Sự Nghiệp Anh Hùng (Apadāna)

matī ahaṁ; 
Upetvā tassa kalyāṇaṁ, 
sutvāna vimalaṁ ahaṁ. 
Byāhataṁ punaruttaṁ vā, 
apatthaṁ vā niratthakaṁ; 
Nāddasaṁ tassa munino, 
tato pabbajito ahaṁ. 
Nacireneva kālena, 
sabbasattavisārado; 
Nipuṇo buddhavacane, 
ahosiṁ guṇisammato. 
Tadā catasso gāthāyo, 
ganthayitvā subyañjanā; 
Santhavitvā tilokaggaṁ, 
desayissaṁ dine dine. 
‘Virattosi mahāvīro, 
saṁsāre sabhaye vasaṁ; 
Karuṇāya na nibbāyi, 
tato kāruṇiko muni. 
Puthujjano vayo santo, 
na kilesavaso ahu; 
Sampajāno satiyutto, 
tasmā eso acintiyo. 
Dubbalāni kilesāni, 
yassāsayagatāni me; 
Ñāṇaggiparidaḍḍhāni, 
na khīyiṁsu tamabbhutaṁ. 
Yo sabbalokassa garu, 
loko yassa tathā garu; 
Tathāpi lokācariyo, 
loko tassānuvattako’. 
Evamādīhi sambuddhaṁ, 
kittayaṁ dhammadesanaṁ; 
Yāvajīvaṁ karitvāna, 
gato saggaṁ tato cuto. 
Satasahassito kappe, 
yaṁ buddhamabhikittayiṁ; 
Duggatiṁ nābhijānāmi, 
kittanāya idaṁ phalaṁ. 
Devaloke mahārajjaṁ, 
pādesiṁ kañcanagghiyaṁ; 
Cakkavattī mahārajjaṁ, 
bahusonubhaviṁ ahaṁ. 
Duve bhave pajāyāmi, 
devatte atha mānuse; 
Aññaṁ gatiṁ na jānāmi, 
kittanāya idaṁ phalaṁ. 
Duve kule pajāyāmi, 
khattiye atha brāhmaṇe; 
Nīce kule na jāyāmi, 
kittanāya idaṁ phalaṁ. 
Pacchime ca bhave dāni, 
giribbajapuruttame; 
Raññohaṁ bimbisārassa, 
putto nāmena cābhayo. 
Pāpamittavasaṁ gantvā, 
nigaṇṭhena vimohito; 
Pesito nāṭaputtena, 
buddhaseṭṭhamupeccahaṁ. 
Pucchitvā nipuṇaṁ pañhaṁ, 
sutvā byākaraṇuttamaṁ; 
Pabbajitvāna naciraṁ, 
arahattamapāpuṇiṁ. 
Kittayitvā jinavaraṁ, 
kittito homi sabbadā; 
Sugandhadehavadano, 
āsiṁ sukhasamappito. 
Tikkhahāsalahupañño, 
mahāpañño tathevahaṁ; 
Vicittapaṭibhāno ca, 
tassa kammassa vāhasā. 
Abhitthavitvā padumuttarāhaṁ, 
Pasannacitto asamaṁ sayambhuṁ; 
Na gacchi kappāni apāyabhūmiṁ, 
Sataṁsahassāni balena tassa. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā abhayo thero imā gāthāyo abhāsitthāti. 
Abhayattherassāpadānaṁ sattamaṁ. 

Therāpadāna 
Bījanivagga 
2 Sataraṁsittheraapadāna 
“Ubbiddhaṁ selamāruyha, 
nisīdi purisuttamo; 
Pabbatassāvidūramhi, 
brāhmaṇo mantapāragū. 
Upaviṭṭhaṁ mahāvīraṁ, 
devadevaṁ narāsabhaṁ; 
Añjaliṁ paggahetvāna, 
santhaviṁ lokanāyakaṁ. 
‘Esa buddho mahāvīro, 
varadhammappakāsako; 
Jalati aggikhandhova, 
bhikkhusaṅghapurakkhato. 
Mahāsamuddovakkhubbho, 
aṇṇavova duruttaro; 
Migarājāvasambhīto, 
dhammaṁ deseti cakkhumā’. 
Mama saṅkappamaññāya, 
padumuttaranāyako; 
Bhikkhusaṅghe ṭhito satthā, 
imā gāthā abhāsatha. 
‘Yenāyaṁ añjalī dinno, 
buddhaseṭṭho ca thomito; 
Tiṁsakappasahassāni, 
devarajjaṁ karissati. 
Kappasatasahassamhi, 
aṅgīrasasanāmako; 
Vivaṭṭacchado sambuddho, 
uppajjissati tāvade. 
Tassa dhammesu dāyādo, 
oraso dhammanimmito; 
Sataraṁsīti nāmena, 
arahā so bhavissati’. 
Jātiyā sattavassohaṁ, 
pabbajiṁ anagāriyaṁ; 
Sataraṁsimhi nāmena, 
pabhā niddhāvate mama. 
Maṇḍape rukkhamūle vā, 
jhāyī jhānarato ahaṁ; 
Dhāremi antimaṁ dehaṁ, 
sammāsambuddhasāsane. 
Saṭṭhikappasahassamhi, 
caturo rāmanāmakā; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sataraṁsi thero imā gāthāyo abhāsitthāti. 
Sataraṁsittherassāpadānaṁ dutiyaṁ. 

Therāpadāna 
Bhaddiyavagga 
8 Lomasakaṅgiyattheraapadāna 
“Imamhi bhaddake kappe, 
brahmabandhu mahāyaso; 
Kassapo nāma gottena, 
uppajji vadataṁ varo. 
Tadāhaṁ candano ceva, 
pabbajitvāna sāsane; 
Āpāṇakoṭikaṁ dhammaṁ, 
pūrayitvāna sāsane. 
Tato cutā santusitaṁ, 
upapannā ubho mayaṁ; 
Tattha dibbehi naccehi, 
gītehi vāditehi ca. 
Rūpādidasahaṅgehi, 
abhibhotvāna sesake; 
Yāvatāyuṁ vasitvāna, 
anubhotvā mahāsukhaṁ. 
Tato cavitvā tidasaṁ, 
candano upapajjatha; 
Ahaṁ kapilavatthusmiṁ, 
ajāyiṁ sākiyatrajo. 
Yadā udāyittherena, 
ajjhiṭṭho lokanāyako; 
Anukampiya sakyānaṁ, 
upesi kapilavhayaṁ. 
Tadātimānino sakyā, 
na buddhassa guṇaññuno; 
Paṇamanti na sambuddhaṁ, 
jātithaddhā anādarā. 
Tesaṁ saṅkappamaññāya, 
ākāse caṅkamī jino; 
Pajjunno viya vassittha, 
pajjalittha yathā sikhī. 
Dassetvā rūpamatulaṁ, 
puna antaradhāyatha; 
Ekopi hutvā bahudhā, 
ahosi punarekako. 
Andhakāraṁ pakāsañca, 
dassayitvā anekadhā; 
Pāṭiheraṁ karitvāna, 
vinayī ñātake muni. 
Cātuddīpo mahāmegho, 
tāvadeva pavassatha; 
Tadā hi jātakaṁ buddho, 
vessantaramadesayi. 
Tadā te khattiyā sabbe, 
nihantvā jātijaṁ madaṁ; 
Upesuṁ saraṇaṁ buddhaṁ, 
āha suddhodano tadā. 
‘Idaṁ tatiyaṁ tava bhūripañña, 
Pādāni vandāmi samantacakkhu; 
Yadābhijāto pathavī pakampayī, 
Yadā ca taṁ najjahi jambuchāyā’. 
Tadā buddhānubhāvaṁ taṁ, 
disvā vimhitamānaso; 
Pabbajitvāna tattheva, 
nivasiṁ mātupūjako. 
Candano devaputto maṁ, 
upagantvānupucchatha; 
Bhaddekarattassa tadā, 
saṅkhepavitthāraṁ nayaṁ. 
Coditohaṁ tadā tena, 
upecca naranāyakaṁ; 
Bhaddekarattaṁ sutvāna, 
saṁviggo vanamāmako. 
Tadā mātaramapucchiṁ, 
‘vane vacchāmi ekako’; 
‘Sukhumālo’ti me mātā, 
vārayī taṁ tadā vacaṁ. 
‘Kāsaṁ kusaṁ poṭakilaṁ, 
usīraṁ muñjapabbajaṁ; 
Urasā panudissāmi, 
vivekamanubrūhayaṁ’. 
Tadā vanaṁ paviṭṭhohaṁ, 
saritvā jinasāsanaṁ; 
Bhaddekarattaovādaṁ, 
arahattamapāpuṇiṁ. 
‘Atītaṁ nānvāgameyya, 
nappaṭikaṅkhe anāgataṁ; 
Yadatītaṁ pahīnaṁ taṁ, 
appattañca anāgataṁ. 
Paccuppannañca yo dhammaṁ, 
tattha tattha vipassati; 
Asaṁhīraṁ asaṅkuppaṁ, 
taṁ vidvā manubrūhaye. 
Ajjeva kiccamātappaṁ, 
ko jaññā maraṇaṁ suve; 
Na hi no saṅgaraṁ tena, 
mahāsenena maccunā. 
Evaṁvihāriṁ ātāpiṁ, 
ahorattamatanditaṁ; 
Taṁ ve bhaddekarattoti, 
santo ācikkhate muni’. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā lomasakaṅgiyo thero imā gāthāyo abhāsitthāti. 
Lomasakaṅgiyattherassāpadānaṁ aṭṭhamaṁ. 

