buddhoti niṭṭhaṁ gantvāna, 
saha sissehi pabbajiṁ. 
Satehi tīhi sahito, 
pabbajiṁ anagāriyaṁ; 
Addhamāse asampatte, 
sabbe pattāmha nibbutiṁ. 
Ekato kammaṁ katvāna, 
puññakkhette anuttare; 
Ekato saṁsaritvāna, 
ekato vinivattayuṁ. 
Gopānasiyo datvāna, 
pūgadhamme vasiṁ ahaṁ; 
Tena kammena sukatena, 
aṭṭha hetū labhāmahaṁ. 
Disāsu pūjito homi, 
bhogā ca amitā mama; 
Patiṭṭhā homi sabbesaṁ, 
tāso mama na vijjati. 
Byādhayo me na vijjanti, 
dīghāyuṁ pālayāmi ca; 
Sukhumacchaviko homi, 
āvāse patthite vase. 
Aṭṭha gopānasī datvā, 
pūgadhamme vasiṁ ahaṁ; 
Paṭisambhidārahattañca, 
etaṁ me aparaṭṭhamaṁ. 
Sabbavositavosāno, 
katakicco anāsavo; 
Aṭṭhagopānasī nāma, 
tava putto mahāmuni. 
Pañca thambhāni datvāna, 
pūgadhamme vasiṁ ahaṁ; 
Tena kammena sukatena, 
pañca hetū labhāmahaṁ. 
Acalo homi mettāya, 
anūnaṅgo bhavāmahaṁ; 
Ādeyyavacano homi, 
na dhaṁsemi yathā ahaṁ. 
Abhantaṁ hoti me cittaṁ, 
akhilo homi kassaci; 
Tena kammena sukatena, 
vimalo homi sāsane. 
Sagāravo sappatisso, 
katakicco anāsavo; 
Sāvako te mahāvīra, 
bhikkhu taṁ vandate muni. 
Katvā sukatapallaṅkaṁ, 
sālāyaṁ paññapesahaṁ; 
Tena kammena sukatena, 
pañca hetū labhāmahaṁ. 
Ucce kule pajāyitvā, 
mahābhogo bhavāmahaṁ; 
Sabbasampattiko homi, 
maccheraṁ me na vijjati. 
Gamane patthite mayhaṁ, 
pallaṅko upatiṭṭhati; 
Saha pallaṅkaseṭṭhena, 
gacchāmi mama patthitaṁ. 
Tena pallaṅkadānena, 
tamaṁ sabbaṁ vinodayiṁ; 
Sabbābhiññābalappatto, 
thero vandati taṁ muni. 
Parakiccattakiccāni, 
sabbakiccāni sādhayiṁ; 
Tena kammena sukatena, 
pāvisiṁ abhayaṁ puraṁ. 
Pariniṭṭhitasālamhi, 
paribhogamadāsahaṁ; 
Tena kammena sukatena, 
seṭṭhattaṁ ajjhupāgato. 
Ye keci damakā loke, 
hatthiasse damenti ye; 
Karitvā kāraṇā nānā, 
dāruṇena damenti te. 
Na hevaṁ tvaṁ mahāvīra, 
damesi naranāriyo; 
Adaṇḍena asatthena, 
damesi uttame dame. 
Dānassa vaṇṇe kittento, 
desanākusalo muni; 
Ekapañhaṁ kathentova, 
bodhesi tisate muni. 
Dantā mayaṁ sārathinā, 
suvimuttā anāsavā; 
Sabbābhiññābalapattā, 
nibbutā upadhikkhaye. 
Satasahassito kappe, 
yaṁ dānamadadiṁ tadā; 
Atikkantā bhayā sabbe, 
sālādānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā selo sapariso bhagavato santike imā gāthāyo abhāsitthāti. 
Selattherassāpadānaṁ dutiyaṁ. 

Therāpadāna 
Pilindavacchavagga 
Sabbakittikattheraapadāna 
“Kaṇikāraṁva jalitaṁ, 
dīparukkhaṁva ujjalaṁ; 
Osadhiṁva virocantaṁ, 
vijjutaṁ gagane yathā. 
Asambhītaṁ anuttāsiṁ, 
migarājaṁva kesariṁ; 
Ñāṇālokaṁ pakāsentaṁ, 
maddantaṁ titthiye gaṇe. 
Uddharantaṁ imaṁ lokaṁ, 
chindantaṁ sabbasaṁsayaṁ; 
Gajjantaṁ migarājaṁva, 
addasaṁ lokanāyakaṁ. 
Jaṭājinadharo āsiṁ, 
brahā uju patāpavā; 
Vākacīraṁ gahetvāna, 
pādamūle apatthariṁ. 
Kāḷānusāriyaṁ gayha, 
anulimpiṁ tathāgataṁ; 
Sambuddhamanulimpetvā, 
santhaviṁ lokanāyakaṁ. 
‘Samuddharasimaṁ lokaṁ, 
oghatiṇṇamahāmuni; 
Ñāṇālokena jotesi, 
nāvaṭaṁ ñāṇamuttamaṁ. 
Dhammacakkaṁ pavattesi, 
maddase paratitthiye; 
Usabho jitasaṅgāmo, 
sampakampesi medaniṁ. 
Mahāsamudde ūmiyo, 
velantamhi pabhijjare; 
Tatheva tava ñāṇamhi, 
sabbadiṭṭhī pabhijjare. 
Sukhumacchikajālena, 
saramhi sampatānite; 
Antojālikatā pāṇā, 
pīḷitā honti tāvade. 
Tatheva titthiyā loke, 
puthupāsaṇḍanissitā; 
Antoñāṇavare tuyhaṁ, 
parivattanti mārisa. 
Patiṭṭhā vuyhataṁ oghe, 
tvañhi nātho abandhunaṁ; 
Bhayaṭṭitānaṁ saraṇaṁ, 
muttitthīnaṁ parāyaṇaṁ. 
Ekavīro asadiso, 
mettākaruṇasañcayo; 
Asamo susamo santo, 
vasī tādī jitañjayo. 
Dhīro vigatasammoho, 
anejo akathaṅkathī; 
Tusito vantadososi, 
nimmalo saṁyato suci. 
Saṅgātigo hatamado, 
tevijjo tibhavantago; 
Sīmātigo dhammagaru, 
gatattho hitavabbhuto. 
Tārako tvaṁ yathā nāvā, 
nidhīvassāsakārako; 
Asambhīto yathā sīho, 
gajarājāva dappito’. 
Thometvā dasagāthāhi, 
padumuttaraṁ mahāyasaṁ; 
Vanditvā satthuno pāde, 
tuṇhī aṭṭhāsahaṁ tadā. 
Padumuttaro lokavidū, 
āhutīnaṁ paṭiggaho; 
Bhikkhusaṅghe ṭhito satthā, 
imā gāthā abhāsatha. 
‘Yo me sīlañca ñāṇañca, 
saddhammañcāpi vaṇṇayi; 
Tamahaṁ kittayissāmi, 
suṇātha mama bhāsato. 
Saṭṭhi kappasahassāni, 
devaloke ramissati; 
Aññe devebhibhavitvā, 
issaraṁ kārayissati. 
So pacchā pabbajitvāna, 
sukkamūlena codito; 
Gotamassa bhagavato, 
sāsane pabbajissati. 
Pabbajitvāna kāyena, 
pāpakammaṁ vivajjiya; 
Sabbāsave pariññāya, 
nibbāyissatināsavo’. 
Yathāpi megho thanayaṁ, 
tappeti mediniṁ imaṁ; 
Tatheva tvaṁ mahāvīra, 
dhammena tappayī mamaṁ. 
Sīlaṁ paññañca dhammañca, 
thavitvā lokanāyakaṁ; 
Pattomhi paramaṁ santiṁ, 
nibbānaṁ padamaccutaṁ. 
Aho nūna sa bhagavā, 
Ciraṁ tiṭṭheyya cakkhumā; 
Aññātañca vijāneyyuṁ, 
Phuseyyuṁ amataṁ padaṁ. 
Ayaṁ me pacchimā jāti, 
bhavā sabbe samūhatā; 
Sabbāsave pariññāya, 
viharāmi anāsavo. 
Satasahassito kappe, 
yaṁ buddhamabhithomayiṁ; 
Duggatiṁ nābhijānāmi, 
kittanāya idaṁ phalaṁ. 
Kilesā jhāpitā mayhaṁ, 
bhavā sabbe samūhatā; 
Sabbāsavā parikkhīṇā, 
natthi dāni punabbhavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sabbakittiko thero imā gāthāyo abhāsitthāti. 
Sabbakittikattherassāpadānaṁ tatiyaṁ. 

Therāpadāna 
Pilindavacchavagga 
Madhudāyakattheraapadāna 
“Sindhuyā nadiyā tīre, 
sukato assamo mama; 
Tattha vācemahaṁ sisse, 
itihāsaṁ salakkhaṇaṁ. 
Dhammakāmā vinītā te, 
sotukāmā susāsanaṁ; 
Chaḷaṅge pāramippattā, 
sindhukūle vasanti te. 
Uppātagamane ceva, 
lakkhaṇesu ca kovidā; 
Uttamatthaṁ gavesantā, 
vasanti vipine tadā. 
Sumedho nāma sambuddho, 
loke uppajji tāvade; 
Amhākaṁ anukampanto, 
upāgacchi vināyako. 
Upāgataṁ mahāvīraṁ, 
sumedhaṁ lokanāyakaṁ; 
Tiṇasanthārakaṁ katvā, 
lokajeṭṭhassadāsahaṁ. 
Vipināto madhuṁ gayha, 
buddhaseṭṭhassadāsahaṁ; 
Sambuddho paribhuñjitvā, 
idaṁ vacanamabravi. 
‘Yo taṁ adāsi madhuṁ me, 
pasanno sehi pāṇibhi; 
Tamahaṁ kittayissāmi, 
suṇātha mama bhāsato. 
Iminā madhudānena, 
tiṇasanthārakena ca; 
Tiṁsa kappasahassāni, 
devaloke ramissati. 
Tiṁsa kappasahassamhi, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādo, 
oraso dhammanimmito; 
Sabbāsave pariññāya, 
nibbāyissatināsavo’. 
