Sự Nghiệp Anh Hùng (Apadāna)

āyako so narissaro. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā maggadāyako thero imā gāthāyo abhāsitthāti. 
Maggadāyakattherassāpadānaṁ sattamaṁ. 

Therāpadāna 
Sīhāsaniyavagga 
Ekatthambhikattheraapadāna 
“Siddhatthassa bhagavato, 
mahāpūgagaṇo ahu; 
Saraṇaṁ gatā ca te buddhaṁ, 
saddahanti tathāgataṁ. 
Sabbe saṅgamma mantetvā, 
māḷaṁ kubbanti satthuno; 
Ekatthambhaṁ alabhantā, 
vicinanti brahāvane. 
Tehaṁ araññe disvāna, 
upagamma gaṇaṁ tadā; 
Añjaliṁ paggahetvāna, 
paripucchiṁ gaṇaṁ ahaṁ. 
Te me puṭṭhā viyākaṁsu, 
sīlavanto upāsakā; 
Māḷaṁ mayaṁ kattukāmā, 
ekatthambho na labbhati. 
Ekatthambhaṁ mamaṁ detha, 
ahaṁ dassāmi satthuno; 
Āharissāmahaṁ thambhaṁ, 
appossukkā bhavantu te. 
Te me thambhaṁ pavecchiṁsu, 
pasannā tuṭṭhamānasā; 
Tato paṭinivattitvā, 
agamaṁsu sakaṁ gharaṁ. 
Aciraṁ gate pūgagaṇe, 
thambhaṁ ahāsahaṁ tadā; 
Haṭṭho haṭṭhena cittena, 
paṭhamaṁ ussapesahaṁ. 
Tena cittappasādena, 
Vimānaṁ upapajjahaṁ; 
Ubbiddhaṁ bhavanaṁ mayhaṁ, 
Sattabhūmaṁ samuggataṁ. 
Vajjamānāsu bherīsu, 
paricāremahaṁ sadā; 
Pañcapaññāsakappamhi, 
rājā āsiṁ yasodharo. 
Tatthāpi bhavanaṁ mayhaṁ, 
sattabhūmaṁ samuggataṁ; 
Kūṭāgāravarūpetaṁ, 
ekatthambhaṁ manoramaṁ. 
Ekavīsatikappamhi, 
udeno nāma khattiyo; 
Tatrāpi bhavanaṁ mayhaṁ, 
sattabhūmaṁ samuggataṁ. 
Yaṁ yaṁ yonupapajjāmi, 
devattaṁ atha mānusaṁ; 
Anubhomi sukhaṁ sabbaṁ, 
ekatthambhassidaṁ phalaṁ. 
Catunnavutito kappe, 
yaṁ thambhamadadaṁ tadā; 
Duggatiṁ nābhijānāmi, 
ekatthambhassidaṁ phalaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā ekatthambhiko thero imā gāthāyo abhāsitthāti. 
Ekatthambhikattherassāpadānaṁ dutiyaṁ. 

Therāpadāna 
Chattavagga 
Phalakadāyakattheraapadāna 
“Yānakāro pure āsiṁ, 
dārukamme susikkhito; 
Candanaṁ phalakaṁ katvā, 
adāsiṁ lokabandhuno. 
Pabhāsati idaṁ byamhaṁ, 
suvaṇṇassa sunimmitaṁ; 
Hatthiyānaṁ assayānaṁ, 
dibbayānaṁ upaṭṭhitaṁ. 
Pāsādā sivikā ceva, 
Nibbattanti yadicchakaṁ; 
Akkhobhaṁ ratanaṁ mayhaṁ, 
Phalakassa idaṁ phalaṁ. 
Ekanavutito kappe, 
phalakaṁ yamahaṁ dadiṁ; 
Duggatiṁ nābhijānāmi, 
phalakassa idaṁ phalaṁ. 
Sattapaññāsakappamhi, 
caturo nimmitāvhayā; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā phalakadāyako thero imā gāthāyo abhāsitthāti. 
Phalakadāyakattherassāpadānaṁ aṭṭhamaṁ. 

Therāpadāna 
Chattavagga 
Vaṭaṁsakiyattheraapadāna 
“Sumedho nāma nāmena, 
sayambhū aparājito; 
Vivekamanubrūhanto, 
ajjhogāhi mahāvanaṁ. 
Saḷalaṁ pupphitaṁ disvā, 
ganthitvāna vaṭaṁsakaṁ; 
Buddhassa abhiropesiṁ, 
sammukhā lokanāyakaṁ. 
Tiṁsakappasahassamhi, 
yaṁ pupphamabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Ūnavīse kappasate, 
soḷasāsuṁ sunimmitā; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā vaṭaṁsakiyo thero imā gāthāyo abhāsitthāti. 
Vaṭaṁsakiyattherassāpadānaṁ navamaṁ. 

Therāpadāna 
Chattavagga 
Pallaṅkadāyakattheraapadāna 
“Sumedhassa bhagavato, 
lokajeṭṭhassa tādino; 
Pallaṅko hi mayā dinno, 
sauttarasapacchado. 
Sattaratanasampanno, 
pallaṅko āsi so tadā; 
Mama saṅkappamaññāya, 
nibbattati sadā mama. 
Tiṁsakappasahassamhi, 
pallaṅkamadadiṁ tadā; 
Duggatiṁ nābhijānāmi, 
pallaṅkassa idaṁ phalaṁ. 
Vīsakappasahassamhi, 
suvaṇṇābhā tayo janā; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā pallaṅkadāyako thero imā gāthāyo abhāsitthāti. 
Pallaṅkadāyakattherassāpadānaṁ dasamaṁ. 
Chattavaggo pannarasamo. 
Tassuddānaṁ 
Chattaṁ thambho ca vedi ca, 
parivārumapupphiyo; 
Anulepo ca maggo ca, 
phalako ca vaṭaṁsako; 
Pallaṅkadāyī ca gāthāyo, 
chappaññāsa pakittitāti. 

Therāpadāna 
Bandhujīvakavagga 
Bandhujīvakattheraapadāna 
“Candaṁva vimalaṁ suddhaṁ, 
vippasannamanāvilaṁ; 
Nandībhavaparikkhīṇaṁ, 
tiṇṇaṁ loke visattikaṁ. 
Nibbāpayantaṁ janataṁ, 
Tiṇṇaṁ tārayataṁ varaṁ; 
Muniṁ vanamhi jhāyantaṁ, 
Ekaggaṁ susamāhitaṁ. 
Bandhujīvakapupphāni, 
lagetvā suttakenahaṁ; 
Buddhassa abhiropayiṁ, 
sikhino lokabandhuno. 
Ekattiṁse ito kappe, 
yaṁ kammamakariṁ tadā; 
Duggatiṁ nābhijānāmi, 
buddhapūjāyidaṁ phalaṁ. 
Ito sattamake kappe, 
manujindo mahāyaso; 
Samantacakkhu nāmāsi, 
cakkavattī mahabbalo. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā bandhujīvako thero imā gāthāyo abhāsitthāti. 
Bandhujīvakattherassāpadānaṁ paṭhamaṁ. 

Therāpadāna 
Bandhujīvakavagga 
Tambapupphiyattheraapadāna 
“Parakammāyane yutto, 
aparādhaṁ akāsahaṁ; 
Vanantaṁ abhidhāvissaṁ, 
bhayaverasamappito. 
Pupphitaṁ pādapaṁ disvā, 
piṇḍibandhaṁ sunimmitaṁ; 
Tambapupphaṁ gahetvāna, 
bodhiyaṁ okiriṁ ahaṁ. 
Sammajjitvāna taṁ bodhiṁ, 
pāṭaliṁ pādaputtamaṁ; 
Pallaṅkaṁ ābhujitvāna, 
bodhimūle upāvisiṁ. 
Gatamaggaṁ gavesantā, 
āgacchuṁ mama santikaṁ; 
Te ca disvānahaṁ tattha, 
āvajjiṁ bodhimuttamaṁ. 
Vanditvāna ahaṁ bodhiṁ, 
vippasannena cetasā; 
Anekatāle papatiṁ, 
giridugge bhayānake. 
Ekanavutito kappe, 
yaṁ pupphamabhiropayiṁ; 
Duggatiṁ nābhijānāmi, 
bodhipūjāyidaṁ phalaṁ. 
Ito ca tatiye kappe, 
rājā susaññato ahaṁ; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā tambapupphiyo thero imā gāthāyo abhāsitthāti. 
Tambapupphiyattherassāpadānaṁ dutiyaṁ. 

Therāpadāna 
Bandhujīvakavagga 
Vīthisammajjakattheraapadāna 
“Udentaṁ sataraṁsiṁva, 
pītaraṁsiṁva bhāṇumaṁ; 
Pannarase yathā candaṁ, 
niyyantaṁ lokanāyakaṁ. 
Aṭṭhasaṭṭhisahassāni, 
sabbe khīṇāsavā ahuṁ; 
Parivāriṁsu sambuddhaṁ, 
dvipadindaṁ narāsabhaṁ. 
Sammajjitvāna taṁ vīthiṁ, 
niyyante lokanāyake; 
Ussāpesiṁ dhajaṁ tattha, 
vippasannena cetasā. 
Ekanavutito kappe, 
yaṁ dhajaṁ abhiropayiṁ; 
Duggatiṁ nābhijānāmi, 
dhajadānassidaṁ phalaṁ. 
Ito catutthake kappe, 
rājāhosiṁ mahabbalo; 
Sabbākārena sampanno, 
sudhajo iti vissuto. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā vīthisammajjako thero imā gāthāyo abhāsitthāti. 
Vīthisammajjakattherassāpadānaṁ tatiyaṁ. 

