Sự Nghiệp Anh Hùng (Apadāna)

ṁ phalaṁ. 
Ito tesattatikappe, 
eko āsiṁ mahīpati; 
Jotiyo nāma nāmena, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā mañjaripūjako thero imā gāthāyo abhāsitthāti. 
Mañjaripūjakattherassāpadānaṁ sattamaṁ. 

Therāpadāna 
Subhūtivagga 
3 Tisaraṇagamaniyattheraapadāna 
“Nagare candavatiyā, 
mātuupaṭṭhāko ahuṁ; 
Andhā mātā pitā mayhaṁ, 
te posemi ahaṁ tadā. 
Rahogato nisīditvā, 
evaṁ cintesahaṁ tadā; 
Posento mātāpitaro, 
pabbajjaṁ na labhāmahaṁ. 
Mahandhakārapihitā, 
tividhaggīhi ḍayhare; 
Etādise bhave jāte, 
natthi koci vināyako. 
Buddho loke samuppanno, 
dippati dāni sāsanaṁ; 
Sakkā uddharituṁ attā, 
puññakāmena jantunā. 
Uggayha tīṇi saraṇe, 
paripuṇṇāni gopayiṁ; 
Tena kammena sukatena, 
paṭimokkhāmi duggatiṁ. 
Nisabho nāma samaṇo, 
buddhassa aggasāvako; 
Tamahaṁ upagantvāna, 
saraṇagamanaṁ gahiṁ. 
Vassasatasahassāni, 
āyu vijjati tāvade; 
Tāvatā saraṇagamanaṁ, 
paripuṇṇaṁ agopayiṁ. 
Carime vattamānamhi, 
saraṇaṁ taṁ anussariṁ; 
Tena kammena sukatena, 
tāvatiṁsaṁ agacchahaṁ. 
Devalokagato santo, 
puññakammasamāhito; 
Yaṁ desaṁ upapajjāmi, 
aṭṭha hetū labhāmahaṁ. 
Disāsu pūjito homi, 
tikkhapañño bhavāmahaṁ; 
Sabbe devānuvattanti, 
amitabhogaṁ labhāmahaṁ. 
Suvaṇṇavaṇṇo sabbattha, 
paṭikanto bhavāmahaṁ; 
Mittānaṁ acalo homi, 
yaso abbhuggato mamaṁ. 
Asītikkhattu devindo, 
devarajjamakārayiṁ; 
Dibbasukhaṁ anubhaviṁ, 
accharāhi purakkhato. 
Pañcasattatikkhattuñca, 
cakkavattī ahosahaṁ; 
Padesarajjaṁ vipulaṁ, 
gaṇanāto asaṅkhiyaṁ. 
Pacchime bhave sampatte, 
puññakammasamāhito; 
Pure sāvatthiyaṁ jāto, 
mahāsāle suaḍḍhake. 
Nagarā nikkhamitvāna, 
dārakehi purakkhato; 
Hasakhiḍḍasamaṅgīhaṁ, 
saṅghārāmaṁ upāgamiṁ. 
Tatthaddasāsiṁ samaṇaṁ, 
vippamuttaṁ nirūpadhiṁ; 
So me dhammamadesesi, 
saraṇañca adāsi me. 
Sohaṁ sutvāna saraṇaṁ, 
saraṇaṁ me anussariṁ; 
Ekāsane nisīditvā, 
arahattamapāpuṇiṁ. 
Jātiyā sattame vasse, 
arahattamapāpuṇiṁ; 
Upasampādayi buddho, 
guṇamaññāya cakkhumā. 
Aparimeyye ito kappe, 
saraṇāni agacchahaṁ; 
Tato me sukataṁ kammaṁ, 
phalaṁ dassesi me idha. 
Sugopitaṁ me saraṇaṁ, 
mānasaṁ suppaṇīhitaṁ; 
Anubhotvā yasaṁ sabbaṁ, 
pattomhi acalaṁ padaṁ. 
Yesaṁ sotāvadhānatthi, 
suṇotha mama bhāsato; 
Ahaṁ vo kathayissāmi, 
sāmaṁ diṭṭhaṁ padaṁ mama. 
‘Buddho loke samuppanno, 
vattate jinasāsanaṁ; 
Amatā vāditā bherī, 
sokasallavinodanā. 
Yathāsakena thāmena, 
puññakkhette anuttare; 
Adhikāraṁ kareyyātha, 
passayissatha nibbutiṁ. 
Paggayha tīṇi saraṇe, 
pañcasīlāni gopiya; 
Buddhe cittaṁ pasādetvā, 
dukkhassantaṁ karissatha. 
Sammā dhammaṁ bhāvetvāna, 
Sīlāni parigopiya; 
Aciraṁ arahattaṁ vo, 
Sabbepi pāpuṇissatha. 
Tevijjo iddhipattomhi, 
cetopariyakovido; 
Sāvako te mahāvīra, 
saraṇo vandati satthuno’. 
Aparimeyye ito kappe, 
saraṇaṁ buddhassa gacchahaṁ; 
Duggatiṁ nābhijānāmi, 
saraṇaṁ gamane phalaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā tisaraṇagamaniyo thero imā gāthāyo abhāsitthāti. 
Tisaraṇagamaniyattherassāpadānaṁ tatiyaṁ. 

Therāpadāna 
Thomakavagga 
Paṇṇadāyakattheraapadāna 
“Pabbate himavantamhi, 
vākacīradharo ahaṁ; 
Aloṇapaṇṇabhakkhomhi, 
niyamesu ca saṁvuto. 
Pātarāse anuppatte, 
siddhattho upagacchi maṁ; 
Tāhaṁ buddhassa pādāsiṁ, 
pasanno sehi pāṇibhi. 
Catunnavutito kappe, 
yaṁ paṇṇamadadiṁ tadā; 
Duggatiṁ nābhijānāmi, 
paṇṇadānassidaṁ phalaṁ. 
Sattavīsatikappamhi, 
rājā āsiṁ sadatthiyo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā paṇṇadāyako thero imā gāthāyo abhāsitthāti. 
Paṇṇadāyakattherassāpadānaṁ aṭṭhamaṁ. 

Therāpadāna 
Thomakavagga 
Kuṭidāyakattheraapadāna 
“Vipinacārī sambuddho, 
rukkhamūle vasī tadā; 
Paṇṇasālaṁ karitvāna, 
adāsiṁ aparājite. 
Ekanavutito kappe, 
yaṁ paṇṇakuṭikaṁ adaṁ; 
Duggatiṁ nābhijānāmi, 
kuṭidānassidaṁ phalaṁ. 
Aṭṭhavīse ito kappe, 
soḷasāsiṁsu rājāno; 
Sabbattha abhivassīti, 
vuccare cakkavattino. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā kuṭidāyako thero imā gāthāyo abhāsitthāti. 
Kuṭidāyakattherassāpadānaṁ navamaṁ. 

Therāpadāna 
Thomakavagga 
Aggapupphiyattheraapadāna 
“Suvaṇṇavaṇṇaṁ sambuddhaṁ, 
Nisinnaṁ pabbatantare; 
Obhāsayantaṁ raṁsena, 
Sikhinaṁ sikhinaṁ yathā. 
Aggajaṁ pupphamādāya, 
upāgacchiṁ naruttamaṁ; 
Pasannacitto sumano, 
buddhassa abhiropayiṁ. 
Ekattiṁse ito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Pañcavīsatikappamhi, 
ahosi amitogato; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā aggapupphiyo thero imā gāthāyo abhāsitthāti. 
Aggapupphiyattherassāpadānaṁ dasamaṁ. 
Thomakavaggo chabbīsatimo. 
Tassuddānaṁ 
Thomakekāsanacitakaṁ, 
campako sattapāṭali; 
Pānadhi mañjarī paṇṇaṁ, 
kuṭido aggapupphiyo; 
Gāthāyo gaṇitā cettha, 
ekatālīsameva cāti. 

Therāpadāna 
Padumukkhipavagga 
Ākāsukkhipiyattheraapadāna 
“Suvaṇṇavaṇṇaṁ siddhatthaṁ, 
Gacchantaṁ antarāpaṇe; 
Jalajagge duve gayha, 
Upāgacchiṁ narāsabhaṁ. 
Ekañca pupphaṁ pādesu, 
buddhaseṭṭhassa nikkhipiṁ; 
Ekañca pupphaṁ paggayha, 
ākāse ukkhipiṁ ahaṁ. 
Catunnavutito kappe, 
yaṁ pupphamabhiropayiṁ; 
Duggatiṁ nābhijānāmi, 
pupphadānassidaṁ phalaṁ. 
Ito chattiṁsakappamhi, 
eko āsiṁ mahīpati; 
Antalikkhakaro nāma, 
cakkavattī mahabbalo. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā ākāsukkhipiyo thero imā gāthāyo abhāsitthāti. 
Ākāsukkhipiyattherassāpadānaṁ paṭhamaṁ. 

Therāpadāna 
Padumukkhipavagga 
Telamakkhiyattheraapadāna 
“Siddhatthamhi bhagavati, 
nibbutamhi narāsabhe; 
Bodhiyā vedikāyāhaṁ, 
telaṁ makkhesi tāvade. 
Catunnavutito kappe, 
yaṁ telaṁ makkhayiṁ tadā; 
Duggatiṁ nābhijānāmi, 
makkhanāya idaṁ phalaṁ. 
Catuvīse ito kappe, 
succhavi nāma khattiyo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā telamakkhiyo thero imā gāthāyo abhāsitthāti. 
Telamakkhiyattherassāpadānaṁ dutiyaṁ. 