Therāpadāna 
Bhaddiyavagga 
Vanavacchattheraapadāna 
“Imamhi bhaddake kappe, 
brahmabandhu mahāyaso; 
Kassapo nāma gottena, 
uppajji vadataṁ varo. 
Tadāhaṁ pabbajitvāna, 
tassa buddhassa sāsane; 
Yāvajīvaṁ caritvāna, 
brahmacāraṁ tato cuto. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Tato cuto araññamhi, 
kapoto āsahaṁ tahiṁ; 
Vasate guṇasampanno, 
bhikkhu jhānarato sadā. 
Mettacitto kāruṇiko, 
sadā pamuditānano; 
Upekkhako mahāvīro, 
appamaññāsu kovido. 
Vinīvaraṇasaṅkappe, 
sabbasattahitāsaye; 
Visaṭṭho nacirenāsiṁ, 
tasmiṁ sugatasāvake. 
Upecca pādamūlamhi, 
nisinnassa tadāssame; 
Kadāci sāmisaṁ deti, 
dhammaṁ desesi cekadā. 
Tadā vipulapemena, 
upāsitvā jinatrajaṁ; 
Tato cuto gato saggaṁ, 
pavāso sagharaṁ yathā. 
Saggā cuto manussesu, 
nibbatto puññakammunā; 
Agāraṁ chaḍḍayitvāna, 
pabbajiṁ bahuso ahaṁ. 
Samaṇo tāpaso vippo, 
paribbajo tathevahaṁ; 
Hutvā vasiṁ araññamhi, 
anekasataso ahaṁ. 
Pacchime ca bhave dāni, 
ramme kapilavatthave; 
Vacchagotto dijo tassa, 
jāyāya ahamokkamiṁ. 
Mātu me dohaḷo āsi, 
tirokucchigatassa me; 
Jāyamānasamīpamhi, 
vanavāsāya nicchayo. 
Tato me ajanī mātā, 
ramaṇīye vanantare; 
Gabbhato nikkhamantaṁ maṁ, 
kāsāyena paṭiggahuṁ. 
Tato kumāro siddhattho, 
jāto sakyakuladdhajo; 
Tassa mitto piyo āsiṁ, 
saṁvisaṭṭho sumāniyo. 
Sattasārebhinikkhante, 
ohāya vipulaṁ yasaṁ; 
Ahampi pabbajitvāna, 
himavantamupāgamiṁ. 
Vanālayaṁ bhāvanīyaṁ, 
kassapaṁ dhutavādikaṁ; 
Disvā sutvā jinuppādaṁ, 
upesiṁ narasārathiṁ. 
So me dhammamadesesi, 
sabbatthaṁ sampakāsayaṁ; 
Tatohaṁ pabbajitvāna, 
vanameva punāgamaṁ. 
Tatthāppamatto viharaṁ, 
chaḷabhiññā aphassayiṁ; 
Aho suladdhalābhomhi, 
sumittenānukampito. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā vanavaccho thero imā gāthāyo abhāsitthāti. 
Vanavacchattherassāpadānaṁ navamaṁ. 

Therāpadāna 
Bhaddiyavagga 
Cūḷasugandhattheraapadāna 
“Imamhi bhaddake kappe, 
brahmabandhu mahāyaso; 
Kassapo nāma gottena, 
uppajji vadataṁ varo. 
Anubyañjanasampanno, 
bāttiṁsavaralakkhaṇo; 
Byāmappabhāparivuto, 
raṁsijālasamotthaṭo. 
Assāsetā yathā cando, 
sūriyova pabhaṅkaro; 
Nibbāpetā yathā megho, 
sāgarova guṇākaro. 
Dharaṇīriva sīlena, 
himavāva samādhinā; 
Ākāso viya paññāya, 
asaṅgo anilo yathā. 
Tadāhaṁ bārāṇasiyaṁ, 
upapanno mahākule; 
Pahūtadhanadhaññasmiṁ, 
nānāratanasañcaye. 
Mahatā parivārena, 
nisinnaṁ lokanāyakaṁ; 
Upecca dhammamassosiṁ, 
amataṁva manoharaṁ. 
Dvattiṁsalakkhaṇadharo, 
sanakkhattova candimā; 
Anubyañjanasampanno, 
sālarājāva phullito. 
Raṁsijālaparikkhitto, 
dittova kanakācalo; 
Byāmappabhāparivuto, 
sataraṁsī divākaro. 
Soṇṇānano jinavaro, 
samaṇīva siluccayo; 
Karuṇā puṇṇahadayo, 
guṇena viya sāgaro. 
Lokavissutakitti ca, 
sinerūva naguttamo; 
Yasasā vitthato vīro, 
ākāsasadiso muni. 
Asaṅgacitto sabbattha, 
anilo viya nāyako; 
Patiṭṭhā sabbabhūtānaṁ, 
mahīva munisattamo. 
Anupalitto lokena, 
toyena padumaṁ yathā; 
Kuvādagacchadahano, 
aggikhandhova sobhasi. 
Agadho viya sabbattha, 
kilesavisanāsako; 
Gandhamādanaselova, 
guṇagandhavibhūsito. 
Guṇānaṁ ākaro vīro, 
ratanānaṁva sāgaro; 
Sindhūva vanarājīnaṁ, 
kilesamalahārako. 
Vijayīva mahāyodho, 
mārasenāvamaddano; 
Cakkavattīva so rājā, 
bojjhaṅgaratanissaro. 
Mahābhisakkasaṅkāso, 
dosabyādhitikicchako; 
Sallakatto yathā vejjo, 
diṭṭhigaṇḍaviphālako. 
So tadā lokapajjoto, 
sanarāmarasakkato; 
Parisāsu narādicco, 
dhammaṁ desayate jino. 
‘Dānaṁ datvā mahābhogo, 
sīlena sugatūpago; 
Bhāvanāya ca nibbāti’, 
iccevamanusāsatha. 
Desanaṁ taṁ mahassādaṁ, 
ādimajjhantasobhanaṁ; 
Suṇanti parisā sabbā, 
amataṁva mahārasaṁ. 
Sutvā sumadhuraṁ dhammaṁ, 
pasanno jinasāsane; 
Sugataṁ saraṇaṁ gantvā, 
yāvajīvaṁ namassahaṁ. 
Munino gandhakuṭiyā, 
opuñjesiṁ tadā mahiṁ; 
Catujjātena gandhena, 
māse aṭṭha dinesvahaṁ. 
Paṇidhāya sugandhattaṁ, 
sarīravissagandhino; 
Tadā jino viyākāsi, 
sugandhatanulābhitaṁ. 
‘Yo yaṁ gandhakuṭibhūmiṁ, 
gandhenopuñjate sakiṁ; 
Tena kammavipākena, 
upapanno tahiṁ tahiṁ. 
Sugandhadeho sabbattha, 
bhavissati ayaṁ naro; 
Guṇagandhayutto hutvā, 
nibbāyissatināsavo’. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Pacchime ca bhave dāni, 
jāto vippakule ahaṁ; 
Gabbhaṁ me vasato mātā, 
dehenāsi sugandhitā. 
Yadā ca mātukucchimhā, 
nikkhamāmi tadā purī; 
Sāvatthisabbagandhehi, 
vāsitā viya vāyatha. 
Pupphavassañca surabhi, 
dibbagandhaṁ manoramaṁ; 
Dhūpāni ca mahagghāni, 
upavāyiṁsu tāvade. 
Devā ca sabbagandhehi, 
dhūpapupphehi taṁ gharaṁ; 
Vāsayiṁsu sugandhena, 
yasmiṁ jāto ahaṁ ghare. 
Yadā ca taruṇo bhaddo, 
paṭhame yobbane ṭhito; 
Tadā selaṁ saparisaṁ, 
vinetvā narasārathi. 
Tehi sabbehi parivuto, 
sāvatthipuramāgato; 
Tadā buddhānubhāvaṁ taṁ, 
disvā pabbajito ahaṁ. 
Sīlaṁ samādhipaññañca, 
vimuttiñca anuttaraṁ; 
Bhāvetvā caturo dhamme, 
pāpuṇiṁ āsavakkhayaṁ. 
Yadā pabbajito cāhaṁ, 
yadā ca arahā ahuṁ; 
Nibbāyissaṁ yadā cāhaṁ, 
gandhavasso tadā ahu. 
Sarīragandho ca sadātiseti me, 
Mahārahaṁ candanacampakuppalaṁ; 
Tatheva gandhe itare ca sabbaso, 
Pasayha vāyāmi tato tahiṁ tahiṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā cūḷasugandho thero imā gāthāyo abhāsitthāti. 
Cūḷasugandhattherassāpadānaṁ dasamaṁ. 
Bhaddiyavaggo pañcapaññāsamo. 
Tassuddānaṁ 
Bhaddiyo revato thero, 
mahālābhī ca sīvali; 
Vaṅgīso nandako ceva, 
kāḷudāyī tathābhayo. 
Lomaso vanavaccho ca, 
sugandho ceva dasamo; 
Tīṇi gāthāsatā tattha, 
soḷasā ca taduttari. 
Atha vagguddānaṁ 
Kaṇikāravhayo vaggo, 
phalado tiṇadāyako; 
Kaccāno bhaddiyo vaggo, 
gāthāyo gaṇitā cimā. 
Navagāthāsatānīha, 
caturāsītiyeva ca; 
Sapaññāsaṁ pañcasataṁ, 
apadānā pakāsitā. 
Saha udānagāthāhi, 
chasahassāni hontimā; 
Dvesatāni ca gāthānaṁ, 
aṭṭhārasa taduttari. 