Therāpadāna 
Bandhujīvakavagga 
4 Kakkārupupphapūjakattheraapadāna 
“Devaputto ahaṁ santo, 
pūjayiṁ sikhināyakaṁ; 
Kakkārupupphaṁ paggayha, 
buddhassa abhiropayiṁ. 
Ekattiṁse ito kappe, 
yaṁ pupphamabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Ito ca navame kappe, 
rājā sattuttamo ahuṁ; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā kakkārupupphapūjako thero imā gāthāyo abhāsitthāti. 
Kakkārupupphapūjakattherassāpadānaṁ catutthaṁ. 

Therāpadāna 
Bandhujīvakavagga 
5 Mandāravapupphapūjakattheraapadāna 
“Devaputto ahaṁ santo, 
pūjayiṁ sikhināyakaṁ; 
Mandāravena pupphena, 
buddhassa abhiropayiṁ. 
Sattāhaṁ chadanaṁ āsi, 
dibbaṁ mālaṁ tathāgate; 
Sabbe janā samāgantvā, 
namassiṁsu tathāgataṁ. 
Ekattiṁse ito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Ito ca dasame kappe, 
rājāhosiṁ jutindharo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā mandāravapupphapūjako thero imā gāthāyo abhāsitthāti. 
Mandāravapupphapūjakattherassāpadānaṁ pañcamaṁ. 

Therāpadāna 
Bandhujīvakavagga 
Kadambapupphiyattheraapadāna 
“Himavantassāvidūre, 
kukkuṭo nāma pabbato; 
Tamhi pabbatapādamhi, 
satta buddhā vasanti te. 
Kadambaṁ pupphitaṁ disvā, 
dīparājaṁva uggataṁ; 
Ubho hatthehi paggayha, 
satta buddhe samokiriṁ. 
Catunnavutito kappe, 
yaṁ pupphamabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Dvenavute ito kappe, 
sattāsuṁ pupphanāmakā; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā kadambapupphiyo thero imā gāthāyo abhāsitthāti. 
Kadambapupphiyattherassāpadānaṁ chaṭṭhaṁ. 

Therāpadāna 
Bandhujīvakavagga 
Tiṇasūlakattheraapadāna 
“Himavantassāvidūre, 
bhūtagaṇo nāma pabbato; 
Vasateko jino tattha, 
sayambhū lokanissaṭo. 
Tiṇasūlaṁ gahetvāna, 
buddhassa abhiropayiṁ; 
Ekūnasatasahassaṁ, 
kappaṁ na vinipātiko. 
Ito ekādase kappe, 
ekosiṁ dharaṇīruho; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā tiṇasūlako thero imā gāthāyo abhāsitthāti. 
Tiṇasūlakattherassāpadānaṁ sattamaṁ. 

Therāpadāna 
Sīhāsaniyavagga 
Nandattheraapadāna 
“Padumuttarassa bhagavato, 
Lokajeṭṭhassa tādino; 
Vatthaṁ khomaṁ mayā dinnaṁ, 
Sayambhussa mahesino. 
Taṁ me buddho viyākāsi, 
jalajuttaranāmako; 
‘Iminā vatthadānena, 
hemavaṇṇo bhavissasi. 
Dve sampattī anubhotvā, 
kusalamūlehi codito; 
Gotamassa bhagavato, 
kaniṭṭho tvaṁ bhavissasi. 
Rāgaratto sukhasīlo, 
kāmesu gedhamāyuto; 
Buddhena codito santo, 
tadā tvaṁ pabbajissasi. 
Pabbajitvāna tvaṁ tattha, 
kusalamūlena codito; 
Sabbāsave pariññāya, 
nibbāyissasināsavo’. 
Satta kappasahassamhi, 
caturo ceḷanāmakā; 
Saṭṭhi kappasahassamhi, 
upacelā catujjanā. 
Pañca kappasahassamhi, 
ceḷāva caturo janā; 
Sattaratanasampannā, 
catudīpamhi issarā. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā nando thero imā gāthāyo abhāsitthāti. 
Nandattherassāpadānaṁ tatiyaṁ. 

Therāpadāna 
Bandhujīvakavagga 
Nāgapupphiyattheraapadāna 
“Suvaccho nāma nāmena, 
brāhmaṇo mantapāragū; 
Purakkhato sasissehi, 
vasate pabbatantare. 
Padumuttaro nāma jino, 
āhutīnaṁ paṭiggaho; 
Mamuddharitukāmo so, 
āgacchi mama santikaṁ. 
Vehāsamhi caṅkamati, 
dhūpāyati jalate tathā; 
Hāsaṁ mamaṁ viditvāna, 
pakkāmi pācināmukho. 
Tañca acchariyaṁ disvā, 
abbhutaṁ lomahaṁsanaṁ; 
Nāgapupphaṁ gahetvāna, 
gatamaggamhi okiriṁ. 
Satasahassito kappe, 
yaṁ pupphaṁ okiriṁ ahaṁ; 
Tena cittappasādena, 
duggatiṁ nupapajjahaṁ. 
Ekattiṁse kappasate, 
rājā āsi mahāraho; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā nāgapupphiyo thero imā gāthāyo abhāsitthāti. 
Nāgapupphiyattherassāpadānaṁ aṭṭhamaṁ. 

Therāpadāna 
Bandhujīvakavagga 
Punnāgapupphiyattheraapadāna 
“Kānanaṁ vanamogayha, 
vasāmi luddako ahaṁ; 
Punnāgaṁ pupphitaṁ disvā, 
buddhaseṭṭhaṁ anussariṁ. 
Taṁ pupphaṁ ocinitvāna, 
sugandhaṁ gandhitaṁ subhaṁ; 
Thūpaṁ karitvā puline, 
buddhassa abhiropayiṁ. 
Dvenavute ito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Ekamhi navute kappe, 
eko āsiṁ tamonudo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā punnāgapupphiyo thero imā gāthāyo abhāsitthāti. 
Punnāgapupphiyattherassāpadānaṁ navamaṁ. 

Therāpadāna 
Bandhujīvakavagga 
Kumudadāyakattheraapadāna 
“Himavantassāvidūre, 
mahājātassaro ahu; 
Padumuppalasañchanno, 
puṇḍarīkasamotthaṭo. 
Kukuttho nāma nāmena, 
tatthāsiṁ sakuṇo tadā; 
Sīlavā buddhisampanno, 
puññāpuññesu kovido. 
Padumuttaro lokavidū, 
āhutīnaṁ paṭiggaho; 
Jātassarassāvidūre, 
sañcarittha mahāmuni. 
Jalajaṁ kumudaṁ chetvā, 
upanesiṁ mahesino; 
Mama saṅkappamaññāya, 
paṭiggahi mahāmuni. 
Tañca dānaṁ daditvāna, 
sukkamūlena codito; 
Kappānaṁ satasahassaṁ, 
duggatiṁ nupapajjahaṁ. 
Soḷaseto kappasate, 
āsuṁ varuṇanāmakā; 
Aṭṭha ete janādhipā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā kumudadāyako thero imā gāthāyo abhāsitthāti. 
Kumudadāyakattherassāpadānaṁ dasamaṁ. 
Bandhujīvakavaggo soḷasamo. 
Tassuddānaṁ 
Bandhujīvo tambapupphī, 
vīthikakkārupupphiyo; 
Mandāravo kadambī ca, 
sūlako nāgapupphiyo; 
Punnāgo komudī gāthā, 
chappaññāsa pakittitāti. 

Therāpadāna 
Supāricariyavagga 
Supāricariyattheraapadāna 
“Padumo nāma nāmena, 
dvipadindo narāsabho; 
Pavanā abhinikkhamma, 
dhammaṁ deseti cakkhumā. 
Yakkhānaṁ samayo āsi, 
avidūre mahesino; 
Yena kiccena sampattā, 
ajjhāpekkhiṁsu tāvade. 
Buddhassa giramaññāya, 
amatassa ca desanaṁ; 
Pasannacitto sumano, 
apphoṭetvā upaṭṭhahiṁ. 
Suciṇṇassa phalaṁ passa, 
upaṭṭhānassa satthuno; 
Tiṁsakappasahassesu, 
duggatiṁ nupapajjahaṁ. 
Ūnatiṁse kappasate, 
samalaṅkatanāmako; 
Sattaratanasampanno, 
cakkavattī mahabbalo. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā supāricariyo thero imā gāthāyo abhāsitthāti. 
Supāricariyattherassāpadānaṁ paṭhamaṁ. 

Therāpadāna 
Supāricariyavagga 
Kaṇaverapupphiyattheraapadāna 
“Siddhattho nāma bhagavā, 
lokajeṭṭho narāsabho; 
Purakkhato sāvakehi, 
nagaraṁ paṭipajjatha. 
Rañño antepure āsiṁ, 
gopako abhisammato; 
Pāsāde upaviṭṭhohaṁ, 
addasaṁ lokanāyakaṁ. 
Kaṇaveraṁ gahetvāna, 
bhikkhusaṅghe samokiriṁ; 
Buddhassa visuṁ katvāna, 
tato bhiyyo samokiriṁ. 
Catunnavutito kappe, 
Yaṁ pupphamabhipūjayiṁ; 
Duggatiṁ nābhijānāmi, 
Buddhapūjāyidaṁ phalaṁ. 
Sattāsītimhito kappe, 
caturāsuṁ mahiddhikā; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā kaṇaverapupphiyo thero imā gāthāyo abhāsitthāti. 
Kaṇaverapupphiyattherassāpadānaṁ dutiyaṁ. 