Devalokā idhāgantvā, 
mātukucchiṁ upāgate; 
Madhuvassaṁ pavassittha, 
chādayaṁ madhunā mahiṁ. 
Mayi nikkhantamattamhi, 
kucchiyā ca suduttarā; 
Tatrāpi madhuvassaṁ me, 
vassate niccakālikaṁ. 
Agārā abhinikkhamma, 
pabbajiṁ anagāriyaṁ; 
Lābhī annassa pānassa, 
madhudānassidaṁ phalaṁ. 
Sabbakāmasamiddhohaṁ, 
bhavitvā devamānuse; 
Teneva madhudānena, 
pattomhi āsavakkhayaṁ. 
Vuṭṭhamhi deve caturaṅgule tiṇe, 
Sampupphite dharaṇīruhe sañchanne; 
Suññe ghare maṇḍaparukkhamūlake, 
Vasāmi niccaṁ sukhito anāsavo. 
Majjhe mahante hīne ca, 
bhave sabbe atikkamiṁ; 
Ajja me āsavā khīṇā, 
natthi dāni punabbhavo. 
Tiṁsakappasahassamhi, 
yaṁ dānamadadiṁ tadā; 
Duggatiṁ nābhijānāmi, 
madhudānassidaṁ phalaṁ. 
Kilesā jhāpitā mayhaṁ, 
bhavā sabbe samūhatā; 
Sabbāsavā parikkhīṇā, 
natthi dāni punabbhavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā madhudāyako thero imā gāthāyo abhāsitthāti. 
Madhudāyakattherassāpadānaṁ catutthaṁ. 

Therāpadāna 
Pilindavacchavagga 
5 Padumakūṭāgāriyattheraapadāna 
“Piyadassī nāma bhagavā, 
sayambhū lokanāyako; 
Vivekakāmo sambuddho, 
samādhikusalo muni. 
Vanasaṇḍaṁ samogayha, 
piyadassī mahāmuni; 
Paṁsukūlaṁ pattharitvā, 
nisīdi purisuttamo. 
Migaluddo pure āsiṁ, 
araññe kānane ahaṁ; 
Pasadaṁ migamesanto, 
āhiṇḍāmi ahaṁ tadā. 
Tatthaddasāsiṁ sambuddhaṁ, 
oghatiṇṇamanāsavaṁ; 
Pupphitaṁ sālarājaṁva, 
sataraṁsiṁva uggataṁ. 
Disvānahaṁ devadevaṁ, 
piyadassiṁ mahāyasaṁ; 
Jātassaraṁ samogayha, 
padumaṁ āhariṁ tadā. 
Āharitvāna padumaṁ, 
satapattaṁ manoramaṁ; 
Kūṭāgāraṁ karitvāna, 
chādayiṁ padumenahaṁ. 
Anukampako kāruṇiko, 
piyadassī mahāmuni; 
Sattarattindivaṁ buddho, 
kūṭāgāre vasī jino. 
Purāṇaṁ chaḍḍayitvāna, 
navena chādayiṁ ahaṁ; 
Añjaliṁ paggahetvāna, 
aṭṭhāsiṁ tāvade ahaṁ. 
Vuṭṭhahitvā samādhimhā, 
piyadassī mahāmuni; 
Disaṁ anuvilokento, 
nisīdi lokanāyako. 
Tadā sudassano nāma, 
upaṭṭhāko mahiddhiko; 
Cittamaññāya buddhassa, 
piyadassissa satthuno. 
Asītiyā sahassehi, 
bhikkhūhi parivārito; 
Vanante sukhamāsīnaṁ, 
upesi lokanāyakaṁ. 
Yāvatā vanasaṇḍamhi, 
adhivatthā ca devatā; 
Buddhassa cittamaññāya, 
sabbe sannipatuṁ tadā. 
Samāgatesu yakkhesu, 
kumbhaṇḍe saharakkhase; 
Bhikkhusaṅghe ca sampatte, 
gāthā pabyāharī jino. 
‘Yo maṁ sattāhaṁ pūjesi, 
āvāsañca akāsi me; 
Tamahaṁ kittayissāmi, 
suṇātha mama bhāsato. 
Sududdasaṁ sunipuṇaṁ, 
gambhīraṁ suppakāsitaṁ; 
Ñāṇena kittayissāmi, 
suṇātha mama bhāsato. 
Catuddasāni kappāni, 
devarajjaṁ karissati; 
Kūṭāgāraṁ mahantassa, 
padmapupphehi chāditaṁ. 
Ākāse dhārayissati, 
Pupphakammassidaṁ phalaṁ; 
Catubbīse kappasate, 
Vokiṇṇaṁ saṁsarissati. 
Tattha pupphamayaṁ byamhaṁ, 
Ākāse dhārayissati; 
Yathā padumapattamhi, 
Toyaṁ na upalimpati. 
Tathevīmassa ñāṇamhi, 
kilesā nopalimpare; 
Manasā vinivaṭṭetvā, 
pañca nīvaraṇe ayaṁ. 
Cittaṁ janetvā nekkhamme, 
agārā pabbajissati; 
Tato pupphamaye byamhe, 
dhārente nikkhamissati. 
Rukkhamūle vasantassa, 
Nipakassa satīmato; 
Tattha pupphamayaṁ byamhaṁ, 
Matthake dhārayissati. 
Cīvaraṁ piṇḍapātañca, 
paccayaṁ sayanāsanaṁ; 
Datvāna bhikkhusaṅghassa, 
nibbāyissatināsavo’. 
Kūṭāgārena caratā, 
pabbajjaṁ abhinikkhamiṁ; 
Rukkhamūle vasantampi, 
kūṭāgāraṁ dharīyati. 
Cīvare piṇḍapāte ca, 
cetanā me na vijjati; 
Puññakammena saṁyutto, 
labhāmi pariniṭṭhitaṁ. 
Gaṇanāto asaṅkheyyā, 
kappakoṭī bahū mama; 
Rittakā te atikkantā, 
pamuttā lokanāyakā. 
Aṭṭhārase kappasate, 
piyadassī vināyako; 
Tamahaṁ payirupāsitvā, 
imaṁ yoniṁ upāgato. 
Idha passāmi sambuddhaṁ, 
anomaṁ nāma cakkhumaṁ; 
Tamahaṁ upagantvāna, 
pabbajiṁ anagāriyaṁ. 
Dukkhassantakaro buddho, 
maggaṁ me desayī jino; 
Tassa dhammaṁ suṇitvāna, 
pattomhi acalaṁ padaṁ. 
Tosayitvāna sambuddhaṁ, 
gotamaṁ sakyapuṅgavaṁ; 
Sabbāsave pariññāya, 
viharāmi anāsavo. 
Aṭṭhārase kappasate, 
yaṁ buddhamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Kilesā jhāpitā mayhaṁ, 
bhavā sabbe samūhatā; 
Sabbāsavā parikkhīṇā, 
natthi dāni punabbhavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā padumakūṭāgāriyo thero imā gāthāyo abhāsitthāti. 
Padumakūṭāgāriyattherassāpadānaṁ pañcamaṁ. 

Therāpadāna 
Pilindavacchavagga 
6 Bākulattheraapadāna 
“Himavantassāvidūre, 
sobhito nāma pabbato; 
Assamo sukato mayhaṁ, 
sakasissehi māpito. 
Maṇḍapā ca bahū tattha, 
pupphitā sinduvārakā; 
Kapitthā ca bahū tattha, 
pupphitā jīvajīvakā. 
Nigguṇḍiyo bahū tattha, 
badarāmalakāni ca; 
Phārusakā alābū ca, 
puṇḍarīkā ca pupphitā. 
Āḷakā beluvā tattha, 
kadalī mātuluṅgakā; 
Mahānāmā bahū tattha, 
ajjunā ca piyaṅgukā. 
Kosambā saḷalā nimbā, 
nigrodhā ca kapitthanā; 
Ediso assamo mayhaṁ, 
sasissohaṁ tahiṁ vasiṁ. 
Anomadassī bhagavā, 
sayambhū lokanāyako; 
Gavesaṁ paṭisallānaṁ, 
mamassamamupāgami. 
Upetamhi mahāvīre, 
anomadassimahāyase; 
Khaṇena lokanāthassa, 
vātābādho samuṭṭhahi. 
Vicaranto araññamhi, 
addasaṁ lokanāyakaṁ; 
Upagantvāna sambuddhaṁ, 
cakkhumantaṁ mahāyasaṁ. 
Iriyañcāpi disvāna, 
upalakkhesahaṁ tadā; 
Asaṁsayañhi buddhassa, 
byādhi no udapajjatha. 
Khippaṁ assamamāgañchiṁ, 
mama sissāna santike; 
Bhesajjaṁ kattukāmohaṁ, 
sisse āmantayiṁ tadā. 
Paṭissuṇitvāna me vākyaṁ, 
sissā sabbe sagāravā; 
Ekajjhaṁ sannipatiṁsu, 
satthugāravatā mama. 
Khippaṁ pabbatamāruyha, 
sabbosadhamahāsahaṁ; 
Pānīyayogaṁ katvāna, 
buddhaseṭṭhassadāsahaṁ. 
Paribhutte mahāvīre, 
sabbaññulokanāyake; 
Khippaṁ vāto vūpasami, 
sugatassa mahesino. 
Passaddhaṁ darathaṁ disvā, 
anomadassī mahāyaso; 
Sakāsane nisīditvā, 
imā gāthā abhāsatha. 
‘Yo me pādāsi bhesajjaṁ, 
byādhiñca samayī mama; 
Tamahaṁ kittayissāmi, 
suṇātha mama bhāsato. 
Kappasatasahassāni, 
devaloke ramissati; 
Vādite tūriye tattha, 
modissati sadā ayaṁ. 
Manussalokamāgantvā, 
sukkamūlena codito; 
Sahassakkhattuṁ rājā ca, 
cakkavattī bhavissati. 
Pañcapaññāsakappamhi, 
anomo nāma khattiyo; 
Cāturanto vijitāvī, 
jambumaṇḍassa issaro. 
Sattaratanasampanno, 
cakkavattī mahabbalo; 
Tāvatiṁsepi khobhetvā, 
issaraṁ kārayissati. 