Therāpadāna 
Yasavagga 
Yasattheraapadāna 
“Mahāsamuddaṁ oggayha, 
bhavanaṁ me sunimmitaṁ; 
Sunimmitā pokkharaṇī, 
cakkavākūpakūjitā. 
Mandārakehi sañchannā, 
padumuppalakehi ca; 
Nadī ca sandate tattha, 
supatitthā manoramā. 
Macchakacchapasañchannā, 
nānādijasamotthaṭā; 
Mayūrakoñcābhirudā, 
kokilādīhi vagguhi. 
Pārevatā ravihaṁsā, 
cakkavākā nadīcarā; 
Tittirā sālikā cettha, 
pāvakā jīvaṁjīvakā. 
Haṁsākoñcābhinaditā, 
kosiyā piṅgalā bahū; 
Sattaratanasampannā, 
maṇimuttapavāḷikā. 
Sabbe soṇṇamayā rukkhā, 
nānākhandhasameritā; 
Ujjotenti divārattiṁ, 
bhavanaṁ sabbakālikaṁ. 
Saṭṭhituriyasahassāni, 
sāyaṁ pāto pavajjare; 
Soḷasitthisahassāni, 
parivārenti maṁ sadā. 
Abhinikkhamma bhavanā, 
sumedhaṁ lokanāyakaṁ; 
Pasannacitto sumano, 
vandayiṁ taṁ mahāyasaṁ. 
Sambuddhaṁ abhivādetvā, 
sasaṅghaṁ taṁ nimantayiṁ; 
Adhivāsesi so dhīro, 
sumedho lokanāyako. 
Mama dhammakathaṁ katvā, 
uyyojesi mahāmuni; 
Sambuddhaṁ abhivādetvā, 
bhavanaṁ me upāgamiṁ. 
Āmantayiṁ parijanaṁ, 
sabbe sannipatuṁ tadā; 
‘Pubbaṇhasamayaṁ buddho, 
bhavanaṁ āgamissati. 
Lābhā amhaṁ suladdhā no, 
ye vasāma tavantike; 
Mayampi buddhaseṭṭhassa, 
pūjayissāma satthuno’. 
Annaṁ pānaṁ paṭṭhapetvā, 
kālaṁ ārocayiṁ ahaṁ; 
Vasīsatasahassehi, 
upesi lokanāyako. 
Pañcaṅgikehi turiyehi, 
paccuggamamakāsahaṁ; 
Sabbasoṇṇamaye pīṭhe, 
nisīdi purisuttamo. 
Uparicchadanaṁ āsi, 
sabbasoṇṇamayaṁ tadā; 
Bījanīyo pavāyanti, 
bhikkhusaṅghaṁ anuttaraṁ. 
Pahūtenannapānena, 
bhikkhusaṅghaṁ atappayiṁ; 
Paccekadussayugale, 
bhikkhusaṅghassadāsahaṁ. 
Yaṁ vadeti sumedho so, 
āhutīnaṁ paṭiggaho; 
Bhikkhusaṅghe nisīditvā, 
imā gāthā abhāsatha. 
‘Yo maṁ annena pānena, 
sabbe ime ca tappayi; 
Tamahaṁ kittayissāmi, 
suṇātha mama bhāsato. 
Aṭṭhārase kappasate, 
devaloke ramissati; 
Sahassakkhattuṁ rājāyaṁ, 
cakkavattī bhavissati. 
Upagacchati yaṁ yoniṁ, 
devattaṁ atha mānusaṁ; 
Sabbasoṇṇamayaṁ tassa, 
chadanaṁ dhārayissati. 
Tiṁsakappasahassamhi, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādo, 
oraso dhammanimmito; 
Sabbāsave pariññāya, 
nibbāyissatināsavo. 
Bhikkhusaṅghe nisīditvā, 
sīhanādaṁ nadissati; 
Citake chattaṁ dhārenti, 
heṭṭhā chattamhi ḍayhatha’. 
Sāmaññaṁ me anuppattaṁ, 
kilesā jhāpitā mayā; 
Maṇḍape rukkhamūle vā, 
santāso me na vijjati. 
Tiṁsakappasahassamhi, 
yaṁ dānamadadiṁ tadā; 
Duggatiṁ nābhijānāmi, 
sabbadānassidaṁ phalaṁ. 
Kilesā jhāpitā mayhaṁ, 
bhavā sabbe samūhatā; 
Nāgova bandhanaṁ chetvā, 
viharāmi anāsavo. 
Svāgataṁ vata me āsi, 
mama buddhassa santike; 
Tisso vijjā anuppattā, 
kataṁ buddhassa sāsanaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā yaso thero imā gāthāyo abhāsitthāti. 
Yasattherassāpadānaṁ paṭhamaṁ. 

Therāpadāna 
Yasavagga 
Nadīkassapattheraapadāna 
“Padumuttarassa bhagavato, 
Lokajeṭṭhassa tādino; 
Piṇḍacāraṁ carantassa, 
Vārato uttamaṁ yasaṁ; 
Aggaphalaṁ gahetvāna, 
Adāsiṁ satthuno ahaṁ. 
Tena kammena devindo, 
lokajeṭṭho narāsabho; 
Sampattomhi acalaṁ ṭhānaṁ, 
hitvā jayaparājayaṁ. 
Satasahassito kappe, 
yaṁ phalaṁ adadiṁ tadā; 
Duggatiṁ nābhijānāmi, 
aggadānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā nadīkassapo thero imā gāthāyo abhāsitthāti. 
Nadīkassapattherassāpadānaṁ dutiyaṁ. 

Therāpadāna 
Yasavagga 
Gayākassapattheraapadāna 
“Ajinacammavatthohaṁ, 
khāribhāradharo tadā; 
Khārikaṁ hārayitvāna, 
kolaṁ ahāsi assamaṁ. 
Bhagavā tamhi samaye, 
eko adutiyo jino; 
Mamassamaṁ upāgacchi, 
jotento sabbakālikaṁ. 
Sakaṁ cittaṁ pasādetvā, 
abhivādetvāna subbataṁ; 
Ubho hatthehi paggayha, 
kolaṁ buddhassadāsahaṁ. 
Ekatiṁse ito kappe, 
yaṁ phalaṁ adadiṁ tadā; 
Duggatiṁ nābhijānāmi, 
koladānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā gayākassapo thero imā gāthāyo abhāsitthāti. 
Gayākassapattherassāpadānaṁ tatiyaṁ. 

Therāpadāna 
Yasavagga 
4 Kimilattheraapadāna 
“Nibbute kakusandhamhi, 
brāhmaṇamhi vusīmati; 
Gahetvā salalaṁ mālaṁ, 
maṇḍapaṁ kārayiṁ ahaṁ. 
Tāvatiṁsaṁ gato santo, 
labhimha byamhamuttamaṁ; 
Aññe devetirocāmi, 
puññakammassidaṁ phalaṁ. 
Divā vā yadi vā rattiṁ, 
caṅkamanto ṭhito cahaṁ; 
Channo salalapupphehi, 
puññakammassidaṁ phalaṁ. 
Imasmiṁyeva kappamhi, 
yaṁ buddhamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā kimilo thero imā gāthāyo abhāsitthāti. 
Kimilattherassāpadānaṁ catutthaṁ. 

Therāpadāna 
Yasavagga 
Vajjīputtattheraapadāna 
“Sahassaraṁsī bhagavā, 
sayambhū aparājito; 
Vivekā vuṭṭhahitvāna, 
gocarāyābhinikkhami. 
Phalahattho ahaṁ disvā, 
upagacchiṁ narāsabhaṁ; 
Pasannacitto sumano, 
savaṇṭaṁ adadiṁ phalaṁ. 
Catunnavutito kappe, 
yaṁ phalaṁ adadiṁ tadā; 
Duggatiṁ nābhijānāmi, 
phaladānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā vajjīputto thero imā gāthāyo abhāsitthāti. 
Vajjīputtattherassāpadānaṁ pañcamaṁ. 

Therāpadāna 
Yasavagga 
Uttarattheraapadāna 
“Sumedho nāma sambuddho, 
bāttiṁsavaralakkhaṇo; 
Vivekakāmo bhagavā, 
himavantamupāgami. 
Ajjhogāhetvā himavantaṁ, 
aggo kāruṇiko muni; 
Pallaṅkaṁ ābhujitvāna, 
nisīdi purisuttamo. 
Vijjādharo tadā āsiṁ, 
antalikkhacaro ahaṁ; 
Tisūlaṁ sukataṁ gayha, 
gacchāmi ambare tadā. 
Pabbatagge yathā aggi, 
puṇṇamāyeva candimā; 
Vanaṁ obhāsate buddho, 
sālarājāva phullito. 
Vanaggā nikkhamitvāna, 
buddharaṁsībhidhāvare; 
Naḷaggivaṇṇasaṅkāsā, 
disvā cittaṁ pasādayiṁ. 
Vicinaṁ addasaṁ pupphaṁ, 
kaṇikāraṁ devagandhikaṁ; 
Tīṇi pupphāni ādāya, 
buddhaseṭṭhamapūjayiṁ. 
Buddhassa ānubhāvena, 
tīṇi pupphāni me tadā; 
Uddhaṁ vaṇṭā adhopattā, 
chāyaṁ kubbanti satthuno. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Tattha me sukataṁ byamhaṁ, 
kaṇikārīti ñāyati; 
Saṭṭhiyojanamubbedhaṁ, 
tiṁsayojanavitthataṁ. 
Sahassakaṇḍaṁ satabheṇḍu, 
dhajālu haritāmayaṁ; 
Satasahassaniyyūhā, 
byamhe pātubhaviṁsu me. 
Soṇṇamayā maṇimayā, 
lohitaṅkamayāpi ca; 
Phalikāpi ca pallaṅkā, 
yenicchakā yadicchakā. 
Mahārahañca sayanaṁ, 
tūlikā vikatīyutaṁ; 
Uddhalomiñca ekantaṁ, 
bimbohanasamāyutaṁ. 
Bhavanā nikkhamitvāna, 
caranto devacārikaṁ; 
Yathā icchāmi gamanaṁ, 
devasaṅghapurakkhato. 
Pupphassa heṭṭhā tiṭṭhāmi, 
uparicchadanaṁ mama; 
Samantā yojanasataṁ, 
kaṇikārehi chāditaṁ. 
Saṭṭhituriyasahassāni, 
sāyapātaṁ upaṭṭhahuṁ; 
Parivārenti maṁ niccaṁ, 
rattindivamatanditā. 
Tattha naccehi gītehi, 
tālehi vāditehi ca; 
Ramāmi khiḍḍā ratiyā, 
modāmi kāmakāmahaṁ. 
Tattha bhutvā pivitvā ca, 
modāmi tidase tadā; 
Nārīgaṇehi sahito, 
modāmi byamhamuttame. 
Satānaṁ pañcakkhattuñca, 
devarajjamakārayiṁ; 
Satānaṁ tīṇikkhattuñca, 
cakkavattī ahosahaṁ; 
Padesarajjaṁ vipulaṁ, 
gaṇanāto asaṅkhiyaṁ. 
Bhave bhave saṁsaranto, 
mahābhogaṁ labhāmahaṁ; 
Bhoge me ūnatā natthi, 
buddhapūjāyidaṁ phalaṁ. 
Duve bhave saṁsarāmi, 
devatte atha mānuse; 
Aññaṁ gatiṁ na jānāmi, 
buddhapūjāyidaṁ phalaṁ. 
Duve kule pajāyāmi, 
khattiye cāpi brāhmaṇe; 
Nīce kule na jānāmi, 
buddhapūjāyidaṁ phalaṁ. 
Hatthiyānaṁ assayānaṁ, 
sivikaṁ sandamānikaṁ; 
Labhāmi sabbamevetaṁ, 
buddhapūjāyidaṁ phalaṁ. 
Dāsīgaṇaṁ dāsagaṇaṁ, 
nāriyo samalaṅkatā; 
Labhāmi sabbamevetaṁ, 
buddhapūjāyidaṁ phalaṁ. 
Koseyyakambaliyāni, 
khomakappāsikāni ca; 
Labhāmi sabbamevetaṁ, 
buddhapūjāyidaṁ phalaṁ. 
Navavatthaṁ navaphalaṁ, 
navaggarasabhojanaṁ; 
Labhāmi sabbamevetaṁ, 
buddhapūjāyidaṁ phalaṁ. 
Imaṁ khāda imaṁ bhuñja, 
imamhi sayane saya; 
Labhāmi sabbamevetaṁ, 
buddhapūjāyidaṁ phalaṁ. 
Sabbattha pūjito homi, 
yaso accuggato mama; 
Mahāpakkho sadā homi, 
abhejjapariso sadā; 
Ñātīnaṁ uttamo homi, 
buddhapūjāyidaṁ phalaṁ. 
Sītaṁ uṇhaṁ na jānāmi, 
pariḷāho na vijjati; 
Atho cetasikaṁ dukkhaṁ, 
hadaye me na vijjati. 
Suvaṇṇavaṇṇo hutvāna, 
saṁsarāmi bhavābhave; 
Vevaṇṇiyaṁ na jānāmi, 
buddhapūjāyidaṁ phalaṁ. 
Devalokā cavitvāna, 
sukkamūlena codito; 
Sāvatthiyaṁ pure jāto, 
mahāsālesu aḍḍhake. 
Pañca kāmaguṇe hitvā, 
pabbajiṁ anagāriyaṁ; 
Jātiyā sattavassohaṁ, 
arahattamapāpuṇiṁ. 
Upasampadāyī buddho, 
guṇamaññāya cakkhumā; 
Taruṇo pūjanīyohaṁ, 
buddhapūjāyidaṁ phalaṁ. 
Dibbacakkhuvisuddhaṁ me, 
samādhikusalo ahaṁ; 
Abhiññāpāramippatto, 
buddhapūjāyidaṁ phalaṁ. 
Paṭisambhidā anuppatto, 
iddhipādesu kovido; 
Dhammesu pāramippatto, 
buddhapūjāyidaṁ phalaṁ. 
Tiṁsakappasahassamhi, 
yaṁ buddhamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā uttaro thero imā gāthāyo abhāsitthāti. 
Uttarattherassāpadānaṁ chaṭṭhaṁ. 