Therāpadāna 
Padumukkhipavagga 
Aḍḍhacandiyattheraapadāna 
“Tissassa kho bhagavato, 
bodhiyā pādaputtame; 
Aḍḍhacandaṁ mayā dinnaṁ, 
dharaṇīruhapādape. 
Dvenavute ito kappe, 
yaṁ candamabhiropayiṁ; 
Duggatiṁ nābhijānāmi, 
bodhipūjāyidaṁ phalaṁ. 
Pañcavīse ito kappe, 
devalo nāma khattiyo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā aḍḍhacandiyo thero imā gāthāyo abhāsitthāti. 
Aḍḍhacandiyattherassāpadānaṁ tatiyaṁ. 

Therāpadāna 
Padumukkhipavagga 
4 Padīpadāyakattheraapadāna 
“Devabhūto ahaṁ santo, 
oruyha pathaviṁ tadā; 
Padīpe pañca pādāsiṁ, 
pasanno sehi pāṇibhi. 
Catunnavutito kappe, 
yaṁ padīpamadaṁ tadā; 
Duggatiṁ nābhijānāmi, 
dīpadānassidaṁ phalaṁ. 
Pañcapaññāsake kappe, 
eko āsiṁ mahīpati; 
Samantacakkhunāmena, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā padīpadāyako thero imā gāthāyo abhāsitthāti. 
Padīpadāyakattherassāpadānaṁ catutthaṁ. 

Therāpadāna 
Padumukkhipavagga 
Biḷālidāyakattheraapadāna 
“Himavantassāvidūre, 
romaso nāma pabbato; 
Tamhi pabbatapādamhi, 
samaṇo bhāvitindriyo. 
Biḷāliyo gahetvāna, 
samaṇassa adāsahaṁ; 
Anumodi mahāvīro, 
sayambhū aparājito. 
Biḷālī te mama dinnā, 
vippasannena cetasā; 
Bhave nibbattamānamhi, 
phalaṁ nibbattataṁ tava. 
Catunnavutito kappe, 
yaṁ biḷālimadāsahaṁ; 
Duggatiṁ nābhijānāmi, 
biḷāliyā idaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā biḷālidāyako thero imā gāthāyo abhāsitthāti. 
Biḷālidāyakattherassāpadānaṁ pañcamaṁ. 

Therāpadāna 
Padumukkhipavagga 
Macchadāyakattheraapadāna 
“Candabhāgānadītīre, 
ukkuso āsahaṁ tadā; 
Mahantaṁ macchaṁ paggayha, 
siddhatthamunino adaṁ. 
Catunnavutito kappe, 
yaṁ macchamadadiṁ tadā; 
Duggatiṁ nābhijānāmi, 
macchadānassidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā macchadāyako thero imā gāthāyo abhāsitthāti. 
Macchadāyakattherassāpadānaṁ chaṭṭhaṁ. 

Therāpadāna 
Padumukkhipavagga 
Javahaṁsakattheraapadāna 
“Candabhāgānadītīre, 
Āsiṁ vanacaro tadā; 
Siddhatthaṁ addasaṁ buddhaṁ, 
Gacchantaṁ anilañjase. 
Añjaliṁ paggahetvāna, 
ullokento mahāmuniṁ; 
Sakaṁ cittaṁ pasādetvā, 
avandiṁ nāyakaṁ ahaṁ. 
Catunnavutito kappe, 
yamavandiṁ narāsabhaṁ; 
Duggatiṁ nābhijānāmi, 
vandanāya idaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā javahaṁsako thero imā gāthāyo abhāsitthāti. 
Javahaṁsakattherassāpadānaṁ sattamaṁ. 

Therāpadāna 
Subhūtivagga 
Pañcasīlasamādāniyattheraapadāna 
“Nagare candavatiyā, 
bhatako āsahaṁ tadā; 
Parakammāyane yutto, 
pabbajjaṁ na labhāmahaṁ. 
Mahandhakārapihitā, 
tividhaggīhi ḍayhare; 
Kena nu kho upāyena, 
visaṁyutto bhave ahaṁ. 
Deyyadhammo ca me natthi, 
varāko bhatako ahaṁ; 
Yannūnāhaṁ pañcasīlaṁ, 
rakkheyyaṁ paripūrayaṁ. 
Anomadassissa munino, 
nisabho nāma sāvako; 
Tamahaṁ upasaṅkamma, 
pañcasikkhāpadaggahiṁ. 
Vassasatasahassāni, 
āyu vijjati tāvade; 
Tāvatā pañcasīlāni, 
paripuṇṇāni gopayiṁ. 
Maccukāle ca sampatte, 
devā assāsayanti maṁ; 
‘Ratho sahassayutto te, 
mārisāyaṁ upaṭṭhito’. 
Vattante carime citte, 
mama sīlaṁ anussariṁ; 
Tena kammena sukatena, 
tāvatiṁsaṁ agacchahaṁ. 
Tiṁsakkhattuñca devindo, 
devarajjamakārayiṁ; 
Dibbasukhaṁ anubhaviṁ, 
accharāhi purakkhato. 
Pañcasattatikkhattuñca, 
cakkavattī ahosahaṁ; 
Padesarajjaṁ vipulaṁ, 
gaṇanāto asaṅkhiyaṁ. 
Devalokā cavitvāna, 
sukkamūlena codito; 
Pure vesāliyaṁ jāto, 
mahāsāle suaḍḍhake. 
Vassūpanāyike kāle, 
dippante jinasāsane; 
Mātā ca me pitā ceva, 
pañcasikkhāpadaggahuṁ. 
Saha sutvānahaṁ sīlaṁ, 
mama sīlaṁ anussariṁ; 
Ekāsane nisīditvā, 
arahattamapāpuṇiṁ. 
<b>Jātiyā pañcavassena</b>, 
arahattamapāpuṇiṁ; 
Upasampādayi buddho, 
guṇamaññāya cakkhumā. 
Paripuṇṇāni gopetvā, 
pañcasikkhāpadānahaṁ; 
Aparimeyye ito kappe, 
vinipātaṁ na gacchahaṁ. 
Svāhaṁ yasamanubhaviṁ, 
tesaṁ sīlāna vāhasā; 
Kappakoṭimpi kittento, 
kittaye ekadesakaṁ. 
Pañca sīlāni gopetvā, 
tayo hetū labhāmahaṁ; 
Dīghāyuko mahābhogo, 
tikkhapañño bhavāmahaṁ. 
Saṅkittento ca sabbesaṁ, 
adhimattañca porisaṁ; 
Bhavābhave saṁsaritvā, 
ete ṭhāne labhāmahaṁ. 
Aparimeyyasīlesu, 
vattantā jinasāvakā; 
Bhavesu yadi rajjeyyuṁ, 
vipāko kīdiso bhave. 
Suciṇṇaṁ me pañcasīlaṁ, 
bhatakena tapassinā; 
Tena sīlenahaṁ ajja, 
mocayiṁ sabbabandhanā. 
Aparimeyye ito kappe, 
pañca sīlāni gopayiṁ; 
Duggatiṁ nābhijānāmi, 
pañcasīlānidaṁ phalaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā pañcasīlasamādāniyo thero imā gāthāyo abhāsitthāti. 
Pañcasīlasamādāniyattherassāpadānaṁ catutthaṁ. 

Therāpadāna 
Padumukkhipavagga 
8 Saḷalapupphiyattheraapadāna 
“Candabhāgānadītīre, 
ahosiṁ kinnaro tadā; 
Vipassiṁ addasaṁ buddhaṁ, 
raṁsijālasamākulaṁ. 
Pasannacitto sumano, 
paramāya ca pītiyā; 
Paggayha saḷalaṁ pupphaṁ, 
vipassiṁ okiriṁ ahaṁ. 
Ekanavutito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā saḷalapupphiyo thero imā gāthāyo abhāsitthāti. 
Saḷalapupphiyattherassāpadānaṁ aṭṭhamaṁ. 

Therāpadāna 
Padumukkhipavagga 
9 Upāgatāsayattheraapadāna 
“Himavantassa vemajjhe, 
saro āsi sunimmito; 
Tatthāhaṁ rakkhaso āsiṁ, 
heṭhasīlo bhayānako. 
Anukampako kāruṇiko, 
vipassī lokanāyako; 
Mamuddharitukāmo so, 
āgacchi mama santikaṁ. 
Upāgataṁ mahāvīraṁ, 
devadevaṁ narāsabhaṁ; 
Āsayā abhinikkhamma, 
avandiṁ satthuno ahaṁ. 
Ekanavutito kappe, 
yaṁ vandiṁ purisuttamaṁ; 
Duggatiṁ nābhijānāmi, 
vandanāya idaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā upāgatāsayo thero imā gāthāyo abhāsitthāti. 
Upāgatāsayattherassāpadānaṁ navamaṁ. 

Therāpadāna 
Padumukkhipavagga 
Taraṇiyattheraapadāna 
“Suvaṇṇavaṇṇo sambuddho, 
vipassī dakkhiṇāraho; 
Nadītīre ṭhito satthā, 
bhikkhusaṅghapurakkhato. 
Nāvā na vijjate tattha, 
santāraṇī mahaṇṇave; 
Nadiyā abhinikkhamma, 
tāresiṁ lokanāyakaṁ. 
Ekanavutito kappe, 
yaṁ tāresiṁ naruttamaṁ; 
Duggatiṁ nābhijānāmi, 
taraṇāya idaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā taraṇiyo thero imā gāthāyo abhāsitthāti. 
Taraṇiyattherassāpadānaṁ dasamaṁ. 
Padumukkhipavaggo sattavīsatimo. 
Tassuddānaṁ 
Ukkhipī telacandī ca, 
dīpado ca biḷālido; 
Maccho javo saḷalado, 
rakkhaso taraṇo dasa; 
Gāthāyo cettha saṅkhātā, 
tālīsaṁ cekameva cāti. 