Devabhūto manusso vā, 
appābādho bhavissati; 
Pariggahaṁ vivajjetvā, 
byādhiṁ loke tarissati. 
Apparimeyye ito kappe, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādo, 
oraso dhammanimmito; 
Sabbāsave pariññāya, 
nibbāyissatināsavo. 
Kilese jhāpayitvāna, 
taṇhāsotaṁ tarissati; 
Bākulo nāma nāmena, 
hessati satthu sāvako. 
Idaṁ sabbaṁ abhiññāya, 
gotamo sakyapuṅgavo; 
Bhikkhusaṅghe nisīditvā, 
etadagge ṭhapessati’. 
Anomadassī bhagavā, 
sayambhū lokanāyako; 
Vivekānuvilokento, 
mamassamamupāgami. 
Upāgataṁ mahāvīraṁ, 
sabbaññuṁ lokanāyakaṁ; 
Sabbosadhena tappesiṁ, 
pasanno sehi pāṇibhi. 
Tassa me sukataṁ kammaṁ, 
sukhette bījasampadā; 
Khepetuṁ neva sakkomi, 
tadā hi sukataṁ mama. 
Lābhā mama suladdhaṁ me, 
yohaṁ addakkhi nāyakaṁ; 
Tena kammāvasesena, 
pattomhi acalaṁ padaṁ. 
Sabbametaṁ abhiññāya, 
gotamo sakyapuṅgavo; 
Bhikkhusaṅghe nisīditvā, 
etadagge ṭhapesi maṁ. 
Aparimeyye ito kappe, 
yaṁ kammamakariṁ tadā; 
Duggatiṁ nābhijānāmi, 
bhesajjassa idaṁ phalaṁ. 
Kilesā jhāpitā mayhaṁ, 
bhavā sabbe samūhatā; 
Sabbāsavā parikkhīṇā, 
natthi dāni punabbhavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā bākulo thero imā gāthāyo abhāsitthāti. 
Bākulattherassāpadānaṁ chaṭṭhaṁ. 

Therāpadāna 
Pilindavacchavagga 
Girimānandattheraapadāna 
“Bhariyā me kālaṅkatā, 
putto sīvathikaṁ gato; 
Mātā pitā matā bhātā, 
ekacitamhi ḍayhare. 
Tena sokena santatto, 
kiso paṇḍu ahosahaṁ; 
Cittakkhepo ca me āsi, 
tena sokena aṭṭito. 
Sokasallaparetohaṁ, 
vanantamupasaṅkamiṁ; 
Pavattaphalaṁ bhuñjitvā, 
rukkhamūle vasāmahaṁ. 
Sumedho nāma sambuddho, 
dukkhassantakaro jino; 
Mamuddharitukāmo so, 
āgañchi mama santikaṁ. 
Padasaddaṁ suṇitvāna, 
sumedhassa mahesino; 
Paggahetvānahaṁ sīsaṁ, 
ullokesiṁ mahāmuniṁ. 
Upāgate mahāvīre, 
pīti me udapajjatha; 
Tadāsimekaggamano, 
disvā taṁ lokanāyakaṁ. 
Satiṁ paṭilabhitvāna, 
paṇṇamuṭṭhimadāsahaṁ; 
Nisīdi bhagavā tattha, 
anukampāya cakkhumā. 
Nisajja tattha bhagavā, 
sumedho lokanāyako; 
Dhammaṁ me kathayī buddho, 
sokasallavinodanaṁ. 
‘Anavhitā tato āguṁ, 
ananuññātā ito gatā; 
Yathāgatā tathā gatā, 
tattha kā paridevanā. 
Yathāpi pathikā sattā, 
vassamānāya vuṭṭhiyā; 
Sabhaṇḍā upagacchanti, 
vassassāpatanāya te. 
Vasse ca te oramite, 
sampayanti yadicchakaṁ; 
Evaṁ mātā pitā tuyhaṁ, 
tattha kā paridevanā. 
Āgantukā pāhunakā, 
caliteritakampitā; 
Evaṁ mātā pitā tuyhaṁ, 
tattha kā paridevanā. 
Yathāpi urago jiṇṇaṁ, 
hitvā gacchati saṁ tacaṁ; 
Evaṁ mātā pitā tuyhaṁ, 
saṁ tanuṁ idha hīyare’. 
Buddhassa giramaññāya, 
sokasallaṁ vivajjayiṁ; 
Pāmojjaṁ janayitvāna, 
buddhaseṭṭhaṁ avandahaṁ. 
Vanditvāna mahānāgaṁ, 
Pūjayiṁ girimañjariṁ; 
Dibbagandhaṁ sampavantaṁ, 
Sumedhaṁ lokanāyakaṁ. 
Pūjayitvāna sambuddhaṁ, 
sire katvāna añjaliṁ; 
Anussaraṁ guṇaggāni, 
santhaviṁ lokanāyakaṁ. 
‘Nittiṇṇosi mahāvīra, 
sabbaññu lokanāyaka; 
Sabbe satte uddharasi, 
ñāṇena tvaṁ mahāmune. 
Vimatiṁ dveḷhakaṁ vāpi, 
sañchindasi mahāmune; 
Paṭipādesi me maggaṁ, 
tava ñāṇena cakkhuma. 
Arahā vasipattā ca, 
chaḷabhiññā mahiddhikā; 
Antalikkhacarā dhīrā, 
parivārenti tāvade. 
Paṭipannā ca sekhā ca, 
phalaṭṭhā santi sāvakā; 
Sūrodayeva padumā, 
pupphanti tava sāvakā. 
Mahāsamuddovakkhobho, 
atulopi duruttaro; 
Evaṁ ñāṇena sampanno, 
appameyyosi cakkhuma’. 
Vanditvāhaṁ lokajinaṁ, 
cakkhumantaṁ mahāyasaṁ; 
Puthu disā namassanto, 
paṭikuṭiko agañchahaṁ. 
Devalokā cavitvāna, 
sampajāno patissato; 
Okkamiṁ mātuyā kucchiṁ, 
sandhāvanto bhavābhave. 
Agārā abhinikkhamma, 
pabbajiṁ anagāriyaṁ; 
Ātāpī nipako jhāyī, 
paṭisallānagocaro. 
Padhānaṁ padahitvāna, 
tosayitvā mahāmuniṁ; 
Candovabbhaghanā mutto, 
vicarāmi ahaṁ sadā. 
Vivekamanuyuttomhi, 
upasanto nirūpadhi; 
Sabbāsave pariññāya, 
viharāmi anāsavo. 
Tiṁsakappasahassamhi, 
yaṁ buddhamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Kilesā jhāpitā mayhaṁ, 
bhavā sabbe samūhatā; 
Sabbāsavā parikkhīṇā, 
natthi dāni punabbhavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā girimānando thero imā gāthāyo abhāsitthāti. 
Girimānandattherassāpadānaṁ sattamaṁ. 

Therāpadāna 
Kuṇḍadhānavagga 
Lasuṇadāyakattheraapadāna 
“Himavantassāvidūre, 
tāpaso āsahaṁ tadā; 
Lasuṇaṁ upajīvāmi, 
lasuṇaṁ mayhabhojanaṁ. 
Khāriyo pūrayitvāna, 
saṅghārāmamagacchahaṁ; 
Haṭṭho haṭṭhena cittena, 
saṅghassa lasuṇaṁ adaṁ. 
Vipassissa naraggassa, 
sāsane niratassahaṁ; 
Saṅghassa lasuṇaṁ datvā, 
kappaṁ saggamhi modahaṁ. 
Ekanavutito kappe, 
lasuṇaṁ yamadaṁ tadā; 
Duggatiṁ nābhijānāmi, 
lasuṇassa idaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā lasuṇadāyako thero imā gāthāyo abhāsitthāti. 
Lasuṇadāyakattherassāpadānaṁ sattamaṁ. 

Therāpadāna 
Buddhavagga 
Sāriputtattheraapadāna 
Atha therāpadānaṁ suṇātha—
“Himavantassa avidūre, 
lambako nāma pabbato; 
Assamo sukato mayhaṁ, 
paṇṇasālā sumāpitā. 
Uttānakūlā nadikā, 
supatitthā manoramā; 
Susuddhapulinākiṇṇā, 
avidūre mamassamaṁ. 
Asakkharā apabbhārā, 
sādu appaṭigandhikā; 
Sandatī nadikā tattha, 
sobhayantā mamassamaṁ. 
Kumbhīlā makarā cettha, 
susumārā ca kacchapā; 
Caranti nadiyā tattha, 
sobhayantā mamassamaṁ. 
Pāṭhīnā pāvusā macchā, 
balajā muñjarohitā; 
Vaggaḷā papatāyantā, 
sobhayanti mamassamaṁ. 
Ubho kūlesu nadiyā, 
pupphino phalino dumā; 
Ubhato abhilambantā, 
sobhayanti mamassamaṁ. 
Ambā sālā ca tilakā, 
pāṭalī sinduvārakā; 
Dibbagandhā sampavanti, 
pupphitā mama assame. 
Campakā saḷalā nīpā, 
nāgapunnāgaketakā; 
Dibbagandhā sampavanti, 
pupphitā mama assame. 
Atimuttā asokā ca, 
bhaginīmālā ca pupphitā; 
Aṅkolā bimbijālā ca, 
pupphitā mama assame. 
Ketakā kandali ceva, 
godhukā tiṇasūlikā; 
Dibbagandhaṁ sampavantā, 
sobhayanti mamassamaṁ. 
Kaṇikārā kaṇṇikā ca, 
asanā ajjunā bahū; 
Dibbagandhaṁ sampavantā, 
sobhayanti mamassamaṁ. 
Punnāgā giripunnāgā, 
koviḷārā ca pupphitā; 
Dibbagandhaṁ sampavantā, 
sobhayanti mamassamaṁ. 
Uddhālakā ca kuṭajā, 
kadambā vakulā bahū; 
Dibbagandhaṁ sampavantā, 
sobhayanti mamassamaṁ. 
Āḷakā isimuggā ca, 
kadalimātuluṅgiyo; 
Gandhodakena saṁvaḍḍhā, 
phalāni dhārayanti te. 