Therāpadāna 
Yasavagga 
Aparauttarattheraapadāna 
“Nibbute lokanāthamhi, 
siddhatthe lokanāyake; 
Mama ñātī samānetvā, 
dhātupūjaṁ akāsahaṁ. 
Catunnavutito kappe, 
yaṁ dhātumabhipūjayiṁ; 
Duggatiṁ nābhijānāmi, 
dhātupūjāyidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā aparauttaratthero imā gāthāyo abhāsitthāti. 
Aparassa uttarattherassāpadānaṁ sattamaṁ. 

Therāpadāna 
Bījanivagga 
Sayanadāyakattheraapadāna 
“Padumuttarabuddhassa, 
sabbalokānukampino; 
Sayanaṁ tassa pādāsiṁ, 
vippasannena cetasā. 
Tena sayanadānena, 
sukhette bījasampadā; 
Bhogā nibbattare tassa, 
sayanassa idaṁ phalaṁ. 
Ākāse seyyaṁ kappemi, 
dhāremi pathaviṁ imaṁ; 
Pāṇesu me issariyaṁ, 
sayanassa idaṁ phalaṁ. 
Pañcakappasahassamhi, 
aṭṭha āsuṁ mahātejā; 
Catuttiṁse kappasate, 
caturo ca mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sayanadāyako thero imā gāthāyo abhāsitthāti. 
Sayanadāyakattherassāpadānaṁ tatiyaṁ. 

Therāpadāna 
Yasavagga 
Bhaddajittheraapadāna 
“Ogayha yaṁ pokkharaṇiṁ, 
nānākuñjarasevitaṁ; 
Uddharāmi bhisaṁ tattha, 
ghāsahetu ahaṁ tadā. 
Bhagavā tamhi samaye, 
padumuttarasavhayo; 
Rattambaradharo buddho, 
gacchate anilañjase. 
Dhunanto paṁsukūlāni, 
saddaṁ assosahaṁ tadā; 
Uddhaṁ nijjhāyamānohaṁ, 
addasaṁ lokanāyakaṁ. 
Tattheva ṭhitako santo, 
āyāciṁ lokanāyakaṁ; 
‘Madhuṁ bhisehi sahitaṁ, 
khīraṁ sappiṁ muḷālikaṁ. 
Paṭiggaṇhātu me buddho, 
anukampāya cakkhumā’; 
Tato kāruṇiko satthā, 
orohitvā mahāyaso. 
Paṭiggaṇhi mama bhikkhaṁ, 
anukampāya cakkhumā; 
Paṭiggahetvā sambuddho, 
akā me anumodanaṁ. 
‘Sukhī hotu mahāpuñña, 
gati tuyhaṁ samijjhatu; 
Iminā bhisadānena, 
labhassu vipulaṁ sukhaṁ’. 
Idaṁ vatvāna sambuddho, 
jalajuttamanāmako; 
Bhikkhamādāya sambuddho, 
ākāsenāgamā jino. 
Tato bhisaṁ gahetvāna, 
āgacchiṁ mama assamaṁ; 
Bhisaṁ rukkhe laggetvāna, 
mama dānaṁ anussariṁ. 
Mahāvāto uṭṭhahitvā, 
sañcālesi vanaṁ tadā; 
Ākāso abhinādittha, 
asanī ca phalī tadā. 
Tato me asanīpāto, 
matthake nipatī tadā; 
Sohaṁ nisinnako santo, 
tattha kālaṅkato ahaṁ. 
Puññakammena saññutto, 
tusitaṁ upapajjahaṁ; 
Kaḷevaraṁ me patitaṁ, 
devaloke ramāmahaṁ. 
Chaḷasītisahassāni, 
nāriyo samalaṅkatā; 
Sāyaṁ pātaṁ upaṭṭhanti, 
bhisadānassidaṁ phalaṁ. 
Manussayonimāgantvā, 
sukhito homahaṁ tadā; 
Bhogā me ūnatā natthi, 
bhisadānassidaṁ phalaṁ. 
Anukampitako tena, 
devadevena tādinā; 
Sabbāsavaparikkhīṇā, 
natthi dāni punabbhavo. 
Satasahassito kappe, 
yaṁ bhisaṁ adadiṁ tadā; 
Duggatiṁ nābhijānāmi, 
bhisadānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā bhaddajitthero imā gāthāyo abhāsitthāti. 
Bhaddajittherassāpadānaṁ aṭṭhamaṁ. 

Therāpadāna 
Yasavagga 
Sivakattheraapadāna 
“Esanāya carantassa, 
vipassissa mahesino; 
Rittakaṁ pattaṁ disvāna, 
kummāsaṁ pūrayiṁ ahaṁ. 
Ekanavutito kappe, 
yaṁ bhikkhamadadiṁ tadā; 
Duggatiṁ nābhijānāmi, 
kummāsassa idaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sivakatthero imā gāthāyo abhāsitthāti. 
Sivakattherassāpadānaṁ navamaṁ. 