Therāpadāna 
Suvaṇṇabibbohanavagga 
1 Suvaṇṇabibbohaniyattheraapadāna 
“Ekāsanaṁ ahamadaṁ, 
pasanno sehi pāṇibhi; 
Bibbohanañca pādāsiṁ, 
uttamatthassa pattiyā. 
Ekanavutito kappe, 
bibbohanamadāsahaṁ; 
Duggatiṁ nābhijānāmi, 
bibbohanassidaṁ phalaṁ. 
Ito tesaṭṭhime kappe, 
asamo nāma khattiyo; 
Sattaratanasampanno, 
cakkavattī mahabbalo. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā suvaṇṇabibbohaniyo thero imā gāthāyo abhāsitthāti. 
Suvaṇṇabibbohaniyattherassāpadānaṁ paṭhamaṁ. 

Therāpadāna 
Suvaṇṇabibbohanavagga 
2 Tilamuṭṭhidāyakattheraapadāna 
“Mama saṅkappamaññāya, 
satthā lokagganāyako; 
Manomayena kāyena, 
iddhiyā upasaṅkami. 
Satthāraṁ upasaṅkantaṁ, 
vanditvā purisuttamaṁ; 
Pasannacitto sumano, 
tilamuṭṭhimadāsahaṁ. 
Ekanavutito kappe, 
yaṁ dānamadadiṁ tadā; 
Duggatiṁ nābhijānāmi, 
tilamuṭṭhiyidaṁ phalaṁ. 
Ito soḷasakappamhi, 
tantiso nāma khattiyo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā tilamuṭṭhidāyako thero imā gāthāyo abhāsitthāti. 
Tilamuṭṭhidāyakattherassāpadānaṁ dutiyaṁ. 

Therāpadāna 
Suvaṇṇabibbohanavagga 
3 Caṅkoṭakiyattheraapadāna 
“Mahāsamuddaṁ nissāya, 
vasatī pabbatantare; 
Paccuggantvāna katvāna, 
caṅkoṭaka madāsahaṁ. 
Siddhatthassa mahesino, 
sabbasattānukampino; 
Pupphacaṅkoṭakaṁ datvā, 
kappaṁ saggamhi modahaṁ. 
Catunnavutito kappe, 
caṅkoṭakamadaṁ tadā; 
Duggatiṁ nābhijānāmi, 
caṅkoṭakassidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā caṅkoṭakiyo thero imā gāthāyo abhāsitthāti. 
Caṅkoṭakiyattherassāpadānaṁ tatiyaṁ. 

Therāpadāna 
Suvaṇṇabibbohanavagga 
Abbhañjanadāyakattheraapadāna 
“Koṇḍaññassa bhagavato, 
vītarāgassa tādino; 
Ākāsasamacittassa, 
nippapañcassa jhāyino. 
Sabbamohātivattassa, 
sabbalokahitesino; 
Abbhañjanaṁ mayā dinnaṁ, 
dvipadindassa tādino. 
Aparimeyye ito kappe, 
abbhañjanamadaṁ tadā; 
Duggatiṁ nābhijānāmi, 
abbhañjanassidaṁ phalaṁ. 
Ito pannarase kappe, 
cirappo nāma khattiyo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā abbhañjanadāyako thero imā gāthāyo abhāsitthāti. 
Abbhañjanadāyakattherassāpadānaṁ catutthaṁ. 

Therāpadāna 
Suvaṇṇabibbohanavagga 
5 Ekañjalikattheraapadāna 
“Udumbare vasantassa, 
niyate paṇṇasanthare; 
Vutthokāso mayā dinno, 
samaṇassa mahesino. 
Tissassa dvipadindassa, 
lokanāthassa tādino; 
Añjaliṁ paggahetvāna, 
santhariṁ pupphasantharaṁ. 
Dvenavute ito kappe, 
yaṁ kariṁ pupphasantharaṁ; 
Duggatiṁ nābhijānāmi, 
santharassa idaṁ phalaṁ. 
Ito cuddasakappamhi, 
ahosiṁ manujādhipo; 
Ekaañjaliko nāma, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ekañjaliko thero imā gāthāyo abhāsitthāti. 
Ekañjalikattherassāpadānaṁ pañcamaṁ. 

Therāpadāna 
Suvaṇṇabibbohanavagga 
6 Potthakadāyakattheraapadāna 
“Satthāraṁ dhammamārabbha, 
saṅghañcāpi mahesinaṁ; 
Potthadānaṁ mayā dinnaṁ, 
dakkhiṇeyye anuttare. 
Ekanavutito kappe, 
yaṁ kammamakariṁ tadā; 
Duggatiṁ nābhijānāmi, 
potthadānassidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā potthakadāyako thero imā gāthāyo abhāsitthāti. 
Potthakadāyakattherassāpadānaṁ chaṭṭhaṁ. 

Therāpadāna 
Suvaṇṇabibbohanavagga 
Citakapūjakattheraapadāna 
“Candabhāgānadītīre, 
anusotaṁ vajāmahaṁ; 
Satta māluvapupphāni, 
citamāropayiṁ ahaṁ. 
Catunnavutito kappe, 
citakaṁ yamapūjayiṁ; 
Duggatiṁ nābhijānāmi, 
citapūjāyidaṁ phalaṁ. 
Sattasaṭṭhimhito kappe, 
paṭijaggasanāmakā; 
Sattaratanasampannā, 
sattāsuṁ cakkavattino. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā citakapūjako thero imā gāthāyo abhāsitthāti. 
Citakapūjakattherassāpadānaṁ sattamaṁ. 

Therāpadāna 
Subhūtivagga 
Annasaṁsāvakattheraapadāna 
“Suvaṇṇavaṇṇaṁ sambuddhaṁ, 
Gacchantaṁ antarāpaṇe; 
Kañcanagghiyasaṅkāsaṁ, 
Bāttiṁsavaralakkhaṇaṁ. 
Siddhatthaṁ lokapajjotaṁ, 
appameyyaṁ anopamaṁ; 
Alatthaṁ paramaṁ pītiṁ, 
disvā dantaṁ jutindharaṁ. 
Sambuddhaṁ abhināmetvā, 
bhojayiṁ taṁ mahāmuniṁ; 
Mahākāruṇiko loke, 
anumodi mamaṁ tadā. 
Tasmiṁ mahākāruṇike, 
paramassāsakārake; 
Buddhe cittaṁ pasādetvā, 
kappaṁ saggamhi modahaṁ. 
Catunnavutito kappe, 
yaṁ dānamadadiṁ tadā; 
Duggatiṁ nābhijānāmi, 
bhikkhādānassidaṁ phalaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā annasaṁsāvako thero imā gāthāyo abhāsitthāti. 
Annasaṁsāvakattherassāpadānaṁ pañcamaṁ. 

Therāpadāna 
Suvaṇṇabibbohanavagga 
Āluvadāyakattheraapadāna 
“Pabbate himavantamhi, 
mahāsindhu sudassanā; 
Tatthaddasaṁ vītarāgaṁ, 
suppabhāsaṁ sudassanaṁ. 
Paramopasame yuttaṁ, 
disvā vimhitamānaso; 
Āluvaṁ tassa pādāsiṁ, 
pasanno sehi pāṇibhi. 
Ekattiṁse ito kappe, 
yaṁ phalamadadiṁ tadā; 
Duggatiṁ nābhijānāmi, 
āluvassa idaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā āluvadāyako thero imā gāthāyo abhāsitthāti. 
Āluvadāyakattherassāpadānaṁ aṭṭhamaṁ. 

Therāpadāna 
Suvaṇṇabibbohanavagga 
9 Ekapuṇḍarīkattheraapadāna 
“Romaso nāma nāmena, 
sayambhū subbato tadā; 
Puṇḍarīkaṁ mayā dinnaṁ, 
vippasannena cetasā. 
Catunnavutito kappe, 
puṇḍarīkamadaṁ tadā; 
Duggatiṁ nābhijānāmi, 
puṇḍarīkassidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ekapuṇḍarīko thero imā gāthāyo abhāsitthāti. 
Ekapuṇḍarīkattherassāpadānaṁ navamaṁ. 

Therāpadāna 
Suvaṇṇabibbohanavagga 
10 Taraṇīyattheraapadāna 
“Mahāpathamhi visame, 
setu kārāpito mayā; 
Taraṇatthāya lokassa, 
pasanno sehi pāṇibhi. 
Ekanavutito kappe, 
yo setu kārito mayā; 
Duggatiṁ nābhijānāmi, 
setudānassidaṁ phalaṁ. 
Pañcapaññāsito kappe, 
eko āsiṁ samogadho; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā taraṇīyo thero imā gāthāyo abhāsitthāti. 
Taraṇīyattherassāpadānaṁ dasamaṁ. 
Suvaṇṇabibbohanavaggo aṭṭhavīsatimo. 
Tassuddānaṁ 
Suvaṇṇaṁ tilamuṭṭhi ca, 
caṅkoṭabbhañjanañjalī; 
Potthako citamāluvā, 
ekapuṇḍarī setunā; 
Dvecattālīsa gāthāyo, 
gaṇitāyo vibhāvibhīti. 
Ekādasamaṁ bhāṇavāraṁ. 

Therāpadāna 
Paṇṇadāyakavagga 
Paṇṇadāyakattheraapadāna 
“Paṇṇasāle nisinnomhi, 
paṇṇabhojanabhojano; 
Upaviṭṭhañca maṁ santaṁ, 
upāgacchi mahāisi. 
Siddhattho lokapajjoto, 
sabbalokatikicchako; 
Tassa paṇṇaṁ mayā dinnaṁ, 
nisinnaṁ paṇṇasanthare. 
Catunnavutito kappe, 
yaṁ paṇṇamadadiṁ tadā; 
Duggatiṁ nābhijānāmi, 
paṇṇadānassidaṁ phalaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā paṇṇadāyako thero imā gāthāyo abhāsitthāti. 
Paṇṇadāyakattherassāpadānaṁ paṭhamaṁ. 