Therāpadāna 
Supāricariyavagga 
Khajjakadāyakattheraapadāna 
“Tissassa kho bhagavato, 
pubbe phalamadāsahaṁ; 
Nāḷikerañca pādāsiṁ, 
khajjakaṁ abhisammataṁ. 
Buddhassa tamahaṁ datvā, 
Tissassa tu mahesino; 
Modāmahaṁ kāmakāmī, 
Upapajjiṁ yamicchakaṁ. 
Dvenavute ito kappe, 
yaṁ dānamadadiṁ tadā; 
Duggatiṁ nābhijānāmi, 
phaladānassidaṁ phalaṁ. 
Ito terasakappamhi, 
rājā indasamo ahu; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā khajjakadāyako thero imā gāthāyo abhāsitthāti. 
Khajjakadāyakattherassāpadānaṁ tatiyaṁ. 

Therāpadāna 
Supāricariyavagga 
Desapūjakattheraapadāna 
“Atthadassī tu bhagavā, 
lokajeṭṭho narāsabho; 
Abbhuggantvāna vehāsaṁ, 
gacchate anilañjase. 
Yamhi dese ṭhito satthā, 
abbhuggacchi mahāmuni; 
Tāhaṁ desaṁ apūjesiṁ, 
pasanno sehi pāṇibhi. 
Aṭṭhārase kappasate, 
addasaṁ yaṁ mahāmuniṁ; 
Duggatiṁ nābhijānāmi, 
desapūjāyidaṁ phalaṁ. 
Ekādase kappasate, 
gosujātasanāmako; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā desapūjako thero imā gāthāyo abhāsitthāti. 
Desapūjakattherassāpadānaṁ catutthaṁ. 

Therāpadāna 
Supāricariyavagga 
5 Kaṇikārachattiyattheraapadāna 
“Vessabhū nāma sambuddho, 
lokajeṭṭho narāsabho; 
Divāvihārāya muni, 
ogāhayi mahāvanaṁ. 
Kaṇikāraṁ ocinitvā, 
chattaṁ katvānahaṁ tadā; 
Pupphacchadanaṁ katvāna, 
buddhassa abhiropayiṁ. 
Ekattiṁse ito kappe, 
yaṁ pupphamabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Ito vīsatikappamhi, 
soṇṇābhā aṭṭha khattiyā; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā kaṇikārachattiyo thero imā gāthāyo abhāsitthāti. 
Kaṇikārachattiyattherassāpadānaṁ pañcamaṁ. 

Therāpadāna 
Supāricariyavagga 
Sappidāyakattheraapadāna 
“Phusso nāmāsi bhagavā, 
āhutīnaṁ paṭiggaho; 
Gacchate vīthiyaṁ vīro, 
nibbāpento mahājanaṁ. 
Anupubbena bhagavā, 
āgacchi mama santikaṁ; 
Tato taṁ pattaṁ paggayha, 
sappitelamadāsahaṁ. 
Dvenavute ito kappe, 
yaṁ sappimadadiṁ tadā; 
Duggatiṁ nābhijānāmi, 
sappidānassidaṁ phalaṁ. 
Chappaññāse ito kappe, 
eko āsi samodako; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sappidāyako thero imā gāthāyo abhāsitthāti. 
Sappidāyakattherassāpadānaṁ chaṭṭhaṁ. 

Therāpadāna 
Supāricariyavagga 
7 Yūthikapupphiyattheraapadāna 
“Candabhāgānadītīre, 
anusotaṁ vajāmahaṁ; 
Sayambhuṁ addasaṁ tattha, 
sālarājaṁva phullitaṁ. 
Pupphaṁ yūthikamādāya, 
upagacchiṁ mahāmuniṁ; 
Pasannacitto sumano, 
buddhassa abhiropayiṁ. 
Catunnavutito kappe, 
yaṁ pupphamabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Sattasaṭṭhimhito kappe, 
eko sāmuddharo ahuṁ; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā yūthikapupphiyo thero imā gāthāyo abhāsitthāti. 
Yūthikapupphiyattherassāpadānaṁ sattamaṁ. 

Therāpadāna 
Sīhāsaniyavagga 
4 Cūḷapanthakattheraapadāna 
“Padumuttaro nāma jino, 
āhutīnaṁ paṭiggaho; 
Gaṇamhā vūpakaṭṭho so, 
himavante vasī tadā. 
Ahampi himavantamhi, 
vasāmi assame tadā; 
Acirāgataṁ mahāvīraṁ, 
upesiṁ lokanāyakaṁ. 
Pupphacchattaṁ gahetvāna, 
upagacchiṁ narāsabhaṁ; 
Samādhiṁ samāpajjantaṁ, 
antarāyamakāsahaṁ. 
Ubho hatthehi paggayha, 
pupphacchattaṁ adāsahaṁ; 
Paṭiggahesi bhagavā, 
padumuttaro mahāmuni. 
Sabbe devā attamanā, 
himavantaṁ upenti te; 
Sādhukāraṁ pavattesuṁ, 
anumodissati cakkhumā. 
Idaṁ vatvāna te devā, 
upagacchuṁ naruttamaṁ; 
Ākāse dhārayantassa, 
padumacchattamuttamaṁ. 
Satapattachattaṁ paggayha, 
adāsi tāpaso mama; 
‘Tamahaṁ kittayissāmi, 
suṇātha mama bhāsato. 
Pañcavīsatikappāni, 
devarajjaṁ karissati; 
Catuttiṁsatikkhattuñca, 
cakkavattī bhavissati. 
Yaṁ yaṁ yoniṁ saṁsarati, 
devattaṁ atha mānusaṁ; 
Abbhokāse patiṭṭhantaṁ, 
padumaṁ dhārayissati. 
Kappasatasahassamhi, 
okkākakulasambhavo; 
Gotamo nāma gottena, 
satthā loke bhavissati. 
Pakāsite pāvacane, 
manussattaṁ labhissati; 
Manomayamhi kāyamhi, 
uttamo so bhavissati. 
Dve bhātaro bhavissanti, 
ubhopi panthakavhayā; 
Anubhotvā uttamatthaṁ, 
jotayissanti sāsanaṁ’. 
Sohaṁ aṭṭhārasavasso, 
pabbajiṁ anagāriyaṁ; 
Visesāhaṁ na vindāmi, 
sakyaputtassa sāsane. 
Dandhā mayhaṁ gatī āsi, 
paribhūto pure ahuṁ; 
Bhātā ca maṁ paṇāmesi, 
gaccha dāni sakaṁ gharaṁ. 
Sohaṁ paṇāmito santo, 
saṅghārāmassa koṭṭhake; 
Dummano tattha aṭṭhāsiṁ, 
sāmaññasmiṁ apekkhavā. 
Bhagavā tattha āgacchi, 
sīsaṁ mayhaṁ parāmasi; 
Bāhāya maṁ gahetvāna, 
saṅghārāmaṁ pavesayi. 
Anukampāya me satthā, 
adāsi pādapuñchaniṁ; 
Evaṁ suddhaṁ adhiṭṭhehi, 
ekamantamadhiṭṭhahaṁ. 
Hatthehi tamahaṁ gayha, 
sariṁ kokanadaṁ ahaṁ; 
Tattha cittaṁ vimucci me, 
arahattaṁ apāpuṇiṁ. 
Manomayesu kāyesu, 
sabbattha pāramiṁ gato; 
Sabbāsave pariññāya, 
viharāmi anāsavo. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā cūḷapanthako thero imā gāthāyo abhāsitthāti. 
Cūḷapanthakattherassāpadānaṁ catutthaṁ. 

Therāpadāna 
Supāricariyavagga 
Dussadāyakattheraapadāna 
“Tivarāyaṁ pure ramme, 
rājaputtosahaṁ tadā; 
Paṇṇākāraṁ labhitvāna, 
upasantassadāsahaṁ. 
Adhivāsesi bhagavā, 
vatthaṁ hatthena āmasi; 
Siddhattho adhivāsetvā, 
vehāsaṁ nabhamuggami. 
Buddhassa gacchamānassa, 
dussā dhāvanti pacchato; 
Tattha cittaṁ pasādesiṁ, 
buddho no aggapuggalo. 
Catunnavutito kappe, 
yaṁ dussamadadiṁ tadā; 
Duggatiṁ nābhijānāmi, 
dussadānassidaṁ phalaṁ. 
Sattasaṭṭhimhito kappe, 
cakkavattī tadā ahuṁ; 
Parisuddhoti nāmena, 
manujindo mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā dussadāyako thero imā gāthāyo abhāsitthāti. 
Dussadāyakattherassāpadānaṁ aṭṭhamaṁ. 

Therāpadāna 
Supāricariyavagga 
Samādapakattheraapadāna 
“Nagare bandhumatiyā, 
mahāpūgagaṇo ahu; 
Tesāhaṁ pavaro āsiṁ, 
mama baddhacarā ca te. 
Sabbe te sannipātetvā, 
puññakamme samādayiṁ; 
Māḷaṁ kassāma saṅghassa, 
puññakkhettaṁ anuttaraṁ. 
Sādhūti te paṭissutvā, 
mama chandavasānugā; 
Niṭṭhāpetvā ca taṁ māḷaṁ, 
vipassissa adamhase. 
Ekanavutito kappe, 
yaṁ māḷamadadiṁ tadā; 
Duggatiṁ nābhijānāmi, 
māḷadānassidaṁ phalaṁ. 
Ekūnasattatikappe, 
eko āsi janādhipo; 
Ādeyyo nāma nāmena, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā samādapako thero imā gāthāyo abhāsitthāti. 
Samādapakattherassāpadānaṁ navamaṁ. 