Therāpadāna 
Yasavagga 
Upavānattheraapadāna 
“Padumuttaro nāma jino, 
sabbadhammāna pāragū; 
Jalitvā aggikkhandhova, 
sambuddho parinibbuto. 
Mahājanā samāgamma, 
pūjayitvā tathāgataṁ; 
Citakaṁ katvā sugataṁ, 
sarīraṁ abhiropayuṁ. 
Sarīrakiccaṁ katvāna, 
dhātuṁ tattha samānayuṁ; 
Sadevamanussā sabbe, 
buddhathūpaṁ akaṁsu te. 
Paṭhamā kañcanamayā, 
dutiyā ca maṇimayā; 
Tatiyā rūpiyamayā, 
catutthī phalikāmayā. 
Tattha pañcamikā ceva, 
lohitaṅkamayā ahu; 
Chaṭṭhā masāragallassa, 
sabbaṁ ratanamayūpari. 
Jaṅghā maṇimayā āsi, 
vedikā ratanāmayā; 
Sabbasoṇṇamayo thūpo, 
uddhaṁ yojanamuggato. 
Devā tattha samāgantvā, 
ekato mantayuṁ tadā; 
‘Mayampi thūpaṁ kassāma, 
lokanāthassa tādino. 
Dhātu āveṇikā natthi, 
sarīraṁ ekapiṇḍitaṁ; 
Imamhi buddhathūpamhi, 
kassāma kañcukaṁ mayaṁ’. 
Devā sattahi ratnehi, 
aññaṁ vaḍḍhesuṁ yojanaṁ; 
Thūpo dviyojanubbedho, 
timiraṁ byapahanti so. 
Nāgā tattha samāgantvā, 
ekato mantayuṁ tadā; 
‘Manussā ceva devā ca, 
buddhathūpaṁ akaṁsu te. 
Mā no pamattā assumha, 
appamattā sadevakā; 
Mayampi thūpaṁ kassāma, 
lokanāthassa tādino’. 
Indanīlaṁ mahānīlaṁ, 
atho jotirasaṁ maṇiṁ; 
Ekato sannipātetvā, 
buddhathūpaṁ achādayuṁ. 
Sabbaṁ maṇimayaṁ āsi, 
yāvatā buddhacetiyaṁ; 
Tiyojanasamubbedhaṁ, 
ālokakaraṇaṁ tadā. 
Garuḷā ca samāgantvā, 
ekato mantayuṁ tadā; 
‘Manussā devanāgā ca, 
buddhapūjaṁ akaṁsu te. 
Mā no pamattā assumha, 
appamattā sadevakā; 
Mayampi thūpaṁ kassāma, 
lokanāthassa tādino’. 
Sabbaṁ maṇimayaṁ thūpaṁ, 
akaruṁ te ca kañcukaṁ; 
Yojanaṁ tepi vaḍḍhesuṁ, 
āyataṁ buddhacetiyaṁ. 
Catuyojanamubbedho, 
buddhathūpo virocati; 
Obhāseti disā sabbā, 
sataraṁsīva uggato. 
Kumbhaṇḍā ca samāgantvā, 
ekato mantayuṁ tadā; 
‘Manussā ceva devā ca, 
nāgā ca garuḷā tathā. 
Paccekaṁ buddhaseṭṭhassa, 
akaṁsu thūpamuttamaṁ; 
Mā no pamattā assumha, 
appamattā sadevakā. 
Mayampi thūpaṁ kassāma, 
lokanāthassa tādino; 
Ratanehi chādessāma, 
āyataṁ buddhacetiyaṁ’. 
Yojanaṁ tepi vaḍḍhesuṁ, 
āyataṁ buddhacetiyaṁ; 
Pañcayojanamubbedho, 
thūpo obhāsate tadā. 
Yakkhā tattha samāgantvā, 
ekato mantayuṁ tadā; 
‘Manussā devanāgā ca, 
garuḷā ca kumbhaṇḍakā. 
Paccekaṁ buddhaseṭṭhassa, 
akaṁsu thūpamuttamaṁ; 
Mā no pamattā assumha, 
appamattā sadevakā. 
Mayampi thūpaṁ kassāma, 
lokanāthassa tādino; 
Phalikā chādayissāma, 
āyataṁ buddhacetiyaṁ’. 
Yojanaṁ tepi vaḍḍhesuṁ, 
āyataṁ buddhacetiyaṁ; 
Chayojanikamubbedho, 
thūpo obhāsate tadā. 
Gandhabbā ca samāgantvā, 
ekato mantayuṁ tadā; 
‘Manujā devatā nāgā, 
kumbhaṇḍā guyhakā tathā. 
Sabbe akaṁsu buddhathūpaṁ, 
mayamettha akārakā; 
Mayampi thūpaṁ kassāma, 
lokanāthassa tādino’. 
Vediyo satta katvāna, 
dhajaṁ chattaṁ akaṁsu te; 
Sabbasoṇṇamayaṁ thūpaṁ, 
gandhabbā kārayuṁ tadā. 
Sattayojanamubbedho, 
thūpo obhāsate tadā; 
Rattindivā na ñāyanti, 
āloko hoti sabbadā. 
Abhibhonti na tassābhā, 
candasūrā satārakā; 
Samantā yojanasate, 
padīpopi na pajjali. 
Tena kālena ye keci, 
thūpaṁ pūjenti mānusā; 
Na te thūpaṁ āruhanti, 
ambare ukkhipanti te. 
Devehi ṭhapito yakkho, 
abhisammatanāmako; 
Dhajaṁ vā pupphadāmaṁ vā, 
abhiropeti uttariṁ. 
Na te passanti taṁ yakkhaṁ, 
dāmaṁ passanti gacchato; 
Evaṁ passitvā gacchantā, 
sabbe gacchanti suggatiṁ. 
Viruddhā ye pāvacane, 
pasannā ye ca sāsane; 
Pāṭihīraṁ daṭṭhukāmā, 
thūpaṁ pūjenti mānusā. 
Nagare haṁsavatiyā, 
ahosiṁ bhatako tadā; 
Āmoditaṁ janaṁ disvā, 
evaṁ cintesahaṁ tadā. 
‘Uḷāro bhagavā neso, 
yassa dhātughare disaṁ; 
Imā ca janatā tuṭṭhā, 
kāraṁ kubbaṁ na tappare. 
Ahampi kāraṁ kassāmi, 
lokanāthassa tādino; 
Tassa dhammesu dāyādo, 
bhavissāmi anāgate’. 
Sudhotaṁ rajakenāhaṁ, 
uttareyyaṁ paṭaṁ mama; 
Veḷagge ālaggetvāna, 
dhajaṁ ukkhipimambare. 
Abhisammatako gayha, 
ambare hāsi me dhajaṁ; 
Vāteritaṁ dhajaṁ disvā, 
bhiyyo hāsaṁ janesahaṁ. 
Tattha cittaṁ pasādetvā, 
samaṇaṁ upasaṅkamiṁ; 
Taṁ bhikkhuṁ abhivādetvā, 
vipākaṁ pucchahaṁ dhaje. 
So me kathesi ānandī, 
pītisañjananaṁ mama; 
‘Tassa dhajassa vipākaṁ, 
anubhossasi sabbadā. 
Hatthiassarathāpattī, 
senā ca caturaṅginī; 
Parivāressanti taṁ niccaṁ, 
dhajadānassidaṁ phalaṁ. 
Saṭṭhituriyasahassāni, 
bheriyo samalaṅkatā; 
Parivāressanti taṁ niccaṁ, 
dhajadānassidaṁ phalaṁ. 
Chaḷasītisahassāni, 
nāriyo samalaṅkatā; 
Vicittavatthābharaṇā, 
āmukkamaṇikuṇḍalā. 
Aḷārapamhā hasulā, 
susaññā tanumajjhimā; 
Parivāressanti taṁ niccaṁ, 
dhajadānassidaṁ phalaṁ. 
Tiṁsakappasahassāni, 
devaloke ramissasi; 
Asītikkhattuṁ devindo, 
devarajjaṁ karissasi. 
Sahassakkhattuṁ rājā ca, 
cakkavattī bhavissati; 
Padesarajjaṁ vipulaṁ, 
gaṇanāto asaṅkhiyaṁ. 
Kappasatasahassamhi, 
okkākakulasambhavo; 
Gotamo nāma gottena, 
satthā loke bhavissati. 
Devalokā cavitvāna, 
sukkamūlena codito; 
Puññakammena saññutto, 
brahmabandhu bhavissasi. 
Asītikoṭiṁ chaḍḍetvā, 
dāse kammakare bahū; 
Gotamassa bhagavato, 
sāsane pabbajissasi. 
Ārādhayitvā sambuddhaṁ, 
gotamaṁ sakyapuṅgavaṁ; 
Upavānoti nāmena, 
hessasi satthu sāvako’. 
Satasahasse kataṁ kammaṁ, 
phalaṁ dassesi me idha; 
Sumutto saravegova, 
kilese jhāpayiṁ mama. 
Cakkavattissa santassa, 
cātuddīpissarassa me; 
Tīṇi yojanāni sāmantā, 
ussīyanti dhajā sadā. 
Satasahassito kappe, 
yaṁ kammamakariṁ tadā; 
Duggatiṁ nābhijānāmi, 
dhajadānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā upavānatthero imā gāthāyo abhāsitthāti. 
Upavānattherassāpadānaṁ dasamaṁ. 

Therāpadāna 
Yasavagga 
Raṭṭhapālattheraapadāna 
“Padumuttarassa bhagavato, 
Lokajeṭṭhassa tādino; 
Varanāgo mayā dinno, 
Īsādanto urūḷhavā. 
Setacchattopasobhito, 
sakappano sahatthipo; 
Agghāpetvāna taṁ sabbaṁ, 
saṅghārāmaṁ akārayiṁ. 
Catupaññāsasahassāni, 
pāsāde kārayiṁ ahaṁ; 
Mahoghadānaṁ karitvāna, 
niyyādesiṁ mahesino. 
Anumodi mahāvīro, 
sayambhū aggapuggalo; 
Sabbe jane hāsayanto, 
desesi amataṁ padaṁ. 
Taṁ me buddho viyākāsi, 
jalajuttamanāmako; 
Bhikkhusaṅghe nisīditvā, 
imā gāthā abhāsatha. 
‘Catupaññāsasahassāni, 
pāsāde kārayī ayaṁ; 
Kathayissāmi vipākaṁ, 
suṇātha mama bhāsato. 
Aṭṭhārasasahassāni, 
kūṭāgārā bhavissare; 
Byamhuttamamhi nibbattā, 
sabbasoṇṇamayā ca te. 
Paññāsakkhattuṁ devindo, 
devarajjaṁ karissati; 
Aṭṭhapaññāsakkhattuñca, 
cakkavattī bhavissati. 
Kappasatasahassamhi, 
okkākakulasambhavo; 
Gotamo nāma gottena, 
satthā loke bhavissati. 
Devalokā cavitvāna, 
sukkamūlena codito; 
Aḍḍhe kule mahābhoge, 
nibbattissati tāvade. 
So pacchā pabbajitvāna, 
sukkamūlena codito; 
Raṭṭhapāloti nāmena, 
hessati satthu sāvako. 
Padhānapahitatto so, 
upasanto nirūpadhi; 
Sabbāsave pariññāya, 
nibbāyissatināsavo’. 
Uṭṭhāya abhinikkhamma, 
jahitā bhogasampadā; 
Kheḷapiṇḍeva bhogamhi, 
pemaṁ mayhaṁ na vijjati. 
Vīriyaṁ me dhuradhorayhaṁ, 
yogakkhemādhivāhanaṁ; 
Dhāremi antimaṁ dehaṁ, 
sammāsambuddhasāsane. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā raṭṭhapālo thero imā gāthāyo abhāsitthāti. 
Raṭṭhapālattherassāpadānaṁ ekādasamaṁ. 
Yasavaggo chapaññāsamo. 
Tassuddānaṁ 
Yaso nadīkassapo ca, 
gayākimilavajjino; 
Duve uttarā bhaddajī, 
sivako upavāhano; 
Raṭṭhapālo ekasataṁ, 
gāthānaṁ pañcanavuti. 
Therāpadānaṁ samattaṁ. 