Aññe pupphanti padumā, 
aññe jāyanti kesarī; 
Aññe opupphā padumā, 
pupphitā taḷāke tadā. 
Gabbhaṁ gaṇhanti padumā, 
niddhāvanti mulāḷiyo; 
Siṅghāṭipattamākiṇṇā, 
sobhanti taḷāke tadā. 
Nayitā ambagandhī ca, 
uttalī bandhujīvakā; 
Dibbagandhā sampavanti, 
pupphitā taḷāke tadā. 
Pāṭhīnā pāvusā macchā, 
balajā muñjarohitā; 
Saṅgulā maggurā ceva, 
vasanti taḷāke tadā. 
Kumbhīlā susumārā ca, 
tantigāhā ca rakkhasā; 
Oguhā ajagarā ca, 
vasanti taḷāke tadā. 
Pārevatā ravihaṁsā, 
cakkavākā nadīcarā; 
Kokilā sukasāḷikā, 
upajīvanti taṁ saraṁ. 
Kukkutthakā kuḷīrakā, 
vane pokkharasātakā; 
Dindibhā suvapotā ca, 
upajīvanti taṁ saraṁ. 
Haṁsā koñcā mayūrā ca, 
kokilā tambacūḷakā; 
Pammakā jīvaṁjīvā ca, 
upajīvanti taṁ saraṁ. 
Kosikā poṭṭhasīsā ca, 
kurarā senakā bahū; 
Mahākāḷā ca sakuṇā, 
upajīvanti taṁ saraṁ. 
Pasadā ca varāhā ca, 
camarā gaṇḍakā bahū; 
Rohiccā sukapotā ca, 
upajīvanti taṁ saraṁ. 
Sīhabyagghā ca dīpī ca, 
acchakokataracchakā; 
Tidhā pabhinnamātaṅgā, 
upajīvanti taṁ saraṁ. 
Kinnarā vānarā ceva, 
athopi vanakammikā; 
Cetā ca luddakā ceva, 
upajīvanti taṁ saraṁ. 
Tindukāni piyālāni, 
madhuke kāsumāriyo; 
Dhuvaṁ phalāni dhārenti, 
avidūre mamassamaṁ. 
Kosambā saḷalā nimbā, 
sāduphalasamāyutā; 
Dhuvaṁ phalāni dhārenti, 
avidūre mamassamaṁ. 
Harītakā āmalakā, 
ambajambuvibhītakā; 
Kolā bhallātakā billā, 
phalāni dhārayanti te. 
Āluvā ca kaḷambā ca, 
biḷālītakkaḷāni ca; 
Jīvakā sutakā ceva, 
bahukā mama assame. 
Assamassāvidūramhi, 
taḷākāsuṁ sunimmitā; 
Acchodakā sītajalā, 
supatitthā manoramā. 
Padumuppalasañchannā, 
puṇḍarīkasamāyutā; 
Mandālakehi sañchannā, 
dibbagandho pavāyati. 
Evaṁ sabbaṅgasampanne, 
pupphite phalite vane; 
Sukate assame ramme, 
viharāmi ahaṁ tadā. 
Sīlavā vatasampanno, 
jhāyī jhānarato sadā; 
Pañcābhiññābalappatto, 
suruci nāma tāpaso. 
Catuvīsasahassāni, 
sissā mayhaṁ upaṭṭhahuṁ; 
Sabbeva brāhmaṇā ete, 
jātimanto yasassino. 
Lakkhaṇe itihāse ca, 
sanighaṇṭusakeṭubhe; 
Padakā veyyākaraṇā, 
sadhamme pāramiṁ gatā. 
Uppātesu nimittesu, 
lakkhaṇesu ca kovidā; 
Pathabyā bhūmantalikkhe, 
mama sissā susikkhitā. 
Appicchā nipakā ete, 
appāhārā alolupā; 
Lābhālābhena santuṭṭhā, 
parivārenti maṁ sadā. 
Jhāyī jhānaratā dhīrā, 
santacittā samāhitā; 
Ākiñcaññaṁ patthayantā, 
parivārenti maṁ sadā. 
Abhiññāpāramippattā, 
pettike gocare ratā; 
Antalikkhacarā dhīrā, 
parivārenti maṁ sadā. 
Saṁvutā chasu dvāresu, 
anejā rakkhitindriyā; 
Asaṁsaṭṭhā ca te dhīrā, 
mama sissā durāsadā. 
Pallaṅkena nisajjāya, 
ṭhānacaṅkamanena ca; 
Vītināmenti te rattiṁ, 
mama sissā durāsadā. 
Rajanīye na rajjanti, 
dussanīye na dussare; 
Mohanīye na muyhanti, 
mama sissā durāsadā. 
Iddhiṁ vīmaṁsamānā te, 
vattanti niccakālikaṁ; 
Pathaviṁ te pakampenti, 
sārambhena durāsadā. 
Kīḷamānā ca te sissā, 
kīḷanti jhānakīḷitaṁ; 
Jambuto phalamānenti, 
mama sissā durāsadā. 
Aññe gacchanti goyānaṁ, 
aññe pubbavidehakaṁ; 
Aññe ca uttarakuruṁ, 
esanāya durāsadā. 
Purato pesenti khāriṁ, 
pacchato ca vajanti te; 
Catuvīsasahassehi, 
chāditaṁ hoti ambaraṁ. 
Aggipākī anaggī ca, 
dantodukkhalikāpi ca; 
Asmena koṭṭitā keci, 
pavattaphalabhojanā. 
Udakorohaṇā keci, 
sāyaṁ pāto sucīratā; 
Toyābhisecanakarā, 
mama sissā durāsadā. 
Parūḷhakacchanakhalomā, 
paṅkadantā rajassirā; 
Gandhitā sīlagandhena, 
mama sissā durāsadā. 
Pātova sannipatitvā, 
jaṭilā uggatāpanā; 
Lābhālābhaṁ pakittetvā, 
gacchanti ambare tadā. 
Etesaṁ pakkamantānaṁ, 
mahāsaddo pavattati; 
Ajinacammasaddena, 
muditā honti devatā. 
Disodisaṁ pakkamanti, 
antalikkhacarā isī; 
Sake balenupatthaddhā, 
te gacchanti yadicchakaṁ. 
Pathavīkampakā ete, 
sabbeva nabhacārino; 
Uggatejā duppasahā, 
sāgarova akhobhiyā. 
Ṭhānacaṅkamino keci, 
keci nesajjikā isī; 
Pavattabhojanā keci, 
mama sissā durāsadā. 
Mettāvihārino ete, 
hitesī sabbapāṇinaṁ; 
Anattukkaṁsakā sabbe, 
na te vambhenti kassaci. 
Sīharājāvasambhītā, 
gajarājāva thāmavā; 
Durāsadā byagghāriva, 
āgacchanti mamantike. 
Vijjādharā devatā ca, 
nāgagandhabbarakkhasā; 
Kumbhaṇḍā dānavā garuḷā, 
upajīvanti taṁ saraṁ. 
Te jaṭākhāribharitā, 
ajinuttaravāsanā; 
Antalikkhacarā sabbe, 
upajīvanti taṁ saraṁ. 
Sadānucchavikā ete, 
aññamaññaṁ sagāravā; 
Catubbīsasahassānaṁ, 
khipitasaddo na vijjati. 
Pāde pādaṁ nikkhipantā, 
appasaddā susaṁvutā; 
Upasaṅkamma sabbeva, 
sirasā vandare mamaṁ. 
Tehi sissehi parivuto, 
santehi ca tapassibhi; 
Vasāmi assame tattha, 
jhāyī jhānarato ahaṁ. 
Isīnaṁ sīlagandhena, 
pupphagandhena cūbhayaṁ; 
Phalīnaṁ phalagandhena, 
gandhito hoti assamo. 
Rattindivaṁ na jānāmi, 
arati me na vijjati; 
Sake sisse ovadanto, 
bhiyyo hāsaṁ labhāmahaṁ. 
Pupphānaṁ pupphamānānaṁ, 
phalānañca vipaccataṁ; 
Dibbagandhā pavāyanti, 
sobhayantā mamassamaṁ. 
Samādhimhā vuṭṭhahitvā, 
ātāpī nipako ahaṁ; 
Khāribhāraṁ gahetvāna, 
vanaṁ ajjhogahiṁ ahaṁ. 
Uppāte supine cāpi, 
Lakkhaṇesu susikkhito; 
Pavattamānaṁ mantapadaṁ, 
Dhārayāmi ahaṁ tadā. 
Anomadassī bhagavā, 
lokajeṭṭho narāsabho; 
Vivekakāmo sambuddho, 
himavantamupāgami. 
Ajjhogāhetvā himavantaṁ, 
aggo kāruṇiko muni; 
Pallaṅkaṁ ābhujitvāna, 
nisīdi purisuttamo. 
Tamaddasāhaṁ sambuddhaṁ, 
sappabhāsaṁ manoramaṁ; 
Indīvaraṁva jalitaṁ, 
ādittaṁva hutāsanaṁ. 
Jalantaṁ dīparukkhaṁva, 
vijjutaṁ gagane yathā; 
Suphullaṁ sālarājaṁva, 
addasaṁ lokanāyakaṁ. 
Ayaṁ nāgo mahāvīro, 
dukkhassantakaro muni; 
Imaṁ dassanamāgamma, 
sabbadukkhā pamuccare. 
Disvānāhaṁ devadevaṁ, 
lakkhaṇaṁ upadhārayiṁ; 
Buddho nu kho na vā buddho, 
handa passāmi cakkhumaṁ. 
Sahassārāni cakkāni, 
dissanti caraṇuttame; 
Lakkhaṇānissa disvāna, 
niṭṭhaṁ gacchiṁ tathāgate. 
Sammajjaniṁ gahetvāna, 
sammajjitvānahaṁ tadā; 
Atha pupphe samānetvā, 
buddhaseṭṭhaṁ apūjayiṁ. 
Pūjayitvāna taṁ buddhaṁ, 
oghatiṇṇamanāsavaṁ; 
Ekaṁsaṁ ajinaṁ katvā, 
namassiṁ lokanāyakaṁ. 