Therāpadāna 
Supāricariyavagga 
Pañcaṅguliyattheraapadāna 
“Tisso nāmāsi bhagavā, 
lokajeṭṭho narāsabho; 
Pavisati gandhakuṭiṁ, 
vihārakusalo muni. 
Sugandhamālamādāya, 
agamāsiṁ jinantikaṁ; 
Apasaddo ca sambuddhe, 
pañcaṅgulimadāsahaṁ. 
Dvenavute ito kappe, 
yaṁ gandhamabhiropayiṁ; 
Duggatiṁ nābhijānāmi, 
pañcaṅgulissidaṁ phalaṁ. 
Dvesattatimhito kappe, 
rājā āsiṁ sayampabho; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā pañcaṅguliyo thero imā gāthāyo abhāsitthāti. 
Pañcaṅguliyattherassāpadānaṁ dasamaṁ. 
Supāricariyavaggo sattarasamo. 
Tassuddānaṁ 
Supāricari kaṇaverī, 
khajjako desapūjako; 
Kaṇikāro sappidado, 
yūthiko dussadāyako; 
Māḷo ca pañcaṅguliko, 
catupaññāsa gāthakāti. 

Therāpadāna 
Kumudavagga 
Kumudamāliyattheraapadāna 
“Pabbate himavantamhi, 
mahājātassaro ahu; 
Tatthajo rakkhaso āsiṁ, 
ghorarūpo mahabbalo. 
Kumudaṁ pupphate tattha, 
cakkamattāni jāyare; 
Ocināmi ca taṁ pupphaṁ, 
balino samitiṁ tadā. 
Atthadassī tu bhagavā, 
dvipadindo narāsabho; 
Pupphasaṅkocitaṁ disvā, 
āgacchi mama santikaṁ. 
Upāgatañca sambuddhaṁ, 
devadevaṁ narāsabhaṁ; 
Sabbañca pupphaṁ paggayha, 
buddhassa abhiropayiṁ. 
Yāvatā himavantantā, 
parisā sā tadā ahu; 
Tāvacchadanasampanno, 
agamāsi tathāgato. 
Aṭṭhārase kappasate, 
yaṁ pupphamabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Ito pannarase kappe, 
sattāhesuṁ janādhipā; 
Sahassarathanāmā te, 
cakkavattī mahabbalā. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā kumudamāliyo thero imā gāthāyo abhāsitthāti. 
Kumudamāliyattherassāpadānaṁ paṭhamaṁ. 

Therāpadāna 
Kumudavagga 
2 Nisseṇidāyakattheraapadāna 
“Koṇḍaññassa bhagavato, 
lokajeṭṭhassa tādino; 
Ārohatthāya pāsādaṁ, 
nisseṇī kāritā mayā. 
Tena cittappasādena, 
anubhotvāna sampadā; 
Dhāremi antimaṁ dehaṁ, 
sammāsambuddhasāsane. 
Ekattiṁsamhi kappānaṁ, 
sahassamhi tayo ahuṁ; 
Sambahulā nāma rājāno, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā nisseṇidāyako thero imā gāthāyo abhāsitthāti. 
Nisseṇidāyakattherassāpadānaṁ dutiyaṁ. 

Therāpadāna 
Kumudavagga 
3 Rattipupphiyattheraapadāna 
“Migaluddo pure āsiṁ, 
araññe kānane ahaṁ; 
Vipassiṁ addasaṁ buddhaṁ, 
devadevaṁ narāsabhaṁ. 
Rattikaṁ pupphitaṁ disvā, 
kuṭajaṁ dharaṇīruhaṁ; 
Samūlaṁ paggahetvāna, 
upanesiṁ mahesino. 
Ekanavutito kappe, 
yaṁ pupphamabhiropayiṁ; 
Duggatiṁ nābhijānāmi, 
pupphadānassidaṁ phalaṁ. 
Ito ca aṭṭhame kappe, 
suppasannasanāmako; 
Sattaratanasampanno, 
rājāhosiṁ mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā rattipupphiyo thero imā gāthāyo abhāsitthāti. 
Rattipupphiyattherassāpadānaṁ tatiyaṁ. 

Therāpadāna 
Kumudavagga 
Udapānadāyakattheraapadāna 
“Vipassino bhagavato, 
udapāno kato mayā; 
Piṇḍapātañca datvāna, 
niyyādesimahaṁ tadā. 
Ekanavutito kappe, 
yaṁ kammamakariṁ tadā; 
Duggatiṁ nābhijānāmi, 
udapānassidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā udapānadāyako thero imā gāthāyo abhāsitthāti. 
Udapānadāyakattherassāpadānaṁ catutthaṁ. 

Therāpadāna 
Kumudavagga 
Sīhāsanadāyakattheraapadāna 
“Nibbute lokanāthamhi, 
padumuttaranāyake; 
Pasannacitto sumano, 
sīhāsanamadāsahaṁ. 
Bahūhi gandhamālehi, 
diṭṭhadhammasukhāvahe; 
Tattha pūjañca katvāna, 
nibbāyati bahujjano. 
Pasannacitto sumano, 
vanditvā bodhimuttamaṁ; 
Kappānaṁ satasahassaṁ, 
duggatiṁ nupapajjahaṁ. 
Pannarasasahassamhi, 
kappānaṁ aṭṭha āsu te; 
Siluccayasanāmā ca, 
rājāno cakkavattino. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sīhāsanadāyako thero imā gāthāyo abhāsitthāti. 
Sīhāsanadāyakattherassāpadānaṁ pañcamaṁ. 

Therāpadāna 
Kumudavagga 
Maggadattikattheraapadāna 
“Anomadassī bhagavā, 
dvipadindo narāsabho; 
Diṭṭhadhammasukhatthāya, 
abbhokāsamhi caṅkami. 
Uddhate pāde pupphāni, 
sobhaṁ muddhani tiṭṭhare; 
Pasannacitto sumano, 
vanditvā pupphamokiriṁ. 
Vīsakappasahassamhi, 
ito pañca janā ahuṁ; 
Pupphacchadaniyā nāma, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā maggadattiko thero imā gāthāyo abhāsitthāti. 
Maggadattikattherassāpadānaṁ chaṭṭhaṁ. 

Therāpadāna 
Kumudavagga 
Ekadīpiyattheraapadāna 
“Padumuttarassa munino, 
saḷale bodhimuttame; 
Pasannacitto sumano, 
ekadīpaṁ adāsahaṁ. 
Bhave nibbattamānamhi, 
nibbatte puññasañcaye; 
Duggatiṁ nābhijānāmi, 
dīpadānassidaṁ phalaṁ. 
Soḷase kappasahasse, 
ito te caturo janā; 
Candābhā nāma nāmena, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ekadīpiyo thero imā gāthāyo abhāsitthāti. 
Ekadīpiyattherassāpadānaṁ sattamaṁ. 
Navamaṁ bhāṇavāraṁ. 

Therāpadāna 
Sīhāsaniyavagga 
5 Pilindavacchattheraapadāna 
“Nibbute lokanāthamhi, 
sumedhe aggapuggale; 
Pasannacitto sumano, 
thūpapūjaṁ akāsahaṁ. 
Ye ca khīṇāsavā tattha, 
chaḷabhiññā mahiddhikā; 
Tehaṁ tattha samānetvā, 
saṅghabhattaṁ akāsahaṁ. 
Sumedhassa bhagavato, 
upaṭṭhāko tadā ahu; 
Sumedho nāma nāmena, 
anumodittha so tadā. 
Tena cittappasādena, 
vimānaṁ upapajjahaṁ; 
Chaḷāsītisahassāni, 
accharāyo ramiṁsu me. 
Mameva anuvattanti, 
sabbakāmehi tā sadā; 
Aññe deve abhibhomi, 
puññakammassidaṁ phalaṁ. 
Pañcavīsatikappamhi, 
varuṇo nāma khattiyo; 
Visuddhabhojano āsiṁ, 
cakkavattī ahaṁ tadā. 
Na te bījaṁ pavapanti, 
napi nīyanti naṅgalā; 
Akaṭṭhapākimaṁ sāliṁ, 
paribhuñjanti mānusā. 
Tattha rajjaṁ karitvāna, 
devattaṁ puna gacchahaṁ; 
Tadāpi edisā mayhaṁ, 
nibbattā bhogasampadā. 
Na maṁ mittā amittā vā, 
hiṁsanti sabbapāṇino; 
Sabbesampi piyo homi, 
puññakammassidaṁ phalaṁ. 
Tiṁsakappasahassamhi, 
yaṁ dānamadadiṁ tadā; 
Duggatiṁ nābhijānāmi, 
gandhālepassidaṁ phalaṁ. 
Imasmiṁ bhaddake kappe, 
eko āsiṁ janādhipo; 
Mahānubhāvo rājāhaṁ, 
cakkavattī mahabbalo. 
Sohaṁ pañcasu sīlesu, 
ṭhapetvā janataṁ bahuṁ; 
Pāpetvā sugatiṁyeva, 
devatānaṁ piyo ahuṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā pilindavaccho thero imā gāthāyo abhāsitthāti. 
Pilindavacchattherassāpadānaṁ pañcamaṁ. 

Therāpadāna 
Kumudavagga 
Maṇipūjakattheraapadāna 
“Orena himavantassa, 
nadikā sampavattatha; 
Tassā cānupakhettamhi, 
sayambhū vasate tadā. 
Maṇiṁ paggayha pallaṅkaṁ, 
sādhucittaṁ manoramaṁ; 
Pasannacitto sumano, 
buddhassa abhiropayiṁ. 
Catunnavutito kappe, 
yaṁ maṇiṁ abhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Ito ca dvādase kappe, 
sataraṁsīsanāmakā; 
Aṭṭha te āsuṁ rājāno, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā maṇipūjako thero imā gāthāyo abhāsitthāti. 
Maṇipūjakattherassāpadānaṁ aṭṭhamaṁ. 