Therāpadāna 
Paṇṇadāyakavagga 
Phaladāyakattheraapadāna 
“Sinerusamasantoso, 
dharaṇīsamasādiso; 
Vuṭṭhahitvā samādhimhā, 
bhikkhāya mamupaṭṭhito. 
Harītakaṁ āmalakaṁ, 
ambajambuvibhītakaṁ; 
Kolaṁ bhallātakaṁ billaṁ, 
phārusakaphalāni ca. 
Siddhatthassa mahesissa, 
sabbalokānukampino; 
Tañca sabbaṁ mayā dinnaṁ, 
vippasannena cetasā. 
Catunnavutito kappe, 
yaṁ phalaṁ adadiṁ tadā; 
Duggatiṁ nābhijānāmi, 
phaladānassidaṁ phalaṁ. 
Sattapaññāsito kappe, 
ekajjho nāma khattiyo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā phaladāyako thero imā gāthāyo abhāsitthāti. 
Phaladāyakattherassāpadānaṁ dutiyaṁ. 

Therāpadāna 
Paṇṇadāyakavagga 
Paccuggamaniyattheraapadāna 
“Sīhaṁ yathā vanacaraṁ, 
nisabhājāniyaṁ yathā; 
Kakudhaṁ vilasantaṁva, 
āgacchantaṁ narāsabhaṁ. 
Siddhatthaṁ lokapajjotaṁ, 
sabbalokatikicchakaṁ; 
Akāsiṁ paccuggamanaṁ, 
vippasannena cetasā. 
Catunnavutito kappe, 
paccuggacchiṁ narāsabhaṁ; 
Duggatiṁ nābhijānāmi, 
paccuggamane idaṁ phalaṁ. 
Sattatiṁse ito kappe, 
eko āsiṁ janādhipo; 
Saparivāroti nāmena, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā paccuggamaniyo thero imā gāthāyo abhāsitthāti. 
Paccuggamaniyattherassāpadānaṁ tatiyaṁ. 

Therāpadāna 
Paṇṇadāyakavagga 
Ekapupphiyattheraapadāna 
“Dakkhiṇamhi duvāramhi, 
pisāco āsahaṁ tadā; 
Addasaṁ virajaṁ buddhaṁ, 
pītaraṁsiṁva bhāṇumaṁ. 
Vipassissa naraggassa, 
sabbalokahitesino; 
Ekapupphaṁ mayā dinnaṁ, 
dvipadindassa tādino. 
Ekanavutito kappe, 
yaṁ pupphamadadiṁ tadā; 
Duggatiṁ nābhijānāmi, 
buddhapūjāyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ekapupphiyo thero imā gāthāyo abhāsitthāti. 
Ekapupphiyattherassāpadānaṁ catutthaṁ. 

Therāpadāna 
Paṇṇadāyakavagga 
Maghavapupphiyattheraapadāna 
“Nammadānadiyā tīre, 
sayambhū aparājito; 
Samādhiṁ so samāpanno, 
vippasanno anāvilo. 
Disvā pasannasumano, 
sambuddhaṁ aparājitaṁ; 
Tāhaṁ maghavapupphena, 
sayambhuṁ pūjayiṁ tadā. 
Ekanavutito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā maghavapupphiyo thero imā gāthāyo abhāsitthāti. 
Maghavapupphiyattherassāpadānaṁ pañcamaṁ. 

Therāpadāna 
Paṇṇadāyakavagga 
6 Upaṭṭhākadāyakattheraapadāna 
“Rathiyaṁ paṭipajjantaṁ, 
āhutīnaṁ paṭiggahaṁ; 
Dvipadindaṁ mahānāgaṁ, 
lokajeṭṭhaṁ narāsabhaṁ. 
Pakkosāpiya tassāhaṁ, 
sabbalokahitesino; 
Upaṭṭhāko mayā dinno, 
siddhatthassa mahesino. 
Paṭiggahetvā sambuddho, 
niyyādesi mahāmuni; 
Uṭṭhāya āsanā tamhā, 
pakkāmi pācināmukho. 
Catunnavutito kappe, 
upaṭṭhākamadaṁ tadā; 
Duggatiṁ nābhijānāmi, 
upaṭṭhānassidaṁ phalaṁ. 
Sattapaññāsito kappe, 
balasenasanāmako; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā upaṭṭhākadāyako thero imā gāthāyo abhāsitthāti. 
Upaṭṭhākadāyakattherassāpadānaṁ chaṭṭhaṁ. 

Therāpadāna 
Paṇṇadāyakavagga 
Apadāniyattheraapadāna 
“Apadānaṁ sugatānaṁ, 
kittayiṁhaṁ mahesinaṁ; 
Pāde ca sirasā vandiṁ, 
pasanno sehi pāṇibhi. 
Dvenavute ito kappe, 
apadānaṁ pakittayiṁ; 
Duggatiṁ nābhijānāmi, 
kittanāya idaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā apadāniyo thero imā gāthāyo abhāsitthāti. 
Apadāniyattherassāpadānaṁ sattamaṁ. 

Therāpadāna 
Subhūtivagga 
Dhūpadāyakattheraapadāna 
“Siddhatthassa bhagavato, 
lokajeṭṭhassa tādino; 
Kuṭidhūpaṁ mayā dinnaṁ, 
vippasannena cetasā. 
Yaṁ yaṁ yonupapajjāmi, 
devattaṁ atha mānusaṁ; 
Sabbesampi piyo homi, 
dhūpadānassidaṁ phalaṁ. 
Catunnavutito kappe, 
yaṁ dhūpamadadiṁ tadā; 
Duggatiṁ nābhijānāmi, 
dhūpadānassidaṁ phalaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā dhūpadāyako thero imā gāthāyo abhāsitthāti. 
Dhūpadāyakattherassāpadānaṁ chaṭṭhaṁ. 

Therāpadāna 
Paṇṇadāyakavagga 
Sattāhapabbajitattheraapadāna 
“Vipassissa bhagavato, 
saṅgho sakkatamānito; 
Byasanaṁ me anuppattaṁ, 
ñātibhedo pure ahu. 
Pabbajjaṁ upagantvāna, 
byasanupasamāyahaṁ; 
Sattāhābhirato tattha, 
satthusāsanakamyatā. 
Ekanavutito kappe, 
yamahaṁ pabbajiṁ tadā; 
Duggatiṁ nābhijānāmi, 
pabbajjāya idaṁ phalaṁ. 
Sattasaṭṭhimhito kappe, 
satta āsuṁ mahīpatī; 
Sunikkhamāti ñāyanti, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sattāhapabbajito thero imā gāthāyo abhāsitthāti. 
Sattāhapabbajitattherassāpadānaṁ aṭṭhamaṁ. 

Therāpadāna 
Paṇṇadāyakavagga 
9 Buddhupaṭṭhāyikattheraapadāna 
“Veṭambhinīti me nāmaṁ, 
pitusantaṁ mamaṁ tadā; 
Mama hatthaṁ gahetvāna, 
upānayi mahāmuniṁ. 
Imemaṁ uddisissanti, 
buddhā lokagganāyakā; 
Tehaṁ upaṭṭhiṁ sakkaccaṁ, 
pasanno sehi pāṇibhi. 
Ekattiṁse ito kappe, 
buddhe upaṭṭhahiṁ tadā; 
Duggatiṁ nābhijānāmi, 
upaṭṭhānassidaṁ phalaṁ. 
Tevīsamhi ito kappe, 
caturo āsu khattiyā; 
Samaṇupaṭṭhākā nāma, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā buddhupaṭṭhāyiko thero imā gāthāyo abhāsitthāti. 
Buddhupaṭṭhāyikattherassāpadānaṁ navamaṁ. 

Therāpadāna 
Paṇṇadāyakavagga 
10 Pubbaṅgamiyattheraapadāna 
“Cullāsītisahassāni, 
pabbajimha akiñcanā; 
Tesaṁ pubbaṅgamo āsiṁ, 
uttamatthassa pattiyā. 
Sarāgā sabhavā cete, 
vippasannamanāvilā; 
Upaṭṭhahiṁsu sakkaccaṁ, 
pasannā sehi pāṇibhi. 
Khīṇāsavā vantadosā, 
katakiccā anāsavā; 
Phariṁsu mettacittena, 
sayambhū aparājitā. 
Tesaṁ upaṭṭhahitvāna, 
sambuddhānaṁ patissato; 
Maraṇañca anuppatto, 
devattañca agamhase. 
Catunnavutito kappe, 
yaṁ sīlamanupālayiṁ; 
Duggatiṁ nābhijānāmi, 
saññamassa idaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā pubbaṅgamiyo thero imā gāthāyo abhāsitthāti. 
Pubbaṅgamiyattherassāpadānaṁ dasamaṁ. 
Paṇṇadāyakavaggo ekūnatiṁsatimo. 
Tassuddānaṁ 
Paṇṇaṁ phalaṁ paccuggamaṁ, 
ekapupphi ca maghavā; 
Upaṭṭhākāpadānañca, 
pabbajjā buddhupaṭṭhāko; 
Pubbaṅgamo ca gāthāyo, 
aṭṭhatālīsa kittitā. 

Therāpadāna 
Citakapūjakavagga 
Citakapūjakattheraapadāna 
“Ajito nāma nāmena, 
ahosiṁ brāhmaṇo tadā; 
Āhutiṁ yiṭṭhukāmohaṁ, 
nānāpupphaṁ samānayiṁ. 
Jalantaṁ citakaṁ disvā, 
sikhino lokabandhuno; 
Tañca pupphaṁ samānetvā, 
citake okiriṁ ahaṁ. 
Ekattiṁse ito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Sattavīse ito kappe, 
sattāsuṁ manujādhipā; 
Supajjalitanāmā te, 
cakkavattī mahabbalā. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā citakapūjako thero imā gāthāyo abhāsitthāti. 
Citakapūjakattherassāpadānaṁ paṭhamaṁ. 