Yena ñāṇena sambuddho, 
viharati anāsavo; 
Taṁ ñāṇaṁ kittayissāmi, 
suṇātha mama bhāsato. 
‘Samuddharasimaṁ lokaṁ, 
sayambhū amitodaya; 
Tava dassanamāgamma, 
kaṅkhāsotaṁ taranti te. 
Tuvaṁ satthā ca ketu ca, 
dhajo yūpo ca pāṇinaṁ; 
Parāyaṇo patiṭṭhā ca, 
dīpo ca dvipaduttamo. 
Sakkā samudde udakaṁ, 
pametuṁ āḷhakena vā; 
Na tveva tava sabbaññu, 
ñāṇaṁ sakkā pametave. 
Dhāretuṁ pathaviṁ sakkā, 
ṭhapetvā tulamaṇḍale; 
Na tveva tava sabbaññu, 
ñāṇaṁ sakkā dharetave. 
Ākāso minituṁ sakkā, 
rajjuyā aṅgulena vā; 
Na tveva tava sabbaññu, 
ñāṇaṁ sakkā pametave. 
Mahāsamudde udakaṁ, 
pathavī cākhilājaṭaṁ; 
Buddhañāṇaṁ upādāya, 
upamāto na yujjare. 
Sadevakassa lokassa, 
cittaṁ yesaṁ pavattati; 
Antojālagatā ete, 
tava ñāṇamhi cakkhuma. 
Yena ñāṇena pattosi, 
kevalaṁ bodhimuttamaṁ; 
Tena ñāṇena sabbaññu, 
maddasī paratitthiye’. 
Imā gāthā thavitvāna, 
suruci nāma tāpaso; 
Ajinaṁ pattharitvāna, 
pathaviyaṁ nisīdi so. 
‘Cullāsītisahassāni, 
ajjhogāḷho mahaṇṇave; 
Accuggato tāvadeva, 
girirājā pavuccati. 
Tāva accuggato neru, 
āyato vitthato ca so; 
Cuṇṇito aṇubhedena, 
koṭisatasahassaso. 
Lakkhe ṭhapiyamānamhi, 
parikkhayamagacchatha; 
Na tveva tava sabbaññu, 
ñāṇaṁ sakkā pametave. 
Sukhumacchikena jālena, 
udakaṁ yo parikkhipe; 
Ye keci udake pāṇā, 
antojālagatā siyuṁ. 
Tatheva hi mahāvīra, 
ye keci puthutitthiyā; 
Diṭṭhigahanapakkhandā, 
parāmāsena mohitā. 
Tava suddhena ñāṇena, 
anāvaraṇadassinā; 
Antojālagatā ete, 
ñāṇaṁ te nātivattare’. 
Bhagavā tamhi samaye, 
anomadassī mahāyaso; 
Vuṭṭhahitvā samādhimhā, 
disaṁ olokayī jino. 
Anomadassimunino, 
Nisabho nāma sāvako; 
Parivuto satasahassehi, 
Santacittehi tādibhi. 
Khīṇāsavehi suddhehi, 
chaḷabhiññehi jhāyibhi; 
Cittamaññāya buddhassa, 
upesi lokanāyakaṁ. 
Antalikkhe ṭhitā tattha, 
padakkhiṇamakaṁsu te; 
Namassantā pañjalikā, 
otaruṁ buddhasantike. 
Anomadassī bhagavā, 
lokajeṭṭho narāsabho; 
Bhikkhusaṅghe nisīditvā, 
sītaṁ pātukarī jino. 
Varuṇo nāmupaṭṭhāko, 
anomadassissa satthuno; 
Ekaṁsaṁ cīvaraṁ katvā, 
apucchi lokanāyakaṁ. 
‘Ko nu kho bhagavā hetu, 
sitakammassa satthuno; 
Na hi buddhā ahetūhi, 
sitaṁ pātukaronti te’. 
Anomadassī bhagavā, 
lokajeṭṭho narāsabho; 
Bhikkhumajjhe nisīditvā, 
imaṁ gāthaṁ abhāsatha. 
‘Yo maṁ pupphena pūjesi, 
ñāṇañcāpi anutthavi; 
Tamahaṁ kittayissāmi, 
suṇotha mama bhāsato’. 
Buddhassa giramaññāya, 
sabbe devā samāgatā; 
Saddhammaṁ sotukāmā te, 
sambuddhamupasaṅkamuṁ. 
Dasasu lokadhātūsu, 
devakāyā mahiddhikā; 
Saddhammaṁ sotukāmā te, 
sambuddhamupasaṅkamuṁ. 
‘Hatthī assā rathā pattī, 
senā ca caturaṅginī; 
Parivāressantimaṁ niccaṁ, 
buddhapūjāyidaṁ phalaṁ. 
Saṭṭhitūriyasahassāni, 
bheriyo samalaṅkatā; 
Upaṭṭhissantimaṁ niccaṁ, 
buddhapūjāyidaṁ phalaṁ. 
Soḷasitthisahassāni, 
nāriyo samalaṅkatā; 
Vicittavatthābharaṇā, 
āmuttamaṇikuṇḍalā. 
Aḷārapamhā hasulā, 
susaññā tanumajjhimā; 
Parivāressantimaṁ niccaṁ, 
buddhapūjāyidaṁ phalaṁ. 
Kappasatasahassāni, 
devaloke ramissati; 
Sahassakkhattuṁ cakkavattī, 
rājā raṭṭhe bhavissati. 
Sahassakkhattuṁ devindo, 
devarajjaṁ karissati; 
Padesarajjaṁ vipulaṁ, 
gaṇanāto asaṅkhiyaṁ. 
Pacchime bhavasampatte, 
manussattaṁ gamissati; 
Brāhmaṇī sāriyā nāma, 
dhārayissati kucchinā. 
Mātuyā nāmagottena, 
paññāyissatiyaṁ naro; 
Sāriputtoti nāmena, 
tikkhapañño bhavissati. 
Asītikoṭī chaḍḍetvā, 
pabbajissatikiñcano; 
Gavesanto santipadaṁ, 
carissati mahiṁ imaṁ. 
Apparimeyye ito kappe, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādo, 
oraso dhammanimmito; 
Sāriputtoti nāmena, 
hessati aggasāvako. 
Ayaṁ bhāgīrathī gaṅgā, 
himavantā pabhāvitā; 
Mahāsamuddamappeti, 
tappayantī mahodadhiṁ. 
Tathevāyaṁ sāriputto, 
sake tīsu visārado; 
Paññāya pāramiṁ gantvā, 
tappayissati pāṇine. 
Himavantamupādāya, 
sāgarañca mahodadhiṁ; 
Etthantare yaṁ pulinaṁ, 
gaṇanāto asaṅkhiyaṁ. 
Tampi sakkā asesena, 
saṅkhātuṁ gaṇanā yathā; 
Na tveva sāriputtassa, 
paññāyanto bhavissati. 
Lakkhe ṭhapiyamānamhi, 
khīye gaṅgāya vālukā; 
Na tveva sāriputtassa, 
paññāyanto bhavissati. 
Mahāsamudde ūmiyo, 
gaṇanāto asaṅkhiyā; 
Tatheva sāriputtassa, 
paññāyanto na hessati. 
Ārādhayitvā sambuddhaṁ, 
gotamaṁ sakyapuṅgavaṁ; 
Paññāya pāramiṁ gantvā, 
hessati aggasāvako. 
Pavattitaṁ dhammacakkaṁ, 
sakyaputtena tādinā; 
Anuvattessati sammā, 
vassento dhammavuṭṭhiyo. 
Sabbametaṁ abhiññāya, 
gotamo sakyapuṅgavo; 
Bhikkhusaṅghe nisīditvā, 
aggaṭṭhāne ṭhapessati’. 
Aho me sukataṁ kammaṁ, 
anomadassissa satthuno; 
Yassāhaṁ kāraṁ katvāna, 
sabbattha pāramiṁ gato. 
Aparimeyye kataṁ kammaṁ, 
phalaṁ dassesi me idha; 
Sumutto saravegova, 
kilese jhāpayiṁ ahaṁ. 
Asaṅkhataṁ gavesanto, 
nibbānaṁ acalaṁ padaṁ; 
Vicinaṁ titthiye sabbe, 
esāhaṁ saṁsariṁ bhave. 
Yathāpi byādhito poso, 
pariyeseyya osadhaṁ; 
Vicineyya vanaṁ sabbaṁ, 
byādhito parimuttiyā. 
Asaṅkhataṁ gavesanto, 
nibbānaṁ amataṁ padaṁ; 
Abbokiṇṇaṁ pañcasataṁ, 
pabbajiṁ isipabbajaṁ. 
Jaṭābhārena bharito, 
ajinuttaranivāsano; 
Abhiññāpāramiṁ gantvā, 
brahmalokaṁ agacchihaṁ. 
Natthi bāhirake suddhi, 
ṭhapetvā jinasāsanaṁ; 
Ye keci buddhimā sattā, 
sujjhanti jinasāsane. 
Attakāramayaṁ etaṁ, 
nayidaṁ itihītihaṁ; 
Asaṅkhataṁ gavesanto, 
kutitthe sañcariṁ ahaṁ. 
Yathā sāratthiko poso, 
kadaliṁ chetvāna phālaye; 
Na tattha sāraṁ vindeyya, 
sārena rittako hi so. 
Tatheva titthiyā loke, 
nānādiṭṭhī bahujjanā; 
Asaṅkhatena rittāse, 
sārena kadalī yathā. 
Pacchime bhavasampatte, 
brahmabandhu ahosahaṁ; 
Mahābhogaṁ chaḍḍetvāna, 
pabbajiṁ anagāriyaṁ”. 
Paṭhamabhāṇavāraṁ. 
“Ajjhāyako mantadharo, 
tiṇṇaṁ vedāna pāragū; 
Brāhmaṇo sañcayo nāma, 
tassa mūle vasāmahaṁ. 
Sāvako te mahāvīra, 
assaji nāma brāhmaṇo; 
Durāsado uggatejo, 
piṇḍāya caratī tadā. 
Tamaddasāsiṁ sappaññaṁ, 
muniṁ mone samāhitaṁ; 
Santacittaṁ mahānāgaṁ, 
suphullaṁ padumaṁ yathā. 