Therāpadāna 
Kumudavagga 
Tikicchakattheraapadāna 
“Nagare bandhumatiyā, 
vejjo āsiṁ susikkhito; 
Āturānaṁ sadukkhānaṁ, 
mahājanasukhāvaho. 
Byādhitaṁ samaṇaṁ disvā, 
sīlavantaṁ mahājutiṁ; 
Pasannacitto sumano, 
bhesajjamadadiṁ tadā. 
Arogo āsi teneva, 
samaṇo saṁvutindriyo; 
Asoko nāma nāmena, 
upaṭṭhāko vipassino. 
Ekanavutito kappe, 
yaṁ osadhamadāsahaṁ; 
Duggatiṁ nābhijānāmi, 
bhesajjassa idaṁ phalaṁ. 
Ito ca aṭṭhame kappe, 
sabbosadhasanāmako; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā tikicchako thero imā gāthāyo abhāsitthāti. 
Tikicchakattherassāpadānaṁ navamaṁ. 

Therāpadāna 
Kumudavagga 
Saṅghupaṭṭhākattheraapadāna 
“Vessabhumhi bhagavati, 
ahosārāmiko ahaṁ; 
Pasannacitto sumano, 
upaṭṭhiṁ saṅghamuttamaṁ. 
Ekattiṁse ito kappe, 
yaṁ kammamakariṁ tadā; 
Duggatiṁ nābhijānāmi, 
upaṭṭhānassidaṁ phalaṁ. 
Ito te sattame kappe, 
sattevāsuṁ samodakā; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā saṅghupaṭṭhāko thero imā gāthāyo abhāsitthāti. 
Saṅghupaṭṭhākattherassāpadānaṁ dasamaṁ. 
Kumudavaggo aṭṭhārasamo. 
Tassuddānaṁ 
Kumudo atha nisseṇī, 
rattiko udapānado; 
Sīhāsanī maggadado, 
ekadīpī maṇippado; 
Tikicchako upaṭṭhāko, 
ekapaññāsa gāthakāti. 

Therāpadāna 
Kuṭajapupphiyavagga 
Kuṭajapupphiyattheraapadāna 
“Suvaṇṇavaṇṇaṁ sambuddhaṁ, 
Sataraṁsiṁva uggataṁ; 
Disaṁ anuvilokentaṁ, 
Gacchantaṁ anilañjase. 
Kuṭajaṁ pupphitaṁ disvā, 
saṁvitthatasamotthataṁ; 
Rukkhato ocinitvāna, 
phussassa abhiropayiṁ. 
Dvenavute ito kappe, 
yaṁ pupphamabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Ito sattarase kappe, 
tayo āsuṁ supupphitā; 
Sattaratanasampannā, 
cakkavattī mahabbalā. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā kuṭajapupphiyo thero imā gāthāyo abhāsitthāti. 
Kuṭajapupphiyattherassāpadānaṁ paṭhamaṁ. 

Therāpadāna 
Kuṭajapupphiyavagga 
Bandhujīvakattheraapadāna 
“Siddhattho nāma sambuddho, 
sayambhū sabbhi vaṇṇito; 
Samādhiṁ so samāpanno, 
nisīdi pabbatantare. 
Jātassare gavesanto, 
dakajaṁ pupphamuttamaṁ; 
Bandhujīvakapupphāni, 
addasaṁ samanantaraṁ. 
Ubho hatthehi paggayha, 
upāgacchiṁ mahāmuniṁ; 
Pasannacitto sumano, 
siddhatthassābhiropayiṁ. 
Catunnavutito kappe, 
yaṁ pupphamabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Ito cātuddase kappe, 
eko āsiṁ janādhipo; 
Samuddakappo nāmena, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā bandhujīvako thero imā gāthāyo abhāsitthāti. 
Bandhujīvakattherassāpadānaṁ dutiyaṁ. 

Therāpadāna 
Kuṭajapupphiyavagga 
3 Koṭumbariyattheraapadāna 
“Kaṇikāraṁva jotantaṁ, 
nisinnaṁ pabbatantare; 
Appameyyaṁva udadhiṁ, 
vitthataṁ dharaṇiṁ yathā. 
Pūjitaṁ devasaṅghena, 
nisabhājāniyaṁ yathā; 
Haṭṭho haṭṭhena cittena, 
upāgacchiṁ naruttamaṁ. 
Sattapupphāni paggayha, 
koṭumbarasamākulaṁ; 
Buddhassa abhiropesiṁ, 
sikhino lokabandhuno. 
Ekattiṁse ito kappe, 
yaṁ pupphamabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Ito vīsatikappamhi, 
mahānelasanāmako; 
Eko āsi mahātejo, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā koṭumbariyo thero imā gāthāyo abhāsitthāti. 
Koṭumbariyattherassāpadānaṁ tatiyaṁ. 

Therāpadāna 
Kuṭajapupphiyavagga 
Pañcahatthiyattheraapadāna 
“Tisso nāmāsi bhagavā, 
lokajeṭṭho narāsabho; 
Purakkhato sāvakehi, 
rathiyaṁ paṭipajjatha. 
Pañca uppalahatthā ca, 
cāturā ṭhapitā mayā; 
Āhutiṁ dātukāmohaṁ, 
paggaṇhiṁ vatasiddhiyā. 
Suvaṇṇavaṇṇaṁ sambuddhaṁ, 
Gacchantaṁ antarāpaṇe; 
Buddharaṁsīhi phuṭṭhosmi, 
Pūjesiṁ dvipaduttamaṁ. 
Dvenavute ito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Ito terasakappamhi, 
pañca susabhasammatā; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā pañcahatthiyo thero imā gāthāyo abhāsitthāti. 
Pañcahatthiyattherassāpadānaṁ catutthaṁ. 

Therāpadāna 
Kuṭajapupphiyavagga 
Isimuggadāyakattheraapadāna 
“Udentaṁ sataraṁsiṁva, 
pītaraṁsiṁva bhāṇumaṁ; 
Kakudhaṁ vilasantaṁva, 
padumuttaranāyakaṁ. 
Isimuggāni pisitvā, 
madhukhudde anīḷake; 
Pāsādeva ṭhito santo, 
adāsiṁ lokabandhuno. 
Aṭṭhasatasahassāni, 
ahesuṁ buddhasāvakā; 
Sabbesaṁ pattapūrentaṁ, 
tato cāpi bahuttaraṁ. 
Tena cittappasādena, 
sukkamūlena codito; 
Kappānaṁ satasahassaṁ, 
duggatiṁ nupapajjahaṁ. 
Cattālīsamhi sahasse, 
kappānaṁ aṭṭhatiṁsa te; 
Isimuggasanāmā te, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā isimuggadāyako thero imā gāthāyo abhāsitthāti. 
Isimuggadāyakattherassāpadānaṁ pañcamaṁ. 

Therāpadāna 
Kuṭajapupphiyavagga 
6 Bodhiupaṭṭhākattheraapadāna 
“Nagare rammavatiyā, 
āsiṁ murajavādako; 
Niccupaṭṭhānayuttomhi, 
gatohaṁ bodhimuttamaṁ. 
Sāyaṁ pātaṁ upaṭṭhitvā, 
sukkamūlena codito; 
Aṭṭhārasakappasate, 
duggatiṁ nupapajjahaṁ. 
Pannarase kappasate, 
ito āsiṁ janādhipo; 
Murajo nāma nāmena, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā bodhiupaṭṭhāko thero imā gāthāyo abhāsitthāti. 
Bodhiupaṭṭhākattherassāpadānaṁ chaṭṭhaṁ. 

Therāpadāna 
Kuṭajapupphiyavagga 
Ekacintikattheraapadāna 
“Yadā devo devakāyā, 
cavate āyusaṅkhayā; 
Tayo saddā niccharanti, 
devānaṁ anumodataṁ. 
‘Ito bho sugatiṁ gaccha, 
manussānaṁ sahabyataṁ; 
Manussabhūto saddhamme, 
labha saddhaṁ anuttaraṁ. 
Sā te saddhā niviṭṭhāssa, 
mūlajātā patiṭṭhitā; 
Yāvajīvaṁ asaṁhīrā, 
saddhamme suppavedite. 
Kāyena kusalaṁ katvā, 
vācāya kusalaṁ bahuṁ; 
Manasā kusalaṁ katvā, 
abyāpajjaṁ nirūpadhiṁ. 
Tato opadhikaṁ puññaṁ, 
katvā dānena taṁ bahuṁ; 
Aññepi macce saddhamme, 
brahmacariye nivesaya’. 
Imāya anukampāya, 
devā devaṁ yadā vidū; 
Cavantaṁ anumodanti, 
ehi deva punappunaṁ. 
Saṁvego me tadā āsi, 
devasaṅghe samāgate; 
Kaṁ su nāma ahaṁ yoniṁ, 
gamissāmi ito cuto. 
Mama saṁvegamaññāya, 
samaṇo bhāvitindriyo; 
Mamuddharitukāmo so, 
āgacchi mama santikaṁ. 
Sumano nāma nāmena, 
padumuttarasāvako; 
Atthadhammānusāsitvā, 
saṁvejesi mamaṁ tadā. 
Tassāhaṁ vacanaṁ sutvā, 
buddhe cittaṁ pasādayiṁ; 
Taṁ dhīraṁ abhivādetvā, 
tattha kālaṅkato ahaṁ. 
Upapajjiṁ sa tattheva, 
sukkamūlena codito; 
Kappānaṁ satasahassaṁ, 
duggatiṁ nupapajjahaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ekacintiko thero imā gāthāyo abhāsitthāti. 
Ekacintikattherassāpadānaṁ sattamaṁ. 