Therāpadāna 
Citakapūjakavagga 
Pupphadhārakattheraapadāna 
“Vākacīradharo āsiṁ, 
ajinuttaravāsano; 
Abhiññā pañca nibbattā, 
candassa parimajjako. 
Vipassiṁ lokapajjotaṁ, 
disvā abhigataṁ mamaṁ; 
Pāricchattakapupphāni, 
dhāresiṁ satthuno ahaṁ. 
Ekanavutito kappe, 
yaṁ pupphamabhipūjayiṁ; 
Duggatiṁ nābhijānāmi, 
dhāraṇāya idaṁ phalaṁ. 
Sattāsītimhito kappe, 
eko āsiṁ mahīpati; 
Samantadhāraṇo nāma, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā pupphadhārako thero imā gāthāyo abhāsitthāti. 
Pupphadhārakattherassāpadānaṁ dutiyaṁ. 

Therāpadāna 
Citakapūjakavagga 
Chattadāyakattheraapadāna 
“Putto mama pabbajito, 
kāsāyavasano tadā; 
So ca buddhattaṁ sampatto, 
nibbuto lokapūjito. 
Vicinanto sakaṁ puttaṁ, 
agamaṁ pacchato ahaṁ; 
Nibbutassa mahantassa, 
citakaṁ agamāsahaṁ. 
Paggayha añjaliṁ tattha, 
vanditvā citakaṁ ahaṁ; 
Setacchattañca paggayha, 
āropesiṁ ahaṁ tadā. 
Catunnavutito kappe, 
yaṁ chattamabhiropayiṁ; 
Duggatiṁ nābhijānāmi, 
chattadānassidaṁ phalaṁ. 
Pañcavīse ito kappe, 
satta āsuṁ janādhipā; 
Mahārahasanāmā te, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā chattadāyako thero imā gāthāyo abhāsitthāti. 
Chattadāyakattherassāpadānaṁ tatiyaṁ. 

Therāpadāna 
Citakapūjakavagga 
Saddasaññakattheraapadāna 
“Anuggatamhi ādicce, 
panādo vipulo ahu; 
Buddhaseṭṭhassa lokamhi, 
pātubhāvo mahesino. 
Ghosamassosahaṁ tattha, 
na ca passāmi taṁ jinaṁ; 
Maraṇañca anuppatto, 
buddhasaññamanussariṁ. 
Catunnavutito kappe, 
yaṁ saññamalabhiṁ tadā; 
Duggatiṁ nābhijānāmi, 
buddhapūjāyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā saddasaññako thero imā gāthāyo abhāsitthāti. 
Saddasaññakattherassāpadānaṁ catutthaṁ. 

Therāpadāna 
Citakapūjakavagga 
Gosīsanikkhepakattheraapadāna 
“Ārāmadvārā nikkhamma, 
gosīsaṁ santhataṁ mayā; 
Anubhomi sakaṁ kammaṁ, 
pubbakammassidaṁ phalaṁ. 
Ājāniyā vātajavā, 
sindhavā sīghavāhanā; 
Anubhomi sabbametaṁ, 
gosīsassa idaṁ phalaṁ. 
Aho kāraṁ paramakāraṁ, 
sukhette sukataṁ mayā; 
Saṅghe katassa kārassa, 
na aññaṁ kalamagghati. 
Catunnavutito kappe, 
yaṁ sīsaṁ santhariṁ ahaṁ; 
Duggatiṁ nābhijānāmi, 
santharassa idaṁ phalaṁ. 
Pañcasattatikappamhi, 
suppatiṭṭhitanāmako; 
Eko āsiṁ mahātejo, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā gosīsanikkhepako thero imā gāthāyo abhāsitthāti. 
Gosīsanikkhepakattherassāpadānaṁ pañcamaṁ. 

Therāpadāna 
Citakapūjakavagga 
6 Pādapūjakattheraapadāna 
“Pabbate himavantamhi, 
ahosiṁ kinnaro tadā; 
Addasaṁ virajaṁ buddhaṁ, 
pītaraṁsiṁva bhāṇumaṁ. 
Upetaṁ tamahaṁ buddhaṁ, 
vipassiṁ lokanāyakaṁ; 
Candanaṁ tagarañcāpi, 
pāde osiñcahaṁ tadā. 
Ekanavutito kappe, 
yaṁ pādaṁ abhipūjayiṁ; 
Duggatiṁ nābhijānāmi, 
pādapūjāyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā pādapūjako thero imā gāthāyo abhāsitthāti. 
Pādapūjakattherassāpadānaṁ chaṭṭhaṁ. 

Therāpadāna 
Citakapūjakavagga 
7 Desakittakattheraapadāna 
“Upasālakanāmohaṁ, 
ahosiṁ brāhmaṇo tadā; 
Kānanaṁ vanamogāḷhaṁ, 
lokajeṭṭhaṁ narāsabhaṁ. 
Disvāna vandiṁ pādesu, 
lokāhutipaṭiggahaṁ; 
Pasannacittaṁ maṁ ñatvā, 
buddho antaradhāyatha. 
Kānanā abhinikkhamma, 
buddhaseṭṭhamanussariṁ; 
Taṁ desaṁ kittayitvāna, 
kappaṁ saggamhi modahaṁ. 
Dvenavute ito kappe, 
yaṁ desamabhikittayiṁ; 
Duggatiṁ nābhijānāmi, 
kittanāya idaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā desakittako thero imā gāthāyo abhāsitthāti. 
Desakittakattherassāpadānaṁ sattamaṁ. 

Therāpadāna 
Subhūtivagga 
7 Pulinapūjakattheraapadāna 
“Vipassissa bhagavato, 
bodhiyā pādaputtame; 
Purāṇapulinaṁ hitvā, 
suddhapulinamākiriṁ. 
Ekanavutito kappe, 
yaṁ pulinamadāsahaṁ; 
Duggatiṁ nābhijānāmi, 
pulinadānassidaṁ phalaṁ. 
Tiṁsatime ito kappe, 
rājā āsiṁ janādhibhū; 
Mahāpulinanāmena, 
cakkavattī mahabbalo. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā pulinapūjako thero imā gāthāyo abhāsitthāti. 
Pulinapūjakattherassāpadānaṁ sattamaṁ. 