Therāpadāna 
Bījanivagga 
4 Gandhodakiyattheraapadāna 
“Padumuttarabuddhassa, 
mahābodhimaho ahu; 
Vicittaṁ ghaṭamādāya, 
gandhodakamadāsahaṁ. 
Nhānakāle ca bodhiyā, 
mahāmegho pavassatha; 
Ninnādo ca mahā āsi, 
asaniyā phalantiyā. 
Tenevāsanivegena, 
tattha kālaṅkato ahaṁ; 
Devaloke ṭhito santo, 
imā gāthā abhāsahaṁ. 
‘Aho buddhā aho dhammā, 
aho no satthusampadā; 
Kaḷevaraṁ me patitaṁ, 
devaloke ramāmahaṁ. 
Ubbiddhaṁ bhavanaṁ mayhaṁ, 
Satabhūmaṁ samuggataṁ; 
Kaññāsatasahassāni, 
Parivārenti maṁ sadā. 
Ābādhā me na vijjanti, 
soko mayhaṁ na vijjati; 
Pariḷāhaṁ na passāmi, 
puññakammassidaṁ phalaṁ. 
Aṭṭhavīse kappasate, 
rājā saṁvasito ahuṁ; 
Sattaratanasampanno, 
cakkavattī mahabbalo’. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā gandhodakiyo thero imā gāthāyo abhāsitthāti. 
Gandhodakiyattherassāpadānaṁ catutthaṁ. 

Therāpadāna 
Bījanivagga 
5 Opavayhattheraapadāna 
“Padumuttarabuddhassa, 
ājānīyamadāsahaṁ; 
Niyyādetvāna sambuddhe, 
agamāsiṁ sakaṁ gharaṁ. 
Devalo nāma nāmena, 
satthuno aggasāvako; 
Varadhammassa dāyādo, 
āgacchi mama santikaṁ. 
Sapattabhāro bhagavā, 
ājāneyyo na kappati; 
Tava saṅkappamaññāya, 
adhivāsesi cakkhumā. 
Agghāpetvā vātajavaṁ, 
sindhavaṁ sīghavāhanaṁ; 
Padumuttarabuddhassa, 
khamanīyamadāsahaṁ. 
Yaṁ yaṁ yonupapajjāmi, 
devattaṁ atha mānusaṁ; 
Khamanīyaṁ vātajavaṁ, 
cittaṁ nibbattate mama. 
Lābhaṁ tesaṁ suladdhaṁva, 
ye labhantupasampadaṁ; 
Punapi payirupāseyyaṁ, 
buddho loke sace bhave. 
Aṭṭhavīsatikkhattuṁhaṁ, 
rājā āsiṁ mahabbalo; 
Cāturanto vijitāvī, 
jambusaṇḍassa issaro. 
Idaṁ pacchimakaṁ mayhaṁ, 
carimo vattate bhavo; 
Pattosmi acalaṁ ṭhānaṁ, 
hitvā jayaparājayaṁ. 
Catutiṁsasahassamhi, 
mahātejosi khattiyo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā opavayho thero imā gāthāyo abhāsitthāti. 
Opavayhattherassāpadānaṁ pañcamaṁ. 

Therāpadāna 
Bījanivagga 
Saparivārāsanattheraapadāna 
“Padumuttarabuddhassa, 
piṇḍapātaṁ adāsahaṁ; 
Gantvā kiliṭṭhakaṁ ṭhānaṁ, 
mallikāhi parikkhitaṁ. 
Tamhāsanamhi āsīno, 
buddho lokagganāyako; 
Akittayi piṇḍapātaṁ, 
ujubhūto samāhito. 
Yathāpi bhaddake khette, 
bījaṁ appampi ropitaṁ; 
Sammā dhāraṁ pavecchante, 
phalaṁ toseti kassakaṁ. 
Tathevāyaṁ piṇḍapāto, 
sukhette ropito tayā; 
Bhave nibbattamānamhi, 
phalaṁ te tosayissati. 
Idaṁ vatvāna sambuddho, 
jalajuttamanāmako; 
Piṇḍapātaṁ gahetvāna, 
pakkāmi uttarāmukho. 
Saṁvuto pātimokkhasmiṁ, 
indriyesu ca pañcasu; 
Pavivekamanuyutto, 
viharāmi anāsavo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā saparivārāsano thero imā gāthāyo abhāsitthāti. 
Saparivārāsanattherassāpadānaṁ chaṭṭhaṁ. 

Therāpadāna 
Bījanivagga 
Pañcadīpakattheraapadāna 
“Padumuttarabuddhassa, 
sabbabhūtānukampino; 
Saddahitvāna saddhamme, 
ujudiṭṭhi ahosahaṁ. 
Padīpadānaṁ pādāsiṁ, 
parivāretvāna bodhiyaṁ; 
Saddahanto padīpāni, 
akariṁ tāvade ahaṁ. 
Yaṁ yaṁ yonupapajjāmi, 
devattaṁ atha mānusaṁ; 
Ākāse ukkaṁ dhārenti, 
dīpadānassidaṁ phalaṁ. 
Tirokuṭṭaṁ tiroselaṁ, 
samatiggayha pabbataṁ; 
Samantā yojanasataṁ, 
dassanaṁ anubhomahaṁ. 
Tena kammāvasesena, 
pattomhi āsavakkhayaṁ; 
Dhāremi antimaṁ dehaṁ, 
dvipadindassa sāsane. 
Catuttiṁse kappasate, 
satacakkhusanāmakā; 
Rājāhesuṁ mahātejā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā pañcadīpako thero imā gāthāyo abhāsitthāti. 
Pañcadīpakattherassāpadānaṁ sattamaṁ. 

Therāpadāna 
Buddhavagga 
Mahākassapattheraapadāna 
“Padumuttarassa bhagavato, 
Lokajeṭṭhassa tādino; 
Nibbute lokanāthamhi, 
Pūjaṁ kubbanti satthuno. 
Udaggacittā janatā, 
āmoditapamoditā; 
Tesu saṁvegajātesu, 
pīti me udapajjatha. 
Ñātimitte samānetvā, 
idaṁ vacanamabraviṁ; 
Parinibbuto mahāvīro, 
handa pūjaṁ karomase. 
Sādhūti te paṭissutvā, 
bhiyyo hāsaṁ janiṁsu me; 
Buddhasmiṁ lokanāthamhi, 
kāhāma puññasañcayaṁ. 
Agghiyaṁ sukataṁ katvā, 
satahatthasamuggataṁ; 
Diyaḍḍhahatthapatthaṭaṁ, 
vimānaṁ nabhamuggataṁ. 
Katvāna hammiyaṁ tattha, 
tālapantīhi cittitaṁ; 
Sakaṁ cittaṁ pasādetvā, 
cetiyaṁ pūjayuttamaṁ. 
Aggikkhandhova jalito, 
kiṁsuko iva phullito; 
Indalaṭṭhīva ākāse, 
obhāsati catuddisā. 
Tattha cittaṁ pasādetvā, 
katvāna kusalaṁ bahuṁ; 
Pubbakammaṁ saritvāna, 
tidasaṁ upapajjahaṁ. 
Sahassayuttaṁ hayavāhiṁ, 
Dibbayānamadhiṭṭhito; 
Ubbiddhaṁ bhavanaṁ mayhaṁ, 
Sattabhūmaṁ samuggataṁ. 
Kūṭāgārasahassāni, 
sabbasoṇṇamayā ahuṁ; 
Jalanti sakatejena, 
disā sabbā pabhāsayaṁ. 
Santi aññepi niyyūhā, 
lohitaṅgamayā tadā; 
Tepi jotanti ābhāya, 
samantā caturo disā. 
Puññakammābhinibbattā, 
kūṭāgārā sunimmitā; 
Maṇimayāpi jotanti, 
disā dasa samantato. 
Tesaṁ ujjotamānānaṁ, 
obhāso vipulo ahu; 
Sabbe deve abhibhomi, 
puññakammassidaṁ phalaṁ. 
Saṭṭhikappasahassamhi, 
ubbiddho nāma khattiyo; 
Cāturanto vijitāvī, 
pathaviṁ āvasiṁ ahaṁ. 
Tatheva bhaddake kappe, 
tiṁsakkhattuṁ ahosahaṁ; 
Sakakammābhiraddhomhi, 
cakkavattī mahabbalo. 
Sattaratanasampanno, 
catudīpamhi issaro; 
Tatthāpi bhavanaṁ mayhaṁ, 
indalaṭṭhīva uggataṁ. 
Āyāmato catubbīsaṁ, 
vitthārena ca dvādasa; 
Rammaṇaṁ nāma nagaraṁ, 
daḷhapākāratoraṇaṁ. 
Āyāmato pañcasataṁ, 
vitthārena tadaḍḍhakaṁ; 
Ākiṇṇaṁ janakāyehi, 
tidasānaṁ puraṁ viya. 
Yathā sūcighare sūcī, 
pakkhittā paṇṇavīsati; 
Aññamaññaṁ paghaṭṭenti, 
ākiṇṇaṁ hoti laṅkataṁ. 
Evampi nagaraṁ mayhaṁ, 
hatthissarathasaṅkulaṁ; 
Manussehi sadākiṇṇaṁ, 
rammaṇaṁ nagaruttamaṁ. 
Tattha bhutvā pivitvā ca, 
puna devattanaṁ gato; 
Bhave pacchimake mayhaṁ, 
ahosi kulasampadā. 
Brāhmaññakulasambhūto, 
mahāratanasañcayo; 
Asītikoṭiyo hitvā, 
hiraññassāpi pabbajiṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā mahākassapo thero imā gāthāyo abhāsitthāti. 
Mahākassapattherassāpadānaṁ tatiyaṁ. 