Disvā me cittamuppajji, 
sudantaṁ suddhamānasaṁ; 
Usabhaṁ pavaraṁ vīraṁ, 
arahāyaṁ bhavissati. 
Pāsādiko iriyati, 
abhirūpo susaṁvuto; 
Uttame damathe danto, 
amatadassī bhavissati. 
Yannūnāhaṁ uttamatthaṁ, 
puccheyyaṁ tuṭṭhamānasaṁ; 
So me puṭṭho kathessati, 
paṭipucchāmahaṁ tadā. 
Piṇḍapātaṁ carantassa, 
pacchato agamāsahaṁ; 
Okāsaṁ paṭimānento, 
pucchituṁ amataṁ padaṁ. 
Vīthintare anuppattaṁ, 
upagantvāna pucchahaṁ; 
‘Kathaṁ gottosi tvaṁ vīra, 
kassa sissosi mārisa’. 
So me puṭṭho viyākāsi, 
asambhītova kesarī; 
‘Buddho loke samuppanno, 
tassa sissomhi āvuso’. 
‘Kīdisaṁ te mahāvīra, 
anujāta mahāyasa; 
Buddhassa sāsanaṁ dhammaṁ, 
sādhu me kathayassu bho’. 
So me puṭṭho kathī sabbaṁ, 
gambhīraṁ nipuṇaṁ padaṁ; 
Taṇhāsallassa hantāraṁ, 
sabbadukkhāpanūdanaṁ. 
‘Ye dhammā hetuppabhavā, 
Tesaṁ hetuṁ tathāgato āha; 
Tesañca yo nirodho, 
Evaṁvādī mahāsamaṇo’. 
Sohaṁ vissajjite pañhe, 
paṭhamaṁ phalamajjhagaṁ; 
Virajo vimalo āsiṁ, 
sutvāna jinasāsanaṁ. 
Sutvāna munino vākyaṁ, 
passitvā dhammamuttamaṁ; 
Pariyogāḷhasaddhammo, 
imaṁ gāthamabhāsahaṁ. 
‘Eseva dhammo yadi tāvadeva, 
Paccabyatha padamasokaṁ; 
Adiṭṭhaṁ abbhatītaṁ, 
Bahukehi kappanahutehi’. 
Svāhaṁ dhammaṁ gavesanto, 
kutitthe sañcariṁ ahaṁ; 
So me attho anuppatto, 
kālo me nappamajjituṁ. 
Tositohaṁ assajinā, 
patvāna acalaṁ padaṁ; 
Sahāyakaṁ gavesanto, 
assamaṁ agamāsahaṁ. 
Dūratova mamaṁ disvā, 
sahāyo me susikkhito; 
Iriyāpathasampanno, 
idaṁ vacanamabravi. 
‘Pasannamukhanettosi, 
munibhāvova dissati; 
Amatādhigato kacci, 
nibbānamaccutaṁ padaṁ. 
Subhānurūpo āyāsi, 
āneñjakārito viya; 
Dantova dantadamatho, 
upasantosi brāhmaṇa’. 
‘Amataṁ mayādhigataṁ, 
sokasallāpanūdanaṁ; 
Tvampi taṁ adhigacchesi, 
gacchāma buddhasantikaṁ’. 
Sādhūti so paṭissutvā, 
sahāyo me susikkhito; 
Hatthena hatthaṁ gaṇhitvā, 
upagamma tavantikaṁ. 
Ubhopi pabbajissāma, 
sakyaputta tavantike; 
Tava sāsanamāgamma, 
viharāma anāsavā. 
Kolito iddhiyā seṭṭho, 
ahaṁ paññāya pārago; 
Ubhova ekato hutvā, 
sāsanaṁ sobhayāmase. 
Apariyositasaṅkappo, 
kutitthe sañcariṁ ahaṁ; 
Tava dassanamāgamma, 
saṅkappo pūrito mama. 
Pathaviyaṁ patiṭṭhāya, 
pupphanti samaye dumā; 
Dibbagandhā sampavanti, 
tosenti sabbapāṇinaṁ. 
Tathevāhaṁ mahāvīra, 
sakyaputta mahāyasa; 
Sāsane te patiṭṭhāya, 
samayesāmi pupphituṁ. 
Vimuttipupphaṁ esanto, 
bhavasaṁsāramocanaṁ; 
Vimuttipupphalābhena, 
tosemi sabbapāṇinaṁ. 
Yāvatā buddhakhettamhi, 
ṭhapetvāna mahāmuniṁ; 
Paññāya sadiso natthi, 
tava puttassa cakkhuma. 
Suvinītā ca te sissā, 
parisā ca susikkhitā; 
Uttame damathe dantā, 
parivārenti taṁ sadā. 
Jhāyī jhānaratā dhīrā, 
santacittā samāhitā; 
Munī moneyyasampannā, 
parivārenti taṁ sadā. 
Appicchā nipakā dhīrā, 
appāhārā alolupā; 
Lābhālābhena santuṭṭhā, 
parivārenti taṁ sadā. 
Āraññikā dhutaratā, 
jhāyino lūkhacīvarā; 
Vivekābhiratā dhīrā, 
parivārenti taṁ sadā. 
Paṭipannā phalaṭṭhā ca, 
sekhā phalasamaṅgino; 
Āsīsakā uttamatthaṁ, 
parivārenti taṁ sadā. 
Sotāpannā ca vimalā, 
sakadāgāmino ca ye; 
Anāgāmī ca arahā, 
parivārenti taṁ sadā. 
Satipaṭṭhānakusalā, 
bojjhaṅgabhāvanāratā; 
Sāvakā te bahū sabbe, 
parivārenti taṁ sadā. 
Iddhipādesu kusalā, 
samādhibhāvanāratā; 
Sammappadhānānuyuttā, 
parivārenti taṁ sadā. 
Tevijjā chaḷabhiññā ca, 
iddhiyā pāramiṁ gatā; 
Paññāya pāramiṁ pattā, 
parivārenti taṁ sadā. 
Edisā te mahāvīra, 
tava sissā susikkhitā; 
Durāsadā uggatejā, 
parivārenti taṁ sadā. 
Tehi sissehi parivuto, 
saññatehi tapassibhi; 
Migarājāvasambhīto, 
uḷurājāva sobhasi. 
Pathaviyaṁ patiṭṭhāya, 
ruhanti dharaṇīruhā; 
Vepullataṁ pāpuṇanti, 
phalañca dassayanti te. 
Pathavīsadiso tvaṁsi, 
sakyaputta mahāyasa; 
Sāsane te patiṭṭhāya, 
labhanti amataṁ phalaṁ. 
Sindhu sarassatī ceva, 
nadiyo candabhāgikā; 
Gaṅgā ca yamunā ceva, 
sarabhū ca atho mahī. 
Etāsaṁ sandamānānaṁ, 
sāgaro sampaṭicchati; 
Jahanti purimaṁ nāmaṁ, 
sāgaroteva ñāyati. 
Tathevime catubbaṇṇā, 
pabbajitvā tavantike; 
Jahanti purimaṁ nāmaṁ, 
buddhaputtāti ñāyare. 
Yathāpi cando vimalo, 
gacchaṁ ākāsadhātuyā; 
Sabbe tāragaṇe loke, 
ābhāya atirocati. 
Tatheva tvaṁ mahāvīra, 
parivuto devamānuse; 
Ete sabbe atikkamma, 
jalasi sabbadā tuvaṁ. 
Gambhīre uṭṭhitā ūmī, 
na velamativattare; 
Sabbā velaṁva phusanti, 
sañcuṇṇā vikiranti tā. 
Tatheva titthiyā loke, 
nānādiṭṭhī bahujjanā; 
Dhammaṁ vāditukāmā te, 
nātivattanti taṁ muniṁ. 
Sace ca taṁ pāpuṇanti, 
paṭivādehi cakkhuma; 
Tavantikaṁ upāgantvā, 
sañcuṇṇāva bhavanti te. 
Yathāpi udake jātā, 
kumudā mandālakā bahū; 
Upalimpanti toyena, 
kaddamakalalena ca. 
Tatheva bahukā sattā, 
loke jātā virūhare; 
Aṭṭitā rāgadosena, 
kaddame kumudaṁ yathā. 
Yathāpi padumaṁ jalajaṁ, 
jalamajjhe virūhati; 
Na so limpati toyena, 
parisuddho hi kesarī. 
Tatheva tvaṁ mahāvīra, 
loke jāto mahāmuni; 
Nopalimpasi lokena, 
toyena padumaṁ yathā. 
Yathāpi rammake māse, 
bahū pupphanti vārijā; 
Nātikkamanti taṁ māsaṁ, 
samayo pupphanāya so. 
Tatheva tvaṁ mahāvīra, 
pupphito te vimuttiyā; 
Sāsanaṁ nātivattanti, 
padumaṁ vārijaṁ yathā. 
Supupphito sālarājā, 
dibbagandhaṁ pavāyati; 
Aññasālehi parivuto, 
sālarājāva sobhati. 
Tatheva tvaṁ mahāvīra, 
buddhañāṇena pupphito; 
Bhikkhusaṅghaparivuto, 
sālarājāva sobhasi. 
Yathāpi selo himavā, 
osadho sabbapāṇinaṁ; 
Nāgānaṁ asurānañca, 
devatānañca ālayo. 
Tatheva tvaṁ mahāvīra, 
osadho viya pāṇinaṁ; 
Tevijjā chaḷabhiññā ca, 
iddhiyā pāramiṁ gatā. 
Anusiṭṭhā mahāvīra, 
tayā kāruṇikena te; 
Ramanti dhammaratiyā, 
vasanti tava sāsane. 
Migarājā yathā sīho, 
abhinikkhamma āsayā; 
Catuddisānuviloketvā, 
tikkhattuṁ abhinādati. 
Sabbe migā uttasanti, 
migarājassa gajjato; 
Tathā hi jātimā eso, 
pasū tāseti sabbadā. 
Gajjato te mahāvīra, 
vasudhā sampakampati; 
Bodhaneyyāvabujjhanti, 
tasanti mārakāyikā. 
Tasanti titthiyā sabbe, 
nadato te mahāmuni; 
Kākā senāva vibbhantā, 
migaraññā yathā migā. 