Therāpadāna 
Buddhavagga 
Paccekabuddhaapadāna 
Atha paccekabuddhāpadānaṁ suṇātha—
“Tathāgataṁ jetavane vasantaṁ, 
Apucchi vedehamunī nataṅgo; 
‘Paccekabuddhā kira nāma honti, 
Bhavanti te hetubhi kehi vīra’. 
Tadāha sabbaññuvaro mahesi, 
Ānandabhaddaṁ madhurassarena; 
‘Ye pubbabuddhesu katādhikārā, 
Aladdhamokkhā jinasāsanesu. 
Teneva saṁvegamukhena dhīrā, 
Vināpi buddhehi sutikkhapaññā; 
Ārammaṇenāpi parittakena, 
Paccekabodhiṁ anupāpuṇanti. 
Sabbamhi lokamhi mamaṁ ṭhapetvā, 
Paccekabuddhehi samova natthi; 
Tesaṁ imaṁ vaṇṇapadesamattaṁ, 
Vakkhāmahaṁ sādhu mahāmunīnaṁ. 
Sayameva buddhānaṁ mahāisīnaṁ, 
Sādhūni vākyāni madhūva khuddaṁ; 
Anuttaraṁ bhesajaṁ patthayantā, 
Suṇātha sabbesu pasannacittā’. 
Paccekabuddhānaṁ samāgatānaṁ, 
Paramparaṁ byākaraṇāni yāni; 
Ādīnavo yañca virāgavatthuṁ, 
Yathā ca bodhiṁ anupāpuṇiṁsu. 
Sarāgavatthūsu virāgasaññī, 
Rattamhi lokamhi virattacittā; 
Hitvā papañce jiya phanditāni, 
Tatheva bodhiṁ anupāpuṇiṁsu. 
Sabbesu bhūtesu nidhāya daṇḍaṁ, 
Aviheṭhayaṁ aññatarampi tesaṁ; 
Mettena cittena hitānukampī, 
Eko care khaggavisāṇakappo. 
Sabbesu bhūtesu nidhāya daṇḍaṁ, 
Aviheṭhayaṁ aññatarampi tesaṁ; 
Na puttamiccheyya kuto sahāyaṁ, 
Eko care khaggavisāṇakappo’. 
‘Saṁsaggajātassa bhavanti snehā, 
Snehanvayaṁ dukkhamidaṁ pahoti; 
Ādīnavaṁ snehajaṁ pekkhamāno, 
Eko care khaggavisāṇakappo’. 
‘Mitte suhajje anukampamāno, 
Hāpeti atthaṁ paṭibaddhacitto; 
Etaṁ bhayaṁ santhave pekkhamāno, 
Eko care khaggavisāṇakappo’. 
‘Vaṁso visālova yathā visatto, 
Puttesu dāresu ca yā apekkhā; 
Vaṁse kaḷīrova asajjamāno, 
Eko care khaggavisāṇakappo’. 
‘Migo araññamhi yathā abaddho, 
Yenicchakaṁ gacchati gocarāya; 
Viññū naro seritaṁ pekkhamāno, 
Eko care khaggavisāṇakappo’. 
‘Āmantanā hoti sahāyamajjhe, 
Vāse ca ṭhāne gamane cārikāya; 
Anabhijjhitaṁ seritaṁ pekkhamāno, 
Eko care khaggavisāṇakappo’. 
‘Khiḍḍā ratī hoti sahāyamajjhe, 
Puttesu pemaṁ vipulañca hoti; 
Piyavippayogaṁ vijigucchamāno, 
Eko care khaggavisāṇakappo’. 
‘Cātuddiso appaṭigho ca hoti, 
Santussamāno itarītarena; 
Parissayānaṁ sahitā achambhī, 
Eko care khaggavisāṇakappo’. 
‘Dussaṅgahā pabbajitāpi eke, 
Atho gahaṭṭhā gharamāvasantā; 
Appossukko paraputtesu hutvā, 
Eko care khaggavisāṇakappo’. 
‘Oropayitvā gihibyañjanāni, 
Sañchinnapatto yathā koviḷāro; 
Chetvāna vīro gihibandhanāni, 
Eko care khaggavisāṇakappo’. 
‘Sace labhetha nipakaṁ sahāyaṁ, 
Saddhiṁ caraṁ sādhuvihāridhīraṁ; 
Abhibhuyya sabbāni parissayāni, 
Careyya tenattamano satīmā’. 
‘No ce labhetha nipakaṁ sahāyaṁ, 
Saddhiṁ caraṁ sādhuvihāri dhīraṁ; 
Rājāva raṭṭhaṁ vijitaṁ pahāya, 
Eko care mātaṅgaraññeva nāgo’. 
‘Addhā pasaṁsāma sahāyasampadaṁ, 
Seṭṭhā samā sevitabbā sahāyā; 
Ete aladdhā anavajjabhojī, 
Eko care khaggavisāṇakappo’. 
‘Disvā suvaṇṇassa pabhassarāni, 
Kammāraputtena suniṭṭhitāni; 
Saṅghaṭṭamānāni duve bhujasmiṁ, 
Eko care khaggavisāṇakappo’. 
‘Evaṁ dutīyena sahā mamassa, 
Vācābhilāpo abhisajjanā vā; 
Etaṁ bhayaṁ āyatiṁ pekkhamāno, 
Eko care khaggavisāṇakappo’. 
‘Kāmā hi citrā madhurā manoramā, 
Virūparūpena mathenti cittaṁ; 
Ādīnavaṁ kāmaguṇesu disvā, 
Eko care khaggavisāṇakappo’. 
‘Ītī ca gaṇḍo ca upaddavo ca, 
Rogo ca sallañca bhayañca metaṁ; 
Etaṁ bhayaṁ kāmaguṇesu disvā, 
Eko care khaggavisāṇakappo’. 
‘Sītañca uṇhañca khudaṁ pipāsaṁ, 
Vātātape ḍaṁsasarīsape ca; 
Sabbānipetāni abhibbhavitvā, 
Eko care khaggavisāṇakappo’. 
‘Nāgova yūthāni vivajjayitvā, 
Sañjātakhandho padumī uḷāro; 
Yathābhirantaṁ viharaṁ araññe, 
Eko care khaggavisāṇakappo’. 
‘Aṭṭhāna taṁ saṅgaṇikāratassa, 
Yaṁ phassaye sāmayikaṁ vimuttiṁ; 
Ādiccabandhussa vaco nisamma, 
Eko care khaggavisāṇakappo’. 
‘Diṭṭhīvisūkāni upātivatto, 
Patto niyāmaṁ paṭiladdhamaggo; 
Uppannañāṇomhi anaññaneyyo, 
Eko care khaggavisāṇakappo’. 
‘Nillolupo nikkuho nippipāso, 
Nimmakkha niddhantakasāvamoho; 
Nirāsayo sabbaloke bhavitvā, 
Eko care khaggavisāṇakappo’. 
‘Pāpaṁ sahāyaṁ parivajjayetha, 
Anatthadassiṁ visame niviṭṭhaṁ; 
Sayaṁ na seve pasutaṁ pamattaṁ, 
Eko care khaggavisāṇakappo’. 
‘Bahussutaṁ dhammadharaṁ bhajetha, 
Mittaṁ uḷāraṁ paṭibhānavantaṁ; 
Aññāya atthāni vineyya kaṅkhaṁ, 
Eko care khaggavisāṇakappo’. 
‘Khiḍḍaṁ ratiṁ kāmasukhañca loke, 
Analaṅkaritvā anapekkhamāno; 
Vibhūsaṭṭhānā virato saccavādī, 
Eko care khaggavisāṇakappo’. 
‘Puttañca dāraṁ pitarañca mātaraṁ, 
Dhanāni dhaññāni ca bandhavāni; 
Hitvāna kāmāni yathodhikāni, 
Eko care khaggavisāṇakappo’. 
‘Saṅgo eso parittamettha sokhyaṁ, 
Appassādo dukkhamevettha bhiyyo; 
Gaḷo eso iti ñatvā matimā, 
Eko care khaggavisāṇakappo’. 
‘Sandālayitvāna saṁyojanāni, 
Jālaṁva bhetvā salilambucārī; 
Aggīva daḍḍhaṁ anivattamāno, 
Eko care khaggavisāṇakappo’. 
‘Okkhittacakkhū na ca pādalolo, 
Guttindriyo rakkhitamānasāno; 
Anavassuto apariḍayhamāno, 
Eko care khaggavisāṇakappo’. 
‘Ohārayitvā gihibyañjanāni, 
Sañchannapatto yathā pārichatto; 
Kāsāyavattho abhinikkhamitvā, 
Eko care khaggavisāṇakappo’. 
‘Rasesu gedhaṁ akaraṁ alolo, 
Anaññaposī sapadānacārī; 
Kule kule appaṭibaddhacitto, 
Eko care khaggavisāṇakappo’. 
‘Pahāya pañcāvaraṇāni cetaso, 
Upakkilese byapanujja sabbe; 
Anissito chejja sinehadosaṁ, 
Eko care khaggavisāṇakappo’. 
‘Vipiṭṭhikatvāna sukhañca dukkhaṁ, 
Pubbeva somanassadomanassaṁ; 
Laddhānupekkhaṁ samathaṁ visuddhaṁ, 
Eko care khaggavisāṇakappo’. 
‘Āraddhavīriyo paramatthapattiyā, 
Alīnacitto akusītavutti; 
Daḷhanikkamo thāmabalūpapanno, 
Eko care khaggavisāṇakappo’. 
‘Paṭisallānaṁ jhānamariñcamāno, 
Dhammesu niccaṁ anudhammacārī; 
Ādīnavaṁ sammasitā bhavesu, 
Eko care khaggavisāṇakappo’. 
‘Taṇhakkhayaṁ patthayamappamatto, 
Aneḷamūgo sutavā satīmā; 
Saṅkhātadhammo niyato padhānavā, 
Eko care khaggavisāṇakappo’. 
‘Sīhova saddesu asantasanto, 
Vātova jālamhi asajjamāno; 
Padumaṁva toyena alippamāno, 
Eko care khaggavisāṇakappo’. 
‘Sīho yathā dāṭhabalī pasayha, 
Rājā migānaṁ abhibhuyya cārī; 
Sevetha pantāni senāsanāni, 
Eko care khaggavisāṇakappo’. 
‘Mettaṁ upekkhaṁ karuṇaṁ vimuttiṁ, 
Āsevamāno muditañca kāle; 
Sabbena lokena avirujjhamāno, 
Eko care khaggavisāṇakappo’. 
‘Rāgañca dosañca pahāya mohaṁ, 
Sandālayitvāna saṁyojanāni; 
Asantasaṁ jīvitasaṅkhayamhi, 
Eko care khaggavisāṇakappo’. 
‘Bhajanti sevanti ca kāraṇatthā, 
Nikkāraṇā dullabhā ajja mittā; 
Attatthapaññā asucīmanussā, 
Eko care khaggavisāṇakappo’. 
Visuddhasīlā suvisuddhapaññā, 
Samāhitā jāgariyānuyuttā; 
Vipassakā dhammavisesadassī, 
Maggaṅgabojjhaṅgagate vijaññā. 
Suññappaṇidhiñca tathānimittaṁ, 
Āsevayitvā jinasāsanamhi; 
Ye sāvakattaṁ na vajanti dhīrā, 
Bhavanti paccekajinā sayambhū. 
Mahantadhammā bahudhammakāyā, 
Cittissarā sabbadukkhoghatiṇṇā; 
Udaggacittā paramatthadassī, 
Sīhopamā khaggavisāṇakappā. 
Santindriyā santamanā samādhī, 
Paccantasattesu patippacārā; 
Dīpā parattha idha vijjalantā, 
Paccekabuddhā satataṁ hitāme. 
Pahīnasabbāvaraṇā janindā, 
Lokappadīpā ghanakañcanābhā; 
Nissaṁsayaṁ lokasudakkhiṇeyyā, 
Paccekabuddhā satatappitāme. 
Paccekabuddhānaṁ subhāsitāni, 
Caranti lokamhi sadevakamhi; 
Sutvā tathā ye na karonti bālā, 
Caranti dukkhesu punappunaṁ te. 
Paccekabuddhāna subhāsitāni, 
Madhuṁ yathā khuddamavassavantaṁ; 
Sutvā tathā ye paṭipattiyuttā, 
Bhavanti te saccadasā sapaññā. 
Paccekabuddhehi jinehi bhāsitā, 
Kathā uḷārā abhinikkhamitvā; 
Tā sakyasīhena naruttamena, 
Pakāsitā dhammavijānanatthaṁ. 
Lokānukampāya imāni tesaṁ, 
Paccekabuddhāna vikubbitāni; 
Saṁvegasaṅgamativaḍḍhanatthaṁ, 
Sayambhusīhena pakāsitānī”ti. 
Paccekabuddhāpadānaṁ samattaṁ. 