Therāpadāna 
Bījanivagga 
Dhajadāyakattheraapadāna 
“Padumuttarabuddhassa, 
bodhiyā pādaputtame; 
Haṭṭho haṭṭhena cittena, 
dhajamāropayiṁ ahaṁ. 
Patitapattāni gaṇhitvā, 
bahiddhā chaḍḍayiṁ ahaṁ; 
Antosuddhaṁ bahisuddhaṁ, 
adhimuttamanāsavaṁ. 
Sammukhā viya sambuddhaṁ, 
avandiṁ bodhimuttamaṁ; 
Padumuttaro lokavidū, 
āhutīnaṁ paṭiggaho. 
Bhikkhusaṅghe ṭhito satthā, 
imā gāthā abhāsatha; 
‘Iminā dhajadānena, 
upaṭṭhānena cūbhayaṁ. 
Kappānaṁ satasahassaṁ, 
duggatiṁ so na gacchati; 
Devesu devasobhagyaṁ, 
anubhossatinappakaṁ. 
Anekasatakkhattuñca, 
rājā raṭṭhe bhavissati; 
Uggato nāma nāmena, 
cakkavattī bhavissati. 
Sampattiṁ anubhotvāna, 
sukkamūlena codito; 
Gotamassa bhagavato, 
sāsanebhiramissati’. 
Padhānapahitattomhi, 
upasanto nirūpadhi; 
Dhāremi antimaṁ dehaṁ, 
sammāsambuddhasāsane. 
Ekapaññāsasahasse, 
kappe uggatasavhayo; 
Paññāsasatasahasse, 
khattiyo meghasavhayo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā dhajadāyako thero imā gāthāyo abhāsitthāti. 
Dhajadāyakattherassāpadānaṁ aṭṭhamaṁ. 

Therāpadāna 
Bījanivagga 
Padumattheraapadāna 
“Catusaccaṁ pakāsento, 
varadhammappavattako; 
Vassate amataṁ vuṭṭhiṁ, 
nibbāpento mahājanaṁ. 
Sadhajaṁ padumaṁ gayha, 
aḍḍhakose ṭhito ahaṁ; 
Padumuttaramunissa, 
pahaṭṭho ukkhipimambare. 
Āgacchante ca padume, 
abbhuto āsi tāvade; 
Mama saṅkappamaññāya, 
paggaṇhi vadataṁ varo. 
Karaseṭṭhena paggayha, 
jalajaṁ pupphamuttamaṁ; 
Bhikkhusaṅghe ṭhito satthā, 
imā gāthā abhāsatha. 
‘Yenidaṁ padumaṁ khittaṁ, 
sabbaññumhi vināyake; 
Tamahaṁ kittayissāmi, 
suṇātha mama bhāsato. 
Tiṁsakappāni devindo, 
devarajjaṁ karissati; 
Pathabyā rajjaṁ sattasataṁ, 
vasudhaṁ āvasissati. 
Tattha pattaṁ gaṇetvāna, 
cakkavattī bhavissati; 
Ākāsato pupphavuṭṭhi, 
abhivassissatī tadā. 
Kappasatasahassamhi, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādo, 
oraso dhammanimmito; 
Sabbāsave pariññāya, 
nibbāyissatināsavo’. 
Nikkhamitvāna kucchimhā, 
sampajāno patissato; 
Jātiyā pañcavassohaṁ, 
arahattaṁ apāpuṇiṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā padumo thero imā gāthāyo abhāsitthāti. 
Padumattherassāpadānaṁ navamaṁ. 

Therāpadāna 
Bījanivagga 
Asanabodhiyattheraapadāna 
“Jātiyā sattavassohaṁ, 
addasaṁ lokanāyakaṁ; 
Pasannacitto sumano, 
upagacchiṁ naruttamaṁ. 
Tissassāhaṁ bhagavato, 
lokajeṭṭhassa tādino; 
Haṭṭho haṭṭhena cittena, 
ropayiṁ bodhimuttamaṁ. 
Asano nāmadheyyena, 
dharaṇīruhapādapo; 
Pañcavasse paricariṁ, 
asanaṁ bodhimuttamaṁ. 
Pupphitaṁ pādapaṁ disvā, 
abbhutaṁ lomahaṁsanaṁ; 
Sakaṁ kammaṁ pakittento, 
buddhaseṭṭhaṁ upāgamiṁ. 
Tisso tadā so sambuddho, 
sayambhū aggapuggalo; 
Bhikkhusaṅghe nisīditvā, 
imā gāthā abhāsatha. 
‘Yenāyaṁ ropitā bodhi, 
buddhapūjā ca sakkatā; 
Tamahaṁ kittayissāmi, 
suṇātha mama bhāsato. 
Tiṁsakappāni devesu, 
devarajjaṁ karissati; 
Catusaṭṭhi cakkhattuṁ so, 
cakkavattī bhavissati. 
Tusitā hi cavitvāna, 
sukkamūlena codito; 
Dve sampattī anubhotvā, 
manussatte ramissati. 
Padhānapahitatto so, 
upasanto nirūpadhi; 
Sabbāsave pariññāya, 
nibbāyissatināsavo’. 
Vivekamanuyuttohaṁ, 
upasanto nirūpadhi; 
Nāgova bandhanaṁ chetvā, 
viharāmi anāsavo. 
Dvenavute ito kappe, 
bodhiṁ ropesahaṁ tadā; 
Duggatiṁ nābhijānāmi, 
bodhiropassidaṁ phalaṁ. 
Catusattatito kappe, 
daṇḍasenoti vissuto; 
Sattaratanasampanno, 
cakkavattī tadā ahuṁ. 
Tesattatimhito kappe, 
sattāhesuṁ mahīpatī; 
Samantanemināmena, 
rājāno cakkavattino. 
Paṇṇavīsatito kappe, 
puṇṇako nāma khattiyo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā asanabodhiyo thero imā gāthāyo abhāsitthāti. 
Asanabodhiyattherassāpadānaṁ dasamaṁ. 
Bījanivaggo chaṭṭho. 
Tassuddānaṁ 
Bījanī sataraṁsī ca, 
sayanodakivāhiyo; 
Parivāro padīpañca, 
dhajo padumapūjako; 
Bodhi ca dasamo vutto, 
gāthā dvenavuti tathā. 

Therāpadāna 
Sakacintaniyavagga 
1 Sakacintaniyattheraapadāna 
“Pavanaṁ kānanaṁ disvā, 
appasaddamanāvilaṁ; 
Isīnaṁ anuciṇṇaṁva, 
āhutīnaṁ paṭiggahaṁ. 
Thūpaṁ katvāna pulinaṁ, 
nānāpupphaṁ samokiriṁ; 
Sammukhā viya sambuddhaṁ, 
nimmitaṁ abhivandahaṁ. 
Sattaratanasampanno, 
rājā raṭṭhamhi issaro; 
Sakakammābhiraddhohaṁ, 
pupphapūjāyidaṁ phalaṁ. 
Ekanavutito kappe, 
yaṁ pupphamabhiropayiṁ; 
Duggatiṁ nābhijānāmi, 
pupphapūjāyidaṁ phalaṁ. 
Asītikappenantayaso, 
cakkavattī ahosahaṁ; 
Sattaratanasampanno, 
catudīpamhi issaro. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā sakacintaniyo thero imā gāthāyo abhāsitthāti. 
Sakacintaniyattherassāpadānaṁ paṭhamaṁ. 

Therāpadāna 
Sakacintaniyavagga 
2 Avopupphiyattheraapadāna 
“Vihārā abhinikkhamma, 
abbhuṭṭhāsi ca caṅkame; 
Catusaccaṁ pakāsanto, 
desento amataṁ padaṁ. 
Sikhissa giramaññāya, 
buddhaseṭṭhassa tādino; 
Nānāpupphaṁ gahetvāna, 
ākāsamhi samokiriṁ. 
Tena kammena dvipadinda, 
lokajeṭṭha narāsabha; 
Pattomhi acalaṁ ṭhānaṁ, 
hitvā jayaparājayaṁ. 
Ekattiṁse ito kappe, 
yaṁ pupphamabhiropayiṁ; 
Duggatiṁ nābhijānāmi, 
pupphapūjāyidaṁ phalaṁ. 
Ito vīsatikappamhi, 
sumedho nāma khattiyo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā avopupphiyo thero imā gāthāyo abhāsitthāti. 
Avopupphiyattherassāpadānaṁ dutiyaṁ. 

Therāpadāna 
Sakacintaniyavagga 
Paccāgamaniyattheraapadāna 
“Sindhuyā nadiyā tīre, 
cakkavāko ahaṁ tadā; 
Suddhasevālabhakkhohaṁ, 
pāpesu ca susaññato. 
Addasaṁ virajaṁ buddhaṁ, 
gacchantaṁ anilañjase; 
Tuṇḍena sālaṁ paggayha, 
vipassissābhiropayiṁ. 
Yassa saddhā tathāgate, 
acalā supatiṭṭhitā; 
Tena cittappasādena, 
duggatiṁ so na gacchati. 
Svāgataṁ vata me āsi, 
buddhaseṭṭhassa santike; 
Vihaṅgamena santena, 
subījaṁ ropitaṁ mayā. 
Ekanavutito kappe, 
yaṁ pupphamabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Sucārudassanā nāma, 
aṭṭhete ekanāmakā; 
Kappe sattarase āsuṁ, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā paccāgamaniyo thero imā gāthāyo abhāsitthāti. 
Paccāgamaniyattherassāpadānaṁ tatiyaṁ. 

Therāpadāna 
Sakacintaniyavagga 
Parappasādakattheraapadāna 
“Usabhaṁ pavaraṁ vīraṁ, 
Mahesiṁ vijitāvinaṁ; 
Suvaṇṇavaṇṇaṁ sambuddhaṁ, 
Ko disvā nappasīdati. 
Himavāvāparimeyyo, 
sāgarova duruttaro; 
Tatheva jhānaṁ buddhassa, 
ko disvā nappasīdati. 
Vasudhā yathāppameyyā, 
cittā vanavaṭaṁsakā; 
Tatheva sīlaṁ buddhassa, 
ko disvā nappasīdati. 
Anilañjasāsaṅkhubbho, 
yathākāso asaṅkhiyo; 
Tatheva ñāṇaṁ buddhassa, 
ko disvā nappasīdati. 
Imāhi catugāthāhi, 
brāhmaṇo senasavhayo; 
Buddhaseṭṭhaṁ thavitvāna, 
siddhatthaṁ aparājitaṁ. 
Catunnavutikappāni, 
duggatiṁ nupapajjatha; 
Sugatiṁ sukhasampattiṁ, 
anubhosimanappakaṁ. 
Catunnavutito kappe, 
thavitvā lokanāyakaṁ; 
Duggatiṁ nābhijānāmi, 
thomanāya idaṁ phalaṁ. 
Cātuddasamhi kappamhi, 
caturo āsumuggatā; 
Sattaratanasampannā, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā parappasādako thero imā gāthāyo abhāsitthāti. 
Parappasādakattherassāpadānaṁ catutthaṁ. 