Ye keci gaṇino loke, 
satthāroti pavuccare; 
Paramparāgataṁ dhammaṁ, 
desenti parisāya te. 
Na hevaṁ tvaṁ mahāvīra, 
dhammaṁ desesi pāṇinaṁ; 
Sāmaṁ saccāni bujjhitvā, 
kevalaṁ bodhipakkhiyaṁ. 
Āsayānusayaṁ ñatvā, 
indriyānaṁ balābalaṁ; 
Bhabbābhabbe viditvāna, 
mahāmeghova gajjasi. 
Cakkavāḷapariyantā, 
nisinnā parisā bhave; 
Nānādiṭṭhī vicinantā, 
vimaticchedanāya taṁ. 
Sabbesaṁ cittamaññāya, 
opammakusalo muni; 
Ekaṁ pañhaṁ kathentova, 
vimatiṁ chindasi pāṇinaṁ. 
Upatissasadiseheva, 
vasudhā pūritā bhave; 
Sabbeva te pañjalikā, 
kittayuṁ lokanāyakaṁ. 
Kappaṁ vā te kittayantā, 
nānāvaṇṇehi kittayuṁ; 
Parimetuṁ na sakkeyyuṁ, 
appameyyo tathāgato. 
Yathāsakena thāmena, 
kittito hi mayā jino; 
Kappakoṭīpi kittentā, 
evamevaṁ pakittayuṁ. 
Sace hi koci devo vā, 
manusso vā susikkhito; 
Pametuṁ parikappeyya, 
vighātaṁva labheyya so. 
Sāsane te patiṭṭhāya, 
sakyaputta mahāyasa; 
Paññāya pāramiṁ gantvā, 
viharāmi anāsavo. 
Titthiye sampamaddāmi, 
vattemi jinasāsanaṁ; 
Dhammasenāpati ajja, 
sakyaputtassa sāsane. 
Aparimeyye kataṁ kammaṁ, 
phalaṁ dassesi me idha; 
Sukhitto saravegova, 
kilese jhāpayī mama. 
Yo koci manujo bhāraṁ, 
dhāreyya matthake sadā; 
Bhārena dukkhito assa, 
bhārehi bharito tathā. 
Ḍayhamāno tīhaggīhi, 
bhavesu saṁsariṁ ahaṁ; 
Bharito bhavabhārena, 
giriṁ uccārito yathā. 
Oropito ca me bhāro, 
bhavā ugghāṭitā mayā; 
Karaṇīyaṁ kataṁ sabbaṁ, 
sakyaputtassa sāsane. 
Yāvatā buddhakhettamhi, 
ṭhapetvā sakyapuṅgavaṁ; 
Ahaṁ aggomhi paññāya, 
sadiso me na vijjati. 
Samādhimhi sukusalo, 
iddhiyā pāramiṁ gato; 
Icchamāno cahaṁ ajja, 
sahassaṁ abhinimmine. 
Anupubbavihārassa, 
vasībhūto mahāmuni; 
Kathesi sāsanaṁ mayhaṁ, 
nirodho sayanaṁ mama. 
Dibbacakkhu visuddhaṁ me, 
samādhikusalo ahaṁ; 
Sammappadhānānuyutto, 
bojjhaṅgabhāvanārato. 
Sāvakena hi pattabbaṁ, 
sabbameva kataṁ mayā; 
Lokanāthaṁ ṭhapetvāna, 
sadiso me na vijjati. 
Samāpattīnaṁ kusalo, 
Jhānavimokkhāna khippapaṭilābhī; 
Bojjhaṅgabhāvanārato, 
Sāvakaguṇapāramigatosmi. 
Sāvakaguṇenapi phussena, 
Buddhiyā parisuttamabhāravā; 
Yaṁ saddhāsaṅgahitaṁ cittaṁ, 
Sadā sabrahmacārīsu. 
Uddhatavisova sappo, 
Chinnavisāṇova usabho; 
Nikkhittamānadappova, 
Upemi garugāravena gaṇaṁ. 
Yadi rūpinī bhaveyya, 
Paññā me vasumatīpi na sameyya; 
Anomadassissa bhagavato, 
Phalametaṁ ñāṇathavanāya. 
Pavattitaṁ dhammacakkaṁ, 
sakyaputtena tādinā; 
Anuvattemahaṁ sammā, 
ñāṇathavanāyidaṁ phalaṁ. 
Mā me kadāci pāpiccho, 
kusīto hīnavīriyo; 
Appassuto anācāro, 
sameto ahu katthaci. 
Bahussuto ca medhāvī, 
sīlesu susamāhito; 
Cetosamathānuyutto, 
api muddhani tiṭṭhatu. 
Taṁ vo vadāmi bhaddante, 
yāvantettha samāgatā; 
Appicchā hotha santuṭṭhā, 
jhāyī jhānaratā sadā. 
Yamahaṁ paṭhamaṁ disvā, 
virajo vimalo ahuṁ; 
So me ācariyo dhīro, 
assaji nāma sāvako. 
Tassāhaṁ vāhasā ajja, 
dhammasenāpatī ahuṁ; 
Sabbattha pāramiṁ patvā, 
viharāmi anāsavo. 
Yo me ācariyo āsi, 
assaji nāma sāvako; 
Yassaṁ disāyaṁ vasati, 
ussīsamhi karomahaṁ. 
Mama kammaṁ saritvāna, 
gotamo sakyapuṅgavo; 
Bhikkhusaṅghe nisīditvā, 
aggaṭṭhāne ṭhapesi maṁ. 
Kilesā jhāpitā mayhaṁ, 
bhavā sabbe samūhatā; 
Nāgova bandhanaṁ chetvā, 
viharāmi anāsavo. 
Svāgataṁ vata me āsi, 
buddhaseṭṭhassa santike; 
Tisso vijjā anuppattā, 
kataṁ buddhassa sāsanaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā sāriputto thero imā gāthāyo abhāsitthāti. 
Sāriputtattherassāpadānaṁ paṭhamaṁ. 

Therāpadāna 
Pilindavacchavagga 
8 Saḷalamaṇḍapiyattheraapadāna 
“Nibbute kakusandhamhi, 
brāhmaṇamhi vusīmati; 
Gahetvā saḷalaṁ mālaṁ, 
maṇḍapaṁ kārayiṁ ahaṁ. 
Tāvatiṁsagato santo, 
labhāmi byamhamuttamaṁ; 
Aññe devetirocāmi, 
puññakammassidaṁ phalaṁ. 
Divā vā yadi vā rattiṁ, 
caṅkamanto ṭhito cahaṁ; 
Channo saḷalapupphehi, 
puññakammassidaṁ phalaṁ. 
Imasmiṁyeva kappamhi, 
yaṁ buddhamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā saḷalamaṇḍapiyo thero imā gāthāyo abhāsitthāti. 
Saḷalamaṇḍapiyattherassāpadānaṁ aṭṭhamaṁ. 

Therāpadāna 
Pilindavacchavagga 
Sabbadāyakattheraapadāna 
“Mahāsamuddaṁ ogayha, 
bhavanaṁ me sunimmitaṁ; 
Sunimmitā pokkharaṇī, 
cakkavākapakūjitā. 
Mandālakehi sañchannā, 
padumuppalakehi ca; 
Nadī ca sandate tattha, 
supatitthā manoramā. 
Macchakacchapasañchannā, 
nānādijasamotthatā; 
Mayūrakoñcābhirudā, 
kokilādīhi vagguhi. 
Pārevatā ravihaṁsā ca, 
cakkavākā nadīcarā; 
Dindibhā sāḷikā cettha, 
pampakā jīvajīvakā. 
Haṁsā koñcāpi naditā, 
kosiyā piṅgalā bahū; 
Sattaratanasampannā, 
maṇimuttikavālukā. 
Sabbasoṇṇamayā rukkhā, 
nānāgandhasameritā; 
Ujjotenti divārattiṁ, 
bhavanaṁ sabbakālikaṁ. 
Saṭṭhi tūriyasahassāni, 
sāyaṁ pāto pavajjare; 
Soḷasitthisahassāni, 
parivārenti maṁ sadā. 
Abhinikkhamma bhavanā, 
sumedhaṁ lokanāyakaṁ; 
Pasannacitto sumano, 
vandayiṁ taṁ mahāyasaṁ. 
Sambuddhaṁ abhivādetvā, 
sasaṅghaṁ taṁ nimantayiṁ; 
Adhivāsesi so dhīro, 
sumedho lokanāyako. 
Mama dhammakathaṁ katvā, 
uyyojesi mahāmuni; 
Sambuddhaṁ abhivādetvā, 
bhavanaṁ me upāgamiṁ. 
Āmantayiṁ parijanaṁ, 
‘sabbe sannipatātha vo; 
Pubbaṇhasamayaṁ buddho, 
bhavanaṁ āgamissati. 
Lābhā amhaṁ suladdhaṁ no, 
ye vasāma tavantike; 
Mayampi buddhaseṭṭhassa, 
pūjaṁ kassāma satthuno’. 
Annapānaṁ paṭṭhapetvā, 
kālaṁ ārocayiṁ ahaṁ; 
Vasīsatasahassehi, 
upesi lokanāyako. 
Pañcaṅgikehi tūriyehi, 
paccuggamanamakāsahaṁ; 
Sabbasoṇṇamaye pīṭhe, 
nisīdi purisuttamo. 
Uparicchadanaṁ āsi, 
sabbasoṇṇamayaṁ tadā; 
Bījaniyo pavāyanti, 
bhikkhusaṅghassa antare. 
Pahūtenannapānena, 
bhikkhusaṅghamatappayiṁ; 
Paccekadussayugaḷe, 
bhikkhusaṅghassadāsahaṁ. 
Yaṁ vadanti sumedhoti, 
lokāhutipaṭiggahaṁ; 
Bhikkhusaṅghe nisīditvā, 
imā gāthā abhāsatha. 
‘Yo me annena pānena, 
sabbe ime ca tappayiṁ; 
Tamahaṁ kittayissāmi, 
suṇātha mama bhāsato. 
Aṭṭhārase kappasate, 
devaloke ramissati; 
Sahassakkhattuṁ rājā ca, 
cakkavattī bhavissati. 