Therāpadāna 
Sīhāsaniyavagga 
Rāhulattheraapadāna 
“Padumuttarassa bhagavato, 
Lokajeṭṭhassa tādino; 
Sattabhūmamhi pāsāde, 
Ādāsaṁ santhariṁ ahaṁ. 
Khīṇāsavasahassehi, 
parikiṇṇo mahāmuni; 
Upāgami gandhakuṭiṁ, 
dvipadindo narāsabho. 
Virocento gandhakuṭiṁ, 
devadevo narāsabho; 
Bhikkhusaṅghe ṭhito satthā, 
imā gāthā abhāsatha. 
‘Yenāyaṁ jotitā seyyā, 
ādāsova susanthato; 
Tamahaṁ kittayissāmi, 
suṇātha mama bhāsato. 
Soṇṇamayā rūpimayā, 
atho veḷuriyāmayā; 
Nibbattissanti pāsādā, 
ye keci manaso piyā. 
Catusaṭṭhikkhattuṁ devindo, 
devarajjaṁ karissati; 
Sahassakkhattuṁ cakkavattī, 
bhavissati anantarā. 
Ekavīsatikappamhi, 
vimalo nāma khattiyo; 
Cāturanto vijitāvī, 
cakkavattī bhavissati. 
Nagaraṁ reṇuvatī nāma, 
iṭṭhakāhi sumāpitaṁ; 
Āyāmato tīṇi sataṁ, 
caturassasamāyutaṁ. 
Sudassano nāma pāsādo, 
vissakammena māpito; 
Kūṭāgāravarūpeto, 
sattaratanabhūsito. 
Dasasaddāvivittaṁ taṁ, 
vijjādharasamākulaṁ; 
Sudassanaṁva nagaraṁ, 
devatānaṁ bhavissati. 
Pabhā niggacchate tassa, 
uggacchanteva sūriye; 
Virocessati taṁ niccaṁ, 
samantā aṭṭhayojanaṁ. 
Kappasatasahassamhi, 
okkākakulasambhavo; 
Gotamo nāma gottena, 
satthā loke bhavissati. 
Tusitā so cavitvāna, 
sukkamūlena codito; 
Gotamassa bhagavato, 
atrajo so bhavissati. 
Sacevaseyya agāraṁ, 
cakkavattī bhaveyya so; 
Aṭṭhānametaṁ yaṁ tādī, 
agāre ratimajjhagā. 
Nikkhamitvā agāramhā, 
pabbajissati subbato; 
Rāhulo nāma nāmena, 
arahā so bhavissati’. 
Kikīva aṇḍaṁ rakkheyya, 
cāmarī viya vāladhiṁ; 
Nipako sīlasampanno, 
evaṁ rakkhiṁ mahāmuni. 
Tassāhaṁ dhammamaññāya, 
vihāsiṁ sāsane rato; 
Sabbāsave pariññāya, 
viharāmi anāsavo. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā rāhulo thero imā gāthāyo abhāsitthāti. 
Rāhulattherassāpadānaṁ chaṭṭhaṁ. 

Therāpadāna 
Kuṭajapupphiyavagga 
Tikaṇṇipupphiyattheraapadāna 
“Devabhūto ahaṁ santo, 
accharāhi purakkhato; 
Pubbakammaṁ saritvāna, 
buddhaseṭṭhaṁ anussariṁ. 
Tikaṇṇipupphaṁ paggayha, 
sakaṁ cittaṁ pasādayiṁ; 
Buddhamhi abhiropesiṁ, 
vipassimhi narāsabhe. 
Ekanavutito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Tesattatimhito kappe, 
caturāsuṁ ramuttamā; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā tikaṇṇipupphiyo thero imā gāthāyo abhāsitthāti. 
Tikaṇṇipupphiyattherassāpadānaṁ aṭṭhamaṁ. 

Therāpadāna 
Kuṭajapupphiyavagga 
Ekacāriyattheraapadāna 
“Tāvatiṁsesu devesu, 
mahāghoso tadā ahu; 
Buddho ca loke nibbāti, 
mayañcamha sarāgino. 
Tesaṁ saṁvegajātānaṁ, 
sokasallasamaṅginaṁ; 
Sabalena upatthaddho, 
agamaṁ buddhasantikaṁ. 
Mandāravaṁ gahetvāna, 
saṅgīti abhinimmitaṁ; 
Parinibbutakālamhi, 
buddhassa abhiropayiṁ. 
Sabbe devānumodiṁsu, 
accharāyo ca me tadā; 
Kappānaṁ satasahassaṁ, 
duggatiṁ nupapajjahaṁ. 
Saṭṭhikappasahassamhi, 
ito soḷasa te janā; 
Mahāmallajanā nāma, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ekacāriyo thero imā gāthāyo abhāsitthāti. 
Ekacāriyattherassāpadānaṁ navamaṁ. 

Therāpadāna 
Kuṭajapupphiyavagga 
Tivaṇṭipupphiyattheraapadāna 
“Abhibhūtaṁ panijjhanti, 
Sabbe saṅgamma te mamaṁ; 
Tesaṁ nijjhāyamānānaṁ, 
Pariḷāho ajāyatha. 
Sunando nāma nāmena, 
buddhassa sāvako tadā; 
Dhammadassissa munino, 
āgacchi mama santikaṁ. 
Ye me baddhacarā āsuṁ, 
te me pupphaṁ aduṁ tadā; 
Tāhaṁ pupphaṁ gahetvāna, 
sāvake abhiropayiṁ. 
Sohaṁ kālaṅkato tattha, 
punāpi upapajjahaṁ; 
Aṭṭhārase kappasate, 
vinipātaṁ na gacchahaṁ. 
Teraseto kappasate, 
aṭṭhāsuṁ dhūmaketuno; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā tivaṇṭipupphiyo thero imā gāthāyo abhāsitthāti. 
Tivaṇṭipupphiyattherassāpadānaṁ dasamaṁ. 
Kuṭajapupphiyavaggo ekūnavīsatimo. 
Tassuddānaṁ 
Kuṭajo bandhujīvī ca, 
koṭumbarikahatthiyo; 
Isimuggo ca bodhi ca, 
ekacintī tikaṇṇiko; 
Ekacārī tivaṇṭi ca, 
gāthā dvāsaṭṭhi kittitāti. 

Therāpadāna 
Tamālapupphiyavagga 
Tamālapupphiyattheraapadāna 
“Cullāsītisahassāni, 
thambhā sovaṇṇayā ahū; 
Devalaṭṭhipaṭibhāgaṁ, 
vimānaṁ me sunimmitaṁ. 
Tamālapupphaṁ paggayha, 
vippasannena cetasā; 
Buddhassa abhiropayiṁ, 
sikhino lokabandhuno. 
Ekattiṁse ito kappe, 
yaṁ kammamakariṁ tadā; 
Duggatiṁ nābhijānāmi, 
buddhapūjāyidaṁ phalaṁ. 
Ito vīsatime kappe, 
candatittoti ekako; 
Sattaratanasampanno, 
cakkavattī mahabbalo. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā tamālapupphiyo thero imā gāthāyo abhāsitthāti. 
Tamālapupphiyattherassāpadānaṁ paṭhamaṁ. 

Therāpadāna 
Tamālapupphiyavagga 
2 Tiṇasanthārakattheraapadāna 
“Yaṁ dāyavāsiko isi, 
tiṇaṁ lāyati satthuno; 
Sabbe padakkhiṇāvaṭṭā, 
pathabyā nipatiṁsu te. 
Tamahaṁ tiṇamādāya, 
santhariṁ dharaṇuttame; 
Tīṇeva tālapattāni, 
āharitvānahaṁ tadā. 
Tiṇena chadanaṁ katvā, 
siddhatthassa adāsahaṁ; 
Sattāhaṁ dhārayuṁ tassa, 
devamānusasatthuno. 
Catunnavutito kappe, 
yaṁ tiṇaṁ adadiṁ tadā; 
Duggatiṁ nābhijānāmi, 
tiṇadānassidaṁ phalaṁ. 
Pañcasaṭṭhimhito kappe, 
cattārosuṁ mahaddhanā; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā tiṇasanthārako thero imā gāthāyo abhāsitthāti. 
Tiṇasanthārakattherassāpadānaṁ dutiyaṁ. 

Therāpadāna 
Tamālapupphiyavagga 
Khaṇḍaphulliyattheraapadāna 
“Phussassa kho bhagavato, 
thūpo āsi mahāvane; 
Kuñjarehi tadā bhinno, 
parūḷho pādapo tahiṁ. 
Visamañca samaṁ katvā, 
sudhāpiṇḍaṁ adāsahaṁ; 
Tilokagaruno tassa, 
guṇehi paritosito. 
Dvenavute ito kappe, 
yaṁ kammamakariṁ tadā; 
Duggatiṁ nābhijānāmi, 
sudhāpiṇḍassidaṁ phalaṁ. 
Sattasattatikappamhi, 
jitasenāsuṁ soḷasa; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā khaṇḍaphulliyo thero imā gāthāyo abhāsitthāti. 
Khaṇḍaphulliyattherassāpadānaṁ tatiyaṁ. 