Therāpadāna 
Citakapūjakavagga 
Saraṇagamaniyattheraapadāna 
“Pabbate himavantamhi, 
ahosiṁ luddako tadā; 
Vipassiṁ addasaṁ buddhaṁ, 
lokajeṭṭhaṁ narāsabhaṁ. 
Upāsitvāna sambuddhaṁ, 
veyyāvaccamakāsahaṁ; 
Saraṇañca upāgacchiṁ, 
dvipadindassa tādino. 
Ekanavutito kappe, 
saraṇaṁ upagacchahaṁ; 
Duggatiṁ nābhijānāmi, 
saraṇāgamanapphalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā saraṇagamaniyo thero imā gāthāyo abhāsitthāti. 
Saraṇagamaniyattherassāpadānaṁ aṭṭhamaṁ. 

Therāpadāna 
Citakapūjakavagga 
Ambapiṇḍiyattheraapadāna 
“Romaso nāma nāmena, 
dānavo iti vissuto; 
Ambapiṇḍī mayā dinnā, 
vipassissa mahesino. 
Ekanavutito kappe, 
yamambamadadiṁ tadā; 
Duggatiṁ nābhijānāmi, 
ambadānassidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ambapiṇḍiyo thero imā gāthāyo abhāsitthāti. 
Ambapiṇḍiyattherassāpadānaṁ navamaṁ. 

Therāpadāna 
Citakapūjakavagga 
Anusaṁsāvakattheraapadāna 
“Piṇḍāya caramānāhaṁ, 
vipassimaddasaṁ jinaṁ; 
Uḷuṅgabhikkhaṁ pādāsiṁ, 
dvipadindassa tādino. 
Pasannacitto sumano, 
abhivādesahaṁ tadā; 
Anusaṁsāvayiṁ buddhaṁ, 
uttamatthassa pattiyā. 
Ekanavutito kappe, 
anusaṁsāvayiṁ ahaṁ; 
Duggatiṁ nābhijānāmi, 
anusaṁsāvanā phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā anusaṁsāvako thero imā gāthāyo abhāsitthāti. 
Anusaṁsāvakattherassāpadānaṁ dasamaṁ. 
Citakapūjakavaggo tiṁsatimo. 
Tassuddānaṁ 
Citakaṁ pārichatto ca, 
saddagosīsasantharaṁ; 
Pādo padesaṁ saraṇaṁ, 
ambo saṁsāvakopi ca; 
Aṭṭhatālīsa gāthāyo, 
gaṇitāyo vibhāvibhi. 
Atha vagguddānaṁ 
Kaṇikāro hatthidado, 
ālambaṇudakāsanaṁ; 
Tuvaraṁ thomako ceva, 
ukkhepaṁ sīsupadhānaṁ. 
Paṇṇado citapūjī ca, 
gāthāyo ceva sabbaso; 
Cattāri ca satānīha, 
ekapaññāsameva ca. 
Pañcavīsasatā sabbā, 
dvāsattati taduttari; 
Tisataṁ apadānānaṁ, 
gaṇitā atthadassibhi. 
Kaṇikāravaggadasakaṁ. 
Tatiyasatakaṁ samattaṁ. 

Therāpadāna 
Padumakesaravagga 
Padumakesariyattheraapadāna 
“Isisaṅghe ahaṁ pubbe, 
āsiṁ mātaṅgavāraṇo; 
Mahesīnaṁ pasādena, 
padmakesaramokiriṁ. 
Paccekajinaseṭṭhesu, 
dhutarāgesu tādisu; 
Tesu cittaṁ pasādetvā, 
kappaṁ saggamhi modahaṁ. 
Ekanavutito kappe, 
kesaraṁ okiriṁ tadā; 
Duggatiṁ nābhijānāmi, 
buddhapūjāyidaṁ phalaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā padumakesariyo thero imā gāthāyo abhāsitthāti. 
Padumakesariyattherassāpadānaṁ paṭhamaṁ. 

Therāpadāna 
Padumakesaravagga 
Sabbagandhiyattheraapadāna 
“Gandhamālaṁ mayā dinnaṁ, 
vipassissa mahesino; 
Adāsiṁ ujubhūtassa, 
koseyyavatthamuttamaṁ. 
Ekanavutito kappe, 
yaṁ vatthamadadiṁ pure; 
Duggatiṁ nābhijānāmi, 
gandhadānassidaṁ phalaṁ. 
Ito pannarase kappe, 
suceḷo nāma khattiyo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sabbagandhiyo thero imā gāthāyo abhāsitthāti. 
Sabbagandhiyattherassāpadānaṁ dutiyaṁ. 

Therāpadāna 
Padumakesaravagga 
Paramannadāyakattheraapadāna 
“Kaṇikāraṁva jotantaṁ, 
udayantaṁva bhāṇumaṁ; 
Vipassiṁ addasaṁ buddhaṁ, 
lokajeṭṭhaṁ narāsabhaṁ. 
Añjaliṁ paggahetvāna, 
abhinesiṁ sakaṁ gharaṁ; 
Abhinetvāna sambuddhaṁ, 
paramannamadāsahaṁ. 
Ekanavutito kappe, 
paramannamadiṁ tadā; 
Duggatiṁ nābhijānāmi, 
paramannassidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā paramannadāyako thero imā gāthāyo abhāsitthāti. 
Paramannadāyakattherassāpadānaṁ tatiyaṁ. 

Therāpadāna 
Padumakesaravagga 
Dhammasaññakattheraapadāna 
“Vipassino bhagavato, 
Mahābodhimaho ahu; 
Rukkhaṭṭhasseva sambuddho, 
Lokajeṭṭho narāsabho. 
Bhagavā tamhi samaye, 
bhikkhusaṅghapurakkhato; 
Catusaccaṁ pakāseti, 
vācāsabhimudīrayaṁ. 
Saṅkhittena ca desento, 
vitthārena ca desayaṁ; 
Vivaṭṭacchado sambuddho, 
nibbāpesi mahājanaṁ. 
Tassāhaṁ dhammaṁ sutvāna, 
lokajeṭṭhassa tādino; 
Vanditvā satthuno pāde, 
pakkāmiṁ uttarāmukho. 
Ekanavutito kappe, 
yaṁ dhammamasuṇiṁ tadā; 
Duggatiṁ nābhijānāmi, 
dhammasavassidaṁ phalaṁ. 
Tettiṁsamhi ito kappe, 
eko āsiṁ mahīpati; 
Sutavā nāma nāmena, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā dhammasaññako thero imā gāthāyo abhāsitthāti. 
Dhammasaññakattherassāpadānaṁ catutthaṁ. 

Therāpadāna 
Padumakesaravagga 
Phaladāyakattheraapadāna 
“Bhāgīrathīnadītīre, 
ahosi assamo tadā; 
Tamahaṁ assamaṁ gacchiṁ, 
phalahattho apekkhavā. 
Vipassiṁ tattha addakkhiṁ, 
pītaraṁsiṁva bhāṇumaṁ; 
Yaṁ me atthi phalaṁ sabbaṁ, 
adāsiṁ satthuno ahaṁ. 
Ekanavutito kappe, 
yaṁ phalaṁ adadiṁ tadā; 
Duggatiṁ nābhijānāmi, 
phaladānassidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā phaladāyako thero imā gāthāyo abhāsitthāti. 
Phaladāyakattherassāpadānaṁ pañcamaṁ. 

Therāpadāna 
Padumakesaravagga 
6 Sampasādakattheraapadāna 
“‘Namo te buddha vīratthu, 
vippamuttosi sabbadhi; 
Byasanamhi anuppatto, 
tassa me saraṇaṁ bhava’. 
Siddhattho tassa byākāsi, 
loke appaṭipuggalo; 
‘Mahodadhisamo saṅgho, 
appameyyo anuttaro. 
Tattha tvaṁ viraje khette, 
anantaphaladāyake; 
Saṅghe cittaṁ pasādetvā, 
subījaṁ vāpa ropaya’. 
Idaṁ vatvāna sabbaññū, 
lokajeṭṭho narāsabho; 
Mameva anusāsitvā, 
vehāsaṁ nabhamuggami. 
Aciraṁ gatamattamhi, 
sabbaññumhi narāsabhe; 
Maraṇaṁ samanuppatto, 
tusitaṁ upapajjahaṁ. 
Tadāhaṁ viraje khette, 
anantaphaladāyake; 
Saṅghe cittaṁ pasādetvā, 
kappaṁ saggamhi modahaṁ. 
Catunnavutito kappe, 
pasādamalabhiṁ tadā; 
Duggatiṁ nābhijānāmi, 
pasādassa idaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sampasādako thero imā gāthāyo abhāsitthāti. 
Sampasādakattherassāpadānaṁ chaṭṭhaṁ. 

Therāpadāna 
Padumakesaravagga 
Ārāmadāyakattheraapadāna 
“Siddhatthassa bhagavato, 
ārāmo ropito mayā; 
Sandacchāyesu rukkhesu, 
upāsantesu pakkhisu. 
Addasaṁ virajaṁ buddhaṁ, 
āhutīnaṁ paṭiggahaṁ; 
Ārāmaṁ abhināmesiṁ, 
lokajeṭṭhaṁ narāsabhaṁ. 
Haṭṭho haṭṭhena cittena, 
phalaṁ pupphamadāsahaṁ; 
Tato jātappasādova, 
taṁ vanaṁ pariṇāmayiṁ. 
Buddhassa yamidaṁ dāsiṁ, 
vippasannena cetasā; 
Bhave nibbattamānamhi, 
nibbattati phalaṁ mama. 
Catunnavutito kappe, 
yaṁ ārāmamadaṁ tadā; 
Duggatiṁ nābhijānāmi, 
ārāmassa idaṁ phalaṁ. 
Sattatiṁse ito kappe, 
sattāsuṁ mudusītalā; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ārāmadāyako thero imā gāthāyo abhāsitthāti. 
Ārāmadāyakattherassāpadānaṁ sattamaṁ. 