Therāpadāna 
Sakacintaniyavagga 
Bhisadāyakattheraapadāna 
“Vessabhū nāma nāmena, 
isīnaṁ tatiyo ahu; 
Kānanaṁ vanamogayha, 
vihāsi purisuttamo. 
Bhisamuḷālaṁ gaṇhitvā, 
agamaṁ buddhasantikaṁ; 
Tañca buddhassa pādāsiṁ, 
pasanno sehi pāṇibhi. 
Karena ca parāmaṭṭho, 
vessabhūvarabuddhinā; 
Sukhāhaṁ nābhijānāmi, 
samaṁ tena kutottariṁ. 
Carimo vattate mayhaṁ, 
bhavā sabbe samūhatā; 
Hatthināgena santena, 
kusalaṁ ropitaṁ mayā. 
Ekattiṁse ito kappe, 
yaṁ kammamakariṁ tadā; 
Duggatiṁ nābhijānāmi, 
bhisadānassidaṁ phalaṁ. 
Samodhānā ca rājāno, 
soḷasa manujādhipā; 
Kappamhi cuddase āsuṁ, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā bhisadāyako thero imā gāthāyo abhāsitthāti. 
Bhisadāyakattherassāpadānaṁ pañcamaṁ. 

Therāpadāna 
Sakacintaniyavagga 
Sucintitattheraapadāna 
“Giriduggacaro āsiṁ, 
abhijātova kesarī; 
Migasaṅghaṁ vadhitvāna, 
jīvāmi pabbatantare. 
Atthadassī tu bhagavā, 
sabbaññū vadataṁ varo; 
Mamuddharitukāmo so, 
āgacchi pabbatuttamaṁ. 
Pasadañca migaṁ hantvā, 
bhakkhituṁ samupāgamiṁ; 
Bhagavā tamhi samaye, 
bhikkhamāno upāgami. 
Varamaṁsāni paggayha, 
adāsiṁ tassa satthuno; 
Anumodi mahāvīro, 
nibbāpento mamaṁ tadā. 
Tena cittappasādena, 
giriduggaṁ pavisiṁ ahaṁ; 
Pītiṁ uppādayitvāna, 
tattha kālaṅkato ahaṁ. 
Etena maṁsadānena, 
cittassa paṇidhīhi ca; 
Pannarase kappasate, 
devaloke ramiṁ ahaṁ. 
Avasesesu kappesu, 
kusalaṁ cintitaṁ mayā; 
Teneva maṁsadānena, 
buddhānussaraṇena ca. 
Aṭṭhattiṁsamhi kappamhi, 
aṭṭha dīghāyunāmakā; 
Saṭṭhimhito kappasate, 
duve varuṇanāmakā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sucintito thero imā gāthāyo abhāsitthāti. 
Sucintitattherassāpadānaṁ chaṭṭhaṁ. 

Therāpadāna 
Sakacintaniyavagga 
Vatthadāyakattheraapadāna 
“Pakkhijāto tadā āsiṁ, 
supaṇṇo garuḷādhipo; 
Addasaṁ virajaṁ buddhaṁ, 
gacchantaṁ gandhamādanaṁ. 
Jahitvā garuḷavaṇṇaṁ, 
māṇavakaṁ adhārayiṁ; 
Ekaṁ vatthaṁ mayā dinnaṁ, 
dvipadindassa tādino. 
Tañca dussaṁ paṭiggayha, 
buddho lokagganāyako; 
Antalikkhe ṭhito satthā, 
imā gāthā abhāsatha. 
‘Iminā vatthadānena, 
cittassa paṇidhīhi ca; 
Pahāya garuḷaṁ yoniṁ, 
devaloke ramissati’. 
Atthadassī tu bhagavā, 
lokajeṭṭho narāsabho; 
Vatthadānaṁ pasaṁsitvā, 
pakkāmi uttarāmukho. 
Bhave nibbattamānamhi, 
honti me vatthasampadā; 
Ākāse chadanaṁ hoti, 
vatthadānassidaṁ phalaṁ. 
Aruṇavā satta janā, 
cakkavattī mahabbalā; 
Chattiṁsatimhi āsiṁsu, 
kappamhi manujādhipā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā vatthadāyako thero imā gāthāyo abhāsitthāti. 
Vatthadāyakattherassāpadānaṁ sattamaṁ. 

Therāpadāna 
Buddhavagga 
Anuruddhattheraapadāna 
“Sumedhaṁ bhagavantāhaṁ, 
lokajeṭṭhaṁ narāsabhaṁ; 
Vūpakaṭṭhaṁ viharantaṁ, 
addasaṁ lokanāyakaṁ. 
Upagantvāna sambuddhaṁ, 
sumedhaṁ lokanāyakaṁ; 
Añjaliṁ paggahetvāna, 
buddhaseṭṭhamayācahaṁ. 
Anukampa mahāvīra, 
lokajeṭṭha narāsabha; 
Padīpaṁ te padassāmi, 
rukkhamūlamhi jhāyato. 
Adhivāsesi so dhīro, 
sayambhū vadataṁ varo; 
Dumesu vinivijjhitvā, 
yantaṁ yojiyahaṁ tadā. 
Sahassavaṭṭiṁ pādāsiṁ, 
buddhassa lokabandhuno; 
Sattāhaṁ pajjalitvāna, 
dīpā vūpasamiṁsu me. 
Tena cittappasādena, 
cetanāpaṇidhīhi ca; 
Jahitvā mānusaṁ dehaṁ, 
vimānamupapajjahaṁ. 
Upapannassa devattaṁ, 
byamhaṁ āsi sunimmitaṁ; 
Samantato pajjalati, 
dīpadānassidaṁ phalaṁ. 
Samantā yojanasataṁ, 
virocesimahaṁ tadā; 
Sabbe deve abhibhomi, 
dīpadānassidaṁ phalaṁ. 
Tiṁsakappāni devindo, 
devarajjamakārayiṁ; 
Na maṁ kecītimaññanti, 
dīpadānassidaṁ phalaṁ. 
Aṭṭhavīsatikkhattuñca, 
cakkavattī ahosahaṁ; 
Divā rattiñca passāmi, 
samantā yojanaṁ tadā. 
Sahassalokaṁ ñāṇena, 
passāmi satthu sāsane; 
Dibbacakkhumanuppatto, 
dīpadānassidaṁ phalaṁ. 
Sumedho nāma sambuddho, 
tiṁsakappasahassito; 
Tassa dīpo mayā dinno, 
vippasannena cetasā. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā anuruddho thero imā gāthāyo abhāsitthāti. 
Anuruddhattherassāpadānaṁ catutthaṁ. 

Therāpadāna 
Sakacintaniyavagga 
Ambadāyakattheraapadāna 
“Anomadassī bhagavā, 
nisinno pabbatantare; 
Mettāya aphari loke, 
appamāṇe nirūpadhi. 
Kapi ahaṁ tadā āsiṁ, 
himavante naguttame; 
Disvā anomadassiṁ taṁ, 
buddhe cittaṁ pasādayiṁ. 
Avidūre himavantassa, 
ambāsuṁ phalino tadā; 
Tato pakkaṁ gahetvāna, 
ambaṁ samadhukaṁ adaṁ. 
Taṁ me buddho viyākāsi, 
anomadassī mahāmuni; 
Iminā madhudānena, 
ambadānena cūbhayaṁ. 
Sattapaññāsakappamhi, 
devaloke ramissati; 
Avasesesu kappesu, 
vokiṇṇaṁ saṁsarissati. 
Khepetvā pāpakaṁ kammaṁ, 
paripakkāya buddhiyā; 
Vinipātamagantvāna, 
kilese jhāpayissati. 
Damena uttamenāhaṁ, 
damitomhi mahesinā; 
Pattomhi acalaṁ ṭhānaṁ, 
hitvā jayaparājayaṁ. 
Sattasattatikappasate, 
ambaṭṭhajasanāmakā; 
Catuddasa te rājāno, 
cakkavattī mahabbalā. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ambadāyako thero imā gāthāyo abhāsitthāti. 
Ambadāyakattherassāpadānaṁ aṭṭhamaṁ. 

Therāpadāna 
Sakacintaniyavagga 
Sumanattheraapadāna 
“Sumano nāma nāmena, 
mālākāro ahaṁ tadā; 
Addasaṁ virajaṁ buddhaṁ, 
lokāhutipaṭiggahaṁ. 
Ubho hatthehi paggayha, 
sumanaṁ pupphamuttamaṁ; 
Buddhassa abhiropesiṁ, 
sikhino lokabandhuno. 
Imāya pupphapūjāya, 
cetanāpaṇidhīhi ca; 
Duggatiṁ nābhijānāmi, 
buddhapūjāyidaṁ phalaṁ. 
Ekattiṁse ito kappe, 
yaṁ pupphamabhiropayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Chabbīsatimhi kappamhi, 
cattārosuṁ mahāyasā; 
Sattaratanasampannā, 
rājāno cakkavattino. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sumano thero imā gāthāyo abhāsitthāti. 
Sumanattherassāpadānaṁ navamaṁ. 

Therāpadāna 
Sakacintaniyavagga 
Pupphacaṅkoṭiyattheraapadāna 
“Abhītarūpaṁ sīhaṁva, 
garuḷaggaṁva pakkhinaṁ; 
Byagghūsabhaṁva pavaraṁ, 
abhijātaṁva kesariṁ. 
Sikhiṁ tilokasaraṇaṁ, 
anejaṁ aparājitaṁ; 
Nisinnaṁ samaṇānaggaṁ, 
bhikkhusaṅghapurakkhataṁ. 
Caṅkoṭake ṭhapetvāna, 
anojaṁ pupphamuttamaṁ; 
Saha caṅkoṭakeneva, 
buddhaseṭṭhaṁ samokiriṁ. 
Tena cittappasādena, 
dvipadinda narāsabha; 
Pattomhi acalaṁ ṭhānaṁ, 
hitvā jayaparājayaṁ. 
Ekattiṁse ito kappe, 
yaṁ kammamakariṁ tadā; 
Duggatiṁ nābhijānāmi, 
buddhap