Therāpadāna 
Tamālapupphiyavagga 
Asokapūjakattheraapadāna 
“Tivarāyaṁ pure ramme, 
rājuyyānaṁ ahu tadā; 
Uyyānapālo tatthāsiṁ, 
rañño baddhacaro ahaṁ. 
Padumo nāma nāmena, 
sayambhū sappabho ahu; 
Nisinnaṁ puṇḍarīkamhi, 
chāyā na jahi taṁ muniṁ. 
Asokaṁ pupphitaṁ disvā, 
piṇḍibhāraṁ sudassanaṁ; 
Buddhassa abhiropesiṁ, 
jalajuttamanāmino. 
Catunnavutito kappe, 
yaṁ pupphamabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Sattatiṁsamhito kappe, 
soḷasa araṇañjahā; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā asokapūjako thero imā gāthāyo abhāsitthāti. 
Asokapūjakattherassāpadānaṁ catutthaṁ. 

Therāpadāna 
Tamālapupphiyavagga 
Aṅkolakattheraapadāna 
“Aṅkolaṁ pupphitaṁ disvā, 
mālāvaraṁ sakosakaṁ; 
Ocinitvāna taṁ pupphaṁ, 
agamaṁ buddhasantikaṁ. 
Siddhattho tamhi samaye, 
patilīno mahāmuni; 
Muhuttaṁ paṭimānetvā, 
guhāyaṁ pupphamokiriṁ. 
Catunnavutito kappe, 
Yaṁ pupphamabhipūjayiṁ; 
Duggatiṁ nābhijānāmi, 
Pupphadānassidaṁ phalaṁ. 
Chattiṁsamhi ito kappe, 
āseko devagajjito; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā aṅkolako thero imā gāthāyo abhāsitthāti. 
Aṅkolakattherassāpadānaṁ pañcamaṁ. 

Therāpadāna 
Tamālapupphiyavagga 
Kisalayapūjakattheraapadāna 
“Nagare dvāravatiyā, 
mālāvaccho mamaṁ ahu; 
Udapāno ca tattheva, 
pādapānaṁ virohano. 
Sabalena upatthaddho, 
siddhattho aparājito; 
Mamānukampamāno so, 
gacchate anilañjase. 
Aññaṁ kiñci na passāmi, 
pūjāyoggaṁ mahesino; 
Asokaṁ pallavaṁ disvā, 
ākāse ukkhipiṁ ahaṁ. 
Buddhassa te kisalayā, 
gacchato yanti pacchato; 
Tāhaṁ disvāna saṁvijiṁ, 
aho buddhassuḷāratā. 
Catunnavutito kappe, 
pallavaṁ abhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Sattatiṁse ito kappe, 
eko ekissaro ahu; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā kisalayapūjako thero imā gāthāyo abhāsitthāti. 
Kisalayapūjakattherassāpadānaṁ chaṭṭhaṁ. 

Therāpadāna 
Tamālapupphiyavagga 
Tindukadāyakattheraapadāna 
“Giriduggacaro āsiṁ, 
makkaṭo thāmavegiko; 
Phalinaṁ tindukaṁ disvā, 
buddhaseṭṭhaṁ anussariṁ. 
Nikkhamitvā katipāhaṁ, 
viciniṁ lokanāyakaṁ; 
Pasannacitto sumano, 
siddhatthaṁ tibhavantaguṁ. 
Mama saṅkappamaññāya, 
satthā loke anuttaro; 
Khīṇāsavasahassehi, 
āgacchi mama santikaṁ. 
Pāmojjaṁ janayitvāna, 
phalahattho upāgamiṁ; 
Paṭiggahesi bhagavā, 
sabbaññū vadataṁ varo. 
Catunnavutito kappe, 
yaṁ phalaṁ adadiṁ tadā; 
Duggatiṁ nābhijānāmi, 
phaladānassidaṁ phalaṁ. 
Sattapaññāsakappamhi, 
upanandasanāmako; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā tindukadāyako thero imā gāthāyo abhāsitthāti. 
Tindukadāyakattherassāpadānaṁ sattamaṁ. 

Therāpadāna 
Sīhāsaniyavagga 
7 Upasenavaṅgantaputtattheraapadāna 
“Padumuttaraṁ bhagavantaṁ, 
lokajeṭṭhaṁ narāsabhaṁ; 
Pabbhāramhi nisīdantaṁ, 
upagacchiṁ naruttamaṁ. 
Kaṇikārapupphaṁ disvā, 
vaṇṭe chetvānahaṁ tadā; 
Alaṅkaritvā chattamhi, 
buddhassa abhiropayiṁ. 
Piṇḍapātañca pādāsiṁ, 
paramannaṁ subhojanaṁ; 
Buddhena navame tattha, 
samaṇe aṭṭha bhojayiṁ. 
Anumodi mahāvīro, 
sayambhū aggapuggalo; 
Iminā chattadānena, 
paramannapavecchanā. 
Tena cittappasādena, 
sampattimanubhossasi; 
Chattiṁsakkhattuṁ devindo, 
devarajjaṁ karissati. 
Ekavīsatikkhattuñca, 
cakkavattī bhavissati; 
Padesarajjaṁ vipulaṁ, 
gaṇanāto asaṅkhiyaṁ. 
Satasahassito kappe, 
okkākakulasambhavo; 
Gotamo nāma gottena, 
satthā loke bhavissati. 
Sāsane dibbamānamhi, 
manussattaṁ gamissati; 
Tassa dhammesu dāyādo, 
oraso dhammanimmito. 
Upasenoti nāmena, 
hessati satthu sāvako; 
Samantapāsādikattā, 
aggaṭṭhāne ṭhapessati. 
Carimaṁ vattate mayhaṁ, 
bhavā sabbe samūhatā; 
Dhāremi antimaṁ dehaṁ, 
jetvā māraṁ savāhiniṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā upaseno vaṅgantaputto thero imā gāthāyo abhāsitthāti. 
Upasenavaṅgantaputtattherassāpadānaṁ sattamaṁ. 
Tatiyabhāṇavāraṁ. 