Therāpadāna 
Subhūtivagga 
8 Uttiyattheraapadāna 
“Candabhāgānadītīre, 
susumāro ahaṁ tadā; 
Sagocarappasutohaṁ, 
nadītitthaṁ agacchahaṁ. 
Siddhattho tamhi samaye, 
sayambhū aggapuggalo; 
Nadiṁ taritukāmo so, 
nadītitthaṁ upāgami. 
Upāgate ca sambuddhe, 
ahampi tatthupāgamiṁ; 
Upagantvāna sambuddhaṁ, 
imaṁ vācaṁ udīrayiṁ. 
‘Abhirūha mahāvīra, 
tāressāmi ahaṁ tuvaṁ; 
Pettikaṁ visayaṁ mayhaṁ, 
anukampa mahāmuni’. 
Mama uggajjanaṁ sutvā, 
abhirūhi mahāmuni; 
Haṭṭho haṭṭhena cittena, 
tāresiṁ lokanāyakaṁ. 
Nadiyā pārime tīre, 
siddhattho lokanāyako; 
Assāsesi mamaṁ tattha, 
amataṁ pāpuṇissasi. 
Tamhā kāyā cavitvāna, 
devalokaṁ āgacchahaṁ; 
Dibbasukhaṁ anubhaviṁ, 
accharāhi purakkhato. 
Sattakkhattuñca devindo, 
devarajjamakāsahaṁ; 
Tīṇikkhattuṁ cakkavattī, 
mahiyā issaro ahuṁ. 
Vivekamanuyuttohaṁ, 
nipako ca susaṁvuto; 
Dhāremi antimaṁ dehaṁ, 
sammāsambuddhasāsane. 
Catunnavutito kappe, 
tāresiṁ yaṁ narāsabhaṁ; 
Duggatiṁ nābhijānāmi, 
taraṇāya idaṁ phalaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā uttiyo thero imā gāthāyo abhāsitthāti. 
Uttiyattherassāpadānaṁ aṭṭhamaṁ. 

Therāpadāna 
Padumakesaravagga 
Anulepadāyakattheraapadāna 
“Atthadassissa munino, 
addasaṁ sāvakaṁ ahaṁ; 
Navakammaṁ karontassa, 
sīmāya upagacchahaṁ. 
Niṭṭhite navakamme ca, 
anulepamadāsahaṁ; 
Pasannacitto sumano, 
puññakkhette anuttare. 
Aṭṭhārase kappasate, 
yaṁ kammamakariṁ tadā; 
Duggatiṁ nābhijānāmi, 
anulepassidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā anulepadāyako thero imā gāthāyo abhāsitthāti. 
Anulepadāyakattherassāpadānaṁ aṭṭhamaṁ. 

Therāpadāna 
Padumakesaravagga 
9 Buddhasaññakattheraapadāna 
“Udentaṁ sataraṁsiṁva, 
pītaraṁsiṁva bhāṇumaṁ; 
Vanantaragataṁ santaṁ, 
lokajeṭṭhaṁ narāsabhaṁ. 
Addasaṁ supinantena, 
siddhatthaṁ lokanāyakaṁ; 
Tattha cittaṁ pasādetvā, 
sugatiṁ upapajjahaṁ. 
Catunnavutito kappe, 
yaṁ saññamalabhiṁ tadā; 
Duggatiṁ nābhijānāmi, 
buddhasaññāyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā buddhasaññako thero imā gāthāyo abhāsitthāti. 
Buddhasaññakattherassāpadānaṁ navamaṁ. 

Therāpadāna 
Padumakesaravagga 
Pabbhāradāyakattheraapadāna 
“Piyadassino bhagavato, 
pabbhāro sodhito mayā; 
Ghaṭakañca upaṭṭhāsiṁ, 
paribhogāya tādino. 
Taṁ me buddho viyākāsi, 
piyadassī mahāmuni; 
Sahassakaṇḍo satabheṇḍu, 
dhajālu haritāmayo. 
Nibbattissati so yūpo, 
ratanañca anappakaṁ; 
Pabbhāradānaṁ datvāna, 
kappaṁ saggamhi modahaṁ. 
Ito bāttiṁsakappamhi, 
susuddho nāma khattiyo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā pabbhāradāyako thero imā gāthāyo abhāsitthāti. 
Pabbhāradāyakattherassāpadānaṁ dasamaṁ. 
Padumakesaravaggo ekatiṁsatimo. 
Tassuddānaṁ 
Kesaraṁ gandhamannañca, 
dhammasaññī phalena ca; 
Pasādārāmadāyī ca, 
lepako buddhasaññako; 
Pabbhārado ca gāthāyo, 
ekapaññāsa kittitā. 

Therāpadāna 
Ārakkhadāyakavagga 
Ārakkhadāyakattheraapadāna 
“Dhammadassissa munino, 
vati kārāpitā mayā; 
Ārakkho ca mayā dinno, 
dvipadindassa tādino. 
Aṭṭhārase kappasate, 
yaṁ kammamakariṁ tadā; 
Tena kammavisesena, 
patto me āsavakkhayo. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā ārakkhadāyako thero imā gāthāyo abhāsitthāti. 
Ārakkhadāyakattherassāpadānaṁ paṭhamaṁ. 

Therāpadāna 
Ārakkhadāyakavagga 
Bhojanadāyakattheraapadāna 
“Sujāto sālalaṭṭhīva, 
sobhañjanamivuggato; 
Indalaṭṭhirivākāse, 
virocati sadā jino. 
Tassa devātidevassa, 
vessabhussa mahesino; 
Adāsi bhojanamahaṁ, 
vippasannena cetasā. 
Taṁ me buddho anumodi, 
sayambhū aparājito; 
Bhave nibbattamānamhi, 
phalaṁ nibbattatū tava. 
Ekattiṁse ito kappe, 
yaṁ dānamadadiṁ tadā; 
Duggatiṁ nābhijānāmi, 
bhojanassa idaṁ phalaṁ. 
Pañcavīse ito kappe, 
eko āsiṁ amittako; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā bhojanadāyako thero imā gāthāyo abhāsitthāti. 
Bhojanadāyakattherassāpadānaṁ dutiyaṁ. 

Therāpadāna 
Ārakkhadāyakavagga 
Gatasaññakattheraapadāna 
“Ākāseva padaṁ natthi, 
ambare anilañjase; 
Siddhatthaṁ jinamaddakkhiṁ, 
gacchantaṁ tidivaṅgaṇe. 
Anileneritaṁ disvā, 
sammāsambuddhacīvaraṁ; 
Vitti mamāhu tāvade, 
disvāna gamanaṁ muniṁ. 
Catunnavutito kappe, 
yaṁ saññamalabhiṁ tadā; 
Duggatiṁ nābhijānāmi, 
buddhasaññāyidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā gatasaññako thero imā gāthāyo abhāsitthāti. 
Gatasaññakattherassāpadānaṁ tatiyaṁ. 

Therāpadāna 
Ārakkhadāyakavagga 
Sattapadumiyattheraapadāna 
“Nadīkūle vasāmahaṁ, 
nesādo nāma brāhmaṇo; 
Satapattehi pupphehi, 
sammajjitvāna assamaṁ. 
Suvaṇṇavaṇṇaṁ sambuddhaṁ, 
Siddhatthaṁ lokanāyakaṁ; 
Disvā nabhena gacchantaṁ, 
Hāso me udapajjatha. 
Paccuggantvāna sambuddhaṁ, 
lokajeṭṭhaṁ narāsabhaṁ; 
Assamaṁ atināmetvā, 
jalajaggehi okiriṁ. 
Catunnavutito kappe, 
yaṁ pupphamabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Ito te sattame kappe, 
caturo pādapāvarā; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sattapadumiyo thero imā gāthāyo abhāsitthāti. 
Sattapadumiyattherassāpadānaṁ catutthaṁ. 

Therāpadāna 
Ārakkhadāyakavagga 
Pupphāsanadāyakattheraapadāna 
“Suvaṇṇavaṇṇaṁ sambuddhaṁ, 
Pītaraṁsiṁva bhāṇumaṁ; 
Avidūrena gacchantaṁ, 
Siddhatthaṁ aparājitaṁ. 
Tassa paccuggamitvāna, 
pavesetvāna assamaṁ; 
Pupphāsanaṁ mayā dinnaṁ, 
vippasannena cetasā. 
Añjaliṁ paggahetvāna, 
vedajāto tadā ahaṁ; 
Buddhe cittaṁ pasādetvā, 
taṁ kammaṁ pariṇāmayiṁ. 
Yaṁ me atthi kataṁ puññaṁ, 
sayambhumhaparājite; 
Sabbena tena kusalena, 
vimalo homi sāsane. 
Catunnavutito kappe, 
pupphāsanamadaṁ tadā; 
Duggatiṁ nābhijānāmi, 
pupphāsanassidaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā pupphāsanadāyako thero imā gāthāyo abhāsitthāti. 
Pupphāsanadāyakattherassāpadānaṁ pañcamaṁ. 

Therāpadāna 
Ārakkhadāyakavagga 
6 Āsanasanthavikattheraapadāna 
“Cetiyaṁ uttamaṁ nāma, 
sikhino lokabandhuno; 
Araññe irīṇe vane, 
andhāhiṇḍāmahaṁ tadā. 
Pavanā nikkhamantena, 
diṭṭhaṁ sīhāsanaṁ mayā; 
Ekaṁsaṁ añjaliṁ katvā, 
santhaviṁ lokanāyakaṁ. 
Divasabhāgaṁ thavitvāna, 
buddhaṁ lokagganāyakaṁ; 
Haṭṭho haṭṭhena cittena, 
imaṁ vācaṁ udīrayiṁ. 
‘Namo te purisājañña, 
namo te purisuttama; 
Sabbaññūsi mahāvīra, 
lok