Upapajjati yaṁ yoniṁ, 
devattaṁ atha mānusaṁ; 
Sabbadā sabbasovaṇṇaṁ, 
chadanaṁ dhārayissati. 
Tiṁsakappasahassamhi, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādo, 
oraso dhammanimmito; 
Sabbāsave pariññāya, 
nibbāyissatināsavo. 
Bhikkhusaṅghe nisīditvā, 
sīhanādaṁ nadissati; 
Citake chattaṁ dhārenti, 
heṭṭhā chattamhi ḍayhatha’. 
Sāmaññaṁ me anuppattaṁ, 
kilesā jhāpitā mayā; 
Maṇḍape rukkhamūle vā, 
santāpo me na vijjati. 
Tiṁsakappasahassamhi, 
yaṁ dānamadadiṁ tadā; 
Duggatiṁ nābhijānāmi, 
sabbadānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sabbadāyako thero imā gāthāyo abhāsitthāti. 
Sabbadāyakattherassāpadānaṁ navamaṁ. 

Therāpadāna 
Pilindavacchavagga 
Ajitattheraapadāna 
“Padumuttaro nāma jino, 
sabbadhammāna pāragū; 
Ajjhogāhetvā himavantaṁ, 
nisīdi lokanāyako. 
Nāhaṁ addakkhiṁ sambuddhaṁ, 
Napi saddaṁ suṇomahaṁ; 
Mama bhakkhaṁ gavesanto, 
Āhiṇḍāmi vane ahaṁ. 
Tatthaddassāsiṁ sambuddhaṁ, 
dvattiṁsavaralakkhaṇaṁ; 
Disvāna vittimāpajjiṁ, 
satto ko nāmayaṁ bhave. 
Lakkhaṇāni viloketvā, 
mama vijjaṁ anussariṁ; 
Sutañhi metaṁ vuḍḍhānaṁ, 
paṇḍitānaṁ subhāsitaṁ. 
Tesaṁ yathā taṁ vacanaṁ, 
ayaṁ buddho bhavissati; 
Yannūnāhaṁ sakkareyyaṁ, 
gatiṁ me sodhayissati. 
Khippaṁ assamamāgantvā, 
madhutelaṁ gahiṁ ahaṁ; 
Kolambakaṁ gahetvāna, 
upagacchiṁ vināyakaṁ. 
Tidaṇḍake gahetvāna, 
abbhokāse ṭhapesahaṁ; 
Padīpaṁ pajjalitvāna, 
aṭṭhakkhattuṁ avandahaṁ. 
Sattarattindivaṁ buddho, 
nisīdi purisuttamo; 
Tato ratyā vivasāne, 
vuṭṭhāsi lokanāyako. 
Pasannacitto sumano, 
sabbarattindivaṁ ahaṁ; 
Dīpaṁ buddhassa pādāsiṁ, 
pasanno sehi pāṇibhi. 
Sabbe vanā gandhamayā, 
Pabbate gandhamādane; 
Buddhassa ānubhāvena, 
Āgacchuṁ buddhasantikaṁ. 
Ye keci pupphagandhāse, 
pupphitā dharaṇīruhā; 
Buddhassa ānubhāvena, 
sabbe sannipatuṁ tadā. 
Yāvatā himavantamhi, 
nāgā ca garuḷā ubho; 
Dhammañca sotukāmā te, 
āgacchuṁ buddhasantikaṁ. 
Devalo nāma samaṇo, 
buddhassa aggasāvako; 
Vasīsatasahassehi, 
buddhasantikupāgami. 
Padumuttaro lokavidū, 
āhutīnaṁ paṭiggaho; 
Bhikkhusaṅghe nisīditvā, 
imā gāthā abhāsatha. 
‘Yo me dīpaṁ padīpesi, 
pasanno sehi pāṇibhi; 
Tamahaṁ kittayissāmi, 
suṇātha mama bhāsato. 
Saṭṭhi kappasahassāni, 
devaloke ramissati; 
Sahassakkhattuṁ rājā ca, 
cakkavattī bhavissati. 
Soḷasamaṁ bhāṇavāraṁ. 
Chattiṁsakkhattuṁ devindo, 
devarajjaṁ karissati; 
Pathaviyaṁ sattasataṁ, 
vipulaṁ rajjaṁ karissati. 
Padesarajjaṁ vipulaṁ, 
gaṇanāto asaṅkhiyaṁ; 
Iminā dīpadānena, 
dibbacakkhu bhavissati. 
Samantato aṭṭhakosaṁ, 
passissati ayaṁ sadā; 
Devalokā cavantassa, 
nibbattantassa jantuno. 
Divā vā yadi vā rattiṁ, 
padīpaṁ dhārayissati; 
Jāyamānassa sattassa, 
puññakammasamaṅgino. 
Yāvatā nagaraṁ āsi, 
tāvatā jotayissati; 
Upapajjati yaṁ yoniṁ, 
devattaṁ atha mānusaṁ. 
Asseva dīpadānassa, 
aṭṭhadīpaphalena hi; 
Na jayissantimaṁ jantū, 
dīpadānassidaṁ phalaṁ. 
Kappasatasahassamhi, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādo, 
oraso dhammanimmito; 
Sabbāsave pariññāya, 
nibbāyissatināsavo. 
Tosayitvāna sambuddhaṁ, 
gotamaṁ sakyapuṅgavaṁ; 
Ajito nāma nāmena, 
hessati satthu sāvako’. 
Saṭṭhi kappasahassāni, 
devaloke ramiṁ ahaṁ; 
Tatrāpi me dīpasataṁ, 
jotate niccakālikaṁ. 
Devaloke manusse vā, 
niddhāvanti pabhā mama; 
Buddhaseṭṭhaṁ saritvāna, 
bhiyyo hāsaṁ janesahaṁ. 
Tusitāhaṁ cavitvāna, 
okkamiṁ mātukucchiyaṁ; 
Jāyamānassa santassa, 
āloko vipulo ahu. 
Agārā abhinikkhamma, 
pabbajiṁ anagāriyaṁ; 
Bāvariṁ upasaṅkamma, 
sissattaṁ ajjhupāgamiṁ. 
Himavante vasantohaṁ, 
assosiṁ lokanāyakaṁ; 
Uttamatthaṁ gavesanto, 
upagacchiṁ vināyakaṁ. 
Danto buddho dametāvī, 
oghatiṇṇo nirūpadhi; 
Nibbānaṁ kathayī buddho, 
sabbadukkhappamocanaṁ. 
Taṁ me āgamanaṁ siddhaṁ, 
tositohaṁ mahāmuniṁ; 
Tisso vijjā anuppattā, 
kataṁ buddhassa sāsanaṁ. 
Satasahassito kappe, 
yaṁ dīpamadadiṁ tadā; 
Duggatiṁ nābhijānāmi, 
dīpadānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ajito thero imā gāthāyo abhāsitthāti. 
Ajitattherassāpadānaṁ dasamaṁ. 
Pilindavacchavaggo cattālīsamo. 
Tassuddānaṁ 
Pilindavaccho selo ca, 
sabbakittī madhundado; 
Kūṭāgārī bākulo ca, 
giri saḷalasavhayo. 
Sabbado ajito ceva, 
gāthāyo gaṇitā iha; 
Satāni pañca gāthānaṁ, 
vīsati ca taduttarīti. 
Atha vagguddānaṁ 
Padumārakkhado ceva, 
umā gandhodakena ca; 
Ekapadma saddasaññī, 
mandāraṁ bodhivandako. 
Avaṭañca pilindi ca, 
gāthāyo gaṇitā iha; 
Catusattati gāthāyo, 
ekādasa satāni ca. 
Padumavaggadasakaṁ. 
Catutthasatakaṁ samattaṁ. 

Therāpadāna 
Metteyyavagga 
Tissametteyyattheraapadāna 
“Pabbhārakūṭaṁ nissāya, 
sobhito nāma tāpaso; 
Pavattaphalaṁ bhuñjitvā, 
vasati pabbatantare. 
Aggiṁ dāruṁ āharitvā, 
ujjālesiṁ ahaṁ tadā; 
Uttamatthaṁ gavesanto, 
brahmalokūpapattiyā. 
Padumuttaro lokavidū, 
āhutīnaṁ paṭiggaho; 
Mamuddharitukāmo so, 
āgacchi mama santike. 
‘Kiṁ karosi mahāpuñña, 
dehi me aggidārukaṁ; 
Ahamaggiṁ paricare, 
tato me suddhi hohiti’. 
‘Subhaddako tvaṁ manuje, 
devate tvaṁ pajānasi; 
Tuvaṁ aggiṁ paricara, 
handa te aggidārukaṁ’. 
Tato kaṭṭhaṁ gahetvāna, 
aggiṁ ujjālayī jino; 
Na tattha kaṭṭhaṁ pajjhāyi, 
pāṭiheraṁ mahesino. 
‘Na te aggi pajjalati, 
āhutī te na vijjati; 
Niratthakaṁ vataṁ tuyhaṁ, 
aggiṁ paricarassu me’. 
‘Kīdiso so mahāvīra, 
aggi tava pavuccati; 
Mayhampi kathayassetaṁ, 
ubho paricarāmase’. 
‘Hetudhammanirodhāya, 
kilesasamaṇāya ca; 
Issāmacchariyaṁ hitvā, 
tayo ete mamāhutī’. 
‘Kīdiso tvaṁ mahāvīra, 
kathaṁ gottosi mārisa; 
Ācārapaṭipatti te, 
bāḷhaṁ kho mama ruccati’. 
‘Khattiyamhi kule jāto, 
abhiññāpāramiṁ gato; 
Sabbāsavaparikkhīṇo, 
natthi dāni punabbhavo’. 
‘Yadi buddhosi sabbaññū, 
pabhaṅkara tamonuda; 
Namassissāmi taṁ deva, 
dukkhassantakaro tuvaṁ’. 
Pattharitvājinacammaṁ, 
nisīdanamadāsahaṁ; 
Nisīda nātha sabbaññu, 
upaṭṭhissāmahaṁ tuvaṁ. 
Nisīdi bhagavā tattha, 
ajinamhi suvitthate; 
Nimantayitvā sambudd