Therāpadāna 
Buddhavagga 
Buddhaapadāna 
Namo tassa Bhagavato Arahato Sammāsambuddhassa. 
Tathāgataṁ jetavane vasantaṁ, 
Apucchi vedehamunī nataṅgo; 
“Sabbaññubuddhā kira nāma honti, 
Bhavanti te hetubhi kehi vīra”. 
Tadāha sabbaññuvaro mahesī, 
Ānandabhaddaṁ madhurassarena; 
“Ye pubbabuddhesu katādhikārā, 
Aladdhamokkhā jinasāsanesu. 
Teneva sambodhimukhena dhīrā, 
Ajjhāsayenāpi mahābalena; 
Paññāya tejena sutikkhapaññā, 
Sabbaññubhāvaṁ anupāpuṇanti. 
Ahampi pubbabuddhesu, 
buddhattamabhipatthayiṁ; 
Manasāyeva hutvāna, 
dhammarājā asaṅkhiyā. 
Atha buddhāpadānāni, 
suṇātha suddhamānasā; 
Tiṁsapāramisampuṇṇā, 
dhammarājā asaṅkhiyā. 
Sambodhiṁ buddhaseṭṭhānaṁ, 
sasaṅghe lokanāyake; 
Dasaṅgulī namassitvā, 
sirasā abhivādayiṁ. 
Yāvatā buddhakhettesu, 
ratanā vijjantisaṅkhiyā; 
Ākāsaṭṭhā ca bhūmaṭṭhā, 
manasā sabbamāhariṁ. 
Tattha rūpiyabhūmiyaṁ, 
pāsādaṁ māpayiṁ ahaṁ; 
Nekabhummaṁ ratanāmayaṁ, 
ubbiddhaṁ nabhamuggataṁ. 
Vicittathambhaṁ sukataṁ, 
suvibhattaṁ mahārahaṁ; 
Kanakamayasaṅghāṭaṁ, 
kontacchattehi maṇḍitaṁ. 
Paṭhamā veḷuriyā bhūmi, 
vimalabbhasamā subhā; 
Naḷinajalajākiṇṇā, 
varakañcanabhūmiyā. 
Pavāḷaṁsā pavāḷavaṇṇā, 
kāci lohitakā subhā; 
Indagopakavaṇṇābhā, 
bhūmi obhāsatī disā. 
Suvibhattā gharamukhā, 
niyyūhā sīhapañjarā; 
Caturo vedikā jālā, 
gandhāveḷā manoramā. 
Nīlā pītā lohitakā, 
odātā suddhakāḷakā; 
Kūṭāgāravarūpetā, 
sattaratanabhūsitā. 
Olokamayā padumā, 
vāḷavihaṅgasobhitā; 
Nakkhattatārakākiṇṇā, 
candasūrehi maṇḍitā. 
Hemajālena sañchannā, 
soṇṇakiṅkiṇikāyutā; 
Vātavegena kūjanti, 
soṇṇamālā manoramā. 
Mañjeṭṭhakaṁ lohitakaṁ, 
pītakaṁ haripiñjaraṁ; 
Nānāraṅgehi sampītaṁ, 
ussitaddhajamālinī. 
Na naṁ bahūnekasatā, 
phalikā rajatāmayā; 
Maṇimayā lohitaṅgā, 
masāragallamayā tathā; 
Nānāsayanavicittā, 
saṇhakāsikasanthatā. 
Kampalā dukūlā cīnā, 
pattuṇṇā paṇḍupāvurā; 
Vividhattharaṇaṁ sabbaṁ, 
manasā paññapesahaṁ. 
Tāsu tāsveva bhūmīsu, 
ratanakūṭalaṅkataṁ; 
Maṇiverocanā ukkā, 
dhārayantā sutiṭṭhare. 
Sobhanti esikā thambhā, 
subhā kañcanatoraṇā; 
Jambonadā sāramayā, 
atho rajatamayāpi ca. 
Nekā sandhī suvibhattā, 
kavāṭaggaḷacittitā; 
Ubhato puṇṇaghaṭānekā, 
padumuppalasaṁyutā. 
Atīte sabbabuddhe ca, 
sasaṅghe lokanāyake; 
Pakativaṇṇarūpena, 
nimminitvā sasāvake. 
Tena dvārena pavisitvā, 
sabbe buddhā sasāvakā; 
Sabbasoṇṇamaye pīṭhe, 
nisinnā ariyamaṇḍalā. 
Ye ca etarahi atthi, 
Buddhā loke anuttarā; 
Atīte vattamānā ca, 
Bhavanaṁ sabbe samāruhuṁ. 
Paccekabuddhenekasate, 
Sayambhū aparājite; 
Atīte vattamāne ca, 
Bhavanaṁ sabbe samāruhuṁ. 
Kapparukkhā bahū atthi, 
Ye dibbā ye ca mānusā; 
Sabbaṁ dussaṁ samāhantvā, 
Acchādemi ticīvaraṁ. 
Khajjaṁ bhojjaṁ sāyanīyaṁ, 
sampannaṁ pānabhojanaṁ; 
Maṇimaye subhe patte, 
sampūretvā adāsahaṁ. 
Dibbavatthasamā hutvā, 
maṭṭhā cīvarasaṁyutā; 
Madhurā sakkharā ceva, 
telā ca madhuphāṇitā. 
Tappitā paramannena, 
sabbe te ariyamaṇḍalā; 
Ratanagabbhaṁ pavisitvā, 
kesarīva guhāsayā. 
Mahārahamhi sayane, 
sīhaseyyamakappayuṁ; 
Sampajānā samuṭṭhāya, 
sayane pallaṅkamābhujuṁ. 
Gocaraṁ sabbabuddhānaṁ, 
jhānaratisamappitā; 
Aññe dhammāni desenti, 
aññe kīḷanti iddhiyā. 
Aññe abhiññā appenti, 
abhiññā vasibhāvitā; 
Vikubbanā vikubbanti, 
aññenekasahassiyo. 
Buddhāpi buddhe pucchanti, 
visayaṁ sabbaññumālayaṁ; 
Gambhīraṁ nipuṇaṁ ṭhānaṁ, 
paññāya vinibujjhare. 
Sāvakā buddhe pucchanti, 
buddhā pucchanti sāvake; 
Aññamaññañca pucchitvā, 
aññoññaṁ byākaronti te. 
Buddhā paccekabuddhā ca, 
sāvakā paricārakā; 
Evaṁ sakāya ratiyā, 
pāsādebhiramanti te. 
Chattā tiṭṭhantu ratanā, 
kañcanāveḷapantikā; 
Muttājālaparikkhittā, 
sabbe dhārentu matthake. 
Bhavantu ceḷavitānā, 
soṇṇatārakacittitā; 
Vicittamalyavitatā, 
sabbe dhārentu matthake. 
Vitatā malyadāmehi, 
gandhadāmehi sobhitā; 
Dussadāmaparikiṇṇā, 
ratanadāmabhūsitā. 
Pupphābhikiṇṇā sucittā, 
surabhigandhabhūsitā; 
Gandhapañcaṅgulakatā, 
hemacchadanachāditā. 
Catuddisā pokkharañño, 
padumuppalasanthatā; 
Sovaṇṇarūpā khāyantu, 
padmareṇurajuggatā. 
Pupphantu pādapā sabbe, 
pāsādassa samantato; 
Sayañca pupphā muñcitvā, 
gantvā bhavanamokiruṁ. 
Sikhino tattha naccantu, 
dibbahaṁsā pakūjare; 
Karavīkā ca gāyantu, 
dijasaṅghā samantato. 
Bheriyo sabbā vajjantu, 
vīṇā sabbā rasantu tā; 
Sabbā saṅgīti vattantu, 
pāsādassa samantato. 
Yāvatā buddhakhettamhi, 
cakkavāḷe tato pare; 
Mahantā jotisampannā, 
acchinnā ratanāmayā. 
Tiṭṭhantu soṇṇapallaṅkā, 
dīparukkhā jalantu te; 
Bhavantu ekapajjotā, 
dasasahassiparamparā. 
Gaṇikā lāsikā ceva, 
naccantu accharāgaṇā; 
Nānāraṅgā padissantu, 
pāsādassa samantato. 
Dumagge pabbatagge vā, 
sinerugirimuddhani; 
Ussāpemi dhajaṁ sabbaṁ, 
vicittaṁ pañcavaṇṇikaṁ. 
Narā nāgā ca gandhabbā, 
sabbe devā upentu te; 
Namassantā pañjalikā, 
pāsādaṁ parivārayuṁ. 
Yaṁ kiñci kusalaṁ kammaṁ, 
kattabbaṁ kiriyaṁ mama; 
Kāyena vācā manasā, 
tidase sukataṁ kataṁ. 
Ye sattā saññino atthi, 
ye ca sattā asaññino; 
Kataṁ puññaphalaṁ mayhaṁ, 
sabbe bhāgī bhavantu te. 
Yesaṁ kataṁ suviditaṁ, 
dinnaṁ puññaphalaṁ mayā; 
Ye ca tattha na jānanti, 
devā gantvā nivedayuṁ. 
Sabbalokamhi ye sattā, 
Jīvantāhārahetukā; 
Manuññaṁ bhojanaṁ sabbaṁ, 
Labhantu mama cetasā. 
Manasā dānaṁ mayā dinnaṁ, 
manasā pasādamāvahiṁ; 
Pūjitā sabbasambuddhā, 
paccekā jinasāvakā. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Duve bhave pajānāmi, 
devatte atha mānuse; 
Aññaṁ gatiṁ na jānāmi, 
manasā patthanāphalaṁ. 
Devānaṁ adhiko homi, 
bhavāmi manujādhipo; 
Rūpalakkhaṇasampanno, 
paññāya asamo bhave. 
Bhojanaṁ vividhaṁ seṭṭhaṁ, 
Ratanañca anappakaṁ; 
Vividhāni ca vatthāni, 
Nabhā khippaṁ upenti maṁ. 
Pathabyā pabbate ceva, 
ākāse udake vane; 
Yaṁ yaṁ hatthaṁ pasāremi, 
dibbā bhakkhā upenti maṁ. 
Pathabyā pabbate ceva, 
ākāse udake vane; 
Yaṁ yaṁ hatthaṁ pasāremi, 
ratanā sabbe upenti maṁ. 
Pathabyā pabbate ceva, 
ākāse udake vane; 
Yaṁ yaṁ hatthaṁ pasāremi, 
sabbe gandhā upenti maṁ. 
Pathabyā pabbate ceva, 
ākāse udake vane; 
Yaṁ yaṁ hatthaṁ pasāremi, 
sabbe yānā upenti maṁ. 
Pathabyā pabbate ceva, 
ākāse udake vane; 
Yaṁ yaṁ hatthaṁ pasāremi, 
sabbe mālā upenti maṁ. 
Pathabyā pabbate ceva, 
ākāse udake vane; 
Yaṁ yaṁ hatthaṁ pasāremi, 
alaṅkārā upenti maṁ. 
Pathabyā pabbate ceva, 
ākāse udake vane; 
Yaṁ yaṁ hatthaṁ pasāremi, 
sabbā kaññā upenti maṁ. 
Pathabyā pabbate ceva, 
ākāse udake vane; 
Yaṁ yaṁ hatthaṁ pasāremi, 
madhusakkharā upenti maṁ. 
Pathabyā pabbate ceva, 
ākāse udake vane; 
Yaṁ yaṁ hatthaṁ pasāremi, 
sabbe khajjā upenti maṁ. 
Adhane addhikajane, 
yācake ca pathāvino; 
Dadāmihaṁ dānavaraṁ, 
sambodhivarapattiyā. 
Nādento pabbataṁ selaṁ, 
gajjento bahalaṁ giriṁ; 
Sadevakaṁ hāsayanto, 
buddho loke bhavāmahaṁ. 
Disā dasavidhā loke, 
yāyato natthi antakaṁ; 
Tasmiñca disābhāgamhi, 
buddhakhettā asaṅkhiyā. 
Pabhā pakittitā mayhaṁ, 
yamakā raṁsivāhanā; 
Etthantare raṁsijālaṁ, 
āloko vipulo bhave. 
Ettake lokadhātumhi, 
sabbe passantu maṁ janā; 
Sabbe maṁ anuvattantu, 
yāva brahmanivesanaṁ. 
Visiṭṭhamadhunādena, 
amatabherimāhaniṁ; 
Etthantare janā sabbe, 
suṇantu madhuraṁ giraṁ. 
Dhammameghena vassante, 
sabbe hontu anāsavā; 
Yettha pacchimakā sattā, 
sotāpannā bhavantu te. 
Datvā dātabbakaṁ dānaṁ, 
sīlaṁ pūretvā asesato; 
Nekkhammapāramiṁ gantvā, 
patto sambodhimuttamaṁ. 
Paṇḍite paripucchitvā, 
katvā vīriyamuttamaṁ; 
Khantiyā pāramiṁ gantvā, 
patto sambodhimuttamaṁ. 
Katvā daḷhamadhiṭṭhānaṁ, 
saccapārami pūriya; 
Mettāya pāramiṁ gantvā, 
patto sambodhimuttamaṁ. 
Lābhālābhe sukhe dukkhe, 
sammāne cāvamānane; 
Sabbattha samako hutvā, 
patto sambodhimuttamaṁ. 
Kosajjaṁ bhayato disvā, 
vīriyañcāpi khemato; 
Āraddhavīriyā hot